The New Testament of our Lord and Saviour Jesus Christ
1 ซูรัจ บือแนฮ นะ เยซู คริด นู ฌาดี บือแนฮ นะ ราฌา ดาวิด นู ฌาดี บือแนฮ นะ อับราฮัม. 2 อับราฮัม ญา บือเลฮ นานะ นู ปือนามา จะ อีซัก. อีซัก ญา บือเลฮ นานะ นู ปือนามา จะ ยาโกบ. ยาโกบ ญา บือเลฮ นานะ นู ปือนามา จะ ยูดา ฌางัน ลูมอฮ อาดี-บราดี นะ ญา. 3 ยูดา ญา บือเลฮ นานะ นู ปือนามา จะ เปเรด ฌางัน เซรา นู มะ เดะ กูญา ปือนามา จะ ทามา. เปเรด ญา บือเลฮ นานะ นู ปือนามา จะ เฮซะโรน. เฮซะโรน ญา บือเลฮ นานะ นู ปือนามา จะ ราม. 4 ราม ญา บือเลฮ นานะ นู ปือนามา จะ อะมีนาดับ. อะมีนาดับ ญา บือเลฮ นานะ นู ปือนามา จะ นาโซน. นาโซน ญา บือเลฮ นานะ นู ปือนามา จะ ซันโมน. 5 ซันโมน ญา บือเลฮ นานะ นู ปือนามา จะ โบอัด นู มะ เดะ ญา ปือนามา จะ ราฮับ. โบอัด ญา บือเลฮ นานะ นู ปือนามา จะ โอเบด นู มะ เดะ ญา ปือนามา จะ รูด. โอเบด ญา บือเลฮ นานะ นู ปือนามา จะ เจซี. 6 เจซี ญา บือเลฮ นานะ นู ปือนามา จะ ดาวิด นู ฌาดี ราฌา. ราฌา ดาวิด ญา บือเลฮ นานะ นู ปือนามา จะ ซะโลโม นู มะ เดะ ญา ดูลู ฌาดี บีนี นะ อูรียา. 7 ซะโลโม ญา บือเลฮ นานะ นู ปือนามา จะ เรโฮโบอัม. เรโฮโบอัม ญา บือเลฮ นานะ นู ปือนามา จะ อาบียา. อาบียา ญา บือเลฮ นานะ นู ปือนามา จะ อาซา. 8 อาซา ญา บือเลฮ นานะ นู ปือนามา จะ เยโฮซาฟัด. เยโฮซาฟัด ญา บือเลฮ นานะ นู ปือนามา จะ โยรัม. โยรัม ญา บือเลฮ นานะ นู ปือนามา จะ อูซียา. 9 อูซียา ญา บือเลฮ นานะ นู ปือนามา จะ โยทัม. โยทัม ญา บือเลฮ นานะ นู ปือนามา จะ อาฮัด. อาฮัด ญา บือเลฮ นานะ นู ปือนามา จะ เฮเซคียา. 10 เฮเซคียา ญา บือเลฮ นานะ นู ปือนามา จะ มานาเซฮ. มานาเซฮ ญา บือเลฮ นานะ นู ปือนามา จะ อาโมน. อาโมน ญา บือเลฮ นานะ นู ปือนามา จะ โยซียา. 11 โยซียา ญา บือเลฮ นานะ นู ปือนามา จะ เยโคนียา ฌางัน ลูมอฮ อาดี เดะ ญา เดะ วะตู กูญา กือนา บาวา บือปี ฌาดี ฮามา เดะ นังฆรี บาบิโลน. 12 ลือปัซ เดะ กูญา กือนา บาวา บือปี กะ นังฆรี บาบิโลน ดัฮ เยโคนียา ญา บือเลฮ นานะ นู ปือนามา จะ ซาลาทีเอน. ซาลาทีเอน ญา บือเลฮ นานะ นู ปือนามา จะ เซรูบาเบน. 13 เซรูบาเบน ญา บือเลฮ นานะ นู ปือนามา จะ อาบียุด. อาบียุด ญา บือเลฮ นานะ นู ปือนามา จะ เอลียาคิม. เอลียาคิม ญา บือเลฮ นานะ นู ปือนามา จะ อาซอ. 14 อาซอ ญา บือเลฮ นานะ นู ปือนามา จะ ซาโดก. ซาโดก ญา บือเลฮ นานะ นู ปือนามา จะ อาคิม. อาคิม ญา บือเลฮ นานะ นู ปือนามา จะ เอลียุด. 15 เอลียุด ญา บือเลฮ นานะ นู ปือนามา จะ เอเลอาซา. เอเลอาซา ญา บือเลฮ นานะ นู ปือนามา จะ มัดทัน. มัดทัน ญา บือเลฮ นานะ นู ปือนามา จะ ยาโกบ. 16 ยาโกบ ญา บือเลฮ นานะ นู ปือนามา จะ โยเซบ นู ฌาดี ลากี นะ มารียา. มารียา อีนี ญา บือเลฮ นานะ ปือนามา จะ เยซู นู กือนา บลาโลก จะ ราฌา นู บรี ซือลามัจ เตอ. 17 กะฆีเตอ ตะเดะ อับราฮัม ตือดะ รอจ กะ ดาวิด อาดา บือแนฮ ซือมูฮา ปัจ-บือลัซ อูรัก. ตะเดะ ดาวิด ตือดะ นู กูญา กือนา บาวา บือปี กะ นังฆรี บาบิโลน อาดา บือแนฮ ซือมูฮา ปัจ-บือลัซ อูรัก. ตะเดะ กูญา กือนา บาวา บือปี กะ นังฆรี บาบิโลน ตือดะ ราฌา นู บรี ซือลามัจ อีตู มาแรฮ อาดา บือแนฮ ซือมูฮา ปัจ-บือลัซ อูรัก. 18 ลาฆู เยซู คริด ราฌา นู บรี ซือลามัจ นู ญา มาแรฮ ดูโดะ เดะ อาปี ฌาดี กะฆีนี. อาดา มารียา เอด เดะ ญา ญา บือตูนัง ฌางัน โยเซบ ดัฮ. ตาปี ตานา ดูวา อูรัก อีตู เตด ดือละ บือซามา ลาฆี ลีฮัจ จะ ซือมืองัจ นะ ตูฮัด บูวัจ ลาฆู มือฆัฮ บรี มารียา บือโปรจ. 19 โยเซบ ตูนัง นะ ญา ญา เลอ ฌาดี ซือมียา บาฌิ-ตือปัจ. ญา กีรา นะ กรัจ ตูนัง ซืองะๆ ตีเมา บรี มารียา จือและ. 20 ตานา โยเซบ ตืองัฮ อีงัจ ลาฆู อีตู ลีฮัจ เลอ ญา ตือลีนา มีปี ลีฮัจ บือฆารี ฮูลู-บาลัก นะ ตูฮัด ซืออูรัก มาแรฮ มือเลา จะ "โยเซบ เออ อานะ-กือมอน นะ ราฌา ดาวิด เออ. ฌางัน ตาโกจ เลอ นู นะ ซาโมจ มารียา มาแรฮ ฌาดี บีนี นะ เกา. กรานา ซือมืองัจ นะ ตูฮัด เลอ บูวัจ ลาฆู มือฆัฮ ดัฮ บรี ญา บือโปรจ. 21 มารียา ญา นะ ดูโดะ เดะ อาปี ฌาดี นานะ กีลากี. เกา กือนา ตืองะ นามา นะ ญา จะ เยซู. กรานา ญา เลอ ญา นู นะ ตูโลก ลูมอฮ ซือมียา นะ ญา บรี ลือปัซ เดะ ดูซา นะ กูญา." ญา จะ. 22 ลามา ดูลู ตูฮัด เดะ อาตัซ บือเลฮ ซูโรฮ ซือมียา ตูโดฮ ซืออูรัก มือเลา ตูโดฮ ลาฆู โซะ ฮึลด. ลาฆู นะ มารียา อีนี ฌาดี ดัฮ บีดา นะ บูวัจ บรี รือมัก บือกะ ปือมือเลา ตูโดฮ อีตู นู จะ 23 "ลีฮัจ เลอ อาดา ราดารา ซืออูรัก นะ บือโปรจ นะ ดูโดะ เดะ อาปี นานะ กีลากี. กูญา นะ ตืองะ ปือนามา กะ ญา จะ อิมมานูเอน." ฌาดี-จะ ตูฮัด เดะ อาตัซ ดูโดะ ฌางัน กีตา. 24 ตานา โยเซบ ดาฮานี ดัฮ ญา บูวัจ ตูโรจ กะ ปือมือซัด นะ ฮูลู-บาลัก นะ ตูฮัด. ญา ซาโมจ มารียา มาแรฮ ฌาดี บีนี นะ ญา 25 ตาปี กูญา ดูวา อูรัก เตด ดือละ บือซามา ตือดะ มารียา ดูโดะ เดะ อาปี นานะ กีลากี ดัฮ. กะฆีเตอ โยเซบ ตืองะ นามา นะ นานะ อีตู จะ เยซู.
1 ตานา เยซู ดูโดะ เดะ อาปี เดะ ตูโปะ เบดเลเฮม โซะ นังฆรี ยูเดีย เฮโรด ญา ฌาดี ราฌา เดะ นังฆรี อีตู. ลีฮัจ เลอ อาดา ลูมอฮ ซือมียา ปานัย มาแรฮ ดาตัก โซะ ตีมอยํ มาแรฮ รอจ กะ นังฆรี เยรูซาเลม 2 ตาญา จะ "เปะ ดีฮา เลอ นานะ นู ดูโดะ เดะ อาปี ฌาดี ราฌา บักซา ยิว? กามี ลีฮัจ บีตัก นะ ญา ญาแญะ โซะ ตีมอยํ ดัฮ. กะฆีเตอ กามี ปาคัจ มาแรฮ นะ มือญือมัฮ กะ ญา เลอ."กูญา จะ. 3 ตานา ราฌา เฮโรด ดืองัยํ ลาฆู กะฆีเตอ ดัฮ ญา ฆาโดฮ-ฮาตี บาญะ. โกะ ลูมอฮ ซือมียา เดะ นังฆรี เยรูซาเลม ปาคัจ ตูโรจ ฆาโดฮ-ฮาตี ซามา. 4 ราฌา เฮโรด บลาโลก โกะ ลูมอฮ ซามี ซัยํ-บือซัยํ ฌางัน โกะ ลูมอฮ ซือมียา อาฌัยํ ลาฆู ปือมือซัด นะ ตูฮัด มาแรฮ บือมุน บือกีรา. ญา ตาญา จะ " ราฌา นู บรี ซือลามัจ เตอ ญา นะ ดูโดะ เดะ อาปี เปะ ดีฮา?" 5 กะฆีเตอ โกะ ลูมอฮ อีตู ตีกัฮ กะ ญา จะ "ญา นะ ดูโดะ เดะ อาปี เดะ ตูโปะ เบดเลเฮม นังฆรี ยูเดีย. กรานา อาดา ซือมียา ตูโดฮ ลาฆู นะ ตูฮัด ซืออูรัก นู ฆาแรฮ ดัฮ จะ 6 'โอ ตูโปะ เบดเลเฮม เดะ โซะ นังฆรี ยูเดีย เออ โบะ เกา เตด ฌาดี ตูโปะ นู ดือมิ เดะ กาวัด เตอ เดะ มาตา นะ ลูมอฮ ซือมียา บือบือลา นังฆรี ยูเดีย. กรานา อาดา ซือมียา ซืออูรัก นู นะ ตรือเบะ เดะ เกา เตอ ญา เลอ นู นะ บือบือลา อิซราเอน บักซา นะ กู.' ตูฮัด ญา จะ." 7 กะฆีเตอ ราฌา เฮโรด ญา จูรี บลาโลก ลูมอฮ ซือมียา ปานัย อีตู มาแรฮ ตาญา ลาฆู ฌือแนฮๆ จะ "กาเญา ลีฮัจ บีตัก อีตู ตรือเบะ ญาแญะ วะตู ดีฮา?" 8 กะฆีเตอ ญา บรี ลูมอฮ อีตู ปี กะ ตูโปะ เบดเลเฮม ปือซัด จะ "ปี มือโซะ ตาญา ปาซัน นานะ ดือมิ อีตู เลอ. ดาปัจ ดัฮ บาลิ มาแรฮ มือญาเระ บรี กะ กู ตาฮู บีดา กู นะ ปี มือญือมัฮ กะ นานะ ดือมิ อีตู ฌูฆา เลอ." ญา จะ. 9 ลูมอฮ ซือมียา ปานัย กูญา ปี ตูโรจ กะ ปือมือซัด นะ ราฌา. ลีฮัจ เลอ บีตัก อีตู บีตัก นู กูญา ลีฮัจ โซะ ตีมอยํ ซีงี เตอ ญา ปี โซะ ฮึลด กูญา มาแรฮ บราดู เดะ อาตัซ ตือปัจ นานะ ดือมิ ดูโดะ. 10 ตานา ลีฮัจ บีตัก อีตู ดัฮ กูญา ซูกา-ฮาตี บาญะ ซูโงฮ เลอ. 11 กะฆีเตอ กูญา มาโซะ ปี กะ ดาลับ รูมัฮ อีตู ดาปัจ นานะ ดือมิ ฌางัน มารียา มะ เดะ ญา. กูญา ปาคัจ ตือมะ มือญือมัฮ กะ นานะ ดือมิ อีตู. กูญา บูกา ปือตี นะ กูญา อาเมด กลือกะ นู บรือฆา มาแรฮ มือญือมัฮ กะ นานะ ดือมิ. อาดา มัซ อาดา กือมียัน อาดา มีญะ บาวู มดยอบ กูญา มือญือมัฮ กะ ญา. 12 ลือปัซ อีตู ลูมอฮ ซือมียา ปานัย กูญา ตือลีนา มีปี ดืองัยํ ลาฆู ปรีงัจ กะ กูญา ตีเมา บรี กูญา บาลิ ปี ดาปัจ ราฌา เฮโรด เลอ. กะฆีเตอ กูญา บาลิ กะ นังฆรี นะ กูญา ปี กะ ฌาลัด อาซิก. 13 ตานา ลูมอฮ ซือมียา ปานัย ปี ดัฮ ลีฮัจ เลอ อาดา ฮูลู-บาลัก นะ ตูฮัด ญา ปลีฮัจ กะ โยเซบ เดะ ลาฆู มีปี มือญาเระ จะ "บีกัซ เลอ. บาวา นานะ ดือมิ ฌางัน มะ เดะ ญา ลารี ปี กะ นังฆรี อียิบ. ดูโดะ นาตี เปะ อีตู ตือดะ กู นะ จาเระ ซือกาลี ปูลัก. กรานา-จะ ราฌา เฮโรด นะ ซารี นานะ ดือมิ อีนี บีดา นะ บูนอฮ ญา บูวัก." ญา จะ. 14 กะฆีเตอ มาลับ อีตู โยเซบ บีกัซ บาวา นานะ ดือมิ ฌางัน มะ เดะ ญา บือปี กะ นังฆรี อียิบ. 15 กูญา ดูโดะ เปะ อีตู ตือดะ ราฌา เฮโรด มาตี ดัฮ บีดา นะ ฌาดี รือมัก บือกะ ปือมือเลา นะ ตูฮัด นู ญา บรี ซือมียา ตูโดฮ มือเลา ดูลู จะ "กู บลาโลก นานะ นะ กู บรี ตรือเบะ เดะ นังฆรี อียิบ." 16 ตานา ราฌา เฮโรด ลีฮัจ จะ ลูมอฮ ซือมียา ปานัย อีตู กูญา ตีปู ญา ญา โปด มูซัยํ โตระ. ญา ซูโรฮ ซือมียา ปี กะ ตูโปะ เบดเลเฮม ปี กะ ตูโปะ ปิกดาปิก ซามา บรี กูญา ปี บูนอฮ โกะ นานะ กีลากี ซือมูฮา ตะเดะ ดูวา ตาโฮด ตูโรด มาแรฮ บือกะ วะตู นู ญา บือเลฮ ตาฮู เดะ ลูมอฮ ซือมียา ปานัย. 17 วะตู อีตู ฌาดี รือมัก ดัฮ บือกะ ปือมือเลา นู เยเรมี ซือมียา ตูโดฮ ลาฆู นะ ตูฮัด บือเลฮ มือเลา จะ 18 "เดะ ตูโปะ รามา อาดา ซูวารา ซือมียา มือนาแงฮ บือปาโตด บาญะ. นีบีนี ราเชน เตอ ญา มือนาแงฮ กรานา ลูมอฮ นานะ นะ ญา. ญา ตีเมา นะ บรี ซาปา ปูโฌะ ญา กรานา โกะ นานะ อีตู ฮอย ดัฮ เลอ." ญา จะ. 19 ตานา ราฌา เฮโรด มาตี ดัฮ ลีฮัจ เลอ อาดา ฮูลู-บาลัก นะ ตูฮัด ปลีฮัจ กะ โยเซบ เดะ ลาฆู มีปี เดะ นังฆรี อียิบ 20 มือเลา จะ "บีกัซ เลอ. บาวา นานะ ดือมิ ฌางัน มะ เดะ ญา ตรือเบะ ปี กะ นังฆรี อิซราเอน เลอ. กรานา โกะ ซือมียา นู นะ บูนอฮ นานะ ดือมิ เตอ กูญา มาตี ดัฮ." ญา จะ. 21 กะฆีเตอ โยเซบ ญา บีกัซ ญา บาวา นานะ ดือมิ ฌางัน มะ เดะ ญา บือปี กะ นังฆรี อิซราเอน. 22 ตานา โยเซบ ดืองัยํ จะ อาเคเลา ฌาดี ราฌา เดะ นังฆรี ยูเดีย ฆาตี เฮโรด อาโปก เดะ ญา เตอ ญา ตาโกจ นะ ปี โซะ อีตู เลอ. ตานา ญา มีปี ฌาดี ลาฆู ปรีงัจ กะ ญา เตอ ญา ลาลู ปี กะ โซะ นังฆรี ฆาลิลี. 23 ญา ปี ดูโดะ เดะ ตูโปะ นาซาเรด. กะฆีนี ฌาดี รือมัก ดัฮ บือกะ ปือมือเลา นะ โกะ ซือมียา ตูโดฮ ลาฆู นะ ตูฮัด นู บือเลฮ มือเลา จะ กูญา นะ บลาโลก ซือมียา อีตู จะ อูรัก นาซาเรด เลอ.
1 กาลา อีตู อาดา โยฮัน นู บรี ลาฆู ซือลับ เดะ อาเย เตอ ญา มาแรฮ รอจ กะ ปาดัก ตานัฮ ตูโฮยํ นู ลือฆา เดะ นังฆรี ยูเดีย 2 มือญาเระ จะ "กือนา บราเลฮ-ฮาตี เลอ ซาเบะ-จะ เตด ลามา ลาฆี ตูฮัด เดะ อาตัซ นะ มาแรฮ ฌาดี ราฌา นะ บือบือลา อูมัจ-ซือมียา ดัฮ เลอ." 3 ปาซัน โยฮัน อีนี เลอ อิซายา ซือมียา ตูโดฮ ลาฆู นะ ตูฮัด บือเลฮ ตูโดฮ มือเลา จะ "อาดา ซูวารา ซือมียา บือซูระ เดะ ปาดัก ตานัฮ ตูโฮยํ นู ลือฆา มือเลา จะ กือนา ซียะ ฌาลัด บรี ซุจ บีดา ตูฮัด นะ มาแรฮ เลอ. กือนา บือกรือฌา ฌาลัด นะ ญา บรี รือมัก ปี เลอ." ญา จะ. 4 กาเยด บาฌู นะ โยฮัน บูวัจ ฌางัน บูลู อูตัยํ. ญา อาดา กูเละ บือนาตัก ฌาดี ตาลี ปีงัก นะ ญา. ญา มากัด โกะ บลาลัก ฌางัน อาเย มีซัด มาทู. 5 วะตู อีตู อาดา ลูมอฮ ซือมียา ดาตัก เดะ นังฆรี เยรูซาเลม เดะ นังฆรี ยูเดีย ราตา เดะ โซะ บีดิก ซูงัย จอแดน ราตา เตอ กูญา ปาคัจ ตรือเบะ ปี ซารี โยฮัน ซือมูฮา. 6 กูญา ซาโงะ ลาฆู ดูซา นะ กูญา. กะฆีเตอ โยฮัน บูวัจ บรี กูญา ซาโมจ ลาฆู ซือลับ เดะ อาเย เดะ ซูงัย จอแดน. 7 โยฮัน ลีฮัจ บือฆารี ลูมอฮ ฟาริซี ฌางัน ลูมอฮ ซะดูซี มาแรฮ บาญะ บีดา นะ ซาโมจ ลาฆู ซือลับ เดะ อาเย. กะฆีเตอ ญา มือเลา ฌางัน กูญา จะ "กาเญา บักซา อูลัยํ ฌาฮัจ เลอ. ซาปา บือเลฮ ปรีงัจ กะ กาเญา บรี กาเญา ลารี บูวัก เดะ ลาฆู นู ตูฮัด นะ มูซัยํ กรัจ ฮูโกบ เตอ? 8 กะฆีเตอ กะ กาเญา บราเลฮ-ฮาตี ซูโงฮ ดัฮ เตอ กือนา ปลีฮัจ เดะ ลาฆู ปือบูวัจ นะ กาเญา เลอ ซือรูปา ปูโฮด กายู นู บือบูวัฮ บาฌิ. 9 ฌางัน อีงัจ มือเลา เดะ ฮาตี จะ 'กีตา อาดา อับราฮัม ฌาดี อาโปก เลอ.' ซาเบะ กู มือญาเระ กะ กาเญา จะ ตูฮัด เดะ อาตัซ ญา นะ บูวัจ บรี โกะ บีฌี บาตู อีนี ฌาดี นานะ นะ อับราฮัม บือเลฮ. 10 วะตู อีนี กาเญา ซือรูปา โกะ ปูโฮด กายู นู อาดา กาปะ ตืองะ เดะ ปรือดู เตอ. ราตา ปูโฮด นู บือบูวัฮ เตด บาฌิ นะ กือนา ตือบัก บูวัก ตูนู เดะ อาปี เลอ. 11 โซะ กู นี กู บูวัจ บรี กาเญา ซือลับ เดะ อาเย บีดา นะ บรี ลีฮัจ นู กาเญา บราเลฮ-ฮาตี ดัฮ. ตาปี อาดา ซือมียา ซืออูรัก นะ มาแรฮ เดะ บลากัก กู เตอ ญา เลอ นู มือฆัฮ ลือเบฮ เดะ กู. ปะตาปะ นะ ญา โปด กู เตด บือฆูนา นะ บาวา เลอ. ซือมียา อีตู เลอ ญา นะ บูวัจ บรี กาเญา ซือรูปา ซือลับ เดะ ซือมืองัจ นะ ตูฮัด เตอ ซือลับ เดะ อาปี ฌูฆา เลอ. 12 ซือมียา อีตู ญา อาดา ปือญูเดาะ เดะ ตางัน นะ ญา บีดา นะ ซูเดาะ ปาดี. ญา นะ บูวัจ บรี ลามัน ปาดี นะ ญา จรัฮ บาฌิ. โกะ บรัซ นะ ญา เตอ ญา นะ ตาโรฮ เดะ ดาเงา. ตาปี กูเละ ปาดี อีตู ญา นะ ตูนู เดะ อาปี นู เตด ดือละ ปาดับ ลาลู เลอ." โยฮัน ญา จะ. 13 วะตู อีตู เยซู มาแรฮ ดาตัก เดะ นังฆรี ฆาลิลี ซารี โยฮัน เดะ ซูงัย จอแดน บีดา นะ ซาโมจ ลาฆู ซือลับ เดะ อาเย เดะ โยฮัน เตอ. 14 ตาปี โยฮัน ญา นะ บลารัก กะ เยซู มือเลา จะ "กู ฆาโดฮ นะ ซาโมจ ลาฆู ซือลับ เดะ เกา เลอ. ตาปี เกา ฆามะ นะ มาแรฮ ซาโมจ เดะ กู เฆอ?" 15 ตาปี เยซู ตีกัฮ กะ ญา จะ "วะตู อีนี เกา กือนา บูวัจ เลอ. บือฆูนา เลอ นู กีตา นะ บูวัจ ลาฆู บาฌิ-ตือปัจ ราตา ลาฆู." กะฆีเตอ โยฮัน ญา บรี กะ ญา ดัฮ. 16 ตานา เยซู ซาโมจ ลาฆู ซือลับ เดะ อาเย ดัฮ ญา ญาแญะ เดะ อาเย ดัดดัด. ลีฮัจ เลอ ลาแงะ ตือบูกา ดัฮ. เยซู ลีฮัจ ซือมืองัจ นะ ตูฮัด ซือรูปา บูโรก ปาตี ตูโรด มาแรฮ มืองาตอจ เดะ อาตัซ ญา. 17 ลีฮัจ เลอ อาดา ซูวารา นะ ตูฮัด ดาตัก เดะ ลาแงะ มือเลา จะ "ซือมียา อีนี เลอ ฌาดี นานะ นะ กู นู กู ซายัก. กู ซูกา-ฮาตี กะ ญา บาญะ เลอ." ญา จะ.
1 ลือปัซ อีตู ซือมืองัจ นะ ตูฮัด บาวา เยซู บือปี กะ ปาดัก ตานัฮ ตูโฮยํ นู ลือฆา บีดา กือปาลา ฮาตู ซีตัด นะ บาอาฌะ ญา บรี บูวัจ ซาลัฮ. 2 กือมูฮา ปัจ-ปูโลฮ อารี ปัจ-ปูโลฮ มาลับ นู เยซู ญา บือตาฮัด บารัก มากัด. ลือปัซ อีตู ญา ลาปัยํ โตระ. 3 กะฆีเตอ ฮาตู นู บาอาฌะ ซีงี มาแรฮ มือเลา ฌางัน ญา จะ "ดัฮ เกา ฌาดี นานะ นะ ตูฮัด ซูโงฮ เตอ เกา กือนา ปือซัด บรี โกะ บาตู อีนี ฌาดี ตือโปก โรตี เลอ." 4 ตาปี เยซู ตีกัฮ กะ ญา จะ " ซูรัจ ปือมือเลา นะ ตูฮัด มือเลา จะ 'นู โกะ ซือมียา นะ ฮีโดะ เตอ บูกัด ซา ซือบารัก มากัด เลอ. ตาปี ญา นะ ฮีโดะ กรานา ราตา ปือมือเลา นู ตรือเบะ เดะ มูโลจ นะ ตูฮัด เดะ อาตัซ เลอ.' ญา จะ." 5 กะฆีเตอ ฮาตู ซีตัด บาวา เยซู บือปี กะ นังฆรี เยรูซาเลม นู บาฌิ บือซรี บรี ญา บือดีรี เดะ อาตัซ กือมูโบก นู ตีงี เดะ รูมัฮ มือญือมัฮ ตูฮัด. 6 ญา มือเลา ฌางัน เยซู จะ "ดัฮ เกา ฌาดี นานะ นะ ตูฮัด โปด เกา กือนา ตรือโฌด เลอ ปี กะ บาวัฮ. ซาเบะ ซูรัจ ปือมือเลา นะ ตูฮัด มือเลา จะ 'ตูฮัด นะ ซูโรฮ โกะ ฮูลู-บาลัก นะ ญา มาแรฮ บือบือลา เกา เลอ. กูญา อีตู นะ ฮามัจ รีบา เกา เดะ ตางัน นะ กูญา ตีเมา บรี กากี นะ เกา นะ กือนา บาตู.' ญา จะ." 7 เยซู ตีกัฮ กะ ญา จะ "ซูรัจ ปือมือเลา นะ ตูฮัด มือเลา ลาฆี จะ 'ฌางัน นะ ลกลีฮัจ ตูฮัด เดะ อาตัซ นู ฌาดี ตูฮัด นะ เกา เลอ.'_" ญา จะ. 8 กะฆีเตอ ฮาตู ซีตัด ญา บาวา เยซู ปูลัก บือปี กะ บูเกะ นู ตีงี ซูโงฮ บีดา ญา นะ ลีฮัจ โกะ นังฆรี ซือมูฮา ราตา เดะ ดือนียา นู บาฌิ บือฆาจะ เลอ. 9 ฮาตู ซีตัด มือเลา ฌางัน เยซู จะ "ดัฮ เกา นะ ตือมะ มือญือมัฮ กะ กู เตอ กู นะ บรี ลาฆู บาฌิ อีนี ซือมูฮา กะ เกา เลอ." ญา จะ. 10 กะฆีเตอ เยซู ตีกัฮ กะ ญา จะ "เออ กือปาลา ซีตัด บรี เกา ลือปัซ ปี บูวัก เลอ. ซาเบะ ซูรัจ ปือมือเลา นะ ตูฮัด มือเลา จะ 'กือนา มือญือมัฮ กะ ตูฮัด บือซัยํ เดะ อาตัซ ตูฮัด นะ เกา เลอ. กือนา ตูเฮะ กะ ญา นู ฌาดี ตูฮัด แนฮ ซา เลอ.' " ญา จะ. 11 กะฆีเตอ ฮาตู ซีตัด ญา ตีงัน เยซู ปี ดัฮ. ลีฮัจ เลอ โกะ ฮูลู-บาลัก นะ ตูฮัด มาแรฮ ตูโลก เยซู ดัฮ. 12 ตานา เยซู ดืองัยํ จะ โยฮัน กือนา กานัก เดะ ปือฌารา ดัฮ กะฆีเตอ ญา บาลิ ปี กะ โซะ นังฆรี ฆาลิลี. 13 ญา ตรือเบะ เดะ ตูโปะ นาซาเรด ปี ดูโดะ เดะ ตูโปะ คาเปอนาอุม นู อาดา เดะ บีดิก ลาโวจ ฆาลิลี เดะ โซะ ตือกอซ นังฆรี เซบูโลน ฌางัน นังฆรี นับทาลี. 14 กะฆีเตอ ปือมือเลา นะ อิซายา ซือมียา ตูโดฮ ลาฆู นะ ตูฮัด เตอ ญา ฌาดี รือมัก นู จะ 15 "นังฆรี เซบูโลน ฌางัน นังฆรี นับทาลี ฌาลัด นู ปี รอจ กะ ลาโวจ โซะ ซรือบัก ซูงัย จอแดน โซะ นังฆรี ฆาลิลี นู โกะ ลูมอฮ ซือมียา บักซา อาซิก ดูโดะ เตอ 16 โกะ ลูมอฮ ซือมียา นู ดูโดะ โซะ กือลับ กูญา ลีฮัจ บือฆารี จรัฮ นู บือซายา โตระ ดัฮ เลอ. โกะ ลูมอฮ ซือมียา นู ดูโดะ เดะ โซะ บายัก นะ ลาฆู มาตี เตอ อาดา จรัฮ ซูโลฮ มาแรฮ รอจ กะ กูญา ดัฮ เลอ." ญา จะ. 17 ตะเดะ วะตู อีตู เยซู ฮึนตะ นะ บือตาฮู มือเลา จะ "กือนา บราเลฮ-ฮาตี บารู เลอ ซาเบะ ตูฮัด เดะ อาตัซ ญา ฆามะ นะ มาแรฮ ฌาดี ราฌา นะ บือบือลา อูมัจ-ซือมียา ดัฮ." 18 ตานา เยซู บือฌาลัด ปี เดะ บีดิก ลาโวจ ฆาลิลี ญา ลีฮัจ บือฆารี ดูวา บราดี จะ ซีโมน นู ปือนามา อาซิก จะ เปโตร เตอ ฌางัน อันดรู อาดี เดะ ญา. กูญา ตืองัฮ มือญาลา เดะ ลาโวจ ซาเบะ กูญา ฌาดี ซือมียา รีฆะ อีกัด. 19 เยซู มือเลา กะ กูญา จะ "มาแรฮ ตูโรจ กะ กู เลอ. กู นะ บูวัจ บรี กาเญา ฌาดี ซือมียา รีฆะ ซือมียา." 20 ดัดดัด อีตู กูญา ตีงัน ฌาลา นะ กูญา บูวัก ตูโรจ ปี กะ เยซู ดัฮ. 21 กะฆีเตอ เยซู บือฌาลัด ปี เดะ โซะ อีตู ญา ลีฮัจ บือฆารี ดูวา บราดี นู อาซิก ฌาดี-จะ ยากอบ นานะ นะ เซเบดี ฌางัน โยฮัน อาดี เดะ ญา. กูญา อาดา เดะ ปราฮู ฌางัน เซเบดี ปะ เดะ กูญา ตืองัฮ บูโบน โกะ ปูกัจ. เยซู ญา ปาเงน กูญา ดูวา อูรัก. 22 ดัดดัด กูญา ตีงัน บูวัก โกะ ปราฮู ฌางัน ปะ เดะ กูญา ซามา ตูโรจ ปี กะ เยซู ดัฮ. 23 กะฆีเตอ เยซู บือฌาลัด ปี ราตา เดะ โซะ นังฆรี ฆาลิลี. ญา อาฌัยํ เดะ โกะ รูมัฮ ปือมุน นะ กูญา. ญา บือตาฮู บรีตา นู บาฌิ ปาซัน นู ตูฮัด เดะ อาตัซ นะ มาแรฮ ฌาดี ราฌา นะ โกะ อูมัจ-ซือมียา. ญา บือบือลา โกะ ซือมียา ปือญาเกะ โกะ ซือมียา เตด ซือนัง ญาวา ราตา มาจับ. 24 ลูมอฮ ซือมียา เดะ โซะ นังฆรี ซีเรีย ราตา กูญา ดืองัยํ ปาซัน ลาฆู นะ เยซู ดัฮ. กะฆีเตอ โกะ ซือมียา เตด ซือนัง ญาวา โกะ ซือมียา ปือญาเกะ โปด โกะ ซือมียา บราซา ซาเกะ โกะ ซือมียา กือนา ฮาตู บูวัจ บรี ญา ราโซะ เตอ โกะ ซือมียา นู ฆีลา บาบี โกะ ซือมียา ฮอย อูรัจ โปด โกะ ซือมียา อีนี ซือมูฮา เลอ กูญา บาวา บือมาแรฮ มียา เยซู. กะฆีเตอ ญา บือบือลา โกะ ลูมอฮ อีตู บรี ซือนัง บาฌิ ดัฮ. 25 อาดา ลูมอฮ ซือมียา บาญะ มาแรฮ เดะ โซะ นังฆรี ฆาลิลี เดะ โซะ นังฆรี ทดบุรี เดะ นังฆรี เยรูซาเลม เตอ เดะ โซะ นังฆรี ยูเดีย เดะ โซะ ซรือบัก ซูงัย จอแดน โปด กูญา ตูโรจ ปี กะ เยซู ซือมูฮา เลอ.
1 ตานา เยซู ลีฮัจ ลูมอฮ ซือมียา บาญะ ญา ญาแญะ ปี กะ อาตัซ บูเกะ ซา บูเกะ ญา ดูโดะ โซะ อีตู. ลูมอฮ มูเระ นะ ญา มาแรฮ บือมุน โซะ กือลีลิก ญา. 2 กะฆีเตอ เยซู ญา ฮึนตะ นะ อาฌัยํ กูญา มือเลา จะ 3 "ซือนัง ซือลามัจ เลอ โกะ ซือมียา นู บราซา จะ กูญา ซูซัฮ ปายัฮ โซะ ฮาตี เตอ ซาเบะ กูญา ฌาดี ลูมอฮ ซือมียา นู อาดา ตูฮัด ฌาดี ราฌา นะ กูญา ดัฮ. 4 ซือนัง ซือลามัจ เลอ โกะ ซือมียา นู ซูซัฮ-ฮาตี ซาเบะ ตูฮัด นะ ปูโฌะ ฮาตี นะ กูญา เลอ. 5 ซือนัง ซือลามัจ เลอ โกะ ซือมียา นู ฮาตี บือแฌะ ซาเบะ กูญา นะ ซาโมจ ดือนียา อีนี ฌาดี ปือซากา นะ กูญา เลอ. 6 ซือนัง ซือลามัจ เลอ โกะ ซือมียา นู ลาปัยํ นะ ฌาดี บาฌิ-ตือปัจ เตอ ซาเบะ ตูฮัด นะ บรี กูญา กือญัง ซูโงฮ เลอ. 7 ซือนัง ซือลามัจ เลอ โกะ ซือมียา นู ฮาตี ตือจีฮัด กะ กาวัด เตอ ซาเบะ ตูฮัด นะ ตือจีฮัด กะ กูญา ฌูฆา เลอ. 8 ซือนัง ซือลามัจ เลอ โกะ ซือมียา นู ฮาตี จรัฮ บาฌิ ซาเบะ กูญา นะ ลีฮัจ บือฆารี ตูฮัด เดะ อาตัซ เลอ. 9 ซือนัง ซือลามัจ เลอ โกะ ซือมียา นู บูวัจ บรี ซือมียา บาฌิ ฌางัน กาวัด เตอ ซาเบะ กูญา นะ กือนา ปือนามา จะ ฌาดี นานะ นะ ตูฮัด เลอ. 10 ซือนัง ซือลามัจ เลอ โกะ ซือมียา นู กือนา ปรือกัด ซาเบะ ลาฆู บาฌิ-ตือปัจ เตอ ซาเบะ กูญา ฌาดี ลูมอฮ ซือมียา นู อาดา ตูฮัด ฌาดี ราฌา นะ กูญา ดัฮ. 11 ซือนัง ซือลามัจ เลอ กาเญา กาลา อาดา ซือมียา มือฌัฮ กะ กาเญา ปรือกัด กาเญา มือเลา ฌาฮัจ กะ กาเญา บาญะ มาจับ ฌาดี ลาฆู มืออูปัย ซาเบะ กาเญา ตูโรจ กะ กู เตอ. 12 บรี กาเญา บรามัย ซูกา-ฮาตี ซูโงฮ เลอ กรานา-จะ กาเญา อาดา บาฮาเฆด นู บือซัยํ เดะ โซะ อาตัซ ลาแงะ. ฌาดี กะฆีเตอ เลอ นู กูญา บือเลฮ ปรือกัด โกะ ซือมียา ตูโดฮ ลาฆู นะ ตูฮัด นู อาดา ดูลู เดะ กาเญา ดัฮ." เยซู ญา จะ. 13 เยซู มือเลา ปูลัก จะ "กาเญา ฌาดี ซือรูปา ฆารับ เดะ ดือนียา. กาเลา-จะ ฆารับ อีตู ตาวัยํ ดัฮ นะ บูวัจ บรี มาเซด ปูลัก บือเลฮ กะฮามี เลอ? ญา ฮอย เตด ตือปากัย ดัฮ นะ กือนา ตีงัน บูวัก นะ กือนา โกะ ซือมียา กาจะ เลอ. 14 "กาเญา ซือรูปา จรัฮ นู ซูโลฮ เดะ ดือนียา. นังฆรี ดีฮา นู ตืองะ เดะ อาตัซ บูเกะ เตอ นะ ตูโดก เตด บือเลฮ ดัฮ. 15 โกะ ซือมียา นู จูโจฮ ปลีตา กูญา เตด บอฮ เดะ บาวัฮ เตง. บูกัด ญา บอฮ เดะ อาตัซ ซลีแป บรี ซูโลฮ จรัฮ กะ ซือมียา ซือมูฮา เดะ รูมัฮ เตอ. 16 กะฆีเตอ จรัฮ นะ กาเญา กือนา ซูโลฮ กะ ลูมอฮ ซือมียา บีดา กูญา นะ บือฆารี ปือบูวัจ นู บาฌิ นะ กาเญา. กะฆีเตอ กูญา นะ มือโอจ กะ อาโปก นะ กาเญา นู ดูโดะ โซะ อาตัซ ลาแงะ." ญา จะ. 17 เยซู มือเลา ลาฆี จะ "ฌางัน อีงัจ จะ กู มาแรฮ ดัฮ นะ บูวัจ บรี ปือมือเลา ฮูโกบ นะ ตูฮัด ฌางัน ปือมือเลา นะ โกะ ซือมียา ตูโดฮ ลาฆู นะ ตูฮัด นะ บือนาซา ฮาบิฮ. บูกัด กะฆีเตอ. กู มาแรฮ ดัฮ บูกัด นะ บูวัจ บรี ปือมือเลา อีตู บือนาซา ฮาบิฮ ตาปี นะ บูวัจ บรี ญา ซุจ รือมัก บาฌิ ดัฮ. 18 กู มือเลา ฌางัน กาเญา ลาฆู นู ซูโงฮ จะ ตือดะ ลาแงะ ฌางัน ดือนียา นะ ลือแงะ ปี ฮาบิฮ ดัฮ เดะ ซูรัจ ปือมือเลา ฮูโกบ นะ ตูฮัด ฮอย ลาฆู นามา นู ดีกิ-ตอจ ซา ปาตัฮ โปด นู นะ ลือแงะ ปี ฮาบิฮ ดัฮ. กือนา ฌาดี รือมัก ดูลู ซือมูฮา เลอ. 19 กะฆีเตอ ซือมียา ดีฮา นู บูวัจ บรี ซา ตือนอซ นู ดีกิ-ตอจ เดะ โกะ ปือมือซัด นะ ตูฮัด บรี กูรัก เตอ นู อาฌัยํ ซือมียา อาซิก กะฆีเตอ ฌูฆา เตอ ซือมียา อีตู เลอ นะ ฌาดี ซือมียา นู ดือมิ เดะ กาวัด เดะ ลูมอฮ ซือมียา นะ ตูฮัด. ตาปี ซือมียา ดีฮา นู บูวัจ ตูโรจ ปือมือซัด อีตู เตอ นู อาฌัยํ กะฆีเตอ ฌูฆา ญา เลอ นะ ฌาดี ซือมียา บือซัยํ เดะ ลูมอฮ ซือมียา นะ ตูฮัด. 20 กรานา กู มือญาเระ กะ กาเญา จะ ดัฮ กาเญา เตด ฌาดี ซือมียา บาฌิ-ตือปัจ ลือเบฮ เดะ ลูมอฮ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ ฟาริซี เตอ กาเญา นะ มาโซะ กะ ลูมอฮ ซือมียา นะ ตูฮัด ฮอย เตด บือเลฮ เลอ." เยซู ญา จะ. 21 เยซู มือเลา ปูลัก จะ "กาเญา ดืองัยํ ดัฮ ปือมือเลา นู มือญาเระ กะ โกะ ซือมียา กาลา นูตู จะ 'ฌางัน บูนอฮ ซือมียา เลอ. ซือมียา นู บูนอฮ ซือมียา เตอ ญา นะ กือนา กรัจ ฮูโกบ เลอ.' 22 ตาปี กู นี เลอ กู มือเลา ฌางัน กาเญา จะ ซือมียา ดีฮา นู มูซัยํ ฌางัน กาวัด เตอ ญา นะ กือนา กรัจ ฮูโกบ เลอ. ซือมียา ดีฮา นู มือเลา ฌางัน กาวัด จะ 'เกา บูดอ เลอ' ญา นะ กือนา กรัจ ฮูโกบ เดะ ซัน. ซือมียา ดีฮา นู มือเลา ฌางัน กาวัด จะ 'เกา ฆีลา เลอ' ญา นะ กือนา ตีงัน เดะ อาปี นอรากา เลอ. 23 กะฆีเตอ ตานา เกา ตืองัฮ บาวา บารัก นะ มือนืองะ มือญือมัฮ กะ ตูฮัด รอจ กะ ตือปัจ ตูนู บารัก มือนืองะ เตอ ดัฮ เกา โตะ-ตืออีงัจ จะ กาวัด นะ เกา อาดา ปาซัน นามา ฌางัน เกา เตอ 24 กะฆีเตอ เกา กือนา ตาโรฮ บารัก มือนืองะ นะ เกา เดะ ตือปัจ มือนืองะ อีตู บาลิ ปี บาฌิ ปาเระ ฌางัน กาวัด อีตู ดูลู เตอ. ลือปัซ อีตู มาแรฮ ปูลัก เลอ มือนืองะ บารัก มือญือมัฮ นะ เกา บรี กะ ตูฮัด เลอ. 25 ดัฮ ซือมียา ซืออูรัก นะ อาดู เกา เตอ นะ บาวา เกา บือปี ญาแญะ กะ ซัน โปด เกา กือนา บาฌิ ฌางัน ญา จือปัจๆ เลอ เดะ ตืองัฮ ฌาลัด. กะ เตด บูวัจ กะฆีเตอ ซือมียา อีตู นะ ซรัฮ เกา บรี กะ ซือมียา กรัจ ฮูโกบ. ซือมียา กรัจ ฮูโกบ นะ ซรัฮ เกา บรี กะ ตามาตา บีดา เกา นะ กือนา กานัก เดะ ปือฌารา. 26 ซูโงฮ เลอ กู มือเลา ฌางัน เกา จะ เกา นะ ลือปัซ เดะ ตือปัจ อีตู เตด บือเลฮ ลาลู ตือดะ เกา บายัยํ ฮูตัก บรี ฆือนะ ฮาบิฮ ดัฮ เลอ." เยซู ญา จะ. 27 เยซู มือเลา ปูลัก จะ "กาเญา ดืองัยํ ดัฮ ปือมือเลา นู บือเลฮ มือญาเระ จะ 'ฌางัน บือกาเซฮ เลอ.' 28 ตาปี กู มือเลา ฌางัน กาเญา จะ ซือมียา ดีฮา นู ตีญูง กะ นีบีนี ซืออูรัก ฆีลา กะ นีบีนี อีตู เตอ ญา เลอ บือกาเซฮ ฌางัน นีบีนี อีตู โซะ ฮาตี ดัฮ. 29 ดัฮ มาตา โซะ กานัน นะ เกา บูวัจ บรี เกา ซาลัฮ ดัฮ บีฌี มาตา อีตู เตอ เกา กือนา จูเกน บือตรือเบะ บูวัก เลอ. นู กลือกะ นู ซา นะ เกา นะ ลือแงะ ปี ดัฮ บาฌิ เดะ ญาวา นะ เกา ซือมูฮา นะ กือนา ตีงัน บูวัก เดะ นอรากา เลอ. 30 ดัฮ ตางัน โซะ กานัน นะ เกา บูวัจ บรี เกา ซาลัฮ ดัฮ ตางัน อีตู เตอ เกา กือนา กรัจ บูวัก เลอ. นู กลือกะ นู ซา นะ เกา นะ ลือแงะ ปี ดัฮ บาฌิ เดะ ญาวา นะ เกา ซือมูฮา ฆาโดฮ นะ มาโซะ ปี กะ นอรากา เลอ." 31 "อาดา ฌูฆา นู บือเลฮ มือญาเระ จะ 'กาเลา-จะ ซือมียา นะ บรือจัย ฌางัน บีนี นะ ญา บรี ญา ฆาแรฮ ซูรัจ บรือจัย บรี กะ นีบีนี อีตู.' 32 ตาปี กู มือเลา ฌางัน กาเญา จะ ราตา ซือมียา นู บรือจัย ฌางัน บีนี นะ ญา ปาซัน ซาลัฮ อาซิก เดะ ลาฆู บือกาเซฮ เตอ ญา บูวัจ บรี นีบีนี อีตู ซาลัฮ บือกาเซฮ. ซือมียา ดีฮา นู ซาโมจ นีบีนี นู กือนา บรือจัย ฌาดี บีนี นะ ญา เตอ ซือมียา อีตู เลอ ซาลัฮ บือกาเซฮ ดัฮ." เยซู ญา จะ. 33 เยซู ญา มือเลา ปูลัก จะ "กาเญา ดืองัยํ ฌูฆา ดัฮ ปือมือเลา นู มือญาเระ กะ โกะ ซือมียา กาลา นูตู จะ 'นู เกา อาเกะ มือเลา บือซูปัฮ เดะ นามา นะ ตูฮัด เดะ อาตัซ ดัฮ เตอ ฌางัน บรี ปูตุซ เลอ ตาปี กือนา บูวัจ ตูโรจ เลอ.' 34 ตาปี กู นี เลอ กู มือเลา ฌางัน กาเญา จะ ฌางัน บือซูปัฮ ลาลู เลอ. ฌางัน อาเกะ ลาแงะ มาแรฮ มือเลา บือซูปัฮ เตอ ซาเบะ ลาแงะ ฌาดี ซือรูปา ปาปัด กรือซี ตือปัจ นู ตูฮัด ดูโดะ ฌาดี ราฌา เลอ. 35 ฌางัน อาเกะ ดือนียา มาแรฮ มือเลา บือซูปัฮ เตอ ซาเบะ ดือนียา ฌาดี ซือรูปา ตือปัจ ซาโมจ กากี นะ ตูฮัด เลอ. ฌางัน อาเกะ นังฆรี เยรูซาเลม มาแรฮ มือเลา บือซูปัฮ เตอ ซาเบะ นังฆรี เยรูซาเลม ฌาดี นังฆรี นะ ตูฮัด นู ฌาดี ราฌา บือซัยํ เลอ. 36 ฌางัน อาเกะ ปาลา นะ เกา มาแรฮ มือเลา บือซูปัฮ เตอ ซาเบะ เกา นะ บูวัจ บรี โบะ นะ เกา แนฮ ซา อูรัจ โปด นะ บือฮูบัด เฆอ-จะ ฮีตับ ฮอย เตด บือเลฮ เลอ. 37 ตาปี กาเญา กือนา บรี ปือมือเลา นะ กาเญา ฌาดี รือมัก เลอ. ดัฮ ซูโงฮ กือนา มือเลา จะ ซูโงฮ. ดัฮ เตด ซูโงฮ กือนา มือเลา จะ เตด ซูโงฮ เลอ. นู นะ มือเลา ลือเบฮ เดะ อีตู เตอ ดาตัก มาแรฮ เดะ ฮาตู ฌาฮัจ เลอ." เยซู ญา จะ. 38 เยซู ญา มือเลา ปูลัก จะ "กาเญา ดืองัยํ ดัฮ ปือมือเลา นู มือญาเระ จะ 'มาตา ฆาตี มาตา ฆีฆี ฆาตี ฆีฆี'. 39 ตาปี กู นี เลอ กู มือเลา ฌางัน กาเญา จะ ฌางัน บลาวัด ฌางัน ซือมียา ฌาฮัจ เลอ. ดัฮ ซือมียา ดีฮา ตาปัยํ ปีปี บือลัฮ กานัน นะ เกา เกา กือนา อาเลฮ มูคา บรี ญา ตาปัยํ ปีปี บือลัฮ กีรี ฌูฆา. 40 ดัฮ ซือมียา ดีฮา อีงัจ นะ อาดู เกา บีดา นะ อาเมด บาฌู นะ เกา เตอ เกา กือนา ฮาฆิ บาฌู ซรือโกะ ญาวา บรี กะ ญา ฌูฆา. 41 ดัฮ ซือมียา ดีฮา นะ ปรือกัด เกา บรี เกา บาวา บารัก นะ ญา ปี รอจ กะ ซา กีโลเมด เตอ บรี เกา บาวา บารัก อีตู ปี รอจ กะ ดูวา กีโลเมด เลอ. 42 ดัฮ อาดา ซือมียา มีตา บารัก เดะ เกา เกา กือนา ฮาฆิ กะ ญา กะฆีเตอ เลอ. ดัฮ อาดา ซือมียา อีงัจ นะ มีตา มีญับ เดะ เกา ฌางัน อาเลฮ มูคา เดะ ญา เลอ." เยซู ญา จะ. 43 เยซู มือเลา ปูลัก จะ "กาเญา ดืองัยํ ดัฮ ลาฆู นู จะ 'กือนา ซายัก กาวัด นะ เกา เลอ ตาปี ซือตรู นะ เกา เตอ เกา กือนา บือชี เลอ'. 44 ตาปี กู นี เลอ กู มือญาเระ กะ กาเญา จะ กือนา ซายัก ซือตรู นะ กาเญา เลอ. กือนา บือซาโวจ กรานา ซือมียา นู บูวัจ ลาฆู ฌาฮัจ ปรือกัด กะ กาเญา. 45 กะฆีเตอ กาเญา นะ ฌาดี นานะ นะ อาโปก นู เดะ อาตัซ ลาแงะ. ญา เตอ นู บูวัจ บรี มาตาอารี ซูโลฮ จรัฮ บาฌิ กะ โกะ ซือมียา ฌาฮัจ ฌางัน โกะ ซือมียา บาฌิ ฌูฆา. ญา เตอ นู ซูโรฮ ฮูฌัด ตูโรด ราตา เดะ โกะ ซือมียา บาฌิ-ตือปัจ ฌางัน โกะ ซือมียา เตด บาฌิ-ตือปัจ ฌูฆา. 46 "กะ กาเญา ซายัก ซือมียา นู ซายัก กาเญา กาเญา นะ บือเลฮ บาฮาเฆด นามา เลอ? มีเซ-จะ โกะ ซือมียา มูงอจ อาเซน เตอ กูญา บูวัจ กะฆีเตอ เลอ. 47 กะ กาเญา มืองา ซา ลูมอฮ อาดี-บราดี นะ กาเญา เตอ กาเญา ซือมียา บาฌิ เดะ กาวัด กะฮามี เลอ? มีเซ-จะ โกะ ซือมียา นู เตด ตูเฮะ กะ ตูฮัด โปด กูญา บูวัจ กะฆีเตอ บูกัด เฆอ? 48 "อาโปก เดะ อาตัซ นะ กาเญา ญา เตอ บาฌิ ซือมูฮา. กะฆีเตอ กาเญา เลอ กือนา บาฌิ กะฆีเตอ ฌูฆา เลอ." เยซู ญา จะ.
1 เยซู มือเลา ปูลัก จะ "กือนา ฌาฆา บรี บาฌิ เลอ. ฌางัน บูวัจ ปือบูวัจ นู บาฌิ นะ กาเญา โซะ ฮึลด มูคา โกะ ซือมียา บีดา กูญา นะ บือฆารี. กะ บูวัจ กะฆีเตอ กาเญา นะ เตด บือเลฮ ดาปัจ บาฮาเฆด เดะ อาโปก นะ กาเญา นู ดูโดะ โซะ อาตัซ ลาแงะ. 2 กะฆีเตอ วะตู เกา นะ ฮาฆิ ดูเวะ กะ ซือมียา ฮาฌะ เตอ ฌางัน ตีโยะ ซือลูนัย โซะ ฮึลด เกา. ลูมอฮ ซือมียา นู มูคา มาเนฮ ฮาตี ฌาฮัจ เตอ กูญา บูวัจ กะฆีเตอ เดะ รูมัฮ บือมุน เดะ บีดิก ฌาลัด ฌูฆา บีดา นะ บรี ลูมอฮ ซือมียา มือโอจ กะ กูญา. กู มือเลา ฌางัน กาเญา ลาฆู นู ซูโงฮ จะ กูญา บือเลฮ ซาโมจ บาฮาเฆด นะ กูญา ดัฮ. 3 ตาปี โซะ เกา เตอ วะตู เกา นะ ฮาฆิ ดูเวะ กะ ซือมียา ฮาฌะ ฌางัน บรี ตางัน กีรี ตาฮู จะ ตางัน กานัน ญา บูวัจ นามา. 4 กะฆีเตอ นู เกา ฮาฆิ เตอ ฌาดี ลาฆู นู ลีนง ดัฮ. กะฆีเตอ อาโปก เดะ อาตัซ นะ เกา นู ลีฮัจ บือฆารี ปือบูวัจ นะ เกา เดะ ตือปัจ ลีนง เตอ ญา เลอ นะ ฮาฆิ บาฮาเฆด บรี กะ เกา เลอ." เยซู ญา จะ. 5 เยซู มือเลา จะ "วะตู กาเญา บือซาโวจ ฌางัน บูวัจ ลาฆู ซือรูปา โกะ ซือมียา มูคา มาเนฮ ฮาตี ฌาฮัจ. กูญา อีตู ซูกา บือดีรี บือซาโวจ เดะ รูมัฮ บือมุน เตอ เดะ จีปัก ปัจ เตอ บีดา นะ บรี โกะ ซือมียา อาซิก ลีฮัจ. กู มือเลา ฌางัน กาเญา ลาฆู นู ซูโงฮ จะ กูญา บือเลฮ ซาโมจ บาฮาเฆด นะ กูญา ดัฮ. 6 ตาปี วะตู เกา นะ บือซาโวจ กือนา มาโซะ กะ ดาลับ รูวัก กาปุซ ปีตู บือซาโวจ กะ อาโปก เดะ อาตัซ นะ เกา นู อาดา เดะ ตือปัจ ลีนง. กะฆีเตอ อาโปก นะ เกา นู ลีฮัจ บือฆารี ปือบูวัจ นะ เกา เดะ ตือปัจ ลีนง เตอ ญา เลอ นะ ฮาฆิ บาฮาเฆด บรี กะ เกา เลอ. 7 "วะตู กาเญา บือซาโวจ ฌางัน มือเลา แงฮ-อูแงฮ ซือรูปา ลาฆู นะ โกะ ซือมียา นู เตด ตูเฮะ กะ ตูฮัด. กูญา อีงัจ จะ มือเลา บาญะ ตูฮัด นะ ดืองัยํ. 8 ฌางัน บูวัจ กะฆีเตอ เลอ. กรานา ดูลู เดะ กาเญา นะ บือซาโวจ เตอ ตูฮัด นู อาโปก นะ กาเญา ญา ตาฮู ดัฮ บารัก นู กาเญา บือคานะ เตอ." 9 เยซู มือเลา จะ "กาเญา กือนา บือซาโวจ กะฆีนี จะ 'โอ ตูฮัด อาโปก นะ กามี นู ดูโดะ เดะ อาตัซ ลาแงะ มีตา บรี นามา นะ เกา ฌาดี นามา นู บาฌิ บือซรี เลอ. 10 มีตา บรี ตูฮัด นะ บือบือลา ฌาดี ราฌา เดะ ดือนียา อีนี เลอ. มีตา บรี บือนา ซือมูฮา นะ ตูโรจ กะ ฮาตี นะ ตูฮัด เลอ. กูญา ตูโรจ โซะ อาตัซ ลาแงะ กะฮามี บรี กูญา ตูโรจ เดะ ดือนียา กะฆีเตอ ฌูฆา. 11 มีตา บารัก นู กามี บือคานะ นะ มากัด เดะ อารี อีนี เลอ. 12 มีตา บรี ตูฮัด อาเกะ ซาลัฮ นะ กามี เลอ ซือรูปา กามี บือเลฮ อาเกะ ซาลัฮ นะ โกะ ซือมียา นู บูวัจ กะ กามี ดัฮ. 13 ฌางัน บรี กามี นะ กือนา บาอาฌะ บูวัจ ดูซา. ตูโลก บรี กามี ลือปัซ เดะ ฮาตู ฌาฮัจ เลอ. [โอ ตูฮัด เออ มีตา บรี ตูฮัด ฌาดี ราฌา นู บือซัยํ ราฌา นู มือฆัฮ ราฌา นู บือซรี เลอ. บรี ฌาดี กะฆีนี ซือลาลู เตด บราดู. อาเมน.] 14 "กรานา-จะ กะ กาเญา นะ อาเกะ ซาลัฮ นะ กาวัด เตอ อาโปก เดะ อาตัซ นะ กาเญา นะ อาเกะ ซาลัฮ นะ กาเญา ฌูฆา. 15 ตาปี กะ กาเญา เตด อาเกะ ซาลัฮ นะ กาวัด เตอ อาโปก นะ กาเญา โปด เตด อาเกะ ซาลัฮ นะ กาเญา ฌูฆา." เยซู ญา จะ. 16 เยซู มือเลา ปูลัก จะ "วะตู กาเญา บูวัจ ลาฆู บือตาฮัด มากัด ฌางัน บูวัจ ซือรูปา ซือมียา มูคา มาเนฮ ฮาตี ฌาฮัจ. กูญา บูวัจ มูคา มาซับ นะ บรี กะ ซือมียา อาซิก ตาฮู จะ กูญา ตืองัฮ บูวัจ ลาฆู บือตาฮัด มากัด. กู มือเลา ฌางัน กาเญา ลาฆู นู ซูโงฮ จะ กูญา ซาโมจ บาฮาเฆด นะ กูญา ดัฮ เลอ. 17 ตาปี โซะ เกา เลอ วะตู เกา บูวัจ ลาฆู บือตาฮัด มากัด กือนา บาโซฮ มูคา บอฮ มีญะ บาวู เดะ ปาลา. 18 กะฆีเตอ โกะ ซือมียา อาซิก นะ ลีฮัจ เตด บือฆารี นู เกา ตืองัฮ บือตาฮัด บารัก มากัด. ตาปี อาโปก เดะ อาตัซ นะ เกา นู อาดา เดะ ตือปัจ ลีนง เตอ ญา นะ ลีฮัจ นู เกา บูวัจ ลาฆู อีตู. กะฆีเตอ อาโปก นะ เกา นู ลีฮัจ ปือบูวัจ นะ เกา เดะ ตือปัจ ลีนง เตอ ญา เลอ นะ ฮาฆิ บาฮาเฆด บรี กะ เกา." เยซู ญา จะ. 19 เยซู มือเลา ลาฆี จะ "ฌางัน ปือมุน ซือบารัก นู บรือฆา นะ กาเญา เดะ ดือนียา อีนี. ซือบารัก อีตู โกะ นอยํ-อานอยํ นะ มากัด ซือตืองัฮ นะ บือการัจ ซือตืองัฮ อูรัก ปือญูรี โปด นะ มาแรฮ ปือเลาะ ดีนิง มาโซะ จูรี บารัก ซือตืองัฮ. 20 กะฆีเตอ กือนา ปือมุน ซือบารัก บรือฆา นะ กาเญา โซะ อาตัซ ลาแงะ. ปัจ อีตู ฮอย นอยํ-อานอยํ นะ มากัด ฮอย เตด นะ บือการัจ ฮอย อูรัก ปือญูรี นะ ปือเลาะ ดีนิง มาโซะ จูรี บารัก ปี. 21 กรานา-จะ ซือบารัก บรือฆา นะ เกา อาดา ตือปัจ ดีฮา ฮาตี นะ เกา โปด อาดา ตือปัจ อีตู เลอ." เยซู ญา จะ. 22 เยซู อาฌัยํ ปูลัก จะ "มาตา เตอ ฌาดี ซือรูปา ปลีตา เดะ ญาวา นะ ซือมียา. กะ มาตา นะ เกา จรัฮ บาฌิ ญาวา นะ เกา โปด จรัฮ บาฌิ ซือมูฮา ฌูฆา. 23 กะ มาตา นะ เกา บูตา เตอ ญาวา นะ เกา กือลับ ฮาบิฮ ดัฮ. กะ จรัฮ เดะ ญาวา นะ เกา ญา กือลับ ดัฮ ญา เตอ กือลับ ฮีตับ เลอ." เยซู ญา จะ. 24 เยซู มือเลา กะ กูญา จะ "ฮอย ซือมียา ดีฮา นู ฌาดี ปราโซฮ นะ ตกเก ดูวา อูรัก บือเลฮ. ซาเบะ-จะ นะ บือชี กะ นู ซา นะ ซายัก กะ นู ซา เฆอ-จะ นะ ตูเฮะ กะ นู ซา นะ มือฌัฮ กะ นู ซา. กะฆีเตอ กาเญา นะ ฌาดี ปราโซฮ นะ ตูฮัด เดะ อาตัซ นะ ฌาดี ปราโซฮ นะ ดูเวะ ซามา ฮอย เตด บือเลฮ เลอ. 25 "กะฆีเตอ กู มือญาเระ กะ กาเญา จะ ฌางัน ฆาโดฮ-ฮาตี เดะ ลาฆู มียา มากัด จะ นะ อาเมด นามา มาแรฮ มากัด นะ อาเมด นามา มาแรฮ โอะ เตอ. ฌางัน ฆาโดฮ-ฮาตี ปาซัน ญาวา นะ กาเญา จะ นะ อาเมด กาเยด นามา มาแรฮ ปากัย. นู กาเญา ฮีโดะ เตอ รือฆา บาฌิ เดะ บารัก มากัด บูกัด เฆอ? ญาวา นะ กาเญา บาฌิ เดะ บารัก ปากัย บูกัด เฆอ? 26 บรีงัจ ลีฮัจ เลอ โกะ บูโรก นู ตรือบัก ปี มาแรฮ. กูญา เตด ตานัม นามา เตด กือตับ ปาดี เตด ปูงอจ ตาโรฮ โกะ ลูโงะ ปาดี เดะ ดาเงา เตอ ตาปี อาโปก เดะ อาตัซ นะ กาเญา ญา บูวัจ บรี กูญา อาดา ซือบารัก มากัด ฆือนะ ดัฮ. กาเญา อาดา รือฆา บาฌิ เดะ โกะ บูโรก อีตู บูกัด เฆอ? 27 เดะ ลูมอฮ กาเญา อาดา ซือมียา ดีฮา นู ญา ฆาโดฮ-ฮาตี ฆามะ นะ ฮูโบก อูมอยํ นะ ญา บรี ปาญัก แนฮ ซือฌับ ลาฆี บือเลฮ เฆอ? ฮอย เลอ. 28 "บูวัจ นามา กาเญา ฆาโดฮ-ฮาตี ปาซัน โกะ กาเยด บาฌู? บรีงัจ เลอ โกะ บูงา นู บือตูโมฮ เดะ บีดิก บือนัก เตอ ญา เตด ปายัฮ บือกรือฌา เตด ปายัฮ ฌาเฮะ บาฌู ปือแญะ 29 ตาปี กู มือญาเระ กะ กาเญา จะ ราฌา ซะโลโม โปด วะตู ญา ปากัย มะอาลัจ บรี บือซรี โตระ ญา เตด บือปากัย บือฆาจะ ซือรูปา กะ บูงา แนฮ ซา บูงา อีนี. 30 โกะ รูโปจ เดะ บือนัก อีตู เตอ อารี อีนี ญา อาดา ลาฆี มัฮปาฆี ญา กือนา ตูนู เดะ อาปี ฮาบิฮ ดัฮ. ตาปี รูโปจ อีตู โปด ตูฮัด เดะ อาตัซ นะ บูวัจ บรี ญา บือปากัย บาฌิ กะฆีเตอ เลอ. เออ กาเญา ซือมียา นู กูรัก ปือจายา เลอ กือนา อีงัจ จะ ซูโงฮ เลอ ตูฮัด เดะ อาตัซ นะ บูวัจ บรี กาเญา บือเลฮ บือปากัย บาฌิ ลือเบฮ เดะ บูงา อีตู ปูลัก บูกัด เฆอ? 31 "กะฆีเตอ ฌางัน ฆาโดฮ-ฮาตี จะ 'โอ กีตา นะ อาเมด นามา มาแรฮ มากัด? นะ อาเมด นามา มาแรฮ โอะ เลอ? กีตา นะ อาเมด กาเยด นามา มาแรฮ บือปากัย?' 32 โกะ ซือมียา นู เตด ตูเฮะ กะ ตูฮัด กูญา มือโซะ มียา โกะ ลาฆู กะฆีเตอ. ตาปี อาโปก เดะ อาตัซ นะ กาเญา เตอ ญา ตาฮู จะ กาเญา บือคานะ ซือบารัก อีตู ซือมูฮา. 33 กะฆีเตอ ดูลู เดะ ลาฆู อาซิก กาเญา กือนา กูวาซา บูวัจ บรี ตูฮัด เดะ อาตัซ นะ ฌาดี ราฌา เดะ ฮาตี นะ กาเญา กือนา กูวาซา นะ บูวัจ ลาฆู นู กือนา เดะ ฮาตี นะ ตูฮัด เลอ. กะฆีเตอ ตูฮัด เดะ อาตัซ นะ บือตามัฮ บรี กะ กาเญา โกะ ซือบารัก อีตู ซือมูฮา ฌูฆา. 34 กะฆีเตอ ฌางัน ฆาโดฮ-ฮาตี กะ ลาฆู มัฮปาฆี. ลาฆู มัฮปาฆี เตอ ญา ฌาดี ลาฆู มัฮปาฆี เลอ. ซืออารีๆ กือนา อีงัจ กะ ลาฆู เดะ อารี อีตู เลอ." เยซู ญา จะ.
1 เยซู มือเลา ลาฆี จะ "ฌางัน กรัจ ฮูโกบ กาวัด เลอ บีดา ตูฮัด นะ เตด กรัจ ฮูโกบ กาเญา. 2 ซาเบะ กาเญา นะ กรัจ ฮูโกบ กาวัด กะฮามี เตอ ตูฮัด นะ กรัจ ฮูโกบ กาเญา กะฆีเตอ เลอ. กาเญา นะ ตูวัก บรี กะ กาวัด ฌางัน มาโกะ นู ดีฮา ตูฮัด นะ ตูวัก บรี กะ กาเญา ฌางัน มาโกะ นู อีตู ฌูฆา เลอ. 3 ซาเบะ นามา เลอ เกา ตีญูง ลีฮัจ ตานัฮ ซือบีฌี เดะ มาตา นะ กาวัด ตาปี เตด บราซา ตาฮู จะ อาดา บาตัก กายู ซือกูตก ดูโดะ เดะ มาตา นะ เกา ตะอาซิก? 4 ซาเบะ นามา เลอ เกา นะ มือเลา ฌางัน กาวัด บือเลฮ จะ 'บรี กู รือฆู ตานัฮ ซือบีฌี อีตู บรี ตรือเบะ เดะ มาตา นะ เกา เลอ.' ตาปี ลีฮัจ เลอ อาดา บาตัก กายู ซือกูตก ดูโดะ เดะ มาตา นะ เกา ตะอาซิก ดัฮ. 5 เกา เตอ ซือมียา มูคา มาเนฮ ฮาตี ฌาฮัจ เออ. กือนา ซีตะ บาตัก กายู ซือกูตก บือตรือเบะ เดะ มาตา นะ เกา ดูลู. กะฆีเตอ เกา นะ ลีฮัจ บือฆารี ซัฮ นะ ปี รือฆู ตานัฮ ซือบีฌี บือตรือเบะ เดะ มาตา นะ กาวัด บือเลฮ โปด. 6 "โกะ บารัก บรือฆา เตอ ฌางัน บรี กะ อาซู เลอ. โกะ ตือมีกา โปด ฌางัน ตีงัน บูวัก บรี กะ บาบี. ตาโกจ-จะ ญา นะ กาจะ บูวัก เลอ โกะ อาซู ซีงี เตอ นะ อาเลฮ มาแรฮ ฆีเฆะ กาเญา ปาเระ." เยซู ญา จะ. 7 เยซู มือเลา จะ "กือนา มีตา บารู ญา นะ บรี กะ กาเญา กือนา ซารี บารู นะ ดาปัจ กือนา บลาโลก เดะ ปีตู บารู ญา นะ บูกา บรี. 8 ซาเบะ-จะ ราตา ซือมียา นู มีตา ญา นะ บือเลฮ. ราตา ซือมียา นู ซารี ญา นะ ดาปัจ. ราตา ซือมียา นู บลาโลก เดะ ปีตู ปีตู นะ บูกา บรี กะ ญา เลอ. 9 เดะ ลูมอฮ กาเญา เตอ อาดา ซือมียา ดีฮา กะ นานะ มีตา ตือโปก เตอ ปะ นะ บรี บาตู เฆอ? 10 กะ นานะ มีตา อีกัด เตอ ปะ นะ บรี อูลัยํ เฆอ? 11 กาเญา เตอ มีเซ-จะ ฌาดี ซือมียา บือดูซา ตาปี ตาฮู นะ บรี บือนา นู บาฌิ กะ นานะ นะ กาเญา. กะฆีเตอ บาญะ ลือเบฮ เดะ อีตู อาโปก นะ กาเญา นู ดูโดะ เดะ อาตัซ ลาแงะ เตอ ญา นะ บรี บือนา นู บาฌิ กะ ซือมียา นู มีตา เดะ ญา เลอ. 12 "กะฆีเตอ กาเญา อาดา ฮาตี นะ บรี โกะ ซือมียา บูวัจ กะ กาเญา กะฮามี เตอ กาเญา กือนา บูวัจ กะ กูญา กะฆีเตอ ฌูฆา เลอ. กรานา ซูรัจ ปือมือเลา ฮูโกบ นะ ตูฮัด ฌางัน ซูรัจ ปือมือเลา นะ โกะ ซือมียา ตูโดฮ ลาฆู นะ ตูฮัด เตอ ญา อาฌัยํ กะฆีเตอ เลอ." เยซู ญา จะ. 13 เยซู มือเลา จะ "กาเญา กือนา มาโซะ ปี กะ ปีตู นู ซือแปะ เลอ. ฌาลัด นู บาวา ปี กะ ฌาฮานัม เตอ อาดา ปีตู ลือฆา ฌาลัด อีตู โปด ซือนัง. บาญะ เลอ โกะ ซือมียา นู มาโซะ ปี เดะ ฌาลัด อีตู. 14 ซาเบะ ฌาลัด นู บาวา ปี กะ ฮีโดะ เตอ อาดา ปีตู ซือแปะ ฌาลัด อีตู โปด ปายัฮ เลอ. ซือมียา นู ดาปัจ ฌาลัด อีตู อาดา เตด บราปา บาญะ เลอ." เยซู ญา จะ. 15 เยซู มือเลา ลาฆี จะ "กาเญา กือนา ฌาฆา เลอ โกะ ซือมียา นู มืออูปัย จะ ฌาดี ซือมียา ตูโดฮ ลาฆู นะ ตูฮัด นู นะ มาแรฮ ซารี กาเญา. โซะ ลูวัยํ เตอ ลีฮัจ ญา ซือรูปา กะ กาเมก เตอ ตาปี โซะ ดาลับ ฮาตี เตอ ญา ฌาฮัจ ลือเบฮ เดะ อาซู ฮูตัด. 16 กาเญา นะ กราลา กูญา เดะ ปือบูวัจ นะ กูญา เลอ. กูญา ปี ปูงอจ บูวัฮ อางุน เดะ ปูโฮด กายู บือดูรี เฆอ? นะ ปี ปูงอจ บูวัฮ กรายา-บูดี เดะ ปูโฮด ดักซัย เฆอ? เตด โบะ. 17 ปูโฮด กายู นู บาฌิ ราตา ปูโฮด ญา ตรือเบะ บูวัฮ นู บาฌิ. ตาปี ปูโฮด กายู นู ตะอารัฮ ญา ตรือเบะ บูวัฮ นู ตะอารัฮ. 18 ปูโฮด กายู นู บาฌิ นะ ตรือเบะ บูวัฮ นู ตะอารัฮ เตด บือเลฮ เลอ. ปูโฮด กายู นู ตะอารัฮ นะ ตรือเบะ บูวัฮ นู บาฌิ เตด บือเลฮ ฌูฆา. 19 ปูโฮด กายู ราตา ปูโฮด นู ฮอย เตด ตรือเบะ บูวัฮ นู บาฌิ นะ กือนา ตือบัก ตีงัน บูวัก เดะ อาปี เลอ. 20 กะฆีเตอ เลอ กาเญา นะ กราลา ซือมียา อีตู ซีงี ซาเบะ ลีฮัจ กะ ปือบูวัจ นะ กูญา." เยซู ญา จะ. 21 เยซู มือเลา ลาฆี จะ "บูกัด ราตา ซือมียา นู มือเลา ฌางัน กู จะ 'ตูฮัด เออ. ตูฮัด เออ.' นู นะ บือเลฮ มาโซะ กะ ลูมอฮ ซือมียา นะ ตูฮัด. ตาปี ซือมียา นู บูวัจ ตูโรจ กะ ฮาตี นะ อาโปก เดะ อาตัซ นะ กู ญา เลอ นะ มาโซะ บือเลฮ. 22 เดะ อารี อีตู อาดา ซือมียา บาญะ นู นะ มือเลา ฌางัน กู จะ 'ตูฮัด เออ ตูฮัด เออ เดะ นามา นะ เกา เตอ เลอ กามี บือเลฮ ตูโดฮ ลาฆู นะ ตูฮัด ดัฮ บือเลฮ โปรฮ โกะ ฮาตู บือเลฮ บูวัจ ลาฆู นู มือฆัฮ ซูโงฮ บูกัด เฆอ?' 23 ตาปี กู นะ ตีกัฮ กะ กูญา จะ 'กู เตด ดือละ กราลา กาเญา ดัฮ. กาเญา นู บูวัจ ฌาฮัจ เตอ อูโนยํ ปี เดะ กู เลอ.' " เยซู ญา จะ. 24 เยซู มือญาเระ กะ กูญา จะ "ราตา ซือมียา นู มือนีงัย โกะ ปือมือเลา นะ กู นู บูวัจ ตูโรจ กะ ปือมือเลา อีตู เตอ ญา ฌาดี ซือรูปา ซือมียา ปานัย อากัน ซืออูรัก นู กรือฌา รูมัฮ เดะ อาตัซ บาตู. 25 ฮูฌัด ตูโตฮ บาญะ อาเย ซูงัย โปด อาโปฮ รีโบจ ตีโยะ กือนา เดะ รูมัฮ อีตู. ตาปี รูมัฮ ฮอย เตด รูโตฮ ซาเบะ บูวัจ เดะ อาตัซ บาตู เลอ. 26 "โซะ ซือมียา นู มือนีงัย ปือมือเลา นะ กู เตอ ตาปี เตด บูวัจ ตูโรจ ญา ฌาดี ซือรูปา ซือมียา บูดอ นู กรือฌา รูมัฮ เดะ ตานัฮ ปาตัย. 27 ฮูฌัด ตูโตฮ บาญะ อาเย ซูงัย โปด อาโปฮ รีโบจ ตูโรด กาเตาะ รูมัฮ อีตู บูวัจ บรี รูมัฮ เตอ รูโตฮ ฮาบิฮ ฌาฮานัม ซือมูฮา ดัฮ เลอ." เยซู ญา จะ. 28 ตานา เยซู มือเลา ลาฆู อีนี ฮาบิฮ ดัฮ ลูมอฮ ซือมียา บาญะ ปือและ-ฮาตี ซูโงฮ นู ญา อาฌัยํ กะฆีเตอ 29 ซาเบะ-จะ ญา อาฌัยํ กูญา บือกะ ซือมียา นู อาดา มือฆัฮ เลอ ฮอย เตด ซือรูปา โกะ ซือมียา อาฌัยํ ลาฆู ปือมือซัด นะ ตูฮัด.
1 ตานา เยซู ตูโรด มาแรฮ เดะ บูเกะ ดัฮ อาดา ลูมอฮ ซือมียา บาญะ ตูโรจ ปี ซามา. 2 ลีฮัจ เลอ อาดา ซือมียา ปือญาเกะ ปูรู ซืออูรัก มาแรฮ มือญือมัฮ มือนูโนะ กะ ญา มือเลา จะ "ตูฮัด เออ กะ เกา อาดา ฮาตี นะ บือบือลา กู กะฆีเตอ นะ บูวัจ บรี กู ซือนัง บือเลฮ เลอ." 3 กะฆีเตอ เยซู ญา อาเงา ตางัน นะ ญา ปือเตาะ เดะ ญาวา นะ ซือมียา อีตู มือเลา จะ "กู อาดา ฮาตี นะ บือบือลา เกา. บรี เกา ซือนัง บาฌิ เลอ." ดัดดัด อีตู ปือญาเกะ ปูรู เดะ ญาวา ซือมียา อีตู โปด ซือโมฮ ซือนัง บาฌิ ดัฮ. 4 กะฆีเตอ เยซู ปือซัด กะ ญา จะ "ฌางัน จาเระ ลาฆู อีนี กะ ซือมียา ดีฮา โปด. ตาปี ปี เลอ มียา ซามี บรี ญา ลีฮัจ จะ เกา ลือฆา ดัฮ. มือนืองะ บารัก มือญือมัฮ กะ ตูฮัด เลอ บือกะ มูซา ปือซัด ดัฮ เตอ บีดา นะ บรี ราตา ซือมียา ลีฮัจ จะ เกา ซือนัง บาฌิ ดัฮ." เยซู ญา จะ. 5 ตานา เยซู บือฌาลัด ปี มาโซะ กะ ตูโปะ คาเปอนาอุม อาดา กือปาลา ตาฮัน นังฆรี โรม ซืออูรัก มาแรฮ ปูโฌะ มีตา เดะ เยซู มือเลา จะ 6 "ตูฮัด เออ ปราโซฮ นะ กู ญา ฮอย อูรัจ ตีโนะ เดะ รูมัฮ ญา ซาเกะ ซูซัฮ โตระ เลอ." 7 เยซู ตีกัฮ กะ ญา จะ "กู นี เลอ นะ ปี บือบือลา ญา บรี ซือนัง บาฌิ." 8 ตาปี กือปาลา ตาฮัน อีตู ตีกัฮ กะ เยซู จะ "ตูฮัด เออ กู ฌาดี ซือมียา เตด บือฆูนา นะ ซาโมจ เกา มาโซะ เดะ ดาลับ รูมัฮ นะ กู เตอ. ตาปี บรี เกา อูซิ มือเลา โปด ฌาดี. กะฆีเตอ ปราโซฮ นะ กู นะ ลือฆา เดะ ปือญาเกะ เลอ. 9 กรานา-จะ กู นี ฌาดี ซือมียา ดูโดะ เดะ บาวัฮ ฮูโกบ นะ ราฌา. ตาปี อาดา ลูมอฮ ตาฮัน ดูโดะ เดะ บาวัฮ ฮูโกบ นะ กู ปูลัก. กู ปือซัด กะ ซือมียา อีนี จะ 'ปี เลอ' ญา โปด ปี ดัฮ. ปือซัด กะ ซือมียา นู ซา จะ 'มาแรฮ เลอ' ญา โปด มาแรฮ ดัฮ. ซูโรฮ ปราโซฮ จะ 'กือนา ปี บูวัจ กะฆีนี เลอ' ญา โปด บูวัจ ตูโรจ ดัฮ." ญา จะ. 10 ตานา เยซู ดืองัยํ กะฆีเตอ ดัฮ ญา ปือและ-ฮาตี ซูโงฮ มือเลา กะ ลูมอฮ ซือมียา นู ตูโรจ กะ ญา จะ "กู มือเลา ฌางัน กาเญา ลาฆู นู ซูโงฮ จะ เดะ ลูมอฮ บักซา อิซราเอน เตอ กู เตด ดือละ ดาปัจ ซือมียา นู ปือจายา บาญะ กะฆีนี เลอ. 11 กู มือเลา ฌางัน กาเญา จะ อาดา ลูมอฮ ซือมียา บาญะ นะ มาแรฮ เดะ โซะ ตีมอยํ เดะ โซะ บารัจ โปด นะ ดูโดะ มากัด บือซามา ฌางัน อับราฮัม อีซัก ฌางัน ยาโกบ เดะ ดือนียา บารู อีตู นู ตูฮัด ฌาดี ราฌา. 12 ตาปี โกะ ซือมียา นู ดือละ ฌาดี ลูมอฮ ซือมียา นะ ตูฮัด กะฆีเตอ กูญา นะ กือนา ตีงัน บูวัก เดะ โซะ กือลับ โซะ ลูวัยํ. โซะ อีตู เลอ กูญา นะ มือนาแงฮ ตือกาจิ ฆีฆี ซาเกะ โตระ." เยซู ญา จะ. 13 กะฆีเตอ เยซู มือเลา ฌางัน กือปาลา ตาฮัน จะ "บาลิ ปี กะ รูมัฮ นะ เกา เลอ. เกา ปือจายา กะฮามี ดัฮ นะ ฌาดี กะฆีเตอ เลอ." ดัดดัด อีตู เลอ ปือญูโรฮ นะ กือปาลา ตาฮัน อีตู ซือนัง บาฌิ ดัฮ. 14 กะฆีเตอ เยซู ปี มาโซะ กะ ดาลับ รูมัฮ นะ เปโตร. ญา ลีฮัจ มะ มือตูฮา นะ เปโตร ตีโนะ ญา เตด ซือนัง ตืองัฮ ฮูวัจ เลอ. 15 เยซู ญา ปือเตาะ ตางัน นะ ญา. กะฆีเตอ ฮูวัจ อีตู ฮอย ดัฮ ญา ซือนัง บาฌิ เลอ. นีบีนี อีตู ญา บีกัซ ดัฮ ตูโลก บือกรือฌา มากัด บรี กะ เยซู. 16 รอจ กะ วะตู ปะฮึญา กูญา ปาคัจ บาวา โกะ ลูมอฮ ซือมียา นู อาดา ฮาตู มาโซะ ราโซะ ดัฮ บาญะ อูรัก มาแรฮ ซารี เยซู. เยซู ญา ปือซัด โกะ ฮาตู โปรฮ กูญา บรี ตรือเบะ ปี ฮาบิฮ ดัฮ. ญา บือบือลา ซือมียา เตด ซือนัง ญาวา ซือมูฮา. 17 กะฆีเตอ ปือมือเลา นะ อิซายา นู ซือมียา ตูโดฮ ลาฆู นะ ตูฮัด เตอ ฌาดี รือมัก ดัฮ นู จะ "อีซี ญา ตะอาซิก เตอ บือเลฮ อาเมด ลาฆู ปือญาเกะ นะ กีตา บือเลฮ บาวา ลาฆู เตด ซือนัง ญาวา นะ กีตา บือปี ฮาบิฮ ดัฮ เลอ." 18 ตานา เยซู ลีฮัจ ลูมอฮ ซือมียา บาญะ มาแรฮ กือลีลิก ญาวา นะ ญา ญา ปือซัด โกะ มูเระ นะ ญา บรี ซียะ นะ ฌรือมัก ปี โซะ ซรือบัก. 19 วะตู อีตู อาดา ซือมียา อาฌัยํ ลาฆู ปือมือซัด นะ ตูฮัด ซืออูรัก ญา มาแรฮ ซารี เยซู มือเลา ฌางัน ญา จะ " บูมอยํ เออ เกา นะ ปี กะ ดีฮา กู นะ ตูโรจ ปี ซามา เลอ." 20 เยซู ตีกัฮ กะ ญา จะ "อาซู ฮูตัด อาดา ลูบัก นะ ญา. บูโรก เดะ อาตัซ โปด ญา อาดา ซารัก นะ ญา ฌูฆา. ตาปี โซะ กู นู นานะ นะ อูมัจ-ซือมียา เตอ กู ฮอย ตือปัจ นะ ตืองะ ปาลา ตีโนะ เลอ." 21 เดะ ลูมอฮ มูเระ นะ ญา อาดา ซือมียา อาซิก ซืออูรัก มือเลา ฌางัน เยซู จะ "จา เออ มีตา บรี กู นะ ปี ตานัม บาดัด นะ ปะ เดะ กู ดูลู เลอ." 22 ตาปี เยซู มือเลา ฌางัน ญา จะ "เกา กือนา ตูโรจ กะ กู เลอ. บรี ซือมียา มาตี ปี ตานัม ซือมียา มาตี ซามา เลอ." 23 กะฆีเตอ เยซู ญาแญะ กะ ปราฮู. โกะ มูเระ นะ ญา ตูโรจ ปี ซามา. 24 ลีฮัจ เลอ กูญา กือนา รีโบจ บือซัยํ เดะ ลาโวจ อูมะ ตือโปะ มาโซะ กะ ปราฮู ยู อาโปฮ. ตาปี เยซู เตอ ญา ตีโนะ ลีนา ดัฮ. 25 กะฆีเตอ โกะ มูเระ นะ ญา ปี ฆระ เยซู มือเลา จะ "ตูฮัด เออ ตูโลก เลอ. กีตา มาจับ นะ มาตี ดัฮ." 26 ตาปี เยซู มือเลา ฌางัน กูญา จะ "เออ กาเญา ซือมียา กูรัก ลาฆู ปือจายา บูวัจ นามา ปะ กาเญา ตาโกจ กะฆีนี เลอ?" กะฆีเตอ ญา บีกัซ บลารัก อาเงน บลารัก อูมะ. กะฆีเตอ อูมะ อาเงน โปด ตือโดฮ บลีนัง ฮาบิฮ ดัฮ. 27 ตาปี โกะ ลูมอฮ มูเระ นะ ญา ปือและ-ฮาตี ซูโงฮ มือเลา จะ "ซือมียา อีนี ญา ฌาดี ซือมียา กะฮามี เลอ ยู อาเงน อูมะ โปด ตูโรจ กะ ปือมือซัด นะ ญา?" 28 ตานา เยซู ฌรือมัก ปี รอจ กะ นังฆรี นะ ลูมอฮ ฆาดารา ดัฮ อาดา ซือมียา นู อาดา ฮาตู มาโซะ ราโซะ ดัฮ ดูวา อูรัก. กูญา ตรือเบะ มาแรฮ ดาตัก เดะ ฆูฮา ตานัม บาดัด มาแรฮ ดาปัจ เยซู. กูญา ฌาฮัจ ซูโงฮ บูวัจ บรี ฮอย ซือมียา ซืออูรัก โปด นู บรานี นะ ปี โซะ ฌาลัด อีตู ลาลู. 29 ลีฮัจ เลอ กูญา บือซูระ บลาโลก เยซู จะ "เออ เยซู นานะ นะ ตูฮัด บือซัยํ เดะ อาตัซ บูวัจ นามา เกา มาแรฮ บือฆาโดฮ กามี เลอ? เกา มาแรฮ นะ บรี กามี ฌาฮานัม ดูลู เดะ วะตู เฆอ?" 30 ฌาโวฮ ดีกิ เดะ ลูมอฮ กูญา อาดา กาวัด บาบี บาญะ อีโกยํ ตืองัฮ มียา มากัด. 31 กะฆีเตอ ลูมอฮ ฮาตู อีตู มีตา เดะ เยซู กือมัซๆ จะ "นู เกา นะ โปรฮ ลูมอฮ กามี เตอ บรี กะ กามี ปี มาโซะ ดาลับ กาวัด บาบี อีตู เลอ." 32 เยซู ปือซัด กะ กูญา จะ "ปี เลอ." กะฆีเตอ กูญา อีตู ตรือเบะ เดะ ซือมียา ดูวา อูรัก ซีงี กูญา ปี มาโซะ ดาลับ กาวัด บาบี อีตู. ลีฮัจ เลอ โกะ บาบี ฮาบิฮ ซือกาวัด ปาคัจ บลารี ปี โซะ ลาเฮา นู ตีงี ฆูโฆยํ กะ ลาโวจ ลือมัซ มาตี เดะ อาเย ฮาบิฮ ดัฮ. 33 โซะ ซือมียา บือบือลา บาบี กูญา บลารี ปี มาโซะ กะ ดาลับ ตูโปะ นะ กูญา มือญาเระ ลาฆู อีนี ซือมูฮา ปาซัน โกะ ซือมียา อาดา ฮาตู มาโซะ ราโซะ ดัฮ. 34 ลีฮัจ เลอ โกะ ซือมียา ฮาบิฮ ซือตูโปะ อีตู ปี ดาปัจ เยซู. ดาปัจ ดัฮ กูญา มีตา เดะ เยซู กือมัซๆ บรี ญา นะ ตรือเบะ ปี เดะ ตือกอซ นังฆรี นะ กูญา.
1 กะฆีเตอ เยซู ญาแญะ ปราฮู ปูลัก ญา ฌรือมัก ปี รอจ กะ ตูโปะ นะ ญา. 2 ลีฮัจ เลอ อาดา โกะ ซือมียา อูโซก ซือมียา ฮอย อูรัจ ซืออูรัก มาแรฮ ซารี เยซู. ซือมียา อีตู แลก-ฆูแลก เดะ ลือปัจ นะ ญา. ตานา เยซู ลีฮัจ นู กูญา ปือจายา กะฆีเตอ ญา มือเลา กะ ซือมียา ฮอย อูรัจ จะ "เกา เออ บรี ซือนัง-ฮาตี เลอ. ดูซา นะ เกา กือนา อาเกะ บรี ดัฮ." 3 ลีฮัจ เลอ อาดา โกะ ซือมียา อาฌัยํ ลาฆู ปือมือซัด นะ ตูฮัด ซือตืองัฮ กูญา อีงัจ เดะ ฮาตี จะ "ซือมียา อีนี ญา มือเลา ตะอารัฮ กะ ตูฮัด เดะ อาตัซ ดัฮ." 4 ตาปี เยซู ญา ตาฮู กูญา อีงัจ กะฆีนี. กะฆีเตอ ญา มือเลา กะ กูญา จะ "บูวัจ นามา เลอ กาเญา อีงัจ ฌาฮัจ เดะ ฮาตี กะฆีนี? 5 นู ดีฮา มือเลา ซือนัง ลาฆี? นู จะ 'ดูซา นะ เกา กือนา อาเกะ ดัฮ' เฆอ-จะ 'บีกัซ บือฌาลัด ปี เลอ'. นู ดีฮา ซือนัง ลาฆี เลอ? 6 ตาปี กู นะ บรี กาเญา ตาฮู จะ นานะ นะ อูมัจ-ซือมียา อาดา มือฆัฮ นู นะ อาเกะ ดูซา นะ ซือมียา เดะ ดือนียา บือเลฮ." ญา จะ. กะฆีเตอ เยซู มือเลา กะ ซือมียา ฮอย อูรัจ จะ "บีกัซ เลอ. อาเกะ บาวา ลือปัจ นะ เกา บาลิ ปี กะ รูมัฮ เลอ." ญา จะ. 7 กะฆีเตอ ซือมียา อีตู ญา บีกัซ ดัฮ บาลิ ปี กะ รูมัฮ นะ ญา. 8 ตาปี ตานา ลูมอฮ ซือมียา บือฆารี ลาฆู อีนี ดัฮ กูญา ตาโกจ กูญา มือโอจ กะ ตูฮัด เดะ อาตัซ นู บือเลฮ บรี กะ อูมัจ-ซือมียา นะ อาดา มือฆัฮ กะฆีเตอ. 9 ตานา เยซู ฌาลัด ลาลู ปี เดะ ตูโปะ อีตู ญา ลีฮัจ บือฆารี ซือมียา ซืออูรัก ปือนามา จะ มัดทัย ดูโดะ เดะ ตือปัจ ปูงอจ อาเซน. เยซู มือเลา กะ ญา จะ "มาแรฮ ตูโรจ กะ กู เลอ." กะฆีเตอ มัดทัย บีกัซ ตูโรจ กะ เยซู ปี ดัฮ. 10 ลือปัซ อีตู เยซู ญา ดูโดะ มากัด เดะ รูมัฮ. ลีฮัจ เลอ อาดา ลูมอฮ ซือมียา มูงอจ อาเซน ฌางัน ลูมอฮ ซือมียา บือดูซา บาญะ อูรัก กูญา มาแรฮ ดูโดะ มากัด บือซามา ฌางัน เยซู ฌางัน โกะ มูเระ นะ ญา. 11 โกะ ลูมอฮ ฟาริซี เตอ ตานา กูญา ลีฮัจ บือฆารี กะฆีเตอ ดัฮ กูญา ตาญา โกะ มูเระ นะ เยซู จะ "บูวัจ นามา ปะ บูมอยํ นะ กาเญา อีตู เตอ ญา มากัด บือซามา ฌางัน โกะ ซือมียา มูงอจ อาเซน ฌางัน โกะ ซือมียา บือดูซา ฌูฆา?" 12 ตานา เยซู ดืองัยํ กะฆีเตอ ญา มือเลา ฌางัน กูญา จะ "ซือมียา นู ซือนัง ญาวา เตอ ญา เตด ปี มียา บูมอยํ. ตาปี ซือมียา นู ซาเกะ ญา เลอ นู นะ มียา บูมอยํ. 13 บรี กาเญา ปี บลาฌัยํ ตือนอซ อีตู นู ตูฮัด มือเลา จะ 'กู เตด บือคานะ บารัก มือญือมัฮ เตอ ตาปี กู บือคานะ บรี โกะ ซือมียา นะ ตือจีฮัด เลอ.' " เยซู ญา มือเลา ปูลัก จะ "กู มาแรฮ ดัฮ บูกัด นะ ปาเงน ซือมียา นู บาฌิ-ตือปัจ ตาปี บีดา นะ ปาเงน โกะ ซือมียา บือดูซา เลอ." ญา จะ. 14 วะตู อีตู โกะ มูเระ นะ โยฮัน มาแรฮ ซารี เยซู ตาญา ญา จะ "บูวัจ นามา โกะ ลูมอฮ กามี ฌางัน โกะ ลูมอฮ ฟาริซี ตูโรจ กะ ลาฆู บือตาฮัด มากัด บาญะ ตาปี โกะ มูเระ นะ เกา เตด ตูโรจ กะฆีเตอ?" 15 เยซู มือเลา ฌางัน กูญา จะ "กาลา เจาเบา อาดา เดะ ลาฆู มือนีกัฮ เตอ ลูมอฮ กาวัด นะ ญา นะ ซูซัฮ-ฮาตี เฆอ? ตาปี อาดา ซืออารี เจาเบา นะ กือนา ราปัจ เดะ กูญา. อารี อีตู เลอ กูญา นะ ตูโรจ กะ ลาฆู บือตาฮัด บารัก มากัด. 16 ฮอย ซาปา นะ อาเมด กาเยด บารู ซือกรัจ มาแรฮ ตาโปก เดะ บาฌู นู ตูฮา. กะ บูวัจ กะฆีเตอ กาเยด นู ตาโปก ดัฮ ซีงี นะ จีรอจ บูวัจ บรี กาเยด นู ตูฮา อีตู จีแจะ บือตามัฮ ลาฆี. 17 กูญา เตด อาเมด อาระ อางุน นู บารู บอฮ เดะ ดาลับ โทก กูเละ นู ตูฮา ตาโกจ-จะ อาระ อางุน นะ กือมัก บูวัจ บรี โทก กูเละ นะ บรือโตฮ. กะฆีเตอ อาระ อางุน อีตู นะ มือนีเลฮ ตรือเบะ. โทก กูเละ โปด นะ บือนาซา ฌูฆา. ตาปี กูญา บอฮ อาระ อางุน บารู เดะ โทก กูเละ นู บารู เลอ. กะฆีเตอ ฌางัน อาระ อางุน ฌางัน โทก กูเละ ญา นะ ดูโดะ ฌิบาฌิ ดัฮ." เยซู ญา จะ. 18 ตานา เยซู ตืองัฮ มือเลา กะฆีเตอ ฌางัน กูญา ลีฮัจ เลอ อาดา กือปาลา รูมัฮ บือมุน ซืออูรัก ญา มาแรฮ ตือมะ มือญือมัฮ กะ เยซู มือเลา จะ "นานะ นีบีนี นะ กู ญา บารู มาตี. ตาปี มีตา บรี เกา นะ ปี ปือเตาะ ตางัน เดะ ญาวา นะ ญา กะฆีเตอ ญา นะ ฮีโดะ ปาเระ เลอ." ญา จะ. 19 กะฆีเตอ เยซู บีกัซ ดัฮ ปี บือซามา ฌางัน ญา. โกะ มูเระ นะ ญา โปด ปี ซามา. 20 ลีฮัจ เลอ อาดา นีบีนี ซืออูรัก นู ฌาดี ปือญาเกะ ตรือเบะ ดารัฮ กือมูฮา ดูวา-บือลัซ ตาโฮด ดัฮ. ญา มือฮึนะ มาแรฮ โซะ บลากัก ซูโรก ตางัน ปือเตาะ บีดิก บาฌู นะ เยซู 21 ซาเบะ ญา อีงัจ เดะ ฮาตี จะ "มีเซ-จะ ซา ปือเตาะ กือนา เดะ บาฌู นะ ญา โปด ปือญาเกะ นะ กู นะ ลือฆา ซือนัง บาฌิ เลอ." 22 ตาปี เยซู ญา อาเลฮ โซะ บลากัก บือฆารี นีบีนี อีตู มือเลา กะ ญา จะ "อียา เออ บรี ซูกา-ฮาตี เลอ. ซาเบะ เกา ปือจายา เตอ กะฆีเตอ เกา ซือนัง บาฌิ ดัฮ เลอ." ตะเดะ วะตู อีตู เลอ นีบีนี อีตู ซือนัง บาฌิ ดัฮ. 23 ตานา เยซู มาแรฮ รอจ กะ รูมัฮ นะ กือปาลา รูมัฮ บือมุน ดัฮ ญา ลีฮัจ บือฆารี ลูมอฮ ซือมียา ตีโยะ ซือลูนัย ฌางัน ลูมอฮ บาญะ บือฆาโดฮ-ฆาโดฮ. 24 เยซู มือเลา กะ กูญา จะ "กาเญา ปี บูวัก เลอ. ซาเบะ นานะ นีบีนี เตอ ญา ฮอย เตด มาตี ดัฮ ฮาฌา ญา ตีโนะ ลีนา เลอ." ตาปี กูญา ปาคัจ อาฆัฮ-ฆือละ กะ เยซู. 25 ตานา ลูมอฮ ซือมียา บาญะ อีตู กือนา โปรฮ บรี ตรือเบะ ปี ดัฮ เยซู มาโซะ ปี ปือฆัก ตางัน นะ นานะ นีบีนี อีตู. กะฆีเตอ นานะ อีตู โปด ญา บีกัซ ดัฮ เลอ. 26 กะฆีเตอ ลาฆู อีตู กือจัย ปี ราตา โซะ นังฆรี อีตู. 27 วะตู เยซู บือฌาลัด ปี เดะ โซะ อีตู อาดา ซือมียา มาตา บูตา ดูวา อูรัก ตูโรจ กะ ญา. กูญา บือซูระ จะ " นานะ นะ ราฌา ดาวิด เออ จีฮัด กะ กามี เลอ." 28 ตานา เยซู มาโซะ ปี กะ รูมัฮ ดัฮ กูญา ดูวา อูรัก มาโซะ ปี ซารี ญา. เยซู ตาญา กูญา จะ "กาเญา ปือจายา เฆอ นู กู อาดา มือฆัฮ นะ บูวัจ ลาฆู กะฆีนี บือเลฮ?" กูญา ดูวา อูรัก ตีกัฮ จะ "เออ เออ กามี ปือจายา ดัฮ ตูฮัด." 29 กะฆีเตอ เยซู ปือเตาะ บีฌี มาตา นะ กูญา ดูวา อูรัก ญา มือเลา จะ "นู กาเญา ปือจายา กะฆีนี ดัฮ บรี ฌาดี กะฆีเตอ เลอ." 30 กะฆีเตอ มาตา นะ กูญา ดูวา อูรัก ลีฮัจ บือฆารี ดัฮ. เยซู ญา ปือซัด กะ กูญา กือมัซๆ จะ "ฌางัน บรี ซาปา ตาฮู ปาซัน ลาฆู อีนี." 31 ตาปี กาลา กูญา ดูวา อูรัก ตรือเบะ ปี ดัฮ กูญา ปี มือญาเระ ปาซัน ลาฆู นะ เยซู เดะ โซะ นังฆรี อีตู ราตา. 32 วะตู กูญา ดูวา อูรัก ตืองัฮ ตรือเบะ ปี เดะ โซะ อีตู ลีฮัจ เลอ อาดา โกะ ซือมียา บาวา ซือมียา ซืออูรัก บือมาแรฮ ดาปัจ เยซู. ซือมียา อีตู กือนา ฮาตู มาโซะ ราโซะ ดัฮ บูวัจ บรี มือเลา เตด บือเลฮ ดัฮ. 33 ตานา เยซู โปรฮ ฮาตู อีตู ตรือเบะ ปี ดัฮ ซือมียา อีตู เตอ มือเลา บือเลฮ ดัฮ. ลูมอฮ ซือมียา บาญะ ปือและ-ฮาตี ซูโงฮ ปาคัจ มือเลา จะ "เดะ นังฆรี อิซราเอน กีตา เตด ดือละ ลีฮัจ ซือมียา บูวัจ กะฆีนี เลอ." 34 ตาปี โกะ ลูมอฮ ฟาริซี กูญา มือเลา จะ "ซือมียา อีนี ญา โปรฮ ฮาตู ตรือเบะ บือเลฮ กรานา ปือมือฆัฮ นะ กือปาลา ฮาตู ซีตัด เลอ." 35 เยซู ญา บือฌาลัด ปี ราตา ตูโปะ ราตา นังฆรี. ญา อาฌัยํ เดะ โกะ รูมัฮ บือมุน นะ กูญา มือญาเระ บรี ตาฮู บรีตา นู บาฌิ ปาซัน นู ตูฮัด ญา มาแรฮ ฌาดี ราฌา นะ บือบือลา อูมัจ-ซือมียา. ญา บือบือลา โกะ ซือมียา ปือญาเกะ โกะ ซือมียา เตด ซือนัง ญาวา ราตา มาจับ. 36 ตานา เยซู ลีฮัจ บือฆารี โกะ ลูมอฮ ซือมียา บาญะ นู กูญา กือนา ปรือกัด ยู ฆาโดฮ-ฮาตี ฮอย ตือปัจ นะ บือซานัยํ ซือรูปา กาวัด กาเมก นู ฮอย ซาปา บือบือลา เตอ ญา ตือจีฮัด กะ กูญา เลอ. 37 กะฆีเตอ ญา มือเลา ฌางัน โกะ มูเระ นะ ญา จะ "ปาดี เดะ บือนัก อาดา บาญะ ซูโงฮ รอจ วะตู นะ กือตับ เตอ ตาปี ซือมียา บือกรือฌา อาดา ดีกิ เลอ. 38 กะฆีเตอ กาเญา กือนา มีตา กือมัซๆ เดะ ตูฮัด บือนัก อีตู บรี ญา นะ ซูโรฮ ซือมียา บาญะ ปี บือกรือฌา กือตับ ปาดี เดะ บือนัก นะ ญา." เยซู ญา จะ.
1 กะฆีเตอ เยซู ญา ปาเงน โกะ มูเระ นะ ญา ดูวา-บือลัซ อูรัก บรี กูญา มาแรฮ ดาปัจ ญา. ญา บรี กูญา อาดา มือฆัฮ นะ บือเลฮ โปรฮ โกะ ฮาตู นู ตะอารัฮ บรี ตรือเบะ ปี เตอ นะ บือบือลา ญาวา โกะ ซือมียา ซาเกะ เตด ซือนัง ญาวา ราตา มาจับ บรี กูญา ซือนัง บาฌิ. 2 ปือญูโรฮ นะ ญา ดูวา-บือลัซ อูรัก อีตู ปือนามา กะฆีนี ซือมียา ลามูลา ปือนามา ซีโมน นู กือนา บลาโลก จะ เปโตร ฌางัน อันดรู อาดี เดะ ญา. อาดา ยากอบ นานะ นะ เซเบดี ฌางัน โยฮัน อาดี เดะ ญา. 3 อาดา ฟีลิบ ฌางัน บาโทโลมัย เตอ โทมัด ฌางัน มัดทัย นู ฌาดี ซือมียา มูงอจ อาเซน. อาดา ยากอบ นู นานะ นะ อันเฟอัด ฌางัน ทาดัย. 4 อาดา ซีโมน ซือมียา นังฆรี คานาอัน ฌางัน ยูดา อิดคารีโยด ซือมียา นู ซรัฮ เยซู บรี กือนา รีฆะ เตอ. 5 โกะ ซือมียา ดูวา-บือลัซ อูรัก อีนี เยซู ซูโรฮ กูญา ตรือเบะ ปี. ญา ปือซัด กะ กูญา จะ "ฌางัน ปี โซะ นังฆรี ลูมอฮ บักซา อาซิก เลอ. ฌางัน มาโซะ ปี กะ นังฆรี นะ ลูมอฮ ซือมียา บักซา ซะมาเรีย เลอ. 6 ตาปี กาเญา กือนา ปี ซารี โกะ ลูมอฮ ซือมียา บักซา อิซราเอน เลอ นู ซือซัจ ฮาบิฮ ดัฮ ซือรูปา ลูมอฮ กาเมก. บูวัจ กะฆีเตอ ญา บาฌิ ลาฆี. 7 ตานา กาเญา ปี กะฆีเตอ ดัฮ กาเญา กือนา มือญาเระ บรี กูญา ตาฮู จะ 'ตูฮัด เดะ อาตัซ ฆามะ นะ มาแรฮ ฌาดี ราฌา นะ บือบือลา อูมัจ-ซือมียา.' 8 กือนา บือบือลา โกะ ซือมียา ซาเกะ บรี ซือนัง บาฌิ. กือนา บูวัจ บรี ซือมียา นู มาตี ดัฮ นะ ฮีโดะ ปาเระ. กือนา บือบือลา โกะ ซือมียา ปือญาเกะ ปูรู บรี ซือโมฮ บาฌิ เลอ. กือนา โปรฮ โกะ ฮาตู บรี ตรือเบะ ปี ฮาบิฮ. ตูฮัด ฮาลัย บรี กะ กาเญา ดัฮ กะฆีเตอ กาเญา กือนา ฮาลัย บรี กะ ซือมียา อาซิก ฌูฆา. 9 ฌางัน อาเมด โกะ มัซ โกะ ปีระ โกะ ตัง เดะ แบะ บอฮ ดูเวะ นะ กาเญา. 10 ฌางัน อาเมด กือพัย บาวา ปี ซูโรฮ เดะ ตืองัฮ ฌาลัด. โกะ บาฌู ดูวา กรัจ โกะ ปะตาปะ โกะ ตูกัจ โปด เตด ปายัฮ บาวา ปี ซามา เลอ. ซาเบะ-จะ ซือมียา บือกรือฌา ญา บือฆูนา นะ ซาโมจ บารัก มากัด นะ ญา. 11 วะตู กาเญา มาโซะ กะ ตูโปะ ดีฮา นังฆรี ดีฮา โปด กือนา ซาซัจ ซารี ซือมียา ดีฮา นู บือฆูนา นะ ซาโมจ กาเญา. บรี กาเญา มือนูปัก ฌางัน ซือมียา อีตู เลอ ตือดะ กาเญา นะ ตรือเบะ ปี เดะ โซะ อีตู. 12 ตานา กาเญา มาโซะ รูมัฮ อีตู ดัฮ กาเญา กือนา มีตา เดะ ตูฮัด บรี ซือลามัจ กะ รูมัฮ อีตู. 13 กาเลา-จะ โกะ ซือมียา เดะ รูมัฮ อีตู บือฆูนา เตอ นู กาเญา มีตา บรี ซือลามัจ ดัฮ นะ บรี กูญา ซือนัง ซือลามัจ เลอ. ตาปี กาเลา-จะ โกะ ซือมียา เดะ รูมัฮ อีตู เตด บือฆูนา เตอ กาเญา กือนา อาเมด ลาฆู ซือนัง ซือลามัจ อีตู มาแรฮ ปาเระ กะ กาเญา เลอ. 14 กาเลา-จะ เดะ รูมัฮ ดีฮา เดะ ตูโปะ ดีฮา โปด กูญา ตีเมา ซาโมจ กาเญา ตีเมา มือนีงัย กะ ปือมือเลา นะ กาเญา เตอ ตานา กาเญา ตรือเบะ ปี เดะ ตือปัจ อีตู กือนา กือติฮ โกะ ตานัฮ โกะ ฮาบู เดะ ตาปะ กากี นะ กาเญา. 15 กู มือเลา ฌางัน กาเญา ลาฆู นู ซูโงฮ จะ เดะ อารี กรัจ ฮูโกบ เตอ โกะ ซือมียา เดะ นังฆรี โซโดม นังฆรี โฆโมรา นะ อาดา ซาลัฮ นู รีฮัน เดะ โกะ ซือมียา เดะ ตือปัจ อีตู เลอ." เยซู ญา จะ. 16 เยซู ญา มือเลา ปูลัก จะ "ลีฮัจ เลอ กู นะ ซูโรฮ กาเญา ปี ซือรูปา โกะ กาเมก เดะ ตืองัฮ กาวัด อาซู ฮูตัด นู ฌาฮัจ. กะฆีเตอ กาเญา กือนา ฌาดี ซือมียา ปานัย อากัน ซือรูปา อูลัยํ เตอ ตาปี ลือมัฮ-ฮาตี บาฌิ ซือรูปา บูโรก ปาตี เลอ. 17 ตาปี กาเญา กือนา ฌาฆา โกะ ซือมียา บรี บาฌิ ซาเบะ กูญา นะ รีฆะ กาเญา นะ อาตัจ กาเญา ญาแญะ กะ ซัน นะ รือเปะ กาเญา เดะ โกะ รูมัฮ บือมุน นะ กูญา. 18 กูญา นะ อาตัจ กาเญา กะ โกะ ซือมียา ซัยํ-บือซัยํ กะ โกะ ราฌา โปด กรานา กู. กะฆีเตอ กาเญา นะ ฌาดี ซะซี กะ กูญา กะ โกะ ซือมียา บักซา อาซิก ฌูฆา. 19 กาลา กูญา นะ อาตัจ กาเญา กะฆีเตอ ฌางัน อีงัจ ฆาโดฮ-ฮาตี จะ นะ มือเลา บือเลฮ กะฮามี นะ มือเลา ลาฆู นามา โปด. กรานา เดะ วะตู อีตู เลอ ตูฮัด นะ บรี กาเญา มือเลา ปือมือเลา นู กือนา ดัฮ. 20 ซาเบะ บูกัด ปือมือเลา นะ กาเญา เลอ ตาปี ฌาดี ปือมือเลา นะ ซือมืองัจ นะ ตูฮัด อาโปก เดะ อาตัซ นะ กาเญา นู ญา ซูโรฮ กาเญา มือเลา เลอ. 21 กากา ซือตืองัฮ นะ อาตัจ อาดี บรี กือนา ฮูโกบ ยู มาตี. อาโปก ซือตืองัฮ นะ อาตัจ นานะ กะฆีเตอ ฌูฆา. โกะ นานะ นะ บลาวัด ฌางัน โกะ ปะมะ เตอ นะ บรี กูญา กือนา ฮูโกบ ยู มาตี. 22 ซือมียา ซือมูฮา นะ บือชี กะ กาเญา กรานา นามา นะ กู. ตาปี ซือมียา ดีฮา นู ตาฮัด รอจ กะ นู ปือญูดัฮ เตอ ซือมียา อีตู เลอ นะ ฮีโดะ ลือปัซ บาฌิ ดัฮ. 23 ตาปี กาลา กูญา ปรือกัด กาเญา เดะ ตูโปะ นู ซา บรี กาเญา ลารี ปี กะ ตูโปะ นู อาซิก เลอ. กู มือเลา ลาฆู นู ซูโงฮ กะ กาเญา จะ กาเญา นะ เตด ดัด ปี กะ ราตา ตูโปะ เดะ นังฆรี อิซราเอน ดูลู เดะ กู นู นานะ นะ อูมัจ-ซือมียา นะ มาแรฮ เลอ." 24 เยซู มือเลา ปูลัก จะ "ฮอย มูเระ นู ดีฮา นู บือซัยํ เดะ ซือมียา อาฌัยํ ญา. ฮอย ปราโซฮ นู ดีฮา นู บือซัยํ เดะ ตกเก นะ ญา. 25 นู มูเระ นะ ซามา บายา ฌางัน ซือมียา อาฌัยํ ญา เตอ บาฌิ ดัฮ เลอ. นู ปราโซฮ นะ ซามา บายา ฌางัน ตกเก บาฌิ ฌูฆา เลอ. กะ กูญา นะ บลาโลก ตูฮัด รูมัฮ จะ ' ฌิด เบเอนซือบุน' บาญะ ลือเบฮ เดะ อีตู เลอ กูญา นะ มือฌัฮ กะ โกะ ซือมียา ซือรูมัฮ นะ ญา." 26 กะฆีเตอ ฌางัน ตาโกจ เดะ กูญา เลอ. ซาเบะ ลาฆู นามาๆ นู ตูโดก บรี ลีฮัจ เตด บือฆารี ดัฮ นะ กือนา ปลีฮัจ ซัฮ ซือมูฮา. ลาฆู นามาๆ นู บูนี ดัฮ นะ กือนา บูวัจ บรี ตาฮู ราตาๆ. 27 ลาฆู นู กู มือญาเระ กะ กาเญา เดะ โซะ กือลับ เตอ กาเญา กือนา มือเลา เดะ โซะ จรัฮ. ลาฆู นามา นู กือนา บือบีซิ เดะ ตือลีงา นะ กาเญา กาเญา กือนา บือซูระ เดะ อาตัซ รูมัฮ บรี ดืองัยํ ราตาๆ. 28 ฌางัน นะ ตาโกจ เดะ ซือมียา นู บูนอฮ บือเลฮ ซา ญาวา นะ กาเญา ตาปี บูนอฮ ซือมืองัจ นะ กาเญา เตด บือเลฮ. ตาปี กาเญา กือนา ตาโกจ เดะ ตูฮัด เลอ. ญา เลอ นู นะ บูวัจ บรี ญาวา ฌางัน ซือมืองัจ บือนาซา เดะ นอรากา บือเลฮ. 29 บูโรก จียะ รายา ดูวา อีโกยํ กูญา ฌูวัน ซือบัจ บูกัด เฆอ? ตาปี กะ อาโปก เดะ อาตัซ นะ กาเญา เตด บรี เตอ บูโรก อีตู ซืออีโกยํ โปด นะ เตด ฆูโฆยํ รอจ กะ ตานัฮ เลอ. 30 ตาปี โซะ กาเญา เตอ รอจ กะ โบะ นะ กาเญา ซือมูฮา โปด ตูฮัด กีรา ตาฮู จะ อาดา บราปา อูรัจ. 31 กะฆีเตอ ฌางัน ตาโกจ เลอ กาเญา อาดา รือฆา ลือเบฮ เดะ บูโรก จียะ รายา บาญะ อีโกยํ อีตู เลอ. 32 กะฆีเตอ ราตา ซือมียา นู ซาโงะ กู โซะ ฮึลด มูคา โกะ ซือมียา เตอ กู โปด นะ ซาโงะ ซือมียา อีตู ฌูฆา โซะ ฮึลด มูคา นะ อาโปก เดะ กู นู ดูโดะ เดะ อาตัซ ลาแงะ. 33 ตาปี ซือมียา ดีฮา นู ตีเมา ซาโงะ กู โซะ ฮึลด มูคา โกะ ซือมียา เตอ กู โปด นะ ตีเมา ซาโงะ ซือมียา อีตู ฌูฆา โซะ ฮึลด มูคา นะ อาโปก เดะ กู นู ดูโดะ เดะ อาตัซ ลาแงะ. 34 ฌางัน อีงัจ จะ กู มาแรฮ ดัฮ นะ บรี ซือนัง ซือลามัจ เดะ ดือนียา. กู มาแรฮ ดัฮ บูกัด นะ บรี ซือนัง ซือลามัจ ตาปี นะ บรี อาดา ปือดัก นู นะ บรี ซือมียา ปือจัฮ-บือลัฮ. 35 ซาเบะ กู มาแรฮ ดัฮ "นะ บรี นานะ กีลากี ซาลัฮ-ฮาตี ฌางัน ปะ นะ บรี นานะ นีบีนี ซาลัฮ-ฮาตี ฌางัน มะ นะ บรี มือนาตู นีบีนี ซาลัฮ-ฮาตี ฌางัน มะ มือตูฮา. 36 กะฆีเตอ ซือมียา ซา รูมัฮ นะ ฌาดี ซือตรู บลาวัด บือซามา." 37 ซือมียา ดีฮา นู ซายัก ปะมะ ลือเบฮ เดะ ซายัก กะ กู เตอ ซือมียา อีตู เตด บือฆูนา ฌางัน กู เลอ. ซือมียา ดีฮา ซายัก กะ นานะ กีลากี นานะ นีบีนี ลือเบฮ เดะ ซายัก กะ กู เตอ ซือมียา อีตู เตด บือฆูนา ฌางัน กู เลอ. 38 ซือมียา ดีฮา ตีเมา ซาโมจ กายู ปลีตัก นะ ญา ตูโรจ กะ กู ปี ซือมียา อีตู เตด ปาโตจ ฌางัน กู เลอ. 39 ซือมียา ดีฮา อีงัจ นะ บรี ญาวา นะ ญา ดูโดะ ซือนัง เตอ ญาวา นะ ญา นะ ฌาฮานัม เลอ. ตาปี ซือมียา ดีฮา นู ซรัฮ ญาวา บรี ฌาฮานัม กรานา ญา ตูเฮะ กะ กู เตอ ญา เลอ นะ บือเลฮ ดูโดะ ซือนัง ซูโงฮ. 40 ซือมียา ดีฮา นู ซาโมจ กาเญา ญา เตอ ซาโมจ กู ฌูฆา. ซือมียา ดีฮา ซาโมจ กู ญา ซาโมจ ตูฮัด นู ซูโรฮ กู มาแรฮ เลอ. 41 ซาปา ซาโมจ ซือมียา ตูโดฮ ลาฆู นะ ตูฮัด ซาเบะ ญา มือเลา ตูโดฮ ลาฆู นะ ตูฮัด เตอ ญา นะ บือเลฮ บาฮาเฆด บือกะ ฌาดี ซือมียา ตูโดฮ ลาฆู นะ ตูฮัด ฌูฆา. ซาปา ซาโมจ ซือมียา บาฌิ-ตือปัจ ซาเบะ ญา ฌาดี ซือมียา บาฌิ-ตือปัจ เตอ ญา นะ บือเลฮ บาฮาเฆด บือกะ ฌาดี ซือมียา บาฌิ-ตือปัจ ฌูฆา. 42 ซือมียา ดีฮา นู ฮาฆิ อาเย บือแฌะ แนฮ ซือเจาะ กะ ซือมียา รือนัฮ เดะ กาวัด ซาเบะ ญา ฌาดี มูเระ นะ กู เตอ กู มือเลา กะ กาเญา ซูโงฮ จะ ซือมียา อีตู เลอ นะ ปูตุซ บาฮาเฆด นะ ญา เตด บือเลฮ เลอ." เยซู ญา จะ.
1 กาลา เยซู ปือซัด โกะ มูเระ นะ ญา ดูวา-บือลัซ อูรัก อีตู ซุจ ดัฮ ญา ตรือเบะ เดะ ตือปัจ อีตู ปี อาฌัยํ เดะ โกะ ตูโปะ ปิกดาปิก มือญาเระ บรี กูญา ตาฮู ลาฆู นะ ตูฮัด. 2 วะตู อีตู โยฮัน อาดา เดะ ปือฌารา. ตานา ญา ดืองัยํ ดัฮ ปาซัน ปือบูวัจ นะ เยซู คริด ญา ซูโรฮ โกะ มูเระ นะ ญา ปี ซือตืองัฮ 3 ตาญา เยซู จะ "เกา เตอ ฌาดี ซือมียา นู นะ มาแรฮ อีตู เฆอ? เฆอ-จะ กามี กือนา นะ นาตี ซือมียา อาซิก เลอ?" 4 ตาปี เยซู ตีกัฮ กะ กูญา จะ "กาเญา กือนา ปี มือญาเระ กะ โยฮัน ปาซัน ลาฆู นู กาเญา ดืองัยํ ดัฮ ลีฮัจ ดัฮ. 5 ฌาดี-จะ โกะ ซือมียา มาตา บูตา บือเลฮ ลีฮัจ บือฆารี ดัฮ. โกะ ซือมียา จาเปะ โปด บือเลฮ ฌาลัด ดัฮ. โกะ ซือมียา ปือญาเกะ ปูรู ซือนัง บาฌิ ดัฮ. โกะ ซือมียา ตือลีงา ตูลี โปด ดืองัยํ บาฌิ ดัฮ. โกะ ซือมียา มาตี บือเลฮ ฮีโดะ ปาเระ ดัฮ. บรีตา นู บาฌิ เตอ บือเลฮ มือญาเระ กะ โกะ ซือมียา ฮาฌะ ดัฮ เลอ. 6 ซือนัง ซือลามัจ เลอ ซือมียา ดีฮา นู เตด จือและ ปาซัน ลาฆู นะ กู." เยซู ญา จะ. 7 ตานา มูเระ นะ โยฮัน ปี ดัฮ เยซู มือเลา ฌางัน โกะ ลูมอฮ ซือมียา บาญะ ปาซัน นะ โยฮัน จะ "กาเญา บือเลฮ ตรือเบะ ปี เดะ ปาดัก ตานัฮ ตูโฮยํ นู ลือฆา บีดา นะ ลีฮัจ นามา? นะ ลีฮัจ ปูโฮด รีโยก นู กือนา อาเงน นะ ตีโยะ บรี บรีเงาะ เฆอ? บูกัด กะฆีเตอ เลอ. 8 ตาปี กาเญา บือเลฮ ปี บีดา นะ ลีฮัจ นามา? นะ ลีฮัจ ซือมียา ซืออูรัก นู บือปากัย กาเยด ลือมัฮๆ เฆอ? ลีฮัจ เลอ โกะ ซือมียา นู ปากัย กาเยด กะฆีเตอ กูญา ดูโดะ เดะ บาลัย นะ ราฌา เลอ. 9 ตาปี กาเญา บือเลฮ ตรือเบะ ปี บีดา นะ ลีฮัจ นามา เลอ? นะ ลีฮัจ ซือมียา ตูโดฮ ลาฆู นะ ตูฮัด เฆอ? เออ ซูโงฮ เลอ ตาปี กู มือญาเระ กะ กาเญา จะ ญา ฌาดี ซือมียา ซืออูรัก นู บาฌิ ลือเบฮ เดะ ซือมียา ตูโดฮ ลาฆู นะ ตูฮัด ลาฆี. 10 ปาซัน โยฮัน นี เลอ ซูรัจ ปือมือเลา นะ ตูฮัด มือเลา จะ 'ลีฮัจ เลอ กู ซูโรฮ ปือญูโรฮ นะ กู บรี ญา ปี โซะ ฮึลด เกา ญา เตอ นะ ซียะ ฌาลัด นะ เกา ดูลู บีดา เกา นะ บือฌาลัด มาแรฮ เลอ.' ตูฮัด ญา จะ." 11 เยซู มือเลา ลาฆี จะ "กู มือเลา ฌางัน กาเญา ลาฆู นู ซูโงฮ จะ เดะ ลูมอฮ ซือมียา นู บือฌาดี มาแรฮ เตอ ฮอย ซือมียา ดีฮา โปด นู มาแรฮ บือซัยํ เดะ โยฮัน ซือมียา นู บรี ลาฆู ซือลับ เดะ อาเย. ตาปี ซือมียา นู ดือมิ เดะ กาวัด เดะ ลูมอฮ ซือมียา นะ ตูฮัด เตอ ญา เลอ บือซัยํ เดะ โยฮัน ลาฆี. 12 ตะเดะ ตือกาลา นะ โยฮัน นู บรี ลาฆู ซือลับ เดะ อาเย ตือดะ รอจ กะ วะตู อีนี เตอ ลูมอฮ ซือมียา นะ ตูฮัด กือนา โกะ ซือมียา ฮาตี ฮางัจ บรือโบจ บลาวัด กูวาซา นะ อาเมด ฌือนัฮ เดะ ญา. 13 กรานา ลูมอฮ ซือมียา ตูโดฮ ลาฆู นะ ตูฮัด ซือมูฮา ฌางัน ซูรัจ ปือมือเลา ฮูโกบ นะ ตูฮัด บือเลฮ มือเลา ตูโดฮ ปาซัน ลาฆู อีนี ตือดะ รอจ กะ ตือกาลา นะ โยฮัน ดัฮ. 14 ดัฮ กาเญา อาดา ฮาตี นะ ซาโมจ ลาฆู กะฆีนี โยฮัน อีนี เลอ ฌาดี บือกะ เอลียา นู นะ มาแรฮ อีตู. 15 ซือมียา นู อาดา ตือลีงา มือนีงัย เลอ." เยซู ญา จะ. 16 เยซู มือเลา ลาฆี จะ "ตาปี โกะ ซือมียา ฮาดัจ อีนี กูญา ซือรูปา นามา? กูญา ซือรูปา โกะ นานะ ตืองัฮ ดูโดะ อูซิ เดะ ตูโปะ นู อูจะ กะ ลูมอฮ กาวัด จะ 17 'กามี ตีโยะ ซือลูนัย บรี กะ กาเญา ดัฮ ตาปี กาเญา ตีเมา มือนารี ซามา. กามี มือนาแงฮ บือปาโตด ดัฮ ตาปี กาเญา ตีเมา มือนาแงฮ ซามา เลอ.' กูญา จะ. 18 กรานา-จะ วะตู โยฮัน มาแรฮ ญา บูวัจ ลาฆู บือตาฮัด มากัด ญา เตด โอะ อาระ อางุน เตอ. กะฆีเตอ กูญา มือเลา จะ 'ญา กือนา ฮาตู ราโซะ ดัฮ.' 19 โซะ กู นู นานะ นะ อูมัจ-ซือมียา เตอ กู มาแรฮ ฌางัน มากัด ฌางัน โอะ ฌูฆา. กะฆีเตอ กูญา มือเลา จะ 'ลีฮัจ เลอ ญา มากัด บาญะ ตือลาลู ญา โอะ อาระ อางุน ยู มาโบะ ดัฮ ญา บือซาบัจ ฌางัน โกะ ซือมียา มูงอจ อาเซน ฌางัน โกะ ซือมียา บือดูซา เลอ.' ตาปี นู ตูฮัด ญา ปานัย อากัน เตอ นะ ปลีฮัจ รือมัก เดะ ลาฆู ปือบูวัจ นู บาฌิ นะ ญา เลอ." เยซู ญา จะ. 20 กาลา อีตู เยซู ฮึนตะ อูจะ ลูมอฮ ซือมียา เดะ ตูโปะ นู ญา บือเลฮ บูวัจ ลาฆู มือฆัฮ บาญะ ดัฮ ซาเบะ ลูมอฮ ซือมียา อีตู ตีเมา บราเลฮ-ฮาตี. 21 ญา มือเลา จะ "จือลากา เลอ กาเญา ตูโปะ โคราซิน จือลากา เลอ กาเญา ตูโปะ เบดซัยดา. ดัฮ กู บือเลฮ บูวัจ ลาฆู มือฆัฮ เดะ นังฆรี ทัยระ เดะ นังฆรี ซัยดอน เตอ ซือรูปา ลาฆู มือฆัฮ นู กู บือเลฮ บูวัจ เดะ ตูโปะ นะ กาเญา ซูโงฮ เลอ โกะ ซือมียา นังฆรี อีตู กูญา ฆาโดฮ บราเลฮ-ฮาตี ลามา ดัฮ เลอ ปากัย กาเยด ฆูนี กาซัยํ อาเมด ฮาบู อาปี บอฮ เดะ ปาลา เตอ บรี ลีฮัจ จะ กูญา มือญือซัน ซูโงฮ. 22 ตาปี กู มือเลา ฌางัน กาเญา จะ เดะ อารี กรัจ ฮูโกบ เตอ โกะ ซือมียา นังฆรี ทัยระ นังฆรี ซัยดอน กูญา นะ กือนา ฮูโกบ นู รีฮัน เดะ ฮูโกบ นะ กาเญา เลอ. 23 โซะ เกา ตูโปะ คาเปอนาอุม เตอ เกา อีงัจ นะ ฌาดี ตูโปะ นู ตีงี ซามา บายา ลาแงะ เฆอ? เตด บือเลฮ เลอ. โงฮ-ซูโงฮ เกา นะ กือนา บูวัก ดัฮ ตูโรด ปี กะ นังฆรี ฮาตู เลอ. ดัฮ กู บือเลฮ บูวัจ ลาฆู มือฆัฮ เดะ นังฆรี โซโดม ซือรูปา บือกะ ลาฆู มือฆัฮ นู กู บือเลฮ บูวัจ เดะ ตูโปะ นะ กาเญา ดัฮ เตอ ซูโงฮ เลอ นังฆรี โซโดม อีตู นะ อาดา ดูโดะ ลาฆี ตือดะ รอจ อารี อีนี เลอ. 24 ตาปี กู มือเลา ฌางัน กาเญา จะ เดะ อารี กรัจ ฮูโกบ เตอ ลูมอฮ ซือมียา นังฆรี โซโดม กูญา นะ กือนา ฮูโกบ นู รีฮัน เดะ ฮูโกบ นะ กาเญา เลอ." เยซู ญา จะ. 25 วะตู อีตู เยซู บือซาโวจ จะ "โอ อาโปก เออ เกา นู ฌาดี ตูฮัด โซะ ลาแงะ ฌางัน ดือนียา กู บรี ซือลามัจ กะ อาโปก นู อาโปก บือเลฮ บูนี โกะ ลาฆู อีนี ตีเมา บรี โกะ ซือมียา ปานัย โกะ ซือมียา อาดา อากัน นะ ตาฮู. ตาปี ลาฆู อีนี เลอ อาโปก บือเลฮ ปลีฮัจ บรี กะ โกะ ซือมียา ฮอย อากัน นะ ตาฮู ดัฮ. 26 โอ อาโปก เออ นู ฌาดี กะฆีเตอ ซาเบะ อาโปก ลีฮัจ บาฌิ ดัฮ." 27 เยซู มือเลา ปูลัก จะ "อาโปก เดะ กู บือเลฮ ซรัฮ บือนา ซือมูฮา บรี กะ กู ดัฮ. ฮอย ซาปา นู กราลา นานะ นะ ตูฮัด ลือเบฮ ซา อาโปก เดะ อาตัซ นู กราลา. กะฆีเตอ ฌูฆา ฮอย ซาปา นู กราลา อาโปก เดะ อาตัซ ลือเบฮ ซา นานะ นะ ญา เลอ ฌางัน โกะ ซือมียา อีตู นู นานะ นะ ตูฮัด ซูกา นะ ปลีฮัจ อาโปก บรี กะ กูญา กราลา. 28 "โอ ลูมอฮ ซือมียา นู บือกรือฌา โตระ นู ตาโงก ยู ปือนัจ เตอ มาแรฮ ซารี กู เลอ. กู นี เลอ นะ บูวัจ บรี กาเญา ดูโดะ ซือนัง ฮอย รือมัย ดัฮ. 29 กือนา อาเกะ ปืองานัยํ นะ กู กือนา บลาฌัยํ เดะ กู เลอ ซาเบะ กู อาดา ฮาตี บือแฌะ ฮาตี มือนูโนะ. กะฆีเตอ ฮาตี นะ กาเญา นะ ดูโดะ ซือนัง ฮอย รือมัย ดัฮ. 30 ซาเบะ ปืองานัยํ นะ กู เตอ ญา ซือนัง. บารัก นู กู นะ บรี ตาโงก เตอ ญา รีฮัน เลอ." เยซู ญา จะ.
1 วะตู อีตู เดะ อารี บราดู กรือฌา ซืออารี เยซู ญา บือฌาลัด ลาลู เดะ ฮูมา ปาดี. โกะ มูเระ นะ ญา ลาปัยํ กูญา ฮึนตะ นะ ลือกับ ตากัย ปาดี นะ มากัด. 2 ตาปี โกะ ลูมอฮ ฟาริซี ตานา กูญา ลีฮัจ บือฆารี กะฆีเตอ กูญา มือเลา ฌางัน เยซู จะ "ลีฮัจ เลอ โกะ มูเระ นะ เกา กูญา บูวัจ ลาฆู นู กือนา บลารัก ดัฮ ตีเมา บรี บูวัจ เดะ อารี บราดู กรือฌา." 3 ตาปี เยซู ตีกัฮ กะ กูญา จะ "กาเญา เตด บือเลฮ บาจา เฆอ ลาฆู นู ราฌา ดาวิด บูวัจ ดัฮ? ญา เตอ ฌางัน ลูมอฮ ซือมียา นะ ญา กูญา ลาปัยํ โกะ ซือบารัก มากัด. 4 กะฆีเตอ ญา บือเลฮ มาโซะ ปี กะ ดาลับ รูมัฮ มือญือมัฮ ตูฮัด ญา อาเมด ตือโปก โรตี นู มือนืองะ บรี กะ ตูฮัด ดัฮ มาแรฮ มากัด. ตาปี ตือโปก โรตี อีตู เตอ ปือมือเลา ฮูโกบ นะ ตูฮัด ปือซัด จะ ซา ลูมอฮ ซามี เลอ นู นะ บือเลฮ มากัด. โซะ ดาวิด ฌางัน โกะ ซือมียา นะ ญา นะ มากัด เตด บือเลฮ." เยซู ญา จะ. 5 เยซู มือเลา กะ ลูมอฮ กูญา ปูลัก จะ "กาเญา เตด บือเลฮ บาจา เฆอ ลาฆู เดะ ซูรัจ ปือมือเลา ฮูโกบ นู จะ โกะ ซามี เดะ รูมัฮ มือญือมัฮ ตูฮัด บูวัจ ลาฆู นู กือนา บลารัก เดะ อารี บราดู เตอ ตาปี นู กูญา บูวัจ กะฆีเตอ ฮอย ซาลัฮ ดัฮ. 6 ตาปี กู มือเลา ฌางัน กาเญา จะ เดะ โซะ อีนี อาดา นู บือซัยํ เดะ รูมัฮ มือญือมัฮ ตูฮัด ลาฆี เลอ. 7 อาดา ซูรัจ ปือมือเลา นะ ตูฮัด นู จะ 'กู ตีเมา โกะ บารัก มือญือมัฮ เลอ ตาปี กู ซูกา นะ บรี โกะ ซือมียา ตือจีฮัด กะ กาวัด เลอ.' ตูฮัด ญา จะ. กาเลา-จะ ลาฆู อีนี มาโซะ เดะ ฮาตี นะ กาเญา ดัฮ กะฆีเตอ กาเญา นะ เตด กรัจ ฮูโกบ ซือมียา นู ฮอย ซาลัฮ ลาฆี. 8 กรานา กู นู นานะ นะ อูมัจ-ซือมียา เตอ กู ฌาดี ตูฮัด เดะ ลาฆู อารี บราดู ฌูฆา เลอ." เยซู ญา จะ. 9 กะฆีเตอ เยซู บือฌาลัด ตรือเบะ ปี เดะ ตือปัจ อีตู ญา มาโซะ กะ ดาลับ รูมัฮ บือมุน นะ กูญา. 10 ลีฮัจ เลอ อาดา ซือมียา ซืออูรัก นู ตางัน กาแป. อาดา โกะ ซือมียา นู ตาญา เยซู จะ "โซะ ปือมือเลา ฮูโกบ เตอ นะ บือบือลา ซือมียา ซาเกะ เดะ อารี บราดู กรือฌา บือเลฮ เฆอ?" กูญา อีตู ซารี ลาฆู นู นะ อาดู เยซู. 11 กะฆีเตอ เยซู ตีกัฮ กะ กูญา จะ "กาเลา-จะ อาดา ซือมียา ซืออูรัก เดะ ลูมอฮ กาเญา นู อาดา กาเมก ซืออีโกยํ. กะ กาเมก อีตู ฆูโฆยํ เดะ ตือลาฆา เดะ อารี บราดู ดัฮ เตอ ซือมียา อีตู ญา ฆาโดฮ ซีตะ บือญาแญะ ตรือเบะ เดะ ตือลาฆา บูกัด เฆอ? 12 ตาปี ซือมียา ซืออูรัก โปด ญา บรือฆา ลือเบฮ เดะ กาเมก ซืออีโกยํ ปูลัก บูกัด เฆอ? กะฆีเตอ ปือมือเลา ฮูโกบ เตอ นะ บรี ซือมียา บูวัจ ลาฆู นู บาฌิ เดะ อารี บราดู ฌูฆา เลอ." เยซู ญา จะ. 13 กะฆีเตอ เยซู มือเลา กะ ซือมียา ตางัน กาแป อีตู จะ "ลือฌัก ตางัน นะ เกา เลอ." กะฆีเตอ ซือมียา อีตู ญา ลือฌัก ตางัน ดัฮ. ตางัน อีตู โปด ลือฆา บาฌิ ดัฮ ซือรูปา บือกะ ตางัน ซือบือลัฮ นู บาฌิ อีตู. 14 ลูมอฮ ฟาริซี กูญา ตรือเบะ ปี บือกีรา บือซามา จะ นะ บูวัจ กะฮามี บีดา นะ บือเลฮ บูนอฮ เยซู. 15 ตาปี เยซู ตาฮู ฮาตี นะ กูญา ญา ตรือเบะ ปี เดะ โซะ อีตู ดัฮ. อาดา ลูมอฮ ซือมียา บาญะ กูญา ตูโรจ ปี บือซามา. เยซู บือบือลา กูญา ซือมูฮา บรี ซือนัง ญาวา บาฌิ. 16 ญา บลารัก กูญา ตีเมา บรี มือญาเระ ลาฆู นะ ญา กะ ซาปา โปด. 17 กะฆีเตอ นะ ฌาดี รือมัก ฌางัน ปือมือเลา นะ อิซายา ซือมียา นู ตูโดฮ ลาฆู นะ ตูฮัด นู จะ 18 'ลีฮัจ เลอ ซือมียา บือกรือฌา นะ กู นู กู ปีเลฮ ดัฮ. ญา เลอ นู กู ซายัก นู กือนา เดะ ฮาตี นะ กู ซูโงฮๆ เลอ. กู นะ บรี ซือมืองัจ นะ กู อาดา เดะ อาตัซ ญา เลอ. นู กู นะ กรัจ ฮูโกบ บรี กือนา ลาฆู เตอ ญา นะ มือญาเระ กะ ลูมอฮซือมียา บักซา อาซิก 19 ญา นะ เตด บือตือฆัฮ ฌางัน ซาปา โปด เตด บือซูระ ซูวารา บือซัยํ. ฮอย ซาปา นะ ดืองัยํ ซูวารา นะ ญา เดะ โกะ ฌาลัด บือซัยํ เลอ. 20 ปูโฮด รีโยก นู ลือมัฮ เตอ ญา เตด ปาตัฮ เลอ. โปรจ ปลีตา นู ฌาดี อาซะ ดัฮ ญา เตด ปาดับ เลอ. ตือดะ ญา บูวัจ บรี ลาฆู กรัจ ฮูโกบ นู กือนา ลาฆู ฌือนัฮ ดัฮ. 21 ลูมอฮ ซือมียา ราตา บักซา นะ ฮาระ กะ ญา เลอ.' ตูฮัด ญา จะ." 22 วะตู อีตู กูญา บาวา ซือมียา ซืออูรัก มาแรฮ ดาปัจ เยซู. ซือมียา อีตู กือนา ฮาตู มาโซะ ราโซะ ดัฮ บรี ญา มาตา บูตา มือเลา เตด บือเลฮ ดัฮ. ตาปี เยซู บือบือลา ญา บรี ญา ลีฮัจ บือฆารี บือเลฮ มือเลา ปูลัก. 23 กะฆีเตอ ลูมอฮ ซือมียา ซือมูฮา ปือและ-ฮาตี ซูโงฮ ปาคัจ มือเลา จะ "ซือมียา อีนี ฌาดี นานะ นะ ราฌา ดาวิด เฆอ?" 24 ตาปี ตานา ลูมอฮ ฟาริซี ดืองัยํ ลาฆู อีนี ดัฮ กูญา มือเลา จะ "นู ซือมียา อีนี โปรฮ ฮาตู ตรือเบะ บือเลฮ เตอ กรานา ปือมือฆัฮ นะ ฌิด เบเอนซือบุน นู กือปาลา ฮาตู ซีตัด อีตู เตอ เลอ." 25 ตาปี เยซู ตาฮู ลาฆู นู กูญา อีงัจ เดะ ฮาตี ญา มือเลา ฌางัน กูญา จะ "นังฆรี ดีฮา โปด นู ปือจัฮ-บือลัฮ ฌาดี โซกซา ปาโซะ ดัฮ นะ กือนา ฌาฮานัม ปี เลอ. ตูโปะ ดีฮา รูมัฮ ดีฮา นู โกะ ซือมียา ปือจัฮ-บือลัฮ ดัฮ นะ ดูโดะ กือฌะ เตด บือเลฮ เลอ. 26 กาเลา-จะ ฮาตู ซีตัด นะ โปรฮ ฮาตู ซีตัด เตอ ญา บือปือจัฮ เดะ ญาวา ตะอาซิก ดัฮ. นังฆรี นะ ญา นะ ดูโดะ กือฌะ บือเลฮ กะฮามี เลอ? 27 กาเลา-จะ กู นี โปรฮ โกะ ฮาตู กรานา ปือมือฆัฮ นะ ฌิด เบเอนซือบุน เตอ กะฆีเตอ ลูมอฮ นะ กาเญา โปรฮ โกะ ฮาตู กรานา ปือมือฆัฮ นะ ซาปา เลอ? กะฆีเตอ ลูมอฮ กาเญา ตะอาซิก นู นะ กรัจ ฮูโกบ กาเญา. 28 ตาปี นู กู โปรฮ โกะ ฮาตู ซีตัด เดะ ปือมือฆัฮ นะ ซือมืองัจ นะ ตูฮัด เตอ กะฆีเตอ ตูฮัด เดะ อาตัซ ญา มาแรฮ ฌาดี ราฌา นะ บือบือลา กาเญา ดัฮ. " เยซู ญา จะ. 29 เยซู มือเลา ลาฆี จะ "ฌาดี กะฮามี เลอ? ซือมียา ดีฮา นะ มาโซะ ปี ซามุน บารัก เดะ รูมัฮ นะ ซือมียา ตือฆัยํ-อูรัจ บือเลฮ กะฮามี? กือนา รีฆะ ซือมียา ตือฆัยํ-อูรัจ อีตู อีกัจ บรี กือฌะ-กือมัซ ดูลู. อีกัจ ดัฮ บารู นะ ซามุน บารัก เดะ รูมัฮ อีตู บือเลฮ. 30 ซือมียา ดีฮา นู เตด ดูโดะ โซะ กู เตอ ญา บลาวัด ฌางัน กู เลอ. ซือมียา ดีฮา นู เตด ตูโลก กู ปี ปือมุน โกะ ซือมียา เตอ ญา บูวัจ บรี กูญา กือจัย ปี เลอ. 31 กะฆีเตอ กู มือเลา ฌางัน กาเญา จะ ซือมียา นู บูวัจ ดูซา นู มือเลา ตะอารัฮ กะ ตูฮัด เดะ อาตัซ ราตา มาจับ เตอ ดูซา นะ ญา เตอ ตูฮัด นะ อาเกะ บรี เลอ. ตาปี ซือมียา นู มือเลา ตะอารัฮ กะ ซือมืองัจ นะ ตูฮัด เตอ ตูฮัด นะ ฮอย เตด อาเกะ ดูซา นะ ญา เลอ. 32 ซือมียา ดีฮา นู มือเลา บลาวัด ฌางัน กู นู นานะ นะ อูมัจ-ซือมียา เตอ ดูซา นะ ญา ตูฮัด นะ อาเกะ บรี เลอ. ตาปี ซือมียา ดีฮา นู มือเลา บลาวัด ฌางัน ซือมืองัจ นะ ตูฮัด เตอ ตูฮัด นะ ฮอย เตด อาเกะ ดูซา นะ ญา. เดะ ฮาดัจ อีนี เตอ เดะ ฮาดัจ โซะ ฮึลด โปด นะ อาเกะ เตด บือเลฮ ดัฮ เลอ." เยซู ญา จะ. 33 "กือนา อีงัจ บรี ตือตู เลอ. กะ อาดา ปูโฮด กายู นู บาฌิ เตอ ญา อาดา บูวัฮ นู บาฌิ ฌูฆา. กะ อาดา ปูโฮด กายู นู ตะอารัฮ ญา อาดา บูวัฮ นู ตะอารัฮ ฌูฆา. กรานา-จะ นู นะ ตาฮู ปูโฮด กายู อีตู เตอ กือนา ลีฮัจ กะ บูวัฮ นะ ญา. 34 กาเญา บักซา อูลัยํ ฌาฮัจ เลอ. กาเญา ฌาดี ซือมียา นู ฌาฮัจ ดัฮ กาเญา นะ มือเลา ลาฆู นู บาฌิ บือเลฮ กะฮามี เลอ? กรานา-จะ ฮาตี ปือนอฮ ฌางัน ลาฆู นามา เตอ มูโลจ โปด นะ มือเลา ตูโรจ ลาฆู กะฆีเตอ เลอ. 35 ซือมียา นู บาฌิ เตอ ญา นะ อาเมด บือนา นู บาฌิ มาแรฮ เดะ บารัก บรือฆา บาฌิ นู ญา ปือมุน เดะ ฮาตี ดัฮ. ตาปี ซือมียา นู ฌาฮัจ นะ อาเมด บือนา นู ฌาฮัจ มาแรฮ เดะ บารัก ฌาฮัจ นู ญา ปือมุน เดะ ฮาตี ดัฮ. 36 กู มือเลา ฌางัน กาเญา จะ เดะ อารี กรัจ ฮูโกบ เตอ โกะ ซือมียา กือนา ซาโงะ ซาลัฮ ซาเบะ ราตา ปือมือเลา นู ฮอย เตด บือฆูนา นู กูญา บือเลฮ มือเลา ดัฮ. 37 กะฆีเตอ นู เกา นะ ลือปัซ เดะ ฮูโกบ เตอ นู นะ กือนา ฮูโกบ เตอ กรานา ปือมือเลา นะ เกา เลอ." เยซู ญา จะ. 38 กาลา อีตู อาดา โกะ ซือมียา อาฌัยํ ลาฆู ปือมือซัด นะ ตูฮัด ซือตืองัฮ ฌางัน โกะ ลูมอฮ ฟาริซี ซือตืองัฮ กูญา มือเลา กะ เยซู จะ " บูมอยํ เออ บรี เกา บูวัจ ปือนานา นู มือฆัฮ บรี กะ กามี นะ ลีฮัจ เลอ." 39 ตาปี เยซู ตีกัฮ กะ กูญา จะ "ลูมอฮ ซือมียา ฮาดัจ อีนี นู ฌาฮัจ นู ฮอย เตด บือฆูนา เตอ กูญา ซูกา นะ ลีฮัจ ปือนานา นู มือฆัฮ. ตาปี ฮอย ปือนานา นามา โปด นะ บรี ลีฮัจ กะ กูญา ลือเบฮ ซา ปือนานา นะ โยนา ซือมียา ตูโดฮ ลาฆู นะ ตูฮัด. 40 โยนา เตอ ญา อาดา เดะ ดาลับ โปรจ นะ อีกัด บือซัยํ กือมูฮา ตีฆา อารี ตีฆา มาลับ ดัฮ. ซือรูปา กะฆีเตอ กู นู นานะ นะ อูมัจ-ซือมียา โปด กู นะ ดูโดะ เดะ บาวัฮ ตานัฮ กือมูฮา ตีฆา อารี ตีฆา มาลับ ฌูฆา. 41 เดะ อารี กรัจ ฮูโกบ ลูมอฮ ซือมียา นังฆรี นีนะเว เตอ นะ บีกัซ บือดีรี อาดู โกะ ซือมียา ฮาดัจ อีนี ซาเบะ-จะ โซะ กูญา ตานา ดืองัยํ ปือมือเลา นู โยนา มือญาเระ กูญา บือเลฮ บราเลฮ-ฮาตี บารู ดัฮ. ตาปี ลีฮัจ เลอ นู บือซัยํ ลือเบฮ เดะ โยนา อาดา โซะ อีนี ดัฮ เลอ. 42 ราฌา นีบีนี เดะ นังฆรี โซะ บารัจ-ดายา เตอ ญา นะ บีกัซ บือดีรี อาดู ลูมอฮ ซือมียา ฮาดัจ อีนี เดะ อารี กรัจ ฮูโกบ เลอ. ซาเบะ-จะ ญา บือเลฮ บือฌาลัด มาแรฮ ดาตัก เดะ โซะ ฮูโฌก ปือญูดัฮ เดะ ดือนียา บีดา นะ มือนีงัย ปือมือเลา นู ปานัย อากัน นะ ราฌา ซะโลโม. ลีฮัจ เลอ นู บือซัยํ ลือเบฮ เดะ ซะโลโม อาดา โซะ อีนี ดัฮ เลอ." เยซู ญา จะ. 43 เยซู มือเลา ปูลัก จะ "ตานา ฮาตู ตะอารัฮ ตรือเบะ เดะ ซือมียา ดีฮา ดัฮ ญา ปี ราตา เดะ ตือปัจ ตานัฮ กริก นู ฮอย อาเย ลาลู มียา ตือปัจ นะ ดูโดะ ซือนัง ตาปี ญา เตด ดาปัจ ลาลู. 44 กะฆีเตอ ญา มือเลา จะ 'บอฮ กู นะ บาลิ ปาเระ กะ รูมัฮ นะ กู นู กู ตรือเบะ มาแรฮ ซีงี เลอ.' ตานา มาแรฮ รอจ ดัฮ ญา ดาปัจ รูมัฮ อีตู ฮอย ซาปา ดูโดะ กือนา กีกัย จรัฮ ปือตัด ตาโรฮ บาฌิ ดัฮ. 45 กะฆีเตอ ฮาตู อีตู ปี ซาโมจ อาเมด ฮาตู อาซิก ตูโฌฮ ฮาตู นู ฌาฮัจ ลือเบฮ เดะ ญา บาวา กูญา มาแรฮ มาโซะ ดูโดะ บือซามา เดะ รูมัฮ อีตู. กะฆีเตอ วะตู เดะ บลากัก เตอ ซือมียา อีตู ญา ซูซัฮ ปายัฮ ลือเบฮ เดะ วะตู ลามูลา ลาฆี. ลูมอฮ ซือมียา เดะ ฮาดัจ นู ฌาฮัจ อีนี เตอ กูญา นะ ฌาดี กะฆีเตอ เลอ." เยซู ญา จะ. 46 ตานา เยซู ตืองัฮ มือเลา ฌางัน ลูมอฮ ซือมียา บาญะ อีตู ลีฮัจ เลอ มะ เดะ เยซู ฌางัน โกะ อาดี เดะ ญา มาแรฮ บือดีรี เดะ ลามัน มีตา มือเลา ฌางัน ญา. 47 อาดา ซือมียา ซืออูรัก มือเลา ฌางัน เยซู จะ "ลีฮัจ เลอ โกะ มะ โกะ อาดีๆ เดะ เกา อาดา บือดีรี โซะ ลามัน มีตา มือเลา ฌางัน เกา. 48 ตาปี เยซู ตีกัฮ กะ ซือมียา อีตู จะ "ซาปา เลอ นู ฌาดี มะ เดะ กู? ซาปา ซือตืองัฮ นู ฌาดี อาดี-บราดี เดะ กู?" 49 กะฆีเตอ ญา อาเงา ตางัน นะ ญา ตูโญะ กะ โกะ มูเระ นะ ญา มือเลา จะ "ลีฮัจ เลอ มะ เดะ กู ฌางัน อาดี-บราดี เดะ กู เลอ. 50 กรานา ซือมียา ดีฮา นู บูวัจ ตูโรจ กะ ฮาตี นะ อาโปก เดะ กู นู ดูโดะ โซะ อาตัซ ลาแงะ ญา เลอ นู ฌาดี อาดี-บราดี กีลากี นีบีนี เดะ กู เลอ นู ฌาดี มะ เดะ กู ฌูฆา." เยซู ญา จะ.
1 อารี อีตู เยซู ตรือเบะ เดะ รูมัฮ ญา บือฌาลัด ปี ดูโดะ เดะ บีดิก ลาโวจ. 2 อาดา ลูมอฮ ซือมียา บาญะ บือมุน กือลีลิก โซะ ญา. กะฆีเตอ เยซู ญา ญาแญะ ปี ดูโดะ เดะ ปราฮู ตาปี โกะ ซือมียา บาญะ อีตู ซือมูฮา กูญา บือดีรี เดะ ปาตัย. 3 เยซู มือเลา จรือตา อาฌัยํ กะ กูญา บาญะ ลาฆู มือเลา จะ "ลีฮัจ เลอ อาดา ซือมียา ซืออูรัก ญา ปี ปรัก บีฌี ตาโระ เดะ กือโบด. 4 ตานา ญา ปรัก กะฆีเตอ อาดา บีฌี ซือตืองัฮ ญา ฆูโฆยํ เดะ บีดิก ฌาลัด. กะฆีเตอ อาดา กาวัด บูโรก มาแรฮ ปาโตะ มากัด บีฌี อีตู ปี ดัฮ. 5 อาดา บีฌี ซือตืองัฮ ฌูฆา ญา ฆูโฆยํ เดะ ตานัฮ นู อาดา บาตู บาญะ อาดา ตานัฮ กิดีกิ เตอ. บีฌี อีตู โปด ญา บือตูโมฮ งัจบางัจ ซาเบะ ตานัฮ เตด ดาลับ. 6 ตานา มาตาอารี ตือลาลู ฮางัจ เตอ ปูโฮด อีตู ญา ลายู ตูโฮยํ ดัฮ กรานา ฮอย ฌากัยํ. 7 อาดา บีฌี ซือตืองัฮ ญา ฆูโฆยํ เดะ ตืองัฮ ปูโฮด บือดูรี. ปูโฮด บือดูรี อีตู ญา บือตูโมฮ ญา ตูโดก ปูโฮด ตาโระ อีตู บรี ฮาบิฮ ดัฮ. 8 อาดา บีฌี ซือตืองัฮ ญา ฆูโฆยํ เดะ ตานัฮ นู บาฌิ. กะฆีเตอ ญา บือบูวัฮ บาฌิ บือตามัฮ บูวัฮ บาญะ ซือตืองัฮ ตีฆา-ปูโลฮ บีฌี เตอ ซือตืองัฮ นัม-ปูโลฮ บีฌี ซือตืองัฮ รอจ-กะ ซือราตุซ บีฌี เลอ. 9 ซาปา อาดา ตือลีงา บรี ญา มือนีงัย เลอ." เยซู ญา จะ. 10 โกะ มูเระ มาแรฮ ตาญา เยซู จะ "บูวัจ นามา เกา อาฌัยํ กูญา ฌาดี จรือตา อาฌัยํ เลอ?" 11 เยซู ตีกัฮ กะ กูญา จะ "โซะ ลูมอฮ กาเญา เตอ ตูฮัด บือเลฮ บรี ตาฮู ลาฆู ดาลับ ซูโงฮ ปาซัน ลาฆู นู ตูฮัด ฌาดี ราฌา นู บือบือลา ดือนียา อีนี. ตาปี โซะ กูญา อีตู ตูฮัด ตีเมา บรี ตาฮู เลอ. 12 กรานา-จะ ซือมียา ดีฮา นู ตาฮู ซือตืองัฮ เตอ ญา นะ ซาโมจ ลาฆี ยู ตาฮู บาญะ ซูโงฮ เลอ. ตาปี ซือมียา นู เตด ตาฮู นามา ลาฆี นู ญา ตาฮู นู ดีกิ-ตอจ เตอ นะ กือนา อาเมด ปี เดะ ญา ดัฮ เลอ. 13 ซาเบะ กะฆีเตอ เลอ กู มือเลา ฌางัน กูญา ฌาดี จรือตา อาฌัยํ. กรานา กูญา ลีฮัจ ตาปี ซือรูปา ลีฮัจ เตด บือฆารี นามา. กูญา ดืองัยํ ตาปี ซือรูปา ฮอย เตด ดืองัยํ นามา. กูญา เตด มาโซะ เดะ ฮาตี ลาลู เลอ. 14 โซะ ลูมอฮ กูญา ปือมือเลา นู อิซายา บือเลฮ ตูโดฮ เตอ ฌาดี รือมัก ดัฮ นู จะ 'กาเญา นะ ดืองัยํ ตาปี ดืองัยํ ดัฮ นะ เตด มาโซะ เดะ ฮาตี. นะ ลีฮัจ ตาปี ลีฮัจ ดัฮ นะ เตด บือฆารี นามา. 15 ซาเบะ ลูมอฮ บักซา อีนี ตือฆัยํ-ฮาตี ดัฮ อีงัจ เตด กือนา. ตือลีงา นะ กูญา กูญา กือจัจ ดัฮ. มาตา นะ กูญา กูญา ปือฌับ ดัฮ. ตาโกจ-จะ มาตา นะ กูญา นะ บือฆารี ตือลีงา นะ กูญา นะ ดืองัยํ ลาฆู นะ มาโซะ เดะ ฮาตี นะ กูญา. กะฆีเตอ กูญา นะ อาเลฮ มาแรฮ กะ กู บรี กู นะ บือบือลา กูญา บรี ลือปัซ บาฌิ ดัฮ.' ตูฮัด ญา จะ." 16 เยซู มือเลา ลาฆี จะ "ตาปี มาตา นะ กาเญา เตอ ญา ลีฮัจ บือฆารี ดัฮ ตือลีงา นะ กาเญา โปด ญา ดืองัยํ ดัฮ. ซือนัง ซือลามัจ ซูโงฮ เลอ กาเญา. 17 กู มือเลา ฌางัน กาเญา ลาฆู นู ซูโงฮ จะ อาดา โกะ ซือมียา ตูโดฮ ลาฆู นะ ตูฮัด ฌางัน โกะ ซือมียา บาฌิ-ตือปัจ บาญะ อูรัก เตอ กูญา บือคานะ นะ ลีฮัจ ลาฆู นู กูญา บือเลฮ ลีฮัจ ดัฮ ตาปี เตด บือเลฮ ลีฮัจ เลอ. กูญา บือคานะ นะ ดืองัยํ ลาฆู นู กาเญา ดืองัยํ โปด ตาปี เตด บือเลฮ ดืองัยํ เลอ." เยซู ญา จะ. 18 เยซู มือเลา ปูลัก จะ "กะฆีเตอ กาเญา กือนา มือนีงัย เลอ ลาฆู กู จรือตา อาฌัยํ ซีงี ปาซัน ซือมียา นู ปรัก บีฌี ตาโระ อีตู. 19 วะตู ซือมียา ดีฮา ดืองัยํ ปือมือเลา ปาซัน ลาฆู นู ตูฮัด นะ ฌาดี ราฌา เตอ ตาปี เตด มาโซะ เดะ ฮาตี ดัฮ กะฆีเตอ ฮาตู ฌาฮัจ มาแรฮ จาปัย บีฌี นู ปรัก เดะ ฮาตี นะ ญา บือปี ดัฮ. นี เลอ ซือรูปา บือกะ บีฌี นู ปรัก ฆูโฆยํ เดะ บีดิก ฌาลัด ซีงี ดัฮ. 20 โซะ บีฌี นู ปรัก ฆูโฆยํ เดะ ตือปัจ อาดา บาตู บาญะ อีตู ญา เลอ ซือรูปา บือกะ ซือมียา นู ดืองัยํ ลาฆู นะ ตูฮัด ดัฮ ดัดดัด ญา ซูกา-ฮาตี ซาโมจ ลาฆู ปือมือเลา อีตู. 21 ตาปี ปือมือเลา อีตู ญา ฮอย เตด บือฌากัยํ เดะ ฮาตี นะ ญา เตอ นะ ตาฮัด เตด ลามา เลอ. ตานา ซือมียา อีตู กือนา ลาฆู ซูซัฮ ปายัฮ เตอ กือนา ปรือกัด เตอ กรานา ซาโมจ ปือมือเลา อีตู ดัฮ ดัดดัด ญา มืองือละ บูวัก ดัฮ. 22 โซะ บีฌี นู ปรัก ฆูโฆยํ เดะ ตืองัฮ ปูโฮด บือดูรี เตอ ซือรูปา บือกะ ซือมียา นู ดืองัยํ ปือมือเลา อีตู ดัฮ ตาปี ตานา ญา ฆาโดฮ-ฮาตี ปาซัน ลาฆู โซะ ดือนียา เตอ ตานา ญา บือคานะ ซูกา โกะ บือนา บารัก เตอ ลาฆู อีนี ฌาดี ลาฆู นู ตูโดก ปือมือเลา อีตู บูวัจ บรี ญา ฮอย เตด บือบูวัฮ ดัฮ เลอ. 23 ตาปี โซะ บีฌี นู ปรัก ฆูโฆยํ เดะ ตานัฮ บาฌิ เตอ ญา ซือรูปา บือกะ ซือมียา นู ดืองัยํ ปือมือเลา อีตู บรี มาโซะ เดะ ฮาตี ดัฮ. กะฆีเตอ ญา บือบูวัฮ ซือตืองัฮ บือตามัฮ ตีฆา-ปูโลฮ บีฌี เตอ ซือตืองัฮ นัม-ปูโลฮ ซือตืองัฮ รอจ กะ ซือราตุซ บีฌี เลอ." เยซู ญา จะ. 24 เยซู อาฌัยํ กูญา ฌาดี ลาฆู จรือตา อาซิก ปูลัก มือเลา จะ "นู ตูฮัด เดะ อาตัซ นะ มาแรฮ บือบือลา ฌาดี ราฌา เตอ ฌาดี ซือรูปา บือกะ ลาฆู กะฆีนี. อาดา ซือมียา ซืออูรัก นู ตานัม บีฌี ปาดี นู บาฌิ เดะ บือนัก นะ ญา. 25 ตาปี ตานา ลูมอฮ ซือมียา ตีโนะ ลีนา เตอ ซือตรู นะ ญา มาแรฮ ตานัม บีฌี ตะอารัฮ จาโปยํ เดะ ตืองัฮ บีฌี ปาดี อีตู บารู ญา ปี เลอ. 26 กะฆีเตอ กาลา บีฌี อีตู ญา บือตูโมฮ ฌาดี ตากัย ปาดี ดัฮ โกะ ตาโระ นู ตะอารัฮ ญา บือตูโมฮ ปลีฮัจ ซามา ฌางัน ปาดี อีตู. 27 โกะ ปราโซฮ นะ ตูฮัด บือนัก อีตู กูญา มาแรฮ มือเลา ฌางัน ญา จะ 'จา เออ เกา ตานัม ปาดี นู บาฌิ เดะ บือนัก นะ เกา บูกัด เฆอ? นู ตาโระ ตะอารัฮ อีนี ญา มาแรฮ ดาตัก เปะ ดีฮา?' 28 ญา ตีกัฮ กะ กูญา จะ 'อาดา ซือตรู ซืออูรัก เลอ นู ญา บูวัจ กะฆีนี ดัฮ.' กะฆีเตอ โกะ ปราโซฮ ตาญา ญา จะ 'นะ บรี กามี ปี กือตัจ ปูงอจ โกะ ตาโระ นู ตะอารัฮ บูวัก เฆอ?' 29 ญา ตีกัฮ นะ กูญา จะ 'ฌางัน เลอ. ตานา กาเญา กือตัจ ตาโระ นู ตะอารัฮ เตอ ตาโกจ-จะ นะ ตือกือตัจ ปาดี นู บาฌิ ซามา เลอ. 30 บรี โกะ บีฌี ดูวา มาจับ บือตูโมฮ บือซามา-ซามา รอจ-กะ วะตู นู นะ กือตับ ปาดี เลอ. วะตู อีตู เลอ กู นะ ซูโรฮ ซือมียา กือตับ ปาดี บรี กือตัจ โกะ ตาโระ นู ตะอารัฮ ดูลู อีกัจ บรือกัซ บือปี ตูนู เดะ อาปี. ลือปัซ อีตู กู นะ กือตับ ปาดี ตาโรฮ เดะ ดาเงา นะ กู เลอ.' " เยซู ญา จะ. 31 เยซู อาฌัยํ กูญา จรือตา ซา ลาฆู ปูลัก มือเลา จะ "นู ตูฮัด เดะ อาตัซ นะ มาแรฮ บือบือลา ฌาดี ราฌา เตอ ฌาดี ซือรูปา บือกะ ลาฆู กะฆีนี. อาดา บีฌี ตาโระ ซือบีฌี นู ซือมียา ซืออูรัก ญา อาเมด ปี ตานัม เดะ กือโบด นะ ญา. 32 บีฌี อีตู ญา ดือมิ เดะ บีฌี อาซิกๆ ซือมูฮา เลอ ตาปี ตานา บือตูโมฮ บือซัยํ ดัฮ ญา ฌาดี ปูโฮด ตาโระ นู ตีงี เดะ กาวัด ซือมูฮา เลอ ฌาดี ปูโฮด กายู ดัฮ. กะฆีเตอ โกะ บูโรก เดะ อาตัซ มาแรฮ บูวัจ ซารัก เดะ โกะ ฌามัยํ นะ ปูโฮด กายู อีตู เลอ." เยซู ญา จะ. 33 เยซู จรือตา อาฌัยํ ซา ลาฆู ปูลัก มือเลา ฌางัน กูญา จะ "นู ตูฮัด เดะ อาตัซ นะ มาแรฮ บือบือลา ฌาดี ราฌา เตอ ฌาดี ซือรูปา บือกะ ลาฆู กะฆีนี. อาดา นีบีนี ซืออูรัก นู อาเมด ราฆี ซือตืองัฮ จาโปยํ เดะ ตือโปก ตีฆา เตง. ญา กือโมก ญาแญะ บรี ตือโปก อีตู กือโมก ฮาบิฮ ดัฮ ซือมูฮา เลอ." เยซู ญา จะ. 34 ลาฆู อีนี ซือมูฮา เยซู บือเลฮ มือเลา ฌางัน ลูมอฮ ซือมียา บาญะ ฌาดี ลาฆู จรือตา อาฌัยํ กูญา. ญา เตด อาฌัยํ กูญา มาจับ อาซิก ตาปี ญา อูซิ จรือตา กะฆีเตอ เลอ. 35 กะฆีเตอ ปือมือเลา นะ ซือมียา ตูโดฮ ลาฆู นะ ตูฮัด ฌาดี รือมัก ดัฮ นู จะ "กู นะ มือเลา จรือตา อาฌัยํ กะ กาเญา. กู นะ มือญาเระ กะ กูญา ลาฆู นู บูนี ตาโรฮ ดัฮ ตะเดะ ดือนียา บือฌาดี ดัฮ." ญา จะ. 36 กะฆีเตอ เยซู ตีงัน ลูมอฮ ซือมียา บาญะ อีตู ญา มาโซะ ปี กะ รูมัฮ ดัฮ. โกะ มูเระ นะ ญา มาแรฮ ตาญา ญา จะ "ปาซัน โกะ ตาโระ นู ตะอารัฮ เดะ บือนัก ซีงี เตอ มีตา มือญาเระ บรี กามี นะ มาโซะ เดะ ฮาตี บือเลฮ เลอ." 37 เยซู ตีกัฮ กะ กูญา จะ "ซือมียา นะ ตานัม บีฌี นู บาฌิ อีตู ฌาดี นานะ นะ อูมัจ-ซือมียา เตอ 38 บือนัก อีตู ฌาดี ซือรูปา บือกะ ดือนียา อีนี. บีฌี นู บาฌิ อีตู ซือรูปา บือกะ ลูมอฮ ซือมียา นะ ตูฮัด. ตาโระ นู ตะอารัฮ เตอ ซือรูปา บือกะ โกะ ซือมียา นู โซะ ฮาตู ซีตัด นู ฌาฮัจ. 39 ซือตรู นู ตานัม บีฌี ตาโระ นู ตะอารัฮ อีตู เตอ ญา เตอ ฌาดี กือปาลา ฮาตู ซีตัด เลอ. วะตู กือตับ ปาดี อีตู ญา ซือรูปา บือกะ วะตู ปือญูดัฮ เดะ ฮาดัจ อีนี. โกะ ซือมียา กือตับ ปาดี อีตู เตอ กูญา ซือรูปา ลูมอฮ ฮูลู-บาลัก นะ ตูฮัด. 40 ซือรูปา กูญา กือตัจ โกะ ตาโระ นู ตะอารัฮ มาแรฮ ปูงอจ บือปี ตูนู เดะ อาปี เตอ นะ ฌาดี กะฆีเตอ โซะ วะตู ปือญูดัฮ เดะ ฮาดัจ อีนี. 41 กู นู นานะ นะ อูมัจ-ซือมียา นะ ซูโรฮ ฮูลู-บาลัก นะ กู ปี. กูญา นะ กีกัย ราตา ซือมียา นู บูวัจ บรี กาวัด ซือซัจ ฌาลัด เตอ ฌางัน ลูมอฮ ซือมียา บูวัจ ฌาฮัจ ซือมูฮา เตอ บรี ตรือเบะ เดะ ดือนียา บารู นะ กู. 42 กูญา นะ ตีงัน ลูมอฮ ซือมียา อีตู ปี บูวัก เดะ ลูโงะ อาปี นู บือฌาฮุยํ เลอ. โซะ อีตู ลูมอฮ ซือมียา กูญา นะ มือนาแงฮ ตือกาจิ ฆีฆี ซาเกะ โตระ. 43 วะตู อีตู ลูมอฮ ซือมียา บาฌิ-ตือปัจ นะ บือซายา จรัฮ ซือรูปา มาตาอารี เดะ ดือนียา บารู นะ อาโปก เดะ กูญา. ซือมียา นู อาดา ตือลีงา เตอ กือนา มือนีงัย เลอ." เยซู ญา จะ. 44 กะฆีเตอ เยซู มือเลา ปูลัก จะ "นู ตูฮัด เดะ อาตัซ นะ มาแรฮ บือบือลา ฌาดี ราฌา เตอ ฌาดี ซือรูปา บือกะ บารัก บรือฆา นู บูนี เดะ บือนัก ดัฮ. อาดา ซือมียา ซืออูรัก ญา ดาปัจ บารัก บรือฆา อีตู บารู ญา บูนี ปูลัก. ญา ซูกา-ฮาตี เลอ. ญา ปี ฌูวัน บือนา บารัก นะ ญา ซือมูฮา ปี บือลี บือนัก อีตู เลอ. 45 "อาดา ลาฆู กะฆีนี ปูลัก เตอ. นู ตูฮัด เดะ อาตัซ นะ มาแรฮ บือบือลา ฌาดี ราฌา เตอ ฌาดี ซือรูปา บือกะ ลาฆู กะฆีนี. อาดา ซือมียา ฌูวัน บารัก ซืออูรัก นู ปี มือญารี ตือมีกา นู บาฌิ. 46 ตานา ญา ดาปัจ ตือมีกา ซา บีฌี นู บาฌิ ซูโงฮ ญา ปี ฌูวัน บือนา บารัก นะ ญา ซือมูฮา ปี บือลี ตือมีกา อีตู. 47 "กะฆีเตอ ปูลัก. นู ตูฮัด เดะ อาตัซ นะ มาแรฮ บือบือลา ฌาดี ราฌา เตอ ฌาดี ซือรูปา บือกะ ลาฆู กะฆีนี. อาดา ปูกัจ นู ปลือปัซ เดะ ลาโวจ ดัฮ บือเลฮ อีกัด ราตา มาจับ. 48 ตานา ปือนอฮ ดัฮ กูญา อีเระ กะ ปาตัย. กูญา ดูโดะ ปีเลฮ อีกัด. อีกัด นู บาฌิ กูญา บอฮ เดะ ราฆา. อีกัด นู ตะอารัฮ กูญา ตีงัน บูวัก. 49 ลาฆู อีนี ซือรูปา กะ อารี ปือญูดัฮ เดะ ฮาดัจ อีนี. ลูมอฮ ฮูลู-บาลัก นะ ตูฮัด นะ มาแรฮ ปีเลฮ ลูมอฮ ซือมียา ฌาฮัจ บือตรือเบะ เดะ ลูมอฮ ซือมียา บาฌิ-ตือปัจ 50 นะ ตีงัน กูญา ปี บูวัก เดะ ลูโงะ อาปี นู บือฌาฮุยํ. โซะ อีตู กูญา นะ มือนาแงฮ ตือกาจิ ฆีฆี ซาเกะ โตระ." เยซู ญา จะ. 51 เยซู ตาญา โกะ มูเระ นะ ญา จะ "ลาฆู อีนี ซือมูฮา มาโซะ เดะ ฮาตี นะ กาเญา เฆอ?" กูญา ตีกัฮ กะ ญา จะ "เออ มาโซะ ดัฮ เลอ." 52 เยซู มือเลา กะ กูญา ปูลัก จะ "กะฆีเตอ เลอ ราตา ซือมียา นู อาฌัยํ ลาฆู นะ ตูฮัด นู บลาฌัยํ ลาฆู นู ตูฮัด ฌาดี ราฌา ดัฮ เตอ ญา เลอ ซือรูปา ตูฮัด รูมัฮ ซืออูรัก นู นะ อาเมด บือนา บาฌิ นู บารู ซือตืองัฮ ฌางัน บือนา บาฌิ นู ลามา ซือตืองัฮ บือตรือเบะ เดะ รูมัฮ ตาโรฮ บารัก บรือฆา นะ ญา เลอ." เยซู ญา จะ. 53 ตานา เยซู มือเลา ลาฆู จรือตา อาฌัยํ อีนี ฮาบิฮ ดัฮ ญา บือฌาลัด ปี เดะ โซะ อีตู. 54 ตานา ญา รอจ กะ ตูโปะ นะ ญา ญา อาฌัยํ เดะ โกะ รูมัฮ บือมุน นะ กูญา. ลูมอฮ ซือมียา ซือมูฮา ปือและ-ฮาตี ซูโงฮ มือเลา จะ "กะฮามี เลอ นู ซือมียา อีนี ญา ปานัย อากัน กะฆีนี? ฌาดี นามา เลอ นู ญา บูวัจ ลาฆู มือฆัฮ ซูโงฮ กะฆีนี? 55 ญา ฌาดี นานะ นะ ตูกัก กายู บูกัด เฆอ? มะ เดะ ญา ปือนามา มารียา บูกัด เฆอ? อาดี กีลากี เดะ ญา ฌาดี ยากอบ โยเซบ ซีโมน ฌางัน ยูดา บูกัด เฆอ? 56 โกะ อาดี นีบีนี เดะ ญา อาดา บือซามา ฌางัน กีตา บูกัด เฆอ? กะฆีเตอ ญา ดาปัจ บือนา อีนี ซือมูฮา ดาตัก เปะ ดีฮา เลอ?" 57 กะฆีเตอ ลูมอฮ กูญา ดือกี กะ เยซู. ตาปี เยซู ตีกัฮ กะ กูญา จะ "โกะ ซือมียา ราตาๆ นะ ตูเฮะ กะ ซือมียา ตูโดฮ ลาฆู นะ ตูฮัด เตอ ตาปี เดะ ตูโปะ นะ ญา เดะ รูมัฮ นะ ญา โปด กูญา เตด ตูเฮะ กะ ญา ลาลู เลอ." 58 กะฆีเตอ เดะ ตูโปะ อีตู ญา บูวัจ ลาฆู มือฆัฮ เตด บราปา บาญะ ซาเบะ กูญา ฮอย เตด ปือจายา ดัฮ.
1 กาลา อีตู ราฌา เฮโรด ญา ดืองัยํ ลาฆู นะ เยซู ดัฮ. 2 กะฆีเตอ ราฌา มือเลา ฌางัน โกะ ปือญูโรฮ นะ ญา จะ "ซือมียา อีนี ฌาดี โยฮัน เลอ นู บรี ลาฆู ซือลับ เดะ อาเย. ญา ฮีโดะ ปาเระ เดะ มาตี ดัฮ. ซาเบะ กะฆีเตอ เลอ ญา บูวัจ โกะ ลาฆู มือฆัฮ ซูโงฮ กะฆีนี บือเลฮ." 3 กรานา-จะ ดูลู เตอ ราฌา เฮโรด บือเลฮ รีฆะ โยฮัน อีกัจ ญา ตาโรฮ เดะ ปือฌารา ดัฮ. ญา บูวัจ กะฆีเตอ กรานา ลาฆู นะ เฮโรดียัด นู ดูลู ญา ฌาดี บีนี นะ ฟีลิบ อาดี เดะ ราฌา เลอ. 4 ตาปี โยฮัน บือเลฮ มือญาเระ กะ ราฌา จะ "นู เกา อาเมด บีนี นะ อาดี มาแรฮ ฌาดี บีนี นะ เกา เตอ เกา บูวัจ ซาลัฮ เดะ ฮาดัจ เลอ." 5 มีเซ-จะ ราฌา ญา อีงัจ นะ บูนอฮ โยฮัน ตาปี ญา ตาโกจ เดะ โกะ ลูมอฮ ซือมียา บาญะ ซาเบะ กูญา ตูเฮะ กะ โยฮัน อีงัจ จะ ญา ฌาดี ซือมียา ตูโดฮ ลาฆู นะ ตูฮัด เลอ. 6 กะฆีเตอ ตานา รอจ กะ บรามัย รือมัก อารี ดูโดะ เดะ อาปี นะ ราฌา เฮโรด เตอ นานะ นีบีนี นะ เฮโรดียัด มาแรฮ มือนารี โซะ ฮึลด มูคา นะ ลูมอฮ ซือมียา ซัยํ-บือซัยํ บูวัจ บรี ราฌา ซูกา-ฮาตี บาญะ เลอ. 7 กะฆีเตอ ราฌา อาเกะ มือเลา บือซูปัฮ ฌางัน ราดารา อีตู จะ "เกา มีตา นามาๆ โปด กู นะ บรี กะ เกา ซือมูฮา เลอ." 8 ราดารา อีตู เตอ ญา ตูโรจ กะ ฮาตี นะ มะ เดะ ญา มือเลา จะ "ราฌา เออ กู มีตา ปาลา นะ โยฮัน นู บรี ลาฆู ซือลับ เดะ อาเย. อาดู กรัจ ปาลา นะ ญา บอฮ เดะ ตาลับ อาตัจ กะ กู ปัจ อีนี เลอ." ญา จะ. 9 กะฆีเตอ ราฌา ญา ฆาโดฮ-ฮาตี บาญะ เลอ ตาปี กรานา ญา บือเลฮ อาเกะ มือเลา บือซูปัฮ ดัฮ โซะ ฮึลด ลูมอฮ ซือมียา นู ดูโดะ มากัด บือซามา เตอ กะฆีเตอ ญา ปือซัด บรี บูวัจ ตูโรจ กะ ปือมือเลา นะ ราดารา อีตู เลอ. 10 กะฆีเตอ ญา ซูโรฮ ซือมียา ซืออูรัก ปี กะ ปือฌารา กรัจ ปาลา นะ โยฮัน. 11 กรัจ ดัฮ กูญา บอฮ เดะ ตาลับ อาเมด มาแรฮ อาตัจ บรี กะ ราดารา อีตู. ญา โปด บาวา บือปี อาตัจ บรี กะ มะ เดะ ญา. 12 กะฆีเตอ โกะ มูเระ นะ โยฮัน มาแรฮ อาเมด บาดัด นะ ญา บาวา บือปี ตานัม. ลือปัซ อีตู กูญา มาแรฮ มือญาเระ ลาฆู อีตู กะ เยซู. 13 โซะ เยซู เตอ ตานา ดืองัยํ ลาฆู อีตู ดัฮ ญา ญาแญะ กะ ปราฮู ตรือเบะ เดะ โซะ อีตู รอจ-กะ ตือปัจ ฮอย ซือมียา อาดา ซา กูญา. ตานา ลูมอฮ ซือมียา บาญะ ดืองัยํ จะ เยซู ปี กะ ดีฮา ดัฮ กูญา ตรือเบะ เดะ ตูโปะ ราตาๆ กูญา ปาคัจ บือฌาลัด ตูโรจ กะ เยซู ปี ดัฮ. 14 ตานา เยซู ตูโรด เดะ ปราฮู ญา ลีฮัจ ลูมอฮ ซือมียา บาญะ. ญา ตือจีฮัด กะ ลูมอฮ กูญา ญา บือบือลา ลูมอฮ ซือมียา ซาเกะ นะ กูญา บรี ซือนัง บาฌิ ซือมูฮา ดัฮ. 15 ตานา รอจ กะ ปะฮึญา ดัฮ โกะ มูเระ นะ เยซู มาแรฮ มือเลา ฌางัน ญา จะ "ซรือปะ นะ กือลับ ดัฮ. ตือปัจ อีนี ฌาดี ฮูตัด ฮอย ซือมียา ดูโดะ เลอ. กะฆีเตอ บรี โกะ ซือมียา บาญะ อีนี ปี กะ โกะ ตูโปะ บีดา นะ บือลี โกะ ซือบารัก มากัด เลอ." 16 ตาปี เยซู ตีกัฮ กะ กูญา จะ "กูญา เตด ปายัฮ ปี. ลูมอฮ กาเญา เลอ ปี อาเมด โกะ ซือบารัก บรี กะ กูญา มากัด." 17 ตาปี โกะ มูเระ มือเลา กะ เยซู จะ "กามี ฮอย นามา ปัจ อีนี ลือเบฮ ซา ตือโปก โรตี ลีมา กือโตน ฌางัน อีกัด ดูวา อีโกยํ เลอ." 18 ตาปี เยซู ตีกัฮ กะ กูญา จะ "อาเมด มาแรฮ บรี กะ กู เลอ." 19 กะฆีเตอ เยซู ปือซัด กะ โกะ ซือมียา บาญะ บรี กูญา ดูโดะ เดะ รูโปจ. ญา อาเมด ตือโปก โรตี ลีมา กือโตน อีตู ฌางัน อีกัด ดูวา อีโกยํ มาแรฮ ดัฮ ญา ลางอฮ ลีฮัจ กะ ลาแงะ ญา บรี ซือลามัจ กะ ตูฮัด เดะ อาตัซ. กะฆีเตอ ญา ลือแปะ ตือโปก โรตี อีตู ญา อูโญะ กะ โกะ มูเระ นะ ญา. โกะ มูเระ โปด ฮาฆิ บรี กะ ลูมอฮ ซือมียา บาญะ อีตู. 20 กูญา ซือมูฮา ปาคัจ มากัด กือญัง ฮาบิฮ ดัฮ. โกะ มูเระ นะ เยซู กูญา มูงอจ โกะ กรือดะ บารัก มากัด นู ลือเบฮ เตอ บือเลฮ ดูวา-บือลัซ บีฌี ซูเปะ ปือนอฮ. 21 ลูมอฮ ซือมียา นู มากัด บารัก อีตู ซือมูฮา เตอ กีรา ซา โกะ กีลากี ฆามะ-จะ ลีมา รีบู อูรัก บือเลฮ เตด กีรา โกะ นีบีนี ฌางัน โกะ นานะ เลอ. 22 ดัดดัด อีตู เยซู ซูโรฮ โกะ มูเระ นะ ญา ตูโรด กะ ปราฮู ฌรือมัก ปี ดูลู กะ โซะ ซรือบัก. ตาปี เยซู ตะอาซิก เตอ ญา นาตี ซูโรฮ โกะ ซือมียา นู บาญะ ซีงี ปี ปาเระ กะ รูมัฮ นะ กูญา. 23 ตานา ญา บรี ลูมอฮ กูญา ตรือเบะ ปี ฮาบิฮ ดัฮ ญา ญาแญะ ปี กะ บูเกะ ซา อูรัก ญา บีดา นะ บือซาโวจ. ตานา รอจ กะ มาลับ ดัฮ ญา อาดา โซะ อีตู ซา อูรัก. 24 ตาปี ปราฮู อีตู อาดา ฌาโวฮ เดะ ตืองัฮ ลาโวจ ฆาโดฮ บือจางัฮ อูมะ ฌางัน อาเงน เลอ. 25 วะตู ตืองัฮ มาลับ ดัฮ เดะ ปูโกยํ ตีฆา ลือเบฮ เตอ เยซู บือฌาลัด มาแรฮ รอจ กะ โกะ มูเระ นะ ญา บือฌาลัด เดะ อาตัซ อาเย เลอ. 26 ตาปี ตานา โกะ มูเระ ลีฮัจ เยซู บือฌาลัด เดะ อาตัซ อาเย กูญา ปาคัจ ตือกือฌุจ ตาโกจ โตระ มือเลา จะ "ฮาตู เลอ." กะฆีเตอ กูญา ปาคัจ บือแกว. 27 ตาปี ดัดดัด อีตู เยซู ญา มือเลา ฌางัน กูญา จะ "บูวัจ ฮาตี ฌิบาฌิ เลอ. อีนี อีซี กู ตะอาซิก. ฌางัน ตาโกจ เลอ." 28 กะฆีเตอ เปโตร ตีกัฮ กะ ญา จะ "ตูฮัด เออ กะ ฌาดี เกา ซูโงฮ เตอ มีตา ซูโรฮ กู นะ บือเลฮ บือฌาลัด เดะ อาตัซ อาเย ปี รอจ กะ เกา เลอ." 29 กะฆีเตอ เยซู มือเลา จะ "มาแรฮ เลอ." กะฆีเตอ เปโตร ตูโรด เดะ ปราฮู ดัฮ บือฌาลัด เดะ อาตัซ อาเย นะ ปี บรี รอจ กะ เยซู. 30 ตาปี ตานา ญา บือฆารี อาเงน ตือฆัยํ เตอ ญา ตาโกจ ญา ซรือปะ นะ ตาลับ ดัฮ. กะฆีเตอ ญา บือซูระ จะ "ตูฮัด เออ ตูโลก กู เลอ." 31 ดัดดัด เยซู อาเงา ตางัน ปือฆัก ญา ดัฮ. เยซู มือเลา ฌางัน ญา จะ "เออ เกา อูรัก ปือจายา ดีกิ เลอ. บูวัจ นามา ปะ เกา บรีงัจ บาญะ กะฆีนี?" 32 ตานา กูญา กือดูวา ญาแญะ กะ ปราฮู ดัฮ อาเงน โปด ตือโดฮ ซืองะ ดัฮ. 33 ลูมอฮ ซือมียา เดะ ปราฮู กูญา มาแรฮ ตือมะ มือญือมัฮ กะ เยซู มือเลา จะ "ซูโงฮ เลอ เกา ฌาดี นานะ นะ ตูฮัด บือซัยํ เดะ อาตัซ เลอ." 34 วะตู กูญา ฌรือมัก ปี ดัฮ กูญา มาแรฮ รอจ กะ ตูโปะ เฆนเนซาเรด ดัฮ. 35 ตานา โกะ ซือมียา โซะ อีตู กราลา เยซู ดัฮ กูญา ซูโรฮ ซือมียา ปี กะ โซะ นังฆรี อีตู ราตาๆ. กูญา ปาคัจ บาวา โกะ ซือมียา เตด ซือนัง ญาวา มาแรฮ มียา เยซู ซือมูฮา. 36 กูญา มีตา เดะ เยซู บรี กูญา นะ ปือเตาะ เดะ บีดิก กาเยด นะ ญา. โกะ ซือมียา นู บือเลฮ ปือเตาะ ดัฮ เตอ กูญา ซือนัง บาฌิ ดัฮ ราตา ซือมียา เลอ.
1 ลือปัซ อีตู อาดา โกะ ลูมอฮ ฟาริซี ฌางัน โกะ ลูมอฮ ซือมียา อาฌัยํ ลาฆู ปือมือซัด นะ ตูฮัด กูญา มาแรฮ เดะ นังฆรี เยรูซาเลม ซารี เยซู ตาญา จะ 2 "บูวัจ นามา ปะ โกะ มูเระ นะ เกา บูวัจ ซาลัฮ กะ ฮาดัจ นะ โกะ ญัง-มูญัง? ลีฮัจ เลอ ตานา กูญา นะ มากัด ซือบารัก นามา โปด กูญา เตด บือเลฮ ตูโรจ กะ ลาฆู บาโซฮ ตางัน ดูลู. " กูญา จะ 3 กะฆีเตอ เยซู ตีกัฮ กะ กูญา จะ "บูวัจ นามา เลอ กาเญา ฌูฆา บูวัจ ซาลัฮ กะ ปือมือซัด นะ ตูฮัด เดะ อาตัซ เตอ บีดา นะ ตูโรจ กะ ฮาดัจ นะ กาเญา ตะอาซิก ดัฮ? 4 กรานา ตูฮัด บือซัยํ เดะ อาตัซ ปือซัด จะ 'กาเญา กือนา ตูเฮะ กะ เอด อาโปก นะ กาเญา เลอ.' ญา มือเลา ลาฆี จะ 'ซือมียา ดีฮา นู มือเลา กาซัยํ ฌางัน เอด อาโปก เดะ ญา ซือมียา อีตู เตอ กือนา นะ ฮูโกบ รอจ กะ มาตี เลอ.' ญา จะ. 5 ตาปี โซะ กาเญา เตอ กาเญา มือเลา จะ 'กะ ซือมียา ดีฮา มือเลา ฌางัน เอด อาโปก เดะ ญา จะ ซือบารัก ซือมูฮา นู ญา อาดา ดัฮ บีดา นะ บือบือลา กูญา เตอ บารัก อีตู ฌาดี บารัก มือญือมัฮ กะ ตูฮัด ดัฮ 6 กะฆีเตอ ญา เตด ปายัฮ นะ บือบือลา เอด อาโปก เดะ ญา เลอ.' กาเญา จะ. กะฆีเตอ เลอ กาเญา บูวัจ บรี ปือมือซัด นะ ตูฮัด เดะ อาตัซ เตด ฌาดี นามา เตอ บีดา นะ บือเลฮ ตูโรจ กะ ฮาดัจ นะ กาเญา ตะอาซิก. 7 กาเญา เลอ นู มูคา มาเนฮ ฮาตี ฌาฮัจ. อิซายา บือเลฮ ตูโดฮ ลาฆู นะ กาเญา รือมัก ดัฮ ฌาดี ปือมือเลา นะ ตูฮัด นู จะ 8 'ลูมอฮ อีนี กูญา ตูเฮะ กะ กู ซา มูโลจ เตอ ตาปี ฮาตี นะ กูญา ฌาโวฮ เดะ กู เลอ. 9 นู กูญา มือญือมัฮ กะ กู เตด ฌาดี นามา เลอ ซาเบะ กูญา อาเมด โกะ ปือมือซัด นะ ซือมียา มาแรฮ อาฌัยํ บือกะ ฌาดี ฮูโกบ นะ ตูฮัด.' " ญา จะ. 10 กะฆีเตอ เยซู บลาโลก โกะ ลูมอฮ ซือมียา บาญะ มาแรฮ ญา มือเลา ฌางัน กูญา จะ "เฮย กาเญา มือนีงัย เลอ. บรี ลาฆู อีนี มาโซะ เดะ ฮาตี นะ กาเญา เลอ. 11 บูกัด ลาฆู นู มาโซะ เดะ มูโลจ นู นะ บูวัจ บรี ซือมียา ตะอารัฮ ตาปี ลาฆู นู ตรือเบะ เดะ มูโลจ เตอ ญา เลอ นู บูวัจ บรี ญา ตะอารัฮ ดัฮ." ญา จะ. 12 ลือปัซ อีตู โกะ มูเระ นะ เยซู มาแรฮ มือเลา ฌางัน ญา จะ "เกา ตาฮู ดัฮ เฆอ กาลา โกะ ลูมอฮ ฟาริซี ดืองัยํ ลาฆู อีตู ดัฮ กูญา รีเซา-ฮาตี เลอ?" 13 ตาปี เยซู ตีกัฮ กะ กูญา จะ "ราตา ปูโฮด นู อาโปก เดะ อาตัซ นะ กู เตด บือเลฮ ตานัม เตอ ปูโฮด อีตู นะ กือนา กือตัจ บูวัก ดัฮ. 14 บือบียัยํ เลอ. กูญา ฌาดี ซือมียา ตูโญะ ฌาลัด นู มาตา บูตา. กะ อูรัก มาตา บูตา ซืออูรัก นะ ตูโตด ซามา อูรัก มาตา บูตา เตอ กูญา กือดูวา นะ ตรือซุ เดะ ตือลาฆา บือซามา-ซามา เลอ." ญา จะ. 15 ตาปี เปโตร มือเลา กะ เยซู จะ "มีตา จา มือญาเระ ปาซัน ลาฆู เกา จรือตา ซีงี บรี มาโซะ เดะ ฮาตี นะ กามี เลอ." 16 เยซู ตีกัฮ กะ ญา จะ "กาเญา ฌูฆา เลอ เตด บือเลฮ มาโซะ เดะ ฮาตี ลาฆี ซูโงฮ เฆอ? 17 กาเญา เตด ลีฮัจ เฆอ? บารัก ซือมูฮา นู ซือมียา มากัด มาโซะ กะ ดาลับ มูโลจ ดัฮ ญา ตูโรด ปี กะ ดาลับ โปรจ นะ ญา เอฮ ตรือเบะ ปี ดัฮ. 18 ตาปี ลาฆู อีตู นู ตรือเบะ เดะ มูโลจ นะ ซือมียา เตอ ดาตัก มาแรฮ เดะ ดาลับ ฮาตี นะ ญา ลาฆู อีตู เลอ นู บูวัจ บรี ญา ตะอารัฮ ดัฮ. 19 อาดา ลาฆู ฌาฮัจ ดาตัก มาแรฮ เดะ ดาลับ ฮาตี นะ ซือมียา เตอ อาดา ลาฆู อีงัจ ฌาฮัจ ลาฆู บูนอฮ ซือมียา ลาฆู ซาลัฮ บีนี กาวัด ลากี กาวัด เตอ. อาดา ลาฆู บือกาเซฮ ลาฆู มือญูรี ลาฆู ฌาดี ซะซี มืออูปัย ลาฆู มืออูปัจ เตอ อีนี เลอ นู ดาตัก ตรือเบะ เดะ ฮาตี. 20 ลาฆู อีนี ซือมูฮา เลอ นู บูวัจ บรี ซือมียา ตะอารัฮ ดัฮ. ตาปี นู นะ มากัด นาซี เตด ตูโรจ กะ ลาฆู บาโซฮ ตางัน ดูลู เตอ เตด บูวัจ บรี ญา ตะอารัฮ เลอ." เยซู ญา จะ. 21 ลือปัซ อีตู เยซู ตรือเบะ เดะ ตือปัจ อีตู ปี ดาปิก นังฆรี ทัยระ ฌางัน นังฆรี ซัยดอน. 22 ลีฮัจ เลอ อาดา นีบีนี บักซา คานาอัน ซืออูรัก นู ดูโดะ เดะ โซะ อีตู ญา มาแรฮ บลาโลก เยซู จะ "ตูฮัด นู นานะ นะ ราฌา ดาวิด เออ มีตา ตือจีฮัด กะ กู เลอ. นานะ นีบีนี นะ กู อาดา ฮาตู ตะอารัฮ มาโซะ ราโซะ ดัฮ ซูซัฮ โตระ เลอ." 23 ตาปี เยซู เตด ตีกัฮ นามา กะ ญา ซา ปาตัฮ โปด. โกะ มูเระ นะ เยซู มาแรฮ มีตา เดะ เยซู จะ "โปรฮ ญา ปี บูวัก เลอ. ซาเบะ ญา ตูโรจ กะ กีตา บลาโลก บูริ ตือลาลู." 24 เยซู ตีกัฮ จะ "ตูฮัด ซูโรฮ กู มาแรฮ เตอ บีดา นะ ซารี ลูมอฮ กาเมก นู ซือซัจ เดะ ลูมอฮ บักซา อิซราเอน ซา กูญา เลอ." 25 ตาปี นีบีนี อีตู มาแรฮ ตือมะ มือญือมัฮ กะ ญา มีตา จะ "ตูฮัด เออ ตูโลก กู เลอ." 26 เยซู ตีกัฮ กะ ญา จะ "บารัก มากัด นะ โกะ นานะ เตอ ดัฮ นะ อาเมด มาแรฮ บูวัก บรี กะ โกะ อาซู มากัด ฮอย เตด บาฌิ เลอ." 27 นีบีนี อีตู ตีกัฮ จะ "ซูโงฮ เลอ ตูฮัด. ตาปี โกะ อาซู บียาซา มากัด โกะ กรือดะ ลือเบฮ นู ฆูโฆยํ เดะ ปาปัด โตะ นะ ตูฮัด นะ ญา เลอ." ญา จะ. 28 กะฆีเตอ เยซู มือเลา กะ ญา จะ "นีบีนี เออ เกา ปือจายา บาฌิ กือฌะ ดัฮ เลอ. บือกะ เกา มีตา ดัฮ นะ ฌาดี กะฆีเตอ เลอ." ญา จะ. เดะ วะตู อีตู เลอ นานะ นีบีนี นะ ญา ซือนัง บาฌิ ดัฮ. 29 กะฆีเตอ เยซู ตรือเบะ เดะ โซะ อีตู บือฌาลัด ปี เดะ บีดิก ลาโวจ ฆาลิลี. ญา ญาแญะ บูเกะ ซา บูเกะ ดูโดะ โซะ อีตู ดัฮ. 30 อาดา ลูมอฮ ซือมียา บาญะ มาแรฮ ซารี ญา. กูญา ปาคัจ บาวา ลูมอฮ ซือมียา เตด ซือนัง ญาวา มาแรฮ ดาปัจ เยซู. อาดา ลูมอฮ ซือมียา จาเปะ ลูมอฮ ซือมียา กูโดก ลูมอฮ ซือมียา มาตา บูตา ลูมอฮ ซือมียา มือเลา เตด บือเลฮ ซือตืองัฮ เตอ. ลูมอฮ ซือมียา ปือญาเกะ แนฮ-ฌือแนฮ บาญะ อูรัก ฌูฆา กูญา บาวา มาแรฮ ตืองะ ดาปิก กากี นะ เยซู. ญา เตอ บือบือลา ลูมอฮ กูญา บรี ซือนัง ญาวา ราตา ซือมียา. 31 กะฆีเตอ โกะ ลูมอฮ ซือมียา บาญะ ปือและ-ฮาตี ซูโงฮ. กูญา ลีฮัจ โกะ ซือมียา เตด บือเลฮ มือเลา บือเลฮ มือเลา ดัฮ โกะ ซือมียา กูโดก ซือนัง บาฌิ ดัฮ โกะ ซือมียา จาเปะ บือเลฮ บือฌาลัด ดัฮ โกะ ซือมียา มาตา บูตา ลีฮัจ บือฆารี ดัฮ. กะฆีเตอ กูญา มือโอจ กะ ตูฮัด บือซัยํ นะ ลูมอฮ บักซา อิซราเอน. 32 ลือปัซ อีตู เยซู บลาโลก โกะ มูเระ นะ ญา มาแรฮ มือเลา ฌางัน กูญา จะ "กู ตือจีฮัด กะ โกะ ลูมอฮ ซือมียา อีนี. กูญา ดูโดะ ฌางัน กู รอจ กะ ตีฆา อารี ดัฮ. บารัก มากัด นะ กูญา โปด ฮาบิฮ ดัฮ. กู ตีเมา บรี กูญา ปาเระ ปี กะ รูมัฮ เตด ราซา มากัด นามา ตาโกจ-จะ กูญา นะ รือมัย ฮอย อูรัจ เดะ ตืองัฮ ฌาลัด เลอ." เยซู ญา จะ. 33 กะฆีเตอ โกะ มูเระ ตีกัฮ กะ เยซู จะ "ตือปัจ อีนี ฌาดี ฮูตัด ฮอย ซือมียา ดูโดะ. กีตา นะ ซารี ซือบารัก มากัด เปะ ดีฮา เลอ บรี ลูมอฮ ซือมียา บาญะ กะฆีนี นะ บือเลฮ มากัด กือญัง?" 34 กะฆีเตอ เยซู ตาญา กูญา จะ "กาเญา อาดา ตือโปก โรตี บราปา กือโตน?" กูญา ตีกัฮ กะ เยซู จะ "อาดา ตูโฌฮ กือโตน อาดา ฌางัน อีกัด มิดือมิ ซามา ดูวา ตีฆา อีโกยํ." 35 กะฆีเตอ เยซู ซูโรฮ บรี ลูมอฮ ซือมียา บาญะ อีตู ดูโดะ เดะ ตานัฮ. 36 ญา อาเมด ตือโปก โรตี ตูโฌฮ กือโตน อีตู ฌางัน อีกัด อีตู มาแรฮ ญา บรี ซือลามัจ กะ ตูฮัด. กะฆีเตอ ญา ลือแปะ ตือโปก โรตี ฌางัน อีกัด อีตู บรี กะ โกะ มูเระ นะ ญา บรี กะ กูญา ปาฮาฆิ กะ ลูมอฮ ซือมียา นู บาญะ อีตู. 37 กูญา ซือมูฮา ปาคัจ มากัด กือญัง ฮาบิฮ ดัฮ. กะฆีเตอ โกะ มูเระ มูงอจ โกะ กรือดะ บารัก มากัด นู ลือเบฮ เตอ บือเลฮ ตูโฌฮ ราฆา ปือนอฮ. 38 ลูมอฮ ซือมียา นู มากัด อีตู อาดา กีลากี ปัจ รีบู อูรัก เตด กีรา โกะ นีบีนี ฌางัน โกะ นานะ. 39 กะฆีเตอ เยซู บรี ลูมอฮ ซือมียา นู บาญะ อีตู บาลิ ปี. ญา ญาแญะ ปราฮู มาแรฮ กะ ตูโปะ มาฆาดัน.
1 โกะ ลูมอฮ ฟาริซี ฌางัน โกะ ลูมอฮ ซะดูซี มาแรฮ ดาปัจ เยซู บีดา นะ ลกลีฮัจ ญา. กูญา มีตา เดะ เยซู บรี ญา บูวัจ ปือนานา ซีดี ซือมาจับ บรี ตาฮู จะ ญา ฌาดี ซือมียา นู ตูฮัด เดะ อาตัซ ซูโรฮ มาแรฮ. 2 เยซู ตีกัฮ กะ กูญา จะ "วะตู โซะ ปะซือญา กาเญา ลีฮัจ ลาแงะ มีรัฮ กาเญา บียาซา มือเลา จะ 'มัฮปาฆี อาเงน นะ ตือโดฮ เลอ.' 3 ตาปี กะ โซะ ปาฆี กาเญา ลีฮัจ ลาแงะ มีรัฮ บือดาบู กาเญา นะ มือเลา จะ 'อารี อีนี อาเงน นะ ตือฆัยํ เลอ.' กาเญา ลีฮัจ โซะ ลาแงะ บือเลฮ ตูโดฮ ลาฆู อาเงน มัฮปาฆี เตอ ตาปี กาลา กาเญา ลีฮัจ ปือนานา นะ ฮาดัจ อีนี กาเญา เตด ตาฮู อารัฮ เลอ. 4 ลูมอฮ ซือมียา ฮาดัจ อีนี นู ฌาฮัจ นู ฮอย เตด บือฆูนา เตอ กูญา ซูกา นะ ลีฮัจ ปือนานา นู มือฆัฮ. ตาปี ฮอย ปือนานา นะ บรี ลีฮัจ กะ กูญา ลือเบฮ ซา ปือนานา นะ โยนา เลอ." เยซู ญา จะ. กะฆีเตอ เยซู ญา ตีงัน กูญา ปี ดัฮ. 5 ตานา โกะ มูเระ ฌรือมัก ปี กะ โซะ ซรือบัก ดัฮ กูญา ลีฮัจ จะ กูญา ลูปา อาเมด ตือโปก โรตี บือปี ซามา. 6 กะฆีเตอ เยซู มือเลา ฌางัน กูญา จะ "กาเญา เออ กือนา ฌาฆา บรี บาฌิ เลอ เดะ ราฆี นะ ลูมอฮ ฟาริซี ฌางัน ลูมอฮ ซะดูซี." เยซู ญา จะ. 7 โกะ มูเระ มือเลา บือซามา-ซามา จะ "ญา มือเลา กะฆีนี ซาเบะ กีตา เตด บือเลฮ อาเมด ตือโปก โรตี มาแรฮ ซามา เลอ." 8 ตาปี เยซู ตาฮู ลาฆู อีนี ญา มือเลา ฌางัน กูญา จะ "เออ กาเญา ซือมียา นู ปือจายา กิดีกิ เลอ. บูวัจ นามา ปะ กาเญา มือเลา บือซามา-ซามา ปาซัน ลาฆู ฮอย ตือโปก โรตี? 9 กาเญา เตด บือเลฮ มาโซะ เดะ ฮาตี ลาฆี เฆอ? กาเญา จับ เตด บือเลฮ เฆอ? ตานา กู ลือแปะ ตือโปก โรตี ลีมา กือโตน บรี กะ โกะ ลูมอฮ ซือมียา ลีมา รีบู อูรัก อีตู เตอ กาเญา มูงอจ โกะ กรือดะ บารัก มากัด บราปา ซูเปะ เลอ? 10 ตานา ลือแปะ ตือโปก โรตี ตูโฌฮ กือโตน บรี กะ โกะ ลูมอฮ ปัจ รีบู อูรัก อีตู เตอ กาเญา มูงอจ โกะ กรือดะ บารัก มากัด บราปา ราฆา เลอ? 11 บูวัจ นามา ปะ กาเญา เตด มาโซะ เดะ ฮาตี จะ นู กู เตด บือเลฮ มือเลา ปาซัน ซา ลาฆู ตือโปก โรตี เตอ. ฌาฆา บรี บาฌิ เลอ เดะ ราฆี นะ ลูมอฮ ฟาริซี ฌางัน ลูมอฮ ซะดูซี." เยซู ญา จะ. 12 กะฆีเตอ เลอ โกะ มูเระ บือเลฮ มาโซะ เดะ ฮาตี จะ เยซู เตด บือเลฮ ปือซัด บรี กูญา นะ ฌาฆา ราฆี เดะ ตือโปก โรตี เตอ. บูกัด กะฆีเตอ ตาปี ญา นะ บรี กูญา ฌาฆา เดะ ลาฆู นู โกะ ลูมอฮ ฟาริซี ฌางัน โกะ ลูมอฮ ซะดูซี นะ อาฌัยํ. 13 ตานา เยซู ปี กะ โซะ ซือบือลัฮ นังฆรี ซีซาเรีย ฟีลิบปี เตอ ญา ตาญา โกะ มูเระ นะ ญา จะ "โกะ ซือมียา อาดา มือเลา จะ กู นู นานะ นะ อูมัจ-ซือมียา เตอ ฌาดี ซาปา เลอ?" 14 โกะ มูเระ กูญา ตีกัฮ จะ "อาดา ซือมียา ซือตืองัฮ จะ เกา ฌาดี โยฮัน นู บรี ลาฆู ซือลับ เดะ อาเย เตอ. อาดา ซือมียา อาซิก จะ ฌาดี เอลียา. อาดา ฌูฆา ซือมียา นู จะ เกา ฌาดี เยเรมี เตอ เฆอ-จะ ซือมียา นู ซืออูรัก ลาฆี เดะ ลูมอฮ ซือมียา ตูโดฮ ลาฆู นะ ตูฮัด." 15 เยซู ตาญา กูญา จะ "ตาปี โซะ ลูมอฮ กาเญา เตอ กาเญา มือเลา จะ กู ฌาดี ซาปา?" 16 ซีโมน นู ปือนามา อาซิก จะ เปโตร ญา ตีกัฮ จะ "เกา ฌาดี ราฌา นู บรี ซือลามัจ อีตู เลอ ฌาดี นานะ นะ ตูฮัด เดะ อาตัซ ตูฮัด นู ฮีโดะ เตอ เลอ." 17 กะฆีเตอ เยซู ตีกัฮ กะ ญา จะ "ซีโมน นานะ นะ โยนา เออ เกา ซือนัง ซือลามัจ เลอ. บูกัด ซือมียา นู ปลีฮัจ ลาฆู อีนี กะ เกา ดัฮ ตาปี อาโปก เดะ กู นู เดะ อาตัซ ลาแงะ เตอ ญา เลอ นู ปลีฮัจ บรี กะ เกา ตาฮู ดัฮ. 18 โซะ กู ฌูฆา กู มือเลา ฌางัน เกา จะ เกา ฌาดี เปโตร ฌาดี บาตู บือซัยํ เลอ. เดะ อาตัซ บาตู อีนี กู นะ ตืองะ ลูมอฮ นะ กู เตอ. มีเซ-จะ ลาฆู มาตี โปด นะ ฌือนัฮ เดะ ลูมอฮ อีตู เตด บือเลฮ ดัฮ เลอ. 19 กู นะ บรี กูจี นะ ดือนียา บารู นะ ตูฮัด กะ เกา. ลาฆู นามา นู เกา นะ บลารัก เดะ ดือนียา เตอ ลาฆู อีตู นะ กือนา บลารัก เดะ โซะ อาตัซ ลาแงะ ฌูฆา เลอ. ลาฆู นามา โปด นู เกา นะ บรี บูวัจ เดะ ดือนียา เตอ ลาฆู อีตู เตอ นะ กือนา บรี บูวัจ เดะ โซะ อาตัซ ลาแงะ ฌูฆา เลอ." เยซู ญา จะ. 20 กะฆีเตอ เยซู บลารัก กะ โกะ มูเระ นะ ญา ตีเมา บรี กูญา มือญาเระ กะ ซาปา โปด ปาซัน นู ญา ฌาดี ราฌา นู บรี ซือลามัจ อีตู เลอ. 21 ตะเดะ วะตู อีตู เลอ เยซู ฮึนตะ นะ มือญาเระ ซัฮ กะ โกะ มูเระ นะ ญา จะ "กู ฆาโดฮ นะ ปี กะ นังฆรี เยรูซาเลม เลอ. กู นะ กือนา ลาวัด ซาเกะ ซูซัฮ บาญะ ฌือแนฮ นู โกะ กือปาลา นังฆรี โกะ ลูมอฮ ซามี ซัยํ-บือซัยํ ฌางัน โกะ ซือมียา อาฌัยํ ลาฆู ปือมือซัด นะ ตูฮัด นะ บูวัจ กะ กู. กู นะ กือนา บูนอฮ บรี มาตี เลอ ตาปี เดะ อารี นู ตีฆา กู นะ กือนา บูวัจ บรี ฮีโดะ ปาเระ เดะ มาตี ปูลัก." เยซู ญา จะ. 22 กะฆีเตอ เปโตร ญา รือฆัก เยซู บรี มืองือละ เดะ กูญา อูจะ บลารัก กะ ญา จะ "ฌางัน บรี ฌาดี กะฆีเตอ เลอ ตูฮัด. ลาฆู อีตู นะ เตด บือฌาดี ฌางัน เกา ลาลู." 23 ตาปี เยซู ญา กรือเลฮ ปี มือเลา ฌางัน เปโตร จะ "เกา กือปาลา ซีตัด เออ ปี ฌาโวฮ บูวัก โซะ บลากัก กู เลอ. เกา ฌาดี ซือรูปา บาตู นู นะ บรี กู ตือซีปะ. เกา เตด กีรา ตูโรจ กะ ตูฮัด เดะ อาตัซ เตอ ตาปี เกา ปี กีรา ตูโรจ กะ โกะ ซือมียา เลอ." เยซู ญา จะ. 24 กะฆีเตอ เยซู มือเลา ฌางัน โกะ มูเระ นะ ญา จะ "ซือมียา ดีฮา นู อาดา ฮาตี นะ มาแรฮ ตูโรจ กะ กู เตอ บรี ญา บราดู บือฮีมัจ กะ ญาวา ตะอาซิก ดูลู บรี กะ ญา อาเกะ ตาโงก กายู ปลีตัก นะ ญา ตูโรจ กะ กู มาแรฮ เลอ. 25 กรานา-จะ ซือมียา ดีฮา นู อาดา ฮาตี นะ ฌาฆา ญาวา นะ ญา บรี ซือนัง เตอ ญาวา ญา นะ ฌาฮานัม เลอ. ตาปี ซือมียา ดีฮา นู ซรัฮ ญาวา นะ ญา บูวัก กรานา ลีฮัจ กะ กู ซือมียา อีตู เตอ ญา นะ ดาปัจ ลาฆู ฮีโดะ ซูโงฮๆ เลอ. 26 กะ ซือมียา ดีฮา บือเลฮ โกะ ซือบารัก ซือมูฮา เดะ ดือนียา ตาปี ญาวา นะ ญา นะ ฌาฮานัม ดัฮ ซือมียา อีตู นะ บือเลฮ อูโตก นามา เลอ? ซือมียา อีตู นะ บรี รือฆา นามา บีดา นะ อาเมด ญาวา นะ ญา ปาเระ? 27 ซาเบะ-จะ กู นู นานะ นะ อูมัจ-ซือมียา เตอ กู นะ มาแรฮ บือซายา บือซรี บือกะ อาโปก เดะ กู เตอ นะ มาแรฮ บือซามา ฌางัน โกะ ลูมอฮ ฮูลู-บาลัก นะ กู ฌูฆา. วะตู อีตู เลอ กู นะ บรี บาลัซ ปาเระ กะ ราตา ซือมียา ตูโรจ บือกะ ปือบูวัจ นะ กูญา. 28 กู มือเลา ฌางัน กาเญา ลาฆู นู ซูโงฮ จะ อาดา ซือมียา นู บือดีรี โซะ อีนี ซือตืองัฮ นู นะ ฮอย เตด มาตี ดูลู ตือดะ กูญา นะ ลีฮัจ กู นู นานะ นะ อูมัจ-ซือมียา เตอ กู มาแรฮ ปลีฮัจ ฌาดี ราฌา เลอ." เยซู ญา จะ.
1 ลือปัซ นัม อารี ดัฮ เยซู บาวา เปโตร ยากอบ ฌางัน โยฮัน อาดี เดะ ยากอบ ปี ซา กูญา ญาแญะ กะ บูเกะ นู ตีงี ซา บูเกะ. 2 เปะ อีตู กูญา ลีฮัจ จะ ญาวา นะ เยซู ซาเลด ดัฮ. มูคา นะ ญา บือซายา โตระ ซือรูปา กะ มาตาอารี. กาเยด นะ ญา โปด ปูเตฮ มรือแจว ซือรูปา กะ จรัฮ ซียัก. 3 นี เลอ กูญา ลีฮัจ มูซา ฌางัน เอลียา มาแรฮ ปลีฮัจ ดัฮ กูญา ดูวา อูรัก ตืองัฮ มือเลา ฌางัน เยซู. 4 กะฆีเตอ เปโตร มือเลา ฌางัน เยซู จะ "ตูฮัด เออ นู กามี อาดา โตะ อีนี โบะ บาฌิ ดัฮ เลอ. ดัฮ กือนา เดะ ฮาตี นะ เกา กู นะ บูวัจ ซาเราะ ตีฆา บีฌี นะ เกา ซา นะ มูซา ซา นะ เอลียา ซา." ญา จะ. 5 ตืองัฮ เปโตร ญา มือเลา ลาฆี เตอ ลีฮัจ เลอ อาดา กือมูวัง นู บือซายา มาแรฮ ตูโดก เดะ อาตัซ กูญา. อาดา ซูวารา บูงี ดาตัก มาแรฮ เดะ กือมูวัง มือเลา จะ "ซือมียา อีนี เลอ ฌาดี นานะ นะ กู นู กู ซายัก. กู ซูกา-ฮาตี กะ ญา บาญะ. กือนา มือนีงัย กะ ญา เลอ." ญา จะ. 6 ตานา ดืองัยํ ปือมือเลา อีนี โกะ มูเระ กูญา ตาโกจ โตระ กูญา ตือมะ มูคา รอจ กะ ตานัฮ. 7 ตาปี เยซู มาแรฮ ปือเตาะ ญาวา นะ กูญา มือเลา จะ "บีกัซ เลอ. เตด ปายัฮ ตาโกจ." 8 ตานา กูญา ลางอฮ ปาลา ลีฮัจ กะ โซะ อาตัซ กูญา ลีฮัจ เตด บือฆารี ซาปา ดัฮ บือฆารี ซา เยซู เลอ. 9 ตานา กูญา ตืองัฮ ตูโรด มาแรฮ เดะ บูเกะ เตอ เยซู ปือซัด กะ โกะ มูเระ ตีฆา อูรัก จะ "ลาฆู นู ปลีฮัจ กะ กาเญา ดัฮ เตอ ฌางัน มือญาเระ กะ ซือมียา ดีฮา เลอ ตือดะ กู นู นานะ นะ อูมัจ-ซือมียา อีนี นะ ฮีโดะ ปาเระ เดะ มาตี ปูลัก." 10 กะฆีเตอ โกะ มูเระ ตีฆา อูรัก ตาญา เยซู จะ "บูวัจ นามา โกะ ซือมียา อาฌัยํ ลาฆู ปือมือซัด นะ ตูฮัด กูญา มือเลา จะ เอลียา ฆาโดฮ มาแรฮ ดูลู?" 11 เยซู ตีกัฮ กะ กูญา จะ "ซูโงฮ เลอ เอลียา ญา นะ มาแรฮ ดูลู ญา นะ ซียะ บือนา ซือมูฮา บรี บาฌิ บือกะ นู ดูลู. 12 ตาปี กู มือญาเระ กะ กาเญา จะ เอลียา บือเลฮ มาแรฮ ดัฮ เลอ. โกะ ลูมอฮ ซือมียา เตอ ฮอย เตด กราลา ญา บูวัจ ลาฆู ตะอารัฮ กะ ญา บือกะ ตูโรจ กะ ฮาตี นะ กูญา. กะฆีเตอ กูญา นะ บูวัจ บรี กู นู นานะ นะ อูมัจ-ซือมียา นะ ตาฮัด ซูซัฮ ฌูฆา." เยซู ญา จะ. 13 กะฆีเตอ โกะ มูเระ อีตู กูญา มาโซะ เดะ ฮาตี จะ นู เยซู มือเลา กะฆีเตอ ฌางัน กูญา ญา มือเลา ปาซัน นะ โยฮัน นู บรี ซือลับ เดะ อาเย เลอ. 14 วะตู กูญา มาแรฮ รอจ กะ โกะ ลูมอฮ ซือมียา ดัฮ อาดา ซือมียา ซืออูรัก มาแรฮ มียา เยซู ตูกู ลูโตจ โซะ ฮึลด มูคา ญา มือเลา จะ 15 "เยซู เออ มีตา บรี เกา ตือจีฮัด เลอ กะ นานะ กีลากี นะ กู. ซาเบะ ญา เตอ ฌาดี ปือญาเกะ ฆีลา บาบี ซูซัฮ โตระ เลอ. ซัจๆ ญา ฆูโฆยํ เดะ อาปี ฆูโฆยํ เดะ อาเย โปด. 16 กู บือเลฮ บาวา ญา มาแรฮ มียา ลูมอฮ มูเระ นะ เกา ดัฮ ตาปี กูญา บือบือลา ญา บรี ซือนัง เตด บือเลฮ ดัฮ เลอ." ญา จะ. 17 กะฆีเตอ เยซู ตีกัฮ จะ "เฮอ โกะ ซือมียา ฮาดัจ อีนี ลาฆู ปือจายา ฮาบิฮ ปี กะ ดีฮา ดัฮ เลอ? กาเญา ซือซัจ ซาลัฮ ซูโงฮ เลอ. กู ฆาโดฮ ดูโดะ ฌางัน กาเญา บราปา ลามา ลาฆี? กู ฆาโดฮ นะ ตาฮัด ลูมอฮ กาเญา บราปา ลามา เลอ? กือนา อาเมด นานะ อีตู บือมาแรฮ กะ กู เปะ อีนี." เยซู ญา จะ. 18 กะฆีเตอ เยซู ญา โปรฮ ฮาตู บรี ตรือเบะ เดะ นานะ อีตู ดัดดัด นานะ อีตู โปด ซือนัง บาฌิ ดัฮ. 19 เดะ บลากัก โกะ มูเระ มาแรฮ ซา กูญา ตาญา เยซู จะ "บูวัจ นามา ลูมอฮ กามี โปรฮ ฮาตู อีตู เตด บือเลฮ ดัฮ?" 20 เยซู ตีกัฮ กะ กูญา จะ "กาเญา โปรฮ ญา เตด บือเลฮ ซาเบะ กาเญา เตด ปือจายา. ซูโงฮ เลอ กู มือเลา ฌางัน กาเญา จะ กะ กาเญา บือเลฮ ปือจายา กิดีกิ ตารา บีฌี ตาโระ นู ดือมิ ซือบีฌี กาเญา นะ บือเลฮ ปือซัด กะ บูเกะ อีนี จะ กือนา อูบัฮ เดะ โซะ อีนี ปี กะ โซะ อีตู เลอ. กะฆีเตอ บูเกะ อีนี นะ อูบัฮ ปี. ฮอย นามาๆ เลอ นู กาเญา นะ บูวัจ เตด บือเลฮ. " เยซู ญา จะ. 22 ตานา เยซู ฌางัน โกะ มูเระ นะ ญา อาดา บือมุน บือซามา เดะ โซะ นังฆรี ฆาลิลี เยซู มือเลา ฌางัน กูญา จะ "กู นู นานะ นะ อูมัจ-ซือมียา อีนี กู นะ กือนา อาตัจ บรี กะ โกะ ลูมอฮ ซือมียา รีฆะ เตอ. 23 กูญา นะ บูนอฮ กู ตาปี เดะ อารี ตีฆา กู นะ กือนา บูวัจ บรี ฮีโดะ ปาเระ ปูลัก." เยซู ญา จะ. กะฆีเตอ โกะ มูเระ นะ ญา ฌาโวฮ-ฮาตี ซูโงฮ. 24 ตานา กูญา มาแรฮ รอจ กะ ตูโปะ คาเปอนาอุม ดัฮ โกะ ซือมียา มูงอจ อาเซน รูมัฮ มือญือมัฮ กูญา มาแรฮ ตาญา เปโตร จะ "ฌาดี กะฮามี? บูมอยํ นะ กาเญา บียาซา บายัยํ อาเซน รูมัฮ มือญือมัฮ เฆอ?" 25 เปโตร ตีกัฮ กะ กูญา จะ "บายัยํ เลอ." ตานา เปโตร รอจ กะ รูมัฮ ดัฮ เยซู มือเลา ฌางัน ญา ดูลู ตาญา จะ "ซีโมน เออ เกา อีงัจ กะฮามี เลอ? นู โกะ ราฌา เดะ ดือนียา อีนี ปูงอจ อาเซน กูญา ปูงอจ เดะ ซาปา เลอ? ปูงอจ เดะ โกะ นานะ นะ กูญา เฆอ-จะ เดะ โกะ ลูมอฮ ซือมียา อาซิก?" เยซู ญา จะ. 26 กะฆีเตอ เปโตร ตีกัฮ จะ "เดะ ลูมอฮ ซือมียา อาซิก เลอ." เยซู มือเลา กะ ญา จะ "กะฆีเตอ เลอ โกะ นานะ นะ ราฌา เตด ปายัฮ บายัยํ นามา เลอ. 27 ตาปี กีตา ตีเมา นะ บรี กะ กูญา ดือมิ-ฮาตี. กะฆีเตอ เกา ปี เลอ มืองาเยน เดะ ลาโวจ บือเลฮ อีกัด ลามูลา ดัฮ บูกา มูโลจ นะ ญา เกา นะ ดาปัจ ดูเวะ ซา รีเงะ. ดูเวะ อีตู เกา กือนา บาวา ปี บายัยํ อาเซน นะ กีตา ดูวา อูรัก." เยซู ญา จะ.
1 วะตู อีตู โกะ มูเระ มาแรฮ ตาญา เยซู จะ "เดะ ดาลับ ลูมอฮ ซือมียา นู ตูฮัด บือบือลา ฌาดี ราฌา เตอ ซาปา เลอ นู นะ ฌาดี ซือมียา ซัยํ-บือซัยํ เดะ กาวัด?" 2 กะฆีเตอ เยซู บลาโลก นานะ ซืออูรัก มาแรฮ บรี ญา บือดีรี เดะ ตืองัฮ ลูมอฮ กูญา. 3 ญา มือเลา จะ "กู มือเลา ฌางัน กาเญา ลาฆู นู ซูโงฮ จะ กะ กาเญา เตด บราเลฮ-ฮาตี ฌาดี ซือรูปา โกะ นานะ ดือมิ กาเญา นะ มาโซะ กะ ลูมอฮ ซือมียา นะ ตูฮัด อีตู ฮอย เตด บือเลฮ เลอ. 4 กะฆีเตอ ซือมียา ดีฮา นู มือนูโนะ ญาวา ตะอาซิก ฌาดี ซือรูปา นานะ ดือมิ อีนี ญา เลอ นู นะ ฌาดี ซือมียา ซัยํ-บือซัยํ เดะ กาวัด เดะ ลูมอฮ ซือมียา อีตู นู อาดา ตูฮัด ฌาดี ราฌา. 5 ซือมียา ดีฮา นู ซาโมจ นานะ ดือมิ กะฆีนี ซืออูรัก กรานา นามา นะ กู เตอ ซือรูปา ซือมียา อีตู ซาโมจ กู ดัฮ เลอ. 6 เยซู มือเลา ลาฆี จะ "ซือมียา ดีฮา นู บูวัจ บรี นานะ ดือมิ ซืออูรัก นู ปือจายา กะ กู นะ บรี ญา ซาลัฮ ฌาลัด เตอ ดัฮ อาเมด บาตู ฆีลิก ตือโปก นู บือซัยํ มาแรฮ อีกัจ เดะ ลีเฮ นะ ญา เตอ บรี ญา ลือมัซ มาตี บูวัก เดะ ลาโวจ นู ดาลับ โปด บาฌิ เลอ. 7 จือลากา เลอ ดือนียา อีนี ซาเบะ อาดา ลาฆู นู บูวัจ บรี ซาลัฮ ฌาลัด. ซาเบะ-จะ ฆาโดฮ อาดา ลาฆู นู บูวัจ บรี ซาลัฮ ฌาลัด เตอ ตาปี จือลากา เลอ ซือมียา นู บูวัจ บรี ซาลัฮ กะฆีเตอ. 8 กาเลา-จะ ตางัน นะ เกา เฆอ-จะ กากี นะ เกา เตอ บูวัจ บรี เกา ซาลัฮ ดัฮ ตางัน อีตู กากี อีตู เกา กือนา กรัจ ตีงัน บูวัก เลอ. นู เกา นะ มาโซะ รอจ กะ ฮีโดะ กูโดก ซือบือลัฮ โปด บาฌิ เดะ อาดา กากี ตางัน ดูวา บือลัฮ เลอ ตาปี นะ กือนา บูวัก เดะ อาปี นอรากา นู อาดา ซือลาลู เลอ. 9 กาเลา-จะ มาตา นะ เกา บูวัจ บรี เกา ซาลัฮ ดัฮ มาตา อีตู เตอ เกา กือนา จูเกน บือตรือเบะ บูวัก เลอ. นู เกา นะ มาโซะ รอจ กะ ฮีโดะ เตอ บูตา ซือบือลัฮ โปด บาฌิ เดะ อาดา มาตา ดูวา บือลัฮ เลอ ตาปี นะ กือนา บูวัก เดะ อาปี นอรากา." เยซู ญา จะ. 10 เยซู มือเลา ลาฆี จะ "ลีฮัจ เลอ ฌางัน มือฌัฮ นานะ ดือมิ อีนี ซืออูรัก โปด. กู มือเลา ฌางัน กาเญา จะ เดะ โซะ อาตัซ ลาแงะ เตอ ลูมอฮ ฮูลู-บาลัก นู บือบือลา กูญา อาดา ตือปัจ นะ กูญา โซะ ฮึลด มูคา นะ อาโปก เดะ กู ญา นู ดูโดะ โซะ อาตัซ ลาแงะ เลอ. 12 "กาเญา อีงัจ กะฮามี เลอ? ซือมียา ซืออูรัก นู อาดา กาวัด กาเมก ซือราตุซ อีโกยํ เตอ กะ กาเมก นู ซืออีโกยํ ซือซัจ ลือแงะ ปี ดัฮ ญา นะ บูวัจ กะฮามี เลอ? ซูโงฮ ญา นะ ตีงัน กาเมก นู ซือมีลัด-ปูโลฮ ซือมีลัด อีโกยํ เดะ อาตัซ บูเกะ ดูลู. กะฆีเตอ ญา นะ ปี มียา นู ซืออีโกยํ นู ซือซัจ ฌาลัด ดัฮ บูกัด เฆอ? 13 ตานา ดาปัจ ดัฮ ซูโงฮ เลอ กู มือเลา ฌางัน กาเญา จะ ญา ซูกา-ฮาตี เดะ กาเมก ซืออีโกยํ นู ซือซัจ ฌาลัด อีตู ลือเบฮ เดะ นู ซือมีลัด-ปูโลฮ ซือมีลัด นู เตด ดือละ ซือซัจ ปี เลอ. 14 กะฆีเตอ เลอ อาโปก นะ กาเญา นู อาดา เดะ โซะ อาตัซ ลาแงะ เตอ ญา ตีเมา บรี กะ นานะ ดือมิ นู ซืออูรัก โปด นะ ฌาฮานัม ดัฮ เลอ." เยซู ญา จะ. 15 เยซู มือเลา จะ "กะ อาดี-บราดี นู ปือจายา ซืออูรัก บูวัจ ซาลัฮ กะ เกา กือนา ปี มือญาเระ กะ ญา ปาซัน นู ซาลัฮ อีตู ซา กาเญา ดูวา บราดี. ดัฮ ญา มือนีงัย กะ เกา เกา นะ บือเลฮ อาดี-บราดี บาลิ ปาเระ ปูลัก. 16 ดัฮ ญา เตด มือนีงัย กะ เกา กือนา บาวา ซือมียา อาซิก ปี ซามา ซืออูรัก เฆอ-จะ ดูวา อูรัก บีดา-จะ 'ปือมือเลา อาดู ราตา ฆาโดฮ อาดา ซะซี มือเลา ดูวา ตีฆา อูรัก บรี ตาฮู จะ ฌาดี ลาฆู นู ซูโงฮ.' บือกะ ซูรัจ ปือมือเลา นะ ตูฮัด ปือซัด ดัฮ. 17 ดัฮ ญา เตด มือนีงัย กูญา อีตู กือนา ปี มือญาเระ กะ ลูมอฮ นะ ตูฮัด. ดัฮ ญา เตด มือนีงัย ลูมอฮ นะ ตูฮัด บรี ฌาดี-จะ ญา เตอ ซือรูปา ซือมียา บักซา อาซิก นู เตด ปือจายา ซือรูปา ซือมียา มูงอจ อาเซน เลอ. 18 กู มือเลา ลาฆู นู ซูโงฮ ฌางัน กาเญา จะ ลาฆู นามาๆ นู กาเญา นะ บลารัก เดะ ดือนียา เตอ นะ ฌาดี ลาฆู นู กือนา บลารัก เดะ ลาแงะ ฌูฆา เลอ. ลาฆู นามาๆ โปด นู กาเญา นะ บรี บูวัจ เดะ ดือนียา เตอ นะ ฌาดี ลาฆู นู กือนา บรี บูวัจ เดะ ลาแงะ ฌูฆา เลอ. 19 "กู มือเลา ฌางัน กาเญา ปูลัก จะ กะ อาดา ดูวา ตีฆา อูรัก เดะ ลูมอฮ กาเญา นู ดูโดะ เดะ ดือนียา อีนี เตอ นู นะ ซามา-ฮาตี บือซาโวจ มีตา ลาฆู นามาๆ โปด อาโปก นะ กู นู ดูโดะ เดะ อาตัซ ลาแงะ ญา นะ บูวัจ บรี ฌาดี กะฆีเตอ เลอ. 20 ซาเบะ-จะ ตือปัจ ดีฮา อาดา ดูวา ตีฆา อูรัก บือมุน เดะ นามา นะ กู เตอ กู นะ ดูโดะ เดะ ตืองัฮ กูญา ตือปัจ อีตู เลอ." เยซู ญา จะ. 21 ลือปัซ อีตู เปโตร มาแรฮ ตาญา เยซู จะ "ตูฮัด เออ อาดี-บราดี เดะ กู นะ บูวัจ ซาลัฮ กะ กู บราปา กาลี นู กู นะ กือนา อาเกะ ซาลัฮ นะ ญา? รอจ กะ ตูโฌฮ กาลี เฆอ?" 22 เยซู ตีกัฮ กะ ญา จะ "บูกัด ตูโฌฮ กาลี เลอ. กู มือเลา ฌางัน เกา จะ กือนา อาเกะ ซาลัฮ ตูโฌฮ-ปูโลฮ ตูโฌฮ ซือมาญัก-รอจ เลอ. 23 ซาเบะ นู ตูฮัด นะ มาแรฮ บือบือลา ฌาดี ราฌา เตอ ญา ซือรูปา บือกะ ลาฆู กะฆีนี. อาดา ราฌา ซืออูรัก นู นะ กีรา ดูเวะ ฌางัน ปราโซฮ นะ ญา. 24 กาลา ญา ฮึนตะ นะ กีรา กูญา บาวา ปราโซฮ ซืออูรัก มาแรฮ นู อาดา ฮูตัก รีเงะ มัซ ซือละซา รีเงะ. 25 ซือมียา อีตู ดูเวะ เตด ฆือนะ นะ บายัยํ ฮูตัก. กะฆีเตอ ราฌา ปือซัด บรี อาเมด ซือมียา อีตู ลากี บีนี ฌางัน นานะ ฌูวัน ฌาดี ปราโซฮ บรี ฌูวัน โกะ ซือบารัก นะ กูญา ซือมูฮา ฌูฆา บีดา นะ บายัยํ ฮูตัก. 26 ซือมียา นู บือฮูตัก อีตู ญา ตือมะ มือญือมัฮ กะ ราฌา จะ 'โอ ราฌา เออ มีตา นาตี ดูลู. กู นะ บายัยํ ฮูตัก บรี ฮาบิฮ เลอ.' 27 กะฆีเตอ ราฌา ญา ตือจีฮัด กะ ซือมียา อีตู ญา อาเกะ ฮูตัก บรี ดัฮ ปลือปัซ ซือมียา อีตู ปี. 28 "ตาปี ปราโซฮ นู อีตู ญา ตรือเบะ ปี ดาปัจ กาวัด ปราโซฮ ซืออูรัก ปูลัก นู อาดา ฮูตัก เดะ ญา ซือราตุซ รีเงะ ปีระ. ญา รีฆะ จือแกะ ลีเฮ มือเลา จะ 'กือนา บายัยํ ฮูตัก กะ กู เลอ.' 29 "กะฆีเตอ ซือมียา อีตู ญา ตือมะ มือญือมัฮ มือเลา จะ 'มีตา นาตี ดูลู. กู นะ บายัยํ บรี ฮาบิฮ เลอ.' 30 ตาปี ญา ตีเมา. ญา อาเมด ซือมียา อีตู บือปี กานัก เดะ ปือฌารา ตือดะ ญา นะ บายัยํ ฮูตัก บรี ฮาบิฮ ดูลู. 31 ตานา ลูมอฮ ปราโซฮ นู อาซิก ตาฮู ลาฆู อีตู นู บือฌาดี ดัฮ กูญา ฌาโวฮ-ฮาตี บาญะ ซูโงฮ. กูญา ปี มือญาเระ ลาฆู อีตู ซือมูฮา ฌางัน ราฌา. 32 กะฆีเตอ ราฌา ญา บลาโลก ปราโซฮ อีตู มาแรฮ ญา มือเลา จะ 'อูรัก ฌาฮัจ เออ กู บือเลฮ อาเกะ ฮูตัก นะ เกา ซือมูฮา ดัฮ ซาเบะ เกา มีตา เดะ กู. 33 บูวัจ นามา เกา เตด ตือจีฮัด กะ กาวัด ซามา ซือรูปา นู กู ตือจีฮัด กะ เกา ดัฮ?' 34 กะฆีเตอ ราฌา ญา มูซัยํ โตระ ญา อาตัจ ซือมียา อีตู กะ ลูมอฮ ตามาตา นู นะ บรี ญา ซูซัฮ ญาวา ตือดะ ญา นะ บายัยํ ฮูตัก บรี ฮาบิฮ เลอ." เยซู ญา จะ. 35 เยซู มือเลา ฌางัน กูญา จะ "กะ กาเญา ราตา ซือมียา เตด ตือจีฮัด อาเกะ ซาลัฮ นะ อาดี-บราดี นู ปือจายา เตอ อาโปก นะ กู เดะ อาตัซ นะ บูวัจ ฌางัน กาเญา กะฆีเตอ ฌูฆา เลอ." ญา จะ.
1 ตานา เยซู มือเลา ลาฆู อีนี ฮาบิฮ ดัฮ ญา ตรือเบะ เดะ โซะ นังฆรี ฆาลิลี ปี กะ โซะ นังฆรี ยูเดีย เดะ โซะ ซรือบัก ซูงัย จอแดน. 2 อาดา ลูมอฮ ซือมียา บาญะ ปาคัจ ตูโรจ ปี ฌางัน ญา กะฆีเตอ ญา บือบือลา โกะ ปือญาเกะ นะ กูญา บรี ซือนัง โซะ อีตู. 3 อาดา ลูมอฮ ฟาริซี ซือตืองัฮ มาแรฮ บือดาปัจ ฌางัน เยซู นะ ลกลีฮัจ ญา ตาญา จะ "นู ลากี นะ บรือจัย ฌางัน บีนี ซาเบะ ปาซัน นามาๆ เตอ กือนา ลาฆู ฌางัน ปือมือเลา ฮูโกบ นะ ตูฮัด เฆอ?" 4 เยซู ตีกัฮ กะ กูญา จะ "กาเญา เตด ดือละ บาจา เฆอ ซูรัจ ปาซัน ลาฆู ลามูลา วะตู ตูฮัด บือฌาดี ดือนียา นู จะ 'ญา บือฌาดี ซือมียา กีลากี ฌางัน นีบีนี เลอ.' 5 อาดา ฌูฆา นู จะ 'กะฆีเตอ กีลากี นะ ตีงัน เอด อาโปก เดะ ญา นะ ปี ดูโดะ บือซามา บือซูโงฮ-ซูโงฮ ฌางัน บีนี นะ ญา เลอ กะฆีเตอ กูญา กือดูวา นะ ฌาดี ญาวา ซือตือปัจ.' ซูรัจ นะ ตูฮัด ญา จะ." 6 กะฆีเตอ เยซู มือเลา ปูลัก จะ "กะฆีเตอ กูญา บูกัด ฌาดี ดูวา ญาวา ตาปี ฌาดี แนฮ ซา ญาวา อีตู เลอ. ลาฆู นู ตูฮัด เดะ อาตัซ อีกัจ บือกระ ดัฮ ฌางัน บรี โกะ ซือมียา นะ บรือจัย เลอ." เยซู ญา จะ. 7 โกะ ฟาริซี ตาญา เยซู จะ "ดัฮ กะฆีเตอ บูวัจ นามา มูซา ปือซัด บรี ซือมียา บูวัจ ซูรัจ บรือจัย บูวัก บีนี บือเลฮ?" 8 เยซู ตีกัฮ กะ กูญา จะ "กรานา กาเญา ฮาตี กรัซ เตอ มูซา บียัยํ บรี กาเญา บรือจัย ฌางัน บีนี ตาปี วะตู ลามูลา เตด ฌาดี กะฆีเตอ เลอ. 9 ตาปี กู มือเลา ฌางัน กาเญา จะ "กะ ซือมียา ดีฮา นะ บรือจัย ฌางัน บีนี นะ ญา ปาซัน ซาลัฮ อาซิก เดะ ลาฆู บือกาเซฮ เตอ ดัฮ ปี อาเมด บีนี บารู เตอ ญา เลอ ซาลัฮ บือกาเซฮ ดัฮ. [ซือมียา ดีฮา อาเมด นีบีนี นู บรือจัย อีตู ดัฮ มาแรฮ ฌาดี บีนี นะ ญา เตอ ญา เลอ ซาลัฮ บือกาเซฮ ฌูฆา.]" เยซู ญา จะ. 10 โกะ มูเระ มือเลา ฌางัน เยซู จะ "กะ ลากี ฆาโดฮ บูวัจ ตูโรจ กะฆีเตอ ฌางัน บีนี นะ ญา นู นะ เตด อาเมด บีนี บาฌิ ลาฆี เลอ." 11 ตาปี เยซู มือเลา ฌางัน กูญา จะ "ซือมียา ซือมูฮา นะ ซาโมจ ลาฆู อีนี ฮอย เตด บือเลฮ เลอ. อาดา ซือมียา ซือตืองัฮ นู ตูฮัด บรี ซาโมจ ลาฆู อีนี ซือมียา อาซิก ซาโมจ เตด บือเลฮ เลอ. 12 อาดา บาญะ ลาฆู นู บูวัจ บรี ซือมียา นะ เตด อาเมด บีนี. อาดา ซือตืองัฮ ฮาฌา กูญา ฌาดี กะฆีเตอ ตะเดะ ดูโดะ เดะ อาปี เลอ. อาดา ซือตืองัฮ นู ซือมียา อาซิก บูวัจ บรี กูญา กือนา กาซี ดัฮ. อาดา ฌูฆา ซือตืองัฮ นู นะ เตด อาเมด บีนี บีดา นะ บูวัจ ตูโรจ กะ ตูฮัด เลอ. ซือมียา นู ซาโมจ ลาฆู อีนี บือเลฮ กือนา ซาโมจ เลอ." เยซู ญา จะ. 13 ลือปัซ อีตู อาดา ซือมียา บาวา นานะ ดือมิ ซือตืองัฮ มาแรฮ ซารี เยซู บีดา นะ บรี เยซู บอฮ ตางัน เดะ ญาวา นะ กูญา บีดา นะ บือซาโวจ กรานา กูญา. ตาปี โกะ มูเระ นะ ญา เตอ กูญา อูจะ บลารัก โกะ ซือมียา อีตู. 14 ตาปี เยซู มือเลา ฌางัน กูญา จะ "บียัยํ เลอ บรี โกะ นานะ มาแรฮ มียา กู. ฌางัน นะ ซือกัจ กูญา กรานา-จะ ซือมียา นู อาดา ฮาตี ซือรูปา โกะ นานะ กะฆีนี เตอ ซือมียา อีตู เลอ นู อาดา ตูฮัด ฌาดี ราฌา นะ ญา. 15 กะฆีเตอ เยซู บอฮ ตางัน นะ ญา เดะ ญาวา โกะ นานะ ซือมูฮา ญา ปี เดะ โซะ อีตู ดัฮ. 16 ลีฮัจ เลอ อาดา ซือมียา ซืออูรัก มาแรฮ ซารี เยซู ตาญา จะ "บูมอยํ เออ กู กือนา บูวัจ ลาฆู นามา นู บาฌิ บีดา กู นะ บือเลฮ ลาฆู ฮีโดะ ซูโงฮ นู ซือลาลู เลอ?" 17 เยซู มือเลา ฌางัน ญา จะ "บูวัจ นามา เกา ตาญา กู ปาซัน ลาฆู นู บาฌิ? อาดา ซา ตูฮัด เดะ อาตัซ เลอ นู บาฌิ. กะ เกา ซูกา นะ มาโซะ รอจ กะ ฮีโดะ เตอ เกา กือนา บูวัจ ตูโรจ กะ โกะ ปือมือซัด นะ ตูฮัด เลอ." 18 ซือมียา อีตู ตาญา เยซู จะ "ปือมือซัด นู ดีฮา เลอ?" เยซู มือเลา ฌางัน ญา จะ "ปือมือซัด นู จะ 'ฌางัน บูนอฮ ซือมียา เลอ. ฌางัน บือกาเซฮ ลากี นะ กาวัด บีนี นะ กาวัด เลอ. ฌางัน จูรี บารัก นะ กาวัด เลอ. ฌางัน ฌาดี ซะซี มืออูปัย เลอ. 19 กือนา ตูเฮะ กะ เอด อาโปก นะ เกา เลอ.' อาดา ฌูฆา นู จะ 'เกา กือนา ซายัก กะ กาวัด ซือรูปา ซายัก กะ ญาวา ตะอาซิก เลอ.' " เยซู ญา จะ. 20 อูรัก มูดา อีตู ตีกัฮ กะ เยซู จะ "ลาฆู อีนี กู ตูโรจ ดัฮ ซือมูฮา. กู ปูตุซ นามา ลาฆี เลอ?" 21 เยซู มือเลา ฌางัน ญา จะ "กะ เกา ซูกา ฌาดี ซือมียา บาฌิ ซือมูฮา เตอ ปี เลอ ฌูวัน ซือบารัก นะ เกา ซือมูฮา ฮาฆิ บรี กะ โกะ ซือมียา ฮาฌะ เลอ. กะฆีเตอ เกา นะ ฌาดี ซือมียา กายา โซะ อาตัซ ลาแงะ ดัฮ. ลือปัซ อีตู กือนา มาแรฮ ตูโรจ กะ กู เลอ." เยซู ญา จะ. 22 ตาปี ตานา อูรัก มูดา อีตู ดืองัยํ ลาฆู กะฆีเตอ ญา ตรือเบะ ปี ดัฮ ซูซัฮ-ฮาตี ซูโงฮ ซาเบะ-จะ ญา อาดา โกะ บือนา บารัก บาญะ. 23 กะฆีเตอ เยซู มือเลา ฌางัน โกะ มูเระ นะ ญา จะ "กู มือเลา ฌางัน กาเญา ลาฆู นู ซูโงฮ จะ นู ซือมียา กายา นะ มาโซะ กะ ลูมอฮ ซือมียา นะ ตูฮัด ปายัฮ ซูโงฮ เลอ. 24 กู มือเลา ฌางัน กาเญา ปูลัก จะ นู อูตัยํ ซืออีโกยํ นะ มรือลุซ เดะ ลูบัก ฌาโรบ โปด มูดัฮ ลาฆี เดะ ซือมียา กายา นะ มาโซะ กะ ดือนียา บารู นะ ตูฮัด เตอ." เยซู ญา จะ. 25 ตานา โกะ มูเระ นะ ญา ดืองัยํ กะฆีนี ดัฮ กูญา ปือและ-ฮาตี ซูโงฮ ตาญา จะ "ดัฮ กะฆีเตอ ซาปา เลอ นะ บือเลฮ ฮีโดะ ลือปัซ บาฌิ?" 26 ตาปี เยซู ตีญูง ลีฮัจ กะ กูญา มือเลา จะ "โซะ อูมัจ-ซือมียา นะ บูวัจ กะฆีนี เตด บือเลฮ ลาลู ตาปี โซะ ตูฮัด เดะ อาตัซ เตอ ญา เลอ นู บูวัจ บือเลฮ ซือมูฮา." ญา จะ. 27 กะฆีเตอ เปโตร ตีกัฮ กะ เยซู จะ "ลีฮัจ เลอ ลูมอฮ กามี บือเลฮ ตีงัน บือนา บารัก ซือมูฮา มาแรฮ ตูโรจ กะ เกา ดัฮ เลอ. กามี นะ บือเลฮ นามา เลอ?" 28 เยซู มือเลา ฌางัน กูญา จะ "กู มือเลา ฌางัน กาเญา ลาฆู นู ซูโงฮ จะ เดะ วะตู อีตู นู ตูฮัด นะ ตืองะ บือนา ซือมูฮา บรี ฌาดี บารู ตานา กู นู นานะ นะ อูมัจ-ซือมียา นะ ดูโดะ เดะ ตือปัจ ดูโดะ นู บือซายา นะ กู เตอ วะตู อีตู กาเญา นู บือเลฮ ตูโรจ กะ กู ดัฮ กาเญา ฌูฆา นะ ดูโดะ เดะ ตือปัจ ดูโดะ นะ ราฌา ดูวา-บือลัซ ตือปัจ นะ กรัจ ฮูโกบ ลูมอฮ อิซราเอน ดูวา-บือลัซ บือแนฮ เลอ. 29 ราตา ซือมียา นู ตีงัน โกะ รูมัฮ โกะ อาดี-บราดี กีลากี นีบีนี โกะ ปะ มะ โกะ นานะ โกะ ตือปัจ ตานัฮ เตอ กรานา ลีฮัจ กะ นามา นะ กู เตอ ซือมียา อีตู เลอ ญา นะ ซาโมจ ซือราตุซ กาลี นะ ซาโมจ ลาฆู ฮีโดะ ซูโงฮ นู ซือลาลู ฌาดี ปือซากา นะ ญา เลอ. 30 ตาปี อาดา ซือมียา บาญะ โซะ ปรือดู นะ ปี ดูโดะ โซะ ฮูโฌก. ซือมียา โซะ ฮูโฌก นะ ปี ดูโดะ โซะ ปรือดู เลอ." เยซู ญา จะ.
1 เยซู มือเลา ลาฆี จะ "นู ตูฮัด เดะ อาตัซ นะ บือบือลา ฌาดี ราฌา นะ ฌาดี ซือรูปา บือกะ ลาฆู กะฆีนี. อาดา ตูฮัด กือโบด ซืออูรัก นู ตรือเบะ ปี กัยํ-มูกัยํ_บีดา นะ อูปัฮ ซือมียา ปี บือกรือฌา เดะ กือโบด บูวัฮ อางุน นะ ญา. 2 ญา ซาโงะ ฌางัน กูญา จะ นะ บรี รือฆา อูปัฮ ซืออารี ซา รีเงะ.กะฆีเตอ ญา ซูโรฮ กูญา ปี กรือฌา เดะ กือโบด นะ ญา. 3 "วะตู ปูโกยํ ซือมีลัด เตอ ญา ตรือเบะ ปี ปูลัก กะ ปาฌะ อีกัด_ญา ลีฮัจ อาดา ลูมอฮ ซือมียา ซือตืองัฮ บือดีรี โซะ อีตู ฮอย กรือฌา. 4 กะฆีเตอ ญา มือเลา ฌางัน กูญา จะ 'ปี เลอ กาเญา_บือกรือฌา เดะ กือโบด นะ กู. กู นะ บรี รือฆา อูปัฮ นู กือนา เลอ.'กะฆีเตอ กูญา ปาคัจ ปี ดัฮ. 5 "เดะ วะตู ตืองัฮ อารี เตอ เดะ ปูโกยํ ตีฆา โปด ญา ปี บูวัจ กะฆีเตอ ปูลัก. 6 เดะ วะตู ปูโกยํ ลีมา ญา ปี กะ ปาฌะ อีกัด ปูลัก_ดาปัจ ซือมียา อาซิก ซือตืองัฮ บือดีรี โซะ อีตู. ญา ตาญา กูญา จะ 'บูวัจ นามา ปะ_กาเญา บือดีรี ปัจ อีนี ซืออารี บูลัจ? กาเญา ฮอย กรือฌา เฆอ?' 7 กูญา ตีกัฮ กะ ญา จะ 'ฮอย ซาปา อูปัฮ กามี เลอ.'กะฆีเตอ ญา มือเลา ฌางัน กูญา จะ 'โฌฮ ปี บือกรือฌา เดะ กือโบด นะ กู.' 8 "วะตู รอจ มาลับ ดัฮ ตูฮัด กือโบด มือเลา ฌางัน กือปาลา กรือฌา นะ ญา จะ_'กือนา บลาโลก โกะ ซือมียา บือกรือฌา มาแรฮ บายัยํ รือฆา อูปัฮ นะ กูญา เลอ.กือนา ฮึนตะ เดะ ลูมอฮ ซือมียา นู มาแรฮ กรือฌา โซะ บลากัก เตอ บายัยํ ซือรูโลยํ_ตือดะ รอจ กะ ลูมอฮ ซือมียา นู มาแรฮ วะตู ลามูลา เลอ.' ญา จะ. 9 วะตู โกะ ซือมียา นู บือกรือฌา ตะเดะ ปูโกยํ ลีมา มาแรฮ ดัฮ ญา บรี กะ กูญา_ซืออูรัก ซา รีเงะ. 10 วะตู โกะ ซือมียา นู บือกรือฌา ตะเดะ ลามูลา มาแรฮ ดัฮ กูญา อีงัจ จะ_กูญา นะ ซาโมจ ลือเบฮ. ตาปี กูญา ฌูฆา ซาโมจ ซืออูรัก แนฮ ซา รีเงะ เลอ. 11 ตานา ซาโมจ ดัฮ กูญา ฮึนตะ บือซูงุจ กะ ตูฮัด กือโบด 12 มือเลา จะ 'ลูมอฮ นู มาแรฮ เดะ บลากัก อีนี บือกรือฌา แนฮ ซา ฌับ เตอ.กามี บือเลฮ ตาฮัด ลาวัด บือกรือฌา เดะ มาตาอารี นู ฮางัจ โตระ ซืออารี บูลัจ เลอ.ตาปี เกา บรี รือฆา อูปัฮ กะ กูญา ซามา บายา ฌางัน กามี เลอ.' 13 "ตาปี ตูฮัด กือโบด ตีกัฮ กะ ซือมียา ซืออูรัก เดะ ลูมอฮ กูญา จะ 'กาวัด เออ_กู เตด บือเลฮ กีจอฮ เกา เลอ. เกา ซาโงะ ฌางัน กู จะ ซืออารี ซา รีเงะ บูกัด เฆอ? 14 อาเมด รือฆา อูปัฮ นะ เกา ปี เลอ. กู ตือตู ดัฮ_นะ บายัยํ กะ ซือมียา นู มาแรฮ เดะ บลากัก อีนี ซามา บายา ฌางัน เกา เลอ. 15 กู นะ ซูโรฮ ดูเวะ นะ กู ตูโรจ กะ ฮาตี นะ กู เตด บือเลฮ เฆอ?นู กู ฮาตี บาฌิ บูวัจ บรี มาตา นะ เกา ฮาลูบา เฆอ?' ญา จะ." 16 กะฆีเตอ เยซู มือเลา จะ "กะฆีเตอ_ซือมียา โซะ ฮูโฌก นะ ปี ดูโดะ โซะ ปรือดู เตอ_ซือมียา โซะ ปรือดู นะ ปี ดูโดะ โซะ ฮูโฌก เลอ." ญา จะ. 17 ตานา เยซู ตืองัฮ บือฌาลัด ปี กะ นังฆรี เยรูซาเลม ญา บาวา โกะ มูเระ นะ ญา_ดูวา-บือลัซ อูรัก บือปี ซา กูญา ญา มือเลา ฌางัน กูญา เดะ ตืองัฮ ฌาลัด จะ 18 "ลีฮัจ เลอ กีตา ตืองัฮ บือฌาลัด ปี กะ นังฆรี เยรูซาเลม.กู นู นานะ นะ อูมัจ-ซือมียา นะ กือนา อาตัจ บรี กะ ลูมอฮ ซามี ซัยํ-บือซัยํ_ฌางัน โกะ ซือมียา อาฌัยํ ลาฆู ปือมือซัด นะ ตูฮัด เตอ.โกะ ลูมอฮ กูญา อีตู นะ กรัจ ฮูโกบ กู บรี กือนา บูนอฮ มาตี เลอ. 19 กะฆีเตอ กูญา นะ อาตัจ กู บรี กะ ลูมอฮ ซือมียา บักซา อาซิก.กูญา อีตู นะ อาฆัฮ-ฆือละ กะ กู นะ รือเปะ กู_นะ กาจิก กู บรี มาตี เดะ กายู ปลีตัก เลอ. ตาปี รอจ กะ อารี ตีฆา เตอ_กู นะ กือนา บูวัจ บรี ฮีโดะ ปาเระ เดะ มาตี เลอ." เยซู ญา จะ. 20 ลือปัซ อีตู บีนี นะ เซเบดี ฌางัน นานะ นะ ญา ดูวา บราดี กูญา ตีฆา อูรัก มาแรฮ มียา เยซู.นีบีนี อีตู ตือมะ มือญือมัฮ กะ เยซู มีตา ซา ลาฆู เดะ ญา. 21 เยซู ตีกัฮ กะ ญา จะ "เกา ซูกา ลาฆู นามา เลอ?"นีบีนี อีตู มือเลา ฌางัน เยซู จะ "กาลา เกา นะ มาแรฮ บือกะ ราฌา นู บือซัยํ เตอ_มีตา บรี นานะ นะ กู ดูวา อูรัก อีนี นะ ดูโดะ บือซามา ฌางัน เกา โซะ กานัน ซา_โซะ กีรี ซา เลอ." 22 ตาปี เยซู ตีกัฮ กะ ซือมียา ดูวา อูรัก อีตู จะ "นู กาเญา มีตา กะฆีเตอ_กาเญา เตด ตาฮู อารัฮ เลอ. ลาฆู ซูซัฮ นู ซือรูปา เจาะ นู กู นะ โอะ เตอ_กาเญา นะ โอะ ฌูฆา บือเลฮ เฆอ?" กูญา กือดูวา ตีกัฮ กะ เยซู จะ "บือเลฮ ฌูฆา เลอ." 23 กะฆีเตอ เยซู มือเลา ฌางัน กูญา ดูวา อูรัก จะ "เจาะ นะ กู เตอ_กาเญา นะ โอะ ซูโงฮ เลอ. ตาปี นู นะ ดูโดะ โซะ กานัน นะ กู โซะ กีรี นะ กู เตอ_กู นะ บรี เตด บือเลฮ เลอ. ตือปัจ ดูโดะ อีตู เตอ อาโปก นะ กู ญา ซียะ ตาโรฮ ดัฮ_บีดา โกะ ซือมียา นู ญา ปีเลฮ ดัฮ เลอ." เยซู ญา จะ. 24 โกะ มูเระ นู ซือปูโลฮ อูรัก เตอ ตานา ดืองัยํ ลาฆู กะฆีเตอ ดัฮ_กูญา บราซา รีเซา-ฮาตี กะ ซือมียา ดูวา บราดี อีตู. 25 ตาปี เยซู บลาโลก กูญา ซือมูฮา มาแรฮ มือเลา ฌางัน กูญา จะ_"กาเญา ตาฮู จะ โกะ กือปาลา นะ ลูมอฮ บักซา อาซิก กูญา ปรือกัด ลูมอฮ กูญา_บือกะ ฌาดี ราฌา เตอ. โกะ ซือมียา ซัยํ-บือซัยํ โปด_กูญา อาดา มือฆัฮ นะ ฮูโกบ ลูมอฮ กูญา ฌูฆา เลอ. 26 ตาปี โซะ ลูมอฮ กาเญา ฌางัน บรี ฌาดี กะฆีเตอ เลอ.ซือมียา ดีฮา นู นะ ฌาดี บือซัยํ เดะ ลูมอฮ กาเญา เตอ_ญา กือนา ฌาดี ซือมียา มือนูโลก นะ กาเญา เลอ. 27 ซือมียา ดีฮา นู นะ ฌาดี กือปาลา เดะ ลูมอฮ กาเญา_ญา กือนา ฌาดี ปราโซฮ นะ กาเญา เลอ. 28 ซือรูปา บือกะ กู นู นานะ นะ อูมัจ-ซือมียา เตอ กู มาแรฮ ดัฮ_บูกัด นะ บรี โกะ ซือมียา บือกรือฌา มือนูโลก กู ตาปี กู มาแรฮ ดัฮ_นะ บือกรือฌา มือนูโลก กูญา เตอ เลอ นะ ซรัฮ ญาวา นะ กู_ฌาดี รือฆา ตือบุซ โกะ ซือมียา บาญะ บรี ลือปัซ." เยซู ญา จะ. 29 ลือปัซ อีตู ตานา เยซู ฌางัน โกะ มูเระ นะ ญา_ตืองัฮ ตรือเบะ เดะ นังฆรี เยริโค อาดา ลูมอฮ ซือมียา บาญะ ตูโรจ กะ ญา ปี. 30 ลีฮัจ เลอ อาดา ซือมียา มาตา บูตา ดูวา อูรัก ดูโดะ เดะ บีดิก ฌาลัด.ตานา กูญา ดูวา อูรัก ดืองัยํ จะ นู เยซู ตืองัฮ ฌาลัด ลาลู ปี กูญา บือซูระ จะ_"ตูฮัด นานะ นะ ราฌา ดาวิด เออ จีฮัด กะ กามี เลอ." 31 ตาปี ลูมอฮ ซือมียา บาญะ อูจะ กะ กูญา ซูโรฮ บรี กูญา ซืองะ.ตาปี กูญา ดูวา อูรัก ดรัซ บือซูระ ลาฆี จะ "ตูฮัด นานะ นะ ดาวิด เออ_ตือจีฮัด กะ กามี เลอ." 32 กะฆีเตอ เยซู ญา บราดู บลาโลก กูญา ดูวา อูรัก มาแรฮ ตาญา กูญา จะ_"กาเญา นะ บรี กู บูวัจ ลาฆู นามา บีดา กาเญา เลอ?" 33 กูญา ตีกัฮ กะ ญา จะ "ตูฮัด เออ ตูโลก บรี มาตา นะ กามี_ลีฮัจ บือฆารี ซัฮ เลอ." 34 กะฆีเตอ เยซู ตือจีฮัด กะ กูญา ดูวา อูรัก ญา ปือเตาะ บีฌี มาตา นะ กูญา.ดัดดัด อีตู กูญา ดูวา อูรัก บือเลฮ ลีฮัจ บือฆารี ซัฮ กูญา ตูโรจ ปี กะ เยซู ดัฮ.
1 กะฆีเตอ กูญา อีตู มาแรฮ ดาปิก กะ นังฆรี เยรูซาเลม รอจ กะ ตูโปะ เบดฟายี_เดะ บูเกะ กือดูโนด ดัฮ. วะตู อีตู เยซู ซูโรฮ มูเระ ดูวา อูรัก ปี ดูลู 2 ปือซัด กะ กูญา จะ "มาโซะ เลอ กะ ตูโปะ โซะ ฮึลด อีตู. ดัดดัด กาเญานะ ดาปัจ กูดา ซืออีโกยํ นู กือนา อีกัจ ดัฮ ฌางัน อานะ นะ ญา ซามา. อูฆัย เลอ อีเระ มาแรฮ กะ กู. 3 กะ ซือมียา ดีฮา มือเลา นามา ฌางัน กาเญา กาเญา กือนา ตีกัฮ จะ_'ซาเบะ ตูฮัด นะ อาเมด ซูโรฮ เลอ'. ดัดดัด ญา นะ มือเลา จะ 'บือปี เลอ'. 4 ลาฆู อีนี บือฌาดี ดัฮ บีดา นะ บูวัจ บรี รือมัก_ตูโรจ บือกะ ปือมือเลา นะ ซือมียา ตูโดฮ ลาฆู นะ ตูฮัด นู บือเลฮ มือเลากาลา ดูลู จะ 5 "กือนา มือญาเระ เลอ กะ ลูมอฮ ซือมียา เดะ นังฆรี ซีโอน จะ ลีฮัจ เลอ ราฌา นะ กาเญา ตืองัฮ มาแรฮ กะ กาเญา ดัฮ ญา เลอ ฮาตี บือแฌะ ดูโดะ เดะ อาตัซ กูดา ซืออีโกยํ เดะ อาตัซ อานะ กูดา ซืออีโกยํ เลอ." 6 กะฆีเตอ มูเระ ดูวา อูรัก อีตู ปี ดัฮ บูวัจ ตูโรจ บือกะ ปือมือซัด นะ เยซู เตอ. 7 กูญา อีเระ กูดา ฌางัน อานะ นะ ญา บือมาแรฮ ซามา_กูญา บอฮ บาฌู นะ กูญา อาปัยํ เดะ อาตัซ บลากัก กูดา ฌางัน อานะ กูดา.กะฆีเตอ เยซู ญาแญะ ดูโดะ เดะ อาตัซ. 8 โซะ ลูมอฮ ซือมียา นู บาญะ เตอ กูญา อาปัยํ บาฌู นะ กูญา เดะ ฌาลัด.ลูมอฮ ซือมียา อาซิกๆ ซือตืองัฮ กรัจ รือบา ดาฮัด กายู มาแรฮ อาปัยํ เดะ ฌาลัด. 9 อาดา ลูมอฮ ซือมียา บาญะ ปี โซะ ฮึลด ญา ซือตืองัฮ โซะ บลากัก ซือตืองัฮ.กูญา บือซูระ บูริ มือเลา จะ " โฮซันนา ปูฌี เลอ กะ นานะ นะ ราฌา ดาวิด. ซือลามัจ เลอ ซือมียา นู มาแรฮ เดะ นามา นะ ตูฮัด เดะ อาตัซ. โฮซันนา_ปูฌี เลอ กะ ตูฮัด นู ตีงี เดะ อาตัซ ซูโงฮ." 10 ตานา เยซู มาโซะ กะ นังฆรี เยรูซาเลม_ลูมอฮ ซือมียา เดะ นังฆรี ฆาโดฮ-ฮาตี ซูโงฮ มือเลา จะ_"ซือมียา อีนี ฌาดี ซาปา เลอ?" 11 โกะ ลูมอฮ ซือมียา บาญะ ซีงี ตีกัฮ จะ "นี เลอ ฌาดี เยซู ซือมียา ตูโดฮ ลาฆู นะ ตูฮัด นู มาแรฮ ดาตัก เดะ ตูโปะ นาซาเรด_เดะ โซะ นังฆรี ฆาลิลี." 12 กะฆีเตอ เยซู ญา มาโซะ กะ รูมัฮ มือญือมัฮ ตูฮัด.อาดา ลูมอฮ ซือมียา ฌูวัน บารัก บือลี บารัก เดะ ลามัน รูมัฮ มือญือมัฮ.โกะ ซือมียา อีตู เยซู โปรฮ ฮาบิฮ. ปาปัด โตะ นะ ซือมียา ฮูโระ ดูเวะ_ญา บือจือเกาะ บูวัก ดัฮ. ตือปัจ ดูโดะ นะ ซือมียา ฌูวัน บูโรก ปาตี โปด_ญา บือจือเกาะ บูวัก ฌูฆา. 13 ญา มือเลา ฌางัน กูญา จะ "ซูรัจ ปือมือเลา นะ ตูฮัด มือเลา จะ 'รูมัฮ นะ กู เตอ นะ กือนา บลาโลก จะ รูมัฮ ตือปัจ บือซาโวจ กะ ตูฮัด.' ตาปี กาเญา บูวัจ บรี ฌาดี บือกะ ซารัก ลูมอฮ อูรัก ปือญามุน เลอ." เยซู ญา จะ. 14 อาดา ซือมียา มาตา บูตา ซือตืองัฮ ซือมียา จาเปะ ซือตืองัฮ_กูญา มาแรฮ มียา เยซู เดะ รูมัฮ มือญือมัฮ ตูฮัด. ญา บือบือลา กูญา บรี ซือนัง บาฌิ ดัฮ. 15 ตาปี โซะ ลูมอฮ ซามี ซัยํ-บือซัยํ_ฌางัน โกะ ซือมียา อาฌัยํ ลาฆู ปือมือซัด นะ ตูฮัด_ตานา กูญา ลีฮัจ บือนา นู ปือและ ซูโงฮ นู เยซู บือเลฮ บูวัจ ดัฮ_ตานา กูญา ดืองัยํ โกะ นานะ บือซูระ เดะ รูมัฮ มือญือมัฮ ตูฮัด มือเลา จะ "โฮซันนา_ปูฌี กะ นานะ นะ ราฌา ดาวิด เลอ" กะฆีเตอ กูญา อีตู มูซัยํ โตระ. 16 กูญา มือเลา ฌางัน เยซู จะ "เกา ดืองัยํ ดัฮ เฆอ จะ_โกะ นานะ มือเลา กะฮามี เลอ?" เยซู ตีกัฮ กะ กูญา จะ "ดืองัยํ ดัฮ. กาเญา เตด ดือละ บาจา เฆอ ซูรัจปือมือเลา นะ ตูฮัด นู จะ 'เกา บูวัจ บรี มูโลจ นะ โกะ นานะ ฌางัน โกะ นานะ มิดือมิ ปานัย ปูฌี กะ เกา_บาฌิ ซูโงฮ เลอ.' ?" 17 กะฆีเตอ เยซู ตีงัน กูญา ญา ตรือเบะ เดะ นังฆรี เยรูซาเลม_ปี ดูโดะ เดะ ตูโปะ เบดทานี ดัฮ. 18 จรัฮ ปาฆี ตานา เยซู ตืองัฮ บาลิ ปี กะ นังฆรี ญา ลาปัยํ ดัฮ เลอ. 19 เดะ บีดิก ฌาลัด ญา ลีฮัจ อาดา ปูโฮด กรายา-บูดี ซา ปูโฮด.กะฆีเตอ ญา มาโซะ ปี ดาปิก ลีฮัจ จะ ปูโฮด อีตู ฮอย บูวัฮ นามา โปด_อาดา ซา ดาโวด. กะฆีเตอ ญา มือเลา กะ ปูโฮด อีตู จะ "ตะเดะ อีนี ปี_เกา ฌางัน นะ บือบูวัฮ ลาลู ซือมาญัก-รอจ เลอ." ดัดดัด ปูโฮด อีตู ลายู ตูโฮยํ ดัฮ. 20 โกะ มูเระ นะ เยซู กูญา ลีฮัจ บือฆารี ลาฆู อีนี ดัฮ กูญา ปือและ-ฮาตี ซูโงฮ_ตาญา จะ "กะฮามี เลอ นู ปูโฮด กรายา-บูดี อีนี ลายู ตูโฮยํ ดัดดัด กะฆีนี ดัฮ?" 21 เยซู ตีกัฮ กะ กูญา จะ "กู มือเลา ฌางัน กาเญา ลาฆู นู ซูโงฮ จะ_กะ กาเญา ปือจายา ฮอย เตด บรูบัฮ-ฮาตี เตอ_กาเญา นะ บือเลฮ บูวัจ ซือรูปา กู บูวัจ ดัฮ ฌางัน ปูโฮด กายู อีนี.ตาปี ลือเบฮ เดะ อีตู ปูลัก กาเญา นะ บือเลฮ ปือซัด กะ บูเกะ อีนี จะ_'กือนา อาเกะ ปี บือตาลับ เดะ ลาโวจ เลอ' นะ ฌาดี กะฆีเตอ ดัฮ. 22 วะตู กาเญา บือซาโวจ มีตา ลาฆู นามาๆ เตอ กะ กาเญา ปือจายา ดัฮ_กาเญา นะ บือเลฮ ลาฆู อีตู เลอ." 23 วะตู เยซู มาโซะ กะ รูมัฮ มือญือมัฮ ตูฮัด ตืองัฮ อาฌัยํ ลูมอฮ ซือมียา เตอ_โกะ ลูมอฮ ซามี ซัยํ-บือซัยํ ฌางัน ลูมอฮ อูรัก ตูฮา_กูญา ปาคัจ มาแรฮ ตาญา ญา จะ "เกา บูวัจ ลาฆู กะฆีนี ฌางัน ปือมือฆัฮ นู ดีฮา?จะ ซาปา บือเลฮ บรี กะ เกา บูวัจ ลาฆู กะฆีนี เลอ?" 24 เยซู ญา ตีกัฮ กะ กูญา จะ "กู นะ ตาญา กาเญา ซา ลาฆู ฌูฆา เลอ.กะ กาเญา ตีกัฮ กะ กู กือนา ดัฮ กู นะ มือญาเระ กะ กาเญา ฌูฆา จะ_กู บูวัจ ลาฆู กะฆีนี ฌางัน ปือมือฆัฮ นู ดีฮา เลอ. 25 นู โยฮัน บรี โกะ ซือมียา ซือลับ เดะ อาเย เตอ ฌาดี ลาฆู ดาตัก ปัจ ดีฮา? ดาตัก เดะ โซะ ลาแงะ เฆอ-จะ_ดาตัก เดะ โกะ อูมัจ-ซือมียา?" กูญา บือตือฆัฮ ซามา กูญา จะ "ดัฮ กีตา จะ 'ดาตัก เดะ โซะ ลาแงะ'_ญา นะ ตาญา กีตา จะ 'ซาเบะ นามา กาเญา เตด บือเลฮ ปือจายา กะ โยฮัน เลอ?' 26 ตาปี ดัฮ กีตา มือเลา จะ 'ดาตัก เดะ โกะ อูมัจ-ซือมียา'_กีตา ตาโกจ เดะ โกะ ซือมียา บาญะ กรานา-จะ โกะ ซือมียา ซือมูฮา กีรา จะ_โยฮัน ฌาดี ซือมียา ตูโดฮ ลาฆู นะ ตูฮัด." 27 กะฆีเตอ กูญา มือเลา จะ "กามี เตด ตาฮู เลอ." เยซู ตีกัฮ กะ กูญา จะ "กะฆีเตอ กู โปด เตด มือญาเระ กะ กาเญา ฌูฆา_จะ ลาฆู กู บูวัจ กะฆีนี บูวัจ ฌางัน ปือมือฆัฮ นู ดีฮา." 28 เยซู มือเลา ลาฆี จะ "กาเญา กีรา กะฮามี? ซือมียา ซืออูรัก_อาดา นานะ กีลากี ดูวา บราดี ญา ปี มียา นานะ ซูโลก มือเลา จะ 'นานะ เออ_อารี อีนี เกา กือนา ปี กรือฌา เดะ กือโบด บูวัฮ อางุน เลอ.' 29 นานะ ซูโลก ตีกัฮ กะ ปะ เดะ ญา จะ 'กู ตีเมา นะ ปี.' ตาปี เดะ บลากัก_ญา บราเลฮ-ฮาตี ญา ปี ดัฮ. 30 ซือมียา อีตู ปี มียา นานะ นู อาดี ปูลัก มือเลา ฌางัน ญา ซือรูปา ซีงี.นานะ อีตู ตีกัฮ จะ 'ปะ เออ กู นะ ปี' ตาปี ญา เตด บือเลฮ ปี ดัฮ. 31 นานะ นู ดีฮา เลอ นู บูวัจ ตูโรจ บือกะ ฮาตี นะ อาโปก เดะ ญา?"เยซู ญา จะ. กูญา ตีกัฮ กะ ญา จะ "นานะ นู ซูโลก เลอ." กะฆีเตอ เยซู มือเลา ฌางัน กูญา จะ "กู มือเลา ฌางัน กาเญา ลาฆู นู ซูโงฮ จะ_โกะ ซือมียา มูงอจ อาเซน ฌางัน โกะ นีบีนี ฌาลัก เตอ กูญา นะ มาโซะ กะลูมอฮ ซือมียา นู ตูฮัด เดะ อาตัซ บือบือลา ฌาดี ราฌา ดูลู เดะ กาเญา เลอ. 32 กรานา โยฮัน มาแรฮ ซารี กาเญา ดัฮ บีดา นะ อาฌัยํ ฌาลัด นู บาฌิ-ตือปัจ เตอ_ตาปี กาเญา เตด บือเลฮ ปือจายา กะ ญา. ตาปี โกะ ซือมียา มูงอจ อาเซน_โกะ นีบีนี ฌาลัก โปด กูญา ปือจายา กะ ญา ดัฮ.มีเซ-จะ กาเญา ลีฮัจ บือฆารี ลาฆู อีตู ดัฮ ตาปี เดะ บลากัก_กาเญา เตด บือเลฮ บราเลฮ-ฮาตี เตด บือเลฮ ปือจายา กะ ญา ดัฮ." เยซู ญา จะ. 33 เยซู มือเลา ลาฆี จะ "มือนีงัย เลอ ลาฆู จรือตา อาฌัยํ ซา ลาฆู ปูลัก.อาดา ซือมียา ซืออูรัก นู บูวัจ กือโบด ตานัม ปูโฮด อางุน. ญา บูวัจ ปาฆัยํ กือลีลิก.ญา กาลี ตือลาฆา กาจะ บูวัฮ อางุน. ญา อาเกะ ดาเงา ตีงี บีดา นะ ตูงู กือโบด.กะฆีเตอ ญา บรี โกะ ซือมียา กรือฌา กือโบด ซีวา ตาปี อีซี ญา เตอ_ปี กะ นังฆรี อาซิก. 34 ตานา ฆามะ นะ รอจ วะตู บือบูวัฮ ดัฮ ญา ซูโรฮ ปราโซฮ ซือตืองัฮ_ปี มียา โกะ ซือมียา นู ซีวา กือโบด บรี ปูงอจ ฮาบด นะ ญา เดะ โกะ บูวัฮ อางุน. 35 ตาปี โกะ ซือมียา ซีวา กือโบด อีตู กูญา รีฆะ ปราโซฮ นะ ญา กาเตาะ ซืออูรัก_บูนอฮ ซืออูรัก ลีปัยํ บาตู บรี มาตี ซืออูรัก. 36 ซือกาลี ลาฆี ญา ซูโรฮ ปราโซฮ อาซิก ซือตืองัฮ ปี บาญะ เดะ ดูลู ปูลัก.ซือมียา ซีวา กือโบด บูวัจ กะ กูญา อีนี ซือรูปา บือเลฮ บูวัจ กะ โกะ ซือมียา ลามูลา. 37 เดะ บลากัก ญา ซูโรฮ อีซี นานะ นะ ญา ปี. ญา กีรา จะ_'ซูโงฮ กูญา นะ ตูเฮะ กะ นานะ นะ กู.' 38 ตาปี โกะ ซือมียา ซีวา กือโบด เตอ ตานา บือฆารี นานะ นะ ตูฮัด กือโบด ดัฮ_กูญา มือเลา ซามา กูญา จะ 'ญา เลอ ฌาดี นานะ นะ ตูฮัด กือโบด_นู นะ ซาโมจ ปือซากา. โฌฮ บรี กีตา บูนอฮ ญา บูวัก. กะฆีเตอ_กีตา นะ บือเลฮ ปือซากา นะ ญา เลอ.' 39 กะฆีเตอ กูญา ปาคัจ รีฆะ ญา ตูละ บือตรือเบะ กะ โซะ ลูวัยํ กือโบด_กูญา บูนอฮ ญา มาตี ดัฮ." 40 กะฆีเตอ เยซู ตาญา กูญา จะ "กาลา ตูฮัด กือโบด บาลิ มาแรฮ ดัฮ_ญา นะ บูวัจ กะฮามี ฌางัน โกะ ซือมียา ซีวา กือโบด อีตู?" 41 กูญา ตีกัฮ กะ เยซู จะ "ญา นะ บูนอฮ โกะ ซือมียา ฌาฮัจ อีตู บรี มาตี ซูซัฮ.ญา นะ อาเมด กือโบด นะ ญา บรี กะ ซือมียา อาซิก ซีวา ปูลัก เลอ_ฌาดี ซือมียา นู นะ บรี ฮาบด กะ ญา วะตู มูเซด บือบูวัฮ ดัฮ." 42 เยซู มือเลา ฌางัน กูญา จะ "กาเญา เตด ดือละ บาจา เฆอ เดะ ซูรัจปือมือเลา นะ ตูฮัด อาดา นู จะ 'บาตู บือซัยํ นู ตูกัก กรือฌา รูมัฮ ตีงัน บูวัก ดัฮ บาตู อีตู เลอ ปาเระ มาแรฮ ฌาดี บาตู กือปาลา ซาฆี ดัฮ. ตูฮัด เดะ อาตัซ เลอ นู บือเลฮ บูวัจ กะฆีนี. กีตา ลีฮัจ จะ ฌาดี ลาฆู บาฌิ ซูโงฮ เลอ.' ญา จะ. 43 "กรานา กะฆีเตอ เลอ กู มือเลา ฌางัน กาเญา จะ นู กาเญา ฌาดี ลูมอฮซือมียา นะ ตูฮัด เตอ นะ กือนา อาเมด ปาเระ เดะ กาเญา ดัฮ.ตูฮัด นะ อาเกะ บรี กะ ลูมอฮ บักซา อาซิก ฌาดี ลูมอฮ ซือมียา นะ ญา_ฌาดี ซือมียา นู นะ บือตามัฮ บูวัฮ นู ปาโตจ เลอ. 44 [ซือมียา ดีฮา นู รือบัฮ ตือกัด บาตู อีนี นะ กือนา ปือจัฮ-บือลัฮ ดัฮ_ตาปี ดัฮ บาตู อีตู นะ ฆูโฆยํ ตือกัด ซือมียา ดีฮา ซือมียา อีตู เลอ_นะ ฮาโจยํ ปี ฮาบิฮ ดัฮ.]. "เยซู ญา จะ. 45 ตานา ลูมอฮ ซามี ซัยํ-บือซัยํ ฌางัน โกะ ลูมอฮ ฟาริซี_ดืองัยํ ลาฆู นู เยซู จรือตา อาฌัยํ ดัฮ กูญา ลีฮัจ จะ_เยซู บือเลฮ มือเลา จรือตา กะฆีเตอ กียัซ กะ กูญา ตะอาซิก. 46 ตาปี กาลา กูญา กูวาซา นะ รีฆะ ญา กูญา ตาโกจ เดะ โกะ ซือมียา บาญะ_ซาเบะ โกะ ซือมียา บาญะ อีตู กีรา จะ_เยซู ฌาดี ซือมียา ตูโดฮ ลาฆู นะ ตูฮัด ซืออูรัก เลอ.
1 เยซู มือเลา จรือตา อาฌัยํ กูญา ซือกาลี ลาฆี จะ 2 "นู ตูฮัด เดะ อาตัซ นะ มาแรฮ บือบือลา ฌาดี ราฌา เตอ ญา ซือรูปา บือกะ ลาฆู กะฆีนี. อาดา ราฌา ซืออูรัก นู นะ บูวัจ ลาฆู มือนีกัฮ_บีดา นานะ กีลากี นะ ญา. 3 ญา ซูโรฮ โกะ ปราโซฮ นะ ญา ปี ตูโรจ โกะ ซือมียา นู ญา บลาโลก ดัฮ_บรี มาแรฮ บือฮีโปด มากัด บือซามา ตาปี กูญา อีตู ตีเมา นะ มาแรฮ. 4 ซือกาลี ลาฆี ราฌา ซูโรฮ โกะ ปราโซฮ นู อาซิก ปี ปือซัด กะ กูญา จะ_'ปี เลอ ตูโรจ กะ โกะ ซือมียา นู กู บลาโลก ดัฮ มือเลา จะ ลีฮัจ เลอ_โกะ ซือบารัก มากัด ซือมูฮา กู บือเลฮ ซียะ ตาโรฮ ฆือนะ ดัฮ ลูมอฮ ลือมู นะ กู_ลูมอฮ อานะ ลือมู นู ลือมะ นะ กู บูนอฮ ดัฮ. ราตา ฌือแนฮ ซียะ ตาโรฮ ดัฮ.โฌฮ เลอ มาแรฮ กะ ลาฆู มือนีกัฮ อีนี.' 5 "ตาปี กูญา อีตู เตด ปือดูลี ลาลู กะฆีเตอ กูญา ปาคัจ ปี ซิกมาซิก.นู ซา ญา ปี กะ บือนัก นู ซา ปี กะ ปาฌะ อีกัด. 6 โกะ ซือมียา ฆีลาฆี โปด กูญา รีฆะ ปราโซฮ นะ ราฌา กาเตาะ กูญา_บูนอฮ กูญา ดัฮ. 7 กะฆีเตอ ราฌา ญา มูซัยํ โตระ ญา ซูโรฮ ลูมอฮ ตาฮัน นะ ญา ปี_บูนอฮ โกะ ลูมอฮ ซือมียา ฌาฮัจ อีตู จูโจฮ บรี ปือลัฮ ฮาบิฮ ซือนังฆรี นะ กูญา. 8 กะฆีเตอ ราฌา มือเลา ฌางัน ปราโซฮ นะ ญา จะ_'ลาฆู มือนีกัฮ ซียะ ตาโรฮ ดัฮ เลอ ตาปี โกะ ซือมียา นู กู บลาโลก ดัฮ_เตด บือฆูนา เลอ. 9 กะฆีเตอ กาเญา กือนา ปี กะ ตือปัจ ฌาลัด จีปัก เดะ โกะ ฌาลัด บือซัยํ_ดาปัจ ซือมียา ดีฮา บลาโลก กูญา มาแรฮ กะ ลาฆู มือนีกัฮ เลอ.' 10 กะฆีเตอ ลูมอฮ ปราโซฮ อีตู ตรือเบะ ปี กะ โซะ ฌาลัด ราตาๆ_ดาปัจ ซือมียา ดีฮา ซือมียา ฌาฮัจ เฆอ-จะ ซือมียา บาฌิ โปด ปือมุน กูญา ซือมูฮา_บาวา มาแรฮ กะ ลาฆู มือนีกัฮ เลอ. กะฆีเตอ ตือปัจ มือนีกัฮ อีตู_อาดา ซือมียา บาญะ ปือนอฮ ดัฮ. 11 "ตาปี กาลา ราฌา มาแรฮ นะ บือดาปัจ ลูมอฮ ซือมียา นู บือฮีโปด เตอ_ญา ลีฮัจ บือฆารี ซือมียา ซืออูรัก นู เตด บือเลฮ ปากัย กาเยด บาฌู_นู บือฆูนา ฌางัน ลาฆู มือนีกัฮ. 12 ราฌา มือเลา ฌางัน ซือมียา อีตู จะ 'กาวัด เออ กะฮามี เลอ_เกา มาโซะ มาแรฮ ดัฮ_ฮอย เตด ปากัย กาเยด บาฌู นู บือฆูนา ฌางัน ลาฆู มือนีกัฮ เลอ?' ซือมียา อีตู ซืองะ ดัฮ_ญา มือเลา นามา เตด ตรือเบะ เลอ. 13 กะฆีเตอ ราฌา ปือซัด กะ ปราโซฮ นะ ญา จะ 'กือนา อีกัจ ตางัน_อีกัจ กากี นะ ซือมียา อีนี บาวา ปี ตีงัน บูวัก เดะ โซะ ลูวัยํ นู กือลับ โตระ.โซะ อีตู กูญา มือนาแงฮ ตือกาจิ ฆีฆี ซาเกะ โตระ เลอ.' " 14 กะฆีเตอ เยซู มือเลา จะ "ซือมียา นู กือนา บลาโลก ดัฮ อาดา บาญะ_ตาปี ซือมียา นู กือนา ปีเลฮ เตด บราปา บาญะ เลอ." 15 ลือปัซ อีตู โกะ ลูมอฮ ฟาริซี ซือตืองัฮ ปี บือกีรา บือซามา นะ อาเมด ซาลัฮ_เดะ ปือมือเลา นะ เยซู บือเลฮ กะฮามี. 16 กูญา ซูโรฮ โกะ มูเระ นะ กูญา ซือตืองัฮ_ฌางัน ลูมอฮ นะ ราฌา เฮโรด ซือตืองัฮ ปี ซารี เยซู มือเลา จะ_" บูมอยํ เออ กามี ตาฮู จะ เกา เลอ ซือมียา รือมัก ซูโงฮ.เกา อาฌัยํ โงฮ-ซูโงฮ ปาซัน ฌาลัด นะ ตูฮัด เดะ อาตัซ.เกา เตด ตาโกจ เดะ ซาปา โปด ซาเบะ เกา เตด ปีเลฮ มูคา ซือมียา ดีฮา เลอ. 17 มือญาเระ กะ กามี เลอ เกา กีรา กะฮามี.นู นะ บายัยํ อาเซน กะ ราฌา ซีซา เตอ_รือมัก ฌางัน ปือมือเลา ฮูโกบ นะ ตูฮัด เฆอ เตด?" 18 ตาปี เยซู ญา ตาฮู ดัฮ นู กูญา ฮาตี ฌาฮัจ ญา มือเลา จะ_"กาเญา นู มูคา มาเนฮ ฮาตี ฌาฮัจ เตอ บูวัจ นามา กาเญา ลกลีฮัจ กู? 19 กือนา อาเมด ดูเวะ บายัยํ อาเซน บรี กะ กู ลีฮัจ ซา รีเงะ เลอ." กูญา อาเมด ซา รีเงะ มาแรฮ บรี กะ ญา. 20 เยซู ตาญา กูญา จะ "รูปา อีนี ฌาดี รูปา นะ ซาปา? ปือนามา ฆาแรฮ อีนี_ฌาดี นะ ซาปา เลอ?" 21 กูญา ตีกัฮ จะ "นะ ราฌา ซีซา เลอ." กะฆีเตอ เยซู มือเลา ฌางัน กูญา จะ "ซือบารัก นะ ราฌา ซีซา_กือนา มือญือมัฮ กะ ซีซา. ซือบารัก นะ ตูฮัด กือนา อาเกะ มือญือมัฮ กะ ตูฮัด เลอ." 22 ตานา กูญา ดืองัยํ กะฆีนี ดัฮ กูญา ปาคัจ ปือและ-ฮาตี.กะฆีเตอ กูญา ตีงัน เยซู ปี ดัฮ. 23 อารี อีตู เตอ อาดา ลูมอฮ ซะดูซี ซือตืองัฮ มาแรฮ ซารี เยซู.ลูมอฮ ซะดูซี อีตู กูญา จะ ลาฆู ฮีโดะ ปาเระ เดะ มาตี เตอ ฮอย ลาลู.กูญา ตาญา เยซู 24 มือเลา จะ "บูมอยํ เออ มูซา บือเลฮ มือเลา กาลา นูตู จะ 'ซือมียา ดีฮา นู ฮอย นานะ เตอ ดัฮ ญา มาตี ดัฮ อาดี เดะ ญา ซืออูรัก_กือนา ซาโมจ นีบีนี ฌานา อีตู ฌาดี บีนี นะ ญา เตอ บีดา นะ บือเลฮ นานะ_นู นะ ฌาดี บือแนฮ นะ กากา เดะ ญา.' 25 นี เลอ เดะ ตืองัฮ ลูมอฮ กามี อาดา โกะ ดีบราดี ตูโฌฮ อูรัก.นู ซูโลก มือนีกัฮ ดัฮ ตาปี ญา มาตี ฮอย นานะ. กะฆีเตอ_อาดี เดะ ญา ซาโมจ บีนี นะ กากา มาแรฮ ฌาดี บีนี นะ ญา. 26 ตาปี ลาฆู อีตู ฌาดี กะ อาดี นู ดูวา อาดี นู ตีฆา ตือดะ รอจ กะ อาดี นู ตูโฌฮ. 27 เดะ บลากัก โกะ ดีบราดี ซือมูฮา นีบีนี อีตู โปด ญา มาตี ฌูฆา ดัฮ. 28 กะฆีเตอ ตานา รอจ วะตู นู โกะ ซือมียา นะ ฮีโดะ ปาเระ เดะ มาตี เตอ_นีบีนี อีตู นะ ฌาดี บีนี นะ ซาปา เลอ? กรานา-จะ กูญา ซือมูฮา ซาโมจ ญา_ฌาดี บีนี นะ กูญา ดัฮ." 29 ตาปี เยซู ตีกัฮ กะ กูญา จะ "กาเญา ซาลัฮ ดัฮ เลอ.ซาเบะ-จะ ซูรัจ ปือมือเลา นะ ตูฮัด กาเญา เตด ตาฮู.นู ปือมือฆัฮ นะ ตูฮัด เดะ อาตัซ โปด กาเญา เตด ตาฮู ฌูฆา. 30 กรานา วะตู ฮีโดะ ปาเระ เดะ มาตี ดัฮ เตอ โกะ ซือมียา เตด มือนีกัฮ ปูลัก_กูญา เตด อาเกะ บรี ฌาดี ลากี บีนี ดัฮ เลอ.ตาปี กูญา นะ ฌาดี ซือรูปา โกะ ฮูลู-บาลัก เดะ โซะ อาตัซ ลาแงะ เลอ. 31 ตาปี ปาซัน ซือมียา มาตี นะ ฮีโดะ ปาเระ เตอ กาเญา เตด ดือละ บาจา เฆอ_นู ตูฮัด เดะ อาตัซ บือเลฮ มือเลา จะ 32 'กู นี เลอ_ฌาดี ตูฮัด นะ อับราฮัม ตูฮัด นะ อีซัก ตูฮัด นะ ยาโกบ เลอ.' ตูฮัด เดะ อาตัซ เตอ ญา บูกัด ตูฮัด นะ ซือมียา นู ฮาบิฮ มาตี ดัฮ_ตาปี ญา ฌาดี ตูฮัด นะ ซือมียา นู อาดา ฮีโดะ เลอ." เยซู ญา จะ. 33 ตานา ลูมอฮ ซือมียา บาญะ ดืองัยํ ลาฆู อีนี ดัฮ กูญา ปือและ-ฮาตี ซูโงฮ_นู ญา อาฌัยํ กะฆีนี. 34 ตาปี กาลา โกะ ลูมอฮ ฟาริซี ดืองัยํ_นู เยซู ญา บูวัจ บรี โกะ ลูมอฮ ซะดูซี ซืองะ ดัฮ กูญา บือมุน บือซามา. 35 อาดา ซือมียา อาฌัยํ ลาฆู ปือมือซัด นะ ตูฮัด เดะ ตืองัฮ กูญา.ญา อีงัจ นะ ลกลีฮัจ เยซู ตาญา จะ 36 "บูมอยํ เออ เดะ ปือมือเลา ฮูโกบ นะ ตูฮัด ปือมือซัด ตือนอซ ดีฮา เลอ_นู บือซัยํ เดะ กาวัด?" 37 เยซู ตีกัฮ กะ ญา จะ "นู จะ 'เกา กือนา ซายัก กะ ตูฮัด บือซัยํ เดะ อาตัซ ตูฮัด นะ เกา_บรี ปือนอฮ เดะ ฮาตี ซือมูฮา เลอ บือกะ ญาวา เกา บูวัจ บือเลฮ ซือมูฮา' บือกะ เกา กีรา บรีงัจ บือเลฮ ซือมูฮา ฌูฆา เลอ. 38 ปือมือซัด ตือนอซ อีนี เลอ ฌาดี ปือมือซัด นู ลามูลา นู บือซัยํ เดะ กาวัด. 39 ปือมือซัด ตือนอซ นู ดูวา โปด ซือรูปา นู จะ 'เกา กือนา ซายัก กะ กาวัด ซือรูปา ซายัก กะ ญาวา ตะอาซิก เลอ.' 40 ปือมือเลา ฮูโกบ นะ ตูฮัด ซือมูฮา_ฌางัน ปือมือเลา นะ โกะ ซือมียา ตูโดฮ ลาฆู นะ ตูฮัด ซือมูฮา_อาดา เดะ ดูวา ตือนอซ อีนี ฆือนะ ดัฮ." เยซู ญา จะ. 41 ตานา โกะ ลูมอฮ ฟาริซี อาดา บือมุน บือซามา เยซู ตาญา กูญา จะ 42 "กาเญา กีรา กะฮามี ปาซัน ราฌา นู บรี ซือลามัจ.ญา ฌาดี บือแนฮ นะ ซาปา เลอ?" กูญา ตีกัฮ กะ ญา จะ "ญา ฌาดี บือแนฮ นะ ราฌา ดาวิด เลอ." 43 เยซู มือเลา ฌางัน กูญา จะ "ดัฮ กะฆีเตอ บูวัจ นามา เลอ ซือมืองัจ นะ ตูฮัด ซูโรฮ ราฌา ดาวิด บรี ญา บลาโลก ราฌา อีตู จะ 'ตูฮัด'?ญา มือเลา จะ 44 'ตูฮัด บือซัยํ เดะ อาตัซ มือเลา ฌางัน ตูฮัด นะ กู จะ ดูโดะ เลอ โซะ ซือบือลัฮ กานัน นะ กู ตือดะ กู นะ บูวัจ บรี ลูมอฮ ซือตรู นะ เกา นะ ดูโดะ เดะ บาวัฮ ตาปะ กากี นะ เกา.' ดาวิด ญา จะ. 45 กะ ราฌา ดาวิด บลาโลก ราฌา นู บรี ซือลามัจ อีตู จะ 'ตูฮัด' เตอ_ญา นะ ฌาดี บือแนฮ นะ ดาวิด บือเลฮ กะฮามี เลอ?" เยซู ญา จะ. 46 ฮอย ซาปา บือเลฮ ตีกัฮ กะ เยซู แนฮ ซา ปาตัฮ โปด ฮอย.ตะเดะ อารี อีตู เตอ ฮอย ซาปา นู บรานี นะ ตาญา เยซู ปูลัก ดัฮ.
1 ลือปัซ อีตู เยซู มือเลา ฌางัน ลูมอฮ ซือมียา บาญะ_ฌางัน โกะ มูเระ นะ ญา ซามา จะ 2 "ลูมอฮ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ ฟาริซี_ซา กูญา เลอ นู บือเลฮ บลาฌัยํ ยู ปานัย มือญาเระ_ปาซัน โกะ ปือมือซัด ฮูโกบ นะ มูซา. 3 กะฆีเตอ ลาฆู นามา นู กูญา ปือซัด กะ กาเญา กาเญา กือนา บูวัจ ตูโรจ เลอ_ตาปี ฌางัน นะ ตูโรจ กะ ปือบูวัจ นะ กูญา เลอ ซาเบะ กูญา อาฌัยํ ปือมือซัด นะ ตูฮัด_กือนา ดัฮ ตาปี กูญา ตะอาซิก เตด บูวัจ ตูโรจ เลอ. 4 กูญา อีกัจ ซือบารัก บรัจ นู ตาโงก ปายัฮ โตระ ตืองะ เดะ อาตัซ ซือมียา_ตาปี โซะ ลูมอฮ กูญา ตะอาซิก แนฮ ซา ฌารี โปด ฮอย เตด อาเกะ ลาลู_บีดา นะ ตูโลก กูญา ตาโงก ซือบารัก นู บรัจ อีตู. 5 ปือบูวัจ นะ กูญา ซือมูฮา เตอ กูญา บูวัจ บีดา ซือมียา อาซิก นะ บือฆารี.กูญา อีกัจ ตือนอซ ซูรัจ ปือมือเลา นะ ตูฮัด บูกุซ บือซัยํ เดะ กือนิง_เดะ ตางัน นะ กูญา เตอ. กูญา บูวัจ รามัย นู ปาญัก เดะ บีดิก บาฌู ซรือโกะนะ กูญา. 6 เดะ ลาฆู มากัด บรามัย เตอ เดะ รูมัฮ บือมุน โปด_กูญา ซูกา นะ ดูโดะ เดะ ตือปัจ นู บาฌิ เดะ กาวัด. 7 กูญา ซูกา บรี โกะ ซือมียา อาเกะ ซือมัฮ กะ กูญา เดะ ปาฌะ อีกัด เตอ_กูญา ซูกา บรี ซือมียา บลาโลก กะ กูญา จะ 'บูมอยํ'. 8 ตาปี โซะ กาเญา เตอ ฌางัน บรี ซือมียา ดีฮา บลาโลก กาเญา จะ 'บูมอยํ' เลอ_ซาเบะ-จะ กาเญา ซือมูฮา ฌาดี อาดี-บราดี บือซามา อาดา บูมอยํ แนฮ ซา เลอ. 9 กะฆีเตอ ฌูฆา ฌางัน บรี กาเญา บลาโลก ซือมียา ดีฮา เดะ ดือนียา จะ 'อาโปก'.ซาเบะ กาเญา อาดา อาโปก แนฮ ซา ญา เลอ นู ดูโดะ เดะ โซะ อาตัซ ลาแงะ. 10 กะฆีเตอ ฌางัน บรี ซือมียา ดีฮา บลาโลก กาเญา จะ 'กือปาลา' เลอ.กาเญา อาดา กือปาลา แนฮ ซา ญา เตอ ราฌา นู บรี ซือลามัจ เลอ. 11 ซือมียา นู บือซัยํ เดะ ลูมอฮ กาเญา ญา กือนา ฌาดี ซือมียา มือนูโลก นะ กาเญา. 12 ซือมียา ดีฮา นู อาเกะ ญาวา ตะอาซิก บรี ตีงี เตอ_ญา ฆาโดฮ กือนา บูวัจ บรี รือนัฮ เลอ. ซือมียา ดีฮา นู มือนูโนะ ญาวา ตะอาซิก เตอ_ญา นะ กือนา อาเกะ บรี ตีงี เลอ." 13 "จือลากา เลอ กาเญา ลูมอฮ ซือมียา อาฌัยํ ลาฆู ปือมือซัด นะ ตูฮัด_ฌางัน ลูมอฮ ฟาริซี. กาเญา นู มูคา มาเนฮ ฮาตี ฌาฮัจ เลอ.ซาเบะ กาเญา ตูโดก ปีตู ตีเมา บรี โกะ ซือมียา นะ มาโซะ ฌาดี ลูมอฮ ซือมียานะ ตูฮัด. ลูมอฮ กาเญา ตะอาซิก โปด เตด บือเลฮ มาโซะ ฌูฆา เลอ. ซือมียา นู นะ มาโซะ เตอ_กาเญา บลารัก ตีเมา บรี กูญา นะ มาโซะ ดัฮ. 15 "จือลากา เลอ กาเญา ลูมอฮ ซือมียา อาฌัยํ ลาฆู ปือมือซัด นะ ตูฮัด_ฌางัน ลูมอฮ ฟาริซี. กาเญา นู มูคา มาเนฮ ฮาตี ฌาฮัจ เลอ.กาเญา บือฌาลัด ปี มาแรฮ โซะ ลาโวจ โซะ ฮูตัด ราตา_บีดา นะ บาวา ซือมียา ซืออูรัก มาโซะ กะ ลาฆู นะ กาเญา. ตานา ญา มาโซะ ดัฮ_กาเญา บูวัจ บรี ญา ฌาดี ซือมียา บือฆูนา ฌางัน อาปี นอรากา_บาญะ ลือเบฮ เดะ กาเญา ดูวา กาลี. 16 "จือลากา เลอ กาเญา กาเญา ฌาดี อูรัก มาตา บูตา นู ตูโญะ ฌาลัด_บรี กะ ซือมียา อาซิก. กาเญา อาฌัยํ จะ 'กะ ซาปา อาเกะ บาลัย นะ ตูฮัด_มาแรฮ มือเลา บือซูปัฮ ลาฆู บือซูปัฮ อีตู เตด ฌาดี นามา. ตาปี กะ ญา อาเกะ โกะ มัซ_เดะ บาลัย อีตู มือเลา บือซูปัฮ ญา ฆาโดฮ บูวัจ ตูโรจ เลอ.' กาเญา จะ. 17 กาเญา อูรัก บูดอ มาตา บูตา เลอ. บือนา นามา นู บือซัยํ ลือเบฮ ลาฆี?มัซ เฆอ-จะ บาลัย นะ ตูฮัด นู บูวัจ บรี มัซ อีตู ฌาดี บารัก นู จรัฮ บาฌิ. 18 กาเญา มือเลา ปูลัก จะ_'กะ ซือมียา ดีฮา อาเกะ ตือปัจ มือนืองะ บารัก มือญือมัฮ กะ ตูฮัด_มาแรฮ มือเลา บือซูปัฮ ลาฆู บือซูปัฮ อีตู เตด ฌาดี นามา เลอ.ตาปี กะ อาเกะ บารัก มือญือมัฮ เดะ อาตัซ ตือปัจ ตูนู บารัก มือนืองะ อีตู_มือเลา บือซูปัฮ ญา กือนา บูวัจ ตูโรจ เลอ.' 19 กาเญา มาตา บูตา เลอ. บือนา นามา นู บือซัยํ ลือเบฮ ลาฆี?นู บารัก มือนืองะ เตอ เฆอ-จะ นู ตือปัจ ตูนู บารัก มือนืองะ กะ ตูฮัด_นู บูวัจ บรี บารัก อีตู ฌาดี บารัก จรัฮ บาฌิ? 20 กะฆีเตอ ซาปา นู บือซูปัฮ อาเกะ กะ ตือปัจ ตูนู บารัก มือนืองะ กะ ตูฮัด อีตู เตอ_ญา บือซูปัฮ อาเกะ กะ ตือปัจ อีตู ฌางัน บารัก ซือมูฮา เดะ อาตัซ ตือปัจ อีตู ฌูฆา. 21 ซาปา นู บือซูปัฮ อาเกะ กะ บาลัย นะ ตูฮัด เตอ_ญา บือซูปัฮ อาเกะ กะ บาลัย อีตู ฌางัน ตูฮัด นู ดูโดะ เดะ บาลัย อีตู เลอ. 22 ซาปา นู บือซูปัฮ อาเกะ กะ ลาแงะ โปด_ญา บือซูปัฮ อาเกะ กะ ตือปัจ ดูโดะ นะ ตูฮัด เตอ ฌางัน ตูฮัด บือซัยํ เดะ อาตัซ_นู ดูโดะ เดะ อาตัซ ตือปัจ ดูโดะ อีตู เลอ. 23 "จือลากา เลอ กาเญา ลูมอฮ ซือมียา อาฌัยํ ลาฆู ปือมือซัด นะ ตูฮัด_ฌางัน ลูมอฮ ฟาริซี. กาเญา นู มูคา มาเนฮ ฮาตี ฌาฮัจ เลอ. กรานา-จะ ปูโจะ รูกู_ฌางัน ปูโจะ ฌือแม ฌางัน กูแญะ เตอ เดะ ดาลับ ซือปูโลฮ บรือกัซ_กาเญา อาเกะ บรี กะ ตูฮัด ซา บรือกัซ. ตาปี โกะ ลาฆู นู ซัยํ-บือซัยํ เดะ อีตู_เดะ ปือมือเลา ฮูโกบ นะ ตูฮัด เตอ_บือกะ นู กาเญา กือนา ฮาตี รือมัก ฌางัน กาวัด เตอ กือนา อาดา ฮาตี ตือจีฮัด_ฮาตี ปือจายา เลอ ลาฆู กะฆีนี กาเญา บือเลฮ ตีงัน บูวัก ดัฮ.ลาฆู ซัยํ-บือซัยํ กะฆีนี กาเญา ฆาโดฮ บูวัจ ตูโรจ เลอ ตาปี ลาฆู ดือมิ ซีงี_ฌางัน นะ ตีงัน ฌูฆา. 24 กาเญา ฌาดี อูรัก มาตา บูตา นู ตูโญะ ฌาลัด บรี กะ ซือมียา อาซิก.กาเญา ซรอก ติอูติ ตรือเบะ เดะ อาเย โอะ ตาปี ญาวา อูตัยํ โปด_กาเญา ตือลัด ปี ฮาบิฮ ซืออีโกยํ เลอ. 25 "จือลากา เลอ กาเญา ลูมอฮ ซือมียา อาฌัยํ ลาฆู ปือมือซัด นะ ตูฮัด_ฌางัน ลูมอฮ ฟาริซี. กาเญา นู มูคา มาเนฮ ฮาตี ฌาฮัจ เลอ.กาเญา บาโซฮ มาโกะ ฌับ โซะ ลูวัยํ. ตาปี โซะ ดาลับ มาโกะ ฌับ เตอ_ปือนอฮ ปี ฌางัน ลาฆู ฮาลูบา ซือมาตา ราปัซ อาเมด บารัก นะ กาวัด. 26 โอ ลูมอฮ ฟาริซี นู มาตา บูตา เออ บาโซฮ เลอ โกะ มาโกะ ฌับ_โซะ ดาลับ ดูลู. กะฆีเตอ เลอ ญา นะ จรัฮ บาฌิ โซะ ลูวัยํ ฌูฆา ดัฮ. 27 "จือลากา เลอ กาเญา ลูมอฮ ซือมียา อาฌัยํ ลาฆู ปือมือซัด นะ ตูฮัด_ฌางัน ลูมอฮ ฟาริซี. กาเญา เลอ นู มูคา มาเนฮ ฮาตี ฌาฮัจ.กาเญา ซือรูปา กะ ฆูฮา ตานัม บาดัด. โซะ ลูวัยํ ซาปัก กาโปยํ ปูเตฮ ลีฮัจ บือฆาจะ_ตาปี โซะ ดาลับ เตอ ปือนอฮ ฌางัน ตูลัก ซือมียา มาตี_ฌางัน บารัก บูโซะ ราตา ฌือแนฮ เลอ. 28 กะฆีเตอ ฌูฆา กาเญา เตอ โซะ ลูวัยํ โกะ ซือมียา ลีฮัจ กาเญา จะ บาฌิ-ตือปัจ_ตาปี โซะ ดาลับ กาเญา ซือมาตา ฮาตี ปีเกาะ บือดูซา บาญะ เลอ. 29 "จือลากา เลอ กาเญา ลูมอฮ ซือมียา อาฌัยํ ลาฆู ปือมือซัด นะ ตูฮัด_ฌางัน ลูมอฮ ฟาริซี. กาเญา นู มูคา มาเนฮ ฮาตี ฌาฮัจ เลอ.กรานา-จะ กาเญา บูวัจ รูมัฮ ตานัม บาดัด นู บาฌิ_บีดา โกะ ซือมียา ตูโดฮ ลาฆู นะ ตูฮัด เตอ_กาเญา ปือตัด รูมัฮ ตานัม บาดัด บรี บือฆาจะ บีดา โกะ ซือมียา บาฌิ-ตือปัจ. 30 กาเญา มือเลา จะ 'ตือกาลา โกะ บีลาแก เตอ ดัฮ อาดา กามี ซูโงฮ_กามี เตด บือปาคัจ ฌางัน กูญา เดะ ลาฆู บูนอฮ โกะ ซือมียา ตูโดฮ อีตู.' 31 กะฆีเตอ กาเญา ซือมูฮา บรี ซะซี จะ_นู กาเญา ตะอาซิก ฌาดี บือแนฮ นะ โกะ ซือมียา_นู บูนอฮ โกะ ซือมียา ตูโดฮ ลาฆู นะ ตูฮัด อีตู ดัฮ. 32 กาเญา กือนา บูวัจ ตูโรจ จูตอ นะ โกะ บีลาแก นะ กาเญา_บรี ปือนอฮ ซูโงฮ เลอ. 33 โอ กาเญา เลอ ลูมอฮ อูลัยํ ลูมอฮ บักซา อูลัยํ ฌาฮัจ เลอ.ซูโงฮ กาเญา นะ กือนา กรัจ ฮูโกบ ปี กะ นอรากา เตอ. กาเญา นะ ลือปัซ กะฮามี เลอ? 34 "ซาเบะ กะฆีเตอ ลีฮัจ เลอ โกะ ซือมียา ตูโดฮ ลาฆู นะ ตูฮัด_ฌางัน โกะ ซือมียา ปานัย อากัน ฌางัน โกะ ซือมียา นู อาฌัยํ ลาฆู นะ ตูฮัด เตอ_กู นะ ซูโรฮ กูญา มาแรฮ กะ กาเญา. กูญา อีตู ซือตืองัฮ กาเญา นะ บูนอฮ_ซือตืองัฮ นะ กาจิก เดะ กายู ปลีตัก เตอ_ซือตืองัฮ กาเญา นะ รือเปะ เดะ รูมัฮ บือมุน นะ กาเญา นะ ปรือกัด กูญา บรี ลารี_ตรือเบะ เดะ นังฆรี อีนี ปี กะ นังฆรี อีตู. 35 กะฆีเตอ เลอ กาเญา นะ กือนา กรัจ ฮูโกบ_ปาซัน ดารัฮ นะ ลูมอฮ ซือมียา บาฌิ-ตือปัจ นู กือนา บูนอฮ ดัฮ ราตา เดะ ดือนียา.ตะเดะ ดารัฮ นะ เฮเบน ซือมียา นู บาฌิ-ตือปัจ เตอ รอจ กะ ดารัฮ นะ ซะคารียา นานะ นะ บาราเคีย นู ลูมอฮ กาเญา บือเลฮ บูนอฮ ดัฮ เตอ เดะ จือลัฮ บาลัย นะ ตูฮัด_ฌางัน ตือปัจ ตูนู บารัก มือนืองะ เตอ_กรานา ดารัฮ นะ ลูมอฮ ซือมียา อีตู ซือมูฮา เตอ กาเญา นะ กือนา กรัจ ฮูโกบ เลอ. 36 ซูโงฮ เลอ กู มือเลา ฌางัน กาเญา จะ ลูมอฮ ซือมียา ฮาดัจ อีนี_นะ กือนา ลาฆู อีนี ซือมูฮา." เยซู ญา จะ. 37 เยซู ญา มือเลา ลาฆี จะ "โอ กาเญา ลูมอฮ เยรูซาเลม เออ_นู บูนอฮ โกะ ซือมียา ตูโดฮ ลาฆู นะ ตูฮัด เตอ นู อาเมด บาตู_ลีปัยํ โกะ ซือมียา นู ตูฮัด ซูโรฮ มาแรฮ มียา กาเญา. บาญะ กาลี เลอ_กู บือคานะ นะ บือมุน ลูมอฮ กาเญา ตาโรฮ_ซือรูปา อีโนก ฮายับ นู กรด โกะ อานะ นะ ญา บรี ดูโดะ เดะ บาวัฮ ซายะ_ตาปี กาเญา ตีเมา เลอ. 38 ลีฮัจ เลอ รูมัฮ นะ กาเญา นะ กือนา บือบียัยํ ดัฮ เลอ. 39 กู มือญาเระ กะ กาเญา จะ ตะเดะ อีนี ปี_กาเญา นะ ฮอย เตด บือเลฮ ลีฮัจ กู ดัฮ ตือดะ กาเญา นะ มือเลา จะ 'ซือลามัจ เลอ ซือมียา นู มาแรฮ เดะ นามา นะ ตูฮัด เดะ อาตัซ.' " เยซู ญา จะ.
1 ตานา เยซู ตรือเบะ เดะ รูมัฮ มือญือมัฮ ตูฮัด นะ ปี ปูลัก_โกะ มูเระ นะ ญา มาแรฮ ตูโญะ บรี ญา ลีฮัจ โกะ รูมัฮ บาตู เดะ รูมัฮ มือญือมัฮ อีตู. 2 ตาปี เยซู มือเลา ฌางัน กูญา จะ "รูมัฮ อีนี ซือมูฮา กาเญา ลีฮัจ ดัฮ_บูกัด เฆอ? ซูโงฮ เลอ กู มือเลา ฌางัน กาเญา จะ รูมัฮ อีนี ซือมูฮา_นะ กือนา ปรูโตฮ ฮาบิฮ เตอ. ฮอย บาตู ซือกือโตน โปด_นู นะ บือซูโซด-ซูโซด กะฆีนี เลอ." เยซู ญา จะ. 3 ตานา เยซู ดูโดะ เดะ บูเกะ กือดูโนด โกะ มูเระ มาแรฮ ซารี ญา ตาญา ญา จะ_"มือญาเระ เลอ ลาฆู อีนี นะ บือฌาดี กาลา? อาดา ปือนานา นามา นู นะ บรี ลีฮัจ จะ_รอจ วะตู นู เกา นะ บาลิ มาแรฮ นู ฮาดัจ อีนี นะ ปือญูดัฮ ฮาบิฮ เลอ?" กูญา จะ. 4 เยซู ตีกัฮ กะ กูญา จะ "กือนา ฌาฆา บรี บาฌิ เลอ_ฌางัน บรี ซาปาๆ บาวา กาเญา ปี ซือซัจ ฌาลัด เลอ. 5 กรานา-จะ อาดา ซือมียา บาญะ นะ อาเกะ ซือโบจ นามา นะ กู_มาแรฮ มือเลา จะ 'กู นี ฌาดี ราฌา นู บรี ซือลามัจ เลอ.'กะฆีเตอ กูญา นะ บาวา โกะ ซือมียา บาญะ ปี ซือซัจ ฌาลัด ดัฮ. 6 กาเญา นะ ดืองัยํ จะ อาดา นังฆรี บือปรัก โซะ อีนี โซะ อีตู เตอ. ฌาฆา เลอ_ตีเมา บรี ฆาโดฮ-ฮาตี ซาเบะ ฆาโดฮ ฌาดี กะฆีเตอ ดัฮ_ตาปี ฮอย เตด รอจ กะ วะตู ปือญูดัฮ ลาฆี เลอ. 7 อาดา ฌูฆา ลูมอฮ อีนี นะ บลาวัด ฌางัน ลูมอฮ อีตู. นังฆรี โซะ อีนี_นะ บลาวัด ฌางัน นังฆรี โซะ อีตู. บาญะ ซือมียา นะ บือตาฮัด บารัก มากัด.นะ ฌาดี ตานัฮ บรีเงาะ บาญะ ตือปัจ เลอ. 8 ลาฆู อีนี ซือมูฮา นะ ฌาดี ซือรูปา ลาฆู ลามูลา เดะ วะตู นู นะ ซูซัฮ โตระ."เยซู ญา จะ. 9 "กาลา อีตู กูญา นะ อาตัจ กาเญา บรี กือนา ซูซัฮ ปายัฮ โตระ เลอ_บรี กาเญา นะ กือนา บูนอฮ มาตี. ลูมอฮ บักซา ซือมูฮา นะ บือชี กะ กาเญา_กรานา กาเญา ตูเฮะ กะ นามา นะ กู. 10 บาญะ ซือมียา นะ กือนา บาวา ปี ซือซัจ ฌาลัด ดัฮ.กูญา นะ บูวัจ กือบลากัก กะ กาวัด ซือตืองัฮ นะ บือชี กาวัด ซือตืองัฮ ดัฮ. 11 กาลา อีตู อาดา ซือมียา ตูโดฮ ลาฆู มืออูปัย บาญะ อูรัก นะ มาแรฮ_นะ บาวา โกะ ซือมียา บาญะ ปี ซือซัจ ฌาลัด ดัฮ. 12 ลูมอฮ ซือมียา นะ บูวัจ ลาฆู นู ฌาฮัจ บาญะ ซือรูโลยํ. กะฆีเตอ_นู โกะ ซือมียา บาญะ นะ บือซายัก-ซายัก เตอ นะ กูรัก เลอ. 13 ตาปี ซือมียา ดีฮา นู ลาวัด ตาฮัด รอจ กะ วะตู นู ปือญูดัฮ ดัฮ ซือมียา อีตู เตอ_นะ ฮีโดะ ลือปัซ บาฌิ เลอ. 14 บรีตา นู บาฌิ อีนี ปาซัน ลาฆู นู ตูฮัด ญา บือบือลา ฌาดี ราฌา เตอ กือนา ปี มือญาเระ กะ ลูมอฮ บักซา ราตา เดะ ดือนียา บรี ฌาดี ซะซี กะ กูญา อีตู.ลือปัซ อีตู นู ปือญูดัฮ นะ มาแรฮ รอจ เลอ." เยซู ญา จะ. 15 เยซู มือเลา ลาฆี จะ "อาดา ซืออารี_กาเญา นะ ลีฮัจ บือนา นู รูบือฮีรู โตระ นู บูวัจ บรี ตะอารัฮ เตอ_ญา เลอ นะ บือดีรี เดะ ตือปัจ นู บาฌิ บือซรี. ดานีเอน_นู ซือมียา ตูโดฮ ลาฆู นะ ตูฮัด เตอ ญา บือเลฮ มือเลา ปาซัน อีตู ดัฮ (ซือมียา นู บาจา บรี ลาฆู อีนี มาโซะ เดะ ฮาตี เลอ.) 16 ตานา ลีฮัจ ดัฮ บรี โกะ ซือมียา เดะ นังฆรี ยูเดีย ลารี ปี กะ โซะ บูเกะ เลอ. 17 ซือมียา นู อาดา เดะ อาตัซ ลอเตง เตอ_ฌางัน บรี ญา ตูโรด อาเมด โกะ ซือบารัก เดะ รูมัฮ บือปี ดูลู. 18 ซือมียา นู อาดา เดะ บือนัก เตอ ฌางัน บรี ญา ปาเระ มาแรฮ_ซีงัฮ อาเมด บาฌู ซรือโกะ บือปี เลอ. บรี กูญา ลารี บูวัก ซือมูฮา. 19 เดะ กาลา อีตู ซูซัฮ ปายัฮ โตระ เลอ โกะ นีบีนี นู บือโปรจ_โกะ นีบีนี นู อาดา นานะ มูดา นู ตืองัฮ มากัด ดาดา ลาฆี เตอ. 20 กือนา บือซาโวจ เลอ บรี กาเญา นะ เตด ฆาโดฮ ลารี เดะ มูเซด บือแฌะ เตอ_เดะ อารี บราดู กรือฌา เลอ. 21 กรานา กาลา อีตู นะ ฌาดี วะตู ซูซัฮ ปายัฮ โตระ_นู ลูมอฮ ซือมียา เตด ดือละ ดาปัจ. ตะเดะ บือฌาดี ดือนียา มาแรฮ รอจ กะ ฮาดัจ อีนี_เตด ดือละ ลีฮัจ เลอ นู ซูซัฮ ปายัฮ โตระ กะฆีเตอ. เดะ วะตู โซะ ฮึลด เตอ_นะ ฮอย เตด อาดา กะฆีเตอ ปูลัก เลอ. 22 กะ ตูฮัด เตด บูวัจ บรี วะตู อีตู ซีกัจ ปานะ ดัฮ ฮอย ซือมียา ซืออูรัก โปด_นู นะ ฮีโดะ ลือปัซ เลอ. ตาปี ตูฮัด ญา ลีฮัจ กะ โกะ ซือมียา นู ญา ปีเลฮ ดัฮ_กะฆีเตอ ญา บูวัจ บรี วะตู อีตู ซีกัจ ปานะ ดัฮ. 23 "วะตู อีตู กะ อาดา ซือมียา มือญาเระ กะ กาเญา จะ 'ลีฮัจ เลอ ราฌา นู บรี ซือลามัจ ญา อาดา โซะ อีนี' เฆอ-จะ 'ญา อาดา โซะ อีตู'_กาเญา ฌางัน ปือจายา กะ กูญา เลอ. 24 กรานา อาดา โกะ ราฌา นู บรี ซือลามัจ วัจบูวัจ_ฌางัน โกะ ซือมียา ตูโดฮ วัจบูวัจ นะ บือฌาดี บาญะ อูรัก_กูญา นะ บูวัจ บรี ลีฮัจ ปือนานา นู มือฆัฮ โตระ นู ปือและ ซูโงฮ. กะฆีเตอ_กะ ฌาดี บือเลฮ กูญา นะ มืออูปัย บรี โกะ ซือมียา นู ตูฮัด ปีเลฮ ดัฮ_นะ ซือซัจ ฌาลัด ฌูฆา เลอ. 25 "ลีฮัจ เลอ กู บือเลฮ มือเลา ปรีงัจ ลาฆู อีนี กะ กาเญา ดูลู ดัฮ. 26 ดัฮ กะฆีเตอ กะ กูญา มือเลา ฌางัน กาเญา จะ 'ลีฮัจ เลอ_ญา อาดา เดะ ปาดัก ตานัฮ ตูโฮยํ นู ลือฆา.' ฌางัน ปี โซะ อีตู เลอ. กะ กูญา จะ_'ลีฮัจ เลอ ญา อาดา เดะ โซะ ดาลับ รูวัก.' ฌางัน ปือจายา เลอ. 27 กรานา ซือรูปา บือกะ กีลัจ นู ดาตัก มาแรฮ เดะ โซะ ตีมอยํ เตอ_ซูวัยํ จรัฮ ปี รอจ กะ โซะ บารัจ เตอ_กู นู นานะ นะ อูมัจ-ซือมียา นะ มาแรฮ กะฆีเตอ เลอ. 28 กรานา-จะ อาดา บาดัด เปะ ดีฮา กาวัด บูโรก อีแรก โปด_นะ บือมุน มากัด เปะ อีตู เลอ." 29 "ตานา ลือปัซ วะตู นู ซูซัฮ ปายัฮ โตระ อีตู ดัดดัด มาตาอารี นะ กือลับ_บูลัด นะ ฮอย เตด ซูโลฮ จรัฮ ลาฆี ลูมอฮ บีตัก นะ ฆูโฆยํ เดะ ลาแงะ โกะ ลาฆู ปือมือฆัฮ เดะ โซะ ลาแงะ นะ บรีเงาะ บือฆาญะ เลอ. 30 วะตู อีตู เลอ ปือนานา นะ กู นู นานะ นะ อูมัจ-ซือมียา_นะ ปลีฮัจ เดะ โซะ ลาแงะ. ลูมอฮ ซือมียา ซือมูฮา ราตา บักซา ราตา เดะ ดือนียา_นะ บือปาโตด มือนาแงฮ. กูญา นะ ลีฮัจ กู นู นานะ นะ อูมัจ-ซือมียา กู นะ มาแรฮ เดะ อาตัซ กือมูวังโซะ ลาแงะ นะ มาแรฮ ฌางัน นู มือฆัฮ ฌางัน นู บือซรี บือซายา บาฌิ ซูโงฮ เลอ. 31 กะฆีเตอ กู นะ ซูโรฮ โกะ ฮูลู-บาลัก นะ กู บรี กูญา ปี ราตา_ฌางัน ซูวารา ซือลูนัย นู บูงี มือฮาโมก โตระ เลอ. กูญา นะ ปือมุน บือซามา_โกะ ลูมอฮ ซือมียา นู ตูฮัด ปีเลฮ ดัฮ นู ดาตัก เดะ ปัจ บือดาฮะ_ตะเดะ ตือกอซ ปือญูดัฮ เดะ ลาแงะ โซะ อีนี_ยู รอจ กะ ตือกอซ ปือญูดัฮ โซะ อีตู เลอ." เยซู ญา จะ. 32 "กาเญา กือนา บลาฌัยํ เลอ เดะ ลาฆู นู ปูโฮด กรายา-บูดี ตูโญะ บรี ลีฮัจ.ตานา ญา บือปูโจะ นะ ตรือเบะ ดาโวด กะฆีเตอ กาเญา นะ ตาฮู จะ_มูเซด ฮางัจ ดาปิก นะ รอจ ดัฮ. 33 กะฆีเตอ ฌูฆา ตานา กาเญา นะ ลีฮัจ ลาฆู ซูซัฮ กะฆีเตอ ซือมูฮา ดัฮ_กาเญา นะ ตาฮู จะ วะตู อีตู ดาปิก นะ รอจ ดัฮ ฆามะ-จะ อาดา เดะ ปีตู ดัฮ เลอ. 34 กู มือเลา ฌางัน กาเญา ลาฆู นู ซูโงฮ จะ โกะ ซือมียา ฮาดัจ อีนี นะ เตด มือนีงัน ปี ดูลู เดะ ลาฆู อีนี ซือมูฮา นะ บือฌาดี มาแรฮ. 35 ลาแงะ ฌางัน ดือนียา นะ ลือแงะ ปี ฮาบิฮ ดัฮ ตาปี ปือมือเลา นะ กู_นะ ฮอย เตด ลือแงะ ลาลู เลอ." 36 "ตาปี นะ ฌาดี อารี ดีฮา วะตู ดีฮา ฮอย ซาปา นะ ตาฮู เลอ.มีเซ ลูมอฮ ฮูลู-บาลัก โซะ ลาแงะ โปด กูญา เตด ตาฮู. นู นานะ นะ ตูฮัด โปด_ญา เตด ตาฮู ฌูฆา. ตาปี อาโปก เดะ อาตัซ แนฮ ซา ญา เลอ นู ตาฮู. 37 เดะ ฮาดัจ นะ โนฮา ลาฆู บือเลฮ บือฌาดี กะฮามี เตอ เดะ ฮาดัจ นะ กู นู นานะ นะ อูมัจ-ซือมียา_นะ มาแรฮ ปลีฮัจ โปด นะ ฌาดี กะฆีเตอ ฌูฆา เลอ. 38 เดะ กาลา อีตู ดูลู เดะ อาเย อาโปฮ ดือนียา ดัฮ ลูมอฮ ซือมียา บือเลฮ มากัด_โอะ บือเลฮ มือนีกัฮ อาเกะ บรี ฌาดี ลากี-บีนี ฌูฆา ตือดะ รอจ อารี อีตู_นู โนฮา มาโซะ กะ ดาลับ กาปัน บือซัยํ. 39 ลูมอฮ ซือมียา เตด ตาฮู อารัฮ ตือดะ อาเย มาแรฮ อาโปฮ_กีกัย กูญา บรี บือนาซา ฮาบิฮ ซือมูฮา ดัฮ.กาลา กู นู นานะ นะ อูมัจ-ซือมียา นะ มาแรฮ ปลีฮัจ เตอ นะ ฌาดี กะฆีเตอ ฌูฆา เลอ. 40 เดะ อารี อีตู นะ อาดา กีลากี ดูวา อูรัก บือกรือฌา บือนัก บือซามา เตอ_นะ ซาโมจ บือปี ซืออูรัก นะ ตีงัน ซืออูรัก เลอ. 41 อาดา นีบีนี ดูวา อูรัก ตืองัฮ ฆีลิก ตือโปก เดะ บาตู ฆีลิก บือซามา_นะ ซาโมจ บือปี ซืออูรัก นะ ตีงัน ซืออูรัก เลอ. 42 "กะฆีเตอ ฌาฆา เลอ กรานา กาเญา เตด ตาฮู จะ_ตูฮัด นะ กาเญา นะ มาแรฮ อารี ดีฮา เตอ. 43 กาเญา กือนา มาโซะ เดะ ฮาตี กะฆีนี จะ ดัฮ ตูฮัด รูมัฮ บือเลฮ ตาฮู ดูลู จะ_อูรัก ปือญูรี ญา นะ มาแรฮ กาลา ญา นะ นาตี ฌาฆา_ตีเมา บรี อูรัก ปือญูรี มาโซะ กะ ดาลับ รูมัฮ นะ ญา บือเลฮ เลอ. 44 กะฆีเตอ กาเญา กือนา ซียะ ญาวา บรี ฆือนะ ซือลาลู ฌูฆา กรานา-จะ_กู นู นานะ นะ อูมัจ-ซือมียา กู นะ มาแรฮ เดะ วะตู ดีฮา_กาเญา ฮอย เตด กือตะ บรีงัจ เลอ." เยซู ญา จะ. 45 เยซู มือเลา ลาฆี จะ "กะฆีเตอ ซาปา เลอ ฌาดี กือปาลา ปราโซฮ_นู ฮาตี รือมัก ปานัย อากัน? ญา เลอ นู ตกเก นะ ตืองะ บรี ฌาดี บือซัยํ_เดะ โกะ ปราโซฮ ซือมูฮา บีดา นะ บรี โกะ นาซี กะ กูญา รือมัก เดะ วะตู เลอ. 46 ตานา ตกเก บาลิ กะ รูมัฮ ญา ดาปัจ ปราโซฮ ตืองัฮ บือกรือฌา กะฆีเตอ ดัฮ_ปราโซฮ อีตู เตอ ซือนัง ซือลามัจ ซูโงฮ เลอ. 47 กู มือญาเระ กะ กาเญา ลาฆู นู ซูโงฮ จะ ตกเก นะ ตืองะ ญา_บรี ฌาดี ซือมียา ฮัจ-ลีฮัจ บือนา โกะ บารัก นะ ญา ซือมูฮา เลอ. 48 "ตาปี ปราโซฮ อีตู ดัฮ ญา บรีงัจ เดะ ฮาตี จะ ตกเก นะ ญา_ญา มาแรฮ ลามัจ 49 กะฆีเตอ ญา ฮึนตะ กาเตาะ โกะ ปราโซฮ บือซามา ญา มากัด กือญัง_โอะ อาระ บือซามา โกะ ซือมียา นู มาโบะ เลอ. 50 อาดา ซืออารี ตกเก นะ ญา ญา นะ บาลิ ปาเระ_เดะ อารี นู ปราโซฮ เตด ดัด นะ อีงัจ เดะ วะตู นู ญา ฮอย เตด ตาฮู เลอ. 51 กะฆีเตอ ตกเก ญา นะ ฮูโกบ บรี โตระ ญา นะ โปรฮ ปราโซฮ อีตู_บรี ปี ดูโดะ ฌางัน โกะ ซือมียา มูคา มาเนฮ ฮาตี ฌาฮัจ. โซะ อีตู เลอ_กูญา นะ มือนาแงฮ ตือกาจิ ฆีฆี ซาเกะ โตระ." เยซู ญา จะ.
1 เยซู ญา มือเลา จะ "ลาฆู นู ตูฮัด นะ มาแรฮ บือบือลา ฌาดี ราฌา เตอ ญา ซือรูปา บือกะ ลาฆู กะฆีนี. อาดา นีบีนี ราดารา ซือปูโลฮ อูรัก.กูญา อาเมด ปลีตา นะ กูญา ตรือเบะ ปี บีดา นะ ซาโมจ เจาเบา. 2 นีบีนี อีตู ลีมา อูรัก บูดอ ลีมา อูรัก อาดา อากัน. 3 โซะ นีบีนี นู บูดอ อีตู กูญา อาเมด ซา ปลีตา นะ กูญา ปี_เตด อาเมด มีญะ บือปี ซามา. 4 ตาปี โซะ นีบีนี นู อาดา อากัน อีตู กูญา อาเมด มีญะ บือปี ซามา บอฮ เดะ ตีกอ_บือปี ฌางัน ปลีตา ฌูฆา. 5 ตานา เจาเบา ลามัจ นะ มาแรฮ โกะ นีบีนี โปด มืองาโตะ_กูญา ตีโนะ ลีนา ซือมูฮา ดัฮ. 6 โซะ ตืองัฮ มาลับ ดัฮ อาดา ซือมียา บือซูระ จะ 'ลีฮัจ เลอ.เจาเบา นะ มาแรฮ รอจ ดัฮ เลอ. ตรือเบะ มาแรฮ ซาโมจ ญา เลอ.' 7 กะฆีเตอ โกะ นีบีนี ราดารา ปาคัจ บีกัซ ปือตัด ปลีตา นะ กูญา บรี บาฌิ. 8 โกะ นีบีนี นู บูดอ อีตู มือเลา ฌางัน โกะ นีบีนี นู อาดา อากัน จะ_'มีตา เดะ กาเญา ฮาฆิ มีญะ บรี กะ กามี ซือตืองัฮ เลอ.ปลีตา นะ กามี ซรือปะ นะ ปาดับ ดัฮ.' 9 "ตาปี โกะ นีบีนี นู อาดา อากัน ตีกัฮ จะ 'ตาโกจ-จะ มีญะ เตด ฆือนะ เลอ_บีดา กามี ฌางัน กาเญา. กือนา ปี ซารี ซือมียา ฌูวัน มีญะ เลอ_บือลี มีญะ บีดา นะ กาเญา ตะอาซิก.' 10 "ตานา โกะ นีบีนี บูดอ ตืองัฮ ปี บือลี มีญะ เตอ เจาเบา มาแรฮ รอจ ดัฮ.โกะ ซือมียา นู ซียะ ฆือนะ ดัฮ กูญา ปี บือซามา ฌางัน ญา มาโซะ ลาฆู มือนีกัฮ บือซามา.โซะ ปีตู รูมัฮ โปด ญา ตูโดก ดัฮ. 11 ลือปัซ อีตู โกะ นีบีนี ราดารา นู ซีงี มาแรฮ รอจ ดัฮ บือซูระ จะ 'โอ จา_บูกา บรี กามี นะ มาโซะ ฌูฆา เลอ.' 12 "ตาปี เจาเบา ตีกัฮ กะ กูญา จะ 'กู มือเลา ฌางัน กาเญา ลาฆู นู ซูโงฮ จะ_กู เตด กราลา กาเญา เลอ.' ญา จะ. 13 กะฆีเตอ กาเญา กือนา ฌาฆา เลอ กรานา กาเญา เตด ตาฮู จะ_วะตู อีตู นะ รอจ อารี ดีฮา วะตู ดีฮา เลอ." เยซู ญา จะ. 14 เยซู มือเลา ลาฆี จะ "นู ตูฮัด นะ มาแรฮ ฌาดี ราฌา นะ ฌาดี กะฆีนี_ซือรูปา ลาฆู นะ ตูฮัด รูมัฮ ซืออูรัก นู นะ บือฌาลัด ปี กะ นังฆรี อาซิก.ญา บลาโลก ลูมอฮ ปราโซฮ นะ ญา มาแรฮ บือมุน_บีดา นะ กีเรบ ซือบารัก นะ ญา ฌางัน กูญา ดัฮ. 15 ญา กีเรบ ฌางัน โซก ซืออูรัก ตูโรจ บือกะ ลาฆู นู กูญา นะ บูวัจ บียัซ.กะ ปราโซฮ นู ซา ญา กีเรบ รีเงะ มัซ ลีมา ละซา รีเงะ. กะ ปราโซฮ นู ซา ปูลัก ญา กีเรบ ดูวา ละซา รีเงะ. กะ ปราโซฮ นู ซา ลาฆี_ญา กีเรบ ซา ละซา รีเงะ. กะฆีเตอ ญา ปี ดัฮ. 16 ดัดดัด ปราโซฮ นู ซาโมจ ลีมา ละซา รีเงะ เตอ ญา ปี บูวัจ ลาฆู บือฌูวัน ดัฮ_บือเลฮ อูโตก ลีมา ละซา รีเงะ ปูลัก. 17 กะฆีเตอ ฌูฆา ปราโซฮ นู ซาโมจ ดูวา ละซา รีเงะ เตอ ญา บูวัจ ซือรูปา ฌูฆา_ญา บือเลฮ อูโตก ดูวา ละซา รีเงะ ปูลัก เลอ. 18 ตาปี ปราโซฮ นู ซาโมจ ซา ละซา รีเงะ เตอ ญา ปี กาลี ลูบัก_ตานัม บูนี โกะ ดูเวะ นะ ตกเก นะ ญา. 19 "ตานา วะตู ลามา ลือปัซ ปี ดัฮ ตกเก นะ โกะ ปราโซฮ อีตู บาลิ มาแรฮ_นะ กีรา ลาฆู ดูเวะ ฌางัน โกะ ปราโซฮ อีตู. 20 โซะ ปราโซฮ อีตู นู ซาโมจ ลีมา ละซา รีเงะ เตอ_ญา บาวา ดูเวะ ลีมา ละซา รีเงะ ลาฆี มาแรฮ มือญาเระ จะ 'ตกเก เออ.เกา กีเรบ ดูเวะ ฌางัน กู ลีมา ละซา รีเงะ เตอ. ลีฮัจ เลอ_กู บือเลฮ อูโตก ลีมา ละซา รีเงะ บือตามัฮ ปูลัก เลอ.' 21 "ตกเก นะ ญา มือเลา ฌางัน ญา จะ 'บาฌิ ดัฮ เลอ.เกา ฌาดี ปราโซฮ นู บาฌิ นู ฮาตี รือมัก. เกา ฌาดี ซือมียา รือมัก เดะ ลาฆู กิดีกิ.บอฮ กู นะ ตืองะ เกา บรี บือบือลา บือนา นู บาญะ เลอ. มาแรฮ เลอ_บือซูกา-ฮาตี บือซามา ฌางัน กู.' 22 "ปราโซฮ อีตู นู ซาโมจ ดูวา ละซา รีเงะ เตอ ญา มาแรฮ ฌูฆา_มือญาเระ จะ 'ตกเก เออ เกา กีเรบ ดูเวะ ฌางัน กู ดูวา ละซา รีเงะ เตอ.ลีฮัจ เลอ กู บือเลฮ อูโตก บือตามัฮ ดูวา ละซา รีเงะ ปูลัก เลอ.' 23 "กะฆีเตอ ตกเก นะ ญา มือเลา ฌางัน ญา จะ 'บาฌิ ดัฮ เลอ.เกา ฌาดี ปราโซฮ นู บาฌิ นู ฮาตี รือมัก. เกา ฌาดี ซือมียา นู รือมัก เดะ ลาฆู กิดีกิ.บอฮ กู นะ ตืองะ เกา บรี บือบือลา บือนา นู บาญะ. มาแรฮ เลอ_บือซูกา-ฮาตี บือซามา ฌางัน กู.' 24 "ปราโซฮ อีตู นู ซาโมจ ดูเวะ ซา ละซา รีเงะ เตอ ญา มาแรฮ_มือญาเระ กะ ตกเก นะ ญา จะ 'ตกเก เออ กู ตาฮู จะ_เกา ฌาดี ซือมียา นู ฮาตี ตือฆัยํ. เกา กือตับ ปาดี นู เกา เตด บือเลฮ ตานัม ดัฮ.เกา ปี มูงอจ ตาโระ เดะ ตือปัจ นู เกา เตด บือเลฮ ปรัก บีฌี เลอ. 25 กะฆีเตอ กู ตาโกจ เลอ. กู ปี กาลี ลูบัก ตานัม ดูเวะ นะ เกา. ลีฮัจ เลอ_ดูเวะ อีนี ฌาดี ดูเวะ นะ เกา เลอ.' 26 "ตาปี ตกเก นะ ญา มือเลา ฌางัน ญา จะ 'เกา ปราโซฮ นู ฌาฮัจ_นู ปือญือฆัด เลอ. เกา ตาฮู ดัฮ จะ กู กือตับ ปาดี นู กู เตด บือเลฮ ตานัม ดัฮ_กู มูงอจ ตาโระ เดะ ตือปัจ กู เตด บือเลฮ ปรัก บีฌี เลอ. 27 กะฆีเตอ เกา ฆาโดฮ กีเรบ ดูเวะ นะ กู ฌางัน โกะ ซือมียา ปลือปัซ บูงา เตอ.กะฆีเตอ วะตู กู มาแรฮ เตอ กู นะ บือเลฮ ซาโมจ ดูเวะ นะ กู_ฌางัน บูงา นะ ญา ซามา เลอ. 28 กะฆีเตอ กาเญา เออ อาเมด ซา ละซา รีเงะ อีตู เดะ ซือมียา อีนี_ปี กีเรบ เดะ ปราโซฮ อีตู นู อาดา ซือปูโลฮ ละซา รีเงะ เลอ. 29 กรานา ราตา ซือมียา นู อาดา ซือตืองัฮ ดัฮ นะ บือตามัฮ บรี กะ ญา ลาฆี_บรี ญา อาดา บาญะ เลอ. ตาปี ซือมียา ดีฮา นู ฮอย ดัฮ มีเซ-จะ นู ญา อาดา เตอ_นะ กือนา ฆาโดฮ อาเมด ปี เดะ ญา เลอ. 30 โซะ ปราโซฮ อีนี ญา ฮอย เตด ตือปากัย เลอ. บาวา ญา บือปี ตูละ บูวัก เลอ_เดะ นู กือลับ โซะ ลูวัยํ. โซะ อีตู กูญา นะ อาดา มือนาแงฮ ตือกาจิ ฆีฆี_ซาเกะ โตระ เลอ.' " เยซู ญา จะ. 31 เยซู มือเลา ปูลัก จะ "กาลา กู นู นานะ นะ อูมัจ-ซือมียา_นะ มาแรฮ เตอ นะ บือซรี บือซายา ซือรูปา กะ ราฌา_อาดา ลูมอฮ ฮูลู-บาลัก นะ ตูฮัด ซือมูฮา มาแรฮ บือซามา_กู นะ ดูโดะ เดะ ปาปัด กรือซี ตือปัจ ดูโดะ นะ ราฌา นู บือซรี เลอ. 32 กะฆีเตอ ลูมอฮ ซือมียา ราตา บักซา ซือมูฮา นะ บือมุน โซะ ฮึลด กู.กู นะ บือปือจัฮ กูญา ฌาดี ดูวา กาวัด ซือรูปา บือกะ ซือมียา บือบือลา กาวัด กาเมก_นู นะ บือปือจัฮ โกะ กาเมก ฌางัน โกะ แบะ. 33 โกะ ซือมียา นู ซือรูปา บือกะ กาวัด กาเมก เตอ กู นะ ตืองะ_เดะ โซะ กานัน นะ กู. โกะ ซือมียา นู ซือรูปา บือกะ กาวัด แบะ เตอ_กู นะ ตืองะ เดะ โซะ กีรี นะ กู เลอ. 34 กะฆีเตอ กู นู ราฌา อีตู นะ มือเลา ฌางัน ลูมอฮ ซือมียา เดะ โซะ กานัน_จะ 'มาแรฮ เลอ กาเญา ลูมอฮ ซือมียา นู อาโปก เดะ กู บรี ซือลามัจ ดัฮ.มาแรฮ เลอ มาโซะ กะ ดือนียา บารู นู ตูฮัด เดะ อาตัซ ซียะ ดัฮ_บีดา ฌาดี ปือซากา นะ กาเญา ตะเดะ ญา บือเลฮ บือฌาดี ดือนียา ดัฮ เลอ. 35 กรานา-จะ กาลา กู ลาปัยํ กาเญา บือเลฮ บรี ซือบารัก มากัด กะ กู เลอ.กาลา กู ดาฆา อาเย กาเญา บือเลฮ บรี กู โอะ. กาลา กู ฌาดี ซือมียา นังฆรี อาซิก_กาเญา บือเลฮ ซาโมจ กู. 36 กาลา กู ฮอย กาเยด กาเญา บือเลฮ ฮาฆิ กาเยด บรี กะ กู.กาลา กู เตด ซือนัง ญาวา กาเญา บือเลฮ ฌือเงาะ ลีฮัจ กู.กาลา กู กือนา กานัก เดะ ปือฌารา กาเญา บือเลฮ มาแรฮ ซารี กู.' ราฌา ญา จะ. 37 "กะฆีเตอ โกะ ซือมียา บาฌิ-ตือปัจ นะ ตาญา กะ ญา จะ 'ตูฮัด เออ_อารี ดีฮา เลอ นู กามี ลีฮัจ เกา ลาปัยํ บรี ซือบารัก มากัด กะ เกา_นู กามี ลีฮัจ เกา ดาฆา อาเย บรี เกา โอะ เลอ? 38 อารี ดีฮา เลอ นู กามี ลีฮัจ เกา ฌาดี ซือมียา นังฆรี อาซิก ซาโมจ เกา ดัฮ_นู กามี ลีฮัจ เกา ฮอย กาเยด บาฌู ฮาฆิ บรี กะ เกา? 39 นู กามี ลีฮัจ เกา เตด ซือนัง ญาวา เฆอ-จะ อาดา เดะ ปือฌารา ดัฮ_มาแรฮ ฌือเงาะ ลีฮัจ เกา เลอ? ลาฆู อีนี ฌาดี กาลา ดัฮ เลอ?' กูญา จะ. 40 "กะฆีเตอ ราฌา นะ ตีกัฮ กะ กูญา จะ 'กู มือเลา ฌางัน กาเญา_ลาฆู นู ซูโงฮ จะ อารี ดีฮา กาเญา บูวัจ ลาฆู กะฆีนี บีดา อาดี-บราดี นะ กู ซืออูรัก_นู ดือมิ เดะ กาวัด เตอ ซือรูปา บือกะ กาเญา บูวัจ บีดา กู ฌูฆา เลอ.' 41 "กะฆีเตอ ราฌา ญา นะ มือเลา ฌางัน ลูมอฮ ซือมียา_นู บือดีรี โซะ กีรี นะ ญา จะ 'ปี ญัฮ บูวัก กาเญา_ลูมอฮ ซือมียา นู ตูฮัด เดะ อาตัซ อาโบยํ ดัฮ. ตรือเบะ ปี เดะ กู เลอ_ปี กะ อาปี นู อาดา ซือลาลู เตอ นู ตูฮัด เดะ อาตัซ ซียะ ดัฮ บีดา กือปาลา ฮาตู ซีตัด_ฌางัน กาวัด ฮูลู-บาลัก นะ ญา เลอ. 42 ซาเบะ-จะ วะตู กู ลาปัยํ กาเญา เตด บือเลฮ บรี ซือบารัก มากัด กะ กู.วะตู กู ดาฆา อาเย กาเญา เตด บือเลฮ บรี อาเย กะ กู โอะ. 43 วะตู กู ฌาดี ซือมียา นังฆรี อาซิก กาเญา เตด บือเลฮ ซาโมจ กู ดัฮ.วะตู กู ฮอย กาเยด กาเญา เตด บือเลฮ ฮาฆิ กาเยด บรี กะ กู เลอ.วะตู กู เตด ซือนัง ญาวา เตอ อาดา เดะ ปือฌารา โปด_กาเญา เตด บือเลฮ มาแรฮ ฌือเงาะ ลีฮัจ กู เลอ.' ญา จะ. 44 "กะฆีเตอ ลูมอฮ กูญา นะ ตีกัฮ กะ ญา จะ 'ตูฮัด เออ อารี ดีฮา เลอ_นู กามี ลีฮัจ เกา ลาปัยํ ดาฆา อาเย เตอ ลีฮัจ เกา ฌาดี ซือมียา นังฆรี อาซิก_ฮอย กาเยด เตอ ลีฮัจ เกา เตด ซือนัง ญาวา เฆอ-จะ อาดา เดะ ปือฌารา_ตาปี กามี เตด มาแรฮ มือนูโลก เกา ดัฮ? ลาฆู อีนี ฌาดี กาลา ดัฮ เลอ?' กูญา จะ. 45 "วะตู อีตู ราฌา นะ มือเลา ฌางัน กูญา จะ 'กู มือเลา ฌางัน กาเญา_ลาฆู นู ซูโงฮ จะ อารี ดีฮา กาเญา เตด บูวัจ ลาฆู กะฆีนี_บีดา ซือมียา ซืออูรัก นู ดือมิ เดะ กาวัด เตอ_ซือรูปา บือกะ กาเญา เตด บูวัจ บีดา กู ฌูฆา เลอ.' ญา จะ. 46 กะฆีเตอ ลูมอฮ ซือมียา อีนี นะ ปี กะ ฌาฮานัม นู ซือลาลู ดัฮ_ตาปี ลูมอฮ ซือมียา บาฌิ-ตือปัจ นะ มาโซะ ปี กะ ลาฆู ฮีโดะ ซูโงฮ นู ซือลาลู เลอ."เยซู ญา จะ.
1 ตานา เยซู มือญาเระ ลาฆู อีนี ซือมูฮา ฮาบิฮ ดัฮ_ญา มือเลา ฌางัน โกะ มูเระ นะ ญา จะ 2 "กาเญา ตาฮู จะ อาดา ดูวา อารี ดัฮ นู อารี บรามัย ลือปัซ ปี_นะ รอจ เตอ. กาลา อีตู กู นู นานะ นะ อูมัจ-ซือมียา นะ กือนา ซรัฮ_บรี กูญา บูนอฮ กาจิก เดะ กายู ปลีตัก." ญา จะ. 3 วะตู อีตู ลูมอฮ ซามี ซัยํ-บือซัยํ ฌางัน โกะ ซือมียา ซัยํ-บือซัยํ นะ บักซา ยิว_กูญา บือมุน เดะ บาลัย นะ กือปาลา ซามี นู ปือนามา จะ กายาฟัด. 4 กูญา อีตู บือกีรา บือซามา บีดา นะ มือฮึนะ รีฆะ เยซู ปี บูนอฮ. 5 ตาปี กูญา มือเลา จะ "เดะ อารี บือซัยํ ฌางัน นะ บูวัจ นามา โปด_ตาโกจ-จะ ลูมอฮ ซือมียา บาญะ นะ ปาคัจ ฆรูมง บลาวัด ฌางัน กีตา เลอ." 6 วะตู เยซู อาดา เดะ ตูโปะ เบดทานี ญา ดูโดะ เดะ รูมัฮ นะ ซีโมน_นู กาลา ดูลู ญา ฌาดี ซือมียา ปือญาเกะ ปูรู. 7 ตานา เยซู ดูโดะ มากัด อาดา นีบีนี ซืออูรัก มาแรฮ กะ ญา. นีบีนี อีตู เตอ_ญา อาดา ลีบูลี นู บูวัจ ฌางัน บาตู ปูเตฮ อาดา มีญะ บาวู เดะ ดาลับ. มีญะ บาวู อีตู_รือฆา มาฮัน โตระ. ญา อูแร มีญะ บาวู อีตู เดะ อาตัซ ปาลา นะ เยซู. 8 ตาปี ตานา โกะ มูเระ ลีฮัจ ลาฆู อีนี ดัฮ กูญา รีเซา-ฮาตี มือเลา จะ_"บูวัจ นามา ปะ ญา บูวัจ บรี มีญะ มาฮัน อีนี เตด ฌาดี นามา? 9 มีญะ อีนี เตอ ดัฮ ฌูวัน ฆามะ บือเลฮ รือฆา มาฮัน เลอ. กะฆีเตอ_นะ ฮาฆิ กะ โกะ อูรัก ฮาฌะ โปด บือเลฮ." 10 นู กูญา อีงัจ กะฆีเตอ เยซู ญา ตาฮู ญา มือเลา ฌางัน กูญา จะ_"บูวัจ นามา ปะ กาเญา บือฆาโดฮ นีบีนี อีนี เลอ? ญา บูวัจ ลาฆู บาฌิ ซูโงฮ_กะ กู ดัฮ. 11 อาดา โกะ อูรัก ฮาฌะ ดูโดะ ดาปิก กาเญา ซือรูโลยํ. ตาปี โซะ กู นี_กู นะ ดูโดะ ฌางัน กาเญา เตด บราปา ลามา ดัฮ เลอ. 12 กู เตด มาตี ลาฆี ตาปี นู ญา มาแรฮ อูแร มีญะ อีนี เดะ ญาวา นะ กู ดัฮ_ญา บูวัจ ซือรูปา นะ บือมานี บาดัด นะ กู ซียะ นะ ตานัม ดัฮ เลอ. 13 กู มือเลา ฌางัน กาเญา ลาฆู นู ซูโงฮ จะ ราตา ดือนียา_เปะ ดีฮา นู กูญา ปี มือญาเระ บรีตา นู บาฌิ อีนี เปะ อีตู เตอ_กูญา นะ มือญาเระ ปือบูวัจ นะ นีบีนี อีนี กูญา นะ ปาคัจ อีงัจ รอจ กะ ญา เลอ."เยซู ญา จะ. 14 ลือปัซ อีตู ซือมียา ซา อูรัก เดะ โกะ มูเระ ดูวา-บือลัซ อูรัก อีตู_นู ปือนามา จะ ยูดา อิดคารีโยด ญา ปี ซารี ลูมอฮ ซามี ซัยํ-บือซัยํ 15 ญา มือเลา จะ "ดัฮ กู นะ ซรัฮ เยซู กะ กาเญา บรี กาเญา รีฆะ ญา เตอ_กาเญา นะ บรี ดูเวะ กะ กู บราปา บาญะ เลอ?" กะฆีเตอ กูญา บรี ดูเวะ ปีระ กะ ญา ตีฆา-ปูโลฮ รีเงะ. 16 ตะเดะ วะตู อีตู มาแรฮ ยูดา ญา ซารี จือลัฮ นะ ซรัฮ เยซู กะ ลูมอฮ กูญา อีตู. 17 เดะ อารี ลามูลา เดะ ลาฆู บรามัย มากัด โรตี ฮอย ราฆี เตอ_โกะ มูเระ มาแรฮ ซารี เยซู ตาญา จะ "เกา นะ บรี กามี ซียะ บูวัจ บารัก มากัด ลาฆู บรามัย ลือปัซ ปี โซะ ดีฮา เลอ?" 18 เยซู มือเลา ฌางัน กูญา จะ "มาโซะ ปี กะ นังฆรี เลอ_ปี ดาปัจ ซือมียา ซา อูรัก มือเลา ฌางัน ญา จะ 'บูมอยํ นะ กามี ญา จะ_วะตู นะ ญา ซรือปะ นะ รอจ ดัฮ. ญา ซูกา นะ มากัด ลาฆู ลือปัซ ปี_เดะ รูมัฮ นะ เกา เลอ บือซามา ฌางัน โกะ มูเระ นะ ญา ฌูฆา.' " 19 โซะ โกะ มูเระ อีตู กูญา ปี บูวัจ ตูโรด กะ ปือมือซัด นะ เยซู_ซียะ บารัก มากัด ลาฆู บรามัย ลือปัซ ปี ฆือนะ ดัฮ. 20 รอจ วะตู ปะฮึญา เยซู ฌางัน โกะ มูเระ ดูวา-บือลัซ อูรัก_กูญา ดูโดะ มากัด บือซามา. 21 ตานา กูญา ตืองัฮ มากัด เยซู มือเลา จะ "กู มือเลา ฌางัน กาเญา_ลาฆู นู ซูโงฮ จะ อาดา ซือมียา ซา อูรัก เดะ ลูมอฮ กาเญา นู นะ ซรัฮ กู_บรี กือนา รีฆะ ดัฮ." 22 กะฆีเตอ โกะ มูเระ กูญา ปาคัจ ซูซัฮ-ฮาตี โตระ ตาญา เยซู ซือกาลี ซืออูรัก_จะ "โอ ตูฮัด อีซี กู เฆอ?" 23 เยซู ตีกัฮ จะ "ซือมียา ซา อูรัก นู อาเงา ตางัน อาเมด ตือโปก มาแรฮ_ฌูโฌน ซือฌับ ฌางัน กู เตอ ญา เลอ นู นะ ซรัฮ กู บรี กะ กูญา รีฆะ. 24 กู นู นานะ นะ อูมัจ-ซือมียา กู นะ ปี มาตี บือกะ อาดา ฆาแรฮ ดัฮ_เดะ ซูรัจ ปือมือเลา นะ ตูฮัด ปาซัน ลาฆู นะ กู. ตาปี จือลากา เลอ_ซือมียา นู ซรัฮ กู บรี กือนา รีฆะ. ดัฮ ซือมียา อีตู เตด บือฌาดี โปด บาฌิ เลอ."เยซู ญา จะ. 25 ยูดา ซือมียา นู นะ ซรัฮ ญา ตาญา จะ "โอ บูมอยํ อีซี กู เฆอ?" เยซู ตีกัฮ กะ ญา จะ "บือกะ เกา มือเลา กือนา ดัฮ." 26 ตานา กูญา ตืองัฮ มากัด เยซู ญา อาเมด ตือโปก โรตี มาแรฮ_บรี ซือลามัจ กะ ตูฮัด เดะ อาตัซ. ญา ลือแปะ ตือโปก โรตี อีตู_อูโญะ บรี กะ โกะ มูเระ นะ ญา มือเลา จะ "อาเมด เลอ มากัด.อีนี ฌาดี ญาวา นะ กู." 27 กะฆีเตอ เยซู อาเมด เจาะ อาระ อางุน มาแรฮ บรี ซือลามัจ กะ ตูฮัด.ญา บรี เจาะ อีตู กะ กูญา มือเลา จะ "กาเญา โอะ ซือมูฮา เลอ. 28 กรานา-จะ อีนี เลอ ฌาดี ดารัฮ นะ กู นู บรี ปือมือเลา บือปาคัจ นะ ตูฮัด_ฌาดี ตือตู ดัฮ. ดารัฮ อีตู นะ มือนีเลฮ ตรือเบะ กรานา ซือมียา บาญะ_บรี อาเกะ ดูซา นะ กูญา. 29 กู มือเลา ฌางัน กาเญา จะ อาเย บูวัฮ อางุน อีนี กู เตด โอะ ปูลัก_ตือดะ อารี อีตู นู กู นะ โอะ อาระ อางุน นู บารู บือซามา ฌางัน กาเญา_เดะ ดือนียา บารู นู อาโปก เดะ กู ฌาดี ราฌา เลอ." เยซู ญา จะ. 30 ตานา กูญา มือญาญี ปูฌี กะ ตูฮัด ดัฮ กูญา ตรือเบะ ปี กะ บูเกะ กือดูโนด. 31 ลือปัซ อีตู เยซู มือเลา ฌางัน กูญา จะ "มาลับ อีนี กาเญา ซือมูฮา เลอ_นะ จือและ เดะ กู ตีงัน กู บูวัก บือกะ ลาฆู นู ฆาแรฮ ดัฮ_เดะ ซูรัจ ปือมือเลา นะ ตูฮัด จะ 'กู นะ กาเตาะ ซือมียา บือบือลา กาเมก บรี มาตี. กะฆีเตอ_โกะ กาเมก เดะ กาวัด นะ ปือจัฮ-บือลัฮ ปี ฮาบิฮ ดัฮ.' ญา จะ. 32 ตาปี ลือปัซ กู ฮีโดะ ปาเระ เดะ มาตี ดัฮ กู นะ ปี ดูลู เดะ กาเญา_กะ นังฆรี ฆาลิลี." เยซู ญา จะ. 33 เปโตร ตีกัฮ กะ ญา จะ "มีเซ-จะ กูญา ซือมูฮา นะ ตีงัน เกา บูวัก เตอ_ตาปี กู นี เลอ ฮอย เตด ตีงัน เกา ลาลู." 34 เยซู มือเลา ฌางัน ญา จะ "กู มือเลา ฌางัน เกา ลาฆู นู ซูโงฮ จะ_มาลับ อีนี เตอ ดูลู เดะ ฮายับ นะ มูเกาะ เกา นะ มือเลา กีปัซ กู บูวัก_ตีฆา กาลี เลอ." เยซู ญา จะ. 35 ตาปี เปโตร ตีกัฮ กะ ญา จะ "มีเซ กู ฆาโดฮ มาตี บือซามา ฌางัน เกา โปด_กู นะ เตด มือเลา กีปัซ กะ เกา เลอ." โกะ มูเระ มือเลา กะฆีเตอ ราตา อูรัก เลอ. 36 ลือปัซ อีตู เยซู ญา ปี บือซามา ฌางัน โกะ มูเระ นะ ญา_ปี กะ ตือปัจ นู ปือนามา จะ เฆดเซมานี. ญา มือเลา ฌางัน กูญา จะ "ดูโดะ เลอ_เปะ อีนี. กู นะ ปี บือซาโวจ โซะ อีตู." 37 ญา อาเมด เปโตร ฌางัน นานะ นะ เซเบดี ดูวา บราดี บือปี ซามา. กะฆีเตอ_ญา บราซา ซูซัฮ-ฮาตี โตระ ฌาโวฮ-ฮาตี บือตามัฮ บาญะ ซือรูโลยํ. 38 กะฆีเตอ ญา มือเลา ฌางัน ตีฆา อูรัก อีตู จะ "ฮาตี กู บราซา ซูซัฮ โตระ เลอ_มาจับ นะ มาตี. กาเญา นาตี โซะ อีนี ตูงู ฌาฆา บือซามา ฌางัน กู เลอ." 39 กะฆีเตอ เยซู บือฌาลัด ปี ดีกิ ญา ตือมะ มูคา รอจ กะ ตานัฮ บือซาโวจ จะ_"โอ อาโปก นะ กู เออ กะ ฌาดี บือเลฮ มีตา บรี ลาฆู ซูซัฮ อีนี_นู ซือรูปา กะ เจาะ ปือนอฮ อาระ นะ ลือปัซ ปี เดะ กู เลอ.ตาปี ฌางัน บรี ฌาดี บือกะ ฮาตี นะ กู บรี ฌาดี บือกะ นู ฮาตี นะ อาโปก ซูกา เลอ."เยซู ญา จะ. 40 กะฆีเตอ เยซู มาแรฮ รอจ กะ มูเระ ตีฆา อูรัก อีตู_ดาปัจ กูญา ตืองัฮ ตีโนะ ลีนา ดัฮ. กะฆีเตอ ญา มือเลา ฌางัน เปโตร จะ_"กะฮามี เลอ กาเญา ตูงู ฌาฆา บือซามา ฌางัน กู แนฮ ซือฌับ เตด บือเลฮ เฆอ? 41 ฌาฆา เลอ. บือซาโวจ เลอ ตีเมา บรี กือนา ลกลีฮัจ บรี บูวัจ ดูซา.โซะ ฮาตี กาเญา รือมา นะ ตูโรจ เตอ ตาปี อีซี ญาวา นะ กาเญา ลือมัฮ_ฮอย อูรัจ เลอ." ญา จะ. 42 เยซู ปี ซือกาลี ปูลัก บือซาโวจ จะ "อาโปก นะ กู เออ_กะ เจาะ อีนี นะ ลือปัซ ปี เดะ กู เตด บือเลฮ ตาปี กู ฆาฆัฮ นะ โอะ เตอ_บรี ฌาดี ตูโรจ บือกะ ฮาตี นะ อาโปก เลอ." 43 ญา ปาเระ มาแรฮ ปูลัก ลีฮัจ กูญา ตืองัฮ ลีนา กรานา กูญา ตือลาลู มืองาโตะ. 44 กะฆีเตอ ญา ตีงัน กูญา ตีฆา อูรัก ปี ปูลัก ญา บือซาโวจ รอจ กะ ตีฆา กาลี_มือเลา บือกะ นู ดูลู เลอ. 45 ลือปัซ อีตู ญา มาแรฮ ดาปัจ โกะ มูเระ มือเลา ฌางัน กูญา จะ_"กาเญา นะ ตีโนะ ลีนา บรี ฮอย รือมัย ลาฆี เฆอ? ลีฮัจ เลอ รอจ วะตู ดัฮ.กู นู นานะ นะ อูมัจ-ซือมียา อีนี นะ กือนา ซรัฮ บรี กะ โกะ ซือมียา บือดูซา รีฆะ. 46 บีกัซ เลอ บรี กีตา ปี บือซามา. ลีฮัจ เลอ ซือมียา นู นะ ซรัฮ กู บรี กือนา รีฆะ_ญา มาแรฮ ดาปิก ดัฮ เลอ." 47 ตานา เยซู ตืองัฮ มือเลา เตด ดัด ฮาบิฮ ลีฮัจ เลอ อาดา ยูดา_นู ซืออูรัก เดะ ลูมอฮ มูเระ ดูวา-บือลัซ อูรัก อีตู เตอ ญา มาแรฮ รอจ ดัฮ.อาดา ลูมอฮ ซือมียา บาญะ ซูโงฮ มาแรฮ ซามา อาดา ฌางัน ปือดัก ฌางัน ตูกัจ.ลูมอฮ อีตู มาแรฮ ดาตัก เดะ โกะ ลูมอฮ ซามี ซัยํ-บือซัยํ_ฌางัน โกะ อูรัก ตูฮา นะ ลูมอฮ บักซา ยิว ซามา. 48 ซือมียา นู นะ ซรัฮ เยซู เตอ ญา บือเลฮ บรี ปือนานา_กะ โกะ ลูมอฮ ซือมียา บาญะ อีตู จะ "ดัฮ กู จีโยบ ซือมียา ดีฮา เตอ_ฌาดี ซือมียา อีตู เลอ. บรี กาเญา รีฆะ ญา." 49 ดัดดัด ยูดา มาแรฮ รอจ กะ เยซู มือเลา จะ "ซือลามัจ เลอ บูมอยํ".กะฆีเตอ ญา จีโยบ เยซู ดัฮ. 50 โซะ เยซู ญา ตีกัฮ กะ ยูดา จะ "ซาบัจ เออ บูวัจ นามา เกา มาแรฮ กะอีนี เลอ ?"ลือปัซ อีตู โกะ ซือมียา บาญะ กูญา มาแรฮ รีฆะ เยซู ยู กือมัซ ดัฮ. 51 ลีฮัจ เลอ ซือมียา ซืออูรัก นู อาดา ฌางัน เยซู ญา อาเงา ตางัน_ซีตะ ปือดัก นะ ญา บาโฮะ ปราโซฮ ซืออูรัก นะ กือปาลา ซามี กือนา เดะ ตือลีงา_ยู ปูตุซ ดัฮ. 52 ตาปี เยซู มือเลา ฌางัน ซือมียา อีตู จะ "ตาโรฮ ปือดัก นะ เกา เลอ_เดะ ตือปัจ นะ ญา ปาเระ เลอ. ซาเบะ-จะ ราตา ซือมียา นู ซูโรฮ ปือดัก เตอ_นะ บือนาซา ฌางัน ปือดัก เลอ. 53 เกา เตด ตาฮู เฆอ? ดัฮ กู มีตา เดะ อาโปก นะ กู เตอ ดัดดัด_ญา นะ ซูโรฮ ฮูลู-บาลัก นะ ญา ดูวา-บือลัซ กาวัด มาแรฮ ตูโลก กู. 54 ตาปี กะ บูวัจ กะฆีเตอ ซูรัจ ปือมือเลา นะ ตูฮัด นู ตูโดฮ ดัฮ จะ_ลาฆู กะฆีนี ฆาโดฮ นะ บือฌาดี เตอ ญา นะ ซุจ รือมัก บือเลฮ กะฮามี เลอ?"เยซู ญา จะ. 55 เดะ วะตู อีตู เยซู มือเลา ฌางัน ลูมอฮ ซือมียา บาญะ จะ_"กาเญา ปือฆัก ปือดัก ปือฆัก ตูกัจ มาแรฮ รีฆะ กู ซือรูปา กู ฌาดี อูรัก ปือญามุน เฆอ?อารีๆ กู ดูโดะ อาฌัยํ เดะ รูมัฮ มือญือมัฮ ตูฮัด ตาปี กาเญา เตด มาแรฮ รีฆะ กู เลอ. 56 ตาปี ลาฆู อีนี ซือมูฮา ฌาดี ดัฮ บีดา-จะ_ลาฆู นู โกะ ซือมียา ตูโดฮ บือเลฮ ฆาแรฮ ดัฮ เดะ ซูรัจ ปือมือเลา นะ ตูฮัด_นะ ซุจ รือมัก ดัฮ." เยซู ญา จะ. ลือปัซ อีตู โกะ ลูมอฮ มูเระ กูญา ปาคัจ ตีงัน เยซู ลารี ปี ซือมูฮา ดัฮ. 57 กะฆีเตอ โกะ ซือมียา นู รีฆะ เยซู ดัฮ กูญา บาวา ญา บือปี กะ กายาฟัด_นู ฌาดี กือปาลา ซามี. อาดา โกะ ซือมียา อาฌัยํ ลาฆู ปือมือซัด นะ ตูฮัด_ฌางัน โกะ อูรัก ตูฮา กูญา บือเลฮ บือมุน เปะ อีตู ดัฮ. 58 ตาปี เปโตร เตอ ญา ตูโรจ เยซู ปี โวฮ-ฌาโวฮ_มาโซะ รอจ กะ ลามัน รูมัฮ นะ กือปาลา ซามี.ญา ดูโดะ บือซามา ฌางัน ลูมอฮ ซือมียา ฌาฆา นะ ลีฮัจ จะ ลาฆู นะ ซือลือซัย กะฮามี. 59 ลูมอฮ ซามี ซัยํ-บือซัยํ ฌางัน โกะ ลูมอฮ บือมุน บือกีรา ซือมูฮา_กูญา ซารี ซะซี มืออูปัย อาดู กะ เยซู บีดา กูญา นะ บรี ญา กือนา ฮูโกบ มาตี. 60 ตาปี ฮอย เตด ดาปัจ. มีเซ-จะ อาดา ซือมียา ฌาดี ซะซี มืออูปัย บาญะ อูรัก_ตาปี ปือมือเลา ซะซี กะฆีเตอ ฮอย ลาลู. เดะ บลากัก_อาดา ซือมียา ดูวา อูรัก มาแรฮ ดัฮ 61 กูญา มือเลา จะ "ซือมียา อีนี เตอ ญา บือเลฮ มือเลา จะ_'กู นะ ปรูโตฮ บาลัย นะ ตูฮัด อีนี บือเลฮ. ลือปัซ ตีฆา อารี_กู นะ อาเกะ ปาเระ บือเลฮ ฌูฆา.' " กูญา จะ. 62 กะฆีเตอ กือปาลา ซามี ญา บือดีรี มือเลา ฌางัน เยซู จะ "บูวัจ นามา_เกา เตด ตีกัฮ นามา โปด? นู กูญา อาดู เกา ดัฮ ฌาดี กะฮามี เลอ?" 63 ตาปี เยซู ญา ซืองะ ดัฮ. กือปาลา ซามี ญา ตาญา เยซู ปูลัก จะ_"กู บรี เกา อาเกะ มือเลา บือฌาญี เดะ นามา นะ ตูฮัด เดะ อาตัซ_ตูฮัด นู ฮีโดะ เตอ กู ซูโรฮ เกา บรี มือญาเระ กะ กามี จะ เกา เลอ_ฌาดี ราฌา นู บรี ซือลามัจ เฆอ เตด?ฌาดี นานะ นะ ตูฮัด บือซัยํ เดะ อาตัซ เฆอ?" 64 เยซู ตีกัฮ กะ ญา จะ "เกา เลอ มือเลา กะฆีเตอ ดัฮ.ตาปี กู มือเลา ฌางัน กาเญา ตะเดะ อีนี ปี กาเญา นะ ลีฮัจ กู_นู นานะ นะ อูมัจ-ซือมียา อาดา ดูโดะ เดะ โซะ กานัน นะ ตูฮัด นู มือฆัฮ ซูโงฮ.กาเญา นะ ลีฮัจ กู มาแรฮ เดะ อาตัซ กือมูวัง โซะ ลาแงะ เลอ. "ญา จะ. 65 ลือปัซ อีตู กือปาลา ซามี ญา จูลัด บาฌู ซรือโกะ ญาวา นะ ญา บรี จีแจะ_ญา มือเลา จะ "ซือมียา อีนี มือเลา ตะอารัฮ กะ ตูฮัด บือซัยํ เดะ อาตัซ เตอ.เตด ปายัฮ ซารี ซะซี ดัฮ. กาเญา ดืองัยํ ปือมือเลา ตะอารัฮ นะ ญา ดัฮ เลอ. 66 กาเญา ซือมูฮา นะ กีรา กะฮามี เลอ?" ญา จะ. กูญา ตีกัฮ จะ "ญา ฆาโดฮ กือนา ฮูโกบ รอจ กะ มาตี เลอ." 67 ลือปัซ อีตู กูญา ปือทุย อาเย ลีโยยํ เดะ มูคา นะ ญา กาเตาะ ญา.ซือตืองัฮ ตาปัยํ ญา 68 มือเลา จะ "โอ เกา ราฌา นู บรี ซือลามัจ เออ ตูโดฮ เลอ_ซาปา นู ตาปัยํ เกา?" 69 วะตู อีตู เปโตร ดูโดะ เดะ ลามัน เดะ รูมัฮ กือปาลา ซามี.ปราโซฮ นีบีนี ซืออูรัก มาแรฮ มือเลา ฌางัน ญา จะ "เกา ฌูฆา เลอ_ดูโดะ ฌางัน เยซู ซือมียา นังฆรี ฆาลิลี." 70 ตาปี เปโตร มือเลา กีปัซ โซะ ฮึลด กูญา ซือมูฮา จะ "นู เกา มือเลา เตอ_กู เตด ตาฮู อารัฮ เลอ." 71 กะฆีเตอ ตานา ญา ตรือเบะ ปี กะ ปีตู ปาฆัยํ รูมัฮ ปราโซฮ นีบีนี ซา อูรัก ปูลัก_ลีฮัจ บือฆารี ญา มือเลา ฌางัน ลูมอฮ ซือมียา นู บือดีรี โซะ อีตู จะ "อูรัก อีนี เลอ_บือเลฮ ดูโดะ ฌางัน เยซู ซือมียา ตูโปะ นาซาเรด อีตู." 72 ตาปี เปโตร มือเลา กีปัซ ปูลัก บือซูปัฮ จะ "โบะ กู เตด กราลา ญา เลอ." 73 ซือฌูรุซ โกะ ซือมียา นู บือดีรี โซะ อีตู กูญา มาแรฮ มือเลา ฌางัน เปโตร จะ_"เกา เลอ ซูโงฮ เกา ฌาดี ซือมียา ลูมอฮ อีตู กรานา ซูวารา ปือมือเลา นะ เกา_ฌาดี ซูวารา ซือรูปา บือกะ ลูมอฮ กูญา เลอ." 74 ลือปัซ อีตู เปโตร อาเกะ มือเลา บือซูปัฮ จะ "ซูโงฮ เลอ_ซือมียา นู กาเญา มือเลา เตอ กู เตด กราลา ลาลู." ดัดดัด ฮายับ โปด มูเกาะ. 75 กะฆีเตอ เปโตร ญา โตะ-ตืออีงัจ กะ ปือมือเลา นะ เยซู จะ_"ดูลู เดะ ฮายับ นะ มูเกาะ เกา นะ มือเลา กีปัซ กู ตีฆา กาลี เลอ." กะฆีเตอ_เปโตร ตรือเบะ ปี กะ โซะ ลูวัยํ มือนาแงฮ ซูซัฮ โตระ.
1 วะตู มูกัยํ ดัฮ ลูมอฮ ซามี ซัยํ-บือซัยํ ซือมูฮา_ฌางัน โกะ อูรัก ตูฮา นะ ลูมอฮ ยิว กูญา ปาคัจ บือมุน บือกีรา บือซามา_ปาซัน ลาฆู นะ เยซู บีดา กูญา นะ บูนอฮ ญา บรี มาตี เลอ. 2 กะฆีเตอ กูญา อีกัจ เยซู บาวา ญา บือปี อาตัจ กะ ปีลาด_นู ฌาดี ฮูลู-บาลัก นะ ราฌา ซีซา. 3 โซะ ยูดา ซือมียา นู ซรัฮ เยซู บรี กือนา รีฆะ เตอ ตานา ญา ลีฮัจ จะ_เยซู กือนา กรัจ ฮูโกบ ดัฮ ญา บราเลฮ-ฮาตี ญา อาเมด ดูเวะ ตีฆา-ปูโลฮ รีเงะ ซีงี_อาตัจ บรี ปาเระ กะ ลูมอฮ ซามี ซัยํ-บือซัยํ ฌางัน โกะ อูรัก ตูฮา. 4 ญา มือเลา ฌางัน กูญา จะ "กู บูวัจ ลาฆู บือดูซา ดัฮ นู กู บือเลฮ ซรัฮ_ซือมียา นู ฮอย ซาลัฮ เตอ บรี กือนา ฮูโกบ มาตี เลอ." ตาปี กูญา อีตู ตีกัฮ กะ ญา จะ "บูกัด ฌาดี ลาฆู นะ กามี_ตาปี ฌาดี ลาฆู นะ เกา ตะอาซิก เลอ." 5 กะฆีเตอ ยูดา ฮึมปัซ ดูเวะ อีตู เดะ รูมัฮ มือญือมัฮ ตูฮัด. ญา ตรือเบะ ปี_อีกัจ ตาลี เดะ ลีเฮ บูนอฮ ดีรี มาตี ดัฮ. 6 กะฆีเตอ ลูมอฮ ซามี ซัยํ-บือซัยํ อาเมด รีเงะ ปีระ อีตู มาแรฮ_มือเลา บือซามา จะ "ดูเวะ อีนี ฌาดี รือฆา ดารัฮ นะ ซือมียา เตอ_นู นะ บอฮ เดะ ปือตี ตาโรฮ ดูเวะ มือญือมัฮ ฌาดี ลาฆู ซาลัฮ เดะ ฮูโกบ เลอ." 7 กะฆีเตอ กูญา ปาคัจ บือกีรา นะ ซูโรฮ ดูเวะ อีตู_ปี บือลี ปาดัก นะ ตูกัก บูวัจ ปีโยะ ตานัฮ_บีดา นะ ฌาดี ฌีรัจ ตานัม บาดัด นะ โกะ ซือมียา บักซา อาซิกๆ. 8 กะฆีเตอ ปาดัก อีตู กือนา บลาโลก ปือนามา จะ ปาดัก ดารัฮ_รอจ กะ ฮาดัจ อีนี เลอ. 9 วะตู อีตู ฌาดี รือมัก ดัฮ บือกะ ปือมือเลา นู เยเรมี บือเลฮ มือเลา ตูโดฮ ดัฮ_นู จะ "กูญา อาเมด ดูเวะ ตีฆา-ปูโลฮ รีเงะ อีตู นู ฌาดี รือฆา นะ ซือมียา อีตู_นู โกะ บือแนฮ บักซา อิซราเอน ซือตืองัฮ ตืองะ รือฆา ดัฮ เตอ 10 กูญา ปี บือลี ตือปัจ ตานัฮ นะ ตูกัก บูวัจ ปีโยะ ตานัฮ_ตูโรจ บือกะ นู ตูฮัด เดะ อาตัซ ปือซัด กะ กู ดัฮ." ญา จะ. 11 ตานา เยซู ญา บือดีรี โซะ ฮึลด ฮูลู-บาลัก นะ ราฌา ฮูลู-บาลัก อีตู ตาญา ญา จะ_"เกา นี ฌาดี ราฌา นะ ลูมอฮ ยิว เฆอ?" เยซู ตีกัฮ จะ "เกา เลอ มือเลา กะฆีเตอ ดัฮ." 12 ตาปี วะตู ลูมอฮ ซามี ซัยํ-บือซัยํ ฌางัน โกะ อูรัก ตูฮา มือเลา อาดู เยซู ดัฮ_ญา เตด ตีกัฮ นามา โปด. 13 กะฆีเตอ ปีลาด มือเลา ฌางัน เยซู จะ "นู กูญา อาดู เกา บาญะ ลาฆู เตอ_เกา เตด ดืองัยํ เฆอ?" 14 ตาปี เยซู ตีเมา ตีกัฮ กะ กูญา แนฮ ซา ปาตัฮ โปด ฮอย. กะฆีเตอ_ฮูลู-บาลัก อีตู ญา ปือและ-ฮาตี บาญะ ซูโงฮ. 15 วะตู ลาฆู บรามัย ลือปัซ ปี อีตู ปีลาด ญา บียาซา ปลือปัซ อูรัก ซาลัฮ ซืออูรัก_บือกะ ตูโรจ ฮาตี นะ ลูมอฮ ซือมียา บาญะ. 16 เดะ ปือฌารา เตอ อาดา อูรัก ซาลัฮ นู ฌาฮัจ ซืออูรัก ปือนามา จะ บาระบา. 17 กาลา โกะ ซือมียา บาญะ บือมุน ดัฮ ปีลาด ตาญา กูญา จะ_"กาเญา ซูกา บรี กู นะ ปลือปัซ ซาปา เลอ? นะ ปลือปัซ บาระบา_เฆอ-จะ นะ ปลือปัซ เยซู นู กือนา บลาโลก จะ ราฌา นู บรี ซือลามัจ?" 18 กรานา ปีลาด ตาฮู จะ กูญา อาตัจ เยซู กะ ญา ซาเบะ กูญา ดือกี กะ ญา. 19 กาลา อีตู ตืองัฮ ปีลาด ดูโดะ เดะ ตือปัจ ดูโดะ บือดะวา_บีนี นะ ญา ซูโรฮ ซือมียา ปี มือญาเระ กะ ญา จะ_"ฌางัน บูวัจ นามา กะ ซือมียา ฮอย ซาลัฮ อีตู. ซาเบะ-จะ มาลับ ฮึญา_กู มีปี ลีฮัจ ลาฆู นะ ญา บูวัจ บรี กู ฆาโดฮ-ฮาตี บาญะ เลอ." ญา จะ. 20 ตาปี ลูมอฮ ซามี ซัยํ-บือซัยํ ฌางัน โกะ อูรัก ตูฮา_กูญา อาโจบ โกะ ลูมอฮ ซือมียา บาญะ บรี กูญา นะ มีตา ปลือปัซ บาระบา_บรี กะ เยซู นะ กือนา ฮูโกบ มาตี. 21 กะฆีเตอ ปีลาด ตาญา กูญา ปูลัก จะ "เดะ ดูวา อูรัก อีนี_กาเญา ซูกา บรี กู นะ ปลือปัซ ซือมียา ดีฮา บรี กะ กาเญา?" โกะ ซือมียา บาญะ ตีกัฮ จะ "ปลือปัซ บาระบา เลอ." 22 ปีลาด มือเลา ฌางัน กูญา อีตู จะ "ดัฮ กะฆีเตอ กู นะ บูวัจ กะฮามี ฌางัน เยซู_นู กือนา บลาโลก จะ ราฌา นู บรี ซือลามัจ?" กูญา อีตู ซือมูฮา ปาคัจ มือเลา จะ "บรี ญา กือนา กาจิก เดะ กายู ปลีตัก เลอ." 23 ปีลาด ตาญา กูญา อีตู จะ "กาจิก บูวัจ นามา? ญา บูวัจ ลาฆู ฌาฮัจ นามา เลอ?" ตาปี กูญา อีตู ดรัซ บือซูระ จะ "บรี ญา กือนา กาจิก เดะ กายู ปลีตัก เลอ." 24 ตานา ปีลาด ลีฮัจ จะ เตด ฌาดี นามา ดัฮ ตาปี นะ ฌาดี ลาฆู บูริ ฆาโดฮ โตระ_กะฆีเตอ ญา อาเมด อาเย มาแรฮ บาโซฮ ตางัน นะ ญา โซะ ฮึลด กูญา อีตู_มือเลา จะ "กู ฮอย ซาลัฮ ปาซัน ลาฆู มาตี นะ ซือมียา อีนี.ฌาดี ลาฆู นะ ลูมอฮ กาเญา เลอ." 25 โกะ ลูมอฮ ซือมียา ซือมูฮา ตีกัฮ จะ "ลาฆู มาตี นะ ญา_ฌาดี ลาฆู ซาลัฮ นะ กามี ฌางัน โกะ อานะ-กือมอน เลอ." 26 กะฆีเตอ ปีลาด ปลือปัซ บาระบา ปี บรี กะ กูญา อีตู. ตาปี เยซู เตอ_ญา ปือซัด บรี กือนา รือเปะ อาตัจ ญา บรี กือนา กาจิก เดะ กายู ปลีตัก เลอ. 27 กะฆีเตอ โกะ ลูมอฮ ตาฮัน นะ ปีลาด กูญา อาเมด เยซู บือปี_กะ บาลัย นะ ฮูลู-บาลัก นะ ราฌา. กูญา บือมุน โกะ กาวัด ตาฮัน ซือมูฮา_มาแรฮ กะ ญา. 28 กูญา อูฆัย โกะ กาเยด บาฌู นะ เยซู อาเมด กาเยด ซรือโกะ ญาวา_ซี มีรัฮ ฮีตับ ปากัย บรี กะ ญา. 29 กูญา อาเมด อากัยํ บือดูรี มาแรฮ อาญัม ฌาดี บือกะ จูบุก_บอฮ เดะ ปาลา นะ ญา. กูญา อาเมด กายู รีโยก มาแรฮ_บอฮ เดะ ตางัน โซะ กานัน นะ ญา. กูญา ตูกู ลูโตจ ซือมัฮ กะ ญา_อาฆัฮ-ฆือละ มือเลา จะ "ซือลามัจ เลอ เกา นู ราฌา นะ ลูมอฮ ยิว." 30 กูญา ปือทุย อาเย ลีโยยํ เดะ ญาวา นะ ญา. กูญา อาเมด กายู รีโยก ซีงี มาแรฮ_กาเตาะ เดะ ปาลา นะ ญา. 31 ซูดัฮ อาฆัฮ-ฆือละ กะ ญา กะฆีเตอ ดัฮ กูญา อูฆัย กาเยด อีตู_บอฮ กาเยด บาฌู นะ ญา ปาเระ. กะฆีเตอ กูญา บาวา ญา บือปี_นะ กาจิก เดะ กายู ปลีตัก เลอ. 32 ตืองัฮ กูญา ตรือเบะ ปี เตอ กูญา ดาปัจ ซือมียา นังฆรี ซัยรีน ซืออูรัก_ปือนามา จะ ซีโมน. ซือมียา อีตู เตอ ลูมอฮ ตาฮัน ปรือกัด_ซูโรฮ บรี ญา ตาโงก กายู ปลีตัก นะ เยซู. 33 ตานา กูญา รอจ กะ ตือปัจ นู กือนา บลาโลก จะ โฆละโฆทา ฌาดี-จะ_ตือปัจ ตูลัก กือปาลา เตอ 34 กูญา นะ บรี เยซู โอะ อาระ อางุน นู จาโปยํ ฌางัน อูบัจ ปาเฮะ.ตาปี ตานา ญา ฌือเลบ ดัฮ ญา ตีเมา โอะ. 35 ตานา กูญา กาจิก เยซู เดะ กายู ปลีตัก ดัฮ_กูญา อาเมด กาเยด บาฌู นะ เยซู มาแรฮ ปาคัจ ยิบละ ปาฮาฆิ. 36 กะฆีเตอ กูญา ดูโดะ ตูงู เยซู โซะ อีตู. 37 เดะ ฮูโฌก กายู ปลีตัก อาตัซ ปาลา นะ เยซู เตอ กูญา บอฮ ปาปัด_นู อาดา ฆาแรฮ ปาซัน นู ญา กือนา อาดู จะ "อีนี เลอ เยซู_ราฌา นะ ลูมอฮ ยิว." 38 กูญา บาวา อูรัก ปือญามุน ดูวา อูรัก มาแรฮ กาจิก กูญา เดะ กายู ปลีตัก_บือซามา ฌางัน เยซู ฌูฆา โซะ กานัน ซา โซะ กีรี ซา. 39 โกะ ซือมียา นู บือฌาลัด ปี มาแรฮ เตอ กูญา อีลิก ปาลา อาฆัฮ-ฆือละ_กูญา มือเลา ตะอารัฮ อูจะ กะ เยซู 40 จะ "เกา เลอ นู นะ ปรูโตฮ บาลัย นะ ตูฮัด_นะ บูวัจ ปาเระ เดะ ตีฆา อารี เตอ ตูโลก ญาวา ตะอาซิก บรี ลือปัซ เลอ.ดัฮ เกา ฌาดี นานะ นะ ตูฮัด เดะ อาตัซ เตอ_กือนา ตูโรด มาแรฮ เดะ กายู ปลีตัก เลอ." กูญา จะ. 41 กะฆีเตอ ฌูฆา ลูมอฮ ซามี ซัยํ-บือซัยํ_ฌางัน โกะ ซือมียา อาฌัยํ ลาฆู ปือมือซัด นะ ตูฮัด ฌางัน โกะ อูรัก ตูฮา เตอ_กูญา อาฆัฮ-ฆือละ กะ เยซู มือเลา จะ 42 "ซือมียา อาซิก ญา บือเลฮ ตูโลก บรี ลือปัซ ดัฮ_ตาปี ญาวา นะ ญา ตะอาซิก เตอ ญา นะ ตูโลก เตด บือเลฮ เลอ.ญา ฌาดี ราฌา นะ ลูมอฮ อิซราเอน นอ_บรี ญา ตูโรด มาแรฮ เดะ กายู ปลีตัก เดะ วะตู อีนี ลีฮัจ_บีดา กีตา นะ บือเลฮ ปือจายา กะ ญา ฌูฆา เลอ. 43 ญา บือเลฮ ปือจายา กะ ตูฮัด เดะ อาตัซ เลอ. กะ ตูฮัด เดะ อาตัซ ซูกา กะ ญา_บรี ตูฮัด ตูโลก ญา เดะ วะตู อีนี เลอ. กรานา ญา บือเลฮ มือเลา จะ_นู ญา ฌาดี นานะ นะ ตูฮัด เดะ อาตัซ ดัฮ." กูญา จะ. 44 โกะ ปือญามุน นู กือนา กาจิก บือซามา ฌางัน เยซู เตอ กูญา โปด_บือเลฮ มือเลา มือฌัฮ อูจะ กะ ญา ฌูฆา. 45 กะฆีเตอ ตะเดะ ตืองัฮ อารี นังฆรี ซือมูฮา ฮาบิฮ กือลับ_ตือดะ รอจ กะ ปูโกยํ ตีฆา. 46 วะตู ฆามะ ปูโกยํ ตีฆา บือเลฮ เยซู บือซูระ ซูวารา บูริ จะ "เอลี_เอลี ลามา ซะบักทานี" ฌาดี-จะ "โอ ตูฮัด นะ กู โอ ตูฮัด นะ กู บูวัจ นามา เกา ตีงัน กู บูวัก ดัฮ?" 47 อาดา ซือมียา ซือตืองัฮ นู บือดีรี ดาปิก โซะ อีตู เตอ กูญา มือเลา จะ_"ซือมียา อีนี ญา บลาโลก เอลียา." 48 ดัดดัด ซือมียา ซืออูรัก เดะ ลูมอฮ กูญา ญา บลารี ปี_อาเมด ฆาบุซ ลือมัฮ มาแรฮ จือลุ อาระ อางุน มาซับ ซือและ เดะ ฮูโฌก กายู รีโยก_บรี กะ เยซู โอะ. 49 ตาปี ลูมอฮ ซือมียา อาซิก มือเลา จะ "นาตี ดูลู เลอ. บรี กีตา ลีฮัจ จะ_เอลียา นะ มาแรฮ ตูโลก ญา บรี ลือปัซ เฆอ เตด?" 50 ตาปี เยซู เตอ ญา บือซูระ ปูลัก ซูวารา บูริ มาตี ปี ดัฮ. 51 ลีฮัจ เลอ กาเยด กือตัก เดะ บาลัย นะ ตูฮัด ญา ปูตุซ ตือกรัจ ดูวา_ตะเดะ โซะ อาตัซ รอจ กะ โซะ บาวัฮ. ตานัฮ บรีเงาะ_บาตู กือโตน บือซัยํ ซือตืองัฮ ปือจัฮ-บือลัฮ ดัฮ. 52 ฆูฮา ตานัม บาดัด ซือตืองัฮ กือนา บูกา ดัฮ. บาดัด นะ โกะ ซือมียา นะ ตูฮัด_บาญะ อูรัก นู มือนีงัน ปี ดัฮ เตอ กูญา ฮีโดะ ปาเระ เดะ มาตี. 53 กาลา เยซู ฮีโดะ ปาเระ เดะ มาตี ดัฮ กูญา อีตู ตรือเบะ มาแรฮ เดะ ฆูฮา_มาโซะ ปี กะ ดาลับ นังฆรี เยรูซาเลม นู บาฌิ บือซรี ปี ปลีฮัจ กะ ซือมียา บาญะ อูรัก. 54 โซะ กือปาลา ตาฮัน ฌางัน โกะ ซือมียา นู อาดา บือซามา ตูงู เยซู เตอ_ตานา กูญา ลีฮัจ นู ตานัฮ บรีเงาะ บือฆารี ลาฆู อาซิก นู บือฌาดี ดัฮ เตอ_กูญา ปาคัจ ตือกือฌุจ ตาโกจ โตระ มือเลา จะ "ซูโงฮ เลอ_ซือมียา อีนี ฌาดี นานะ นะ ตูฮัด บือซัยํ เดะ อาตัซ เลอ." 55 อาดา นีบีนี บาญะ อูรัก ฌูฆา นู นาตี ลีฮัจ ฌาโวฮ ดีกิ.โกะ นีบีนี อีตู บือเลฮ ตูโรจ กะ เยซู ดาตัก เดะ นังฆรี ฆาลิลี บือกรือฌา ตูโลก ญา. 56 เดะ ลูมอฮ อีตู อาดา มารียา ซือมียา ตูโปะ มักดาลา เตอ อาดา มารียา_มะ เดะ ยากอบ ฌางัน โยเซ เตอ อาดา บีนี นะ เซเบดี ฌูฆา. 57 วะตู ปะฮึญา อารี อีตู อาดา อูรัก กายา มาแรฮ ฌาดี ซือมียา ตูโปะ อาริมาเทีย_ปือนามา จะ โยเซบ นู ฌาดี มูเระ นะ เยซู ฌูฆา เตอ 58 ญา มาโซะ ปี รอจ กะ ปีลาด มีตา บาดัด นะ เยซู. ปีลาด ปือซัด โกะ ตาฮัน_บรี กูญา นะ บรี บาดัด อีตู กะ โยเซบ. 59 กะฆีเตอ โยเซบ อาเมด บาดัด นะ เยซู_บูกุซ บาโลจ ฌางัน กาเยด ปูเตฮ นู จรัฮ บาฌิ 60 บาวา บือปี บอฮ เดะ ฆูฮา นู บารู นะ ญา นู ญา ตือโบะ เดะ บูเกะ บาตู ดัฮ.ญา ฆรือลิก บาตู บือซัยํ มาแรฮ ตูโดก ลูบัก ฆูฮา ลาลู ญา ปี ดัฮ. 61 อาดา มารียา ซือมียา ตูโปะ มักดาลา ฌางัน มารียา นู อาซิก ซีงี_กูญา ดูโดะ โซะ อีตู รือมัก ฌางัน ฆูฮา เตอ. 62 จรัฮ ปาฆี อารี อีตู ลือปัซ เดะ อารี บือซียะ เตอ_โกะ ลูมอฮ ซามี ซัยํ-บือซัยํ ฌางัน ลูมอฮ ฟาริซี กูญา ปาคัจ ปี ซารี ปีลาด 63 มือเลา จะ "ตูวัด เออ กามี จับ บือเลฮ จะ ตานา ซือมียา มือนีปู อีตู_อาดา ฮีโดะ ลาฆี เตอ ญา บือเลฮ มือเลา จะ ลือปัซ ตีฆา อารี_ญา นะ ฮีโดะ ปาเระ ปูลัก ญา จะ. 64 กะฆีเตอ บรี เกา ปือซัด บรี ตูโดก ฆูฮา นะ ญา บรี กือมัซๆ_ตือดะ รอจ กะ อารี นู ตีฆา เลอ ตาโกจ-จะ โกะ มูเระ นะ ญา นะ มาแรฮ_จูรี อาเมด บาดัด นะ ญา บือปี เดะ ตืองัฮ มาลับ นะ มือเลา ฌางัน ลูมอฮ ซือมียา จะ_'ญา บือเลฮ ฮีโดะ ปาเระ เดะ มาตี ดัฮ.' กะฆีเตอ ลาฆู มือนีปู โซะ ปือญูดัฮ_นะ ฌาฮัจ ลือเบฮ เดะ โซะ ลามูลา เลอ." กูญา จะ. 65 ปีลาด มือเลา ฌางัน กูญา จะ "บอฮ บาวา ลูมอฮ ตาฮัน บือปี_ปี ตูงู ฆูฮา บรี กือมัซๆ บือกะ กาเญา บือเลฮ บูวัจ ตือตู ซูโงฮ เลอ." ญา จะ. 66 กะฆีเตอ กูญา ปี ดัฮ ตูโดก ปีตู ฆูฮา บรี กือมัซๆ ตาแปะ มือกรา_ปือนานา นะ ราฌา บีดา นะ ตาฮู จะ อาดา ซาปา มาแรฮ อูบัฮ บาตู อีตู.กูญา บรี ลูมอฮ ตาฮัน ตูงู โซะ อีตู เลอ.
1 ลือปัซ เดะ อารี บราดู กรือฌา เดะ วะตู บือบีฮัก เดะ อารี มีงู อีตู เตอ_มารียา ซือมียา ตูโปะ มักดาลา ฌางัน มารียา นู อาซิก ซีงี กูญา บือฌาลัด ปี_นะ ลีฮัจ ฆูฮา นะ เยซู. 2 ลีฮัจ เลอ ตานัฮ ญา บรีเงาะ บือซัยํ ซูโงฮ ดัฮ.อาดา ฮูลู-บาลัก นะ ตูฮัด ซืออูรัก ญา ตูโรด มาแรฮ ดาตัก เดะ โซะ ลาแงะ_ญา ฆรือลิก บาตู บือซัยํ อีตู บรี ตรือเบะ เดะ ลูบัก ฆูฮา_ญา ดูโดะ เดะ อาตัซ บาตู อีตู เลอ. 3 ญา ปลีฮัจ บือซายา ซูโงฮ ซือรูปา บือกะ กีลัจ. กาเยด บาฌู นะ ญา ปูเตฮ_ซือรูปา บือกะ ซายา กือมูวัง. 4 โกะ ตาฮัน นู ตูงู อีตู กูญา ตาโกจ เดะ ญา ยู ญาวา กือตัยํ กูญา รือบัฮ ตือฆูแลก_ซือรูปา ซือมียา นู มาตี ดัฮ. 5 ตาปี ฮูลู-บาลัก ญา มือเลา ฌางัน โกะ นีบีนี อีตู จะ "ฌางัน นะ ตาโกจ เลอ.กู ตาฮู ดัฮ จะ กาเญา มาแรฮ ซารี เยซู นู กือนา กาจิก เดะ กายู ปลีตัก ดัฮ. 6 ญา ฮอย ปัจ อีนี ดัฮ เลอ ซาเบะ ญา ฮีโดะ ปาเระ เดะ มาตี_บือกะ ญา มือเลา ดัฮ. มาแรฮ ลีฮัจ เลอ ตือปัจ นู ญา บือเลฮ ตีโนะ เตอ. 7 ปี เลอ จือปัจๆ มือญาเระ กะ โกะ มูเระ นะ ญา จะ_'ญา ฮีโดะ ปาเระ เดะ มาตี ดัฮ. ลีฮัจ เลอ ญา นะ ปี กะ นังฆรี ฆาลิลี_ดูลู เดะ กาเญา. เปะ อีตู เลอ กาเญา นะ ลีฮัจ บือฆารี ญา.' ลีฮัจ เลอ_กู บือเลฮ มือญาเระ ลาฆู อีนี กะ กาเญา ดัฮ." ญา จะ. 8 กะฆีเตอ โกะ นีบีนี อีตู ตรือเบะ ปี จือปัจๆ ดัฮ. กูญา โปด อาดา ลาฆู ตาโกจ_อาดา ลาฆู บือซูกา-ฮาตี ซูโงฮ ฌูฆา เลอ. กูญา บลารี ปี นะ มือญาเระ ลาฆู อีนี_กะ โกะ มูเระ นะ เยซู. 9 ลีฮัจ เลอ เยซู เตอ ญา มาแรฮ ดาปัจ กูญา มือเลา จะ "ซือลามัจ เลอ."กูญา มาแรฮ รอจ กะ ญา ปือฆัก กากี นะ ญา ตือมะ มือญือมัฮ กะ ญา. 10 เยซู มือเลา ฌางัน กูญา จะ "ฌางัน นะ ตาโกจ เลอ. ปี เลอ_มือญาเระ กะ ลูมอฮ อาดี-บราดี นะ กู จะ บรี กูญา นะ ปี กะ นังฆรี ฆาลิลี เลอ.โซะ อีตู เลอ กูญา นะ ลีฮัจ บือฆารี กู." ญา จะ. 11 ตานา โกะ นีบีนี ตืองัฮ ปี เตอ โกะ ตาฮัน นู ตูงู เดะ ฆูฮา ซือตืองัฮ_กูญา บาลิ ปี กะ นังฆรี มือญาเระ กะ ลูมอฮ ซามี ซัยํ-บือซัยํ_ลาฆู ซือมูฮา นู ฌาดี ดัฮ. 12 ลูมอฮ ซามี ซัยํ-บือซัยํ บือมุน บือกีรา ฌางัน โกะ ลูมอฮ อูรัก ตูฮา.กะฆีเตอ กูญา บรี ดูเวะ บาญะ กะ โกะ ตาฮัน อีตู 13 มือเลา ฌางัน กูญา จะ "กาเญา กือนา มือเลา ฌางัน ลูมอฮ ซือมียา นู บาญะ จะ_ตานา กามี ตีโนะ ลีนา ดัฮ โกะ มูเระ นะ ญา มาแรฮ ตืองัฮ มาลับ_จูรี อาเมด บาดัด นะ เยซู บือปี เตอ.' 14 กะ ฮูลู-บาลัก นะ ราฌา ดืองัยํ ลาฆู อีนี ดัฮ กามี นะ ปี มือเลา ฌางัน ญา_อูฆัย ลาฆู นะ กาเญา บรี กาเญา เตด กือนา ฮูโกบ เลอ." 15 โซะ ตาฮัน อีตู กูญา ซาโมจ ดูเวะ ดัฮ_ปี บูวัจ ตูโรจ บือกะ ลูมอฮ ซามี ซัยํ-บือซัยํ ปือซัด ดัฮ. กะฆีเตอ ลาฆู อีนี กือจัย ปี ราตา_เดะ ตืองัฮ ลูมอฮ ยิว ดัฮ ตือดะ รอจ กะ อารี อีนี เลอ. 16 กะฆีเตอ โกะ มูเระ ซือบือลัซ อูรัก อีตู กูญา ปี กะ นังฆรี ฆาลิลี_รอจ กะ บูเกะ นู เยซู จาเระ กะ กูญา ดัฮ. 17 ตานา กูญา ดาปัจ เยซู ดัฮ กูญา ตือมะ มือญือมัฮ กะ ญา_ตาปี ซือมียา ซือตืองัฮ บือฮีมัจ เตด ตือตู-ฮาตี เลอ. 18 เยซู มาแรฮ มือเลา ฌางัน กูญา จะ "ลาฆู ปือมือฆัฮ ซือมูฮา เดะ ลาแงะ_เดะ ดือนียา เตอ ตูฮัด บือซัยํ เดะ อาตัซ ซรัฮ บรี กะ กู ดัฮ เลอ. 19 กะฆีเตอ กาเญา กือนา ปี กะ ราตา บักซา_บูวัจ บรี กูญา ฌาดี มูเระ นะ กู เลอ บรี กูญา ซาโมจ ลาฆู ซือลับ เดะ อาเย_เดะ นามา นะ ตูฮัด เตอ ฌาดี-จะ นามา นะ อาโปก ฌางัน นานะ นะ ตูฮัด_ฌางัน ซือมืองัจ นะ ตูฮัด เลอ. 20 กือนา อาฌัยํ กูญา บรี บูวัจ ตูโรจ ลาฆู นู กู ปือซัด ดัฮ ซือมูฮา.ลีฮัจ เลอ กู นะ ดูโดะ บือซามา ฌางัน กาเญา ซือลาลู_ตือดะ ฮาดัจ อีนี นะ ฮาบิฮ ดัฮ เลอ." เยซู ญา จะ.
1 นี เลอ บรีตา นู บาฌิ ปาซัน นะ เยซู คริด. ญา เตอ นานะ นะ ตูฮัด บือซัยํ เดะ อาตัซ. 2 ลาฆู อีนี ฮึนตะ บือกะ ลาฆู นะ อิซายา ซือมียา ตูโดฮ ลาฆู นะ ตูฮัด เตอ. ญา ฆาแรฮ ดัฮ จะ " 'ลีฮัจ เลอ กู ซูรโฮ ปือญูโรฮ นะ กู บรี ญา ปี โซะ ฮึลด เกา ญา เลอ นะ ซียะ ฌาลัด นะ เกา ดูลู เลอ.' ตูฮัด เดะ อาตัซ ญา จะ." 3 "อาดา ซูวารา ซือมียา บือซูระ เดะ ปาดัก ตานัฮ ตูโฮยํ นู ลือฆา จะ 'กือนา ซียา ฌาลัด บรี ซุจ บีดา ตูฮัด นะ มาแรฮ เลอ กือนา บือกรือฌา ฌาลัด นะ ญา บรี รือมัก ปี เลอ.' ญา จะ." 4 กะฆีเตอ โยฮัน เตอ ญา มาแรฮ เดะ ปาดัก ตานัฮ ตูโฮยํ นู ลือฆา ญา บรี โกะ ซือมียา ซาโมจ ลาฆู ซือลับ เดะ อาเย. ญา มือญาเระ จะ "กาเญา ซือมูฮา บราเลฮ-ฮาตี ซาโมจ ลาฆู ซือลับ เดะ อาเย เลอ. กะฆีเตอ ตูฮัด นะ อาเกะ ดูซา นะ กาเญา." ญา จะ. 5 กะฆีเตอ ซือมียา เดะ ราตา นังฆรี ยูเดีย ฌางัน ซือมียา เดะ นังฆรี เยรูซาเลม เตอ กูญา ซือมูฮา ปาคัจ ตรือเบะ ปี ซารี โยฮัน. กูญา ซาโงะ ลาฆู ดูซา นะ กูญา. กะฆีเตอ โยฮัน บูวัจ บรี กูญา ซาโมจ ลาฆู ซือลับ เดะ อาเย เดะ ซูงัย จอแดน. 6 โยฮัน เตอ ญา ปือแญะ กาเยด บูวัจ ฌางัน บูลู อูตัยํ อาดา กูเละ บือนาตัก ฌาดี ตาลี ปีงัก นะ ญา. ญา บียาซา มากัด โกะ บลาลัก ฌางัน อาเย มีซัด มาทู. 7 ญา มือญาเระ จะ "อาดา ซือมียา ซืออูรัก นู มือฆัฮ ลือเบฮ เดะ กู ญา นะ มาแรฮ เดะ บลากัก กู. ตาลี ปะตาปะ นะ ญา โปด กู เตด บือฆูนา นะ ตือมะ อูฆัย เลอ. 8 กู บรี กาเญา ซือลับ เดะ อาเย เตอ ตาปี ซือมียา อีตู เลอ ญา นะ บรี กาเญา ซือลับ เดะ ซือมืองัจ นะ ตูฮัด." ญา จะ. 9 วะตู อีตู เยซู มาแรฮ ดาตัก เดะ ตูโปะ นาซาเรด เดะ โซะ นังฆรี ฆาลิลี. ญา ซาโมจ ลาฆู ซือลับ เดะ อาเย เดะ ซูงัย จอแดน นู โยฮัน บูวัจ บรี. 10 ตานา เยซู ญาแญะ เดะ อาเย ดัฮ ดัดดัด อีตู ญา ลีฮัจ จะ ลาแงะ ตือบูกา ดัฮ. อาดา ซือมืองัจ นะ ตูฮัด ซือรูปา บูโรก ปาตี ญา ตูโรด มาแรฮ เดะ อาตัซ ญา. 11 อาดา ซูวารา มาแรฮ ดาตัก เดะ โซะ ลาแงะ นู จะ "เกา เลอ ฌาดี นานะ นะ กู นู กู ซายัก. กู ซูกา-ฮาตี กะ เกา บาญะ เลอ." 12 ดัดดัด อีตู ซือมืองัจ นะ ตูฮัด บูวัจ บรี เยซู มาโซะ ปี กะ ปาดัก ตานัฮ ตูโฮยํ นู ลือฆา. 13 เยซู อาดา ดูโดะ ตือปัจ อีตู ปัจ-ปูโลฮ อารี. กือปาลา ฮาตู ซีตัด ญา มาแรฮ บาอาฌะ ญา บรี บูวัจ ซาลัฮ. เปะ อีตู อาดา บือนาตัก ฮูตัด ฌูฆา. อาดา ฮูลู-บาลัก นะ ตูฮัด มาแรฮ บือบือลา ญา. 14 ลือปัซ เดะ โยฮัน กือนา กานัก เดะ ปือฌารา ดัฮ เยซู เตอ ญา มาแรฮ กะ นังฆรี ฆาลิลี. ญา บรี ตาฮู บรีตา นู บาฌิ นะ ตูฮัด. 15 ญา มือเล จะ "วะตู นู บาฌิ ญา มาแรฮ ปือนอฮ ดัฮ. ตูฮัด เดะ อาตัซ ญา มาแรฮ ฌาดี ราฌา นะ บือบือลา อูมัจ-ซือมียา ดัฮ. กาเญา กือนา บราเลฮ-ฮาตี บารู ปือจายา กะ บรีตา นู บาฌิ อีนี เลอ." ญา จะ. 16 เยซู ญา บือฌาลัด ปี เดะ บีดิก ลาโวจ ฆาลิลี. ญา ลีฮัจ บือฆารี ซือมียา ดูวา อูรัก จะ ซีโมน ฌางัน อันดรู อาดี เดะ ญา. กูญา ตืองัฮ มือญาลา เดะ ลาโวจ ซาเบะ กูญา ฌาดี ซือมียา รีฆะ อีกัด. 17 เยซู มือเลา กะ กูญา จะ "มาแรฮ ตูโรจ กะ กู เลอ. กู นะ บูวัจ บรี กาเญา ฌาดี ซือมียา รีฆะ ซือมียา." 18 ดัดดัด อีตู กูญา ตีงัน ฌาลา นะ กูญา บูวัก ตูโรต ปี กะ เยซู ดัฮ. 19 กะฆีเตอ เยซู ญา บือฌาลัด ปี ดีกิ ญา ลีฮัจ บือฆารี ยากอบ นานะ นะ เซเบดี ฌางัน โยฮัน อาดี เดะ ญา. กูญา ตืองัฮ บูโบน โกะ ปูกัจ เดะ ปราฮู นะ กูญา. 20 ดัดดัด อีตู เยซู เตอ ญา ปาเงน ดูวา อูรัก อีตู. กะฆีเตอ กูญา ตีงัน เซเบดี ปะ เดะ กูญา นู อาดา เดะ ปราฮู บือซามา ฌางัน โกะ อานะ กูลี. กูญา ดูวา บราดี ตูโรจ กะ เยซู ปี ดัฮ. 21 กะฆีเตอ เยซู ฌางัน โกะ มูเระ นะ ญา ฌาลัด ปี กะ ตูโปะ คาเปอนาอุม. บารู เดะ อารี บราดู กรือฌา เยซู เตอ ญา มาโซะ ปี เดะ รูมัฮ บือมุน ปี อาฌัยํ ลูมอฮ ซือมียา. 22 โกะ ซือมียา นู ดืองัยํ เตอ กูญา ปือและ-ฮาตี ซูโงฮ นู ญา อาฌัยํ กะฆีเตอ ซาเบะ-จะ เยซู อาฌัยํ กูญา บือกะ ซือมียา นู อาดา มือฆัฮ เลอ ฮอย เตด ซือรูปา โกะ ซือมียา อาฌัยํ ลาฆู ปือมือซัด นะ ตูฮัด. 23 ดัดดัด อีตู เดะ รูมัฮ บือมุน นะ กูญา อาดา ซือมียา ซืออูรัก นู กือนา ฮาตู ตะอารัฮ มาโซะ ราโซะ เดะ ญาวา นะ ญา ดัฮ. ซือมียา อีตู เตอ ญา บือซูระ จะ 24 "เออ เยซู อูรัก นาซาเรด เกา มาแรฮ บือฆาโดฮ ลูมอฮ กามี บูวัจ นามา เลอ? เกา มาแรฮ นะ บูวัจ บรี ลูมอฮ กามี ฌาฮานัม เฆอ? กู ตาฮู จะ เกา เตอ ซือมียา นู บืาฌิ บือซรี นะ ตูฮัด บือซัยํ เดะ อาตัซ เลอ." ญา จะ. 25 ตาปี เยซู เตอ ญา อูจะ บลารัก ฮาตู อีตู จะ "กือนา ซืองะ บูวัก เลอ. ตรือเบะ เดะ ญาวา ซือมียา อีตู ปี ญัฮ เลอ." 26 ฮาตู นู ตะอารัฮ ซีงี เตอ ญา บูวัจ ซือมียา อีตู ยู มืองือตัจ. ญา บรือแกว บูริ. กะฆีเตอ ฮาตู ญา ตรือเบะ เดะ ญาวา นะ ญา ปี ดัฮ. 27 โกะ ซือมียา ซือมูฮา กูญา ปาคัจ ปือและ-ฮาตี ซูโงฮ บือตาญา-ตาญา ซามา กูญา จะ "ลาฆู อีนี ฌาดี กะฮามี เลอ? ซูโงฮ เลอ ซือมียา อีนี อาฌัยํ ลาฆู นู บารู. ญา อาฌัยํ ฌางัน ปือมือเลา นู มือฆัฮ. มีเซ-จะ ฮาตู ตะอารัฮ โปด ซือมียา อีนี ญา ปือซัด ฮาตู ฆาโดฮ ตูโรจ ปือมือซัด นะ ญา." กูญา จะ. 28 กะฆีเตอ ลาฆู นะ เยซู กือจัย ปี ราตาๆ เดะ โซะ นังฆรี ฆาลิลี. 29 กะฆีเตอ เยซู ฌางัน โกะ มูเระ นะ ญา เตอ กูญา ตรือเบะ ปี เดะ รูมัฮ บือมุน ปี มาโซะ เดะ รูมัฮ นะ ซีโมน ฌางัน อันดรู. ยากอบ ฌางัน โยฮัน ปี ซามา. 30 มะ มือตูฮา นะ ซีโมน เตอ ญา ตีโนะ เตด ซือนัง ตืองัฮ ฮูวัจ เลอ. ตานา เยซู มาโซะ กะ ดาลับ รูมัฮ ดัดดัด กูญา บรี ญา ตาฮู ปาซัน นีบีนี อีตู. 31 เยซู เตอ ญา ปี ปือฆัก ตางัน นีบีนี อีตู อาปู บือบีกัซ. กะฆีเตอ ฮูวัจ อีตู ฮอย ดัฮ ญา ซือนัง บาฌิ เลอ. ญา ตูโลก บือกรือฌา มากัด บรี กะ กูญา. 32 วะตู ปะฮึญา มาตาอารี นะ ฆูโฆยํ ดัฮ กูญา ปาคัจ บาวา โกะ ซือมียา เตด ซือนัง ญาวา ฌางัน โกะ ซือมียา นู อาดา ฮาตู มาโซะ ราโซะ ดัฮ เตอ มาแรฮ ซารี เยซู ซือมูฮา. 33 ซือมียา ซือตูโปะ กูญา ปาคัจ มาแรฮ ปือนอฮ เดะ ลามัน รูมัฮ อีตู. 34 เยซู เตอ ญา บือบือลา ซือมียา เตด ซือนัง ญาวา อาดา ปือญาเกะ แนฮ-ฌือแนฮ บาญะ อูรัก. ญา โปรฮ โกะ ฮาตู บาญะ บรี ตรือเบะ ปี ฮาบิฮ ดัฮ. ญา บลารัก ฮาตู ตีเมา บรี มือเลา นามา โปด ซาเบะ ฮาตู อีตู เตอ กูญา กราลา เยซู. 35 โซะ มูกัยํ วะตู กือลับ ลาฆีฝ เยซู บีกัซ ตรือเบะ ปี กะ ตือปัจ ฮอย ซือมียา. เปะ อีตู ญา บือซาโวจ กะ ตูฮัด. 36 กะฆีเตอ ซีโมน ฌางัน กาวัด นะ ญา เตอ กูญา ตรือเบะ ปี ตูโรจ กะ เยซู. 37 ตือปัจ อีตู กูญา มือเลา ฌางัน ญา จะ "ซือมียา ซือมูฮา ปาคัจ มียา เกา." 38 ตาปี เยซู มือเลา ฌางัน กูญา จะ "โฌฮ บรี กีตา ปี กะ ตูโปะ อาซิก ปูลัก บีดา นะ มือญาเระ ลาฆู นะ ตูฮัด เปะ อีตู ฌูฆา. กรานา กู มาแรฮ ดัฮ นะ บูวัจ กะฆีเตอ เลอ." 39 กะฆีเตอ เยซู บือฌาลัด ปี เดะ นังฆรี ฆาลิลี ราตาๆ มือญาเระ ลาฆู นะ ตูฮัด เดะ โกะ รูมัฮ บือมุน นะ กูญา. โกะ ฮาตู โปด ญา โปรฮ บรี ตรือเบะ เดะ ซือมียา. 40 อาดา ซือมียา ปือญาเกะ ปูรู ซืออูรั ญา มาแรฮ ซารี เยซู. ญา ตูกู ลูโตจ มีตา เดะ เยซู จะ "กะ เกา อาดา ฮาตี นะ บือบือลา กู กะฆีเตอ นะ บูวัจ บรี กู ซือนัง บือเลฮ เลอ. 41 กะฆีเตอ เยซู ตือจีฮัด กะ ซือมียา อีตู ญา อาเงา ตางัน ปือเตาะ เดะ ญาวา นะ ญา มือเลา จะ "กู อาดา ฮาตี นะ บือบือลา เกา. บรี เกา ซือนัง บาฌิ เลอ." 42 ดัดดัด อีตู ปือญาเกะ ปูรู ฮอย ฮาบิฮ ดัฮ เดะ ญาวา นะ ญา ซือนัง บาฌิิ ดัฮ เลอ. 43 กะฆีเตอ เยซู ซูโรฮ ซือมียา อีตู ปี ดัดดัด. ญา บลารัก กะ ญา กือมัซๆ 44 มือเลา จะ "ฌางัน จาเระ ลาฆู อีนี กะ ซือมียา ดีฮา โปด. ตาปี ปี เลอ มียา ซามี บรี ญา ลีฮัจ จะ เกา ลือฆา ดัฮ. มือนืองะ บารัก มือญือมัฮ บรี กะ ตูฮัด เลอ บือกะ มูซา ปือซัด ดัฮ เตอ บีดา นะ บรี ราตา ซือมียา ตาฮู จะ เกา ซือนัง บาฌิ ดัฮ." เยซู ญา จะ. 45 ตาปี ซือมียา อีตู ตรือเบะ ปี มือญาเระ ลาฆู อีตู ราตาๆ บูวัจ บรี บรีตา นะ เยซู กือจัย ปี ราตา เลอ. กะฆีเตอ เยซู นะ มาโซะ ปี โซะ ตูโปะ นู ดีฮา เตด บือเลฮ ตาปี ญา กือนา ดูโดะ เดะ ลูวัยํ ตูโปะ เดะ ตือปัจ ฮอย ซือมียา. เปะ อีตู อาดา ซือมียา ดาตัก เดะ ราตา ตือปัจ มาแรฮ ซารี ญา.
1 ลือปัซ บาญะ อารี ดัฮ เยซู มาโซะ กะ ตูโปะ คาเปอนาอุม ปูลัก. อาดา ซือมียา ดืองัยํ จะ เยซู อาดา เดะ รูมัฮ. 2 กะฆีเตอ โกะ ซือมียา ปาคัจ มาแรฮ บือมุน บือซามา บาญะ อูรัก ยู เดะ ดาลับ รูมัฮ ฮอย ตือปัจ นะ มาโซะ. โซะ ปีตู รูมัฮ โปด กรือจัจ ฮาบิฮ. กะฆีเตอ เยซู มือญาเระ ปือมือเลา นะ ตูฮัด บรี กูญา มือนีงัย. 3 อาดา ซือมียา ปัจ อูรัก อูโซก ซือมียา ฮอย อูรัจ มาแรฮ. 4 ตาปี กูญา มาโซะ บรี รอจ กะ ญาวา นะ เยซู เตด บือเลฮ ดัฮ กรานา โกะ ซือมียา บาญะ ตือลาลู. กะฆีเตอ กูญา บูกา กือมูโบก รูมัฮ เดะ อาตัซ ตือปัจ เยซู ดูโดะ. ตือบูกา ดัฮ กูญา ปลือปัซ ลือปัจ นะ อูรัก ฮอย อูรัจ อีตู บือตูโรด ปี กะ บาวัฮ. 5 ตานา เยซู ลีฮัจ นู กูญา ปือจายา กะฆีเตอ ญา มือเลา กะ ซือมียา ฮอย อูรัจ จะ "เกา เออ ดูซา นะ เกา กือนา อาเกะ บรี ดัฮ." 6 ตาปี เปะ อีตู อาดา โกะ ซือมียา อาฌัยํ ลาฆู ปือมือซัด นะ ตูฮัด ซือตืองัฮ. กูญา อีตู ดูโดะ อีงัจ เดะ ฮาตี จะ 7 "เอะ บูวัจ นามา ปะ ซือมียา อีนี มือเลา กะฆีนี? อีนี ฌาดี ลาฆู มือเลา ตะอารัฮ กะ ตูฮัด เดะ อาตัซ. ฮอย ซือมียา ดีฮา นะ อาเกะ ดูซา บือเลฮ. ซา ตูฮัด บือซัยํ เดะ อาตัซ เลอ นู นะ อาเกะ บือเลฮ." กูญา จะ. 8 ดัดดัด อีตู เยซู เตอ ญา ตาฮู เดะ ฮาตี จะ กูญา อีตู อีงัจ ตาญา กะฆีนี. กะฆีเตอ ญา มือเลา กะ กูญา จะ "บูวัจ นามา เลอ กาเญา บรีงัจ เดะ ฮาตี กะฆีนี? 9 นู ดีฮา มือเลา ซือนัง ลาฆี? นะ มือเลา กะ ซือมียา ฮอย อูรัจ จะ 'ดูซา นะ เกา กือนา อาเกะ ดัฮ' เฆอ-จะ 'บีกัซ เลอ อาเกะ บาวา ลือปัจ นะ เกา บือฌาลัด ปี เลอ.' นู ดีฮา ซือนัง ลาฆี? 10 ตาปี กู นะ บรี กาเญา ตาฮู จะ นานะ นะ อูมัจ-ซือมียา อาดา มือฆัฮ นู นะ อาเกะ ดูซา นะ ซือมียา เดะ ดือนียา บือเลฮ." ญา จะ. กะฆีเตอ เยซู มือเลา กะ ซือมียา ฮอย อูรัจ จะ 11 "กู ซูโรฮ เกา จะ บีกัซ เลอ. อาเกะ บาวา ลือปัจ นะ เกา บาลิ ปี กะ รูมัฮ เลอ." ญา จะ. 12 ดัดดัด อีตู ซือมียา ฮอย อูรัจ ญา บีกัซ ดัฮ. ญา อาเกะ บาวา ลือปัจ นะ ญา ตรือเบะ ปี ดัฮ โซะ ฮึลด มูคา นะ โกะ ซือมียา ซือมูฮา. กะฆีเตอ กูญา ซือมูฮา ปือและ-ฮาตี ซูโงฮ มือโอจ กะ ตูฮัด เดะ อาตัซ มือเลา จะ "ลาฆู กะฆีนี เลอ กีตา เตด ดือละ ลีฮัจ ดูลู." 13 เยซู เตอ ญา ตรือเบะ ปี ปูลัก บือฌาลัด เดะ บีดิก ลาโวจ. อาดา โกะ ลูมอฮ ซือมียา บาญะ กูญา ปาคัจ มาแรฮ ซารี ญา. กะฆีเตอ เยซู เตอ ญา อาฌัยํ โกะ ซือมียา อีตู. 14 ตานา ญา ฌาลัด ลาลู ปี ญา ลีฮัจ เลวี นานะ นะ อันเฟอัด ดูโดะ เดะ ตือปัจ ปูงอจ อาเซน. เยซู มือเลา กะ เลวี จะ "มาแรฮ ตูโรจ กะ กู เลอ." กะฆีเตอ เลวี ญา บีกัซ ตูโรจ เยซู ปี ดัฮ. 15 ลือปัซ อีตู เยซู ดูโดะ มากัด เดะ รูมัฮ นะ เลวี. อาดา ซือมียา มูงอจ อาเซน ฌางัน ซือมียา บือดูซา บาญะ อูรัก ดูโดะ มากัด บือซามา ฌางัน เยซู ฌางัน โกะ มูเระ นะ ญา. ซาเบะ-จะ อาดา ลูมอฮ ซือมียา กะฆีเตอ บาญะ นู ตูโรจ กะ เยซู. 16 อาดา โกะ ซือมียา อาฌัยํ ลาฆู ปือมือซัด นะ ตูฮัด ซือตืองัฮ เดะ ลูมอฮ ฟาริซี เตอ ตานา กูญา ลีฮัจ จะ เยซู มากัด ฌางัน โกะ ลูมอฮ ซือมียา บือดูซา ฌางัน ลูมอฮ ซือมียา มูงอจ อาเซน ฌูฆา. กะฆีเตอ กูญา ตาญา โกะ มูเระ นะ เยซู จะ "บูวัจ นามา ปะ ญา มากัด บือซามา ฌางัน โกะ ลูมอฮ ซือมียา มูงอจ อาเซน ฌางัน ลูมอฮ ซือมียา บือดูซา ฌูฆา?" 17 ตานา เยซู ดืองัยํ กะฆีเตอ ญา ตีกัฮ กะ กูญา จะ "ซือมียา นู ซือนัง ญาวา เตอ ญา เตด ปี มียา บูมอยํ. ตาปี ซือมียา นู ซาเกะ ญา เลอ นู นะ มียา บูมอยํ. กู มาแรฮ ดัฮ บูกัด นะ ปาเงน โกะ ซือมียา บาฌิ-ตือปัจ ตาปี บีดา นะ ปาเงน โกะ ซือมียา บือดูซา เลอ." ญา จะ. 18 ตือกาลา อีตู ลูมอฮ มูเระ นะ โยฮัน ฌางัน ลูมอฮ ฟาริซี กูญา ปาคัจ ตูโรจ ลาฆู บือตาฮัด มากัด. กะฆีเตอ อาดา โกะ ซือมียา มาแรฮ ซารี เยซู ตาญา จะ "ลูมอฮ มูเระ นะ โยฮัน ฌางัน มูเระ นะ ลูมอฮ ฟาริซี กูญา ตูโรจ ลาฆู บือตาฮัด มากัด. บูวัจ นามา ลูมอฮ มูเระ นะ เกา เตด ตูโรจ ลาฆู กะฆีเตอ?" 19 เยซู ตีกัฮ กะ กูญา จะ "กาลา เจาเบา อาดา เดะ ลาฆู มือนีกัฮ เตอ ลูมอฮ กาวัด นะ ญา กูญา นะ บือตาฮัด มากัด เฆอ? บูกัด กะฆีเตอ. กาลา เจาเบา อาดา บือซามา ฌางัน กูญา กูญา นะ เตด บือตาฮัด มากัด เลอ. 20 ตาปี อาดา ซืออารี เจาเบา นะ กือนา ราปัจ เดะ กูญา. อารี อีตู เลอ กูญา นะ ตูโรจ ลาฆู บือตาฮัด มากัด. 21 "ฮอย ซาปา นะ อาเมด กาเยด บารู ซือกรัจ มาแรฮ ตาโปก เดะ บาฌู นู ตูฮา. กะ บูวัจ กะฆีเตอ กาเยด นู ตาโปก ดัฮ ซีงี นะ จีรอจ นะ ลือปัซ เดะ บาฌู นู ตูฮา บูวัจ บรี ญา จีแจะ บือตามัฮ ลาฆี. 22 "กะฆีเตอ ฌูฆา ฮอย ซาปา อาเมด อาระ อางุน นู บารู บอฮ เดะ โทก กูเละ นู ตูฮา ตาโกจ-จะ อาระ อางุน อีตู นะ กือมัก บูวัจ บรี โทก กูเละ บรือโตฮ. กะฆีเตอ อาระ อางุน นะ ลือแงะ ฮาบิฮ. โทก กูเละ โปด นะ บือนาซา ฌูฆา. ตาปี อาระ อางุน นู บารู เตอ กือนา บอฮ เดะ โทก กูเละ นู บารู เลอ." ญา จะ. 23 เดะ อารี บราดู กรือฌา ซืออารี เยซู บือฌาลัด ปี เดะ ฮูมา ปาดี. วะตู โกะ มูเระ นะ ญา บือฌาลัด ปี ซามา กูญา ฮึนตะ นะ ลือกับ ตากัย ปาดี นะ มากัด. 24 กะฆีเตอ โกะ ลูมอฮ ฟาริซี มือเลา ฌางัน เยซู จะ "ลีฮัจ เลอ. บูวัจ นามา ลูมอฮ มูเระ นะ เกา กูญา บูวัจ ลาฆู นู กือนา บลารัก ดัฮ ตีเมา บรี บูวัจ เดะ อารี บราดู กรือฌา?" 25 กะฆีเตอ เยซู ตีกัฮ กะ กูญา จะ "กาเญา เตด ดือละ บาจา เฆอ ลาฆู นู ราฌา ดาวิด บูวัจ ดัฮ? ตือกาลา อาบียาทา ฌาดี กือปาลา ซามี ดาวิด เตอ ฌางัน ลูมอฮ ซือมียา นะ ญา กูญา ลาปัยํ โกะ ซือบารัก มากัด. กะฆีเตอ ดาวิด ญา มาโซะ ปี กะ ดาลับ รูมัฮ มือญือมัฮ ตูฮัด อาเมด ตือโปก โรตี นู มือนืองะ บรี กะ ตูฮัด ดัฮ มาแรฮ มากัด. ญา ฮาฆิ บรี กะ ลูมอฮ ซือมียา นะ ญา ฌูฆา. ตาปี ตือโปก โรตี อีตู ปือมือเลา ฮูโกบ นะ ตูฮัด บลารัก ดัฮ_ ตีเมา บรี ซาปาๆ มากัด. ซา โกะ ลูมอฮ ซามี เลอ นู นะ บือเลฮ มากัด. " ญา จะ. 27 กะฆีเตอ เยซู มือเลา กะ ลูมอฮ ฟาริซี จะ "นู ตูฮัด บือฌาดี โกะ อูมัจ-ซือมียา ดัฮ บูกัด บีดา กูญา นะ ตูโรจ ฮูโกบ อารี บราดู เตอ ตาปี ญา ตืองะ ฮูโกบ อารี บราดู อีตู บีดา นะ ตูโลก โกะ อูมัจ-ซือมียา. 28 กะฆีเตอ เลอ กู นู นานะ นะ อูมัจ-ซือมียา อีนี ฌาดี ตูฮัด เดะ ลาฆู อารี บราดู ฌูฆา." ญา จะ.
1 กะฆีเตอ เยซู มาโซะ ปี ปูลัก กะ ดาลับ รูมัฮ บือมุน. เปะ อีตู อาดา ซือมียา ซืออูรัก นู อาดา ตางัน กาแป. 2 อาดา ลูมอฮ ซือมียา นู ซารี ลาฆู นะ อาดู เยซู เตอ กูญา นาตี ลีฮัจ จะ เยซู ญา นะ บือบือลา ซือมียา อีตู เดะ อารี บราดู กรือฌา เฆอ เตด. 3 กะฆีเตอ เยซู ญา มือเลา กะ ซือมียา ตางัน กาแป จะ "มาแรฮ บือดีรี โซะ ฮึลด เลอ." 4 กะฆีเตอ เยซู มือเลา กะ ลูมอฮ ซือมียา ซีงี จะ "ปือมือเลา ฮูโกบ เตอ นะ บรี ซือมียา บูวัจ ลาฆู นามา เดะ อารี บราดู กรือฌา? นะ บูวัจ ลาฆู นู บาฌิ เฆอ-จะ นะ บูวัจ ลาฆู ฌาฮัจ? นะ ตูโลก ซือมียา บรี ฮีโดะ เฆอ-จะ นะ บูนอฮ ซือมียา? นู ดีฮา บาฌิ เลอ?" ตาปี โกะ ลูมอฮ ซือมียา อีตู ดูโดะ ซืองะ เตด มือเลา นามา โปด. 5 กะฆีเตอ เยซู ตีญูง กือลีลิก ลีฮัจ โกะ ซือมียา อีตู ญา รีเซา-ฮาตี บราซา ซูซัฮ-ฮาตี โตระ นู กูญา ฮาตี กรัซ กะฆีเตอ. ญา มือเลา กะ ซือมียา ตางัน กาแป อีตู จะ "ลือฌัก ตางัน นะ เกา เลอ." กะฆีเตอ ซือมียา อีตู ญา ลือฌัก ตางัน ดัฮ. ตางัน อีตู โปด ลือฆา บาฌิ ดัฮ. 6 ดัดดัด อีตู ลูมอฮ ฟาริซี กูญา ตรือเบะ ปี บือกีรา บือซามา ฌางัน โกะ ลูมอฮ นู ตูโรจ ราฌา เฮโรด จะ นะ บูวัจ กะฮามี บีดา นะ บือเลฮ บูนอฮ เยซู. 7 ตาปี เยซู ฌางัน โกะ ลูมอฮ มูเระ นะ ญา เตอ กูญา ตรือเบะ ปี เดะ ตูโปะ อีตู ปี กะ บีดิก ลาโวจ ฆาลิลี. อาดา ซือมียา บาญะ ตูโรจ เยซู ปี ฌูฆา. อาดา ซือมียา ดาตัก เดะ นังฆรี ฆาลิลี เตอ ซือมียา เดะ นังฆรี ยูเดีย 8 นังฆรี เยรูซาเลม นังฆรี อีดูเมีย เตอ ซือมียา เดะ นังฆรี นู โซะ ซรือบัก ซูงัย จอแดน ฌางัน ซือมียา เดะ โกะ ตูโปะ ดาปิก นังฆรี ทัยระ ฌางัน นังฆรี ซัยดอน เตอ โกะ ซือมียา บาญะ อีตู กูญา ดืองัยํ ดัฮ จะ เยซู บูวัจ กะฮามี ดัฮ. กะฆีเตอ กูญา มาแรฮ ซารี ญา. 9 กะฆีเตอ เยซู มือเลา ฌางัน โกะ มูเระ นะ ญา บรี กูญา ซียะ ปราฮู ซือบูวัฮ ตาโกจ-จะ โกะ ซือมียา นู บาญะ อีตู นะ ปือแปะ ญา ยู กรือจัจ. 10 อาดา บาญะ ซือมียา นู เยซู บือบือลา บรี ซือนัง บาฌิ ซือมูฮา ดัฮ. กะฆีเตอ ซือมียา ปือญาเกะ บาญะ อูรัก เตอ มาแรฮ ซารี เยซู ยู กรือจัจ บีดา นะ กือนา ญาวา นะ ญา. 11 โซะ โกะ ฮาตู ตะอารัฮ นู ดูโดะ เดะ ญาวา โกะ ซือมียา เตอ ตานา กูญา ลีฮัจ เยซู ดัฮ กูญา มือนูโนะ มือญือมัฮ โซะ ฮึลด ญา บือซูระ จะ "เกา เลอ นานะ นะ ตูฮัด เดะ อาตัซ เลอ." 12 ตาปี เยซู บลารัก ลูมอฮ ฮาตู อีตู กือมัซๆ ตีเมา บรี มือญาเระ ลาฆู นะ ญา กะ ซาปา โปด. 13 กะฆีเตอ เยซู ปี ญาแญะ กะ อาตัซ บูเกะ. ญา บลาโลก ซือมียา นู ญา ปีเลฮ ดัฮ กะฆีเตอ กูญา อีตู ปาคัจ มาแรฮ ดาปัจ ญา. 14 อาดา ดูวา-บือลัซ อูรัก เตอ เยซู ตืองะ ดัฮ นะ บรี กูญา ดูโดะ บือซามา ฌางัน ญา นะ ซูโรฮ กูญา ปี มือญาเระ ลาฆู นะ ญา 15 นะ บรี กูญา มือฆัฮ บือเลฮ โปรฮ โกะ ฮาตู บรี ตรือเบะ เดะ ญาวา นะ ซือมียา. 16 ดูวา-บือลัซ อูรัก อีตู อาดา กะฆีนี. อาดา ซีโมน นู เยซู บรี ปือนามา จะ เปโตร เตอ. 17 อาดา ยากอบ นานะ นะ เซเบดี ฌางัน โยฮัน อาดี เดะ ญา เตอ. เยซู บรี กูญา ดูวา อูรัก ปือนามา จะ โบอานือเฆ ฌาดี-จะ ซือมียา นู ซือรูปา ฆูโตยํ เตอ. 18 อาดา อันดรู ฟีลิบ บาโทโลมัย มัดทัย โทมัด เตอ. อาดา ยากอบ นานะ นะ อันเฟอัด เตอ. อาดา ทาดัย อาดา ซีโมน ซือมียา นังฆรี คานาอัน เตอ. 19 อาดา ฌูฆา ยูดา อิดคารีโยด นู บูวัจ กือบลากัก กะ เยซู เตอ. ลูมอฮ อีนี ซือมูฮา เตอ เยซู ตืองะ ฌาดี ปือญูโรฮ นะ ญา. 20 กะฆีเตอ เยซู ปี มาโซะ กะ รูมัฮ ซือรูมัฮ. อาดา ซือมียา บาญะ ปาคัจ มาแรฮ ซารี ญา ยู เยซู ฌางัน ลูมอฮ มูเระ นะ ญา ฮอย วะตู นะ มากัด. 21 กาลา ลูมอฮ ดีบราดี นะ เยซู ดืองัยํ ลาฆู อีนี ดัฮ กูญา ตรือเบะ ปี นะ ซือกัจ เยซู ซาเบะ โกะ ซือมียา อาดา มือเลา จะ ญา ฆีลา ดัฮ. 22 อาดา ฌูฆา โกะ ซือมียา อาฌัยํ ลาฆู ปือมือซัด นะ ตูฮัด นู มาแรฮ เดะ นังฆรี เยรูซาเลม ดัฮ เตอ กูญา มือเลา จะ "เยซู กือนา ฌิด เบเอนซือบุน มาโซะ ราโซะ ดัฮ. กรานา ปือมือฆัฮ นะ กือปาลา ฮาตู ซีตัด อีตู เลอ นู ญา โปรฮ ฮาตู ตรือเบะ บือเลฮ." 23 กะฆีเตอ เยซู บลาโลก ลูมอฮ ซือมียา บาญะ อีตู มาแรฮ ญา อาฌัยํ กะ ลูมอฮ อีตู ฌาดี ลาฆู จรือตา อาฌัยํ มือเลา จะ "ฮาตู ซีตัด นะ โปรฮ ฮาตู ซีตัด บรี ตรือเบะ ปี บือเลฮ กะฮามี? 24 นังฆรี ดีฮา นู ปือจัฮ-บือลัฮ ดัฮ ฌาดี โซกซา ปาโซะ เตอ นังฆรี อีตู นะ ดูโดะ กือฌะ เตด บือเลฮ ดัฮ. 25 กะฆีเตอ ฌูฆา โกะ ซือมียา ซือรูมัฮ ดีฮา นู ปือจัฮ-บือลัฮ ฌาดี โซกซา ปาโซะ ดัฮ เตอ รูมัฮ อีตู นะ ดูโดะ กือฌะ เตด บือเลฮ เลอ. 26 กะฆีเตอ กะ กือปาลา ฮาตู ซีตัด นะ บลาวัด ฌางัน ญาวา ตะอาซิก ญา นะ บือดีรี กือฌะ เตด บือเลฮ. ญา นะ ฮาบิฮ ซูโงฮ ดัฮ." ญา จะ. 27 เยซู มือเลา ปูลัก จะ "กะฆีเตอ ฌูฆา ฮอย ซือมียา ดีฮา นู นะ มาโซะ ปี ซามุน บารัก เดะ รูมัฮ นะ ซือมียา ตือฆัยํ-อูรัจ บือเลฮ. กือนา ปี รีฆะ ซือมียา ตือฆัยํ-อูรัจ อีตู อีกัจ บรี กือฌะ-กือมัซ ดูลู. อีกัจ ดัฮ บารู นะ ซามุน บารัก เดะ รูมัฮ อีตู บือเลฮ. 28 กู มือเลา ฌางัน กาเญา ลาฆู นู ซูโงฮ จะ ซือมียา นู บูวัจ ดูซา กะฮามี โปด ตูฮัด นะ อาเกะ บรี. มีเซ-จะ ซือมียา มือเลา ตะอารัฮ กะ ตูฮัด เดะ อาตัซ โปด ดูซา อีตู ตูฮัด นะ อาเกะ ฌูฆา. 29 ตาปี กะ ซือมียา มือเลา ตะอารัฮ กะ ซือมืองัจ นะ ตูฮัด ดูซา นะ ซือมียา อีตู โปด อาเกะ เตด บือเลฮ ลาลู. ลาฆู ดูซา นะ ญา เตด ซือลือซัย ซือลาลู ปี ดัฮ." ญา จะ. 30 เยซู มือเลา กะฆีนี กรานา ลูมอฮ อีตู บือเลฮ มือเลา จะ "อาดา ฮาตู ตะอารัฮ ราโซะ เดะ ญาวา นะ เยซู ดัฮ." 31 วะตู อีตู มะ เดะ เยซู ฌางัน โกะ อาดี เดะ ญา มาแรฮ รอจ ดัฮ. กูญา บือดีรี โซะ ลามัน รูมัฮ อีตู ซูโรฮ ซือมียา มาโซะ ปี บลาโลก เยซู. 32 อาดา ซือมียา บาญะ ดูโดะ ฌางัน เยซู. กูญา มือญาเระ กะ เยซู จะ "ลีฮัจ เลอ โกะ มะ โกะ อาดีๆ เดะ เกา อาดา นาตี โซะ ลามัน มาแรฮ ซารี เกา ดัฮ." 33 ตาปี เยซู ตีกัฮ จะ "ซาปา เลอ นู ฌาดี มะ เดะ กู? ซาปา ซือตืองัฮ นู ฌาดี อาดี-บราดี เดะ กู?" 34 กะฆีเตอ เยซู ลีฮัจ กือลีลิก กะ ลูมอฮ ซือมียา นู ดูโดะ บือซามา ฌางัน ญา มือเลา จะ "นี เลอ มะ เดะ กู. นี เลอ โกะ อาดี-บราดี เดะ กู. 35 กรานา ซือมียา ดีฮา นู บูวัจ ตูโรจ กะ ฮาตี นะ ตูฮัด เดะ อาตัซ ซือมียา อีตู เลอ นู ฌาดี อาดี-บราดี กีลากี นีบีนี เดะ กู เลอ นู ฌาดี มะ เดะ กู ฌูฆา." ญา จะ.
1 ซือกาลี ลาฆี เยซู เตอ ญา ปี อาฌัยํ เดะ บีดิก ลาโวจ. อาดา โกะ ลูมอฮ ซือมียา บาญะ ซูโงฮ กูญา มาแรฮ บือมุน กือลีลิก เยซู. กะฆีเตอ เยซู เตอ ญา ปี ญาแญะ กะ อาตัซ ปราฮู. ญา ดูโดะ เดะ ปราฮู เดะ บีดิก ลาโวจ ตาปี โกะ ลูมอฮ ซือมียา บาญะ อีตู ซือมูฮา กูญา ดูโดะ โซะ ปาตัย. 2 กะฆีเตอ เยซู ญา จรือตา อาฌัยํ กะ กูญา บาญะ ลาฆู. ญา อาฌัยํ โกะ ซือมียา บาญะ มือเลา จะ 3 "มือนีงัย เลอ. อาดา ซือมียา ซืออูรัก ญา ปี ปรัก บีฌี ตาโระ เดะ กือโบด. 4 ตานา ญา ปรัก กะฆีเตอ อาดา บีฌี ซือตืองัฮ ญา ฆูโฆยํ เดะ บีดิก ฌาลัด. กะฆีเตอ อาดา กาวัด บูโรก ปาคัจ มาแรฮ ปาโตะ มากัด บีฌี อีตู ปี ดัฮ." ญา จะ. 5 "อาดา บีฌี ซือตืองัฮ ฌูฆา ญา ฆูโฆยํ เดะ ตานัฮ นู อาดา บาตู บาญะ อาดา ตานัฮ กิดีกิ เตอ. บีฌี อีตู โปด ญา บือตูโมฮ งัจบางัจ ซาเบะ ตานัฮ เตด ดาลับ. 6 ตานา มาตาอารี ตือลาลู ฮางัจ เตอ ปูโฮด อีตู ญา ลายู ตูโฮยํ ดัฮ กรานา ฮอย ฌากัยํ. 7 อาดา บีฌี ซือตืองัฮ ญา ฆูโฆยํ เดะ ตืองัฮ ปูโฮด บือดูรี. ปูโฮด บือดูรี อีตู ญา บือตูโมฮ ญา ตูโดก บูวัก ปูโฮด ตาโระ อีตู. กะฆีเตอ ปูโฮด ตาโระ ฮอย เตด บือตามัฮ บูวัฮ ลาลู. 8 อาดา บีฌี ซือตืองัฮ ญา ฆูโฆยํ เดะ ตานัฮ นู บาฌิ. กะฆีเตอ ญา บือบูวัฮ บาฌิ ญา บือตูโมฮ บาฌิ บือตามัฮ บูวัฮ บาญะ. ซือตืองัฮ บือตามัฮ ตีฆา-ปูโลฮ บีฌี ซือตืองัฮ นัม-ปูโลฮ บีฌี ซือตืองัฮ รอจ กะ ซือราตุซ บีฌี เลอ." ญา จะ. 9 กะฆีเตอ เลอ เยซู ญา มือเลา จะ "ซาปา อาดา ตือลีงา นู ดืองัยํ บือเลฮ บรี ญา มือนีงัย เลอ." 10 กาลา โกะ ซือมียา บาญะ ปาคัจ ปี ดัฮ โกะ ซือมียา นู อาดา ฌางัน เยซู บือซามา ฌางัน โกะ มูเระ ดูวา-บือลัซ อูรัก อีตู เตอ กูญา ตาญา เยซู ปาซัน ลาฆู จรือตา อาฌัยํ อีตู. 11 กะฆีเตอ เยซู มือเลา ฌางัน กูญา จะ "โซะ ลูมอฮ กาเญา เตอ ตูฮัด บือเลฮ บรี ตาฮู ลาฆู ดาลับ ซูโงฮ ปาซัน ลาฆู นู ตูฮัด ฌาดี ราฌา นู บือบือลา ดือนียา อีนี. ตาปี โซะ ลูมอฮ ซือมียา วัยํ-ลูวัยํ เตอ ลาฆู อีนี ซือมูฮา ฌาดี ลาฆู จรือตา เลอ. 12 กะฆีเตอ นะ ฌาดี กะฆีนี 'บรี กูญา ลีฮัจ ตาปี ซือรูปา ลีฮัจ ดัฮ เตด บือฆารี นามา นะ บรี กูญา ดืองัยํ ตาปี ซือรูปา ดืองัยํ ดัฮ เตด มาโซะ เดะ ฮาตี ลาลู. ตีเมา บรี กูญา นะ อาเลฮ มาแรฮ กะ ตูฮัด ปูลัก บรี ตูฮัด นะ อาเกะ ดูซา นะ กูญา.' " ญา จะ. 13 กะฆีเตอ เยซู เตอ ญา มือเลา ฌางัน กูญา จะ "กะ ลาฆู กู จรือตา อาฌัยํ ซีงี ฮอย เตด มาโซะ เดะ ฮาตี นะ กาเญา ลาฆู จรือตา อาซิก นะ มาโซะ เดะ ฮาตี บือเลฮ กะฮามี เลอ? 14 ซือมียา นู ปรัก บีฌี ซีงี เตอ ซือรูปา ญา ปรัก ปือมือเลา นะ ตูฮัด. 15 โซะ บีฌี นู ฆูโฆยํ เดะ บีดิก ฌาลัด ซีงี เตอ ฌาดี-จะ ซือรูปา ปือมือเลา อีตู กือนา ปรัก เดะ ฮาตี ลูมอฮ ซือมียา. ตานา กูญา ดืองัยํ ดัฮ ดัดดัด อีตู กือปาลา ฮาตู ซีตัด เตอ ญา มาแรฮ จาปัย ปือมือเลา อีตู นู ปรัก เดะ ฮาตี นะ กูญา บือปี ดัฮ. 16 "กะฆีเตอ โกะ บีฌี นู ปรัก เดะ ตือปัจ อาดา บาตู บาญะ ซีงี เตอ ซือรูปา บือกะ ลูมอฮ ซือมียา ตานา ดืองัยํ ลาฆู นะ ตูฮัด ดัฮ ดัดดัด กูญา ซูกา-ฮาตี ซาโมจ ลาฆู ปือมือเลา อีตู เลอ. 17 ตาปี ปือมือเลา อีตู ญา ฮอย เตด บือฌากัยํ เดะ ดาลับ ฮาตี นะ กูญา เตอ นะ ตาฮัด เตด ลามา เลอ. วะตู โกะ ซือมียา อีตู กือนา ซูซัฮ ปายัฮ เตอ กือนา ปรือกัด เตอ กรานา กูญา ซาโมจ ปือมือเลา อีตู ดัฮ ดัดดัด กูญา นะ มืองือละ บูวัก. 18 กะฆีเตอ บีฌี อาซิก นู ปรัก ฆูโฆยํ เดะ ตืองัฮ ปูโฮด บือดูรี ซีงี เตอ ซือรูปา บือกะ ลูมอฮ ซือมียา นู ดืองัยํ ปือมือเลา อีตู 19 ตาปี ตานา กูญา ฆาโดฮ-ฮาตี ปาซัน ลาฆู โซะ ดือนียา เตอ ตานา กูญา บือคานะ ซูกา โกะ บือนา บารัก อาดา ฮาตี ฆาละ นะ บือเลฮ บาญะ เตอ ลาฆู อีตู ซือมูฮา เตอ ญา ซือรูปา ปูโฮด บือดูรี มาแรฮ ตูโดก ปือมือเลา อีตู บูวัจ บรี ญา ฮอย เตด บือบูวัฮ ดัฮ เลอ. 20 "ตาปี โกะ บีฌี อีตู นู ปรัก ฆูโฆยํ เดะ ตานัฮ บาฌิ ซีงี เตอ ซือรูปา บือกะ โกะ ซือมียา นู ดืองัยํ ปือมือเลา อีตู เตอ ซาโมจ บาฌิ บรี ลือกัจ เดะ ฮาตี. กูญา เลอ บือบูวัฮ บาญะ ซือตืองัฮ บือตามัฮ ตีฆา-ปูโลฮ บีฌี เตอ ซือตืองัฮ นัม-ปูโลฮ ซือตืองัฮ รอจ กะ ซือราตุซ บีฌี เลอ." เยซู ญา จะ. 21 กะฆีเตอ เยซู มือเลา ฌางัน กูญา จะ "ปลือกัจ ปลีตา ดัฮ เตอ นะ อาเมด มาแรฮ บอฮ เปะ ดีฮา? นะ บอฮ เดะ บาวัฮ เตง เฆอ? นะ บอฮ เดะ บาวัฮ ตือปัจ ตีโนะ เฆอ? โงฮ-ซูโงฮ นะ บอฮ เดะ อาตัซ ซลีแป บรี ซูโลฮ จรัฮ ราตา. 22 กรานา-จะ ลาฆู นามา นู ตูโดก บูนี ดัฮ เตอ ญา บูนี ดัฮ บีดา นะ กือนา บูกา บรี ลีฮัจ ปูลัก. ลาฆู นามา นู ลีนง ตาโรฮ ดัฮ เตอ ญา ตาโรฮ ดัฮ กะฆีเตอ บีดา นะ กือนา อาเมด มาแรฮ บรี ลีฮัจ บือฆารี ซัฮ เลอ. 23 กะฆีเตอ ซือมียา อาดา ตือลีงา นู นะ ดืองัยํ บือเลฮ เตอ มือนีงัย เลอ." ญา จะ. 24 กะฆีเตอ เยซู มือเลา ฌางัน กูญา จะ "กาเญา กือนา ฌาฆา บรี บาฌิ นะ มือนีงัย ลาฆู นามา. กาเญา นะ ตูวัก ฌางัน มาโกะ นู ดีฮา ตูฮัด นะ ตูวัก บรี กะ กาเญา ฌางัน มาโกะ นู อีตู เลอ ลือเบฮ เดะ อีตู โปด ตูฮัด นะ บือตามัฮ บรี กะ กาเญา. 25 กรานา-จะ ซือมียา ดีฮา นู ตาฮู ซือตืองัฮ เตอ ญา นะ ซาโมจ ลาฆี. ตาปี ซือมียา นู เตด ตาฮู นามา ลาฆี นู ญา ตาฮู นู ดีกิ-ตอจ เตอ นะ กือนา อาเมด ปี เดะ ญา ดัฮ เลอ." ญา จะ. 26 กะฆีเตอ เยซู มือเลา จะ "ลาฆู นู ตูฮัด เดะ อาตัซ ญา นะ มาแรฮ บือบือลา ฌาดี ราฌา เตอ ญา ฌาดี ซือรูปา บือกะ ลาฆู นะ ซือมียา นู ปรัก บีฌี เดะ ตานัฮ ดัฮ. 27 ญา ตีโนะ โซะ มาลับ บีกัซ โซะ ปาฆี ตาปี นู บีฌี อีตู บือตูโมฮ เดะ ตานัฮ บือตูโมฮ ตีงี กะฮามี เตอ ซือมียา อีตู ญา เตด ตาฮู ลาฆู นามา โปด. 28 กรานา ตานัฮ ตะอาซิก บรี บีฌี อีตู บือตูโมฮ. อาดา ตูนัซ ดูลู. ลือปัซ อีตู อาดา ตากัย. ปือญูดัฮ อาดา บีฌี ปาดี ปือนอฮ เดะ ตากัย. 29 วะตู ปาดี มาซะ ดัฮ ดัดดัด ซือมียา ซีงี เตอ ญา ซูโรฮ โกะ ซือมียา ปี กือตับ ปาดี กรานา รอจ วะตู กือตับ ดัฮ." เยซู ญา จะ. 30 กะฆีเตอ เยซู มือเลา จะ "ลาฆู นู ตูฮัด เดะ อาตัซ ญา นะ มาแรฮ บือบือลา ฌาดี ราฌา เตอ กีตา นะ ปือซามา ฌาดี ซือรูปา ลาฆู นามา? กู นะ จรือตา ลาฆู นามา อาฌัยํ ปาซัน ลาฆู อีตู เลอ? 31 เออ ญา ซือรูปา กะฆีนี เลอ อาดา บีฌี ตาโระ ซือบีฌี. ตานา บีฌี อีตู ตานัม ดัฮ ฌาดี บีฌี นู ดือมิ เดะ กาวัด ซือมูฮา เดะ ดือนียา. 32 ตานัม ดัฮ ตาโระ อีตู บือตูโมฮ ยู ฌาดี ปูโฮด ตาโระ ตีงี เดะ กาวัด ซือมูฮา. ปูโฮด อีตู อาดา ฌามัยํ บือซัยํ บรี โกะ บูโรก เดะ อาตัซ มาแรฮ งาตอจ บูวัจ ซารัก เดะ ลีโนฮ ปูโฮด อีตู." เยซู ญา จะ. 33 กะฆีเตอ เยซู มือญาเระ ปือมือเลา อีตู กะ กูญา ฌาดี ลาฆู จรือตา อาฌัยํ กะฆีเตอ บาญะ ลาฆู บือกะ กูญา มือนีงัย บือเลฮ. 34 ญา เตด บือเลฮ มือเลา มาจับ อาซิก อูซิ จรือตา กะฆีเตอ เลอ. ตาปี วะตู ฮอย ซือมียา ดัฮ ญา มือญาเระ ลาฆู ซือมูฮา บรี กะ ลูมอฮ มูเระ นะ ญา บรี มาโซะ เดะ ฮาตี นะ กูญา. 35 ปะฮึญา อารี อีตู เยซู ญา มือเลา ฌางัน โกะ มูเระ นะ ญา จะ "โฌฮ กีตา ฌรือมัก ปี โซะ ซรือบัก เลอ." 36 กะฆีเตอ โกะ มูเระ เตอ กูญา ตีงัน โกะ ลูมอฮ ซือมียา บาญะ อีตู กูญา ญาแญะ กะ ปราฮู ปี ฌางัน เยซู ดัฮ. อาดา ปราฮู อาซิก ซือตืองัฮ ปี ซามา. 37 กูญา ปี กะฆีเตอ กูญา กือนา รีโบจ อาเงน ตือฆัยํ โตระ. อาดา อูมะ ตือโปะ มาโซะ กะ ปราฮู ยู ปราฮู ซารัจ ดาปิก นะ ตาลับ. 38 ตาปี เยซู เตอ ญา ตีโนะ ลีนา เดะ บาตัน โซะ กือมูดี. โกะ มูเระ เตอ กูญา ฆระ เยซู มือเลา จะ " บูมอยํ เออ กีตา มาจับ นะ มาตี ดัฮ เลอ. เกา เตด ปือดูลี เฆอ?" 39 เยซู เตอ ญา บีกัซ ญา บลารัก อาเงน บรี ตือโดฮ. ญา มือเลา ฌางัน ลาโวจ จะ "กือนา ซืองะ เลอ. ฌางัน บูริ." กะฆีเตอ อาเงน ฮอย ดัฮ ตือโดฮ บลีนัง ฮาบิฮ เลอ. 40 กะฆีเตอ เยซู เตอ ญา มือเลา ฌางัน กูญา จะ "บูวัจ นามา ปะ กาเญา ตาโกจ กะฆีนี? กะฮามี กาเญา เตด ปือจายา เฆอ?" 41 ตาปี โกะ มูเระ อีตู เตอ กูญา ตาโกจ โตระ. กูญา ปาคัจ มือเลา ซามา กูญา จะ "ซือมียา อีนี ฌาดี ซาปา ยู อาเงน อูมะ โปด ตูโรจ กะ ปือมือซัด นะ ญา?"
1 กะฆีเตอ เยซู ฌางัน ลูมอฮ มูเระ นะ ญา กูญา ฌรือมัก ลาโวจ ปี รอจ กะ นังฆรี นะ ลูมอฮ ฆือราซา ดัฮ. 2 ตานา เยซู ตูโรด เดะ ปราฮู เตอ อาดา ซือมียา ซืออูรัก ตรือเบะ เดะ ฆูฮา ตานัม บาดัด มาแรฮ ดาปัจ เยซู. ซือมียา อีตู กือนา ฮาตู ตะอารัฮ มาโซะ ราโซะ ดัฮ. 3 ญา เตอ ดูโดะ เดะ ฆูฮา ตานัม บาดัด. ฮอย ซาปา รีฆะ อีกัจ ญา บือเลฮ. มีเซ-จะ ราตัย โปด อีกัจ ญา เตด บือเลฮ ดัฮ เลอ. 4 บาญะ กาลี ดัฮ กูญา บือเลฮ อาเมด ราตัย มาแรฮ นะ อีกัจ ตางัน อีกัจ กากี นะ ญา. ตาปี ญา รือฆัก บูวัจ บรี ราตัย เดะ ตางัน ปูตุซ ฮาบิฮ ดัฮ บรี ราตัย เดะ กากี โปด ตืออูฆัย ฮาบิฮ ฌูฆา. ฮอย ซาปา นู ตือฆัยํ-อูรัจ นะ บูวัจ บรี ญา ดูโดะ งะซืองะ. 5 ซียัก มาลับ เตอ ญา อาดา เดะ บูเกะ อาดา เดะ ฆูฮา ซือลาลู. ซัจ ญา บือซูระ ซัจ ญา อาเมด บาตู มาแรฮ กาเตาะ ญาวา ตะอาซิก บรี ลูกา. 6 ตานา ซือมียา อีตู ลีฮัจ เยซู ตะเดะ ฌาโวฮ ญา บลารี มาแรฮ ตือมะ มือญือมัฮ กะ เยซู. 7 ญา บือซูระ ซูวารา บือซัยํ จะ "เออ เยซู นานะ นะ ตูฮัด นู ตีงี เดะ อาตัซ บูวัจ นามา เกา มาแรฮ บือฆาโดฮ กู? กู มีตา กือมัซๆ เดะ นามา นะ ตูฮัด ฌางัน บูวัจ บรี กู ฌาฮานัม เลอ." ญา จะ. 8 นู มือเลา กะฆีนี กรานา เยซู บือเลฮ มือเลา จะ "ฮาตู ตะอารัฮ เออ ตรือเบะ มาแรฮ เดะ ญาวา นะ ซือมียา อีนี เลอ." 9 กะฆีเตอ เยซู ตาญา ซือมียา อีตู จะ "เกา ปือนามา นามา?" ซือมียา อีตู ตีกัฮ จะ "กู ปือนามา รีบู ซาเบะ กามี อีนี อาดา บาญะ เลอ." 10 กะฆีเตอ ซือมียา อีตู มีตา เดะ เยซู กือมัซๆ จะ "ฌางัน ซูโรฮ ลูมอฮ กามี ตรือเบะ ปี เดะ นังฆรี อีนี เลอ." 11 โซะ บูเกะ อีตู อาดา กาวัด บาบี บาญะ อีโกยํ ตืองัฮ มียา มากัด. 12 กะฆีเตอ ลูมอฮ ฮาตู อีตู มีตา เดะ เยซู จะ "บรี ลูมอฮ กามี ปี มาโซะ ดาลับ ลูมอฮ บาบี อีตู เลอ." 13 เยซู เตอ ญา บรี ดัฮ. กะฆีเตอ ลูมอฮ ฮาตู ตะอารัฮ ตรือเบะ เดะ ซือมียา อีตู ปี มาโซะ ดาลับ กาวัด บาบี. กะฆีเตอ กาวัด บาบี อีตู ปาคัจ บลารี ปี โซะ ลาเฮา นู ตีงี ฆูโฆยํ กะ ลาโวจ ลือมัซ มาตี เดะ ลาโวจ ฮาบิฮ ดัฮ. กาวัด บาบี อีตู กือมูฮา ดูวา รีบู อีโกยํ. 14 โซะ ซือมียา บือบือลา บาบี กูญา บลารี ปี มือญาเระ ลาฆู อีตู กะ ซือมียา ดูโดะ เดะ ตูโปะ ฌางัน ซือมียา ดูโดะ โซะ ลูวัยํ ฌูฆา. กะฆีเตอ โกะ ซือมียา อีตู กูญา ปาคัจ ตรือเบะ ปี ลีฮัจ ลาฆู นู บือฌาดี ดัฮ. 15 ตานา มาแรฮ รอจ กะ เยซู ดัฮ กูญา ลีฮัจ ซือมียา อีตู นู กาลา ดูลู อาดา ฮาตู มาโซะ ราโซะ ดัฮ นู ปือนามา รีบู เตอ. ญา เตอ ดูโดะ ซือนัง บาฌิ ดัฮ ญา บือปากัย กาเยด บาซา บาฌิ ดัฮ. กะฆีเตอ กูญา อีตู ปาคัจ ตาโกจ โตระ. 16 โซะ โกะ ซือมียา นู ลีฮัจ ดัฮ เตอ กูญา มือญาเระ ลาฆู นู บือฌาดี ดัฮ ปาซัน ซือมียา อาดา ฮาตู มาโซะ ราโซะ เตอ ฌางัน ลาฆู นะ กาวัด บาบี ฌูฆา. 17 กะฆีเตอ ลูมอฮ ซือมียา อีตู ฮึนตะ นะ มีตา เดะ เยซู บรี ญา ปี บูวัก เดะ ตือกอซ นังฆรี นะ กูญา. 18 วะตู เยซู ตืองัฮ ญาแญะ กะ ปราฮู เตอ ซือมียา อีตู นู กาลา ดูลู อาดา ฮาตู มาโซะ ราโซะ เตอ ญา มาแรฮ มีตา นะ ปี ซามา. 19 ตาปี เยซู ตีเมา บรี ตูโรจ. ญา มือเลา กะ ซือมียา อีตู จะ "กือนา ปาเระ ปี กะ รูมัฮ นะ เกา เลอ มือญาเระ กะ ลูมอฮ กาวัด นะ เกา จะ ตูฮัด เดะ อาตัซ บือเลฮ ตือจีฮัด กะ เกา บือเลฮ ตูโลก เกา บาญะ ตารา ดีฮา เลอ." ญา จะ. 20 กะฆีเตอ ซือมียา อีตู ปาเระ ปี ฮึนตะ นะ มือญาเระ เดะ นังฆรี ทดบุรี ราตา จะ เยซู บือเลฮ ตูโลก ญา บาญะ กะฮามี ดัฮ. กะฆีเตอ ซือมียา ซือมูฮา บราซา ปือและ-ฮาตี บาญะ. 21 กะฆีเตอ เยซู ญาแญะ ปราฮู ฌรือมัก ปี โซะ ซรือบัก. โซะ อีตู อาดา ซือมียา บาญะ ปาคัจ มาแรฮ ซารี ญา เดะ บีดิก ลาโวจ. 22 อาดา กือปาลา รูมัฮ บือมุน ซืออูรัก ปือนามา ยัยรัด เตอ ญา มาแรฮ ซารี เยซู. ดาปัจ เยซู ดัฮ ญา ตือมะ มือญือมัฮ เดะ กากี นะ ญา. 23 ญา ปูโฌะ เยซู มีตา จะ "นานะ นีบีนี นู ดือมิ นะ กู เตอ ญา ซาเกะ โตระ มาจับ นะ มาตี ดัฮ. มีตา มาแรฮ ปือเตาะ ตางัน เดะ ญาวา ญา บรี ญา นะ ซือนัง บาฌิ เลอ บรี ลือปัซ เดะ มาตี ดัฮ." ญา จะ. 24 กะฆีเตอ เยซู ญา ปี ฌางัน กือปาลา อีตู. อาดา โกะ ลูมอฮ ซือมียา บาญะ กูญา ตูโรจ ปี ซามา กูญา กือลีลิก เยซู ยู กรือจัจ. 25 อาดา นีบีนี ซืออูรัก นู ฌาดี ปือญาเกะ ตรือเบะ ดารัฮ เตด บราดู กือมูฮา ดูวา-บือลัซ ตาโฮด ดัฮ. 26 ญา ซูซัฮ โตระ ปี มียา บูมอยํ บาญะ อูรัก ตือดะ ดูเวะ นะ ญา ฮาบิฮ ดัฮ ตาปี ปือญาเกะ นะ ญา เตด ลือฆา ลาลู. ดรัซ ลามา ดรัซ ซาเกะ โตระ. 27 นีบีนี อีตู ดืองัยํ ลาฆู นะ เยซู ดัฮ. กะฆีเตอ ญา มือฮึนะ มาแรฮ โซะ บลากัก เดะ ตืองัฮ ลูมอฮ ซือมียา บาญะ อีตู ญา ซูโรก ตางัน ปือเตาะ เดะ บาฌู นะ เยซู 28 ซาเบะ ญา อีงัจ จะ "มีเซ-จะ กู ปือเตาะ กือนา ซา เดะ บาฌู นะ ญา โปด ปือญาเกะ นะ กู นะ ลือฆา ซือนัง บาฌิ เลอ." 29 ดัดดัด อีตู ดารัฮ นู ตรือเบะ เตอ บราดู กริก ดัฮ. ญา บราซา จะ ปือญาเกะ เดะ ญาวา นะ ญา ลือฆา บาฌิ ดัฮ เลอ. 30 ดัดดัด เยซู ญา บราซา ตาฮู จะ อาดา นู ปือมือฆัฮ ตรือเบะ เดะ ญาวา นะ ญา. กะฆีเตอ ญา อาเลฮ บลากัก เดะ ตืองัฮ ลูมอฮ ซือมียา บาญะ อีตู มือเลา จะ "ซาปา เลอ นู ปือเตาะ กาเยด นะ กู ดัฮ?" 31 ลูมอฮ มูเระ นะ ญา มือเลา จะ "โบะ เกา ลีฮัจ อาดา ซือมียา บาญะ กรือจัจ กือลีลิก กะฆีนี. บูวัจ นามา เกา ตาญา จะ ซาปา ปือเตาะ กู?" 32 ตาปี เยซู อาเลฮ ลีฮัจ โซะ กือลีลิก นะ ลีฮัจ จะ ซาปา นู บูวัจ ลาฆู อีตู ดัฮ. 33 กะฆีเตอ นีบีนี อีตู เตอ ญา ตาฮู ลาฆู นู บือฌาดี เดะ ญาวา นะ ญา. ญา มาแรฮ ตาโกจ ยู ญาวา กือตัยํ ญา ตือมะ มือญือมัฮ โซะ ฮึลด มูคา นะ เยซู มือญาเระ กะ เยซู ลาฆู นู บือฌาดี ดัฮ ซือมูฮา. 34 กะฆีเตอ เยซู มือเลา กะ ญา จะ "อียา เออ ซาเบะ เกา ปือจายา เตอ กะฆีเตอ เกา ซือนัง บาฌิ ดัฮ. ปี ซือนัง ซือลามัจ เลอ. ปือญาเกะ นะ เกา ลือฆา ฮาบิฮ ดัฮ." ญา จะ. 35 วะตู เยซู ตืองัฮ มือเลา กะฆีนี อาดา โกะ ซือมียา มาแรฮ ดาตัก เดะ รูมัฮ นะ กือปาลา รูมัฮ บือมุน อีตู มือญาเระ จะ "นานะ นีบีนี นะ เกา ญา มาตี ดัฮ. บูวัจ นามา เกา บือฆาโดฮ เยซู ลาฆี?" 36 ตาปี โซะ เยซู เตอ ญา ฮอย เตด ปือดูลี ปือมือเลา นะ กูญา. ญา มือเลา กะ กือปาลา อีตู จะ "ฌางัน นะ ตาโกจ. อาดู เกา ปือจายา เลอ." 37 เยซู เตอ ญา ตีเมา บรี ซาปา ตูโรจ ปี ซามา. นู บือเลฮ ปี เตอ อาดา เปโตร ยากอบ ฌางัน โยฮัน อาดี เดะ ยากอบ ซามา. 38 ตานา กูญา มาแรฮ รอจ กะ รูมัฮ นะ กือปาลา รูมัฮ บือมุน ดัฮ เยซู เตอ ญา ลีฮัจ จะ กูญา บือฆาโดฮ. อาดา ซือมียา ปาคัจ มือนาแงฮ บือปาโตด ซูวารา บือซัยํ. 39 เยซู เตอ ญา มาโซะ ปี มือเลา ฌางัน กูญา จะ "กาเญา ซือมูฮา บูวัจ นามา ปะ กาเญา บือฆาโดฮ มือนาแงฮ กะฆีนี? นานะ อีนี เตอ ญา ฮอย เตด มาตี ดัฮ ฮาฌา ญา ตีโนะ ลีนา เลอ." ญา จะ. 40 ตาปี โกะ ซือมียา อีตู กูญา ปาคัจ อาฆัฮ-ฆือละ กะ เยซู. กะฆีเตอ เยซู ญา โปรฮ กูญา ซือมูฮา บรี ตรือเบะ ปี กะ ลูวัยํ ดัฮ. อาดา ซา เอด อาโปก เดะ นานะ อีตู ฌางัน มูเระ นะ ญา นู มาแรฮ ซามา เตอ ญา บาวา มาโซะ ปี กะ ดาลับ รูวัก นานะ นีบีนี อีตู. 41 กะฆีเตอ เยซู ญา ปือฆัก ตางัน นานะ นีบีนี อีตู มือเลา กะ ญา จะ "ทาลิทา คูมิ" ฌาดี-จะ "อียา เออ. กู ซูโรฮ เกา บีกัซ เลอ." 42 ดัดดัด อีตู นานะ นีบีนี เตอ ญา บีกัซ บือดีรี บือฌาลัด ดัฮ. อูมอยํ นะ ญา ดูวา-บือลัซ ตาโฮด เลอ. กะฆีเตอ ซือมียา ซือมูฮา ปาคัจ ปือและ-ฮาตี ซูโงฮ. 43 ตาปี เยซู เตอ ญา บลารัก กูญา อีตู กือมัซๆ จะ ตีเมา บรี ซาปาๆ ตาฮู ลาฆู อีนี. ญา ซูโรฮ กูญา อาเมด ซือบารัก มากัด บรี กะ นานะ นีบีนี อีตู มากัด เลอ.
1 เยซู ญา ตรือเบะ เดะ นังฆรี อีตู ญา ปี กะ ตูโปะ นะ ญา. โกะ ลูมอฮ มูเระ นะ ญา ตูโรจ ปี ซามา. 2 ตานา รอจ กะ อารี บราดู กรือฌา เยซู ปี อาฌัยํ เดะ รูมัฮ บือมุน. ซือมียา บาญะ มือนีงัย กะ ญา ดัฮ กูญา ปือและ-ฮาตี ซูโงฮ กูญา ปาคัจ มือเลา จะ "ซือมียา อีนี เตอ ญา บือเลฮ ดาปัจ บือนา กะฆีนี ดาตัก เปะ ดีฮา? เออ นู ญา บือเลฮ อาเมด ลาฆู ปานัย อากัน กะฆีนี ฌาดี กะฮามี? นู ญา บูวัจ ลาฆู มือฆัฮ ซูโงฮ กะฆีนี ฌาดี กะฮามี เลอ? 3 ญา เตอ ฌาดี ตูกัก กายู บูกัด เฆอ? ญา นานะ นะ มารียา บูกัด เฆอ? ญา ฌาดี กากา เดะ ยากอบ โยเซ ยูดา ฌางัน ซีโมน บูกัด เฆอ? โกะ อาดี นีบีนี นะ ญา อาดา บือซามา ฌางัน กีตา บูกัด เฆอ?" กะฆีเตอ กูญา อีตู ดือกี กะ เยซู. 4 ตาปี เยซู มือเลา ฌางัน กูญา อีตู จะ "โกะ ซือมียา ราตาๆ นะ ตูเฮะ กะ ซือมียา ตูโดฮ ลาฆู นะ ตูฮัด เตอ ตาปี เดะ ตูโปะ นะ ญา เดะ โกะ นะบรานะ นะ ญา เดะ รูมัฮ นะ ญา โปด กูญา นะ เตด ตูเฮะ ลาลู เลอ." 5 กะฆีเตอ เยซู นะ บูวัจ ลาฆู นู มือฆัฮ เดะ ตูโปะ อีตู โปด ฮอย เตด บือเลฮ ดัฮ ตาปี ญา บอฮ ตางัน เดะ ซือมียา ซาเกะ บรี ซือนัง เตด บราปา บาญะ อูรัก. 6 กะฆีเตอ เยซู ญา ปือและ-ฮาตี กรานา ลูมอฮ อีตู เตด ปือจายา. กะฆีเตอ ญา ตรือเบะ ปี อาฌัยํ เดะ ตูโปะ อาซิกๆ ปูลัก. 7 กะฆีเตอ เยซู ปาเงน โกะ มูเระ ดูวา-บือลัซ อูรัก อีตู มาแรฮ ซูโรฮ กูญา ตรือเบะ ปี ซือฆูๆ. ญา บรี กูญา อาดา มือฆัฮ นะ บือเลฮ โปรฮ โกะ ฮาตู นู ตะอารัฮ เลอ. 8 เยซู ปือซัด กะ กูญา อีตู จะ "วะตู กาเญา บือฌาลัด ปี เตอ ฌางัน อาเมด โกะ ซือบารัก นามา บือปี ซูโรฮ. บือกะ โกะ บารัก มากัด โกะ กือพัย โกะ ตัง เดะ แบะ บอฮ ดูเวะ นะ กาเญา โปด ฌางัน อาเมด ปี เลอ. ซา ตูกัจ เตอ นะ อาเมด บือปี บือเลฮ. 9 โกะ ปะตาปะ เตอ บอฮ บือเลฮ ฌูฆา ตาปี ฌางัน ปือแญะ บาฌู ดูวา ลาปิฮ." ญา จะ. 10 กะฆีเตอ เยซู มือเลา ฌางัน กูญา ปูลัก จะ "รูมัฮ ดีฮา นู กาเญา มาโซะ ปี มือนูปัก เตอ รูมัฮ อีตู กาเญา กือนา ดูโดะ เลอ ตือดะ กาเญา นะ อูบัฮ ปี เดะ ตูโปะ อีตู. 11 ตูโปะ ดีฮา นู กูญา ฮอย เตด ซาโมจ ฮอย เตด มือนีงัย กะ กาเญา เตอ วะตู กาเญา นะ ตรือเบะ ปี เดะ ตูโปะ อีตู กาเญา กือนา กือติฮ โกะ ตานัฮ โกะ ฮาบู เดะ ตาปะ กากี นะ กาเญา ฌาดี ลาฆู ตูโดฮ ซาลัฮ นะ กูญา." 12 กะฆีเตอ โกะ ลูมอฮ มูเระ อีตู กูญา ตรือเบะ ปี มือญาเระ กะ โกะ ซือมียา บรี บราเลฮ-ฮาตี. 13 กะฆีเตอ กูญา โปรฮ ฮาตู บาญะ ฮาตู บรี ตรือเบะ เดะ ญาวา ซือมียา. กูญา อาเมด มีญะ ปี บูวัจ ลาฆู ลือมัยํ เดะ โกะ ซือมียา เตด ซือนัง ญาวา บรี ซือมียา อีตู ซือนัง บาฌิ ดัฮ บาญะ อูรัก. 14 ลาฆู อีนี ราฌา เฮโรด ญา ดืองัยํ ดัฮ กรานา ลาฆู นะ เยซู เตอ ซือมียา ราตาๆ ตาฮู ดัฮ. อาดา ซือมียา ซือตืองัฮ จะ " โยฮัน นู บรี ซือลับ เดะ อาเย อีตู ญา ฮีโดะ ปาเระ เดะ มาตี ดัฮ. ซาเบะ กะฆีเตอ เลอ ญา บูวัจ โกะ ลาฆู มือฆัฮ ซูโงฮ กะฆีนี บือเลฮ." 15 อาดา ซือมียา อาซิก มือเลา จะ "ญา เตอ ฌาดี เอลียา." ซือมียา อาซิก มือเลา จะ "ญา เตอ ฌาดี ซือมียา ตูโดฮ ลาฆู นะ ตูฮัด ซือรูปา โกะ ซือมียา ตูโดฮ กาลา นูตู." กูญา จะ. 16 ตาปี วะตู ราฌา เฮโรด ดืองัยํ ลาฆู อีนี ดัฮ ญา จะ "โยฮัน นู กู กรัจ ปาลา เตอ ญา ฮีโดะ ปาเระ เดะ มาตี ดัฮ เลอ." 17 กรานา-จะ ดูลู เตอ ราฌา เฮโรด บือเลฮ ซูโรฮ โกะ ซือมียา ปี รีฆะ โยฮัน อีกัจ บอฮ เดะ ปือฌารา ดัฮ. ญา บูวัจ กะฆีเตอ ซาเบะ ลาฆู นะ เฮโรดียัด นู ดูลู ญา ฌาดี บีนี นะ ฟีลิบ อาดี เดะ ราฌา เลอ. นีบีนี อีตู เฮโรด บือเลฮ อาเมด มาแรฮ ฌาดี บีนี นะ ญา. 18 กะฆีเตอ โยฮัน มือเลา ฌางัน เฮโรด จะ "นู เกา อาเมด บีนี นะ อาดี มาแรฮ กะฆีนี เกา บูวัจ ซาลัฮ เดะ ฮาดัจ เลอ." 19 กะฆีเตอ เฮโรดียัด ญา ซาเกะ-ฮาตี กะ โยฮัน ญา อีงัจ นะ บูนอฮ ญา. ตาปี ญา บูนอฮ เตด บือเลฮ 20 กรานา เฮโรด ญา ตูเฮะ กะ โยฮัน. ญา ตาฮู จะ โยฮัน ญา ฌาดี ซือมียา นู บาฌิ-ตือปัจ นู จรัฮ บาฌิ ซูโงฮ. กะฆีเตอ ญา บือบือลา ญา บรี บาฌิ. ตานา ดืองัยํ ปือมือเลา นะ โยฮัน เตอ เฮโรด ญา บรีงัจ บาญะ เตด ตาฮู จะ นะ บูวัจ กะฮามี. ตาปี ญา ซูกา นะ ดืองัยํ เลอ. 21 อาดา ซืออารี ฌาดี จือลัฮ นู บาฌิ. ฌาดี อารี ดูโดะ เดะ อาปี นะ ราฌา เฮโรด ญา บูวัจ ลาฆู มากัด บรามัย บือซัยํ. ญา บลาโลก โกะ ฮูลู-บาลัก นะ ญา โกะ ตาฮัน นู ซัยํ-บือซัยํ ฌางัน ลูมอฮ ซือมียา ซัยํ-บือซัยํ เดะ โซะ นังฆรี ฆาลิลี ฌูฆา มาแรฮ มากัด บรามัย บือซามา. 22 กะฆีเตอ นานะ นีบีนี นะ เฮโรดียัด ญา มาโซะ มาแรฮ มือนารี. ราฌา เฮโรด ฌางัน โกะ ซือมียา ซัยํ-บือซัยํ เตอ กูญา ปาคัจ ซูกา-ฮาตี บาญะ. กะฆีเตอ ราฌา เฮโรด มือเลา ฌางัน ราดารา อีตู จะ "เกา ซูกา อาเมด นามา โปด กู นะ บรี กะ เกา ฮาปา." 23 กะฆีเตอ ราฌา ญา อาเกะ มือเลา บือซูปัฮ ฌางัน ญา จะ 'เกา มีตา นามา โปด กู นะ บรี. เตด-จะ นังฆรี นะ กู โปด กู นะ ปาฮาฆิ บรี กะ เกา ซือตืองัฮ ฌูฆา เลอ." 24 กะฆีเตอ ราดารา อีตู ญา ตรือเบะ ปี ตาญา มะ เดะ ญา จะ "กู นะ มีตา นามา?" กะฆีเตอ มะ เดะ ญา ซูโรฮ ปี มีตา ปาลา นะ โยฮัน นู บูวัจ ลาฆู ซือลับ เดะ อาเย. 25 ดัดดัด นีบีนี อีตู ญา ปี งัจบางัจ มาโซะ รอจ กะ ราฌา มือเลา ฌางัน ราฌา จะ "ราฌา เออ กู มีตา ปาลา นะ โยฮัน นู บรี ลาฆู ซือลับ เดะ อาเย. อาดู กรัจ ปาลา นะ ญา ดัดดัด บอฮ เดะ ตาลับ บรี กะ กู เลอ." 26 กะฆีเตอ ราฌา ญา ฆาโดฮ-ฮาตี บาญะ ซูโงฮ ตาปี ซาเบะ ญา บือเลฮ อาเกะ มือเลา บือซูปัฮ ดัฮ โซะ ฮึลด ลูมอฮ ซือมียา นู ดูโดะ มากัด บือซามา เตอ กะฆีเตอ ญา ตีเมา นะ บูวัจ ซาลัฮ ปือมือเลา บือฌาญี อีตู. 27 ดัดดัด อีตู ราฌา ญา ซูโรฮ ตาฮัน ซืออูรัก ปี อาเมด ปาลา นะ โยฮัน มาแรฮ. กะฆีเตอ ตาฮัน อีตู ญา ปี กะ ปือฌารา กรัจ ปาลา นะ โยฮัน 28 บอฮ เดะ ตาลับ อาเมด มาแรฮ อาตัจ บรี กะ ราดารา อีตู. ญา โปด อาตัจ บรี กะ มะ เดะ ญา. 29 ลูมอฮ มูเระ นะ โยฮัน เตอ ตานา ดืองัยํ กะฆีเตอ ดัฮ กูญา มาแรฮ อาเมด บาดัด นะ โยฮัน ปี ตาโรฮ เดะ ฆูฮา ตานัม บาดัด. 30 โกะ ลูมอฮ ปือญูโรฮ นะ เยซู ปาเระ มาแรฮ ดาปัจ เยซู ดัฮ กูญา มือญาเระ กะ ญา บือกะ ลาฆู นู กูญา บือเลฮ บูวัจ ดัฮ นู กูญา อาฌัยํ ดัฮ ซือมูฮา. 31 อาดา ซือมียา บาญะ ตืองัฮ ปี มาแรฮ ยู-จะ เยซู ฌางัน โกะ มูเระ นะ ญา ฮอย จือลัฮ นะ มากัด. กะฆีเตอ เยซู มือเลา ฌางัน ลูมอฮ มูเระ จะ "โฌฮ ลูมอฮ กาเญา มาแรฮ ซา กาเญา บราดู รือมัย ดีกิ เดะ ตือปัจ ฮอย ซือมียา." 32 กะฆีเตอ เยซู ฌางัน โกะ มูเระ นะ ญา เตอ กูญา ญาแญะ กะ ปราฮู ปี กะ ตือปัจ ฮอย ซือมียา ซา กูญา. 33 อาดา ซือมียา บาญะ เตอ กูญา ลีฮัจ เยซู ฌางัน โกะ มูเระ ปี กูญา กราลา. กะฆีเตอ กูญา ตรือเบะ เดะ ตูโปะ ราตาๆ กูญา ปาคัจ บลารี ลีตัซ รอจ ดูลู. 34 ตานา เยซู ตูโรด เดะ ปราฮู ญา ลีฮัจ ลูมอฮ ซือมียา บาญะ. ญา ตือจีฮัด กะ ลูมอฮ กูญา ซาเบะ กูญา อีตู ซือรูปา กะ กาวัด กาเมก ฮอย ซาปา บือบือลา. กะฆีเตอ ญา ฮึนตะ นะ อาฌัยํ กูญา บาญะ ลาฆู. 35 วะตู อารี อีตู ซรือปะ นะ มาลับ ดัฮ โกะ มูเระ มาแรฮ กะ เยซู มือเลา จะ "ตือปัจ อีนี ฌาดี ฮูตัด ฮอย ซือมียา ดูโดะ ซรือปะ นะ มาลับ ดัฮ ฌูฆา เลอ. 36 กะฆีเตอ บรี โกะ ลูมอฮ อีนี ปี กะ โกะ รูมัฮ โกะ ตูโปะ นู ปิกดาปิก บีดา นะ บือลี โกะ ซือบารัก มากัด เลอ." 37 ตาปี เยซู มือเลา ฌางัน โกะ มูเระ นะ ญา จะ "ลูมอฮ กาเญา เลอ ปี อาเมด โกะ ซือบารัก บรี กะ กูญา มากัด." กะฆีเตอ โกะ มูเระ กูญา มือเลา ฌางัน เยซู จะ "กะฮามี เลอ? เกา นะ บรี กามี ปี บือลี ตือโปก โรตี ดูวา ราตุซ รีเงะ ปีระ บรี กะ กูญา มากัด เฆอ?" 38 กะฆีเตอ เยซู มือเลา ฌางัน กูญา จะ "กาเญา อาดา ตือโปก โรตี บราปา กือโตน. ปี ลีฮัจ ดูลู." ตานา กูญา ตาฮู ดัฮ กูญา มือเลา จะ "อาดา ตือโปก โรตี ลีมา กือโตน. อาดา อีกัด ดูวา อีโกยํ ฌูฆา." 39 กะฆีเตอ เยซู ปือซัด บรี กูญา ซือมูฮา ดูโดะ เดะ รูโปจ ฮีเฌา บือกาวัด-กาวัด. 40 กะฆีเตอ กูญา ปี ดูโดะ ซือมูฮา ดัฮ ซือกาวัด รอจ กะ ซือราตุซ อูรัก ซือตืองัฮ ซือกาวัด ลีมา-ปูโลฮ อูรัก ซือตืองัฮ. 41 กะฆีเตอ เยซู ญา อาเมด ตือโปก โรตี ลีมา กือโตน ฌางัน อีกัด ดูวา อีโกยํ อีตู ญา ลางอฮ ลีฮัจ กะ ลาแงะ บรี ซือลามัจ กะ ตูฮัด เดะ อาตัซ. กะฆีเตอ ญา ลือแปะ ตือโปก โรตี อูโญะ กะ โกะ มูเระ บรี กูญา นะ ฮาฆิ กะ โกะ ซือมียา ซือมูฮา. อีกัด ดูวา อีโกยํ ซีงี ญา ปาฮาฆิ ปูลัก บรี กะ โกะ ซือมียา ราตาๆ. 42 กูญา ซือมูฮา ปาคัจ มากัด กือญัง ฮาบิฮ ดัฮ. 43 กรือดะ ตือโปก โรตี กรือดะ อีกัด นู ลือเบฮ เดะ มากัด เตอ กูญา มูงอจ บือเลฮ ดูวา-บือลัซ บีฌี ซูเปะ ปือนอฮ ฮาบิฮ. 44 ซือมียา นู มากัด ซือมูฮา เตอ อาดา กีลากี ลีมา รีบู อูรัก. 45 ดัดดัด อีตู เยซู ซูโรฮ โกะ มูเระ นะ ญา ตูโรด กะ ปราฮู ฌรือมัก ปี ดูลู กะ โซะ ซรือบัก อีตู กะ ตูโปะ เบดซัยดา. ตาปี เยซู ตะอาซิก เตอ ญา นาตี ซูโรฮ โกะ ซือมียา นู บาญะ ซีงี ปี ปาเระ กะ รูมัฮ นะ กูญา. 46 ตานา ตีงัน กูญา อีตู ดัฮ เยซู เตอ ญา ญาแญะ ปี กะ บูเกะ นะ ปี บือซาโวจ. 47 ตานา รอจ กะ มาลับ ดัฮ ปราฮู อีตู เตอ อาดา เดะ ตืองัฮ ลาโวจ. ตาปี เยซู ญา อาดา เดะ ฮูตัด ซืออูรัก ญา. 48 เยซู ญา ลีฮัจ โกะ มูเระ นะ ญา เตอ ฆาโดฮ บลาวัด บราวัจ บือจางัฮ อูมะ ฌางัน อาเงน. วะตู อีตู ตืองัฮ มาลับ ปูโกยํ ตีฆา ลือเบฮ. เยซู ญา บือฌาลัด มาแรฮ รอจ กะ โกะ มูเระ นะ ญา บือฌาลัด เดะ อาตัซ อาเย เลอ. ญา นะ ฌาลัด ปี ลือปัซ เตอ. 49 ตาปี ตานา โกะ มูเระ นะ ญา ลีฮัจ เยซู บือฌาลัด เดะ อาตัซ อาเย กูญา อาคา จะ ฌาดี ฮาตู กูญา ปาคัจ บือแกว. 50 กูญา ซือมูฮา ลีฮัจ เยซู กูญา ปาคัจ ตือกือฌุจ ตาโกจ โตระ. ตาปี ดัดดัด อีตู เยซู มือเลา ฌางัน กูญา จะ "บูวัจ ฮาตี ฌิบาฌิ เลอ. อีนี อีซี กู ตะอาซิก. ฌางัน ตาโกจ เลอ." 51 กะฆีเตอ เยซู ญา ญาแญะ กะ ปราฮู ซามา กูญา. อาเงน โปด ญา ตือโดฮ ซืองะ ดัฮ. กะฆีเตอ โกะ มูเระ กูญา ปือและ-ฮาตี ซูโงฮ 52 กรานา ลาฆู ตือโปก โรตี อีตู เตด บือเลฮ มาโซะ เดะ ฮาตี นะ ญา ลาฆี. กูญา อีตู ตือฆัยํ-ฮาตี ซูโงฮ. 53 วะตู กูญา ฌรือมัก ปี ดัฮ กูญา มาแรฮ ซีงัฮ ปราฮู เดะ ตูโปะ เฆนเนซาเรด. 54 ตานา กูญา ตูโรด เดะ ปราฮู ดัดดัด อีตู โกะ ซือมียา บาญะ กราลา เยซู. 55 กะฆีเตอ กูญา ปาคัจ บลารี ปี ซารี โกะ ซือมียา เตด ซือนัง ญาวา เดะ นังฆรี อีตู ราตาๆ. กะฆีเตอ กูญา ลีฮัจ จะ เยซู อาดา เปะ ดีฮา กูญา อาเมด โกะ ซือมียา เตด ซือนัง ญาวา บอฮ เดะ ลือปัจ อูโซก บือปี กะ โซะ อีตู. 56 เตด-จะ เยซู นะ ปี กะ ดีฮา เดะ ดาลับ ตูโปะ เดะ นังฆรี เดะ ลูวัยํ นังฆรี โปด อาดา โกะ ซือมียา ตูโรจ ปี ซามา. กูญา บาวา โกะ ซือมียา ซาเกะ ปี บือฆูแลก ตือลือตัก เดะ ปาฌะ อีกัด นาตี เยซู นะ มาแรฮ. กูญา มีตา เดะ เยซู บรี กูญา นะ ปือเตาะ เดะ บีดิก กาเยด นะ ญา. โกะ ซือมียา นู บือเลฮ ปือเตาะ ดัฮ เตอ กูญา ซือนัง บาฌิ ดัฮ ราตา ซือมียา เลอ.
1 อาดา โกะ ลูมอฮ ฟาริซี กูญา ปาคัจ มาแรฮ ซารี เยซู. อาดา ฌูฆา โกะ ซือมียา อาฌัยํ ลาฆู ปือมือซัด นะ ตูฮัด ดาตัก มาแรฮ เดะ นังฆรี เยรูซาเลม เตอ กูญา มาแรฮ ซามา. 2 กูญา ลีฮัจ โกะ มูเระ นะ เยซู ซือตืองัฮ มากัด โกะ ซือบารัก ฮอย เตด บือเลฮ ตูโรจ กะ ลาฆู บาโซฮ ตางัน ดูลู เลอ. 3 (โซะ ลูมอฮ ฟาริซี ฌางัน บักซา ยิว ซือมูฮา เตอ กะ กูญา นะ มากัด นามา โปด กูญา ฆาโดฮ ตูโรจ กะ ลาฆู บาโซฮ ตางัน ดูลู ตูโรจ กะ ฮาดัจ นะ โกะ ญัง-มูญัง. 4 วะตู กูญา บาลิ มาแรฮ เดะ ปาฌะ อีกัด กูญา ฆาโดฮ ตูโรจ ลาฆู บาโซฮ ญาวา ดูลู บารู กูญา นะ มากัด. ฮาดัจ นู กูญา ตูโรจ เตอ อาดา บาญะ ลาฆู. กูญา ฆาโดฮ บาโซฮ โกะ เจาะ โกะ ปีโยะ โกะ มาโกะ ตือมาฆา บาญะ ฌือแนฮ.) 5 กะฆีเตอ ลูมอฮ ฟาริซี ฌางัน โกะ ซือมียา อาฌัยํ ลาฆู ปือมือซัด นะ ตูฮัด อีตู กูญา ตาญา เยซู จะ "บูวัจ นามา ปะ โกะ มูเระ นะ เกา ฮอย เตด ตูโรจ กะ ฮาดัจ นะ โกะ ญัง-มูญัง? โกะ มูเระ นะ เกา เตอ วะตู กูญา มากัด ซือบารัก นามา กูญา เตด ตูโรจ ลาฆู บาโซฮ ตางัน ดูลู เลอ" กูญา จะ. 6 กะฆีเตอ เยซู ตีกัฮ กะ กูญา จะ "กาเญา เลอ มูคา มาเนฮ ฮาตี ฌาฮัจ. อิซายา บือเลฮ ตูโดฮ ลาฆู นะ กาเญา รือมัก ดัฮ. ฌาดี ปือมือเลา นะ ตูฮัด นู จะ 'ลูมอฮ อีนี กูญา ตูเฮะ กะ กู ซา มูโลจ เตอ ตาปี ฮาตี นะ กูญา ฌาโวฮ เดะ กู. 7 นู กูญา มือญือมัฮ กะ กู เตด ฌาดี นามา เลอ ซาเบะ กูญา อาเมด โกะ ปือมือซัด นะ ซือมียา มาแรฮ อาฌัยํ บือกะ ฌาดี ฮูโกบ นะ ตูฮัด.' ญา จะ. 8 กะฆีเตอ ปือมือซัด นะ ตูฮัด เดะ อาตัซ เตอ กาเญา ตีงัน บูวัก. ตาปี ฮาดัจ นะ โกะ ซือมียา กาเญา ตูโรจ กือฌะ-กือมัซ เลอ." เยซู ญา จะ. 9 กะฆีเตอ เยซู มือเลา กะ กูญา ปูลัก จะ "กาเญา บูวัจ บาฌิ อามัจ เอะ นู กาเญา กีปัซ ปือมือซัด นะ ตูฮัด บูวัก บีดา นะ บือเลฮ ตูโรจ กะ ฮาดัจ นะ กาเญา. 10 กรานา-จะ มูซา บือเลฮ มือเลา จะ 'กาเญา กือนา ตูเฮะ กะ เอด อาโปก นะ กาเญา.' ญา มือเลา ลาฆี จะ 'ซือมียา ดีฮา นู มือเลา กาซัยํ ฌางัน เอด อาโปก นะ ญา ซือมียา อีตู เลอ กือนา ฮูโกบ รอจ กะ มาตี.' มูซา ญา จะ. 11 ตาปี โซะ กาเญา เตอ กาเญา จะ 'กะ ซือมียา ซืออูรัก มือเลา ฌางัน เอด อาโปก เดะ ญา จะ ซือบารัก ซือมูฮา นู ญา อาดา ดัฮ บีดา นะ บือบือลา กูญา เตอ บารัก อีตู ฌาดี 'กือบัน' ดัฮ ฌาดี-จะ ญา ฌาดี บารัก มือญือมัฮ กะ ตูฮัด ดัฮ. 12 กะฆีเตอ กาเญา บรี กะ ซือมียา อีตู เตด ปายัฮ บือบือลา เอด อาโปก เดะ ญา ดัฮ. 13 กะฆีเตอ ฮาดัจ ตูโรด-มือนูโรด นะ กาเญา บูวัจ บรี ปือมือซัด นะ ตูฮัด เดะ อาตัซ เตด ฌาดี นามา. บาญะ ลาฆู เลอ นู กาเญา บูวัจ ซาลัฮ กะฆีเตอ." เยซู ญา จะ. 14 กะฆีเตอ เยซู บลาโลก ลูมอฮ ซือมียา บาญะ มาแรฮ ปูลัก มือเลา ฌางัน กูญา จะ "กาเญา ซือมูฮา มือนีงัย เลอ บรี ลาฆู อีนี มาโซะ เดะ ฮาตี นะ กาเญา. 15 ฮอย บารัก นามา โซะ ลูวัยํ เตอ กะ ซือมียา นะ ตือลัด มาโซะ กะ ดาลับ นู นะ บรี ญา ตะอารัฮ. ตาปี ลาฆู นู ตรือเบะ เดะ ฮาตี ซือมียา เตอ ลาฆู อีตู เลอ นู บูวัจ บรี ญา ตะอารัฮ ดัฮ. " ญา จะ. 17 ตานา เยซู ตีงัน โกะ ซือมียา บาญะ มาโซะ รูมัฮ ดัฮ โกะ มูเระ นะ ญา ตาญา ปาซัน ลาฆู ญา จรือตา อาฌัยํ อีตู. 18 กะฆีเตอ เยซู มือเลา ฌางัน กูญา จะ "กะฮามี เลอ? กาเญา ฌูฆา เตด บือเลฮ มาโซะ เดะ ฮาตี? กาเญา เตด ลีฮัจ เฆอ? บารัก โซะ ลูวัยํ เตอ ซือมียา มากัด มาโซะ กะ ดาลับ ดัฮ บารัก อีตู เตด บูวัจ บรี ญา ตะอารัฮ ดัฮ. 19 บารัก อีตู เตด มาโซะ กะ ดาลับ ฮาตี นะ ญา ตาปี มาโซะ กะ ดาลับ โปรจ เลอ เอฮ ตรือเบะ ปี ดัฮ." เยซู ญา จะ. กะฆีเตอ ญา บูวัจ บรี บารัก มากัด ราตา มาจับ ฮอย เตด ตะอารัฮ ดัฮ. 20 กะฆีเตอ เยซู มือเลา ปูลัก จะ "ลาฆู นู ตรือเบะ เดะ ฮาตี ซือมียา เลอ นู บูวัจ บรี ญา ตะอารัฮ ดัฮ. 21 ลาฆู ฌาฮัจ ซือมูฮา ดาตัก มาแรฮ เดะ ดาลับ ฮาตี นะ ซือมียา เตอ. อาดา ลาฆู อีงัจ ฌาฮัจ ลาฆู บือกาเซฮ ลาฆู มือญูรี ลาฆู บูนอฮ ซือมียา เตอ. 22 อาดา ลาฆู ซาลัฮ บีนี กาวัด ลากี กาวัด ลาฆู ฮาลูบา ลาฆู บูวัจ ฌาฮัจ เตอ. ลาฆู ตีปู กาวัด ลาฆู บูวัจ เตด บือฆูนา ลาฆู ดือกี กาวัด ลาฆู มืออูปัจ ลาฆู งันตืองัน ลาฆู ฌาดี ซือมียา บูดอ เลอ. 23 ลาฆู ฌาฮัจ อีนี ซือมูฮา ดาตัก เดะ โซะ ดาลับ ฮาตี ซือมียา บูวัจ บรี ซือมียา ตะอารัฮ ดัฮ เลอ." ญา จะ. 24 กะฆีเตอ เยซู บีกัซ ตรือเบะ เดะ ตือปัจ อีตู ปี ดาปิก นังฆรี ทัยระ ฌางัน นังฆรี ซัยดอน. ญา ปี มาโซะ กะ ดาลับ รูมัฮ ตีเมา บรี ซาปา ตาฮู จะ ญา อาดา เปะ อีตู. ตาปี ญา ซือลูนี เตด บือเลฮ ดัฮ. 25 อาดา นีบีนี ซืออูรัก นู อาดา นานะ นีบีนี นู ดือมิ. นานะ อีตู อาดา ฮาตู ตะอารัฮ มาโซะ ราโซะ ดัฮ. วะตู นีบีนี อีตู ดืองัยํ ลาฆู นะ เยซู ดัฮ ดัดดัด ญา มาแรฮ ญา ตือมะ เดะ กากี นะ เยซู. 26 นีบีนี อีตู เตอ ฌาดี ซือมียา นังฆรี ฟีนิเซีย เดะ โซะ นังฆรี ซีเรีย. ปือมือเลา นะ ญา บาซา กรีก. ญา มีตา เดะ เยซู บรี ญา โปรฮ ฮาตู บรี ตรือเบะ เดะ นานะ นีบีนี นะ ญา. 27 ตาปี เยซู มือเลา ฌางัน นีบีนี อีตู จะ "กือนา บรี โกะ นานะ มากัด กือญัง ดูลู เลอ. บารัก มากัด นะ โกะ นานะ เตอ ดัฮ นะ อาเมด มาแรฮ บูวัก บรี กะ โกะ อาซู มากัด ฮอย เตด บาฌิ เลอ." 28 ตาปี นีบีนี อีตู ตีกัฮ จะ "ซูโงฮ เลอ ตูฮัด. ตาปี โกะ อาซู นู เดะ บาวัฮ ปาปัด โตะ กูญา บียาซา มากัด โกะ กรือดะ ลือเบฮ นะ โกะ นานะ." ญา จะ. 29 กะฆีเตอ เยซู มือเลา ฌางัน ญา จะ "โอ เกา มือเลา กะฆีนี บาฌิ ดัฮ. กะฆีเตอ ปี เลอ ฮาตู อีตู ญา ตรือเบะ ปี เดะ นานะ นีบีนี นะ เกา ดัฮ เลอ." 30 กะฆีเตอ นีบีนี อีตู ญา ปาเระ ปี กะ รูมัฮ ญา ลีฮัจ นานะ นะ ญา ตีโนะ เดะ ลือปัจ ลีนา ดัฮ. ฮาตู นู มาโซะ ราโซะ เตอ ญา ตรือเบะ ปี ดัฮ. 31 กะฆีเตอ เยซู ตรือเบะ ปี เดะ โกะ ตูโปะ ดาปิก นังฆรี ทัยระ ญา ลาลู ปี เดะ โซะ นังฆรี ซัยดอน เดะ โซะ นังฆรี ทดบุรี ฌูฆา มาแรฮ รอจ กะ ลาโวจ ฆาลิลี ปูลัก. 32 อาดา โกะ ซือมียา บาวา อูรัก ตูลี มือเลา เตด ซัฮ ลาลู ซืออูรัก มาแรฮ ซารี เยซู. กูญา ปูโฌะ มีตา เดะ เยซู บรี ญา นะ ปือเตาะ ตางัน เดะ ซือมียา อีตู. 33 กะฆีเตอ เยซู เตอ ญา บาวา ซือมียา อีตู ซืออูรัก บือปี กะ ตือปัจ ฮอย ซือมียา. ญา บอฮ ฌารี นะ ญา เดะ ตือลีงา นะ ซือมียา ตูลี อีตู อูแล อาเย ลีโยยํ ปือเตาะ กือนา เดะ ลีดัฮ ซือมียา อีตู. 34 ญา ลางอฮ ตีญูง กะ ลาแงะ มือญาวา บือซัยํ มือเลา ฌางัน ซือมียา อีตู จะ "เอฟาทา" ฌาดี-จะ "กือนา บูกา เลอ." 35 กะฆีเตอ ตือลีงา นะ อูรัก ตูลี เตอ บูกา ดืองัยํ ซัฮ ดัฮ. ลีดัฮ นะ ญา โปด บาฌิ ดัฮ ญา มือเลา ซัฮ บือเลฮ ดัฮ เลอ. 36 กะฆีเตอ เยซู เตอ ญา บลารัก โกะ ลูมอฮ ซือมียา จะ "ฌางัน นะ มือญาเระ ลาฆู อีนี กะ ซาปา." ตาปี ดรัซ บลารัก ดรัซ กูญา ราเฌด มือญาเระ บรี ตาฮู ราตา. 37 โกะ ซือมียา ซือมูฮา เตอ กูญา ปือและ-ฮาตี บาญะ ซูโงฮ มือเลา จะ "ซือมียา อีนี เลอ ญา บูวัจ นามา ซือมูฮา ญา บูวัจ บาฌิ ฮาปา. มีเซ-จะ ซือมียา นู ตูลี โปด ญา บูวัจ บรี ดืองัยํ บือเลฮ ดัฮ. ซือมียา มือเลา เตด บือเลฮ โปด ญา บูวัจ ยู มือเลา บือเลฮ." กูญา จะ.
1 วะตู อีตู อาดา ซือมียา บาญะ มาแรฮ บือมุน. โกะ ซือบารัก มากัด นะ กูญา โปด ฮาบิฮ ดัฮ. กะฆีเตอ เยซู บลาโลก โกะ มูเระ นะ ญา มาแรฮ มือเลา ฌางัน กูญา จะ 2 "กู ตือจีฮัด กะ โกะ ลูมอฮ ซือมียา อีนี. กูญา ดูโดะ ฌางัน กู รอจ กะ ตีฆา อารี ดัฮ. บารัก มากัด นะ กูญา โปด ฮาบิฮ ดัฮ. 3 กะ กู บรี กูญา ปี ปาเระ กะ รูมัฮ เตด ราซา มากัด นามา กะฆีนี เตอ กูญา นะ รือมัย ฮอย อูรัจ เดะ ตืองัฮ ฌาลัด. อาดา ซือตืองัฮ ดาตัก มาแรฮ เดะ ฌาโวฮ ฌูฆา." ญา จะ. 4 กะฆีเตอ โกะ มูเระ ตีกัฮ กะ เยซู จะ "ตือปัจ อีนี ฌาดี ฮูตัด ฮอย ซือมียา ดูโดะ. กีตา นะ ซารี ซือบารัก มากัด บรี กะ ลูมอฮ อีนี เปะ ดีฮา เลอ?" 5 กะฆีเตอ เยซู ตาญา กูญา จะ "กาเญา อาดา ตือโปก โรตี บราปา กือโตน?" กูญา ตีกัฮ กะ เยซู จะ "อาดา ตูโฌฮ กือโตน." 6 กะฆีเตอ เยซู ซูโรฮ บรี ลูมอฮ ซือมียา บาญะ อีตู ดูโดะ เดะ ตานัฮ. ญา อาเมด ตือโปก โรตี ตูโฌฮ กือโตน อีตู มาแรฮ ญา บรี ซือลามัจ กะ ตูฮัด. กะฆีเตอ ญา ลือแปะ ตือโปก โรตี อีตู บรี โกะ มูเระ นะ ญา ปาฮาฆิ กะ ลูมอฮ ซือมียา บาญะ อีตู. กะฆีเตอ กูญา ปาฮาฆิ บรี กะ ราตา ซือมียา. 7 กูญา อาดา อีกัด มิดือมิ ฌูฆา ดูวา ตีฆา อีโกยํ. กะฆีเตอ เยซู มีตา เดะ ตูฮัด เดะ อาตัซ นะ บรี ซือลามัจ กะ อีกัด อีตู. ญา ปือซัด โกะ มูเระ บรี กูญา ปาฮาฆิ กะ โกะ ลูมอฮ ซือมียา อีตู. 8 กูญา ซือมูฮา ปาคัจ มากัด กือญัง ดัฮ. กะฆีเตอ โกะ มูเระ มูงอจ โกะ กรือดะ บารัก มากัด นู ลือเบฮ เตอ บือเลฮ ตูโฌฮ ราฆา เลอ. 9 ลูมอฮ ซือมียา อีตู กือมูฮา ฆามะ-จะ ปัจ รีบู อูรัก บือเลฮ. กะฆีเตอ เยซู บรี ลูมอฮ อีตู บาลิ ปี. 10 ดัดดัด อีตู ญา ญาแญะ ปราฮู ฌางัน โกะ มูเระ นะ ญา ปี กะ นังฆรี ดันมานูทา. 11 โกะ ลูมอฮ ฟาริซี มาแรฮ บือตือฆัฮ ฌางัน เยซู นะ ลกลีฮัจ ญา บรี ญา นะ บูวัจ ปือนานา ซีดี ซือมาจับ บรี ตาฮู จะ ญา ฌาดี ซือมียา นู ตูฮัด เดะ อาตัซ ซูโรฮ มาแรฮ. 12 กะฆีเตอ เยซู บือญาวา บือซัยํ มือเลา จะ "บูวัจ นามา ซือมียา เดะ ฮาดัจ อีนี ซูกา นะ ลีฮัจ ปือนานา นู มือฆัฮ? กู มือเลา ฌางัน กาเญา ลาฆู นู ซูโงฮ จะ ฮอย ปือนานา นามา โปด นะ บรี ลีฮัจ กะ ลูมอฮ ซือมียา เดะ ฮาดัจ อีนี." 13 กะฆีเตอ เยซู ตีงัน ลูมอฮ อีตู ดัฮ ญา ปี ญาแญะ ปราฮู ปูลัก มือลากัฮ ปี โซะ ซรือบัก. 14 โกะ มูเระ นะ เยซู กูญา ลูปา อาเมด ตือโปก โรตี บือปี ซามา. เดะ ปราฮู เตอ กูญา อาดา ตือโปก โรตี แนฮ ซา กือโตน. 15 กะฆีเตอ เยซู ปือซัด กะ ลูมอฮ กูญา จะ "กาเญา เลอ ฌาฆา ฮัจ-ลีฮัจ บรี บาฌิ เดะ ราฆี นะ ลูมอฮ ฟาริซี เดะ ราฆี นะ ราฌา เฮโรด ฌูฆา เลอ." 16 กะฆีเตอ โกะ มูเระ มือเลา ซามา กูญา จะ "ญา มือเลา กะฆีนี ซาเบะ กีตา ฮอย ตือโปก โรตี ดัฮ." 17 ตาปี เยซู ตาฮู ลาฆู อีนี ญา มือเลา ฌางัน กูญา จะ "บูวัจ นามา ปะ กาเญา มือเลา บือซามา ปาซัน ลาฆู ฮอย ตือโปก โรตี? กาเญา เตด บือเลฮ ตาฮู เตด บือเลฮ มาโซะ เดะ ฮาตี ลาฆี เฆอ? กาเญา ตือฆัยํ-ฮาตี ลาฆี เฆอ? 18 กาเญา อาดา มาตา ตาปี นะ ลีฮัจ เตด บือฆารี เฆอ? กาเญา อาดา ตือลีงา ตาปี นะ ดืองัยํ เตด บือเลฮ เฆอ? กาเญา จับ เตด บือเลฮ เฆอ? 19 ตานา กู ลือแปะ ตือโปก โรตี ลีมา กือโตน บรี กะ ลีมา รีบู อูรัก อีตู เตอ อาดา กรือดะ บารัก มากัด นู ลือเบฮ นู กาเญา มูงอจ บราปา ซูเปะ เลอ?" กูญา ตีกัฮ กะ ญา จะ "ดูวา-บือลัซ." 20 "ตานา ลือแปะ โรตี ตูโฌฮ กือโตน บรี กะ นู ปัจ รีบู อูรัก อีตู เตอ อาดา โกะ กรือดะ บารัก มากัด นู กาเญา มูงอจ บราปา ราฆา?" กูญา ตีกัฮ จะ "ตูโฌฮ เลอ." 21 กะฆีเตอ เยซู มือเลา ฌางัน กูญา จะ "กาเญา เตด มาโซะ เดะ ฮาตี ลาฆี เฆอ?" 22 กะฆีเตอ เยซู ฌางัน โกะ มูเระ นะ ญา มาแรฮ รอจ กะ ตูโปะ เบดซัยดา. อาดา ซือมียา บาวา อูรัก มาตา บูตา มาแรฮ ซารี เยซู. กูญา อีตู มีตา เดะ เยซู บรี ญา นะ ปือเตาะ ตางัน เดะ ซือมียา มาตา บูตา อีตู. 23 กะฆีเตอ เยซู เตอ ญา ตูโตด ตางัน อูรัก มาตา บูตา อีตู บาวา บือปี กะ โซะ ลูวัยํ ตูโปะ. ญา ปือทุย อาเย ลีโยยํ บรี กือนา เดะ มาตา นะ ญา. ญา ปือเตาะ ตางัน เดะ ซือมียา อีตู. กะฆีเตอ ญา ตาญา ซือมียา อีตู จะ "เกา ลีฮัจ บือฆารี นามา ซือตืองัฮ?" 24 กะฆีเตอ ซือมียา อีตู เตอ ญา ญรือลัก มาตา ลีฮัจ มือเลา จะ "บือฆารี โกะ ซือมียา บือเลฮ ตาปี ซือรูปา ปูโฮด กายู บือฌาลัด ปี มาแรฮ เลอ." 25 กะฆีเตอ เยซู ญา ปือเตาะ ตางัน นะ ญา ซือกาลี ลาฆี เดะ มาตา อูรัก มาตา บูตา อีตู. กะฆีเตอ ซือมียา อีตู เตอ ญา ตีญูง ลีฮัจ ลีฮัจ บือฆารี บาฌิ ปูลัก ดัฮ. นามาๆ โปด บือฆารี ซัฮ ฮาปา ดัฮ. 26 กะฆีเตอ เยซู เตอ ญา ซูโรฮ ซือมียา อีตู บาลิ กะ รูมัฮ นะ ญา ตาปี ญา ปือซัด จะ "ฌางัน ปี มาโซะ เดะ ตูโปะ เลอ." 27 กะฆีเตอ เยซู ฌางัน โกะ มูเระ นะ ญา กูญา บือฌาลัด ปี กะ โกะ ตูโปะ นู ดาปิก นังฆรี ซีซาเรีย ฟีลิบปี. ตานา บือฌาลัด ปี เยซู เตอ ญา ตาญา โกะ มูเระ นะ ญา จะ "โกะ ซือมียา อาดา มือเลา จะ กู ฌาดี ซาปา เลอ?" 28 โกะ มูเระ กูญา ตีกัฮ จะ "ซือตืองัฮ จะ เกา ฌาดี โยฮัน ซือมียา นู บรี ลาฆู ซือลับ เดะ อาเย เตอ. ซือมียา อาซิก จะ ฌาดี เอลียา. อาดา ฌูฆา ซือมียา นู จะ ฌาดี ซือมียา ตูโดฮ ลาฆู นะ ตูฮัด ซืออูรัก." 29 ตาปี เยซู เตอ ญา ตาญา กูญา จะ "ตาปี โซะ ลูมอฮ กาเญา เตอ กาเญา มือเลา จะ กู ฌาดี ซาปา?" เปโตร ญา ตีกัฮ กะ เยซู จะ "เกา ฌาดี ราฌา นู บรี ซือลามัจ เลอ." 30 กะฆีเตอ เยซู ญา บลารัก กะ โกะ มูเระ นะ ญา ตีเมา บรี กูญา มือญาเระ กะ ซาปา ปาซัน ลาฆู นะ ญา เลอ. 31 กะฆีเตอ เยซู เตอ ญา ฮึนตะ นะ อาฌัยํ โกะ มูเระ นะ ญา จะ "กู เลอ นู นานะ นะ อูมัจ-ซือมียา เตอ กู นะ ฆาโดฮ ลาวัด ซาเกะ ซูซัฮ บาญะ ฌือแนฮ. โกะ กือปาลา นังฆรี โกะ ลูมอฮ ซามี ซัยํ-บือซัยํ ฌางัน โกะ ซือมียา อาฌัยํ ลาฆู ปือมือซัด นะ ตูฮัด เตอ กูญา นะ กีปัซ กู บูวัก ดัฮ. กู เตอ กู นะ กือนา บูนอฮ บรี มาตี ตาปี ลือปัซ ตีฆา อารี กู นะ ฮีโดะ ปาเระ เดะ มาตี ปูลัก." ญา จะ. 32 ลาฆู อีนี เตอ เยซู มือเลา บรี กูญา ดืองัยํ ซัฮ. กะฆีเตอ เปโตร ญา รือฆัก เยซู บรี มืองือละ เดะ กูญา อูจะ บลารัก กะ ญา. 33 ตาปี เยซู ญา กรือเลฮ ลีฮัจ โกะ มูเระ นะ ญา ญา อูจะ กะ เปโตร จะ "เกา กือปาลา ซีตัด เออ ปี ฌาโวฮ บูวัก โซะ บลากัก กู เลอ. เกา เตด กีรา ตูโรจ กะ ตูฮัด เดะ อาตัซ เตอ ตาปี เกา ปี กีรา ตูโรจ กะ โกะ ซือมียา เลอ." ญา จะ 34 กะฆีเตอ เยซู ญา บลาโลก โกะ ซือมียา บาญะ ฌางัน โกะ มูเระ นะ ญา มาแรฮ ซามา มือเลา ฌางัน กูญา อีตู จะ "ซือมียา ดีฮา นู อาดา ฮาตี นะ ตูโรจ กะ กู บรี ญา บราดู บือฮีมัจ กะ ญาวา ตะอาซิก ดูลู บรี กะ ญา อาเกะ ตาโงก กายู ปลีตัก นะ ญา ตูโรจ กะ กู มาแรฮ เลอ. 35 กรานา-จะ ซือมียา ดีฮา นู อาดา ฮาตี นะ ฌาฆา ญาวา นะ ญา บรี ซือนัง เตอ ญาวา ญา นะ ฌาฮานัม. ตาปี ซือมียา ดีฮา นู ซรัฮ ญาวา นะ ญา บูวัก กรานา ลีฮัจ กะ กู ฌางัน บรีตา นู บาฌิ นะ กู ซือมียา อีตู เลอ นะ บือเลฮ ฮีโดะ ซูโงฮๆ. 36 กะ ซือมียา ดีฮา บือเลฮ โกะ ซือบารัก ซือมูฮา เดะ ดือนียา เตอ ตาปี ญาวา นะ ญา นะ ฌาฮานัม ดัฮ ซือมียา อีตู นะ บือเลฮ อูโตก นามา เลอ? 37 ซือมียา อีตู นะ บรี รือฆา นามา บีดา นะ อาเมด ญาวา นะ ญา ปาเระ? 38 "กะ ซือมียา ดีฮา ปือจือและ กรานา กู ฌางัน ปือมือเลา นะ กู เดะ ฮาดัจ อีนี นู ตะอารัฮ นู ฌาฮัจ เตอ ซือมียา อีตู เลอ กู นะ ปือจือและ บาลัซ ปาเระ เดะ อารี บลากัก. เดะ อารี บลากัก อีตู กู นู นานะ นะ อูมัจ-ซือมียา เตอ กู นะ มาแรฮ บือซายา บือซรี บือกะ อาโปก เดะ กู เตอ นะ มาแรฮ บือซามา ฌางัน โกะ ลูมอฮ ฮูลู-บาลัก นู จรัฮ บาฌิ ฌูฆา." ญา จะ.
1 กะฆีเตอ เยซู มือเลา ฌางัน โกะ มูเระ นะ ญา จะ "กู มือเลา ฌางัน กาเญา ลาฆู นู ซูโงฮ จะ อาดา ซือมียา นู บือดีรี โซะ อีนี ซือตืองัฮ นู นะ ฮอย เตด มาตี ดูลู ตือดะ กูญา นะ บือเลฮ ลีฮัจ ตูฮัด มาแรฮ ฌาดี ราฌา นู บือบือลา ฌางัน ลาฆู นู มือฆัฮ ซูโงฮ เลอ." ญา จะ. 2 ลือปัซ นัม อารี ดัฮ เยซู บาวา เปโตร ยากอบ ฌางัน โยฮัน บือปี ญาแญะ กะ บูเกะ นู ตีงี ซา บูเกะ. ปี ซา กูญา ปัจ อูรัก ฌางัน ญา. เปะ อีตู กูญา ลีฮัจ จะ ญาวา นะ เยซู เตอ ซาเลด ดัฮ. 3 กาเยด นะ ญา โปด บือซายา ปูเตฮ มรือแจว. ฮอย ซาปา เดะ ดือนียา นู บือเลฮ บาโซฮ กาเยด บรี ปูเตฮ มรือแจว กะฆีเตอ. 4 กูญา ลีฮัจ เอลียา ฌางัน มูซา มาแรฮ ปลีฮัจ. กูญา ดูวา อูรัก ตืองัฮ มือเลา ฌางัน เยซู. 5 กะฆีเตอ เปโตร มือเลา ฌางัน เยซู จะ "บูมอยํ เออ นู กามี อาดา โตะ อีนี โบะ บาฌิ ดัฮ เลอ. กะฆีเตอ บรี กามี บูวัจ ซาเราะ ตีฆา บีฌี นะ เกา ซา นะ มูซา ซา นะ เอลียา ซา." 6 นู เปโตร มือเลา กะฆีเตอ ซาเบะ ญา เตด ตาฮู นะ มือเลา กะฮามี กรานา กูญา ตีฆา อูรัก กูญา ตาโกจ ซูโงฮ. 7 กะฆีเตอ อาดา กือมูวัง มาแรฮ ตูโดก เดะ อาตัซ กูญา. อาดา ซูวารา บูงี ดาตัก มาแรฮ เดะ กือมูวัง จะ "อีนี เลอ ฌาดี นานะ นะ กู นู กู ซายัก. กือนา มือนีงัย กะ ญา เลอ." 8 ดัดดัด กูญา ตีญูง ลีฮัจ กือลีลิก เตด บือฆารี ซาปา ดัฮ บือฆารี อาดา ซา เยซู เลอ บือซามา ฌางัน กูญา. 9 ตานา กูญา ตืองัฮ ตูโรด มาแรฮ เดะ บูเกะ เตอ เยซู ปือซัด กะ โกะ มูเระ ตีฆา อูรัก จะ "ลาฆู นู กาเญา ลีฮัจ ดัฮ เตอ ฌางัน มือญาเระ กะ ซือมียา ดีฮา เลอ ตือดะ กู นู นานะ นะ อูมัจ-ซือมียา อีนี นะ ฮีโดะ ปาเระ เดะ มาตี ปูลัก." 10 ปือมือซัด อีนี กูญา ตูโรจ ดัฮ ตาปี กูญา ตีฆา อูรัก มือเลา ซามา กูญา จะ "ลาฆู ฮีโดะ ปาเระ เดะ มาตี อีนี ฌาดี นามา เลอ?" 11 กะฆีเตอ กูญา ตาญา เยซู จะ "บูวัจ นามา โกะ ซือมียา อาฌัยํ ลาฆู ปือมือซัด นะ ตูฮัด กูญา มือเลา จะ เอลียา ฆาโดฮ มาแรฮ ดูลู ?" 12 กะฆีเตอ เยซู มือเลา ฌางัน กูญา จะ "ซูโงฮ เลอ เอลียา ญา นะ มาแรฮ ดูลู บีดา นะ ซียะ บือนา ซือมูฮา บรี บาฌิ บือกะ นู ดูลู. ตาปี บูวัจ นามา ซูรัจ ปือมือเลา นะ ตูฮัด มือเลา จะ นานะ นะ อูมัจ-ซือมียา นะ ลาวัด ซาเกะ ซูซัฮ โตระ บาญะ ฌือแนฮ นะ กือนา ซือมียา มือฌัฮ กีปัซ บูวัก ฌูฆา? 13 ตาปี กู มือญาเระ กะ กาเญา จะ เอลียา มาแรฮ ดัฮ. ตาปี กูญา บูวัจ ลาฆู ตะอารัฮ กะ ญา บือกะ ตูโรจ กะ ฮาตี นะ กูญา. ลาฆู กะฆีเตอ ฌาดี ดัฮ บือกะ อาดา ฆาแรฮ ดัฮ เดะ ซูรัจ ปือมือเลา นะ ตูฮัด." ญา จะ. 14 ตานา มาแรฮ รอจ กะ โกะ มูเระ นู ฆีลาฆี เตอ ญา ลีฮัจ ลูมอฮ ซือมียา บาญะ มาแรฮ กือลีลิก โกะ มูเระ อีตู. อาดา ฌูฆา โกะ ซือมียา อาฌัยํ ลาฆู ปือมือซัด นะ ตูฮัด ตืองัฮ บือตือฆัฮ ฌางัน กูญา. 15 ตานา โกะ ลูมอฮ ซือมียา บาญะ ลีฮัจ เยซู เตอ ดัดดัด อีตู ลูมอฮ กูญา ปือและ-ฮาตี ซูโงฮ ปาคัจ บลารี มาแรฮ ซาโมจ ญา. 16 กะฆีเตอ เยซู ตาญา กูญา จะ "กาเญา บือตือฆัฮ ฌางัน โกะ มูเระ นะ กู ปาซัน ลาฆู นามา?" 17 อาดา ซือมียา ซืออูรัก เดะ ลูมอฮ ซือมียา บาญะ ตีกัฮ จะ "บูมอยํ เออ กู อาเมด นานะ กีลากี นะ กู มาแรฮ มียา เกา ดัฮ. นานะ อีตู อาดา ฮาตู นู บูวัจ บรี ญา มือเลา เตด บือเลฮ ดัฮ. 18 เปะ ดีฮา ฮาตู อีตู บาวา นานะ ราโซะ ญา บูวัจ บรี นานะ รือบัฮ เดะ ตานัฮ. กะฆีเตอ นานะ ตรือเบะ ฆรือลือมา ตือกาจิ ฆีฆี ญาวา ตือฆัยํ. กะฆีเตอ กู มีตา ตูโลก เดะ โกะ มูเระ นะ เกา บรี โปรฮ ฮาตู อีตู ตาปี กูญา อีตู โปรฮ เตด บือเลฮ ดัฮ." ญา จะ. 19 กะฆีเตอ เยซู ตีกัฮ กะ กูญา อีตู จะ "เฮอ โกะ ซือมียา ฮาดัจ อีนี ลาฆู ปือจายา ฮาบิฮ ปี กะ ดีฮา ดัฮ? กู ฆาโดฮ ดูโดะ ฌางัน กาเญา บราปา ลามา ลาฆี? กู ฆาโดฮ นะ ตาฮัด ลูมอฮ กาเญา บราปา ลามา เลอ? อาเมด นานะ อีตู บือมาแรฮ กะ กู เลอ." 20 กะฆีเตอ กูญา อาเมด นานะ อีตู มาแรฮ รอจ กะ เยซู. ตานา ฮาตู อีตู ลีฮัจ เยซู ดัฮ ดัดดัด ญา บูวัจ บรี นานะ อีตู มืองือตัจ ยู ญา รือบัฮ กะ ตานัฮ ฆรือลิก ปี มาแรฮ ตรือเบะ ฆรือลือมา. 21 กะฆีเตอ เยซู ตาญา ปะ เดะ นานะ อีตู จะ "บราปา ลามา ดัฮ นานะ นะ เกา ฌาดี กะฆีนี?" ปะ เดะ ญา ตีกัฮ จะ "ตะเดะ ดือมิ มาแรฮ. 22 ฮาตู อีตู บูวัจ บรี นานะ รือบัฮ ซัจๆ ฆูโฆยํ เดะ อาปี ฆูโฆยํ เดะ อาเย โปด นะ บรี ญา มาตี. กะ เกา นะ บูวัจ บือเลฮ กะฮามี โปด มีตา ตือจีฮัด กะ กามี มีตา ตูโลก กามี ฌูฆา เลอ." ญา จะ. 23 กะฆีเตอ เยซู มือเลา ฌางัน ญา จะ "บูกัด ฌาดี ลาฆู นู กู บูวัจ บือเลฮ เตด บือเลฮ เลอ. ตาปี โซะ ซือมียา นู ปือจายา เตอ ซือมูฮา เลอ บูวัจ บือเลฮ ฮาปา." 24 ดัดดัด อีตู ปะ เดะ นานะ อีตู บือซูระ มือเลา จะ "กู ปือจายา ดัฮ เลอ ตาปี ปือจายา เตด ปือนอฮ. มีตา บือตามัฮ บรี กู ปือจายา ปือนอฮ เดะ ฮาตี เลอ." 25 ตานา เยซู ลีฮัจ จะ โกะ ซือมียา บาญะ ปาคัจ บลารี มาแรฮ บือซามา ญา บลารัก ฮาตู นู ตะอารัฮ อีตู จะ "เกา เลอ ฮาตู นู เตด บือเลฮ มือเลา เตอ นู ตูลี เตอ กู ปือซัด จะ ปี ญัฮ เลอ ตรือเบะ เดะ ญาวา นานะ อีนี. ฌางัน มาโซะ กะ นานะ อีนี ปูลัก ดัฮ เลอ." ญา จะ. 26 ฮาตู อีตู บูวัจ บรี นานะ อีตู บือซูระ มืองือตัจ บาญะ กาลี ลาลู ญา ตรือเบะ ปี ดัฮ. นานะ อีตู ตือลือตัก ซือรูปา ซือมียา มาตี. กะฆีเตอ บาญะ ซือมียา มือเลา จะ "ญา มาตี ดัฮ." 27 ตาปี เยซู รือฆัก ตางัน อาปู นานะ อีตู บือบีกัซ บือดีรี. 28 ตานา เยซู มาโซะ รูมัฮ ดัฮ โกะ มูเระ นะ ญา มาแรฮ ซา กูญา ตาญา ญา จะ "บูวัจ นามา ลูมอฮ กามี โปรฮ ฮาตู อีตู เตด บือเลฮ ดัฮ?" 29 กะฆีเตอ เยซู ตีกัฮ กะ กูญา จะ "ฮาตู มาจับ อีนี โปรฮ เตด บือเลฮ ลาลู กะ ฮอย ลาฆู บือซาโวจ." 30 กูญา ตรือเบะ ปี เดะ ตูโปะ อีตู ปี ลาลู โซะ นังฆรี ฆาลิลี. ตาปี เยซู ตีเมา บรี ซือมียา ดีฮา ตาฮู 31 กรานา ญา ตืองัฮ อาฌัยํ โกะ มูเระ นะ ญา. ญา มือเลา จะ "กู นู นานะ นะ อูมัจ-ซือมียา อีนี กู นะ กือนา อาตัจ บรี กะ ลูมอฮ ซือมียา รีฆะ กู เตอ. กูญา นะ บูนอฮ กู ตาปี กือนา บูนอฮ ดัฮ ลือปัซ ตีฆา อารี กู นะ ฮีโดะ ปาเระ ปูลัก." ญา จะ. 32 ตาปี ปือมือเลา ลาฆู อีตู โกะ มูเระ นะ ญา ฮอย เตด มาโซะ เดะ ฮาตี. กูญา โปด ฮอย เตด บรานี นะ ตาญา เยซู ปาซัน ลาฆู อีตู เลอ. 33 กะฆีเตอ เยซู มาแรฮ รอจ กะ ตูโปะ คาเปอนาอุม. มาโซะ กะ รูมัฮ ดัฮ ญา ตาญา โกะ มูเระ จะ "วะตู กาเญา บือฌาลัด มาแรฮ กาเญา บือตือฆัฮ ปาซัน นามา เลอ?" 34 ตาปี โกะ มูเระ กูญา ซืองะ เตด ตีกัฮ นามา โปด ซาเบะ เดะ ตืองัฮ ฌาลัด กูญา อีตู บือตือฆัฮ ซามา กูญา จะ "ซาปา นะ ฌาดี ซือมียา ซัยํ-บือซัยํ เดะ กาวัด?" 35 กะฆีเตอ เยซู ญา ดูโดะ ญา บลาโลก โกะ มูเระ ดูวา-บือลัซ อูรัก อีตู มาแรฮ. ญา มือเลา ฌางัน กูญา อีตู จะ "กะ ซือมียา ดีฮา ซูกา นะ ฌาดี ปรือดู เตอ บรี ซือมียา อีตู ฌาดี ซือมียา ฮูโฌก ปือญูดัฮ กาวัด บรี ญา ฌาดี ปือญูโรฮ นะ กาวัด ซือมูฮา." ญา จะ. 36 กะฆีเตอ เยซู เตอ ญา อาเมด นานะ ซืออูรัก มาแรฮ บือดีรี เดะ ตืองัฮ กูญา อีตู. ญา กรด นานะ อีตู มือเลา ฌางัน โกะ มูเระ นะ ญา จะ 37 "ซือมียา ดีฮา นู ซาโมจ นานะ ดือมิ กะฆีนี ซืออูรัก กรานา นามา นะ กู ซือรูปา ซือมียา อีตู ซาโมจ กู ดัฮ. ซือมียา ดีฮา นู ซาโมจ กู เตอ บูกัด ญา ซาโมจ กู ซืออูรัก ตาปี ญา ซาโมจ ตูฮัด นู ซูโรฮ กู มาแรฮ ฌูฆา." ญา จะ. 38 กะฆีเตอ โยฮัน มือเลา ฌางัน เยซู จะ "บูมอยํ เออ กามี บือเลฮ ลีฮัจ ซือมียา ซืออูรัก นู ซือโบจ นามา นะ เกา บีดา นะ โปรฮ โกะ ฮาตู ตรือเบะ เดะ ญาวา นะ ซือมียา. กะฆีเตอ กามี บือเลฮ บลารัก ญา บูวัก ซาเบะ ญา เตด ตูโรจ กะ ลูมอฮ กีตา." 39 ตาปี เยซู มือเลา จะ "ฌางัน บลารัก ญา เลอ. ซาเบะ-จะ ซือมียา ดีฮา นู ซือโบจ นามา นะ กู บีดา บูวัจ ลาฆู มือฆัฮ เตอ กลาฆี ญา นะ มือเลา กาซัยํ กะ กู ฮอย เตด บือเลฮ ดัฮ. 40 ซือมียา นู เตด บลาวัด ฌางัน กีตา เตอ ญา ฌาดี ซือมียา โซะ กีตา. 41 กะฆีเตอ กู มือเลา ฌางัน กาเญา ลาฆู นู ซูโงฮ จะ ซือมียา ดีฮา นู ฮาฆิ อาเย โอะ กะ กาเญา ซือเจาะ โปด ซาเบะ กาเญา ตูโรจ กะ ราฌา นู บรี ซือลามัจ เตอ ซือมียา อีตู เลอ นะ ปูตุซ บาฮาเฆด นะ ญา ฮอย เตด บือเลฮ." ญา จะ. 42 กะฆีเตอ เยซู มือเลา จะ "ซือมียา ดีฮา นู บูวัจ บรี นานะ ดือมิ ซืออูรัก นู ปือจายา กะ กู นะ บรี ญา ซาลัฮ ฌาลัด เตอ ดัฮ อาเมด บาตู ฆีลิก ตือโปก นู บือซัยํ มาแรฮ ซาโกจ เดะ ลีเฮ นะ ญา เตอ บือปี ปือตาลับ บูวัก เดะ ลาโวจ โปด บาฌิ เลอ. 43 กะฆีเตอ กาเลา-จะ ตางัน นะ เกา บูวัจ บรี เกา ซาลัฮ ดัฮ ตางัน อีตู เตอ เกา กือนา กรัจ บูวัก เลอ. นู เกา นะ มาโซะ รอจ กะ ฮีโดะ กูโดก ซือบือลัฮ โปด บาฌิ เดะ อาดา ตางัน ดูวา บือลัฮ ตาปี ฆาโดฮ นะ มาโซะ ปี กะ อาปี นอรากา กะ อาปี นู เตด ดือละ ปาดับ เลอ . 45 กาเลา-จะ กากี นะ เกา บูวัจ บรี เกา ซาลัฮ ดัฮ กากี อีตู เตอ เกา กือนา กรัจ บูวัก เลอ. นู เกา นะ มาโซะ รอจ กะ ฮีโดะ กูโดก ซือบือลัฮ โปด บาฌิ เดะ อาดา กากี ดูวา บือลัฮ ตาปี นะ กือนา ตีงัน บูวัก เดะ นอรากา เลอ." ญา จะ . 47 "กาเลา-จะ มาตา นะ เกา บูวัจ บรี เกา ซาลัฮ ดัฮ มาตา อีตู เตอ เกา กือนา จูเกน บือตรือเบะ เลอ. นู เกา นะ มาโซะ รอจ กะ ดือนียา บารู นู ตูฮัด ฌาดี ราฌา บูตา ซือบือลัฮ โปด บาฌิ เดะ อาดา มาตา ดูวา บือลัฮ ตาปี นะ กือนา บูวัก กะ นอรากา. 48 โซะ อีตู อาดา โกะ ฮูลัจ นู มากัด บาดัด นะ กูญา เตอ นู เตด ดือละ มาตี. อาปี โปด เตด ดือละ ปาดับ." ญา จะ. 49 "กรานา ราตา ซือมียา นะ กือนา ฆาโวน ฌางัน โกะ ฆารับ นะ กือนา บือบาฌิ ฌางัน อาปี. 50 ฆารับ เตอ ฌาดี ซือบารัก นู บาฌิ ตาปี กะ ฮอย มาเซด ดัฮ เตอ นะ บรี มาเซด ปูลัก บือเลฮ กะฮามี เลอ? กะฆีเตอ บรี กาเญา บือฆารับ เดะ ฮาตี บรี กาเญา ดูโดะ บือปาคัจ บือบาฌิ-บาฌิ." ญา จะ. chk 120597 FINAL CLEAN 28-05-97,15:25 OPT 1.50
1 กะฆีเตอ เยซู ตรือเบะ เดะ นังฆรี อีตู ปี กะ โซะ นังฆรี ยูเดีย. ญา ฌรือมัก ปี กะ โซะ ซรือบัก ซูงัย จอแดน โซะ ตีมอยํ. อาดา ซือมียา บาญะ ปาคัจ มาแรฮ ซารี เยซู ปูลัก. กะฆีเตอ เยซู อาฌัยํ ลูมอฮ อีตู บือกะ ญา บียาซา บูวัจ. 2 อาดา ลูมอฮ ฟาริซี มาแรฮ นะ ลกลีฮัจ เยซู ตาญา จะ "นู ลากี นะ บรือจัย ฌางัน บีนี เตอ กือนา ลาฆู ฌางัน ปือมือเลา ฮูโกบ นะ ตูฮัด เฆอ?" 3 เยซู มือเลา จะ " มูซา บือเลฮ ปือซัด กาเญา กะฮามี?" 4 กูญา ตีกัฮ จะ "มูซา บรี ซือมียา บูวัจ ซูรัจ บรือจัย บูวัก บีนี บือเลฮ. " 5 ตาปี เยซู มือเลา ฌางัน กูญา จะ "กรานา กาเญา ฮาตี กรัซ เลอ มูซา บือเลฮ ฆาแรฮ ปือมือซัด ฮูโกบ กะฆีเตอ. 6 ตาปี ตะเดะ ลามูลา ตูฮัด บือฌาดี ดือนียา ดัฮ บือกะ ซูรัจ นู จะ 'ตูฮัด บือฌาดี ซือมียา กีลากี ฌางัน นีบีนี'. 7 อาดา ฌูฆา นู จะ 'กะฆีเตอ กีลากี นะ ตีงัน เอด อาโปก นะ ญา นะ ปี ดูโดะ บือซามา บือซูโงฮ-ซูโงฮ ฌางัน บีนี นะ ญา. 8 กะฆีเตอ กูญา กือดูวา นะ ฌาดี ญาวา ซือตือปัจ.' ซูรัจ นะ ตูฮัด ญา จะ." กะฆีเตอ เยซู มือเลา ปูลัก จะ "กะฆีเตอ กูญา บูกัด ฌาดี ดูวา ญาวา ตาปี ฌาดี แนฮ ซา ญาวา อีตู ดัฮ. 9 กะฆีเตอ นู ตูฮัด เดะ อาตัซ อีกัจ บือกระ ดัฮ ฌางัน บรี โกะ ซือมียา นะ บรือจัย." ญา จะ. 10 กะฆีเตอ ตานา มาโซะ กะ รูมัฮ ดัฮ โกะ มูเระ นะ ญา ตาญา ปาซัน ลาฆู อีนี ปูลัก. 11 กะฆีเตอ เยซู มือเลา ฌางัน กูญา อีตู จะ "กะ ซือมียา ดีฮา บรือจัย ฌางัน บีนี นะ ญา เตอ อาเมด บีนี อาซิก มาแรฮ ดัฮ ญา ซาลัฮ บือกาเซฮ ฌูฆา. 12 กะ นีบีนี ดีฮา บรือจัย ฌางัน ลากี นะ ญา อาเมด ลากี อาซิก ญา โปด ซาลัฮ บือกาเซฮ ฌูฆา." เยซู ญา จะ. 13 กะฆีเตอ อาดา ซือมียา บาวา นานะ ดือมิ ซือตืองัฮ มาแรฮ ซารี เยซู บีดา นะ บรี เยซู ปือเตาะ เดะ ญาวา นะ กูญา. ตาปี โกะ มูเระ นะ ญา เตอ กูญา อูจะ บลารัก โกะ ซือมียา อีตู. 14 ตานา เยซู ลีฮัจ กะฆีเตอ ญา เตด ซือนัง-ฮาตี ญา มือเลา กะ โกะ มูเระ นะ ญา จะ "บียัยํ เลอ บรี โกะ นานะ มาแรฮ มียา กู. ฌางัน นะ ซือกัจ กูญา กรานา-จะ ซือมียา นู อาดา ฮาตี ซือรูปา โกะ นานะ กะฆีนี เตอ ซือมียา อีตู เลอ นู อาดา ตูฮัด ฌาดี ราฌา นะ ญา. 15 กู มือญาเระ กะ กาเญา ลาฆู นู ซูโงฮ จะ ซือมียา ดีฮา นู เตด ซาโงะ ตูฮัด ฌาดี ราฌา นะ ญา ฌางัน ฮาตี ซือรูปา บือกะ นานะ เตอ ซือมียา อีตู นะ ฮอย เตด บือเลฮ มาโซะ กะ ลูมอฮ ซือมียา นู ตูฮัด บือบือลา ฌาดี ราฌา " ญา จะ. 16 กะฆีเตอ เยซู เตอ ญา เนก โกะ นานะ ญา ปือเตาะ ตางัน เดะ ญาวา นะ กูญา ญา บรี ซือลามัจ กะ กูญา โซก ซืออูรัก. 17 ตานา เยซู ตืองัฮ นะ บือฌาลัด ปี ปูลัก อาดา ซือมียา ซืออูรัก บลารี มาแรฮ ซารี ญา. ซือมียา อีตู ญา ตูกู ลูโตจ โซะ ฮึลด เยซู ตาญา เยซู จะ " บูมอยํ นู บาฌิ เออ กู กือนา บูวัจ กะฮามี เลอ บีดา นะ บือเลฮ ลาฆู ฮีโดะ ซูโงฮ นู ซือลาลู?" 18 กะฆีเตอ เยซู ตีกัฮ กะ ญา จะ "เกา มือเลา ซือโบจ จะ 'นู บาฌิ' บูวัจ นามา? ฮอย ซือมียา ดีฮา นู บาฌิ ลือเบฮ ซา ตูฮัด เดะ อาตัซ เลอ. 19 เกา ตาฮู โกะ ปือมือซัด นะ ตูฮัด นู จะ 'ฌางัน บูนอฮ ซือมียา. ฌางัน บือกาเซฮ บีนี นะ กาวัด ลากี นะ กาวัด เลอ. ฌางัน จูรี บารัก นะ กาวัด เลอ. ฌางัน ฌาดี ซะซี มืออูปัย เลอ. ฌางัน กีจอฮ กาวัด เลอ. กือนา ตูเฮะ กะ เอด อาโปก นะ เกา เลอ.' " ญา จะ. 20 ซือมียา อีตู ญา มือเลา ฌางัน เยซู จะ "บูมอยํ เออ ปือมือซัด อีนี ซือมูฮา เตอ กู บือเลฮ ตูโรจ ดัฮ ตะเดะ มิดือมิ." 21 เยซู เตอ ญา ตีญูง กะ ซือมียา อีตู ญา ซายัก. ญา มือเลา ฌางัน ซือมียา อีตู จะ "เกา ปูตุซ ซา มาตา เลอ. เกา ปี ฌูวัน โกะ ซือบารัก นะ เกา เลอ ฮาฆิ บรี กะ โกะ ซือมียา ฮาฌะ กะฆีเตอ เกา นะ ฌาดี ซือมียา กายา โซะ อาตัซ ลาแงะ ดัฮ. ลือปัซ อีตู กือนา มาแรฮ ตูโรจ กะ กู เลอ." ญา จะ. 22 ตาปี ตานา ซือมียา อีตู ดืองัยํ ลาฆู กะฆีเตอ ดัฮ ดัดดัด ญา มูคา มาซับ ญา ตรือเบะ ปี ซูซัฮ-ฮาตี ซูโงฮ ซาเบะ-จะ ญา อาดา โกะ บือนา บารัก บาญะ. 23 เยซู เตอ ญา ตีญูง ลีฮัจ กือลีลิก ญาวา นะ ญา ญา มือเลา ฌางัน โกะ มูเระ นะ ญา จะ "ปายัฮ ซูโงฮ เลอ นู โกะ ซือมียา กายา นะ มาโซะ กะ ลูมอฮ ซือมียา นะ ตูฮัด. " 24 ตาปี โกะ มูเระ นะ ญา ดืองัยํ ดัฮ กูญา ปือและ-ฮาตี ซูโงฮ. กะฆีเตอ เยซู มือเลา ฌางัน กูญา ลาฆี จะ "โอ มิ เออ ปายัฮ ซูโงฮ เลอ นู นะ มาโซะ กะ ลูมอฮ ซือมียา นะ ตูฮัด. 25 อูตัยํ ซืออีโกยํ นะ มรือลุซ เดะ ลูบัก ฌาโรบ โปด มูดัฮ ลาฆี เดะ ซือมียา กายา นะ มาโซะ กะ ดือนียา บารู นะ ตูฮัด." ญา จะ. 26 กะฆีเตอ โกะ มูเระ นะ ญา เตอ กูญา ปือและ-ฮาตี ซูโงฮ กูญา ปาคัจ ตาญา จะ "ดัฮ กะฆีเตอ ซาปา เลอ นะ บือเลฮ ฮีโดะ ลือปัซ บาฌิ?" 27 ตาปี เยซู เตอ ญา ตีญูง ลีฮัจ กะ กูญา อีตู มือเลา จะ "โซะ อูมัจ-ซือมียา นะ บูวัจ กะฆีนี เตด บือเลฮ ลาลู. ตาปี ตูฮัด เดะ อาตัซ เตอ นู บูวัจ บือเลฮ. ลาฆู นามาๆ โปด ตูฮัด เตอ เลอ นู บูวัจ บือเลฮ ซือมูฮา." 28 กะฆีเตอ เปโตร ฮึนตะ มือเลา ฌางัน เยซู จะ "ลีฮัจ เลอ ลูมอฮ กามี บือเลฮ ตีงัน บือนา บารัก ซือมูฮา มาแรฮ ตูโรจ กะ เกา ดัฮ เลอ." 29 เยซู เตอ ญา มือเลา จะ "กู มือเลา ฌางัน กาเญา ลาฆู นู ซูโงฮ จะ ซือมียา ดีฮา นู ตีงัน โกะ รูมัฮ โกะ อาดี-บราดี กีลากี นีบีนี โกะ ปะ มะ โกะ นานะ โกะ ตือปัจ ตานัฮ เตอ กรานา ลีฮัจ กะ กู ลีฮัจ กะ บรีตา นู บาฌิ นะ กู เตอ 30 ซือมียา อีตู เลอ ญา นะ ซาโมจ ซือราตุซ กาลี เดะ ฮาดัจ อีนี. ญา นะ ซาโมจ ปาเระ โกะ รูมัฮ โกะ อาดี-บราดี กีลากี นีบีนี โกะ มะ โกะ นานะ โกะ ตือปัจ ตานัฮ ตาปี ญา นะ กือนา ลาฆู ปรือกัด ซามา. เดะ ฮาดัจ โซะ ฮึลด โปด ซือมียา อีตู เตอ ญา นะ ซาโมจ ลาฆู ฮีโดะ ซูโงฮ นู ซือลาลู เลอ. 31 ตาปี อาดา ซือมียา บาญะ โซะ ปรือดู นะ ปี ดูโดะ โซะ ฮูโฌก. ซือมียา โซะ ฮูโฌก นะ ปี ดูโดะ โซะ ปรือดู เลอ." ญา จะ. 32 กาลา กูญา อีตู ตืองัฮ ฌาลัด ปี กะ นังฆรี เยรูซาเลม เยซู เตอ ญา ฌาลัด ปี โซะ ฮึลด ตาปี โกะ มูเระ อีตู กูญา ปือและ-ฮาตี บาญะ. โกะ ซือมียา นู ฌาลัด ปี โซะ บลากัก เตอ กูญา ตาโกจ โตระ. ซือกาลี ลาฆี เยซู บาวา โกะ มูเระ ดูวา-บือลัซ อูรัก อีตู บือปี ซามา มือญาเระ ลาฆู นู นะ บือฌาดี ฌางัน ญา จะ 33 "นี เลอ กีตา ตืองัฮ บือฌาลัด ปี กะ นังฆรี เยรูซาเลม. กู นู นานะ นะ อูมัจ-ซือมียา เตอ กู นะ กือนา อาตัจ บรี กะ ลูมอฮ ซามี ซัยํ-บือซัยํ ฌางัน โกะ ซือมียา อาฌัยํ ลาฆู ปือมือซัด นะ ตูฮัด เตอ. โกะ ลูมอฮ กูญา อีตู นะ กรัจ ฮูโกบ กู บรี กือนา บูนอฮ มาตี เลอ. กะฆีเตอ กูญา นะ อาตัจ กู บรี กะ โกะ ลูมอฮ ซือมียา บักซา อาซิก. 34 กูญา อีตู นะ อาฆัฮ-ฆือละ กะ กู. กูญา นะ ปือทุย อาเย ลีโยยํ เดะ ญาวา นะ กู. กูญา นะ รือเปะ กู นะ บูนอฮ กู เลอ. ตาปี ลือปัซ ตีฆา อารี เตอ กู นะ ฮีโดะ ปาเระ เดะ มาตี ปูลัก." ญา จะ. 35 ยากอบ ฌางัน โยฮัน โกะ นานะ นะ เซเบดี เตอ กูญา มาแรฮ มีตา เดะ เยซู จะ "บูมอยํ เออ กามี ซูกา นะ บรี เกา ตูโลก กามี บือกะ ลาฆู กามี นะ มีตา เลอ." 36 กะฆีเตอ เยซู ตาญา กูญา จะ "กาเญา นะ บรี กู บูวัจ ลาฆู นามา บีดา กาเญา?" 37 ดูวา อูรัก อีตู มือเลา ฌางัน เยซู จะ "กาลา เกา นะ มาแรฮ บือกะ ราฌา นู บือซรี เตอ มีตา บรี กามี นะ ดูโดะ บือซามา โซะ กานัน ซา โซะ กีรี ซา เลอ." 38 ตาปี เยซู ตีกัฮ กะ กูญา จะ "นู กาเญา มีตา กะฆีเตอ กาเญา เตด ตาฮู อารัฮ เลอ. ลาฆู ซูซัฮ นู ซือรูปา เจาะ นู กู นะ โอะ กาเญา นะ โอะ ฌูฆา บือเลฮ เฆอ? ซือรูปา กู นะ ซือลับ เดะ ลาฆู ซูซัฮ กาเญา นะ ซือลับ กะฆีเตอ ฌูฆา บือเลฮ เฆอ?" 39 กูญา กือดูวา ตีกัฮ กะ เยซู จะ "บือเลฮ ฌูฆา เลอ." กะฆีเตอ เยซู มือเลา ฌางัน กูญา จะ "เจาะ นู กู นะ โอะ กาเญา นะ โอะ ฌูฆา. ลาฆู นู กู นะ ซือลับ เดะ ลาฆู ซูซัฮ เตอ กาเญา นะ ซือลับ ฌูฆา. 40 ตาปี นู นะ ดูโดะ โซะ กานัน นะ กู โซะ กีรี นะ กู เตอ กู นะ บรี เตด บือเลฮ เลอ. ตือปัจ ดูโดะ อีตู ตูฮัด บือเลฮ ซียะ ตาโรฮ ดัฮ บีดา โกะ ซือมียา นู ญา ปีเลฮ ดัฮ เลอ." 41 โกะ มูเระ อาซิก ซือปูโลฮ อูรัก เตอ ตานา ดืองัยํ ลาฆู กะฆีเตอ ดัฮ กูญา รีเซา-ฮาตี กะ ยากอบ ฌางัน โยฮัน. 42 กะฆีเตอ เยซู บลาโลก โกะ มูเระ มาแรฮ มือเลา ฌางัน กูญา จะ "กาเญา ตาฮู จะ โกะ ซือมียา นู ลีฮัจ ซือรูปา ฌาดี กือปาลา นะ ลูมอฮ บักซา อาซิก เตอ กูญา ปรือกัด ลูมอฮ กูญา บือกะ ฌาดี ราฌา เตอ. โกะ ซือมียา ซัยํ-บือซัยํ โปด กูญา อาดา มือฆัฮ นะ ฮูโกบ ลูมอฮ กูญา ฌูฆา เลอ. 43 ตาปี โซะ ลูมอฮ กาเญา ฌางัน บรี ฌาดี กะฆีเตอ เลอ. ซือมียา ดีฮา นู นะ ฌาดี บือซัยํ เดะ ลูมอฮ กาเญา ญา กือนา ฌาดี ซือมียา มือนูโลก นะ กาเญา. 44 ซือมียา ดีฮา นู นะ ฌาดี กือปาลา เดะ ลูมอฮ กาเญา ญา กือนา ฌาดี ปราโซฮ นะ กาวัด ซือมูฮา. 45 กรานา-จะ กู นู นานะ นะ อูมัจ-ซือมียา เตอ กู มาแรฮ ดัฮ บูกัด นะ บรี โกะ ซือมียา บือกรือฌา มือนูโลก กู ตาปี กู มาแรฮ ดัฮ นะ บือกรือฌา มือนูโลก กูญา เตอ เลอ นะ ซรัฮ ญาวา นะ กู ฌาดี รือฆา ตือบุซ โกะ ซือมียา บาญะ บรี ลือปัซ." ญา จะ. 46 กะฆีเตอ กูญา มาแรฮ รอจ กะ นังฆรี เยริโค. วะตู เยซู ตืองัฮ ตรือเบะ เดะ นังฆรี ฌางัน โกะ มูเระ นะ ญา ฌางัน ลูมอฮ ซือมียา บาญะ ซามา อาดา ซือมียา งือแมง ดูเวะ ซืออูรัก ดูโดะ เดะ บีดิก ฌาลัด. ญา ซืออูรัก นู มาตา บูตา ปือนามา จะ บาทิเมอัด นานะ นะ ทิเมอัด. 47 ตานา ญา ดืองัยํ จะ เยซู ซือมียา ตูโปะ นาซาเรด มาแรฮ ดัฮ ญา บือซูระ จะ "เยซู นานะ นะ ราฌา ดาวิด เออ จีฮัด กะ กู เลอ." 48 อาดา ซือมียา บาญะ กูญา อูจะ กะ ญา ซูโรฮ บรี ญา ซืองะ. ตาปี ดรัซ ญา บือซูระ จะ "นานะ นะ ราฌา ดาวิด เออ ตือจีฮัด กะ กู ฌูฆา เลอ." 49 กะฆีเตอ เยซู ญา บราดู มือเลา จะ "บรี ญา มาแรฮ กะ อีนี." กะฆีเตอ กูญา บลาโลก อูรัก มาตา บูตา อีตู กูญา มือเลา จะ "บรี ซือนัง-ฮาตี เลอ. บีกัซ เลอ ญา บลาโลก เกา ดัฮ." 50 กะฆีเตอ ซือมียา อีตู ญา ตีงัน กาเยด นู ญา บือซาโปจ ญา มือลูปัจ บีกัซ มาแรฮ รอจ กะ เยซู. 51 เยซู ตาญา ญา จะ "เกา นะ บรี กู บูวัจ ลาฆู นามา บีดา เกา?" กะฆีเตอ อูรัก มาตา บูตา อีตู ตีกัฮ กะ ญา จะ "บูมอยํ เออ มีตา ตูโลก บรี กู บือเลฮ ลีฮัจ บือฆารี เลอ." 52 เยซู มือเลา ฌางัน ญา ปูลัก จะ "ปี เลอ. นู เกา ปือจายา บือเลฮ บูวัจ บรี เกา ซือนัง บาฌิ ดัฮ." ดัดดัด ซือมียา อีตู ญา ลีฮัจ บือฆารี ดัฮ. ญา ตูโรจ กะ เยซู ปี ซามา.
1 กะฆีเตอ กูญา อีตู มาแรฮ ดาปิก นังฆรี เยรูซาเลม รอจ กะ ตูโปะ เบดฟายี ฌางัน ตูโปะ เบดทานี เดะ บูเกะ กือดูโนด ดัฮ. วะตู อีตู เยซู ซูโรฮ มูเระ ดูวา อูรัก ปี ดูลู 2 ปือซัด กะ กูญา จะ "มาโซะ เลอ กะ ตูโปะ โซะ ฮึลด อีตู. มาโซะ ดัฮ ดัดดัด กาเญา นะ ดาปัจ อานะ กูดา ซืออีโกยํ นู กือนา อีกัจ ดัฮ. อานะ กูดา อีตู เตอ ฮอย ซาปา ดือละ ญาแญะ. อูฆัย เลอ อาเมด มาแรฮ เปะ อีนี. 3 กะ ซือมียา ดีฮา ตาญา จะ 'บูวัจ นามา กาเญา บูวัจ กะฆีนี?' กือนา ตีกัฮ จะ 'ซาเบะ ตูฮัด นะ อาเมด ซูโรฮ ซัจ นะ อาตัจ ปาเระ เลอ.' " 4 กะฆีเตอ มูเระ ดูวา อูรัก อีตู กูญา ปี ดัฮ ปี ดาปัจ อานะ กูดา อาดา อีกัจ เดะ ปีตู เดะ บีดิก ฌาลัด. กะฆีเตอ กูญา อูฆัย กูดา อีตู. 5 กะฆีเตอ อาดา ซือมียา ซือตืองัฮ นู บือดีรี โซะ อีตู กูญา อูจะ โกะ มูเระ อีตู จะ "บูวัจ นามา เลอ กาเญา อูฆัย อานะ กูดา อีนี?" 6 กะฆีเตอ กูญา ดูวา อูรัก ตีกัฮ กะ โกะ ซือมียา บือกะ ลาฆู เยซู มือญาเระ กะ กูญา ดัฮ. กะฆีเตอ โซะ ซือมียา อีตู กูญา บือบียัยํ บรี อูฆัย อานะ กูดา บือปี. 7 กะฆีเตอ กูญา อาเมด อานะ กูดา อีตู มาแรฮ อาตัจ กะ เยซู. กูญา อาเมด บาฌู นะ กูญา อาปัยํ เดะ บลากัก กูดา อีตู. กะฆีเตอ เยซู ญาแญะ ดูโดะ. 8 บาญะ ซือมียา อาเมด โกะ บาฌู นะ กูญา มาแรฮ อาปัยํ เดะ ฌาลัด. ซือมียา อาซิกๆ เตอ กูญา ปี กะ ปาดัก ลือกับ โกะ รือบา ดาโวด ลือบัจ อาเมด มาแรฮ อาปัยํ ฌูฆา. 9 อาดา ซือมียา ปี โซะ ฮึลด ซือตืองัฮ ตูโรจ โซะ บลากัก ซือตืองัฮ กูญา บือซูระ จะ " โฮซันนา ปูฌี กะ ตูฮัด เลอ. ซือลามัจ เลอ ซือมียา นู มาแรฮ เดะ นามา นะ ตูฮัด เดะ อาตัซ. 10 ซือนัง ซือลามัจ เลอ นังฆรี นะ ราฌา ดาวิด อาโปก นะ กีตา นู นะ กือนา ตืองะ ดัฮ. โฮซันนา ปูฌี เลอ กะ ตูฮัด นู ตีงี เดะ อาตัซ ซูโงฮ." กูญา จะ. 11 กะฆีเตอ เยซู มาโซะ กะ นังฆรี เยรูซาเลม ญา ปี มาโซะ รอจ กะ รูมัฮ มือญือมัฮ ตูฮัด ปี ฌือเงาะ ลีฮัจ ราตา เดะ รูมัฮ อีตู. ตาปี ซรือปะ นะ มาลับ ดัฮ กะฆีเตอ ญา ตรือเบะ ปี ฌางัน โกะ มูเระ ดูวา-บือลัซ อูรัก อีตู ปี กะ ตูโปะ เบดทานี. 12 จรัฮ ปาฆี ตานา กูญา ตืองัฮ มาแรฮ ดาตัก เดะ เบดทานี เยซู ญา ลาปัยํ ดัฮ. 13 ญา ลีฮัจ ตะเดะ ฌาโวฮ อาดา ปูโฮด กรายา-บูดี ซา ปูโฮด นู อาดา ดาโวด ลือบัจ. กะฆีเตอ ญา บราดู ปี ลีฮัจ จะ อาดา บูวัฮ เฆอ เตด? ตานา มาแรฮ รอจ ดัฮ ญา ลีฮัจ จะ ปูโฮด กายู อีตู อาดา ซา ดาโวด. ญา เตด รอจ มูเซด นะ บือบูวัฮ ลาฆี. 14 กะฆีเตอ เยซู มือเลา กะ ปูโฮด กายู อีตู จะ "ตะเดะ อีนี ปี ฮอย ซาปา นะ บือเลฮ มากัด บูวัฮ นะ เกา ซือมาญัก-รอจ เลอ." โกะ มูเระ นะ ญา กูญา ดืองัยํ ลาฆู อีนี ดัฮ. 15 กะฆีเตอ กูญา ปี รอจ กะ นังฆรี เยรูซาเลม ดัฮ. เยซู มาโซะ ปี กะ รูมัฮ มือญือมัฮ ตูฮัด. อาดา ซือมียา ฌูวัน บารัก ซือมียา บือลี บารัก เดะ ลามัน รูมัฮ มือญือมัฮ เตอ. โกะ ซือมียา อีตู เยซู โปรฮ ฮาบิฮ. ปาปัด โตะ นะ ซือมียา ฮูโระ ดูเวะ ฌางัน ตือปัจ ดูโดะ นะ ซือมียา ฌูวัน บูโรก ปาตี ญา บือจือเกาะ บูวัก ดัฮ. 16 ญา บลารัก โกะ ซือมียา ตีเมา บรี บาวา โกะ ซือบารัก บือมาแรฮ ลาลู เดะ ลามัน รูมัฮ มือญือมัฮ ตูฮัด. 17 กะฆีเตอ ญา อาฌัยํ ลูมอฮ กูญา มือเลา จะ "อาดา ฆาแรฮ ดัฮ เดะ ซูรัจ ปือมือเลา นะ ตูฮัด บูกัด เฆอ นู จะ 'รูมัฮ นะ กู เตอ นะ กือนา บลาโลก จะ รูมัฮ ตือปัจ นู ซือมียา ราตา บักซา นะ มาแรฮ บือซาโวจ กะ ตูฮัด.' ตาปี กาเญา บือเลฮ บูวัจ บรี ฌาดี บือกะ ซารัก ลูมอฮ อูรัก ปือญามุน เลอ." 18 ตานา โกะ ลูมอฮ ซามี ซัยํ-บือซัยํ ฌางัน โกะ ซือมียา อาฌัยํ ลาฆู ปือมือซัด นะ ตูฮัด กูญา ดืองัยํ ลาฆู อีนี ดัฮ กูญา บือกีรา ซามา กูญา จะ นะ บูนอฮ เยซู กะฮามี. ซาเบะ กูญา ตาโกจ เดะ เยซู ลีฮัจ จะ นู เยซู อาฌัยํ ลาฆู กะฆีนี บูวัจ บรี โกะ ซือมียา บาญะ ปือและ-ฮาตี ซูโงฮ. 19 โซะ ปะฮึญา เยซู ฌางัน โกะ มูเระ นะ ญา ตรือเบะ ปี กะ ลูวัยํ นังฆรี. 20 จรัฮ ปาฆี กูญา ฌาลัด ลาลู ปี ลีฮัจ ปูโฮด กรายา-บูดี อีตู ญา ลายู ตูโฮยํ ฮาบิฮ รอจ กะ ฌากัยํ. 21 กะฆีเตอ เปโตร จับ บือเลฮ ดัฮ มือเลา จะ " บูมอยํ เออ ลีฮัจ เลอ ปูโฮด กายู นู เกา อาโบยํ เตอ ฮาบิฮ ลายู ดัฮ." 22 กะฆีเตอ เยซู มือเลา กะ กูญา จะ "ปือจายา เลอ กะ ตูฮัด เดะ อาตัซ. 23 กู มือเลา ฌางัน กาเญา ลาฆู นู ซูโงฮ จะ ซือมียา ดีฮา นู ปือซัด กะ บูเกะ อีนี จะ 'กือนา อาเกะ ปี บือตาลับ เดะ ลาโวจ เลอ' กะ ซือมียา อีตู เตด บรูบัฮ-ฮาตี ตาปี ปือจายา จะ บือกะ นู ญา ปือซัด ดัฮ นะ ฌาดี ซูโงฮ เตอ กะฆีเตอ ลาฆู อีตู นะ ฌาดี ซูโงฮ เลอ." เยซู ญา จะ. 24 "กะฆีเตอ กู มือเลา ฌางัน กาเญา จะ วะตู กาเญา บือซาโวจ มีตา ลาฆู นามาๆ โปด ปือจายา เลอ นู กาเญา บือเลฮ ดัฮ. กะฆีเตอ กาเญา นะ บือเลฮ ลาฆู อีตู ซูโงฮ เลอ. 25 กะฆีเตอ วะตู กาเญา อาดา บือดีรี บือซาโวจ กะ ตูฮัด กะ อาดา ปาซัน ลาฆู นามา ฌางัน กาวัด เตอ กือนา อาเกะ ซาลัฮ นะ ญา ดูลู. กาเญา บูวัจ กะฆีเตอ ดัฮ อาโปก นะ กาเญา นู ดูโดะ เดะ อาตัซ ลาแงะ ญา นะ อาเกะ ซาลัฮ นะ กาเญา ฌูฆา. " ญา จะ. 27 กะฆีเตอ กูญา มาโซะ ปี กะ นังฆรี เยรูซาเลม ปูลัก. วะตู เยซู บือฌาลัด ปี เดะ รูมัฮ มือญือมัฮ ตูฮัด อาดา โกะ ลูมอฮ ซามี ซัยํ-บือซัยํ โกะ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ อูรัก ตูฮา เตอ กูญา ปาคัจ มาแรฮ ดาปัจ ญา. 28 กูญา ตาญา เยซู จะ "เกา บือเลฮ บูวัจ ลาฆู กะฆีนี ฌางัน ปือมือฆัฮ นู ดีฮา? จะ ซาปา บือเลฮ บรี กะ เกา บูวัจ ลาฆู กะฆีนี นู เกา บูวัจ ดัฮ เลอ?" 29 เยซู ตีกัฮ กะ กูญา จะ "กู นะ ตาญา กาเญา ซา ลาฆู ฌูฆา. กาเญา ตีกัฮ เลอ กะฆีเตอ กู นะ มือญาเระ กะ กาเญา จะ กู บูวัจ ลาฆู กะฆีนี ฌางัน ปือมือฆัฮ นู ดีฮา เลอ. 30 นู โยฮัน บรี โกะ ซือมียา ซือลับ เดะ อาเย เตอ ฌาดี ลาฆู ดาตัก เดะ ลาแงะ เฆอ-จะ ดาตัก เดะ โกะ อูมัจ-ซือมียา?" ญา จะ. 31 กะฆีเตอ กูญา บือตือฆัฮ ซามา กูญา จะ "กะ กีตา มือเลา จะ 'ดาตัก เดะ โซะ ลาแงะ' กะฆีเตอ ญา นะ ตาญา กีตา จะ 'ซาเบะ นามา กาเญา เตด บือเลฮ ปือจายา กะ โยฮัน เลอ?' 32 ตาปี กะ กีตา นะ มือเลา จะ 'ดาตัก เดะ โกะ ซือมียา.' อานู..." กูญา โปด ตาโกจ เดะ โกะ ซือมียา บาญะ กรานา โกะ ซือมียา บาญะ อีตู กีรา จะ โยฮัน เตอ ฌาดี ซือมียา ตูโดฮ ลาฆู นะ ตูฮัด ซูโงฮ เลอ. 33 กะฆีเตอ กูญา ตีกัฮ กะ เยซู จะ "กามี เตด ตาฮู เลอ." เยซู มือเลา ฌางัน กูญา จะ "กะฆีเตอ กู โปด เตด มือญาเระ กะ กาเญา ฌูฆา จะ ลาฆู กู บูวัจ กะฆีนี บูวัจ ฌางัน ปือมือฆัฮ นู ดีฮา."
1 กะฆีเตอ เยซู ญา ฮึนตะ มือเลา จรือตา อาฌัยํ โกะ ลูมอฮ อีตู จะ "อาดา ซือมียา ซืออูรัก นู บูวัจ กือโบด ตานัม ปูโฮด อางุน. ญา บูวัจ ปาฆัยํ กือลีลิก. ญา กาลี ตือลาฆา กาจะ บูวัฮ อางุน. ญา อาเกะ ดาเงา ตีงี บีดา นะ ตูงู กือโบด. กะฆีเตอ ญา บรี โกะ ซือมียา กรือฌา กือโบด ซีวา ตาปี อีซี ญา เตอ ปี กะ นังฆรี อาซิก. 2 ตานา รอจ วะตู มูเซด บือบูวัฮ ดัฮ ตูฮัด กือโบด ญา ซูโรฮ ปราโซฮ ซืออูรัก ปี มียา โกะ ซือมียา นู ซีวา กือโบด บรี ปูงอจ ฮาบด นะ ญา เดะ บูวัฮ อางุน อีตู. 3 ตาปี โกะ ซือมียา ซีวา กือโบด อีตู กูญา รีฆะ ปราโซฮ อีตู กาเตาะ. กูญา บรี ญา บาลิ ซา ญาวา ฮอย นามา. 4 กะฆีเตอ ตูฮัด กือโบด ญา ซูโรฮ ปราโซฮ นู อาซิก ปี ปูลัก ตาปี ตานา ปี ดัฮ กูญา อีตู กาเตาะ ปาลา ปือจัฮ บูวัจ แนฮ-ฌือแนฮ บรี ญา จือและ. 5 กะฆีเตอ ตูฮัด กือโบด ซูโรฮ ปราโซฮ ปี ปูลัก ตาปี ปราโซฮ อีตู กูญา บูนอฮ มาตี ดัฮ. ปราโซฮ อาซิก เตอ บาญะ อูรัก กือนา ลาฆู กะฆีนี ฌูฆา. ซือตืองัฮ กือนา กาเตาะ ซือตืองัฮ กือนา บูนอฮ มาตี." ญา จะ. 6 "กะฆีเตอ ตูฮัด กือโบด อาดา ซืออูรัก ลาฆี นานะ นะ ญา นู ญา ซายัก บาญะ ซูโงฮ. เดะ ปือญูดัฮ เตอ ญา ซูโรฮ นานะ อีตู ปี กะ กูญา. ญา กีรา จะ 'ซูโงฮ กูญา นะ ตูเฮะ กะ นานะ นะ กู.' 7 ตาปี โกะ ซือมียา ซีวา กือโบด อีตู กูญา มือเลา ซามา กูญา จะ 'ญา เลอ ฌาดี นานะ นะ ตูฮัด กือโบด นู นะ ซาโมจ ปือซากา. โฌฮ บรี กีตา บูนอฮ ญา บูวัก. กะฆีเตอ กือโบด อีนี นะ ฌาดี ปือซากา นะ กีตา.' 8 กะฆีเตอ กูญา ปาคัจ รีฆะ ญา บูนอฮ ตูละ บูวัก กะ โซะ ลูวัยํ กือโบด. 9 กะฆีเตอ ตูฮัด กือโบด อางุน นะ บูวัจ กะฮามี? ญา นะ มาแรฮ บูนอฮ โกะ ซือมียา ซีวา กือโบด อีตู นะ อาเมด กือโบด อางุน อีตู บรี กะ ซือมียา อาซิก ซีวา." เยซู ญา จะ. 10 กะฆีเตอ เยซู ตาญา จะ "กาเญา เตด ดือละ บาจา เฆอ ตือนอซ ซูรัจ ปือมือเลา นะ ตูฮัด นู จะ 'บาตู บือซัยํ นู ตูกัก กรือฌา รูมัฮ ตีงัน บูวัก ดัฮ บาตู อีตู เลอ ปาเระ มาแรฮ ฌาดี บาตู กือปาลา ซาฆี ดัฮ. 11 ตูฮัด เดะ อาตัซ เลอ นู บือเลฮ บูวัจ กะฆีนี. กีตา ลีฮัจ จะ ฌาดี ลาฆู บาฌิ ซูโงฮ เลอ.' " ญา จะ. 12 โกะ ซือมียา ซัยํ-บือซัยํ เตอ กูญา กูวาซา นะ รีฆะ เยซู ซาเบะ กูญา ลีฮัจ จะ เยซู บือเลฮ มือเลา จรือตา กะฆีเตอ ตูโญะ กะ กูญา ตะอาซิก. ตาปี กูญา ตาโกจ เดะ โกะ ลูมอฮ ซือมียา บาญะ. กะฆีเตอ กูญา ตีงัน เยซู ปี โซะ อาซิก ดัฮ. 13 กะฆีเตอ กูญา ซูโรฮ ลูมอฮ ฟาริซี ซือตืองัฮ ลูมอฮ นะ ราฌา เฮโรด ซือตืองัฮ ปี ซารี เยซู บีดา นะ มือนาตี อาเมด ซาลัฮ เดะ ปือมือเลา นะ ญา. 14 กะฆีเตอ กูญา มาแรฮ มือเลา ฌางัน เยซู จะ " บูมอยํ เออ กามี ตาฮู จะ เกา เลอ ซือมียา รือมัก ซูโงฮ. เกา เตด ตาโกจ เดะ ซาปา โปด ซาเบะ เกา เตด ปีเลฮ มูคา ซือมียา ดีฮา ตาปี เกา อาฌัยํ ปาซัน ฌาลัด นะ ตูฮัด เดะ อาตัซ โงฮ-ซูโงฮ เลอ. นู นะ บายัยํ อาเซน กะ ราฌา ซีซา เตอ รือมัก ฌางัน ปือมือเลา ฮูโกบ นะ ตูฮัด เฆอ เตด? 15 กีตา นะ บายัยํ บาฌิ เฆอ เตด บายัยํ บาฌิ เฆอ?" ตาปี เยซู ญา ตาฮู กูญา ฮาตี ปีเกาะ กะฆีนี ญา มือเลา ฌางัน กูญา จะ "บูวัจ นามา กาเญา ลกลีฮัจ กู? อาเมด มาแรฮ เลอ ซา รีเงะ บรี กะ กู ลีฮัจ." 16 กะฆีเตอ กูญา อาเมด บรี ซา รีเงะ. เยซู ตาญา กูญา จะ "รูปา อีนี ฌาดี รูปา นะ ซาปา? ปือนามา นู ฆาแรฮ อีนี ฌาดี นะ ซาปา เลอ?" กูญา ตีกัฮ กะ ญา จะ "นะ ราฌา ซีซา เลอ." 17 กะฆีเตอ เยซู มือเลา ฌางัน กูญา จะ "ซือบารัก นะ ราฌา ซีซา กือนา มือญือมัฮ กะ ซีซา เลอ. ซือบารัก นะ ตูฮัด กือนา อาเกะ มือญือมัฮ กะ ตูฮัด เลอ." กะฆีเตอ กูญา ปือและ-ฮาตี ซูโงฮ นู ญา ตีกัฮ กะฆีนี. 18 อาดา ลูมอฮ ซะดูซี ซือตืองัฮ มาแรฮ ซารี เยซู. ลูมอฮ ซะดูซี อีตู กูญา จะ ลาฆู ฮีโดะ ปาเระ เดะ มาตี เตอ ฮอย ลาลู. 19 กะฆีเตอ กูญา ตาญา เยซู จะ "บูมอยํ เออ. มูซา บือเลฮ ฆาแรฮ ซูรัจ กาลา นูตู ปือซัด กะ กีตา จะ 'กะ กีลากี ซือมียา ดีฮา มาตี อาดา บีนี ตาปี ฮอย นานะ ลาฆี บรี อาดี เดะ ญา ซืออูรัก อาเมด กากา อีปัย อีตู ฌาดี บีนี นะ ญา บีดา นะ บือเลฮ นานะ นู นะ ฌาดี บือแนฮ นะ กากา เดะ ญา.' 20 กะฆีเตอ อาดา โกะ ดีบราดี ตูโฌฮ อูรัก. นู ซูโลก บือเลฮ บีนี ดัฮ ตาปี วะตู ญา มาตี ญา ฮอย นานะ ลาฆี. 21 กะฆีเตอ นู ดูวา เตอ อาเมด กากา อีปัย อีตู มาแรฮ ฌาดี บีนี นะ ญา ตาปี ญา มาตี ฮอย นานะ ฌูฆา. นู ตีฆา โปด บูวัจ กะฆีเตอ ฌูฆา. 22 กะฆีเตอ ดีบราดี กือตูโฌฮ อูรัก อีตู กูญา อาเมด นีบีนี อีตู มาแรฮ ฌาดี บีนี นะ กูญา ดัฮ ตาปี กูญา ซือมูฮา มาตี ดัฮ ฮอย นานะ ฮาปา. โซะ ปือญูดัฮ นีบีนี อีตู ญา มาตี ฌูฆา ดัฮ. 23 กะฆีเตอ ตานา รอจ วะตู นู โกะ ซือมียา นะ ฮีโดะ ปาเระ เดะ มาตี เตอ นีบีนี อีตู นะ ฌาดี บีนี นะ ซาปา เลอ? กรานา-จะ กูญา กือตูโฌฮ บราดี บือเลฮ ซาโมจ ญา ฌาดี บีนี นะ กูญา ซือมูฮา ดัฮ." กูญา จะ. 24 ตาปี เยซู มือเลา ฌางัน กูญา จะ "บูวัจ นามา กาเญา กีรา ซาลัฮ กะฆีนี? ซาเบะ กะฆีนี บูกัด เฆอ? จะ ซูรัจ ปือมือเลา นะ ตูฮัด กาเญา เตด ตาฮู. นู ปือมือฆัฮ นะ ตูฮัด เดะ อาตัซ โปด กาเญา เตด ตาฮู ฌูฆา. 25 วะตู โกะ ซือมียา นะ ฮีโดะ ปาเระ เดะ มาตี เตอ กูญา เตด มือนีกัฮ ปูลัก กูญา ฮอย เตด อาเกะ บรี ฌาดี ลากี บีนี ดัฮ เลอ. ตาปี กูญา นะ ฌาดี ซือรูปา โกะ ฮูลู-บาลัก เดะ อาตัซ ลาแงะ เลอ. 26 ตาปี ปาซัน ลาฆู นู ซือมียา มาตี นะ ฮีโดะ ปาเระ เตอ กาเญา เตด ดือละ บาจา เฆอ เดะ ซูรัจ นะ มูซา เดะ ซือปาตัฮ นู มือญาเระ ปาซัน รือบา กายู นู บือญาลา อาปี เตอ นู ตูฮัด เดะ อาตัซ บือเลฮ มือเลา ฌางัน มูซา จะ 'กู นี เลอ ตูฮัด นะ อับราฮัม ตูฮัด นะ อีซัก ตูฮัด นะ ยาโกบ.' 27 ตูฮัด เดะ อาตัซ เตอ ญา บูกัด ตูฮัด นะ ซือมียา นู ฮาบิฮ มาตี ดัฮ ตาปี ญา ฌาดี ตูฮัด นะ ซือมียา นู อาดา ฮีโดะ. กะฆีเตอ กาเญา ซาลัฮ โตระ เลอ." เยซู ญา จะ. 28 อาดา ซือมียา อาฌัยํ ลาฆู ปือมือซัด นะ ตูฮัด ซืออูรัก ญา มาแรฮ มือนีงัย กูญา บือตือฆัฮ ลาฆู กะฆีนี. ญา ลีฮัจ เยซู ตีกัฮ กะ กูญา บาฌิ ดัฮ. กะฆีเตอ ญา ตาญา เยซู จะ "เดะ โกะ ปือมือซัด นะ ตูฮัด เตอ ตือนอซ ดีฮา นู บือซัยํ เดะ กาวัด?" 29 เยซู ตีกัฮ จะ "ตือนอซ นู ซา นู บือซัยํ เดะ กาวัด ญา มือเลา จะ 'ลูมอฮ บักซา อิซราเอน มือนีงัย เลอ. ตูฮัด นะ กีตา นู ตูฮัด บือซัยํ เดะ อาตัซ เตอ ญา เตอ เลอ ตูฮัด แนฮ ซา. 30 เกา กือนา ซายัก กะ ตูฮัด บือซัยํ เดะ อาตัซ ตูฮัด นะ เกา บรี ปือนอฮ เดะ ฮาตี ซือมูฮา บือกะ ญาวา นะ เกา บูวัจ บือเลฮ ซือมูฮา บือกะ เกา กีรา บรีงัจ บือเลฮ ซือมูฮา บือกะ อูรัจ นะ เกา บูวัจ บือเลฮ ซือมูฮา เลอ.' 31 อาดา ปือมือซัด ตือนอซ นู ดูวา นู จะ 'เกา กือนา ซายัก กะ กาวัด ซือรูปา ซายัก กะ ญาวา ตะอาซิก เลอ.' เดะ โกะ ปือมือซัด นะ ตูฮัด เตอ ฮอย ตือนอซ อาซิก นู นะ บือซัยํ เดะ ดูวา ตือนอซ อีนี." เยซู ญา จะ. 32 กะฆีเตอ ซือมียา อีตู ญา ตีกัฮ กะ เยซู จะ "กือนา ดัฮ บูมอยํ เออ. เกา มือเลา ลาฆู นู ซูโงฮ ดัฮ นู จะ 'ญา เตอ ตูฮัด แนฮ ซา. ตูฮัด นู อาซิก ฮอย ดัฮ.' 33 นู กีตา นะ ซายัก กะ ตูฮัด ปือนอฮ เดะ ฮาตี บือกะ กีตา มาโซะ เดะ ฮาตี ซือมูฮา บือกะ ญาวา กีตา บูวัจ บือเลฮ ซือมูฮา เตอ นู กีตา นะ ซายัก กาวัด ซือรูปา บือกะ ซายัก ญาวา ตะอาซิก เตอ ลาฆู อีนี เลอ บาฌิ เดะ ลาฆู อาเมด บือนาตัก มาแรฮ ตูนู มือนืองะ มือญือมัฮ กะ ตูฮัด บาฌิ เดะ ลาฆู มือนืองะ อาซิกๆ ซือมูฮา เลอ." ญา จะ. 34 ตานา เยซู ลีฮัจ ซือมียา อีตู ตีกัฮ ปานัย ดัฮ ญา มือเลา ฌางัน ญา จะ "เกา เลอ ซรือปะ นะ มาโซะ กะ ลูมอฮ ซือมียา นู ตูฮัด บือบือลา ฌาดี ราฌา. " ลือปัซ อีตู ฮอย ซาปา นะ บรานี ตาญา เยซู ลาฆู อาซิก ดัฮ. 35 ตานา เยซู อาฌัยํ เดะ รูมัฮ มือญือมัฮ ตูฮัด ญา มือเลา จะ "นู โกะ ซือมียา อาฌัยํ ลาฆู ปือมือซัด นะ ตูฮัด กูญา มือเลา จะ ' ราฌา นู บรี ซือลามัจ นะ ฌาดี บือแนฮ นะ ราฌา ดาวิด' นะ บือเลฮ กะฮามี เลอ? 36 ซือมืองัจ นะ ตูฮัด บือเลฮ ซูโรฮ ราฌา ดาวิด ตะอาซิก บรี ญา มือเลา จะ 'ตูฮัด บือซัยํ เดะ อาตัซ มือเลา ฌางัน ตูฮัด นะ กู จะ ดูโดะ เลอ โซะ ซือบือลัฮ กานัน นะ กู ตือดะ กู นะ บูวัจ บรี ลูมอฮ ซือตรู นะ เกา นะ ดูโดะ เดะ บาวัฮ ตาปะ กากี นะ เกา.' ดาวิด ญา จะ. 37 ราฌา ดาวิด ตะอาซิก ญา บลาโลก กะ ราฌา นู บรี ซือลามัจ อีตู จะ 'ตูฮัด.' กะฆีเตอ ญา นะ ฌาดี บือแนฮ นะ ดาวิด บือเลฮ กะฮามี?" เยซู ญา จะ. กะฆีเตอ โกะ ลูมอฮ ซือมียา บาญะ กูญา ซูกา นะ มือนีงัย นู เยซู มือเลา. 38 กะฆีเตอ เยซู ญา อาฌัยํ มือเลา จะ "กือนา ฌาฆา เลอ โกะ ซือมียา อาฌัยํ ลาฆู ปือมือซัด นะ ตูฮัด. กูญา ซูกา ปือแญะ บาฌู ปาญัก บือฌาลัด ปี มาแรฮ ซูกา บรี โกะ ซือมียา มือนูโนะ ซือมัฮ กะ กูญา เดะ ปาฌะ อีกัด เตอ. 39 เดะ รูมัฮ บือมุน เตอ เดะ ลาฆู มากัด บรามัย โปด กูญา ซูกา นะ ดูโดะ เดะ ตือปัจ นู บาฌิ เดะ กาวัด. 40 กูญา ราปัซ อาเมด โกะ ซือบารัก โกะ รูมัฮ นะ นีบีนี ฌานา เตอ. ตาปี กูญา ซืองาฌา บือซาโวจ ปาญักๆ เลอ. โกะ ซือมียา กะฆีนี กูญา นะ กือนา กรัจ ฮูโกบ ลือเบฮ เดะ กาวัด." เยซู ญา จะ. 41 กะฆีเตอ เยซู ดูโดะ ดาปิก เดะ ปือตี บอฮ ดูเวะ มือญือมัฮ กะ ตูฮัด ญา ลีฮัจ ลูมอฮ ซือมียา บาญะ บอฮ ดูเวะ เดะ ปือตี อีตู. อาดา ซือมียา กายา บาญะ อูรัก กูญา บอฮ ดูเวะ บาญะ. 42 อาดา นีบีนี ฌานา นู ฮาฌะ ซืออูรัก ญา มาแรฮ บอฮ รีเงะ ตือมาฆา ดูวา รีเงะ รือฆา ญา เตด รอจ ซือบัจ. 43 กะฆีเตอ เยซู บลาโลก โกะ มูเระ นะ ญา มาแรฮ มือเลา ฌางัน กูญา จะ "กู มือเลา ฌางัน กาเญา ลาฆู นู ซูโงฮ จะ นีบีนี ฌานา นู ฮาฌะ อีนี เตอ ญา บือเลฮ มือญือมัฮ ดูเวะ กะ ตูฮัด บาญะ ลือเบฮ เดะ กูญา ซือมูฮา นู บอฮ ดูเวะ เดะ ปือตี มือญือมัฮ เลอ. 44 กรานา-จะ กูญา อีตู ซือมูฮา กูญา อาดา บาญะ กูญา อาเมด ดูเวะ ลือเบฮ เดะ ซูโรฮ นะ กูญา มาแรฮ มือญือมัฮ. ตาปี นีบีนี ฌานา อีนี ญา ฮาฌะ โตระ. ดูเวะ นู ญา อาดา ซือมูฮา เตอ ญา บือเลฮ อาเมด มาแรฮ มือญือมัฮ ตือดะ ฮาบิฮ บลาญา นะ ญา เลอ." ญา จะ.
1 ตานา เยซู ตืองัฮ ตรือเบะ เดะ รูมัฮ มือญือมัฮ ตูฮัด อาดา มูเระ นะ ญา ซืออูรัก มือเลา ฌางัน ญา จะ "บูมอยํ เออ ลีฮัจ เลอ. โกะ รูมัฮ อีนี บือฆาจะ โตระ บูวัจ ฌางัน บาตู นู บาฌิ ซูโงฮ เลอ." 2 ตาปี เยซู มือเลา ฌางัน ญา จะ "เกา ลีฮัจ โกะ รูมัฮ บือซัยํ อีนี เฆอ? อีนี ซือมูฮา นะ กือนา ปรูโตฮ ฮาบิฮ. ฮอย บาตู ซือกือโตน โปด นู นะ บือซูโซด-ซูโซด กะฆีนี เลอ." ญา จะ. 3 ตานา เยซู ดูโดะ เดะ บูเกะ กือดูโนด รือมัก ฌางัน รูมัฮ มือญือมัฮ ตูฮัด อาดา เปโตร ยากอบ โยฮัน ฌางัน อันดรู ปัจ อูรัก มาแรฮ ซารี ญา ตาญา จะ 4 "มือญาเระ เลอ ลาฆู อีนี นะ บือฌาดี กาลา? อาดา ปือนานา นามา นู นะ บรี ลีฮัจ จะ ลาฆู อีนี ซือมูฮา นะ รอจ ดัฮ?" 5 กะฆีเตอ เยซู มือเลา ฌางัน กูญา จะ "กือนา ฌาฆา บรี บาฌิ เลอ ฌางัน บรี ซาปาๆ บาวา กาเญา ปี ซือซัจ ฌาลัด เลอ. 6 กรานา อาดา ซือมียา บาญะ นู นะ อาเกะ ซือโบจ นามา นะ กู มาแรฮ มือเลา จะ 'กู นี ฌาดี ซือมียา อีตู เลอ'. กะฆีเตอ กูญา นะ บาวา โกะ ซือมียา บาญะ ปี ซือซัจ ฌาลัด. 7 กาลา กาเญา ดืองัยํ จะ อาดา นังฆรี บือปรัก โซะ อีนี โซะ อีตู เตอ ฌางัน นะ ฆาโดฮ-ฮาตี เลอ. ซาเบะ ฆาโดฮ ฌาดี กะฆีเตอ ดัฮ ตาปี ฮอย เตด รอจ กะ วะตู ปือญูดัฮ ลาฆี. 8 อาดา ฌูฆา ลูมอฮ อีนี นะ บลาวัด ฌางัน ลูมอฮ อีตู. นังฆรี โซะ อีนี นะ บลาวัด ฌางัน นังฆรี โซะ อีตู. ญา นะ ฌาดี ตานัฮ บรีเงาะ บาญะ ตือปัจ. บาญะ ซือมียา นะ บือตาฮัด บารัก มากัด. ลาฆู กะฆีเตอ นะ ฌาดี ซือรูปา ลาฆู ลามูลา เดะ วะตู นู ซูซัฮ โตระ." ญา จะ. 9 "ตาปี กาเญา กือนา ฌาฆา ฮาตี ตะอาซิก บรี บาฌิ เลอ ซาเบะ กูญา นะ รีฆะ กาเญา อาตัจ ญาแญะ กะ ซัน. กาเญา นะ กือนา รือเปะ เดะ โกะ รูมัฮ บือมุน. กาเญา นะ กือนา บือดีรี โซะ ฮึลด โกะ ซือมียา ซัยํ-บือซัยํ โกะ ราฌา โปด กรานา กู. กะฆีเตอ กาเญา นะ ฌาดี ซะซี กะ กูญา เลอ. 10 บรีตา นู บาฌิ อีนี กือนา มือญาเระ กะ ลูมอฮ ซือมียา ราตา บักซา ดูลู. 11 กาลา กูญา นะ รีฆะ กาเญา อาตัจ กะ ซัน ฌางัน ฆาโดฮ-ฮาตี ดูลู เลอ นู กาเญา นะ ตีกัฮ มือเลา ลาฆู นามา เตอ. ปือมือเลา นามา นู ตูฮัด นะ บรี เดะ วะตู อีตู เตอ กือนา มือญาเระ เลอ. ซาเบะ บูกัด ปือมือเลา นะ กาเญา ตาปี ฌาดี ปือมือเลา นะ ซือมืองัจ นะ ตูฮัด. 12 กากา ซือตืองัฮ นะ อาตัจ อาดี บรี กือนา ฮูโกบ ยู มาตี. อาโปก ซือตืองัฮ โปด นะ อาตัจ นานะ กะฆีเตอ ฌูฆา. โกะ นานะ นะ บูวัจ กือบลากัก กะ โกะ เอด อาโปก เตอ บรี กือนา ฮูโกบ ยู มาตี ฌูฆา. 13 ซือมียา ซือมูฮา นะ บือชี กะ กาเญา กรานา กาเญา ตูเฮะ กะ นามา นะ กู เลอ. ตาปี ซือมียา ดีฮา นู ลาวัด ตาฮัด รอจ กะ นู ปือญูดัฮ เตอ ซือมียา อีตู เลอ นะ ฮีโดะ ลือปัซ บาฌิ ดัฮ." ญา จะ. 14 เยซู มือเลา ลาฆี จะ "ตาปี อาดา ซืออารี กาเญา นะ ลีฮัจ บือนา นู รูบือฮีรู โตระ นู บูวัจ บรี ตะอารัฮ เตอ ญา นะ ตืองะ เดะ ตือปัจ นู เตด ปาโตจ นะ ตืองะ เลอ (ซือมียา นู บาจา บรี ลาฆู อีนี มาโซะ เดะ ฮาตี เลอ). ตานา ลีฮัจ ดัฮ บรี โกะ ซือมียา เดะ นังฆรี ยูเดีย ลารี ปี กะ โซะ บูเกะ เลอ. 15 ซือมียา นู ดูโดะ เดะ ลอเตง ฌางัน บรี ญา ตูโรด มาโซะ กะ รูมัฮ อาเมด โกะ ซือบารัก บือปี ดูลู. 16 ซือมียา นู อาดา เดะ บือนัก ฌางัน บรี ญา ปาเระ มาแรฮ ซีงัฮ อาเมด บาฌู ซรือโกะ บือปี เลอ. บรี กูญา ลารี บูวัก ซือมูฮา. 17 เดะ กาลา อีตู ซูซัฮ ปายัฮ โตระ เลอ โกะ นีบีนี นู บือโปรจ โกะ นีบีนี นู อาดา นานะ มูดา นู มากัด ดาดา ลาฆี เตอ. 18 กือนา บือซาโวจ เลอ บรี ลาฆู อีนี นะ เตด บือฌาดี เดะ มูเซด บือแฌะ. 19 กรานา กาลา อารี อีตู นะ ฌาดี ซูซัฮ ปายัฮ โตระ นู โกะ ซือมียา เตด ดือละ ดาปัจ. ตะเดะ ลามูลา นู ตูฮัด บือฌาดี ดือนียา รอจ กะ ฮาดัจ อีนี เตด ดือละ ลีฮัจ นะ ซูซัฮ ปายัฮ โตระ กะฆีเตอ. เดะ วะตู โซะ ฮึลด เตอ นะ ฮอย เตด อาดา กะฆีเตอ ปูลัก เลอ. 20 กะ ตูฮัด เตด บูวัจ บรี วะตู อีตู ซีกัจ ปานะ ดัฮ ฮอย ซือมียา ซืออูรัก โปด นู นะ ฮีโดะ ลือปัซ เลอ. ตาปี ตูฮัด ญา ลีฮัจ กะ โกะ ซือมียา นู ญา ปีเลฮ ดัฮ กะฆีเตอ ญา บูวัจ บรี วะตู อีตู ซีกัจ ปานะ ดัฮ." ญา จะ. 21 "วะตู อีตู กะ อาดา ซือมียา มือเลา ฌางัน กาเญา จะ 'ลีฮัจ เลอ ราฌา นู บรี ซือลามัจ ญา อาดา โซะ อีนี.' เฆอ-จะ 'ญา อาดา โซะ อีตู.' กาเญา ฌางัน ปือจายา กะ กูญา เลอ. 22 กรานา อาดา โกะ ราฌา นู บรี ซือลามัจ วัจบูวัจ ฌางัน โกะ ซือมียา ตูโดฮ วัจบูวัจ นะ บือฌาดี บาญะ อูรัก กูญา นะ บูวัจ บรี ลีฮัจ ปือนานา นู มือฆัฮ นู ปือและ ซูโงฮ. กะ ฌาดี บือเลฮ กูญา นะ มืออูปัย บรี โกะ ซือมียา นู ตูฮัด ปีเลฮ ดัฮ นะ ซือซัจ ฌาลัด ฌูฆา เลอ. 23 ตาปี กาเญา เลอ กือนา ฌาฆา บรี บาฌิ. ลาฆู ซือมูฮา อีนี กู บือเลฮ มือญาเระ กะ กาเญา ดัฮ บรี กาเญา ตาฮู ดูลู." ญา จะ. 24 "ตาปี ลือปัซ เดะ วะตู นู ซูซัฮ ปายัฮ โตระ อีตู ดัฮ เดะ วะตู อีตู มาตาอารี นะ กือลับ บูลัด นะ ฮอย เตด ซูโลฮ จรัฮ ลาฆี ดัฮ. 25 ลูมอฮ บีตัก นะ ฆูโฆยํ เดะ ลาแงะ. โกะ ลาฆู ปือมือฆัฮ เดะ โซะ ลาแงะ นะ บรีเงาะ บือฆาญะ. 26 วะตู อีตู เลอ กูญา นะ ลีฮัจ กู นู นานะ นะ อูมัจ-ซือมียา เตอ กู นะ มาแรฮ เดะ โซะ กือมูวัง นะ มาแรฮ ฌางัน นู มือฆัฮ บาญะ ซูโงฮ ฌางัน นู บือซรี บือซายา เลอ. 27 กะฆีเตอ กู นะ ซูโรฮ โกะ ฮูลู-บาลัก ปี ปือมุน บือซามา โกะ ลูมอฮ ซือมียา นู ตูฮัด ปีเลฮ ดัฮ นู ดาตัก เดะ ปัจ บือดาฮะ ตะเดะ ตือกอซ ปือญูดัฮ เดะ ดือนียา ยู รอจ กะ ตือกอซ ปือญูดัฮ เดะ ลาแงะ เลอ." ญา จะ. 28 "กาเญา กือนา บลาฌัยํ เลอ เดะ ลาฆู นู ปูโฮด กรายา-บูดี ตูโญะ บรี ลีฮัจ. ตานา ญา บือปูโจะ นะ ตรือเบะ ดาโวด กะฆีเตอ กาเญา นะ ตาฮู จะ มูเซด ฮางัจ ดาปิก นะ รอจ ดัฮ. 29 กะฆีเตอ ฌูฆา ตานา กาเญา นะ ลีฮัจ ลาฆู ซูซัฮ กะฆีเตอ บือฌาดี มาแรฮ กาเญา นะ ตาฮู จะ วะตู อีตู ดาปิก นะ รอจ ดัฮ ฆามะ-จะ อาดา เดะ ปีตู ดัฮ เลอ. 30 กู มือเลา ฌางัน กาเญา ลาฆู นู ซูโงฮ จะ โกะ ซือมียา ฮาดัจ อีนี นะ ฮอย เตด มือนีงัน ปี ดูลู เดะ ลาฆู อีนี ซือมูฮา นะ บือฌาดี มาแรฮ. 31 ลาแงะ ฌางัน ดือนียา นะ ลือแงะ ปี ฮาบิฮ ดัฮ ตาปี ปือมือเลา นะ กู นะ ฮอย เตด ลือแงะ ลาลู เลอ." 32 "ตาปี นะ ฌาดี อารี ดีฮา วะตู ดีฮา ฮอย ซาปา นะ ตาฮู. มีเซ ลูมอฮ ฮูลู-บาลัก เดะ ลาแงะ โปด กูญา เตด ตาฮู. นู นานะ นะ ตูฮัด โปด ญา เตด ตาฮู ฌูฆา. อาดา ซา อาโปก เดะ อาตัซ ญา เลอ นู ตาฮู. 33 กือนา ตูงู ฌาฆา เลอ ซาเบะ กาเญา เตด ตาฮู วะตู อีตู นะ รอจ กาลา." ญา จะ. 34 "กะฆีเตอ ซือรูปา ตูฮัด รูมัฮ ซืออูรัก ญา นะ บือฌาลัด ปี ฌาโวฮ. วะตู ญา นะ ตรือเบะ เดะ รูมัฮ ปี โปด ญา กีเรบ เดะ โกะ ปราโซฮ นะ ญา บรี กูญา บือกรือฌา ตูโรจ บือกะ กรือฌา นะ กูญา ซิกมาซิก. ญา ปือซัด ซือมียา นู ฌาฆา ปีตู เตอ บรี ญา อาดา ฌาฆา บรี บาฌิ เลอ. 35 กะฆีเตอ กาเญา ฌาฆา เลอ กรานา กาเญา เตด ตาฮู จะ ตูฮัด รูมัฮ นะ มาแรฮ กาลา. วะตู มาลับ เฆอ วะตู ตืองัฮ มาลับ เฆอ วะตู ฮายับ มูเกาะ เฆอ-จะ วะตู ซียัก ดัฮ? 36 กะฆีเตอ ฌาฆา เลอ ตาโกจ-จะ ญา นะ บาลิ งูฆางู มาแรฮ ดาปัจ กาเญา ตืองัฮ ตีโนะ ลีนา. 37 นู กู มือเลา ฌางัน กาเญา กู มือเลา ฌางัน ซือมียา ซือมูฮา จะ ฌาฆา เลอ." ญา จะ.
1 อาดา ดูวา อารี นะ รอจ อารี บรามัย ลือปัซ ปี ฌางัน ลาฆู บรามัย มากัด โรตี ฮอย ราฆี. กะฆีเตอ ลูมอฮ ซามี ซัยํ-บือซัยํ ฌางัน โกะ ซือมียา อาฌัยํ ลาฆู ปือมือซัด นะ ตูฮัด กูญา ซารี ปรือลก นะ มือฮึนะ รีฆะ บูนอฮ เยซู. 2 ตาปี กูญา มือเลา จะ "เดะ อารี บือซัยํ ฌางัน นะ บูวัจ นามา ตาโกจ-จะ ลูมอฮ ซือมียา บาญะ นะ ปาคัจ ฆรูมง บลาวัด ฌางัน กีตา". 3 วะตู เยซู อาดา เดะ ตูโปะ เบดทานี ดูโดะ มากัด เดะ รูมัฮ ซีโมน นู กาลา ดูลู ญา ฌาดี ซือมียา ปือญาเกะ ปูรู อาดา นีบีนี ซืออูรัก มาแรฮ. ญา อาดา ลีบูลี นู บูวัจ ฌางัน บาตู ปูเตฮ อาดา มีญะ บาวู เดะ ดาลับ. มีญะ บาวู อีตู ปือนามา นาระดา ฌาดี มีญะ นู บาฌิ รือฆา มาฮัน โตระ. ญา กาเตาะ มูโลจ ลีบูลี อีตู ปือจัฮ ดัฮ อูแร มีญะ บาวู อีตู เดะ อาตัซ ปาลา นะ เยซู. 4 ตาปี อาดา ซือมียา ซือตืองัฮ กูญา รีเซา-ฮาตี กูญา มือเลา ซามา กูญา จะ "บูวัจ นามา ปะ ญา บูวัจ บรี มีญะ มาฮัน อีนี เตด ฌาดี นามา? 5 มีญะ อีนี ดัฮ ฌูวัน ฆามะ บือเลฮ รือฆา ตีฆา ราตุซ รีเงะ ลือเบฮ. กะฆีเตอ นะ ฮาฆิ กะ โกะ อูรัก ฮาฌะ โปด บือเลฮ." กูญา อูจะ กะ นีบีนี อีตู กะฆีเตอ เลอ. 6 ตาปี เยซู มือเลา ฌางัน กูญา จะ "บือบียัยํ ญา เลอ. บูวัจ นามา กาเญา บือฆาโดฮ นีบีนี อีนี? ญา บูวัจ ลาฆู นู บาฌิ ซูโงฮ กะ กู ดัฮ. 7 อาดา โกะ อูรัก ฮาฌะ ดูโดะ ดาปิก กาเญา ซือรูโลยํ. กาเญา นะ ตูโลก ลูมอฮ อีตู วะตู ดีฮา ตูโลก บือเลฮ เลอ. ตาปี โซะ กู นี กู นะ ดูโดะ ฌางัน กาเญา เตด บราปา ลามา ดัฮ เลอ. 8 บือกะ ญา บูวัจ บือเลฮ ญา บูวัจ ดัฮ. กู เตด มาตี ลาฆี ตาปี ญา มาแรฮ อูแร มีญะ เดะ ญาวา นะ กู ซือรูปา ญา บือเลฮ บือมานี บาดัด นะ กู ดูลู ดัฮ ซียะ นะ ตานัม เลอ. 9 กู มือเลา ฌางัน กาเญา ลาฆู นู ซูโงฮ จะ ราตา ดือนียา เปะ ดีฮา นู กูญา ปี มือญาเระ บรีตา นู บาฌิ อีนี เปะ อีตู เลอ กูญา นะ มือเลา ลาฆู ปือบูวัจ นะ นีบีนี อีนี กูญา นะ ปาคัจ อีงัจ รอจ กะ ญา เลอ." เยซู ญา จะ. 10 กะฆีเตอ ยูดา อิดคารีโยด ซืออูรัก เดะ โกะ มูเระ ดูวา-บือลัซ อูรัก อีตู เตอ ญา ปี ซารี ลูมอฮ ซามี ซัยํ-บือซัยํ ญา อีงัจ นะ ซรัฮ เยซู บรี กูญา รีฆะ. 11 ตานา กูญา อีตู ดืองัยํ ดัฮ กูญา ซูกา-ฮาตี. กูญา บือฌาญี นะ บรี ดูเวะ กะ ยูดา. กะฆีเตอ ยูดา เตอ ญา ซารี จือลัฮ นะ ซรัฮ เยซู กะ ลูมอฮ กูญา. 12 อารี ลามูลา นะ ลาฆู บรามัย มากัด โรตี ฮอย ราฆี นู ฌาดี อารี กูญา ลาดัจ บูนอฮ มือญือมัฮ อานะ กาเมก บีดา ลาฆู บรามัย ลือปัซ ปี อีตู เตอ โกะ มูเระ นะ เยซู ตาญา ญา จะ "เกา นะ บรี กามี ซียะ บูวัจ บารัก มากัด ลาฆู บรามัย ลือปัซ ปี โซะ ดีฮา เลอ?" 13 กะฆีเตอ เยซู ซูโรฮ มูเระ นะ ญา ดูวา อูรัก มือเลา ฌางัน กูญา จะ "ปี มาโซะ กะ นังฆรี เลอ. อาดา กีลากี ซืออูรัก ตาโงก อาเย เดะ ฆูรี ญา นะ มาแรฮ ดาปัจ กาเญา. กือนา ตูโรจ กะ กีลากี อีตู เลอ. 14 ญา นะ มาโซะ กะ รูมัฮ เปะ ดีฮา กาเญา กือนา มาโซะ มือเลา ฌางัน ตูฮัด รูมัฮ จะ 'บูมอยํ นะ กามี ซูโรฮ ตาญา จะ อาดา รูวัก เปะ ดีฮา นู ญา ฌางัน โกะ มูเระ นะ ญา นะ มากัด ลาฆู ลือปัซ ปี?' 15 ตูฮัด รูมัฮ อีตู นะ ตูโญะ กะ กาเญา จะ อาดา รูวัก บือซัยํ เดะ อาตัซ นู ปือตัด ซียะ ดัฮ. กือนา ซียะ บารัก มากัด เดะ รูวัก อีตู เลอ." ญา จะ. 16 โกะ มูเระ ดูวา อูรัก อีตู กูญา ปี มาโซะ กะ นังฆรี. กูญา ดาปัจ รือมัก ดัฮ บือกะ เยซู บือเลฮ มือเลา เลอ. กะฆีเตอ กูญา ซียะ บารัก มากัด ลาฆู บรามัย ลือปัซ ปี. 17 รอจ วะตู ปะฮึญา เยซู ญา มาแรฮ ฌางัน โกะ มูเระ ดูวา-บือลัซ อูรัก อีตู. 18 ตานา กูญา อีตู ดูโดะ มากัด บือซามา เยซู มือเลา จะ "กู มือเลา ฌางัน กาเญา ลาฆู นู ซูโงฮ จะ อาดา ซือมียา ซืออูรัก เดะ ลูมอฮ กาเญา ซืออูรัก นู ตืองัฮ มากัด ฌางัน กู เตอ ญา เลอ นะ ซรัฮ กู บรี กือนา รีฆะ ดัฮ." ญา จะ. 19 กะฆีเตอ โกะ มูเระ นะ ญา เตอ กูญา ปาคัจ ซูซัฮ-ฮาตี ตาญา เยซู ซือกาลี ซืออูรัก จะ "อีซี กู เฆอ?" 20 เยซู มือเลา ฌางัน กูญา จะ "อาดา ซืออูรัก เดะ ลูมอฮ ดูวา-บือลัซ อูรัก กาเญา อีนี. ญา เลอ ซืออูรัก อาเงา ตางัน อาเมด ตือโปก มาแรฮ ฌูโฌน ซือฌับ ฌางัน กู. 21 กู นู นานะ นะ อูมัจ-ซือมียา อีนี กู นะ ปี มาตี บือกะ อาดา ฆาแรฮ ดัฮ เดะ ซูรัจ ปือมือเลา นะ ตูฮัด ปาซัน ลาฆู นะ กู. ตาปี จือลากา เลอ ซือมียา นู ซรัฮ กู บรี กือนา รีฆะ. กะ ซือมียา อีตู เตด บือฌาดี โปด บาฌิ เลอ." ญา จะ. 22 กะฆีเตอ ตานา กูญา อีตู ตืองัฮ มากัด เยซู ญา อาเมด ตือโปก โรตี มาแรฮ บรี ซือลามัจ กะ ตูฮัด เดะ อาตัซ. ญา ลือแปะ ตือโปก โรตี อีตู อูโญะ บรี กะ กูญา. ญา มือเลา จะ "อาเมด เลอ. อีนี ฌาดี ญาวา นะ กู." 23 กะฆีเตอ เยซู อาเมด เจาะ อาระ อางุน มาแรฮ บรี ซือลามัจ กะ ตูฮัด. ญา บรี เจาะ อีตู กะ กูญา. กะฆีเตอ กูญา โปด โอะ ซือมูฮา. 24 ญา มือเลา ฌางัน กูญา จะ "อีนี เลอ ฌาดี ดารัฮ นะ กู นู บรี ปือมือเลา บือปาคัจ นะ ตูฮัด ฌาดี ตือตู ดัฮ. ดารัฮ อีตู นะ มือนีเลฮ ตรือเบะ กรานา ซือมียา บาญะ เลอ. 25 กู มือเลา ฌางัน กาเญา ลาฆู นู ซูโงฮ จะ อาเย บูวัฮ อางุน อีนี กู นะ เตด โอะ ปูลัก ตือดะ อารี อีตู นู กู นะ โอะ อาระ อางุน นู บารู เดะ ดือนียา บารู อีตู นู ตูฮัด ฌาดี ราฌา." ญา จะ. 26 ตานา กูญา มือญาญี ปูฌี กะ ตูฮัด ดัฮ กูญา ตรือเบะ ปี กะ บูเกะ กือดูโนด. 27 กะฆีเตอ เยซู มือเลา ฌางัน กูญา จะ "กาเญา ซือมูฮา นะ จือและ ตีงัน กู บือกะ ลาฆู นู ฆาแรฮ ดัฮ เดะ ซูรัจ ปือมือเลา นะ ตูฮัด จะ 'กู นะ กาเตาะ ซือมียา บือบือลา กาเมก บรี มาตี. กะฆีเตอ โกะ กาวัด กาเมก นะ ปือจัฮ-บือลัฮ ปี ฮาบิฮ ดัฮ.' ญา จะ 28 ตาปี ลือปัซ กู ฮีโดะ ปาเระ เดะ มาตี ดัฮ กู นะ ปี ดูลู เดะ กาเญา กะ นังฆรี ฆาลิลี." เยซู ญา จะ. 29 กะฆีเตอ เปโตร มือเลา ฌางัน ญา จะ "มีเซ-จะ กูญา ซือมูฮา นะ ตีงัน เกา บูวัก ตาปี กู นี เลอ นะ ฮอย เตด ตีงัน เกา." 30 ตาปี เยซู มือเลา ฌางัน ญา จะ "กู มือเลา ฌางัน เกา ลาฆู นู ซูโงฮ จะ มาลับ อีนี เตอ ดูลู เดะ ฮายับ นะ มูเกาะ ดูวา กาลี เกา นะ มือเลา กีปัซ กู บูวัก ตีฆา กาลี เลอ." ญา จะ. 31 ตาปี เปโตร ญา มือเลา กือมัซๆ จะ "มีเซ กู ฆาโดฮ มาตี บือซามา ฌางัน เกา โปด กู นะ เตด มือเลา กีปัซ กะ เกา เลอ." กูญา ซือมูฮา มือเลา กะฆีเตอ ฌูฆา. 32 กะฆีเตอ กูญา ปี กะ ตือปัจ ปือนามา จะ เฆดเซมานี. เยซู มือเลา ฌางัน โกะ มูเระ นะ ญา จะ "ดูโดะ เลอ เปะ อีนี. กู นะ ปี บือซาโวจ." 33 ญา อาเมด เปโตร ยากอบ ฌางัน โยฮัน บือปี ซามา. กะฆีเตอ ญา บราซา ฆาโดฮ-ฮาตี โตระ ฌาโวฮ-ฮาตี บือตามัฮ บาญะ ซือรูโลยํ. 34 ญา มือเลา ฌางัน กูญา จะ "ฮาตี กู บราซา ซูซัฮ โตระ เลอ มาจับ นะ มาตี. กาเญา นาตี ตูงู ฌาฆา โซะ อีนี เลอ." 35 กะฆีเตอ เยซู บือฌาลัด ปี ดีกิ ญา ตือมะ กะ ตานัฮ บือซาโวจ จะ "กะ ฌาดี บือเลฮ มีตา บรี วะตู นู ซูซัฮ อีนี นะ ลือปัซ ปี เดะ กู เลอ." 36 ญา มือเลา จะ "อับบา โอ อาโปก เดะ กู บือนา ซือมูฮา อาโปก บูวัจ บือเลฮ ฮาปา. มีตา อาเมด ลาฆู ซูซัฮ อีนี นู ซือรูปา กะ เจาะ ปือนอฮ อาระ อูบัฮ ปี ฌาโวฮ เดะ กู เลอ. ตาปี ฌางัน บรี ฌาดี บือกะ ฮาตี นะ กู บรี ฌาดี บือกะ นู ฮาตี นะ อาโปก ซูกา เลอ." ญา จะ. 37 กะฆีเตอ เยซู มาแรฮ ดาปัจ ตีฆา อูรัก อีตู ตืองัฮ ตีโนะ ลีนา ดัฮ. ญา มือเลา ฌางัน เปโตร จะ "ซีโมน เออ เกา ลีนา ดัฮ เฆอ? เกา ตูงู ฌาฆา แนฮ ซือฌับ เตด บือเลฮ เฆอ? 38 ฌาฆา เลอ บือซาโวจ เลอ ตีเมา บรี กือนา ลกลีฮัจ บรี บูวัจ ดูซา. โซะ ฮาตี กาเญา รือมา นะ ตูโรจ เตอ ตาปี อีซี ญาวา นะ กาเญา ลือมัฮ ฮอย อูรัจ เลอ." ญา จะ. 39 กะฆีเตอ เยซู ปี ปูลัก ญา บือซาโวจ บือกะ ลาฆู นู ดูลู. 40 ญา ปาเระ มาแรฮ ปูลัก ลีฮัจ กูญา ตืองัฮ ลีนา กรานา กูญา มืองาโตะ ซูโงฮ. กะฆีเตอ กูญา โปด เตด ตาฮู นะ ตีกัฮ กะ ญา กะฮามี. 41 กะฆีเตอ ญา มาแรฮ ยู รอจ กะ ตีฆา กาลี มือเลา ฌางัน กูญา จะ "กาเญา นะ ตีโนะ ลีนา บรี ฮอย รือมัย ลาฆี เฆอ? ฌาดี ดัฮ เลอ. รอจ วะตู ดัฮ. กู นู นานะ นะ อูมัจ-ซือมียา อีนี นะ กือนา ซรัฮ บรี กะ โกะ ซือมียา บือดูซา นะ รีฆะ. 42 บีกัซ เลอ บรี กีตา ปี บือซามา. ลีฮัจ เลอ ซือมียา นู นะ ซรัฮ กู บรี กือนา รีฆะ ญา มาแรฮ ดาปิก ดัฮ." ญา จะ. 43 ดัดดัด อีตู ตืองัฮ เยซู ญา มือเลา เตด ดัด ฮาบิฮ อาดา ยูดา นู ซืออูรัก เดะ ลูมอฮ มูเระ ดูวา-บือลัซ อูรัก อีตู เตอ ญา มาแรฮ รอจ ดัฮ. อาดา ลูมอฮ ซือมียา บาญะ อูรัก มาแรฮ ซามา อาดา ฌางัน ปือดัก ฌางัน ตูกัจ. ลูมอฮ อีตู มาแรฮ ดาตัก เดะ โกะ ลูมอฮ ซามี ซัยํ-บือซัยํ โกะ ซือมียา อาฌัยํ ลาฆู ปือมือซัด นะ ตูฮัด ฌางัน โกะ อูรัก ตูฮา ซามา. 44 ซือมียา นู นะ ซรัฮ เยซู เตอ ญา บือเลฮ บรี ปือนานา กะ โกะ ลูมอฮ ซือมียา บาญะ อีตู จะ "ดัฮ กู จีโยบ ซือมียา ดีฮา ฌาดี ซือมียา อีตู เลอ. บรี กาเญา รีฆะ ญา บรี กือมัซ บาวา บือปี เลอ." 45 ตานา ยูดา มาแรฮ ดัฮ ดัดดัด ญา ปี รอจ กะ เยซู มือเลา จะ "บูมอยํ เออ." กะฆีเตอ ญา จีโยบ เยซู. 46 กะฆีเตอ โกะ ซือมียา นู บาญะ อีตู กูญา มาแรฮ รีฆะ เยซู ยู กือมัซ ดัฮ. 47 ตาปี อาดา ซือมียา ซืออูรัก นู บือดีรี โซะ อีตู ญา ซีตะ ปือดัก บาโฮะ ปราโซฮ ซืออูรัก นะ กือปาลา ซามี กือนา เดะ ตือลีงา ยู ปูตุซ ดัฮ. 48 กะฆีเตอ เยซู มือเลา ฌางัน กูญา จะ "กาเญา ปือฆัก ปือดัก ปือฆัก ตูกัจ มาแรฮ รีฆะ กู ซือรูปา กู ฌาดี อูรัก ปือญามุน เฆอ? 49 อารีๆ กู อาดา ฌางัน กาเญา อาดา อาฌัยํ เดะ รูมัฮ มือญือมัฮ ตูฮัด ตาปี กาเญา เตด มาแรฮ รีฆะ กู เลอ ตาปี ลาฆู นู ฆาแรฮ ดัฮ เดะ ซูรัจ ปือมือเลา นะ ตูฮัด ฆาโดฮ นะ ซุจ รือมัก ดัฮ." 50 กะฆีเตอ โกะ มูเระ กูญา ปาคัจ ตีงัน เยซู ลารี ปี ซือมูฮา ดัฮ. 51 ตาปี อาดา อูรัก มูดา ซืออูรัก ญา บือซาโปจ ซา กาเยด นีปิฮ ตูโรจ กะ เยซู ปี. กะฆีเตอ โกะ ลูมอฮ ซือมียา บาญะ กูญา นะ รีฆะ อูรัก มูดา อีตู 52 ตาปี ญา ปรือลอจ ตีงัน กาเยด อีตู ญา ลารี ปี ญัก-ตือลาญัก เลอ. 53 กะฆีเตอ กูญา บาวา เยซู บือปี กะ กือปาลา ซามี. อาดา โกะ ลูมอฮ ซามี ซัยํ-บือซัยํ โกะ อูรัก ตูฮา โกะ ซือมียา อาฌัยํ ลาฆู ปือมือซัด นะ ตูฮัด กูญา บือมุน ดัฮ ซือมูฮา. 54 ตาปี เปโตร เตอ ญา ตูโรจ เยซู ปี โวฮ-ฌาโวฮ มาโซะ รอจ กะ ลามัน รูมัฮ นะ กือปาลา ซามี. ญา ดูโดะ บือดียัก เดะ อาปี ฌางัน ลูมอฮ ซือมียา ฌาฆา. 55 ลูมอฮ ซามี ซัยํ-บือซัยํ ฌางัน โกะ ลูมอฮ บือมุน บือกีรา ซือมูฮา กูญา ซารี ซะซี อาดู กะ เยซู บีดา นะ บรี ญา กือนา ฮูโกบ มาตี ตาปี ฮอย เตด ดาปัจ ลาลู. 56 อาดา บาญะ ซือมียา มาแรฮ ฌาดี ซะซี มืออูปัย อาดู กะ เยซู ตาปี ปือมือเลา นะ กูญา อาซิกๆ ฮอย เตด รือมัก. 57 อาดา ซือตืองัฮ บือดีรี ฌาดี ซะซี มืออูปัย อาดู เยซู จะ 58 "โซะ กามี เลอ บือเลฮ ดืองัยํ ญา มือเลา จะ 'กู นะ ปรูโตฮ บาลัย นะ ตูฮัด อีนี นู บูวัจ ฌางัน ตางัน ซือมียา ดัฮ. เดะ ดาลับ ตีฆา อารี กู นะ อาเกะ บาลัย นู อาซิก นู ฮอย เตด บูวัจ ฌางัน ตางัน ซือมียา.' " กูญา จะ. 59 ตาปี มีเซ กะฆีนี โกะ ปือมือเลา ซะซี เตด กือนา ลาฆู มือเลา ฮอย เตด ซือรูปา เลอ. 60 กะฆีเตอ กือปาลา ซามี ญา บือดีรี เดะ โซะ ฮึลด ตาญา เยซู จะ "บูวัจ นามา เกา เตด ตีกัฮ นามา โปด? นู กูญา อาดู เกา ดัฮ ฌาดี กะฮามี เลอ?" 61 ตาปี เยซู ซืองะ ฮอย เตด มือเลา นามา. กือปาลา ซามี ตาญา ญา ปูลัก จะ "เกา เลอ ฌาดี ราฌา นู บรี ซือลามัจ เฆอ? ฌาดี นานะ นะ ตูฮัด บือซัยํ เดะ อาตัซ เฆอ?" 62 กะฆีเตอ เยซู มือเลา จะ "กู นี เลอ ฌาดี กะฆีเตอ. กะฆีเตอ กาเญา นะ ลีฮัจ กู นู นานะ นะ อูมัจ-ซือมียา อีนี อาดา ดูโดะ เดะ โซะ กานัน นะ ตูฮัด นู มือฆัฮ ซูโงฮ. กาเญา นะ ลีฮัจ กู มาแรฮ เดะ อาตัซ กือมูวัง โซะ ลาแงะ เลอ. " ญา จะ. 63 กะฆีเตอ กือปาลา ซามี ญา จูลัด กาเยด บาฌู นะ ญา บรี จีแจะ มือเลา จะ "เตด ปายัฮ ซารี ซะซี ลาฆี เลอ. 64 กาเญา ดืองัยํ ดัฮ ญา มือเลา ตะอารัฮ กะ ตูฮัด บือซัยํ เดะ อาตัซ กะฆีนี. กาเญา ซือมูฮา นะ กีรา กะฮามี เลอ?" ญา จะ. ซือมียา ซือมูฮา บรี มูโลจ จะ "ญา ฆาโดฮ กือนา ฮูโกบ รอจ กะ มาตี เลอ." 65 ซือมียา ซือตืองัฮ ปือทุย อาเย ลีโยยํ เดะ ญาวา นะ ญา. ซือตืองัฮ ตูโดก มูคา มาตา นะ ญา ตาปัยํ ญา. กูญา มือเลา จะ "ตูโดฮ เลอ ซาปา นู ตาปัยํ เกา?" โกะ ซือมียา ฌาฆา โปด อาเมด ตางัน กาเตาะ ญา ฌูฆา. 66 กะฆีเตอ เปโตร ญา อาดา เดะ ลามัน โซะ บาวัฮ. อาดา นีบีนี มาแรฮ ซืออูรัก นู ฌาดี ปราโซฮ นะ กือปาลา ซามี. 67 ตานา ญา บือฆารี เปโตร บือดียัก เดะ อาปี ญา ฌือเงาะ ลีฮัจ มือเลา จะ "เกา ฌูฆา เลอ ดูโดะ ฌางัน เยซู ซือมียา ตูโปะ นาซาเรด อีตู." 68 ตาปี เปโตร มือเลา กีปัซ ตีกัฮ จะ "นู เกา มือเลา เตอ กู เตด ตาฮู ฮอย เตด มาโซะ เดะ ฮาตี เลอ." กะฆีเตอ ญา ตรือเบะ ปี ดูโดะ เดะ ปีตู ปาฆัยํ รูมัฮ. [ฮายับ โปด ญา มูเกาะ ดัฮ.] 69 ตานา นีบีนี อีตู ลีฮัจ ญา ปูลัก ญา มือเลา ฌางัน ซือมียา นู บือดีรี โซะ อีตู จะ "อูรัก อีนี เลอ ฌาดี ซือมียา ลูมอฮ อีตู ฌูฆา." 70 ตาปี เปโตร มือเลา กีปัซ ปูลัก. ซือฌูรุซ โกะ ซือมียา โซะ อีตู มือเลา ฌางัน เปโตร จะ "ซูโงฮ เลอ เกา ฌาดี ซือมียา ลูมอฮ อีตู. กรานา เกา ฌาดี ซือมียา ลูมอฮ ฆาลิลี เลอ." 71 ตาปี เปโตร อาเกะ มือเลา บือซูปัฮ จะ "ซูโงฮ เลอ ซือมียา นู กาเญา มือเลา เตอ กู เตด กราลา ลาลู." 72 ดัดดัด อาดา ฮายับ มูเกาะ มาโซะ กือดูวา กาลี. กะฆีเตอ เปโตร ญา โตะ-ตืออีงัจ กะ ปือมือเลา นะ เยซู บือกะ นู เยซู บือเลฮ มือเลา ฌางัน ญา จะ "ดูลู เดะ ฮายับ มูเกาะ ดูวา กาลี เกา นะ มือเลา กีปัซ กู ตีฆา กาลี เลอ." ตานา เปโตร บือเลฮ อีงัจ ญา มือนาแงฮ โตระ.
1 ตานา มูกัยํ ดัฮ ดัดดัด ลูมอฮ ซามี ซัยํ-บือซัยํ โกะ อูรัก ตูฮา โกะ ซือมียา อาฌัยํ ลาฆู ปือมือซัด นะ ตูฮัด โกะ ลูมอฮ บือมุน บือกีรา ซือมูฮา เตอ กูญา ปาคัจ มาแรฮ บือมุน บือกีรา บือซามา. กูญา อีกัจ เยซู บือปี อาตัจ กะ ปีลาด นู ฌาดี ฮูลู-บาลัก นะ ราฌา ซีซา. 2 กะฆีเตอ ปีลาด ตาญา เยซู จะ "เกา นี ฌาดี ราฌา นะ ลูมอฮ ยิว เฆอ?" เยซู ตีกัฮ กะ ญา จะ "เกา เลอ มือเลา กะฆีเตอ ดัฮ." 3 ลูมอฮ ซามี ซัยํ-บือซัยํ กูญา อาดู เยซู บาญะ ลาฆู. 4 กะฆีเตอ ปีลาด ตาญา เยซู ปูลัก จะ "นี เลอ กูญา อีตู อาดู เกา บาญะ ลาฆู. บูวัจ นามา ปะ เกา เตด ตีกัฮ กะ กูญา นามา โปด?" 5 ตาปี เยซู เตด ตีกัฮ นามา ปูลัก. กะฆีเตอ ปีลาด ปือและ-ฮาตี บาญะ. 6 เดะ ลาฆู บรามัย ลือปัซ ปี อีตู ปีลาด ญา บียาซา ปลือปัซ ซือมียา ซาลัฮ ซืออูรัก บือกะ กูญา มีตา. 7 เดะ ปือฌารา เตอ อาดา โกะ อูรัก ซาลัฮ นู บือเลฮ บลาวัด ฌางัน ลูวัก บือเลฮ บูนอฮ ซือมียา ฌูฆา เดะ วะตู บลาวัด อีตู. อาดา ซืออูรัก เดะ ลูมอฮ อีตู ปือนามา จะ บาระบา. 8 กะฆีเตอ ลูมอฮ ซือมียา บาญะ มาแรฮ มีตา เดะ ปีลาด บรี ปลือปัซ ซือมียา บือกะ ญา บียาซา บูวัจ. 9 กะฆีเตอ ปีลาด ตาญา กูญา จะ "กาเญา นะ บรี กู ปลือปัซ ราฌา นะ ลูมอฮ ยิว เฆอ?" 10 ซาเบะ ปีลาด ลีฮัจ จะ ลูมอฮ ซามี ซัยํ-บือซัยํ กูญา บือเลฮ อาตัจ เยซู กะ ญา ซาเบะ กูญา ดือกี กะ เยซู. 11 ตาปี ลูมอฮ ซามี ซัยํ-บือซัยํ กูญา อาโจบ โกะ ลูมอฮ ซือมียา นู บาญะ ซูโรฮ มีตา เดะ ปีลาด บรี ปลือปัซ บาระบา บรี กะ กูญา. 12 กะฆีเตอ ปีลาด ตาญา กูญา ปูลัก จะ "ดัฮ กะฆีเตอ กาเญา นะ บรี กู บูวัจ กะฮามี ฌางัน ซือมียา อีนี นู กาเญา บลาโลก จะ ราฌา นะ ลูมอฮ ยิว?" 13 ตาปี โกะ ซือมียา บาญะ ปาคัจ บือซูระ จะ "บือปี กาจิก เดะ กายู ปลีตัก เลอ." 14 ปีลาด ตาญา กูญา จะ "กาจิก บูวัจ นามา? ญา บูวัจ ลาฆู ฌาฮัจ นามา เลอ?" ดรัซ กูญา บือซูระ จะ "อาเมด ปี กาจิก เดะ กายู ปลีตัก เลอ." 15 ปีลาด ญา อีงัจ นะ อาเมด ฮาตี โกะ ซือมียา บาญะ อีตู. กะฆีเตอ ญา ปลือปัซ บาระบา บรี กะ กูญา อีตู. ญา ปือซัด บรี เยซู กือนา รือเปะ อาตัจ ญา บรี กือนา กาจิก เดะ กายู ปลีตัก. 16 กะฆีเตอ โกะ ลูมอฮ ตาฮัน บาวา เยซู บือปี กะ ลามัน เดะ บาลัย นะ ฮูลู-บาลัก นะ ราฌา. กูญา บลาโลก โกะ กาวัด ตาฮัน มาแรฮ บือมุน ซือมูฮา. 17 กูญา อาเมด กาเยด ซรือโกะ ญาวา ซี แนบปริง ปากัย บรี กะ เยซู. กูญา อาเมด อากัยํ บือดูรี มาแรฮ อาญัม ฌาดี บือกะ จูบุก บอฮ เดะ ปาลา นะ ญา. 18 กะฆีเตอ กูญา มาแรฮ มือนูโนะ กะ ญา มือเลา จะ "ซือลามัจ เลอ เกา นู ราฌา นะ ลูมอฮ ยิว." 19 กะฆีเตอ กูญา อาเมด กายู รีโยก มาแรฮ กาเตาะ ปาลา นะ ญา ปือทุย อาเย ลีโยยํ เดะ ญาวา นะ ญา. กูญา ตูกู ลูโตจ ซือมัฮ กะ ญา. 20 ซูดัฮ อาฆัฮ-ฆือละ กะ ญา กะฆีเตอ ดัฮ กูญา อูฆัย กาเยด ซี แนบปริง บอฮ กาเยด บาฌู นะ ญา ปาเระ. กะฆีเตอ กูญา บาวา ญา บือปี บีดา นะ กาจิก ญา เดะ กายู ปลีตัก เลอ. 21 อาดา ซือมียา ซืออูรัก ปือนามา ซีโมน ซือมียา เดะ นังฆรี ซัยรีน. ญา เตอ ฌาดี อาโปก เดะ อาเลกซันเดอ ฌางัน รูฟัด. ญา ตืองัฮ บือฌาลัด มาแรฮ ดาตัก เดะ ปาดัก โซะ ลูวัยํ นะ มาโซะ กะ นังฆรี เดะ ฌาลัด อีตู. ลูมอฮ ตาฮัน กูญา ปรือกัด ซูโรฮ ซีโมน อีตู บรี ตาโงก กายู ปลีตัก นะ เยซู. 22 กูญา บาวา เยซู บือปี รอจ กะ ตือปัจ นู บลาโลก จะ โฆละโฆทา ฌาดี-จะ ตือปัจ ตูลัก กือปาลา. 23 กูญา นะ บรี เยซู โอะ อาระ อางุน นู จาโปยํ ฌางัน อูบัจ มดยอบ ตาปี ญา ตีเมา โอะ. 24 กะฆีเตอ กูญา กาจิก เยซู เดะ กายู ปลีตัก. กูญา อาเมด กาเยด บาฌู นะ ญา ปาคัจ ยิบละ ปาฮาฆิ ลีฮัจ จะ ซาปา นะ บือเลฮ นู ดีฮา. 25 กูญา กาจิก เยซู เดะ วะตู ปูโกยํ ซือมีลัด ปาฆี. 26 อาดา ปาปัด นู ฆาแรฮ ปาซัน นู ญา กือนา อาดู นู จะ "ราฌา นะ ลูมอฮ ยิว". 27 กูญา บาวา อูรัก ปือญามุน ดูวา อูรัก มาแรฮ กาจิก บือซามา ฌางัน เยซู โซะ กานัน ซา โซะ กีรี ซา. 29 โกะ ซือมียา นู บือฌาลัด ปี มาแรฮ เตอ กูญา อีลิก ปาลา อาฆัฮ-ฆือละ มือเลา ตะอารัฮ อูจะ กะ เยซู จะ "เออ เกา นู นะ ปรูโตฮ บาลัย นะ ตูฮัด นะ บูวัจ ปาเระ เดะ ตีฆา อารี เตอ 30 ตูโลก ญาวา ตะอาซิก บรี ลือปัซ เลอ. ตูโรด มาแรฮ เดะ กายู ปลีตัก เลอ." กูญา จะ. 31 กะฆีเตอ ฌูฆา ลูมอฮ ซามี ซัยํ-บือซัยํ ฌางัน โกะ ซือมียา อาฌัยํ ลาฆู ปือมือซัด นะ ตูฮัด เตอ กูญา ปาคัจ อาฆัฮ-ฆือละ กะ เยซู มือเลา ซามา กูญา จะ "ซือมียา อาซิก ญา บือเลฮ ตูโลก ดัฮ ตาปี ญาวา นะ ญา ตะอาซิก เตอ ญา นะ ตูโลก เตด บือเลฮ เลอ. 32 ญา เลอ ฌาดี ราฌา นู บรี ซือลามัจ ราฌา นะ ลูมอฮ อิซราเอน นอ บรี ญา ตูโรด มาแรฮ เดะ กายู ปลีตัก เดะ วะตู อีนี เลอ บีดา กีตา นะ ลีฮัจ บือฆารี นะ บือเลฮ ปือจายา กะ ญา ฌูฆา." กูญา จะ. กะฆีเตอ โกะ ซือมียา นู กือนา กาจิก บือซามา ฌางัน เยซู เตอ กูญา โปด บือเลฮ มือเลา มือฌัฮ อูจะ กะ ญา ฌูฆา. 33 วะตู ตืองัฮ อารี ดัฮ นังฆรี ซือมูฮา ฮาบิฮ กือลับ ตือดะ รอจ กะ ปูโกยํ ตีฆา. 34 วะตู ปูโกยํ ตีฆา เยซู บือซูระ ซูวารา บูริ จะ "เอโลอี เอโลอี ลามา ซะบักทานี" ฌาดี-จะ "ตูฮัด นะ กู ตูฮัด นะ กู บูวัจ นามา เกา ตีงัน กู บูวัก ดัฮ?" 35 อาดา ซือมียา ซือตืองัฮ บือดีรี ดาปิก เตอ กูญา ดืองัยํ ดัฮ กูญา มือเลา จะ "นี เลอ ญา บลาโลก เอลียา." 36 อาดา ซืออูรัก ญา บลารี ปี อาเมด ฆาบุซ ลือมัฮ มาแรฮ จือลุ อาระ อางุน มาซับ ซือและ ฮูโฌก กายู รีโยก บรี กะ เยซู โอะ. ญา มือเลา จะ "นาตี ดูลู เลอ. กีตา นะ ลีฮัจ จะ เอลียา นะ มาแรฮ บือตูโรด ญา เฆอ เตด?" 37 ตาปี เยซู เตอ ญา บือซูระ ซูวารา บูริ ญา ฮาบิฮ ญาวา ดัฮ. 38 กะฆีเตอ กาเยด กือตัก เดะ บาลัย นะ ตูฮัด ปูตุซ ตือกรัจ ดูวา ตะเดะ โซะ อาตัซ รอจ กะ โซะ บาวัฮ. 39 โซะ กือปาลา ตาฮัน นู อาดา บือดีรี รือมัก เยซู เตอ ตานา ญา ลีฮัจ เยซู มาตี กะฮามี ญา มือเลา จะ "ซูโงฮ เลอ ซือมียา อีนี ฌาดี นานะ นะ ตูฮัด บือซัยํ เดะ อาตัซ เลอ." 40 อาดา โกะ นีบีนี กูญา นาตี ลีฮัจ ฌาโวฮ ดีกิ. อาดา มารียา ซือมียา ตูโปะ มักดาลา เตอ อาดา มารียา มะ เดะ ยากอบ ดือมิ ฌางัน โยเซ เตอ อาดา ซะโลเม ฌูฆา. 41 กาลา เยซู ดูโดะ เดะ นังฆรี ฆาลิลี โกะ นีบีนี อีตู เตอ กูญา บือเลฮ ตูโรจ เยซู บือกรือฌา ตูโลก ญา. เปะ อีตู อาดา นีบีนี อาซิก บาญะ อูรัก นู มาแรฮ กะ นังฆรี เยรูซาเลม ฌางัน เยซู. 42 อารี อีตู ฌาดี อารี บือซียะ ฌาดี-จะ อารี ดูลู เดะ อารี บราดู กรือฌา. อาดา โยเซบ ซือมียา ตูโปะ อาริมาเทีย เตอ. ญา ฌาดี ซืออูรัก เดะ ลูมอฮ ซือมียา บือกีรา ฌาดี ซือมียา กาวัด ปือจายา. อีซี ญา ฌูฆา เตอ อาดา มือนาตี นะ ลีฮัจ กาลา อีตู นู ตูฮัด นะ มาแรฮ บือบือลา ฌาดี ราฌา. วะตู ปะฮึญา อารี อีตู ญา บรานี มาโซะ ปี รอจ กะ ปีลาด มีตา บาดัด นะ เยซู. 44 ปีลาด เตอ ญา ปือและ-ฮาตี จะ เยซู บือเลฮ มาตี ดัฮ เฆอ. ญา บลาโลก กือปาลา ตาฮัน มาแรฮ ตาญา จะ "เยซู มาตี ลามา ดัฮ เฆอ?" 45 ตานา ญา บือเลฮ ตาฮู ลาฆู เดะ กือปาลา ตาฮัน ดัฮ ญา ยอม บรี บาดัด นะ เยซู กะ โยเซบ. 46 กะฆีเตอ โยเซบ เตอ ญา ปี บือลี กาเยด ปูเตฮ นู ลือมัฮ อาเมด บาดัด นะ เยซู บือตูโรด มาแรฮ เดะ กายู ปลีตัก บูกุซ บาโลจ ตาโรฮ เดะ กาเยด อีตู บาวา บือปี บอฮ เดะ ฆูฮา นู ตือโบะ เดะ บูเกะ บาตู เตอ. ญา ฆรือลิก บาตู บือซัยํ มาแรฮ ตูโดก ลูบัก ฆูฮา. 47 อาดา มารียา ซือมียา ตูโปะ มักดาลา ฌางัน มารียา มะ เดะ โยเซ เตอ กูญา บือเลฮ ลีฮัจ ตือปัจ นู โยเซบ บอฮ บาดัด นะ เยซู.
1 วะตู อารี บราดู กรือฌา ลือปัซ ปี ดัฮ มารียา ซือมียา ตูโปะ มักดาลา ฌางัน มารียา มะ เดะ ยากอบ ฌางัน ซะโลเม เตอ กูญา ปี บือลี กลือกะ นู บาวู นะ ลูมอยํ บาดัด นะ เยซู. 2 กะฆีเตอ จรัฮ ปาฆี อารี มีงู อีตู มาตาอารี บารู ญาแญะ กูญา อีตู ปี รอจ กะ ฆูฮา. 3 กูญา อาดา บือกีรา เดะ ตืองัฮ ฌาลัด จะ "ซาปา นะ ตูโลก ฆรือลิก บาตู อีตู เดะ ลูบัก ฆูฮา?" 4 กรานา บาตู อีตู บือซัยํ โตระ. ตานา กูญา ลางอฮ ลีฮัจ บือฆารี จะ บาตู อีตู เตอ ฆรือลิก บือตรือเบะ ดัฮ. 5 ตานา กูญา มาโซะ เดะ ฆูฮา ดัฮ กูญา ลีฮัจ จะ อาดา อูรัก มูดา ซืออูรัก ปากัย บาฌู ปาญัก นู ปูเตฮ ญา ดูโดะ โซะ กานัน. นีบีนี อีตู เตอ กูญา ตือกือฌุจ บาญะ. 6 ตาปี ซือมียา อีตู มือเลา ฌางัน กูญา จะ "กาเญา ฌางัน ตือกือฌุจ เลอ. กาเญา มาแรฮ ซารี เยซู ซือมียา ตูโปะ นาซาเรด นู กือนา กาจิก เดะ กายู ปลีตัก. ญา เตอ ฮีโดะ ปาเระ เดะ มาตี ดัฮ. ญา ฮอย ปัจ อีนี ดัฮ. ลีฮัจ เลอ ตือปัจ กูญา บอฮ บาดัด นะ ญา. 7 ตาปี กาเญา ปี เลอ มือญาเระ กะ โกะ มูเระ นะ ญา ฌางัน เปโตร ฌูฆา จะ 'ญา นะ ปี กะ นังฆรี ฆาลิลี ดูลู เดะ กาเญา. เปะ อีตู เลอ กาเญา นะ บือฆารี ญา บือกะ ญา มือเลา ฌางัน กาเญา ดัฮ.' " ญา จะ. 8 กะฆีเตอ โกะ นีบีนี อีตู บลารี ตรือเบะ เดะ ฆูฮา ดัฮ กูญา ตือกือฌุจ ยู ญาวา กือตัยํ. กูญา เตด มือเลา ฌางัน ซาปา โปด กรานา ตาโกจ. 9 [ตานา ปาฆี อีตู ฌาดี อารี มีงู เตอ เยซู ญา ฮีโดะ ปาเระ ดัฮ ญา มาแรฮ ปลีฮัจ ดูลู กะ มารียา ซือมียา ตูโปะ มักดาลา อีตู. ซือมียา อีตู เตอ เยซู บือเลฮ โปรฮ ฮาตู ตรือเบะ เดะ ญาวา นะ ญา ตูโฌฮ ฮาตู. 10 มารียา อีตู ญา ปี มือญาเระ กะ โกะ ซือมียา นู บือเลฮ ดูโดะ ฌางัน เยซู ตืองัฮ กูญา อาดา มือนาแงฮ บือปาโตด. 11 ตานา กูญา ดืองัยํ ดัฮ จะ นู เยซู ฮีโดะ ปาเระ ดัฮ มาแรฮ ปลีฮัจ กะ มารียา กูญา เตด ปือจายา. 12 เดะ บลากัก เยซู ปลีฮัจ ปูลัก กะ มูเระ ดูวา อูรัก ตืองัฮ กูญา บือฌาลัด ปี กะ ตูโปะ โซะ ลูวัยํ นังฆรี. ตาปี ญา ฌาดี ซือรูปา ซือมียา อาซิก. 13 กูญา กือดูวา อูรัก บาลิ ปี มือญาเระ กะ โกะ มูเระ นู ฆีลาฆี ตาปี กูญา อีตู เตด บือเลฮ ปือจายา นามา โปด. 14 เดะ บลากัก เยซู มาแรฮ ปลีฮัจ กะ โกะ มูเระ ซือบือลัซ อูรัก อีตู เดะ วะตู กูญา ตืองัฮ มากัด. ญา อูจะ กูญา กรานา กูญา ฮาตี กรัซ เตด บือเลฮ ปือจายา โกะ ซือมียา นู ลีฮัจ นู ญา ฮีโดะ ปาเระ เดะ มาตี ดัฮ. 15 เยซู มือเลา ฌางัน กูญา จะ "กาเญา เลอ กือนา ปี ราตา เดะ ดือนียา. มือญาเระ เลอ บรีตา นู บาฌิ อีนี กะ ซือมียา ราตา. 16 ซาปา นู ปือจายา ซาโมจ ลาฆู ซือลับ เดะ อาเย เตอ ญา เลอ นะ ฮีโดะ ลือปัซ บาฌิ. ตาปี ซาปา นู เตด ปือจายา เตอ ญา นะ กือนา กรัจ ฮูโกบ. 17 โกะ ซือมียา นู ปือจายา เตอ กูญา นะ บือเลฮ บูวัจ ปือนานา นู มือฆัฮ กะฆีนี. กูญา นะ โปรฮ ฮาตู ตรือเบะ ปี เดะ นามา นะ กู. กูญา นะ บือเลฮ มือเลา โกะ บาซา นู บารู. 18 กูญา นะ ปือฆัก อูลัยํ เตอ นะ มากัด อูบัจ ราโจด เตอ ตาปี ฮอย เตด ฌาดี นามา. กูญา นะ ปือเตาะ ตางัน กือนา เดะ โกะ ซือมียา เตด ซือนัง ญาวา บูวัจ บรี กูญา ซือนัง บาฌิ." ญา จะ. 19 ตานา ตูฮัด เยซู มือญาเระ กะ กูญา ซุจ ดัฮ ญา ปาเระ ปี กะ อาตัซ ลาแงะ ญา ปี ดูโดะ โซะ ซือบือลัฮ กานัน นะ ตูฮัด เดะ อาตัซ. 20 โกะ มูเระ ตรือเบะ ปี ราตาๆ มือญาเระ ลาฆู นะ ญา. ตูฮัด เตอ ญา บือกรือฌา บือซามา ฌางัน กูญา บรี อาดา ปือนานา นู บรี ลีฮัจ จะ ลาฆู อีนี ฌาดี ลาฆู นู ซูโงฮ เลอ.]
1 เทโอฟีโล เออ เกา นู โกะ ซือมียา ตูเฮะ ซูโงฮ เกา ตาฮู ดัฮ จะ อาดา บาญะ ซือมียา กูวาซา ฆาแรฮ ลาฆู จรือตา อีตู ตะเดะ ลามูลา ปาซัน ลาฆู นู ซุจ ฮาบิฮ ดัฮ เดะ ตืองัฮ โกะ ลูมอฮ กามี. 2 นู กูญา ฆาแรฮ กะฆีเตอ กูญา ตูโรจ กะ โกะ ซือมียา อีตู นู บือเลฮ ลีฮัจ บือฆารี เดะ มาตา นะ กูญา ตะอาซิก ดัฮ ตะเดะ ลามูลา. กูญา อีนี เลอ ฌาดี ซือมียา นู บือเลฮ มือญาเระ ลาฆู อีตู บรี กามี ตาฮู ดัฮ. 3 กะฆีเตอ เทโอฟีโล เออ กู โปด บือเลฮ ซาซัจ บรี ตาฮู ลาฆู ซือมูฮา ตะเดะ ลามูลา ยู ฮาบิฮ ดัฮ. กู อีงัจ บาฌิ ดัฮ จะ นะ ฆาแรฮ โกะ ลาฆู อีตู บรี บาฌิ นะ กีเรบ บรี กะ เกา ฌูฆา เลอ. 4 กู บูวัจ กะฆีนี บรี เกา นะ บือเลฮ ตาฮู ปือนอฮ ดัฮ ลาฆู นู ซูโงฮ เตอ ปาซัน โกะ ลาฆู อีตู นู กูญา บือเลฮ บรี กะ เกา ตาฮู ดัฮ. 5 กาลา เฮโรด ฌาดี ราฌา เดะ นังฆรี ยูเดีย เตอ อาดา ซามี ซืออูรัก เดะ ซือลูมอฮ นะ อาบียา ซามี อีตู ปือนามา ซะคารียา. บีนี นะ ญา ปือนามา เอลีซาเบด. ญา ฌูฆา ฌาดี ซือมียา เดะ บือแนฮ นะ อาโรน. 6 กูญา ลากี บีนี ฌาดี ซือมียา บาฌิ-ตือปัจ โซะ ฮึลด มูคา นะ ตูฮัด. กูญา ตูโรจ โกะ ปือมือซัด นะ ตูฮัด ซือมูฮา ฮอย จือลัฮ นู นะ บือเลฮ มืออูปัจ กะ กูญา เลอ. 7 กูญา ฮอย นานะ กรานา เอลีซาเบด ญา ฌาดี ซือมือโฆจ. กูญา ลากี บีนี โปด ตูฮา ดัฮ เลอ. 8 อาดา ซืออารี ซะคารียา ญา บือกรือฌา ฌาดี ซามี เดะ รูมัฮ มือญือมัฮ ตูฮัด วะตู ซือลูมอฮ นะ ญา มาโซะ ปี บือกรือฌา. 9 อารี อีตู ญา ยิบละ กือนา ปีเลฮ ดัฮ ตูโรจ กะ ฮาดัจ นะ โกะ ซามี เตอ กือนา ปีเลฮ ฌาดี ซือมียา มาโซะ ปี จูโจฮ โกะ กือมียัน เดะ ดาลับ บาลัย นะ ตูฮัด. 10 โกะ ซือมียา บาญะ ซือมูฮา กูญา อาดา บือซาโวจ โซะ ลูวัยํ เลอ วะตู ญา ตูนู กือมียัน มือญือมัฮ กะ ตูฮัด เตอ. 11 อาดา ฮูลู-บาลัก นะ ตูฮัด ซืออูรัก มาแรฮ ปลีฮัจ กะ ซะคารียา. ฮูลู-บาลัก อีตู บือดีรี โซะ ซือบือลัฮ กานัน เดะ ตือปัจ อาซะ กือมียัน. 12 ตานา ซะคารียา ลีฮัจ ดัฮ ญา ตือกือฌุจ ญา ตาโกจ ซูโงฮ. 13 ตาปี ฮูลู-บาลัก อีตู ญา มือเลา ฌางัน ซะคารียา จะ "เกา ฌางัน ตาโกจ เลอ. ตูฮัด ญา ดืองัยํ ดัฮ นู เกา บือเลฮ บือซาโวจ มีตา เดะ ญา. เอลีซาเบด บีนี นะ เกา นะ บือเลฮ นานะ กีลากี เลอ. เกา กือนา ตืองะ นามา นะ นานะ อีตู จะ โยฮัน. 14 เกา นะ ซูกา-ฮาตี บาญะ ซูโงฮ เลอ. โกะ ซือมียา บาญะ โปด กูญา นะ ซูกา-ฮาตี ฌูฆา กรานา นานะ นู นะ มาแรฮ บือฌาดี เตอ. 15 ซาเบะ ญา เลอ นะ ฌาดี ซือมียา บือซัยํ โซะ ฮึลด มูคา นะ ตูฮัด. ญา นะ เตด โอะ อาระ อางุน เฆอ-จะ อาระ มานามา โปด. ญา นะ ปือนอฮ ฌางัน ซือมืองัจ นะ ตูฮัด ตะเดะ โปรจ นะ มะ เดะ ญา เลอ. 16 ญา นะ บาวา โกะ ซือมียา บักซา อิซราเอน บาญะ อูรัก บราเลฮ-ฮาตี ปาเระ มาแรฮ มียา ตูฮัด บือซัยํ เดะ อาตัซ ตูฮัด นะ กูญา เลอ. 17 ญา นะ ปี ดูลู เดะ ตูฮัด อาดา ฮาตี นู ตือฆัยํ-อูรัจ นู มือฆัฮ บือกะ เอลียา เลอ. ญา นะ บรี โกะ อาโปก นะ บาลิ บาฌิ ปาเระ ฌางัน โกะ นานะ นะ กูญา. ญา นะ บรี โกะ ซือมียา บาตัฮ นะ อาดา ฮาตี นู ปานัย อากัน บือกะ โกะ ซือมียา นู บาฌิ-ตือปัจ เลอ. ญา นะ บูวัจ กะฆีเตอ บีดา นะ ซียะ โกะ ลูมอฮ ซือมียา นะ ตูฮัด บรี ตูฮัด นะ มาแรฮ เลอ." ฮูลู-บาลัก ญา จะ. 18 ซะคารียา ญา ตาญา ฮูลู-บาลัก จะ "กู นะ ตาฮู บือเลฮ กะฮามี เลอ นู ลาฆู อีนี นะ ฌาดี ซูโงฮ? ซาเบะ กู นี ฌาดี อูรัก ตูฮา. บีนี นะ กู โปด ญา ตูฮา ฌูฆา ดัฮ." 19 โซะ ฮูลู-บาลัก ญา ตีกัฮ จะ "กู ฌาดี ฆาบรีเอน นู บือดีรี นาตี ฌาดี ปราโซฮ โซะ ฮึลด มูคา นะ ตูฮัด บือซัยํ เดะ อาตัซ. ญา เลอ บือเลฮ ซูโรฮ กู มาแรฮ มือเลา ฌางัน เกา บาวา บรีตา นู บาฌิ อีนี มาแรฮ มือญาเระ กะ เกา เลอ. 20 เออ กรานา เกา ฮอย เตด ปือจายา เดะ ปือมือเลา นะ กู นู นะ ฌาดี ดัฮ รอจ วะตู นะ ญา เตอ กะฆีเตอ ลีฮัจ เลอ เกา นะ เตด บือเลฮ มือเลา ลาลู ตือดะ รอจ กะ อารี อีตู นู ลาฆู กะฆีนี นะ ซุจ ฮาบิฮ ดัฮ เลอ." ญา จะ. 21 โซะ โกะ ซือมียา ซือมูฮา กูญา อาดา นาตี ซะคารียา. กูญา ปือและ-ฮาตี กรานา ญา ดูโดะ เดะ ดาลับ บาลัย นะ ตูฮัด ลามา ตือลาลู เลอ. 22 ตานา ญา ตรือเบะ ดัฮ เตอ นะ มือเลา ฌางัน กูญา โปด เตด บือเลฮ. กะฆีเตอ โกะ ซือมียา ซือมูฮา ตาฮู ดัฮ จะ อาดา ลาฆู มานามา บือเลฮ ปลีฮัจ กะ ญา เดะ ดาลับ บาลัย นะ ตูฮัด. ญา อูซิ บูวัจ ตางัน ฌางัน กูญา ซาเบะ ญา ฮอย เตด บือเลฮ มือเลา ดัฮ. 23 ตานา ลาฆู บือกรือฌา นะ ญา ฮาบิฮ ดัฮ ญา บือเลฮ บาลิ ปี กะ รูมัฮ นะ ญา. 24 ลือปัซ อีตู เอลีซาเบด บีนี นะ ญา ญา บือโปรจ ดัฮ. กะฆีเตอ ญา ปี ซือลูนี เดะ รูมัฮ ลีมา บูลัด ดัฮ ญา มือเลา จะ 25 "วะตู อีนี เลอ ตูฮัด บือเลฮ ตือจีฮัด กะ กู บือเลฮ ตูโลก กู ดัฮ. ญา บูวัจ บรี กู เตด ฆาโดฮ จือและ เดะ ซาปา ซาเบะ กู ฮอย นานะ เลอ." ญา จะ. 26 ลือปัซ นัม บูลัด เตอ ตูฮัด เดะ อาตัซ ซูโรฮ ฮูลู-บาลัก นะ ญา ฆาบรีเอน ปี กะ ตูโปะ นาซาเรด เดะ นังฆรี ฆาลิลี. 27 ญา ปี ดาปัจ นีบีนี ราดารา ซืออูรัก ปือนามา มารียา. นีบีนี อีตู ฌาดี ตูนัง นะ โยเซบ นู ฌาดี บือแนฮ นะ ราฌา ดาวิด. 28 ฮูลู-บาลัก ญา มาแรฮ รอจ กะ นีบีนี อีตู มือเลา จะ "ซือลามัจ เลอ เกา. ตูฮัด บือซัยํ เดะ อาตัซ ดูโดะ บือซามา ฌางัน เกา ญา บรี ซือลามัจ กะ เกา ดัฮ." 29 โซะ มารียา ญา ตือกือฌุจ กรานา ปือมือเลา นะ ฮูลู-บาลัก อีตู. ญา บือฮีมัจ เดะ ฮาตี จะ ปือมือเลา กะฆีเตอ ฌาดี นามา เลอ? 30 กะฆีเตอ ฮูลู-บาลัก ญา มือญาเระ กะ ญา จะ "มารียา เออ ฌางัน ตาโกจ เลอ. ตูฮัด ญา ฮาลัย บรี ซือลามัจ กะ เกา ดัฮ. 31 นี เลอ เกา นะ บือโปรจ นะ ดูโดะ เดะ อาปี นานะ กีลากี. กือนา ตืองะ นามา กะ นานะ อีตู จะ เยซู. 32 นานะ อีตู นะ ฌาดี ซือมียา บือซัยํ. ญา เตอ นะ บือเลฮ นามา จะ ฌาดี นานะ นะ ตูฮัด เดะ อาตัซ ซือซูโงฮ เลอ. ตูฮัด บือซัยํ เดะ อาตัซ นะ บูวัจ บรี ญา ฌาดี ราฌา ซือรูปา ราฌา ดาวิด อาโปก เดะ ญา กาลา นูตู. 33 ญา นะ บือบือลา ฌาดี ราฌา เดะ บักซา นะ ยาโกบ ซือลาลู. นู ญา ฌาดี ราฌา เตอ เตด ดือละ นะ ฮาบิฮ เลอ." ญา จะ. 34 ตาปี มารียา ญา ตีกัฮ กะ ฮูลู-บาลัก จะ "ปาซัน อีนี นะ ฌาดี กะฮามี เลอ? กู นี เตด ดือละ บือซามา ฌางัน กีลากี โปด." 35 ฮูลู-บาลัก ญา มือเลา จะ " ซือมืองัจ นะ ตูฮัด นะ ตูโรด มาแรฮ เดะ อาตัซ เกา. นู ปือมือฆัฮ นะ ตูฮัด เดะ อาตัซ ซือซูโงฮ นะ ฌาฆา เกา. กะฆีเตอ เลอ นานะ นู นะ บือฌาดี เตอ ญา นะ กือนา บลาโลก จะ ซือมียา นู บาฌิ บือซรี จะ นานะ นะ ตูฮัด เดะ อาตัซ เตอ เลอ. 36 นี เลอ เอลีซาเบด วา เดะ เกา นู ตูฮา ดัฮ ญา บือโปรจ นานะ กีลากี ฌูฆา. ญา นู กูญา บลาโลก จะ ฌาดี ซือมือโฆจ เตอ วะตู อีนี ญา บือโปรจ นัม บูลัด ดัฮ. 37 ซาเบะ-จะ ฮอย นามา เลอ นู ตูฮัด เดะ อาตัซ นะ บูวัจ เตด บือเลฮ." ญา จะ. 38 กะฆีเตอ มารียา ญา มือเลา จะ "กู นี ฌาดี ปราโซฮ นะ ตูฮัด บือซัยํ เดะ อาตัซ เลอ. บรี ฌาดี บือกะ ปือมือเลา นะ เกา เลอ." กะฆีเตอ ฮูลู-บาลัก ญา ลือแงะ ปี เดะ ญา ดัฮ. 39 วะตู อีตู มารียา ญา บีกัซ ฆางู ปี กะ ซา ตูโปะ นู อาดา เดะ ตืองัฮ โกะ บูเกะ โซะ นังฆรี ยูเดีย. 40 ตานา รอจ ดัฮ ญา มาโซะ รูมัฮ นะ ซะคารียา มือเลา บรี ซือลามัจ กะ เอลีซาเบด. 41 ตานา เอลีซาเบด ดืองัยํ นู ญา มือเลา กะฆีเตอ นานะ เดะ ดาลับ โปรจ ญา งูตัยํ. เอลีซาเบด โปด ญา ปือนอฮ ฌางัน ซือมืองัจ นะ ตูฮัด 42 ญา บือซูระ ซูวารา บือซัยํ จะ "เกา เลอ นู ซือลามัจ ซูโงฮ ลือเบฮ เดะ โกะ ลูมอฮ นีบีนี ซือมูฮา. นานะ เดะ ดาลับ โปรจ นะ เกา ญา ซือลามัจ ซูโงฮ ฌูฆา. 43 ฌาดี กะฮามี เลอ นู กู กือนา ลาฆู บาฌิ กะฆีนี ดัฮ จะ เอด เดะ ตูฮัด นะ กู เตอ ญา มาแรฮ ฌือเงาะ ลีฮัจ กู ดัฮ เลอ? 44 ซาเบะ-จะ ตานา ซูวารา มือเลา นะ เกา มาโซะ เดะ ตือลีงา นะ กู ดัฮ นานะ เดะ ดาลับ โปรจ นะ กู ญา งูตัยํ ซูกา-ฮาตี ซูโงฮ เลอ. 45 ซือนัง ซือลามัจ ซูโงฮ เลอ นีบีนี นู บือเลฮ ปือจายา ดัฮ จะ ปือมือเลา นะ ตูฮัด นู มาแรฮ รอจ กะ ญา นะ ฌาดี รือมัก ดัฮ." เอลีซาเบด ญา จะ. 46 มารียา มือเลา จะ "ฮาตี นะ กู ปูฌี กะ ตูฮัด บือซัยํ เดะ อาตัซ 47 อีซี ญาวา นะ กู โปด ซูกา-ฮาตี กรานา ตูฮัด เลอ นู บูวัจ บรี กู ฮีโดะ ลือปัซ บาฌิ. 48 กรานา-จะ ตูฮัด ญา ลีฮัจ ลาฆู ปายัฮ รือนัฮ ซูโงฮ นะ นีบีนี ปราโซฮ นะ ญา. นี เลอ ตะเดะ อีนี ปี โกะ ซือมียา ราตา อูมอยํ นะ บลาโลก กะ กู จะ ฌาดี ซือมียา ซือนัง ซือลามัจ เลอ. 49 กรานา-จะ ตูฮัด นู มือฆัฮ บือเลฮ บูวัจ ลาฆู บือซัยํ ฌางัน กู นามา นะ ตูฮัด โปด บาฌิ บือซรี เลอ. 50 ตูฮัด ซายัก ตือจีฮัด กะ ซือมียา นู มือนูโนะ กะ ญา ราตา อูมอยํ นะ โกะ อูมัจ-ซือมียา ปี เลอ. 51 ตูฮัด ญา บูวัจ ลาฆู มือฆัฮ ฌางัน ตางัน นะ ญา. โกะ ซือมียา ฮาตี งันตืองัน เตอ ญา บูวัจ บรี กูญา จัฮ-บือลัฮ ดัฮ. 52 ตูฮัด ญา บือตูโรด โกะ ซือมียา ซัยํ-บือซัยํ เดะ ตือปัจ ดูโดะ ตีงี นะ กูญา ญา อาเกะ ซือมียา รือนัฮ ปี ดูโดะ ฆาตี. 53 ตูฮัด ญา บรี ซือมียา บือตาฮัด บือเลฮ มากัด ซือบารัก บาฌิ ยู กือญัง ญา บรี ซือมียา นู กายา ปี ฮอย ซือบารัก นามา เดะ ตางัน เลอ. 54 ตูฮัด ญา ตูโลก อิซราเอน นู ฌาดี ปราโซฮ นะ ญา ญา บรีงัจ จะ นะ ซายัก ตือจีฮัด เตอ 55 กะ อับราฮัม ฌางัน บือแนฮ นะ ญา ซือลาลู ปี ตูโรจ บือกะ นู ญา บือเลฮ มือเลา ฌางัน โกะ บีลาแก นะ กีตา ดัฮ เตอ." 56 มารียา ญา ดูโดะ ฌางัน เอลีซาเบด บือเลฮ ฆามะ ตีฆา บูลัด บารู ญา บาลิ ปี กะ รูมัฮ นะ ญา. 57 ตานา ฆือนะ วะตู ดัฮ เอลีซาเบด ญา ดูโดะ เดะ อาปี บือเลฮ นานะ กีลากี. 58 โกะ ซือมียา นู ดูโดะ ดาปิก ฌางัน โกะ นะบรานะ นะ ญา ดืองัยํ จะ นู ตูฮัด บือเลฮ ตือจีฮัด กะ เอลีซาเบด บาญะ ซูโงฮ ดัฮ. กะฆีเตอ กูญา ซือมูฮา ปาคัจ มาแรฮ ซูกา-ฮาตี ฌางัน ญา ฌูฆา. 59 ตานา รอจ กะ อารี ลาปัด ดัฮ กูญา ปาคัจ มาแรฮ มียา นานะ อีตู นะ บรี ญา มาโซะ ลาฆู กรัจ. กูญา นะ ตืองะ ปือนามา กะ นานะ อีตู จะ ซะคารียา ตูโรจ กะ นามา นะ อาโปก เดะ ญา. 60 ตาปี โซะ มะ เดะ ญา ตีกัฮ จะ "ตีเมา เลอ. ตาปี กือนา ตืองะ ปือนามา จะ โยฮัน." 61 กูญา ปาคัจ ตีกัฮ จะ "ฮอย ซือมียา ดีฮา โบะ เดะ ลูมอฮ นะบรานะ นะ เกา อาดา ปือนามา กะฆีนี เลอ." 62 กะฆีเตอ กูญา อูซิ บูวัจ ตางัน กะ ปะ เดะ ญา ตาญา จะ "เกา นะ ตืองะ ปือนามา นามา บรี กะ นานะ นะ เกา?" 63 ปะ เดะ ญา มีตา ปาปัด ตือปัจ ฆาแรฮ ญา ฆาแรฮ จะ "ปือนามา นานะ นะ กู จะ โยฮัน." กะฆีเตอ โกะ ซือมียา ซือมูฮา กูญา ปาคัจ ปือและ-ฮาตี ซูโงฮ เลอ. 64 ดัดดัด อีตู มูโลจ ฌางัน ลีดัฮ นะ ซะคารียา โปด ญา บาฌิ ปาเระ ดัฮ. กะฆีเตอ ญา มือเลา มือโอจ กะ ตูฮัด เดะ อาตัซ เลอ. 65 กะฆีเตอ โกะ ซือมียา นู ดูโดะ ดาปิก รูมัฮ กูญา ปาคัจ ตาโกจ. ลาฆู ซือมูฮา อีตู กือจัย ปี ราตา โซะ บูเกะ นังฆรี ยูเดีย. 66 โกะ ลูมอฮ ซือมียา นู บือเลฮ ดืองัยํ กูญา บรีงัจ เดะ ฮาตี ตาญา จะ "นานะ อีตู นะ ฌาดี กะฮามี เลอ?" กรานา-จะ ตางัน นะ ตูฮัด ดูโดะ ฌางัน ญา. 67 ซะคารียา นู ฌาดี อาโปก ญา ปือนอฮ ฌางัน ซือมืองัจ นะ ตูฮัด ญา มือเลา ตูโดฮ จะ 68 "ซือลามัจ เลอ กะ ตูฮัด ตูฮัด บือซัยํ นะ ลูมอฮ อิซราเอน กรานา-จะ ญา บือเลฮ มาแรฮ ฌือเงาะ ลีฮัจ ลูมอฮ บักซา นะ ญา บือเลฮ ตือบุซ กูญา บรี ลือปัซ ดัฮ เลอ. 69 ญา บือเลฮ ซูโรฮ ซือมียา นู มือฆัฮ มาแรฮ ตูโลก บรี ลือปัซ นู ดาตัก มาแรฮ เดะ บือแนฮ นะ ราฌา ดาวิด ปราโซฮ นะ ตูฮัด เลอ 70 ตูโรจ กะ ลาฆู นู ญา บือเลฮ มือเลา ตะเดะ นูตู ดัฮ ฌางัน มูโลจ นะ โกะ ซือมียา จรัฮ บาฌิ นู ตูโดฮ ลาฆู นะ ตูฮัด. 71 ฌาดี-จะ ซือมียา มือฆัฮ อีตู นะ บรี กีตา ลือปัซ เดะ ลูมอฮ ซือตรู นะ กีตา ซือมูฮา บรี ลือปัซ เดะ ตางัน นะ โกะ ซือมียา ซือมูฮา นู บือชี กะ กีตา. 72 กะฆีเตอ ตูฮัด บูวัจ ตูโรจ กะ ลาฆู ตือจีฮัด อีตู นู บือเลฮ บือฌาญี ฌางัน โกะ บีลาแก นะ กีตา ดัฮ ญา บรีงัจ กะ ปือมือเลา บือปาคัจ นู จรัฮ บาฌิ นู ญา ตืองะ ดัฮ เลอ. 73 ฌาดี-จะ ปือมือเลา อาเกะ มือเลา บือฌาญี นะ ตูฮัด นู ญา บือเลฮ บือฌาญี ฌางัน อับราฮัม บีลาแก นะ กีตา จะ 74 ตานา กีตา ซือมูฮา ลือปัซ เดะ ตางัน ซือตรู นะ กีตา ดัฮ ญา นะ บรี กีตา บือกรือฌา ตูโลก ญา ฮอย เตด ตาโกจ นามา เลอ 75 บรี กีตา บือกรือฌา กะฆีเตอ อาดา ฮาตี จรัฮ บาฌิ ฮาตี รือมัก โซะ ฮึลด มูคา นะ ตูฮัด ตือดะ ฮาบิฮ อูมอยํ นะ กีตา เลอ. 76 โซะ เกา นานะ นะ กู เออ กูญา นะ บลาโลก กะ เกา จะ ซือมียา ตูโดฮ ลาฆู นะ ตูฮัด นู บือซัยํ เดะ อาตัซ กรานา-จะ เกา นะ บือฌาลัด ปี ดูลู เดะ ตูฮัด บีดา นะ ซียะ ฌาลัด นะ ญา เลอ 77 บีดา นะ บรี กะ โกะ ซือมียา บักซา นะ ตูฮัด นะ ตาฮู จะ ตูฮัด นะ ตูโลก กูญา บรี ฮีโดะ ลือปัซ บาฌิ นะ อาเกะ ลาฆู ซาลัฮ ซือมูฮา นะ กูญา เลอ. 78 นู ฌาดี กะฆีเตอ ซาเบะ ตูฮัด บือซัยํ นะ กีตา ญา ตือจีฮัด ซายัก กะ กีตา เตอ ญา นะ บรี ซายา นู จรัฮ ดาตัก มาแรฮ เดะ โซะ ลาแงะ นะ ซูโลฮ กะ กีตา ซือรูปา กะ มาตาอารี เดะ วะตู มูกัยํ เลอ 79 นะ ซูโลฮ จรัฮ บรี กะ โกะ ซือมียา นู ดูโดะ โซะ กือลับ กะ ซือมียา นู ดูโดะ เดะ บายัก นะ ลาฆู ฌาฮานัม บีดา นะ บาวา กากี นะ กีตา ปี ตูโรจ กะ ฌาลัด นู ซือนัง ซือลามัจ เลอ." ซะคารียา ญา จะ. 80 โซะ นานะ อีตู ญา โปด บือซัยํ ซือมาตา. นู โซะ ฮาตี โปด ญา ตือฆัยํ-อูรัจ ฌูฆา เลอ. ญา ปี ดูโดะ เดะ ตือปัจ ปาดัก ตานัฮ ตูโฮยํ นู ลือฆา ตือดะ รอจ กะ อารี นู ญา นะ มาแรฮ ปลีฮัจ กะ ลูมอฮ อิซราเอน.
1 ตือกาลา อีตู ราฌา ซีซา ออกัดตัด ญา ปือซัด บรี ราตา ซือมียา ราตา นังฆรี กือนา บูวัจ บรี นามา นะ กูญา อาดา ฆาแรฮ ดัฮ เดะ ซูรัจ นะ ราฌา. 2 กาลา กูญา กือนา ปี ฆาแรฮ นามา วะตู ลามูลา อีตู เตอ กูรีนียัด ญา ฌาดี ฮูลู-บาลัก นะ ราฌา เดะ นังฆรี ซีเรีย. 3 โกะ ซือมียา ซือมูฮา กือนา ปี ฆาแรฮ นามา นะ กูญา เดะ ตูโปะ นู กูญา บือเลฮ บือฌาดี ซิกมาซิก เลอ. 4 อาดา โยเซบ ญา ตรือเบะ เดะ ตูโปะ นาซาเรด นังฆรี ฆาลิลี ปี รอจ กะ ตูโปะ เบดเลเฮม นังฆรี ยูเดีย. ตูโปะ อีตู ฌาดี ตูโปะ นะ ราฌา ดาวิด. โยเซบ เตอ ญา ฌาดี บือแนฮ นะ ราฌา ดาวิด. 5 ญา ปี ฌางัน มารียา ตูนัง นะ ญา บีดา นะ ฆาแรฮ นามา นะ กูญา ปัจ อีตู. มารียา เตอ ญา ตืองัฮ โปรจ บือซัยํ เลอ. 6 วะตู กูญา ดูวา อูรัก ดูโดะ เดะ ตูโปะ อีตู ลาฆี เตอ รอจ วะตู ดัฮ นู มารียา นะ ดูโดะ เดะ อาปี. 7 กะฆีเตอ ญา ดูโดะ เดะ อาปี นานะ ซูโลก กีลากี เลอ. ญา อาเมด กาเยด ปอจๆ บาโลจ เดะ นานะ ญา บรี นานะ อีตู ตีโนะ เดะ ปาโลก. ซาเบะ-จะ ฮอย ตือปัจ นะ ดูโดะ เดะ รูมัฮ มือนูปัก เลอ. 8 เดะ โซะ นังฆรี อีตู อาดา ลูมอฮ ซือมียา บือบือลา กาเมก กูญา ดูโดะ เดะ ปาดัก โซะ ลูวัยํ นังฆรี ฌาฆา ตูงู กาวัด กาเมก นะ กูญา โซะ มาลับ. 9 อาดา ฮูลู-บาลัก นะ ตูฮัด ซืออูรัก ญา มาแรฮ ปลีฮัจ กะ กูญา. นู บือซายา บือซรี นะ ตูฮัด ซูโลฮ จรัฮ กือลีลิก กูญา. กะฆีเตอ กูญา ตือกือฌุจ ตาโกจ ซูโงฮ เลอ. 10 ตาปี ฮูลู-บาลัก อีตู ญา มือเลา ฌางัน กูญา จะ "ฌางัน ตาโกจ เลอ. นี เลอ กู อาดา บรีตา นู บาฌิ นะ มือญาเระ กะ กาเญา นะ บรี ลูมอฮ ซือมียา ซือมูฮา นะ ซูกา-ฮาตี โตระ. 11 เดะ อารี อีนี เลอ เดะ ตูโปะ นะ ราฌา ดาวิด อาดา ซือมียา นู ตูโลก กาเญา บรี ฮีโดะ ลือปัซ บาฌิ เตอ ญา ดูโดะ เดะ อาปี ดัฮ. ญา เตอ ฌาดี ราฌา นู บรี ซือลามัจ ฌาดี ตูฮัด เตอ เลอ. 12 กาเญา นะ ดาปัจ นานะ ดือมิ อีตู อาดา กาเยด ปอจๆ บาโลจ เดะ ญาวา ตีโนะ เดะ ปาโลก เลอ. กะฆีเตอ กาเญา นะ ตาฮู จะ ลาฆู อีนี ฌาดี ลาฆู ซูโงฮ เลอ." ญา จะ. 13 ดัดดัด อีตู อาดา ลูมอฮ ฮูลู-บาลัก นะ ตูฮัด บาญะ อูรัก กูญา มาแรฮ บือซามา มือญาญี ปูฌี กะ ตูฮัด มือเลา จะ 14 "ปูฌี เลอ กะ ตูฮัด บือซัยํ นู ดูโดะ โซะ อาตัซ ลาแงะ นู ตีงี ซูโงฮ เลอ. ซือนัง ซือลามัจ เลอ ลูมอฮ ซือมียา เดะ ดือนียา นู ตูฮัด ปีเลฮ ดัฮ." 15 ตานา ลูมอฮ ฮูลู-บาลัก บาลิ ปาเระ ญาแญะ ปี กะ อาตัซ ลาแงะ ดัฮ โกะ ซือมียา บือบือลา กาเมก อีตู กูญา ปาคัจ มือเลา ซามา กูญา จะ "โฌฮ บรี กีตา ปี กะ ตูโปะ เบดเลเฮม นะ ลีฮัจ ลาฆู อีนี นู บือฌาดี ดัฮ เตอ บือกะ นู ตูฮัด บือเลฮ มือญาเระ กะ กีตา ดัฮ." 16 กะฆีเตอ กูญา ฆางู ปี กูญา ดาปัจ มารียา ฌางัน โยเซบ. อาดา นานะ ดือมิ ซามา ญา ตีโนะ เดะ ปาโลก. 17 ตานา กูญา ลีฮัจ ลาฆู กะฆีเตอ กูญา ปาคัจ มือญาเระ ลาฆู ปาซัน นานะ อีตู นู กูญา บือเลฮ ดืองัยํ ดัฮ. 18 ราตา ซือมียา นู ดืองัยํ ดัฮ กูญา ปือและ-ฮาตี เดะ ปือมือเลา นะ โกะ ซือมียา บือบือลา กาเมก. 19 ตาปี มารียา เตอ ญา จับ ลาฆู อีนี ซือมูฮา บือฮีมัจ ตาโรฮ เดะ ฮาตี. 20 กะฆีเตอ โกะ ซือมียา บือบือลา กาเมก กูญา บาลิ ปี ดัฮ. กูญา ปาคัจ ปูฌี มือโอจ กะ ตูฮัด เดะ อาตัซ ปาซัน ลาฆู นู กูญา มือนีงัย ดัฮ ลีฮัจ ดัฮ นู รือมัก ฌางัน ปือมือเลา นะ ฮูลู-บาลัก เลอ. 21 ตานา ฆือนะ ลาปัด อารี ดัฮ ฌาดี อารี นะ บรี นานะ อีตู ซาโมจ ลาฆู กรัจ กูญา ตืองะ ปือนามา กะ นานะ อีตู จะ เยซู ฌาดี นามา นู ฮูลู-บาลัก บือเลฮ ตืองะ บรี ดูลู เดะ มารียา บือโปรจ ดัฮ. 22 ตานา รอจ กะ อารี บูวัจ ลาฆู บาโซฮ ญาวา บรี จรัฮ บาฌิ ตูโรจ กะ ซูรัจ ปือมือเลา ฮูโกบ นะ มูซา เตอ กูญา บาวา นานะ อีตู บือปี กะ นังฆรี เยรูซาเลม บีดา นะ ซรัฮ ญา บรี กะ ตูฮัด เลอ. 23 บือกะ ซือรูปา อาดา ฆาแรฮ ดัฮ เดะ ปือมือเลา ฮูโกบ นะ ตูฮัด นู จะ "นานะ ซูโลก กีลากี ราตา อูรัก เตอ กาเญา กือนา อาเกะ ซรัฮ บรี กะ ตูฮัด เลอ." 24 กะฆีเตอ กูญา ลากี บีนี ปี มือนืองะ ซือบารัก มือญือมัฮ ตูโรจ กะ ปือมือเลา ฮูโกบ นะ ตูฮัด นู จะ "บูโรก ตูตรู ซือฆู เฆอ-จะ อานะ บูโรก ปาตี ดูวา อีโกยํ". 25 นี เลอ อาดา กีลากี ซืออูรัก เดะ นังฆรี เยรูซาเลม ปือนามา ซีเมโอน ฌาดี ซือมียา บาฌิ-ตือปัจ บรีงัจ ตาโกจ เดะ ตูฮัด ซามา. ญา อาดา นาตี วะตู นู ตูฮัด นะ ปูโฌะ โกะ ลูมอฮ บักซา อิซราเอน. ซือมืองัจ นะ ตูฮัด ญา ดูโดะ บือซามา ฌางัน ญา เลอ. 26 ซือมืองัจ นะ ตูฮัด อีตู บือเลฮ ปลีฮัจ กะ ญา ดัฮ จะ ญา นะ เตด มาตี ดูลู ตือดะ นะ บือเลฮ ลีฮัจ ราฌา นู บรี ซือลามัจ นู ตูฮัด นะ ซูโรฮ มาแรฮ. 27 ซีเมโอน เตอ ญา มาโซะ กะ ดาลับ รูมัฮ มือญือมัฮ ตูฮัด ตูโรจ บือกะ ซือมืองัจ นะ ตูฮัด บาวา. ตานา โกะ เอด อาโปก บาวา เยซู นานะ นะ กูญา มาโซะ ปี บีดา นะ บูวัจ บรี กะ นานะ อีตู ตูโรจ กะ ฮาดัจ ปือมือเลา ฮูโกบ อีตู เตอ 28 ซีเมโอน ญา อาเกะ เนก นานะ อีตู ญา บรี ซือลามัจ กะ ตูฮัด จะ 29 "โอ ตูฮัด เออ วะตู อีนี เกา นะ บือเลฮ บรี ปราโซฮ นะ เกา ปี บรี ซือนัง ซือลามัจ เตอ ตูโรจ กะ ปือมือเลา นะ ตูฮัด เลอ. 30 กรานา-จะ มาตา นะ กู บือเลฮ ลีฮัจ ซือมียา นู ตูฮัด นะ ซูโรฮ ตูโลก โกะ อูมัจ-ซือมียา บรี ฮีโดะ ลือปัซ บาฌิ เลอ. 31 ซือมียา อีนี ตูฮัด บือเลฮ ซียะ ตาโรฮ ดัฮ เดะ ฮึลด มูคา นะ โกะ ซือมียา ซือมูฮา 32 นะ ซูโลฮ จรัฮ บรี กะ โกะ ซือมียา นังฆรี อาซิกๆ นะ ลีฮัจ บือฆารี เตอ นะ ฌาดี บือซรี บือซายา กะ โกะ ลูมอฮ อิซราเอน โกะ ซือมียา นะ ตูฮัด เลอ." 33 โซะ เอด อาโปก นะ นานะ อีตู กูญา ปือและ-ฮาตี กรานา ปือมือเลา นู ญา มือเลา ปาซัน นานะ นะ กูญา. 34 ซีเมโอน เตอ ญา บรี ซือลามัจ กะ กูญา ญา มือเลา ฌางัน มารียา มะ เดะ นานะ อีตู จะ "นี เลอ นานะ อีนี เตอ ญา กือนา ตืองะ ดัฮ นะ บูวัจ บรี ซือมียา บาญะ เดะ ลูมอฮ อิซราเอน นะ รือบัฮ นะ อาเกะ ซือมียา บาญะ บรี บือดีรี โปด ฌูฆา เลอ. ญา เตอ กือนา ตืองะ ฌาดี ปือนานา นู นะ บรี โกะ ซือมียา นะ มือเลา บลาวัด ฌางัน ญา เลอ 35 บีดา ลาฆู บรีงัจ เดะ ฮาตี นะ โกะ ซือมียา บาญะ นะ บือเลฮ บือฆารี ซัฮ. ตาปี โซะ เกา เตอ ลาฆู ซูซัฮ นะ มาแรฮ ซือรูปา กะ ปือดัก นะ ตีกับ ตือมุซ รอจ กะ ฮาตี นะ เกา ตะอาซิก เลอ." 36 ตานา บาฌิ อาดา นีบีนี ซืออูรัก มาแรฮ รอจ. ญา ฌาดี ซือมียา ตูโดฮ ลาฆู นะ ตูฮัด ปือนามา อันนา นานะ นีบีนี นะ ฟานูเอน เดะ บือแนฮ โกะ อาเซอ. นีบีนี อีตู ญา ตูฮา โตระ ดัฮ บือเลฮ ลากี ตะเดะ ราดารา ดูโดะ บือซามา ตูโฌฮ ตาโฮด ดัฮ. 37 ญา โปด ดูโดะ ฌาดี ฌานา ตือดะ อูมอยํ นะ ญา บือเลฮ ลาปัด-ปูโลฮ ปัจ ตาโฮด ดัฮ. ญา ฮอย เตด ดือละ ตีงัน ปี ฌาโวฮ เดะ รูมัฮ มือญือมัฮ ลาลู ดูโดะ มือญือมัฮ บูวัจ ลาฆู บือตาฮัด มากัด บือซาโวจ ซียัก มาลับ เลอ. 38 เดะ อารี อีตู ตานา ญา มาแรฮ รอจ ดัฮ ญา บรี ซือลามัจ กะ ตูฮัด เดะ อาตัซ. ญา ปี มือเลา ปาซัน นานะ อีตู ฌางัน โกะ ซือมียา ซือมูฮา นู อาดา นาตี ตาดัฮ วะตู ตูฮัด นะ ตือบุซ นังฆรี เยรูซาเลม. 39 ตานา โยเซบ ฌางัน มารียา บูวัจ ตูโรจ กะ ปือมือเลา ฮูโกบ นะ ตูฮัด ซุจ ฮาบิฮ ดัฮ กูญา บาลิ ปี กะ นาซาเรด ตูโปะ นะ กูญา เดะ นังฆรี ฆาลิลี. 40 นานะ อีตู ญา บือซัยํ ตือฆัยํ-อูรัจ ดัฮ ฆือนะ ฌางัน ลาฆู ปานัย อากัน. ตูฮัด เดะ อาตัซ โปด ญา ฮาลัย บรี ซือลามัจ กะ ญา ฌูฆา. 41 บีลัก ตาโฮด เอด อาโปก นะ เยซู นะ ปี กะ นังฆรี เยรูซาเลม ปี บรามัย เดะ ลาฆู บรามัย ลือปัซ ปี เตอ. 42 กะฆีเตอ ตานา เยซู อูมอยํ ดูวา-บือลัซ ตาโฮด ดัฮ กูญา กือตีฆา ปี กะ ลาฆู บรามัย อีตู บือซามา บือกะ ฮาดัจ อีตู เลอ. 43 ตานา ลาฆู บรามัย ฮาบิฮ ดัฮ กูญา ตืองัฮ บาลิ ปี กะ ตูโปะ. ตาปี โซะ เยซู เตอ ญา อาดา ดูโดะ ลือกัจ เดะ นังฆรี เยรูซาเลม ลาฆี. โกะ เอด อาโปก นะ ญา กูญา เตด ตาฮู 44 กูญา อาคา จะ ญา บาลิ มาซามา ฌางัน โกะ ซือมียา นู บาญะๆ อีตู. กะฆีเตอ กูญา บือฌาลัด ปี ซืออารี ดัฮ บารู ซารี เยซู เดะ ลูมอฮ นะบรานะ เดะ ลูมอฮ กาวัด นะ กูญา ฌูฆา. 45 ฮอย เตด ดาปัจ กูญา บาลิ ปาเระ ปี กะ นังฆรี เยรูซาเลม ซารี เยซู ปูลัก เลอ. 46 ตานา ลือปัซ ตีฆา อารี ดัฮ กูญา ดาปัจ เยซู เดะ รูมัฮ มือญือมัฮ ตูฮัด. ญา เตอ ดูโดะ บือซามา ฌางัน โกะ ซือมียา อาฌัยํ มือนีงัย ปือมือเลา นะ กูญา ตาญา ลาฆู แนฮ-ฌือแนฮ เดะ กูญา. 47 ซือมียา นู ดืองัยํ กูญา ปือและ-ฮาตี นู เยซู มาโซะ เดะ ฮาตี ตีกัฮ กะ กูญา ฌางัน อากัน นู ปานัย เตอ. 48 โกะ เอด อาโปก เดะ ญา เตอ ตานา ลีฮัจ เยซู กูญา ปือและ-ฮาตี ซูโงฮ. เอด เดะ ญา มือเลา จะ "นานะ เออ. บูวัจ นามา เกา บูวัจ กะฆีนี ฌางัน กามี? มะปะ ปี ซารี เกา บือบือเละ บรีงัจ บาญะ กะ เกา เลอ." 49 เยซู ตีกัฮ กะ กูญา จะ "บูวัจ นามา มะปะ ปี ซารี กะฆีเตอ? มะปะ เตด ตาฮู เฆอ จะ กู ฆาโดฮ อาดา เดะ รูมัฮ นะ อาโปก เดะ กู เลอ?" 50 ตาปี นู เยซู ญา ตีกัฮ กะฆีนี เตด มาโซะ เดะ ฮาตี นะ กูญา. 51 กะฆีเตอ เยซู ญา บาลิ ปี กะ ตูโปะ นาซาเรด ฌางัน กูญา มือนีงัย ปือจายา ปือมือเลา นะ กูญา. โกะ ลาฆู กะฆีเตอ ซือมูฮา เตอ เอด เดะ ญา ญา จับ ตาโรฮ เดะ ฮาตี เลอ. 52 กะฆีเตอ เยซู ญา บือซัยํ ดัฮ ฌางัน ญาวา ฌางัน อากัน. ลาฆู นะ ญา ตูฮัด ญา ซูกา. โกะ ซือมียา โปด ซูกา ฌูฆา เลอ.
1 วะตู ทิเบรียัด ฌาดี ราฌา บือซัยํ กือมูฮา ลีมา-บือลัซ ตาโฮด ดัฮ เตอ ปอนตัด ปีลาด ฌาดี ฮูลู-บาลัก นะ ราฌา ซีซา เดะ นังฆรี ยูเดีย เฮโรด ฌาดี ราฌา เดะ นังฆรี ฆาลิลี. ฟีลิบ นู อาดี เดะ เฮโรด เตอ ญา ฌาดี ราฌา เดะ นังฆรี โซะ ซือบือลัฮ อิทูเรีย ฌางัน ตราโคนิด. ลีซานียัด ฌาดี ราฌา เดะ นังฆรี อาบีเลน ฌูฆา เตอ. 2 อานัด ฌางัน กายาฟัด กูญา ฌาดี โกะ กือปาลา ซามี เตอ. วะตู อีตู เลอ ปือมือเลา นะ ตูฮัด มาแรฮ รอจ กะ โยฮัน นานะ นะ ซะคารียา เดะ ปาดัก ตานัฮ ตูโฮยํ นู ลือฆา เลอ. 3 กะฆีเตอ โยฮัน ปี เดะ บีดิก ซูงัย จอแดน ราตา ญา มือญาเระ จะ "กาเญา ซือมูฮา บราเลฮ-ฮาตี ซาโมจ ลาฆู ซือลับ เดะ อาเย เลอ. กะฆีเตอ ตูฮัด นะ อาเกะ ดูซา นะ กาเญา." ญา จะ. 4 ซือรูปา บือเลฮ ฆาแรฮ ตาโรฮ ดัฮ เดะ ซูรัจ ปือมือเลา นะ อิซายา ซือมียา ตูโดฮ ลาฆู นะ ตูฮัด จะ "อาดา ซูวารา ซือมียา บือซูระ เดะ ปาดัก ตานัฮ ตูโฮยํ นู ลือฆา มือเลา จะ 'กือนา ซียะ ฌาลัด บรี ซุจ บีดา ตูฮัด นะ มาแรฮ เลอ. 5 กือนา บือกรือฌา ฌาลัด นะ ญา บรี รือมัก ปี เลอ. โกะ ลาเฮา ซือมูฮา กือนา ตามะ บรี ซามา โกะ บูเกะ โกะ ตือปัจ ตีงี กือนา จาโกน บรี ซามา บายา ปือฮาบิฮ เลอ. ฌาลัด ดีฮา นู ปีเกาะ กือนา กรัจ บรี รือมัก เลอ. โตะ ดีฮา นู ฌาลัด บือลูปะ-ลูปะ กือนา ซูเดาะ ตามะ บรี ซามา. 6 กะฆีเตอ โกะ อูมัจ-ซือมียา ซือมูฮา นะ บือเลฮ ลีฮัจ ลาฆู นู ตูฮัด เดะ อาตัซ นะ ตูโลก กูญา บรี ฮีโดะ ลือปัซ บาฌิ เลอ.' " อิซายา ญา จะ. 7 อาดา โกะ ซือมียา บาญะ ตรือเบะ มาแรฮ มียา โยฮัน บีดา ญา นะ บรี กูญา ซาโมจ ลาฆู ซือลับ เดะ อาเย. กะฆีเตอ โยฮัน ญา มือเลา ฌางัน กูญา จะ "กาเญา บักซา อูลัยํ ฌาฮัจ เลอ. ซาปา บือเลฮ ปรีงัจ กะ กาเญา บรี กาเญา ลารี บูวัก เดะ ลาฆู นู ตูฮัด นะ มูซัยํ กรัจ ฮูโกบ เตอ? 8 กะฆีเตอ กะ กาเญา บราเลฮ-ฮาตี ซูโงฮ ดัฮ เตอ กือนา ปลีฮัจ เดะ ลาฆู ปือบูวัจ นะ กาเญา เลอ ซือรูปา ปูโฮด กายู นู บือบูวัฮ บาฌิ. ฌางัน นะ อีงัจ มือเลา เดะ ฮาตี จะ กีตา อาดา อับราฮัม ฌาดี อาโปก. ซาเบะ กู มือญาเระ กะ กาเญา จะ ตูฮัด เดะ อาตัซ ญา นะ บูวัจ บรี โกะ บีฌี บาตู อีนี ฌาดี นานะ นะ อับราฮัม บือเลฮ. 9 วะตู อีนี กาเญา ซือรูปา โกะ ปูโฮด กายู นู อาดา กาปะ ตืองะ เดะ ปรือดู เตอ. ราตา ปูโฮด นู บือบูวัฮ เตด บาฌิ นะ กือนา ตือบัก บูวัก เดะ อาปี เลอ." โยฮัน ญา จะ. 10 โซะ โกะ ลูมอฮ ซือมียา บาญะ ซัจๆ ตาญา จะ "กะฆีเตอ กามี ฆาโดฮ นะ บูวัจ กะฮามี เลอ?" 11 ญา ตีกัฮ กะ กูญา อีตู จะ "ซาปา นู อาดา บาฌู ดูวา กรัจ เตอ กือนา ฮาฆิ กะ โกะ ซือมียา นู ฮอย เลอ. ซาปา อาดา โกะ นาซี โปด กือนา ฮาฆิ ซือรูปา กะฆีเตอ ฌูฆา เลอ." 12 อาดา โกะ ซือมียา มูงอจ อาเซน โปด กูญา มาแรฮ ซาโมจ ลาฆู ซือลับ เดะ อาเย ฌูฆา. กูญา ตาญา โยฮัน จะ "บูมอยํ เออ ลูมอฮ กามี ฆาโดฮ นะ บูวัจ กะฮามี เลอ?" 13 ญา ตีกัฮ กะ กูญา จะ "กาเญา ซือมูฮา ฌางัน ปูงอจ อาเซน ลือเบฮ เดะ ปรืองัด เลอ." 14 อาดา โกะ ตาฮัน ซือตืองัฮ ฌูฆา กูญา ตาญา ญา จะ "โซะ ลูมอฮ กามี ฆาโดฮ นะ บูวัจ กะฮามี เลอ?" ญา ตีกัฮ กะ กูญา จะ "ฌางัน มืออารับ ปรือกัด ซาปา ฌางัน มียา ลาฆู มืออูปัย อาดู กะ ซาปา โปด บีดา นะ อาเมด ดูเวะ. ตาปี กือนา ปือนอฮ เดะ ฮาตี เดะ รือฆา อูปัฮ นะ กาเญา ตะอาซิก เลอ." 15 กะฆีเตอ โกะ ซือมียา ตืองัฮ จาดัก นะ ลีฮัจ ลาฆู บาฌิ ซูโงฮ. ราตา ซือมียา บือเลฮ บรีงัจ เดะ ฮาตี รอจ กะ โยฮัน จะ "อีซี ญาวา นะ ญา ฌาดี ราฌา นู บรี ซือลามัจ เฆอ เตด?" 16 โยฮัน ญา ตีกัฮ กะ กูญา ซือมูฮา จะ "โซะ กู นี กู บูวัจ บรี กาเญา ซือลับ เดะ อาเย เตอ. ตาปี อาดา ซือมียา ซืออูรัก นู มือฆัฮ ลือเบฮ เดะ กู ญา นะ มาแรฮ เลอ. ตาลี ปะตาปะ นะ ญา โปด กู ฮอย เตด บือฆูนา นะ อูฆัย เลอ. ซือมียา อีตู เลอ ญา นะ บูวัจ บรี กาเญา ซือรูปา ซือลับ เดะ ซือมืองัจ นะ ตูฮัด ซือลับ เดะ อาปี ฌูฆา เลอ. 17 ซือมียา อีตู ญา อาดา ปือญูเดาะ เดะ ตางัน ญา บีดา นะ ซูเดาะ ปาดี บรี ลามัน ปาดี นะ ญา นะ จรัฮ บาฌิ. โกะ บรัซ ญา นะ ตาโรฮ เดะ ดาลับ ดาเงา นะ ญา. ตาปี กูเละ ปาดี อีตู ญา นะ ตูนู เดะ อาปี นู เตด ดือละ ปาดับ ลาลู เลอ." โยฮัน ญา จะ. 18 กะฆีเตอ โยฮัน ญา บือเลฮ อาฌัยํ ปูลัก ปรีงัจ กะ กูญา บาญะ ลาฆู มือญาเระ บรีตา นู บาฌิ นะ ตูฮัด บรี โกะ ลูมอฮ ซือมียา ตาฮู. 19 ตาปี โซะ ราฌา เฮโรด ตานา กือนา โยฮัน อูจะ ญา ปาซัน ลาฆู นะ เฮโรดียัด บีนี นะ อาดี เดะ ญา กรานา ลาฆู ฌาฮัจ ซือมูฮา นู ราฌา เฮโรด บือเลฮ บูวัจ ฌูฆา เตอ 20 เฮโรด ญา บือเลฮ บูวัจ ฌาฮัจ บือตามัฮ ลือเบฮ เดะ ดูลู ปูลัก เตอ จะ ญา บือเลฮ รีฆะ โยฮัน กานัก ญา ตาโรฮ เดะ ปือฌารา. 21 ตานา โกะ ลูมอฮ ซือมียา ซือมูฮา ซาโมจ ลาฆู ซือลับ เดะ อาเย ดัฮ เยซู โปด ญา ซาโมจ ฌูฆา ดัฮ เตอ. ตืองัฮ เยซู บือซาโวจ ลาแงะ ตือบูกา ดัฮ. 22 อาดา ซือมืองัจ นะ ตูฮัด ญา ปลีฮัจ ซือรูปา บูโรก ปาตี ญา ตูโรด มาแรฮ เดะ อาตัซ เยซู. อาดา ซูวารา มาแรฮ ดาตัก เดะ โซะ ลาแงะ นู จะ "เกา เลอ ฌาดี นานะ นะ กู นู กู ซายัก. กู ซูกา-ฮาตี กะ เกา บาญะ เลอ." 23 วะตู เยซู ฮึนตะ นะ บือกรือฌา ลาฆู นะ ญา อูมอยํ นะ ญา เตอ ฆามะ-จะ ตีฆา-ปูโลฮ ตาโฮด ดัฮ. โกะ ซือมียา อาคา จะ ญา ฌาดี นานะ นะ โยเซบ. โยเซบ อีตู ฌาดี นานะ นะ เฮลี 24 เฮลี ฌาดี นานะ นะ มัดทัด มัดทัด ฌาดี นานะ นะ เลวี เลวี ฌาดี นานะ นะ เมลคี เมลคี ฌาดี นานะ นะ ยันนาย ยันนาย ฌาดี นานะ นะ โยเซบ 25 โยเซบ ฌาดี นานะ นะ มัดตาทียัด มัดตาทียัด ฌาดี นานะ นะ อาโมซ อาโมซ ฌาดี นานะ นะ นาฮูม นาฮูม ฌาดี นานะ นะ เอซลี เอซลี ฌาดี นานะ นะ นักฆาย 26 นักฆาย ฌาดี นานะ นะ มาอัด มาอัด ฌาดี นานะ นะ มัดตาทียัด มัดตาทียัด ฌาดี นานะ นะ เซเมยิน เซเมยิน ฌาดี นานะ นะ โยเซก โยเซก ฌาดี นานะ นะ โยดา 27 โยดา ฌาดี นานะ นะ โยอานัน โยอานัน ฌาดี นานะ นะ เรซา เรซา ฌาดี นานะ นะ เซรูบาเบน เซรูบาเบน ฌาดี นานะ นะ ซาลาทีเอน ซาลาทีเอน ฌาดี นานะ นะ เนรี 28 เนรี ฌาดี นานะ นะ เมลคี เมลคี ฌาดี นานะ นะ อัดดี อัดดี ฌาดี นานะ นะ โคซาม โคซาม ฌาดี นานะ นะ เอลมาดัม เอลมาดัม ฌาดี นานะ นะ เออ 29 เออ ฌาดี นานะ นะ โยซูวา โยซูวา ฌาดี นานะ นะ เอลีเยเซอ เอลีเยเซอ ฌาดี นานะ นะ โยริม โยริม ฌาดี นานะ นะ มัดทัด มัดทัด ฌาดี นานะ นะ เลวี 30 เลวี ฌาดี นานะ นะ ซีเมโอน ซีเมโอน ฌาดี นานะ นะ ยูดา ยูดา ฌาดี นานะ นะ โยเซบ โยเซบ ฌาดี นานะ นะ โยนัม โยนัม ฌาดี นานะ นะ เอลียาคิม 31 เอลียาคิม ฌาดี นานะ นะ เมเลยา เมเลยา ฌาดี นานะ นะ เมนนา เมนนา ฌาดี นานะ นะ มัดตาทา มัดตาทา ฌาดี นานะ นะ นาทาน นาทาน ฌาดี นานะ นะ ดาวิด 32 ดาวิด ฌาดี นานะ นะ เจซี เจซี ฌาดี นานะ นะ โอเบด โอเบด ฌาดี นานะ นะ โบอัด โบอัด ฌาดี นานะ นะ ซันโมน ซันโมน ฌาดี นานะ นะ นาโซน 33 นาโซน ฌาดี นานะ นะ อะมีนาดับ อะมีนาดับ ฌาดี นานะ นะ อัดมิน อัดมิน ฌาดี นานะ นะ อารนี อารนี ฌาดี นานะ นะ เฮซะโรน เฮซะโรน ฌาดี นานะ นะ เปเรด เปเรด ฌาดี นานะ นะ ยูดา 34 ยูดา ฌาดี นานะ นะ ยาโกบ ยาโกบ ฌาดี นานะ นะ อีซัก อีซัก ฌาดี นานะ นะ อับราฮัม อับราฮัม ฌาดี นานะ นะ ทารา ทารา ฌาดี นานะ นะ นาโฮ 35 นาโฮ ฌาดี นานะ นะ เซรุก เซรุก ฌาดี นานะ นะ เรอู เรอู ฌาดี นานะ นะ เปเลก เปเลก ฌาดี นานะ นะ เอเบอ เอเบอ ฌาดี นานะ นะ เซลัฮ 36 เซลัฮ ฌาดี นานะ นะ คัยนาน คัยนาน ฌาดี นานะ นะ อารพาซัด อารพาซัด ฌาดี นานะ นะ เซม เซม ฌาดี นานะ นะ โนฮา โนฮา ฌาดี นานะ นะ ลาเมก 37 ลาเมก ฌาดี นานะ นะ มือทูเซลา มือทูเซลา ฌาดี นานะ นะ เอโนก เอโนก ฌาดี นานะ นะ ยาเรด ยาเรด ฌาดี นานะ นะ มือฮาลาเลเอน มือฮาลาเลเอน ฌาดี นานะ นะ คัยนาน 38 คัยนาน ฌาดี นานะ นะ เอโนซ เอโนซ ฌาดี นานะ นะ เซด เซด ฌาดี นานะ นะ อาดับ อาดับ ฌาดี นานะ นะ ตูฮัด บือซัยํ เดะ อาตัซ.
1 กะฆีเตอ เยซู บาลิ มาแรฮ ดาตัก เดะ ซูงัย จอแดน. อาดา ซือมืองัจ นะ ตูฮัด ปือนอฮ เดะ ฮาตี นะ ญา บาวา ญา บือปี กะ โซะ ปาดัก ตานัฮ ตูโฮยํ นู ลือฆา เลอ. 2 กือมูฮา ปัจ-ปูโลฮ อารี กือปาลา ฮาตู ซีตัด มาแรฮ บาอาฌะ ญา บรี บูวัจ ซาลัฮ. วะตู อีตู เยซู เตด มากัด นามาๆ โปด. ตานา ลือปัซ วะตู อีตู ดัฮ ญา ลาปัยํ โตระ. 3 กะฆีเตอ ฮาตู ซีตัด ญา มือเลา จะ "ดัฮ เกา ฌาดี นานะ นะ ตูฮัด ซูโงฮ เตอ เกา กือนา ปือซัด บรี โกะ บาตู อีนี ฌาดี ตือโปก โรตี เลอ." 4 เยซู ตีกัฮ กะ ญา จะ " ซูรัจ ปือมือเลา นะ ตูฮัด มือเลา จะ 'นู โกะ ซือมียา นะ ฮีโดะ เตอ บูกัด ซา ซือบารัก มากัด เลอ.' ญา จะ." 5 กะฆีเตอ ฮาตู ซีตัด บาวา เยซู ปี ญาแญะ กะ ตือปัจ ตีงี บรี ญา ลีฮัจ โกะ นังฆรี ซือมูฮา ราตา เดะ ดือนียา ซือกาลี. 6 ฮาตู ซีตัด มือเลา จะ "ลาฆู มือฆัฮ ลาฆู บาฌิ บือฆาจะ อีนี ซือมูฮา กู นะ บรี กะ เกา เลอ. กู ซาโมจ ดัฮ ซือมูฮา. กู นะ บรี กะ ซาปา โปด บือเลฮ ฮาปา เลอ. 7 ดัฮ เกา นะ มือญือมัฮ กะ กู เตอ ลาฆู อีนี ซือมูฮา นะ บือเลฮ กะ เกา ดัฮ เลอ." ญา จะ. 8 เยซู ตีกัฮ กะ ฮาตู ซีตัด จะ "ซูรัจ ปือมือเลา นะ ตูฮัด มือเลา จะ 'กือนา มือญือมัฮ กะ ตูฮัด บือซัยํ เดะ อาตัซ ตูฮัด นะ เกา เลอ. กือนา ตูเฮะ กะ ญา นู ฌาดี ตูฮัด แนฮ ซา เลอ.' " ญา จะ. 9 กะฆีเตอ ฮาตู ซีตัด บาวา เยซู บือปี กะ นังฆรี เยรูซาเลม บรี ญา บือดีรี เดะ อาตัซ กือมูโบก นู ตีงี เดะ รูมัฮ มือญือมัฮ ตูฮัด. ญา มือเลา ฌางัน เยซู จะ "ดัฮ เกา ฌาดี นานะ นะ ตูฮัด โปด เกา กือนา ตรือโฌด เดะ อีนี ปี กะ บาวัฮ เลอ. 10 ซาเบะ ซูรัจ ปือมือเลา นะ ตูฮัด มือเลา จะ 'ตูฮัด นะ ซูโรฮ โกะ ฮูลู-บาลัก นะ ญา มาแรฮ บือบือลา เกา มาแรฮ ฌาฆา เกา เลอ.' 11 อาดา ฌูฆา นู จะ 'กูญา นะ ฮามัจ รีบา เกา เดะ ตางัน นะ กูญา ตีเมา บรี กากี นะ เกา นะ กือนา บาตู.' " 12 เยซู ตีกัฮ กะ ฮาตู ซีตัด อีตู จะ "ซูรัจ ปือมือเลา นะ ตูฮัด มือเลา จะ 'ฌางัน นะ ลกลีฮัจ ตูฮัด เดะ อาตัซ นู ฌาดี ตูฮัด นะ เกา เลอ.' " ญา จะ 13 ตานา กือปาลา ฮาตู ซีตัด บือเลฮ บาอาฌะ เยซู บรี บูวัจ ซาลัฮ ราตา ลาฆู ฮาบิฮ ดัฮ ญา ตีงัน เยซู ปี นาตี ตาดัฮ นู บาฌิ อาซิก ปูลัก. 14 ลือปัซ อีตู เยซู ญา บาลิ มาแรฮ ปาเระ กะ นังฆรี ฆาลิลี อาดา ฌางัน นู ปือมือฆัฮ นะ ซือมืองัจ นะ ตูฮัด. อาดา บรีตา นะ ญา กือจัย ปี ราตาๆ โซะ ซือบือลัฮ อีตู เลอ. 15 ญา ปี อาฌัยํ เดะ โกะ รูมัฮ บือมุน นะ กูญา. โกะ ซือมียา ซือมูฮา กูญา มือโอจ กะ ญา ฮาปา เลอ. 16 กะฆีเตอ เยซู ญา มาแรฮ รอจ กะ ตูโปะ นาซาเรด ฌาดี ตือปัจ นู ญา บือเลฮ บือซัยํ ญาวา มาแรฮ เลอ. เดะ อารี บราดู กรือฌา เตอ ญา มาโซะ กะ ดาลับ รูมัฮ บือมุน บือกะ ญา ลาดัจ บูวัจ บีลัก กาลี. ญา บีกัซ บือดีรี บีดา นะ บาจา ซูรัจ. 17 กูญา อาเมด ซูรัจ นะ อิซายา ซือมียา ตูโดฮ ลาฆู นะ ตูฮัด บรี กะ เยซู. ตานา ญา บูกา ซูรัจ อีตู ดัฮ ญา มียา ตือนอซ นู อาดา ฆาแรฮ ดัฮ จะ 18 "ซือมืองัจ นะ ตูฮัด ญา อาดา บือซามา กู ดัฮ. กรานา ญา บือเลฮ ตืองะ กู บีดา กู นะ ปี มือญาเระ บรีตา นู บาฌิ บรี กะ โกะ ซือมียา ฮาฌะ. ญา บือเลฮ ซูโรฮ กู ปี มือญาเระ กะ โกะ ซือมียา นู ฌาดี ฮามา จะ นู กูญา นะ ลือปัซ ดัฮ. ปี มือญาเระ กะ โกะ ซือมียา มาตา บูตา นู กูญา นะ บือเลฮ ลีฮัจ บือฆารี ปูลัก เลอ. ปี ตูโลก โกะ ซือมียา นู กือนา ปรือกัด บรี ลือปัซ เดะ ลาฆู ซูซัฮ ดัฮ. 19 ปี มือญาเระ บรี ตาฮู ฌูฆา จะ รอจ วะตู ดัฮ นู ตูฮัด นะ ตือจีฮัด ซูโงฮ กะ โกะ ลูมอฮ ซือมียา นะ ญา เลอ." 20 ตานา เยซู ญา ฆูโลก ซูรัจ บรี ปาเระ กะ ซือมียา มือนูโลก ญา โปด ดูโดะ บีดา นะ อาฌัยํ. มาตา นะ โกะ ซือมียา ซือมูฮา เดะ รูมัฮ บือมุน กูญา ปาคัจ ตีญูง กะ ญา ฮาปา เลอ. 21 กะฆีเตอ ญา ฮึนตะ นะ มือเลา กะ กูญา กะฆีนี จะ "อารี อีนี ตืองัฮ กาเญา ดืองัยํ เตอ ซูรัจ ปือมือเลา นะ ตูฮัด ตือนอซ นู บาจา ซีงี ญา รือมัก ซุจ ดัฮ เลอ." ญา จะ. 22 ซือมียา ซือมูฮา มือเลา มือโอจ กะ ญา. กูญา ปาคัจ ปือและ-ฮาตี เดะ ปือมือเลา นะ ญา นู ปือนอฮ ฌางัน ลาฆู บาฌิ. ตาปี กูญา มือเลา จะ "โบะ ซือมียา อีนี ฌาดี นานะ นะ โยเซบ บูกัด เฆอ?" 23 เยซู ญา มือเลา กะ กูญา จะ "ซูโงฮ เลอ กาเญา นะ มือเลา ปือมือเลา กียัซ อีนี กะ กู นู จะ 'บูมอยํ เออ กือนา บือบือลา ญาวา นะ เกา ตะอาซิก เลอ.' กาเญา นะ มือเลา ปูลัก จะ 'บือนา อีตู นู กามี บือเลฮ ดืองัยํ จะ เกา บูวัจ ดัฮ เดะ ตูโปะ คาเปอนาอุม เตอ บือนา อีตู กือนา บูวัจ ตือปัจ อีนี เดะ ตูโปะ นะ เกา ตะอาซิก ฌูฆา เลอ.' " 24 กะฆีเตอ เยซู ญา มือเลา ปูลัก จะ "กู นะ มือญาเระ กะ กาเญา ลาฆู ซูโงฮ จะ ฮอย ซือมียา ตูโดฮ นู ดีฮา เลอ นู โกะ ซือมียา เดะ ตูโปะ นะ ญา นะ ซูกา กะ ญา เลอ. 25 ตาปี โงฮ-ซูโงฮ เลอ กู มือญาเระ กะ กาเญา จะ อาดา นีบีนี ฌานา บาญะ อูรัก เดะ นังฆรี อิซราเอน ฮาดัจ นะ เอลียา เตอ กาลา ลาแงะ ตูโดก ดัฮ ฮอย ฮูฌัด รอจ กะ ตีฆา ตาโฮด นัม บูลัด เตอ กาลา ซือมียา ซือมูฮา บือตาฮัด โกะ ซือบารัก มากัด ฮาฌะ โตระ ราตา เดะ นังฆรี เลอ. 26 ตาปี ตูฮัด เตด บือเลฮ ซูโรฮ เอลียา ปี มียา โกะ นีบีนี ฌานา ซือมียา ดีฮา เดะ นังฆรี อิซราเอน. ญา ซูโรฮ ปี กะ นีบีนี ฌานา ซืออูรัก เดะ ตูโปะ ซาเรฟัด นังฆรี ซัยดอน เลอ. 27 อาดา ฌูฆา ซือมียา ปือญาเกะ ปูรู บาญะ อูรัก เดะ นังฆรี อิซราเอน ฮาดัจ นะ เอลีชา ซือมียา ตูโดฮ ลาฆู นะ ตูฮัด เตอ ตาปี ฮอย ซาปา เดะ ลูมอฮ กูญา กือนา บือบือลา บรี ซือนัง เดะ ปือญาเกะ อีตู ลาลู. อาดา ซา นามัน อูรัก ลูมอฮ ซีเรีย เตอ ญา กือนา บือบือลา ดัฮ เลอ." เยซู ญา จะ. 28 ตานา โกะ ซือมียา ซือมูฮา เดะ รูมัฮ บือมุน อีตู กูญา บือเลฮ ดืองัยํ กะฆีเตอ ดัฮ กูญา มูซัยํ โตระ เลอ. 29 กูญา บีกัซ ฆรูมง ตูละ เยซู โปรฮ ตรือเบะ เดะ ตูโปะ บือปี กะ บีดิก ลาเฮา บูเกะ ตือปัจ ตูโปะ นะ กูญา บีดา นะ บือเลฮ ตูละ ญา บรี ฆูโฆยํ กะ บาวัฮ. 30 ตาปี เยซู ญา บือเลฮ ปี ลือปัซ เดะ ตืองัฮ กูญา ปี ดัฮ. 31 ลือปัซ อีตู เยซู ญา ตูโรด ปี กะ ตูโปะ คาเปอนาอุม โซะ นังฆรี ฆาลิลี. ญา อาฌัยํ โกะ ลูมอฮ ซือมียา เดะ อารี บราดู. 32 โกะ ซือมียา นู ดืองัยํ เตอ กูญา ปือและ-ฮาตี ซูโงฮ นู ญา อาฌัยํ กะฆีเตอ กรานา ปือมือเลา นะ ญา อาดา ฆือนะ ฌางัน ลาฆู ปือมือฆัฮ เลอ. 33 เดะ รูมัฮ บือมุน เตอ อาดา ซือมียา ซืออูรัก นู กือนา ฮาตู ฌิด นู ตะอารัฮ มาโซะ ราโซะ เดะ ญาวา ญา ดัฮ. ซือมียา อีตู เตอ ญา บือซูระ บูริ จะ 34 "อาโดย เยซู อูรัก นาซาเรด เออ เกา มาแรฮ บือฆาโดฮ ลูมอฮ กามี บูวัจ นามา เลอ? เกา มาแรฮ นะ บูวัจ บรี ลูมอฮ กามี ฌาฮานัม เฆอ? กู ตาฮู จะ เกา ฌาดี ซาปา. เกา เตอ ซือมียา นู บาฌิ บือซรี นะ ตูฮัด บือซัยํ เดะ อาตัซ เลอ." ญา จะ. 35 ตาปี เยซู เตอ ญา อูจะ บลารัก กะ ฮาตู อีตู จะ "กือนา ซืองะ บูวัก เลอ ตรือเบะ เดะ ญาวา นะ ซือมียา อีตู ปี ญัฮ เลอ." ฮาตู อีตู เตอ ญา บูวัจ บรี ซือมียา อีตู รือบัฮ เดะ ตืองัฮ กูญา. กะฆีเตอ ฮาตู ญา ตรือเบะ เดะ ญาวา นะ ญา ปี ดัฮ เตด บือเลฮ บูวัจ บรี ญา ซาเกะ มานามา โปด. 36 โกะ ซือมียา ซือมูฮา กูญา ปาคัจ ปือและ-ฮาตี ซูโงฮ มือเลา ซามา กูญา จะ "ปือมือเลา นะ ญา ฌาดี กะฮามี เลอ? ซาเบะ-จะ ญา ปือซัด โกะ ฮาตู ฌางัน ปือมือเลา นู มือฆัฮ ปือมือเลา นู ซีดี เตอ. โกะ ฮาตู โปด ฆาโดฮ ตรือเบะ มาแรฮ เลอ." 37 กะฆีเตอ บรีตา นะ เยซู บือเลฮ กือจัย ปี ราตาๆ เดะ โซะ นังฆรี อีตู. 38 โซะ เยซู ญา บีกัซ บือดีรี ตรือเบะ เดะ รูมัฮ บือมุน ปี กะ ดาลับ รูมัฮ นะ ซีโมน. อาดา มะ มือตูฮา นะ ซีโมน ญา ฮูวัจ โตระ. 39 กะฆีเตอ กูญา ซือมูฮา ปาคัจ มีตา ตูโลก เดะ เยซู บรี ตูโลก นีบีนี อีตู. กะฆีเตอ ญา บือดีรี โซะ ซือมียา ซาเกะ ญา อูจะ บลารัก กะ ฮูวัจ. ฮูวัจ อีตู โปด ฮอย ดัฮ ซือนัง บาฌิ ดัฮ. วะตู อีตู เลอ มะ มือตูฮา นะ ซีโมน ญา บีกัซ ดัฮ ตูโลก บือกรือฌา มากัด บรี กะ กูญา เลอ. 40 ตานา มาตาอารี นะ ฆูโฆยํ ซาปา อาดา นะบรานะ นู ซาเกะ ปือญาเกะ แนฮ-ฌือแนฮ เตอ ปาคัจ บาวา กูญา มาแรฮ มียา เยซู. เยซู ญา ปือเตาะ ตางัน กือนา โกะ ซือมียา ซาเกะ ราตา บูวัจ บรี กูญา ลือฆา เดะ โกะ ปือญาเกะ อีตู. 41 อาดา โกะ ฮาตู ฌูฆา ตรือเบะ มาแรฮ เดะ โกะ ซือมียา บาญะ อูรัก ซาเมน บือซูระ จะ "เกา เลอ ฌาดี นานะ นะ ตูฮัด บือซัยํ เดะ อาตัซ." ตาปี โซะ เยซู ญา บลารัก กูญา ตีเมา บรี กูญา มือเลา ซาเบะ กูญา ตาฮู ดัฮ จะ เยซู ฌาดี ราฌา นู บรี ซือลามัจ. 42 ตานา จรัฮ ปาฆี เยซู ญา ตรือเบะ งะซืองะ ปี กะ โซะ ตือปัจ ฮอย ซือมียา. กะฆีเตอ โกะ ซือมียา ปาคัจ มียา ญา. ดาปัจ ดัฮ กูญา นะ ตาฮัด ญา ตีเมา บรี ปี เดะ กูญา. 43 ตาปี เยซู ญา มือเลา ฌางัน กูญา จะ "กู นะ ฆาฆัฮ ปี มือญาเระ บรีตา นู บาฌิ ปาซัน นู ตูฮัด ญา อาดา บือบือลา ฌาดี ราฌา เตอ บรี กะ โกะ ตูโปะ อาซิกๆ ดืองัยํ ฌูฆา. ซาเบะ-จะ กรานา ลาฆู กะฆีนี เลอ ตูฮัด เดะ อาตัซ ซูโรฮ กู มาแรฮ." 44 กะฆีเตอ ญา บือเลฮ ปี มือญาเระ อาฌัยํ เดะ รูมัฮ บือมุน ราตา นังฆรี ยูเดีย เลอ.
1 อาดา ซืออารี เยซู ญา บือดีรี เดะ บีดิก ลาโวจ ฆาลิลี. โกะ ซือมียา บาญะ ปาคัจ ปี ปือแปะ ญา ยู กรือจัจ บีดา นะ มือนีงัย ปือมือเลา นะ ตูฮัด นู เยซู อาฌัยํ เลอ. 2 เยซู ญา ลีฮัจ ปราฮู จรือนิ เดะ ปาตัย ดูวา บูวัฮ ตาปี ซือมียา เดะ ปราฮู กูญา ตูโรด ฮาบิฮ ดัฮ ตืองัฮ บาโซฮ โกะ ปูกัจ. 3 กะฆีเตอ เยซู ญา ปี ญาแญะ กะ อาตัซ ปราฮู นู ซา ฌาดี ปราฮู นะ ซีโมน เตอ มีตา บรี มืองือละ ดีกิ เดะ บีดิก ปาตัย. กะฆีเตอ ญา ดูโดะ เดะ อาตัซ ปราฮู อาฌัยํ โกะ ลูมอฮ ซือมียา นู บาญะ อีตู. 4 ตานา เยซู อาฌัยํ กูญา ซุจ ดัฮ ญา มือเลา ฌางัน ซีโมน จะ "ตรือเบะ ปราฮู ปี กะ โซะ ดาลับ ปลือปัซ ปูกัจ รีฆะ อีกัด เลอ." 5 ซีโมน ญา ตีกัฮ กะ เยซู จะ "จา เออ กามี มูกัจ มาลับ บือซียัก ดัฮ ฮอย เตด บือเลฮ อีกัด ซืออีโกยํ โปด. ตาปี กู นะ ปลือปัซ ปูกัจ ตูโรจ กะ ปือมือซัด นะ เกา." 6 ตานา กูญา ปลือปัซ ปูกัจ ดัฮ บือเลฮ อีกัด บาญะ ซูโงฮ ยู ปูกัจ ฆามะ นะ ปือจัฮ เลอ. 7 กะฆีเตอ กูญา ลามัย โกะ กาวัด เดะ ปราฮู นู ซือบูวัฮ อีตู บรี มาแรฮ ตูโลก. กูญา ปือโดะ อีกัด นู บาญะ ยู ดูวา บูวัฮ ปราฮู ซารัจ ดาปิก นะ ตาลับ ดัฮ เลอ. 8 โซะ ซีโมน นู ปือนามา อาซิก จะ เปโตร ตานา ญา ลีฮัจ กะฆีเตอ ดัฮ ญา ตือมะ เดะ ลูโตจ นะ เยซู มือเลา จะ "ตูฮัด เออ มีตา ปี ฌาโวฮ เดะ กู เลอ. ซาเบะ กู นี ฌาดี อูรัก บือดูซา บาญะ." 9 กรานา-จะ อีซี ญา ฌางัน โกะ ซือมียา เดะ ปราฮู ซือมูฮา กูญา ปาคัจ ปือและ-ฮาตี ซูโงฮ ปาซัน นู กูญา บือเลฮ อีกัด บาญะ กะฆีเตอ. 10 ยากอบ ฌางัน โยฮัน โกะ นานะ นะ เซเบดี นู บือฮุน บือซามา ฌางัน ซีโมน กูญา บือและ-ฮาตี ฌูฆา. ตาปี เยซู มือเลา ฌางัน ซีโมน จะ "ฌางัน ตาโกจ เลอ. ตะเดะ อีนี ปี เกา นะ ฌาดี ซือมียา รีฆะ โกะ ซือมียา เลอ." 11 กะฆีเตอ ตานา กูญา บาวา ปราฮู รอจ กะ ปาตัย ดัฮ กูญา ตีงัน โกะ ซือบารัก นะ กูญา ซือมูฮา ฮาบิฮ ตูโรจ กะ เยซู ปี ดัฮ. 12 กาลา เยซู อาดา เดะ ตูโปะ ซา ตูโปะ อาดา ซือมียา ปือญาเกะ ปูรู ปือนอฮ เดะ ญาวา ญา มาแรฮ. ตานา ลีฮัจ เยซู ญา ตือมะ มูคา รอจ กะ ตานัฮ มีตา เดะ เยซู จะ "ตูฮัด เออ กะ เกา อาดา ฮาตี นะ บือบือลา กู กะฆีเตอ นะ บูวัจ บรี กู ซือนัง บือเลฮ เลอ." 13 กะฆีเตอ เยซู ญา อาเงา ตางัน นะ ญา ปือเตาะ เดะ ญาวา นะ ซือมียา อีตู มือเลา จะ "กู อาดา ฮาตี นะ บือบือลา เกา. บรี เกา ซือนัง บาฌิ เลอ." ดัดดัด อีตู ปือญาเกะ ปูรู ฮอย ฮาบิฮ ดัฮ เดะ ญาวา นะ ญา. 14 กะฆีเตอ เยซู บลารัก กะ ญา ตีเมา บรี จาเระ ลาฆู อีตู กะ ซาปา. ญา มือเลา ปูลัก จะ "ปี เลอ มียา ซามี บรี ญา ลีฮัจ จะ เกา ลือฆา ดัฮ. มือนืองะ บารัก มือญือมัฮ บรี กะ ตูฮัด เลอ_ บือกะ มูซา ปือซัด ดัฮ เตอ บีดา นะ บรี ราตา ซือมียา ลีฮัจ จะ เกา ซือนัง บาฌิ ดัฮ." เยซู ญา จะ. 15 ตาปี บรีตา นะ เยซู กือจัย ปี ราตาๆ บือตามัฮ บาญะ ดัฮ. โกะ ซือมียา บาญะ ปาคัจ มาแรฮ บือมุน บือซามา บีดา นะ มือนีงัย เยซู อาฌัยํ เลอ บีดา เยซู นะ บือบือลา ปือญาเกะ แนฮ-ฌือแนฮ นะ กูญา บรี ลือฆา ฮาบิฮ. 16 ตาปี โซะ เยซู ญา บียาซา ตรือเบะ ปี โซะ ตือปัจ นู ซืองะ ฮอย ซือมียา บีดา นะ บือซาโวจ. 17 อาดา ซืออารี เยซู ญา ตืองัฮ อาฌัยํ เตอ อาดา โกะ ลูมอฮ ฟาริซี ฌางัน ลูมอฮ ซือมียา อาฌัยํ ลาฆู ปือมือซัด นะ ตูฮัด กูญา ดูโดะ ซามา. กูญา มาแรฮ ดาตัก เดะ ราตา ตูโปะ เดะ โซะ นังฆรี ฆาลิลี เดะ โซะ นังฆรี ยูเดีย ฌางัน นังฆรี เยรูซาเลม. ปือมือฆัฮ นะ ตูฮัด เตอ ดูโดะ ฌางัน เยซู บีดา ญา นะ บือบือลา โกะ ซือมียา บรี ซือนัง เดะ โกะ ปือญาเกะ เลอ. 18 นี เลอ อาดา โกะ ซือมียา กูญา อูโซก ซือมียา ฮอย อูรัจ ซืออูรัก แลก-ฆูแลก เดะ ลือปัจ. กูญา มียา จือลัฮ นะ อูโซก ซือมียา อีตู มาโซะ มาแรฮ ตืองะ โซะ ฮึลด มูคา นะ เยซู. 19 ตานา มียา จือลัฮ นะ มาโซะ ฮอย เตด บือเลฮ กรานา โกะ ซือมียา บาญะ ตือลาลู กูญา อาเลฮ ปี ญาแญะ กะ อาตัซ กือมูโบก รูมัฮ บูกา จือลัฮ เดะ อาตัซ กือมูโบก บือตูโรด ซือมียา ฮอย อูรัจ อีตู ฌางัน ลือปัจ นะ ญา ตืองะ เดะ ตืองัฮ โกะ ซือมียา โซะ ฮึลด มูคา นะ เยซู. 20 ตานา เยซู ลีฮัจ นู กูญา ปือจายา กะฆีเตอ ญา มือเลา กะ ซือมียา อีตู จะ "กาวัด เออ ดูซา นะ เกา กือนา อาเกะ บรี ดัฮ." 21 โซะ ลูมอฮ ซือมียา อาฌัยํ ลาฆู ปือมือซัด นะ ตูฮัด ฌางัน โกะ ลูมอฮ ฟาริซี กูญา อีงัจ เดะ ฮาตี ตาญา จะ "ซือมียา อีนี ฌาดี ซาปา เลอ นู ญา มือเลา ตะอารัฮ กะ ตูฮัด เดะ อาตัซ? ฮอย ซือมียา ดีฮา นะ อาเกะ ดูซา บือเลฮ. ซา ตูฮัด บือซัยํ เดะ อาตัซ เลอ นู นะ อาเกะ บือเลฮ." 22 ตาปี ตานา เยซู ญา ตาฮู จะ กูญา อีงัจ กะฮามี ญา มือเลา กะ กูญา จะ "บูวัจ นามา เลอ กาเญา บรีงัจ เดะ ฮาตี กะฆีนี? 23 นู ดีฮา มือเลา ซือนัง ลาฆี? นู จะ 'ดูซา นะ เกา กือนา อาเกะ บรี ดัฮ' เฆอ-จะ 'บีกัซ บือฌาลัด ปี เลอ.' นู ดีฮา ซือนัง ลาฆี? 24 ตาปี กู นะ บรี กาเญา ตาฮู จะ นานะ นะ อูมัจ-ซือมียา อาดา มือฆัฮ นู นะ อาเกะ ดูซา เดะ ดือนียา อีนี บือเลฮ." กะฆีเตอ เยซู ญา มือเลา กะ ซือมียา ฮอย อูรัจ จะ "กู ซูโรฮ เกา จะ บีกัซ เลอ อาเกะ บาวา ลือปัจ นะ เกา บาลิ ปี กะ รูมัฮ เลอ." 25 ดัดดัด อีตู ซือมียา อีตู ญา บีกัซ โซะ ฮึลด มูคา นะ กูญา ซือมูฮา อาเกะ บาวา ตือปัจ นู ญา ตีโนะ ซีงี บาลิ ปี กะ รูมัฮ นะ ญา ซาเมน ปูฌี มือโอจ กะ ตูฮัด เดะ อาตัซ. 26 โกะ ซือมียา ซือมูฮา กูญา ปาคัจ ปือและ-ฮาตี โตระ มือโอจ กะ ตูฮัด เดะ อาตัซ. กูญา ตาโกจ ซูโงฮ มือเลา จะ "อารี อีนี กีตา บือเลฮ ลีฮัจ ลาฆู ปือและ ซูโงฮ เลอ." 27 ลือปัซ ลาฆู กะฆีเตอ เยซู ตรือเบะ ปี ดัฮ. ญา ลีฮัจ ซือมียา มูงอจ อาเซน ซืออูรัก ปือนามา จะ เลวี ดูโดะ เดะ ตือปัจ ปูงอจ อาเซน. เยซู มือเลา กะ ญา จะ "มาแรฮ ตูโรจ กะ กู เลอ." 28 กะฆีเตอ เลวี ญา ตีงัน โกะ ซือบารัก ซือมูฮา บีกัซ ตูโรจ กะ เยซู ปี ดัฮ. 29 ลือปัซ อีตู เลวี ญา บูวัจ โกะ ซือบารัก มากัด บาญะ เดะ รูมัฮ นะ ญา บีดา ซาโมจ เยซู. อาดา โกะ ซือมียา มูงอจ อาเซน ฌางัน ลูมอฮ ซือมียา อาซิก บาญะ อูรัก มาแรฮ มากัด บือซามา ฌูฆา. 30 อาดา โกะ ลูมอฮ ฟาริซี ฌางัน ซือมียา อาฌัยํ ลาฆู ปือมือซัด นะ ตูฮัด เดะ ลูมอฮ กูญา เตอ กูญา บือบีซิ บือซูงุจ กะ โกะ มูเระ นะ เยซู จะ "บูวัจ นามา ปะ กาเญา มาแรฮ มากัด โอะ บือซามา ฌางัน โกะ ลูมอฮ ซือมียา มูงอจ อาเซน ฌางัน โกะ ลูมอฮ ซือมียา บือดูซา?" 31 เยซู ญา ตีกัฮ กะ กูญา จะ "ซือมียา นู ซือนัง บาฌิ เตอ ญา เตด มียา บูมอยํ ตาปี ซือมียา นู ซาเกะ ญา เลอ นู นะ มียา บูมอยํ. 32 กู มาแรฮ ดัฮ บูกัด นะ ปาเงน โกะ ซือมียา บาฌิ-ตือปัจ ตาปี บีดา นะ ปาเงน โกะ ซือมียา บือดูซา บรี บราเลฮ-ฮาตี ปาเระ." ญา จะ. 33 อาดา โกะ ซือมียา มือเลา กะ เยซู จะ "โกะ มูเระ นะ โยฮัน กูญา บูวัจ ตูโรจ ลาฆู บือตาฮัด มากัด ซัจๆ ซาเมน บือซาโวจ. โกะ มูเระ นะ ลูมอฮ ฟาริซี กูญา บูวัจ ตูโรจ กะฆีเตอ ฌูฆา. ตาปี โกะ มูเระ นะ เกา เตอ กูญา มากัด กูญา โอะ ซามา เลอ." 34 โซะ เยซู มือเลา กะ กูญา จะ "กาลา เจาเบา อาดา เดะ ลาฆู มือนีกัฮ กาเญา นะ บูวัจ บรี กาวัด นะ ญา นะ บือตาฮัด บารัก มากัด บือเลฮ เฆอ? ฮอย เตด บือเลฮ เลอ. 35 ตาปี อาดา ซืออารี เจาเบา นะ กือนา ราปัจ เดะ กูญา อีตู. อารี อีตู เลอ กูญา นะ ตูโรจ กะ ลาฆู บือตาฮัด บารัก มากัด." 36 เยซู ญา มือเลา จรือตา อาฌัยํ กูญา ฌูฆา จะ "ฮอย ซาปา นะ จูลัด กาเยด ซือกรัจ เดะ บาฌู นู บารู มาแรฮ ตาโปก เดะ บาฌู นู ตูฮา. ดัฮ บูวัจ กะฆีเตอ บาฌู บารู อีตู ญา นะ จีแจะ ปี ดัฮ เตอ ตาปี กาเยด ซือกรัจ อีตู นู อาเมด ดาตัก เดะ บาฌู นู บารู ญา เตด ซือรูปา กาเยด เดะ บาฌู นู ตูฮา เลอ. 37 กะฆีเตอ ฌูฆา ฮอย ซาปา อาเมด อาระ อางุน นู บารู บอฮ เดะ โทก กูเละ นู ตูฮา ตาโกจ-จะ อาระ อางุน นู บารู นะ กือมัก บูวัจ บรี โทก กูเละ บรือโตฮ. กะฆีเตอ อาระ อางุน นะ มือนีเลฮ ตรือเบะ ฮาบิฮ. โทก กูเละ โปด นะ บือนาซา ฌูฆา. 38 ตาปี อาระ อางุน นู บารู กือนา บอฮ เดะ โทก กูเละ นู บารู เลอ. 39 ฮอย ซือมียา ดีฮา นู บือเลฮ โอะ อาระ อางุน นู ลามา ดัฮ นู นะ ตือตาเฆฮ อาระ อางุน นู บารู. กรานา ญา จะ 'นู ลามา บาฌิ ลาฆี เลอ.' " เยซู ญา จะ.
1 อาดา ซืออารี เดะ อารี บราดู กรือฌา เยซู ตืองัฮ บือฌาลัด ปี เดะ ฮูมา ปาดี. โกะ มูเระ นะ เยซู กูญา ลือกับ โกะ ตากัย ปาดี ฆีเญฮ เดะ ตางัน มากัด ดัฮ. 2 โกะ ลูมอฮ ฟาริซี ซือตืองัฮ กูญา มือเลา จะ "บูวัจ นามา กาเญา บูวัจ ลาฆู นู กือนา บลารัก ดัฮ ตีเมา บรี บูวัจ เดะ อารี บราดู กรือฌา เลอ?" 3 กะฆีเตอ เยซู ญา ตีกัฮ กะ กูญา จะ "กาเญา เตด บือเลฮ บาจา เฆอ ลาฆู นู ราฌา ดาวิด บูวัจ ดัฮ? ญา เตอ ฌางัน ลูมอฮ ซือมียา นะ ญา กูญา ลาปัยํ โกะ ซือบารัก มากัด. 4 กะฆีเตอ ญา บือเลฮ มาโซะ ปี กะ ดาลับ รูมัฮ มือญือมัฮ ตูฮัด ญา อาเมด ตือโปก โรตี นู มือนืองะ บรี กะ ตูฮัด ดัฮ มาแรฮ มากัด. ญา ฮาฆิ บรี กะ ลูมอฮ ซือมียา นะ ญา ซามา. ตาปี ตือโปก โรตี อีตู ปือมือเลา ฮูโกบ นะ ตูฮัด บลารัก ดัฮ ตีเมา บรี ซาปาๆ มากัด. ซา โกะ ลูมอฮ ซามี เลอ นู นะ บือเลฮ มากัด. " 5 กะฆีเตอ เยซู ญา มือเลา กะ กูญา ปูลัก จะ "กู นู นานะ นะ อูมัจ-ซือมียา อีนี ฌาดี ตูฮัด เดะ ลาฆู อารี บราดู กรือฌา เลอ." ญา จะ. 6 เดะ อารี บราดู กรือฌา นู ซา อารี ปูลัก เยซู มาโซะ กะ ดาลับ รูมัฮ บือมุน ญา อาฌัยํ โตะ อีตู. อาดา ซือมียา ซืออูรัก นู ตางัน กานัน นะ ญา กาแป. 7 โซะ ลูมอฮ ฟาริซี ฌางัน ลูมอฮ ซือมียา อาฌัยํ ลาฆู ปือมือซัด นะ ตูฮัด กูญา ซารี ลาฆู นะ อาดู เยซู. กะฆีเตอ กูญา นาตี ลีฮัจ จะ เยซู นะ บือบือลา ซือมียา อีตู เดะ อารี บราดู เฆอ เตด. 8 ตาปี เยซู เตอ ญา ตาฮู ลาฆู นู กูญา บรีงัจ เดะ ฮาตี. กะฆีเตอ ญา มือเลา กะ ซือมียา ตางัน กาแป อีตู จะ "บีกัซ เลอ มาแรฮ บือดีรี โซะ ฮึลด." กะฆีเตอ ซือมียา อีตู ญา บีกัซ บือดีรี โซะ อีตู ดัฮ. 9 กะฆีเตอ เยซู มือเลา กะ ลูมอฮ ซือมียา อีตู จะ "กู นะ ตาญา กาเญา จะ ปือมือเลา ฮูโกบ เตอ นะ บรี ซือมียา บูวัจ ลาฆู นามา เดะ อารี บราดู กรือฌา? นะ บูวัจ ลาฆู บาฌิ เฆอ-จะ นะ บูวัจ ลาฆู ฌาฮัจ? นะ ตูโลก ซือมียา บรี ฮีโดะ เฆอ-จะ นะ บูวัจ บรี บือนาซา ปี? นู ดีฮา บาฌิ เลอ?" 10 เยซู ญา ตีญูง กือลีลิก ลีฮัจ โกะ ซือมียา ซือมูฮา. กะฆีเตอ ญา มือเลา กะ ซือมียา ตางัน กาแป จะ "ลือฌัก ตางัน นะ เกา เลอ." ญา โปด บูวัจ ตูโรจ. กะฆีเตอ ตางัน นะ ญา ลือฆา บาฌิ ดัฮ. 11 โซะ โกะ ซือมียา อีตู ซือมูฮา กูญา มูซัยํ โตระ ปาคัจ บือกีรา ซามา กูญา จะ นะ บูวัจ กะฮามี ฌางัน เยซู บือเลฮ เลอ. 12 กาลา อีตู เยซู ญา ญาแญะ ปี กะ อาตัซ บูเกะ บีดา นะ บือซาโวจ. ญา บือซาโวจ กะ ตูฮัด เดะ อาตัซ มาลับ บือซียัก. 13 ตานา ซียัก ดัฮ เยซู ญา บลาโลก โกะ มูเระ นะ ญา. กะฆีเตอ ญา ปีเลฮ ดูวา-บือลัซ อูรัก เดะ ลูมอฮ กูญา ตืองะ กูญา อีตู บรี ฌาดี ปือญูโรฮ นะ ญา. 14 อาดา ซือมียา กะฆีนี ฌาดี-จะ ซีโมน นู เยซู บลาโลก ปือนามา อาซิก จะ เปโตร ฌางัน อันดรู อาดี เดะ ญา. อาดา ยากอบ ฌางัน โยฮัน อาดา ฟีลิบ บาโทโลมัย 15 มัดทัย โทมัด. อาดา ยากอบ นู นานะ นะ อันเฟอัด เตอ อาดา ซีโมน ซือมียา เดะ ลูมอฮ นู นะ บลาวัด บีดา ปลือปัซ นังฆรี. 16 อาดา ยูดา นู นานะ นะ ยากอบ ฌางัน ยูดา อิดคารีโยด นู ฌาดี ซือมียา บูวัจ กือบลากัก กะ เยซู ดัฮ. 17 กะฆีเตอ เยซู ฌางัน โกะ มูเระ นู อีตู กูญา ตูโรด มาแรฮ บือดีรี เดะ ตือปัจ จรัฮ นู ซามา. อาดา ลูมอฮ มูเระ นะ ญา บาญะ อูรัก. อาดา โกะ ลูมอฮ ซือมียา บาญะ ซูโงฮ เลอ นู มาแรฮ ดาตัก เดะ ราตา นังฆรี ยูเดีย ฌางัน นังฆรี เยรูซาเลม ดาตัก เดะ โกะ ตูโปะ นู เดะ บีดิก ลาโวจ โซะ ตือกอซ นังฆรี ทัยระ ฌางัน นังฆรี ซัยดอน. 18 กูญา มาแรฮ บีดา นะ มือนีงัย กะ เยซู บีดา นะ บรี เยซู บือบือลา โกะ ปือญาเกะ นะ กูญา. โซะ โกะ ซือมียา นู ลาวัด ซูซัฮ กรานา โกะ ฮาตู ตะอารัฮ เตอ กูญา ซือนัง ฮาบิฮ ซือมูฮา เลอ. 19 โกะ ซือมียา ซือมูฮา ปาคัจ มาแรฮ นะ บรี กือนา ญาวา นะ เยซู ซาเบะ-จะ อาดา ปือมือฆัฮ นู ซีดี ตรือเบะ เดะ เยซู นู บือบือลา กูญา ซือมูฮา บรี ซือนัง ดัฮ. 20 เยซู ญา ตีญูง ลีฮัจ โกะ มูเระ นะ ญา ญา มือเลา จะ "ซือนัง ซือลามัจ เลอ กาเญา นู ฌาดี ซือมียา ฮาฌะ ซาเบะ กาเญา ฌาดี ลูมอฮ ซือมียา นู อาดา ตูฮัด ฌาดี ราฌา ดัฮ. 21 "ซือนัง ซือลามัจ เลอ กาเญา นู ลาปัยํ นะ มากัด เดะ วะตู อีนี ซาเบะ กาเญา นะ บือเลฮ กือญัง. "ซือนัง ซือลามัจ เลอ กาเญา นู มือนาแงฮ วะตู อีนี ซาเบะ กาเญา นะ บือเลฮ บือฆือละ. 22 "ซือนัง ซือลามัจ เลอ กาเญา วะตู โกะ ซือมียา นะ บือชี กะ กาเญา นะ โปรฮ กาเญา ตรือเบะ เดะ ลูมอฮ กูญา นะ มือฌัฮ กะ กาเญา นะ มือเลา ฌาฮัจ กะ นามา นะ กาเญา กรานา-จะ กาเญา ตูโรจ กะ กู นู นานะ นะ อูมัจ-ซือมียา อีนี เลอ. 23 เดะ อารี กูญา บูวัจ กะฆีเตอ บรี กาเญา บรามัย มือนารี ซูกา-ฮาตี เลอ กรานา-จะ นี เลอ กาเญา อาดา บาฮาเฆด นู บือซัยํ เดะ โซะ อาตัซ ลาแงะ. ซาเบะ โกะ บีลาแก นะ กูญา บือเลฮ บูวัจ ซือรูปา กะฆีเตอ ฌูฆา กะ โกะ ซือมียา ตูโดฮ ลาฆู นะ ตูฮัด. 24 "ตาปี จือลากา เลอ กาเญา นู ฌาดี ซือมียา กายา ซาเบะ กาเญา บือเลฮ ซาโมจ ลาฆู ซือนัง นะ กาเญา ฮาบิฮ ดัฮ. 25 "จือลากา เลอ กาเญา นู กือญัง เดะ วะตู อีนี ซาเบะ กาเญา ฆาโดฮ นะ บือตาฮัด. "จือลากา เลอ กาเญา นู บือฆือละ เดะ วะตู อีนี ซาเบะ กาเญา นะ มือนาแงฮ บือปาโตด. 26 "จือลากา เลอ กาเญา ตานา โกะ ซือมียา ซือมูฮา นะ มือโอจ กะ กาเญา ซาเบะ โกะ บีลาแก นะ กูญา บือเลฮ มือโอจ ซือรูปา กะฆีเตอ กะ โกะ ซือมียา นู มืออูปัย จะ ฌาดี ซือมียา ตูโดฮ ลาฆู นะ ตูฮัด." 27 "ตาปี กู มือญาเระ กะ กาเญา ซือมูฮา นู ตืองัฮ มือนีงัย จะ กือนา ซายัก กะ ซือตรู นะ กาเญา กือนา บูวัจ บาฌิ กะ ซือมียา นู บือชี กะ กาเญา. 28 กือนา มีตา เดะ ตูฮัด นะ บรี ซือลามัจ กะ ซือมียา นู อาโบยํ ซูปัฮ กะ กาเญา กือนา บือซาโวจ มีตา บีดา ซือมียา นู อูจะ ฌาฮัจ กะ กาเญา เลอ. 29 ซือมียา ดีฮา ตาปัยํ ปีปี นะ เกา ซือบือลัฮ เกา กือนา อาเลฮ โซะ ซือบือลัฮ บรี กะ ญา ฌูฆา. ดัฮ ซือมียา ดีฮา นะ ราปัซ อาเมด บาฌู ซรือโกะ ญาวา นะ เกา ปี บรี ญา อาเมด บาฌู นู ซา ปูลัก ฌางัน นะ บลารัก เลอ. 30 กือนา บรี กะ ราตา ซือมียา นู มีตา เดะ เกา. ดัฮ ซาปา อาเมด โกะ ซือบารัก นะ เกา บือปี ฌางัน ตูงู ปาเระ เลอ. 31 กาเญา อาดา ฮาตี นะ บรี โกะ ซือมียา บูวัจ กะ กาเญา กะฮามี เตอ กาเญา กือนา บูวัจ กะ กูญา กะฆีเตอ ฌูฆา เลอ. 32 "ดัฮ กาเญา ซายัก กะ ซือมียา นู ซายัก กาเญา นะ บือเลฮ ลาฆู นามา บาฌิ? มีเซ-จะ โกะ ซือมียา บือดูซา เตอ กูญา ซายัก กะ ซือมียา นู ซายัก กูญา ฌูฆา เลอ. 33 ดัฮ กาเญา บูวัจ บาฌิ กะ ซือมียา นู บูวัจ บาฌิ กะ กาเญา นะ บือเลฮ ลาฆู นามา บาฌิ เลอ? ซาเบะ-จะ โกะ ซือมียา บือดูซา โปด กูญา บูวัจ กะฆีเตอ ฌูฆา. 34 ดัฮ กาเญา บรี มีญับ กะ ซือมียา นู กาเญา จาดัก จะ นะ บือเลฮ ปาเระ เดะ ญา ปูลัก เตอ นะ บือเลฮ ลาฆู นามา บาฌิ เลอ? มีเซ-จะ โกะ ซือมียา บือดูซา เตอ กูญา บรี กะ ซือมียา บือดูซา มีญับ บีดา นะ บือเลฮ ปาเระ เดะ กูญา ซามา บายา เลอ. 35 ตาปี กาเญา กือนา ซายัก โกะ ซือตรู นะ กาเญา เลอ. กือนา บูวัจ บาฌิ ราตา. กือนา บรี มีญับ เตด จาดัก จะ นะ บือเลฮ ปาเระ เลอ. กะฆีเตอ บาฮาเฆด นะ กาเญา นะ อาดา ปือนอฮ บาฌิ. กาเญา นะ ฌาดี นานะ นะ ตูฮัด นู ตีงี เดะ อาตัซ. ซาเบะ-จะ ตูฮัด อาดา ฮาตี บาฌิ ซายัก กะ ซือมียา ฮาตี ตะอารัฮ ฌางัน ซือมียา ฌาฮัจ. 36 กาเญา กือนา ตือจีฮัด ซายัก ราตา ซือรูปา บือกะ อาโปก นะ กาเญา ญา อาดา ฮาตี จีฮัด ซายัก เลอ." 37 เยซู มือเลา ปูลัก จะ "ฌางัน นะ อาดู กาวัด กะฆีเตอ ตูฮัด โปด นะ เตด อาดู กาเญา. ฌางัน กรัจ ฮูโกบ กาวัด กะฆีเตอ ตูฮัด โปด นะ เตด กรัจ ฮูโกบ กาเญา. กือนา อาเกะ ซาลัฮ นะ กาวัด กะฆีเตอ ตูฮัด โปด นะ อาเกะ ซาลัฮ นะ กาเญา. 38 กือนา ฮาฆิ กะ กูญา กะฆีเตอ ตูฮัด โปด นะ ฮาฆิ กะ กาเญา ฌูฆา. ตูฮัด นะ ตูวัก ฌางัน มาโกะ นู อีเงาะ บรี กือฌะ บรี ปือนอฮ มีเม บอฮ เดะ รีบา นะ กาเญา เลอ. ซาเบะ-จะ กาเญา นะ ตูวัก บรี กะ กาวัด ฌางัน มาโกะ นู ดีฮา ตูฮัด โปด นะ ตูวัก ปาเระ กะ กาเญา ฌางัน มาโกะ นู อีตู ฌูฆา เลอ." 39 เยซู ญา มือเลา กะ กูญา ปูลัก ฌาดี ลาฆู มือญาเระ ปือซือรูปา จะ "ซือมียา มาตา บูตา นะ ตูโตด ซามา ซือมียา มาตา บูตา นะ บือเลฮ เฆอ? กูญา กือดูวา อูรัก เตอ นะ ฆาโดฮ ตรือซุ เดะ ตือลาฆา บูกัด เฆอ? 40 ฮอย มูเระ นู ดีฮา นู นะ บือซัยํ เดะ ซือมียา อาฌัยํ ญา. ตาปี โกะ มูเระ ราตา อูรัก ตานา ญา บลาฌัยํ บรี ฮาบิฮ ดัฮ นะ บือเลฮ ซามา บายา ฌางัน ซือมียา อาฌัยํ ญา เลอ. 41 "ซาเบะ นามา เลอ เกา ตีญูง ลีฮัจ ตานัฮ ซือบีฌี เดะ มาตา นะ กาวัด ตาปี เตด บราซา ตาฮู จะ อาดา บาตัก กายู ซือกูตก ดูโดะ เดะ มาตา นะ เกา ตะอาซิก? 42 ซาเบะ นามา เกา มือเลา กะ กาวัด บือเลฮ จะ 'กาวัด เออ บรี กู รือฆู ตานัฮ ซือบีฌี อีตู ตรือเบะ เดะ มาตา นะ เกา.' ตาปี เกา ตะอาซิก เตด บือฆารี บาตัก กายู ซือกูตก นู ดูโดะ เดะ มาตา นะ เกา? เกา เตอ ซือมียา มูคา มาเนฮ ฮาตี ฌาฮัจ เออ. กือนา ซีตะ กายู ซือกูตก บือตรือเบะ เดะ มาตา นะ เกา ดูลู. กะฆีเตอ เกา นะ ลีฮัจ บือฆารี ซัฮ นะ ปี รือฆู ตานัฮ ซือบีฌี ตรือเบะ เดะ มาตา นะ กาวัด บือเลฮ โปด." เยซู ญา จะ. 43 เยซู มือเลา ปูลัก จะ "ปูโฮด กายู นู บาฌิ ญา เตด ตรือเบะ บูวัฮ นู ตะอารัฮ เตอ. ปูโฮด กายู นู ตะอารัฮ โปด นะ ฮอย เตด ตรือเบะ บูวัฮ นู บาฌิ ฌูฆา เลอ. 44 นะ ตาฮู โกะ ปูโฮด กายู ราตา ปูโฮด บือเลฮ ซาเบะ ลีฮัจ กะ บูวัฮ นะ ญา เลอ. กะฆีเตอ กูญา เตด ปูงอจ บูวัฮ กรายา-บูดี เดะ ปูโฮด กายู บือดูรี เตด ปูงอจ บูวัฮ อางุน เดะ ปูโฮด แปรกๆ เลอ. 45 ซือมียา นู บาฌิ เตอ ญา นะ อาเมด ซือบารัก บาฌิ มาแรฮ เดะ บารัก บรือฆา บาฌิ นู ญา ปือมุน เดะ ฮาตี นะ ญา ดัฮ. ตาปี ซือมียา นู ฌาฮัจ นะ อาเมด ซือบารัก ฌาฮัจ มาแรฮ เดะ บารัก ฌาฮัจ นู ญา ปือมุน เดะ ฮาตี ดัฮ. กรานา-จะ ฮาตี ญา ปือนอฮ ฌางัน ลาฆู นามา เตอ มูโลจ โปด นะ มือเลา ตูโรจ กะ ลาฆู กะฆีเตอ เลอ." 46 "ซาเบะ นามา กาเญา บลาโลก กู จะ 'ตูฮัด เออ ตูฮัด เออ' ตาปี เตด บูวัจ ตูโรจ บือนา นู กู อาฌัยํ เตอ. 47 ราตา ซือมียา นู มาแรฮ มียา กู นะ มือนีงัย ปือมือเลา นะ กู นู บูวัจ ตูโรจ กะ ปือมือเลา นู อีตู กู นะ มือญาเระ บรี กะ กาเญา ตาฮู จะ ญา ฌาดี ซือมียา มาจับ นามา. 48 ญา ซือรูปา บือกะ ซือมียา ซืออูรัก นู กรือฌา รูมัฮ นู กาลี ยู ดาลับ จาจะ จาวัก เดะ อาตัซ บาตู. ตานา อาเย ซูงัย อาโปฮ บือดรัซ กาเตาะ รูมัฮ อีตู รูมัฮ อีตู ฮอย เตด บรีเงาะ ซาเบะ ญา กือฌะ บาฌิ ดัฮ. 49 ตาปี ซือมียา นู มือนีงัย ตาปี เตด บูวัจ ตูโรจ ญา ซือรูปา บือกะ ซือมียา ซืออูรัก นู กรือฌา รูมัฮ เดะ อาตัซ ตานัฮ ฮอย เตด จาจะ จาวัก. ตานา อาเย ซูงัย บือดรัซ กาเตาะ รูมัฮ อีตู รูมัฮ อีตู โปด รูโตฮ ดัดดัด ฌาฮานัม ฮาบิฮ เลอ." เยซู ญา จะ.
1 วะตู เยซู ซูดัฮ มือเลา ปือมือเลา อีตู บรี กะ โกะ ซือมียา ดืองัยํ เตอ ญา มาโซะ ปี กะ ตูโปะ คาเปอนาอุม. 2 อาดา กือปาลา ตาฮัน นังฆรี โรม ซืออูรัก นู อาดา ปราโซฮ นู ญา ซายัก ซูโงฮ. ตาปี ปราโซฮ อีตู ญา ซาเกะ โตระ ยู ซรือปะ นะ มาตี. 3 วะตู กือปาลา ตาฮัน ญา ดืองัยํ ปาซัน ลาฆู นะ เยซู เตอ ญา ซูโรฮ โกะ อูรัก ตูฮา ลูมอฮ ยิว ซือตืองัฮ บรี กูญา ปี มีตา เดะ เยซู บรี มาแรฮ บือบือลา ปราโซฮ นะ ญา. 4 ตานา กูญา อีตู มาแรฮ รอจ กะ เยซู ดัฮ กูญา มือเลา ปูโฌะ เยซู ฌางัน ฮาตี ฮางัจ จะ "กือปาลา ตาฮัน อีตู ฌาดี ซือมียา บือฆูนา นะ บรี เยซู ปี ตูโลก ญา เลอ. 5 ซาเบะ-จะ ญา ซายัก ลูมอฮ บักซา กีตา เตอ. ญา บือเลฮ บูวัจ รูมัฮ บือมุน บรี กะ กามี ฌูฆา." 6 กะฆีเตอ เยซู ญา ปี ฌางัน กูญา. ตานา ดาปิก นะ รอจ กะ รูมัฮ ดัฮ กือปาลา ตาฮัน ญา ซูโรฮ โกะ ฆูๆ นะ ญา ปี มียา เยซู มือเลา จะ "ตูฮัด เออ ฌางัน นะ ฆาโดฮ เดะ ลาฆู อีนี เลอ. ซาเบะ กู ฌาดี ซือมียา เตด บือฆูนา นะ ซาโมจ เกา มาโซะ เดะ ดาลับ รูมัฮ นะ กู เตอ. 7 กะฆีเตอ ฌูฆา กู เตด บือเลฮ อีงัจ จะ กู ตะอาซิก นะ ปี มียา เกา เลอ. ตาปี บรี เกา อูซิ มือเลา โปด ฌาดี บีดา ปราโซฮ นะ กู นะ ลือฆา เดะ ปือญาเกะ เลอ. 8 กรานา-จะ กู นี ฌาดี ซือมียา ดูโดะ เดะ บาวัฮ ฮูโกบ นะ ราฌา. ตาปี อาดา ลูมอฮ ตาฮัน ดูโดะ เดะ บาวัฮ ฮูโกบ นะ กู ฌูฆา. กู ปือซัด กะ ซือมียา อีนี จะ 'ปี เลอ' ญา โปด ปี ดัฮ. ปือซัด กะ ซือมียา นู ซา จะ 'มาแรฮ เลอ' ญา โปด มาแรฮ ดัฮ. ซูโรฮ ปราโซฮ จะ 'กือนา ปี บูวัจ กะฆีนี เลอ.' ญา โปด บูวัจ ตูโรจ ดัฮ." ญา จะ. 9 ตานา เยซู ดืองัยํ ปือมือเลา กะฆีเตอ ดัฮ ญา ปือและ-ฮาตี ซูโงฮ เดะ ซือมียา อีตู. ญา อาเลฮ บลากัก มือเลา ฌางัน โกะ ซือมียา บาญะ นู ตูโรจ ญา จะ "กู มือญาเระ กะ กาเญา เตด-จะ เดะ โกะ ลูมอฮ บักซา อิซราเอน เตอ กู เตด ดือละ ดาปัจ ซือมียา นู ปือจายา บาญะ กะฆีนี เลอ." 10 โซะ ซือมียา ปือญูโรฮ นู มาแรฮ เตอ ตานา บาลิ กะ รูมัฮ กูญา ลีฮัจ จะ ปราโซฮ นู อีตู ซือนัง บาฌิ ดัฮ. 11 เตด บาญะ อารี เยซู บือฌาลัด มาโซะ ปี เดะ ดาลับ ซา ตูโปะ ปือนามา นาอิน. โกะ มูเระ นะ เยซู ฌางัน โกะ ซือมียา บาญะ ตูโรจ ปี ซามา. 12 ตานา มาแรฮ ดาปิก ปีตู ตูโปะ อีตู ดัฮ อาดา โกะ ซือมียา อูโซก บาดัด ซือมียา มาตี ซืออูรัก มาแรฮ. ซือมียา มาตี อีตู ฌาดี นานะ ตูงัน นะ นีบีนี ฌานา ซืออูรัก. โกะ ซือมียา เดะ ตูโปะ บาญะ อูรัก กูญา มาแรฮ ฌางัน นีบีนี อีตู. 13 ตานา เยซู ญา ลีฮัจ มะ เดะ ซือมียา อีตู ญา ตือจีฮัด กะ ญา มือเลา จะ "ฌางัน มือนาแงฮ เลอ." 14 กะฆีเตอ เยซู ญา มาโซะ ปี ดาปิก อาเงา ตางัน ปือเตาะ เดะ ลาโรก. โกะ ซือมียา นู อูโซก ลาโรก อีตู กูญา บราดู. เยซู ญา มือเลา จะ "อูรัก มูดา เออ กู ซูโรฮ เกา บีกัซ เลอ." 15 ซือมียา นู มาตี อีตู ญา บีกัซ ดูโดะ มือเลา. เยซู ญา ซรัฮ อูรัก มูดา อีตู บรี กะ มะ เดะ ญา. 16 โซะ ซือมียา ซือมูฮา กูญา ลีฮัจ กูญา ตาโกจ ซูโงฮ มือโอจ กะ ตูฮัด เดะ อาตัซ มือเลา จะ " ซือมียา ตูโดฮ นู มือฆัฮ บือเลฮ ฌาดี เดะ ตืองัฮ กีตา ดัฮ. ตูฮัด เดะ อาตัซ บือเลฮ มาแรฮ ตูโลก ลูมอฮ ซือมียา นะ ญา ดัฮ." กูญา จะ. 17 บรีตา ปาซัน ลาฆู นะ เยซู อีตู กือจัย ปี ราตา เดะ นังฆรี ยูเดีย ราตา โกะ นังฆรี นู ดูโดะ ดาปิก นังฆรี อีตู ฌูฆา. 18 โซะ มูเระ นะ โยฮัน กูญา บือเลฮ มือญาเระ ลาฆู อีตู ซือมูฮา ฮาบิฮ บรี กะ โยฮัน ดืองัยํ. 19 กะฆีเตอ โยฮัน ญา บลาโลก มูเระ ดูวา อูรัก ซูโรฮ กูญา ปี มียา เยซู ตาญา จะ "เกา เตอ ฌาดี ซือมียา นู นะ มาแรฮ อีตู เฆอ? เฆอ-จะ กามี กือนา นะ นาตี ซือมียา อาซิก เลอ?" 20 ตานา กูญา ดูวา อูรัก อีตู มาแรฮ รอจ กะ เยซู ดัฮ กูญา มือเลา จะ "โยฮัน ซือมียา บูวัจ ลาฆู ซือลับ เดะ อาเย ญา ซูโรฮ กามี มาแรฮ ตาญา เกา จะ 'เกา ฌาดี ซือมียา นู นะ มาแรฮ อีตู เฆอ? เฆอ-จะ กามี กือนา นะ นาตี ซือมียา อาซิก?' " 21 เดะ วะตู อีตู เลอ เยซู ญา บือเลฮ บือบือลา ซือมียา ซาเกะ บาญะ อูรัก บรี ซือนัง บรี ลือฆา เดะ โกะ ปือญาเกะ ฌือแนฮๆ. ญา โปรฮ โกะ ฮาตู ฌาฮัจ บือบือลา ซือมียา มาตา บูตา บาญะ อูรัก บรี กูญา บือเลฮ ลีฮัจ บือฆารี. 22 กะฆีเตอ เยซู ญา ตีกัฮ กะ มูเระ นู ดูวา อูรัก อีตู จะ "กาเญา กือนา ปี มือญาเระ กะ โยฮัน นู กาเญา บือเลฮ ลีฮัจ บือเลฮ ดืองัยํ ดัฮ จะ โกะ ซือมียา มาตา บูตา บือเลฮ ลีฮัจ บือฆารี โกะ ซือมียา จาเปะ โปด บือเลฮ บือฌาลัด โกะ ซือมียา ปือญาเกะ ปูรู ซือนัง บาฌิ ดัฮ โกะ ซือมียา ตือลีงา ตูลี โปด บือเลฮ ดืองัยํ บาฌิ โกะ ซือมียา มาตี บือเลฮ ฮีโดะ ปาเระ ดัฮ. บรีตา นู บาฌิ เตอ บือเลฮ มือญาเระ กะ โกะ ซือมียา ฮาฌะ ดัฮ. 23 ซือนัง ซือลามัจ เลอ ซือมียา ดีฮา นู เตด จือและ ปาซัน ลาฆู นะ กู." 24 ตานา โกะ มูเระ นะ โยฮัน ดูวา อูรัก กูญา ปี ดัฮ เยซู ญา มือเลา กะ ลูมอฮ ซือมียา บาญะ ปาซัน นะ โยฮัน จะ "กาเญา บือเลฮ ตรือเบะ ปี กะ ปาดัก ตานัฮ ตูโฮยํ นู ลือฆา บีดา นะ ลีฮัจ นามา? นะ ลีฮัจ ปูโฮด รีโยก นู กือนา อาเงน ตีโยะ บรี บรีเงาะ เฆอ? บูกัด กะฆีเตอ เลอ. 25 ตาปี กาเญา บือเลฮ ปี บีดา นะ ลีฮัจ นามา? ปี ลีฮัจ ซือมียา บือปากัย กาเยด นู ลือมัฮๆ เฆอ? ลีฮัจ เลอ ซือมียา นู ปากัย กาเยด บือฆาจะ กะฆีเตอ นู มากัด กือญัง มากัด ซือบารัก บาฌิ กูญา ดูโดะ เดะ บาลัย นะ ราฌา เลอ. 26 ตาปี กาเญา บือเลฮ ตรือเบะ ปี บีดา นะ ลีฮัจ นามา เลอ? นะ ลีฮัจ ซือมียา ตูโดฮ ลาฆู นะ ตูฮัด เฆอ? เออ ซูโงฮ เลอ ตาปี กู มือญาเระ กะ กาเญา จะ ญา ฌาดี ซือมียา ซืออูรัก นู บาฌิ ลือเบฮ เดะ โกะ ซือมียา ตูโดฮ ลาฆู นะ ตูฮัด ลาฆี. 27 ปาซัน โยฮัน นี เลอ ซูรัจ ปือมือเลา นะ ตูฮัด มือเลา จะ 'ลีฮัจ เลอ กู ซูโรฮ ปือญูโรฮ นะ กู บรี ญา ปี โซะ ฮึลด เกา ญา เตอ นะ ซียะ ฌาลัด นะ เกา ดูลู บีดา เกา นะ บือฌาลัด มาแรฮ เลอ.' ตูฮัด ญา จะ." 28 เยซู มือเลา ลาฆี จะ "กู มือญาเระ กะ กาเญา จะ เดะ โกะ ซือมียา นู บือฌาดี มาแรฮ ดัฮ เตอ ฮอย ซือมียา ดีฮา โปด นู มาแรฮ บือซัยํ เดะ โยฮัน. ตาปี ซือมียา นู ดือมิ เดะ กาวัด เดะ ลูมอฮ ซือมียา นะ ตูฮัด เตอ ญา เลอ บือซัยํ เดะ โยฮัน ลาฆี." 29 ตานา ดืองัยํ กะฆีเตอ ลูมอฮ ซือมียา ซือมูฮา ฌางัน โกะ ซือมียา มูงอจ อาเซน ซามา เตอ กูญา ซาโงะ จะ ตูฮัด เดะ อาตัซ ญา รือมัก ซูโงฮ กรานา-จะ กูญา บือเลฮ ซาโมจ ลาฆู ซือลับ เดะ อาเย เดะ โยฮัน. 30 ตาปี โซะ ลูมอฮ ฟาริซี ฌางัน ลูมอฮ ซือมียา อาฌัยํ ลาฆู ปือมือซัด นะ ตูฮัด เตอ กูญา กีปัซ บูวัก ลาฆู นู ตูฮัด บือเลฮ บือคานะ นะ ตูโลก กูญา ดัฮ ซาเบะ-จะ กูญา ฮอย เตด บือเลฮ ซาโมจ ลาฆู ซือลับ เดะ อาเย เดะ โยฮัน. 31 เยซู มือเลา ปูลัก จะ "กะฆีเตอ โกะ ซือมียา ฮาดัจ อีนี กู นะ มือเลา ปือซือรูปา บือเลฮ กะฮามี? กูญา ซือรูปา บือกะ นามา เลอ? 32 กูญา ซือรูปา บือกะ โกะ นานะ นู ตืองัฮ ดูโดะ อูซิ เดะ ตูโปะ นู บืออูจะ-อูจะ ซามา กูญา จะ 'กามี ตีโยะ ซือลูนัย บรี กะ กาเญา ดัฮ ตาปี กาเญา ตีเมา มือนารี ซามา. กามี มือนาแงฮ บือปาโตด ดัฮ ตาปี กาเญา ตีเมา มือนาแงฮ ซามา เลอ.' 33 กรานา-จะ โยฮัน นู บูวัจ ลาฆู ซือลับ เดะ อาเย เตอ วะตู ญา มาแรฮ ดัฮ ญา บูวัจ ลาฆู บือตาฮัด มากัด เตด บือเลฮ โอะ อาระ อางุน. กะฆีเตอ กาเญา มือเลา จะ 'ญา กือนา ฮาตู ราโซะ ดัฮ.' 34 โซะ กู นู นานะ นะ อูมัจ-ซือมียา เตอ กู มาแรฮ ฌางัน มากัด ฌางัน โอะ ฌูฆา. กะฆีเตอ กาเญา มือเลา จะ 'ลีฮัจ เลอ ญา มากัด บาญะ ตือลาลู ญา โอะ อาระ อางุน ยู มาโบะ ดัฮ. ญา บือซาบัจ ฌางัน โกะ ซือมียา มูงอจ อาเซน ฌางัน โกะ ซือมียา บือดูซา.' 35 ตาปี นู ตูฮัด ญา ปานัย อากัน เตอ นะ ปลีฮัจ รือมัก เดะ ลาฆู ปือบูวัจ นู บาฌิ นะ โกะ ซือมียา นู ตูโรจ กะ ญา เลอ." เยซู ญา จะ. 36 อาดา ซืออูรัก เดะ ลูมอฮ ฟาริซี บลาโลก เยซู ปี มากัด บือซามา ฌางัน ญา. กะฆีเตอ เยซู ญา มาโซะ กะ ดาลับ รูมัฮ นะ ซือมียา อีตู ดูโดะ มากัด ฌางัน ญา. 37 นี เลอ อาดา นีบีนี ซืออูรัก เดะ ตูโปะ อีตู นู ฌาดี นีบีนี ซาลัฮ บือดูซา. ตานา ญา ตาฮู จะ เยซู ตืองัฮ ดูโดะ มากัด เดะ รูมัฮ นะ ซือมียา ฟาริซี อีตู ญา บาวา ลีบูลี นู บูวัจ ฌางัน บาตู ปูเตฮ อาดา มีญะ บาวู เดะ ดาลับ. 38 ญา มาแรฮ บือดีรี โซะ บลากัก เยซู ดาปิก กากี นะ ญา ญา มือนาแงฮ อาเย มาตา มือนีเลฮ โซะ กากี นะ เยซู. ญา อาเมด โบะ อีซุจ จีโยบ เดะ กากี นะ เยซู บาญะ กาลี อาเมด มีญะ บาวู อีตู ลือมัยํ เดะ กากี นะ ญา. 39 โซะ ซือมียา ฟาริซี อีตู นู บือเลฮ บลาโลก เยซู ตานา ลีฮัจ ญา บรีงัจ เดะ ฮาตี จะ "ดัฮ ซือมียา อีนี ฌาดี ซือมียา ตูโดฮ ลาฆู นะ ตูฮัด ญา กือนา ตาฮู จะ นีบีนี อีนี นู กือนา ญาวา นะ ญา ฌาดี ซือมียา ดีฮา ฌาดี ซือมียา มาจับ กะฮามี ซาเบะ ญา ฌาดี นีบีนี ซาลัฮ บือดูซา เลอ." 40 โซะ เยซู ตีกัฮ กะ ญา จะ "ซีโมน เออ กู อาดา นามา นะ มือเลา ฌางัน เกา." ซีโมน ตีกัฮ จะ " บูมอยํ เออ เกา มือเลา ปี เลอ." 41 โซะ เยซู มือเลา จะ "อาดา ตกเก ซืออูรัก ญา อาดา ซือมียา ตือฮูตัก เดะ ญา ดูวา อูรัก. ซืออูรัก อาดา ฮูตัก ดูเวะ ลีมา ราตุซ บัจ. นู ซืออูรัก อาดา ฮูตัก ดูเวะ ลีมา-ปูโลฮ บัจ. 42 ตานา กูญา ฮอย นามา นะ บายัยํ รือฆา ฮูตัก อีตู เตอ ตกเก ญา บือเลฮ อาเกะ ฮูตัก นะ กูญา ดูวา อูรัก. เดะ ดูวา อูรัก อีตู นู ดีฮา นะ ซายัก กะ ตกเก บาญะ ลาฆี?" 43 ซีโมน ญา ตีกัฮ จะ "กู ลีฮัจ จะ ซือมียา นู ตกเก อาเกะ ฮูตัก นู บาญะ ญา เลอ นู นะ ซายัก กะ ตกเก บาญะ ซูโงฮ." เยซู ญา มือเลา กะ ญา จะ "เกา มือเลา กือนา ดัฮ เลอ." 44 กะฆีเตอ เยซู กรือเลฮ ลีฮัจ นีบีนี อีตู ญา มือเลา กะ ซีโมน จะ "เกา ลีฮัจ นีบีนี อีนี เฆอ? กู บือเลฮ มาโซะ กะ ดาลับ รูมัฮ นะ เกา เกา เตด บือเลฮ บรี อาเย บาโซฮ กากี นะ กู. ตาปี นีบีนี อีนี ญา บือเลฮ อาเมด อาเย มาตา นะ ญา บาโซฮ กากี นะ กู อาเมด โบะ นะ ญา อีซุจ. 45 เกา เตด บือเลฮ จีโยบ กู ตาปี นีบีนี อีนี ตะเดะ ญา มาโซะ มาแรฮ ญา จีโยบ เดะ กากี นะ กู ฮอย เตด บราดู เลอ. 46 เกา เตด บือเลฮ อาเมด มีญะ ลือมัยํ บอฮ เดะ ปาลา นะ กู ตาปี นีบีนี อีนี บือเลฮ อาเมด มีญะ บาวู ลือมัยํ บอฮ เดะ กากี นะ กู. 47 ซาเบะ กะฆีเตอ กู มือญาเระ กะ เกา จะ ลาฆู ซาลัฮ บือดูซา นะ นีบีนี อีนี นู อาดา บาญะ กือนา อาเกะ ดูซา ดัฮ ซาเบะ ญา ซายัก บาญะ. ตาปี ซือมียา นู บือเลฮ อาเกะ ดูซา กิดีกิ ซือมียา อีตู โปด ซายัก กิดีกิ." 48 เยซู มือเลา กะ นีบีนี อีตู จะ "ลาฆู ซาลัฮ ดูซา นะ เกา บือเลฮ อาเกะ บูวัก ดัฮ." 49 โซะ โกะ ซือมียา อาซิก นู อาดา มากัด บือซามา เตอ กูญา บรีงัจ เดะ ฮาตี นะ กูญา จะ "ซือมียา อีนี ฌาดี ซาปา? มีเซ-จะ ลาฆู ซาลัฮ บือดูซา ญา อาเกะ บือเลฮ เลอ." 50 ตาปี เยซู ญา มือเลา กะ นีบีนี อีตู จะ "นู เกา ปือจายา บาฌิ ดัฮ บูวัจ บรี เกา ฮีโดะ ลือปัซ บาฌิ เลอ. ปี ดูโดะ ซือนัง ซือลามัจ เลอ."
1 ลือปัซ อีตู เตด ลามา เยซู ญา บือฌาลัด ปี เดะ โกะ ตูโปะ เดะ โกะ นังฆรี มือญาเระ บรี ตาฮู บรีตา นู บาฌิ ปาซัน นู ตูฮัด เดะ อาตัซ ญา มาแรฮ ฌาดี ราฌา นะ บือบือลา อูมัจ-ซือมียา. โกะ มูเระ ดูวา-บือลัซ อูรัก อีตู โปด กูญา ปี ซามา. 2 อาดา ฌูฆา โกะ นีบีนี นู เยซู บือเลฮ โปรฮ ฮาตู ฌาฮัจ ตรือเบะ เดะ ญาวา นะ กูญา ซือตืองัฮ บือบือลา กูญา บรี ลือฆา เดะ ปือญาเกะ แนฮ-ฌือแนฮ ซือตืองัฮ ดัฮ. อาดา มารียา ซือมียา ตูโปะ มักดาลา นู เยซู บือเลฮ โปรฮ ฮาตู ตรือเบะ เดะ ญาวา นะ ญา ตูโฌฮ ฮาตู. 3 อาดา โยอันนา บีนี นะ คูซา กือปาลา ปราโซฮ นะ เฮโรด. อาดา ซูซันนา ฌางัน โกะ นีบีนี ซิก-อาซิก ฌูฆา บาญะ ซือมียา นู บือเลฮ ซูโรฮ ดูเวะ นะ กูญา ตะอาซิก บีดา บลาญา กะ เยซู ฌางัน โกะ มูเระ นะ ญา. 4 อาดา โกะ ซือมียา มาแรฮ ดาตัก เดะ ราตา ตูโปะ มาแรฮ มียา เยซู. กาลา อาดา ลูมอฮ ซือมียา บาญะ ซูโงฮ ดูโดะ บือซามา เตอ เยซู ญา จรือตา ซา ลาฆู อาฌัยํ กูญา กะฆีนี จะ 5 "อาดา ซือมียา ซืออูรัก ญา ปี ปรัก บีฌี ตาโระ เดะ กือโบด. ตานา ญา ปรัก กะฆีเตอ อาดา บีฌี ซือตืองัฮ ฆูโฆยํ เดะ บีดิก ฌาลัด กือนา กาจะ ฮาบิฮ. กะฆีเตอ อาดา กาวัด บูโรก ปาคัจ ตรือบัก มาแรฮ ปาโตะ มากัด บีฌี อีตู ปี ดัฮ. 6 อาดา ซือตืองัฮ ฆูโฆยํ เดะ บาตู. ตานา บือตูโมฮ มาแรฮ ญา ลายู ตูโฮยํ ฮาบิฮ ซาเบะ ฌาดี ตือปัจ นู ฮอย เตด บาอะ. 7 ซือตืองัฮ เตอ ฆูโฆยํ เดะ ตืองัฮ ปูโฮด บือดูรี. ปูโฮด ดูรี อีตู เตอ ญา บือตูโมฮ บือซามา. ญา ตูโดก บูวัก ปูโฮด ตาโระ อีตู. 8 อาดา ซือตืองัฮ ฆูโฆยํ เดะ ตานัฮ บาฌิ. กะฆีเตอ ญา บือตูโมฮ บือบูวัฮ บาฌิ บือตามัฮ รอจ กะ ซือราตุซ กาลี." ตานา เยซู มือเลา กะฆีเตอ ดัฮ ญา บือซูระ จะ "ซาปา อาดา ตือลีงา นู ดืองัยํ บือเลฮ บรี ญา มือนีงัย เลอ." 9 โกะ มูเระ กูญา ตาญา เยซู จะ ปาซัน ลาฆู จรือตา อีตู ฌาดี กะฮามี เลอ. 10 เยซู ญา ตีกัฮ จะ "โซะ ลูมอฮ กาเญา เตอ ตูฮัด บือเลฮ บรี ตาฮู ลาฆู ดาลับ ซูโงฮ ปาซัน ลาฆู นู ตูฮัด ฌาดี ราฌา นู บือบือลา ดือนียา อีนี. ตาปี โซะ ซือมียา อาซิก เตอ ญา ฌาดี ซือรูปา บือกะ ลาฆู จรือตา เลอ บีดา นะ บือฌาดี บือกะ ซูรัจ ปือมือเลา นะ ตูฮัด นู จะ 'กูญา นะ ลีฮัจ โปด ตาปี ซือรูปา ลีฮัจ ฮอย เตด บือฆารี. กูญา นะ ดืองัยํ ตาปี ซือรูปา ดืองัยํ ดัฮ ฮอย เตด มาโซะ เดะ ฮาตี ลาลู.' " ญา จะ. 11 "ลาฆู จรือตา ซีงี ฌาดี กะฆีนี เลอ. ปาซัน บีฌี ตาโระ ญา ซือรูปา บือกะ ปือมือเลา นะ ตูฮัด เดะ อาตัซ. 12 บีฌี ตาโระ นู ฆูโฆยํ เดะ บีดิก ฌาลัด ซือรูปา บือกะ โกะ ซือมียา นู บือเลฮ ดืองัยํ ปือมือเลา นะ ตูฮัด ดัฮ. ตาปี ฮาตู ซีตัด ญา จาปัย อาเมด ปือมือเลา อีตู เดะ ฮาตี นะ กูญา ตีเมา บรี กูญา นะ ปือจายา นะ ฮีโดะ ลือปัซ บาฌิ บือเลฮ. 13 โซะ บีฌี ตาโระ นู ฆูโฆยํ เดะ บาตู อีตู ญา ซือรูปา บือกะ โกะ ซือมียา ตานา ดืองัยํ ลาฆู นะ ตูฮัด ดัฮ ซูกา-ฮาตี นะ ซาโมจ ลาฆู ปือมือเลา อีตู เลอ. ตาปี ญา เตด มาโซะ เดะ ฮาตี ซือรูปา ฮอย ฌากัยํ เตอ. กูญา ปือจายา ซัจ ตาปี วะตู กือนา ลกลีฮัจ กูญา ซือซัจ ปี ดัฮ. 14 โซะ บีฌี ตาโระ นู ฆูโฆยํ เดะ ตืองัฮ ปูโฮด บือดูรี เตอ ซือรูปา บือกะ โกะ ซือมียา นู ดืองัยํ ปือมือเลา อีตู ดัฮ. ตาปี ซือกาลี ดีกิ กูญา ฆาโดฮ-ฮาตี บาญะ ลาฆู ซือมาตา บรีงัจ เดะ ฮาตี จะ นะ ฌาดี อูรัก กายา ซูกา นะ บรามัย บาญะ. ลาฆู กะฆีเตอ นะ ตูโดก ฮาบิฮ ลาฆู ปือจายา นะ กูญา. กะฆีเตอ ซือรูปา บูวัฮ นะ ญา ญา ฮอย เตด มาซะ ลาลู เลอ. 15 ตาปี โซะ บีฌี นู ฆูโฆยํ เดะ ตานัฮ บาฌิ เตอ ซือรูปา บือกะ โกะ ซือมียา นู ดืองัยํ ปือมือเลา นะ ตูฮัด ดัฮ กูญา ซาโมจ ตาโรฮ ลือกัจ เดะ ฮาตี ซือมาตา บูวัจ ตูโรจ ฮาตี รือมัก ตือดะ บือเลฮ บือบูวัฮ เลอ." 16 เยซู มือเลา ลาฆี จะ "ฮอย ซือมียา ดีฮา ตานา ญา จูโจฮ ปลีตา ดัฮ นะ อาเมด เตง มาแรฮ จรือเกาะ ตาโรฮ เฆอ-จะ นะ ตืองะ เดะ บาวัฮ ตือปัจ ตีโนะ. ตาปี ญา นะ ตืองะ ปลีตา อีตู โซะ อาตัซ ซลีแป บีดา บรี โกะ ซือมียา นู มาโซะ มาแรฮ นะ ลีฮัจ ซายา บือฆารี ซัฮ. 17 กรานา-จะ ฮอย ลาฆู นามา นู ตูโดก บูนี ดัฮ นะ เตด กือนา บูกา บรี ลีฮัจ. ฮอย ลาฆู นามา นู ลีนง ตาโรฮ ดัฮ นู นะ เตด กือนา ตาฮู ดัฮ นะ เตด กือนา อาเมด มาแรฮ บรี ลีฮัจ บือฆารี ซัฮ. 18 กะฆีเตอ เลอ กาเญา นะ มือนีงัย กะฮามี กือนา ฌาฆา บรี บาฌิ กรานา-จะ ซือมียา ดีฮา นู ตาฮู ซือตืองัฮ เตอ ญา นะ ซาโมจ ลาฆี. ตาปี ซือมียา นู เตด ตาฮู นามา ลาฆี นู ญา อีงัจ จะ ญา ตาฮู นู ดีกิ-ตอจ เตอ นะ กือนา อาเมด ปี เดะ ญา ดัฮ เลอ." เยซู ญา จะ. 19 กาลา อีตู มะ เดะ เยซู ฌางัน โกะ อาดี เดะ ญา มาแรฮ มียา เยซู ตาปี กูญา มาโซะ รอจ กะ เยซู เตด บือเลฮ กรานา-จะ โกะ ซือมียา ตือลาลู บาญะ. 20 อาดา ซือมียา มือญาเระ กะ เยซู จะ "โกะ มะ โกะ อาดีๆ เดะ เกา อาดา บือดีรี โซะ ลามัน ซูกา นะ ดาปัจ เกา." 21 ตาปี เยซู ญา ตีกัฮ กะ ญา จะ "ซือมียา ดีฮา นู มือนีงัย ปือมือเลา นะ ตูฮัด เดะ อาตัซ เตอ นู บูวัจ ตูโรจ ซามา ญา เตอ เลอ ฌาดี มะ เดะ กู ฌางัน อาดี เดะ กู." ญา จะ. 22 อาดา ซืออารี เยซู ญา ญาแญะ กะ ปราฮู ฌางัน โกะ มูเระ นะ ญา. ญา มือเลา ฌางัน กูญา จะ "โฌฮ บรี กีตา ฌรือมัก ลาโวจ ฆาลิลี ปี กะ โซะ ซรือบัก อีตู." กูญา โปด อูโนยํ ปราฮู ตรือเบะ ปี ดัฮ. 23 ตานา กูญา บลายัยํ ปี เยซู ญา ตีโนะ ลีนา. อาดา อาเงน รีโบจ ตูโรด เดะ ตืองัฮ อารก อาเย มาโซะ ดาลับ ปราฮู ยู ซารัจ ตาโกจ นะ ตาลับ. 24 กะฆีเตอ กูญา ปี ฆระ เยซู มือเลา จะ "จา จา เออ กีตา มาจับ นะ มาตี ดัฮ เลอ." เยซู ญา บีกัซ ญา บลารัก อาเงน บลารัก โกะ อูมะ บือซัยํ. กะฆีเตอ อูมะ อาเงน โปด ตือโดฮ บลีนัง ฮาบิฮ ดัฮ. 25 กะฆีเตอ เยซู ญา มือเลา ฌางัน โกะ มูเระ นะ ญา จะ "ลาฆู ปือจายา นะ กาเญา ลือแงะ ปี กะ ดีฮา ฮาบิฮ ดัฮ เลอ?" ตาปี โกะ มูเระ นะ ญา กูญา ตาโกจ ปือและ-ฮาตี มือเลา ซามา กูญา จะ "ซือมียา อีนี ฌาดี ซาปา เลอ? ญา บลารัก โกะ อาเงน ฌางัน อูมะ โปด กูญา ฆาโดฮ ตูโรจ กะ ปือมือซัด นะ ญา เลอ." 26 กะฆีเตอ กูญา บลายัยํ ปี รอจ กะ นังฆรี นะ ลูมอฮ ฆือราซา นู ดูโดะ โซะ ซรือบัก ลาโวจ ฆาลิลี. 27 ตานา เยซู ญา ตูโรด เดะ ปราฮู ดัฮ อาดา กีลากี ซืออูรัก เดะ นังฆรี อีตู มาแรฮ ดาปัจ เยซู. ซือมียา อีตู อาดา โกะ ฮาตู มาโซะ ราโซะ ดัฮ. ลามา ดัฮ ญา ฮอย เตด ปือแญะ โกะ กาเยด บาฌู เตด ดูโดะ เดะ รูมัฮ โปด ตาปี ญา ดูโดะ เดะ โกะ ฆูฮา ตานัม บาดัด เลอ. 28 ตานา ญา ลีฮัจ เยซู ญา บือซูระ ญา ตือมะ กะ ตานัฮ เดะ กากี นะ เยซู. ญา บือซูระ ซูวารา บือซัยํ จะ "เออ เยซู นานะ นะ ตูฮัด นู ตีงี เดะ อาตัซ บูวัจ นามา เกา มาแรฮ บือฆาโดฮ กู? กู มีตา กือมัซๆ ฌางัน บูวัจ บรี กู ฌาฮานัม เลอ." 29 นู มือเลา กะฆีนี ซาเบะ-จะ เยซู ญา บือเลฮ ซูโรฮ ฮาตู ตะอารัฮ บรี ตรือเบะ เดะ ญาวา นะ ซือมียา อีตู. กรานา ฮาตู ฌาฮัจ อีตู ญา ซูกา นะ บูวัจ กะ ญาวา นะ ซือมียา อีตู ซัจๆ. มีเซ-จะ กูญา นะ ฌาฆา ญา อีกัจ ราตัย เดะ ตางัน เดะ กากี โปด ตาปี ญา รือฆัก ราตัย อีตู ปูตุซ ฮาบิฮ. กะฆีเตอ ฮาตู ฌาฮัจ บาวา ญา บือปี กะ ตือปัจ ฮอย ซือมียา. 30 โซะ เยซู ญา ตาญา ซือมียา อีตู จะ "เกา ปือนามา นามา?" ซือมียา อีตู ญา ตีกัฮ จะ "กู ปือนามา รีบู. " กรานา-จะ อาดา ฮาตู บาญะ มาโซะ เดะ ญาวา นะ ญา. 31 ฮาตู เดะ ซือมียา อีตู ญา มือเลา ปูโฌะ มีตา เดะ เยซู จะ "ฌางัน ซูโรฮ กามี ปี กะ ลาเฮา นังฆรี ฮาตู เลอ." 32 อาดา กาวัด บาบี บาญะ อีโกยํ ตืองัฮ มียา มากัด โซะ บูเกะ อีตู. กะฆีเตอ โกะ ฮาตู อีตู มีตา เดะ เยซู บรี กูญา นะ ปี มาโซะ ดาลับ กาวัด บาบี อีตู. ตานา เยซู ญา บรี ดัฮ 33 กะฆีเตอ โกะ ฮาตู อีตู กูญา ตรือเบะ เดะ ญาวา ซือมียา อีตู ดัฮ กูญา ปี มาโซะ ดาลับ กาวัด บาบี. โกะ บาบี ซือกาวัด อีตู ปาคัจ บลารี ปี โซะ ลาเฮา นู ตีงี ฆูโฆยํ กะ ลาโวจ ลือมัซ มาตี ฮาบิฮ ดัฮ. 34 โซะ ซือมียา บือบือลา บาบี ตานา กูญา ลีฮัจ ฌาดี ลาฆู กะฆีเตอ ดัฮ กูญา บลารี ปี มือญาเระ ลาฆู อีตู กะ ซือมียา ดูโดะ เดะ ตูโปะ ฌางัน ซือมียา ดูโดะ โซะ ลูวัยํ ฌูฆา. 35 กะฆีเตอ โกะ ซือมียา อีตู กูญา ปาคัจ ตรือเบะ ปี ลีฮัจ ลาฆู นู บือฌาดี ดัฮ. ตานา มาแรฮ รอจ กะ เยซู ดัฮ กูญา ดาปัจ ซือมียา อีตู นู โกะ ฮาตู ตรือเบะ เดะ ญาวา นะ ญา ดัฮ เตอ ญา ดูโดะ ดาปิก ตาปะ กากี นะ เยซู ญา ซือนัง บาฌิ ดัฮ บือปากัย กาเยด บาซา บาฌิ เลอ. กะฆีเตอ กูญา อีตู ปาคัจ ตาโกจ โตระ. 36 โซะ โกะ ซือมียา นู ลีฮัจ ดัฮ เตอ กูญา มือญาเระ ปาซัน ลาฆู นู ซือมียา อาดา ฮาตู มาโซะ เดะ ญาวา นะ ญา ญา ซือนัง บาฌิ ปาเระ กะฮามี เลอ. 37 โกะ ลูมอฮ ซือมียา ซือมูฮา เดะ นังฆรี ฆือราซา ราตา เตอ กูญา ปาคัจ มาแรฮ ปูโฌะ เยซู บรี ญา ปี บูวัก เดะ กูญา. กรานา-จะ กูญา ตาโกจ ซูโงฮ เลอ. กะฆีเตอ เยซู ญา ญาแญะ กะ ปราฮู บาลิ ปี ดัฮ. 38 ซือมียา อีตู นู ลูมอฮ ฮาตู ตรือเบะ เดะ ญาวา นะ ญา ดัฮ เตอ ญา ปูโฌะ เยซู มีตา นะ ปี ซามา. ตาปี เยซู ซูโรฮ ญา ปี ปือซัด จะ 39 "กือนา ปาเระ ปี กะ รูมัฮ นะ เกา เลอ มือญาเระ บรี กะ กูญา ตาฮู นู ตูฮัด เดะ อาตัซ บือเลฮ ตูโลก เกา บาญะ ตารา ดีฮา เลอ." กะฆีเตอ ซือมียา อีตู ญา บาลิ ปี มือญาเระ ราตา เดะ ตูโปะ นู เยซู บือเลฮ ตูโลก ญา บาญะ กะฮามี ดัฮ. 40 กะฆีเตอ ตานา เยซู บาลิ ปาเระ ดัฮ อาดา โกะ ซือมียา บาญะ ซาโมจ ญา ซาเบะ กูญา ปาคัจ ดูโดะ มือนาตี นะ ฮามัจ ญา เลอ. 41 อาดา กีลากี ซืออูรัก ปือนามา ยัยรัด นู ฌาดี กือปาลา รูมัฮ บือมุน เตอ ญา มาแรฮ ตือมะ มือญือมัฮ เดะ กากี นะ เยซู ปูโฌะ มีตา เยซู บรี มาโซะ กะ ดาลับ รูมัฮ นะ ญา. 42 กรานา-จะ อาดา นานะ ตูงัน นีบีนี อูมอยํ นะ ญา ดูวา-บือลัซ ตาโฮด ตาปี นานะ อีตู ญา เตด ซือนัง ซาเกะ ยู นะ มาตี. กะฆีเตอ ตืองัฮ เยซู ปี กะ รูมัฮ อีตู อาดา โกะ ซือมียา บาญะ ปาคัจ มาแรฮ ปือแปะ ญา. 43 อาดา นีบีนี ซืออูรัก นู ฌาดี ปือญาเกะ ตรือเบะ ดารัฮ เตด บราดู กือมูฮา ดูวา-บือลัซ ตาโฮด มาแรฮ ดัฮ. ญา ปี มียา บูมอยํ บาญะ อูรัก ยู ดูเวะ นะ ญา ฮาบิฮ ดัฮ ตาปี ฮอย บูมอยํ ดีฮา โปด นะ บือบือลา บรี ญา ซือนัง เลอ. 44 นีบีนี อีตู ญา มือฮึนะ มาแรฮ โซะ บลากัก ซูโรก ตางัน ปือเตาะ บีดิก บาฌู นะ เยซู. ดัดดัด อีตู ดารัฮ นู ตรือเบะ เตด บราดู เตอ ญา กริก ดัฮ. 45 เยซู ตาญา จะ "ซาปา เลอ นู ปือเตาะ กู ดัฮ?" โกะ ซือมียา ซือมูฮา กูญา ปาคัจ ฮอย เตด มืองากู เตอ กะฆีเตอ เปโตร มือเลา จะ "บูมอยํ เออ อาดา โกะ ซือมียา บาญะ กือลีลิก ปือแปะ ญาวา นะ เกา." 46 ตาปี เยซู ญา ตีกัฮ จะ "อาดา ซือมียา ซืออูรัก ปือเตาะ เดะ ญาวา นะ กู กรานา กู บราซา ตาฮู จะ อาดา นู ปือมือฆัฮ ตรือเบะ เดะ ญาวา นะ กู ดัฮ เลอ." 47 ตานา นีบีนี อีตู ญา ลีฮัจ จะ ญา ซือลูนี เตด บือเลฮ ดัฮ ญา โปด มาโซะ มาแรฮ ญาวา กือตัยํ ตือมะ มือญือมัฮ เดะ ฮึลด มูคา นะ เยซู มือญาเระ โซะ ฮึลด มูคา นะ โกะ ซือมียา ซือมูฮา จะ ซาเบะ นามา ญา ปี ปือเตาะ เดะ ญาวา นะ เยซู เตอ. จะ ปือญาเกะ นะ ญา ลือฆา บาฌิ ดัฮ ดัดดัด. 48 เยซู ญา มือเลา กะ นีบีนี อีตู จะ "อียา เออ ซาเบะ เกา ปือจายา เตอ กะฆีเตอ เกา ซือนัง บาฌิ ดัฮ. ปี ซือนัง ซือลามัจ เลอ." 49 วะตู เยซู ตืองัฮ มือเลา กะฆีนี อาดา ซือมียา ซืออูรัก ดาตัก เดะ รูมัฮ นะ กือปาลา รูมัฮ บือมุน มือญาเระ จะ "นานะ นีบีนี นะ เกา ญา มาตี ดัฮ. ฌางัน บือฆาโดฮ เยซู ลาฆี เลอ." 50 โซะ เยซู ตานา ดืองัยํ กะฆีเตอ ญา ตีกัฮ กะ ยัยรัด จะ "ฌางัน นะ ตาโกจ เลอ. อาดู เกา ปือจายา นานะ นะ ซือนัง บาฌิ ปูลัก." 51 ตานา เยซู รอจ กะ รูมัฮ ญา ตีเมา บรี ซาปา มาโซะ ปี ซามา. นู บือเลฮ มาโซะ ปี เตอ อาดา เปโตร โยฮัน ยากอบ ฌางัน เอด อาโปก นะ นานะ อีตู. 52 โกะ ซือมียา ซือมูฮา ปาคัจ มือนาแงฮ บือปาโตด กรานา นานะ อีตู. ตาปี เยซู ญา มือเลา จะ "ฌางัน มือนาแงฮ เลอ. ญา ฮอย เตด มาตี ดัฮ ฮาฌา ญา ตีโนะ ลีนา เลอ." 53 โกะ ซือมียา ซือมูฮา กูญา ปาคัจ อาฆัฮ-ฆือละ กะ ญา ซาเบะ กูญา ตาฮู จะ นานะ อีตู ญา มาตี ดัฮ. 54 ตาปี เยซู เตอ ญา ปือฆัก ตางัน นะ นานะ นีบีนี อีตู ญา บลาโลก มือเลา จะ "นานะ เออ บรี เกา บีกัซ เลอ." 55 กะฆีเตอ ซือมืองัจ นะ นานะ นีบีนี อีตู ปาเระ มาโซะ กะ ดาลับ ญาวา ปูลัก เลอ. ดัดดัด ญา บีกัซ บือดีรี. เยซู ญา ซูโรฮ อาเมด โกะ ซือบารัก มากัด บรี กะ นานะ อีตู มากัด. 56 โซะ เอด อาโปก เดะ นานะ อีตู เตอ กูญา ปือและ-ฮาตี ซูโงฮ เลอ. ตาปี เยซู ญา บลารัก กือมัซๆ ตีเมา บรี ปี มือญาเระ กะ ซือมียา ดีฮา ลาฆู นู บือเลฮ บือฌาดี ดัฮ เลอ.
1 กะฆีเตอ เยซู ญา ปาเงน โกะ มูเระ นะ ญา ดูวา-บือลัซ อูรัก บรี บือมุน ซือกาลี. ญา บรี ลาฆู ซีดี กะ กูญา บรี กูญา อาดา มือฆัฮ นะ บือเลฮ โปรฮ โกะ ฮาตู แนฮ-ฌือแนฮ นะ บือเลฮ บือบือลา โกะ ปือญาเกะ บรี ลือฆา ฌูฆา. 2 กะฆีเตอ เยซู ญา ซูโรฮ บรี กูญา ปี มือญาเระ ปาซัน นู ตูฮัด เดะ อาตัซ ญา นะ มาแรฮ ฌาดี ราฌา นะ โกะ อูมัจ-ซือมียา บรี กูญา บือบือลา โกะ ซือมียา ซาเกะ บรี ลือฆา. 3 เยซู ญา มือเลา ฌางัน กูญา จะ "วะตู กาเญา ตืองัฮ บือฌาลัด ปี เตอ ฌางัน อาเมด โกะ ซือบารัก นามา บือปี ซูโรฮ บือกะ โกะ ตูกัจ โกะ กือพัย โกะ ซือบารัก มากัด โกะ ดูเวะ เตอ. ฌางัน บาวา บาฌู โซก ดูวา กรัจ. 4 ดัฮ กาเญา นะ มาโซะ ปี มือนูปัก รูมัฮ ดีฮา กือนา ดูโดะ เดะ รูมัฮ อีตู เลอ ฌางัน อูบัฮ ตือดะ กาเญา นะ ตรือเบะ ปี เดะ ตูโปะ อีตู. 5 ดัฮ โกะ ซือมียา ตูโปะ ดีฮา ฮอย เตด ซาโมจ ลูมอฮ กาเญา เตอ วะตู กาเญา นะ ตรือเบะ เดะ ตูโปะ นะ กูญา กือนา กีปัซ โกะ ตานัฮ โกะ ฮาบู เดะ ตาปะ กากี นะ กาเญา บรี ฮาบิฮ ฌาดี ลาฆู ตูโดฮ ซาลัฮ นะ กูญา." เยซู ญา จะ. 6 กะฆีเตอ โกะ มูเระ ตรือเบะ ปี มือญาเระ บรีตา นู บาฌิ นะ ตูฮัด ราตา ตูโปะ. กูญา ปี บือบือลา โกะ ซือมียา ซาเกะ ราตา ตือปัจ บรี ลือฆา. 7 โซะ ราฌา เฮโรด ตานา ญา ดืองัยํ ลาฆู กะฆีเตอ ซือมูฮา ดัฮ นู เยซู บือเลฮ บูวัจ เตอ ญา บรีงัจ บาญะ เตด ตาฮู จะ นะ บูวัจ กะฮามี กรานา-จะ ซือมียา ซือตืองัฮ มือเลา จะ โยฮัน ฮีโดะ ปาเระ เดะ มาตี ดัฮ. 8 ซือตืองัฮ จะ เอลียา ญา มาแรฮ ปลีฮัจ ดัฮ. ซือมียา อาซิก จะ ฌาดี ซือมียา ตูโดฮ ลาฆู นะ ตูฮัด กาลา นูตู มาแรฮ บือฌาดี ปูลัก. 9 โซะ เฮโรด ญา จะ "โบะ โยฮัน กู บือเลฮ กรัจ ปาลา นะ ญา ดัฮ. ตาปี ซือมียา อีนี นู กู บือเลฮ ดืองัยํ ลาฆู นะ ญา กะฆีนี ฌาดี ซาปา เลอ?" กะฆีเตอ เฮโรด ญา มียา จือลัฮ นะ ปี ลีฮัจ เยซู. 10 โกะ ปือญูโรฮ กูญา บาลิ มาแรฮ มือญาเระ กะ เยซู บือกะ ลาฆู นู กูญา บือเลฮ บูวัจ ดัฮ เตอ. กะฆีเตอ เยซู บาวา กูญา บือปี กะ ตือปัจ นู ซืองะ ซา กูญา เดะ ตูโปะ เบดซัยดา. 11 ตาปี โกะ ซือมียา บาญะ เตอ ตานา ตาฮู จะ เยซู ปี โซะ ดีฮา กูญา ตูโรจ ปี ฌูฆา. เยซู ญา ซาโมจ กูญา มือเลา อาฌัยํ กูญา ปาซัน ลาฆู นู ตูฮัด เดะ อาตัซ ฌาดี ราฌา นู บือบือลา อูมัจ-ซือมียา. โกะ ซือมียา ดีฮา อาดา ปือญาเกะ ญา บือบือลา บรี ลือฆา. 12 รอจ วะตู มาตาอารี ดาปิก นะ มาโซะ ดัฮ โกะ มูเระ ดูวา-บือลัซ อูรัก มาแรฮ มือเลา ฌางัน เยซู จะ 'บรี โกะ ซือมียา บาญะ อีนี ปี กะ โกะ ตูโปะ โกะ รูมัฮ นู ปิกดาปิก ซารี ซือบารัก มากัด มียา ตือปัจ บราดู ตีโนะ ซามา. ซาเบะ-จะ ตือปัจ อีนี ฌาดี ฮูตัด ฮอย ซือมียา ดูโดะ เลอ." 13 ตาปี เยซู ญา มือเลา กะ กูญา จะ "ลูมอฮ กาเญา เลอ ปี อาเมด โกะ ซือบารัก บรี กะ กูญา มากัด." กูญา ตีกัฮ จะ "กามี ฮอย นามา บาญะ เลอ. อาดา ซา ตือโปก โรตี ลีมา กือโตน ฌางัน อีกัด ดูวา อีโกยํ. ดัฮ เตด ปี บือลี โกะ ซือบารัก มากัด บรี กะ โกะ ซือมียา บาญะ อีนี ฮอย นามา อาซิก เลอ." 14 ซาเบะ-จะ กีรา ซา โกะ กีลากี ฆามะ-จะ ลีมา รีบู อูรัก บือเลฮ. ตาปี เยซู ญา มือเลา ฌางัน โกะ มูเระ นะ ญา จะ "บรี กูญา ดูโดะ บือกาวัด-กาวัด เลอ. ซือกาวัด ลีมา-ปูโลฮ อูรัก." 15 โกะ มูเระ กูญา บูวัจ ตูโรจ บรี โกะ ลูมอฮ ซือมียา ซือมูฮา ปาคัจ ดูโดะ. 16 กะฆีเตอ เยซู ญา อาเมด ตือโปก โรตี ลีมา กือโตน ฌางัน อีกัด ดูวา อีโกยํ อีตู ญา ลางอฮ ลีฮัจ กะ ลาแงะ บรี ซือลามัจ กะ ตูฮัด เดะ อาตัซ. กะฆีเตอ ญา ลือแปะ ตือโปก โรตี ฌางัน อีกัด อูโญะ กะ โกะ มูเระ บรี กูญา นะ ฮาฆิ กะ โกะ ซือมียา นู บาญะ อีตู. 17 กูญา ซือมูฮา ปาคัจ มากัด กือญัง ฮาบิฮ ดัฮ. โกะ กรือดะ นู ลือเบฮ เดะ มากัด เตอ โกะ มูเระ กูญา มูงอจ บือเลฮ ดูวา-บือลัซ ซูเปะ. 18 อาดา ซืออารี ตานา เยซู ญา ตืองัฮ บือซาโวจ ซา ญา เตอ โกะ มูเระ กูญา มาแรฮ ดูโดะ ฌางัน เยซู ซามา. กะฆีเตอ เยซู ตาญา กูญา จะ "โกะ ซือมียา บาญะ กูญา อาดา มือเลา จะ กู ฌาดี ซาปา เลอ?" 19 โกะ มูเระ กูญา ตีกัฮ จะ "กูญา จะ เกา ฌาดี โยฮัน ซือมียา นู บรี ลาฆู ซือลับ เดะ อาเย เลอ. ตาปี ซือตืองัฮ จะ ฌาดี เอลียา. อาดา ฌูฆา ซือตืองัฮ นู จะ ฌาดี ซือมียา ตูโดฮ ลาฆู นะ ตูฮัด กาลา นูตู ซืออูรัก นู บือเลฮ ฮีโดะ ปาเระ เดะ มาตี เลอ." 20 เยซู ตาญา กูญา จะ "ตาปี โซะ ลูมอฮ กาเญา เตอ กาเญา มือเลา จะ กู ฌาดี ซาปา?" ซีโมน เปโตร ญา ตีกัฮ กะ เยซู จะ "เกา ฌาดี ราฌา นู บรี ซือลามัจ นู ตูฮัด เดะ อาตัซ ซูโรฮ มาแรฮ เลอ." 21 เยซู บลารัก กะ โกะ มูเระ นะ ญา กือมัซๆ ตีเมา บรี กูญา มือญาเระ ลาฆู กะฆีนี กะ ซาปา เลอ. 22 เยซู มือญาเระ กะ กูญา ปูลัก จะ "กู นู นานะ นะ อูมัจ-ซือมียา อีนี นะ ฆาโดฮ ลาวัด ซาเกะ ซูซัฮ บาญะ ฌือแนฮ. โกะ กือปาลา นังฆรี ฌางัน โกะ ลูมอฮ ซามี ซัยํ-บือซัยํ โกะ ซือมียา อาฌัยํ ลาฆู ปือมือซัด นะ ตูฮัด เตอ กูญา นะ กีปัซ กู บูวัก ดัฮ. กู นะ กือนา บูนอฮ บรี มาตี บูวัก. ตาปี เดะ อารี นู ตีฆา กู นะ กือนา บูวัจ บรี ฮีโดะ ปาเระ เดะ มาตี ปูลัก เลอ." ญา จะ. 23 กะฆีเตอ เยซู ญา มือเลา กะ กูญา ซือมูฮา จะ "ซือมียา ดีฮา นู อาดา ฮาตี นะ มาแรฮ ตูโรจ กะ กู เตอ บรี ญา บราดู บือฮีมัจ กะ ญาวา ตะอาซิก ดูลู. บรี กะ ญา อาเกะ ตาโงก กายู ปลีตัก นะ ญา บีลัก อารี เตอ ตูโรจ กะ กู มาแรฮ เลอ. 24 กรานา-จะ ซือมียา ดีฮา นู อาดา ฮาตี นะ ฌาฆา ญาวา นะ ญา บรี ซือนัง เตอ ญาวา ญา นะ ฌาฮานัม. ตาปี ซือมียา ดีฮา นู ซรัฮ ญาวา นะ ญา บูวัก กรานา ลีฮัจ กะ กู ซือมียา อีตู ญา นะ ดาปัจ ลาฆู ฮีโดะ ซูโงฮๆ เลอ. 25 ดัฮ ซือมียา ดีฮา บือเลฮ โกะ ซือบารัก ซือมูฮา เดะ ดือนียา ตาปี อีซี ญา นะ ฌาฮานัม ดัฮ ซือมียา อีตู นะ บือเลฮ อูโตก นามา เลอ? ฮอย ลาลู. 26 ซาเบะ-จะ ซือมียา ดีฮา นู ปือจือและ กรานา กู ฌางัน ปือมือเลา นะ กู ซือมียา อีตู เลอ กู นะ ปือจือและ บาลัซ ปาเระ เดะ อารี บลากัก. เดะ อารี บลากัก อีตู เตอ กู นู นานะ นะ อูมัจ-ซือมียา เตอ กู นะ มาแรฮ อาดา บือซายา บือซรี บือกะ บือซายา นะ อาโปก เดะ กู บือกะ บือซายา นะ โกะ ลูมอฮ ฮูลู-บาลัก นู จรัฮ บาฌิ เลอ. 27 ตาปี กู มือญาเระ บือซูโงฮ-ซูโงฮ กะ กาเญา จะ อาดา ซือมียา ซือตืองัฮ นู บือดีรี โตะ อีนี นู นะ ฮอย เตด มาตี ดูลู ตือดะ กูญา นะ ลีฮัจ ตูฮัด มาแรฮ บือบือลา ฌาดี ราฌา ดัฮ เลอ." เยซู ญา จะ. 28 เดะ บลากัก เยซู บือเลฮ มือเลา ปือมือเลา อีตู ฆามะ ลาปัด อารี เยซู ญา บาวา เปโตร โยฮัน ฌางัน ยากอบ ปี ซามา. ญา ปี ญาแญะ กะ อาตัซ บูเกะ บีดา นะ บือซาโวจ. 29 กะฆีเตอ ตานา เยซู ญา ตืองัฮ บือซาโวจ มูคา นะ ญา ซาเลด ดัฮ กาเยด นะ ญา โปด ฌาดี ปูเตฮ มรือแจว เลอ. 30 นี เลอ อาดา ดูวา อูรัก มาแรฮ มือเลา บือซามา ฌางัน ญา. กูญา เตอ ฌาดี มูซา ฌางัน เอลียา. 31 กูญา มาแรฮ ปลีฮัจ บือซายา เตอ มือเลา ฌางัน เยซู ปาซัน ลาฆู นู ญา นะ มือนีงัน ปี ดัฮ เดะ นังฆรี เยรูซาเลม. 32 โซะ เปโตร ฌางัน กาวัด นะ ญา กูญา ตีโนะ ลีนา ดัฮ. ตาปี ตานา กูญา ดาฮานี ดัฮ กูญา ลีฮัจ บือซายา เดะ ญาวา นะ เยซู ลีฮัจ ดูวา อูรัก อีตู บือดีรี ซามา ฌางัน ญา. 33 ตานา ดูวา อูรัก อีตู ตืองัฮ นะ ปี ดัฮ เปโตร ญา มือเลา ฌางัน เยซู จะ "จา เออ นู กามี อาดา โตะ อีนี โบะ บาฌิ ดัฮ เลอ. บรี กามี บูวัจ ซาเราะ โตะ อีนี ตีฆา บีฌี นะ เกา ซา นะ มูซา ซา นะ เอลียา ซา." นู เปโตร ญา มือเลา กะฆีเตอ ญา ฮอย เตด ตาฮู ลาฆู เลอ. 34 ตืองัฮ ญา มือเลา กะฆีนี ลาฆี อาดา กือมูวัง มาแรฮ ตูโดก เดะ อาตัซ กูญา. ตานา มาโซะ เดะ กือมูวัง ดัฮ กูญา โปด ตาโกจ เลอ. 35 อาดา ซูวารา บูงี ดาตัก มาแรฮ เดะ กือมูวัง อีตู มือเลา จะ "ซือมียา อีนี เลอ ฌาดี นานะ นะ กู. ญา เตอ นู กู ปีเลฮ ดัฮ. กือนา มือนีงัย กะ ญา เลอ." 36 ตานา ซูวารา อีตู ญา ซืองะ ดัฮ อาดา เยซู ซืออูรัก เลอ. โกะ มูเระ ตีฆา อูรัก ซีงี กูญา ซืองะ ดัฮ. เดะ วะตู อีตู กูญา ฮอย เตด มือเลา มือญาเระ ลาฆู นู กูญา บือเลฮ ลีฮัจ บือฆารี กะ ซือมียา ดีฮา เลอ. 37 วะตู จรัฮ ปาฆี เยซู ฌางัน โกะ มูเระ นะ ญา ตูโรด มาแรฮ ดาตัก เดะ โซะ บูเกะ ดัฮ เตอ. อาดา โกะ ซือมียา บาญะ ปาคัจ มาแรฮ ดาปัจ เยซู. 38 นี เลอ อาดา กีลากี ซืออูรัก เดะ ลูมอฮ ซือมียา บาญะ อีตู ญา บือซูระ จะ " บูมอยํ เออ กู มีตา บรี เกา ฆาฆัฮ ลีฮัจ นานะ กีลากี นะ กู เลอ ซาเบะ กู อาดา นานะ แนฮ ซา อูรัก อีนี. 39 ลีฮัจ เลอ อาดา ฮาตู ราโซะ รีฆะ นานะ อีตู บูวัจ บรี ญา บือซูระ ดัดดัด บูวัจ บรี ญา มืองือตัจ ยู ตรือเบะ ฆรือลือมา. ฮาตู อีตู ญา ปายัฮ นะ ตรือเบะ เดะ นานะ อีตู ตาปี บูวัจ บรี ญา บือซูซัฮ ญาวา ตือลาลู เลอ. 40 กู มีตา ตูโลก เดะ โกะ มูเระ นะ เกา บรี โปรฮ ฮาตู อีตู บรี ญา ตรือเบะ บูวัก เดะ นานะ นะ กู. ตาปี กูญา บูวัจ เตด บือเลฮ เลอ." 41 กะฆีเตอ เยซู ญา ตีกัฮ จะ "เฮอ โกะ ซือมียา ฮาดัจ อีนี ลาฆู ปือจายา ฮาบิฮ ปี กะ ดีฮา ดัฮ เลอ? กาเญา ซือซัจ ซาลัฮ ซูโงฮ เลอ. กะฆีเตอ กู นะ ดูโดะ ฌางัน กาเญา นะ ตาฮัด ลูมอฮ กาเญา บราปา ลามา เลอ? บาวา นานะ นะ เกา บือมาแรฮ กะ อีนี เลอ." 42 ตานา นานะ อีตู ตืองัฮ มาแรฮ ฮาตู บูวัจ บรี ญา รือบัฮ บรี ญา มืองือตัจ. ตาปี เยซู ญา โปรฮ ฮาตู ญา บือบือลา นานะ อีตู บรี ซือนัง บาฌิ ดัฮ. กะฆีเตอ ญา บรี ปาเระ กะ ปะ เดะ ญา. 43 โกะ ซือมียา ซือมูฮา กูญา ปาคัจ ปือและ-ฮาตี เดะ ลาฆู มือฆัฮ นู บือซัยํ ซูโงฮ นะ ตูฮัด เดะ อาตัซ. ตาปี วะตู กูญา ซือมูฮา อาดา ปือและ-ฮาตี ลาฆี กรานา ลาฆู ซือมูฮา นู เยซู บือเลฮ บูวัจ เตอ เยซู ญา มือเลา ฌางัน โกะ มูเระ นะ ญา จะ 44 "ลาฆู นู กู นะ มือญาเระ อีนี กาเญา ฌางัน นะ ลูปา เลอ. กรานา-จะ กู นู นานะ นะ อูมัจ-ซือมียา เตอ กู นะ กือนา อาตัจ บรี กะ โกะ ลูมอฮ ซือมียา รีฆะ เตอ." ญา จะ. 45 ตาปี ปือมือเลา ลาฆู อีตู โกะ มูเระ นะ ญา ฮอย เตด มาโซะ เดะ ฮาตี. กรานา ปือมือเลา อีตู กือนา บูนี ตาโรฮ เดะ กูญา ตีเมา บรี กูญา นะ ตาฮู. กูญา โปด ฮอย เตด บรานี นะ ตาญา เยซู ปาซัน ปือมือเลา อีตู เลอ. 46 กะฆีเตอ โกะ มูเระ กูญา ปาคัจ บือตือฆัฮ ซามา กูญา จะ เดะ ลูมอฮ กูญา อีตู ซาปา เลอ นู ซัยํ-บือซัยํ เดะ กาวัด? 47 ตาปี โซะ เยซู ตานา ญา ตาฮู ลาฆู นู กูญา บรีงัจ เดะ ดาลับ ฮาตี นะ กูญา ญา บาวา นานะ ซืออูรัก มาแรฮ บือดีรี ดาปิก ญา. 48 ญา มือเลา จะ "ซือมียา ดีฮา นู ซาโมจ นานะ ดือมิ อีนี กรานา นามา นะ กู ซือรูปา ซือมียา อีตู ซาโมจ กู ดัฮ. ซือมียา ดีฮา ซาโมจ กู เตอ ซือรูปา ญา บือเลฮ ซาโมจ ตูฮัด นู บือเลฮ ซูโรฮ กู มาแรฮ เลอ. กรานา-จะ เดะ ลูมอฮ นะ กาเญา ซือมียา นู ฌาดี ดือมิ เดะ กาวัด ซือมียา อีตู เลอ ญา ฌาดี ซัยํ-บือซัยํ ซูโงฮ." 49 โซะ โยฮัน ญา มือเลา กะ เยซู จะ "จา เออ ลูมอฮ กามี บือเลฮ ลีฮัจ ซือมียา ซืออูรัก นู ซือโบจ นามา นะ เกา บีดา นะ โปรฮ โกะ ฮาตู ตรือเบะ เดะ ญาวา นะ ซือมียา. กะฆีเตอ กามี บือเลฮ บลารัก ญา บูวัก ซาเบะ ญา เตด ตูโรจ กะ เกา ซามา ลูมอฮ กามี เลอ." 50 ตาปี เยซู ตีกัฮ กะ ญา จะ "ฌางัน บลารัก ญา เลอ ซาเบะ-จะ ซือมียา ดีฮา นู เตด บลาวัด ฌางัน กาเญา ซือมียา อีตู ญา ฌาดี ซือมียา โซะ กาเญา เลอ." 51 ตานา ดาปิก นะ รอจ วะตู นู เยซู นะ กือนา ซาโมจ ญาแญะ ปี ดัฮ เยซู ญา ตือตู-ฮาตี กือฌะ ดัฮ นู นะ ปี กะ นังฆรี เยรูซาเลม. 52 กะฆีเตอ ญา ซูโรฮ โกะ ซือมียา ปี ดูลู เดะ ญา บรี กูญา มาโซะ ปี กะ ดาลับ ตูโปะ นะ ลูมอฮ ซะมาเรีย ซา ตูโปะ บีดา นะ ซียะ ตือปัจ มือนูปัก บรี กะ ญา. 53 ตาปี โกะ ซือมียา เดะ ตูโปะ อีตู กูญา ฮอย เตด ซาโมจ เยซู ซาเบะ-จะ เยซู ญา ตือตู-ฮาตี นะ บือฌาลัด ปี กะ นังฆรี เยรูซาเลม. 54 ยากอบ ฌางัน โยฮัน นู มูเระ นะ ญา เตอ ตานา กูญา ลีฮัจ กะฆีเตอ กูญา มือเลา กะ เยซู จะ "จา เออ เกา นะ บรี กามี ปือซัด อาปี บรี ตูโรด ดาตัก เดะ โซะ ลาแงะ มาแรฮ ตูนู กูญา บรี ฌาฮานัม เฆอ?" 55 ตาปี เยซู ญา บือเลฮ อาเลฮ มาแรฮ บลารัก กูญา. 56 กะฆีเตอ เยซู ฌางัน มูเระ นะ ญา กูญา บือฌาลัด ปี ลือปัซ กะ ตูโปะ นู ซา. 57 ตานา เยซู ฌางัน โกะ มูเระ นะ ญา ตืองัฮ บือฌาลัด ปี อาดา ซือมียา ซืออูรัก มือเลา ฌางัน เยซู จะ "เกา นะ ปี กะ ดีฮา กู นะ ตูโรจ ปี ซามา เลอ." 58 กะฆีเตอ เยซู ตีกัฮ กะ ญา จะ "โกะ อาซู ฮูตัด ญา อาดา ลูบัก. โกะ บูโรก เดะ ลาแงะ ญา อาดา ซารัก. ตาปี โซะ กู นู นานะ นะ อูมัจ-ซือมียา เตอ กู ฮอย ตือปัจ นะ ตืองะ ปาลา ตีโนะ เลอ." 59 เยซู ญา มือเลา กะ ซือมียา นู ซืออูรัก ปูลัก จะ "กือนา ตูโรจ กะ กู เลอ." ตาปี ซือมียา อีตู ญา ตีกัฮ จะ "จา เออ มีตา บรี กู นะ ปี ตานัม บาดัด นะ ปะ เดะ กู ดูลู เลอ." 60 ตาปี เยซู มือเลา กะ ญา จะ "บรี ซือมียา มาตี ปี ตานัม ซือมียา มาตี ซามา. ตาปี โซะ เกา เตอ เกา กือนา ปี มือญาเระ บรี ตาฮู จะ ตูฮัด เดะ อาตัซ ญา มาแรฮ ฌาดี ราฌา นะ บือบือลา อูมัจ-ซือมียา เลอ. " 61 โซะ ซือมียา นู ซา ญา มือเลา ฌางัน เยซู จะ "จา เออ กู นะ ตูโรจ เกา ปี. ตาปี บรี กู ปี จาเระ ซือมียา เดะ รูมัฮ นะ กู ดูลู." 62 เยซู มือเลา กะ ญา จะ "ซือมียา ดีฮา อาเมด ตางัน ปือฆัก ฆาลา ดัฮ ตาปี อาเลฮ บลากัก ปูลัก เตอ ซือมียา อีตู ญา ฮอย เตด บือฆูนา นะ อาดา ตูฮัด เดะ อาตัซ ฌาดี ราฌา นู บือบือลา ญา."
1 ลือปัซ อีตู ตูฮัด เยซู ญา บือเลฮ ปีเลฮ มูเระ ซิก-อาซิก ตูโฌฮ-ปูโลฮ ดูวา อูรัก ลาฆี ญา ซูโรฮ กูญา ปี ดูลู เดะ ญา ซือกาลี ดูวา อูรัก บรี กะ กูญา ปี ราตา ตูโปะ ราตา ตือปัจ นู เยซู ตะอาซิก นะ มาโซะ ปี เตอ. 2 ญา มือเลา กะ กูญา จะ "ปาดี เดะ บือนัก อาดา บาญะ ซูโงฮ รอจ วะตู นะ กือตับ ดัฮ ตาปี ซือมียา บือกรือฌา อาดา ดีกิ เลอ. กะฆีเตอ กาเญา กือนา มีตา กือมัซๆ เดะ ตูฮัด บือนัก อีตู บรี ญา นะ ซูโรฮ ซือมียา บาญะ ปี บือกรือฌา กือตับ ปาดี เดะ บือนัก นะ ญา. 3 กาเญา กือนา ปี. นี เลอ กู ซูโรฮ กาเญา ปี บือกะ โกะ อานะ กาเมก เดะ ตืองัฮ กาวัด อาซู ฮูตัด นู ฌาฮัจ. 4 โกะ แบะ บอฮ ดูเวะ โกะ กือพัย โกะ ปะตาปะ เตอ ฌางัน อาเมด บือปี เลอ. ฌางัน นะ ซีงัฮ มือญือมัฮ กะ ซือมียา ดีฮา เดะ ตืองัฮ ฌาลัด. 5 ดัฮ นะ มาโซะ กะ รูมัฮ ดีฮา กือนา มือเลา ดูลู จะ 'ดูโดะ ซือนัง ซือลามัจ เลอ โกะ ซือมียา เดะ รูมัฮ อีนี.' 6 ดัฮ อาดา ซือมียา ดูโดะ เดะ รูมัฮ อีตู นู อาดา ฮาตี นะ ดูโดะ ซือนัง เตอ ลาฆู นู กาเญา บือเลฮ บรี ซือลามัจ ซีงี นะ บรี กะ ญา ดูโดะ ซือนัง ซือลามัจ ซูโงฮ. ดัฮ เตด กะฆีเตอ ลาฆู ซือนัง อีตู กือนา อาเมด ปาเระ ดูโดะ ฌางัน กาเญา ปูลัก. 7 กือนา ดูโดะ แนฮ ซา รูมัฮ อีตู เลอ. มากัด โอะ ซือบารัก นู กูญา ตืองะ บรี เตอ ซาเบะ-จะ ซือมียา บือกรือฌา บือฆูนา นะ บือเลฮ รือฆา อูปัฮ นะ ญา. ฌางัน นะ ตรือเบะ เดะ รูมัฮ นู อีตู มาโซะ ปี กะ รูมัฮ นู ซา. 8 วะตู กาเญา มาโซะ กะ ตูโปะ ดีฮา ดัฮ กูญา ซาโมจ กาเญา บรี บาฌิ กือนา มากัด ซือบารัก นู กูญา ตืองะ บรี เลอ. 9 กือนา บือบือลา ซือมียา ซาเกะ เดะ ตูโปะ อีตู บรี ซือนัง บาฌิ. กือนา มือญาเระ กะ โกะ ซือมียา จะ 'เตด ลามา ลาฆี ตูฮัด เดะ อาตัซ ญา นะ มาแรฮ บือบือลา ฌาดี ราฌา เดะ ตืองัฮ ลูมอฮ กาเญา เลอ.' 10 ตาปี ดัฮ กาเญา ปี มาโซะ กะ ตูโปะ ดีฮา กูญา ฮอย เตด ซาโมจ กาเญา กือนา ตรือเบะ ปี กะ ตืองัฮ ฌาลัด ตูโปะ อีตู มือเลา จะ 11 'มีเซ-จะ โกะ ตานัฮ โกะ ฮาบู เดะ ตูโปะ นะ กาเญา นู ลือกัจ เดะ ตาปะ กากี นะ กามี เตอ กามี นะ กือติฮ บูวัก เลอ ฌาดี ลาฆู ตูโดฮ ซาลัฮ นะ กาเญา. ตาปี กาเญา กือนา มาโซะ เดะ ฮาตี ลาฆู อีนี จะ เตด ลามา ลาฆี ตูฮัด เดะ อาตัซ เตอ ญา นะ มาแรฮ บือบือลา ฌาดี ราฌา เดะ ตืองัฮ ลูมอฮ กาเญา ดัฮ.' " 12 เยซู มือเลา ปูลัก จะ "กู มือญาเระ กะ กาเญา จะ เดะ อารี อีตู เตอ โกะ ซือมียา นังฆรี โซโดม กูญา นะ อาดา ซาลัฮ นู รีฮัน เดะ โกะ ซือมียา ตูโปะ อีตู เลอ." เยซู ญา จะ. 13 "จือลากา เลอ กาเญา ตูโปะ โคราซิน. จือลากา เลอ กาเญา ตูโปะ เบดซัยดา. ดัฮ กู บือเลฮ บูวัจ ลาฆู มือฆัฮ เดะ นังฆรี ทัยระ เดะ นังฆรี ซัยดอน เตอ บือกะ ลาฆู มือฆัฮ นู กู บือเลฮ บูวัจ เดะ ตูโปะ นะ กาเญา ซูโงฮ เลอ โกะ ซือมียา นังฆรี อีตู ฆาโดฮ บราเลฮ-ฮาตี ลามา ดัฮ เลอ ดูโดะ ปากัย กาเยด ฆูนี กาซัยํ อาเมด ฮาบู อาปี บอฮ เดะ ปาลา บรี ลีฮัจ จะ กูญา มือญือซัน ซูโงฮ. 14 ตาปี เดะ อารี กรัจ ฮูโกบ เตอ โกะ ซือมียา นังฆรี ทัยระ ฌางัน นังฆรี ซัยดอน กูญา นะ กือนา ฮูโกบ นู รีฮัน เดะ ฮูโกบ นะ กาเญา เลอ. 15 โซะ เกา ตูโปะ คาเปอนาอุม เตอ เกา อีงัจ นะ ฌาดี ตูโปะ นู ตีงี ซามา บายา ลาแงะ เฆอ? เตด บือเลฮ เลอ. โงฮ-ซูโงฮ เกา นะ กือนา บูวัก ดัฮ ตูโรด ปี กะ นังฆรี ฮาตู เลอ." 16 เยซู ญา มือเลา กะ โกะ มูเระ นะ ญา ปูลัก จะ "ซือมียา ดีฮา นู มือนีงัย กะ กาเญา เตอ ญา มือนีงัย กะ กู เลอ. ซือมียา ดีฮา ตีเมา ซาโมจ กาเญา ซือรูปา ญา ตีเมา ซาโมจ กู. ซือมียา ดีฮา ตีเมา ซาโมจ กู ซือรูปา ญา ตีเมา ซาโมจ ตูฮัด นู ซูโรฮ กู มาแรฮ เลอ." ญา จะ. 17 โกะ มูเระ ตูโฌฮ-ปูโลฮ ดูวา อูรัก อีตู กูญา บาลิ ซูกา-ฮาตี ซูโงฮ มือญาเระ จะ "จา เออ วะตู กามี ซือโบจ ตรือเบะ นามา นะ เกา โกะ ฮาตู โปด กูญา ฆาโดฮ ดูโดะ เดะ บาวา ฮูโกบ นะ กามี เลอ." 18 เยซู มือเลา กะ กูญา จะ "กู บือเลฮ ลีฮัจ กือปาลา ฮาตู ซีตัด ญา ฆูโฆยํ ดาตัก เดะ อาตัซ ลาแงะ ซือรูปา บือกะ ลีตัยํ ปานัฮ. 19 นี เลอ กู บรี กะ ลูมอฮ กาเญา อาดา ปือมือฆัฮ นะ บือเลฮ กาจะ อูลัยํ ฌาฮัจ ฌางัน ลางือลา นะ บือเลฮ ฌือนัฮ เดะ ซือตรู อีตู เลอ. ฮอย นามา ดัฮ เลอ นะ บูวัจ ฌาฮัจ กะ กาเญา บือเลฮ. 20 ตาปี ฌางัน นะ ซูกา-ฮาตี เดะ ลาฆู อีนี จะ โกะ ลูมอฮ ฮาตู ดูโดะ เดะ บาวา ฮูโกบ นะ กาเญา บือเลฮ. ตาปี กือนา ซูกา-ฮาตี เลอ กรานา-จะ นามา นะ กาเญา อาดา ฆาแรฮ ดัฮ เดะ โซะ ลาแงะ เตอ." 21 เดะ วะตู อีตู ซือมืองัจ นะ ตูฮัด บูวัจ บรี เยซู ซูกา-ฮาตี ซูโงฮ มือเลา จะ "โอ อาโปก เออ เกา นู ฌาดี ตูฮัด โซะ ลาแงะ ฌางัน ดือนียา กู บรี ซือลามัจ กะ อาโปก นู อาโปก บือเลฮ บูนี โกะ ลาฆู อีนี ตีเมา บรี โกะ ซือมียา ปานัย โกะ ซือมียา อาดา อากัน นะ ตาฮู. ตาปี ลาฆู อีนี อาโปก บือเลฮ ปลีฮัจ บรี กะ โกะ ซือมียา ฮอย อากัน นะ ตาฮู ดัฮ. โอ อาโปก เออ นู ฌาดี กะฆีเตอ ซาเบะ อาโปก ลีฮัจ บาฌิ ดัฮ." 22 เยซู มือเลา ปูลัก จะ "อาโปก เดะ กู บือเลฮ ซรัฮ บือนา ซือมูฮา บรี กะ กู ดัฮ. ฮอย ซาปา ตาฮู จะ นานะ นะ ตูฮัด ฌาดี ซือมียา ดีฮา ลือเบฮ ซา อาโปก เดะ อาตัซ นู ตาฮู. กะฆีเตอ ฌูฆา ฮอย ซือมียา ดีฮา ตาฮู จะ อาโปก เดะ อาตัซ ฌาดี ซาปา ลือเบฮ ซา นานะ นะ ญา เลอ ฌางัน โกะ ซือมียา อีตู นู นานะ นะ ตูฮัด ซูกา นะ ปลีฮัจ อาโปก บรี กะ กูญา ตาฮู." 23 บารู เยซู ญา กรือเลฮ กะ บลากัก ลีฮัจ โกะ มูเระ มือเลา กะ ซา กูญา จะ "ซือนัง ซือลามัจ เลอ กาเญา นู กาเญา บือเลฮ ลีฮัจ บือฆารี ลาฆู กะฆีนี ซือมูฮา. 24 ซาเบะ กู มือญาเระ กะ กาเญา จะ อาดา โกะ ซือมียา ตูโดฮ ลาฆู นะ ตูฮัด ฌางัน โกะ ราฌา บาญะ อูรัก เตอ กูญา ซูกา นะ ลีฮัจ ลาฆู นู กาเญา บือเลฮ ลีฮัจ ดัฮ ตาปี ฮอย เตด บือเลฮ ลีฮัจ เลอ. กูญา ซูกา นะ ดืองัยํ ลาฆู นู กาเญา บือเลฮ ดืองัยํ โปด ตาปี ฮอย เตด บือเลฮ ดืองัยํ เลอ." เยซู ญา จะ. 25 อาดา ซือมียา อาฌัยํ ลาฆู ปือมือซัด นะ ตูฮัด ซืออูรัก ญา มาแรฮ นะ ลกลีฮัจ เยซู. ญา ตาญา จะ "บูมอยํ เออ กู นะ บูวัจ กะฮามี เลอ บีดา นะ บือเลฮ ลาฆู ฮีโดะ ซูโงฮ นู ซือลาลู?" 26 เยซู มือเลา จะ "ซูรัจ ปือมือเลา ฮูโกบ นะ ตูฮัด มือเลา นามา? เกา บาจา ดาปัจ กะฮามี?" 27 ซือมียา อาฌัยํ อีตู จะ "ญา ปือซัด จะ 'เกา กือนา ซายัก กะ ตูฮัด บือซัยํ เดะ อาตัซ ตูฮัด นะ เกา บรี ปือนอฮ เดะ ฮาตี ซือมูฮา บือกะ ญาวา นะ เกา บูวัจ บือเลฮ ซือมูฮา บือกะ เกา บรีงัจ กีรา บือเลฮ ซือมูฮา บือกะ อูรัจ นะ เกา บูวัจ บือเลฮ ซือมูฮา เลอ.' อาดา ฌูฆา นู จะ 'เกา กือนา ซายัก กะ กาวัด ซือรูปา ซายัก กะ ญาวา ตะอาซิก เลอ.' " 28 เยซู มือเลา ฌางัน ญา จะ "เกา มือเลา กือนา ดัฮ. เกา ปี บูวัจ ตูโรจ กะฆีเตอ นะ บือเลฮ ฮีโดะ เลอ." 29 ตาปี ซือมียา อีตู ซูกา ปลีฮัจ จะ ญา บาฌิ ดัฮ. กะฆีเตอ ญา มือเลา ฌางัน เยซู จะ "ซาปา เลอ นู ฌาดี กาวัด นะ กู?" 30 เยซู ตีกัฮ จะ "อาดา ซือมียา ซืออูรัก ญา มาแรฮ ดาตัก เดะ นังฆรี เยรูซาเลม นะ ตูโรด ปี กะ นังฆรี เยริโค. ญา กือนา โกะ อูรัก ปือญามุน มาแรฮ ซามุน. กูญา ราปัซ กาเยด นะ ญา กาเตาะ ญา ซามา ตีงัน ญา มาจับ นะ มาตี ดัฮ. 31 ตานา บาฌิ อาดา ซามี ซืออูรัก บือฌาลัด ปี เดะ ฌาลัด อีตู. ตานา ลีฮัจ ซือมียา อีตู ญา ฌาลัด ปี ลือปัซ โซะ ซรือบัก ฌาลัด นู ซา. 32 กะฆีเตอ ฌูฆา อาดา ซือมียา เดะ ลูมอฮ เลวี ซืออูรัก ญา มาแรฮ รอจ ดัฮ. ญา ปี ลีฮัจ ซือมียา อีตู ตาปี ญา บือฌาลัด ปี ลือปัซ โซะ ซรือบัก ฌาลัด นู ซา ฌูฆา เลอ. 33 ตาปี อาดา ซือมียา บักซา ซะมาเรีย ญา ฌาลัด มาแรฮ รอจ ดัฮ. ตานา ลีฮัจ ซือมียา อีตู ญา อาดา ฮาตี ตือจีฮัด เลอ. 34 ญา ปี รอจ กะ ซือมียา อีตู อาเมด มีญะ ฌางัน อาระ อางุน อูแร เดะ ลียัก อาเมด กาเยด บือเละ เตอ. กะฆีเตอ ญา บรี ซือมียา อีตู ญาแญะ กูดา นะ ญา บาวา บือปี กะ โรงแรม บือบือลา ญา โซะ อีตู ดัฮ. 35 ตานา จรัฮ ปาฆี ญา นะ ปี. กะฆีเตอ ญา อาเมด ดูเวะ ดูวา รีเงะ ปีระ บรี กะ ตูฮัด โรงแรม มือเลา จะ 'กือนา บือบือลา ซือมียา อีนี เลอ. ดัฮ ดูเวะ เตด ฆือนะ กู นี เลอ นะ บายัยํ บรี กะ เกา วะตู กู บาลิ ปาเระ.' ญา จะ." 36 กะฆีเตอ เยซู ตาญา จะ "เดะ ตีฆา อูรัก อีตู เกา กีรา จะ ซือมียา ดีฮา นู ฌาดี กาวัด นะ ซือมียา นู กือนา ซามุน?" 37 ซือมียา อาฌัยํ อีตู ญา ตีกัฮ จะ "ฌาดี ซือมียา อีตู เลอ นู ตือจีฮัด กะ ญา." กะฆีเตอ เยซู มือเลา ฌางัน ญา จะ "เกา กือนา ปี บูวัจ กะฆีเตอ ฌูฆา เลอ." 38 ตานา เยซู ฌางัน โกะ มูเระ ตืองัฮ บือฌาลัด ปี เยซู ญา ปี มาโซะ กะ ตูโปะ ซา ตูโปะ. อาดา นีบีนี ซืออูรัก ปือนามา มาทา ญา มาแรฮ ซาโมจ เยซู บรี มาโซะ กะ รูมัฮ นะ ญา. 39 มาทา ญา อาดา อาดี นีบีนี ปือนามา จะ มารียา. มารียา เตอ ญา มาแรฮ ดูโดะ ดาปิก กากี นะ เยซู ดืองัยํ ปือมือเลา นู เยซู อาฌัยํ. 40 ตาปี มาทา ญา ฆาโดฮ-ฮาตี เดะ ลาฆู บือกรือฌา ตูโลก บาญะ ฌือแนฮ. กะฆีเตอ ญา มาแรฮ มือเลา กะ เยซู จะ "จา เออ นู อาดี เดะ กู ญา บือบียัยํ บรี กู บือกรือฌา ซา กู เตอ จา เตด ปือดูลี เฆอ? อาดู ซูโรฮ ญา มาแรฮ ตูโลก กู เลอ." 41 ตาปี เยซู ญา ตีกัฮ กะ ญา จะ "มาทา มาทา เออ เกา บรีงัจ บาญะ ซูซัฮ ฆาโดฮ-ฮาตี บาญะ มาตา เลอ. 42 ตาปี อาดา แนฮ ซือมาตา นู ฆาโดฮ นะ บูวัจ. มารียา ญา บือเลฮ ปีเลฮ อาเมด ลาฆู นู บาฌิ เตอ. ซาปา นะ ราปัซ อาเมด เดะ ญา ฮอย เตด บือเลฮ เลอ." ญา จะ.
1 อาดา ซืออารี เยซู ญา บือซาโวจ เดะ ตือปัจ ซา ตือปัจ. ตานา ฮาบิฮ ดัฮ อาดา มูเระ นะ ญา ซืออูรัก มือเลา กะ ญา จะ "จา เออ มีตา อาฌัยํ ลูมอฮ กามี บรี ปานัย บือซาโวจ เลอ ซือรูปา บือกะ โยฮัน ญา บือเลฮ อาฌัยํ โกะ มูเระ นะ ญา." 2 กะฆีเตอ เยซู ญา มือเลา ฌางัน กูญา จะ "วะตู บือซาโวจ เตอ กือนา มือเลา จะ 'โอ ตูฮัด อาโปก นะ กามี มีตา บรี นามา นะ เกา ฌาดี นามา นู บาฌิ บือซรี เลอ. มีตา บรี ตูฮัด นะ บือบือลา ฌาดี ราฌา เดะ ดือนียา อีนี เลอ. 3 มีตา บารัก นู กามี บือคานะ นะ มากัด เดะ บีลัก อารี เลอ. 4 มีตา บรี ตูฮัด อาเกะ ดูซา นะ กามี ซาเบะ กามี อาเกะ ซาลัฮ นะ โกะ ซือมียา ซือมูฮา นู บูวัจ กะ กามี ดัฮ. ฌางัน บรี กามี นะ กือนา บาอาฌะ บูวัจ ดูซา.' " 5 กะฆีเตอ เยซู ญา มือเลา ฌางัน โกะ มูเระ นะ ญา จะ "บรีงัจ ลีฮัจ. กาเลา-จะ ซือมียา ดีฮา เดะ ลูมอฮ กาเญา อาดา ซาบัจ ซืออูรัก เกา ปี ซารี ญา ตืองัฮ มาลับ มือเลา ฌางัน ญา จะ 'ซาบัจ เออ มีตา มีญับ ตือโปก โรตี ตีฆา กือโตน เลอ. 6 ซาเบะ-จะ ซาบัจ นะ กู นู ซืออูรัก ญา มาแรฮ ดาตัก เดะ ฌาโวฮ. กู ฮอย นามา นะ บรี กะ ญา มากัด.' 7 ตาปี ซาบัจ นู เดะ ดาลับ รูมัฮ เตอ ญา ตีกัฮ จะ 'ฌางัน มาแรฮ บือฆาโดฮ กู เลอ. ปีตู ตูโดก ดัฮ โกะ นานะ นะ กู โปด ตีโนะ ลีนา ซามา ฮาบิฮ ดัฮ. กู นะ บีกัซ ปี อาเมด บรี กะ เกา ฮอย เตด บือเลฮ ดัฮ เลอ.' 8 บรีงัจ ลีฮัจ เลอ นะ ฌาดี กะฮามี? กู มือญาเระ กะ กาเญา จะ มีเซ ซือมียา อีตู ญา ตีเมา บีกัซ ปี อาเมด บรี ซาเบะ เกา ฌาดี ซาบัจ นะ ญา เตอ ตาปี ซาเบะ เกา แงฮ-อูแงฮ มีตา กะฆีเตอ ญา นะ ฆาฆัฮ บีกัซ ปี อาเมด ซือบารัก บรี กะ เกา บือกะ เกา มีตา เลอ. 9 "กะฆีเตอ กู มือเลา ฌางัน กาเญา จะ กือนา มีตา บารู ญา นะ บรี กะ กาเญา กือนา ซารี บารู นะ ดาปัจ กือนา บลาโลก เดะ ปีตู บารู ญา นะ บูกา บรี. 10 ซาเบะ-จะ ราตา ซือมียา นู มีตา ญา นะ บือเลฮ ราตา ซือมียา นู ซารี ญา นะ ดาปัจ ราตา ซือมียา นู บลาโลก เดะ ปีตู ปีตู นะ บูกา บรี กะ ญา เลอ. 11 เดะ ลูมอฮ กาเญา อาดา ซาปา ฌาดี ปะ ดัฮ นานะ มีตา อีกัด ปะ นะ บรี อูลัยํ ฆาตี อีกัด เฆอ? 12 เฆอ-จะ นานะ ญา มีตา ตือโลยํ ปะ นะ บรี ลางือลา เฆอ? 13 กาเญา เตอ มีเซ-จะ ฌาดี ซือมียา บือดูซา ตาปี ตาฮู นะ บรี บือนา นู บาฌิ กะ นานะ นะ กาเญา. กะฆีเตอ บาญะ ลือเบฮ เดะ อีตู อาโปก นู โซะ อาตัซ ลาแงะ ญา นะ บรี ซือมืองัจ นะ ตูฮัด กะ ซือมียา นู มีตา เดะ ญา เลอ." เยซู ญา จะ. 14 เยซู ญา ตืองัฮ โปรฮ ฮาตู นู บูวัจ บรี ซือมียา มือเลา เตด บือเลฮ. ตานา ฮาตู ตรือเบะ ดัฮ ซือมียา อีตู บารู ญา บือเลฮ มือเลา. กะฆีเตอ โกะ ซือมียา บาญะ กูญา ปาคัจ ปือและ-ฮาตี ซูโงฮ. 15 ตาปี อาดา ซือมียา ซือตืองัฮ มือเลา จะ "ซือมียา อีนี ญา โปรฮ ฮาตู ตรือเบะ บือเลฮ กรานา ปือมือฆัฮ นะ ฌิด เบเอนซือบุน นู กือปาลา ฮาตู ซีตัด เลอ." 16 โกะ ซือมียา อาซิกๆ กูญา ลกลีฮัจ เยซู มีตา บรี ญา บูวัจ ปือนานา ซีดี บรี ตาฮู จะ ญา ฌาดี ซือมียา นู ตูฮัด เดะ อาตัซ ซูโรฮ มาแรฮ. 17 ตาปี เยซู ญา ตาฮู ลาฆู นู กูญา บรีงัจ. กะฆีเตอ ญา มือเลา ฌางัน กูญา จะ "นังฆรี ดีฮา นู ปือจัฮ-บือลัฮ ฌาดี โซกซา ปาโซะ เตอ นะ ฌาฮานัม. รูมัฮ ดีฮา นู โกะ ซือมียา ปือจัฮ-บือลัฮ ดัฮ เตอ ญา นะ รูโตฮ แจะ-บีแระ ฮาบิฮ เลอ. 18 ดัฮ โกะ ฮาตู ซีตัด กูญา บือปือจัฮ ซามา กูญา นังฆรี นะ กูญา นะ ดูโดะ กือฌะ บือเลฮ กะฮามี เลอ? ซาเบะ กาเญา จะ กู โปรฮ ฮาตู เดะ นามา นะ เบเอนซือบุน. 19 ดัฮ กู นี โปรฮ โกะ ฮาตู กรานา ปือมือฆัฮ นะ เบเอนซือบุน กะฆีเตอ ลูมอฮ นะ กาเญา โปรฮ ฮาตู ตรือเบะ กรานา ปือมือฆัฮ นะ ซาปา เลอ? กะฆีเตอ ลูมอฮ นะ กาเญา ตะอาซิก นู นะ กรัจ ฮูโกบ กาเญา. 20 ตาปี นู กู โปรฮ โกะ ฮาตู ตรือเบะ เดะ ปือมือฆัฮ ฌารี ตางัน นะ ตูฮัด เดะ อาตัซ กะฆีเตอ ตูฮัด เลอ ญา มาแรฮ ฌาดี ราฌา นะ บือบือลา กาเญา ดัฮ เลอ. 21 "กาลา ซือมียา ตือฆัยํ-อูรัจ ปือฆัก ซือนาตา ฌาฆา รูมัฮ นะ ญา เตอ โกะ ซือบารัก เดะ รูมัฮ อีตู ฮอย เตด ลือแงะ เลอ. 22 ตาปี วะตู ซือมียา นู ตือฆัยํ-อูรัจ ลือเบฮ เดะ ญา ลาฆี มาแรฮ บลาวัด อาเมด ฌือนัฮ เดะ ญา เตอ ซือมียา อีตู โปด นะ อาเมด โกะ ซือนาตา นู บูวัจ บรี ตูฮัด รูมัฮ ซือนัง-ฮาตี ปี ดัฮ. กะฆีเตอ ญา นะ ปาฮาฆิ โกะ ซือบารัก นู ตูฮัด รูมัฮ ซีงี บือเลฮ ซามุน เตอ อาเมด บือปี เลอ. 23 "ซือมียา ดีฮา เตด ดูโดะ โซะ กู โงฮ-ซูโงฮ ซือมียา อีตู ญา บลาวัด ฌางัน กู. ซือมียา ดีฮา นู เตด ตูโลก กู ปี ปือมุน โกะ ซือมียา เตอ ญา บูวัจ บรี กูญา กือจัย ปี เลอ." 24 เยซู มือเลา ปูลัก จะ "ตานา ฮาตู นู ตะอารัฮ ตรือเบะ เดะ ซือมียา ดีฮา ดัฮ ญา ปี ราตา เดะ ตือปัจ ตานัฮ กริก นู ฮอย อาเย ลาลู มียา ตือปัจ นะ ดูโดะ ซือนัง. ฮอย เตด ดาปัจ ดัฮ ญา มือเลา จะ 'บอฮ กู นะ บาลิ ปาเระ กะ รูมัฮ นะ กู นู กู ตรือเบะ มาแรฮ ซีงี เลอ.' 25 ตานา มาแรฮ รอจ ดัฮ ญา ดาปัจ รูมัฮ อีตู กือนา กีกัย จรัฮ ปือตัด ตาโรฮ บาฌิ ดัฮ. 26 กะฆีเตอ ฮาตู อีตู ปี ซาโมจ อาเมด ฮาตู อาซิก ตูโฌฮ ฮาตู นู ฌาฮัจ ลือเบฮ เดะ ญา มาแรฮ มาโซะ ดูโดะ บือซามา เดะ รูมัฮ อีตู. กะฆีเตอ วะตู เดะ บลากัก เตอ ซือมียา อีตู ญา ซูซัฮ ปายัฮ ลือเบฮ เดะ วะตู ลามูลา ลาฆี." เยซู ญา จะ. 27 ตานา เยซู ญา ตืองัฮ มือเลา ปือมือเลา กะฆีเตอ อาดา นีบีนี ซืออูรัก เดะ ตืองัฮ โกะ ซือมียา บือซูระ มือเลา กะ ญา จะ "ซือมียา อีตู เตอ นู เกา บือเลฮ บือฌาดี เดะ โปรจ นะ ญา นู เกา บือเลฮ มากัด ดาดา นะ ญา ญา ซือนัง ซือลามัจ เลอ." 28 ตาปี เยซู ญา มือเลา จะ "ซือมียา ซือมูฮา นู มือนีงัย กะ ปือมือเลา นะ ตูฮัด นู บูวัจ ตูโรจ ปือมือเลา อีตู กูญา เลอ นู นะ ซือนัง ซือลามัจ ลือเบฮ เดะ อีตู ลาฆี." 29 ตานา โกะ ซือมียา อาดา บือตามัฮ บาญะ เยซู ญา ฮึนตะ นะ มือเลา จะ "โกะ ซือมียา ฮาดัจ อีนี กูญา ฌาดี ซือมียา ฌาฮัจ ซือมาตา. กูญา มีตา ลีฮัจ ปือนานา นู มือฆัฮ ตาปี ฮอย ปือนานา นามา โปด นู นะ บรี ลีฮัจ กะ กูญา ลือเบฮ ซา ปือนานา นะ โยนา. 30 ซาเบะ-จะ โยนา ญา ฌาดี ปือนานา บรี กะ โกะ ซือมียา นังฆรี นีนะเว กะฮามี เตอ กู นู นานะ นะ อูมัจ-ซือมียา อีนี นะ ฌาดี ปือนานา บรี กะ โกะ ซือมียา ฮาดัจ อีนี กะฆีเตอ ฌูฆา เลอ. 31 ราฌา นีบีนี เดะ นังฆรี โซะ บารัจ-ดายา เตอ ญา นะ บีกัซ บือดีรี อาดู โกะ ซือมียา ฮาดัจ อีนี เดะ อารี กรัจ ฮูโกบ เลอ. ซาเบะ-จะ ญา บือเลฮ บือฌาลัด มาแรฮ ดาตัก เดะ โซะ ฮูโฌก ดือนียา บีดา นะ มือนีงัย ปือมือเลา นู ปานัย อากัน นะ ราฌา ซะโลโม. ตาปี นี เลอ นู บือซัยํ ลือเบฮ เดะ ซะโลโม อาดา โซะ อีนี ดัฮ เลอ. 32 ลูมอฮ ซือมียา นังฆรี นีนะเว เตอ นะ บีกัซ บือดีรี อาดู โกะ ซือมียา ฮาดัจ อีนี เดะ อารี กรัจ ฮูโกบ ฌูฆา ซาเบะ-จะ โซะ กูญา ตานา ดืองัยํ ปือมือเลา นู โยนา มือญาเระ กูญา บือเลฮ บราเลฮ-ฮาตี บารู ปาเระ ดัฮ. ตาปี นี เลอ นู บือซัยํ ลือเบฮ เดะ โยนา อาดา โซะ อีนี ดัฮ เลอ." 33 เยซู มือเลา ปูลัก จะ "ฮอย ซือมียา ดีฮา ตานา จูโจฮ ปลีตา ดัฮ นะ ตืองะ ตาโรฮ โซะ ตือปัจ ลีนง เฆอ-จะ เดะ บาวัฮ เตง เตอ. ตาปี ตืองะ ปลีตา อีตู โซะ อาตัซ ซลีแป บีดา โกะ ซือมียา นู มาโซะ มาแรฮ นะ ลีฮัจ ซายา บือฆารี ซัฮ. 34 มาตา นะ เกา ฌาดี ซือรูปา ปลีตา เดะ ญาวา เลอ. วะตู มาตา นะ เกา จรัฮ บาฌิ ญาวา นะ เกา โปด นะ จรัฮ บาฌิ ซือมูฮา ฌูฆา. ตาปี วะตู มาตา นะ เกา บูตา ญาวา นะ เกา โปด นะ กือลับ ฮาบิฮ เลอ. 35 กะฆีเตอ กือนา ฌาฆา บรี บาฌิ เลอ ตีเมา บรี จรัฮ เดะ ญาวา นะ เกา นะ ฌาดี กือลับ อีตู. 36 กะฆีเตอ ดัฮ ญาวา นะ เกา ญา จรัฮ บาฌิ ซือมูฮา ฮอย ตือปัจ กือลับ ลาลู เตอ ญา นะ ฌาดี ตือปัจ จรัฮ ราตาๆ เลอ ซือรูปา บือกะ ซายา ปลีตา นู ซูโลฮ จรัฮ บรี กะ เกา." เยซู ญา จะ. 37 ตานา เยซู ญา ตืองัฮ มือเลา ลาฆี ซือมียา ซืออูรัก เดะ ลูมอฮ ฟาริซี ญา บลาโลก เยซู ปี มากัด นาซี ฌางัน ญา. กะฆีเตอ เยซู ญา มาโซะ ปี ดูโดะ มากัด. 38 โซะ อูรัก ฟาริซี อีตู ตานา ญา ลีฮัจ เยซู ฮอย เตด ตูโรจ กะ ฮาดัจ บาโซฮ ตางัน ดูลู นู นะ มากัด นาซี เตอ ญา โปด ปือและ-ฮาตี. 39 เยซู มือเลา กะ ญา จะ "ลีฮัจ เลอ กาเญา ลูมอฮ ฟาริซี กาเญา บาโซฮ มาโกะ ฌับ โซะ ลูวัยํ. ตาปี โซะ ดาลับ เตอ กาเญา ปือนอฮ ฌางัน ลาฆู ฮาลูบา ลาฆู ฌาฮัจ. 40 เออ โกะ ซือมียา บูดอ เลอ ตูฮัด นู บือเลฮ บือฌาดี โซะ ลูวัยํ บือเลฮ บือฌาดี โซะ ดาลับ ฌูฆา บูกัด เฆอ? 41 ตาปี โกะ ซือบารัก นู กาเญา อาดา เดะ ดาลับ โกะ มาโกะ ฌับ เตอ กือนา ฮาฆิ บรี กะ อูรัก ฮาฌะ. กะฆีเตอ นี เลอ โกะ บือนา บารัก แนฮ-ฌือแนฮ นะ จรัฮ บาฌิ บรี กะ กาเญา ซือมูฮา. 42 "ตาปี จือลากา เลอ กาเญา ลูมอฮ ฟาริซี กรานา-จะ ปูโจะ รูกู ฌางัน กูแญะ โกะ ตาโระ ราตา ฌือแนฮ เตอ เดะ ดาลับ ซือปูโลฮ บรือกัซ กาเญา อาเกะ บรี กะ ตูฮัด ซา บรือกัซ. ตาปี ลาฆู นู นะ ฮาตี รือมัก ฌางัน กาวัด ลาฆู ซายัก กะ ตูฮัด เตอ กาเญา บือเลฮ ตีงัน บูวัก ดัฮ. ลาฆู ซัยํ-บือซัยํ กะฆีนี ลูมอฮ กาเญา ฆาโดฮ บูวัจ ตูโรจ เลอ ตาปี ลาฆู อาซิก ซีงี ฌางัน นะ ตีงัน ฌูฆา. 43 "จือลากา เลอ กาเญา ลูมอฮ ฟาริซี ซาเบะ-จะ ลูมอฮ กาเญา ซูกา ตือปัจ ดูโดะ นู บาฌิ เดะ กาวัด เดะ รูมัฮ บือมุน ซูกา บรี โกะ ซือมียา อาเกะ ซือมัฮ กะ กาเญา เดะ ตืองัฮ ปาฌะ อีกัด. 44 จือลากา เลอ กาเญา กรานา-จะ กาเญา ฌาดี ซือรูปา ตือปัจ ตานัม บาดัด นู ฮอย ปือนานา. กะฆีเตอ โกะ ซือมียา บือฌาลัด กาจะ ตือปัจ อีตู ฮอย เตด ตาฮู จะ อาดา นามา เลอ." เยซู ญา จะ. 45 อาดา ซือมียา อาฌัยํ ลาฆู ปือมือซัด นะ ตูฮัด ซืออูรัก ญา มือเลา กะ เยซู จะ "บูมอยํ เออ นู เกา มือเลา กะฆีเตอ ซือรูปา เกา อูจะ กะ ลูมอฮ กามี ฌูฆา เลอ." 46 เยซู ญา ตีกัฮ จะ "จือลากา เลอ กาเญา ฌูฆา ลูมอฮ ซือมียา อาฌัยํ ลาฆู ปือมือซัด นะ ตูฮัด กรานา-จะ กาเญา อาเมด ซือบารัก บรัจ นู ตาโงก ปายัฮ โตระ ตืองะ เดะ อาตัซ ซือมียา. ตาปี โซะ ลูมอฮ กาเญา ตะอาซิก แนฮ ซา ฌารี โปด ฮอย เตด ปือฆัก ลาลู บีดา ตูโลก กูญา ตาโงก ซือบารัก บรัจ อีตู. 47 จือลากา เลอ กาเญา ซาเบะ กาเญา บูวัจ รูมัฮ ตานัม บาดัด นู บาฌิ บีดา โกะ ลูมอฮ ซือมียา ตูโดฮ ลาฆู นะ ตูฮัด กูญา เลอ นู โกะ บีลาแก นะ กาเญา ตะอาซิก บือเลฮ บูนอฮ ดัฮ. 48 กะฆีเตอ ลูมอฮ กาเญา ฌาดี ซะซี ลีฮัจ บาฌิ ฌางัน โกะ บีลาแก นะ กาเญา. กรานา-จะ กูญา บือเลฮ บูนอฮ ซือมียา ตูโดฮ ดัฮ เตอ กะฆีเตอ ลูมอฮ กาเญา บือเลฮ บูวัจ รูมัฮ ตานัม บาดัด บรี กะ กูญา. 49 ซาเบะ กะฆีเตอ เลอ ซูรัจ ลาฆู อากัน นะ ตูฮัด มือเลา จะ 'กู นะ ซูโรฮ โกะ ซือมียา ตูโดฮ ฌางัน โกะ ปือญูโรฮ ปี มียา กูญา. กูญา นะ บูนอฮ ซือตืองัฮ นะ ปรือกัด ซือตืองัฮ โปด.' 50 กะฆีเตอ โกะ ซือมียา ฮาดัจ อีนี นะ กือนา ฮูโกบ ดัฮ กรานา ดารัฮ นะ โกะ ซือมียา ตูโดฮ ราตา อูรัก นู มือนีเลฮ ตรือเบะ ดัฮ ตะเดะ ลามูลา นู บือเลฮ บือฌาดี ดือนียา. 51 ฌาดี-จะ ตะเดะ ดารัฮ นะ เฮเบน รอจ กะ ดารัฮ นะ ซะคารียา นู กือนา บูนอฮ มาตี เดะ จือลัฮ ตือปัจ ตูนู บารัก มือนืองะ ฌางัน บาลัย นะ ตูฮัด. กู มือญาเระ กะ กาเญา ลาฆู ซูโงฮ จะ โกะ ซือมียา ฮาดัจ อีนี ฆาโดฮ กือนา ฮูโกบ กรานา ดารัฮ อีตู ซือมูฮา เลอ. 52 "จือลากา เลอ กาเญา ลูมอฮ ซือมียา อาฌัยํ ลาฆู ปือมือซัด นะ ตูฮัด กรานา-จะ กูจี นู บูกา ปีตู บรี โกะ ซือมียา ตาฮู ซูโงฮ เตอ กาเญา บือเลฮ อาเมด ปี ดัฮ. ลูมอฮ กาเญา ตะอาซิก โปด ฮอย เตด มาโซะ ปี เลอ. ซือมียา นู นะ มาโซะ ปี เตอ กาเญา บือเลฮ ซือกัจ บูวัก." 53 ตานา เยซู ญา ตรือเบะ มาแรฮ เดะ รูมัฮ ดัฮ ลูมอฮ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ ฟาริซี กูญา ฮึนตะ นะ บือฆาโดฮ กะ เยซู ซัจๆ ตาญา ญา บาญะ ฌือแนฮ 54 นาตี ตาดัฮ บีดา นะ อาเมด ซาลัฮ เดะ ปือมือเลา นะ ญา เลอ.
1 วะตู อีตู โกะ ซือมียา บาญะ รีบู อูรัก ปาคัจ บือมุน ยู ฮอย ตือปัจ นะ บือดีรี. กะฆีเตอ เยซู ญา มือเลา กะ โกะ มูเระ นะ ญา ดูลู จะ "กาเญา กือนา ฌาฆา บรี ลือปัซ เดะ ราฆี นะ ลูมอฮ ฟาริซี ฌาดี-จะ ลาฆู มูคา มาเนฮ ฮาตี ฌาฮัจ. 2 ตาปี ลาฆู นามาๆ นู ตูโดก บรี ลีฮัจ เตด บือฆารี ดัฮ นะ กือนา ปลีฮัจ ซัฮ ซือมูฮา. ลาฆู นามาๆ นู บูนี ดัฮ นะ กือนา บูวัจ บรี ตาฮู ราตาๆ. 3 ซาเบะ กะฆีเตอ ลาฆู แนฮ-ฌือแนฮ นู กาเญา บือเลฮ มือเลา เดะ โซะ กือลับ กูญา นะ ดืองัยํ เดะ โซะ จรัฮ. นู กาเญา บือเลฮ บือบีซิ ดาปิก ตือลีงา เดะ รูวัก นะ กาเญา นะ กือนา บือซูระ เดะ อาตัซ รูมัฮ บรี ดืองัยํ ราตาๆ เลอ." 4 "กาวัด นะ กู เออ กู มือเลา กะ กาเญา จะ ฌางัน นะ ตาโกจ เดะ ซือมียา นู บูนอฮ บือเลฮ ซา ญาวา เดะ บลากัก ฮอย นามา นู นะ บูวัจ บือเลฮ ปูลัก. 5 ตาปี กู นะ บรี กะ กาเญา ตาฮู จะ ฆาโดฮ นะ ตาโกจ เดะ ซาปา. กือนา ตาโกจ เดะ ตูฮัด ญา เลอ นู ตานา บูนอฮ ญาวา ดัฮ อาดา ปือมือฆัฮ นะ บูวัก กะ นอรากา บือเลฮ ฌูฆา. โงฮ-ซูโงฮ กู มือญาเระ กะ กาเญา จะ กือนา ตาโกจ เดะ ตูฮัด นู อีตู เลอ. 6 "บูโรก จียะ รายา ลีมา อีโกยํ กูญา ฌูวัน ดูวา บัจ บูกัด เฆอ? ตาปี บูโรก แนฮ ซา อีโกยํ โปด ตูฮัด เดะ อาตัซ ญา ฮอย เตด ลูปา เลอ. 7 รอจ กะ โบะ นะ กาเญา โปด ตูฮัด ญา กีรา ตาฮู จะ อาดา บราปา อูรัจ. ฌางัน ตาโกจ เลอ กาเญา อาดา รือฆา ลือเบฮ เดะ บูโรก จียะ รายา บาญะ อีโกยํ เลอ." 8 "กะฆีเตอ กู มือญาเระ กะ กาเญา จะ ราตา ซือมียา นู ซาโงะ กู โซะ ฮึลด มูคา โกะ ซือมียา เตอ กู นู นานะ นะ อูมัจ-ซือมียา อีนี นะ ซาโงะ ญา ฌูฆา โซะ ฮึลด มูคา โกะ ฮูลู-บาลัก นะ ตูฮัด. 9 ตาปี ซือมียา ดีฮา นู ตีเมา ซาโงะ กู โซะ ฮึลด มูคา โกะ ซือมียา เตอ กู โปด นะ ตีเมา ซาโงะ ญา เลอ โซะ ฮึลด มูคา นะ โกะ ฮูลู-บาลัก นะ ตูฮัด. 10 "ซือมียา ดีฮา นะ มือเลา ตะอารัฮ กะ กู นู นานะ นะ อูมัจ-ซือมียา เตอ ตูฮัด นะ อาเกะ ดูซา นะ ซือมียา อีตู เลอ. ตาปี ซือมียา ดีฮา นู มือเลา ฌาฮัจ กะ ซือมืองัจ นะ ตูฮัด ตูฮัด นะ ฮอย เตด อาเกะ ดูซา นะ ญา เลอ. 11 "ตานา กูญา นะ บาวา กาเญา มาโซะ กะ โกะ รูมัฮ บือมุน บาวา ปี โซะ ฮึลด มูคา นะ โกะ ราฌา โกะ ซือมียา ซัยํ-บือซัยํ เตอ ฌางัน อีงัจ ฆาโดฮ-ฮาตี จะ นะ ตีกัฮ กะฮามี นะ มือเลา ลาฆู นามา เลอ. 12 กรานา-จะ เดะ วะตู อีตู เลอ ซือมืองัจ นะ ตูฮัด ญา นะ อาฌัยํ กาเญา จะ นะ มือเลา กะฮามี บาฌิ." เยซู ญา จะ. 13 เดะ โกะ ซือมียา บาญะ อีตู อาดา ซืออูรัก ญา มือเลา กะ เยซู จะ " บูมอยํ เออ ปือซัด กะ กากา เดะ กู เลอ บรี ญา ปาฮาฆิ ซือบารัก ปือซากา อีตู บรี กะ กู ฌูฆา เลอ." 14 ตาปี เยซู มือเลา กะ ญา จะ "เกา เออ ซาปา ตืองะ กู บรี ฌาดี ซือมียา กรัจ ฮูโกบ ฌาดี ซือมียา ปาฮาฆิ ซือบารัก ปือซากา บรี กะ กาเญา?" 15 กะฆีเตอ ญา มือเลา กะ โกะ ซือมียา ซือมูฮา จะ "กือนา ลีฮัจ เลอ ฌาฆา บรี บาฌิ ฌางัน บรี ฮาตี นะ กาเญา ฮาลูบา ซือบารัก มานามา. นู ซือมียา ดูโดะ ซือนัง เตอ บูกัด กรานา อาดา โกะ ซือบารัก บาญะ เลอ." 16 กะฆีเตอ เยซู มือเลา จรือตา อาฌัยํ กะ กูญา จะ "อาดา อูรัก กายา ซืออูรัก บือนัก นะ ญา ฌางัน กือโบด นะ ญา บูวัฮ ลือบัจ เลอ. 17 กะฆีเตอ ญา อีงัจ เดะ ฮาตี จะ 'กู นะ บูวัจ กะฮามี เลอ? กู ฮอย ตือปัจ นะ ตาโรฮ โกะ บูวัฮ นะ กู.' 18 กะฆีเตอ ญา มือเลา จะ 'นี เลอ กู นะ ปรูโตฮ ตือปัจ ตาโรฮ บูวัฮ นู ดือมิ นะ บูวัจ อาซิก บรี บือซัยํ ลาฆี บีดา ตาโรฮ โกะ บูวัฮ โกะ บรัซ ซือมูฮา ตือปัจ อีตู. 19 กะฆีเตอ กู นะ บือเลฮ บือฮีมัจ เดะ ฮาตี นะ กู จะ บาฌิ ดัฮ เลอ กู อาดา ซือบารัก บาญะ บือเลฮ ตาโรฮ บาญะ ตาโฮด เลอ ฮอย เตด ปายัฮ กรือฌา บรี ปือนัจ ดัฮ. โอะ มากัด บรี กือญัง บรามัย ซูกา-ฮาตี เลอ.' 20 ตาปี ตูฮัด บือซัยํ เดะ อาตัซ มือเลา กะ ซือมียา อีตู จะ 'เอย เกา ซือมียา บูดอ เออ. เดะ มาลับ อีนี เลอ เกา นะ มาตี ซือมืองัจ นะ เกา กือนา นะ ปาเงน อาเมด ปี เดะ เกา. กะฆีเตอ โกะ ซือบารัก อีตู นู เกา ปือมุน ดัฮ ซือมูฮา เตอ ฌาดี นะ ซาปา เลอ?' " 21 กะฆีเตอ เยซู มือเลา จะ "ซือรูปา กะฆีเตอ เลอ โกะ ซือมียา นู ปือมุน บารัก บาญะ บีดา ญาวา ตะอาซิก ตาปี ตูฮัด เดะ อาตัซ ลีฮัจ ดัฮ จะ ญา บูกัด อูรัก กายา เลอ." 22 กะฆีเตอ เยซู มือเลา กะ โกะ มูเระ นะ ญา จะ "ซาเบะ กะฆีเตอ กู มือญาเระ กะ กาเญา จะ ฌางัน ฆาโดฮ-ฮาตี เดะ ลาฆู มียา มากัด จะ นะ อาเมด นามา มาแรฮ มากัด. ฌางัน ฆาโดฮ-ฮาตี ปาซัน ญาวา นะ กาเญา จะ นะ อาเมด กาเยด นามา มาแรฮ ปากัย เตอ. 23 กรานา-จะ นู กาเญา ฮีโดะ เตอ รือฆา บาฌิ เดะ บารัก มากัด เลอ. ญาวา นะ กาเญา โปด บาฌิ เดะ บารัก ปากัย ฌูฆา เลอ. 24 กือนา บรีงัจ เลอ กะ โกะ บูโรก ดือนัก. กูญา เตด ตานัม นามา เตด กือตับ ปาดี เลอ ญา ฮอย ดาเงา ฮอย ตือปัจ นะ ปูงอจ ตาโรฮ โกะ ลูโงะ ปาดี โปด. ตาปี ตูฮัด เดะ อาตัซ ญา บูวัจ บรี กูญา อาดา ซือบารัก มากัด ฆือนะ ดัฮ. กาเญา อาดา รือฆา บาฌิ บาญะ ลือเบฮ เดะ บูโรก เลอ. 25 เดะ ลูมอฮ กาเญา อาดา ซือมียา ดีฮา นู ญา ฆาโดฮ-ฮาตี ฆามะ นะ ฮูโบก อูมอยํ นะ ญา บรี ปาญัก ซือฌับ ลาฆี บือเลฮ เฆอ? ฮอย เลอ. 26 ดัฮ ซือบารัก ดือมิ-ตอจ กะฆีเตอ กาเญา บูวัจ ฮอย เตด บือเลฮ ลาลู เตอ ซาเบะ นามา เลอ กาเญา ฆาโดฮ-ฮาตี เดะ ลาฆู ซิก-อาซิก ลาฆี? 27 กือนา บรีงัจ กะ โกะ บูงา ญา บือตูโมฮ กะฮามี เตอ ญา เตด ปายัฮ บือกรือฌา เตด ปายัฮ ฌาเฮะ บาฌู ปือแญะ. ตาปี กู มือญาเระ กะ กาเญา จะ ราฌา ซะโลโม โปด วะตู ญา ปากัย มะอาลัจ บรี บือซรี โตระ ญา เตด บือปากัย บือฆาจะ ซือรูปา กะ บูงา แนฮ ซา บูงา อีนี. 28 โกะ รูโปจ อีตู เตอ อารี อีนี อาดา เดะ บือนัก มัฮปาฆี ญา กือนา ตูนู เดะ อาปี ฮาบิฮ ดัฮ. ตาปี รูโปจ อีตู โปด ตูฮัด เดะ อาตัซ นะ บูวัจ บรี ญา บือปากัย บาฌิ กะฆีเตอ เลอ. เออ กาเญา ซือมียา นู กูรัก ปือจายา เลอ กือนา อีงัจ จะ ซูโงฮ เลอ ตูฮัด เดะ อาตัซ นะ บูวัจ บรี กาเญา บือเลฮ บือปากัย บาฌิ ลือเบฮ เดะ บูงา อีตู ปูลัก เลอ. 29 "กะฆีเตอ กาเญา ฌางัน ฆาโดฮ-ฮาตี มียา ซือบารัก นะ มากัด ซือบารัก นะ โอะ เตอ. ฌางัน ฆาโดฮ-ฮาตี บาญะ กะฆีเตอ เลอ. 30 ซาเบะ-จะ โกะ ซือมียา นู เตด ตูเฮะ กะ ตูฮัด ราตา ดือนียา กูญา มือโซะ มียา ลาฆู กะฆีเตอ. ตาปี ตูฮัด นู อาโปก นะ กาเญา ญา ตาฮู จะ กาเญา บือคานะ ซือบารัก อีตู ดัฮ. 31 ตาปี กาเญา กือนา นะ บูวัจ บรี ตูฮัด ฌาดี ราฌา เดะ ฮาตี นะ กาเญา. กะฆีเตอ ตูฮัด โปด นะ บือตามัฮ บรี กะ กาเญา โกะ ซือบารัก อีตู ฌูฆา." 32 "โอ กาวัด กาเมก นู กิดีกิ เออ ฌางัน ตาโกจ เลอ กรานา-จะ อาโปก นะ กาเญา ญา ซูกา-ฮาตี นะ บรี กาเญา บือบือลา บือซามา เดะ ดือนียา บารู นะ ญา เลอ. 33 กาเญา กือนา ฌูวัน โกะ ซือบารัก นะ กาเญา มูนา บรี กะ กาวัด เลอ. กือนา บูวัจ แบะ ดูเวะ บีดา ตะอาซิก นู ฮอย เตด ดือละ ตูฮา นะ บรี อาดา โกะ ซือบารัก นู บรือฆา นู ตาโรฮ เดะ อาตัซ ลาแงะ นู ฮอย เตด ดือละ นะ ฮาบิฮ. โซะ อีตู อูรัก ปือญูรี นะ มาแรฮ ดาปิก ฮอย เตด บือเลฮ โกะ นอยํ-อานอยํ โปด นะ เฆระ เตด บือเลฮ เลอ. 34 กรานา-จะ ซือบารัก บรือฆา นะ กาเญา อาดา ตือปัจ ดีฮา ฮาตี นะ กาเญา โปด อาดา ตือปัจ อีตู เลอ." 35 เยซู มือเลา ปูลัก จะ "กาเญา กือนา บือปากัย ซียะ นาตี บรี ปลีตา นะ กาเญา อาดา บลือกัจ กะฆีเตอ เลอ. 36 ลูมอฮ กาเญา กือนา ฌาดี ซือรูปา โกะ ซือมียา นู นาตี ฮามัจ ตกเก นะ กูญา วะตู ตกเก บาลิ ดาตัก เดะ รูมัฮ มือนีกัฮ บีดา-จะ ตานา ตกเก นะ มาแรฮ บลาโลก เดะ ปีตู กูญา นะ บือเลฮ บูกา บรี กะ ญา ดัดดัด. 37 โกะ ปราโซฮ อีตู เตอ นู ตกเก มาแรฮ ดาปัจ กูญา ตืองัฮ ฌาฆา ตูงู เตอ กูญา ซือนัง ซือลามัจ เลอ. กู มือญาเระ กะ กาเญา ซูโงฮ จะ ตกเก เตอ ญา นะ ซือซิก กาเยด ซือและ เดะ ปีงัก นะ บรี กูญา ดูโดะ มากัด เดะ ปาปัด โตะ นะ มาแรฮ บือกรือฌา ซือรูปา ฌาดี ปราโซฮ นะ กูญา อีตู ปูลัก เลอ. 38 ดัฮ ตกเก มาแรฮ ลือปัซ ตืองัฮ มาลับ รอจ กะ มูกัยํ โปด ดาปัจ โกะ ปราโซฮ อีตู ตืองัฮ ตูงู ฌาฆา กะฆีเตอ ปราโซฮ อีตู กูญา นะ ซือนัง ซือลามัจ ซูโงฮ เลอ. 39 "กาเญา กือนา มาโซะ เดะ ฮาตี กะฆีนี จะ ดัฮ ตูฮัด รูมัฮ บือเลฮ ตาฮู ดูลู จะ อูรัก ปือญูรี ญา นะ มาแรฮ ปูโกยํ บราปา ญา นะ เตด ตีงัน รูมัฮ ตีเมา บรี อูรัก ปือญูรี นะ มาโซะ กะ ดาลับ บือเลฮ. 40 กาเญา กือนา ซียะ ญาวา บรี ฆือนะ ซือลาลู ฌูฆา กรานา-จะ กู นู นานะ นะ อูมัจ-ซือมียา กู นะ มาแรฮ เดะ วะตู ดีฮา กาเญา ฮอย เตด ดัด บรีงัจ เลอ." เยซู ญา จะ. 41 โซะ เปโตร ญา ตาญา เยซู จะ "ตูฮัด เออ นู เกา บือเลฮ จรือตา มือเลา อีนี เกา มือเลา ตูโญะ กะ ลูมอฮ กามี เฆอ? เฆอ-จะ มือเลา ตูโญะ กะ ซือมียา ซือมูฮา?" 42 ตูฮัด เยซู ญา ตีกัฮ จะ "กะฆีเตอ ซาปา เลอ ฌาดี กือปาลา ปราโซฮ นู ฮาตี รือมัก ปานัย อากัน? ญา เลอ นู ตกเก นะ ญา นะ ตืองะ บรี ฌาดี บือซัยํ เดะ โกะ ปราโซฮ ซือมูฮา บีดา นะ บรี โกะ นาซี กะ กูญา รือมัก เดะ วะตู เลอ. 43 ตานา ตกเก บาลิ กะ รูมัฮ ดาปัจ ปราโซฮ ตืองัฮ บือกรือฌา กะฆีเตอ ปราโซฮ อีตู นะ ซือนัง ซือลามัจ ซูโงฮ เลอ. 44 กู มือญาเระ กะ กาเญา ลาฆู นู ซูโงฮ จะ ตกเก นะ ตืองะ ญา บรี ฌาดี ซือมียา ลีฮัจ บือนา โกะ บารัก นะ ญา ซือมูฮา เลอ. 45 "ตาปี ปราโซฮ อีตู ดัฮ ญา บรีงัจ เดะ ฮาตี จะ ตกเก นะ ญา ญา ลามัจ นะ มาแรฮ กะฆีเตอ ญา กาเตาะ โกะ ปราโซฮ กีลากี นีบีนี ญา มากัด กือญัง โอะ อาระ บรี มาโบะ เลอ. 46 อาดา ซืออารี ตกเก นะ ญา นะ บาลิ ปาเระ เดะ อารี นู ปราโซฮ เตด ดัด นะ อีงัจ เดะ วะตู นู ญา ฮอย เตด ตาฮู เลอ. กะฆีเตอ ตกเก ญา นะ ฮูโกบ บรี โตระ ญา นะ โปรฮ ปราโซฮ อีตู บรี ปี ดูโดะ ฌางัน โกะ ซือมียา นู ฮาตี เตด รือมัก. 47 "ปราโซฮ อีตู นู ญา ตาฮู ฮาตี นะ ตกเก นะ ญา ตาปี ฮอย เตด บือเลฮ ซียะ ญาวา นะ ญา เตด บือเลฮ บูวัจ ตูโรจ กะ ฮาตี นะ ตกเก เตอ ญา ฆาโดฮ นะ กือนา รือเปะ โตระ. 48 ตาปี ซือมียา ดีฮา นู เตด ตาฮู ดัฮ ญา บูวัจ บือกะ นู ฆาโดฮ กือนา รือเปะ เตอ ญา นะ กือนา รือเปะ ดีกิ. ซือมียา ดีฮา บือเลฮ ซาโมจ บาญะ ดัฮ นะ ฆาโดฮ อาเมด ปาเระ เดะ ญา บาญะ เลอ. ซือมียา ดีฮา นู โกะ ซือมียา กีเรบ ตาโรฮ เดะ ญา บาญะ เตอ กูญา นะ ปือซัด อาเมด เดะ ซือมียา อีตู บาญะ เลอ." 49 "กู นี มาแรฮ บีดา นะ บรี ปลือกัจ อาปี เดะ ดือนียา. กะฆีเตอ กู บือคานะ ซูโงฮ นะ บรี อาปี อีตู นะ บลือกัจ ดัฮ เลอ. 50 กู นะ ฆาโดฮ ซาโมจ ลาฆู ซือลับ เดะ ลาฆู ซูซัฮ เตอ กะฆีเตอ กู ฆาโดฮ-ฮาตี บาญะ ตือดะ ญา นะ ซุจ ฮาบิฮ ดัฮ เลอ. 51 กาเญา บรีงัจ จะ กู มาแรฮ บีดา นะ บือฌาดี ลาฆู ซือนัง เดะ ดือนียา เฆอ? กู มือญาเระ กะ กาเญา จะ บูกัด กะฆีเตอ เลอ. ตาปี กู มาแรฮ บีดา นะ บรี โกะ ซือมียา ปือจัฮ-บือลัฮ เลอ. 52 กะฆีเตอ เลอ ตะเดะ วะตู อีนี ลีมา อูรัก เดะ รูมัฮ นะ ปือจัฮ-บือลัฮ เตอ โซะ ซือบือลัฮ ตีฆา ซือบือลัฮ ดูวา. 53 ปะ นะ บลาวัด ฌางัน นานะ กีลากี นานะ กีลากี นะ บลาวัด ฌางัน ปะ. มะ นะ บลาวัด ฌางัน นานะ นีบีนี นานะ นีบีนี นะ บลาวัด ฌางัน มะ. มะ มือตูฮา นะ บลาวัด ฌางัน มือนาตู มือนาตู โปด นะ บลาวัด มะ มือตูฮา." 54 เยซู มือเลา กะ โกะ ซือมียา ปูลัก จะ "ตานา กาเญา ลีฮัจ กือมูวัง บือฌาดี โซะ บาวัฮ มาตาอารี ดัดดัด กาเญา มือเลา จะ นะ ฮูฌัด. ญา โปด ฌาดี กะฆีเตอ ซูโงฮ เลอ. 55 ตานา กาเญา ลีฮัจ อาเงน บารัจ-ดายา ตีโยะ มาแรฮ กาเญา มือเลา จะ นะ ฮางัจ โตระ เลอ. ญา โปด ฌาดี กะฆีเตอ ซูโงฮ เลอ. 56 เออ ซือมียา มูคา มาเนฮ ฮาตี ฌาฮัจ. กาเญา ตาฮู ลีฮัจ ลาฆู นู บือฌาดี เดะ ดือนียา ฌางัน ลาแงะ บีดา นะ ตูโดฮ อาเงน ตาปี ซาเบะ นามา กาเญา เตด ตาฮู ลีฮัจ ลาฆู นู ฌาดี ดัฮ เดะ ฮาดัจ อีนี เลอ? 57 "ซาเบะ นามา กาเญา เตด บือเลฮ ตือตู-ฮาตี ตะอาซิก จะ ลาฆู นามา นู กือนา? 58 ซาเบะ-จะ ดัฮ ซือมียา ดีฮา อาดู เกา บาวา ปี กะ ซัน เตอ กือนา กูวาซา มียา จือลัฮ นู นะ บือปาคัจ ฌางัน ญา กาลา ดูโดะ เดะ ตืองัฮ ฌาลัด ลาฆี. ดัฮ เตด กะฆีเตอ ญา นะ รือฆัก เกา ปี รอจ กะ ซือมียา กรัจ ฮูโกบ. กะฆีเตอ ซือมียา กรัจ ฮูโกบ นะ ซรัฮ บรี กะ ตามาตา ตามาตา โปด ญา นะ บอฮ เดะ ปือฌารา. 59 กู มือญาเระ กะ เกา จะ เกา นะ ลือปัซ เดะ ตือปัจ อีตู เตด บือเลฮ ลาลู ตือดะ เกา นะ บายัยํ ฮูตัก บรี ฆือนะ ฮาบิฮ ดัฮ เลอ." เยซู ญา จะ.
1 วะตู อีตู อาดา ซือมียา ซือตืองัฮ ดูโดะ โตะ อีตู จรือตา บรี กะ เยซู ดืองัยํ ปาซัน ซือมียา นังฆรี ฆาลิลี นู ปีลาด บือเลฮ ซูโรฮ บูนอฮ กูญา ตานา กูญา ตืองัฮ อาเมด โกะ บือนาตัก มาแรฮ บูนอฮ มือญือมัฮ กะ ตูฮัด. 2 กะฆีเตอ เยซู ญา มือเลา ตีกัฮ กะ กูญา จะ "กาเญา บรีงัจ กะฮามี เลอ? ลูมอฮ ฆาลิลี อีตู เตอ กูญา ฌาดี ซือมียา บือดูซา บาญะ ลือเบฮ เดะ ลูมอฮ ฆาลิลี นู ซิก-อาซิก ซือมูฮา เฆอ นู กูญา บือเลฮ กือนา ลาฆู ซูซัฮ โตระ กะฆีเตอ? 3 เตด โบะ. ตาปี กู มือญาเระ กะ กาเญา จะ ดัฮ กาเญา ฮอย เตด บราเลฮ-ฮาตี ปาเระ เตอ กาเญา ซือมูฮา นะ ฌาฮานัม กะฆีเตอ ฌูฆา เลอ. 4 บรีงัจ ลีฮัจ ปูลัก ลาปัด-บือลัซ อูรัก อีตู นู รูมัฮ บือปรัก นู ตีงี โซะ ซีโลอัม บือเลฮ รูโตฮ ตือกัด กูญา มาตี ดัฮ เตอ กาเญา บรีงัจ จะ กูญา ฌาดี ซือมียา บือดูซา ลือเบฮ เดะ ซือมียา ซือมูฮา นู ดูโดะ เดะ นังฆรี เยรูซาเลม เฆอ? 5 เตด โบะ. ตาปี กู มือญาเระ กะ กาเญา จะ ดัฮ กาเญา ฮอย เตด บราเลฮ-ฮาตี ปาเระ เตอ กาเญา ซือมูฮา นะ ฆาโดฮ ฌาฮานัม กะฆีเตอ ฌูฆา เลอ." เยซู ญา จะ. 6 เยซู มือเลา จรือตา อาฌัยํ กะฆีนี ปูลัก จะ "ซือมียา ซืออูรัก ญา อาดา ปูโฮด กรายา-บูดี ซา ปูโฮด ตานัม ตาโรฮ เดะ กือโบด บูวัฮ อางุน นะ ญา. กะฆีเตอ ญา มาแรฮ มียา บูวัฮ เดะ ปูโฮด อีตู ตาปี ฮอย เตด ดาปัจ. 7 กะฆีเตอ ญา อูจะ กะ ซือมียา บือกรือฌา ตูงู กือโบด ปูโฮด อางุน อีตู จะ 'นี เลอ กู มาแรฮ มียา บูวัฮ เดะ ปูโฮด กรายา-บูดี อีนี ตีฆา ตาโฮด ดัฮ ตาปี ฮอย เตด ดาปัจ. กือนา ตือบัก ปรูโตฮ บูวัก เลอ. บูวัจ นามา นะ บรี ตานัฮ ตาวัยํ เปา-เปลา?' 8 ตาปี ซือมียา ตูงู กือโบด บูวัฮ อางุน ญา ตีกัฮ จะ 'ตกเก เออ มีตา บรี ตาโรฮ ซา ตาโฮด ลาฆี เลอ บรี กะ กู จาโกน ตานัฮ อาเมด บาฌา บอฮ. 9 ตาโฮด ฮึลด ดัฮ ญา นะ บือฌาดี บูวัฮ บาฌิ เลอ. ตาปี ดัฮ ญา ฮอย เตด บือบูวัฮ เตอ เกา กือนา ตือบัก ปรูโตฮ ญา บูวัก เลอ.' ญา จะ." 10 อาดา อารี บราดู กรือฌา ซืออารี เยซู ตืองัฮ อาฌัยํ เดะ รูมัฮ บือมุน ซา ตือปัจ. 11 นี เลอ อาดา นีบีนี ซืออูรัก นู อาดา ฮาตู มาโซะ บูวัจ บรี ฌาดี ปือญาเกะ ลาปัด-บือลัซ ตาโฮด มาแรฮ ดัฮ. บลากัก นะ ญา บูโกะ นะ บือดีรี รือมัก เตด บือเลฮ เลอ. 12 เยซู เตอ ตานา ลีฮัจ ดัฮ ญา บลาโลก นีบีนี อีตู มือเลา กะ ญา จะ "นีบีนี เออ ญาวา นะ เกา ลือฆา ลือปัซ เดะ ปือญาเกะ นะ เกา ดัฮ เลอ." 13 เยซู ญา ปือเตาะ ตางัน เดะ ญาวา นะ นีบีนี อีตู. ดัดดัด อีตู ญา บีกัซ บือดีรี รือมัก บือเลฮ ญา มือเลา มือโอจ ปูฌี กะ นามา นะ ตูฮัด เดะ อาตัซ. 14 ตาปี กือปาลา รูมัฮ บือมุน ญา ซาลัฮ-ฮาตี กรานา-จะ เยซู บือเลฮ บือบือลา ซือมียา เดะ อารี บราดู ดัฮ. กะฆีเตอ ญา มือเลา กะ โกะ ซือมียา จะ "อาดา นัม อารี นู ฌาดี อารี ฆาโดฮ บือกรือฌา. เดะ ดาลับ นัม อารี อีตู เตอ กือนา มาแรฮ บรี บือบือลา ญาวา. ตาปี เดะ อารี บราดู เตอ ฌางัน เลอ." 15 ตาปี ตูฮัด เยซู ญา ตีกัฮ กะ ซือมียา อีตู จะ "เออ กาเญา ซือมียา มูคา มาเนฮ ฮาตี ฌาฮัจ เลอ. กาเญา ราตา ซือมียา นะ อูฆัย ลือมู อูฆัย กูดา เดะ กานัก นะ ญา บาวา บือปี บรี มากัด อาเย เดะ อารี บราดู บูกัด เฆอ? 16 ตาปี โซะ นีบีนี นู อีนี ญา ฌาดี บือแนฮ นะ อับราฮัม ญา เตอ กือปาลา ฮาตู ซีตัด บือเลฮ อีกัจ ตาโรฮ ลาปัด-บือลัซ ตาโฮด ดัฮ. เตด บือฆูนา เฆอ นะ บรี ญา ลือปัซ เดะ โกะ ราตัย อีตู เดะ อารี บราดู เตอ?" 17 นู เยซู ญา มือเลา กะฆีเตอ บูวัจ บรี ลูมอฮ ซือมียา นู ลาวัด ฌางัน ญา ปาคัจ จือและ. ตาปี โกะ ซือมียา นู บาญะ กูญา ซูกา-ฮาตี ซูโงฮ ซาเบะ ลาฆู บือซรี ซูโงฮ นู เยซู บือเลฮ บูวัจ ดัฮ. 18 กะฆีเตอ เยซู ญา มือเลา จะ "ลาฆู นู ตูฮัด เดะ อาตัซ ญา นะ มาแรฮ บือบือลา ฌาดี ราฌา เตอ นะ ฌาดี กะฮามี เลอ? กู นะ ปือซามา ลาฆู อีตู ซือรูปา บือกะ ลาฆู นามา บาฌิ? 19 เออ ญา ซือรูปา กะฆีนี เลอ อาดา บีฌี ตาโระ มิดือมิ ซือบีฌี นู ซือมียา ซืออูรัก อาเมด ปี ตานัม เดะ กือโบด นะ ญา. กะฆีเตอ บีฌี อีตู ญา บือตูโมฮ ฌาดี ปูโฮด กายู. โกะ บูโรก เดะ อาตัซ ญา ตรือบัก มาแรฮ บูวัจ ซารัก เดะ โกะ ฌามัยํ ปูโฮด กายู อีตู เลอ." 20 เยซู ญา มือเลา ปูลัก จะ "กู นะ ปือซามา ลาฆู นู ตูฮัด นะ มาแรฮ ฌาดี ราฌา ซือรูปา บือกะ ลาฆู นามา? 21 ญา ซือรูปา กะฆีนี เลอ อาดา นีบีนี ซืออูรัก นู อาเมด ราฆี ซือตืองัฮ จาโปยํ เดะ ตือโปก ตีฆา เตง. ญา กือโมก ญาแญะ บรี ตือโปก อีตู กือโมก ฮาบิฮ ดัฮ ซือมูฮา เลอ." ญา จะ. 22 ตานา เยซู ตืองัฮ บือฌาลัด ปี กะ นังฆรี เยรูซาเลม ญา ลาลู ปี บาญะ นังฆรี บาญะ ตูโปะ อาฌัยํ กูญา. 23 อาดา ซือมียา ซืออูรัก ตาญา เยซู จะ "ตูฮัด เออ ซือมียา นู นะ ฮีโดะ ลือปัซ บาฌิ เตอ อาดา กิดีกิ เฆอ?" เยซู ตีกัฮ กะ กูญา จะ 24 "กาเญา กือนา ราเฌด มาโซะ ปี กะ ปีตู นู ซือแปะ ซาเบะ กู มือญาเระ กะ กาเญา จะ โกะ ซือมียา บาญะ นะ กูวาซา มาโซะ ปี ตาปี มาโซะ เตด บือเลฮ. 25 ตานา ตูฮัด รูมัฮ ญา ซูดัฮ บีกัซ กาปุซ ปีตู ดัฮ กาเญา นะ อาดา บือดีรี โซะ ลูวัยํ กือเทาะ ปีตู มือเลา จะ 'จา เออ มีตา บูกา ปีตู บรี กะ กามี เลอ.' ตาปี ตูฮัด รูมัฮ นะ ตีกัฮ กะ กาเญา จะ 'กู เตด ตาฮู จะ กาเญา ฌาดี ซือมียา ดาตัก ปัจ ดีฮา เลอ.' 26 กะฆีเตอ กาเญา นะ อูจะ จะ 'กามี บือเลฮ มากัด บือเลฮ โอะ ฌางัน เกา. เกา บือเลฮ อาฌัยํ เดะ ตืองัฮ ฌาลัด นะ ลูมอฮ กามี.' 27 ตูฮัด รูมัฮ อีตู ญา นะ มือเลา จะ 'กู จาเระ ดัฮ จะ กู เตด ตาฮู นู กาเญา ฌาดี ซือมียา ดาตัก ปัจ ดีฮา. อูโนยํ ปี บูวัก เดะ กู เลอ กาเญา ซือมียา นู บูวัจ ปรางัย ฌาฮัจ เตอ.' 28 ตานา กาเญา นะ ลีฮัจ อับราฮัม อีซัก ยาโกบ ฌางัน โกะ ลูมอฮ ซือมียา ตูโดฮ ลาฆู นะ ตูฮัด ซือมูฮา กูญา อาดา ดูโดะ เดะ ดือนียา บารู อีตู นู ตูฮัด ฌาดี ราฌา เตอ ตาปี ญาวา นะ กาเญา ตะอาซิก กือนา ตูละ บูวัก กะ โซะ ลูวัยํ กาเญา นะ มือนาแงฮ ตือกาจิ ฆีฆี ซาเกะ โตระ เลอ. 29 โกะ ซือมียา นะ มาแรฮ ดาตัก เดะ โซะ ตีมอยํ โซะ บารัจ เตอ นะ มาแรฮ เดะ โซะ บารัจ-ดายา โซะ ตารา ฌูฆา เลอ นะ ดูโดะ มากัด เดะ ดือนียา บารู นะ ตูฮัด. 30 นี เลอ อาดา ซือมียา โซะ ฮูโฌก ซือตืองัฮ นะ ปี ดูโดะ โซะ ปรือดู. ซือมียา โซะ ปรือดู ซือตืองัฮ นะ ปี ดูโดะ โซะ ฮูโฌก." เยซู ญา จะ. 31 เดะ วะตู อีตู ลูมอฮ ฟาริซี ซือตืองัฮ มาแรฮ มือญาเระ กะ เยซู จะ "เกา กือนา บีกัซ ปี โซะ อาซิก เลอ. ซาเบะ-จะ ราฌา เฮโรด ญา อีงัจ นะ บูนอฮ เกา บูวัก." 32 เยซู มือเลา กะ กูญา จะ "กือนา ปี มือญาเระ กะ ซือมียา เตด บือฆูนา อีตู จะ ลีฮัจ เลอ กู โปรฮ โกะ ฮาตู ตรือเบะ ดัฮ บือบือลา ปือญาเกะ เดะ ซือมียา อารี อีนี มัฮปาฆี ปูลัก เลอ. บารู เดะ อารี นู ตีฆา กู นะ บูวัจ บรี ซุจ ฮาบิฮ ดัฮ. 33 ตาปี กู ฆาโดฮ นะ บือฌาลัด ปี เดะ อารี อีนี มัฮปาฆี มัฮปาฆีซา เลอ. ซาเบะ-จะ เตด บือฆูนา ดัฮ นะ บรี ซือมียา ตูโดฮ ลาฆู นะ ตูฮัด นะ กือนา บูนอฮ โซะ ลูวัยํ นังฆรี เยรูซาเลม เลอ. 34 "โอ กาเญา ลูมอฮ เยรูซาเลม เออ นู บูนอฮ โกะ ซือมียา ตูโดฮ ลาฆู นะ ตูฮัด นู อาเมด บาตู ลีปัยํ โกะ ซือมียา นู ตูฮัด ซูโรฮ มาแรฮ มียา กาเญา. บาญะ กาลี เลอ กู บือคานะ นะ บือมุน ลูมอฮ กาเญา ตาโรฮ ซือรูปา อีโนก ฮายับ นู กรด โกะ อานะ นะ ญา บรี ดูโดะ เดะ บาวัฮ ซายะ. ตาปี กาเญา ตีเมา เลอ. 35 ลีฮัจ เลอ รูมัฮ นะ กาเญา นะ กือนา บือบียัยํ ดัฮ เลอ. กู มือญาเระ กะ กาเญา จะ กาเญา นะ ฮอย เตด บือเลฮ ลีฮัจ กู ตือดะ กาเญา นะ มือเลา จะ 'ซือลามัจ เลอ ซือมียา นู มาแรฮ เดะ นามา นะ ตูฮัด เดะ อาตัซ.' "
1 อาดา อารี บราดู กรือฌา ซืออารี เยซู ญา มาโซะ ปี กะ รูมัฮ นะ กือปาลา ลูมอฮ ฟาริซี ซืออูรัก นะ มากัด นาซี. โกะ ซือมียา เตอ กูญา อาดา นาตี ลีฮัจ เยซู. 2 นี เลอ อาดา ซือมียา ซืออูรัก ฌาดี ปือญาเกะ กากี ตางัน บาซัน มาแรฮ โซะ ฮึลด มูคา นะ เยซู. 3 กะฆีเตอ เยซู ญา ตาญา ลูมอฮ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ ฟาริซี จะ "ดัฮ นะ บือบือลา ซือมียา ซาเกะ เดะ อารี บราดู กรือฌา นะ ซาลัฮ เดะ ฮูโกบ เฆอ เตด?" 4 กูญา ปาคัจ ซืองะ. กะฆีเตอ เยซู ญา บาวา ซือมียา อีตู บือปี บือบือลา บรี ซือนัง บาฌิ ปลือปัซ ญา บรี บาลิ ปี กะ รูมัฮ. 5 กะฆีเตอ เยซู ญา มือเลา กะ กูญา จะ "ซือมียา ดีฮา เดะ ลูมอฮ กาเญา ดัฮ นานะ นะ ญา เฆอ-จะ ลือมู นะ ญา ฆูโฆยํ เดะ ตือลาฆา ญา เตด ฆางู รือฆัก บือตรือเบะ เดะ อารี บราดู กรือฌา เฆอ?" 6 ตาปี กูญา ตีกัฮ เดะ ตือนอซ อีตู ฮอย เตด บือเลฮ เลอ. 7 โซะ เยซู ตานา ญา ลีฮัจ จะ ซือมียา นู กือนา บลาโลก เตอ กูญา บือเลฮ ปีเลฮ ตือปัจ ดูโดะ นู บาฌิ เดะ กาวัด ญา มือเลา ลาฆู จรือตา อาฌัยํ กะ กูญา จะ 8 "ดัฮ ซือมียา ดีฮา บลาโลก เกา ปี กะ รูมัฮ มือนีกัฮ ฌางัน นะ ดูโดะ โซะ ตือปัจ บาฌิ ตาโกจ-จะ ญา บือเลฮ บลาโลก ซือมียา ซัยํ-บือซัยํ เดะ เกา ลาฆี เลอ. 9 กะฆีเตอ ตูฮัด รูมัฮ มือนีกัฮ นู บือเลฮ บลาโลก กาเญา ดูวา อูรัก เตอ นะ มือเลา ฌางัน เกา จะ 'กือนา บรี ตือปัจ ดูโดะ กะ ซือมียา อีนี เลอ.' กะฆีเตอ เกา นะ ฆาโดฮ อูบัฮ ปี ดูโดะ โซะ ตือปัจ ตะอารัฮ เดะ กาวัด. เกา นะ จือและ มาตา เลอ. 10 ตาปี ดัฮ กือนา บลาโลก เตอ เกา กือนา ปี ดูโดะ โซะ ตือปัจ ตะอารัฮ ดูลู บีดา-จะ ตานา ตูฮัด รูมัฮ มือนีกัฮ มาแรฮ ญา นะ มือเลา จะ 'ฆู เออ อูบัฮ บีกัซ ปี ดูโดะ โซะ ตือปัจ บาฌิ เลอ.' กะฆีเตอ เกา นะ บือเลฮ บือซัยํ มูคา โซะ ฮึลด มูคา นะ โกะ ซือมียา ซือมูฮา นู ดูโดะ มากัด บือซามา โตะ อีตู เลอ. 11 กรานา-จะ ราตา ซือมียา นู อาเกะ ญาวา ตีงี ญา นะ ฆาโดฮ กือนา อูบัฮ ตูโรด. ตาปี ซือมียา นู มือนูโนะ ญาวา เตอ ญา นะ กือนา อาเกะ บรี ตีงี เลอ." เยซู ญา จะ. 12 เยซู ญา มือเลา กะ ซือมียา นู บลาโลก ญา จะ "ตานา เกา นะ กรือฌา ซือบารัก มากัด บรี โกะ ซือมียา เตด-จะ ตืองัฮ อารี เฆอ-จะ ปะซือญา โปด ฌางัน นะ บลาโลก ซา โกะ ฆูๆ นะ เกา โกะ อาดี-บราดี โกะ นะบรานะ เฆอ-จะ โกะ กาวัด รูมัฮ นู กายา เตอ. ซาเบะ-จะ กูญา นะ บือเลฮ บลาโลก เกา ปูลัก ฌาดี ลาฆู บูวัจ บาลัซ เลอ. 13 ตาปี ดัฮ เกา บูวัจ ลาฆู มากัด บรามัย กือนา บลาโลก โกะ ซือมียา ฮาฌะ ซือมียา จาเปะ ซือมียา บือฌาลัด เตาะ-อูเตาะ ซือมียา มาตา บูตา. 14 กูญา อีตู เตอ ฮอย นามา นะ บาลัซ กะ เกา ตาปี ตูฮัด เดะ อาตัซ นะ บรี ซือลามัจ บาลัซ ปาเระ กะ เกา เดะ อารี อีตู นู โกะ ซือมียา บาฌิ-ตือปัจ นะ ฮีโดะ ปาเระ เดะ มาตี เลอ." เยซู ญา จะ. 15 โซะ ซือมียา ซืออูรัก นู ดูโดะ มากัด บือซามา เตอ ตานา ญา ดืองัยํ ปือมือเลา กะฆีเตอ ญา มือเลา ฌางัน เยซู จะ "ซือมียา นู นะ มากัด บือซามา ฌางัน ตูฮัด วะตู ญา มาแรฮ ฌาดี ราฌา เตอ ซือมียา อีตู นะ ซือนัง ซือลามัจ เลอ." 16 กะฆีเตอ เยซู ญา มือเลา ฌางัน ซือมียา อีตู จะ "อาดา ซือมียา ซืออูรัก บือเลฮ บูวัจ ซือบารัก มากัด บาญะ ซูโงฮ บือเลฮ บลาโลก ซือมียา บาญะ เตอ. 17 ตานา รอจ วะตู นะ บรี มากัด ดัฮ ญา ซูโรฮ ปราโซฮ นะ ญา ปี ตูโรจ โกะ ซือมียา ซือมูฮา นู บือเลฮ บลาโลก ดัฮ มือเลา จะ 'มาแรฮ เลอ. ซาเบะ-จะ ซือบารัก ราตา ฌือแนฮ บือเลฮ ซียะ ตาโรฮ ฆือนะ ดัฮ.' 18 ตาปี โกะ ซือมียา อีตู เตอ กูญา ปาคัจ บือตาฮู ซิกมาซิก จะ กูญา ฆาโดฮ. ซือมียา ลามูลา มือเลา กะ ปราโซฮ อีตู จะ 'กู บารู บือลี บือนัก ดัฮ. ฆาโดฮ นะ ปี ลีฮัจ บือนัก อีตู. ฮาฌา มีตา เลอ ซาเบะ กู ฆาโดฮ.' 19 นู ซืออูรัก โปด จะ 'กู บารู บือลี ลือมู ลีมา ฆู ดัฮ. กู ตืองัฮ นะ ปี มือญาซัจ ลีฮัจ ลือมู อีตู. ฮาฌา กู มีตา เลอ ซาเบะ กู ฆาโดฮ.' 20 นู ซืออูรัก มือเลา จะ 'ฮาฌา มีตา เลอ กู บารู มือนีกัฮ. ซาเบะ กะฆีเตอ กู เตด บือเลฮ ปี เลอ.' 21 "กะฆีเตอ ปราโซฮ อีตู ญา บาลิ มาแรฮ มือญาเระ ลาฆู อีตู บรี กะ ตกเก ดืองัยํ. ตกเก ญา มูซัยํ ซูโงฮ มือเลา กะ ปราโซฮ จะ 'กือนา ตรือเบะ ปี งัจบางัจ ตูโรจ โกะ ฌาลัด บือซัยํ มาโซะ กะ โกะ จือเราะ มิดือมิ เดะ นังฆรี เตอ บาวา ซือมียา ฮาฌะ ซือมียา จาเปะ ซือมียา มาตา บูตา ซือมียา บือฌาลัด เตาะ-อูเตาะ มาโซะ มาแรฮ กะ อีนี.' 22 กะฆีเตอ ปราโซฮ มือญาเระ จะ 'ตกเก เออ กู บือเลฮ บูวัจ ตูโรจ บือกะ เกา ปือซัด ดัฮ. ตาปี อาดา ตือปัจ ดูโดะ ลือเบฮ ลาฆี เลอ.' 23 ตกเก ซูโรฮ ปราโซฮ อีตู ปูลัก จะ 'กือนา ตรือเบะ ปี ตูโรจ กะ ฌาลัด บือซัยํ มาโซะ โกะ จือเราะ มิดือมิ เดะ โซะ ลูวัยํ นังฆรี ฌูฆา เตอ บือฆางู โกะ ซือมียา เปะ อีตู บรี มาแรฮ เลอ บีดา บรี รูมัฮ นะ กู นะ ปือนอฮ ดัฮ. 24 ซาเบะ กู มือญาเระ กะ กาเญา จะ เดะ โกะ ซือมียา นู บือเลฮ บลาโลก เตอ ฮอย ซือมียา ซืออูรัก โปด นู นะ บือเลฮ ฌือเลบ ซือบารัก นะ กู.' " 25 อาดา ซือมียา บาญะ ฌาลัด ปี ฌางัน เยซู. เยซู เตอ ญา อาเลฮ ปี มือเลา ฌางัน กูญา จะ 26 "ซือมียา ดีฮา มาแรฮ ซารี กู ญา เตอ กือนา บือชี กะ เอด อาโปก นะ ญา บีนี นะ ญา นานะ นะ ญา ฌางัน ดีบราดี นะ ญา ฌางัน ญาวา ญา นะ ตะอาซิก ซามา เตอ ญา กือนา บือชี ฮาปา เลอ. ดัฮ เตด บือชี กะฆีเตอ ญา นะ ฌาดี มูเระ นะ กู เตด บือเลฮ เลอ. 27 ซือมียา ดีฮา นู ตีเมา ตาโงก กายู ปลีตัก นะ ญา ตูโรจ กะ กู เตอ ญา นะ ฌาดี มูเระ นะ กู เตด บือเลฮ เลอ. 28 "ซาเบะ-จะ เดะ ลูมอฮ กาเญา อาดา ซาปา ซูกา บูวัจ รูมัฮ ญา ฆาโดฮ ดูโดะ กีรา รือฆา ดูลู เตอ จะ ตัง ฆือนะ เฆอ เตด. 29 ตาโกจ-จะ จาจะ จาวัก ดัฮ บูวัจ บรี ซุจ เตด บือเลฮ ตัง เตด ฆือนะ. กะฆีเตอ ซือมียา ซือมูฮา นู ลีฮัจ นะ อาฆัฮ-ฆือละ มือเลา จะ 30 'ซือมียา อีนี ฮึนตะ นะ บูวัจ รูมัฮ ตาปี นะ บูวัจ บรี ซุจ ฮอย เตอ บือเลฮ ดัฮ เลอ.' 31 "ดัฮ ราฌา ซืออูรัก ญา นะ ปี บือปรัก ฌางัน ราฌา อาซิก เตอ ญา ฆาโดฮ ดูโดะ บือฮีมัจ ดูลู จะ ลูมอฮ ตาฮัน นะ ญา อาดา ซือละซา. ราฌา อาซิก อีตู ญา อาดา ตาฮัน ดูวา ละซา. กะฆีเตอ นะ ปี บือปรัก ฌางัน ญา นะ ฌือนัฮ เฆอ เตด? 32 ดัฮ ญา ลีฮัจ จะ ลาวัด เตด บือเลฮ วะตู ราฌา อาซิก อาดา ดูโดะ ฌาโวฮ ลาฆี ญา ซูโรฮ ฮูลู-บาลัก ปี บือตาฮู มีตา นะ บือปาคัจ ฌาดี ซาบัจ. 33 "กะฆีเตอ ฌูฆา เลอ ซือมียา ดีฮา เดะ ลูมอฮ กาเญา นู ตีเมา นะ ตีงัน ซือบารัก แนฮ-ฌือแนฮ นู ญา อาดา ซือมูฮา เตอ ญา นะ ฌาดี มูเระ นะ กู เตด บือเลฮ เลอ." เยซู ญา จะ. 34 "ฆารับ ฌาดี ซือบารัก บาฌิ เตอ ตาปี ดัฮ ฆารับ อีตู ตาวัยํ ดัฮ เตอ นะ บูวัจ บรี ญา มาเซด ปาเระ ปูลัก บือเลฮ กะฮามี เลอ? 35 ญา เตด บือฆูนา ดัฮ. นะ จาโปยํ ฌางัน ตานัฮ บูวัจ บาฌา ฮอย เตด บือเลฮ. นะ ลูโงะ กาซับ ตาโรฮ จาโปยํ โกะ ตาฮี บูวัจ บาฌา โปด เตด บือเลฮ. กะฆีเตอ กูญา นะ ตีงัน บูวัก เลอ. ซาปา อาดา ตือลีงา มือนีงัย เลอ." เยซู ญา จะ.
1 อาดา ซืออารี โกะ ซือมียา มูงอจ อาเซน ฌางัน ลูมอฮ ซือมียา บือดูซา กูญา ซือมูฮา มาโซะ มาแรฮ ดาปิก บีดา นะ มือนีงัย เยซู มือเลา. 2 โซะ ลูมอฮ ฟาริซี ฌางัน โกะ ซือมียา อาฌัยํ ลาฆู ปือมือซัด นะ ตูฮัด กูญา บือซูงุจ จะ "ซือมียา อีนี ญา ซาโมจ โกะ ซือมียา บือดูซา ดูโดะ มากัด ฌางัน กูญา โปด." 3 กะฆีเตอ เยซู ญา มือเลา จรือตา อาฌัยํ กูญา กะฆีนี จะ 4 "เดะ ลูมอฮ กาเญา ซือมียา ดีฮา อาดา กาเมก ซือราตุซ อีโกยํ นู ซืออีโกยํ ซือซัจ ลือแงะ ปี ดัฮ ญา นะ บูวัจ กะฮามี? ญา นะ ตีงัน กาเมก นู ซือมีลัด-ปูโลฮ ซือมีลัด อีโกยํ อีตู เดะ ตืองัฮ ปาดัก. กะฆีเตอ ญา นะ ปี ตูโรจ นู ซืออีโกยํ นู ลือแงะ ซีงี ตือดะ ดาปัจ บูกัด เฆอ? 5 ตานา ดาปัจ ดัฮ ญา อาเกะ บอฮ เดะ บาฮู ตาโงก มาแรฮ ซูกา-ฮาตี เลอ. 6 รอจ กะ รูมัฮ ดัฮ ญา บลาโลก โกะ ฆูๆ นะ ญา ฌางัน โกะ นะบรานะ มาแรฮ มารือมา มือเลา ฌางัน กูญา จะ 'กือนา ซูกา-ฮาตี ฌางัน กู ซาเบะ-จะ กู บือเลฮ ดาปัจ กาเมก นะ กู นู ลือแงะ ดัฮ เลอ.' 7 กู มือญาเระ กะ กาเญา จะ ซือรูปา กะฆีเตอ นู ซือมียา บือดูซา ซืออูรัก โปด นู บราเลฮ-ฮาตี ปาเระ เตอ บูวัจ บรี อาดา ลาฆู ซูกา-ฮาตี บาญะ โซะ ลาแงะ ลือเบฮ เดะ ลาฆู ซูกา-ฮาตี กรานา ซือมียา บาฌิ-ตือปัจ ซือมีลัด-ปูโลฮ ซือมีลัด อูรัก นู เตด ฆาโดฮ นะ บราเลฮ-ฮาตี เลอ." 8 เยซู มือเลา ปูลัก จะ "นีบีนี ดีฮา นู อาดา ดูเวะ ซือปูโลฮ รีเงะ ปีระ ดัฮ ดูเวะ นะ ญา ลือแงะ ซา รีเงะ ญา นะ บูวัจ กะฮามี เลอ? นะ จูโจฮ ปลีตา กีกัย รูมัฮ มียา ราตาๆ ยู ดาปัจ เลอ. 9 ดาปัจ ดัฮ ญา บลาโลก โกะ ฆูๆ ฌางัน โกะ นะบรานะ มาแรฮ มารือมา มือเลา ฌางัน กูญา จะ 'กือนา ซูกา-ฮาตี ฌางัน กู เลอ ซาเบะ-จะ กู บือเลฮ ดาปัจ ดูเวะ ซา รีเงะ อีตู นู ลือแงะ ดัฮ.' 10 กู มือญาเระ กะ กาเญา จะ ซือรูปา กะฆีเตอ ฌูฆา โกะ ฮูลู-บาลัก นะ ตูฮัด เดะ อาตัซ กูญา ซูกา-ฮาตี ซูโงฮ เลอ กรานา ซือมียา บือดูซา ซืออูรัก นู บราเลฮ-ฮาตี ปาเระ ดัฮ." 11 เยซู มือเลา ปูลัก จะ "อาดา ซือมียา ซืออูรัก ญา อาดา นานะ กีลากี ดูวา บราดี. 12 นู อาดี มือเลา ฌางัน ปะ เดะ ญา จะ 'ปะ เออ มีตา ปาฮาฆิ โกะ บือนา บารัก บรี กะ กู นะ อาดา บาฮาเฆด นะ กู เลอ.' กะฆีเตอ ปะ เดะ ญา ญา ปาฮาฆิ บือนา บารัก ซือมูฮา บรี กะ นานะ นะ ญา ดูวา บราดี. 13 ฮอย เตด บาญะ อารี นู อาดี ญา ฌูวัน บาฮาเฆด นะ ญา ซือมูฮา อาเมด ดูเวะ บือฌาลัด ปี กะ นังฆรี ฌาโวฮ. ปัจ อีตู ญา บูวัจ ลาฆู ซูมก ซูโรฮ ตัง ยู ฮาบิฮ. 14 ตานา ตัง นะ ญา ฮาบิฮ ดัฮ ฌาดี วะตู ฮอย บารัก นะ มากัด เดะ นังฆรี อีตู ซือมูฮา. นานะ นู อาดี อีตู ซีงี ญา ซูซัฮ ฮาฌะ โตระ เลอ. 15 กะฆีเตอ ญา ปี ดูโดะ ฌางัน ซือมียา เดะ นังฆรี อีตู ซืออูรัก. ซือมียา อีตู ซูโรฮ ญา ปี กะ ปาดัก นะ ญา บือบือลา โกะ บาบี ปัจ อีตู. 16 ญา เตอ บือคานะ นะ มากัด โกะ ตาโระ กาจัก นู บาบี มากัด อีตู บรี กือญัง. ตาปี ฮอย ซาปา ฮาฆิ บารัก นามา บรี กะ ญา มากัด เลอ. 17 บารู ญา ซือดัยํ ดัฮ มือเลา จะ 'โกะ อานะ กูลี นะ ปะ เดะ กู ราตา อูรัก กูญา อาดา บารัก มากัด บาญะ. กูญา มากัด กือญัง ยู ลือเบฮ. ตาปี กู นี เลอ บือตาฮัด นาซี มาจับ นะ มาตี ดัฮ. 18 กู กือนา บีกัซ ปี ซารี ปะ เดะ กู มือเลา กะ ญา จะ "ปะ เออ กู บูวัจ ซาลัฮ ฌางัน ตูฮัด เดะ อาตัซ ซาลัฮ ฌางัน ปะ ซามา ดัฮ. 19 กู เตด บือฆูนา นะ ฌาดี นานะ นะ ปะ ลาฆี. กู มีตา เดะ ปะ บรี กู ฌาดี บือกะ อานะ กูลี นะ ปะ ซืออูรัก เลอ.' 20 "กะฆีเตอ ญา บีกัซ ปี ซารี ปะ เดะ ญา. ตาปี กาลา ญา อาดา ฌาโวฮ ลาฆี ปะ เดะ ญา ลีฮัจ บือฆารี ตือจีฮัด กะ ญา บลารี ปี ลาบัด เดะ ลีเฮ จีโยบ ญา บาญะ กาลี. 21 กะฆีเตอ นานะ อีตู มือเลา ฌางัน ปะ เดะ ญา จะ 'ปะ เออ กู บูวัจ ซาลัฮ ฌางัน ตูฮัด เดะ อาตัซ ซาลัฮ ฌางัน ปะ ซามา ดัฮ. กู เตด บือฆูนา นะ ฌาดี นานะ นะ ปะ ลาฆี.' 22 ตาปี ปะ เดะ ญา ปือซัด โกะ ปราโซฮ นะ ญา จะ 'ปี เลอ จือปัจๆ อาเมด บาฌู นู บาฌิ ซูโงฮ มาแรฮ ปากัย บรี กะ ญา. อาเมด จีเจด มาแรฮ บอฮ เดะ ฌารี นะ ญา. อาเมด ปะตาปะ มาแรฮ บอฮ บรี ซามา. 23 ปี อาเมด อานะ ลือมู นู ลือมะ มาแรฮ บูนอฮ เลอ. กีตา นะ บรามัย ซูกา-ฮาตี มากัด บือซามา. 24 ซาเบะ-จะ นานะ นะ กู นี ญา มาตี ตาปี ญา ฮีโดะ ปาเระ ดัฮ. ญา ลือแงะ ปี ตาปี มาแรฮ ดาปัจ ปูลัก เลอ.' กะฆีเตอ กูญา ซือมูฮา บรามัย ซูกา-ฮาตี. 25 "ตาปี นานะ ซูโลก เตอ ญา อาดา เดะ บือนัก. ตานา บาลิ มาแรฮ ดาปิก กะ รูมัฮ ญา ดืองัยํ กูญา ปาคัจ มือญาญี มือนารี ซามา. 26 กะฆีเตอ ญา บลาโลก ซือมียา บือกรือฌา ซืออูรัก ตาญา จะ 'กูญา ตืองัฮ บูวัจ นามา เลอ?' 27 ซือมียา อีตู ตีกัฮ จะ 'อาดี เดะ เกา ญา บาลิ มาแรฮ ดัฮ. กะฆีเตอ ปะ เดะ เกา บรี บูนอฮ อานะ ลือมู นู ลือมะ บรี บรามัย มากัด บือซามา กรานา-จะ ญา บือเลฮ ซาโมจ นานะ บาลิ มาแรฮ ซือนัง บาฌิ ดัฮ.' 28 "ตาปี นานะ ซูโลก ญา มูซัยํ โตระ ตีเมา มาโซะ กะ รูมัฮ. กะฆีเตอ ปะ เดะ ญา ตรือเบะ ปี ปูโฌะ ญา บรี มาโซะ กะ รูมัฮ. 29 ตาปี นานะ อีตู ญา ตีกัฮ ปาเระ กะ ปะ เดะ ญา จะ 'ลีฮัจ เลอ กู บือเลฮ บือกรือฌา ซือรูปา ฌาดี ปราโซฮ นะ ปะ บราปา ตาโฮด มาแรฮ ดัฮ? กู เตด ดือละ ปูตุซ ปือมือซัด นะ ปะ ซือกาลี เตอ. ตาปี ปะ เตด ดือละ ฮาฆิ กู อานะ แบะ ซืออีโกยํ โปด บีดา กู นะ มากัด บรามัย ฌางัน โกะ ฆูๆ นะ กู. 30 ตาปี นานะ นะ เกา นู อีนี เลอ ญา ปี บือซามา ฌางัน นีบีนี ฌาลัก ตือดะ บลาญา นะ ปะ ฮาบิฮ ซือมูฮา ดัฮ. ตานา ญา บาลิ มาแรฮ ปะ ปี อาเมด อานะ ลือมู นู ลือมะ มาแรฮ บรี กะ กูญา มากัด บรามัย เลอ.' ญา จะ. 31 "ปะ ตีกัฮ กะ ญา จะ 'นานะ เออ เกา อาดา ดูโดะ ฌางัน กู ซือลาลู. บารัก นะ กู ซือมูฮา ฌาดี บารัก นะ เกา เลอ. 32 ตาปี ปาโตจ เลอ นู กีตา บือเลฮ บรามัย ซูกา-ฮาตี ซาเบะ อาดี เดะ เกา อีนี ซือรูปา ญา มาตี ดัฮ ตาปี ฮีโดะ ปาเระ เลอ. ญา ลือแงะ ปี ตาปี มาแรฮ ดาปัจ ปูลัก ดัฮ เลอ.' ญา จะ."
1 เยซู มือเลา กะ โกะ มูเระ นะ ญา จะ "อาดา อูรัก กายา ซืออูรัก ญา อาดา กือปาลา ปราโซฮ นู ญา กีเรบ บรี ฌาฆา โกะ ซือบารัก นะ ญา. ตาปี โกะ ซือมียา กูญา มาแรฮ อาดู กะ อูรัก กายา จะ 'กือปาลา ปราโซฮ อีตู บือเลฮ ซูโรฮ โกะ ซือบารัก นะ เกา บรี ฮาบิฮ ดัฮ.' 2 กะฆีเตอ อูรัก กายา อีตู ญา บลาโลก กือปาลา ปราโซฮ อีตู อูจะ กะ ญา จะ 'ลาฆู นู กู บือเลฮ ดืองัยํ ดัฮ ปาซัน ลาฆู นะ เกา เตอ ฌาดี กะฮามี เลอ? เกา กือนา ฆาแรฮ กีรา ดูเวะ กีรา บือนา บารัก นู กู กีเรบ บรี กะ เกา ฌาฆา เตอ. ซาเบะ-จะ เกา นะ ฌาดี กือปาลา ปราโซฮ ลาฆี ฮอย เตด บือเลฮ ดัฮ.' 3 กือปาลา ปราโซฮ อีตู ญา บรีงัจ เดะ ฮาตี จะ 'กู นะ บูวัจ กะฮามี บาฌิ? ซาเบะ-จะ ตกเก นะ ปรือลอจ กู ดัฮ เดะ ลาฆู นู กู ฌาดี กือปาลา. กู นะ จาโกน ตานัฮ โปด ฮอย อูรัจ นะ ปี งือแมง โปด จือและ เดะ กาวัด เลอ. 4 เออ กู ตาฮู ดัฮ จะ นะ บูวัจ กะฮามี บาฌิ บีดา-จะ วะตู กู กือนา ปรือลอจ เดะ ลาฆู นู กู ฌาดี กือปาลา ปราโซฮ เตอ โกะ ซือมียา นะ ซาโมจ กู เดะ รูมัฮ นะ กูญา บือเลฮ.' 5 "กะฆีเตอ ซือมียา อีตู ญา บลาโลก โกะ ซือมียา นู ตือฮูตัก เดะ ตกเก นะ ญา ราตา อูรัก ตาญา ซือมียา ลามูลา จะ 'เกา ลือกัจ ฮูตัก เดะ ตกเก นะ กู บราปา บาญะ เลอ?' 6 ญา ตีกัฮ จะ 'กู ตือฮูตัก มีญะ ซือราตุซ เตง.' กือปาลา ปราโซฮ มือญาเระ กะ ญา จะ 'อาเมด ซูรัจ ฮูตัก นะ เกา ดูโดะ งัจบางัจ กาเลฮ เดะ ซูรัจ บรี ฌาดี ลีมา-ปูโลฮ เตง เลอ.' 7 กะฆีเตอ ญา ตาญา นู ซืออูรัก ปูลัก จะ 'เกา เลอ เกา ตือฮูตัก บราปา บาญะ?' ญา ตีกัฮ จะ 'กู ตือฮูตัก บรัซ ซือราตุซ ฆูนี.' กือปาลา ปราโซฮ ตีกัฮ จะ 'อาเมด ซูรัจ ฮูตัก นะ เกา กาเลฮ บรี ฌาดี ลาปัด-ปูโลฮ ฆูนี เลอ.' 8 กะฆีเตอ อูรัก กายา ญา มือโอจ กะ กือปาลา ปราโซฮ นู บูวัจ ซาลัฮ อีตู ซาเบะ-จะ ญา บือเลฮ บูวัจ ฌางัน ลาฆู ปานัย อากัน. กรานา-จะ โกะ ซือมียา ฮาดัจ อีนี กูญา ตาฮู บูวัจ ปานัย อากัน ซามา ลูมอฮ กูญา ตะอาซิก ลือเบฮ เดะ โกะ ซือมียา นู ดูโดะ โซะ จรัฮ ซียัก." 9 กะฆีเตอ เยซู มือเลา ปูลัก จะ "กะฆีเตอ กู นี มือญาเระ กะ กาเญา จะ กือนา อาเมด ดูเวะ เดะ โซะ ดือนียา นู ฌาฮัจ อีนี บูวัจ บรี อาดา โกะ ซาบัจ บีดา-จะ ดัฮ โกะ ดูเวะ อีตู ฮาบิฮ ดัฮ เกา นะ กือนา ซาโมจ มาโซะ กะ ตือปัจ ดูโดะ นู บาฌิ ซือลาลู เลอ. 10 "ซือมียา นู รือมัก เดะ โกะ ลาฆู มิดือมิ เตอ ญา นะ รือมัก เดะ ลาฆู นู ซัยํ-บือซัยํ ฌูฆา เลอ. ซือมียา นู เตด รือมัก เดะ โกะ ลาฆู มิดือมิ เตอ ญา นะ เตด รือมัก เดะ ลาฆู ซัยํ-บือซัยํ ฌูฆา เลอ. 11 กะฆีเตอ เลอ ดัฮ กาเญา เตด รือมัก ปาซัน โกะ ดูเวะ เดะ ดือนียา นู ฌาฮัจ อีนี ซาปา เลอ นะ กีเรบ ซือบารัก นู บาฌิ ซูโงฮ กะ กาเญา? 12 ดัฮ กาเญา เตด รือมัก เดะ ซือบารัก นะ ซือมียา อาซิก เตอ ซาปา เลอ นะ บรี ซือบารัก นู นะ ฌาดี บารัก นะ กาเญา ตะอาซิก? 13 "ฮอย ปราโซฮ ซือมียา ดีฮา นะ บือกรือฌา บรี กะ ตกเก ดูวา อูรัก บือเลฮ. ซาเบะ-จะ นะ บือชี กะ นู ซา นะ ซายัก กะ นู ซา เฆอ-จะ นะ ตูเฮะ กะ นู ซา นะ มือฌัฮ กะ นู ซา. กะฆีเตอ กาเญา นะ ฌาดี ปราโซฮ นะ ตูฮัด เดะ อาตัซ นะ ฌาดี ปราโซฮ นะ ดูเวะ ซามา ฮอย เตด บือเลฮ เลอ." 14 โซะ ลูมอฮ ฟาริซี นู อาดา ฮาตี ซายัก โกะ ดูเวะ ตานา ดืองัยํ ปือมือเลา กะฆีเตอ ซือมูฮา ดัฮ กูญา อาฆัฮ-ฆือละ กะ เยซู. 15 ตาปี เยซู มือเลา กะ กูญา จะ "กาเญา เตอ ฮาฌา กาเญา บูวัจ บรี โกะ ซือมียา อีงัจ จะ กาเญา ฌาดี ซือมียา รือมัก. ตาปี ตูฮัด เดะ อาตัซ ญา ตาฮู ฮาตี นะ กาเญา. ซาเบะ-จะ โกะ ซือบารัก นู โกะ อูมัจ-ซือมียา กีรา จะ อาดา รือฆา บาญะ ญา ฌาดี ซือบารัก ตะอารัฮ โซะ ฮึลด มูคา นะ ตูฮัด เลอ. 16 " ซูรัจ ปือมือเลา ฮูโกบ นะ ตูฮัด ฌางัน ซูรัจ โกะ ซือมียา ตูโดฮ ลาฆู นะ ตูฮัด เตอ อาดา ฮูโกบ ตือดะ รอจ กะ ตือกาลา โยฮัน ซือมียา นู บรี ลาฆู ซือลับ เดะ อาเย. ตะเดะ อีตู มาแรฮ อาดา บรีตา นู บาฌิ ปาซัน นู ตูฮัด นะ มาแรฮ ฌาดี ราฌา นะ บือบือลา โกะ อูมัจ-ซือมียา เตอ บรีตา อีตู กือนา มือญาเระ ดัฮ. กะฆีเตอ โกะ ซือมียา ซือมูฮา ปาคัจ บรือโบจ นะ มาโซะ ฌาดี ซือมียา นู ตูฮัด บือบือลา กะฆีเตอ เลอ. 17 ตาปี นู ลาแงะ ฌางัน ดือนียา นะ ลือแงะ ปี เตอ ญา ซือนัง เดะ ลาฆู นู ซูรัจ ปือมือเลา ฮูโกบ นะ ตูฮัด แนฮ ซา ปาตัฮ นะ เตด ฌาดี นามา. 18 "ซือมียา ดีฮา บรือจัย ฌางัน บีนี นะ ญา ปี อาเมด บีนี อาซิก ญา ซาลัฮ บือกาเซฮ เตอ. ซือมียา ดีฮา นู อาเมด บีนี นู ลากี บรือจัย ดัฮ เตอ มาแรฮ บูวัจ ฌาดี บีนี นะ ญา ญา โปด ซาลัฮ บือกาเซฮ ฌูฆา เลอ." 19 เยซู มือเลา ปูลัก จะ "อาดา อูรัก กายา ซืออูรัก ญา ปือแญะ กาเยด รือฆา มาฮัน. ญา มากัด กือญัง มากัด บาฌิ บีลัก อารี. 20 อาดา ฌูฆา อูรัก ฮาฌะ ซืออูรัก ปือนามา ลาซาโร อาดา ลียัก บรา ฮาปา เดะ ญาวา. ญา เตอ บียาซา ฆูแลก เดะ ปีตู ปาฆัยํ รูมัฮ นะ อูรัก กายา อีตู ซีงี. 21 ญา จาดัก นะ มากัด ซือบารัก นู ลือเบฮ เดะ มากัด นะ อูรัก กายา อีตู. โกะ อาซู โปด มาแรฮ ฌีลัจ ลียัก บรา นะ ญา. 22 "อาดา ซืออารี อูรัก ฮาฌะ อีตู มาตี ดัฮ. กะฆีเตอ อาดา ลูมอฮ ฮูลู-บาลัก นะ ตูฮัด มาแรฮ อาเมด ญา บาวา บือปี กะ ลาแงะ ดูโดะ บือซามา ดาปิก อับราฮัม. อูรัก กายา อีตู โปด มาตี ฌูฆา กือนา ตานัม ดัฮ. 23 เดะ นังฆรี ฮาตู ญา ซาเกะ บาญะ โตระ. ญา ลีฮัจ กะ อาตัซ บือฆารี อับราฮัม ดูโดะ ฌาโวฮ. อาดา ลาซาโร ดูโดะ ดาปิก ญา. 24 กะฆีเตอ อูรัก กายา อีตู ญา บลาโลก จะ 'โอ อับราฮัม ปะ เออ ตือจีฮัด กะ กู เลอ. กู ซาเกะ โตระ เดะ ญาลา อาปี อีนี. ซูโรฮ ลาซาโร บรี จือลุ ฮูโฌก ฌารี นะ ญา เดะ อาเย มาแรฮ บอฮ บรี ลีดัฮ นะ กู บือแฌะ ดีกิ เลอ.' 25 "ตาปี อับราฮัม มือเลา จะ 'นานะ เออ บรีงัจ เลอ. กาลา เกา ฮีโดะ เตอ เกา บือเลฮ มากัด กือญัง ดูโดะ ซือนัง บาฌิ. โซะ ลาซาโร โปด ญา ดูโดะ ฮาฌะ โตระ. ตาปี วะตู อีนี เลอ ลาซาโร ญา ดูโดะ ซือนัง บาฌิ ตือปัจ อีนี ดัฮ โซะ เกา เตอ ซาเกะ บาญะ ดัฮ เลอ. 26 ลือเบฮ เดะ อีตู เลอ อาดา ลาเฮา บือซัยํ ดูโดะ เดะ ตืองัฮ กามี ฌางัน กาเญา. ซือมียา โซะ อีนี นู นะ ฌรือมัก ปี กะ กาเญา ฮอย เตด บือเลฮ ดัฮ. ซือมียา โซะ อีตู นู นะ ฌรือมัก มาแรฮ กะ กามี โปด ฮอย เตด บือเลฮ ฌูฆา เลอ.' 27 อูรัก กายา ซีงี เตอ ญา มือเลา จะ 'ปะ เออ กู มีตา ตูโลก เดะ ปะ เลอ. ซูโรฮ ลาซาโร ปี กะ รูมัฮ นะ อาโปก เดะ กู. 28 เดะ รูมัฮ อีตู อาดา อาดี เดะ กู ลีมา บราดี. บรี ลาซาโร ปี ปรีงัจ มือญาเระ กะ กูญา อีตู จะ ฌางัน บรี กูญา ฌูฆา นะ มาแรฮ กะ ตือปัจ นู ซาเกะ โตระ อีนี.' 29 "ตาปี อับราฮัม มือเลา จะ 'โกะ อาดี เดะ เกา อาดา ซูรัจ ปือมือเลา นะ มูซา อาดา ซูรัจ ปือมือเลา นะ ลูมอฮ ซือมียา ตูโดฮ ลาฆู นะ ตูฮัด ฌูฆา. บรี กูญา มือนีงัย กะ ซูรัจ ปือมือเลา อีตู เลอ.' 30 ตาปี อูรัก กายา ซีงี ตีกัฮ จะ 'ปะ อับราฮัม กะฆีเตอ เตด ฆือนะ เลอ. ตาปี อาซัน-จะ อาดา ซือมียา นู มาตี ดัฮ ปาเระ ปี มือญาเระ กะ กูญา อีตู กะฆีเตอ เลอ กูญา นะ บราเลฮ-ฮาตี.' 31 ตาปี อับราฮัม มือเลา กะ ญา จะ 'กูญา อีตู ตีเมา มือนีงัย กะ ซูรัจ ปือมือเลา นะ มูซา ฌางัน ปือมือเลา นะ ลูมอฮ ซือมียา ตูโดฮ ลาฆู นะ ตูฮัด ดัฮ. กะฆีเตอ มีเซ-จะ อาดา ซือมียา มาตี ฮีโดะ ปาเระ โปด ตาปี กูญา เตด ปือจายา ลาฆี.' ญา จะ."
1 กะฆีเตอ เยซู มือเลา กะ มูเระ นะ ญา จะ "ฆาโดฮ อาดา ลาฆู ฌือแนฮๆ นู นะ บูวัจ บรี ซือมียา ซาลัฮ ฌาลัด. ตาปี จือลากา เลอ ซือมียา นู บูวัจ บรี ซาลัฮ กะฆีเตอ. 2 ดัฮ อาเมด บาตู ฆีลิก ตือโปก ฆาโตก เดะ ลีเฮ ซือมียา อีตู บือปี ฌาลา กะ ลาโวจ บูวัก เลอ บาฌิ เดะ นู นะ บรี ญา บาวา นานะ ดือมิ กะฆีนี ซืออูรัก โปด ปี ซาลัฮ ฌาลัด ดัฮ. 3 กะฆีเตอ กือนา ฌาฆา ญาวา บรี บาฌิ เลอ. "ดัฮ ดีบราดี บูวัจ ซาลัฮ กะ เกา กือนา อูจะ กะ ญา. ดัฮ ญา บราเลฮ-ฮาตี กือนา อาเกะ ซาลัฮ กะ ญา เลอ. 4 ตาปี มีเซ ญา บูวัจ ซาลัฮ กะ เกา ซืออารี ตูโฌฮ กาลี โปด ตาปี ญา อาเลฮ มาแรฮ มียา เกา บือกะ ตูโฌฮ กาลี อีตู เตอ มือเลา จะ 'กู บราเลฮ-ฮาตี ดัฮ' กือนา อาเกะ ซาลัฮ กะ ญา เลอ." 5 โซะ โกะ ปือญูโรฮ กูญา มือเลา กะ ตูฮัด เยซู จะ "มีตา บรี ลูมอฮ กามี นะ ปือจายา บรี บาญะ ซือมาตา เลอ." 6 ตูฮัด เยซู ญา มือเลา จะ "ดัฮ ลูมอฮ กาเญา อาดา ลาฆู ปือจายา กิดีกิ ตารา บีฌี ตาโระ นู มิดือมิ ซือบีฌี กาเญา นะ ซูโรฮ ปูโฮด กายู อีนี จะ 'เกา กือนา กือตัจ ฌากัยํ ปี ตานัม เดะ ลาโวจ เลอ.' กะฆีเตอ ญา นะ บูวัจ ตูโรจ กะ กาเญา. 7 "ซือมียา ดีฮา เดะ ลูมอฮ กาเญา อาดา ปราโซฮ กรือฌา บือนัก เฆอ-จะ บือบือลา กาวัด กาเมก เตอ ตานา ปราโซฮ นู อีตู ญา บาลิ ดาตัก เดะ บือนัก นะ มือเลา กะ ญา จะ 'บางัจ เลอ มาแรฮ ดูโดะ มากัด บือซามา ฌางัน กามี'? 8 ฮอย. กาเญา เตด มือเลา กะฆีเตอ เลอ ตาปี นะ มือญาเระ กะ ญา จะ 'กือนา ซียะ โกะ ซือบารัก บรี กะ กู มากัด. ซือซิก กาเยด ซือและ เดะ ปีงัก ตาโรฮ บือกรือฌา บรี กะ กู ตือดะ กู นะ มากัด โอะ กือญัง ดัฮ. เดะ บลากัก เกา โปด นะ บือเลฮ มากัด โอะ ปูลัก เลอ.' 9 ตกเก อีตู นะ มือโอจ กะ ปราโซฮ เฆอ ซาเบะ ปราโซฮ บือเลฮ บูวัจ ตูโรจ กะ ญา เตอ? เตด โบะ. 10 กะฆีเตอ ฌูฆา เลอ โซะ กาเญา ตานา บูวัจ ตูโรจ ลาฆู ซือมูฮา นู กือนา ปือซัด ดัฮ กาเญา กือนา มือเลา จะ 'กามี ฌาดี ปราโซฮ นู เตด ปาโตจ นะ กือนา มือโอจ เลอ. กามี บือเลฮ บือกรือฌา บูวัจ บือกะ กามี ฆาโดฮ นะ บูวัจ ซา อีตู เลอ.' " เยซู ญา จะ. 11 กาลา เยซู ตืองัฮ บือฌาลัด ญาแญะ ปี กะ นังฆรี เยรูซาเลม ญา บือฌาลัด โซะ ตืองัฮ ตือกอซ นังฆรี ซะมาเรีย ฌางัน ฆาลิลี. 12 ตานา เยซู นะ มาโซะ กะ ตูโปะ ซา ตูโปะ อาดา ซือมียา ปือญาเกะ ปูรู ซือปูโลฮ อูรัก มาแรฮ บือดาปัจ ฌางัน ญา. กูญา บือดีรี ฌาโวฮ 13 บือซูระ จะ "โอ เยซู บูมอยํ เออ. ตือจีฮัด กะ กามี เลอ." 14 ตานา เยซู ลีฮัจ กูญา ดัฮ ญา มือเลา จะ "ปี เลอ. ปี ซารี โกะ ซามี บรี กูญา ซาซัจ กาเญา." กะฆีเตอ วะตู กูญา ตืองัฮ บือฌาลัด ปี กูญา ซือนัง บาฌิ ดัฮ. 15 ซือมียา ซืออูรัก เดะ ลูมอฮ อีตู ตานา ญา ลีฮัจ จะ ญา ซือนัง บาฌิ ดัฮ เตอ ญา อาเลฮ มาแรฮ ซารี เยซู บือซูระ บูริ มือโอจ กะ ตูฮัด เดะ อาตัซ เลอ. 16 ญา ตือมะ มูคา รอจ กะ ตานัฮ เดะ โซะ กากี นะ เยซู บรี ซือลามัจ กะ ญา. ซือมียา อีตู เตอ ฌาดี ซืออูรัก เดะ บักซา ซะมาเรีย. 17 กะฆีเตอ เยซู มือเลา จะ "ซือปูโลฮ อูรัก ซือนัง บาฌิ ดัฮ บูกัด เฆอ? ตาปี นู ซือมีลัด อูรัก อีตู อาดา เปะ ดีฮา? 18 บูวัจ นามา เลอ ฮอย ซือมียา ดีฮา บาลิ มาแรฮ มือโอจ กะ ตูฮัด เดะ อาตัซ ลือเบฮ ซือมียา บักซา อาซิก แนฮ ซืออูรัก อีนี เลอ?" 19 กะฆีเตอ เยซู มือเลา กะ ญา จะ "บีกัซ ปี เลอ. นู เกา ปือจายา อีนี บูวัจ บรี เกา ซือนัง บาฌิ ดัฮ เลอ." 20 อาดา ลูมอฮ ฟาริซี ตาญา เยซู จะ นู ตูฮัด เดะ อาตัซ นะ มาแรฮ ฌาดี ราฌา นะ บือบือลา อูมัจ-ซือมียา นะ บือฌาดี กาลา? เยซู ญา ตีกัฮ จะ "นู ตูฮัด ญา มาแรฮ ฌาดี ราฌา เตอ บูกัด-จะ อาดา ปือนานา นะ ลีฮัจ บือฆารี ฌางัน มาตา เลอ. 21 ฮอย ซาปา นะ มือเลา จะ 'มาแรฮ ลีฮัจ ปัจ อีนี.' เฆอ-จะ 'ปัจ อีตู เลอ'. ซาเบะ-จะ นี เลอ ตูฮัด ญา อาดา บือบือลา ฌาดี ราฌา เดะ ตืองัฮ กาเญา ดัฮ." 22 เยซู มือเลา กะ โกะ มูเระ นะ ญา จะ "อาดา ซา วะตู นู นะ มาแรฮ นู กาเญา นะ ซูกา ลีฮัจ อารี นะ นานะ นะ อูมัจ-ซือมียา แนฮ ซืออารี เตอ ตาปี นะ ลีฮัจ เตด บือฆารี. 23 อาดา ซือมียา นะ มือเลา ฌางัน กาเญา จะ 'มาแรฮ ลีฮัจ นู อีนี' เฆอ-จะ 'ปี ลีฮัจ นู อีตู เลอ'. ฌางัน ตรือเบะ ปี ตูโรจ กูญา. 24 ซือรูปา บือกะ กีลัจ เตอ นู และ ตรือเบะ เดะ ลาแงะ ซือบือลัฮ ซูโลฮ ปี รอจ กะ ลาแงะ นู ซือบือลัฮ เตอ กู นู นานะ นะ อูมัจ-ซือมียา นะ ฌาดี กะฆีเตอ เลอ เดะ อารี นะ กู. 25 ตาปี กู ฆาโดฮ ตาฮัด ซูซัฮ บาญะ ฌือแนฮ ดูลู. โกะ ซือมียา ฮาดัจ อีนี นะ ตีเมา ซาโมจ กู เลอ. 26 เดะ ฮาดัจ นะ โนฮา ลาฆู บือเลฮ บือฌาดี กะฮามี เตอ ฮาดัจ นะ นานะ นะ อูมัจ-ซือมียา โปด นะ ฌาดี กะฆีเตอ ฌูฆา เลอ. 27 กูญา บือเลฮ มากัด บือเลฮ โอะ บือเลฮ มือนีกัฮ อาเกะ บรี ฌาดี ลากี-บีนี ฌูฆา ตือดะ รอจ กะ อารี อีตู นู โนฮา บือเลฮ มาโซะ กะ ดาลับ กาปัน บือซัยํ อาเย บือเลฮ อาโปฮ บรี โกะ ซือมียา ฌาฮานัม ฮาบิฮ. 28 เดะ ฮาดัจ นะ โลด โปด ฌาดี กะฆีเตอ ฌูฆา. กูญา บือเลฮ มากัด บือเลฮ โอะ บือลี ฌูวัน ปุย-ปรุย ตานัม ตาโระ บูวัจ โกะ รูมัฮ เลอ. 29 ตาปี เดะ อารี อีตู นู โลด ญา ตรือเบะ เดะ นังฆรี โซโดม อาปี ฌางัน บลีรัก ญา ฆูโฆยํ ดาตัก เดะ โซะ ลาแงะ จูโจฮ นังฆรี ปือลัฮ ฮาบิฮ. 30 เดะ อารี อีตู นู นานะ นะ อูมัจ-ซือมียา นะ มาแรฮ ปลีฮัจ เตอ นะ ฌาดี ซือรูปา กะฆีเตอ ฌูฆา เลอ. 31 "เดะ อารี อีตู ซือมียา นู อาดา เดะ รูวัก โซะ อาตัซ รูมัฮ โกะ ซือบารัก นะ ญา อาดา เดะ ดาลับ รูมัฮ ฌางัน บรี ญา ตูโรด มาโซะ ดาลับ รูมัฮ อาเมด โกะ ซือบารัก อีตู บือปี. ซือมียา นู อาดา โซะ บือนัก เตอ ฌางัน บรี ญา ปาเระ มาแรฮ ฌูฆา เลอ. 32 กือนา บรีงัจ จะ บีนี นะ โลด ญา กือนา ลาฆู นามา เลอ. 33 ซือมียา ดีฮา กูวาซา ตูโลก ญาวา ตะอาซิก บรี ดูโดะ ซือนัง เตอ ญาวา ญา นะ ฌาฮานัม เลอ. ตาปี ซือมียา ดีฮา นู ซรัฮ ญาวา นะ ญา บรี ฌาฮานัม ซือมียา อีตู นะ บือเลฮ ฮีโดะ ลือปัซ บาฌิ เลอ. 34 กู มือญาเระ กะ กาเญา จะ เดะ มาลับ อีตู นะ อาดา ซือมียา ดูวา อูรัก ตีโนะ เดะ ตือปัจ ตีโนะ ซือตือปัจ เตอ นะ ซาโมจ บือปี ซืออูรัก นะ ตีงัน ซืออูรัก. 35 นะ อาดา นีบีนี ดูวา อูรัก ฆีลิก ตือโปก บือซามา เตอ นะ ซาโมจ บือปี ซืออูรัก นะ ตีงัน ซืออูรัก. " เยซู ญา จะ. 37 กูญา ตาญา เยซู จะ "นะ บือฌาดี ปัจ ดีฮา ตูฮัด เออ?" เยซู ตีกัฮ จะ "อาดา บาดัด ปัจ ดีฮา กาวัด บูโรก อีแรก นะ บือมุน มากัด ปัจ อีตู เลอ."
1 เยซู นะ บรี โกะ มูเระ บือซาโวจ กะ ตูฮัด ซือรูโลยํ ฮอย เตด กูรัก เดะ ฮาตี. กะฆีเตอ ญา มือญาเระ ลาฆู จรือตา อาฌัยํ กะฆีนี จะ 2 "เดะ นังฆรี ซา นังฆรี อาดา ซือมียา กรัจ ฮูโกบ ซืออูรัก นู เตด ตาโกจ ตูฮัด เดะ อาตัซ เตด ตูเฮะ กะ ซือมียา ดีฮา โปด. 3 เดะ นังฆรี อีตู อาดา ฌูฆา นีบีนี ฌานา ซืออูรัก เตอ ญา มาแรฮ เตด บราดู มีตา เดะ ซือมียา กรัจ ฮูโกบ บรี ตูโลก ญา มือเลา จะ 'มีตา เดะ เกา นะ กรัจ ฮูโกบ บรี กือนา ลาฆู ฌางัน ซือมียา นู บือดะวา ลาวัด กู เลอ.' 4 ซือมียา กรัจ ฮูโกบ อีตู ญา เตด ปือดูลี ลามัจ นะ ตีกัฮ เลอ. ตาปี เดะ บลากัก ญา อีงัจ เดะ ฮาตี จะ 'มีเซ-จะ กู เตด ตาโกจ เดะ ตูฮัด เตด ตูเฮะ กะ ซือมียา ดีฮา เตอ 5 ตาปี นีบีนี ฌานา อีนี ญา มาแรฮ บือฆาโดฮ เตด บราดู. บอฮ กู นะ กรัจ ฮูโกบ กือนา ลาฆู บรี กะ ญา ตีเมา บรี ญา มาแรฮ บือฆาโดฮ กู ซัจๆ ยู กู รือมัย เลอ." ญา จะ. 6 กะฆีเตอ ตูฮัด เยซู มือเลา จะ "มือนีงัย เลอ ซือมียา กรัจ ฮูโกบ นู ปีเกาะ อีตู บือเลฮ มือเลา กะฮามี ดัฮ. 7 ดัฮ ฌาดี กะฆีเตอ ตูฮัด บือซัยํ เดะ อาตัซ ญา นะ กรัจ ฮูโกบ บรี กือนา ลาฆู กะ โกะ ซือมียา นู ญา ปีเลฮ ดัฮ เตอ นู ฆางู มีตา ตูโลก เดะ ญา ซียัก มาลับ บูกัด เฆอ? ตูฮัด ลามัจ นะ ตูโลก กูญา เฆอ? เตด โบะ. 8 กู มือญาเระ กะ กาเญา จะ ตูฮัด นะ มาแรฮ ตูโลก กูญา งัจบางัจ เลอ. ตาปี วะตู กู นู นานะ นะ อูมัจ-ซือมียา อีนี นะ มาแรฮ เตอ นะ ดาปัจ ซือมียา นู อาดา ลาฆู ปือจายา เดะ ดือนียา อีนี เฆอ?" เยซู ญา จะ. 9 อาดา ซือมียา ซือตืองัฮ นู มือฌัฮ อูรัก อาซิก ตาปี มือโอจ กะ ญาวา ตะอาซิก จะ กูญา บาฌิ-ตือปัจ. กะฆีเตอ เยซู มือเลา ลาฆู จรือตา อาฌัยํ กะฆีนี บรี กูญา อีตู ดืองัยํ จะ 10 "อาดา ซือมียา ดูวา อูรัก มาโซะ กะ รูมัฮ มือญือมัฮ ตูฮัด บีดา นะ บือซาโวจ. นู ซืออูรัก ฌาดี ซือมียา ลูมอฮ ฟาริซี นู ซืออูรัก ฌาดี ซือมียา มูงอจ อาเซน เตอ. 11 "โซะ อูรัก ฟาริซี อีตู ญา บือดีรี ซา ญา บือซาโวจ จะ 'โอ ตูฮัด บือซัยํ เดะ อาตัซ กู บรี ซือลามัจ กะ ตูฮัด จะ กู เตด ซือรูปา โกะ ซือมียา อาซิก เลอ. กู บูกัด ซือมียา ฮาลูบา ซือมียา ฌาฮัจ ซือมียา บือกาเซฮ. กู ฮอย เตด ซือรูปา กะ ซือมียา มูงอจ อาเซน นู อีตู เลอ. 12 บีลัก มีงู กู บูวัจ ลาฆู บือตาฮัด มากัด ดูวา อารี. ดูเวะ นะ กู นู บือเลฮ ซือมูฮา เตอ บือเลฮ ซือราตุซ รีเงะ กู อาเกะ ซือปูโลฮ รีเงะ มือญือมัฮ กะ ตูฮัด.' ญา จะ. 13 "ตาปี โซะ ซือมียา มูงอจ อาเซน ญา บือดีรี ฌาโวฮ ดีกิ ตีเมา ลางอฮ ปาลา ลีฮัจ กะ ลาแงะ. ญา กาเตาะ ตาฮะ ดาดา นะ ญา บือซาโวจ จะ 'โอ ตูฮัด บือซัยํ เดะ อาตัซ กู อูรัก บือดูซา โตระ. มีตา บรี ตูฮัด ตือจีฮัด กะ กู เลอ.' ญา จะ." 14 กะฆีเตอ เยซู มือเลา จะ "กู มือญาเระ กะ กาเญา จะ ตานา บาลิ กะ รูมัฮ ซือมียา มูงอจ อาเซน อีนี เลอ นู ตูฮัด กีรา จะ ญา ซือมียา ฌาดี บาฌิ-ตือปัจ ดัฮ. โซะ ซือมียา นู ซา ซีงี ฮอย เลอ ตูฮัด เตด อีงัจ กะฆีเตอ. กรานา-จะ ราตา ซือมียา นู อาเกะ ญาวา ตีงี เตอ ญา ฆาโดฮ กือนา บูวัจ บรี รือนัฮ เลอ. ตาปี ซือมียา ดีฮา นู มือนูโนะ ญาวา เตอ ญา นะ กือนา อาเกะ บรี ตีงี เลอ." ญา จะ. 15 กะฆีเตอ อาดา ซือมียา บาวา โกะ นานะ ดือมิ ฌูฆา มาแรฮ ซารี เยซู บีดา นะ บรี เยซู ปือเตาะ เดะ ญาวา นะ กูญา. ตาปี โกะ มูเระ นะ ญา เตอ ตานา ลีฮัจ กะฆีเตอ กูญา อูจะ บลารัก โกะ ซือมียา อีตู. 16 ตาปี เยซู บลาโลก โกะ นานะ มือเลา จะ "บียัยํ เลอ บรี โกะ นานะ มาแรฮ มียา กู. ฌางัน นะ ซือกัจ กูญา กรานา-จะ ซือมียา นู อาดา ฮาตี ซือรูปา บือกะ โกะ นานะ กะฆีนี เตอ ซือมียา อีตู เลอ นู อาดา ตูฮัด ฌาดี ราฌา นะ ญา. 17 กู มือญาเระ กะ กาเญา ลาฆู นู ซูโงฮ จะ ซือมียา ดีฮา นู เตด ซาโงะ ตูฮัด ฌาดี ราฌา นะ ญา ฌางัน ฮาตี ซือรูปา บือกะ นานะ เตอ ซือมียา อีตู นะ ฮอย เตด บือเลฮ มาโซะ กะ ลูมอฮ ซือมียา นู ตูฮัด บือบือลา ฌาดี ราฌา." เยซู ญา จะ. 18 อาดา กือปาลา ลูมอฮ ยิว ซืออูรัก ตาญา เยซู จะ "บูมอยํ นู บาฌิ เออ กู นะ บูวัจ กะฮามี เลอ บีดา นะ บือเลฮ ลาฆู ฮีโดะ ซูโงฮ นู ซือลาลู?" 19 กะฆีเตอ เยซู ตีกัฮ กะ ญา จะ "เกา บลาโลก กะ กู จะ 'นู บาฌิ' บูวัจ นามา? ฮอย ซือมียา ดีฮา นะ บาฌิ ลือเบฮ ซา ตูฮัด เดะ อาตัซ เลอ. 20 เกา ตาฮู โกะ ปือมือซัด นะ ตูฮัด นู จะ 'ฌางัน บือกาเซฮ บีนี นะ กาวัด ลากี นะ กาวัด เลอ. ฌางัน บูนอฮ ซือมียา เลอ. ฌางัน จูรี บารัก นะ กาวัด เลอ. ฌางัน ฌาดี ซะซี มืออูปัย เลอ. กือนา ตูเฮะ กะ เอด อาโปก นะ เกา เลอ.' " ญา จะ. 21 ซือมียา อีตู ญา มือเลา จะ "ปือมือซัด อีนี ซือมูฮา กู บือเลฮ ตูโรจ ดัฮ ตะเดะ มิดือมิ." 22 ตานา ดืองัยํ กะฆีเตอ เยซู มือเลา ฌางัน ญา จะ "เกา ปูตุซ ซา มาตา ลาฆี เลอ. เกา กือนา ปี ฌูวัน โกะ ซือบารัก ซือมูฮา นู เกา อาดา ฮาฆิ บรี กะ โกะ ซือมียา ฮาฌะ เตอ. กะฆีเตอ เกา นะ ฌาดี ซือมียา กายา โซะ อาตัซ ลาแงะ ดัฮ. ลือปัซ อีตู กือนา มาแรฮ ตูโรจ กะ กู เลอ." เยซู ญา จะ. 23 ตาปี ตานา ญา ดืองัยํ ลาฆู กะฆีเตอ ซือมียา อีตู ซูซัฮ-ฮาตี ซูโงฮ ซาเบะ-จะ ญา ฌาดี ซือมียา กายา บาญะ. 24 เยซู ญา ลีฮัจ ซือมียา อีตู นู ญา ซูซัฮ-ฮาตี กะฮามี ดัฮ กะฆีเตอ ญา มือเลา จะ "ปายัฮ ซูโงฮ เลอ นู โกะ ซือมียา กายา นะ มาโซะ กะ ลูมอฮ ซือมียา นะ ตูฮัด. 25 ซาเบะ-จะ อูตัยํ ซืออีโกยํ นะ มรือลุซ เดะ ลูบัก ฌาโรบ โปด มูดัฮ ลาฆี เดะ ซือมียา กายา นะ มาโซะ กะ ดือนียา บารู นะ ตูฮัด เลอ." ญา จะ. 26 โซะ โกะ ซือมียา นู บือเลฮ ดืองัยํ กูญา มือเลา จะ "ดัฮ กะฆีเตอ ซาปา เลอ นะ บือเลฮ ฮีโดะ ลือปัซ บาฌิ?" 27 ตาปี เยซู ตีกัฮ จะ "ลาฆู นามา นู อูมัจ-ซือมียา บูวัจ เตด บือเลฮ ลาลู ตูฮัด เดะ อาตัซ ญา บูวัจ บือเลฮ เลอ." 28 กะฆีเตอ เปโตร ญา มือเลา ฌางัน เยซู จะ "นี เลอ ลูมอฮ กามี บือเลฮ ตีงัน โกะ รูมัฮ นะ กามี มาแรฮ ตูโรจ กะ เกา ดัฮ เลอ." 29 เยซู มือเลา กะ กูญา จะ "กู มือญาเระ กะ กาเญา ลาฆู ซูโงฮ จะ ซือมียา ดีฮา นู ตีงัน โกะ รูมัฮ โกะ อานะ บีนี โกะ ปะ มะ ฌางัน อาดี-บราดี นะ ญา เตอ บีดา นะ บูวัจ ตูโรจ กะ ตูฮัด นู ราฌา นะ ญา เตอ 30 ซือมียา อีตู นะ ซาโมจ บาญะ ลือเบฮ เดะ อีตู เดะ ฮาดัจ อีนี เลอ. รอจ กะ ฮาดัจ โซะ ฮึลด ญา นะ ซาโมจ ลาฆู ฮีโดะ ซูโงฮ นู ซือลาลู ปูลัก เลอ." เยซู ญา จะ. 31 กะฆีเตอ เยซู บาวา มูเระ นะ ญา ดูวา-บือลัซ อูรัก บือปี ซามา มือเลา ฌางัน กูญา จะ "นี เลอ กีตา ตืองัฮ บือฌาลัด ปี กะ นังฆรี เยรูซาเลม. ลาฆู ซือมูฮา นู โกะ ซือมียา ตูโดฮ ลาฆู นะ ตูฮัด ฆาแรฮ ดัฮ ปาซัน กู นู นานะ นะ อูมัจ-ซือมียา อีนี นะ ฌาดี รือมัก เลอ. 32 กรานา-จะ กู นะ กือนา อาตัจ บรี กะ โกะ ลูมอฮ ซือมียา บักซา อาซิก. กูญา นะ อาฆัฮ-ฆือละ กะ กู นะ บูวัจ กาซัยํ กะ กู นะ ปือทุย อาเย ลีโยยํ เดะ ญาวา กู. 33 กูญา นะ รือเปะ กู นะ บูนอฮ กู เลอ. ตาปี รอจ กะ อารี ตีฆา กู นะ ฮีโดะ ปาเระ เดะ มาตี ปูลัก." เยซู ญา จะ. 34 ตาปี โกะ ลูมอฮ มูเระ กูญา เตด มาโซะ เดะ ฮาตี ฌาดี ซือรูปา ลาฆู บูนี เดะ กูญา. นู เยซู มือเลา เตอ กูญา เตด ตาฮู อารัฮ. 35 ตานา เยซู มาแรฮ ดาปิก กะ นังฆรี เยริโค อาดา ซือมียา มาตา บูตา ซืออูรัก ญา ดูโดะ มืองือแมง ดูเวะ เดะ บีดิก ฌาลัด. 36 ตานา ญา ดืองัยํ โกะ ซือมียา บือฌาลัด ลือปัซ ญา ตาญา จะ "ลาฆู นามา เลอ?" 37 กูญา มือญาเระ กะ ญา จะ "เยซู ซือมียา ตูโปะ นาซาเรด บือฌาลัด ปี ดัฮ." 38 กะฆีเตอ ซือมียา มาตา บูตา อีตู บือซูระ จะ "เยซู นานะ นะ ราฌา ดาวิด เออ จีฮัด กะ กู เลอ." 39 ซือมียา นู บือฌาลัด โซะ ฮึลด กูญา อูจะ กะ ญา ซูโรฮ บรี ญา ซืองะ. ตาปี ดรัซ ญา บือซูระ จะ "นานะ นะ ราฌา ดาวิด เออ มีตา บรี ตือจีฮัด กะ กู เลอ." 40 กะฆีเตอ เยซู ญา บราดู ซูโรฮ บาวา ซือมียา มาตา บูตา มาแรฮ กะ ญา. ตานา มาแรฮ ดาปิก ดัฮ เยซู ตาญา จะ 41 "เกา นะ บรี กู บูวัจ ลาฆู นามา บีดา เกา?" ซือมียา มาตา บูตา มือเลา จะ " บูมอยํ เออ มีตา ตูโลก บรี กู บือเลฮ ลีฮัจ บือฆารี เลอ." 42 กะฆีเตอ เยซู มือเลา กะ ญา จะ "บรี เกา ลีฮัจ บือฆารี เลอ. นู เกา ปือจายา บือเลฮ บูวัจ บรี เกา ซือนัง บาฌิ ดัฮ." 43 ดัดดัด ซือมียา อีตู ญา ลีฮัจ บือฆารี ดัฮ ญา ตูโรจ กะ เยซู ปี มือโอจ กะ ตูฮัด เดะ อาตัซ. โซะ โกะ ซือมียา ซือมูฮา เตอ ตานา กูญา ลีฮัจ ลาฆู อีตู ดัฮ กูญา โปด มือเลา มือโอจ กะ ตูฮัด เดะ อาตัซ ฌูฆา เลอ.
1 กะฆีเตอ เยซู ญา มาโซะ กะ นังฆรี เยริโค นะ ลาลู ลือปัซ ปี ปูลัก. 2 อาดา ซือมียา ซืออูรัก ปือนามา จะ ซักคียัด. ญา เตอ ฌาดี กือปาลา ลูมอฮ ซือมียา มูงอจ อาเซน ซืออูรัก นู ฌาดี อูรัก กายา เลอ. 3 ญา ซูกา นะ ลีฮัจ เยซู จะ ฌาดี ซือมียา ดีฮา. ตาปี ญา ลีฮัจ เตด บือฆารี กรานา โกะ ซือมียา ตือลาลู บาญะ นู กรือจัจ ซาเบะ-จะ ญา ญาวา รือนัฮ เลอ. 4 กะฆีเตอ ญา บลารี ปี โซะ ฮึลด ญาแญะ ปูโฮด กายู บีดา ญา นะ ลีฮัจ บรี บือฆารี เยซู กรานา เยซู นะ ลาลู ปี ฌาลัด อีตู. 5 ตานา เยซู มาแรฮ รอจ กะ ตือปัจ อีตู ญา ลางอฮ ลีฮัจ กะ อาตัซ มือเลา จะ "ซักคียัด เออ. บรี เกา ตูโรด มาแรฮ งูฆางู เลอ. อารี อีนี กู กือนา นะ บราดู เดะ รูมัฮ นะ เกา." 6 กะฆีเตอ ซักคียัด ญา ฆางู ตูโรด มาแรฮ ญา ซูกา-ฮาตี ซูโงฮ ซาโมจ เยซู ปี กะ รูมัฮ นะ ญา. 7 ตานา โกะ ซือมียา ลีฮัจ กูญา ซือมูฮา ปาคัจ มือเลา บือซูงุจ จะ "เยซู มาโซะ ปี ดูโดะ เดะ รูมัฮ อูรัก บือดูซา เลอ." 8 ตาปี ซักคียัด บือดีรี มือเลา ฌางัน ตูฮัด เยซู จะ "ลีฮัจ เลอ ตูฮัด ซือบารัก นะ กู ซือมูฮา กู นะ ฮาฆิ ซือตืองัฮ บรี กะ โกะ อูรัก ฮาฌะ. นู กู บือเลฮ กีจอฮ โกะ ซือบารัก นะ ซาปา เตอ กู นะ บรี ปาเระ ลือเบฮ เดะ อีตู ปัจ บาฮาเฆด เลอ." 9 กะฆีเตอ เยซู มือเลา กะ ซือมียา อีตู จะ "อารี อีนี เลอ โกะ ซือมียา ซือรูมัฮ อีนี ฮีโดะ ลือปัซ บาฌิ ดัฮ กรานา-จะ ซือมียา อีนี เตอ ญา ฌาดี บือแนฮ นะ อับราฮัม ฌูฆา. 10 ซาเบะ-จะ กู นู นานะ นะ อูมัจ-ซือมียา อีนี กู มาแรฮ ดัฮ นะ ซารี ซือมียา ซือซัจ ฌาลัด นะ ตูโลก ญา บรี ฮีโดะ ลือปัซ บาฌิ เลอ." เยซู ญา จะ. 11 ตานา กูญา ตืองัฮ ดืองัยํ ลาฆู กะฆีเตอ เยซู บือเลฮ มือเลา ปูลัก ฌาดี ลาฆู จรือตา อาฌัยํ บรี กะ กูญา ดืองัยํ ซาเบะ-จะ เยซู มาแรฮ ดาปิก กะ นังฆรี เยรูซาเลม ดัฮ. กะฆีเตอ กูญา อาคา จะ ตูฮัด เดะ อาตัซ นะ มาแรฮ ปลีฮัจ ฌาดี ราฌา ดัดดัด. 12 กะฆีเตอ เยซู มือเลา จะ "อาดา ซือมียา ซัยํ-บือซัยํ ซืออูรัก นะ ปี กะ นังฆรี ฌาโวฮ บีดา นะ ซาโมจ ปือมือฆัฮ ฌาดี ราฌา เดะ นังฆรี นะ ญา บารู นะ บาลิ ปาเระ มาแรฮ ปูลัก. 13 กะฆีเตอ ญา บลาโลก ปราโซฮ นะ ญา ซือปูโลฮ อูรัก บรี ดูเวะ กะ กูญา ซืออูรัก ซือราตุซ รีเงะ ปีระ. ญา ปือซัด กะ กูญา จะ 'กือนา อาเมด ปี บูวัจ ตาฆัด บีดา นะ ปี บือลี ฌูวัน โกะ ซือบารัก ตือดะ กู นะ ปาเระ มาแรฮ ปูลัก เลอ.' 14 ตาปี ลูมอฮ ซือมียา เดะ นังฆรี กูญา บือชี กะ ซือมียา อีตู. กูญา ซูโรฮ ซือมียา ปี ตูโรจ มือญาเระ จะ 'กามี ตีเมา บรี ซือมียา อีนี มาแรฮ บือบือลา ฌาดี ราฌา นะ กามี เลอ.' 15 "ตานา ญา ซาโมจ ปือมือฆัฮ ฌาดี ราฌา ดัฮ ญา บาลิ มาแรฮ ญา บลาโลก โกะ ปราโซฮ อีตู นู ญา บือเลฮ กีเรบ ตาโรฮ โกะ ดูเวะ เตอ บีดา นะ บือเลฮ ตาฮู จะ กูญา ซูโรฮ ดูเวะ บือลี ฌูวัน บารัก บือเลฮ อูโตก ดีกิ บาญะ ตารา ดีฮา เลอ. 16 โซะ ซือมียา ลามูลา มือญาเระ จะ 'ราฌา เออ ดูเวะ นะ เกา ซือราตุซ รีเงะ อีตู กู บือเลฮ อูโตก ซือรีบู รีเงะ เลอ.' 17 กะฆีเตอ ซือมียา อีตู มือเลา ฌางัน ญา จะ 'บาฌิ ดัฮ เลอ เกา ฌาดี ปราโซฮ นู บาฌิ. กรานา เกา รือมัก ฌางัน โกะ ซือบารัก นู ดีกิ-ตอจ กะฆีเตอ กู นะ บรี กะ เกา อาดา มือฆัฮ บือบือลา ซือปูโลฮ ตูโปะ เลอ.' 18 ปราโซฮ นู ดูวา มาแรฮ มือญาเระ จะ 'ราฌา เออ ดูเวะ นะ เกา ซือราตุซ รีเงะ กู บือเลฮ อูโตก ลีมา ราตุซ รีเงะ เลอ.' 19 กะฆีเตอ ซือมียา อีตู มือเลา ฌางัน ญา ฌูฆา จะ 'เกา โปด นะ บือเลฮ บือบือลา ลีมา ตูโปะ เลอ.' 20 "นู ซืออูรัก มาแรฮ มือญาเระ จะ 'ราฌา เออ นี เลอ ดูเวะ นะ เกา ซือราตุซ รีเงะ กู บือเลฮ บูกุซ ตาโรฮ เดะ กาเยด ดัฮ. 21 ซาเบะ-จะ กู ตาโกจ เดะ เกา กรานา เกา ฌาดี ซือมียา กรัซ. เกา มูงอจ บาฮาเฆด นู เกา ฮอย เตด บือเลฮ ตรือเบะ อูรัจ เกา กือตับ ปาดี นู เกา ฮอย เตด บือเลฮ ตานัม เลอ.' 22 ราฌา ตีกัฮ กะ ญา จะ 'เกา เออ ปราโซฮ นู ฌาฮัจ เลอ กู นะ อาเมด ปือมือเลา นะ เกา ตะอาซิก มาแรฮ กรัจ ฮูโกบ เกา เลอ. เกา ตาฮู ดัฮ จะ กู ฌาดี ซือมียา กรัซ มูงอจ บาฮาเฆด นู กู ฮอย เตด บือเลฮ ตรือเบะ อูรัจ กือตับ ปาดี นู กู ฮอย เตด บือเลฮ ตานัม. 23 ซาเบะ กะฆีเตอ เลอ บูวัจ นามา เกา ฮอย เตด บือเลฮ กีเรบ ดูเวะ นะ กู ตาโรฮ เดะ รูมัฮ กีเรบ ดูเวะ เตอ? กะฆีเตอ วะตู กู มาแรฮ กู นะ บือเลฮ อาเมด ดูเวะ อีตู ฌางัน บูงา นะ ญา ซามา เลอ.' 24 กะฆีเตอ ราฌา ปือซัด กะ ซือมียา นู บือดีรี โซะ อีตู จะ 'กือนา อาเมด ดูเวะ เดะ ซือมียา นู อาดา ซือราตุซ รีเงะ อีตู บือปี อาตัจ บรี กะ ซือมียา นู อาดา ซือรีบู รีเงะ เลอ.' 25 โซะ ซือมียา อีตู มือเลา จะ 'ราฌา เออ ญา อาดา ดูเวะ ซือรีบู รีเงะ ดัฮ.' 26 ญา ตีกัฮ จะ 'กู มือญาเระ กะ กาเญา จะ ราตา ซือมียา นู อาดา ซือตืองัฮ ดัฮ นะ บือตามัฮ บรี กะ ญา ลาฆี. ตาปี ซือมียา ดีฮา นู ฮอย มีเซ-จะ นู ญา อาดา เตอ นะ กือนา อาเมด ปี เดะ ญา เลอ. 27 ตาปี โซะ ลูมอฮ ซือตรู นะ กู นู ตีเมา บรี กู บือบือลา ฌาดี ราฌา นะ กูญา เตอ กือนา บาวา กูญา มาแรฮ กะ อีนี บูนอฮ กูญา โซะ ฮึลด มูคา นะ กู เลอ.' ราฌา ญา จะ." 28 ตานา มือเลา ปือมือเลา กะฆีเตอ ดัฮ เยซู ญา ฌาลัด ดูลู โซะ ฮึลด บาวา กูญา ปี กะ นังฆรี เยรูซาเลม. 29 กะฆีเตอ ตานา มาแรฮ ดาปิก ตูโปะ เบดฟายี ฌางัน ตูโปะ เบดทานี เดะ บูเกะ นู บลาโลก จะ บูเกะ กือดูโนด เตอ เยซู ญา ซูโรฮ มูเระ ดูวา อูรัก ปี ดูลู 30 ปือซัด จะ "กือนา มาโซะ ตูโปะ โซะ ฮึลด อีตู. มาโซะ ดัฮ กาเญา นะ ดาปัจ อานะ กูดา ซืออีโกยํ นู กือนา อีกัจ ดัฮ. อานะ กูดา อีตู เตอ ฮอย ซาปา ดือละ ญาแญะ. กือนา อูฆัย อีเระ มาแรฮ กะ อีนี เลอ. 31 ดัฮ ซือมียา ดีฮา ตาญา จะ 'กาเญา อูฆัย บูวัจ นามา?' กือนา จาเระ จะ 'ซาเบะ ตูฮัด นะ อาเมด ซูโรฮ เลอ.' " เยซู ญา จะ. 32 กะฆีเตอ มูเระ นู เยซู ซูโรฮ ปี เตอ กูญา ปี ดัฮ ดาปัจ ลาฆู นู ซือรูปา บือกะ เยซู บือเลฮ มือเลา เลอ. 33 ตานา กูญา อูฆัย อานะ กูดา อีตู โกะ ตูฮัด กูดา กูญา ตาญา จะ "กาเญา อูฆัย อานะ กูดา บูวัจ นามา เลอ?" 34 กูญา ตีกัฮ จะ "ซาเบะ ตูฮัด นะ อาเมด ซูโรฮ เลอ." 35 กะฆีเตอ กูญา อีเระ อานะ กูดา มาแรฮ รอจ กะ เยซู. กูญา อาเมด บาฌู นะ กูญา อาปัยํ เดะ บลากัก กูดา. กูญา บรี เยซู ญาแญะ ดูโดะ เดะ อานะ กูดา อีตู. 36 ตานา เยซู ปี โกะ ซือมียา กูญา อาปัยํ บาฌู นะ กูญา เดะ ฌาลัด. 37 ตานา ญา มาแรฮ ดาปิก นังฆรี เยรูซาเลม รอจ กะ ฌาลัด นู ตูโรด เดะ บูเกะ กือดูโนด เตอ โกะ ลูมอฮ มูเระ ซือมูฮา บาญะ อูรัก กูญา ซูกา-ฮาตี ซูโงฮ มือโอจ กะ ตูฮัด เดะ อาตัซ ซูวารา บูริ ซาเบะ ลีฮัจ ลาฆู มือฆัฮ ซือมูฮา นู เยซู บือเลฮ บูวัจ ดัฮ. 38 กูญา มือเลา จะ "ซือลามัจ เลอ ราฌา นู มาแรฮ เดะ นามา นะ ตูฮัด เดะ อาตัซ. ซือนัง ซือลามัจ เลอ เดะ โซะ อาตัซ ลาแงะ. ปูฌี กะ ตูฮัด นู ตีงี เดะ อาตัซ ซูโงฮ." 39 เดะ ลูมอฮ ซือมียา บาญะ อีตู อาดา โกะ ลูมอฮ ฟาริซี ซือตืองัฮ. กูญา มือเลา ฌางัน เยซู จะ "บูมอยํ เออ กือนา บลารัก ลูมอฮ มูเระ นะ เกา เลอ." 40 ตาปี เยซู ตีกัฮ จะ "กู มือญาเระ กะ กาเญา จะ ดัฮ ลูมอฮ อีนี นะ ซืองะ ลูมอฮ บาตู โปด นะ อาดา บือซูระ บูริ ลาฆี." 41 ตานา มาแรฮ ดาปิก บือกะ นะ ลีฮัจ บือฆารี นังฆรี เยรูซาเลม เตอ เยซู ญา มือนาแงฮ บรีงัจ ตือจีฮัด กะ นังฆรี อีตู. 42 ญา จะ "เออ ดัฮ เกา บือเลฮ ตาฮู เดะ อารี อีนี จะ ลาฆู นามา นู นะ บรี ดูโดะ ซือนัง ซือลามัจ เตอ กะฆีเตอ เลอ บาฌิ. ตาปี วะตู อีนี ลาฆู อีตู บูนี ตาโรฮ เดะ มาตา นะ เกา ดัฮ. 43 กรานา-จะ อาดา ซา อารี นู นะ มาแรฮ เตอ ตานา โกะ ซือตรู นะ เกา ญา บูวัจ รูมัฮ บือปรัก กือลีลิก เกา ปาฆัยํ กานัก เกา ตาโรฮ ตีเมา บรี ซาปา มาโซะ ปี ตรือเบะ มาแรฮ ราตา ตือปัจ. 44 กะฆีเตอ กูญา นะ ปรูโตฮ เกา บรี ซามา ซือรูปา บือกะ ตานัฮ นะ บูนอฮ โกะ นานะ นะ เกา ซือมูฮา นู ดูโดะ เดะ เกา. กูญา นะ ตีเมา บรี อาดา บาตู บือซูโซด เดะ ดาลับ เกา ลาลู ซาเบะ-จะ เกา ฮอย เตด ตาฮู วะตู นู ตูฮัด บือเลฮ มาแรฮ ตูโลก เกา." เยซู ญา จะ. 45 ลือปัซ อีตู เยซู ญา มาโซะ ปี กะ ดาลับ รูมัฮ มือญือมัฮ ตูฮัด ญา โปรฮ โกะ ซือมียา นู ฌูวัน โกะ ซือบารัก เดะ ลามัน รูมัฮ อีตู. 46 ญา มือเลา กะ กูญา จะ "อาดา ฆาแรฮ ดัฮ เดะ ซูรัจ ปือมือเลา นะ ตูฮัด จะ 'รูมัฮ นะ กู นะ ฌาดี รูมัฮ ตือปัจ บือซาโวจ กะ ตูฮัด.' ตาปี กาเญา บือเลฮ บูวัจ บรี ฌาดี บือกะ ซารัก ลูมอฮ อูรัก ปือญามุน เลอ." เยซู ญา จะ. 47 เยซู ญา อาดา อาฌัยํ เดะ รูมัฮ มือญือมัฮ ตูฮัด บีลัก อารี. ตาปี ลูมอฮ ซามี ซัยํ-บือซัยํ ฌางัน โกะ ซือมียา อาฌัยํ ลาฆู ปือมือซัด นะ ตูฮัด โกะ ซือมียา ซัยํ-บือซัยํ ฌูฆา เตอ กูญา มียา จือลัฮ นะ บูนอฮ เยซู บูวัก. 48 ตาปี เตด ดาปัจ จือลัฮ นะ บูวัจ นามา เตด บือเลฮ เลอ. ซาเบะ-จะ โกะ ซือมียา ซือมูฮา กูญา ซูกา นะ มือนีงัย กะ เยซู บาญะ.
1 อาดา ซืออารี เยซู ญา ตืองัฮ อาฌัยํ โกะ ซือมียา เดะ รูมัฮ มือญือมัฮ ตูฮัด มือญาเระ บรีตา นู บาฌิ นะ ตูฮัด เตอ โกะ ลูมอฮ ซามี ซัยํ-บือซัยํ โกะ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ อูรัก ตูฮา เตอ กูญา ปาคัจ มาแรฮ 2 มือเลา ฌางัน เยซู จะ "กือนา มือญาเระ กะ ลูมอฮ กามี เลอ เกา บูวัจ ลาฆู กะฆีนี ฌางัน ปือมือฆัฮ นู ดีฮา? จะ ซาปา บือเลฮ บรี กะ เกา บูวัจ ลาฆู กะฆีนี เลอ?" 3 เยซู ญา ตีกัฮ กะ กูญา จะ "กู โปด นะ ตาญา กาเญา ซา ลาฆู ฌูฆา. กาเญา กือนา มือญาเระ กะ กู เลอ 4 จะ นู โยฮัน บรี ซือมียา ซือลับ เดะ อาเย เตอ ฌาดี ลาฆู ดาตัก เดะ โซะ ลาแงะ เฆอ-จะ ดาตัก เดะ โกะ อูมัจ-ซือมียา?" 5 กะฆีเตอ กูญา ปาคัจ บือกีรา ซามา กูญา จะ "ดัฮ กีตา จะ 'ดาตัก เดะ โซะ ลาแงะ' ญา นะ ตาญา กีตา จะ 'ซาเบะ นามา กาเญา เตด บือเลฮ ปือจายา กะ โยฮัน เลอ?' 6 ตาปี ดัฮ กีตา มือเลา จะ 'ดาตัก เดะ โกะ อูมัจ-ซือมียา' โกะ ซือมียา บาญะ นะ อาเมด บาตู ลีปัยํ กีตา กรานา-จะ โกะ ซือมียา ซือมูฮา กูญา ตือตู-ฮาตี จะ โยฮัน ฌาดี ซือมียา ตูโดฮ ลาฆู นะ ตูฮัด." 7 กะฆีเตอ กูญา มือเลา จะ "กามี เตด ตาฮู จะ มาแรฮ ดาตัก ปัจ ดีฮา เลอ." 8 เยซู ตีกัฮ กะ กูญา จะ "กะฆีเตอ กู เตด มือญาเระ กะ กาเญา ฌูฆา จะ ลาฆู กู บูวัจ กะฆีนี บูวัจ ฌางัน ปือมือฆัฮ นู ดีฮา." 9 กะฆีเตอ เยซู ญา ฮึนตะ นะ มือเลา จรือตา อาฌัยํ โกะ ลูมอฮ ซือมียา กะฆีนี จะ "อาดา ซือมียา ซืออูรัก ญา บูวัจ กือโบด ตานัม ปูโฮด อางุน บรี กะ ซือมียา กรือฌา กือโบด ซีวา. ตาปี อีซี ญา เตอ ปี กะ นังฆรี อาซิก ลามา ดัฮ. 10 ตานา รอจ วะตู มูเซด บือบูวัฮ เตอ ตูฮัด กือโบด ญา ซูโรฮ ปราโซฮ ซืออูรัก ปี มียา ซือมียา นู ซีวา กือโบด บีดา กูญา นะ ปาฮาฆิ ฮาบด นะ ญา เดะ บูวัฮ อางุน อีตู. ตาปี โกะ ซือมียา นู ซีวา กือโบด กูญา กาเตาะ ปราโซฮ อีตู บรี ญา บาลิ ซา ญาวา ฮอย นามา เลอ. 11 กะฆีเตอ ตูฮัด กือโบด ญา ซูโรฮ ปราโซฮ นู อาซิก ปี ปูลัก. ตาปี โกะ ซือมียา นู ซีวา กือโบด กูญา กาเตาะ บูวัจ แนฮ-ฌือแนฮ บรี กะ ปราโซฮ อีตู จือและ โปรฮ ญา บาลิ ซา ญาวา ฮอย นามา ฌูฆา. 12 กะฆีเตอ ตูฮัด กือโบด ญา ซูโรฮ ซือมียา นู ตีฆา ปี ปูลัก. ตาปี โกะ ซือมียา อีตู กูญา กาเตาะ ญาวา นะ ญา บรี ซาเกะ ตูละ บูวัก โซะ ลูวัยํ กือโบด. 13 โซะ ตูฮัด กือโบด อางุน มือเลา จะ 'กู นะ บูวัจ กะฮามี บาฌิ? อาดา นานะ นะ กู นู กู ซายัก ซูโงฮ กู นะ ซูโรฮ ญา ปี. ตาโกจ-จะ กูญา นะ ตูเฮะ กะ ญา เลอ.' 14 ตาปี ตานา ลูมอฮ ซือมียา ซีวา กือโบด กูญา ลีฮัจ นานะ นะ ตูฮัด กือโบด เตอ กูญา มือเลา ซามา กูญา จะ 'ญา เลอ ฌาดี นานะ นะ ตูฮัด กือโบด นู นะ ซาโมจ ปือซากา. บรี กีตา บูนอฮ บูวัก เลอ บีดา-จะ กือโบด อีนี นะ บือเลฮ ฌาดี ปือซากา นะ กีตา.' 15 กะฆีเตอ กูญา ตูละ ญา บือตรือเบะ โซะ ลูวัยํ กือโบด บูนอฮ บูวัก ดัฮ. "กะฆีเตอ ตูฮัด กือโบด อางุน ญา นะ บูวัจ กะฮามี ฌางัน กูญา อีตู? 16 ญา นะ มาแรฮ บูนอฮ ซือมียา นู ซีวา กือโบด อางุน บูวัก นะ อาเมด กือโบด อางุน อีตู บรี กะ ซือมียา อาซิก ซีวา." เยซู ญา จะ. โกะ ซือมียา ตานา กูญา ดืองัยํ กะฆีเตอ กูญา มือเลา จะ "ฌางัน บรี ฌาดี กะฆีเตอ เลอ." 17 โซะ เยซู ตีญูง ลีฮัจ กูญา มือเลา จะ "กะฆีเตอ ฌาดี กะฮามี เลอ ตือนอซ นู ฆาแรฮ เดะ ซูรัจ ปือมือเลา นะ ตูฮัด นู จะ บาตู บือซัยํ นู ตูกัก กรือฌา รูมัฮ ตีงัน บูวัก ดัฮ บาตู อีตู เลอ ปาเระ มาแรฮ ฌาดี บาตู กือปาลา ซาฆี ดัฮ. 18 ซือมียา ดีฮา รือบัฮ ตือกัด บาตู อีตู นะ ปือจัฮ-บือลัฮ ดัฮ. ตาปี ดัฮ บาตู อีตู ฆูโฆยํ ตือกัด ซือมียา ดีฮา ซือมียา อีตู นะ ฮาโจยํ ปี ฮาบิฮ เลอ." 19 โซะ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ ซามี ซัยํ-บือซัยํ กูญา กูวาซา นะ รีฆะ เยซู เดะ วะตู อีตู ซาเบะ กูญา ลีฮัจ จะ เยซู บือเลฮ มือเลา จรือตา กะฆีเตอ ตูโญะ กะ กูญา ตะอาซิก. ตาปี กูญา ตาโกจ โกะ ลูมอฮ ซือมียา เลอ. 20 กะฆีเตอ กูญา มียา จือลัฮ ซูโรฮ ซือมียา ปี ซาซัจ มือลูปา ฌาดี ซือมียา บาฌิ จาดัก นะ รีฆะ อาเมด ซาลัฮ เดะ ปือมือเลา นะ เยซู บีดา นะ อาตัจ ญา ปี ดูโดะ เดะ บาวัฮ ฮูโกบ นะ ราฌา. 21 โกะ ซือมียา อีตู กูญา ตาญา เยซู จะ " บูมอยํ เออ กามี ตาฮู จะ เกา มือเลา อาฌัยํ เตอ ฌาดี ลาฆู รือมัก ซูโงฮ เลอ ฮอย เตด ปีเลฮ มูคา ซือมียา ดีฮา ตาปี อาฌัยํ ปาซัน ฌาลัด นะ ตูฮัด เดะ อาตัซ โงฮ-ซูโงฮ เลอ. 22 นู กีตา บายัยํ อาเซน กะ ราฌา ซีซา เตอ รือมัก ฌางัน ปือมือเลา ฮูโกบ นะ ตูฮัด เฆอ เตด?" 23 ตาปี เยซู ญา ตาฮู ลาฆู บาอากัน นะ กูญา ญา มือเลา ฌางัน กูญา จะ 24 "กือนา อาเมด ดูเวะ ซา รีเงะ บรี กะ กู ลีฮัจ เลอ. รูปา อีนี ฌาดี นะ ซาปา? ปือนามา ฆาแรฮ อีนี ฌาดี นะ ซาปา เลอ?" กูญา ตีกัฮ จะ "นะ ราฌา ซีซา เลอ." 25 เยซู ตีกัฮ กะ กูญา จะ "ซือบารัก นะ ราฌา ซีซา กือนา มือญือมัฮ กะ ซีซา. ซือบารัก นะ ตูฮัด กือนา อาเกะ มือญือมัฮ กะ ตูฮัด เลอ." 26 โกะ ซือมียา อีตู นะ รีฆะ ซาลัฮ เดะ ปือมือเลา นะ เยซู โซะ ฮึลด มูคา โกะ ซือมียา ฮอย เตด บือเลฮ ดัฮ. กูญา ปาคัจ ปือและ-ฮาตี เดะ ปือมือเลา ตีกัฮ นะ เยซู. กะฆีเตอ กูญา ซืองะ ดัฮ. 27 อาดา ลูมอฮ ซะดูซี ซือตืองัฮ มาแรฮ ซารี เยซู. ลูมอฮ ซะดูซี อีตู กูญา จะ ลาฆู ฮีโดะ ปาเระ เดะ มาตี เตอ ฮอย ลาลู. 28 กะฆีเตอ กูญา ตาญา เยซู จะ "บูมอยํ เออ มูซา บือเลฮ ฆาแรฮ ซูรัจ กาลา นูตู ปือซัด กะ กีตา จะ 'ดัฮ กีลากี ซือมียา ดีฮา มาตี อาดา บีนี ตาปี ฮอย นานะ ลาฆี บรี อาดี เดะ ญา ซืออูรัก อาเมด กากา อีปัย อีตู ฌาดี บีนี นะ ญา บีดา นะ บือเลฮ นานะ นู นะ ฌาดี บือแนฮ นะ กากา เดะ ญา เลอ.' 29 นี เลอ อาดา โกะ ดีบราดี ตูโฌฮ อูรัก. นู ซูโลก บือเลฮ บีนี ดัฮ ตาปี มาตี ฮอย นานะ. 30 กะฆีเตอ อาดี นู ดูวา 31 นู ตีฆา โปด กูญา ซาโมจ กากา อีปัย บรี ฌาดี บีนี นะ กูญา. กือตูโฌฮ อูรัก ซาโมจ กะฆีเตอ ฌูฆา ตาปี กูญา มาตี ฮอย นานะ ฮาปา เลอ. 32 เดะ บลากัก นีบีนี อีตู โปด ญา มาตี ฌูฆา ดัฮ. 33 กะฆีเตอ เลอ ตานา รอจ วะตู นู โกะ ซือมียา นะ ฮีโดะ ปาเระ เดะ มาตี เตอ นีบีนี อีตู นะ ฌาดี บีนี นะ ซาปา เลอ? กรานา-จะ กูญา กือตูโฌฮ บือเลฮ ซาโมจ ญา ฌาดี บีนี นะ กูญา ซือมูฮา ดัฮ." 34 เยซู มือเลา ตีกัฮ กะ กูญา จะ "โกะ ซือมียา ฮาดัจ อีนี กูญา มือนีกัฮ กูญา อาเกะ บรี ฌาดี ลากี บีนี เตอ. 35 ตาปี โซะ ซือมียา อีตู นู ปาโตจ นะ มาโซะ รอจ กะ ฮาดัจ โซะ ฮึลด นะ ฮีโดะ ปาเระ เดะ มาตี โปด กูญา เตด มือนีกัฮ ปูลัก กูญา เตด อาเกะ บรี ฌาดี ลากี บีนี ดัฮ เลอ. 36 ซาเบะ-จะ กูญา นะ มาตี ปูลัก ฮอย เตด บือเลฮ เลอ. กูญา ซือรูปา บือกะ โกะ ฮูลู-บาลัก ฌาดี นานะ นะ ตูฮัด เดะ อาตัซ ดัฮ กรานา-จะ กูญา ฌาดี ซือมียา นู ฮีโดะ ปาเระ เดะ มาตี ดัฮ. 37 ตาปี นู ซือมียา มาตี นะ ฮีโดะ ปาเระ เตอ มูซา บือเลฮ มือญาเระ บรี ลีฮัจ เดะ ซือปาตัฮ ปาซัน ลาฆู รือบา กายู นู บือญาลา อาปี เตอ. นู ญา บลาโลก กะ ตูฮัด จะ ฌาดี ตูฮัด นะ โกะ อับราฮัม ตูฮัด นะ อีซัก ตูฮัด นะ ยาโกบ เลอ. 38 ซาเบะ-จะ ตูฮัด เดะ อาตัซ ญา บูกัด ตูฮัด นะ ซือมียา นู ฮาบิฮ มาตี ดัฮ ตาปี ญา ฌาดี ตูฮัด นะ ซือมียา นู อาดา ฮีโดะ. กรานา ซา ตูฮัด เตอ โกะ ซือมียา ราตา อาดา ฮีโดะ เลอ. 39 โกะ ซือมียา อาฌัยํ ลาฆู ปือมือซัด นะ ตูฮัด ซือตืองัฮ มือเลา กะ เยซู จะ "บูมอยํ เออ เกา มือเลา บาฌิ ดัฮ เลอ." 40 ซาเบะ-จะ โกะ ลูมอฮ ซะดูซี เตด ตือฆามะ นะ ตาญา เยซู ปูลัก ดัฮ เลอ. 41 กะฆีเตอ เยซู ตาญา กูญา จะ "นู โกะ ซือมียา กูญา มือเลา จะ ' ราฌา นู บรี ซือลามัจ ฌาดี บือแนฮ นะ ราฌา ดาวิด.' นะ บือเลฮ กะฮามี เลอ? 42 กรานา-จะ ราฌา ดาวิด ตะอาซิก ญา บือเลฮ มือเลา เดะ ซูรัจ มือญาญี ปูฌี ตูฮัด จะ 'ตูฮัด บือซัยํ เดะ อาตัซ มือเลา ฌางัน ตูฮัด นะ กู จะ ดูโดะ เลอ โซะ ซือบือลัฮ กานัน นะ กู 43 ตือดะ กู นะ บูวัจ บรี ลูมอฮ ซือตรู นะ เกา นะ ฌาดี บือกะ ปาปัด นู ซาโมจ ตาปะ กากี นะ เกา.' ดาวิด ญา จะ. 44 ราฌา ดาวิด ญา บลาโลก ราฌา นู บรี ซือลามัจ อีตู จะ 'ตูฮัด'. กะฆีเตอ ญา นะ ฌาดี บือแนฮ นะ ดาวิด บือเลฮ กะฮามี เลอ?" เยซู ญา จะ. 45 ตานา โกะ ซือมียา ซือมูฮา มือนีงัย เตอ เยซู ญา มือเลา ฌางัน โกะ มูเระ นะ ญา จะ 46 "กือนา ฌาฆา บรี บาฌิ เลอ โกะ ซือมียา อาฌัยํ ลาฆู ปือมือซัด นะ ตูฮัด. กูญา ซูกา ปือแญะ บาฌู ปาญัก บือฌาลัด ปี มาแรฮ ซูกา บรี โกะ ซือมียา มือนูโนะ ซือมัฮ กะ กูญา เดะ ตืองัฮ ปาฌะ อีกัด เตอ. เดะ รูมัฮ บือมุน เตอ เดะ ลาฆู มากัด บรามัย โปด กูญา ซูกา นะ ดูโดะ เดะ ตือปัจ นู บาฌิ เดะ กาวัด. 47 กูญา ราปัซ อาเมด โกะ ซือบารัก โกะ รูมัฮ นะ นีบีนี ฌานา เตอ ตาปี กูญา ซืองาฌา บือซาโวจ ปาญักๆ เลอ. โกะ ซือมียา กะฆีนี กูญา นะ กือนา กรัจ ฮูโกบ ลือเบฮ เดะ กาวัด." เยซู ญา จะ.
1 เยซู ญา ลางอฮ ปาลา ลีฮัจ โกะ อูรัก กายา กูญา ปาคัจ มาแรฮ บอฮ ดูเวะ เดะ ปือตี ตาโรฮ ดูเวะ มือญือมัฮ กะ ตูฮัด. 2 ญา ลีฮัจ นีบีนี ฌานา ซืออูรัก นู ฌาดี ซือมียา ฮาฌะ ญา อาเมด ดูเวะ ตือมาฆา ดูวา รีเงะ มาแรฮ บอฮ เดะ ปือตี ฌูฆา. 3 กะฆีเตอ เยซู มือเลา จะ "กู มือญาเระ กะ กาเญา ลาฆู นู ซูโงฮ จะ นีบีนี ฌานา นู ฮาฌะ อีนี ญา บือเลฮ มือญือมัฮ ดูเวะ กะ ตูฮัด บาญะ ลือเบฮ เดะ กูญา ซือมูฮา เลอ. 4 กรานา-จะ กูญา อีตู ซือมูฮา กูญา อาดา บาญะ กูญา อาเมด ดูเวะ ลือเบฮ เดะ ซูโรฮ นะ กูญา มาแรฮ มือญือมัฮ. ตาปี นีบีนี ฌานา อีนี ญา ฮาฌะ โตระ เตอ นู ดูเวะ ญา อาดา บีดา มากัด ญา บือเลฮ อาเมด มาแรฮ มือญือมัฮ ฮาบิฮ ซือมูฮา เลอ." ญา จะ. 5 อาดา โกะ ซือมียา ซือตืองัฮ มือเลา มือโอจ กะ รูมัฮ มือญือมัฮ ตูฮัด จะ บือเลฮ ปือตัด บรี บือฆาจะ ฌางัน โกะ บาตู บาฌิ ฌางัน โกะ ซือบารัก มือญือมัฮ เตอ. กะฆีเตอ เยซู ตีกัฮ จะ 6 "โกะ ซือบารัก อีนี นู กาเญา ลีฮัจ เตอ อาดา ซืออารี ฮอย บาตู ซือกือโตน โปด นู นะ บือซูโซด-ซูโซด กะฆีนี เตอ กือนา นะ ปรูโตฮ ฮาบิฮ ซือมูฮา เลอ." 7 กะฆีเตอ กูญา ตาญา เยซู จะ "บูมอยํ เออ ลาฆู กะฆีนี นะ บือฌาดี กาลา? อาดา ปือนานา นามา นู นะ บรี ลีฮัจ จะ ลาฆู อีนี นะ บือฌาดี ดัฮ?" 8 กะฆีเตอ เยซู มือเลา จะ "กือนา ฌาฆา บรี บาฌิ เลอ ฌางัน บรี ซาปา ตีปู กาเญา บรี ซือซัจ ฌาลัด. กรานา-จะ ซือมียา บาญะ นะ อาเกะ ซือโบจ นามา นะ กู มาแรฮ มือเลา จะ 'กู นี ฌาดี ซือมียา อีตู เลอ' มือเลา จะ 'วะตู อีตู ดาปิก นะ รอจ ดัฮ.' กาเญา ฌางัน ปี ตูโรจ กะ กูญา เลอ. 9 ตานา กาเญา ดืองัยํ จะ อาดา ลาฆู บือปรัก ลาฆู จาเจา โซะ อีตู โซะ อีนี กาเญา ฌางัน ตือกือฌุจ เลอ ซาเบะ-จะ ลาฆู กะฆีเตอ ฆาโดฮ บือฌาดี ดูลู ตาปี วะตู ปือญูดัฮ ฮอย เตด รอจ ดัดดัด ลาฆี." 10 กะฆีเตอ เยซู มือเลา กะ กูญา ปูลัก จะ "นะ อาดา ลาฆู บลาวัด ลูมอฮ อีนี นะ บลาวัด ฌางัน ลูมอฮ อีตู. นังฆรี โซะ อีนี นะ บลาวัด ฌางัน นังฆรี โซะ อีตู. 11 นะ ฌาดี ตานัฮ บือฆาญะ บือซัยํ. บาญะ ตือปัจ เตอ โกะ ซือมียา นะ บือตาฮัด บารัก มากัด นะ อาดา ปือญาเกะ แนฮ-ฌือแนฮ. นะ ฌาดี ลาฆู ซูซัฮ ตาโกจ โตระ ฌางัน โกะ ปือนานา มือฆัฮ ซูโงฮ ดาตัก เดะ ลาแงะ เลอ. 12 "ตาปี ดูลู เดะ ลาฆู อีตู นะ บือฌาดี เตอ กูญา นะ รีฆะ กาเญา นะ ปรือกัด กาเญา. กูญา นะ อาตัจ กาเญา บรี กะ โกะ รูมัฮ บือมุน กะ โกะ ปือฌารา โปด. กูญา นะ บาวา กาเญา บือปี กะ ฮึลด มูคา นะ โกะ ราฌา โกะ ซือมียา ซัยํ-บือซัยํ กรานา กาเญา ตูเฮะ กะ นามา นะ กู. 13 ลาฆู อีตู นะ ฌาดี จือลัฮ บรี กะ กาเญา นะ บือเลฮ มือเลา ฌาดี ซะซี นะ กู. 14 ซาเบะ กะฆีเตอ กาเญา กือนา นะ บรีงัจ บรี ตือตู-ฮาตี จะ นะ ฮอย เตด บรีงัจ ดูลู นู นะ บือปูลัซ ญาวา ตะอาซิก กะฮามี. 15 กรานา-จะ กู เลอ นะ บรี กะ กาเญา ปานัย มือเลา ฌางัน ลาฆู อากัน เตอ นู ซือตรู นะ กาเญา บลารัก บลาวัด เตด บือเลฮ เลอ. 16 ตาปี โกะ มะ ปะ นะบรานะ โกะ อาดี ฆูๆ นะ กาเญา นะ รีฆะ กาเญา อาตัจ กะ กูญา. กูญา นะ บูนอฮ ซือมียา ซือตืองัฮ เดะ ลูมอฮ กาเญา บูวัก. 17 โกะ ซือมียา ซือมูฮา นะ บือชี กะ กาเญา กรานา กาเญา ตูเฮะ กะ นามา นะ กู เลอ. 18 ตาปี-จะ โบะ นะ กาเญา ซา อูรัจ โปด นะ บรี ฆูรก เตด บือเลฮ เลอ. 19 ดัฮ กาเญา ลาวัด ตาฮัด ซูซัฮ เตอ กะฆีเตอ กาเญา นะ บือเลฮ ฮีโดะ ซือลาลู." 20 เยซู มือเลา ลาฆี จะ "ตานา กาเญา ลีฮัจ กาวัด ตาฮัน มาแรฮ ตืองะ กือลีลิก เดะ นังฆรี เยรูซาเลม วะตู อีตู เตอ กาเญา กือนา ตาฮู ดัฮ จะ ลาฆู ฌาฮานัม นะ นังฆรี อีตู มาแรฮ ดาปิก ดัฮ. 21 ตานา ลีฮัจ ดัฮ บรี โกะ ซือมียา เดะ นังฆรี ยูเดีย ลารี ปี กะ โซะ บูเกะ เลอ. โกะ ซือมียา นู ดูโดะ เดะ ดาลับ นังฆรี บรี กูญา ตรือเบะ ปี เลอ โกะ ซือมียา นู ดูโดะ โซะ ลูวัยํ นังฆรี เตอ ฌางัน บรี กูญา มาโซะ กะ ดาลับ นังฆรี. 22 ซาเบะ-จะ วะตู อีตู ฌาดี อารี บูวัจ บาลัซ บีดา นะ บรี โกะ ซือบารัก แนฮ-ฌือแนฮ นู ฆาแรฮ ตาโรฮ ดัฮ เดะ ซูรัจ ปือมือเลา นะ ตูฮัด นะ ฌาดี รือมัก ซุจ ดัฮ. 23 เดะ กาลา อีตู ซูซัฮ โตระ เลอ โกะ นีบีนี บือโปรจ โกะ นีบีนี นู อาดา นานะ มูดา นู ตืองัฮ มากัด ดาดา ลาฆี ซาเบะ-จะ นะ อาดา ลาฆู ซูซัฮ ปายัฮ โตระ โซะ นังฆรี อีนี. ตูฮัด เดะ อาตัซ นะ มูซัยํ กรัจ ฮูโกบ กะ ลูมอฮ ซือมียา อีนี เลอ. 24 กูญา นะ กือนา บูนอฮ ฌางัน ปือดัก นะ กือนา บาวา บือปี ฌาดี ฮามา เดะ ราตา นังฆรี. โกะ ซือมียา ลูมอฮ บักซา อาซิก นะ ปรือกัด นังฆรี เยรูซาเลม ตือดะ รอจ วะตู อีตู นู ฮาดัจ นะ ลูมอฮ บักซา อาซิก ฆือนะ ฮาบิฮ ดัฮ." 25 "กะฆีเตอ นะ อาดา ปือนานา บรี ลีฮัจ โซะ มาตาอารี โซะ บูลัด โซะ บีตัก เตอ. เดะ โซะ ดือนียา โปด โกะ ซือมียา นะ ฆาโดฮ-ฮาตี ซือบะ ฮาบิฮ ราตา นังฆรี ซาเบะ บูงี ซูวารา บาฮานา ฆือลูมัก บือซัยํ เดะ ลาโวจ เลอ. 26 โกะ อูมัจ-ซือมียา นะ เตด ตาฮู อารัฮ กรานา กูญา ตาโกจ โตระ ซาเบะ นาตี ลีฮัจ ลาฆู นู นะ บือฌาดี เดะ โซะ ดือนียา. กรานา โกะ ลาฆู ปือมือฆัฮ เดะ โซะ ลาแงะ นะ บรีเงาะ บือฆาญะ. 27 วะตู อีตู โกะ ซือมียา ซือมูฮา นะ ลีฮัจ กู นู นานะ นะ อูมัจ-ซือมียา อีนี กู นะ มาแรฮ เดะ อาตัซ กือมูวัง มาแรฮ ฌางัน ปือมือฆัฮ ฌางัน นู บือซรี บือซายา บาฌิ ซูโงฮ เลอ. 28 กาลา ลาฆู อีตู ซือมูฮา ฮึนตะ นะ บือฌาดี เตอ กาเญา กือนา บีกัซ ลางอฮ ปาลา ซาเบะ-จะ ลาฆู นู กาเญา นะ กือนา มือนือบุซ บรี ลือปัซ ญา มาแรฮ ดาปิก ดัฮ. 29 กะฆีเตอ เยซู มือเลา จรือตา อาฌัยํ กูญา กะฆีนี จะ "กือนา ลีฮัจ ปูโฮด กรายา-บูดี ฌางัน โกะ ปูโฮด กายู ซิก-อาซิก เลอ. 30 ตานา ปูโฮด ญา บารู ตรือเบะ ดาโวด เตอ กาเญา นะ ลีฮัจ ตาฮู ตะอาซิก จะ มูเซด ฮางัจ ดาปิก นะ รอจ ดัฮ. 31 กะฆีเตอ ฌูฆา ตานา กาเญา นะ ลีฮัจ ลาฆู ซูซัฮ กะฆีเตอ บือฌาดี มาแรฮ กาเญา นะ ตาฮู จะ ตูฮัด ฆามะ นะ มาแรฮ บือบือลา ฌาดี ราฌา ดัฮ เลอ. 32 กู มือญาเระ กะ กาเญา ลาฆู นู ซูโงฮ จะ โกะ ซือมียา ฮาดัจ อีนี นะ ฮอย เตด มือนีงัน ปี ดูลู เดะ ลาฆู ซือมูฮา อีตู นะ บือฌาดี มาแรฮ. 33 ลาแงะ ฌางัน ดือนียา นะ ลือแงะ ปี ฮาบิฮ ดัฮ ตาปี ปือมือเลา นะ กู นะ ฮอย เตด ลือแงะ ลาลู เลอ. 34 "ตาปี กือนา ฌาฆา ญาวา บรี บาฌิ ตาโกจ-จะ ฮาตี กาเญา นะ ฆาโดฮ ฌางัน ลาฆู มากัด บาญะ โอะ อาระ ยู มาโบะ ฆาโดฮ-ฮาตี เดะ ลาฆู อารีๆ เลอ ดัฮ. กะฆีเตอ อารี อีตู นะ มาแรฮ รอจ กะ กาเญา บือกะ ปือมีเตฮ กาลา กาเญา เตด ดัด นะ บรีงัจ เลอ. 35 ซาเบะ อารี อีตู นะ มาแรฮ รอจ โกะ ซือมียา นู ดูโดะ ราตา เดะ โซะ ดือนียา. 36 กะฆีเตอ กือนา บือซาโวจ บีลัก วะตู บีดา กาเญา นะ ลือปัซ เดะ ลาฆู ซือมูฮา นู นะ บือฌาดี มาแรฮ เตอ บีดา กาเญา นะ บือเลฮ บือดีรี โซะ ฮึลด มูคา นะ กู นู นานะ นะ อูมัจ-ซือมียา อีนี." 37 วะตู ซียัก เยซู ญา อาฌัยํ เดะ รูมัฮ มือญือมัฮ ตูฮัด บีลัก อารี. ตาปี โซะ มาลับ ญา นะ ตรือเบะ ปี ญาแญะ ดูโดะ โซะ บูเกะ นู กูญา บลาโลก จะ บูเกะ กือดูโนด. 38 โกะ ซือมียา กูญา มาแรฮ มียา เยซู เดะ รูมัฮ มือญือมัฮ ตูฮัด ตะเดะ ฆีปาฆี บีดา นะ มือนีงัย เยซู อาฌัยํ.
1 อารี บรามัย มากัด ตือโปก โรตี ฮอย ราฆี นู บลาโลก จะ อารี บรามัย ลือปัซ ปี ซรือปะ นะ รอจ ดัฮ. 2 โกะ ลูมอฮ ซามี ซัยํ-บือซัยํ ฌางัน ลูมอฮ ซือมียา อาฌัยํ ลาฆู ปือมือซัด นะ ตูฮัด เตอ กูญา นะ บูนอฮ เยซู ตาปี ฆาโดฮ มียา จือลัฮ ซาเบะ กูญา ตาโกจ เดะ โกะ ลูมอฮ ซือมียา เลอ. 3 โซะ กือปาลา ฮาตู ซีตัด ญา มาโซะ งาปอ เดะ ฮาตี นะ ยูดา นู บลาโลก จะ อิดคารีโยด ซือมียา ซืออูรัก เดะ ลูมอฮ มูเระ ดูวา-บือลัซ อูรัก อีตู. 4 กะฆีเตอ ยูดา ญา บือเลฮ ปี บือกีรา ฌางัน ลูมอฮ ซามี ซัยํ-บือซัยํ โกะ กือปาลา ฌาฆา รูมัฮ มือญือมัฮ ตูฮัด จะ ญา นะ ซรัฮ เยซู บรี กูญา รีฆะ บือเลฮ กะฮามี เลอ. 5 โกะ ซือมียา อีตู กูญา ซูกา-ฮาตี บือฌาญี ฌางัน ยูดา จะ นะ บรี ดูเวะ. 6 กะฆีเตอ ยูดา ญา ซาโงะ ญา มือนาตี มียา จือลัฮ นะ ซรัฮ เยซู บรี กะ กูญา วะตู ฮอย โกะ ลูมอฮ ซือมียา. 7 รอจ อารี บรามัย มากัด โรตี ฮอย ราฆี ดัฮ ฌาดี อารี กูญา ลาดัจ บูนอฮ มือญือมัฮ อานะ กาเมก บีดา ลาฆู ลือปัซ ปี เตอ. 8 กะฆีเตอ เยซู ซูโรฮ เปโตร ฌางัน โยฮัน ปี ปือซัด จะ 9 "กือนา ปี ซียะ บารัก มากัด ลาฆู ลือปัซ ปี บรี กีตา นะ มากัด." กูญา ตาญา เยซู จะ "นะ บรี กามี ปี ซียะ ลาฆู อีตู โซะ ดีฮา เลอ?" 10 เยซู ตีกัฮ กะ กูญา จะ "นี เลอ ตานา กาเญา มาโซะ ปี กะ ดาลับ นังฆรี อาดา กีลากี ซืออูรัก ตาโงก อาเย เดะ ฆูรี มาแรฮ ญา นะ ดาปัจ กาเญา. ญา นะ มาโซะ เดะ รูมัฮ ดีฮา กาเญา กือนา ตูโรจ มาโซะ ปี ฌูฆา. 11 กือนา มือเลา ฌางัน ตูฮัด รูมัฮ จะ 'บูมอยํ นะ กามี ซูโรฮ ตาญา เกา จะ อาดา รูวัก เปะ ดีฮา นู ญา ฌางัน โกะ มูเระ นะ ญา นะ มากัด ลาฆู ลือปัซ ปี?' 12 ตูฮัด รูมัฮ นะ ตูโญะ บรี กะ กาเญา ลีฮัจ รูวัก บือซัยํ โซะ อาตัซ นู ปือตัด ดัฮ. กือนา ซียะ บารัก มากัด เดะ รูวัก อีตู เลอ." ญา จะ. 13 กูญา ดูวา อูรัก ปี ดาปัจ รือมัก ดัฮ บือกะ เยซู มือเลา เลอ. กะฆีเตอ กูญา ซียะ บารัก มากัด ลาฆู บรามัย ลือปัซ ปี. 14 รอจ วะตู เยซู ญา ดูโดะ มากัด บือซามา ฌางัน โกะ ปือญูโรฮ นะ ญา. 15 ญา มือเลา ฌางัน กูญา จะ "กู บือคานะ ซูโงฮ นะ มากัด ลาฆู บรามัย ลือปัซ ปี อีนี ฌางัน กาเญา ดูลู เดะ กู นะ กือนา ลาฆู ซาเกะ โตระ. 16 กู มือเลา ฌางัน กาเญา จะ ลาฆู อีนี กู ฮอย เตด มากัด ปูลัก ตือดะ ลาฆู อีนี นะ รือมัก ดัฮ เดะ ดือนียา บารู อีตู นู ตูฮัด ฌาดี ราฌา." 17 กะฆีเตอ ญา อาเมด เจาะ อาระ อางุน มาแรฮ ญา บรี ซือลามัจ กะ ตูฮัด เดะ อาตัซ มือเลา จะ "อาเมด เจาะ อีนี ปาฮาฆิ โอะ บรี ราตา. 18 กู มือเลา ฌางัน กาเญา จะ อาเย บูวัฮ อางุน กะฆีนี กู เตด โอะ ปูลัก ตือดะ ตูฮัด นะ มาแรฮ ฌาดี ราฌา เดะ ดือนียา บารู นะ ญา." 19 กะฆีเตอ เยซู ญา อาเมด ตือโปก โรตี มาแรฮ บรี ซือลามัจ กะ ตูฮัด เดะ อาตัซ. ญา ลือแปะ โรตี อูโญะ กะ กูญา มือเลา จะ "นี เลอ ฌาดี ญาวา นะ กู นู ซรัฮ บรี กรานา กาเญา. กือนา บูวัจ ตูโรจ ลาฆู กะฆีนี บีดา บรีงัจ กะ กู เลอ." 20 ตานา กูญา มากัด ดัฮ ญา อาเมด เจาะ อาระ อางุน มาแรฮ ญา บูวัจ ซือรูปา มือเลา จะ "เจาะ อีนี เลอ ฌาดี ปือมือเลา บือปาคัจ นู บารู นู ตืองะ บรี ตือตู ดัฮ ฌางัน ดารัฮ นะ กู นู นะ มือนีเลฮ ตรือเบะ กรานา กาเญา. 21 "ตาปี นี เลอ ซือมียา นู นะ ซรัฮ กู บรี กือนา รีฆะ ดัฮ เตอ ตางัน นะ ญา อาดา เดะ ปาปัด โตะ บือซามา ฌางัน ตางัน นะ กู. 22 ซูโงฮ กู นู นานะ นะ อูมัจ-ซือมียา อีนี นะ ปี มาตี บือกะ ตูฮัด เดะ อาตัซ กีรา ตือตู ดูลู ดัฮ. ตาปี จือลากา เลอ ซือมียา นู นะ ซรัฮ กู บรี กือนา รีฆะ ดัฮ." 23 ลูมอฮ มูเระ ฮึนตะ นะ บือกีรา บือซามา กูญา จะ ซาปา เดะ ลูมอฮ กูญา นะ บูวัจ ลาฆู กะฆีเตอ? 24 อาดา ลาฆู บือตือฆัฮ เดะ ลูมอฮ มูเระ จะ ซาปา นะ ฌาดี บือซัยํ เดะ กาวัด. 25 เยซู มือเลา กะ กูญา จะ "โกะ ราฌา นะ ลูมอฮ ซือมียา บักซา อาซิก กูญา ปรือกัด ซูโรฮ ลูมอฮ กูญา เตอ. โกะ ซือมียา นู อาดา ปือมือฆัฮ มืองากู จะ ฌาดี กือปาลา นู ฮาตี บาฌิ. 26 ตาปี โซะ ลูมอฮ กาเญา ฮอย เตด กะฆีเตอ เลอ. ซือมียา ดีฮา เดะ ลูมอฮ กาเญา นู ฌาดี บือซัยํ เดะ กาวัด บรี ซือมียา อีตู ฌาดี ซือรูปา อาดี. ซือมียา ดีฮา ฌาดี กือปาลา บรี ซือมียา อีตู ฌาดี ซือรูปา ซือมียา มือนูโลก เลอ. 27 กรานา-จะ ซือมียา ดีฮา นู บือซัยํ ลาฆี ซือมียา นู ดูโดะ มากัด เดะ ปาปัด โตะ เฆอ-จะ ซือมียา มือนูโลก นู บือกรือฌา บรี ญา มากัด? ซือมียา นู ดูโดะ เดะ ปาปัด โตะ บูกัด เฆอ? ตาปี กู ดูโดะ ตืองัฮ กาเญา ซือรูปา ฌาดี ซือมียา มือนูโลก เลอ. 28 "โซะ กาเญา ฌาดี ซือมียา ดูโดะ บือซามา ฌางัน กู เดะ วะตู กู กือนา ซูซัฮ. 29 กะฆีเตอ อาโปก เดะ กู บือเลฮ บรี กะ กู บือบือลา ฌาดี ราฌา กะฮามี กู โปด บรี กะ กาเญา บือบือลา ฌาดี ราฌา ซือรูปา กะฆีเตอ เลอ. 30 กาลา กู นะ บือบือลา ฌาดี ราฌา เตอ กาเญา นะ มากัด นะ โอะ เดะ ปาปัด โตะ นะ กู เลอ. กะฆีเตอ กาเญา นะ ดูโดะ เดะ ปาปัด กรือซี ตือปัจ ดูโดะ นะ ราฌา นะ กรัจ ฮูโกบ ลูมอฮ บักซา อิซราเอน ดูวา-บือลัซ บือแนฮ เลอ." 31 เยซู มือเลา ปูลัก จะ "ซีโมน ซีโมน เออ ลีฮัจ เลอ กือปาลา ฮาตู ซีตัด บือเลฮ มีตา อาเมด ลูมอฮ กาเญา บีดา นะ ลกลีฮัจ กาเญา นะ ตาปิฮ อีเงาะ กาเญา ซือรูปา บือกะ ปาดี. 32 ตาปี กู บือเลฮ บือซาโวจ บีดา ญาวา นะ เกา บีดา ลาฆู ปือจายา นะ เกา ฮอย เตด ปูตุซ ดัฮ. กะฆีเตอ กาลา เกา บือเลฮ บราเลฮ-ฮาตี ปาเระ ดัฮ กือนา ตูโลก อาโซฮ ฮาตี โกะ อาดี-บราดี นะ เกา ฌูฆา เลอ." 33 โซะ เปโตร ตีกัฮ กะ เยซู จะ "ตูฮัด เออ กู ตือตู ดัฮ นู นะ ปี ฌางัน เกา เตด-จะ นะ ลือกัจ เดะ ปือฌารา เฆอ นะ รอจ กะ ลาฆู มาตี โปด บาฌิ." 34 เยซู มือเลา จะ "เปโตร เออ กู มือเลา ฌางัน เกา จะ อารี อีนี ดูลู เดะ ฮายับ นะ มูเกาะ เกา นะ มือเลา กีปัซ กู บูวัก ตีฆา กาลี มือเลา จะ ฮอย เตด กราลา กู." 35 กะฆีเตอ เยซู ตาญา โกะ มูเระ จะ "วะตู กู บือเลฮ ซูโรฮ กาเญา ตรือเบะ ปี ฮอย ตีปะ บอฮ ดูเวะ ฮอย กือพัย ฮอย ปะตาปะ เตอ กาเญา ปูตุซ ซือบารัก นามา?" กูญา ตีกัฮ จะ "เตด ปูตุซ นามา ดัฮ เลอ." 36 เยซู มือเลา กะ กูญา จะ "ตาปี วะตู อีนี ซาปา อาดา ตีปะ บอฮ ดูเวะ อาเมด บือปี ซามา. โกะ กือพัย โปด บือปี ฌูฆา เลอ. ซือมียา ดีฮา ฮอย ปือดัก บรี ญา ฌูวัน บาฌู ซรือโกะ ญาวา นะ ญา ปี บือลี ปือดัก เลอ. 37 ซาเบะ-จะ กู มือญาเระ กะ กาเญา จะ ตือนอซ อีตู เดะ ซูรัจ ปือมือเลา นะ ตูฮัด นู จะ 'ญา กือนา กีรา มาโซะ ฌางัน โกะ ซือมียา ฌาฮัจ' ตือนอซ อีตู เตอ นะ ซุจ รือมัก เดะ กู เลอ. ซาเบะ-จะ โกะ ปือมือเลา นู ฆาแรฮ ดัฮ นู ตูโดฮ ตูโญะ กะ กู เตอ นะ ซุจ ดัฮ เลอ. 38 โกะ มูเระ ตีกัฮ จะ "นี เลอ ตูฮัด อาดา ปือดัก ดูวา บีลัฮ." เยซู ตีกัฮ จะ "ฆือนะ ดัฮ เลอ." 39 กะฆีเตอ เยซู ตรือเบะ เดะ นังฆรี ปี กะ บูเกะ กือดูโนด บือกะ ญา บูวัจ บีลัก กาลี. ลูมอฮ มูเระ นะ ญา ตูโรจ ปี ซามา. 40 ตานา รอจ ตือปัจ อีตู ดัฮ เยซู มือเลา ฌางัน กูญา จะ "กือนา บือซาโวจ เลอ ตีเมา บรี กือนา ลกลีฮัจ บรี บูวัจ ดูซา." 41 ญา บือฌาลัด ปี ฌาโวฮ เดะ กูญา เตด บราปา ฌาโวฮ. ญา ตูกู ลูโตจ บือซาโวจ. 42 ญา จะ "อาโปก เออ ดัฮ กือนา เดะ ฮาตี นะ เกา มีตา บรี อาเมด ลาฆู ซูซัฮ อีนี นู ซือรูปา กะ เจาะ ปือนอฮ อาระ อูบัฮ ปี ฌาโวฮ เดะ กู เลอ. ตาปี ฌางัน บรี ฌาดี บือกะ ฮาตี นะ กู. บรี ตูโรจ บือกะ ฮาตี นะ อาโปก เลอ." 43 [อาดา ฮูลู-บาลัก นะ ตูฮัด มาแรฮ ปลีฮัจ กะ เยซู ตูโลก บรี ฮาตี นะ ญา กือฌะ-กือมัซ. 44 เยซู ญา ฆาโดฮ-ฮาตี บาญะ ญา ฆางู บือซาโวจ. ญาวา นะ ญา ปือโลฮ มือนีเลฮ บาญะ ซือรูปา บือกะ ดารัฮ ฆูโฆยํ กะ ตานัฮ บีฌี บือซัยํ. ] 45 ตานา บือซาโวจ ซุจ ดัฮ เยซู บีกัซ ปี ซารี โกะ มูเระ นะ ญา. ญา ดาปัจ กูญา ตืองัฮ ตีโนะ ลีนา ซาเบะ-จะ กูญา ซูซัฮ-ฮาตี. 46 ญา มือเลา ฌางัน กูญา จะ "กาเญา ตีโนะ ลีนา บูวัจ นามา? กือนา บีกัซ บือซาโวจ เลอ ตีเมา บรี กือนา ลกลีฮัจ บรี บูวัจ ดูซา." 47 ตานา เยซู ตืองัฮ มือเลา เตด ดัด ฮาบิฮ นี เลอ อาดา ซือมียา มาแรฮ บาญะ อูรัก. อาดา ฌูฆา ซือมียา ปือนามา จะ ยูดา นู ซืออูรัก เดะ ลูมอฮ มูเระ ดูวา-บือลัซ อูรัก อีตู ญา บาวา โกะ ซือมียา บาญะ บือมาแรฮ. ญา มาแรฮ ดาปิก เยซู นะ จีโยบ ญา. 48 ตาปี เยซู ตาญา ยูดา จะ "ยูดา เออ เกา นะ ซรัฮ กู บรี กูญา รีฆะ ฌางัน ลาฆู จีโยบ เฆอ?" 49 ตานา โกะ มูเระ นู อาดา ดาปิก เยซู ลีฮัจ ลาฆู นะ ฌาดี กะฮามี กูญา ตาญา เยซู จะ "ตูฮัด เออ นะ บรี กามี ซีตะ ปือดัก บาโฮะ กูญา เฆอ?" 50 อาดา มูเระ ซืออูรัก ญา บาโฮะ ปราโซฮ ซืออูรัก นะ กือปาลา ซามี กือนา เดะ ตือลีงา โซะ กานัน ยู ปูตุซ. 51 ตาปี เยซู มือเลา บลารัก จะ "ฌาดี ดัฮ เลอ." กะฆีเตอ เยซู ปือเตาะ ตางัน เดะ ตือลีงา อูรัก อีตู บูวัจ บรี ญา ซือนัง บาฌิ ปาเระ ดัฮ. 52 ตาปี เยซู มือเลา ฌางัน ลูมอฮ ซือมียา นู มาแรฮ รีฆะ ญา ฌาดี-จะ ลูมอฮ ซามี ซัยํ-บือซัยํ โกะ ซือมียา ฌาฆา รูมัฮ มือญือมัฮ ตูฮัด ฌางัน โกะ อูรัก ตูฮา เตอ ญา มือเลา จะ "กาเญา ปือฆัก ปือดัก ปือฆัก ตูกัจ มาแรฮ ซารี กู ซือรูปา กู ฌาดี อูรัก ปือญามุน เฆอ? 53 บีลัก อารี กู อาดา ฌางัน กาเญา เดะ รูมัฮ มือญือมัฮ ตูฮัด ตาปี กาเญา เตด บือเลฮ อาเงา ตางัน รีฆะ กู เลอ. ตาปี วะตู อีนี เลอ ฌาดี วะตู นะ กาเญา. วะตู อีนี เลอ ฮาตู ซีตัด นู ราฌา โซะ กือลับ ญา บือบือลา ดัฮ." ญา จะ. 54 กะฆีเตอ กูญา รีฆะ เยซู บาวา ปี กะ รูมัฮ กือปาลา ซามี. เปโตร ญา ตูโรจ เยซู ปี โวฮ-ฌาโวฮ. 55 ตานา รูโมด อาปี เดะ โซะ ลามัน รูมัฮ กูญา ปาคัจ ดูโดะ บือซามา ดัฮ. เปโตร โปด ดูโดะ เดะ ตืองัฮ กูญา. 56 อาดา นีบีนี ปราโซฮ ซืออูรัก ญา ลีฮัจ เปโตร ดูโดะ ดาปิก อาปี ญา ตีญูง บรี ซัฮ มือเลา จะ "ซือมียา อีนี เลอ ญา ดูโดะ ฌางัน เยซู อีตู." 57 ตาปี เปโตร ญา มือเลา กีปัซ จะ "มิ เออ ซือมียา อีตู กู ฮอย เตด กราลา ญา เลอ." 58 ซือฌูรุซ อาดา ซือมียา ซืออูรัก ญา ลีฮัจ เปโตร ญา มือเลา จะ "เกา เลอ ฌาดี ซือมียา ลูมอฮ อีตู ฌูฆา." ตาปี เปโตร ญา ตีกัฮ จะ "เตด โบะ จา เออ." 59 ลือปัซ ซา ฌับ ปูลัก อาดา ซือมียา ซืออูรัก มาแรฮ มือเลา กือมัซๆ จะ "ซูโงฮ ซือมียา อีนี ญา ดูโดะ ฌางัน เยซู อีตู ซาเบะ-จะ ญา ฌาดี ซือมียา ลูมอฮ ฆาลิลี เลอ." 60 ตาปี เปโตร มือเลา จะ "จา เออ นู เกา มือเลา กะฆีเตอ กู ฮอย เตด ตาฮู อารัฮ เลอ." ตานา เปโตร มือเลา ฮอย เตด ดัด ฮาบิฮ ดัฮ ดัดดัด อีตู ฮายับ ญา มูเกาะ. 61 ตูฮัด เยซู ญา กรือเลฮ มูคา ตีญูง ลีฮัจ กะ เปโตร. กะฆีเตอ เปโตร ญา โตะ-ตืออีงัจ กะ ปือมือเลา นะ เยซู บือกะ นู เยซู บือเลฮ มือเลา กะ ญา จะ "อารี อีนี ดูลู เดะ ฮายับ มูเกาะ เกา นะ มือเลา กีปัซ กู ตีฆา กาลี เลอ." 62 กะฆีเตอ เปโตร ญา ตรือเบะ ปี กะ โซะ ลูวัยํ มือนาแงฮ ซูซัฮ โตระ. 63 โกะ ซือมียา นู ฌาฆา เยซู กูญา อาฆัฮ-ฆือละ รือเปะ ญา. 64 กะฆีเตอ กูญา อาเมด กาเยด ตูโดก มาตา นะ เยซู ดัฮ ตาญา จะ "เกา ตูโดฮ ลีฮัจ เลอ จะ ซาปา นู ตาปัยํ เกา?" 65 กะฆีเตอ กูญา มือเลา ตะอารัฮ อูจะ กะ เยซู ปูลัก บาญะ ฌือแนฮ. 66 ตานา ซียัก ดัฮ ลูมอฮ โกะ อูรัก ตูฮา นะ ลูมอฮ บักซา ยิว ฌางัน ลูมอฮ ซามี ซัยํ-บือซัยํ ฌางัน โกะ ซือมียา อาฌัยํ ลาฆู ปือมือซัด นะ ตูฮัด เตอ กูญา ปาคัจ มาแรฮ บือซามา. กูญา อีเระ เยซู บาวา บือปี โซะ ฮึลด มูคา นะ ลูมอฮ บือมุน บือกีรา นะ กูญา. กะฆีเตอ กูญา มือเลา จะ 67 "ดัฮ เกา ฌาดี ราฌา นู บรี ซือลามัจ กือนา มือญาเระ กะ กามี เลอ." ตาปี เยซู ตีกัฮ กะ กูญา จะ "มีเซ-จะ กู นะ มือญาเระ กะ กาเญา โปด กาเญา ฮอย เตด ปือจายา. 68 มีเซ-จะ กู นะ ตาญา กาเญา กาเญา โปด ฮอย เตด มือญาเระ กะ กู. 69 ตาปี ตะเดะ อีนี ปี กู นู นานะ นะ อูมัจ-ซือมียา อีนี นะ อาดา ดูโดะ โซะ กานัน นะ ตูฮัด บือซัยํ เดะ อาตัซ นู มือฆัฮ ซูโงฮ เลอ." 70 โกะ ซือมียา ซือมูฮา กูญา ตาญา จะ "กะฆีเตอ เกา เลอ ฌาดี นานะ นะ ตูฮัด บือซัยํ เดะ อาตัซ เฆอ?" เยซู ตีกัฮ กะ กูญา จะ "อีซี กาเญา เลอ บือเลฮ มือเลา จะ กู ฌาดี กะฆีเตอ." 71 กูญา มือเลา จะ "เตด ปายัฮ มียา ปือมือเลา ซะซี ลาฆี เลอ. กรานา-จะ กีตา บือเลฮ ดืองัยํ เดะ มูโลจ นะ ญา ตะอาซิก ดัฮ."
1 ลูมอฮ ซือมียา ซือมูฮา เดะ ตือปัจ บือมุน บือกีรา นะ บักซา ยิว กูญา บีกัซ บาวา เยซู บือปี กะ ปีลาด นู ฌาดี ฮูลู-บาลัก นะ ราฌา ซีซา. 2 กูญา อาดู จะ "กามี ดาปัจ ซือมียา อีนี ญา อาโจบ โกะ ลูมอฮ ซือมียา เดะ นังฆรี นะ กามี. ญา บลารัก ตีเมา บรี บายัยํ อาเซน กะ ราฌา ซีซา. ญา มืองากู จะ อีซี ญา ตะอาซิก ฌาดี ราฌา ซืออูรัก ฌาดี-จะ ราฌา นู บรี ซือลามัจ เลอ." 3 ปีลาด ตาญา เยซู จะ "เกา นี ฌาดี ราฌา นะ ลูมอฮ ยิว เฆอ?" เยซู ตีกัฮ จะ "เกา เลอ มือเลา กะฆีเตอ ดัฮ." 4 กะฆีเตอ ปีลาด มือเลา ฌางัน ลูมอฮ ซามี ซัยํ-บือซัยํ ฌางัน ลูมอฮ ซือมียา บาญะ จะ "โบะ กู ลีฮัจ จะ ซือมียา อีนี ญา ฮอย ซาลัฮ นามา เลอ." 5 ตาปี ลูมอฮ ซือมียา อีตู มือเลา งูฆางู จะ "ซือมียา อีนี ญา อาโจบ ลูมอฮ โกะ ซือมียา บรี กือลาจุ. ญา ปี อาฌัยํ เดะ นังฆรี ยูเดีย ราตา ตะเดะ นังฆรี ฆาลิลี ตือดะ รอจ กะ ตือปัจ อีนี." 6 ตานา ปีลาด ดืองัยํ กะฆีเตอ ดัฮ ญา ตาญา จะ "ซือมียา อีนี ซือมียา นังฆรี ฆาลิลี เฆอ?" 7 ตานา ปีลาด ญา ตาฮู ดัฮ จะ เยซู ฌาดี ซือมียา ดาตัก เดะ นังฆรี นะ ราฌา เฮโรด ญา อาตัจ เยซู บรี ปี ดาปัจ ราฌา. วะตู อีตู อีซี ราฌา เฮโรด เตอ ญา อาดา ดูโดะ เดะ นังฆรี เยรูซาเลม. 8 โซะ เฮโรด เตอ ตานา ญา ลีฮัจ เยซู ดัฮ ญา ซูกา-ฮาตี บาญะ ซาเบะ-จะ ลามา ดัฮ ซูกา นะ บือดาปัจ ฌางัน ญา. ญา ดืองัยํ ลาฆู นะ เยซู ดัฮ จาดัก จะ นะ บือเลฮ ลีฮัจ เยซู บูวัจ ปือนานา นู มือฆัฮ. 9 กะฆีเตอ ญา ตาญา เยซู บาญะ ฌือแนฮ. ตาปี เยซู เตด บือเลฮ ตีกัฮ นามา โปด. 10 ตาปี ลูมอฮ ซามี ซัยํ-บือซัยํ ฌางัน ลูมอฮ ซือมียา อาฌัยํ ลาฆู ปือมือซัด นะ ตูฮัด กูญา บือดีรี อาดู เยซู กือมัซๆ. 11 ราฌา เฮโรด ฌางัน ลูมอฮ ตาฮัน นะ ญา กูญา บูวัจ ลาฆู ตะอารัฮ อาฆัฮ-ฆือละ กะ เยซู. กูญา บรี เยซู บือปากัย กาเยด บือฆาจะ อาตัจ ญา ปาเระ ปี กะ ปีลาด ปูลัก. 12 เดะ อารี อีตู เฮโรด ฌางัน ปีลาด กูญา บือบาฌิ-บาฌิ ปาเระ ดัฮ. ดูลู กูญา บือมูซัยํ-มูซัยํ เลอ. 13 กะฆีเตอ ปีลาด ปาเงน ลูมอฮ ซามี ซัยํ-บือซัยํ โกะ กือปาลา นังฆรี ฌางัน ลูมอฮ ซือมียา ซือมูฮา มาแรฮ บือซามา. 14 ญา มือเลา ฌางัน กูญา จะ "กาเญา บาวา ซือมียา อีนี มาแรฮ ซารี กู อาดู จะ ญา อาโจบ โกะ ซือมียา เดะ นังฆรี. นี เลอ กู บือเลฮ มือโซะ ตาญา โซะ ฮึลด มูคา นะ กาเญา. กู ลีฮัจ จะ เดะ ลาฆู กาเญา อาดู เตอ ซือมียา อีนี ญา ฮอย ซาลัฮ นามา เลอ. 15 ราฌา เฮโรด โปด ญา ลีฮัจ กะฆีเตอ ฌูฆา ซาเบะ ญา บือเลฮ อาตัจ เยซู บาลิ ปาเระ กะ กีตา ดัฮ. นี เลอ ซือมียา อีนี ญา เตด บือเลฮ บูวัจ ซาลัฮ นามา โปด นู ปาโตจ นะ ฮูโกบ บรี ญา มาตี. 16 กะฆีเตอ ซูดัฮ กู รือเปะ ญา ดัฮ กู นะ ปลือปัซ ปี เลอ." ญา จะ. 18 ตาปี โกะ ซือมียา บาญะ ปาคัจ บือซูระ มือเลา จะ "อาเมด ซือมียา อีนี บือปี บูนอฮ เลอ. ปลือปัซ บาระบา บรี กะ กามี เลอ." 19 บาระบา อีตู ญา อาดา เดะ ปือฌารา กรานา ฌาดี ซือมียา ซืออูรัก เดะ ลูมอฮ อีตู นู ปาคัจ กือลาจุ เดะ นังฆรี เยรูซาเลม บลาวัด ฌางัน ลูวัก บือเลฮ บูนอฮ ซือมียา ฌูฆา. 20 ตาปี ปีลาด ญา อาดา ฮาตี นะ ปลือปัซ เยซู กะฆีเตอ ญา มือเลา ฌางัน กูญา ปูลัก. 21 ตาปี กูญา บือซูระ ตีกัฮ จะ "อาเมด ปี กาจิก เดะ กายู ปลีตัก เลอ. อาเมด ปี กาจิก เลอ." 22 กะฆีเตอ ปีลาด ตาญา กูญา มาโซะ กะ ตีฆา กาลี จะ "กาจิก บูวัจ นามา? ญา บูวัจ ลาฆู ฌาฮัจ นามา เลอ? กู เตด ลีฮัจ จะ ญา ซาลัฮ นามา โปด นู นะ ฮูโกบ บรี กะ ญา มาตี. กะฆีเตอ ซูดัฮ รือเปะ ญา กู นะ ปลือปัซ ปี เลอ." ญา จะ. 23 ตาปี โกะ ซือมียา บาญะ กูญา ปาคัจ บือซูระ มารือมา ซูวารา บือซัยํ จะ บรี กาจิก เยซู เดะ กายู ปลีตัก. โซะ ซูวารา โกะ ซือมียา นู บาญะ ฌือนัฮ ดัฮ. 24 กะฆีเตอ ปีลาด กรัจ ฮูโกบ นะ บูวัจ ตูโรจ บือกะ โกะ ซือมียา นู บาญะ บือคานะ. 25 ญา ปลือปัซ ซือมียา อีตู นู กูญา มีตา. ญา เตอ นู อาดา เดะ ปือฌารา ซาเบะ บลาวัด ฌางัน ลูวัก บูนอฮ ซือมียา ฌูฆา. ตาปี เยซู เตอ ญา อาตัจ บรี กะ กูญา บือกะ กูญา ซูกา-ฮาตี เลอ. 26 ตานา กูญา บาวา เยซู บือปี อาดา ซีโมน ซือมียา เดะ นังฆรี ซัยรีน. ญา ตืองัฮ บือฌาลัด มาแรฮ ดาตัก เดะ ปาดัก โซะ ลูวัยํ นะ มาโซะ กะ นังฆรี. กูญา รีฆะ ซีโมน อีตู ฮูโกบ บรี ญา ตาโงก กายู ปลีตัก บือฌาลัด ปี ตูโรจ กะ เยซู. 27 อาดา โกะ ลูมอฮ ซือมียา บาญะ กูญา ตูโรจ ปี ซามา. อาดา ลูมอฮ นีบีนี ฌูฆา นู มือนาแงฮ บือปาโตด ตือจีฮัด กะ เยซู. 28 ตาปี เยซู กรือเลฮ มูคา ลีฮัจ กูญา มือเลา จะ "นานะ นีบีนี นังฆรี เยรูซาเลม เออ ฌางัน มือนาแงฮ ตือจีฮัด กะ กู เลอ. ตาปี กือนา มือนาแงฮ ตือจีฮัด กะ ญาวา นะ กาเญา ตะอาซิก ฌางัน โกะ อานะ จูจู กือมูฮา นะ กาเญา เลอ. 29 ลีฮัจ เลอ อาดา ซา วะตู นะ มาแรฮ กูญา นะ มือเลา จะ 'ซือนัง ซือลามัจ เลอ โกะ นีบีนี อีตู นู ฌาดี ซือมือโฆจ นู โปรจ ฮอย เตด ดือละ ดูโดะ เดะ อาปี เตอ. ซือนัง ซือลามัจ เลอ โกะ นีบีนี นู ปาลา ดาดา ฮอย เตด ดือละ บรี อีซะ ลาลู โปด.' 30 กาลา อีตู โกะ ซือมียา นะ ฮึนตะ มือเลา กะ โกะ บูเกะ ตีงี จะ 'กือนา ปรูโตฮ มาแรฮ ตือกัด กามี เลอ' มือเลา กะ โกะ บูเกะ ดือมิ จะ 'กือนา ลีนง กามี ตาโรฮ เลอ.' 31 ซาเบะ-จะ ดัฮ กูญา บูวัจ กะ ปูโฮด กายู ฮีโดะ กะฆีนี กูญา นะ บูวัจ กะฮามี ฌางัน ปูโฮด กายู นู ตูโฮยํ มาตี ดัฮ เลอ?" 32 อาดา ฌูฆา อูรัก ซาลัฮ ดูวา อูรัก กูญา บาวา บือปี ซามา นะ บูนอฮ กูญา มารือมา ฌางัน เยซู. 33 ตานา รอจ กะ ตือปัจ ปือนามา จะ ตูลัก กือปาลา กูญา กาจิก เยซู เดะ กายู ปลีตัก เปะ อีตู. กูญา กาจิก อูรัก ซาลัฮ ดูวา อูรัก อีตู ฌูฆา โซะ กานัน ซา โซะ กีรี ซา. 34 กะฆีเตอ เยซู ญา บือซาโวจ จะ "อาโปก เดะ อาตัซ เออ มีตา อาเกะ ดูซา นะ กูญา. นู กูญา บูวัจ กะฆีนี กูญา เตด ตาฮู ลาฆู." กูญา อาเมด กาเยด บาฌู นะ เยซู มาแรฮ ปาคัจ ยิบละ ปาฮาฆิ. 35 โกะ ซือมียา บาญะ ปี บือดีรี ลีฮัจ. ลูมอฮ ซือมียา ซัยํ-บือซัยํ กูญา อาฆัฮ-ฆือละ กะ เยซู มือเลา จะ "ซือมียา อาซิก ญา บือเลฮ ตูโลก บรี ลือปัซ ดัฮ. ดัฮ ญา ฌาดี ราฌา นู บรี ซือลามัจ นู ตูฮัด ซูโรฮ มาแรฮ ดัฮ บรี ญา ตูโลก ญาวา ตะอาซิก บรี ลือปัซ ฌูฆา เลอ." 36 ลูมอฮ ตาฮัน อาฆัฮ-ฆือละ กะ ญา ฌูฆา. กูญา มาโซะ ปี ดาปิก อาเมด อาระ อางุน มาซับ มาแรฮ อูโญะ บรี กะ ญา 37 มือเลา จะ "ดัฮ เกา ฌาดี ราฌา นะ ลูมอฮ ยิว กือนา ตูโลก ญาวา ตะอาซิก บรี ลือปัซ เลอ." 38 อาดา ปือมือเลา นู ฆาแรฮ เดะ ปาปัด ตาโรฮ เดะ อาตัซ เยซู นู จะ "นี เลอ ราฌา นะ ลูมอฮ ยิว." 39 อูรัก ซาลัฮ นู กือนา กาจิก ซามา ฌางัน เยซู ซืออูรัก ญา มือเลา ตะอารัฮ อูจะ กะ เยซู จะ "เกา ฌาดี ราฌา นู บรี ซือลามัจ บูกัด เฆอ? กือนา ตูโลก ญาวา ตะอาซิก บรี ลือปัซ ตูโลก กามี ซามา เลอ." 40 นู ซืออูรัก ตีกัฮ บลารัก กะ ญา จะ "เกา เลอ เตด ตาโกจ เดะ ตูฮัด เฆอ? กรานา-จะ เกา กือนา ฮูโกบ ซือรูปา กะ ซือมียา อีนี ฌูฆา เลอ. 41 กีตา ดูวา อูรัก ปาโตจ นะ กือนา ฮูโกบ กะฆีนี ซาเบะ กีตา กือนา ฮูโกบ บือกะ กีตา บือเลฮ บูวัจ ซาลัฮ ดัฮ. ตาปี โซะ ซือมียา อีนี เตอ ญา เตด บือเลฮ บูวัจ ซาลัฮ นามา โปด." ญา จะ. 42 กะฆีเตอ ซือมียา อีตู ญา มือเลา ฌางัน เยซู จะ "เยซู เออ กาลา เกา นะ มาแรฮ ฌาดี ราฌา มีตา บรีงัจ กะ กู ฌูฆา เลอ." 43 เยซู ตีกัฮ กะ ญา จะ "ซูโงฮ กู มือเลา ฌางัน เกา จะ อารี อีนี เลอ เกา นะ ดูโดะ ฌางัน กู เดะ กือโบด นะ ตูฮัด โซะ อาตัซ ลาแงะ." ญา จะ. 44 วะตู อีตู ฆามะ ตืองัฮ อารี บือเลฮ ดัฮ นังฆรี ซือมูฮา ฮาบิฮ กือลับ ตือดะ รอจ กะ ปูโกยํ ตีฆา. 45 มาตาอารี กือลับ ฮาบิฮ. กาเยด กือตัก เดะ บาลัย นะ ตูฮัด ญา ปูตุซ เดะ ตืองัฮ ตือกรัจ ดัฮ. 46 เยซู บือซูระ ซูวารา บือซัยํ มือเลา จะ "อาโปก เออ ซือมืองัจ นะ กู กู กีเรบ เดะ ตางัน นะ เกา เลอ." ตานา ญา มือเลา ซูดัฮ ญา ฮาบิฮ ญาวา ดัฮ. 47 ตานา กือปาลา ตาฮัน ลีฮัจ ลาฆู กะฆีนี ญา มือเลา มือโอจ กะ ตูฮัด เดะ อาตัซ จะ "ซูโงฮ เลอ ซือมียา อีนี ญา ฌาดี ซือมียา บาฌิ-ตือปัจ เลอ." 48 โซะ โกะ ซือมียา บาญะ นู มาแรฮ นะ ลีฮัจ จะ ฌาดี ลาฆู นามา เตอ ตานา ลีฮัจ ลาฆู กะฆีนี ดัฮ กูญา ซูซัฮ-ฮาตี กาเตาะ ตาฮะ ดาดา บาลิ กะ รูมัฮ. 49 โกะ ซือมียา นู กราลา เยซู ฌางัน ลูมอฮ นีบีนี นู ดาตัก เดะ นังฆรี ฆาลิลี ตูโรจ เยซู กูญา บือดีรี ฌาโวฮ ลีฮัจ ลาฆู กะฆีเตอ กะฆีนี. 50 นี เลอ อาดา กีลากี ซืออูรัก ปือนามา โยเซบ ซือมียา ตูโปะ อาริมาเทีย เดะ นังฆรี ยูเดีย. ญา ฌาดี ซืออูรัก เดะ ลูมอฮ ซือมียา บือกีรา ฌาดี ซือมียา บาฌิ-ตือปัจ ซืออูรัก 51 นู เตด ซูกา-ฮาตี เดะ ลาฆู บือกีรา ฌางัน โกะ ปือบูวัจ นะ ลูมอฮ บือกีรา อีตู. ตาปี ญา มือนาตี นะ ลีฮัจ กาลา อีตู นู ตูฮัด นะ มาแรฮ บือบือลา ฌาดี ราฌา. 52 ซือมียา อีนี ญา มาโซะ ปี รอจ กะ ปีลาด มีตา บาดัด นะ เยซู. 53 กะฆีเตอ ญา อาเมด บาดัด บือตูโรด มาแรฮ เดะ กายู ปลีตัก. ญา อาเมด กาเยด ปูเตฮ นู ลือมัฮ มาแรฮ บูกุซ บาโลจ บาดัด นะ เยซู บาวา บือปี บอฮ เดะ ฆูฮา นู ตือโบะ เดะ บูเกะ บาตู ดัฮ. เดะ ฆูฮา อีตู กูญา เตด ดือละ บอฮ บาดัด นะ ซาปา ลาฆี. 54 อารี อีตู ฌาดี อารี บือซียะ ซรือปะ นะ รอจ กะ อารี บราดู กรือฌา. 55 ลูมอฮ นีบีนี นู ตูโรจ เยซู ดาตัก เดะ นังฆรี ฆาลิลี กูญา ตูโรจ ปี ซามา ลีฮัจ ฆูฮา อีตู ปี ลีฮัจ นู กูญา บอฮ บาดัด นะ เยซู ฌาดี กะฮามี. 56 กะฆีเตอ กูญา บาลิ ปี ปือตัด กลือกะ บาวู ฌางัน มีญะ บาวู ฌูฆา. ตาปี เดะ อารี บราดู กรือฌา กูญา บราดู บือกรือฌา ตูโรจ กะ ปือมือซัด นะ ตูฮัด.
1 โซะ มูกัยํ อารี มีงู ลูมอฮ นีบีนี อีตู อาเมด กลือกะ บาวู นู กูญา ซียะ ดัฮ ปี รอจ กะ ฆูฮา. 2 กูญา ลีฮัจ บาตู บือซัยํ อีตู ญา ฆรือลิก ปี ดัฮ บือตรือเบะ เดะ ลูบัก ฆูฮา. 3 กะฆีเตอ กูญา มาโซะ ปี ตาปี เตด บือฆารี บาดัด นะ ตูฮัด เยซู. 4 ตานา กูญา บือฮีมัจ ปือและ-ฮาตี เดะ ลาฆู อีนี นี เลอ อาดา กีลากี ดูวา อูรัก บือดีรี ดาปิก กูญา บือปากัย กาเยด นู บือตือแล. 5 โกะ นีบีนี อีตู กูญา ตาโกจ โตระ ตือมะ มูคา รอจ กะ ตานัฮ. โกะ กีลากี อีตู มือเลา ฌางัน กูญา จะ "บูวัจ นามา กาเญา มาแรฮ มือญารี ซือมียา ฮีโดะ เดะ ตือปัจ ซือมียา มาตี? 6 ญา ฮอย ปัจ อีนี ดัฮ เลอ. ญา ฮีโดะ ปาเระ เดะ มาตี ดัฮ. กาเญา กือนา บรีงัจ กะ ปือมือเลา นู ญา บือเลฮ มือเลา ฌางัน กาเญา กาลา อาดา เดะ นังฆรี ฆาลิลี ลาฆี 7 จะ ญา นู นานะ นะ อูมัจ-ซือมียา เตอ ฆาโดฮ นะ กือนา อาตัจ กะ ตางัน ซือมียา บือดูซา กือนา บือปี กาจิก เดะ กายู ปลีตัก. ตาปี อารี ตีฆา ญา นะ ฮีโดะ ปาเระ เดะ มาตี." กูญา จะ. 8 บารู โกะ นีบีนี อีตู กูญา บรีงัจ จับ บือเลฮ กะ ปือมือเลา นะ เยซู ดัฮ. 9 กะฆีเตอ กูญา บาลิ ดาตัก เดะ ฆูฮา มือเลา ลาฆู อีนี ซือมูฮา ฌางัน โกะ มูเระ ซือบือลัซ อูรัก อีตู ฌางัน โกะ ซือมียา ฆีลาฆี ฌูฆา. 10 โกะ ซือมียา นู มือญาเระ ลาฆู อีนี บรี กะ โกะ ปือญูโรฮ ดืองัยํ อาดา ปือนามา จะ มารียา ซือมียา ตูโปะ มักดาลา เตอ โยอันนา มารียา มะ เดะ ยากอบ เตอ ฌางัน โกะ นีบีนี อาซิก ซามา. 11 ตาปี โกะ ปือญูโรฮ กีรา จะ ลาฆู นู กูญา มือญาเระ อีตู เตด ฌาดี นามา กูญา เตด ปือจายา เลอ. 12 ตาปี เปโตร ญา บีกัซ บลารี ปี กะ ฆูฮา. ญา ตูโนะ ลีฮัจ จะ อาดา ซา กาเยด ปูเตฮ อีตู งะตืองะ ดัฮ. ฮอย เตด บือฆารี นามา อาซิก. กะฆีเตอ ญา บาลิ ปี กะ รูมัฮ นะ ญา ดัฮ บือฮีมัจ จะ นะ ฌาดี ลาฆู นามา เลอ. 13 นี เลอ เดะ อารี อีตู อาดา มูเระ ดูวา อูรัก บือฌาลัด ปี กะ ตูโปะ ปือนามา เอมมาอู ฌาโวฮ เดะ นังฆรี เยรูซาเลม บือเลฮ ฆามะ-จะ ซือบือลัซ กีโลเมด. 14 กูญา ตืองัฮ มือเลา ซามา กูญา รอจ กะ ลาฆู อีตู ซือมูฮา นู บือเลฮ บือฌาดี เตอ. 15 ตานา กูญา ตืองัฮ มือเลา บือตาญา-ตาญา เตอ เยซู ตะอาซิก โปด มาแรฮ ดาปิก บือฌาลัด ปี บือซามา ฌางัน กูญา ฌูฆา. 16 ตาปี มาตา นะ กูญา ฌาดี ซือรูปา ซือมียา มาตา บือดาบู ดัฮ นะ กราลา เยซู โปด เตด บือเลฮ ดัฮ. 17 เยซู มือเลา กะ กูญา จะ "ลาฆู นามา เลอ นู กาเญา มือเลา บือตีกัฮ-ตีกัฮ ตืองัฮ กาเญา บือฌาลัด มาแรฮ เตอ?" กูญา โปด บราดู บือดีรี มูคา มาตา ซูซัฮ. 18 ซือมียา ซืออูรัก นู ปือนามา เกลโอปา ญา ตาญา เยซู จะ "ซา เกา เลอ เดะ ลูมอฮ ซือมียา มือนูปัก นังฆรี เยรูซาเลม นู เตด ตาฮู ลาฆู ซือมูฮา นู บือเลฮ บือฌาดี เดะ โกะ อารี อีนี เฆอ?" 19 เยซู ตาญา กูญา จะ "ลาฆู นามา ซือตืองัฮ?" กูญา ตีกัฮ กะ เยซู จะ "ลาฆู นะ เยซู ซือมียา ตูโปะ นาซาเรด เลอ. ญา ฌาดี ซือมียา ตูโดฮ ลาฆู นะ ตูฮัด นู ตูฮัด เดะ อาตัซ ฌางัน ลูมอฮ ซือมียา ซือมูฮา ลีฮัจ จะ ญา มือฆัฮ ซูโงฮ เดะ ลาฆู บือกรือฌา นะ ญา เดะ ปือมือเลา อาฌัยํ นะ ญา ฌูฆา. 20 ลูมอฮ ซามี ซัยํ-บือซัยํ ฌางัน โกะ กือปาลา นะ กามี กูญา บือเลฮ อาตัจ ญา บรี กือนา กรัจ ฮูโกบ รอจ กะ มาตี เลอ. กูญา บือเลฮ กาจิก ญา เดะ กายู ปลีตัก. 21 ตาปี โซะ กามี เลอ กามี บือเลฮ จาดัก จะ ญา นะ ฌาดี ซือมียา อีตู นู นะ ตือบุซ ลูมอฮ อิซราเอน บรี ลือปัซ. ลือเบฮ เดะ อีตู ลาฆี อารี อีนี ฌาดี อารี ตีฆา ตะเดะ ลาฆู อีตู บือฌาดี มาแรฮ ดัฮ. 22 อาดา โกะ นีบีนี ซือตืองัฮ เดะ ลูมอฮ กามี บือเลฮ บูวัจ บรี กามี ปือและ-ฮาตี. กูญา บือเลฮ ปี กะ ฆูฮา เดะ วะตู กัยํ-มูกัยํ 23 ตาปี ฮอย เตด ดาปัจ บาดัด นะ เยซู. กูญา บาลิ มาแรฮ มือญาเระ จะ กูญา บือเลฮ ลีฮัจ บือฆารี โกะ ฮูลู-บาลัก นะ ตูฮัด ฌูฆา. โกะ ฮูลู-บาลัก อีตู มือญาเระ จะ เยซู อาดา ฮีโดะ เลอ. 24 ซือมียา ซือตืองัฮ นู ดูโดะ ฌางัน กามี กูญา ปี รอจ กะ ฆูฮา กูญา ลีฮัจ บือฆารี ซือรูปา โกะ นีบีนี อีตู บือเลฮ มือญาเระ. ตาปี อีซี เยซู เตอ กูญา ลีฮัจ เตด บือฆารี ลาลู." 25 เยซู เตอ ญา มือเลา กะ กูญา ดูวา อูรัก จะ "กาเญา ซือมียา บูดอ เลอ อาดา ฮาตี ลามัจ นะ ปือจายา กะ ปือมือเลา ซือมูฮา นู ลูมอฮ ซือมียา ตูโดฮ บือเลฮ มือเลา ดูลู ดัฮ. 26 ราฌา นู บรี ซือลามัจ อีตู เตอ ญา ฆาโดฮ นะ ตาฮัด ลาฆู ซูซัฮ โตระ อีนี กะฆีเตอ นะ มาโซะ กะ ลาฆู บือซรี ซูโงฮ นะ ญา บูกัด เฆอ?" 27 กะฆีเตอ เยซู ญา มือญาเระ บรี กูญา ตาฮู ลาฆู นู ฆาแรฮ ตาโรฮ ดัฮ เดะ ซูรัจ ปือมือเลา นะ ตูฮัด นู ตูโญะ รอจ กะ ญาวา ญา ตะอาซิก ฮึนตะ เดะ ซูรัจ นะ มูซา ฌางัน ซูรัจ นะ โกะ ซือมียา ตูโดฮ ลาฆู นะ ตูฮัด ซือมูฮา. 28 ตานา กูญา มาแรฮ ดาปิก ตูโปะ นู นะ ปี เตอ เยซู ญา บูวัจ ลาฆู ซือรูปา จะ นะ บือฌาลัด ปี ลือปัซ เลอ. 29 ตาปี กูญา มือเลา ตาฮัด เยซู จะ "บรี เกา บราดู ดูโดะ ฌางัน กามี ดูลู เลอ. ซาเบะ-จะ ปะฮึญา ดัฮ มาตาอารี นะ มาโซะ." กะฆีเตอ เยซู ญา มาโซะ ปี บีดา นะ บราดู ดูโดะ ฌางัน กูญา. 30 ตานา ดูโดะ มากัด บือซามา ฌางัน กูญา เยซู ญา อาเมด ตือโปก โรตี ญา บรี ซือลามัจ กะ ตูฮัด เดะ อาตัซ ญา ลือแปะ ตือโปก โรตี บรี กะ กูญา ดัฮ. 31 มาตา นะ กูญา โปด ซือนัง เตด บือดาบู กูญา กราลา เยซู ดัฮ. ตาปี เยซู โปด ญา ลือแงะ ปี เดะ กูญา เลอ. 32 กูญา ปาคัจ มือเลา จะ "ตานา ญา มือเลา ฌางัน กามี เดะ ตืองัฮ ฌาลัด เตอ ตานา ญา มือญาเระ ลาฆู ซูรัจ ปือมือเลา นะ ตูฮัด บรี กะ กามี ดัฮ กามี บราซา ฮางัจ-ฮาตี งูฆางู ซูโงฮ บูกัด เฆอ?" 33 กะฆีเตอ กูญา ดูวา อูรัก อีตู บีกัซ ดัดดัด บาลิ ปาเระ กะ นังฆรี เยรูซาเลม ปี ดาปัจ โกะ มูเระ ซือบือลัซ อูรัก. โกะ มูเระ เตอ กูญา อาดา บือมุน บือซามา ฆือนะ ฌางัน โกะ กาวัด ฌูฆา 34 กูญา มือเลา จะ "ตูฮัด เยซู ญา บือเลฮ ฮีโดะ ปาเระ เดะ มาตี ซูโงฮ ดัฮ. ญา บือเลฮ ปลีฮัจ กะ เปโตร เลอ." 35 โซะ ดูวา อูรัก อีตู กูญา มือญาเระ ลาฆู นู บือฌาดี เดะ ตืองัฮ ฌาลัด จะ กูญา บือเลฮ กราลา เยซู เดะ วะตู ญา ลือแปะ ตือโปก โรตี เลอ. 36 ตานา กูญา ตืองัฮ มือญาเระ ลาฆู กะฆีนี เยซู ตะอาซิก มาแรฮ บือดีรี เดะ ตืองัฮ กูญา มือเลา จะ "บรี กาเญา ซือนัง ซือลามัจ เลอ." 37 ตาปี กูญา ตือกือฌุจ ตาโกจ โตระ อาคา จะ ฌาดี ฮาตู. 38 เยซู มือเลา ฌางัน กูญา จะ "บูวัจ นามา กาเญา ตือกือฌุจ กะฆีนี? บูวัจ นามา ฮาตี นะ กาเญา บรีงัจ บาญะ เลอ? 39 กือนา ลีฮัจ ตางัน นะ กู กากี นะ กู จะ อีนี ฌาดี อีซี กู ตะอาซิก เลอ. กือนา ปือฆัก ราบา ญาวา นะ กู ลีฮัจ เลอ. ฮาตู ญา ฮอย ลูลู ฮอย ตูลัก ซือรูปา กาเญา ลีฮัจ เดะ ญาวา นะ กู เลอ." 40 ตานา ญา มือเลา กะฆีเตอ ดัฮ ญา บรี กูญา ลีฮัจ โกะ กากี ตางัน นะ ญา. 41 โกะ มูเระ กูญา ซูกา-ฮาตี ซือตืองัฮ ปือและ-ฮาตี ซือตืองัฮ เตด บราปา ปือจายา ลาฆี. กะฆีเตอ เยซู มือเลา ฌางัน กูญา จะ "กาเญา อาดา บารัก มากัด ตือปัจ อีนี เฆอ?" 42 กูญา อาเมด อีกัด ซาลัย ซือตีแปะ บรี กะ เยซู. 43 ญา ฮามัจ มาแรฮ มากัด โซะ ฮึลด มูคา นะ กูญา. 44 ญา มือเลา ฌางัน กูญา จะ "กาลา กู อาดา บือซามา ฌางัน กาเญา ลาฆี กู บือเลฮ มือเลา ฌางัน กาเญา ลาฆู กะฆีนี จะ อาดา ลาฆู นู ฆาแรฮ ดูลู ดัฮ นู ตูโญะ กะ กู. อาดา เดะ ซูรัจ ปือมือเลา ฮูโกบ นะ มูซา เตอ เดะ ซูรัจ นะ ลูมอฮ ซือมียา ตูโดฮ ลาฆู นะ ตูฮัด เตอ เดะ ซูรัจ มือญาญี ปูฌี ตูฮัด ฌูฆา เลอ. กะฆีเตอ ลาฆู อีตู ซือมูฮา นู ตูโญะ รอจ กะ กู กือนา นะ ฌาดี รือมัก ซุจ ดัฮ เลอ." ญา จะ. 45 กะฆีเตอ ญา บือเลฮ บูกา ฮาตี นะ กูญา ดัฮ บรี กะ กูญา มาโซะ เดะ ฮาตี โกะ ซูรัจ ปือมือเลา นะ ตูฮัด อีตู เลอ. 46 ญา มือเลา ฌางัน กูญา จะ "อาดา ปือมือเลา นู ฆาแรฮ ดัฮ จะ ราฌา นู บรี ซือลามัจ เตอ ญา กือนา นะ ตาฮัด ซูซัฮ โตระ ตาปี อารี ตีฆา นะ ฮีโดะ ปาเระ เดะ มาตี. 47 กะฆีเตอ โกะ ปือญูโรฮ นะ ญา กือนา ปี มือญาเระ บรี กะ โกะ ซือมียา ราตา บักซา นะ บราเลฮ-ฮาตี ซาโมจ ลาฆู อาเกะ ดูซา. กือนา ปี มือญาเระ ฮึนตะ เดะ นังฆรี เยรูซาเลม เลอ. 48 กาเญา เลอ กือนา ฌาดี ซะซี มือญาเระ ปาซัน ลาฆู อีนี." เยซู ญา จะ. 49 เยซู มือเลา ลาฆี จะ "นี เลอ ลาฆู อีตู นู อาโปก เดะ กู บือฌาญี ดัฮ เตอ กู โปด นะ อาตัจ บรี กะ กาเญา. ตาปี โซะ กาเญา กือนา นาตี เดะ นังฆรี เยรูซาเลม ตือดะ กาเญา นะ ปือนอฮ ฌางัน ปือมือฆัฮ อีตู นู ดาตัก เดะ โซะ อาตัซ." ญา จะ. 50 กะฆีเตอ เยซู บาวา กูญา บือปี กะ ตูโปะ เบดทานี. ญา อาเกะ ตางัน บรี ซือลามัจ กะ กูญา. 51 ตืองัฮ ญา บรี ซือลามัจ เตอ ญา ตีงัน กูญา ดัฮ กือนา บาวา บือญาแญะ ปี กะ อาตัซ ลาแงะ. 52 ลูมอฮ มูเระ กูญา มือญือมัฮ กะ ญา กะฆีเตอ กูญา บาลิ ปี กะ นังฆรี เยรูซาเลม. กูญา ซูกา-ฮาตี บาญะ ซูโงฮ เลอ. 53 บีลัก อารี กูญา อาดา เดะ รูมัฮ มือญือมัฮ ตูฮัด ปูฌี กะ ตูฮัด เดะ อาตัซ บรี ซือลามัจ กะ ญา.
1 ลามูลา ดูลู นูตู เตอ นู บลาโลก จะ ปือมือเลา นะ ตูฮัด ญา อาดา ดัฮ. ปือมือเลา อีตู ญา อาดา ดูโดะ บือซามา ฌางัน ตูฮัด บือซัยํ เดะ อาตัซ ดัฮ. นู จะ ปือมือเลา อีตู เตอ ฌาดี ตูฮัด เลอ. 2 ญา เตอ ลามูลา ดูลู นูตู ญา อาดา ดูโดะ บือซามา ฌางัน ตูฮัด บือซัยํ เดะ อาตัซ. 3 ตูฮัด เดะ อาตัซ บือเลฮ ซูโรฮ ปือมือเลา อีตู บือฌาดี บือนา บารัก ราตา ซือมูฮา. เดะ บือนา บารัก นู บือเลฮ บือฌาดี เตอ ฮอย นามา โปด นู ตูฮัด เตด บือเลฮ ซูโรฮ ปือมือเลา อีตู บือฌาดี. 4 ปือมือเลา นะ ตูฮัด อีตู ญา เลอ นู บรี ฮีโดะ. นู ฮีโดะ อีตู เตอ ฌาดี ตือปัจ จรัฮ นู ซูโลฮ บรี กะ โกะ อูมัจ-ซือมียา ราตา บรี ลีฮัจ ลาฆู ซูโงฮ. 5 นู จรัฮ เตอ ญา ซูโลฮ มาแรฮ โซะ ตือปัจ กือลับ จะ นู กือลับ อีตู เตอ นะ อาเมด ฌือนัฮ เดะ ลาฆู จรัฮ เตด บือเลฮ ดัฮ เลอ. 6 อาดา ซือมียา ซืออูรัก นู ตูฮัด เดะ อาตัซ ซูโรฮ มาแรฮ ดัฮ ญา ปือนามา จะ โยฮัน. 7 ญา โปด มาแรฮ ฌาดี ซะซี ปาซัน ลาฆู นู จรัฮ อีตู บีดา โกะ ซือมียา ซือมูฮา นะ ปือจายา กะ ลาฆู จรัฮ กรานา ปือมือเลา นะ ญา เลอ. 8 โยฮัน เตอ บูกัด ญา ฌาดี นู จรัฮ อีตู ตาปี ญา มาแรฮ บีดา นะ มือเลา บรี ฌาดี ซะซี กะ ปาซัน ลาฆู นู จรัฮ อีตู เลอ. 9 อีตู เลอ ฌาดี ลาฆู จรัฮ ซูโงฮ นู ซูโลฮ มาโซะ กะ ดือนียา นู บูวัจ บรี กะ โกะ อูมัจ-ซือมียา ราตา บือเลฮ ลีฮัจ ลาฆู นู ซูโงฮ. 10 ปือมือเลา นะ ตูฮัด อีตู ญา อาดา ดูโดะ เดะ ดาลับ ดือนียา. มีเซ-จะ ญา โปด บือเลฮ บือฌาดี ดือนียา ดัฮ เตอ ตาปี โซะ ซือมียา เดะ ดือนียา กูญา เตด บือเลฮ กราลา ญา เลอ. 11 ญา มาแรฮ รอจ กะ นังฆรี นะ ญา ดัฮ ตาปี โกะ ลูมอฮ นะ ญา โปด ฮอย เตด บือเลฮ ซาโมจ ญา. 12 ตาปี โซะ โกะ ซือมียา นู มาแรฮ ซาโมจ ญา ซือมียา นู ปือจายา กะ ญา เตอ ญา บือเลฮ อาเกะ บรี กะ กูญา ฌาดี นานะ นะ ตูฮัด บือซัยํ เดะ อาตัซ เลอ. 13 กูญา บือฌาดี ดัฮ บูกัด ตูโรจ บือกะ โกะ อูมัจ-ซือมียา ราตา บูกัด ตูโรจ ฮาตี นะ โกะ ซือมียา ดีฮา โปด ตาปี ตูฮัด เดะ อาตัซ เลอ นู ฌาดี อาโปก นะ กูญา. 14 ปือมือเลา นะ ตูฮัด อีตู เตอ ญา มาแรฮ ฌาดี อูมัจ-ซือมียา ดัฮ ญา บือเลฮ ดูโดะ เดะ ตืองัฮ ลูมอฮ กีตา บือเลฮ ปลีฮัจ บรี ปือนอฮ จะ ตูฮัด เดะ อาตัซ ฌาดี กะฮามี ซูโงฮ จะ ญา นะ ฮาลัย บรี ซือลามัจ กะ อูมัจ-ซือมียา. กีตา บือเลฮ ลีฮัจ ลาฆู บือซรี บือซายา นะ ญา ซือรูปา บือกะ ลาฆู บือซรี นะ นานะ ตูงัน นะ อาโปก เดะ อาตัซ เตอ. 15 โยฮัน ญา มือเลา บรี ฌาดี ซะซี กะ ปาซัน นู ปือมือเลา อีตู เตอ ญา บือเลฮ บือซูระ มือญาเระ จะ "นี เลอ ฌาดี ซือมียา นู กู บือเลฮ มือเลา ดูลู ดัฮ จะ 'ซือมียา นู นะ มาแรฮ เดะ บลากัก กู เตอ ญา เลอ นู บือซัยํ ลือเบฮ เดะ กู ซาเบะ-จะ ญา อาดา ดูลู เดะ กู.' " ญา จะ. 16 นู ญา ปือนอฮ ฌางัน ลาฆู บาฌิ เตอ ญา บือเลฮ ฮาลัย บรี ซือลามัจ กะ กีตา ซือมูฮา บือกะ ลาฆู บาฌิ นู ซูโซด ลาฆู บาฌิ ดัฮ เลอ. 17 ซาเบะ-จะ ตูฮัด เดะ อาตัซ บือเลฮ กีเรบ ปือมือซัด ฮูโกบ อีตู บรี กะ มูซา มือญาเระ. ตาปี ลาฆู นู ญา ฌาดี กะฮามี ซูโงฮ นู ญา นะ ฮาลัย บรี ซือลามัจ กะ อูมัจ-ซือมียา เตอ เยซู คริด เลอ ฌาดี ซือมียา นู บาวา ลาฆู อีตู มาแรฮ ปลีฮัจ. 18 ฮอย ซือมียา ดีฮา โปด ดือละ ลีฮัจ ตูฮัด เดะ อาตัซ. นู นานะ ตูงัน อีตู นู ฌาดี ตูฮัด นู ดูโดะ โซะ รูโซะ นะ อาโปก เดะ อาตัซ เตอ ญา เลอ บือเลฮ บรี ลีฮัจ ดัฮ จะ ตูฮัด ฌาดี กะฮามี เลอ. 19 ปือมือเลา ซะซี นะ โยฮัน ฌาดี กะฆีนี เตอ. ตานา โกะ กือปาลา ลูมอฮ บักซา ยิว เดะ นังฆรี เยรูซาเลม ซูโรฮ โกะ ซามี ฌางัน โกะ ลูมอฮ เลวี ซือตืองัฮ ปี บีดา นะ ตาญา จะ ญา ฌาดี ซาปา เตอ 20 โยฮัน ญา เตด กีปัซ ตาปี ญา ซาโงะ จะ "กู บูกัด ราฌา นู บรี ซือลามัจ อีตู เลอ." 21 กูญา ตาญา ญา จะ "ดัฮ กะฆีเตอ เกา ฌาดี ซาปา เลอ? ฌาดี เอลียา เฆอ?" ญา ตีกัฮ จะ "บูกัด เลอ." กูญา จะ "กะฆีเตอ เกา ฌาดี ซือมียา ตูโดฮ อีตู เฆอ?" ญา ตีกัฮ จะ "บูกัด." 22 กูญา อีตู ตาญา ปูลัก จะ "เกา ฌาดี ซาปา? มีตา บรี มือญาเระ กะ กามี ดูลู บีดา กามี นะ บือเลฮ ปี มือญาเระ กะ ซือมียา นู ซูโรฮ กามี มาแรฮ เตอ. เกา มืองากู ญาวา ตะอาซิก จะ ฌาดี ซาปา เลอ?" 23 โยฮัน ตีกัฮ จะ "กู นี ฌาดี ซือมียา อีตู บือกะ นู อิซายา ญา บือเลฮ มือเลา ตูโดฮ ดูลู ดัฮ จะ 'อาดา ซูวารา นะ ซือมียา บือซูระ เดะ ปาดัก ตานัฮ ตูโฮยํ นู ลือฆา จะ กือนา บือกรือฌา ฌาลัด บรี รือมัก เลอ บีดา ตูฮัด นะ มาแรฮ.' ญา จะ." 24 โซะ โกะ ซือมียา นู ลูมอฮ ฟาริซี ซูโรฮ มาแรฮ เตอ 25 กูญา อีตู ตาญา โยฮัน จะ "ดัฮ เกา บูกัด ราฌา นู บรี ซือลามัจ อีตู บูกัด เอลียา บูกัด ซือมียา ตูโดฮ ปือมือเลา นะ ตูฮัด อีตู เตอ บูวัจ นามา ปะ เกา บูวัจ ลาฆู ซือลับ เดะ อาเย เลอ?" 26 โยฮัน ญา บือเลฮ ตีกัฮ กะ กูญา อีตู จะ "กู นี บรี ลาฆู ซือลับ ฌางัน อาเย ตาปี อาดา ซือมียา ซืออูรัก นู ดูโดะ เดะ ตืองัฮ ลูมอฮ กาเญา นู กาเญา เตด กราลา. 27 ซือมียา อีตู เลอ นะ มาแรฮ เดะ บลากัก กู. ตาลี ปะตาปะ นะ ญา โปด กู เตด ปาโตจ นะ อูฆัย เลอ." 28 ลาฆู กะฆีนี บือเลฮ บือฌาดี เดะ ตูโปะ เบดทานี เดะ ซรือบัก ซูงัย จอแดน โซะ อาตัซ มาตาอารี นู ตือปัจ โซะ โยฮัน ญา บูวัจ ลาฆู ซือลับ เดะ อาเย เลอ. 29 ลือปัซ ซืออารี โซะ ปาฆี โยฮัน บือเลฮ ลีฮัจ เยซู มาแรฮ มียา ญา. ญา มือเลา จะ "ลีฮัจ เลอ อานะ กาเมก นะ ตูฮัด ซือมียา นู ซาโมจ ลาฆู ซาลัฮ บือดูซา นะ ดือนียา ปี บูวัก เตอ. 30 ญา เลอ นู กู บือเลฮ มือเลา ตูโดฮ ดัฮ จะ 'เดะ บลากัก กู อาดา ซืออูรัก นู นะ มาแรฮ ฌาดี บือซัยํ เดะ กู เลอ ซาเบะ-จะ ญา อาดา ดูโดะ ดูลู เดะ กู.' 31 กู ตะอาซิก โปด เตด บือเลฮ ตาฮู ดัฮ จะ ซาปา นู นะ ฌาดี ซือมียา อีตู. ตาปี กู มาแรฮ บูวัจ ลาฆู บรี ซือลับ เดะ อาเย เตอ บีดา นะ บรี ตาฮู ปาซัน ลาฆู นะ ญา กะ ลูมอฮ บักซา อิซราเอน. 32 โยฮัน ญา มือเลา ฌาดี ซะซี จะ "กู บือเลฮ ลีฮัจ ซือมืองัจ นะ ตูฮัด ซือรูปา บือกะ บูโรก ปาตี ตูโรด มาแรฮ ดาตัก เดะ โซะ ลาแงะ มาแรฮ ดูโดะ เดะ ซือมียา อีตู เลอ. 33 ดูลู กู ตะอาซิก โปด เตด บือเลฮ ตาฮู ดัฮ จะ ซาปา นู นะ ฌาดี ซือมียา อีตู ตาปี ตูฮัด เดะ อาตัซ นู บือเลฮ ซูโรฮ กู มาแรฮ บูวัจ ลาฆู ซือลับ เดะ อาเย เตอ ญา มือเลา ฌางัน กู จะ 'ดัฮ เกา ลีฮัจ ซือมืองัจ นะ ตูฮัด ตูโรด มาแรฮ ดูโดะ เดะ ซือมียา ดีฮา ญา เลอ นู นะ บูวัจ ลาฆู ซือลับ เดะ ซือมืองัจ นะ ตูฮัด.' 34 "กะฆีเตอ กู บือเลฮ ลีฮัจ ดัฮ บือเลฮ ฌาดี ซะซี จะ ซือมียา อีตู เตอ ญา ฌาดี นานะ นะ ตูฮัด เดะ อาตัซ เลอ." โยฮัน ญา จะ. 35 จรัฮ ปาฆี ซืออารี ปูลัก โยฮัน ญา ตืองัฮ บือดีรี โซะ อีตู ฌางัน มูเระ นะ ญา ดูวา อูรัก. 36 กูญา ลีฮัจ เยซู ตืองัฮ บือฌาลัด โยฮัน ญา มือเลา จะ "ลีฮัจ เลอ อานะ กาเมก นะ ตูฮัด เดะ อาตัซ." 37 ตานา กูญา ดืองัยํ โยฮัน มือเลา กะฆีเตอ กูญา ดูวา อูรัก บือฌาลัด ตูโรจ กะ เยซู ปี. 38 โซะ เยซู ญา กรือเลฮ กะ บลากัก ลีฮัจ กูญา ดูวา อูรัก อีตู ตูโรจ กะ ญา. กะฆีเตอ ญา ตาญา จะ "กาเญา มียา นามา เลอ?" กูญา ดูวา อูรัก ตีกัฮ จะ "บูมอยํ เกา ดูโดะ ปัจ ดีฮา?" นู จะ บูมอยํ เดะ บาซา นะ กูญา ฌาดี-จะ ซือมียา ปานัย อาฌัยํ. 39 เยซู ญา ตีกัฮ กะ กูญา จะ "มาแรฮ ลีฮัจ เลอ." กะฆีเตอ กูญา ตูโรจ ปี กูญา ลีฮัจ ตือปัจ นู เยซู ดูโดะ. กูญา โปด ดูโดะ ฌางัน เยซู เดะ อารี อีตู ซาเบะ-จะ วะตู อีตู ฆามะ ปูโกยํ ปัจ บือเลฮ ดัฮ. 40 นู ซืออูรัก เดะ ดูวา อูรัก อีตู นู ดืองัยํ โยฮัน มือเลา นู บือเลฮ ตูโรจ เยซู ปี เตอ ญา ปือนามา จะ อันดรู อาดี เดะ ซีโมน เปโตร. 41 กะฆีเตอ อันดรู ปี ดูลู มียา ซีโมน จา เดะ ญา มือญาเระ จะ "กามี บือเลฮ ดาปัจ ซือมียา อีตู นู ฌาดี มาซีฮา." นู จะ มาซีฮา อีตู ฌาดี-จะ " ราฌา นู บรี ซือลามัจ". 42 กะฆีเตอ อันดรู ญา บาวา ซีโมน ปี ดาปัจ เยซู. เยซู ญา ลีฮัจ ซีโมน มือเลา จะ "เกา ปือนามา ซีโมน นานะ นะ โยฮัน บูกัด เฆอ? ตาปี กูญา นะ บลาโลก เกา จะ เคฟา." ปือนามา อีนี ญา ซือรูปา กะ ปือนามา จะ เปโตร ฌาดี-จะ บาตู บือซัยํ. 43 จรัฮ ปาฆี ปูลัก เยซู ญา ตือตู เดะ ฮาตี จะ นะ ปี กะ นังฆรี ฆาลิลี. ญา ดาปัจ ฟีลิบ มือเลา ฌางัน ญา จะ "เกา กือนา ตูโรจ กะ กู เลอ." 44 ฟีลิบ เตอ ญา ดาตัก มาแรฮ เดะ ตูโปะ เบดซัยดา ตูโปะ นะ อันดรู ฌางัน เปโตร. 45 ฟีลิบ ญา ปี มียา นาทานาเอน มือญาเระ กะ ญา จะ "กามี บือเลฮ ดาปัจ ซือมียา อีตู นู มูซา ญา บือเลฮ มือเลา เดะ ซูรัจ ปือมือเลา ฮูโกบ นะ ตูฮัด ดัฮ นู ลูมอฮ ซือมียา ตูโดฮ บือเลฮ มือเลา ตูโดฮ ปาซัน ลาฆู นะ ญา. ญา เตอ ฌาดี เยซู นานะ นะ โยเซบ ซือมียา ตูโปะ นาซาเรด." 46 นาทานาเอน ญา ตาญา จะ "ลาฆู นู บาฌิ นามา นะ มาแรฮ ดาตัก เดะ นาซาเรด บือเลฮ เฆอ?" ฟีลิบ ญา ตีกัฮ จะ "มาแรฮ ลีฮัจ เลอ." 47 ตานา เยซู บือเลฮ ลีฮัจ นาทานาเอน มาแรฮ มียา ญา ญา มือเลา ปาซัน ลาฆู นะ ญา จะ "ลีฮัจ เลอ ซือมียา ลูมอฮ อิซราเอน นู ซูโงฮ. เดะ ญาวา นะ ญา ฮอย ลาฆู ตีปู เลอ." 48 นาทานาเอน ญา ตาญา เยซู จะ "เกา กราลา กู ปัจ ดีฮา เลอ?" เยซู ตีกัฮ จะ "ดูลู เดะ ฟีลิบ บือเลฮ บลาโลก เกา วะตู เกา ตืองัฮ ดูโดะ เดะ บาวัฮ ปูโฮด กรายา-บูดี อีตู กู บือเลฮ ลีฮัจ เกา เลอ." 49 นาทานาเอน ญา มือเลา จะ "บูมอยํ เกา ฌาดี นานะ นะ ตูฮัด เดะ อาตัซ ฌาดี ราฌา นะ ลูมอฮ อิซราเอน เลอ." 50 เยซู ญา ตีกัฮ กะ ญา จะ "ซาเบะ กู บือเลฮ มือญาเระ กะ เกา ดัฮ จะ กู ลีฮัจ เกา ดูโดะ เดะ บาวัฮ ปูโฮด กรายา-บูดี อีตู กะฆีเตอ เกา ปือจายา เฆอ? จะ เกา นะ บือเลฮ ลีฮัจ ลาฆู นู บือซัยํ ลือเบฮ เดะ อีตู ลาฆี เลอ." 51 กะฆีเตอ เยซู มือเลา กะ ญา จะ "กู มือญาเระ ลาฆู ซูโงฮ กะ กาเญา จะ กาเญา นะ ลีฮัจ ลาแงะ ญา บูกา ดัฮ อาดา โกะ ฮูลู-บาลัก นะ ตูฮัด บือกะ กูญา ตูโรด ญาแญะ โซะ อาตัซ นานะ นะ อูมัจ-ซือมียา เลอ."
1 โซะ อารี ตีฆา อาดา ลาฆู มือนีกัฮ เดะ ตูโปะ คานา นังฆรี ฆาลิลี. มะ เดะ เยซู ญา อาดา ปัจ อีตู. 2 เยซู ฌางัน โกะ มูเระ นะ ญา กือนา บลาโลก ปี กะ มือนีกัฮ อีตู ฌูฆา เลอ. 3 ตานา อาระ อางุน ฮาบิฮ ดัฮ มะ เดะ เยซู มือเลา ฌางัน เยซู จะ "กูญา ฮอย อาระ อางุน ดัฮ." 4 เยซู ญา มือเลา ฌางัน มะ เดะ ญา จะ "มะ เออ ฌางัน มาแรฮ บือฆาโดฮ กู เลอ. วะตู นะ กู ญา เตด รอจ ลาฆี." 5 มะ เดะ เยซู ญา มือญาเระ กะ โกะ ปราโซฮ จะ "กือนา บูวัจ ตูโรจ บือกะ ญา ซูโรฮ เลอ." 6 โซะ อีตู อาดา ฆาซัด บาตู นัม บีฌี งะตืองะ ดัฮ บอฮ อาเย บือเลฮ ฆามะ ปัจ ลีมา เตง บีดา ตูโรจ กะ ฮาดัจ บาโซฮ นะ โกะ ลูมอฮ ยิว. 7 กะฆีเตอ เยซู ญา ปือซัด กะ กูญา จะ "กือนา อาโกจ อาเย บอฮ บรี ปือนอฮ เลอ." กะฆีเตอ กูญา อาโกจ อาเย บรี ปือนอฮ ซามา มูโลจ ฆาซัด. 8 กะฆีเตอ เยซู ญา ปือซัด กะ กูญา จะ "กือนา จือบุ อาตัจ บรี กะ กือปาลา เดะ ลาฆู มือนีกัฮ เลอ." กูญา โปด อาเมด ปี อาตัจ บรี. 9 ตานา กือปาลา เดะ ลาฆู มือนีกัฮ ญา ฌือเลบ อาเย นู ฌาดี อาระ อางุน ดัฮ ญา เตด ตาฮู จะ มาแรฮ ดาตัก ปัจ ดีฮา. ตาปี โกะ ปราโซฮ อีตู นู จือบุ อาเย ดัฮ กูญา เลอ นู ตาฮู. กะฆีเตอ กือปาลา เดะ ลาฆู มือนีกัฮ ญา บลาโลก เจาเบา มาแรฮ. 10 ญา มือเลา จะ "ราตา ซือมียา นะ อาเมด อาระ อางุน นู บาฌิ มาแรฮ ดูลู. ตานา บือเลฮ มากัด บาญะ ดัฮ บารู กือนา อาเมด อาระ อางุน นู เตด บราปา บาฌิ มาแรฮ. ตาปี เกา เตอ บือเลฮ ตาโรฮ อาระ อางุน นู บาฌิ ตือดะ อีนี เลอ." 11 ปือนานา นู มือฆัฮ นู ลามูลา อีนี เตอ เยซู บือเลฮ บูวัจ เดะ ตูโปะ คานา นังฆรี ฆาลิลี. กะฆีเตอ ญา บือเลฮ ปลีฮัจ บรี บือฆารี นู ญา บือซรี บือซายา เลอ. กะฆีเตอ เลอ โกะ มูเระ กูญา บือเลฮ ปือจายา กะ เยซู. 12 ลือปัซ อีตู เยซู ฌางัน มะ เดะ ญา โกะ อาดีๆ โกะ มูเระ นะ ญา กูญา บือเลฮ ปี กะ ตูโปะ คาเปอนาอุม. กูญา ดูโดะ ปัจ อีตู เตด บาญะ อารี. 13 ลาฆู บรามัย ลือปัซ ปี นะ โกะ ลูมอฮ บักซา ยิว ซรือปะ นะ รอจ ดัฮ. กะฆีเตอ เยซู ญา ญาแญะ ปี กะ นังฆรี เยรูซาเลม. 14 โซะ ลามัน รูมัฮ มือญือมัฮ ตูฮัด เยซู ญา ลีฮัจ อาดา โกะ ซือมียา ฌูวัน โกะ ลือมู โกะ กาเมก ฌางัน โกะ บูโรก ปาตี ฌูฆา. อาดา ซือมียา รีบัยํ ดูเวะ ดูโดะ ปัจ อีตู เลอ. 15 กะฆีเตอ เยซู ญา อาเมด โกะ ตาลี อาญัม ฌาดี ตาลี รือเปะ อูเซ กูญา อีตู ซือมูฮา มารือมา ฌางัน โกะ กาเมก โกะ ลือมู เตอ บรี ตรือเบะ เดะ ลามัน รูมัฮ มือญือมัฮ ตูฮัด. ญา บือจือเกาะ ปาปัด โตะ นะ โกะ ซือมียา ฮูโระ ดูเวะ อูแร โกะ ดูเวะ รีเงะ นะ กูญา. 16 ญา ปือซัด โกะ ซือมียา ฌูวัน บูโรก ปาตี จะ "กือนา อาเมด โกะ ซือบารัก อีนี บือปี บูวัก เลอ. ฌางัน บูวัจ บรี รูมัฮ อาโปก นะ กู ฌาดี ตือปัจ บือฌูวัน โกะ ซือบารัก เลอ." 17 โกะ ลูมอฮ มูเระ กูญา โตะ-ตืออีงัจ กะ ปือมือเลา นู ฆาแรฮ ดัฮ เดะ ซูรัจ ปือมือเลา นะ ตูฮัด จะ "ตูฮัด เดะ อาตัซ เออ กู อาดา ฮาตี ตูเฮะ กะ รูมัฮ มือญือมัฮ ตูฮัด ซือรูปา อาดา อาปี ตูนู เดะ ฮาตี นะ กู เลอ." 18 ซาเบะ กะฆีเตอ โกะ กือปาลา ลูมอฮ ยิว ตีกัฮ ปาเระ กะ เยซู จะ "เกา นะ บรี กามี ลีฮัจ ปือนานา นามา นู นะ บรี กามี ตาฮู จะ นู เกา บูวัจ ลาฆู กะฆีนี บือเลฮ?" 19 เยซู ญา ตีกัฮ กะ กูญา จะ "ดัฮ ปรูโตฮ บาลัย รูมัฮ นะ ตูฮัด อีนี บูวัก ดัฮ กู นะ อาเกะ ปาเระ เดะ ดาลับ ตีฆา อารี เลอ." 20 โกะ ลูมอฮ ยิว กูญา มือเลา จะ "บาลัย นะ ตูฮัด อีนี กูญา บือเลฮ บือกรือฌา ดัฮ กือมูฮา ปัจ-ปูโลฮ นัม ตาโฮด ดัฮ. ฆามะ-จะ เกา นะ บูวัจ บรี ซุจ เดะ ตีฆา อารี บือเลฮ เฆอ?" 21 ตาปี บาลัย นะ ตูฮัด นู เยซู มือเลา เตอ ฌาดี ญาวา นะ ญา ตะอาซิก เลอ. 22 ซาเบะ กะฆีเตอ ตานา ญา ฮีโดะ ปาเระ เดะ มาตี ดัฮ ลูมอฮ มูเระ นะ เยซู กูญา บรีงัจ บือเลฮ ดัฮ จะ ญา บือเลฮ มือเลา กะฆีนี. กะฆีเตอ กูญา ปือจายา กะ ซูรัจ ปือมือเลา นะ ตูฮัด ฌางัน ปือมือเลา นู เยซู บือเลฮ มือเลา ดัฮ เลอ. 23 ตานา เยซู ญา ดูโดะ เดะ นังฆรี เยรูซาเลม เดะ อารี บรามัย ลือปัซ ปี อีตู อาดา โกะ ซือมียา บาญะ กูญา ปือจายา กะ นามา นะ เยซู กรานา กูญา บือเลฮ ลีฮัจ ปือนานา นู มือฆัฮ นู เยซู บือเลฮ บูวัจ เตอ. 24 ตาปี เยซู ญา เตด บือเลฮ ตือตู-ฮาตี เดะ โกะ ซือมียา อีตู กรานา-จะ ญา กราลา ราตา โกะ ซือมียา 25 เตด ฆาโดฮ นะ อาดา ซาปา มือญาเระ กะ ญา ปาซัน ลาฆู นะ โกะ ซือมียา ซาเบะ-จะ ญา ตะอาซิก ญา ตาฮู ดัฮ จะ อาดา นามา เดะ ดาลับ ฮาตี นะ โกะ อูมัจ-ซือมียา เตอ.
1 อาดา ซือมียา ซืออูรัก เดะ ลูมอฮ ฟาริซี ปือนามา จะ นีโกเดมัด นู ฌาดี ซือมียา ซัยํ-บือซัยํ นะ โกะ ลูมอฮ ยิว. 2 ซือมียา อีนี ญา บือเลฮ มาแรฮ มียา เยซู เดะ วะตู มาลับ มือเลา จะ " บูมอยํ เออ ลูมอฮ กามี ตาฮู จะ เกา ฌาดี ซือมียา อาฌัยํ นู ดาตัก เดะ ตูฮัด. ซาเบะ-จะ ดัฮ ตูฮัด เดะ อาตัซ เตด ดูโดะ บือซามา ฮอย ซาปา เลอ นู นะ บือเลฮ บูวัจ ปือนานา นู มือฆัฮ บือกะ เกา บือเลฮ บูวัจ กะฆีเตอ." 3 เยซู ญา ตีกัฮ กะ ญา จะ "กู มือญาเระ กะ เกา ลาฆู นู ซูโงฮ จะ ดัฮ ซือมียา ดีฮา เตด บือฌาดี บารู เตอ ซือมียา อีตู นะ เตด บือเลฮ มาโซะ กะ ลูมอฮ ซือมียา นู ตูฮัด บือบือลา ฌาดี ราฌา เลอ." 4 นีโกเดมัด มือเลา กะ เยซู จะ "อูรัก ตูฮา นะ บือฌาดี บารู บือเลฮ กะฮามี? นะ มาโซะ กะ ดาลับ โปรจ มะ เดะ ญา ซือกาลี ลาฆี นะ บือฌาดี บารู บือเลฮ เฆอ?" 5 เยซู ตีกัฮ จะ "กู มือญาเระ ลาฆู นู ซูโงฮ กะ เกา จะ กะ ซือมียา ดีฮา เตด บือฌาดี มาแรฮ ดาตัก เดะ อาเย ฌางัน ซือมืองัจ นะ ตูฮัด เตอ ซือมียา อีตู นะ มาโซะ กะ ลูมอฮ ซือมียา นู ตูฮัด บือบือลา ฌาดี ราฌา เตด บือเลฮ เลอ. 6 โซะ ญาวา นะ ซือมียา ญา บือฌาดี มาแรฮ ดาตัก เดะ โกะ ซือมียา เตอ. ตาปี โซะ ซือมืองัจ นะ ซือมียา ญา บือฌาดี มาแรฮ ดาตัก เดะ ซือมืองัจ นะ ตูฮัด เลอ. 7 ฌางัน นะ ปือและ-ฮาตี นู กู มือญาเระ กะ เกา จะ กาเญา นะ ฆาโดฮ บือฌาดี บารู เลอ. 8 จะ อาเงน นะ ตีโยะ ปี โซะ ดีฮา ญา โปด ปี กะ โซะ อีตู เลอ. เกา ดืองัยํ ซูวารา อาเงน บือเลฮ เตอ ตาปี เกา เตด ตาฮู จะ ญา มาแรฮ ดาตัก เดะ โซะ ดีฮา นะ ตีโยะ ปี กะ โซะ ดีฮา. ซือมียา นู บือฌาดี ดาตัก เดะ ซือมืองัจ นะ ตูฮัด ฌาดี กะฆีเตอ ราตา ซือมียา เลอ." เยซู ญา จะ. 9 นีโกเดมัด ญา ตาญา เยซู จะ "ลาฆู กะฆีนี นะ ฌาดี กะฮามี บือเลฮ เลอ?" 10 เยซู ญา ตีกัฮ กะ ญา จะ "เกา เลอ นู ฌาดี ซือมียา อาฌัยํ นู ซัยํ-บือซัยํ เดะ ลูมอฮ อิซราเอน เกา เตด มาโซะ เดะ ฮาตี เดะ ลาฆู กะฆีนี เฆอ? 11 กู มือญาเระ ลาฆู นู ซูโงฮ กะ เกา จะ กามี มือเลา บือกะ บือนา นู กามี ตาฮู เลอ นะ ฌาดี ซะซี ปาซัน ซือบารัก นู กามี บือเลฮ ลีฮัจ. ตาปี กาเญา เตด บือเลฮ ซาโมจ ปือมือเลา ซะซี นะ กามี โปด. 12 ดัฮ กู มือญาเระ กะ กาเญา ลาฆู ซือบารัก โซะ ดือนียา อีนี ตาปี กาเญา เตด ปือจายา ดัฮ กะฆีเตอ วะตู กู นะ มือญาเระ กะ กาเญา ลาฆู ปาซัน ซือบารัก โซะ ลาแงะ กาเญา นะ บือเลฮ ปือจายา กะฮามี เลอ? 13 ฮอย ซือมียา ดีฮา บือเลฮ ญาแญะ ปี กะ อาตัซ ลาแงะ ดัฮ ลือเบฮ ซา ซือมียา อีตู นู ตูโรด มาแรฮ ดัฮ ฌาดี-จะ กู นู นานะ นะ อูมัจ-ซือมียา อีนี เลอ. 14 " มูซา ญา อาเมด อูลัยํ ตือมาฆา อีตู บอฮ เดะ กายู อาเกะ บรี ตีงี เดะ ปาดัก ตานัฮ ตูโฮยํ นู ลือฆา กะฮามี ดัฮ เตอ กะฆีเตอ เลอ นานะ นะ อูมัจ-ซือมียา ฆาโดฮ นะ กือนา อาเกะ บรี ตีงี ฌูฆา 15 บีดา ราตา ซือมียา นู ปือจายา กะ ญา นะ บือเลฮ ฮีโดะ ซูโงฮ ซือลาลู เลอ." 16 กรานา-จะ ตูฮัด เดะ อาตัซ ญา ซายัก ซูโงฮ กะ ลูมอฮ ซือมียา เดะ ดือนียา ราตา กะฆีเตอ ญา ฮาลัย บรี นานะ ตูงัน นะ ญา บีดา-จะ ราตา ซือมียา นู ปือจายา กะ นานะ อีตู นะ เตด ฌาฮานัม ตาปี นะ อาดา ลาฆู ฮีโดะ ซูโงฮ นู ซือลาลู เลอ. 17 กรานา-จะ ตูฮัด ญา บือเลฮ ซูโรฮ นานะ นะ ญา มาโซะ กะ ดือนียา อีนี บูกัด บีดา นะ ฮูโกบ โกะ ลูมอฮ ซือมียา เดะ ดือนียา ตาปี บีดา นานะ นะ ญา นะ ตูโลก กูญา อีตู บรี ฮีโดะ ลือปัซ บาฌิ. 18 ซือมียา นู ปือจายา กะ นานะ นะ ตูฮัด เตอ เตด ฆาโดฮ กือนา กรัจ ฮูโกบ เลอ. ตาปี ซือมียา นู เตด ปือจายา เตอ ญา กือนา กรัจ ฮูโกบ ดัฮ เลอ ซาเบะ-จะ ญา เตด บือเลฮ ปือจายา กะ นานะ ตูงัน นะ ตูฮัด เลอ. 19 ลาฆู กรัจ ฮูโกบ อีตู ญา ฌาดี กะฆีนี จะ ลาฆู จรัฮ บือเลฮ ซูโลฮ กะ ดาลับ ดือนียา ดัฮ ตาปี โกะ อูมัจ-ซือมียา กูญา ซายัก กะ นู กือลับ บาญะ เดะ นู จรัฮ กรานา-จะ โกะ ปือบูวัจ นะ กูญา ฌาฮัจ ซูโงฮ เลอ. 20 กรานา ราตา ซือมียา นู บูวัจ ฌาฮัจ เตอ ญา นะ บือชี กะ ลาฆู จรัฮ. ญา นะ เตด มาแรฮ รอจ กะ ลาฆู จรัฮ ตาโกจ-จะ นู ปือบูวัจ นะ ญา กือนา นะ ลีฮัจ บือฆารี จะ ฌาดี ลาฆู ฌาฮัจ เลอ. 21 ตาปี ซือมียา บูวัจ นู รือมัก เตอ ญา ซูกา มาแรฮ กะ ลาฆู จรัฮ บีดา นะ ลีฮัจ จะ ปือบูวัจ นะ ญา ญา บูวัจ ดัฮ ฌางัน ลาฆู ฮาระ กะ ตูฮัด เลอ. 22 ลือปัซ เดะ ลาฆู อีตู ดัฮ เตอ เยซู ญา บือเลฮ ปี กะ โซะ นังฆรี ยูเดีย ฌางัน โกะ มูเระ นะ ญา. ญา ดูโดะ ปัจ อีตู ฌางัน กูญา บือเลฮ บูวัจ ลาฆู ซือลับ เดะ อาเย ฌูฆา. 23 โซะ โยฮัน โปด ญา บูวัจ ลาฆู ซือลับ เดะ อาเย ปัจ ตูโปะ อัยโนน ดาปิก ตูโปะ ซาลิม กรานา-จะ ปัจ อีตู อาดา อาเย บาญะ. อาดา โกะ ซือมียา ปาคัจ ปี ซาโมจ ลาฆู ซือลับ เดะ อาเย. 24 วะตู อีตู โยฮัน ญา เตด กือนา รีฆะ บอฮ เดะ ปือฌารา ลาฆี เลอ. 25 อาดา ลาฆู บือตือฆัฮ เดะ ลูมอฮ มูเระ นะ โยฮัน ฌางัน ซือมียา บักซา ยิว ซืออูรัก ปาซัน ลาฆู บาโซฮ ญาวา บรี จรัฮ. 26 กะฆีเตอ โกะ มูเระ นะ โยฮัน อีตู กูญา ปี มียา โยฮัน มือเลา จะ "บูมอยํ เออ ซือมียา นู ดูโดะ ฌางัน เกา โซะ ซรือบัก ซูงัย จอแดน โซะ อาตัซ มาตาอารี ซือมียา อีตู เตอ นู เกา บือเลฮ ฌาดี ซะซี ปาซัน ลาฆู นะ ญา ญา เลอ อาดา บูวัจ ลาฆู ซือลับ เดะ อาเย. โกะ ซือมียา บาญะ ปาคัจ ปี มียา ญา เลอ." 27 โยฮัน ตีกัฮ จะ "ฮอย ซือมียา ดีฮา นะ บือเลฮ ซาโมจ ลาฆู นู นามา เลอ ลือเบฮ เดะ ตูฮัด บรี กะ ญา ดาตัก เดะ โซะ ลาแงะ ดัฮ. 28 กาเญา ตะอาซิก บือเลฮ ฌาดี ซะซี ปาซัน ลาฆู นะ กู ดัฮ นู กู บือเลฮ มือเลา จะ กู บูกัด ราฌา นู บรี ซือลามัจ เตอ ตาปี ฌาดี ปือญูโรฮ นู ตูฮัด ซูโรฮ มาแรฮ ดูลู เดะ ญา เลอ. 29 ซือมียา นู บือเลฮ เจาเซา เตอ ฌาดี เจาเบา เลอ. ตาปี กาวัด นะ เจาเบา นู บือดีรี นาตี โซะ เจาเบา ญา นะ ซูกา-ฮาตี ซูโงฮ ตานา ดืองัยํ ซูวารา นะ เจาเบา. กะฆีเตอ เลอ ลาฆู ซูกา-ฮาตี นะ กู ญา ปือนอฮ มีเม ดัฮ. 30 ญา เลอ ฆาโดฮ นะ บือซัยํ ซือมาตา ตาปี กู นี นะ ฆาโดฮ รือนัฮ ซือรูโลยํ เลอ." 31 ซือมียา นู มาแรฮ ดาตัก เดะ โซะ อาตัซ ญา บือซัยํ ลือเบฮ เดะ บือนา ซือมูฮา เลอ. ซือมียา นู มาแรฮ ดาตัก เดะ ดือนียา ฌาดี โซะ ดือนียา เลอ ฆาโดฮ นะ มือเลา ปาซัน ลาฆู โซะ ดือนียา. ซือมียา นู มาแรฮ เดะ โซะ ลาแงะ ญา บือซัยํ ลือเบฮ เดะ บือนา ซือมูฮา เลอ. 32 ญา เตอ ฌาดี ซะซี ปาซัน ลาฆู นู ญา บือเลฮ ลีฮัจ บือเลฮ ดืองัยํ เตอ. ตาปี ฮอย ซือมียา ดีฮา ซาโมจ ปือมือเลา ซะซี นะ ญา เลอ. 33 ตาปี ซือมียา ดีฮา นู ซาโมจ ปือมือเลา ซะซี นะ ญา เตอ บือเลฮ ตาแปะ มือกรา จะ ตูฮัด เดะ อาตัซ ญา ฌาดี นู ซูโงฮ เลอ. 34 ซาเบะ-จะ ซือมียา นู ตูฮัด เดะ อาตัซ ซูโรฮ มาแรฮ เตอ ญา มือเลา ปือมือเลา นะ ตูฮัด กรานา-จะ ตูฮัด ญา บรี ซือมืองัจ นะ ญา กะ ซือมียา อีตู ฮอย เตด กรีมัจ เลอ. 35 อาโปก เดะ อาตัซ ญา ซายัก กะ นานะ นะ ญา เลอ ญา บือเลฮ บรี บือนา ซือมูฮา ดูโดะ เดะ บาวัฮ ฮูโกบ นะ นานะ อีตู. 36 ซือมียา ดีฮา นู ปือจายา กะ นานะ นะ ตูฮัด ซือมียา อีตู นะ ฮีโดะ ซูโงฮ ซือลาลู. ซือมียา ดีฮา เตด มือนีงัย กะ นานะ นะ ตูฮัด นะ เตด บือเลฮ ดาปัจ ลาฆู ฮีโดะ ตาปี ญา ฆาโดฮ ดูโดะ เดะ บาวัฮ ลาฆู มูซัยํ กรัจ ฮูโกบ นะ ตูฮัด เดะ อาตัซ เลอ.
1 ลูมอฮ ฟาริซี กูญา ดืองัยํ บรีตา จะ เยซู ญา บือเลฮ มูเระ บาญะ เดะ โยฮัน ญา บรี กูญา ซาโมจ ลาฆู ซือลับ เดะ อาเย. 2 โงฮ-ซูโงฮ เตอ เยซู ตะอาซิก เตด บือเลฮ บรี ลาฆู ซือลับ เดะ อาเย ตาปี โกะ มูเระ นะ ญา เตอ กูญา บูวัจ บรี เลอ. 3 ตานา เยซู ตาฮู ดัฮ จะ กูญา มือเลา กะฮามี กะฆีเตอ ญา ตรือเบะ เดะ นังฆรี ยูเดีย ปาเระ ปี กะ นังฆรี ฆาลิลี ปูลัก. 4 เดะ ตืองัฮ ฌาลัด ญา ฆาฆัฮ บือฌาลัด ปี ลาลู เดะ นังฆรี ซะมาเรีย. 5 กะฆีเตอ เยซู ญา บือฌาลัด ปี รอจ กะ ซา ตูโปะ ปือนามา จะ ซีคา เดะ นังฆรี ซะมาเรีย ดาปิก ตานัฮ นู ยาโกบ ญา บือเลฮ บรี กะ โยเซบ นานะ นะ ญา. 6 ปัจ อีตู อาดา ตือลาฆา นะ ยาโกบ. เยซู ญา รือมัย โตระ ซาเบะ ญา บือฌาลัด มาแรฮ ฌาโวฮ ดัฮ. กะฆีเตอ ญา ดูโดะ เดะ บีดิก ตือลาฆา อีตู. วะตู อีตู บือเลฮ ฆามะ ตืองัฮ อารี ดัฮ. 7 อาดา นีบีนี ลูมอฮ ซะมาเรีย ซืออูรัก ญา มาแรฮ จือบุ อาเย. เยซู มือเลา ฌางัน นีบีนี อีตู จะ "ฮาฆิ อาเย บรี กะ กู นะ โอะ ซือตืองัฮ เลอ." 8 เดะ วะตู อีตู โกะ มูเระ นะ เยซู กูญา บือเลฮ มาโซะ ปี กะ ดาลับ นังฆรี บีดา นะ บือลี โกะ ซือบารัก มากัด. 9 นีบีนี อีตู ญา มือเลา ฌางัน เยซู จะ "เกา ฌาดี ซือมียา ลูมอฮ ยิว กู ฌาดี นีบีนี ลูมอฮ ซะมาเรีย เลอ. กะฆีเตอ ซาเบะ นามา ปะ เกา มาแรฮ มีตา อาเย เดะ กู?" ซาเบะ-จะ โกะ ลูมอฮ ยิว กูญา เตด กือนา บูกู ฌางัน ลูมอฮ ซะมาเรีย เลอ. 10 เยซู ญา ตีกัฮ กะ นีบีนี อีตู จะ "ดัฮ เกา บือเลฮ ตาฮู ซือบารัก นู ตูฮัด เดะ อาตัซ บรี ดัฮ เกา กราลา ซือมียา นู มือเลา ฌางัน เกา จะ 'มีตา อาเย บรี กะ กู โอะ.' กะฆีเตอ เกา โปด นะ บือเลฮ มีตา เดะ ซือมียา อีตู. ญา โปด นะ บรี อาเย นู บรี ฮีโดะ กะ เกา." 11 นีบีนี อีตู ญา มือเลา ฌางัน เยซู จะ "จา เออ โบะ เกา ฮอย อูเปฮ. ตือลาฆา อีนี โปด ดาลับ เลอ. เกา นะ บือเลฮ อาเย นู บรี ฮีโดะ ดาตัก ปัจ ดีฮา เลอ? 12 ยาโกบ เตอ นู บีลาแก นะ กามี ญา บือเลฮ บรี ตือลาฆา อีนี กะ กามี เลอ. จะ ยาโกบ ตะอาซิก โปด ญา บือเลฮ โอะ อาเย เดะ ตือลาฆา อีนี ฌางัน โกะ นานะ โกะ บือนาตัก นะ ญา ฌูฆา เลอ. เกา นี ฌาดี บือซัยํ ลือเบฮ เดะ ยาโกบ ซูโงฮ เฆอ?" 13 กะฆีเตอ เยซู ญา ตีกัฮ จะ "ราตา ซือมียา นู โอะ อาเย อีนี นะ ดาฆา ปูลัก เลอ. 14 ตาปี ดัฮ ซือมียา ดีฮา โอะ อาเย นู กู นะ บรี กะ ญา เตอ ญา นะ เตด ดาฆา อาเย ปูลัก ซือมาญัก-รอจ เลอ. อาเย นู กู นะ บรี กะ ญา เตอ นะ บรี ฌาดี บือกะ มาตา อาเย ซือบุยํ ดาลับ ญาวา นะ ญา บูวัจ บรี ญา อาดา ลาฆู ฮีโดะ ซูโงฮ นู ซือลาลู." 15 นีบีนี อีตู ญา มือเลา ฌางัน เยซู จะ "จา เออ มีตา ฮาฆิ อาเย อีตู บรี กะ กู เลอ บีดา กู นะ เตด ดาฆา อาเย ปูลัก ฮอย เตด ฆาโดฮ มาแรฮ จือบุ ปัจ อีนี ปูลัก." 16 เยซู ญา มือเลา ฌางัน นีบีนี อีตู จะ "ปี บลาโลก ลากี นะ เกา มาแรฮ กะ อีนี เลอ." 17 นีบีนี อีตู ญา ตีกัฮ กะ เยซู จะ "กู ฮอย ลากี เลอ." เยซู มือเลา ฌางัน ญา จะ "เกา มือเลา กือนา ดัฮ นู จะ เกา ฮอย ลากี. 18 ซาเบะ-จะ เกา บือเลฮ อาดา ลากี ลีมา อูรัก ดัฮ ตาปี ซือมียา นู ดูโดะ ฌางัน เกา เดะ วะตู อีนี เตอ ญา บูกัด ลากี นะ เกา. ลาฆู นู เกา มือเลา เตอ ซูโงฮ เลอ." 19 นีบีนี อีตู มือญาเระ กะ เยซู จะ "จา เออ กู ลีฮัจ บือฆารี ซูโงฮ ดัฮ จะ เกา ฌาดี ซือมียา ตูโดฮ ลาฆู นะ ตูฮัด เลอ. 20 โกะ ลูมอฮ บีลาแก นะ กามี กูญา บือเลฮ มือญือมัฮ กะ ตูฮัด เดะ บูเกะ อีนี. ตาปี ลูมอฮ กาเญา มือเลา จะ นังฆรี เยรูซาเลม เลอ นู ฌาดี ตือปัจ ฆาโดฮ นะ มือญือมัฮ กะ ตูฮัด." 21 เยซู มือเลา กะ นีบีนี อีตู จะ "นีบีนี เออ กือนา ปือจายา กะ ปือมือเลา นะ กู เลอ จะ อาดา ซา วะตู นู นะ มาแรฮ นู ลูมอฮ กาเญา นะ เตด มือญือมัฮ กะ อาโปก เดะ อาตัซ เดะ บูเกะ อีนี เฆอ-จะ เดะ ตือปัจ นังฆรี เยรูซาเลม โปด. 22 นู กาเญา มือญือมัฮ เตอ กาเญา เตด กราลา เลอ. ตาปี นู ลูมอฮ กามี มือญือมัฮ กามี กราลา เลอ. ซาเบะ-จะ นู โกะ อูมัจ-ซือมียา นะ ฮีโดะ ลือปัซ บาฌิ เตอ มาแรฮ ดาตัก เดะ ลูมอฮ ยิว. 23 ตาปี วะตู อีตู นะ มาแรฮ โงฮ-ซูโงฮ ญา รอจ ดัฮ เลอ จะ โกะ ซือมียา นู นะ มือญือมัฮ บรี กือนา ลาฆู เตอ ฆาโดฮ นะ มือญือมัฮ กะ อาโปก เดะ อาตัซ บือกะ ญา ฌาดี ซูโงฮ ตูโรจ บือกะ ซือมืองัจ นะ ตูฮัด บาวา. ซาเบะ-จะ อาโปก ญา มียา ซือมียา กะฆีเตอ นะ มือญือมัฮ กะ ญา เลอ. 24 ตูฮัด เดะ อาตัซ ญา ฌาดี ซือมืองัจ นู บาวา บรี ฮีโดะ เตอ. กะฆีเตอ ซือมียา นู นะ มือญือมัฮ กะ ญา ฆาโดฮ มือญือมัฮ กะ ตูฮัด บือกะ ญา ฌาดี ซูโงฮ ตูโรจ บือกะ ซือมืองัจ นะ ตูฮัด บาวา." 25 นีบีนี อีตู มือเลา ฌางัน เยซู จะ "กู ตาฮู จะ นู มาซีฮา อีตู นู บลาโลก จะ ราฌา นู บรี ซือลามัจ ญา นะ มาแรฮ ดัฮ. ตานา ญา มาแรฮ ญา นะ ตูโญะ บรี ลีฮัจ ลาฆู ซือมูฮา กะ กามี." 26 เยซู มือเลา ฌางัน นีบีนี อีตู จะ "กู นี นู มือเลา ฌางัน เกา กู ฌาดี ซือมียา อีตู เลอ." 27 ตานา บาฌิ โกะ มูเระ นะ เยซู กูญา มาแรฮ รอจ. กูญา ปาคัจ ปือและ-ฮาตี ซูโงฮ นู เยซู ญา มือเลา ฌางัน นีบีนี. ตาปี ฮอย ซาปา ตาญา จะ "เยซู นะ อาเมด นามา?" เฆอ-จะ "บูวัจ นามา ปะ เกา มือเลา ฌางัน นีบีนี อีตู เลอ?" 28 กะฆีเตอ นีบีนี อีตู ญา ตีงัน ปีโยะ บอฮ อาเย ญา มาโซะ ปี กะ ดาลับ ตูโปะ มือญาเระ กะ ซือมียา ซือมูฮา จะ 29 "มาแรฮ ลีฮัจ เลอ อาดา ซือมียา ซืออูรัก จรือตา รอจ กะ ลาฆู แนฮ-ฌือแนฮ นู กู บือเลฮ บูวัจ ซือมูฮา เตอ. ซือมียา อีนี นะ ฌาดี ราฌา นู บรี ซือลามัจ อีตู บือเลฮ เฆอ?" 30 กะฆีเตอ โกะ ซือมียา ปาคัจ ตรือเบะ เดะ ตูโปะ ปี มียา เยซู. 31 เดะ วะตู อีตู ลูมอฮ มูเระ บลาโลก เยซู จะ "บูมอยํ เออ มาแรฮ มากัด นาซี เลอ." 32 ตาปี เยซู มือเลา ฌางัน กูญา จะ "กู อาดา ซือบารัก มากัด นู กาเญา เตด ตาฮู ลาลู เลอ." 33 กะฆีเตอ โกะ มูเระ กูญา ปาคัจ บือตาญา-ตาญา ซามา กูญา จะ "อาดา ซือมียา ดีฮา นู บือเลฮ มาแรฮ อาตัจ นาซี บรี กะ บูมอยํ ดัฮ เฆอ?" 34 เยซู มือเลา ฌางัน กูญา จะ "บารัก มากัด นะ กู เตอ ฌาดี ลาฆู บูวัจ ตูโรจ ฮาตี นะ ตูฮัด นู บือเลฮ ซูโรฮ กู มาแรฮ บรี บูวัจ ลาฆู บือกรือฌา นู ญา ซูโรฮ บรี กู บูวัจ ตือดะ ซุจ ฮาบิฮ เลอ. 35 กาเญา มือเลา จะ 'อาดา ปัจ บูลัด ลาฆี นะ รอจ กะ มูเซด กือตับ ปาดี' บูกัด เฆอ? ตาปี กู มือญาเระ กะ กาเญา จะ ลางอฮ ปาลา เลอ ลีฮัจ โกะ บือนัก. ปาดี ญา กูนิง ฮาบิฮ รอจ วะตู ดัฮ นู นะ กือตับ ปาดี เลอ. 36 โกะ ซือมียา กือตับ โปด กูญา ตืองัฮ ซาโมจ รือฆา อูปัฮ ดัฮ จะ กูญา ตืองัฮ ปือมุน โกะ ปาดี ตาโรฮ บีดา นะ ฮีโดะ ซูโงฮ ซือลาลู. กะฆีเตอ เลอ ซือมียา ตานัม ฌางัน ซือมียา กือตับ ปาดี นะ บือเลฮ ซูกา-ฮาตี บือซามา เลอ. 37 ซาเบะ-จะ เดะ ลาฆู อีนี ปือมือเลา อีตู ฌาดี ซูโงฮ เลอ นู จะ 'นู ซืออูรัก ตานัม นู ซืออูรัก กือตับ.' 38 กู บือเลฮ ซูโรฮ กาเญา ปี กือตับ ตือปัจ บือนัก นู กาเญา เตด บือเลฮ บือกรือฌา. ตาปี ซือมียา อาซิก บือเลฮ บือกรือฌา บือนัก อีตู บารู กาเญา บือเลฮ อูโตก เดะ ลาฆู บือกรือฌา นะ ญา." เยซู ญา จะ. 39 อาดา ลูมอฮ ซะมาเรีย บาญะ อูรัก เดะ นังฆรี อีตู นู บือเลฮ ปือจายา กะ เยซู กรานา ปือมือเลา ซะซี นะ นีบีนี อีตู นู จะ "ญา บือเลฮ มือญาเระ ลาฆู แนฮ-ฌือแนฮ นู กู ดือละ บูวัจ ซือมูฮา ดัฮ เตอ." 40 กะฆีเตอ ตานา ลูมอฮ ซะมาเรีย มาแรฮ รอจ กะ เยซู กูญา มือเลา บาอาฌะ เยซู บรี ดูโดะ ฌางัน กูญา. กะฆีเตอ เยซู โปด ดูโดะ ตือปัจ อีตู ดูวา อารี. 41 อาดา โกะ ซือมียา บาญะ ลาฆี นู กูญา ปือจายา กะ เยซู กรานา ปือมือเลา นะ ญา เลอ. 42 กูญา มือเลา ฌางัน นีบีนี อีตู จะ "ตะเดะ อารี อีนี ปี นู กามี ปือจายา เตอ บูกัด กรานา ปือมือเลา นะ เกา ดัฮ เลอ ตาปี กรานา-จะ กามี บือเลฮ ดืองัยํ ตะอาซิก ดัฮ. กามี บือเลฮ ตาฮู ดัฮ จะ โงฮ-ซูโงฮ เยซู อีนี เลอ ฌาดี ซือมียา ตูโลก โกะ อูมัจ-ซือมียา เดะ ดือนียา บรี ฮีโดะ ลือปัซ บาฌิ ดัฮ เลอ." 43 ตานา ลือปัซ ดูวา อารี ดัฮ เยซู ตรือเบะ เดะ ตือปัจ อีตู ปี กะ นังฆรี ฆาลิลี. 44 ซาเบะ-จะ อีซี เยซู บือเลฮ มือเลา ฌาดี ซะซี จะ " ซือมียา ตูโดฮ ลาฆู นะ ตูฮัด เตอ กือนา เตด บราปา นะ ตูเฮะ เดะ ตูโปะ นะ ญา ตะอาซิก เลอ." 45 กะฆีเตอ ตานา เยซู ญา ปี กะ นังฆรี ฆาลิลี ลูมอฮ กูญา ซาโมจ ญา ซาเบะ-จะ กูญา โปด บือเลฮ ปี กะ บรามัย ปัจ นังฆรี เยรูซาเลม บือเลฮ ลีฮัจ ราตา มาจับ นู เยซู ญา บูวัจ ดัฮ เดะ บรามัย อีตู เลอ. 46 กะฆีเตอ เยซู ญา ปี กะ ตูโปะ คานา นังฆรี ฆาลิลี ปูลัก ฌาดี ตือปัจ นู ญา บือเลฮ บูวัจ อาเย บรี ฌาดี อาระ อางุน. ปัจ อีตู อาดา ซือมียา ซัยํ-บือซัยํ ซืออูรัก นานะ กีลากี นะ ญา นู ดูโดะ เดะ ตูโปะ คาเปอนาอุม ญา ฮอย เตด ซือนัง ญาวา. 47 ตานา ซือมียา อีตู ดืองัยํ บรีตา จะ เยซู มาแรฮ ดาตัก เดะ นังฆรี ยูเดีย มาแรฮ รอจ กะ นังฆรี ฆาลิลี ดัฮ กะฆีเตอ ญา ปี มือเลา ปูโฌะ เยซู บรี ปี กะ ตูโปะ คาเปอนาอุม บือบือลา นานะ นะ ญา กรานา นานะ อีตู ซรือปะ นะ มาตี ดัฮ. 48 เยซู มือเลา ฌางัน ญา จะ "ดัฮ กาเญา เตด ลีฮัจ โกะ ปือนานา นู มือฆัฮ นู ปือและ ซูโงฮ เตอ กาเญา นะ ฮอย เตด ปือจายา เลอ." 49 ซือมียา ซัยํ-บือซัยํ อีตู มือเลา ฌางัน เยซู จะ "จา เออ มาแรฮ ฌางัน กู ดูลู เลอ. ดัฮ ปี เตด ดัด นานะ นะ กู นะ มาตี เลอ." 50 กะฆีเตอ เยซู มือเลา ฌางัน ญา จะ "เกา บาลิ ปี เลอ นานะ นะ เกา ญา ซือนัง บาฌิ ดัฮ เลอ." ซือมียา อีตู ญา ปือจายา กะ ปือมือเลา อีตู นู เยซู บือเลฮ มือเลา ฌางัน ญา. กะฆีเตอ ญา บาลิ ปี ดัฮ. 51 วะตู ญา ตืองัฮ บือฌาลัด บาลิ ปี เตอ ลูมอฮ ปราโซฮ นะ ญา มาแรฮ ดาปัจ ญา เดะ ตืองัฮ ฌาลัด มือญาเระ บรีตา กะ ญา จะ "นานะ นะ เกา ซือนัง บาฌิ ดัฮ เลอ." 52 กะฆีเตอ ญา ตาญา วะตู นู นานะ นะ ญา ลือฆา ดัฮ จะ ปูโกยํ บราปา. โกะ ลูมอฮ ปราโซฮ กูญา มือญาเระ จะ "กือมารี เดะ วะตู ปูโกยํ ซา เลอ ฮูวัจ อีตู ฮาบิฮ ฮอย ดัฮ." 53 ปะ เดะ ญา อีงัจ บือเลฮ ดัฮ จะ วะตู อีตู เตอ ฌาดี วะตู นู เยซู บือเลฮ มือเลา ฌางัน ญา จะ "นานะ นะ เกา นะ ซือนัง บาฌิ." กะฆีเตอ อีซี ญา ตะอาซิก โปด ฌางัน โกะ นะบรานะ ซือรูมัฮ นะ ญา โปด กูญา ปือจายา ดัฮ. 54 นี เลอ ฌาดี ปือนานา มือฆัฮ นู ดูวา นู เยซู ญา บือเลฮ บูวัจ ดัฮ ตานา ญา ตรือเบะ เดะ นังฆรี ยูเดีย ปี กะ นังฆรี ฆาลิลี เลอ.
1 ลือปัซ อีตู รอจ กะ บรามัย นะ ลูมอฮ ยิว. กะฆีเตอ เยซู ญา ปี กะ นังฆรี เยรูซาเลม ดัฮ. 2 ปัจ นังฆรี เยรูซาเลม เดะ บีดิก ปีตู นู กูญา บลาโลก จะ ปีตู กาเมก อาดา กูบัก อาเย ซา กูบัก นู อาดา รูมัฮ บราดู รือมัย ลีมา บีฌี. กูบัก อีตู บาซา ฮีบรู บลาโลก จะ เบดซาทา. 3 เดะ โกะ รูมัฮ อีตู อาดา ซือมียา ซาเกะ บาญะ อูรัก อาดา ซือมียา มาตา บูตา ซือมียา จาเปะ ซือมียา เตด บือเลฮ ฌาลัด. ปัจ อีตู อาดา กีลากี ซืออูรัก เตด ซือนัง บือเลฮ ตีฆา-ปูโลฮ ลาปัด ตาโฮด ดัฮ. 6 ตานา เยซู ญา ลีฮัจ ซือมียา อีตู ตืองัฮ ตีโนะ ญา ตาฮู จะ ญา เตด ซือนัง ดูโดะ กะฆีเตอ ลามา ดัฮ. เยซู มือเลา ฌางัน ญา จะ "เกา ซูกา นะ บรี ซือนัง เดะ ปือญาเกะ อีนี เฆอ?" 7 ซือมียา นู เตด ซือนัง อีตู ญา ตีกัฮ จะ "จา เออ กาลา อาเย ญา ตืองัฮ บือดรัซ เตอ ฮอย ซือมียา ดีฮา โปด นะ บาวา กู บือปี ตูโรด กะ กูบัก. ตาปี ตืองัฮ กู ปี เตอ ซือมียา อาซิก ญา นะ ตูโรด ปี ดูลู เดะ กู ดัฮ เลอ." 8 เยซู มือเลา ฌางัน ญา จะ "บีกัซ เลอ อาเกะ บาวา ลือปัจ นะ เกา บือฌาลัด ปี เลอ." 9 ดัดดัด ซือมียา อีตู โปด ญา ซือนัง เดะ ปือญาเกะ อีตู ดัฮ. กะฆีเตอ ญา อาเกะ บาวา ลือปัจ นะ ญา บือฌาลัด ปี ดัฮ. อารี อีตู เลอ ฌาดี อารี บราดู กรือฌา. 10 กะฆีเตอ โกะ กือปาลา ลูมอฮ ยิว กูญา มือเลา ซัจๆ ฌางัน ซือมียา นู ซือนัง เดะ ปือญาเกะ อีตู จะ "อารี อีนี ฌาดี อารี บราดู เลอ. นู เกา บาวา ลือปัจ ปี เตอ ญา ซาลัฮ เดะ ฮาดัจ ฮูโกบ ลูมอฮ กีตา เลอ." 11 ตาปี ซือมียา อีตู ญา ตีกัฮ กะ กูญา จะ "ซือมียา นู บือบือลา กู บรี ซือนัง เดะ ปือญาเกะ เตอ ญา ปือซัด เดะ กู จะ 'อาเกะ บาวา ลือปัจ นะ เกา บือฌาลัด ปี เลอ.' " 12 โกะ ซือมียา อีตู กูญา ตาญา ญา จะ "ซือมียา นู ซูโรฮ เกา จะ อาเกะ บาวา ลือปัจ บือฌาลัด ปี เตอ ญา ฌาดี ซือมียา ดีฮา เลอ?" 13 ตาปี ซือมียา นู ซือนัง เดะ ปือญาเกะ เตอ ญา โปด เตด ตาฮู จะ ฌาดี ซือมียา ดีฮา ซาเบะ-จะ เยซู เตอ ญา บือเลฮ ซือลูนี ปี ดัฮ กรานา-จะ วะตู อีตู อาดา โกะ ซือมียา บาญะ เดะ ตือปัจ อีตู เลอ. 14 เดะ บลากัก เยซู ญา บือเลฮ ดาปัจ ฌางัน ซือมียา อีตู เดะ รูมัฮ มือญือมัฮ ตูฮัด มือเลา ฌางัน ญา จะ "นี เลอ เกา ซือนัง เดะ ปือญาเกะ ดัฮ. ฌางัน บูวัจ ดูซา ปูลัก เลอ. ดัฮ เตด กะฆีเตอ ลาฆู ฌาฮานัม ลือเบฮ เดะ อีตู นะ บือฌาดี เดะ เกา เลอ." 15 กีลากี อีตู ญา บือเลฮ ตรือเบะ มือญาเระ กะ โกะ กือปาลา ลูมอฮ ยิว จะ ซือมียา นู บือเลฮ บือบือลา ญา บรี ซือนัง เดะ ปือญาเกะ เตอ ฌาดี เยซู เลอ. 16 ซาเบะ ลาฆู อีนี เลอ ลูมอฮ ยิว อีตู กูญา ปรือกัด เยซู กรานา-จะ เยซู ญา บือเลฮ บือกรือฌา บือบือลา กะฆีเตอ เดะ อารี บราดู กรือฌา. 17 ตาปี เยซู ญา ตีกัฮ กะ กูญา จะ "อาโปก เดะ กู ญา ตืองัฮ บือกรือฌา ตือดะ รอจ กะ วะตู อีนี เลอ. กู โปด ตืองัฮ บือกรือฌา กะฆีเตอ ฌูฆา เลอ." 18 ซาเบะ ลาฆู อีนี เลอ โกะ กือปาลา ลูมอฮ ยิว กูญา ซือมาตา มียา จือลัฮ นะ บูนอฮ เยซู บูวัก บูกัด ซาเบะ เยซู ญา บูวัจ ซาลัฮ เดะ ฮาดัจ อารี บราดู ซา ลาฆู เตอ ตาปี ซาเบะ ญา บือเลฮ บลาโลก กะ ตูฮัด เดะ อาตัซ จะ ฌาดี อาโปก เดะ ญา ตะอาซิก เลอ. กะฆีเตอ ญา มืองากู จะ ญา ซามา บายา ฌางัน ตูฮัด เลอ. 19 กะฆีเตอ เยซู มือเลา ตีกัฮ กะ กูญา จะ "กู นะ มือญาเระ ฌางัน กาเญา ลาฆู นู ซูโงฮ จะ นานะ นะ ตูฮัด นะ บูวัจ ลาฆู นามา ตูโรจ กะ ฮาตี ตะอาซิก เตด บือเลฮ เลอ ลือเบฮ ซา ลาฆู อีตู นู ญา ลีฮัจ อาโปก เดะ ญา บูวัจ เลอ. กรานา-จะ ลาฆู นามา นู อาโปก บูวัจ เตอ ลาฆู อีตู นานะ นะ ญา บูวัจ กะฆีเตอ ฌูฆา เลอ. 20 กรานา-จะ อาโปก เดะ อาตัซ ญา ซายัก กะ นานะ นะ ญา เลอ. กะฆีเตอ ญา บูวัจ บรี นานะ นะ ญา ลีฮัจ โกะ ลาฆู ซือมูฮา นู อาโปก ตืองัฮ บูวัจ. อาดา ลาฆู บือกรือฌา นู บือซัยํ ซูโงฮ ลือเบฮ เดะ อีตู ปูลัก นู อาโปก นะ ปลีฮัจ กะ นานะ นะ ญา บีดา กาเญา นะ ปือและ-ฮาตี. 21 กรานา-จะ อาโปก เดะ อาตัซ ญา อาเกะ ซือมียา มาตี บรี ฮีโดะ ปาเระ กะฮามี เตอ นานะ นะ ตูฮัด โปด ญา ซูกา นะ บรี ซือมียา ดีฮา นะ ฮีโดะ ซูโงฮ เตอ ญา นะ บูวัจ กะฆีเตอ ฌูฆา เลอ. 22 กรานา-จะ อาโปก เดะ อาตัซ ญา เตด กรัจ ฮูโกบ ซือมียา ดีฮา โปด ตาปี ญา บือเลฮ ซรัฮ บรี นานะ นะ ญา ฌาดี ซือมียา กรัจ ฮูโกบ ลาฆู ซือมูฮา เลอ. 23 อาโปก ญา บูวัจ กะฆีเตอ บีดา โกะ ซือมียา ซือมูฮา นะ บือเลฮ ตูเฮะ กะ นานะ นะ ตูฮัด อีตู เลอ ซือรูปา บือกะ กูญา ตูเฮะ กะ อาโปก เดะ อาตัซ. ดัฮ ซือมียา ดีฮา เตด ตูเฮะ กะ นานะ นะ ตูฮัด ซือรูปา จะ ญา เตด ตูเฮะ กะ อาโปก เดะ อาตัซ นู ซูโรฮ นานะ นะ ญา มาแรฮ เลอ. 24 "กู มือญาเระ กะ กาเญา ลาฆู นู ซูโงฮ จะ ดัฮ ซือมียา ดีฮา มือนีงัย กะ ปือมือเลา นะ กู ปือจายา กะ ตูฮัด นู ซูโรฮ กู มาแรฮ เตอ ซือมียา อีตู เลอ ญา อาดา ลาฆู ฮีโดะ ซูโงฮ นู ซือลาลู. ญา นะ เตด กือนา กรัจ ฮูโกบ ตาปี ญา บือเลฮ ลือปัซ ลาฆู มาตี ปี กะ ลาฆู ฮีโดะ ดัฮ เลอ. 25 กู มือญาเระ กะ กาเญา ลาฆู นู ซูโงฮ จะ อาดา ซา วะตู นะ มาแรฮ เตอ โงฮ-ซูโงฮ วะตู อีตู ญา รอจ ดัฮ เลอ จะ ซือมียา นู มาตี ดัฮ นะ ดืองัยํ ซูวารา นะ นานะ นะ ตูฮัด. โกะ ซือมียา นู ดืองัยํ อีตู เตอ นะ อาดา ฮีโดะ ซูโงฮ เลอ. 26 กรานา-จะ อีซี อาโปก เดะ อาตัซ ญา ฌาดี ตือปัจ นู บรี ฮีโดะ กะฮามี ญา โปด บรี กะ นานะ นะ ญา ฌาดี ตือปัจ นู บรี ฮีโดะ กะฆีเตอ ฌูฆา เลอ. 27 ญา บือเลฮ บรี นานะ นะ อาดา ปือมือฆัฮ นะ กรัจ ฮูโกบ ฌูฆา ซาเบะ-จะ ญา ฌาดี นานะ นะ อูมัจ-ซือมียา เลอ. 28 กาเญา ฌางัน นะ ปือและ-ฮาตี เดะ ตือนอซ อีนี เลอ กรานา-จะ ดาปิก นะ รอจ วะตู นู โกะ ซือมียา มาตี ซือมูฮา นู ตานัม ดัฮ นะ ดืองัยํ ซูวารา นะ ญา 29 นะ ตรือเบะ มาแรฮ เลอ. โกะ ซือมียา นู บือเลฮ บูวัจ บาฌิ กูญา นะ ฮีโดะ ปาเระ บรี ฮีโดะ ซูโงฮ ซือลาลู. ตาปี โกะ ซือมียา นู บือเลฮ บูวัจ ฌาฮัจ เตอ กูญา นะ ฮีโดะ ปาเระ บีดา นะ กือนา กรัจ ฮูโกบ เลอ." 30 เยซู ญา มือเลา ปูลัก จะ "กู นะ บูวัจ ซือบารัก นามา โปด ตูโรจ กะ ฮาตี ตะอาซิก เตด บือเลฮ เลอ. กู ดืองัยํ กะฮามี กู กรัจ ฮูโกบ กะฆีเตอ. ลาฆู นู กู กรัจ ฮูโกบ เตอ ญา รือมัก ดัฮ กรานา บูกัด-จะ กู ซือมาตา นะ ตูโรจ กะ ฮาตี นะ กู ตะอาซิก ตาปี กู ตูโรจ บือกะ ฮาตี นะ ตูฮัด นู ซูโรฮ กู มาแรฮ เลอ. 31 "ดัฮ กู ฌาดี ซะซี ปาซัน ญาวา นะ กู ตะอาซิก ปือมือเลา ซะซี นะ กู เตอ ฮอย ซาปา นะ ซาโมจ ฌาดี ซูโงฮ เลอ. 32 ตาปี อาดา ซืออูรัก นู ฌาดี ซะซี ปาซัน ลาฆู นะ กู นู กู ตาฮู จะ ปือมือเลา ซะซี นู ญา มือเลา เตอ ฌาดี ซูโงฮ. 33 โซะ กาเญา บือเลฮ ซูโรฮ ซือมียา ปี มียา โยฮัน. กะฆีเตอ โยฮัน โปด บือเลฮ ฌาดี ซะซี ปาซัน ลาฆู นู ซูโงฮ. 34 ตาปี โซะ กู เตด ฆรานา อาดา ปือมือเลา ซะซี นู มาแรฮ ดาตัก เดะ โกะ ซือมียา ตาปี กู มือเลา ปือมือเลา กะฆีเตอ บีดา กาเญา นะ บือเลฮ ฮีโดะ ลือปัซ บาฌิ เลอ. 35 โยฮัน เตอ ฌาดี ซือรูปา ปลีตา นู จูโจฮ จรัฮ บือซายา. กะฆีเตอ กาเญา บือเลฮ ยอม ซูกา-ฮาตี ซา วะตู เดะ ลาฆู นู จรัฮ นะ ญา. 36 ตาปี กู โปด อาดา ปือมือเลา ซะซี ปาซัน ญาวา นะ กู เตอ นู บือซัยํ ลือเบฮ เดะ ปือมือเลา ซะซี นะ โยฮัน ลาฆี เลอ. กรานา-จะ ลาฆู บือกรือฌา นู ตูฮัด บือเลฮ บรี กะ กู กรือฌา บรี ซุจ เตอ ลาฆู บือกรือฌา อีตู เลอ นู กู ตืองัฮ บือกรือฌา ฌาดี ซะซี ปาซัน ลาฆู นะ กู จะ อาโปก เดะ อาตัซ บือเลฮ ซูโรฮ กู มาแรฮ. 37 กะฆีเตอ อาโปก นู ซูโรฮ กู มาแรฮ เตอ ญา ตะอาซิก โปด ฌาดี ซะซี ปาซัน ลาฆู นะ กู. กาเญา ฮอย เตด ดือละ ดืองัยํ ซูวารา นะ อาโปก เตอ เตด ดือละ ลีฮัจ ญาวา นะ ญา เลอ. 38 กาเญา ฮอย ปือมือเลา นะ ญา ดูโดะ เดะ ฮาตี นะ กาเญา กรานา-จะ กาเญา เตด ปือจายา กะ ซือมียา นู อาโปก บือเลฮ ซูโรฮ มาแรฮ เตอ. 39 กาเญา มือรูมะ เดะ ดาลับ ซูรัจ ปือมือเลา นะ ตูฮัด กรานา-จะ กาเญา บรีงัจ จะ เดะ ดาลับ ซูรัจ อีตู อาดา ลาฆู ฮีโดะ ซูโงฮ นู ซือลาลู. ตาปี อีซี ซูรัจ ปือมือเลา อีตู เลอ ญา ฌาดี ซะซี ปาซัน ลาฆู นะ กู. 40 ตาปี กาเญา ตีเมา มาแรฮ มียา กู บีดา นะ บือเลฮ ฮีโดะ เลอ. 41 "กู เตด นาตี ซาโมจ ลาฆู มือโอจ นู ดาตัก เดะ อูมัจ-ซือมียา. 42 ตาปี กู กราลา กาเญา บาฌิ จะ เดะ ฮาตี นะ กาเญา ฮอย ลาฆู ซายัก กะ ตูฮัด เดะ อาตัซ เลอ. 43 กู นี บือเลฮ มาแรฮ เดะ นามา นะ อาโปก เดะ กู. ตาปี กาเญา เตด บือเลฮ ซาโมจ กู ดัฮ. ตาปี ดัฮ ซือมียา อาซิก มาแรฮ เดะ นามา นะ ญา ตะอาซิก ซือมียา อีตู เลอ กาเญา นะ ซาโมจ. 44 กาเญา ซูกา นะ บรี กาวัด มือโอจ กะ กาเญา บือซามา-ซามา เตอ ตาปี ตีเมา นะ มียา ลาฆู มือโอจ นู ดาตัก เดะ ตูฮัด นู ฌาดี ตูฮัด แนฮ ซา เลอ. กะฆีเตอ กาเญา นะ ปือจายา กะ กู บือเลฮ กะฮามี เลอ? 45 ฌางัน บรีงัจ จะ กู นะ อาดู กาเญา กะ อาโปก เดะ อาตัซ เตอ. อาดา ซือมียา นู อาดู กาเญา ดัฮ ปือนามา จะ มูซา ซือมียา นู กาเญา ฮาระ กะ ญา เตอ เลอ. 46 ดัฮ กาเญา ปือจายา กะ มูซา เตอ กาเญา นะ ปือจายา กะ กู ดัฮ ซาเบะ-จะ มูซา บือเลฮ ฆาแรฮ มือเลา ปาซัน ลาฆู นะ กู เลอ. 47 ตาปี ดัฮ กาเญา เตด ปือจายา กะ ลาฆู นู มูซา บือเลฮ ฆาแรฮ ดัฮ กาเญา นะ ปือจายา กะ ปือมือเลา นะ กู บือเลฮ กะฮามี เลอ?" เยซู ญา จะ.
1 ลือปัซ อีตู เยซู ญา มือลากัฮ ลาโวจ ฆาลิลี นู โกะ ซือมียา บลาโลก ฌูฆา จะ ลาโวจ ทิเบรียัด. 2 โกะ ซือมียา บาญะ กูญา ตูโรจ กะ เยซู ปี กรานา-จะ กูญา อีตู บือเลฮ ลีฮัจ จะ เยซู บือเลฮ บูวัจ ปือนานา นู มือฆัฮ บือบือลา โกะ ซือมียา นู เตด ซือนัง ญาวา. 3 กะฆีเตอ เยซู ญา ญาแญะ ปี กะ อาตัซ บูเกะ ดูโดะ โซะ อีตู ฌางัน โกะ มูเระ นะ ญา เตอ. 4 เดะ วะตู อีตู ดาปิก นะ รอจ กะ อารี บรามัย ลือปัซ ปี จะ อารี บรามัย นะ ลูมอฮ ยิว. 5 กะฆีเตอ เยซู ญา ลางอฮ ปาลา ลีฮัจ โกะ ซือมียา บาญะ ปาคัจ มาแรฮ มียา ญา. ญา มือเลา ฌางัน ฟีลิบ จะ "กีตา นะ บือลี บารัก มากัด ตือปัจ ดีฮา เลอ บีดา นะ บรี กะ กูญา อีนี บือเลฮ มากัด เตอ?" 6 เยซู ญา มือเลา กะฆีเตอ บีดา นะ ลกลีฮัจ ฮาตี นะ ฟีลิบ. ตาปี อีซี ญา ตะอาซิก ตาฮู ดัฮ จะ นะ บูวัจ กะฮามี. 7 ฟีลิบ ญา ตีกัฮ กะ เยซู จะ "กีตา นะ บือลี บารัก มากัด เตอ รือฆา ดูวา ราตุซ รีเงะ ปีระ โปด เตด ฆือนะ นู นะ บรี กูญา มากัด โซก ดีกิ." 8 อาดา มูเระ นะ เยซู ซืออูรัก ปือนามา อันดรู อาดี เดะ เปโตร เตอ ญา มือเลา ฌางัน เยซู จะ 9 "ปัจ อีนี อาดา นานะ กีลากี ซืออูรัก. ญา อาดา ตือโปก โรตี ลีมา กือโตน ฌางัน อีกัด ดูวา อีโกยํ. ตาปี ตารา อีตู นะ ฆือนะ บือเลฮ กะฮามี เลอ ฌางัน โกะ ซือมียา นู บาญะ กะฆีนี?" 10 ตาปี เยซู มือเลา จะ "บรี กะ โกะ ซือมียา ซือมูฮา ดูโดะ เลอ." ตือปัจ อีตู อาดา รูโปจ บาญะ. กะฆีเตอ โกะ ซือมียา อีตู กูญา ดูโดะ กีรา ซา โกะ กีลากี ฆามะ-จะ ลีมา รีบู อูรัก บือเลฮ. 11 กะฆีเตอ เยซู ญา อาเมด ตือโปก อีตู บรี ซือลามัจ กะ ตูฮัด เดะ อาตัซ ดัฮ. ญา ลือแปะ ตือโปก โรตี อีตู ปาฮาฆิ บรี กะ โกะ ซือมียา นู ดูโดะ โตะ อีตู. ญา บูวัจ ซือรูปา กะฆีเตอ ฌางัน อีกัด บือกะ นู กูญา บือคานะ. 12 ตานา กูญา มากัด กือญัง ดัฮ เยซู มือเลา ฌางัน โกะ มูเระ นะ ญา จะ "กือนา มูงอจ ตาโรฮ โกะ กรือดะ นู ลือเบฮ เดะ มากัด ฌางัน บรี ตือตีงัน นามาๆ โปด." 13 กะฆีเตอ กูญา บือเลฮ มูงอจ โกะ กรือดะ ตือโปก โรตี นู ลือเบฮ เดะ มากัด เดะ ลีมา กือโตน อีตู บอฮ เดะ ซูเปะ บือเลฮ ดูวา-บือลัซ บีฌี ซูเปะ นอฮ-ปือนอฮ เลอ. 14 ตานา โกะ ซือมียา กูญา บือเลฮ ลีฮัจ ปือนานา นู มือฆัฮ นู เยซู บือเลฮ บูวัจ เตอ กูญา โปด ปาคัจ มือเลา จะ "โงฮ-ซูโงฮ ซือมียา อีนี ฌาดี ซือมียา ตูโดฮ ลาฆู นะ ตูฮัด อีตู นู นะ มาโซะ มาแรฮ กะ ดาลับ ดือนียา เลอ." 15 เยซู ญา ตาฮู ดัฮ จะ กูญา นะ รีฆะ ญา บือปี ตืองะ ฌาดี ราฌา. กะฆีเตอ ญา ปี กะ อาตัซ บูเกะ ปูลัก ซา อูรัก ญา เลอ. 16 ตานา มาตาอารี แฌะ-บือแฌะ โกะ มูเระ นะ เยซู กูญา ตูโรด ปี โซะ ลาโวจ 17 ญาแญะ ปราฮู นะ มือลากัฮ ปี กะ ซรือบัก โซะ ตูโปะ คาเปอนาอุม. กือลับ ดัฮ ตาปี เยซู ญา เตด บือเลฮ มาแรฮ รอจ กะ กูญา ลาฆี เลอ. 18 โซะ ลาโวจ อีตู อูมะ ญา บือซัยํ ดัฮ ซาเบะ-จะ อาเงน โปด ตือฆัยํ เลอ. 19 ตานา กูญา บราวัจ ปี บือเลฮ ฆามะ ลีมา นัม กีโลเมด กูญา ลีฮัจ บือฆารี เยซู ญา บือฌาลัด เดะ อาตัซ อาเย มาแรฮ ดาปิก ปราฮู. กูญา ตาโกจ ซูโงฮ 20 ตาปี เยซู มือเลา ฌางัน กูญา จะ "อีนี อีซี กู ตะอาซิก. ฌางัน ตาโกจ เลอ." 21 กะฆีเตอ กูญา ปาคัจ ซูกา-ฮาตี ซาโมจ เยซู ญาแญะ กะ ปราฮู ฌูฆา. ดัดดัด อีตู ปราฮู โปด รอจ กะ ปาตัย นู กูญา นะ ปี ดัฮ เลอ. 22 ตานา จรัฮ ปาฆี โกะ ซือมียา บาญะ นู อาดา ดูโดะ โซะ ซรือบัก อีตู ลาฆี กูญา ลีฮัจ จะ ดูลู เดะ อีตู อาดา ปราฮู แนฮ ซือบูวัฮ เลอ. กูญา ตาฮู ดัฮ จะ เยซู ญา เตด บือเลฮ ญาแญะ ปราฮู อีตู ปี ฌางัน โกะ มูเระ นะ ญา. ตาปี โกะ มูเระ ปี ดัฮ ซา กูญา เลอ. 23 ตาปี อาดา โกะ ปราฮู นู อาซิก มาแรฮ ดาตัก เดะ นังฆรี ทิเบรียัด มาแรฮ มือญูโซยํ ดาปิก ตือปัจ นู กูญา บือเลฮ มากัด ตือโปก โรตี ลือปัซ เดะ นู ตูฮัด เยซู บือเลฮ บรี ซือลามัจ กะ ตูฮัด เดะ อาตัซ ดัฮ. 24 กะฆีเตอ ตานา โกะ ซือมียา บาญะ อีตู ลีฮัจ จะ เยซู ฌางัน โกะ มูเระ นะ ญา เตด บือเลฮ ดูโดะ ตือปัจ อีตู เตอ กูญา ปาคัจ ญาแญะ ปราฮู ปี มียา เยซู ตือปัจ ตูโปะ คาเปอนาอุม. 25 ตานา โกะ ซือมียา ดาปัจ เยซู โซะ ซรือบัก ลาโวจ อีตู ดัฮ กูญา มือเลา ฌางัน ญา จะ " บูมอยํ เออ เกา มาแรฮ กะ ตือปัจ อีนี วะตู ดีฮา เลอ?" 26 เยซู ตีกัฮ กะ กูญา จะ "กู นะ มือญาเระ กะ กาเญา ลาฆู นู ซูโงฮ จะ กาเญา ตูโรจ มียา กู บูกัด กรานา-จะ บือเลฮ ลีฮัจ ปือนานา นู มือฆัฮ เตอ ตาปี กรานา-จะ บือเลฮ มากัด ตือโปก โรตี บรี กือญัง เลอ. 27 ฌางัน บือกรือฌา มียา ซือบารัก มากัด นู นะ บูโซะ ปี ดัฮ. ตาปี กือนา บือกรือฌา มียา ซือบารัก มากัด นู อาดา ซือรูโลยํ เตอ นู นะ บรี อาดา ฮีโดะ ซูโงฮ ซือลาลู เลอ. ซือบารัก อีตู กู นู นานะ นะ อูมัจ-ซือมียา อีนี นะ บรี กะ กาเญา กรานา-จะ ตูฮัด นู ฌาดี อาโปก เดะ อาตัซ ญา บือเลฮ บอฮ มือกรา บรี ลีฮัจ จะ ญา ซูกา-ฮาตี กะ กู เลอ." 28 กะฆีเตอ กูญา ตาญา เยซู จะ "ลูมอฮ กามี นะ บูวัจ กะฮามี บรี กามี นะ บือกรือฌา ลาฆู นะ ตูฮัด บือเลฮ เลอ?" 29 เยซู ตีกัฮ กะ กูญา จะ "กรือฌา นะ ตูฮัด ฌาดี กะฆีนี เลอ จะ บรี กาเญา ปือจายา กะ ซือมียา นู ตูฮัด ซูโรฮ มาแรฮ เลอ." 30 กะฆีเตอ กูญา มือเลา ฌางัน เยซู จะ "ดัฮ กะฆีเตอ เกา เลอ นะ บูวัจ ปือนานา มือฆัฮ นามา บีดา กามี นะ ลีฮัจ นะ บือเลฮ ปือจายา กะ เกา? จะ เกา นะ บือกรือฌา ลาฆู นามา เลอ? 31 โกะ บีลาแก นะ กามี เตอ กูญา บือเลฮ มากัด ตือโปก มานา เดะ ปาดัก ตานัฮ ตูโฮยํ นู ลือฆา อีตู ซือรูปา บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ 'ญา บือเลฮ บรี ซือบารัก นู ดาตัก เดะ โซะ ลาแงะ บรี กะ กูญา มากัด ดัฮ.' " 32 เยซู มือเลา ฌางัน กูญา จะ "กู มือญาเระ กะ กาเญา ลาฆู นู ซูโงฮ จะ บูกัด มูซา เตอ นู บือเลฮ บรี ซือบารัก มากัด นู ดาตัก เดะ โซะ ลาแงะ บรี กะ กาเญา. ตาปี อาโปก เดะ อาตัซ นะ กู เลอ ญา บรี ซือบารัก มากัด นู ซูโงฮ ดาตัก เดะ โซะ ลาแงะ บรี กะ กาเญา. 33 กรานา-จะ ซือบารัก มากัด นู ตูฮัด บรี เตอ ญา ฌาดี ซือมียา นู ตูโรด มาแรฮ ดาตัก เดะ โซะ ลาแงะ นู บรี ลาฆู ฮีโดะ กะ โกะ อูมัจ-ซือมียา เดะ ดือนียา เลอ." 34 กะฆีเตอ กูญา มือเลา ฌางัน เยซู จะ "จา เออ มีตา บรี ซือบารัก มากัด อีตู กะ กามี ซือมาญัก-รอจ เลอ." 35 เยซู มือเลา ฌางัน กูญา จะ "กู นี เลอ ฌาดี ซือบารัก มากัด นู บรี ฮีโดะ. ซือมียา นู มาแรฮ มียา กู นะ ฮอย เตด ลาปัยํ ปูลัก. ซือมียา นู ปือจายา กะ กู นะ ฮอย เตด ดาฆา ปูลัก ซือมาญัก-รอจ เลอ. 36 ตาปี กู บือเลฮ มือญาเระ กะ กาเญา ดัฮ จะ มีเซ-จะ กาเญา บือเลฮ ลีฮัจ กู ดัฮ ตาปี กาเญา เตด ปือจายา เลอ. 37 ราตา ซือมียา นู อาโปก เดะ อาตัซ บรี กะ กู กูญา นะ มาแรฮ รอจ กะ กู เลอ. ดัฮ ซือมียา ดีฮา มาแรฮ รอจ กะ กู กู โปด นะ ฮอย เตด ตีงัน ญา. 38 ซาเบะ-จะ กู บือเลฮ ตูโรด มาแรฮ ดาตัก เดะ ลาแงะ บูกัด นะ บูวัจ ตูโรจ กะ ฮาตี นะ กู ตะอาซิก ตาปี นะ บูวัจ ตูโรจ บือกะ ฮาตี นะ ตูฮัด นู ซูโรฮ กู มาแรฮ เลอ. 39 ตูฮัด นู ซูโรฮ กู มาแรฮ เตอ ญา อาดา ฮาตี กะฆีนี จะ บรี กู นะ บือบือลา ราตา โกะ ซือมียา นู อาโปก บือเลฮ ซรัฮ บรี กะ กู ตีเมา บรี ลือแงะ ซืออูรัก โปด ตาปี นะ บรี กูญา ฮีโดะ ปาเระ ปูลัก เดะ อารี ปือญูดัฮ เลอ. 40 กรานา-จะ นี เลอ ฌาดี ลาฆู บือคานะ นะ อาโปก เดะ กู จะ บรี ราตา ซือมียา นู ลีฮัจ บือฆารี นานะ นะ ญา ปือจายา กะ นานะ นะ ญา เตอ นะ บรี กูญา บือเลฮ ลาฆู ฮีโดะ ซูโงฮ นู ซือลาลู. กะฆีเตอ กู โปด นะ อาเกะ ซือมียา อีตู บรี ฮีโดะ ปาเระ เดะ อารี ปือญูดัฮ." เยซู ญา จะ. 41 กะฆีเตอ โกะ ลูมอฮ ยิว บือซูงุจ ซามา กูญา ลาฆู นะ เยซู กรานา เยซู บือเลฮ มือเลา จะ "กู ฌาดี ซือบารัก มากัด นู ตูโรด มาแรฮ ดัฮ ดาตัก เดะ โซะ ลาแงะ." 42 กูญา อีตู ปาคัจ มือเลา จะ "ซือมียา อีนี เตอ ญา ฌาดี เยซู นานะ นะ โยเซบ บูกัด เฆอ? มะปะ เดะ ญา กีตา โปด กราลา. ซาเบะ นามา ญา มือเลา วะตู อีนี จะ ญา บือเลฮ ตูโรด มาแรฮ ดาตัก เดะ โซะ ลาแงะ?" 43 เยซู ตีกัฮ กะ กูญา จะ "ฌางัน บือซูงุจ ซามา กาเญา เลอ. 44 ฮอย ซือมียา ดีฮา นะ มาแรฮ รอจ กะ กู เลอ ลือเบฮ เดะ อาโปก ญา นู ซูโรฮ กู มาแรฮ เตอ นะ บาวา บาอาฌะ ญา. กู โปด นะ อาเกะ ญา บรี ฮีโดะ ปาเระ เดะ อารี ปือญูดัฮ เลอ. 45 อาดา ซือปาตัฮ นู ฆาแรฮ ดัฮ เดะ ซูรัจ นะ โกะ ซือมียา ตูโดฮ ลาฆู นะ ตูฮัด จะ 'ตูฮัด นะ อาฌัยํ กูญา ราตา ซือมียา.' กะฆีเตอ โกะ ซือมียา ราตา นู มือนีงัย กะ อาโปก เดะ อาตัซ นู บลาฌัยํ เดะ ญา เตอ กูญา มาแรฮ รอจ กะ กู เลอ. 46 บูกัด-จะ ซือมียา ดีฮา บือเลฮ ลีฮัจ บือฆารี อาโปก เดะ อาตัซ เตอ. ลือเบฮ ซา ซือมียา อีตู นู มาแรฮ ดาตัก เดะ ตูฮัด. ญา เตอ เลอ นู บือเลฮ ลีฮัจ บือฆารี อาโปก เดะ อาตัซ ดัฮ. 47 "กู มือญาเระ ลาฆู นู ซูโงฮ กะ กาเญา จะ ซือมียา นู ปือจายา กะ กู ญา อาดา ลาฆู ฮีโดะ ซูโงฮ นู ซือลาลู เลอ. 48 กู นี เลอ ฌาดี ซือบารัก มากัด นู บรี ฮีโดะ. 49 โกะ บีลาแก นะ กาเญา บือเลฮ มากัด ตือโปก มานา เดะ ตือปัจ ปาดัก ตานัฮ ตูโฮยํ นู ลือฆา เตอ ตาปี กูญา มาตี ดัฮ เลอ. 50 ตาปี ซือบารัก มากัด นู ตูโรด มาแรฮ ดาตัก เดะ โซะ ลาแงะ เตอ ฌาดี มาจับ อีนี จะ ซือมียา ดีฮา มากัด ดัฮ นะ เตด มาตี เลอ. 51 กู นี เลอ ฌาดี ซือบารัก มากัด นู ฮีโดะ ตูโรด มาแรฮ เดะ โซะ ลาแงะ ดัฮ. ซือมียา ดีฮา มากัด ซือบารัก มากัด อีนี ซือมียา อีตู นะ ฮีโดะ ซูโงฮ ซือลาลู เลอ. โกะ ซือบารัก มากัด นู กู นะ บรี เตอ ฌาดี ลูลู นะ กู นู กู นะ ซรัฮ บรี บีดา โกะ ซือมียา เดะ ดือนียา นะ ฮีโดะ เลอ." เยซู ญา จะ. 52 กะฆีเตอ โกะ ลูมอฮ ยิว กูญา ปาคัจ บือตือฆัฮ ซามา กูญา จะ "ซือมียา อีนี นะ อาเมด ลูลู นะ ญา บรี กะ กีตา มากัด บือเลฮ กะฮามี เลอ?" 53 กะฆีเตอ เยซู มือเลา ฌางัน กูญา จะ "กู มือญาเระ ลาฆู ซูโงฮ กะ กาเญา จะ ดัฮ กาเญา เตด มากัด ลูลู เตด โอะ ดารัฮ นะ กู นู นานะ นะ อูมัจ-ซือมียา อีนี กาเญา นะ ฮอย เตด ฮีโดะ เดะ ญาวา นะ กาเญา เลอ. 54 ซือมียา ดีฮา นู มากัด ลูลู นะ กู นู โอะ ดารัฮ นะ กู ญา อาดา ลาฆู ฮีโดะ ซูโงฮ นู ซือลาลู เลอ. จะ กู โปด นะ อาเกะ ซือมียา อีตู บรี ฮีโดะ ปาเระ เดะ มาตี เดะ อารี ปือญูดัฮ. 55 กรานา-จะ ลูลู นะ กู ฌาดี ซือบารัก มากัด นู ซูโงฮ. ดารัฮ นะ กู ฌาดี ซือบารัก โอะ นู ซูโงฮ เลอ. 56 ซือมียา นู มากัด ลูลู นะ กู นู โอะ ดารัฮ นะ กู เตอ ซือมียา อีตู เลอ ญา อาดา ดูโดะ ลือกัจ ฌางัน กู. กู โปด อาดา ดูโดะ ลือกัจ ฌางัน ซือมียา อีตู ฌูฆา เลอ. 57 อาโปก นู ฮีโดะ ซือลาลู เตอ ญา เลอ ซูโรฮ กู มาแรฮ ดัฮ. กู โปด อาดา ฮีโดะ กรานา อาโปก เตอ. ซือรูปา กะฆีเตอ ซือมียา นู มากัด กู ซือมียา อีตู โปด นะ อาดา ฮีโดะ กรานา กู กะฆีเตอ ฌูฆา เลอ. 58 นี เลอ ฌาดี ซือบารัก มากัด นู ตูโรด มาแรฮ ดาตัก เดะ โซะ ลาแงะ ดัฮ เตด ซือรูปา ซือบารัก นู โกะ บีลาแก นะ กาเญา มากัด ตาปี กูญา มาตี ดัฮ เตอ. ซือมียา นู มากัด ซือบารัก มากัด อีนี นะ อาดา ฮีโดะ ซือลาลู เลอ." เยซู ญา จะ. 59 ปือมือเลา กะฆีนี เยซู บือเลฮ มือเลา เดะ รูมัฮ บือมุน กาลา ญา ตืองัฮ อาฌัยํ เดะ ตูโปะ คาเปอนาอุม. 60 ตานา โกะ มูเระ นะ ญา บาญะ อูรัก ดืองัยํ กะฆีเตอ ดัฮ กูญา มือเลา จะ "ปือมือเลา กะฆีนี ปายัฮ ซูโงฮ ซาปา นะ มาโซะ เดะ ฮาตี บือเลฮ เลอ?" 61 ตาปี เยซู ญา ตาฮู เดะ ฮาตี จะ โกะ มูเระ นะ ญา บือซูงุจ ซามา กูญา ปาซัน ลาฆู อีนี. กะฆีเตอ ญา มือเลา ฌางัน กูญา จะ "ลาฆู อีนี บูวัจ บรี กาเญา บรีงัจ บาญะ บรี อูโนยํ เดะ กู เฆอ? 62 ดัฮ-จะ กาเญา นะ ลีฮัจ กู นู นานะ นะ อูมัจ-ซือมียา อีนี ญาแญะ ปี กะ ตือปัจ นู กู ดูโดะ ดูลู เตอ กาเญา นะ มือเลา กะฮามี เลอ? 63 ซือมืองัจ นะ ตูฮัด เตอ ญา เลอ นู บรี ฮีโดะ. ตาปี โซะ ญาวา นะ ซือมียา เตอ บูวัจ ลาฆู นามา เตด บือเลฮ เลอ. โกะ ปือมือเลา นู กู บือเลฮ มือเลา ฌางัน กาเญา ดัฮ ฌาดี ปือมือเลา ดาตัก เดะ ซือมืองัจ นะ ตูฮัด ฌาดี ปือมือเลา นู บรี ฮีโดะ เลอ. 64 ตาปี เดะ ลูมอฮ กาเญา อาดา ซือตืองัฮ นู เตด ปือจายา." ญา จะ. กรานา-จะ เยซู ญา ตาฮู ตะเดะ ลามูลา ดัฮ จะ ซือมียา ดีฮา นู นะ เตด ปือจายา กะ ญา จะ อาดา ซืออูรัก นู ดีฮา นะ ซรัฮ ญา บรี กือนา รีฆะ. 65 เยซู มือเลา ปูลัก จะ "ซาเบะ กะฆีเตอ เลอ กู บือเลฮ มือญาเระ กะ กาเญา จะ ฮอย ซือมียา ดีฮา นะ มาแรฮ รอจ กะ กู บือเลฮ ลือเบฮ ซา โกะ ซือมียา นู อาโปก เดะ อาตัซ นะ บรี มาแรฮ เลอ." 66 ตะเดะ อีตู มาแรฮ มูเระ นะ เยซู บาญะ อูรัก กูญา อูโนยํ เดะ ญา ตีเมา นะ ตูโรจ กะ ญา ปี กะ ดีฮา ดัฮ. 67 กรานา กะฆีเตอ เยซู ตาญา โกะ มูเระ ดูวา-บือลัซ อูรัก อีตู จะ "กาเญา โปด กาเญา นะ ตีงัน กู ปี ฌูฆา ดัฮ เฆอ?" 68 กะฆีเตอ เปโตร ญา ตีกัฮ กะ เยซู จะ "ตูฮัด เออ ลูมอฮ กามี นะ ตีงัน เกา ปี มียา ซือมียา ดีฮา เลอ? เกา อาดา โกะ ปือมือเลา นู บรี อาดา ลาฆู ฮีโดะ ซูโงฮ นู ซือลาลู เลอ. 69 จะ ลูมอฮ กามี บือเลฮ ปือจายา ดัฮ บือเลฮ ตาฮู ดัฮ จะ เกา เลอ ฌาดี ซือมียา นู บาฌิ บือซรี นู ดาตัก เดะ ตูฮัด เดะ อาตัซ เลอ." 70 เยซู ตีกัฮ กะ กูญา จะ "กู บือเลฮ ปีเลฮ กาเญา ดูวา-บือลัซ อูรัก บูกัด เฆอ? ตาปี เดะ ลูมอฮ กาเญา อาดา ซืออูรัก นู ฌาดี ฮาตู ซีตัด เลอ." 71 เยซู ญา มือเลา ตูโดฮ รอจ กะ ยูดา นานะ นะ ซีโมน อิดคารีโยด ซาเบะ-จะ ญา เตอ มีเซ-จะ ฌาดี ซืออูรัก เดะ ลูมอฮ มูเระ ดูวา-บือลัซ อูรัก อีตู ตาปี ญา ฌาดี ซือมียา นู นะ ซรัฮ เยซู บรี กือนา รีฆะ เลอ.
1 ลือปัซ อีตู ปูลัก เยซู ญา บือฌาลัด ปี ราตา ตือปัจ เดะ นังฆรี ฆาลิลี. ญา ตีเมา นะ ปี กะ นังฆรี ยูเดีย ซาเบะ-จะ โกะ กือปาลา ลูมอฮ ยิว กูญา มียา ตาดัฮ นะ บูนอฮ ญา. 2 กาลา อีตู ซรือปะ นะ รอจ กะ ลาฆู บรามัย ดูโดะ เดะ ซาเราะ กาฌัก นะ ลูมอฮ ยิว. 3 กะฆีเตอ โกะ ลูมอฮ อาดี นะ เยซู กูญา มือเลา ฌางัน ญา จะ "เกา กือนา ตรือเบะ เดะ ตือปัจ อีนี เลอ ปี กะ นังฆรี ยูเดีย บีดา โกะ มูเระ นะ เกา นะ บือเลฮ ลีฮัจ โกะ ลาฆู ปือบูวัจ นะ เกา นู เกา ตืองัฮ บูวัจ เตอ. 4 กรานา-จะ ดัฮ ซือมียา ดีฮา ซูกา นะ บรี โกะ ซือมียา ราตาๆ กราลา ญาวา นะ ญา ซือมียา อีตู นะ ฮอย เตด บูนี บูวัจ โกะ ซือบารัก นามา งะซืองะ เลอ. ดัฮ เกา นะ บูวัจ ลาฆู กะฆีนี กือนา บูวัจ บรี ดือนียา ซือมูฮา นะ ลีฮัจ บือฆารี ญาวา นะ เกา เลอ." กูญา จะ. 5 โกะ ลูมอฮ อาดี นะ เยซู กูญา มือเลา กะฆีเตอ ซาเบะ-จะ กูญา เตด ปือจายา กะ ญา. 6 กะฆีเตอ เยซู มือเลา ฌางัน กูญา จะ "ฮอย เตด รอจ กะ วะตู นู บาฌิ นะ กู ลาฆี. ตาปี วะตู นะ กาเญา อาดา ซือรูโลยํ เลอ. 7 ดือนียา นะ บือชี กะ ลูมอฮ กาเญา เตด บือเลฮ เลอ ตาปี ดือนียา นะ บือชี กะ กู ดัฮ กรานา-จะ กู นี เลอ ฌาดี ซะซี จะ ลาฆู บือกรือฌา นะ ดือนียา เตอ ญา ฌาฮัจ เลอ. 8 ลูมอฮ กาเญา เลอ กือนา ญาแญะ ปี กะ บรามัย. ตาปี โซะ กู กู เตด ปี กะ บรามัย อีตู ซาเบะ-จะ วะตู นะ กู เตอ ญา ฮอย เตด รอจ ลาฆี เลอ." 9 ตานา เยซู มือเลา กะฆีเตอ ดัฮ อีซี ญา เตอ อาดา ดูโดะ เดะ นังฆรี ฆาลิลี ลาฆี. 10 ตาปี ตานา โกะ อาดี นะ เยซู กูญา ญาแญะ ปี กะ บรามัย ดัฮ เยซู โปด ตูโรจ ญาแญะ ปี ฌูฆา. ตาปี ญา ปี งะซืองะ เตด บรี ซาปา ตาฮู เลอ. 11 โกะ กือปาลา ลูมอฮ ยิว กูญา มียา เยซู เดะ บรามัย อีตู เตด ดาปัจ. กูญา บือตาญา-ตาญา จะ "ซือมียา อีตู ดูโดะ ตือปัจ ดีฮา เลอ?" 12 โกะ ลูมอฮ ซือมียา บาญะ กูญา ปาคัจ บือบีซิ ซามา กูญา ปาซัน ลาฆู นะ เยซู. ซือตืองัฮ มือเลา จะ "ญา ฌาดี ซือมียา บาฌิ เลอ." ซือตืองัฮ จะ "บูกัด โบะ ญา บูวัจ บรี โกะ ซือมียา ซือซัจ ฌาลัด ดัฮ." 13 ตาปี ฮอย ซือมียา ดีฮา บรานี มือเลา บรี ดืองัยํ กรานา-จะ ตาโกจ เดะ โกะ กือปาลา ลูมอฮ ยิว เลอ. 14 ตานา รอจ กะ อารี เดะ ตืองัฮ ลาฆู บรามัย อีตู ดัฮ เยซู ญา มาโซะ ปี กะ รูมัฮ มือญือมัฮ ตูฮัด ฮึนตะ นะ อาฌัยํ โกะ ลูมอฮ ซือมียา. 15 โกะ กือปาลา ลูมอฮ ยิว กูญา ปาคัจ ปือและ-ฮาตี มือเลา จะ "ซือมียา อีนี ญา ตาฮู โกะ ซูรัจ บือเลฮ กะฮามี? โบะ ญา เตด บือเลฮ บลาฌัยํ ซูรัจ เลอ." 16 กะฆีเตอ เยซู ญา ตีกัฮ กะ กูญา จะ "ปือมือเลา อาฌัยํ นะ กู บูกัด นะ กู ตะอาซิก เลอ ตาปี ฌาดี นะ ตูฮัด นู ซูโรฮ กู มาแรฮ. 17 ซือมียา ดีฮา นู ตือตู-ฮาตี นะ บูวัจ ตูโรจ กะ ลาฆู นู ตูฮัด บือคานะ เตอ ซือมียา อีตู นะ ตาฮู จะ ปือมือเลา อาฌัยํ อีตู ดาตัก เดะ ตูฮัด เดะ อาตัซ เฆอ? เฆอ-จะ กู มือเลา ตูโรจ กะ ฮาตี นะ กู ตะอาซิก เลอ. 18 ซือมียา ดีฮา นู มือเลา ตูโรจ กะ ฮาตี นะ ตะอาซิก เตอ ซือมียา อีตู ญา ซูกา นะ บรี โกะ ซือมียา มือโอจ กะ อีซี ญาวา นะ ญา. ตาปี ซือมียา ดีฮา นู นะ บรี โกะ ซือมียา มือโอจ กะ ตูฮัด นู ซูโรฮ ญา มาแรฮ เตอ ซือมียา อีตู เลอ ญา ฌาดี ซือมียา รือมัก ฮอย ลาฆู มืออูปัย ลาลู เลอ. 19 มูซา ญา บือเลฮ อาเมด ปือมือเลา ฮูโกบ นะ ตูฮัด บรี กะ กาเญา บูกัด เฆอ? ตาปี เดะ ลูมอฮ กาเญา ฮอย ซาปา บูวัจ ตูโรจ กะ ปือมือซัด อีตู. จะ กาเญา มียา จือลัฮ นะ บูนอฮ กู บูวัจ นามา เลอ?" 20 โกะ ซือมียา บาญะ อีตู กูญา ตีกัฮ จะ "เดะ ญาวา นะ เกา อาดา ฮาตู มาโซะ. ซาปา เลอ นะ มียา จือลัฮ นะ บูนอฮ เกา?" 21 กะฆีเตอ เยซู ญา ตีกัฮ กะ กูญา จะ "กู บือเลฮ บือกรือฌา ลาฆู มือฆัฮ ซือมาตา บารู กาเญา ปาคัจ ปือและ-ฮาตี เดะ ลาฆู อีตู เลอ. 22 มูซา ญา บือเลฮ ปือซัด บรี กาเญา บูวัจ ลาฆู กรัจ. (โงฮ-ซูโงฮ บูกัด-จะ มาแรฮ ดาตัก เดะ มูซา ตาปี มาแรฮ ดาตัก เดะ โกะ บีลาแก เลอ.) มีเซ เดะ อารี บราดู กรือฌา โปด กาเญา บรี กะ ซือมียา นะ ซาโมจ ลาฆู กรัจ. 23 ดัฮ เดะ อารี บราดู ซือมียา นะ บือเลฮ ซาโมจ ลาฆู กรัจ บีดา ตีเมา บรี ซาลัฮ เดะ ฮาดัจ ฮูโกบ นะ มูซา ดัฮ บูวัจ นามา ปะ กาเญา มูซัยํ กะ กู กรานา-จะ กู บือเลฮ บูวัจ บรี ซือมียา ซืออูรัก ซือนัง บาฌิ ซือมูฮา ดัฮ เดะ อารี บราดู เลอ? 24 ฌางัน นะ กรัจ ฮูโกบ ซือมียา ตูโรจ บือกะ ลาฆู นู กาเญา ลีฮัจ โซะ ลูวัยํ. ตาปี กือนา กรัจ ฮูโกบ บรี รือมัก บาฌิ เลอ." 25 กะฆีเตอ ลูมอฮ ซือมียา นังฆรี เยรูซาเลม มือเลา จะ "ซือมียา อีนี บูกัด เฆอ นู กูญา มียา จือลัฮ นะ บูนอฮ ญา บูวัก เตอ? 26 นี เลอ ญา ตืองัฮ มือเลา บรี ดืองัยํ. โกะ ซือมียา โปด กูญา ฮอย เตด มือเลา นามา กะ ญา ลาลู เลอ. โกะ ลูมอฮ กือปาลา ตาฮู ซูโงฮ ดัฮ เฆอ จะ ซือมียา อีนี ฌาดี ราฌา นู บรี ซือลามัจ? 27 ตาปี กีตา ตาฮู ดัฮ จะ ซือมียา อีนี ญา ดาตัก เดะ ตือปัจ ดีฮา. ตานา ราฌา นู บรี ซือลามัจ นะ มาแรฮ เตอ ฮอย ซาปา นะ บือเลฮ ตาฮู ดัฮ จะ ญา มาแรฮ ดาตัก ปัจ ดีฮา เลอ." 28 กะฆีเตอ ตานา เยซู ตืองัฮ อาฌัยํ เดะ รูมัฮ มือญือมัฮ ตูฮัด ญา บือเลฮ มือญาเระ ซูวารา บือซัยํ จะ "กาเญา กราลา กู ซูโงฮ ดัฮ เฆอ? กาเญา ตาฮู จะ กู นี มาแรฮ ดาตัก ปัจ ดีฮา? ตาปี บูกัด-จะ ฮาฌา กู มาแรฮ ตะอาซิก เลอ ตาปี ตูฮัด นู บือเลฮ ซูโรฮ กู มาแรฮ เตอ ญา รือมัก ซูโงฮ. ญา เตอ นู กาเญา ฮอย เตด กราลา เลอ. 29 กู กราลา ตูฮัด ซาเบะ กู มาแรฮ ดาตัก เดะ ตูฮัด. ตูฮัด เลอ นู บือเลฮ ซูโรฮ กู มาแรฮ เตอ." 30 กรานา กะฆีเตอ กูญา ปาคัจ มียา จือลัฮ นะ รีฆะ เยซู. ตาปี เตด รอจ กะ วะตู นะ ญา ลาฆี. กะฆีเตอ ฮอย ซือมียา ดีฮา อาเงา ตางัน รีฆะ ญา บือเลฮ. 31 ตาปี อาดา บาญะ ซือมียา เดะ ลูมอฮ โกะ ซือมียา อีตู นู ปือจายา กะ เยซู ดัฮ. กูญา มือเลา จะ "ดัฮ ราฌา นู บรี ซือลามัจ นะ มาแรฮ เตอ ญา นะ บูวัจ ลาฆู ปือมือฆัฮ บาญะ ลือเบฮ เดะ ซือมียา อีนี นู ญา บือเลฮ บูวัจ เฆอ?" 32 ตานา ลูมอฮ ฟาริซี ดืองัยํ โกะ ซือมียา บือบีซิ ปาซัน ลาฆู นะ เยซู กะฆีเตอ ลูมอฮ โกะ ฟาริซี ฌางัน ลูมอฮ ซามี ซัยํ-บือซัยํ ซูโรฮ โกะ ตามาตา ปี รีฆะ เยซู. 33 กะฆีเตอ เยซู มือเลา จะ "กู นะ ดูโดะ ฌางัน กาเญา กิดีกิ ลาฆี บารู กู นะ บาลิ ปี มียา ตูฮัด นู ญา ซูโรฮ กู มาแรฮ เลอ. 34 กาเญา นะ มียา กู ตาปี เตด ดาปัจ. ซาเบะ ตือปัจ กู ดูโดะ เตอ กาเญา นะ มาโซะ ปี เตด บือเลฮ เลอ." 35 กะฆีเตอ โกะ กือปาลา ลูมอฮ ยิว ปาคัจ มือเลา ซามา กูญา จะ "ซือมียา อีนี นะ ปี กะ ดีฮา นู กีตา นะ มียา ญา เตด ดาปัจ? ญา นะ ปี มียา โกะ ซือมียา ลูมอฮ กีตา นู ปือจัฮ-บือลัฮ ปี ดูโดะ เดะ ตืองัฮ ลูมอฮ ซือมียา บักซา อาซิก เฆอ? นะ อาฌัยํ โกะ ซือมียา บักซา อาซิก อีตู เฆอ? 36 นู ญา มือเลา เตอ ฌาดี กะฮามี เลอ นู จะ 'กาเญา นะ มียา กู ตาปี เตด ดาปัจ. ตือปัจ นู กู ดูโดะ เตอ กาเญา นะ มาโซะ ปี เตด บือเลฮ เลอ.' " กูญา จะ. 37 เดะ บรามัย อารี ปือญูดัฮ ฌาดี อารี บือซัยํ เตอ เยซู ญา บือดีรี มือญาเระ ซูวารา บือซัยํ จะ "ดัฮ ซือมียา ดีฮา ดาฆา อาเย บรี กะ ซือมียา อีตู มาแรฮ มียา กู บีดา นะ โอะ อาเย. 38 ซือมียา นู ปือจายา กะ กู เตอ บือกะ อาดา ฆาแรฮ ดัฮ เดะ ซูรัจ ปือมือเลา นะ ตูฮัด จะ 'ซูงัย อาดา อาเย นู บรี ฮีโดะ เตอ นะ มือนีเลฮ ตรือเบะ เดะ ดาลับ ฮาตี นะ ซือมียา อีตู เลอ.' " เยซู ญา จะ. 39 นู เยซู มือเลา เตอ ญา ตูโญะ กะ ซือมืองัจ นะ ตูฮัด เลอ นู โกะ ซือมียา ปือจายา กะ ญา นะ บือเลฮ ซาโมจ ดัฮ. กรานา-จะ ตูฮัด เตด บือเลฮ บรี ซือมืองัจ นะ ญา ลาฆี ซาเบะ เยซู เตด กือนา อาเกะ บรี บือซรี บือซายา ลาฆี เลอ. 40 ตานา โกะ ซือมียา บาญะ บือเลฮ ดืองัยํ ลาฆู กะฆีเตอ ดัฮ ซือมียา ซือตืองัฮ มือเลา จะ "โงฮ-ซูโงฮ เตอ ซือมียา อีนี ฌาดี ซือมียา ตูโดฮ ปือมือเลา นะ ตูฮัด นู อีตู เลอ." 41 ซือมียา นู ซิก-อาซิก โปด มือเลา จะ "ซือมียา อีนี ฌาดี ราฌา นู บรี ซือลามัจ เลอ." ตาปี ซือมียา ซือตืองัฮ มือเลา จะ "ราฌา นู บรี ซือลามัจ นะ มาแรฮ ดาตัก เดะ นังฆรี ฆาลิลี เฆอ? เตด โบะ. 42 เดะ ซูรัจ ปือมือเลา นะ ตูฮัด มือเลา จะ ราฌา นู บรี ซือลามัจ นะ มาแรฮ ดาตัก เดะ บือแนฮ นะ ราฌา ดาวิด นะ มาแรฮ เดะ ตูโปะ เบดเลเฮม เลอ ฌาดี ตูโปะ นู ดาวิด ญา ดือละ ดูโดะ เตอ." 43 ซาเบะ กะฆีเตอ โกะ ซือมียา กูญา ปาคัจ จัฮ-บือลัฮ ปาซัน ลาฆู นะ เยซู. 44 ซือตืองัฮ นะ รีฆะ เยซู ตาปี ฮอย ซือมียา ดีฮา นะ อาเงา ตางัน รีฆะ ญา เลอ. 45 กะฆีเตอ ตานา โกะ ตามาตา กูญา บาลิ ปี มียา ลูมอฮ ซามี ซัยํ-บือซัยํ ฌางัน ลูมอฮ ฟาริซี เตอ โกะ ลูมอฮ อีตู กูญา มือเลา ฌางัน ตามาตา จะ "บูวัจ นามา กาเญา ตีเมา รีฆะ ญา บาวา มาแรฮ กะ กียัด เลอ?" 46 โกะ ตามาตา ตีกัฮ จะ "ฮอย ซือมียา ดีฮา ลาลู นู บือเลฮ มือเลา ซือรูปา กะ ซือมียา อีตู เลอ." 47 ลูมอฮ ฟาริซี ตีกัฮ กะ กูญา จะ "ลูมอฮ กาเญา กือนา ตูโตด ปี ซือซัจ ฌาลัด ฌูฆา ดัฮ เฆอ? 48 เดะ ลูมอฮ กือปาลา เดะ ลูมอฮ ฟาริซี โปด อาดา ซือมียา ดีฮา ปือจายา กะ ซือมียา อีตู ซือตืองัฮ เฆอ? 49 ตาปี โกะ ซือมียา นู บาญะ อีนี นู เตด ตาฮู โกะ ปือมือซัด ฮูโกบ โปด กูญา กือนา อาโบยํ ดัฮ เลอ." 50 นีโกเดมัด ซือมียา นู ดือละ มาแรฮ มียา เยซู วะตู ดูลู เตอ ญา ฌาดี ซือมียา ซืออูรัก เดะ ลูมอฮ ฟาริซี อีตู. ญา มือเลา ฌางัน กูญา จะ 51 "โซะ โกะ ฮาดัจ ฮูโกบ นะ กีตา ดัฮ นะ กรัจ ฮูโกบ ซือมียา ดีฮา เตอ กือนา ดืองัยํ กะ ญา ดูลู นะ บือเลฮ ตาฮู จะ ญา บือเลฮ บูวัจ นามา ซือตืองัฮ บูกัด เฆอ?" 52 กูญา ซือมูฮา ตีกัฮ กะ นีโกเดมัด จะ "เกา มาแรฮ ดาตัก เดะ นังฆรี ฆาลิลี ฌูฆา เฆอ? กือนา มือโซะ มียา ลีฮัจ เดะ ซูรัจ ปือมือเลา นะ ตูฮัด เลอ. เกา นะ บือเลฮ ตาฮู จะ ฮอย ซือมียา ตูโดฮ ปือมือเลา นะ ตูฮัด นู ดีฮา บือฌาดี ดาตัก มาแรฮ เดะ นังฆรี ฆาลิลี." [ 53 กะฆีเตอ กูญา ซิกมาซิก บาลิ กะ รูมัฮ นะ กูญา ดัฮ เลอ.
1 ตาปี เยซู ญา ปี กะ บูเกะ กือดูโนด. 2 โซะ มูกัยํ นะ ซียัก ดัฮ เยซู ญา ปี กะ รูมัฮ มือญือมัฮ ตูฮัด ปูลัก. โกะ ซือมียา ซือมูฮา กูญา ปาคัจ มาแรฮ กะ เยซู. กะฆีเตอ เยซู ญา ดูโดะ ฮึนตะ นะ อาฌัยํ กูญา. 3 โกะ ลูมอฮ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ ฟาริซี กูญา บาวา นีบีนี ซืออูรัก มาแรฮ นู กือนา รีฆะ ดัฮ ตืองัฮ ญา บือซามา ฌางัน กีลากี นู บูกัด ลากี นะ ญา. กะฆีเตอ กูญา บรี กะ นีบีนี อีตู บือดีรี โซะ ฮึลด มูคา นะ โกะ ซือมียา ซือมูฮา. 4 กูญา มือญาเระ กะ เยซู จะ "บูมอยํ เออ นีบีนี อีนี กือนา รีฆะ ตืองัฮ ญา บือซามา ฌางัน กีลากี นู บูกัด ลากี นะ ญา เลอ. 5 เดะ ซูรัจ ปือมือเลา ฮูโกบ นะ กีตา มูซา บือเลฮ ปือซัด บรี อาเมด บาตู ลีปัยํ นีบีนี กะฆีนี บรี มาตี. โซะ เกา นะ มือเลา กะฮามี เดะ ลาฆู กะฆีนี เลอ?" 6 กูญา มือเลา กะฆีนี บีดา นะ ลกลีฮัจ เยซู บีดา นะ มียา ตาดัฮ นู นะ อาดู ญา. ตาปี เยซู ญา ตือมะ ฆาแรฮ เดะ ตานัฮ ฌางัน ฌารี นะ ญา. 7 ตานา ลูมอฮ กูญา ซือมาตา ตาญา กะฆีเตอ เยซู ญา บีกัซ บือดีรี ตีกัฮ กะ กูญา จะ "ซือมียา ดีฮา เดะ ลูมอฮ กาเญา นู เตด ดือละ บูวัจ ซาลัฮ บรี กะ ซือมียา อีตู เลอ ลีปัยํ ญา ดูลู." 8 กะฆีเตอ ญา ตือมะ ฆาแรฮ เดะ ตานัฮ ฌางัน ฌารี นะ ญา ปูลัก. 9 ตานา โกะ ซือมียา บือเลฮ ดืองัยํ กะฆีเตอ กูญา ซือมูฮา ปาคัจ ตรือเบะ ซือกาลี ซืออูรักๆ ฮึนตะ เดะ โกะ อูรัก ฮาตูฮา. ลือเบฮ ซา เยซู ฌางัน นีบีนี อีตู นู บือดีรี โซะ ฮึลด มูคา นะ ญา. 10 กะฆีเตอ เยซู ญา บีกัซ มือเลา ฌางัน นีบีนี อีตู จะ "นีบีนี เออ กูญา ปี กะ ดีฮา ฮาบิฮ? ฮอย ซาปา อาเมด ซาลัฮ เกา ดัฮ เฆอ?" 11 นีบีนี อีตู มือเลา จะ "ฮอย ซาปา ลาลู จา เออ." เยซู มือเลา จะ "กู โปด เตด อาเมด ซาลัฮ เกา ฌูฆา. ปี เลอ ฌางัน บูวัจ ดูซา ปูลัก ดัฮ เลอ." ญา จะ.] 12 อาดา ซือกาลี ปูลัก เยซู มือเลา ฌางัน โกะ ซือมียา จะ "กู นี เลอ ฌาดี ตือปัจ จรัฮ เดะ ดือนียา. โซะ ซือมียา นู ตูโรจ กะ กู ญา นะ เตด บือฌาลัด เดะ โซะ กือลับ ตาปี นะ อาดา ลาฆู จรัฮ นู บูวัจ บรี ฮีโดะ เลอ." 13 ลูมอฮ ฟาริซี มือเลา กะ เยซู จะ "เกา ฌาดี ซะซี ปาซัน ญาวา นะ เกา ตะอาซิก. นู ปือมือเลา ซะซี นะ เกา เตด ฌาดี ซูโงฮ เลอ." 14 เยซู ญา ตีกัฮ จะ "มีเซ-จะ กู ฌาดี ซะซี ปาซัน ญาวา ตะอาซิก ปือมือเลา ซะซี นะ กู โปด ฌาดี ซูโงฮ. กรานา กู ตาฮู จะ กู มาแรฮ ดาตัก ปัจ ดีฮา นะ ปี กะ ดีฮา ปูลัก. ตาปี ลูมอฮ กาเญา เตด ตาฮู จะ กู มาแรฮ ดาตัก ปัจ ดีฮา นะ ปี กะ ดีฮา เลอ. 15 กาเญา เตอ กรัจ ฮูโกบ ตูโรจ กะ ฮาดัจ นะ โกะ ซือมียา. กู นี เตด บือเลฮ ฮูโกบ ซือมียา ดีฮา เลอ. 16 ตาปี มีเซ-จะ กู นะ กรัจ ฮูโกบ ลาฆู ฮูโกบ นะ กู โปด ญา นะ รือมัก ซูโงฮ เลอ. กรานา-จะ กู เตด บือเลฮ กรัจ ฮูโกบ ซา กู ตาปี กู กรัจ ฮูโกบ บือซามา ฌางัน อาโปก เดะ อาตัซ นู ซูโรฮ กู มาแรฮ เลอ. 17 เดะ ซูรัจ ปือมือเลา ฮูโกบ นะ ลูมอฮ กาเญา บือเลฮ ฆาแรฮ ดัฮ จะ ปือมือเลา ซะซี นะ ซือมียา ดูวา อูรัก เตอ ฌาดี ซูโงฮ เลอ. 18 กู ฌาดี ซะซี ปาซัน ญาวา นะ กู ตะอาซิก. โซะ อาโปก นู ซูโรฮ กู มาแรฮ เตอ ญา เตอ ฌาดี ซะซี ปาซัน ลาฆู นะ กู ฌูฆา." 19 ซาเบะ กะฆีเตอ กูญา ตาญา เยซู จะ "อาโปก นะ เกา ดูโดะ ปัจ ดีฮา เลอ?" เยซู ตีกัฮ จะ "ญาวา นะ กู โปด บาฌิ อาโปก เดะ กู โปด บาฌิ กาเญา เตด กราลา เลอ. ดัฮ กาเญา กราลา กู เตอ อาโปก เดะ กู โปด กาเญา นะ กราลา ฌูฆา." 20 เยซู ญา มือเลา ปือมือเลา กะฆีเตอ ตืองัฮ ญา อาฌัยํ เดะ รูมัฮ มือญือมัฮ ตูฮัด เดะ โซะ ตือปัจ ตาโรฮ ดูเวะ. ตาปี ฮอย ซือมียา ดีฮา นะ รีฆะ ญา กรานา-จะ เตด รอจ กะ วะตู นะ ญา ลาฆี เลอ. 21 กะฆีเตอ เยซู มือเลา ฌางัน กูญา ปูลัก จะ "กู เตอ นะ ปี ดัฮ. กาเญา นะ มียา กู เลอ ตาปี กาเญา นะ มาตี กรานา ดูซา นะ กาเญา. ตือปัจ นู กู นะ ปี เตอ กาเญา นะ ปี เตด บือเลฮ เลอ." 22 กะฆีเตอ โกะ ลูมอฮ ยิว กูญา ปาคัจ มือเลา จะ "ญา นะ บูนอฮ ดีรี ซูโงฮ เฆอ? ซาเบะ ญา มือเลา จะ 'ตือปัจ นู กู นะ ปี เตอ กาเญา นะ ปี เตด บือเลฮ.' " 23 เยซู มือเลา ฌางัน กูญา จะ "กาเญา ฌาดี ซือมียา เดะ โซะ บาวัฮ อีนี กู นี เลอ ดาตัก เดะ โซะ อาตัซ. กาเญา ฌาดี นะ ดือนียา อีนี กู เตด ฌาดี นะ ดือนียา อีนี เลอ. 24 กะฆีเตอ เลอ กู บือเลฮ มือญาเระ กะ กาเญา จะ กาเญา นะ มาตี กรานา โกะ ลาฆู ดูซา นะ กาเญา. ดัฮ กาเญา เตด ปือจายา จะ กู ฌาดี บือกะ นู กู ฌาดี เตอ กาเญา นะ ฆาโดฮ มาตี กรานา โกะ ลาฆู ดูซา นะ กาเญา เลอ." 25 กูญา ตาญา เยซู จะ "เกา ฌาดี ซาปา เลอ?" เยซู ตีกัฮ กะ กูญา จะ "กู ฌาดี บือกะ นู กู มือญาเระ กะ กาเญา ตะเดะ ลามูลา ดัฮ เตอ. 26 กู อาดา บาญะ ลาฆู ลาฆี เลอ นู นะ มือเลา ปาซัน กาเญา นู นะ กรัจ ฮูโกบ กาเญา. ตาปี ตูฮัด นู ซูโรฮ กู มาแรฮ เตอ ญา รือมัก ซูโงฮ เลอ. ลาฆู นู กู ดืองัยํ ดาตัก เดะ ตูฮัด เตอ กู นะ มือเลา บรี กะ ดือนียา ดืองัยํ." 27 กูญา เตด ตาฮู จะ เยซู มือเลา ฌางัน กูญา ปาซัน ลาฆู นะ อาโปก เดะ อาตัซ เลอ. 28 กะฆีเตอ ญา มือเลา ฌางัน กูญา จะ "ตานา กาเญา นะ อาเกะ กู นู นานะ นะ อูมัจ-ซือมียา เตอ กาลา อีตู เลอ กาเญา นะ ตาฮู จะ กู ฌาดี บือกะ นู กู ฌาดี เลอ นะ ตาฮู จะ กู เตด บูวัจ ลาฆู นามา ตูโรจ กะ ฮาตี นะ กู ตะอาซิก. ตาปี อาโปก เดะ อาตัซ ญา บือเลฮ อาฌัยํ กู กะฮามี ดัฮ กู บือเลฮ มือเลา กะฆีเตอ เลอ. 29 อาโปก นู ซูโรฮ กู มาแรฮ เตอ ญา ดูโดะ บือซามา ฌางัน กู. ญา เตด บือเลฮ ตีงัน บือบียัยํ ซา กู กรานา-จะ กู ซือมาตา บูวัจ ตูโรจ กะ ฮาตี นะ อาโปก เดะ อาตัซ เลอ." 30 ตานา เยซู มือเลา กะฆีเตอ อาดา ซือมียา บาญะ บือเลฮ ปือจายา กะ ญา. 31 กะฆีเตอ เยซู มือเลา ฌางัน ลูมอฮ ยิว นู ปือจายา กะ ญา จะ "ดัฮ กาเญา ซือมาตา บูวัจ ตูโรจ กะ ปือมือเลา นะ กู กาเญา เตอ ฌาดี มูเระ นะ กู ซูโงฮ เลอ. 32 กาเญา นะ กราลา ตูฮัด ซูโงฮ จะ ญา ฌาดี กะฮามี. ปาซัน ลาฆู นู กราลา ญา ซูโงฮ เตอ นะ บูวัจ บรี กาเญา ลือปัซ ดัฮ เลอ." 33 กูญา ตีกัฮ กะ เยซู จะ "กามี ฌาดี บือแนฮ นะ อับราฮัม นู เตด ดือละ ฌาดี ปราโซฮ นะ ซือมียา ดีฮา เลอ. ซาเบะ นามา เกา มือเลา จะ 'กาเญา นะ ฌาดี ซือมียา นู ลือปัซ ดัฮ' เตอ?" 34 เยซู ตีกัฮ กะ กูญา จะ "กู มือญาเระ กะ กาเญา ลาฆู นู ซูโงฮ จะ ราตา ซือมียา นู บูวัจ ดูซา เตอ ญา ฌาดี ปราโซฮ กะ ลาฆู ดูซา อีตู เลอ. 35 ปราโซฮ อีตู บูกัด ญา นะ ดูโดะ ซา เดะ รูมัฮ ซือลาลู เลอ. ตาปี นานะ นะ ตูฮัด รูมัฮ เตอ เลอ ญา นะ ดูโดะ เดะ รูมัฮ ซือลาลู. 36 ซาเบะ กะฆีเตอ ดัฮ นานะ นะ ตูฮัด บือเลฮ บูวัจ บรี กาเญา ลือปัซ กาเญา โปด นะ ฌาดี ซือมียา นู ลือปัซ ซูโงฮ ดัฮ เลอ. 37 กู ตาฮู จะ กาเญา ฌาดี บือแนฮ นะ อับราฮัม. ตาปี กาเญา โปด มียา จือลัฮ นู นะ บูนอฮ กู กรานา-จะ กาเญา ตีเมา ซาโมจ ปือมือเลา นะ กู เลอ. 38 โซะ กู เตอ กู มือเลา ปาซัน ลาฆู นู กู บือเลฮ ลีฮัจ กาลา กู ดูโดะ ฌางัน อาโปก เดะ กู. ตาปี โซะ กาเญา เลอ กาเญา บูวัจ ลาฆู บือกะ กาเญา บือเลฮ ดืองัยํ ดาตัก มาแรฮ เดะ อาโปก นะ กาเญา." เยซู ญา จะ. 39 โกะ ซือมียา ตีกัฮ กะ เยซู จะ "อับราฮัม เลอ ฌาดี อาโปก นะ กามี." เยซู มือเลา ฌางัน กูญา จะ "ดัฮ กาเญา ฌาดี นานะ นะ อับราฮัม ซูโงฮ เตอ กาเญา โปด นะ บูวัจ ตูโรจ บือกะ อับราฮัม บือเลฮ บูวัจ เลอ. 40 ตาปี วะตู อีนี กาเญา มียา จือลัฮ นะ บูนอฮ กู บูวัก นู ฌาดี ซือมียา นู ซือมาตา มือญาเระ กะ กาเญา ปาซัน ลาฆู นู ซูโงฮ นู กู บือเลฮ ดืองัยํ ดาตัก มาแรฮ เดะ ตูฮัด เดะ อาตัซ. อับราฮัม เตอ ฮอย เตด ดือละ บูวัจ กะฆีเตอ เลอ. 41 กาเญา ตืองัฮ บูวัจ ลาฆู นู อาโปก นะ กาเญา บูวัจ เตอ." กูญา มือเลา ฌางัน เยซู จะ "กามี นี บูกัด บือฌาดี ดาตัก มาแรฮ เดะ ลาฆู บือกาเซฮ. กามี อาดา อาโปก แนฮ ซา นู ฌาดี ตูฮัด เดะ อาตัซ เลอ." 42 เยซู มือเลา ฌางัน กูญา จะ "ดัฮ ตูฮัด ฌาดี อาโปก นะ กาเญา ซูโงฮ เตอ กาเญา โปด นะ ซายัก กะ กู. กรานา-จะ กู นี เลอ นู ดาตัก มาแรฮ เดะ ตูฮัด อาดา ดูโดะ โตะ อีนี ดัฮ เลอ. บูกัด กู มาแรฮ ตูโรจ บือกะ ฮาตี ตะอาซิก ตาปี ตูฮัด ซูโรฮ กู มาแรฮ เลอ. 43 ซาเบะ นามา ปะ กาเญา เตด มาโซะ เดะ ฮาตี กะ ปือมือเลา นะ กู เลอ? ฌาดี กะฆีเตอ ซาเบะ-จะ กาเญา ตีเมา นะ มือนีงัย กะ ปือมือเลา นะ กู เลอ. 44 กาเญา เลอ มาแรฮ ดาตัก เดะ อาโปก นะ กาเญา นู ฌาดี กือปาลา ฮาตู ซีตัด. จะ กาเญา บือคานะ นะ บูวัจ ตูโรจ บือกะ ฮาตี นู ฆาละ นะ อาโปก เดะ กาเญา. ตะเดะ ดูลู นูตู มาแรฮ เตอ ญา บือเลฮ บูนอฮ โกะ ซือมียา ญา เตด ปือดูลี กะ ลาฆู นู ซูโงฮ ซาเบะ-จะ เดะ ญาวา นะ ญา ฮอย ลาฆู นู ซูโงฮ เลอ. วะตู ญา มือเลา มืออูปัย ญา ตูโรจ บือกะ ปรางัย นะ ญา กรานา-จะ ญา ฌาดี ซือมียา ซูกา มืออูปัย ฌาดี อาโปก นะ ลาฆู มืออูปัย อีตู เลอ. 45 ตาปี กู นี เลอ มือเลา ลาฆู นู ซูโงฮ. ซาเบะ กะฆีเตอ กาเญา โปด เตด ปือจายา กะ ปือมือเลา นะ กู. 46 อาดา ซือมียา ดีฮา เดะ ลูมอฮ กาเญา เฆอ นู นะ บรี ลีฮัจ จะ กู บือเลฮ บูวัจ ดูซา? ดัฮ กู มือเลา ลาฆู นู ซูโงฮ บูวัจ นามา ปะ กาเญา ตีเมา ปือจายา กะ กู เลอ? 47 ซือมียา นู มาแรฮ ดาตัก เดะ ตูฮัด เตอ นะ มือนีงัย กะ ปือมือเลา นะ ตูฮัด. ตาปี กาเญา ฮอย เตด บือเลฮ มาแรฮ ดาตัก เดะ ตูฮัด ซาเบะ กะฆีเตอ เลอ กาเญา ฮอย เตด มือนีงัย กะ ตูฮัด เลอ." เยซู ญา จะ. 48 ลูมอฮ ยิว ตีกัฮ จะ "นู กามี มือเลา จะ เกา ฌาดี ซือมียา ลูมอฮ ซะมาเรีย จะ เกา อาดา ฮาตู มาโซะ เตอ ซูโงฮ นอ?" 49 เยซู ตีกัฮ จะ "กู โปด ฮอย ฮาตู มาโซะ เลอ. กู มือเลา ปูฌี กะ อาโปก เดะ กู ตาปี กาเญา มือเลา มือฌัฮ กะ กู เลอ. 50 บูกัด กู มียา ลาฆู มือโอจ นะ บรี กะ ญาวา นะ ตะอาซิก. ตาปี อาดา ซือมียา นู มียา บรี กะ กู กะฆีเตอ ฌาดี-จะ ตูฮัด เดะ อาตัซ ญา เตอ นู กรัจ ฮูโกบ. 51 กู มือญาเระ ลาฆู ซูโงฮ กะ กาเญา จะ ดัฮ ซือมียา ดีฮา บูวัจ ตูโรจ กะ ปือมือเลา นะ กู ซือมียา อีตู นะ ฮอย เตด รอจ กะ ลาฆู มาตี." 52 โกะ ลูมอฮ ยิว มือเลา ฌางัน เยซู จะ "วะตู อีนี กามี ตาฮู ตือตู ดัฮ จะ เกา อาดา ฮาตู มาโซะ. อับราฮัม โปด มาตี ดัฮ. โกะ ลูมอฮ ซือมียา ตูโดฮ ลาฆู นะ ตูฮัด โปด มาตี ฮาบิฮ ฌูฆา ดัฮ. ตาปี เกา มือเลา จะ ซือมียา ดีฮา บูวัจ ตูโรจ กะ ปือมือเลา นะ เกา ญา นะ เตด บือเลฮ ฌือเลบ ลาฆู มาตี เลอ. 53 เกา เตอ ฌาดี บือซัยํ ลือเบฮ เดะ อับราฮัม อาโปก เดะ กามี นู มาตี ปี ดัฮ ซูโงฮ เฆอ? โกะ ซือมียา นู มือเลา ตูโดฮ ปือมือเลา นะ ตูฮัด โปด มาตี ฌูฆา ดัฮ. เกา มืองากู จะ เกา ฌาดี ซือมียา ดีฮา เลอ?" 54 กะฆีเตอ เยซู ตีกัฮ จะ "ดัฮ กู มือเลา มือโอจ กะ ญาวา นะ กู ตะอาซิก เตอ ลาฆู มือโอจ อีตู โปด เตด ฌาดี นามา. ซือมียา นู มือเลา มือโอจ กะ กู เตอ ฌาดี อาโปก เดะ กู เลอ. ญา เลอ นู ลูมอฮ กาเญา มือเลา จะ ฌาดี ตูฮัด นะ กาเญา เตอ. 55 กาเญา เตด ดือละ กราลา ตูฮัด ตาปี กู นี กราลา ญา เลอ. ดัฮ กู มือเลา จะ กู เตด กราลา ตูฮัด กู ฌาดี ซือมียา มืออูปัย ซือรูปา กะ กาเญา เลอ. ตาปี กู กราลา ตูฮัด กู บูวัจ ตูโรจ บือกะ ปือมือเลา นะ ญา เลอ. 56 อับราฮัม อาโปก นะ กาเญา บรามัย ซูกา-ฮาตี นู นะ บือเลฮ ลีฮัจ อารี นะ กู. ลีฮัจ ดัฮ ญา ซูกา-ฮาตี ดัฮ เลอ." 57 ลูมอฮ ยิว มือเลา ฌางัน เยซู จะ "อูมอยํ นะ เกา เตด รอจ กะ ลีมา-ปูโลฮ ตาโฮด. เกา ดือละ ลีฮัจ อับราฮัม ดัฮ เฆอ?" 58 เยซู ตีกัฮ กะ กูญา จะ "กู มือเลา กะ กาเญา ลาฆู ซูโงฮ จะ ดูลู เดะ อับราฮัม นะ บือเลฮ บือฌาดี เตอ กู อาดา ดัฮ เลอ." 59 ซาเบะ กะฆีเตอ โกะ ซือมียา อีตู กูญา ปาคัจ อาเมด บาตู นะ ลีปัยํ เยซู เลอ. ตาปี เยซู ญา ซือลูนี จูรี ตรือเบะ เดะ รูมัฮ มือญือมัฮ ตูฮัด เตอ.
1 ตานา เยซู บือฌาลัด ปี เตอ ญา ลีฮัจ ซือมียา ซืออูรัก นู มาตา บูตา ตะเดะ ญา ดูโดะ เดะ อาปี เลอ. 2 โกะ ลูมอฮ มูเระ นะ ญา กูญา ตาญา เยซู จะ " บูมอยํ เออ ซาปา บือเลฮ บูวัจ ดูซา จะ ซือมียา อีนี เฆอ-จะ ปะมะ เดะ ญา นู บูวัจ บรี ญา บือฌาดี มาแรฮ มาตา บูตา เตอ?" 3 เยซู ตีกัฮ จะ "บูกัด-จะ ซือมียา อีนี เฆอ-จะ ปะมะ เดะ ญา บือเลฮ บูวัจ ดูซา. ตาปี ญา บือฌาดี มาแรฮ มาตา บูตา บีดา นะ บรี บือกรือฌา นะ ตูฮัด เดะ อาตัซ ลีฮัจ บือฆารี เดะ ญาวา นะ ญา. 4 กีตา ฆาโดฮ บูวัจ บือกรือฌา นะ ตูฮัด นู ซูโรฮ กู มาแรฮ ตืองัฮ ซียัก ลาฆี. ตานา รอจ กะ มาลับ ฮอย ซาปา นะ บือกรือฌา บือเลฮ. 5 กาลา กู อาดา ดูโดะ เดะ ดือนียา กู ฌาดี ตือปัจ จรัฮ บีดา ดือนียา เลอ." 6 ตานา มือเลา กะฆีเตอ ดัฮ เยซู ญา มูโมยํ อาเย ลีโยยํ อูแล เดะ ตานัฮ อาเมด อาเย ลีโยยํ อีตู ฆาโวน บรี ฌาดี ลูโปยํ ซาปัก เดะ มาตา นะ ซือมียา นู มาตา บูตา อีตู 7 มือเลา จะ "กือนา ปี กะ กูบัก อาเย ปือนามา กูบัก ซีโลอัม ปี บาโซฮ ลูโปยํ บรี ตรือเบะ เลอ." (นู จะ ซีโลอัม อีตู เตอ ฌาดี-จะ 'ซูโรฮ ปี'). ซือมียา อีตู ญา ปี บาโซฮ มาตา นะ ญา โปด ลีฮัจ บือฆารี ดัฮ. กะฆีเตอ ญา บาลิ ปี กะ รูมัฮ นะ ญา. 8 โกะ ซือมียา นู ดูโดะ รูมัฮ ปิกดาปิก ฌางัน โกะ ซือมียา นู ดือละ ลีฮัจ ญา ฌาดี ซือมียา มืองือแมง ดูเวะ ตะเดะ ดูลู เตอ กูญา มือเลา จะ "ซือมียา อีนี บูกัด เฆอ นู ดือละ ดูโดะ มืองือแมง ดูเวะ?" 9 ซือมียา ซือตืองัฮ มือเลา จะ "ญา เลอ." ซือมียา อาซิก จะ "บูกัด ตาปี ญา ซือรูปา กะ ซือมียา อีตู." อีซี ญา ตะอาซิก มือเลา จะ "กู นี ฌาดี ซือมียา นู อีตู เลอ." 10 กูญา ตาญา จะ "มาตา นะ เกา ลีฮัจ บือฆารี บือเลฮ กะฮามี เลอ?" 11 ญา ตีกัฮ จะ "ซือมียา อีตู นู ปือนามา จะ เยซู ญา บือเลฮ บูวัจ ลูโปยํ ซาปัก เดะ มาตา นะ กู. ญา มือญาเระ กะ กู จะ 'เกา กือนา ปี กะ กูบัก ซีโลอัม บาโซฮ มาตา นะ เกา.' กะฆีเตอ กู โปด ปี. ตานา กู บาโซฮ มาตา ดัฮ บารู กู ลีฮัจ บือฆารี เลอ." 12 กะฆีเตอ กูญา ตาญา จะ "ซือมียา อีตู อาดา ปัจ ดีฮา?" ญา ตีกัฮ จะ "กู เตด ตาฮู เลอ." 13 กูญา บาวา ซือมียา นู มาตา นะ ญา ดือละ บูตา เตอ ปี มียา ลูมอฮ ฟาริซี. 14 อารี นู เยซู บูวัจ ลูโปยํ ซาปัก เดะ มาตา นะ ซือมียา อีตู บรี มาตา นะ ญา ลีฮัจ บือฆารี เตอ ฌาดี อารี บราดู กรือฌา เลอ. 15 กะฆีเตอ โกะ ลูมอฮ ฟาริซี ตาญา ญา ปูลัก จะ "มาตา นะ เกา ลีฮัจ บือฆารี บือเลฮ กะฮามี เลอ?" ญา มือญาเระ กะ กูญา จะ "ญา อาเมด ลูโปยํ ซาปัก เดะ มาตา นะ กู. ตานา กู ปี บาโซฮ บารู มาตา นะ กู ลีฮัจ บือฆารี ดัฮ." 16 ลูมอฮ ฟาริซี ซือตืองัฮ มือเลา จะ "ซือมียา อีตู ญา เตด บือเลฮ มาแรฮ ดาตัก เดะ ตูฮัด เลอ. กรานา-จะ ญา เตด ตูโรจ กะ ฮาดัจ อารี บราดู กรือฌา." ตาปี ซือมียา อาซิก มือเลา จะ "ซือมียา บือดูซา นะ บูวัจ โกะ ลาฆู มือฆัฮ กะฆีเตอ นะ บือเลฮ กะฮามี เลอ?" กะฆีเตอ ลูมอฮ อีตู กูญา ปาคัจ ปือจัฮ-บือลัฮ โซกซา กาวัด เลอ. 17 กะฆีเตอ กูญา ตาญา ปูลัก กะ ซือมียา นู กาลา อารีเตอ ญา มาตา บูตา จะ "เกา บรีงัจ กะฮามี ลาฆู นะ ซือมียา อีตู นู ญา บือเลฮ บูวัจ บรี มาตา นะ เกา ลีฮัจ บือฆารี ดัฮ?" ซือมียา อีตู ตีกัฮ จะ "ญา ฌาดี ซือมียา ตูโดฮ ลาฆู นะ ตูฮัด ซืออูรัก เลอ." 18 ตาปี โกะ กือปาลา ลูมอฮ ยิว กูญา เตด ปือจายา จะ ซือมียา อีตู มาตา นะ ญา บูตา จะ ญา บือเลฮ ลีฮัจ บือฆารี ปูลัก ดัฮ ตือดะ กูญา บลาโลก ปะมะ เดะ ญา มาแรฮ 19 ตาญา จะ "ซือมียา อีนี ฌาดี นานะ นะ กาเญา เฆอ นู กาเญา มือญาเระ จะ มาตา นะ ญา บูตา ตะเดะ ดูโดะ เดะ อาปี เตอ? ฮาดัจ อีนี ญา ลีฮัจ บือฆารี ดัฮ บือเลฮ กะฮามี เลอ?" 20 ปะมะ เดะ ซือมียา อีตู ตีกัฮ จะ "กามี ตาฮู จะ ญา ฌาดี นานะ นะ กามี จะ ญา มาตา บูตา ตะเดะ ดูโดะ เดะ อาปี เลอ. 21 ตาปี เตด ตาฮู จะ มาแรฮ กะ ฮาดัจ อีนี ญา ลีฮัจ บือฆารี บือเลฮ กะฮามี ดัฮ. ซาปา นู บูวัจ บรี มาตา นะ ญา ลีฮัจ บือฆารี กามี โปด เตด ตาฮู. กือนา ปี ตาญา ญา ตะอาซิก เลอ. ญา บือซัยํ ดัฮ นะ มือญาเระ ลาฆู นะ ญาวา ตะอาซิก บือเลฮ ดัฮ เลอ." 22 นู ปะมะ เดะ ญา มือเลา กะฆีเตอ ซาเบะ-จะ กูญา ตาโกจ เดะ โกะ กือปาลา ลูมอฮ ยิว. กรานา กูญา อีตู ปาคัจ ตือตู จะ ดัฮ ซาปา ซาโมจ จะ เยซู ฌาดี ราฌา นู บรี ซือลามัจ เตอ ฆาโดฮ โปรฮ ซือมียา อีตู บรี ตรือเบะ เดะ รูมัฮ บือมุน. 23 ซาเบะ กะฆีเตอ ปะมะ เดะ ซือมียา อีตู กูญา มือเลา จะ "ญา บือซัยํ ดัฮ ปี ตาญา ญา ตะอาซิก เลอ." 24 โกะ ซือมียา อีตู กูญา บลาโลก ซือมียา นู กาลา อารีเตอ มาตา นะ ญา บูตา เตอ มาแรฮ ซือกาลี ปูลัก มือญาเระ กะ ญา จะ "กือนา มือโอจ กะ ตูฮัด เดะ อาตัซ เลอ. กามี ตาฮู จะ ซือมียา นู บือบือลา เกา เตอ ญา ฌาดี ซือมียา บือดูซา." 25 ญา ตีกัฮ จะ "ญา ฌาดี ซือมียา บือดูซา เฆอ เตด กู เตด ตาฮู เลอ. กู ตาฮู ซา มาตา อีนี จะ กาลา อารีเตอ กู มาตา บูตา ตาปี วะตู อีนี กู ลีฮัจ บือฆารี ดัฮ เลอ." 26 กะฆีเตอ โกะ ซือมียา อีตู ตาญา ญา จะ "ญา บูวัจ นามา ซือตืองัฮ ฌางัน เกา? ญา บือบือลา เกา กะฮามี ยู เกา ลีฮัจ บือฆารี ดัฮ เตอ?" 27 ซือมียา อีตู ตีกัฮ กะ กูญา จะ "กู มือญาเระ ดัฮ ตาปี กาเญา เตด มือนีงัย. บูวัจ นามา ปะ กาเญา ซูกา นะ ดืองัยํ ปูลัก? กาเญา ซูกา นะ ฌาดี มูเระ นะ ซือมียา อีตู ฌูฆา เฆอ?" 28 กะฆีเตอ กูญา อาฆัฮ-ฆือละ กะ ซือมียา อีตู จะ "เกา เตอ ฌาดี มูเระ นะ ซือมียา กะฆีนี ตาปี กามี ฌาดี มูเระ นะ มูซา เลอ. 29 กามี ตาฮู จะ ตูฮัด เดะ อาตัซ มือเลา ฌางัน มูซา ดัฮ. ตาปี โซะ ซือมียา อีตู เตอ กามี เตด ตาฮู จะ ญา มาแรฮ ดาตัก ปัจ ดีฮา เลอ." 30 ซือมียา อีตู ตีกัฮ จะ "เออ ลาฆู อีนี ปือและ-ฮาตี ซูโงฮ เลอ นู ลูมอฮ กาเญา เตด ตาฮู จะ ซือมียา อีตู ญา มาแรฮ ดาตัก ปัจ ดีฮา. ตาปี ญา เลอ บือเลฮ บูวัจ บรี มาตา นะ กู ลีฮัจ บือฆารี ดัฮ. 31 ลูมอฮ กีตา ตาฮู จะ ตูฮัด เดะ อาตัซ เตด มือนีงัย กะ ซือมียา บือดูซา. ตาปี ดัฮ ซือมียา ดีฮา มือนูโนะ กะ ตูฮัด บูวัจ ตูโรจ กะ ฮาตี นะ ตูฮัด ตูฮัด นะ มือนีงัย กะ ซือมียา อีตู เลอ. 32 ตะเดะ ดูลู นูตู ฮอย ซาปา ดือละ ดืองัยํ จะ อาดา ซือมียา ดีฮา บือบือลา มาตา นะ ซือมียา นู มาตา บูตา ตะเดะ ดูโดะ เดะ อาปี บรี ลีฮัจ บือฆารี เลอ. 33 ดัฮ ซือมียา อีตู ญา เตด มาแรฮ ดาตัก เดะ ตูฮัด เตอ ญา นะ บูวัจ ลาฆู นามา ฮอย เตด บือเลฮ เลอ." 34 กูญา ตีกัฮ กะ ซือมียา อีตู จะ "เกา บือฌาดี เดะ ลาฆู บือดูซา ฮาปา เตอ. เกา นะ มาแรฮ อาฌัยํ กามี บือเลฮ เฆอ?" กะฆีเตอ กูญา โปรฮ ญา ปี บูวัก. 35 ตานา เยซู ญา ดืองัยํ จะ กูญา บือเลฮ โปรฮ ซือมียา อีตู ดัฮ เตอ ญา ปี มียา ยู ดาปัจ มือเลา ฌางัน ซือมียา อีตู จะ "เกา ปือจายา กะ นานะ นะ อูมัจ-ซือมียา เฆอ?" 36 ซือมียา อีตู ญา ตีกัฮ จะ "จา เออ นานะ นะ อูมัจ-ซือมียา อีตู ฌาดี ซาปา เลอ บีดา กู นะ ปือจายา กะ ญา บือเลฮ?" 37 เยซู มือเลา ฌางัน ญา จะ "เกา บือเลฮ ลีฮัจ ญา ดัฮ เลอ. ซือมียา อีนี เลอ นู ตืองัฮ มือเลา ฌางัน เกา เตอ." 38 ญา มือเลา จะ "ตูฮัด เออ กู ปือจายา ดัฮ เลอ." กะฆีเตอ ญา ตือมะ มือญือมัฮ กะ เยซู. 39 เยซู มือเลา จะ "กู มาโซะ มาแรฮ กะ ดือนียา อีนี บีดา ลาฆู นะ กรัจ ฮูโกบ เตอ บีดา โกะ ซือมียา นู ลีฮัจ เตด บือฆารี นะ บือเลฮ ลีฮัจ บือฆารี ปูลัก เลอ บีดา โกะ ซือมียา นู ลีฮัจ บือฆารี มาตา กูญา นะ บูตา เลอ." 40 ตานา โกะ ลูมอฮ ฟาริซี นู อาดา ปิกดาปิก เตอ กูญา ดืองัยํ เยซู มือเลา กะฆีเตอ กูญา ตาญา เยซู จะ "กามี มาตา บูตา ฌูฆา เฆอ?" 41 เยซู ตีกัฮ จะ "ดัฮ ลูมอฮ กาเญา มาตา บูตา ลูมอฮ กาเญา โปด ฮอย เตด ซาลัฮ. ตาปี วะตู อีนี กาเญา มือเลา จะ กาเญา ลีฮัจ บือฆารี ดัฮ ซาเบะ กะฆีเตอ ลาฆู ซาลัฮ นะ กาเญา อาดา ลาฆี เลอ."
1 เยซู มือเลา ปูลัก จะ "กู นะ มือญาเระ กะ กาเญา ลาฆู นู ซูโงฮ จะ ซือมียา นู เตด มาโซะ ปี กะ ดาลับ ปาฆัยํ กาเมก ฌาลัด ปีตู เตอ ตาปี ญาแญะ มือลากัฮ ปี โซะ ฌาลัด อาซิก ซือมียา อีตู ญา ฌาดี อูรัก มือญูรี ฌาดี อูรัก ปือญามุน เลอ. 2 ตาปี ซือมียา นู มาโซะ โซะ ปีตู เตอ ฌาดี ซือมียา บือบือลา กาเมก เลอ. 3 ซือมียา นู ตูงู ปีตู ญา บูกา ปีตู บรี กะ ซือมียา อีตู เลอ. โกะ กาวัด กาเมก โปด มือนีงัย กะ ซูวารา นะ ญา. ญา บลาโลก ปือนามา โกะ กาเมก นะ ญา บาวา กูญา ตรือเบะ ปี. 4 ตานา ญา บาวา กาวัด กาเมก นะ ญา ตรือเบะ ปี ฮาบิฮ ดัฮ ญา โปด บือฌาลัด ปี ดูลู. โกะ กาวัด กาเมก ตูโรจ กะ ญา ปี ซาเบะ-จะ กาวัด กาเมก กราลา ซูวารา นะ ญา เลอ. 5 โซะ ซือมียา อาซิก กาวัด กาเมก ญา เตด ตูโรจ เลอ ตาปี ญา ลารี ปี เดะ กูญา กรานา เตด กราลา ซูวารา นะ ซือมียา อาซิก." 6 ปือมือเลา ปือซามา อีตู เยซู บือเลฮ มือเลา ฌางัน กูญา ตาปี กูญา เตด มาโซะ เดะ ฮาตี ลาลู กะ ปือมือเลา นู ญา บือเลฮ มือเลา ฌางัน กูญา เตอ. 7 กะฆีเตอ เยซู มือเลา ฌางัน กูญา ปูลัก จะ "กู มือญาเระ กะ กาเญา ลาฆู นู ซูโงฮ จะ กู ฌาดี ปีตู นะ โกะ กาเมก เลอ. 8 โกะ ซือมียา นู มาแรฮ ดูลู เดะ กู เตอ ฌาดี อูรัก ปือญูรี ฌางัน อูรัก ปือญามุน. ตาปี กาวัด กาเมก เตด บือเลฮ มือนีงัย กะ กูญา. 9 กู นี เลอ ฌาดี ปีตู ดัฮ. ซือมียา ดีฮา นู มาโซะ ฌาลัด โซะ กู ซือมียา อีตู นะ ฮีโดะ ลือปัซ บาฌิ. ญา นะ มาโซะ ซือนัง ตรือเบะ ซือนัง นะ ดาปัจ ซือบารัก มากัด. 10 อูรัก ปือญูรี อีตู ญา มาแรฮ ซือมาตา บีดา นะ จูรี นะ บูนอฮ นะ บูวัจ บรี บือนาซา ฮาบิฮ. ตาปี กู นี มาแรฮ บีดา กาเญา นะ บือเลฮ ลาฆู ฮีโดะ ฌาดี-จะ ลาฆู ฮีโดะ นู ปือนอฮ ซูโงฮ เลอ. 11 "กู นี เลอ ฌาดี ซือมียา บือบือลา กาเมก นู บาฌิ. ซือมียา บือบือลา นู บาฌิ อีตู เตอ ญา ยอม ซรัฮ ญาวา กรานา กาวัด กาเมก เลอ. 12 ซือมียา นู มากัด อูปัฮ บูกัด ฌาดี ซือมียา บือบือลา กาเมก เตอ กาวัด กาเมก เตด ฌาดี นะ ญา เลอ. ตานา ญา ลีฮัจ อาซู ฮูตัด มาแรฮ ญา ตีงัน กาวัด กาเมก ลารี ปี ดัฮ. กะฆีเตอ อาซู ฮูตัด ญา นะ ราปัซ กาเมก บือปี บูวัก บูวัจ บรี กาวัด กาเมก ปือจัฮ-บือลัฮ ปี ฮาบิฮ เตอ. 13 ซือมียา อีตู ซีงี ญา ลารี ซาเบะ-จะ ญา ฌาดี ซือมียา มากัด อูปัฮ ญา เตด บรีงัจ กะ กาวัด กาเมก ลาลู เลอ. 14 กู นี เลอ ฌาดี ซือมียา บือบือลา กาเมก นู บาฌิ. บือกะ นู อาโปก ญา กราลา กู กู โปด กราลา ญา. ซือรูปา กะฆีเตอ ฌูฆา เลอ กู กราลา โกะ กาเมก นะ กู กาเมก นะ กู โปด กูญา กราลา กู ฌูฆา เลอ. ญาวา นะ กู กู ยอม ซรัฮ บีดา กาวัด กาเมก เลอ. 16 กู อาดา โกะ กาเมก นู อาซิก ฌูฆา บูกัด ซา เดะ ปาฆัยํ อีนี. กู ฆาโดฮ บาวา โกะ กาเมก อีตู มาแรฮ ฌูฆา. โกะ กาเมก อีตู กูญา นะ มือนีงัย ซูวารา นะ กู นะ มาโซะ บือมุน ซือกาลี ฌาดี ซา กาวัด นู อาดา ซือมียา บือบือลา แนฮ ซืออูรัก เลอ. 17 ซาเบะ กะฆีนี อาโปก ญา ซายัก กะ กู กรานา-จะ กู ยอม ซรัฮ ญาวา นะ กู บีดา นะ ซาโมจ ญาวา อีตู ปูลัก. 18 ฮอย ซือมียา ดีฮา นะ ราปัซ ญาวา ปี เดะ กู บือเลฮ. ตาปี กู ซรัฮ ญาวา ฌางัน ฮาตี นะ กู ตะอาซิก เลอ. กู อาดา มือฆัฮ นู นะ ซรัฮ ญาวา นะ กู ตะอาซิก. กู อาดา มือฆัฮ นู นะ ซาโมจ อาเมด ปาเระ ปูลัก. ปือมือซัด อีตู กู บือเลฮ ซาโมจ เดะ อาโปก นะ กู ดัฮ." เยซู ญา จะ. 19 ปือมือเลา อีตู บูวัจ บรี ลูมอฮ ยิว ปือจัฮ-บือลัฮ ปูลัก โซกซา กาวัด. 20 ลูมอฮ กูญา บาญะ อูรัก มือเลา จะ "ญา อาดา ฮาตู มาโซะ ฆีลา ดัฮ. ปี มือนีงัย กะ ญา บูวัจ นามา เลอ?" 21 ตาปี ลูมอฮ อาซิก มือเลา จะ "ปือมือเลา กะฆีเตอ บูกัด ปือมือเลา นะ ซือมียา นู ฮาตู มาโซะ เลอ. ฮาตู นะ บูวัจ บรี ซือมียา มาตา บูตา ลีฮัจ บือฆารี บือเลฮ กะฮามี เลอ?" 22 เดะ วะตู อีตู ฌาดี ลาฆู บรามัย อารี นู ซรัฮ รูมัฮ มือญือมัฮ ตูฮัด เดะ นังฆรี เยรูซาเลม ฌาดี มูเซด บือแฌะ. 23 เยซู บือฌาลัด เดะ ลามัน รูมัฮ มือญือมัฮ เดะ โซะ ปือทอยํ นู บลาโลก จะ ปือทอยํ นะ ซะโลโม. 24 โกะ ลูมอฮ ยิว กูญา ปาคัจ มาแรฮ กือลีลิก เยซู ตาญา จะ "นะ บรี กามี เตด ตือตู เดะ ฮาตี บราปา ลามา เลอ? ดัฮ เกา ฌาดี ราฌา นู บรี ซือลามัจ กือนา มือญาเระ กะ กามี บรี ซัฮ เลอ." 25 เยซู มือเลา ฌางัน กูญา จะ "กู บือเลฮ มือญาเระ กะ กาเญา ดัฮ ตาปี กาเญา เตด ปือจายา. โกะ ลาฆู มือฆัฮ นู กู บูวัจ เดะ นามา นะ อาโปก เดะ กู เตอ ลาฆู อีตู ฌาดี ซะซี ปาซัน ลาฆู นะ กู ดัฮ เลอ. 26 ตาปี กาเญา เตอ นะ เตด ปือจายา ซาเบะ กาเญา เตด ฌาดี กาเมก นะ กู. 27 โกะ กาเมก นะ กู กูญา มือนีงัย กะ ซูวารา นะ กู. กู โปด กราลา กูญา ฌูฆา เลอ. 28 กู บรี กะ ลูมอฮ กาเมก นะ กู บรี กูญา นะ ฮีโดะ ซูโงฮ ซือลาลู. กะฆีเตอ กูญา นะ เตด ฌาฮานัม ลาลู เลอ. ฮอย ซือมียา ดีฮา นะ บือเลฮ ราปัซ โกะ กาเมก อีตู เดะ ตางัน นะ กู. 29 อาโปก เดะ กู นู บรี กาเมก อีตู กะ กู ดัฮ ญา บือซัยํ ลือเบฮ เดะ ลาฆู ซือมูฮา. ฮอย ซาปา นะ บือเลฮ ราปัซ โกะ กาเมก อีตู บือปี เดะ ตางัน นะ อาโปก เดะ กู. 30 กู ฌางัน อาโปก ฌาดี ซา ญาวา อีตู เลอ." เยซู ญา จะ. 31 โกะ ลูมอฮ ยิว กูญา ปือฆัก บาตู นะ ลีปัยํ เยซู ปูลัก บรี มาตี. 32 เยซู มือเลา ฌางัน กูญา จะ "กู บือเลฮ บูวัจ ลาฆู นู บาฌิ บาญะ ฌือแนฮ ดาตัก เดะ อาโปก เดะ กู บรี กะ กาเญา ลีฮัจ. กาเญา ปือฆัก บาตู นะ ลีปัยํ กู บรี มาตี กรานา ลาฆู ปือบูวัจ นู ดีฮา เลอ?" 33 ลูมอฮ ยิว กูญา ตีกัฮ กะ เยซู จะ "กามี นะ ลีปัยํ เกา บูกัด กรานา ลาฆู ปือบูวัจ บาฌิ ตาปี กรานา เกา มือเลา ตะอารัฮ กะ ตูฮัด เดะ อาตัซ เลอ. ซาเบะ เกา ฌาดี อูมัจ-ซือมียา ตาปี มืองากู กะ ญาวา ตะอาซิก จะ ฌาดี ตูฮัด." 34 เยซู ตีกัฮ จะ "เดะ ซูรัจ ปือมือเลา ฮูโกบ นะ กาเญา ฆาแรฮ ดัฮ บูกัด เฆอ นู ตูฮัด เดะ อาตัซ มือเลา จะ 'กาเญา ฌาดี ซือรูปา โกะ ตูฮัด ซือมูฮา เลอ.' 35 ซูรัจ ปือมือเลา นะ ตูฮัด อีตู ญา รือมัก ซือลาลู เตอ จะ เดะ ซูรัจ อีตู ตูฮัด เดะ อาตัซ บลาโลก กะ ซือมียา นู ซาโมจ ปือมือเลา นะ ตูฮัด จะ ฌาดี โกะ ตูฮัด เลอ. 36 กะฆีเตอ กาเญา นะ อาดู กู ลาฆู นามา กู นู อาโปก เดะ อาตัซ ตืองะ ดัฮ ซูโรฮ กู มาแรฮ กะ ดาลับ ดือนียา? นะ อาดู จะ กู มือเลา ตะอารัฮ กะ ตูฮัด กรานา กู มือเลา จะ กู ฌาดี นานะ นะ ตูฮัด กะฆีเตอ บือเลฮ กะฮามี เลอ? 37 ดัฮ กู เตด บูวัจ บือกรือฌา นู ตูโรจ กะ ลาฆู นะ อาโปก เดะ กู เตอ ฌางัน ปือจายา กะ กู เลอ. 38 ตาปี ดัฮ กู บือกรือฌา ตูโรจ กะ ลาฆู นะ อาโปก เดะ กู เตอ มีเซ-จะ กาเญา เตด ปือจายา กะ กู ตาปี บรี กาเญา ปือจายา กะ ลาฆู บือกรือฌา อีตู เลอ บีดา กาเญา นะ ตาฮู มาโซะ เดะ ฮาตี จะ อาโปก ญา อาดา ดูโดะ เดะ กู กู โปด อาดา ดูโดะ เดะ อาโปก เลอ." เยซู ญา จะ. 39 ลูมอฮ กูญา มียา จือลัฮ ปูลัก นะ รีฆะ เยซู. ตาปี เยซู ลารี ลือปัซ เดะ ตางัน นะ กูญา ปี บือเลฮ. 40 เยซู ญา มือลากัฮ ซูงัย จอแดน ปูลัก ญา ปี รอจ กะ ตือปัจ นู ตืองัฮ ดูลู อีตู โยฮัน บูวัจ ลาฆู ซือลับ เดะ อาเย ดัฮ. กะฆีเตอ เยซู ญา บือเลฮ บราดู ตือปัจ อีตู เลอ. 41 โกะ ซือมียา บาญะ มาแรฮ มียา เยซู มือเลา ซามา กูญา จะ "โยฮัน เตด บือเลฮ บูวัจ ปือนานา นู มือฆัฮ ลาลู. ตาปี ราตา ฌือแนฮ นู โยฮัน บือเลฮ มือเลา ปาซัน ซือมียา อีนี ฌาดี ซูโงฮ เลอ." 42 กะฆีเตอ อาดา ซือมียา บาญะ เดะ ตือปัจ อีตู ปือจายา กะ เยซู เลอ.
1 อาดา กีลากี ซืออูรัก ปือนามา ลาซาโร นู เตด ซือนัง. ญา ดูโดะ เดะ ตูโปะ เบดทานี ฌาดี ตือปัจ ตูโปะ นะ มารียา ฌางัน มาทา จา นีบีนี เดะ ญา เตอ. 2 มารียา ซีงี ฌาดี ซือมียา นู อาเมด มีญะ บาวู อูแร เดะ กากี นะ ตูฮัด เยซู อาเมด โบะ นะ ญา มาแรฮ อีซุจ. ลาซาโร อีตู ฌาดี อาดี เดะ ญา นู เตด ซือนัง เตอ. 3 กะฆีเตอ จา นีบีนี เดะ ญา ดูวา อูรัก กูญา ซูโรฮ ซือมียา ปี ซารี เยซู มือเลา จะ "จา เออ นี เลอ ซาบัจ นู จา ซายัก ญา เตด ซือนัง ญาวา เลอ." 4 ตาปี ตานา เยซู ดืองัยํ ดัฮ ญา มือเลา จะ "ปือญาเกะ อีตู เตด รอจ กะ มาตี เลอ. ตาปี ญา ฌาดี ดัฮ บีดา นะ บรี ลีฮัจ ลาฆู บือซรี บือซายา นะ ตูฮัด เดะ อาตัซ เลอ. กะฆีเตอ ลาฆู นู นานะ นะ ตูฮัด นะ บือซรี บือซายา นะ ปลีฮัจ ดัฮ กรานา ปือญาเกะ อีตู เตอ เลอ." 5 เยซู ญา ซายัก มาทา ฌางัน อาดี เดะ ญา ฌางัน ลาซาโร ฌูฆา. 6 กะฆีเตอ ตานา ญา ดืองัยํ จะ ลาซาโร ญา ตืองัฮ เตด ซือนัง เตอ เยซู ญา ดูโดะ เดะ ตือปัจ นู ญา ดูโดะ อีตู ดูวา อารี ลาฆี. 7 ลือปัซ อีตู เยซู มือเลา ฌางัน โกะ ลูมอฮ มูเระ จะ "โฌฮ บรี กีตา บาลิ ปี ปาเระ กะ นังฆรี ยูเดีย ปูลัก เลอ." 8 โกะ ลูมอฮ มูเระ มือเลา ฌางัน เยซู จะ " บูมอยํ เออ ลือปัซ เตด บาญะ อารี อีนี ลูมอฮ ยูเดีย กูญา มียา จือลัฮ นะ อาเมด บาตู ลีปัยํ เกา บรี มาตี. ดัฮ กะฆีเตอ เกา นะ ปี กะ ตือปัจ อีตู ปูลัก เฆอ?" 9 เยซู ตีกัฮ จะ "เดะ ดาลับ ซืออารี อาดา ดูวา-บือลัซ ฌับ บูกัด เฆอ? ดัฮ ซือมียา ดีฮา บือฌาลัด เดะ วะตู ซียัก ญา นะ เตด ตือซีปะ กรานา-จะ ญา ลีฮัจ ลาฆู จรัฮ เดะ ดือนียา อีนี. 10 ตาปี ดัฮ ซือมียา ดีฮา บือฌาลัด เดะ วะตู มาลับ ญา โปด นะ ตือซีปะ ดัฮ กรานา-จะ ญา ฮอย ลาฆู จรัฮ เดะ ญาวา นะ ญา เลอ." 11 ตานา เยซู มือเลา กะฆีเตอ ดัฮ ญา มือเลา ฌางัน กูญา ปูลัก จะ "ลาซาโร ซาบัจ นะ กีตา ญา ลีนา ดัฮ. ตาปี กู ปี บีดา นะ ฆระ ญา บรี ดาฮานี เลอ." 12 กะฆีเตอ โกะ ลูมอฮ มูเระ มือเลา ฌางัน เยซู จะ "จา เออ ดัฮ ญา ตืองัฮ ลีนา ญา นะ ลือฆา บาฌิ เลอ." 13 เยซู มือเลา ปาซัน ลาฆู มาตี นะ ลาซาโร ตาปี โกะ มูเระ กูญา อาคา จะ ญา มือเลา ปาซัน ลาฆู ตีโนะ ลีนา บรี ฮอย รือมัย. 14 กะฆีเตอ เยซู มือเลา ฌางัน กูญา มักรือมัก จะ "ลาซาโร ญา มาตี ดัฮ. 15 กรานา ลีฮัจ กะ กาเญา เตอ กู ซูกา-ฮาตี นู กู เตด บือเลฮ ดูโดะ เดะ ตือปัจ อีตู บีดา กาเญา นะ บือเลฮ ปือจายา. ตาปี โฌฮ เลอ บรี กีตา ปี มียา ญา." 16 โทมัด นู กูญา บลาโลก จะ บือกือมัยํ ญา มือเลา ฌางัน กาวัด มูเระ จะ "โฌฮ ลูมอฮ กีตา ปี ฌางัน จา ฌูฆา บีดา นะ มาตี บือซามา ฌางัน ญา เลอ." 17 ตานา เยซู มาแรฮ รอจ ดัฮ ญา บือเลฮ ตาฮู จะ กูญา บาวา บาดัด นะ ลาซาโร ปี ตานัม เดะ ฌีรัจ ปัจ อารี ดัฮ. 18 ตูโปะ เบดทานี ดูโดะ ดาปิก นังฆรี เยรูซาเลม รืองัก บือเลฮ ฆามะ ตีฆา กีโลเมด. 19 ลูมอฮ ยูเดีย บาญะ อูรัก กูญา ปาคัจ มาแรฮ มียา มาทา ฌางัน มารียา บีดา นะ ปูโฌะ กูญา เดะ ลาฆู ปาซัน อาดี เดะ กูญา. 20 ตานา มาทา ญา ดืองัยํ บรีตา จะ เยซู ตืองัฮ มาแรฮ ญา ตรือเบะ ปี ซาโมจ เยซู. ตาปี มารียา ญา อาดา ดูโดะ เดะ ดาลับ รูมัฮ. 21 มาทา มือเลา ฌางัน เยซู จะ "ตูฮัด เออ อาดู จะ ตูฮัด อาดา ดูโดะ ตือปัจ อีนี อาดี เดะ กู โปด เตด มาตี เลอ. 22 มีเซ รอจ วะตู อีนี โปด กู ตาฮู จะ ซือบารัก นามา นู เกา มีตา เดะ ตูฮัด เดะ อาตัซ เตอ ญา นะ ซรัฮ บรี กะ เกา ซือมูฮา เลอ." 23 เยซู มือเลา ฌางัน มาทา จะ "อาดี กีลากี เดะ เกา ญา นะ ฮีโดะ ปาเระ ปูลัก." 24 มาทา มือเลา ฌางัน เยซู จะ "กู ตาฮู ดัฮ จะ ญา นะ ฮีโดะ ปาเระ เดะ อารี ปือญูดัฮ ปูลัก เตอ เดะ อารี นู โกะ ซือมียา ซือมูฮา นะ ฮีโดะ ปาเระ เดะ มาตี เลอ." 25 เยซู มือเลา ฌางัน ญา จะ "กู นี เลอ นู บรี โกะ ซือมียา ฮีโดะ ปาเระ เดะ มาตี นู บรี กูญา อาดา ฮีโดะ ซูโงฮ. ซือมียา นู ปือจายา กะ กู เตอ มีเซ-จะ ญา มาตี ดัฮ โปด นะ อาดา ฮีโดะ ปูลัก. 26 ราตา ซือมียา นู อาดา ฮีโดะ ซูโงฮ นู ปือจายา กะ กู เตอ กูญา นะ เตด มาตี ลาลู เลอ. เกา ปือจายา กะฆีนี เฆอ?" 27 มาทา มือเลา ฌางัน เยซู จะ "ซูโงฮ ตูฮัด เออ กู บือเลฮ ปือจายา ดัฮ จะ เกา ฌาดี ราฌา นู บรี ซือลามัจ ฌาดี นานะ นะ ตูฮัด เดะ อาตัซ เตอ นู นะ มาโซะ มาแรฮ กะ ดือนียา อีนี เลอ." ญา จะ. 28 ตานา มาทา มือเลา กะฆีเตอ ดัฮ ญา บาลิ ปี บลาโลก มารียา อาดี เดะ ญา บือบีซิ จะ "บูมอยํ มาแรฮ ดัฮ. ญา บลาโลก เกา เลอ." 29 ตานา มารียา ดืองัยํ กะฆีเตอ ดัฮ ญา ฆางู บีกัซ ปี มียา เยซู. 30 โซะ เยซู เตอ ญา เตด มาโซะ ปี กะ ดาลับ ตูโปะ ลาฆี ตาปี ญา อาดา ดูโดะ เดะ ตือปัจ นู มาทา ดาปัจ ฌางัน ญา โตะ อีตู เลอ. 31 ตานา ลูมอฮ ยิว นู ดูโดะ เดะ รูมัฮ ตืองัฮ ปูโฌะ ฮาตี นะ มารียา เตอ กูญา ลีฮัจ มารียา ญา ฆางู บีกัซ ตรือเบะ ปี. กะฆีเตอ กูญา ตูโรจ ญา ปี อาคา จะ ญา นะ ปี มือนาแงฮ เดะ ตือปัจ ฌีรัจ. 32 มารียา ญา มาแรฮ รอจ กะ ตือปัจ นู เยซู ดูโดะ เตอ. ตานา ลีฮัจ เยซู ญา ตือมะ มือญือมัฮ เดะ กากี นะ เยซู มือเลา จะ "ตูฮัด เออ อาดู จะ ตูฮัด อาดา ดูโดะ เดะ ตือปัจ อีนี อาดี เดะ กู โปด ญา เตด มาตี เลอ." 33 เยซู ญา ลีฮัจ มารียา มือนาแงฮ โกะ ลูมอฮ ยูเดีย นู มาแรฮ ฌางัน ญา โปด มือนาแงฮ ฌูฆา. เยซู ญา ฆาโดฮ-ฮาตี ซูซัฮ ซูโงฮ เลอ. 34 ญา ตาญา จะ "ลูมอฮ กาเญา อาเมด บาดัด นะ ญา ปี บอฮ ปัจ ดีฮา?" กูญา ตีกัฮ จะ "มาแรฮ ลีฮัจ เลอ." 35 เยซู ญา ตรือเบะ อาเย มาตา เลอ. 36 โกะ ลูมอฮ ยูเดีย กูญา มือเลา จะ "ลีฮัจ เลอ เยซู ซายัก กะ ญา บาญะ เลอ." 37 ตาปี ซือมียา ซือตืองัฮ มือเลา จะ "ซือมียา อีนี ญา บือเลฮ บูวัจ บรี ซือมียา มาตา บูตา ลีฮัจ บือฆารี ดัฮ. นะ บือบือลา ซือมียา อีนี บรี เตด มาตี เตด บือเลฮ เฆอ?" 38 เยซู ญา ฆาโดฮ-ฮาตี ปูลัก. กะฆีเตอ ญา มาแรฮ รอจ กะ ฌีรัจ ดัฮ. เดะ ฌีรัจ อีตู ลูบัก ตานัม บาดัด ฌาดี ฆูฮา เลอ อาดา บาตู ตูโดก มูโลจ ฆูฮา ตาโรฮ. 39 เยซู มือเลา จะ "กือนา อาเมด บาตู บือตรือเบะ เลอ." มาทา นู กากา นีบีนี เดะ ซือมียา มาตี ญา มือเลา จะ "ตารา อีนี บาดัด นะ ญา บือบาวู บูโซะ ดัฮ เลอ กรานา-จะ ญา มาตี บือเลฮ ปัจ อารี ดัฮ." 40 เยซู มือเลา ฌางัน มาทา จะ "กู มือญาเระ กะ เกา ดัฮ บูกัด เฆอ จะ ดัฮ เกา ปือจายา เตอ เกา นะ บือเลฮ ลีฮัจ ลาฆู บือซรี บือซายา นะ ตูฮัด เลอ?" 41 ลูมอฮ กูญา อาเมด บาตู บือตรือเบะ. เยซู ญา ลางอฮ ปาลา กะ ลาแงะ มือเลา จะ "โอ อาโปก บือซัยํ เดะ อาตัซ. กู บรี ซือลามัจ กะ เกา นู เกา ดืองัยํ กะ กู. 42 กู ตาฮู จะ ตูฮัด มือนีงัย กะ กู เลอ. ตาปี นู กู มือเลา กะฆีนี กรานา ลีฮัจ กะ โกะ ซือมียา นู บือดีรี เดะ ตือปัจ อีนี บีดา กูญา นะ ปือจายา กะ อาโปก นู ซูโรฮ กู มาแรฮ." 43 เยซู มือเลา กะฆีเตอ ดัฮ ญา บือซูระ ซูวารา บือซัยํ จะ "ลาซาโร เออ กือนา ตรือเบะ มาแรฮ เลอ." 44 ซือมียา นู มาตี อีตู โปด ญา ตรือเบะ มาแรฮ อาดา กาเยด บาโลจ เดะ กากี ฌางัน ตางัน นะ ญา. เดะ มูคา โปด อาดา กาเยด บาโลจ ฌูฆา. เยซู มือเลา ฌางัน กูญา จะ. "กือนา อูฆัย กาเยด นู บาโลจ บูวัก ปลือปัซ ญา เลอ." 45 กะฆีเตอ โกะ ลูมอฮ ยิว บาญะ อูรัก นู มาแรฮ มียา มารียา นู บือเลฮ ลีฮัจ ลาฆู ปือบูวัจ นะ เยซู เตอ กูญา โปด ปือจายา กะ เยซู ดัฮ. 46 ตาปี ลูมอฮ กูญา ซือตืองัฮ ปี มียา ลูมอฮ ฟาริซี จรือตา ลาฆู นู เยซู บือเลฮ บูวัจ บรี กะ กูญา ดืองัยํ. 47 ซาเบะ กะฆีเตอ ลูมอฮ ซามี ซัยํ-บือซัยํ ฌางัน ลูมอฮ ฟาริซี กูญา บลาโลก ลูมอฮ บือมุน บือกีรา ดัฮ จะ "นะ บูวัจ กะฮามี เลอ กรานา-จะ ซือมียา อีนี ญา บือเลฮ บูวัจ ปือนานา นู มือฆัฮ บาญะ ฌือแนฮ ดัฮ. 48 ดัฮ บือบียัยํ ตาโรฮ กะฆีนี โกะ ซือมียา ซือมูฮา นะ ปือจายา กะ ญา เลอ. กะฆีเตอ ลูมอฮ โรม โปด กูญา ฆางู นะ มาแรฮ ปรูโตฮ รูมัฮ มือญือมัฮ นะ กีตา ฌางัน ลูมอฮ บักซา นะ กีตา ฌูฆา." 49 ตาปี ซือมียา ซืออูรัก เดะ ลูมอฮ กูญา ปือนามา กายาฟัด นู ฌาดี กือปาลา ซามี เดะ ตาโฮด อีตู ญา มือเลา ฌางัน กูญา จะ "กาเญา เตด ตาฮู อารัฮ นามา เลอ. 50 เตด ตาฮู จะ ญา ฌาดี ลาฆู บาฌิ นะ กาเญา เลอ นู นะ บรี ซือมียา มาตี ซืออูรัก ฆาตี โกะ ซือมียา ซือมูฮา. กะฆีเตอ โปด บาฌิ เดะ นู นะ บรี ฌาฮานัม ฮาบิฮ ซา บักซา เลอ." 51 ญา มือเลา กะฆีเตอ บูกัด ตูโรจ กะ ฮาตี นะ ตะอาซิก ตาปี ซาเบะ ญา ฌาดี กือปาลา ซามี นู ดูโดะ บือกรือฌา เดะ ตาโฮด อีตู เลอ. ญา มือเลา ปือมือเลา ตูโดฮ จะ เยซู ญา ฆาโดฮ มาตี ฆาตี โกะ ซือมียา บักซา อีตู. 52 บูกัด-จะ นะ มาตี ฆาตี ซา ลูมอฮ อีตู ตาปี บีดา นะ บรี โกะ นานะ นะ ตูฮัด นู จัฮ-บือลัฮ ปี เตอ นะ มาแรฮ บือฮีมุน บือซามา ฌาดี ซา ลูมอฮ อีตู เลอ. 53 ตะเดะ อารี อีตู มาแรฮ กูญา ปาคัจ บือกีรา นะ บูนอฮ เยซู บูวัก เลอ. 54 ซาเบะ กะฆีเตอ เยซู ญา เตด มาโซะ ปี เดะ ตืองัฮ บรี โกะ ลูมอฮ ยิว ลีฮัจ. ตาปี ญา บือเลฮ ตรือเบะ เดะ ตือปัจ อีตู ปี กะ ซา ตูโปะ นู ดูโดะ ดาปิก ปาดัก ตานัฮ ตูโฮยํ นู ลือฆา รอจ กะ นังฆรี นู ปือนามา เอฟราอิม. ญา บือเลฮ บราดู ดูโดะ ตือปัจ อีตู ฌางัน มูเระ นะ ญา. 55 เดะ กาลา อีตู ดาปิก นะ รอจ กะ อารี บรามัย ลือปัซ ปี นะ ลูมอฮ ยิว ดัฮ. โกะ ซือมียา บาญะ กูญา ตรือเบะ มาแรฮ เดะ ราตา ตูโปะ ญาแญะ ปี กะ นังฆรี เยรูซาเลม ดูลู เดะ อารี บรามัย ลือปัซ ปี บีดา นะ ตูโรจ กะ ลาฆู บาโซฮ ญาวา. 56 กูญา ซือมูฮา ปาคัจ มียา เยซู ตานา กูญา บือดีรี เดะ ลามัน รูมัฮ มือญือมัฮ กูญา ปาคัจ มือเลา จะ "กาเญา บรีงัจ กะฮามี เยซู นะ มาแรฮ กะ ลาฆู บรามัย อีนี เฆอ เตด?" 57 โซะ กือปาลา ซามี ฌางัน ลูมอฮ ฟาริซี บือเลฮ ปือซัด ปือมือเลา ดัฮ จะ กะ ซือมียา ดีฮา ตาฮู จะ เยซู ดูโดะ ปัจ ดีฮา บรี มาแรฮ มือญาเระ กะ ลูมอฮ กูญา บีดา กูญา นะ บือเลฮ ปี รีฆะ ญา.
1 ดูลู เดะ อารี บรามัย ลือปัซ ปี นัม อารี ดัฮ เตอ เยซู ญา มาแรฮ กะ ตูโปะ เบดทานี นู ฌาดี ตือปัจ ดูโดะ นะ ลาซาโร ซือมียา นู เยซู บือเลฮ บูวัจ บรี ญา ฮีโดะ ปาเระ เดะ มาตี. 2 ตือปัจ อีตู กูญา บูวัจ บรามัย บารัก มากัด บรี กะ เยซู. มาทา ญา ตูโลก บือกรือฌา ฌูฆา. ลาซาโร เตอ ญา เลอ ฌาดี ซือมียา ซืออูรัก เดะ ลูมอฮ ซือมียา นู ดูโดะ มากัด บือซามา ฌางัน เยซู. 3 มารียา ญา อาเมด มีญะ บาวู ปือนามา นาระดา ฌาดี มีญะ นู บาฌิ รือฆา มาฮัน โตระ บรัจ บือเลฮ ฆามะ ตืองัฮ กีโล เตอ. มีญะ อีตู ญา อาเมด มาแรฮ ลือมัยํ เดะ กากี นะ เยซู. ญา อาเมด โบะ นะ ญา มาแรฮ อีซุจ เดะ กากี นะ เยซู. เดะ รูมัฮ โปด บือบาวู บาฌิ ฌางัน มีญะ บาวู อีตู. 4 ตาปี มูเระ นะ เยซู ซืออูรัก นู ปือนามา จะ ยูดา อิดคารีโยด ซือมียา นู นะ ซรัฮ เยซู บรี กือนา รีฆะ เตอ ญา มือเลา จะ 5 "ซาเบะ นามา ตีเมา ฌูวัน มีญะ บาวู อีตู บรี ฌาดี ดูเวะ บือเลฮ ตีฆา ราตุซ รีเงะ ปีระ เลอ บีดา ปี อาเมด ปี ฮาฆิ กะ โกะ อูรัก ฮาฌะ?" 6 ญา มือเลา กะฆีเตอ บูกัด นะ อาเมด ฮาตี นะ โกะ อูรัก ฮาฌะ ตาปี ซาเบะ ญา ฌาดี ซือมียา ปือญูรี เลอ. ญา ฌาดี ซือมียา นู บาวา ตีปะ บอฮ ดูเวะ นะ ลูมอฮ กูญา กะฆีเตอ ญา ซัจๆ อาเมด ดูเวะ อีตู ปี ซูโรฮ ตะอาซิก. 7 เยซู มือเลา จะ "บือบียัยํ ญา เลอ บรี ญา อาเมด มีญะ อีนี ตาโรฮ ตือดะ รอจ กะ อารี นู นะ ตานัม บาดัด นะ กู. 8 กรานา-จะ อาดา โกะ อูรัก ฮาฌะ ดูโดะ ดาปิก กาเญา ซือรูโลยํ. ตาปี โซะ กู นี กู นะ ดูโดะ ฌางัน กาเญา เตด บราปา ลามา ดัฮ เลอ." 9 โซะ ลูมอฮ ยิว บาญะ ซือมียา กูญา บือเลฮ ตาฮู ดัฮ จะ เยซู อาดา ดูโดะ ตือปัจ อีตู. กะฆีเตอ กูญา ปาคัจ มาแรฮ กะ ตือปัจ อีตู ฌูฆา บูกัด-จะ กรานา เยซู ซืออูรัก ตาปี บีดา นะ มาแรฮ ลีฮัจ ลาซาโร ซือมียา นู เยซู บูวัจ บรี ญา ฮีโดะ ปาเระ เดะ มาตี เลอ. 10 กะฆีเตอ ลูมอฮ ซามี ซัยํ-บือซัยํ กูญา ปาคัจ บือกีรา บือซามา บีดา นะ บูนอฮ ลาซาโร ฌูฆา เลอ. 11 ซาเบะ-จะ กรานา ลาฆู นะ ลาซาโร เตอ โกะ ลูมอฮ ยิว บาญะ อูรัก ตรือเบะ เดะ โซะ กูญา ปี ปือจายา กะ เยซู. 12 ลือปัซ ปี ซืออารี โกะ ซือมียา บาญะ อีตู นู บือเลฮ มาแรฮ กะ บรามัย ลือปัซ ปี เตอ กูญา ดืองัยํ จะ เยซู ตืองัฮ มาแรฮ รอจ กะ นังฆรี เยรูซาเลม ดัฮ. 13 กะฆีเตอ กูญา ปาคัจ อาเมด โกะ ดาฮัด ปูโฮด กายู ตรือเบะ ปี ซาโมจ เยซู บือซูระ จะ " โฮซันนา ปูฌี กะ ตูฮัด เลอ. ซือลามัจ เลอ ซือมียา นู มาแรฮ เดะ นามา นะ ตูฮัด เดะ อาตัซ. ซือนัง ซือลามัจ เลอ ราฌา นะ ลูมอฮ บักซา อิซราเอน." 14 เยซู ญา ดาปัจ อานะ กูดา ซืออีโกยํ ญา ญาแญะ อานะ กูดา อีตู ซือรูปา อาดา ฆาแรฮ ดัฮ เดะ ซูรัจ ปือมือเลา นะ ตูฮัด จะ 15 "ลูมอฮ ซือมียา เดะ นังฆรี ซีโอน เออ ฌางัน ตาโกจ เลอ. ลีฮัจ เลอ ราฌา นะ กาเญา ญา ตืองัฮ มาแรฮ ดัฮ. ญา ดูโดะ เดะ อาตัซ อานะ กูดา มาแรฮ ดัฮ." 16 ลามูลา เตอ โกะ มูเระ นะ เยซู เตด บือเลฮ มาโซะ เดะ ฮาตี ลาฆู นู อีตู. ตาปี ตานา เยซู ญา กือนา อาเกะ บรี บือซรี บือซายา ดัฮ บารู กูญา โตะ-ตืออีงัจ ดัฮ จะ อาดา ปือมือเลา กะฆีเตอ นู ฆาแรฮ ดัฮ นู มือเลา รอจ กะ เยซู. นู โกะ ซือมียา กูญา บือเลฮ บูวัจ กะฆีเตอ ฌางัน เยซู ฌูฆา เลอ. 17 โกะ ลูมอฮ ซือมียา บาญะ นู อาดา ฌางัน เยซู ตานา ญา บลาโลก ลาซาโร ตรือเบะ เดะ ฆูฮา ตานัม บาดัด บูวัจ บรี ญา ฮีโดะ ปาเระ เดะ มาตี เตอ กูญา โปด มือญาเระ ฌาดี ซะซี ปาซัน ลาฆู นู กูญา บือเลฮ ดืองัยํ บือเลฮ ลีฮัจ ดัฮ. 18 ซาเบะ กะฆีเตอ โกะ ซือมียา บาญะ ปาคัจ ปี มียา เยซู กรานา กูญา บือเลฮ ดืองัยํ จะ เยซู ญา บือเลฮ บูวัจ ปือนานา นู มือฆัฮ อีตู. 19 กะฆีเตอ ลูมอฮ ฟาริซี กูญา มือเลา จะ "กาเญา ลีฮัจ ดัฮ เฆอ กีตา บูวัจ นามา โปด ฮอย เตด ตือปากัย. ลีฮัจ เลอ ดือนียา ตูโรจ กะ ญา ปี ฮาบิฮ ดัฮ." 20 เดะ โกะ ลูมอฮ ซือมียา นู ญาแญะ ปี มือญือมัฮ เดะ ลาฆู บรามัย อีตู เตอ อาดา ลูมอฮ ซือมียา บักซา กรีก ซือตืองัฮ. 21 ลูมอฮ กูญา อีนี เลอ ปี มียา ฟีลิบ ซือมียา นู มาแรฮ ดาตัก เดะ ตูโปะ เบดซัยดา เดะ นังฆรี ฆาลิลี กูญา มือเลา จะ "จา เออ ลูมอฮ กามี บือคานะ นะ ลีฮัจ เยซู." 22 ฟีลิบ ญา ปี มือญาเระ กะ อันดรู. กะฆีเตอ อันดรู ฌางัน ฟีลิบ กูญา ปี มือญาเระ กะ เยซู. 23 เยซู ตีกัฮ กะ กูญา จะ "รอจ วะตู ดัฮ นู โกะ ซือมียา นะ บือเลฮ ลีฮัจ จะ กู นู นานะ นะ อูมัจ-ซือมียา อีนี นะ กือนา อาเกะ บรี บือซรี บือซายา เลอ. 24 กู มือญาเระ ลาฆู นู ซูโงฮ กะ กาเญา จะ ดัฮ บีฌี ปาดี เตด ฆูโฆยํ เดะ ตานัฮ ยู บูโระ เตอ ญา นะ ฌาดี แนฮ ซา บีฌี อีตู เลอ. ตาปี ดัฮ ญา บูโระ ปี ดัฮ ญา นะ บือตูโมฮ ฌาดี บาญะ บีฌี ปูลัก. 25 ซือมียา นู ซายัก กะ อีซี ญาวา ตะอาซิก เตอ ญาวา ญา นะ ฌาฮานัม เลอ. ตาปี ซือมียา นู บือชี กะ อีซี ญาวา นะ ญา เดะ ดือนียา อีนี เตอ ญา นะ ฌาฆา ญาวา อีตู ปี รอจ กะ ลาฆู ฮีโดะ ซูโงฮ นู ซือลาลู เลอ. 26 ดัฮ ซือมียา ดีฮา นะ บือกรือฌา ตูโลก กู ซือมียา อีตู เตอ ฆาโดฮ ตูโรจ กะ กู เลอ. กู ดูโดะ ปัจ ดีฮา ซือมียา บือกรือฌา ตูโลก กู โปด ญา นะ ดูโดะ ปัจ อีตู ฌูฆา เลอ. ซือมียา ดีฮา บือเลฮ บือกรือฌา ตูโลก กู อาโปก เดะ อาตัซ นะ ปูฌี กะ ซือมียา อีตู." 27 "วะตู อีนี ฮาตี นะ กู ซูซัฮ จะ กู นะ มือเลา กะฮามี? นะ จะ 'โอ อาโปก เออ มีตา บรี กู ลือปัซ เดะ วะตู นู ซูซัฮ อีนี เลอ ดัฮ.' กะฆีเตอ เฆอ? บูกัด เลอ. กรานา ลาฆู อีนี เลอ กู บือเลฮ มาแรฮ รอจ กะ วะตู นู ซูซัฮ อีนี. 28 โอ อาโปก เดะ อาตัซ มีตา บรี อาโปก นะ บรี ลีฮัจ จะ นามา นะ อาโปก ญา บือซรี บือซายา เลอ." เดะ วะตู อีตู อาดา ซูวารา ดาตัก เดะ โซะ ลาแงะ มือเลา จะ "กู บือเลฮ ปลีฮัจ ดัฮ จะ นามา นะ กู บือซรี บือซายา. กู นะ ปลีฮัจ ลาฆู กะฆีเตอ ปูลัก เลอ." 29 ลูมอฮ ซือมียา บาญะ นู บือดีรี เดะ ตือปัจ อีตู กูญา บือเลฮ ดืองัยํ ซูวารา อีตู กะฆีเตอ ซือตืองัฮ จะ บูงี ฆูโตยํ. ซือมียา นู อาซิก จะ " ฮูลู-บาลัก นะ ตูฮัด ซืออูรัก มือเลา ฌางัน ญา." 30 เยซู ญา ตีกัฮ จะ "บูกัด บีดา กู เตอ นู ซูวารา อีตู บือฌาดี มาแรฮ ตาปี มาแรฮ บีดา กาเญา เลอ. 31 วะตู อีนี เลอ รอจ กะ วะตู นู นะ กรัจ ฮูโกบ ดือนียา อีนี ดัฮ. วะตู อีนี เลอ ฮาตู ซีตัด นู ฮูโกบ ดือนียา อีนี ญา นะ กือนา โปรฮ ปี บูวัก เลอ. 32 ตาปี กู นี ตานา กู นะ กือนา อาเกะ เดะ ตานัฮ ดัฮ กู นะ บูวัจ บรี อูมัจ-ซือมียา ซือมูฮา มาแรฮ รอจ กะ กู เลอ." 33 เยซู มือเลา กะฆีเตอ บรี ลีฮัจ จะ ญา นะ มาตี กะฮามี. 34 กะฆีเตอ โกะ ซือมียา บาญะ อีตู ตีกัฮ กะ เยซู จะ "กามี บือเลฮ ดืองัยํ เดะ ซูรัจ ปือมือเลา ฮูโกบ นะ ตูฮัด นู จะ ราฌา นู บรี ซือลามัจ นะ อาดา ฮีโดะ ซือลาลู. ซาเบะ นามา เกา มือเลา จะ นานะ นะ อูมัจ-ซือมียา นะ กือนา อาเกะ? นู จะ นานะ นะ อูมัจ-ซือมียา อีนี ญา ฌาดี ซือมียา ดีฮา เลอ?" 35 เยซู มือเลา ฌางัน กูญา จะ "ลาฆู จรัฮ นะ อาดา ดูโดะ ฌางัน กาเญา ปี กิดีกิ ลาฆี. กาลา อาดา จรัฮ ลาฆี กือนา บือฌาลัด ปี เลอ. ตาโกจ-จะ ลาฆู กือลับ นะ อูเซ ดัด. ซือมียา นู บือฌาลัด เดะ โซะ กือลับ ญา เตด ตาฮู จะ นะ ปี กะ โซะ ดีฮา. 36 กาลา กาเญา อาดา จรัฮ ลาฆี กือนา ปือจายา กะ นู จรัฮ อีตู เลอ บีดา กาเญา นะ ฌาดี ซือมียา นู ดูโดะ เดะ โซะ จรัฮ." ตานา เยซู มือเลา กะฆีเตอ ดัฮ ญา ตีงัน กูญา ปี ซือลูนี. 37 มีเซ-จะ เยซู บือเลฮ บูวัจ ปือนานา นู มือฆัฮ บาญะ ฌือแนฮ เตอ บรี กะ กูญา ลีฮัจ กูญา โปด เตด ปือจายา กะ ญา. 38 ลาฆู กะฆีเตอ บือฌาดี ดัฮ บีดา นะ บูวัจ บรี ปือมือเลา นะ อิซายา ซือมียา นู ตูโดฮ ลาฆู นะ ตูฮัด นะ ซุจ รือมัก ดัฮ นู จะ "ตูฮัด เออ ซาปา เลอ นู นะ ปือจายา กะ ปือมือเลา นะ กามี? นู ปือมือฆัฮ นะ ตูฮัด นะ บือเลฮ ปลีฮัจ กะ ซือมียา ดีฮา เลอ?" 39 ซาเบะ ลาฆู อีนี ลูมอฮ กูญา ปือจายา เตด บือเลฮ บือกะ นู อิซายา บือเลฮ มือเลา ปูลัก ดัฮ จะ 40 "ตูฮัด เดะ อาตัซ บือเลฮ บูวัจ บรี มาตา นะ กูญา บูตา เตอ บูวัจ บรี ฮาตี นะ กูญา ตือฆัยํ ตีเมา บรี กูญา นะ บือเลฮ ลีฮัจ ฌางัน มาตา นะ กูญา ตีเมา บรี กูญา บรีงัจ บรี มาโซะ เดะ ฮาตี. กะฆีเตอ กูญา นะ เตด บือเลฮ อาเลฮ มาแรฮ ซารี กู บีดา กู นะ บือบือลา กูญา บรี ซือนัง." 41 อิซายา บือเลฮ มือเลา กะฆีเตอ ดัฮ ซาเบะ-จะ ญา บือเลฮ ลีฮัจ ลาฆู บือซรี บือซายา นะ เยซู บือเลฮ มือเลา ปาซัน ลาฆู นะ ญา. 42 มีเซ กะฆีเตอ เดะ ลูมอฮ ซือมียา นู ซัยํ-บือซัยํ โปด อาดา บาญะ อูรัก ปือจายา กะ เยซู. ตาปี กูญา ตีเมา นะ ซาโงะ กะฆีเตอ บรี กะ โกะ ซือมียา ตาฮู ตาโกจ-จะ ลูมอฮ ฟาริซี นะ โปรฮ กูญา บรี ตรือเบะ เดะ รูมัฮ บือมุน. 43 กรานา-จะ กูญา ซูกา นะ บรี โกะ ซือมียา มือโอจ นะ กูญา บาญะ ลือเบฮ เดะ นู ตูฮัด นะ มือโอจ กะ กูญา เลอ. 44 โซะ เยซู ญา บือซูระ จะ "ลูมอฮ โกะ ซือมียา นู ปือจายา กะ กู เตอ กูญา ฮอย เตด ปือจายา ซา กะ กู เลอ ตาปี ปือจายา กะ ตูฮัด นู ซูโรฮ กู มาแรฮ. 45 ซือมียา นู ลีฮัจ กู เตอ ญา นะ ลีฮัจ ตูฮัด นู ซูโรฮ กู มาแรฮ เลอ. 46 กู นี บือเลฮ มาแรฮ กะ ดือนียา บรี ฌาดี ตือปัจ จรัฮ บีดา ราตา ซือมียา นู ปือจายา กะ กู ญา นะ เตด ปายัฮ ดูโดะ โซะ กือลับ เลอ. 47 ดัฮ ซือมียา ดีฮา บือเลฮ ดืองัยํ ปือมือเลา นะ กู ตาปี ญา เตด บูวัจ ตูโรจ กู โปด เตด กรัจ ฮูโกบ ซือมียา อีตู. ซาเบะ-จะ กู เตด บือเลฮ มาแรฮ บีดา กรัจ ฮูโกบ ดือนียา ตาปี มาแรฮ บีดา นะ ตูโลก โกะ ซือมียา เดะ ดือนียา บรี ฮีโดะ ลือปัซ บาฌิ เลอ. 48 ดัฮ ซือมียา ดีฮา กีปัซ กู ตีเมา ซาโมจ ปือมือเลา นะ กู เตอ ซือมียา อีตู อาดา ซา ลาฆู นู นะ กรัจ ฮูโกบ ญา. ปือมือเลา นู กู บือเลฮ มือเลา ดัฮ เตอ ปือมือเลา อีตู นะ กรัจ ฮูโกบ ญา เดะ อารี ปือญูดัฮ เลอ. 49 กรานา-จะ กู เตด บือเลฮ มือเลา ตูโรจ กะ ฮาตี นะ กู ตะอาซิก. ตาปี อาโปก นู ซูโรฮ กู มาแรฮ ญา บือเลฮ ปือซัด บรี กู มือเลา กะฮามี กู โปด มือเลา กะฆีเตอ อาฌัยํ กะฆีเตอ เลอ. 50 กู ตาฮู ฌูฆา จะ ปือมือซัด นะ อาโปก บาวา บือปี กะ ลาฆู ฮีโดะ ซูโงฮ นู ซือลาลู. กะฆีเตอ ลาฆู นู กู มือเลา เตอ กู มือเลา ตูโรจ บือกะ นู อาโปก บือเลฮ ซูโรฮ กู มือเลา เลอ." เยซู ญา จะ.
1 ดูลู เดะ ลาฆู บรามัย ลือปัซ ปี เตอ เยซู ญา ตาฮู จะ รอจ วะตู ดัฮ นู ญา นะ ตีงัน ดือนียา อีนี ปี ดูโดะ ฌางัน อาโปก เดะ ญา. เยซู ญา บือเลฮ ซายัก โกะ มูเระ นะ ญา นู ดูโดะ โซะ ดือนียา อีนี กะฆีเตอ ญา ซายัก กูญา ดัฮ ตือดะ ฮาบิฮ ปือญูดัฮ เลอ. 2 กูญา ตืองัฮ มากัด บือซามา โซะ วะตู ปะซือญา เตอ ตาปี กือปาลา ฮาตู ซีตัด บือเลฮ บือกรือฌา ดัฮ เดะ ฮาตี นะ ยูดา อิดคารีโยด นานะ นะ ซีโมน บรี ญา นะ ซรัฮ เยซู บรี กือนา รีฆะ. 3 เยซู ญา ตาฮู จะ อาโปก ญา บือเลฮ ซรัฮ โกะ บารัก ซือมูฮา บรี ดูโดะ เดะ ตางัน นะ ญา. ญา ตาฮู จะ ญา มาแรฮ ดาตัก เดะ ตูฮัด เดะ อาตัซ ดัฮ นะ ปี ปาเระ รอจ กะ ตูฮัด ปูลัก เลอ. 4 กะฆีเตอ ญา บีกัซ บือดีรี เดะ ตือปัจ มากัด อีตู อูฆัย บาฌู นะ ญา ตืองะ ตาโรฮ. ญา อาเมด กาเยด อีซุจ ญาวา อีกัจ เดะ ปีงัก นะ ญา. 5 กะฆีเตอ ญา อูแร อาเย เดะ แบพุน อาเมด ปี บาโซฮ กากี นะ ลูมอฮ มูเระ นะ ญา อาเมด กาเยด อีซุจ ญาวา นู อีกัจ ตาโรฮ เดะ ปีงัก เตอ มาแรฮ อีซุจ กากี นะ กูญา ฌูฆา เลอ. 6 ตานา ญา มาแรฮ รอจ กะ เปโตร เปโตร มือเลา ฌางัน ญา จะ "ตูฮัด เออ เกา นะ บาโซฮ กากี นะ กู เฆอ?" 7 เยซู ตีกัฮ กะ ญา จะ "นู กู บูวัจ เดะ วะตู อีนี เกา เตด ตาฮู ลาฆี. ตาปี เดะ บลากัก เกา นะ มาโซะ เดะ ฮาตี เลอ." 8 เปโตร มือเลา ฌางัน เยซู จะ "เกา นะ ฮอย เตด บาโซฮ กากี นะ กู ปี ซือมาญัก-รอจ เลอ." เยซู ตีกัฮ กะ ญา จะ "ดัฮ กู เตด บาโซฮ กากี นะ เกา เตอ เกา นะ อาดา บาฮาเฆด บือซามา ฌางัน กู เตด บือเลฮ เลอ." 9 เปโตร มือเลา ฌางัน เยซู จะ "ตูฮัด เออ บูกัด-จะ ซา กากี นะ กู เลอ มีตา บาโซฮ ตางัน นะ กู ฌางัน ปาลา นะ กู ฌูฆา เลอ." 10 เยซู มือเลา ฌางัน ญา จะ "ซือมียา ดีฮา นู มานี ดัฮ ญาวา นะ ญา จรัฮ ฮาบิฮ ดัฮ เลอ เตด ฆาโดฮ บาโซฮ ญาวา ปูลัก. บาโซฮ ซา กากี โปด ฌาดี ดัฮ. ลูมอฮ กาเญา โปด จรัฮ บาฌิ ดัฮ ตาปี บูกัด ราตา ซือมียา เลอ." 11 กรานา-จะ ญา ตาฮู ดัฮ ซือมียา ดีฮา นู นะ ซรัฮ ญา บรี กือนา รีฆะ. ซาเบะ กะฆีเตอ เยซู ญา มือเลา จะ "บูกัด ราตา ซือมียา นู จรัฮ บาฌิ ดัฮ." 12 ตานา ซูดัฮ บาโซฮ กากี นะ กูญา ดัฮ เยซู ญา ปากัย บาฌู นะ ญา ปูลัก ดูโดะ เดะ ตือปัจ นู ญา ดูโดะ ซีงี มือเลา ฌางัน กูญา จะ "กาเญา มาโซะ เดะ ฮาตี ลาฆู ปือบูวัจ นะ กู นู กู บือเลฮ บูวัจ ฌางัน กาเญา ซีงี ดัฮ เฆอ? 13 นู กาเญา บลาโลก กะ กู จะ บูมอยํ ฌางัน ตูฮัด เตอ กาเญา บลาโลก กือนา ดัฮ. ซาเบะ กู ฌาดี บือกะ นู กาเญา บลาโลก กะฆีเตอ เลอ. 14 โซะ กู นี เลอ มีเซ กู ฌาดี ตูฮัด ฌางัน บูมอยํ นะ กาเญา เตอ ตาปี กู บือเลฮ บาโซฮ กากี นะ ลูมอฮ กาเญา ดัฮ. กะฆีเตอ ลูมอฮ กาเญา โปด ฆาโดฮ นะ บาโซฮ กากี บือซามา-ซามา ฌูฆา เลอ. 15 กรานา-จะ กู บือเลฮ บูวัจ จูตอ บรี กะ กาเญา ดัฮ บีดา บรี กาเญา นะ บูวัจ ซือรูปา บือกะ นู กู บือเลฮ บูวัจ ฌางัน กาเญา ฌูฆา. 16 กู มือญาเระ กะ กาเญา ลาฆู นู ซูโงฮ จะ ปราโซฮ นะ บือซัยํ ลือเบฮ เดะ ตกเก เตด บือเลฮ เตอ. ปือญูโรฮ นะ บือซัยํ ลือเบฮ เดะ ซือมียา นู ซูโรฮ ญา ปี โปด เตด บือเลฮ เลอ. 17 นู กาเญา บือเลฮ ตาฮู ลาฆู อีตู เตอ ดัฮ บูวัจ ตูโรจ กาเญา โปด นะ ซือนัง ซือลามัจ เลอ. 18 "กู เตด มือเลา ปาซัน นะ กาเญา ราตา ซือมียา. กู กราลา โกะ ซือมียา นู กู ปีเลฮ ดัฮ. ตาปี บีดา นะ ฌาดี ซูโงฮ ตูโรจ กะ ซูรัจ ปือมือเลา นะ ตูฮัด นู จะ 'ซือมียา นู มากัด บือซามา ฌางัน กู ญา บือเลฮ อาเกะ กากี ซูวา กะ กู.' 19 กู มือญาเระ กะ กาเญา เดะ วะตู อีนี ดูลู เดะ ลาฆู อีตู นะ บือฌาดี บีดา-จะ ดัฮ ลาฆู อีตู บือฌาดี ดัฮ กาเญา นะ บือเลฮ ปือจายา จะ กู ฌาดี บือกะ กู ฌาดี เตอ. 20 กู มือญาเระ กะ กาเญา ลาฆู นู ซูโงฮ จะ ซาปา ซาโมจ ซือมียา นู กู ซูโรฮ ปี ซือมียา อีตู โปด ซาโมจ กู ฌูฆา. ซือมียา ดีฮา ซาโมจ กู ซือมียา อีตู โปด ญา ซาโมจ ตูฮัด นู ซูโรฮ กู มาแรฮ ฌูฆา เลอ." 21 ตานา เยซู มือเลา กะฆีเตอ ดัฮ ญา ซูซัฮ-ฮาตี บาญะ มือญาเระ บรี ซัฮ จะ "กู มือเลา ฌางัน กาเญา ลาฆู นู ซูโงฮ จะ อาดา ซือมียา ซืออูรัก เดะ ลูมอฮ กาเญา นู นะ ซรัฮ กู บรี กือนา รีฆะ ดัฮ." 22 โกะ มูเระ กูญา ปาคัจ บือตีญุง-ตีญุง มูคา ปือและ-ฮาตี จะ เยซู มือเลา ปาซัน นะ ซือมียา ดีฮา? 23 เดะ ปาปัด โตะ อาดา มูเระ ซืออูรัก นู เยซู ซายัก ซูโงฮ ญา ดูโดะ ญาเปะ เยซู. 24 เปโตร ญา อาโงะ ปาลา กะ มูเระ นู อีตู บรี ญา ตาญา เยซู จะ เยซู มือเลา ปาซัน นะ ซือมียา ดีฮา เลอ. 25 กะฆีเตอ มูเระ นู อีตู ญา อีแซก ดาปิก เยซู ตาญา จะ "ตูฮัด เออ ซือมียา นู อีตู ฌาดี ซือมียา ดีฮา เลอ?" 26 เยซู ญา ตีกัฮ จะ "ซือมียา อีตู เตอ นู กู นะ อาเมด ตือโปก โรตี ฌูโฌน บรี กะ ญา ดัฮ นะ ฌาดี ซือมียา อีตู เลอ." กะฆีเตอ เยซู ญา อาเมด ตือโปก โรตี อีตู ฌูโฌน ดัฮ อูโญะ บรี กะ ยูดา อิดคารีโยด นานะ นะ ซีโมน. 27 ตานา ยูดา ญา ซาโมจ ตือโปก โรตี อีตู ดัฮ กือปาลา ฮาตู ซีตัด โปด มาโซะ บือกรือฌา เดะ ดาลับ ฮาตี นะ ญา. เยซู มือเลา ฌางัน ญา จะ "เกา นะ บูวัจ นามา ดัฮ กือนา บูวัจ งัจบางัจ เลอ." 28 ตาปี เดะ ลูมอฮ อีตู นู ดูโดะ มากัด บือซามา เตอ ฮอย ซือมียา ดีฮา โปด มาโซะ เดะ ฮาตี จะ ซาเบะ นามา เยซู มือเลา ฌางัน ญา กะฆีเตอ. 29 ซือมียา ซือตืองัฮ บรีงัจ จะ ซาเบะ ยูดา ญา บาวา ตีปะ ตาโรฮ ดูเวะ เตอ เยซู มือเลา มือญาเระ กะ ญา จะ บรี ญา ปี บือลี ซือบารัก นู ฆาโดฮ นะ ซูโรฮ เดะ ลาฆู บรามัย อีตู เฆอ-จะ ปี ฮาฆิ ซือบารัก บรี กะ โกะ ซือมียา ฮาฌะ ซือตืองัฮ. 30 กะฆีเตอ ยูดา ญา ซาโมจ ตือโปก โรตี ซือกือโตน อีตู ดัฮ ญา ตรือเบะ ปี ดัดดัด. เดะ วะตู อีตู ฌาดี วะตู มาลับ ดัฮ. 31 ตานา ยูดา ญา ตรือเบะ ปี ดัฮ เยซู มือเลา จะ "วะตู อีนี นานะ นะ อูมัจ-ซือมียา นะ กือนา อาเกะ บรี บือซรี บือซายา ดัฮ เตอ. กะฆีเตอ ญา โปด นะ บรี ลีฮัจ ดัฮ จะ นู ตูฮัด เดะ อาตัซ ญา บือซรี บือซายา เลอ. 32 ดัฮ บูวัจ กะฆีเตอ อีซี ตูฮัด เดะ อาตัซ โปด นะ อาเกะ นานะ นะ อูมัจ-ซือมียา บรี บือซรี บือซายา เลอ. ญา นะ บูวัจ กะฆีเตอ ดัดดัด. 33 โกะ นานะ เออ กู อาดา ดูโดะ ฌางัน กาเญา เตด บราปา ลามา ลาฆี. กาเญา นะ มือโซะ มียา กู ตาปี บือกะ กู บือเลฮ มือเลา ฌางัน ลูมอฮ ยิว ดัฮ วะตู อีนี กู นะ มือเลา ฌางัน กาเญา ปูลัก จะ ตือปัจ นู กู นะ ปี เตอ กาเญา นะ ปี เตด บือเลฮ เลอ. 34 กู บรี ปือมือซัด นู บารู กะ กาเญา จะ บรี กะ กาเญา ซายัก บือซามา-ซามา. กู บือเลฮ ซายัก กาเญา กะฮามี เตอ กาเญา กือนา ซายัก บือซามา กะฆีเตอ ฌูฆา เลอ. 35 ดัฮ กาเญา ซายัก บือซามา-ซามา กะฆีนี โกะ ซือมียา ซือมูฮา นะ บือเลฮ ตาฮู จะ กาเญา ฌาดี มูเระ นะ กู เลอ." เยซู ญา จะ. 36 เปโตร ญา ตาญา เยซู จะ "ตูฮัด เออ เกา นะ ปี กะ ตือปัจ ดีฮา เลอ?" เยซู ญา ตีกัฮ จะ "ตือปัจ นู กู นะ ปี เตอ เกา นะ ตูโรจ ปี เดะ วะตู อีนี ฮอย เตด บือเลฮ. ตาปี เดะ บลากัก เกา นะ ตูโรจ กะ กู ปี เลอ." 37 เปโตร มือเลา ฌางัน เยซู จะ "ตูฮัด เออ ซาเบะ นามา กู นะ ตูโรจ กะ เกา เดะ วะตู อีนี ฮอย เตด บือเลฮ? กู นะ ยอม ซรัฮ ญาวา นะ กู บีดา ตูฮัด เลอ." 38 เยซู ญา ตีกัฮ จะ "เกา นะ ยอม ซรัฮ ญาวา นะ เกา บีดา กู เฆอ? กู มือญาเระ กะ เกา ลาฆู นู ซูโงฮ จะ ดูลู เดะ ฮายับ มูเกาะ เตอ เกา นะ มือเลา กีปัซ กะ กู ตีฆา กาลี เลอ."
1 เยซู มือเลา ปูลัก จะ "ฌางัน บรี กาเญา นะ ฆาโดฮ-ฮาตี บาญะ เลอ กาเญา กือนา ปือจายา กะ ตูฮัด เดะ อาตัซ กือนา ปือจายา กะ กู ฌูฆา เลอ. 2 เดะ รูมัฮ นะ อาโปก เดะ กู อาดา ตือปัจ บราดู บาญะ ตือปัจ. ดัฮ ฮอย กะฆีเตอ กู โปด เตด บือเลฮ มือญาเระ กะ กาเญา ดัฮ จะ กู นะ ปี ซียะ ตือปัจ บีดา กาเญา เลอ. 3 ตานา กู ปี ซียะ ตือปัจ บีดา กาเญา ดัฮ กู นะ บาลิ ปาเระ มาแรฮ ปูลัก เตอ ซาโมจ กาเญา ปี ดูโดะ บือซามา ฌางัน กู บีดา-จะ ดัฮ กู นะ อาดา ดูโดะ ปัจ ดีฮา กาเญา โปด นะ อาดา ดูโดะ ปัจ อีตู ฌูฆา เลอ. 4 กู นะ ปี ตือปัจ ดีฮา กาเญา โปด ตาฮู ฌาลัด อีตู ดัฮ." 5 โทมัด ญา มือเลา ฌางัน เยซู จะ "ตูฮัด เออ ลูมอฮ กามี เตด ตาฮู จะ เกา นะ ปี ตือปัจ ดีฮา. กะฆีเตอ กามี นะ ตาฮู ฌาลัด อีตู บือเลฮ กะฮามี เลอ?" 6 เยซู ตีกัฮ กะ ญา จะ "กู นี เลอ ฌาดี ฌาลัด นู อีตู นู บาวา ปี กราลา ตูฮัด นู ซูโงฮ นู บาวา ปี กะ ลาฆู ฮีโดะ เลอ. ราตา ซือมียา นู นะ มาแรฮ รอจ กะ อาโปก เดะ อาตัซ ฆาโดฮ มาแรฮ ฌาลัด นะ กู เลอ. 7 นู กาเญา กราลา กู ดัฮ กาเญา โปด นะ กราลา อาโปก เดะ กู ฌูฆา. ตะเดะ อีนี ปี กาเญา บือเลฮ กราลา ญา บือเลฮ ลีฮัจ ญา ดัฮ เลอ." 8 ฟีลิบ มือเลา ฌางัน เยซู จะ "ตูฮัด เออ มีตา ปลีฮัจ อาโปก บรี กะ กามี บือเลฮ ลีฮัจ กะฆีเตอ ฌาดี ดัฮ เลอ." 9 เยซู ตีกัฮ จะ "ฟีลิบ เออ กู ดูโดะ ฌางัน กาเญา ลามา กะฆีนี ตาปี เกา เตด กราลา กู ลาฆี เฆอ? ซือมียา ดีฮา บือเลฮ ลีฮัจ กู ญา โปด บือเลฮ ลีฮัจ อาโปก ฌูฆา เลอ. บูวัจ นามา ปะ เกา มือเลา จะ 'มีตา ปลีฮัจ อาโปก บรี กะ กามี ลีฮัจ?' 10 เกา เตด ปือจายา เฆอ จะ กู อาดา ลือกัจ บือซามา ฌางัน อาโปก อาโปก โปด ญา อาดา ลือกัจ บือซามา ฌางัน กู. โกะ ปือมือเลา นู กู บือเลฮ มือเลา กะ กาเญา เตอ กู เตด บือเลฮ มือเลา ตูโรจ กะ ฮาตี นะ กู ตะอาซิก เลอ. ตาปี อาโปก นู อาดา ลือกัจ กระ ฌางัน กู เตอ ญา บูวัจ ลาฆู บือกรือฌา นะ ญา. 11 กือนา ปือจายา กะ กู เลอ จะ กู อาดา ลือกัจ บือซามา ฌางัน อาโปก. อาโปก โปด อาดา ลือกัจ บือซามา ฌางัน กู ฌูฆา. ดัฮ เตด ปือจายา กะฆีเตอ กือนา ปือจายา กรานา โกะ ปือบูวัจ นะ กู เลอ. 12 กู มือญาเระ กะ กาเญา ลาฆู นู ซูโงฮ จะ ซือมียา นู ปือจายา กะ กู นะ บือเลฮ บือกรือฌา โกะ ปือบูวัจ นู กู บูวัจ ฌูฆา นะ บือเลฮ บูวัจ บือซัยํ ลือเบฮ เดะ อีตู ปูลัก กรานา-จะ กู นะ ปี รอจ กะ อาโปก เดะ กู. 13 ลาฆู นามา นู กาเญา มีตา เดะ นามา นะ กู กู นะ บูวัจ ลาฆู อีตู เลอ บีดา-จะ นู อาโปก เดะ อาตัซ ญา บือซรี บือซายา เตอ นะ ปลีฮัจ ซัฮ เดะ นานะ นะ ญา เลอ. 14 ลาฆู นามา นู กาเญา มีตา เดะ นามา นะ กู กู นะ บูวัจ ลาฆู อีตู เลอ." 15 "ดัฮ กาเญา ซายัก กะ กู กาเญา นะ บูวัจ ตูโรจ กะ ปือมือซัด นะ กู. 16 กะฆีเตอ กู นะ มีตา เดะ อาโปก ญา นะ บรี ซือมียา มือนูโลก กะ กาเญา ซา ลาฆี บีดา ญา นะ ดูโดะ บือซามา ฌางัน กาเญา ซือลาลู เลอ. 17 ญา เตอ ฌาดี ซือมืองัจ นะ ตูฮัด นู ปลีฮัจ ลาฆู นู ซูโงฮ. ซือมืองัจ อีตู เตอ โกะ ซือมียา เดะ ดือนียา นะ ซาโมจ เตด บือเลฮ กรานา-จะ ลีฮัจ เตด บือฆารี เตด กราลา ญา. ตาปี กาเญา เลอ กราลา ซือมืองัจ อีตู ซาเบะ ญา อาดา ดูโดะ บือซามา ฌางัน กาเญา นะ ดูโดะ เดะ ดาลับ ฮาตี นะ กาเญา เลอ. 18 "กู นะ เตด ตีงัน กาเญา บรี ดูโดะ ซา กาเญา. กู นะ มาแรฮ มียา กาเญา. 19 เตด บราปา ลามา ดือนียา อีนี นะ ลีฮัจ กู เตด บือฆารี ตาปี กาเญา เลอ นะ ลีฮัจ บือฆารี กู. ซาเบะ กู นี อาดา ฮีโดะ กาเญา โปด นะ อาดา ฮีโดะ ฌูฆา เลอ. 20 เดะ อารี อีตู เตอ กาเญา นะ ตาฮู จะ กู อาดา ลือกัจ บือซามา ฌางัน อาโปก เดะ กู กาเญา โปด อาดา ลือกัจ บือซามา ฌางัน กู กู โปด อาดา ลือกัจ บือซามา ฌางัน กาเญา เลอ. 21 "ซือมียา ดีฮา นู อาดา ปือมือซัด นะ กู บูวัจ ตูโรจ บือกะ ปือมือซัด อีตู ซือมียา อีตู เลอ ฌาดี ซือมียา นู ซายัก กะ กู. ซือมียา นู ซายัก กะ กู เตอ อาโปก เดะ กู นะ ซายัก กะ ญา. กู โปด นะ ซายัก กะ ญา ฌูฆา นะ ปลีฮัจ บรี กะ ญา ลีฮัจ บือฆารี ญาวา นะ กู." เยซู ญา จะ. 22 ยูดา บูกัด ยูดา อิดคารีโยด ญา ตาญา เยซู จะ "ตูฮัด เออ นะ ฌาดี กะฮามี เลอ นู เกา นะ ปลีฮัจ ญาวา นะ เกา บรี กะ กามี นะ ลีฮัจ บือฆารี ตาปี เตด ปลีฮัจ กะ ซือมียา เดะ ดือนียา?" 23 เยซู ตีกัฮ จะ "ซือมียา ดีฮา นู ซายัก กะ กู ซือมียา อีตู นะ ตูโรจ กะ ปือมือเลา นะ กู. อาโปก เดะ กู โปด นะ ซายัก กะ ญา. อาโปก ฌางัน กู เตอ กามี นะ มาแรฮ มียา ญา นะ ดูโดะ บือซามา ฌางัน ญา เลอ. 24 ซือมียา ดีฮา นู เตด ซายัก กะ กู ญา เตด ตูโรจ กะ ปือมือเลา นะ กู. ปือมือเลา นู กาเญา ดืองัยํ ดัฮ เตอ บูกัด ปือมือเลา นะ กู ตาปี ฌาดี ปือมือเลา นะ อาโปก เดะ อาตัซ นู ซูโรฮ กู มาแรฮ เลอ. 25 "ลาฆู กะฆีนี กู บือเลฮ มือญาเระ กะ กาเญา ดัฮ กาลา กู อาดา ดูโดะ บือซามา ฌางัน กาเญา ลาฆี. 26 ตาปี ซือมียา มือนูโลก อีตู ญา เตอ ฌาดี ซือมืองัจ นะ ตูฮัด นู อาโปก เดะ อาตัซ นะ ซูโรฮ มาแรฮ เดะ นามา นะ กู เตอ. ญา เลอ นะ อาฌัยํ กาเญา ลาฆู ซือมูฮา ญา นะ บรี กาเญา บรีงัจ รอจ กะ ลาฆู ซือมูฮา นู กู บือเลฮ มือเลา ฌางัน กาเญา ดัฮ. 27 ลาฆู ซือนัง ซือลามัจ กู ซรัฮ บรี กะ กาเญา. กู ซือนัง ซือลามัจ กะฮามี เตอ กู บรี กาเญา ซือนัง ซือลามัจ กะฆีเตอ เลอ. นู กู บรี กาเญา ซือนัง ซือลามัจ กะฆีนี ญา ฮอย เตด ซือรูปา บือกะ นู ดือนียา บรี. กาเญา ฌางัน ฆาโดฮ-ฮาตี ฌางัน ตาโกจ เลอ. 28 กาเญา ดืองัยํ ดัฮ นู กู มือญาเระ กะ กาเญา จะ 'กู นะ ตีงัน กาเญา นะ บาลิ ปาเระ มาแรฮ รอจ กะ กาเญา ปูลัก เลอ.' ดัฮ กาเญา ซายัก กะ กู ซูโงฮ เตอ กาเญา โปด นะ ซูกา-ฮาตี นู กู นะ ปี รอจ กะ อาโปก เดะ อาตัซ กรานา-จะ อาโปก ญา บือซัยํ ลือเบฮ เดะ กู เลอ. 29 เดะ วะตู อีนี กู บือเลฮ มือญาเระ กะ กาเญา ดูลู เดะ ลาฆู อีตู นะ บือฌาดี บีดา-จะ วะตู ลาฆู อีตู บือฌาดี ดัฮ กาเญา นะ บือเลฮ ปือจายา. 30 ตะเดะ อีนี ปี กู นะ เตด มือเลา ฌางัน กาเญา ลามา กะฆีนี ดัฮ ซาเบะ-จะ กือปาลา ฮาตู ซีตัด นู ฌาดี ราฌา นู ฮูโกบ ดือนียา อีนี ญา นะ มาแรฮ. ตาปี ญา เตอ ฮอย ปือมือฆัฮ นามา นะ บูวัจ กู บือเลฮ เลอ. 31 ตาปี บีดา ซือมียา โซะ ดือนียา นะ ตาฮู จะ กู ซายัก กะ อาโปก เดะ กู กะฆีเตอ นู อาโปก บือเลฮ มือเลา ปือซัด กะ กู กะฮามี ดัฮ กู นะ บูวัจ กะฆีเตอ เลอ. "โฌฮ บีกัซ เลอ บรี กีตา ปี เดะ ตือปัจ อีนี." เยซู ญา จะ.
1 เยซู มือเลา ลาฆี จะ "กู นี เลอ ฌาดี ฌากัยํ อางุน นู ซูโงฮ. อาโปก เดะ กู โปด ญา ฌาดี ซือมียา บือบือลา กือโบด อางุน เลอ. 2 ราตา ฌามัยํ นะ กู นู เตด บือบูวัฮ ญา กรัจ บูวัก. ราตา ฌามัยํ นู บือบูวัฮ ญา กาซี ฌามัยํ อีตู บรี จรัฮ บีดา นะ บรี อาดา บูวัฮ บาญะ ซือรูโลยํ เลอ. 3 วะตู อีนี เลอ กาเญา กือนา บูวัจ บรี จรัฮ ดัฮ ฌางัน ปือมือเลา อาฌัยํ นู กู บือเลฮ มือเลา ฌางัน กาเญา เตอ. 4 กาเญา กือนา มาโซะ บรี ลือกัจ กระ ฌางัน กู เลอ. กู โปด นะ ลือกัจ กระ ฌางัน กาเญา. ดัฮ ฌามัยํ เตด ลือกัจ กระ ฌางัน บาตัก ฌากัยํ อางุน เตอ ญา นะ บือบูวัฮ ตะอาซิก เตด บือเลฮ. กะฆีเตอ เลอ ดัฮ กาเญา เตด ลือกัจ กระ ฌางัน กู กาเญา โปด นะ บือบูวัฮ เตด บือเลฮ ฌูฆา. 5 "กู นี เลอ ฌาดี ฌากัยํ อางุน. กาเญา โปด ฌาดี ฌามัยํ. ซือมียา ดีฮา นู มาโซะ บรี ลือกัจ กระ ฌางัน กู กู โปด มาโซะ บรี ลือกัจ กระ ฌางัน ซือมียา อีตู ญา เตอ นะ บือบูวัฮ บาญะ เลอ. ซาเบะ-จะ ดัฮ มืองือละ เดะ กู เตอ กาเญา นะ บูวัจ นามา เตด บือเลฮ ลาลู เลอ. 6 ดัฮ ซือมียา เตด มาโซะ บรี ลือกัจ กระ ฌางัน กู ซือมียา อีตู เตอ กือนา นะ กรัจ บูวัก ซือรูปา กะ ฌามัยํ กะฆีเตอ ญา นะ ตูโฮยํ มาตี ปี. โกะ ฌามัยํ กะฆีเตอ กือนา นะ มูงอจ ลูโงะ ปี ตูนู เดะ อาปี เลอ. 7 ดัฮ กาเญา ลือกัจ กระ ฌางัน กู ปือมือเลา นะ กู โปด ลือกัจ กระ เดะ กาเญา ดัฮ ฌูฆา กาเญา นะ มีตา ลาฆู นามา นู กาเญา บือคานะ กาเญา นะ บือเลฮ ลาฆู อีตู เลอ. 8 ลาฆู บือซรี บือซายา นะ อาโปก เดะ กู นะ ลีฮัจ บือฆารี ซัฮ เดะ ลาฆู กะฆีนี นู กาเญา บือบูวัฮ บาญะ. กะฆีเตอ บรี ลีฮัจ จะ กาเญา ฌาดี มูเระ นะ กู. 9 อาโปก ญา ซายัก กู กะฮามี ดัฮ กู โปด ซายัก กาเญา กะฆีเตอ ฌูฆา เลอ. กือนา ดูโดะ กือฌะ-กือมัซ เดะ ลาฆู ซายัก นะ กู เตอ. 10 ดัฮ กาเญา บูวัจ ตูโรจ กะ ปือมือซัด นะ กู กาเญา โปด นะ ดูโดะ กือฌะ-กือมัซ เดะ ลาฆู ซายัก นะ กู ซือรูปา บือกะ นู กู บูวัจ ตูโรจ กะ ปือมือซัด นะ อาโปก กะฆีเตอ กู ดูโดะ กือฌะ-กือมัซ เดะ ลาฆู ซายัก นะ อาโปก เลอ. 11 "ลาฆู กะฆีเตอ ซีงี กู บือเลฮ มือญาเระ กะ กาเญา ดัฮ บีดา ลาฆู ซูกา-ฮาตี นะ กู นะ ดูโดะ เดะ ฮาตี นะ กาเญา บรี ลาฆู ซูกา-ฮาตี นะ กาเญา นะ ปือนอฮ มีเม เลอ. 12 นี เลอ ฌาดี ปือมือซัด นะ กู ฌาดี-จะ กู บือเลฮ ซายัก กะ กาเญา กะฮามี ดัฮ บรี กาเญา ซายัก บือซามา-ซามา ซือรูปา กะฆีเตอ ฌูฆา เลอ. 13 ฮอย ซือมียา ดีฮา นะ บือเลฮ ซายัก บาญะ ลือเบฮ เดะ อีนี นู ซือมียา ซืออูรัก นะ ซรัฮ ญาวา นะ ญา บีดา ซาบัจ นะ ญา. 14 ดัฮ กาเญา บูวัจ ตูโรจ กะ ลาฆู นู กู ปือซัด กะ กาเญา เตอ กาเญา โปด นะ ฌาดี ซาบัจ นะ กู เลอ. 15 กู เตด บลาโลก กาเญา จะ ฌาดี ปราโซฮ ลาฆี ซาเบะ-จะ ปราโซฮ เตด ตาฮู จะ ตกเก นะ ญา บูวัจ กะฮามี. ตาปี กู บลาโลก กาเญา จะ ฌาดี ซาบัจ เลอ กรานา-จะ ราตา ลาฆู นู กู ดืองัยํ ดาตัก เดะ อาโปก นะ กู กู บือเลฮ ปลีฮัจ บรี กะ กาเญา ปูลัก ดัฮ. 16 กาเญา เตด บือเลฮ ปีเลฮ กู ตาปี กู นี เลอ บือเลฮ ปีเลฮ กาเญา ตืองะ กาเญา ดัฮ บีดา กาเญา นะ บือบูวัฮ ลือบัจ บีดา บูวัฮ อีตู นะ อาดา ดูโดะ กือฌะ เลอ. กะฆีเตอ ดัฮ กาเญา มีตา ลาฆู นามา เดะ อาโปก เดะ นามา นะ กู อาโปก นะ อาเกะ ลาฆู อีตู บรี กะ กาเญา เลอ. 17 ลาฆู กะฆีนี กู ปือซัด บรี กะ กาเญา จะ บรี กาเญา ซายัก บือซามา-ซามา เลอ." 18 "ดัฮ ซือมียา โซะ ดือนียา อีนี บือชี กะ กาเญา กือนา ตาฮู ดัฮ จะ กูญา บือเลฮ บือชี กะ กู ดูลู ดัฮ. 19 อาดู จะ กาเญา ฌาดี ซือมียา นะ ดือนียา อีนี โกะ ซือมียา โซะ ดือนียา โปด นะ ซายัก กาเญา นู ฌาดี นะ ดือนียา. ตาปี กาเญา เตด ฌาดี ซือมียา นะ ดือนียา อีนี ซาเบะ กู นี เลอ บือเลฮ ปีเลฮ กาเญา บรี ตรือเบะ เดะ ดือนียา. กรานา กะฆีเตอ โกะ ซือมียา โซะ ดือนียา นะ บือชี กะ กาเญา. 20 กือนา บรีงัจ กะ ปือมือเลา นู กู บือเลฮ มือเลา ฌางัน กาเญา ดัฮ จะ 'ปราโซฮ เตด บือซัยํ ลือเบฮ เดะ ตกเก.' นู กูญา ปรือกัด กู ดัฮ กูญา นะ ปรือกัด กาเญา โปด ฌูฆา. อาดู กูญา บูวัจ ตูโรจ กะ ปือมือเลา นะ กู ดัฮ กูญา นะ บูวัจ ตูโรจ กะ ปือมือเลา นะ กาเญา ฌูฆา เลอ. 21 ตาปี ลาฆู อีตู ซือมูฮา กูญา นะ บูวัจ กะ ลูมอฮ กาเญา เตอ กรานา นามา นะ กู เลอ. กูญา นะ บูวัจ กะฆีเตอ ซาเบะ กูญา เตด กราลา ตูฮัด นู ซูโรฮ กู มาแรฮ. 22 ดัฮ กู เตด บือเลฮ มาแรฮ อาฌัยํ กูญา กูญา โปด ฮอย ซาลัฮ เดะ ลาฆู ดูซา ดัฮ. ตาปี วะตู อีนี เลอ กูญา ฮอย ตือปัจ นู นะ บือปูลัซ เดะ ลาฆู ดูซา นะ กูญา ดัฮ เลอ. 23 ซือมียา ดีฮา นู บือชี กะ กู ญา เตอ บือชี กะ อาโปก เดะ กู ฌูฆา เลอ. 24 ดัฮ-จะ กู เตด บือเลฮ บูวัจ ลาฆู มือฆัฮ เดะ ตืองัฮ ลูมอฮ กูญา นู ฮอย ซือมียา อาซิก ดือละ บูวัจ เตอ ลูมอฮ กูญา โปด นะ ฮอย เตด ซาลัฮ เดะ ลาฆู ดูซา. ตาปี วะตู อีนี กูญา บือเลฮ ลีฮัจ ลาฆู อีตู ดัฮ บือเลฮ บือชี กะ กู ฌางัน อาโปก เดะ กู ฌูฆา เลอ. 25 ตาปี ฆาโดฮ ฌาดี กะฆีเตอ บีดา ปือมือเลา นู ฆาแรฮ ดัฮ เดะ ซูรัจ ฮูโกบ นะ กูญา นะ ซุจ รือมัก ดัฮ นู จะ 'ฮอย ปาซัน นามา เลอ ตาปี กูญา บือเลฮ บือชี กะ กู ดัฮ.' 26 "ตาปี ซือมียา มือนูโลก อีตู นะ มาแรฮ ดัฮ ฌาดี-จะ ซือมืองัจ นู ปลีฮัจ ลาฆู นู ซูโงฮ นู มาแรฮ ดาตัก เดะ อาโปก เดะ อาตัซ. กู นะ ซูโรฮ ญา มาแรฮ ดาตัก เดะ อาโปก กะฆีเตอ ญา เตอ เลอ นะ ฌาดี ซะซี ปาซัน ลาฆู นะ กู. 27 กาเญา โปด นะ ฌาดี ซะซี ปาซัน ลาฆู นะ กู ฌูฆา เตอ ซาเบะ-จะ กาเญา บือเลฮ ดูโดะ ฌางัน กู ตะเดะ ลามูลา ดัฮ เลอ." เยซู ญา จะ.
1 เยซู มือเลา ปูลัก จะ "ลาฆู กะฆีเตอ กู บือเลฮ มือญาเระ กะ กาเญา ดัฮ บีดา ตีเมา บรี กาเญา ตืออูโนยํ. 2 กูญา นะ โปรฮ กาเญา ปี บูวัก เดะ รูมัฮ บือมุน. โงฮ-ซูโงฮ อาดา ซืออารี ราตา ซือมียา นู บูนอฮ กาเญา กูญา นะ บรีงัจ จะ นู กูญา บูวัจ ลาฆู อีตู ฌาดี ลาฆู บูวัจ ตูโรจ กะ ตูฮัด เดะ อาตัซ เลอ. 3 กูญา นะ บูวัจ กะฆีเตอ ฌางัน กาเญา กรานา-จะ กูญา เตด กราลา อาโปก เดะ อาตัซ เตด กราลา กู ฌูฆา เลอ. 4 ตาปี กู บือเลฮ มือญาเระ ลาฆู อีตู บรี กะ กาเญา ดืองัยํ บีดา-จะ รอจ วะตู อีตู กาเญา นะ บือเลฮ บรีงัจ กะ ลาฆู นู กู มือญาเระ กะ กาเญา ดัฮ." "กู เตด บือเลฮ มือญาเระ ลาฆู อีตู กะ กาเญา ตะเดะ ลามูลา ซาเบะ-จะ กู อาดา ดูโดะ ฌางัน กาเญา. 5 ตาปี วะตู อีนี กู ตืองัฮ นะ ปี มียา ตูฮัด นู ซูโรฮ กู มาแรฮ ตาปี ฮอย ซาปา เดะ ลูมอฮ กาเญา ตาญา กู จะ 'เกา ปี กะ ดีฮา เลอ?' 6 กรานา กู บือเลฮ มือญาเระ ลาฆู อีตู กะ ลูมอฮ กาเญา ดัฮ กะฆีเตอ กาเญา ซูซัฮ-ฮาตี ปือนอฮ ดัฮ เลอ. 7 กะฮามี โปด บาฌิ กู มือญาเระ ลาฆู นู ซูโงฮ กะ กาเญา จะ นู กู นะ ปี เตอ บีดา กาเญา นะ บือเลฮ อูโตก. ซาเบะ-จะ ดัฮ กู เตด ปี ซือมียา มือนูโลก อีตู เตอ นะ เตด มาแรฮ กะ กาเญา. ตาปี ดัฮ กู ปี เตอ กู นะ ซูโรฮ ญา มาแรฮ กะ กาเญา เลอ. 8 ตานา ญา มาแรฮ ดัฮ ญา นะ บรี โกะ ซือมียา เดะ ดือนียา ลีฮัจ ซัฮ จะ นู กูญา อีงัจ ซาลัฮ ปาซัน ลาฆู ดูซา ปาซัน ลาฆู นู บาฌิ-ตือปัจ ปาซัน ลาฆู นู ตูฮัด นะ กรัจ ฮูโกบ ฌูฆา เตอ. 9 กูญา อีงัจ ซาลัฮ ปาซัน ลาฆู ดูซา อีตู ซาเบะ-จะ กูญา เตด ปือจายา กะ กู เลอ. 10 กูญา อีงัจ ซาลัฮ ปาซัน ลาฆู นู บาฌิ-ตือปัจ กรานา-จะ กู ปี กะ อาโปก กาเญา นะ เตด บือเลฮ ลีฮัจ กู ปูลัก. 11 กูญา อีงัจ ซาลัฮ ปาซัน ลาฆู นู ตูฮัด นะ กรัจ ฮูโกบ ซาเบะ-จะ กือปาลา ฮาตู ซีตัด นู ฌาดี ราฌา เดะ ดือนียา อีนี เตอ ญา กือนา กรัจ ฮูโกบ ดัฮ. 12 "กู อาดา บาญะ ลาฆู ลาฆี นู นะ มือญาเระ กะ กาเญา ตาปี วะตู อีนี กาเญา นะ ซาโมจ อาเมด เตด บือเลฮ เลอ. 13 ตาปี ตานา ซือมืองัจ อีตู นู ปลีฮัจ ลาฆู นู ซูโงฮ นะ มาแรฮ ดัฮ ญา นะ บาวา กาเญา ปี มาโซะ กะ ลาฆู นู ซูโงฮ ซือมูฮา. กรานา-จะ ญา นะ เตด มือเลา ตูโรจ กะ ฮาตี นะ ญา ตะอาซิก ตาปี ญา ดืองัยํ ลาฆู นามา ดัฮ ญา นะ มือเลา กะฆีเตอ เลอ. ซือมืองัจ อีตู นะ มือญาเระ บรี กะ กาเญา ตาฮู เดะ ลาฆู นู นะ บือฌาดี เตอ. 14 ญา นะ บรี ลีฮัจ ลาฆู บือซรี บือซายา นะ กู กรานา-จะ ญา นะ อาเมด ลาฆู นะ กู มาแรฮ มือญาเระ บรี กะ กาเญา. 15 ลาฆู ซือมูฮา นู อาโปก เดะ อาตัซ อาดา เตอ ฌาดี นะ กู. ซาเบะ กะฆีเตอ กู มือเลา จะ ซือมืองัจ นู อีตู ญา นะ อาเมด ลาฆู นะ กู มาแรฮ มือญาเระ บรี กะ กาเญา เลอ." 16 เยซู มือเลา ลาฆี จะ "เตด บราปา ลามา อีนี กาเญา นะ ลีฮัจ กู เตด บือฆารี ลาฆี. เตด ลามา ปูลัก กาเญา นะ ลีฮัจ บือฆารี กู ปูลัก เลอ." 17 ซาเบะ กะฆีเตอ โกะ มูเระ นะ เยซู ซือตืองัฮ มือเลา ซามา กูญา จะ "ลาฆู อีนี ฌาดี ลาฆู กะฮามี เลอ นู ญา มือเลา ฌางัน กีตา จะ 'เตด บราปา ลามา อีนี กาเญา นะ ลีฮัจ กู เตด บือฆารี ดัฮ. เตด ลามา ปูลัก กาเญา นะ ลีฮัจ บือฆารี กู ปูลัก เลอ.'? ญา มือเลา ฌูฆา จะ 'กรานา กู นะ ปี กะ อาโปก เดะ อาตัซ.' กะฆีเตอ ฌาดี ลาฆู นามา เลอ?" 18 กะฆีเตอ กูญา ปาคัจ มือเลา จะ "นู จะ 'เตด บราปา ลามา เตอ' ฌาดี-จะ ลาฆู นามา? นู เยซู มือเลา กีตา เตด มาโซะ เดะ ฮาตี เลอ." 19 เยซู ญา ตาฮู จะ กูญา นะ ตาญา ญา กะฆีเตอ ญา มือเลา ดูลู จะ "นู กู มือเลา ซีงี จะ 'เตด บราปา ลามา อีนี กาเญา นะ ลีฮัจ กู เตด บือฆารี ดัฮ. เตด ลามา ปูลัก กาเญา นะ ลีฮัจ บือฆารี กู ปูลัก เลอ.' ลาฆู อีนี บูกัด เฆอ นู กาเญา อาดา บือตาญา-ตาญา ซามา กาเญา? 20 กู มือญาเระ กะ กาเญา ลาฆู นู ซูโงฮ จะ โซะ กาเญา นะ มือนาแงฮ บือปาโตด ตาปี ซือมียา โซะ ดือนียา อีนี นะ ซูกา-ฮาตี. โซะ กาเญา นะ ซูซัฮ-ฮาตี ตาปี ลาฆู ซูซัฮ-ฮาตี นะ กาเญา นะ กาเลฮ บรี ฌาดี ลาฆู ซูกา-ฮาตี เลอ. 21 ตานา นีบีนี นะ ดูโดะ เดะ อาปี เตอ ญา นะ อาดา ลาฆู ซูซัฮ โตระ ซาเบะ รอจ วะตู ซาเกะ ดูโดะ เดะ อาปี ดัฮ เลอ. ตาปี ตานา ดูโดะ เดะ อาปี ดัฮ ญา เตด บรีงัจ กะ ลาฆู นู ซาเกะ อีตู เลอ ซาเบะ ญา ซูกา-ฮาตี นู นานะ ซืออูรัก บือเลฮ บือฌาดี เดะ ดือนียา อีนี ดัฮ. 22 กะฆีเตอ ฌูฆา กาเญา โปด เดะ วะตู อีนี กาเญา ซูซัฮ-ฮาตี เลอ. ตาปี กู นะ มาแรฮ ลีฮัจ กาเญา ปูลัก กะฆีเตอ กาเญา นะ ซูกา-ฮาตี ปือนอฮ. ฮอย ซาปา นะ ราปัซ อาเมด ลาฆู ซูกา-ฮาตี เดะ กาเญา บือเลฮ เลอ. 23 "เดะ อารี อีตู เตอ กาเญา นะ เตด ตาญา กู ปูลัก ดัฮ. กู มือญาเระ กะ กาเญา ลาฆู นู ซูโงฮ จะ ดัฮ กาเญา นะ มีตา ลาฆู นามา เดะ อาโปก เตอ ญา นะ บรี ลาฆู อีตู กะ กาเญา เดะ นามา นะ กู เลอ. 24 รอจ กะ วะตู อีนี กาเญา เตด บือเลฮ มีตา ซือบารัก นามา เดะ นามา นะ กู. กือนา มีตา เลอ บารู นะ บือเลฮ บีดา กาเญา นะ ซูกา-ฮาตี ปือนอฮ มีเม." 25 "ลาฆู กะฆีเตอ กู บือเลฮ มือเลา ฌางัน กาเญา ฌาดี ปือมือเลา กียัซ. ตาปี-จะ อาดา ซืออารี กู นะ เตด มือเลา ปือมือเลา กียัซ ปูลัก ดัฮ ตาปี นะ มือญาเระ กะ กาเญา บรี ซัฮ ปาซัน ลาฆู นะ อาโปก เดะ กู. 26 เดะ อารี อีตู ลูมอฮ กาเญา นะ มีตา เดะ นามา นะ กู. กู นะ เตด มือญาเระ กะ กาเญา จะ กู นะ ปูโฌะ อาโปก บีดา กาเญา. 27 ซาเบะ อาโปก ตะอาซิก โปด ญา ซายัก กะ กาเญา กรานา-จะ กาเญา ซายัก กะ กู ดัฮ ปือจายา ดัฮ จะ กู มาแรฮ ดาตัก เดะ ตูฮัด เดะ อาตัซ เตอ. 28 กู มาแรฮ ดาตัก เดะ อาโปก มาโซะ กะ ดาลับ ดือนียา ดัฮ. กู นะ ตีงัน ดือนียา อีนี นะ ปี รอจ กะ อาโปก ปูลัก เลอ." เยซู ญา จะ. 29 โกะ มูเระ นะ เยซู มือเลา จะ "นี เลอ วะตู อีนี เกา มือเลา ซัฮ ดัฮ เตด บือเลฮ มือเลา ฌาดี ปือมือเลา กียัซ. 30 วะตู อีนี เลอ ลูมอฮ กามี อีนี ตาฮู ซูโงฮ ดัฮ จะ เกา ตาฮู ลาฆู ซือมูฮา เตด ฆาโดฮ นะ อาดา ซือมียา ดีฮา ตาญา เกา ปูลัก. ซาเบะ กะฆีเตอ เลอ กามี ตาฮู จะ เกา มาแรฮ ดาตัก เดะ ตูฮัด เดะ อาตัซ เลอ." 31 เยซู ญา ตีกัฮ กะ กูญา จะ "วะตู อีนี กาเญา ปือจายา ดัฮ เฆอ? 32 ลีฮัจ เลอ อาดา ซา วะตู นู นะ มาแรฮ โงฮ-ซูโงฮ ญา มาแรฮ รอจ ดัฮ เลอ นู กาเญา นะ กือนา ปือจัฮ-บือลัฮ ปี กะ ตือปัจ ดูโดะ นะ กาเญา ซิกมาซิก นะ ตีงัน บือบียัยํ ซา กู. ตาปี กู เตด ดูโดะ ซา กู ซาเบะ-จะ อาโปก ญา อาดา ดูโดะ บือซามา ฌางัน กู เลอ. 33 ลาฆู กะฆีนี กู มือญาเระ กะ กาเญา ดัฮ บีดา กาเญา นะ อาดา ซือนัง ซือลามัจ ลือกัจ บือซามา ฌางัน กู. เดะ ดือนียา อีนี กาเญา นะ อาดา ลาฆู ซูซัฮ ปายัฮ. ตาปี กือนา ซูกา-ฮาตี เลอ ซาเบะ-จะ กู ฌือนัฮ เดะ ดือนียา ดัฮ."
1 ตานา เยซู มือเลา กะฆีเตอ ดัฮ ญา ลางอฮ ปาลา ลีฮัจ กะ ลาแงะ มือเลา จะ "อาโปก เออ รอจ วะตู ดัฮ. มีตา เดะ อาโปก บรี เกา อาเกะ นานะ นะ เกา บรี บือซรี บือซายา เตอ บีดา นานะ อีตู นะ บือเลฮ บรี ลีฮัจ นู บือซรี บือซายา นะ อาโปก เลอ. 2 กรานา-จะ อาโปก บือเลฮ ซรัฮ บรี กะ นานะ อาดา มือฆัฮ นู นะ ฮูโกบ โกะ อูมัจ-ซือมียา ราตา เตอ บีดา-จะ นานะ นะ บือเลฮ บาวา ลาฆู ฮีโดะ ซูโงฮ นู ซือลาลู มาแรฮ บรี กะ โกะ ซือมียา นู อาโปก บือเลฮ ซรัฮ บรี กะ นานะ เตอ. 3 ลาฆู ฮีโดะ ซูโงฮ นู ซือลาลู ฌาดี กะฆีนี เลอ บรี กูญา กราลา เกา นู ฌาดี ตูฮัด เดะ อาตัซ ตูฮัด นู ซูโงฮ ตูฮัด แนฮ ซา เลอ. บรี กูญา กราลา เยซู คริด นู เกา ซูโรฮ มาแรฮ ดัฮ ฌูฆา. 4 กู บือเลฮ บรี กะ โกะ ซือมียา เดะ ดือนียา ลีฮัจ นู บือซรี บือซายา นะ อาโปก ซาเบะ-จะ ลาฆู บือกรือฌา นู อาโปก บือเลฮ อาเกะ บรี กะ กู บูวัจ เตอ ลาฆู อีตู กู บือเลฮ บูวัจ ซุจ ฮาบิฮ ดัฮ เลอ. 5 อาโปก เออ วะตู อีนี มีตา เดะ อาโปก บรี อาเกะ กู บรี อาดา ลาฆู บือซรี บือซายา โซะ ฮึลด มูคา นะ เกา บือกะ ซือรูปา กะ ลาฆู บือซรี บือซายา อีตู นู กู อาดา บือซามา ฌางัน เกา ดูลู เดะ ดือนียา อีนี นะ บือฌาดี ดัฮ. 6 "โกะ ซือมียา อีตู นู เกา บือเลฮ บรี กะ กู ดัฮ ดาตัก เดะ โกะ อูมัจ-ซือมียา เดะ ดือนียา เตอ กู บือเลฮ บรี กะ กูญา ตาฮู ปาซัน ลาฆู นะ อาโปก ดัฮ. โกะ ซือมียา อีตู กูญา ฌาดี นะ เกา เตอ. เกา อาเกะ กูญา บรี กะ กู ดัฮ. กูญา บือเลฮ บูวัจ ตูโรจ กะ ปือมือเลา นะ อาโปก ดัฮ เลอ. 7 วะตู อีนี กูญา ตาฮู ดัฮ จะ ลาฆู ซือมูฮา นู อาโปก บรี กะ กู ดัฮ มาแรฮ ดาตัก เดะ อาโปก ซูโงฮ เลอ. 8 ซาเบะ-จะ โกะ ปือมือเลา อีตู นู อาโปก บือเลฮ บรี กะ กู เตอ กู บือเลฮ บรี กะ กูญา ดัฮ. ปือมือเลา อีตู กูญา บือเลฮ ซาโมจ ดัฮ เลอ. กะฆีเตอ กูญา โปด ตาฮู ซูโงฮ ดัฮ จะ กู มาแรฮ ดาตัก เดะ อาโปก เลอ. กูญา ปือจายา ดัฮ จะ อาโปก เกา เลอ นู บือเลฮ ซูโรฮ กู มาแรฮ. 9 "กู บือซาโวจ บีดา กูญา เลอ. กู เตด บือซาโวจ บีดา โกะ ซือมียา เดะ ดือนียา ตาปี บีดา โกะ ซือมียา นู อาโปก บือเลฮ อาเกะ บรี กะ กู ดัฮ ซาเบะ กูญา ฌาดี นะ อาโปก เลอ. 10 ราตา ซือมียา นู ฌาดี นะ กู เตอ ฌาดี นะ อาโปก ฌูฆา เลอ. ราตา ซือมียา นู ฌาดี นะ อาโปก ฌาดี นะ กู ฌูฆา เลอ. กูญา โปด บรี ลีฮัจ จะ กู บือซรี บือซายา เลอ. 11 วะตู อีนี กู เตด ดูโดะ เดะ ดือนียา อีนี ลาฆี ดัฮ ตาปี กูญา อาดา ดูโดะ เดะ ดือนียา อีนี เลอ. กู ตืองัฮ นะ ปี รอจ กะ เกา. อาโปก เออ เกา นู บาฌิ บือซรี เลอ มีตา บรี ฌาฆา บือบือลา โกะ ซือมียา นู เกา บือเลฮ อาเกะ บรี กะ กู เตอ. มีตา บรี ฌาฆา กูญา ฌางัน ลาฆู มือฆัฮ เดะ นามา นะ อาโปก เลอ บีดา กูญา นะ ฌาดี ซา อีตู ซือรูปา บือกะ กามี ฌาดี ซา ฌูฆา เลอ. 12 กาลา กู อาดา ดูโดะ บือซามา ฌางัน กูญา อีตู กู บือเลฮ ฌาฆา บือบือลา กูญา ซือมียา นู อาโปก บือเลฮ อาเกะ บรี กะ กู ดัฮ. กู บือเลฮ ฌาฆา กูญา ฌางัน ลาฆู มือฆัฮ เดะ นามา นะ อาโปก เลอ. ฮอย ซือมียา ซืออูรัก โปด เดะ ลูมอฮ กูญา นู บือนาซา ดัฮ ลือเบฮ ซา ซือมียา อีตู นู ฆาโดฮ บือนาซา ปี บีดา นะ ฌาดี รือมัก บือกะ ซูรัจ ปือมือเลา นะ ตูฮัด เลอ. 13 ตาปี วะตู อีนี กู ตืองัฮ นะ ปี มียา อาโปก กู บือเลฮ มือเลา ปาซัน ลาฆู กะฆีนี โซะ ดือนียา บีดา บรี กูญา นะ ซูกา-ฮาตี ปือนอฮ มีเม ฌางัน ลาฆู ซูกา-ฮาตี นะ กู. 14 กู นี เลอ บือเลฮ ซรัฮ ปือมือเลา นะ อาโปก บรี กะ กูญา ดัฮ. กะฆีเตอ โกะ ซือมียา โซะ ดือนียา อีนี บือเลฮ บือชี กะ กูญา ซาเบะ กูญา บูกัด ซือมียา โซะ ดือนียา ซือรูปา บือกะ กู โปด บูกัด ซือมียา โซะ ดือนียา เลอ. 15 กู เตด มีตา บรี อาโปก อาเมด กูญา บือตรือเบะ เดะ ดือนียา ตาปี บรี ฌาฆา บือบือลา กูญา บรี ลือปัซ เดะ กือปาลา ฮาตู ซีตัด นู ฌาฮัจ. 16 กูญา อีตู บูกัด ซือมียา โซะ ดือนียา ซือรูปา บือกะ กู บูกัด ซือมียา โซะ ดือนียา. 17 มีตา อาเมด กูญา บรี ฌาดี ซือมียา นะ เกา ตูโรจ บือกะ ลาฆู นู ซูโงฮ. ปือมือเลา นะ อาโปก เตอ ฌาดี ลาฆู นู ซูโงฮ เลอ. 18 อาโปก บือเลฮ ซูโรฮ กู มาโซะ มาแรฮ กะ ดือนียา กะฮามี เตอ กู โปด บือเลฮ ซูโรฮ กูญา มาโซะ ปี กะ ดือนียา กะฆีเตอ เลอ. 19 กู ซรัฮ ญาวา นะ กู บรี กะ อาโปก กรานา ลีฮัจ กะ กูญา บีดา กูญา นะ กือนา ซรัฮ บรี กะ อาโปก ตูโรจ กะ ลาฆู นู ซูโงฮ ฌูฆา เลอ. 20 "กู เตด บือซาโวจ บีดา ลูมอฮ อีนี ซา ลูมอฮ เตอ ตาปี บีดา โกะ ซือมียา ซือมูฮา นู นะ ปือจายา กะ กู ซาเบะ ปือมือเลา นะ กูญา. 21 กู มีตา บรี กูญา นะ บือเลฮ ฌาดี ซา อีตู เลอ. ซือรูปา บือกะ อาโปก เกา เลอ อาดา ลือกัจ บือซามา ฌางัน กู กู โปด อาดา ลือกัจ บือซามา ฌางัน เกา บรี กูญา นะ อาดา ลือกัจ บือซามา ฌางัน กีตา ฌาดี ซา อีตู เลอ. กะฆีเตอ โกะ ซือมียา เดะ ดือนียา นะ ปือจายา จะ อาโปก บือเลฮ ซูโรฮ กู มาแรฮ. 22 ลาฆู บือซรี บือซายา นู อาโปก บรี กะ กู ดัฮ กู บือเลฮ บรี กะ กูญา ฌูฆา ดัฮ บีดา กูญา นะ ฌาดี ซา อีตู ซือรูปา บือกะ นู กู ฌางัน อาโปก ฌาดี ซา อีตู เลอ. 23 กู ลือกัจ บือซามา ฌางัน กูญา อาโปก โปด ลือกัจ บือซามา ฌางัน กู บีดา กูญา นะ บือเลฮ ฌาดี ซา อีตู บาฌิ ดัฮ. กะฆีเตอ เลอ โกะ ซือมียา เดะ ดือนียา นะ ตาฮู จะ อาโปก บือเลฮ ซูโรฮ กู มาแรฮ นะ ตาฮู ปูลัก จะ อาโปก ซายัก กะ กูญา อีตู ซือรูปา บือกะ อาโปก ซายัก กะ กู ฌูฆา เลอ. 24 "อาโปก เออ โกะ ซือมียา อีนี นู อาโปก บือเลฮ ซรัฮ บรี กะ กู เตอ กู บือคานะ นะ บรี กูญา ดูโดะ ฌางัน กู เดะ ตือปัจ นู กู ดูโดะ บีดา กูญา นะ บือเลฮ ลีฮัจ ลาฆู บือซรี บือซายา นะ กู นู อาโปก บือเลฮ ซรัฮ บรี กะ กู ดัฮ. ซาเบะ อาโปก เกา บือเลฮ ซายัก กู ดัฮ ดูลู เดะ เกา นะ บือฌาดี ดือนียา เตอ. 25 เออ อาโปก นู บาฌิ-ตือปัจ เลอ โกะ ซือมียา โซะ ดือนียา กูญา เตด กราลา เกา ตาปี กู นี เลอ กราลา เกา. โกะ ซือมียา อีนี โปด กูญา ตาฮู จะ เกา บือเลฮ ซูโรฮ กู มาแรฮ ดัฮ. 26 กู บือเลฮ บูวัจ บรี กูญา ตาฮู ปือนามา นะ เกา นะ บูวัจ บรี กูญา ตาฮู ปูลัก เลอ บีดา กูญา นะ ซายัก บือซามา-ซามา บือกะ ซือรูปา นู เกา บือเลฮ ซายัก กะ กู ดัฮ บีดา กู โปด นะ ลือกัจ บือซามา ฌางัน กูญา." เยซู ญา จะ.
1 ตานา เยซู มือเลา กะฆีเตอ ดัฮ ญา ตรือเบะ ปี ฌางัน โกะ มูเระ นะ ญา มือลากัฮ ซูงัย ปือนามา กิดโรน. ปัจ อีตู อาดา กือโบด ซา กือโบด. เยซู ฌางัน โกะ มูเระ นะ ญา มาโซะ ปี กะ กือโบด อีตู. 2 ยูดา ซือมียา นู นะ ซรัฮ เยซู บรี กือนา รีฆะ เตอ ญา กราลา กือโบด อีตู ฌูฆา ซาเบะ-จะ เยซู ฌางัน โกะ มูเระ นะ ญา ดือละ มาแรฮ บือดาปัจ เดะ ตือปัจ อีตู ซัจๆ. 3 กะฆีเตอ ยูดา ญา บาวา โกะ ลูมอฮ ตาฮัน ซือตืองัฮ ฌางัน โกะ ซือมียา ฌาฆา นู มาแรฮ ดาตัก เดะ ลูมอฮ ซามี ซัยํ-บือซัยํ ฌางัน ลูมอฮ ฟาริซี ปี กะ ตือปัจ อีตู ฌูฆา. กูญา บาวา โกะ ปลีตา โกะ ดามัยํ โกะ ซือนาตา บือปี ซามา. 4 เยซู ญา ตาฮู ลาฆู ซือมูฮา นู นะ ฌาดี ฌางัน ญา ดัฮ กะฆีเตอ ญา ปี ตาญา กูญา จะ "กาเญา มาแรฮ มียา ซาปา เลอ?" 5 กูญา ตีกัฮ จะ "มาแรฮ มียา เยซู ซือมียา ตูโปะ นาซาเรด." เยซู มือเลา ฌางัน กูญา จะ "กู นี เลอ ฌาดี ซือมียา นู อีตู." ยูดา ซือมียา นู ซรัฮ เยซู เตอ อาดา บือดีรี ฌางัน โกะ ซือมียา อีตู ฌูฆา. 6 ตานา เยซู มือเลา ฌางัน กูญา จะ "กู นี เลอ ฌาดี ซือมียา นู อีตู." กูญา โปด อูโนยํ กะ บลากัก รือบัฮ เดะ ตานัฮ. 7 เยซู ตาญา กูญา ปูลัก จะ "กาเญา มาแรฮ มียา ซาปา เลอ?" กูญา ตีกัฮ จะ "มาแรฮ มียา เยซู ซือมียา ตูโปะ นาซาเรด." 8 เยซู ตีกัฮ กะ กูญา จะ "กู บือเลฮ มือญาเระ กะ กาเญา ดัฮ จะ กู ฌาดี ซือมียา นู อีตู เลอ. ดัฮ กาเญา มียา กู กือนา ปลือปัซ โกะ ซือมียา อีนี ปี เลอ." 9 นู เยซู มือเลา กะฆีเตอ บีดา นะ บูวัจ บรี ซุจ รือมัก ดัฮ บือกะ ปือมือเลา นู ญา บือเลฮ มือเลา ดัฮ จะ "เดะ โกะ ซือมียา อีตู นู อาโปก ซรัฮ บรี กะ กู เตอ กู นะ เตด บรี บือนาซา มีเซ-จะ ซืออูรัก โปด." 10 โซะ เปโตร ญา อาดา ปือดัก. กะฆีเตอ ญา ซีตะ ปือดัก บาโฮะ ปราโซฮ ซืออูรัก นะ กือปาลา ซามี กือนา เดะ ตือลีงา โซะ กานัน ยู ปูตุซ ดัฮ. ปราโซฮ อีตู ปือนามา จะ มาละคัด. 11 กะฆีเตอ เยซู มือเลา ฌางัน เปโตร จะ "อาเมด ปือดัก ตาโรฮ บูวัก เลอ. กะฮามี เลอ เจาะ นู อาโปก เดะ กู อาเกะ บรี กะ กู เตอ กู นะ เตด โอะ เฆอ?" 12 โกะ ลูมอฮ ตาฮัน ฌางัน กือปาลา ตาฮัน ฌางัน โกะ ซือมียา ฌาฆา นะ ลูมอฮ ยิว กูญา ปาคัจ ฆรูมง รีฆะ อีกัจ เยซู. 13 กูญา บาวา ญา บือปี มียา อานัด ดูลู ซาเบะ อานัด ญา ฌาดี ปะ มือตูฮา นะ กายาฟัด นู ฌาดี กือปาลา ซามี บือกรือฌา เดะ ตาโฮด อีตู. 14 กายาฟัด ซือมียา อีนี เลอ นู บือเลฮ บือกีรา ฌางัน ลูมอฮ ยิว จะ ฌาดี ลาฆู บาฌิ นู นะ บรี ซือมียา ซืออูรัก มาตี ฆาตี โกะ ซือมียา ซือมูฮา. 15 เปโตร ฌางัน มูเระ นู ซืออูรัก กูญา บือเลฮ ตูโรจ เยซู ปี. มูเระ นู อีตู เตอ ญา บือกราลา ฌางัน กือปาลา ซามี. กะฆีเตอ ญา บือเลฮ มาโซะ ฌางัน เยซู ปี รอจ กะ ลามัน รูมัฮ นะ กือปาลา ซามี อีตู. 16 ตาปี เปโตร ญา บือดีรี เดะ บีดิก ปีตู โซะ ลูวัยํ. กะฆีเตอ มูเระ อีตู นู บือกราลา ฌางัน กือปาลา ซามี ญา ตรือเบะ ปี มือเลา ฌางัน นีบีนี นู ตูงู ปีตู. กะฆีเตอ ญา บาวา เปโตร มาโซะ ปี. 17 นีบีนี ปราโซฮ อีตู นู ตูงู ปีตู เตอ ญา ตาญา เปโตร จะ "เกา ฌาดี มูเระ นะ ซือมียา อีตู ฌูฆา บูกัด เฆอ?" เปโตร ตีกัฮ จะ "เตด โบะ." 18 ลูมอฮ ปราโซฮ ฌางัน ตามาตา นู บือดีรี เดะ ตือปัจ อีตู เตอ กูญา บือเลฮ อาเมด ฮารัก มาแรฮ รูโมด อาปี ดัฮ ซาเบะ อาเงน ญา บือแฌะ เตอ กะฆีเตอ กูญา ปาคัจ บือดียัก เดะ อาปี อีตู. เปโตร โปด อาดา บือดียัก เดะ อาปี ฌางัน กูญา ฌูฆา เลอ. 19 กะฆีเตอ กือปาลา ซามี อีตู ตาญา เยซู ปาซัน โกะ มูเระ นะ ญา ฌางัน ปือมือเลา อาฌัยํ นะ ญา ฌูฆา. 20 เยซู มือเลา ตีกัฮ กะ ญา จะ "กู นี เลอ บือเลฮ มือเลา บรี กะ โกะ ซือมียา เดะ ดือนียา ดืองัยํ ฮอย เตด บูนี. กู ซือมาตา อาฌัยํ เดะ โกะ รูมัฮ บือมุน เดะ โซะ รูมัฮ มือญือมัฮ ตูฮัด ฌูฆา ตือปัจ นู ลูมอฮ ยิว ซือมูฮา ลาดัจ บือมุน บือซามา. กู เตด บือเลฮ มือเลา ซือปาตัฮ นามา เดะ ตือปัจ นู บูนี เลอ. 21 เกา ตาญา กู บูวัจ นามา? กือนา ปี ตาญา โกะ ซือมียา นู บือเลฮ ดืองัยํ นู กู มือเลา ดัฮ เตอ จะ กู บือเลฮ มือเลา นามา ฌางัน กูญา. กูญา โปด นะ ตาฮู จะ กู บือเลฮ อาฌัยํ นามา." 22 ตานา เยซู มือเลา กะฆีเตอ ดัฮ ซือมียา ฌาฆา ซืออูรัก นู บือดีรี โตะ อีตู ญา ตาปัยํ ปีปี นะ ญา มือเลา จะ "เกา ตีกัฮ กะฆีเตอ เฆอ กะ กือปาลา ซามี?" 23 เยซู ตีกัฮ กะ ญา จะ "ดัฮ กู มือเลา ซาลัฮ กือนา ฌาดี ซะซี ปาซัน ลาฆู ซาลัฮ อีตู เตอ. ตาปี ดัฮ กู มือเลา กือนา เกา ตาปัยํ กู บูวัจ นามา เลอ?" 24 กะฆีเตอ อานัด ซูโรฮ บาวา เยซู นู อาดา อีกัจ เดะ ตางัน ดัฮ เตอ ปี มียา กายาฟัด ซือมียา นู ฌาดี กือปาลา ซามี. 25 วะตู อีตู เปโตร ญา ตืองัฮ บือดีรี บือดียัก เดะ อาปี เตอ. โกะ ซือมียา อีตู ตาญา ญา จะ "เกา ฌูฆา เลอ ฌาดี มูเระ นะ ซือมียา อีตู บูกัด เฆอ?" เปโตร ญา มือเลา กีปัซ จะ "ฮอย เตด โบะ." 26 อาดา ปราโซฮ ซืออูรัก นะ กือปาลา ซามี นู ฌาดี นะบรานะ นะ ซือมียา นู เปโตร บาโฮะ ตือลีงา ปูตุซ เตอ ญา ตาญา จะ "กู บือเลฮ ลีฮัจ เกา ฌางัน ซือมียา อีตู เดะ กือโบด บูกัด เฆอ?" 27 เปโตร ญา มือเลา กีปัซ ซือกาลี ปูลัก. ดัดดัด อีตู ฮายับ โปด มูเกาะ. 28 วะตู มูกัยํ กูญา บาวา เยซู ตรือเบะ ปี เดะ รูมัฮ นะ กายาฟัด บือปี กะ บาลัย นะ ฮูลู-บาลัก นะ ราฌา. ลูมอฮ ยิว ตะอาซิก โปด เตด บือเลฮ มาโซะ ปี กะ ดาลับ บาลัย อีตู เตอ บีดา กูญา นะ เตด ฌาดี ตะอารัฮ ตาปี นะ บือเลฮ มากัด ลาฆู บรามัย ลือปัซ ปี เลอ. 29 กะฆีเตอ ปีลาด ญา ตรือเบะ มาแรฮ ตาญา กูญา อีตู จะ "ลูมอฮ กาเญา อาดา ปาซัน นามา นะ อาดู ซือมียา อีนี เลอ?" 30 กูญา ตีกัฮ กะ ญา จะ "ดัฮ ญา เตด ฌาดี อูรัก ฌาฮัจ เตอ กามี โปด เตด รีฆะ ญา บาวา มาแรฮ อาตัจ บรี กะ เกา เลอ." 31 กะฆีเตอ ปีลาด มือเลา กะ กูญา จะ "กาเญา ตะอาซิก กือนา อาเมด ซือมียา อีนี บือปี บือดะวา เลอ ตูโรจ ฮูโกบ นะ กาเญา." ลูมอฮ ยิว ตีกัฮ จะ "ราฌา เตด บรี กะ ลูมอฮ กามี นะ บูนอฮ ซือมียา ดีฮา ซืออูรัก โปด." 32 นู ฌาดี กะฆีนี บีดา บรี ฌาดี ซูโงฮ ตูโรจ บือกะ ปือมือเลา นะ เยซู นู ญา บือเลฮ มือเลา ตูโดฮ ดัฮ จะ ญา นะ มาตี กะฮามี. 33 ปีลาด ญา มาโซะ ปี กะ รูมัฮ นะ ญา ปูลัก บลาโลก เยซู มาแรฮ ตาญา จะ "เกา นี ฌาดี ราฌา นะ ลูมอฮ ยิว เฆอ?" 34 เยซู ตีกัฮ ปาเระ จะ "เกา ตาญา กะฆีเตอ ตูโรจ กะ ฮาตี นะ เกา ตะอาซิก เฆอ? เฆอ-จะ อาดา ซือมียา อาซิก บือเลฮ มือญาเระ กะ เกา ปาซัน ลาฆู นะ กู?" 35 ปีลาด ตาญา จะ "กู นี ฌาดี อูรัก ยิว เฆอ? โกะ ซือมียา ลูมอฮ นะ เกา ตะอาซิก ฌางัน ลูมอฮ ซามี ซัยํ-บือซัยํ กูญา เลอ บือเลฮ รีฆะ เกา อาตัจ บรี กะ กู. เกา บูวัจ ซาลัฮ นามา ดัฮ เลอ?" 36 เยซู ตีกัฮ จะ "กู บูกัด ฌาดี ราฌา บือกะ ซือรูปา โกะ ราฌา เดะ ดือนียา อีนี. ดัฮ กู ฌาดี ราฌา บือกะ เดะ ดือนียา อีนี เตอ โกะ ซือมียา นะ กู โปด นะ บือเลฮ บลาวัด ตีเมา บรี กู กือนา รีฆะ อาตัจ บรี กะ โกะ กือปาลา ลูมอฮ ยิว. ตาปี นู กู ฌาดี ราฌา บูกัด ซือรูปา กะฆีเตอ เลอ. " 37 ปีลาด มือเลา ฌางัน เยซู จะ "กะฆีเตอ เกา ฌาดี ราฌา ซูโงฮ เฆอ?" เยซู ตีกัฮ จะ "เกา เลอ นู มือเลา จะ กู ฌาดี ราฌา. โซะ กู เตอ ซาเบะ ลาฆู กะฆีนี กู บือเลฮ บือฌาดี มาโซะ มาแรฮ กะ ดือนียา อีนี จะ บีดา กู นะ ฌาดี ซะซี ปาซัน ลาฆู นู ซูโงฮ. ซือมียา ซือมูฮา นู ตูโรจ บือกะ ลาฆู นู ซูโงฮ กูญา นะ มือนีงัย กะ ซูวารา นะ กู เลอ." 38 ปีลาด ญา ตาญา เยซู จะ "ลาฆู นู ซูโงฮ ฌาดี กะฮามี เลอ?" ตานา ญา ตาญา กะฆีเตอ ดัฮ ปีลาด โปด ญา ตรือเบะ ปี มียา ลูมอฮ ยิว ปูลัก มือญาเระ กะ กูญา จะ "โบะ กู ลีฮัจ จะ ญา ฮอย ซาลัฮ นามา เลอ. 39 ตาปี ลูมอฮ กาเญา อาดา ฮาดัจ นะ บรี กู ปลือปัซ ซือมียา ซืออูรัก บรี กะ กาเญา เดะ วะตู อารี บรามัย ลือปัซ ปี. กาเญา บือคานะ นะ บรี กู ปลือปัซ ราฌา นะ ลูมอฮ ยิว บรี กะ กาเญา เฆอ?" 40 โกะ ซือมียา ซือมูฮา ปาคัจ บือซูระ จะ "ฌางัน ปลือปัซ ซือมียา อีนี. กือนา ปลือปัซ บาระบา เลอ." โซะ บาระบา เตอ ญา ฌาดี อูรัก ปือญามุน เลอ.
1 กะฆีเตอ ปีลาด อาตัจ เยซู บรี กะ ตาฮัน รือเปะ. 2 โกะ ตาฮัน โปด อาเมด อากัยํ บือดูรี มาแรฮ อาญัม บือกะ ฌาดี จูบุก บอฮ เดะ ปาลา นะ เยซู. กูญา อาเมด กาเยด ซรือโกะ ญาวา ซี แนบปริง ปากัย บรี กะ ญา. 3 กูญา มาแรฮ ซัจๆ ตาปัยํ มูคา นะ เยซู มือเลา ฌางัน ญา จะ "ซือลามัจ เลอ เกา นู ราฌา นะ ลูมอฮ ยิว." 4 ปีลาด ญา ตรือเบะ ปี ปูลัก มือเลา ฌางัน โกะ ซือมียา บาญะ จะ "ลีฮัจ เลอ กู บาวา ซือมียา อีนี มาแรฮ อาตัจ บรี กะ กาเญา ดัฮ บีดา นะ บรี กาเญา ตาฮู จะ กู เตด ลีฮัจ จะ ญา อาดา ลาฆู ซาลัฮ นามา เลอ." 5 กะฆีเตอ เยซู ญา ตรือเบะ มาแรฮ อาดา จูบุก เดะ ปาลา นู บูวัจ ฌางัน อากัยํ บือดูรี ญา ปือแญะ บาฌู ซี แนบปริง ฌูฆา. ปีลาด มือเลา ฌางัน กูญา จะ "ลีฮัจ เลอ ซือมียา อีนี." 6 ตานา ลูมอฮ ซามี ซัยํ-บือซัยํ ฌางัน โกะ ตามาตา ลีฮัจ เยซู กูญา ซือมูฮา บือซูระ จะ "อาเมด บือปี กาจิก เดะ กายู ปลีตัก. อาเมด บือปี กาจิก เลอ." ปีลาด มือเลา ฌางัน กูญา จะ "กาเญา เลอ อาเมด ปี กาจิก ตะอาซิก ซาเบะ โซะ กู เตอ กู ลีฮัจ จะ ญา ฮอย ซาลัฮ นามา เลอ." 7 ลูมอฮ ยิว กูญา ตีกัฮ จะ "ลูมอฮ กามี อาดา ปือมือเลา ฮูโกบ นู นะ ตูโรจ กะ ฮูโกบ อีตู เตอ ญา ฆาโดฮ มาตี ซาเบะ-จะ ญา มืองากู ญาวา ตะอาซิก จะ ญา ฌาดี นานะ นะ ตูฮัด บือซัยํ เดะ อาตัซ เลอ." 8 ตานา ปีลาด ญา ดืองัยํ กะฆีเตอ ดัฮ ญา ตาโกจ บาญะ ซือรูโลยํ. 9 ญา มาโซะ ปี กะ ดาลับ บาลัย นะ ราฌา ปูลัก ตาญา เยซู จะ "เกา มาแรฮ ดาตัก ปัจ ดีฮา เลอ?" ตาปี เยซู ญา เตด ตีกัฮ นามา โปด. 10 กะฆีเตอ ปีลาด มือเลา ฌางัน ญา จะ "เกา ตีเมา มือเลา ฌางัน กู เฆอ? เกา เตด ตาฮู เฆอ จะ กู อาดา มือฆัฮ นู นะ ปลือปัซ เกา บือเลฮ อาดา มือฆัฮ นู นะ กาจิก เดะ กายู ปลีตัก โปด บือเลฮ ฌูฆา?" 11 เยซู ญา ตีกัฮ จะ "เกา อาดา มือฆัฮ นู นะ ฮูโกบ กู โปด เตด บือเลฮ ลือเบฮ เดะ ตูฮัด เดะ อาตัซ นะ บรี กะ เกา เตอ. ซาเบะ กะฆีเตอ ซือมียา นู อาตัจ กู บรี กะ เกา โปด ญา อาดา ดูซา บาญะ ลือเบฮ เดะ เกา เลอ." 12 ตะเดะ อีตู ปีลาด มียา จือลัฮ นะ ปลือปัซ เยซู. ตาปี ลูมอฮ ยิว บือซูระ จะ "ดัฮ เกา ปลือปัซ ซือมียา อีนี เตอ เกา เตด ฌาดี ซาบัจ นะ ราฌา ซีซา เลอ. ซือมียา ดีฮา มืองากู ญาวา ตะอาซิก จะ ฌาดี ราฌา ญา เตอ มือเลา บลาวัด ฌางัน ราฌา ซีซา เลอ." 13 ตานา ดืองัยํ กะฆีเตอ ดัฮ ปีลาด ญา บาวา เยซู ตรือเบะ มาแรฮ ญา ดูโดะ เดะ ตือปัจ ดูโดะ บือดะวา นู บลาโลก จะ ลามัน อาปัยํ ฌางัน บาตู นู บาซา ฮีบรู บลาโลก จะ ฆับบาทา. 14 อารี อีตู ฌาดี อารี ซียะ ลาฆู บรามัย ลือปัซ ปี. ฆามะ วะตู ตืองัฮ อารี ดัฮ ปีลาด ญา มือเลา ฌางัน ลูมอฮ ยิว จะ "นี เลอ ราฌา นะ กาเญา." 15 กูญา ปาคัจ บือซูระ จะ "อาเมด ปี เลอ อาเมด ปี เลอ บือปี กาจิก เดะ กายู ปลีตัก เลอ." ปีลาด ตาญา กูญา จะ "นะ บรี กู กาจิก ราฌา นะ กาเญา เดะ กายู ปลีตัก เฆอ?" ลูมอฮ ซามี ซัยํ-บือซัยํ ตีกัฮ จะ "ลือเบฮ เดะ ซีซา เตอ กามี ฮอย ราฌา อาซิก ลาลู ดัฮ เลอ." 16 กะฆีเตอ ปีลาด โปด อาตัจ เยซู บรี กะ กูญา บือปี กาจิก เดะ กายู ปลีตัก. 17 กะฆีเตอ กูญา บาวา เยซู ตรือเบะ ปี. โซะ เยซู ญา ตาโงก กายู ปลีตัก นะ ญา บือปี กะ ตือปัจ นู บลาโลก จะ ตือปัจ ตูลัก กือปาลา นู บาซา ฮีบรู บลาโลก จะ โฆละโฆทา. 18 ตือปัจ อีนี เลอ กูญา กาจิก เยซู เดะ กายู ปลีตัก ฌางัน ซือมียา อาซิก ดูวา อูรัก เดะ กายู โซกซา บาตัก บือลัฮ อีนี ซืออูรัก บือลัฮ อีตู ซืออูรัก อาดา เยซู เดะ ตืองัฮ. 19 ปีลาด ญา ฆาแรฮ เดะ ปาปัด ปือมือเลา กือนา อาดู ซูโรฮ ตาฮัน ปี บอฮ เดะ อาตัซ ฮูโฌก กายู ปลีตัก ฌูฆา. ปือมือเลา อีตู ฆาแรฮ จะ "เยซู ซือมียา ตูโปะ นาซาเรด ราฌา นะ ลูมอฮ ยิว." 20 ปือมือเลา อาดู อีตู เตอ โกะ ลูมอฮ ยิว บาญะ อูรัก บือเลฮ บาจา ดัฮ ซาเบะ-จะ ตือปัจ นู กูญา กาจิก เยซู เดะ กายู ปลีตัก เตอ ดูโดะ ดาปิก นังฆรี เลอ. เดะ ปาปัด อีตู ฆาแรฮ ฌาดี บาซา ลูมอฮ ฮีบรู บาซา ลาติน บาซา กรีก ฌูฆา. 21 กะฆีเตอ ลูมอฮ ซามี ซัยํ-บือซัยํ นะ ลูมอฮ ยิว กูญา มือเลา ฌางัน ปีลาด จะ "ฌางัน นะ ฆาแรฮ จะ 'ราฌา นะ ลูมอฮ ยิว.' เตอ ตาปี กือนา ฆาแรฮ จะ 'ซือมียา อีนี มืองากู จะ ญา ฌาดี ราฌา นะ ลูมอฮ ยิว.'_" 22 ปีลาด ญา ตีกัฮ จะ "ลาฆู นามา นู กู บือเลฮ ฆาแรฮ ดัฮ เตอ กือนา บือบียัยํ เลอ." 23 ตานา ลูมอฮ ตาฮัน กาจิก เยซู เดะ กายู ปลีตัก ดัฮ กูญา โปด อาเมด โกะ กาเยด บาฌู นะ เยซู มาแรฮ ปาฮาฆิ ฌาดี ปัจ บาฮาเฆด บรี กะ ตาฮัน โซกซา บาฮาเฆด. กูญา อาเมด บาฌู ดาลับ นะ เยซู ปูลัก ตาปี บาฌู ดาลับ อีตู ญา ฮอย บือกัซ ฌาเฮะ ตะเดะ อาตัซ ยู รอจ กะ บาวัฮ. 24 ซาเบะ กะฆีเตอ กูญา ปาคัจ บือกีรา จะ "กีตา ฌางัน จูลัด ปาฮาฆิ เลอ. ตาปี บรี กีตา อูซิ ยิบละ นะ บรี ตาฮู จะ ซาปา นะ บือเลฮ." ฌาดี กะฆีนี บีดา นะ บรี รือมัก ฌางัน ซูรัจ ปือมือเลา นะ ตูฮัด นู จะ "กาเยด นะ กู กูญา ปาคัจ ปาฮาฆิ. บาฌู นะ กู กูญา อูซิ ยิบละ เลอ." กะฆีนี เลอ โกะ ตาฮัน บูวัจ ดัฮ. 25 ซือมียา นู บือดีรี ดาปิก กายู ปลีตัก นะ เยซู เตอ อาดา มะ เดะ เยซู ฌางัน มัย เดะ ญา อาดา มารียา บีนี นะ เกลโอปา ฌางัน มารียา ซือมียา ตูโปะ มักดาลา ฌูฆา. 26 ตานา เยซู ลีฮัจ มะ เดะ ญา ฌางัน มูเระ นู ญา ซายัก บือดีรี ดาปิก เตอ เยซู มือเลา ฌางัน มะ เดะ ญา จะ "นีบีนี เออ ลีฮัจ เลอ ซือมียา อีตู ฌาดี นานะ นะ เกา." 27 กะฆีเตอ เยซู ญา มือเลา ฌางัน มูเระ นู อีตู จะ "ลีฮัจ เลอ ญา ฌาดี มะ เดะ เกา." ตะเดะ อีตู มาแรฮ มูเระ นู อีตู บือเลฮ ซาโมจ มะ เดะ เยซู มาแรฮ ดูโดะ เดะ รูมัฮ นะ ญา. 28 ลือปัซ อีตู เยซู ญา ตาฮู จะ ลาฆู ซือมูฮา ซุจ ฮาบิฮ ดัฮ. กะฆีเตอ บีดา นะ บูวัจ บรี ซุจ ตูโรจ บือกะ ซูรัจ ปือมือเลา นะ ตูฮัด เยซู ญา มือเลา จะ "กู ดาฆา อาเย." 29 เดะ ตือปัจ อีตู อาดา มาโกะ บอฮ อาระ อางุน นู มาซับ ตาโรฮ ปือนอฮ. กูญา อาเมด ฆาบุซ จือลุ เดะ อาระ อางุน มาซับ ซือและ เดะ ฮูโฌก ดาฮัด กายู อูโญะ บอฮ เดะ มูโลจ นะ เยซู. 30 ตานา บือเลฮ โอะ อาระ อางุน เยซู ญา มือเลา จะ "ซุจ ฮาบิฮ ดัฮ เลอ." เยซู ตูโนะ ปาลา นะ ญา ฮาบิฮ ญาวา ดัฮ. 31 อารี อีตู ฌาดี อารี บือซียะ ดูลู เดะ อารี บราดู. กะฆีเตอ ลูมอฮ ยิว มีตา เดะ ปีลาด ปาซัน ซือมียา นู กือนา กาจิก จะ มีตา นะ กาเตาะ ตูลัก กากี บรี ปาตัฮ อาเมด บาดัด ปือตูโรด. กูญา ตีเมา บรี บาดัด อีตู ลือกัจ เดะ กายู ปลีตัก เดะ อารี บราดู กรือฌา ซาเบะ-จะ อารี บราดู อีตู ฌาดี อารี บือซัยํ เลอ. 32 กะฆีเตอ ลูมอฮ ตาฮัน กูญา ปี กาเตาะ กากี นะ ซือมียา โซะ กานัน ฌางัน ซือมียา โซะ กีรี นู กือนา กาจิก เดะ กายู ปลีตัก มารือมา ฌางัน เยซู บรี ปาตัฮ. 33 ตาปี ตานา กูญา มาแรฮ รอจ กะ เยซู ลีฮัจ จะ เยซู ญา มาตี ดัฮ กูญา โปด เตด บือเลฮ กาเตาะ กากี นะ ญา. 34 ตาปี ตาฮัน ซืออูรัก อาเมด บูลุซ ตีกับ เดะ รูโซะ ปีงัก นะ เยซู ดัฮ. ดัดดัด อาดา อาเย ฌางัน ดารัฮ มือนีเลฮ เดะ ลียัก อีตู. 35 ซือมียา อีตู นู บือเลฮ ลีฮัจ ลาฆู กะฆีเตอ ญา บือเลฮ มือญาเระ บรี ตาฮู ดัฮ. ปือมือเลา นะ ญา โปด ฌาดี ซูโงฮ. ญา ตาฮู จะ ญา มือเลา ซูโงฮ กะฆีเตอ ญา มือญาเระ บรี ตาฮู กะฆีนี บีดา กาเญา นะ บือเลฮ ปือจายา. 36 ซาเบะ-จะ ลาฆู กะฆีนี เตอ บือฌาดี บีดา ซูรัจ ปือมือเลา นะ ตูฮัด นะ ซุจ ดัฮ นู จะ "ตูลัก นะ ญา แนฮ ซา โปด นะ เตด ปาตัฮ ลาลู." 37 อาดา ซา ตือนอซ ปูลัก เดะ ซูรัจ ปือมือเลา นะ ตูฮัด นู จะ "กูญา นะ ตีญูง ลีฮัจ ซือมียา นู กูญา ตีกับ ดัฮ เตอ." 38 ลือปัซ อีตู โยเซบ ซือมียา ตูโปะ อาริมาเทีย ญา มีตา บาดัด นะ เยซู เดะ ปีลาด. โยเซบ อีตู ญา ฌาดี มูเระ นะ เยซู ตาปี เตด บือเลฮ บรี ซาปา ตาฮู ซาเบะ ญา ตาโกจ เดะ โกะ กือปาลา ลูมอฮ ยิว. กะฆีเตอ ปีลาด โปด ญา บรี โยเซบ อาเมด บาดัด นะ เยซู บือปี. 39 นีโกเดมัด ซือมียา นู ลามูลา ญา ปี มียา เยซู เดะ วะตู มาลับ เตอ ญา ปี ฌูฆา. ญา บาวา มีญะ บาวู นู จะ มดยอบ จาโปยํ ฌางัน อาโลเว บรัจ บือเลฮ ฆามะ ตีฆา-ปูโลฮ กีโล ลือเบฮ บือปี ซามา. 40 กูญา อาเมด บาดัด นะ เยซู บือปี บอฮ มีญะ บาวู อาเมด กาเยด ปูเตฮ บาโลจ ญา ตูโรจ กะ ฮาดัจ ตานัม บาดัด นะ ลูมอฮ ยิว. 41 เดะ ตือปัจ นู กูญา กาจิก เยซู เดะ กายู ปลีตัก เตอ อาดา กือโบด ซา กือโบด. เดะ กือโบด อีตู เตอ อาดา ฆูฮา ตานัม บาดัด นู เตด ดือละ ตานัม บาดัด นะ ซือมียา ดีฮา โปด. 42 ซาเบะ อารี อีตู ฌาดี อารี บือซียะ นะ ลูมอฮ ยิว เตอ กะฆีเตอ กูญา บอฮ บาดัด นะ เยซู ตาโรฮ เดะ ฆูฮา อีตู เลอ กรานา-จะ ฆูฮา อีตู ดูโดะ ดาปิก.
1 เดะ อารี มีงู โซะ มูกัยํ มารียา ซือมียา ตูโปะ มักดาลา ญา ปี รอจ กะ ฆูฮา ตานัม บาดัด. ญา ลีฮัจ บาตู ตูโดก ฆูฮา กือนา บือตรือเบะ ดัฮ. 2 กะฆีเตอ ญา บลารี ปี กะ เปโตร ฌางัน มูเระ ซืออูรัก นู เยซู ซายัก อีตู มือญาเระ กะ กูญา จะ "กูญา อาเมด บาดัด นะ ตูฮัด เยซู ตรือเบะ เดะ ฆูฮา ดัฮ. กามี เตด ตาฮู จะ กูญา อาเมด บือปี บอฮ ปัจ ดีฮา เลอ." 3 กะฆีเตอ เปโตร ญา ตรือเบะ ปี กะ ฆูฮา ฌางัน มูเระ นู อีตู. 4 กูญา ปาคัจ บลารี กือดูวา อูรัก. ตาปี มูเระ นู อีตู ญา บลารี จือปัจ ลาฆี ญา รอจ กะ ฆูฮา ดูลู. 5 ญา ตูโนะ ฌือเงาะ ลีฮัจ อาดา กาเยด ปูเตฮ อีตู งะตืองะ ดัฮ. ตาปี ญา เตด บือเลฮ มาโซะ ปี กะ ดาลับ ฆูฮา. 6 โซะ เปโตร ญา ตูโรจ มาแรฮ เดะ บลากัก. ญา มาโซะ ปี กะ ดาลับ ฆูฮา ญา ลีฮัจ อาดา ซา กาเยด ปูเตฮ อีตู งะตืองะ ดัฮ. 7 นู กาเยด ซีปัย ปาลา นะ เยซู เตด ตืองะ ดาปิก กาเยด ปูเตฮ ตาปี อาดา ปัย-ซีปัย ซา ญา. 8 กะฆีเตอ มูเระ นู มาแรฮ รอจ ดูลู ญา โปด มาโซะ ปี ฌูฆา. ญา บือเลฮ ลีฮัจ บือเลฮ ปือจายา. 9 ซาเบะ-จะ วะตู อีตู กูญา เตด บือเลฮ มาโซะ เดะ ฮาตี กะ ซูรัจ ปือมือเลา นะ ตูฮัด นู ฆาแรฮ ดัฮ จะ ญา ฆาโดฮ ฮีโดะ ปาเระ เดะ มาตี เลอ. 10 กะฆีเตอ มูเระ กือดูวา อูรัก อีตู กูญา บาลิ ปี กะ รูมัฮ นะ กูญา. 11 ตาปี โซะ มารียา ญา อาดา มือนาแงฮ โซะ ลูวัยํ ฆูฮา. วะตู ญา ตืองัฮ มือนาแงฮ เตอ ญา ตูโนะ ฌือเงาะ ลีฮัจ เดะ ดาลับ ฆูฮา. 12 ญา บือฆารี ฮูลู-บาลัก นะ ตูฮัด ดูวา อูรัก ปือแญะ บาฌู ปูเตฮ ดูโดะ โซะ ตือปัจ กือนา บอฮ บาดัด นะ เยซู โซะ ปาลา ซืออูรัก โซะ กากี ซืออูรัก. 13 ฮูลู-บาลัก ดูวา อูรัก อีตู ตาญา มารียา จะ "นีบีนี เออ เกา มือนาแงฮ บูวัจ นามา เลอ?" มารียา ตีกัฮ จะ "ซาเบะ กูญา บือเลฮ อาเมด ตูฮัด นะ กู บือปี ดัฮ. กูญา บือปี บอฮ ตือปัจ ดีฮา กู เตด ตาฮู เลอ." 14 ตานา มารียา มือเลา กะฆีเตอ ดัฮ ญา กรือเลฮ กะ บลากัก ลีฮัจ จะ อาดา เยซู ญา บือดีรี โตะ อีตู. ตาปี ญา เตด ตาฮู จะ ฌาดี เยซู. 15 เยซู ญา ตาญา จะ "นีบีนี เออ เกา มือนาแงฮ บูวัจ นามา เลอ? เกา มาแรฮ มียา ซาปา?" มารียา ญา อาคา จะ ฌาดี ซือมียา ตูงู กือโบด กะฆีเตอ ญา มือเลา ฌางัน เยซู จะ "จา เออ ดัฮ เกา บือเลฮ อาเมด บาดัด นะ เยซู บือปี มีตา บรี มือญาเระ กะ กู จะ เกา บาวา บือปี บอฮ ตือปัจ ดีฮา ดัฮ เลอ บีดา กู นะ ปี อาเมด ญา." 16 เยซู มือเลา ฌางัน ญา จะ "มารียา เออ." มารียา โปด ญา อาเลฮ ญาวา มาแรฮ มือเลา ฌางัน เยซู ปือมือเลา บาซา ฮีบรู จะ "ราโบนี." ฌาดี-จะ " บูมอยํ เออ." 17 เยซู มือเลา ฌางัน ญา ปูลัก จะ "ฌางัน ปือฆัก ตาฮัด ญาวา นะ กู เลอ กรานา-จะ กู เตด บือเลฮ ญาแญะ ปี มียา อาโปก เดะ กู ลาฆี. ตาปี เกา กือนา ปี มียา โกะ นะบรานะ นะ กู มือญาเระ กะ กูญา จะ กู ตืองัฮ นะ ญาแญะ ปี กะ ตูฮัด บือซัยํ เดะ อาตัซ นู ฌาดี อาโปก เดะ กู อาโปก นะ กูญา ฌูฆา ฌาดี ตูฮัด นะ กู ตูฮัด นะ กูญา ฌูฆา เลอ." 18 กะฆีเตอ มารียา ซือมียา ตูโปะ มักดาลา ญา ปี มือญาเระ กะ โกะ มูเระ จะ "กู บือเลฮ ลีฮัจ ตูฮัด เยซู ดัฮ." ญา มือญาเระ ปูลัก จะ เยซู บือเลฮ มือเลา ปือมือเลา นู อีตู ฌางัน ญา. 19 ตานา มาลับ ดัฮ เดะ อารี มีงู อีตู รูวัก นู ลูมอฮ มูเระ ดูโดะ เตอ กาปุซ ปีตู กาจิก ดัฮ ซาเบะ กูญา ตาโกจ โกะ กือปาลา ลูมอฮ ยิว. กะฆีเตอ เยซู โปด ญา มาแรฮ บือดีรี เดะ ตืองัฮ กูญา มือเลา จะ "บรี กาเญา ซือนัง ซือลามัจ เลอ." 20 ตานา มือเลา กะฆีเตอ ดัฮ ญา บรี กะ กูญา ลีฮัจ โกะ ตางัน ฌางัน รูโซะ นะ ญา. ตานา ลูมอฮ มูเระ บือเลฮ ลีฮัจ ตูฮัด เยซู ดัฮ กูญา โปด ซูกา-ฮาตี ซูโงฮ เลอ. 21 กะฆีเตอ เยซู มือเลา ฌางัน กูญา ปูลัก จะ "บรี กาเญา ซือนัง ซือลามัจ เลอ. อาโปก เดะ อาตัซ บือเลฮ ซูโรฮ กู มาแรฮ กะฮามี ดัฮ กู โปด ซูโรฮ กาเญา ปี กะฆีเตอ ฌูฆา เลอ." 22 ตานา เยซู มือเลา กะฆีเตอ ดัฮ ญา บือญาวา รือฆู อาเงน รอจ กะ กูญา มือเลา กะ กูญา จะ "บรี กาเญา ซาโมจ ซือมืองัจ นะ ตูฮัด เลอ. 23 ดัฮ กาเญา นะ อาเกะ ดูซา นะ ซือมียา ดีฮา ลาฆู ดูซา อีตู โปด นะ อาเกะ บรี ดัฮ. ดัฮ กาเญา นะ บรี ลาฆู ดูซา ลือกัจ เดะ ซือมียา ดีฮา ลาฆู ดูซา อีตู โปด นะ อาดา ลือกัจ เดะ ซือมียา อีตู เลอ." 24 โทมัด นู กูญา บลาโลก จะ บือกือมัยํ นู ฌาดี มูเระ ซืออูรัก เดะ ดูวา-บือลัซ อูรัก อีตู เตอ ญา เตด บือเลฮ ดูโดะ ฌางัน ลูมอฮ กูญา วะตู เยซู มาแรฮ. 25 มูเระ นู อาซิกๆ มือญาเระ กะ โทมัด จะ "กามี บือเลฮ ลีฮัจ ตูฮัด เยซู ดัฮ." ตาปี โทมัด ตีกัฮ กะ กูญา จะ "ดัฮ กู เตด ลีฮัจ บือกัซ ซีปากู เดะ ตางัน นะ เยซู เตอ ดัฮ เตด อาเมด ฌารี ตางัน นะ กู ตีเญฮ เดะ บือกัซ ซีปากู อีตู เตอ เตด อาเมด ตางัน นะ กู ตีเญฮ เดะ รูโซะ นะ เยซู ดัฮ กู ฮอย เตด ปือจายา เลอ." 26 ตานา ลือปัซ ซือมีงู ดัฮ โกะ มูเระ นะ เยซู กูญา อาดา ดูโดะ เดะ ดาลับ รูมัฮ อีตู ปูลัก อาดา โทมัด ดูโดะ ซามา กูญา ฌูฆา. ปีตู โปด กูญา บือเลฮ กาปุซ กาจิก ดัฮ เลอ ตาปี เยซู ญา มาแรฮ บือดีรี เดะ ตืองัฮ กูญา มือเลา จะ "บรี กาเญา ซือนัง ซือลามัจ เลอ." 27 กะฆีเตอ ญา มือเลา ฌางัน โทมัด จะ "กือนา อูโญะ ฌารี ตางัน นะ เกา บอฮ ปัจ อีนี ลีฮัจ ตางัน นะ กู เลอ. อูโญะ ตางัน นะ เกา ปูลัก ตีเญฮ เดะ รูโซะ ญาวา นะ กู. ฌางัน นะ ปูตุซ ลาฆู ปือจายา. กือนา ปือจายา เลอ." 28 โทมัด ญา ตีกัฮ กะ เยซู จะ "เกา เลอ นู ฌาดี ตูฮัด นะ กู ฌาดี ตูฮัด บือซัยํ นะ กู." 29 เยซู มือเลา กะ ญา จะ "ซาเบะ เกา บือเลฮ ลีฮัจ กู เตอ เกา ปือจายา ดัฮ เฆอ? ซือนัง ซือลามัจ ซูโงฮ เลอ โกะ ซือมียา นู เตด บือเลฮ ลีฮัจ กู ตาปี ปือจายา." 30 เยซู ญา บูวัจ ปือนานา นู มือฆัฮ บาญะ ฌือแนฮ เดะ ฮึลด มูคา นะ โกะ มูเระ นะ ญา นู เตด บือเลฮ ฆาแรฮ ตาโรฮ เดะ ซูรัจ อีนี. 31 ตาปี ลาฆู กะฆีนี กู ฆาแรฮ ตาโรฮ ดัฮ บีดา กาเญา นะ บือเลฮ ปือจายา จะ เยซู ฌาดี ราฌา นู บรี ซือลามัจ ฌาดี นานะ นะ ตูฮัด เดะ อาตัซ เลอ. กะฆีเตอ ตานา ปือจายา กะ นามา นะ ญา ดัฮ กาเญา นะ บือเลฮ ฮีโดะ ซูโงฮ เลอ.
1 ลือปัซ ลาฆู อีตู เยซู บือเลฮ ปลีฮัจ ปูลัก กะ โกะ มูเระ นะ ญา เดะ ลาโวจ ทิเบรียัด. ฌาดี กะฆีนี เลอ 2 อาดา เปโตร โทมัด นู กูญา บลาโลก จะ บือกือมัยํ นาทานาเอน ซือมียา ตูโปะ คานา โซะ นังฆรี ฆาลิลี ฌางัน นานะ นะ เซเบดี ดูวา บราดี ฌางัน มูเระ นะ เยซู ดูวา อูรัก ลาฆี เตอ กูญา ซือมูฮา ดูโดะ บือซามา. 3 เปโตร มือเลา กะ กูญา จะ "กู นะ ปี รีฆะ อีกัด." โกะ มูเระ นู ซิก-อาซิก โปด กูญา จะ "กามี โปด นะ ปี ซามา เลอ." กะฆีเตอ กูญา ซือมูฮา ปาคัจ ตูโรด กะ ปราฮู ปี มาซามา. ตาปี เดะ มาลับ อีตู กูญา รีฆะ อีกัด เตด บือเลฮ ลาลู เลอ. 4 ตานา จรัฮ ปาฆี เยซู ญา บือดีรี โซะ ปาตัย. ตาปี โกะ มูเระ อีตู กูญา เตด ตาฮู จะ ฌาดี เยซู. 5 เยซู ตาญา กูญา จะ "โอ ดัง กาเญา บือเลฮ อีกัด ดัฮ เฆอ?" กูญา ตีกัฮ จะ "ฮอย เตด บือเลฮ เลอ." 6 เยซู มือเลา ฌางัน กูญา จะ "กือนา ปลือปัซ ปูกัจ โซะ ซือบือลัฮ กานัน ปราฮู เลอ กาเญา นะ บือเลฮ อีกัด." กะฆีเตอ กูญา ปลือปัซ ปูกัจ บือเลฮ อีกัด บาญะ ตือดะ ซีตะ ปูกัจ เตด บียัซ. 7 มูเระ อีตู นู เยซู ซายัก ญา มือญาเระ กะ เปโตร จะ "อีตู เลอ ตูฮัด." ตานา เปโตร ดืองัยํ จะ ฌาดี ตูฮัด ญา โปด อาเมด บาฌู มาแรฮ ปือแญะ ซาเบะ ซา ญาวา เลอ. กะฆีเตอ ญา ตรือโฌด กะ ลาโวจ. 8 ตาปี โกะ มูเระ นู ซิก-อาซิก กูญา บาวา ปราฮู มาโซะ กะ ปาตัย อีเระ ปูกัจ นู ลือกัจ อีกัด อีตู บือมาแรฮ ฌูฆา ซาเบะ-จะ กูญา เตด บราปา ฌาโวฮ เดะ ปาตัย ฌาโวฮ ฆามะ ลีมา-ปูโลฮ ดือปา บือเลฮ. 9 ตานา มาแรฮ กะ ปาตัย ดัฮ กูญา ลีฮัจ อาดา ฮารัก บลือกัจ อาปี ดัฮ อาดา อีกัด ตูนู เดะ อาตัซ อาปี อาดา ตือโปก โรตี ฌูฆา. 10 เยซู มือเลา ฌางัน กูญา จะ "อาเมด อีกัด ซือตืองัฮ นู กาเญา บารู บือเลฮ ซีงี มาแรฮ ตูนู เลอ." 11 กะฆีเตอ เปโตร ญา ตูโรด ปี กะ ปราฮู อีเระ ปูกัจ นู ลือกัจ อีกัด บือมาแรฮ กะ ปาตัย. อาดา อีกัด บือซัยํ ปือนอฮ 153 อีโกยํ. ตาปี อีกัด บาญะ กะฮามี โปด ปูกัจ เตด จีแจะ เลอ. 12 เยซู มือเลา ฌางัน กูญา จะ "มาแรฮ มากัด เลอ." โกะ ลูมอฮ มูเระ ฮอย ซาปา โปด นะ บรานี ตาญา เยซู จะ "เกา ฌาดี ซาปา?" ซาเบะ กูญา ตาฮู ดัฮ จะ ฌาดี ตูฮัด เยซู เลอ. 13 เยซู ญา อาเมด ตือโปก โรตี บรี กะ กูญา. ญา อาเมด อีกัด บรี กะ กูญา ฌูฆา. 14 นี เลอ รอจ กะ ตีฆา กาลี ดัฮ นู เยซู บือเลฮ ปลีฮัจ กะ โกะ มูเระ ลือปัซ นู ญา ฮีโดะ ปาเระ เดะ มาตี ดัฮ. 15 ตานา ซูดัฮ มากัด ดัฮ เยซู มือเลา ฌางัน เปโตร นู อาดา ปือนามา อาซิก จะ ซีโมน ตาญา กะฆีนี จะ "ซีโมน นานะ นะ โยฮัน เออ เกา ซายัก กู บาญะ เดะ โกะ ซือมียา อีนี เฆอ?" ญา ตีกัฮ จะ "ซูโงฮ เลอ ตูฮัด เกา ตาฮู จะ กู ซายัก เกา." เยซู ปือซัด กะ ญา จะ "บรี เกา บือบือลา โกะ อานะ กาเมก นะ กู เลอ." 16 เยซู ตาญา รอจ กะ ดูวา กาลี จะ "ซีโมน นานะ นะ โยฮัน เออ เกา ซายัก กู เฆอ?" ญา ตีกัฮ กะ เยซู จะ "ซูโงฮ เลอ ตูฮัด เกา ตาฮู จะ กู ซายัก เกา." เยซู มือเลา ฌางัน ญา จะ "บรี เกา ฌาฆา บือบือลา โกะ กาเมก นะ กู เลอ." 17 เยซู ตาญา มาโซะ รอจ กะ ตีฆา กาลี จะ "ซีโมน นานะ นะ โยฮัน เออ เกา ซายัก กู เฆอ?" เปโตร ญา ซูซัฮ-ฮาตี นู เยซู ตาญา ญา รอจ กะ ตีฆา กาลี ดัฮ จะ "เกา ซายัก กู เฆอ?" กะฆีเตอ ญา มือเลา ฌางัน เยซู จะ "ตูฮัด เออ เกา ตาฮู ราตา ฌือแนฮ เลอ เกา ตาฮู จะ กู ซายัก เกา." เยซู มือเลา ฌางัน ญา จะ "บรี เกา บือบือลา กาเมก นะ กู เลอ. 18 กู นะ มือญาเระ ลาฆู นู ซูโงฮ กะ เกา จะ ตานา เกา ฌาดี อูรัก มูดา เกา บือเลฮ ซือซิก ลีปัจ กาเยด ซือและ เดะ ปีงัก นะ เกา บือฌาลัด ปี ตูโรจ กะ ฮาตี นะ เกา นู เกา บือคานะ นะ ปี. ตาปี ตานา เกา ตูฮา ดัฮ เกา นะ อูโญะ ตางัน บรี กะ โกะ ซือมียา อาซิก ซือซิก อีกัจ บรี กะ เกา นะ บาวา เกา บือปี ตือปัจ นู เกา เตด บือคานะ นะ ปี เลอ." 19 เยซู มือเลา กะฆีเตอ บีดา บรี ลีฮัจ จะ เปโตร นะ มาตี กะฮามี บีดา นะ บรี ลีฮัจ จะ ตูฮัด เดะ อาตัซ บือซรี บือซายา เลอ. กะฆีเตอ เยซู มือเลา ปูลัก จะ "กือนา ตูโรจ กะ กู เลอ." 20 เปโตร ญา กรือเลฮ กะ บลากัก ลีฮัจ อาดา มูเระ นู เยซู ซายัก ตูโรจ มาแรฮ. มูเระ อีตู เลอ นู ดูโดะ ญาเปะ เยซู กาลา เยซู ตืองัฮ ดูโดะ มากัด เตอ นู ตาญา จะ "ตูฮัด เออ ซือมียา นู นะ ซรัฮ เกา บรี กือนา รีฆะ ฌาดี ซาปา เลอ?" 21 ตานา เปโตร ญา ลีฮัจ มูเระ นู อีตู ดัฮ ญา ตาญา เยซู จะ "ตูฮัด เออ โซะ ซือมียา อีนี นะ ฌาดี กะฮามี เลอ?" 22 เยซู ตีกัฮ จะ "ดัฮ กู บือคานะ นะ บรี ญา อาดา ฮีโดะ ตือดะ กู นะ มาแรฮ ปาเระ เตอ บูกัด ฌาดี ลาฆู นามา นะ เกา. เกา เลอ กือนา ตูโรจ มาแรฮ กะ กู." 23 ซาเบะ กะฆีเตอ ปือมือเลา อีนี กือจัย ปี ดัฮ เดะ ตืองัฮ ลูมอฮ ดีบราดี ปือจายา จะ มูเระ นู อีตู นะ เตด มาตี เลอ. ตาปี เยซู เตด บือเลฮ มือเลา จะ มูเระ อีตู นะ เตด มาตี. ญา อูซิ มือเลา จะ "ดัฮ กู บือคานะ นะ บรี ญา ฮีโดะ ตือดะ กู นะ มาแรฮ เตอ บูกัด ฌาดี ลาฆู นามา นะ เกา." 24 มูเระ อีตู เลอ นู มือเลา ฌาดี ซะซี ปาซัน ลาฆู กะฆีนี นู ฌาดี ซือมียา ฆาแรฮ ตาโรฮ ลาฆู กะฆีนี ดัฮ. กามี ตาฮู จะ ปือมือเลา ซะซี นะ ญา ฌาดี ซูโงฮ เลอ. 25 อาดา บาญะ ลาฆู ลาฆี นู เยซู บือเลฮ บูวัจ ดัฮ เตอ. มีเซ นะ ฆาแรฮ บรี ฮาบิฮ ราตา ลาฆู กู บรีงัจ จะ ดือนียา อีนี ฮอย ตือปัจ นะ ตาโรฮ โกะ ซูรัจ นู นะ ฆาแรฮ กะฆีนี เลอ.
1 เทโอฟีโล เออ เดะ ซูรัจ ลามูลา นะ กู กู ฆาแรฮ ดัฮ ลาฆู ซือมูฮา นู เยซู ฮึนตะ นะ บูวัจ ฮึนตะ นะ อาฌัยํ 2 ตือดะ อารี อีตู นู ญา กือนา ซาโมจ บือญาแญะ ปี กะ อาตัซ ลาแงะ. ดูลู เดะ อารี อีตู ซือมืองัจ นะ ตูฮัด อาดา ฌางัน เยซู ตูโลก บรี ญา ปือซัด กะ ลูมอฮ ซือมียา อีตู นู ญา บือเลฮ ปีเลฮ ดัฮ บรี ฌาดี ลูมอฮ ปือญูโรฮ นะ ญา. 3 ลือปัซ ญา มาตี ดัฮ ญา มาแรฮ ปลีฮัจ กะ ลูมอฮ กูญา บาญะ กาลี บาญะ มาจับ นู บรี ลีฮัจ ตือตู จะ ญา ฮีโดะ ปาเระ ซูโงฮ ดัฮ. ปัจ-ปูโลฮ อารี ญา ปลีฮัจ กะ กูญา มือเลา ฌางัน กูญา ปาซัน ลาฆู นู ตูฮัด เดะ อาตัซ นะ บือบือลา ฌาดี ราฌา นะ อูมัจ-ซือมียา. 4 กาลา กูญา อาดา บือซามา ลาฆี ญา ปือซัด กะ กูญา จะ "ฌางัน ตรือเบะ ปี เดะ นังฆรี เยรูซาเลม ตาปี นาตี เลอ บรี ซาโมจ บือนา นู อาโปก นะ กู บือฌาญี นะ บรี บือกะ กู บือเลฮ มือญาเระ กะ กาเญา ดัฮ. 5 โยฮัน บรี ซือมียา ซือลับ เดะ อาเย ดัฮ ตาปี เตด บาญะ อารี กาเญา นะ ซือลับ เดะ ซือมืองัจ นะ ตูฮัด." เยซู ญา จะ. 6 กาลา โกะ ปือญูโรฮ บือมุน บือซามา ฌางัน เยซู กูญา ปาคัจ ตาญา จะ "ตูฮัด เออ เกา นะ ตืองะ นังฆรี อิซราเอน บรี ลือปัซ ปูลัก เดะ วะตู อีนี เฆอ?" 7 เยซู มือเลา ฌางัน กูญา จะ "นู นะ ฌาดี วะตู ดีฮา บูกัด ลาฆู นะ กาเญา เลอ. อาโปก เดะ อาตัซ ญา เลอ นู นะ ตืองะ วะตู อีตู บือกะ ฮาตี นะ ญา เลอ. 8 ตาปี กาลา ซือมืองัจ นะ ตูฮัด นะ ตูโรด เดะ อาตัซ กาเญา ตูฮัด นะ บูวัจ บรี กาเญา มือฆัฮ เลอ. กะฆีเตอ กาเญา นะ ฌาดี ซะซี มือญาเระ ลาฆู นะ กู เดะ นังฆรี เยรูซาเลม เดะ นังฆรี ยูเดีย เดะ นังฆรี ซะมาเรีย เดะ โกะ นังฆรี ราตาๆ ยู รอจ กะ ฮูโฌก ปือญูดัฮ นังฆรี เดะ ดือนียา เลอ." ญา จะ. 9 ตานา ญา มือเลา กะฆีเตอ ดัฮ กูญา ตีญูง ลีฮัจ ญา ญาแญะ ปี กะ อาตัซ ลาแงะ. ญา มาโซะ เดะ ดาลับ กือมูวัง ดัฮ บรี กูญา ลีฮัจ ญา เตด บือฆารี. 10 ตืองัฮ กูญา ตีญูง โซะ ลาแงะ นู ญา ปี ดัฮ นี เลอ อาดา ซือมียา บือปากัย กาเยด ปูเตฮ ดูวา อูรัก. กูญา มาแรฮ บือดีรี ดาปิก 11 มือเลา จะ "ลูมอฮ ซือมียา นังฆรี ฆาลิลี เออ บูวัจ นามา กาเญา บือดีรี ตีญูง กะ ลาแงะ? เยซู อีนี เตอ นู กือนา ซาโมจ บือญาแญะ ปี เดะ กาเญา รอจ กะ อาตัซ ลาแงะ ดัฮ ญา เลอ นะ ปาเระ มาแรฮ ปูลัก ซือรูปา บือกะ กาเญา บือฆารี ญา ปี กะ ลาแงะ ดัฮ." กูญา จะ. 12 กะฆีเตอ โกะ ปือญูโรฮ บาลิ ปี เดะ บูเกะ กือดูโนด มาโซะ กะ นังฆรี เยรูซาเลม. บูเกะ อีตู อาดา ฌาโวฮ เดะ นังฆรี ฆามะ บือเลฮ ซา กีโลเมด. 13 ตานา กูญา มาโซะ นังฆรี ดัฮ กูญา ปี กะ รูวัก โซะ อาตัซ นู กูญา มือนูปัก. อาดา เปโตร โยฮัน ยากอบ อันดรู ฟีลิบ โทมัด บาโทโลมัย มัดทัย ยากอบ นานะ นะ อันเฟอัด ซีโมน ซือมียา เดะ ลูมอฮ นู นะ บลาวัด บีดา ปลือปัซ นังฆรี. อาดา ฌูฆา ยูดา นานะ นะ ยากอบ. 14 กูญา ซือมูฮา ซาฮาตี บือปาคัจ บือซาโวจ บือซามา. อาดา ฌูฆา ลูมอฮ นีบีนี อาดา มารียา มะ เดะ เยซู ฌางัน ลูมอฮ อาดี เดะ ญา. 15 วะตู อีตู อาดา ลูมอฮ ดีบราดี บือมุน บือซามา กือมูฮา ซือราตุซ ดูวา-ปูโลฮ อูรัก. เปโตร บีกัซ บือดีรี เดะ ตืองัฮ กูญา มือเลา จะ 16 "ดีบราดี เออ อาดา ลาฆู เดะ ซูรัจ ปือมือเลา นะ ตูฮัด นู ฆาโดฮ ฌาดี รือมัก ดัฮ. ซือมืองัจ นะ ตูฮัด บูวัจ บรี ราฌา ดาวิด ตูโดฮ ดูลู ปาซัน ลาฆู นะ ยูดา. ยูดา เตอ ฌาดี ซือมียา นู บาวา โกะ ซือมียา บือปี รีฆะ เยซู 17 ญา เตอ ฌาดี ซือมียา ซืออูรัก เดะ ลูมอฮ กามี. เยซู บือเลฮ ปีเลฮ ญา บรี บือกรือฌา ฌางัน กามี ดัฮ." ญา จะ. 18 (ยูดา อีตู บูวัจ ฌาฮัจ กะฆีเตอ บือเลฮ รือฆา อูปัฮ ดัฮ. ญา อาเมด ดูเวะ อีตู ปี บือลี ตือปัจ ตานัฮ ซา ตือปัจ. ปัจ อีตู ญา รือบัฮ ตือซือมับ มาตี ดัฮ. โปรจ นะ ญา ปือจัฮ โกะ กลือกะ โปรจ เดะ ดาลับ ตรือเบะ ฮาบิฮ ดัฮ. 19 ซือมียา ซือมูฮา เดะ นังฆรี เยรูซาเลม ดืองัยํ ลาฆู อีตู ดัฮ. กะฆีเตอ กูญา ตืองะ ปือนามา กะ ตือปัจ ตานัฮ อีตู เดะ บาซา นะ กูญา จะ อาเคนดามา ฌาดี-จะ บือนัก ดารัฮ ตูปัฮ.) 20 เปโตร มือเลา ปูลัก จะ "อาดา นู ฆาแรฮ เดะ ซูรัจ มือญาญี ปูฌี ตูฮัด นู จะ 'บรี ตือปัจ ดูโดะ นะ ญา ฌาดี ตือปัจ ฮอย ซือมียา ดูโดะ. ฌางัน บรี ซาปา ดูโดะ ปัจ อีตู เลอ.' อาดา ฌูฆา นู จะ 'บรี ซือมียา อาซิก ฌาดี กือปาลา ฆาตี ญา.' 21 กะฆีเตอ เลอ กือนา อาดา ซือมียา ซืออูรัก ลาฆี นู นะ มือเลา ฌาดี ซะซี บือซามา ฌางัน กามี ปาซัน ลาฆู นู ตูฮัด เยซู ฮีโดะ ปาเระ เดะ มาตี ดัฮ. ญา กือนา ฌาดี ซือมียา นู อาดา บือซามา ฌางัน กามี ซือลาลู วะตู ตูฮัด เยซู ปี มาแรฮ เดะ ตืองัฮ กามี ตะเดะ ตือกาลา โยฮัน บรี ลาฆู ซือลับ เดะ อาเย ตือดะ อารี อีตู นู เยซู กือนา ซาโมจ บือญาแญะ ปี เดะ กามี ดัฮ." ญา จะ. 23 กะฆีเตอ กูญา ปีเลฮ ซือมียา ดูวา อูรัก. อาดา โยเซบ นู ปือนามา จะ บาระซาบา (ญา อาดา นามา อาซิก จะ ยูซะตัด). อาดา ฌูฆา มัดเทีย. 24 กูญา บือซาโวจ จะ "โอ ตูฮัด เกา เลอ นู ตาฮู ฮาตี นะ ราตา ซือมียา. กะฆีเตอ ตูฮัด เออ บรี กามี ลีฮัจ ซือมียา ดีฮา นู เกา ปีเลฮ ดัฮ 25 บรี ญา บือกรือฌา ฌาดี ปือญูโรฮ ฆาตี ยูดา. กรือฌา อีนี ยูดา ญา ตีงัน ดัฮ ปี กะ ตือปัจ นะ ญา เลอ." กูญา จะ. 26 กะฆีเตอ กูญา ยิบละ นะ ลีฮัจ จะ ฌาดี ซือมียา ดีฮา. ฌาดี มัดเทีย ดัฮ. กะฆีเตอ กูญา ซาโมจ ญา บรี ฌาดี ซือมียา ซืออูรัก บือซามา ฌางัน ปือญูโรฮ ซือบือลัซ อูรัก อีตู.
1 กาลา อารี บรามัย เพนเทคด รอจ ดัฮ ลูมอฮ มูเระ ซือมูฮา ดูโดะ บือซามา ซือตือปัจ. 2 ดัดดัด อาดา ซูวารา บือซัยํ ซือรูปา รีโบจ ตือฆัยํ บูงี มือฮาโมก เดะ รูมัฮ นู กูญา ดูโดะ อีตู. 3 กูญา ลีฮัจ บือกะ-จะ อาดา ญาลา อาปี ซือรูปา ลีดัฮ มาแรฮ ฌือแลว กือนา เดะ อาตัซ กูญา ซิกมาซิก. 4 กูญา ซือมูฮา ซาโมจ ซือมืองัจ นะ ตูฮัด ปือนอฮ ดัฮ. กูญา ปาคัจ ฮึนตะ นะ มือเลา ปือมือเลา บาซา อาซิก ตูโรจ บือกะ นู ซือมืองัจ นะ ตูฮัด บรี กูญา มือเลา. 5 วะตู อีตู เดะ นังฆรี เยรูซาเลม อาดา ลูมอฮ บักซา ยิว นู ตูเฮะ กะ ตูฮัด เตอ นู มาแรฮ เดะ โกะ นังฆรี ซือมูฮา ราตา เดะ ดือนียา เลอ. 6 ตานา กูญา ดืองัยํ บูงี ซูวารา บือซัยํ อีตู ซือมียา บาญะ มาแรฮ บือซามา. กูญา ตือกือฌุจ กรานา ดืองัยํ โกะ มูเระ มือเลา ฌาดี ปือมือเลา บาซา นะ อีซี กูญา ตะอาซิก. 7 กะฆีเตอ กูญา ปือและ-ฮาตี ซูโงฮ มือเลา จะ "แอะ ลูมอฮ ซือมียา นู มือเลา เตอ โบะ กูญา ฌาดี ลูมอฮ นังฆรี ฆาลิลี ราตา ซือมียา บูกัด เฆอ? 8 กะฮามี เลอ นู กีตา ซือมูฮา ดืองัยํ กูญา มือเลา ฌาดี บาซา ตูโปะ นะ กีตา ซิกมาซิก? 9 โซะ กีตา นี อาดา ซือมียา นังฆรี ปาเทีย นังฆรี มาดัย นังฆรี เอลาม นังฆรี เมโซโปเตเมีย นังฆรี ยูเดีย นังฆรี กับปาโดเซีย นังฆรี ปอนโตด นังฆรี เอเซีย 10 นังฆรี ฟรีเจีย นังฆรี ปัมฟีเลีย นังฆรี อียิบ โซะ นังฆรี ลีเบีย นู ดาปิก ซัยรีน. อาดา ซือมียา นังฆรี อีนี ซือมูฮา ฌางัน ซือมียา มาแรฮ เดะ นังฆรี โรม. อาดา ลูมอฮ บักซา ยิว ฌางัน ซือมียา มาโซะ ลาฆู ยิว. 11 อาดา ซือมียา ปูเลา ครีด ฌางัน ลูมอฮ บักซา อาระเบีย กีตา ซือมูฮา ดืองัยํ ซือมียา อีนี มือเลา ลาฆู มือฆัฮ นู ตูฮัด บูวัจ ดัฮ ฌาดี ปือมือเลา บาซา นะ กีตา ตะอาซิก เลอ." 12 กะฆีเตอ กูญา ซือมูฮา ปือและ-ฮาตี กูญา ซือบะ ตาญา ซามา กูญา จะ "ฌาดี กะฮามี เลอ?" 13 อาดา ซือมียา ซือตืองัฮ อาฆัฮ-ฆือละ มือเลา จะ "ลูมอฮ อีนี มาโบะ ซูโงฮ ดัฮ." 14 ตาปี เปโตร เตอ ญา บือดีรี บือซามา ฌางัน ลูมอฮ ปือญูโรฮ ซือบือลัซ อูรัก อีตู ญา มือเลา ฌางัน ลูมอฮ ซือมียา บาญะ. ญา มือเลา ซูวารา บือซัยํ จะ "เออ กาเญา ลูมอฮ บักซา ยิว ฌางัน ลูมอฮ ซือมียา นู ดูโดะ เดะ นังฆรี เยรูซาเลม มือนีงัย กะ กู เลอ กู นะ บรี กาเญา ตาฮู จะ ลาฆู อีนี ฌาดี กะฮามี. 15 ลูมอฮ อีนี ฮอย เตด มาโบะ บือกะ นู กาเญา อีงัจ เลอ กรานา-จะ ฌาดี วะตู ปูโกยํ ซือมีลัด ปาฆี แอะ. 16 ลาฆู อีนี ฌาดี ดัฮ ซือรูปา บือกะ ปือมือเลา นะ โยเอน ซือมียา ตูโดฮ ลาฆู นะ ตูฮัด นู จะ 17 ตูฮัด เดะ อาตัซ มือเลา จะ 'เดะ วะตู โซะ ปือญูดัฮ กู นะ บูวัจ กะฆีนี กู นะ อูแร ซือมืองัจ นะ กู กะ ลูมอฮ ซือมียา ซือมูฮา. โกะ นานะ กีลากี นีบีนี นะ กาเญา นะ ตูโดฮ ลาฆู นะ ตูฮัด. โกะ อูรัก มูดา โกะ อูรัก ตูฮา นะ มีปี ลีฮัจ ลาฆู นะ ตูฮัด เลอ. 18 โซะ ลูมอฮ ปราโซฮ กีลากี นีบีนี นะ กู โปด กาลา อีตู กู นะ อูแร ซือมืองัจ นะ กู เดะ กูญา บรี กูญา นะ ตูโดฮ ลาฆู นะ กู เลอ. 19 กู นะ ปลีฮัจ ปือนานา นู มือฆัฮ นู ปือและ เดะ ลาแงะ โซะ อาตัซ เดะ ดือนียา โซะ บาวัฮ โปด. อาดา ซือรูปา ดารัฮ ซือรูปา อาปี ซือรูปา อาซะ เลอ. 20 มาตาอารี นะ กือลับ เตอ. บูลัด นะ มีรัฮ โปด ซือรูปา กะ ดารัฮ ดูลู เดะ อารี อีตู. ฌาดี อารี บือซัยํ อารี บือซรี นะ ตูฮัด เตอ เลอ. 21 นะ ฌาดี กะฆีนี จะ ราตา ซือมียา นู บลาโลก กะ ตูฮัด บรี ตูโลก กูญา นะ ฮีโดะ ลือปัซ บาฌิ ดัฮ.' ตูฮัด ญา จะ." 22 เปโตร ญา มือเลา ลาฆี จะ "ลูมอฮ บักซา อิซราเอน เออ มือนีงัย เลอ กะ ลาฆู อีนี. อาดา เยซู ซือมียา ตูโปะ นาซาเรด เตอ ญา เลอ นู ตูฮัด เดะ อาตัซ ซูโรฮ มาแรฮ กะ กาเญา. ตูฮัด บือเลฮ ตูโลก ญา บรี บูวัจ ปือนานา ซีดี นู มือฆัฮ นู ปือและ ซูโงฮ เดะ ตืองัฮ กาเญา. กะฆีเตอ ญา บรี ลีฮัจ ซัฮ จะ นู ญา ซูโรฮ เยซู มาแรฮ. ลาฆู อีนี ซือมูฮา กาเญา ตาฮู ดัฮ. 23 เยซู อีนี เตอ ตูฮัด ซรัฮ บรี กะ กาเญา บือกะ ญา บือกีรา ตือตู ดัฮ บือกะ ญา ตาฮู ดูลู เลอ. กะฆีเตอ กาเญา รีฆะ ญา บรี ลูมอฮ อูรัก ฌาฮัจ กาจิก ญา บรี มาตี เดะ กายู ปลีตัก. 24 เยซู อีนี เลอ ตูฮัด บือเลฮ อาเกะ บรี ฮีโดะ ปาเระ ดัฮ บรี ลือปัซ เดะ ลาฆู ซูซัฮ ซาเกะ นู บรี มาตี ดัฮ. ลาฆู มาตี นะ ปือฆัก ญา นะ ฮูโกบ ญา ฮอย เตด บือเลฮ เลอ. 25 " ราฌา ดาวิด ดือละ มือเลา ปาซัน ญา ดัฮ จะ 'กู ฌือเงาะ ลีฮัจ ตูฮัด อาดา โซะ ฮึลด กู ซือลาลู. ญา อาดา เดะ โซะ กานัน กู ตีเมา บรี กู ฆาโดฮ เดะ ลาฆู มานามา. 26 กะฆีเตอ กู ซูกา-ฮาตี โตระ. มูโลจ นะ กู มือเลา ลาฆู ปือมือเลา นู บรี ซูกา-ฮาตี. กะฆีเตอ ฌูฆา ญาวา นะ กู โปด นะ นาตี จาดัก นะ ดาปัจ ตูฮัด. 27 กรานา เกา นะ ฮอย เตด ตีงัน กู เดะ นังฆรี ฮาตู. เกา นะ ฮอย เตด บรี ปราโซฮ นู จรัฮ บาฌิ นะ เกา นะ กือนา บูโระ บูโซะ เดะ ฌีรัจ. 28 qt เกา บรี กู ลีฮัจ ฌาลัด นู บาวา ปี กะ ลาฆู ฮีโดะ ดัฮ. เกา นะ ดูโดะ บือซามา ฌางัน กู บรี กู ซูกา-ฮาตี ปือนอฮ ดัฮ.' ญา จะ." 29 เปโตร มือเลา ลาฆี จะ "โกะ ดีบราดี เออ ปาซัน ราฌา ดาวิด นู บีลาแก นะ กีตา อีนี เตอ กู ฮาตี บรานี นะ มือเลา ฌางัน กาเญา จะ ญา โปด มาตี ดัฮ กือนา ตานัม ดัฮ. ฆูฮา ตานัม บาดัด นะ ญา อาดา ฌางัน กีตา รอจ กะ อารี อีนี เลอ. 30 ตาปี ญา ฌาดี ซือมียา ตูโดฮ ลาฆู นะ ตูฮัด เลอ. ญา ตาฮู ปูลัก จะ ตูฮัด เดะ อาตัซ บือเลฮ อาเกะ มือเลา กือมัซๆ บือฌาญี ฌางัน ญา จะ ตูฮัด นะ บรี บือแนฮ นะ ญา ซืออูรัก ฌาดี ราฌา ซือรูปา บือกะ ญา. 31 ดาวิด ตาฮู ลาฆู อีนี ดูลู กะฆีเตอ ญา มือเลา ปาซัน ราฌา นู บรี ซือลามัจ อีตู จะ ญา นะ ฮีโดะ ปาเระ เดะ มาตี. ญา มือเลา จะ 'ตูฮัด นะ เตด ตีงัน ญา เดะ นังฆรี ฮาตู. ญาวา นะ ญา เตด นะ กือนา บูโระ บูโซะ.' 32 "เยซู อีนี เลอ ตูฮัด เดะ อาตัซ บูวัจ บรี ญา ฮีโดะ ปาเระ เดะ มาตี ดัฮ. กามี ซือมูฮา ฌาดี ซะซี นู ลาฆู อีนี ฌาดี ลาฆู ซูโงฮ. 33 กะฆีเตอ เยซู อีนี ญา กือนา อาเกะ ดัฮ ปี รอจ กะ โซะ กานัน นะ ตูฮัด นู อาโปก เดะ อาตัซ. กะฆีเตอ ญา ซาโมจ ซือมืองัจ นะ ตูฮัด บือกะ ตูฮัด บือเลฮ บือฌาญี ดัฮ. กะฆีเตอ เยซู โปด ญา บือเลฮ อูแร ซือมืองัจ นะ ตูฮัด กะฆีนี เลอ บือกะ กาเญา ลีฮัจ ดัฮ ดืองัยํ ดัฮ. 34 ซาเบะ ราฌา ดาวิด เตด บือเลฮ ญาแญะ รอจ กะ อาตัซ ลาแงะ ตาปี อีซี ญา ตะอาซิก มือเลา จะ 'ตูฮัด บือซัยํ เดะ อาตัซ มือเลา ฌางัน ตูฮัด นะ กู จะ ดูโดะ เลอ โซะ ซือบือลัฮ กานัน นะ กู 35 ตือดะ กู นะ บูวัจ บรี ลูมอฮ ซือตรู นะ เกา นะ ฌาดี บือกะ ปาปัด นู ซาโมจ ตาปะ กากี นะ เกา.' 3 ดาวิด ญา จะ. 36 "กะฆีเตอ บรี ลูมอฮ บักซา อิซราเอน ซือมูฮา ตาฮู ซูโงฮ จะ เยซู เตอ นู กาเญา กาจิก เดะ กายู ปลีตัก ดัฮ ญา เตอ ตูฮัด เดะ อาตัซ บือเลฮ บูวัจ บรี ญา ฌาดี ตูฮัด ดัฮ บรี ญา ฌาดี ราฌา นู บรี ซือลามัจ เลอ." เปโตร ญา จะ. 37 ตานา ลูมอฮ ซือมียา ดืองัยํ ดัฮ กูญา บราซา ฆาโดฮ-ฮาตี มือเลา ฌางัน เปโตร ฌางัน ลูมอฮ ปือญูโรฮ นะ ตูฮัด นู ฆีลาฆี จะ "ดีบราดี เออ กามี นะ บูวัจ กะฮามี บาฌิ?" 38 กะฆีเตอ เปโตร มือญาเระ กะ กูญา จะ "บรี กาเญา ราตา ซือมียา บราเลฮ-ฮาตี เลอ ซาโมจ ลาฆู ซือลับ เดะ อาเย เดะ นามา นะ เยซู คริด เลอ บีดา ตูฮัด นะ อาเกะ ดูซา นะ กาเญา. กะฆีเตอ กาเญา โปด นะ ซาโมจ ซือมืองัจ นะ ตูฮัด นู ตูฮัด นะ บรี. 39 ซาเบะ-จะ นู ตูฮัด บือเลฮ บือฌาญี กะฆีเตอ ญา บือฌาญี ฌางัน กาเญา ฌางัน กือมอน อานะ นะ กาเญา ฌางัน ลูมอฮ ซือมียา นู ดูโดะ ฌาโวฮ ซามา เตอ ฌาดี ราตา ซือมียา นู ตูฮัด นะ กีตา บลาโลก บรี มาแรฮ ซารี ญา เลอ." ญา จะ. 40 กะฆีเตอ เปโตร ญา มือเลา กือฌะ-กือมัซ มือเลา บาญะ ลาฆู ปรีงัจ กะ กูญา จะ "บรี ญาวา นะ กาเญา ลือปัซ เดะ บักซา นู เตด บือฆูนา อีนี เลอ." 41 กะฆีเตอ ลูมอฮ ซือมียา นู ซาโมจ ปือมือเลา นะ เปโตร เตอ กูญา ซาโมจ ลาฆู ซือลับ เดะ อาเย ดัฮ. อารี อีตู อาดา ซือมียา นู มาโซะ ฌาดี มูเระ นะ ตูฮัด ฆามะ บือเลฮ ตีฆา รีบู อูรัก ดัฮ. 42 กูญา ปาคัจ ตูเฮะ มือนีงัย กะ ปือมือเลา นู โกะ ปือญูโรฮ นะ ตูฮัด อาฌัยํ เตอ ตูเฮะ เดะ ลาฆู บือรามัย บือมุน บือซามา เตอ ตูเฮะ เดะ ลาฆู มากัด บือซามา เดะ ลาฆู บือมุน บือซาโวจ กูญา ตูเฮะ ซือมูฮา. 43 กะฆีเตอ ราตา ซือมียา ตาโกจ ซูโงฮ เดะ ตูฮัด. ลูมอฮ ปือญูโรฮ นะ ตูฮัด กูญา บูวัจ ปือนานา ซีดี นู ปือและ ซูโงฮ บาญะ ลาฆู. 44 ลูมอฮ ซือมียา ปือจายา อาดา บือซามา อาเมด บารัก นะ กูญา มาแรฮ บือมุน ฌาดี บารัก ซามา บายา. 45 ตือปัจ ตานัฮ นะ กูญา บือนา บารัก นะ กูญา กูญา ฌูวัน อาเมด ดูเวะ มาแรฮ ปาฮาฆิ กะ ซือมียา นู ฮาฌะ. 46 บีลัก อารี กูญา ซา ฮาตี บือมุน บือซามา เดะ รูมัฮ มือญือมัฮ ตูฮัด. กูญา ปี มากัด บือซามา บือกะ เดะ รูมัฮ นะ กูญา ราตา ซูกา-ฮาตี บรามัย มากัด บือซามา อาดา ฌางัน ฮาตี นู ลือฆา เลอ. 47 กูญา ซือมาตา ปูฌี มือโอจ กะ ตูฮัด. ลูมอฮ ซือมียา อาซิก โปด มือโอจ กะ กูญา. บีลัก อารี ตูฮัด บรี อาดา ซือมียา นู นะ ลือปัซ เดะ ดูซา มาแรฮ มาโซะ บือซามา ฌางัน ลูมอฮ กูญา.
1 อาดา ซืออารี เปโตร ฌางัน โยฮัน ปี กะ รูมัฮ มือญือมัฮ ตูฮัด. ฌาดี วะตู ปูโกยํ ตีฆา นู โกะ ซือมียา บาญะ ปี บือซาโวจ. 2 เดะ ปีตู รูมัฮ นู บลาโลก จะ ปีตู บือฆาจะ อาดา ซือมียา ซืออูรัก นู จาเปะ บือฌาลัด เตด บือเลฮ ตะเดะ ญา ดูโดะ เดะ อาปี. บีลัก อารี อาดา ซือมียา อูโซก ญา ปี กะ ปีตู อีตู บรี ญา งือแมง ดูเวะ เดะ โกะ ซือมียา นู มาโซะ กะ รูมัฮ มือญือมัฮ ตูฮัด. 3 ตานา ญา ลีฮัจ เปโตร ฌางัน โยฮัน นะ มาโซะ ญา มีตา เดะ กูญา บรี ฮาฆิ ดูเวะ กะ ญา ซือตืองัฮ. 4 กูญา ดูวา อูรัก ฌือเงาะ ลีฮัจ ญา กะฆีเตอ เปโตร มือเลา จะ "ลีฮัจ กะ กามี เลอ." 5 กะฆีเตอ ซือมียา อีตู ลีฮัจ กะ กูญา ดูวา อูรัก อีงัจ นะ บือเลฮ ดูเวะ ซือตืองัฮ เดะ กูญา. 6 ตาปี เปโตร มือเลา ฌางัน ญา จะ "กู ฮอย ปีระ ฮอย มัซ ลาลู. ตาปี ลาฆู นู กู อาดา กู นะ บรี กะ เกา. เดะ นามา นะ เยซู คริด ซือมียา ตูโปะ นาซาเรด บีกัซ บือฌาลัด เลอ." ญา จะ. 7 เปโตร ปือฆัก ตางัน โซะ กานัน นะ ญา ตูโลก บือบีกัซ บือดีรี. ดัดดัด กากี นะ ญา ฌางัน บูกู กากี นะ ญา ตือฆัยํ-อูรัจ ดัฮ. 8 ญา มือลูปัจ บือดีรี ฌาลัด โปด บือเลฮ ดัฮ. ญา มาโซะ กะ ดาลับ รูมัฮ มือญือมัฮ ตูฮัด บือซามา เปโตร ฌางัน โยฮัน ซัจ บือฌาลัด ซัจ มือลูปัจ ซาเมน ปูฌี กะ ตูฮัด. 9 โกะ ซือมียา ลีฮัจ บือฆารี ญา บือฌาลัด ซาเมน ปูฌี กะ ตูฮัด 10 กูญา กราลา จะ ญา เตอ ฌาดี ซือมียา อีตู นู งือแมง ดูเวะ เดะ รูโซะ ปีตู นู บือฆาจะ อีตู. กะฆีเตอ กูญา ซือมูฮา ปือและ-ฮาตี ซูโงฮ ลีฮัจ ลาฆู นู ฌาดี ดัฮ. 11 กาลา ซือมียา อีตู อาดา ปือฆัก เปโตร ฌางัน โยฮัน ลาฆี โกะ ซือมียา ซือมูฮา ปือและ-ฮาตี โตระ ปาคัจ บลารี ปี กะ กูญา เดะ ตือปัจ นู ปือนามา จะ ปือทอยํ นะ ราฌา ซะโลโม. 12 ตานา เปโตร ลีฮัจ ซือมียา บาญะ อีตู ญา มือเลา ฌางัน กูญา จะ "ลูมอฮ บักซา อิซราเอน เออ บูวัจ นามา กาเญา ปือและ-ฮาตี ลีฮัจ กะ ซือมียา อีนี? บูวัจ นามา กาเญา ฌือเงาะ ลีฮัจ กะ กามี? กาเญา อาคา จะ อีซี กามี ตะอาซิก ฌาดี ซือมียา มือฆัฮ ซือมียา บาฌิ โตระ กะฆีเตอ กามี บูวัจ บรี ซือมียา อีนี ฌาลัด บือเลฮ ดัฮ เฆอ? เตด โบะ. 13 ตูฮัด นะ อับราฮัม ฌางัน อีซัก ฌางัน ยาโกบ เตอ ตูฮัด นะ โกะ บีลาแก นะ กีตา เตอ ญา เลอ บือเลฮ อาเกะ เยซู ซือมียา บือกรือฌา นะ ญา บรี ญา บือซรี ซูโงฮ. ตาปี ลูมอฮ กาเญา อาตัจ ญา กะ ปีลาด นู ฌาดี ฮูลู-บาลัก นะ ราฌา. วะตู ปีลาด อีงัจ นะ บรี ญา ลือปัซ กาเญา กีปัซ ญา บูวัก ดัฮ. 14 กะฆีเตอ กาเญา มือเลา กีปัซ ซือมียา อีตู นู บาฌิ บือซรี นู บาฌิ-ตือปัจ. กาเญา มีตา เดะ ปีลาด บรี ปลือปัซ ซือมียา บูนอฮ ซือมียา ซืออูรัก. 15 ซือมียา นู บาวา บรี ฮีโดะ เตอ กาเญา บูนอฮ ดัฮ ตาปี ตูฮัด เดะ อาตัซ บือเลฮ อาเกะ ญา บรี ฮีโดะ ปาเระ เดะ มาตี ดัฮ. กามี ฌาดี ซะซี นู ลีฮัจ ลาฆู อีตู. 16 นามา นะ เยซู เตอ เลอ นู บูวัจ บรี อูรัก จาเปะ อีนี ตือฆัยํ-อูรัจ ดัฮ ซาเบะ ญา ปือจายา กะ นามา อีตู. ญา ฌาดี ซือมียา ซืออูรัก นู กาเญา ลีฮัจ บือฆารี ดัฮ นู กาเญา กราลา โปด. นู ญา ปือจายา กะ เยซู เตอ บือเลฮ บูวัจ บรี ญา ซือนัง ญาวา ดัฮ บือกะ กาเญา บือเลฮ ลีฮัจ บือฆารี เลอ." 17 "กะฆีเตอ ดีบราดี เออ" เปโตร ญา จะ "กู ตาฮู จะ นู กาเญา ฌางัน โกะ กือปาลา นะ กาเญา บูวัจ ฌางัน เยซู ดัฮ กาเญา บูวัจ ซาเบะ กาเญา เตด ตาฮู อารัฮ. 18 ลามา ดัฮ ตูฮัด บือซัยํ บือเลฮ ซูโรฮ ลูมอฮ ซือมียา ตูโดฮ ลาฆู นะ ญา บรี กูญา มือเลา ตูโดฮ จะ ราฌา นู บรี ซือลามัจ นะ ตูฮัด นะ กือนา ซาเกะ โตระ. ลาฆู อีตู ตูฮัด บรี ฌาดี รือมัก กะฆีเตอ ดัฮ. 19 กะฆีเตอ บราเลฮ-ฮาตี เลอ. อาเลฮ ปี ซารี ตูฮัด บรี ญา บาโซฮ ดูซา นะ กาเญา. 20 กะฆีเตอ ตูฮัด นะ บรี อาดา วะตู นู นะ บรี กาเญา ดูโดะ ซือนัง บาฌิ. ญา นะ ซูโรฮ เยซู มาแรฮ. ญา เตอ ฌาดี ราฌา นู บรี ซือลามัจ นู ตูฮัด ตืองะ ดัฮ กรานา กาเญา. 21 ญา กือนา ดูโดะ เดะ โซะ อาตัซ ลาแงะ ตือดะ วะตู อีตู นู ตูฮัด นะ ตืองะ บือนา ซือมูฮา บรี ฌาดี บารู. ตะเดะ ดูลู นูตู ตูฮัด บือเลฮ บีตาฮู ปาซัน วะตู อีตู เดะ ปือมือเลา นะ โกะ ซือมียา จรัฮ บาฌิ นู ตูโดฮ ลาฆู นะ ญา. 22 กรานา-จะ มูซา บือเลฮ มือเลา ดัฮ จะ 'ตูฮัด บือซัยํ เดะ อาตัซ ญา นะ ตืองะ ซือมียา ซืออูรัก เดะ นะบรานะ นะ กาเญา นะ บรี ญา ฌาดี ซือมียา ตูโดฮ ลาฆู นะ ตูฮัด ซือรูปา บือกะ กู. กาเญา กือนา มือนีงัย ลาฆู ซือมูฮา นู ญา นะ มือญาเระ กะ กาเญา. 23 ราตา ซือมียา นู ตีเมา มือนีงัย กะ ซือมียา ตูโดฮ อีตู ญา เลอ นะ กือนา บือนาซา ปี เดะ ลูมอฮ ซือมียา นะ ตูฮัด.' มูซา ญา จะ." 24 "ซูโงฮ เลอ" เปโตร ญา จะ "ตะเดะ ซามูเอน ฌางัน โกะ ซือมียา ตูโดฮ ลาฆู นะ ตูฮัด ซือมูฮา นู มาแรฮ เดะ บลากัก กูญา ซือมูฮา บือเลฮ ตูโดฮ ดูลู ปาซัน วะตู อารี อีนี. 25 กาเญา เลอ ฌาดี ลูมอฮ ซือมียา นู นะ ซาโมจ บือนา ซือมูฮา นู โกะ ซือมียา ตูโดฮ อีตู บือเลฮ บือฌาญี ดัฮ. กาเญา อาดา บาฮาเฆด ฌูฆา เดะ ปือมือเลา บือปาคัจ อีตู นู ตูฮัด ตืองะ ฌางัน โกะ บีลาแก นะ กีตา ดัฮ. ตูฮัด บือเลฮ มือเลา ฌางัน อับราฮัม จะ 'กรานา บือแนฮ นะ เกา เตอ ลูมอฮ ซือมียา เดะ ดือนียา ราตา นะ ดูโดะ ซือนัง ซือลามัจ เลอ.' 26 กะฆีเตอ ตูฮัด ตืองะ เยซู นู ซือมียา บือกรือฌา นะ ญา บรี ญา มาแรฮ นะ บรี ซือลามัจ กะ กาเญา ดูลู นะ บรี กาเญา โซก ซืออูรัก นะ อาเลฮ มาแรฮ ตีงัน โกะ ดูซา นะ กูญา." เปโตร ญา จะ.
1 ตานา กูญา ดูวา อูรัก ตืองัฮ มือเลา ฌางัน ลูมอฮ ซือมียา อาดา โกะ ซามี ฌางัน กือปาลา ลูมอฮ ฌาฆา รูมัฮ มือญือมัฮ ตูฮัด ฌางัน ลูมอฮ ซะดูซี กูญา มาแรฮ ดาปัจ กูญา ดูวา อูรัก อีตู. 2 กูญา ฆาโดฮ-ฮาตี ซาเบะ ดูวา อูรัก อีตู อาฌัยํ โกะ ซือมียา บาญะ มือญาเระ ปาซัน ลาฆู ฮีโดะ ปาเระ เดะ มาตี บือกะ เยซู ฮีโดะ ปาเระ ดัฮ. 3 โกะ ลูมอฮ ซามี รีฆะ เปโตร ฌางัน โยฮัน กานัก ตาโรฮ เดะ ปือฌารา ยู รอจ กะ ปาฆี ซาเบะ อารี อีตู ปะฮึญา นะ มาลับ ดัฮ. 4 ตาปี เดะ ลูมอฮ ซือมียา นู ดืองัยํ ปือมือเลา อีตู อาดา บาญะ อูรัก ปือจายา บูวัจ บรี อาดา ลูมอฮ ซือมียา ปือจายา ฆามะ บือเลฮ ลีมา รีบู อูรัก. 5 ตานา จรัฮ ปาฆี โกะ ลูมอฮ กือปาลา ลูมอฮ อูรัก ตูฮา ลูมอฮ ซือมียา อาฌัยํ ลาฆู ปือมือซัด นะ ตูฮัด กูญา ปาคัจ มาแรฮ บือมุน เดะ นังฆรี เยรูซาเลม. 6 อาดา ฌูฆา อานัด นู ฌาดี กือปาลา ซามี. อาดา กายาฟัด โยฮัน อาเลกซันเดอ ฌางัน ลูมอฮ นะบรานะ นะ กือปาลา ซามี ซือมูฮา. 7 ลูมอฮ กูญา บรี เปโตร ฌางัน โยฮัน ดูวา อูรัก บือดีรี เดะ ตืองัฮ กูญา ตาญา จะ "นู กาเญา บูวัจ บรี ซือมียา อีตู ลือฆา เตอ กาเญา บูวัจ ฌางัน ปือมือฆัฮ นู ดีฮา? กาเญา บูวัจ เดะ นามา นะ ซาปา เลอ?" 8 เปโตร เตอ ญา ปือนอฮ ฌางัน ซือมืองัจ นะ ตูฮัด มือเลา ฌางัน กูญา จะ "กาเญา นู ฌาดี โกะ กือปาลา ลูมอฮ ซือมียา ฌางัน โกะ อูรัก ตูฮา เออ. 9 กาเญา นะ ซาซัจ กามี เดะ อารี อีนี เฆอ ปาซัน ปือบูวัจ นู บาฌิ นู บรี อูรัก เตด ซือนัง ญาวา อีนี ตือฆัยํ-อูรัจ ดัฮ กะฮามี? 10 กะฆีเตอ บรี กาเญา ฌางัน ลูมอฮ บักซา อิซราเอน ซือมูฮา ตาฮู จะ อาดา เยซู คริด ซือมียา ตูโปะ นาซาเรด นู กาเญา กาจิก เดะ กายู ปลีตัก ดัฮ นู ตูฮัด เดะ อาตัซ บรี ฮีโดะ ปาเระ เดะ มาตี ดัฮ. ปือนามา นะ ญา เลอ นู บูวัจ บรี ซือมียา อีนี บือดีรี เดะ ตืองัฮ กาเญา ฌาดี ซือมียา ตือฆัยํ-อูรัจ ดัฮ. 11 เยซู เลอ ฌาดี ซือมียา นู ซูรัจ ปือมือเลา นะ ตูฮัด มือเลา ปาซัน ญา จะ บาตู บือซัยํ อีตู นู กาเญา นู ฌาดี ตูกัก กรือฌา รูมัฮ ตีงัน บูวัก ดัฮ บาตู อีตู เลอ ปาเระ มาแรฮ ฌาดี บาตู กือปาลา ซาฆี ดัฮ. 12 เดะ ซือมียา อาซิก นู ดีฮา โปด ฮอย ซาปา นะ บรี ฮีโดะ ลือปัซ บาฌิ. กรานา เดะ บาวัฮ ลาแงะ ฮอย ปือนามา อาซิก นู ตูฮัด บรี กะ ลูมอฮ ซือมียา นู นะ ตูโลก กีตา บรี ฮีโดะ ลือปัซ บาฌิ ดัฮ. ฮอย ลาลู เลอ." เปโตร ญา จะ. 13 ลูมอฮ ซือมียา ลีฮัจ จะ เปโตร ฌางัน โยฮัน ฮาตี บรานี กะฆีเตอ. กูญา ตาฮู จะ ดูวา อูรัก อีตู ฌาดี ซือมียา เตด บือเลฮ บลาฌัยํ ซูรัจ บูกัด ซือมียา บือซัยํ. กะฆีเตอ กูญา ปือและ-ฮาตี ซูโงฮ. กูญา ลีฮัจ จะ กือดูวา อูรัก อีตู ฌาดี ซือมียา นู บือเลฮ ตูโรจ บือซามา ฌางัน เยซู ดัฮ. 14 วะตู กูญา ลีฮัจ บือฆารี ซือมียา นู กือนา บือบือลา บรี ลือฆา ดัฮ ญา อาดา บือดีรี บือซามา เปโตร ฌางัน โยฮัน กูญา ฮอย ปือมือเลา นามา นะ ตีกัฮ บือเลฮ เลอ. 15 กะฆีเตอ กูญา ซูโรฮ ดูวา อูรัก อีตู บรี ตรือเบะ ปี กะ ลูวัยํ ตือปัจ บือมุน บือกีรา. กูญา ซือมูฮา บือกีรา บือซามา 16 มือเลา จะ "กีตา นะ บูวัจ กะฮามี ฌางัน กูญา อีนี? โกะ ซือมียา นู ดูโดะ เดะ นังฆรี เยรูซาเลม ซือมูฮา ลีฮัจ ดัฮ จะ นู กูญา บือเลฮ บูวัจ ปือนานา นู ซีดี ซูโงฮ. กีตา กีปัซ ลาฆู อีนี เตด บือเลฮ ดัฮ. 17 ตาปี กีตา ตีเมา บรี ลาฆู อีนี นะ กือจัย ลาฆี กะ ลูมอฮ ซือมียา บาญะ. กะฆีเตอ บรี กีตา มืออารับ กะ กูญา ตีเมา บรี กูญา มือเลา ฌางัน ซาปา ปาซัน ปือนามา นะ เยซู อีนี." กูญา จะ. 18 กะฆีเตอ กูญา ปาเงน กือดูวา อูรัก อีตู บรี บาลิ มาแรฮ ปือซัด กูญา จะ "ปาซัน ปือนามา นะ เยซู อีนี เตอ ฌางัน ซือโบจ ฌางัน อาฌัยํ นามา ลาลู เลอ." 19 ตาปี เปโตร ฌางัน โยฮัน ตีกัฮ กูญา จะ "กาเญา ฆาโดฮ บรีงัจ ลีฮัจ ลาฆู นู ดีฮา กือนา เดะ ฮาตี นะ ตูฮัด? นะ มือนีงัย กะ กาเญา เฆอ-จะ นะ มือนีงัย กะ ตูฮัด? 20 ตาปี โซะ กามี เตอ ลาฆู มานามา นู กามี ลีฮัจ บือฆารี ดัฮ ดืองัยํ ดัฮ ลาฆู อีตู กามี นะ บราดู มือญาเระ เตด บือเลฮ ดัฮ เลอ." กูญา จะ. 21 กะฆีเตอ โกะ ซือมียา บือมุน บือกีรา มืออารับ กะ ดูวา อูรัก อีตู กือมัซๆ ลาฆี บารู ปลือปัซ กูญา ปี เลอ. กูญา ลีฮัจ จะ นะ กรัจ ฮูโกบ กูญา เตด บือเลฮ ดัฮ กรานา โกะ ซือมียา บาญะ ซือมูฮา มือโอจ กะ ตูฮัด ปาซัน ลาฆู นู ฌาดี ดัฮ. 22 ซือมียา นู กือนา บือบือลา บรี ลือฆา ดัฮ เดะ ปือนานา ซีดี อีตู ญา เลอ อูมอยํ ปัจ-ปูโลฮ ตาโฮด ลือเบฮ ดัฮ. 23 ตานา กือนา ปลือปัซ ดัฮ กูญา ดูวา อูรัก ปี ดาปัจ ลูมอฮ ซือมียา นะ กูญา มือญาเระ ลาฆู นู ลูมอฮ ซามี ซัยํ-บือซัยํ โกะ อูรัก ตูฮา มือเลา ดัฮ ซือมูฮา. 24 ซูดัฮ กูญา ซือมูฮา มือนีงัย ดัฮ กูญา ปาคัจ รือมา-ฮาตี บือซาโวจ กะ ตูฮัด เดะ อาตัซ มือเลา จะ "โอ ตูฮัด เออ เกา เลอ ฌาดี ตูฮัด นู บือฌาดี ลาแงะ ฌางัน ดือนียา ฌางัน ลาโวจ ดัฮ บือฌาดี โกะ บือนา บารัก เดะ ดาลับ ราตา ซือมูฮา. 25 เกา เลอ บือเลฮ ซูโรฮ ราฌา ดาวิด นู ฌาดี บีลาแก นะ กามี บรี ญา มือเลา โกะ ปือมือเลา นะ เกา. ซือมืองัจ นะ เกา ซือมืองัจ นู บาฌิ บือซรี เตอ บือเลฮ บาวา ญา นู ฌาดี ซือมียา บือกรือฌา นะ เกา บรี ญา มือเลา จะ "บูวัจ นามา ลูมอฮ บักซา อาซิก บืออีเซด ซือมูฮา? บูวัจ นามา ลูมอฮ ซือมียา ปาคัจ บือกีรา ลาฆู ฌาฮัจ นู เตด ฌาดี นามา? 26 ลูมอฮ ราฌา เดะ ดือนียา กูญา ซียะ นะ บือปรัก ลูมอฮ ซือมียา บือบือลา ดือนียา กูญา บือมุน บือซามา บีดา นะ บลาวัด ฌางัน ตูฮัด บือซัยํ เดะ อาตัซ นะ บลาวัด ฌางัน ราฌา นู บรี ซือลามัจ นะ ญา." ญา จะ. 27 "ซูโงฮ เลอ ราฌา เฮโรด ฌางัน ปอนตัด ปีลาด กูญา บือเลฮ บือมุน ฌางัน ลูมอฮ บักซา อาซิก ฌางัน ลูมอฮ บักซา อิซราเอน บีดา นะ บลาวัด ฌางัน เยซู ซือมียา บือกรือฌา นู บาฌิ บือซรี นะ เกา เตอ นู เกา ตืองะ ดัฮ ฌาดี ราฌา นู บรี ซือลามัจ. 28 กูญา อีตู บรีงัจ นะ บูวัจ กะฮามี โปด ฌาดี ลาฆู นู เกา บือเลฮ ตือตู-ฮาตี ตะเดะ ดูลู นะ บรี ฌาดี กะฆีเตอ. เกา ตือตู-ฮาตี นะ บูวัจ กะฆีเตอ ฌางัน ปือมือฆัฮ นะ เกา ตูโรจ บือกะ ฮาตี นะ เกา เลอ. 29 วะตู อีนี ตูฮัด เออ ลีฮัจ เลอ กูญา ปือซัด บลารัก กะฮามี ดัฮ. มีตา เดะ ตูฮัด บรี กามี นู ปราโซฮ นะ เกา เตอ บรี กามี บรานี มือเลา ปือมือเลา นะ เกา เลอ. 30 มีตา บรี ตูฮัด อาเงา ตางัน นู มือฆัฮ บรี บือบือลา ซือมียา บรี ซือนัง ญาวา. บรี กามี บูวัจ ปือนานา ซีดี นู ปือและ ซูโงฮ เดะ นามา นะ เยซู ซือมียา บือกรือฌา นู บาฌิ บือซรี นะ เกา เลอ." กูญา จะ. 31 กาลา กูญา บือซาโวจ ดัฮ ตือปัจ นู กูญา บือมุน บือซามา บรีเงาะ โตระ. กูญา ซือมูฮา ปือนอฮ ฌางัน ซือมืองัจ นะ ตูฮัด. กูญา ฮาตี บรานี ปาคัจ มือเลา ปือมือเลา นะ ตูฮัด. 32 ลูมอฮ ซือมียา นู ปือจายา กูญา บือปาคัจ บือซามา ซา ฮาตี ซือมูฮา. ฮอย ซาปา มือเลา จะ บือนา บารัก นู ญา อาดา ฌาดี บือนา บารัก นะ อีซี ญา ตะอาซิก. ตาปี บือนา บารัก ราตา ซือมูฮา กูญา ซูโรฮ บือซามา-ซามา. 33 ลูมอฮ ปือญูโรฮ นะ ตูฮัด ปือนอฮ ฌางัน นู มือฆัฮ ซูโงฮ มือเลา ฌาดี ซะซี จะ "ตูฮัด เยซู ญา ฮีโดะ ปาเระ เดะ มาตี ดัฮ." ตูฮัด ญา ฮาลัย บรี ซือลามัจ บาญะ ซูโงฮ กะ ลูมอฮ ปือจายา ราตา ซือมียา. 34 เดะ ลูมอฮ กูญา ฮอย ซาปา นู ฮาฌะ ซาเบะ ซือมียา ดีฮา อาดา ตือปัจ ตานัฮ อาดา รูมัฮ กูญา นะ ฌูวัน. ดูเวะ รือฆา บารัก นู ฌูวัน อีตู 35 กูญา นะ อาเมด มาแรฮ กีเรบ เดะ โกะ ปือญูโรฮ. โกะ ปือญูโรฮ โปด นะ ฮาฆิ ดูเวะ อีตู บรี กะ ราตา ซือมียา นู ฮาฌะ. 36 อาดา ซือมียา ซืออูรัก ปือนามา โยเซบ ญา ฌาดี ซืออูรัก เดะ ลูมอฮ เลวี นู มาแรฮ เดะ ปูเลา ซัยปรัด ดัฮ. โกะ ปือญูโรฮ ตืองะ ปือนามา กะ ญา จะ บานาบัด ฌาดี-จะ ซือมียา นู ปูโฌะ-ฮาตี กาวัด. 37 บานาบัด ปี ฌูวัน ตือปัจ ตานัฮ นะ ญา ซือตือปัจ อาเมด ดูเวะ มาแรฮ กีเรบ เดะ โกะ ปือญูโรฮ นะ ตูฮัด.
1 อาดา ฌูฆา ซืออูรัก นู ปือนามา อานานียา ฌางัน บีนี นะ ญา ซับฟีรา. ญา ฌูวัน บือนา บารัก นะ กูญา ซือตืองัฮ. 2 รือฆา นะ บือนา บารัก อีตู ญา อาเมด ตาโรฮ ซือตืองัฮ ซือตืองัฮ ญา อาเมด มาแรฮ กีเรบ เดะ โกะ ปือญูโรฮ. บีนี นะ ญา โปด บือซามา ฌางัน ญา เดะ ลาฆู อีนี ฌูฆา. 3 ตาปี เปโตร มือเลา จะ "อานานียา เออ บูวัจ นามา ปะ ฮาตู ซีตัด อาดา ปือนอฮ เดะ ฮาตี นะ เกา บูวัจ บรี เกา มืออูปัย กะ ซือมืองัจ นะ ตูฮัด. ฌาดี-จะ เกา บอฮ ตาโรฮ รือฆา ตือปัจ ตานัฮ อีตู ซือตืองัฮ ดัฮ. 4 กาลา เกา เตด ฌูวัน ลาฆี ฌาดี ตือปัจ ตานัฮ นะ เกา ตะอาซิก บูกัด เฆอ? วะตู ฌูวัน ดัฮ ดูเวะ อีตู ฌาดี นะ เกา บูกัด เฆอ? บูวัจ นามา ปะ เกา อีงัจ เดะ ฮาตี นะ บูวัจ ลาฆู อีนี? บูกัด เกา มืออูปัย กะ ซือมียา เตอ ตาปี เกา มืออูปัย กะ ตูฮัด เดะ อาตัซ เลอ." 5 ตานา อานานียา ดืองัยํ ปือมือเลา อีตู ญา รือบัฮ ตือฆูแลก มาตี ดัฮ. ซือมียา ซือมูฮา นู ดืองัยํ ลาฆู อีนี กูญา ตาโกจ โตระ. 6 โกะ อูรัก มูดา กูญา บีกัซ บูกุซ บาดัด นะ ญา บาวา บือปี ตานัม ดัฮ. 7 ลือปัซ วะตู ตีฆา ฌับ บีนี นะ อานานียา ญา มาแรฮ มาโซะ ดัฮ ญา เตด ตาฮู ลาฆู นู บือฌาดี ดัฮ. 8 โซะ เปโตร ตาญา ญา จะ "มือเลา เลอ นู กาเญา ฌูวัน ตือปัจ ตานัฮ ดัฮ ฌาดี รือฆา กะฆีนี รือมัก เฆอ?" ญา ตีกัฮ จะ "ฌาดี รือฆา กะฆีเตอ เลอ รือมัก ดัฮ." 9 กะฆีเตอ เปโตร มือเลา ฌางัน ญา จะ "บูวัจ นามา ปะ เกา ฌางัน ลากี บรีงัจ บือซามา นะ ลกลีฮัจ ซือมืองัจ นะ ตูฮัด. ตานา บาฌิ โกะ ซือมียา นู ตานัม ลากี นะ เกา รอจ กะ ปีตู ดัฮ. กูญา นะ บาวา เกา บือปี ตานัม ซามา." 10 ดัดดัด ญา รือบัฮ ตือฆูแลก มาตี โซะ กากี นะ เปโตร. ตานา โกะ อูรัก มูดา มาโซะ กะ ดาลับ รูมัฮ กูญา ลีฮัจ จะ ญา มาตี ดัฮ. กูญา บาวา บาดัด นะ ญา บือปี ตานัม บือซามา ฌางัน ลากี นะ ญา. 11 ลูมอฮ นะ ตูฮัด ซือมูฮา ตาโกจ โตระ. ลูมอฮ ซือมียา อาซิก นู ดืองัยํ ลาฆู อีนี กูญา โปด ตาโกจ ฌูฆา. 12 โกะ ปือญูโรฮ กูญา บูวัจ ปือนานา ซีดี นู ปือและ ซูโงฮ บาญะ ลาฆู เดะ ตืองัฮ โกะ ลูมอฮ ซือมียา. ลูมอฮ ซือมียา ปือจายา อาดา บือซามา เดะ ตือปัจ นู บลาโลก จะ 'ปือทอยํ นะ ราฌา ซะโลโม' อีตู. 13 โกะ ซือมียา ฆีลาฆี ตาโกจ นะ บือซามา ฌางัน ลูมอฮ กูญา ตาปี โกะ ซือมียา บาญะ มือโอจ กะ กูญา. 14 อาดา โกะ กีลากี นีบีนี พรัด บาญะ นู มาแรฮ ปือจายา กะ ตูฮัด มาโซะ บือซามา ฌางัน กูญา. 15 กะฆีเตอ ลูมอฮ ซือมียา กูญา บาวา โกะ ซือมียา เตด ซือนัง ญาวา บือปี กะ บีดิก ฌาลัด ตืองะ บรี ฆูแลก เดะ ตือปัจ ตีโนะ เดะ ลือปัจ นะ กูญา. กะฆีเตอ ตานา เปโตร นะ ฌาลัด ลาลู กูญา อาซัน บรี บายัก นะ ญา นะ กือนา เดะ กูญา โปด ฌาดี. 16 อาดา ซือมียา บาญะ มาแรฮ ดาตัก เดะ โกะ ตูโปะ โซะ กือลีลิก เยรูซาเลม. กูญา บาวา บือมาแรฮ ซือมียา เตด ซือนัง ญาวา ฌางัน ซือมียา อาดา ฮาตู ฌาฮัจ ราโซะ. กูญา ซือมูฮา ซือนัง บาฌิ ดัฮ ราตา อูรัก. 17 ตาปี กือปาลา ซามี ฌางัน ลูมอฮ นะ ญา นู ฌาดี ลูมอฮ ซะดูซี เตอ กูญา ดือกี กะ โกะ ปือญูโรฮ บาญะ 18 รีฆะ กูญา บอฮ เดะ ปือฌารา. 19 ตาปี มาลับ อีตู อาดา ฮูลู-บาลัก นะ ตูฮัด มาแรฮ ซืออูรัก. ญา บูกา ปีตู ปือฌารา ปลือปัซ กูญา มือเลา จะ 20 "ปี เลอ บือดีรี เดะ โซะ รูมัฮ มือญือมัฮ ตูฮัด. มือญาเระ บรี ตาฮู เลอ ปาซัน ลาฆู ฮีโดะ บารู อีนี ซือมูฮา กะ ลูมอฮ ซือมียา บาญะ." 21 กะฆีเตอ โกะ ปือญูโรฮ บูวัจ ตูโรจ. ตานา จรัฮ ปาฆี ดัฮ กูญา มาโซะ ปี กะ รูมัฮ มือญือมัฮ ตูฮัด อาฌัยํ ปือมือเลา นะ ตูฮัด. ตาปี โซะ กือปาลา ซามี ฌางัน ลูมอฮ นะ ญา เตอ กูญา ปาเงน โกะ ลูมอฮ บือกีรา ฌางัน ลูมอฮ อูรัก ตูฮา นะ นังฆรี ยิว ซือมูฮา มาแรฮ บือมุน บือกีรา. กูญา ปือซัด บรี ปี อาเมด โกะ ปือญูโรฮ บือมาแรฮ เดะ ปือฌารา. 22 ตาปี ตานา โกะ ตามาตา รอจ กะ ปือฌารา ดัฮ ฮอย ซาปา เดะ ดาลับ. กะฆีเตอ กูญา บาลิ มาแรฮ บีตาฮู จะ 23 "กามี ปี รอจ กะ ปือฌารา ลีฮัจ จะ ปีตู ตูโดก กือมัซ ดัฮ. โกะ ซือมียา ตูงู โปด อาดา บือดีรี เดะ ปีตู. ตาปี ตานา บูกา ปีตู ดัฮ ฮอย ซาปา โซะ ดาลับ เลอ." 24 ตานา กือปาลา ลูมอฮ ฌาฆา รูมัฮ มือญือมัฮ ตูฮัด ฌางัน ลูมอฮ ซามี ซัยํ-บือซัยํ กูญา ดืองัยํ ลาฆู กะฆีนี กูญา ปือและ-ฮาตี ซูโงฮ อีงัจ จะ นะ ฌาดี กะฮามี. 25 ซัจ อาดา ซือมียา ซืออูรัก มาแรฮ มือเลา จะ "นี เลอ โกะ ซือมียา อีตู นู กาเญา บอฮ เดะ ปือฌารา อาดา เดะ รูมัฮ มือญือมัฮ ตูฮัด เลอ. กูญา ตืองัฮ อาฌัยํ ลูมอฮ ซือมียา บาญะ." 26 กะฆีเตอ กือปาลา ลูมอฮ ฌาฆา ฌางัน ลูมอฮ ตามาตา นะ ญา กูญา ปี อาเมด โกะ ปือญูโรฮ บือมาแรฮ. ตาปี กูญา บูวัจ ซืองะๆ ตาโกจ-จะ ลูมอฮ ซือมียา บาญะ นะ ลีปัยํ บาตู กือนา เดะ กูญา. 27 กูญา บาวา โกะ ปือญูโรฮ บือมาแรฮ ดัฮ บรี กูญา บือดีรี เดะ ตืองัฮ ลูมอฮ ซือมียา บือมุน บือกีรา. นู กือปาลา ซามี ญา ตาญา กูญา จะ 28 "กามี ปือซัด กาเญา กือมัซๆ บลารัก ตีเมา บรี กาเญา อาฌัยํ ปือนามา อีนี. ตาปี กาเญา อาฌัยํ บาญะ ดัฮ บรี นังฆรี เยรูซาเลม ปือนอฮ ฌางัน ลาฆู อีนี. กาเญา อีงัจ นะ บรี ลาฆู นู ซือมียา อีนี กือนา บูนอฮ ดัฮ ฌาดี ซาลัฮ นะ กามี เฆอ?" 29 ตาปี เปโตร ฌางัน โกะ ปือญูโรฮ อาซิก กูญา ตีกัฮ จะ "บูกัด กีตา กือนา ตูโรจ กะ ซือมียา ตาปี กือนา ตูโรจ กะ ตูฮัด เดะ อาตัซ เตอ เลอ. 30 กาเญา บูนอฮ เยซู ดัฮ กาจิก ญา บรี ฆาโตก เดะ ปูโฮด กายู. ตาปี ตูฮัด นะ ลูมอฮ บีลาแก นะ กีตา ญา อาเกะ เยซู บรี ฮีโดะ ปาเระ เดะ มาตี ดัฮ. 31 ญา ตืองะ เยซู บรี ดูโดะ เดะ โซะ กานัน นะ ญา บรี ฌาดี ซือมียา นู บาวา โกะ อูมัจ-ซือมียา ฌาดี ซือมียา นู ตูโลก กูญา บรี ฮีโดะ ลือปัซ บาฌิ. ญา เตอ นู นะ บรี ลูมอฮ บักซา อิซราเอน บราเลฮ-ฮาตี นะ อาเกะ ดูซา นะ กูญา. 32 กามี อีนี เลอ ฌาดี ซะซี เดะ ลาฆู กะฆีเตอ. ซือมืองัจ นะ ตูฮัด นู ตูฮัด บรี กะ ซือมียา นู ตูโรจ ญา ญา โปด ฌาดี ซะซี บือซามา ฌูฆา." กูญา จะ. 33 ตานา โกะ ซือมียา บือมุน บือกีรา ดืองัยํ ลาฆู อีนี กูญา มูซัยํ โตระ ปาคัจ อีงัจ นะ บูนอฮ โกะ ปือญูโรฮ. 34 ตาปี อาดา ซืออูรัก ปือนามา จะ ฆามาลีเอน. ญา เตอ ฌาดี ซือมียา เดะ ลูมอฮ ฟาริซี ฌาดี ซือมียา อาฌัยํ ปือมือเลา นะ ตูฮัด. ลูมอฮ ซือมียา บาญะ มือโอจ กะ ญา. ญา บือดีรี เดะ ตืองัฮ ลูมอฮ บือมุน บือกีรา ซูโรฮ บาวา โกะ ปือญูโรฮ ปี กะ โซะ ลูวัยํ ซือฌูรุซ. 35 ญา มือเลา ฌางัน ลูมอฮ ซือมียา บือกีรา จะ "ลูมอฮ ซือมียา บักซา อิซราเอน เออ กือนา ฌาฆา บรี บาฌิ นะ บูวัจ กะฮามี ฌางัน โกะ ซือมียา อีนี. 36 ดูลู เตอ อาดา ซืออูรัก ปือนามา จะ ทูดา นู มือเลา จะ อีซี ญา ฌาดี ซือมียา ซัยํ-บือซัยํ. อาดา ลูมอฮ ซือมียา ปัจ ราตุซ อูรัก นู ตูโรจ กะ ญา. ตาปี ญา กือนา บูนอฮ ดัฮ. โกะ ลูมอฮ นะ ญา โปด จัฮ-บือลัฮ ปี ฮาบิฮ. ลาฆู เตด ฌาดี นามา เลอ. 37 ลือปัซ อีตู กาลา อาดา ลาฆู มาโซะ ปือนามา เดะ ซูรัจ นะ ราฌา เตอ อาดา ยูดา ซือมียา นังฆรี ฆาลิลี. ญา บาวา ซือมียา บาญะ บือปี ตูโรจ กะ ญา. ตาปี ญา โปด มาตี. ลูมอฮ ซือมียา นู ตูโรจ กะ ญา กูญา จัฮ-บือลัฮ ซือมูฮา ฌูฆา. 38 กะฆีเตอ เลอ เดะ ลาฆู อีนี กู มือเลา จะ ฌางัน บูวัจ นามา กะ โกะ ซือมียา อีนี. บือบียัยํ กูญา เลอ. ดัฮ ปาซัน อีนี นู ปือบูวัจ นะ กูญา ฌาดี ลาฆู นะ ซือมียา ญา นะ เตด ฌาดี นามา. 39 ตาปี ดัฮ ฌาดี ลาฆู นะ ตูฮัด กาเญา นะ ฌือนัฮ เดะ กูญา ฮอย เตด บือเลฮ เลอ นะ ฌาดี ซือรูปา กาเญา นะ บลาวัด ฌางัน ตูฮัด เดะ อาตัซ เลอ." ญา จะ. โกะ ลูมอฮ ซือมียา บือกีรา กูญา ตูโรจ กะ ปือมือเลา นะ ฆามาลีเอน. 40 กูญา บลาโลก โกะ ปือญูโรฮ บรี มาโซะ บรี กูญา กือนา รือเปะ ปือซัด กะ กูญา จะ "ฌางัน มือเลา มานามา โปด เดะ นามา นะ เยซู เลอ." กะฆีเตอ กูญา ปลือปัซ โกะ ปือญูโรฮ ปี ดัฮ. 41 โกะ ปือญูโรฮ ตรือเบะ เดะ ตือปัจ บือมุน บือกีรา. กูญา ซูกา-ฮาตี บาญะ ซาเบะ ตูฮัด อีงัจ กะ กูญา บาฌิ ดัฮ บรี กูญา นะ กือนา ซูซัฮ กือนา ลาฆู ปือญือและ กรานา ปือนามา นะ เยซู. 42 บีลัก อารี กูญา เตด บราดู อาฌัยํ. เดะ รูมัฮ มือญือมัฮ ตูฮัด เดะ รูมัฮ ซือมียา ฌูฆา กูญา มือญาเระ บรีตา นู บาฌิ นู เยซู ฌาดี ราฌา นู บรี ซือลามัจ นู ตูฮัด ซูโรฮ มาแรฮ ดัฮ.
1 เดะ กาลา อีตู ลูมอฮ มูเระ บือตามัฮ บาญะ. ลูมอฮ ยิว นู มือเลา บาซา กรีก กูญา เตด ซือนัง-ฮาตี ฌางัน ลูมอฮ ยิว นู มือเลา บาซา ฮีบรู ปาซัน ลาฆู ฮาฆิ บารัก มากัด. กูญา บือซูงุจ มือเลา จะ "วะตู ฮาฆิ บารัก มากัด บีลัก อารี เตอ ลูมอฮ นีบีนี ฌานา นะ กามี บือเลฮ ดีกิ เดะ กูญา." 2 โกะ ปือญูโรฮ ดูวา-บือลัซ อูรัก กูญา ปาเงน ลูมอฮ มูเระ ซือมูฮา บรี บือมุน บือซามา มือเลา ฌางัน กูญา จะ "เตด ปาโตจ นู กามี นะ ตีงัน ลาฆู อาฌัยํ ปือมือเลา นะ ตูฮัด บีดา นะ ตูโลก บือกรือฌา ฮาฆิ บารัก มากัด. 3 กะฆีเตอ ดีบราดี เออ กาเญา กือนา ปีเลฮ ตูโฌฮ อูรัก เดะ ตืองัฮ กาเญา ฌาดี ซือมียา อาดา ปือนามา นู บาฌิ นู ปือนอฮ ฌางัน ซือมืองัจ นะ ตูฮัด ปือนอฮ ฌางัน อากัน. กามี นะ ตืองะ โกะ ซือมียา อีตู บรี บือบือลา ลาฆู อีนี. 4 ตาปี กามี นะ ซือมาตา ซรัฮ ญาวา กะ ลาฆู บือซาโวจ ฌางัน ลาฆู อาฌัยํ ปือมือเลา นะ ตูฮัด." 5 ลูมอฮ ซือมียา บาญะ ซูกา นู กูญา มือเลา กะฆีเตอ. กูญา ปีเลฮ ซือตีเฟน นู ปือนอฮ ฌางัน ลาฆู ปือจายา ปือนอฮ ฌางัน ซือมืองัจ นะ ตูฮัด. อาดา ฌูฆา ฟีลิบ โปรโครัด นีกาโน ตีโมน ปาเมนัด ฌางัน นีโกเลา ซือมียา นังฆรี อันตีโยก นู ฌาดี ซือมียา มาโซะ ลาฆู ยิว ดัฮ. 6 กูญา บรี ตูโฌฮ อูรัก อีตู บือดีรี โซะ ฮึลด ลูมอฮ ปือญูโรฮ. โกะ ปือญูโรฮ บือซาโวจ ตืองะ ตางัน เดะ กูญา อีตู. 7 กะฆีเตอ ปือมือเลา นะ ตูฮัด กือจัย ปี ราตา. อาดา ลูมอฮ มูเระ บือตามัฮ บาญะ เดะ นังฆรี เยรูซาเลม. อาดา ฌูฆา โกะ ซามี บาญะ อูรัก นู ตูโรจ ลาฆู ปือจายา ซามา. 8 กะฆีเตอ ซือตีเฟน ฌาดี ซือมียา นู ตูฮัด ฮาลัย บรี ซือลามัจ ปือนอฮ ดัฮ. ญา มือฆัฮ โตระ บูวัจ ปือนานา ซีดี นู บือซัยํ นู ปือและ ซูโงฮ เดะ ตืองัฮ โกะ ซือมียา บาญะ. 9 ตาปี อาดา โกะ ซือมียา มาแรฮ บลาวัด บือตือฆัฮ ฌางัน ญา. กูญา ฌาดี ซือมียา เดะ รูมัฮ บือมุน นู บลาโลก จะ รูมัฮ บือมุน นะ ลูมอฮ ปราโซฮ นู ลือปัซ ดัฮ. อาดา ซือมียา นังฆรี ซัยรีน นังฆรี อาเลกซันดรียา ฌางัน นังฆรี ซิลีเซีย นังฆรี เอเซีย ฌูฆา. กูญา ปาคัจ มาแรฮ บือตือฆัฮ ฌางัน ซือตีเฟน. 10 ตาปี ซือมืองัจ นะ ตูฮัด ตูโลก ซือตีเฟน บรี ปือมือเลา นะ ญา ปานัย อากัน. กะฆีเตอ กูญา อีตู นะ ฌือนัฮ เตด บือเลฮ. 11 กูญา จูรี ซูวะ ดูเวะ กะ ซือมียา ซือตืองัฮ บรี กูญา นะ มือเลา จะ "กามี ดืองัยํ ซือมียา อีนี มือเลา ตะอารัฮ กะ มูซา มือเลา ตะอารัฮ กะ ตูฮัด เดะ อาตัซ ฌูฆา." 12 กะฆีเตอ กูญา อาโจบ ลูมอฮ ซือมียา บาญะ ฌางัน โกะ อูรัก ตูฮา ฌางัน ลูมอฮ ซือมียา อาฌัยํ ลาฆู ปือมือซัด นะ ตูฮัด บรี ฆรูมง มาแรฮ รีฆะ ซือตีเฟน บาวา ปี กะ ตือปัจ บือมุน บือกีรา. 13 กูญา บรี ซือมียา ฌาดี ซะซี มือเลา มืออูปัย จะ "ซือมียา อีนี ซือมาตา มือเลา อูจะ กะ รูมัฮ มือญือมัฮ ตูฮัด อีนี มือเลา อูจะ กะ ปือมือเลา ฮูโกบ นะ มูซา ฌูฆา. 14 กามี ดืองัยํ ญา มือเลา จะ เยซู ซือมียา ตูโปะ นาซาเรด เตอ นะ ปรูโตฮ รูมัฮ มือญือมัฮ อีนี นะ ซาเลด โกะ ฮาดัจ ฮูโกบ นู มูซา บือเลฮ กีเรบ บรี กะ กีตา ฌูฆา." 15 โกะ ลูมอฮ บือมุน บือกีรา นู ดูโดะ เปะ อีตู ซือมูฮา กูญา ปาคัจ ตีญูง ซือตีเฟน ลีฮัจ จะ มูคา นะ ญา จรัฮ บือซายา ซือรูปา มูคา นะ ฮูลู-บาลัก นะ ตูฮัด.
1 กะฆีเตอ กือปาลา ซามี ญา ตาญา ซือตีเฟน จะ "ลาฆู อีนี ซูโงฮ เฆอ?" 2 ซือตีเฟน ตีกัฮ จะ "โกะ ดีบราดี ฌางัน โกะ อาโปก ซือมูฮา เออ มือนีงัย เลอ. ตูฮัด นู บือซรี บือซายา เตอ ญา มาแรฮ ปลีฮัจ กะ อับราฮัม นู บีลาแก นะ กีตา. กาลา อีตู อับราฮัม อาดา ดูโดะ ลาฆี เดะ นังฆรี เมโซโปเตเมีย เตด บือเลฮ ปี ดูโดะ เดะ นังฆรี ฮาราน ลาฆี. 3 ตูฮัด มือเลา ฌางัน ญา จะ 'เกา กือนา ตีงัน นังฆรี นะ เกา ตีงัน โกะ นะบรานะ นะ เกา กือนา ปี ดูโดะ เดะ นังฆรี อาซิก นู กู นะ ตูโญะ บรี กะ เกา.' ตูฮัด ญา จะ. 4 "กะฆีเตอ อับราฮัม ตรือเบะ ปี เดะ นังฆรี นะ บักซา คานเดีย ปี ดูโดะ เดะ นังฆรี ฮาราน. กาลา อาโปก เดะ ญา มาตี ดัฮ ตูฮัด บรี ญา ตรือเบะ ดาตัก เดะ เปะ อีตู มาแรฮ ดูโดะ เดะ นังฆรี ตือปัจ กาเญา ดูโดะ บีลัก อารี อีนี. 5 "ตาปี ตูฮัด เตด บือเลฮ บรี อับราฮัม อาดา ตือปัจ ดูโดะ นามา ลาลู เดะ นังฆรี อีนี. มีเซ-จะ บีดา ตาปะ กากี นะ กาจะ โปด ฮอย. อับราฮัม ญา ฮอย นานะ ซืออูรัก โปด ตาปี ตูฮัด บือฌาญี ฌางัน ญา จะ นังฆรี อีนี นะ ฌาดี ปือซากา นะ ญา ฌางัน โกะ อานะ กือมอน เดะ ญา. 6 ตูฮัด มือเลา กะฆีนี จะ 'โกะ อานะ กือมอน นะ เกา นะ ปี ดูโดะ เดะ นังฆรี อาซิก. ซือมียา นังฆรี อีตู นะ บูวัจ บรี กูญา ฌาดี ปราโซฮ นะ บรี กูญา ดูโดะ ซูซัฮ ฮาฌะ โตระ ตือดะ ปัจ ราตุซ ตาโฮด. 7 กู นะ ฮูโกบ โกะ ซือมียา เดะ นังฆรี อีตู นู ตือกัด กูญา บรี ฌาดี ปราโซฮ.' ตูฮัด มือเลา ปูลัก จะ 'ลือปัซ อีตู กูญา นะ ตรือเบะ เดะ นังฆรี อีตู นะ มาแรฮ มือญือมัฮ กะ กู ตือปัจ อีนี เลอ.' ตูฮัด ญา จะ. 8 "กะฆีเตอ ตูฮัด บรี อับราฮัม บูวัจ ลาฆู กรัจ ฌาดี ปือนานา นะ ปือมือเลา บือปาคัจ นะ ตูฮัด. กะฆีเตอ อับราฮัม ฌาดี ปะ นะ อีซัก บรี ญา ซาโมจ ลาฆู กรัจ อีตู เดะ อารี ลาปัด. กะฆีเตอ ฌูฆา อีซัก บูวัจ ลาฆู กรัจ กะ นานะ นะ ญา ยาโกบ. ยาโกบ โปด บูวัจ กะฆีเตอ กะ โกะ นานะ กีลากี นะ ญา นู ฌาดี โกะ บีลาแก นะ ลูมอฮ กีตา ดูวา-บือลัซ อูรัก. 9 "ตาปี ลูมอฮ บีลาแก อีตู บือชี ดือกี กะ โยเซบ อาดี เดะ กูญา. กูญา ฌูวัน ญา บรี ฌาดี ปราโซฮ เดะ นังฆรี อียิบ. ตาปี ตูฮัด เดะ อาตัซ ญา ดูโดะ บือซามา ฌางัน โยเซบ. 10 ญา ตูโลก บรี ญา ลือปัซ เดะ ลาฆู ซูซัฮ ซือมูฮา บูวัจ บรี ญา ปานัย อากัน. กะฆีเตอ ราฌา ฟาโร นู ราฌา นะ นังฆรี อียิบ ญา ซูกา กะ โยเซบ. ญา ตืองะ บรี ฌาดี ซือมียา บือบือลา นังฆรี อียิบ ฌาฆา ฮัจ-ลีฮัจ บาลัย นะ ราฌา ซือมูฮา. 11 ฌาดี วะตู อาดา บารัก มากัด ปายัฮ เดะ นังฆรี อียิบ เดะ นังฆรี คานาอัน โปด. ฮอย บารัก มากัด ลาลู บูวัจ บรี โกะ ซือมียา ซูซัฮ ฮาฌะ โตระ. กะฆีเตอ ลูมอฮ บีลาแก นะ กีตา ฮอย บารัก มากัด ฌูฆา. 12 วะตู ยาโกบ ดืองัยํ จะ อาดา บรัซ เดะ นังฆรี อียิบ กะฆีเตอ ญา ซูโรฮ ลูมอฮ บีลาแก นะ กีตา บรี กูญา ปี วะตู ลามูลา อีตู. 13 ตานา กูญา ปี มาโซะ กะ ดูวา กาลี ดัฮ เตอ โยเซบ ญา บูวัจ บรี โกะ ดีบราดี กราลา จะ ฌาดี อีซี ญา เลอ. กะฆีเตอ ราฌา ฟาโร ญา บือเลฮ บือกราลา ฌางัน โกะ ดีบราดี นะ ญา ฌูฆา. 14 โยเซบ บาอาฌะ ยาโกบ อาโปก เดะ ญา ฌางัน โกะ นะบรานะ นะ ญา ตูโฌฮ-ปูโลฮ ลีมา อูรัก ซือมูฮา บรี มาแรฮ ดูโดะ เดะ นังฆรี อียิบ. 15 "กะฆีเตอ ยาโกบ ปี ดูโดะ เปะ อีตู. ญา เตอ ฌางัน ลูมอฮ บีลาแก นะ กีตา ซือมูฮา กูญา มาตี เปะ อีตู ดัฮ. 16 บาดัด นะ กูญา กือนา บาวา ปี ตานัม เดะ ตูโปะ เซเคม ดัฮ ตานัม เดะ ฆูฮา นู อับราฮัม บือลี เดะ โกะ บือแนฮ นะ ฮามอ ตือปัจ อีตู ฌาดี รือฆา ดูเวะ ปีระ. 17 "กาลา ซรือปะ นะ รอจ วะตู ดัฮ นู ลาฆู ตูฮัด บือฌาญี ฌางัน อับราฮัม อีตู นะ ฌาดี รือมัก ดัฮ เตอ ลูมอฮ บักซา อิซราเอน บือตามัฮ พรัด บาญะ เดะ นังฆรี อียิบ. 18 ตือกาลา อีตู อาดา ราฌา บารู เดะ นังฆรี อียิบ ฌาดี ซือมียา นู เตด ตาฮู ลาฆู นะ โยเซบ. 19 ราฌา อีตู ญา บูวัจ ลาฆู บาอากัน กีจอฮ ลูมอฮ บักซา นะ กีตา ญา ฮาตี ฌาฮัจ ซูโรฮ โกะ บีลาแก นะ กีตา. บรี ตีงัน โกะ นานะ ดือมิ นะ กูญา โซะ ลูวัยํ บรี มาตี. 20 "กาลา อีตู เลอ มูซา ลือปัซ ดูโดะ เดะ อาปี. ญา ฌาดี นานะ รูปา บือฆาจะ. กะฆีเตอ เอด อาโปก บือบือลา ญา เดะ รูมัฮ ฆือนะ ตีฆา บูลัด ดัฮ. 21 กาลา กูญา ตีงัน โซะ ลูวัยํ นานะ นีบีนี นะ ราฌา ฟาโร ญา ซาโมจ บือบือลา ซือรูปา บือกะ ฌาดี นานะ นะ ญา. 22 มูซา ญา บลาฌัยํ ปานัย เดะ ลาฆู นะ บักซา อียิบ ซือมูฮา ราตา. ปือมือเลา นะ ญา ปือบูวัจ นะ ญา มือฆัฮ ซูโงฮ เลอ. 23 "ตาปี กาลา มูซา อูมอยํ ปัจ-ปูโลฮ ตาโฮด ดัฮ ญา อีงัจ เดะ ฮาตี นะ ปี ฌือเงาะ ลีฮัจ ลูมอฮ นะบรานะ นะ ญา ฌาดี ลูมอฮ บักซา อิซราเอน. 24 ญา ลีฮัจ บือฆารี ซือมียา บักซา อียิบ ซืออูรัก ตืองัฮ กาเตาะ ซือมียา บักซา อิซราเอน ซืออูรัก. กะฆีเตอ มูซา ญา บูนอฮ บาลัซ ซือมียา บักซา อียิบ อีตู. 25 ญา อีงัจ จะ โกะ บักซา นะ ญา นะ ตาฮู นู ตูฮัด ซูโรฮ ญา บรี ฌาดี ซือมียา ตูโลก กูญา บรี ลือปัซ. ตาปี ลาฆู อีตู เตด บือเลฮ มาโซะ เดะ ฮาตี นะ กูญา. 26 จรัฮ ปาฆี ญา มาแรฮ ดาปัจ ซือมียา บักซา อิซราเอน ดูวา อูรัก ตืองัฮ บือตือฆัฮ บือกาเตาะ. ญา อีงัจ นะ บรี กูญา บาฌิๆ ปาเระ ญา มือเลา จะ 'นะบรานะ เออ กาเญา ฌาดี ดีบราดี เลอ. บูวัจ นามา ปะ กาเญา บือตือฆัฮ บือปาซัน กะฆีนี?' 27 "ตาปี ซือมียา นู บูวัจ กาวัด ญา ตูละ มูซา มือเลา จะ 'ซาปา ตืองะ เกา บรี ฌาดี ซือมียา บือบือลา กามี ซือมียา กรัจ ฮูโกบ กามี? 28 เกา อีงัจ นะ บูนอฮ กู ซือรูปา บือกะ เกา บูนอฮ อูรัก อียิบ อีตู กือมารี เฆอ?' 29 "ตานา มูซา ดืองัยํ ปือมือเลา อีตู ญา ลารี ปี ดูโดะ เดะ นังฆรี มีเดียน. เปะ อีตู ญา บือเลฮ นานะ กีลากี ดูวา อูรัก. 30 "ลือปัซ ปัจ-ปูโลฮ ตาโฮด ดัฮ เดะ ฮูตัด บูเกะ ซีนัย เตอ อาดา ฮูลู-บาลัก นะ ตูฮัด มาแรฮ ปลีฮัจ กะ มูซา เดะ รือโปะ กายู นู บือญาลา อาปี. 31 ตานา มูซา ลีฮัจ ดัฮ ญา ปือและ-ฮาตี ญา อาเลฮ ปี ลีฮัจ ดาปิกๆ. อาดา ซูวารา นะ ตูฮัด มือเลา จะ 32 'กู นี เลอ ฌาดี ตูฮัด บือซัยํ เดะ อาตัซ ตูฮัด นะ ลูมอฮ บีลาแก นะ เกา ฌาดี ตูฮัด นะ อับราฮัม นะ อีซัก นะ ยาโกบ ฌูฆา.' "กะฆีเตอ มูซา ญา ตาโกจ ยู ญาวา กือตัยํ เตด บรานี นะ ลีฮัจ. 33 ตูฮัด มือเลา ฌางัน ญา จะ 'กือนา อูฆัย ปะตาปะ นะ เกา เลอ ซาเบะ นู เกา บือดีรี อีตู เตอ ฌาดี ตือปัจ นู จรัฮ บาฌิ นะ กู เลอ. 34 ซูโงฮ กู บือเลฮ ลีฮัจ ลูมอฮ ซือมียา นะ กู เดะ นังฆรี อียิบ นู ลูมอฮ บักซา อียิบ บูวัจ กูญา. กู บือเลฮ ดืองัยํ นู กูญา อีตู กือนา ซูซัฮ มือรายู ดัฮ. กะฆีเตอ กู ตูโรด มาแรฮ นะ ตูโลก กูญา บรี ลือปัซ. วะตู อีนี เลอ โฌฮ มาแรฮ เลอ. กู นะ ซูโรฮ เกา ปี กะ นังฆรี อียิบ.' ตูฮัด ญา จะ. 35 "กะฆีเตอ มูซา นี เลอ นู กูญา บือเลฮ กีปัซ มือเลา จะ 'ซาปา ตืองะ เกา บรี ฌาดี ซือมียา บือบือลา กามี ซือมียา กรัจ ฮูโกบ กามี?' ญา เตอ เลอ นู ตูฮัด เดะ อาตัซ บือเลฮ บรี อาดา ฮูลู-บาลัก มาแรฮ ปลีฮัจ กะ ญา เดะ รือโปะ กายู อีตู เตอ บรี ตืองะ ญา ฌาดี ซือมียา บือบือลา กูญา ซือมียา ตูโลก กูญา บรี ลือปัซ. 36 ญา เตอ เลอ นู บือเลฮ บาวา ลูมอฮ อิซราเอน บรี ลือปัซ เดะ นังฆรี อียิบ. ญา บูวัจ ปือนานา ซีดี นู ปือและ ซูโงฮ เดะ นังฆรี อียิบ เตอ เดะ ลาโวจ มีรัฮ เตอ เดะ ปาดัก ตานัฮ ตูโฮยํ นู ลือฆา โปด กือมูฮา ปัจ-ปูโลฮ ตาโฮด ดัฮ. 37 มูซา นี เลอ ฌาดี ซือมียา นู บือเลฮ มือญาเระ กะ ลูมอฮ บักซา อิซราเอน จะ 'ตูฮัด บือซัยํ เดะ อาตัซ นะ ตืองะ ซือมียา ซืออูรัก เดะ นะบรานะ นะ กาเญา นะ บรี ญา ฌาดี ซือมียา ตูโดฮ ลาฆู นะ ตูฮัด ซือรูปา บือกะ กู เลอ.' ญา จะ. 38 "มูซา อีนี เลอ นู อาดา บือซามา ฌางัน ลูมอฮ ซือมียา นะ บักซา อิซราเอน เดะ ปาดัก ตานัฮ ตูโฮยํ นู ลือฆา. ญา อาดา ฌางัน ฮูลู-บาลัก นะ ตูฮัด นู มือเลา ฌางัน ญา เดะ บูเกะ ซีนัย. ญา อาดา ฌูฆา ฌางัน โกะ บีลาแก นะ กีตา. ญา เตอ นู ซาโมจ โกะ ปือมือเลา นะ ตูฮัด ฌาดี ปือมือเลา นู อาดา กือฌะ บีดา นะ บรี กะ กีตา. 39 มูซา อีนี เตอ ลูมอฮ บีลาแก นะ กีตา เตด ยอม มือนีงัย. กูญา กีปัซ ญา. เดะ ฮาตี นะ กูญา กูญา ซูกา นะ บาลิ ปาเระ ปี กะ นังฆรี อียิบ. 40 กูญา มือเลา ฌางัน อาโรน จะ 'บรี เกา บูวัจ บราลา บีดา กีตา นู นะ บาวา กีตา ปี โซะ ฮึลด. ซาเบะ มูซา อีนี นู บาวา กีตา ตรือเบะ เดะ นังฆรี อียิบ ญา ฌาดี กะฮามี กีตา เตด ตาฮู.' กูญา จะ. 41 "กาลา อีตู กูญา บูวัจ บราลา ฌาดี ซือรูปา อานะ ลือมู. กูญา อาเมด บารัก มาแรฮ มือนืองะ มือญือมัฮ กะ บราลา อีตู. กูญา บรามัย ซูกา-ฮาตี เดะ บือนา นู กูญา บูวัจ ตะอาซิก. 42 กะฆีเตอ ตูฮัด ญา อาเลฮ มืองือละ ปี เดะ กูญา ปลือปัซ บรี กูญา มือญือมัฮ กะ ลูมอฮ บีตัก เดะ โซะ ลาแงะ บือกะ นู อาดา ฆาแรฮ ดัฮ เดะ ซูรัจ นะ ซือมียา ตูโดฮ ลาฆู นะ ตูฮัด นู จะ 'โอ ลูมอฮ บักซา อิซราเอน เออ รอจ ปัจ-ปูโลฮ ตาโฮด เดะ ปาดัก ตานัฮ ตูโฮยํ นู ลือฆา กาเญา บือเลฮ บูนอฮ โกะ บือนาตัก บีดา มือนืองะ มือญือมัฮ กะ กู เฆอ? บูกัด กะ กู เลอ. 43 ตาปี กาเญา บือเลฮ อาเกะ บาวา บาลัย นะ บราลา โมโลก ฌางัน ฆามัยํ บีตัก นะ บราลา เรฟาน ฌาดี บราลา นู กาเญา บูวัจ ตะอาซิก บีดา นะ มาแรฮ มือญือมัฮ. กะฆีเตอ กู นะ กีกัย กาเญา ปี ดูโดะ ลือปัซ เดะ นังฆรี บาบิโลน เลอ.' ตูฮัด ญา จะ. 44 "เดะ ปาดัก ตานัฮ ตูโฮยํ นู ลือฆา เตอ ลูมอฮ บีลาแก นะ กีตา กูญา อาดา บาลัย กาเยด ตือปัจ มือญือมัฮ กะ ตูฮัด บือกะ ปือมือเลา บือปาคัจ นะ ญา. บาลัย อีตู กูญา บูวัจ ดัฮ ซือรูปา บือกะ นู ตูฮัด ปือซัด ฌางัน มูซา บรี บูวัจ บือกะ จูตอ นู ญา ลีฮัจ ดัฮ. 45 โกะ นานะ นะ กูญา ซาโมจ บาลัย อีตู อาโกจ ปี ตูโรจ โยซูวา. กูญา มาโซะ ปี กะ นังฆรี นะ ซือมียา บักซา อาซิก นู ตูฮัด โปรฮ โซะ ฮึลด กูญา. บาลัย อีตู อาดา ฌูฆา ตือดะ รอจ กะ วะตู นะ ราฌา ดาวิด. 46 "ราฌา ดาวิด ญา กือนา เดะ ฮาตี นะ ตูฮัด เตอ กะฆีเตอ ญา มีตา นะ บูวัจ บาลัย ตือปัจ ดูโดะ บีดา ตูฮัด นะ ยาโกบ. 47 ตาปี ราฌา ซะโลโม ฌาดี ซือมียา นู บูวัจ บาลัย นะ ตูฮัด อีตู. 48 ตาปี ตูฮัด นู บือซัยํ เดะ อาตัซ ญา เตด ดูโดะ เดะ รูมัฮ นู ตางัน นะ ซือมียา บูวัจ ดัฮ บือกะ นู ซือมียา ตูโดฮ ลาฆู นะ ตูฮัด ซืออูรัก บือเลฮ มือเลา ปือมือเลา นะ ตูฮัด นู จะ 49 'ลาแงะ ฌาดี ตือปัจ ดูโดะ นะ กู. ดือนียา โปด ฌาดี บือกะ ปาปัด ซาโมจ ตาปะ กากี นะ กู. กาเญา นะ บูวัจ รูมัฮ กะฮามี เลอ บีดา กู นะ ดูโดะ? เปะ ดีฮา ฌาดี ตือปัจ บราดู ซือนัง นะ กู? 50 ฌาดี ตางัน นะ กู ตะอาซิก นู บือฌาดี บือนา อีนี ซือมูฮา บูกัด เฆอ?' ตูฮัด ญา จะ. 51 "โอ กาเญา บักซา บาตัฮ ฮาตี ตือฆัยํ ตือลีงา ตูลี เลอ. กาเญา กือตัก ซือมืองัจ นะ ตูฮัด ซือลาลู. ลูมอฮ บีลาแก นะ กาเญา บูวัจ กะฮามี กาเญา บูวัจ กะฆีเตอ ฌูฆา. 52 เดะ ลูมอฮ ซือมียา ตูโดฮ ลาฆู นะ ตูฮัด อาดา ซาปา นู ลูมอฮ บีลาแก นะ กาเญา เตด บือเลฮ ปรือกัด เฆอ? กูญา บูนอฮ โกะ ซือมียา อีตู นู มือญาเระ ดูลู ปาซัน ซือมียา บือกรือฌา นะ ตูฮัด นู บาฌิ-ตือปัจ นู นะ มาแรฮ เตอ. กาลา อีนี กาเญา บูวัจ กือบลากัก กะ ซือมียา อีตู บูนอฮ ญา ฮาบิฮ ดัฮ. 53 กาเญา เลอ นู ซาโมจ ปือมือเลา ฮูโกบ เดะ ฮูลู-บาลัก นะ ตูฮัด ตาปี เตด บือเลฮ บูวัจ ตูโรจ ดัฮ เลอ." ซือตีเฟน ญา จะ. 54 ตานา กูญา อีตู มือนีงัย ลาฆู อีนี ดัฮ กูญา บืออีเซด ซูโงฮ กาจิ ฆีฆี ฆือแญะ กะ ซือตีเฟน. 55 ตาปี ซือตีเฟน ญา ปือนอฮ ฌางัน ซือมืองัจ นะ ตูฮัด ญา ลางอฮ ปาลา กะ ลาแงะ ญา ลีฮัจ ตูฮัด นู บือซรี บือซายา อาดา ฌางัน เยซู บือดีรี โซะ กานัน นะ ญา. 56 กะฆีเตอ ญา มือเลา จะ "นี เลอ. กู ลีฮัจ ลาแงะ บูกา บือฆรือลก ดัฮ. อาดา นานะ นะ อูมัจ-ซือมียา ญา บือดีรี โซะ กานัน นะ ตูฮัด เดะ อาตัซ." 57 ตาปี โกะ ซือมียา ซือมูฮา มือเลา บือซูระ. กูญา กือจัจ ตือลีงา บลารี ปี มารือมา ซือมูฮา กะ ซือตีเฟน. 58 กูญา โปรฮ ญา ปี กะ ลูวัยํ นังฆรี. กูญา อาเมด บาตู ลีปัยํ บีดา นะ บูนอฮ ญา. โกะ ซือมียา นู ฌาดี ซะซี อาดู ซือตีเฟน กูญา ตีงัน บาฌู เดะ กากี นะ อูรัก มูดา ซืออูรัก ปือนามา จะ เซาโล. 59 กูญา อาเมด บาตู ลีปัยํ กะ ซือตีเฟน ซือรูโลยํ. โซะ ซือตีเฟน ญา ตืองัฮ มีตา เดะ ตูฮัด จะ "โอ ตูฮัด เยซู มีตา บรี ซาโมจ ซือมืองัจ นะ กู ฌูฆา." 60 ญา ตูกู ลูโตจ บือซูระ จะ "มีตา เดะ ตูฮัด ฌางัน ฮูโกบ กูญา กรานา ซาลัฮ อีนี." ซูดัฮ มือเลา กะฆีเตอ ญา มาตี ดัฮ.
1 นู กูญา บูนอฮ ซือตีเฟน เตอ เซาโล ญา ลีฮัจ จะ บาฌิ ฌูฆา เลอ. ตะเดะ อารี อีตู เลอ ลูมอฮ นะ ตูฮัด เดะ นังฆรี เยรูซาเลม กูญา กือนา ลาฆู ปรือกัด ซูซัฮ โตระ บูวัจ บรี กูญา ลารี จัฮ-บือลัฮ ปี กะ นังฆรี ยูเดีย นังฆรี ซะมาเรีย ราตา. ตาปี โกะ ปือญูโรฮ กูญา เตด ลารี. 2 อาดา ซือมียา นู ตูเฮะ กะ ตูฮัด กูญา บาวา บาดัด นะ ซือตีเฟน ปี ตานัม. กูญา มือนาแงฮ บือปาโตด ซูวารา บือซัยํ. 3 ตาปี โซะ เซาโล ญา ซูกา บรี ลูมอฮ นะ ตูฮัด บือนาซา ฮาบิฮ. ญา ปี มาโซะ รูมัฮ อีนี รูมัฮ อีตู รีฆะ โกะ กีลากี โกะ นีบีนี อีเระ บาวา บือปี บอฮ เดะ ปือฌารา. 4 โกะ ซือมียา นู จัฮ-บือลัฮ ดัฮ เตอ กูญา ปี ราตา มือญาเระ ปือมือเลา นะ ตูฮัด. 5 โซะ ฟีลิบ เตอ ญา ปี รอจ กะ นังฆรี ซะมาเรีย บรี กะ กูญา ตาฮู จะ เยซู ฌาดี ราฌา นู บรี ซือลามัจ. 6 ตานา โกะ ซือมียา บาญะ ดืองัยํ ปือมือเลา นะ ฟีลิบ ลีฮัจ ปือนานา ซีดี นู ญา บูวัจ ดัฮ กูญา ปาคัจ ซูกา นะ มือนีงัย กะ ญา. 7 ซือมียา บาญะ นู อาดา ฮาตู ตะอารัฮ บูวัจ บรี กูญา ราโซะ เตอ โกะ ฮาตู อีตู ตรือเบะ ฮาบิฮ ดัฮ บือซูระ ซูวารา บือซัยํ. ซือมียา บาญะ นู ฮอย อูรัจ นู จาเปะ เตอ ฟีลิบ บือบือลา บรี ลือฆา บาฌิ ดัฮ. 8 กะฆีเตอ ลูมอฮ ซือมียา เดะ นังฆรี อีตู กูญา ซูกา-ฮาตี บาญะ. 9 ตาปี เดะ นังฆรี อีตู อาดา ซือมียา ซืออูรัก ปือนามา จะ ซีโมน. ลามา ดัฮ ญา บือฆูรู อาเย-ลือมู มืองากู จะ อีซี ญา ฌาดี ซือมียา ซัยํ-บือซัยํ. ญา บูวัจ บรี โกะ ลูมอฮ ซะมาเรีย ปือและ-ฮาตี. 10 กูญา ซือมูฮา มือนีงัย กะ ญา ตะเดะ ซือมียา ฮาฌะ รอจ กะ ซือมียา กายา. กูญา ปาคัจ มือเลา จะ "ซือมียา อีนี ญา ฌาดี ซือมียา ซีดี เลอ. ญา อาดา ฆูรู นู กรัซ ซูโงฮ." 11 ลามา ดัฮ ญา บือฆูรู อาเย-ลือมู กะฆีเตอ บรี กูญา ปือและ-ฮาตี ซูโงฮ. กะฆีเตอ ลูมอฮ กูญา มือนีงัย ตูโรจ กะ ญา. 12 ฟีลิบ ญา มือญาเระ บรีตา นู บาฌิ ปาซัน ลาฆู นู ตูฮัด เดะ อาตัซ นะ บือบือลา ฌาดี ราฌา นะ อูมัจ-ซือมียา ปาซัน ลาฆู นะ เยซู ราฌา นู บรี ซือลามัจ อีตู. กะฆีเตอ อาดา บาญะ ซือมียา ปือจายา ซาโมจ ลาฆู ซือลับ เดะ อาเย. อาดา ฌางัน โกะ กีลากี ฌางัน โกะ นีบีนี ซามา. 13 ซีโมน ฌูฆา ญา ปือจายา ซาโมจ ลาฆู ซือลับ เดะ อาเย ดัฮ. ญา อาดา ดาปิก ฌางัน ฟีลิบ. ตานา ญา ลีฮัจ ฟีลิบ บูวัจ ปือนานา ซีดี นู มือฆัฮ ญา โปด ปือและ-ฮาตี ซูโงฮ เลอ. 14 กาลา โกะ ปือญูโรฮ เดะ นังฆรี เยรูซาเลม ดืองัยํ ดัฮ นู ลูมอฮ บักซา ซะมาเรีย ซาโมจ ปือมือเลา นะ ตูฮัด ดัฮ กูญา ซูโรฮ เปโตร ฌางัน โยฮัน ปี กะ ลูมอฮ กูญา. 15 ตานา กูญา ดูวา อูรัก รอจ ดัฮ กูญา บือซาโวจ บรี ลูมอฮ ซือมียา นะ ซาโมจ ซือมืองัจ นะ ตูฮัด. 16 ลูมอฮ กูญา บือเลฮ ซาโมจ ลาฆู ซือลับ เดะ อาเย ดัฮ เดะ นามา นะ ตูฮัด เยซู ตาปี ซือมืองัจ นะ ตูฮัด เตด บือเลฮ ตูโรด มาแรฮ กะ กูญา ลาฆี. 17 กะฆีเตอ โกะ ปือญูโรฮ ดูวา อูรัก กูญา ตืองะ ตางัน เดะ ญาวา นะ โกะ ซือมียา บูวัจ บรี กูญา ซาโมจ ซือมืองัจ นะ ตูฮัด. 18 โซะ ซีโมน ญา ลีฮัจ จะ นู โกะ ปือญูโรฮ ตืองะ ตางัน เดะ ลูมอฮ ซือมียา บูวัจ บรี กูญา ซาโมจ ซือมืองัจ นะ ตูฮัด. กะฆีเตอ ญา อาเมด ดูเวะ มาแรฮ นะ บรี กะ โกะ ปือญูโรฮ 19 มือเลา จะ "มีตา บรี กู นะ บือเลฮ บูวัจ ลาฆู อีนี. บรี กู ตืองะ ตางัน เดะ ซือมียา ดีฮา ญา นะ ซาโมจ ซือมืองัจ นะ ตูฮัด." ญา จะ. 20 ตาปี เปโตร มือเลา ฌางัน ซีโมน จะ "บรี เกา นะ ฌาฮานัม ฌางัน ดูเวะ นะ เกา ซามา. เกา อีงัจ นะ ซูโรฮ ดูเวะ บรี เกา บือเลฮ บูวัจ ลาฆู อีนี. ตาปี ลาฆู อีนี เตอ ตูฮัด เลอ นู ฮาลัย บรี. 21 เกา ฮอย บาฮาเฆด เดะ ลาฆู อีนี เลอ. ฮาตี นะ เกา เตด รือมัก ฌางัน ตูฮัด เลอ. 22 บราเลฮ-ฮาตี เลอ ตีงัน ลาฆู ฌาฮัจ นะ เกา นู อีนี. มีตา เลอ เดะ ตูฮัด บรี ญา อาเกะ ดูซา นู เกา อีงัจ เดะ ฮาตี ดัฮ. 23 กามี ลีฮัจ จะ เกา ซาเกะ-ฮาตี ดือกี กะ กาวัด เลอ. ดูซา นะ เกา บูวัจ บรี เกา ซือรูปา ลือกัจ เดะ ปือฌารา ดัฮ." เปโตร ญา จะ. 24 กะฆีเตอ ซีโมน ตีกัฮ กะ กูญา ดูวา อูรัก จะ "มีตา บือซาโวจ กะ ตูฮัด บือซัยํ บีดา กู เลอ บรี กู เตด กือนา ลาฆู นู เกา มือเลา ดัฮ." ญา จะ. 25 กาลา กูญา ดูวา อูรัก บือเลฮ มือเลา ฌาดี ซะซี มือญาเระ ปือมือเลา นะ ตูฮัด ดัฮ กูญา บาลิ ปี กะ นังฆรี เยรูซาเลม. เดะ ตืองัฮ ฌาลัด กูญา มือญาเระ บรีตา นู บาฌิ เดะ ตูโปะ บักซา ซะมาเรีย บาญะ ตือปัจ. 26 อาดา ฮูลู-บาลัก นะ ตูฮัด มือเลา กะ ฟีลิบ จะ "ตรือเบะ ปี เลอ โซะ บารัจ-ดายา รอจ กะ ฌาลัด นู มาแรฮ เดะ นังฆรี เยรูซาเลม ปี กะ นังฆรี ฆาซา." ญา จะ. ฌาลัด อีตู เตอ ฮอย ซาปา ซูโรฮ ดัฮ. 27 กะฆีเตอ ฟีลิบ ตรือเบะ ปี โซะ อีตู. นี เลอ เดะ ฌาลัด อีตู อาดา ซือมียา บักซา เอทีโอเปีย ซืออูรัก. ญา เตอ ฮูลู-บาลัก นะ ราฌา กันดาซี นู ฌาดี ราฌา นีบีนี นะ นังฆรี อีตู. ฮูลู-บาลัก อีตู ญา บือบือลา บือนา บารัก บรือฆา ซือมูฮา นะ ราฌา. ญา ซูดัฮ ปี มือญือมัฮ ตูฮัด เดะ นังฆรี เยรูซาเลม ดัฮ. 28 ญา ตืองัฮ ปาเระ กะ นังฆรี นะ ญา. ญา ดูโดะ เดะ ซือตรี กูดา บาจา ซูรัจ นะ อิซายา ซือมียา ตูโดฮ ลาฆู นะ ตูฮัด. 29 กะฆีเตอ ซือมืองัจ นะ ตูฮัด มือเลา กะ ฟีลิบ จะ "ปี ญาเปะ ซือตรี กูดา อีตู เลอ." 30 กะฆีเตอ ฟีลิบ บลารี ปี กะ ซือตรี ดืองัยํ ซือมียา อีตู ตืองัฮ บาจา ซูรัจ นะ อิซายา. กะฆีเตอ ฟีลิบ ตาญา จะ "นู เกา บาจา เตอ บือเลฮ มาโซะ เดะ ฮาตี เฆอ?" 31 ฮูลู-บาลัก อีตู ตีกัฮ จะ "นะ มาโซะ เดะ ฮาตี บือเลฮ กะฮามี? ฮอย ซือมียา ตูโลก มือญาเระ บรี กะ กู." กะฆีเตอ ญา บืออาฌะ ฟีลิบ ญาแญะ ซือตรี นะ ญา ดูโดะ บือซามา. 32 นี เลอ ญา ตืองัฮ บาจา ซูรัจ ปือมือเลา นะ ตูฮัด นู จะ "ญา เลอ ญา ซือรูปา กะ กาเมก นู อูรัก บาวา ปี บูนอฮ. ญา เลอ ซือรูปา กะ อานะ กาเมก บือดีรี ซืองะ โซะ ฮึลด อูรัก ฆูติก บูลู นะ ญา. ญา โปด เตด บือเลฮ มือเลา นามาๆ กะฆีเตอ ฌูฆา. 33 ญา เตอ กือนา กาจะ บรี รือนัฮ กือนา กรัจ ฮูโกบ เตด กือนา ลาฆู. ฮอย ซาปา นู บือเลฮ มือญาเระ ลาฆู อานะ กือมอน นะ ญา กรานา ญา กือนา กรัจ ตรือเบะ ตีเมา บรี อาดา ฮีโดะ เดะ ดือนียา ลาฆี." 34 กะฆีเตอ ฮูลู-บาลัก อีตู ตาญา ฟีลิบ จะ "ซือมียา ตูโดฮ ลาฆู นะ ตูฮัด อีนี มือเลา ปาซัน ลาฆู นะ ซาปา? ลาฆู ญาวา ตะอาซิก เฆอ? ลาฆู ซือมียา อาซิก เฆอ?" 35 กะฆีเตอ ฟีลิบ ญา ฮึนตะ เดะ ตือนอซ อีตู เตอ มือญาเระ บรีตา นู บาฌิ นะ เยซู กะ ฮูลู-บาลัก. 36 ตานา บือฌาลัด ปี กูญา รอจ กะ ตือปัจ อาดา อาเย. ฮูลู-บาลัก อีตู มือเลา จะ "ลีฮัจ เลอ อาดา อาเย. กู นะ ซาโมจ ลาฆู ซือลับ เดะ อาเย. อาดา นามา นะ กือตัก เฆอ?" 38 กะฆีเตอ ญา ซูโรฮ ซือตรี บราดู. กูญา ดูวา อูรัก ตูโรด บรือเมา เดะ อาเย. กะฆีเตอ ฟีลิบ เตอ ญา บูวัจ บรี ฮูลู-บาลัก อีตู ซือลับ เดะ อาเย ดัฮ. 39 ตานา กูญา ญาแญะ เดะ อาเย ซือมืองัจ นะ ตูฮัด บาวา ฟีลิบ บือปี. ฮูลู-บาลัก อีตู เตด บือฆารี ญา ดัฮ. กะฆีเตอ ฮูลู-บาลัก อีตู ญาแญะ ซือตรี ปี. ญา ซูกา-ฮาตี บาญะ เลอ. 40 ตาปี ฟีลิบ มาแรฮ รอจ กะ นังฆรี อาโซโต. ญา ปี ลาลู นังฆรี อีตู มือญาเระ บรีตา นู บาฌิ นะ ตูฮัด เดะ ตูโปะ ราตาๆ ยู รอจ กะ นังฆรี ซีซาเรีย.
1 เดะ วะตู อีตู เซาโล ญา มือเลา มืออารับ นู ญา ซูกา บูนอฮ ลูมอฮ มูเระ นะ ตูฮัด. กะฆีเตอ ญา ปี ซารี กือปาลา ซามี 2 มีตา ซูรัจ กะ ลูมอฮ รูมัฮ บือมุน นะ บักซา ยิว เดะ นังฆรี ดามัดกัด. ฌาดี ซูรัจ นู จะ ดัฮ เซาโล ดาปัจ ซาปา นู ตูโรจ ลาฆู นะ เยซู กือนา รีฆะ กูญา เลอ เตด-จะ กีลากี นีบีนี โปด อีกัจ กูญา บาวา บือปี กะ นังฆรี เยรูซาเลม. 3 ตานา เซาโล ฌาลัด ปี ดาปิก นังฆรี ดามัดกัด ดัดดัด อาดา ซายา จรัฮ ดาตัก เดะ ลาแงะ บรือเงา โซะ กือลีลิก ญา. 4 ญา รือบัฮ กะ ตานัฮ. ญา ดืองัยํ บูงี ซูวารา นู มือเลา ฌางัน ญา จะ "เซาโล เซาโล เออ บูวัจ นามา ปะ เกา ตืองัฮ ปรือกัด กู?" 5 เซาโล มือเลา จะ "ตูฮัด เออ เกา ฌาดี ซาปา?" ตูฮัด ญา มือเลา จะ "กู นี เลอ ฌาดี เยซู นู เกา ตืองัฮ ปรือกัด. 6 ตาปี บีกัซ เลอ มาโซะ กะ นังฆรี. โซะ อีตู อาดา ซือมียา นู นะ บรี เกา ตาฮู จะ เกา กือนา บูวัจ กะฮามี." ญา จะ. 7 โกะ ซือมียา นู ปี ซามา กูญา บือดีรี ซืองะ มือเลา เตด ตรือเบะ. กูญา ดืองัยํ อาดา บูงี ซูวารา ตาปี กูญา เตด บือฆารี ซาปา. 8 เซาโล บีกัซ บือดีรี. ญา ญรือลัก มาตา ตาปี เตด บือเลฮ บือฆารี นามา. กะฆีเตอ กูญา ปือฆัก ตางัน นะ ญา ตูโตด บาวา ปี มาโซะ กะ นังฆรี ดามัดกัด. 9 อาดา ตีฆา อารี ญา ลีฮัจ เตด บือฆารี นามา โปด. ญา เตด มากัด นามา เตด โอะ นามา ฌูฆา. 10 เดะ นังฆรี ดามัดกัด อาดา มูเระ ซืออูรัก ปือนามา จะ อานานียา. ตูฮัด มาแรฮ ปลีฮัจ กะ ญา มือเลา จะ "อานานียา เออ." อานานียา ตีกัฮ จะ "ตูฮัด เออ กู อาดา โตะ อีนี เลอ." 11 กะฆีเตอ ตูฮัด มือเลา ฌางัน ญา จะ "บีกัซ เลอ. ปี กะ ฌาลัด นู ปือนามา จะ ฌาลัด รือมัก ปี มียา ซือมียา นังฆรี ทาซัด ซืออูรัก นู ปือนามา เซาโล นู อาดา ดูโดะ เดะ รูมัฮ นะ ยูดา. นี เลอ ญา ตืองัฮ บือซาโวจ. 12 ญา บือเลฮ ลีฮัจ บือฆารี ซืออูรัก ปือนามา อานานียา มาแรฮ มาโซะ ตืองะ ตางัน เดะ ญาวา นะ ญา บีดา บรี ญา นะ บือเลฮ ลีฮัจ บือฆารี ปูลัก." 13 ตาปี อานานียา มือเลา จะ "ตูฮัด เออ บาญะ ซือมียา บือเลฮ บีตาฮู กะ กู ปาซัน ซือมียา อีนี ดัฮ. ญา บือเลฮ บูวัจ ลาฆู ฌาฮัจ บาญะ กะ โกะ ซือมียา นะ ตูฮัด เดะ นังฆรี เยรูซาเลม. 14 ลูมอฮ ซามี ซัยํ-บือซัยํ บรี ซูรัจ กะ ญา บรี ญา นะ รีฆะ อีกัจ ราตา ซือมียา เดะ นังฆรี อีนี นู บือซาโวจ ตรือเบะ นามา นะ เกา." 15 ตาปี ตูฮัด มือเลา ฌางัน ญา จะ "ปี เลอ. กรานา กู ปีเลฮ ญา ดัฮ บรี ญา ฌาดี ซือมียา บือกรือฌา นะ กู บรี ญา นะ มือญาเระ บรี ตาฮู ปาซัน นามา นะ กู กะ ลูมอฮ บักซา อาซิก เลอ กะ โกะ ราฌา กะ ลูมอฮ บักซา อิซราเอน ฌูฆา. 16 กะฆีเตอ กู นี เลอ นะ บรี กะ ญา ลีฮัจ นู ญา นะ กือนา ตาฮัด ซูซัฮ กือนา ซาเกะ บาญะ กรานา นามา นะ กู." ตูฮัด ญา จะ. 17 กะฆีเตอ อานานียา เตอ ญา ปี มาโซะ กะ รูมัฮ อีตู ดัฮ ตืองะ ตางัน เดะ ญาวา นะ เซาโล. ญา มือเลา จะ "มิ เซาโล เออ. ตูฮัด ซูโรฮ บรี กู มาแรฮ. ญา เตอ เยซู นู ปลีฮัจ กะ เกา ตืองัฮ เกา ฌาลัด มาแรฮ กะ อีนี. ญา ซูโรฮ กู มาแรฮ บรี เกา นะ ลีฮัจ บือฆารี ปูลัก บรี เกา นะ ปือนอฮ ฌางัน ซือมืองัจ นะ ตูฮัด." ญา จะ. 18 ดัดดัด อาดา บารัก ซือรูปา ซีซิ ฆูรก ตรือเบะ เดะ มาตา นะ เซาโล ดัฮ. ญา บือเลฮ ลีฮัจ บือฆารี ปูลัก. กะฆีเตอ ญา บีกัซ ซาโมจ ลาฆู ซือลับ เดะ อาเย. 19 ตานา ญา มากัด ดัฮ ญา ตือฆัยํ-อูรัจ ปูลัก เลอ. กะฆีเตอ เซาโล ดูโดะ บือซามา ฌางัน โกะ มูเระ เดะ นังฆรี ดามัดกัด ซา วะตู. 20 ญา เตด ลามัจ นู นะ มาโซะ ปี กะ รูมัฮ บือมุน นะ บักซา ยิว มือญาเระ ปาซัน ลาฆู นะ เยซู บรี กูญา ตาฮู จะ ญา เตอ เลอ ฌาดี นานะ นะ ตูฮัด เดะ อาตัซ. 21 ซือมียา ซือมูฮา นู ดืองัยํ ญา กูญา ปือและ-ฮาตี มือเลา จะ "ซือมียา อีนี บูกัด เฆอ นู บือเลฮ บูนอฮ โกะ ซือมียา ตูเฮะ กะ นามา นะ เยซู เดะ นังฆรี เยรูซาเลม? ญา เตอ บือเลฮ มาแรฮ กะ กียัด บีดา นะ รีฆะ อีกัจ ลูมอฮ อีนี บาวา กูญา บือปี กะ ลูมอฮ ซามี ซัยํ-บือซัยํ บูกัด เฆอ?" กูญา จะ. 22 ตาปี เซาโล มือญาเระ ลาฆู นะ ตูฮัด กรัซ ลาฆี. ญา บรี ลีฮัจ กือมัซๆ จะ นู เยซู ฌาดี ราฌา นู บรี ซือลามัจ นู ตูฮัด ซูโรฮ มาแรฮ ดัฮ. กะฆีเตอ ลูมอฮ บักซา ยิว เดะ นังฆรี ดามัดกัด กูญา ซือบะ. กูญา ฮอย นามา นะ ตีกัฮ ลาฆี. 23 ตานา บาญะ อารี ลือปัซ ดัฮ โกะ บักซา ยิว บือกีรา บือซามา จะ นะ บูนอฮ เซาโล. 24 ตาปี เซาโล ดืองัยํ ดัฮ นู กูญา บือกีรา นะ บูวัจ กะฮามี. ซียัก มาลับ โปด กูญา อาดา ซือมียา ฌาฆา เดะ ปีตู นังฆรี นาตี นะ บูนอฮ ญา. 25 ตาปี โซะ มาลับ โกะ มูเระ นะ เซาโล บรี ญา มาโซะ ดูโดะ เดะ ราฆา บือซัยํ บรี บือตูโรด ปี โซะ ดีนิง นังฆรี ลือปัซ ดัฮ. 26 ตานา เซาโล รอจ กะ นังฆรี เยรูซาเลม ดัฮ ญา กูวาซา นะ บือซามา ฌางัน ลูมอฮ มูเระ นะ เยซู. ตาปี กูญา ตาโกจ เดะ ญา เตด ปือจายา จะ ญา ฌาดี มูเระ ดัฮ. 27 ตาปี บานาบัด ยอม ตูโลก ญา บาวา บือปี ดาปัจ ลูมอฮ ปือญูโรฮ นะ ตูฮัด. ญา มือญาเระ กะ กูญา จะ นู เซาโล บือเลฮ ลีฮัจ ตูฮัด เดะ ตืองัฮ ฌาลัด ดัฮ นู ตูฮัด บือเลฮ มือเลา ฌางัน ญา ดัฮ นู ญา บรานี มือญาเระ ลาฆู นะ เยซู เดะ นังฆรี ดามัดกัด ดัฮ. 28 กะฆีเตอ เซาโล ดูโดะ บือซามา ฌางัน กูญา. ญา ฮาตี บรานี บือฌาลัด ปี มาแรฮ เดะ นังฆรี เยรูซาเลม ราตา มือญาเระ ลาฆู นะ ตูฮัด. 29 ญา มือเลา บือตีกัฮ-ตีกัฮ ฌางัน ลูมอฮ ยิว นู มือเลา บาซา กรีก ตาปี กูญา ซารี ตาดัฮ นะ บูนอฮ ญา บูวัก. 30 กาลา โกะ ดีบราดี ตาฮู ลาฆู อีตู กูญา บาวา เซาโล บือปี กะ นังฆรี ซีซาเรีย อาตัจ ญา ปี กะ นังฆรี ทาซัด. 31 กะฆีเตอ ลูมอฮ นะ ตูฮัด ราตา เดะ นังฆรี ยูเดีย นังฆรี ฆาลิลี นังฆรี ซะมาเรีย โปด กูญา ดูโดะ ซือนัง. กูญา ปือจายา กือฌะ-กือมัซ ซือรูโลยํ. กูญา ฌาลัด ตูเฮะ กะ ตูฮัด. ซือมืองัจ นะ ตูฮัด ตูโลก กูญา บรี บือตามัฮ บาญะ. 32 วะตู เปโตร ฌาลัด ปี มาแรฮ ราตา ญา ปี ฌือเงาะ ลีฮัจ โกะ ซือมียา นะ ตูฮัด นู ดูโดะ เดะ ตูโปะ ลิดดา. 33 เปะ อีตู ญา ดาปัจ อูรัก กีลากี ซืออูรัก ปือนามา อัยนียัด. ญา ฮอย อูรัจ ลาปัด ตาโฮด ดัฮ ซือมาตา ฆูแลก เดะ ตือปัจ ตีโนะ. 34 เปโตร มือเลา ฌางัน ญา จะ "อัยนียัด เออ เยซู คริด ญา บรี เกา ซือนัง ญาวา. บีกัซ เลอ ฆูโลก ลือปัจ นะ เกา เลอ." ดัดดัด อัยนียัด บีกัซ ดัฮ. 35 ลูมอฮ ซือมียา ซือมูฮา นู ดูโดะ เดะ ตูโปะ ลิดดา เดะ ตานัฮ ราตา นู ปือนามา ซาโรน โปด กูญา ลีฮัจ ญา. กูญา อาเลฮ มาแรฮ ตูโรจ กะ ตูฮัด. 36 เดะ ตูโปะ ยบพา อาดา มูเระ นีบีนี ซืออูรัก ปือนามา ทาบีทา. เดะ บาซา กรีก นามา นะ ญา ฌาดี โดระคัด (ฌาดี-จะ รูซา). นีบีนี อีตู บูวัจ บาฌิ ซือลาลู เตด บราดู ตูโลก โกะ อูรัก ฮาฌะ. 37 กาลา อีตู ญา เตด ซือนัง ญาวา มาตี ดัฮ. กูญา บือมานี บาดัด นะ ญา บอฮ เดะ รูวัก โซะ อาตัซ. 38 ตูโปะ ยบพา เตด บราปา ฌาโวฮ เดะ ตูโปะ ลิดดา. ลูมอฮ มูเระ ดืองัยํ ดัฮ นู เปโตร อาดา เปะ อีตู. กะฆีเตอ กูญา ซูโรฮ ซือมียา ดูวา อูรัก ปี นะ ปูโฌะ เปโตร มือเลา จะ "โฌฮ ปี กะ ตูโปะ กามี งัจบางัจ เลอ." 39 กะฆีเตอ เปโตร บีกัซ ปี ซามา ฌางัน ดูวา อูรัก อีตู. รอจ ดัฮ กูญา บาวา ปี กะ รูวัก โซะ อาตัซ อีตู. อาดา นีบีนี ฌานา บาญะ อูรัก กือลีลิก เปโตร. กูญา ตืองัฮ มือนาแงฮ ซาเมน บูวัจ บรี ญา ลีฮัจ โกะ กาเยด บาฌู นู โดระคัด ฌาเฮะ ดัฮ วะตู ญา อาดา ฮีโดะ ลาฆี. 40 เปโตร บรี กูญา ซือมูฮา ตรือเบะ ปี กะ โซะ ลูวัยํ. ญา ตูกู ลูโตจ บือซาโวจ. ลือปัซ อีตู ญา อาเลฮ มือเลา ฌางัน บาดัด จะ "ทาบีทา เออ บีกัซ เลอ." กะฆีเตอ ทาบีทา ญา ญรือลัก มาตา. ตานา ญา ลีฮัจ เปโตร ญา บีกัซ ดูโดะ. 41 เปโตร อาเงา ตางัน ตูโลก บรี บือดีรี. กะฆีเตอ ญา บลาโลก ลูมอฮ ซือมียา ปือจายา ลูมอฮ นีบีนี ฌานา ซรัฮ ทาบีทา บรี กะ กูญา ฮีโดะ ดัฮ. 42 เดะ ตูโปะ ยบพา ราตา โกะ ซือมียา ดืองัยํ ลาฆู อีนี ดัฮ. บาญะ ซือมียา มาแรฮ ปือจายา กะ ตูฮัด. 43 กะฆีเตอ เปโตร ดูโดะ เดะ ตูโปะ ยบพา บาญะ อารี. ญา นูปัก เดะ รูมัฮ นะ ตูกัก บูวัจ กูเละ บือนาตัก ซืออูรัก ปือนามา ซีโมน.
1 เดะ นังฆรี ซีซาเรีย อาดา ซือมียา ซืออูรัก ปือนามา โกเนลียัด. ญา เตอ ฌาดี กือปาลา ตาฮัน ซืออูรัก เดะ กาวัด ตาฮัน นู ปือนามา จะ กาวัด อิตาลี. 2 ญา ฌาดี ซือมียา ตูโรจ กะ ฌาลัด นะ ตูฮัด เดะ อาตัซ ตูเฮะ ปือจายา กะ ญา บือซามา ฌางัน ซือมียา ซือรูมัฮ นะ ญา ซือมูฮา. ญา ฮาฆิ ดูเวะ บาญะ กะ โกะ ซือมียา ฮาฌะ เดะ บักซา ยิว. ญา บือซาโวจ กะ ตูฮัด ซือลาลู. 3 อาดา ซืออารี วะตู ปูโกยํ ตีฆา ญา ลีฮัจ บือฆารี ฮูลู-บาลัก นะ ตูฮัด ซืออูรัก มาแรฮ มาโซะ ปลีฮัจ เดะ ดาลับ รูมัฮ มือเลา จะ "โกเนลียัด เออ." 4 โกเนลียัด ตาโกจ ซูโงฮ ตีญูง กะ ฮูลู-บาลัก อีตู มือเลา จะ "ตูฮัด เออ ฌาดี ลาฆู นามา เลอ?" ฮูลู-บาลัก อีตู มือเลา กะ ญา จะ "นู เกา บือซาโวจ นู เกา ฮาฆิ ดูเวะ กะ อูรัก ฮาฌะ เตอ ตูฮัด เดะ อาตัซ ญา ลีฮัจ ดัฮ. ญา ซูกา ลาฆู นะ เกา. 5 กะฆีเตอ วะตู อีนี เกา กือนา ซูโรฮ ซือมียา ปี กะ ตูโปะ ยบพา ปี ซารี ซือมียา ซืออูรัก ปือนามา ซีโมน เปโตร บาวา บือมาแรฮ. 6 ญา เตอ มือนูปัก ฌางัน ซือมียา ปือนามา ซีโมน นู ฌาดี ตูกัก บูวัจ กูเละ บือนาตัก. รูมัฮ นะ ญา อาดา เดะ บีดิก ลาโวจ." ญา จะ. 7 ตานา ฮูลู-บาลัก นู มือเลา ฌางัน ญา ปี ดัฮ โกเนลียัด ญา บลาโลก ปือญูโรฮ นะ ญา ดูวา อูรัก ฌางัน ตาฮัน นู ตูเฮะ กะ ตูฮัด นู บือกรือฌา ฌางัน ญา ซืออูรัก. 8 ญา บีตาฮู ลาฆู อีนี ซือมูฮา กะ กูญา ตีฆา อูรัก ซูโรฮ กูญา ปี กะ ตูโปะ ยบพา. 9 จรัฮ ปาฆี กูญา บือฌาลัด มาแรฮ ซรือปะ นะ รอจ กะ นังฆรี ดัฮ. วะตู อีตู ฌาดี ตืองัฮ อารี ดัฮ เปโตร ญา ปี ดูโดะ เดะ อาตัซ ลอเตง รูมัฮ นะ บือซาโวจ. 10 ญา ลาปัยํ ซูกา นะ มากัด ตาปี ตานา กูญา ตืองัฮ ตืองะ นาซี ญา อาดา ลาฆู ปือและ ปลีฮัจ กะ ญา บือกะ-จะ 11 โซะ ลาแงะ ตือบูกา ดัฮ. อาดา ซือบารัก ซือรูปา บือกะ กาเยด บือซัยํ นู กือนา ฆาโตก เดะ ปัจ บือดาฮะ บือตูโรด มาแรฮ รอจ กะ ดือนียา ดัฮ. 12 เดะ ดาลับ กาเยด อีตู อาดา บือนาตัก บาญะ ฌือแนฮ ฌางัน บือนาตัก มือรากะ ฌางัน บูโรก ฌูฆา. 13 อาดา ซูวารา นู มือเลา จะ "เปโตร เออ. บีกัซ เลอ. บูนอฮ มากัด ซือตืองัฮ เลอ." 14 ตาปี เปโตร ตีกัฮ จะ "ตูฮัด เออ บูวัจ กะฆีเตอ เตด บือเลฮ เลอ. กู เตด ดือละ มากัด บารัก นู กือนา ปาตัก นู นะ บูวัจ บรี ตะอารัฮ." ญา จะ. 15 อาดา ซูวารา มือเลา ฌางัน ญา ซือกาลี ลาฆี นู จะ "บารัก นู ตูฮัด บาโซฮ ดัฮ ฌางัน บรี เกา กีรา จะ ฌาดี บารัก ตะอารัฮ." 16 อาดา ลาฆู กะฆีเตอ รอจ กะ ตีฆา กาลี ดัฮ บารู บือนา บารัก อีตู กือนา อาเกะ ปี กะ ลาแงะ ดัฮ. 17 ลาฆู อีนี บูวัจ บรี เปโตร ฆาโดฮ-ฮาตี นู ปลีฮัจ กะฆีนี ฌาดี ลาฆู นามา. ตานา บาฌิ เลอ ซือมียา ตีฆา อูรัก นู โกเนลียัด ซูโรฮ มาแรฮ กูญา ซารี รูมัฮ นะ ซีโมน ดาปัจ ดัฮ กูญา บือดีรี เดะ ปีตู 18 บลาโลก ตาญา จะ "ซือมียา ปือนามา ซีโมน เปโตร ญา อาดา มือนูปัก เปะ อีนี เฆอ?" 19 ตานา เปโตร ตืองัฮ บือฮีมัจ ลาฆู นู ปลีฮัจ อีตู ซือมืองัจ นะ ตูฮัด มือเลา ฌางัน ญา จะ "นี เลอ อาดา ซือมียา ตีฆา อูรัก มาแรฮ ซารี เกา ดัฮ. 20 บีกัซ เลอ ปี กะ โซะ บาวัฮ. ฌางัน บรีงัจ เลอ ตาปี ปี บือซามา ฌางัน กูญา. กู นี เลอ นู ซูโรฮ กูญา มาแรฮ." ซือมืองัจ ญา จะ. 21 กะฆีเตอ เปโตร ตูโรด ปี ดาปัจ กูญา ตีฆา อูรัก มือเลา จะ "กู นี เลอ นู กาเญา มาแรฮ ซารี. นู กาเญา ซารี กู ฌาดี ลาฆู นามา?" 22 กูญา ตีฆา อูรัก มือเลา จะ "อาดา กือปาลา ตาฮัน ปือนามา โกเนลียัด ญา เตอ ซืออูรัก นู บาฌิ-ตือปัจ นู ตูเฮะ ปือจายา กะ ตูฮัด. โกะ ลูมอฮ บักซา ยิว ราตา มือโอจ กะ ญา. อาดา ฮูลู-บาลัก นู จรัฮ บาฌิ นะ ตูฮัด ปือซัด ฌางัน ญา บรี บลาโลก เกา บรี เกา ปี กะ รูมัฮ นะ ญา บรี ญา นะ มือนีงัย ลาฆู นู เกา นะ มือญาเระ." กูญา จะ. 23 กะฆีเตอ เปโตร ซาโมจ กูญา บรี มาโซะ มือนูปัก เดะ รูมัฮ. จรัฮ ปาฆี เปโตร บีกัซ ปี บือซามา ฌางัน กูญา ตีฆา อูรัก. อาดา ฌูฆา โกะ ดีบราดี นู ปือจายา เดะ นังฆรี ยบพา กูญา ปี ซามา ซือตืองัฮ. 24 ลือปัซ ซืออารี ปูลัก กูญา มาโซะ กะ นังฆรี ซีซาเรีย ดัฮ. โกเนลียัด อาดา นาตี กูญา. ญา บือเลฮ บลาโลก ลูมอฮ นะบรานะ นะ ญา ฌางัน โกะ ฆูๆ นะ ญา มาแรฮ บือซามา. 25 กาลา เปโตร นะ มาโซะ ดัฮ โกเนลียัด ดาปัจ ญา ตือมะ กะ ตานัฮ เดะ กากี นะ ญา มือญือมัฮ กะ ญา เลอ. 26 ตาปี เปโตร อาเกะ ญา บือบีกัซ มือเลา จะ "บีกัซ บือดีรี เลอ. อีซี กู ฌูฆา ฌาดี ซือมียา." 27 กาลา ญา ตืองัฮ มือเลา ฌางัน โกเนลียัด ญา มาโซะ กะ รูมัฮ ดาปัจ อาดา ซือมียา บาญะ โซะ อีตู. 28 ญา มือเลา ฌางัน กูญา จะ "กาเญา ตะอาซิก ตาฮู จะ อาดา ลาฆู นะ บักซา ยิว นู บลารัก กามี ตีเมา บรี บือซามา ฌางัน อูรัก บักซา อาซิก นะ ปี ฌือเงาะ ลีฮัจ กูญา โปด ฮอย เตด บือเลฮ เลอ. ตาปี ตูฮัด เดะ อาตัซ บูวัจ บรี กู ลีฮัจ จะ กู นะ บลาโลก ซือมียา ดีฮา ฌาดี ซือมียา นู กือนา บลารัก ฌาดี ซือมียา นู ตะอารัฮ เตอ ฮอย เตด บือเลฮ เลอ. 29 กะฆีเตอ ตานา เกา บืออาฌะ กู บรี มาแรฮ กู มาแรฮ ดัฮ ฮอย เตด บรีงัจ นามา. กะฆีเตอ กู นะ ตาญา จะ บูวัจ นามา เลอ นู เกา บืออาฌะ กู บรี มาแรฮ กะฆีนี?" เปโตร ญา จะ. 30 โกเนลียัด มือเลา จะ "ปัจ อารี ดูลู กู ตืองัฮ บือซาโวจ เดะ รูมัฮ เดะ ปูโกยํ ตีฆา กะฆีนี. ดัดดัด อาดา ซือมียา ปากัย กาเยด บือตือแล ญา บือดีรี โซะ ฮึลด กู. 31 ญา มือเลา จะ 'โกเนลียัด เออ นู เกา บือซาโวจ ตูฮัด ญา ดืองัยํ ดัฮ. นู เกา ฮาฆิ ดูเวะ กะ อูรัก ฮาฌะ ตูฮัด เดะ อาตัซ ญา ลีฮัจ ดัฮ. 32 กะฆีเตอ บรี เกา ซูโรฮ ซือมียา ปี กะ ตูโปะ ยบพา ซารี ซือมียา ปือนามา จะ ซีโมน เปโตร. ญา มือนูปัก ดูโดะ เดะ รูมัฮ เดะ บีดิก ลาโวจ ฌาดี รูมัฮ นะ ซีโมน นู ฌาดี ตูกัก บูวัจ กูเละ บือนาตัก.' ญา จะ. 33 ดัดดัด กู ซูโรฮ ซือมียา ปี ซารี เกา. เกา เลอ ฮาตี บาฌิ มาแรฮ ดัฮ. กะฆีเตอ กามี ซือมูฮา อาดา เปะ อีนี เดะ โซะ ฮึลด ตูฮัด เดะ อาตัซ. กามี ซูกา มือนีงัย ลาฆู ซือมูฮา นู ตูฮัด ปือซัด เกา บรี มือญาเระ." ญา จะ. 34 กะฆีเตอ เปโตร ญา ฮึนตะ มือเลา กะฆีนี จะ "ซูโงฮ เลอ กู ลีฮัจ จะ ตูฮัด เดะ อาตัซ เตด ปีเลฮ มูคา ซือมียา ดีฮา. 35 เดะ ราตา บักซา ญา ยอม ซาโมจ ซือมียา นู ตูเฮะ กะ ญา นู อาดา ปือบูวัจ บาฌิ. 36 กาเญา ตาฮู เลอ ปือมือเลา ลาฆู บาฌิ นู ตูฮัด บรี กะ ลูมอฮ บักซา อิซราเอน ฌาดี บรีตา นู บาฌิ จะ เยซู คริด นะ บูวัจ บรี อูมัจ-ซือมียา ดูโดะ ซือนัง ซือลามัจ ซูโงฮ. เยซู เตอ เลอ ญา ฌาดี ตูฮัด นะ ซือมียา ราตาๆ. 37 กาเญา ตาฮู ลาฆู บือซัยํ อีตู นู ฌาดี ดัฮ เดะ นังฆรี ยูเดีย ราตา. ลือปัซ โยฮัน มือญาเระ ปาซัน ลาฆู ซือลับ เดะ อาเย เตอ ลาฆู อีนี ฮึนตะ ดัฮ เดะ นังฆรี ฆาลิลี. 38 กาเญา ตาฮู ปูลัก ปาซัน นะ เยซู ซือมียา ตูโปะ นาซาเรด. ญา เตอ เลอ ตูฮัด เดะ อาตัซ ปีเลฮ ดัฮ อูแร ซือมืองัจ นะ ตูฮัด เดะ ญา ดัฮ บรี ญา มือฆัฮ ซูโงฮ. กะฆีเตอ ญา ปี ราตา บูวัจ บือนา นู บาฌิ บือบือลา ซือมียา นู ฮาตู ซีตัด ตือกัด ดัฮ. ญา บูวัจ กะฆีนี กรานา ตูฮัด เดะ อาตัซ อาดา บือซามา ฌางัน ญา. 39 กามี อีนี ฌาดี ซะซี เดะ ลาฆู ซือมูฮา นู เยซู บูวัจ เดะ นังฆรี นะ บักซา ยิว เดะ นังฆรี เยรูซาเลม โปด. กูญา กาจิก ญา บรี มาตี เดะ กายู ปลีตัก. 40 ญา เตอ เลอ ตูฮัด เดะ อาตัซ บูวัจ บรี ฮีโดะ ปาเระ เดะ มาตี ดัฮ เดะ อารี ตีฆา บูวัจ บรี ญา ปลีฮัจ ดัฮ. 41 บูกัด ญา ปลีฮัจ กะ ลูมอฮ ซือมียา ซือมูฮา ตาปี ปลีฮัจ กะ ลูมอฮ กามี นู ตูฮัด บือเลฮ ปีเลฮ ดูลู ดัฮ บรี ฌาดี ซะซี. กามี มากัด กามี โอะ บือซามา ฌางัน ญา ลือปัซ ญา ฮีโดะ ปาเระ เดะ มาตี ดัฮ. 42 ญา ซูโรฮ กามี บรี ปี มือญาเระ ลาฆู บาฌิ อีนี กะ ลูมอฮ ซือมียา นะ บรี กามี ฌาดี ซะซี จะ ญา เตอ เลอ นู ตูฮัด เดะ อาตัซ ตืองะ ดัฮ บรี ฌาดี ซือมียา กรัจ ฮูโกบ โกะ ซือมียา นู ฮีโดะ ฌางัน โกะ ซือมียา นู มาตี ดัฮ. 43 ลาฆู ซือมียา อีนี เลอ ลูมอฮ ซือมียา ตูโดฮ ลาฆู นะ ตูฮัด ซือมูฮา บือเลฮ มือเลา ฌาดี ซะซี จะ ราตา ซือมียา นู ปือจายา กะ ญา ดัฮ ตูฮัด เดะ อาตัซ นะ อาเกะ ดูซา นะ กูญา เดะ นามา นะ เยซู." เปโตร ญา จะ. 44 ตานา เปโตร ตืองัฮ มือเลา กะฆีนี ซือมืองัจ นะ ตูฮัด ตูโรด มาแรฮ ดูโดะ เดะ ลูมอฮ ซือมียา นู ตืองัฮ มือนีงัย ปือมือเลา อีตู. 45 โกะ ซือมียา บักซา ยิว นู ปือจายา นู มาแรฮ บือซามา ฌางัน เปโตร ดัฮ กูญา ปือและ-ฮาตี ลีฮัจ จะ ตูฮัด ญา ฮาลัย บรี ซือมืองัจ นะ ญา บรี ตูโรด มาแรฮ กะ ซือมียา บักซา อาซิก ฌูฆา. 46 กูญา ดืองัยํ โกะ ซือมียา อีนี มือเลา ฌาดี ปือมือเลา บาซา อาซิกๆ ปูฌี กะ ตูฮัด. กะฆีเตอ เปโตร มือเลา ตีกัฮ จะ 47 "ลูมอฮ ซือมียา อีนี ซาโมจ ซือมืองัจ นะ ตูฮัด ซือรูปา บือกะ กีตา ซาโมจ ดัฮ. กะฆีเตอ ซาปา นะ บลารัก ตีเมา บรี กูญา ซาโมจ ลาฆู ซือลับ เดะ อาเย ฌูฆา? บลารัก เตด บือเลฮ เลอ." ญา จะ. 48 กะฆีเตอ เปโตร ปือซัด บรี กูญา ซาโมจ ลาฆู ซือลับ เดะ อาเย เดะ นามา นะ เยซู คริด. กูญา อีตู บืออาฌะ ญา บรี ดูโดะ บือซามา ฌางัน กูญา ซือตืองัฮ.
1 โกะ ปือญูโรฮ ฌางัน ลูมอฮ ดีบราดี นู ปือจายา เดะ นังฆรี ยูเดีย ราตา กูญา ดืองัยํ จะ ซือมียา บักซา อาซิก ฌูฆา ซาโมจ ปือมือเลา นะ ตูฮัด ดัฮ. 2 กะฆีเตอ กาลา เปโตร ญาแญะ ปี กะ นังฆรี เยรูซาเลม ลูมอฮ ซือมียา นู ตูเฮะ กะ ลาฆู กรัจ กูญา อูจะ กะ ญา 3 มือเลา จะ "เกา ปี นูปัก เดะ รูมัฮ ซือมียา บักซา อาซิก ปี มากัด ฌางัน กูญา โปด." 4 กะฆีเตอ เปโตร มือญาเระ บรี กูญา ตาฮู ลาฆู ตะเดะ ลามูลา มือเลา จะ 5 "กู ตืองัฮ บือซาโวจ เดะ นังฆรี ยบพา อาดา บือนา ปลีฮัจ กะ กู กะฆีนี. กู ลีฮัจ ซือบารัก ซือรูปา กาเยด บือซัยํ นู กือนา ฆาโตก เดะ ปัจ บือดาฮะ บือตูโรด มาแรฮ เดะ โซะ ลาแงะ มาแรฮ ดาปิก กู ดัฮ. 6 ตานา กู ฌือเงาะ ลีฮัจ กาเยด อีตู ลีฮัจ จะ อาดา บือนาตัก โซะ ดาลับ ฌาดี บือนาตัก ฮูตัด บือนาตัก มือรากะ ฌางัน โกะ บูโรก ฌูฆา. 7 กู ดืองัยํ อาดา ซูวารา มือเลา ฌางัน กู นู จะ 'เปโตร เออ บีกัซ เลอ. บูนอฮ มากัด ซือตืองัฮ เลอ.' 8 ตาปี กู ตีกัฮ จะ 'ตูฮัด เออ บูวัจ กะฆีเตอ เตด บือเลฮ เลอ. บารัก มากัด นู กือนา ปาตัก นู นะ บูวัจ บรี ตะอารัฮ เตด ดือละ มาโซะ มูโลจ นะ กู ดัฮ.' กู จะ. 9 "ซูวารา อีตู มือเลา เดะ ลาแงะ ปูลัก จะ 'บารัก นู ตูฮัด บาโซฮ ดัฮ ฌางัน บรี เกา กีรา จะ ฌาดี บารัก ตะอารัฮ.' ญา จะ. 10 อาดา ลาฆู กะฆีนี ตีฆา กาลี ดัฮ. ลือปัซ อีตู บือนา อีตู ซือมูฮา กือนา อาเกะ บือปี กะ ลาแงะ ดัฮ. 11 ตานา บาฌิ อาดา ตีฆา อูรัก มาแรฮ รอจ กะ รูมัฮ นู กู มือนูปัก อีตู ฌาดี ซือมียา นู ญา ซูโรฮ มาแรฮ เดะ นังฆรี ซีซาเรีย ดัฮ บรี ซารี กู. 12 ซือมืองัจ นะ ตูฮัด มือเลา ฌางัน กู บรี กู นะ ปี ซามา ฌางัน กูญา ฌางัน บรีงัจ นามาๆ โปด. ดีบราดี นัม อูรัก เดะ นังฆรี ยบพา อีนี กูญา ปี บือซามา ฌางัน กู กะ นังฆรี ซีซาเรีย. กามี ซือมูฮา มาโซะ เดะ รูมัฮ นะ โกเนลียัด. 13 ญา มือญาเระ กะ กามี นู ญา ลีฮัจ ฮูลู-บาลัก นะ ตูฮัด บือดีรี เดะ รูมัฮ นะ ญา มือเลา ฌางัน ญา จะ 'กือนา บรี ซือมียา ปี กะ นังฆรี ยบพา ซารี ซือมียา ซืออูรัก นู ปือนามา จะ ซีโมน เปโตร. 14 ญา เตอ นะ มือเลา ปือมือเลา กะ เกา นู นะ บรี เกา ฌางัน ลูมอฮ ซือมียา ซือรูมัฮ นะ เกา นะ ฮีโดะ ลือปัซ บาฌิ ดัฮ.' ญา จะ. 15 "กาลา กู ฮึนตะ นะ มือเลา กะ กูญา ซือมืองัจ นะ ตูฮัด ตูโรด มาแรฮ ดูโดะ เดะ กูญา บือกะ ญา ตูโรด มาแรฮ กะ กามี เดะ วะตู ลามูลา. 16 กะฆีเตอ กู จับ ดัฮ นู ตูฮัด มือญาเระ จะ โยฮัน บูวัจ บรี ซือลับ เดะ อาเย ดัฮ ตาปี กาเญา นะ ซาโมจ ลาฆู ซือลับ เดะ ซือมืองัจ นะ ตูฮัด. 17 กะฆีเตอ ตูฮัด ฮาลัย บรี ซือมืองัจ นะ ญา กะ ซือมียา บักซา อาซิก ซือรูปา บือกะ ญา บรี ฌางัน กีตา ดัฮ กาลา กีตา ปือจายา กะ ตูฮัด เยซู คริด ดัฮ. กะฆีเตอ กู ฌาดี ซาปา เลอ นู นะ บลารัก ตูฮัด เดะ อาตัซ?" เปโตร ญา จะ. 18 กาลา กูญา อีตู ดืองัยํ ลาฆู อีนี ดัฮ กูญา เตด อูจะ ลาฆี. กูญา ปูฌี กะ ตูฮัด มือเลา จะ "กะฆีเตอ เลอ ตูฮัด เดะ อาตัซ บูวัจ บรี ลูมอฮ บักซา อาซิก ฌูฆา นะ บราเลฮ-ฮาตี บรี ฮีโดะ ซูโงฮ เลอ." กูญา จะ. 19 ลือปัซ ซือตีเฟน กือนา บูนอฮ ดัฮ ลูมอฮ ซือมียา ปือจายา กือนา ลาฆู ปรือกัด บูวัจ บรี กูญา จัฮ-บือลัฮ ปี ราตา. อาดา ซือตืองัฮ นู ปี กะ นังฆรี ฟีนิเซีย กะ ปูเลา ซัยปรัด กะ นังฆรี อันตีโยก ฌูฆา. กูญา ปี มือญาเระ ลาฆู นะ เยซู กะ ซา ลูมอฮ บักซา ยิว. 20 ตาปี อาดา ซือตืองัฮ ฌาดี ซือมียา ปูเลา ซัยปรัด ฌางัน ซือมียา นังฆรี ซัยรีน กูญา ปี กะ นังฆรี อันตีโยก มือญาเระ บรีตา นู บาฌิ ปาซัน ตูฮัด เยซู กะ ลูมอฮ บักซา อาซิก ฌูฆา. 21 ตางัน นะ ตูฮัด อาดา บือซามา ฌางัน กูญา. อาดา ลูมอฮ ซือมียา บาญะ ปือจายา อาเลฮ มาแรฮ ซารี ตูฮัด. 22 ลาฆู ปาซัน อีนี รอจ กะ ลูมอฮ นะ ตูฮัด นู อาดา เดะ นังฆรี เยรูซาเลม. กะฆีเตอ กูญา ซูโรฮ บานาบัด ปี กะ นังฆรี อันตีโยก. 23 ตานา บานาบัด รอจ ดัฮ ญา ลีฮัจ จะ ตูฮัด ญา ฮาลัย บรี ซือลามัจ กะ กูญา. กะฆีเตอ ญา ซูกา-ฮาตี ญา มือเลา ฌางัน กูญา ซือมูฮา กือมัซๆ จะ "บรี กาเญา ฮาตี รือมัก ลือกัจ บือซามา ฌางัน ตูฮัด ปือนอฮ เดะ ฮาตี เลอ." ญา จะ. 24 บานาบัด เตอ ฌาดี ซือมียา นู บาฌิ. ญา ปือนอฮ ฌางัน ซือมืองัจ นะ ตูฮัด ปือจายา ปือนอฮ ดัฮ. กะฆีเตอ อาดา ซือมียา บาญะ มาแรฮ ปือจายา กะ ตูฮัด ดัฮ. 25 เดะ วะตู อีตู บานาบัด ญา ปี กะ นังฆรี ทาซัด ปี ซารี เซาโล. 26 ดาปัจ ดัฮ ญา บาวา เซาโล บือมาแรฮ กะ นังฆรี อันตีโยก. กูญา ดูวา อูรัก อาดา บือซามา ฌางัน ลูมอฮ นะ ตูฮัด เปะ อีตู ซือตาโฮด ดัฮ. กูญา อาฌัยํ ลูมอฮ ซือมียา บาญะ. เดะ นังฆรี อันตีโยก อีตู กูญา ฮึนตะ ซือโบจ ลูมอฮ มูเระ จะ ลูมอฮ คริดเตียน. 27 เดะ วะตู อีตู อาดา ซือมียา ตูโดฮ ลาฆู นะ ตูฮัด ซือตืองัฮ กูญา ดาตัก เดะ นังฆรี เยรูซาเลม ปี กะ นังฆรี อันตีโยก. 28 อาดา ซืออูรัก เดะ ลูมอฮ กูญา ปือนามา อาฆาบัด ญา บีกัซ บือดีรี. ซือมืองัจ นะ ตูฮัด บูวัจ บรี ญา ตูโดฮ จะ "นะ ฌาดี วะตู ปายัฮ โตระ บารัก มากัด กูรัก เดะ ดือนียา ราตา." ลาฆู อีนี ฌาดี รือมัก ดัฮ วะตู คลาวดียัด ฌาดี ราฌา บือซัยํ นังฆรี โรม. 29 ลูมอฮ มูเระ บือกีรา นะ ซูโรฮ ดูเวะ บรี ตูโลก ลูมอฮ ดีบราดี ปือจายา นู ดูโดะ เดะ นังฆรี ยูเดีย. โซก ซืออูรัก นะ ฮาฆิ บือกะ ญา อาดา. 30 กูญา บูวัจ กะฆีเตอ ดัฮ ซูโรฮ บานาบัด ฌางัน เซาโล บาวา ดูเวะ อีตู บือปี กีเรบ ฌางัน โกะ ซือมียา บือบือลา ลูมอฮ นะ ตูฮัด.
1 กาลา อีตู เตอ ราฌา เฮโรด ญา อีงัจ นะ ปรือกัด ลูมอฮ นะ ตูฮัด. 2 กะฆีเตอ ญา ปือซัด บรี ยากอบ กากา นะ โยฮัน กือนา บูนอฮ ฌางัน ปือดัก ดัฮ. 3 วะตู ญา ลีฮัจ จะ ลาฆู บูวัจ กะฆีเตอ กือนา เดะ ฮาตี นะ ลูมอฮ บักซา ยิว ญา รีฆะ เปโตร ฌูฆา. วะตู อีตู ฌาดี ลาฆู บรามัย มากัด โรตี ฮอย ราฆี. 4 รีฆะ เปโตร ดัฮ ญา บอฮ เดะ ปือฌารา บรี อาดา ตาฮัน ฌาฆา ปัจ ลูมอฮ ซา ลูมอฮ ปัจ อูรัก. ราฌา อีงัจ จะ ตานา ลาฆู บรามัย ลือปัซ ปี อีตู ฮาบิฮ ดัฮ ญา นะ อาตัจ เปโตร บรี กือนา ฮูโกบ. 5 กะฆีเตอ เปโตร อาดา เดะ ปือฌารา ตาปี ลูมอฮ นะ ตูฮัด กูญา ฆางู บือซาโวจ กะ ตูฮัด เดะ อาตัซ บีดา ตูโลก ญา. 6 ตานา รอจ วะตู นู ราฌา นะ บาวา เปโตร ตรือเบะ ปี มาลับ อีตู เตอ เลอ เปโตร อาดา ลีนา เดะ ตืองัฮ ตาฮัน ดูวา อูรัก. อาดา ราตัย ลือกัจ ดัฮ ดูวา อูตัซ. อาดา ตาฮัน อาซิก กูญา ฌาฆา เดะ ปีตู ปือฌารา. 7 นี เลอ อาดา ฮูลู-บาลัก นะ ตูฮัด มาแรฮ ปลีฮัจ. อาดา ซายา จรัฮ ซูโลฮ เดะ ดาลับ ปือฌารา. ฮูลู-บาลัก อีตู ญา จาและ เปโตร เดะ รูโซะ บรี ดาฮานี มือเลา จะ "บีกัซ จือปัจๆ เลอ." กะฆีเตอ ราตัย อีตู ฆูรก ลือปัซ เดะ ตางัน นะ เปโตร ดัฮ. 8 ฮูลู-บาลัก ญา มือเลา กะ ญา จะ "บอฮ ตาลี ปีงัก อีกัจ ปะตาปะ ฌูฆา เลอ." เปโตร ญา บูวัจ ตูโรจ กะฆีเตอ. ฮูลู-บาลัก มือเลา ปูลัก จะ "กือนา ปากัย บาฌู ซรือโกะ ญาวา ตูโรจ กู มาแรฮ เลอ." 9 กะฆีเตอ เปโตร ญา ตูโรจ ตรือเบะ ปี. ญา เตด ตาฮู จะ ฌาดี ลาฆู ซูโงฮ. ญา อาคา จะ ญา มีปี. 10 กูญา ตรือเบะ ปี ลือปัซ เดะ ตือปัจ ตาฮัน ฌาฆา นู ซา นู ดูวา ปูลัก. บารู กูญา รอจ กะ ปีตู บือซี นู นะ ปี กะ โซะ ลูวัยํ. ปีตู อีตู บูกา ตะอาซิก บรี กะ กูญา. กูญา ตรือเบะ ปี ตูโรจ ฌาลัด ซา ฌาลัด. ดัดดัด ฮูลู-บาลัก อีตู ญา ลือแงะ ปี เดะ เปโตร. 11 ตานา เปโตร ซือดัยํ ดัฮ ญา มือเลา จะ "วะตู อีนี กู ตาฮู ซูโงฮ จะ ตูฮัด ซูโรฮ ฮูลู-บาลัก นะ ญา มาแรฮ ตูโลก กู บรี ลือปัซ เดะ ตางัน นะ ราฌา เฮโรด บรี ลือปัซ เดะ ลาฆู ฌาฮัจ นะ ลูมอฮ บักซา ยิว." ญา จะ. 12 ตานา เปโตร บือฮีมัจ ลาฆู อีนี ญา มาแรฮ รอจ กะ รูมัฮ นะ มารียา มะ เดะ โยฮัน นู ปือนามา อาซิก จะ มาระโก. เดะ รูมัฮ อีตู อาดา ซือมียา บาญะ บือมุน บือซามา กูญา อาดา บือซาโวจ. 13 เปโตร กรือโคก เดะ ปีตู รูมัฮ. อาดา นีบีนี ราดารา ซืออูรัก ปือนามา โรดา ญา มาแรฮ ดืองัยํ จะ ซาปา บลาโลก. 14 กาลา ญา ตาฮู จะ ฌาดี ซูวารา นะ เปโตร ญา ซูกา-ฮาตี. กะฆีเตอ ญา เตด บูกา ปีตู ตาปี ญา บลารี ปี กะ ดาลับ รูมัฮ มือญาเระ จะ เปโตร อาดา บือดีรี โซะ ปีตู เลอ. 15 ตาปี โกะ ซือมียา มือเลา จะ "เกา ฆีลา ดัฮ เลอ." ตาปี นีบีนี อีตู มือเลา กือมัซๆ จะ "ฌาดี อีซี เปโตร ซูโงฮ เลอ." กะฆีเตอ กูญา มือเลา จะ "ฌาดี ซือมืองัจ นะ ญา นอ." 16 ตาปี เปโตร ญา อาดา กรือโคก ปีตู ลาฆี. ตานา บูกา ปีตู ดัฮ กูญา ลีฮัจ บือฆารี ญา กูญา ปือและ-ฮาตี โตระ. 17 ตาปี เปโตร ลามัย ตางัน บรี กูญา ซืองะ. ญา มือญาเระ กะ กูญา นู ตูฮัด บูวัจ กะฮามี บรี ญา ลือปัซ เดะ ปือฌารา ดัฮ. ญา มือเลา จะ "ปี เลอ มือญาเระ ลาฆู อีนี บรี กะ ยากอบ ฌางัน ลูมอฮ ดีบราดี ปือจายา ตาฮู." กะฆีเตอ เปโตร ญา ปี กะ ตือปัจ อาซิก. 18 วะตู จรัฮ ปาฆี ดัฮ โกะ ลูมอฮ ตาฮัน ฆาโดฮ-ฮาตี โตระ เตด ตาฮู จะ เปโตร ลือแงะ ปี กะฮามี เลอ. 19 ตานา ราฌา เฮโรด ซูโรฮ ซารี เปโตร ตาปี เตด ดาปัจ ญา ซาซัจ โกะ ลูมอฮ ตาฮัน นู ฌาฆา อีตู ปือซัด บรี กูญา กือนา ลาฆู ฮูโกบ มาตี. ญา เตอ ตรือเบะ เดะ นังฆรี ยูเดีย ปี ดูโดะ เดะ นังฆรี ซีซาเรีย ดัฮ. 20 ราฌา เฮโรด ญา มูซัยํ โตระ ฌางัน โกะ ซือมียา นังฆรี ทัยระ นังฆรี ซัยดอน. กะฆีเตอ ลูมอฮ กูญา ปาคัจ มาแรฮ ซารี ญา. ลามูลา เตอ กูญา ปี ดาปัจ บลาซือตัด นู ฌาดี ฮูลู-บาลัก ฮัจ-ลีฮัจ รูมัฮ นะ ราฌา บรี ญา บาฌิ ฌางัน กูญา. กะฆีเตอ กูญา ปี กะ ราฌา มีตา บรี บาฌิ ปาเระ ฌางัน ญา ซาเบะ นังฆรี นะ กูญา ฆาโดฮ อาเมด บารัก มากัด เดะ นังฆรี นะ ราฌา. 21 ราฌา ญา ตืองะ ซา อารี บรี ดาปัจ กูญา. อารี อีตู ญา บือปากัย กาเยด นะ ราฌา ดูโดะ เดะ ปาปัด กรือซี นะ ราฌา มือเลา ปือมือเลา ฌางัน กูญา. 22 โกะ ลูมอฮ ซือมียา บือซูระ จะ "บูกัด ปือมือเลา นะ ซือมียา ตาปี ฌาดี ปือมือเลา นะ ตูฮัด." 23 ดัดดัด อีตู ฮูลู-บาลัก นะ ตูฮัด บูวัจ บรี ราฌา ซาเกะ โตระ กรานา-จะ ราฌา เตด บรี นามา นะ ตูฮัด ฌาดี นามา นู บาฌิ. กะฆีเตอ อาดา อูลัยํ จะจิก มากัด โปรจ นะ ราฌา บรี มาตี. 24 ตาปี ปือมือเลา นะ ตูฮัด ปี ราตา บือตามัฮ บาฌิ พรัด บาญะ. 25 กาลา บานาบัด ฌางัน เซาโล บูวัจ กรือฌา นะ กูญา ซุจ ดัฮ กูญา บาลิ ปี เดะ นังฆรี เยรูซาเลม บาวา โยฮัน นู ปือนามา มาระโก ปี ซามา.
1 เดะ ลูมอฮ นะ ตูฮัด เดะ นังฆรี อันตีโยก อาดา ซือมียา ตูโดฮ ลาฆู นะ ตูฮัด ฌางัน ซือมียา อาฌัยํ ลาฆู ปือมือเลา นะ ตูฮัด ซือตืองัฮ. อาดา บานาบัด อาดา ซีเมโอน นู ปือนามา จะ ฮีตับ. อาดา ลูกีโย ซือมียา นังฆรี ซัยรีน. อาดา มานาเอน นู ฌาดี นานะ บือบือลา บือซามา ฌางัน ราฌา เฮโรด. อาดา เซาโล ฌูฆา. 2 กาลา กูญา ตืองัฮ มือญือมัฮ กะ ตูฮัด บูวัจ ลาฆู บือตาฮัด มากัด เตอ ซือมืองัจ นะ ตูฮัด มือเลา ฌางัน กูญา จะ "กู บือเลฮ ปีเลฮ บานาบัด ฌางัน เซาโล ดัฮ บรี บูวัจ ลาฆู บือกรือฌา นะ กู. กาเญา กือนา ตืองะ กูญา บรี บือกรือฌา ลาฆู อีตู บีดา กู." 3 กะฆีเตอ กาลา กูญา บูวัจ ลาฆู บือตาฮัด มากัด ซาเมน บือซาโวจ ดัฮ_กูญา ตืองะ ตางัน เดะ ญาวา กูญา ดูวา อูรัก บรี กูญา ลือปัซ ปี. 4 กะฆีเตอ ซือมืองัจ นะ ตูฮัด ซูโรฮ บานาบัด ฌางัน เซาโล ปี. กูญา ปี กะ ตือเปด เซลูเกีย ญาแญะ กาปัน ปี กะ ปูเลา ซัยปรัด. 5 ตานา รอจ กะ นังฆรี ซะลามิด ดัฮ กูญา ดูวา อูรัก ปี มือญาเระ ปือมือเลา นะ ตูฮัด เดะ โกะ รูมัฮ บือมุน นะ บักซา ยิว. อาดา โยฮัน ปี ซามา บรี ตูโลก กูญา. 6 กูญา บือฌาลัด ตูโรจ ปี บลากัก ปูเลา รอจ กะ นังฆรี ปาโฟ. ปัจ อีตู กูญา ดาปัจ ซือมียา บักซา ยิว ซืออูรัก ปือนามา จะ บาระเยซู. ญา ฌาดี ซือมียา บือฆูรู อาเย-ลือมู ฌาดี ซือมียา ตูโดฮ มืออูปัย. 7 ญา อาดา ฌางัน ซือจียัด เปาโล นู ฌาดี ฮูลู-บาลัก นะ ลูวัก เดะ ปูเลา อีตู. ฮูลู-บาลัก อีตู ญา ฌาดี ซือมียา ปานัย ญา บลาโลก บานาบัด ฌางัน เซาโล มาแรฮ. ญา ซูกา นะ ดืองัยํ ลาฆู ปือมือเลา นะ ตูฮัด. 8 ตาปี ซือมียา บือฆูรู อาเย-ลือมู อีตู (นู อาดา ปือนามา จะ เอลีมา ฌาดี-จะ ซือมียา บือฆูรู) ญา เตอ บลาวัด ฌางัน กูญา ดูวา อูรัก ตีเมา บรี ฮูลู-บาลัก ปือจายา. 9 เซาโล (นู อาดา ปือนามา อาซิก จะ เปาโล) ญา ปือนอฮ ฌางัน ซือมืองัจ นะ ตูฮัด ตีญูง รือมัก กะ เอลีมา มือเลา จะ 10 "เกา เลอ ฌาดี นานะ นะ ฮาตู ซีตัด ฌาดี ซือตรู นะ ลาฆู บาฌิ ราตา. เกา เลอ ปือนอฮ ฌางัน ลาฆู มืออูปัย ลาฆู ฮอย เตด บือฆูนา ซือมูฮา. เกา เตด บราดู กูวาซา บรี ลาฆู บาฌิ นะ ตูฮัด ปี ซาลัฮ ฌาลัด. 11 กะฆีเตอ ตางัน นะ ตูฮัด บือซัยํ นะ ฮูโกบ เกา บูวัจ บรี เกา มาตา บูตา นะ ลีฮัจ เตด บือฆารี ซายา มาตาอารี ซา วะตู." ดัดดัด มาตา นะ เอลีมา บือดาบู ดัฮ. ญา มือราบา ปี มาแรฮ ซารี ซือมียา ซืออูรัก นู นะ ตูโตด ญา. 12 กาลา ฮูลู-บาลัก ลีฮัจ ลาฆู อีนี บารู ญา ปือจายา. ญา เตอ ปือและ-ฮาตี เดะ ปือมือเลา นะ ตูฮัด. 13 เปาโล ฌางัน ลูมอฮ นะ ญา ญาแญะ กาปัน เดะ ปาโฟ ปี กะ ตือเปด ปรือกา เดะ นังฆรี ปัมฟีเลีย. เปะ อีตู โยฮัน ตีงัน กูญา บาลิ ปี กะ นังฆรี เยรูซาเลม. 14 กูญา ตรือเบะ เดะ ปรือกา ฌาลัด ปี กะ อันตีโยก เดะ นังฆรี ปิซีเดีย. เดะ อารี บราดู กรือฌา กูญา มาโซะ ปี ดูโดะ เดะ รูมัฮ บือมุน นะ บักซา ยิว. 15 ตานา บาจา ซูรัจ ปือมือเลา ฮูโกบ นะ มูซา ฌางัน ซูรัจ นะ ลูมอฮ ซือมียา ตูโดฮ ลาฆู นะ ตูฮัด ดัฮ กือปาลา รูมัฮ บือมุน เตอ ญา ซูโรฮ ซือมียา ปี มือเลา ฌางัน กูญา จะ "อาดี-บราดี เออ กะ กาเญา อาดา ปือมือเลา ปรีงัจ กะ ลูมอฮ ซือมียา มาแรฮ มือเลา ปือมือเลา อีตู เลอ." 16 กะฆีเตอ เปาโล บือดีรี ลามัย ตางัน มือเลา จะ "ลูมอฮ บักซา อิซราเอน ฌางัน ลูมอฮ อาซิก นู ตูเฮะ กะ ตูฮัด เตอ มือนีงัย เลอ. 17 ตูฮัด เดะ อาตัซ นะ ลูมอฮ บักซา อิซราเอน อีนี เตอ ญา ปีเลฮ โกะ บีลาแก นะ กีตา ดัฮ. ตานา กูญา ดูโดะ ฌาดี ซือมียา นังฆรี อาซิก เดะ นังฆรี อียิบ ตูฮัด บูวัจ บรี กูญา บือตามัฮ บาญะ. ญา บาวา กูญา ตรือเบะ เดะ นังฆรี อียิบ ฌางัน ตางัน นู มือฆัฮ นะ ญา. 18 กือมูฮา ปัจ-ปูโลฮ ตาโฮด ตูฮัด ตาฮัด ปือบูวัจ เตด บาฌิ นะ กูญา เดะ ปาดัก ตานัฮ ตูโฮยํ นู ลือฆา. 19 ญา บูวัจ บรี ตูโฌฮ บักซา เดะ นังฆรี คานาอัน บือนาซา ฮาบิฮ บรี ตือปัจ ตานัฮ นะ บักซา อีตู ฌาดี ปือซากา นะ บักซา นะ ญา. 20 ลาฆู อีนี ซือมูฮา ฌาดี ดัฮ กือมูฮา ปัจ ราตุซ ลีมา-ปูโลฮ ตาโฮด. "เดะ บลากัก ตูฮัด บูวัจ บรี อาดา ลูมอฮ ซือมียา กรัจ ฮูโกบ กูญา ตือดะ รอจ วะตู นะ ซามูเอน ซือมียา ตูโดฮ ลาฆู นะ ตูฮัด. 21 ตานา ลูมอฮ กูญา ซูกา อาดา ราฌา ซืออูรัก ตูฮัด ญา ตืองะ เซาโล บรี ฌาดี ราฌา นะ กูญา. ญา เตอ นานะ นะ คิด เดะ โกะ ลูมอฮ บือแนฮ เบนยามิน. ญา ฌาดี ราฌา ปัจ-ปูโลฮ ตาโฮด ดัฮ. 22 ตานา ตีงัน เซาโล ดัฮ ตูฮัด ตืองะ ดาวิด บรี ฌาดี ราฌา นะ กูญา. ตูฮัด บรี ซะซี ปาซัน ดาวิด จะ 'กู ดาปัจ ดาวิด นานะ นะ เจซี ดัฮ. ญา เตอ ฌาดี ซือมียา นู กือนา เดะ ฮาตี นะ กู. ญา นะ บูวัจ ตูโรจ บือกะ ฮาตี นะ กู ราตา มาจับ.' ตูฮัด ญา จะ. 23 "เดะ อานะ กือมอน นะ ดาวิด อีตู ตูฮัด ตืองะ เยซู บรี ฌาดี ซือมียา ตูโลก ลูมอฮ บักซา อิซราเอน บรี ลือปัซ. ลาฆู อีนี ฌาดี ดัฮ รือมัก ฌางัน ปือมือเลา บือฌาญี นะ ตูฮัด. 24 ดูลู เดะ เยซู มาแรฮ ดัฮ โยฮัน มาแรฮ มือญาเระ กะ ลูมอฮ บักซา อิซราเอน ซือมูฮา บรี กูญา บราเลฮ-ฮาตี ซาโมจ ลาฆู ซือลับ เดะ อาเย. 25 วะตู กรือฌา นะ โยฮัน ซรือปะ นะ ฮาบิฮ ดัฮ ญา ตาญา จะ 'กาเญา อีงัจ จะ กู ฌาดี ซาปา? กู บูกัด ซือมียา อีตู. นี เลอ อาดา ซือมียา ซืออูรัก นะ มาแรฮ โซะ บลากัก กู. กู นี เตด ปาโตจ นะ อูฆัย ปะตาปะ เดะ กากี นะ ญา.' โยฮัน ญา จะ." 26 เปาโล มือเลา ปูลัก จะ "อาดี-บราดี เออ อานะ กือมอน นะ อับราฮัม เออ ลูมอฮ ซือมียา นู ตูเฮะ กะ ตูฮัด เออ มือนีงัย เลอ. ปือมือเลา นู จะ ตูฮัด นะ ตูโลก บรี ฮีโดะ ลือปัซ บาฌิ เตอ ตูฮัด ญา ซูโรฮ บรี ปือมือเลา อีตู มาแรฮ รอจ กะ กีตา นี เลอ. 27 ตาปี โกะ ซือมียา นู ดูโดะ เดะ นังฆรี เยรูซาเลม ฌางัน โกะ กือปาลา นะ กูญา เตด กราลา เยซู ดัฮ. ปือมือเลา นะ ลูมอฮ ซือมียา ตูโดฮ ลาฆู นะ ตูฮัด กูญา บาจา เดะ อารี บราดู กรือฌา บีลัก มีงู ตาปี ปือมือเลา อีตู เตด บือเลฮ มาโซะ เดะ ฮาตี นะ กูญา. กะฆีเตอ กูญา กรัจ ฮูโกบ เยซู กูญา บูวัจ บรี รือมัก ฌางัน ปือมือเลา นะ ลูมอฮ ซือมียา ตูโดฮ อีตู. 28 มีเซ-จะ กูญา ฮอย ปาซัน นามา นู นะ กรัจ ฮูโกบ เยซู บรี มาตี ตาปี กูญา มีตา เดะ ปีลาด บรี ญา นะ ฮูโกบ เยซู บรี มาตี. 29 "กาลา กูญา บือเลฮ บูวัจ ลาฆู ซือมูฮา นู อาดา ฆาแรฮ ดูลู ดัฮ ปาซัน เยซู เดะ ซูรัจ ปือมือเลา นะ ตูฮัด เตอ กูญา อาเมด บาดัด นะ ญา ปือตูโรด เดะ กายู ปลีตัก บือปี ตานัม เดะ ฆูฮา. 30 ตาปี ตูฮัด เดะ อาตัซ บูวัจ บรี ญา ฮีโดะ ปาเระ เดะ มาตี ดัฮ. 31 บาญะ อารี เตอ เยซู ญา ปลีฮัจ กะ ลูมอฮ ซือมียา อีตู นู บือเลฮ ตูโรจ กะ ญา ดาตัก เดะ นังฆรี ฆาลิลี มาแรฮ รอจ กะ นังฆรี เยรูซาเลม. วะตู อีนี เลอ ลูมอฮ ซือมียา อีตู มือญาเระ ฌาดี ซะซี ปาซัน ลาฆู นะ ญา กะ ลูมอฮ ซือมียา. 32 กะฆีเตอ กามี มือญาเระ บรีตา นู บาฌิ อีนี บรี กะ กาเญา ตาฮู. นู ตูฮัด บือเลฮ บือฌาญี ฌางัน โกะ บีลาแก นะ กีตา นะ บูวัจ กะฮามี เตอ 33 วะตู อีนี ญา บูวัจ กะฆีเตอ ดัฮ บีดา กีตา นู ฌาดี อานะ กือมอน นะ กูญา. ฌาดี-จะ ญา บูวัจ บรี เยซู ฮีโดะ ปาเระ เดะ มาตี ดัฮ. บือกะ อาดา ฆาแรฮ ดัฮ เดะ ซูรัจ มือญาญี ปูฌี ตูฮัด ปาซัน นู ดูวา นู จะ 'เกา เลอ ฌาดี นานะ นะ กู. อารี อีนี เลอ กู ฌาดี อาโปก นะ เกา ดัฮ.' ญา จะ. 34 เปาโล มือเลา ลาฆี จะ "นู ตูฮัด เดะ อาตัซ บรี เยซู ฮีโดะ ปาเระ เดะ มาตี เตด ดือละ นะ บูโระ บูโซะ ลาฆี ตูฮัด บือเลฮ มือเลา กะฆีนี จะ 'ปือมือเลา บือฌาญี นู บาฌิ โตระ นู ตือตู นู กู บือฌาญี กะ ราฌา ดาวิด ดัฮ. ปือมือเลา อีตู เลอ กู นะ บรี ฌาดี ลาฆู รือมัก ฌางัน กาเญา.' ตูฮัด ญา จะ. 35 ซาเบะ เดะ ซูรัจ อาซิก อาดา นู จะ 'ตูฮัด เออ เกา ตีเมา นะ บรี ซือมียา นู จรัฮ บาฌิ นะ เกา นะ กือนา บูโระ บูโซะ ดัฮ.' ตูฮัด ญา จะ. 36 "กรานา-จะ ตือกาลา ราฌา ดาวิด เตอ ดาวิด ญา บูวัจ ตูโรจ บือกะ ฮาตี นะ ตูฮัด บารู ญา มาตี ดัฮ ญา กือนา ตานัม ฌางัน ลูมอฮ ญัง-มูญัง นะ ญา ดัฮ. ญา โปด กือนา บูโระ บูโซะ ดัฮ. 37 ตาปี ซือมียา อีตู นู ตูฮัด บูวัจ บรี ฮีโดะ ปาเระ เดะ มาตี ดัฮ ญา เลอ เตด กือนา เดะ นู นะ บูโระ บูโซะ เลอ. 38 "กะฆีเตอ ดีบราดี เออ กือนา มาโซะ เดะ ฮาตี กะฆีนี เลอ. กรานา เยซู นี เลอ กามี มือญาเระ กะ กาเญา จะ ตูฮัด นะ อาเกะ ดูซา นะ กาเญา. ปือมือเลา ฮูโกบ นะ มูซา เตด บือเลฮ ตูโลก กาเญา บรี ลือปัซ เดะ ดูซา มานามา เตอ ตาปี ราตา ซือมียา นู ปือจายา กะ เยซู อีนี นะ ฌาดี บาฌิ ลือปัซ ดัฮ เดะ ลาฆู ดูซา ราตาๆ เลอ. 40 กะฆีเตอ กาเญา กือนา ฌาฆา บรี บาฌิ ตีเมา บรี ลาฆู นะ บือฌาดี ฌางัน กาเญา บือกะ ปือมือเลา นะ โกะ ซือมียา ตูโดฮ ลาฆู นะ ตูฮัด นู จะ 41 'ลีฮัจ เลอ กาเญา นู อาฆัฮ-ฆือละ. กาเญา นะ ปือและ-ฮาตี นะ ฌาฮานัม. กรานา กู นี เลอ นะ บูวัจ ลาฆู เดะ ฮาดัจ นะ กาเญา มีเซ-จะ อาดา ซือมียา มือญาเระ ลาฆู อีตู กะ กาเญา ตาปี กาเญา นะ เตด ปือจายา.' ตูฮัด ญา จะ." 42 ตานา เปาโล ฌางัน บานาบัด ตืองัฮ ตรือเบะ เดะ รูมัฮ บือมุน ลูมอฮ ซือมียา ปูโฌะ กูญา บรี มือเลา ลาฆู อีนี ปูลัก เดะ อารี บราดู มีงู ฮึลด. 43 กาลา โกะ ซือมียา ตีงัน รูมัฮ บือมุน ปี ฮาบิฮ ดัฮ อาดา ลูมอฮ ยิว บาญะ ฌางัน ลูมอฮ บักซา อาซิก นู มาโซะ ลาฆู นะ ตูฮัด บาญะ ฌูฆา กูญา ตูโรจ เปาโล ฌางัน บานาบัด ดัฮ. ดูวา อูรัก อีตู มือเลา ฌางัน กูญา บรี กูญา นะ ฮาระ กือมัซๆ กะ ลาฆู นู ตูฮัด ญา ฮาลัย บรี ซือลามัจ. 44 เดะ อารี บราดู มีงู ฮึลด อาดา ซือมียา มาแรฮ บือมุน ซรือปะ นะ ฮาบิฮ ซือนังฆรี บีดา นะ ดืองัยํ ปือมือเลา นะ ตูฮัด. 45 กาลา โกะ บักซา ยิว ลีฮัจ ซือมียา บาญะ อีตู กูญา ดือกี โตระ มือเลา ตะอารัฮ บลาวัด ฌางัน ปือมือเลา นะ เปาโล. 46 กะฆีเตอ เปาโล ฌางัน บานาบัด ฮาตี บรานี มือเลา จะ "กามี ฆาโดฮ มาแรฮ มือญาเระ ปือมือเลา นะ ตูฮัด กะ กาเญา ดูลู. ตาปี กาเญา กีปัซ ปือมือเลา อีตู ดัฮ. กาเญา บราซา จะ กาเญา เตด ปาโตจ นะ บือเลฮ ฮีโดะ ซูโงฮ ซือลาลู. บอฮ กามี นะ อาเลฮ ปี ซารี ลูมอฮ บักซา อาซิก. 47 กรานา ตูฮัด บือซัยํ เดะ อาตัซ บือเลฮ ปือซัด กะ กามี จะ 'กู ตืองะ เกา ดัฮ บรี ซูโลฮ จรัฮ กะ ลูมอฮ บักซา อาซิก. กะฆีเตอ เกา นะ ตูโลก บรี โกะ ซือมียา ราตา เดะ ดือนียา นะ ฮีโดะ ลือปัซ บาฌิ.' ญา จะ." 48 ตานา ลูมอฮ บักซา อาซิก ดืองัยํ กะฆีเตอ กูญา ซูกา-ฮาตี มือโอจ กะ ปือมือเลา นะ ตูฮัด. ซือมียา ซือมูฮา นู ตูฮัด ปีเลฮ ดัฮ บรี กูญา อาดา ฮีโดะ ซูโงฮ ซือลาลู เตอ กูญา ปือจายา ดัฮ. 49 ลาฆู ปือมือเลา นะ ตูฮัด งรือลา ปี ราตา โซะ ซือบือลัฮ นังฆรี อีตู. 50 ตาปี โกะ บักซา ยิว เตอ กูญา อาโจบ ลูมอฮ นีบีนี ซัยํ-บือซัยํ นู ตูเฮะ กะ ตูฮัด ฌางัน ลูมอฮ กีลากี ซัยํ-บือซัยํ เดะ นังฆรี. กูญา อาโจบ บรี ปรือกัด บลาวัด เปาโล ฌางัน บานาบัด โปรฮ กูญา ดูวา อูรัก บรี ตรือเบะ เดะ นังฆรี อีตู ราตา. 51 กะฆีเตอ กูญา ดูวา อูรัก กีปัซ ฮาบู ตานัฮ เดะ กากี นะ กูญา ฌาดี ลาฆู กีปัซ ลูมอฮ ซือมียา อีตู. กูญา บือฌาลัด ปี กะ นังฆรี อิโกนียุม. 52 ตาปี ลูมอฮ มูเระ กูญา ซูกา-ฮาตี ซูโงฮ ปือนอฮ ฌางัน ซือมืองัจ นะ ตูฮัด.
1 เดะ นังฆรี อิโกนียุม ฌาดี กะฆีเตอ ฌูฆา. เปาโล ฌางัน บานาบัด ปี มาโซะ กะ รูมัฮ บือมุน นะ บักซา ยิว. กูญา ดูวา อูรัก มือเลา กือมัซๆ บูวัจ บรี ซือมียา บาญะ ปือจายา กะ เยซู. อาดา นู บักซา ยิว ฌางัน บักซา กรีก ฌูฆา. 2 ตาปี โกะ บักซา ยิว นู ตีเมา ปือจายา กูญา อาโจบ ซือมียา บักซา อาซิก บรี อีงัจ ฌาฮัจ กะ ลูมอฮ ดีบราดี นู ปือจายา. 3 กูญา ดูวา อูรัก ดูโดะ เปะ อีตู ลามา ฮาตี บรานี มือญาเระ ลาฆู นะ ตูฮัด ปาซัน นู ตูฮัด ญา ฮาลัย บรี ซือลามัจ กะ อูมัจ-ซือมียา. ตูฮัด ญา บรี กูญา ดูวา อูรัก บูวัจ ปือนานา ซีดี นู ปือและ ซูโงฮ. กะฆีเตอ ญา บรี ลีฮัจ จะ ปือมือเลา นะ กูญา ฌาดี ลาฆู ซูโงฮ. 4 ตาปี ลูมอฮ ซือมียา เดะ นังฆรี อีตู บือปือจัฮ ฌาดี ดูวา บือลัฮ. ซือตืองัฮ อาดา โซะ โกะ บักซา ยิว ซือตืองัฮ อาดา โซะ โกะ ปือญูโรฮ ดูวา อูรัก. 5 อาดา ซือมียา บักซา อาซิก ฌางัน ซือมียา บักซา ยิว ฌางัน โกะ กือปาลา นะ กูญา เตอ กูญา ปาคัจ บรีงัจ บือซามา นะ บูวัจ ฌาฮัจ กะ เปาโล ฌางัน บานาบัด นะ อาเมด บาตู มาแรฮ ลีปัยํ บรี บูนอฮ กูญา. 6 กาลา กูญา ดูวา อูรัก ตาฮู ลาฆู อีนี กูญา ลารี ปี กะ โซะ ตูโปะ ลิดซือตรา ตูโปะ ดือบี โซะ ซือบือลัฮ นังฆรี ลีกาโอเนีย ฌางัน โกะ ตูโปะ อาซิกๆ โซะ อีตู. 7 เปะ อีตู กูญา ดูวา อูรัก มือญาเระ บรีตา นู บาฌิ นะ เยซู. 8 เดะ นังฆรี ลิดซือตรา อาดา ซือมียา ซืออูรัก นู ฌาลัด เตด บือเลฮ. ตะเดะ ดูโดะ เดะ อาปี ญา จาเปะ เตด ดือละ บือฌาลัด ลาลู. 9 ญา ดูโดะ เปะ อีตู มือนีงัย ปือมือเลา นะ เปาโล. เปาโล ตีญูง กะ ญา ลีฮัจ ญา อาดา ฮาตี ปือจายา บีดา นะ บือเลฮ บือบือลา บรี ซือนัง. 10 กะฆีเตอ เปาโล มือเลา ซูวารา บือซัยํ จะ "บีกัซ เลอ. บือดีรี ฌางัน กากี นะ เกา." ซือมียา อีตู มือลูปัจ บือฌาลัด. 11 ตานา โกะ ซือมียา บาญะ กูญา ลีฮัจ บือฆารี ปือบูวัจ นะ เปาโล กูญา ฮึนตะ บือซูระ เดะ บาซา นะ กูญา จะ "ลูมอฮ ดาโตะ นะ กีตา ตูโรด มาแรฮ ดัฮ อีซี ญาวา ซือรูปา ซือมียา เลอ." 12 กูญา บลาโลก บานาบัด ปือนามา จะ พระซุด. กูญา ลีฮัจ จะ เปาโล ฌาดี ซือมียา ปานัย มือเลา กะฆีเตอ กูญา บลาโลก จะ พระฮือเมด. 13 อาดา บาลัย มือญือมัฮ กะ พระซุด โซะ ฮึลด ปีตู ตูโปะ. กะฆีเตอ ซามี นะ พระซุด ญา ตูโตด โกะ ลือมู มาแรฮ ซือตืองัฮ ฌางัน บูงา ซีปัย ญา ปี กะ ปีตู ตูโปะ ฌางัน ลูมอฮ ซือมียา บาญะ บีดา นะ บูนอฮ ลือมู มือญือมัฮ กะ โกะ ปือญูโรฮ. 14 ตาปี กาลา โกะ ปือญูโรฮ ดูวา อูรัก ตาฮู ลาฆู อีตู กูญา จูลัด โกะ กาเยด บาฌู นะ กูญา บรี จีแจะ. กูญา บลารี ปี กะ ตืองัฮ ซือมียา บาญะ บือซูระ จะ 15 "กาเญา ซือมูฮา เออ บูวัจ นามา ปะ บูวัจ กะฆีนี? กามี ฌูฆา ฌาดี ซือมียา เลอ ซือรูปา บือกะ กาเญา. กามี มาแรฮ ดัฮ บีดา นะ มือญาเระ บรีตา นู บาฌิ กะ กาเญา นู จะ บรี กาเญา อาเลฮ มาแรฮ เดะ ลาฆู เตด บือฆูนา กะฆีนี บรี ซารี ตูฮัด นู ฮีโดะ ซูโงฮ เลอ. ญา เตอ บือฌาดี ลาแงะ ฌางัน ดือนียา ฌางัน ลาโวจ ฌางัน บือนา บารัก เดะ โซะ อีตู ซือมูฮา. 16 เดะ ฮาดัจ ดูลู ตูฮัด ญา บรี ลูมอฮ ซือมียา ซือมูฮา ตูโรจ กะ ฌาลัด นะ กูญา ซิกมาซิก. 17 ตาปี ญา ซือมาตา บูวัจ บือนา บาฌิ บรี ลีฮัจ จะ นู ญา เตอ ฌาดี ตูฮัด เลอ. ญา บรี กาเญา อาดา ฮูฌัด ตูโตฮ เดะ โซะ ลาแงะ อาดา มูเซด นู อาดา บูวัฮ บาญะ บรี กาเญา มากัด กือญัง ดัฮ บรี ซูกา-ฮาตี เลอ." กูญา จะ. 18 มีเซ-จะ มือเลา กะฆีนี ดัฮ ตาปี ปายัฮ นะ บลารัก ลูมอฮ ซือมียา ตีเมา บรี บูนอฮ บือนาตัก มือนืองะ มือญือมัฮ กะ กูญา ดูวา อูรัก. 19 ตาปี อาดา ซือมียา บักซา ยิว ซือตืองัฮ มาแรฮ เดะ นังฆรี อันตีโยก ฌางัน นังฆรี อิโกนียุม. กูญา อาโจบ ลูมอฮ ซือมียา บรี อาเมด บาตู มาแรฮ ลีปัยํ นะ บูนอฮ เปาโล. ลีปัยํ ดัฮ กูญา อีเระ ญา บือตรือเบะ ปี โซะ ลูวัยํ ตูโปะ อาคา จะ ญา มาตี ดัฮ. 20 ตาปี ตานา โกะ มูเระ มาแรฮ บือดีรี โซะ กือลีลิก เปาโล ญา บีกัซ ดัฮ มาโซะ กะ ตูโปะ. ฆีปาฆี ญา บือฌาลัด บาลิ ปี ฌางัน บานาบัด กะ ตูโปะ ดือบี. 21 เดะ ตูโปะ ดือบี กูญา ดูวา อูรัก มือญาเระ บรีตา นู บาฌิ นะ เยซู บูวัจ บรี อาดา ซือมียา ฌาดี มูเระ บาญะ อูรัก. ลือปัซ อีตู กูญา ดูวา อูรัก บาลิ ปี กะ ตูโปะ ลิดซือตรา นังฆรี อิโกนียุม นังฆรี อันตีโยก ปูลัก. 22 เปะ อีตู กูญา บูวัจ บรี ลูมอฮ มูเระ ตือตู-ฮาตี ปรีงัจ กะ กูญา บรี ตูโรจ กะ เยซู ฮาตี รือมัก. กูญา มือเลา จะ ดัฮ กีตา นะ อาดา บาฮาเฆด เดะ ดือนียา บารู นะ ตูฮัด เตอ กีตา ฆาโดฮ นะ ตาฮัด ลาฆู ซูซัฮ บาญะ. 23 เดะ โกะ ลูมอฮ นะ ตูฮัด ราตา ตือปัจ กูญา ดูวา อูรัก ตืองะ ซือมียา ซือตืองัฮ ฌาดี โกะ ซือมียา บือบือลา กูญา. กูญา บือเลฮ บือซาโวจ ตูโรจ ลาฆู บือตาฮัด มากัด เตอ ซรัฮ กูญา อีตู บรี ดูโดะ เดะ ตางัน นะ ตูฮัด นู กูญา ปือจายา ดัฮ. 24 เดะ บลากัก กูญา ดูวา อูรัก บือฌาลัด ลาลู นังฆรี ปิซีเดีย รอจ กะ นังฆรี ปัมฟีเลีย. 25 ตานา กูญา มือญาเระ ปือมือเลา นะ ตูฮัด เดะ นังฆรี ปรือกา ดัฮ กูญา ปี กะ ตือเปด อะตาเลีย. 26 เปะ อีตู กูญา ญาแญะ กาปัน บลายัยํ ปี กะ นังฆรี อันตีโยก. ฌาดี ลูมอฮ นะ ตูฮัด เดะ นังฆรี อันตีโยก อีตู นู ซรัฮ กูญา ดูวา อูรัก บรี กะ ตูฮัด นะ ฮาลัย บรี ซือลามัจ กะ กูญา เดะ ลาฆู บือกรือฌา อีตู นู กูญา บารู บูวัจ บรี ซุจ ฮาบิฮ ดัฮ. 27 ตานา รอจ นังฆรี อันตีโยก ดัฮ กูญา ซูโรฮ ลูมอฮ นะ ตูฮัด มาแรฮ บือมุน บือซามา. กูญา ดูวา อูรัก มือญาเระ กะ กูญา ลาฆู ซือมูฮา นู ตูฮัด ตูโลก บรี กูญา บูวัจ นู ตูฮัด บูกา ปีตู ดัฮ บรี กะ ลูมอฮ บักซา อาซิก มาโซะ ปือจายา ดัฮ. 28 กูญา ดูโดะ บือซามา ฌางัน ลูมอฮ มูเระ ลามา ดัฮ.
1 อาดา ซือมียา ซือตืองัฮ มาแรฮ ดาตัก เดะ นังฆรี ยูเดีย รอจ กะ นังฆรี อันตีโยก. กูญา อีตู ฮึนตะ นะ อาฌัยํ ลูมอฮ ดีบราดี จะ "กะ กาเญา เตด ซาโมจ ลาฆู กรัจ ตูโรจ บือกะ ฮาดัจ ฮูโกบ นะ มูซา กาเญา นะ ฮีโดะ ลือปัซ บาฌิ เตด บือเลฮ เลอ." 2 เปาโล ฌางัน บานาบัด มือเลา บือตีกัฮ-ตีกัฮ โตระ ฌางัน กูญา จะ นู กูญา อาฌัยํ ซาลัฮ ดัฮ. กะฆีเตอ กูญา ตืองะ เปาโล ฌางัน บานาบัด ฌางัน ซือมียา อาซิก ซือตืองัฮ บรี กูญา ปี กะ นังฆรี เยรูซาเลม บีดา นะ บือกีรา ปาซัน ลาฆู อีนี ฌางัน ลูมอฮ ปือญูโรฮ ฌางัน โกะ ซือมียา บือบือลา ลูมอฮ นะ ตูฮัด โซะ อีตู. 3 กะฆีเตอ ลูมอฮ นะ ตูฮัด เดะ นังฆรี อันตีโยก ซูโรฮ กูญา ปี โซะ อีตู. ตืองัฮ กูญา บือฌาลัด ลาลู นังฆรี ฟีนิเซีย นังฆรี ซะมาเรีย กูญา มือญาเระ กะ ลูมอฮ ดีบราดี ลาฆู นู ลูมอฮ บักซา อาซิก อาเลฮ มาแรฮ ซารี ตูฮัด ดัฮ. ลาฆู อีนี บูวัจ บรี ลูมอฮ ดีบราดี อีตู ซูกา-ฮาตี บาญะ เลอ. 4 ตานา รอจ กะ นังฆรี เยรูซาเลม ดัฮ ลูมอฮ นะ ตูฮัด ฌางัน โกะ ปือญูโรฮ ฌางัน โกะ ซือมียา บือบือลา ลูมอฮ นะ ตูฮัด ปาคัจ ซาโมจ กูญา บาฌิ ดัฮ. กูญา บือเลฮ มือญาเระ ลาฆู ซือมูฮา นู ตูฮัด บูวัจ ฌางัน กูญา ดัฮ. 5 ตาปี อาดา ซือมียา ปือจายา ซือตืองัฮ เดะ ลูมอฮ ฟาริซี กูญา บือดีรี มือเลา จะ "ลูมอฮ บักซา อาซิก กือนา ซาโมจ ลาฆู กรัจ เลอ. กือนา ปือซัด กะ กูญา บรี ตูโรจ ปือมือเลา ฮูโกบ นะ มูซา เลอ." 6 กะฆีเตอ โกะ ปือญูโรฮ ฌางัน โกะ ซือมียา บือบือลา กูญา บือมุน บือซามา บีดา นะ บือกีรา ลาฆู อีนี. 7 ตานา กูญา บือตีกัฮ-ตีกัฮ ลามา ดัฮ เปโตร ญา บือดีรี มือเลา จะ "ดีบราดี เออ กาเญา ตาฮู จะ เดะ วะตู ลามูลา เตอ ตูฮัด ปีเลฮ กู ดัฮ เดะ ลูมอฮ กาเญา บรี กู นะ มือญาเระ บรีตา นู บาฌิ นะ เยซู กะ ลูมอฮ บักซา อาซิก บรี กูญา นะ มือนีงัย นะ บือเลฮ ปือจายา. 8 ตูฮัด นู ตาฮู ฮาตี ซือมียา ญา บรี ลีฮัจ จะ ญา ซาโงะ ลูมอฮ กูญา ดัฮ. กะฆีเตอ ญา บรี ซือมืองัจ นะ ตูฮัด กะ กูญา บือกะ ญา บือเลฮ บรี กะ กีตา ดัฮ. 9 กะฆีเตอ ฌูฆา ญา เตด กีรา จะ ลูมอฮ กูญา อาซิก เดะ ลูมอฮ กีตา ตาปี ญา บาโซฮ ฮาตี นะ กูญา บรี บาฌิ ซาเบะ กูญา ปือจายา กะ เยซู ดัฮ. 10 ลาฆู ตูโรจ กะ ปือมือเลา ฮูโกบ นะ มูซา ฌาดี ซือรูปา บือนา บรัจ นู ลูมอฮ กีตา ฌางัน ลูมอฮ ญัง-มูญัง นะ กีตา ตาโงก เตด บียัซ ดัฮ. กะฆีเตอ บูวัจ นามา ปะ กาเญา อีงัจ นะ ลกลีฮัจ ตูฮัด นะ บอฮ บือนา บรัจ อีตู เดะ บลากัก นะ ลูมอฮ มูเระ บักซา อาซิก บรี กูญา ตาโงก? 11 กะฆีเตอ เตด บือเลฮ เลอ. ตาปี กีตา ปือจายา จะ นู ลูมอฮ กีตา ฮีโดะ ลือปัซ บาฌิ ดัฮ ฌาดี ซา ลาฆู ฌางัน ลูมอฮ กูญา ฌาดี-จะ ซาเบะ ตูฮัด เยซู ญา ฮาลัย บรี ซือลามัจ กะ กีตา ซือมูฮา ดัฮ เลอ." เปโตร ญา จะ. 12 กะฆีเตอ โกะ ลูมอฮ ซือมียา ซือมูฮา นู บือมุน บือซามา กูญา ซืองะ ดัฮ มือนีงัย กะ บานาบัด ฌางัน เปาโล นู กูญา มือญาเระ จะ ตูฮัด บือเลฮ บรี กูญา บูวัจ ปือนานา ซีดี นู ปือและ ซูโงฮ เดะ ตืองัฮ ลูมอฮ บักซา อาซิก. 13 ตานา กูญา ดูวา อูรัก มือเลา ฮาบิฮ ดัฮ ยากอบ ญา มือเลา ตีกัฮ จะ "ดีบราดี เออ มือนีงัย กะ กู เลอ. 14 เปโตร บือเลฮ มือญาเระ ดัฮ นู โซะ ลามูลา ตูฮัด บรี ลีฮัจ จะ นู ญา ซายัก กะ ลูมอฮ อูรัก บักซา อาซิก. ญา ปีเลฮ ซือมียา ซือตืองัฮ เดะ ลูมอฮ กูญา บรี ฌาดี ลูมอฮ ซือมียา นะ ญา. 15 ลาฆู อีนี รือมัก ฌางัน ปือมือเลา นะ โกะ ซือมียา ตูโดฮ ลาฆู นะ ตูฮัด บือกะ ซูรัจ นู จะ 16 'ลือปัซ อีนี กู นะ บาลิ มาแรฮ' ตูฮัด ญา จะ. 'บาลัย นะ ราฌา ดาวิด นู รูโตฮ ดัฮ กู นะ อาเกะ ปูลัก. บาลัย นู บือนาซา อีตู กู นะ อาเกะ ปาเระ นะ ตืองะ บรี กือฌะ บาฌิ ปูลัก เลอ. 17 กะฆีเตอ โกะ อูมัจ-ซือมียา นู ฆีลาฆี นะ บือเลฮ ซารี ตูฮัด ฌาดี-จะ ลูมอฮ ซือมียา บักซา อาซิก นู ฌาดี ลูมอฮ ซือมียา นะ กู ดัฮ. 18 ตูฮัด บือซัยํ เดะ อาตัซ นู ปลีฮัจ ลาฆู อีนี ตะเดะ ดูลู นูตู เตอ ญา เลอ บือเลฮ มือเลา กะฆีเตอ ดัฮ.' ญา จะ." 19 กะฆีเตอ ยากอบ มือเลา ลาฆี จะ "กู กีรา จะ ฌางัน บรี กีตา บือฆาโดฮ โกะ ซือมียา บักซา อาซิก นู อาเลฮ มาแรฮ ซารี ตูฮัด. 20 ตาปี กีตา กือนา ฆาแรฮ ซูรัจ กะ กูญา นู จะ ฌางัน มากัด บารัก นู ตะอารัฮ ซาเบะ ซูดัฮ มือนืองะ กะ บราลา ดัฮ. ฌางัน บือกาเซฮ. ฌางัน มากัด ลูลู นะ โกะ บือนาตัก นู จือแกะ ลีเฮ บรี มาตี. ฌางัน มากัด ดารัฮ ฌูฆา. 21 กรานา ตะเดะ ฮาดัจ ดูลู บีลัก มีงู อาดา ซือมียา บาจา ซูรัจ นะ มูซา เดะ รูมัฮ บือมุน นะ บักซา ยิว. กะฆีเตอ ราตา นังฆรี อาดา ซือมียา อาฌัยํ ปือมือเลา นะ ญา." ยากอบ ญา จะ. 22 กะฆีเตอ โกะ ปือญูโรฮ ฌางัน โกะ ซือมียา บือบือลา ฌางัน ลูมอฮ นะ ตูฮัด ซือมูฮา เตอ กูญา ปาคัจ ลีฮัจ บาฌิ จะ นะ ปีเลฮ ซือมียา นะ กูญา ซือตืองัฮ บรี กูญา นะ ปี กะ นังฆรี อันตีโยก บือซามา ฌางัน เปาโล ฌางัน บานาบัด. กูญา ปีเลฮ ยูดา นู ปือนามา อาซิก จะ บาระซาบา ฌางัน ซีลา ฌูฆา. กูญา ดูวา อูรัก ฌาดี ซือมียา ซัยํ-บือซัยํ เดะ ลูมอฮ ซือมียา ปือจายา. 23 กูญา อีตู ฆาแรฮ ซูรัจ กีเรบ เดะ กูญา ดูวา อูรัก มือเลา จะ "โกะ ปือญูโรฮ ฌางัน โกะ ซือมียา บือบือลา ลูมอฮ นะ ตูฮัด นู ฌาดี ดีบราดี นะ กาเญา กามี กีเรบ ซูรัจ อีนี บรี กะ ลูมอฮ ซือมียา ปือจายา บักซา อาซิก เดะ นังฆรี อันตีโยก นังฆรี ซีเรีย นังฆรี ซิลีเซีย. ซือลามัจ เลอ. 24 กามี ดืองัยํ ดัฮ จะ อาดา ซือมียา ซือตืองัฮ เดะ ลูมอฮ กามี ปี มือเลา ลาฆู นู บรี กะ กาเญา เตด ซือนัง-ฮาตี บรี ฆาโดฮ-ฮาตี โตระ. ตาปี โซะ กามี อีนี เตด บือเลฮ ซูโรฮ กูญา บรี ปี กะฆีเตอ เลอ. 25 กะฆีเตอ กามี บือเลฮ บือมุน บือซามา ซาฮาตี ปาคัจ ลีฮัจ บาฌิ จะ นะ ปีเลฮ ซือมียา ซือตืองัฮ ซูโรฮ กูญา ปี กะ กาเญา. กูญา นะ ปี บือซามา ฌางัน บานาบัด ฌางัน เปาโล นู กามี ซายัก. 26 กูญา ดูวา อูรัก อีนี ฌาดี ซือมียา นู ยอม ซรัฮ ญาวา นะ กูญา กรานา นามา นะ เยซู คริด ตูฮัด นะ กีตา. 27 กะฆีเตอ กามี ซูโรฮ ยูดา ฌางัน ซีลา ปี บือซามา. กูญา นะ บือเลฮ มือเลา ฌางัน กาเญา ลาฆู นู รือมัก ฌางัน ปือมือเลา เดะ ซูรัจ อีนี. 28 ซือมืองัจ นะ ตูฮัด บือซามา ฌางัน กามี อีนี ลีฮัจ บาฌิ จะ ฌางัน บรี กามี บอฮ บารัก บรัจ อาซิก เดะ อาตัซ กาเญา ลือเบฮ ซา ลาฆู อีนี เลอ นู จะ 29 ฌางัน บรี กาเญา มากัด ซือบารัก นู มือนืองะ กะ บราลา ดัฮ. ฌางัน มากัด ดารัฮ. ฌางัน มากัด ลูลู นะ โกะ บือนาตัก นู จือแกะ ลีเฮ บรี มาตี. ฌางัน บือกาเซฮ. ดัฮ กาเญา เตด ตูโรจ กะ ลาฆู กะฆีเตอ โบะ บาฌิ ดัฮ เลอ. ซือลามัจ เลอ." ซูรัจ ญา จะ. 30 กะฆีเตอ กูญา ซูโรฮ โกะ ซือมียา อีตู ปี ดัฮ ปี รอจ กะ นังฆรี อันตีโยก. กูญา บรี ลูมอฮ ซือมียา นะ ตูฮัด บือมุน บือซามา บรี ซูรัจ อีตู กะ กูญา. 31 ลูมอฮ ซือมียา บาจา ซูรัจ ดัฮ นู ปูโฌะ ฮาตี นะ กูญา บรี ซูกา-ฮาตี. 32 ยูดา ฌางัน ซีลา ฌาดี ซือมียา ตูโดฮ ลาฆู นะ ตูฮัด ฌูฆา. กูญา มือญาเระ ปือมือเลา บาญะ นู ปูโฌะ-ฮาตี ลูมอฮ โกะ ดีบราดี ตูโลก บรี กูญา กือฌะ-กือมัซ. 33 ซูดัฮ กูญา ดูวา อูรัก ดูโดะ เปะ อีตู ลามา ดัฮ ลูมอฮ ดีบราดี บรี ซือลามัจ กะ กูญา บรี กูญา บาลิ ปี กะ โกะ ซือมียา นู ซูโรฮ กูญา มาแรฮ. 35 ตาปี เปาโล ฌางัน บานาบัด ดูโดะ เดะ นังฆรี อันตีโยก. กูญา ฌางัน ซือมียา อาซิก บาญะ อูรัก อาฌัยํ ปือมือเลา นะ ตูฮัด มือญาเระ บรีตา นู บาฌิ นะ เยซู. 36 ตานา บาญะ อารี ลือปัซ ดัฮ เปาโล มือเลา กะ บานาบัด จะ "โฌฮ บรี กีตา ปี ปูลัก กะ ราตา นังฆรี ราตา ตูโปะ นู กีตา มือญาเระ ปือมือเลา นะ ตูฮัด ดัฮ. บรี กีตา ปี ฌือเงาะ ลีฮัจ ลูมอฮ ดีบราดี โซะ อีตู ลีฮัจ จะ กูญา ตืองัฮ ตูโรจ กะ ตูฮัด เยซู บาฌิ เฆอ?" ญา จะ. 37 บานาบัด ซูกา บาวา โยฮัน นู ปือนามา อาซิก จะ มาระโก ปี ซามา 38 ตาปี เปาโล ตีเมา บาวา ญา ปี ซามา ซาเบะ-จะ กาลา ดูลู ญา ตีงัน กูญา เดะ นังฆรี ปัมฟีเลีย ดัฮ เตด บือเลฮ ปี บือกรือฌา ซามา ฌางัน กูญา ยู ตือดะ ฮาบิฮ ดัฮ. 39 กะฆีเตอ เปาโล ฌางัน บานาบัด บือตือฆัฮ รืองัก ปี ดัฮ. บานาบัด อาเมด มาระโก บลายัยํ ปี กะ ปูเลา ซัยปรัด. 40 ตาปี โซะ เปาโล ญา ปีเลฮ ซีลา ดัฮ ลาลู กูญา ปี. ลูมอฮ ดีบราดี ซรัฮ กูญา ดูวา อูรัก กะ ตูฮัด บรี ญา นะ ฮาลัย บรี ซือลามัจ กะ กูญา. 41 ญา ปี ลาลู นังฆรี ซีเรีย นังฆรี ซิลีเซีย ราตา บูวัจ บรี โกะ ลูมอฮ นะ ตูฮัด กือฌะ-กือมัซ ดัฮ ราตา ตือปัจ.
1 เปาโล บือฌาลัด ปี กะ ตูโปะ ดือบี ตูโปะ ลิดซือตรา. โซะ อีตู อาดา มูเระ ซืออูรัก ปือนามา ทิโมที. ญา เตอ ฌาดี นานะ นะ นีบีนี บักซา ยิว ซืออูรัก นู ปือจายา กะ เยซู ดัฮ. ตาปี ปะ เดะ ญา ฌาดี ซือมียา บักซา กรีก. 2 ลูมอฮ ดีบราดี เดะ ตูโปะ ลิดซือตรา เดะ นังฆรี อิโกนียุม กูญา มือโอจ กะ ทิโมที. 3 เปาโล ซูกา นะ บาวา ญา ปี ซามา. กะฆีเตอ ญา อาเมด ทิโมที บูวัจ ลาฆู กรัจ ซาเบะ ลูมอฮ บักซา ยิว เดะ นังฆรี อีตู ซือมูฮา ตาฮู จะ ปะ เดะ ญา ฌาดี ซือมียา บักซา กรีก. 4 กูญา ตีฆา อูรัก บือฌาลัด ปี เดะ นังฆรี โซะ อีตู ราตา. ลาฆู นู โกะ ปือญูโรฮ ฌางัน โกะ ซือมียา บือบือลา ลูมอฮ นะ ตูฮัด เดะ นังฆรี เยรูซาเลม บือกีรา ดัฮ เตอ ลาฆู อีตู กูญา กีเรบ เดะ ลูมอฮ ซือมียา ปือจายา บรี กูญา นะ บูวัจ ตูโรจ. 5 กะฆีเตอ โกะ ลูมอฮ นะ ตูฮัด ซือมูฮา กือฌะ-กือมัซ ดัฮ. บีลัก อารี กูญา ดรัซ บือตามัฮ บาญะ เลอ. 6 กูญา ตีฆา อูรัก บือฌาลัด ปี ตูโรจ ตือกอซ นังฆรี ฟรีเจีย ฌางัน นังฆรี ฆาลาเตีย ซาเบะ ซือมืองัจ นะ ตูฮัด บลารัก ตีเมา บรี กูญา มือญาเระ ปือมือเลา นะ ตูฮัด เดะ นังฆรี เอเซีย. 7 ตานา รอจ กะ ตือกอซ นังฆรี มีเซีย กูญา กูวาซา นะ มาโซะ กะ นังฆรี บิทีเนีย ตาปี ซือมืองัจ นะ เยซู ตีเมา บรี กูญา ปี โซะ อีตู. 8 กะฆีเตอ กูญา ฌาลัด ปี ลาลู นังฆรี มีเซีย รอจ กะ ตือเปด โตรอัด. 9 มาลับ อีตู เปาโล ญา มีปี ลีฮัจ บือฆารี ซือมียา นังฆรี มาซิโดเนีย ซืออูรัก บือดีรี มีตา กือมัซๆ จะ "มาแรฮ เลอ โซะ ซรือบัก นังฆรี มาซิโดเนีย บีดา ตูโลก กามี." 10 ตานา เปาโล ลีฮัจ มีปี อีตู ดัฮ ดัดดัด กามี ซียะ นะ ปี กะ นังฆรี มาซิโดเนีย บือกีรา จะ ตูฮัด บือเลฮ ปาเงน กามี บรี กามี นะ ปี มือญาเระ บรีตา นู บาฌิ กะ ลูมอฮ ซือมียา โซะ อีตู. 11 กามี ญาแญะ กาปัน เดะ ตือเปด โตรอัด บลายัยํ ปี กะ ปูเลา ซาโมทรัด. ฆีปาฆี กามี บลายัยํ ปี ปูลัก กะ ตือเปด เนอาบุรี. 12 ดาตัก เดะ เปะ อีตู กามี ฌาลัด ปี กะ นังฆรี ฟีลิบปี นู ฌาดี ซือนังฆรี ซัยํ-บือซัยํ เดะ ซือบือลัฮ นังฆรี มาซิโดเนีย. นังฆรี โรม โปด บือเลฮ ตืองะ ฟีลิบปี ดัฮ บรี ฌาดี นังฆรี นะ บักซา โรม. กามี นูปัก เปะ อีตู บาญะ อารี ดัฮ. 13 เดะ อารี บราดู กรือฌา กามี ตรือเบะ โซะ ลูวัยํ นังฆรี ปี กะ บีดิก ซูงัย. ตือปัจ อีตู กามี อาคา จะ ฌาดี ตือปัจ นู ลูมอฮ บักซา ยิว บียาซา ปี บือซาโวจ บือซามา. กามี ปี ดูโดะ มือเลา ฌางัน ลูมอฮ นีบีนี นู บือมุน โซะ อีตู ดัฮ. 14 เดะ ลูมอฮ ซือมียา นู ดืองัยํ กามี อาดา นีบีนี ซืออูรัก ปือนามา ลิดดียา นู มาแรฮ เดะ นังฆรี ทียาตีรา. ญา เตอ ฌาดี ซือมียา ฌูวัน กาเยด ซี แนบปริง นู รือฆา มาฮัน ฌาดี ซือมียา ซืออูรัก นู ตูเฮะ กะ ตูฮัด. ตูฮัด บูกา ฮาตี นะ ญา บรี ญา มือนีงัย กะ ปือมือเลา นะ เปาโล. 15 ตานา ญา ซาโมจ ลาฆู ซือลับ เดะ อาเย ดัฮ ฌางัน โกะ ซือมียา ซือรูมัฮ นะ ญา ญา บืออาฌะ กามี จะ "ดัฮ กาเญา ลีฮัจ จะ กู ปือจายา กะ ตูฮัด รือมัก ดัฮ โฌฮ ปี ดูโดะ เดะ รูมัฮ นะ กู เลอ." ญา บืออาฌะ กามี กือมัซๆ. กะฆีเตอ กามี โปด ตูโรจ ปี ฌางัน ญา ดัฮ. 16 อาดา ซืออารี ตานา กามี ตืองัฮ ปี กะ ตือปัจ นู กูญา บียาซา บือซาโวจ ซีงี กามี ดาปัจ นีบีนี ปราโซฮ ซืออูรัก นู อาดา ฮาตู ราโซะ ดัฮ บรี ญา ฌาดี บูมอยํ ลีฮัจ โฆรฮ. นู ญา ตูโดฮ โฆรฮ กะฆีเตอ บูวัจ บรี โกะ ตกเก นะ ญา อูโตก บาญะ. 17 นีบีนี อีตู ซือมาตา ตูโรจ กะ เปาโล ฌางัน ลูมอฮ กามี บือซูระ จะ "ลูมอฮ ซือมียา อีนี ฌาดี ปราโซฮ นะ ตูฮัด เดะ อาตัซ นู ตีงี ซูโงฮ. กูญา นะ มือญาเระ บรี กะ กาเญา ตาฮู ลาฆู นู นะ บรี กาเญา ฮีโดะ ลือปัซ บาฌิ เลอ." ญา จะ. 18 ญา บูวัจ กะฆีนี บาญะ อารี ดัฮ บูวัจ บรี เปาโล ฆาโดฮ-ฮาตี โตระ. ญา อาเลฮ ปี มือเลา ฌางัน ฮาตู อีตู จะ "เดะ นามา นะ เยซู คริด กู ปือซัด เกา บรี ตรือเบะ เดะ ซือมียา อีนี เลอ." ญา จะ. ดัดดัด ฮาตู อีตู ตรือเบะ เดะ นีบีนี อีตู ดัฮ. 19 กาลา โกะ ตกเก นะ นีบีนี อีตู ลีฮัจ จะ กูญา ฮอย จาดัก นะ บือเลฮ อูโตก ลาฆี กูญา รีฆะ เปาโล ฌางัน ซีลา อีเระ ตางัน กูญา บือปี กะ โกะ กือปาลา เดะ ลามัน นังฆรี. 20 กาลา บาวา รอจ กะ โกะ กือปาลา นังฆรี ดัฮ กูญา อาดู จะ "ลูมอฮ ซือมียา อีนี ฌาดี บักซา ยิว. กูญา บูวัจ บือฆาโดฮ บาญะ เดะ นังฆรี นะ กีตา. 21 กูญา อาฌัยํ ฮาดัจ นู ซาลัฮ เดะ ฮูโกบ นะ กีตา. กีตา นู ซือมียา บักซา โรม นะ ซาโมจ ฮาดัจ นะ กูญา นะ บูวัจ ตูโรจ กะฆีเตอ ฮอย เตด บือเลฮ เลอ." 22 ลูมอฮ ซือมียา บาญะ ปาคัจ บลาวัด ฌางัน เปาโล ฌางัน ซีลา. ลูมอฮ กือปาลา โปด ปือซัด บรี จูลัด กาเยด บาฌู นะ กูญา ดูวา อูรัก บูวัก ดัฮ บรี ตามาตา รือเปะ กูญา. 23 ซูดัฮ กาเตาะ บาญะ กาลี ดัฮ กูญา กานัก ดูวา อูรัก อีตู เดะ ปือฌารา ปือซัด กือปาลา ปือฌารา บรี ฌาฆา กูญา กือมัซๆ. 24 ตานา กือนา ปือซัด กะฆีเตอ ดัฮ ญา บอฮ กูญา เดะ รูวัก โซะ ดาลับ บอฮ กากี นะ กูญา บรี มาโซะ ลือกัจ เดะ ปาปัด นู ตือโบะ ฌาดี ฆารี กากี ดัฮ. 25 วะตู ตืองัฮ มาลับ เปาโล ฌางัน ซีลา อาดา บือซาโวจ อาดา มือญาญี ปูฌี กะ ตูฮัด. โกะ อูรัก ซาลัฮ อาซิกๆ เดะ ปือฌารา ดืองัยํ กูญา. 26 ตานา บาฌิ ตานัฮ ญา บรีเงาะ โตระ บูวัจ บรี ปือฌารา มาจับ นะ รูโตฮ. ดัดดัด ปีตู ซือมูฮา ตือบูกา ดัฮ. ราตัย นะ อูรัก ซาลัฮ ซือมูฮา กือนา อูฆัย ฮาบิฮ ดัฮ. 27 กือปาลา ปือฌารา ดาฮานี บีกัซ. ตานา ญา ลีฮัจ จะ ปีตู เดะ ปือฌารา บูกา ดัฮ ญา อีงัจ จะ ลูมอฮ อูรัก ซาลัฮ ลารี ลือปัซ ดัฮ ซือมูฮา. กะฆีเตอ ญา ซีตะ ปือดัก นะ ญา นะ บูนอฮ ญาวา ตะอาซิก. 28 ตาปี เปาโล บือซูระ บูงี ซูวารา บือซัยํ จะ "ฌางัน บูวัจ ฌาฮัจ กะ ญาวา ตะอาซิก เลอ. กามี ซือมูฮา อาดา เปะ อีนี ดัฮ." 29 กือปาลา ปือฌารา ปือซัด บรี อาเมด ปลีตา มาแรฮ. ญา บลารี มาโซะ กะ ดาลับ ปือฌารา ตาโกจ ยู ญาวา กือตัยํ ตือมะ เดะ กากี นะ เปาโล ฌางัน ซีลา. 30 ญา บาวา กูญา ดูวา อูรัก ปี กะ โซะ ลูวัยํ ตาญา จะ "จา เออ กู นะ บูวัจ กะฮามี บีดา บรี กู นะ ฮีโดะ ลือปัซ บาฌิ?" 31 กูญา ดูวา อูรัก มือเลา จะ "กือนา ปือจายา กะ ตูฮัด เยซู เลอ. กะฆีเตอ เกา นะ ฮีโดะ ลือปัซ บาฌิ ดัฮ ฌางัน โกะ ซือมียา ซือรูมัฮ นะ เกา ซามา." 32 กะฆีเตอ กูญา มือเลา ปือมือเลา นะ ตูฮัด บรี กะ ญา ฌางัน โกะ ซือมียา ฮาบิฮ ซือรูมัฮ นะ ญา. 33 เดะ วะตู มาลับ อีตู เลอ ญา บาวา กูญา ดูวา อูรัก บือปี บาโซฮ ลียัก นะ กูญา. ดัดดัด ญา ซาโมจ ลาฆู ซือลับ เดะ อาเย ฌางัน โกะ นะบรานะ นะ ญา ซือมูฮา. 34 ลือปัซ อีตู ญา บาวา กูญา บรี มาโซะ เดะ ดาลับ รูมัฮ นะ ญา บูวัจ บารัก มากัด บรี บือบือลา กูญา. ญา ซูกา-ฮาตี โตระ ฮาบิฮ ฌางัน โกะ ซือมียา ซือรูมัฮ นะ ญา ซาเบะ ปือจายา กะ ตูฮัด ดัฮ. 35 ตานา จรัฮ ปาฆี ดัฮ โกะ กือปาลา นังฆรี ซูโรฮ ตามาตา ปี ปือซัด จะ "ปลือปัซ โกะ ซือมียา อีตู เลอ." 36 กือปาลา ปือฌารา บีตาฮู ปือมือเลา อีตู กะ เปาโล มือเลา จะ "โกะ กือปาลา ซูโรฮ ปลือปัซ กาเญา. กะฆีเตอ ตรือเบะ ปี ซือนัง ซือลามัจ เลอ." 37 ตาปี เปาโล มือเลา ฌางัน กูญา จะ "กามี ฌาดี ซือมียา บักซา โรม เลอ. กามี เตด บือเลฮ กือนา กรัจ ฮูโกบ ปาซัน ลาฆู ซาลัฮ มานามา โปด ตาปี กูญา บูวัจ บรี กามี กือนา รือเปะ โซะ ฮึลด ลูมอฮ ซือมียา. กูญา กานัก กามี เดะ ปือฌารา ฌูฆา. วะตู อีนี กูญา อีงัจ นะ โปรฮ กามี ซืองะๆ เฆอ? กะฆีเตอ เตด บือเลฮ เลอ. บรี กูญา มาแรฮ ตะอาซิก นะ บาวา กามี ตรือเบะ บรี ลือปัซ." 38 โกะ ตามาตา ปี มือญาเระ ปือมือเลา กะฆีเตอ กะ โกะ กือปาลา นังฆรี. ตานา โกะ กือปาลา ดืองัยํ ดัฮ นู ดูวา อูรัก อีตู ฌาดี ซือมียา บักซา โรม กูญา ตือกือฌุจ โตระ 39 มาแรฮ มีตา มะอัฮ เดะ กูญา ดูวา อูรัก. กะฆีเตอ โกะ กือปาลา บาวา กูญา บรี ตรือเบะ เดะ ปือฌารา มีตา บรี กูญา ตรือเบะ ปี เดะ นังฆรี ฟีลิบปี. 40 กะฆีเตอ กูญา ตรือเบะ เดะ ปือฌารา ปี ฌือเงาะ ลีฮัจ ลิดดียา. ตานา ดาปัจ ลูมอฮ ดีบราดี ดัฮ กูญา มือเลา ปือมือเลา บรี ปูโฌะ ฮาตี นะ กูญา ลาลู ตรือเบะ ปี เดะ นังฆรี.
1 เปาโล ฌางัน ซีลา เตอ กูญา บือฌาลัด ลาลู นังฆรี อัมฟิบุรี ฌางัน นังฆรี อะโปโลเนีย มาแรฮ รอจ กะ นังฆรี เทซะโลนิกา. เปะ อีตู อาดา รูมัฮ บือมุน นะ ลูมอฮ บักซา ยิว. 2 ตูโรจ บือกะ ลาฆู นู เปาโล บียาซา บูวัจ เตอ ญา ปี มาโซะ กะ รูมัฮ บือมุน อีตู. เดะ อารี บราดู ตีฆา มีงู ญา มือเลา บือตีกัฮ-ตีกัฮ ฌางัน ลูมอฮ ซือมียา ปาซัน ลาฆู ซูรัจ ปือมือเลา นะ ตูฮัด. 3 ญา มือญาเระ บรี มาโซะ เดะ ฮาตี บรี ลีฮัจ จะ ราฌา นู บรี ซือลามัจ เตอ ญา ฆาฆัฮ นะ ตาฮัด ซูซัฮ นะ ฮีโดะ ปาเระ เดะ มาตี ปูลัก. ญา มือเลา ลาฆี จะ "เยซู อีนี นู กู มือญาเระ บรี กะ กาเญา ตาฮู ญา เลอ ฌาดี ราฌา นู บรี ซือลามัจ อีตู." ญา จะ. 4 อาดา ซือมียา ซือตืองัฮ นู ปือจายา กะ ปือมือเลา นะ เปาโล มาโซะ โซะ ซือบือลัฮ ลูมอฮ นะ เปาโล ฌางัน ซีลา. อาดา ฌูฆา ลูมอฮ ซือมียา บักซา กรีก นู ตูเฮะ กะ ตูฮัด บาญะ อูรัก ฌางัน ลูมอฮ นีบีนี ซัยํ-บือซัยํ บาญะ. 5 ตาปี ลูมอฮ บักซา ยิว กูญา ดือกี. กูญา ปี มียา ซือมียา ฮอย เตด บือฆูนา เดะ ปือกัด ซือตืองัฮ บรี กูญา นะ มาแรฮ ฆรูมง บูวัจ กือลาจุ เดะ นังฆรี อีตู ราตา. กูญา ปี ปรือกัด มาโซะ กะ รูมัฮ นะ ยาโซน มียา เปาโล ฌางัน ซีลา บีดา นะ บาวา กูญา ปี กะ โซะ ลูวัยํ อาตัจ กะ ลูมอฮ ซือมียา บาญะ. 6 ตานา กูญา ซารี เตด ดาปัจ ดัฮ กูญา อีเระ ยาโซน ฌางัน ลูมอฮ ดีบราดี ซือตืองัฮ บาวา กูญา บือปี กะ โกะ กือปาลา นังฆรี บือซูระ จะ "ลูมอฮ ซือมียา อีนี นู บูวัจ บือฆาโดฮ เดะ ดือนียา ราตา กูญา มาแรฮ กะ นังฆรี กีตา ดัฮ. 7 ยาโซน อีนี ซาโมจ กูญา ดัฮ บรี นูปัก เดะ รูมัฮ นะ ญา. ลูมอฮ ซือมียา อีนี ซือมูฮา บูวัจ ซาลัฮ เดะ ปือมือเลา ฮูโกบ นะ ราฌา ซีซา. กูญา มือเลา จะ อาดา ราฌา อาซิก ปือนามา จะ เยซู." กูญา จะ. 8 ตานา ดืองัยํ กะฆีเตอ ดัฮ ลูมอฮ ซือมียา บาญะ ฌางัน โกะ กือปาลา นังฆรี กูญา ปาคัจ ฆาโดฮ-ฮาตี โตระ. 9 กูญา อาเมด รือฆา ตือบุซ ญาวา นะ ยาโซน ฌางัน กาวัด บารู ปลือปัซ กูญา ปี ดัฮ. 10 ตานา มาลับ ดัฮ ลูมอฮ ดีบราดี ซูโรฮ เปาโล ฌางัน ซีลา ปี กะ นังฆรี เบโรอา. รอจ กะ อีตู ดัฮ กูญา ดูวา อูรัก ปี มาโซะ กะ รูมัฮ บือมุน นะ บักซา ยิว. 11 ลูมอฮ ซือมียา เปะ อีตู กูญา ฮาตี บาฌิ เดะ โกะ ซือมียา นังฆรี เทซะโลนิกา. กูญา ซูกา-ฮาตี ซาโมจ ปือมือเลา นะ เปาโล. บีลัก อารี กูญา บาจา ซูรัจ ปือมือเลา นะ ตูฮัด นะ ซาซัจ ลีฮัจ จะ ปือมือเลา นะ เปาโล รือมัก ฌางัน ซูรัจ อีตู เฆอ เตด. 12 ลูมอฮ บักซา ยิว ปือจายา ดัฮ บาญะ อูรัก ฌางัน ลูมอฮ นีบีนี นู ซัยํ-บือซัยํ เดะ บักซา กรีก ฌางัน โกะ กีลากี บักซา กรีก บาญะ ฌูฆา. 13 ตานา โกะ บักซา ยิว เดะ นังฆรี เทซะโลนิกา ตาฮู จะ นู เปาโล ตืองัฮ มือญาเระ ปือมือเลา นะ ตูฮัด เดะ นังฆรี เบโรอา ฌูฆา กูญา ปาคัจ มาแรฮ กะ โซะ อีตู อาโจบ โกะ ลูมอฮ ซือมียา บรี ฆรูมง กือลาจุ. 14 ดัดดัด ลูมอฮ ดีบราดี บาวา เปาโล บือปี ตูโรจ ฌาลัด นู นะ ปี กะ ลาโวจ. ตาปี ซีลา ฌางัน ทิโมที ดูโดะ เดะ เบโรอา ลาฆี. 15 ลูมอฮ ซือมียา นู บาวา เปาโล บือปี กูญา บาวา ญา ปี รอจ กะ นังฆรี เอเทน. เปาโล กีเรบ ปือมือซัด เดะ กูญา บรี ซีลา ฌางัน ทิโมที นะ ปี มียา ญา งัจบางัจ เลอ. กะฆีเตอ กูญา บาลิ ปี ดัฮ. 16 กาลา เปาโล อาดา มือนาตี ซีลา ฌางัน ทิโมที เดะ นังฆรี เอเทน ญา ฆาโดฮ-ฮาตี บาญะ ลีฮัจ จะ นังฆรี อีตู กูญา ตูเฮะ กะ บราลา บาญะ. 17 กะฆีเตอ ญา ปี กะ รูมัฮ บือมุน บักซา ยิว มือเลา บือตีกัฮ-ตีกัฮ ฌางัน ลูมอฮ ยิว ฌางัน ลูมอฮ บักซา อาซิก นู ตูเฮะ กะ ตูฮัด. บีลัก อารี โปด ญา ปี กะ ปือกัด มือเลา บือตีกัฮ-ตีกัฮ ฌางัน โกะ ซือมียา นู ญา ดาปัจ เปะ อีตู. 18 กะฆีเตอ ญา ดาปัจ ซือมียา ปานัย ลาฆู เอปีกูเรียน ซือตืองัฮ ซือมียา ปานัย ลาฆู ซือโตอิก ซือตืองัฮ. โกะ ซือมียา อีตู กูญา ปาคัจ มือเลา จะ "แอะ ซือมียา อีนี มือเลา บาญะ ลาฆู กะฆีนี กะฆีเตอ." อาดา ซือมียา อาซิก นู จะ "โอ ญา มาแรฮ มือญาเระ ลาฆู ฌือแนฮๆ ลาฆู โกะ ดาโตะ นะ ญา." กูญา จะ. นู กูญา มือเลา กะฆีเตอ กรานา เปาโล อาดา มือญาเระ ลาฆู นะ เยซู ฌางัน ลาฆู ฮีโดะ ปาเระ เดะ มาตี. 19 กะฆีเตอ ลูมอฮ อีตู อาเมด เปาโล บือปี กะ ตือปัจ บือมุน บือกีรา เดะ บูเกะ อาเรโอ มือเลา จะ "บอฮ กามี บือคานะ นะ ตาฮู ลาฆู บารู นะ เกา นี. 20 กามี ดืองัยํ ดัฮ จะ เกา มือเลา ลาฆู นู ปือและ. กามี บือคานะ นะ ตาฮู จะ ลาฆู อีตู ฌาดี กะฮามี." กูญา จะ. 21 กรานา ลูมอฮ นังฆรี เอเทน เตอ ลูมอฮ อูรัก อาซิก เปะ อีตู โปด กูญา ซือมาตา ซูกา ดูโดะ ดืองัยํ มือญาเระ ลาฆู นู บารู ซือมูฮา. 22 กะฆีเตอ เปาโล บือดีรี โซะ ฮึลด ลูมอฮ บือมุน บือกีรา เดะ บูเกะ อาเรโอ มือเลา จะ "ซือมียา นังฆรี เอเทน ซือมูฮา เออ. กู ลีฮัจ จะ กาเญา ฌาดี ซือมียา ตูเฮะ กะ บราลา บาญะ มาจับ. 23 วะตู กู บือฌาลัด เดะ นังฆรี นะ กาเญา เตอ ลีฮัจ ลูมอฮ บราลา นะ กาเญา กู ดาปัจ ตือปัจ มือนืองะ มือญือมัฮ บารัก ซา ตือปัจ อาดา ซูรัจ นู ฆาแรฮ ตาโรฮ ดัฮ นู จะ 'ตือปัจ มือญือมัฮ กะ ตูฮัด นู เตด กราลา.' กะฆีเตอ เลอ กาเญา มือญือมัฮ กะ ตูฮัด นู กาเญา เตด ตาฮู เตด กราลา. ลาฆู ตูฮัด อีตู เลอ กู มาแรฮ มือญาเระ กะ กาเญา." ญา จะ. 24 "ญา เตอ ตูฮัด บือซัยํ เดะ อาตัซ. ญา เลอ นู บือฌาดี ดือนียา ฌางัน บือนา เดะ ดือนียา ซือมูฮา ดัฮ. ญา เลอ ฌาดี ตูฮัด นะ ลาแงะ ฌางัน ดือนียา โปด. กะฆีเตอ ญา เตด ดูโดะ เดะ รูมัฮ มือญือมัฮ นู โกะ ซือมียา บูวัจ ดัฮ. 25 ญา เตด ฆรานา อาดา ซือมียา อาเมด บารัก มาแรฮ บีดา บือบือลา ญา บือกะ ญา ปูตุซ บารัก นามา. กรานา ญา เตอ เลอ ฌาดี ตูฮัด นู บรี ลูมอฮ ซือมียา ซือมูฮา ฮีโดะ บือญาวา โปด นู บรี บารัก ซือมูฮา กะ อูมัจ-ซือมียา ดัฮ." ญา จะ. 26 "ตูฮัด เลอ ญา บือฌาดี อูมัจ-ซือมียา ซือมูฮา ราตา บักซา. ญา บูวัจ บรี กูญา อีตู ฌาดี ซา ดารัฮ อีตู บูวัจ บรี กูญา ดูโดะ ราตา เดะ ดือนียา. ญา เตอ บือเลฮ ตืองะ โกะ มูเซด นะ กูญา บรี ตือตู ดัฮ. ญา เลอ บือเลฮ ตืองะ นังฆรี ซือมูฮา บรี ลูมอฮ ซือมียา ดูโดะ ดัฮ. 27 ตูฮัด บูวัจ กะฆีเตอ ดัฮ นะ บรี ลูมอฮ ซือมียา ซารี ญา มืองาเฆา ปี บีดา นะ ดาปัจ ญา. ตาปี ตูฮัด เตอ ญา ฮอย เตด ฌาโวฮ เดะ ลูมอฮ กีตา. 28 อาดา ลาฆู ซือปาตัฮ นู จะ 'กรานา กีตา ลือกัจ บือซามา ฌางัน ตูฮัด เตอ กะฆีเตอ กีตา อาดา ฮีโดะ บือฌาลัด ปี มาแรฮ ดูโดะ ซือนัง โปด บือเลฮ.' ญา จะ. กะฆีเตอ ฌาดี ซือรูปา ลาฆู ปาโตด นู ซือมียา ซือตืองัฮ นะ บักซา กาเญา มือญาเระ จะ 'กีตา ฌาดี บือแนฮ นะ ตูฮัด ดัฮ.' ญา จะ. 29 กะฆีเตอ ดัฮ กีตา ฌาดี บือแนฮ นะ ตูฮัด เดะ อาตัซ กีตา เตด ปายัฮ บือฮีมัจ จะ ตูฮัด เตอ ญา ซือรูปา บราลา มัซ บราลา ปีระ บราลา บาตู นู ซือมียา ปานัย จูเตก บือกะ ญา อีงัจ ดัฮ. ตูฮัด ญา บูกัด กะฆีเตอ เลอ. 30 "กาลา ดูลู เตอ ตูฮัด เตด บอฮ เดะ ฮาตี ลาฆู กะฆีเตอ. ญา ลีฮัจ จะ ลูมอฮ ซือมียา เตด ตาฮู อารัฮ. ตาปี วะตู อีนี เลอ ตูฮัด ปือซัด บรี ซือมียา ซือมูฮา บราเลฮ-ฮาตี ราตา ตือปัจ 31 กรานา อารี กรัจ ฮูโกบ เตอ ตูฮัด ญา ตืองะ ดัฮ. อารี อีตู เลอ ญา นะ กรัจ ฮูโกบ อูมัจ-ซือมียา ซือมูฮา ตูโรจ กะ ลาฆู นู บาฌิ-ตือปัจ. ซือมียา กรัจ ฮูโกบ เตอ ตูฮัด ตืองะ ดัฮ ฌูฆา. ตูฮัด บูวัจ บรี ญา ฮีโดะ ปาเระ เดะ มาตี ดัฮ บรี ซือมียา ซือมูฮา ลีฮัจ จะ ลาฆู อีนี เตอ ฌาดี ลาฆู บือซูโงฮ-ซูโงฮ เลอ." ญา จะ. 32 ตานา กูญา ดืองัยํ เปาโล มือเลา ปาซัน ลาฆู ซือมียา ฮีโดะ ปาเระ เดะ มาตี ดัฮ เตอ อาดา ซือมียา อาฆัฮ-ฆือละ กะ เปาโล ซือตืองัฮ. ตาปี โซะ ซือมียา อาซิก จะ "กามี นะ ดืองัยํ เกา มือญาเระ ลาฆู อีนี ปูลัก." 33 กะฆีเตอ เปาโล ตรือเบะ ปี เดะ ตือปัจ อีตู. 34 อาดา ซือมียา ซือตืองัฮ นู ปือจายา ดัฮ ตูโรจ กะ เปาโล ปี. อาดา ดีโยนีซียัด ซืออูรัก เดะ ลูมอฮ บือกีรา บูเกะ อาเรโอ อีตู เตอ. อาดา นีบีนี ซืออูรัก ปือนามา ดามาริด อาดา อูรัก อาซิก ฌูฆา.
1 ลือปัซ อีตู เปาโล ตรือเบะ เดะ นังฆรี เอเทน ปี กะ นังฆรี โกริน. 2 โซะ อีตู ญา ดาปัจ ซือมียา บักซา ยิว ซืออูรัก นู ปือนามา จะ อาควีลา. อาควีลา ฌาดี ซือมียา นังฆรี ปอนโตด. กาลา อีตู ราฌา คลาวดียัด ซูดัฮ ปือซัด บรี ลูมอฮ บักซา ยิว ตรือเบะ เดะ นังฆรี โรม ซือมูฮา ดัฮ. กะฆีเตอ อาควีลา ฆาโดฮ ตีงัน นังฆรี อิตาลี ญา บารู มาแรฮ รอจ กะ นังฆรี โกริน ฌางัน บีนี นะ ญา นู ปือนามา จะ ปริซีลา. เปาโล ปี ฌือเงาะ ลีฮัจ กูญา ลากี บีนี 3 ดูโดะ บือกรือฌา บือซามา ฌางัน กูญา ซาเบะ ญา ฌาดี ตูกัก บูวัจ กาฌัก ซือรูปา กูญา. 4 เดะ อารี บราดู กรือฌา บีลัก มีงู ญา ปี กะ รูมัฮ บือมุน นะ บักซา ยิว มือเลา บือตีกัฮ-ตีกัฮ ฌางัน กูญา กูวาซา นะ ปรีงัจ กะ ลูมอฮ บักซา ยิว ฌางัน ลูมอฮ บักซา กรีก บรี กูญา ปือจายา. 5 ตานา ซีลา ฌางัน ทิโมที มาแรฮ ดาตัก เดะ นังฆรี มาซิโดเนีย ดัฮ เปาโล บือกรือฌา ซา ลาฆู ซือมาตา มือญาเระ ปือมือเลา นะ ตูฮัด มือเลา ฌาดี ซะซี กะ ลูมอฮ บักซา ยิว จะ เยซู เลอ ฌาดี ราฌา นู บรี ซือลามัจ. 6 กาลา กูญา บลาวัด ฌางัน ญา มือเลา ตะอารัฮ กะ ญา เปาโล กือพุจ ฮาบู ตานัฮ เดะ กาเยด นะ ญา มือเลา ฌางัน กูญา จะ "นู กาเญา นะ ฌาฮานัม เตอ บูกัด ซาลัฮ นะ กู ตาปี ฌาดี บือกะ ฮาตี นะ กาเญา เลอ. บอฮ ตะเดะ อีนี กู นะ ปี ซารี ลูมอฮ บักซา อาซิก." ญา จะ. 7 กะฆีเตอ เปาโล ตีงัน ลูมอฮ กูญา ดัฮ ญา ปี มาโซะ เดะ รูมัฮ นะ ซือมียา ซืออูรัก ปือนามา จะ ทิทียัด ยูซะตัด. ญา เตอ ฌาดี ซือมียา ตูเฮะ กะ ตูฮัด. รูมัฮ นะ ญา อาดา โซะ บีดิก รูมัฮ บือมุน นะ บักซา ยิว. 8 คริซือปัด นู ฌาดี กือปาลา รูมัฮ บือมุน อีตู ญา ปือจายา กะ ตูฮัด เยซู ดัฮ ฌางัน โกะ ซือมียา ซือรูมัฮ นะ ญา ซือมูฮา. อาดา ซือมียา นังฆรี โกริน บาญะ อูรัก นู มือนีงัย ดัฮ นู ปือจายา ซาโมจ ลาฆู ซือลับ เดะ อาเย ฌูฆา. 9 อาดา ซา มาลับ ตูฮัด ญา มาแรฮ ปลีฮัจ กะ เปาโล มือเลา จะ "ฌางัน ตาโกจ เลอ กือนา มือญาเระ ลาฆู นะ กู กะ ลูมอฮ อีนี ลาฆี. ฌางัน นะ ซืองะ เลอ. 10 กรานา-จะ กู นี เลอ อาดา บือซามา ฌางัน เกา. ฮอย ซาปา นะ บือเลฮ บลาวัด ฌางัน เกา นะ บูวัจ ฌาฮัจ กะ เกา. กรานา เดะ นังฆรี อีนี กู อาดา โกะ ซือมียา นะ กู บาญะ อูรัก." ตูฮัด ญา จะ. 11 กะฆีเตอ เปาโล ดูโดะ เปะ อีตู ซา ตาโฮด นัม บูลัด. ญา อาฌัยํ กูญา ลาฆู ปือมือเลา นะ ตูฮัด. 12 กาลา ฆาลีโย ฌาดี ฮูลู-บาลัก บือบือลา นังฆรี อาคายา โกะ บักซา ยิว ปาคัจ บลาวัด ฌางัน เปาโล รีฆะ ญา บาวา บือปี ญาแญะ กะ ซัน. 13 กูญา อาดู เปาโล จะ "ซือมียา อีนี เตอ ญา บืออาฌะ ลูมอฮ ซือมียา บรี มือญือมัฮ กะ ตูฮัด บือกะ ซาลัฮ เดะ ฮูโกบ เลอ." กูญา จะ. 14 ตานา เปาโล ฆามะ นะ ตีกัฮ กูญา ฆาลีโย มือเลา ฌางัน โกะ บักซา ยิว จะ "กาเญา บักซา ยิว เออ ดัฮ ปาซัน อีนี ฌาดี ลาฆู ซาลัฮ ลาฆู ฌาฮัจ มานามา นู ญา บูวัจ ดัฮ กู นะ ตาฮัด มือนีงัย กะ กาเญา. 15 ตาปี นี เลอ ฌาดี ปาซัน ลาฆู ปือมือเลา ซือตืองัฮ เตอ ปาซัน ปือนามา อีนี ปือนามา อีตู ปาซัน ปือมือเลา ฮูโกบ นะ กาเญา โปด. ปาซัน อีนี กาเญา ปี ฮัจ-ลีฮัจ ตะอาซิก เลอ. โซะ กู นี กู ตีเมา นะ ฌาดี ซือมียา กรัจ ฮูโกบ ลาฆู กะฆีนี ลาลู เลอ." ญา จะ. 16 กะฆีเตอ ญา โปรฮ กูญา บรี ตรือเบะ เดะ ซัน. 17 อาดา ลูมอฮ ซือมียา ซือมูฮา ปาคัจ บลาวัด ฌางัน โซซะเทเน นู ฌาดี กือปาลา รูมัฮ บือมุน นะ บักซา ยิว. กูญา รือเปะ ญา เดะ ลามัน ซัน. ตาปี โซะ ฆาลีโย ญา เตด ปือดูลี ลาลู. 18 เปาโล ดูโดะ เดะ นังฆรี โกริน บาญะ อารี ลาฆี ลาลู ญา ตีงัน ลูมอฮ ดีบราดี. ญา ญาแญะ กาปัน บลายัยํ ปี กะ นังฆรี ซีเรีย. ปริซีลา ฌางัน อาควีลา ปี ซามา. ดูลู เดะ ญาแญะ กาปัน เดะ ตือเปด เคนครียา เปาโล บือเลฮ ฆูติก โบะ นะ ญา ฌาดี ลาฆู ปือมือเลา ฌาญี ฌางัน ตูฮัด. 19 กูญา มาแรฮ รอจ กะ นังฆรี เอเฟซัด. เปาโล ตีงัน ปริซีลา ฌางัน อาควีลา เปะ อีตู ดัฮ. ญา ปี มาโซะ เดะ รูมัฮ บือมุน นะ บักซา ยิว มือเลา บือตีกัฮ-ตีกัฮ ฌางัน กูญา. 20 กูญา มีตา กือมัซๆ เดะ ญา บรี ดูโดะ ลามา ฌางัน กูญา ตาปี ญา ตีเมา. 21 ตาปี ดูลู ญา นะ ปี ดัฮ ญา มือเลา จะ "ดัฮ ตูฮัด บือคานะ กะฆีเตอ กู นะ บาลิ มาแรฮ ซารี กาเญา ปูลัก." กะฆีเตอ ญา ญาแญะ กาปัน บลายัยํ ปี เดะ นังฆรี เอเฟซัด. 22 ตานา รอจ กะ นังฆรี ซีซาเรีย ดัฮ ญา ฌาลัด ปี กะ นังฆรี เยรูซาเลม มืองา ลูมอฮ นะ ตูฮัด ลาลู ปี กะ นังฆรี อันตีโยก. 23 ตานา ญา ดูโดะ เดะ นังฆรี อันตีโยก ซือตืองัฮ ดัฮ ญา ตรือเบะ ปูลัก บือฌาลัด ปี ราตา เดะ นังฆรี ฆาลาเตีย ฌางัน นังฆรี ฟรีเจีย. โซะ อีตู ญา ตูโลก ลูมอฮ มูเระ ซือมูฮา บรี กือฌะ-กือมัซ. 24 อาดา ซือมียา บักซา ยิว ซืออูรัก ปือนามา อะโปโล. ญา บือฌาดี เดะ นังฆรี อาเลกซันดรียา ดัฮ ฌาดี ซือมียา ปานัย มือเลา ตาฮู ซูรัจ ปือมือเลา นะ ตูฮัด บาฌิ ซูโงฮ. ญา เตอ มาแรฮ รอจ กะ นังฆรี เอเฟซัด. 25 ญา บือเลฮ บลาฌัยํ ลาฆู นะ ตูฮัด ดัฮ. กะฆีเตอ ญา มือญาเระ ลาฆู อีตู ฮาตี ฮางัจ. ญา อาฌัยํ ลาฆู นะ เยซู กือนา ดัฮ ตาปี ปาซัน ลาฆู ซือลับ เดะ อาเย เตอ ญา ตาฮู ซา ลาฆู อีนี นู โยฮัน บือเลฮ บรี ซือมียา ซือลับ เดะ อาเย ดัฮ. 26 ญา ฮาตี บรานี ฮึนตะ นะ อาฌัยํ เดะ รูมัฮ บือมุน นะ บักซา ยิว. กาลา ปริซีลา ฌางัน อาควีลา ดืองัยํ ญา ดัฮ กูญา บาวา ญา บือปี กะ รูมัฮ นะ กูญา. กูญา อาฌัยํ ญา บรี ตาฮู ลาฆู นะ ตูฮัด บรี บาฌิ เดะ ดูลู. 27 วะตู อะโปโล ซูกา ปี กะ นังฆรี อาคายา ลูมอฮ ดีบราดี ตูโลก ญา ฆาแรฮ ซูรัจ บรี กะ ลูมอฮ มูเระ โซะ อีตู บรี กูญา นะ ซาโมจ ญา. ตานา รอจ ดัฮ ญา บือเลฮ ตูโลก บาญะ กะ โกะ ซือมียา นู ตูฮัด ฮาลัย บรี ซือลามัจ บรี กูญา ฌาดี ซือมียา ปือจายา ดัฮ. 28 โซะ ฮึลด ซือมียา บาญะ ญา ฮาตี งูฆางู มือเลา บือตีกัฮ บีดา บรี ฌือนัฮ เดะ ลูมอฮ ยิว. ญา บาจา ซูรัจ ปือมือเลา นะ ตูฮัด บรี ลีฮัจ จะ เยซู เตอ เลอ ญา ฌาดี ราฌา นู บรี ซือลามัจ.
1 กาลา อะโปโล อาดา เดะ นังฆรี โกริน เปาโล ฌาลัด ปี เดะ นังฆรี โซะ ตารา มาแรฮ รอจ กะ นังฆรี เอเฟซัด. เปะ อีตู ญา ดาปัจ มูเระ ซือตืองัฮ 2 ตาญา กูญา จะ "กาลา กาเญา ปือจายา กาเญา ซาโมจ ซือมืองัจ นะ ตูฮัด เฆอ เตด?" กูญา ตีกัฮ จะ "นู อาดา ซือมืองัจ นะ ตูฮัด เตอ กามี เตด ดือละ ดืองัยํ เลอ." 3 เปาโล ตาญา จะ "ดัฮ ฌาดี กะฆีเตอ กาเญา ซาโมจ ลาฆู ซือลับ เดะ อาเย มาจับ นามา?" กูญา ตีกัฮ จะ "ฌาดี มาจับ นู โยฮัน บรี ซือลับ เดะ อาเย." 4 เปาโล มือญาเระ จะ "โยฮัน บรี ซือมียา นู บราเลฮ-ฮาตี นะ ซาโมจ ลาฆู ซือลับ เดะ อาเย เตอ. ญา มือญาเระ กะ ลูมอฮ ซือมียา จะ นู กูญา กือนา ปือจายา กะ ซือมียา นู นะ มาแรฮ เดะ บลากัก ฌาดี เยซู เลอ." 5 ตานา กูญา ดืองัยํ ลาฆู กะฆีเตอ กูญา ซาโมจ ลาฆู ซือลับ เดะ อาเย เดะ นามา นะ ตูฮัด เยซู. 6 ตานา เปาโล ตืองะ ตางัน เดะ ญาวา กูญา ซือมืองัจ นะ ตูฮัด ญา ตูโรด มาแรฮ เดะ อาตัซ กูญา. กูญา มือเลา ฌาดี ปือมือเลา บาซา แนฮ-ฌือแนฮ กูญา ตูโดฮ ลาฆู นะ ตูฮัด. 7 ลูมอฮ กีลากี อีตู อาดา กีรา บือเลฮ ซือมูฮา ฆามะ-จะ ดูวา-บือลัซ อูรัก. 8 กือมูฮา ตีฆา บูลัด เปาโล ปี มาโซะ เดะ รูมัฮ บือมุน นะ บักซา ยิว ญา ฮาตี บรานี มือเลา บือตีกัฮ-ตีกัฮ ฌางัน ลูมอฮ ซือมียา กูวาซา นะ บรี กูญา ตาฮู ตือตู จะ นู ตูฮัด เดะ อาตัซ นะ บือบือลา ฌาดี ราฌา นะ ฌาดี กะฮามี. 9 ตาปี อาดา ซือมียา ซือตืองัฮ นู บาตัฮ ตีเมา ปือจายา. กูญา มือเลา กาซัยํ ปาซัน ฌาลัด นะ ตูฮัด โซะ ฮึลด ลูมอฮ ซือมียา. กะฆีเตอ เปาโล ตีงัน กูญา ดัฮ บาวา ลูมอฮ มูเระ ปี ซามา. บีลัก อารี ญา มือเลา บือตีกัฮ-ตีกัฮ เดะ รูมัฮ นู ซา ตือปัจ ซือมียา ปือนามา ทีรันนัด บียาซา อาฌัยํ. 10 ญา บูวัจ กะฆีเตอ กือมูฮา ดูวา ตาโฮด. กะฆีเตอ ลูมอฮ ซือมียา เดะ นังฆรี เอเซีย ราตา กูญา ดืองัยํ ปือมือเลา นะ ตูฮัด เยซู ดัฮ เตด-จะ ลูมอฮ บักซา ยิว เตอ ลูมอฮ บักซา กรีก ฌูฆา. 11 ตูฮัด เดะ อาตัซ บูวัจ บรี เปาโล บูวัจ ปือนานา ซีดี นู ปือและ ซูโงฮ. 12 อาดา ซือมียา อาเมด กาเยด อีซุจ มูคา ซือตืองัฮ โกะ กาเยด มานามา โปด นู เปาโล บือเลฮ ซูโรฮ ดัฮ บาวา ปี ตืองะ เดะ ซือมียา ซาเกะ บูวัจ บรี ปือญาเกะ นะ กูญา ลือฆา บาฌิ ดัฮ บรี ฮาตู ฌาฮัจ นู มาโซะ เดะ กูญา ตรือเบะ ดัฮ. 13 อาดา ซือมียา บักซา ยิว ซือตืองัฮ นู ฌาลัด ปี มาแรฮ ฌาดี บูมอยํ โปรฮ ฮาตู. กูญา กูวาซา นะ ซูโรฮ ปือนามา นะ เยซู นะ มือเลา ฌางัน ฮาตู จะ "เดะ นามา นะ เยซู นู เปาโล มือญาเระ อีตู กู ปือซัด เกา บรี ตรือเบะ ปี เลอ." 14 อาดา เซวา นู ฌาดี ซามี บือซัยํ เดะ บักซา ยิว ซืออูรัก. ญา อาดา นานะ กีลากี ตูโฌฮ อูรัก นู บูวัจ กะฆีเตอ. 15 ตาปี ฮาตู ฌาฮัจ อีตู ตีกัฮ กะ กูญา จะ "เยซู กู กราลา. เปาโล โปด กู กราลา ฌูฆา. ตาปี โซะ กาเญา อีนี กู เตด กราลา. กาเญา เตด ซีดี เลอ." 16 กะฆีเตอ ซือมียา นู อาดา ฮาตู มาโซะ อีตู ญา มือลูปัจ เดะ อาตัซ กูญา บลาวัด บรี ฌือนัฮ เดะ กูญา. ญา กาเตาะ กูญา บาญะ กาลี บรี กูญา ลารี ตรือเบะ เดะ รูมัฮ ยู ญาวา นะ กูญา ตือตลาญัก อาดา ลียัก เดะ ญาวา ฌูฆา. 17 กาลา ลูมอฮ บักซา ยิว ฌางัน ลูมอฮ บักซา กรีก เดะ นังฆรี เอเฟซัด ดืองัยํ ลาฆู กะฆีเตอ กูญา ปาคัจ ตาโกจ โตระ ซือมาตา มือโอจ กะ นามา นะ ตูฮัด เยซู. 18 อาดา บาญะ ซือมียา นู บือเลฮ มาแรฮ ปือจายา กะ เยซู ดัฮ กูญา ซาโงะ ปือบูวัจ นู ฌาฮัจ นะ กูญา บรี ราตา ซือมียา ตาฮู. 19 อาดา บาญะ นู ฌาดี ซือมียา มากัย อาเย-ลือมู ดัฮ. กูญา อาเมด ซูรัจ บือฆูรู นะ กูญา มาแรฮ ตูนู เดะ อาปี โซะ ฮึลด ลูมอฮ ซือมียา บาญะ. กูญา บือกีรา รือฆา ซูรัจ อีตู ฆามะ บือเลฮ ลีมา ละซา รีเงะ ปีระ กือมูฮา. 20 กะฆีเตอ ลาฆู ซีดี อีนี บูวัจ บรี ลาฆู ปือมือเลา นะ ตูฮัด งรือลา บาญะ. อาดา ซือมียา นู ปือจายา พรัด บาญะ. 21 วะตู ลาฆู อีนี ซุจ ฮาบิฮ ดัฮ เปาโล กีรา ตือตู เดะ ฮาตี นะ ลาลู ปี เดะ นังฆรี มาซิโดเนีย ฌางัน นังฆรี อาคายา บารู นะ ปี กะ นังฆรี เยรูซาเลม ดัฮ. ญา มือเลา จะ "วะตู กู ปี เปะ อีตู ดัฮ กู ฆาฆัฮ นะ ปี กะ นังฆรี โรม ฌูฆา." 22 อาดา ซือมียา ตูโลก ญา ดูวา อูรัก ฌาดี ทิโมที ฌางัน เอรัดตัด. ญา ซูโรฮ กูญา ปี กะ นังฆรี มาซิโดเนีย ตาปี อีซี ญา ตะอาซิก ดูโดะ เดะ นังฆรี เอเซีย ลาฆี ซือตืองัฮ. 23 กาลา อีตู อาดา ลาฆู ฆาโดฮ โตระ ซาเบะ ฌาลัด นะ ตูฮัด. 24 อาดา ตูกัก ปีระ ซืออูรัก ปือนามา เดเมตรีโย. ญา บียาซา อาเมด ปีระ มาแรฮ บูวัจ บาลัย มิดือมิ ซือรูปา กะ บาลัย นะ พระอาเทมิด. นู บูวัจ กะฆีนี บูวัจ บรี ลูมอฮ ตูกัก ปีระ อูโตก บาญะ. 25 กะฆีเตอ ญา บลาโลก ลูมอฮ ตูกัก ปีระ มาแรฮ บือซามา ฌางัน ลูมอฮ ซือมียา นู บือกรือฌา ลาฆู กะฆีเตอ ซือมูฮา. ญา มือเลา ฌางัน กูญา จะ "กาเญา ซือมูฮา กาเญา ตาฮู จะ นู กีตา กรือฌา กะฆีนี กีตา บือเลฮ อูโตก บาญะ ดัฮ. 26 กาเญา ลีฮัจ ดัฮ ดืองัยํ ดัฮ นู ปือบูวัจ นะ อูรัก อีนี เปาโล เตอ. ญา มือเลา จะ บราลา นู บูวัจ ฌางัน ตางัน นะ ซือมียา เตด ฌาดี ตูฮัด นู ซูโงฮ. บูกัด เดะ เอเฟซัด ซา นังฆรี ญา มือเลา กะฆีนี ตาปี เดะ นังฆรี เอเซีย ราตา ญา บูวัจ บรี ซือมียา บาญะ ซือซัจ ดัฮ อาเลฮ ปี ตูโรจ ลาฆู อีตู. 27 ตาโกจ-จะ บูกัด ซา ลาฆู นู กรือฌา นะ กีตา นะ รูฆี ดัฮ ตาปี นะ บูวัจ บรี บาลัย นะ พระอาเทมิด นู บือซัยํ นะ กือนา มือฌัฮ ฌูฆา นะ บูวัจ บรี บือซรี นู บาฌิ นะ ญา นะ ลือแงะ ฮาบิฮ ดัฮ. ญา เลอ นู ซือมียา ซือมูฮา มือญือมัฮ เดะ นังฆรี เอเซีย ราตา เดะ ดือนียา ราตาๆ โปด." ญา จะ. 28 ตานา ลูมอฮ ซือมียา บาญะ ดืองัยํ ปือมือเลา อีนี กูญา มูซัยํ โตระ ปาคัจ บือซูระ จะ "เฮย พระอาเทมิด นะ ลูมอฮ เอเฟซัด ญา บือซัยํ โตระ เลอ." 29 บารู ฌาดี ลาฆู ฆาโดฮ ซูโงฮ ราตา เดะ นังฆรี. กูญา ฆรูมง รีฆะ ฆาโย ฌางัน อาริดตาคัด ซือมียา เดะ นังฆรี มาซิโดเนีย นู บือฌาลัด มาแรฮ ฌางัน เปาโล ดัฮ. กูญา ซา ฮาตี บาวา กูญา ดูวา อูรัก บือปี บลารี มาโซะ กะ ตือปัจ บือมุน. 30 เปาโล อีงัจ นะ มาโซะ ปี ดาปัจ ลูมอฮ ซือมียา บาญะ อีตู ตาปี ลูมอฮ มูเระ ตีเมา บรี ญา มาโซะ. 31 ลูมอฮ ซือมียา ซัยํ-บือซัยํ เดะ นังฆรี เอเซีย ซือตืองัฮ นู ฌาดี ซาบัจ นะ เปาโล กูญา ซูโรฮ ซือมียา ปี มือเลา ฌางัน ญา จะ "ฌางัน นะ มาโซะ เดะ ตือปัจ บือมุน เลอ." ญา จะ. 32 โซะ ซือมียา นู บือมุน ดัฮ เตอ กูญา ฆาโดฮ โตระ. อาดา ซือมียา บือซูระ กะฆีนี กะฆีเตอ. ซือมียา นู บาญะ เตอ กูญา เตด ตาฮู จะ ปาซัน นู กูญา บือมุน ดัฮ ฌาดี ลาฆู นามา เลอ. 33 โกะ ซือมียา ซือตืองัฮ อาคา จะ อาเลกซันเดอ ฌาดี ซือมียา นู บูวัจ ลาฆู ฆาโดฮ ซาเบะ ลูมอฮ บักซา ยิว ซูโรฮ ญา ปี บือดีรี โซะ ฮึลด. โซะ อาเลกซันเดอ ญา ลามัย ตางัน อีงัจ นะ ตีกัฮ กูญา. 34 ตาปี ตานา กูญา ลีฮัจ จะ ญา ฌาดี ซือมียา บักซา ยิว กูญา ซือมูฮา ปาคัจ บือซูระ บือซามา กีรา บือเลฮ ฆามะ ดูวา ฌับ ซือมาตา มือเลา จะ "เฮย พระอาเทมิด นะ ลูมอฮ เอเฟซัด ญา บือซัยํ โตระ เลอ." 35 กะฆีเตอ กือปาลา นังฆรี มาแรฮ ซืออูรัก. ญา บูวัจ บรี ลูมอฮ ซือมียา ซืองะ ดัฮ ญา มือเลา ฌางัน กูญา จะ "ลูมอฮ ซือมียา นังฆรี เอเฟซัด เออ โกะ ซือมียา ราตา ตาฮู จะ นู ลูมอฮ ซือมียา เดะ นังฆรี เอเฟซัด ฌาดี ซือมียา บือบือลา บาลัย นะ พระอาเทมิด นู บือซัยํ โตระ บือบือลา บาตู กรามัจ นู ฆูโฆยํ เดะ ลาแงะ ดัฮ ฌูฆา. 36 ฮอย ซาปา นะ บือเลฮ กีปัซ ลาฆู อีตู. กะฆีเตอ กาเญา กือนา ซืองะ เลอ. ฌางัน บูวัจ ลาฆู เตด บือฆูนา. 37 กาเญา ซูดัฮ บาวา ซือมียา ดูวา อูรัก อีนี มาแรฮ ดัฮ นู เตด ฌาดี ซือมียา ปือญามุน บารัก เดะ รูมัฮ มือญือมัฮ เตอ นู เตด บือเลฮ มือเลา ตะอารัฮ กะ ดาโตะ นะ กีตา. 38 ดัฮ เดเมตรีโย ฌางัน อานะ กูลี นะ ญา อาดา ลาฆู นะ อาดู ซาปา อาดา อารี นู ซัน นะ ซาซัจ ลาฆู มานามา เตอ อาดา ซือมียา กรัจ ฮูโกบ ฌูฆา. บรี กูญา อาเมด ปาซัน นะ กูญา ปี อาดู ตือปัจ ซัน เลอ. 39 ดัฮ อาดา ลาฆู นามา อาซิก บรี ลาฆู อีตู นะ ซือลือซัย เดะ ตือปัจ บือมุน บือกีรา บรี กือนา ลาฆู. 40 ตาโกจ-จะ กีตา นะ กือนา อาดู ซาเบะ นู บือมุน ฆาโดฮ เดะ อารี อีนี ดัฮ. กรานา ฮอย ลาฆู นะ ตีกัฮ นู กีตา ฆรูมง บือมุน ฆาโดฮ กะฆีนี ดัฮ." ญา จะ. 41 ซูดัฮ มือเลา กะฆีเตอ ดัฮ ญา ซูโรฮ ลูมอฮ บือมุน บรี กูญา ปาคัจ บาลิ เลอ.
1 กาลา ลาฆู ฆาโดฮ อีตู ซืองะ ฮาบิฮ ดัฮ เปาโล บลาโลก ลูมอฮ มูเระ มาแรฮ ปูโฌะ ฮาตี นะ กูญา ตีงัน กูญา ลาลู ญา ฌรือมัก ปี กะ นังฆรี มาซิโดเนีย. 2 ญา ฌาลัด ปี โซะ อีตู ราตา มือเลา บาญะ มาจับ ปูโฌะ ฮาตี นะ กูญา ลาลู ปี รอจ กะ นังฆรี กรีก. 3 ญา ดูโดะ เปะ อีตู ตีฆา บูลัด ดัฮ. ตานา ญา นะ ญาแญะ กาปัน ปี กะ นังฆรี ซีเรีย โกะ บักซา ยิว บือกีรา นะ บูวัจ ฌาฮัจ กะ ญา. กะฆีเตอ ญา อีงัจ นะ บาลิ ปี ลาลู นังฆรี มาซิโดเนีย. 4 อาดา ซือมียา ปี ซามา ฌาดี โซปาเตอ นานะ นะ ปีรัด ซือมียา นังฆรี เบโรอา. อาดา อาริดตาคัด ฌางัน เซกุนดัด ซือมียา นังฆรี เทซะโลนิกา. อาดา ฆาโย ซือมียา นังฆรี ดือบี ฌางัน ทิโมที. อาดา ทีคิกัด ฌางัน โตรฟีมัด ซือมียา นังฆรี เอเซีย. 5 กูญา อีนี ปี ดูลู นาตี กามี เดะ ตือเปด โตรอัด. 6 กาลา ลาฆู บรามัย มากัด โรตี ฮอย ราฆี ฮาบิฮ ดัฮ กามี บลายัยํ มาแรฮ เดะ นังฆรี ฟีลิบปี ลีมา อารี ดัฮ บารู ดาปัจ กูญา เดะ ตือเปด โตรอัด. กามี ดูโดะ เปะ อีตู ตูโฌฮ อารี ดัฮ. 7 เดะ อารี มีงู อีตู เตอ กามี บือมุน บือซามา นะ บูวัจ ลาฆู ลือแปะ โรตี. เปาโล มือญาเระ ลาฆู นะ ตูฮัด อาฌัยํ กูญา. ซาเบะ ญา นะ ตีงัน กูญา เดะ โซะ ปาฆี ญา มือเลา บาญะ รอจ กะ ตืองัฮ มาลับ ดัฮ. 8 เดะ รูวัก โซะ อาตัซ นู กามี บือมุน อีตู อาดา ปลีตา บาญะ. 9 อาดา อูรัก มูดา ซืออูรัก ปือนามา ยูทิกัด. ญา ดูโดะ เดะ ตีกะ มืองาโตะ โตระ ซาเบะ เปาโล ญา อาฌัยํ กูญา ลามัจ นะ ซุจ ลาฆี. กะฆีเตอ อูรัก มูดา อีตู ญา ตือลีนา ดัฮ ฆูโฆยํ ตะเดะ อาตัซ จากัจ นู ตีฆา รอจ กะ ตานัฮ. กูญา ปี อาเกะ ญา ลีฮัจ จะ ญา มาตี ดัฮ. 10 เปาโล ตูโรด ปี กะ โซะ บาวัฮ ตือมะ กรด ญา มือเลา จะ "ฌางัน ตือกือฌุจ เลอ. เดะ ญาวา นะ ญา ญา อาดา ฮีโดะ ลาฆี." 11 ลาลู ญา ปี กะ รูวัก โซะ อาตัซ ปูลัก ญา ลือแปะ โรตี มากัด บือซามา. ญา มือเลา ฌางัน กูญา ตือดะ บือซียัก ดัฮ ลาลู ญา ตรือเบะ ปี. 12 กูญา บาวา อูรัก มูดา อีตู ปี กะ รูมัฮ. ญา ฮีโดะ ดัฮ บูวัจ บรี กูญา ซูกา-ฮาตี โตระ. 13 ลูมอฮ กามี ญาแญะ กาปัน บลายัยํ ปี กะ ตือเปด อาโซ นะ ซาโมจ เปาโล เปะ อีตู. ญา บือเลฮ ปือซัด บรี บูวัจ กะฆีเตอ กรานา อีซี ญา นะ บือฌาลัด โซะ ฮูตัด ปี กะ ตือเปด อีตู. 14 กาลา ญา ดาปัจ กามี เดะ ตือเปด อาโซ กามี ซาโมจ ญา ญาแญะ กาปัน ลาลู มาแรฮ รอจ กะ ตือเปด มีทิเลน. 15 กามี บลายัยํ เดะ โซะ อีตู ซืออารี รอจ กะ ปูเลา คิโอ. มาโซะ กะ อารี ดูวา กามี รอจ กะ ปูเลา ซาโม. เดะ อารี ตีฆา กามี รอจ กะ ตือเปด มีเลทัด. 16 เปาโล ตือตู ดัฮ นะ ลาลู นังฆรี เอเฟซัด กรานา ญา ตีเมา ดูโดะ ลามา เดะ นังฆรี เอเซีย ตาปี ซูกา ปี ปัจ-จือปัจ กะ นังฆรี เยรูซาเลม. ดัฮ บือเลฮ เตอ ญา อีงัจ นะ รอจ ดูลู เดะ อารี บรามัย เพนเทคด. 17 เดะ ตือเปด มีเลทัด ญา ซูโรฮ ซือมียา ปี ปาเงน โกะ ซือมียา บือบือลา ลูมอฮ นะ ตูฮัด เดะ นังฆรี เอเฟซัด. 18 ตานา กูญา มาแรฮ ดาปัจ ญา ญา มือเลา กะ กูญา จะ "กาเญา ตะอาซิก ตาฮู จะ ตะเดะ อารี ลามูลา นู กู รอจ กะ นังฆรี เอเซีย ดัฮ กู บือเลฮ บูวัจ ตูโรจ กะฮามี เดะ ตืองัฮ ลูมอฮ กาเญา บีลัก วะตู. 19 ฌางัน ฮาตี มือนูโนะ โตระ กู บือเลฮ บือกรือฌา ฌาดี ปราโซฮ นะ ตูฮัด ดัฮ. กู มือนาแงฮ โปด ตาฮัด ซูซัฮ ซาเบะ โกะ บักซา ยิว กีรา ฌาฮัจ กะ กู ดัฮ. 20 ลาฆู นามาๆ นู นะ ตูโลก กาเญา กู เตด บูนี ดัฮ ตาปี บือเลฮ มือญาเระ บรี กะ กาเญา ดัฮ. กู บือเลฮ อาฌัยํ ลาฆู นะ ตูฮัด เยซู เดะ ตือปัจ บือมุน เดะ รูมัฮ ซือมียา ฌูฆา. 21 กู บือเลฮ ปรีงัจ กือมัซๆ กะ ลูมอฮ บักซา ยิว ฌางัน ลูมอฮ บักซา กรีก นู กูญา กือนา บราเลฮ-ฮาตี ซารี ตูฮัด เดะ อาตัซ กือนา ปือจายา กะ เยซู ตูฮัด นะ กีตา. 22 "นี เลอ ซือมืองัจ นะ ตูฮัด ปรือกัด กู บรี กู ฆาฆัฮ นะ ปี กะ นังฆรี เยรูซาเลม. กู เตด ตาฮู นู กู นะ กือนา ลาฆู นามา เดะ โซะ อีตู. 23 ตาปี เดะ ราตา นังฆรี ซือมืองัจ นะ ตูฮัด ปรีงัจ กะ กู จะ กู นะ กือนา กานัก เดะ ปือฌารา ตาฮัด ซูซัฮ โตระ. 24 ตาปี กู กีรา จะ นู กู อาดา ฮีโดะ ลาฆี ฌาดี ลาฆู เตด บรือฆา กะ กู. อาดา กรือฌา นู ตูฮัด เยซู บรี กะ กู ดัฮ ฌาดี กรือฌา มือญาเระ บรีตา นู บาฌิ ปาซัน นู ตูฮัด ญา ฮาลัย บรี ซือลามัจ กะ กีตา. กรือฌา อีนี กู บือคานะ นะ บูวัจ ซุจ ดัฮ ซือรูปา ซือมียา บลารี บือลูมา นู นะ บลารี บรี ซุจ ฮาบิฮ ดัฮ. 25 "ลีฮัจ เลอ กู บือเลฮ ปี มาแรฮ ดัฮ เดะ ตืองัฮ ลูมอฮ กาเญา มือญาเระ ปาซัน ลาฆู นู ตูฮัด เดะ อาตัซ นะ บือบือลา ฌาดี ราฌา. ตาปี วะตู อีนี กู ตาฮู จะ กาเญา ซือมูฮา นะ เตด บือฆารี กู ปูลัก. 26 กะฆีเตอ เลอ กู ปรีงัจ กะ กาเญา กือมัซๆ จะ นู กู เตด บือเลฮ อูโนยํ เดะ ลาฆู มือญาเระ กะ กาเญา ลาฆู นู อาดา เดะ ฮาตี นะ ตูฮัด ซือมูฮา. กะฆีเตอ ดัฮ ซาปา นะ มาตี ฌาฮานัม ดัฮ บูกัด ซาลัฮ นะ กู ตาปี ซาลัฮ นะ ญา เลอ. 28 ซือมืองัจ นะ ตูฮัด ญา บือเลฮ ตืองะ กาเญา ฌาดี ซือมียา ตูงู กาวัด กาเมก นะ ตูฮัด ฌาดี-จะ ลูมอฮ นะ ตูฮัด. ลูมอฮ อีตู ตูฮัด บือเลฮ อาเมด มาแรฮ ฌาดี นะ ญา ดัฮ กรานา-จะ อีซี นานะ นะ ญา มาตี ดารัฮ มือนีเลฮ ดัฮ. กะฆีเตอ เลอ กาเญา กือนา ฌาฆา ญาวา ตะอาซิก กือนา ฌาฆา บือบือลา กาวัด กาเมก อีตู บรี บาฌิ ฌูฆา. 29 กู ตาฮู จะ กาลา กู ปี ดัฮ อาดา ซือมียา ซือรูปา อาซู ฮูตัด นู ฌาฮัจ นะ มาแรฮ มาโซะ เดะ ตืองัฮ กาเญา. กูญา นะ เตด ตือจีฮัด กะ กาวัด กาเมก นะ ตูฮัด. 30 อาดา ฌูฆา ซือมียา ซือตืองัฮ นะ ปลีฮัจ เดะ ตืองัฮ กาเญา. กูญา นะ มือเลา ลาฆู ซือซัจ อีงัจ นะ บาวา ลูมอฮ มูเระ บรี ตูโรจ กะ กูญา. 31 กะฆีเตอ กาเญา กือนา ฌาฆา เลอ. กือนา จับ เลอ นู กือมูฮา รอจ กะ ตีฆา ตาโฮด โปด กู อาดา ปรีงัจ กะ ราตา ซือมียา ซียัก มาลับ ฮอย เตด บราดู. อาดา ฌางัน ลาฆู มือนาแงฮ ซามา เลอ. 32 "วะตู อีนี กู ซรัฮ กาเญา กะ ตูฮัด ฌางัน ปือมือเลา มือญาเระ ปาซัน นู ตูฮัด ญา ฮาลัย บรี ซือลามัจ ดัฮ. ปือมือเลา อีตู เลอ นะ บือเลฮ บูวัจ บรี กาเญา ปือจายา กือฌะ-กือมัซ ดัฮ นะ บรี กาเญา นะ บือเลฮ ซาโมจ ปือซากา เดะ ตืองัฮ ลูมอฮ ซือมียา ซือมูฮา นู ตูฮัด ปีเลฮ ดัฮ บรี ฌาดี ซือมียา นะ ญา. 33 โกะ ปีระ โกะ มัซ โกะ กาเยด บือปากัย นะ ซาปา โปด กู เตด บือเลฮ ฮาลูบา. 34 กาเญา ตาฮู จะ ฌางัน ตางัน อีนี เลอ กู บือเลฮ บือกรือฌา บีดา นะ บือบือลา ญาวา ตะอาซิก ฌางัน ซือมียา นู อาดา บือซามา. 35 เดะ บือนา ซือมูฮา กู ฌาดี จูตอ บรี กะ กาเญา ดัฮ นะ บรี กาเญา นะ ราเฌด บือกรือฌา บีดา บือบือลา โกะ ซือมียา ฮอย อูรัจ. กู นะ บรี กาเญา อีงัจ กะ ปือมือเลา นะ ตูฮัด เยซู อีตู นู ญา มือเลา จะ 'ซือมียา นู ฮาฆิ กะ กาวัด ญา ซือนัง ซือลามัจ ลือเบฮ เดะ ซือมียา นู ซาโมจ.' " ญา จะ. 36 ตานา เปาโล มือเลา กะฆีนี ฮาบิฮ ดัฮ ญา ตูกู ลูโตจ บือซาโวจ ฌางัน กูญา ซือมูฮา. 37 ลูมอฮ กูญา มือนาแงฮ บาญะ กรด ลีเฮ นะ ญา จีโยบ ปีปี ญา. 38 กูญา ซูซัฮ-ฮาตี โตระ ซาเบะ ปือมือเลา นะ ญา นู จะ กูญา นะ เตด บือฆารี ญา ปูลัก. กะฆีเตอ ลูมอฮ กูญา บาวา ญา บือปี บรี ญาแญะ กาปัน.
1 ตานา ตีงัน กูญา ดัฮ กามี ญาแญะ กาปัน บลายัยํ ปี รือมัก รอจ กะ ปูเลา โกด. ลือปัซ ซืออารี ปูลัก กามี มาแรฮ รอจ กะ ปูเลา โรด. ตะเดะ โซะ อีตู กามี มาแรฮ รอจ กะ ตือเปด ปะตารา. 2 เปะ อีตู กามี ดาปัจ กาปัน นู นะ ปี กะ นังฆรี ฟีนิเซีย. กามี ญาแญะ กาปัน อีตู บลายัยํ ปี. 3 ตานา ลีฮัจ บือฆารี ปูเลา ซัยปรัด ดัฮ กามี ลาลู ปูเลา อีตู ซือบือลัฮ โซะ ลาโวจ บลายัยํ ปี กะ นังฆรี ซีเรีย. กามี ตูโรด เดะ กาปัน ปัจ ตือเปด ทัยระ ซาเบะ กูญา นะ อาเกะ ซือบารัก เดะ ดาลับ กาปัน ตือปัจ อีตู. 4 กามี ปี มียา ลูมอฮ มูเระ ปัจ อีตู ดูโดะ ฌางัน กูญา ตูโฌฮ อารี. ซือมืองัจ นะ ตูฮัด บือกรือฌา เดะ ฮาตี นะ โกะ มูเระ อีตู บูวัจ บรี กูญา ปรีงัจ กะ เปาโล จะ "ฌางัน ปี กะ นังฆรี เยรูซาเลม เลอ." 5 ซูดัฮ ดูโดะ ปัจ อีตู ตูโฌฮ อารี กามี ตีงัน ลูมอฮ กูญา ปี ดัฮ. กูญา ซือมูฮา ฌางัน โกะ อานะ บีนี ซามา บาวา กามี บือปี ตรือเบะ เดะ นังฆรี. กามี ซือมูฮา ตูกู ลูโตจ เดะ ปาตัย บือซาโวจ บือซามา. 6 กามี ตีงัน กูญา ปี ญาแญะ กาปัน ตาปี กูญา บาลิ ปี กะ รูมัฮ นะ กูญา ดัฮ. 7 ตานา กามี บลายัยํ มาแรฮ เดะ ตือเปด ทัยระ ดัฮ กามี รอจ กะ นังฆรี โตละมัย. ตือปัจ อีตู กามี ดาปัจ ลูมอฮ ดีบราดี ปือจายา ดูโดะ ฌางัน กูญา ซืออารี. 8 เดะ โซะ ปาฆี กามี ปี ปูลัก มาแรฮ รอจ กะ นังฆรี ซีซาเรีย. กามี มาโซะ ปี ดูโดะ เดะ รูมัฮ นะ ฟีลิบ ซือมียา นู มือญาเระ บรีตา นู บาฌิ นะ ตูฮัด. ญา เตอ ฌาดี ซือมียา ซืออูรัก เดะ ลูมอฮ ตูโฌฮ อูรัก อีตู นู กูญา ปีเลฮ ดัฮ เดะ นังฆรี เยรูซาเลม. 9 ญา อาดา นานะ ราดารา ปัจ อูรัก นู ตูโดฮ ลาฆู นะ ตูฮัด. 10 ตานา กามี ดูโดะ ปัจ อีตู บาญะ อารี ดัฮ อาดา ซือมียา ตูโดฮ ซืออูรัก ปือนามา อาฆาบัด มาแรฮ ดาตัก เดะ นังฆรี ยูเดีย. 11 ญา มาแรฮ ดาปัจ กามี อาเมด ตาลี ปีงัก นะ เปาโล อีกัจ กากี นะ ตะอาซิก ฌางัน ตางัน ซามา มือเลา จะ "ซือมืองัจ นะ ตูฮัด มือเลา จะ ตูฮัด ตาลี ปีงัก อีนี เตอ โกะ บักซา ยิว เดะ นังฆรี เยรูซาเลม กูญา นะ อีกัจ ญา กะฆีนี เลอ นะ อาตัจ ญา กะ ลูมอฮ บักซา อาซิก." ญา จะ. 12 ตานา กามี ดืองัยํ ลาฆู กะฆีเตอ กามี ฌางัน ลูมอฮ ซือมียา โซะ อีตู ปูโฌะ กะ เปาโล กือมัซๆ จะ "ฌางัน นะ ปี กะ นังฆรี เยรูซาเลม เลอ." 13 ตาปี เปาโล ตีกัฮ จะ "บูวัจ นามา เลอ กาเญา มือนาแงฮ บูวัจ บรี กู ฆาโดฮ-ฮาตี บาญะ. กู ปือนอฮ เดะ ฮาตี บูกัด นะ กือนา อีกัจ เดะ นังฆรี เยรูซาเลม ซา ลาฆู ตาปี นะ กือนา มาตี ปัจ อีตู โปด กรานา นามา นะ ตูฮัด เยซู." ญา จะ. 14 กาลา กามี ลีฮัจ จะ ญา ตีเมา มือนีงัย กามี ซืองะ ดัฮ มือเลา จะ "บรี ฌาดี บือกะ ฮาตี นะ ตูฮัด เลอ." 15 ลือปัซ บาญะ อารี อีตู กามี ปือตัด โกะ ซือบารัก ปี รอจ กะ นังฆรี เยรูซาเลม ดัฮ. 16 อาดา มูเระ เดะ นังฆรี ซีซาเรีย ซือตืองัฮ ปี ซามา ฌางัน กามี บาวา บือปี กะ รูมัฮ นะ นาโซน บรี นูปัก ปัจ อีตู. นาโซน เตอ ฌาดี ซือมียา ปูเลา ซัยปรัด นู ฌาดี มูเระ ตะเดะ นูตู. 17 ตานา กามี รอจ กะ นังฆรี เยรูซาเลม ดัฮ ลูมอฮ ดีบราดี กูญา ซาโมจ กามี ซูกา-ฮาตี ซูโงฮ. 18 จรัฮ ปาฆี เปาโล ฌางัน กามี มาโซะ ปี ดาปัจ ยากอบ. โกะ ซือมียา บือบือลา ลูมอฮ นะ ตูฮัด อาดา บือซามา ฌูฆา. 19 เปาโล มืองา กะ กูญา กะฆีเตอ ญา มือญาเระ กะ กูญา ลาฆู ซือมูฮา นู ตูฮัด บือเลฮ บูวัจ เดะ ตืองัฮ ลูมอฮ บักซา อาซิก นู ฌาดี ลาฆู บือกรือฌา นะ ญา. 20 ตานา กูญา ดืองัยํ ลาฆู อีตู กูญา ปูฌี กะ ตูฮัด เดะ อาตัซ. กูญา มือเลา ฌางัน เปาโล จะ "มิ เออ ลีฮัจ เลอ เดะ ลูมอฮ บักซา ยิว อาดา ซือมียา นู ปือจายา ดัฮ บาญะ รีบู อูรัก. กูญา ซือมูฮา ราเฌด ตูเฮะ กะ ปือมือเลา ฮูโกบ นะ มูซา. 21 อาดา ซือมียา บือเลฮ มือเลา ฌางัน กูญา ปาซัน นะ เกา จะ นู เกา อาฌัยํ ลูมอฮ บักซา ยิว นู ดูโดะ เดะ ตืองัฮ ลูมอฮ บักซา อาซิก บรี กูญา ตีงัน บูวัก ปือมือเลา ฮูโกบ นะ มูซา เตด ปายัฮ บูวัจ ลาฆู กรัจ กะ นานะ นะ กูญา เตด ปายัฮ ตูโรจ กะ ฮาดัจ ฮูโกบ นะ บักซา ยิว เลอ. 22 กะฆีเตอ กีตา นะ บูวัจ กะฮามี บาฌิ? ซูโงฮ กูญา นะ ดืองัยํ จะ นู เกา มาแรฮ ดัฮ. 23 กะฆีเตอ กือนา บูวัจ ตูโรจ บือกะ กามี นะ มือเลา ฌางัน เกา. นี เลอ กามี อาดา ซือมียา ปัจ อูรัก นู บือเลฮ มือเลา ปือมือเลา บือฌาญี ตือตู ฌางัน ตูฮัด เดะ อาตัซ ดัฮ. 24 บรี เกา บาวา ปัจ อูรัก อีตู บือปี บรี เกา บูวัจ ลาฆู บาโซฮ ญาวา ตะอาซิก ฌางัน กูญา ซูโรฮ ดูเวะ ฆาตี กูญา บรี กูญา นะ กูโกยํ ปาลา. กะฆีเตอ ลูมอฮ ซือมียา ซือมูฮา นะ ตาฮู จะ นู กูญา บือเลฮ ดืองัยํ ปาซัน นะ เกา อีตู เตด ฌาดี นามา เลอ ตาปี อีซี เกา ตะอาซิก บูวัจ ตูโรจ กะ ปือมือเลา ฮูโกบ อีตู. 25 ตาปี โซะ ลูมอฮ ซือมียา บักซา อาซิก นู ปือจายา ดัฮ กามี บือเลฮ กีเรบ ซูรัจ มือญาเระ ลาฆู นู กามี บือกีรา ดัฮ นู จะ ฌางัน บรี กูญา มากัด บารัก นู มือนืองะ กะ บราลา ดัฮ. ฌางัน มากัด ดารัฮ ฌางัน ลูลู บือนาตัก นู จือแกะ ลีเฮ บรี มาตี. ฌางัน บรี กูญา บือกาเซฮ." กูญา จะ. 26 กะฆีเตอ เปาโล บาวา ซือมียา ปัจ อูรัก อีตู บือปี. โซะ ปาฆี ญา บูวัจ ลาฆู บาโซฮ ญาวา ตะอาซิก ฌางัน กูญา. ญา มาโซะ ปี กะ รูมัฮ มือญือมัฮ ตูฮัด นะ บรี ตาฮู ดูลู จะ อาดา บราปา อารี นู ลาฆู บาโซฮ อีตู นะ ซือลือซัย ดัฮ. ฌาดี-จะ อารี ดีฮา นะ อาเมด บารัก มือญือมัฮ มาแรฮ มือนืองะ กรานา กูญา โซก ซืออูรัก. 27 วะตู ตูโฌฮ อารี อีตู ซรือปะ นะ ฮาบิฮ ดัฮ อาดา ลูมอฮ บักซา ยิว นู ดาตัก เดะ นังฆรี เอเซีย ซือตืองัฮ กูญา ลีฮัจ เปาโล เดะ รูมัฮ มือญือมัฮ ตูฮัด. กูญา อาโจบ ลูมอฮ ซือมียา บาญะ บรี รีฆะ เปาโล 28 บือซูระ จะ "ลูมอฮ บักซา อิซราเอน เออ ตูโลก เลอ. ซือมียา อีนี เลอ ญา อาฌัยํ ลูมอฮ ซือมียา ราตา บรี บลาวัด ฌางัน บักซา กามี ฌางัน ปือมือเลา ฮูโกบ นะ มูซา ฌางัน รูมัฮ มือญือมัฮ ตูฮัด อีนี เลอ. ลือเบฮ เดะ อีตู ปูลัก ญา บือเลฮ บาวา โกะ ซือมียา บักซา กรีก ซือตืองัฮ บรี มาโซะ กะ รูมัฮ มือญือมัฮ บูวัจ บรี รูมัฮ นู บาฌิ บือซรี อีนี ฌาดี ตะอารัฮ ดัฮ." 29 กูญา มือเลา กะฆีนี กรานา-จะ ดูลู เตอ กูญา บือเลฮ บือฆารี โตรฟีมัด นู ซือมียา นังฆรี เอเฟซัด อาดา ฌางัน เปาโล เดะ ปือกัด. กะฆีเตอ กูญา อาคา จะ เปาโล บือเลฮ บาวา ญา บรี มาโซะ กะ รูมัฮ มือญือมัฮ ตูฮัด. 30 กะฆีเตอ นังฆรี เยรูซาเลม ราตา ฆาโดฮ โตระ. โกะ ซือมียา บาญะ กูญา ฆรูมง บลารี บือซามา รีฆะ เปาโล อีเระ ญา บรี ตรือเบะ เดะ รูมัฮ มือญือมัฮ ตูฮัด. ดัดดัด กูญา ตูโดก ปีตู รูมัฮ มือญือมัฮ ดัฮ. 31 ตานา กูญา กูวาซา นะ บูนอฮ เปาโล อาดา บรีตา มาแรฮ กะ กือปาลา บือซัยํ นะ กาวัด ตาฮัน บักซา โรม จะ นังฆรี เยรูซาเลม ราตา ฆาโดฮ โตระ. 32 ดัดดัด ญา อาเมด ลูมอฮ ตาฮัน ฌางัน โกะ กือปาลา ตาฮัน ซามา บลารี ปี ซารี กูญา. ตานา กูญา บือฆารี กือปาลา บือซัยํ อีตู ฌางัน ลูมอฮ ตาฮัน มาแรฮ กูญา บราดู เตด กาเตาะ เปาโล ดัฮ. 33 กะฆีเตอ กือปาลา บือซัยํ ญา มาแรฮ รีฆะ เปาโล ปือซัด บรี อีกัจ ญา ฌางัน ราตัย ดูวา อูตัซ. ญา ตาญา จะ "ซือมียา อีนี ฌาดี ซาปา? ญา บูวัจ ซาลัฮ นามา เลอ?" 34 เดะ ลูมอฮ ซือมียา บาญะ อาดา ซือตืองัฮ บือซูระ กะฆีนี ซือตืองัฮ บือซูระ กะฆีเตอ. อาดา บูริ ฆาโดฮ โตระ. กือปาลา ตาฮัน อีตู นะ ดืองัยํ ลาฆู ซูโงฮ เตด บือเลฮ ดัฮ. กะฆีเตอ ญา ปือซัด บรี บาวา เปาโล มาโซะ กะ รูมัฮ ตาฮัน. 35 กาลา กูญา นะ ญาแญะ ตางา โกะ ตาฮัน ฆาโดฮ อาเกะ เปาโล บาวา บือปี ซาเบะ ลูมอฮ ซือมียา บาญะ นะ บูวัจ ลาฆู ฌาฮัจ. 36 กูญา อีตู ฆรูมง ตูโรจ ญา บือซูระ จะ "บูนอฮ ญา เลอ." 37 ตานา โกะ ตาฮัน นะ บาวา เปาโล บรี มาโซะ กะ รูมัฮ นะ กูญา ญา มือเลา กะ กือปาลา ตาฮัน จะ "บรี กู มือเลา ฌางัน เกา ซือตืองัฮ บือเลฮ เฆอ?" กือปาลา ตาฮัน ตาญา จะ "เกา ปานัย มือเลา บาซา กรีก เฆอ? 38 กะฆีเตอ เกา ฌาดี ซือมียา บักซา อียิบ อีตู บูกัด เฆอ? ฌาดี ซือมียา นู ดูลู อาโจบ ลูมอฮ ซือมียา บรี บูวัจ ลาฆู ฆาโดฮ โตระ นู บาวา โกะ ซือมียา ปือฆัก ปีเซา บรี มาโซะ ฮูตัด ปัจ รีบู อูรัก ซูโงฮ เฆอ เตด?" 39 ตาปี เปาโล ตีกัฮ จะ "กู นี เลอ ฌาดี ซือมียา บักซา ยิว. กู มาแรฮ ดาตัก เดะ นังฆรี ทาซัด โซะ นังฆรี ซิลีเซีย เลอ. กู ฌาดี ซือมียา เดะ นังฆรี ซัยํ-บือซัยํ อีตู เลอ. กู มีตา เดะ เกา บรี กู นะ มือเลา ฌางัน ลูมอฮ ซือมียา บาญะ บือเลฮ เฆอ?" 40 กะฆีเตอ กือปาลา ตาฮัน ญา บรี เปาโล มือเลา ปือมือเลา กะฆีเตอ. เปาโล ญา บือดีรี เดะ ตางา ลามัย ตางัน กะ ลูมอฮ ซือมียา บาญะ. ตานา กูญา ซือมูฮา ซืองะ กือเมน ดัฮ เปาโล มือเลา ฌางัน กูญา ฌาดี บาซา ฮีบรู มือเลา จะ
1 "ลูมอฮ ดีบราดี ฌางัน โกะ อาโปก เออ วะตู อีนี บรี กาเญา มือนีงัย เลอ นู กู นะ มือเลา บือปูลัซ ญาวา เดะ ปาซัน นู กาเญา อาดู ดัฮ." 2 ตานา กูญา ดืองัยํ ดัฮ นู ญา มือเลา ฌาดี บาซา ฮีบรู โตระ กูญา ซืองะ ดัฮ. เปาโล มือเลา ลาฆี จะ 3 "กู นี ฌาดี ซือมียา บักซา ยิว นู ดูโดะ เดะ อาปี เดะ นังฆรี ทาซัด โซะ นังฆรี ซิลีเซีย ดัฮ. ตาปี กู มาแรฮ บือซัยํ ญาวา เดะ นังฆรี อีนี เลอ. กู บลาฌัยํ ซูรัจ ฌางัน ฆามาลีเอน บรี บูวัจ ตูโรจ กะ ปือมือเลา ฮูโกบ นะ ลูมอฮ บีลาแก นะ กีตา กือมัซๆ. กู ราเฌด นะ ตูเฮะ กะ ตูฮัด เดะ อาตัซ บือกะ กาเญา ราเฌด เดะ อารี อีนี เลอ. 4 ดูลู กู ปรือกัด ลูมอฮ ซือมียา นู ตูโรจ ลาฆู อีนี ยู มาตี ดัฮ ซือตืองัฮ. กู อีกัจ ฌางัน ราตัย โกะ กีลากี โกะ นีบีนี อาตัจ กูญา ปี กะ ปือฌารา. 5 กือปาลา ซามี ฌางัน ลูมอฮ บือมุน บือกีรา ซือมูฮา กูญา นะ มือเลา ฌาดี ซะซี บือเลฮ จะ ลาฆู อีนี ซูโงฮ. กูญา อีตู กีเรบ ซูรัจ เดะ กู บรี กู บาวา ปี อาตัจ กะ ลูมอฮ ดีบราดี เดะ นังฆรี ดามัดกัด. กะฆีเตอ กู ปี ดัฮ บีดา นะ อีกัจ ฌางัน ราตัย ลูมอฮ ซือมียา อีตู บาวา กูญา มาแรฮ บรี กือนา ฮูโกบ เดะ นังฆรี เยรูซาเลม. 6 "กาลา กู ตืองัฮ ฌาลัด ปี ซรือปะ นะ รอจ กะ นังฆรี ดามัดกัด โซะ ตืองัฮ อารี ดัดดัด อาดา บือซายา จรัฮ ดาตัก เดะ ลาแงะ บรือเงา โซะ กือลีลิก กู. 7 กู รือบัฮ กะ ตานัฮ ดัฮ ดืองัยํ บูงี ซูวารา นู มือเลา ฌางัน กู จะ 'เซาโล เซาโล เออ บูวัจ นามา ปะ เกา ตืองัฮ ปรือกัด กู?' 8 "กู ตีกัฮ จะ 'ตูฮัด เออ เกา ฌาดี ซาปา?' "ญา มือเลา ฌางัน กู จะ 'กู นี เลอ ฌาดี เยซู ซือมียา ตูโปะ นาซาเรด นู เกา ตืองัฮ ปรือกัด.' 9 "ลูมอฮ ซือมียา นู อาดา บือซามา ฌางัน กู กูญา ลีฮัจ บือฆารี จรัฮ อีตู ตาปี กูญา เตด บือเลฮ ดืองัยํ ซูวารา นู มือเลา ฌางัน กู. 10 กะฆีเตอ กู มือเลา จะ 'ตูฮัด เออ กู นะ บูวัจ กะฮามี เลอ?' "ตูฮัด ญา มือเลา ฌางัน กู จะ 'บีกัซ เลอ มาโซะ ปี กะ นังฆรี ดามัดกัด. โซะ อีตู อาดา ซือมียา นะ บรี กะ เกา ตาฮู ลาฆู ซือมูฮา นู ตูฮัด ตืองะ ดัฮ บรี เกา นะ บือเลฮ บูวัจ.' 11 "ตานา กู ลีฮัจ เตด บือฆารี กรานา จรัฮ นู บือซายา อีตู ดัฮ โกะ ซือมียา นู อาดา บือซามา กูญา ปือฆัก ตางัน นะ กู ตูโตด บาวา บือปี มาโซะ กะ นังฆรี ดามัดกัด. 12 "อาดา ซือมียา ซืออูรัก ปือนามา อานานียา. ญา ฌาดี ซือมียา นู ตูเฮะ กะ ตูฮัด ตูโรจ ปือมือเลา ฮูโกบ นะ กีตา. ลูมอฮ บักซา ยิว นู ดูโดะ โซะ นังฆรี อีตู กูญา มือโอจ กะ ญา ซือมูฮา. 13 ญา เตอ มาแรฮ ซารี กู ดัฮ ญา บือดีรี ดาปิก กู มือเลา จะ 'มิ เซาโล เออ บรี เกา ลีฮัจ บือฆารี ปูลัก เลอ.' "ดัดดัด กู ลีฮัจ บือฆารี ญา. 14 ญา มือเลา ฌางัน กู จะ 'ตูฮัด นะ ลูมอฮ บีลาแก นะ กีตา ญา ปีเลฮ เกา ดัฮ บรี เกา นะ ตาฮู ลาฆู เดะ ฮาตี นะ ญา บรี เกา นะ ลีฮัจ ซือมียา อีตู นู บาฌิ-ตือปัจ บรี เกา นะ ดืองัยํ ปือมือเลา นู ญา มือเลา ฌางัน เกา ดัฮ. 15 กะฆีเตอ เกา นะ ฌาดี ซะซี ปาซัน ญา กะ ลูมอฮ ซือมียา ซือมูฮา ฌาดี ลาฆู นู เกา ลีฮัจ บือฆารี ดัฮ ดืองัยํ ดัฮ. 16 ตาปี วะตู อีนี บูวัจ นามา เกา นะ นาตี ลาฆี. บีกัซ เลอ ซาโมจ ลาฆู ซือลับ เดะ อาเย. บลาโลก เลอ ซือโบจ นามา นะ เยซู บีดา บรี ตูฮัด นะ บาโซฮ ดูซา นะ เกา.' ญา จะ." 17 กะฆีเตอ เปาโล มือเลา ลาฆี จะ "กาลา กู บาลิ กะ นังฆรี เยรูซาเลม ดัฮ ตืองัฮ กู อาดา บือซาโวจ เดะ รูมัฮ มือญือมัฮ ตูฮัด อาดา ลาฆู ปลีฮัจ กะ กู กะฆีนี. 18 กู ลีฮัจ ตูฮัด มาแรฮ มือเลา ฌางัน กู จะ 'ตรือเบะ ตีงัน นังฆรี เยรูซาเลม ปี งัจบางัจ เลอ กรานา ลูมอฮ ซือมียา ปัจ อีนี นะ เตด ซาโมจ ลาฆู นู เกา มือเลา ฌาดี ซะซี ปาซัน กู ดัฮ.' 19 "โซะ กู ตีกัฮ จะ 'ตูฮัด เออ กูญา อีนี ตาฮู ซูโงฮ จะ นู กู บือเลฮ ปี กะ โกะ รูมัฮ บือมุน รีฆะ ซือมียา ปือจายา กะ เกา รือเปะ กูญา. 20 กาลา ซือตีเฟน ซือมียา นู บือเลฮ มือเลา ฌาดี ซะซี ปาซัน ลาฆู นะ เกา ญา กือนา บูนอฮ ดัฮ เตอ กู นี อาดา บือดีรี ดาปิก ลีฮัจ จะ บือบูวัจ นะ กูญา บาฌิ ดัฮ. ลูมอฮ ซือมียา นู บูนอฮ ญา กูญา กีเรบ โกะ บาฌู นะ กูญา เดะ กู ฌูฆา. ' กู จะ. 21 "ตาปี ตูฮัด มือเลา ฌางัน กู จะ 'เกา ปี เลอ. กู นะ ซูโรฮ เกา ปี ฌาโวฮ บรี ซารี ลูมอฮ บักซา อาซิก.' " เปาโล ญา จะ. 22 ลูมอฮ ซือมียา ดืองัยํ เปาโล ตือดะ รอจ กะ ปือมือเลา จะ ลูมอฮ บักซา อาซิก ซีงี. บารู กูญา มูซัยํ ฮึนตะ นะ บือซูระ บูงี ซูวารา บือซัยํ จะ "ซือมียา อีนี ฮอย เตด บือฆูนา นะ ฮีโดะ ลาฆี. อาเมด ปี บูนอฮ บูวัก เลอ." 23 กูญา ซือมูฮา บือซูระ บูริ ซูวารา บือซัยํ. กูญา อูฆัย บาฌู นะ กูญา ลามัย ปี มาแรฮ อาเมด ฮาบู ตานัฮ ปรัก กะ อาตัซ ลาแงะ. 24 กือปาลา ตาฮัน นู บือซัยํ อีตู ญา ปือซัด บรี บาวา เปาโล มาโซะ กะ ดาลับ รูมัฮ ตาฮัน บรี รือเปะ ญา ซาซัจ มือโซะ บรี ตาฮู จะ บูวัจ นามา กูญา บือซูระ บลาวัด ญา กะฆีเตอ. 25 ตานา กูญา ตืองัฮ อีกัจ เปาโล ฌางัน ตาลี ญา มือเลา ฌางัน กือปาลา ตาฮัน ซืออูรัก นู บือดีรี ดาปิก ตาญา จะ "นู กาเญา นะ รือเปะ ซือมียา บักซา โรม ซือมียา นู เตด กือนา กรัจ ฮูโกบ ดัฮ เตอ กะฆีเตอ รือมัก ฌางัน ปือมือเลา ฮูโกบ นะ นังฆรี โรม เฆอ?" 26 ตานา กือปาลา ตาฮัน อีตู ดืองัยํ กะฆีเตอ ญา มาโซะ ปี มือญาเระ กะ กือปาลา บือซัยํ จะ "เกา นะ บูวัจ กะฮามี เลอ? ซือมียา อีตู ฌาดี ซือมียา บักซา โรม." 27 กือปาลา บือซัยํ ญา ปี ตาญา เปาโล จะ "กือนา มือญาเระ กะ กู เลอ. เกา ฌาดี ซือมียา บักซา โรม เฆอ?" เปาโล ตีกัฮ จะ "เออ กู ฌาดี กะฆีเตอ เลอ." 28 กือปาลา บือซัยํ อีตู มือเลา จะ "กู โปด บือเลฮ บายัยํ ดูเวะ บาญะ บีดา นะ ฌาดี ซือมียา บักซา โรม." ตาปี เปาโล ตีกัฮ จะ "ตาปี โซะ กู นี ฌาดี ซือมียา บักซา โรม ตะเดะ บือฌาดี มาแรฮ เลอ." 29 ลูมอฮ ตาฮัน นู ฆามะ นะ ซาซัจ เปาโล กูญา อูโนยํ ปี ดัดดัด. ตานา กือปาลา ตาฮัน นู บือซัยํ อีตู ตาฮู จะ ซือมียา นู ญา อีกัจ เดะ ราตัย ดัฮ ฌาดี ซือมียา บักซา โรม ญา โปด ตาโกจ โตระ ฌูฆา. 30 โซะ ปาฆี กือปาลา ตาฮัน นู บือซัยํ อีตู ญา ซูกา นะ ตาฮู ซูโงฮ จะ ฌาดี ลาฆู นามา นู โกะ บักซา ยิว อาดู เปาโล. กะฆีเตอ ญา ปลือปัซ เปาโล ญา ปือซัด บรี ลูมอฮ ซามี ซัยํ-บือซัยํ ฌางัน ลูมอฮ บือมุน บือกีรา ซือมูฮา นะ บือมุน บือซามา. ญา บาวา เปาโล บือปี บรี บือดีรี โซะ ฮึลด นู บือมุน บือกีรา อีตู.
1 เปาโล ตีญูง ลีฮัจ กะ ลูมอฮ บือมุน บือกีรา มือเลา จะ "โกะ ดีบราดี เออ ตือดะ รอจ กะ อารี อีนี เลอ กู บือเลฮ บูวัจ ตูโรจ เดะ โซะ ฮึลด ตูฮัด เดะ อาตัซ บือกะ ลาฆู นู ฮาตี กู อีงัจ จะ บาฌิ ดัฮ." 2 กะฆีเตอ อานานียา นู ฌาดี กือปาลา ซามี ซูโรฮ ซือมียา นู บือดีรี ดาปิก เปาโล บรี ตาปัยํ มูโลจ นะ ญา. 3 เปาโล มือเลา ฌางัน ญา จะ "ตูฮัด เดะ อาตัซ นะ ตาปัยํ เกา เลอ. เกา ฌาดี ซือรูปา ดีนิง ตะอารัฮ นู ซาปัก จัจ ปูเตฮ ดัฮ. เกา ดูโดะ นะ กรัจ ฮูโกบ กู ตูโรจ ปือมือเลา ฮูโกบ นะ มูซา ตาปี เกา ซูโรฮ กูญา ตาปัยํ กู ฌาดี ลาฆู ซาลัฮ เดะ ปือมือเลา ฮูโกบ อีตู เลอ." 4 โกะ ซือมียา นู บือดีรี ดาปิก เปาโล มือเลา กะ ญา จะ "เกา นะ มือเลา กาซัยํ กะ กือปาลา ซามี นะ ตูฮัด เดะ อาตัซ เฆอ?" 5 เปาโล ตีกัฮ กูญา จะ "ดีบราดี เออ กู เตด บือเลฮ ตาฮู จะ ญา ฌาดี กือปาลา ซามี. กรานา-จะ อาดา ฆาแรฮ ดัฮ เดะ ซูรัจ ปือมือเลา นะ ตูฮัด จะ 'ฌางัน มือเลา กาซัยํ กะ กือปาลา ลูมอฮ บักซา นะ กาเญา.' 6 กะฆีเตอ ตานา เปาโล ลีฮัจ จะ โกะ ซือมียา เดะ ลูมอฮ บือมุน บือกีรา ฌาดี ลูมอฮ ซะดูซี ซือตืองัฮ ลูมอฮ ฟาริซี ซือตืองัฮ ญา บือซูระ เดะ ตือปัจ บือมุน จะ "ดีบราดี เออ กู ฌาดี ซือมียา ลูมอฮ ฟาริซี ซืออูรัก ฌาดี นานะ นะ ซือมียา ลูมอฮ ฟาริซี ฌูฆา. นู กู กือนา กรัจ ฮูโกบ กะฆีนี กรานา กู จาดัก จะ อาดา ลาฆู ฮีโดะ ปาเระ เดะ มาตี เลอ." ญา จะ. 7 ตานา ญา มือเลา กะฆีนี ดัฮ ลูมอฮ ฟาริซี ฌางัน ลูมอฮ ซะดูซี ฮึนตะ นะ บือตือฆัฮ บูวัจ บรี โกะ ซือมียา นู บือมุน บือกีรา ฌาดี ดูวา ปาลัฮ ดัฮ. 8 ลูมอฮ ซะดูซี อีงัจ จะ ฮอย ลาฆู ฮีโดะ ปาเระ เดะ มาตี ฮอย ฮูลู-บาลัก นะ ตูฮัด ฮอย ซือมืองัจ โปด. ตาปี ลูมอฮ ฟาริซี ซาโงะ บือนา อีตู ซือมูฮา. 9 กะฆีเตอ อาดา ฌาดี ลาฆู บูริ บือซัยํ ฆาโดฮ โตระ. อาดา โกะ ซือมียา อาฌัยํ ลาฆู ปือมือเลา นะ ตูฮัด ซือตืองัฮ นู โซะ ซือบือลัฮ ลูมอฮ ฟาริซี กูญา บือดีรี บือตือฆัฮ กือมัซๆ จะ "กามี เตด ลีฮัจ ซาลัฮ นามา โปด เดะ ซือมียา อีนี. ดัฮ อาดา ซือมืองัจ อาดา ฮูลู-บาลัก นะ ตูฮัด มาแรฮ มือเลา ฌางัน ญา ดัฮ กาเญา นะ มือเลา กะฮามี เลอ?" 10 กูญา บือตือฆัฮ ฆาโดฮ บาญะ บูวัจ บรี กือปาลา ตาฮัน นู บือซัยํ ตาโกจ จะ กูญา นะ ฆรูมง บรือโบจ บือรือฆัก-รือฆัก เปาโล บรี มาตี. กะฆีเตอ ญา ปือซัด ลูมอฮ ตาฮัน บรี ตูโรด ปี บาวา เปาโล ตรือเบะ มาแรฮ เดะ ลูมอฮ กูญา บรี มาโซะ กะ รูมัฮ ตาฮัน. 11 มาลับ อีตู ตูฮัด เยซู มาแรฮ บือดีรี ดาปิก เปาโล มือเลา จะ "กือนา อาดา ฮาตี บรานี เลอ. เกา บือเลฮ มือเลา ฌาดี ซะซี ปาซัน ลาฆู นะ กู เดะ นังฆรี เยรูซาเลม อีนี ดัฮ. เกา กือนา ปี มือเลา ฌาดี ซะซี กะฆีเตอ ฌูฆา เดะ นังฆรี โรม." ญา จะ. 12 เดะ โซะ ปาฆี ลูมอฮ ยิว ซือตืองัฮ กูญา บือมุน บือกีรา บือซามา. กูญา อีตู บือฌาญี กือมัซๆ บือซามา จะ กูญา นะ เตด มากัด นามา เตด โอะ นามา ยู ตือดะ กูญา บือเลฮ บูนอฮ เปาโล ดัฮ. 13 อาดา ซือมียา ปัจ-ปูโลฮ อูรัก ลือเบฮ นู บือกีรา บือซามา กะฆีเตอ. 14 กูญา ปี ดาปัจ ลูมอฮ ซามี ซัยํ-บือซัยํ ฌางัน ลูมอฮ อูรัก ตูฮา มือเลา จะ "กามี ซูดัฮ มือเลา ปือมือเลา ฌาญี ตือตู บือซามา นู กามี ตีเมา นะ มากัด นามา ยู ตือดะ กามี บือเลฮ บูนอฮ เปาโล ดัฮ. 15 กะฆีเตอ อาดู กาเญา ฌางัน ลูมอฮ บือมุน บือกีรา มือญาเระ บรี กะ กือปาลา ตาฮัน บือซัยํ ตาฮู จะ นู กาเญา อีงัจ นะ ซาซัจ ลาฆู นะ เปาโล บรี บาฌิ เดะ ดูลู. บรี ญา นะ บาวา เปาโล มาแรฮ ซารี กาเญา ปูลัก. โซะ กามี กามี นะ อาดา ซียะ ดัฮ นะ บูนอฮ ญา ตานา ญา เตด รอจ ลาฆี." กูญา จะ. 16 ตาปี นานะ กีลากี นะ อาดี นีบีนี นะ เปาโล เตอ ญา ดืองัยํ นู กูญา นาตี จือลัฮ กะฆีนี. ญา ปี มาโซะ กะ รูมัฮ ตาฮัน มือญาเระ ลาฆู อีตู กะ เปาโล. 17 กะฆีเตอ เปาโล บลาโลก กือปาลา ตาฮัน ซืออูรัก มือเลา จะ "มีตา บาวา อูรัก มูดา อีนี ปี ซารี กือปาลา บือซัยํ. ญา อาดา ลาฆู นะ มือญาเระ บรี กะ ญา ตาฮู." 18 กะฆีเตอ กือปาลา ตาฮัน อีตู บาวา กือมอน นะ เปาโล บือปี กะ กือปาลา บือซัยํ มือเลา จะ "เปาโล นู อาดา เดะ ปือฌารา ญา บลาโลก กู ดัฮ มีตา บรี กู นะ บาวา อูรัก มูดา อีนี อาตัจ กะ เกา กรานา ญา อาดา ลาฆู นะ มือเลา ฌางัน เกา." 19 กะฆีเตอ กือปาลา บือซัยํ ญา ปือฆัก ตางัน นะ ญา ตูโตด ปี กะ ตือปัจ ฮอย ซือมียา ตาญา จะ "เกา อาดา ลาฆู นามา นะ มือญาเระ กะ กู?" 20 อูรัก มูดา อีตู มือเลา จะ "ลูมอฮ บักซา ยิว บือเลฮ บือกีรา ดัฮ นะ มีตา บรี เกา บาวา เปาโล บือปี กะ ตือปัจ บือมุน บือกีรา มัฮปาฆี ซือรูปา บือกะ กูญา นะ ซาซัจ ลาฆู นะ ญา บรี บาฌิ เดะ ดูลู. 21 ตาปี เกา ฌางัน บูวัจ ตูโรจ เลอ. กรานา อาดา ลูมอฮ กูญา ปัจ-ปูโลฮ อูรัก ลือเบฮ นู นาตี จือลัฮ นะ บูนอฮ เปาโล. กูญา บือเลฮ บือฌาญี กือมัซๆ บือซามา นู กูญา นะ เตด มากัด นามา นะ เตด โอะ นามา ยู ตือดะ กูญา บือเลฮ บูนอฮ เปาโล ดัฮ. กาลา อีนี กูญา ซียะ ดัฮ. กูญา นาตี ปือมือเลา นะ เกา." ญา จะ. 22 กือปาลา บือซัยํ ญา บรี อูรัก มูดา อีตู ปี ดัฮ ปือซัด กะ ญา จะ "ฌางัน นะ มือเลา ฌางัน ซาปา นู เกา บือเลฮ มือญาเระ ลาฆู อีนี บรี กะ กู ตาฮู." 23 กะฆีเตอ กือปาลา ตาฮัน นู ซัยํ-บือซัยํ อีตู ญา บลาโลก กือปาลา ตาฮัน ดูวา อูรัก มาแรฮ ปือซัด จะ "กือนา ปือซัด ตาฮัน ดูวา ราตุซ อูรัก ฌางัน ตาฮัน ญาแญะ กูดา ตูโฌฮ-ปูโลฮ อูรัก ฌางัน ตาฮัน ปือฆัก บูลุซ ดูวา ราตุซ อูรัก. ซูโรฮ กูญา บรี ซียะ นะ ปี กะ นังฆรี ซีซาเรีย วะตู ปูโกยํ ซือมีลัด มาลับ อีนี. 24 กือนา อาดา กูดา บรี กะ เปาโล ญาแญะ. กือนา ฌาฆา ญา บรี บาฌิ บาวา บือปี กะ ฮูลู-บาลัก ฟีลิก. " ญา จะ. 25 กะฆีเตอ กือปาลา บือซัยํ ญา ฆาแรฮ ซูรัจ กะฆีนี ดัฮ. 26 "กู คลาวดียัด ลีซียา ฆาแรฮ ซูรัจ อีนี กีเรบ บรี กะ ฟีลิก ฮูลู-บาลัก นะ ราฌา นู บือซรี ซูโงฮ. 27 "ซือลามัจ เลอ. ลูมอฮ บักซา ยิว รีฆะ ซือมียา อีนี ซรือปะ นะ บูนอฮ ญา ดัฮ. ตาปี กู มาแรฮ ฌางัน ลูมอฮ ตาฮัน ตูโลก บรี ญา ลือปัซ ดัฮ กรานา กู ดืองัยํ จะ ญา เตอ ฌาดี ซือมียา บักซา โรม. 28 กู ซูกา นะ ตาฮู จะ กูญา อาดู ญา ปาซัน ลาฆู นามา กะฆีเตอ กู บาวา ญา บือปี กะ ตือปัจ บือมุน บือกีรา นะ กูญา. 29 กู ดาปัจ จะ ญา เตด บือเลฮ บูวัจ ซาลัฮ นามา นู ปาโตจ นะ กือนา มาตี นะ กือนา ปือฌารา โปด ฮอย. ตาปี กูญา อาดู ญา ฌาดี ลาฆู ซาลัฮ เดะ ปือมือเลา ฮูโกบ นะ กูญา. 30 ตานา กู บือเลฮ ตาฮู ดัฮ จะ นู กูญา บือกีรา บือซามา นะ บูนอฮ ญา ดัดดัด กู ปือซัด บรี บาวา ญา บือปี กะ เกา. กู บือเลฮ มือญาเระ กะ ลูมอฮ ซือมียา อาดู ญา บรี กูญา ปี มือเลา ฌางัน เกา นู กูญา อาดู ญา ฌาดี ปาซัน ลาฆู นามา." ญา จะ. 31 กะฆีเตอ โกะ ตาฮัน บูวัจ ตูโรจ ปือมือซัด อีตู. โซะ มาลับ กูญา บาวา เปาโล บือปี กะ ตูโปะ อันตีปาตรี. 32 โซะ ปาฆี ลูมอฮ ตาฮัน กูดา บาวา เปาโล บือปี ปูลัก ตาปี ลูมอฮ ตาฮัน ฆีลาฆี บาลิ ปี กะ รูมัฮ ตาฮัน ดัฮ. 33 ตานา โกะ ตาฮัน กูดา รอจ กะ นังฆรี ซีซาเรีย ดัฮ กูญา อาตัจ ซูรัจ อีตู บรี กะ ฮูลู-บาลัก นะ ราฌา อาตัจ เปาโล กะ ญา ฌูฆา. 34 ตานา ฮูลู-บาลัก อีตู บาจา ซูรัจ ดัฮ ญา ตาญา เปาโล จะ "เกา มาแรฮ ดาตัก เดะ นังฆรี ดีฮา?" ตานา ญา ตาฮู จะ ญา มาแรฮ เดะ นังฆรี ซิลีเซีย 35 ญา มือเลา จะ "กาลา ซือมียา อาดู เกา มาแรฮ กู นะ ดืองัยํ ลาฆู นะ เกา." กะฆีเตอ ญา ปือซัด บรี ฌาฆา เปาโล เดะ บาลัย นะ ราฌา เฮโรด.
1 ลือปัซ ลีมา อารี อานานียา นู กือปาลา ซามี ฌางัน ลูมอฮ อูรัก ตูฮา ซือตืองัฮ ฌางัน บูมอยํ บือดะวา ซืออูรัก ปือนามา ตือตูลัด กูญา ปี กะ นังฆรี ซีซาเรีย. กูญา ปี บือดาปัจ ฌางัน ฮูลู-บาลัก นะ ราฌา บีดา นะ อาดู เปาโล. 2 ตานา บลาโลก เปาโล บรี มาโซะ ดัฮ ตือตูลัด ฮึนตะ นะ อาดู เปาโล มือเลา จะ "โอ ฟีลิก เกา นู ฌาดี ซือมียา ซัยํ-บือซัยํ เออ ลามา ดัฮ เกา บือเลฮ บือบือลา กามี บาฌิ บรี ดูโดะ ซือนัง โตระ. เกา บลารัก ลาฆู ตะอารัฮ ซาเลด บรี ฌาดี ลาฆู นู บาฌิ บรี กะ ลูมอฮ บักซา กามี. 3 ลาฆู นู บาฌิ กะฆีเตอ กามี ซาโงะ ซือลาลู ราตา วะตู ราตา ตูโปะ. กะฆีเตอ กามี ซือมูฮา บรี ซือลามัจ กะ เกา บาญะ. 4 กู ตีเมา มือเลา บาญะ นู นะ บรี เกา รือมัย ตาปี กู มีตา เดะ เกา นะ ตือจีฮัด มือนีงัย กะ ลาฆู ดีกิ-ตอจ อีนี เลอ. 5 กามี นี เลอ ลีฮัจ จะ ซือมียา อีนี ฌาดี ซือมียา ฮอย เตด ตือปากัย. ญา บูวัจ ลาฆู ฆาโดฮ เดะ ตืองัฮ ลูมอฮ บักซา ยิว ราตา ดือนียา. ญา ฌาดี กือปาลา ซืออูรัก เดะ ปาโซะ นะ ลูมอฮ นาซาเรด. 6 ญา กูวาซา นะ บูวัจ บรี รูมัฮ มือญือมัฮ ตูฮัด นะ กามี ฌาดี ตะอารัฮ ดัฮ. กะฆีเตอ เลอ กามี บือเลฮ รีฆะ ญา. อาดู เกา ซาซัจ ญา อีซี เกา ตะอาซิก นะ ลีฮัจ ลาฆู ซือมูฮา นู กามี อาดู ญา กะฆีนี." 9 โกะ ลูมอฮ บักซา ยิว กูญา ปาคัจ อาดู ญา ซาโงะ จะ ลาฆู กะฆีเตอ ฌาดี ซูโงฮ เลอ. 10 ฮูลู-บาลัก ฟีลิก ญา ลามัย เปาโล บรี ตีกัฮ กะ กูญา. กะฆีเตอ เปาโล มือเลา จะ "กู ตาฮู จะ เกา ฌาดี ซือมียา กรัจ ฮูโกบ บักซา อีนี บาญะ ตาโฮด ดัฮ. กะฆีเตอ กู ซูกา-ฮาตี นะ ตีกัฮ ปาซัน นู อาดู อีนี. 11 เกา บือเลฮ ตาฮู ดัฮ จะ เตด รอจ กะ ดูวา-บือลัซ อารี นู กู ปี กะ นังฆรี เยรูซาเลม ดัฮ บีดา นะ มือญือมัฮ กะ ตูฮัด. 12 โกะ บักซา ยิว เตด บือเลฮ ดาปัจ กู บือตือฆัฮ ฌางัน ซาปา เดะ รูมัฮ มือญือมัฮ ตูฮัด. กูญา เตด บือเลฮ ดาปัจ กู ตืองัฮ อาโจบ ลูมอฮ ซือมียา บรี กือลาจุ เตด-จะ เดะ ดาลับ รูมัฮ บือมุน นู ดีฮา เดะ นังฆรี เยรูซาเลม โปด ฮอย. 13 นู กูญา อาดู กู เดะ ปาซัน อีนี กูญา ฮอย ลาฆู ปือมือเลา นู นะ ฌาดี ซะซี นามา โปด. 14 ตาปี กู ยอม ซาโงะ ฌางัน เกา จะ กู มือญือมัฮ กะ ตูฮัด เดะ อาตัซ ตูฮัด นะ โกะ บีลาแก นะ กามี ตูโรจ กะ ลาฆู ฌาลัด อีตู นู กูญา จะ ซือซัจ ดัฮ. ตาปี กู ปือจายา ลาฆู ซือมูฮา นู ฆาแรฮ ดัฮ เดะ ซูรัจ ปือมือเลา ฮูโกบ นะ มูซา เดะ ซูรัจ นะ โกะ ซือมียา ตูโดฮ ลาฆู นะ ตูฮัด ซือมูฮา. 15 ซือรูปา บือกะ นู กูญา ปือจายา กู โปด อาดา ฮาระ กะ ตูฮัด ฌูฆา จะ ลูมอฮ ซือมียา มาตี ซือมูฮา นะ ฮีโดะ ปาเระ เดะ มาตี ฌางัน ซือมียา นู บาฌิ ฌางัน ซือมียา นู ฌาฮัจ ฌูฆา. 16 กะฆีเตอ กู ราเฌด นะ ตูโรจ ลาฆู นู กู อีงัจ เดะ ฮาตี เตด ซาลัฮ ฌางัน ตูฮัด เตด ซาลัฮ ฌางัน ซือมียา ฌูฆา. 17 "ลือปัซ กู ดูโดะ เดะ นังฆรี อาซิก บาญะ ตาโฮด ดัฮ กู บือเลฮ มาแรฮ กะ บักซา นะ กู ปูลัก บีดา อาเมด ดูเวะ มาแรฮ ฮาฆิ กะ อูรัก ฮาฌะ ซือตืองัฮ บีดา อาเมด บารัก มาแรฮ มือนืองะ มือญือมัฮ กะ ตูฮัด ฌูฆา. 18 ตืองัฮ กู บูวัจ กะฆีเตอ กูญา ดาปัจ กู เดะ รูมัฮ มือญือมัฮ ตูฮัด บารู บูวัจ ลาฆู บาโซฮ ญาวา ดัฮ. วะตู อีตู ฮอย ซือมียา บาญะ บือซามา ฌางัน กู ฮอย ลาฆู กือลาจุ นามา โปด. 19 ตาปี อาดา ลูมอฮ ยิว ซือตืองัฮ นู มาแรฮ ดาตัก เดะ นังฆรี เอเซีย. ดัฮ กูญา อาดา ปาซัน นามา นะ อาดู กู อีซี กูญา โปด ฆาโดฮ นะ มาแรฮ อาดู โซะ ฮึลด เกา. 20 ตาปี บรี ลูมอฮ ซือมียา อีนี มือญาเระ บรี ตาฮู จะ วะตู กู บือดีรี โซะ ฮึลด ลูมอฮ บือมุน บือกีรา กูญา ดาปัจ ลาฆู ซาลัฮ นามา เดะ กู 21 ลือเบฮ ซา ลาฆู อีนี นู กู บือซูระ เดะ ตืองัฮ ลูมอฮ กูญา จะ 'อารี อีนี กาเญา นะ กรัจ ฮูโกบ กู ปาซัน ลาฆู นู กู ปือจายา จะ ซือมียา ซือมูฮา นะ ฮีโดะ ปาเระ เดะ มาตี.' " เปาโล ญา จะ. 22 ฟีลิก ญา ตาฮู ปาซัน ฌาลัด นะ เยซู บาฌิ ดัฮ. กะฆีเตอ ซูดัฮ ญา ดืองัยํ เปาโล ฮาบิฮ ดัฮ ญา อูบัฮ บรี ดืองัยํ ลาฆู อีตู เดะ อารี อาซิก ปูลัก. ญา มือเลา จะ "ตานา ลีซียา นู กือปาลา ตาฮัน บือซัยํ นะ มาแรฮ กู นะ บรี ลาฆู นะ เกา ซือลือซัย ดัฮ." 23 ญา ปือซัด กือปาลา ตาฮัน ซืออูรัก บรี ฌาฆา เปาโล ตาปี ฌางัน บอฮ ราตัย ฌางัน บลารัก ซาปา เดะ ลูมอฮ ฆูๆ นะ ญา นู นะ มาแรฮ ฌือเงาะ ลีฮัจ มาแรฮ บือบือลา ญา. 24 ลือปัซ บาญะ อารี ดัฮ ฟีลิก มาแรฮ ฌางัน ดรูซีลา บีนี นะ ญา นู ฌาดี นีบีนี บักซา ยิว ซืออูรัก. ญา ซูโรฮ บาวา เปาโล มาแรฮ บีดา นะ ดืองัยํ ปือมือเลา นะ ญา ปาซัน ลาฆู ปือจายา กะ เยซู คริด. 25 ตาปี ซูดัฮ เปาโล มือญาเระ ปาซัน ลาฆู นู บาฌิ-ตือปัจ ลาฆู ฮูโกบ ฮาตี ตะอาซิก ปาซัน อารี กรัจ ฮูโกบ นู นะ มาแรฮ รอจ ฟีลิก ญา ตาโกจ ตือกือฌุจ มือเลา จะ "กาลา อีนี บรี เกา ปี ดูลู. วะตู กู อาดา จือลัฮ กู นะ บลาโลก เกา ปูลัก." 26 ซูโงฮ เลอ ฟีลิก จาดัก เดะ ฮาตี นู เปาโล นะ ซูวะ ดูเวะ กะ ญา. กะฆีเตอ ญา บลาโลก เปาโล มาแรฮ ซัจๆ มือเลา ฌางัน ญา. 27 ลือปัซ ดูวา ตาโฮด ปอซียัด เฟซะตัด มาแรฮ ฌาดี ฮูลู-บาลัก นะ ราฌา ฆาตี ฟีลิก. ฟีลิก อีงัจ นะ บรี ลูมอฮ บักซา ยิว ซูกา-ฮาตี กะฆีเตอ ญา บรี เปาโล ดูโดะ เดะ ปือฌารา ลาฆี.
1 ตานา เฟซะตัด มาแรฮ ฌาดี ฮูลู-บาลัก บือเลฮ ตีฆา อารี ดัฮ ญา ตรือเบะ เดะ นังฆรี ซีซาเรีย ปี กะ นังฆรี เยรูซาเลม. 2 ตือปัจ อีตู ลูมอฮ ซามี ซัยํ-บือซัยํ ฌางัน ลูมอฮ กือปาลา บักซา ยิว มาแรฮ ดาปัจ ญา อาดู ลาฆู นะ เปาโล กะ ญา. กูญา ปูโฌะ ญา มีตา จะ 3 บรี เฟซะตัด นะ ตูโลก กูญา ปือซัด บรี อาตัจ เปาโล มาแรฮ กะ นังฆรี เยรูซาเลม. กูญา อีงัจ นะ นาตี เดะ ตืองัฮ ฌาลัด บีดา นะ บูนอฮ ญา. 4 ตาปี เฟซะตัด ตีกัฮ กะ กูญา จะ "เปาโล อาดา เดะ ปือฌารา เดะ นังฆรี ซีซาเรีย. กลาฆี กู นะ บาลิ ปี กะ กียุฮ. 5 กะ เปาโล บูวัจ ซาลัฮ นามา โปด บรี กือปาลา นะ กาเญา ซือตืองัฮ ปี บือซามา ฌางัน กู บรี อาดู ญา ปัจ กียุฮ." ญา จะ. 6 กาลา เฟซะตัด ดูโดะ ปัจ อีตู บือเลฮ ฆามะ-จะ ลาปัด อารี ซือปูโลฮ อารี ดัฮ ญา บาลิ ปี กะ นังฆรี ซีซาเรีย. โซะ ปาฆี ญา ปี ดูโดะ เดะ ตือปัจ บือดะวา กรัจ ฮูโกบ ปือซัด บรี อาเมด เปาโล บาวา มาแรฮ. 7 ตานา เปาโล มาโซะ ดัฮ โกะ บักซา ยิว นู มาแรฮ ดาตัก เดะ นังฆรี เยรูซาเลม ดัฮ กูญา บือดีรี กือลีลิก ญา อาดู ญา บาญะ ลาฆู บาญะ มาจับ นู ซาลัฮ โตระ. ตาปี กูญา ฮอย ปือมือเลา ซะซี นู นะ บูวัจ บรี บือฆารี บือเลฮ. 8 เปาโล ตีกัฮ ลาฆู อีตู จะ "กู เตด บือเลฮ บูวัจ นามาๆ โปด นู ซาลัฮ เดะ ปือมือเลา ฮูโกบ นะ บักซา ยิว นู ซาลัฮ เดะ รูมัฮ มือญือมัฮ ตูฮัด นู ซาลัฮ เดะ ราฌา ซีซา โปด ฮอย ลาลู." ญา จะ. 9 ตาปี เฟซะตัด อีงัจ นะ บรี บักซา ยิว ซูกา-ฮาตี. กะฆีเตอ ญา มือเลา ฌางัน เปาโล จะ "เกา นะ ปี กะ นังฆรี เยรูซาเลม เฆอ บีดา กู นะ กรัจ ฮูโกบ เกา ปัจ กียุฮ ปาซัน ลาฆู นู กูญา อาดู อีนี?." 10 เปาโล ตีกัฮ จะ "กู ตีเมา. กู อาดา บือดีรี โซะ ฮึลด ตือปัจ ดูโดะ กรัจ ฮูโกบ นะ ราฌา ซีซา. โซะ อีนี เลอ ฆาโดฮ นะ ซาซัจ กรัจ ฮูโกบ ลาฆู นะ กู. อีซี เกา ตะอาซิก ตาฮู จะ กู เตด บือเลฮ บูวัจ ซาลัฮ ฌางัน ลูมอฮ บักซา ยิว. 11 ดัฮ กู บูวัจ ซาลัฮ นู ปาโตจ นะ กือนา กรัจ ฮูโกบ บรี มาตี กู นะ เตด บลาวัด นะ ปี มาตี กะฆีเตอ. ตาปี ดัฮ กูญา อาดู กู ฌาดี ลาฆู เตด ซูโงฮ ฮอย ซาปา นู นะ บือเลฮ อาตัจ กู บรี กะ กูญา. กู มีตา ปี ดาปัจ ราฌา ซีซา เดะ นังฆรี โรม บรี ญา นะ กรัจ ฮูโกบ ลาฆู นะ กู." เปาโล ญา จะ. 12 กะฆีเตอ เฟซะตัด บรีงัจ ลาฆู อีนี ฌางัน ลูมอฮ ซือมียา บือกีรา นะ ญา ลาลู มือเลา จะ "เกา มีตา ปี ดาปัจ ราฌา ซีซา กะฆีเตอ เกา นะ ปี กะ ราฌา ซีซา เลอ." 13 ลือปัซ บาญะ อารี ดัฮ ราฌา อาฆริบปา ฌางัน บือนิด อาดี นีบีนี เดะ ญา กูญา มาแรฮ กะ นังฆรี ซีซาเรีย บีดา นะ ฌือเงาะ ลีฮัจ ฮูลู-บาลัก เฟซะตัด. 14 กาลา กูญา ดูโดะ ปัจ อีตู บาญะ อารี ดัฮ เฟซะตัด มือญาเระ ลาฆู นะ เปาโล บรี กะ ราฌา ตาฮู มือเลา จะ "ตือปัจ อีนี อาดา ซือมียา ซืออูรัก นู ฟีลิก ญา กานัก ตีงัน เดะ ปือฌารา ดัฮ. 15 กาลา กู ปี กะ นังฆรี เยรูซาเลม เตอ ลูมอฮ ซามี ซัยํ-บือซัยํ ฌางัน ลูมอฮ อูรัก ตูฮา นะ บักซา ยิว กูญา อาดู ญา มีตา บรี กู นะ กรัจ ฮูโกบ ญา. 16 ตาปี กู มือเลา ฌางัน กูญา จะ ฮาดัจ นะ บักซา โรม บูกัด กะฆีเตอ เลอ. ดัฮ นะ กรัจ ฮูโกบ ซือมียา ดีฮา เตอ ซือมียา กือนา อาดู ฌางัน ซือมียา นู อาดู ญา กือนา บือดาปัจ บือซูวา มูคา บีดา บรี ซือมียา กือนา อาดู อาดา จือลัฮ นะ ตีกัฮ ลาฆู นู กูญา อาดู อีตู. ดัฮ เตด บูวัจ กะฆีเตอ นะ ซรัฮ ซือมียา กือนา อาดู บรี กะ กูญา เตด บือเลฮ ดัฮ เลอ. 17 "กาลา กูญา มาแรฮ ปัจ อีนี ดัฮ กู เตด นาตี ลามา. เดะ โซะ ปาฆี กู ปี ดูโดะ เดะ ตือปัจ บือดะวา กรัจ ฮูโกบ ปือซัด บรี บาวา อูรัก อีตู มาแรฮ มาโซะ. 18 ตานา โกะ ซือมียา อาดู บือดีรี อาดู ญา กู อีงัจ จะ กูญา นะ อาดู ญา ฌาดี ลาฆู ฌาฮัจ ตาปี บูกัด กะฆีเตอ. 19 กูญา อาดา ลาฆู บือตือฆัฮ ฌางัน ญา ปาซัน ลาฆู นู กูญา มือญือมัฮ กะ ตูฮัด ปาซัน ซือมียา ซืออูรัก ปือนามา เยซู นู มาตี ดัฮ. ตาปี เปาโล มือเลา จะ ญา อาดา ฮีโดะ ลาฆี. 20 ตานา กู บรีงัจ บาญะ เตด ตาฮู นะ กรัจ ฮูโกบ ลาฆู อีนี กะฮามี กู ตาญา เปาโล จะ ญา นะ ปี กะ นังฆรี เยรูซาเลม เฆอ บีดา นะ ซาซัจ ลาฆู ปัจ อีตู? 21 ตาปี เปาโล มีตา บรี ราฌา ซีซา นะ ซาซัจ ลาฆู นะ ญา. กะฆีเตอ กู ปือซัด บรี ญา ดูโดะ เดะ ปือฌารา ตือดะ กู นะ บือเลฮ อาตัจ ญา กะ ราฌา ซีซา." เฟซะตัด ญา จะ. 22 ราฌา อาฆริบปา มือเลา กะ เฟซะตัด จะ "กู ซูกา นะ ดืองัยํ ซือมียา อีตู ฌูฆา." เฟซะตัด ตีกัฮ จะ "มัฮปาฆี เลอ เกา นะ บือเลฮ ดืองัยํ ญา." 23 เดะ โซะ ปาฆี ราฌา อาฆริบปา ฌางัน บือนิด มาแรฮ มาโซะ ดูโดะ เดะ บาลัย กรัจ ฮูโกบ. อาดา ฌางัน บือนา นู บือฆาจะ บือซรี อาดา ฌางัน โกะ ปรูโซก แนฮ-ฌือแนฮ. อาดา ลูมอฮ กือปาลา ตาฮัน ฌางัน ลูมอฮ ซือมียา ซัยํ-บือซัยํ นะ นังฆรี อีตู มาแรฮ ซามา. เฟซะตัด ปือซัด บรี บาวา เปาโล บือมาแรฮ. 24 เฟซะตัด มือเลา จะ "ราฌา อาฆริบปา เออ ลูมอฮ กาเญา ซือมูฮา เออ ลีฮัจ เลอ กะ ซือมียา อีนี. ลูมอฮ บักซา ยิว ซือมูฮา มาแรฮ อาดู ญา เดะ โซะ อีนี เดะ โซะ นังฆรี เยรูซาเลม ฌูฆา. กูญา บือซูระ จะ ญา เตด บือฆูนา นะ ฮีโดะ ลาฆี. 25 ตาปี โซะ กู นี ลีฮัจ จะ ญา เตด บือเลฮ บูวัจ ซาลัฮ นามา นู ปาโตจ นะ กือนา ฮูโกบ มาตี. ตาปี ญา มีตา บรี ลาฆู นะ ญา นะ ปี กะ ราฌา ซีซา นู บือซัยํ. กะฆีเตอ กู อีงัจ นะ อาตัจ ญา ปี กะ นังฆรี โรม. 26 ตาปี กู ฮอย ลาฆู นู ซัฮ นู นะ ฆาแรฮ กะ ราฌา ซีซา นู ฌาดี ตูฮัด นะ กู. กะฆีเตอ กู บาวา ญา บรี มาแรฮ ดาปัจ ลูมอฮ กาเญา ฌางัน เกา เลอ ราฌา อาฆริบปา เออ. กะฆีเตอ วะตู ซาซัจ ลาฆู นะ ญา บรี ซือลือซัย ดัฮ กู นะ อาดา ลาฆู นู ซัฮ นะ ฆาแรฮ. 27 กรานา กู ลีฮัจ จะ ดัฮ กู อาตัจ อูรัก ซาลัฮ ตาปี เตด บรี ตาฮู ลาฆู นู กือนา อาดู ญา นะ ฌาดี ลาฆู เตด กือนา เลอ." เฟซะตัด ญา จะ.
1 ราฌา อาฆริบปา มือเลา ฌางัน เปาโล จะ "บรี เกา มือเลา ตีกัฮ ปาซัน ลาฆู นะ เกา เลอ." กะฆีเตอ เปาโล ลามัย ตางัน มือเลา จะ 2 "ราฌา อาฆริบปา เออ กู ลีฮัจ จะ บาฌิ ดัฮ เลอ นู กู ฆาโดฮ บือดีรี โซะ ฮึลด มูคา เกา อารี อีนี บรี ตีกัฮ ลาฆู ซือมูฮา นู โกะ บักซา ยิว อาดู กู นี. 3 เกา เลอ ฌาดี ซือมียา นู ปานัย ซูโงฮ เดะ โกะ ฮาดัจ นะ บักซา ยิว เดะ ลาฆู นู กูญา บือตือฆัฮ ซือมูฮา. กะฆีเตอ กู มีตา บรี เกา ตาฮัด-ฮาตี ดืองัยํ ลาฆู นะ กู เลอ. 4 "ลูมอฮ ยิว ซือมูฮา ตาฮู นู ตะเดะ กู ฌาดี นานะ กู อาดา ลาฆู ดูโดะ กะฮามี. กูญา ตาฮู นู ตะเดะ ลามูลา เตอ กู บือเลฮ ดูโดะ กะฮามี เดะ นังฆรี นะ กู เดะ นังฆรี เยรูซาเลม โปด. 5 กูญา กราลา กู ลามา ดัฮ. ดัฮ กูญา นะ มือเลา ฌาดี ซะซี กูญา ฆาโดฮ ซาโงะ จะ ตะเดะ ลามูลา กู ฌาดี ซือมียา ลูมอฮ ฟาริซี ซืออูรัก ราเฌด ตูโรจ กะ ลาฆู นะ กีตา. 6 วะตู อีนี กู กือนา บือดีรี ปัจ อีนี บรี กือนา ฮูโกบ กรานา กู อาดา จาดัก กะฆีนี จะ ลาฆู อีตู นู ตูฮัด เดะ อาตัซ บือเลฮ บือฌาญี ฌางัน โกะ บีลาแก นะ กีตา เตอ ญา นะ บูวัจ บรี ซุจ รือมัก ดัฮ. 7 ดูวา-บือลัซ ปาลัฮ นะ บักซา กีตา นู ราเฌด มือญือมัฮ กะ ตูฮัด เดะ อาตัซ ซียัก มาลับ กูญา โปด จาดัก นะ ซาโมจ บือกะ ปือมือเลา บือฌาญี อีตู รือมัก ดัฮ. ราฌา เออ กรานา กู จาดัก กะฆีนี เลอ นู ลูมอฮ ยิว อาดู กู นี. 8 กาเญา ซือมูฮา เออ บูวัจ นามา เลอ กาเญา ปาคัจ อีงัจ จะ นู ตูฮัด เดะ อาตัซ นะ บูวัจ บรี ซือมียา ฮีโดะ ปาเระ เดะ มาตี เตอ ฌาดี ลาฆู นู ปือจายา เตด บือเลฮ ดัฮ? 9 "ตาปี อีซี กู ตะอาซิก ดูลู เตอ กู บือเลฮ ตือตู เดะ ฮาตี นู กู ฆาโดฮ บูวัจ ลาฆู มานามา บาญะ มาจับ นู นะ บลาวัด ฌางัน ลาฆู นะ เยซู ซือมียา ตูโปะ นาซาเรด อีตู. 10 กะฆีเตอ กู บือเลฮ บูวัจ กะฆีเตอ เดะ นังฆรี เยรูซาเลม. ลูมอฮ ซามี ซัยํ-บือซัยํ กูญา ปือซัด กะ กู จะ บรี กู รีฆะ โกะ ซือมียา นะ ตูฮัด บาญะ อูรัก กานัก เดะ ปือฌารา. กาลา กูญา กือนา กรัจ ฮูโกบ บรี มาตี กู โปด ลีฮัจ บาฌิ บือซามา. 11 บาญะ กาลี กู ปี กะ รูมัฮ บือมุน โซะ อีนี โซะ อีตู บูวัจ บรี กูญา กือนา ฮูโกบ. กู กูวาซา นะ บูวัจ บรี กูญา นะ มือเลา ตะอารัฮ กะ ตูฮัด เดะ อาตัซ. กู บืออีเซด โตระ ฌางัน กูญา ยู-จะ กู ตูโรจ กูญา ปี กะ นังฆรี อาซิก ฌูฆา บีดา นะ ปรือกัด กูญา." เปาโล ญา จะ. 12 เปาโล มือเลา ลาฆี จะ "กรานา กะฆีเตอ เลอ กู ปี กะ นังฆรี ดามัดกัด อาดา ซูรัจ ปือมือซัด นะ ลูมอฮ ซามี ซัยํ-บือซัยํ. 13 โอ ราฌา เออ ตานา กู ฌาลัด ปี วะตู ตืองัฮ อารี กู ลีฮัจ จรัฮ ซูโลฮ มาแรฮ ดาตัก เดะ โซะ ลาแงะ โซะ กือลีลิก กู ฌางัน กาวัด นู ปี ซามา. จรัฮ อีตู บือซายา ลือเบฮ เดะ มาตาอารี ดัฮ. 14 กามี ซือมูฮา รือบัฮ กะ ตานัฮ. กู ดืองัยํ ซูวารา มือเลา ฌางัน กู ฌาดี บาซา ฮีบรู นู จะ 'เซาโล เซาโล เออ บูวัจ นามา ปะ เกา ตืองัฮ ปรือกัด กู? ซาเบะ กะฆีเตอ เกา ซูซัฮ ดัฮ เลอ ซือรูปา กะ กรือเบา ซืออีโกยํ นู ซีปะ ตูกัจ นะ ตกเก ญา.' 15 โซะ กู ตาญา จะ 'ตูฮัด เออ เกา ฌาดี ซาปา?' ตูฮัด ญา ตีกัฮ จะ 'กู ฌาดี เยซู นู เกา ตืองัฮ ปรือกัด เลอ. 16 ตาปี บีกัซ บือดีรี เลอ. กู มาแรฮ ปลีฮัจ กะ เกา บีดา นะ ตืองะ เกา ฌาดี ซือมียา บือกรือฌา นะ กู บรี เกา นะ มือเลา ฌาดี ซะซี ปาซัน ลาฆู นู เกา ลีฮัจ กู ดัฮ ปาซัน ลาฆู นู กู นะ ปลีฮัจ กะ เกา โซะ ฮึลด ฌูฆา. 17 กู นะ ตูโลก เกา บรี ลือปัซ เดะ ลูมอฮ บักซา ยิว เดะ ลูมอฮ บักซา อาซิก โปด. กู นะ ซูโรฮ บรี เกา ปี กะ กูญา. 18 เกา นะ บูวัจ บรี กูญา ญรือลัก มาตา ดัฮ บีดา บรี กูญา นะ อาเลฮ มาแรฮ เดะ โซะ กือลับ รอจ กะ โซะ จรัฮ นะ อาเลฮ มาแรฮ เดะ ตางัน นะ กือปาลา ฮาตู ซีตัด รอจ กะ ตูฮัด เดะ อาตัซ. กรานา กูญา ปือจายา กะ กู กู นะ อาเกะ ดูซา นะ กูญา นะ บรี กูญา อาดา บาฮาเฆด บือซามา ฌางัน โกะ ซือมียา นู กู ปีเลฮ ดัฮ บรี ฌาดี ลูมอฮ ซือมียา นะ กู.' ตูฮัด ญา จะ. 19 "กะฆีเตอ เลอ ราฌา อาฆริบปา เออ กู ฆางู บูวัจ ตูโรจ กะ ลาฆู นู ปลีฮัจ กะ กู เดะ โซะ ลาแงะ. 20 กู ฮึนตะ เดะ นังฆรี ดามัดกัด เดะ นังฆรี เยรูซาเลม ลาลู กู ปี กะ นังฆรี บักซา ยิว ราตา กะ ลูมอฮ บักซา อาซิก ฌูฆา. กู ปี มือญาเระ กะ กูญา นู กูญา กือนา บราเลฮ-ฮาตี กือนา อาเลฮ มาแรฮ ซารี ตูฮัด เดะ อาตัซ กือนา บูวัจ ตูโรจ ลาฆู นู บรี ลีฮัจ จะ กูญา บราเลฮ-ฮาตี ดัฮ. 21 กรานา ลาฆู กะฆีเตอ เลอ ลูมอฮ ยิว รีฆะ กู เดะ ลามัน รูมัฮ มือญือมัฮ ตูฮัด. กูญา อีงัจ นะ บูนอฮ กู. 22 ตาปี รอจ กะ อารี อีนี ตูฮัด เดะ อาตัซ ญา ตูโลก กู ดัฮ. กะฆีเตอ กู อาดา บือดีรี ตือปัจ อีนี มือเลา ฌาดี ซะซี กะ ลูมอฮ ซือมียา ฮาฌะ ฌางัน ลูมอฮ ซือมียา ซัยํ-บือซัยํ ซือมูฮา. นู กู มือญาเระ อีตู ฌาดี ซา ลาฆู ฌางัน ปือมือเลา นะ โกะ ซือมียา ตูโดฮ ลาฆู นะ ตูฮัด ฌางัน ปือมือเลา นะ มูซา ฌูฆา. กูญา อีตู บือเลฮ ตูโดฮ ลาฆู นู นะ ฌาดี โซะ ฮึลด นู จะ 23 ราฌา นู บรี ซือลามัจ เตอ ญา ฆาโดฮ นะ ตาฮัด ซูซัฮ. ญา เตอ นะ ฌาดี ซือมียา ลามูลา นู ฮีโดะ ปาเระ เดะ มาตี. กะฆีเตอ นะ บรี ลูมอฮ บักซา ยิว ฌางัน ลูมอฮ บักซา อาซิก นะ ลีฮัจ ซายา จรัฮ นู นะ บรี กูญา ฮีโดะ ลือปัซ บาฌิ." ญา จะ. 24 ตานา เปาโล ตีกัฮ ลาฆู นะ ญา กะฆีนี ฮูลู-บาลัก เฟซะตัด มือเลา กะ ญา ซูวารา บือซัยํ จะ "เปาโล เออ เกา ฆีลา ดัฮ เลอ. นู เกา บลาฌัยํ บาญะ ดัฮ บูวัจ บรี เกา ฆีลา ดัฮ." ญา จะ. 25 เปาโล ตีกัฮ จะ "โอ เฟซะตัด นู ฌาดี ซือมียา ซัยํ-บือซัยํ เออ กู ฮอย เตด ฆีลา ดัฮ เลอ ตาปี กู มือเลา ปือมือเลา นู ซูโงฮ ปือมือเลา นู บาฌิ บือฆูนา. 26 โซะ ราฌา เตอ ญา ตาฮู ลาฆู อีนี บาฌิ ดัฮ. กะฆีเตอ กู บรานี มือเลา ฌางัน ญา. กู ปือจายา ซูโงฮ จะ ลาฆู อีนี ซือมูฮา ญา ลีฮัจ บาฌิ ดัฮ. กรานา ลาฆู อีนี เตด บือเลฮ บือฌาดี เดะ ตือปัจ ลีนง เลอ. 27 ราฌา อาฆริบปา เออ เกา ปือจายา ปือมือเลา นะ โกะ ซือมียา ตูโดฮ ลาฆู นะ ตูฮัด เฆอ? กู ตาฮู นู เกา ปือจายา ดัฮ เลอ." เปาโล ญา จะ. 28 ราฌา อาฆริบปา ตีกัฮ กะ เปาโล จะ "ฌางัน ปือมือเลา ดีกิ-ตอจ กะฆีนี เกา อีงัจ นะ บูวัจ บรี กู ฌาดี อูรัก คริดเตียน เฆอ?" 29 เปาโล ตีกัฮ กะ ราฌา จะ "เตด-จะ ปือมือเลา ดีกิ-ตอจ ปือมือเลา บาญะ โปด กู มีตา เดะ ตูฮัด เดะ อาตัซ บรี เกา ฌางัน ลูมอฮ กาเญา ซือมูฮา นู ดืองัยํ กู อารี อีนี นะ ฌาดี ซือรูปา บือกะ กู ฌาดี เลอ. ตาปี ตีเมา บรี กาเญา กือนา ราตัย กะฆีนี ซือรูปา กู." ญา จะ. 30 กะฆีเตอ ราฌา ฌางัน ฮูลู-บาลัก กูญา บือดีรี ฌางัน บือนิด ฌางัน ลูมอฮ ซือมียา นู ดูโดะ บือซามา. 31 กูญา ตรือเบะ ปี บือกีรา บือซามา มือเลา จะ "ซือมียา อีนี เตด บือเลฮ บูวัจ ซาลัฮ นามา นู ฆาโดฮ นะ บรี มาตี นู ปาโตจ นะ กือนา ราตัย โปด ฮอย." 32 ราฌา อาฆริบปา มือเลา ฌางัน ฮูลู-บาลัก เฟซะตัด จะ "ดัฮ ซือมียา อีนี เตด บือเลฮ มีตา นะ ดาปัจ ราฌา ซีซา เตอ นะ ปลือปัซ ญา โปด บือเลฮ."
1 ตานา ตือตู เดะ ฮาตี ดัฮ นู กามี นะ ปี กะ นังฆรี อิตาลี กูญา อาตัจ เปาโล ฌางัน อูรัก ซาลัฮ อาซิก บรี กะ กือปาลา ตาฮัน ซืออูรัก ปือนามา ยูลียัด. ญา ฌาดี กือปาลา ตาฮัน เดะ กาวัด ตาฮัน นู กือนา ซือโบจ จะ "กาวัด ตาฮัน นะ ราฌา ซีซา". 2 กามี ญาแญะ กาปัน นู ดาตัก มาแรฮ เดะ ตือเปด อัดรามิดทียุม นู นะ ปี กะ โกะ ตือเปด ซือตืองัฮ เดะ โซะ นังฆรี เอเซีย. อาดา อาริดตาคัด ซือมียา เดะ นังฆรี เทซะโลนิกา โซะ นังฆรี มาซิโดเนีย ญา ปี ซามา. กะฆีเตอ กามี บลายัยํ ปี ดัฮ. 3 โซะ ปาฆี กาปัน ซีงัฮ เดะ ตือเปด ซัยดอน. กือปาลา ตาฮัน ญา ฮาตี บาฌิ ญา บรี เปาโล ตูโรด ปี มียา โกะ ฆูๆ นะ ญา บีดา กูญา นะ ตูโลก บือบือลา ญา. 4 กาลา กามี ตรือเบะ เดะ ตือเปด อีตู กามี บลายัยํ ปี มือญูโซยํ ปูเลา ซัยปรัด ซาเบะ มือญางัฮ อาเงน. 5 กะฆีเตอ กามี บลายัยํ มือลากัฮ ลาโวจ นู ดาปิก กะ นังฆรี ซิลีเซีย ฌางัน นังฆรี ปัมฟีเลีย บารู มาแรฮ รอจ กะ ตือเปด มีรา ดัฮ โซะ นังฆรี ลีซียา. 6 ปัจ อีตู กือปาลา ตาฮัน ญา ดาปัจ กาปัน ซือบูวัฮ ดาตัก เดะ นังฆรี อาเลกซันดรียา นู นะ ปี กะ นังฆรี อิตาลี. กะฆีเตอ ญา บาวา กามี บรี ญาแญะ กะ กาปัน อีตู ดัฮ. 7 บาญะ อารี กามี บลายัยํ ปี ฮัด-ปรือฮัด ลามัจ นะ รอจ กะ ตูโปะ คือนีดัด กรานา อาเงน ตือฆัยํ โตระ. กาลา กามี มือญางัฮ อาเงน เตด บียัซ กามี บลายัยํ ปี มือญูโซยํ ปูเลา ครีด ปี ลีนง อาเงน เดะ โซะ ตาโญก ซันโมเน. 8 กามี บลายัยํ มือญูโซยํ ปูเลา อีตู ปายัฮ มาแรฮ รอจ กะ ตือเปด นู ปือนามา จะ "ตือเปด ลีนง บาฌิ" ดาปิก เดะ ตูโปะ ลาเซีย. 9 กาลา อีตู บาญะ อารี ลือปัซ ดัฮ รอจ กะ มูเซด บลายัยํ ปายัฮ โตระ ฌาดี-จะ ลาฆู บรามัย บือตาฮัด มากัด นะ บักซา ยิว ลือปัซ ปี ดัฮ. กะฆีเตอ เปาโล อูจะ กะ กูญา จะ 10 "กาเญา เออ กู ลีฮัจ จะ นู กีตา นะ บลายัยํ ปี ปูลัก เดะ วะตู อีนี นะ บูวัจ บรี กีตา มาจับ นะ ฌาฮานัม นะ รูฆี โปด ฌางัน โกะ บารัก นู ปือโดะ เดะ กาปัน ฌางัน กาปัน ตะอาซิก. ตาโกจ-จะ อาดา ซือมียา นะ มาตี ฌูฆา." 11 มีเซ-จะ กะฆีเตอ กือปาลา ตาฮัน ญา ปือจายา กะ ปือมือเลา นะ เตกก ฌางัน ปือมือเลา นะ ตกเก กาปัน ลือเบฮ เดะ ปือจายา กะ ปือมือเลา นะ เปาโล. 12 ตือเปด อีตู เตด บราปา บาฌิ. นะ ซีงัฮ กาปัน ปัจ อีตู ตือดะ ฮาบิฮ มูเซด บือแฌะ ปายัฮ. กะฆีเตอ โกะ ซือมียา นู บาญะ บรีงัจ นะ ตรือเบะ ปี จาดัก นะ บือเลฮ รอจ กะ ตือเปด ฟีนิก นะ ดูโดะ ปัจ อีตู ตือดะ ฮาบิฮ มูเซด บือแฌะ. ตูโปะ ฟีนิก อีตู ฌาดี ตือเปด เดะ ปูเลา ครีด นู ลีนง เดะ อาเงน โซะ ตีมอยํ. 13 ตานา อาดา อาเงน บารัจ-ดายา นู ซืองะๆ กูญา อีงัจ จะ "โฌฮ ฆามะ-จะ บือเลฮ." กูญา ซีตะ ซาโวฮ บลายัยํ มือญูโซยํ ดิก-บีดิก ปูเลา. 14 ตาปี เตด ลามา อาดา อาเงน รีโบจ ตูโรด เดะ โซะ ฮูตัด นู กือนา บลาโลก จะ อาเงน ตีมอยํ ปาดัก. 15 ตานา กือนา อาเงน รีโบจ อีตู กาปัน นะ มือญางัฮ อาเงน โปด เตด บียัซ ฆาโดฮ ลารี มือนูโรจ อาเงน. 16 ตานา มาแรฮ ลีนง เดะ ปูเลา ดือมิ ปือนามา ปูเลา เคาดา กามี อาเกะ ปราฮู ดือมิ อีกัจ เดะ อาตัซ กาปัน ตาปี บูวัจ ปายัฮ เลอ. 17 กูญา อาเมด ตาลี มาแรฮ บือเละ กาปัน อีกัจ บรี กือฌะ. กูญา ตาโกจ นะ ตือกริก เดะ บูโฮยํ โซะ นังฆรี ลีเบีย. กะฆีเตอ กูญา ฆูโลก ลายัยํ ปลือปัซ กาปัน บรี ฮาญอจ มือนูโรจ อาเงน. 18 กือนา รีโบจ โตระ กะฆีนี โซะ ปาฆี กูญา อาเมด บารัก นู ปือโดะ เดะ กาปัน ซือตืองัฮ บูวัก กะ ลาโวจ. 19 เดะ อารี ตีฆา ฌางัน ตางัน นะ กูญา ตะอาซิก กูญา อาเมด บารัก ซูโรฮ เดะ กาปัน ซือตืองัฮ บูวัก กะ ลาโวจ. 20 บาญะ อารี ดัฮ กามี ลีฮัจ เตด บือฆารี โกะ มาตาอารี โกะ บีตัก นามา โปด. กามี กือนา รีโบจ ซูซัฮ โตระ ยู-จะ ฮอย เตด จาดัก นะ บือเลฮ ปี ลือปัซ เลอ. 21 ตานา กูญา บือตาฮัด บารัก มากัด ลามา ดัฮ เปาโล ญา บือดีรี เดะ ตืองัฮ กูญา มือเลา จะ "กาเญา เออ อาดู-จะ กาเญา มือนีงัย กะ ปือมือเลา นะ กู ดัฮ เตด ตรือเบะ ปี เดะ ปูเลา ครีด เตอ กาเญา นะ ฮอย เตด กือนา ลาฆู บือนาซา เตด กือนา รูฆี กะฆีนี เลอ. 22 ตาปี วะตู อีนี กู ปรีงัจ กะ กาเญา จะ บรี กาเญา ซือนัง-ฮาตี เลอ. ฮอย ซือมียา นะ มาตี ซืออูรัก โปด. ตาปี กาปัน นะ บือนาซา ฮาบิฮ. 23 กู ฌาดี ซือมียา นะ ตูฮัด เดะ อาตัซ ดัฮ ฌาดี ซือมียา บือกรือฌา นะ ญา เตอ. มาลับ อีนี เลอ อาดา ฮูลู-บาลัก นะ ตูฮัด มาแรฮ บือดีรี ดาปิก กู 24 มือเลา จะ 'เปาโล เออ ฌางัน ตาโกจ เลอ. เกา ฆาโดฮ นะ บือดาปัจ ฌางัน ราฌา ซีซา. นี เลอ ตูฮัด เดะ อาตัซ ญา บาฌิ ฌางัน เกา ญา นะ บูวัจ บรี ลูมอฮ ซือมียา นู อาดา บือซามา ฌางัน เกา เดะ กาปัน เตด มาตี ซืออูรัก โปด.' ฮูลู-บาลัก ญา จะ. 25 "กะฆีเตอ กาเญา เออ" เปาโล ญา จะ "กู ปือจายา กะ ตูฮัด นู ญา นะ บูวัจ รือมัก ฌางัน ปือมือเลา นู ญา มือญาเระ ดัฮ. 26 ตาปี กีตา ฆาโดฮ นะ กือนา ตีงัน เดะ ปูเลา ซา ปูเลา ดัฮ." เปาโล ญา จะ. 27 กาลา รอจ กะ ปัจ-บือลัซ มาลับ ดัฮ นู กามี กือนา อาเงน บาวา ปี มาแรฮ เดะ ลาโวจ อาดรียา ดัฮ โซะ ตืองัฮ มาลับ โกะ อานะ กูลี เดะ กาปัน กูญา อาคา จะ ฆามะ นะ รอจ กะ ฮูตัด ดัฮ. 28 กูญา อาเมด ตาลี อีกัจ ตือลาโปก อูโกยํ อาเย จะ บราปา ดาลับ. ดาปัจ ดัฮ ฌาดี ดูวา-ปูโลฮ ดือปา. ปี ดีกิ ลาฆี ดัฮ กูญา อูโกยํ อาเย ปูลัก ฌาดี ลีมา-บือลัซ ดือปา ดัฮ. 29 กูญา ตาโกจ จะ กาปัน นะ ตือญาแญะ เดะ อาตัซ ตูกด กูญา ปลือปัซ ซาโวฮ เดะ กือมูดี ปัจ ซาโวฮ. กูญา มือเลา เตด บราดู นู นะ บรี ซียัก งัจบางัจ. 30 ลูมอฮ อานะ กูลี เดะ กาปัน อีงัจ นะ ตีงัน กาปัน. กูญา บือตูโรด ปราฮู ดือมิ เดะ ลาโวจ ซืองาฌา นะ ปี ปลือปัซ ซาโวฮ เดะ บอยา โซะ ฮึลด. 31 ตาปี เปาโล มือเลา ฌางัน กือปาลา ตาฮัน ฌางัน กาวัด ตาฮัน จะ "ดัฮ กูญา อีนี เตด ดูโดะ เดะ กาปัน กาเญา นะ ลือปัซ เตด บือเลฮ." 32 กะฆีเตอ โกะ ตาฮัน กรัจ ตาลี นะ ปราฮู ดือมิ บรี ญา ลือแงะ ปี เดะ ลาโวจ ดัฮ. 33 ตานา บือบีฮัก ดัฮ เปาโล ปูโฌะ กูญา ซือมูฮา บรี มากัด ซือตืองัฮ มือเลา จะ "อารี อีนี ฌาดี ปัจ-บือลัซ อารี ดัฮ นู กาเญา นาตี เตด บือเลฮ มากัด นามาๆ โปด. 34 กะฆีเตอ กู ปูโฌะ กาเญา บรี มากัด ซือตืองัฮ บีดา กาเญา นะ ตือฆัยํ-อูรัจ. กรานา-จะ โบะ นะ เตด ฆูรก เดะ ปาลา นะ กาเญา ซา อูรัจ โปด ฮอย เลอ." ญา จะ. 35 ตานา มือเลา กะฆีนี ดัฮ เปาโล อาเมด ตือโปก โรตี มาแรฮ ซือตืองัฮ ญา บรี ซือลามัจ กะ ตูฮัด เดะ อาตัซ โซะ ฮึลด มูคา นะ กูญา ซือมูฮา. กะฆีเตอ ญา ลือแปะ ตือโปก ฮึนตะ นะ มากัด. 36 กะฆีเตอ กูญา ซือมูฮา ซือนัง-ฮาตี มากัด บือซามา. 37 ลูมอฮ กามี เดะ กาปัน ซือมูฮา ฌาดี ดูวา ราตุซ ตูโฌฮ-ปูโลฮ นัม อูรัก. 38 ตานา มากัด กือญัง ดัฮ กูญา อาเมด บรัซ นู ปือโดะ เดะ กาปัน บูวัก กะ ลาโวจ บรี กาปัน รีฮัน เลอ. 39 ตานา ซียัก ดัฮ กูญา เตด กราลา ตือปัจ อีตู. ตาปี กูญา ลีฮัจ ซา ตือโละ นู อาดา ปาตัย กูญา อีงัจ นะ มาโซะ จรือนิ กาปัน บรี ดาปัยํ โซะ อีตู. 40 กะฆีเตอ กูญา กรัจ ตาลี บูวัก โกะ ซาโวฮ เดะ ลาโวจ. กูญา ปลือปัซ ตาลี นู อีกัจ กือมูดี. กูญา อาเกะ ลายัยํ โซะ ฮึลด บรี กือนา อาเงน อีงัจ นะ จรือนิ กะ ปาตัย. 41 กูญา ปี กือนา ตือปัจ นู อูมะ ดูวา บือลัฮ ญา บลาฆา. กาปัน ญา ตือกริก เดะ อาตัซ บูโฮยํ โซะ อีตู. โซะ บอยา ลือกัจ เดะ บูโฮยํ ตือโฆฮ ดัฮ ตรือเบะ เตด บียัซ. โซะ กือมูดี กือนา อูมะ บือซัยํ ตาปัยํ ดัฮ บรี กาปัน ปือจัฮ ฮาบิฮ. 42 โกะ ตาฮัน อีงัจ นะ บูนอฮ ลูมอฮ อูรัก ซาลัฮ ตาโกจ-จะ กูญา นะ บือดือนัง ปี ลือปัซ ดัฮ. 43 ตาปี กือปาลา ตาฮัน บลารัก กูญา ตีเมา บรี บูวัจ กะฆีเตอ ญา บือคานะ นะ บรี เปาโล นะ ฮีโดะ. ญา ปือซัด จะ ซือมียา นู ปานัย บือดือนัง บรี กูญา ตรือโฌด กะ ลาโวจ ดูลู บือดือนัง ปี กะ ปาตัย. 44 บารู บรี โกะ ซือมียา ฆีลาฆี งาปอ ปาปัด ซือตืองัฮ งาปอ บารัก นู บือกัซ ปือโดะ เดะ กาปัน ซือตืองัฮ ปาคัจ ปี กะ ปาตัย. กะฆีเตอ กามี รอจ ดัฮ ซือมูฮา. ฮอย ซาปา มาตี ซืออูรัก โปด ฮอย.
1 ตานา กามี รอจ กะ ปาตัย ซือนัง ดัฮ บารู กามี ตาฮู จะ ปูเลา อีตู ปือนามา ปูเลา มอนตา. 2 ลูมอฮ ซือมียา เดะ ปูเลา อีตู ตือจีฮัด กะ กามี ซาโมจ กามี บาฌิ ดัฮ. กูญา จูโจฮ อาปี ซาเบะ อาดา ฮูฌัด บูวัจ บรี กามี บือแฌะ ดัฮ. 3 เปาโล ญา บือเลฮ มียา กายู อาปี ซือตืองัฮ อาเมด มาแรฮ บอฮ เดะ อาปี. ตานา บาฌิ อาดา อูลัยํ บีซา ซืออีโกยํ กือนา อาปี ฮางัจ ดัฮ ญา ตรือเบะ มาแรฮ ปาโตะ ลือกัจ เดะ ตางัน นะ เปาโล. 4 ตานา ลูมอฮ ซือมียา เดะ ปูเลา ลีฮัจ อูลัยํ อีตู ลือกัจ โตก-ฆาโตก เดะ ตางัน นะ เปาโล กูญา มือเลา บือซามา กูญา จะ "ซูโงฮ เลอ ซือมียา อีนี ฌาดี ซือมียา บูนอฮ กาวัด. มีเซ-จะ ลือปัซ เดะ ลาโวจ ดัฮ ตาปี โฆรฮ นะ ญา ตีเมา บรี ลือปัซ เดะ มาตี เลอ." 5 ตาปี เปาโล กือติฮ อูลัยํ อีตู บรี ฆูโฆยํ เดะ อาปี. ญา เตด ซาเกะ นามา โปด. 6 ตาปี กูญา อีตู ตีญูง ลีฮัจ กะ ญา อีงัจ จะ ญา นะ ฌาดี บาซัน ดัฮ นะ รือบัฮ มาตี ดัดดัด. กาลา กูญา บือฆารี ลามา ดัฮ ลีฮัจ ญา เตด ซาเกะ นามา บารู กูญา บราเลฮ-ฮาตี อีงัจ จะ ญา ฌาดี ซือมียา ซีดี ซืออูรัก. 7 เดะ ตูโปะ อีตู อาดา ตือปัจ ตานัฮ นะ ปุบลียัด นู ฌาดี กือปาลา เดะ ปูเลา อีตู. ญา ซาโมจ กามี บาฌิ ดัฮ บือบือลา กามี ตีฆา อารี ดัฮ. 8 อาโปก เดะ ปุบลียัด เตด ซือนัง ญาวา ฮูวัจ ดัฮ เอฮ ตรือเบะ ดารัฮ. เปาโล มาโซะ ปี ซารี ญา บือซาโวจ ตืองะ ตางัน เดะ ญาวา ญา. บารู ญา ซือนัง บาฌิ ดัฮ. 9 ลือปัซ อีตู โกะ ลูมอฮ ซือมียา ฆีลาฆี เดะ ปูเลา นู ซาเกะ กูญา มาแรฮ ดัฮ. เปาโล บือบือลา กูญา บรี ซือนัง บาฌิ ดัฮ. 10 กูญา มือโอจ กะ กามี บาญะ ดัฮ. รอจ วะตู กามี นะ ตรือเบะ เดะ ปูเลา อีตู กูญา อาเมด โกะ บือนา บารัก มาแรฮ บรี กะ กามี มากัด เดะ กาปัน. 11 กาลา กามี ดูโดะ ปัจ อีตู กือมูฮา ตีฆา บูลัด ดัฮ กามี ญาแญะ กาปัน ซือบูวัฮ นู ปือนามา จะ "ดาโตะ บือกือมัยํ". ฌาดี กาปัน นู มาแรฮ ดาตัก เดะ นังฆรี อาเลกซันดรียา ดูโดะ เดะ ปูเลา ฮาบิฮ มูเซด บือแฌะ ดัฮ. กามี บลายัยํ ปี 12 รอจ กะ ตือเปด ซัยราคิว ซีงัฮ ปัจ อีตู ตีฆา อารี ดัฮ. 13 กามี ตรือเบะ เดะ โซะ อีตู ปี รอจ กะ ตือเปด เรฆียุม. เดะ โซะ ปาฆี อาดา อาเงน มาแรฮ เดะ โซะ บารัจ-ดายา. กามี บลายัยํ ดูวา อารี มาแรฮ รอจ กะ ตือเปด โปทิโอลี. 14 ตือปัจ อีตู กามี ดาปัจ ลูมอฮ ดีบราดี ปือจายา ซือตืองัฮ นู บืออาฌะ กามี บรี นูปัก ดูโดะ บือซามา กูญา ตูโฌฮ อารี. กะฆีเตอ กามี บือฌาลัด ปี กะ นังฆรี โรม. 15 ตานา ลูมอฮ ดีบราดี เดะ นังฆรี โรม ดืองัยํ ลาฆู นะ กามี ดัฮ กูญา มาแรฮ ซาโมจ กามี เดะ ปือกัด อับปียัด ซือตืองัฮ เดะ ตูโปะ นู ปือนามา จะ "ตีฆา โรงแรม" ซือตืองัฮ. กาลา เปาโล ลีฮัจ กูญา ญา บรี ซือลามัจ กะ ตูฮัด บราซา ซือนัง-ฮาตี ดัฮ. 16 ตานา กามี รอจ กะ นังฆรี โรม ดัฮ กูญา ยอม บรี เปาโล ดูโดะ ซาญา บรี อาดา ตาฮัน ซืออูรัก ดูโดะ บือซามา ตูงู ญา. 17 ลือปัซ ตีฆา อารี เปาโล บืออาฌะ ลูมอฮ กือปาลา นะ บักซา ยิว บรี มาแรฮ บือมุน บือซามา. บือมุน ดัฮ ญา มือเลา ฌางัน กูญา จะ "ลูมอฮ ดีบราดี เออ กู นี เตด ดือละ บูวัจ นามาๆ นู บลาวัด ฌางัน บักซา กีตา นู บลาวัด ฌางัน ฮาดัจ นะ โกะ บีลาแก นะ กีตา. ตาปี กู กือนา รีฆะ เดะ นังฆรี เยรูซาเลม กือนา อาตัจ กะ ลูมอฮ บักซา โรม. 18 ซูดัฮ กูญา อีตู ซาซัจ กู ดัฮ กูญา อาดา ฮาตี นะ ปลือปัซ กู ซาเบะ ลีฮัจ จะ กู เตด บือเลฮ บูวัจ ซาลัฮ นามา นู ปาโตจ นะ กือนา ฮูโกบ บรี มาตี. 19 ตานา โกะ บักซา ยิว ซือกัจ มือเลา เตอ มีเซ-จะ กู ฮอย ปาซัน นามา นะ อาดู บักซา นะ กู ตาปี กู ฆาฆัฮ นะ มีตา ปี บือดาปัจ ฌางัน ราฌา ซีซา. 20 กะฆีเตอ เลอ กู ซูกา นะ ดาปัจ กาเญา นะ มือเลา ฌางัน กาเญา กะฆีนี จะ อาดา ซา ลาฆู นู บักซา อิซราเอน จาดัก นะ ดาปัจ เตอ กรานา ลาฆู อีตู เลอ นู กู กือนา ราตัย กะฆีนี." เปาโล ญา จะ. 21 โกะ กือปาลา บักซา ยิว ตีกัฮ กะ ญา จะ "โซะ กามี เตอ เตด บือเลฮ ซาโมจ ซูรัจ มานามา มาแรฮ เดะ นังฆรี ยูเดีย ปาซัน ลาฆู นะ เกา. ฮอย ดีบราดี นะ กามี ซือมียา ดีฮา โปด บือเลฮ ดาตัก มาแรฮ เดะ โซะ อีตู นู มือญาเระ บรีตา เฆอ-จะ มือเลา ลาฆู ฌาฮัจ มานามา ปาซัน นะ เกา. 22 ตาปี กามี ซูกา นะ ดืองัยํ เกา มือเลา ลาฆู นู เกา อีงัจ เดะ ฮาตี ซาเบะ กามี ตาฮู จะ ราตา ตือปัจ อาดา ซือมียา มือเลา บลาวัด ฌางัน ลูมอฮ นะ เกา อีนี เลอ." กูญา จะ. 23 กะฆีเตอ กูญา ตือตู ฌางัน เปาโล จะ นะ มาแรฮ มียา ญา อารี ดีฮา. อารี อีตู อาดา ลูมอฮ กูญา มาแรฮ มียา เปาโล เดะ รูมัฮ บาญะ อูรัก. ตะเดะ ปาฆี ตือดะ รอจ กะ มาลับ ญา มือญาเระ บรี กะ กูญา ตาฮู ปาซัน ลาฆู นู ตูฮัด เดะ อาตัซ มาแรฮ บือบือลา ฌาดี ราฌา กะฮามี. ญา มือเลา ลาฆู เดะ ซูรัจ ปือมือเลา ฮูโกบ นะ มูซา เดะ ซูรัจ นะ โกะ ซือมียา ตูโดฮ ลาฆู นะ ตูฮัด ฌูฆา บือคานะ นะ บรี กูญา ปือจายา ลาฆู นะ เยซู. 24 ปือมือเลา นะ ญา อีตู อาดา ซือมียา ปือจายา ซือตืองัฮ ซือมียา เตด ปือจายา ซือตืองัฮ. 25 กะฆีเตอ กูญา ฆามะ นะ ตรือเบะ ปี ตืองัฮ มือเลา บือตีกัฮ-ตีกัฮ บือซามา. ตาปี เปาโล มือเลา ปือมือเลา ซา ปาตัฮ ลาฆี จะ "ซูโงฮ เลอ ปือมือเลา อีตู นู ซือมืองัจ นะ ตูฮัด บูวัจ บรี อิซายา ซือมียา ตูโดฮ ลาฆู นะ ตูฮัด มือเลา กะ โกะ บีลาแก นะ กาเญา ญา รือมัก ดัฮ. 26 ญา บือเลฮ มือเลา กะฆีนี จะ 'ปี เลอ มือเลา ฌางัน ลูมอฮ บักซา อีนี จะ "กาเญา ซือมาตา ดืองัยํ ตาปี เตด มาโซะ เดะ ฮาตี เลอ. กาเญา นะ ฌือเงาะ ลีฮัจ ตาปี เตด บือฆารี ดัฮ." 27 ซาเบะ ลูมอฮ บักซา อีนี เตอ ฮาตี นะ กูญา บรีงัจ เตด กือนา ลาฆู ตือลีงา นะ กูญา กูญา ตูโดก ดัฮ. มาตา นะ กูญา กูญา ปือฌับ ดัฮ. ตาโกจ-จะ มาตา นะ กูญา นะ บือฆารี ตือลีงา นะ กูญา นะ ดืองัยํ ลาฆู นะ มาโซะ เดะ ฮาตี นะ กูญา. กะฆีเตอ กูญา นะ อาเลฮ มาแรฮ ซารี กู. กู โปด นะ บือบือลา กูญา บรี ลือฆา บาฌิ ดัฮ.' ตูฮัด ญา จะ." 28 เปาโล มือเลา ลาฆี จะ "กะฆีเตอ เลอ กาเญา กือนา ตาฮู จะ ปือมือเลา นะ ตูฮัด เดะ อาตัซ นู ญา นะ บรี ลูมอฮ ซือมียา ฮีโดะ ลือปัซ บาฌิ ดัฮ ปือมือเลา อีตู นะ ปี กะ ลูมอฮ บักซา อาซิก. กูญา อีตู เลอ นะ มือนีงัย." เปาโล ญา จะ. 30 กือมูฮา ดูวา ตาโฮด ดัฮ เปาโล ดูโดะ ปัจ อีตู เดะ รูมัฮ นู ญา ซีวา ตะอาซิก. ญา ซาโมจ ซือมียา ซือมูฮา นู มาแรฮ ซารี ญา. 31 ฌางัน ฮาตี บรานี ญา มือญาเระ ลาฆู ปาซัน นู ตูฮัด เดะ อาตัซ นะ บือบือลา ฌาดี ราฌา ญา อาฌัยํ ลาฆู ปาซัน ตูฮัด เยซู คริด. ฮอย ซาปา บลารัก ดัฮ.
1 กู เปาโล นู ฌาดี ปราโซฮ นะ เยซู คริด กู ฆาแรฮ ซูรัจ อีนี กีเรบ บรี กะ ลูมอฮ ซือมียา ตือปัจ นังฆรี โรม. ตูฮัด เดะ อาตัซ บือเลฮ ปาเงน กู บรี ฌาดี ปือญูโรฮ นะ ญา. ญา ปีเลฮ กู ดัฮ บีดา กู นะ มือญาเระ ซา ลาฆู บรีตา นู บาฌิ นะ ญา. 2 บรีตา นู บาฌิ อีตู ตูฮัด บือเลฮ บือฌาญี ดูลู ดัฮ บือเลฮ ซูโรฮ โกะ ซือมียา ตูโดฮ ลาฆู นะ ญา มาแรฮ มือญาเระ บือกะ อาดา ฆาแรฮ ดัฮ เดะ ซูรัจ ปือมือเลา นะ ตูฮัด ซูรัจ นู บาฌิ บือซรี เตอ. 3 บรีตา อีตู เตอ มือญาเระ ลาฆู ปาซัน นานะ นะ ตูฮัด เดะ อาตัซ ฌาดี-จะ เยซู คริด ตูฮัด นะ กีตา เลอ. โซะ ญาวา นะ ญา เตอ ญา บือฌาดี มาแรฮ เดะ บือแนฮ นะ ราฌา ดาวิด 4 ตาปี โซะ ซือมืองัจ นะ ญา นู บาฌิ บือซรี เตอ ญา กือนา ตืองะ ดัฮ ฌาดี นานะ นะ ตูฮัด นู มือฆัฮ ซูโงฮ กรานา-จะ ญา กือนา บูวัจ บรี ฮีโดะ ปาเระ เดะ มาตี ดัฮ เลอ. 5 กรานา เยซู อีตู เตอ ตูฮัด บือเลฮ ฮาลัย บรี ซือลามัจ กะ กามี บรี กามี ฌาดี ปือญูโรฮ นะ ญา บีดา นะ บาวา โกะ ลูมอฮ ซือมียา ราตา บักซา มาแรฮ ปือจายา กะ ตูฮัด บูวัจ ตูโรจ กะ ญา เลอ. กะฆีเตอ นะ บรี นามา นะ เยซู นะ ฌาดี บือซัยํ ซูโงฮ. 6 ลูมอฮ กาเญา ฌูฆา นู เยซู คริด บือเลฮ ปาเงน ดัฮ กาเญา อาดา เดะ โกะ ลูมอฮ ซือมียา อีตู เลอ. 7 กะฆีเตอ กู ฆาแรฮ ซูรัจ อีนี กีเรบ บรี กะ ลูมอฮ ซือมียา เดะ โซะ นังฆรี โรม ลูมอฮ ซือมียา นู ตูฮัด เดะ อาตัซ ซายัก บือเลฮ ปาเงน ดัฮ บรี ฌาดี โกะ ซือมียา นะ ญา. มีตา เดะ ตูฮัด นู อาโปก เดะ อาตัซ นะ กีตา มีตา เดะ ตูฮัด เยซู คริด นะ บรี ซือลามัจ กะ กาเญา นะ บรี กาเญา ดูโดะ ซือนัง ซือลามัจ เลอ. 8 ลามูลา เตอ นู เยซู คริด ญา อาดา ตูโลก กู กะฆีเตอ กู บรี ซือลามัจ กะ ตูฮัด เดะ อาตัซ ตูฮัด นะ กู ปาซัน ลาฆู นะ กาเญา ซือมูฮา กรานา-จะ นู กาเญา ปือจายา กะ ตูฮัด เตอ ญา กือจัย ปี ดัฮ บรี โกะ ซือมียา ราตา ดือนียา ดืองัยํ. 9 ตูฮัด เดะ อาตัซ นู กู บูวัจ ตูโรจ ปือนอฮ เดะ ฮาตี เดะ ลาฆู มือญาเระ บรีตา นู บาฌิ ปาซัน นานะ นะ ญา เตอ ตูฮัด เลอ ญา บรี ซะซี ปาซัน กู จะ กู บรีงัจ กะ กาเญา ซือลาลู เตด บราดู. 10 วะตู กู บือซาโวจ บีลัก กาลี กู มีตา เดะ ตูฮัด จะ อาซัน บรี กือนา เดะ ฮาตี นะ ตูฮัด เตอ กะฮามี โปด บรี กู นะ บือเลฮ มาแรฮ ฌือเงาะ ลีฮัจ ลูมอฮ กาเญา เดะ วะตู โซะ บลากัก อีนี เลอ. 11 กรานา-จะ กู ฌีราซา นะ ลีฮัจ กาเญา บีดา นะ บือเลฮ ปาฮาฆิ ลาฆู บาฌิ บรี กะ กาเญา นู ดาตัก เดะ ซือมืองัจ นะ ตูฮัด เตอ เลอ บรี กะ กาเญา นะ กือฌะ-กือมัซ เดะ ฮาตี. 12 ฌาดี-จะ นู กีตา ซือมูฮา ปือจายา กะ เยซู ดัฮ กะฆีเตอ กีตา นะ ปาคัจ ตูโลก ปูโฌะ-ฮาตี บือซามา-ซามา เลอ. 13 อาดี-บราดี เออ กู นะ บรี กาเญา ตาฮู จะ บาญะ กาลี ดัฮ นู กู ตือตู-ฮาตี นะ มาแรฮ ฌือเงาะ ลีฮัจ กาเญา ตาปี อาดา ลาฆู ซือกัจ ตือดะ ฮาดัจ อีนี เลอ. กู ซูกา นะ มาแรฮ บีดา นะ บือเลฮ ตูโลก บรี อาดา ซือมียา ซือตืองัฮ นะ มาแรฮ ปือจายา เดะ ตืองัฮ ลูมอฮ กาเญา บือกะ กู บือเลฮ ตูโลก ดัฮ เดะ โกะ ลูมอฮ บักซา อาซิก นู ฆีลาฆี ฌูฆา. 14 กู ซือรูปา ตือฮูตัก ดัฮ เดะ โกะ ลูมอฮ บักซา บาฌิ ฌางัน โกะ ลูมอฮ บักซา เตด บาฌิ ซามา เดะ โกะ ลูมอฮ ซือมียา ปานัย ซูรัจ ฌางัน โกะ ลูมอฮ ซือมียา นู เตด ตาฮู ซูรัจ ฌูฆา. 15 กะฆีเตอ กู บือคานะ บาญะ ซูโงฮ เลอ นะ บือเลฮ มือญาเระ บรีตา นู บาฌิ อีตู บรี กะ ลูมอฮ กาเญา นู ดูโดะ เดะ นังฆรี โรม นะ บือเลฮ ดืองัยํ ฌูฆา. 16 กรานา-จะ กู ตือตู-ฮาตี ซูโงฮ เดะ บรีตา นู บาฌิ นะ ตูฮัด. บรีตา อีนี เลอ ฌาดี บือกะ ลาฆู ปือมือฆัฮ นะ ตูฮัด เดะ อาตัซ บีดา นะ ตูโลก ราตา ซือมียา นู ปือจายา บรี ลือปัซ เดะ ดูซา ดัฮ. ซือมียา บักซา ยิว ดูลู เตอ ซือมียา บักซา อาซิก ซามา ฌูฆา เลอ. 17 ซาเบะ เดะ บรีตา นู บาฌิ อีนี เตอ ตูฮัด เดะ อาตัซ ญา ปลีฮัจ บรี ซัฮ จะ นู ญา นะ บูวัจ บรี ลูมอฮ ซือมียา นะ บาฌิ-ตือปัจ ฌางัน ญา กะฮามี ฌาดี-จะ ซาเบะ ซือมียา อีตู ปือจายา กะ ตูฮัด ดัฮ. ตะเดะ ลามูลา ยู ปือญูดัฮ โปด ซาเบะ ญา ปือจายา ซา ฌาลัด อีตู เลอ. บือกะ ซูรัจ ปือมือเลา นะ ตูฮัด อาดา ฆาแรฮ ดัฮ จะ "ซือมียา นู บาฌิ-ตือปัจ ฌางัน ตูฮัด ซาเบะ ญา ปือจายา ดัฮ เตอ ซือมียา อีตู นะ อาดา ฮีโดะ ซูโงฮ เลอ." ญา จะ. 18 กรานา-จะ ลาฆู อีนี ปลีฮัจ ดัฮ จะ ตูฮัด นู เดะ อาตัซ ลาแงะ เตอ ญา มูซัยํ กรัจ ฮูโกบ กะ ลาฆู ดูซา ฌางัน ลาฆู ฌาฮัจ ซือมูฮา นะ โกะ อูมัจ-ซือมียา. เดะ ลาฆู ฌาฮัจ นะ กูญา กูญา ตูโดก ลาฆู นู ซูโงฮ ปาซัน นะ ตูฮัด ตีเมา บรี ซาปา นะ ตาฮู. 19 ตูฮัด กรัจ ฮูโกบ กะฆีเตอ ซาเบะ-จะ ลาฆู นามา นู ซือมียา นะ บือเลฮ ตาฮู ปาซัน ตูฮัด เดะ อาตัซ เตอ ญา ลีฮัจ ซัฮ เดะ ตืองัฮ กูญา. ตูฮัด ตะอาซิก โปด บูวัจ บรี กูญา ลีฮัจ ซัฮ กะฆีเตอ ดัฮ เลอ. 20 นู ตูฮัด ฌาดี กะฮามี เตอ โกะ ซือมียา นะ ลีฮัจ เตด บือฆารี. ตาปี ตะเดะ ญา บือฌาดี ดือนียา ดัฮ นู ตูฮัด ญา มือฆัฮ ซูโงฮ ซือลาลู นู ญา ฌาดี ตูฮัด บือซัยํ เตอ กูญา นะ บือเลฮ ลีฮัจ บือเลฮ ตาฮู เดะ โกะ ซือบารัก นู ญา บือฌาดี ดัฮ. กะฆีเตอ กูญา ฮอย ฌาลัด นะ มือเลา บือปูลัซ เลอ 21 กรานา มีเซ-จะ กูญา กราลา ตูฮัด กูญา ตีเมา ปูฌี กะ ญา บือกะ ลาฆู นู บือฆูนา เตอ ตีเมา บรี ซือลามัจ กะ ญา. ตาปี กูญา ปี กีรา กะ ลาฆู บูดอ กีรา กะ ลาฆู นู ฮอย เตด ตือปากัย บือกะ ฮาตี บูดอ นะ กูญา กือลับ ดัฮ. 22 มีเซ กูญา มืองากู จะ ฌาดี ซือมียา ปานัย อากัน เตอ ตาปี กูญา ฌาดี ซือมียา นู บูดอ เลอ. 23 กะฆีเตอ กูญา เตด มือญือมัฮ กะ ตูฮัด เดะ อาตัซ นู เตด ดือละ มาตี เตอ ตาปี กูญา อาเลฮ ปี มือญือมัฮ กะ บราลา บือกะ ฆามัยํ นะ ซือมียา นู ฆาโดฮ มาตี เตอ บือกะ ฆามัยํ นะ บูโรก นะ บือนาตัก กากี ปัจ บือนาตัก มือรากะ เลอ. 24 ซาเบะ ลูมอฮ ซือมียา บูวัจ กะฆีเตอ ดัฮ ตูฮัด เดะ อาตัซ ญา ปลือปัซ กูญา อีตู บรี ปี บูวัจ ลาฆู นู เตด บือฆูนา ตูโรจ กะ ลาฆู ฌาฮัจ นู ฮาตี นะ กูญา ฆาละ นะ บูวัจ เลอ. กะฆีเตอ โซะ ญาวา นะ กูญา ปาคัจ บูวัจ ลาฆู นู มือญือและ โตระ บือซามา-ซามา. 25 ตูฮัด นู ซูโงฮ เตอ กูญา รีบัยํ ฌาดี ลาฆู มืออูปัย. กูญา ตีเมา มือญือมัฮ ตีเมา บูวัจ ตูโรจ กะ ตูฮัด นู บือฌาดี ดือนียา ดัฮ ตาปี อาเลฮ ปี มือญือมัฮ กะ บือนา บารัก นู ตูฮัด บือเลฮ บือฌาดี. ตูฮัด เดะ อาตัซ เตอ ญา เลอ นู บือฆูนา นะ บรี ลูมอฮ ซือมียา นะ ปูฌี ซือลาลู. อาเมน. 26 กรานา ลูมอฮ ซือมียา บูวัจ กะฆีเตอ ตูฮัด ปลือปัซ กูญา อีตู บรี ตูโรจ กะ ฮาตี ฆาละ นู มือญือและ. มีเซ โกะ นีบีนี โปด กูญา กีปัซ ลาฆู บือซามา ฌางัน กีลากี อาเลฮ ปี ปาคัจ อูซิ ลาฆู นู เตด บือฆูนา ซามา นีบีนี. 27 กะฆีเตอ ฌูฆา โกะ กีลากี บราดู ดูโดะ บือซามา ฌางัน โกะ นีบีนี. กูญา อาดา ฮาตี ฆาละ นะ บือซามา ฌางัน โกะ กีลากี อาซิก. โกะ กีลากี ปาคัจ ปี อูซิ ลาฆู นู มือญือและ โตระ ซามา กีลากี. กะฆีเตอ กูญา กือนา ฮูโกบ บาลัซ ปาเระ เดะ ญาวา นะ กูญา บือกะ รือมัก ฌางัน ลาฆู นู ฌาฮัจ นะ กูญา. 28 กรานา ลูมอฮ ซือมียา ตีเมา อีงัจ ตีเมา ตาฮู กะ ลาฆู นะ ตูฮัด เดะ อาตัซ กะฆีเตอ ตูฮัด เตอ ญา ปลือปัซ กูญา บรี ฮาตี นะ กูญา เตด บือฆูนา บาญะ บรี กูญา บูวัจ ลาฆู นู ฌาฮัจ นู เตด ปาโตจ. 29 กูญา ปือนอฮ ฌางัน ลาฆู ฌาฮัจ ลาฆู ซาลัฮ ลาฆู ฮาลูบา ลาฆู เตด ตือปากัย. ฮาฌา กูญา นะ ดือกี นะ บูนอฮ ซือมียา นะ บลาวัด นะ ตีปู นะ กีรา ฌาฮัจ. กูญา นะ บือบีซิ มือเลา มืออูปัย 30 นะ มือเลา มืออูปัจ กะ กาวัด. กูญา บูวัจ ลาฆู นู ตูฮัด บือชี ฮาตี กรัซ งันตืองัน มือนูโญะ กะ ญาวา ตะอาซิก ซูกา อีงัจ กะ ลาฆู นู ฌาฮัจ. กูญา ฮอย เตด มือนีงัย กะ เอด อาโปก. 31 กูญา บูดอ ซูโงฮ. กูญา กาเลฮ ปือมือเลา นู กูญา บือฌาญี ดัฮ. กูญา เตด ซายัก เตด ตือจีฮัด กะ ซือมียา อาซิก. 32 มีเซ-จะ กูญา ตาฮู ปือมือเลา ฮูโกบ นะ ตูฮัด นู จะ ซือมียา นู บูวัจ ลาฆู กะฆีเตอ ญา บือฆูนา นะ มาตี ตาปี กูญา ฌือนัฮ บูวัจ กะฆีเตอ ลาฆี. ลือเบฮ เดะ อีตู เลอ กูญา ลีฮัจ บาฌิ ฌางัน ซือมียา อาซิก นู บูวัจ ลาฆู กะฆีเตอ ฌูฆา ดัฮ.
1 กาวัด เออ เกา นะ กรัจ ฮูโกบ ซือมียา อาซิก เฆอ? กะฆีเตอ เตด-จะ เกา ฌาดี ซือมียา ดีฮา เกา ฮอย ฌาลัด นะ บือปูลัซ ญาวา เลอ. เกา นะ กรัจ ฮูโกบ ซือมียา อาซิก เตอ ตาปี เกา ฌูฆา โปด บูวัจ ลาฆู ซือรูปา กะ ญา. กะฆีเตอ ซือรูปา เกา กรัจ ฮูโกบ ญาวา ตะอาซิก เลอ. 2 กีตา ตาฮู จะ นู ตูฮัด นะ กรัจ ฮูโกบ ซือมียา นู บูวัจ ลาฆู ฌาฮัจ อีตู เตอ ญา บูวัจ กือนา ลาฆู ดัฮ เลอ. 3 กาวัด เออ เกา ตะอาซิก บูวัจ ลาฆู อีตู ตาปี เกา กรัจ ฮูโกบ ซือมียา อาซิก นู บูวัจ กะฆีเตอ. เกา อีงัจ จะ ญาวา เกา นะ ลือปัซ เดะ ฮูโกบ นะ ตูฮัด เฆอ? 4 นู ตูฮัด ฮาตี บาฌิ ซูโงฮ นู ญา ตาฮัด-ฮาตี มือนาตี ลามา เตอ โกะ ลาฆู กะฆีเตอ เกา กีรา จะ เตด ฌาดี นามา เฆอ? เกา ฮอย เตด ตาฮู เฆอ จะ นู ตูฮัด ฮาตี บาฌิ กะฆีเตอ บีดา นะ บรี เกา บราเลฮ-ฮาตี เลอ? 5 ตาปี เกา เตอ ฮาตี กรัซ ฮาตี บาตัฮ เลอ. กะฆีเตอ เกา นะ บูวัจ บรี ญาวา เกา ตะอาซิก นะ กือนา ลาฆู มูซัยํ บือตามัฮ บาญะ เลอ เดะ อารี กรัจ ฮูโกบ. เดะ อารี อีตู ตูฮัด เดะ อาตัซ นะ บรี ลีฮัจ จะ ญา มูซัยํ กรัจ ฮูโกบ บือกะ ลาฆู บาฌิ-ตือปัจ เลอ. 6 กรานา-จะ บือกะ ราตา ซือมียา บือเลฮ บูวัจ กะฮามี เตอ ตูฮัด เดะ อาตัซ นะ บรี กะ ญา ตูโรจ ลาฆู กะฆีเตอ เลอ. 7 โซะ ซือมียา ซือตืองัฮ นู ราเฌด บูวัจ ลาฆู บาฌิ บีดา บรี ตูฮัด นะ ปูฌี กะ กูญา นะ บรี กูญา บือซัยํ มูคา นะ บรี กูญา ฮอย เตด มาตี เตอ ซือมียา กะฆีเตอ ตูฮัด นะ บรี กูญา ฮีโดะ ซูโงฮ ซือลาลู. 8 โซะ ซือมียา อาซิก นู บรีงัจ กะ ซา ญาวา นะ กูญา ตะอาซิก นู ตีเมา มือนีงัย กะ ลาฆู นู ซูโงฮ ตาปี ตูโรจ กะ ลาฆู นู ฌาฮัจ เตอ ซือมียา กะฆีเตอ ตูฮัด นะ มูซัยํ กรัจ ฮูโกบ กูญา เลอ. 9 ราตา ซือมียา นู บูวัจ ลาฆู เตด บาฌิ เตด-จะ ฌาดี โกะ ลูมอฮ บักซา ยิว ดูลู เตอ ฌาดี โกะ ลูมอฮ บักซา อาซิก ฌูฆา ตูฮัด นะ บรี กูญา กือนา ลาฆู ซูซัฮ ปายัฮ โตระ. 10 ตาปี ราตา ซือมียา นู บูวัจ ลาฆู นู บาฌิ เตด-จะ ฌาดี โกะ ลูมอฮ บักซา ยิว ดูลู เตอ ฌาดี โกะ ลูมอฮ บักซา อาซิก ฌูฆา ตูฮัด นะ ปูฌี กะ กูญา บรี กูญา บือซัยํ มูคา บรี กูญา ดูโดะ ซือนัง ซือลามัจ เลอ. 11 ซาเบะ-จะ ตูฮัด เดะ อาตัซ ญา เตด ปีเลฮ มูคา ซือมียา ดีฮา เลอ. 12 ซาเบะ-จะ โซะ โกะ ซือมียา นู ฮอย ปือมือเลา ฮูโกบ นะ ตูฮัด นู บูวัจ ซาลัฮ เตอ มีเซ-จะ ฮอย ปือมือเลา ฮูโกบ ตาปี กูญา นะ กือนา ลาฆู ฌาฮานัม เลอ. ตาปี โซะ โกะ ซือมียา นู อาดา ปือมือเลา ฮูโกบ นะ ตูฮัด นู บูวัจ ซาลัฮ เตอ กูญา นะ กือนา กรัจ ฮูโกบ บือกะ ปือมือเลา ฮูโกบ อีตู เลอ. 13 ซาเบะ-จะ โกะ ซือมียา นู นะ บาฌิ-ตือปัจ โซะ ฮึลด มูคา นะ ตูฮัด เตอ กูญา บูกัด ซือมียา นู ซา ดืองัยํ ปือมือเลา ฮูโกบ นะ ตูฮัด ตาปี ฌาดี ซือมียา บูวัจ ตูโรจ กะ ปือมือเลา ฮูโกบ อีตู. กูญา เลอ นู ฌาดี ซือมียา บาฌิ-ตือปัจ ดัฮ. 14 ซาเบะ ลูมอฮ ซือมียา บักซา อาซิก กูญา ฮอย ปือมือเลา ฮูโกบ นะ ตูฮัด. ตาปี ดักกาดัก กูญา บูวัจ ตูโรจ ปือมือเลา ฮูโกบ อีตู บือกะ ฮาตี นะ กูญา บาวา เตอ. วะตู บูวัจ กะฆีเตอ กูญา บรี ลีฮัจ จะ มีเซ กูญา ฮอย ปือมือเลา ฮูโกบ นะ ตูฮัด ดัฮ ตาปี ฮาตี กูญา ฌาดี ปือมือเลา ฮูโกบ บรี กะ ญาวา นะ กูญา ตะอาซิก เลอ. 15 นู กูญา บูวัจ ตูโรจ กะฆีเตอ บรี ลีฮัจ จะ ลาฆู นู ปือมือเลา ฮูโกบ นะ ตูฮัด ปือซัด เตอ อาดา ฆาแรฮ ดัฮ เดะ ฮาตี นะ กูญา เลอ. ฮาตี นะ กูญา นู ตาฮู ลาฆู ซาลัฮ กือนา ฌาดี ซะซี จะ ลาฆู กะฆีเตอ ฌาดี ซูโงฮ. ซาเบะ-จะ ลาฆู กูญา อีงัจ เดะ ฮาตี ญา บือตือฆัฮ บือซามา-ซามา ซัจ มือเลา จะ "ซาลัฮ ดัฮ เลอ" ซัจ จะ "กือนา ดัฮ" ฌูฆา. 16 นะ ฌาดี กะฆีเตอ เลอ เดะ อารี อีตู นู ตูฮัด เดะ อาตัซ นะ บรี เยซู คริด กรัจ ฮูโกบ โกะ ลาฆู นู บูนี ดัฮ เดะ ดาลับ ฮาตี นะ ลูมอฮ ซือมียา. ญา บูวัจ กะฆีเตอ ตูโรจ บือกะ บรีตา นู บาฌิ อีตู นู กู บือเลฮ มือญาเระ ดัฮ. 17 ตาปี โซะ เกา เลอ เกา มืองากู จะ ฌาดี ซือมียา บักซา ยิว เตอ เกา บือซานัยํ เดะ ปือมือเลา ฮูโกบ นะ ตูฮัด มือโอจ กะ ญาวา ตะอาซิก จะ ฌาดี ซือมียา นู ตูฮัด เดะ อาตัซ ซูกา. 18 เกา บือเลฮ บลาฌัยํ เดะ ซูรัจ ปือมือเลา ฮูโกบ ตาฮู ดัฮ จะ ลาฆู นามา นู ตูฮัด บือคานะ เตอ จะ นะ ปีเลฮ บูวัจ ลาฆู นามา บาฌิ เลอ. 19 เกา ตือตู เดะ ฮาตี ดัฮ จะ เกา ฌาดี ซือรูปา ซือมียา ตูโตด โกะ อูรัก มาตา บูตา ซือรูปา ตือปัจ จรัฮ นะ โกะ ซือมียา นู ดูโดะ โซะ กือลับ 20 ฌาดี ซือมียา อูจะ-อาฌัยํ โกะ ซือมียา เตด บือฆูนา ฌาดี ซือมียา อาฌัยํ โกะ ซือมียา บูดอ เลอ. เกา ตือตู-ฮาตี จะ นู เกา อาดา ซูรัจ ปือมือเลา ฮูโกบ อีตู กะฆีเตอ เกา ตาฮู ปือนอฮ ดัฮ รอจ กะ ลาฆู ซูโงฮ ซือมูฮา. 21 เกา เลอ เกา อาฌัยํ โกะ ซือมียา อาซิก บูวัจ นามา ปะ เตด อาฌัยํ ฮาตี นะ เกา ตะอาซิก เลอ? เกา มือญาเระ จะ "ฌางัน จูรี โกะ ซือบารัก นะ กาวัด." ตาปี อีซี เกา ตะอาซิก จูรี โกะ ซือบารัก เฆอ? 22 เกา มือเลา ปูลัก จะ "ฌางัน บือกาเซฮ." ตาปี เกา ปี บือกาเซฮ เฆอ? เกา บือชี โกะ บราลา ตาปี เกา ปี จูรี ซือบารัก เดะ โกะ รูมัฮ มือญือมัฮ บราลา เฆอ? 23 เกา งันตืองัน จะ เกา อาดา ซูรัจ ปือมือเลา ฮูโกบ นะ ตูฮัด ตาปี นู เกา บูวัจ ซาลัฮ เดะ ปือมือเลา ฮูโกบ อีตู เกา นะ บูวัจ ลาฆู ปือจือและ กะ ตูฮัด เฆอ? 24 บือกะ อาดา ฆาแรฮ ดัฮ เดะ ซูรัจ ปือมือเลา นะ ตูฮัด จะ "กรานา กาเญา ลูมอฮ ยิว เลอ โกะ ลูมอฮ บักซา อาซิก มือเลา ตะอารัฮ กะ ตูฮัด เดะ อาตัซ." 25 ดัฮ เกา บูวัจ ตูโรจ กะ ปือมือเลา ฮูโกบ นะ ตูฮัด อีตู เตอ นู เกา ซาโมจ ลาฆู กรัจ ดัฮ ญา อาดา รือฆา บาฌิ. ตาปี ดัฮ เกา เตด บูวัจ ตูโรจ กะ ปือมือเลา ฮูโกบ อีตู ฌาดี ซือรูปา บือกะ เกา เตด ดือละ ซาโมจ ลาฆู กรัจ ดัฮ เลอ. 26 กะฆีเตอ ซือมียา บักซา อาซิก นู เตด บือเลฮ ซาโมจ ลาฆู กรัจ เตอ ดัฮ ญา บูวัจ ตูโรจ กะ โกะ ปือมือซัด เดะ ปือมือเลา ฮูโกบ นะ ตูฮัด ตูฮัด นะ ลีฮัจ กะ ญา ซือรูปา บือกะ ฌาดี ซือมียา นู ซาโมจ ลาฆู กรัจ ดัฮ บูกัด เฆอ? 27 กะฆีเตอ ลูมอฮ บักซา อาซิก นะ กรัจ ฮูโกบ กาเญา นู ฌาดี บักซา ยิว เตอ. ซาเบะ-จะ มีเซ กูญา เตด บือเลฮ ซาโมจ ลาฆู กรัจ เดะ ญาวา นะ กูญา กูญา บูวัจ ตูโรจ กะ ปือมือเลา ฮูโกบ นะ ตูฮัด. ตาปี กาเญา เตอ กาเญา อาดา โกะ ปือมือเลา ฮูโกบ นะ ตูฮัด ฆาแรฮ ฌาดี ซูรัจ ดัฮ กาเญา บือเลฮ ซาโมจ ลาฆู กรัจ ฌูฆา ตาปี ปือมือเลา ฮูโกบ อีตู กาเญา บูวัจ ซาลัฮ เลอ. 28 กรานา-จะ ซือมียา บักซา ยิว นู ซูโงฮๆ เตอ ญา บูกัด ซือมียา นู ลีฮัจ ซือรูปา ฌาดี อูรัก บักซา ยิว ซา อีตู. ลาฆู กรัจ นู ซูโงฮๆ เตอ ญา บูกัด ลาฆู กรัจ นู บูวัจ เดะ ญาวา นะ ซือมียา ซา อีตู เลอ. 29 ตาปี ซือมียา บักซา ยิว นู ซูโงฮๆ เตอ ญา ฌาดี ซือมียา นู ฌาดี บักซา ยิว เดะ ดาลับ ฮาตี นะ ญา นู บือเลฮ ซาโมจ ลาฆู กรัจ เดะ ฮาตี นะ ญา. ลาฆู กะฆีเตอ ซา ซือมืองัจ นะ ตูฮัด นะ บูวัจ บือเลฮ ซูรัจ ปือมือเลา ฮูโกบ นะ บูวัจ เตด บือเลฮ เลอ. ซือมียา กะฆีเตอ บูกัด โกะ ซือมียา นะ มือโอจ กะ ญา ตาปี ตูฮัด เดะ อาตัซ เลอ นะ มือโอจ กะ ญา.
1 ดัฮ กะฆีเตอ ซือมียา บักซา ยิว อาดา ลาฆู นามา นู บาฌิ เดะ กาวัด เฆอ? นู กูญา ซาโมจ ลาฆู กรัจ เตอ นะ อาดา อูโตก นามา เฆอ? 2 อาดา ซูโงฮ บาญะ ฌือแนฮ เลอ. ลามูลา เตอ ตูฮัด เดะ อาตัซ บือเลฮ กีเรบ โกะ ปือมือเลา นะ ญา บรี กะ ลูมอฮ ยิว. 3 นู กูญา ซือตืองัฮ ฮาตี เตด รือมัก ฌาดี กะฮามี เลอ? นู กูญา ฮาตี เตด รือมัก กะฆีเตอ นะ บูวัจ บรี ลาฆู นู ตูฮัด ญา ฮาตี รือมัก เตอ เตด ฌาดี นามา เฆอ? 4 เตด โบะ. ฮอย เตด ฌาดี กะฆีเตอ เลอ. ตูฮัด ญา มือเลา ซูโงฮ เลอ มีเซ-จะ โกะ อูมัจ-ซือมียา นะ ฌาดี ซือมียา มืออูปัย ราตา ซือมียา บือกะ อาดา ฆาแรฮ ดัฮ เดะ ซูรัจ ปือมือเลา นะ ตูฮัด จะ "กะฆีเตอ วะตู เกา มือเลา เตอ นะ บือเลฮ ลีฮัจ จะ เกา มือเลา ซูโงฮ ดัฮ วะตู ซือมียา อาดู เกา เตอ เกา นะ บือเลฮ ฌือนัฮ เดะ ลาฆู บือดะวา อีตู เลอ." 5 ตาปี-จะ กะ ลาฆู นู กีตา บูวัจ เตด บาฌิ นะ ปลีฮัจ บรี ซัฮ จะ ตูฮัด เดะ อาตัซ ญา บาฌิ-ตือปัจ เตอ กะฆีเตอ กีตา นะ มือเลา กะฮามี เลอ? นู ตูฮัด มูซัยํ กรัจ ฮูโกบ กีตา ญา บูวัจ เตด บาฌิ เฆอ? (กู มือเลา ตูโรจ กะ ฮาดัจ นะ โกะ อูมัจ-ซือมียา เลอ.) 6 ฮอย เตด ฌาดี กะฆีเตอ เลอ. กะ ตูฮัด บูวัจ เตด กือนา ลาฆู เตอ ญา นะ กรัจ ฮูโกบ ลูมอฮ ซือมียา เดะ ดือนียา บือเลฮ กะฮามี เลอ? 7 ตาปี อาดา ซือมียา มือเลา จะ "มีเซ กู นะ มืออูปัย เตอ ลาฆู มืออูปัย อีตู นะ ปลีฮัจ จะ นู ตูฮัด ญา รือมัก ซูโงฮ เลอ กะฆีเตอ นะ บูวัจ บรี ลีฮัจ ลาฆู บือซายา บือซรี นะ ญา บรี ซัฮ. กะ ลาฆู มืออูปัย นะ กู นะ บูวัจ กะฆีเตอ บูวัจ นามา เลอ กู นะ กือนา กรัจ ฮูโกบ บือกะ ฌาดี ซือมียา บือดูซา?" ญา จะ. 8 ดัฮ กะฆีเตอ บูวัจ นามา เตด มือเลา ปูลัก จะ "โฌฮ บรี กีตา บูวัจ ฌาฮัจ เลอ บีดา ลาฆู บาฌิ นะ บือฌาดี มาแรฮ." ซูโงฮ อาดา ซือมียา ซือตืองัฮ นู มือเลา มือฌัฮ กะ กู อาดู จะ กู อาดา มือเลา กะฆีเตอ เลอ. ตูฮัด นะ กรัจ ฮูโกบ กูญา บรี กือนา ลาฆู. 9 กะฆีเตอ นะ ฌาดี กะฮามี เลอ? กามี นู บักซา ยิว อาดา ลาฆู บาฌิ เดะ ลูมอฮ อาซิก เฆอ? บูกัด เลอ. กู ซูดัฮ บรี ลีฮัจ จะ นู ลูมอฮ บักซา ยิว ลูมอฮ บักซา อาซิก เตอ กูญา ซือมูฮา ดูโดะ เดะ บาวัฮ ฮูโกบ นะ ลาฆู ดูซา เลอ. 10 เดะ ซูรัจ ปือมือเลา นะ ตูฮัด มือเลา จะ "ฮอย ซือมียา ดีฮา นู บาฌิ ซือมาตา เลอ. ซา อูรัก โปด ฮอย. 11 ฮอย ซาปา นู บือเลฮ มาโซะ เดะ ฮาตี. ฮอย ซาปา โปด นู ซารี ตูฮัด เดะ อาตัซ. 12 กูญา ซือมูฮา ปี ซือซัจ เดะ ฌาลัด นะ ตูฮัด ดัฮ. กูญา ปาคัจ บูวัจ ลาฆู ฮอย เตด ตือปากัย. ฮอย ซาปา เลอ นู บูวัจ บาฌิ. ซา อูรัก โปด ฮอย." 13 "มูโลจ นะ กูญา ฌาดี ซือรูปา ลูบัก ตานัม บาดัด นู บูกา ดัฮ. กูญา บียาซา ซูโรฮ ลีดัฮ นะ กูญา มือเลา มืออูปัย." "ปือมือเลา นะ กูญา ซือรูปา อาเย บีซา อูลัยํ." 14 "มูโลจ นะ กูญา ปือนอฮ ฌางัน ปือมือเลา ซูปัฮ อาโบยํ นู ฮาวุซ ฮางัจ." 15 "ตาปะ กากี นะ กูญา บลารี จือปัจ เดะ ลาฆู นะ บูนอฮ ซือมียา. 16 กูญา นะ ปี กะ ดีฮา นะ บรี ซือมียา ฌาฮานัม ซูซัฮ ปายัฮ ดัฮ. 17 ฌาลัด นู บรี ซือนัง-ฮาตี อีตู กูญา เตด กราลา เลอ." 18 "กูญา เตด ดือละ อีงัจ นะ ตาโกจ เดะ ตูฮัด เดะ อาตัซ." 19 กีตา ตาฮู จะ ลาฆู ซือมูฮา นู ปือมือเลา ฮูโกบ นะ ตูฮัด มือเลา เตอ ญา มือเลา กะ ลูมอฮ ซือมียา นู ดูโดะ เดะ บาวัฮ ปือมือเลา ฮูโกบ อีตู บีดา นะ ตูโดก มูโลจ ราตา ซือมียา บรี กือเมน เลอ บีดา อูมัจ-ซือมียา ซือมูฮา เดะ ดือนียา นะ ดูโดะ เดะ บาวัฮ ลาฆู กรัจ ฮูโกบ นะ ตูฮัด. 20 กะฆีเตอ ฮอย ซือมียา ดีฮา นู นะ บาฌิ-ตือปัจ โซะ ฮึลด มูคา นะ ตูฮัด กรานา ญา บูวัจ ตูโรจ กะ ปือมือเลา ฮูโกบ เลอ. ซาเบะ ปือมือเลา ฮูโกบ อีตู บูวัจ บรี ซือมียา ซือดัยํ ญาวา จะ ญา ฌาดี อูรัก บือดูซา ดัฮ. 21 ตาปี วะตู อีนี เลอ ตูฮัด เดะ อาตัซ บือเลฮ ปลีฮัจ จะ นู ญา นะ บูวัจ บรี ซือมียา นะ บาฌิ-ตือปัจ ฌางัน ญา กะฮามี ฮอย เตด ปือดูลี เดะ ลาฆู ตูโรจ กะ ปือมือเลา ฮูโกบ นู ดีฮา เลอ. ตาปี ซูรัจ ปือมือเลา ฮูโกบ นะ ตูฮัด ฌางัน ซูรัจ นะ ลูมอฮ ซือมียา ตูโดฮ ลาฆู นะ ตูฮัด กูญา ฌาดี ซะซี ปาซัน ลาฆู อีตู เลอ. 22 ฌาดี-จะ ตูฮัด เดะ อาตัซ ญา บูวัจ บรี โกะ ซือมียา นะ บาฌิ-ตือปัจ ฌางัน ญา กรานา ซือมียา อีตู ปือจายา กะ เยซู คริด ดัฮ. ตูฮัด ญา บูวัจ กะฆีเตอ ฌางัน ราตา ซือมียา นู ปือจายา. กรานา ลูมอฮ ซือมียา เตด อาซิกๆ เลอ 23 กูญา บูวัจ ดูซา ดัฮ ราตา ซือมียา. กูญา ปูตุซ เดะ ลาฆู บือซรี นะ ตูฮัด เดะ อาตัซ. 24 กะฆีเตอ ตูฮัด ญา ฮาลัย บรี ซือลามัจ กะ กูญา บรี ฌาดี ซือมียา บาฌิ-ตือปัจ เตด กีรา รือฆา นามา โปด ซาเบะ-จะ เยซู คริด เตอ ญา ตือบุซ กูญา บรี ลือปัซ เดะ ดูซา ดัฮ. 25 ตูฮัด เดะ อาตัซ ตืองะ เยซู ดัฮ บรี ฌาดี บารัก มือญือมัฮ. นู เยซู มาตี ดารัฮ มือนีเลฮ ดัฮ กะฆีเตอ ตูฮัด นะ อาเกะ ดูซา นะ โกะ ซือมียา นู ปือจายา กะ ญา. ญา บูวัจ กะฆีเตอ บีดา นะ บรี ลีฮัจ จะ นู ญา บาฌิ-ตือปัจ เตอ กรานา-จะ เดะ กาลา ดูลู อีตู ญา ตาฮัด-ฮาตี ดัฮ เตด กีรา ดูซา นะ โกะ ซือมียา. 26 ตาปี รอจ วะตู อีนี ตูฮัด บรี ลีฮัจ จะ ญา บาฌิ-ตือปัจ เลอ ฌาดี-จะ ญา นู บาฌิ-ตือปัจ ญา เลอ นู บูวัจ บรี ซือมียา นู ปือจายา กะ เยซู ฌาดี ซือมียา บาฌิ-ตือปัจ ฌางัน ญา ฌูฆา. 27 กะ ฌาดี กะฆีเตอ กีตา นะ งันตืองัน บือเลฮ กะฮามี? ฮอย เตด บือเลฮ เลอ. ซาเบะ ลาฆู นามา? ซาเบะ ลาฆู บูวัจ ตูโรจ ปือมือเลา ฮูโกบ เฆอ? บูกัด กะฆีเตอ ตาปี ซาเบะ ลาฆู ปือจายา เลอ. 28 กะฆีเตอ กีตา กีรา จะ นู ซือมียา ซืออูรัก นะ บาฌิ-ตือปัจ ฌางัน ตูฮัด บูกัด ซาเบะ บูวัจ ตูโรจ กะ ปือมือเลา ฮูโกบ ดัฮ ตาปี ซาเบะ ซา ลาฆู อีนี จะ นู ญา ปือจายา กะ เยซู คริด เลอ. 29 ตูฮัด เดะ อาตัซ ญา ฌาดี ตูฮัด นะ ลูมอฮ บักซา ยิว ซา ลูมอฮ เฆอ? ญา ฌาดี ตูฮัด นะ ลูมอฮ บักซา อาซิก ฌูฆา เฆอ? ซูโงฮ เลอ ญา ฌาดี ตูฮัด นะ ลูมอฮ บักซา อาซิก ซามา เลอ. 30 กรานา อาดา ตูฮัด เดะ อาตัซ แนฮ ซา ตูฮัด เลอ. ญา เตอ นะ บูวัจ บรี ซือมียา บักซา ยิว นู ซาโมจ ลาฆู กรัจ ดัฮ นะ บาฌิ-ตือปัจ ซาเบะ ญา ปือจายา ดัฮ. ญา นะ บรี ซือมียา บักซา อาซิก นู เตด บือเลฮ ซาโมจ ลาฆู กรัจ นะ บาฌิ-ตือปัจ ซาเบะ ญา ปือจายา ฌูฆา. 31 นู กีตา จะ ซือมียา นะ บาฌิ-ตือปัจ ฌางัน ตูฮัด ซาเบะ ลาฆู นู ญา ปือจายา ดัฮ กะฆีเตอ กีตา นะ บูวัจ บรี ปือมือเลา ฮูโกบ นะ ตูฮัด ฮาบิฮ ดัฮ เฆอ? บูกัด เลอ. ตาปี กีตา บูวัจ บรี ปือมือเลา ฮูโกบ อีตู ตืองะ กือฌะ-กือมัซ ดัฮ เลอ.
1 ดัฮ กะฆีเตอ นะ มือเลา กะฮามี เลอ ปาซัน อับราฮัม นู บีลาแก นะ กีตา? ญา ดาปัจ ลาฆู นามา ซือตืองัฮ? 2 ซาเบะ ดัฮ ตูฮัด ซาโมจ อับราฮัม ฌาดี ซือมียา บาฌิ-ตือปัจ กรานา ลาฆู ปือบูวัจ นะ ญา เตอ กะฆีเตอ ญา อาดา ตือปัจ นู นะ งันตืองัน. ตาปี โซะ ฮึลด มูคา นะ ตูฮัด เตด บือเลฮ เลอ. 3 ซูรัจ ปือมือเลา นะ ตูฮัด มือเลา กะฮามี เลอ? ญา มือเลา กะฆีนี จะ "อับราฮัม ปือจายา กะ ตูฮัด เดะ อาตัซ ดัฮ. ซาเบะ กะฆีเตอ เลอ ตูฮัด บือเลฮ กีรา ดัฮ จะ ญา ฌาดี ซือมียา บาฌิ-ตือปัจ." 4 โซะ ซือมียา นู บือกรือฌา เตอ ญา ฮอย เตด กีรา จะ ฆาฌี บูลัด นะ ญา ฌาดี ลาฆู นู ตกเก ญา ฮาลัย บรี ตาปี ฌาดี บือกะ รือฆา อูปัฮ นู ญา บือเลฮ บือกรือฌา เลอ. 5 ตาปี อาดา ซือมียา นู เตด ฮาระ กะ ลาฆู บือกรือฌา บูวัจ ตูโรจ ปือมือเลา ฮูโกบ ตาปี ญา ซือมาตา ปือจายา กะ ตูฮัด นู ซาโมจ อูรัก ซาลัฮ ฌาดี ซือมียา บาฌิ-ตือปัจ. โซะ ซือมียา อีตู เตอ ตูฮัด ญา กีรา จะ ญา บาฌิ-ตือปัจ ดัฮ กรานา ญา ปือจายา ดัฮ เลอ. 6 ซือรูปา บือกะ ราฌา ดาวิด บือเลฮ มือญาเระ กาลา ดูลู ปาซัน ซือมียา นู เตด ฮาระ กะ ลาฆู บือกรือฌา ตาปี ตูฮัด กีรา จะ ญา บาฌิ-ตือปัจ เลอ. ซือมียา อีตู เตอ ราฌา ดาวิด บือเลฮ มือญาเระ จะ ญา ซือนัง ซือลามัจ เลอ. ญา มือเลา กะฆีนี จะ 7 "ซือนัง ซือลามัจ เลอ โกะ ซือมียา นู ตูฮัด บือเลฮ อาเกะ ซาลัฮ นะ กูญา ซือมียา นู ตูฮัด บือเลฮ บาโซฮ ลาฆู ดูซา นะ กูญา บรี ลือแงะ ปี ฮาบิฮ เตอ 8 ซือนัง ซือลามัจ เลอ ซือมียา นู ตูฮัด เดะ อาตัซ ฮอย เตด กีรา ลาฆู ดูซา นะ ญา." 9 ดัฮ กะฆีเตอ ลาฆู ซือนัง ซือลามัจ อีตู ญา อาดา บีดา ซา ซือมียา นู ซาโมจ ลาฆู กรัจ เฆอ? บูกัด ญา อาดา บีดา ซือมียา นู เตด บือเลฮ ซาโมจ ลาฆู กรัจ ฌูฆา. ซาเบะ ตือนอซ อีตู นู กามี บือเลฮ มือเลา ซีงี ญา จะ "ตูฮัด กีรา จะ อับราฮัม ฌาดี ซือมียา บาฌิ-ตือปัจ เตอ ซาเบะ ญา ปือจายา กะ ตูฮัด ดัฮ เลอ." 10 ตาปี ตูฮัด กีรา กะฆีเตอ วะตู ดีฮา เลอ? วะตู อับราฮัม ซาโมจ ลาฆู กรัจ ดัฮ เฆอ? เฆอ-จะ วะตู ญา เตด บือเลฮ ซาโมจ ลาฆู กรัจ ลาฆี? ซูโงฮ เลอ วะตู ญา เตด บือเลฮ ซาโมจ ลาฆี. 11 กะฆีเตอ ญา ซาโมจ ลาฆู กรัจ ฌาดี ปือนานา มือกรา บรี ลีฮัจ จะ ตูฮัด บูวัจ บรี ญา ฌาดี บาฌิ-ตือปัจ ซาเบะ ญา ปือจายา ดัฮ เลอ วะตู นู ญา เตด บือเลฮ ซาโมจ ลาฆู กรัจ ลาฆี. ซาเบะ กะฆีเตอ อับราฮัม ญา ฌาดี ซือรูปา อาโปก นะ ลูมอฮ ซือมียา ซือมูฮา นู เตด บือเลฮ ซาโมจ ลาฆู กรัจ เตอ ตาปี กูญา ปือจายา กะ ตูฮัด เลอ. กะฆีเตอ ตูฮัด กีรา จะ กูญา บาฌิ-ตือปัจ ดัฮ. 12 ญา ฌาดี ซือรูปา อาโปก นะ ลูมอฮ ซือมียา นู ซาโมจ ลาฆู กรัจ ฌูฆา ฌาดี-จะ ซือมียา นู เตด ซา ซาโมจ ลาฆู กรัจ อีตู เตอ ตาปี กูญา ตูโรจ บือกัซ ฌาลัด นะ อับราฮัม อาโปก นะ กีตา นู อาดา ปือจายา วะตู ญา เตด บือเลฮ ซาโมจ ลาฆู กรัจ ลาฆี. 13 ตูฮัด บือเลฮ บือฌาญี ฌางัน อับราฮัม ฌางัน โกะ บือแนฮ นะ ญา จะ กูญา นะ ซาโมจ ดือนียา ฌาดี ปือซากา นะ กูญา. ตาปี นู ญา บือฌาญี กะฆีเตอ บูกัด กรานา อับราฮัม บูวัจ ตูโรจ กะ ปือมือเลา ฮูโกบ นะ ตูฮัด เตอ ตาปี กรานา ญา ปือจายา ดัฮ กะฆีเตอ ตูฮัด บูวัจ บรี ญา ฌาดี ซือมียา บาฌิ-ตือปัจ เลอ. 14 ดัฮ โกะ ซือมียา นู บูวัจ ตูโรจ กะ ปือมือเลา ฮูโกบ นะ ตูฮัด นะ ฌาดี ซือมียา ซาโมจ ลาฆู ปือซากา อีตู กะฆีเตอ นู ซือมียา ดีฮา ปือจายา นะ เตด ฌาดี นามา ลาลู นู ปือมือเลา บือฌาญี อีตู โปด ฮอย รือฆา นามา เลอ. 15 ซาเบะ-จะ ปือมือเลา ฮูโกบ นะ ตูฮัด อีตู ญา บูวัจ ปาซัน นู บรี ตูฮัด นะ มูซัยํ กรัจ ฮูโกบ เตอ. ตาปี ตือปัจ ดีฮา ฮอย โกะ ปือมือเลา ฮูโกบ ตือปัจ อีตู ฮอย ซาปา นะ บูวัจ ซาลัฮ เดะ ปือมือเลา ฮูโกบ ฌูฆา. 16 ซาเบะ กะฆีเตอ ปือมือเลา บือฌาญี ญา ตูโรจ กะ ลาฆู ปือจายา บีดา ปือมือเลา บือฌาญี อีตู นะ กือนา ตืองะ บรี ตือตู ดัฮ ฌาดี ลาฆู นู ตูฮัด ฮาลัย บรี ซือลามัจ กะ บือแนฮ นะ อับราฮัม ราตา ซือมียา. บูกัด ซา โกะ ซือมียา นู บูวัจ ตูโรจ ปือมือเลา ฮูโกบ นะ ตูฮัด เตอ ตาปี บีดา โกะ ซือมียา นู ปือจายา ซือรูปา บือกะ อับราฮัม บือเลฮ ปือจายา ฌูฆา. กรานา-จะ อับราฮัม เตอ ญา ฌาดี ซือรูปา อาโปก นะ กีตา ซือมูฮา เลอ 17 บือกะ ซูรัจ ปือมือเลา นะ ตูฮัด จะ "กู บือเลฮ ตืองะ เกา ฌาดี อาโปก นะ ลูมอฮ ซือมียา บาญะ บักซา เลอ." กะฆีเตอ อับราฮัม เตอ ญา ฌาดี อาโปก นะ กีตา ซือมูฮา โซะ ฮึลด มูคา นะ ตูฮัด เดะ อาตัซ นู ญา บือเลฮ ปือจายา ดัฮ. ตูฮัด อีตู เลอ นู บูวัจ บรี ซือมียา มาตี นะ ฮีโดะ ปาเระ นู ปือซัด โกะ ซือบารัก นู ฮอย ลาฆี บูวัจ บรี ญา บือฌาดี ดัฮ. 18 มีเซ ฮอย ตือปัจ นะ จาดัก นู ตือตู เดะ ฮาตี ตาปี อับราฮัม ญา ซือมาตา จาดัก ปือจายา จะ ญา นะ ฌาดี "อาโปก นะ ลูมอฮ ซือมียา บาญะ บักซา" บือกะ ซูรัจ ปือมือเลา นะ ตูฮัด จะ "บือแนฮ นะ เกา นะ ฌาดี บาญะ กะฆีเตอ เลอ." 19 ญาวา นะ ญา ฌาดี ซือรูปา บือกะ ซือมียา มาตี ฆามะ บือเลฮ ซือราตุซ ตาโฮด ดัฮ. ซารา นู บีนี นะ ญา โปด ญา ฌาดี ซือมือโฆจ ฌูฆา. ตาปี มีเซ-จะ บรีงัจ กะ ลาฆู กะฆีเตอ ดัฮ นู อับราฮัม ปือจายา เตอ ฮอย เตด กูรัก ลาลู เลอ. 20 ญา เตด ฆาโดฮ-ฮาตี ลาลู ปาซัน ลาฆู นู ตูฮัด บือฌาญี ดัฮ เตอ บือกะ ฮาตี เตด ปือจายา ตาปี ญา ปือจายา กือฌะ-กือมัซ บาญะ ซือรูโลยํ. กะฆีเตอ ญา บรี ปูฌี กะ ตูฮัด. 21 ญา ตือตู เดะ ฮาตี กีรา จะ ตูฮัด บือฌาญี ลาฆู นามา โปด ญา มือฆัฮ โตระ บูวัจ บือเลฮ ฮาปา. 22 ซาเบะ กะฆีเตอ เลอ "ตูฮัด กีรา จะ ญา ฌาดี ซือมียา บาฌิ-ตือปัจ." 23 ตาปี นู ฆาแรฮ ดัฮ จะ "ตูฮัด กีรา จะ ญา ฌาดี ซือมียา บาฌิ-ตือปัจ." บูกัด ญา ฆาแรฮ กรานา อับราฮัม ซา อูรัก เลอ 24 ตาปี ฆาแรฮ ดัฮ กรานา กีตา ซามา. กีตา โปด ปือจายา กะ ตูฮัด เดะ อาตัซ ญา เลอ นู บูวัจ บรี เยซู ตูฮัด นะ กีตา ฮีโดะ ปาเระ เดะ มาตี ดัฮ. กะฆีเตอ ตูฮัด เดะ อาตัซ นะ กีรา จะ กีตา ฌาดี ซือมียา บาฌิ-ตือปัจ ฌูฆา. 25 เยซู เตอ เลอ ญา กือนา อาตัจ ปี กะ ลาฆู มาตี ดัฮ กรานา ดูซา นะ กีตา เตอ ตาปี ญา กือนา บูวัจ บรี ฮีโดะ ปาเระ เดะ มาตี ดัฮ นะ บรี กีตา ฌาดี ซือมียา บาฌิ-ตือปัจ เลอ.
1 ซาเบะ กะฆีเตอ นู กีตา บาฌิ-ตือปัจ ฌางัน ตูฮัด ดัฮ กรานา กีตา ปือจายา กะฆีเตอ เยซู คริด ตูฮัด นะ กีตา ญา บือเลฮ บูวัจ บรี กีตา ดูโดะ ซือนัง ซือลามัจ ฌางัน ตูฮัด เดะ อาตัซ ดัฮ เลอ. 2 เยซู เตอ บือเลฮ บาวา กีตา มาแรฮ ดาปัจ ลาฆู นู ตูฮัด ฮาลัย บรี ซือลามัจ กะ กีตา ดัฮ บือกะ กีตา อาดา ดูโดะ ซือลามัจ กะฆีนี เลอ. กะฆีเตอ กีตา ซูกา-ฮาตี ซูโงฮ จาดัก บือตือตู-ฮาตี จะ นะ บือเลฮ บาฮาเฆด เดะ ลาฆู บือซรี บือซายา นะ ตูฮัด เดะ อาตัซ เตอ. 3 ตาปี ลือเบฮ เดะ อีตู ปูลัก กีตา ซูกา-ฮาตี เดะ ลาฆู ซูซัฮ ปายัฮ นะ กีตา เลอ ซาเบะ กีตา ตาฮู จะ ลาฆู นู ซูซัฮ ปายัฮ อีตู บูวัจ บรี กีตา ตาฮัด-ฮาตี ลามา. 4 ลาฆู นู กีตา ตาฮัด-ฮาตี ลามา บูวัจ บรี กีตา ฌาดี ซือมียา นู กือนา เดะ ฮาตี นะ ตูฮัด. นู กีตา กือนา เดะ ฮาตี นะ ตูฮัด กะฆีเตอ บูวัจ บรี กีตา อาดา ตือปัจ จาดัก นู ตือตู. 5 นู กีตา จาดัก บือตือตู กะฆีเตอ ญา ฮอย เตด บูวัจ บรี กีตา ซาลัฮ ฮาตี ดัฮ ซาเบะ-จะ ตูฮัด บือเลฮ บรี ซือมืองัจ นะ ญา กะ กีตา บูวัจ บรี กีตา ตาฮู ปือนอฮ เดะ ฮาตี จะ ญา ซายัก กีตา บาญะ กะฮามี เลอ. 6 กาลา กีตา ตูโลก ญาวา ตะอาซิก เตด บือเลฮ ลาฆี เดะ วะตู นู บาฌิ นู ตูฮัด ตืองะ ดัฮ เตอ เยซู คริด ญา มาตี ดัฮ กรานา ลูมอฮ ซือมียา นู ฌาฮัจ. 7 นู ซือมียา นะ มาตี กรานา ซือมียา นู บาฌิ-ตือปัจ ฌารัก เลอ. ตาปี ดักกาดัก อาดา ซือมียา ยอม มาตี กรานา ซือมียา นู บาฌิ ซูโงฮ เตอ. 8 ตาปี ตูฮัด เดะ อาตัซ เตอ เลอ ญา บรี ลีฮัจ จะ นู ญา ซายัก กีตา บาญะ ฌาดี-จะ กาลา กีตา ฌาดี ซือมียา บือดูซา ลาฆี โปด เยซู คริด ญา ยอม มาตี กรานา กีตา ดัฮ. 9 นู เยซู มาตี ดารัฮ มือนีเลฮ ดัฮ เตอ ญา บูวัจ บรี กีตา บาฌิ-ตือปัจ ฌางัน ตูฮัด ดัฮ. กะฆีเตอ บาญะ ลือเบฮ เดะ อีตู เลอ ญา นะ ตูโลก กีตา บรี ลือปัซ เดะ ลาฆู นู ตูฮัด นะ มูซัยํ กรัจ ฮูโกบ. 10 ซาเบะ กะฆีเตอ กาลา กีตา ฌาดี ซือตรู ฌางัน ตูฮัด เดะ อาตัซ เตอ ตูฮัด ญา บรี นานะ นะ ญา มาตี บรี กีตา บาฌิ ปาเระ ฌางัน ญา ดัฮ. กะฆีเตอ บาญะ ลือเบฮ เดะ อีตู เลอ วะตู กีตา บาฌิ ปาเระ ฌางัน ตูฮัด กะฆีนี ดัฮ นู เยซู อาดา ฮีโดะ เตอ ญา นะ ตูโลก กีตา บรี ฮีโดะ ลือปัซ บาฌิ เลอ. 11 ตาปี ลือเบฮ เดะ อีตู ปูลัก กีตา ซูกา-ฮาตี ปูฌี กะ ตูฮัด เดะ อาตัซ กรานา เยซู คริด ตูฮัด นะ กีตา. ญา เลอ นู บูวัจ บรี กีตา บาฌิ ปาเระ ฌางัน ตูฮัด กะฆีนี ดัฮ. 12 กะฆีเตอ เลอ ลาฆู ดูซา บือเลฮ มาโซะ กะ ดือนียา กรานา ซือมียา ซืออูรัก. ลาฆู ดูซา โปด ญา บาวา ลาฆู มาตี มาแรฮ ซามา. กะฆีเตอ ฌูฆา ลาฆู มาตี บือเลฮ งรือลา ปี กะ อูมัจ-ซือมียา ราตา ดัฮ ซาเบะ โกะ ซือมียา ราตา บูวัจ ดูซา ดัฮ เลอ. 13 กาลา ดูลู วะตู ฮอย ปือมือเลา ฮูโกบ ลาฆี เตอ ลาฆู ดูซา ญา อาดา เดะ ดือนียา ดัฮ. ตาปี ตือปัจ ดีฮา นู ฮอย ปือมือเลา ฮูโกบ ลาฆู ดูซา ตูฮัด ญา เตด กีรา เลอ. 14 มีเซ กะฆีเตอ ตะเดะ ฮาดัจ นะ อาดับ ตือดะ รอจ กะ ฮาดัจ นะ มูซา เตอ ลาฆู มาตี ฌาดี ซือรูปา ราฌา นู ฮูโกบ โกะ ซือมียา ซือมูฮา มีเซ-จะ ลาฆู ดูซา นะ กูญา เตด ซือรูปา บือกะ ลาฆู นู อาดับ บูวัจ ซาลัฮ ฮูโกบ เตอ. อาดับ อีตู ญา ฌาดี บือกะ รูปา ตูโญะ กะ ซือมียา นู นะ มาแรฮ เดะ บลากัก เลอ. 15 ตาปี ลาฆู อีตู นู ตูฮัด ฮาลัย บรี เตอ ญา ฮอย เตด ซือรูปา บือกะ ลาฆู บูวัจ ซาลัฮ นะ อาดับ. โงฮ-ซูโงฮ เตอ โกะ ซือมียา บาญะ บือเลฮ มาตี กรานา ลาฆู บูวัจ ซาลัฮ นะ ซือมียา ซืออูรัก อีตู. ตาปี ลาฆู นู ตูฮัด ญา ฮาลัย บรี ซือลามัจ เตอ ญา บือซัยํ ลือเบฮ เดะ อีตู เลอ. ซาเบะ ซือมียา ซืออูรัก อีนี ฌาดี-จะ เยซู คริด เตอ ญา บือเลฮ บรี ซือลามัจ บือตามัฮ บาญะ บูวัจ บรี โกะ ซือมียา บาญะ อีตู นะ ฮีโดะ ลือปัซ บาฌิ เลอ. 16 กะฆีเตอ ฌูฆา ลาฆู นู ตูฮัด บรี เตอ ญา ฮอย เตด ซือรูปา บือกะ ลาฆู นู ซือมียา ซืออูรัก อีตู บูวัจ ดูซา ดัฮ. ซาเบะ-จะ ลาฆู กรัจ ฮูโกบ นู ตูโรจ กะ ลาฆู บูวัจ ดูซา ซา กาลี อีตู ญา บูวัจ บรี โกะ ซือมียา กือนา กีรา จะ ซาลัฮ ดัฮ. ตาปี ลาฆู นู ตูฮัด ฮาลัย บรี ซือลามัจ เตอ นู ตูโรจ กะ ลาฆู บูวัจ ซาลัฮ บาญะ กาลี โปด ญา บูวัจ บรี โกะ ซือมียา กือนา กีรา จะ ฮอย ซาลัฮ ลาลู ฌาดี ซือมียา บาฌิ-ตือปัจ ดัฮ. 17 โงฮ-ซูโงฮ เลอ นู ซือมียา ซืออูรัก อีตู บูวัจ ซาลัฮ ดัฮ บูวัจ บรี ลาฆู มาตี ฌาดี ซือรูปา ราฌา นู ฮูโกบ โกะ ซือมียา ซือมูฮา กรานา ซือมียา นู ซืออูรัก อีตู. ตาปี โซะ ซือมียา นู ซาโมจ ลาฆู นู ตูฮัด ฮาลัย บรี ซือลามัจ บือตามัฮ บาญะ บูวัจ บรี กูญา บาฌิ-ตือปัจ เตอ กูญา นะ อาดา ลาฆู บาฌิ บาญะ ลือเบฮ เดะ อีตู เลอ. กูญา โปด นะ อาดา ฮีโดะ ปือนอฮ บาฌิ ซือรูปา ฌาดี ราฌา กรานา ซือมียา นู ซืออูรัก อีนี ฌาดี-จะ เยซู คริด เตอ เลอ. 18 ซาเบะ กะฆีเตอ เลอ บือกะ นู ซือมียา ซืออูรัก บูวัจ ซาลัฮ บูวัจ บรี กะ อูมัจ-ซือมียา ราตา กือนา กรัจ ฮูโกบ กะฮามี ดัฮ นู ซือมียา ซืออูรัก บูวัจ กือนา ลาฆู นะ ตูโลก อูมัจ-ซือมียา ราตา บรี ลือปัซ เดะ ฮูโกบ บรี ฮีโดะ ซูโงฮ กะฆีเตอ เลอ. 19 บือกะ-จะ บาญะ ซือมียา ฌาดี อูรัก บือดูซา ดัฮ กรานา ลาฆู นู ซือมียา ซืออูรัก อีตู เตด มือนีงัย กะ ตูฮัด เตอ กะฆีเตอ ฌูฆา ซือมียา บาญะ นะ บาฌิ-ตือปัจ ฌางัน ตูฮัด กรานา ซือมียา นู ซืออูรัก อีนี มือนีงัย กะ ตูฮัด ดัฮ เลอ. 20 ปือมือเลา ฮูโกบ เตอ ตูฮัด ญา บรี ดัฮ บีดา นะ บือตามัฮ ลาฆู บูวัจ ซาลัฮ. ตาปี-จะ ตือปัจ ดีฮา อาดา ลาฆู ดูซา บือตามัฮ ตือปัจ อีตู เลอ ตูฮัด ญา ฮาลัย บรี ซือลามัจ บือตามัฮ ลือเบฮ บาญะ ลาฆี. 21 กะฆีเตอ ลาฆู ดูซา ฮูโกบ กูญา ซือรูปา ฌาดี ราฌา ดัฮ ซาเบะ โกะ ซือมียา ฆาโดฮ มาตี เตอ. กะฆีเตอ ฌูฆา นู ตูฮัด ญา ฮาลัย บรี ซือลามัจ ญา โปด บือบือลา กูญา ซือรูปา ฌาดี ราฌา ซาเบะ ตูฮัด บูวัจ บรี โกะ ซือมียา บาฌิ-ตือปัจ บาวา ปี รอจ กะ ลาฆู ฮีโดะ ซูโงฮ นู ซือลาลู กรานา เยซู คริด ตูฮัด นะ กีตา เลอ.
1 ดัฮ ฌาดี กะฆีเตอ กีตา นะ มือเลา นามา? กีตา นะ บูวัจ ดูซา ลาฆี เฆอ บีดา ตูฮัด นะ ฮาลัย บรี ซือลามัจ กะ กีตา บือตามัฮ บาญะ? 2 ฌางัน บรี ฌาดี กะฆีเตอ เลอ. ลูมอฮ กีตา ซือรูปา มาตี ลือปัซ เดะ ฮูโกบ นะ ลาฆู ดูซา ดัฮ. กะฆีเตอ กีตา นะ ลาดัจ บูวัจ ดูซา ลาฆี บือเลฮ กะฮามี เลอ? 3 กาเญา เตด ตาฮู เฆอ จะ นู กีตา ซาโมจ ลาฆู ซือลับ เดะ อาเย บรี มาโซะ บือซามา ฌางัน เยซู คริด ดัฮ กะฆีเตอ กีตา บือเลฮ มาโซะ บือซามา เดะ ลาฆู นู ญา มาตี ดัฮ เลอ. 4 กะฆีเตอ นู กีตา ซือลับ เดะ อาเย ดัฮ กีตา กือนา ตานัม บือซามา ฌางัน เยซู มาโซะ บือซามา เดะ ลาฆู นู ญา มาตี ดัฮ บีดา กีตา นะ ตูโรจ ลาฆู ฮีโดะ นู บารู บือกะ ซือรูปา นู อาโปก เดะ อาตัซ นู มือฆัฮ ซูโงฮ บือเลฮ บูวัจ บรี เยซู คริด ฮีโดะ ปาเระ เดะ มาตี ดัฮ. 5 กรานา-จะ กะ กีตา บือซามา ฌางัน เยซู ดัฮ เตอ ซาเบะ กีตา มาตี ซือรูปา กะ ญา กะฆีเตอ กีตา นะ บือซามา ฌางัน ญา เดะ ลาฆู ฮีโดะ ปาเระ ซือรูปา บือกะ ญา ฮีโดะ ปาเระ เดะ มาตี ฌูฆา เลอ. 6 กีตา ตาฮู จะ ญาวา นู ลามา นะ กีตา อีตู กือนา กาจิก เดะ กายู ปลีตัก ฌางัน เยซู ดัฮ บีดา นะ บูวัจ บรี ปรางัย นู บือดูซา นะ บือนาซา ฮาบิฮ บูวัก. กะฆีเตอ กีตา นะ เตด ฌาดี ปราโซฮ นะ ลาฆู ดูซา ลาฆี เลอ. 7 ซาเบะ-จะ ซือมียา ดีฮา นู มาตี ดัฮ ญา ลือปัซ ดัฮ เดะ ลาฆู นู ดูซา นะ ปรือกัด ญา เลอ. 8 ตาปี กะ กีตา มาตี ดัฮ บือซามา ฌางัน เยซู คริด เตอ กีตา ปือจายา จะ กีตา นะ ฮีโดะ บือซามา ฌางัน ญา ฌูฆา ดัฮ. 9 กีตา ตาฮู จะ เยซู คริด นู ฮีโดะ ปาเระ เดะ มาตี ดัฮ เตอ ญา นะ เตด มาตี ปูลัก. ลาฆู มาตี นะ ฮูโกบ ญา ลาฆี เตด บือเลฮ ดัฮ เลอ. 10 ซาเบะ นู ญา มาตี ดัฮ เตอ ญา มาตี บรี ลือปัซ เดะ ฮูโกบ นะ ลาฆู ดูซา แนฮ ซือกาลี อีตู. ตาปี นู ญา อาดา ฮีโดะ เตอ ญา ฮีโดะ บีดา ตูฮัด เดะ อาตัซ เลอ. 11 ซือรูปา กะฆีเตอ ฌูฆา กาเญา กือนา บือกีรา จะ กาเญา มาตี บรี ลือปัซ เดะ ฮูโกบ นะ ลาฆู ดูซา ดัฮ ตาปี อาดา ฮีโดะ กรานา ตูฮัด เดะ อาตัซ ลือกัจ บือซามา ฌางัน เยซู คริด เลอ. 12 กะฆีเตอ ฌางัน บรี ลาฆู ดูซา นะ ฮูโกบ ญาวา นะ กาเญา นู นะ กือนา มาตี เตอ บูวัจ บรี กาเญา ตูโรจ กะ ฮาตี นู ฆาละ เดะ ญาวา อีตู. 13 ฌางัน ซรัฮ โกะ กลือกะ เดะ ญาวา นะ กาเญา บรี กะ ลาฆู ดูซา ฌาดี บารัก นู ซูโรฮ บูวัจ ลาฆู นู ฌาฮัจ. ตาปี กือนา ซรัฮ ญาวา นะ กาเญา กะ ตูฮัด บือซัยํ เดะ อาตัซ บือกะ ซือมียา นู ฮีโดะ ปาเระ เดะ มาตี ดัฮ. กือนา ซรัฮ โกะ กลือกะ เดะ ญาวา กะ ตูฮัด ฌูฆา ฌาดี บารัก นู ซูโรฮ บูวัจ ลาฆู นู กือนา เดะ ฮาตี นะ ตูฮัด. 14 กะฆีเตอ ลาฆู ดูซา นะ เตด บือเลฮ ฮูโกบ กาเญา ลาฆี เลอ. ซาเบะ กาเญา เตด ดูโดะ เดะ บาวัฮ ปือมือเลา ฮูโกบ ตาปี อาดา ดูโดะ เดะ ลาฆู นู ตูฮัด ฮาลัย บรี ซือลามัจ ดัฮ เลอ. 15 ดัฮ กะฆีเตอ นะ ฌาดี กะฮามี เลอ? นู กีตา เตด ดูโดะ เดะ บาวัฮ ปือมือเลา ฮูโกบ ตาปี อาดา ดูโดะ เดะ ลาฆู นู ตูฮัด ฮาลัย บรี ซือลามัจ ดัฮ เตอ กะฆีเตอ กีตา นะ บูวัจ ดูซา ลาฆี เฆอ? ฌางัน บรี ฌาดี กะฆีเตอ เลอ. 16 กาเญา เตด ตาฮู เฆอ จะ ดัฮ กาเญา ซรัฮ ญาวา นะ กาเญา บรี ฌาดี ปราโซฮ บูวัจ ตูโรจ กะ ซือมียา ดีฮา เตอ กาเญา โปด ฌาดี ปราโซฮ นะ ซือมียา นู กาเญา บูวัจ ตูโรจ อีตู เลอ? นะ ฌาดี ปราโซฮ บูวัจ ตูโรจ กะ ลาฆู ดูซา นู บาวา บือปี รอจ กะ มาตี เฆอ-จะ ฌาดี ปราโซฮ บูวัจ ตูโรจ กะ ตูฮัด นู บาวา บือปี ฌาดี ซือมียา บาฌิ-ตือปัจ ฌางัน ตูฮัด ดัฮ เลอ. 17 ตาปี บรี ซือลามัจ กะ ตูฮัด เลอ. กรานา กาเญา นู กาลา ดูลู ฌาดี ปราโซฮ บูวัจ ตูโรจ กะ ลาฆู ดูซา เตอ กาเญา โปด บือเลฮ มือนีงัย ปือนอฮ เดะ ฮาตี กะ ปือมือเลา อาฌัยํ อีตู นู ซรัฮ บรี กะ กาเญา ดัฮ. 18 กาเญา ลือปัซ เดะ ฮูโกบ นะ ลาฆู ดูซา ดัฮ ฌาดี ปราโซฮ นู บูวัจ ตูโรจ กะ ฮาตี นะ ตูฮัด ดัฮ เลอ. 19 กู มือเลา นัง-ซือนัง เลอ บีดา กาเญา นะ บือเลฮ มาโซะ เดะ ฮาตี. กาลา ดูลู กาเญา บือเลฮ ซรัฮ โกะ กลือกะ เดะ ญาวา นะ กาเญา บรี ฌาดี ปราโซฮ บูวัจ ตูโรจ กะ ลาฆู ตะอารัฮ ลาฆู ฌาฮัจ บีดา นะ บูวัจ ลาฆู ฌาฮัจ อีตู เตอ. ตาปี วะตู อีนี กาเญา กือนา ซรัฮ โกะ กลือกะ อีตู บรี ฌาดี ปราโซฮ นู บูวัจ ตูโรจ กะ ฮาตี นะ ตูฮัด บีดา นะ ฌาดี ซือมียา จรัฮ บาฌิ ซือรูโลยํ เลอ. 20 กาลา ดูลู วะตู กาเญา ฌาดี ปราโซฮ นู บูวัจ ตูโรจ กะ ลาฆู ดูซา กาเญา ฮอย เตด ปายัฮ ตูโรจ กะ ลาฆู นู บาฌิ-ตือปัจ เลอ. 21 ตาปี โกะ ลาฆู อีตู นู วะตู อีนี กาเญา จือและ ดัฮ เตอ กาเญา บือเลฮ อูโตก นามา บาลัซ ปาเระ เดะ ลาฆู อีตู? ฮูโฌก ปือญูดัฮ อีตู ฌาดี ลาฆู มาตี เลอ. 22 ตาปี วะตู อีนี กาเญา ลือปัซ เดะ ฮูโกบ นะ ลาฆู ดูซา ฌาดี ปราโซฮ นู บูวัจ ตูโรจ กะ ตูฮัด ดัฮ. กาเญา บือเลฮ บาฌิ บาลัซ ปาเระ ฌูฆา ฌาดี-จะ กาเญา ฌาดี ซือมียา นู จรัฮ บาฌิ ซือรูโลยํ เลอ. ฮูโฌก ปือญูดัฮ อีตู เตอ ฌาดี ลาฆู ฮีโดะ ซูโงฮ นู อาดา ซือลาลู เลอ. 23 กรานา ลาฆู ดูซา เตอ ญา บรี รือฆา อูปัฮ นะ ญา ฌาดี-จะ กีตา นะ กือนา ลาฆู มาตี. ตาปี ตูฮัด เดะ อาตัซ เตอ ญา ฮาลัย บรี ซือลามัจ กะ กีตา บรี กีตา อาดา ฮีโดะ ซูโงฮ ซือลาลู ลือกัจ บือซามา ฌางัน เยซู คริด ตูฮัด นะ กีตา เลอ.
1 โกะ ดีบราดี เออ กาเญา ตาฮู ลาฆู ปาซัน โกะ ปือมือเลา ฮูโกบ. กะฆีเตอ กาเญา ฆาโดฮ ตาฮู ลาฆู นู กู นะ มือเลา กะฆีนี จะ ปือมือเลา ฮูโกบ นะ ฮูโกบ ซือมียา ซา วะตู ญา อาดา ฮีโดะ ลาฆี เลอ. 2 บือกะ นีบีนี นู บือเลฮ ลากี เตอ ตานา ลากี นะ ญา อาดา ฮีโดะ ลาฆี ปือมือเลา ฮูโกบ นะ บรี บีนี อาดา ลือกัจ บือซามา ฌางัน ลากี นะ ญา. ตาปี กาเลา-จะ ลากี อีตู มาตี เตอ บีนี นะ ญา ลือปัซ ดัฮ เดะ ปือมือเลา ฮูโกบ ซีงี ปาซัน ลากี นะ ญา. 3 กะฆีเตอ ดัฮ นีบีนี อีตู ปี อาเมด ลากี อาซิก ดัฮ วะตู ลากี นะ ญา อาดา ฮีโดะ ลาฆี ญา นะ กือนา ปือนามา จะ ฌาดี นีบีนี บือกาเซฮ. ตาปี ดัฮ-จะ ลากี อีตู มาตี เตอ บีนี ญา นะ ลือปัซ เดะ ปือมือเลา ฮูโกบ อีตู. มีเซ-จะ ปี อาเมด ลากี อาซิก โปด ญา ฮอย เตด ฌาดี นีบีนี บือกาเซฮ เลอ. 4 โกะ ดีบราดี เออ ญา นะ ฌาดี กะฆีเตอ ฌูฆา ฌางัน กาเญา เลอ. กรานา เยซู คริด มาตี ดัฮ เตอ กาเญา โปด มาตี ฌูฆา เดะ โซะ ปือมือเลา ฮูโกบ บีดา กาเญา นะ ฌาดี บือกะ บีนี นะ ซือมียา อาซิก ฌาดี-จะ นะ เยซู คริด นู ฮีโดะ ปาเระ เดะ มาตี ดัฮ. นู ฌาดี กะฆีเตอ ดัฮ บีดา นะ บูวัจ บรี กีตา ฌาดี ซือรูปา ปูโฮด กายู นู ตรือเบะ บูวัฮ ฌาดี ลาฆู บือกรือฌา บูวัจ ตูโรจ กะ ตูฮัด เดะ อาตัซ. 5 ซาเบะ-จะ กาลา กีตา อาดา ตูโรจ กะ ปรางัย เดะ ญาวา กีตา เตอ ปือมือเลา ฮูโกบ อีตู บือเลฮ อาโจบ โกะ ลาฆู ฆาละ นู บือดูซา เดะ ฮาตี กีตา. โกะ ลาฆู ฆาละ อีตู โปด ญา อาดา บือกรือฌา เดะ กลือกะ ญาวา นะ กีตา บูวัจ ซือรูปา บรี กีตา ตรือเบะ บูวัฮ บูวัจ ลาฆู ฌาฮัจ นู บือปี รอจ กะ มาตี เลอ. 6 ตาปี วะตู อีนี กีตา ลือปัซ ดัฮ เดะ โกะ ปือมือเลา ฮูโกบ อีตู กรานา กีตา มาตี ดัฮ เดะ โซะ ฮูโกบ อีตู นู รีฆะ ตาฮัด กีตา. กะฆีเตอ เลอ กีตา บูวัจ ตูโรจ กะ ตูฮัด บูกัด ตูโรจ กะ ฌาลัด ลามา บือกะ ปือมือเลา ฮูโกบ นู อาดา ฆาแรฮ ดัฮ ตาปี ตูโรจ กะ ฌาลัด บารู บือกะ ซือมืองัจ นะ ตูฮัด บาวา บือปี เลอ. 7 ดัฮ กะฆีเตอ กีตา นะ มือเลา กะฮามี เลอ? จะ ปือมือเลา ฮูโกบ นะ ตูฮัด ฌาดี ลาฆู ดูซา เฆอ? ฮอย เตด กะฆีเตอ เลอ. ตาปี ดัฮ ฮอย ปือมือเลา ฮูโกบ อีตู เตอ กู เตด บือเลฮ ตาฮู ซูโงฮ จะ ลาฆู ดูซา ฌาดี กะฮามี. ดัฮ ปือมือเลา ฮูโกบ อีตู เตด บือเลฮ บลารัก จะ "ฌางัน นะ ฮาลูบา" กู เตด ตาฮู ซูโงฮ จะ ลาฆู ฮาลูบา ฌาดี กะฮามี. 8 ตาปี ลาฆู ดูซา ญา ดาปัจ จือลัฮ เดะ ปือมือซัด อีตู กะฆีเตอ ญา บือเลฮ บือกรือฌา เดะ ฮาตี นะ กู บูวัจ บรี กู อาดา ลาฆู ฮาลูบา ราตา ฌือแนฮ. ซาเบะ-จะ ดัฮ ฮอย ปือมือเลา ฮูโกบ เตอ ลาฆู ดูซา ญา ซือรูปา มาตี ดัฮ. 9 กู ตะอาซิก เตอ กาลา ดูลู กู อาดา ฮีโดะ ฮอย ปือมือเลา ฮูโกบ. ตาปี ตานา ปือมือซัด อีตู มาแรฮ ดัฮ ลาฆู ดูซา ญา อาดา บือฌาดี ดัฮ. โซะ กู โปด มาตี เลอ. 10 กะฆีเตอ ปือมือซัด อีตู นู ตูฮัด ตืองะ ดัฮ บรี กู นะ ฮีโดะ เตอ โซะ กู โปด ญา บือเลฮ บูวัจ บรี กู มาตี ดัฮ. 11 ลาฆู ดูซา ญา ดาปัจ จือลัฮ นะ ตีปู กู เดะ ปือมือซัด อีตู. กะฆีเตอ ญา อาเมด ปือมือซัด อีตู มาแรฮ บูนอฮ กู ดัฮ เลอ. 12 กะฆีเตอ ปือมือเลา ฮูโกบ ญา มาแรฮ ดาตัก เดะ ตูฮัด เลอ. โกะ ปือมือซัด ราตา ตือนอซ โปด ญา ดาตัก เดะ ตูฮัด ฌูฆา. ญา รือมัก บาฌิ ซูโงฮ เลอ. 13 กะฮามี เลอ ลาฆู นู บาฌิ ญา บือเลฮ บูวัจ บรี กู มาตี เฆอ? ฮอย เตด เลอ. ลาฆู ดูซา เตอ เลอ นู บือเลฮ บูวัจ กะฆีเตอ. ญา ซูโรฮ ลาฆู นู บาฌิ บือกรือฌา บรี กู มาตี บีดา นะ บรี ลีฮัจ จะ ลาฆู ดูซา ฌาดี ดูซา กะฮามี ซูโงฮ. กะฆีเตอ กรานา ปือมือซัด ฮูโกบ อีตู ลาฆู ดูซา นะ ปลีฮัจ ฌาดี บือดูซา ลือเบฮ บาญะ เลอ. 14 ซาเบะ กีตา ตาฮู จะ ปือมือเลา ฮูโกบ ญา ดาตัก เดะ โซะ ซือมืองัจ นะ ตูฮัด. ตาปี โซะ กู นี กู ตูโรจ บือกะ ปรางัย นะ อูมัจ-ซือมียา. กู กือนา ฌูวัน ดัฮ บรี ฌาดี ปราโซฮ นะ ลาฆู ดูซา. 15 โกะ ลาฆู นู กู บูวัจ เตอ กู เตด ตาฮู ลาลู เลอ. ลาฆู นู กู ซูกา นะ บูวัจ ลาฆู อีตู กู เตด บูวัจ. ตาปี ลาฆู นู กู บือชี เตอ ลาฆู อีตู เลอ กู อาดา บูวัจ ลาฆี. 16 กะฆีเตอ นู กู บูวัจ ลาฆู นู กู ตีเมา นะ บูวัจ เตอ กู ซาโงะ จะ ปือมือเลา ฮูโกบ ญา บาฌิ เลอ. 17 กะฆีเตอ เลอ บูกัด กู ตะอาซิก นู บูวัจ ตาปี ลาฆู ดูซา นู อาดา ดูโดะ เดะ ฮาตี นะ กู ญา เลอ นู บูวัจ กะฆีเตอ. 18 ซาเบะ กู ตาฮู จะ ฮอย ลาฆู บาฌิ นามา โปด ดูโดะ เดะ ฮาตี กู ฌาดี-จะ เดะ ปรางัย นู บือดูซา นะ กู. กรานา มีเซ-จะ กู อาดา ฮาตี นะ บูวัจ บาฌิ เตอ ตาปี นะ บูวัจ เตด บือเลฮ เลอ. 19 ลาฆู บาฌิ นู กู อาดา ฮาตี นะ บูวัจ กู เตด บูวัจ ดัฮ. ตาปี ลาฆู ฌาฮัจ นู กู ตีเมา นะ บูวัจ เตอ ลาฆู อีตู เลอ กู ฌือนัฮ นะ บูวัจ. 20 กะฆีเตอ นู กู ฌือนัฮ บูวัจ ลาฆู อีตู นู กู ตีเมา นะ บูวัจ เตอ บูกัด กู ตะอาซิก นู บูวัจ กะฆีเตอ ลาฆี ตาปี ลาฆู ดูซา นู ดูโดะ เดะ ฮาตี นะ กู ญา เลอ นู อาดา บูวัจ กะฆีเตอ. 21 ซาเบะ กะฆีเตอ กู ดาปัจ ลาฆู นู ฮูโกบ กู กะฆีนี จะ วะตู กู อาดา ฮาตี นะ บูวัจ นู บาฌิ เตอ อาดา ซา ลาฆู ฌาฮัจ นู กู บูวัจ บือเลฮ เลอ. 22 โซะ ดาลับ ฮาตี นะ กู เตอ กู ซูกา-ฮาตี โตระ เดะ ปือมือเลา ฮูโกบ นะ ตูฮัด. 23 ตาปี กู ลีฮัจ จะ อาดา ลาฆู ฮูโกบ นู อาซิก บือกรือฌา เดะ กลือกะ ญาวา นะ กู บลาวัด ฌางัน ลาฆู ฮูโกบ นู กือนา เดะ ฮาตี นะ กู. ลาฆู ฮูโกบ นู อาซิก อีตู เตอ ญา บูวัจ บรี กู ฌาดี ปราโซฮ นะ ลาฆู ฮูโกบ นู บูวัจ บรี บือดูซา นู อาดา บือกรือฌา เดะ ญาวา นะ กู. 24 อาโดซ กู ซูซัฮ-ฮาตี ซูโงฮ เลอ. ซาปา เลอ นู นะ ตูโลก กู บรี ลือปัซ เดะ ญาวา อีนี นู ตืองัฮ บาวา กู ปี รอจ กะ มาตี? 25 บรี ซือลามัจ เลอ กะ ตูฮัด เดะ อาตัซ. ญา เตอ ซูโรฮ เยซู คริด ตูฮัด นะ กีตา บรี ตูโลก กู. กะฆีเตอ เลอ โซะ ฮาตี นะ กู ตะอาซิก กู บูวัจ ตูโรจ กะ ปือมือเลา ฮูโกบ นะ ตูฮัด ตาปี โซะ ปรางัย เดะ ญาวา นะ กู เตอ กู บูวัจ ตูโรจ กะ ลาฆู ฮูโกบ อีตู นู บูวัจ บรี บือดูซา เลอ.
1 กะฆีเตอ โซะ ลูมอฮ ซือมียา นู ลือกัจ บือซามา ฌางัน เยซู คริด เตอ วะตู อีนี กูญา นะ ฮอย เตด กือนา กรัจ ฮูโกบ ดัฮ. 2 ซาเบะ-จะ ลาฆู ฮูโกบ นะ ซือมืองัจ นะ ตูฮัด เตอ จะ ซือมืองัจ นู บรี กีตา อาดา ฮีโดะ ลือกัจ บือซามา ฌางัน เยซู คริด เตอ ญา บือเลฮ บูวัจ บรี เกา ลือปัซ ดัฮ เดะ ลาฆู ฮูโกบ นู บูวัจ บรี ซือมียา บือดูซา นู บาวา ปี รอจ กะ มาตี. 3 ลาฆู อีตู นู ปือมือเลา ฮูโกบ บูวัจ เตด บือเลฮ ดัฮ กรานา ปรางัย นะ อูมัจ-ซือมียา นู ลือมัฮ ลือเตฮ เตอ ลาฆู อีตู ตูฮัด เดะ อาตัซ บือเลฮ บูวัจ ดัฮ กะฆีนี เลอ. ญา ซูโรฮ นานะ นะ ญา ตะอาซิก มาแรฮ ฌาดี บือกะ ซือรูปา กะ อูมัจ-ซือมียา นู บือดูซา มาแรฮ ฌาดี บารัก มือนืองะ นู บรี ลือปัซ เดะ ดูซา. กะฆีเตอ ตูฮัด ญา บือเลฮ ฌือนัฮ เดะ ลาฆู ดูซา เดะ ปรางัย นะ อูมัจ-ซือมียา เลอ. 4 ญา บูวัจ กะฆีเตอ ดัฮ บีดา-จะ ลาฆู นู บาฌิ อีตู นู ปือมือเลา ฮูโกบ นะ ตูฮัด ปือซัด ดัฮ เตอ กีตา นะ บือเลฮ บูวัจ บรี ซุจ ฮาบิฮ บือกะ นู กีตา บือฌาลัด ตูโรจ กะ ซือมืองัจ นะ ตูฮัด บูกัด ตูโรจ กะ ปรางัย นะ อูมัจ-ซือมียา. 5 ซาเบะ-จะ โกะ ซือมียา นู ตูโรจ กะ ปรางัย นะ อูมัจ-ซือมียา เตอ ฮาตี นะ กูญา ลือกัจ เดะ ลาฆู นะ อูมัจ-ซือมียา เลอ. ตาปี โกะ ซือมียา นู ตูโรจ กะ ซือมืองัจ นะ ตูฮัด เตอ ฮาตี นะ กูญา ลือกัจ เดะ ลาฆู นะ ซือมืองัจ อีตู เลอ. 6 กรานา-จะ นู ฮาตี นะ ลือกัจ เดะ ปรางัย นะ อูมัจ-ซือมียา เตอ นะ บาวา บือปี กะ มาตี เลอ. ตาปี นู ฮาตี ลือกัจ เดะ ลาฆู โซะ ซือมืองัจ นะ ตูฮัด เตอ ญา นะ บาวา บือปี กะ ลาฆู ฮีโดะ นู ซือนัง ซือลามัจ เลอ. 7 กะฆีเตอ ซือมียา นู ฮาตี นะ ญา ลือกัจ เดะ ปรางัย นะ อูมัจ-ซือมียา เตอ ญา บลาวัด ฌางัน ตูฮัด เลอ ซาเบะ ญา เตด บูวัจ ตูโรจ กะ ปือมือเลา ฮูโกบ นะ ตูฮัด. โงฮ-ซูโงฮ เลอ ญา นะ บูวัจ ตูโรจ เตด บือเลฮ. 8 โกะ ซือมียา นู อาดา ตูโรจ กะ ปรางัย นะ อูมัจ-ซือมียา เตอ นะ บูวัจ บรี ตูฮัด ซูกา-ฮาตี ฮอย เตด บือเลฮ ดัฮ เลอ. 9 กะ ซือมืองัจ นะ ตูฮัด เดะ อาตัซ ดูโดะ ปือนอฮ เดะ ฮาตี นะ กาเญา เตอ กาเญา นะ เตด ตูโรจ โซะ ปรางัย นะ อูมัจ-ซือมียา ตาปี นะ ตูโรจ โซะ ซือมืองัจ นะ ตูฮัด อีตู เลอ. กะ ซือมียา ดีฮา ฮอย ซือมืองัจ นะ เยซู คริด ซือมียา อีตู ญา เตด ฌาดี ซือมียา นะ เยซู เลอ. 10 ตาปี กะ เยซู คริด อาดา ดูโดะ เดะ ฮาตี นะ กาเญา เตอ มีเซ-จะ โซะ ญาวา กาเญา นะ มาตี ดัฮ กรานา ลาฆู ดูซา ตาปี โซะ ซือมืองัจ นะ ตูฮัด นะ บรี กาเญา ฮีโดะ กรานา กาเญา บาฌิ-ตือปัจ ฌางัน ตูฮัด. 11 ตูฮัด เดะ อาตัซ ญา บือเลฮ บูวัจ บรี เยซู ฮีโดะ ปาเระ เดะ มาตี ดัฮ. กะฆีเตอ เลอ กะ ซือมืองัจ นะ ตูฮัด อาดา ดูโดะ เดะ ฮาตี นะ กาเญา ตูฮัด เตอ เลอ ญา นะ ซูโรฮ ซือมืองัจ อีตู บีดา นะ บูวัจ บรี ญาวา นะ กาเญา นู ฆาโดฮ มาตี นะ อาดา ฮีโดะ เลอ. 12 กะฆีเตอ เลอ โกะ ดีบราดี นะ กู เออ กีตา ตือฮูตัก ดัฮ ตาปี บูกัด ตือฮูตัก เดะ ปรางัย นะ อูมัจ-ซือมียา กีตา นู นะ ฆาโดฮ บูวัจ ตูโรจ บือกะ ปรางัย อีตู. 13 ซาเบะ-จะ ดัฮ กาเญา ตูโรจ กะ ปรางัย นะ อูมัจ-ซือมียา อีตู เตอ กาเญา ฆาโดฮ นะ มาตี. ตาปี ดัฮ ซือมืองัจ นะ ตูฮัด ตูโลก กาเญา บรี บูนอฮ โกะ ปือบูวัจ นู บือดูซา นะ กาเญา กะฆีเตอ กาเญา นะ อาดา ฮีโดะ ซูโงฮ. 14 ราตา ซือมียา นู ซือมืองัจ นะ ตูฮัด บาวา บือปี เตอ โกะ ซือมียา อีตู เลอ ฌาดี นานะ นะ ตูฮัด ดัฮ. 15 กรานา-จะ ซือมืองัจ นู กาเญา ซาโมจ ดัฮ ญา เตด บูวัจ บรี กาเญา ฌาดี ปราโซฮ ฌาดี ซือมียา ปือนาโกจ ปูลัก เลอ. ตาปี ซือมืองัจ อีตู ญา บูวัจ บรี กาเญา ฌาดี นานะ นะ ตูฮัด ดัฮ. ญา เตอ นู บรี กีตา บือซาโวจ บลาโลก กะ ตูฮัด จะ "อับบา" ฌาดี-จะ "ปะ เออ." 16 กะฆีเตอ ซือมืองัจ นะ ตูฮัด เตอ ญา ฌาดี ซะซี บูวัจ บรี ฮาตี นะ กีตา ตาฮู ตือตู จะ กีตา เลอ ฌาดี นานะ นะ ตูฮัด เดะ อาตัซ. 17 นู กีตา ฌาดี นานะ นะ ตูฮัด ดัฮ กีตา นะ บือเลฮ ซาโมจ ปือซากา ฌูฆา ฌาดี ลาฆู บาฌิ นู ตูฮัด เดะ อาตัซ อาดา ตาโรฮ ดัฮ บีดา นานะ นะ ญา. ปือซากา อีตู กีตา นะ ซาโมจ บือซามา ฌางัน เยซู คริด. ซาเบะ-จะ นู กีตา กือนา ตาฮัด ซูซัฮ ปายัฮ บือซามา ฌางัน เยซู เตอ กีตา นะ ซาโมจ ลาฆู นู บือซรี บือซายา บือซามา ฌางัน ญา ฌูฆา เลอ. 18 กู ตือตู-ฮาตี จะ ลาฆู ซูซัฮ นู กีตา ฆาโดฮ กือนา เดะ ฮาดัจ อีนี ญา เตด บือฆูนา นะ อาเมด ปี ปือซามา ฌางัน ลาฆู บือซรี บือซายา อีตู นู ตูฮัด นะ ปลีฮัจ กะ กีตา เลอ. 19 ซาเบะ-จะ โกะ บือนา บารัก นู ตูฮัด บือฌาดี ดัฮ ซือมูฮา อาดา บือคานะ ตาฮัด นาตี ฌางัน ฮาตี ปือนอฮ ซูโงฮ นะ ลีฮัจ อารี อีตู นู ลูมอฮ โกะ นานะ นะ ตูฮัด นะ ปลีฮัจ ดัฮ. 20 โกะ บือนา บารัก นู บือฌาดี ดัฮ อีตู ญา กือนา ปรือกัด ดัฮ บรี ฌาดี บารัก ฮอย เตด ตือปากัย เลอ บูกัด ตูโรจ กะ ฮาตี ตะอาซิก ตาปี ตูโรจ ฮาตี นะ ตูฮัด นู ปรือกัด ดัฮ เตอ. ตาปี อาดา ตือปัจ จาดัก กะฆีนี จะ 21 อาดา ซืออารี บือนา บารัก นู บือฌาดี ดัฮ เตอ ญา โปด นะ ลือปัซ ซูโงฮ ดัฮ เตด ฆาโดฮ นะ บูโระ บูโซะ ปูลัก เลอ ตาปี นะ รอจ กะ ลาฆู ลือปัซ บาฌิ ลาฆู บือซรี บือซายา บือซามา ฌางัน ลูมอฮ โกะ นานะ นะ ตูฮัด. 22 ซาเบะ กีตา ตาฮู จะ ตือดะ รอจ กะ ฮาดัจ อีนี โกะ บือนา บารัก นู บือฌาดี ดัฮ ซือมูฮา อาดา ซือรูปา มือนาแงฮ มือรายู ซือรูปา บือกะ นีบีนี นู ซาเกะ นะ ดูโดะ เดะ อาปี เลอ. 23 บูกัด ซา โกะ ซือบารัก อีตู ตาปี ลูมอฮ กีตา ฌูฆา. กีตา บือเลฮ ซาโมจ ซือมืองัจ นะ ตูฮัด ฌาดี ซือรูปา บูวัฮ นู ลามูลา เดะ ลาฆู บาฌิ นู ตูฮัด นะ บรี กะ กีตา. ตาปี วะตู อีนี นู กีตา อาดา นาตี ลาฆู นู ตูฮัด นะ ซาโมจ กีตา บรี ฌาดี นานะ นะ ญา เตอ ฌาดี-จะ นะ มือนือบุซ ญาวา กีตา บรี ลือปัซ เดะ มาตี ดัฮ กีตา โปด ฌูฆา อาดา มือนาแงฮ มือรายู เดะ ฮาตี กะฆีเตอ เลอ. 24 กรานา-จะ ตูฮัด บือเลฮ บูวัจ บรี กีตา ฮีโดะ ลือปัซ บาฌิ ดัฮ บีดา กีตา นะ จาดัก เดะ ลาฆู กะฆีเตอ บือเลฮ เตอ. ตาปี กะ กีตา นะ บือเลฮ ลีฮัจ ตือปัจ จาดัก นะ กีตา บูกัด-จะ กีตา จาดัก ซูโงฮ. ซาปา เลอ นู จาดัก เดะ ลาฆู นู ญา ลีฮัจ บือฆารี ซัฮ? 25 ตาปี กะ กีตา จาดัก เดะ ลาฆู นู กีตา ลีฮัจ เตด บือฆารี เตอ กีตา นะ ตาฮัด-ฮาตี นาตี ลาฆู อีตู เลอ. 26 กะฆีเตอ ฌูฆา ซือมืองัจ นะ ตูฮัด ญา มาแรฮ ตูโลก กีตา นู ฌาดี ซือมียา ลือมัฮ ลือเตฮ เตอ. ซาเบะ-จะ กีตา เตด ตาฮู นะ บือซาโวจ กะฮามี บาฌิ ตาปี ซือมืองัจ อีตู โปด ญา มือนาแงฮ มือรายู บือซาโวจ บือกะ มือเลา เตด ตรือเบะ มีตา เดะ ตูฮัด เดะ อาตัซ บีดา กีตา เลอ. 27 กะฆีเตอ ตูฮัด เดะ อาตัซ เตอ ญา นู มือญาซัจ ลีฮัจ ฮาตี นะ โกะ อูมัจ-ซือมียา ญา ตาฮู ลาฆู นามา นู อาดา เดะ ฮาตี นะ ซือมืองัจ นะ ญา ซาเบะ-จะ ซือมืองัจ อีตู ญา บือซาโวจ มีตา บีดา โกะ ซือมียา นะ ตูฮัด ตูโรจ กะ ฮาตี นะ ตูฮัด เดะ อาตัซ เลอ. 28 กีตา ตาฮู ดัฮ จะ ตูฮัด ญา อาดา บือกรือฌา บูวัจ บรี บือนา ซือมูฮา ฌาดี บาฌิ ดัฮ บีดา โกะ ซือมียา นู ซายัก กะ ญา ฌาดี-จะ โกะ ซือมียา นู ตูฮัด บือเลฮ ปาเงน ดัฮ ตูโรจ บือกะ ลาฆู นู ญา กีรา ตือตู ดัฮ. 29 โกะ ซือมียา ดีฮา นู ตูฮัด กราลา ดูลู ดัฮ ซือมียา อีตู เตอ ญา บือเลฮ ตืองะ บรี กูญา นะ ฌาดี ซือรูปา บือกะ เยซู นานะ นะ ญา บีดา เยซู อีตู นะ ฌาดี นานะ ซูโลก เดะ ตืองัฮ โกะ อาดี-บราดี บาญะ อูรัก เลอ. 30 กะฆีเตอ ซือมียา ดีฮา นู ตูฮัด บือเลฮ ตืองะ ดัฮ ซือมียา อีตู ญา บือเลฮ ปาเงน ดัฮ ฌูฆา. ซือมียา ดีฮา นู ญา บือเลฮ ปาเงน ดัฮ เตอ ซือมียา อีตู ญา บือเลฮ บูวัจ บรี บาฌิ-ตือปัจ ฌางัน ญา ดัฮ. ซือมียา ดีฮา นู ญา บือเลฮ บูวัจ บรี บาฌิ-ตือปัจ เตอ ซือมียา อีตู ญา บือเลฮ บูวัจ บรี ฌาดี บือซรี บือซายา ฌูฆา เลอ. 31 ดัฮ ตาฮู ลาฆู กะฆีเตอ กีตา นะ มือเลา กะฮามี เลอ? กะ ตูฮัด เดะ อาตัซ อาดา โซะ กีตา เตอ ซาปา เลอ นู นะ มาแรฮ บลาวัด? 32 ตูฮัด ญา ฮอย เตด มือญือซัน นานะ นะ ญา ตะอาซิก ตาปี ญา บือเลฮ ซรัฮ นานะ อีตู บรี มาตี กรานา กีตา ซือมูฮา. กะฆีเตอ ลาฆู นู บาฌิ ซือมูฮา ญา นะ ฮาลัย บรี กะ กีตา บือซามา ฌางัน นานะ นะ ญา บูกัด เฆอ? 33 กีตา ซือมียา นู ตูฮัด ปีเลฮ ดัฮ เตอ ซาปา เลอ นู นะ อาดู กีตา? ตูฮัด เดะ อาตัซ เตอ เลอ ญา กีรา จะ กีตา บาฌิ-ตือปัจ ดัฮ. 34 ซาปา เลอ นู นะ กรัจ ฮูโกบ กีตา? เยซู คริด เตอ ญา นู มาตี ดัฮ ลือเบฮ เดะ อีตู โปด ญา ฮีโดะ ปาเระ เดะ มาตี อาดา ดูโดะ โซะ ซือบือลัฮ กานัน นะ ตูฮัด เดะ อาตัซ. ญา เลอ ตืองัฮ บือซาโวจ มีตา เดะ ตูฮัด ปาซัน ลาฆู นะ กีตา ซือมูฮา. 35 กะฆีเตอ ซาปา เลอ นะ บูวัจ บรี กีตา ปูตุซ เดะ ลาฆู นู เยซู คริด ซายัก กีตา? ลาฆู นู ซูซัฮ นู ฮาฌะ โตระ เตอ เฆอ-จะ นู ซือมียา นะ ปรือกัด กีตา เตอ เฆอ-จะ นู ฮอย บารัก นะ มากัด ฮอย กาเยด นะ ปากัย เตอ เฆอ-จะ นู กีตา กือนา ลาฆู นู บรี ตาโกจ นู กีตา นะ กือนา บูนอฮ มาตี เตอ? โกะ ลาฆู กะฆีเตอ นะ บูวัจ บรี กีตา ปูตุซ เดะ ลาฆู ซายัก อีตู บือเลฮ เฆอ? 36 ซือรูปา ซูรัจ ปือมือเลา นะ ตูฮัด นู จะ "กรานา กีตา ตูโรจ กะ ตูฮัด ดัฮ เตอ บีลัก อารี โกะ ซือมียา นะ บูนอฮ กีตา เลอ กูญา กีรา จะ กีตา ซือรูปา บือกะ กาเมก นู นะ บาวา ปี บูนอฮ." ญา จะ. 37 บูกัด กะฆีเตอ เลอ ตาปี เดะ ลาฆู อีนี ซือมูฮา กีตา ฌือนัฮ ปือนอฮ บาญะ ซูโงฮ กรานา เยซู นู ซายัก กะ กีตา ดัฮ. 38 กู ตือตู-ฮาตี จะ ฮอย ลาฆู นามา เลอ นู นะ บือเลฮ บูวัจ บรี กีตา ปูตุซ เดะ ลาฆู นู ตูฮัด ซายัก กีตา เตด-จะ ลาฆู มาตี ลาฆู ฮีโดะ เตอ เตด-จะ โกะ ฮูลู-บาลัก เฆอ-จะ โกะ ฌิด โกะ ฮาตู โปด เตด-จะ ลาฆู เดะ อารี อีนี ลาฆู เดะ อารี โซะ ฮึลด เตอ 39 เตด-จะ ลาฆู โซะ อาตัซ ลาฆู โซะ บาวัฮ โปด. เดะ บือนา บารัก นู ตูฮัด บือฌาดี ดัฮ ซือมูฮา เตอ ฮอย นามา เลอ นู นะ บือเลฮ บูวัจ บรี กีตา ปูตุซ เดะ ลาฆู นู ตูฮัด บือซัยํ เดะ อาตัซ ซายัก กะ กีตา บือกะ นู ญา ปลีฮัจ ดัฮ เดะ เยซู คริด ตูฮัด นะ กีตา เลอ.
1 บือกะ กู อาดา ลือกัจ ฌางัน เยซู คริด เตอ กู มือเลา ลาฆู นู ซูโงฮ บูกัด มือเลา ลาฆู มืออูปัย เลอ. ซือมืองัจ นะ ตูฮัด ญา บาวา ฮาตี นู ตาฮู ลาฆู ซาลัฮ กือนา นะ กู บรี ฌาดี ซะซี จะ กู เตด มือเลา มืออูปัย. 2 ลาฆู นู ซูโงฮ อีตู ฌาดี-จะ กู ซูซัฮ-ฮาตี บาญะ บาฮาตี โตระ เตด บราดู ปาซัน ลูมอฮ ดีบราดี นะ กู นู ฌาดี โกะ ซือมียา ซา บักซา ฌางัน กู. 3 ซาเบะ กู ซูกา นะ บรี ญาวา นะ กู ตะอาซิก นะ กือนา ตูฮัด กรัจ ฮูโกบ ดัฮ บรี ปูตุซ เดะ เยซู คริด บีดา นะ ตูโลก ลูมอฮ กูญา เลอ. 4 กูญา เตอ ฌาดี ลูมอฮ บักซา อิซราเอน นู ตูฮัด ปีเลฮ ดัฮ. ตูฮัด ญา บูวัจ บรี ลูมอฮ กูญา ฌาดี โกะ นานะ นะ ญา บรี กูญา ลีฮัจ ลาฆู บือซายา บือซรี นะ ญา. ญา ตืองะ โกะ ปือมือเลา บือปาคัจ ฌางัน กูญา ญา บรี โกะ ปือมือเลา ฮูโกบ กะ กูญา. ลูมอฮ กูญา เตอ นู ตาฮู มือญือมัฮ กะ ตูฮัด บือกะ ลาฆู ซูโงฮ นู อาดา โกะ ปือมือเลา บือฌาญี นะ ตูฮัด เลอ. 5 ลูมอฮ กูญา ฌาดี บือแนฮ นะ โกะ บีลาแก เตอ. นู เยซู คริด ฌาดี ซือมียา ดัฮ ญา ฌาดี ซือมียา บักซา นะ กูญา ฌูฆา เลอ. ปูฌี เลอ กะ ตูฮัด นู อาดา เดะ อาตัซ บือนา ซือมูฮา. บรี ซือลามัจ กะ ญา ซือมาญัก-รอจ เลอ. อาเมน. 6 บูกัด-จะ ปือมือเลา บือฌาญี นะ ตูฮัด เตด ฌาดี นามา ดัฮ. ซาเบะ-จะ บูกัด ราตา ซือมียา นู บือฌาดี มาแรฮ เดะ บักซา อิซราเอน นะ ฌาดี บักซา อิซราเอน นู ตูฮัด ปีเลฮ ดัฮ. 7 บูกัด บือแนฮ นะ อับราฮัม ราตา ซือมูฮา นู นะ กีรา จะ ฌาดี นานะ นะ ญา. ซาเบะ ตูฮัด บือเลฮ มือเลา จะ "โกะ ซือมียา นู ตูโรด-มือนูโรด เดะ อีซัก เลอ นู นะ กือนา กีรา จะ ฌาดี บือแนฮ นะ เกา." 8 ฌาดี-จะ บูกัด โกะ นานะ นู บือฌาดี มาแรฮ ตูโรจ กะ ลาฆู นะ ซือมียา นู นะ ฌาดี นานะ นะ ตูฮัด ตาปี โกะ นานะ นู บือฌาดี มาแรฮ ตูโรจ กะ ปือมือเลา บือฌาญี นะ ตูฮัด กูญา เลอ กือนา กีรา จะ ฌาดี บือแนฮ นู ซูโงฮ ดัฮ เลอ. 9 ซาเบะ ตูฮัด บือเลฮ บือฌาญี กะฆีนี จะ "เดะ วะตู นู บาฌิ เตอ กู นะ บาลิ ปาเระ. กะฆีเตอ ซารา โปด นะ บือเลฮ นานะ กีลากี." 10 บูกัด ตารา อีตู ตาปี เรเบคา โปด บือเลฮ นานะ กีลากี บือกือมัยํ เดะ กีลากี นู ซา ฌูฆา ฌาดี-จะ อีซัก นู บีลาแก นะ กีตา เตอ. 11 ตานา โกะ นานะ อีตู ฮอย เตด ลือปัซ เดะ โปรจ นะ มะ ลาฆี ฮอย เตด บือเลฮ บูวัจ บาฌิ เฆอ-จะ บูวัจ ฌาฮัจ ลาฆี เตอ ตูฮัด ญา มือเลา ดูลู ฌางัน เรเบคา จะ "นู กากา นะ ฌาดี ปราโซฮ นะ อาดี." กะฆีเตอ ญา บรี ลีฮัจ จะ ลาฆู นู ตูฮัด บือคานะ นะ ปีเลฮ นานะ นู ซา อีตู เตอ ญา อาดา กือฌะ-กือมัซ ดัฮ บูกัด กรานา ลาฆู ปือบูวัจ นะ นานะ อีตู ตาปี กรานา ตูฮัด ปาเงน ญา ดัฮ เลอ. 13 บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ "ยาโกบ เตอ นู กู ซายัก ตาปี เอเซา เตอ กู บือชี เลอ." 14 ดัฮ กะฆีเตอ กีตา นะ มือเลา กะฮามี เลอ? จะ ตูฮัด ญา เตด รือมัก บาฌิ เฆอ? เตด โบะ. ฮอย เตด ฌาดี กะฆีเตอ เลอ. 15 ซาเบะ ตูฮัด บือเลฮ มือเลา ฌางัน มูซา จะ "ดัฮ กู นะ ตือจีฮัด กะ ซือมียา ดีฮา กู นะ ตือจีฮัด กะ ซือมียา อีตู เลอ. ดัฮ กู นะ บูวัจ บาฌิ ฌางัน ซือมียา ดีฮา กู นะ บูวัจ บาฌิ ฌางัน ซือมียา อีตู เลอ." 16 กะฆีเตอ เลอ นู นะ ปีเลฮ ซือมียา ดีฮา เตอ บูกัด กรานา ซือมียา อีตู บือคานะ บูกัด กรานา ญา กูวาซา บือกรือฌา โปด ตาปี กรานา ตูฮัด ตือจีฮัด กะ ญา เลอ. 17 ซาเบะ-จะ เดะ ซูรัจ ปือมือเลา นะ ตูฮัด อาดา นู ตูฮัด มือเลา ฌางัน ราฌา ฟาโร จะ "กู บือเลฮ ตืองะ เกา ฌาดี ราฌา กรานา ลาฆู อีนี เลอ บีดา นะ ซูโรฮ เกา ปลีฮัจ ลาฆู ปือมือฆัฮ นะ กู บีดา นะ มือญาเระ บรี ตาฮู นามา นะ กู ราตา เดะ ดือนียา ฌูฆา." 18 กะฆีเตอ เลอ ตูฮัด นะ ตือจีฮัด กะ ซือมียา ดีฮา เฆอ-จะ นะ บูวัจ บรี ซือมียา ดีฮา ตือฆัยํ-ฮาตี เตอ ลือเบฮ เดะ ฮาตี นะ ตูฮัด เตอ เลอ. 19 กะฆีเตอ ซืออูรัก เดะ ลูมอฮ กาเญา นะ ตาญา กู จะ "ดัฮ ฌาดี กะฆีเตอ ซาเบะ นามา ตูฮัด ญา ตูโดฮ จะ กีตา ซาลัฮ ลาฆี? ซาปา เลอ นะ บือเลฮ บลาวัด ฌางัน ลาฆู นู ตูฮัด บือคานะ ดัฮ?" 20 กาวัด เออ เกา ฌาดี ซาปา เลอ นู นะ ตีกัฮ ปาเระ กะ ตูฮัด เดะ อาตัซ? ปีโยะ ตานัฮ นะ ฮอย เตด มือเลา ฌางัน ซือมียา นู บูวัจ ญา จะ "ซาเบะ นามา ปะ เกา บูวัจ กู บรี ฌาดี กะฆีนี?" 21 ซือมียา นู บูวัจ โกะ ปีโยะ ตานัฮ เตอ ญา นะ อาเมด ตานัฮ ลียัจ มาแรฮ บูวัจ ซือบารัก นามา บือเลฮ ฮาปา บูกัด เฆอ? ญา นะ อาเมด ตานัฮ ลียัจ ซือกือโตน อีตู บูวัจ ซือตืองัฮ บรี ฌาดี ปีโยะ นู นะ ซูโรฮ เดะ อารี ซัยํ-บือซัยํ ซือตืองัฮ ฌาดี ปีโยะ นู นะ ซูโรฮ เดะ บีลัก อารี บือเลฮ นอ? 22 ตูฮัด ญา บือเลฮ บูวัจ กะฆีเตอ ฌูฆา. ญา บือคานะ นะ ปลีฮัจ ลาฆู นู ญา นะ มูซัยํ กรัจ ฮูโกบ ญา นะ บรี ตาฮู ลาฆู นู ญา มือฆัฮ ซูโงฮ. กะฆีเตอ ญา บือเลฮ ตาฮัด-ฮาตี ลามา ฌางัน โกะ ซือมียา นู ญา นะ มูซัยํ กรัจ ฮูโกบ นู ซียะ ฆือนะ ดัฮ นะ กือนา ลาฆู ฌาฮานัม. 23 ญา บือคานะ นะ บรี ลีฮัจ ฌูฆา ลาฆู บือซรี บือซายา นู บาฌิ ซูโงฮ นะ ญา นู ญา บือเลฮ บรี กะ กีตา ซือมียา นู ญา ตือจีฮัด ดัฮ นู ญา บือเลฮ ซียะ ตะเดะ ดูลู บีดา นะ ซาโมจ ลาฆู บือซรี อีตู. 24 กีตา เลอ ฌาดี ลูมอฮ ซือมียา นู ญา ปาเงน ดัฮ บูกัด เดะ ลูมอฮ บักซา ยิว ซา บักซา ตาปี เดะ ลูมอฮ บักซา อาซิก ฌูฆา. 25 บือกะ ตูฮัด มือเลา เดะ ซูรัจ นะ โฮเซยา จะ "ลูมอฮ ซือมียา อีตู นู ฮอย เตด ฌาดี ลูมอฮ นะ กู เตอ กู นะ บลาโลก กะ กูญา จะ ลูมอฮ นะ กู เลอ. บักซา อีตู นู กู เตด บือเลฮ ซายัก เตอ กู นะ บลาโลก กะ กูญา จะ บักซา นู กู ซายัก เลอ. 26 ตือปัจ อีตู นู ตูฮัด บือเลฮ มือเลา ฌางัน กูญา จะ 'กาเญา เตอ กาเญา บูกัด ลูมอฮ นะ กู.' ตือปัจ อีตู เลอ กูญา นะ กือนา บลาโลก จะ โกะ นานะ นะ ตูฮัด ญา นู อาดา ฮีโดะ ซูโงฮ." 27 อิซายา โปด ญา บือซูระ ปาซัน บักซา อิซราเอน จะ "มีเซ-จะ ลูมอฮ บักซา อิซราเอน นะ บือฌาดี บาญะ โตระ ซือรูปา บือกะ โกะ บีฌี ตานัฮ เดะ บีดิก ลาโวจ เตอ ตาปี อาดา โกะ ซือมียา ดีกิ-ตอจ นู นะ ฮีโดะ ลือปัซ บาฌิ เลอ. 28 ซาเบะ ตูฮัด นะ บูวัจ บรี ปือมือเลา ฮูโกบ นะ ญา เดะ ดือนียา นะ ซือลือซัย ซุจ งัจบางัจ เลอ." 29 บือกะ ซือรูปา อิซายา บือเลฮ มือเลา ดูลู จะ "ดัฮ ตูฮัด นู มือฆัฮ โตระ ญา เตด บือเลฮ ตาโรฮ บือแนฮ ซือตืองัฮ บรี กะ กีตา เตอ กีตา นะ ฌาฮานัม ดัฮ ซือรูปา นังฆรี โซโดม ดัฮ ซือรูปา บือกะ นังฆรี โฆโมรา เลอ." 30 กะฆีเตอ กีตา นะ มือเลา กะฮามี เลอ? จะ ลูมอฮ บักซา อาซิก นู เตด บือเลฮ มียา ฌาลัด นู นะ บาฌิ-ตือปัจ ฌางัน ตูฮัด เตอ กูญา โปด บาฌิ-ตือปัจ ฌางัน ตูฮัด ดัฮ กรานา กูญา ปือจายา เลอ. 31 ตาปี โซะ ลูมอฮ บักซา อิซราเอน นู บือเลฮ มียา ฮาดัจ ฮูโกบ นู นะ บูวัจ บรี กูญา บาฌิ-ตือปัจ ฌางัน ตูฮัด เตอ กูญา เตด บือเลฮ ดาปัจ ฮาดัจ ฮูโกบ อีตู เลอ. 32 ซาเบะ นามา กะฆีเตอ? ซาเบะ กูญา เตด บือเลฮ ปือจายา ตาปี บือกะ บือเลฮ ฮาระ กะ ลาฆู ปือบูวัจ นะ กูญา. กูญา ตือซีปะ ดัฮ เดะ บาตู อีตู นู นะ บรี ซือมียา รือบัฮ 33 บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ "ลีฮัจ เลอ กู อาเมด บาตู ซือกือโตน บอฮ เดะ นังฆรี ซีโอน ฌาดี บาตู นู นะ บรี โกะ ซือมียา ตือซีปะ ฌาดี บาตู บือซัยํ นู นะ บรี กูญา รือบัฮ. ตาปี ซือมียา ดีฮา นู ปือจายา กะ ญา เตอ ฮอย ลาฆู นะ มือญือซัน ลาลู เลอ."
1 โกะ ดีบราดี เออ กู อาดา ฮาตี บือคานะ ซูโงฮ บีดา ลูมอฮ บักซา อิซราเอน. กู บือซาโวจ กะ ตูฮัด เดะ อาตัซ เตอ มีตา บรี กูญา นะ ซาโมจ ลาฆู ฮีโดะ ลือปัซ บาฌิ เลอ. 2 กรานา กู ฌาดี ซะซี ปาซัน ลาฆู นะ กูญา จะ กูญา ตูเฮะ กะ ตูฮัด ซูโงฮ. ตาปี นู กูญา ตูเฮะ เตอ ฌาดี ลาฆู นู ฮอย เตด มาโซะ เดะ ฮาตี นะ กูญา เลอ. 3 ซาเบะ-จะ กูญา เตด ตาฮู ฌาลัด อีตู นู ตูฮัด นะ บูวัจ บรี โกะ ซือมียา นะ บาฌิ-ตือปัจ ฌางัน ญา. ตาปี กูญา กูวาซา ตืองะ ฌาลัด นะ กูญา ตะอาซิก. กะฆีเตอ กูญา ตีเมา นะ ซาโงะ จะ ฌาลัด อีตู นู ตูฮัด นะ บูวัจ บรี ซือมียา บาฌิ-ตือปัจ ฌางัน ญา ฌาดี ฌาลัด นู ซูโงฮ เลอ. 4 ซาเบะ-จะ เยซู คริด บือเลฮ บูวัจ บรี ปือมือเลา ฮูโกบ นะ ตูฮัด ซุจ ฮาบิฮ ดัฮ เลอ บีดา-จะ ราตา ซือมียา นู ปือจายา นะ ฌาดี ซือมียา นู บาฌิ-ตือปัจ ฌางัน ตูฮัด. 5 ซาเบะ-จะ มูซา เตอ บือเลฮ ฆาแรฮ ปาซัน ฌาลัด อีตู นู ซือมียา นะ บาฌิ-ตือปัจ ฌางัน ตูฮัด กรานา ญา ตูโรจ กะ ปือมือเลา ฮูโกบ. ญา มือเลา กะฆีนี จะ "ซือมียา ดีฮา นู บูวัจ ตูโรจ กะ โกะ ปือมือเลา ฮูโกบ เตอ ญา นะ ดูโดะ ซือนัง ซือลามัจ กรานา ปือมือเลา ฮูโกบ อีตู เลอ." 6 ตาปี ปาซัน ฌาลัด นู ซือมียา นะ บาฌิ-ตือปัจ ฌางัน ตูฮัด กรานา ญา ปือจายา เตอ ซูรัจ นะ ตูฮัด ฆาแรฮ กะฆีนี จะ "ฌางัน นะ บรีงัจ เดะ ฮาตี นะ เกา จะ ซาปา เลอ นะ ญาแญะ ปี รอจ กะ อาตัซ ลาแงะ?" ฌาดี-จะ บีดา นะ บาวา เยซู คริด ปือตูโรด มาแรฮ เตอ. 7 ญา มือเลา ปูลัก จะ "ฌางัน นะ บรีงัจ จะ ซาปา เลอ นะ ตูโรด ปี กะ ลาเฮา นังฆรี ฮาตู ?" ฌาดี-จะ บีดา นะ บาวา เยซู คริด ปือญาแญะ มาแรฮ เดะ ลาฆู มาตี. 8 ตาปี ลาฆู อีตู มือเลา กะฮามี? ซูรัจ ปือมือเลา นะ ตูฮัด ญา จะ "ปือมือเลา อีตู อาดา ดาปิก เกา อาดา เดะ มูโลจ นะ เกา อาดา เดะ ฮาตี นะ เกา ฌูฆา เลอ." ญา จะ. ฌาดี-จะ ปือมือเลา อีตู ปาซัน ลาฆู ปือจายา กะ ตูฮัด บือกะ นู กามี มือญาเระ เลอ. 9 ฌาดี-จะ ดัฮ เกา มือเลา ซาโงะ จะ "เยซู ฌาดี ตูฮัด" เตอ ดัฮ เกา ปือจายา เดะ ฮาตี ฌูฆา จะ "ตูฮัด เดะ อาตัซ บือเลฮ บูวัจ บรี เยซู ฮีโดะ ปาเระ เดะ มาตี เลอ" กะฆีเตอ เกา นะ ฮีโดะ ลือปัซ บาฌิ ดัฮ. 10 นู ซือมียา ปือจายา เดะ ฮาตี เตอ ญา นะ บาฌิ-ตือปัจ ฌางัน ตูฮัด ดัฮ เลอ. นู ญา มือเลา ซาโงะ กะฆีเตอ ญา นะ ฮีโดะ ลือปัซ บาฌิ เลอ. 11 ซาเบะ ซูรัจ ปือมือเลา นะ ตูฮัด มือเลา จะ "ราตา ซือมียา นู ปือจายา กะ ญา เตอ ฮอย ลาฆู นะ มือญือซัน ลาลู เลอ." ญา จะ. 12 กรานา ลูมอฮ บักซา ยิว เตอ ลูมอฮ บักซา อาซิก โปด ตูฮัด ญา เตด กีรา จะ ฌาดี ซือมียา อาซิกๆ. ญา เตอ ฌาดี ตูฮัด แนฮ ซา ฌาดี ตูฮัด นะ ซือมียา ราตาๆ เลอ. ญา นะ บรี ซือลามัจ ซูโงฮ กะ ราตา ซือมียา นู บลาโลก มีตา เดะ ญา. 13 ซาเบะ ซูรัจ นะ ตูฮัด จะ "ราตา ซือมียา นู บลาโลก ซือโบจ นามา นะ ตูฮัด นะ ฮีโดะ ลือปัซ บาฌิ เลอ." 14 ตาปี ดัฮ กูญา เตด บือเลฮ ปือจายา กะ ตูฮัด กูญา นะ บลาโลก มีตา เดะ ญา บือเลฮ กะฮามี เลอ? ดัฮ กูญา เตด บือเลฮ ดืองัยํ ลาฆู นะ ญา กูญา นะ ปือจายา บือเลฮ กะฮามี เลอ? ดัฮ ฮอย ซาปา ปี มือญาเระ ลาฆู อีตู กูญา นะ ดืองัยํ บือเลฮ กะฮามี เลอ? 15 ดัฮ ฮอย ซาปา ซูโรฮ ซือมียา ปี ญา นะ ปี มือญาเระ บือเลฮ กะฮามี เลอ? บือกะ ซูรัจ ปือมือเลา นะ ตูฮัด จะ "บาฌิ ซูโงฮ เลอ นู อาดา โกะ ซือมียา บาวา บรีตา นู บาฌิ มาแรฮ." 16 ตาปี บูกัด ราตา ซือมียา บือเลฮ มือนีงัย กะ บรีตา นู บาฌิ อีตู. ซาเบะ อิซายา บือเลฮ มือเลา จะ "ตูฮัด เออ ซาปา บือเลฮ ปือจายา กะ ลาฆู นู ญา ดืองัยํ เดะ กามี ดัฮ?" 17 กะฆีเตอ เลอ ซือมียา นะ ปือจายา กรานา ลาฆู นู ญา ดืองัยํ ดัฮ. ลาฆู ญา ดืองัยํ โปด ญา ดืองัยํ บือเลฮ กรานา อาดา ซือมียา มาแรฮ มือญาเระ ปาซัน ลาฆู นะ เยซู คริด. 18 ตาปี กู นะ ตาญา กะฆีนี จะ ลูมอฮ บักซา อิซราเอน เตด บือเลฮ ดืองัยํ ลาฆู อีตู เฆอ? ซูโงฮ กูญา ดืองัยํ ดัฮ บือกะ ซูรัจ ปือมือเลา นะ ตูฮัด นู มือเลา ปาซัน ซือมียา มือญาเระ ลาฆู นะ ตูฮัด จะ "ซูวารา นะ กูญา บือเลฮ กือจัย ปี ราตา เดะ ดือนียา เตอ โกะ ปือมือเลา นะ กูญา รอจ กะ ฮูโฌก ปือญูดัฮ นะ ดือนียา ราตา เลอ." 19 กู นะ ตาญา ปูลัก จะ โกะ ลูมอฮ บักซา อิซราเอน เตด บือเลฮ ตาฮู เฆอ? มูซา บือเลฮ ตีกัฮ ดูลู ฌาดี ปือมือเลา นะ ตูฮัด นู จะ "กู นะ บูวัจ บรี กาเญา ดือกี กะ กูญา อีตู นู เตด ฌาดี ลูมอฮ บักซา นู ดีฮา เตอ กรานา ลูมอฮ ซือมียา นู บูดอ โปด กู นะ บูวัจ บรี กาเญา มูซัยํ เลอ." 20 โซะ อิซายา เตอ ญา ฮาตี บรานี นะ มือเลา ปือมือเลา นะ ตูฮัด กะฆีนี จะ "โกะ ซือมียา นู เตด บือเลฮ มียา กู เตอ กูญา บือเลฮ ดาปัจ กู ดัฮ. โกะ ซือมียา นู เตด บือเลฮ มือโซะ ตาญา ปาซัน ลาฆู นะ กู เตอ กู โปด บือเลฮ ปลีฮัจ กะ กูญา ดัฮ." 21 ตาปี ปาซัน ลูมอฮ บักซา อิซราเอน อิซายา ญา มือเลา ปือมือเลา นะ ตูฮัด นู จะ "ซืออารี บูลัจ เตอ กู บือเลฮ อาเงา ตางัน ซาโมจ ลูมอฮ ซือมียา นู บาตัฮ ตีเมา นะ มือนีงัย เลอ."
1 กะฆีเตอ กู นะ ตาญา จะ ตูฮัด เดะ อาตัซ ญา กีปัซ ลูมอฮ บักซา นะ ญา บูวัก ดัฮ เฆอ? เตด โบะ. ฮอย เตด ฌาดี กะฆีเตอ. ซาเบะ อีซี กู ตะอาซิก โปด ฌาดี ซือมียา บักซา อิซราเอน ฌาดี บือแนฮ นะ อับราฮัม ฌาดี ซืออูรัก เดะ ปาลัฮ นะ เบนยามิน. 2 ตูฮัด ญา ฮอย เตด บือเลฮ กีปัซ ลูมอฮ นะ ญา นู ญา ปีเลฮ ตะเดะ ดูลู นูตู ดัฮ. กาเญา เตด ตาฮู เฆอ ซูรัจ ปือมือเลา นะ ตูฮัด นู มือเลา ปาซัน เอลียา นู ญา บือเลฮ บือซาโวจ กะ ตูฮัด อาดู ลาฆู นะ บักซา อิซราเอน จะ 3 "ตูฮัด เออ โกะ ซือมียา นู ตูโดฮ ลาฆู นะ เกา เตอ กูญา บือเลฮ บูนอฮ บูวัก ดัฮ โกะ ตือปัจ ตูนู บารัก มือนืองะ กะ เกา โปด กูญา บือเลฮ ปรูโตฮ บูวัก ฮาบิฮ ดัฮ เลอ. ลือเบฮ อาดา ซืออูรัก กู ลาฆี เตอ ตาปี กูญา มียา ฌาลัด นะ บูนอฮ กู ฌูฆา เลอ." 4 ตาปี ตูฮัด บือเลฮ ตีกัฮ กะ เอลียา กะฮามี? ญา ตีกัฮ กะฆีนี จะ "กู อาดา ลือเบฮ ซือมียา ตูโฌฮ รีบู อูรัก นู กู บือเลฮ ตาโรฮ บีดา กู ตะอาซิก เตอ นู เตด ดือละ ตูกู ลูโตจ มือญือมัฮ กะ บราลา บาอัน. " 5 กะฆีเตอ ฌูฆา เดะ วะตู อีนี อาดา ลือเบฮ ซือมียา กิดีกิ นู ตูฮัด ปีเลฮ ดัฮ กรานา ญา ฮาลัย บรี ซือลามัจ กะ กูญา. 6 ตาปี ดัฮ ตูฮัด ปีเลฮ กูญา กรานา ญา ฮาลัย บรี ซือลามัจ เตอ กะฆีเตอ ญา ฮอย เตด ปีเลฮ กูญา กรานา ลาฆู ปือบูวัจ นะ กูญา. ดัฮ เตด กะฆีเตอ ลาฆู นู ญา ฮาลัย บรี ซือลามัจ เตอ ฮอย เตด ฌาดี ลาฆู ซูโงฮ ลาฆี เลอ. 7 ดัฮ กะฆีเตอ นะ ฌาดี กะฮามี เลอ? ลาฆู อีตู นู ลูมอฮ บักซา อิซราเอน มียา ดัฮ ลาฆู อีตู กูญา ฮอย เตด บือเลฮ ดาปัจ เลอ. ตาปี โกะ ซือมียา กิดีกิ นู ตูฮัด ปีเลฮ ดัฮ กูญา เลอ บือเลฮ ดาปัจ ลาฆู อีตู ดัฮ. โซะ ซือมียา นู ฆีลาฆี กูญา ตือฆัยํ-ฮาตี ดัฮ 8 บือกะ อาดา เดะ ซูรัจ ปือมือเลา นะ ตูฮัด นู จะ "ตูฮัด เดะ อาตัซ บรี กะ กูญา อาดา ฮาตี กือบัซ บรี อาดา มาตา นู ลีฮัจ เตด บือฆารี อาดา ตือลีงา นู ดืองัยํ เตด บือเลฮ ตือดะ รอจ กะ อารี อีนี เลอ." ญา จะ. 9 ราฌา ดาวิด ญา บือเลฮ มือเลา กะฆีนี ฌูฆา จะ "มีตา บรี ลาฆู มากัด บรามัย นะ กูญา นะ ฌาดี ปืองีเตฮ นู รีฆะ กูญา ฌาดี ตือปัจ นู บรี กูญา ตือซีปะ รือบัฮ บรี กูญา กือนา ฮูโกบ ปาเระ. 10 มีตา บรี มาตา นะ กูญา นะ บือดาบู บีดา กูญา นะ ลีฮัจ เตด บือฆารี มีตา บรี บลากัก นะ กูญา บูโกะ ซือลาลู กรานา ลาฆู ซูซัฮ เลอ." ญา จะ. 11 กู นะ ตาญา กะฆีนี จะ "นู ลูมอฮ บักซา อิซราเอน ตือซีปะ ดัฮ กะฆีเตอ กูญา รือบัฮ ฮาบิฮ ดัฮ เฆอ?" เตด โบะ. ฮอย เตด ฌาดี กะฆีเตอ. ตาปี นู กูญา บูวัจ ซาลัฮ ดัฮ บือเลฮ บูกา จือลัฮ บรี ลูมอฮ บักซา อาซิก นะ ฮีโดะ ลือปัซ บาฌิ ฌูฆา บีดา ลูมอฮ อิซราเอน นะ ดือกี กะ กูญา. 12 นู ลูมอฮ อิซราเอน บูวัจ ซาลัฮ ดัฮ เตอ บือเลฮ บูวัจ บรี โกะ ซือมียา เดะ ดือนียา ซาโมจ ลาฆู บาฌิ บาญะ ซูโงฮ ดัฮ. นู ฮาตี นะ กูญา อาลัฮ ดัฮ โปด บือเลฮ บูวัจ บรี ลูมอฮ บักซา อาซิก ซาโมจ ลาฆู บาฌิ บาญะ ซูโงฮ ดัฮ เลอ. กะฆีเตอ วะตู ลูมอฮ อิซราเอน ซือมูฮา นะ บาฌิ ปาเระ ฌางัน ตูฮัด เตอ ลาฆู บาฌิ บาญะ ลือเบฮ เดะ อีตู ปูลัก นะ มาแรฮ. 13 นี เลอ กู นะ มือเลา ฌางัน กาเญา นู ฌาดี บักซา อาซิก กรานา กู ฌาดี ปือญูโรฮ นู ตูฮัด ซูโรฮ ปี อาฌัยํ โกะ ลูมอฮ บักซา อาซิก เตอ กู นะ งันตืองัน เดะ ลาฆู นู กู บือกรือฌา กะฆีเตอ เลอ. 14 นากือนา เตอ กู นะ บือเลฮ บูวัจ บรี โกะ ซือมียา บักซา นะ กู นะ ดือกี บีดา กูญา ซือตืองัฮ นะ บือเลฮ ฮีโดะ ลือปัซ บาฌิ ฌูฆา. 15 กรานา-จะ นู ตูฮัด กีปัซ กูญา บูวัก เตอ บูวัจ บรี โกะ ซือมียา เดะ ดือนียา บาฌิ ปาเระ ฌางัน ตูฮัด ดัฮ. กะฆีเตอ วะตู ตูฮัด ซาโมจ กูญา ปาเระ นะ ฌาดี กะฮามี? นะ ฌาดี บือกะ ลาฆู ฮีโดะ ปาเระ เดะ มาตี เลอ. 16 กะฆีเตอ ดัฮ กรัจ ตือโปก กือโตน ลามูลา ซรัฮ บรี กะ ตูฮัด ตือโปก อีตู ฌาดี นะ ตูฮัด ฮาบิฮ ซือกือโตน. ดัฮ โกะ ฌากัยํ ปูโฮด กายู กือนา ซรัฮ บรี กะ ตูฮัด โกะ ดาฮัด โปด ฌาดี นะ ญา ฌูฆา เลอ. 17 ลูมอฮ บักซา อิซราเอน ญา ซือรูปา ปูโฮด กือดูโนด เดะ กือโบด นู โกะ ดาฮัด ซือตืองัฮ กือนา ลือกับ บูวัก ดัฮ. เกา นู ซือมียา บักซา อาซิก เตอ เกา ซือรูปา ดาฮัด ปูโฮด กือดูโนด ฮูตัด นู กือนา อาเมด มาแรฮ บือฮูโบก ฌางัน ปูโฮด นู บาฌิ อีตู บีดา เกา นะ ซาโมจ ลาฆู บาฌิ ซือลามัจ นะ ฌากัยํ อีตู ฌาดี-จะ นะ ลูมอฮ บักซา อิซราเอน. 18 กะฆีเตอ ฌางัน บรี เกา งันตืองัน เดะ โกะ ดาฮัด นู กือนา ลือกับ บูวัก ซีงี เตอ. โบะ เกา ฮอย ตือปัจ นะ งันตืองัน ดัฮ เลอ. เกา นู ฌาดี ดาฮัด บูกัด เกา บูวัจ บรี ฌากัยํ บือตูโมฮ ตาปี ฌากัยํ เลอ นู บูวัจ บรี เกา บือตูโมฮ. 19 ตาปี เกา นะ มือเลา จะ "ตูฮัด บือเลฮ ลือกับ โกะ ดาฮัด อีตู บูวัก ดัฮ เตอ บีดา นะ บือเลฮ บือฮูโบก กู เลอ." 20 ซูโงฮ ตาปี กูญา กือนา ลือกับ บูวัก กรานา กูญา เตด ปือจายา. เกา โปด ดูโดะ กือฌะ กรานา เกา ปือจายา ดัฮ. กะฆีเตอ ฌางัน บรีงัจ มือนูโญะ กะ ญาวา ตะอาซิก ตาปี กือนา บรีงัจ ตาโกจ เดะ ตูฮัด เลอ. 21 ดัฮ ตูฮัด เตด บือเลฮ ตาโรฮ โกะ ดาฮัด ลามูลา ฌาดี-จะ ลูมอฮ อิซราเอน เตอ ญา นะ ฮอย เตด ตาโรฮ เกา ฌูฆา ดัฮ เลอ. 22 กะฆีเตอ ลีฮัจ เลอ ตูฮัด เดะ อาตัซ ญา อาดา ฮาตี ตือจีฮัด ฌางัน ฮาตี กรัซ ซามา. ญา ฮาตี กรัซ ฌางัน โกะ ซือมียา นู รือบัฮ ซือซัจ ฌาลัด ดัฮ ตาปี ญา ฮาตี ตือจีฮัด กะ เกา เลอ ดัฮ เกา บูวัจ ตูโรจ บรี บือฆูนา ฌางัน ลาฆู นู ญา ฮาตี ตือจีฮัด อีตู. เตด กะฆีเตอ เกา โปด นะ กือนา กรัจ ตีงัน บูวัก ฌูฆา ดัฮ เลอ. 23 ตาปี โซะ โกะ ลูมอฮ อิซราเอน เตอ ดัฮ กูญา บราเลฮ-ฮาตี มาแรฮ ปือจายา ปูลัก เตอ กูญา นะ กือนา บือฮูโบก ปาเระ ฌูฆา เลอ. ตูฮัด ญา มือฆัฮ นะ บูวัจ กะฆีเตอ โปด บือเลฮ. 24 กะฆีเตอ เลอ เกา ซือมียา บักซา อาซิก ซือรูปา ดาฮัด นู กือนา กรัจ เดะ ปูโฮด กือดูโนด ฮูตัด ตาปี กือนา บือฮูโบก ปูลัก ดัฮ เดะ ปูโฮด กือดูโนด เดะ กือโบด. บาญะ ลือเบฮ เดะ อีตู เลอ ตูฮัด นะ บือเลฮ อาเมด โกะ ดาฮัด นู กือนา ลือกับ เดะ ปูโฮด กือโบด อีตู ฌาดี-จะ ลูมอฮ อิซราเอน เตอ มาแรฮ บือฮูโบก เดะ ปูโฮด นะ ญา ปูลัก เลอ. 25 โกะ ดีบราดี เออ อาดา ลาฆู ดาลับ ซูโงฮ ซา ลาฆู นู กู นะ บรี กะ กาเญา ตาฮู ตีเมา บรี กาเญา นะ อีงัจ จะ อีซี กาเญา ปานัย อากัน. ลาฆู ดาลับ ซูโงฮ อีนี ฌาดี-จะ ลูมอฮ บักซา อิซราเอน ซือตืองัฮ ตือฆัยํ-ฮาตี ดัฮ ตือดะ โกะ ลูมอฮ บักซา อาซิก นะ มาโซะ กะ ตูฮัด บรี ฆือนะ บาฌิ ดัฮ. 26 กาลา ฌาดี กะฆีเตอ ดัฮ ลูมอฮ บักซา อิซราเอน ซือมูฮา นะ ฮีโดะ ลือปัซ บาฌิ เลอ บือกะ อาดา เดะ ซูรัจ ปือมือเลา นะ ตูฮัด นู จะ "ซือมียา นู ตูโลก บรี ลือปัซ ญา นะ ตรือเบะ มาแรฮ เดะ นังฆรี ซีโอน ญา นะ อาเมด ลาฆู ซาลัฮ เดะ บือแนฮ นะ ยาโกบ บูวัก บรี ฮาบิฮ. 27 กะฆีเตอ กู นี เลอ นะ บูวัจ ปือมือเลา บือปาคัจ บือตือตู อีนี ฌางัน กูญา กาลา กู อาเกะ ดูซา นะ กูญา ดัฮ เลอ." ตูฮัด ญา จะ. 28 ซาเบะ ลูมอฮ อิซราเอน ตีเมา ซาโมจ บรีตา นู บาฌิ เตอ กะฆีเตอ กูญา ฌาดี ซือตรู นะ ตูฮัด ดัฮ บีดา ลูมอฮ กาเญา นู ฌาดี บักซา อาซิก นะ บือเลฮ อูโตก. ตาปี ซาเบะ ลาฆู นู ตูฮัด ญา ปีเลฮ กูญา ดัฮ กูญา โปด ฌาดี ซือมียา นู ตูฮัด ซายัก กรานา ลีฮัจ กะ โกะ บีลาแก นะ กูญา เลอ. 29 ซาเบะ-จะ ตูฮัด เดะ อาตัซ ญา เตด บราเลฮ-ฮาตี ลาลู ปาซัน นู ญา นะ บรี ซือลามัจ กะ ซือมียา ดีฮา ญา นะ ปีเลฮ ซือมียา ดีฮา โปด. 30 บือกะ กาเญา ลูมอฮ บักซา อาซิก ดูลู กาเญา เตด บือเลฮ มือนีงัย กะ ตูฮัด เตอ. ตาปี วะตู อีนี ตูฮัด ตือจีฮัด กะ กาเญา ดัฮ ซาเบะ โกะ ลูมอฮ อิซราเอน ตีเมา มือนีงัย ดัฮ เลอ. 31 กะฆีเตอ ฌูฆา ซาเบะ ตูฮัด บือเลฮ ตือจีฮัด กะ กาเญา ดัฮ เตอ วะตู อีนี ลูมอฮ อิซราเอน เตด มือนีงัย กะ ตูฮัด เลอ บีดา-จะ ตูฮัด นะ ตือจีฮัด กะ กูญา ฌูฆา. 32 ซาเบะ-จะ ตูฮัด บือเลฮ กานัก ซือมียา ซือมูฮา บรี ฌาดี ซือมียา นู ตีเมา มือนีงัย บีดา ญา นะ บือเลฮ ตือจีฮัด กะ กูญา ซือมูฮา เลอ. 33 ซูโงฮ เลอ ตูฮัด ญา ตือจีฮัด บาญะ โตระ. ญา เตอ ปานัย อากัน ซูโงฮ ญา เตอ เลอ นู ตาฮู ลาฆู ดาลับ ซือมูฮา. โกะ ปือมือเลา ฮูโกบ นะ ญา เตอ ฮอย ซาปา นะ บือเลฮ มือญาซัจ บรี ตาฮู. โกะ ปือบูวัจ นะ ญา โปด ฮอย ซาปา นะ บือเลฮ มาโซะ เดะ ฮาตี เลอ. 34 บือกะ ซูรัจ ปือมือเลา นะ ตูฮัด นู จะ "ซาปา เลอ นู ตาฮู ฮาตี นะ ตูฮัด เดะ อาตัซ? ซาปา เลอ นู นะ ฌาดี ซาบัจ บือกีรา ฌางัน ญา?" 35 "ซาปา เลอ ดือละ บรี โกะ ซือบารัก มานามา กะ ตูฮัด บีดา ตูฮัด นะ บาลัซ ปาเระ กะ ญา?" 36 กรานา-จะ บือนา บารัก ราตา ซือมูฮา เตอ ดาตัก มาแรฮ เดะ ตางัน นะ ตูฮัด อาดา กือฌะ กรานา ญา อาดา ดูโดะ บีดา ปูฌี กะ ญา. ซือลามัจ เลอ กะ ตูฮัด ซือลาลู ซือมาญัก-รอจ. อาเมน.
1 โกะ ดีบราดี เออ ซาเบะ ตูฮัด เดะ อาตัซ บือเลฮ ตือจีฮัด กะ กีตา บาญะ กะฆีเตอ กู มีตา เดะ กาเญา กือมัซๆ จะ บรี ซรัฮ ญาวา นะ กาเญา กะ ตูฮัด เลอ ฌาดี บารัก มือญือมัฮ นู อาดา ฮีโดะ นู ตาโรฮ ดัฮ บีดา ซา ตูฮัด นู กือนา เดะ ฮาตี นะ ตูฮัด เลอ. นี เลอ ฌาดี ลาฆู มือญือมัฮ กะ ตูฮัด นู กือนา ลาฆู นู ดาตัก เดะ ฮาตี นะ กาเญา. 2 ฌางัน ตูโรจ บือกะ จูตอ นะ โกะ ซือมียา ฮาดัจ อีนี ตาปี บรี ตูฮัด ซาเลด ฮาตี นะ กาเญา บรี ฌาดี ฮาตี นู บารู เลอ. กะฆีเตอ กาเญา นะ บือเลฮ มือญาซัจ บรี ตาฮู จะ นู นามา ตูโรจ บือกะ ฮาตี นะ ตูฮัด. ลาฆู อีตู ฌาดี ลาฆู นู บาฌิ เตอ นู กือนา เดะ ฮาตี นะ ตูฮัด ลาฆู นู ปือนอฮ บาฌิ ซือมูฮา เลอ. 3 ซาเบะ ตูฮัด บือเลฮ ฮาลัย บรี ซือลามัจ กะ กู ดัฮ กะฆีเตอ กู มือเลา ฌางัน กาเญา ราตา ซือมียา จะ ฌางัน นะ บรีงัจ จะ ญาวา ตะอาซิก ฌาดี บือซัยํ ลือเบฮ เดะ ลาฆู นู ซูโงฮ เลอ. ตาปี ซิกมาซิก กือนา อีงัจ ตูโรจ กะ ลาฆู บาฌิ นู บือฆูนา เตอ. บือกะ นู ตูฮัด บือเลฮ บรี ญา ปือจายา ตารา ดีฮา บรี ญา บรีงัจ ปาซัน ญาวา นะ ตะอาซิก ตารา อีตู เลอ. 4 กรานา-จะ บือกะ เดะ ซา ญาวา เตอ กีตา อาดา กลือกะ บาญะ ฌือแนฮ ตาปี โกะ กลือกะ อีตู อาดา ลาฆู บือกรือฌา นะ ญา ซิกมาซิก เลอ. 5 กะฆีเตอ ฌูฆา นู กีตา ลือกัจ บือซามา ฌางัน เยซู คริด ดัฮ เตอ กีตา นู บาญะ ซือมียา ฌาดี ญาวา แนฮ ซา อีตู เลอ. กีตา ซือมูฮา ปาคัจ ฌาดี กลือกะ นู ลือกัจ บือซามา-ซามา เดะ ซา ญาวา อีตู. 6 ตูฮัด เตอ ญา ฮาลัย บรี ซือลามัจ กะ กีตา บรี กีตา อาดา อากัน นู ปานัย โซก ซือมาจับ. กะฆีเตอ บรี กีตา ซูโรฮ โกะ อากัน อีตู บรี บาฌิ. ซือมียา ดีฮา นู ญา บรี ปานัย ตูโดฮ ปือมือเลา นะ ตูฮัด เตอ บรี ซือมียา อีตู มือญาเระ บือกะ นู ญา ปือจายา ดัฮ. 7 ซือมียา ดีฮา นู ปานัย บือกรือฌา ตูโลก กาวัด เตอ บรี ญา ตูโลก กะฆีเตอ เลอ. ซือมียา ดีฮา นู ปานัย อาฌัยํ บรี ญา อาฌัยํ กะฆีเตอ เลอ. 8 ซือมียา ดีฮา นู ปานัย ปูโฌะ-ฮาตี กาวัด บรี ญา ปูโฌะ-ฮาตี กะฆีเตอ ซือมียา ดีฮา นู ซูกา ฮาฆิ บือนา บารัก กะ กาวัด เตอ บรี ญา บูวัจ กะฆีเตอ ฌางัน ฮาตี ลือฆา เลอ. ซือมียา ดีฮา นู นะ บาวา ลูมอฮ นะ ตูฮัด บรี ญา ราเฌด บูวัจ กะฆีเตอ เลอ. ซือมียา ดีฮา นู นะ ตือจีฮัด กะ กาวัด บรี ญา ตือจีฮัด ปือนอฮ เดะ ฮาตี เลอ. 9 นู กาเญา ซายัก กะ กาวัด บรี ซายัก ฌางัน ฮาตี นู ซูโงฮ เลอ. บรี กาเญา บือชี ลาฆู นู ฌาฮัจ บูวัก ตาปี บรี ปือฆัก กือมัซๆ กะ ลาฆู นู บาฌิ เลอ. 10 บรี กาเญา ซายัก บือซามา-ซามา บือกะ ซายัก กะ ดีบราดี ฌูฆา. บรี ตูเฮะ กะ โกะ ดีบราดี บือซามา บือกะ กูญา บาฌิ เดะ ญาวา นะ ตะอาซิก เลอ. 11 ฌางัน นะ ฌาดี ซือมียา ปือญือฆัด ตาปี บรี กาเญา ราเฌด งูฆางู ตูโลก บือกรือฌา ลาฆู นะ ตูฮัด ปือนอฮ เดะ ฮาตี เลอ. 12 นู กาเญา อาดา ฮาระ กะ ตูฮัด บรี กาเญา ซูกา-ฮาตี กะฆีเตอ เลอ. บรี ตาฮัด-ฮาตี ลามา เดะ ลาฆู ซูซัฮ ปายัฮ. นู กาเญา บือซาโวจ กะ ตูฮัด บรี กาเญา ซือมาตา บือซาโวจ เตด บราดู เลอ. 13 บรี กาเญา ปาฮาฆิ บือนา บารัก นะ กาเญา ฌางัน โกะ ซือมียา นะ ตูฮัด นู ฮาฌะ. บรี กาเญา ซาโมจ บรี บาฌิ ซือมียา ตูโปะ อาซิก นู มาแรฮ มือนูปัก เดะ รูมัฮ นะ กาเญา. 14 ดัฮ ซือมียา ดีฮา ปรือกัด กาเญา เตอ กาเญา กือนา มีตา เดะ ตูฮัด นะ บรี ซือลามัจ กะ กูญา. ซูโงฮ เลอ กือนา มีตา บรี ซือลามัจ ฌางัน นะ ซูปัฮ อาโบยํ กะ กูญา. 15 ซือมียา ดีฮา นู ซูกา-ฮาตี กาเญา กือนา ซูกา-ฮาตี บือซามา. ซือมียา ดีฮา นู มือนาแงฮ กาเญา กือนา มือนาแงฮ บือซามา เลอ. 16 บรี กาเญา บรีงัจ ซา ฮาตี บือซามา ซือมูฮา เลอ. ฌางัน นะ งันตืองัน มือโอจ กะ ญาวา ตาปี บรี ยอม มือนูโนะ บูวัจ บือกรือฌา นู มิดือมิ. ฌางัน นะ อีงัจ จะ อีซี กาเญา ตะอาซิก ปานัย อากัน. 17 ดัฮ ซาปา บูวัจ ฌาฮัจ กะ กาเญา ฌางัน บูวัจ ฌาฮัจ บาลัซ ปาเระ กะ ญา เลอ. บรี กาเญา ตือตู-ฮาตี ดูลู นู นะ บูวัจ ตูโรจ กะ ลาฆู ดีฮา นู โกะ ซือมียา ราตาๆ ซาโงะ จะ บาฌิ ดัฮ เลอ. 18 ตารา ดีฮา นู กาเญา ตะอาซิก นะ บูวัจ บือเลฮ บรี กาเญา กูวาซา ดูโดะ ซือนัง ซือลามัจ ฌางัน ซือมียา ซือมูฮา. 19 ลูมอฮ นู กู ซายัก เออ ฌางัน บรี กาเญา นะ บูวัจ บาลัซ เลอ ตาปี กือนา ซรัฮ บรี กะ ตูฮัด กรัจ ฮูโกบ เลอ ซาเบะ ซูรัจ ปือมือเลา นะตูฮัด มือเลา จะ "กู เลอ นะ บูวัจ บาลัซ ลาฆู นู ซือมียา บูวัจ ฌาฮัจ. กู นี เลอ นะ บูวัจ บรี ลาฆู ฌาฮัจ บาลิ ปาเระ กะ ญา เตอ เลอ." ตูฮัด ญา จะ. 20 ตาปี กาเญา กือนา บูวัจ ซือรูปา ปือมือเลา นะ ตูฮัด นู จะ "ดัฮ ซือตรู นะ เกา ลาปัยํ บรี กะ ญา มากัด. ดัฮ ญา ดาฆา อาเย เตอ บรี กะ ญา โอะ เลอ. ซาเบะ-จะ นู เกา บูวัจ กะฆีเตอ นะ บรี ญา บราซา จือและ มาตา โตระ เลอ. " 21 ฌางัน อาลัฮ เดะ ลาฆู ฌาฮัจ ตาปี กือนา บูวัจ บาฌิ บีดา นะ ฌือนัฮ เดะ ลาฆู ฌาฮัจ ดัฮ เลอ.
1 ราตา ซือมียา กือนา มือนูโนะ บูวัจ ตูโรจ กะ โกะ ซือมียา ซัยํ-บือซัยํ นะ ลูวัก เลอ. ซาเบะ-จะ ดัฮ ตูฮัด เดะ อาตัซ เตด บรี ฮอย ซาปา นะ ฌาดี บือซัยํ บือเลฮ. นู ฌาดี โกะ ลูวัก เตอ ตูฮัด บือเลฮ ตืองะ ดัฮ. 2 กะฆีเตอ ซือมียา ดีฮา นู บลาวัด ฌางัน ลูวัก ญา นะ บลาวัด ฌางัน ลาฆู นู ตูฮัด บือเลฮ ตืองะ ดัฮ. โกะ ซือมียา นู บลาวัด กะฆีเตอ นะ บูวัจ บรี ญาวา นะ กูญา ตะอาซิก กือนา กรัจ ฮูโกบ เลอ. 3 ซือมียา นู บูวัจ บาฌิ ญา เตด ปายัฮ ตาโกจ เดะ ลูวัก ตาปี ซือมียา บูวัจ ฌาฮัจ ญา เลอ ฆาโดฮ นะ ตาโกจ. เกา ตีเมา นะ ตาโกจ เดะ ลูวัก เฆอ? บรี เกา บูวัจ บาฌิ เลอ ญา นะ บือเลฮ ปูฌี กะ เกา. 4 ซาเบะ ลูวัก ญา ฌาดี ปราโซฮ นะ ตูฮัด นู บือกรือฌา ตูโลก เกา. ตาปี ดัฮ เกา บูวัจ ฌาฮัจ กือนา ตาโกจ เลอ กรานา นู ญา มือฆัฮ เตอ ญา นะ กรัจ ฮูโกบ บือเลฮ. ญา ฌาดี ปราโซฮ นะ ตูฮัด บีดา ญา นะ มูซัยํ กรัจ ฮูโกบ โกะ ซือมียา นู บูวัจ ฌาฮัจ เลอ. 5 ซาเบะ กะฆีเตอ ฆาโดฮ นะ มือนูโนะ บูวัจ ตูโรจ บูกัด กรานา ตาโกจ เดะ ลาฆู นู ตูฮัด นะ มูซัยํ กรัจ ฮูโกบ ซา ลาฆู เตอ ตาปี บีดา นะ ตูโรจ กะ ลาฆู นู ฮาตี นะ กาเญา ลีฮัจ จะ บาฌิ ดัฮ ฌูฆา. 6 กรานา ซา ลาฆู อีตู ฌูฆา กาเญา ฆาโดฮ บายัยํ อาเซน. ซาเบะ-จะ วะตู โกะ ลูวัก กูวาซา บือกรือฌา ลาฆู นะ กูญา เตอ กูญา ฌาดี ซือมียา บือกรือฌา ลาฆู นะ ตูฮัด เดะ อาตัซ. 7 กะฆีเตอ เลอ กือนา บายัยํ บรี กะ ลูวัก บือกะ ลาฆู นู บือฆูนา ซือมูฮา. กือนา บายัยํ โกะ อาเซน ราตา มาจับ. กือนา มือนูโนะ-ฮาตี ตูเฮะ ตาโกจ กะ กูญา ฌูฆา. 8 ฌางัน นะ ตือฮูตัก เดะ ซือมียา ดีฮา. กือนา อาดา ฮูตัก เดะ ซา ลาฆู อีนี บือเลฮ ฌาดี-จะ บรี ซายัก บือซามา-ซามา. ซาเบะ-จะ ซือมียา ดีฮา นู ซายัก กะ กาวัด เตอ ญา บือเลฮ บูวัจ ตูโรจ กะ ปือมือเลา ฮูโกบ นะ ตูฮัด บรี ปือนอฮ บาฌิ ดัฮ. 9 ซาเบะ อาดา ปือมือซัด นะ ตูฮัด นู จะ "ฌางัน บือกาเซฮ. ฌางัน บูนอฮ กาวัด. ฌางัน จูรี บารัก นะ กาวัด. ฌางัน ดือกี บารัก นะ กาวัด เลอ." ตาปี เตด-จะ โกะ ปือมือซัด อีนี เฆอ-จะ โกะ ปือมือซัด อาซิกๆ โปด ญา รือฆัจ ซือกาลี เดะ ซา ปือมือซัด อีนี นู จะ "เกา กือนา ซายัก กะ กาวัด ซือรูปา บือกะ ซายัก กะ ญาวา ตะอาซิก เลอ." 10 ซือมียา นู ซายัก กะ กาวัด ญา นะ ฮอย เตด บูวัจ ฌาฮัจ กะ ญา. กะฆีเตอ เลอ ซือมียา นู ซายัก เตอ ซือรูปา บือกะ ญา บูวัจ ตูโรจ โกะ ปือมือซัด ฮูโกบ ซือมูฮา ดัฮ เลอ. 11 กือนา บูวัจ กะฆีเตอ เลอ ซาเบะ กาเญา ตาฮู ปาซัน ฮาดัจ อีนี จะ รอจ วะตู ดัฮ นะ บรี กาเญา นะ ดาฮานี บีกัซ เลอ. กรานา-จะ ตะเดะ กีตา บารู ปือจายา ดัฮ เตอ อารี นู กีตา นะ ฮีโดะ ลือปัซ บาฌิ ญา มาแรฮ ดาปิก ซือรูโลยํ ซรือปะ นะ รอจ ดัฮ. 12 มาลับ ญา ซรือปะ นะ ฮาบิฮ เตอ ซียัก โปด ดาปิก นะ รอจ ดัฮ. กะฆีเตอ เลอ บรี กีตา บราดู บูวัก เดะ ลาฆู บือกรือฌา นู โซะ กือลับ. บรี กีตา อาเมด โกะ ซือนาตา มาแรฮ ปากัย บีดา นะ บือปรัก เดะ โซะ จรัฮ. 13 บรี กีตา บูวัจ ตูโรจ บรี กือนา ลาฆู บือกะ ซือมียา นู ดูโดะ โซะ ซียัก. ฌางัน นะ อูซิ บรามัย มาโบะ อาระ. ฌางัน นะ บือกาเซฮ บูวัจ ลาฆู เตด บือฆูนา. ฌางัน นะ บลาวัด ดือกี กะ กาวัด บือซามา-ซามา เลอ. 14 ตาปี กือนา อาเมด ลาฆู บาฌิ นะ ตูฮัด เยซู คริด มาแรฮ ปากัย เดะ ญาวา เลอ. บราดู บือฮีมัจ กะ ปรางัย นู บือดูซา นะ กาเญา. ฌางัน นะ ตูโรจ กะ ลาฆู ฆาละ กะฆีเตอ.
1 ซือมียา นู ปือจายา เตด กือฌะ-กือมัซ เตอ กาเญา กือนา ซาโมจ ญา บรี บาฌิ ตาปี ฌางัน นะ บือตือฆัฮ ฌางัน ญา ปาซัน ลาฆู นู ญา ฆาโดฮ บูวัจ ตูโรจ กะ ลาฆู มานามา. 2 โซะ ซือมียา นู ซา นู ญา ปือจายา บาฌิ ดัฮ ญา มากัด บือเลฮ ราตา ฌือแนฮ. โซะ ซือมียา นู ซา นู ญา ปือจายา เตด กือฌะ-กือมัซ เตอ ญา นะ ปาตัก เตด มากัด โกะ ลูลู. 3 ซือมียา นู มากัด เตอ ฌางัน บรี ญา มือเลา มือฌัฮ กะ ซือมียา นู ปาตัก เลอ. ซือมียา นู ปาตัก โปด ฌางัน บรี ญา อาดู ซือมียา นู มากัด ซาเบะ ตูฮัด เดะ อาตัซ เลอ บือเลฮ ซาโมจ ญา ดัฮ. 4 เกา ฌาดี ซาปา เลอ นู เกา นะ อาดู ปราโซฮ นะ ซือมียา อาซิก? นู ปราโซฮ อีตู นะ ดูโดะ กือฌะ เฆอ-จะ นะ รือบัฮ ลือเบฮ เดะ ตูฮัด นะ ญา ตะอาซิก เลอ. ญา นะ ดูโดะ กือฌะ บือเลฮ กรานา ตูฮัด ญา มือฆัฮ บูวัจ บรี ญา ดูโดะ กือฌะ บือเลฮ. 5 โซะ ซือมียา นู ซา ญา อีงัจ จะ อาดา โกะ อารี บือซัยํ ลือเบฮ เดะ อารี อาซิก. โซะ ซือมียา นู ซา ลาฆี ญา อีงัจ จะ โกะ อารี ราตาๆ ซามา บายา ฮาปา เลอ. บรี ราตา ซือมียา ตือตู เดะ ฮาตี นะ กูญา ตะอาซิก ดัฮ เลอ. 6 ซือมียา ดีฮา นู ตูเฮะ กะ อารี บือซัยํ เตอ ญา ตูเฮะ บีดา ปูฌี กะ ตูฮัด เลอ. ซือมียา ดีฮา นู มากัด ราตา ฌือแนฮ ญา มากัด บีดา ปูฌี กะ ตูฮัด เตอ กรานา ญา บรี ซือลามัจ กะ ตูฮัด ปาซัน บารัก มากัด อีตู เลอ. ซือมียา นู ปาตัก ตีเมา มากัด ญา ปาตัก บีดา ปูฌี กะ ตูฮัด. ญา โปด บรี ซือลามัจ กะ ตูฮัด ฌูฆา. 7 เดะ ลูมอฮ กีตา เตอ ฮอย ซือมียา ดีฮา อาดา ฮีโดะ กรานา ญาวา นะ ตะอาซิก ฮอย ซือมียา ดีฮา มาตี กรานา ญาวา นะ ตะอาซิก ฌูฆา. 8 ดัฮ กีตา ฮีโดะ กีตา ฮีโดะ กรานา ตูฮัด เลอ. ดัฮ กีตา มาตี กีตา มาตี กรานา ตูฮัด ฌูฆา. กะฆีเตอ เตด-จะ กีตา นะ ฮีโดะ เฆอ-จะ นะ มาตี โปด กีตา ฌาดี นะ ตูฮัด ฮาปา. 9 ซาเบะ-จะ เยซู คริด ญา บือเลฮ มาตี ญา บือเลฮ ฮีโดะ ปาเระ เตอ กรานา ลาฆู อีนี จะ บีดา ญา นะ ฌาดี ตูฮัด นะ โกะ ซือมียา นู ฮีโดะ ฌางัน โกะ ซือมียา นู มาตี ดัฮ ฌูฆา เลอ. 10 ตาปี เกา เลอ บูวัจ นามา ปะ เกา อาดู อาดี-บราดี นะ เกา? โซะ เกา โปด บูวัจ นามา ปะ เกา มือเลา มือฌัฮ กะ อาดี-บราดี นะ เกา? ซาเบะ-จะ กีตา ซือมูฮา ฆาโดฮ นะ บือดีรี โซะ ฮึลด มูคา นะ ตูฮัด เดะ อาตัซ บีดา ญา นะ กรัจ ฮูโกบ กีตา. 11 กรานา ซูรัจ ปือมือเลา นะ ตูฮัด อาดา ฆาแรฮ ดัฮ จะ "ตูฮัด บือซัยํ เดะ อาตัซ ญา มือเลา กะฆีนี 'กู นี ฌาดี ตูฮัด นู ฮีโดะ ซือลาลู กะฆีเตอ เลอ ราตา ซือมียา นะ ตูกู ลูโตจ มือนูโนะ กะ กู ราตา ซือมียา นะ มือเลา ซาโงะ จะ กู ฌาดี ตูฮัด เดะ อาตัซ เลอ.' ญา จะ." 12 กะฆีเตอ เลอ กีตา ซือมูฮา นะ ฆาโดฮ ปี มือญาเระ ตีกัฮ กะ ตูฮัด ปาซัน โกะ ลาฆู ปือบูวัจ นะ กีตา ซิกมาซิก. 13 กะฆีเตอ ฌางัน บรี กีตา อาดู บือซามา-ซามา ลาฆี เลอ ตาปี กือนา ตือตู เดะ ฮาตี กะฆีนี บาฌิ ลาฆี จะ นะ ฮอย เตด บูวัจ ลาฆู นามา นู นะ ซือกัจ ฌาลัด นะ อาดี-บราดี นู ปือจายา บรี ญา ตือซีปะ รือบัฮ บูวัจ ลาฆู ดูซา. 14 บือกะ กู อาดา ลือกัจ บือซามา ฌางัน ตูฮัด เยซู เตอ กู ตือตู เดะ ฮาตี ตาฮู จะ ฮอย บารัก มากัด นามา นู กือนา ปาตัก เดะ อีซี ญา. ตาปี ซือมียา ดีฮา นู อีงัจ จะ บารัก อีตู ปาตัก เตอ ญา กือนา ปาตัก ดัฮ เลอ โซะ ซือมียา อีตู. 15 ดัฮ อาดี-บราดี นะ เกา นะ เตด ซือนัง-ฮาตี กรานา บารัก นู เกา มากัด เตอ กะฆีเตอ เกา เตด บือฌาลัด ตูโรจ กะ ลาฆู ซายัก ลาฆี เลอ. เยซู คริด ญา บือเลฮ มาตี กรานา อาดี-บราดี อีตู ดัฮ. กะฆีเตอ เลอ ฌางัน บูวัจ บรี บารัก มากัด นะ เกา นะ บรี กะ ญา ฌาฮานัม เลอ. 16 ลาฆู อีตู นู กาเญา อีงัจ จะ บาฌิ เตอ ฌางัน บรี โกะ ซือมียา นะ มือเลา มือฌัฮ กะ ญา บือเลฮ เลอ. 17 นู ตูฮัด เดะ อาตัซ ฌาดี ราฌา เดะ ฮาตี นะ กีตา ญา บูกัด ลาฆู จะ นะ มากัด ซือบารัก นามา นะ โอะ ซือบารัก นามา เตอ. ตาปี ญา ฌาดี กะฆีนี จะ บรี กีตา ตูโรจ กะ ลาฆู นู กือนา เดะ ฮาตี นะ ตูฮัด เตอ บรี กีตา ดูโดะ ซือนัง ซือลามัจ ซูกา-ฮาตี โตระ บือกะ ซือมืองัจ นะ ตูฮัด บาวา กีตา เลอ. 18 ซือมียา ดีฮา นู บูวัจ ตูโรจ กะ เยซู คริด กะฆีเตอ ญา บูวัจ บรี ตูฮัด ซูกา-ฮาตี กะ ญา บูวัจ บรี โกะ ซือมียา โปด มือโอจ กะ ญา ฌูฆา เลอ. 19 กะฆีเตอ เลอ บรี กีตา กูวาซา ตูโรจ กะ ลาฆู นู นะ บรี ดูโดะ ซือนัง ซือลามัจ นู นะ ตูโลก บรี กือฌะ-กือมัซ บือซามา-ซามา. 20 ฌางัน นะ บูวัจ บรี ลาฆู บือกรือฌา นะ ตูฮัด นะ บือนาซา กรานา บารัก มากัด เลอ. ราตา โกะ ซือบารัก ญา บาฌิ มากัด บือเลฮ ฮาปา. ตาปี ดัฮ ลาฆู นู นะ มากัด นามา เตอ นะ บูวัจ บรี กาวัด ตือซีปะ รือบัฮ บูวัจ ดูซา กะฆีเตอ ญา ตะอารัฮ เลอ. 21 นะ บูวัจ กะฆีนี บาฌิ จะ ตีเมา นะ มากัด ลูลู บือนาตัก ตีเมา นะ โอะ อาระ ตีเมา นะ บูวัจ ลาฆู มานามา โปด นู นะ บรี อาดี-บราดี นู ปือจายา นะ ตือซีปะ บูวัจ ดูซา. 22 นู เกา ตือตู เดะ ฮาตี ปาซัน ลาฆู อีตู เตอ บรี เกา ตือตู-ฮาตี ฌางัน ตูฮัด ซา ญา เลอ. ซือมียา ดีฮา นู ฮาตี นะ ญา เตด อูจะ กะ ญาวา ตะอาซิก วะตู บูวัจ ลาฆู นู ญา ลีฮัจ จะ บาฌิ เตอ ญา โปด ซือนัง ซือลามัจ เลอ. 23 ตาปี ซือมียา ดีฮา นู ฮาตี เตด ตือตู นู บรีงัจ ปี มาแรฮ เตอ วะตู ญา มากัด ญา กือนา ตูฮัด กรัจ ฮูโกบ ดัฮ ซาเบะ-จะ ญา เตด มากัด ฌางัน ฮาตี นู ปือจายา. ลาฆู ปือบูวัจ มานามา นู เตด มาแรฮ เดะ ฮาตี นู ปือจายา เตอ ญา ฌาดี ลาฆู ดูซา ฮาปา เลอ.
1 กีตา นู ปือจายา กือฌะ-กือมัซ เตอ ฌางัน ซือมาตา ตูโรจ กะ ฮาตี นะ ตะอาซิก ตาปี กีตา ปาโตจ นะ ตูโลก โกะ ซือมียา นู เตด กือฌะ เดะ ลาฆู นู กูญา ลือมัฮ. 2 บรี กีตา ซือมูฮา บูวัจ ตูโรจ กะ ฮาตี นะ กาวัด บรี ญา ซูกา-ฮาตี บีดา นะ บูวัจ บาฌิ ฌางัน ญา บรี ญา นะ ปือจายา กะ ตูฮัด กือฌะ บาญะ ซือรูโลยํ เลอ. 3 ซาเบะ-จะ เยซู คริด โปด ญา เตด บือเลฮ ตูโรจ กะ ฮาตี นะ ญา ตะอาซิก. ตาปี บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ "โอ ตูฮัด นู โกะ ซือมียา อูจะ มือฌัฮ กะ เกา เตอ โงฮ-ซูโงฮ ปือมือเลา มือฌัฮ อีตู กือนา กะ กู เลอ." 4 กรานา ลาฆู ซือมูฮา นู อาดา ฆาแรฮ ดูลู ดัฮ เดะ ซูรัจ ปือมือเลา นะ ตูฮัด เตอ อาดา ดัฮ บีดา นะ อาฌัยํ กีตา. ซูรัจ ปือมือเลา นะ ตูฮัด อีตู ญา ตูโลก บรี กีตา ตาฮัด-ฮาตี ลามา ตูโลก ปูโฌะ ฮาตี นะ กีตา ฌูฆา เตอ. ซาเบะ กะฆีเตอ เลอ กีตา อาดา ตือปัจ นะ ฮาระ. 5 มีตา ตูฮัด เดะ อาตัซ ญา เลอ นู บรี กีตา ตาฮัด-ฮาตี ลามา นู ปูโฌะ ฮาตี นะ กีตา เตอ มีตา เดะ ญา นะ บรี กาเญา บือปาคัจ บรี บาฌิ บือซามา ตูโรจ บือกะ เยซู คริด เลอ 6 บีดา กาเญา นะ บือซามา-ฮาตี ปาคัจ มือเลา ปูฌี กะ ตูฮัด บือซัยํ เดะ อาตัซ นู อาโปก นะ เยซู คริด ตูฮัด นะ กีตา เลอ. 7 กะฆีเตอ บรี กาเญา ซาโมจ กาวัด บือซามา-ซามา บีดา นะ บรี ปูฌี กะ ตูฮัด เลอ บือกะ ซือรูปา นู เยซู คริด บือเลฮ ซาโมจ กาเญา ฌูฆา ดัฮ. 8 ซาเบะ กู มือเลา ฌางัน กาเญา จะ เยซู คริด เตอ ญา มาแรฮ ฌาดี ซือมียา บือกรือฌา มือนูโลก ลูมอฮ บักซา อิซราเอน บีดา นะ บรี ลีฮัจ จะ นู ตูฮัด เดะ อาตัซ ญา รือมัก ซูโงฮ บีดา นะ บูวัจ บรี โกะ ปือมือเลา นู ตูฮัด บือเลฮ บือฌาญี ฌางัน โกะ บีลาแก นะ กูญา นะ ซุจ รือมัก ดัฮ เลอ. 9 กะฆีเตอ ฌูฆา ญา บูวัจ บรี โกะ ซือมียา บักซา อาซิก บือเลฮ ปูฌี กะ ตูฮัด กรานา ญา ตือจีฮัด บาฌิ เตอ บือกะ นู อาดา เดะ ซูรัจ ปือมือเลา นะ ตูฮัด นู จะ "ซาเบะ กะฆีเตอ กู นะ บรี ซือลามัจ กะ เกา เดะ ตืองัฮ ลูมอฮ ซือมียา บักซา อาซิก กู นะ มือญาญี ปูฌี กะ นามา นะ เกา เลอ." 10 อาดา ฌูฆา นู จะ "โอ โกะ ลูมอฮ ซือมียา บักซา อาซิก บรี กาเญา บือรามัย บือซามา ซูกา-ฮาตี ฌางัน ลูมอฮ นะ ตูฮัด เลอ." 11 อาดา ปูลัก นู จะ "ลูมอฮ ซือมียา ราตา บักซา เออ ปูฌี กะ ตูฮัด บือซัยํ เดะ อาตัซ เลอ. ลูมอฮ ซือมียา ซือมูฮา เออ มือโอจ กะ ตูฮัด เตอ เลอ." 12 นู อิซายา ญา มือเลา ปูลัก จะ "บือแนฮ นะ เจซี นะ มาแรฮ ซืออูรัก ญา นะ กือนา ตืองะ ดัฮ บรี ฌาดี ซือมียา บือบือลา ลูมอฮ บักซา อาซิก ญา เลอ นู นะ ฌาดี ตือปัจ ฮาระ นะ ลูมอฮ บักซา อาซิก." 13 มีตา เดะ ตูฮัด ญา นู บรี ฌาดี ตือปัจ ฮาระ นะ กีตา เตอ มีตา เดะ ญา นะ บรี กาเญา ซูกา-ฮาตี ซือนัง ซือลามัจ ปือนอฮ บาฌิ ดัฮ บือกะ กาเญา อาดา ปือจายา กะ ญา. บรี ญา บูวัจ กะฆีเตอ บีดา ซือมืองัจ นะ ตูฮัด นะ บูวัจ บรี กาเญา จาดัก กะ ตูฮัด บาญะ ซือรูโลยํ เลอ. 14 โกะ ดีบราดี นะ กู เออ อีซี กู ตะอาซิก ตือตู เดะ ฮาตี ปาซัน กาเญา จะ กาเญา บาฌิ ปือนอฮ ดัฮ เตอ ตาฮู ราตา ลาฆู ปือนอฮ ดัฮ ปานัย นะ อาฌัยํ ปรีงัจ กะ กาวัด บือซามา-ซามา บือเลฮ ฌูฆา เลอ. 15 ตาปี เดะ ซูรัจ อีนี กู อาดา ฮาตี บรานี ซูโงฮ บือเลฮ ฆาแรฮ ปรีงัจ กะ กาเญา ปาซัน ลาฆู ซือตืองัฮ. นู กู ฮาตี บรานี กะฆีเตอ ซาเบะ ตูฮัด ญา ฮาลัย บรี ซือลามัจ กะ กู 16 บีดา กู นะ ฌาดี ซือมียา บือกรือฌา นะ เยซู คริด นู บือกรือฌา ตูโลก ลูมอฮ บักซา อาซิก. กู บูวัจ ซือรูปา ฌาดี ซามี นู มือญาเระ บรีตา นู บาฌิ นะ ตูฮัด กะ ลูมอฮ กูญา เตอ บีดา นะ บาวา ลูมอฮ บักซา อาซิก อีตู มาแรฮ ฌาดี ซือรูปา บารัก มือญือมัฮ นู กือนา เดะ ฮาตี นะ ตูฮัด ซาเบะ ซือมืองัจ นะ ตูฮัด บือเลฮ ตืองะ กูญา ฌาดี ซือมียา นะ ตูฮัด. 17 กะฆีเตอ นู กู ลือกัจ บือซามา ฌางัน เยซู คริด เตอ กู งันตืองัน บือเลฮ เดะ ลาฆู นู กู บูวัจ บือกรือฌา นะ ตูฮัด. 18 ซาเบะ กู เตด บรานี นะ มือเลา ปาซัน ลาฆู นามา ลือเบฮ ซา ลาฆู อีตู นู เยซู คริด บือเลฮ บือกรือฌา ฌางัน กู บีดา กู นะ บาวา ลูมอฮ บักซา อาซิก มาแรฮ มือนีงัย กะ ตูฮัด. กู บูวัจ กะฆีเตอ ฌางัน ปือมือเลา มือญาเระ ฌางัน ลาฆู ปือบูวัจ ฌูฆา 19 ฌางัน ปือนานา ซีดี นู มือฆัฮ นู ปือและ ซูโงฮ ฌางัน ปือบูวัจ นู มือฆัฮ เดะ ซือมืองัจ นะ ตูฮัด เลอ. กะฆีเตอ ฮึนตะ เดะ นังฆรี เยรูซาเลม บือฌาลัด ปี ราตา ตือดะ รอจ กะ นังฆรี อีลีริคุม เตอ กู บือเลฮ มือญาเระ บรีตา นู บาฌิ ปาซัน เยซู คริด บรี ปือนอฮ ฮาบิฮ ดัฮ. 20 โงฮ-ซูโงฮ เตอ กู ตือตู จะ ตือปัจ ดีฮา นู กูญา เตด บือเลฮ ดืองัยํ ลาฆู นะ เยซู คริด ลาฆี เตอ กู ซือมาตา กูวาซา นะ ปี มือญาเระ บรีตา นู บาฌิ เดะ ตือปัจ อีตู เลอ. กู ตีเมา นะ บูวัจ รูมัฮ เดะ อาตัซ จาวัก นะ กาวัด เลอ. 21 ตาปี บือกะ ซูรัจ ปือมือเลา นะ ตูฮัด มือเลา จะ "โกะ ซือมียา อีตู นู ฮอย ซาปา ดือละ ปี มือญาเระ กะ กูญา ปาซัน ลาฆู นะ ญา กูญา เลอ นะ บือเลฮ ลีฮัจ. โกะ ซือมียา นู เตด ดือละ ดืองัยํ ลาฆู นะ ญา เตอ กูญา เลอ นะ บือเลฮ มาโซะ เดะ ฮาตี." 22 ซาเบะ ลาฆู กะฆีเตอ เลอ กู กือนา ซือกัจ บาญะ กาลี เตด ราซา มาแรฮ มียา กาเญา. 23 ตาปี วะตู อีนี กู ฮอย ตือปัจ นะ บือกรือฌา ลาฆี เดะ โซะ ซือบือลัฮ อีนี. บาญะ ตาโฮด อีนี กู บือเลฮ บือคานะ ซูโงฮ จะ นะ มาแรฮ มียา กาเญา. 24 กะฆีเตอ ตืองัฮ กู บือฌาลัด ปี กะ นังฆรี ซะเปน กู จาดัก จะ นะ บือเลฮ ซีงัฮ ฌือเงาะ ลีฮัจ กาเญา เลอ. ซูดัฮ กู ดูโดะ ซือนัง บาฌิ ฌางัน กาเญา ซา วะตู เตอ กาเญา นะ บือเลฮ ตูโลก อาตัจ กู บือฌาลัด ปี ปูลัก เลอ. 25 ตาปี วะตู อีนี เลอ กู ตืองัฮ ปี กะ นังฆรี เยรูซาเลม บีดา นะ ปี ตูโลก โกะ ซือมียา นะ ตูฮัด ตือปัจ อีตู. 26 ซาเบะ-จะ โกะ ลูมอฮ นะ ตูฮัด เดะ โซะ นังฆรี มาซิโดเนีย ฌางัน นังฆรี อาคายา เตอ กูญา ซูกา-ฮาตี บือกีรา จะ นะ มืองูเตะ ดูเวะ อาตัจ ปี ตูโลก โกะ ซือมียา นะ ตูฮัด นู ฮาฌะ เดะ นังฆรี เยรูซาเลม. 27 กูญา ซูกา-ฮาตี บือกีรา กะฆีเตอ. ตาปี โงฮ-ซูโงฮ กูญา ตือฮูตัก เดะ โกะ ซือมียา ฮาฌะ อีตู. ซาเบะ-จะ ลูมอฮ ซือมียา บักซา อาซิก บือเลฮ บาฮาเฆด บือซามา ฌางัน ลูมอฮ บักซา ยิว เดะ ลาฆู บาฌิ นู ตูฮัด บรี ดัฮ. กะฆีเตอ เลอ บือฆูนา ดัฮ นะ บรี กูญา ปาฮาฆิ โกะ บือนา บารัก นู บาฌิ โซะ ดือนียา บรี กะ ลูมอฮ ยิว ฌูฆา. 28 ตานา กู บูวัจ ลาฆู อีนี บรี ซือลือซัย ดัฮ จะ กู บือเลฮ ซรัฮ โกะ ดูเวะ มืองูเตะ บรี กะ กูญา อีตู ฮาบิฮ ดัฮ เตอ กู นะ บือฌาลัด ลาลู นังฆรี นะ กาเญา ปี รอจ กะ นังฆรี ซะเปน. 29 กะฆีเตอ กู ตาฮู จะ วะตู กู มาแรฮ รอจ กะ กาเญา กู นะ มาแรฮ ปาฮาฆิ บรี กะ กาเญา ลาฆู นู เยซู คริด นะ บรี ซือลามัจ กะ กาเญา ปือนอฮ มีเม เลอ. 30 โกะ ดีบราดี เออ นู กีตา ปือจายา กะ เยซู คริด ตูฮัด นะ กีตา เตอ นู ซือมืองัจ นะ ตูฮัด บรี กีตา ซายัก บือซามา-ซามา ฌูฆา กะฆีเตอ เลอ กู มีตา กือมัซๆ จะ บรี กาเญา นะ ปาคัจ ตูโลก บือซาโวจ บือซามา ฌางัน กู ฌางัน ฮาตี งูฆางู บือซาโวจ กะ ตูฮัด เดะ อาตัซ ปาซัน ลาฆู นะ กู เลอ. 31 บือซาโวจ เลอ มีตา บรี กู นะ บือเลฮ ลือปัซ เดะ ตางัน นะ โกะ ซือมียา นู ตีเมา ปือจายา เดะ นังฆรี ยูเดีย มีตา บรี โกะ ซือมียา นะ ตูฮัด เดะ นังฆรี เยรูซาเลม นะ ลีฮัจ จะ นู กู บือกรือฌา ตูโลก กูญา ฌาดี ลาฆู บาฌิ ซูโงฮ เลอ. 32 กะฆีเตอ ดัฮ กือนา เดะ ฮาตี นะ ตูฮัด กู นะ บือเลฮ มาแรฮ รอจ กะ กาเญา อาดา ลาฆู ซูกา-ฮาตี ซูโงฮ นะ บือเลฮ ดูโดะ บรี ซือนัง บาฌิ ฌางัน กาเญา เลอ. 33 ตูฮัด เดะ อาตัซ ญา นู บรี กีตา ดูโดะ ซือนัง ซือลามัจ เตอ มีตา บรี ญา นะ ดูโดะ บือซามา ฌางัน กาเญา ซือมูฮา เลอ. อาเมน.
1 กู นะ กีเรบ เฟบี อาดี นีบีนี นะ กีตา ปี กะ กาเญา. ญา ฌาดี ซือมียา บาฌิ ฌาดี ซือมียา บือกรือฌา มือนูโลก ลูมอฮ นะ ตูฮัด ตือปัจ นังฆรี เคนครียา. 2 มีตา บรี กาเญา ซาโมจ ญา เดะ นามา นะ ตูฮัด เลอ บือกะ โกะ ซือมียา นะ ตูฮัด ปาโตจ นะ บูวัจ. ญา นะ มีตา ตูโลก เดะ กาเญา ปาซัน ลาฆู นามา เตอ บรี กาเญา ตูโลก ญา กะฆีเตอ เลอ. ซาเบะ ญา โปด บือเลฮ ตูโลก โกะ ซือมียา บาญะ ตูโลก กู ตะอาซิก ฌูฆา ดัฮ. 3 กู กีเรบ บรีงัจ กะ ปริซีลา ฌางัน อาควีลา นู ฌาดี ซือมียา บือกรือฌา บือซามา ฌางัน กู เดะ ลาฆู นะ เยซู คริด. 4 กูญา ยอม บือบียัยํ ญาวา นะ กูญา รอจ กะ มาตี โปด บีดา นะ บรี กู ฮีโดะ. บูกัด ซา กู ตาปี โกะ ลูมอฮ นะ ตูฮัด ราตาๆ เดะ โกะ ลูมอฮ บักซา อาซิก กือนา บรี ซือลามัจ กะ กูญา ฌูฆา เลอ. 5 กู กีเรบ บรีงัจ ฌูฆา กะ ลูมอฮ นะ ตูฮัด นู บือมุน เดะ รูมัฮ นะ กูญา. กู กีเรบ บรีงัจ กะ เอเปเนตัด ซือมียา นู กู ซายัก นู ฌาดี ซือมียา ลามูลา เดะ โซะ นังฆรี เอเซีย นู ปือจายา กะ เยซู คริด. 6 กู กีเรบ บรีงัจ กะ มารียา ซือมียา นู บือเลฮ บือกรือฌา บาญะ ยู รือมัย กรานา ลูมอฮ กาเญา. 7 กู กีเรบ บรีงัจ กะ อันโดรนิคัด ฌางัน ยูนียัด โกะ นะบรานะ นะ กู นู กือนา รีฆะ กานัก เดะ ปือฌารา บือซามา ฌางัน กู ฌูฆา. กูญา ฌาดี ซือมียา นู กือนา มือโอจ เดะ ดาลับ ลูมอฮ ปือญูโรฮ นะ ตูฮัด ฌาดี ซือมียา นู ปือจายา กะ เยซู คริด ดูลู เดะ กู ฌูฆา. 8 กู กีเรบ บรีงัจ กะ อัมพลียาตัด ซือมียา นะ ตูฮัด นู กู ซายัก. 9 กู กีเรบ บรีงัจ กะ อูระบานัด ซือมียา บือกรือฌา บือซามา ฌางัน กามี เดะ ลาฆู นะ เยซู คริด. กีเรบ บรีงัจ ฌูฆา กะ ซะตาคิด ซือมียา นู กู ซายัก เลอ. 10 กู กีเรบ บรีงัจ กะ อาเปเลด ซือมียา นู เยซู คริด กือนา เดะ ฮาตี. กีเรบ บรีงัจ กะ โกะ ซือมียา เดะ รูมัฮ นะ อาริโตบูลัด. 11 กีเรบ บรีงัจ กะ เฮโรดีโยน นะบรานะ นะ กู. กีเรบ บรีงัจ กะ โกะ ซือมียา ซือรูมัฮ นะ นาระซิซัด นู ปือจายา กะ ตูฮัด. 12 กู กีเรบ บรีงัจ กะ ตรีเฟนา ฌางัน ตรีโฟซา ซือมียา บือกรือฌา ลาฆู นะ ตูฮัด. กีเรบ บรีงัจ ฌูฆา กะ ปือซิด ซือมียา นู กู ซายัก นู บือเลฮ บือกรือฌา บีดา ตูฮัด บาญะ ยู รือมัย. 13 กีเรบ บรีงัจ กะ รูฟัด ซือมียา นู ตูฮัด ปีเลฮ ดัฮ ฌางัน มะ เดะ ญา นู ฌาดี ซือรูปา บือกะ มะ เดะ กู ฌูฆา. 14 กู กีเรบ บรีงัจ กะ อาซินครีตัด ฟลีโฆน ฮือเมด ปัดโรบัด ฮือมัด ฌางัน ลูมอฮ ดีบราดี ปือจายา ซือมูฮา นู อาดา บือซามา ฌางัน กูญา. 15 กู กีเรบ บรีงัจ กะ ฟีโลโลฆัด ยูลียา เนเรยา ฌางัน อาดี นีบีนี เดะ ญา กะ โอลิมปัด ฌางัน ลูมอฮ ซือมียา นะ ตูฮัด ซือมูฮา นู อาดา บือซามา ฌางัน กูญา. 16 กาเญา กือนา บือฌาบัจ ตางัน บือซามา-ซามา บือกะ ฌาดี โกะ ซือมียา นะ ตูฮัด ซือมูฮา. โกะ ลูมอฮ นะ ตูฮัด เยซู คริด ซือมูฮา กูญา กีเรบ บรีงัจ กะ กาเญา. 17 โกะ ดีบราดี เออ กู ปรีงัจ กะ กาเญา บรี ฌาฆา ลีฮัจ โกะ ซือมียา อีตู นู บูวัจ บรี โกะ ซือมียา ปือจายา ปือจัฮ-บือลัฮ ตือซีเป เดะ ฌาลัด นะ ตูฮัด. กาเญา กือนา มืองือละ บูวัก เดะ โกะ ซือมียา กะฆีเตอ เลอ. 18 โกะ ซือมียา นู บูวัจ กะฆีเตอ กูญา เตด บูวัจ ตูโรจ กะ เยซู คริด ตูฮัด นะ กีตา ตาปี ซือมาตา ตูโรจ กะ ฮาตี โปรจ นะ กูญา ตะอาซิก เลอ. กูญา มือเลา บาฌิ มือโอจ กะ กาวัด กะฆีเตอ กูญา ตีปู ฮาตี นะ โกะ ซือมียา นู เตด ตาฮู อารัฮ. 19 ซาเบะ-จะ นู กาเญา มือนีงัย กะ ลาฆู นะ ตูฮัด ดัฮ เตอ ญา กือจัย ปี กะ ซือมียา ราตา ดัฮ. กะฆีเตอ กู โปด ซูกา-ฮาตี กรานา กาเญา. ตาปี กู นะ บรี กาเญา อาดา อากัน โซะ ลาฆู บาฌิ บรี บูดอ โซะ ลาฆู ฌาฮัจ เลอ. 20 เตด ลามา อีนี ตูฮัด เดะ อาตัซ นู บรี กีตา ดูโดะ ซือนัง ซือลามัจ เตอ ญา นะ กาจะ นู กือปาลา ฮาตู ซีตัด บรี ปีแญะ เดะ บาวัฮ ตาปะ กากี นะ กาเญา เลอ. มีตา เดะ เยซู ตูฮัด นะ กีตา นะ บรี ซือลามัจ กะ กาเญา ซือรูโลยํ เลอ. 21 ทิโมที ซือมียา บือกรือฌา บือซามา ฌางัน กู ญา กีเรบ บรีงัจ กะ กาเญา. ลูกีโย ยาโซน ฌางัน โซซิปาเตอ โกะ นะบรานะ นะ กู กูญา โปด กีเรบ บรีงัจ ฌูฆา. 22 กู นี ตือตีโย นู ฆาแรฮ ซูรัจ อีนี กู ฌาดี ซือมียา ปือจายา กะ ตูฮัด ฌูฆา. กู โปด กีเรบ บรีงัจ กะ กาเญา. 23 ฆาโย ซือมียา นู ซาโมจ กู บรี มือนูปัก เดะ รูมัฮ นะ ญา เตอ นู ซาโมจ ลูมอฮ นะ ตูฮัด ซือมูฮา บือมุน เดะ รูมัฮ นะ ญา ฌูฆา ญา กีเรบ บรีงัจ กะ กาเญา. เอรัดตัด นู ฌาดี ซือมียา ฌาฆา ฮัจ-ลีฮัจ ดูเวะ นะ นังฆรี อีนี ฌางัน กูวาระตัด อาดี-บราดี นะ กีตา กูญา กีเรบ บรีงัจ ฌูฆา เลอ. 25 บรี กีตา ปูฌี กะ ตูฮัด บือซัยํ เดะ อาตัซ เลอ. ญา นู มือฆัฮ นะ บือเลฮ บูวัจ บรี กาเญา ปือจายา กือฌะ-กือมัซ บือกะ อาดา เดะ บรีตา นู บาฌิ นู กู มือญาเระ ปาซัน นะ เยซู คริด. บรีตา อีตู เตอ ญา ปลีฮัจ บรี ซัฮ ลาฆู ดาลับ ซูโงฮ นู กาลา นูตู บูนี ลามา ดัฮ. 26 ตาปี วะตู อีนี เตอ โกะ ซูรัจ นะ ลูมอฮ ซือมียา ตูโดฮ ลาฆู นะ ตูฮัด กูญา บือเลฮ บูกา ลาฆู ดาลับ อีตู บรี ลีฮัจ บือฆารี ซัฮ. กะฆีเตอ ตูฮัด นู อาดา ซือลาลู ญา ซูโรฮ บรี ลาฆู อีตู กือนา มือญาเระ บรี ตาฮู กะ โกะ ซือมียา ราตา บักซา เลอ บรี กูญา นะ บือเลฮ มือนีงัย ปือจายา กะ ญา. 27 ปูฌี เลอ กะ ตูฮัด เดะ อาตัซ ตูฮัด แนฮ ซา นู ปานัย อากัน. ปูฌี กะ ญา กรานา เยซู คริด ซือลาลู ซือมาญัก-รอจ เลอ. อาเมน.
1 กู เปาโล กือนา ปาเงน ดัฮ ฌาดี ปือญูโรฮ นะ เยซู คริด ตูโรจ ฮาตี นะ ตูฮัด เดะ อาตัซ. กู ฌางัน โซซะเทเน อาดี-บราดี นะ กีตา 2 กามี ฆาแรฮ ซูรัจ อีนี กีเรบ บรี กะ ลูมอฮ นะ ตูฮัด นู อาดา เดะ นังฆรี โกริน. ตูฮัด บือเลฮ บูวัจ บรี กาเญา ฌาดี ซือมียา จรัฮ บาฌิ ลือกัจ บือซามา ฌางัน เยซู คริด. ญา ปาเงน กาเญา ดัฮ ฌาดี โกะ ซือมียา นะ ญา บือซามา ฌางัน โกะ ซือมียา ซือมูฮา ราตาๆ นู บือซาโวจ ตรือเบะ นามา นะ ตูฮัด เยซู คริด เตอ ตูฮัด นะ กูญา ตูฮัด นะ กีตา ฌูฆา. 3 มีตา เดะ ตูฮัด นู อาโปก นะ กีตา มีตา เดะ ตูฮัด เยซู คริด นะ บรี ซือลามัจ กะ กาเญา นะ บรี กาเญา ดูโดะ ซือนัง ซือลามัจ เลอ. 4 กู บรี ซือลามัจ กะ ตูฮัด นะ กู ซือลาลู ปาซัน ลาฆู นะ กาเญา ซาเบะ ตูฮัด เตอ ญา บือเลฮ ฮาลัย บรี ซือลามัจ กะ กาเญา ดัฮ กรานา เยซู คริด เลอ. 5 กะฆีเตอ นู กาเญา อาดา ลือกัจ บือซามา ฌางัน ญา ตูฮัด บรี กาเญา อาดา โกะ บือนา บาฌิ ซือมูฮา บาญะ ซูโงฮ เลอ บรี กาเญา ปานัย มือเลา อาดา อากัน เดะ ราตา มาจับ. 6 กะฆีเตอ เลอ ปือมือเลา ซะซี ปาซัน เยซู คริด อาดา กือฌะ-กือมัซ เดะ ตืองัฮ กาเญา ดัฮ. 7 กะฆีเตอ วะตู กาเญา ฌาฆา นาตี อารี อีตู นู เยซู คริด ตูฮัด นะ กีตา นะ มาแรฮ ปลีฮัจ เตอ กาเญา เตด ปูตุซ นามา เลอ เดะ โกะ อากัน นู ปานัย นู ตูฮัด ฮาลัย บรี ดัฮ. 8 เยซู เตอ ญา นะ บูวัจ บรี กาเญา กือฌะ-กือมัซ ฌูฆา ตือดะ รอจ กะ อารี ปือญูดัฮ บรี กาเญา ฮอย ตือปัจ นะ กือนา มือฌัฮ นามา โปด เดะ อารี อีตู นู เยซู คริด ตูฮัด นะ กีตา นะ บาลิ มาแรฮ ปาเระ. 9 ตูฮัด เดะ อาตัซ ญา รือมัก ซูโงฮ เตอ. ญา เลอ นู บือเลฮ ปาเงน กาเญา บรี กาเญา นะ บือรามัย บือซามา ฌางัน นานะ นะ ญา เยซู คริด เตอ ตูฮัด นะ กีตา. 10 อาดี-บราดี นะ กู เออ กู มีตา เดะ กาเญา บรี กือมัซๆ เตอ มีตา เดะ นามา นะ เยซู คริด ตูฮัด นะ กีตา บรี กาเญา ซือมูฮา นะ บือปาคัจ บือซามา เดะ โกะ ปือมือเลา นะ กาเญา เลอ. กะฆีเตอ นะ ฮอย ลาฆู ปือจัฮ-บือลัฮ เดะ ตืองัฮ กาเญา. ตาปี บรี กาเญา บือปาคัจ บือซามา อาดา ซา ฮาตี ซือมูฮา เลอ. 11 โกะ อาดี-บราดี นะ กู เออ กู มือเลา กะฆีนี ซาเบะ-จะ โกะ ซือมียา ซือรูมัฮ นะ นีบีนี ปือนามา คะโลเอ กูญา บือเลฮ มาแรฮ มือญาเระ กะ กู จะ ลูมอฮ กาเญา อาดา บือตือฆัฮ-ตือฆัฮ ซามา กาเญา. 12 กู มือเลา กะฆีนี จะ กาเญา โซก ซืออูรัก มือเลา ซิกมาซิก จะ "กู นี ตูโรจ กะ เปาโล" ซือตืองัฮ จะ "กู ตูโรจ กะ อะโปโล" ซือตืองัฮ จะ "กู ตูโรจ กะ เปโตร " ซือตืองัฮ จะ "กู ตูโรจ กะ เยซู คริด" ฌูฆา. 13 กะฮามี เลอ? เยซู คริด กือนา ปือจัฮ ดัฮ เฆอ? กู เปาโล กือนา กาจิก เดะ กายู ปลีตัก กรานา กาเญา ดัฮ เฆอ? กาเญา ซาโมจ ลาฆู ซือลับ เดะ อาเย เดะ นามา นะ เปาโล เฆอ? บูกัด ฌาดี กะฆีเตอ เลอ. 14 กู บรี ซือลามัจ กะ ตูฮัด จะ กู บือเลฮ บูวัจ บรี ซา คริซือปัด ฌางัน ฆาโย ซาโมจ ลาฆู ซือลับ เดะ อาเย. ลือเบฮ เดะ กูญา กู เตด บือเลฮ บูวัจ บรี ซาปา ซือลับ เดะ อาเย เลอ 15 ตีเมา บรี ซือมียา ดีฮา นะ บือเลฮ มือเลา จะ ญา ซาโมจ ลาฆู ซือลับ อีตู เดะ นามา นะ กู ดัฮ. 16 นาตี ดูลู เลอ อาดา โกะ ซือมียา ซือรูมัฮ นะ ซือเตฟานัด กู บือเลฮ บูวัจ บรี กูญา ซือลับ เดะ อาเย ฌูฆา. ลือเบฮ เดะ อีตู กู เตด ตาฮู จะ กู บูวัจ บรี ซาปา โปด ซาโมจ ลาฆู ซือลับ เดะ อาเย ดัฮ. 17 กะฮามี โปด เยซู คริด เตด บือเลฮ ซูโรฮ กู นะ บรี โกะ ซือมียา ซือลับ เดะ อาเย เตอ ตาปี ญา ซูโรฮ กู ปี มือญาเระ บรีตา นู บาฌิ เลอ. ญา บรี กู มือญาเระ กะฆีเตอ บือกะ ซือมียา นู ฮอย อากัน เตด ปานัย มือเลา เตอ ตาโกจ-จะ กู นะ บูวัจ บรี ลาฆู นู เยซู คริด มาตี เดะ กายู ปลีตัก นะ เตด ฌาดี นามา เลอ. 18 ซาเบะ-จะ โซะ โกะ ซือมียา นู ตืองัฮ ฌาฮานัม เตอ กูญา ลีฮัจ จะ ปือมือเลา มือญาเระ ปาซัน ลาฆู นู เยซู มาตี เดะ กายู ปลีตัก เตอ ฌาดี ปือมือเลา บูดอ. ตาปี โซะ กีตา นี นู ตูฮัด ตืองัฮ บูวัจ บรี ฮีโดะ ลือปัซ บาฌิ เตอ ปือมือเลา อีตู ฌาดี ปือมือฆัฮ นะ ตูฮัด เลอ. 19 กรานา ซูรัจ ปือมือเลา นะ ตูฮัด มือเลา จะ "ลาฆู ปานัย อากัน นะ ซือมียา บาอากัน กู นะ บูวัจ บรี บือนาซา. ลาฆู นู ซือมียา ปานัย บลาฌัยํ บือเลฮ มาโซะ เดะ ฮาตี เตอ กู นะ บูวัจ บรี เตด ฌาดี นามา." ตูฮัด ญา จะ. 20 กะฆีเตอ เปะ ดีฮา เลอ ซือมียา ปานัย อากัน? เปะ ดีฮา เลอ ซือมียา ปานัย อาฌัยํ ปือมือซัด นะ ตูฮัด? เปะ ดีฮา เลอ ซือมียา ปานัย บือตือฆัฮ เดะ ฮาดัจ อีนี? ตาปี ตูฮัด เดะ อาตัซ บือเลฮ บูวัจ บรี ลาฆู ปานัย อากัน โซะ ดือนียา อีนี ฌาดี ลาฆู บูดอ ฮาบิฮ ดัฮ เลอ. 21 ซาเบะ-จะ นู ตูฮัด ญา อาดา อากัน บาญะ ซูโงฮ ญา บูวัจ บรี ฌาดี กะฆีนี จะ โกะ ซือมียา เดะ ดือนียา อีนี นู ตูโรจ ลาฆู ปานัย อากัน นะ กูญา ตะอาซิก เตอ กูญา นะ บือกราลา ฌางัน ตูฮัด กะฆีเตอ ฮอย เตด บือเลฮ เลอ. ตาปี ตูฮัด บือเลฮ บือกีรา จะ นะ อาเมด ลาฆู นู กีตา มือญาเระ อีนี นู กูญา อีงัจ จะ ฌาดี ลาฆู บูดอ เตอ มาแรฮ ตูโลก ลูมอฮ ซือมียา นู ปือจายา บรี ฮีโดะ ลือปัซ บาฌิ เลอ. 22 ลูมอฮ บักซา ยิว กูญา มีตา ลีฮัจ โกะ ปือนานา นู ซีดี เลอ ลูมอฮ บักซา กรีก กูญา มียา ลาฆู ปานัย อากัน โปด. 23 ตาปี โซะ กามี เลอ กามี บีตาฮู ปาซัน เยซู คริด นู กือนา กาจิก เดะ กายู ปลีตัก ดัฮ. โซะ ลูมอฮ บักซา ยิว เตอ ลาฆู อีตู บูวัจ บรี กูญา ตือซีปะ ดัฮ. โซะ ลูมอฮ บักซา อาซิก โปด กูญา ลีฮัจ จะ ฌาดี ลาฆู บูดอ. 24 ตาปี โซะ ลูมอฮ ซือมียา นู ตูฮัด ปาเงน ดัฮ เตอ ฌางัน ลูมอฮ ยิว ลูมอฮ กรีก ซามา เตอ ลาฆู อีตู บรี ลีฮัจ จะ เยซู คริด ตะอาซิก เตอ ญา ฌาดี นู ปือมือฆัฮ นะ ตูฮัด เดะ อาตัซ เลอ ญา ฌาดี นู ปานัย อากัน นะ ตูฮัด เตอ เลอ. 25 ซาเบะ-จะ ลาฆู นู บูดอ นะ ตูฮัด ญา ปานัย อากัน ลือเบฮ เดะ โกะ ซือมียา เลอ. นู ลือมัฮ นะ ตูฮัด ญา มือฆัฮ ลือเบฮ เดะ โกะ ซือมียา ลาฆี เลอ. 26 กะฆีเตอ เลอ โกะ ดีบราดี เออ บรี กาเญา บรีงัจ ลีฮัจ วะตู ตูฮัด ปาเงน กาเญา กาเญา ฌาดี ซือมียา มาจับ นามา เลอ. โซะ ซือมียา เตอ เดะ ตืองัฮ กาเญา อาดา ซือมียา ปานัย อากัน เตด บราปา บาญะ ซือมียา. อาดา ซือมียา ซัยํ-บือซัยํ เตด บราปา บาญะ ซือมียา บือแนฮ บาฌิ เตด บราปา บาญะ เลอ. 27 ตาปี ตูฮัด เดะ อาตัซ บือเลฮ บือกีรา นะ ปีเลฮ โกะ ซือมียา นู ดือนียา อีนี กีรา จะ บูดอ เตอ บีดา นะ บูวัจ บรี โกะ ซือมียา นู ปานัย อากัน นะ จือและ. ตูฮัด ญา ปีเลฮ ซือมียา นู ดือนียา อีนี กีรา จะ ลือมัฮ เตอ บีดา นะ บูวัจ บรี ซือมียา ตือฆัยํ-อูรัจ นะ จือและ มาตา ฌูฆา เลอ. 28 ญา ปีเลฮ ซือมียา รือนัฮ โซะ ดือนียา เตอ นู กูญา ดูทุ มีเซ-จะ ซือมียา นู เตด ฌาดี นามา โปด บีดา นะ บูวัจ บรี โกะ ซือมียา ซัยํ-บือซัยํ นะ เตด ฌาดี นามา ฌูฆา เลอ. 29 กะฆีเตอ ฮอย ซือมียา ดีฮา นู นะ บือเลฮ งันตืองัน โซะ ฮึลด มูคา นะ ตูฮัด เดะ อาตัซ เลอ. 30 ตาปี ตูฮัด เลอ บือเลฮ บูวัจ บรี กาเญา ฌูฆา อาดา ฮีโดะ ลือกัจ บือซามา ฌางัน เยซู คริด. ญา บือเลฮ บูวัจ บรี เยซู อีตู ฌาดี บือกะ ลาฆู ปานัย อากัน กรานา กีตา เลอ ฌาดี-จะ เยซู เลอ นู บูวัจ บรี กีตา บาฌิ-ตือปัจ โซะ ฮึลด มูคา นะ ตูฮัด. ญา เลอ นู บูวัจ บรี กีตา ฌาดี ซือมียา จรัฮ บาฌิ นะ ญา ญา เลอ นู ตือบุซ กีตา บรี ลือปัซ เดะ ดูซา ดัฮ. 31 กะฆีเตอ เลอ บือกะ อาดา ฆาแรฮ ดัฮ เดะ ซูรัจ ปือมือเลา นะ ตูฮัด นู จะ "ซือมียา นู นะ งันตืองัน เตอ บรี ญา งันตืองัน เดะ ลาฆู นู ตูฮัด บูวัจ ดัฮ เลอ."
1 โกะ ดีบราดี เออ วะตู กู มาแรฮ รอจ กะ กาเญา ดัฮ นะ มือญาเระ ปือมือเลา ซะซี ปาซัน ตูฮัด เดะ อาตัซ เตอ กู เตด บือเลฮ มาแรฮ บือกะ ซือมียา ปานัย มือเลา นู อาดา อากัน บาญะ เลอ. 2 ซาเบะ กู บือเลฮ ตือตู-ฮาตี ดัฮ จะ วะตู กู อาดา เดะ ตืองัฮ กาเญา ลาฆู นู อาซิก เดะ เยซู คริด ฌางัน ลาฆู นู ญา กือนา กาจิก เดะ กายู ปลีตัก ดัฮ เตอ กู นะ เตด ปือดูลี เลอ. 3 กะฆีเตอ วะตู กู อาดา บือซามา ฌางัน กาเญา กู ลือมัฮ ลือเตฮ ตาโกจ ซูโงฮ ญาวา กือตัยํ. 4 ปือมือเลา อาฌัยํ ปือมือเลา นู กู มือญาเระ ฌูฆา เตอ ญา บูกัด บือกะ ซือมียา ปานัย อากัน ปานัย ปูโฌะ บรี ซือมียา ปือจายา กะ ญา. ตาปี ญา ปลีฮัจ บรี ซัฮ จะ นู ซือมืองัจ นะ ตูฮัด ญา มือฆัฮ ซูโงฮ. 5 กะฆีเตอ เลอ นู กาเญา อาดา ปือจายา เตอ บูกัด กรานา ลาฆู ปานัย อากัน นะ ซือมียา ตาปี กรานา ลาฆู นู ปือมือฆัฮ นะ ตูฮัด เลอ. 6 ตาปี กามี ฌูฆา นะ มือเลา ซา ลาฆู นู อาดา อากัน ฌางัน โกะ ซือมียา นู บือซัยํ เดะ ลาฆู ปือจายา. ญา บูกัด ลาฆู นู อาดา อากัน บือกะ โซะ ฮาดัจ อีนี บือกะ โกะ กือปาลา นู บือบือลา เดะ ฮาดัจ อีนี. โกะ กือปาลา อีตู ตืองัฮ นะ ฮาบิฮ เตด ฌาดี นามา เลอ. 7 ตาปี กามี มือเลา ปาซัน ลาฆู ปานัย อากัน นะ ตูฮัด เดะ อาตัซ เลอ ลาฆู นู ดาลับ ซูโงฮ นู ญา บูนี ดัฮ. ดูลู เดะ ตูฮัด บือฌาดี ดือนียา ดัฮ ญา บือเลฮ บือกีรา ลาฆู อีตู บรี ตือตู บีดา กีตา นะ บือซัยํ มูคา. 8 โกะ กือปาลา นู บือบือลา เดะ ฮาดัจ อีนี เตอ กูญา เตด บือเลฮ ตาฮู ลาฆู อากัน นะ ตูฮัด อีตู เลอ. กะ กูญา ตาฮู ดัฮ กูญา เตด บือเลฮ อาเมด ตูฮัด นู บือซรี ซูโงฮ บาวา ปี กาจิก เดะ กายู ปลีตัก เลอ. 9 ตาปี-จะ บือกะ อาดา ซูรัจ นู ฆาแรฮ ดัฮ จะ "อาดา ซา ลาฆู ฮอย ซาปา บือเลฮ ลีฮัจ ดัฮ ฮอย ซาปา บือเลฮ ดืองัยํ ดัฮ ฮอย ซาปา บือเลฮ อีงัจ เดะ ฮาตี โปด. ลาฆู อีตู เลอ ตูฮัด เดะ อาตัซ บือเลฮ ซียะ ดัฮ บีดา โกะ ซือมียา นู ซายัก กะ ญา." ญา จะ. 10 ซาเบะ-จะ กีตา อีนี เลอ ตูฮัด เดะ อาตัซ บือเลฮ ซูโรฮ ซือมืองัจ นะ ญา ตูโลก ปลีฮัจ ลาฆู อีตู บรี กะ กีตา ตาฮู. ซือมืองัจ นะ ตูฮัด เลอ ญา มือโซะ ตาฮู ลาฆู ราตา ซือมูฮา มีเซ-จะ ลาฆู ดาลับ นะ ตูฮัด โปด. 11 ซาเบะ ฮอย ซาปา อาซิก ตาฮู ลาฆู เดะ ดาลับ ฮาตี นะ ซือมียา เตอ ซา ซือมืองัจ นะ ซือมียา อีตู นู ตาฮู เลอ. กะฆีเตอ ฌูฆา เลอ ซา ซือมืองัจ นะ ตูฮัด นู ตาฮู ลาฆู เดะ ดาลับ ฮาตี นะ ตูฮัด เดะ อาตัซ. 12 ตาปี โซะ กีตา นี กีตา บือเลฮ ซาโมจ ซือมืองัจ นู ตูฮัด อาตัจ บรี ดัฮ บูกัด ซือมืองัจ นะ ดือนียา อีนี. กะฆีเตอ กีตา นะ บือเลฮ มาโซะ เดะ ฮาตี โกะ บือนา บาฌิ นู ตูฮัด ฮาลัย บรี กะ กีตา ดัฮ. 13 กะฆีเตอ ฌูฆา กามี มือเลา ปาซัน บือนา อีตู บูกัด ฌางัน โกะ ปือมือเลา นู กามี บลาฌัยํ บือกะ ลาฆู อากัน นะ ซือมียา ดัฮ เตอ ตาปี ฌางัน ปือมือเลา นู ซือมืองัจ นะ ตูฮัด อาฌัยํ บรี ดัฮ เลอ. ลาฆู โซะ ซือมืองัจ อีตู กามี อาฌัยํ กะฆีเตอ บรี มาโซะ เดะ ฮาตี นะ โกะ ซือมียา นู อาดา ซือมืองัจ นะ ตูฮัด. 14 โกะ ซือมียา นู ฮอย ซือมืองัจ นะ ตูฮัด เตอ กูญา นะ ซาโมจ โกะ บือนา บาฌิ นู ซือมืองัจ อีตู นะ ฮาลัย บรี ฮอย เตด บือเลฮ เลอ. โกะ บือนา อีตู กูญา เตด บือเลฮ มาโซะ เดะ ฮาตี อีงัจ จะ ฌาดี ลาฆู บูดอ. ซาเบะ-จะ ฌาดี ลาฆู นู ซือมืองัจ นะ ตูฮัด ซา ญา เลอ นะ ตูโลก บรี ซือมียา มือโซะ ตาฮู เลอ. 15 ตาปี ซือมียา นู อาดา ซือมืองัจ นะ ตูฮัด เตอ ญา นะ บือเลฮ มือโซะ ตาฮู ลาฆู ซือมูฮา ฮอย ซาปา บือเลฮ มือโซะ ตาฮู ฮาตี นะ ญา ฌูฆา. 16 บือกะ ซูรัจ ปือมือเลา นะ ตูฮัด มือเลา จะ "ซาปา เลอ บือเลฮ ตาฮู ฮาตี นะ ตูฮัด เดะ อาตัซ? ซาปา เลอ บือเลฮ อาฌัยํ ญา?" ญา จะ. ตาปี กามี อีนี อีงัจ เดะ ฮาตี ตูโรจ ฮาตี นะ เยซู คริด เลอ.
1 โกะ ดีบราดี เออ กาลา อีตู กู นะ มือเลา ฌางัน กาเญา ซือรูปา มือเลา ฌางัน ซือมียา นู ตูโรจ โซะ ซือมืองัจ นะ ตูฮัด เตด บือเลฮ ดัฮ เลอ. ตาปี กือนา มือเลา ฌางัน กาเญา ซือรูปา มือเลา ฌางัน ซือมียา นู ตูโรจ ลาฆู โซะ ญาวา ซือรูปา ฌาดี นานะ ดือมิ บารู ปือจายา กะ เยซู คริด ดัฮ. 2 กู บือเลฮ บือบือลา กาเญา บรี มากัด โกะ อาเย ดาดา บูกัด ซือบารัก มากัด นู ตือฆัยํ ซาเบะ-จะ ดูลู อีตู กาเญา นะ มากัด โกะ ซือบารัก อีตู เตด บือเลฮ ดัฮ. มีเซ-จะ วะตู อีนี โปด นะ มากัด เตด บือเลฮ ลาฆี เลอ. 3 ซาเบะ-จะ กาเญา อาดา ตูโรจ กะ ลาฆู โซะ ญาวา นะ กาเญา ลาฆี. วะตู กาเญา ซาเกะ-ฮาตี ฌางัน กาวัด บือปาซัน ฌางัน กาวัด กาเญา ตูโรจ กะ ลาฆู โซะ ญาวา บูกัด เฆอ? กาเญา ตูโรจ กะ ลาฆู นะ โกะ อูมัจ-ซือมียา ราตาๆ บูกัด เฆอ? 4 กรานา นู ซือมียา อีนี มือเลา จะ "กู ตูโรจ กะ เปาโล" ซือมียา อีตู มือเลา จะ "กู ตูโรจ กะ อะโปโล" กาเญา ฌาดี ซือรูปา โกะ ซือมียา บาญะๆ บูกัด เฆอ? 5 อะโปโล อีนี ญา ฌาดี ซาปา เลอ? เปาโล อีนี ญา ฌาดี ซาปา เลอ? กามี ฌาดี ซือมียา มือนูโลก นู บือเลฮ อาฌัยํ กาเญา บรี มาแรฮ ปือจายา. กามี โซก ซืออูรัก ตูโลก บือกะ ตูฮัด บือเลฮ ซูโรฮ กามี ดัฮ เลอ. 6 กู เปาโล ฌาดี ซือรูปา ซือมียา ตานัม ปูโฮด. อะโปโล เตอ ฌาดี ซือรูปา ซือมียา จือลอยํ อาเย. ตาปี ตูฮัด เลอ ญา นู บูวัจ บรี บือตูโมฮ. 7 กะฆีเตอ ซือมียา ตานัม ซือมียา จือลอยํ อาเย โปด ญา เตด ฌาดี นามา เลอ. ตาปี ตูฮัด เดะ อาตัซ นู บูวัจ บรี บือตูโมฮ เตอ ญา เลอ นู ฌาดี ซัยํ-บือซัยํ ซูโงฮ. 8 ซือมียา นู ตานัม ฌางัน ซือมียา จือลอยํ อาเย อีตู กูญา ซามา บายา เลอ. ตาปี กูญา โซก ซืออูรัก นะ ซาโมจ รือฆา อูปัฮ บือกะ กูญา บือเลฮ กรือฌา ดัฮ. 9 ซาเบะ-จะ กามี ฌาดี ซือมียา กรือฌา บือซามา บีดา ตูฮัด. กาเญา โปด ฌาดี ซือรูปา บือนัก นะ ตูฮัด ฌาดี ซือรูปา รูมัฮ บือซัยํ นะ ตูฮัด เลอ. 10 นู ตูฮัด บือเลฮ ฮาลัย บรี ซือลามัจ กะ กู ดัฮ กู บือเลฮ บือกรือฌา จาจะ จาวัก กะฆีเตอ ดัฮ ซือรูปา ตูกัก รูมัฮ นู ปานัย เตอ. บารู อาดา ซือมียา อาซิก ปูลัก มาแรฮ กรือฌา บือฮูโบก ตามัฮ ฌาดี รูมัฮ. ตาปี บรี ซือมียา ซือมูฮา ฌาฆา บรี บาฌิ จะ นะ ฮูโบก บือตามัฮ กะฮามี เลอ. 11 ซาเบะ-จะ เยซู คริด เลอ ฌาดี จาวัก อีตู นู จาจะ ดัฮ. ซือมียา ดีฮา นะ จาจะ จาวัก อาซิก ปูลัก เตด บือเลฮ ดัฮ เลอ. 12 เดะ อาตัซ จาวัก อีตู เตอ มีเซ โกะ ซือมียา ซือตืองัฮ นะ อาเมด โกะ มัซ ปีระ อีตัด โกะ กายู รูโปจ ลาลัก มาแรฮ บือฮูโบก เตอ 13 ตาปี ลาฆู บือกรือฌา นะ ซือมียา โซก ซืออูรัก นะ บือเลฮ บือฆารี ซัฮ บาฌิ. ซาเบะ-จะ อารี อีตู เตอ นะ บูวัจ บรี ปลีฮัจ ฌางัน อาปี บรี ลีฮัจ บือฆารี ซัฮ. กะฆีเตอ ฌูฆา อาปี อีตู นะ มือญาซัจ บรี ลีฮัจ ลาฆู บือกรือฌา นะ ซือมียา ซือมูฮา จะ ญา ฌาดี กะฮามี เลอ. 14 ซือมียา ดีฮา นู อาเกะ รูมัฮ บือฮูโบก เดะ อาตัซ จาวัก อีตู เตอ กะ ลาฆู บือกรือฌา นะ ญา ตาฮัด อาปี บือเลฮ ซือมียา อีตู เลอ ญา นะ บือเลฮ รือฆา อูปัฮ บาฌิ. 15 ตาปี กะ ลาฆู บือกรือฌา นะ ซือมียา ดีฮา กือนา ตูนู ฮางอซ ซือมียา อีตู ญา นะ ปูตุซ รือฆา อูปัฮ นะ ญา. ตาปี ญาวา นะ ญา ตะอาซิก นะ ฮีโดะ ลือปัซ บาฌิ ตาปี ซือรูปา ซือมียา ลือปัซ เดะ อาปี ดัฮ. 16 กาเญา ซือมูฮา เตด ตาฮู เฆอ? ลูมอฮ กาเญา ฌาดี บาลัย นะ ตูฮัด อาดา ซือมืองัจ นะ ตูฮัด ดูโดะ เดะ ดาลับ ลูมอฮ กาเญา. 17 กะ ซือมียา ดีฮา บูวัจ บรี บาลัย นะ ตูฮัด บือนาซา ตูฮัด ญา นะ บูวัจ บรี ซือมียา อีตู บือนาซา ฌูฆา. ซาเบะ-จะ บาลัย นะ ตูฮัด ญา จรัฮ บาฌิ ซูโงฮ. ลูมอฮ กาเญา เลอ นู ฌาดี บาลัย อีตู. 18 ฌางัน บรี ซือมียา ดีฮา มืออูปัย กะ ญาวา ตะอาซิก เลอ. กะ ซือมียา ดีฮา เดะ ลูมอฮ กาเญา อีงัจ จะ ญา ตะอาซิก อาดา อากัน ตูโรจ กะ ลาฆู เดะ ฮาดัจ อีนี บรี ซือมียา อีตู ฌาดี ซือรูปา ซือมียา บูดอ บีดา นะ บือเลฮ อาดา อากัน ซูโงฮ. 19 ซาเบะ-จะ อากัน โซะ ดือนียา อีนี ฌาดี ลาฆู บูดอ โซะ ฮึลด มูคา นะ ตูฮัด บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ "ตูฮัด นะ รีฆะ โกะ ซือมียา บืออากัน ฌางัน ลาฆู อากัน นะ กูญา ตะอาซิก." 20 ซูรัจ อีตู มือเลา ปูลัก จะ "ตูฮัด ญา ตาฮู จะ ลาฆู อีงัจ เดะ ฮาตี นะ ซือมียา นู อาดา อากัน ญา ฮอย เตด ตือปากัย เลอ." ญา จะ. 21 กะฆีเตอ ฌางัน บรี ซือมียา ดีฮา งันตืองัน จะ ญา ตูโรจ กะ ซือมียา อีนี ซือมียา อีตู. ซาเบะ-จะ บือนา ซือมูฮา ฌาดี นะ กาเญา ดัฮ เลอ 22 เตด-จะ เปาโล อะโปโล เปโตร ดือนียา อีนี ลาฆู ฮีโดะ ลาฆู มาตี วะตู อีนี เฆอ-จะ วะตู โซะ ฮึลด เตอ บือนา บารัก อีนี ซือมูฮา ฌาดี นะ กาเญา ดัฮ เลอ. 23 กาเญา ฌูฆา ฌาดี นะ เยซู คริด. เยซู คริด เตอ ญา ฌาดี นะ ตูฮัด เดะ อาตัซ ปูลัก เลอ.
1 บรี กาเญา บรีงัจ กะ กามี จะ กามี ฌาดี ซือมียา บือกรือฌา นะ เยซู คริด ฌาดี ซือมียา นู ตูฮัด บือเลฮ กีเรบ บรี ฌาฆา ฮัจ-ลีฮัจ ลาฆู ดาลับ ซูโงฮ นะ ญา. 2 กะฆีเตอ โซะ ซือมียา ฌาฆา อีตู เตอ อาดา ซา ลาฆู อีนี จะ ญา กือนา ฌาดี ซือมียา ฮาตี รือมัก. 3 ตาปี มีเซ-จะ กาเญา เฆอ-จะ ซือมียา ดีฮา โปด นะ มือญาซัจ มียา ลาฆู ซาลัฮ เดะ ญาวา นะ กู ตาปี กู นี เลอ อีงัจ จะ ลาฆู มือญาซัจ อีตู ฌาดี ลาฆู ดือมิ-ตอจ. มีเซ-จะ ญาวา นะ กู ตะอาซิก โปด กู ฮอย เตด มือญาซัจ เลอ. 4 กู นี เตด ตาฮู จะ กู บูวัจ ซาลัฮ เดะ ลาฆู นามา. ตาปี มีเซ กะฆีเตอ กู เตด ลือปัซ เดะ ลาฆู ฮูโกบ เตอ. ตูฮัด เลอ นู นะ มือญาซัจ กู. 5 กะฆีเตอ เลอ ฌางัน บรี กาเญา กรัจ ฮูโกบ เดะ ลาฆู มานามา ดูลู นู นะ รอจ กะ วะตู อีตู เตอ ตือดะ รอจ กะ อารี นู ตูฮัด เยซู นะ บาลิ มาแรฮ ปาเระ. ญา เลอ นะ ปลีฮัจ ลาฆู นู บูนี ดัฮ เดะ โซะ กือลับ บรี บือฆารี ซัฮ. ญา นะ บรี ลีฮัจ ฌูฆา ลาฆู นู อาดา เดะ ดาลับ ฮาตี นะ โกะ ซือมียา. เดะ อารี อีตู เตอ ตูฮัด เดะ อาตัซ นะ ปูฌี กะ ซือมียา โซก ซืออูรัก บือกะ ปาโตจ ญา นะ ซาโมจ ดัฮ เลอ. 6 อาดี-บราดี เออ นู กู บือเลฮ มือเลา ซีงี เตอ ปาซัน ญาวา นะ กู ฌางัน อะโปโล ฌูฆา กู มือเลา บีดา นะ ตูโลก ลูมอฮ กาเญา บรี กาเญา นะ ลีฮัจ กามี ฌาดี จูตอ บือกะ นู จะ "ฌางัน บูวัจ ลือเบฮ เดะ ซูรัจ ปือมือเลา นะ ตูฮัด". ฌางัน บรี ซือมียา ดีฮา นะ งันตืองัน กีรา จะ ซือมียา อีตู บาฌิ เดะ ซือมียา อีนี เลอ. 7 ซาเบะ-จะ ซาปา เลอ บือเลฮ บูวัจ บรี กาเญา บาฌิ บือซัยํ เดะ กาวัด? กาเญา อาดา ลาฆู นามา นู กาเญา เตด บือเลฮ ซาโมจ? กะฆีเตอ เลอ กะ ซาโมจ ดัฮ บูวัจ นามา ปะ กาเญา งันตืองัน ซือรูปา เตด บือเลฮ ซาโมจ ลาลู เลอ? 8 กาเญา กือญัง ดัฮ ซูโงฮ เฆอ? กาเญา กายา ดัฮ ซูโงฮ เฆอ? มีเซ-จะ ฮอย กามี ตาปี กาเญา ฌาดี ราฌา ดัฮ ซูโงฮ เฆอ? กามี ซูกา นะ บรี กาเญา นะ บือบือลา ซือรูปา ฌาดี ราฌา บือซูโงฮ-ซูโงฮ เลอ บีดา กามี นะ บือเลฮ บือบือลา บือซามา ฌางัน กาเญา. 9 ซาเบะ กู อีงัจ จะ ตูฮัด เดะ อาตัซ บือเลฮ บูวัจ บรี กามี นู ฌาดี ปือญูโรฮ นะ ญา เตอ ฌาดี ซือมียา ฮูโฌก ปือญูดัฮ ฌาดี ซือรูปา ซือมียา นู กือนา กรัจ ฮูโกบ รอจ กะ มาตี เตอ บีดา โกะ ดือนียา ราตาๆ ฌาดี-จะ โกะ ฮูลู-บาลัก ฌางัน โกะ อูมัจ-ซือมียา ฌูฆา นะ ฌือเงาะ ลีฮัจ กะ กามี อาดา ลาฆู ปือและ-ฮาตี ซูโงฮ เลอ. 10 กามี ฌาดี ซือมียา บูดอ กรานา ลีฮัจ กะ เยซู คริด ตาปี กาเญา ฌาดี ซือมียา นู ปานัย อากัน นอ ลือกัจ บือซามา ฌางัน เยซู คริด. กามี ฮอย อูรัจ ตาปี กาเญา อาดา อูรัจ บาญะ เอะ. กาเญา เตอ ฌาดี ซือมียา บือซัยํ มูคา ตาปี กามี นี ฌาดี ซือมียา เตด บือฆูนา ดัฮ. 11 รอจ กะ วะตู อีนี กามี อาดา ลาปัยํ ซือบารัก มากัด ดาฆา อาเย ปูตุซ โกะ ซือบารัก ปากัย กือนา รือเปะ ฮอย รูมัฮ นะ ดูโดะ เลอ. 12 กามี กูวาซา บือกรือฌา บรัจ ฌางัน ตางัน นะ กามี ตะอาซิก เลอ. วะตู กือนา กูญา บือมากี กามี บรี ซือลามัจ กะ กูญา. วะตู กือนา กูญา ปรือกัด กามี ตาฮัด-ฮาตี บือเลฮ เลอ. 13 วะตู กือนา อูจะ ฌาฮัจ กามี กูวาซา มือเลา บาฌิ บาลัซ ปาเระ กะ กูญา. กามี ฌาดี ซือรูปา บือกะ โกะ ราปัฮ เดะ ดือนียา อีนี ฌาดี ซือรูปา ซือบารัก นู ตะอารัฮ นู เตด บือฆูนา ตือดะ รอจ กะ วะตู อีนี เลอ. 14 กู เตด บือเลฮ ฆาแรฮ ลาฆู กะฆีนี บีดา นะ บูวัจ บรี กาเญา จือและ มาตา ตาปี ฆาแรฮ ดัฮ บีดา นะ ปรีงัจ กะ กาเญา ซือรูปา กาเญา ฌาดี โกะ นานะ นะ กู นู กู ซายัก. 15 ซาเบะ-จะ มีเซ กาเญา นะ อาดา ซือมียา ฌาฆา กาเญา เดะ ลาฆู ปือจายา กะ เยซู คริด บือรีบู-รีบู อูรัก โปด ตาปี กาเญา อาดา ปะ แนฮ ซืออูรัก. ซาเบะ-จะ นู กู บือเลฮ มือญาเระ บรีตา นู บาฌิ บรี กาเญา ปือจายา กะ เยซู คริด ดัฮ เตอ กะฆีเตอ กู นี เลอ บือเลฮ บรานะ กาเญา ดัฮ. 16 กะฆีเตอ กู มีตา กือมัซๆ บรี กาเญา นะ บูวัจ ตูโรจ บือกะ จูตอ นะ กู. 17 ซาเบะ ลาฆู อีนี เลอ กู บือเลฮ ซูโรฮ ทิโมที ปี ฌือเงาะ ลีฮัจ กาเญา. ญา เตอ ฌาดี บือกะ นานะ นะ กู นู กู ซายัก ฌาดี ซือมียา ฮาตี รือมัก ซืออูรัก เดะ ลาฆู นะ ตูฮัด. ญา นะ บือเลฮ ปรีงัจ กะ กาเญา บรี กาเญา ตาฮู บรี บาฌิ จะ กู อาดา ตูโรจ ฌาลัด นะ เยซู คริด กะฮามี ซือตืองัฮ บือกะ กู อาฌัยํ เดะ โกะ ลูมอฮ นะ ตูฮัด ราตา ตือปัจ ซือมูฮา เลอ. 18 กาเญา ซือตืองัฮ งันตืองัน ดัฮ อีงัจ จะ กู นะ เตด บือเลฮ มาแรฮ รอจ กะ กาเญา. 19 ตาปี กาเลา-จะ กือนา เดะ ฮาตี นะ ตูฮัด กู นะ มาแรฮ รอจ กะ กาเญา งัจบางัจ เลอ. กะฆีเตอ กู นะ บือเลฮ ตาฮู ปาซัน นะ โกะ ซือมียา นู งันตืองัน อีตู บูกัด ปือมือเลา นะ กูญา ตาปี ลาฆู มือฆัฮ นู ซีดี นะ กูญา อาดา ซูโงฮ เฆอ? 20 ซาเบะ-จะ นู ซือมียา ดีฮา อาดา ตูฮัด เดะ อาตัซ ฌาดี ราฌา นะ ญา ญา ฆาโดฮ ปลีฮัจ เดะ ลาฆู ปือมือฆัฮ นู ซีดี บูกัด ซา เดะ โกะ ปือมือเลา เตอ. 21 กะฮามี เลอ? นะ บรี กู บาวา กายู มาแรฮ รือเปะ กาเญา เฆอ? เฆอ-จะ นะ บรี กู มาแรฮ ฌางัน ฮาตี ซายัก ฮาตี บือแฌะ? กาเญา นะ อาเมด นู ดีฮา เลอ?
1 นี เลอ อาดา บรีตา จะ ซือมียา เดะ ตืองัฮ กาเญา บือเลฮ บูวัจ ลาฆู ซาลัฮ บือกาเซฮ นู ตะอารัฮ โตระ บือกะ โกะ ซือมียา นู เตด ปือจายา โปด กูญา เตด บูวัจ กะฆีเตอ เลอ. ฌาดี-จะ ซือมียา ซืออูรัก บือเลฮ อาเมด บีนี นะ ปะ เดะ ญา มาแรฮ ฌาดี บีนี นะ ญา ตะอาซิก. 2 กะฆีเตอ กาเญา งันตืองัน บือเลฮ กะฮามี เลอ? โงฮ-ซูโงฮ กาเญา ฆาโดฮ มือญือซัน-ฮาตี บูกัด เฆอ? กาเญา ฆาโดฮ โปรฮ ซือมียา อีตู บรี ตรือเบะ เดะ ลูมอฮ กาเญา เลอ. 3 มีเซ-จะ ญาวา นะ กู ฌาโวฮ เดะ กาเญา เตอ ตาปี โซะ ฮาตี นะ กู กู อาดา บือซามา ฌางัน กาเญา เลอ. กะฆีเตอ บือกะ ซือรูปา กู อาดา บือซามา ซูโงฮ กู บือเลฮ กรัจ ฮูโกบ ซือมียา นู บูวัจ ตะอารัฮ กะฆีเตอ ดัฮ. กรัจ ฮูโกบ ดัฮ เดะ นามา นะ ตูฮัด เยซู เลอ. 4 วะตู กาเญา บือมุน บือซามา อาดา ฮาตี นะ กู บือซามา ฌูฆา อาดา นู ปือมือฆัฮ นะ เยซู ตูฮัด นะ กีตา ดูโดะ บือซามา ฌูฆา เตอ 5 กาเญา กือนา ซรัฮ ซือมียา อีตู บรี กะ กือปาลา ฮาตู ซีตัด บีดา ญาวา ญา นะ บือนาซา ตาปี ซือมืองัจ นะ ญา นะ ฮีโดะ ลือปัซ บาฌิ เดะ อารี กรัจ ฮูโกบ นะ ตูฮัด เลอ. 6 ลาฆู งันตืองัน นะ กาเญา เตด บือฆูนา เลอ. กาเญา เตด ตาฮู เฆอ ปือมือเลา นู จะ " ราฆี ดีกิ-ตอจ เตอ นู บูวัจ บรี ตือโปก กือโมก ฮาบิฮ ซือกือโตน"? 7 บรี กาเญา บาโซฮ บูวัก ราฆี ลามา อีตู กะฆีเตอ กาเญา นะ ฌาดี ซือรูปา ตือโปก ซือกือโตน นู บารู นู ฮอย ราฆี เลอ บือกะ กาเญา ฌาดี บาฌิ ซูโงฮๆ ดัฮ. ซาเบะ-จะ เยซู คริด เตอ นู ซือรูปา อานะ กาเมก นะ กีตา เดะ ลาฆู บรามัย ลือปัซ ปี เตอ ญา เตอ เลอ กือนา บูนอฮ มือญือมัฮ ดัฮ. 8 กรานา กะฆีเตอ บรี กีตา บือรามัย ลาฆู อีตู บือซามา เลอ บูกัด ฌางัน ลาฆู ดูซา ลาฆู ฌาฮัจ ซือรูปา ตือโปก โรตี นู อาดา ราฆี ลามา อีตู ตาปี ฌางัน ฮาตี รือมัก ฌางัน ลาฆู ซูโงฮ ซือรูปา ตือโปก โรตี นู ฮอย ราฆี. 9 กู บือเลฮ ฆาแรฮ ซูรัจ อาตัจ กะ กาเญา มือญาเระ จะ ฌางัน บือเฆาะ โกะ ซือมียา ซาลัฮ นู บือกาเซฮ. 10 ตาปี กู เตด บือเลฮ บลารัก ตีเมา บรี กาเญา นะ บือเฆาะ โกะ ซือมียา เดะ ดือนียา อีนี มีเซ-จะ กูญา ฌาดี ซือมียา ซาลัฮ บือกาเซฮ เตอ ซือมียา ฮาลูบา ซือมียา ปือญามุน เตอ ซือมียา มือญือมัฮ กะ บราลา โปด. ซาเบะ-จะ กะ กู บลารัก กะฆีเตอ กาเญา ซือมูฮา ฆาโดฮ นะ ลารี บูวัก เดะ ดือนียา อีนี เลอ. 11 ตาปี วะตู อีนี กู ฆาแรฮ ซูรัจ ปือซัด กะ กาเญา จะ กะ ซือมียา ดีฮา บือเลฮ นามา จะ ฌาดี อาดี-บราดี นู ปือจายา ตาปี ญา อาดา บูวัจ ลาฆู ซาลัฮ บือกาเซฮ ลาฆี ฌาดี ซือมียา ฮาลูบา ซือมียา มือญือมัฮ กะ บราลา ซือมียา มูโลจ ฌาฮัจ ซือมียา ลือกัจ อาระ ซือมียา กีจอฮ กาวัด ฌางัน นะ บือเฆาะ เลอ ซือมียา กะฆีเตอ. มีเซ-จะ นะ มากัด บือซามา โปด ฌางัน เลอ. 12 บูกัด ลาฆู นะ กู นู นะ กรัจ ฮูโกบ โกะ ซือมียา วัยํ-ลูวัยํ. โซะ ซือมียา วัยํ-ลูวัยํ อีตู ตูฮัด เดะ อาตัซ เลอ ญา นะ กรัจ ฮูโกบ. ตาปี กาเญา เลอ กือนา กรัจ ฮูโกบ โกะ ซือมียา เดะ ตืองัฮ กาเญา บูกัด เฆอ? บือกะ ซูรัจ ปือมือเลา นะ ตูฮัด จะ "บรี กาเญา โปรฮ ซือมียา นู บูวัจ ฌาฮัจ อีตู ตรือเบะ เดะ ลูมอฮ นะ กาเญา บูวัก เลอ." ญา จะ.
1 กะ ซือมียา ดีฮา เดะ ลูมอฮ นะ กาเญา บือปาซัน ฌางัน ดีบราดี นู ปือจายา ญา บรานี ปี บือดะวา โซะ ฮึลด มูคา นะ ซือมียา นู เตด ปือจายา บูกัด ซือมียา ปือจายา เฆอ? ฌางัน บรี ฌาดี กะฆีเตอ เลอ. 2 กาเญา เตด ตาฮู เฆอ โกะ ซือมียา นะ ตูฮัด นะ กรัจ ฮูโกบ ดือนียา อีนี? กะฆีเตอ เลอ กะ กาเญา นะ กรัจ ฮูโกบ ดือนียา อีนี เตอ กาเญา เตด ปาโตจ นะ บือกีรา กรัจ ฮูโกบ ปาซัน โกะ ลาฆู มิดือมิ ซูโงฮ เฆอ? 3 กาเญา เตด ตาฮู เฆอ กีตา นะ กรัจ ฮูโกบ ลูมอฮ ฮูลู-บาลัก นะ ตูฮัด? กะฆีเตอ บาญะ ลือเบฮ เดะ อีตู กีตา ปาโตจ นะ บือเลฮ กรัจ ฮูโกบ โกะ ลาฆู เดะ ดือนียา อีนี เลอ. 4 กะ กาเญา บือปาซัน บือซามา ลาฆู โซะ ดือนียา อีนี กาเญา นะ บรี ซือมียา นู เตด บือซัยํ มูคา เดะ ลูมอฮ นะ ตูฮัด นะ กรัจ ฮูโกบ กาเญา เฆอ? 5 กู มือเลา กะฆีนี บีดา นะ บรี กาเญา จือและ มาตา. เดะ ตืองัฮ ลูมอฮ กาเญา ฮอย ซาปา ซืออูรัก เฆอ นู อาดา อากัน บีดา นะ บือเลฮ บูวัจ บรี ปาซัน อีตู นะ ซือลือซัย? 6 ตาปี โกะ ดีบราดี นู บือปาซัน ฌางัน ดีบราดี ฆาโดฮ นะ ปี บือดะวา โซะ ฮึลด ซือมียา นู เตด ปือจายา เฆอ? 7 โงฮ-ซูโงฮ เลอ วะตู กาเญา บือปาซัน บือซามา กะฆีเตอ ซือรูปา ลาฆู ปือจายา นะ กาเญา อูโนยํ ดัฮ. บูวัจ นามา ปะ กาเญา เตด ตาฮัด ลาฆู กือนา บูวัจ ฌาฮัจ กะ กาเญา? บูวัจ นามา ปะ กาเญา เตด บรี กาวัด กีจอฮ กะ กาเญา? กะฆีเตอ บาฌิ ลาฆี เลอ. 8 ตาปี กาเญา ตะอาซิก ปี บูวัจ ฌาฮัจ บือซามา-ซามา กีจอฮ บือซามา ฌางัน ลูมอฮ กาเญา ตะอาซิก. 9 กาเญา เตด ตาฮู เฆอ ซือมียา นู บูวัจ ฌาฮัจ นะ ซาโมจ ปือซากา เดะ ดือนียา บารู นะ ตูฮัด เตด บือเลฮ เลอ. ฌางัน บรี กูญา ตีปู บรี กาเญา ซือซัจ. ซือมียา ซาลัฮ บือกาเซฮ ซือมียา มือญือมัฮ กะ บราลา ซือมียา ซาลัฮ ลากี บีนี นะ กาวัด โกะ กีลากี อูซิ ซามา กีลากี เตอ 10 อูรัก ปือญูรี อูรัก ฮาลูบา อูรัก ลือกัจ อาระ เตอ อูรัก มูโลจ ฌาฮัจ อูรัก ปือญามุน ลูมอฮ อีนี ซือมูฮา เตอ นะ ซาโมจ ปือซากา เดะ ดือนียา บารู นะ ตูฮัด เตด บือเลฮ เลอ. 11 กาลา ดูลู ลูมอฮ กาเญา ซือตืองัฮ อาดา ฌาดี กะฆีเตอ ฌูฆา. ตาปี ฮาดัจ อีนี ตูฮัด บือเลฮ บาโซฮ กาเญา ดัฮ บูวัจ บรี กาเญา ฌาดี ซือมียา จรัฮ บาฌิ นะ ญา. ญา บูวัจ บรี กาเญา บาฌิ-ตือปัจ ดัฮ เลอ. ลาฆู อีนี ซือมูฮา ตูฮัด เดะ อาตัซ บูวัจ ดัฮ ฌางัน นามา นะ ตูฮัด เยซู คริด เตอ ฌางัน ซือมืองัจ นะ ตูฮัด กีตา เลอ. 12 อาดา ซือมียา นู จะ "ลาฆู ฌือแนฮๆ กู บูวัจ บือเลฮ ซือมูฮา. ฮอย นามา นู กือนา บลารัก." ตาปี-จะ บูกัด ลาฆู ซือมูฮา นู ปาโตจ นะ บูวัจ. "ลาฆู ฌือแนฮๆ กู บูวัจ บือเลฮ ซือมูฮา. ฮอย นามา นู กือนา บลารัก." ตาปี กู ตีเมา ฌาดี ปราโซฮ นะ ลาฆู นามาๆ โปด. 13 ซือมียา อาซิก จะ "อาดา บารัก มากัด บีดา ญาวา กีตา. อาดา ญาวา กีตา บีดา บารัก มากัด. ซาเบะ ตูฮัด เดะ อาตัซ นะ บูวัจ บรี ฌางัน ญาวา ฌางัน บารัก มากัด ลือแงะ ปี ฮาบิฮ ดัฮ." ตาปี บูกัด กะฆีเตอ เลอ. ญาวา กีตา บูกัด บีดา นะ บือกาเซฮ ตาปี อาดา ดูโดะ บีดา ตูฮัด เยซู เลอ. ตูฮัด เยซู เตอ เลอ ญา อาดา บีดา ญาวา นะ กีตา. 14 ซาเบะ ตูฮัด บือซัยํ เดะ อาตัซ ญา บูวัจ บรี ตูฮัด เยซู ฮีโดะ ปาเระ เดะ มาตี ดัฮ. กะฆีเตอ ญา นะ บูวัจ บรี ลูมอฮ กีตา ฮีโดะ ปาเระ ฌูฆา ฌางัน นู ปือมือฆัฮ ซีดี นะ ญา เลอ. 15 กาเญา เตด ตาฮู เฆอ ญาวา นะ กาเญา ฌาดี กลือกะ นะ เยซู คริด ดัฮ? กะฆีเตอ นู กลือกะ นะ เยซู คริด เตอ กู นะ อาเมด ปี บรี ฌาดี กลือกะ นะ นีบีนี ฌาลัก เฆอ? ฌางัน บรี ฌาดี กะฆีเตอ เลอ. 16 กาเญา เตด ตาฮู เฆอ ซือมียา นู ปี ลือกัจ บือซามา ฌางัน นีบีนี ฌาลัก เตอ ญา ฌาดี ญาวา ซือตือปัจ ฌางัน นีบีนี อีตู. ซาเบะ อาดา ปือมือเลา นะ ตูฮัด นู จะ "กูญา กือดูวา นะ ฌาดี ญาวา ซือตือปัจ." ญา จะ. 17 ตาปี ซือมียา ดีฮา นู ลือกัจ บือซามา ฌางัน ตูฮัด เยซู เตอ ญา ฌาดี ฮาตี ซือตือปัจ ฌางัน ตูฮัด เลอ. 18 กะฆีเตอ ลาฆู บือกาเซฮ เตอ กาเญา กือนา มืองือละ ลารี บูวัก เลอ. ดูซา อาซิก ซือมูฮา นู ซือมียา บูวัจ เตอ ฌาดี ดูซา โซะ ลูวัยํ เดะ ญาวา ตาปี ซือมียา บือกาเซฮ เตอ ญา บูวัจ ดูซา รอจ กะ ญาวา นะ ญา ตะอาซิก. 19 กาเญา เตด ตาฮู เฆอ ญาวา นะ กาเญา ฌาดี บาลัย นะ ซือมืองัจ นะ ตูฮัด. ญา เตอ นู ดูโดะ เดะ ฮาตี นะ กาเญา นู กาเญา ซาโมจ เดะ ตูฮัด ดัฮ. กาเญา บูกัด ตูฮัด นะ ญาวา กาเญา ตะอาซิก. 20 ตาปี ตูฮัด เดะ อาตัซ ญา บือเลฮ บือลี กาเญา ดัฮ ฌางัน รือฆา นู มาฮัน. กะฆีเตอ เลอ เดะ ญาวา นะ กาเญา กาเญา กือนา ตูโรจ ลาฆู นู นะ บูวัจ บรี โกะ ซือมียา นะ ปูฌี กะ นามา นะ ตูฮัด เลอ.
1 ปาซัน โกะ ลาฆู นู กาเญา ฆาแรฮ ตาญา กู ดัฮ กู นะ ตีกัฮ กะฆีนี. กะ กีลากี นู ดีฮา เตด อาเมด บีนี ญา บูวัจ บาฌิ เตอ. 2 ตาปี ตาโกจ-จะ กะฆีเตอ นะ อาดา ลาฆู ซาลัฮ บือกาเซฮ เตอ. กะฆีเตอ บรี โกะ กีลากี ซือมูฮา นะ อาเมด บีนี บีดา ญาวา ญา ตะอาซิก. บรี โกะ นีบีนี ซือมูฮา นะ อาเมด ลากี บีดา ญาวา ญา ตะอาซิก ฌูฆา. 3 บรี ลากี นะ บูวัจ ตูโรจ กะ ลาฆู นู ปาโตจ ฌางัน บีนี นะ ญา. บรี บีนี ฌูฆา นะ บูวัจ ตูโรจ กะ ลาฆู นู ปาโตจ ฌางัน ลากี นะ ญา. 4 ซาเบะ-จะ นีบีนี นะ ฮูโกบ ญาวา นะ ญา ตะอาซิก เตด บือเลฮ ตาปี ลากี ญา นะ ฮูโกบ ญาวา ญา. โซะ กีลากี ฌูฆา นะ ฮูโกบ ญาวา นะ ญา ตะอาซิก เตด บือเลฮ ตาปี บีนี นะ ญา นะ ฮูโกบ ญาวา ญา. 5 บรี กาเญา นะ ดูโดะ บือซามา ฌางัน นะ กีปัซ ลากี กีปัซ บีนี. ตาปี กะ กาเญา บือปาคัจ บือกีรา นะ ตีโนะ โซกซา ตือปัจ ซา วะตู บือเลฮ ฌูฆา บีดา นะ ซรัฮ วะตู เดะ ลาฆู บือซาโวจ. ตาปี ลือปัซ อีตู บรี กาเญา มาแรฮ บือซามา ปูลัก ตีเมา บรี ฮาตู ซีตัด นะ บาอาฌะ กาเญา บูวัจ ซาลัฮ ซาเบะ ตาฮัด เตด บือเลฮ. 6 นู กู มือเลา ซีงี กู บรี กาเญา บูวัจ กะฆีเตอ บูกัด กู ปือซัด. 7 ซูโงฮ เลอ กู ซูกา บรี กาเญา ฌาดี ซือรูปา กะ กู. ตาปี ซือมียา ซือมูฮา บือเลฮ ซาโมจ ลาฆู บาฌิ ดาตัก เดะ ตูฮัด นู รือมัก ฌางัน ญาวา ญา โซกซา ฌือแนฮ. ซือมียา อีนี ซาโมจ ลาฆู กะฆีนี ซือมียา อีตู ซาโมจ ลาฆู กะฆีเตอ. 8 โซะ โกะ ซือมียา นู ฮอย บีนี ฮอย ลากี ลาฆี ฌางัน ซือมียา นู ฌาดี ฌานา ดัฮ เตอ กู มือเลา กะฆีนี จะ นู กูญา นะ ดูโดะ ซืออูรัก ญา ซือรูปา กะ กู โปด บาฌิ ฌูฆา. 9 ตาปี กะ กูญา นะ ตาฮัด-ฮาตี เตด บือเลฮ บรี กูญา บือลากี-บีนี เลอ ซาเบะ นู กูญา นะ บือลากี-บีนี อีตู ญา บาฌิ ลือเบฮ เดะ ลาฆู นู กูญา นะ ฮางอซ ฌางัน ลาฆู ฆาละ เดะ โซะ ฮาตี. 10 โซะ โกะ ซือมียา นู บือเลฮ บือลากี-บีนี ดัฮ กู ปือซัด กะฆีนี ตาปี บูกัด กู ปือซัด ตะอาซิก ตาปี ตูฮัด เตอ ญา เลอ นู ปือซัด จะ ฌางัน บรี บีนี นะ ตีงัน ลากี นะ ญา. 11 กะ บีนี ตีงัน ลากี ปี ฌางัน บรี ญา อาเมด ลากี อาซิก เฆอ-จะ บรี นีบีนี อีตู บาลิ ปาเระ เลอ อาเมด ลากี นู ญา ตีงัน ปูลัก. ฌางัน บรี ลากี นะ บรือจัย บีนี นะ ญา ฌูฆา เลอ. 12 โซะ ซือมียา อาซิก เลอ กู มือเลา กะฆีนี บูกัด ตูฮัด มือเลา ตาปี กู มือเลา กะฆีนี จะ กะ ซือมียา ปือจายา นู ดีฮา อาดา บีนี นู เตด ปือจายา ตาปี นีบีนี อีตู ซูกา-ฮาตี นะ ดูโดะ บือซามา ฌางัน ลากี นะ ญา ฌางัน บรี ลากี นะ บรือจัย ฌางัน บีนี นะ ญา เลอ. 13 กะ นีบีนี ซือมียา ดีฮา อาดา ลากี นู เตด ปือจายา ตาปี ลากี นะ ญา ซูกา-ฮาตี นะ ดูโดะ บือซามา ฌางัน ญา ฌางัน บรี นีบีนี อีตู นะ บรือจัย ฌางัน ลากี นะ ญา เลอ. 14 ซาเบะ ลากี นู เตด ปือจายา อีตู ญา กือนา บูวัจ บรี บาฌิ โซะ ฮึลด ตูฮัด ดัฮ กรานา บีนี นะ ญา. บีนี นู เตด ปือจายา ฌูฆา ญา กือนา บูวัจ บรี บาฌิ โซะ ฮึลด ตูฮัด กรานา ลากี นะ ญา. กะ เตด ฌาดี กะฆีเตอ โกะ นานะ นะ กูญา นะ ฌาดี ตะอารัฮ ตาปี โงฮ-ซูโงฮ เลอ กูญา บาฌิ โซะ ฮึลด ตูฮัด ดัฮ. 15 ตาปี กะ ซือมียา นู เตด ปือจายา อีตู ญา ซูกา นะ ปี เตอ บียัยํ ญา เลอ บรี ญา ปี ดัฮ. เดะ ลาฆู กะฆีเตอ ซือมียา นู ปือจายา ลากี บีนี ญา ลือปัซ ดัฮ เตด ปายัฮ นะ ฆาโดฮ-ฮาตี ซาเบะ ตูฮัด บือเลฮ ปาเงน กีตา บรี กีตา ดูโดะ ซือนัง ซือลามัจ ดัฮ. 16 เกา เลอ นู ฌาดี บีนี เกา ตาฮู บือเลฮ กะฮามี ดัฮ จะ เกา นะ ตูโลก ลากี นะ เกา บรี ฮีโดะ ลือปัซ บาฌิ เฆอ เตด? เกา เลอ นู ฌาดี ลากี เกา ตาฮู บือเลฮ กะฮามี ดัฮ จะ เกา นะ ตูโลก บีนี นะ เกา บรี ฮีโดะ ลือปัซ บาฌิ เฆอ เตด? 17 ตาปี มีเซ กะฆีเตอ บรี ราตา ซือมียา นะ ตูโรจ ฌาลัด อีตู นู ตูฮัด ซรัฮ บรี กะ ญา ดัฮ. บรี ญา ฌาดี ซือรูปา บือกะ วะตู อีตู นู ตูฮัด เดะ อาตัซ ปาเงน ญา ดัฮ. กู ปือซัด กะฆีนี เดะ โกะ ลูมอฮ นะ ตูฮัด ราตาๆ เลอ. 18 ซือมียา ดีฮา นู บือเลฮ ซาโมจ ลาฆู กรัจ ดัฮ วะตู ตูฮัด ปาเงน ญา มาแรฮ ปือจายา เตอ ฌางัน บรี ญา กูวาซา นะ อูฆัย ลาฆู กรัจ อีตู เลอ. ซือมียา ดีฮา นู เตด บือเลฮ ซาโมจ ลาฆู กรัจ วะตู ตูฮัด ปาเงน ญา เตอ ฌางัน บรี ญา นะ ซาโมจ ลาฆู กรัจ อีตู ปูลัก เลอ. 19 ซาเบะ-จะ นู นะ ซาโมจ เตด ซาโมจ ลาฆู กรัจ อีตู เตด ฌาดี นามา. ตาปี ลาฆู บูวัจ ตูโรจ โกะ ปือมือซัด นะ ตูฮัด เดะ อาตัซ ลาฆู อีตู เลอ ฌาดี ลาฆู ซัยํ-บือซัยํ. 20 ซือมียา ซิกมาซิก ฌาดี กะฮามี วะตู ตูฮัด ปาเงน ญา เตอ บรี ญา ฌาดี กะฆีเตอ เลอ. 21 ตูฮัด บือเลฮ ปาเงน กาเญา วะตู กาเญา ตืองัฮ ฌาดี ปราโซฮ เฆอ? เตด นามา ฌางัน ฆาโดฮ-ฮาตี เลอ. ตาปี กะ กาเญา อาดา จือลัฮ นะ ตือบุซ ญาวา บรี ลือปัซ เดะ ลาฆู ฌาดี ปราโซฮ บูวัจ กะฆีเตอ บาฌิ เลอ. 22 ซาเบะ ซือมียา นู ฌาดี ปราโซฮ วะตู ตูฮัด ปาเงน ญา ดัฮ ญา ฌาดี ซือมียา ลือปัซ โซะ ฮึลด ตูฮัด เลอ. กะฆีเตอ ฌูฆา ซือมียา นู ลือปัซ วะตู ตูฮัด ปาเงน ญา ดัฮ ญา ฌาดี ปราโซฮ นะ เยซู คริด ดัฮ เลอ. 23 ตูฮัด บือเลฮ ตือบุซ กาเญา ฌางัน รือฆา นู มาฮัน. กะฆีเตอ ฌางัน ปี ฌาดี ปราโซฮ นะ ซือมียา เลอ. 24 อาดี-บราดี เออ วะตู ตูฮัด เดะ อาตัซ บือเลฮ ปาเงน กาเญา ดัฮ กาเญา ฌาดี กะฮามี ซือตืองัฮ บรี กาเญา ดูโดะ บือซามา ฌางัน ตูฮัด กะฆีเตอ ฌูฆา เลอ. 25 ตาปี ปาซัน โกะ ซือมียา นู เตด บือเลฮ ลากี เตด บือเลฮ บีนี เตอ กู เตด บือเลฮ ซาโมจ ปือมือซัด เดะ ตูฮัด เลอ ตาปี กู นะ ปรีงัจ กะ กาเญา บือกะ กู ฌาดี ซือมียา นู ตูฮัด บือเลฮ ตือจีฮัด บรี กะ กู ฌาดี ซือมียา ฮาตี รือมัก. 26 ซาเบะ ลาฆู ซูซัฮ ปายัฮ นู ตืองัฮ นะ รอจ อีนี กู อีงัจ จะ บรี โกะ ซือมียา นะ ดูโดะ บือกะ ซือรูปา นู กูญา อาดา ดูโดะ ดัฮ. 27 เกา บือเลฮ บีนี ดัฮ เฆอ? ฌางัน นะ มียา จือลัฮ นะ ตีงัน บีนี บูวัก เลอ. เกา ฮอย บีนี ลาฆี เฆอ? ฌางัน นะ มียา บีนี เลอ. 28 ตาปี กะ เกา นะ อาเมด บีนี เกา เตด ซาลัฮ นามา เลอ. กะ นีบีนี ราดารา นะ อาเมด ลากี ญา โปด เตด ซาลัฮ นามา ฌูฆา. ตาปี ซือมียา นู บือเลฮ ลากี บือเลฮ บีนี ญา นะ ฆาโดฮ เดะ ลาฆู อารีๆ ฌือแนฮๆ. กู ซูกา บรี กาเญา นะ ลือปัซ เดะ ลาฆู ฆาโดฮ กะฆีเตอ. 29 โกะ ดีบราดี เออ กู มือเลา กะฆีนี ซาเบะ-จะ ฮาดัจ อีนี ดาปิก นะ ฮาบิฮ ดัฮ. กะฆีเตอ ตะเดะ อีนี ปี โกะ ซือมียา นู บือเลฮ บีนี ดัฮ บรี กูญา ดูโดะ ซือรูปา กูญา ฮอย เตด บือเลฮ บีนี ลาฆี. 30 ซือมียา นู มือนาแงฮ ซูซัฮ-ฮาตี บรี กูญา ฌาดี ซือรูปา ซือมียา นู เตด ซูซัฮ-ฮาตี เลอ. ซือมียา นู ซูกา-ฮาตี บรี กูญา ฌาดี ซือรูปา ซือมียา นู ฮอย เตด ซูกา-ฮาตี. บรี โกะ ซือมียา นู บือลี โกะ ซือบารัก ฌาดี ซือรูปา ซือมียา นู ฮอย ซือบารัก นามา ลาลู. 31 โกะ ซือมียา นู ซูโรฮ โกะ ซือบารัก เดะ ดือนียา อีนี ฌางัน บรี กูญา ซูโรฮ ซือบารัก อีตู บรี ปือนอฮ เดะ ฮาตี. ซาเบะ มีเซ-จะ ดือนียา อีนี ฌาดี กะฮามี เตอ ญา ตืองัฮ นะ ลือแงะ ลือปัซ ปี ดัฮ เลอ. 32 กู ซูกา บรี กาเญา นะ ลือปัซ เดะ ลาฆู ฆาโดฮ-ฮาตี. โกะ ซือมียา นู เตด บือเลฮ บีนี ญา ปือดูลี เดะ ลาฆู บือกรือฌา นะ ตูฮัด ซูกา นะ บูวัจ บรี ตูฮัด นะ ซูกา-ฮาตี. 33 ตาปี ซือมียา นู อาดา บีนี ดัฮ ญา ปือดูลี เดะ ลาฆู โซะ ดือนียา อีนี บีดา นะ บูวัจ บรี บีนี ญา นะ ซูกา-ฮาตี. 34 ญา กูวาซา นะ บรี กือนา ฮาตี ดูวา บือลัฮ. โซะ นีบีนี นู ฮอย ลากี ดัฮ ฌางัน โกะ นีบีนี ราดารา ฌูฆา กูญา ปือดูลี เดะ ลาฆู บือกรือฌา นะ ตูฮัด บีดา นะ ฌาดี ซือมียา จรัฮ บาฌิ โซะ ญาวา โซะ ฮาตี ฌูฆา. ตาปี โซะ นีบีนี นู บือเลฮ ลากี ญา ปือดูลี เดะ ลาฆู โซะ ดือนียา อีนี บีดา นะ บูวัจ บรี ลากี ญา นะ ซูกา-ฮาตี. 35 กู มือเลา กะฆีนี บีดา นะ ตูโลก กาเญา บูกัด-จะ นะ ซือกัจ กาเญา ตาปี กู ซูกา บรี กาเญา นะ บูวัจ กือนา ลาฆู เลอ บีดา กาเญา นะ บือเลฮ บูวัจ ตูโรจ กะ ลาฆู นะ ตูฮัด ปือนอฮ เดะ ฮาตี ฮอย ฮาตี กือดูวา. 36 โซะ กีลากี ดีฮา นู อาดา นีบีนี ราดารา ฌาดี ตูนัง นะ ญา เตอ กะ ญา บราซา จะ ญา นะ บูวัจ บรี กือนา ลาฆู เตด บือเลฮ ดัฮ ซาเบะ ญา ฮาตี ฮางัจ ซูกา นะ อาเมด นีบีนี อีตู ฌาดี บีนี นะ ญา บรี ญา บูวัจ กะฆีเตอ เลอ บรี กูญา มือนีกัฮ ฮอย ซาลัฮ นามา เลอ. 37 ตาปี กะ ซือมียา อีตู ตือตู เดะ ฮาตี ดัฮ จะ ญา เตด ปายัฮ นะ มือนีกัฮ ญา ฮูโกบ ฮาตี ตะอาซิก บือเลฮ อีงัจ นะ บรี นีบีนี อีตู นะ ฌาดี ราดารา ลาฆี ญา โปด บูวัจ บาฌิ ฌูฆา. 38 กะฆีเตอ ซือมียา นู มือนีกัฮ ฌางัน ตูนัง นะ ญา ญา บูวัจ บาฌิ ตาปี ซือมียา นู เตด มือนีกัฮ ญา บูวัจ บาฌิ ลือเบฮ เดะ อีตู ฌูฆา. 39 วะตู ลากี อาดา ฮีโดะ ลาฆี บีนี นะ ญา ฆาโดฮ ดูโดะ ฌางัน ลากี อีตู เลอ. ตาปี วะตู ลากี อีตู มาตี ดัฮ นีบีนี อีตู ญา ลือปัซ ดัฮ นะ ปี อาเมด ลากี อาซิก บือกะ ฮาตี ญา ซูกา. ตาปี กีลากี อีตู กือนา ฌาดี ซือมียา ปือจายา กะ ตูฮัด. 40 ตาปี โซะ กู กู ลีฮัจ จะ กะ นีบีนี อีตู นะ ดูโดะ ซืออูรัก ญา ญา นะ ซูกา-ฮาตี บาญะ ลาฆี. กู อีงัจ ฌูฆา จะ ซือมืองัจ นะ ตูฮัด ญา ดูโดะ บือซามา ฌางัน กู ดัฮ เลอ.
1 ปาซัน โกะ ซือบารัก นู กูญา มือญือมัฮ กะ บราลา อีตู กีตา ซือมูฮา ตาฮู ดัฮ จะ "กีตา ซือมูฮา บือเลฮ ตาฮู บาญะ." ลาฆู ตาฮู บาญะ บูวัจ บรี งันตืองัน ตาปี ลาฆู ซายัก บูวัจ บรี บาฌิ บือตามัฮ เลอ. 2 กะ ซือมียา ดีฮา มืองากู ญาวา จะ ญา ตาฮู ลาฆู อานู ดีฮา ดัฮ ซือมียา อีตู เตอ ญา เตด ตาฮู บือกะ ซือรูปา ญา ปาโตจ นะ ตาฮู ดัฮ เลอ. 3 ตาปี กะ ซือมียา ดีฮา ซายัก กะ ตูฮัด ตูฮัด ญา บือเลฮ กราลา ซือมียา อีตู ดัฮ. 4 กะฆีเตอ ปาซัน ลาฆู นู นะ มากัด โกะ ซือบารัก นู กูญา มือญือมัฮ กะ บราลา ดัฮ กีตา ตาฮู ดัฮ จะ "บราลา อีตู ญา ฮอย ลาฆู ซูโงฮ เดะ ดือนียา." ตาฮู ฌูฆา จะ "อาดา ตูฮัด ซูโงฮ แนฮ ซา ตูฮัด เลอ." 5 มีเซ-จะ โซะ ลาแงะ เฆอ-จะ โซะ ดือนียา โปด อาดา นู กูญา บลาโลก จะ "ตูฮัด" บาญะๆ. (ซูโงฮๆ เลอ อาดา โกะ ฌิด โกะ ฮาตู บาญะ นู โกะ ซือมียา อาซิก บลาโลก จะ "ตูฮัด" เลอ.) 6 ตาปี โซะ กีตา นี เลอ อาดา ตูฮัด นู อาโปก เดะ อาตัซ แนฮ ซา ตูฮัด เลอ ญา นู บือเลฮ บือฌาดี โกะ ซือบารัก ซือมูฮา. กีตา ฌูฆา อาดา ฮีโดะ บีดา ญา. อาดา ตูฮัด เยซู คริด แนฮ ซา ตูฮัด เลอ. กรานา ญา เลอ โกะ ซือบารัก ซือมูฮา บือเลฮ บือฌาดี ดัฮ. กีตา ฌูฆา อาดา ฮีโดะ กรานา ญา. 7 ตาปี-จะ บูกัด ซือมียา ซือมูฮา นู ตาฮู กะฆีเตอ ดัฮ. ซาเบะ อาดา ซือมียา ซือตืองัฮ นู ดูลู กูญา ดือละ ตูเฮะ กะ บราลา. กะฆีเตอ รอจ กะ วะตู อีนี ตานา กูญา มากัด โกะ ซือบารัก อีตู กูญา อีงัจ จะ ฌาดี ซือบารัก นู กือนา มือนืองะ บรี กะ บราลา ซูโงฮ ดัฮ เลอ. ฮาตี ตาฮู ลาฆู ซาลัฮ กือนา นะ กูญา ญา เตด กือฌะ-กือมัซ เดะ ลาฆู ปือจายา ลาฆี. กะฆีเตอ กูญา บราซา จะ กูญา ตะอารัฮ ดัฮ วะตู กูญา มากัด ซือบารัก อีตู. 8 ตาปี-จะ โซะ ซือบารัก มากัด เตอ ญา เตด บูวัจ บรี กีตา บาฌิ ฌางัน ตูฮัด. กะ กีตา เตด มากัด กีตา ฮอย เตด ปูตุซ นามา. กะ กีตา มากัด กีตา ฮอย เตด บือเลฮ นามา บือตามัฮ เลอ. 9 ตาปี กือนา ฌาฆา บรี บาฌิ เลอ. นู กาเญา บูวัจ บือเลฮ ฮาปา กะฆีเตอ ฌางัน บรี ญา บูวัจ บรี ซือมียา นู ปือจายา เตด กือฌะ-กือมัซ นะ ซือซัจ บูวัจ ซาลัฮ ปี ดัฮ. 10 กะ กาเญา นู ตาฮู บาญะ กะฆีเตอ นะ มาโซะ ปี มากัด เดะ ดาลับ รูมัฮ มือญือมัฮ กะ บราลา บารู ซือมียา นู ฮาตี ตาฮู ลาฆู ซาลัฮ กือนา นะ ญา เตด กือฌะ-กือมัซ ลาฆี ญา ลีฮัจ กาเญา ดัฮ. นู ญา ลีฮัจ กาเญา มาโซะ ปี มากัด กะฆีเตอ ซือรูปา บาอาฌะ ญา มาโซะ มากัด โกะ ซือบารัก นู มือญือมัฮ กะ บราลา บูกัด เฆอ? 11 กะฆีเตอ ซือมียา อีตู เตอ นู ลาฆู ปือจายา นะ ญา เตด กือฌะ-กือมัซ ลาฆี ญา นะ บือนาซา ปี กรานา ลาฆู นู กาเญา ตาฮู บาญะ. กือนา บรีงัจ เลอ จะ ซือมียา อีตู ฌาดี อาดี-บราดี นู เยซู คริด บือเลฮ มาตี กรานา ญา เลอ. 12 กาเญา บูวัจ ซาลัฮ กะ โกะ อาดี-บราดี นู ปือจายา กาเญา บูวัจ ฌาฮัจ กะ ฮาตี นู ตาฮู ลาฆู ซาลัฮ กือนา นะ กูญา นู เตด กือฌะ-กือมัซ ลาฆี. กะฆีเตอ เลอ กาเญา บือเลฮ บูวัจ ซาลัฮ กะ เยซู คริด ดัฮ ฌูฆา. 13 กะฆีเตอ กะ ซือบารัก มากัด นะ บูวัจ บรี อาดี-บราดี นะ กู นะ ซือซัจ บูวัจ ซาลัฮ กู นะ เตด มากัด ลูลู บือนาตัก ลาลู ดัฮ เลอ ตาโกจ-จะ กู นะ บูวัจ บรี อาดี-บราดี นะ ซือซัจ บูวัจ ซาลัฮ กะฆีเตอ.
1 กู ฌาดี ซือมียา นู ลือปัซ ซูโงฮ บูกัด เฆอ? กู บือเลฮ บือฌาดี ปือญูโรฮ นะ ตูฮัด บูกัด เฆอ? กู บือเลฮ ลีฮัจ เยซู ตูฮัด นะ กีตา บูกัด เฆอ? นู กาเญา มาแรฮ ปือจายา ซาเบะ กู บือเลฮ บือกรือฌา มือญาเระ ลาฆู นะ ตูฮัด บูกัด เฆอ? 2 มีเซ-จะ โกะ ซือมียา อาซิก เตด บือเลฮ ซาโงะ กู ฌาดี ปือญูโรฮ เตอ ตาปี กาเญา เลอ ฆาโดฮ ซาโงะ กู ฌาดี ปือญูโรฮ นะ ตูฮัด. ซาเบะ นู ลูมอฮ กาเญา บือเลฮ ปือจายา ลือกัจ บือซามา ฌางัน ตูฮัด เตอ ลาฆู อีตู ฌาดี ปือนานา นู บรี ลีฮัจ จะ กู ฌาดี ปือญูโรฮ ดัฮ เลอ. 3 วะตู ซือมียา ดีฮา มือญาซัจ กู กู ตีกัฮ กะฆีนี จะ 4 กามี เตด ปาโตจ นะ บือเลฮ ซาโมจ โกะ ซือบารัก มากัด ซือบารัก โอะ ฆาตี ลาฆู บือกรือฌา นะ กามี เฆอ? 5 มีเซ-จะ โกะ ปือญูโรฮ อาซิกๆ เตอ โกะ อาดี เดะ ตูฮัด เตอ เปโตร โปด ฌูฆา กูญา ซือมูฮา บาวา โกะ บีนี นะ กูญา นู ฌาดี ซือมียา ปือจายา ปี กะ ดีฮาๆ บือซามา ฌางัน กูญา. กามี นี เตด ปาโตจ นะ บูวัจ กะฆีเตอ ฌูฆา เฆอ? 6 ซา กามี กู ฌางัน บานาบัด นู เตด บือเลฮ นะ บราดู บือกรือฌา มียา มากัด เฆอ? 7 อาดา ตาฮัน ซือมียา ดีฮา นู นะ ปี บือปรัก นู ฆาโดฮ มียา บลาญา บีดา ญาวา ตะอาซิก เฆอ? ซือมียา ดีฮา นู กรือฌา กือโบด อางุน นู นะ ฮอย เตด บือเลฮ มากัด โกะ บูวัฮ อางุน เดะ กือโบด อีตู เลอ? ซือมียา ดีฮา เลอ นู บือบือลา โกะ บือนาตัก นู นะ ฮอย เตด บือเลฮ มากัด อาเย ดาดา เดะ กาวัด บือนาตัก อีตู? 8 นู กู บือเลฮ มือเลา กะฆีเตอ ซีงี กู มือเลา ตูโรจ ฮาดัจ นะ โกะ ซือมียา ตารา อีตู เฆอ? บูกัด. ซูรัจ ปือมือเลา ฮูโกบ นะ ตูฮัด ญา มือเลา ซือรูปา บูกัด เฆอ? 9 ซาเบะ จะ เดะ ซูรัจ ปือมือเลา ฮูโกบ อีตู นู มูซา ฆาแรฮ อาดา ฆาแรฮ ดัฮ จะ "ตานา กรือเบา ตืองัฮ กาจะ ปาดี ฌางัน นะ ซรือโกะ ตูโดก มูโลจ นะ ญา เลอ." ญา จะ. เดะ ลาฆู อีนี ตูฮัด ญา บรีงัจ ซา กะ โกะ กรือเบา ซูโงฮ เฆอ? 10 เฆอ-จะ ญา บือเลฮ มือเลา กะฆีเตอ กรานา ลีฮัจ กะ กามี เฆอ? โงฮ-ซูโงฮ เลอ ลาฆู อีตู กือนา ฆาแรฮ ดัฮ กรานา ลีฮัจ กะ กามี. กะฆีเตอ ซือมียา นู ฆาลา บือนัก ฌางัน ซือมียา นู งาจะ ปาดี กูญา นะ บือกรือฌา ซาเบะ กูญา จาดัก นะ บือเลฮ ซา ฮาบด เดะ ปาดี อีตู. 11 นู กามี มาแรฮ มือญาเระ ลาฆู นะ ตูฮัด ซือรูปา กามี ฌาดี ซือมียา ปุย-ปรุย บีฌี นู นะ บือตามัฮ ลาฆู บาฌิ โซะ ฮาตี นะ กาเญา. กะฆีเตอ นู กามี นะ งือตับ โกะ ซือบารัก โซะ ดือนียา ฌาดี ลาฆู บาญะ ตือลาลู เฆอ? 12 กะ ซือมียา อาซิก ปาโตจ นะ บือเลฮ เดะ กาเญา เตอ กะฆีเตอ กามี เลอ ปาโตจ นะ บือเลฮ ลือเบฮ เดะ กูญา บูกัด เฆอ? ตาปี ลาฆู นู กามี ปาโตจ นะ บือเลฮ อีตู กามี ตีเมา นะ อาเมด ดัฮ. กามี บือเลฮ ตาฮัด ซูซัฮ ราตา มาจับ ตีเมา นะ บูวัจ นามา นู นะ ซือกัจ บรีตา นู บาฌิ อีตู ปาซัน เยซู คริด. 13 กาเญา เตด ตาฮู เฆอ ซือมียา นู บือกรือฌา เดะ รูมัฮ มือญือมัฮ ตูฮัด ญา กือนา มากัด โกะ ซือบารัก เดะ ดาลับ รูมัฮ อีตู เลอ? ซือมียา นู บือกรือฌา เดะ ตือปัจ ตูนู บารัก มือนืองะ ญา นะ บือเลฮ ซา ฮาบด เดะ ซือบารัก นู มือนืองะ ดัฮ. 14 กะฆีเตอ เลอ ฌูฆา ตูฮัด บือเลฮ ปือซัด จะ ซือมียา นู มือญาเระ บรีตา นู บาฌิ ญา ปาโตจ นะ บือเลฮ ซาโมจ ดูเวะ บลาญา นะ ญา เดะ ลาฆู บือกรือฌา มือญาเระ บรีตา นู บาฌิ อีตู. 15 ตาปี ลาฆู นู กู ปาโตจ นะ บือเลฮ อีตู กู เตด บือเลฮ อาเมด ดัฮ. นู กู ฆาแรฮ ปาซัน ลาฆู อีนี โปด บูกัด-จะ บีดา นะ บูวัจ บรี กูญา บรี กะ กู กะฆีเตอ. กู ตีเมา บรี ซือมียา ดีฮา นะ บูวัจ บรี ลาฆู นู กู งันตืองัน กะฆีนี นะ ฮาบิฮ ปี ดัฮ. บรี กู มาตี บาฌิ ลาฆี เลอ. 16 ซาเบะ-จะ นู กู มือญาเระ บรีตา นู บาฌิ อีตู กู ฮอย ตือปัจ นะ งันตืองัน บือเลฮ เลอ. กู ฆาฆัฮ นะ มือญาเระ บรีตา นู บาฌิ เลอ. กะ กู เตด บือเลฮ มือญาเระ กะฆีเตอ กู นะ กือนา ซูซัฮ ซูโงฮ เลอ. 17 กะ กู ปี มือญาเระ ตูโรจ กะ ฮาตี นะ กู ตะอาซิก กะฆีเตอ กู นะ บือเลฮ ฆาฌี เดะ ลาฆู อีตู. ตาปี บูกัด กะฆีเตอ. กู กือนา ปือซัด ดัฮ ซาเบะ ตูฮัด เลอ บือเลฮ กีเรบ ลาฆู อีนี บรี กะ กู บือเลฮ บูวัจ. 18 กะฆีเตอ กู นะ บือเลฮ ฆาฌี นามา ซือตืองัฮ เฆอ? กู นะ บือเลฮ ซา ลาฆู อีนี จะ นู กู มือญาเระ บรีตา นู บาฌิ กู เตด บือเลฮ อาเมด รือฆา อูปัฮ ลาลู. กะฆีเตอ บาฮาเฆด นะ กู นู ดาตัก เดะ ลาฆู บือกรือฌา มือญาเระ บรีตา นู บาฌิ เตอ บาฮาเฆด อีตู กู เตด บือเลฮ อาเมด ซูโรฮ บรี ฮาบิฮ เลอ. 19 กู ฌาดี ซือมียา ลือปัซ ซูโงฮ เลอ บูกัด ปราโซฮ นะ ซาปา. ตาปี กู บือเลฮ บูวัจ บรี ญาวา กู ตะอาซิก ฌาดี ปราโซฮ นะ ซือมียา ซือมูฮา บีดา นะ บาวา ซือมียา บาญะ ซือรูโลยํ มาแรฮ ตูโรจ กะ เยซู. 20 โซะ ลูมอฮ บักซา ยิว เตอ กู ฌาดี ซือรูปา ซือมียา บักซา ยิว บีดา นะ บาวา โกะ ซือมียา บักซา ยิว มาแรฮ ตูโรจ กะ เยซู. โซะ ซือมียา นู ดูโดะ โซะ บาวัฮ โกะ ปือมือเลา ฮูโกบ เตอ กู ตะอาซิก มีเซ-จะ กู เตด ดูโดะ เดะ บาวัฮ โกะ ปือมือเลา ฮูโกบ เตอ ตาปี กู ฌาดี ซือรูปา ซือมียา ดูโดะ เดะ บาวัฮ ปือมือเลา ฮูโกบ ฌูฆา เลอ บีดา นะ บาวา กูญา อีตู มาแรฮ ตูโรจ กะ เยซู. 21 โซะ โกะ ลูมอฮ ซือมียา นู ฮอย ปือมือเลา ฮูโกบ เตอ กู ฌาดี ซือรูปา ซือมียา นู ฮอย ปือมือเลา ฮูโกบ ฌูฆา เลอ บีดา นะ บาวา โกะ ซือมียา อีตู มาแรฮ ตูโรจ กะ เยซู. ตาปี โงฮ-ซูโงฮ เลอ บูกัด-จะ กู เตด ดูโดะ เดะ บาวัฮ ปือมือเลา ฮูโกบ นะ ตูฮัด เดะ อาตัซ ซาเบะ กู อาดา เดะ บาวัฮ ปือมือเลา ฮูโกบ นะ เยซู คริด เลอ. 22 โซะ ซือมียา นู เตด กือฌะ-กือมัซ เตอ กู ฌูฆา ฌาดี ซือมียา นู เตด กือฌะ-กือมัซ บีดา นะ บาวา กูญา มาแรฮ ตูโรจ กะ เยซู. โซะ ซือมียา ราตาๆ เตอ กู บือเลฮ ฌาดี ซือรูปา ซือมียา ราตา มาจับ ฌูฆา เลอ บีดา กู นะ บือเลฮ ตูโลก กูญา ซือตืองัฮ บาวา ปี ราตา ฌาลัด บรี กูญา นะ ฮีโดะ ลือปัซ บาฌิ เลอ. 23 ลาฆู อีตู ซีงี ซือมูฮา กู บูวัจ กรานา ลีฮัจ กะ บรีตา นู บาฌิ อีตู บีดา กู นะ บือเลฮ บาฮาเฆด บือซามา เดะ ลาฆู บาฌิ นะ ญา เลอ. 24 กาเญา เตด ตาฮู เฆอ วะตู อาดา ลาฆู บลารี บือลูมา เตอ โกะ ซือมียา บลารี อีตู กูญา ปาคัจ บลารี บือลูมา ซือมูฮา ตาปี อาดา ซือมียา แนฮ ซืออูรัก นู ฌือนัฮ บือเลฮ ซาโมจ รังวัน เลอ. กะฆีเตอ บรี กาเญา บลารี เลอ บีดา นะ บือเลฮ ซาโมจ รังวัน อีตู. 25 โกะ ซือมียา นู นะ อูซิ บือลูมา ราตาๆ กูญา กือนา ฌาฆา ฮูโกบ ญาวา นะ กูญา ตะอาซิก บรี บาฌิ. กูญา บูวัจ กะฆีเตอ บีดา นะ ซาโมจ จูบุก นู นะ ลายู ฆูรก ฮาบิฮ. ตาปี กีตา ฮูโกบ ญาวา นะ กีตา ตะอาซิก บีดา นะ ซาโมจ จูบุก นู นะ อาดา ซือลาลู เลอ. 26 กรานา ลาฆู อีตู กู นี เลอ กู ซือมาตา บลารี รือมัก บีดา นะ ฌือนัฮ. กู ฌาดี ซือรูปา ซือมียา บือตูโมะ ตาปี กู เตด ตูโมะ อาเงน เลอ. 27 กู กาเตาะ ตูโมะ ญาวา กู ตะอาซิก บรี ญา ตือฆัยํ-อูรัจ. กู อาเมด ฌือนัฮ เดะ ญาวา นะ กู ตาโกจ-จะ ซูดัฮ มือญาเระ บรีตา นู บาฌิ อีตู กะ ซือมียา อาซิก กู นะ ฌาดี ซือรูปา ซือมียา นู กือนา ปูตุซ รังวัน เลอ.
1 กะฆีเตอ โกะ ดีบราดี เออ กู นะ บรี กาเญา มาโซะ เดะ ฮาตี ลาฆู อีนี จะ ลูมอฮ ญัง-มูญัง นะ กีตา เตอ กูญา ซือมูฮา ดูโดะ เดะ บาวัฮ กือมูวัง อีตู ซือมูฮา บือฌาลัด ลาลู เดะ ลาโวจ อีตู ฌูฆา. 2 กูญา ซือมูฮา บือเลฮ มาโซะ บือซามา ฌางัน มูซา กะฆีนี จะ กูญา ซือรูปา ซาโมจ ลาฆู ซือลับ เดะ ดาลับ กือมูวัง เดะ ดาลับ ลาโวจ เลอ. 3 กูญา ซือมูฮา บือเลฮ มากัด ซือบารัก มากัด นู ซีดี เตอ 4 ซือมูฮา บือเลฮ โอะ อาเย นู ซีดี ฌูฆา เลอ ซาเบะ-จะ กูญา ลาดัจ โอะ อาเย นู ตรือเบะ เดะ บาตู บือซัยํ นู ซีดี นู บือเลฮ ตูโรจ กูญา ปี. บาตู บือซัยํ อีตู ฌาดี เยซู คริด ดัฮ เลอ. 5 ตาปี มีเซ กะฆีเตอ เลอ โซะ ลูมอฮ ซือมียา นู บาญะ อีตู ตูฮัด เตด ซูกา-ฮาตี ฌางัน กูญา เลอ. กะฆีเตอ กูญา มาตี กือนา ปรัก แจะ-บีแระ ดัฮ เดะ โซะ ปาดัก ตานัฮ ตูโฮยํ นู ลือฆา อีตู. 6 โกะ ลาฆู อีตู ซีงี บือฌาดี ดัฮ บีดา กีตา นะ ลีฮัจ จูตอ ตีเมา บรี กีตา ฆาละ นะ บูวัจ ลาฆู ฌาฮัจ บือกะ ซือรูปา นู กูญา ฆาละ ดัฮ. 7 ฌางัน บรี กาเญา ตูเฮะ กะ บราลา เลอ ซือรูปา ลูมอฮ กูญา ซือตืองัฮ บูวัจ ดัฮ บือกะ ซูรัจ ปือมือเลา นะ ตูฮัด นู จะ "ลูมอฮ ซือมียา อีตู กูญา ดูโดะ มากัด ดูโดะ โอะ กะฆีเตอ กูญา บีกัซ มือนารี อูซิ ลาฆู เตด บือฆูนา." 8 ฌางัน บรี กีตา บูวัจ ซาลัฮ บือกาเซฮ บือกะ ซือรูปา นู กูญา อีตู ซือตืองัฮ บูวัจ ดัฮ. กะฆีเตอ กูญา มาตี ดัฮ ดูวา ละซา ตีฆา รีบู อูรัก เดะ ดาลับ ซา อารี อีตู เลอ. 9 ฌางัน บรี กีตา ลกลีฮัจ เยซู คริด เลอ บือกะ ซือรูปา นู กูญา อีตู ซือตืองัฮ บูวัจ ดัฮ. กะฆีเตอ กูญา กือนา โกะ อูลัยํ ปาโตะ มาตี ดัฮ เลอ. 10 ฌางัน บรี กาเญา บือซูงุจ ฌูฆา เลอ บือกะ ซือรูปา นู กูญา อีตู ซือตืองัฮ บูวัจ ดัฮ. กะฆีเตอ กูญา กือนา ฮูลู-บาลัก นู บูวัจ บรี บือนาซา ญา บูนอฮ กูญา มาตี บือนาซา ปี ดัฮ. 11 โกะ ลาฆู อีตู ซีงี ลูมอฮ กูญา กือนา ดัฮ บีดา นะ ฌาดี จูตอ อาดา ฆาแรฮ ดัฮ บีดา นะ ปรีงัจ ลูมอฮ กีตา อีนี นู ดูโดะ เดะ ฮาดัจ นู ปือญูดัฮ นะ ดือนียา เลอ. 12 กะฆีเตอ เลอ ซือมียา ดีฮา นู อีงัจ จะ ญา บือดีรี กือฌะ-กือมัซ ดัฮ ญา กือนา ฌาฆา บรี บาฌิ เลอ ตาโกจ-จะ นะ รือบัฮ. 13 ลาฆู ลกลีฮัจ ราตา มาจับ นู กาเญา กือนา ดัฮ เตอ โกะ ซือมียา ราตาๆ กูญา กือนา กะฆีเตอ ฌูฆา เลอ. ซาเบะ ตูฮัด เดะ อาตัซ ญา ฮาตี รือมัก เลอ ญา เตด บรี กาเญา นะ กือนา ลาฆู ลกลีฮัจ นู ลือเบฮ เดะ กาเญา นะ ตาฮัด บือเลฮ. ตาปี-จะ วะตู กือนา ลกลีฮัจ ดัฮ ญา นะ บูกา ซา ฌาลัด บรี กาเญา นะ ลือปัซ ดัฮ บีดา กาเญา นะ ตาฮัด บือเลฮ เลอ. 14 กะฆีเตอ เลอ กาเญา นู กู ซายัก กือนา ลารี บูวัก เลอ เดะ ลาฆู มือญือมัฮ กะ บราลา. 15 กู มือเลา ฌางัน กาเญา บือกะ มือเลา ฌางัน ซือมียา ปานัย บือฮีมัจ เตอ. บรี กาเญา บรีงัจ ลีฮัจ กะ ลาฆู นู กู มือญาเระ ดัฮ เลอ. 16 เจาะ อีตู เตอ นู ตูฮัด บือเลฮ บรี ซือลามัจ ดัฮ เจาะ อีตู นู กีตา บรี ซือลามัจ ปาเระ กะ ตูฮัด เตอ ญา ฌาดี ลาฆู นู กีตา บือรามัย บือซามา เดะ ดารัฮ นะ เยซู คริด บูกัด เฆอ? ตือโปก โรตี นู กีตา ลือแปะ เตอ ญา ฌาดี ลาฆู นู กีตา บือรามัย บือซามา เดะ ญาวา นะ เยซู คริด บูกัด เฆอ ? 17 ซาเบะ ตือโปก โรตี อีตู แนฮ ซือกือโตน เตอ กีตา บาญะ อูรัก ฌาดี ซา ญาวา กรานา กีตา ซือมูฮา มากัด ตือโปก โรตี ซือกือโตน อีตู เลอ. 18 กือนา บรีงัจ ลีฮัจ โกะ ปือบูวัจ นะ ลูมอฮ บักซา อิซราเอน อีตู. โกะ ซือมียา นู มากัด บารัก นู มือนืองะ กะ ตูฮัด ดัฮ เตอ กูญา บือรามัย บือซามา เดะ นู ตือปัจ ตูนู บารัก มือนืองะ กะ ตูฮัด อีตู บูกัด เฆอ ? 19 กะฆีเตอ กู มือเลา กะฮามี? บารัก มากัด นู มือนืองะ กะ บราลา ดัฮ ฌาดี กรามัจ เฆอ? บราลา อีตู กรามัจ เฆอ? 20 บูกัด เลอ ตาปี กู กีรา จะ บารัก มือนืองะ นู โกะ ซือมียา เตด ปือจายา มือนืองะ อีตู เตอ กูญา มือนืองะ บรี กะ โกะ ฮาตู ซีตัด นู ฮอย เตด ฌาดี ตูฮัด เลอ. กู ตีเมา บรี กาเญา บือรามัย บือซามา ฌางัน โกะ ฮาตู ซีตัด ดัฮ เลอ. 21 กาเญา นะ โอะ เจาะ นะ ตูฮัด ฌางัน เจาะ นะ โกะ ฮาตู บือซามา ฮอย เตด บือเลฮ เลอ. กาเญา นะ มากัด เดะ ปาปัด โตะ นะ ตูฮัด ฌางัน ปาปัด โตะ นะ โกะ ฮาตู ฮอย เตด บือเลฮ เลอ. 22 กีตา นะ บูวัจ บรี ตูฮัด กือมูรู-ฮาตี เฆอ? กีตา ตือฆัยํ-อูรัจ ลือเบฮ เดะ ตูฮัด เฆอ? 23 "ลาฆู ฌือแนฮๆ บูวัจ บือเลฮ ซือมูฮา. ฮอย นามา นู กือนา บลารัก." กูญา จะ. ตาปี-จะ บูกัด ลาฆู ซือมูฮา นู ปาโตจ นะ บูวัจ. "ลาฆู ฌือแนฮๆ บูวัจ บือเลฮ ซือมูฮา. ฮอย นามา นู กือนา บลารัก." ตาปี-จะ บูกัด ลาฆู ซือมูฮา นู นะ บูวัจ บรี โกะ ซือมียา นะ ตูฮัด นะ ปือจายา บือตามัฮ เลอ. 24 ฌางัน บรี ซือมียา ดีฮา นะ มียา ลาฆู บาฌิ บีดา ญาวา นะ ญา ตะอาซิก ตาปี บรี ซารี ลาฆู บาฌิ บีดา โกะ ซือมียา อาซิก เลอ. 25 โกะ ซือบารัก ราตา ซือมูฮา นู กูญา ฌูวัน เดะ ปือกัด ฌูวัน โกะ ลูลู เตอ มากัด บือเลฮ ดัฮ เลอ. เตด ปายัฮ นะ มือโซะ ตาญา ลาฆู นามา โปด บีดา นะ บรี ฮาตี ซือนัง. 26 ซาเบะ ซูรัจ ปือมือเลา นะ ตูฮัด มือเลา จะ "ดือนียา อีนี ฌาดี นะ ตูฮัด เตอ ฌางัน โกะ ซือบารัก ซือมูฮา เดะ ดือนียา ฌูฆา เลอ." ญา จะ. 27 กะ ซือมียา เตด ปือจายา ซือมียา ดีฮา บาอาฌะ กาเญา นะ ปี มากัด เดะ รูมัฮ นะ ญา ดัฮ กาเญา ซูกา นะ ปี ปี เลอ มากัด โกะ ซือบารัก ซือมูฮา นู ญา ตืองะ บรี กะ กาเญา. เตด ปายัฮ นะ มือโซะ ตาญา ลาฆู นามา โปด บีดา นะ บรี ฮาตี ซือนัง. 28 ตาปี กะ ซือมียา ดีฮา มือญาเระ กะ กาเญา จะ "บารัก อีนี กือนา อาเกะ มือนืองะ ดัฮ." ฌางัน มากัด ซือบารัก อีตู เลอ บรี ลีฮัจ กะ ซือมียา นู มือญาเระ บรี อาดา ฮาตี ซือนัง ฌูฆา. 29 กู จะ บรี ฮาตี นะ ซือมียา อีตู ซีงี นะ ซือนัง บูกัด ฮาตี นะ กาเญา. ซาเบะ ลาฆู นามา เลอ ฮาตี ตาฮู ซาลัฮ กือนา นะ ซือมียา อาซิก นะ มาแรฮ ซือกัจ ลาฆู นู กู ลือปัซ ดัฮ? 30 กะ กู มากัด ซือบารัก อีตู อาดา ฮาตี ปูฌี กะ ตูฮัด เตอ ซาเบะ นามา เลอ กู กือนา มือฌัฮ ดัฮ กรานา ซือบารัก อีตู นู กู บือเลฮ บือซาโวจ บรี ซือลามัจ กะ ตูฮัด ดัฮ? 31 กะฆีเตอ เลอ เตด-จะ กาเญา นะ มากัด นะ โอะ เตอ เตด-จะ กาเญา นะ บูวัจ ลาฆู นามาๆ โปด กือนา บูวัจ ซือมูฮา บีดา นะ บรี ปูฌี กะ นามา นะ ตูฮัด เลอ. 32 ฌางัน นะ บูวัจ บรี ซือมียา ดีฮา นะ ซือซัจ บูวัจ ซาลัฮ เตด-จะ โกะ ลูมอฮ บักซา ยิว เฆอ-จะ โกะ ลูมอฮ บักซา กรีก เฆอ-จะ โกะ ลูมอฮ นะ ตูฮัด ฌูฆา เลอ. 33 บือกะ ซือรูปา กู ฌูฆา เตอ กู บูวัจ ลาฆู ซือมูฮา บีดา นะ บรี ซือมียา ราตาๆ นะ ซือนัง-ฮาตี เลอ. กู เตด มียา ลาฆู บาฌิ บีดา ญาวา กู ตะอาซิก ตาปี กู มียา ลาฆู บาฌิ บีดา โกะ ซือมียา นู บาญะ บรี กูญา นะ บือเลฮ ฮีโดะ ลือปัซ บาฌิ.
1 กาเญา กือนา บูวัจ ตูโรจ กะ กู ซือรูปา บือกะ นู กู บูวัจ ตูโรจ กะ เยซู คริด เลอ. 2 กู ปูฌี กะ กาเญา เลอ ซาเบะ-จะ กาเญา บือเลฮ บรีงัจ กะ กู เดะ ลาฆู ซือมูฮา บือเลฮ ตูโรจ โกะ ฮาดัจ นู กู กีเรบ บรี ฌางัน กาเญา ดัฮ. 3 ตาปี กู นะ บรี กะ กาเญา มาโซะ เดะ ฮาตี ลาฆู อีนี จะ เยซู คริด เตอ ญา ฌาดี กือปาลา นะ กีลากี ราตา ซือมียา. กีลากี โปด ญา ฌาดี กือปาลา นะ นีบีนี. ตูฮัด เดะ อาตัซ ญา ฌาดี กือปาลา นะ เยซู คริด ฌูฆา เลอ. 4 กีลากี ซือมียา ดีฮา นู บือซาโวจ นู ตูโดฮ ปือมือเลา นะ ตูฮัด อาดา ซือบารัก นามา ตูโดก ปาลา นะ ญา เตอ ญา บูวัจ ลาฆู จือและ กะ กือปาลา นะ ญา. 5 ตาปี นีบีนี ซือมียา ดีฮา นู บือซาโวจ นู ตูโดฮ ปือมือเลา นะ ตูฮัด ดัฮ เตด บอฮ กาเยด ตูโดก เดะ ปาลา เตอ ญา เลอ บูวัจ ลาฆู จือและ กะ กือปาลา นะ ญา เลอ. ซาเบะ-จะ นู บูวัจ กะฆีเตอ ซือรูปา ญา ฌาดี ซือมียา นู กูโกยํ ปาลา ดัฮ. 6 ดัฮ นีบีนี นะ เตด ตูโดก ปาลา เตอ บรี ญา ฆูติก โบะ บรี ปานะ บูวัก เลอ. ตาปี ดัฮ ญา บราซา จือและ นะ ฆูติก โบะ กะฆีเตอ นะ กูโกยํ ปาลา เตอ บรี ญา อาเมด กาเยด ตูโดก ปาลา นะ ญา บูวัก เลอ. 7 กรานา-จะ โซะ กีลากี ญา เตด ปาโตจ นะ ตูโดก ปาลา นะ ญา เลอ ซาเบะ ญา ฌาดี บือกะ รูปา นะ ตูฮัด เดะ อาตัซ บือกะ ลาฆู บือซรี นะ ตูฮัด. ตาปี โซะ นีบีนี เตอ ญา ฌาดี ลาฆู บือซรี นะ กีลากี เตอ เลอ. 8 ซาเบะ-จะ กีลากี ญา เตด บือเลฮ บือฌาดี ดัฮ ดาตัก เดะ นีบีนี เตอ ตาปี นีบีนี บือเลฮ บือฌาดี ดัฮ ดาตัก เดะ กีลากี. 9 กะฆีเตอ ฌูฆา กีลากี เตด บือเลฮ บือฌาดี ดัฮ บีดา นะ ตูโลก นีบีนี เตอ ตาปี นีบีนี บือเลฮ บือฌาดี ดัฮ บีดา นะ ตูโลก กีลากี เลอ. 10 กรานา กะฆีเตอ เลอ กรานา ลีฮัจ กะ โกะ ฮูลู-บาลัก ฌูฆา โกะ นีบีนี ปาโตจ นะ อาดา ปือนานา นะ ลาฆู มือฆัฮ อีนี ตูโดก เดะ ปาลา นะ กูญา. 11 ตาปี มีเซ กะฆีเตอ เดะ ลาฆู นะ ตูฮัด อีนี เตอ นีบีนี ญา กือนา ฮาระ กะ กีลากี ดัฮ. กีลากี โปด ญา กือนา ฮาระ กะ นีบีนี ฌูฆา. 12 ซาเบะ-จะ นีบีนี ญา บือเลฮ บือฌาดี ดาตัก เดะ กีลากี กะฮามี เตอ กีลากี ญา บรานะ มาแรฮ ดาตัก เดะ นีบีนี กะฆีเตอ ฌูฆา เลอ. ตาปี บือนา บารัก ซือมูฮา ดาตัก มาแรฮ เดะ ตูฮัด เดะ อาตัซ เตอ เลอ. 13 กาเญา บรีงัจ ลีฮัจ ตะอาซิก เลอ นู นีบีนี นะ บือซาโวจ กะ ตูฮัด ฮอย นามา ตูโดก ปาลา เตอ ฌาดี ลาฆู ปาโตจ เฆอ? 14 ลีฮัจ เลอ ฮาดัจ นะ โกะ ซือมียา ราตา บรี กีตา ตาฮู ลาฆู กะฆีนี จะ โซะ กีลากี ดัฮ ญา ตาโรฮ โบะ บรี ปาญัก ฌาดี ลาฆู ปือญือและ เลอ. 15 ตาปี โซะ นีบีนี เตอ ดัฮ ญา ตาโรฮ โบะ บรี ปาญัก ฌาดี ลาฆู บือซรี นะ ญา เตอ เลอ. กรานา-จะ โบะ อีตู ตูฮัด บือเลฮ บรี กะ ญา ฌาดี ตือปัจ ตูโดก ปาลา นะ ญา เลอ. 16 กะฆีเตอ กะ ซือมียา ดีฮา ซูกา นะ บือตือฆัฮ เดะ ลาฆู อีนี เตอ ญา กือนา ตาฮู จะ กามี ฮอย เตด ตูโรจ ฮาดัจ นู อาซิก. โกะ ลูมอฮ นะ ตูฮัด ราตา โปด กูญา ฮอย เตด ตูโรจ ฮาดัจ อาซิก ฌูฆา. 17 ตาปี เดะ ลาฆู กู นะ ปือซัด อีนี เตอ กู นะ ปูฌี กะ กาเญา ฮอย เตด บือเลฮ เลอ จะ วะตู กาเญา บือมุน บือซามา กาเญา บูวัจ ลาฆู ตะอารัฮ บาญะ ลือเบฮ เดะ ลาฆู บาฌิ เลอ. 18 ลามูลา เตอ กู บือเลฮ ดืองัยํ ดัฮ จะ วะตู กาเญา บือมุน บือซามา ฌาดี ลูมอฮ นะ ตูฮัด กาเญา บือปือจัฮ ฌาดี โซกซา ปาโซะ. ลาฆู อีตู โปด กู ปือจายา ซือตืองัฮ ฌูฆา. 19 ซาเบะ-จะ ฆาโดฮ อาดา ลาฆู ปือจัฮ-บือลัฮ เดะ ตืองัฮ กาเญา บีดา โกะ ซือมียา ฮาตี รือมัก นะ ปลีฮัจ บรี บือฆารี ซัฮ เดะ ตืองัฮ กาเญา เลอ. 20 กะฆีเตอ วะตู ลูมอฮ กาเญา บือมุน บือซามา เตอ บูกัด ฌาดี ลาฆู บรามัย นะ ตูฮัด นู กาเญา มากัด เลอ. 21 ซาเบะ-จะ นู กาเญา มากัด เตอ โซก ซืออูรัก มากัด โกะ ซือบารัก นะ ตะอาซิก ดูลู เดะ กาวัด เตอ. กะฆีเตอ ซือตืองัฮ ลาปัยํ ซือตืองัฮ มาโบะ เลอ. 22 กะฮามี เลอ? กาเญา ฮอย รูมัฮ ตะอาซิก บีดา นะ มากัด นะ โอะ ตือปัจ อีตู เฆอ? อาดา เลอ. ตาปี กาเญา นะ มือฌัฮ กะ ลูมอฮ นะ ตูฮัด นะ บูวัจ บรี อูรัก ฮาฌะ นะ จือและ กะฆีเตอ เฆอ? เออ กู นะ มือเลา กะฮามี บาฌิ ฌางัน กาเญา เลอ? นะ บรี ปูฌี กะ กาเญา เดะ ลาฆู อีนี เฆอ? เตด โบะ กู ฮอย เตด ปูฌี กะ กาเญา ลาลู เลอ. 23 กรานา-จะ โกะ ฮาดัจ อีตู นู กู บือเลฮ ซาโมจ เดะ ตูฮัด เตอ กู บือเลฮ ซรัฮ บรี กะ กาเญา ปูลัก เลอ ฌาดี-จะ โซะ มาลับ อีตู นู กาวัด นะ เยซู ซรัฮ ญา บรี กือนา รีฆะ เตอ ตูฮัด เยซู ญา อาเมด ตือโปก โรตี 24 ตานา บรี ซือลามัจ กะ ตูฮัด เดะ อาตัซ ดัฮ ญา ลือแปะ มือเลา จะ "นี เลอ ฌาดี ญาวา นะ กู นู ซรัฮ กรานา กาเญา เตอ. กือนา บูวัจ ตูโรจ ลาฆู กะฆีนี บีดา บรีงัจ กะ กู เลอ." 25 ตานา กูญา มากัด ดัฮ ญา อาเมด เจาะ อาระ อางุน มาแรฮ ญา บูวัจ ซือรูปา มือเลา จะ "เจาะ อีนี เลอ ฌาดี ปือมือเลา บือปาคัจ นู บารู นู ตืองะ บรี ตือตู ดัฮ ฌางัน ดารัฮ นะ กู. วะตู ดีฮา นู กาเญา นะ โอะ เดะ เจาะ อีนี เตอ กือนา โอะ บีดา บรีงัจ กะ กู เลอ." 26 ซาเบะ กะฆีเตอ วะตู ดีฮา กาเญา มากัด ตือโปก โรตี อีนี โอะ เดะ เจาะ อีนี เตอ กาเญา มือญาเระ บีตาฮู ปาซัน ลาฆู มาตี นะ ตูฮัด เลอ ตือดะ ญา นะ มาแรฮ ปูลัก. 27 กะฆีเตอ เลอ ซือมียา ดีฮา นู มากัด ตือโปก โรตี นะ ตูฮัด นู โอะ เดะ เจาะ นะ ตูฮัด บือกะ มาจับ นู เตด บือฆูนา เตอ ญา บือเลฮ บูวัจ ซาลัฮ กะ ญาวา นะ ตูฮัด บูวัจ ซาลัฮ กะ ดารัฮ นะ ตูฮัด เลอ. 28 ตาปี ซือมียา ซือมูฮา กือนา มือญาซัจ ฮาตี ตะอาซิก ดูลู บารู มากัด ตือโปก อีนี โอะ บือซามา เดะ เจาะ อีนี เลอ. 29 ซาเบะ-จะ ซือมียา ดีฮา นู มากัด โอะ ตาปี ฮอย เตด บือเลฮ มาโซะ เดะ ฮาตี ปาซัน ญาวา นะ ตูฮัด เตอ นู ญา มากัด โอะ กะฆีเตอ บูวัจ บรี ญาวา นะ ญา ตะอาซิก นะ กือนา กรัจ ฮูโกบ เลอ. 30 ซาเบะ กะฆีเตอ เลอ เดะ ลูมอฮ กาเญา อาดา บาญะ อูรัก นู ฮอย อูรัจ เตด ซือนัง ญาวา เลอ. นู มาตี โปด อาดา ซือตืองัฮ. 31 ตาปี กะ กีตา มือญาซัจ ฮาตี ตะอาซิก เตอ กีตา ฮอย เตด กือนา ตูฮัด กรัจ ฮูโกบ เลอ. 32 ตาปี นู ตูฮัด กรัจ ฮูโกบ กีตา ซือรูปา ญา กาเตาะ อาฌัยํ กีตา ตีเมา บรี กีตา นะ กือนา ฮูโกบ บือซามา ฌางัน ดือนียา อีนี เลอ. 33 กะฆีเตอ เลอ โกะ ดีบราดี นะ กู เออ วะตู กาเญา บือมุน บือซามา นะ มากัด ลาฆู บรามัย นะ ตูฮัด เตอ กือนา มือนาตี บรี ซามาๆ เลอ. 34 ซือมียา ดีฮา นู ลาปัยํ เตอ บรี กูญา มากัด ตือปัจ รูมัฮ นะ กูญา ตาโกจ-จะ วะตู กาเญา บือมุน บือซามา นะ กือนา ตูฮัด กรัจ ฮูโกบ เลอ. ตาปี ปาซัน ลาฆู อาซิกๆ วะตู กู มาแรฮ ดัฮ เตอ กู นะ ปือซัด กะ กาเญา ปูลัก เลอ.
1 ตาปี โกะ ดีบราดี เออ ปาซัน โกะ บือนา บาฌิ นู ซือมืองัจ นะ ตูฮัด บรี เตอ กู นะ บรี กะ กาเญา มาโซะ เดะ ฮาตี โงฮ-ซูโงฮ เลอ. 2 กาเญา ตาฮู จะ วะตู กาเญา เตด บือเลฮ ปือจายา ลาฆี เตอ กาเญา กือนา อีเระ บือปี ซือซัจ ฌาลัด แนฮ-ฌือแนฮ บรี มือญือมัฮ กะ โกะ บราลา นู ฮอย เตด ฮีโดะ เตอ. 3 กะฆีเตอ กู นะ บรี กาเญา ตาฮู กะฆีนี จะ ฮอย ซือมียา ดีฮา นู อาดา ซือมืองัจ นะ ตูฮัด บาวา ญา บือปี เตอ นู นะ มือเลา ซูปัฮ อาโบยํ กะ เยซู. กะฆีเตอ ฌูฆา ซือมียา ดีฮา นู ยอม ซาโงะ จะ เยซู ฌาดี ตูฮัด เลอ ญา เตอ ฆาโดฮ อาดา ซือมืองัจ นะ ตูฮัด บาวา ญา บือปี. 4 อาดา อากัน นู ปานัย แนฮ-ฌือแนฮ ตาปี ซา ซือมืองัจ นะ ตูฮัด เลอ นู ฮาลัย บรี ลาฆู อีตู ซือมูฮา. 5 อาดา ลาฆู บือตูโลก-ตูโลก แนฮ-ฌือแนฮ เตอ ตาปี อาดา ซา ตูฮัด เยซู อีตู เลอ. 6 อาดา ลาฆู บือกรือฌา แนฮ-ฌือแนฮ เตอ ตาปี ซา ตูฮัด เดะ อาตัซ เลอ นู บือกรือฌา เดะ ดาลับ โกะ ซือมียา ซือมูฮา บูวัจ บรี กูญา บือกรือฌา ราตาๆ. 7 ซือมืองัจ นะ ตูฮัด ญา ปลีฮัจ เดะ ดาลับ ซือมียา โซก ซืออูรัก บีดา นะ ตูโลก ลูมอฮ นะ ตูฮัด บือซามา-ซามา เลอ. 8 กะฆีเตอ โซะ ซือมียา นู ซา เตอ ซือมืองัจ นะ ตูฮัด บรี กะ ญา นะ มือเลา ปือมือเลา นู ปานัย อากัน เตอ. โซะ ซือมียา นู ซา ปูลัก ซือมืองัจ นะ ตูฮัด อีตู เลอ นู บรี กะ ญา มือเลา ปือมือเลา นู ตาฮู ซูโงฮ. 9 ซา ซือมืองัจ นะ ตูฮัด อีตู เตอ ญา บรี กะ ซือมียา ซืออูรัก ลาฆี นะ อาดา ลาฆู ปือจายา. ซือมืองัจ อีตู เลอ ญา บรี กะ ซือมียา นู ซา ปูลัก นะ อาดา อากัน นู ปานัย บีดา บือเลฮ บือบือลา ปือญาเกะ แนฮ-ฌือแนฮ. 10 ญา บรี กะ ซือมียา นู ซา บือเลฮ บือกรือฌา บูวัจ ลาฆู ปือมือฆัฮ นู ซีดี เตอ ญา บรี กะ ซือมียา นู ซา ลาฆี นะ มือเลา ตูโดฮ ลาฆู นะ ตูฮัด บือเลฮ เตอ. ญา บรี กะ ซือมียา นู ซืออูรัก ลาฆี เตอ นะ บือเลฮ ตาฮู จะ บือนา นู ปานัย อากัน ดาตัก มาแรฮ เดะ ซือมืองัจ นะ ตูฮัด เฆอ เตด. ญา บรี กะ ซือมียา นู ซา ปูลัก บือเลฮ มือเลา โกะ บาซา แนฮ-ฌือแนฮ เตอ ญา บรี กะ ซือมียา นู ซา ลาฆี นะ บือเลฮ กาเลฮ โกะ บาซา อีตู ซีงี. 11 ตาปี อาดา ซา ซือมืองัจ นะ ตูฮัด อีตู เลอ นู บือกรือฌา บูวัจ ลาฆู อีตู ซือมูฮา. ตูโรจ กะ ฮาตี นะ ญา เตอ ญา ปาฮาฆิ บรี กะ ซือมียา ซิกมาซิก นะ อาดา อากัน นู ปานัย โซกซา มาจับ เลอ. 12 เยซู คริด ญา ฌาดี ซือรูปา บือกะ ญาวา นะ ซือมียา นู ฌาดี ซา ญาวา เตอ ตาปี อาดา กลือกะ บาญะ ฌือแนฮ. โกะ กลือกะ ราตา ซือมูฮา ฌูฆา มีเซ-จะ อาดา บาญะ เตอ ตาปี ฌาดี ซา ญาวา เลอ. 13 กะฆีเตอ ฌูฆา เลอ กีตา ซือมูฮา เตด-จะ ฌาดี บักซา ยิว ฌาดี บักซา กรีก เตอ ฌาดี ปราโซฮ เตด ฌาดี ปราโซฮ เตอ ซือรูปา กีตา ซือมูฮา บือเลฮ ซือลับ เดะ ดาลับ ซา ซือมืองัจ นะ ตูฮัด อีตู บรี มาโซะ ฌาดี ซา ญาวา ดัฮ เลอ. กีตา ซือมูฮา บือเลฮ ซาโมจ ซา ซือมืองัจ นะ ตูฮัด บรี ปือนอฮ ซือรูปา กีตา โอะ เดะ ญา ดัฮ. 14 ซาเบะ-จะ ญาวา นะ ซือมียา เตอ ญา บูกัด แนฮ ซา กลือกะ ตาปี อาดา กลือกะ บาญะ เลอ. 15 มีเซ-จะ กากี นะ มือเลา จะ "กู บูกัด ตางัน เตอ กะฆีเตอ กู บูกัด กลือกะ เดะ ญาวา เลอ." นู มือเลา กะฆีเตอ นะ บูวัจ บรี กากี อีตู เตด ฌาดี กลือกะ เดะ ญาวา บือเลฮ เฆอ? 16 มีเซ-จะ ตือลีงา นะ มือเลา จะ "กู บูกัด มาตา เตอ กะฆีเตอ กู บูกัด กลือกะ เดะ ญาวา เลอ." นู มือเลา กะฆีเตอ นะ บูวัจ บรี ตือลีงา อีตู เตด ฌาดี กลือกะ เดะ ญาวา บือเลฮ เฆอ? ฮอย เตด บือเลฮ เลอ. 17 กะ ญาวา ฌาดี มาตา ฮาบิฮ เตอ นะ ดืองัยํ บือเลฮ กะฮามี เลอ? กะ ญาวา ฌาดี ตือลีงา ฮาบิฮ เตอ นะ บือบาวู กรือซัย บือเลฮ กะฮามี เลอ? 18 ตาปี ตูฮัด เดะ อาตัซ บือเลฮ บูวัจ บรี ฌาดี กะฆีนี ญา ปือตัด ญาวา บรี อาดา โกะ กลือกะ ราตา ฌือแนฮ ตูโรจ กะ ฮาตี นะ ญา เลอ. 19 กะ ซือมูฮา ฌาดี กลือกะ แนฮ ซือมาจับ เตอ ญาวา นะ อาดา ปัจ ดีฮา เลอ? 20 ตาปี ฌาดี กะฆีนี จะ อาดา กลือกะ บาญะ ตาปี ฌาดี ญาวา แนฮ ซา เลอ. 21 กะฆีเตอ เลอ มาตา นะ มือเลา ฌางัน ตางัน จะ "กู เตด ฆาโดฮ อาดา เกา" เตด บือเลฮ ดัฮ. ปาลา นะ มือเลา ฌางัน โกะ กากี จะ "กู เตด ฆาโดฮ อาดา กาเญา" เตด บือเลฮ ฌูฆา เลอ. 22 บูกัด กะฆีเตอ เลอ ตาปี โกะ กลือกะ เดะ ญาวา นู กีตา ลีฮัจ จะ ลือมัฮ เตอ กลือกะ อีตู เลอ นู ญาวา กีตา ฆาโดฮ อาดา. 23 โกะ กลือกะ เดะ ญาวา นู กีตา อีงัจ จะ เตด บือฆูนา เตอ เตด ปาโตจ นะ บรี ซือมียา ลีฮัจ บือฆารี เตอ กลือกะ อีตู เลอ กีตา บือบือลา บรี บาฌิ ลาฆี ปากัย กาเยด ตูโดก บรี บาฌิ เลอ. 24 บือกะ-จะ โกะ กลือกะ นู ปาโตจ นะ บรี ซือมียา ลีฮัจ บือฆารี เตอ เตด ฆรานา อาดา ลาฆู กะฆีเตอ เลอ. ตาปี ตูฮัด เดะ อาตัซ เตอ ญา เลอ บือเลฮ บือกระ ญาวา กะฆีเตอ ดัฮ บีดา นะ บรี มูคา กะ โกะ กลือกะ นู กีตา อีงัจ จะ เตด บือฆูนา 25 บีดา-จะ ฮอย ลาฆู ปือจัฮ-บือลัฮ เดะ ญาวา เตอ ตาปี โกะ กลือกะ นะ บือฮีมัจ ซายัก บือซามา-ซามา เลอ. 26 ดัฮ กลือกะ นู ซา ซาเกะ โกะ กลือกะ ราตา ซือมูฮา นะ ซาเกะ บือซามา ฌูฆา. ดัฮ โกะ ซือมียา มือโอจ กะ กลือกะ นู ซา โกะ กลือกะ ราตา ซือมูฮา ซูกา-ฮาตี บือซามา ฌูฆา เลอ. 27 โซะ กาเญา ซือมูฮา เตอ ฌาดี ญาวา นะ เยซู คริด ซิกมาซิก ฌาดี กลือกะ เดะ ญาวา อีตู เลอ. 28 กะฆีเตอ ตูฮัด เดะ อาตัซ บือเลฮ ตืองะ โกะ ซือมียา เดะ ลูมอฮ นะ ตูฮัด กะฆีนี จะ นู ซา โกะ ปือญูโรฮ เตอ นู ดูวา โกะ ซือมียา ตูโดฮ ลาฆู นะ ตูฮัด นู ตีฆา โกะ ซือมียา อาฌัยํ. ลือปัซ อีตู อาดา โกะ ซือมียา บือกรือฌา ลาฆู ปือมือฆัฮ นู ซีดี เตอ. ลือปัซ อีตู ปูลัก โกะ ซือมียา อาดา อากัน นู ปานัย บือเลฮ บือบือลา ปือญาเกะ แนฮ-ฌือแนฮ เตอ โกะ ซือมียา ตูโลก อูรัก ฮาฌะ โกะ ซือมียา นู ปานัย บือกีรา ลาฆู ลูมอฮ นะ ตูฮัด โกะ ซือมียา นู ปานัย มือเลา บาซา แนฮ-ฌือแนฮ เลอ. 29 ซือมูฮา ฌาดี ปือญูโรฮ เฆอ? บูกัด เลอ. ซือมูฮา ฌาดี ซือมียา ตูโดฮ ฌาดี ซือมียา อาฌัยํ เฆอ? บูกัด. ซือมูฮา ฌาดี ซือมียา บือเลฮ บูวัจ ปือมือฆัฮ นู ซีดี 30 ฌาดี ซือมียา อาดา อากัน นู ปานัย บือเลฮ บือบือลา ปือญาเกะ แนฮ-ฌือแนฮ เฆอ? บูกัด. ซือมูฮา ฌาดี ซือมียา ปานัย มือเลา โกะ บาซา อาซิกๆ ฌาดี ซือมียา ปานัย กาเลฮ โกะ บาซา อีตู เฆอ? บูกัด กะฆีเตอ เลอ. 31 ตาปี บรี กาเญา กูวาซา มียา โกะ อากัน นู ปานัย นู บาฌิ ลาฆี เลอ. บารู กู นะ บรี กาเญา ลีฮัจ ซา ฌาลัด นู บาฌิ ลือเบฮ บาญะ เลอ.
1 มีเซ-จะ กู นะ บือเลฮ มือเลา โกะ บาซา นะ ลูมอฮ ซือมียา เตอ บาซา นะ ลูมอฮ ฮูลู-บาลัก โปด ตาปี ฮอย เตด ซายัก กะ กาวัด ปือมือเลา นะ กู ฌาดี ซือรูปา กือตาวะ ซูวารา มือฮาโมก ซือรูปา ชิง-ญับ นู ตืองัฮ บูงี เลอ. 2 กะฆีเตอ มีเซ-จะ กู นะ บือเลฮ มือเลา ตูโดฮ ลาฆู นะ ตูฮัด บือเลฮ มาโซะ เดะ ฮาตี ลาฆู ดาลับ ซูโงฮ ซือมูฮา บือเลฮ ตาฮู ลาฆู ราตาๆ เตอ มีเซ-จะ กู นะ ปือจายา ปือนอฮ ฮาบิฮ ตือฆามะ บือเลฮ อาเกะ อูบัฮ โกะ บูเกะ โปด ตาปี ฮอย เตด ซายัก กะ กาวัด กู ฮอย รือฆา นามา เลอ. 3 กะฆีเตอ ฌูฆา มีเซ-จะ กู นะ อาเมด โกะ บือนา บารัก นะ กู ซือมูฮา ปี ปาฮาฆิ บรี ฮาบิฮ เตอ มีเซ-จะ กู นะ ซรัฮ ญาวา นะ กู บรี กะ กูญา ตูนู ฮางอซ โปด ตาปี ฮอย เตด ซายัก กะ กาวัด เตอ กู ฮอย เตด บือเลฮ บาฌิ นามา เลอ. 4 ซือมียา นู ซายัก กะ กาวัด เตอ ญา ตาฮัด-ฮาตี ลามา ญา ฮาตี บาฌิ เลอ ญา ฮอย เตด ซาเกะ-ฮาตี กะ กาวัด ฮอย เตด งันตืองัน มือนูโญะ กะ ญาวา ตะอาซิก เตอ. 5 ญา ฮอย เตด มือเลา กาซัยํ กะ กาวัด ฮอย เตด บรีงัจ กะ ซา ญาวา นะ ญา ตะอาซิก เตอ. ญา ฮอย ฮาตี ฮางัจ. ญา เตด จับ ตาโรฮ ลาฆู ซาลัฮ นะ กาวัด เตอ. 6 ซือมียา นู ซายัก อีตู ญา ฮอย เตด ซูกา-ฮาตี เดะ ลาฆู ฌาฮัจ เตอ ตาปี ญา ซูกา-ฮาตี เดะ ลาฆู นู ซูโงฮ เลอ. 7 ซือมียา นู ซายัก ญา ตาฮัด บือเลฮ ฮาปา ญา ปือจายา เตด บราดู จาดัก เตด บราดู ฌูฆา ตาฮัด-ฮาตี เดะ ลาฆู ซือมูฮา เลอ. 8 ลาฆู ซายัก เตอ ญา ฮอย อารี นะ ฮาบิฮ เลอ. โซะ ปือมือเลา ตูโดฮ ญา นะ ลือแงะ ปี ดัฮ เตอ โซะ ลาฆู ปานัย มือเลา โกะ บาซา อาซิกๆ ญา นะ บราดู ดัฮ เตอ โซะ ลาฆู นู โกะ ซือมียา ตาฮู โปด ญา นะ ลือแงะ ปี ฌูฆา. 9 ซาเบะ-จะ นู กีตา ตาฮู กีตา ตาฮู เตด ฮาบิฮ นู กีตา มือเลา ตูโดฮ กีตา ตูโดฮ เตด ฮาบิฮ. 10 ตาปี ตานา ลาฆู นู ปือนอฮ ซูโงฮ นะ มาแรฮ รอจ เตอ ลาฆู นู เตด ปือนอฮ ฮาบิฮ อีตู นะ ลือแงะ ปี ดัฮ. 11 วะตู กู ฌาดี นานะ ลาฆี กู อาดา มือเลา ซือรูปา บือกะ โกะ นานะ อาดา บรีงัจ อาดา บือกีรา ซือรูปา บือกะ โกะ นานะ ฌูฆา. ตาปี วะตู กู บือซัยํ ดัฮ กู บือเลฮ ตีงัน ปรางัย นู บือกะ โกะ นานะ บูวัก ดัฮ เลอ. 12 ซาเบะ-จะ วะตู อีนี ซือรูปา กีตา ลีฮัจ เดะ จรือเมน นู บือดาบู. ตาปี วะตู โซะ ฮึลด อีตู ซือรูปา กีตา นะ บือซูวา มูคา ฌางัน ตูฮัด เลอ. วะตู อีนี กู ตาฮู เตด ฮาบิฮ ตาปี วะตู อีตู กู นะ มาโซะ เดะ ฮาตี ปือนอฮ ดัฮ เลอ ซือรูปา บือกะ ตูฮัด ญา มาโซะ เดะ ฮาตี ลาฆู นะ กู ปือนอฮ ดัฮ. 13 กะฆีเตอ เดะ วะตู อีนี อาดา ตีฆา มาตา อีนี นู ดูโดะ กือฌะ ฌาดี-จะ ลาฆู ปือจายา ลาฆู จาดัก ฌางัน ลาฆู ซายัก เตอ. ตาปี นู บือซัยํ เดะ กาวัด ฌาดี-จะ ลาฆู ซายัก เลอ.
1 กะฆีเตอ บรี กาเญา ซือมาตา ซายัก บือซามา เลอ. กือนา กูวาซา มียา โกะ อากัน นู ปานัย นู ซือมืองัจ นะ ตูฮัด บรี เตอ ตาปี ลือเบฮ เดะ มานามา บรี กาเญา ปานัย มือเลา ตูโดฮ ลาฆู นะ ตูฮัด. 2 ซาเบะ-จะ โซะ ซือมียา นู มือเลา บาซา อาซิก เตอ บูกัด ญา มือเลา ฌางัน โกะ ซือมียา ตาปี ญา มือเลา ฌางัน ตูฮัด เดะ อาตัซ เลอ ซาเบะ-จะ ฮอย ซาปา นะ มาโซะ เดะ ฮาตี กะ ปือมือเลา นะ ญา เลอ. ญา มือเลา ลาฆู ดาลับ ซูโงฮ โซะ ซือมืองัจ นะ ตูฮัด. 3 ตาปี โซะ ซือมียา นู มือเลา ตูโดฮ ลาฆู นะ ตูฮัด เตอ ญา มือเลา ฌางัน โกะ ซือมียา เลอ บีดา นะ ตูโลก กูญา บรี ปือจายา กือฌะ-กือมัซ บีดา นะ ปูโฌะ ฮาตี นะ กูญา บรี ซือนัง-ฮาตี บาฌิ. 4 ซือมียา นู มือเลา บาซา อาซิก ญา ตูโลก ซา ญาวา นะ ญา ตะอาซิก บรี กือฌะ-กือมัซ เตอ ตาปี ซือมียา นู มือเลา ตูโดฮ ลาฆู นะ ตูฮัด ญา ตูโลก ลูมอฮ นะ ตูฮัด ซือมูฮา เลอ บรี ปือจายา กือฌะ-กือมัซ. 5 ซูโงฮ เลอ กู ซูกา บรี กาเญา ซือมูฮา นะ มือเลา โกะ บาซา อาซิกๆ บือเลฮ. ตาปี บาญะ ลือเบฮ เดะ อีตู ปูลัก กู ซูกา บรี กาเญา นะ มือเลา ตูโดฮ ลาฆู นะ ตูฮัด. ซาเบะ-จะ กะ ฮอย ซาปา บือเลฮ กาเลฮ บาซา อีตู บีดา นะ ตูโลก ลูมอฮ นะ ตูฮัด ซือมูฮา บรี ปือจายา กือฌะ-กือมัซ กะฆีเตอ ซือมียา นู มือเลา ตูโดฮ อีตู ญา อาดา รือฆา ลือเบฮ เดะ ซือมียา นู ปานัย มือเลา โกะ บาซา อาซิกๆ เลอ. 6 กะฆีเตอ โกะ ดีบราดี เออ วะตู กู มาแรฮ รอจ กะ กาเญา กะ กู มือเลา โกะ บาซา อาซิกๆ เตอ นะ ตูโลก กาเญา บือเลฮ กะฮามี? ฮอย เตด บือเลฮ เลอ. กู ฆาโดฮ อาเมด ลาฆู บาฌิ มาแรฮ มือญาเระ กะ กาเญา เลอ ฌาดี-จะ ลาฆู นู ตูฮัด บือเลฮ ปลีฮัจ กะ กู ดัฮ ลาฆู นู บรี ตาฮู ซูโงฮ เตอ ลาฆู ตูโดฮ ลาฆู อาฌัยํ เตอ. กะฆีเตอ เลอ นะ บือเลฮ ตูโลก กาเญา. 7 ลีฮัจ เลอ โกะ ซือบารัก นู ฮอย เตด ฮีโดะ บือกะ โกะ ซือลูนัย โกะ บือฌูลา เตอ กะ ซือมียา นู ตีโยะ นู กาเตฮ ญา บูวัจ บูงี เตด ซัฮ ซาปา นะ บือเลฮ ตาฮู จะ ญา ตีโยะ ลาฆู นามา กาเตฮ ลาฆู นามา เลอ? 8 บือกะ ซือมียา ตีโยะ ซือลูนัย บือปรัก ฌูฆา กะ ญา ตีโยะ บูงี เตด ซัฮ ซาปา เลอ นะ บือเลฮ ตาฮู จะ ฆาโดฮ ซียะ ญาวา บีดา นะ บือปรัก? 9 โซะ กาเญา ฌาดี กะฆีเตอ ฌูฆา เลอ. กะ กาเญา มือเลา บาซา อาซิก มือเลา บือกะ เตด มาโซะ เดะ ฮาตี เตอ ซือมียา ดืองัยํ ญา นะ ตาฮู บือเลฮ กะฮามี จะ กาเญา มือเลา ลาฆู นามา? เตด บือเลฮ เลอ. ปือมือเลา นะ กาเญา เตอ ซือรูปา บือกะ อาเงน บาวา บือปี ลือแงะ ฮาบิฮ ดัฮ. 10 ซูโงฮ เลอ เดะ ดือนียา อีนี อาดา บาซา มือเลา บาญะ ฌือแนฮ ตาปี ซือมูฮา อาดา ซือมียา นู นะ บือเลฮ ตาฮู ดืองัยํ ลาฆู อีตู. 11 ตาปี กะ กู เตด ตาฮู ดืองัยํ ลาฆู ดีฮา เตอ ซือมียา นู มือเลา ลาฆู อีตู นะ ลีฮัจ จะ กู ฌาดี ซือมียา บักซา อาซิก. กู โปด นะ ลีฮัจ กะ ซือมียา อีตู จะ ญา ฌาดี ซือมียา บักซา อาซิก ฌูฆา. 12 โซะ กาเญา ฌาดี กะฆีเตอ ฌูฆา เลอ. กาเญา ราเฌด ตูโรจ โกะ อากัน นู ปานัย บือกะ นู ซือมืองัจ นะ ตูฮัด บรี. กะฆีเตอ ลือเบฮ เดะ มานามา บรี กาเญา กูวาซา นะ ปานัย เดะ ลาฆู นู นะ ตูโลก ลูมอฮ นะ ตูฮัด บรี ปือจายา กือฌะ-กือมัซ. 13 ซาเบะ กะฆีเตอ ซือมียา นู ปานัย มือเลา บาซา อาซิก เตอ บรี ญา บือซาโวจ มีตา นะ บือเลฮ ปานัย อากัน นะ กาเลฮ ปือมือเลา อีตู ฌูฆา เลอ. 14 ซาเบะ-จะ กะ กู นะ บือซาโวจ ฌาดี บาซา อาซิก เตอ ซูโงฮ ฮาตี นะ กู บือซาโวจ บือกะ ซือมืองัจ นะ ตูฮัด บาวา ตาปี กู เตด บือเลฮ ตาฮู ลาฆู อีตู เตด บือเลฮ ซาโมจ ลาฆู นามา นู บาฌิ เลอ. 15 กะฆีเตอ กู นะ บูวัจ กะฮามี บาฌิ? กู นะ บือซาโวจ บือกะ ซือมืองัจ นะ ตูฮัด บาวา ฮาตี นะ กู นะ บือซาโวจ บือกะ กู ตาฮู มาโซะ เดะ ฮาตี ฌูฆา. กู นะ มือญาญี บือกะ ซือมืองัจ นะ ตูฮัด บาวา ฮาตี นะ กู นะ มือญาญี บือกะ กู ตาฮู มาโซะ เดะ ฮาตี ฌูฆา เลอ. 16 เตด กะฆีเตอ กะ เกา ตืองัฮ ปูฌี กะ ตูฮัด บือกะ ซือมืองัจ นะ ตูฮัด บาวา ฮาตี นะ เกา เตอ โซะ ซือมียา นู เตด ตาฮู ลาฆี ญา นะ มือเลา จะ "อาเมน" เดะ ปือมือเลา บือซาโวจ ปูฌี กะ ตูฮัด อีตู บือเลฮ กะฮามี เลอ? ซาเบะ-จะ ปือมือเลา นะ เกา เตอ ญา เตด ตาฮู ดืองัยํ ลาลู. 17 นู เกา ปูฌี กะ ตูฮัด บาฌิ ดัฮ ตาปี ญา เตด ตูโลก ซือมียา อีตู ซีงี บรี ญา ปือจายา กือฌะ-กือมัซ เลอ. 18 กู บรี ซือลามัจ กะ ตูฮัด จะ กู มือเลา โกะ บาซา อาซิกๆ บือเลฮ บาญะ ลือเบฮ เดะ กาเญา ซือมูฮา เลอ. 19 ตาปี วะตู ลูมอฮ นะ ตูฮัด บือมุน บือซามา กู ซูกา นะ มือเลา แนฮ ลีมา ปาตัฮ บือกะ นู มาโซะ เดะ ฮาตี บีดา นะ อาฌัยํ โกะ ซือมียา นู อาซิก เตอ กะฆีเตอ บาฌิ ลือเบฮ เดะ นู มือเลา บือรีบู-รีบู ปาตัฮ นู ฌาดี บาซา อาซิก เลอ. 20 โกะ ดีบราดี เออ ฌางัน ฌาดี บือกะ โกะ นานะ เลอ เดะ ลาฆู นู กาเญา อีงัจ. โซะ ลาฆู ฌาฮัจ กือนา ฌาดี ซือรูปา บือกะ นานะ ดือมิ เตอ ตาปี โซะ ลาฆู นู กาเญา อีงัจ อีตู กือนา ฌาดี ซือรูปา ซือมียา บือซัยํ เลอ. 21 เดะ ซูรัจ ปือมือเลา นะ ตูฮัด อาดา ฆาแรฮ ดัฮ จะ "กู นะ ซูโรฮ โกะ ซือมียา นู มือเลา บาซา อาซิกๆ กู นะ ซูโรฮ มูโลจ นะ โกะ ซือมียา บักซา อาซิก เตอ บีดา กู นะ มือเลา ฌางัน ลูมอฮ ซือมียา อีนี. ตาปี มีเซ กะฆีเตอ โปด กูญา นะ ฮอย เตด มือนีงัย กะ กู เลอ." ตูฮัด ญา จะ. 22 กะฆีเตอ เลอ นู ซือมียา มือเลา โกะ บาซา อาซิกๆ เตอ ญา ฌาดี ปือนานา บรี กะ ลูมอฮ ซือมียา นู เตด บือเลฮ ปือจายา บูกัด บรี กะ ลูมอฮ ซือมียา นู ปือจายา ดัฮ. ตาปี นู ซือมียา มือเลา ตูโดฮ ลาฆู นะ ตูฮัด เตอ ญา ฌาดี ปือนานา บรี กะ ลูมอฮ ซือมียา ปือจายา บูกัด บรี กะ ลูมอฮ ซือมียา นู เตด บือเลฮ ปือจายา เลอ. 23 กะฆีเตอ วะตู ลูมอฮ นะ ตูฮัด ซือมูฮา บือมุน บือซามา ดัฮ กะ ซือมูฮา ปาคัจ มือเลา โกะ บาซา อาซิกๆ เตอ บารู อาดา ซือมียา วัยํ-ลูวัยํ ซือมียา เตด ปือจายา มาโซะ เตอ กะฆีเตอ ซือมียา อีตู ซีงี นะ กีรา จะ กาเญา ปาคัจ ฆีลา ดัฮ บูกัด เฆอ? 24 ตาปี กะ ซือมูฮา ตืองัฮ มือเลา ตูโดฮ ลาฆู นะ ตูฮัด บารู อาดา ซือมียา เตด ปือจายา ซือมียา วัยํ-ลูวัยํ มาโซะ เตอ ปือมือเลา นะ กาเญา ซือมูฮา นะ จูโจะ รอจ กะ ฮาตี นะ ญา บรี ญา ตาฮู ซูโงฮ ดัฮ จะ ญา บือดูซา เลอ. 25 ลาฆู นู ญา บูนี ดัฮ เดะ ดาลับ ฮาตี นะ ญา เตอ ญา นะ กือนา ปลีฮัจ บรี ซัฮ. กะฆีเตอ ญา นะ ตือมะ มูคา รอจ กะ ตานัฮ มือญือมัฮ กะ ตูฮัด เดะ อาตัซ มือเลา ซาโงะ จะ "ซูโงฮ เลอ ตูฮัด อาดา เดะ ตืองัฮ กาเญา." 26 กะฆีเตอ โกะ ดีบราดี เออ กู นะ มือเลา กะฮามี เลอ? วะตู กาเญา บือมุน บือซามา กาเญา โซก ซืออูรัก อาดา ลาฆู บาฌิ นะ มาแรฮ ปาฮาฆิ. นู ซืออูรัก อาดา ลาฆู มือญาญี นู ซืออูรัก อาดา ลาฆู อาฌัยํ นู ซืออูรัก อาดา ลาฆู นู ตูฮัด ปลีฮัจ ดัฮ เตอ นู ซืออูรัก อาดา ปือมือเลา บาซา อาซิก นู ซืออูรัก ลาฆี ญา นะ กาเลฮ ปือมือเลา บาซา อาซิก ซีงี บรี ตาฮู. ตาปี กือนา บูวัจ ลาฆู ซือมูฮา เลอ บีดา นะ ตูโลก ลูมอฮ นะ ตูฮัด บรี ปือจายา กือฌะ-กือมัซ. 27 กะ ซือมียา ดีฮา นะ มือเลา บาซา อาซิก เตอ ฮาบิฮ บาญะ บรี อาดา ดูวา ตีฆา อูรัก มือเลา นาตี ตูโรจ กะ กาวัด เลอ. บารู บรี ซือมียา นู ซา กาเลฮ ลาฆู บาซา อีตู บรี ตาฮู. 28 ตาปี กะ ฮอย ซาปา ปานัย กาเลฮ ลาฆู อีตู บรี กูญา ซืองะ เดะ ตือปัจ บือมุน ลูมอฮ นะ ตูฮัด. บรี กูญา มือเลา เดะ ฮาตี นะ กูญา ตะอาซิก มือเลา ฌางัน ตูฮัด กะฆีเตอ เลอ. 29 บรี โกะ ซือมียา ตูโดฮ ลาฆู นะ ตูฮัด มือเลา ฌูฆา ดูวา ตีฆา อูรัก. บรี กะ โกะ ซือมียา ฆีลาฆี บรีงัจ บือกีรา เดะ ลาฆู นู กูญา อีตู มือเลา. 30 ตาปี กะ อาดา ลาฆู ปลีฮัจ กะ ซือมียา อาซิก นู ดูโดะ บือซามา บรี ซือมียา นู มือเลา ลามูลา อีตู บราดู มือเลา ดูโดะ งะซืองะ เลอ. 31 ซาเบะ-จะ กาเญา ซือมูฮา นะ บือเลฮ มือเลา ตูโดฮ ลาฆู นะ ตูฮัด ซือกาลี ซืออูรักๆ บีดา ซือมียา ซือมูฮา นะ บือเลฮ บลาฌัยํ เตอ บีดา นะ บือเลฮ ปูโฌะ-ฮาตี นะ ซือมียา ซือมูฮา ฌูฆา เลอ. 32 นู นะ มือเลา ตูโดฮ ลาฆู นะ ตูฮัด ญา ดูโดะ เดะ บาวัฮ ฮูโกบ นะ ซือมียา นู มือเลา ตูโดฮ อีตู. 33 ซาเบะ-จะ ตูฮัด ญา ตีเมา บรี กีตา จาเจา ปี แจะ-บีแระ ตาปี ญา นะ บรี กีตา ดูโดะ ซือนัง ซือลามัจ เลอ บือกะ เดะ โกะ ลูมอฮ ซือมียา นะ ตูฮัด ซือมูฮา ราตา. 34 บรี โกะ นีบีนี ดูโดะ งะซืองะ เดะ ตือปัจ บือมุน ลูมอฮ นะ ตูฮัด. ตีเมา บรี กูญา มือเลา บูริ เลอ. บือกะ ซูรัจ ปือมือซัด ฮูโกบ ปือซัด ฌูฆา จะ บรี กูญา ดูโดะ เดะ บาวัฮ ฮูโกบ เลอ. 35 กะ กูญา ซูกา นะ ตาฮู ลาฆู นามา เตอ บรี กูญา ตาญา ลากี นะ กูญา ตือปัจ รูมัฮ เลอ. ซาเบะ-จะ นู นีบีนี นะ มือเลา บูริ เดะ ตือปัจ บือมุน ลูมอฮ นะ ตูฮัด เตอ ฌาดี ลาฆู จือและ เลอ. 36 กะฮามี เลอ? ปือมือเลา นะ ตูฮัด ดาตัก มาแรฮ เดะ ลูมอฮ กาเญา เฆอ? ปือมือเลา อีตู ปี รอจ กะ ซา ลูมอฮ กาเญา เฆอ? 37 ซือมียา ดีฮา นู กีรา จะ ญา ฌาดี ซือมียา มือเลา ตูโดฮ ลาฆู นะ ตูฮัด ฌาดี ซือมียา อาดา อากัน นู ปานัย ดาตัก เดะ ซือมืองัจ นะ ตูฮัด เตอ ญา ฆาโดฮ ซาโงะ จะ นู กู ตืองัฮ ฆาแรฮ กะ กาเญา อีนี ฌาดี ปือมือซัด นะ ตูฮัด เลอ. 38 ตาปี กะ ซือมียา ดีฮา เตด ปือดูลี กะ ลาฆู อีนี ฌางัน ปือดูลี กะ ญา เลอ. 39 กะฆีเตอ โกะ ดีบราดี นะ กู เออ บรี กาเญา ราเฌด กูวาซา นะ บือเลฮ มือเลา ตูโดฮ ลาฆู นะ ตูฮัด. ลาฆู มือเลา โกะ บาซา อาซิกๆ เตอ ฌางัน นะ บลารัก เลอ. 40 ตาปี เดะ ลาฆู ซือมูฮา กือนา บูวัจ ตูโรจ บือกะ ลาฆู นู บาฌิ ตูโรจ กะ ฮาดัจ นู บาฌิ เลอ.
1 กะฆีเตอ โกะ ดีบราดี เออ กู นะ ปรีงัจ กะ กาเญา ปาซัน บรีตา นู บาฌิ อีตู นู กู บือเลฮ มือญาเระ กะ กาเญา ดัฮ นู กาเญา ซาโมจ ดัฮ นู ฌาดี ตือปัจ บือดีรี กือฌะ นะ กาเญา เลอ. 2 บรีตา นู บาฌิ เตอ ฌาดี-จะ ปือมือเลา อีตู นู กู บือเลฮ มือญาเระ กะ กาเญา เตอ. กะ กาเญา ปือฆัก ลาฆู อีตู บรี กือฌะ-กือมัซ ญา นะ บูวัจ บรี กาเญา ฮีโดะ ลือปัซ บาฌิ ดัฮ เลอ. กะ เตด ฌาดี กะฆีเตอ นู กาเญา ปือจายา ญา รูฆี ดัฮ เลอ. 3 ซาเบะ-จะ ลาฆู อีตู นู กู ซาโมจ ดัฮ กู บือเลฮ กีเรบ บรี กะ กาเญา ฌูฆา ฌาดี ลาฆู นู ซัยํ-บือซัยํ เดะ กาวัด จะ เยซู คริด บือเลฮ มาตี ดัฮ กรานา ดูซา นะ กีตา บือกะ อาดา ฆาแรฮ ดูลู ดัฮ เดะ ซูรัจ ปือมือเลา นะ ตูฮัด. 4 ญา กือนา ตานัม ดัฮ ตาปี เดะ อารี ตีฆา ญา กือนา อาเกะ บือบีกัซ บรี ฮีโดะ ปาเระ เดะ มาตี ดัฮ เลอ บือกะ อาดา ฆาแรฮ ดูลู ดัฮ เดะ ซูรัจ ปือมือเลา นะ ตูฮัด. 5 ญา ปลีฮัจ กะ เปโตร บารู ญา ปลีฮัจ กะ ลูมอฮ ปือญูโรฮ ดูวา-บือลัซ อูรัก นะ ญา. 6 ลือปัซ อีตู ญา ปลีฮัจ กะ โกะ ดีบราดี นู ปือจายา ลือเบฮ เดะ ลีมา ราตุซ อูรัก ซือกาลี. กูญา อีตู เตอ ซือตืองัฮ มาตี ดัฮ ตาปี นู บาญะ ญา อาดา ฮีโดะ ลาฆี รอจ กะ อารี อีนี เลอ. 7 ลือปัซ อีตู ปูลัก ญา บือเลฮ ปลีฮัจ กะ ยากอบ บารู ปลีฮัจ กะ โกะ ปือญูโรฮ นะ ญา ซือมูฮา. 8 ปือญูดัฮ เดะ กาวัด เตอ ญา ปลีฮัจ กะ กู ซือรูปา กู ฌาดี นานะ นู ดูโดะ เดะ อาปี เตด ฆือนะ บูลัด. 9 ซาเบะ-จะ กู นี ฌาดี ซือมียา ดือมิ เดะ กาวัด เดะ ลูมอฮ ปือญูโรฮ เตอ เตด ปาโตจ นะ กือนา บลาโลก จะ ฌาดี ปือญูโรฮ นะ ตูฮัด เลอ ซาเบะ กู บือเลฮ ปรือกัด ซา ลูมอฮ นะ ตูฮัด อีตู ดัฮ. 10 ตาปี ตูฮัด เดะ อาตัซ บือเลฮ ฮาลัย บรี ซือลามัจ กะ กู ดัฮ บรี กู ฌาดี ปือญูโรฮ นะ ญา กะฆีนี. นู ญา บรี ซือลามัจ กะฆีเตอ ฮอย เตด ฌาดี ลาฆู รูฆี เลอ. บูกัด กะฆีเตอ ตาปี กู ราเฌด บือกรือฌา ลือเบฮ เดะ ลูมอฮ ปือญูโรฮ ซือมูฮา ปูลัก. โงฮ-ซูโงฮ เตอ บูกัด กู บือกรือฌา ตะอาซิก ตาปี นู ตูฮัด บือเลฮ ฮาลัย บรี ซือลามัจ กะ กู ญา บือกรือฌา เดะ ดาลับ ญาวา กู เลอ. 11 กะฆีเตอ เตด-จะ กู เฆอ-จะ โกะ ปือญูโรฮ อาซิก เตอ กามี บือเลฮ มือญาเระ ลาฆู กะฆีเตอ ดัฮ. กาเญา โปด บือเลฮ ปือจายา ลาฆู กะฆีเตอ ฌูฆา เลอ. 12 กะฆีเตอ เลอ นู กีตา มือญาเระ บีตาฮู ดัฮ จะ เยซู คริด บือเลฮ ฮีโดะ ปาเระ เดะ มาตี ดัฮ เตอ กะฮามี เลอ นู กาเญา ซือตืองัฮ อาดา มือเลา จะ ลาฆู ซือมียา นะ ฮีโดะ ปาเระ เดะ มาตี ฮอย ลาลู เลอ? 13 ตาปี กะ ลาฆู ฮีโดะ ปาเระ เดะ มาตี ฮอย ลาลู เตอ เยซู คริด โปด ญา เตด บือเลฮ ฮีโดะ ปาเระ เดะ มาตี ฌูฆา. 14 กะฆีเตอ ปูลัก กะ เยซู คริด เตด บือเลฮ ฮีโดะ ปาเระ เดะ มาตี เตอ ลาฆู นู กามี มือญาเระ เตด ฌาดี นามา. ลาฆู นู กาเญา ปือจายา โปด เตด ฌาดี นามา ฌูฆา เลอ. 15 ลือเบฮ เดะ อีตู เลอ โกะ ซือมียา นะ ลีฮัจ จะ กามี ฌาดี ซะซี มืออูปัย ปาซัน ลาฆู นะ ตูฮัด เดะ อาตัซ ซาเบะ กามี บือเลฮ ฌาดี ซะซี จะ ตูฮัด บือเลฮ อาเกะ เยซู คริด บรี ฮีโดะ ปาเระ เดะ มาตี ดัฮ เลอ. ตาปี กะ ฌาดี ลาฆู ซูโงฮ นู จะ ซือมียา นะ ฮีโดะ ปาเระ เดะ มาตี ฮอย ลาลู เตอ กะฆีเตอ ตูฮัด เดะ อาตัซ ญา เตด บือเลฮ อาเกะ เยซู คริด บรี ฮีโดะ ปาเระ เลอ. 16 ซาเบะ-จะ กะ ซือมียา มาตี นะ ฮอย เตด ฮีโดะ ปาเระ เตอ เยซู คริด เลอ ญา ฮอย เตด บือเลฮ ฮีโดะ ปาเระ ฌูฆา. 17 กะฆีเตอ กะ เยซู คริด เตด บือเลฮ ฮีโดะ ปาเระ เดะ มาตี เตอ นู กาเญา ปือจายา ฮอย เตด ตือปากัย เลอ กาเญา โปด อาดา ลือกัจ เดะ ลาฆู บือดูซา ลาฆี เลอ. 18 กะฆีเตอ ฌูฆา โกะ ซือมียา นู ปือจายา กะ เยซู คริด นู มาตี ปี ดัฮ กูญา บือนาซา ดัฮ เลอ. 19 กะ กีตา ฮาระ กะ เยซู คริด ดัฮ บีดา นะ บือเลฮ บาฌิ วะตู กีตา อาดา ฮีโดะ ลาฆี ซา วะตู เตอ กะฆีเตอ ปาโตจ นะ บรี โกะ ซือมียา ตือจีฮัด กะ กีตา ลือเบฮ เดะ ซือมียา ซือมูฮา เลอ. 20 ตาปี โงฮ-ซูโงฮ เลอ ตูฮัด เดะ อาตัซ บือเลฮ อาเกะ เยซู คริด บรี ฮีโดะ ปาเระ เดะ มาตี ดัฮ ฌาดี ซือมียา ลามูลา เดะ ลูมอฮ ซือมียา นู มาตี ปี ดัฮ นู นะ ฮีโดะ ปาเระ เลอ. 21 ซาเบะ-จะ นู โกะ ซือมียา กือนา มาตี กรานา ปือบูวัจ นะ ซือมียา นู ซา เตอ กะฆีเตอ โกะ ซือมียา นะ ฮีโดะ ปาเระ เดะ มาตี กรานา ปือบูวัจ นะ ซือมียา นู ซา ปูลัก. 22 ซือมียา ซือมูฮา กือนา มาตี กรานา ลือกัจ บือซามา ฌางัน อาดับ กะฮามี เตอ ซือมูฮา นะ ฮีโดะ ปาเระ กรานา ลือกัจ บือซามา ฌางัน เยซู คริด กะฆีเตอ เลอ. 23 ตาปี นะ ตูโรจ บือกะ วะตู นะ ซิกมาซิก จะ อาดา เยซู คริด ฌาดี ลามูลา. เดะ บลากัก กาลา ญา นะ บาลิ มาแรฮ ปูลัก เตอ โกะ ลูมอฮ ซือมียา นะ ญา นะ ฮีโดะ ปาเระ ฌูฆา. 24 ลือปัซ อีตู นะ ฌาดี วะตู ปือญูดัฮ. กาลา อีตู เยซู นะ บูวัจ บรี โกะ ลูมอฮ ฌิด ลูมอฮ ฮาตู กรัซ ฮาตู ฌาฮัจ ซือมูฮา นะ ฌาฮานัม ปี ฮาบิฮ เลอ. กะฆีเตอ ญา นะ ซรัฮ บรี กะ ตูฮัด นู อาโปก เดะ อาตัซ บรี ญา ฌาดี ราฌา ราตา เลอ. 25 กรานา เยซู คริด ฆาโดฮ บือบือลา ฌาดี ราฌา ตือดะ รอจ กะ อารี อีตู นู ตูฮัด เดะ อาตัซ นะ ฌือนัฮ เดะ ลูมอฮ ซือตรู ซือมูฮา บูวัจ บรี กูญา ดูโดะ เดะ บาวัฮ ตาปะ กากี นะ เยซู. 26 ซือตรู ปือญูดัฮ นู นะ ฌาฮานัม ปี ฮาบิฮ เตอ ฌาดี ลาฆู มาตี เลอ. 27 ซาเบะ ซูรัจ ปือมือเลา นะ ตูฮัด มือเลา จะ "ตูฮัด เดะ อาตัซ นะ บูวัจ บรี บือนา ซือมูฮา ดูโดะ เดะ บาวัฮ ตาปะ กากี นะ ญา." นู จะ "บือนา ซือมูฮา" ซีงี เตอ ฮอย เตด กีรา ตูฮัด ตะอาซิก กรานา ญา เตอ เลอ นู บูวัจ บรี บือนา ซือมูฮา อีตู ดูโดะ เดะ บาวัฮ ตาปะ กากี นะ เยซู. 28 ตาปี กาลา บือนา ซือมูฮา ราตา อาดา เดะ บาวัฮ ฮูโกบ นะ เยซู ดัฮ กะฆีเตอ ญา ตะอาซิก นู นานะ นะ ตูฮัด เตอ ญา นะ ยอม ดูโดะ เดะ บาวัฮ ฮูโกบ นะ ตูฮัด บือซัยํ เดะ อาตัซ นู บูวัจ บรี บือนา อีตู อาดา เดะ บาวัฮ กากี นะ ญา. กะฆีเตอ ตูฮัด บือซัยํ เดะ อาตัซ ญา เลอ นะ ฌาดี นู บือซัยํ ซือซูโงฮ เดะ บือนา ซือมูฮา ราตา. 29 ดัฮ ฮอย เตด กะฆีเตอ โซะ โกะ ซือมียา ซือตืองัฮ นู ซาโมจ ลาฆู ซือลับ เดะ อาเย ฆาตี ซือมียา นู มาตี ดัฮ กูญา บูวัจ กะฮามี เลอ? กะ โกะ ซือมียา นู มาตี ดัฮ นะ ฮอย เตด ฮีโดะ ปาเระ ลาลู บูวัจ นามา เลอ โกะ ซือมียา อีตู นะ ซือลับ เดะ อาเย ฆาตี กูญา? 30 โซะ กามี โปด บูวัจ นามา กามี ยอม บือตือโปฮ ฌางัน ลาฆู นู มาจับ ดาปิก นะ มาตี บีลัก วะตู เลอ? 31 โกะ ดีบราดี เออ กู ดาปิก นะ มาตี บีลัก อารี เลอ. นู กู งันตืองัน ปาซัน ลาฆู นะ กาเญา เตอ นู กาเญา ลือกัจ บือซามา ฌางัน เยซู คริด ตูฮัด นะ กีตา เตอ บูวัจ บรี กู บือเลฮ มือเลา กือมัซๆ กะฆีเตอ เลอ. 32 ดัฮ-จะ นู กู บือเลฮ บลาวัด ฌางัน โกะ บือนาตัก ฌาฮัจ โซะ นังฆรี เอเฟซัด ฌาดี ลาฆู ตูโรจ บือกะ โกะ อูมัจ-ซือมียา ราตาๆ เตอ กู นะ บือเลฮ ซาโมจ นามา นู บาฌิ? ฮอย เลอ. กะ ซือมียา นู มาตี ดัฮ ญา นะ ฮอย เตด ฮีโดะ ปาเระ เตอ บรี กีตา ตูโรจ บือกะ นู จะ "โฌฮ กีตา ปี มากัด ปี โอะ เลอ. ซาเบะ-จะ มัฮปาฆี กีตา นะ มาตี ดัฮ เลอ." 33 ฌางัน บรี กูญา ตีปู กาเญา เลอ. "บือฆู บือซามา ฌางัน ซือมียา ฌาฮัจ บูวัจ บรี กีตา ฌาฮัจ กะฆีเตอ ฌูฆา เลอ." 34 กาเญา กือนา ซือดัยํ ญาวา บูวัจ บือปรางัย บรี บาฌิ เลอ ฌางัน ตูโรจ กะ ลาฆู นู บือดูซา. กู นะ มือเลา กะฆีนี บรี กาเญา จือและ มาตา จะ กาเญา ซือตืองัฮ ฮอย เตด กราลา ตูฮัด เลอ. 35 ตาปี อาดา ซือมียา ซือตืองัฮ นะ ตาญา จะ "ซือมียา นู มาตี ดัฮ นะ กือนา อาเกะ บรี ฮีโดะ ปาเระ บือเลฮ กะฮามี เลอ? กูญา นะ ฮีโดะ ปาเระ ฌาดี รูปา ญาวา กะฮามี เลอ?" 36 โอ โกะ ซือมียา นู บูดอ มาแรฮ มือนีงัย เลอ. กาลา กาเญา ตานัม บีฌี ปาดี เดะ ตานัฮ เตอ กะ บีฌี อีตู เตด มาตี ดูลู ญา นะ เตด บือตูโมฮ บรี ฌาดี ปูลัก เลอ. 37 บีฌี นู กาเญา ตานัม อีตู เตอ มีเซ-จะ ฌาดี บีฌี ปาดี บีฌี นามาๆ โปด ญา ฌาดี ซา บีฌี อีตู เลอ. ญา เตด ซือรูปา โกะ ปูโฮด นู นะ บือตูโมฮ เดะ บลากัก. 38 ตูฮัด เตอ เลอ บูวัจ บรี บีฌี อีตู นะ ฌาดี ปูโฮด ตูโรจ บือกะ ฮาตี นะ ญา. ญา บูวัจ บรี ราตา บีฌี นะ บือตูโมฮ ซือรูปา บือแนฮ นะ ญา. 39 ลูลู ซือมูฮา ญา เตด ซือรูปา เลอ. อาดา ลูลู ซือมียา ซือมาจับ อาดา ลูลู บือนาตัก ซือมาจับ อาดา ลูลู บูโรก ซือมาจับ อาดา ลูลู อีกัด ซือมาจับ. 40 อาดา โกะ ญาวา นู โซะ ลาแงะ เตอ โกะ ญาวา นู โซะ ดือนียา โปด อาดา ฌูฆา เลอ. ญาวา นู โซะ ลาแงะ ญา บือฆาจะ ซือมาจับ ตาปี ญาวา นู โซะ ดือนียา เตอ ญา บือฆาจะ ซือมาจับ นู อาซิก. 41 กะฆีเตอ มาตาอารี บือฆาจะ ซือมาจับ บูลัด บือฆาจะ ซือมาจับ นู อาซิก โกะ บีตัก โปด ญา บือฆาจะ มาจับ นู อาซิก ปูลัก. มีเซ โกะ บีตัก เตอ ญา บือฆาจะ โซกซา มาจับ. 42 นะ ฌาดี กะฆีเตอ ฌูฆา เลอ กาลา โกะ ซือมียา นะ ฮีโดะ ปาเระ เดะ มาตี. นู ตานัม ดัฮ ฌาดี ญาวา นู นะ บูโซะ. นู นะ ฮีโดะ ปาเระ ฮอย เตด นะ บูโซะ ดัฮ เลอ. 43 นู ตานัม ดัฮ ฌาดี ญาวา นู ตะอารัฮ. นู นะ ฮีโดะ ปาเระ นะ บาฌิ บือฆาจะ เลอ. นู ตานัม ดัฮ เตอ ฌาดี ญาวา นู ลือมัฮ ฮอย อูรัจ. นู นะ ฮีโดะ ปาเระ ญา นะ ตือฆัยํ-อูรัจ ซูโงฮ. 44 นู ตานัม ดัฮ ฌาดี ญาวา บือกะ ซือมียา ราตาๆ นู ฮีโดะ ปาเระ นะ ฌาดี ญาวา นู ฮีโดะ โซะ ซือมืองัจ. กะ อาดา ญาวา บือกะ นะ อูมัจ-ซือมียา ราตาๆ เตอ ญาวา นู ฮีโดะ โซะ ซือมืองัจ อาดา ฌูฆา เลอ. 45 ซาเบะ-จะ อาดา เดะ ซูรัจ ปือมือเลา นะ ตูฮัด นู จะ "ตูฮัด บือฌาดี ซือมียา ลามูลา อาดับ เตอ ฌาดี ซือมียา นู ฮีโดะ." ตาปี อาดับ นู ปือญูดัฮ ญา เตอ ฌาดี ซือมืองัจ นู บรี ฮีโดะ. 46 ตาปี ญาวา ลามูลา ญา บูกัด ฌาดี ญาวา นู ฮีโดะ โซะ ซือมืองัจ. อาดา ญาวา บือกะ โกะ ซือมียา ราตาๆ ดูลู เดะ บลากัก บารู อาดา ญาวา นู ฮีโดะ โซะ ซือมืองัจ. 47 ซือมียา ลามูลา บือฌาดี ดัฮ ฌางัน ตานัฮ ฌาดี ซือมียา ดาตัก เดะ ตานัฮ เลอ. ตาปี ซือมียา นู กือดูวา เตอ ญา ตูโรด มาแรฮ ดาตัก เดะ โซะ อาตัซ ลาแงะ. 48 ซือมียา ดาตัก เดะ ตานัฮ ซีงี ญา ฌาดี กะฮามี เตอ โกะ ลูมอฮ ซือมียา นู ดาตัก เดะ ตานัฮ กูญา ฌาดี กะฆีเตอ ฌูฆา เลอ. ซือมียา นู มาแรฮ ดาตัก เดะ โซะ อาตัซ ลาแงะ ซีงี ญา ฌาดี กะฮามี เตอ โกะ ลูมอฮ ซือมียา นู ดาตัก เดะ โซะ อาตัซ ลาแงะ ฌาดี กะฆีเตอ ฌูฆา เลอ. 49 กีตา ฌาดี บือกะ รูปา นะ ซือมียา ดาตัก เดะ ตานัฮ อีตู ดัฮ. กะฆีเตอ เลอ กีตา นะ ฌาดี บือกะ รูปา นะ ซือมียา อีตู นู มาแรฮ ดาตัก เดะ โซะ อาตัซ ลาแงะ ฌูฆา. 50 อาดี-บราดี เออ กู นะ มือญาเระ กะฆีนี จะ ญาวา นู อาดา ลูลู อาดา ดารัฮ เตอ นะ อาดา บาฮาเฆด เดะ ดือนียา บารู นะ ตูฮัด ฮอย เตด บือเลฮ เลอ. กะฆีเตอ ฌูฆา บือนา นู นะ บูโซะ นะ อาดา บาฮาเฆด เดะ ดือนียา บารู อีตู นู โกะ บือนา บารัก นะ เตด บูโซะ ฮอย เตด บือเลฮ เลอ. 51 ลีฮัจ เลอ กู อาดา ซา ลาฆู นู ดาลับ ซูโงฮ นะ มือญาเระ กะ กาเญา จะ ซือมียา กีตา นะ เตด ลีนา มือนีงัน ปี ดัฮ ราตา ซือมียา เตอ ตาปี กีตา นะ กือนา ซาเลด บารู ราตา ซือมียา เลอ. 52 เดะ วะตู ตีโยะ ซือลูนัย นู ปือญูดัฮ อีตู เตอ กีตา นะ กือนา ซาเลด ดัฮ เลอ เดะ ดาลับ แนฮ ซา วะตู บือกะ นู มาตา นะ กีตา งือแตะ ซือกาลี. กรานา-จะ วะตู นู นะ อาดา บูงี ซือลูนัย กะฆีเตอ ซือมียา นู มาตี ดัฮ นะ กือนา อาเกะ บรี ฮีโดะ ปาเระ มาแรฮ นะ ฮอย เตด บูโซะ ลาฆี. กะฆีเตอ กีตา นะ กือนา ซาเลด บารู ดัฮ. 53 ซาเบะ บือนา นู นะ บูโซะ อีนี นะ กือนา อาเมด บือนา นู ฮอย เตด บูโซะ มาแรฮ ปากัย บอฮ. บือนา นู นะ มาตี อีนี นะ กือนา อาเมด บือนา นู เตด มาตี ลาลู มาแรฮ ปากัย บอฮ เลอ. 54 กะฆีเตอ กาลา บือนา นู นะ บูโซะ อีนี นะ บอฮ บือนา นู ฮอย เตด บูโซะ เตอ กาลา บือนา นู นะ มาตี อีนี นะ บอฮ บือนา นู เตด มาตี ลาลู เตอ กาลา อีตู เลอ ปือมือเลา นู อาดา ฆาแรฮ ดัฮ เดะ ซูรัจ ปือมือเลา นะ ตูฮัด นะ รือมัก ดัฮ นู จะ "ลาฆู ฌือนัฮ ญา บือเลฮ ตือลัด ลาฆู มาตี ดัฮ บรี บือนาซา ฮาบิฮ." 55 "โอ ลาฆู มาตี นู เกา ฌือนัฮ ดัฮ อาดา เปะ ดีฮา เลอ? โอ ลาฆู มาตี บีซา นะ เกา อาดา เปะ ดีฮา เลอ?" 56 นู ลาฆู มาตี อาดา บีซา เตอ บีซา อีตู ฌาดี ลาฆู ดูซา เลอ. นู ดูซา อาดา ปือมือฆัฮ เตอ ปือมือฆัฮ อีตู ฌาดี ปือมือเลา ฮูโกบ นะ ตูฮัด เลอ. 57 ตาปี บรี ซือลามัจ กะ ตูฮัด บือซัยํ เดะ อาตัซ เลอ. ญา บรี กีตา ฌือนัฮ ดัฮ ซาเบะ เยซู คริด นู ฌาดี ตูฮัด นะ กีตา ดัฮ เลอ. 58 กะฆีเตอ เลอ โกะ อาดี-บราดี นู กู ซายัก เออ บรี ฮาตี นะ กาเญา กือฌะ-กือมัซ ฌางัน บรูบัฮ เลอ. กือนา บูวัจ กรือฌา นะ ตูฮัด บรี ปือนอฮ บาฌิ บีลัก วะตู เลอ ซาเบะ กาเญา ตาฮู จะ นู กาเญา บูวัจ กรือฌา นะ ตูฮัด เตอ ญา นะ รูฆี ฮอย เตด บือเลฮ เลอ.
1 ปาซัน ลาฆู มืองูเตะ บีดา นะ ตูโลก โกะ ซือมียา นะ ตูฮัด เดะ นังฆรี ยูเดีย เตอ บือกะ กู บือเลฮ ปือซัด โกะ ลูมอฮ นะ ตูฮัด เดะ นังฆรี ฆาลาเตีย กะฮามี เตอ บรี กาเญา บูวัจ กะฆีเตอ ฌูฆา เลอ. 2 เดะ บีลัก อารี มีงู บรี กาเญา โซก ซืออูรัก ปือซาลัฮ ดูเวะ ซือตืองัฮ ตาโรฮ บือกะ กาเญา บือเลฮ ซาโมจ ดัฮ. กะฆีเตอ วะตู กู มาแรฮ รอจ ดัฮ เตด ปายัฮ นะ มืองูเตะ. 3 ตานา กู มาแรฮ ดัฮ เตอ ลูมอฮ กาเญา ซูกา นะ ปีเลฮ ซาปา ปี ฆาตี กาเญา เตอ กู นะ กีเรบ ซูรัจ ฌางัน ดูเวะ มือญือมัฮ นะ กาเญา บรี กะ ซือมียา อีตู นะ บาวา ปี อาตัจ กะ นังฆรี เยรูซาเลม. 4 กะ อาดา จือลัฮ นู บาฌิ บรี กะ กู นะ ปี ตะอาซิก เลอ ลูมอฮ กูญา โปด นะ ปี บือซามา ฌางัน กู ฌูฆา. 5 ลือปัซ กู บือฌาลัด ลาลู นังฆรี มาซิโดเนีย ดัฮ กู นะ ปี ฌือเงาะ ลีฮัจ กาเญา เลอ ซาเบะ-จะ กู ฆาโดฮ นะ บือฌาลัด ลาลู นังฆรี มาซิโดเนีย กะฆีเตอ ดูลู. 6 นากือนา เตอ กู นะ บือเลฮ ดูโดะ ฌางัน กาเญา นะ ดูโดะ ตือดะ ฮาบิฮ มูเซด บือแฌะ โปด บือเลฮ ฌูฆา เลอ. กะฆีเตอ เตด-จะ กู นะ ปี กะ ดีฮา ปูลัก เตอ กาเญา นะ บือเลฮ ตูโลก อาตัจ กู บรี กู ปี ซือลามัจ เลอ. 7 ซาเบะ-จะ กู ตีเมา นะ ซีงัฮ ลีฮัจ กาเญา วะตู อีนี แนฮ ซือฌูรุซ. กู จาดัก จะ กะ ตูฮัด บรี กะฆีเตอ กู นะ บือเลฮ ดูโดะ ฌางัน กาเญา ลามา เลอ. 8 ตาปี กู นะ ดูโดะ ตือปัจ นังฆรี เอเฟซัด อีนี รอจ กะ อารี บรามัย เพนเทคด เตอ 9 ซาเบะ-จะ อาดา จือลัฮ นู ลือฆา นู บาฌิ บรี กู นะ บือกรือฌา ปัจ อีนี. โกะ ซือมียา บลาวัด โปด อาดา บาญะ ฌูฆา เลอ. 10 กะ ทิโมที ปี รอจ กะ กาเญา เตอ กือนา ซาโมจ ญา บรี บาฌิ ฌางัน บรี ญา ตาโกจ นามาๆ โปด. ซาเบะ ญา เตอ ตืองัฮ บือกรือฌา ลาฆู นะ ตูฮัด ซือรูปา บือกะ กู เลอ. 11 กะฆีเตอ ฌางัน บรี ซาปา นะ ดูทุ ญา ตาปี กือนา ตูโลก บรี ญา นะ บือเลฮ บือฌาลัด ปี ซือนัง ซือลามัจ เลอ บีดา ญา นะ บือเลฮ บาลิ ปาเระ รอจ กะ กู. ซาเบะ-จะ กู อาดา นาตี ญา นะ บาลิ บือซามา-ซามา ฌางัน โกะ ดีบราดี อีตู. 12 ตาปี ปาซัน อะโปโล อาดี-บราดี นะ กีตา เตอ กู บือเลฮ ปูโฌะ ญา ซัจๆ บรี ญา ปี ฌือเงาะ ลีฮัจ กาเญา บือซามา ฌางัน โกะ ดีบราดี นู ฆีลาฆี เตอ ตาปี ญา เตด ปือนอฮ เดะ ฮาตี ลาลู นะ ปี เดะ วะตู อีนี. กะฆีเตอ ตานา ญา อาดา จือลัฮ ญา นะ ปี เลอ. 13 กาเญา กือนา ฌาฆา บรี บาฌิ เลอ บรี บือดีรี กือฌะ-กือมัซ เดะ ลาฆู ปือจายา กะ ตูฮัด. บรี ฮาตี บรานี ตือฆัยํ-อูรัจ เลอ. 14 กือนา บูวัจ ลาฆู ซือมูฮา ฌางัน ฮาตี ซายัก เลอ. 15 โกะ ดีบราดี เออ กาเญา ตาฮู จะ โกะ ซือมียา ซือรูมัฮ นะ ซือเตฟานัด เตอ กูญา ฌาดี ซือมียา ลามูลา เดะ โซะ นังฆรี อาคายา นู ปือจายา กะ เยซู. กูญา บือเลฮ ซรัฮ ญาวา นะ กูญา บือกรือฌา ตูโลก โกะ ซือมียา นะ ตูฮัด. กะฆีเตอ กู ปือซัด กือมัซๆ จะ 16 บรี กาเญา ฮาตี มือนูโนะ ตูโรจ โกะ ซือมียา กะฆีเตอ เลอ ฌางัน โกะ ซือมียา ซือมูฮา นู กูวาซา บือกรือฌา ตูโลก บือซามา เตอ. 17 กู ซูกา-ฮาตี ซูโงฮ นู ซือเตฟานัด ฟอตูนาตัด ฌางัน อาคัยกัด กูญา ตีฆา อูรัก บือเลฮ มาแรฮ รอจ กะ กู ดัฮ. ซือรูปา กูญา บือเลฮ ฆาตี กาเญา เลอ 18 ซาเบะ กูญา บือเลฮ ตูโลก ปูโฌะ ฮาตี นะ กู บือกะ กูญา ปูโฌะ ฮาตี นะ กาเญา ดัฮ เตอ. กือนา บรีงัจ บรี บาฌิ กะ โกะ ซือมียา กะฆีเตอ เลอ. 19 โกะ ลูมอฮ นะ ตูฮัด เดะ โซะ นังฆรี เอเซีย กูญา กีเรบ บรีงัจ กะ กาเญา. อาควีลา ฌางัน ปริซีลา บือซามา ฌางัน ลูมอฮ นะ ตูฮัด นู บือมุน ตือปัจ รูมัฮ นะ กูญา เตอ กูญา กีเรบ บรีงัจ บรี บาฌิ เดะ นามา นะ ตูฮัด เลอ. 20 โกะ ดีบราดี โซะ อีนี ซือมูฮา กูญา กีเรบ บรีงัจ กะ กาเญา. กาเญา กือนา บือฌาบัจ ตางัน บือซามา-ซามา บือกะ ฌาดี โกะ ซือมียา นะ ตูฮัด ซือมูฮา. 21 กู เปาโล ฆาแรฮ ปือมือเลา บรีงัจ อีนี ฌางัน ตางัน นะ กู ตะอาซิก เลอ. 22 ซือมียา ดีฮา เตด ซายัก กะ ตูฮัด บรี ญา กือนา ซูปัฮ อาโบยํ เลอ. "มารานา ทา" จะ มาแรฮ เลอ ตูฮัด นะ กีตา. 23 มีตา บรี ตูฮัด เยซู นะ บรี ซือลามัจ กะ กาเญา. 24 กู ซายัก กะ กาเญา ซือมูฮา เลอ บือกะ นู เยซู คริด ญา ซายัก กีตา ดัฮ.
1 กู เปาโล ฌาดี ปือญูโรฮ นะ เยซู คริด ตูโรจ กะ ฮาตี นะ ตูฮัด เดะ อาตัซ. กู ฌางัน ทิโมที อาดี-บราดี นะ กีตา กามี ฆาแรฮ ซูรัจ อีนี กีเรบ บรี กะ ลูมอฮ นะ ตูฮัด นู อาดา เดะ นังฆรี โกริน บรี กะ โกะ ซือมียา นะ ตูฮัด ซือมูฮา นู ดูโดะ ราตา เดะ โซะ นังฆรี อาคายา ฌูฆา เลอ. 2 มีตา เดะ ตูฮัด นู อาโปก นะ กีตา มีตา เดะ ตูฮัด เยซู คริด นะ บรี ซือลามัจ กะ กาเญา นะ บรี กาเญา ดูโดะ ซือนัง ซือลามัจ เลอ. 3 ปูฌี กะ ตูฮัด อาโปก เดะ เยซู คริด ตูฮัด นะ กีตา นู ฌาดี อาโปก ตือจีฮัด ซูโงฮ ฌาดี ตูฮัด นู ปูโฌะ-ฮาตี ราตา ฌือแนฮ. 4 ญา เลอ นู ปูโฌะ ฮาตี นะ กามี เดะ ลาฆู ซูซัฮ ราตา ฌือแนฮ นะ กามี บีดา กามี นะ บือเลฮ ปูโฌะ ฮาตี นะ โกะ ซือมียา อาซิก นู อาดา ลาฆู ซูซัฮ ปายัฮ นามาๆ. ตูฮัด ปูโฌะ ฮาตี นะ กามี กะฮามี ดัฮ เตอ กามี โปด นะ บือเลฮ ปูโฌะ ฮาตี นะ กูญา กะฆีเตอ เลอ. 5 ซาเบะ-จะ นู กามี อาดา บาฮาเฆด บาญะ เดะ ลาฆู ซูซัฮ นะ เยซู คริด กะฮามี เตอ กามี อาดา บาฮาเฆด บาญะ เดะ ลาฆู ปูโฌะ-ฮาตี กรานา เยซู คริด กะฆีเตอ ฌูฆา เลอ. 6 นู กามี ตาฮัด ซูซัฮ ปายัฮ เตอ บีดา นะ ปูโฌะ ฮาตี นะ กาเญา บรี อาดา ลาฆู ฮีโดะ ซูโงฮ. นู กามี บือเลฮ ซาโมจ ลาฆู ปูโฌะ-ฮาตี โปด บีดา นะ ปูโฌะ ฮาตี นะ กาเญา ฌูฆา เลอ. ซาเบะ กะฆีเตอ กาลา กาเญา ตาฮัด ซูซัฮ ซือรูปา บือกะ กามี บือเลฮ ตาฮัด อีตู เตอ กาเญา นะ ลาวัด ตาฮัด-ฮาตี บือเลฮ. 7 กะฆีเตอ กามี จาดัก บือตือตู เดะ กาเญา เตอ ซาเบะ ตาฮู จะ กาเญา อาดา บาฮาเฆด เดะ ลาฆู ซูซัฮ นะ กามี กะฮามี ดัฮ กาเญา นะ บือเลฮ บาฮาเฆด เดะ ลาฆู ปูโฌะ-ฮาตี นะ กามี กะฆีเตอ เลอ. 8 กะฆีเตอ โกะ ดีบราดี เออ กามี บือคานะ นะ บรี กาเญา ตาฮู ปาซัน ลาฆู ซูซัฮ ปายัฮ นู บือฌาดี เดะ กามี เดะ โซะ นังฆรี เอเซีย นู บูวัจ บรี กามี ปือนัจ-ฮาตี ซูโงฮ ฆามะ-จะ นะ ตาฮัด เตด บียัซ ดัฮ ยู กามี ฮอย จาดัก นู นะ บือเลฮ ฮีโดะ เลอ. 9 โงฮ-ซูโงฮ กามี อาคา จะ กามี นะ กือนา บูนอฮ มาตี ดัฮ เตอ. ตาปี นู บือฌาดี กะฆีเตอ โปด บีดา ตีเมา บรี กามี ฮาระ กะ ญาวา นะ ตะอาซิก ตาปี บรี ฮาระ กะ ตูฮัด เดะ อาตัซ ญา เลอ นู บูวัจ บรี โกะ ซือมียา นู มาตี ดัฮ นะ ฮีโดะ ปาเระ. 10 ตูฮัด ญา ตูโลก กามี บรี ลือปัซ ดัฮ เดะ ลาฆู ฌาฮานัม ญา นะ ตูโลก กามี บรี ลือปัซ ปูลัก เลอ. กามี บือเลฮ ตือตู-ฮาตี เดะ ตูฮัด จะ ญา นะ ตูโลก กามี ปูลัก 11 บือกะ นู กาเญา ปาคัจ ตูโลก บือซาโวจ บีดา กามี. นู อาดา ซือมียา บาญะ บือซาโวจ บีดา กามี ตูฮัด ญา นะ ตีกัฮ นะ บรี ซือลามัจ กะ กามี. กะฆีเตอ โกะ ซือมียา บาญะ นะ บรี ซือลามัจ กะ ตูฮัด กรานา กามี เลอ. 12 นี เลอ กามี อาดา ลาฆู นะ งันตืองัน กะฆีนี. ฌาดี-จะ ฮาตี นะ กามี บรี กามี ตาฮู ตือตู จะ ลาฆู ปือบูวัจ นะ กามี เดะ ดือนียา อีนี เตอ กามี บือเลฮ บูวัจ ฌางัน ฮาตี นู รือมัก ฮาตี นู จรัฮ ซูโงฮ นู มาแรฮ ดาตัก เดะ ตูฮัด. ลือเบฮ เดะ ซาปา อาซิก กามี บือเลฮ บูวัจ กะฆีเตอ ฌางัน กาเญา เลอ. กามี เตด บือเลฮ ตูโรจ กะ อากัน นะ อูมัจ-ซือมียา ตาปี ตูโรจ บือกะ ลาฆู นู ตูฮัด ฮาลัย บรี ซือลามัจ กะ กามี ดัฮ. 13 ซาเบะ-จะ กามี เตด ฆาแรฮ ลาฆู อาซิก รอจ กะ กาเญา ลือเบฮ ซา เดะ ลาฆู นู กาเญา บาจา บือเลฮ มาโซะ เดะ ฮาตี บือเลฮ. มีเซ-จะ เดะ วะตู อีนี กาเญา บือเลฮ มาโซะ เดะ ฮาตี แนฮ ซือตืองัฮ ดัฮ ตาปี กู บรีงัจ จาดัก จะ กาเญา นะ มาโซะ เดะ ฮาตี บรี ปือนอฮ บาฌิ เลอ. กะฆีเตอ เดะ อารี นู เยซู ตูฮัด นะ กีตา นะ บาลิ ปาเระ กาเญา โปด นะ งันตืองัน เดะ กามี บือกะ กามี ฌูฆา นู งันตืองัน เดะ กาเญา. 15 กรานา กู ตือตู-ฮาตี ดัฮ เดะ ลาฆู อีตู ซีงี กะฆีเตอ ลามูลา กู อีงัจ จะ นะ ปี ฌือเงาะ ลีฮัจ ลูมอฮ กาเญา ดูลู บีดา กาเญา นะ บือเลฮ ซาโมจ ลาฆู ซือลามัจ ดูวา กาลี เลอ. 16 กู อีงัจ จะ นะ ซีงัฮ ลีฮัจ ลูมอฮ กาเญา ตืองัฮ กู บือฌาลัด ปี กะ นังฆรี มาซิโดเนีย. ลือปัซ อีตู ตานา บาลิ ปาเระ เดะ นังฆรี มาซิโดเนีย กู นะ ซีงัฮ ลีฮัจ ลูมอฮ กาเญา ปูลัก บีดา กาเญา นะ บือเลฮ ตูโลก อาตัจ บรี กู ปี กะ นังฆรี ยูเดีย. 17 นู กู อีงัจ นะ บูวัจ กะฆีเตอ ดัฮ กู บรีงัจ ปี มาแรฮ บาญะ เฆอ? ลาฆู บรีงัจ นะ กู ซือรูปา บือกะ นะ โกะ อูมัจ-ซือมียา ราตา เฆอ? บูกัด กู ฌาดี บือกะ ซือมียา นู ซัจ มือเลา จะ "เออ เออ นะ ปี" ซัจ จะ "เตด ปี." 18 บือกะ ตูฮัด เดะ อาตัซ ญา รือมัก ซูโงฮ เตอ ปือมือเลา นู กามี มือเลา ฌางัน กาเญา โปด บูกัด กามี ซัจ มือเลา ซาโงะ ซัจ มือเลา กีปัซ กะฆีเตอ. 19 ซาเบะ-จะ เยซู คริด นู นานะ นะ ตูฮัด เดะ อาตัซ เตอ ญา บูกัด ฌาดี ซือมียา นู ซัจ มือเลา ซาโงะ ซัจ มือเลา กีปัซ. ญา เลอ นู กามี ตีฆา อูรัก จะ กู ฌางัน ซีลา ฌางัน ทิโมที บือเลฮ มือญาเระ บรี กะ ลูมอฮ กาเญา เตอ ญา ฌาดี บือกะ ปือมือเลา นู ซาโงะ นะ ตูฮัด ซือลาลู เลอ. 20 ซาเบะ-จะ ปือมือเลา บือฌาญี นะ ตูฮัด ซือมูฮา ญา ซาโงะ ฌาดี ซูโงฮ กรานา เยซู. ซาเบะ กะฆีนี กีตา มือเลา จะ "อาเมน" เดะ นามา นะ เยซู คริด ฌาดี ลาฆู ปูฌี มือโอจ กะ ตูฮัด เดะ อาตัซ เลอ. 21 ตูฮัด เตอ เลอ นู บูวัจ บรี กามี ฌางัน กาเญา ดูโดะ กือฌะ-กือมัซ ดัฮ ลือกัจ บือซามา ฌางัน เยซู คริด. ตูฮัด เลอ นู ตืองะ กีตา ดัฮ บีดา ฌาดี ซือมียา บือกรือฌา นะ ญา. 22 ญา บือเลฮ ตาแปะ มือกรา นะ ญา เดะ กีตา ดัฮ. ญา บรี ซือมืองัจ นะ ญา มาแรฮ ดูโดะ เดะ ฮาตี นะ กีตา ฌาดี บือกะ รือฆา อูปัฮ ดูลู เดะ ลาฆู ซือมูฮา นู ญา นะ บรี กะ กีตา. 23 มีตา เดะ ตูฮัด บรี ฌาดี ซะซี ปาซัน ลาฆู โซะ ฮาตี นะ กู จะ นู กู เตด ปี รอจ นังฆรี โกริน เตอ บีดา ตีเมา นะ บือฆาโดฮ กาเญา ลาฆี เลอ. 24 บูกัด-จะ กามี ฌาดี บือกะ ตกเก นู นะ ปรือกัด กาเญา บรี ปือจายา กะฮามี. ตาปี-จะ กามี ฌาดี ซือมียา บือกรือฌา บือซามา บีดา นะ บรี กะ กาเญา ซูกา-ฮาตี ซาเบะ กาเญา ตือตู-ฮาตี ปือจายา กะ เยซู ดัฮ.
1 กะฆีเตอ กู ตือตู-ฮาตี ดัฮ จะ ตีเมา นะ มาแรฮ บูวัจ บรี กาเญา ซูซัฮ-ฮาตี ปูลัก. 2 ซาเบะ-จะ ดัฮ กู นี นะ บูวัจ บรี กาเญา ซูซัฮ-ฮาตี ซาปา เลอ นะ บูวัจ บรี กู ซูกา-ฮาตี ปูลัก? อาดา ซา กาเญา นู กู บือเลฮ บูวัจ บรี ซูซัฮ-ฮาตี เลอ. 3 กู บือเลฮ ฆาแรฮ ลาฆู กะฆีเตอ บีดา-จะ ตานา กู มาแรฮ กู นะ เตด ฆาโดฮ ซูซัฮ-ฮาตี กรานา ลูมอฮ กาเญา นู บือฆูนา นะ บูวัจ บรี กู ซูกา-ฮาตี. ซาเบะ กู ตือตู-ฮาตี เดะ ลูมอฮ กาเญา จะ วะตู กู ซูกา-ฮาตี กาเญา โปด นะ ซูกา-ฮาตี ฌูฆา เลอ. 4 กรานา-จะ วะตู กู ฆาแรฮ ซูรัจ อีตู รอจ กะ กาเญา กู ซูซัฮ-ฮาตี โตระ ยู อาเย มาตา มือนีเลฮ. บูกัด กู ฆาแรฮ บีดา นะ บรี กาเญา ซูซัฮ-ฮาตี ตาปี บีดา นะ บรี กาเญา ตาฮู จะ กู ซายัก กาเญา บาญะ ตารา ดีฮา. 5 ดัฮ ซาปา บูวัจ บรี อาดา ลาฆู ซูซัฮ ซือมียา อีตู เตอ เตด บือเลฮ บูวัจ บรี กู ซูซัฮ-ฮาตี ซืออูรัก ตาปี บือเลฮ บูวัจ บรี กาเญา ซือมูฮา ซูซัฮ-ฮาตี ซือตืองัฮ ฌูฆา. นู จะ ซือตืองัฮ เตอ ฌาดี-จะ กู ตีเมา นะ ตูโดฮ กะ ซือมียา อีตู ยู ลือเบฮ เดะ ฮาดัจ เลอ. 6 นู โกะ ซือมียา บาญะ บือเลฮ ฮูโกบ ซือมียา อีตู โปด ฌาดี ดัฮ เลอ. 7 กะฆีเตอ กาเญา กือนา อาเกะ ซาลัฮ นะ ซือมียา อีตู ปูโฌะ ฮาตี นะ ญา ซือตืองัฮ ตาโกจ-จะ ญา นะ ตาลับ เดะ ลาฆู ซูซัฮ โตระ เลอ. 8 กะฆีเตอ กู มีตา โงฮ-ซูโงฮ เดะ กาเญา บรี ซือมียา อีตู ตาฮู ปูลัก จะ กาเญา ซายัก กะ ญา เลอ. 9 ซาเบะ ลาฆู อีนี เลอ กู บือเลฮ ฆาแรฮ ซูรัจ อีตู อาตัจ กะ กาเญา ฌาดี-จะ บีดา นะ ลกลีฮัจ ฮาตี นะ กาเญา จะ นะ ยอม มือนีงัย กะ กู ราตา ฌือแนฮ ราตา ลาฆู เฆอ เตด. 10 วะตู ลูมอฮ กาเญา อาเกะ ซาลัฮ นะ ซือมียา ดีฮา กู โปด อาเกะ ซาลัฮ นะ ซือมียา อีตู ฌูฆา. ดัฮ กู บือเลฮ อาเกะ ซาลัฮ ลาฆู นามา เตอ กู บือเลฮ อาเกะ ซาลัฮ อีตู โซะ ฮึลด มูคา นะ เยซู คริด กรานา ลีฮัจ กะ ลูมอฮ กาเญา เตอ เลอ. 11 กะฆีเตอ เลอ กือปาลา ฮาตู ซีตัด นะ เตด ฌือนัฮ เดะ กีตา ซาเบะ กีตา ตาฮู อากัน นะ ญา ดัฮ. 12 ตานา กู ปี รอจ กะ นังฆรี โตรอัด บีดา นะ มือญาเระ บรีตา นู บาฌิ นะ เยซู คริด เตอ ตูฮัด ญา บูกา จือลัฮ นู บาฌิ บรี กะ กู นะ บือกรือฌา ตือปัจ อีตู เลอ. 13 ตาปี กู ฮอย เตด ซือนัง-ฮาตี ลาลู เลอ ซาเบะ เตด บือเลฮ ดาปัจ ทีตัด อาดี เดะ กู ตือปัจ อีตู เตอ. กะฆีเตอ กู ตีงัน ลูมอฮ อีตู มาแรฮ กะ นังฆรี มาซิโดเนีย อีนี ปูลัก. 14 ตาปี บรี ซือลามัจ เลอ กะ ตูฮัด บือซัยํ เดะ อาตัซ นู บาวา กามี มาแรฮ บือซามา ฌางัน เยซู คริด อาดา ลาฆู ฌือนัฮ ซือลาลู เลอ. ญา ซูโรฮ กามี ซือรูปา บือกะ กือมียัน นู บาวู กือจัย ปี ราตา บีดา นะ ตูโลก โกะ ซือมียา ราตาๆ บรี บือกราลา ฌางัน เยซู คริด. 15 ซาเบะ กามี ฌาดี บือกะ กือมียัน นู เยซู คริด ตูนู มือญือมัฮ บรี กะ ตูฮัด นู บาวู อาซะ ปี ราตา เดะ โกะ ซือมียา นู ตืองัฮ นะ ฮีโดะ ลือปัซ บาฌิ ฌางัน โกะ ซือมียา นู ตืองัฮ นะ ฌาฮานัม ฌูฆา. 16 กะ โซะ ซือบือลัฮ นู ตืองัฮ นะ ฌาฮานัม ฌาดี ซือรูปา บือบาวู บูโซะ นู บาวา ปี รอจ กะ ลาฆู มาตี เลอ. กะ นู โซะ ซือบือลัฮ นู ตืองัฮ นะ ฮีโดะ ลือปัซ บาฌิ ฌาดี บือบาวู บาฌิ นู บาวา ปี รอจ กะ ลาฆู ฮีโดะ. ซาปา เลอ นู บือฆูนา ฌางัน ลาฆู บือกรือฌา กะฆีนี? 17 กรานา-จะ กามี บูกัด ซือรูปา โกะ ซือมียา บาญะ อีตู นู อาเมด ปือมือเลา ลาฆู บาฌิ นะ ตูฮัด ปี บือฌูวัน มียา มากัด. ตาปี-จะ นู ตูฮัด เดะ อาตัซ ซูโรฮ กามี มาแรฮ ดัฮ กะฆีเตอ กามี มือญาเระ โซะ ฮึลด มูคา นะ ตูฮัด เลอ บือกะ ซือมียา ฮาตี รือมัก นู ลือกัจ บือซามา ฌางัน เยซู คริด.
1 กามี ตืองัฮ นะ มือโอจ กะ ญาวา ตะอาซิก ปูลัก เฆอ? เฆอ-จะ กามี ฆาโดฮ อาดา ซูรัจ มือโอจ กะ ญาวา กามี ซือรูปา บือกะ ซือมียา ซือตืองัฮ เฆอ? เตด โบะ. กามี เตด ฆาโดฮ อาเมด ซูรัจ มือโอจ กะฆีเตอ มาแรฮ กะ ลูมอฮ กาเญา เตด ฆาโดฮ อาเมด ซูรัจ มือโอจ เดะ กาเญา ปี ปูลัก เลอ. 2 กาเญา โปด ฌาดี ซูรัจ นะ กามี นู ฆาแรฮ ดัฮ เดะ ฮาตี นะ กามี บรี โกะ ซือมียา ซือมูฮา บือเลฮ ตาฮู บือเลฮ บาจา เลอ. 3 นู ลีฮัจ บือฆารี ซัฮ จะ กาเญา ฌาดี ซูรัจ นู เยซู คริด ฆาแรฮ ดัฮ นู กามี บือเลฮ อาเมด มาแรฮ อาตัจ. ซูรัจ อีนี บูกัด ญา ฆาแรฮ ฌางัน จัจ ตาปี ฆาแรฮ ฌางัน ซือมืองัจ นะ ตูฮัด นู อาดา ฮีโดะ เลอ. บูกัด ฆาแรฮ เดะ บาตู ลีบัยํ ตาปี บือเลฮ ฆาแรฮ เดะ ฮาตี นะ ซือมียา. 4 นู กามี มือเลา กะฆีเตอ ซาเบะ กามี ตือตู-ฮาตี เดะ ตูฮัด กรานา เยซู คริด เลอ. 5 บูกัด กามี ตะอาซิก ปานัย บือกรือฌา บีดา นะ บือเลฮ มืองากู จะ ซือบารัก นามาๆ ฌาดี ดาตัก เดะ กามี ตะอาซิก ตาปี-จะ ลาฆู ปานัย บือกรือฌา นะ กามี มาแรฮ ดาตัก เดะ ตูฮัด เดะ อาตัซ. 6 ตูฮัด เลอ ญา บือฌาดี บรี กามี ปานัย ฌาดี ซือมียา ตูโลก บือกรือฌา ปาซัน ปือมือเลา บือปาคัจ บือตือตู นู บารู. ปือมือเลา บือปาคัจ อีตู บูกัด ญา ตูโรจ กะ ซูรัจ นู ฆาแรฮ ดัฮ ตาปี ตูโรจ กะ ซือมืองัจ นะ ตูฮัด เลอ. ซาเบะ-จะ ซูรัจ นู ฆาแรฮ ดัฮ กะฆีเตอ ญา บูวัจ บรี มาตี ตาปี ซือมืองัจ นะ ตูฮัด เตอ ญา บรี ฮีโดะ เลอ. 7 ลาฆู บูวัจ ตูโรจ กะ ปือมือเลา ฮูโกบ อีตู นู ฆาแรฮ ฌาดี ซูรัจ เดะ บาตู ลีบัยํ ดัฮ เตอ ญา มาแรฮ ฌางัน บือซรี บือซายา ซูโงฮ. มูคา นะ มูซา ญา บือซายา โตระ. กะฆีเตอ มีเซ-จะ ลาฆู บือซรี บือซายา อีตู ตืองัฮ นะ ลือแงะ ปี เตอ ตาปี ลูมอฮ อิซราเอน ตีญูง ลามา กะ มูคา นะ ญา_เตด บือเลฮ ดัฮ. กะฆีเตอ ดัฮ ลาฆู บูวัจ ตูโรจ นู ลามา อีตู นู บูวัจ บรี มาตี ญา อาดา บือซรี บือซายา กะฆีเตอ ลาฆู บูวัจ ตูโรจ กะ ซือมืองัจ นะ ตูฮัด อีนี ญา นะ ฮอย บือซรี บือซายา ลือเบฮ เดะ อีตู ปูลัก เฆอ? ซูโงฮ อาดา ลือเบฮ เลอ. 9 ซาเบะ-จะ ดัฮ ลาฆู บูวัจ ตูโรจ อีตู นู บรี ตูฮัด กรัจ ฮูโกบ กีตา อาดา บือซรี บือซายา เตอ ลาฆู บูวัจ ตูโรจ นู บารู นู บรี กีตา บาฌิ-ตือปัจ ฌางัน ตูฮัด โตระ อาดา บือซรี บือซายา บาญะ ลือเบฮ เดะ อีตู ปูลัก เลอ. 10 โงฮ-ซูโงฮ เตอ บือซรี บือซายา นู ดูลู โปด ซือรูปา ญา ปาดับ ดัฮ ซาเบะ กือนา บือซรี บือซายา นู จรัฮ บาฌิ โตระ บือเลฮ ซูโลฮ ตูโดก ลีนง ฮาบิฮ ดัฮ เลอ. 11 กรานา-จะ ดัฮ ลาฆู อีตู นู นะ ลือแงะ ปี ดัฮ อาดา บือซรี บือซายา ตารา อีตู ลาฆู นู ดูโดะ กือฌะ โปด นะ อาดา บือซรี บือซายา บาญะ ลือเบฮ เดะ อีตู ปูลัก เลอ. 12 กรานา กามี ฮาระ เดะ ตูฮัด กะฆีเตอ ดัฮ กามี มือเลา ฌางัน ฮาตี นู บรานี ซูโงฮ เลอ. 13 กามี เตด ซือรูปา บือกะ มูซา นู อาเมด กาเยด ซรือโกะ มูคา ดัฮ บีดา ตีเมา บรี ลูมอฮ อิซราเอน ตีญูง กะ นู บือซรี บือซายา อีตู นู ตืองัฮ นะ ลือแงะ ซือกาลี ดีกิ ซือกาลี ดีกิ ยู ปาดับ ฮาบิฮ เลอ. 14 ตาปี กูญา ฮาตี กรัซ ดัฮ ซาเบะ รอจ กะ อารี อีนี ตานา อาดา ซือมียา บาจา ซูรัจ ปือมือเลา บือปาคัจ นู ลามา บรี กูญา ดืองัยํ กาเยด อีตู อาดา ซรือโกะ ตูโดก ฮาตี นะ กูญา กะฆีเตอ ฮอย เตด บูกา เลอ. ซาเบะ-จะ กาเยด ซรือโกะ อีตู เตอ ซา เยซู คริด เลอ นู บูกา บรี ตรือเบะ. 15 ตาปี มาแรฮ ตือดะ รอจ กะ อารี อีนี วะตู กูญา ดืองัยํ ซือมียา บาจา ซูรัจ ปือมือเลา นะ มูซา กาเยด อีตู โปด อาดา ตูโดก ฮาตี นะ กูญา กะฆีเตอ เลอ. 16 ตาปี วะตู ซือมียา ดีฮา อาเลฮ มาแรฮ มียา ตูฮัด กาเยด อีตู โปด ญา นะ บูกา ตรือเบะ เลอ. 17 นู จะ "ตูฮัด" ซีงี เตอ ญา ฌาดี ซือมืองัจ. นู ซือมืองัจ นะ ตูฮัด อาดา เดะ ฮาตี นะ ซือมียา ดีฮา ซือมียา อีตู ลือปัซ ซูโงฮ ดัฮ เลอ. 18 ตาปี กีตา ซือมูฮา ฮอย กาเยด ซรือโกะ มูคา ดัฮ. กีตา ลีฮัจ บือฆารี บือซรี บือซายา นะ ตูฮัด บือเลฮ ซือรูปา ลีฮัจ บายัก เดะ จรือเมน. กะฆีเตอ ญาวา นะ กีตา กือนา ซาเลด บรี ฌาดี ซือรูปา รูปา นะ ตูฮัด บรี บือซรี บือซายา บาญะ ซือรูโลยํ เลอ. ลาฆู กะฆีเตอ ญา มาแรฮ ดาตัก เดะ ตูฮัด นู ฌาดี ซือมืองัจ เลอ.
1 กะฆีเตอ เลอ นู ตูฮัด บือเลฮ ตือจีฮัด กะ กามี บูวัจ บรี กามี บือเลฮ บือกรือฌา เดะ ลาฆู อีนี กะฆีเตอ กามี เตด กูรัก-ฮาตี เลอ. 2 ตาปี ลาฆู บาอากัน แนฮ-ฌือแนฮ นู บูวัจ บรี จือและ เตอ กามี บือเลฮ กีปัซ บูวัก ดัฮ. กามี ตีเมา ตีปู ซาปา ตีเมา กาเลฮ ลาฆู ปือมือเลา นะ ตูฮัด บรี ญา ซาลัฮ. ตาปี โซะ ฮึลด มูคา นะ ตูฮัด เดะ อาตัซ กามี มือเลา ลาฆู นู ซูโงฮ บรี ซัฮ บรี ญาวา นะ กามี กือนา ลาฆู ฌางัน ฮาตี นะ โกะ ซือมียา ซือมูฮา. 3 ตาปี ดัฮ บรีตา นู บาฌิ อีตู นู กามี มือญาเระ กือนา ตูโดก บูนี เดะ ซาปา เตอ ญา บูนี ดัฮ เดะ โกะ ซือมียา อีตู นู ตืองัฮ นะ ฌาฮานัม เลอ. 4 โซะ กูญา อีตู นู เตด ปือจายา เตอ ฮาตู ซีตัด นู ฮูโกบ ดือนียา อีนี ซือรูปา ฌาดี ตูฮัด ญา บือเลฮ บูวัจ บรี ฮาตี นะ กูญา กือลับ ดัฮ บีดา ตีเมา บรี กูญา ลีฮัจ ลาฆู จรัฮ นู ซูโลฮ ตรือเบะ เดะ บรีตา นู บาฌิ อีตู ปาซัน ลาฆู บือซรี บือซายา นะ เยซู คริด นู ฌาดี รูปา นะ ตูฮัด เดะ อาตัซ เลอ. 5 บูกัด ลาฆู ญาวา นะ กามี ตะอาซิก นู กามี มือญาเระ บรี ตาฮู ตาปี ฌาดี ลาฆู นะ เยซู คริด จะ ญา ฌาดี ตูฮัด เตอ เลอ. จะ อีซี ญาวา นะ กามี ฌาดี ปราโซฮ นะ กาเญา กรานา ลีฮัจ กะ เยซู. 6 ซาเบะ-จะ ตูฮัด บือซัยํ เดะ อาตัซ นู บือเลฮ ปือซัด จะ "บรี ลาฆู จรัฮ ซูโลฮ ปี เดะ โซะ กือลับ เลอ." ตูฮัด นู อีตู เลอ บือเลฮ ซูโลฮ จรัฮ บรี มาโซะ เดะ ฮาตี นะ กามี บีดา บรี กามี นะ ตาฮู ปาซัน ลาฆู บือซรี บือซายา นะ ตูฮัด นู อาดา บือซายา โซะ มูคา นะ เยซู คริด. 7 ตาปี บารัก นู บรือฆา ซีงี อาดา ตาโรฮ เดะ ญาวา นะ กามี นู ฌาดี ซือรูปา บือกะ ปีโยะ ตานัฮ บีดา นะ บรี ลีฮัจ จะ ปือมือฆัฮ นู บือซัยํ โตระ อีตู ฌาดี นะ ตูฮัด เดะ อาตัซ เตอ บูกัด นะ กามี ตะอาซิก เลอ. 8 ราตา ลาฆู ราตา ฌือแนฮ เตอ กามี กือนา ฮาเปะ ดูวา บือลัฮ ตาปี บูกัด-จะ นะ บรีเงาะ เตด บือเลฮ กามี ฮาบิฮ อากัน ตาปี ฮอย เตด รอจ กะ ฮาบิฮ กูวาซา 9 กามี กือนา ปรือกัด ตาปี ตูฮัด เตด บือเลฮ ตีงัน กามี บูวัก กือนา กาเตาะ ตาปี ฮอย เตด รอจ กะ มาตี เลอ. 10 กะฆีเตอ ญาวา นะ กามี ดาปิก นะ กือนา ลาฆู มาตี ปี ซือรูโลยํ ซือรูปา กะ ลาฆู มาตี นะ เยซู เตอ บีดา-จะ ลาฆู ฮีโดะ นะ เยซู นะ อาดา บือฆารี เดะ ญาวา นะ กามี ฌูฆา. 11 ซาเบะ-จะ บีลัก วะตู นู กามี อาดา ฮีโดะ ลาฆี เตอ กามี ดาปิก นะ ฌาฮานัม รอจ กะ มาตี ซือลาลู กรานา ลีฮัจ กะ เยซู คริด บีดา-จะ ลาฆู ฮีโดะ นะ เยซู นะ อาดา บือฆารี เดะ อีซี ญาวา นะ กามี นู ฆาโดฮ นะ มาตี เลอ. 12 ซาเบะ กะฆีเตอ ลาฆู มาตี ญา ตืองัฮ บือกรือฌา เดะ ญาวา นะ กามี ตาปี ลาฆู ฮีโดะ ญา ตืองัฮ บือกรือฌา เดะ ญาวา กาเญา เลอ. 13 เดะ ซูรัจ ปือมือเลา นะ ตูฮัด อาดา นู ฆาแรฮ ดัฮ จะ "กู ปือจายา ดัฮ กะฆีเตอ กู บือเลฮ มือเลา ดัฮ." กามี ฌูฆา อาดา ฮาตี ปือจายา ซือรูปา บือกะ ซือมียา อีตู. กามี โปด ปือจายา กะฆีเตอ กามี มือเลา เลอ. 14 กามี ตือตู-ฮาตี จะ ตูฮัด เดะ อาตัซ เตอ เลอ นู บือเลฮ อาเกะ ตูฮัด เยซู บรี ฮีโดะ ปาเระ ดัฮ ญา นะ อาเกะ กามี บรี ฮีโดะ บือซามา ฌางัน เยซู. ญา นะ บาวา กามี มาแรฮ มารือมา ฌางัน กาเญา รอจ กะ ฮึลด มูคา นะ ญา เลอ. 15 ซาเบะ-จะ ลาฆู นู กามี กือนา ซือมูฮา บือฌาดี ดัฮ กรานา กาเญา. กะฆีเตอ บือกะ นู ตูฮัด ญา นะ ฮาลัย บรี ซือลามัจ กะ ซือมียา บาญะ ซือรูโลยํ เตอ กะฆีเตอ กูญา นะ บรี ซือลามัจ กะ ตูฮัด บาญะ ซือรูโลยํ ฌูฆา ฌาดี ลาฆู ปูฌี กะ ตูฮัด เดะ อาตัซ เลอ. 16 กะฆีเตอ กีตา ฮอย เตด กูรัก-ฮาตี. มีเซ-จะ ญาวา โซะ ลูวัยํ นะ กีตา ตืองัฮ นะ บูโระ ดัฮ ตาปี เดะ ฮาตี โซะ ดาลับ เตอ โปด ญา บือตามัฮ บารู ซือรูโลยํ บีลัก อารี. 17 ซาเบะ-จะ ลาฆู ซูซัฮ นู กิดีกิ นะ กีตา นู อาดา เตด บราปา ลามา นะ บูวัจ บรี กีตา ซาโมจ ลาฆู บือซรี บาญะ โตระ นู อาดา ซือลาลู นู ฮอย นามา นะ ปือซามา บือเลฮ เลอ. 18 กรานา-จะ กีตา เตด ตีญูง กะ ลาฆู นู ลีฮัจ บือฆารี เตอ ตาปี ตีญูง กะ ลาฆู นู ลีฮัจ เตด บือฆารี. ซาเบะ-จะ ลาฆู นู ลีฮัจ บือฆารี เตอ ญา ดูโดะ ซัจ เตด ลามา. ตาปี ลาฆู นู ลีฮัจ เตด บือฆารี เตอ ญา อาดา ดูโดะ ซือลาลู เลอ.
1 ซาเบะ กีตา ตาฮู จะ ดัฮ รูมัฮ กาฌัก อีนี นู ฌาดี ญาวา กีตา นะ กือนา ปรูโตฮ ดัฮ เตอ กีตา โปด อาดา ตือปัจ ดูโดะ นู ตูฮัด นะ บรี เลอ นู ตางัน นะ ซือมียา เตด บือเลฮ บูวัจ นู อาดา ดูโดะ ซือลาลู เดะ โซะ อาตัซ ลาแงะ เลอ. 2 ซาเบะ กาลา กีตา อาดา เดะ ญาวา อีนี กีตา ตืองัฮ มือรายู เตอ อาดา บือคานะ นะ ซาโมจ ตือปัจ ดูโดะ นู มาแรฮ ดาตัก เดะ ลาแงะ อีตู 3 บีดา-จะ กาลา กีตา ซาโมจ ดัฮ กีตา นะ เตด ฌาดี ซือมียา ฮอย ตือปัจ ดูโดะ เลอ. 4 ซาเบะ-จะ กาลา กีตา อาดา ดูโดะ เดะ ญาวา อีนี กะฆีเตอ กีตา อาดา ลาฆู บือปาโตด บาฮาตี ซูโงฮ บูกัด บือคานะ นะ ตีงัน ญาวา อีนี บูวัก ตาปี บือคานะ นะ ซาโมจ ญาวา นู บารู ปูลัก บีดา-จะ ลาฆู ฮีโดะ นู ซือลาลู นะ มาแรฮ ซรือโกะ ญาวา อีนี นู นะ มาตี บูโระ บูโซะ ปี เลอ. 5 ตูฮัด เดะ อาตัซ เตอ ญา เลอ นู ซียะ กีตา ดัฮ บรี กีตา นะ กาเลฮ กะฆีเตอ. ญา เตอ นู บรี ซือมืองัจ นะ ญา กะ กีตา ฌาดี ซือรูปา รือฆา อูปัฮ ดูลู เดะ ลาฆู นู กีตา นะ ซาโมจ. 6 ซาเบะ กะฆีเตอ กีตา ตือตู-ฮาตี ซือลาลู ตาฮู กือฌะ ดัฮ จะ กาลา กีตา อาดา ดูโดะ เดะ ญาวา อีนี กีตา ดูโดะ ฌาโวฮ เดะ ตูฮัด. 7 ซาเบะ กีตา เตด ตูโรจ กะ ลาฆู นู มาตา นะ กีตา ลีฮัจ บือฆารี เตอ ตาปี ตูโรจ กะ ลาฆู นู กีตา ปือจายา เลอ. 8 กะฆีเตอ กีตา ตือตู-ฮาตี บือคานะ นะ มือนีงัน ญาวา อีนี ปี ดูโดะ บือซามา ฌางัน ตูฮัด บาฌิ ลาฆี. 9 ซาเบะ กะฆีเตอ เตด-จะ กีตา นะ ดูโดะ เดะ ญาวา อีนี บาฌิ เตด ดูโดะ โปด บาฌิ ตาปี กีตา ตือตู-ฮาตี กะ ลาฆู อีนี จะ นะ บูวัจ ตูโรจ บรี ตูฮัด นะ ซูกา-ฮาตี เลอ. 10 กรานา-จะ กีตา ราตา ซือมียา ฆาโดฮ ปี บรี ลีฮัจ โซะ ฮึลด มูคา นะ เยซู คริด บีดา ญา นะ กรัจ ฮูโกบ กีตา บีดา ราตา ซือมียา นะ บือเลฮ ซาโมจ บรี กือนา ฌางัน ลาฆู นู ญา บือเลฮ บูวัจ เดะ ญาวา นะ ญา เตด-จะ บาฌิ เฆอ-จะ ฌาฮัจ. 11 กะฆีเตอ ซาเบะ กามี ตาโกจ เดะ ตูฮัด ซูโงฮ กามี โปด กูวาซา นะ บาอาฌะ โกะ ซือมียา อาซิก บรี ตูโรจ กะ ญา. ตูฮัด เดะ อาตัซ เตอ ญา ลีฮัจ ลาฆู นะ กามี ซัฮ ดัฮ. กู จาดัก จะ ฮาตี นะ กาเญา นะ ลีฮัจ ลาฆู นะ กามี ซัฮ ฌูฆา. 12 นี บูกัด กามี มือโอจ กะ ญาวา นะ ตะอาซิก ฌางัน กาเญา ปูลัก. ตาปี กามี บรี กาเญา อาดา ปรือลก นะ งันตืองัน ปาซัน ลาฆู นะ กามี บือเลฮ. กะฆีเตอ กาเญา นะ บือเลฮ ตีกัฮ กะ โกะ ซือมียา อีตู นู ซูกา งันตืองัน เดะ ลาฆู ญาวา โซะ ลูวัยํ บูกัด เดะ ลาฆู นู อาดา ดูโดะ เดะ ดาลับ ฮาตี. 13 ดัฮ กาเญา ลีฮัจ กามี ฌาดี ซือรูปา ซือมียา ฆีลา ฌาดี ลาฆู นะ กามี ฌางัน ตูฮัด เลอ. ตาปี ดัฮ กาเญา ลีฮัจ กามี ฌาดี ซือมียา ปานัย อากัน เตอ ฌาดี อูโตก บีดา กาเญา เลอ. 14 กรานา-จะ นู เยซู คริด ซายัก กามี เตอ ซือรูปา ญา ปรือกัด ฮาตี นะ กามี. ซาเบะ กามี ตือตู เดะ ฮาตี กะฆีนี จะ นู เยซู ซืออูรัก มาตี กรานา โกะ ซือมียา ซือมูฮา กะฆีเตอ โกะ ซือมียา ซือมูฮา โปด มาตี ฮาบิฮ ดัฮ. 15 กะฆีเตอ นู เยซู มาตี กรานา โกะ ซือมียา ซือมูฮา บีดา โกะ ซือมียา อีตู นู อาดา ฮีโดะ เตอ นะ เตด ซือมาตา ตูโรจ กะ ฮาตี นะ ตะอาซิก ปูลัก ดัฮ เลอ ตาปี นะ ตูโรจ กะ ฮาตี นะ เยซู ญา นู มาตี นู ฮีโดะ ปาเระ กรานา กูญา ดัฮ. 16 ซาเบะ กะฆีเตอ ตะเดะ อีนี ปี กามี โปด นะ เตด ลีฮัจ กะ ซือมียา ดีฮา ตูโรจ บือกะ ลาฆู นะ อูมัจ-ซือมียา. มีเซ-จะ กาลา ดูลู กามี ดือละ ลีฮัจ กะ เยซู คริด ตูโรจ บือกะ ลาฆู นะ อูมัจ-ซือมียา เตอ ตาปี วะตู อีนี กามี นะ เตด ลีฮัจ กะ ญา กะฆีเตอ ลาฆี เลอ. 17 กะฆีเตอ ปูลัก ดัฮ ซือมียา ดีฮา อาดา ลือกัจ บือซามา ฌางัน เยซู คริด ซือมียา อีตู เตอ กือนา บือฌาดี บารู ดัฮ. โกะ บือนา บารัก นู มาลามา โปด ลือแงะ ปี ดัฮ. นี เลอ ฌาดี บือนา บารัก นู บารู ฮาบิฮ ดัฮ. 18 ลาฆู กะฆีเตอ ซือมูฮา บือฌาดี ดาตัก มาแรฮ เดะ ตูฮัด เดะ อาตัซ เลอ. ญา ซูโรฮ เยซู คริด ตูโลก บรี กีตา บาฌิ ปาเระ ฌางัน ญา. ญา บือเลฮ บรี กามี ฌาดี ซือมียา บือกรือฌา บาวา โกะ ซือมียา อาซิก บรี บาฌิ ปาเระ ฌางัน ตูฮัด ปูลัก. 19 ฌาดี กะฆีนี จะ ตูฮัด เดะ อาตัซ ญา ซูโรฮ เยซู คริด บูวัจ บรี อูมัจ-ซือมียา ราตา เดะ ดือนียา อีนี บาฌิ ปาเระ ฌางัน ญา. ญา เตด กีรา ลาฆู ซาลัฮ นะ กูญา. กะฆีเตอ ญา ซรัฮ ลาฆู นู นะ บรี โกะ ซือมียา บาฌิ ปาเระ ฌางัน ตูฮัด บรี กะ กามี ปี มือญาเระ เลอ. 20 กะฆีเตอ กามี ฌาดี ปือญูโรฮ นะ เยซู คริด ซือรูปา บือกะ ตูฮัด เดะ อาตัซ ซูโรฮ กามี มีตา เดะ กาเญา. กามี มือเลา ฆาตี เยซู คริด มีตา กือมัซๆ เดะ กาเญา บรี กาเญา บาฌิ ปาเระ ฌางัน ตูฮัด เลอ. 21 ซาเบะ-จะ ตูฮัด บือเลฮ บูวัจ บรี เยซู ญา นู ฮอย ดูซา ลาลู บรี อาดา บาฮาเฆด เดะ ลาฆู ดูซา กรานา ลีฮัจ กะ กีตา บีดา กีตา โปด นะ อาดา บาฮาเฆด เดะ ลาฆู บาฌิ-ตือปัจ นะ ตูฮัด ซาเบะ ลือกัจ บือซามา ฌางัน เยซู เลอ.
1 กามี ฌาดี ซือมียา บือกรือฌา บือซามา ฌางัน ตูฮัด. กะฆีเตอ กามี มีตา เดะ กาเญา กือมัซๆ จะ นู ตูฮัด เดะ อาตัซ ฮาลัย บรี ซือลามัจ กะ กาเญา ดัฮ ฌางัน บูวัจ บรี ญา เตด ฌาดี นามา เลอ. 2 ซาเบะ ตูฮัด ญา มือเลา กะฆีนี จะ "รอจ วะตู นู กู นะ ตูโลก กู บือเลฮ มือนีงัย กะ เกา ดัฮ. รอจ อารี นู นะ บรี ฮีโดะ ลือปัซ บาฌิ กู บือเลฮ ตูโลก เกา เตอ." ญา จะ. ลีฮัจ เลอ วะตู อีนี ฌาดี วะตู นู ตูฮัด นะ ตูโลก. อารี นู อีนี ฌาดี อารี นู ญา นะ บรี ฮีโดะ ลือปัซ บาฌิ. 3 กามี เตด บูวัจ ลาฆู นามาๆ โบะ นู นะ ซือกัจ ฌาลัด นะ ซือมียา ดีฮา บีดา ตีเมา บรี กูญา นะ บือเลฮ มือเลา มือฌัฮ กะ ลาฆู นู กามี บือเลฮ บือกรือฌา ดัฮ เตอ. 4 ตาปี นู กามี ฌาดี ปราโซฮ นะ ตูฮัด เตอ กะฆีเตอ กามี กูวาซา นะ บรี ลีฮัจ เดะ ลาฆู ซือมูฮา จะ กามี ราเฌด ตาฮัด-ฮาตี บาญะ ฌือแนฮ เดะ ลาฆู ซูซัฮ ปายัฮ โตระ เดะ ลาฆู นู บรี กามี กือนา ฮาเปะ โปด. 5 บาญะ กาลี กามี กือนา รือเปะ กือนา กานัก เดะ ปือฌารา กือนา ลาฆู กือลาจุ เตอ. กามี บือเลฮ บือกรือฌา โตระ ซัจ บือฌาฆา มาตา บือตาฮัด บารัก มากัด ฌูฆา. 6 กามี ฌาดี ซือมียา จรัฮ บาฌิ ตาฮู ลาฆู นู ซูโงฮ ฌาดี ซือมียา นู ตาฮัด-ฮาตี ลามา อาดา ฮาตี ตือจีฮัด กะ กาวัด. กามี อาดา ซือมืองัจ นะ ตูฮัด บาวา กามี. กามี ซายัก กาวัด บือซูโงฮ-ซูโงฮ เลอ. 7 กามี มือญาเระ ปือมือเลา นู รือมัก อาดา ลาฆู ปือมือฆัฮ นะ ตูฮัด บือกรือฌา บือซามา. นู กามี บาฌิ-ตือปัจ ฌางัน ตูฮัด ดัฮ ฌาดี ซือรูปา ซือนาตา ปือฆัก ดูวา บือลัฮ กีรี กานัน. 8 ซือตืองัฮ กือนา ปูฌี ซือตืองัฮ กือนา มือเลา ตะอารัฮ กะ กามี. ซัจ ปาคัจ มือเลา จะ ฌาฮัจ ซัจ มือเลา จะ บาฌิ. กูญา ตูโดฮ กะ กามี จะ ฌาดี ซือมียา นู มือเลา ตีปู ตาปี โงฮ-ซูโงฮ กามี ฌาดี ซือมียา รือมัก. 9 กูญา ตูโดฮ จะ ฌาดี ซือมียา ฮอย ซาปา กราลา ตาปี กามี ฌาดี ซือมียา นู ราตา ซือมียา กราลา บาฌิ. กูญา จะ กามี ซือรูปา ซือมียา มาตี ตาปี ลีฮัจ เลอ กามี อาดา ฮีโดะ ลาฆี. กามี กือนา กาเตาะ ตาปี เตด มาตี 10 อาดา ลาฆู ซูซัฮ ตาปี กามี ซูกา-ฮาตี ซือรูโลยํ. กามี ลีฮัจ ซือรูปา ฌาดี ซือมียา ฮาฌะ ตาปี บูวัจ บรี ซือมียา นู บาญะ กายา ดัฮ ซือรูปา ซือมียา นู ฮอย นามา ลาลู เตอ ตาปี อาดา ซือบารัก แนฮ-ฌือแนฮ ปือนอฮ มีเม เลอ. 11 ลีฮัจ เลอ ลูมอฮ โกริน กามี บือเลฮ มือเลา ซัฮ ฌางัน กาเญา ดัฮ เตด บูนี ลาลู เลอ. ฮาตี นะ กามี โปด บูกา ลือฆา ดัฮ บีดา นะ ซาโมจ กาเญา. 12 ฮาตี นะ กาเญา กือนา ฮาเปะ บรี ซือแปะ ดัฮ บูกัด กรานา กามี ตาปี กรานา ลาฆู นู กาเญา บรีงัจ ตะอาซิก เตอ. 13 กู มีตา มือเลา ฌางัน กาเญา ซือรูปา มือเลา ฌางัน นานะ นะ กู ฌาดี-จะ มีตา บรี กาเญา บูวัจ บาฌิ บาลัซ บรี บูกา ฮาตี นะ กาเญา ซาโมจ กามี เลอ. 14 ฌางัน บรี กาเญา มาโซะ บือกรือฌา บือฆู บือซามา ฌางัน โกะ ซือมียา นู เตด ปือจายา กะ ตูฮัด. กรานา-จะ ลาฆู บาฌิ-ตือปัจ นะ อาดา บาฮาเฆด บือซามา ฌางัน ลาฆู ฌาฮัจ บือเลฮ กะฮามี เลอ? ลาฆู จรัฮ นะ มาโซะ บรี ลือกัจ บือซามา ฌางัน ลาฆู กือลับ บือเลฮ กะฮามี? 15 เยซู คริด ฌางัน กือปาลา ฮาตู ซีตัด นะ บือปาคัจ บือซามา บือเลฮ กะฮามี? เฆอ-จะ ซือมียา นู ปือจายา นะ อาดา บาฮาเฆด บือซามา ฌางัน ซือมียา นู เตด ปือจายา บือเลฮ กะฮามี? 16 บาลัย นะ ตูฮัด เดะ อาตัซ นะ บือกีรา บือซามา ฌางัน โกะ บราลา บือเลฮ กะฮามี เลอ? กรานา-จะ ลูมอฮ กีตา อีนี ฌาดี บาลัย นะ ตูฮัด ญา นู อาดา ฮีโดะ เตอ บือกะ ตูฮัด เดะ อาตัซ บือเลฮ มือเลา จะ "กู นะ ดูโดะ เดะ ลูมอฮ กูญา นะ บือฌาลัด ปี มาแรฮ เดะ ตืองัฮ กูญา เลอ. กู นะ ฌาดี ตูฮัด นะ กูญา จะ กูญา นะ ฌาดี ลูมอฮ นะ กู." 17 ตูฮัด ญา มือเลา กะ โกะ ซือมียา นะ ญา ปูลัก จะ "ซาเบะ กะฆีเตอ กาเญา กือนา ตรือเบะ เดะ ลูมอฮ อีตู. กือนา มืองือละ ญาวา ตรือเบะ เดะ ลูมอฮ กูญา เลอ. ฌางัน ปือเตาะ ซือบารัก นู ตะอารัฮ กะฆีเตอ บารู กู นะ ซาโมจ ลูมอฮ กาเญา. กู นะ ฌาดี อาโปก นะ ลูมอฮ กาเญา กะฆีเตอ กาเญา นะ ฌาดี โกะ นานะ กีลากี นานะ นีบีนี นะ กู เลอ." ตูฮัด นู มือฆัฮ ลือเบฮ เดะ มานามา เตอ ญา มือเลา กะฆีเตอ ดัฮ เลอ.
1 กะฆีเตอ กาเญา นู กามี ซายัก เออ นู ตูฮัด บือเลฮ บือฌาญี กะฆีนี ฌางัน กีตา ดัฮ บรี กีตา บาโซฮ ญาวา ตะอาซิก บรี ฮอย ลาฆู ตะอารัฮ ราตา ฌือแนฮ โซะ ญาวา โซะ ฮาตี ฌูฆา. กะฆีเตอ บรี กีตา ตูเฮะ ตาโกจ เดะ ตูฮัด บีดา นะ ฌาดี ซือมียา จรัฮ ปือนอฮ บาฌิ ดัฮ. 2 มีตา บรี กาเญา บูกา ฮาตี ซาโมจ กามี เลอ. กามี เตด บือเลฮ กีจอฮ ซือมียา ดีฮา โปด เตด บือเลฮ บาอาฌะ ซือมียา ดีฮา บรี ซือซัจ ฌาลัด เตด บือเลฮ บูวัจ บาอากัน ฌางัน ซือมียา ดีฮา เลอ. 3 กู มือเลา กะฆีนี บูกัด บีดา นะ ตูโดฮ กาเญา ซาเบะ กู บือเลฮ มือเลา ดูลู ดัฮ จะ กาเญา อาดา ดูโดะ เดะ ฮาตี นะ กามี เลอ. นะ มาตี เฆอ-จะ นะ ฮีโดะ โปด อาดา ดูโดะ บือซามา ดัฮ เลอ. 4 กู ตือตู-ฮาตี เดะ กาเญา ซูโงฮ งันตืองัน กรานา กาเญา โงฮ-ซูโงฮ เลอ. กู บือเลฮ ซาโมจ ลาฆู ปูโฌะ-ฮาตี ปือนอฮ ดัฮ. มีเซ-จะ กามี กือนา ลาฆู นู ปายัฮ ซูซัฮ บาญะ ฌือแนฮ ตาปี กู โปด ซูกา-ฮาตี ปือนอฮ มีเม เลอ. 5 ซาเบะ-จะ ตานา กามี มาแรฮ รอจ กะ นังฆรี มาซิโดเนีย ดัฮ โซะ อีซี ญาวา นะ กามี เตด ราซา บราดู รือมัย ลาลู ตาปี อาดา ลาฆู ปายัฮ ดูโดะ กือลีลิก. เดะ โซะ ลูวัยํ อาดา ลาฆู บลาวัด เดะ ดาลับ ฮาตี อาดา ลาฆู ตาโกจ เลอ. 6 ตาปี กะฆีเตอ โปด บาฌิ ตูฮัด เดะ อาตัซ ญา นู ปูโฌะ ฮาตี นะ โกะ ซือมียา นู รือมัย-ฮาตี เตอ ญา บือเลฮ ปูโฌะ ฮาตี นะ กามี บือเลฮ บรี ทีตัด มาแรฮ รอจ กะ กามี ดัฮ. 7 บูกัด ซา ลาฆู นู ทีตัด มาแรฮ ดัฮ เตอ ตาปี เดะ ลาฆู นู กาเญา บือเลฮ ปูโฌะ-ฮาตี นะ ญา ฌูฆา บือกะ ญา บือเลฮ มือญาเระ กะ กามี ปาซัน นู กาเญา บรีงัจ ฌีราซา กะ กู นู กาเญา บาฮาตี ซูโงฮ นู กาเญา ฮาตี ฮางัจ นะ ตีกัฮ ฆาตี กู. ซาเบะ กะฆีเตอ กู ซูกา-ฮาตี บาญะ ซือรูโลยํ เลอ. 8 ซาเบะ-จะ มีเซ กู บือเลฮ บูวัจ บรี กาเญา ซูซัฮ-ฮาตี กรานา ซูรัจ นู อีตู ตาปี กู โปด เตด มือญือซัน-ฮาตี ปาซัน ซูรัจ อีตู เลอ. มีเซ-จะ กาลา ดูลู อีนี กู มือญือซัน ซือตืองัฮ กรานา กู ลีฮัจ จะ ซูรัจ อีตู เตอ บูวัจ บรี กาเญา ซูซัฮ-ฮาตี ซัจ. 9 ตาปี วะตู อีนี กู ซูกา-ฮาตี เลอ บูกัด กรานา กาเญา ซูซัฮ-ฮาตี ตาปี กรานา ลาฆู ซูซัฮ-ฮาตี อีตู บูวัจ บรี กาเญา บราเลฮ-ฮาตี บารู ดัฮ. กรานา-จะ กาเญา ซูซัฮ-ฮาตี ดัฮ ตูโรจ บือกะ ฮาตี นะ ตูฮัด. กะฆีเตอ กามี เตด บือเลฮ บูวัจ ลาฆู ฌาฮัจ กะ กาเญา ลาลู. 10 กรานา-จะ ลาฆู ซูซัฮ-ฮาตี นู ตูโรจ บือกะ ฮาตี นะ ตูฮัด เตอ ญา บูวัจ บรี ซือมียา บราเลฮ-ฮาตี บารู นู บาวา ปี รอจ กะ ลาฆู ฮีโดะ ลือปัซ บาฌิ. ฮอย ซาปา มือญือซัน ลาฆู อีตู เลอ. ตาปี ลาฆู ซูซัฮ-ฮาตี บือกะ ดือนียา เตอ นะ บาวา ปี รอจ กะ ลาฆู มาตี. 11 บรีงัจ ลีฮัจ เลอ ลาฆู ซูซัฮ-ฮาตี นู ตูโรจ บือกะ ฮาตี นะ ตูฮัด บือเลฮ บูวัจ บรี กาเญา ฮาตี งูฆางู บาญะ ตารา ดีฮา นู นะ มือโซะ มียา ลาฆู นะ บือปูลัซ ญาวา ตะอาซิก นู นะ มูซัยํ ฆาตี กู กะ ซือมียา นู บูวัจ ซาลัฮ อีตู เตอ อาดา ฮาตี ตาโกจ บรีงัจ ฌีราซา ฮาตี ราเฌด ฮาตี นะ กรัจ ฮูโกบ ลาฆู ฌาฮัจ เลอ. เดะ ลาฆู ราตา ฌือแนฮ กาเญา บือเลฮ บูวัจ บรี ลีฮัจ บือฆารี จะ กาเญา ฮอย ซาลัฮ. 12 กะฆีเตอ นู กู บือเลฮ ฆาแรฮ ซูรัจ อีตู มาแรฮ รอจ กะ กาเญา บูกัด กรานา ลีฮัจ กะ ซือมียา บูวัจ ซาลัฮ เฆอ-จะ กรานา ลีฮัจ กะ ซือมียา นู ฆาโดฮ ตาฮัด ลาฆู ซาลัฮ อีตู. ตาปี กู ฆาแรฮ บีดา นะ บรี กาเญา ลีฮัจ ซัฮ โซะ ฮึลด มูคา นะ ตูฮัด จะ นู กาเญา อาดา ฮาตี งูฆางู นะ บรีงัจ กะ กามี. 13 ซาเบะ กะฆีเตอ กามี กือนา ปูโฌะ-ฮาตี ดัฮ. ตาปี บูกัด-จะ กามี กือนา ปูโฌะ-ฮาตี ตารา อีตู. นู ลูมอฮ กาเญา บือเลฮ บูวัจ บรี ฮาตี นะ ทีตัด ซืองะ ดัฮ กะฆีเตอ ญา ซูกา-ฮาตี ซูโงฮ บูวัจ บรี กามี ซูกา-ฮาตี บาญะ ซือรูโลยํ เลอ. 14 นู กู บือเลฮ งันตืองัน ลาฆู นะ กาเญา บรี กะ ทีตัด ตาฮู ดัฮ เตอ กู โปด เตด ฆาโดฮ นะ จือและ เลอ. บือกะ ลาฆู นู กามี บือเลฮ มือเลา ฌางัน กาเญา ฌาดี ลาฆู นู ซูโงฮ ซือมูฮา เตอ นู กามี บือเลฮ งันตืองัน ลาฆู นะ กาเญา บรี กะ ทีตัด ตาฮู ญา บือฆารี ดัฮ ฌาดี ลาฆู นู ซูโงฮ กะฆีเตอ ฌูฆา เลอ. 15 ทีตัด จับ บือเลฮ จะ นู กาเญา ซือมูฮา ยอม มือนีงัย กะ ญา นู ลูมอฮ กาเญา ซาโมจ ญา บาฌิ ฌางัน ลาฆู ตาโกจ ยู ญาวา กือตัยํ. กะฆีเตอ ญา ซายัก กะ กาเญา บรี บือตามัฮ บาญะ ซือรูโลยํ. 16 กู ซูกา-ฮาตี ซูโงฮ กรานา-จะ กู ตือตู-ฮาตี เดะ กาเญา บือเลฮ ราตา ฌือแนฮ เลอ.
1 โกะ ดีบราดี เออ กามี นะ มือญาเระ บรี กะ กาเญา ตาฮู ปาซัน นู ตูฮัด ญา ฮาลัย บรี ซือลามัจ กะ โกะ ลูมอฮ นะ ตูฮัด เดะ โซะ นังฆรี มาซิโดเนีย. 2 กะฆีเตอ กาลา ลูมอฮ กูญา กือนา ลกลีฮัจ บาญะ เดะ ลาฆู ซูซัฮ ปายัฮ โตระ เตอ กูญา ซูกา-ฮาตี ปือนอฮ บาฌิ ดัฮ. มีเซ-จะ กูญา ฮาฌะ โตระ ตาปี กูญา ฮาตี ลือฆา นู นะ ฮาฆิ โกะ บือนา บารัก บรี บาญะๆ เลอ. 3 ซาเบะ กู นะ ฌาดี ซะซี บือเลฮ จะ กูญา บือเลฮ ฮาฆิ บือกะ ลาฆู กูวาซา นะ กูญา โงฮ-ซูโงฮ ลือเบฮ เดะ ลาฆู กูวาซา นะ กูญา ปูลัก. บือกะ ตูโรจ กะ ฮาตี นะ กูญา ตะอาซิก 4 กูญา ปูโฌะ กามี กือมัซๆ มีตา บรี กูญา นะ อาดา บาฮาเฆด เดะ ลาฆู นู นะ ตูโลก โกะ ซือมียา นะ ตูฮัด เดะ นังฆรี เยรูซาเลม เตอ. 5 นู กูญา บูวัจ กะฆีเตอ บาฌิ ลือเบฮ เดะ ลาฆู นู กามี จาดัก ดัฮ. กูญา บือเลฮ ซรัฮ ญาวา กะ ตูฮัด ดูลู บารู ซรัฮ ญาวา บรี กะ กามี บือกะ ตูโรจ ฮาตี นะ ตูฮัด เลอ. 6 ซาเบะ กะฆีเตอ กามี บือเลฮ ปรีงัจ กะ ทีตัด จะ บือกะ นู ญา บือเลฮ ฮึนตะ นะ มืองูเตะ ดูเวะ เดะ ลูมอฮ กาเญา เตอ บรี ญา ปี ตูโลก กาเญา ปูลัก บรี กาเญา นะ ฮาลัย บรี ดูเวะ อีตู บรี ซุจ ดัฮ เลอ. 7 กาเญา อาดา ฮาตี บาฌิ ปือนอฮ ดัฮ ราตา ฌือแนฮ จะ กาเญา ปือจายา กือฌะ-กือมัซ กาเญา ปานัย มือญาเระ ลาฆู นะ ตูฮัด กาเญา ตาฮู ลาฆู นู ซูโงฮ อาดา ฮาตี งูฆางู นู นะ ตูโลก กาวัด อาดา ฮาตี ซายัก กาวัด บือกะ กามี บือเลฮ อาฌัยํ กาเญา ดัฮ. กะฆีเตอ กาเญา โปด กือนา อาดา ฮาตี ลือฆา ปือนอฮ บาฌิ นู นะ ฮาลัย บรี ดูเวะ กะฆีนี ฌูฆา เลอ. 8 นู กู มือเลา กะฆีเตอ บูกัด-จะ กู นะ ปรือกัด ซูโรฮ กาเญา ตาปี นะ มือญาเระ บรี กะ ลูมอฮ กาเญา ตาฮู จะ โกะ ซือมียา นู ซิก-อาซิก กูญา งูฆางู นะ ตูโลก กะฮามี. กะฆีเตอ กู นะ ลกลีฮัจ จะ นู กาเญา ซายัก อาดา บาญะ ซูโงฮ ตารา ดีฮา. 9 ซาเบะ กาเญา ตาฮู ดัฮ จะ เยซู คริด ตูฮัด นะ กีตา เตอ ญา ฮาตี ลือฆา ตือจีฮัด กะฮามี เลอ. มีเซ ญา กายา ซูโงฮ โปด ตาปี ญา ยอม ฌาดี ซือมียา ฮาฌะ กรานา ลีฮัจ กะ กาเญา บีดา กาเญา นะ บือเลฮ ฌาดี ซือมียา กายา กรานา ลาฆู นู ญา ฮาฌะ ดัฮ เตอ. 10 กะฆีเตอ ปาซัน ลาฆู มืองูเตะ ดูเวะ อีนี กู อาดา ฮาตี นะ ปรีงัจ กะ กาเญา กะฆีนี จะ กาลา ตาโฮด ดูลู เตอ กาเญา ฌาดี ซือมียา ลามูลา นู ฮึนตะ นะ บูวัจ ลาฆู อีนี ฌาดี ซือมียา ลามูลา นู อาดา ฮาตี กะฆีเตอ โปด. ซาเบะ กะฆีเตอ บือฆูนา ดัฮ 11 นู กาเญา นะ บูวัจ ลาฆู อีตู บรี ซุจ ฮาบิฮ ดัฮ เดะ วะตู อีนี เลอ. บือกะ นู กาเญา อาดา ฮาตี ฆือนะ ดัฮ นะ บือกีรา เตอ บรี กาเญา ฮาตี รือมา นะ บูวัจ บรี ซุจ บือกะ โกะ ซือบารัก นู กาเญา อาดา เลอ. 12 กรานา-จะ กะ อาดา ฮาตี ซียะ ฆือนะ ดัฮ ตูฮัด โปด ซูกา-ฮาตี นะ ซาโมจ บือกะ บารัก นู กาเญา อาดา เตอ บูกัด บือกะ ซือบารัก นู กาเญา ฮอย. 13 กู เตด อีงัจ นะ บรี ซือมียา อาซิก บราดู รือมัย ตาปี บรี กะ กาเญา บือกรือฌา บรัจ โตระ. เตด โบะ ตาปี กู นะ บรี ฌาดี ซามา บายา ฮาปา. 14 วะตู อีนี กาเญา อาดา ลือเบฮ บาญะ ดัฮ. กะฆีเตอ กาเญา นะ บือเลฮ ตูโลก โกะ ลูมอฮ ซือมียา นู บือตาฮัด. กะฆีเตอ วะตู กาเญา บือตาฮัด กูญา โปด อาดา ลือเบฮ บาญะ นู นะ ตูโลก กาเญา บีดา นะ บรี ซามา บายา เลอ. 15 บือกะ อาดา ฆาแรฮ เดะ ซูรัจ ปือมือเลา นะ ตูฮัด จะ "ซือมียา นู ปือมุน ตาโรฮ บาญะ โปด ฮอย เตด ลือเบฮ นามา เตอ. บือกะ ซือมียา นู ปือมุน กิดีกิ โปด ฮอย เตด บือตาฮัด เลอ." 16 ซือลามัจ เลอ กะ ตูฮัด เดะ อาตัซ นู บือเลฮ บรี ทีตัด อาดา ฮาตี งูฆางู นะ ตูโลก กาเญา ซือรูปา บือกะ ฮาตี นะ กามี ฌูฆา. 17 ตานา กามี ปูโฌะ ญา นะ ปี มียา กาเญา ญา ซาโงะ ดัฮ. โงฮ-ซูโงฮ อีซี ญา ตะอาซิก อาดา ฮาตี งูฆางู นู นะ ปี มียา กาเญา เลอ. 18 กามี ซูโรฮ ดีบราดี นู ซืออูรัก บรี ปี ฌางัน ทีตัด ฌูฆา. ดีบราดี นู อีนี เตอ โกะ ลูมอฮ นะ ตูฮัด ราตา ปูฌี กะ ญา ปาซัน ลาฆู นู ญา บือกรือฌา มือญาเระ บรีตา นู บาฌิ นะ ตูฮัด. 19 ลือเบฮ เดะ อีตู ปูลัก โกะ ลูมอฮ นะ ตูฮัด บือเลฮ ตืองะ ญา บรี ฌาดี กาวัด นู นะ บือฌาลัด ปี บือซามา ฌางัน กามี ตูโลก บาวา โกะ ดูเวะ นู กูญา บือเลฮ ฮาลัย บรี บีดา บรี ราตา ซือมียา นะ ปูฌี มือโอจ กะ ตูฮัด บีดา บรี ลีฮัจ จะ กามี อาดา ฮาตี ซียะ ฆือนะ นู นะ ตูโลก ดัฮ. 20 กามี กือนา ฌาฆา ตีเมา บรี ซาปา ซืออูรัก โปด นะ มือเลา มือฌัฮ กะ กามี บือเลฮ ปาซัน โกะ บือนา บารัก นู บาญะ อีนี นู กามี ซาโมจ มาแรฮ ฮาฆิ เตอ. 21 ซาเบะ กามี ตือตู นู นะ ฌาดี ซือมียา บาฌิ-ตือปัจ บูกัด-จะ ซา โซะ ฮึลด มูคา นะ ตูฮัด เตอ ตาปี เดะ โซะ ฮึลด มูคา นะ โกะ ซือมียา ซือมูฮา ฌูฆา. 22 กามี ซูโรฮ อาดี-บราดี นู ซืออูรัก ลาฆี บรี ปี ฌางัน กูญา กือดูวา อูรัก ฌูฆา. ญา ฌาดี ซือมียา นู กามี บือเลฮ ลกลีฮัจ ฮาตี นะ ญา บาญะ กาลี ดัฮ จะ ญา อาดา ฮาตี งูฆางู เดะ ลาฆู บาญะ ฌือแนฮ. เดะ วะตู อีนี นู ญา ตือตู-ฮาตี เดะ กาเญา บูวัจ บรี ญา อาดา ฮาตี งูฆางู นะ ตูโลก บาญะ ซือรูโลยํ เลอ. 23 โซะ ทีตัด เตอ ญา ฌาดี ฆู นะ กู ฌาดี ซือมียา บือกรือฌา บือซามา ฌางัน กู เดะ ลาฆู นู นะ ตูโลก กาเญา. โซะ ดีบราดี นะ กามี ดูวา อูรัก นู ปี ฌางัน ญา เตอ กูญา ฌาดี ซือมียา ฆาตี โกะ ลูมอฮ นะ ตูฮัด นู บูวัจ บรี ลูมอฮ ซือมียา ปูฌี มือโอจ กะ เยซู คริด เลอ. 24 กะฆีเตอ กาเญา กือนา บรี ลีฮัจ บือฆารี ซัฮ นู กาเญา ซายัก กะ โกะ ซือมียา อีนี. กะฆีเตอ โกะ ลูมอฮ นะ ตูฮัด นะ ตาฮู นะ บือเลฮ ลีฮัจ จะ นู กู มือเลา งันตืองัน ปาซัน ลาฆู นะ กาเญา บรี กะ กูญา ดืองัยํ เตอ ฌาดี ลาฆู ซูโงฮ เลอ.
1 โงฮ-ซูโงฮ เตอ กู เตด ฆาโดฮ นะ ฆาแรฮ ซูรัจ อาตัจ บรี กะ กาเญา ปาซัน ลาฆู นะ ตูโลก โกะ ซือมียา นะ ตูฮัด เดะ นังฆรี เยรูซาเลม. 2 ซาเบะ กู ตาฮู ดัฮ จะ ฮาตี นะ กาเญา ซียะ ฆือนะ ดัฮ กะฆีเตอ กู บือเลฮ งันตืองัน มือเลา ลาฆู นะ กาเญา บรี กะ ลูมอฮ มาซิโดเนีย ตาฮู จะ "ลูมอฮ อาคายา บือเลฮ ซียะ ดัฮ ตะเดะ ตาโฮด ดูลู เลอ." นู ลาฆู งูฆางู นะ กาเญา เตอ บือเลฮ บูวัจ บรี โกะ ซือมียา เดะ ลูมอฮ กูญา นู บาญะ งูฆางู นะ ตูโลก ฌูฆา. 3 ตาปี กู ซูโรฮ โกะ ดีบราดี ตีฆา อูรัก ซีงี ปี มียา กาเญา บีดา ตีเมา บรี ลาฆู นู กามี งันตืองัน ปาซัน กาเญา นะ เตด ฌาดี นามา. ตาปี บรี กาเญา ซียะ บรี บาฌิ ตูโรจ กะ ลาฆู นู กู บือเลฮ มือเลา อีตู ดัฮ เลอ. 4 เตด กะฆีเตอ ดัฮ ลูมอฮ มาซิโดเนีย ซือตืองัฮ นะ มาแรฮ ฌางัน กู นะ ลีฮัจ จะ กาเญา เตด บือเลฮ ซียะ นามา ลาฆี เตอ กามี โปด นะ จือและ มาตา เลอ ปาซัน ลาฆู นู กามี ตือตู-ฮาตี ดัฮ. บูกัด ซา กามี ตาปี กาเญา นะ จือและ ฌูฆา. 5 ซาเบะ กะฆีเตอ เลอ กู ลีฮัจ บาฌิ ดัฮ นู นะ ปูโฌะ โกะ ดีบราดี อีตู ซีงี บรี กูญา ปี มียา กาเญา ดูลู เดะ กู บรี ซียะ ดูลู บารัก นู กาเญา บือฌาญี ดัฮ นะ ตูโลก ฮาฆิ. กะฆีเตอ โกะ ซือบารัก อีตู นะ อาดา ฆือนะ ดัฮ ฌาดี ซือบารัก ฮาฆิ ฌางัน ฮาตี นู ปือนอฮ บูกัด ฮาตี นู กือนา ปรือกัด. 6 บรีงัจ ลีฮัจ เลอ ซือมียา ดีฮา นู ตานัม ปาดี กิดีกิ ญา โปด นะ กือตับ บือเลฮ กิดีกิ. ซือมียา ดีฮา นู ตานัม บาญะ ญา โปด นะ กือตับ บือเลฮ บาญะ. 7 ราตา ซือมียา กือนา บรี ตูโรจ บือกะ กูญา บือเลฮ บรีงัจ เดะ ฮาตี บูกัด นะ บรีงัจ มือญือซัน บูกัด นะ บรีงัจ จะ กือนา ปรือกัด ดัฮ. ซาเบะ-จะ ตูฮัด เดะ อาตัซ เตอ ญา ซายัก ซือมียา อีตู นู ฮาลัย บรี ฌางัน ลาฆู ซูกา-ฮาตี เลอ. 8 ตูฮัด ญา มือฆัฮ นะ บรี ซือลามัจ ราตา ฌือแนฮ ปือนอฮ บาฌิ กะ กาเญา บีดา บรี กาเญา อาดา ซือบารัก ราตา ฌือแนฮ อาดา ฆือนะ บีดา ญาวา ตะอาซิก บีลัก อารี เตอ อาดา ลือเบฮ บาญะ ฌูฆา บีดา นะ บือกรือฌา ลาฆู นู บาฌิ ราตาๆ เลอ. 9 บือกะ อาดา ฆาแรฮ เดะ ซูรัจ ปือมือเลา นะ ตูฮัด ปาซัน ซือมียา บาฌิ-ตือปัจ จะ "ญา ฮาฆิ ญา ฮาลัย บรี กะ ซือมียา ฮาฌะ ลาฆู บาฌิ นะ ญา อาดา ดูโดะ ซือลาลู เลอ." ญา จะ. 10 โซะ ตูฮัด ญา นู บรี บีฌี ปาดี กะ ซือมียา นู ปี ตานัม นู บรี นาซี กะ ซือมียา มากัด เตอ ญา โปด นะ บรี บีฌี ปาดี กะ กาเญา บรี อาดา บาญะ ซือรูโลยํ. ญา นะ บรี ลาฆู บาฌิ นะ กาเญา นะ บือบูวัฮ บือตามัฮ บาญะ เลอ. 11 ตูฮัด ญา นะ บรี กาเญา อาดา ซือบารัก ราตา ฌือแนฮ ปือนอฮ บาญะ ซูโงฮ บีดา บรี กาเญา อาดา ฮาตี นู ลือฆา นะ ตูโลก ฮาฆิ โกะ ซือบารัก. กะฆีเตอ วะตู กามี นะ ตูโลก บาวา โกะ ซือบารัก อีตู ปี ฮาฆิ นะ บูวัจ บรี โกะ ซือมียา นะ บรี ซือลามัจ กะ ตูฮัด เลอ. 12 ซาเบะ-จะ นู กาเญา บูวัจ ลาฆู ตูโลก ฮาฆิ อีตู บูกัด-จะ ซา นะ ตูโลก โกะ ซือมียา นะ ตูฮัด นู ฮาฌะ เตอ ตาปี นะ บูวัจ บรี อาดา ลาฆู บรี ซือลามัจ กะ ตูฮัด เดะ อาตัซ บรี บือตามัฮ บาญะ ซือรูโลยํ เลอ. 13 นู กาเญา นะ บือกรือฌา ตูโลก กะฆีนี ฌาดี ลาฆู นู บรี ลีฮัจ จะ กาเญา ยอม มือนีงัย กะ บรีตา นู บาฌิ นะ เยซู คริด. กะฆีเตอ โกะ ซือมียา นู ซาโมจ นะ บือเลฮ ปูฌี กะ ตูฮัด ซาเบะ กาเญา อาดา ฮาตี ลือฆา นะ ตูโลก ปาฮาฆิ โกะ ซือบารัก นะ กาเญา บรี กะ กูญา บรี กะ โกะ ซือมียา ราตาๆ ฌูฆา. 14 กะฆีเตอ ฌูฆา กูญา โปด นะ บรีงัจ ฌีราซา กะ กาเญา นะ บือซาโวจ บีดา กาเญา ซาเบะ ลาฆู นู ตูฮัด บือเลฮ ฮาลัย บรี ซือลามัจ กะ กาเญา ปือนอฮ มีเม ดัฮ. 15 บรี ซือลามัจ กะ ตูฮัด เดะ อาตัซ เลอ กรานา ซือบารัก นู ตูฮัด บรี เตอ ญา บาฌิ ซูโงฮ ยู ฮอย นามา นะ ปือซามา บือเลฮ เลอ.
1 อาดา ซือมียา ซือตืองัฮ นู อูจะ กะ กู จะ "เปาโล เตอ วะตู ดูโดะ ดาปิก ญา ฌาดี ซือมียา ฮาตี ปือนาโกจ ตาปี วะตู ปี ดูโดะ ฌาโวฮ เออ ญา ฌาดี ซือมียา ฮาตี กรัซ ดัฮ นอ." นี เลอ อีซี กู เปาโล เลอ อาดา ซา ลาฆู นะ มีตา เดะ กาเญา เดะ นามา นะ เยซู คริด ญา นู ฮาตี บาฌิ ฮาตี บือแฌะ ซูโงฮ. 2 กู มีตา กือมัซๆ เดะ กาเญา จะ ตานา กู มาแรฮ ดูโดะ ฌางัน กาเญา ฌางัน บรี กู ฆาโดฮ บูวัจ บือกะ ฮาตี กรัซ โตระ. ซูโงฮ กู บรีงัจ ตือฆามะ นะ ปลีฮัจ ฌาดี ฮาตี นู กรัซ กะฆีเตอ กะ ซือมียา ซือตืองัฮ นู บรีงัจ ลีฮัจ จะ กามี อาดา ปือบูวัจ ตูโรจ กะ ปรางัย นะ อูมัจ-ซือมียา เตอ. 3 ซาเบะ-จะ มีเซ กามี อาดา ดูโดะ เดะ ดือนียา อีนี ซูโงฮ ตาปี กามี โปด เตด บือเลฮ บลาวัด บือปรัก ตูโรจ บือกะ อูมัจ-ซือมียา เตอ. 4 กรานา-จะ โกะ ซือนาตา บือปรัก นะ กามี เตด ฌาดี ซือนาตา นะ อูมัจ-ซือมียา ตาปี อาดา มือฆัฮ ดาตัก มาแรฮ เดะ ตูฮัด นู นะ ปรูโตฮ ดีนิง นังฆรี นะ ซือตรู บือเลฮ เลอ. 5 ฌาดี-จะ นะ ปรูโตฮ ลาฆู บือตือฆัฮ นู ลัฮ-ซาลัฮ ราตา ฌือแนฮ นู ตืองะ ญาวา ตะอาซิก ฌาดี ตือปัจ กือตัก ตีเมา บรี โกะ ซือมียา นะ ตาฮู ลาฆู นะ ตูฮัด. กะฆีเตอ กามี นะ รีฆะ ตาฮัด ลาฆู บรีงัจ ราตา ฌือแนฮ บรี ฌาดี ฮามา บีดา นะ มือนีงัย กะ เยซู คริด. 6 วะตู กาเญา อาดา มือนีงัย ปือนอฮ บาฌิ ดัฮ ลือปัซ อีตู เตอ กามี นะ อาดา ฮาตี ซียะ ดัฮ นะ กรัจ ฮูโกบ ราตา ซือมียา นู ตีเมา มือนีงัย. 7 กาเญา กือนา ลีฮัจ ลาฆู นู บือฆารี เดะ มาตา. ดัฮ ซือมียา ดีฮา ตือตู-ฮาตี จะ ญา ฌาดี ซือมียา นะ เยซู คริด เตอ บรี ญา บือฮีมัจ กะ ญาวา นะ ตะอาซิก จะ นู ญา ฌาดี ซือมียา นะ เยซู คริด กามี โปด ฌาดี ซือมียา นะ เยซู คริด ฌูฆา. 8 มีเซ-จะ กู บือเลฮ มือเลา งันตืองัน บาญะ ตือลาลู ปาซัน ลาฆู มือฆัฮ นู ตูฮัด บือเลฮ บรี กะ กามี ดัฮ กู โปด นะ ฮอย เตด บราซา จือและ ลาลู. ซาเบะ ญา บรี กู อาดา มือฆัฮ กะฆีเตอ ดัฮ บีดา นะ ตูโลก กาเญา บรี ปือจายา กือฌะ-กือมัซ เลอ บูกัด บีดา บูวัจ บรี กาเญา นะ ฌาฮานัม ดัฮ. 9 กู มือเลา กะฆีเตอ บีดา ตีเมา บรี กาเญา นะ อีงัจ จะ กู ซูกา นะ บรี กาเญา ตาโกจ กรานา ซูรัจ นู กู ฆาแรฮ กีเรบ บรี กะ กาเญา. 10 ซาเบะ-จะ อาดา ซือมียา ซือตืองัฮ มือเลา จะ "ซูรัจ นะ เปาโล เตอ มือเลา อูจะ ซัยํ-กาซัยํ ตือฆัยํ-อูรัจ เลอ. ตาปี ตานา ญา มาแรฮ ดูโดะ บือซามา ดัฮ อีซี เปาโล โปด ญา ฮาตี ลือมัฮ ปือมือเลา นะ ญา เตอ เตด ฌาดี นามา ดัฮ เลอ." 11 กือนา บรี กะ กูญา อีตู มาโซะ เดะ ฮาตี กะฆีนี จะ ลาฆู นามา นู กามี ฆาแรฮ ดัฮ เดะ ซูรัจ นะ กามี วะตู ฮอย เตด ดูโดะ บือซามา เตอ ตานา กามี มาแรฮ ดัฮ กามี โปด นะ บูวัจ ลาฆู กะฆีเตอ เลอ. 12 กามี เตด บรานี นู นะ ปือซามา ญาวา นะ กามี ตะอาซิก ฌางัน ซือมียา ซือตืองัฮ นู มือโอจ กะ ญาวา นะ ตะอาซิก. ตาปี นู กูญา อีตู อาเกะ ญาวา นะ กูญา ตะอาซิก ฌาดี ตือปัจ อูโกยํ บือซามา-ซามา อาเมด ญาวา ปือซามา ดัฮ กะฆีเตอ กูญา โปด ฌาดี ซือมียา บูดอ เลอ. 13 ตาปี โซะ กามี เตอ กามี นะ เตด งันตืองัน บรี ลือเบฮ เดะ ฮาดัจ ตาปี-จะ นะ งันตืองัน บือกะ ตารา ตือกอซ อีตู นู ตูฮัด บือเลฮ บรี กะ กามี ดัฮ. ลูมอฮ กาเญา โปด อาดา เดะ ฮาดัจ ตือกอซ อีตู ฌูฆา เลอ. 14 กามี เตด บือกรือฌา ลือเบฮ เดะ ตือกอซ นะ กามี ซือรูปา จะ กามี เตด บือเลฮ มาแรฮ รอจ กะ กาเญา. โงฮ-ซูโงฮ กามี ฌาดี ลูมอฮ นู ลามูลา เลอ นู บาวา บรีตา นู บาฌิ นะ เยซู คริด มาแรฮ มือญาเระ กะ กาเญา ดัฮ. 15 กามี เตด บือเลฮ งันตืองัน ลือเบฮ เดะ ฮาดัจ เตด บือเลฮ งันตืองัน เดะ ลาฆู นู ซือมียา อาซิก บือเลฮ บือกรือฌา. ตาปี กามี จาดัก เดะ ฮาตี จะ ลาฆู ปือจายา นะ กาเญา นะ บือตามัฮ บาญะ ซือรูโลยํ บรี กามี นะ อาดา ตือกอซ บือกรือฌา นู ลือฆา บาญะ ซือรูโลยํ เดะ ลูมอฮ กาเญา เลอ. 16 กะฆีเตอ กามี นะ บือเลฮ มือญาเระ บรีตา นู บาฌิ โซะ โกะ นังฆรี อีตู นู ดูโดะ ปี ลือปัซ เดะ นังฆรี นะ กาเญา นะ เตด ปายัฮ งันตืองัน เดะ ลาฆู บือกรือฌา นู ซือมียา อาซิก บูวัจ ซุจ ดัฮ โซะ ตือกอซ นู ตูฮัด บือเลฮ บรี กะ ญา บือกรือฌา. 17 บือกะ อาดา เดะ ซูรัจ ปือมือเลา นะ ตูฮัด จะ "ซือมียา นู นะ งันตืองัน เตอ บรี ญา งันตืองัน เดะ ลาฆู นู ตูฮัด บูวัจ ดัฮ เลอ." 18 กรานา บูกัด ซือมียา นู มือโอจ กะ ญาวา ตะอาซิก ตาปี ซือมียา นู ตูฮัด บือเลฮ มือโอจ ดัฮ เตอ ญา เลอ นะ โกะ ซือมียา ซาโงะ จะ ฌาดี ซือมียา บาฌิ.
1 กู นะ มีตา เดะ กาเญา บรี ตาฮัด มือนีงัย ลาฆู บูดอ นะ กู ซัจ. มีตา บรี กาเญา ปาคัจ ตาฮัด มือนีงัย ดีกิ เลอ. 2 ซาเบะ-จะ กู บรีงัจ ซายัก โตระ กะ กาเญา บือกะ นู ตูฮัด ญา ซายัก กาเญา เตอ. กรานา-จะ ลูมอฮ กาเญา ซือรูปา นีบีนี ราดารา นู เตด ดือละ บือเลฮ ลากี ลาฆี นู กู บือเลฮ อาเกะ บรี บือตูนัง ฌางัน กีลากี แนฮ ซืออูรัก เตอ ฌาดี-จะ เยซู คริด เลอ. 3 ตาปี กู ตาโกจ จะ ซือรูปา บือกะ อูลัยํ กาลา นูตู ญา ตีปู ฮาวา กะฮามี ดัฮ ฌางัน ลาฆู มืออูปัย นะ ญา เตอ ฮาตี นะ กาเญา โปด นะ กือนา ตีปู กะฆีเตอ ฌูฆา บรี ซือซัจ เดะ ลาฆู ตูเฮะ กะ เยซู คริด ฌางัน ฮาตี นู รือมัก นู จรัฮ บาฌิ. 4 ซาเบะ-จะ ดัฮ ซือมียา ดีฮา มาแรฮ มือญาเระ ลาฆู นะ เยซู อาซิก เดะ ลาฆู นู กามี บือเลฮ มือญาเระ ดัฮ เตอ เฮย กาเญา กูวาซา ตาฮัด มือนีงัย กูญา บือเลฮ ซูโงฮ. กาเญา ซูกา-ฮาตี ซาโมจ ซือมืองัจ นู อาซิก ยอม มือนีงัย กะ บรีตา บาฌิ นู อาซิก เดะ ลาฆู นู กาเญา บือเลฮ ซาโมจ เดะ กามี ดัฮ. 5 โกะ ซือมียา อีตู นู กาเญา จะ ฌาดี ปือญูโรฮ นู ซัยํ-บือซัยํ โตระ เตอ กู บรีงัจ จะ กู ฮอย เตด ดือมิ เดะ กูญา แนฮ กิดีกิ โปด ฮอย. 6 มีเซ-จะ กู มือเลา เตด บราปา ปานัย ตาปี กู ตาฮู ลาฆู นู ซูโงฮ. ลาฆู กะฆีเตอ กามี บือเลฮ ปลีฮัจ บรี ซัฮ ดัฮ ราตา มาจับ ราตา ฌือแนฮ บรี กะ ลูมอฮ กาเญา ตาฮู. 7 กู บูวัจ ซาลัฮ เฆอ เดะ ลาฆู นู กู มือนูโนะ-ฮาตี บีดา นะ อาเกะ ฌูโญก กาเญา? กรานา กู บือเลฮ มือญาเระ บรีตา นู บาฌิ นะ ตูฮัด กะ ลูมอฮ กาเญา ฮอย เตด กีรา รือฆา นามา. 8 กะฆีเตอ กู บือเลฮ ซาโมจ บารัก บลาญา เดะ โกะ ลูมอฮ นะ ตูฮัด นู อาซิก. นี เลอ ซือรูปา จะ กู ซามุน กูญา บีดา นะ ตูโลก กาเญา. 9 กาลา กู ดูโดะ ฌางัน ลูมอฮ กาเญา ดักกาดัก ฮอย นามา นะ มากัด เตอ ตาปี กู เตด บือเลฮ ปี บือฆาโดฮ ซือมียา ดีฮา กรานา-จะ โกะ ดีบราดี นู มาแรฮ เดะ นังฆรี มาซิโดเนีย กูญา บือเลฮ ปาฮาฆิ บารัก บรี ฆือนะ บือกะ นู กู บือคานะ เตอ. บือกะ วะตู อีตู กู ตีเมา ฌาดี ซือมียา บือฆาโดฮ กาเญา เตด-จะ ฌาลัด ฮาดีฮา โปด กะฆีเตอ ฌูฆา กู นะ ตีเมา บือฆาโดฮ กาเญา ปี ซือรูโลยํ เลอ. 10 บือกะ ลาฆู ซูโงฮ นะ เยซู คริด อาดา เดะ ฮาตี นะ กู เตอ ฮอย ซือมียา ดีฮา เดะ นังฆรี อาคายา นะ บลารัก ตีเมา บรี กู งันตืองัน เดะ ลาฆู อีนี บือเลฮ. 11 ซาเบะ ลาฆู นามา? ซาเบะ กู เตด ซายัก ลูมอฮ กาเญา เฆอ? โบะ ตูฮัด ตาฮู บาฌิ จะ กู ซายัก กาเญา เลอ. 12 กะฆีเตอ ลาฆู นามา นู กู บูวัจ ดัฮ กู นะ บูวัจ ปูลัก เลอ บีดา ตีเมา บรี โกะ ซือมียา อีตู นะ อาดา จือลัฮ มือเลา งันตืองัน บือเลฮ จะ กูญา บือกรือฌา ซือรูปา บือกะ กามี เลอ. 13 ซาเบะ โกะ ซือมียา กะฆีเตอ บูกัด ฌาดี ปือญูโรฮ นู ซูโงฮ. กูญา ฌาดี ซือมียา บือกรือฌา นู ตีปู มือรูปา ฌาดี ปือญูโรฮ นะ เยซู คริด. 14 ลาฆู ปือบูวัจ กะฆีเตอ ฮอย เตด ปือและ นามา เลอ. เตด-จะ กือปาลา ฮาตู ซีตัด ตะอาซิก โปด ญา บือเลฮ มือรูปา ฌาดี ฮูลู-บาลัก นู บือซายา. 15 กะฆีเตอ ฮอย เตด ฌาดี ลาฆู ปือและ นามา เลอ นู ซือมียา ตูโลก บือกรือฌา นะ ฮาตู ซีตัด นะ มือรูปา ฌาดี ซือมียา ตูโลก บือกรือฌา ลาฆู นู บาฌิ-ตือปัจ. โซะ ปือญูดัฮ เตอ กูญา นะ บือเลฮ ตูโรจ บือกะ ลาฆู ปือบูวัจ นะ กูญา เลอ. 16 กู นะ มือเลา ปูลัก จะ ฌางัน บรี ซือมียา ดีฮา ลีฮัจ จะ กู ฌาดี ซือมียา บูดอ. ตาปี ดัฮ กาเญา ลีฮัจ กะฆีเตอ มีตา บรี ซาโมจ กู ฌาดี ซือมียา บูดอ เลอ บีดา กู นะ บือเลฮ งันตืองัน กิดีกิ ฌูฆา. 17 ลาฆู นู กู มือเลา กะฆีเตอ กู เตด มือเลา ตูโรจ บือกะ นู ตูฮัด ปือซัด ตาปี นู กู มือเลา งันตืองัน กะฆีนี กู มือเลา บือกะ ซือมียา บูดอ. 18 ตาปี อาดา บาญะ อูรัก งันตืองัน บือกะ ลาฆู นะ อูมัจ-ซือมียา. กะฆีเตอ กู โปด นะ งันตืองัน ฌูฆา. 19 กรานา-จะ กาเญา นู อาดา อากัน ซูโงฮ นอ กาเญา ซูกา-ฮาตี ตาฮัด มือนีงัย ซือมียา นู บูดอ เตอ. 20 กรานา-จะ ซือมียา ดีฮา นู นะ บาวา กาเญา ปี ฌาดี ปราโซฮ ซือมียา ดีฮา นะ มากัด อูรัจ นะ กาเญา นะ บาอากัน เดะ กาเญา ซือมียา ดีฮา อาเกะ ญาวา ตะอาซิก บรี ฌาดี บือซัยํ ซือมียา ดีฮา นะ ตาปัยํ มูคา นะ กาเญา เตอ ซือมียา กะฆีเตอ กาเญา ยอม ตาฮัด เลอ. 21 ฮาฌา กู มีตา นอ กู ฆาโดฮ ซาโงะ จะ กามี ลือมัฮ ตือลาลู นู นะ บูวัจ ลาฆู กะฆีเตอ. ตาปี ดัฮ ซือมียา ดีฮา บรานี นะ งันตืองัน เดะ ลาฆู นามา กู โปด บรานี งันตืองัน เดะ ลาฆู อีตู ฌูฆา มีเซ-จะ กู นะ มือเลา บือกะ ซือมียา บูดอ โปด. 22 กูญา ฌาดี ลูมอฮ บักซา ฮีบรู เฆอ? กู โปด ฌาดี. กูญา ฌาดี ซือมียา นู ตูโรจ กะ ฮาดัจ นะ บักซา อิซราเอน เฆอ? กู โปด ฌาดี. กูญา ฌาดี บือแนฮ นะ อับราฮัม เฆอ? กู โปด ฌาดี กะฆีเตอ ฌูฆา เลอ. 23 กูญา ฌาดี ซือมียา บือกรือฌา นะ เยซู คริด เฆอ? กู นี ฌาดี ลือเบฮ เดะ กูญา ปูลัก. ตาปี กู มือเลา ซือรูปา บือกะ ซือมียา ฆีลา เลอ. กู บือกรือฌา โตระ บาญะ ลือเบฮ เดะ กูญา ปูลัก. กู ลือกัจ ปือฌารา บาญะ ลือเบฮ เดะ กูญา กือนา กาเตาะ ลือเบฮ เดะ ซือมียา นะ กีรา บือเลฮ เลอ. กู เตอ ซัจๆ ดาปิก นะ มาตี ดัฮ เลอ. 24 ลูมอฮ ยิว รือเปะ กู ลีมา วะตู ซา วะตู ตีฆา-ปูโลฮ ซือมีลัด กาลี. 25 ลูมอฮ โรม กาเตาะ กู ฌางัน กายู บูลัจ ตีฆา กาลี. อาดา ซือมียา อาเมด บาตู ลีปัยํ กู ซือกาลี. กู กือนา ปราฮู ตาลับ ตีฆา กาลี กู มอ-ลีมอ เดะ อาเย ซืออารี ฌางัน ซือมาลับ เลอ. 26 เดะ ลาฆู บือฌาลัด ปี มาแรฮ ซัจๆ นะ กู เตอ กู ฆาโดฮ บลาวัด ฌางัน ลาฆู นู ดาปิก นะ บรี กู ฌาฮานัม ดัฮ เตด-จะ ฌาฮานัม เดะ ซูงัย ฌาฮานัม กรานา อูรัก ปือญามุน เตอ ฌาฮานัม เดะ ตางัน นะ ลูมอฮ นะ กู นะ ลูมอฮ บักซา อาซิก ฌูฆา เตอ ฌาฮานัม เดะ นังฆรี เดะ ฮูตัด เดะ ลาโวจ โปด ฌาฮานัม กรานา โกะ ดีบราดี ปือจายา นู บูวัจ กือบลากัก ฌูฆา เลอ. 27 กู ฆาโดฮ บือกรือฌา ยู รือมัย ปายัฮ ซูโงฮ ฆาโดฮ บือกรือฌา ฌาฆา มาตา ซัจๆ ฮอย เตด ราซา ตีโนะ ฆาโดฮ ลาปัยํ นาซี ดาฆา อาเย เตอ. บาญะ กาลี กู ฆาโดฮ ตาฮัด บารัก มากัด ตาฮัด บือแฌะ อาดา โกะ กาเยด บาฌู เตด ฆือนะ เลอ. 28 ลือเบฮ เดะ ลาฆู อาซิก เตอ กู ฆาโดฮ-ฮาตี บีลัก อารี บรีงัจ บาญะ กะ โกะ ลูมอฮ นะ ตูฮัด ซือมูฮา. 29 อาดา ซือมียา ดีฮา ลือมัฮ กู โปด ลือมัฮ ฌูฆา. อาดา ซือมียา ดีฮา กือนา บาวา ปี บรี ตือซีปะ บูวัจ ดูซา เตอ กู โปด ซูซัฮ-ฮาตี บรีงัจ กะ ลาฆู นะ กูญา เลอ. 30 ดัฮ กู ฆาโดฮ งันตืองัน กู นะ งันตืองัน เดะ ลาฆู นู บรี ลีฮัจ จะ กู ฌาดี ซือมียา ลือมัฮ. 31 ตูฮัด เดะ อาตัซ นู ฌาดี อาโปก นะ ตูฮัด เยซู เตอ ญา ตาฮู จะ กู ฮอย เตด มืออูปัย. บรี โกะ ซือมียา ปูฌี กะ ญา ซือลาลู เลอ. 32 ฮูลู-บาลัก นะ ราฌา อาเรตัด เดะ นังฆรี ดามัดกัด ญา บรี โกะ ตาฮัน ฌาฆา นังฆรี อีตู บีดา นะ รีฆะ กู. 33 ตาปี อาดา ซือมียา อาเมด ราฆา บือซัยํ บรี กู ดูโดะ เดะ ดาลับ บือตูโรด เดะ ตีกะ โซะ ดีนิง นังฆรี. กะฆีเตอ กู โปด ลือปัซ เดะ ตางัน นะ ฮูลู-บาลัก นะ ราฌา อีตู เลอ.
1 กู ฆาโดฮ นะ งันตืองัน เดะ ลาฆู กะฆีนี มีเซ-จะ ฮอย ซาปา นะ บือเลฮ อูโตก ดีกิ บาญะ โปด. ตาปี กู นะ มือญาเระ ปูลัก ปาซัน ลาฆู นู ตูฮัด บรี กู ลีฮัจ บือฆารี ฌางัน ลาฆู นู ญา ปลีฮัจ กะ กู ดัฮ เตอ. 2 กู บือกราลา ฌางัน ซือมียา นู ปือจายา กะ เยซู คริด ซืออูรัก. กาลา ปัจ-บือลัซ ตาโฮด ดูลู เตอ ญา กือนา ซาโมจ บือปี กะ อาตัซ ลาแงะ นู ตีงี ซูโงฮ เดะ กาวัด ตาปี กู เตด ตาฮู จะ ญา ปี ฌางัน ญาวา เฆอ-จะ ปี ซา ซือมืองัจ. กู โปด ฮอย เตด ตาฮู ตาปี ตูฮัด เดะ อาตัซ ญา เลอ นู ตาฮู. 3 กู ตาฮู จะ ซือมียา อีนี กือนา ซาโมจ ปี กะ อาตัซ ลาแงะ ตาปี เตด ตาฮู จะ ญา ปี ซือกาลี ฌางัน ญาวา เฆอ จะ ปี ซา ซือมืองัจ. ตูฮัด เตอ เลอ ญา ตาฮู. ซือมียา อีตู กือนา ซาโมจ ปี กะ กือโบด นะ ตูฮัด โซะ อาตัซ ลาแงะ เลอ. 4 ตือปัจ อีตู ญา ดืองัยํ ซูวารา นู นะ มือเลา ฌาดี ปือมือเลา เตด บือเลฮ นู อูมัจ-ซือมียา นะ มือเลา โปด ฆาโดฮ บลารัก. 5 ปาซัน ลาฆู นะ ซือมียา อีตู เตอ กู นะ งันตืองัน บือเลฮ. ตาปี ปาซัน ลาฆู ญาวา นะ กู ตะอาซิก กู นะ เตด งันตืองัน เลอ ลือเบฮ เดะ นู นะ งันตืองัน เดะ ลาฆู ลือมัฮ นะ กู ตะอาซิก. 6 มีเซ-จะ กู ซูกา นะ งันตืองัน กู โปด เตด ฌาดี ซือมียา บูดอ ซาเบะ กู มือเลา ลาฆู นู ซูโงฮ. ตาปี กู ตีเมา นะ งันตืองัน เตอ ตาโกจ-จะ ซือมียา ซือตืองัฮ นะ อาเกะ กู บรี ลือเบฮ เดะ ลาฆู นู กูญา ลีฮัจ กูญา ดืองัยํ เดะ กู. 7 ตาปี ตูฮัด ญา ตีเมา บรี กู อาเกะ ญาวา นะ กู ยู ลือเบฮ เดะ ฮาดัจ กรานา ลาฆู ปลีฮัจ นู บาญะ นู กู บือเลฮ ลีฮัจ ดัฮ. กะฆีเตอ ญา บือเลฮ บูวัจ บรี อาดา ซือรูปา ดูรี บือซัยํ ลือกัจ เดะ ญาวา นะ กู. ดูรี อีตู เตอ ฌาดี ซือรูปา ฮูลู-บาลัก นะ กือปาลา ฮาตู ซีตัด นู นะ กาเตาะ กู ซือรูโลยํ บีดา ตีเมา บรี กู นะ อาเกะ ญาวา งันตืองัน ยู ลือเบฮ เดะ ฮาดัจ. 8 ลาฆู ดูรี อีตู เตอ กู บือเลฮ บือซาโวจ มีตา กือมัซๆ เดะ ตูฮัด ตีฆา กาลี ดัฮ บีดา บรี ดูรี อีตู ตรือเบะ เดะ ญาวา นะ กู เลอ. 9 ตาปี ตูฮัด บือเลฮ ตีกัฮ กะ กู จะ "ลาฆู นู กู ฮาลัย บรี ซือลามัจ กะ เกา โปด ฆือนะ บาฌิ ดัฮ เลอ. ซาเบะ-จะ กาลา เกา ลือมัฮ วะตู ดีฮา ลาฆู ปือมือฆัฮ นะ กู นะ มือฆัฮ ปือนอฮ บาฌิ ดัฮ วะตู อีตู เลอ." ซาเบะ กะฆีเตอ กู ซูกา-ฮาตี นะ งันตืองัน บือตามัฮ บรี บาญะ เดะ ลาฆู นู กู ลือมัฮ เตอ บีดา นู ปือมือฆัฮ นะ เยซู คริด นะ มาแรฮ ดูโดะ เดะ กู ปือนอฮ เลอ. 10 ซาเบะ กะฆีเตอ กรานา ลีฮัจ กะ เยซู คริด กู ซือนัง-ฮาตี เดะ วะตู นู กู ลือมัฮ วะตู กู กือนา บูวัจ ตะอารัฮ วะตู กู ซูซัฮ ปายัฮ โตระ เตอ เดะ วะตู นู กือนา ปรือกัด เดะ วะตู นู กือนา ฮาเปะ โปด กรานา-จะ ดัฮ กู ลือมัฮ วะตู ดีฮา กู โปด นะ ตือฆัยํ-อูรัจ โตระ เดะ วะตู อีตู เลอ. 11 กู มือเลา ซือรูปา ซือมียา บูดอ เลอ ตาปี กาเญา โปด ปรือกัด กู บรี ฌาดี กะฆีเตอ. กรานา-จะ กาเญา บือฆูนา นะ มือโอจ กะ กู นี เลอ ซาเบะ กู ฮอย เตด ดือมิ เดะ โกะ ปือญูโรฮ นู ซัยํ-บือซัยํ อีตู เลอ มีเซ กาเญา ลีฮัจ จะ กู ฮอย ลาฆู บาฌิ นามา โปด. 12 โกะ ปือนานา นู บรี ลีฮัจ จะ กู ฌาดี ปือญูโรฮ นะ ตูฮัด ซูโงฮๆ เตอ กู บือเลฮ บูวัจ เดะ ตืองัฮ ลูมอฮ กาเญา บือกะ นู กู ตาฮัด-ฮาตี ลามา บูวัจ โกะ ปือนานา ซีดี นู มือฆัฮ นู ปือและ ซูโงฮ. 13 ลาฆู นามา เลอ นู กู บือเลฮ บูวัจ บรี กะ โกะ ลูมอฮ นะ ตูฮัด นู อาซิกๆ ตาปี กู เตด บือเลฮ บูวัจ บรี กะ ลูมอฮ กาเญา? ลือเบฮ ซา ลาฆู อีนี เตอ ฌาดี-จะ กู นี เตด บือเลฮ บือฆาโดฮ ลูมอฮ กาเญา ปาซัน ดูเวะ บลาญา นะ กู. ฮาฌา กู มีตา เลอ อาเกะ ลาฆู ซาลัฮ อีนี บรี กะ กู นอ. 14 นี เลอ กู ซียะ ดัฮ นู นะ มาแรฮ ฌือเงาะ ลีฮัจ กาเญา มาโซะ กะ ตีฆา กาลี ดัฮ. ตาปี กู นะ เตด บือฆาโดฮ ลูมอฮ กาเญา ลาลู ซาเบะ-จะ ลาฆู นู กู มาแรฮ มียา เตอ บูกัด ดูเวะ นะ กาเญา ตาปี อีซี ญาวา นะ กาเญา เลอ. ซาเบะ-จะ นู นานะ นะ ปือมุน บีดา ปะ มะ โปด เตด บือฆูนา ตาปี ปะ มะ เลอ นู บือฆูนา นะ ปือมุน บรี กะ นานะ. 15 กู ซูกา-ฮาตี นะ ซรัฮ บารัก ซือมูฮา ฌางัน ญาวา นะ กู ฌูฆา บีดา กาเญา. นู กู ซายัก กาเญา บาญะ ซือรูโลยํ เตอ กาเญา นะ ซายัก กู กิดีกิ เฆอ? 16 กะฮามี โปด กาเญา ฆาโดฮ ซาโงะ จะ กู ตะอาซิก เตอ ฮอย เตด บือเลฮ บือฆาโดฮ ลูมอฮ กาเญา เลอ. ตาปี ซือตืองัฮ มือเลา จะ กู บาอากัน ซูโงฮ ตีปู กาเญา บีดา นะ รีฆะ. 17 เดะ ลาฆู นู กู ซูโรฮ กูญา อีตู ปี ฌือเงาะ ลีฮัจ กาเญา เตอ กู กีจอฮ นามา เดะ ลูมอฮ กาเญา เฆอ? 18 กู มีตา ทีตัด กือมัซๆ บรี ญา ปี มียา กาเญา ซูโรฮ ดีบราดี นู อีตู ปี ซามา. ทีตัด ญา บือเลฮ กีจอฮ นามา เดะ กาเญา ซือตืองัฮ เฆอ? โงฮ-ซูโงฮ กามี ดูวา อูรัก เตอ อาดา ฮาตี นะ บือกรือฌา ซา อีตู ตูโรจ ซา ฌาลัด อีตู เลอ. 19 กาเญา อาดา บรีงัจ เดะ ฮาตี ลาฆี จะ กามี บือปูลัซ ญาวา ตะอาซิก ฌางัน กาเญา เฆอ? เตด โบะ. กามี มือเลา บือกะ นู เยซู คริด ญา บรี กะ กามี มือเลา โซะ ฮึลด มูคา นะ ตูฮัด เดะ อาตัซ เลอ. กาเญา ซือมียา นู กู ซายัก เออ ราตา ฌือแนฮ นู กามี บือเลฮ บูวัจ เตอ กามี บูวัจ บีดา นะ ตูโลก บรี กาเญา ปือจายา กือฌะ-กือมัซ เลอ. 20 กรานา กู บรีงัจ ตาโกจ จะ ตานา กู มาแรฮ รอจ กะ นังฆรี โกริน กู นะ ดาปัจ กาเญา อาซิก เดะ นู กู บือคานะ นะ บรี ฌาดี. กาเญา โปด นะ ลีฮัจ กู อาซิก เดะ ลาฆู นู กาเญา บือคานะ นะ บรี กู ฌาดี. ตาโกจ-จะ นะ ดาปัจ กาเญา อาดา บือตือฆัฮ บือซามา-ซามา บือดือกี-ดือกี บือมูซัยํ-มูซัยํ ซูกา นะ ฌาดี บือซัยํ เดะ กาวัด มือเลา มืออูปัจ กะ กาวัด อาดา บือบีซิ มือเลา มืออูปัย นู งันตืองัน มือโอจ กะ ญาวา ตะอาซิก นู ซูกา บูวัจ ลาฆู จาเจา แจะ-บีแระ. 21 กู บรีงัจ ตาโกจ จะ กาลา กู นะ มาแรฮ มียา กาเญา ตูฮัด นะ กู นะ บูวัจ บรี กู จือและ ปูลัก โซะ ฮึลด มูคา นะ กาเญา. กะฆีเตอ กู นะ ฆาโดฮ มือนาแงฮ ซูซัฮ-ฮาตี กรานา โกะ ซือมียา บาญะ นู บูวัจ ดูซา กาลา ดูลู ดัฮ นู เตด บือเลฮ บราเลฮ-ฮาตี เดะ โกะ ลาฆู ตะอารัฮ ลาฆู บือกาเซฮ ลาฆู เตด บือฆูนา นู กูญา บูวัจ ดัฮ.
1 อีนี มาโซะ กะ ตีฆา กาลี ดัฮ เลอ นู กู นะ มาแรฮ ฌือเงาะ ลีฮัจ ลูมอฮ กาเญา. บือกะ นู ซูรัจ ปือมือเลา นะ ตูฮัด จะ "ลาฆู นะ ตูโดฮ แนฮ-ฌือแนฮ ฆาโดฮ นะ อาดา ซะซี ดูวา ตีฆา อูรัก นู นะ ฌาดี ลาฆู ปือจายา บือเลฮ เลอ." 2 กาลา กู มาแรฮ ฌือเงาะ ลีฮัจ กาเญา มาโซะ กะ ดูวา กาลี อีตู กู บือเลฮ ปรีงัจ กะ กาเญา นู ดือละ บูวัจ ดูซา เตอ ฌางัน โกะ ซือมียา อาซิก ฌูฆา. บือกะ กู บือเลฮ มือเลา กาลา อีตู วะตู อีนี นู กู ดูโดะ ฌาโวฮ เดะ กาเญา นะ มือเลา กะฆีเตอ ปูลัก ปรีงัจ กะ กาเญา จะ กาลา อารี อีตู นู กู นะ มาแรฮ ปูลัก เตอ นะ ฮอย ซือมียา ดีฮา นะ ลือปัซ เดะ ฮูโกบ เลอ. 3 กะฆีเตอ เลอ กาเญา นะ บือเลฮ ลีฮัจ บรี ซัฮ บือกะ นู กาเญา บือคานะ ดัฮ จะ เยซู คริด ญา ซูโรฮ กู มือเลา กะฆีนี. กาลา เยซู ญา อูจะ กะ กาเญา ญา ฮอย เตด ลือมัฮ เลอ ตาปี ญา ตือฆัยํ-อูรัจ มือฆัฮ ซูโงฮ เดะ ตืองัฮ ลูมอฮ กาเญา. 4 ซาเบะ-จะ เยซู กือนา กาจิก เดะ กายู ปลีตัก ดัฮ เดะ ลาฆู ลือมัฮ นะ ญาวา ญา เตอ. ตาปี ญา โปด อาดา ฮีโดะ ลาฆี กรานา นู ปือมือฆัฮ นะ ตูฮัด เดะ อาตัซ เลอ. นู กามี ลือกัจ บือซามา ฌางัน เยซู คริด กามี โปด ลือมัฮ ฌูฆา. ตาปี นู กามี มาแรฮ บือกรือฌา ฌางัน กาเญา กามี นะ อาดา ฮีโดะ บือซามา ฌางัน เยซู กรานา ปือมือฆัฮ นะ ตูฮัด เดะ อาตัซ เลอ. 5 กาเญา กือนา บือฮีมัจ ลีฮัจ เดะ ฮาตี นะ กาเญา ตะอาซิก จะ กาเญา อาดา ปือจายา กะ ตูฮัด กือฌะ-กือมัซ เฆอ เตด. กาเญา กือนา มือญาซัจ ฮาตี ตะอาซิก เลอ. กาเญา เตด ตาฮู เฆอ จะ เยซู คริด อาดา ดูโดะ เดะ กาเญา? ดัฮ เตด ตาฮู กะฆีเตอ ตาโกจ-จะ กาเญา อาลัฮ เดะ ลาฆู มือญาซัจ ซีงี เลอ. 6 กู จาดัก จะ กาเญา นะ ตาฮู จะ กามี อีนี เลอ เตด ฌาดี ซือมียา นู อาลัฮ เดะ ลาฆู มือญาซัจ ดัฮ. 7 กามี บือซาโวจ มีตา เดะ ตูฮัด บีดา กาเญา ตีเมา บรี กาเญา บูวัจ ซาลัฮ มานามา โปด บูกัด นะ บรี ลีฮัจ บือฆารี จะ กามี ฌือนัฮ เดะ ลาฆู มือญาซัจ ตาปี บีดา บรี กาเญา นะ บือเลฮ บูวัจ ปือบูวัจ นู กือนา เดะ ฮาตี นะ ตูฮัด เลอ มีเซ ฆามะ ลีฮัจ ซือรูปา จะ กามี ตะอาซิก อาลัฮ ดัฮ. 8 ซาเบะ-จะ กามี นะ บูวัจ นามา นู ซาลัฮ เดะ ลาฆู นู ซูโงฮ เตด บือเลฮ. ตาปี นะ บูวัจ บือเลฮ เตอ บีดา นะ ตูโรจ กะ ลาฆู นู ซูโงฮ ซา อีตู เลอ. 9 กาลา กามี ลือมัฮ ตาปี กาเญา ตือฆัยํ-อูรัจ กามี โปด ซูกา-ฮาตี เลอ. กามี บือซาโวจ มีตา ลาฆู อีนี ฌูฆา จะ มีตา บรี กาเญา นะ บาฌิ ปาเระ ปูลัก ฌางัน ตูฮัด. 10 กู ฆาแรฮ ลาฆู อีนี กาลา กู เตด ดูโดะ ฌางัน กาเญา บีดา-จะ ตานา กู มาแรฮ รอจ กะ กาเญา กู นะ เตด ฆาโดฮ ปรือกัด กาเญา ฌางัน ลาฆู มือฆัฮ นู ตูฮัด บือเลฮ บรี กะ กู. ลาฆู มือฆัฮ อีตู ญา บรี กะ กู ดัฮ บีดา กู นะ ตูโลก กาเญา บรี ปือจายา กือฌะ-กือมัซ บูกัด บีดา นะ บูวัจ บรี กาเญา ฌาฮานัม. 11 โกะ ดีบราดี เออ เดะ โซะ ปือญูดัฮ อีนี บรี กาเญา ซูกา-ฮาตี เลอ. กาเญา กือนา บูวัจ ญาวา ตะอาซิก บรี บาฌิ ปาเระ กือนา มือนีงัย กะ ปือมือเลา ปูโฌะ นะ กู กือนา อาดา ซา ฮาตี บือซามา-ซามา กือนา ดูโดะ บรี ซือนัง-ฮาตี บือซามา เลอ. ตูฮัด เดะ อาตัซ นู ซายัก ซูโงฮ นู บรี กีตา ดูโดะ ซือนัง ซือลามัจ เตอ ญา นะ อาดา ดูโดะ ฌางัน กาเญา เลอ. 12 กือนา ปาคัจ บือฌาบัจ ตางัน บือซามา ตูโรจ กะ ฮาดัจ โกะ ซือมียา นะ ตูฮัด. 13 โกะ ซือมียา นะ ตูฮัด ซือมูฮา กูญา กีเรบ บรีงัจ กะ กาเญา. 14 มีตา บรี ตูฮัด เยซู คริด นะ ฮาลัย บรี ซือลามัจ กะ กาเญา ซือมูฮา มีตา บรี ตูฮัด เดะ อาตัซ นะ ซายัก กะ กาเญา ซือมูฮา มีตา บรี ซือมืองัจ นะ ตูฮัด นะ ตูโลก กาเญา ซือมูฮา บรี ปาคัจ บรามัย บือซามา บาฌิ เลอ.
1 กู เปาโล นู ฌาดี ปือญูโรฮ นะ ตูฮัด เตอ บูกัด ปือญูโรฮ นู โกะ ซือมียา ตืองะ ดัฮ นู ซือมียา ซืออูรัก ซูโรฮ ดัฮ เตอ ตาปี เยซู คริด ฌางัน ตูฮัด นู อาโปก เลอ ญา ตืองะ กู ดัฮ. ตูฮัด นู อาโปก อีตู เลอ นู บูวัจ บรี เยซู ฮีโดะ ปาเระ เดะ มาตี ดัฮ. 2 กู ฌางัน ลูมอฮ อาดี-บราดี นู อาดา บือซามา ฌางัน กู เตอ กามี ฆาแรฮ ซูรัจ อีนี กีเรบ กะ โกะ ลูมอฮ นะ ตูฮัด นู อาดา เดะ โซะ นังฆรี ฆาลาเตีย. 3 มีตา เดะ ตูฮัด นู อาโปก เดะ อาตัซ ฌางัน เยซู คริด ตูฮัด นะ กีตา นะ บรี ซือลามัจ กะ กาเญา นะ บรี กาเญา ดูโดะ ซือนัง ซือลามัจ เลอ. 4 เยซู คริด เตอ ญา ซรัฮ ญาวา นะ ญา ตะอาซิก กรานา ดูซา นะ กีตา บีดา นะ ตูโลก กีตา บรี ลือปัซ เดะ ฮาดัจ นู ฌาฮัจ นะ กาลา อีนี. ญา บูวัจ กะฆีเตอ เลอ ตูโรจ ลาฆู นู ตูฮัด อาโปก นะ กีตา บือคานะ ดัฮ. 5 ตูฮัด เลอ ญา บือซรี ซูโงฮ ซือมาญัก-รอจ ซือลาลู. อาเมน. 6 กู ปือและ-ฮาตี ซูโงฮ นู ลูมอฮ กาเญา ปาคัจ ตีงัน ตูฮัด งัจบางัจ กะฆีนี. ตูฮัด เลอ นู ปาเงน กาเญา ดัฮ ซาเบะ เยซู คริด นู ตือจีฮัด บาฌิ กะ กาเญา. ตาปี กาเญา อูโนยํ ปี ซารี บรีตา บาฌิ นู อาซิก ดัฮ. 7 ตาปี ฮอย บรีตา บาฌิ นู อาซิก เลอ. ตาปี อาดา ซือมียา ซือตืองัฮ นู บูวัจ บรี กาเญา ฆาโดฮ-ฮาตี เตอ. กูญา อีงัจ นะ อาเลฮ บรีตา นู บาฌิ ปาซัน เยซู คริด บรี ฌาดี ลาฆู อาซิก เลอ. 8 ตาปี มีเซ-จะ กามี เตอ ฮูลู-บาลัก นู มาแรฮ เดะ โซะ อาตัซ ลาแงะ โปด นะ มาแรฮ มือญาเระ บรีตา นู บาฌิ กะ กาเญา เตอ นู อาซิก เดะ บรีตา บาฌิ อีตู นู กามี มือญาเระ กะ กาเญา ดัฮ บรี ซือมียา อีตู กือนา ซูปัฮ อาโบยํ เลอ. 9 ซือรูปา กามี บือเลฮ มือญาเระ ดูลู ดัฮ เดะ วะตู อีนี เลอ กามี มือเลา ปูลัก จะ กะ ซือมียา ดีฮา มาแรฮ มือญาเระ กะ กาเญา บรีตา นู บาฌิ นู อาซิก เดะ ลาฆู นู กาเญา บือเลฮ ซาโมจ ดัฮ เตอ บรี ซือมียา อีตู กือนา ซูปัฮ อาโบยํ เลอ. 10 กรานา นู กู มือเลา ซีงี เตอ กู มือเลา บรี อาเมด ฮาตี นะ โกะ ซือมียา เฆอ? เฆอ-จะ บรี อาเมด ฮาตี นะ ตูฮัด เดะ อาตัซ เฆอ? กู อีงัจ นะ บูวัจ บรี โกะ ซือมียา ซูกา-ฮาตี เฆอ? ฮอย เลอ. กะ กู อีงัจ นะ บูวัจ กะฆีเตอ ลาฆี กู เตด ฌาดี ปราโซฮ นะ เยซู คริด เลอ. 11 อาดี-บราดี เออ กู ซูกา มือญาเระ บรี กะ กาเญา ตาฮู จะ บรีตา นู บาฌิ นู กู บีตาฮู กะ กาเญา ดัฮ เตอ เตด ฌาดี ลาฆู นะ โกะ ซือมียา เลอ. 12 กรานา กู เตด ซาโมจ บรีตา บาฌิ อีตู เดะ โกะ ซือมียา ดีฮา โปด. ฮอย ซาปา นู อาฌัยํ กู ดัฮ ตาปี เยซู คริด เลอ ญา ปลีฮัจ กะ กู ดัฮ. 13 กรานา กาเญา ดืองัยํ ดัฮ ลาฆู นะ กู กาลา ดูลู เตอ วะตู กู ตูเฮะ กะ ฮาดัจ บักซา ยิว ดัฮ. กาลา อีตู กู ปรือกัด ลูมอฮ นะ ตูฮัด เดะ อาตัซ บาญะ โตระ ดัฮ. กู อีงัจ นะ บูวัจ บรี ลูมอฮ อีตู นะ ฮาบิฮ บูวัก ดัฮ. 14 กาลา อีตู เลอ กู ตูเฮะ โตระ กะ ฮาดัจ บักซา ยิว ลือเบฮ เดะ กาวัด นู อูมอยํ ซามา บายา ฌางัน กู เดะ บักซา นะ กู. กู อาดา ฮาตี ตูเฮะ ซูโงฮ เลอ กะ ฮาดัจ นู ตูโรด-มือนูโรด มาแรฮ เดะ บือแนฮ นะ กู. 15 ตาปี ตะเดะ กู อาดา เดะ โปรจ นะ มะ เดะ กู ตูฮัด เดะ อาตัซ ญา ปีเลฮ กู ดัฮ. ญา ฮาลัย บรี ซือลามัจ กะ กู กะฆีเตอ ญา ปาเงน กู ดัฮ. 16 ญา ซูกา ปลีฮัจ นานะ นะ ญา กะ กู บีดา กู นะ มือญาเระ บรีตา นู บาฌิ นะ ญา กะ โกะ ลูมอฮ ซือมียา บักซา อาซิก. ดัดดัด อีตู กู เตด ปี บือกีรา ลาฆู อีตู ฌางัน ซือมียา ดีฮา ดัฮ. 17 กู เตด ปี กะ นังฆรี เยรูซาเลม บีดา นะ ดาปัจ โกะ ซือมียา นู ฌาดี ปือญูโรฮ นะ ตูฮัด ดูลู เดะ กู. ตาปี กู ปี กะ นังฆรี อาระเบีย ดัฮ. เดะ บลากัก กู บาลิ ปี กะ นังฆรี ดามัดกัด ปูลัก เลอ. 18 ลือปัซ ตีฆา ตาโฮด กะ บลากัก กู บือฌาลัด ญาแญะ ปี กะ นังฆรี เยรูซาเลม ดัฮ บีดา นะ ดาปัจ เปโตร. กู ดูโดะ มือนูปัก ฌางัน ญา เปะ อีตู ลีมา-บือลัซ อารี ดัฮ. 19 ตาปี กู เตด ดาปัจ โกะ ปือญูโรฮ อาซิก เลอ ดาปัจ ซา ยากอบ นู ฌาดี อาดี เดะ ตูฮัด เยซู. 20 ตูฮัด เดะ อาตัซ ฌาดี ซะซี นู กู เตด มืออูปัย เดะ ลาฆู นู กู ฆาแรฮ กะ กาเญา อีนี เลอ. 21 เดะ บลากัก กู บือฌาลัด ปี กะ โซะ นังฆรี ซีเรีย โซะ นังฆรี ซิลีเซีย ฌูฆา. 22 โกะ ลูมอฮ นะ ตูฮัด เยซู คริด เดะ โซะ นังฆรี ยูเดีย กูญา เตด กราลา กู ลาฆี เลอ. 23 ตาปี กูญา อีตู ดืองัยํ ซา ลาฆู อีนี จะ "ซือมียา อีตู นู ดูลู ปรือกัด กีตา ดัฮ กาลา อีนี ญา ปี มือญาเระ ลาฆู นู กีตา ปือจายา ฌาดี ลาฆู นู ดูลู ญา อีงัจ นะ บูวัจ บรี ฮาบิฮ ดัฮ." 24 กะฆีเตอ ลูมอฮ กูญา มือโอจ กะ ตูฮัด เดะ อาตัซ ซาเบะ ลาฆู นะ กู เลอ.
1 เดะ บลากัก ลือปัซ ปัจ-บือลัซ ตาโฮด ดัฮ กู ฌางัน บานาบัด บือเลฮ บือฌาลัด ปี กะ นังฆรี เยรูซาเลม ปูลัก บาวา ทีตัด บือปี ซามา. 2 ตาปี กู ปี ดัฮ ตูโรจ ลาฆู นู ตูฮัด ปลีฮัจ กะ กู ดัฮ. กู ปี มือเลา ฌางัน กูญา ฌาดี-จะ ฌางัน ซา ลูมอฮ ซือมียา นู บือซัยํ เตอ กู บีตาฮู บรี ซือลือซัย ปาซัน บรีตา บาฌิ นู กู มือญาเระ กะ ลูมอฮ ซือมียา บักซา อาซิก นะ บรี ลีฮัจ จะ นู กู บือเลฮ บือลูมา บลารี เตอ บูกัด บลารี เตด บือเลฮ นามา เลอ. 3 ตาปี มีเซ ทีตัด โปด นู อาดา บือซามา ฌางัน กู เตอ นู ฌาดี ซือมียา บักซา อาซิก เตอ ตาปี กูญา เตด บือเลฮ ปรือกัด ญา บรี ซาโมจ ลาฆู กรัจ. 4 นู ฌาดี กะฆีเตอ ซาเบะ ลูมอฮ อาดี-บราดี มืออูปัย ซือตืองัฮ กูญา จูรี มาโซะ ดัฮ อีงัจ นะ มือโซะ ลีฮัจ ลาฆู นู กามี บือเลฮ ลือปัซ ดัฮ ซาเบะ กามี ปือจายา กะ เยซู คริด ดัฮ. กูญา อีงัจ นะ บาวา กามี บือปี ฌาดี ปราโซฮ ปูลัก เลอ. 5 ตาปี กามี ตีเมา ตูโรจ ลาฆู นะ กูญา อีตู. มีเซ-จะ ซือฌูรุซ โปด กามี ตีเมา นะ ตูโรจ กะ กูญา ลาลู. กามี บูวัจ กะฆีนี นะ บรี บรีตา บาฌิ นู ซูโงฮ ดูโดะ กือฌะ-กือมัซ ฌางัน กาเญา ซือลาลู. 6 ตาปี ลูมอฮ ซือมียา ซีงี เตอ นู กูญา อีงัจ ฌาดี ซือมียา บือซัยํ เตอ (นู กูญา ฌาดี ซือมียา มาจับ นามา ดูลู กู เตด ปือดูลี. ตูฮัด เตด ลีฮัจ กะ มูคา ซือมียา ดีฮา โปด). โกะ ลูมอฮ อีตู เตอ กูญา เตด บือเลฮ อาฌัยํ บือตามัฮ ลาฆู นามา โปด กะ กู. 7 บูกัด กะฆีเตอ เลอ ตาปี กูญา ลีฮัจ จะ ตูฮัด บือเลฮ กีเรบ กะ กู บรี กู นะ มือญาเระ บรีตา บาฌิ นะ ตูฮัด กะ ลูมอฮ ซือมียา บักซา อาซิก นู เตด ซาโมจ ลาฆู กรัจ ดัฮ. กะฆีเตอ ฌูฆา ตูฮัด บือเลฮ กีเรบ กะ เปโตร บรี ญา นะ มือญาเระ บรีตา บาฌิ อีตู กะ ลูมอฮ ซือมียา บักซา ยิว นู ซาโมจ ลาฆู กรัจ ดัฮ. 8 กรานา ตูฮัด เดะ อาตัซ นู บือกรือฌา บูวัจ บรี เปโตร ฌาดี ปือญูโรฮ กะ ลูมอฮ ซือมียา บักซา ยิว เตอ ญา เลอ นู บือกรือฌา บูวัจ บรี กู ฌาดี ปือญูโรฮ กะ ลูมอฮ ซือมียา บักซา อาซิก กะฆีเตอ ฌูฆา เลอ. 9 กะฆีเตอ ยากอบ เปโตร ฌางัน โยฮัน ตีฆา อูรัก อีตู นู โกะ ซือมียา อีงัจ จะ ฌาดี ซือรูปา จาวัก ดัฮ เตอ กูญา อีตู เลอ ลีฮัจ จะ ตูฮัด บือเลฮ กีเรบ บรี กะ กู บูวัจ กรือฌา นู บาฌิ อีนี เลอ. กะฆีเตอ กูญา อีตู บือฌาบัจ ตางัน ฌางัน กู ฌางัน บานาบัด ฌาดี ปือนานา จะ กามี ฌาดี ซือมียา บือกรือฌา บือซามา ฌางัน กูญา. กูญา ซาโงะ จะ กามี นะ ปี กะ ลูมอฮ ซือมียา บักซา อาซิกๆ ตาปี กูญา นะ ปี กะ ลูมอฮ ซือมียา บักซา ยิว. 10 ตาปี กูญา มีตา ซา ลาฆู นู จะ ฌางัน บรี กีตา ลูปา ลูมอฮ อูรัก ฮาฌะ. กู ฌูฆา อาดา ฮาตี นะ บูวัจ กะฆีเตอ. 11 ตาปี กาลา เปโตร มาแรฮ รอจ กะ นังฆรี อันตีโยก ดัฮ กู ตีกัฮ บลาวัด ฌางัน ญา โซะ ฮึลด มูคา นะ ญา กรานา ญา บูวัจ ซาลัฮ ดัฮ. 12 ดูลู ญา มากัด บือซามา ฌางัน ลูมอฮ ซือมียา บักซา อาซิก. ตาปี กาลา อาดา ซือมียา ซือตืองัฮ มาแรฮ เดะ ยากอบ ดัฮ ญา อูโนยํ มืองือละ เดะ กูญา ตีเมา มากัด บือซามา ฌางัน กูญา กะฆีเตอ ซาเบะ ญา ตาโกจ เดะ โกะ ลูมอฮ ซือมียา นู ตูเฮะ กะ ลาฆู กรัจ. 13 กะฆีเตอ ลูมอฮ ดีบราดี บักซา ยิว ฆีลาฆี เตอ กูญา ฮาตี เตด ตือปัจ บูวัจ ตูโรจ กะ เปโตร บือซามา. มีเซ บานาบัด โปด ญา กือนา บาวา บือปี บูวัจ ตูโรจ กะฆีเตอ ฌูฆา. 14 กาลา กู ลีฮัจ จะ กูญา เตด ตูโรจ รือมัก ฌางัน บรีตา บาฌิ นู ซูโงฮ กู โปด มือเลา กะ เปโตร โซะ ฮึลด มูคา นะ กูญา ซือมูฮา มือเลา จะ "มีเซ-จะ เกา ฌาดี ซือมียา บักซา ยิว ตาปี เกา เตด ตูโรจ รือมัก ฌางัน ฮาดัจ บักซา ยิว ดัฮ ตาปี เกา ปี ตูโรจ ฮาดัจ ซือมียา บักซา อาซิก. กะฆีเตอ เลอ บูวัจ นามา ปะ เกา ปรือกัด ลูมอฮ ซือมียา บักซา อาซิก บรี กูญา ตูโรจ ฮาดัจ บักซา ยิว?" 15 กามี นี นู ฌาดี ซือมียา บือแนฮ บักซา ยิว เตอ นู เตด ฌาดี ซือมียา บักซา อาซิก นู บือดูซา 16 กามี ตาฮู จะ ซือมียา ดีฮา โปด เตด ฌาดี บาฌิ-ตือปัจ ฌางัน ตูฮัด ซาเบะ บูวัจ ตูโรจ กะ โกะ ปือมือเลา ฮูโกบ เตอ ตาปี ซาเบะ ญา ปือจายา กะ เยซู คริด เลอ. กะฆีเตอ กามี อีนี เลอ บือเลฮ ปือจายา กะ เยซู คริด ดัฮ บีดา กามี นะ ฌาดี บาฌิ-ตือปัจ ฌางัน ตูฮัด ซาเบะ ปือจายา กะ ญา ดัฮ บูกัด ซาเบะ บูวัจ ตูโรจ กะ โกะ ปือมือเลา ฮูโกบ. กรานา ฮอย ซือมียา ซืออูรัก เลอ นู นะ ฌาดี บาฌิ-ตือปัจ ซาเบะ บูวัจ ตูโรจ กะ โกะ ปือมือเลา ฮูโกบ. 17 ตาปี นู กามี กูวาซา นะ ฌาดี บาฌิ-ตือปัจ ซาเบะ มาโซะ บือซามา ฌางัน เยซู คริด เตอ ฌาดี ซือรูปา กามี ฌูฆา ฌาดี ซือมียา บือดูซา ดัฮ. กะฆีเตอ เยซู คริด อาโจบ กามี บรี บูวัจ ดูซา เฆอ? บูกัด. ฮอย เตด ฌาดี กะฆีเตอ เลอ. 18 ซาเบะ-จะ กะ กู นะ อาเกะ ปูลัก ลาฆู บูวัจ ตูโรจ โกะ ปือมือเลา ฮูโกบ นู กู ปรูโตฮ ดัฮ เตอ กู บูวัจ บรี ลีฮัจ ญาวา ตะอาซิก ฌาดี ซือมียา บูวัจ ซาลัฮ ปือมือเลา ฮูโกบ อีตู เลอ. 19 ซาเบะ-จะ ปือมือเลา ฮูโกบ อีตู บูวัจ บรี กู นี ซือรูปา มาตี ดัฮ. กะฆีเตอ ปือมือเลา ฮูโกบ นะ ฮูโกบ กู ลาฆี เตด บือเลฮ ดัฮ. ฌาดี กะฆีเตอ บีดา กู นะ ฮีโดะ กรานา ตูฮัด เดะ อาตัซ เลอ. 20 กู กือนา กาจิก บือซามา ฌางัน เยซู คริด ดัฮ. บูกัด กู ตะอาซิก นู อาดา ฮีโดะ ลาฆี เตอ ตาปี เยซู คริด เลอ นู อาดา ฮีโดะ เดะ ฮาตี นะ กู. นู กู อาดา ฮีโดะ เดะ ญาวา นะ กู วะตู อีนี เตอ กู อาดา ฮีโดะ ซาเบะ กู ปือจายา กะ นานะ นะ ตูฮัด เลอ. ญา เลอ ซายัก กู ซรัฮ ญาวา ตะอาซิก กรานา กู เลอ. 21 นู ตูฮัด ฮาลัย บรี ซือลามัจ กะ กู เตอ กู เตด กีปัซ บูวัก เลอ. กรานา กาเลา-จะ กีตา ฌาดี บาฌิ-ตือปัจ ฌางัน ตูฮัด ซาเบะ ตูโรจ ปือมือเลา ฮูโกบ เตอ นู เยซู คริด มาตี ดัฮ ฮอย เตด ฌาดี นามา เลอ.
1 โอ ลูมอฮ ซือมียา ฆาลาเตีย นู บูดอ เออ ซาปา เลอ นู ตูโดก มาตา ฮาตี นะ กาเญา บรี กาเญา ลีฮัจ ซาลัฮ ดัฮ? ลาฆู นู เยซู คริด กือนา กาจิก เดะ กายู ปลีตัก ปลีฮัจ ซัฮ ดัฮ เลอ เดะ ฮึลด มาตา นะ กาเญา. 2 กะฆีเตอ กู นะ ตาญา กาเญา ปาซัน ซา ลาฆู อีนี เตอ นู กาเญา บือเลฮ ซาโมจ ซือมืองัจ นะ ตูฮัด ดัฮ ฌาดี ซาเบะ ลาฆู นามา? ซาเบะ กาเญา ตูโรจ กะ ปือมือเลา ฮูโกบ เฆอ? ซาเบะ กาเญา มือนีงัย ปือจายา ดัฮ เฆอ? 3 บูวัจ นามา ปะ กาเญา บูดอ กะฆีนี? ลามูลา กาเญา มาโซะ ดัฮ ตูโรจ นู ซือมืองัจ นะ ตูฮัด บาวา กาเญา บือปี เตอ. ตาปี วะตู อีนี กาเญา อีงัจ นะ ตูโรจ กะ ญาวา ตะอาซิก บีดา นะ ซุจ ฮาบิฮ ดัฮ. 4 นู กาเญา ดาปัจ ลาฆู บาฌิ ลาฆู ฌาฮัจ บาญะ มาจับ เตอ เตด ฌาดี นามา เฆอ? ซูโงฮ บูกัด กะฆีเตอ เลอ. 5 นู ตูฮัด เดะ อาตัซ ญา ฮาลัย บรี ซือมืองัจ นะ ญา กะ กาเญา เตอ นู ญา ปลีฮัจ ลาฆู มือฆัฮ เดะ ตืองัฮ กาเญา ฌาดี ซาเบะ ลาฆู นามา? ซาเบะ กาเญา ตูโรจ กะ ปือมือเลา ฮูโกบ นะ ญา เฆอ? ซาเบะ กาเญา มือนีงัย ปือจายา กะ ญา เฆอ? 6 กะฆีเตอ ฌูฆา ลาฆู นะ อับราฮัม เตอ เดะ ซูรัจ นู จะ "ญา ปือจายา กะ ตูฮัด ดัฮ. กะฆีเตอ ตูฮัด กีรา จะ ญา ฌาดี ซือมียา นู บาฌิ-ตือปัจ ดัฮ." ญา จะ. 7 กาเญา กือนา ตาฮู จะ ลูมอฮ ซือมียา นู ปือจายา เตอ กูญา อีตู เลอ นู ฌาดี นานะ นะ อับราฮัม. 8 ซูรัจ ปือมือเลา นะ ตูฮัด ตูโดฮ ลาฆู อีนี ดูลู นู ตูฮัด เดะ อาตัซ นะ บูวัจ บรี ซือมียา บักซา อาซิก นะ ฌาดี บาฌิ-ตือปัจ ซาเบะ ปือจายา ดัฮ เลอ. กะฆีเตอ ซูรัจ อีตู มือญาเระ บรีตา บาฌิ กะ อับราฮัม ดูลู มือเลา จะ "ตูฮัด จะ 'กู นะ บรี ซือลามัจ กะ ลูมอฮ บักซา ราตา ดือนียา กรานา เกา เลอ.' " ญา จะ. 9 กะฆีเตอ เลอ ตูฮัด ตืองัฮ บรี ซือลามัจ กะ ลูมอฮ ซือมียา ราตา นู ปือจายา บือซามา ฌางัน อับราฮัม ซือมียา นู ปือจายา ดัฮ. 10 กรานา โกะ ซือมียา นู ฮาระ กะ ลาฆู นู กูญา ตูโรจ ปือมือเลา ฮูโกบ นะ ตูฮัด กูญา กือนา ซูปัฮ อาโบยํ ดัฮ ซาเบะ อาดา ซูรัจ นู จะ "ราตา ซือมียา นู เตด ตูโรจ ราตา ตือนอซ นู ฆาแรฮ เดะ ซูรัจ ปือมือเลา ฮูโกบ นะ ตูฮัด เตอ ญา กือนา ซูปัฮ อาโบยํ ดัฮ." ญา จะ. 11 กะฆีเตอ กีตา ลีฮัจ ซัฮๆ ดัฮ จะ ฮอย ซือมียา ซืออูรัก โปด นู ตูฮัด นะ ลีฮัจ จะ ญา ฌาดี บาฌิ-ตือปัจ ดัฮ ซาเบะ ตูโรจ ปือมือเลา ฮูโกบ ดัฮ. กรานา อาดา ซูรัจ นู จะ "ซือมียา นู ฌาดี บาฌิ-ตือปัจ ซาเบะ ญา ปือจายา เตอ ญา เลอ นู นะ ฮีโดะ ซูโงฮ." ญา จะ. 12 ตาปี โกะ ปือมือเลา ฮูโกบ เตอ ญา เตด ซือรูปา กะ ลาฆู ปือจายา ตาปี อาดา นู จะ "ซือมียา นู บูวัจ ตูโรจ โกะ ปือมือเลา ฮูโกบ อีตู ญา นะ อาดา ฮีโดะ ซาเบะ ปือมือเลา ฮูโกบ อีตู เลอ." ญา จะ. 13 เยซู คริด ยอม กือนา ซูปัฮ อาโบยํ ดัฮ ฆาตี กีตา. กะฆีเตอ ญา ตือบุซ กีตา ดัฮ บรี ลือปัซ เดะ ลาฆู นะ ปือมือเลา ฮูโกบ อีตู นู บูวัจ บรี กีตา กือนา ซูปัฮ อาโบยํ ดัฮ. กรานา อาดา ฆาแรฮ ดัฮ นู จะ "ราตา ซือมียา นู กือนา ฆาโตก เดะ ปูโฮด กายู เตอ ญา กือนา ซูปัฮ อาโบยํ ดัฮ เลอ." ญา จะ. 14 ญา บูวัจ กะฆีเตอ บีดา ลาฆู นู ตูฮัด เดะ อาตัซ บรี ซือลามัจ กะ อับราฮัม ดัฮ นะ มาแรฮ รอจ กะ ลูมอฮ ซือมียา บักซา อาซิก ฌูฆา ซาเบะ เยซู คริด เลอ. กะฆีเตอ ฌูฆา กีตา บือเลฮ ซาโมจ ซือมืองัจ นู ตูฮัด บือฌาญี นะ บรี เตอ ซาเบะ กีตา ปือจายา ดัฮ เลอ. 15 อาดี-บราดี เออ กู นะ มือญาเระ ปาซัน ลาฆู นะ ซือมียา ซา ลาฆู. กาเลา-จะ ซือมียา ดีฮา บูวัจ ซูรัจ ปือมือเลา บือปาคัจ บือตือตู ซุจ ดัฮ ตืองะ บรี ตือตู ดัฮ เตอ ซือมียา ดีฮา โปด นะ บูวัจ บรี ปูตุซ เตอ นะ บือตามัฮ ลาฆู อาซิก เตอ เตด บือเลฮ ดัฮ. 16 ตาปี ตูฮัด เดะ อาตัซ ญา บือเลฮ บือฌาญี ฌางัน อับราฮัม ฌางัน บือแนฮ นะ ญา ฌูฆา. ตาปี ซูรัจ อีตู เตด มือเลา จะ "ฌางัน ลูมอฮ บือแนฮ นะ เกา" บือกะ ฌางัน ลูมอฮ ซือมียา บาญะ. ตาปี ญา มือเลา บือกะ ซือมียา ซืออูรัก จะ "ฌางัน บือแนฮ นะ เกา". บือแนฮ อีตู ฌาดี เยซู คริด เลอ. 17 กะฆีเตอ กู มือญาเระ จะ ปือมือเลา บือฌาญี บือตือตู อีตู เตอ ตูฮัด เดะ อาตัซ บือเลฮ ตืองะ ดูลู บรี ตือตู ดัฮ เลอ. ปือมือเลา ฮูโกบ นะ ตูฮัด นู มาแรฮ เดะ บลากัก ปัจ ราตุซ ตีฆา-ปูโลฮ ตาโฮด เตอ ญา เตด บือเลฮ บูวัจ บรี ปือมือเลา ฌาญี อีตู นะ ปูตุซ เตด ฌาดี นามา. เตด บือเลฮ เลอ. 18 กรานา กะ กีตา บือเลฮ ซาโมจ ปือซากา ซาเบะ ตูโรจ กะ ปือมือเลา ฮูโกบ นะ ตูฮัด ดัฮ เตอ กะฆีเตอ กีตา เตด ซาโมจ ซาเบะ ปือจายา ดัฮ เลอ. ตาปี ตูฮัด เดะ อาตัซ ญา บือฌาญี ดัฮ. กะฆีเตอ เลอ ญา ฮาลัย บรี ปือซากา อีตู กะ อับราฮัม ดัฮ. 19 กะ ฌาดี กะฆีเตอ บูวัจ นามา เลอ อาดา ปือมือเลา ฮูโกบ นะ ตูฮัด? ญา กือนา บือตามัฮ ดัฮ บีดา นะ ลีฮัจ จะ ลาฆู ดูซา ฌาดี กะฮามี. บือตามัฮ ดัฮ ตือดะ บือแนฮ นะ อับราฮัม อีตู นู นะ ซาโมจ ปือมือเลา ฌาญี อีตู นะ มาแรฮ รอจ ดัฮ. ปือมือเลา ฮูโกบ อีตู เตอ โกะ ฮูลู-บาลัก กูญา ตูโลก อาเมด มาแรฮ อาตัจ บรี ดัฮ เลอ. อาดา ฌูฆา ซือมียา ซืออูรัก ฌาดี ซือมียา ตืองัฮ. 20 กาลา อาดา ปาซัน นู ซา บือลัฮ เตอ เตด ฆรานา อาดา ซือมียา ตืองัฮ. ตาปี ตูฮัด เดะ อาตัซ เลอ ญา ฌาดี ซา บือลัฮ อีตู ดัฮ. 21 กะ ฌาดี กะฆีเตอ ปือมือเลา ฮูโกบ อีตู ญา บลาวัด ฌางัน ปือมือเลา ฌาญี นะ ตูฮัด เฆอ? ซูโงฮ ฮอย เตด ฌาดี กะฆีเตอ เลอ. กาเลา-จะ ตูฮัด บือเลฮ บรี ปือมือเลา ฮูโกบ นู นะ บรี ซือมียา ฮีโดะ เตอ ซูโงฮ เลอ ปือมือเลา ฮูโกบ อีตู นะ บูวัจ บรี ซือมียา ฌาดี บาฌิ-ตือปัจ. 22 ตาปี ซูรัจ ปือมือเลา นะ ตูฮัด มือญาเระ จะ โกะ อูมัจ-ซือมียา ซือมูฮา อาดา ลือกัจ เดะ ดูซา ดัฮ บีดา ลาฆู นู ตูฮัด บือฌาญี นะ บรี ซาเบะ กูญา ปือจายา กะ เยซู คริด เตอ ญา นะ บรี กะ ลูมอฮ ซือมียา นู ปือจายา. 23 ตาปี ดูลู เดะ ลาฆู ปือจายา อีตู มาแรฮ ดัฮ เตอ ปือมือเลา ฮูโกบ บือเลฮ กานัก กีตา. กะฆีเตอ กีตา กือนา ตูโดก ดัฮ ตือดะ ลาฆู ปือจายา อีตู นะ มาแรฮ ปลีฮัจ. 24 กะฆีเตอ ปือมือเลา ฮูโกบ นะ ตูฮัด ฌาดี ซือรูปา ซือมียา นู ฌาฆา กีตา เลอ นาตี ตือดะ นู เยซู คริด มาแรฮ บีดา กีตา นะ ฌาดี ซือมียา บาฌิ-ตือปัจ ซาเบะ ปือจายา ดัฮ. 25 ตาปี วะตู อีนี ลาฆู ปือจายา อีตู มาแรฮ รอจ ดัฮ. กะฆีเตอ ลาฆู นู ปือมือเลา ฮูโกบ ฌาฆา กีตา เตอ ญา ฮาบิฮ ปี ดัฮ. 26 กรานา กาเญา ซือมูฮา เลอ ฌาดี นานะ นะ ตูฮัด เดะ อาตัซ ลือกัจ บือซามา ฌางัน เยซู คริด ซาเบะ กาเญา ปือจายา ดัฮ. 27 กรานา กาเญา นู ซาโมจ ลาฆู ซือลับ เดะ อาเย บรี มาโซะ กะ ดาลับ เยซู คริด ดัฮ ซือรูปา บือกะ กาเญา ปือแญะ ญาวา ฌางัน เยซู คริด เลอ. 28 กะฆีเตอ ฮอย ลาฆู ฌาดี ลูมอฮ บักซา ยิว ลูมอฮ บักซา กรีก เตอ ฌาดี ลูมอฮ ปราโซฮ ลูมอฮ ซือมียา เตด ฌาดี ปราโซฮ เตอ ฌาดี ลูมอฮ กีลากี ลูมอฮ นีบีนี โปด ฮอย ดัฮ. กรานา กาเญา ซือมูฮา ฌาดี ซา ญาวา ซาเบะ ลือกัจ บือซามา ฌางัน เยซู คริด เลอ. 29 นู กาเญา ฌาดี โกะ ซือมียา นะ เยซู คริด ดัฮ กาเญา ฌาดี บือแนฮ นะ อับราฮัม ฌูฆา. กะฆีเตอ กาเญา นะ ซาโมจ ปือซากา นู ตูฮัด บือฌาญี ฌางัน อับราฮัม ดัฮ.
1 กะฆีเตอ เลอ กู มือญาเระ จะ ซือมียา นู นะ ซาโมจ ปือซากา เตอ มีเซ-จะ ญา ฌาดี ตูฮัด นะ บือนา บารัก นะ ปะ ซือมูฮา ตาปี กาลา ญา ดือมิ ลาฆี ญา ฌาดี ซือรูปา ปราโซฮ เลอ. 2 ญา อาดา เดะ บาวัฮ ฮูโกบ นะ ซือมียา ฌาฆา ฌางัน ซือมียา ลีฮัจ ปือซากา นะ ญา ตือดะ รอจ กะ วะตู นู ปะ เดะ ญา ตืองะ ดัฮ. 3 กะฆีเตอ ฌูฆา กาลา กีตา ดือมิ ลาฆี กีตา ฌาดี ปราโซฮ เดะ บาวัฮ ฮูโกบ นะ โกะ ฮาตู ซีตัด นู ฮูโกบ โซะ ดือนียา ราตา. 4 ตาปี ตานา รอจ วะตู ดัฮ ตูฮัด เดะ อาตัซ ซูโรฮ นานะ นะ ญา มาแรฮ. ญา ดูโดะ เดะ อาปี เดะ นีบีนี ซืออูรัก ฌาดี ซือมียา เดะ บาวัฮ ปือมือเลา ฮูโกบ นะ ตูฮัด. 5 ญา มาแรฮ บีดา นะ ตือบุซ โกะ ซือมียา นู อาดา เดะ บาวัฮ ปือมือเลา ฮูโกบ บรี กีตา นะ ฌาดี ซือมียา นู ตูฮัด ซาโมจ ฌาดี นานะ นะ ญา. 6 ซาเบะ กาเญา ฌาดี นานะ นะ ญา ดัฮ ตูฮัด บือเลฮ ซูโรฮ ซือมืองัจ นะ เยซู นานะ นะ ญา เตอ บรี มาโซะ เดะ ฮาตี นะ กีตา บูวัจ บรี กีตา มือเลา กือมัซๆ จะ "อับบา ปะ เออ". 7 กะฆีเตอ เกา เตด ฌาดี ปราโซฮ ลาฆี ตาปี ฌาดี นานะ นะ ญา ดัฮ. นู เกา ฌาดี นานะ ดัฮ ตูฮัด นะ บรี เกา ฌาดี ซือมียา นู ซาโมจ ปือซากา เดะ ญา ฌูฆา. 8 ตาปี ดูลู กาลา กาเญา เตด กราลา ตูฮัด เดะ อาตัซ กาเญา ฌาดี ปราโซฮ นะ กูญา อีตู เลอ นู ปรางัย กูญา เตด ฌาดี ตูฮัด ลาลู. 9 ตาปี กาลา อีนี กาเญา กราลา ตูฮัด เดะ อาตัซ บรี บาฌิ ดัฮ อานู กะ มือเลา รือมัก เตอ นะ มือเลา จะ ตูฮัด เลอ ญา กราลา กาเญา บรี บาฌิ ดัฮ. กะฆีเตอ เลอ บูวัจ นามา ปะ กาเญา อูโนยํ ปี ซารี โกะ ฮาตู ซีตัด นู ฮอย อูรัจ เตอ นู ฮาฌะ โตระ เตอ? บูวัจ นามา กาเญา อีงัจ นะ ฌาดี ปราโซฮ นะ กูญา อีตู ปูลัก เฆอ? 10 กาเญา ปี ตูเฮะ กะ โกะ อารี บรามัย ฌาดี-จะ โกะ อารี บือซัยํ เตอ โกะ อารี บูลัด เตอ โกะ มูเซด เตอ โกะ ตาโฮด บารู โปด. 11 กู ตาโกจ จะ นู กู บือกรือฌา กรานา กาเญา เตอ นะ เตด ฌาดี นามา เลอ. 12 อาดี-บราดี เออ กู มือเลา กือมัซๆ ฌางัน กาเญา บรี กาเญา นะ ฌาดี ซือรูปา กู เลอ ซาเบะ กู เตอ ยอม ฌาดี ซือรูปา กาเญา ดัฮ ฌูฆา. กาเญา เตด บูวัจ ซาลัฮ นามา โปด นู บลาวัด ฌางัน กู ดัฮ. 13 กาเญา ตาฮู จะ ลามูลา นู กู บือเลฮ ปี มือญาเระ บรีตา นู บาฌิ นะ ตูฮัด กะ กาเญา กู เตด ซือนัง ญาวา เลอ กะฆีเตอ กู ปี กะ ตือปัจ กาเญา. 14 มีเซ-จะ ปือญาเกะ นะ กู อีตู ญา ฌาดี ลาฆู ฆาโดฮ-ฮาตี กะ กาเญา โปด ตาปี กาเญา เตด มือฌัฮ กะ กู เตด บือชี กะ กู ดัฮ. บูกัด กะฆีเตอ ตาปี กาเญา บือเลฮ ซาโมจ กู ซือรูปา กู ฌาดี ฮูลู-บาลัก นะ ตูฮัด เตอ ซือรูปา กู ฌาดี เยซู คริด ตะอาซิก เลอ. 15 นู กาเญา บือเลฮ ซูกา-ฮาตี ซูโงฮ กะฆีเตอ ญา ปี กะ ดีฮา ดัฮ? กู บรี ซะซี จะ กะ บือเลฮ บูวัจ กะฆีเตอ กาเญา ยอม จูเกน บีฌี มาตา นะ กาเญา ตรือเบะ โปด บีดา นะ บรี กะ กู เลอ. 16 กาลา อีนี นู กู มือเลา ลาฆู นู ซูโงฮ กะ กาเญา เตอ ฌาดี ซือรูปา กู ซาเลด ฌาดี ซือตรู นะ กาเญา เฆอ? 17 โกะ ลูมอฮ ซือมียา มืออูปัย อีตู กูญา ซือมาตา นะ อาเมด ฮาตี นะ กาเญา ตาปี นู กูญา อีงัจ นะ บูวัจ กะฆีนี กูญา เตด บูวัจ บรี บาฌิ. กูญา อีงัจ นะ กือตัก ลูมอฮ กาเญา บีดา กาเญา นะ ซือมาตา อาเมด ฮาตี ซา กูญา เลอ. 18 ตาปี นู นะ อาเมด ฮาตี ซูโงฮๆ ฌาดี ลาฆู นู บาฌิ ราตา วะตู บูกัด ซา วะตู นู กู อาดา บือซามา ฌางัน กาเญา. 19 โอ โกะ นานะ ดือมิ นู กู ซายัก เออ กู ซือรูปา ซาเกะ ดูโดะ เดะ อาปี ปูลัก กรานา กาเญา เลอ ตือดะ รูปา นะ เยซู คริด นะ ปลีฮัจ ปือนอฮ เดะ ญาวา นะ กาเญา. 20 ตาปี กู ซูกา นะ ดูโดะ บือซามา ฌางัน กาเญา วะตู อีนี เตอ บีดา นะ ซาเลด ปือมือเลา บรี มือเลา บาฌิ ซาเบะ กู บรีงัจ บาญะ ลาฆู นะ กาเญา. 21 กาเญา นู ซูกา ดูโดะ เดะ บาวัฮ โกะ ปือมือเลา ฮูโกบ นะ ตูฮัด เตอ กาเญา เตด มือนีงัย ลาฆู นะ ปือมือเลา ฮูโกบ อีตู เฆอ? บรี กาเญา ตีกัฮ กะ กู ซัจ. 22 อาดา ซูรัจ นู จะ อับราฮัม อาดา นานะ กีลากี ดูวา อูรัก. นู ซา ฌาดี นานะ นะ บีนี นู ฌาดี ปราโซฮ เตอ นู ซา ฌาดี นานะ นะ บีนี นู เตด ฌาดี ปราโซฮ เตอ. 23 นานะ นะ บีนี นู ฌาดี ปราโซฮ เตอ ญา บือฌาดี ดัฮ บือกะ ซือมียา ราตา. นานะ นะ บีนี นู เตด ฌาดี ปราโซฮ เตอ ญา บือฌาดี ดัฮ บือกะ ตูโรจ ปือมือเลา บือฌาญี นะ ตูฮัด. 24 ลาฆู อีตู ฌาดี ซือรูปา จรือตา นู อาฌัยํ กีตา. นีบีนี ดูวา อูรัก อีตู ฌาดี ซือรูปา ปือมือเลา บือปาคัจ บือตือตู ดูวา มาจับ เลอ. ปือมือเลา บือปาคัจ บือตือตู นู ซา ดาตัก เดะ บูเกะ ซีนัย. ญา เตอ ฌาดี ฮาฆา นู อาดา นานะ นู ฌาดี ปราโซฮ ฌูฆา. 25 ฮาฆา อีตู ญา ซือรูปา บือกะ บูเกะ ซีนัย เดะ โซะ นังฆรี อาระเบีย. ญา รือมัก ฌางัน นังฆรี เยรูซาเลม วะตู อีนี ซาเบะ นังฆรี อีตู ฌางัน ลูมอฮ ซือมียา นะ ญา ฌาดี ปราโซฮ ดัฮ. 26 ตาปี นังฆรี เยรูซาเลม นู โซะ อาตัซ เตอ ญา เตด ฌาดี ปราโซฮ เลอ. ญา เตอ ซือรูปา มะ นะ กีตา. 27 กรานา อาดา ซูรัจ ปือมือเลา นะ ตูฮัด นู จะ "นีบีนี นู ฮอย นานะ เออ บรี เกา ซูกา-ฮาตี เลอ. นีบีนี นู เตด ดือละ ซาเกะ ดูโดะ เดะ อาปี กือนา มือญาญี กือนา บือฆือละ เลอ. ซาเบะ บีนี นู ลากี ตีงัน ดัฮ ญา นะ บือเลฮ นานะ ลือเบฮ เดะ บีนี นู ดูโดะ บือซามา ฌางัน ลากี." ญา จะ. 28 กะฆีเตอ อาดี-บราดี เออ กาเญา ฌาดี โกะ นานะ นู บือฌาดี มาแรฮ ตูโรจ กะ ปือมือเลา บือฌาญี นะ ตูฮัด ซือรูปา บือกะ อีซัก เลอ. 29 วะตู อีตู นานะ อีตู นู บือฌาดี ดัฮ บือกะ ซือมียา ราตา เตอ ญา บือเลฮ ปรือกัด นานะ นู บือฌาดี ดัฮ ซาเบะ ซือมืองัจ นะ ตูฮัด ตูโลก. วะตู อีนี ฌาดี ซือรูปา เลอ. 30 ตาปี ซูรัจ ปือมือเลา นะ ตูฮัด มือเลา กะฮามี? ญา จะ "กือนา โปรฮ ปราโซฮ นีบีนี อีนี ฌางัน นานะ นะ ญา บูวัก เลอ. ซาเบะ นานะ นะ ปราโซฮ นีบีนี นะ ซาโมจ ปือซากา บือซามา ฌางัน นานะ นะ นีบีนี นู เตด ฌาดี ปราโซฮ ฮอย เตด บือเลฮ." ญา จะ. 31 กะฆีเตอ เลอ อาดี-บราดี เออ กีตา เตด ฌาดี นานะ นะ ปราโซฮ นีบีนี เตอ ตาปี ฌาดี นานะ นะ นีบีนี นู เตด ฌาดี ปราโซฮ ลาลู.
1 เยซู คริด บือเลฮ ตูโลก กีตา บรี ลือปัซ ดัฮ บีดา กีตา นะ ฌาดี ซือมียา ลือปัซ ซูโงฮๆ เลอ. กะฆีเตอ บรี กาเญา กือฌะ กือมัซๆ เดะ ลาฆู อีตู เลอ. ฌางัน บรี กาเญา ฌาดี ปราโซฮ ปูลัก. 2 กู นี เลอ เปาโล มือเลา มือญาเระ กะ กาเญา จะ กะ กาเญา นะ ซาโมจ ลาฆู กรัจ นู เยซู คริด ตูโลก กาเญา ดัฮ นะ เตด ฌาดี นามา. 3 กู นะ บรี ซะซี ปูลัก จะ ราตา ซือมียา นู ซาโมจ ลาฆู กรัจ เตอ ญา ฆรานา นะ ตูโรจ ปือมือเลา ฮูโกบ นะ ตูฮัด ซือมูฮา. 4 กาเญา นู อีงัจ นะ ตูโรจ ปือมือเลา ฮูโกบ นะ ตูฮัด บีดา นะ ฌาดี ซือมียา บาฌิ-ตือปัจ ฌางัน ตูฮัด เตอ กาเญา ปูตุซ เดะ เยซู คริด เลอ. ซือรูปา กาเญา ฆูรก ดัฮ บรี ลือปัซ เดะ ตูฮัด นู ฮาลัย บรี ซือลามัจ กะ กาเญา. 5 ตาปี โซะ กามี ซือมืองัจ นะ ตูฮัด บูวัจ บรี กามี อาดา ฮาตี ปือจายา นาตี ลาฆู บาฌิ-ตือปัจ อีตู นู กามี จาดัก นะ ดาปัจ. 6 กรานา โซะ ซือมียา ดีฮา โปด นู อาดา ลือกัจ บือซามา ฌางัน เยซู คริด ดัฮ นู นะ ซาโมจ ลาฆู กรัจ เตอ เตด ซาโมจ เตอ เตด ฌาดี นามา เลอ. ตาปี ลาฆู บือซัยํ ฌาดี กะฆีนี นู ญา ปือจายา เลอ นู ปลีฮัจ ดัฮ เดะ ลาฆู นู ญา ซายัก กาวัด เตอ. 7 ดูลู กาเญา บลารี บือลูมา บาฌิ ดัฮ. ซาปา เลอ นู ปี ซือกัจ กาเญา บรี กาเญา เตด ตูโรจ กะ ลาฆู นู ซูโงฮ? 8 นู ญา อาโจบ กาเญา กะฆีเตอ ญา เตด มาแรฮ เดะ ตูฮัด นู ปาเงน กาเญา ดัฮ. 9 นู ญา นะ บอฮ ราฆี ดีกิ-ตอจ เดะ ตือโปก โรตี เตอ ญา นะ บูวัจ บรี กือบุก ฮาบิฮ ซือกือโตน เลอ. 10 กู ตือตู-ฮาตี เดะ ตูฮัด กรานา กาเญา จะ นู กาเญา นะ เตด ตูโรจ ลาฆู อาซิก ลาฆี. ตาปี ซือมียา อีตู นู มาแรฮ บือฆาโดฮ กาเญา เตอ มีเซ-จะ ญา ฌาดี ซาปา โปด ญา นะ กือนา กรัจ ฮูโกบ ฌูฆา. 11 อาดี-บราดี เออ โซะ กู เตอ กะ กู ตืองัฮ บีตาฮู ราตา บรี โกะ ซือมียา ซาโมจ ลาฆู กรัจ เตอ ซาเบะ นามา อาดา ซือมียา ปรือกัด กู ลาฆี? กะ กู บีตาฮู ลาฆู กะฆีเตอ กายู ปลีตัก นะ เยซู เตด ฌาดี ลาฆู นู นะ บรี กูญา ตือซีปะ เตด รอจ กะ ลาฆู ปือจายา ลาฆี. 12 กู ซูกา บรี โกะ ซือมียา นู บือฆาโดฮ กาเญา เตอ บรี กูญา นะ กาซี ญาวา ตะอาซิก บรี ฮาบิฮ เลอ. 13 อาดี-บราดี เออ ลีฮัจ เลอ. ตูฮัด ปาเงน กาเญา ดัฮ บรี กาเญา ลือปัซ ซูโงฮ เลอ. ตาปี นู กาเญา ลือปัซ ซูโงฮ ดัฮ เตอ ฌางัน บรี ฌาดี จือลัฮ นู นะ บรี กาเญา นะ ตูโรจ ปรางัย นู บือดูซา นะ กาเญา เลอ. ตาปี กาเญา กือนา ซายัก บือซามา-ซามา ตูโลก กาวัด ฌูฆา เลอ. 14 กรานา ลาฆู ปือมือเลา ฮูโกบ นะ ตูฮัด ซือมูฮา เตอ ญา รือฆัจ ซือกาลี ฌางัน ซา ปือมือซัด อีนี นู จะ "บรี เกา ซายัก กะ กาวัด เลอ ซือรูปา บือกะ เกา ซายัก ญาวา ตะอาซิก." 15 ตาปี กาเลา-จะ กาเญา ซือรูปา ฆีเฆะ บือซามา-ซามา ตือลัด กาวัด บือซามา-ซามา เตอ ฌาฆา เลอ ตาโกจ-จะ กาเญา นะ กือนา บือนาซา ฮาบิฮ บือซามา-ซามา. 16 กะฆีเตอ กู มือญาเระ จะ นู ซือมืองัจ นะ ตูฮัด นะ บาวา กาเญา ปี บูวัจ นามา เตอ กาเญา กือนา บูวัจ ตูโรจ. กะฆีเตอ เลอ กาเญา นะ เตด ตูโรจ กะ ลาฆู นู ปรางัย บือดูซา นะ กาเญา อีงัจ นะ บูวัจ เตอ. 17 กรานา นู ปรางัย บือดูซา ฆาละ นะ บูวัจ เตอ ญา บลาวัด ฌางัน ซือมืองัจ นะ ตูฮัด เลอ. ซือมืองัจ นะ ตูฮัด โปด ญา บลาวัด ฌางัน ปรางัย บือดูซา ฌูฆา. นู ดูวา บือลัฮ อีนี เตอ กูญา ฌาดี ซือตรู บือซามา-ซามา. กะฆีเตอ ลาฆู นู กาเญา อีงัจ นะ บูวัจ กาเญา บูวัจ เตด บือเลฮ ดัฮ เลอ. 18 ตาปี นู กาเญา บูวัจ ตูโรจ กะ ซือมืองัจ นะ ตูฮัด เตอ กาเญา เตด ฌาดี ปราโซฮ นะ ปือมือเลา ฮูโกบ นะ ตูฮัด ลาฆี เลอ. 19 ปือบูวัจ นะ ปรางัย บือดูซา อีตู บือเลฮ ลีฮัจ ซัฮ ดัฮ ฌาดี-จะ ลาฆู บือกาเซฮ ลาฆู ตะอารัฮ ลาฆู เตด บือฆูนา เตอ 20 ลาฆู มือญือมัฮ กะ บราลา ลาฆู ตูโรจ กะ อาเย-ลือมู เตอ นู ฌาดี ซือตรู บือซามา บือปาซัน ฌางัน กาวัด เตอ ลาฆู ฮาลูบา นู มูซัยํ บือซามา-ซามา ซูกา นะ บือซัยํ เดะ กาวัด บือปือจัฮ ฌางัน กาวัด นู ตูเฮะ กะ ลาฆู อาซิกๆ โซกซา ปาโซะ เตอ 21 นู ซาเกะ-ฮาตี กะ กาวัด เตอ ซูกา มาโบะ อาระ อูซิ บรามัย มาโบะ บือซามา-ซามา เตอ ลาฆู อาซิก กะฆีเตอ บือมาจับ-มาจับ เตอ ฌาดี ปือบูวัจ นะ ปรางัย บือดูซา เลอ. ดูลู กู บือเลฮ ปรีงัจ กะ กาเญา ปาซัน ลาฆู อีนี ดัฮ. กาลา อีนี กู นะ ปรีงัจ กะ กาเญา ปูลัก จะ โกะ ซือมียา นู ตูโรจ กะ ปรางัย บือดูซา กะฆีนี เตอ กูญา นะ เตด บือเลฮ ซาโมจ ดือนียา บารู นะ ตูฮัด ฌาดี ปือซากา นะ กูญา ลาลู. 22 ตาปี ซือมืองัจ นะ ตูฮัด บูวัจ บรี อาดา บูวัฮ นู บาฌิ ฌาดี-จะ ฮาตี ซายัก กะ กาวัด เตอ นู นะ ซูกา-ฮาตี ซือนัง-ฮาตี ตาฮัด-ฮาตี ลามา เตอ นู นะ ตือจีฮัด กะ กาวัด อาดา ฮาตี บาฌิ ฌางัน กาวัด เตอ อาดา ฮาตี รือมัก 23 ฮาตี บือแฌะ ฮาตี นะ ฮูโกบ ญาวา ตะอาซิก เตอ. ลาฆู อีนี ซือมูฮา ฌาดี บูวัฮ นะ ซือมืองัจ นะ ตูฮัด. ลาฆู กะฆีนี ฮอย ปือมือเลา ฮูโกบ นู บลารัก ลาฆี. 24 โกะ ซือมียา นู อาดา โซะ เยซู คริด เตอ กูญา อาเมด ปรางัย นู บือดูซา นะ กูญา ปี กาจิก เดะ กายู ปลีตัก ดัฮ. ปรางัย นู บือดูซา อีตู ฌางัน ลาฆู นู ญา อีงัจ เตอ ฆาละ นะ บูวัจ เตอ กูญา กาจิก ฮาบิฮ ดัฮ เลอ. 25 นู ซือมืองัจ นะ ตูฮัด บูวัจ บรี กีตา ฮีโดะ เตอ บรี กีตา มือลากัฮ ปี ตูโรจ ญา เลอ. 26 ฌางัน บรี กีตา งันตืองัน เลอ. ฌางัน บูวัจ บรี กาวัด รีเซา-ฮาตี ฌางัน ซาเกะ-ฮาตี กะ กาวัด ฌูฆา.
1 อาดี-บราดี เออ กาเลา กาเญา ดาปัจ จะ ซือมียา ดีฮา ซือซัจ บูวัจ ซาลัฮ ดัฮ เตอ มาจับ นามา โปด กาเญา นู ตูโรจ กะ ซือมืองัจ นะ ตูฮัด เตอ กาเญา กือนา ตูโลก ซือมียา อีตู บรี ญา บราเลฮ ตืองะ ฮาตี นะ ญา บรี บารู เลอ. ตาปี กาเญา กือนา อาดา ฮาตี บือแฌะ กือนา บรีงัจ กะ ญาวา ตะอาซิก ตาโกจ-จะ กาเญา นะ กือนา บืออาฌะ บรี ซือซัจ ฌาลัด ฌูฆา. 2 กาเญา กือนา ตูโลก กาวัด บือซามา-ซามา เดะ ลาฆู บือซูซัฮ เลอ. กะฆีเตอ กาเญา นะ ตูโรจ ปือมือเลา ฮูโกบ นะ เยซู คริด รือมัก ดัฮ. 3 กรานา ซือมียา ดีฮา นู เตด ฌาดี นามา เตอ ฮาฌา ญา อีงัจ จะ ญา ฌาดี ซือมียา ซัยํ-บือซัยํ ญา ตีปู ญาวา ตะอาซิก กะฆีเตอ เลอ. 4 ราตา ซือมียา กือนา ซาซัจ ลีฮัจ ปือบูวัจ นะ ญาวา ตะอาซิก นะ ลีฮัจ จะ ญา อาดา ลาฆู นู นะ มือโอจ เฆอ? ญา เตด กือนา อีงัจ จะ ญา บาฌิ เดะ กาวัด. 5 กรานา ราตา ซือมียา กือนา บูวัจ กรือฌา นะ ญา ตะอาซิก เลอ. 6 ซือมียา ดีฮา นู บลาฌัยํ ลาฆู นะ ตูฮัด ญา เตอ กือนา ฮาฆิ บือนา บารัก บาฌิ ราตา มาจับ กะ ซือมียา นู อาฌัยํ ญา เลอ. 7 ฌางัน ซือซัจ เลอ. กาเญา นะ มืออูปัย กะ ตูฮัด เดะ อาตัซ เตด บือเลฮ. ซือมียา นะ ตานัม ลาฆู นามา โปด ญา นะ กือตับ ลาฆู อีตู เลอ. 8 ซือมียา นู ตานัม ลาฆู นามา บีดา ตูโรจ กะ ปรางัย นู บือดูซา นะ ญา เตอ ญา นะ กือตับ เดะ โซะ ปรางัย บือดูซา อีตู ลาฆู นู นะ บูโระ บูโซะ ดัฮ. ตาปี ซือมียา นู นะ ตานัม ลาฆู นามา บีดา ตูโรจ กะ ซือมืองัจ นะ ตูฮัด เตอ ญา นะ กือตับ เดะ โซะ ซือมืองัจ นะ ตูฮัด ลาฆู นู ญา นะ ฮีโดะ ซูโงฮ ซือลาลู เลอ. 9 ฌางัน บรี กีตา ฌาดี ซือมียา ฮาตี รือมัย ซือฆัด นะ บูวัจ ลาฆู นู บาฌิ เลอ. กะ กีตา เตด กูรัก-ฮาตี เตอ วะตู รอจ มูเซด ดัฮ กีตา นะ กือตับ ลาฆู นู บาฌิ เลอ. 10 กะฆีเตอ กาลา กีตา อาดา จือลัฮ บรี กีตา บูวัจ ลาฆู นู บาฌิ กะ กาวัด ซือมูฮา. ตาปี ลือเบฮ เดะ อีตู เตอ กือนา บูวัจ บาฌิ กะ ลูมอฮ อาดี-บราดี นู ปือจายา ฌูฆา. 11 ลีฮัจ เลอ นู ฆาแรฮ อีนี กู ฆาแรฮ ฌางัน ตางัน นะ กู ตะอาซิก ดัฮ. โกะ ปือมือเลา ราตา ปาตัฮ กู ฆาแรฮ บรี บือซัยํ ซูโงฮ เลอ. 12 โกะ ซือมียา อีตู นู ซูกา ซูโรฮ กาเญา บรี ซาโมจ ลาฆู กรัจ เตอ กูญา อีตู อีงัจ จะ นะ บรี ซือมียา อาซิก นะ มือโอจ กะ กูญา. กูญา บูวัจ กะฆีนี กรานา ซา ลาฆู เลอ บีดา กูญา นะ ฮอย เตด กือนา ซือมียา ปรือกัด กูญา ปาซัน ลาฆู กายู ปลีตัก นะ เยซู คริด. 13 มีเซ-จะ กูญา ซาโมจ ลาฆู กรัจ โปด ตาปี กูญา เตด ตูโรจ ปือมือเลา ฮูโกบ นะ ตูฮัด บรี ฮาบิฮ. ตาปี กูญา บือคานะ นะ บรี กาเญา ซาโมจ ลาฆู กรัจ เตอ บีดา กูญา นะ งันตืองัน เดะ ปาซัน ญาวา นะ กาเญา. 14 ตาปี โซะ กู เตอ ฌางัน บรี ฌาดี กะฆีเตอ เลอ. กู นะ งันตืองัน เดะ ซา ลาฆู กายู ปลีตัก นะ เยซู คริด ตูฮัด นะ กีตา เลอ. โซะ กู เตอ ลาฆู นะ ดือนียา อีนี กือนา กาจิก เดะ กายู ปลีตัก อีตู มาตี ดัฮ. โซะ ดือนียา เตอ กู โปด กือนา กาจิก มาตี กะฆีเตอ ฌูฆา. 15 กะฆีเตอ ลาฆู กือนา กรัจ เตอ เตด กือนา กรัจ เตอ ลาฆู อีตู เตด ฌาดี นามา เลอ. ตาปี ซา ลาฆู นู บือซัยํ ฌาดี-จะ ลาฆู นู กีตา บือฌาดี บารู ดัฮ เลอ. 16 ราตา ซือมียา นู ตูโรจ กะ ปือมือเลา อาฌัยํ อีนี ฌางัน ลูมอฮ อิซราเอน นะ ตูฮัด เดะ อาตัซ ซือมูฮา เตอ มีตา บรี กูญา นะ ดูโดะ ซือนัง ซือลามัจ บรี ตูฮัด ซายัก ตือจีฮัด กะ กูญา เลอ. 17 ตะเดะ อารี อีนี ปี เตอ ฌางัน บรี ซือมียา ซืออูรัก โปด บือฆาโดฮ กู เลอ ซาเบะ เดะ ญาวา นะ กู กู อาดา ปือนานา นะ เยซู คริด ดัฮ. 18 โกะ อาดี-บราดี เออ มีตา บรี เยซู คริด ตูฮัด นะ กีตา นะ บรี ซือลามัจ กะ ฮาตี นะ กาเญา ซือมูฮา เลอ. อาเมน.
1 กู เปาโล นู ฌาดี ปือญูโรฮ นะ เยซู คริด ตูโรจ นู ตูฮัด เดะ อาตัซ บือคานะ ดัฮ กู ฆาแรฮ ซูรัจ อีนี กีเรบ บรี กะ โกะ ซือมียา นะ ตูฮัด เดะ นังฆรี เอเฟซัด นู ฮาตี รือมัก ปือจายา กะ เยซู คริด. 2 มีตา เดะ ตูฮัด อาโปก นะ กีตา ฌางัน ตูฮัด เยซู คริด นะ บรี ซือลามัจ กะ กาเญา นะ บรี กาเญา ดูโดะ ซือนัง ซือลามัจ เลอ. 3 ปูฌี กะ ตูฮัด เดะ อาตัซ นู อาโปก นะ เยซู คริด ตูฮัด นะ กีตา. ญา เตอ บรี ซือลามัจ กะ กีตา ดัฮ ซาเบะ กีตา ลือกัจ บือซามา ฌางัน เยซู คริด บรี กีตา อาดา บือนา บาฌิ ดาตัก เดะ โซะ อาตัซ ลาแงะ ราตา มาจับ. ฌาดี บือนา บาฌิ บีดา ฮาตี นะ กีตา เลอ. 4 ดูลู นู ตูฮัด เดะ อาตัซ บือฌาดี ดือนียา ดัฮ ญา ปีเลฮ กีตา ดัฮ ซือรูปา ญา ลีฮัจ กีตา ลือกัจ ฌางัน เยซู คริด. ญา ปีเลฮ กีตา นะ บรี กีตา ฌาดี ซือมียา ฮาตี จรัฮ บาฌิ ซือมียา นู ญา ลีฮัจ จะ ฮอย ซาลัฮ นามา. ญา ซายัก กีตา 5 กีรา ดูลู ดัฮ นะ ซูโรฮ เยซู คริด มาแรฮ ตูโลก ตืองะ กีตา บรี ฌาดี นานะ บือฮีโดะ นะ ญา. ญา บูวัจ กะฆีเตอ ตูโรจ ลาฆู บาฌิ นู ญา บือคานะ เดะ ฮาตี. 6 บรี กีตา ปูฌี กะ ตูฮัด. นู ญา บรี ซือลามัจ กะฆีนี ฌาดี บือนา บือซรี ซูโงฮ นู ญา ฮาลัย บรี กะ กีตา บือซามา ฌางัน เยซู นู ญา ซายัก. 7 นู เยซู มาตี ดารัฮ มือนีเลฮ ดัฮ บีดา นะ ตือบุซ กีตา บูวัจ บรี กีตา ลือปัซ ดัฮ. ฌาดี-จะ ดูซา นะ กีตา ญา อาเกะ ดัฮ บือกะ ลาฆู ซือลามัจ บาญะ ซูโงฮ 8 นู ญา ฮาลัย บรี กะ กีตา ปือนอฮ มีเม ดัฮ. ตูฮัด เดะ อาตัซ อาดา อากัน ปานัย โตระ. 9 ญา บรี กีตา ตาฮู ลาฆู ดาลับ ซูโงฮ นู ญา อีงัจ เดะ ดาลับ ฮาตี จะ นู ญา อาดา ฮาตี บาฌิ ซูโงฮ กะฆีเตอ ญา บือกีรา นะ บูวัจ ลาฆู นามา ฌางัน เยซู. 10 ตานา รอจ วะตู ปือนอฮ ฮาบิฮ ดัฮ ญา อีงัจ จะ นะ บือมุน บือซามา บือนา ซือมูฮา เดะ โซะ ลาแงะ เดะ โซะ ดือนียา โปด บรี เยซู คริด ฌาดี กือปาลา เดะ บือนา อีตู ซือมูฮา. 11 ตูฮัด เดะ อาตัซ ปีเลฮ กามี ดัฮ บรี ฌาดี ลูมอฮ ซือมียา นะ ญา ลือกัจ บือซามา ฌางัน เยซู คริด. ฌาดี-จะ ญา กีรา ดูลู นะ ตืองะ กามี บือกะ ลาฆู นู ญา อีงัจ เดะ ฮาตี ดัฮ. ญา เลอ นู บือกรือฌา บือนา ซือมูฮา บรี ฌาดี รือมัก ฌางัน ลาฆู นู ญา อีงัจ ดัฮ. 12 กามี นู บือเลฮ ฮาระ กะ เยซู คริด ดูลู เตอ ญา ตืองะ บรี ฌาดี ลูมอฮ ซือมียา นู นะ บรี ปูฌี กะ ญา นู บือซรี ซูโงฮ. 13 กาเญา ฌูฆา เตอ กาลา กาเญา ดืองัยํ ปือมือเลา นู ซูโงฮ อีตู ดัฮ ฌาดี บรีตา นู บาฌิ นู บรี กาเญา ฮีโดะ ลือปัซ บาฌิ ดัฮ กาเญา ฌูฆา ฌาดี ลูมอฮ ซือมียา นะ ญา ลือกัจ บือซามา ฌางัน เยซู เลอ. ตานา ปือจายา กะ เยซู ดัฮ ซือรูปา ตูฮัด ตาแปะ มือกรา นะ ญา เดะ กาเญา ดัฮ. มือกรา อีตู ฌาดี ซือมืองัจ นะ ตูฮัด นู ตูฮัด บือฌาญี นะ บรี กะ กีตา. 14 ซือมืองัจ อีตู ฌาดี ซือรูปา รือฆา อูปัฮ ดูลู เดะ ปือซากา นะ กีตา ตือดะ อารี อีตู นู ตูฮัด นะ ตือบุซ กีตา บรี ลือปัซ บรี ซาโมจ ปือซากา อีตู รือมัก ดัฮ. บรี กีตา ปูฌี กะ ตูฮัด นู บือซรี ซูโงฮ เลอ. 15 กรานา ลาฆู กะฆีนี ตะเดะ กู บือเลฮ ดืองัยํ ดัฮ นู กาเญา ปือจายา กะ ตูฮัด เยซู เตอ นู กาเญา ซายัก โกะ ซือมียา นะ ตูฮัด ซือมูฮา เตอ 16 ตานา กู บือซาโวจ อีงัจ กะ กาเญา กู บรี ซือลามัจ กะ ตูฮัด เตด บราดู. 17 กู มีตา เดะ อาโปก นู บือซรี ซูโงฮ นู ฌาดี ตูฮัด นะ ตูฮัด เยซู คริด เตอ บรี ญา นะ บรี ซือมืองัจ นะ ญา กะ กาเญา นู นะ บรี กาเญา อาดา อากัน ลีฮัจ ซัฮ เตอ บรี กราลา ตูฮัด บาฌิ. 18 กู มีตา บรี มาตา ฮาตี นะ กาเญา นะ จรัฮ ซูโงฮ บรี กาเญา นะ ตาฮู จะ ตูฮัด ปาเงน กาเญา บรี กาเญา จาดัก นะ บือเลฮ ลาฆู นู บาฌิ เตอ นะ ตาฮู จะ ตูฮัด อาดา ปือซากา นู บือซรี บาฌิ ซูโงฮ บีดา โกะ ซือมียา นู ญา ปีเลฮ ดัฮ เตอ 19 นะ ตาฮู จะ ตูฮัด ญา มือฆัฮ โตระ ซูโงฮ ลือเบฮ เดะ มานามา บีดา กีตา นู ปือจายา เลอ. ลาฆู มือฆัฮ อีตู ซือรูปา บือกะ นู ตูฮัด เดะ อาตัซ บือกรือฌา กรัซ ซีดี ซูโงฮ 20 บูวัจ บรี เยซู คริด ฮีโดะ ปาเระ เดะ มาตี ดัฮ บรี ญา ดูโดะ โซะ อาตัซ ลาแงะ เดะ โซะ ซือบือลัฮ กานัน นะ ตูฮัด เดะ อาตัซ. 21 โซะ อีตู ญา ดูโดะ ตีงี เดะ อาตัซ โกะ ฌิด นู ซัยํ-บือซัยํ นู มือฆัฮ ซือมูฮา เดะ อาตัซ โกะ ฮาตู กรัซ โกะ ดาโตะ กรามัจ ซือมูฮา เลอ. ญา เตอ ตีงี เดะ อาตัซ ราตา ปือนามา นู กูญา ซือโบจ เดะ ฮาดัจ อีนี เตอ เดะ ฮาดัจ โซะ ฮึลด ฌูฆา. 22 ตูฮัด เดะ อาตัซ บือเลฮ ตืองะ บือนา ซือมูฮา บรี อาดา เดะ บาวัฮ ตาปะ กากี นะ เยซู คริด เตอ บือเลฮ ตืองะ ญา บรี ฌาดี กือปาลา เดะ โกะ มานามา ซือมูฮา บีดา ซา ลูมอฮ นะ ตูฮัด. 23 ซา ลูมอฮ อีตู ฌาดี ญาวา นะ เยซู คริด ฌาดี ญาวา นู ญา ดูโดะ ปือนอฮ ดัฮ. ญา เลอ ดูโดะ ปือนอฮ เดะ บือนา ซือมูฮา ราตาๆ.
1 ตาปี กาเญา เลอ มีเซ-จะ กาเญา อาดา ซือรูปา มาตี ดัฮ เดะ ลาฆู บูวัจ กือลือเบฮ บูวัจ ดูซา ตาปี ตูฮัด บูวัจ บรี ฮีโดะ ดัฮ. 2 ดูลู กาเญา บูวัจ ดูซา อีตู ตูโรจ กะ ฮาดัจ โซะ ดือนียา อีนี ตูโรจ กะ กือปาลา ฌิด นู มือฆัฮ เดะ โซะ อาตัซ. ญา เตอ ฌาดี ฮาตู นู ฮูโกบ ลูมอฮ ซือมียา นู เตด ตูโรจ กะ ตูฮัด. 3 กาลา อีตู กีตา ซือมูฮา ดูโดะ บือซามา ฌางัน ลูมอฮ กูญา ลาดัจ ตูโรจ กะ ฮาตี นู เตด บือฆูนา นะ ญาวา ตะอาซิก ลาดัจ ตูโรจ กะ บือนา นู ญาวา นะ กีตา ซูกา นู กีตา อีงัจ เดะ ฮาตี. ซือรูปา โกะ ซือมียา ฆีลาฆี เตอ กีตา ฌาดี ซือมียา นู ปาโตจ นะ กือนา ตูฮัด มูซัยํ โตระ. 4 ตาปี ตูฮัด เดะ อาตัซ นู ตือจีฮัด ปือนอฮ เดะ ฮาตี เตอ ญา ซายัก กีตา บาญะ ตือลาลู. 5 มีเซ-จะ กีตา อาดา ซือรูปา มาตี ดัฮ เดะ ลาฆู บือดูซา ตาปี ญา บูวัจ บรี กีตา ฮีโดะ บือซามา ฌางัน เยซู คริด ดัฮ. กรานา นู ญา ฮาลัย บรี ซือลามัจ เตอ เลอ บูวัจ บรี กาเญา ฮีโดะ ลือปัซ บาฌิ ดัฮ. 6 กะฆีเตอ ญา อาเกะ กีตา บือซามา ฌางัน เยซู คริด ดัฮ บรี กีตา ดูโดะ บือซามา ฌางัน ญา เดะ โซะ อาตัซ ลาแงะ. 7 กะฆีเตอ เลอ เดะ ฮาดัจ โซะ ฮึลด ตูฮัด เดะ อาตัซ นะ บรี ลีฮัจ นู ญา ฮาลัย บรี ซือลามัจ บาญะ ตือลาลู เตอ นู ญา อาดา ฮาตี บาฌิ ซูโงฮ ฌางัน กีตา ซาเบะ กีตา ลือกัจ บือซามา ฌางัน เยซู คริด. 8 กรานา นู ตูฮัด ฮาลัย บรี ซือลามัจ เตอ บูวัจ บรี กาเญา ฮีโดะ ลือปัซ บาฌิ ดัฮ ซาเบะ กาเญา ปือจายา. บูกัด กาเญา ตะอาซิก บูวัจ ตาปี ตูฮัด เดะ อาตัซ ญา ฮาลัย บรี ดัฮ. 9 นู กาเญา ฮีโดะ ลือปัซ บาฌิ ดัฮ บูกัด กรานา ปือบูวัจ นะ กาเญา ตีเมา บรี ซือมียา ดีฮา นะ มือโอจ กะ ญาวา ตะอาซิก. 10 กรานา กีตา ฌาดี ปือบูวัจ นะ ตูฮัด เดะ อาตัซ เลอ. ญา บือฌาดี กีตา ดัฮ บรี กีตา นะ ลือกัจ บือซามา ฌางัน เยซู คริด นะ ตูโรจ กะ ลาฆู นู บาฌิ นู ญา ซียะ ดูลู ดัฮ บรี กีตา นะ บูวัจ ตูโรจ. 11 กะฆีเตอ กาเญา กือนา บรีงัจ เลอ. ดูลู กาเญา ฌาดี ซือมียา บักซา อาซิก โซะ ญาวา. ลูมอฮ บักซา อิซราเอน นู ซาโมจ ลาฆู กรัจ นู บูวัจ เดะ ญาวา ฌางัน ตางัน ซือมียา เตอ กูญา ดูทุ กาเญา นู ฌาดี ลูมอฮ บักซา อาซิก นู เตด ซาโมจ ลาฆู กรัจ ดัฮ. 12 บรีงัจ เลอ เดะ วะตู อีตู กาเญา ดูโดะ ซือรูปา กาเญา ฮอย เยซู คริด ดูโดะ โซะ ลูวัยํ เดะ ลูมอฮ ซือมียา บักซา อิซราเอน ดัฮ เตอ ฮอย บาฮาเฆด เดะ ลาฆู นู ตูฮัด บรี ปือมือเลา บือปาคัจ บือตือตู ฌางัน กูญา ดัฮ. กาเญา ดูโดะ เดะ ดือนียา ฮอย ตือปัจ นะ จาดัก กะ ลาฆู นู บาฌิ นามา โปด ฮอย ตูฮัด ดัฮ. 13 ตาปี กาเญา นู ดูลู ดูโดะ ฌาโวฮ เดะ ตูฮัด ดัฮ กาลา อีนี นู กาเญา มาโซะ บือซามา ฌางัน เยซู คริด เตอ กาเญา มาโซะ มาแรฮ ดาปิก ดัฮ ซาเบะ เยซู ญา มาตี ดารัฮ มือนีเลฮ ดัฮ. 14 กรานา ญา เลอ นู บูวัจ บรี กีตา ดูโดะ ซือนัง ซือลามัจ ดัฮ. นู ดูวา บือลัฮ ซาเกะ-ฮาตี บือซามา-ซามา ฌาดี ซือรูปา อาดา ดีนิง นู กือตัก เดะ ตืองัฮ. ตาปี นู เยซู มาตี โซะ ญาวา ดัฮ ญา บูวัจ บรี กีตา ดูวา บือลัฮ ฌาดี ซา ดัฮ บูวัจ บรี ดีนิง อีตู รูโตฮ ฮาบิฮ เลอ. 15 ปือมือเลา ฮูโกบ นะ ตูฮัด ฌางัน โกะ ปือมือซัด มาจับๆ นะ ญา เตอ เยซู บูวัจ บรี ฮาบิฮ ดัฮ เตด ฌาดี นามา. ญา บูวัจ กะฆีเตอ กรานา นะ บูวัจ บรี นู ดูวา บือลัฮ อีนี ฌาดี ซา ซือมียา นู บารู ลือกัจ บือซามา ฌางัน ญา. ฌาดี-จะ ญา บูวัจ บรี กูญา ซือนัง บือซามา เลอ. 16 นู ญา มาตี เดะ กายู ปลีตัก เตอ ญา บูวัจ บรี ดูวา บือลัฮ อีนี บือซามา บาฌิ ฌาดี ซา ญาวา ดัฮ บูวัจ บรี บาฌิ ฌางัน ตูฮัด เดะ อาตัซ ดัฮ. กะฆีเตอ ญา บูวัจ บรี ลาฆู ซาเกะ-ฮาตี บือซามา อีตู บูวัก ฮาบิฮ ดัฮ. 17 กะฆีเตอ เยซู คริด มาแรฮ มือญาเระ บรีตา นู บาฌิ บีตาฮู กะ กาเญา นู ฌาโวฮ เดะ ตูฮัด บีตาฮู กะ ลูมอฮ กูญา นู ดาปิก ฌูฆา จะ นะ ดูโดะ ซือนัง ซือลามัจ บือเลฮ เลอ. 18 ซาเบะ ญา บูวัจ บรี กีตา ดูวา บือลัฮ นะ มาโซะ รอจ กะ อาโปก เดะ อาตัซ บือกะ ซา ซือมืองัจ นะ ตูฮัด อีตู บาวา กีตา. 19 กรานา ลาฆู อีตู วะตู อีนี กาเญา เตด ฌาดี ซือมียา บักซา ลูวัยํ บักซา อาซิก ลาฆี ตาปี กาเญา ฌาดี ลูมอฮ ซือมียา ซา บักซา บือซามา ฌางัน โกะ ซือมียา นะ ตูฮัด ฌาดี ลูมอฮ อานะ กือมอน นะ ตูฮัด เดะ อาตัซ. 20 กาเญา ฌาดี ซือรูปา รูมัฮ นู อาเกะ ดัฮ นู อาดา ลูมอฮ ปือญูโรฮ นะ ตูฮัด ฌางัน ลูมอฮ ซือมียา ตูโดฮ ลาฆู นะ ตูฮัด ฌาดี จาวัก รูโซะ. อาดา เยซู คริด ตะอาซิก ฌาดี จาวัก ซรี เลอ. 21 นู โกะ บือนา บารัก ซือมูฮา นะ รูมัฮ อีตู ลือกัจ บือซามา ฌางัน เยซู เตอ ญา กือนา บือฮูโบก บรี บาฌิ ดัฮ ตืองัฮ ฌาดี รูมัฮ นู บือซัยํ ฌาดี บาลัย นู ซรัฮ บรี กะ ตูฮัด ดัฮ. 22 นู กาเญา ลือกัจ บือซามา ฌางัน เยซู เตอ กาเญา ฌูฆา ตืองัฮ กือนา บอฮ บือซามา บรี ฌาดี บาลัย นะ ตูฮัด เดะ อาตัซ นู อาดา ซือมืองัจ นะ ตูฮัด ดูโดะ.
1 ซาเบะ ลาฆู อีนี กู เปาโล นู อาดา ดูโดะ เดะ ราตัย กรานา เยซู คริด เตอ บีดา นะ ตูโลก กาเญา นู ฌาดี ซือมียา บักซา อาซิก กู บือซาโวจ กะ ตูฮัด. 2 ซูโงฮ กาเญา ดืองัยํ ดัฮ จะ นู ตูฮัด ญา ฮาลัย บรี ซือลามัจ กะ กู ญา บรี กู บือกรือฌา ลาฆู นะ ญา กรานา กาเญา. 3 ลาฆู นะ ตูฮัด อีตู ฌาดี ลาฆู ดาลับ ซูโงฮ นู ตูฮัด ปลีฮัจ บรี กะ กู ตาฮู. ลาฆู อีนี กู ฆาแรฮ ดัฮ ซีงี ฆาแรฮ บรี ฌือกอซๆ. 4 กะ กาเญา นะ บาจา ลาฆู อีนี กาเญา นะ ตาฮู จะ นู ลาฆู ดาลับ ซูโงฮ นะ เยซู คริด อีนี มาโซะ เดะ ฮาตี นะ กู กือนา ดัฮ. 5 เดะ กาลา นูตู ตูฮัด เดะ อาตัซ เตด มือญาเระ ลาฆู อีนี กะ ลูมอฮ ซือมียา ตาปี กาลา อีนี ญา บูวัจ บรี ซือมืองัจ นะ ญา นะ ปลีฮัจ ลาฆู อีนี กะ ลูมอฮ ปือญูโรฮ นู ญา ปีเลฮ ดัฮ เตอ กะ ลูมอฮ ซือมียา ตูโดฮ ลาฆู นะ ญา เตอ. 6 ลาฆู ดาลับ ซูโงฮ อีตู ฌาดี-จะ กรานา บรีตา นู บาฌิ นะ ตูฮัด เตอ โกะ ลูมอฮ บักซา อาซิก ซาโมจ ปือซากา บือซามา ฌางัน ลูมอฮ บักซา ยิว ดัฮ ฌาดี ซา ญาวา บือซามา ฌางัน กูญา เตอ อาดา บาฮาเฆด บือซามา ฌางัน กูญา เดะ บือนา บาฌิ นู ตูฮัด เดะ อาตัซ บือฌาญี นะ บรี เลอ. เยซู คริด เลอ นู บูวัจ บรี กูญา บือเลฮ บือซามา กะฆีเตอ. 7 ตูฮัด ญา ฮาลัย บรี ซือลามัจ กะ กู บรี กู ฌาดี ซือมียา บือกรือฌา เดะ บรีตา นู บาฌิ อีตู. ญา บือกรือฌา ซูโงฮ บรี กู ฌาดี กะฆีนี. 8 เดะ โกะ ซือมียา นะ ตูฮัด กู ฌาดี ซือมียา ดือมิ-ตอจ ลือเบฮ เดะ กาวัด. ตาปี ตูฮัด เดะ อาตัซ ญา ฮาลัย บรี ซือลามัจ กะ กู บรี กู อาดา จือลัฮ นะ มือญาเระ บรีตา นู บาฌิ อีนี บรี กะ ลูมอฮ บักซา อาซิก ตาฮู. ฌาดี ลาฆู ปาซัน เยซู คริด นู บือซรี บาฌิ ซูโงฮ เดะ มานามา ฮอย ตือกอซ ดัฮ. 9 กะฆีเตอ กู อาดา จือลัฮ นะ บรี ลูมอฮ ซือมียา ซือมูฮา ลีฮัจ ซัฮ นู ตูฮัด เดะ อาตัซ นะ บูวัจ นามา บรี ลาฆู ดาลับ ซูโงฮ นะ ญา ซีงี นะ รือมัก ดัฮ. ญา นู บือฌาดี บือนา บารัก ซือมูฮา เตอ ญา บูวัจ บรี ลาฆู อีนี บูนี ดัฮ เดะ ดาลับ ญา บรี ลูมอฮ ซือมียา กาลา นูตู เตด บือเลฮ ลีฮัจ เตด บือเลฮ ตาฮู ดัฮ. 10 กะฆีเตอ เดะ วะตู อีนี ญา บรี ซา ลูมอฮ นะ ตูฮัด นะ บูวัจ บรี ลูมอฮ โกะ ฌิด โกะ ฮาตู กรัซ เดะ โซะ อาตัซ นะ ตาฮู บาฌิ จะ นู ตูฮัด เดะ อาตัซ ญา อาดา อากัน บาญะ ราตา มาจับ. 11 ญา บูวัจ กะฆีนี บือกะ ลาฆู ญา อีงัจ เดะ ฮาตี ตะเดะ ดูลู นูตู. ลาฆู อีนี ญา ซูโรฮ เยซู คริด ตูฮัด นะ กีตา บือกรือฌา บรี ฌาดี รือมัก ดัฮ. 12 กรานา กีตา อาดา ลือกัจ บือซามา ฌางัน เยซู ปือจายา กะ ญา ดัฮ กะฆีเตอ กีตา ฮาตี บรานี นะ มาโซะ รอจ กะ ตูฮัด ฮอย เตด บรูบัฮ-ฮาตี. 13 กะฆีเตอ กู ปรีงัจ กะ กาเญา จะ ฌางัน นะ อูโนยํ เลอ ซาเบะ กู กือนา ซูซัฮ โตระ กรานา กาเญา. นู กู กือนา ซูซัฮ กะฆีนี นะ บรี กาเญา ดูโดะ ซือนัง บาฌิ. 14 ซาเบะ ลาฆู อีนี กู ตูกู ลูโตจ บือซาโวจ กะ อาโปก เดะ อาตัซ. 15 เดะ โซะ ลาแงะ เตอ เดะ โซะ ดือนียา เตอ ลูมอฮ ดีบราดี ซือมูฮา ฌาดี ลูมอฮ ดีบราดี กะฆีเตอ ซาเบะ ฌาดี ลาฆู นู ดาตัก เดะ อาโปก เดะ อาตัซ เลอ. 16 กู มีตา เดะ ญา บรี ญา ซูโรฮ ซือมืองัจ นะ ญา นะ บูวัจ บรี กาเญา ตือฆัยํ-อูรัจ บาญะ เดะ โซะ ฮาตี. อาดา อูรัจ บาญะ กะฆีนี บือกะ นู ญา มือฆัฮ บาฌิ บาญะ ซูโงฮ. 17 มีตา บรี เยซู คริด นะ อาดา ดูโดะ เดะ ฮาตี นะ กาเญา ซาเบะ กาเญา ปือจายา ดัฮ บรี กาเญา กือฌะ-กือมัซ เดะ ลาฆู ซายัก ซือรูปา อาดา ฌากัยํ นู กือฌะ อาดา จาวัก นู ตือโฆฮ. 18 มีตา บรี กาเญา นะ บือเลฮ ตาฮู บรี บาฌิ บือซามา ฌางัน โกะ ซือมียา นะ ตูฮัด ซือมูฮา นู เยซู คริด ซายัก กะ กีตา บาญะ นู ลือฆา ซูโงฮ ปาญัก ซูโงฮ ตีงี ซูโงฮ ดาลับ ซูโงฮ เลอ. 19 บรี กาเญา ตาฮู บาฌิ จะ ญา ซายัก กะฆีนี มีเซ-จะ ลาฆู ซายัก นะ ญา กีตา อีงัจ เตด รอจ. นู กาเญา ตาฮู กะฆีนี นะ บูวัจ บรี กาเญา ปือนอฮ ฌางัน โกะ บือนา บาฌิ ซูโงฮ นะ ตูฮัด ปือนอฮ มีเม ดัฮ. 20 บรี กีตา มือโอจ กะ ตูฮัด เดะ อาตัซ เลอ. ญา เลอ บือเลฮ บูวัจ บือนา บือซัยํ ซือซูโงฮ ลือเบฮ เดะ กีตา นะ มีตา โปด ลือเบฮ เดะ กีตา นะ อีงัจ เลอ ตูโรจ กะ ปือมือฆัฮ นะ ญา นู บือกรือฌา กรัซ เดะ ฮาตี นะ กีตา บรี ฌาดี กะฆีเตอ เลอ. 21 กีตา นู อาดา เดะ ซา ลูมอฮ นะ ญา นู ลือกัจ บือซามา ฌางัน เยซู คริด เตอ บรี กีตา มือโอจ กะ ตูฮัด เดะ อาตัซ ปูฌี กะ ญา ซือลาลู ซือมาญัก-รอจ เลอ. อาเมน
1 กะฆีเตอ กู นู อาดา ดูโดะ เดะ ราตัย กรานา ตูฮัด เตอ กู ฆางู มีตา เดะ กาเญา บรี กาเญา ตูโรจ ฌิบาฌิ บรี ปาโตจ ฌางัน ลาฆู นู ตูฮัด บือเลฮ ปาเงน กาเญา ดัฮ. 2 ฌาดี-จะ บรี กาเญา อาดา ฮาตี มือนูโนะ ฮาตี บือแฌะ ราตา มาจับ. บรี กาเญา ตาฮัด-ฮาตี ลามา. บรี กาเญา ซายัก บือซามา-ซามา ตาฮัด-ฮาตี บือซามา เตด บูวัจ บาลัซ. 3 กือนา กูวาซา ฌาฆา กือมัซๆ เลอ บรี บือซามา-ฮาตี บาฌิ บือกะ นู ซือมืองัจ นะ ตูฮัด อีกัจ กาเญา บรี ฌาดี ซา ดัฮ บรี ซือนัง บือซามา-ซามา กะฆีเตอ เลอ. 4 อาดา ซา ญาวา นะ ญา ซา ซือมืองัจ นะ ญา เตอ ซือรูปา บือกะ อาดา ซา ลาฆู นู ตูฮัด บือเลฮ ปาเงน กาเญา ดัฮ บรี จาดัก นะ ดาปัจ. 5 อาดา ซา ตูฮัด เตอ. อาดา ซา ลาฆู นู กาเญา ปือจายา เตอ. อาดา ซา ลาฆู ซือลับ เดะ อาเย เตอ. 6 อาดา ซา ตูฮัด เดะ อาตัซ นู ฌาดี อาโปก นะ ลูมอฮ ซือมียา ซือมูฮา. ญา เตอ อาดา เดะ โซะ อาตัซ กูญา ซือมูฮา อาดา เดะ ตืองัฮ กูญา ซือมูฮา อาดา เดะ ดาลับ กูญา ซือมูฮา เลอ. 7 กะ กีตา โซก ซืออูรัก ญา ฮาลัย บรี บือนา นู บาฌิ ซือรูปา บือกะ เยซู คริด ฮาลัย บรี ดัฮ. 8 ซาเบะ กะฆีเตอ อาดา ปือมือเลา นะ ตูฮัด นู จะ "กาลา ญา ญาแญะ ปี กะ โซะ ตีงี เดะ อาตัซ ญา บาวา ลูมอฮ ฮามา บือปี ซามา ดัฮ. ญา ฮาลัย บรี บือนา นู บาฌิ กะ ลูมอฮ ซือมียา." 9 นู มือเลา จะ "ญา ญาแญะ ปี" ฌาดี นามา เลอ? ฌาดี-จะ ดูลู เตอ ญา ตูโรด มาแรฮ ดัฮ รอจ กะ ดือนียา โซะ บาวัฮ. 10 กะฆีเตอ ญา นู ตูโรด มาแรฮ เตอ ญา เลอ นู ญาแญะ ปี ดัฮ กะ โซะ ตีงี เดะ อาตัซ ลาแงะ ราตา บีดา ญา อาดา ปือนอฮ เดะ บือนา บารัก ราตา. 11 บือนา บาฌิ นู ตูฮัด ฮาลัย บรี ฌาดี ซือมียา กะฆีนี นู ซือมียา ซือตืองัฮ ฌาดี ปือญูโรฮ นะ ญา เตอ ซือตืองัฮ ฌาดี ซือมียา ตูโดฮ ลาฆู นะ ญา ซือตืองัฮ ฌาดี ซือมียา มือญาเระ บรีตา นู บาฌิ ซือตืองัฮ ฌาดี ซือมียา บือบือลา ซือมียา อาฌัยํ ลูมอฮ ซือมียา ปือจายา. 12 ญา บูวัจ กะฆีนี บรี กูญา นะ ซียะ โกะ ซือมียา นะ ตูฮัด บรี ฌาดี ซือมียา บือกรือฌา นะ ญา นู บรี ญาวา นะ เยซู คริด ฌาดี กือฌะ-กือมัซ. 13 กะฆีเตอ กีตา ซือมูฮา นะ รอจ กะ ตือกอซ นู กีตา อาดา ซาฮาตี ปือจายา_ นะ กราลา นานะ นะ ตูฮัด บรี บาฌิ เตอ นะ ฌาดี ซือมียา บือซัยํ โซะ ฮาตี เตอ นะ ฌาดี ซือรูปา บือกะ เยซู คริด บาฌิ ปือนอฮ ดัฮ เลอ. 14 กะฆีเตอ กีตา เตด ฌาดี นานะ ดือมิ ลาฆี. อาดา ซือมียา บาอากัน ซือตืองัฮ นู นะ ตีปู อาฌัยํ ลาฆู ซาลัฮ แนฮ-ฌือแนฮ. ซือมียา อีนี ซือรูปา อูมะ บือซัยํ ซือรูปา อาเงน นู ตือฆัยํ นะ บาวา กีตา รีวัก ปี มาแรฮ บรี ซือซัจ ฌาลัด. 15 ตาปี กีตา บูกัด นานะ กะฆีเตอ. นู กีตา ซายัก บือซามา ตูโรจ กะ ลาฆู นู กือนา กีตา กือนา ฌาดี ซือมียา บือซัยํ ราตา มาจับ นู ลือกัจ ฌางัน เยซู คริด นู ฌาดี ปาลา เตอ. 16 โกะ กลือกะ นะ ญาวา ซือมูฮา บือฮูโบก บือซามา ฌางัน เยซู คริด บาฌิ ดัฮ. ญาวา ซือมูฮา อีตู ลือกัจ ดัฮ เดะ โกะ ตือนอซ ราตา ซือรูปา บือกะ นู ตูฮัด บือเลฮ บรี ดัฮ. กาลา กลือกะ โซก ซือมาจับ บูวัจ ตูโรจ มาจับ นะ ญา บาฌิ ดัฮ ญาวา ซือมูฮา นะ บือซัยํ ซือรูโลยํ ซาเบะ โกะ กลือกะ ซายัก บือซามา-ซามา. 17 กะฆีเตอ กู ปรีงัจ กะ กาเญา มือเลา กือมัซๆ เดะ นามา นะ ตูฮัด เตอ ตะเดะ อีนี ฌางัน บรี กาเญา บูวัจ ตูโรจ ซือรูปา ลูมอฮ บักซา อาซิก นู กูญา ซือมาตา อีงัจ กะ ลาฆู เตด บือฆูนา. 18 ฮาตี นะ กูญา กือลับ ฮาบิฮ ดัฮ. กูญา ดูโดะ ฌาโวฮ เดะ ตูฮัด นู บรี ฮีโดะ กรานา กูญา บูดอ เตด ตาฮู เตอ กูญา ตือฆัยํ-ฮาตี ดัฮ เลอ. 19 กูญา เตด บราซา จือและ นามา โปด ปลือปัซ ญาวา ตะอาซิก บรี ลือกัจ เดะ ลาฆู นู เตด บือฆูนา ลาฆู บือกาเซฮ แนฮ-ฌือแนฮ ลาดัจ บูวัจ ลาฆู รูบือฮีรู ราตา มาจับ ตีเมา นะ บราดู. 20 ตาปี กาเญา เตด บือเลฮ บลาฌัยํ ลาฆู นะ เยซู คริด กะฆีเตอ. 21 ซูโงฮ เลอ นู กาเญา มือนีงัย ลาฆู นะ ญา ดัฮ ฌาดี มูเระ นะ ญา นู บลาฌัยํ ลาฆู รือมัก ฌาดี-จะ ลาฆู นะ เยซู เลอ. 22 กาเญา กือนา อูฆัย ตีงัน ญาวา นู ลามา นะ กาเญา บูวัก เลอ นู บูวัจ บรี กาเญา ลาดัจ ตูโรจ มาจับ นู ดูลู. ญาวา นู ลามา อีตู ตืองัฮ นะ บูโระ บูโซะ ดัฮ ตูโรจ นู ฮาตี ฆาละ อีงัจ นู นะ มือนีปู. 23 กาเญา กือนา ฌาดี บารู ดัฮ ฌางัน ฮาตี ฌางัน ลาฆู นู อีงัจ ซามา. 24 กือนา อาเมด ญาวา นู บารู มาแรฮ ปากัย เลอ นู บือฌาดี ซือรูปา บือกะ ตูฮัด ดัฮ นู นะ บรี กาเญา บาฌิ-ตือปัจ อาดา ฮาตี จรัฮ บาฌิ นู ซูโงฮ เตอ. 25 กะฆีเตอ กาเญา กือนา บราดู มือเลา มืออูปัย บรี ฮาบิฮ. "กือนา ปาคัจ มือเลา ลาฆู นู ซูโงฮ ฌางัน กาวัด" ซาเบะ กีตา ฌาดี ซือรูปา กลือกะ นู บือซามา เดะ ซา ญาวา ดัฮ. 26 "มีเซ-จะ มูซัยํ โปด ฌางัน บูวัจ ดูซา." ฌางัน มืออาดู ตือดะ รอจ กะ มาลับ. 27 ฌางัน บรี กือปาลา ฮาตู ซีตัด อาดา จือลัฮ นะ มาโซะ. 28 ซือมียา นู ดือละ มือญูรี ฌางัน นะ มือญูรี ปูลัก ตาปี บรี ญา บือกรือฌา บรี บาฌิ บรี ญา นะ บือเลฮ ฮาฆิ บือนา บารัก กะ อูรัก ฮาฌะ. 29 ฌางัน บรี มูโลจ นะ กาเญา มือเลา ปือมือเลา นู เตด บือฆูนา ตาปี บรี มือเลา ปือมือเลา นู บาฌิ นู นะ ตูโลก กาวัด บือกะ ญา บือคานะ นะ บรี ซือลามัจ กะ ซือมียา นู ดืองัยํ. 30 ฌางัน บูวัจ บรี ซือมืองัจ นู บาฌิ บือซรี นะ ตูฮัด เตด ซือนัง-ฮาตี. ญา เลอ ฌาดี มือกรา นู กาเญา ฌาดี ซือมียา นะ ตูฮัด ดัฮ ตือดะ อารี อีตู นู กาเญา นะ ลือปัซ ซุจ บาฌิ ดัฮ. 31 ลาฆู กรัซ-ฮาตี ลาฆู รีเซา-ฮาตี ลาฆู มูซัยํ เดะ ฮาตี ลาฆู บือตือฆัฮ ลาฆู มืออูปัจ ลาฆู อีงัจ นะ บูวัจ ซาลัฮ ราตา มาจับ เตอ บรี กาเญา บูวัก ลาฆู อีนี ซือมูฮา ปี ฌาโวฮ เดะ กาเญา บรี ฮาบิฮ เลอ. 32 ตาปี บรี กาเญา ตือจีฮัด บือซามา บรี ฮาตี บาฌิ บือซามา บรี อาเกะ ซาลัฮ นะ กาวัด ซือรูปา บือกะ ตูฮัด เดะ อาตัซ อาเกะ ซาลัฮ นะ กาเญา กรานา เยซู คริด ดัฮ.
1 กาเญา ฌาดี นานะ นู ตูฮัด เดะ อาตัซ ซายัก ซูโงฮ. กะฆีเตอ กาเญา กือนา ตูโรจ ซือรูปา กะ ญา. 2 กือนา บูวัจ ตูโรจ เลอ กือนา ซายัก ราตา ซือรูปา เยซู คริด ซายัก กีตา ยอม ซรัฮ ญาวา นะ ญา กรานา กีตา บรี ฌาดี ซือรูปา บารัก บาวู นู ซรัฮ มือญือมัฮ กะ ตูฮัด นู ตูฮัด ซูกา. 3 บรี กาเญา บูวัจ นู ลาฆู บือฆูนา ฌางัน โกะ ซือมียา นะ ตูฮัด. ลาฆู บือกาเซฮ ลาฆู เตด บือฆูนา ซือมูฮา ลาฆู ฮาลูบา โปด ลาฆู กะฆีเตอ ฌางัน นะ มือเลา ซิอูซิ เลอ. 4 ฌางัน มือเลา ลาฆู ตะอารัฮ ลาฆู บูดอ ลาฆู ฮาตี ซูมก เตอ นู ฌาดี ลาฆู เตด ปาโตจ นะ มือเลา. ตาปี กะฆีนี บาฌิ กือนา มือเลา บรี ซือลามัจ กะ ตูฮัด เลอ. 5 กือนา ตาฮู ซูโงฮ จะ ซือมียา บือกาเซฮ ซือมียา บูวัจ ฮอย เตด บือฆูนา ซือมียา ฮาลูบา เตอ โกะ ซือมียา อีตู เลอ ฮอย ปือซากา เดะ ดือนียา บารู นะ เยซู คริด ฌางัน ตูฮัด เดะ อาตัซ. นู ลาฆู ฮาลูบา อีตู ฌาดี ซือรูปา ลาฆู ตูเฮะ กะ โกะ บราลา. 6 ฌางัน บรี ซาปา นู มือเลา ลาฆู เตด กือนา นะ มือนีปู กาเญา. ฌาดี กรานา ลาฆู ปือบูวัจ กะฆีเตอ นู ตูฮัด นะ มูซัยํ กรัจ ฮูโกบ ลูมอฮ ซือมียา นู เตด มือนีงัย กะ ญา. 7 กะฆีเตอ กาเญา ฌางัน ปี บือเฆาะ ฌางัน ลูมอฮ ซือมียา อีตู. 8 ดูลู กาเญา ดูโดะ โซะ กือลับ ตาปี วะตู อีนี กาเญา ฌาดี ลูมอฮ ซือมียา นะ ตูฮัด นู ดูโดะ เดะ โซะ จรัฮ ดัฮ. กือนา บูวัจ ตูโรจ กะ ลาฆู โซะ จรัฮ เลอ. 9 จรัฮ อีตู บูวัจ บรี บูวัฮ นู บาฌิ ราตา ฌือแนฮ นะ บือตูโมฮ ฌาดี-จะ ลาฆู บาฌิ เตอ ลาฆู บาฌิ-ตือปัจ เตอ ลาฆู นู ซูโงฮ เตอ. 10 กะฆีเตอ กาเญา กือนา มือญาซัจ ลาฆู นามา นู นะ บรี ตูฮัด ซูกา-ฮาตี. 11 ฌางัน มาโซะ บือซามา ฌางัน ลาฆู โซะ กือลับ นู ฮอย บูวัฮ ลาลู ตาปี กาเญา กือนา บูวัจ บรี ลาฆู อีตู ปลีฮัจ ซัฮ จะ ฌาดี กะฮามี ซูโงฮ. 12 มีเซ-จะ นะ มือเลา โปด กะ ปาซัน ลาฆู นู กูญา จูรี บูวัจ เตอ ญา จือและ ซูโงฮ เลอ. ฌางัน มือเลา ปาซัน ลาฆู ปือบูวัจ กะฆีเตอ. 13 นู จรัฮ อีตู บูวัจ บรี ปือบูวัจ นะ ราตา ซือมูฮา ปลีฮัจ ซัฮ ดัฮ. ซาเบะ ลาฆู ซือมูฮา นู ปลีฮัจ ซัฮ เตอ ฌาดี จรัฮ ดัฮ. 14 ซาเบะ กะฆีเตอ อาดา ปือมือเลา นู จะ "โอ ซือมียา ลีนา เออ กือนา บีกัซ เลอ. กือนา ฮีโดะ ปาเระ เดะ มาตี เลอ. กะฆีเตอ เยซู คริด นะ ซูโลฮ บรี จรัฮ กะ เกา." ญา จะ. 15 กะฆีเตอ กาเญา กือนา ฌาฆา บาฌิ บรี ตูโรจ กะ ฌาลัด นู บาฌิ. ฌางัน ฌาดี ซือมียา ฮอย อากัน ตาปี บรี ฌาดี ซือมียา นู ปานัย อากัน เลอ. 16 อาดา จือลัฮ นะ บูวัจ ลาฆู บาฌิ วะตู ดีฮา โปด กือนา บูวัจ เลอ ซาเบะ บีลัก อารี อีนี ฌาดี ฮาดัจ นู ฌาฮัจ. 17 กะฆีเตอ ฌางัน ฌาดี ซือมียา บูดอ ตาปี กือนา บรี มาโซะ เดะ ฮาตี ลาฆู นามา นู ตูฮัด ซูกา. 18 ฌางัน มาโบะ อาระ นู นะ บูวัจ บรี ซือมียา บือนาซา ตาปี กาเญา กือนา ปือนอฮ ฌางัน ซือมืองัจ นะ ตูฮัด เลอ. 19 กือนา มือเลา บือซามา ฌาดี ลาฆู มือญาญี ปูฌี กะ ตูฮัด เตอ มือญาญี มือโอจ กะ ญา ดาตัก เดะ ฮาตี นะ กาเญา. กือนา มือญาญี บือรามัย ปูฌี กะ ตูฮัด ปือนอฮ เดะ ฮาตี เลอ. 20 เดะ ลาฆู ซือมูฮา เตอ กือนา บรี ซือลามัจ กะ ตูฮัด นู อาโปก เดะ อาตัซ ซือลาลู เดะ นามา นะ เยซู คริด ตูฮัด นะ กีตา. 21 กือนา มือนีงัย กะ กาวัด บือซามา-ซามา ซาเบะ กาเญา ตูเฮะ กะ เยซู คริด. 22 โกะ บีนี เออ กือนา มือนีงัย กะ โกะ ลากี นะ กาเญา ซือรูปา กาเญา มือนีงัย กะ ตูฮัด. 23 ซาเบะ ลากี ฌาดี กือปาลา นะ บีนี นะ ญา ซือรูปา บือกะ เยซู คริด ฌาดี กือปาลา นะ ซา ลูมอฮ นะ ญา. ซา ลูมอฮ อีตู ฌาดี ญาวา นะ เยซู คริด นู ญา ตูโลก บรี ฮีโดะ ลือปัซ บาฌิ เลอ. 24 ซา ลูมอฮ อีตู ยอม มือนีงัย กะ เยซู คริด กะฮามี เตอ โกะ บีนี กือนา มือนีงัย กะ โกะ ลากี นะ กูญา กะฆีเตอ เลอ ราตา มาจับ เลอ. 25 โกะ ลากี เออ กือนา ซายัก บีนี นะ กาเญา เลอ ซือรูปา บือกะ เยซู คริด ซายัก ซา ลูมอฮ นะ ญา ยอม ซรัฮ ญาวา นะ ญา ฆาตี ซา ลูมอฮ อีตู 26 บีดา นะ ซูโรฮ ปือมือเลา นะ ญา บูวัจ บรี ลูมอฮ อีตู ฌาดี จรัฮ บาฌิ กรานา บาโซฮ ฌางัน อาเย ดัฮ. 27 ญา อีงัจ นะ บรี ซา ลูมอฮ อีตู บือซายา บือซรี เตอ ฮอย นามา นู ตะอารัฮ ฮอย บือกัซ จีรอจ นามา โปด ตาปี ฌาดี จรัฮ บาฌิ ฮอย ตือปัจ นู นะ มือฌัฮ นะ บรี ซา ลูมอฮ อีตู ฌาดี ซือรูปา บีนี นะ ญา. 28 กะฆีเตอ เลอ โกะ ลากี กือนา ซายัก โกะ บีนี นะ กูญา บือกะ ซายัก ญาวา ตะอาซิก. ซือมียา นู ซายัก กะ บีนี นะ ญา เตอ ซือรูปา ญา ซายัก กะ ญาวา ตะอาซิก. 29 ซาเบะ ฮอย ซาปา นู นะ บือชี กะ ญาวา ตะอาซิก ตาปี ญา บือบือลา ญาวา อีตู บือฮีมัจ บรี บาฌิ ซือรูปา บือกะ เยซู คริด บือบือลา บือฮีมัจ บาฌิ กะ ซา ลูมอฮ นะ ญา. 30 ซาเบะ กีตา อีนี ฌาดี กลือกะ เดะ ญาวา นะ เยซู คริด เลอ. 31 อาดา เดะ ซูรัจ ปือมือเลา นะ ตูฮัด นู จะ "กะฆีเตอ เลอ กีลากี นะ ตีงัน เอด อาโปก นะ ญา ปี ดูโดะ บือซามา บือซูโงฮ-ซูโงฮ ฌางัน บีนี นะ ญา. กูญา กือดูวา นะ ฌาดี ญาวา ซือตือปัจ." ญา จะ. 32 อาดา ลาฆู ดาลับ ซูโงฮ นู บูนี เดะ ดาลับ ปือมือเลา ซือปาตัฮ อีนี. กู ลีฮัจ จะ ลาฆู อีนี ตูโญะ กะ เยซู คริด ฌางัน ซา ลูมอฮ นะ ญา. 33 มีเซ-จะ กะฆีเตอ กาเญา โซก ซืออูรัก กือนา ซายัก บีนี ซือรูปา ซายัก กะ ญาวา ตะอาซิก. บีนี ฌูฆา กือนา ตูเฮะ กะ ลากี นะ ญา.
1 โกะ นานะ เออ กือนา มือนีงัย กะ เอด อาโปก นะ กาเญา ซาเบะ ลีฮัจ กะ ตูฮัด. นะ บูวัจ กะฆีนี กือนา ดัฮ. 2 ซูรัจ ปือมือเลา นะ ตูฮัด จะ "กือนา ตูเฮะ กะ เอด อาโปก นะ เกา." ญา จะ. อีนี ฌาดี ปือมือซัด นะ ตูฮัด ซือปาตัฮ ลามูลา นู อาดา ปือมือเลา ฌาญี ฌูฆา. 3 ปือมือเลา ฌาญี อีตู ฌาดี-จะ "บีดา เกา นะ ปี ซือนัง บาลิ ซือนัง อาดา อูมอยํ ปาญัก เดะ นังฆรี นะ เกา." ญา จะ. 4 โกะ อาโปก เออ ฌางัน อาโจบ นานะ นะ กาเญา บรี รีเซา-ฮาตี. ตาปี กือนา ปูโฌะ นานะ อาฌัยํ กูญา บรี ตูโรจ กะ ลาฆู นะ ตูฮัด. 5 โกะ ปราโซฮ เออ กือนา มือนีงัย กะ ตกเก นะ กาเญา เดะ โซะ ดือนียา ฌางัน ฮาตี ตาโกจ ญาวา กือตัยํ. บรี กาเญา บือกรือฌา ฌางัน ฮาตี รือมัก ซือรูปา บือกะ กาเญา บือกรือฌา บีดา เยซู คริด. 6 กือนา มือนีงัย กะ กูญา บูกัด นะ บูวัจ เดะ โซะ ฮึลด มูคา นะ กูญา บรี กูญา ซูกา เตอ ตาปี มือนีงัย เลอ ซือรูปา กาเญา ฌาดี ปราโซฮ นะ เยซู คริด. กือนา บือกรือฌา ปือนอฮ เดะ ฮาตี บรี ตูฮัด เดะ อาตัซ ซูกา. 7 กือนา บือกรือฌา ซูกา-ฮาตี ซือรูปา บือกะ กาเญา ตูโลก ตูฮัด บูกัด ตูโลก ซือมียา. 8 ซาเบะ กาเญา ตาฮู จะ ตูฮัด นะ บรี รังวัน กะ ซือมียา นู บูวัจ บาฌิ เตด-จะ ญา ฌาดี ปราโซฮ เฆอ เตด. 9 โกะ ตกเก เออ กือนา บูวัจ กะฆีเตอ ฌูฆา เลอ ฌางัน ปราโซฮ นะ กาเญา. ฌางัน มืออารับ ปรือกัด กูญา ซาเบะ ตาฮู จะ ตูฮัด นะ กูญา นู อาดา เดะ อาตัซ ฌาดี ตูฮัด นะ กาเญา ซามา. ญา เลอ เตด ปีเลฮ มูคา นะ ซือมียา ดีฮา ลาลู เลอ. 10 โซะ ปือญูดัฮ บรี กาเญา ตือฆัยํ-อูรัจ ซาเบะ ลือกัจ บือซามา ฌางัน ตูฮัด นู มือฆัฮ ซูโงฮ. 11 กือนา ปากัย บรี มืออาลัจ ฌางัน บารัก ปากัย บือปรัก นะ ตาฮัน นู ตูฮัด บรี ซือมูฮา เลอ บีดา บรี กาเญา นะ บือเลฮ บลาวัด ฌางัน ฮาตู ซีตัด นู บูวัจ ลาฆู กีจอฮ. 12 ซาเบะ กาเญา เตด บลาวัด ฌางัน ลูมอฮ ซือมียา ตาปี บลาวัด ฌางัน โกะ ฌิด นู ซัยํ-บือซัยํ นู มือฆัฮ เตอ บลาวัด ฌางัน โกะ ฮาตู กรัซ นู ฮูโกบ ดือนียา นู กือลับ อีนี เตอ บลาวัด ฌางัน โกะ ฌิด นู ฌาฮัจ โตระ เดะ โซะ อาตัซ โปด. 13 กะฆีเตอ กาเญา กือนา ซาโมจ บารัก ปากัย บือปรัก นะ ตาฮัน นู ตูฮัด บรี ปากัย บรี มืออาลัจ ซือมูฮา เลอ. กะฆีเตอ เดะ อารี นู ฌาฮัจ เตอ กาเญา นะ บือเลฮ บือดีรี กือฌะ บลาวัด ฌางัน โกะ ซือตรู อีตู. กาลา ซุจ ฮาบิฮ ดัฮ กาเญา นะ บือดีรี กือฌะ เตด อาลัฮ. 14 กะฆีเตอ กือนา บือดีรี กือฌะ เลอ อาดา ลาฆู ซูโงฮ ฌาดี ซือรูปา ตาลี ปีงัก นะ กาเญา เตอ. อาดา ฮาตี รือมัก ฌาดี ซือรูปา บาฌู บือซี นู ตูโดก ตาฮะ ดาดา นะ กาเญา เตอ. 15 นู กาเญา ซียะ นะ มือญาเระ บรีตา นู บาฌิ นู บรี ซือนัง-ฮาตี เตอ ฌาดี ซือรูปา ปะตาปะ นู กาเญา บอฮ เดะ กากี. 16 นู กาเญา ปือจายา ฌาดี ซือรูปา ตือปัจ ซาฆัก. กือนา อาเกะ ตือปัจ ซาฆัก อีตู ปือฆัก ซือลาลู เลอ บีดา นะ บือเลฮ ปาดับ โกะ บูลุซ อาปี นู ฮาตู ฌาฮัจ นะ ตูโฮะ. 17 นู ตูฮัด บูวัจ บรี ฮีโดะ ลือปัซ บาฌิ ดัฮ ซาโมจ เลอ ฌาดี ซือรูปา โมะ บือซี ตูโดก ปาลา. ปือมือเลา นะ ตูฮัด นู ซือมืองัจ นะ ตูฮัด นะ บรี เตอ ซาโมจ เลอ ฌาดี ซือรูปา ปือดัก นะ กาเญา. 18 กือนา บือซาโวจ เลอ ซือลาลู. มีตา เดะ ตูฮัด ราตา มาจับ. กะฆีเตอ ฌาฆา เลอ ฌางัน บราดู ตูโรจ นู ซือมืองัจ นะ ตูฮัด บาวา เตอ. มีตา เลอ เดะ ตูฮัด บรี ตูโลก โกะ ซือมียา นะ ตูฮัด ซือมูฮา. 19 กือนา บือซาโวจ บีดา กู ฌูฆา มีตา เดะ ตูฮัด นะ บรี กู ปานัย มือเลา เตอ บรี กู บรานี นะ มือญาเระ ซัฮ ลาฆู ดาลับ ซูโงฮ นู ฌาดี บรีตา บาฌิ นะ ตูฮัด. 20 กรานา บรีตา นู บาฌิ อีตู กู ฌาดี ปือญูโรฮ นะ ตูฮัด นู อาดา เดะ ราตัย ดัฮ. มีตา เดะ ตูฮัด เลอ บรี กู ฮาตี บรานี นะ มือญาเระ ลาฆู อีตู บือกะ กู ฆาฆัฮ นะ มือญาเระ เตอ. 21 อาดา ทีคิกัด ฌาดี ซือรูปา อาดี นู กู ซายัก นู ฌาดี ซือมียา บือกรือฌา นะ ตูฮัด ซือมียา นู รือมัก. ญา เตอ นะ มือญาเระ กะ กาเญา ลาฆู ซือมูฮา บรี กาเญา นะ ตาฮู ลาฆู นะ กู ปือบูวัจ นะ กู ซือมูฮา. 22 กู ซูโรฮ ญา ปี ซารี กาเญา ซาเบะ ปาซัน อีนี บรี กาเญา ตาฮู ลาฆู นะ กามี ซือมูฮา บรี ญา นะ ปูโฌะ ฮาตี นะ กาเญา ฌูฆา. 23 กู มีตา เดะ ตูฮัด อาโปก เดะ อาตัซ ฌางัน เยซู คริด ตูฮัด นะ กีตา บรี กูญา นะ บูวัจ บรี โกะ ดีบราดี ดูโดะ ซือนัง ซือลามัจ ซายัก บือซามา ปือจายา กะ ตูฮัด. 24 มีตา เดะ ตูฮัด นะ ฮาลัย บรี ซือลามัจ กะ โกะ ซือมียา ซือมูฮา นู ซายัก เตด บราดู กะ เยซู คริด ตูฮัด นะ กีตา.
1 กู เปาโล ฌางัน ทิโมที นู ฌาดี ปราโซฮ นะ เยซู คริด กามี ฆาแรฮ ซูรัจ อีนี กีเรบ บรี กะ กาเญา นู ฌาดี โกะ ซือมียา นะ ตูฮัด ลือกัจ บือซามา ฌางัน เยซู คริด นู ดูโดะ เดะ นังฆรี ฟีลิบปี เตอ กะ โกะ ซือมียา บือบือลา ลูมอฮ กาเญา ฌางัน ลูมอฮ ซือมียา มือนูโลก นะ กาเญา ซามา. 2 มีตา เดะ ตูฮัด อาโปก นะ กีตา ฌางัน ตูฮัด เยซู คริด นะ บรี ซือลามัจ กะ กาเญา นะ บรี กาเญา ดูโดะ ซือนัง ซือลามัจ เลอ. 3 บีลัก กาลี นู กู อีงัจ กะ กาเญา กู บรี ซือลามัจ กะ ตูฮัด นะ กู. 4 บีลัก กาลี นู กู บือซาโวจ บีดา กาเญา ซือมูฮา กู บือซาโวจ ซูกา-ฮาตี ซูโงฮ 5 ซาเบะ ตะเดะ อารี ลามูลา รอจ กะ อารี อีนี กาเญา บือซามา ฌางัน กู เดะ ลาฆู มือญาเระ บรีตา นู บาฌิ นะ เยซู. 6 กู ตือตู-ฮาตี จะ ตูฮัด นู ฮึนตะ นะ บูวัจ กรือฌา นู บาฌิ เดะ ฮาตี นะ กาเญา ดัฮ ญา นะ บือกรือฌา ตือดะ ซุจ ดัฮ เดะ อารี นะ เยซู คริด เลอ. 7 นู กู ตือตู-ฮาตี กะฆีเตอ บาฌิ ดัฮ ซาเบะ กู ซายัก กาเญา ปือนอฮ เดะ ฮาตี ราตา ซือมียา. กรานา เตด-จะ กู กือนา ดูโดะ เดะ ปือฌารา เฆอ-จะ อาดา จือลัฮ นะ ฌาฆา บรีตา นู บาฌิ นะ ตูฮัด บูวัจ บรี ญา ตืองะ กือฌะ-กือมัซ ตือตู ดัฮ เตอ กาเญา ซือมูฮา บือเลฮ ซาโมจ บาฮาเฆด บือซามา ฌางัน กู ดัฮ เดะ ลาฆู นู ตูฮัด ฮาลัย บรี ซือลามัจ กะ กู เตอ เลอ. 8 ตูฮัด ฌาดี ซะซี นู กู อีงัจ ฌีราซา กะ กาเญา ซือรูปา บือกะ เยซู คริด ซายัก กาเญา. 9 กะฆีเตอ กู บือซาโวจ กรานา กาเญา นะ บรี กาเญา ซายัก บือตามัฮ พรัด บาญะๆ เลอ นะ บรี กาเญา ปานัย อากัน เตอ ตาฮู ราตา มาจับ จะ นู ดีฮา บาฌิ นู ดีฮา ฌาฮัจ. 10 กะฆีเตอ กาเญา นะ บือเลฮ บรีงัจ ดูลู ลาฆู นามา นู บาฌิ เดะ กาวัด บูวัจ บรี กาเญา นะ ฌาดี ซือมียา ฮาตี จรัฮ ซูโงฮ เตอ ฮอย ลาฆู นู นะ กือนา มือฌัฮ เตอ เดะ อารี นะ เยซู คริด อีตู. 11 กะฆีเตอ กาเญา นะ อาดา บูวัฮ นู ฌาดี ลาฆู บาฌิ-ตือปัจ ปือนอฮ เดะ ฮาตี. เยซู คริด นะ บูวัจ บรี ฌาดี กะฆีเตอ นะ บรี ลูมอฮ ซือมียา มือโอจ กะ ตูฮัด เดะ อาตัซ นะ ปูฌี กะ ญา. 12 ดีบราดี เออ กู บือคานะ นะ บรี กาเญา ตาฮู จะ ลาฆู นามา ซือมูฮา นู กู กือนา ดัฮ บูวัจ บรี บรีตา นู บาฌิ นะ ตูฮัด กือจัย ปี ราตา. 13 กะฆีเตอ ลูมอฮ ตาฮัน เดะ บาลัย นะ ราฌา ซือมูฮา ฌางัน ซือมียา อาซิก ปัจ อีนี ซือมูฮา ตาฮู บรี ซัฮ จะ นู กู อาดา เดะ ราตัย ดัฮ กรานา เยซู คริด เตอ. 14 ลาฆู นู กู กือนา ราตัย บูวัจ บรี ลูมอฮ ดีบราดี นู บาญะ ตือตู-ฮาตี เดะ ตูฮัด บูวัจ บรี กูญา พรัด บรานี นู นะ มือญาเระ ปือมือเลา นะ ตูฮัด เตด ตาโกจ เดะ ซาปา เลอ. 15 ซูโงฮ อาดา ซือตืองัฮ นู มือญาเระ ลาฆู นะ เยซู คริด ฌางัน ฮาตี ดือกี ฮาตี บือตือฆัฮ. ตาปี อาดา ซือตืองัฮ นู มือญาเระ ฌางัน ฮาตี บาฌิ. 16 กูญา อีนี บูวัจ กะฆีเตอ ซาเบะ ซายัก กะ กู ลีฮัจ จะ กู อาดา เปะ อีนี บรี อูฆัย ลาฆู นู กูญา อาดู ปาซัน บรีตา นู บาฌิ นะ ตูฮัด. 17 กูญา อีตู นู มือญาเระ ลาฆู นะ เยซู คริด ซีงี อีงัจ นะ บือเลฮ บาฌิ เดะ กาวัด ฮาตี กูญา เตด รือมัก เลอ. กูญา อีงัจ นะ บรี กู กือนา ซูซัฮ บือตามัฮ ลาฆี วะตู นู กู อาดา ดูโดะ เดะ ราตัย กะฆีนี. 18 ดัฮ กะฆีเตอ เตด ฌาดี นามา เลอ. กูญา ตืองัฮ บีตาฮู ลาฆู นะ เยซู คริด. อาดา นู ฮาตี เตด รือมัก ซือตืองัฮ ฮาตี รือมัก ซือตืองัฮ. ตาปี กู ซูกา-ฮาตี ซาเบะ กูญา มือญาเระ ลาฆู นะ เยซู ราตา มาจับ. ซูโงฮ กู นะ ซูกา-ฮาตี โตระ โซะ ฮึลด 19 กรานา กู ตาฮู จะ นู กาเญา บือซาโวจ เตอ นู ซือมืองัจ นะ เยซู คริด ตูโลก เตอ นะ ตูโลก กู บรี ลือปัซ ดัฮ. 20 กู อีงัจ ซือซูโงฮ จาดัก จะ กู นะ ฮอย เตด จือและ นามาๆ โปด. ซือรูปา ดูลู นู กู ฮาตี บรานี บูวัจ บรี กูญา มือโอจ กะ เยซู คริด เตอ บรี กู ฮาตี บรานี กะฆีเตอ วะตู อีนี ฌูฆา. เตด-จะ ญาวา กู นะ ฮีโดะ นะ มาตี โปด เตด นามา. 21 นู กู ฮีโดะ ฌาดี นามา? ฌาดี เยซู คริด เลอ. นู กู มาตี โปด ฌาดี นะ บือเลฮ อูโตก เตอ เลอ. 22 กะ ญาวา กู นะ ฮีโดะ ลาฆี บาฌิ เลอ กู นะ บือกรือฌา บรี อาดา บูวัฮ บาญะ. ตาปี กู อีงัจ เตด กือนา นะ ปีเลฮ โซะ ดีฮา. 23 กู ฆาโดฮ-ฮาตี เดะ โซะ ดูวา ฌาลัด อีนี. โซะ อีนี กู ซูกา-ฮาตี นะ มือนีงัน ปี ดูโดะ บือซามา ฌางัน เยซู คริด. นะ ฌาดี กะฆีเตอ ซูโงฮ บาฌิ ลาฆี เลอ. 24 ตาปี โซะ อาซิก กู ฆาฆัฮ นะ ฮีโดะ เดะ ญาวา อีนี ลาฆี บรี กู นะ บือเลฮ ตูโลก กาเญา ปูลัก. 25 กู ตือตู-ฮาตี กะฆีนี ดัฮ. กะฆีเตอ กู ตาฮู จะ กู นะ ฮีโดะ ลาฆี นะ ฮีโดะ บือซามา ฌางัน กาเญา บรี กาเญา นะ ปือจายา บาฌิ ซือรูโลยํ นะ ซูกา-ฮาตี เดะ ลาฆู ปือจายา อีตู เลอ. 26 กะฆีเตอ วะตู กู มาแรฮ ดาปัจ กาเญา ปูลัก กาเญา นะ บือเลฮ งันตืองัน เดะ เยซู คริด ลือเบฮ บาญะ ซาเบะ ลาฆู นะ กู. 27 กะฆีเตอ เลอ บรี กาเญา บูวัจ ตูโรจ บือกะ นู ปาโตจ ฌางัน บรีตา นู บาฌิ นะ เยซู คริด. กะฆีเตอ เตด-จะ กู นะ มาแรฮ ดาปัจ กาเญา เตด มาแรฮ ดาปัจ โปด ตาปี กู นะ ดืองัยํ ลาฆู นะ กาเญา จะ นู กาเญา ซือรูปา ลูมอฮ ตาฮัน นู บือดีรี บือซามา ฮาตี รือมัก เตอ นู บือซามา-ฮาตี บลาวัด กรานา บรีตา นู บาฌิ นู กาเญา ปือจายา ดัฮ 28 นู เตด ตาโกจ นามา เดะ ลูมอฮ ซือตรู เตอ. นู บูวัจ กะฆีนี นะ ฌาดี ปือนานา บูวัจ บรี กูญา ลีฮัจ จะ กูญา นะ บือนาซา กาเญา นะ ฮีโดะ ลือปัซ บาฌิ. ฌาดี ตูฮัด เดะ อาตัซ นู บรี ลือปัซ กะฆีเตอ. 29 กรานา ญา เตอ ฮาลัย บรี กาเญา นะ ตูโรจ กะ เยซู คริด บูกัด ซา ปือจายา กะ ญา เตอ ตาปี บรี ตาฮัด ซูซัฮ กรานา ญา ฌูฆา. 30 กะฆีเตอ กาเญา นะ บลาวัด ซือรูปา นู กาเญา ลีฮัจ กู บลาวัด ดัฮ บือกะ กาเญา ดืองัยํ จะ กู ตืองัฮ บลาวัด เดะ วะตู อีนี.
1 นู กาเญา อาดา ลือกัจ บือซามา ฌางัน เยซู คริด บูวัจ บรี ปูโฌะ ฮาตี นะ กาเญา เตอ. นู เยซู ซายัก กาเญา บูวัจ บรี ฮาตี นะ กาเญา ซือนัง เตอ. นู กาเญา บือรามัย บือซามา ฌางัน ซือมืองัจ นะ ญา นู กาเญา ฮาตี บาฌิ ตือจีฮัด กาวัด เตอ 2 กะฆีเตอ เลอ บรี กาเญา บูวัจ ลาฆู นู นะ บรี กู ซูกา-ฮาตี ปือนอฮ ดัฮ. บรี กาเญา บรีงัจ บือกีรา ซา ฮาตี ซายัก บือซามา เลอ. บรี กาเญา อาดา ฮาตี บือฮีมัจ บือซามา บรี บาฌิ เลอ ราตา มาจับ. 3 ฌางัน บูวัจ นามา นู อาดา ฮาตี มาจิก อีงัจ นะ บือเลฮ บาฌิ เดะ กาวัด เตอ ตาปี บรี กาเญา มือนูโนะ-ฮาตี กะ กาวัด อีงัจ จะ กาวัด เตอ บาฌิ เดะ กาเญา. 4 ฌางัน ซือมาตา บือฮีมัจ กะ ลาฆู ญาวา ตะอาซิก ตาปี บรี กาเญา โซก ซืออูรัก บือฮีมัจ ลาฆู นะ กาวัด ฌูฆา. 5 บรี กาเญา อาดา ฮาตี ซือรูปา บือกะ ฮาตี นะ เยซู คริด กะฆีนี เลอ 6 ญา เตอ เลอ อาดา ซา ญาวา ฌางัน ตูฮัด เดะ อาตัซ ซือลาลู. ตาปี นู ญา ดูโดะ ซือบายา ฌางัน ตูฮัด ญา เตด อีงัจ จะ ฆาโดฮ นะ ปือฆัก กือมัซ เลอ 7 ตาปี ญา ยอม ซรัฮ ตีงัน ดัฮ ยอม ซาโมจ ญาวา นะ ปราโซฮ ยอม มาแรฮ ฌาดี ซือรูปา บือกะ อูมัจ-ซือมียา ดัฮ. 8 วะตู ปลีฮัจ เดะ ดาลับ ญาวา ซือมียา ดัฮ ญา มือนูโนะ ญาวา ตะอาซิก ยอม มือนีงัย รอจ กะ มาตี ฌาดี-จะ 3 ยอม มาตี เดะ กายู ปลีตัก ดัฮ. 9 ซาเบะ กะฆีเตอ เลอ ตูฮัด เดะ อาตัซ อาเกะ เยซู ปี รอจ กะ โซะ ตีงี เดะ อาตัซ บรี ญา อาดา ปือนามา นู บาฌิ บาฌิ เดะ ปือนามา นู อาซิกๆ ซือมูฮา. 10 กะฆีเตอ โกะ ลูมอฮ ซือมูฮา เดะ โซะ ลาแงะ เตอ เดะ โซะ ดือนียา เดะ โซะ บาวัฮ ดือนียา โปด กูญา ซือมูฮา นะ ตูกู ลูโตจ มือนูโนะ มือญือมัฮ กะ นามา นะ เยซู. 11 มูโลจ นะ กูญา ซือมูฮา นะ มือเลา ซาโงะ จะ "เยซู คริด ฌาดี ตูฮัด เตอ เลอ." กะฆีเตอ กูญา นะ มือโอจ กะ ตูฮัด นู อาโปก เดะ อาตัซ. 12 กะฆีเตอ เลอ กาเญา นู กู ซายัก เออ กาเญา ยอม มือนีงัย กะ กู ซือลาลู บูกัด ซา วะตู นู กู อาดา บือซามา ฌางัน กาเญา ตาปี ลือเบฮ เดะ อีตู วะตู อีนี นู กู ฮอย ดัฮ บรี กาเญา มือนีงัย พรัด บาญะ เลอ. กะฆีเตอ นู กาเญา ฮีโดะ ลือปัซ บาฌิ ดัฮ กาเญา กือนา บือกรือฌา บูวัจ ตูโรจ เลอ อาดา ฮาตี ตาโกจ ญาวา กือตัยํ บูวัจ บรี ลือปัซ ฮาบิฮ ดัฮ. 13 ซาเบะ ตูฮัด เดะ อาตัซ เตอ ญา เลอ นู ตืองัฮ บือกรือฌา เดะ ฮาตี นะ กาเญา บูวัจ บรี กาเญา บือคานะ นะ ตูโรจ บือกะ ฮาตี นู บาฌิ นะ ญา เตอ บือเลฮ บูวัจ ตูโรจ กะฆีเตอ ฌูฆา. 14 กือนา บูวัจ บือนา ซือมูฮา ฮอย ลาฆู บือซูงุจ ฮอย ลาฆู บือตือฆัฮ. 15 กะฆีเตอ กาเญา นะ ฌาดี ซือมียา นู เตด กือนา มือฌัฮ ดัฮ นู ฮอย นามา นู ตะอารัฮ. กาเญา ฌาดี นานะ นะ ตูฮัด เดะ อาตัซ นานะ นู ฮอย ซาลัฮ เดะ ตืองัฮ ลูมอฮ ซือมียา ฮาดัจ อีนี นู ซูกา กีจอฮ นู ฮอย เตด ตือปากัย อีนี. เดะ ตืองัฮ ลูมอฮ กูญา อีตู กาเญา บือเลฮ ปลีฮัจ ดัฮ ซือรูปา โกะ มาตา จรัฮ นู ซูวัยํ เดะ ดือนียา 16 ฌาดี-จะ กาเญา กือนา อูโญะ ปือมือเลา นู บรี ฮีโดะ กะ กูญา. กะฆีเตอ เดะ อารี นะ เยซู คริด กู นะ บือเลฮ งันตืองัน ลาฆู นะ กาเญา จะ กู เตด บลารี ฮอย รังวัน เตด บือกรือฌา เตด บือเลฮ นามา เลอ. 17 ซาเบะ กาเญา ปือจายา ดัฮ บือเลฮ มือญือมัฮ ญาวา นะ กาเญา ตะอาซิก ฌาดี บารัก มือญือมัฮ กะ ตูฮัด. มีเซ-จะ กู ฆาโดฮ นะ มาตี ซือรูปา กู ฌาดี อาระ อางุน นู กือนา อูแร เดะ อาตัซ บารัก มือญือมัฮ นะ กาเญา เตอ กู นะ ซูกา-ฮาตี โตระ นะ ซูกา-ฮาตี บือซามา ฌางัน กาเญา. 18 กาเญา ฌูฆา กือนา ซูกา-ฮาตี โตระ บือซามา ฌางัน กู เลอ. 19 กะ ตูฮัด เยซู ซูกา กู จาดัก จะ เตด บราปา ลามา กู นะ ซูโรฮ ทิโมที ปี ซารี กาเญา. กะฆีเตอ ตานา กู มือนีงัย ลาฆู นะ กาเญา กู นะ ซูกา-ฮาตี เลอ. 20 กู ฮอย ซือมียา อาซิก นู ซือรูปา ทิโมที. ญา บอฮ-ฮาตี บือซูโงฮ-ซูโงฮ เดะ ลาฆู นะ กาเญา เตอ. 21 ซาเบะ ลูมอฮ ซือมียา อาซิก กูญา เตด อีงัจ กะ ลาฆู นะ เยซู คริด ตาปี อีงัจ กะ ลาฆู ญาวา นะ ตะอาซิก เตอ. 22 ตาปี กาเญา ตาฮู จะ ทิโมที ญา ฮาตี รือมัก บือกรือฌา มือญาเระ บรีตา นู บาฌิ นะ ตูฮัด บือซามา ฌางัน กู ซือรูปา นานะ บือกรือฌา บือซามา ฌางัน ปะ เดะ ญา. 23 ตานา กู ตาฮู จะ ลาฆู นะ กู นะ ซือลือซัย กะฮามี กู จาดัก นะ ซูโรฮ ญา ปี กะ กาเญา. 24 ตูฮัด บูวัจ บรี กู ตือตู-ฮาตี จะ กลาฆี อีซี กู ตะอาซิก นะ มาแรฮ ซารี กาเญา. 25 กู อีงัจ จะ กู กือนา ซูโรฮ อาดี เดะ กู เอปาโฟรดิทัด ปี ซารี กาเญา. ญา เตอ บือกรือฌา บือซามา ฌางัน กู ดัฮ ซือรูปา กาวัด บือปรัก บือซามา. ญา เตอ นู ฌาดี ปือญูโรฮ นะ กาเญา มาแรฮ ตูโลก กู ดัฮ. 26 ญา บือคานะ นะ ดาปัจ กาเญา ซือมูฮา ปูลัก ฆาโดฮ-ฮาตี ซาเบะ กาเญา ดืองัยํ ดัฮ จะ ญา เตด ซือนัง ญาวา. 27 ซูโงฮ ญา ซาเกะ โตระ ดัฮ มาจับ นะ มาตี ดัฮ. ตาปี ตูฮัด เดะ อาตัซ ตือจีฮัด กะ ญา ดัฮ. บูกัด ซา ตือจีฮัด กะ ญา ซืออูรัก ตาปี ตือจีฮัด กะ กู ฌูฆา ตีเมา บรี กู บาฮาตี โตระ ฌูฆา. 28 กะฆีเตอ กู ฮาตี ฆางู ซูกา นะ ซูโรฮ ญา ปี ซารี กาเญา นะ บรี กาเญา ซูกา-ฮาตี ปูลัก นู บือเลฮ ดาปัจ ฌางัน ญา นะ บรี กู เตด บราปา บาฮาตี ตือลาลู. 29 บรี กาเญา ซาโมจ ญา บรี ซูกา-ฮาตี บือกะ อาดี-บราดี นู ปือจายา กะ ตูฮัด. กือนา มือโอจ กะ ซือมียา นู กะฆีนี เลอ 30 ซาเบะ ญา ยอม ซรัฮ ญาวา มาจับ นะ มาตี ดัฮ กรานา บูวัจ บือกรือฌา นะ เยซู คริด นะ ตูโลก กู ฆาตี กาเญา นู มาแรฮ เตด บือเลฮ.
1 โกะ ดีบราดี นะ กู เออ โซะ ปือญูดัฮ บรี กาเญา ซูกา-ฮาตี กรานา ตูฮัด เลอ. นู กู นะ ฆาแรฮ ลาฆู อีนี กะ กาเญา ปูลัก เตด ฌาดี ลาฆู ปายัฮ นะ กู โปด ตาปี นะ บรี กาเญา ลือปัซ เตด บือนาซา ดัฮ. 2 บรี กาเญา ฌาฆา เลอ ลูมอฮ ซือมียา นู ซือรูปา กะ อาซู. ฌาฆา เลอ ซือมียา นู บูวัจ ลาฆู ฌาฮัจ. ฌาฆา เลอ ซือมียา นู ซายัจ ลูลู เดะ ญาวา. 3 บูกัด กูญา อีตู ตาปี กีตา นี เลอ นู ซาโมจ ลาฆู กรัจ นู ซูโงฮ เตอ. ซาเบะ กีตา เลอ นู มือญือมัฮ กะ ตูฮัด เดะ อาตัซ บือกะ ซือมืองัจ นะ ญา บาวา เตอ นู ซูกา-ฮาตี บือตืองัน ลาฆู นะ เยซู คริด เตอ นู เตด ตือตู-ฮาตี เดะ ลาฆู โซะ ญาวา เตอ. 4 ตาปี กู เลอ บือเลฮ ตือตู-ฮาตี เดะ ลาฆู โซะ ญาวา. กะ อาดา ซือมียา อาซิก อีงัจ จะ ญา บือเลฮ ตือตู-ฮาตี เดะ ลาฆู โซะ ญาวา กู โปด ลือเบฮ เดะ ญา. 5 ฌาดี-จะ กู ซาโมจ ลาฆู กรัจ วะตู อูมอยํ นะ กู ลาปัด อารี ดัฮ เตอ กู บือฌาดี ดัฮ ฌาดี ซือมียา บักซา อิซราเอน เตอ ฌาดี ซือมียา เดะ บือแนฮ นะ เบนยามิน ฌาดี ซือมียา บักซา ฮีบรู ซูโงฮ เตอ. เดะ ลาฆู ตูโรจ กะ ปือมือเลา ฮูโกบ นะ ตูฮัด เตอ กู ฌาดี ซือมียา ลูมอฮ ฟาริซี นู ตูเฮะ ซูโงฮ ดัฮ. 6 นู กู ตูเฮะ ซือซูโงฮ ยู-จะ ยอม ปรือกัด โกะ ลูมอฮ นะ ตูฮัด เตอ. กะ ซือมียา นะ บาฌิ-ตือปัจ บือเลฮ ซาเบะ ญา ตูโรจ กะ ปือมือเลา ฮูโกบ เตอ กู เลอ ฌาดี ซือมียา นู ฮอย ซาลัฮ ดัฮ. 7 ตาปี บือนา อีตู นู กู ดือละ อีงัจ ดัฮ บือนา ตือปากัย เตอ บารู กู อีงัจ จะ ฌาดี บือนา นู ฮอย เตด ตือปากัย กรานา เยซู คริด เตอ เลอ. 8 ซูโงฮ เลอ กู อีงัจ จะ บือนา ซือมูฮา ฌาดี บือนา นู ฮอย เตด ตือปากัย ดัฮ. ซาเบะ กู กีรา จะ นู นะ กราลา เยซู คริด ตูฮัด นะ กู เตอ บาฌิ ซูโงฮ ลือเบฮ เดะ บือนา อาซิก ซือมูฮา. กรานา เยซู เตอ กู กือนา ซรัฮ ตีงัน บูวัก บือนา ซือมูฮา อีตู กีรา จะ บือนา ซือมูฮา อีตู ฌาดี บือนา รูบือฮีรู นู ฮอย เตด ตือปากัย บรี กู นะ บือเลฮ เยซู คริด 9 นะ บรี ลีฮัจ จะ กู อาดา ลือกัจ บือซามา ฌางัน ญา เลอ. กะฆีเตอ กู ฌาดี ซือมียา นู บาฌิ-ตือปัจ ฌางัน ตูฮัด บูกัด ซาเบะ กู ตะอาซิก บูวัจ ตูโรจ กะ ปือมือเลา ฮูโกบ เตอ ตาปี ซาเบะ กู ปือจายา กะ เยซู คริด ดัฮ. กะฆีเตอ ตูฮัด เดะ อาตัซ บูวัจ บรี ฌาดี ซือมียา บาฌิ-ตือปัจ ซาเบะ ปือจายา ดัฮ. 10 กะฆีเตอ กู บือคานะ นะ กราลา เยซู คริด เตอ นะ กราลา ลาฆู ปือมือฆัฮ นู ญา ฮีโดะ ปาเระ เดะ มาตี ดัฮ เลอ. กู บือคานะ นะ อาดา บาฮาเฆด เดะ ลาฆู นู ญา ตาฮัด ซูซัฮ ดัฮ ฌาดี-จะ กู ยอม มาตี ซือรูปา บือกะ เยซู เตอ 11 จาดัก-จะ กะฮามีๆ เลอ กู นะ รอจ กะ ลาฆู ฮีโดะ ปาเระ เดะ มาตี ฌูฆา. 12 บูกัด-จะ กู รอจ ดัฮ. บูกัด-จะ กู ซุจ บาฌิ ดัฮ. ตาปี เยซู คริด ญา จาปัย ปือฆัก กู ดัฮ นะ บรี กู รอจ กะ ลาฆู ฮีโดะ ปาเระ เดะ มาตี อีตู. กะฆีเตอ กู บลารี ปี ตือนอง รือมักๆ บีดา กู นะ จาปัย ปือฆัก ลาฆู อีตู บือเลฮ. 13 ดีบราดี เออ กู เตด อีงัจ จะ นู กู จาปัย บือเลฮ ฮาบิฮ ดัฮ ตาปี กู บูวัจ ซา ลาฆู อีนี ฌาดี-จะ บือนา นู ลือปัซ ดัฮ กู เตด อาเมด มาแรฮ อีงัจ ปูลัก ตาปี บือนา นู โซะ ฮึลด อีตู กู นะ กูวาซา อาเงา ตางัน อาเมด เลอ. 14 กู ตืองัฮ บลารี ตือนอง ปี รือมักๆ นะ รอจ กะ กือนีรา บีดา นะ บือเลฮ รังวัน. รังวัน อีตู ฌาดี กะฆีนี จะ นู ตูฮัด เดะ อาตัซ ญา ซูโรฮ เยซู คริด ปาเงน กู บรี ดูโดะ เดะ อาตัซ ลาแงะ. 15 กะฆีเตอ บรี กีตา นู ฌาดี ซือมียา บือซัยํ อาดา กีรา กะฆีเตอ. กะ กาเญา อีงัจ ลาฆู อาซิก เดะ ลาฆู นามา โปด ตูฮัด เดะ อาตัซ นะ บูวัจ บรี กาเญา ลีฮัจ ลาฆู อีตู ซัฮ ดัฮ. 16 ตาปี กีตา รอจ กะ ตือกอซ ดีฮา ดัฮ บรี กีตา ตูโรจ ฌาลัด ปี เดะ โซะ อีตู เลอ. 17 ดีบราดี เออ บรี กาเญา บือซามา ตูโรจ กะ จูตอ นะ กู เลอ. กือนา บือฮีมัจ กะ โกะ ซือมียา นู บูวัจ ตูโรจ ลาฆู อีนี ซือรูปา กาเญา อาดา ลูมอฮ กามี ฌาดี จูตอ ดัฮ. 18 นู กู มือญาเระ กะ กาเญา ซือกาลี ดัฮ วะตู อีนี กู มือญาเระ ปูลัก ซาเมน มือนาแงฮ มือเลา จะ อาดา ซือมียา บาญะ นู ฌาดี ซือตรู บลาวัด ฌางัน กายู ปลีตัก นะ เยซู คริด. 19 โซะ ฮูโฌก ฌาลัด กูญา นะ รอจ กะ ฌาฮานัม. กูญา บูวัจ ซือรูปา โปรจ กูญา ฌาดี ตูฮัด นะ กูญา. กูญา อาเมด ลาฆู ปือจือและ นะ กูญา มาแรฮ บือตืองัน กะ ลาฆู อีตู. กูญา ซือมาตา อีงัจ ลาฆู โซะ ดือนียา อีนี เลอ. 20 ตาปี กีตา อีนี ฌาดี ซือมียา นังฆรี โซะ ลาแงะ. กีตา มือนาตี ซือมียา นู นะ ตูโลก บรี ลือปัซ นู นะ มาแรฮ ดาตัก เดะ โซะ อาตัซ. ญา เตอ เลอ ฌาดี เยซู คริด ตูฮัด นะ กีตา. 21 ญา นะ ซาเลด ญาวา นู ลือมัฮ นะ กีตา อีนี บรี ฌาดี บารู ซือรูปา ญาวา นู บือซรี นะ ญา. ญา มือฆัฮ โตระ นะ บูวัจ กะฆีเตอ ซือรูปา บือกะ นู นะ บูวัจ บรี บือนา ซือมูฮา อาดา เดะ บาวัฮ ฮูโกบ นะ ญา.
1 กะฆีเตอ โกะ ดีบราดี เออ กู ซายัก กาเญา บรีงัจ ฌีราซา กะ กาเญา. กาเญา บูวัจ บรี กู ซูกา-ฮาตี กาเญา ซือรูปา ฌาดี จูบุก นะ กู. กรานา ลาฆู กะฆีเตอ ซีงี กาเญา นู กู ซายัก เออ บรี กาเญา บือดีรี กือฌะ-กือมัซ ลือกัจ บือซามา ฌางัน ตูฮัด เลอ. 2 ยูโอดียา เออ ซินทิเค เออ กู ปรีงัจ กะ กาเญา เลอ บรี กาเญา บือปาคัจ บือซามา บือกะ ฌาดี ซือมียา ปือจายา กะ ตูฮัด บือซามา เลอ. 3 เกา เลอ นู ฌาดี กาวัด บือกรือฌา ซูโงฮ บือซามา ฌางัน กู เตอ บรี เกา ตูโลก นีบีนี ดูวา อูรัก ซีงี ซาเบะ กูญา บือเลฮ บือกรือฌา โตระ บือซามา ฌางัน กู ตูโลก มือญาเระ บรีตา นู บาฌิ นะ ตูฮัด. อาดา ฌูฆา กือเลเม ฌางัน โกะ ซือมียา อาซิก นู บือกรือฌา บือซามา ฌางัน กู ดัฮ. ตูฮัด ญา บรี นามา นะ กูญา ซือมูฮา อาดา เดะ ซูรัจ นะ ซือมียา นู ฮีโดะ. 4 นู กาเญา ลือกัจ บือซามา ฌางัน ตูฮัด ดัฮ กะฆีเตอ บรี กาเญา ซูกา-ฮาตี ซือลาลู. กู มือเลา ซือกาลี ลาฆี บรี กาเญา ซูกา-ฮาตี เลอ. 5 กือนา บรี ซือมียา ซือมูฮา นะ ลีฮัจ จะ นู กาเญา ฮาตี บือแฌะ. ตูฮัด ดาปิก นะ รอจ ดัฮ. 6 ฌางัน ฆาโดฮ-ฮาตี เดะ ลาฆู นามาๆ โปด ตาปี ลาฆู นะ กาเญา ซือมูฮา ซือมาตา กือนา บีตาฮู กะ ตูฮัด เดะ อาตัซ เลอ. กือนา บือซาโวจ มีตา เดะ ตูฮัด. กือนา บรี ซือลามัจ กะ ญา ซามา. 7 กะฆีเตอ ตูฮัด นะ บรี กาเญา ซือนัง-ฮาตี ลือเบฮ เดะ ซือมียา นะ อีงัจ เดะ ฮาตี. นู กาเญา ซือนัง-ฮาตี กะฆีเตอ นะ ฌาฆา ฮาตี นะ กาเญา ฌางัน ลาฆู นู กาเญา อีงัจ เดะ ฮาตี เตอ บือกะ กาเญา อาดา ลือกัจ บือซามา ฌางัน เยซู คริด ดัฮ. 8 ดีบราดี เออ โซะ ปือญูดัฮ อีนี กาเญา กือนา ซือมาตา อีงัจ กะ บือนา นู รือมัก เตอ บือนา นู ซือมียา มือโอจ เตอ บือนา นู บาฌิ-ตือปัจ บือนา นู จรัฮ บาฌิ บือนา นู บือฆาจะ บือนา นู ตือปาโตจ เตอ. กะ อาดา บือนา นามา นู บาฌิ ซูโงฮ เตอ นู ปาโตจ นะ ปูฌี บรี กาเญา ซือมาตา อีงัจ กะ บือนา อีตู เลอ. 9 บือนา นามาๆ นู กาเญา บลาฌัยํ เดะ กู ซาโมจ เดะ กู ดืองัยํ เดะ กู ลีฮัจ เดะ กู ดัฮ เตอ บรี กาเญา บูวัจ ตูโรจ ซือมูฮา เลอ. กะฆีเตอ ตูฮัด นู บรี ซือนัง-ฮาตี เตอ ญา นะ ดูโดะ บือซามา ฌางัน กาเญา เลอ. 10 ตูฮัด บรี กู ซูกา-ฮาตี บาญะ ลีฮัจ จะ นู กาเญา ฮาตี บาฌิ อีงัจ กะ กู บารู อีนี บือตูโมฮ ปูลัก ดัฮ. ซูโงฮ กาเญา อีงัจ กะ กู ซือลาลู ตาปี ฮอย จือลัฮ นะ ตูโลก. 11 บูกัด-จะ กู มือเลา กะฆีนี ซาเบะ บือซูงุจ จะ กู กูรัก นามา ดัฮ. ตาปี กู บลาฌัยํ ดัฮ นู กู ดูโดะ กะฮามี เตอ กู ซือนัง-ฮาตี กะฆีเตอ เลอ. 12 กู ตาฮู นะ บือซูวา ฌางัน ลาฆู ฮาฌะ โตระ เตอ ตาฮู นะ บือซูวา ฌางัน ลาฆู นู อาดา บาญะ ลือเบฮ เดะ ซูโรฮ ฌูฆา. กู บลาฌัยํ ลาฆู อีนี ซุจ ดัฮ บูวัจ บรี กู ซือนัง-ฮาตี ซือลาลู ราตา มาจับ. เตด-จะ กือญัง ลาปัยํ เตด นามา. เตด-จะ กู อาดา บาญะ ฮอย นามา โปด ตาปี กู ซือนัง-ฮาตี เลอ. 13 ลาฆู นามา โปด กู บูวัจ บือเลฮ ฮาปา ซาเบะ ตูฮัด ตูโลก กู บรี บือเลฮ บูวัจ กะฆีเตอ. 14 ตาปี นู กาเญา บือซามา เดะ ลาฆู ซูซัฮ นะ กู บาฌิ ดัฮ เลอ. 15 ลูมอฮ กาเญา เดะ นังฆรี ฟีลิบปี ตาฮู บาฌิ ดัฮ กาลา กู ฮึนตะ มือญาเระ บรีตา นู บาฌิ นะ ตูฮัด ตรือเบะ เดะ โซะ นังฆรี มาซิโดเนีย ดัฮ เตอ ลูมอฮ กาเญา ฌาดี ซา ลูมอฮ นะ ตูฮัด นู ตูโลก กู ดัฮ นู บือซามา ฌางัน กู เดะ ลาฆู บลาญา นะ กู. 16 ตานา กู ดูโดะ เดะ นังฆรี เทซะโลนิกา กาเญา โปด ตูโลก กู บาญะ กาลี ดัฮ. 17 บูกัด-จะ กู อีงัจ บือคานะ เดะ ซือบารัก นู กาเญา บรี กะ กู ตาปี กู อีงัจ นะ บรี กาเญา นะ บือเลฮ บูวัฮ อูโตก ซือรูโลยํ เลอ. 18 นู เอปาโฟรดิทัด อาเมด ดูเวะ เดะ นามา นะ กาเญา มาแรฮ กู ซาโมจ ดัฮ ซือมูฮา. อาดา บาญะ ฆือนะ ดัฮ. บือนา อีตู ฌาดี ซือรูปา บารัก มือญือมัฮ กะ ตูฮัด นู บาวู บาฌิ นู ตูฮัด เดะ อาตัซ ซูกา ซาโมจ ดัฮ. 19 กะฆีเตอ ตูฮัด เดะ อาตัซ ตูฮัด นะ กู เตอ ญา นู อาดา บือนา บารัก บรือฆา นู บือซรี บาญะ ซูโงฮ นู เยซู คริด นะ บรี เตอ ญา นะ ฮาลัย บรี กะ กาเญา บือนา บารัก ซือมูฮา นู กาเญา บือคานะ. 20 มีตา บรี ตูฮัด นู อาโปก เดะ อาตัซ นะ กีตา นะ บือซรี บาฌิ ซือลาลู เตด บราดู. อาเมน. 21 กู กีเรบ บรีงัจ เลอ กะ โกะ ซือมียา นะ ตูฮัด ซือมูฮา นู อาดา ลือกัจ บือซามา ฌางัน เยซู คริด. ลูมอฮ ดีบราดี นู อาดา บือซามา ฌางัน กู กูญา กีเรบ บรีงัจ รอจ กะ กาเญา ฌูฆา. 22 โกะ ซือมียา นะ ตูฮัด โซะ อีนี ซือมูฮา กีเรบ บรีงัจ กะ กาเญา. ลือเบฮ เดะ กาวัด เตอ ลูมอฮ ซือมียา นู บือกรือฌา เดะ บาลัย นะ ราฌา ซีซา กูญา กีเรบ บรีงัจ กะ กาเญา. 23 มีตา เดะ ตูฮัด เยซู คริด บรี ญา ฮาลัย บรี ซือลามัจ กะ ฮาตี นะ กาเญา เลอ.
1 กู เปาโล นู ฌาดี ปือญูโรฮ นะ เยซู คริด ตูโรจ นู ตูฮัด เดะ อาตัซ บือคานะ ดัฮ กู ฌางัน ทิโมที นู ฌาดี อาดี-บราดี นะ กีตา กามี ฆาแรฮ ซูรัจ อีนี 2 อาตัจ กะ โกะ ซือมียา นะ ตูฮัด เดะ นังฆรี โกโลซี นู ฌาดี อาดี-บราดี ฮาตี รือมัก ปือจายา กะ เยซู คริด. มีตา เดะ ตูฮัด อาโปก นะ กีตา นะ บรี ซือลามัจ กะ กาเญา นะ บรี กาเญา ดูโดะ ซือนัง ซือลามัจ เลอ. 3 วะตู กามี บือซาโวจ ปาซัน ลาฆู นะ กาเญา กามี ซือลาลู บรี ซือลามัจ กะ ตูฮัด เดะ อาตัซ นู ฌาดี อาโปก เดะ เยซู คริด ตูฮัด นะ กีตา 4 ซาเบะ กามี ดืองัยํ ดัฮ นู กาเญา ปือจายา กะ เยซู คริด เตอ นู กาเญา ซายัก กะ โกะ ซือมียา นะ ตูฮัด ซือมูฮา เตอ. 5 นู กาเญา ปือจายา ซายัก กะฆีนี ซาเบะ กาเญา จาดัก นะ ดาปัจ บือนา นู ตาโรฮ ดูลู เดะ โซะ อาตัซ ลาแงะ บีดา กาเญา เตอ. ลาฆู อีนี กาเญา ดืองัยํ ดูลู ดัฮ กาลา กาเญา ดืองัยํ ลาฆู นู ซูโงฮ จะ บรีตา นู บาฌิ นะ ตูฮัด. 6 บรีตา นู บาฌิ อีนี มาแรฮ รอจ กะ กาเญา ดัฮ ซือรูปา บือกะ มาแรฮ รอจ กะ ลูมอฮ ซือมียา ราตา ดือนียา ฌาดี ซือรูปา ปูโฮด กายู นู อาดา บูวัฮ บาฌิ เตอ นู บือตูโมฮ บาญะ ดัฮ. กะฆีเตอ ฌูฆา ญา บือบูวัฮ บาฌิ เดะ โซะ ลูมอฮ กาเญา ดัฮ. ตะเดะ อารี อีตู นู กาเญา ดืองัยํ ลาฆู อีตู ดัฮ ญา บรี ลาฆู นู ตูฮัด เดะ อาตัซ ญา ฮาลัย บรี ซือลามัจ เตอ มาโซะ เดะ ฮาตี นะ กาเญา บือซูโงฮ-ซูโงฮ. 7 ลาฆู อีตู กาเญา บลาฌัยํ เดะ เอปาฟรัด ดัฮ. ญา เตอ ฌาดี ปราโซฮ นะ ตูฮัด บือซามา ฌางัน กามี นู กามี ซายัก. ญา เตอ ฌาดี ซือมียา บือกรือฌา นะ เยซู คริด ฮาตี รือมัก บีดา กาเญา. 8 ญา เลอ นู บรี กะ กามี ตาฮู ปาซัน จะ ซือมืองัจ นะ ตูฮัด ญา บูวัจ บรี กาเญา บือซายัก-ซายัก กะฮามี เลอ. 9 กะฆีเตอ เลอ ตะเดะ อารี อีตู นู กามี ดืองัยํ ลาฆู นะ กาเญา ดัฮ กามี บือซาโวจ บีดา กาเญา เตด บราดู. กามี มีตา เดะ ตูฮัด บรี กาเญา ตาฮู ปือนอฮ เดะ ฮาตี ลาฆู นู ตูฮัด บือคานะ ฌาดี-จะ บรี ซือมืองัจ นะ ตูฮัด นะ บูวัจ บรี กาเญา อาดา อากัน ซูโงฮ บรี ลาฆู นะ ตูฮัด นะ มาโซะ เดะ ฮาตี นะ กาเญา. 10 กะฆีเตอ กาเญา นะ ตูโรจ ฌิบาฌิ นู ปาโตจ ฌางัน ตูฮัด นะ บูวัจ บรี ญา ซูกา-ฮาตี ซือลาลู. กะฆีเตอ ฌูฆา กาเญา นะ บือบูวัฮ เดะ โกะ ปือบูวัจ นู บาฌิ ซือมูฮา นะ ตาฮู ตูฮัด บาฌิ บือตามัฮ ซือรูโลยํ. 11 มีตา บรี ตูฮัด นะ บูวัจ บรี กาเญา ตือฆัยํ-อูรัจ ซูโงฮ โซะ ฮาตี ซือรูปา บือกะ นู ปือมือฆัฮ นู บือซรี นะ ญา. กะฆีเตอ กาเญา นะ ฌาดี ซือมียา กือฌะ-ฮาตี นู ตาฮัด ลามา เตอ ซูกา-ฮาตี เลอ. 12 กาเญา กือนา บรี ซือลามัจ กะ อาโปก เดะ อาตัซ นู บูวัจ บรี กาเญา ปาโตจ นะ ซาโมจ บาฮาเฆด เดะ ปือซากา นะ โกะ ซือมียา นะ ตูฮัด เดะ ดือนียา บารู นะ ตูฮัด นู จรัฮ ซูโงฮ. 13 อาโปก เดะ อาตัซ ญา ตูโลก กีตา บรี ลือปัซ เดะ ฮูโกบ โซะ กือลับ บรี กีตา บราเกะ มาแรฮ มาโซะ ดัฮ กะ ลูมอฮ ซือมียา อีตู นู อาดา เยซู นานะ นะ ญา นู ญา ซายัก เตอ ฌาดี ราฌา นะ กูญา. 14 กรานา เยซู เลอ อาโปก บือเลฮ ตือบุซ กีตา บรี ลือปัซ ญา อาเกะ ดูซา นะ กีตา ดัฮ. 15 เยซู อีตู เลอ ฌาดี รูปา นะ ตูฮัด เดะ อาตัซ นู กีตา เตด ดือละ บือฆารี ฌางัน มาตา. ญา เตอ ฌาดี นู ลามูลา ซูโงฮ เดะ อาตัซ โกะ บือนา บารัก นู บือฌาดี ดัฮ ซือมูฮา. 16 กรานา ตูฮัด เดะ อาตัซ บือเลฮ บรี เยซู บือฌาดี โกะ บือนา บารัก ซือมูฮา ดัฮ. บือนา บารัก เดะ โซะ อาตัซ ลาแงะ เดะ โซะ ดือนียา เตอ บือนา บารัก นู ซือมียา ลีฮัจ บือฆารี นู ซือมียา ลีฮัจ เตด บือฆารี เตอ เตด-จะ ฌาดี โกะ ฌิด เดะ อาตัซ โกะ ดาโตะ กรามัจ เตอ โกะ ฌิด นู ฮูโกบ ซือมียา โกะ ฮาตู นู กรัซ เตอ บือนา อีตู ซือมูฮา ตูฮัด เดะ อาตัซ บรี เยซู บือฌาดี ฮาปา ดัฮ บีดา นะ ฌาดี โกะ บือนา บารัก นะ เยซู เลอ. 17 ญา เลอ อาดา ดูลู เดะ บือนา บารัก ราตา ซือมูฮา. ญา เลอ บูวัจ บรี บือนา บารัก ราตา ซือมูฮา อาดา ดูโดะ ฌิบาฌิ. 18 เยซู เลอ ฌาดี กือปาลา นะ ซา ลูมอฮ นะ ญา นู ฌาดี ญาวา นะ ญา. ญา เตอ ฌาดี นู ลามูลา ซูโงฮ ฌาดี ซือมียา ลามูลา นู ฮีโดะ ปาเระ เดะ มาตี ดัฮ. กะฆีเตอ เลอ ญา อาดา บือซัยํ เดะ อาตัซ บือนา บารัก ซือมูฮา ราตา. 19 กรานา นู อาโปก เดะ อาตัซ ฌาดี กะฮามี เตอ ญา ซูกา บรี นานะ นะ ญา ฌาดี กะฆีเตอ ปือนอฮ ซือมูฮา ดัฮ เลอ. 20 กะฆีเตอ เลอ ญา ซูกา บรี เยซู บูวัจ บรี บือนา บารัก ซือมูฮา ปาเระ มาแรฮ บาฌิ ฌางัน ตูฮัด ปูลัก. นู เยซู มาตี เดะ กายู ปลีตัก ดารัฮ มือนีเลฮ เตอ บูวัจ บรี บาฌิ บือซามา ซือมูฮา ดัฮ. เยซู บูวัจ กะฆีนี บรี บือนา บารัก ซือมูฮา บาฌิ ปาเระ ฌางัน ตูฮัด เตด-จะ บือนา เดะ โซะ ดือนียา เตอ เดะ โซะ อาตัซ ลาแงะ ฌูฆา. 21 กาเญา ฌูฆา เลอ ดูลู กาเญา ตีเมา ดูโดะ บาฌิๆ ฌางัน ตูฮัด เตอ บลาวัด ฌางัน ตูฮัด โซะ ฮาตี ลาดัจ บูวัจ ลาฆู นู ฌาฮัจ เตอ. 22 ตาปี วะตู อีนี ซาเบะ เยซู กือนา มาตี โซะ ญาวา เตอ ตูฮัด เดะ อาตัซ บูวัจ บรี กาเญา บาฌิ ปาเระ ฌางัน ญา ดัฮ. ญา อีงัจ นะ บรี กาเญา ฌาดี ซือมียา ฮาตี จรัฮ บาฌิ ดัฮ ฮอย ซาลัฮ นามา ฮอย นามา นะ กือนา มือฌัฮ โซะ ฮึลด ตูฮัด. 23 กาเญา ฌูฆา เลอ กือนา อาดา ปือจายา กะ ญา กือฌะ-กือมัซ ดัฮ เตด อูบัฮ ปี กะ ดีฮา ดัฮ เตด บราเกะ ตีงัน ลาฆู นู กาเญา จาดัก นะ ดาปัจ นู กาเญา ดืองัยํ เดะ บรีตา นู บาฌิ นะ ตูฮัด ดัฮ. บรีตา อีตู บรี ตาฮู ดัฮ กะ ลูมอฮ ซือมียา เดะ บาวัฮ ลาแงะ ราตา. กู เปาโล ฌาดี ซือมียา บือกรือฌา ตูโลก บรี ตาฮู บรีตา นู บาฌิ อีตู ดัฮ. 24 วะตู อีนี กู ซูกา-ฮาตี นู กู ตาฮัด ซูซัฮ กรานา กาเญา ฌาดี-จะ นู เยซู คริด อาดา ลาฆู ซูซัฮ นะ ตาฮัด ลาฆี เตอ กู ตาฮัด ซูซัฮ โซะ ญาวา กะฆีเตอ นะ บูวัจ บรี ญา นะ ซุจ ฮาบิฮ ดัฮ. กู บูวัจ กะฆีเตอ บีดา นะ ตูโลก ซา ลูมอฮ นะ ตูฮัด นู ฌาดี ญาวา นะ เยซู คริด. 25 กู กือนา ตืองะ ดัฮ ฌาดี ซือมียา บือกรือฌา บรี ตูโลก ซา ลูมอฮ นะ ตูฮัด อีตู ซาเบะ ตูฮัด เดะ อาตัซ ตืองะ กู ดัฮ บรี กู นะ บือกรือฌา กะฆีเตอ กรานา กาเญา บีดา กู นะ บรี ตาฮู ลาฆู ปือมือเลา นะ ตูฮัด บรี ฮาบิฮ ซือมูฮา. 26 ปือมือเลา นะ ตูฮัด อีนี ฌาดี ลาฆู ดาลับ ซูโงฮ. กาลา ดูลู ตูฮัด ญา บูนี ลาฆู อีนี ดัฮ ตีเมา บรี อูมัจ-ซือมียา ราตา นะ ตาฮู. ตาปี วะตู อีนี ญา ปลีฮัจ ลาฆู อีนี ดัฮ บรี โกะ ซือมียา นะ ตูฮัด นะ ตาฮู. 27 กะฆีเตอ ตูฮัด เดะ อาตัซ อีงัจ นะ บรี ตาฮู กะ กูญา ลาฆู ดาลับ ซูโงฮ นู บาฌิ บาญะ นู บือซรี อีนี นู อาดา บีดา ลูมอฮ บักซา ราตา เตอ ฌาดี-จะ เยซู คริด ญา อาดา ดูโดะ เดะ ฮาตี นะ กาเญา. กะฆีเตอ เลอ กาเญา จาดัก นะ บือเลฮ บาฮาเฆด เดะ ลาฆู บือซายา บือซรี นะ ญา. 28 กามี บีตาฮู ลาฆู นะ เยซู คริด กามี ปรีงัจ กะ โกะ ลูมอฮ ซือมียา ราตา อาฌัยํ กูญา บีดา นะ อาดา อากัน ซูโงฮ. กามี บูวัจ กะฆีนี บรี บาวา ราตา ซือมียา ปี มาโซะ รอจ กะ ตูฮัด เดะ อาตัซ ฌาดี ซือมียา บือซัยํ ปือนอฮ ดัฮ นู ลือกัจ บือซามา ฌางัน เยซู คริด. 29 กะฆีเตอ เลอ กู กูวาซา บือกรือฌา ซือรูปา บือกะ ตูฮัด นู มือฆัฮ บูวัจ บรี กู ตือฆัยํ-อูรัจ นะ บือกรือฌา กะฆีเตอ เลอ.
1 กู บือคานะ นะ บรี กาเญา ตาฮู จะ กู กูวาซา บือกรือฌา ซูโงฮ เตอ กรานา ลูมอฮ กาเญา ฌางัน ลูมอฮ ซือมียา เดะ นังฆรี เลาดีเซีย ฌางัน ลูมอฮ ซือมียา นู เตด ดือละ ลีฮัจ มูคา นะ กู ฌูฆา. 2 กู กูวาซา บือกรือฌา กะฆีนี นะ บรี ปูโฌะ ฮาตี นะ กาเญา ซือมูฮา บรี กาเญา ลือกัจ บือซามา บือซายัก-ซายัก เตอ นะ บรี ลาฆู อีนี นะ มาโซะ เดะ ฮาตี นะ กาเญา ปือนอฮ ดัฮ บรี กาเญา นะ ตือตู-ฮาตี ซูโงฮ ฌาดี-จะ นะ บรี ตาฮู เดะ ฮาตี ลาฆู ดาลับ ซูโงฮ นะ ตูฮัด เดะ อาตัซ ฌาดี-จะ เยซู คริด เลอ. 3 นู ตูฮัด ปานัย อากัน ตาฮู ซูโงฮ ฌาดี ซือรูปา บารัก บรือฆา มาฮัน นู บูนี เดะ ดาลับ เยซู คริด กะฆีเตอ. 4 กู มือญาเระ ลาฆู อีนี กะ กาเญา ตีเมา บรี ซาปา มือนีปู กาเญา มือเลา ลาฆู มืออูปัย มีเซ-จะ ญา ดืองัยํ บาฌิ โปด ตาปี นะ บูวัจ บรี กาเญา นะ ซือซัจ ฌาลัด. 5 มีเซ-จะ โซะ ญาวา นะ กู กู ฌาโวฮ เดะ กาเญา เตอ ตาปี โซะ ฮาตี กู อาดา บือซามา ฌางัน กาเญา. กู ซูกา-ฮาตี นะ ลีฮัจ นู กาเญา บือปาคัจ บาฌิ ปือจายา กะ เยซู คริด กือฌะ-กือมัซ ดัฮ. 6 กะฆีเตอ เลอ นู กาเญา ซาโมจ เยซู คริด ฌาดี ตูฮัด นะ กาเญา ดัฮ เตอ กาเญา กือนา ตูโรจ กะ ญา กะฆีเตอ ฌูฆา. 7 ฌาดี-จะ นู กาเญา อาดา ฌากัยํ นู กือฌะ ดัฮ เตอ นู อาดา จาวัก นู ตือโฆฮ เดะ ดาลับ ญา ดัฮ นู กาเญา ปือจายา ตือตู บือกะ ลูมอฮ กามี บือเลฮ อาฌัยํ กาเญา ดัฮ เตอ นู กาเญา บรี ซือลามัจ กะ ตูฮัด ปือนอฮ เดะ ฮาตี เลอ. 8 กือนา ฌาฆา บรี บาฌิ เลอ. ฌางัน บรี ซือมียา ดีฮา นะ อาฌัยํ กาเญา เดะ ลาฆู มืออูปัย นะ ซือมียา นะ บูวัจ บรี กาเญา ฌาดี ฮามา นะ ญา ดัฮ เตอ. กรานา ลาฆู กะฆีเตอ ฌาดี ลาฆู บาอากัน โซะ ดือนียา นู ฮอย เตด ตือปากัย นู ตูโรด-มือนูโรด มาแรฮ เดะ ลูมอฮ บีลาแก นะ กาเญา เตอ นู มาแรฮ เดะ โกะ ฮาตู ซีตัด นู ฮูโกบ โซะ ดือนียา ราตา. ลาฆู บาอากัน อีนี ฮอย เตด มาแรฮ เดะ เยซู คริด เลอ. 9 กรานา นู ตูฮัด เดะ อาตัซ ฌาดี กะฮามี เตอ อาดา ดูโดะ เดะ ดาลับ ญาวา นะ เยซู คริด ปือนอฮ ซือมูฮา ดัฮ เลอ. 10 กาเญา ฌูฆา นู อาดา ลือกัจ บือซามา ฌางัน เยซู คริด เตอ ญา บูวัจ บรี ฮีโดะ ปือนอฮ ซูโงฮ ดัฮ. ญา เลอ ฌาดี กือปาลา นู ตีงี เดะ อาตัซ โกะ ลูมอฮ ฌิด โกะ ลูมอฮ ฮาตู นู กรัซ ซือมูฮา. 11 นู กาเญา อาดา ลือกัจ บือซามา ฌางัน เยซู คริด เตอ ซือรูปา กาเญา ซาโมจ ลาฆู กรัจ ดัฮ. บูกัด ลาฆู กรัจ เดะ ญาวา นู บูวัจ ฌางัน ตางัน นะ ซือมียา ตาปี ลาฆู กรัจ นู เยซู คริด บูวัจ ดัฮ ฌาดี-จะ ลาฆู กีปัซ ตีงัน บูวัก ญาวา นู ลาดัจ บูวัจ ดูซา. 12 นู กาเญา ซาโมจ ลาฆู ซือลับ เดะ อาเย ดัฮ ซือรูปา กาเญา กือนา ตานัม บือซามา ฌางัน เยซู คริด ดัฮ. เดะ ลาฆู อีตู ฌูฆา กาเญา ฮีโดะ ปาเระ เดะ มาตี บือซามา ฌางัน ญา ดัฮ ซาเบะ กาเญา ปือจายา กะ ปือบูวัจ นะ ตูฮัด เดะ อาตัซ นู ญา บูวัจ บรี เยซู คริด ฮีโดะ ปาเระ เดะ มาตี ดัฮ. 13 กาเญา ฌูฆา เลอ ดูลู กาเญา อาดา ซือรูปา มาตี ดัฮ ซาเบะ ลาดัจ บูวัจ ดูซา เตอ ฌาดี ซือมียา นู เตด ซาโมจ ลาฆู กรัจ โซะ ญาวา เตอ ตาปี ตูฮัด เดะ อาตัซ บูวัจ บรี กาเญา ฮีโดะ ปาเระ ดัฮ บือซามา ฌางัน เยซู คริด. ญา ฮาลัย บรี อาเกะ ดูซา นะ กีตา ซือมูฮา ดัฮ. 14 นู กีตา บูวัจ ดูซา ดัฮ อาดา ซือรูปา ซูรัจ ฮูโกบ นู ซือกัจ กีตา ฌาดี-จะ กีตา ตือฮูตัก เดะ ตูฮัด ดัฮ. ซูรัจ อีตู ตูฮัด ญา ปาดับ ฮาบิฮ ตีงัน บูวัก ดัฮ ฌาดี ซือรูปา ญา บาวา ปี กาจิก เดะ กายู ปลีตัก ดัฮ บูวัจ บรี กีตา ลือปัซ ซุจ ฮาบิฮ ดัฮ. 15 เดะ กายู ปลีตัก เตอ ตูฮัด บูวัจ บรี โกะ ฌิด โกะ ฮาตู กรัซ บือนาซา ฮาบิฮ ดัฮ. ญา บูกา บรี ลีฮัจ ลาฆู ปือจือและ นะ กูญา. ญา ฌือนัฮ ดัฮ บาวา กูญา บือปี ฌาดี ฮามา นะ ญา. 16 กะฆีเตอ ฌางัน บรี ซาปา บลารัก กาเญา ปาซัน ลาฆู นะ มากัด นามา นะ โอะ นามา ปาซัน ตูเฮะ กะ อารี บรามัย เตอ กะ ซืออารี บูลัด เตอ กะ อารี บราดู กรือฌา เตอ. 17 ลาฆู อีนี ซือมูฮา ซือรูปา บายัก นะ ลาฆู นู นะ มาแรฮ เดะ บลากัก ตาปี ญาวา ซูโงฮ ฌาดี เยซู คริด เลอ. 18 ฌางัน บรี ซาปา ฮูโกบ กาเญา บรี อาลัฮ ฌาดี-จะ ซือมียา นู ซูกา กะ ลาฆู มือนูโนะ-ฮาตี มืออูปัย ซือมียา มือญือมัฮ กะ ลูมอฮ ฮูลู-บาลัก เดะ อาตัซ เตอ ซือมียา นู มืองากู จะ ญา บือเลฮ มีปี ลีฮัจ ดัฮ. กะฆีเตอ ญา งันตืองัน ตูโรจ กะ ลาฆู นู ญา อีงัจ เดะ ฮาตี ตะอาซิก เตอ 19 ตาปี ญา เตด ลือกัจ กือมัซ ฌางัน เยซู คริด นู ฌาดี ปาลา เลอ. ปาลา อีตู บือบือลา ญาวา นะ ญา ซือมูฮา บูวัจ บรี ญาวา อีตู บือฮูโบก ฌางัน โกะ ตือนอซ โกะ อูรัจ ซือมูฮา. กะฆีเตอ ญาวา อีตู นะ บือซัยํ ซือรูโลยํ ตูโรจ นู ตูฮัด บือคานะ. 20 กาเญา มาตี บือซามา ฌางัน เยซู คริด ดัฮ บรี ลือปัซ เดะ โกะ ฮาตู ซีตัด นู ฮูโกบ โซะ ดือนียา ราตา. กะฆีเตอ เลอ บูวัจ นามา ปะ กาเญา ตูโรจ ลาฆู โซะ ดือนียา ลาฆี? บูวัจ นามา กาเญา ตูโรจ โกะ ปือมือซัด ซือตืองัฮ? 21 ซือรูปา ปือมือซัด นู จะ "ฌางัน อาเมด เลอ." "ฌางัน ฌือเลบ เลอ" "ฌางัน ปือเตาะ เลอ." 22 โกะ บารัก มากัด บารัก โอะ กะฆีนี ซือมูฮา เตอ ตานา กีตา ซูโรฮ ญา บือนาซา ฮาบิฮ ดัฮ. โกะ ปือมือซัด กะฆีนี ฌาดี ปือมือซัด นะ โกะ ซือมียา นู กูญา อาฌัยํ. 23 อาดา ลาฆู มือญือมัฮ ตูโรจ กะ ฮาตี ซีงี เตอ ลาฆู มือนูโนะ-ฮาตี มืออูปัย เตอ ลาฆู บรี กะ ญาวา ตะอาซิก บือซูซัฮ เตอ ลาฆู อีนี ซือมูฮา กูญา อีงัจ จะ อาดา อากัน ดัฮ. ตาปี ลาฆู อีนี เตอ ฮอย เตด ตือปากัย เตด บือเลฮ ฌือนัฮ เดะ ลาฆู นู ญาวา กูญา ลาดัจ นะ บูวัจ เลอ.
1 ตูฮัด อาเกะ กาเญา บรี ฮีโดะ ปาเระ บือซามา ฌางัน เยซู คริด ดัฮ. กะฆีเตอ เลอ กาเญา กือนา ซือมาตา ซารี ลาฆู นู โซะ อาตัซ เลอ. โซะ อีตู เยซู คริด อาดา ดูโดะ เดะ โซะ ซือบือลัฮ กานัน นะ ตูฮัด เดะ อาตัซ. 2 กาเญา กือนา ซือมาตา อีงัจ เดะ ฮาตี บูกัด ลาฆู โซะ ดือนียา ตาปี ลาฆู นู โซะ อาตัซ อีตู. 3 กรานา กาเญา ซือรูปา มาตี ดัฮ ตาปี นู กาเญา อาดา ฮีโดะ ฌาดี ลาฆู นู เตด ปลีฮัจ ลาฆี. ญา บูนี ดัฮ บือซามา ฌางัน เยซู คริด เดะ ดาลับ ตูฮัด เดะ อาตัซ. 4 เยซู คริด เลอ นู บรี กีตา ฮีโดะ. วะตู ญา นะ มาแรฮ ปลีฮัจ กาเญา ฌูฆา นะ ปลีฮัจ บือซามา ฌางัน ญา นะ บือเลฮ บาฮาเฆด เดะ ลาฆู บือซายา บือซรี นะ ญา. 5 นู ปรางัย โซะ ฮาตี นะ กาเญา ลาดัจ ตูโรจ กะ ลาฆู โซะ ดือนียา เตอ ลาฆู อีตู กาเญา กือนา ตีงัน บูวัก เลอ. ฌาดี-จะ นู นะ บือกาเซฮ บูวัจ ลาฆู นู ตะอารัฮ เตอ นู ฆาละ นะ ตูโรจ ลาฆู ฮอย เตด บือฆูนา ลาฆู ฌาฮัจ เตอ นู ฮาตี ฮาลูบา นู ซือรูปา บือกะ ลาฆู ตูเฮะ กะ บราลา เตอ. ลาฆู อีนี ซือมูฮา กาเญา กือนา ตีงัน บูวัก บรี มาตี ฮาบิฮ เลอ. 6 กรานา ลาฆู กะฆีนี ตูฮัด เดะ อาตัซ มูซัยํ กรัจ ฮูโกบ ลูมอฮ ซือมียา นู เตด มือนีงัย กะ ญา. 7 ดูลู กาเญา โปด ลาดัจ บูวัจ ลาฆู นู ซีงี ดัฮ กาลา กาเญา ซือมาตา ตูโรจ กะ มาจับ อีตู. 8 ตาปี กาลา อีนี บือนา อีนี ฌูฆา กาเญา กือนา ตีงัน บูวัก เลอ ฌาดี-จะ ลาฆู มูซัยํ ลาฆู บืออีเซด ลาฆู อีงัจ นะ บูวัจ กาวัด ลาฆู มือเลา มืออูปัจ ปือมือเลา รูบือฮีรู นู ตรือเบะ เดะ มูโลจ นะ กาเญา เตอ บือนา อีนี ซือมูฮา กาเญา กือนา ตีงัน บูวัก ฮาบิฮ เลอ. 9 ฌางัน มือเลา มืออูปัย บือซามา-ซามา ซาเบะ กาเญา บือเลฮ อูฆัย มาจับ ซือมียา ลามา บูวัก ดัฮ ฌางัน ปือบูวัจ ซือมูฮา นู ซือมียา ลามา อีตู ลาดัจ บูวัจ. 10 กาเญา บือเลฮ บือปากัย มาจับ ซือมียา บารู บรี กราลา ตูฮัด ปือนอฮ ดัฮ. ซือมียา บารู อีตู ตูฮัด ตืองัฮ บือฌาดี บารู นะ ฌาดี ซือรูปา บือกะ รูปา นะ ตูฮัด นู บือฌาดี เตอ. 11 กะฆีเตอ เลอ ฮอย ลาฆู ฌาดี โซกซา ปาโซะ ลาฆี เตด-จะ ฌาดี ลูมอฮ บักซา ยิว เตอ ลูมอฮ บักซา อาซิก โปด ฌาดี ลูมอฮ ซาโมจ ลาฆู กรัจ เตอ ลูมอฮ เตด ซาโมจ ลาฆู กรัจ โปด ฌาดี ลูมอฮ อูรัก ฮูตัด เตอ ลูมอฮ ซือมียา ฮอย บูดี บาซา โปด ฌาดี ลูมอฮ ปราโซฮ เตอ ลูมอฮ ซือมียา เตด ฌาดี ปราโซฮ โปด ลาฆู กะฆีเตอ ฮาบิฮ ดัฮ เลอ. ซา เยซู คริด นู บือซัยํ เดะ กาวัด ซือมูฮา. ญา เลอ อาดา เดะ ดาลับ กูญา ซือมูฮา. 12 กาเญา ฌาดี ลูมอฮ ซือมียา นู ตูฮัด เดะ อาตัซ ปีเลฮ ดัฮ บรี ฌาดี โกะ ซือมียา นะ ญา นู ญา ซายัก เตอ. กะฆีเตอ กาเญา กือนา บือปากัย ฮาตี บาฌิ บรี ตือจีฮัด กะ กาวัด บือซามา อาดา ฮาตี มือนูโนะ ฮาตี บือแฌะ ตาฮัด-ฮาตี ลามา. 13 กือนา บือตาฮัด-ฮาตี บือซามา-ซามา. กะ ซาปา บือปาซัน ฌางัน กาวัด เตอ กือนา อาเกะ ซาลัฮ บือซามา-ซามา. นู เยซู คริด อาเกะ ซาลัฮ นะ กาเญา กะฮามี ดัฮ กาเญา กือนา อาเกะ ซาลัฮ นะ กาวัด กะฆีเตอ ฌูฆา เลอ. 14 ลือเบฮ เดะ อีนี ซือมูฮา กือนา บือปากัย ฮาตี ซายัก บือซามา-ซามา นู ซือรูปา ตาลี ปีงัก นู อีกัจ บือนา ซือมูฮา บรี ฌาดี บือซามา บาฌิ. 15 กาเญา กือนา บรี ลาฆู ซือนัง ซือลามัจ นู เยซู คริด บรี เตอ นะ บือบือลา ฮาตี นะ กาเญา ซาเบะ ตูฮัด ปาเงน กาเญา ดัฮ บรี ฌาดี ซา ญาวา นู ซือนัง-ฮาตี บือซามา ฌูฆา. กาเญา กือนา อาดา ฮาตี บรี ซือลามัจ กะ ตูฮัด. 16 กาเญา กือนา บรี ลาฆู บาฌิ ปาซัน เยซู คริด นะ ดูโดะ เดะ ดาลับ ฮาตี นะ กาเญา บรี ปือนอฮ ซูโงฮ ดัฮ. กาเญา กือนา ปานัย อากัน อาฌัยํ กาวัด ปรีงัจ กะ กาวัด บือซามา-ซามา. กือนา มือญาญี ปูฌี กะ ตูฮัด มือญาญี มือโอจ กะ ญา ฌาดี ลาฆู ดาตัก เดะ ฮาตี นะ กาเญา. กือนา มือญาญี บือรามัย บรี ซือลามัจ กะ ตูฮัด เดะ อาตัซ บรี ปือนอฮ เดะ ฮาตี เลอ. 17 นู กาเญา นะ มือเลา ปือมือเลา นามา เตอ นะ บือกรือฌา ลาฆู นามา โปด กือนา บูวัจ ลาฆู ซือมูฮา เดะ นามา นะ ตูฮัด เยซู. กะฆีเตอ เลอ บรี ซือลามัจ กะ ตูฮัด นู อาโปก กรานา เยซู ฌูฆา. 18 โกะ บีนี เออ กือนา มือนีงัย กะ ลากี นะ กาเญา บือกะ ซือมียา ปือจายา กะ ตูฮัด ปาโตจ นะ บูวัจ. 19 โกะ ลากี เออ กือนา ซายัก กะ บีนี นะ กาเญา เลอ. ฌางัน มือเลา ตะอารัฮ ซูโรฮ กูญา ตือลาลู. 20 โกะ นานะ เออ กือนา มือนีงัย กะ เอด อาโปก นะ กาเญา ราตา มาจับ เลอ ซาเบะ นู บูวัจ กะฆีนี ตูฮัด ญา ซูกา. 21 โกะ อาโปก เออ ฌางัน อาโจบ นานะ นะ กาเญา บรี กูญา รีเซา-ฮาตี ตีเมา บรี กูญา นะ กูรัก-ฮาตี เลอ. 22 โกะ ปราโซฮ เออ กือนา มือนีงัย กะ ตกเก นะ กาเญา เดะ ดือนียา ราตา มาจับ เลอ. กือนา มือนีงัย กะ กูญา บูกัด นะ บูวัจ ซา เดะ โซะ ฮึลด มูคา นะ กูญา บรี กูญา ซูกา เตอ ตาปี มือนีงัย บรี ปือนอฮ เดะ ฮาตี ซาเบะ กาเญา ตูเฮะ กะ ตูฮัด เลอ. 23 นะ บูวัจ นามา เตอ บือกรือฌา เลอ บรี ปือนอฮ เดะ ฮาตี ซือรูปา บือกะ กาเญา ตูโลก ตูฮัด บูกัด ตูโลก ซือมียา 24 ซาเบะ กาเญา ตาฮู จะ ตูฮัด เลอ นู นะ บรี กาเญา ซาโมจ ปือซากา บรี ฌาดี บาฮาเฆด นู บาฌิ นะ กาเญา. เยซู คริด เลอ ฌาดี ตูฮัด นู กาเญา บือกรือฌา ฌาดี ปราโซฮ นะ ญา. 25 กะฆีเตอ ซือมียา นู บูวัจ ซาลัฮ ญา นะ ซาโมจ บาลัซ บือกะ ลาฆู ซาลัฮ นะ ญา. ซาเบะ ตูฮัด ญา ฮอย เตด ปีเลฮ มูคา นะ ซาปา ลาลู เลอ.
1 กาเญา นู ฌาดี ตกเก เออ กือนา บูวัจ ฌางัน ปราโซฮ นะ กาเญา ตูโรจ กะ ลาฆู นู บาฌิ-ตือปัจ นู ซามา บายา เตอ ซาเบะ ตาฮู จะ กาเญา ฌูฆา อาดา ตกเก แนฮ ซา เดะ โซะ ลาแงะ. 2 กาเญา กือนา ราเฌด บือซาโวจ เตด บราดู. กือนา ฌาฆา บือซาโวจ กะฆีเตอ ซาเมน บรี ซือลามัจ กะ ตูฮัด ซามา. 3 กือนา บือซาโวจ บีดา กามี ฌูฆา บรี ตูฮัด เดะ อาตัซ นะ บูกา ฌาลัด บีดา กามี นะ บรี ตาฮู ปือมือเลา นะ ญา เตอ บรี กามี นะ มือญาเระ ลาฆู ดาลับ ซูโงฮ นะ เยซู คริด. กรานา ลาฆู อีตู เลอ กู อาดา ดูโดะ เดะ ราตัย กะฆีนี. 4 บือซาโวจ เลอ บรี กะ กู นะ บือเลฮ มือญาเระ ลาฆู อีตู บรี ซัฮ ซือรูปา บือกะ กู ปาโตจ นะ มือญาเระ. 5 กาเญา กือนา อาดา อากัน นู กาเญา บูวัจ นามา ฌางัน โกะ ซือมียา วัยํ-ลูวัยํ. อาดา จือลัฮ นามา โปด กือนา บูวัจ นู บาฌิ กะฆีเตอ. 6 กือนา มือเลา ปือมือเลา บาฌิ ซือมูฮา นู รือมัก ซูโงฮ ซือรูปา ฆูลัย นู ฆาโวน ฌางัน ฆารับ บรี ญามัน นะ บูวัจ บรี กาเญา ตาฮู นะ ตีกัฮ กูญา กะฮามี บรี รอจ กะ ฮาตี นะ กูญา. 7 ทีคิกัด นะ มือญาเระ กะ กาเญา ลาฆู นะ กู ซือมูฮา. ญา เตอ ฌาดี อาดี นู กีตา ซายัก ฌาดี ซือมียา บือกรือฌา ฮาตี รือมัก นู ฌาดี ปราโซฮ นะ ตูฮัด บือซามา ฌางัน กู. 8 ซาเบะ ลาฆู กะฆีนี กู ซูโรฮ ญา ปี ซารี กาเญา บรี กาเญา นะ ตาฮู ลาฆู นะ กามี ซือมูฮา บรี ญา นะ ปูโฌะ ฮาตี นะ กาเญา. 9 อาดา โอเนซิโม ปี ซามา. ญา ฌาดี อาดี-บราดี ซืออูรัก นู กามี ซายัก นู ฮาตี รือมัก. ญา เตอ ฌาดี ซือมียา ซืออูรัก เดะ ตูโปะ นะ กาเญา ฌูฆา. กูญา ดูวา อูรัก นะ บรี กาเญา ตาฮู ปาซัน ลาฆู โซะ อีนี ซือมูฮา. 10 อาริดตาคัด นู กือนา ราตัย บือซามา ฌางัน กู เตอ ญา กีเรบ บรีงัจ กะ กาเญา. อาดา มาระโก ฌูฆา นู ฌาดี อานะ กากา อานะ อาดี ฌางัน บานาบัด เตอ ญา โปด กีเรบ บรีงัจ กะ กาเญา. กาเลา-จะ มาระโก มาแรฮ ซารี กาเญา บรี กาเญา ซาโมจ ญา ฌิบาฌิ เลอ บือกะ กู ปือซัด กะ กาเญา ดัฮ. 11 โยซูวา นู อาดา นามา อาซิก จะ ยูซะตัด เตอ ญา กีเรบ บรีงัจ กะ กาเญา ฌูฆา. อาดา ตีฆา อูรัก อีนี นู ตูโลก ปูโฌะ ฮาตี นะ กู ดัฮ. เดะ ลูมอฮ ยิว นู ปือจายา กะ เยซู เตอ ซา กูญา นู บือกรือฌา บือซามา ฌางัน กู กรานา ลูมอฮ ซือมียา อีตู นู อาดา ตูฮัด ฌาดี ราฌา เลอ. 12 เอปาฟรัด นู ฌาดี ซือมียา ซืออูรัก เดะ ลูมอฮ กาเญา เตอ ญา กีเรบ บรีงัจ กะ กาเญา. ญา ฌาดี ปราโซฮ นะ เยซู คริด ซืออูรัก. ญา กูวาซา บือซาโวจ ซูโงฮ กรานา กาเญา มีตา เดะ ตูฮัด บรี กาเญา นะ บือดีรี กือฌะ-กือมัซ ฌาดี ซือมียา บือซัยํ นู ตูโรจ บรี ปือนอฮ ซือมูฮา นู นะ บรี ตูฮัด ซูกา-ฮาตี. 13 กู ฌาดี ซะซี ปาซัน ญา จะ นู ญา บรีงัจ บาญะ บือกรือฌา โตระ กรานา กาเญา กรานา ลูมอฮ ซือมียา นู ดูโดะ เดะ นังฆรี เลาดีเซีย ฌางัน นังฆรี ฮีราบุรี ฌูฆา. 14 ลูกา นู ฌาดี บูมอยํ นะ กามี นู กามี ซายัก เลอ ฌางัน เดมา เตอ กูญา กีเรบ บรีงัจ กะ กาเญา ฌูฆา. 15 กู ฌูฆา กีเรบ บรีงัจ กะ ลูมอฮ อาดี-บราดี เดะ นังฆรี เลาดีเซีย กะ นีบีนี ปือนามา นุมฟา ฌางัน ลูมอฮ นะ ตูฮัด นู บือมุน เดะ รูมัฮ นะ ญา. 16 ตานา กาเญา บาจา ซูรัจ อีนี ฮาบิฮ ดัฮ บรี ลูมอฮ นะ ตูฮัด เดะ นังฆรี เลาดีเซีย บาจา ฌูฆา. ซูรัจ นู กู กีเรบ กะ กูญา เดะ นังฆรี เลาดีเซีย บรี กาเญา บาจา ฌูฆา. 17 กือนา มือเลา ฌางัน อาริคีโป จะ "ปาซัน บือกรือฌา นู ตูฮัด ซูโรฮ เกา บูวัจ เตอ ฌาฆา บรี บาฌิ เลอ บูวัจ บรี ซูดัฮ ฮาบิฮ เลอ." 18 กู ฆาแรฮ ซือปาตัฮ อีนี กีเรบ บรีงัจ กะ กาเญา ฌางัน ตางัน นะ กู ตะอาซิก. ฌางัน บรี กาเญา ลูปา จะ กู อาดา ดูโดะ เดะ ราตัย เลอ. มีตา เดะ ตูฮัด บรี ญา ตือจีฮัด บาฌิ กะ กาเญา ฌูฆา เลอ.
1 กามี เปาโล ซีลา ฌางัน ทิโมที กามี กีเรบ ซูรัจ อีนี บรี กะ ลูมอฮ นะ ตูฮัด เดะ นังฆรี เทซะโลนิกา นู ลือกัจ บือซามา ฌางัน ตูฮัด อาโปก เดะ อาตัซ ฌางัน ตูฮัด เยซู คริด. มีตา เดะ ตูฮัด นะ บรี ซือลามัจ กะ กาเญา บรี กาเญา ดูโดะ ซือนัง ซือลามัจ เลอ. 2 กามี บรี ซือลามัจ กะ ตูฮัด เดะ อาตัซ ซือลาลู กรานา ลูมอฮ กาเญา ซือมูฮา. วะตู กามี บือซาโวจ เตอ กามี บรีงัจ กะ กาเญา เตด บราดู. 3 เดะ โซะ ฮึลด ตูฮัด อาโปก นะ กีตา กามี บรีงัจ ปาซัน ลาฆู นะ กาเญา กะฆีนี จะ นู กาเญา ปือจายา ดัฮ บูวัจ บรี กาเญา บูวัจ ลาฆู บาฌิ เตอ นู กาเญา ซายัก ซูโงฮ บูวัจ บรี กาเญา ซูกา-ฮาตี นะ บือกรือฌา โตระ เตอ นู กาเญา จาดัก นะ ดาปัจ เยซู คริด ตูฮัด นะ กีตา บูวัจ บรี กาเญา ราเฌด นาตี ลามา ดัฮ. 4 โกะ ดีบราดี เออ กามี ตาฮู ซูโงฮ จะ นู ตูฮัด ญา ซายัก กาเญา ดัฮ ญา ปีเลฮ กาเญา ดัฮ บรี ฌาดี ลูมอฮ ซือมียา นะ ญา. 5 กรานา นู กามี บาวา บรีตา นู บาฌิ มาแรฮ รอจ กะ กาเญา ดัฮ บูกัด ฌาดี ซา ปือมือเลา เตอ ตาปี ฌาดี ลาฆู นู มือฆัฮ ซูโงฮ เลอ นู มาแรฮ เดะ ซือมืองัจ นะ ตูฮัด ฌาดี ลาฆู นู กามี ปือจายา ปือนอฮ เดะ ฮาตี ดัฮ. กาเญา ตาฮู ฌูฆา นู กามี ฌาดี ซือมียา มาจับ นามา เดะ ตืองัฮ ลูมอฮ กาเญา กรานา ลีฮัจ กะ กาเญา. 6 กะฆีเตอ กาเญา เตอ ฌาดี ซือมียา นู ตูโรจ กะ กามี นู ตูโรจ กะ ตูฮัด เยซู ฌูฆา. กาลา กาเญา ซาโมจ ปือมือเลา อีตู กาเญา กือนา ซูซัฮ โตระ ตาปี ซือมืองัจ นะ ตูฮัด บูวัจ บรี กาเญา ซูกา-ฮาตี เลอ. 7 กะฆีเตอ กาเญา ฌาดี จูตอ กะ ซือมียา ปือจายา ซือมูฮา เดะ นังฆรี มาซิโดเนีย เดะ นังฆรี อาคายา เตอ. 8 ซาเบะ ปือมือเลา ปาซัน ตูฮัด เยซู ลาแฮ เดะ กาเญา ปี ราตา ดัฮ บูกัด ซา เดะ นังฆรี มาซิโดเนีย ฌางัน นังฆรี อาคายา เตอ ตาปี นู กาเญา ปือจายา กะ ตูฮัด เดะ อาตัซ ดัฮ ญา กือจัย ปี ราตา ตือปัจ ราตา ตูโปะ. กะฆีเตอ กามี เตด ปายัฮ นะ มือเลา นามา ดัฮ 9 ซาเบะ โกะ ซือมียา อีตู โปด มือญาเระ บรี ตาฮู ปาซัน ลาฆู นะ กามี จะ นู กาเญา ซาโมจ กามี บาฌิ ดัฮ นู กาเญา ตีงัน โกะ บราลา บูวัก อาเลฮ มาแรฮ กะ ตูฮัด เดะ อาตัซ ดัฮ บีดา นะ มือญือมัฮ นะ บูวัจ ตูโรจ กะ ตูฮัด นู ฮีโดะ ตูฮัด นู ซูโงฮ เตอ 10 บีดา นะ นาตี นานะ นะ ตูฮัด นู นะ มาแรฮ เดะ โซะ อาตัซ ลาแงะ นู ตูฮัด เดะ อาตัซ อาเกะ บรี ญา ฮีโดะ ปาเระ เดะ มาตี ดัฮ. ญา เตอ ฌาดี เยซู เลอ นู ตูโลก กีตา บรี ลือปัซ เดะ อารี โซะ ฮึลด นู ตูฮัด นะ มูซัยํ นะ กรัจ ฮูโกบ เตอ.
1 ลูมอฮ ดีบราดี เออ กาเญา ตะอาซิก ตาฮู จะ นู กามี มาแรฮ ซารี กาเญา ดัฮ ญา บูกัด ลาฆู เตด ฌาดี นามา. 2 มีเซ-จะ ดูลู กามี กือนา ตาฮัด ซูซัฮ โตระ กือนา ซือมียา มือเลา เตด บาฌิ เตด บือฆูนา เดะ นังฆรี ฟีลิบปี ดัฮ บือกะ กาเญา ตาฮู. ตาปี ตูฮัด ตูโลก กามี บรี บรานี มือญาเระ บรีตา นู บาฌิ นะ ตูฮัด กะ กาเญา ตาปี อาดา ซือมียา บลาวัด บาญะ. 3 ซาเบะ ลาฆู นู กามี มาแรฮ ปรีงัจ กะ กาเญา บูกัด ลาฆู นู ซือซัจ นู ตะอารัฮ นู นะ ตีปู เตอ. 4 ตาปี บือกะ นู ตูฮัด เดะ อาตัซ ญา ลีฮัจ บาฌิ ดัฮ นะ กีเรบ บรีตา นู บาฌิ อีตู บรี กะ กามี. กะฆีเตอ กามี ปี มือญาเระ บรีตา อีตู. นู กามี บูวัจ กะฆีนี บูกัด นะ บรี โกะ ซือมียา ซูกา-ฮาตี ตาปี นะ บรี ตูฮัด ซูกา-ฮาตี. ญา เตอ นู มือญาซัจ ลีฮัจ ฮาตี นะ กามี. 5 กาเญา ตาฮู จะ กามี เตด ดือละ มือเลา มือโอจ โกะ ซือมียา. กามี เตด ดือละ มือเลา ปือมือเลา มาเนฮ บรี ตูโดก ลาฆู ฮาลูบา เดะ ฮาตี นะ กามี. ตูฮัด เลอ นู ฌาดี ซะซี จะ กามี เตด บือเลฮ บูวัจ กะฆีเตอ. 6 มีเซ-จะ นู กามี ฌาดี ปือญูโรฮ นะ เยซู คริด นะ มีตา เดะ กาเญา โปด บือเลฮ ตาปี ฮอย เลอ. กามี เตด ซูกา ลาฆู บือซัยํ มูคา เดะ ฮึลด มูคา นะ กาเญา เฆอ-จะ ซือมียา อาซิก โปด. กามี ดูโดะ เดะ ตืองัฮ กาเญา อาดา ฮาตี ตือจีฮัด บาฌิ กะ กาเญา ซือรูปา กะ มะ นู บือบือลา นานะ นะ ญา. 8 นู กามี ซายัก กาเญา กะฆีนี กามี อาดา ฮาตี ลีฮัจ บาฌิ นะ ฮาฆิ บรี กะ กาเญา บูกัด บรีตา นู บาฌิ นะ ตูฮัด ซา ลาฆู เตอ ตาปี นะ ยอม ซรัฮ ญาวา นะ กามี ตะอาซิก บรี กะ กาเญา ฌูฆา ซาเบะ กามี ซายัก กาเญา บาญะ ซูโงฮ. 9 โกะ ดีบราดี เออ ฆามะ กาเญา จับ บือเลฮ จะ กาลา กามี มือญาเระ บรีตา นู บาฌิ นะ ตูฮัด บรี กะ กาเญา ตาฮู เตอ กามี บือกรือฌา ปือนัจ ซูซัฮ ปายัฮ บือกรือฌา ซียัก มาลับ ดัฮ บีดา ตีเมา บรี กามี นะ บือฆาโดฮ ซาปา เดะ ลูมอฮ กาเญา เลอ. 10 กาเญา ฌาดี ซะซี ปาซัน ลาฆู นะ กามี. ตูฮัด โปด ฌาดี ซะซี ฌูฆา นู กามี บูวัจ ตูโรจ บือกะ ลาฆู นู จรัฮ บาฌิ นู บาฌิ-ตือปัจ นู ฮอย ตือปัจ นะ มือฌัฮ เดะ ตืองัฮ กาเญา นู ปือจายา. 11 ซาเบะ กาเญา ตาฮู จะ กามี บูวัจ ซือรูปา ปะ ฌางัน นานะ นะ ญา นู ปรีงัจ กะ กาเญา ปูโฌะ ฮาตี นะ กาเญา นู ตูโญะ ฌาลัด กะ กาเญา โซก ซืออูรัก 12 นะ บรี กาเญา บูวัจ ตูโรจ บือกะ นู บือฆูนา ฌางัน ตูฮัด เดะ อาตัซ. ญา เตอ นู ปาเงน กาเญา บรี มาโซะ เดะ ดือนียา บารู นู บือซายา บือซรี นะ ญา. 13 ซาเบะ ลาฆู กะฆีนี เลอ กามี บรี ซือลามัจ กะ ตูฮัด ฮอย เตด บราดู จะ ตานา กาเญา ดืองัยํ ปือมือเลา นะ ตูฮัด นู กามี มือญาเระ กาเญา ซาโมจ บาฌิ ดัฮ บูกัด บือกะ ปือมือเลา นะ ซือมียา ตาปี บือกะ ปือมือเลา นะ ตูฮัด. ญา เตอ ปือมือเลา นะ ตูฮัด ซูโงฮ เลอ นู ตืองัฮ บือกรือฌา เดะ ฮาตี นะ กาเญา นู ปือจายา. 14 โกะ ดีบราดี เออ กาเญา โปด บือเลฮ กือนา ลาฆู ซูซัฮ ซือรูปา ตูโรจ บือกะ โกะ ลูมอฮ นะ ตูฮัด เดะ อาตัซ นู อาดา เดะ นังฆรี ยูเดีย นู ฌาดี ลูมอฮ ซือมียา นะ เยซู คริด. นู กาเญา กือนา ซูซัฮ ปายัฮ เดะ ลูมอฮ ซือมียา นังฆรี นะ กาเญา ฌาดี ซือรูปา ลูมอฮ กูญา อีตู กือนา ดัฮ เดะ โกะ บักซา ยิว. 15 โกะ บักซา ยิว อีตู กูญา บือเลฮ บูนอฮ ตูฮัด เยซู ฌางัน ลูมอฮ ซือมียา ตูโดฮ ลาฆู นะ ตูฮัด เตอ กูญา ปรือกัด ลูมอฮ กามี ฌูฆา. กูญา บูวัจ บรี ตูฮัด เดะ อาตัซ ซูซัฮ-ฮาตี โตระ บูวัจ ลาฆู บลาวัด ฌางัน โกะ ซือมียา ซือมูฮา ฌูฆา. 16 กูญา อีตู บลารัก กามี ตีเมา บรี มือญาเระ ลาฆู นะ เยซู กะ ลูมอฮ บักซา อาซิก ฌาดี ลาฆู นู นะ บรี กูญา ฮีโดะ ลือปัซ บาฌิ ดัฮ. กะฆีเตอ กูญา ซือมาตา บูวัจ บรี ดูซา นะ กูญา บาญะ ปือนอฮ มีเม ดัฮ. เดะ ปือญูดัฮ ตูฮัด เดะ อาตัซ ญา มูซัยํ โตระ กรัจ ฮูโกบ กูญา ดัฮ. 17 ลูมอฮ ดีบราดี เออ กาลา กามี กือนา ปี ดูโดะ ฌาโวฮ เดะ กาเญา ซา วะตู ดัฮ บูกัด ฌาโวฮ เดะ ฮาตี ตาปี ฌาโวฮ ซา ญาวา. กะฆีเตอ กามี ฮาตี ฆางู ซูโงฮ บือคานะ นะ มาแรฮ ลีฮัจ มูคา นะ กาเญา ปูลัก. 18 กะฆีเตอ กามี อีงัจ นะ มาแรฮ ซารี กาเญา. กู เปาโล นี เลอ กู อีงัจ ซัจๆ นะ มาแรฮ ตาปี กือปาลา ฮาตู ซีตัด ญา ซือกัจ กามี ดัฮ. 19 ซาเบะ-จะ ลูมอฮ กาเญา ฌูฆา เลอ นู นะ ฌาดี ตือปัจ จาดัก นะ กามี นู นะ บรี กามี ซูกา-ฮาตี ฌาดี ตือปัจ งันตืองัน นะ กามี โซะ ฮึลด มูคา นะ เยซู ตูฮัด นะ กีตา วะตู ญา นะ ปาเระ มาแรฮ. 20 กรานา กาเญา นี เลอ นู บูวัจ บรี กามี อาดา ลาฆู นะ มือโอจ นู บรี กามี ซูกา-ฮาตี.
1 กะฆีเตอ กาลา กามี ตาฮัด ลาฆี เตด บือเลฮ กามี กีรา บาฌิ ดัฮ นู นะ ดูโดะ ซา กามี เดะ นังฆรี เอเทน 2 นะ ซูโรฮ ทิโมที ปี ซารี กาเญา. ญา เตอ ฌาดี อาดี นะ กามี ฌาดี ซือมียา บือกรือฌา บือซามา ฌางัน ตูฮัด เดะ ลาฆู มือญาเระ บรีตา นู บาฌิ ปาซัน เยซู คริด. กามี ซูโรฮ ญา ปี บีดา นะ ตูโลก กาเญา บรี ดูโดะ ตือตู ซูโงฮๆ นะ ปูโฌะ ฮาตี นะ กาเญา บรี ปือจายา ซูโงฮ. 3 กะฆีเตอ ฮอย ซาปา เดะ ลูมอฮ กาเญา นะ กูรัก-ฮาตี เดะ ลาฆู ซูซัฮ โตระ อีนี ซาเบะ กาเญา ตาฮู จะ ตูฮัด บือเลฮ บือกีรา จะ นะ บรี กีตา กือนา ลาฆู ซูซัฮ กะฆีนี. 4 ตานา กามี อาดา ดูโดะ บือซามา ฌางัน กาเญา เตอ กามี บือเลฮ มือเลา ฌางัน กาเญา ดูลู ดัฮ จะ กีตา ฆาโดฮ นะ ตาฮัด ลาฆู ซูซัฮ ปายัฮ. ญา ฌาดี ซูโงฮ กะฆีเตอ ดัฮ เลอ บือกะ ลาฆู นู กาเญา ตาฮู ดัฮ. 5 กะฆีเตอ เลอ ตานา กู ตาฮัด นาตี ลาฆี เตด บือเลฮ กู ซูโรฮ ทิโมที ปี ลีฮัจ จะ ลาฆู ปือจายา นะ กาเญา ฌาดี กะฮามี. กู ตาโกจ จะ ฮาตู ซีตัด มาแรฮ ลกลีฮัจ กาเญา เดะ ลาฆู นามาๆ ดัฮ บูวัจ บรี ลาฆู นู กามี บือกรือฌา ดัฮ เตอ เตด ฌาดี นามา เลอ. 6 ตาปี วะตู อีนี ทิโมที มาแรฮ ดาตัก เดะ กาเญา รอจ กะ กามี ดัฮ. ญา มือญาเระ บรีตา บาฌิ กะ กามี จะ นู กาเญา ปือจายา กาเญา ซายัก บาฌิ ดัฮ. ญา จะ นู กาเญา อีงัจ กะ กามี ซือลาลู บาฌิ เลอ นู กาเญา ฌีราซา นะ ฌือเงาะ ลีฮัจ กามี ซือรูปา กามี ฌีราซา นะ ฌือเงาะ ลีฮัจ กาเญา ฌูฆา. 7 ดีบราดี เออ มีเซ-จะ กามี กือนา ปรือกัด กือนา ซูซัฮ เตอ ตาปี นู กาเญา ปือจายา กะฆีนี บูวัจ บรี กามี ซือนัง-ฮาตี ดัฮ. 8 อาซัน-จะ กาเญา บือดีรี กือฌะ-กือมัซ ลือกัจ บือซามา ฌางัน ตูฮัด เตอ บูวัจ บรี กามี ดูโดะ ซือนัง ซูโงฮ ดัฮ เลอ. 9 กะฆีเตอ กามี นะ บรี ซือลามัจ กะ ตูฮัด นะ กีตา กรานา กาเญา บรี ฆือนะ บือเลฮ กะฮามี? กรานา กาเญา เลอ กามี ซูกา-ฮาตี บาญะ ซูโงฮ โซะ ฮึลด มูคา นะ ตูฮัด. 10 ซียัก มาลับ กามี ฆางู บือซาโวจ ปือนอฮ เดะ ฮาตี มีตา นะ บือเลฮ ลีฮัจ มูคา นะ กาเญา ปูลัก นะ บือเลฮ ตูโลก กาเญา บรี ลาฆู นู กาเญา ปือจายา นู กูรัก เตอ นะ บือตามัฮ บรี ปือนอฮ บาฌิ ดัฮ. 11 มีตา บรี ตูฮัด เดะ อาตัซ อาโปก นะ กีตา ฌางัน เยซู ตูฮัด นะ กีตา นะ ตูโญะ ฌาลัด บรี กามี นะ ปี รอจ กะ กาเญา. 12 มีตา เดะ ตูฮัด บรี กาเญา นะ ซายัก บือซามา-ซามา_ นะ ซายัก กะ ราตา ซือมียา บรี บือตามัฮ บาญะ ซือรูโลยํ ซือรูปา นู กามี ซายัก กะ กาเญา. 13 กะฆีเตอ ตูฮัด นะ บูวัจ บรี ฮาตี นะ กาเญา ตือตู ดัฮ. เดะ อารี อีตู นู เยซู ตูฮัด นะ กีตา นะ มาแรฮ ฌางัน โกะ ซือมียา นะ ญา ซือมูฮา กาเญา โปด นะ ฌาดี ซือมียา จรัฮ บาฌิ ฮอย ตือปัจ นะ มือฌัฮ โซะ ฮึลด มูคา นะ ตูฮัด เดะ อาตัซ อาโปก นะ กีตา.
1 โซะ ปือญูดัฮ อีนี โกะ ดีบราดี เออ กาเญา บือเลฮ บลาฌัยํ เดะ กามี ดัฮ จะ นะ บูวัจ ตูโรจ กะฮามี นู นะ บรี ตูฮัด ซูกา-ฮาตี. นี เลอ กาเญา ตืองัฮ บูวัจ ตูโรจ กะฆีนี. กะฆีเตอ เดะ นามา นะ ตูฮัด เยซู กามี มีตา กือมัซๆ เดะ กาเญา ปรีงัจ กะ กาเญา บรี บูวัจ ตูโรจ กะฆีเตอ พรัด บาญะ ซือรูโลยํ เลอ. 2 กรานา กาเญา ตาฮู ดัฮ ลาฆู นามา นู กามี ปือซัด ฌางัน กาเญา เดะ นามา นะ ตูฮัด เยซู. 3 ซาเบะ ลาฆู อีนี เลอ ฌาดี ลาฆู นู ตูฮัด บือคานะ นะ บรี กาเญา ฌาดี ซือมียา จรัฮ บาฌิ ซูโงฮ ฮอย ลาฆู บือกาเซฮ นามา โปด. 4 บรี กาเญา ราตา ซือมียา ตาฮู ลาฆู ดูโดะ บือซามา ฌางัน บีนี เดะ ลาฆู นู บาฌิ ซูโงฮ นู นะ บรี โกะ ซือมียา มือโอจ 5 บูกัด ลาฆู ฆาละ นะ บือกาเซฮ ซือรูปา ลูมอฮ บักซา อาซิก นู เตด กราลา ตูฮัด. 6 ฌางัน บรี ซาปา บูวัจ ลือเบฮ เดะ ฮาดัจ บูวัจ ซาลัฮ ฌางัน กาวัด เดะ ลาฆู อีนี. ซาเบะ ตูฮัด เตอ เลอ ญา นะ กรัจ ฮูโกบ ราตา ซือมียา นู บูวัจ กะฆีนี. ลาฆู อีนี กามี บือเลฮ มือญาเระ กะ กาเญา ดูลู บือเลฮ ปรีงัจ กะ กาเญา บรี กือมัซๆ ดัฮ. 7 นู ตูฮัด เดะ อาตัซ ปาเงน กีตา มาแรฮ ดัฮ บูกัด นะ บรี บูวัจ ลาฆู ตะอารัฮ ตาปี บรี ฌาดี ซือมียา นู จรัฮ บาฌิ ซูโงฮ. 8 กะฆีเตอ ซาปา นู กีปัซ ลาฆู อีนี บูวัก บูกัด ญา กีปัซ ซือมียา เตอ ตาปี ญา กีปัซ ตูฮัด นู บรี ซือมืองัจ นู บาฌิ บือซรี นะ ญา กะ กาเญา เลอ. 9 ปาซัน ลาฆู นะ ซายัก กะ ดีบราดี เตอ เตด ปายัฮ ฆาแรฮ นามา บรี กะ กาเญา ซาเบะ กาเญา ตะอาซิก บือเลฮ บลาฌัยํ เดะ ตูฮัด เดะ อาตัซ ดัฮ นู จะ กือนา ซายัก บือซามา-ซามา. 10 ซูโงฮ เลอ กาเญา บูวัจ ตูโรจ ลาฆู อีนี ฌางัน ลูมอฮ ดีบราดี เดะ นังฆรี มาซิโดเนีย ราตา. ตาปี ดีบราดี เออ กามี ปรีงัจ กะ กาเญา บรี กาเญา ซายัก บรี บาญะๆ บือตามัฮ ปี ซือรูโลยํ เลอ. 11 บรี กาเญา กูวาซา นะ ดูโดะ งะซืองะ บือกรือฌา ลาฆู นะ ญาวา ตะอาซิก. บรี มียา มากัด ฌางัน อูรัจ นะ กาเญา ตะอาซิก ซือรูปา กามี ปือซัด กาเญา ดัฮ 12 บีดา ซือมียา วัยํ-ลูวัยํ นะ กือนา มือโอจ กะ ปือบูวัจ นะ กาเญา บีดา กาเญา นะ เตด ฆาโดฮ บือซานัยํ เดะ ซาปา เลอ. 13 โกะ ดีบราดี เออ กามี ซูกา นะ บรี กาเญา ตาฮู ลาฆู นะ ซือมียา นู มาตี มือนีงัน ปี ดัฮ บีดา ตีเมา บรี กาเญา นะ ซูซัฮ-ฮาตี ซือรูปา โกะ ซือมียา อาซิก นู ฮอย ลาฆู จาดัก เดะ ตูฮัด. 14 กีตา ปือจายา จะ เยซู มาตี ดัฮ ฮีโดะ ปาเระ ดัฮ. กะฆีเตอ ลูมอฮ ซือมียา นู ปือจายา กะ เยซู นู มาตี ดัฮ ตูฮัด เดะ อาตัซ นะ บาวา กูญา บือปี บือซามา ฌางัน เยซู ฌูฆา. 15 อาดา ปือมือเลา นะ ตูฮัด เยซู ตะอาซิก นู กามี มือเลา กะ กาเญา จะ กีตา นู อาดา ฮีโดะ รอจ กะ อารี อีตู นู ตูฮัด เยซู ปาเระ มาแรฮ ปูลัก เตอ ตือตู ดัฮ กีตา เตด ปี ดูลู เดะ ลูมอฮ ซือมียา นู มาตี ดัฮ. 16 ซาเบะ ตูฮัด เยซู ตะอาซิก เตอ ญา นะ ตูโรด มาแรฮ ดาตัก เดะ ลาแงะ. อาดา ฌางัน ปือมือซัด ซูวารา บือซัยํ. อาดา ฌางัน ปือมือเลา นะ กือปาลา ฮูลู-บาลัก นะ ตูฮัด. อาดา ฌางัน บูงี ซือลูนัย นะ ตูฮัด. กะฆีเตอ ลูมอฮ ซือมียา นู มาตี ดัฮ นู ปือจายา กะ เยซู คริด เตอ กูญา นะ ฮีโดะ ปาเระ ดูลู. 17 เดะ บลากัก กีตา นู อาดา ฮีโดะ ลาฆี รอจ กะ อารี อีตู กีตา นะ กือนา ฮามัจ ญาแญะ บือปี กะ ดาลับ กือมูวัง บือซามา ฌางัน กูญา อีตู. กีตา นะ ดาปัจ ตูฮัด เยซู เดะ โซะ อาตัซ นะ บือเลฮ ดูโดะ บือซามา ฌางัน ญา ซือลาลู. 18 กะฆีเตอ บรี กาเญา ปูโฌะ ฮาตี นะ กาวัด บือซามา-ซามา ฌางัน ลาฆู อีนี เลอ.
1 โกะ ดีบราดี เออ ลาฆู อีนี นะ ฌาดี อารี ดีฮา วะตู ดีฮา กามี เตด ฆาโดฮ นะ ฆาแรฮ ซูรัจ บรี กะ กาเญา. 2 ซาเบะ กาเญา ตะอาซิก ตาฮู บาฌิ ดัฮ นู จะ อารี นะ ตูฮัด นะ รอจ ดัฮ ซือรูปา อูรัก ปือญูรี นู มาแรฮ เดะ โซะ วะตู มาลับ. 3 ตานา โกะ ซือมียา ตืองัฮ มือเลา จะ "ซือนัง ดัฮ ลือปัซ ดัฮ" กาลา อีตู เลอ ลาฆู ฌาฮานัม นะ รอจ กะ กูญา ดัดดัด ดัฮ ฌาดี ซือรูปา นีบีนี นู บือโปรจ บราซา ซาเกะ นะ ดูโดะ เดะ อาปี. กะฆีเตอ กูญา นะ ลารี โปด เตด ลือปัซ ดัฮ. 4 ตาปี ดีบราดี เออ กาเญา เลอ เตด ดูโดะ เดะ โซะ กือลับ ดัฮ บรี อารี อีตู นะ รอจ กะ กาเญา ซือรูปา อูรัก ปือญูรี. 5 ตาปี กาเญา เลอ ซือมูฮา ฌาดี ซือมียา ดูโดะ โซะ จรัฮ โซะ ซียัก. กีตา เตด ฌาดี ซือมียา ดูโดะ โซะ มาลับ โซะ กือลับ. 6 กะฆีเตอ ฌางัน บรี กีตา ลีนา ซือรูปา โกะ ซือมียา ฆีลาฆี ตาปี บรี กีตา ฌาฆา บรี บาฌิ. บรี กีตา ฌากา ฮาตี นะ ตะอาซิก. 7 ซาเบะ โกะ ซือมียา นู ตีโนะ ลีนา กูญา นะ ลีนา โซะ มาลับ. โกะ ซือมียา มาโบะ กูญา นะ มาโบะ โซะ มาลับ. 8 ตาปี กีตา อีนี ฌาดี ซือมียา โซะ ซียัก. กะฆีเตอ บรี กีตา ฌากา ฮาตี นะ ตะอาซิก. บรี กีตา ฌาดี ซือรูปา ตาฮัน นู อาดา ลาฆู ปือจายา ลาฆู ซายัก กะ ตูฮัด ฌาดี ซือรูปา บาฌู บือซี นู กือตัก ตาฮะ ดาดา เตอ นู อาดา ลาฆู นู กีตา จาดัก นะ ฮีโดะ ลือปัซ บาฌิ ดัฮ ฌาดี ซือรูปา โมะ บือซี กือตัก ปาลา เตอ. 9 ซาเบะ ตูฮัด ตืองะ กีตา บูกัด บรี กือนา นู ตูฮัด มูซัยํ กรัจ ฮูโกบ ตาปี นะ บรี ซาโมจ ลาฆู นู เยซู คริด ตูฮัด นะ กีตา นะ ตูโลก บรี กีตา ฮีโดะ ลือปัซ บาฌิ ดัฮ. 10 ญา มาตี กรานา กีตา ดัฮ. กะฆีเตอ เตด-จะ กีตา ดาฮานี เฆอ-จะ ลีนา โปด กีตา นะ ปี ดูโดะ บือซามา ฌางัน ญา. 11 กะฆีเตอ บรี กีตา ปูโฌะ-ฮาตี บือซามา-ซามา บรี มือเลา ลาฆู นู นะ ตูโลก กาวัด ซือรูปา นู กาเญา ตืองัฮ บูวัจ เตอ. 12 ดีบราดี เออ กามี มีตา เดะ กาเญา บรี ตูเฮะ กะ โกะ ซือมียา นู บือกรือฌา โตระ เดะ ตืองัฮ กาเญา นู บือบือลา กาเญา เดะ นามา นะ ตูฮัด นู ปรีงัจ กะ กาเญา บรี ตูโรจ กะ ตูฮัด. 13 กือนา อาเกะ ฌูโญก กูญา อีตู ซายัก กะ กูญา บรี บาญะ ซูโงฮ ซาเบะ กูญา บือกรือฌา กะฆีเตอ. บรี กาเญา ซือมูฮา ดูโดะ บือซามา บรี ซือนัง ซือลามัจ เลอ. 14 ดีบราดี เออ กามี มีตา เดะ กาเญา บรี ปรีงัจ กะ ซือมียา ซือฆัด ปูโฌะ ซือมียา นู กูรัก-ฮาตี ตูโลก ซือมียา ฮอย อูรัจ ตาฮัด-ฮาตี เดะ ราตา ซือมียา. 15 ฌาฆา บรี บาฌิ เลอ ฌางัน บรี ซาปา บูวัจ ลาฆู ตะอารัฮ บาลัซ ลาฆู ตะอารัฮ นะ กาวัด. ตาปี กือนา มียา ฌาลัด นะ ตูโรจ กะ ลาฆู นู บาฌิ ซือลาลู เดะ ตืองัฮ ลูมอฮ กาเญา ตะอาซิก เตอ ฌางัน ซือมียา ซือมูฮา ฌูฆา. 16 บรี กาเญา ซูกา-ฮาตี ซูโงฮ ซือลาลู เลอ. 17 กือนา บือซาโวจ ซือลาลู เตด บราดู เลอ. 18 กือนา บรี ซือลามัจ กะ ตูฮัด เดะ ราตา มาจับ. นี เลอ ฌาดี ลาฆู นู ตูฮัด บือคานะ บรี กาเญา นะ ตูโรจ กะ เยซู คริด กะฆีนี. 19 ฌางัน ปาดับ ซือมืองัจ นะ ตูฮัด เลอ. 20 ฌางัน นะ กีปัซ ปือมือเลา นะ ซือมียา นู มือเลา ตูโดฮ ลาฆู นะ ตูฮัด. 21 บรี มือญาซัจ เดะ ราตา ลาฆู. ลาฆู นู บาฌิ เตอ กือนา ตูโรจ ซูโงฮ. 22 นามาๆ นู ฌาฮัจ เตอ กือนา ตีงัน บูวัก เลอ. 23 มีตา เดะ ตูฮัด เดะ อาตัซ นู บรี กีตา ดูโดะ ซือนัง ซือลามัจ บรี ญา ตะอาซิก นะ ตืองะ กาเญา ฌาดี ซือมียา จรัฮ บาฌิ ราตา มาจับ. บรี ญา บือบือลา กาเญา โซะ ซือมืองัจ โซะ ฮาตี โซะ ญาวา. กะฆีเตอ กาลา เยซู คริด ตูฮัด นะ กีตา นะ มาแรฮ ปูลัก กาเญา นะ ฮอย ตือปัจ นะ มือฌัฮ นามา โปด. 24 ตูฮัด นู ปาเงน กาเญา ดัฮ ญา ฮาตี รือมัก ญา นะ บูวัจ ลาฆู อีนี บรี ซุจ ซือมูฮา ดัฮ. 25 ดีบราดี เออ มีตา เดะ กาเญา บรี บือซาโวจ บีดา กามี ฌูฆา. 26 กาเญา กือนา บือฌาบัจ ตางัน บือซามา-ซามา ฌางัน โกะ ดีบราดี นู ปือจายา บือกะ ฌาดี โกะ ซือมียา นะ ตูฮัด. 27 กู ปือซัด กาเญา เดะ นามา นะ ตูฮัด บรี บาจา ซูรัจ อีนี กะ ลูมอฮ ซือมียา ปือจายา บรี กะ กูญา มือนีงัย ซือมูฮา. 28 มีตา เดะ เยซู คริด ตูฮัด นะ กีตา บรี ซือลามัจ กะ กาเญา ซือมูฮา เลอ.
1 กามี เปาโล ซีลา ฌางัน ทิโมที กามี กีเรบ ซูรัจ อีนี บรี กะ ลูมอฮ นะ ตูฮัด เดะ นังฆรี เทซะโลนิกา นู ลือกัจ บือซามา ฌางัน ตูฮัด อาโปก เดะ อาตัซ นะ กีตา ฌางัน ตูฮัด เยซู คริด. 2 มีตา เดะ ตูฮัด นู อาโปก นะ กีตา มีตา เดะ ตูฮัด เยซู คริด นะ บรี ซือลามัจ กะ กาเญา บรี กาเญา ดูโดะ ซือนัง ซือลามัจ เลอ. 3 ดีบราดี เออ กามี กือนา บรี ซือลามัจ กะ ตูฮัด เดะ อาตัซ กรานา กาเญา ซือลาลู. กามี ปาโตจ นะ บูวัจ กะฆีนี กรานา นู กาเญา ปือจายา เตอ บือตามัฮ พรัด บาญะ นู กาเญา ซายัก บือซามา โซก ซืออูรัก เตอ บือตามัฮ บาญะ ฌูฆา. 4 กะฆีเตอ กามี ตะอาซิก งันตืองัน ปาซัน ลาฆู นะ กาเญา บรี กะ โกะ ลูมอฮ นะ ตูฮัด เดะ อาตัซ นู ซิก-อาซิก ตาฮู นู กาเญา ตาฮัด ลามา นู กาเญา ปือจายา เดะ วะตู กาเญา กือนา ปรือกัด บาญะ มาจับ กือนา ซูซัฮ ปายัฮ โตระ เตอ. 5 ลาฆู อีนี บรี ลีฮัจ ซัฮ จะ นู ตูฮัด กรัจ ฮูโกบ กือนา ลาฆู ดัฮ. กะฆีเตอ ญา บูวัจ บรี กาเญา บือฆูนา เลอ นะ มาโซะ กะ ดือนียา บารู นะ ญา. กะฆีเตอ เลอ กาเญา ตืองัฮ กือนา ซูซัฮ ปายัฮ บีดา นะ มาโซะ กะ ดือนียา บารู อีตู. 6 ซาเบะ ตูฮัด เดะ อาตัซ นะ บูวัจ ลาฆู นู บาฌิ-ตือปัจ เลอ นะ บาลัซ ลาฆู ซูซัฮ ปายัฮ กะ ลูมอฮ ซือมียา นู บูวัจ บรี กาเญา กือนา ซูซัฮ ปายัฮ เตอ 7 นะ บาลัซ ปูโฌะ กาเญา นู กือนา ซูซัฮ ปายัฮ อีตู บรี ดูโดะ ซือนัง นะ ปูโฌะ กามี ซามา. นะ ฌาดี กะฆีนี กาลา ตูฮัด เยซู นะ ปลีฮัจ นะ ตูโรด มาแรฮ เดะ โซะ ลาแงะ บือซามา ฌางัน ลูมอฮ ฮูลู-บาลัก นู กรัซ นะ ญา อาดา ฌางัน ญาลา อาปี เลอ. 8 ญา นะ กรัจ ฮูโกบ บาลัซ ลูมอฮ ซือมียา นู เตด กราลา ตูฮัด เดะ อาตัซ นู ตีเมา มือนีงัย กะ บรีตา นู บาฌิ นะ เยซู ตูฮัด นะ กีตา. 9 ลูมอฮ ซือมียา กะฆีเตอ นะ กือนา ฮูโกบ นะ ฌาฮานัม ซือลาลู บรี ฌาโวฮ เดะ มูคา นะ ตูฮัด บรี ฌาโวฮ เดะ ลาฆู มือฆัฮ นู บือซรี นะ ญา. 10 เดะ อารี อีตู ญา นะ มาแรฮ นะ บรี โกะ ซือมียา นะ ญา นะ ปูฌี มือโอจ กะ ญา นะ บรี ลูมอฮ ซือมียา ปือจายา ซือมูฮา นะ ตูเฮะ กะ ญา ฮาตี ตาโกจ เลอ. กาเญา ฌูฆา ฌาดี ซือมียา นู ปือจายา กะ ปือมือเลา ซะซี นะ กามี ดัฮ. 11 กะฆีเตอ เลอ กามี อีนี บือซาโวจ ปาซัน กาเญา ซือลาลู. กามี มีตา บรี ตูฮัด เดะ อาตัซ นะ กีตา บูวัจ บรี กาเญา นะ ตูโรจ กะ ลาฆู นู ปาโตจ ฌางัน ซือมียา นู ญา ปาเงน ดัฮ. เดะ ลาฆู บาฌิ ซือมูฮา นู กาเญา บือคานะ นะ บูวัจ ซาเบะ ปือจายา กะ เยซู ดัฮ มีตา บรี ตูฮัด นู กรัซ นะ ตูโลก กาเญา บรี บูวัจ ซุจ ฮาบิฮ ดัฮ. 12 กามี มีตา กะฆีเตอ นะ บรี กาเญา นะ ปูฌี มือโอจ กะ นามา นะ เยซู ตูฮัด นะ กีตา นะ บรี ตูฮัด นะ มือโอจ กะ กาเญา ฌูฆา. นะ ฌาดี กะฆีเตอ บือกะ นู ตูฮัด เดะ อาตัซ นะ กีตา ฌางัน ตูฮัด เยซู คริด กูญา ฮาลัย บรี ซือลามัจ กะ กีตา ดัฮ.
1 ดีบราดี เออ ปาซัน ลาฆู นู เยซู คริด ตูฮัด นะ กีตา นะ มาแรฮ ปูลัก เตอ นู กีตา นะ บือมุน บือซามา ฌางัน ญา เตอ กามี มีตา เดะ กาเญา กือมัซๆ จะ 2 ฌางัน บรี กาเญา มูดัฮ นะ ฆาโดฮ-ฮาตี นะ ตือกือฌุจ กรานา ปือมือเลา นู มืองากู จะ "อารี นะ ตูฮัด ญา รอจ ดัฮ". มีเซ-จะ ฌาดี ลาฆู มือเลา ตูโดฮ เตอ ฌาดี ปือมือเลา มือญาเระ ฌาดี ซูรัจ โปด นู ซือมียา อีงัจ จะ ฌาดี ปือมือเลา นะ กามี เตอ ฌางัน ปือจายา เลอ. 3 ฌางัน บรี ซาปา มือเลา ปือมือเลา นามา นู มือนีปู กาเญา. กรานา อารี นะ ตูฮัด นะ มาแรฮ ตาปี ดูลู เดะ อารี นะ ตูฮัด อีตู นะ มาแรฮ อาดา ซา วะตู นู โกะ ซือมียา บาญะ นะ ตีงัน ตูฮัด บูวัก นะ บลาวัด ฌางัน ญา. วะตู อีตู ซือมียา นู บือดูซา โตระ อีตู นะ มาแรฮ ปลีฮัจ ฌาดี ซือมียา นู นะ กือนา ฌาฮานัม ซูโงฮ. 4 ญา เตอ นะ บลาวัด นู ตืองะ ญาวา ตะอาซิก บรี ฌาดี บือซัยํ เดะ นามาๆ โปด นู โกะ ลูมอฮ ซือมียา อีงัจ ฌาดี ตูฮัด นะ กูญา นู กูญา มือญือมัฮ เตอ. ญา นะ มาโซะ กะ บาลัย นะ ตูฮัด นะ ดูโดะ เปะ อีตู นะ มืองากู จะ ญา เลอ ฌาดี ตูฮัด เดะ อาตัซ. 5 กาลา กู อาดา บือซามา ฌางัน กาเญา กู มือญาเระ ลาฆู อีตู กะ กาเญา ดัฮ. กาเญา จับ เตด บือเลฮ เฆอ? 6 กาเญา ตาฮู จะ เดะ วะตู อีนี อาดา ลาฆู นามา นู ซือกัจ ซือมียา อีตู. ตาปี ตานา รอจ วะตู ดัฮ ซือมียา นู บือดูซา โตระ ซีงี นะ มาแรฮ ปลีฮัจ. 7 ซาเบะ-จะ ฮาตู ซีตัด ญา ตืองัฮ จูรี บือกรือฌา บรี ซือมียา บาญะ บลาวัด ฌางัน ตูฮัด. ตาปี ซือมียา นู ซือกัจ อีตู ญา นะ ซือกัจ ลาฆี รอจ กะ วะตู นู ญา กือนา อาเมด บือปี ดัฮ. 8 วะตู อีตู เลอ ซือมียา นู บือดูซา โตระ อีตู ซีงี นะ มาแรฮ ปลีฮัจ. ตูฮัด เยซู นะ มาแรฮ ปลีฮัจ ญา นะ รือฆู อาเงน เดะ มูโลจ กือปุฮ ซือมียา อีตู ปี ฮาบิฮ บูวัก ดัฮ ญา นะ ปลีฮัจ นู บือซายา บือซรี นะ โปรฮ ซือมียา อีตู บรี ฌาฮานัม ฮาบิฮ ดัฮ. 9 กาลา ซือมียา บือดูซา โตระ นะ มาแรฮ เตอ ปือบูวัจ นะ ญา นะ ฌาดี ลาฆู บือกรือฌา นะ กือปาลา ฮาตู ซีตัด อาดา ฌางัน โกะ ปือนานา ซีดี นู มือฆัฮ นู ปือและ โตระ เตอ นู ฌาดี ลาฆู มืออูปัย ซือมูฮา. 10 ญา เตอ นะ บูวัจ ลาฆู ฌาฮัจ บาญะ นะ มืออูปัย ลูมอฮ ซือมียา นู นะ ฌาฮานัม ซาเบะ กูญา เตด ซูกา ลาฆู นู ซูโงฮ ตีเมา นะ ซาโมจ ลาฆู อีตู นู นะ ตูโลก กูญา บรี ฮีโดะ ลือปัซ บาฌิ. 11 นู ฌาดี กะฆีเตอ ซาเบะ ตูฮัด เดะ อาตัซ เตอ ญา บูวัจ ลาฆู มือฆัฮ บรี กูญา นะ ตูโรจ ฌาลัด นู ซือซัจ ซูโงฮ นะ ปือจายา กะ ลาฆู มืออูปัย อีตู. 12 กะฆีเตอ เลอ ลูมอฮ ซือมียา นู เตด ปือจายา กะ ลาฆู นู ซูโงฮ เตอ นู ซูกา-ฮาตี นะ ตูโรจ กะ ลาฆู นู ฌาฮัจ เตอ กูญา ซือมูฮา นะ กือนา กรัจ ฮูโกบ บรี ฮาบิฮ เลอ. 13 เออ โกะ ดีบราดี นู ตูฮัด ซายัก ดัฮ เตอ กามี กือนา บรี ซือลามัจ กะ ตูฮัด เดะ อาตัซ กรานา กาเญา ซือลาลู. กรานา ตะเดะ ลามูลา นูตู ญา ปีเลฮ กาเญา ดัฮ ญา บูวัจ บรี ซือมืองัจ นะ ญา ตืองะ กาเญา ดัฮ บรี ฌาดี ซือมียา จรัฮ บาฌิ นะ ญา บูวัจ บรี กาเญา ปือจายา กะ ลาฆู นู ซูโงฮ เตอ บีดา นะ บรี กาเญา นะ ฮีโดะ ลือปัซ บาฌิ. 14 กาลา กามี ปี มือญาเระ บรีตา นู บาฌิ กะ กาเญา เตอ ญา ปาเงน กาเญา บรี รอจ กะ ลาฆู ฮีโดะ อีนี ดัฮ นะ บรี กาเญา บือเลฮ บาฮาเฆด ฌางัน เยซู คริด ตูฮัด นะ กีตา เดะ นู บือซายา บือซรี นะ ญา. 15 กะฆีเตอ เลอ ดีบราดี เออ บรี กาเญา บือดีรี ตือตู ตูโรจ กะ ลาฆู นู กามี กีเรบ กะ กาเญา ดัฮ เตด-จะ ปือมือเลา นู กามี มือญาเระ ดัฮ เฆอ-จะ ปือมือเลา เดะ ซูรัจ นู กามี ฆาแรฮ โปด กือนา ตูโรจ เลอ. 16 กะฆีเตอ กามี บือซาโวจ กะ เยซู คริด ตะอาซิก นู ฌาดี ตูฮัด นะ กีตา เตอ บือซาโวจ กะ ตูฮัด เดะ อาตัซ อาโปก นะ กีตา ญา เลอ นู ซายัก กีตา ดัฮ นู ฮาลัย บรี ซือลามัจ กะ กีตา นู ปูโฌะ ฮาตี นะ กีตา ซือลาลู นู บูวัจ บรี กีตา จาดัก นะ ดาปัจ บือนา นู บาฌิ เตอ. 17 กามี มีตา บรี ตูฮัด นะ ปูโฌะ ฮาตี นะ กาเญา นะ บรี กาเญา อาดา ฮาตี กือฌะ-กือมัซ บรี กาเญา นะ บูวัจ ลาฆู บาฌิ นะ มือเลา ปือมือเลา บาฌิ ซือลาลู.
1 โกะ ดีบราดี เออ เดะ ปือญูดัฮ อีนี บรี กาเญา บือซาโวจ บีดา กามี มีตา บรี ปือมือเลา ปาซัน ตูฮัด เยซู นะ กือจัย ปี ราตา บรี ลูมอฮ ซือมียา นะ มือโอจ กะ ปือมือเลา อีตู บือกะ บือฌาดี เดะ ลูมอฮ กาเญา ดัฮ. 2 บือซาโวจ ฌูฆา บรี ตูฮัด นะ ตูโลก กามี บรี ลือปัซ เดะ ซือมียา ฮอย เตด บือฆูนา เดะ ซือมียา ฌาฮัจ ซาเบะ บูกัด ราตา ซือมียา นู ปือจายา. 3 ตาปี ตูฮัด ญา ฮาตี รือมัก เลอ นะ บูวัจ บรี กาเญา กือฌะ-กือมัซ นะ บือบือลา กาเญา บรี ลือปัซ เดะ ลาฆู นู ฌาฮัจ. 4 ตูฮัด ญา บูวัจ บรี กามี ตือตู-ฮาตี เดะ กาเญา จะ นู กาเญา ตืองัฮ ตูโรจ ลาฆู นู กามี ปือซัด กะ กาเญา นู กาเญา นะ ตูโรจ ลาฆี เดะ วะตู โซะ ฮึลด เลอ. 5 กามี มีตา เดะ ตูฮัด บรี กาเญา นะ ตาฮู ปือนอฮ เดะ ฮาตี นู ตูฮัด เดะ อาตัซ ซายัก กาเญา นู เยซู คริด นะ บรี กาเญา ตาฮัด-ฮาตี ลามา. 6 โกะ ดีบราดี เออ กามี ปือซัด กาเญา เดะ นามา นะ เยซู คริด ตูฮัด นะ กีตา บรี มืองือละ เดะ ลูมอฮ ดีบราดี นู ซือฆัด นู ตีเมา ตูโรจ กะ ลาฆู นู กามี กีเรบ ฌางัน กาเญา ดัฮ. 7 กรานา กาเญา ตะอาซิก ตาฮู จะ นู กาเญา กือนา บูวัจ ตูโรจ จูตอ นะ กามี. กาลา กามี บือซามา ฌางัน กาเญา ดัฮ กามี เตด ฌาดี ซือมียา ปือญือฆัด. 8 กามี ตีเมา มากัด บารัก มากัด นะ ซาปา นู กามี เตด บือลี ดัฮ. ตาปี กามี บือกรือฌา ซียัก มาลับ ดัฮ บือกรือฌา ปือนัจ ซูซัฮ ปายัฮ ตีเมา ฆาโดฮ ซาปา เดะ ลูมอฮ กาเญา บรี บือบือลา กามี. 9 บูกัด-จะ กามี ฮอย ลาฆู มือฆัฮ นะ มีตา เดะ กาเญา บรี บือบือลา กามี ตาปี กามี เตด บูวัจ กะฆีเตอ. กามี บือกรือฌา โตระ นะ บรี กามี ฌาดี จูตอ นู นะ บรี กาเญา ตูโรจ. 10 วะตู กามี อาดา บือซามา ฌางัน กาเญา ดัฮ กามี บือเลฮ ปือซัด กาเญา จะ "ดัฮ ซือมียา ดีฮา ซือฆัด นะ บือกรือฌา ฌางัน บรี ญา มากัด เลอ." 11 กรานา กามี ดืองัยํ ดัฮ นู อาดา ซือมียา ซือตืองัฮ เดะ ลูมอฮ กาเญา นู ซือฆัด นะ บือกรือฌา ลาฆี ตาปี ปี บือฆาโดฮ เดะ ลาฆู นะ กาวัด. 12 กามี ปือซัด กะ ลูมอฮ ซือมียา กะฆีเตอ ปรีงัจ กะ กูญา เดะ นามา นะ เยซู คริด ตูฮัด นะ กีตา บรี กูญา บือกรือฌา ฮาตี ซืองะ บรี มากัด บารัก มากัด นู ซารี ตะอาซิก. 13 ตาปี กาเญา โกะ ดีบราดี เออ ฌางัน ซือฆัด นะ บูวัจ ลาฆู บาฌิ เลอ. 14 กะ ซาปา ตีเมา ตูโรจ กะ ปือมือซัด นะ กามี เดะ ซูรัจ อีนี กาเญา กือนา จับ ซือมียา อีตู ตาโรฮ ฌางัน บือเฆาะ บือซามา ฌางัน ญา บรี กะ ญา นะ บือเลฮ จือและ. 15 ตาปี ฌางัน กีรา จะ ญา ฌาดี ซือตรู ดัฮ. กือนา ปรีงัจ กะ ญา ซือรูปา ปรีงัจ กะ อาดี-บราดี. 16 มีตา เดะ ตูฮัด นู บรี กีตา ดูโดะ ซือนัง ซือลามัจ บรี ญา ตะอาซิก นะ บรี กะ กาเญา ดูโดะ ซือนัง ซือลามัจ กะฆีเตอ บีลัก วะตู ราตา มาจับ. มีตา บรี ตูฮัด นะ ดูโดะ บือซามา ฌางัน กาเญา ซือมูฮา. 17 กู เปาโล ตะอาซิก ฆาแรฮ ซือปาตัฮ อีนี นู จะ "ซือลามัจ เลอ" ฌาดี ตานา นะ กู นู กู ฆาแรฮ เดะ ซูรัจ นะ กู ซือมูฮา. 18 มีตา บรี เยซู คริด ตูฮัด นะ กีตา บรี ซือลามัจ กะ กาเญา ซือมูฮา เลอ.
1 กู เปาโล ฌาดี ปือญูโรฮ นะ เยซู คริด ตูโรจ ปือมือซัด นะ ตูฮัด เดะ อาตัซ นู ตูโลก กีตา บรี ฮีโดะ ลือปัซ บาฌิ ตูโรจ ปือมือซัด นะ เยซู คริด นู ฌาดี ตือปัจ ฮาระ นะ กีตา เลอ. 2 กู ฆาแรฮ ซูรัจ อีนี กีเรบ กะ ทิโมที นู ฌาดี ซือรูปา นานะ ซูโงฮ นะ กู เดะ ลาฆู ปือจายา. มีตา เดะ ตูฮัด บือซัยํ นู ฌาดี อาโปก เตอ มีตา เดะ เยซู คริด นู ฌาดี ตูฮัด นะ กีตา นะ บรี ซือลามัจ กะ เกา นะ ตือจีฮัด กะ เกา นะ บรี เกา ดูโดะ ซือนัง ซือลามัจ เลอ. 3 กาลา กู ตืองัฮ ปี กะ โซะ นังฆรี มาซิโดเนีย กู บือเลฮ ซูโรฮ เกา นาตี ตือปัจ นังฆรี เอเฟซัด ลาฆี ซาเบะ-จะ อาดา โกะ ซือมียา ซือตืองัฮ นู อาฌัยํ ลาฆู ซาลัฮๆ. กะฆีเตอ บรี เกา ดูโดะ โซะ อีตู บีดา นะ ปือซัด กูญา บรี กือมัซๆ จะ ตีเมา บรี อาฌัยํ ลาฆู ซาลัฮ กะฆีเตอ. 4 ฌางัน บรี กูญา ตูโรจ กะ โกะ ลาฆู จรือตา นู เตด บือฆูนา เตอ กะ ลาฆู นู เตด ดือละ ฮาบิฮ ปาซัน โกะ บีลาแก เตอ. ลาฆู กะฆีนี บูวัจ บรี กูญา บือตือฆัฮ-ตือฆัฮ เตด บรี มาโซะ เดะ ฮาตี ลาฆู นู ตูฮัด กีรา ดูลู ดัฮ นู กีตา ซือมียา ปือจายา นะ บือเลฮ ตาฮู เลอ. 5 กู ปือซัด กะฆีนี บีดา กีตา นะ บือซายัก-ซายัก ดาตัก เดะ ฮาตี นู จรัฮ บาฌิ ฮาตี นู บราซา จะ ฮอย ซาลัฮ นามา ดาตัก เดะ ฮาตี นู ปือจายา บือซูโงฮ-ซูโงฮ เลอ. 6 อาดา ซือมียา ซือตืองัฮ นู ตือซีเป เดะ ลาฆู กะฆีนี มาโซะ ปี มือเลา ลาฆู เตด ตือปากัย ซือซัจ ฌาลัด กะฆีเตอ ดัฮ เลอ. 7 กูญา ซูกา นะ ฌาดี ซือมียา อาฌัยํ ปือมือเลา ฮูโกบ นะ ตูฮัด ตาปี มีเซ-จะ โกะ ปือมือเลา นู กูญา มือเลา เตอ โกะ ลาฆู นู กูญา บรานี อาฌัยํ ดัฮ โปด กูญา เตด ตาฮู ซูโงฮ เลอ. 8 กีตา ซือมูฮา ตาฮู จะ กะ ซือมียา ดีฮา ซูโรฮ ปือมือเลา ฮูโกบ อีตู กือนา ลาฆู เตอ ปือมือเลา ฮูโกบ อีตู บาฌิ กะฆีเตอ เลอ. 9 ตาปี กีตา ตาฮู กะฆีนี ฌูฆา จะ โกะ ปือมือเลา ฮูโกบ กือนา ตืองะ ดัฮ บูกัด นะ ฮูโกบ ซือมียา นู บาฌิ ตาปี บีดา นะ ฮูโกบ โกะ ซือมียา นู ฌาฮัจ ฌางัน โกะ ซือมียา บาตัฮ เตอ นะ ฮูโกบ โกะ อูรัก ซาลัฮ ฌางัน โกะ อูรัก บูวัจ ดูซา เตอ นะ ฮูโกบ โกะ ซือมียา นู เตด ตูเฮะ กะ ตูฮัด เตด ตูเฮะ กะ ลาฆู บาฌิ เตอ โกะ อูรัก บูนอฮ เอด อาโปก เดะ ญา โกะ อูรัก บูนอฮ ซือมียา เตอ 10 โกะ อูรัก บือกาเซฮ โกะ กีลากี อูซิ ซามา กีลากี เตอ โกะ อูรัก จูรี รีฆะ ซือมียา เตอ โกะ ซือมียา มืออูปัย โกะ ซือมียา เตด ตูโรจ มูโลจ เลอ. โกะ ปือมือเลา ฮูโกบ เตอ นะ ฮูโกบ โกะ ซือมียา นู บูวัจ นามาๆ นู เตด กือนา ฌางัน ปือมือเลา อาฌัยํ นู รือมัก ซูโงฮ เลอ. 11 ปือมือเลา อาฌัยํ อีนี อาดา เดะ บรีตา นู บาฌิ ปาซัน ตูฮัด นู บือซรี ซูโงฮ นู ซือนัง ซือลามัจ ซูโงฮ เลอ. ญา เลอ กีเรบ บรีตา นู บาฌิ ซีงี ดัฮ บรี กะ กู นะ บือเลฮ มือญาเระ. 12 กู บรี ซือลามัจ กะ เยซู คริด ตูฮัด นะ กีตา นู บือเลฮ ตูโลก กู บรี ตือฆัยํ-อูรัจ. กู บรี ซือลามัจ กะ ญา ซาเบะ ญา กีรา จะ กู ฌาดี ซือมียา รือมัก. กะฆีเตอ ญา ตืองะ กู บรี ฌาดี ซือมียา บือกรือฌา นะ ญา ดัฮ เตอ 13 มีเซ-จะ นู ดูลู กู มือเลา ตะอารัฮ กะ ญา ปรือกัด กะ ญา ฌาดี ซือมียา ซูมก ซูโงฮ เลอ. ตาปี ตูฮัด ญา ตือจีฮัด กะ กู ดัฮ ซาเบะ นู กู บูวัจ กะฆีเตอ กู เตด บือเลฮ ปือจายา กะ ญา ลาฆี กะฆีเตอ กู เตด ตาฮู อารัฮ เลอ. 14 ตาปี ตูฮัด ญา ฮาลัย บรี ซือลามัจ กะ กู บาญะ ดัฮ ลือเบฮ เดะ นามาๆ เลอ. ญา บรี กะ กู ปือจายา เตอ ซายัก เตอ บือกะ ซือรูปา ซือมียา นู มาโซะ บือซามา ฌางัน เยซู คริด นะ บือเลฮ บูวัจ เลอ. 15 ปือมือเลา อีนี ปือมือเลา ซูโงฮ บรี ซือมียา ซือมูฮา ซาโมจ อาเมด เลอ. ฌาดี-จะ เยซู คริด ญา มาแรฮ กะ ดือนียา อีนี บีดา นะ ตูโลก โกะ ซือมียา บือดูซา บรี ฮีโดะ ลือปัซ บาฌิ. กู นี เลอ ฌาดี ซือมียา บูวัจ ดูซา ลือเบฮ เดะ กาวัด เตอ. 16 ตาปี ซาเบะ ลาฆู อีนี เลอ ตูฮัด ญา ตือจีฮัด กะ กู ดัฮ บีดา เยซู คริด นะ บือเลฮ ปลีฮัจ นู ญา ตาฮัด-ฮาตี บรี กะ กู ปือนอฮ ลามา ดัฮ. กู นี เลอ บือเลฮ บูวัจ ดูซา ลือเบฮ เดะ กาวัด เตอ กะฆีเตอ กู ฌาดี จูตอ บรี กะ ซือมียา ซือมูฮา นู นะ มาแรฮ ปือจายา กะ เยซู นะ ซาโมจ ลาฆู ฮีโดะ ซูโงฮ นู ซือลาลู เลอ. 17 ปูฌี เลอ กะ ตูฮัด บือซัยํ เดะ อาตัซ นู ฌาดี ราฌา ซือลาลู. ญา เตด ดือละ มาตี ลาลู เตอ เตด ดือละ ปลีฮัจ เดะ มาตา นะ กีตา โปด. ญา ฌาดี ตูฮัด แนฮซา เลอ. บรี กีตา ปูฌี กะ ญา มือโอจ กะ ญา ซือลาลู เตด บราดู เลอ. อาเมน. 18 ลีฮัจ เลอ ทิโมที นานะ นะ กู เออ ลาฆู ปือมือซัด อีนี กู กีเรบ ตาโรฮ เดะ เกา ตูโรจ ปือมือเลา ตูโดฮ นู โกะ ซือมียา ตูโดฮ ลาฆู นะ ตูฮัด บือเลฮ มือเลา ปาซัน เกา เลอ. บรี ปือมือเลา ตูโดฮ อีตู นะ ตูโลก บรี เกา นะ บือเลฮ บือปรัก บรี บาฌิ บลาวัด ฌางัน ฮาตู ซีตัด. 19 บรี เกา ปือจายา บรี กือฌะ-กือมัซ เลอ อาดา ฮาตี นู บราซา จะ ฮอย ซาลัฮ นามา ดัฮ เลอ. ลาฆู กะฆีเตอ ซือมียา ซือตืองัฮ ตีงัน บูวัก ดัฮ เลอ. กะฆีเตอ ลาฆู ปือจายา นะ กูญา ฌาดี ซือรูปา ปราฮู การับ เลอ. 20 เดะ โกะ ซือมียา อีตู อาดา ฮีเมเนอัด ฌางัน อาเลกซันเดอ เตอ กู บือเลฮ ซรัฮ กูญา บรี กะ กือปาลา ฮาตู ซีตัด บีดา นะ อูจะ-อาฌัยํ กูญา ตีเมา บรี มือเลา ตะอารัฮ กะ ตูฮัด ปูลัก เลอ.
1 กะฆีเตอ ลือเบฮ เดะ นามาๆ กู ซูโรฮ กาเญา บือซาโวจ. บือซาโวจ เลอ มีตา เดะ ตูฮัด บือซาโวจ บรี ซือลามัจ กะ ตูฮัด บีดา ซือมียา ซือมูฮา เลอ. 2 บือซาโวจ เลอ บีดา โกะ ราฌา ฌางัน ซือมียา ซัยํ-บือซัยํ ซือมูฮา เตอ บรี กีตา นะ บือเลฮ ดูโดะ ซือนัง ซือลามัจ เลอ นะ ซือมาตา ตูโรจ กะ ฌาลัด นะ ตูฮัด เตอ นะ บือเลฮ บูวัจ ลาฆู บาฌิ ซือมูฮา เลอ. 3 นู นะ บูวัจ กะฆีเตอ ฌาดี ลาฆู บาฌิ บูวัจ บรี ตูฮัด นู ตูโลก กีตา บรี ลือปัซ บาฌิ เตอ นะ ซูกา-ฮาตี เลอ. 4 ญา เลอ นู ซูกา บรี ซือมียา ซือมูฮา นะ ฮีโดะ ลือปัซ บาฌิ นะ ตาฮู ลาฆู นู ซูโงฮ. 5 ซาเบะ-จะ อาดา ตูฮัด แนฮซา เลอ. อาดา ซือมียา แนฮ ซืออูรัก นู บูวัจ บรี โกะ อูมัจ-ซือมียา บาฌิ ปาเระ ฌางัน ตูฮัด ดัฮ. ซือมียา อีตู ฌาดี เยซู คริด เลอ. 6 ญา เลอ บือเลฮ ซรัฮ ญาวา นะ ญา ตะอาซิก บีดา นะ ตือบุซ โกะ อูมัจ-ซือมียา ซือมูฮา. นู ญา ซรัฮ ญาวา กะฆีเตอ ฌาดี ซะซี เดะ วะตู นู บาฌิ จะ ตูฮัด ซูกา บรี โกะ ซือมียา ซือมูฮา นะ ฮีโดะ ลือปัซ บาฌิ เลอ. 7 ซาเบะ ลาฆู อีตู ฌูฆา เลอ ตูฮัด บือเลฮ ตืองะ กู ฌาดี ปือญูโรฮ นะ ญา บีดา นะ มือญาเระ บรีตา นู บาฌิ บรี ตาฮู กะ โกะ ซือมียา บักซา อาซิก ราตาๆ บีดา นะ อาฌัยํ กูญา ปาซัน ลาฆู นู กีตา ปือจายา ปาซัน ลาฆู นู ซูโงฮ. กู มือเลา ซูโงฮๆ เลอ ฮอย เตด มืออูปัย. 8 กะฆีเตอ เลอ ตือปัจ ดีฮา อาดา ซือมียา ปือจายา บือมุน บือซามา กู ซูกา บรี โกะ กีลากี นะ บือซาโวจ ฮาตี จรัฮ บาฌิ อาเกะ ตางัน บือซาโวจ กะ ตูฮัด ฮอย เตด มูซัยํ ฮอย เตด บือตือฆัฮ. 9 โซะ โกะ นีบีนี โปด กู ซูกา บรี กูญา บือปากัย โกะ กาเยด บาฌู บรี บาฌิ ตาฮู จือและ. บรี กูญา บือปากัย ฌางัน โกะ ปือบูวัจ นู บาฌิ บูกัด ลาฆู นะ บูวัจ โบะ บรี มืออาลัจ บูกัด ฌางัน โกะ มัซ โกะ ตือมีกา โกะ กาเยด บาฌู นู มาฮันๆ เตอ 10 ตาปี บรี กูญา บือปากัย ฌางัน โกะ ปือบูวัจ นู บาฌิ นู ปาโตจ ฌางัน นีบีนี นู มือเลา จะ ญา ปือจายา กะ ตูฮัด ดัฮ. 11 บรี โกะ นีบีนี บลาฌัยํ มือนีงัย ซาเมน ซืองะ อาดา ฮาตี มือนูโนะ ราตา. 12 กู เตด บรี โกะ นีบีนี นะ อาฌัยํ เตด บรี กูญา นะ ลือเบฮ เดะ โกะ กีลากี ตาปี บรี กูญา ดูโดะ ซืองะ เลอ 13 ซาเบะ ตูฮัด บือเลฮ บือฌาดี อาดับ ดูลู บารู ญา บือฌาดี ฮาวา ปูลัก. 14 อาดับ ฌูฆา ญา เตด กือนา มืออูปัย ดัฮ ตาปี นีบีนี อีตู ญา เลอ นู กือนา มืออูปัย ดัฮ ฌาดี ซือมียา บือดูซา ดัฮ. 15 ตาปี นู โกะ นีบีนี นะ บือเลฮ นานะ กูญา นะ ฮีโดะ ลือปัซ บาฌิ เตอ. กูญา กือนา ปือจายา กือนา ซายัก กือนา บูวัจ บาฌิ ฮอย เตด บรูบัฮ ตาฮู ฮูโกบ ฮาตี ตะอาซิก เลอ.
1 ปือมือเลา อีนี ปือมือเลา ซูโงฮ เลอ กะ ซือมียา ดีฮา ซูกา นะ ฌาดี ซือมียา ฌาฆา ลูมอฮ นะ ตูฮัด ญา ซูกา นะ บูวัจ กรือฌา นู บาฌิ ซูโงฮ เลอ. 2 ซือมียา ฌาฆา ลูมอฮ นะ ตูฮัด ฆาโดฮ ฌาดี ซือมียา ฮอย ซาปา บือเลฮ มือฌัฮ ฌาดี กีลากี อาดา บีนี แนฮ ซืออูรัก ฌาดี ซือมียา ตาฮู ฌากา ญาวา ตะอาซิก ตาฮู ฮูโกบ ฮาตี ตะอาซิก ฌาดี ซือมียา บูวัจ กือนา ลาฆู ซือมียา ตาฮู ซาโมจ กาวัด บรี บาฌิ ฌาดี ซือมียา ปานัย อาฌัยํ เลอ. 3 บูกัด ซือมียา ลือกัจ โกะ อาระ บูกัด ซือมียา ซูมก ตาปี ฌาดี ซือมียา ฮาตี บือแฌะ บูกัด ซือมียา ซูกา นะ บือตือฆัฮ-ตือฆัฮ บูกัด ซือมียา ตือลาลู ลีฮัจ กะ ดูเวะ. 4 ฆาโดฮ ฌาดี ซือมียา ตาฮู บือบือลา ซือมียา ซือรูมัฮ นะ ญา ตะอาซิก ตาฮู อาฌัยํ โกะ นานะ บรี ตูโรจ มูโลจ กะ ญา บรี อาดา ปรางัย บาฌิ เลอ. 5 ซาเบะ-จะ กะ ซือมียา ดีฮา บือบือลา ซือมียา ซือรูมัฮ นะ ญา ตะอาซิก เตด บือเลฮ ดัฮ ซือมียา อีตู นะ บือบือลา ลูมอฮ นะ ตูฮัด โปด นะ บือเลฮ กะฮามี เลอ? 6 ฌางัน บรี ซือมียา บารู ปือจายา นะ ฌาดี ซือมียา ฌาฆา ลูมอฮ นะ ตูฮัด ตาโกจ-จะ ญา นะ งันตืองัน กะฆีเตอ นะ กือนา ฮูโกบ ซือรูปา กะ กือปาลา ฮาตู ซีตัด. 7 ญา ฆาโดฮ ฌาดี ซือมียา บาฌิ บรี โกะ ซือมียา วัยํ-ลูวัยํ นะ มือโอจ กะ ญา ตาโกจ-จะ ญา นะ กือนา ซือมียา มือเลา มือฌัฮ ญา นะ ลือกัจ เดะ ปือญือรัจ นะ ฮาตู ซีตัด อีตู. 8 โซะ โกะ ซือมียา มือนูโลก โปด ซือรูปา. กูญา ฆาโดฮ ฌาดี ซือมียา ปรางัย บาฌิ บูกัด ซือมียา ปานัย มือเลา จรือเกาะ ตือลือตัก บูกัด ซือมียา ลือกัจ อาระ บูกัด ซือมียา ฮาลูบา กะ ดูเวะ. 9 กูญา ฆาโดฮ ฌาดี ซือมียา ตือตู-ฮาตี ตูโรจ กะ ลาฆู นู กีตา ปือจายา นู ฌาดี ลาฆู ดาลับ ซูโงฮ ฮอย เตด บราซา เดะ ฮาตี จะ บูวัจ ซาลัฮ นามา โปด. 10 กือนา มือญาซัจ ลูมอฮ กูญา ดูลู ฌูฆา. ตานา ลีฮัจ จะ กูญา ฮอย ซาลัฮ ดัฮ บรี กูญา มาโซะ บือกรือฌา ฌาดี ซือมียา มือนูโลก ลูมอฮ นะ ตูฮัด. 11 โซะ โกะ นีบีนี โปด ซือรูปา. กูญา ฆาโดฮ ฌาดี ซือมียา ปรางัย บาฌิ บูกัด ซือมียา ซูกา มืออูปัจ ตาปี ฌาดี ซือมียา ตาฮู ฌากา ญาวา ตะอาซิก ฌาดี ซือมียา รือมัก เดะ ลาฆู ซือมูฮา เลอ. 12 ซือมียา มือนูโลก ฆาโดฮ อาดา บีนี แนฮ ซืออูรัก ฆาโดฮ ตาฮู บือบือลา โกะ นานะ นะ ญา โกะ ซือมียา ซือรูมัฮ นะ ญา บรี บาฌิ. 13 โกะ ซือมียา มือนูโลก นู บือกรือฌา มือนูโลก เดะ ลาฆู นะ ตูฮัด บรี บาฌิ กูญา นะ บือซัยํ มูคา เดะ ลูมอฮ นะ ตูฮัด อาดา ฮาตี บรานี นะ มือญาเระ ปาซัน ลาฆู นู กูญา ปือจายา กะ เยซู คริด ดัฮ. 14 ซูรัจ อีนี กู ฆาแรฮ กีเรบ บรี กะ เกา ดัฮ จาดัก-จะ เตด บราปา ลามา อีนี กู นะ บือเลฮ มาแรฮ มียา เกา ปูลัก. 15 ตาปี กาเลา กู ลามัจ นะ มาแรฮ ซูรัจ อีนี นะ บรี กะ เกา ตาฮู จะ นะ บูวัจ กะฮามี เดะ ซือรูมัฮ นะ ตูฮัด ฌาดี-จะ เดะ ลูมอฮ นะ ตูฮัด ตูฮัด นู อาดา ฮีโดะ ซูโงฮ เลอ. ลูมอฮ นะ ตูฮัด อีนี ฌาดี ซือรูปา จาวัก ซือรูปา ดีนิง บาตู นู ฌาฆา ลาฆู นู ซูโงฮ บรี กือฌะ-กือมัซ ดัฮ. 16 กีตา ซือมูฮา ซาโงะ จะ ฌาลัด นะ ตูฮัด อีนี นู กีตา ตูโรจ ดัฮ เตอ ญา ฌาดี ลาฆู ดาลับ ซูโงฮ นู บือซัยํ โตระ เลอ ฌาดี-จะ "เยซู คริด เตอ ญา มาแรฮ ปลีฮัจ ฌาดี ซือมียา ดัฮ ซือมืองัจ นะ ตูฮัด เลอ บรี ลีฮัจ จะ ญา ฌาดี ซือมียา บาฌิ-ตือปัจ ซูโงฮ โกะ ฮูลู-บาลัก นะ ตูฮัด โปด บือเลฮ ลีฮัจ ญา ราตา บักซา เลอ อาดา ซือมียา ปี มือญาเระ ลาฆู นะ ญา ราตา ดือนียา เลอ อาดา ซือมียา ปือจายา กะ ญา รอจ กะ ลาแงะ โปด ตูฮัด เดะ อาตัซ บือเลฮ ซาโมจ ญา บือปี ดัฮ."
1 ตาปี โซะ ซือมืองัจ นะ ตูฮัด มือญาเระ บรี ซัฮ จะ วะตู โซะ บลากัก นะ อาดา ซือมียา ซือตืองัฮ นู นะ ตีงัน บูวัก ลาฆู นู กีตา ปือจายา นะ ปี ตูโรจ โกะ ฮาตู นู มืออูปัย เตอ นะ ปือจายา กะ ปือมือเลา อาฌัยํ นะ โกะ ฮาตู ซีตัด เลอ. 2 อาดา โกะ ซือมียา มูคา มาเนฮ ฮาตี ฌาฮัจ นู มือเลา มืออูปัย เตอ กูญา บือเลฮ กือจัย ปือมือเลา อาฌัยํ อีตู ดัฮ. ฮาตี นะ กูญา กือบัซ ซือรูปา กูญา อาเมด บือซี ฮางัจ มาแรฮ ตาเอาะ เดะ ฮาตี นะ กูญา ดัฮ ฮอย เตด บราซา ตาฮู จะ ซาลัฮ ลาฆี. 3 ซือมียา กะฆีเตอ กูญา บลารัก ตีเมา บรี มือนีกัฮ บือปาตัก โกะ ซือบารัก มากัด ซือตืองัฮ นู ตูฮัด บือเลฮ บือฌาดี ดัฮ บรี กีตา นะ มากัด. กีตา นู ปือจายา นู ตาฮู ลาฆู นู ซูโงฮ เตอ กีตา นะ ซาโมจ บือซามา บรี ซือลามัจ กะ ตูฮัด นะ มากัด กะฆีเตอ เลอ. 4 ซาเบะ โกะ ซือบารัก ซือมูฮา นู ตูฮัด บือฌาดี ดัฮ บาฌิ ฮาปา เลอ. ลาฆู นามาๆ โปด ฌางัน บรี กีตา นะ กีปัซ บูวัก เลอ ตาปี บรี ซาโมจ ซือมูฮา มาแรฮ มากัด บรี ซือลามัจ กะ ตูฮัด ซามา. 5 กรานา ปือมือเลา นู ตูฮัด มือเลา ดัฮ ฌางัน ปือมือเลา นู กีตา นะ บือซาโวจ ซามา นะ บาโซฮ โกะ ซือบารัก อีตู บรี จรัฮ บาฌิ เลอ. 6 ดัฮ เกา ปรีงัจ โกะ ดีบราดี นู ปือจายา ตูโรจ บือกะ ปือมือเลา อาฌัยํ กะฆีนี เตอ กะฆีเตอ เกา นะ ฌาดี ซือมียา บือกรือฌา นู บาฌิ นะ เยซู คริด. บรี เกา บลาฌัยํ เดะ ลาฆู นู กีตา ปือจายา บลาฌัยํ เดะ ลาฆู นู ซูโงฮ นู เกา บือเลฮ ตูโรจ ดัฮ. กะฆีเตอ เกา นะ อาดา ฮาตี ตือฆัยํ-อูรัจ ซือรูโลยํ เลอ. 7 ฌางัน นะ ตูโรจ โกะ ลาฆู จรือตา นู เตด ฌาดี นามา นู ฮอย เตด บือฆูนา ตาปี เกา กือนา อาฌัยํ ฮาตี เกา ตะอาซิก บรี ตูโรจ ฌาลัด นะ ตูฮัด. 8 นู กีตา นะ อาฌัยํ ญาวา ตะอาซิก บรี ตรือเบะ อูรัจ เตอ ญา ตูโลก กีตา ซือตืองัฮ เตอ ตาปี นู กีตา นะ อาฌัยํ ฮาตี กีตา ตูโรจ ฌาลัด นะ ตูฮัด ญา ตูโลก กีตา ราตา มาจับ เลอ. ญา ตูโลก บรี กีตา อาดา ฮีโดะ วะตู อีนี ญา นะ ตูโลก บรี กีตา นะ ฮีโดะ โซะ ฮึลด ฌูฆา เลอ. 9 ปือมือเลา อีนี ปือมือเลา ซูโงฮ บรี โกะ ซือมียา ซือมูฮา ซาโมจ อาเมด มาแรฮ ปือจายา เลอ ฌาดี-จะ 10 กีตา บือเลฮ ฮาระ กะ ตูฮัด นู ฮีโดะ ซือลาลู. ญา เลอ ฌาดี ตูฮัด นู ตูโลก ลูมอฮ ซือมียา ซือมูฮา บรี ฮีโดะ ลือปัซ บาฌิ นู ตูโลก ลูมอฮ ซือมียา ปือจายา ลือเบฮ เดะ กาวัด เลอ. กะฆีเตอ เลอ กีตา กูวาซา ลาวัด บือกรือฌา. 11 เกา กือนา อาฌัยํ กูญา ปือซัด กูญา กะฆีเตอ. 12 กู ตีเมา บรี ซือมียา ดีฮา โปด นะ กีปัซ เกา ซาเบะ เกา ฌาดี อูรัก มูดา. กะฆีเตอ เลอ เกา กือนา ฌาดี จูตอ บรี กะ โกะ ซือมียา นู ปือจายา นะ มาแรฮ ตูโรจ. เกา กือนา ฌาดี จูตอ เดะ ลาฆู นู เกา มือเลา บาฌิ บูวัจ ปรางัย บาฌิ ซายัก ลูมอฮ ดีบราดี เตอ นู เกา ปือจายา กือมัซๆ อาดา ฮาตี จรัฮ บาฌิ ฌูฆา เลอ. 13 เกา กือนา ราเฌด บาจา ซูรัจ ปือมือเลา นะ ตูฮัด บรี โกะ ซือมียา ปือจายา ดืองัยํ กือนา ราเฌด ปูโฌะ-ฮาตี กูญา อาฌัยํ กูญา ตือดะ กู นะ ปาเระ มาแรฮ ปูลัก เลอ. 14 ฌางัน ซือฆัด นะ บูวัจ บือกะ บือนา นู บาฌิ นู เกา ปานัย บูวัจ เลอ. บือนา อีตู ตูฮัด บือเลฮ ฮาลัย บรี กะ เกา ดัฮ ตูโรจ โกะ ปือมือเลา ตูโดฮ วะตู อีตู นู โกะ ซือมียา บือบือลา ลูมอฮ นะ ตูฮัด บือเลฮ ตืองะ ตางัน เดะ ญาวา นะ เกา. 15 เกา กือนา ราเฌด เลอ บูวัจ ตูโรจ ลาฆู กะฆีเตอ บีดา โกะ ซือมียา ซือมูฮา นะ ลีฮัจ จะ เกา บาฌิ ปี กะ ฮึลด ซือรูโลยํ เลอ. 16 ฌาฆา บรี บาฌิ เลอ กะ ญาวา นะ เกา ตะอาซิก. ฌาฆา บรี บาฌิ เลอ กะ ปือมือเลา อาฌัยํ นะ เกา. เกา กือนา กือฌะ-กือมัซ ตูโรจ กะ ลาฆู กะฆีนี ซาเบะ-จะ นู เกา บูวัจ กะฆีนี เกา นะ ตูโลก ฌางัน ญาวา นะ เกา ตะอาซิก ฌางัน ลูมอฮ ซือมียา นู มือนีงัย กะ เกา ฌูฆา บรี ฮีโดะ ลือปัซ บาฌิ ซือมูฮา เลอ.
1 ฌางัน นะ อูจะ โกะ กีลากี อูรัก ตูฮาๆ ตาปี กือนา ปูโฌะ ฮาตี นะ กูญา อาฌัยํ กูญา บือกะ ซือรูปา ฌาดี อาโปก เดะ เกา. โซะ โกะ กีลากี มูดาๆ เกา กือนา บูวัจ ซือรูปา กูญา ฌาดี อาดี เดะ เกา. 2 โซะ โกะ นีบีนี ตูฮาๆ บูวัจ บรี ซือรูปา ฌาดี เอด เดะ เกา. โซะ โกะ นีบีนี มูดาๆ บูวัจ บรี ซือรูปา ฌาดี อาดี เดะ เกา ฌูฆา เลอ. กือนา บูวัจ ฌางัน กูญา บือกะ ฮาตี จรัฮ บาฌิ ซือมูฮา เลอ. 3 กือนา ตูโลก บรี บลาญา กะ โกะ นีบีนี ฌานา นู ฮอย ตือปัจ นะ บือซานัยํ. 4 ตาปี กะ นีบีนี ฌานา อีตู อาดา นานะ อาดา จูจู โกะ อานะ จูจู อีตู เลอ กือนา ลาดัจ บือบือลา โกะ ซือมียา เดะ รูมัฮ นะ กูญา ดูลู. กะฆีเตอ กูญา นะ บือเลฮ บูวัจ บาฌิ ปาเระ กะ โกะ เอด อาโปก เดะ กูญา ซาเบะ นู ปือบูวัจ กะฆีนี บูวัจ บรี ตูฮัด ซูกา-ฮาตี เลอ. 5 นีบีนี ฌานา นู ฮอย ตือปัจ นะ บือซานัยํ นู ดูโดะ ซืออูรัก ญา เตอ ญา บือเลฮ ฮาระ กะ ตูฮัด บือซาโวจ ซียัก มาลับ มีตา เดะ ตูฮัด บรี ตูโลก ญา เลอ. 6 ตาปี นีบีนี ฌานา นู ปลือปัซ ญาวา ตะอาซิก ตูโรจ กะ ลาฆู รามัยๆ เตอ ญา ซือรูปา มาตี ดัฮ ตืองัฮ ญา อาดา ฮีโดะ ลาฆี. 7 ลาฆู กะฆีเตอ เลอ เกา กือนา ปือซัด กะ กูญา ฌูฆา บีดา ฮอย ซาปา นะ บือเลฮ มือฌัฮ กะ กูญา. 8 ตาปี กะ ซือมียา ดีฮา เตด บือบือลา โกะ นะบรานะ นะ ญา เตอ เตด บือบือลา โกะ ซือมียา เดะ ดาลับ รูมัฮ นะ ญา ลือเบฮ เดะ กาวัด เลอ ซือรูปา บือกะ ญา บือเลฮ กีปัซ ลาฆู ปือจายา บูวัก ดัฮ. ญา บูวัจ ตะอารัฮ ลือเบฮ เดะ ซือมียา เตด ปือจายา เลอ. 9 นีบีนี ฌานา นู ดีฮา นู อูมอยํ นะ ญา ลือเบฮ เดะ นัม-ปูโลฮ ตาโฮด นู ดือละ อาดา ลากี แนฮ ซืออูรัก เตอ บรี มาโซะ นามา นะ ญา เดะ ซูรัจ โกะ นีบีนี ฌานา. 10 ตาปี ญา ฆาโดฮ ฌาดี ซือมียา นู กูญา มือโอจ จะ บูวัจ บาฌิ ฌาดี-จะ ญา บือเลฮ บือบือลา โกะ นานะ นะ ญา บรี บาฌิ ญา บือเลฮ ซาโมจ โกะ กาวัด วัยํ-ลูวัยํ บรี บาฌิ ฌูฆา ญา บือเลฮ บาโซฮ กากี นะ โกะ ซือมียา นะ ตูฮัด ซือรูปา กะ ปราโซฮ เตอ บือเลฮ ฮาฆิ กะ โกะ ซือมียา ฮาฌะ บือเลฮ กูวาซา กรือฌา บูวัจ บาฌิ ซือมาตา เลอ. 11 ตาปี โกะ นีบีนี ฌานา นู อูมอยํ นะ กูญา เตด บราปา บาญะ เตอ ฌางัน บรี มาโซะ นามา นะ กูญา เดะ ซูรัจ โกะ นีบีนี ฌานา ซาเบะ วะตู กูญา มืองือละ บูวัก เดะ เยซู คริด เตอ ฮาตี นะ กูญา ซูกา นะ อาเมด ลากี ปูลัก. 12 กะฆีเตอ กูญา นะ กือนา ฮูโกบ ซาเบะ กูญา ตีงัน บูวัก ลาฆู นู กูญา บือเลฮ ปือจายา เดะ ดูลู อีนี เลอ. 13 กูญา นะ ลาดัจ ฌาดี ซือมียา ซือฆัด ซัจ ปี กะ รูมัฮ อีตู ซัจ ปี กะ รูมัฮ อีนี. ตาปี บูกัด ซา ซือฆัด กูญา นะ มูโลจ ฆาตัน ปูลัก นะ ซูกา ฆาโดฮ เดะ ลาฆู นะ กาวัด เตอ นะ มือเลา ลาฆู นู เตด บือฆูนา นะ มือเลา. 14 กะฆีเตอ กู อาดา ฮาตี นะ บรี โกะ นีบีนี ฌานา นู อูมอยํ เตด บราปา บาญะ บรี กูญา นะ บือเลฮ ลากี นะ บือเลฮ นานะ นะ บือบือลา รูมัฮ นะ กูญา. กะฆีเตอ เลอ โกะ ซือตรู นะ กีตา นะ ฮอย จือลัฮ นะ มืออูปัจ บือเลฮ เลอ. 15 กู มือเลา กะฆีเตอ ซาเบะ-จะ โกะ นีบีนี ฌานา ซือตืองัฮ บือเลฮ ซือซัจ ฌาลัด ตูโรจ กะ กือปาลา ฮาตู ซีตัด ดัฮ. 16 ตาปี กะ นีบีนี ปือจายา นู ดีฮา อาดา นีบีนี ฌานา เดะ ดาลับ รูมัฮ นะ ญา บรี ญา ตูโลก บือบือลา กูญา ฌางัน บรี ฆาโดฮ ลูมอฮ นะ ตูฮัด. กะฆีเตอ ลูมอฮ นะ ตูฮัด นะ บือเลฮ บือบือลา โกะ นีบีนี ฌานา นู ฮอย ตือปัจ บือซานัยํ. 17 กือนา อีงัจ จะ โกะ ซือมียา บือบือลา ลูมอฮ นะ ตูฮัด นู บือกรือฌา บือบือลา ลูมอฮ นะ ตูฮัด บรี บาฌิ เตอ กูญา ปาโตจ นะ บือเลฮ ดูเวะ บีดา บลาญา ดูวา ฮาบด. กูญา เลอ นู ราเฌด มือญาเระ อาฌัยํ ลาฆู นะ ตูฮัด เตอ กูญา ปาโตจ นะ บือเลฮ บลาญา ลือเบฮ เดะ กาวัด เลอ. 18 ซาเบะ ซูรัจ ปือมือเลา นะ ตูฮัด มือเลา จะ "ตานา กรือเบา ตืองัฮ กาจะ ปาดี ฌางัน นะ ซรือโกะ ตูโดก มูโลจ นะ ญา เลอ." ญา มือเลา ปูลัก จะ "ซือมียา บือกรือฌา ปาโตจ นะ มากัด ฆาฌี นะ ญา." 19 ฌางัน นะ ซาโมจ ปือมือเลา นะ ซือมียา ซืออูรัก นู ญา อาดู กะ ซือมียา บือบือลา ลูมอฮ นะ ตูฮัด. ฆาโดฮ อาดา ซะซี ดูวา ตีฆา อูรัก เลอ. 20 โซะ ซือมียา บือบือลา นู บูวัจ ซาลัฮ ลาฆี กือนา อูจะ กูญา โซะ ฮึลด มูคา นะ ซือมียา ซือมูฮา บรี โกะ ซือมียา อาซิก นะ ตาโกจ. 21 โซะ ฮึลด มูคา นะ ตูฮัด เดะ อาตัซ เตอ โซะ ฮึลด มูคา นะ เยซู คริด ฌางัน ลูมอฮ ฮูลู-บาลัก นู ญา ปีเลฮ ดัฮ เตอ กู ปือซัด กือมัซๆ บรี เกา นะ ตูโรจ โกะ ปือมือซัด อีนี. ฌางัน นะ ปีเลฮ มูคา ดีฮา. ฌางัน นะ บูวัจ นามา บือกะ อาดา ฮาตี บรัจ ลัฮ-บือลัฮ. 22 ฌางัน นะ ฆางู ตืองะ ตางัน เดะ ซือมียา ดีฮา เลอ. ฌางัน นะ อาดา บาฮาเฆด เดะ ลาฆู บูวัจ ดูซา นะ ซือมียา อาซิก. กือนา ฌาฆา ญาวา นะ เกา บรี จรัฮ บาฌิ ซูโงฮ เลอ. 23 ฌางัน นะ โอะ ซา อาเย ลาฆี เลอ ตาปี โอะ อาระ อางุน กิดีกิ ฌูฆา บีดา ตูโลก โปรจ นะ เกา ซาเบะ-จะ เกา เตด ซือนัง ซัจๆ เลอ. 24 โกะ ดูซา นะ ซือมียา ซือตืองัฮ ปลีฮัจ ซัฮ บาวา กูญา ปี รอจ กะ ลาฆู กรัจ ฮูโกบ. ตาปี ดูซา นะ ซือมียา อาซิก นะ ปลีฮัจ เดะ บลากัก. 25 กะฆีเตอ ฌูฆา โกะ ปือบูวัจ นู บาฌิ นะ ปลีฮัจ บรี บือฆารี ซัฮ ตาปี มีเซ-จะ ซือตืองัฮ บือฆารี เตด ซัฮ นะ ตูโดก บูนี โปด เตด บือเลฮ เลอ.
1 โกะ ซือมียา ดีฮา นู ฌาดี ปราโซฮ เตอ กูญา กือนา ซือมาตา ตูเฮะ กะ ตกเก นะ กูญา ราตา มาจับ บีดา ฮอย ซาปา นะ บือเลฮ มือเลา ตะอารัฮ กะ นามา นะ ตูฮัด กะ ปือมือเลา อาฌัยํ นะ กีตา ฌูฆา. 2 โซะ โกะ ปราโซฮ นู อาดา ตกเก ปือจายา กะ ตูฮัด เตอ ฌางัน บรี กูญา ปูตุซ เดะ ลาฆู ตูเฮะ กะ ตกเก อีตู ซาเบะ กูญา ฌาดี โกะ ดีบราดี บือซามา เลอ. ตาปี ลือเบฮ เดะ อีตู บรี กูญา บือกรือฌา บาฌิ ซือรูโลยํ ซาเบะ ตกเก นู กูญา ตูโลก บือกรือฌา อีตู ฌาดี ซือมียา ปือจายา นู กูญา ซายัก. เกา กือนา มือญาเระ อาฌัยํ โกะ ซือมียา บรี กูญา ตูโรจ กะ ลาฆู อีนี ฌูฆา เลอ. 3 กะ ซือมียา ดีฮา อาฌัยํ ลาฆู นู ซาลัฮ เดะ ลาฆู อีนี ตีเมา นะ ตูโรจ กะ โกะ ปือมือเลา นู รือมัก ซูโงฮ นะ เยซู คริด ตูฮัด นะ กีตา เตอ ตีเมา นะ ตูโรจ กะ ปือมือเลา อาฌัยํ นู รือมัก ฌางัน ฌาลัด นะ ตูฮัด เตอ 4 โกะ ซือมียา กะฆีเตอ กูญา งันตืองัน กูญา เตด ตาฮู อารัฮ. กูญา ฆาละ นะ บือตือฆัฮ-ตือฆัฮ ปาซัน โกะ ปือมือเลา. กะฆีเตอ กูญา ดือกี กาวัด บือปาซัน ฌางัน กาวัด กูญา มือเลา ตะอารัฮ กะ กาวัด ซาเกะ-ฮาตี กะ กาวัด. 5 นู บือตือฆัฮ ซือลาลู กะฆีเตอ ฮาตี นะ กูญา ฌาฮัจ. กูญา ปูตุซ เดะ ลาฆู นู ซูโงฮ ดัฮ. กูญา อีงัจ จะ ฌาลัด นะ ตูฮัด อีตู นะ ตูโลก กูญา บรี บือเลฮ อูโตก ฌาดี ซือมียา กายา เลอ. 6 ซูโงฮ เลอ ฌาลัด นะ ตูฮัด บูวัจ บรี กีตา บือเลฮ อูโตก บาญะ บูวัจ บรี กีตา ซือนัง-ฮาตี ซูโงฮ. 7 กีตา ฮอย เตด บือเลฮ อาเมด นามา โปด มาโซะ กะ ดือนียา อีนี. กะฆีเตอ กีตา นะ อาเมด นามา บือปี ลือปัซ เดะ ดือนียา ฮอย เตด บือเลฮ ฌูฆา เลอ. 8 นู กีตา อาดา ซือบารัก มากัด อาดา ซือบารัก ปากัย บรี กีตา ปือนอฮ เดะ ฮาตี กะฆีเตอ เลอ. 9 ตาปี ซือมียา ดีฮา นู ซูกา นะ กายา ญา นะ กือนา บืออาฌะ บูวัจ ดูซา นะ ลือกัจ เดะ ปือญือรัจ ฌาดี-จะ ญา ฆาละ นะ บูวัจ ลาฆู บูดอ นู บูวัจ บรี ซาเกะ ญาวา ตะอาซิก นู บาวา โกะ ซือมียา รอจ กะ ฌาฮานัม ฮาบิฮ ญาวา ซือมูฮา เลอ. 10 ซาเบะ-จะ ลาฆู ซายัก กะ ดูเวะ ฌาดี ฌากัยํ นู บูวัจ บรี บือตูโมฮ ลาฆู ฌาฮัจ ราตา. กรานา ซือมียา ซือตืองัฮ ฮาลูบา กะ ดูเวะ กะฆีเตอ กูญา ซือซัจ ฌาลัด ปี ฌาโวฮ เดะ ลาฆู นู กีตา ปือจายา ดัฮ. กูญา บูวัจ บรี ลาฆู ซูซัฮ บาญะ ตีกับ เดะ ฮาตี นะ กูญา บรี ตือมุซ ดัฮ เลอ. 11 ตาปี เกา เลอ นู ฌาดี ซือมียา บือกรือฌา นะ ตูฮัด เกา กือนา ลารี บูวัก เลอ เดะ ลาฆู อีตู ซีงี. บรี เกา ตูโรจ กะ ลาฆู บาฌิ-ตือปัจ ตูโรจ กะ ฌาลัด นะ ตูฮัด ตูโรจ กะ ลาฆู ปือจายา ลาฆู ซายัก ลาฆู ตาฮัด-ฮาตี ลาฆู บือแฌะ-ฮาตี ฌูฆา เลอ. 12 บรี เกา กูวาซา บลาวัด ตูโรจ กะ ลาฆู ปือจายา นู บาฌิ บือกะ ซือรูปา ซือมียา บลารี บือลูมา. บรี เกา ซาโมจ ปือฆัก ลาฆู ฮีโดะ ซูโงฮ นู ซือลาลู เลอ ซาเบะ-จะ วะตู เกา บือเลฮ ซาโงะ จะ เกา ปือจายา กะฆีเตอ บาฌิ ดัฮ โซะ ฮึลด มูคา นะ โกะ ซะซี บาญะ อูรัก เตอ วะตู อีตู เลอ ตูฮัด บือเลฮ ปาเงน เกา บรี เกา ซาโมจ ลาฆู ฮีโดะ กะฆีเตอ. 13 กู ปือซัด กะ เกา โซะ ฮึลด มูคา นะ ตูฮัด นู บูวัจ บรี บือนา บารัก ซือมูฮา อาดา ฮีโดะ เตอ โซะ ฮึลด มูคา นะ เยซู คริด ฌูฆา ญา นู บือเลฮ บรี ซะซี กะ ปอนตัด ปีลาด ปาซัน ลาฆู ปือจายา นู บาฌิ นะ ญา เลอ. 14 กู ปือซัด จะ บรี เกา บูวัจ ตูโรจ เลอ โกะ ปือมือซัด อีนี บรี กือมัซ บรี บาฌิ ฮอย ซาปา บือเลฮ มือฌัฮ กะ เกา ลาลู ตือดะ รอจ กะ อารี อีตู นู ตูฮัด เยซู คริด นะ บาลิ ปาเระ. 15 รอจ วะตู นู บาฌิ ตูฮัด ญา นะ บรี เยซู คริด นะ มาแรฮ ปลีฮัจ กะฆีเตอ. ตูฮัด เลอ ซา ญา นู ซือนัง ซือลามัจ ซูโงฮ นู มือฆัฮ ลือเบฮ เดะ นามาๆ ซือมูฮา. ญา เลอ ฌาดี ราฌา เดะ อาตัซ โกะ ราฌา ซือมูฮา ฌาดี ตูฮัด เดะ อาตัซ โกะ ตูฮัด ซือมูฮา. 16 ซา ญา นู นะ มาตี ฮอย เตด บือเลฮ. ญา ดูโดะ เดะ โซะ จรัฮ นู ฮอย ซือมียา ดีฮา บือเลฮ มาโซะ ปี รอจ กะ ญา. ฮอย ซาปา ดือละ ลีฮัจ บือฆารี ญา ดัฮ เตอ ฮอย ซาปา นู นะ บือเลฮ ลีฮัจ บือฆารี ญา ฌูฆา. บรี ปูฌี กะ ญา บรี ญา มือฆัฮ ซูโงฮ ซือลาลู เลอ. อาเมน. 17 โซะ ซือมียา นู กายา เดะ ดือนียา อีนี เกา กือนา ปือซัด กะ กูญา ฌางัน บรี กูญา มือนูโญะ กะ ญาวา ตะอาซิก ฌางัน บรี กูญา นะ จาดัก กะ โกะ ซือบารัก นู ฮอย เตด ตือตู ตาปี บรี กูญา ฮาระ กะ ตูฮัด นู ฮาลัย บรี โกะ ซือบารัก ซือมูฮา กะ กีตา บรี กีตา นะ ซูกา-ฮาตี เลอ. 18 กือนา ปือซัด กูญา บรี กูญา บูวัจ บาฌิ บรี ปือนอฮ ฌางัน โกะ ปือบูวัจ นู บาฌิ บรี กูญา ฮาตี ลือฆา ตือจีฮัด ฮาฆิ กะ กาวัด. 19 กะฆีเตอ เลอ กูญา นะ ปือมุน ลาฆู บาฌิ นู นะ ฌาดี ตือปัจ บือซานัยํ นู กือฌะ เดะ วะตู โซะ ฮึลด. กะฆีเตอ กูญา นะ บือเลฮ ซาโมจ ลาฆู ฮีโดะ นู ซูโงฮๆ. 20 ทิโมที เออ ลาฆู นู ตูฮัด กีเรบ บรี กะ เกา ดัฮ บรี เกา ฌาฆา บรี บาฌิ เลอ. อาเลฮ ปี บูวัก เดะ ลาฆู มือเลา รูบือฮีรู นู ฮอย เตด บือฆูนา เดะ ลาฆู บือตือฆัฮ-ตือฆัฮ เตอ. ลาฆู กะฆีเตอ ซือมียา ซือตืองัฮ อีงัจ ซาลัฮ จะ ฌาดี ลาฆู ปานัย. 21 ซาเบะ-จะ อาดา ซือมียา ซือตืองัฮ มืองากู จะ กูญา ปานัย. กะฆีเตอ กูญา บือเลฮ ตือซีเป เดะ ลาฆู นู กีตา ปือจายา ดัฮ. มีตา บรี ตูฮัด นะ บรี ซือลามัจ กะ กาเญา ซือมูฮา เลอ.
1 กู เปาโล ฌาดี ปือญูโรฮ นะ เยซู คริด ตูโรจ ฮาตี นะ ตูฮัด เดะ อาตัซ. ตูฮัด ญา ซูโรฮ กู ปี มือญาเระ ปือมือเลา บือฌาญี นู จะ ญา นะ บรี กีตา อาดา ฮีโดะ ลือกัจ บือซามา ฌางัน เยซู คริด. 2 กู ฆาแรฮ ซูรัจ อีนี กีเรบ บรี กะ ทิโมที นู ฌาดี ซือรูปา นานะ นะ กู นู กู ซายัก. มีตา เดะ ตูฮัด บือซัยํ นู ฌาดี อาโปก นะ กีตา เตอ มีตา เดะ เยซู คริด นู ฌาดี ตูฮัด นะ กีตา นะ บรี ซือลามัจ กะ เกา นะ ตือจีฮัด กะ เกา นะ บรี เกา ดูโดะ ซือนัง ซือลามัจ เลอ. 3 กู บรี ซือลามัจ กะ ตูฮัด เดะ อาตัซ นู กู บือเลฮ บูวัจ ตูโรจ ฌางัน ฮาตี นู บราซา จะ ฮอย ซาลัฮ นามา บือกะ ซือรูปา โกะ ญัง-มูญัง นะ กู บือเลฮ บูวัจ ฌูฆา. กู บรี ซือลามัจ กะ ญา เดะ บีลัก กาลี วะตู กู บรีงัจ กะ เกา ซียัก มาลับ บือซาโวจ บีดา เกา. 4 กู บรีงัจ กะ อาเย มาตา นะ เกา บือคานะ บาญะๆ นะ บือเลฮ ลีฮัจ เกา ปูลัก บรี กู นะ ซูกา-ฮาตี ปือนอฮ ดัฮ. 5 กู บรีงัจ จะ นู เกา ปือจายา บือซูโงฮ-ซูโงฮ นู บือกะ ซือรูปา โลอิด แยะ เดะ เกา ฌางัน ยูนิด มะ เดะ เกา กูญา บือเลฮ ปือจายา ดูลู ดัฮ. กู ตือตู-ฮาตี จะ เกา อาดา ปือจายา กะฆีเตอ ฌูฆา เลอ. 6 กะฆีเตอ กู ปรีงัจ กะ เกา เลอ อากัน นู ปานัย อีตู นู ตูฮัด ฮาลัย บรี กะ เกา ดัฮ ตานา กู บือเลฮ ตืองะ ตางัน เดะ ญาวา นะ เกา เตอ อากัน อีตู เกา กือนา ซูโรฮ บรี ปือนอฮ เลอ ซือรูปา อาปี นู เกา กือนา รือฆู บรี มือญาลา บาฌิ ดัฮ เลอ. 7 ซาเบะ-จะ ตูฮัด เตด บือเลฮ บรี กีตา อาดา ฮาตี ปือนาโกจ ตาปี ญา บูวัจ บรี ฮาตี กีตา ปือนอฮ ฌางัน ปือมือฆัฮ นะ ญา อาดา ฮาตี ซายัก กะ กาวัด ญา บรี กีตา ตาฮู ฮูโกบ ฮาตี ตะอาซิก เลอ. 8 กะฆีเตอ เลอ ฌางัน จือและ นู นะ ฌาดี ซะซี ปาซัน ตูฮัด นะ กีตา. ฌางัน นะ จือและ เดะ กู นู กู กือนา กานัก กรานา ตูฮัด ดัฮ เลอ. ตาปี เกา กือนา นะ ตาฮัด ซูซัฮ บือซามา-ซามา กรานา บรีตา นู บาฌิ บือกะ ตูฮัด บรี กะ เกา นะ ตือฆัยํ-อูรัจ กะฆีเตอ เลอ. 9 ตูฮัด เลอ บือเลฮ ตูโลก กีตา บรี ฮีโดะ ลือปัซ บาฌิ ดัฮ. ญา บือเลฮ ปาเงน กีตา บรี ฌาดี ซือมียา จรัฮ บาฌิ นะ ญา บูกัด ซาเบะ ปือบูวัจ นะ กีตา ตาปี ซาเบะ ญา บือเลฮ บือคานะ ดูลู นู นะ ฮาลัย บรี ซือลามัจ กะ กีตา. ตะเดะ ดูลู นูตู เลอ ญา ฮาลัย บรี ซือลามัจ กะ กีตา กรานา เยซู คริด ดัฮ. 10 ตาปี รอจ วะตู อีนี ญา บือเลฮ ปลีฮัจ ลาฆู อีตู กะ กีตา ดัฮ ซาเบะ-จะ เยซู คริด ซือมียา นู ตูโลก กีตา บรี ฮีโดะ ลือปัซ บาฌิ เตอ ญา มาแรฮ ปลีฮัจ ดัฮ. เดะ บรีตา นู บาฌิ ปาซัน นะ เยซู อีตู ญา บือเลฮ บรี กีตา ลีฮัจ ซัฮ จะ นู ญา บูวัจ บรี ลาฆู มาตี บือนาซา ฮาบิฮ ดัฮ. ญา บือเลฮ บรี กะ กีตา ลาฆู ฮีโดะ นู ฮอย เตด ดือละ นะ มาตี เลอ. 11 ตูฮัด บือเลฮ ตืองะ กู เลอ ฌาดี ปือญูโรฮ บีดา นะ มือญาเระ บรี ตาฮู ราตาๆ บีดา นะ อาฌัยํ บรีตา นู บาฌิ อีตู. 12 ซาเบะ ลาฆู อีตู เลอ กู กือนา ตาฮัด ซูซัฮ ปายัฮ กะฆีนี. ตาปี กู ฮอย เตด จือและ เลอ ซาเบะ ตูฮัด นู กู ปือจายา อีตู เตอ กู กราลา ญา บรี บาฌิ ดัฮ. กู ตือตู-ฮาตี จะ ญา มือฆัฮ ซูโงฮ นะ บือเลฮ ฌาฆา ลาฆู อีตู นู กู กีเรบ บรี กะ ญา ดัฮ ตือดะ รอจ กะ อารี ปือญูดัฮ อีตู เลอ. 13 โกะ ปือมือเลา อาฌัยํ นู รือมัก ซูโงฮ นู เกา ดืองัยํ เดะ กู ดัฮ เตอ เกา กือนา อาเมด ฌาดี จูตอ นะ บือเลฮ ปี อาฌัยํ กะฆีเตอ ปูลัก. กือนา ปือจายา กือนา ซายัก ฌูฆา บือกะ ซือมียา นู มาโซะ บือซามา ฌางัน เยซู คริด ดัฮ. 14 ลาฆู นู ซูโงฮ อีตู นู กู บือเลฮ กีเรบ บรี กะ เกา ดัฮ ลาฆู อีตู เกา กือนา ฌาฆา บรี บาฌิ อาดา ซือมืองัจ นะ ตูฮัด นู ดูโดะ เดะ ดาลับ ลูมอฮ กีตา ญา นะ ตูโลก ฌาฆา ซามา. 15 เกา ตาฮู ดัฮ เลอ จะ โกะ ซือมียา ซือมูฮา นู ดูโดะ เดะ โซะ นังฆรี เอเซีย กูญา ปาคัจ มืองือละ ตีงัน กู ปี ดัฮ. เดะ ลูมอฮ อีตู อาดา ฟูเฆโล ฌางัน ฮือโมเฆน. 16 มีตา บรี ตูฮัด นะ ตือจีฮัด กะ โกะ ซือมียา ซือรูมัฮ นะ โอเนซิโฟรัด ซาเบะ ญา บือเลฮ บูวัจ บรี กู ซูกา-ฮาตี ซัจๆ. ญา เตด จือและ เดะ ลาฆู นู กู อาดา เดะ ราตัย. 17 ตาปี ตานา ญา มาแรฮ รอจ กะ นังฆรี โรม ญา กูวาซา ปี มือโซะ มียา กู ยู ดาปัจ. 18 นู ญา บือเลฮ ตูโลก บือกรือฌา บราปา บาญะ เดะ นังฆรี เอเฟซัด เกา โปด ตาฮู บาฌิ ดัฮ. มีตา บรี ตูฮัด นะ ตือจีฮัด กะ ญา เดะ อารี กรัจ ฮูโกบ อีตู เลอ.
1 กะฆีเตอ เกา เลอ นานะ นะ กู เออ บรี เกา ตือฆัยํ-อูรัจ เลอ กรานา-จะ ตูฮัด ญา ฮาลัย บรี ซือลามัจ กะ กีตา นู มาโซะ บือซามา ฌางัน เยซู คริด ดัฮ. 2 โกะ ปือมือเลา อาฌัยํ นู เกา ดืองัยํ เดะ กู ดัฮ โซะ ฮึลด มูคา นะ โกะ ซะซี บาญะ อูรัก เตอ โกะ ปือมือเลา อีตู เลอ เกา กือนา ปี กีเรบ ฌางัน โกะ ซือมียา ฮาตี รือมัก นู นะ ปานัย อาฌัยํ โกะ ซือมียา อาซิก ปูลัก เลอ. 3 เกา กือนา ตาฮัด ซูซัฮ บือซามา ฌางัน กู บือกะ ฌาดี ตาฮัน นู บาฌิ นะ เยซู คริด. 4 ฮอย ซือมียา ดีฮา นู มาโซะ ฌาดี ตาฮัน ดัฮ นู นะ ฆาโดฮ เดะ ลาฆู มียา มากัด. ญา ฆาโดฮ ซา ลาฆู อีนี นะ บรี กือปาลา ตาฮัน นะ ญา นะ ซูกา-ฮาตี เลอ. 5 ซือมียา บือลูมา บลารี นู บลารี เตด ตูโรจ ฮูโกบ เตอ ญา นะ อาเมด รังวัน ฮอย เตด บือเลฮ เลอ. 6 ซือมียา กรือฌา กือโบด นู กูวาซา บือกรือฌา โตระ ญา เลอ ปาโตจ นะ ฌาดี ซือมียา ลามูลา นู บือเลฮ บาฮาเฆด เดะ บูวัฮ อีตู. 7 เกา กือนา บือฮีมัจ กะ ลาฆู นู กู บือเลฮ มือเลา ซีงี เลอ ซาเบะ ตูฮัด นะ ตูโลก เกา บรี มาโซะ เดะ ฮาตี ลาฆู อีตู ซือมูฮา. 8 เกา กือนา บรีงัจ กะ เยซู คริด นู ฮีโดะ ปาเระ เดะ มาตี ดัฮ นู ฌาดี บือแนฮ นะ ราฌา ดาวิด ตูโรจ กะ บรีตา นู บาฌิ นู กู บือเลฮ มือญาเระ ดัฮ. 9 กรานา บรีตา นู บาฌิ อีตู กู กือนา ตาฮัด ซูซัฮ ยู กือนา ราตัย ดัฮ บือกะ อูรัก ปือญามุน. ตาปี ปือมือเลา นะ ตูฮัด นะ กือนา ราตัย ฮอย เตด บือเลฮ เลอ. 10 ซาเบะ ลาฆู อีนี เลอ กู ซาโงะ ตาฮัด ซูซัฮ ราตา มาจับ กรานา โกะ ซือมียา นู ตูฮัด ปีเลฮ ดัฮ เลอ ฌาดี-จะ บีดา กูญา นะ ซาโมจ ลาฆู นู เยซู คริด บูวัจ บรี กูญา ฮีโดะ ลือปัซ บาฌิ ฌางัน นู บือซายา บือซรี ซือลาลู. 11 ปือมือเลา อีนี ปือมือเลา ซูโงฮ จะ "กะ กีตา มาตี บือซามา ฌางัน เยซู ดัฮ กีตา นะ อาดา ฮีโดะ บือซามา ฌางัน ญา ฌูฆา. 12 กะ กีตา ตาฮัด ซูซัฮ กีตา นะ ฌาดี ราฌา บือซามา ฌางัน ญา ฌูฆา. กะ กีตา ตีเมา ซาโงะ ญา ญา โปด นะ ตีเมา ซาโงะ กีตา ฌูฆา. 13 กะ กีตา เตด รือมัก ฌางัน ญา ตาปี ญา นะ รือมัก ฌางัน กีตา ลาฆี. ซาเบะ ปือมือเลา บือฌาญี นะ ญา เตอ ญา นะ กีปัซ เตด บือเลฮ เลอ." 14 เกา กือนา ปรีงัจ โกะ ลูมอฮ ซือมียา ปาซัน ลาฆู นู ซีงี เตอ กือนา ปือซัด กูญา กือมัซๆ โซะ ฮึลด มูคา นะ ตูฮัด ฌางัน บรี กูญา นะ บือตือฆัฮ ปาซัน โกะ ปือมือเลา. นู บูวัจ กะฆีเตอ ฮอย เตด บือฆูนา ตาปี ญา บูวัจ บรี ซือมียา นู ดืองัยํ นะ ตือซีเป เดะ ลาฆู ปือจายา เลอ. 15 เกา กือนา กูวาซา นะ บรี ตูฮัด ซูกา-ฮาตี กะ เกา ฌาดี ซือมียา บือกรือฌา นู ฮอย เตด ปายัฮ จือและ นู อาฌัยํ ปือมือเลา นู ซูโงฮ นะ ตูฮัด บรี รือมัก ดัฮ. 16 เกา กือนา อีละ บูวัก เดะ ลาฆู มือเลา รูบือฮีรู นู ฮอย เตด บือฆูนา เตอ ซาเบะ ปือมือเลา กะฆีเตอ นะ บาวา ซือมียา ปี ฌาโวฮ เดะ ตูฮัด บาญะ ซือรูโลยํ เลอ. 17 โกะ ปือมือเลา อีตู ญา ซือรูปา ลียัก บรา นู มากัด ลูลู ซือมาตา. เดะ ลูมอฮ ซือมียา นู อาฌัยํ กะฆีเตอ อาดา ฮีเมเนอัด ฌางัน ฟีเลทัด ฌูฆา. 18 กูญา ดูวา อูรัก อีตู ซือซัจ เดะ ลาฆู นู ซูโงฮ ดัฮ มือเลา จะ ลาฆู นู นะ ฮีโดะ ปาเระ เดะ มาตี ญา ลือปัซ ปี ดัฮ. กะฆีเตอ กูญา บูวัจ บรี ลาฆู ปือจายา นะ ซือมียา ซือตืองัฮ บือนาซา ดัฮ. 19 ตาปี-จะ ตูฮัด เดะ อาตัซ บือเลฮ จาจะ จาวัก บาตา บรี กือฌะ ดัฮ ฆาแรฮ มือกรา เดะ จาวัก อีตู จะ "ตูฮัด ญา กราลา โกะ ซือมียา นะ ญา". อาดา ฌูฆา กะฆีนี จะ "ซือมียา ซือมูฮา นู มืองากู จะ กูญา ฌาดี ซือมียา นะ ตูฮัด เตอ บรี กูญา ตีงัน บูวัก ลาฆู นู ฌาฮัจ เลอ." 20 เดะ ดาลับ รูมัฮ บือซัยํ นู ดีฮา อาดา โกะ ฌับ โกะ มาโกะ บาญะ มาจับ. อาดา นู บูวัจ ฌางัน ปีระ ฌางัน มัซ ซือตืองัฮ. อาดา นู บูวัจ ฌางัน กายู ฌางัน ตานัฮ ฌูฆา. ซือตืองัฮ บีดา ซูโรฮ เดะ อารี ซัยํ-บือซัยํ ซือตืองัฮ บีดา ซูโรฮ เดะ บีลัก อารี. 21 กะฆีเตอ เลอ กะ ซือมียา ดีฮา บาโซฮ ญาวา ตะอาซิก บรี ลือปัซ เดะ ลาฆู เตด บือฆูนา ญา นะ ฌาดี ซือรูปา ฌับ นู ปีเลฮ ตาโรฮ ดัฮ บีดา ตูฮัด รูมัฮ นะ บือเลฮ ซูโรฮ เดะ อารี ซัยํ-บือซัยํ. ซาเบะ-จะ ญา กือนา ซียะ ตาโรฮ ดัฮ บีดา นะ ซูโรฮ เดะ ลาฆู นู บาฌิ ซือมูฮา. 22 เกา กือนา ลารี บูวัก เดะ ลาฆู ฆาละ นะ โกะ อูรัก มูดาๆ. เกา กือนา ตูโรจ กะ ลาฆู นู บาฌิ-ตือปัจ ตูโรจ กะ ลาฆู ปือจายา. เกา กือนา ซายัก กือนา ดูโดะ ซือนัง บือซามา ฌางัน โกะ ซือมียา ฮาตี จรัฮ บาฌิ ซือมูฮา นู ซือโบจ นามา นะ ตูฮัด. 23 ฌางัน นะ ฆาโดฮ เดะ ลาฆู บือตือฆัฮ นู บูดอ นู ฮอย เตด ฌาดี นามา เตอ ซาเบะ เกา ตาฮู จะ ลาฆู กะฆีเตอ นะ บูวัจ บรี ซือมียา นะ บือปาซัน บือซามา. 24 โซะ ซือมียา นู ฌาดี ปราโซฮ นะ ตูฮัด ฌางัน บรี ญา ฌาดี ซือมียา ซูกา บือตือฆัฮ-ตือฆัฮ. ญา กือนา ฌาดี ซือมียา ฮาตี ลือมัฮ ซายัก กะ กาวัด ซือมูฮา ฌาดี ซือมียา ปานัย อาฌัยํ นู ตาฮู ตาฮัด-ฮาตี เดะ ลาฆู บูวัจ ฌาฮัจ กะ ญา. 25 ญา กือนา อาฌัยํ โกะ ซือมียา นู ลาวัด ฌางัน ญา อาดา ฮาตี บือแฌะ จาดัก-จะ ตูฮัด นะ ตูโลก กูญา บรี บราเลฮ-ฮาตี ปาเระ มาแรฮ ตาฮู ลาฆู นู ซูโงฮ. 26 กะฆีเตอ กูญา นะ ซือดัยํ ญาวา นะ ลือปัซ เดะ ปือญือรัจ นะ ฮาตู ซีตัด นู บือเลฮ รีฆะ กูญา บรี ตูโรจ ฮาตี นะ ญา.
1 กะฆีเตอ เกา กือนา ตาฮู จะ โซะ อารี ปือญูดัฮ นะ ฌาดี วะตู นู ฆาโดฮ ซูซัฮ โตระ. 2 ซาเบะ-จะ โกะ ซือมียา นะ ซายัก กะ ญาวา นะ กูญา ตะอาซิก นะ ซายัก กะ ดูเวะ นะ งันตืองัน มือนูโญะ กะ ญาวา ตะอาซิก. กูญา นะ ซูกา มือเลา มืออูปัจ กะ กาวัด เตด มือนีงัย กะ เอด อาโปก นะ กูญา เตอ เตด บรี ซือลามัจ กะ ซาปา โปด ฮอย เตด ตูเฮะ กะ ตูฮัด เลอ. 3 กูญา นะ ตีเมา ตือจีฮัด กะ กาวัด ตีเมา นะ บาฌิ ปาเระ ฌางัน กาวัด ฌาดี ซือมียา ซูกา นะ มืออูปัจ กะ กาวัด เตด ตาฮู ฮูโกบ ฮาตี นะ กูญา ตะอาซิก ฌาดี ซือมียา ซูมก ซือมียา บือชี ลาฆู นู บาฌิ เลอ. 4 กูญา นะ บูวัจ กือบลากัก กะ กาวัด นะ ฌาดี ซือมียา ฮาตี ฮางัจ มือโอจ กะ ญาวา ตะอาซิก เลอ ฌาดี ซือมียา ซูกา นะ บรามัย บาญะ เดะ ซายัก กะ ตูฮัด. 5 กูญา ซืองาฌา บูวัจ ซือรูปา ตูโรจ กะ ฌาลัด นะ ตูฮัด ตาปี โกะ ปือบูวัจ นะ กูญา นะ บรี ลีฮัจ จะ ลาฆู ปือจายา นะ กูญา ฮอย เตด ฌาดี นามา เลอ. เกา ฌางัน นะ ปี บือเฆาะ บือซามา ฌางัน โกะ ซือมียา กะฆีเตอ เลอ. 6 ซาเบะ-จะ เดะ ลูมอฮ กูญา อาดา ซือตืองัฮ นู มือฮึนะ มาโซะ กะ รูมัฮ นะ ซือมียา อาซิก ฮูโกบ โกะ นีบีนี ซือตืองัฮ นู บูดอ บรี ตูโรจ กะ กูญา ซือรูปา ฌาดี ปราโซฮ นะ กูญา เลอ. โกะ นีบีนี กะฆีเตอ กูญา ฆาโดฮ-ฮาตี ซาเบะ กูญา บูวัจ ดูซา บาญะ ดัฮ กูญา ซือรูปา กือนา อีเระ ตูโรจ ลาฆู แนฮ-ฌือแนฮ นู ฮาตี นะ กูญา ฆาละ นะ บูวัจ. 7 กูญา ซูกา นะ บลาฌัยํ ซือลาลู ตาปี นะ รอจ กะ ลาฆู นู ซูโงฮ ฮอย เตด บือเลฮ เลอ. 8 โกะ ซือมียา อีตู ซีงี เตอ กูญา บลาวัด ฌางัน ลาฆู นู ซูโงฮ บือกะ ซือรูปา ยาเนด ฌางัน ยามเบร นู บือเลฮ บลาวัด ฌางัน มูซา ดัฮ. ฮาตี นะ กูญา อีตู ตะอารัฮ เตอ ลาฆู ปือจายา นะ กูญา โปด ญา ฮอย เตด ซูโงฮ เลอ. 9 ตาปี กูญา นะ ปี ฮอย เตด รอจ กะ ดีฮา เลอ ซาเบะ-จะ ซือมียา ซือมูฮา นะ ลีฮัจ บรี ซัฮ จะ กูญา บูดอ กะฮามี บือกะ ซือรูปา โกะ ดูวา อูรัก ซีงี เลอ. 10 ตาปี เกา เลอ เกา บือเลฮ บลาฌัยํ บรี ตาฮู บาฌิ โกะ ปือมือเลา อาฌัยํ นะ กู โกะ ปือบูวัจ นะ กู โกะ ลาฆู ดีฮา นู กู ตือตู-ฮาตี นะ บูวัจ. เกา บือเลฮ ตาฮู ดัฮ นู กู ปือจายา กะฮามี ตาฮัด-ฮาตี ลามา ซายัก กะ กาวัด ฌาดี ซือมียา กือฌะ-กือมัซ เลอ. 11 เกา บือเลฮ ตาฮู ฌูฆา นู กู กือนา กูญา ปรือกัด ตาฮัด ซูซัฮ โตระ ดัฮ. เกา ตาฮู จะ ตือปัจ นังฆรี อันตีโยก นังฆรี อิโกนียุม นังฆรี ลิดซือตรา ฌูฆา กู กือนา ลาฆู นามา ซือตืองัฮ. กู บือเลฮ ตาฮัด ลาฆู ปรือกัด ซูซัฮ ปายัฮ โตระ เลอ. ตาปี ตูฮัด ญา ตูโลก กู ดัฮ บรี ลือปัซ เดะ ลาฆู อีตู ซือมูฮา. 12 ซูโงฮ เลอ ซือมียา ซือมูฮา นู ลือกัจ บือซามา ฌางัน เยซู คริด ตือตู-ฮาตี นะ ตูโรจ กะ ฌาลัด นะ ตูฮัด กูญา นะ กือนา ปรือกัด ดัฮ. 13 ตาปี โกะ อูรัก ฌาฮัจ โกะ อูรัก บาอากัน กูญา นะ ฌาฮัจ บาญะ ซือรูโลยํ ปี กะ ฮึลด. กูญา นะ มือนีปู กาวัด ตาปี อีซี ญาวา นะ กูญา นะ กือนา มือนีปู ปูลัก เลอ. 14 ตาปี โซะ เกา เลอ เกา กือนา ตูโรจ กะ โกะ ลาฆู นู ซูโงฮ นู เกา บลาฌัยํ ดัฮ นู เกา ปือจายา บือตือตู-ฮาตี ดัฮ. ซาเบะ เกา ตาฮู ฌูฆา จะ เกา บือเลฮ บลาฌัยํ ลาฆู ซูโงฮ อีตู เดะ ซาปา ซือตืองัฮ. 15 เกา จับ บือเลฮ ฌูฆา จะ ตะเดะ เกา ฌาดี นานะ ลาฆี เกา บือเลฮ ตาฮู โกะ ซูรัจ ปือมือเลา นะ ตูฮัด นู นะ บือเลฮ บรี เกา อาดา อากัน บาวา เกา รอจ กะ ลาฆู ฮีโดะ ลือปัซ บาฌิ ซาเบะ ปือจายา กะ เยซู คริด. 16 โกะ ซูรัจ ปือมือเลา นะ ตูฮัด ราตา ซือมูฮา ตูฮัด เลอ ญา บือเลฮ ปลีฮัจ บรี โกะ ซือมียา ฆาแรฮ ดัฮ. ฌาดี ซูรัจ นู บือฆูนา บีดา นะ อาฌัยํ ลาฆู ซูโงฮ นะ อูจะ ลาฆู ซาลัฮ นะ ตูโลก บูวัจ ซือมียา บรี บาฌิ นะ อาฌัยํ ซือมียา บรี ตูโรจ ฌาลัด นะ ตูฮัด. 17 กะฆีเตอ เลอ ซือมียา บือกรือฌา นะ ตูฮัด นะ บาฌิ ปือนอฮ ดัฮ ซียะ ดัฮ นะ บูวัจ ลาฆู บาฌิ ราตา มาจับ เลอ.
1 โซะ ฮึลด มูคา นะ ตูฮัด บือซัยํ เดะ อาตัซ โซะ ฮึลด มูคา นะ เยซู คริด ญา เลอ นู นะ กรัจ ฮูโกบ ฌางัน โกะ ซือมียา ฮีโดะ ฌางัน โกะ ซือมียา มาตี เตอ กู นะ ปือซัด กะ เกา เลอ. เยซู อีตู เลอ ญา นะ บาลิ มาแรฮ ปลีฮัจ ญา นะ บือบือลา ฌาดี ราฌา. กะฆีเตอ เลอ กู ปือซัด กะ เกา กือมัซๆ กะฆีนี จะ 2 บรี เกา มือญาเระ บรี ตาฮู ปือมือเลา นะ ตูฮัด ราตาๆ. เตด-จะ เกา บราซา ซือนัง-ฮาตี เฆอ เตด เกา ฆาฆัฮ ฆาโดฮ มือญาเระ เลอ อูจะ กูญา ปรีงัจ กูญา ปูโฌะ ฮาตี นะ กูญา ฌูฆา. เกา กือนา กูวาซา ตาฮัด-ฮาตี ลามา เดะ ลาฆู อาฌัยํ เลอ. 3 ซาเบะ-จะ อาดา ซืออารี กูญา อีตู นะ ตีเมา ซาโมจ ปือมือเลา อาฌัยํ นู รือมัก ซูโงฮ. ตาปี กูญา นะ ปือมุน โกะ ซือมียา อาฌัยํ บรี บาญะๆ นู นะ อาฌัยํ ลาฆู นู กูญา ซูกา บีดา ตูโรจ กะ ลาฆู นู กูญา ตือตาเฆฮ. 4 กูญา นะ มืองือละ ตีงัน ลาฆู นู ซูโงฮ อาเลฮ ปี มือนีงัย กะ ลาฆู จรือตา แนฮ-ฌือแนฮ. 5 ตาปี โซะ เกา เลอ เกา กือนา ฌากา ญาวา นะ เกา บรี บาฌิ เดะ โกะ ปือบูวัจ นะ เกา ซือมูฮา. เกา กือนา ตาฮัด ลาฆู ซูซัฮ ปายัฮ กือนา บือกรือฌา บือกะ ซือมียา มือญาเระ บรีตา นู บาฌิ. บือกรือฌา อีตู นู ตูฮัด ซรัฮ บรี กะ เกา ดัฮ เตอ เกา กือนา บูวัจ บรี ซุจ ฮาบิฮ เลอ. 6 ซาเบะ-จะ โซะ กู เลอ รอจ วะตู ดัฮ นู กู นะ มาตี มือนีงัน ปี ฌาดี ซือรูปา บารัก มือนืองะ นู กือนา อาเกะ อูแร บรี กะ ตูฮัด. 7 กู บือเลฮ บลาวัด บือลูมา บรี บาฌิ ดัฮ. กู บือเลฮ บลารี บือลูมา รอจ กะ ฮูโฌก ฌาลัด ดัฮ. กู บือเลฮ ฌาฆา ลาฆู ปือจายา นะ กู ดัฮ เลอ. 8 ลือปัซ เดะ อีนี ปี อาดา จูบุก นู ตาโรฮ บีดา กู ฌาดี-จะ จูบุก อีตู นู โกะ ซือมียา บาฌิ-ตือปัจ นะ ซาโมจ เลอ. ตูฮัด เลอ ญา นู กรัจ ฮูโกบ กือนา ลาฆู เตอ ญา นะ บรี จูบุก อีตู กะ กู เดะ อารี นู อีตู. ตาปี บูกัด ซา กู ซืออูรัก เลอ ตาปี ญา นะ บรี กะ โกะ ซือมียา ซือมูฮา นู ซูกา-ฮาตี นาตี อารี อีตู นู ญา นะ มาแรฮ ปลีฮัจ. 9 บรี เกา กูวาซา มาแรฮ มียา กู จือปัจๆ เลอ. 10 ซาเบะ-จะ เดมา ญา บือเลฮ ซือซัจ ซายัก กะ ลาฆู โซะ ฮาดัจ อีนี ตีงัน กู ปี กะ นังฆรี เทซะโลนิกา ดัฮ. เครเซน ปี กะ โซะ นังฆรี ฆาลาเตีย ทีตัด ปี กะ โซะ นังฆรี ดันมาเตีย ดัฮ ฌูฆา. 11 อาดา ลูกา ซืออูรัก นู ดูโดะ ฌางัน กู. เกา กือนา ปี ตูโรจ มาระโก บาวา ญา มาแรฮ ซามา ซาเบะ ญา บือเลฮ ตูโลก กู บือกรือฌา ลาฆู นะ ตูฮัด บาฌิ ดัฮ. 12 ตาปี กู บือเลฮ ซูโรฮ ทีคิกัด ปี กะ นังฆรี เอเฟซัด. 13 บาฌู ซรือโกะ ญาวา นะ กู กู กีเรบ ฌางัน คาระปัด ตือปัจ นังฆรี โตรอัด ดัฮ. วะตู เกา มาแรฮ บรี เกา อาเมด บาฌู อีตู อาเมด โกะ ซูรัจ ฌูฆา บือมาแรฮ ซามา. (บาฌิ เดะ กาวัด โกะ ซูรัจ นู ฆาแรฮ เดะ กูเละ บือนาตัก เลอ.) 14 อาเลกซันเดอ นู ฌาดี ตูกัก ตือมาฆา มีรัฮ เตอ ญา บือเลฮ บูวัจ ฌาฮัจ กะ กู บาญะ โตระ. ตาปี ตูฮัด เลอ ญา นะ บูวัจ บาลัซ กะ ญา บือกะ โกะ ปือบูวัจ นะ ญา. 15 เกา กือนา ฌาฆา ลีฮัจ ญา บรี บาฌิ ฌูฆา เลอ ซาเบะ ญา บือเลฮ บลาวัด บือตือฆัฮ กรัซ โตระ ฌางัน โกะ ปือมือเลา อาฌัยํ นะ กีตา. 16 วะตู ลามูลา นู กู อูฆัย ปาซัน นะ กู ฮอย ซาปา ซืออูรัก โปด นู มาโซะ โซะ กู. ตาปี กูญา ตีงัน กู บูวัก ซือมูฮา ดัฮ. มีตา เดะ ตูฮัด ฌางัน บรี ญา นะ ฮูโกบ กูญา กะฆีเตอ เลอ. 17 ตาปี ตูฮัด ญา ดูโดะ โซะ กู ดัฮ ญา ตูโลก บรี กู ตือฆัยํ-อูรัจ บีดา กู นะ มือญาเระ ลาฆู นะ ญา บรี ปือนอฮ ฮาบิฮ ดัฮ บรี โกะ ซือมียา บักซา อาซิก ซือมูฮา บือเลฮ ดืองัยํ. กะฆีเตอ กู ลือปัซ ดัฮ เตด บือเลฮ กือนา กรัจ ฮูโกบ บรี มาตี. 18 ตูฮัด เตอ ญา นะ ตูโลก กู บรี ลือปัซ เดะ ลาฆู ฌาฮัจ ราตา บาวา กู ปี รอจ กะ นังฆรี บารู โซะ อาตัซ ลาแงะ นู ญา ฌาดี ราฌา เลอ. บรี โกะ ซือมียา ปูฌี กะ ญา ซือลาลู ซือมาญัก-รอจ. อาเมน. 19 กู กีเรบ บรีงัจ กะ ปริซีลา ฌางัน อาควีลา กีเรบ บรีงัจ กะ ซือมียา ซือรูมัฮ นะ โอเนซิโฟรัด ฌูฆา. 20 เอรัดตัด ลือกัจ เดะ นังฆรี โกริน ลาฆี ตาปี โตรฟีมัด ญา เตด ซือนัง ญาวา กะฆีเตอ กู ตีงัน ญา ตือปัจ นังฆรี มีเลทัด ดัฮ. 21 บรี เกา กูวาซา มาแรฮ ดูลู เดะ มูเซด บือแฌะ เลอ. อาดา ยูบูลัด ปูเดน ลีนัด ฌางัน คลาวดียา กูญา ปัจ อูรัก กีเรบ บรีงัจ กะ เกา. โกะ ดีบราดี ปือจายา ซือมูฮา เตอ กูญา กีเรบ บรีงัจ กะ เกา ฌูฆา เลอ. 22 มีตา บรี ตูฮัด นะ ดูโดะ บือซามา ฌางัน ฮาตี นะ เกา. มีตา บรี ตูฮัด นะ บรี ซือลามัจ กะ กาเญา ซือมูฮา เลอ.
1 กู เปาโล ฌาดี ปราโซฮ นะ ตูฮัด เดะ อาตัซ ฌาดี ปือญูโรฮ นะ เยซู คริด บีดา นะ ตูโลก โกะ ซือมียา นู ตูฮัด ปีเลฮ ดัฮ บรี กูญา ปือจายา บาฌิ บรี กูญา ตาฮู ลาฆู นู ซูโงฮ ตูโรจ บือกะ ฌาลัด นะ ตูฮัด เลอ. 2 กะฆีเตอ เลอ กูญา จาดัก นะ ซาโมจ ลาฆู ฮีโดะ ซูโงฮ นู ซือลาลู. ตะเดะ ดูลู นูตู ตูฮัด บือซัยํ เดะ อาตัซ นู เตด ดือละ มืออูปัย เตอ ญา บือเลฮ บือฌาญี นะ บรี กูญา อาดา ฮีโดะ ซูโงฮ ซือลาลู กะฆีเตอ เลอ. 3 ตาปี รอจ วะตู นู ตูฮัด บือเลฮ ตืองะ ดัฮ เตอ ญา บือเลฮ ปลีฮัจ ลาฆู ซูโงฮ นะ ญา เดะ ปือมือเลา อีตู นู ญา กีเรบ บรี กะ กู นะ มือญาเระ บรี ตาฮู ราตาๆ ตูโรจ ปือมือซัด นะ ตูฮัด นู ตูโลก กีตา บรี ฮีโดะ ลือปัซ บาฌิ ดัฮ. 4 กู กีเรบ ซูรัจ อีนี บรี กะ ทีตัด นู ฌาดี ซือรูปา นานะ ซูโงฮ นะ กู ซาเบะ กีตา ปือจายา ซา ลาฆู อีตู เลอ. มีตา เดะ ตูฮัด อาโปก เดะ อาตัซ มีตา เดะ เยซู คริด นู ตูโลก กีตา บรี ฮีโดะ ลือปัซ บาฌิ ดัฮ เตอ นะ บรี ซือลามัจ กะ เกา นะ บรี เกา ดูโดะ ซือนัง ซือลามัจ เลอ. 5 กรานา ลาฆู กะฆีนี เลอ กู บือเลฮ ตีงัน เกา เดะ ปูเลา ครีด บีดา เกา นะ บือเลฮ บือตามัฮ ลาฆู นู กูรัก บรี ปือนอฮ บาฌิ เตอ ฌาดี-จะ บรี เกา ตืองะ โกะ ซือมียา บือบือลา ลูมอฮ นะ ตูฮัด ราตา ตูโปะ ตูโรจ ลาฆู นู กู ปือซัด ดัฮ เลอ. 6 ลาฆู อีตู ฌาดี กะฆีนี จะ กือนา ตืองะ ซือมียา นู ฮอย ตือปัจ นะ มือฌัฮ ฌาดี กีลากี นู อาดา บีนี แนฮ ซืออูรัก เลอ. โกะ นานะ นะ ญา กือนา ฌาดี ซือมียา ปือจายา เตอ ฮอย ซาปา นะ บือเลฮ มือเลา จะ นานะ อีตู ฌาดี ซือมียา ซูมก ซือมียา บาตัฮ เลอ. 7 ซาเบะ-จะ ซือมียา ฌาฆา ลูมอฮ นะ ตูฮัด เตอ ตูฮัด บือเลฮ ซรัฮ บรี ญา กรือฌา กะฆีเตอ ดัฮ. กะฆีเตอ ญา ฆาโดฮ ฌาดี ซือมียา นู ฮอย ตือปัจ นะ กือนา มือฌัฮ บูกัด ซือมียา งันตืองัน บูกัด ซือมียา ฮาตี ฮางัจ เตอ บูกัด ซือมียา ลือกัจ โกะ อาระ เตอ บูกัด ซือมียา ซูมก บูกัด ซือมียา ฮาลูบา กะ ดูเวะ เลอ. 8 ตาปี ญา กือนา ฌาดี ซือมียา ซูกา ซาโมจ กาวัด บาฌิ ซูกา ลาฆู นู บาฌิ เตอ ฌาดี ซือมียา ตาฮู ฮูโกบ ฮาตี ตะอาซิก ฌาดี ซือมียา บาฌิ-ตือปัจ ฮาตี จรัฮ บาฌิ เตอ ฌาดี ซือมียา ตาฮู ตาฮัด ญาวา ตะอาซิก เลอ. 9 ปือมือเลา นู รือมัก นู ญา บลาฌัยํ ดัฮ เตอ ญา กือนา ปือฆัก บรี กือฌะ-กือมัซ เลอ บีดา นะ บือเลฮ ปรีงัจ โกะ ซือมียา ตูโรจ กะ ปือมือเลา อาฌัยํ นู รือมัก ซูโงฮ เตอ บีดา นะ บือเลฮ มือญาเระ บรี ลีฮัจ ซาลัฮ นะ โกะ ซือมียา นู ลาวัด ปือมือเลา อีตู ฌูฆา. 10 ซาเบะ-จะ อาดา ซือมียา บาตัฮ บาญะ นู มือเลา บาญะ เตด ฌาดี นามา เลอ. กูญา มืออูปัย กะ โกะ ซือมียา อาซิก บรี กูญา ซือซัจ ฌาลัด. ซือมียา บูวัจ กะฆีเตอ นู บาญะ ฌาดี ซือมียา บักซา ยิว นู ปือจายา กะ เยซู ดัฮ. 11 ฆาโดฮ นะ ตูโดก มูโลจ นะ กูญา บูวัก เตอ กรานา กูญา อาฌัยํ ลาฆู นู เตด ปาโตจ นะ อาฌัยํ เลอ นู บูวัจ บรี โกะ ซือมียา ซือรูมัฮ จาเจา ฮาบิฮ. กูญา บูวัจ กะฆีเตอ ซาเบะ กูญา ฮาลูบา กะ ดูเวะ เลอ. 12 เดะ ลูมอฮ บักซา ครีด กาลา ดูลู อีตู อาดา ซือมียา ซืออูรัก มือเลา ตูโดฮ จะ "ลูมอฮ บักซา ครีด บียาซา มือเลา มืออูปัย ซือลาลู. กูญา ซือรูปา บือนาตัก ฌาฮัจ. กูญา ปือญือฆัด มากัด เตด ตาฮู กือญัง." ญา จะ. 13 ปือมือเลา นู ญา มือเลา อีตู ซูโงฮ เลอ. กะฆีเตอ เกา กือนา อูจะ กะ กูญา อีตู ซีงี บรี โตระๆ เลอ บีดา กูญา นะ ตูโรจ กะ ลาฆู นู กีตา ปือจายา อีตู บรี รือมัก ซูโงฮ เตอ 14 ตีเมา บรี กูญา นะ ตูโรจ กะ ลาฆู จรือตา นะ บักซา ยิว ตีเมา บรี ตูโรจ โกะ ปือมือซัด นะ ลูมอฮ ซือมียา นู มืองือละ ตีงัน ลาฆู นู ซูโงฮ ดัฮ เลอ. 15 โซะ ซือมียา นู จรัฮ บาฌิ ซูกา นามา โปด บาฌิ ฮาปา. ตาปี โซะ ซือมียา นู ตะอารัฮ ดัฮ นู เตด บือฆูนา นู ฮอย เตด ปือจายา ดัฮ เตอ มีเซ-จะ ญา บูวัจ นู นามา โปด ฮอย เตด บาฌิ เลอ. ฮาตี นะ กูญา เตอ ฮาตี นู ตาฮู ซาลัฮ กือนา โปด ญา ตะอารัฮ ฮอย เตด บือฆูนา ฌูฆา. 16 กูญา มืองากู จะ กูญา กราลา ตูฮัด. ตาปี เดะ โกะ ปือบูวัจ นะ กูญา กูญา กีปัซ ลาฆู นะ ตูฮัด เลอ. กูญา ฌาดี ซือมียา เตด ตือปากัย ตีเมา มือนีงัย กะ ซาปา ฮอย เตด บือฆูนา นะ บูวัจ ลาฆู บาฌิ นามา โปด.
1 โซะ เกา เตอ กือนา อาฌัยํ เลอ ตูโรจ ปือมือเลา อาฌัยํ นู รือมัก ซูโงฮ. 2 บรี ปรีงัจ โกะ กีลากี นู ตูฮาๆ บรี กูญา ตาฮู ฌากา ญาวา ตะอาซิก ฌาดี ซือมียา ปรางัย บาฌิ เตอ ซือมียา บือเลฮ ฮูโกบ ฮาตี ตะอาซิก เลอ. บรี กูญา ตูโรจ กะ ลาฆู ปือจายา บรี รือมัก ฌาดี ซือมียา นู ซายัก กาวัด นู ตาฮัด-ฮาตี เลอ. 3 กือนา ปรีงัจ โกะ นีบีนี นู ตูฮาๆ กะฆีเตอ ฌูฆา เลอ บรี กูญา บูวัจ ตูโรจ บือกะ ซือมียา นู ตูเฮะ กะ ตูฮัด เลอ. ฌางัน บรี กูญา ฌาดี ซือมียา มืออูปัจ ซือมียา ลือกัจ อาระ เตอ ตาปี บรี กูญา อาฌัยํ ลาฆู นู บาฌิ. 4 กะฆีเตอ เลอ กูญา นะ บือเลฮ อาฌัยํ โกะ นีบีนี นู มูดาๆ บรี ซายัก กะ ลากี ซายัก กะ นานะ นะ กูญา 5 บรี กูญา ตาฮู ฮูโกบ ฮาตี ตะอาซิก ฌาดี ซือมียา จรัฮ บาฌิ เตอ บรี กูญา ตาฮู มือตัด รูมัฮ บรี บาฌิ ฌาดี ซือมียา ฮาตี บาฌิ มือนีงัย ตูโรจ มูโลจ กะ ปือมือเลา นะ ลากี นะ กูญา. กะฆีเตอ เลอ ฮอย ซาปา นะ บือเลฮ มือเลา ตะอารัฮ เดะ ปือมือเลา นะ ตูฮัด เลอ. 6 โซะ โกะ กีลากี มูดาๆ โปด กือนา ปรีงัจ กะ กูญา ฌูฆา บรี กูญา ฌาดี ซือมียา ตาฮู ฮูโกบ ฮาตี นะ กูญา ตะอาซิก ฌูฆา เลอ. 7 เกา เลอ เกา ตะอาซิก กือนา บูวัจ ตูโรจ ปือบูวัจ นู บาฌิ ราตา มาจับ ฌาดี จูตอ บรี กาวัด ลีฮัจ เลอ. นู เกา อาฌัยํ เตอ กือนา อาฌัยํ ฌางัน ฮาตี รือมัก อาดา ปรางัย นู บาฌิ เลอ. 8 บรี มือเลา ปือมือเลา นู บาฌิ ฮอย ซาปา นะ บือเลฮ มือฌัฮ. กะฆีเตอ เลอ โกะ ซือมียา นู บลาวัด กูญา นะ จือและ เลอ ฮอย ปือมือเลา นามา นะ อูจะ ฌาฮัจ กะ กีตา ดัฮ. 9 กือนา ปรีงัจ กะ โกะ ซือมียา นู ฌาดี ปราโซฮ บรี กูญา มือนีงัย ตูโรจ มูโลจ กะ ตกเก นะ กูญา ราตา มาจับ นะ บูวัจ บรี ตกเก นะ กูญา ซูกา-ฮาตี. ฌางัน บรี กูญา ลาวัด ปือมือเลา นะ ตกเก อีตู 10 ฌางัน นะ มือญูรี ซือบารัก นะ ตกเก เลอ. ตาปี กูญา กือนา บรี ลีฮัจ จะ นู กูญา อาดา ฮาตี รือมัก ฮาตี บาฌิ ซือมูฮา. กะฆีเตอ เลอ ปือบูวัจ นะ กูญา ราตา ซือมูฮา นะ บรี โกะ ซือมียา อาซิก มือโอจ กะ ปือมือเลา อาฌัยํ ปาซัน ตูฮัด เดะ อาตัซ นู ตูโลก กีตา บรี ฮีโดะ ลือปัซ บาฌิ ดัฮ. 11 ซาเบะ-จะ ตูฮัด บือซัยํ เดะ อาตัซ เตอ ญา บือเลฮ ปลีฮัจ จะ นู ญา ฮาลัย บรี ซือลามัจ กะ อูมัจ-ซือมียา ราตา ซือมูฮา บีดา นะ ตูโลก กูญา บรี ฮีโดะ ลือปัซ บาฌิ ดัฮ. 12 ลาฆู อีตู อาฌัยํ กีตา บรี ตีงัน บูวัก โกะ ปือบูวัจ นู ฌาฮัจ ฌางัน โกะ ลาฆู ฆาละ เดะ ฮาดัจ อีนี. ญา อาฌัยํ กีตา ปูลัก จะ วะตู กีตา อาดา เดะ ดือนียา อีนี บรี กีตา ตาฮู ฮูโกบ ฮาตี ตะอาซิก ตูโรจ ลาฆู บาฌิ-ตือปัจ ตูโรจ ฌาลัด นะ ตูฮัด เลอ. 13 กีตา กือนา บูวัจ ตูโรจ กะฆีเตอ ตืองัฮ นาตี อารี อีตู นู ซูกา-ฮาตี ซูโงฮ นู กีตา จาดัก นะ ลีฮัจ. อารี อีตู เลอ เยซู คริด ตูฮัด นู บือซัยํ นะ กีตา เตอ ญา นู ตูโลก กีตา บรี ฮีโดะ ลือปัซ บาฌิ เตอ. ญา เลอ นะ มาแรฮ ปลีฮัจ ฌางัน นู บือซายา บือซรี นะ ญา. 14 ญา เตอ บือเลฮ ซรัฮ ญาวา นะ ญา มาตี กรานา กีตา ดัฮ บีดา นะ ตือบุซ กีตา บรี ลือปัซ เดะ ลาฆู ฌาฮัจ ซือมูฮา บีดา นะ บาโซฮ กีตา บรี จรัฮ บาฌิ ดัฮ ฌาดี ซา ลูมอฮ ซือมียา นะ ญา ตะอาซิก เลอ ฌาดี ลูมอฮ ซือมียา ฮาตี ฆางู นะ บูวัจ โกะ ปือบูวัจ นู บาฌิ เลอ. 15 ลาฆู กะฆีนี เตอ เกา กือนา มือเลา เลอ ปรีงัจ กะ กูญา อูจะ กูญา บรี กือมัซๆ เลอ. ฌางัน บรี ซาปา นะ กีปัซ เกา เลอ.
1 กือนา ปรีงัจ กะ ลูมอฮ ซือมียา บรี กูญา มือนีงัย ตูโรจ ฮูโกบ นะ ลูวัก นะ โกะ กือปาลา ตูโปะ เลอ บรี มือนีงัย กะ กูญา อีตู. กือนา ซียะ ฮาตี นะ บือกรือฌา โกะ ปือบูวัจ นู บาฌิ ซือมูฮา เลอ. 2 ฌางัน บรี กูญา นะ มือเลา มืออูปัจ กะ ซือมียา ดีฮา เลอ. ฌางัน บรี ฌาดี ซือมียา มูดัฮ นะ บือตือฆัฮ. ตาปี บรี อาดา ฮาตี บือแฌะ บูวัจ ปลีฮัจ ปรางัย นู บาฌิ กะ ซือมียา ซือมูฮา. 3 ซาเบะ-จะ กาลา ดูลู กีตา ตะอาซิก ฌาดี อูรัก บูดอ ฌาดี ซือมียา ตีเมา มือนีงัย ซือมียา กือนา ตีปู ฌาดี ปราโซฮ เดะ ลาฆู ฆาละ ซูกา นะ บรามัย บาญะ ลาฆู ฌาดี ซือมียา ฮาตี ฌาฮัจ ดือกี กาวัด. ซือมียา อาซิก บือชี กะ กีตา กีตา โปด บือชี กาวัด บือซามา-ซามา. 4 ตาปี วะตู ตูฮัด เดะ อาตัซ นู ตูโลก กีตา บรี ลือปัซ ญา บือเลฮ ปลีฮัจ จะ นู ญา ฮาตี บาฌิ ซายัก กะ โกะ อูมัจ-ซือมียา ดัฮ เตอ 5 วะตู อีตู เตอ ญา บือเลฮ ตูโลก กีตา บรี ฮีโดะ ลือปัซ บาฌิ ดัฮ เลอ. ญา ตูโลก กีตา กะฆีเตอ บูกัด กรานา กีตา บือกรือฌา ลาฆู นู บาฌิ-ตือปัจ เตอ ตาปี กรานา ญา บือเลฮ ตือจีฮัด กะ กีตา เตอ เลอ. ญา บือเลฮ ตูโลก กีตา บรี ลือปัซ กะฆีนี จะ ซือมืองัจ นะ ตูฮัด ญา บือเลฮ บาโซฮ กีตา บรี กีตา กือนา บือฌาดี ซือกาลี ลาฆี ดัฮ บรี กีตา อาดา ฮาตี บารู ดัฮ. 6 ซือมืองัจ อีตู เตอ ตูฮัด บือเลฮ อูแร เดะ กีตา ปือนอฮ ซูโงฮ ดัฮ เลอ กรานา เยซู คริด นู ตูโลก กีตา บรี ลือปัซ. 7 ตูฮัด บูวัจ กะฆีเตอ บีดา ญา นะ ฮาลัย บรี ซือลามัจ กะ กีตา บรี กีตา ฌาดี ซือมียา บาฌิ-ตือปัจ โซะ ฮึลด ตูฮัด ฌาดี ซือมียา นู นะ ซาโมจ ลาฆู ฮีโดะ ซูโงฮ นู ซือลาลู ฌาดี ปือซากา บือกะ กีตา จาดัก นะ บือเลฮ เลอ. 8 ปือมือเลา อีตู ปือมือเลา ซูโงฮ เลอ. กู ซูกา บรี เกา มือญาเระ ลาฆู กะฆีเตอ บรี กือมัซๆ นะ บรี โกะ ซือมียา นู ปือจายา กะ ตูฮัด เตอ นะ กูวาซา บือกรือฌา บูวัจ ลาฆู บาฌิ เลอ. ปือบูวัจ กะฆีนี บาฌิ เลอ นะ บูวัจ บรี ซือมียา ซือมูฮา นะ บือเลฮ บาฌิ. 9 ตาปี กือนา อีละ บูวัก เดะ ลาฆู บือตือฆัฮ-ตือฆัฮ นู บูดอ เดะ ลาฆู ปาซัน โกะ บีลาแก ตูโรด-มือนูโรด มาแรฮ เตอ เดะ ลาฆู บือตือฆัฮ ปาซัน ปือมือเลา ฮูโกบ นะ ตูฮัด เลอ. ลาฆู อีตู ซือมูฮา กือนา มืองือละ เลอ ฌาดี ลาฆู ฮอย เตด ตือปากัย เตด ฌาดี นามา เลอ. 10 โซะ ซือมียา ดีฮา อาโจบ กาวัด บรี ปือจัฮ-บือลัฮ เตอ วะตู อูจะ ปรีงัจ กะ ญา ซือกาลี ดูวา กาลี ดัฮ ตาปี ญา ตีเมา มือนีงัย เตอ ฌางัน ปี ปือดูลี กะ ญา ดัฮ เลอ. 11 เกา ตาฮู ซูโงฮ จะ ซือมียา กะฆีเตอ ญา ซือซัจ เดะ ฌาลัด นู ซูโงฮ ดัฮ. นู ญา ฌือนัฮ บูวัจ ดูซา ปลีฮัจ บรี ซัฮ จะ ญา ซาลัฮ ซูโงฮ เลอ. 12 วะตู กู นะ ซูโรฮ อาเตมัด เฆอ ทีคิกัด ปี มียา เกา เกา กือนา กูวาซา ปี มียา กู เดะ ตูโปะ นีโกบุรี กรานา กู ตือตู-ฮาตี ดัฮ จะ นะ บราดู โซะ อีตู ตือดะ ฮาบิฮ มูเซด บือแฌะ. 13 เกา กือนา กูวาซา ตูโลก อาตัจ เซนา นู ซือมียา ปานัย บือดะวา อีตู ฌางัน อะโปโล บรี กูญา บือเลฮ บือฌาลัด ปี บรี บาฌิ เลอ ฮอย เตด ปูตุซ โกะ ซือบารัก นามา โปด. 14 กือนา บรี ลูมอฮ กีตา ฌูฆา บลาฌัยํ บรี ตาฮู นู นะ บูวัจ บือกรือฌา นู บาฌิ บีดา กีตา นะ บือเลฮ ตูโลก เดะ ลาฆู ฆาโดฮ ฌือแนฮๆ เตด ฌาดี ซือรูปา ซือมียา นู ฮอย รือฆา นามา เลอ. 15 โกะ ซือมียา ซือมูฮา นู ดูโดะ ฌางัน กู กูญา กีเรบ บรีงัจ กะ เกา. กามี กีเรบ บรีงัจ กะ โกะ ซือมียา ปือจายา นู ซายัก กามี ฌูฆา. มีตา เดะ ตูฮัด นะ บรี ซือลามัจ กะ กาเญา ซือมูฮา เลอ.
1 กู เปาโล นู อาดา เดะ ราตัย กรานา เยซู คริด ฌางัน ทิโมที ดีบราดี นะ กีตา เตอ กู ฆาแรฮ ซูรัจ อีนี บรี กะ ฟีเลโมน ซือมียา นู กามี ซายัก นู บือกรือฌา บือซามา ฌางัน กามี เตอ. 2 ฆาแรฮ บรี กะ มิ อับฟียา เตอ ฌางัน อาริคีโป นู ฌาดี ซือรูปา ตาฮัน นะ ตูฮัด นู บือซามา ฌางัน กามี เตอ ฆาแรฮ บรี กะ ลูมอฮ นะ ตูฮัด นู บือมุน เดะ รูมัฮ นะ เกา เตอ. 3 มีตา เดะ ตูฮัด อาโปก นะ กีตา มีตา เดะ ตูฮัด เยซู คริด ซามา นะ บรี ซือลามัจ กะ กาเญา นะ บรี กาเญา ดูโดะ ซือนัง ซือลามัจ เลอ. 4 กาลา กู บือซาโวจ บรีงัจ รอจ กะ เกา กู บรี ซือลามัจ กะ ตูฮัด เดะ อาตัซ นะ กู ซือลาลู เลอ. 5 ซาเบะ กู ดืองัยํ จะ เกา ปือจายา กะ ตูฮัด เยซู เตอ เกา ซายัก กะ โกะ ซือมียา นะ ตูฮัด ซือมูฮา ฌูฆา เลอ. 6 กู บือซาโวจ มีตา บรี ลาฆู นู เกา ปือจายา บือซามา นะ ตูโลก เกา บรี ตาฮู บือตามัฮ บรี บาฌิ ลาฆี เดะ บือนา ลาฆู บาฌิ ซือมูฮา นู กีตา กือนา บูวัจ บีดา ตูโรจ กะ เยซู คริด เลอ. 7 มิ เออ นู เกา ซายัก กะฆีเตอ เกา ปูโฌะ ฮาตี นะ กู บรี กู ซูกา-ฮาตี ซูโงฮ เลอ ซาเบะ เกา บือเลฮ บูวัจ บรี โกะ ซือมียา นะ ตูฮัด ซือนัง-ฮาตี ดัฮ. 8 กะฆีเตอ มีเซ-จะ เยซู คริด บูวัจ บรี กู อาดา ฮาตี บรานี นะ บือเลฮ ปือซัด เกา บรี บูวัจ ลาฆู นู ปาโตจ 9 ตาปี กู ซายัก เกา ดัฮ. กะฆีเตอ กู อีงัจ จะ ลาฆู อีนี บาฌิ ลาฆี นะ มีตา เลอ บรี เกา นะ ตูโลก. มีเซ-จะ กู เปาโล ฌาดี ปือญูโรฮ นะ เยซู คริด นู อาดา เดะ ราตัย กรานา ญา เตอ 10 ตาปี กู มีตา เดะ เกา ปาซัน นานะ นะ กู โอเนซิโม. วะตู กู อาดา เดะ ราตัย ญา ฌาดี ซือรูปา นานะ นะ กู ดัฮ. 11 ดูลู เกา ลีฮัจ จะ ญา ฮอย เตด ตือปากัย ดัฮ. ตาปี วะตู อีนี ญา ฌาดี ซือมียา นู ตือปากัย ดัฮ บรี กะ เกา ฌางัน กู ซามา. 12 โอเนซิโม เตอ มีเซ-จะ กู ซายัก กะ ญา บาฌิ ซูโงฮ ตาปี กู ซูโรฮ ญา ปี ซารี เกา. 13 ตานา กู อาดา เดะ ราตัย กรานา บรีตา นู บาฌิ นะ ตูฮัด เตอ กู ซูกา นะ บรี ญา ดูโดะ บือซามา ฌางัน กู นะ บรี ญา ฆาตี เกา เดะ ลาฆู ตูโลก กู. 14 ตาปี กู ตีเมา นะ บูวัจ มานามา นู เตด กือนา เดะ ฮาตี นะ เกา. กู ซูกา บรี เกา นะ บูวัจ บรี กือนา ลาฆู บูกัด ซาเบะ กือนา ปรือกัด ดัฮ ตาปี ซาเบะ เกา อาดา ฮาตี นะ บูวัจ. 15 อีงัจ จะ ซาเบะ ลาฆู อีนี เลอ ญา ตีงัน เกา ซา วะตู ดัฮ จะ บีดา นะ บรี ญา นะ บาลิ มาแรฮ ดูโดะ ฌางัน เกา ซือมาญัก-รอจ. 16 นะ บาลิ มาแรฮ เตด ฌาดี ซา ปราโซฮ เตอ ตาปี บาฌิ เดะ อีตู ปูลัก ญา นะ ฌาดี ซือรูปา อาดี-บราดี นู เกา ซายัก ฌูฆา เตอ. กู ซายัก ญา บาญะ ตาปี เกา นะ ซายัก ญา ลือเบฮ เดะ อีตู ลาฆี ซาเบะ-จะ ญา ฌาดี ปราโซฮ นู บาฌิ ฌาดี ซือมียา นู ปือจายา กะ ตูฮัด บือซามา ฌางัน กีตา ฌูฆา. 17 กะ เกา กีรา จะ กู ฌาดี ซือมียา บือกรือฌา บือซามา ฌางัน เกา เตอ บรี เกา ซาโมจ ญา เลอ บือกะ ซือรูปา เกา นะ ซาโมจ กู. 18 กะ ญา บือเลฮ บูวัจ ซาลัฮ ฌางัน เกา ตือฮูตัก เดะ เกา ดัฮ บรี เกา กีรา จะ ฌาดี ลาฆู นะ กู เลอ. 19 กู เปาโล ฆาแรฮ ฌางัน ตางัน นะ กู ตะอาซิก เตอ กู นะ บายัยํ ฮูตัก ฆาตี ญา. ตาปี กู เตด นะ มือเลา ลาฆู นู เกา ตือฮูตัก เดะ กู ปาซัน ญาวา นะ เกา ตะอาซิก เลอ. 20 นี เลอ มิ เออ บรี เกา ตูโลก กู ฌูฆา ซาเบะ กีตา ปือจายา บือซามา กะ ตูฮัด. บรี กู ซือนัง-ฮาตี ซูโงฮ เดะ ฌาลัด นะ เยซู คริด เลอ. 21 กู ตือตู-ฮาตี นู เกา นะ มือนีงัย กะ ลาฆู อีนี. กะฆีเตอ กู ฆาแรฮ ซูรัจ อีนี ดัฮ ตาฮู จะ เกา นะ บูวัจ ลือเบฮ เดะ นู กู มีตา ลาฆี. 22 อาดา ลาฆู อาซิก ซา ลาฆู. บรี เกา ซียะ ตือปัจ ดูโดะ นู กู นะ มาแรฮ มือนูปัก ซาเบะ กู จาดัก จะ ตูฮัด นะ มือนีงัย กะ ปือมือเลา บือซาโวจ นะ ลูมอฮ กาเญา นะ บรี กู บาลิ มาแรฮ ดาปัจ กาเญา ปูลัก. 23 เอปาฟรัด นู อาดา เดะ ราตัย บือซามา ฌางัน กู กรานา เยซู คริด เตอ ญา กีเรบ บรีงัจ กะ เกา. 24 อาดา มาระโก อาริดตาคัด เดมา ซามา ลูกา เตอ นู บือกรือฌา บือซามา ฌางัน กู กูญา กีเรบ บรีงัจ กะ เกา ฌูฆา เลอ. 25 มีตา เดะ ตูฮัด เยซู คริด นะ ฮาลัย บรี ซือลามัจ กะ ฮาตี นะ กาเญา ซือมูฮา.
1 เดะ กาลา นูตู ตูฮัด บือซัยํ เดะ อาตัซ ญา บือเลฮ มือเลา บาญะ กาลี บาญะ ฌือแนฮ ฌางัน โกะ บีลาแก นะ กีตา. ญา บือเลฮ ซูโรฮ โกะ ซือมียา ตูโดฮ อาเมด ลาฆู นะ ญา มาแรฮ มือเลา มือญาเระ กะฆีเตอ. 2 ตาปี โซะ วะตู นู ปือญูดัฮ อีนี เตอ ตูฮัด บือเลฮ ซูโรฮ นานะ นะ ญา มาแรฮ มือเลา ฌางัน กีตา. นานะ นะ ตูฮัด อีตู เลอ นู ตูฮัด บือเลฮ ตืองะ บรี ญา ฌาดี ซือมียา ซาโมจ บือนา ซือมูฮา บรี ฌาดี ปือซากา. ญา โปด นู ตูฮัด บือเลฮ ซูโรฮ บือฌาดี โกะ ดือนียา ฌางัน ลาแงะ ซือมูฮา. 3 นานะ นะ ตูฮัด นู อีตู เลอ ญา ฌาดี ตือปัจ บือซรี บือซายา นะ ตูฮัด ฌาดี ซา รูปา อีตู ฌางัน ตูฮัด โปด. นานะ นะ ตูฮัด เตอ เลอ ซูโรฮ ปือมือเลา นู มือฆัฮ นะ ญา บีดา ฌาฆา บือบือลา ดือนียา ฌางัน ลาแงะ ซือมูฮา. ตานา ญา บือเลฮ บาโซฮ ดูซา นะ โกะ อูมัจ-ซือมียา ฮาบิฮ ดัฮ ญา โปด ปี ดูโดะ โซะ กานัน นะ ตูฮัด นู มือฆัฮ โตระ เดะ อาตัซ. 4 นานะ นะ ตูฮัด อีตู เตอ ตูฮัด บรี ญา มือฆัฮ ลือเบฮ เดะ โกะ ฮูลู-บาลัก นะ ตูฮัด บาญะ โตระ ซือรูปา บือกะ นู ตูฮัด บือเลฮ บรี กะ ญา อาดา ปือนามา นู บาฌิ บือซรี ลือเบฮ เดะ ปือนามา นะ โกะ ฮูลู-บาลัก นะ ตูฮัด อีตู เลอ. 5 ซาเบะ-จะ ซาปา ซือตืองัฮ เดะ ลูมอฮ ฮูลู-บาลัก นู ตูฮัด ดือละ มือเลา กะ ญา จะ "เกา เลอ ฌาดี นานะ นะ กู. อารี อีนี เลอ กู ฌาดี อาโปก เดะ เกา ดัฮ." ญา มือเลา ปูลัก จะ "กู นี เลอ นะ ฌาดี อาโปก เดะ ญา. ญา โปด นะ ฌาดี นานะ นะ กู." 6 ตาปี ตานา ตูฮัด ญา นะ ซูโรฮ นานะ ซูโลก นะ ญา ตูโรด มาแรฮ กะ ดือนียา เตอ ญา มือเลา ฌูฆา จะ "บรี โกะ ลูมอฮ ฮูลู-บาลัก นะ ตูฮัด ซือมูฮา มือญือมัฮ กะ ญา เลอ." 7 โซะ ลูมอฮ ฮูลู-บาลัก เตอ ตูฮัด มือเลา จะ "ตูฮัด ญา บูวัจ บรี ลูมอฮ ฮูลู-บาลัก นะ ญา ฌาดี บือกะ อาเงน ญา บรี ลูมอฮ บือกรือฌา นะ ญา ฌาดี บือกะ ญาลา อาปี." 8 ตาปี โซะ นานะ นะ ญา เตอ ตูฮัด เดะ อาตัซ มือเลา ฌางัน ญา จะ "ตูฮัด เออ เกา นะ ฌาดี ราฌา ปี ซือลาลู เตด บราดู เลอ. เกา บือบือลา ดือนียา นะ เกา ฌางัน ลาฆู นู รือมัก ซูโงฮ เลอ. 9 เกา ซูกา ลาฆู บาฌิ-ตือปัจ เกา บือชี กะ ลาฆู ฌาฮัจ. กะฆีเตอ ตูฮัด เดะ อาตัซ ตูฮัด นะ เกา ญา อาเกะ ฌูโญก เกา ดัฮ บรี ซูกา-ฮาตี โตระ ลือเบฮ เดะ ซาบัจ นะ เกา ซือมูฮา เลอ." ตูฮัด ญา จะ. 10 ญา มือเลา ปูลัก จะ "ตูฮัด เออ เกา เลอ ลามูลา นูตู เกา บือเลฮ บือฌาดี ดือนียา เกา บือเลฮ บือฌาดี ลาแงะ ฌางัน ตางัน นะ เกา ตะอาซิก เลอ. 11 โกะ บารัก อีตู นะ ลือแงะ ปี ตาปี เกา อาดา ฮีโดะ ซือลาลู. บือนา อีตู ญา นะ ตูฮา ซือรูปา กะ กาเยด ปากัย 12 กะฆีเตอ เกา นะ บูกุซ บูวัก โกะ บารัก อีตู ซือรูปา กะ บาฌู ซรือโกะ. บือนา บารัก อีตู เกา นะ ซาเลด ซือรูปา ฌาดี กาเยด บาฌู นู ลามา ตาปี โซะ เกา เกา อาดา กะฆีเตอ เลอ เกา ฮอย อารี นะ ตูฮา ลาลู ดัฮ เลอ." ตูฮัด ญา จะ. 13 ตาปี ตูฮัด เดะ อาตัซ เตด บือเลฮ มือเลา กะ ฮูลู-บาลัก นู ฮาดีฮา จะ "ดูโดะ เลอ โซะ ซือบือลัฮ กานัน นะ กู ตือดะ กู นะ บูวัจ บรี ลูมอฮ ซือตรู นะ เกา นะ ฌาดี บือกะ ปาปัด นู ซาโมจ ตาปะ กากี นะ เกา." 14 โกะ ฮูลู-บาลัก ซือมูฮา ฌาดี นามา เลอ? ฌาดี บือกะ ซือมืองัจ นู ตูโลก บือกรือฌา บีดา ตูฮัด นู ตูฮัด ซูโรฮ ปี ตูโลก โกะ ซือมียา นู นะ ซาโมจ ลาฆู ฮีโดะ ลือปัซ บาฌิ บูกัด เฆอ?
1 ซาเบะ กะฆีเตอ เลอ กีตา กือนา ตือตู-ฮาตี เดะ ลาฆู นู กีตา บือเลฮ ดืองัยํ บรี บาญะ ลือเบฮ เดะ อีตู ลาฆี. เตด กะฆีเตอ กีตา นะ ฮาญอจ ปี ฌาโวฮ เดะ ลาฆู นู กีตา ปือจายา. 2 กรานา ปือมือซัด อีตู นู โกะ ฮูลู-บาลัก บือเลฮ ปือซัด กาลา ดูลู เตอ ลีฮัจ ดัฮ จะ ฌาดี ลาฆู นู ซูโงฮ. ซือมียา บูวัจ กือลือเบฮ ซือมียา นู ฮอย เตด มือนีงัย กูญา นะ กือนา กรัจ ฮูโกบ บาลัซ ปาเระ บรี กือนา ลาฆู. 3 กะฆีเตอ ดัฮ กีตา เตด ปือดูลี กะ ลาฆู ฮีโดะ ลือปัซ บาฌิ นู บือซัยํ โตระ เตอ กีตา นะ ลารี บรี ลือปัซ บือเลฮ กะฮามี เลอ? ลาฆู ฮีโดะ อีตู เตอ ลามูลา ตูฮัด เยซู ตะอาซิก ญา บือเลฮ มือญาเระ ดัฮ. บารู โกะ ซือมียา นู บือเลฮ ดืองัยํ เดะ ญา โปด กูญา มือญาเระ กะ กามี จะ ฌาดี ลาฆู นู ซูโงฮ เลอ. 4 ตูฮัด บือซัยํ เดะ อาตัซ ญา ฌาดี ซะซี บือซามา ฌูฆา ญา บูวัจ บรี อาดา ปือนานา ซีดี นู มือฆัฮ นู ปือและ ซูโงฮ แนฮ-ฌือแนฮ. ญา ปาฮาฆิ โกะ อากัน นู ปานัย ดาตัก เดะ ซือมืองัจ นะ ตูฮัด ตูโรจ กะ ฮาตี นะ ตูฮัด ตะอาซิก เลอ. 5 บูกัด โกะ ฮูลู-บาลัก นู ตูฮัด ตืองะ บรี กะ กูญา ฮูโกบ ดือนียา นู บารู นู กามี มือเลา เตอ. 6 ตาปี อาดา ซา ตือนอซ เดะ ซูรัจ ปือมือเลา นะ ตูฮัด นู มือเลา กือฌะ-กือมัซ จะ "โอ ตูฮัด อูมัจ-ซือมียา ฌาดี ซาปา เลอ นู เกา บรีงัจ กะ ญา? นานะ นะ ซือมียา โปด ฌาดี ซาปา เลอ นู เกา ฌาฆา บือบือลา ญา? 7 เกา บูวัจ บรี ญา รือนัฮ เดะ โกะ ฮูลู-บาลัก ซัจ เกา บรี จูบุก บือซรี บือซายา กะ ญา บรี ญา กือนา มือโอจ ซูโงฮ เลอ 8 บรี บือนา บารัก ซือมูฮา ดูโดะ เดะ บาวัฮ ตาปะ กากี นะ ญา." ญา จะ. ลาฆู นู ตูฮัด บรี บือนา ซือมูฮา อาดา เดะ บาวัฮ ฮูโกบ นะ อูมัจ-ซือมียา เตอ ฮอย ลาฆู นามา นู เตด ดูโดะ เดะ บาวัฮ ฮูโกบ นะ ญา. โงฮ-ซูโงฮ วะตู อีนี กีตา เตด บือเลฮ ลีฮัจ จะ บือนา ซือมูฮา อาดา เดะ บาวัฮ ฮูโกบ นะ อูมัจ-ซือมียา. 9 ตาปี กีตา ลีฮัจ เยซู นี เลอ. นู ตูฮัด เดะ อาตัซ นะ ฮาลัย บรี ซือลามัจ กะ อูมัจ-ซือมียา กะฆีเตอ ญา บูวัจ บรี กะ เยซู รือนัฮ เดะ โกะ ฮูลู-บาลัก ซัจ บรี ญา กือนา มาตี บีดา นะ ตูโลก อูมัจ-ซือมียา ราตา เลอ. กีตา ลีฮัจ เยซู ญา อาดา จูบุก นู บือซรี บือซายา ญา กือนา มือโอจ ซูโงฮ กรานา ญา ยอม มาตี ฌางัน ลาฆู ซูซัฮ โตระ กะฆีนี เลอ. 10 ซาเบะ ตูฮัด เดะ อาตัซ นู บือฌาดี บือนา ซือมูฮา นู ตูโลก บือนา ซือมูฮา บรี ดูโดะ กือฌะ เตอ ญา ตืองัฮ บาวา โกะ นานะ บาญะ อูรัก มาแรฮ ซาโมจ บาฮาเฆด เดะ ลาฆู บือซรี บือซายา นะ ญา. เยซู เตอ ฌาดี ซือมียา นู บาวา กูญา ปี บรี ฮีโดะ ลือปัซ บาฌิ. กะฆีเตอ บือฆูนา ดัฮ เลอ นู ตูฮัด บือเลฮ บูวัจ บรี เยซู กือนา ลาฆู ซูซัฮ โตระ บีดา ญา นะ ซียะ ฆือนะ ฮาบิฮ ดัฮ นู นะ บูวัจ กะฆีเตอ. 11 เยซู อีตู ญา นู บาโซฮ โกะ ซือมียา บรี จรัฮ บาฌิ เตอ ฌางัน โกะ ซือมียา นู ญา บาโซฮ บรี จรัฮ ฌูฆา กูญา ดาตัก มาแรฮ เดะ ซา อาโปก อีตู เลอ. ซาเบะ กะฆีเตอ เยซู ญา เตด จือและ นะ มือเลา จะ กูญา อีตู ฌาดี โกะ ดีบราดี นะ ญา. 12 ญา มือเลา ตูโรจ บือกะ ซูรัจ ปือมือเลา นะ ตูฮัด นู จะ "กู นะ มือญาเระ ปาซัน ลาฆู นะ ตูฮัด กะ ดีบราดี นะ กู. เดะ ตืองัฮ โกะ ซือมียา บือมุน กู นะ ปูฌี กะ ตูฮัด เลอ." 13 ญา มือเลา ปูลัก จะ "กู นี เลอ นู ตือตู เดะ ฮาตี กะ ตูฮัด เดะ อาตัซ." ญา มือเลา ปูลัก จะ "ลีฮัจ เลอ กู อาดา โตะ อีนี ฌางัน โกะ นานะ นู ตูฮัด บือเลฮ บรี กะ กู." 14 ซาเบะ โกะ นานะ อีตู อาดา ลูลู อาดา ดารัฮ เตอ เยซู โปด ญา ฌาดี ซือมียา ซือรูปา กูญา ฌูฆา. กะฆีเตอ ลาฆู นู เยซู มาตี เตอ นะ บือเลฮ บูวัจ บรี กือปาลา ฮาตู ซีตัด ฌาฮานัม ดัฮ จะ ฮาตู อีตู นู บูวัจ บรี โกะ ซือมียา ฆาโดฮ มาตี. 15 กะฆีเตอ โกะ ซือมียา นู ฌาดี ซือรูปา ปราโซฮ ซือมาญัก-รอจ ซาเบะ ตาโกจ มาตี เตอ กูญา อีตู เลอ นู เยซู ตูโลก บรี ลือปัซ ดัฮ. 16 ซาเบะ-จะ โงฮ-ซูโงฮ เตอ ญา เตด บือเลฮ ตูโลก โกะ ฮูลู-บาลัก ตาปี ญา ปี ตูโลก โกะ บือแนฮ นะ อับราฮัม. 17 กรานา กะฆีเตอ เยซู ญา กือนา ฌาดี ซือรูปา โกะ ดีบราดี นะ ญา ราตา ฌือแนฮ บีดา ญา นะ ฌาดี กือปาลา ซามี นู ตือจีฮัด ซูโงฮ นู รือมัก เดะ ลาฆู บือกรือฌา บรี กะ ตูฮัด เดะ อาตัซ บีดา บาโซฮ ดูซา นะ อูมัจ-ซือมียา ราตา. 18 กรานา นู เยซู ญา กือนา ซูซัฮ โตระ กือนา ลกลีฮัจ ดัฮ กะฆีเตอ เลอ ญา โปด นะ ตูโลก โกะ ซือมียา นู กือนา ลกลีฮัจ บือเลฮ เลอ.
1 กะฆีเตอ โกะ ดีบราดี เออ ลูมอฮ กาเญา นู ตูฮัด เดะ อาตัซ ปาเงน ดัฮ บรี ฌาดี โกะ ซือมียา นะ ญา กาเญา กือนา บรีงัจ กะ ซือมียา นู ฌาดี ปือญูโรฮ ฌางัน กือปาลา ซามี นู กีตา ซาโงะ ปือจายา ดัฮ. ญา เตอ ฌาดี เยซู เลอ. 2 เยซู เตอ ญา ฮาตี รือมัก ฌางัน ตูฮัด เดะ อาตัซ นู บือเลฮ ตืองะ ญา ซือรูปา บือกะ นู มูซา ญา ฮาตี รือมัก ฌูฆา เดะ ดาลับ รูมัฮ นะ ตูฮัด ซือมูฮา. 3 ซาเบะ-จะ เยซู ญา ปาโตจ นะ บือเลฮ ซาโมจ ลาฆู มือโอจ ลือเบฮ เดะ มูซา บาญะ ลาฆี เลอ ซือรูปา กะ ซือมียา บูวัจ รูมัฮ ญา กือนา มือโอจ บาญะ เดะ รูมัฮ นู ญา บูวัจ เตอ. 4 กรานา-จะ ราตา บีฌี รูมัฮ กือนา อาดา ซือมียา บูวัจ ตาปี นู บูวัจ บือนา ซือมูฮา ฌาดี ตูฮัด เดะ อาตัซ เลอ. 5 มูซา เตอ ญา ฌาดี ซือมียา บือกรือฌา นู ฮาตี รือมัก เดะ ดาลับ รูมัฮ นะ ตูฮัด ซือมูฮา บีดา นะ ฌาดี ซะซี เดะ ลาฆู แนฮ-ฌือแนฮ นู ตูฮัด นะ มือเลา เดะ วะตู โซะ บลากัก ปูลัก. 6 ตาปี เยซู คริด โปด ญา ฮาตี รือมัก บือกะ นานะ นู ฌาดี กือปาลา เดะ รูมัฮ นะ ตูฮัด. กีตา นี เลอ ดัฮ กีตา ตือตู กีตา บรานี ปือนอฮ-ฮาตี เดะ ลาฆู นู กีตา จาดัก เตอ กีตา โปด ฌาดี รูมัฮ นะ ญา. 7 กะฆีเตอ ซือมืองัจ นะ ตูฮัด มือเลา จะ "อารี อีนี เลอ ดัฮ กาเญา นะ มือนีงัย กะ ซูวารา นะ ตูฮัด เตอ 8 ฌางัน บรี กาเญา ตือฆัยํ-ฮาตี ซือรูปา อารี อีตู นู โกะ บีลาแก นะ กาเญา บลาวัด ฌางัน ตูฮัด ดัฮ ซือรูปา กะ อารี อีตู นู กูญา ลกลีฮัจ ตูฮัด เดะ ปาดัก ตานัฮ ตูโฮยํ นู ลือฆา เตอ. 9 โกะ บีลาแก นะ กาเญา อีตู กูญา ลกลีฮัจ มือญาซัจ กู ดัฮ มีเซ-จะ กูญา บือเลฮ ลีฮัจ ลาฆู ปือบูวัจ นะ กู ดัฮ กือมูฮา 40 ตาโฮด. 10 ซาเบะ กะฆีเตอ กู มูซัยํ กะ ลูมอฮ ซือมียา ฮาดัจ อีนี จะ 'ฮาตี นะ กูญา ซือซัจ ซือรูโลยํ กูญา ตีเมา นะ ตูโรจ กะ ฌาลัด นะ กู.' 11 กะฆีเตอ กู มูซัยํ อาเกะ มือเลา กือมัซๆ จะ 'กูญา นะ เตด บือเลฮ มาโซะ กะ ตือปัจ บราดู ซือนัง บาฌิ นะ กู เลอ.' " 12 โอ ดีบราดี เออ กาเญา กือนา ฌาฆา บรี บาฌิ เลอ บีดา ตีเมา บรี ซาปา ซืออูรัก โปด เดะ ลูมอฮ กาเญา อาดา ฮาตี ฌาฮัจ ฮาตี เตด ปือจายา นู นะ บาวา กาเญา บรี ตีงัน ตูฮัด ญา นู อาดา ฮีโดะ ซูโงฮ เตอ. 13 ตาปี บือกะ วะตู นู มือเลา ซีงี จะ "อารี อีนี" อาดา ลาฆี เตอ กาเญา กือนา ปูโฌะ-ฮาตี บือซามา-ซามา เดะ บีลัก อารี เลอ บีดา ตีเมา บรี ซาปา ซืออูรัก เดะ ลูมอฮ กาเญา นะ ตือฆัยํ-ฮาตี ปี กรานา ดูซา นะ ตีปู. 14 ซาเบะ-จะ ดัฮ กีตา ซือมาตา ฌาฆา ลาฆู ตือตู เดะ ฮาตี นู กีตา อาดา ตะเดะ ลามูลา เตอ บรี กือฌะ-กือมัซ ตือดะ รอจ กะ ปือญูดัฮ กะฆีเตอ เลอ กีตา นะ อาดา บาฮาเฆด บือซามา ฌางัน เยซู คริด เลอ. 15 ซูรัจ ปือมือเลา นะ ตูฮัด จะ "อารี อีนี เลอ ดัฮ กาเญา นะ มือนีงัย กะ ซูวารา นะ ตูฮัด เตอ ฌางัน บรี กาเญา ตือฆัยํ-ฮาตี ซือรูปา อารี อีตู นู โกะ บีลาแก นะ กาเญา บลาวัด ฌางัน ตูฮัด ดัฮ เลอ." 16 ซาปา เลอ นู บือเลฮ ดืองัยํ ดัฮ ตาปี กูญา บลาวัด ฌางัน ตูฮัด ลาฆี เตอ? ฌาดี ลูมอฮ ซือมียา นู มูซา บาวา ตรือเบะ เดะ นังฆรี อียิบ บูกัด เฆอ? 17 ซาปา เลอ นู ตูฮัด มูซัยํ รอจ กะ 40 ตาโฮด เตอ? ฌาดี ลูมอฮ ซือมียา นู บูวัจ ดูซา นู มาตี ดัฮ บาดัด นะ กูญา กือนา ตีงัน เดะ ปาดัก ตานัฮ ตูโฮยํ นู ลือฆา บูกัด เฆอ? 18 ซาปา เลอ นู ตูฮัด บือเลฮ อาเกะ มือเลา กือมัซๆ จะ "กูญา นะ เตด บือเลฮ มาโซะ กะ ตือปัจ บราดู นู ซือนัง บาฌิ นะ กู." ฌาดี ลูมอฮ ซือมียา นู ตีเมา มือนีงัย บูกัด เฆอ? 19 กะฆีเตอ กีตา ลีฮัจ จะ กูญา มาโซะ ปี กะ ตือปัจ นู ซือนัง อีตู เตด บือเลฮ ดัฮ กรานา กูญา เตด ปือจายา เลอ.
1 ตูฮัด ญา อาดา บือฌาญี ฌางัน กีตา จะ นะ บรี กีตา มาโซะ กะ ตือปัจ บราดู นู ซือนัง บาฌิ นะ ญา เลอ. กะฆีเตอ บรี กีตา ซือมูฮา ปาคัจ ฌาฆา ฮัจ-ลีฮัจ ซือรูโลยํ ตาโกจ-จะ นะ อาดา ซาปา ซืออูรัก เดะ ลูมอฮ กาเญา กือนา ลีฮัจ จะ ญา ปี เตด รอจ เลอ. 2 โงฮ-ซูโงฮ กีตา บือเลฮ ดืองัยํ บรีตา นู บาฌิ อีนี ซือรูปา บือกะ กูญา ดืองัยํ ดัฮ ฌูฆา. ตาปี กูญา เตด บือเลฮ อูโตก นามา เดะ ลาฆู อีตู เตอ ซาเบะ-จะ กูญา เตด ซาโมจ ลาฆู อีตู ฌางัน ฮาตี ปือจายา. 3 กะฆีเตอ กีตา นู ปือจายา เตอ กีตา ตืองัฮ มาโซะ กะ ตือปัจ บราดู นู ซือนัง บาฌิ อีตู ฌาดี-จะ บือกะนู ตูฮัด บือเลฮ มือเลา ดัฮ จะ "กะฆีเตอ กู มูซัยํ อาเกะ มือเลา กือมัซๆ จะ 'กูญา นะ เตด บือเลฮ มาโซะ กะ ตือปัจ บราดู ซือนัง บาฌิ นะ กู เลอ.' " ญา มือเลา กะฆีเตอ มีเซ-จะ ลาฆู บือกรือฌา นะ ญา ซุจ ดัฮ ตะเดะ ลามูลา นู บือฌาดี ดือนียา ดัฮ เลอ. 4 อาดา ซา ตือปัจ เดะ ซูรัจ ปือมือเลา นะ ตูฮัด นู มือเลา ปาซัน อารี ตูโฌฮ อีตู จะ "เดะ อารี ตูโฌฮ เตอ ตูฮัด ญา บราดู เดะ ลาฆู บือกรือฌา ซือมูฮา นะ ญา." ญา จะ. 5 ตาปี ปาซัน ซา ลาฆู อีตู อาดา ปือมือเลา นู บือเลฮ ฆาแรฮ ดัฮ จะ "กูญา นะ เตด บือเลฮ มาโซะ กะ ตือปัจ บราดู นู ซือนัง บาฌิ นะ กู เตอ." 6 โงฮ-ซูโงฮ เตอ อาดา จือลัฮ บรี กะ โกะ ซือมียา ซือตืองัฮ นะ มาโซะ กะ ตือปัจ บราดู นู ซือนัง บาฌิ อีตู ลาฆี. ตาปี ลูมอฮ ซือมียา นู บือเลฮ ดืองัยํ บรีตา บาฌิ อีตู ดูลู ดัฮ กูญา เตด บือเลฮ มาโซะ กรานา กูญา ตีเมา ปือจายา เลอ. 7 กะฆีเตอ ตูฮัด บือเลฮ ตืองะ ซา อารี ปูลัก บือกะ นู จะ "อารี อีนี เลอ." กาลา ลือปัซ ปี ลามา ดัฮ ญา ซูโรฮ ดาวิด มือเลา บือกะ ลาฆู นู ซีงี จะ "อารี อีนี เลอ ดัฮ กาเญา นะ มือนีงัย กะ ซูวารา นะ ตูฮัด เตอ ฌางัน บรี กาเญา ตือฆัยํ-ฮาตี เลอ." 8 กรานา-จะ ดัฮ โยซูวา บือเลฮ บาวา กูญา มาโซะ กะ ตือปัจ บราดู นู ซือนัง บาฌิ ดัฮ เตอ เดะ บลากัก ตูฮัด โปด นะ เตด ตือฆามะ มือเลา ปาซัน อารี อาซิก ปูลัก เลอ. 9 กะฆีเตอ อาดา อารี บราดู กรือฌา ลาฆี บีดา ลูมอฮ ซือมียา นะ ตูฮัด. 10 กรานา-จะ ดัฮ ซาปา มาโซะ กะ ตือปัจ บราดู นู ซือนัง บาฌิ นะ ตูฮัด เตอ ซือรูปา จะ ญา บราดู บือกรือฌา นะ ญา ตะอาซิก บือกะ ตูฮัด ญา บือเลฮ บราดู บือกรือฌา นะ ญา ฌูฆา เลอ. 11 ซาเบะ กะฆีเตอ บรี กีตา ซือมูฮา กูวาซา นู นะ มาโซะ กะ ตือปัจ บราดู นู ซือนัง บาฌิ อีตู เตอ บีดา-จะ ตีเมา บรี ซาปา นะ รือบัฮ ปี ซาเบะ ญา เตด ปือจายา ซือรูปา บือกะ โกะ ซือมียา นู อีตู ซีงี เลอ. 12 กรานา ปือมือเลา นะ ตูฮัด อาดา ฌางัน นู ฮีโดะ ฌางัน นู มือฆัฮ. ญา ตาฌับ ลือเบฮ เดะ โกะ ปือดัก นู ตาฌับ ดูวา บือลัฮ ซือมูฮา. ญา ตีกับ ตือมุซ รอจ กะ ฮาตี รอจ กะ ซือมืองัจ ตือดะ รอจ กะ โกะ ตือนอซ ยู ลือปัซ รอจ กะ ฮาตี ตูลัก. ญา ซาซัจ ลาฆู บรีงัจ ลาฆู บือคานะ เดะ ฮาตี นะ โกะ ซือมียา เลอ. 13 ฮอย นามา นู บือฌาดี ดัฮ นู นะ บูนี บรี ลือปัซ เดะ ตูฮัด เตอ ตาปี มาตา นะ ญา บือเลฮ ลีฮัจ บือนา ซือมูฮา จรัฮ ฮาปา เลอ. ญา เตอ นู กีตา ฆาโดฮ มือญาเระ ปาซัน ลาฆู นะ กีตา ฌางัน ญา. 14 กะฆีเตอ กีตา อาดา กือปาลา ซามี นู บือซัยํ นู บือเลฮ มาโซะ ปี รอจ กะ ตูฮัด บือซัยํ เดะ อาตัซ ดัฮ เตอ ฌาดี เยซู นานะ นะ ญา เตอ เลอ. ซาเบะ กะฆีเตอ นู กีตา ซาโงะ จะ ปือจายา ดัฮ กีตา กือนา ปือฆัก บรี กือฌะ-กือมัซ เลอ. 15 กรานา กือปาลา ซามี นะ กีตา เตอ บูกัด-จะ ญา เตด ตาฮู ลาฆู ลือมัฮ นะ กีตา ตาปี ญา กือนา ลกลีฮัจ ซือรูปา บือกะ กีตา ราตา มาจับ. ตาปี กะฆีเตอ โปด ญา เตด บือเลฮ บูวัจ ดูซา ลาลู เลอ. 16 กะฆีเตอ บรี กีตา ซือมูฮา อาดา ฮาตี บรานี นู นะ มาโซะ รอจ กะ ปาปัด กรือซี ตือปัจ ดูโดะ นะ ตูฮัด ญา นู ฮาลัย บรี ซือลามัจ กะ กีตา บีดา ญา นะ ตือจีฮัด กะ กีตา บีดา ญา นะ ฮาลัย บรี ซือลามัจ นะ ตูโลก กีตา เดะ วะตู นู กีตา บือคานะ เลอ.
1 บรีงัจ ลีฮัจ เลอ กือปาลา ซามี ราตา อูรัก เตอ ญา กือนา ปีเลฮ ดัฮ กือนา ตืองะ ดัฮ ดาตัก มาแรฮ เดะ ลูมอฮ ซือมียา บีดา นะ บือกรือฌา ลาฆู นะ ตูฮัด ฆาตี โกะ ซือมียา. ฌาดี-จะ นะ อาเมด โกะ บารัก มือญือมัฮ มาแรฮ มือนืองะ บรี กะ ตูฮัด บีดา นะ บาโซฮ ดูซา. 2 ญา เตอ ตาฮู นะ อาเมด ฮาตี โกะ ซือมียา นู ซือซัจ บูวัจ ซาลัฮ กรานา กูญา เตด ตาฮู อารัฮ เลอ ซาเบะ อีซี ญา โปด อาดา ฮาตี นู ลือมัฮ บาญะ ฌือแนฮ. 3 ซาเบะ ลาฆู ลือมัฮ กะฆีเตอ ญา ฆาโดฮ อาเมด บือนา บารัก มาแรฮ มือญือมัฮ กะ ตูฮัด บีดา นะ บาโซฮ ดูซา นะ ตะอาซิก บือกะ ซือรูปา ลาฆู ดูซา นะ โกะ ลูมอฮ ซือมียา ฌูฆา เลอ. 4 กือนา บรีงัจ ปูลัก จะ ฮอย ซาปา นะ อาเกะ ญาวา ตะอาซิก บรี ฌาดี กือปาลา ซามี บือเลฮ. ตาปี ซือมียา นะ ฌาดี กือปาลา ซามี บือเลฮ เตอ ฆาโดฮ บรี ตูฮัด เดะ อาตัซ ปาเงน ญา ซือรูปา บือกะ นู ญา ปาเงน อาโรน ดัฮ. 5 นี เลอ เยซู คริด โปด ญา ซือรูปา กะฆีเตอ. ญา เตด บือเลฮ อาเกะ ญาวา นะ ญา ตะอาซิก จะ ฌาดี กือปาลา ซามี. ตาปี ตูฮัด เดะ อาตัซ นู บือเลฮ มือเลา ฌางัน ญา จะ "เกา เลอ ฌาดี นานะ นะ กู. อารี อีนี เลอ กู ฌาดี อาโปก เดะ เกา ดัฮ." 6 บือกะ ญา มือเลา โซะ อาซิก ปูลัก จะ "เกา นะ ฌาดี ซามี ปี ซือลาลู ตูโรจ บือกะ เมนคีเซเดก เลอ." 7 กาลา เยซู อาดา ดูโดะ เดะ ดือนียา อีนี ญา บือเลฮ บือซาโวจ ซูวารา บือซัยํ ฌางัน อาเย มาตา นู มือนีเลฮ บือซาโวจ กะ ตูฮัด บือซัยํ เดะ อาตัซ นู นะ ตูโลก ญา บรี ลือปัซ เดะ มาตี บือเลฮ. กะฆีเตอ ตูฮัด โปด บือเลฮ มือนีงัย กะ เยซู กรานา ญา อาดา ฮาตี มือนูโนะ ตูเฮะ กะ ตูฮัด. 8 มีเซ-จะ ญา ฌาดี นานะ นะ ตูฮัด เตอ ญา โปด บือเลฮ บลาฌัยํ นู นะ มือนีงัย กะ ตูฮัด กรานา ลาฆู ซูซัฮ นู ญา ตาฮัด ดัฮ. 9 วะตู ตูฮัด บือเลฮ บูวัจ บรี กะ เยซู ซียะ ฆือนะ ฮาบิฮ ดัฮ ญา โปด ฌาดี ตือปัจ นู บูวัจ บรี โกะ ซือมียา นู มือนีงัย กะ ญา ซือมูฮา นะ ฮีโดะ ลือปัซ บาฌิ ซือลาลู เลอ. 10 กะฆีเตอ ตูฮัด บือซัยํ เดะ อาตัซ ญา บือเลฮ อาเกะ เยซู บรี ฌาดี กือปาลา ซามี ตูโรจ บือกะ เมนคีเซเดก. 11 ปาซัน ลาฆู อีตู ซีงี เตอ นู เยซู ฌาดี กือปาลา ซามี เตอ อาดา บาญะ ลาฆู นะ จรือตา ตาปี ปายัฮ นู นะ มือญาเระ บรี กะ กาเญา มาโซะ เดะ ฮาตี บือเลฮ ซาเบะ-จะ กาเญา ฌาดี ซือมียา นู ตือลีงา ตูลี ดัฮ เลอ. 12 มีเซ-จะ วะตู อีนี กาเญา ฆามะ นะ อาฌัยํ โกะ ซือมียา อาซิก บือเลฮ ดัฮ ตาปี กาเญา ฆาโดฮ นะ บรี กะ ซือมียา อาซิก อาฌัยํ กาเญา ลาฆี ปาซัน โกะ ลาฆู ลามูลา ลาฆู ซือนัง เดะ ปือมือเลา นะ ตูฮัด. กาเญา กือนา มากัด นาซี บือเลฮ ดัฮ. ตาปี กาเญา ซือมาตา ปี มากัด ฆูเลง ลาฆี. 13 ดัฮ ซือมียา ดีฮา ลือกัจ มากัด ฆูเลง เตอ ซือมียา อีตู ฌาดี นานะ ดือมิ ลาฆี เลอ. ญา เตด ตาฮู ลาฆู ซาลัฮ ลาฆู กือนา เตอ. 14 โซะ นาซี เตอ บีดา โกะ ซือมียา บือซัยํ บีดา โกะ ซือมียา นู บือเลฮ อาฌัยํ ฮาตี นะ กูญา ดัฮ บรี ตาฮู จะ นู ดีฮา ซาลัฮ นู ดีฮา กือนา เลอ.
1 กะฆีเตอ โกะ ลาฆู ลามูลา ปาซัน นะ เยซู คริด เตอ บรี กีตา บือบียัยํ โซะ บลากัก เลอ. บรี กีตา บลาฌัยํ ปี ซือรูโลยํ ยู รอจ กะ ลาฆู นู นะ บรี กีตา ฌาดี ซือมียา บือซัยํ เดะ ลาฆู ปือจายา ดัฮ เตอ. นู กีตา จาจะ จาวัก ดัฮ ฌางัน บรี กีตา จาจะ ปูลัก เลอ. ฌาดี-จะ ลาฆู นู กีตา บราเลฮ-ฮาตี เดะ โกะ ปือบูวัจ นู บาวา ปี รอจ กะ มาตี อาเลฮ มาแรฮ ปือจายา กะ ตูฮัด เตอ 2 ปือมือเลา อาฌัยํ ปาซัน ลาฆู บาโซฮ ญาวา ฌางัน อาเย ลาฆู ตืองะ ตางัน เดะ ญาวา ซือมียา เตอ ปาซัน ลาฆู ฮีโดะ ปาเระ เดะ มาตี ฌางัน ลาฆู กือนา กรัจ ฮูโกบ ซือลาลู เตอ. นู ฌาดี ซือรูปา จาวัก กะฆีนี ฌางัน บรี กีตา จาจะ ปูลัก เลอ. 3 ตาปี บรี กีตา บลาฌัยํ ปี ซือรูโลยํ เลอ. ดัฮ กือนา เดะ ฮาตี นะ ตูฮัด เดะ อาตัซ เตอ กีตา นะ บูวัจ กะฆีเตอ เลอ. 4 ซาเบะ-จะ ดัฮ โกะ ซือมียา ดีฮา ตีงัน ฌาลัด นะ ตูฮัด บูวัก นะ บาวา กูญา มาแรฮ บราเลฮ-ฮาตี ปูลัก บือเลฮ กะฮามี เลอ? ลาฆู จรัฮ นะ ตูฮัด กูญา บือเลฮ ซาโมจ ซือกาลี ดัฮ. บือนา บาฌิ ดาตัก เดะ ลาแงะ กูญา บือเลฮ ฌือเลบ ดัฮ. กูญา บือเลฮ บาฮาเฆด ปูลัก ดัฮ เดะ ซือมืองัจ นะ ตูฮัด เลอ. 5 กูญา บือเลฮ ตาฮู บาฌิ ดัฮ จะ ปือมือเลา นะ ตูฮัด ญา บาฌิ ซูโงฮ บือเลฮ ตาฮู ปูลัก ปาซัน ลาฆู ปือมือฆัฮ นะ ฮาดัจ โซะ ฮึลด นู ตูฮัด นะ มาแรฮ บือบือลา ดือนียา. 6 กะฆีเตอ ดัฮ กูญา ฆูโฆยํ ตูโรด ปี เดะ ฌาลัด นะ ตูฮัด นะ บาวา กูญา มาแรฮ บราเลฮ-ฮาตี ปูลัก เตด บือเลฮ เลอ. ซาเบะ-จะ โซะ กูญา อีตู เตอ ซือรูปา กูญา กาจิก นานะ นะ ตูฮัด เดะ กายู ปลีตัก ซือกาลี ลาฆี. ซือรูปา กูญา บูวัจ บรี ญา จือและ ปูลัก โซะ ฮึลด มาตา นะ โกะ ซือมียา ราตา เลอ. 7 กรานา-จะ ตือปัจ ตานัฮ นู ดีฮา นู บือเลฮ ซาโมจ อาเย ฮูฌัด นู ตูโตฮ ซัจๆ บูวัจ บรี โกะ ปูโฮด ตาโระ บือตูโมฮ บาฌิ บรี กะ ตูฮัด กือโบด นะ บือเลฮ มากัด เตอ ตือปัจ ตานัฮ อีตู ตูฮัด บือซัยํ เดะ อาตัซ นะ บรี ซือลามัจ เลอ. 8 ตาปี ตือปัจ ดีฮา นู บือตูโมฮ โกะ ดูรี ฌางัน โกะ ปูโฮด รูโปจ นู เตด ตือปากัย เตอ ญา นะ กือนา ตีงัน บูวัก ฌาดี ตือปัจ ฮอย รือฆา ฆามะ-จะ นะ กือนา ซูปัฮ อาโบยํ. โซะ ปือญูดัฮ นะ กือนา ตูนู ฌางัน อาปี บูวัก เลอ. 9 ตาปี โซะ กาเญา นู กามี ซายัก เตอ มีเซ-จะ กามี มือเลา กะฆีเตอ ซีงี ดัฮ ตาปี กามี ตือตู เดะ ฮาตี จะ กาเญา นะ ปีเลฮ ฌาลัด นู บาฌิ เดะ อีตู เตอ นู นะ บาวา กาเญา ปี บรี ฮีโดะ ลือปัซ บาฌิ เลอ. 10 ตูฮัด เตอ ญา รือมัก ซูโงฮ เลอ. ญา เตด ลูปา นู กาเญา บือกรือฌา ลาฆู นะ ญา นู กาเญา ซายัก กะ ญา กะฆีเตอ. ลาฆู อีตู ปลีฮัจ ซัฮ ดัฮ นู กาเญา บือเลฮ ตูโลก โกะ ซือมียา นะ ตูฮัด อาดา ตูโลก กะฆีเตอ ปี ซือรูโลยํ. 11 กามี บือคานะ ซูโงฮ นะ บรี กาเญา โซก ซืออูรัก อาดา ฮาตี ราเฌด กะฆีเตอ เลอ ตือดะ รอจ กะ อารี ปือญูดัฮ บีดา-จะ ลาฆู บาฌิ นู กาเญา จาดัก เตอ นะ ฌาดี ซูโงฮ. 12 กามี ตีเมา บรี กาเญา ฌาดี ซือมียา นู ซือฆัด ตาปี บรี กาเญา นะ บูวัจ ตูโรจ บือกะ โกะ ซือมียา นู ปือจายา อีตู นู ตาฮัด-ฮาตี ลามา. กะฆีเตอ นะ บือเลฮ ซาโมจ ลาฆู บาฌิ นู ตูฮัด บือเลฮ บือฌาญี ดัฮ เลอ. 13 กาลา ตูฮัด ญา บือเลฮ บูวัจ ปือมือเลา บือฌาญี ฌางัน อับราฮัม เตอ ฮอย ซาปา นู นะ บือซัยํ ลือเบฮ เดะ ตูฮัด นู ญา นะ อาเกะ มือเลา เดะ นามา นะ ซือมียา อีตู บือเลฮ เลอ. กะฆีเตอ ตูฮัด ญา อาเกะ มือเลา เดะ นามา นะ ญา ตะอาซิก. 14 ญา มือเลา จะ "กู นะ บรี ซือลามัจ กะ เกา บือซูโงฮ-ซูโงฮ นะ บรี ลูมอฮ บือแนฮ นะ เกา บือตามัฮ บาญะ ซือรูโลยํ เลอ." 15 อับราฮัม ญา ตาฮัด นาตี ลามา เตอ. ซาเบะ กะฆีเตอ ญา โปด บือเลฮ ซาโมจ ลาฆู ซือลามัจ บือกะ ตูฮัด ญา บือฌาญี ดัฮ. 16 โกะ ซือมียา เตอ วะตู กูญา นะ อาเกะ ปือมือเลา บือฌาญี กูญา นะ อาเกะ มือเลา เดะ นามา นะ ซือมียา นู บือซัยํ เดะ กูญา เลอ. กะฆีเตอ ดัฮ อาดา ลาฆู บือตือฆัฮ เตอ ปือมือเลา บือฌาญี อีตู นะ บูวัจ บรี ซือลือซัย. 17 กะฆีเตอ ตูฮัด บือคานะ บือซูโงฮ-ซูโงฮ นะ บรี กะ โกะ ซือมียา อีตู นู นะ ซาโมจ ลาฆู บือฌาญี ฌาดี ปือซากา นะ กูญา เตอ บรี กูญา นะ ตาฮู จะ ลาฆู นู ตูฮัด บือคานะ นะ บูวัจ ญา ตือตู ซูโงฮ. ซาเบะ กะฆีเตอ นู ตูฮัด มือเลา บือฌาญี ดัฮ เตอ ญา อาเกะ มือเลา บรี ตือตู ซูโงฮ ฌูฆา เลอ. 18 กะฆีเตอ อาดา ดูวา ลาฆู อีนี นู ตือตู ซูโงฮ ฌาดี ลาฆู นู ตูฮัด นะ มืออูปัย เตด บือเลฮ เลอ. กะฆีเตอ กีตา นู บือเลฮ ลารี ปี รอจ กะ ตูฮัด บีดา นะ ลือปัซ เดะ ฌาฮานัม เตอ กีตา บราซา จะ ตือฆัยํ-อูรัจ ซือรูโลยํ นะ ตือตู-ฮาตี ซูโงฮ เดะ ลาฆู นู กีตา จาดัก นะ ดาปัจ โซะ ฮึลด เลอ. 19 กีตา อาดา ตือปัจ จาดัก กะฆีเตอ นู ฌาดี ซือรูปา บือกะ ซาโวฮ นู ตาฮัด ฮาตี นะ กีตา. ตือปัจ จาดัก อีตู ญา บรี กีตา นะ มาโซะ ปี ลือปัซ เดะ กาเยด กือตัก รอจ กะ รูวัก นู บาฌิ บือซรี โตระ นู โซะ อาตัซ ลาแงะ. 20 เยซู เตอ ญา บือเลฮ มาโซะ ปี ดูลู กรานา กีตา ซาเบะ ญา ฌาดี กือปาลา ซามี ปี ซือลาลู ดัฮ ตูโรจ บือกะ เมนคีเซเดก เลอ.
1 เมนคีเซเดก ซือมียา นู อีนี เตอ ญา ฌาดี ราฌา นะ นังฆรี ซาเลม ฌาดี ซามี นะ ตูฮัด เดะ อาตัซ นู ตีงี ซูโงฮ เลอ. กาลา ญา ดาปัจ อับราฮัม บาลิ เดะ บือปรัก นู ญา ฌือนัฮ เดะ โกะ ราฌา อีตู เตอ ญา บรี ซือลามัจ กะ อับราฮัม. 2 อับราฮัม โปด ญา บือเลฮ อาเกะ บารัก ซา ฮาบด เดะ ดาลับ ซือปูโลฮ ฮาบด ซือมูฮา บรี กะ เมนคีเซเดก. ลามูลา นู นะ มือเลา ปาซัน เมนคีเซเดก เตอ ปือนามา นะ ญา ฌาดี-จะ ราฌา นู ฮาตี รือมัก. ตาปี ญา ฌาดี ราฌา นังฆรี ซาเลม ปูลัก ฌาดี-จะ ราฌา นู บรี ซือนัง ซือลามัจ เลอ. 3 เอด อาโปก ฌางัน ญัง-มูญัง นะ ญา โปด ฮอย ซาปา บือเลฮ ตาฮู. อารี ดูโดะ เดะ อาปี อารี มาตี โปด ซือรูปา ฌูฆา ฮอย ซาปา ตาฮู. ญา อาดา ฌาดี ซามี ซือลาลู ซือรูปา ฌาดี นานะ นะ ตูฮัด นู อีตู เลอ. 4 กาเญา บรีงัจ ลีฮัจ เลอ จะ ซือมียา อีนี ญา บือซัยํ ตารา ดีฮา. อับราฮัม นู ฌาดี อาโปก บือซัยํ เดะ ญัง-มูญัง นะ กีตา เตอ ญา อาเกะ ซา ฮาบด เดะ ดาลับ ซือปูโลฮ ฮาบด นะ บารัก นู ญา บือเลฮ เดะ บือปรัก อีตู มาแรฮ มือญือมัฮ กะ ญา. 5 โกะ บือแนฮ นะ เลวี นู บือเลฮ ฌาดี ซามี เตอ กูญา อาดา ปือมือซัด ตูโรจ กะ ปือมือเลา ฮูโกบ นะ ตูฮัด นู นะ บรี ลูมอฮ กูญา ซาโมจ บารัก ซา ฮาบด เดะ ดาลับ ซือปูโลฮ ฮาบด เดะ โกะ ลูมอฮ ซือมียา มาแรฮ ฌาดี นะ กูญา. ฌาดี-จะ กูญา ซาโมจ เดะ ลูมอฮ นะบรานะ นะ กูญา ตะอาซิก มีเซ-จะ โกะ ซือมียา อีตู ฌาดี บือแนฮ นะ อับราฮัม ฌูฆา. 6 เมนคีเซเดก อีนี บูกัด บือแนฮ นะ เลวี ตาปี ญา บือเลฮ ซาโมจ ซา ฮาบด เดะ อับราฮัม ญา บือเลฮ บรี ซือลามัจ กะ อับราฮัม ซือมียา นู บือเลฮ ซาโมจ ปือมือเลา บือฌาญี มาแรฮ ดาตัก เดะ ตูฮัด. 7 โงฮ-ซูโงฮ ฮอย ซาปา นะ บือตือฆัฮ บือเลฮ เดะ ลาฆู อีนี จะ ซือมียา นู บรี ซือลามัจ ญา กือนา บือซัยํ เดะ ซือมียา นู ซาโมจ. 8 โซะ โกะ ซามี ลูมอฮ เลวี เตอ นู ฌาดี ซือมียา ซาโมจ ซา ฮาบด เดะ ดาลับ ซือปูโลฮ ฮาบด เตอ กูญา ฌาดี ซือมียา นู ฆาโดฮ มาตี เลอ. ตาปี โซะ เมนคีเซเดก ซือมียา นู นะ บือเลฮ ซา ฮาบด อีตู เตอ ซูรัจ ปือมือเลา นะ ตูฮัด ฌาดี ซะซี จะ ญา อาดา ฮีโดะ ลาฆี เลอ. 9 ลูมอฮ บือแนฮ นะ เลวี เตอ นะ ฌาดี โกะ ซือมียา ซาโมจ ซา ฮาบด อีตู. ตาปี นะ มือเลา กะฆีนี บือเลฮ ฌูฆา จะ นู อับราฮัม อาเกะ ซา ฮาบด บรี กะ เมนคีเซเดก เตอ เลวี โปด อาเกะ บรี ฌูฆา เลอ. 10 ซาเบะ วะตู อีตู กาลา เมนคีเซเดก บือเลฮ บือดาปัจ ฌางัน อับราฮัม ดัฮ เตอ ซือรูปา เลวี ญา อาดา เดะ ดารัฮ นะ อับราฮัม ญัง-มูญัง นะ ญา เลอ. 11 บรีงัจ ลีฮัจ เลอ ปือมือเลา ฮูโกบ นะ มูซา บือเลฮ ปือซัด จะ โกะ ซามี นะ ลูมอฮ บักซา อิซราเอน เตอ ฆาโดฮ ฌาดี บือแนฮ นะ เลวี. ตาปี ลูมอฮ ซามี อีตู นะ บูวัจ ลาฆู บือกรือฌา บรี ปือนอฮ บาฌิ ฮอย เตด บือเลฮ ดัฮ. กะฆีเตอ ฆาโดฮ อาดา ซามี นู ซืออูรัก ลาฆี มาแรฮ ปลีฮัจ ตูโรจ บือกะ เมนคีเซเดก ฆาตี ลูมอฮ ซามี นู ตูโรจ บือกะ อาโรน. 12 กรานา-จะ ดัฮ ปาซัน นะ ลูมอฮ ซือมียา นู นะ บือกรือฌา ฌาดี ซามี ญา ซาเลด ปี ดัฮ ลาฆู ปือมือเลา ฮูโกบ ราตา โปด ฆาโดฮ นะ ซาเลด ฌูฆา เลอ. 13 ซาเบะ-จะ ซือมียา นู กามี มือเลา เตอ ญา มาแรฮ เดะ ปาลัฮ บือแนฮ อาซิก ฌาดี ปาลัฮ นู ฮอย ซือมียา ดีฮา ดือละ บือเลฮ บือกรือฌา โซะ ตือปัจ ตูนู บารัก มือนืองะ กะ ตูฮัด เลอ. 14 กีตา ซือมูฮา ตาฮู ซัฮ ดัฮ จะ เยซู ตูฮัด นะ กีตา ญา บือฌาดี มาแรฮ ดาตัก เดะ ปาลัฮ นะ ยูดา. ตาปี มูซา เตด บือเลฮ มือเลา จะ นะ อาดา ซามี ดาตัก มาแรฮ เดะ ปาลัฮ อีตู เลอ. 15 ลาฆู อีตู นะ ลีฮัจ ซัฮ ลาฆี กาลา อาดา ซามี นู อาซิก ซืออูรัก บือฌาดี มาแรฮ ตูโรจ บือกะ ฮาดัจ นะ เมนคีเซเดก. 16 ซือมียา อีนี เตอ นู ญา มาแรฮ ฌาดี ซามี บูกัด ตูโรจ กะ โกะ ฮาดัจ ฮูโกบ นะ อูมัจ-ซือมียา ตาปี กรานา ลาฆู ปือมือฆัฮ นะ ญา นู ญา อาดา ฮีโดะ ซือลาลู ฮอย นามา นะ บูวัจ บรี บือนาซา บือเลฮ. 17 ซาเบะ ซูรัจ ปือมือเลา นะ ตูฮัด มือเลา กือฌะ-กือมัซ จะ "เกา นะ ฌาดี ซามี ปี ซือลาลู ตูโรจ บือกะ เมนคีเซเดก เลอ." 18 กะฆีเตอ ปือมือซัด นู ลามา เตอ โปด กือนา บูวัก ดัฮ กรานา ฮอย เตด มือฆัฮ เตด ฌาดี นามา เลอ. 19 กรานา-จะ ปือมือเลา ฮูโกบ อีตู เตด ตือฆามะ นะ บูวัจ บรี ลาฆู นามา ปือนอฮ บาฌิ ดัฮ. ตาปี นี เลอ กีตา อาดา ตือปัจ จาดัก นู บาฌิ เดะ อีตู ลาฆี นู ลาฆู บาฌิ อีตู เตอ บูวัจ บรี กีตา มาโซะ รอจ กะ ตูฮัด บือซัยํ เดะ อาตัซ บือเลฮ. 20 ลือเบฮ เดะ อีตู เตอ ตูฮัด เดะ อาตัซ บือเลฮ ตืองะ ซามี นู บารู อีนี ฌางัน ปือมือเลา นู อาเกะ มือเลา บือฌาญี เลอ. 21 ตาปี โซะ โกะ ลูมอฮ เลวี เตอ วะตู ตืองะ กูญา ฌาดี ซามี ฮอย ปือมือเลา นู อาเกะ มือเลา บือฌาญี. ตาปี เยซู อีนี ญา ฌาดี ซามี ตูโรจ กะ ปือมือเลา นู อาเกะ มือเลา บือฌาญี บือกะ ตูฮัด บือเลฮ มือเลา ฌางัน ญา จะ "กู นู ตูฮัด เดะ อาตัซ เตอ กู บือเลฮ อาเกะ มือเลา กือมัซๆ กู นะ เตด บราเลฮ-ฮาตี เลอ จะ 'เกา ฌาดี ซามี ปี ซือลาลู.' " ตูฮัด ญา จะ. 22 นู ฌาดี กะฆีเตอ บูวัจ บรี เยซู ญา ฌาดี ซือมียา ฌาฆา ปือมือเลา บือปาคัจ บือตือตู นู บาฌิ ลือเบฮ เดะ นู ดูลู เลอ. 23 กะฆีเตอ ปูลัก โซะ โกะ ซามี ลูมอฮ เลวี เตอ ฆาโดฮ นะ อาดา ซือมียา บาญะ ฆาตี ปี ซือรูโลยํ ซาเบะ นู กูญา มาตี บูวัจ บรี กูญา นะ บือกรือฌา ปี เตด บือเลฮ เลอ. 24 ตาปี โซะ เยซู ญา อาดา บือกรือฌา ฌาดี ซามี ปี ซือมาญัก-รอจ กรานา ญา อาดา ฮีโดะ ซือลาลู เลอ. 25 ซาเบะ ลาฆู กะฆีเตอ ญา อาดา มือฆัฮ นู นะ ตูโลก โกะ ซือมียา ซือมูฮา นู นะ มาโซะ บรี รอจ กะ ตูฮัด เดะ อาตัซ ตูโรจ กะ ฌาลัด นะ ญา เตอ บรี กูญา นะ ฮีโดะ ลือปัซ บาฌิ ปือนอฮ ฮาบิฮ ดัฮ. กรานา-จะ เยซู เตอ ญา อาดา ฮีโดะ ซือลาลู บีดา นะ ตูโลก มีตา เดะ ตูฮัด บรี ตือจีฮัด กะ โกะ ซือมียา อีตู. 26 เยซู นี เลอ ฌาดี กือปาลา ซามี นู บือฆูนา ซูโงฮ ฌางัน กีตา. ญา ฌาดี ซือมียา นู จรัฮ บาฌิ ฮอย ซาลัฮ ฮอย ตือปัจ ตะอารัฮ นามา โปด. ญา กือนา อาเกะ บรี มืองือละ เดะ โกะ ซือมียา บือดูซา ปี ดูโดะ ตีงี ซูโงฮ โซะ อาตัซ ลาแงะ เลอ. 27 เยซู ญา เตด ซือรูปา โกะ กือปาลา ซามี นู อาซิกๆ ตูโรด-มือนูโรด มาแรฮ. ญา โปด เตด ฆาโดฮ นะ อาเมด บารัก มือญือมัฮ มาแรฮ มือนืองะ กะ ตูฮัด บีลัก อารี. นู ลามูลา โกะ ซามี อีตู กูญา มือนืองะ บีดา นะ อูฆัย ดูซา นะ ตะอาซิก เดะ บลากัก บีดา นะ อูฆัย ลาฆู ดูซา นะ โกะ ซือมียา ซือมูฮา. ตาปี เยซู เตอ ญา อาเมด บารัก มือญือมัฮ แนฮ ซา กาลี อีตู ฌาดี-จะ วะตู ญา อาเกะ มือญือมัฮ ญาวา นะ ญา ตะอาซิก กะ ตูฮัด เดะ อาตัซ เลอ. 28 โงฮ-ซูโงฮ เตอ ซูรัจ ปือมือเลา ฮูโกบ ญา บือเลฮ ตืองะ ซือมียา นู ลือมัฮ บรี ฌาดี กือปาลา ซามี. ตาปี ปือมือเลา นู ตูฮัด อาเกะ มือเลา บือฌาญี ดัฮ นู มาแรฮ เดะ บลากัก ปือมือเลา ฮูโกบ เตอ ญา บือเลฮ ตืองะ นานะ นะ ตูฮัด ดัฮ ญา นู ฌาดี กือปาลา ซามี นู ปือนอฮ บาฌิ ซือลาลู เลอ.
1 กะฆีเตอ นู กู บือเลฮ มือเลา ซีงี เตอ อาดา ลาฆู ซัยํ-บือซัยํ กะฆีนี จะ กีตา อาดา กือปาลา ซามี นู กะฆีเตอ เลอ ฌาดี ซามี นู อาดา ดูโดะ โซะ ซือบือลัฮ กานัน นะ ตูฮัด บือซัยํ นู มือฆัฮ ซูโงฮ เดะ อาตัซ ลาแงะ เลอ. 2 ญา เตอ บือกรือฌา ฌาดี กือปาลา ซามี เดะ รูวัก นู บาฌิ บือซรี โตระ ฌาดี-จะ เดะ บาลัย กาเยด นู ซูโงฮ นู บูกัด อูมัจ-ซือมียา ตืองะ ดัฮ ตาปี ตูฮัด เดะ อาตัซ ญา ตืองะ ดัฮ เลอ. 3 ซาเบะ-จะ ตูฮัด ญา ตืองะ กือปาลา ซามี ราตา ซือมียา บีดา นะ บรี กะ กูญา อาเมด โกะ บารัก มือญือมัฮ แนฮ-ฌือแนฮ มาแรฮ อาเกะ มือนืองะ กะ ตูฮัด เตอ. กรานา กะฆีเตอ กือปาลา ซามี นะ กีตา อีนี ญา ฆาโดฮ นะ อาดา บารัก ซือมาตา นู ญา นะ มือญือมัฮ กะ ตูฮัด ฌูฆา. 4 ดัฮ ญา อาดา ดูโดะ เดะ ดือนียา อีนี ญา โปด นะ เตด ฌาดี ซามี เลอ. ซาเบะ-จะ อาดา โกะ ซามี นู นะ อาเกะ บารัก มือญือมัฮ ตูโรจ กะ ฮูโกบ นะ ลูมอฮ ยิว ดัฮ. 5 ตาปี โกะ ซามี อีตู กูญา บือกรือฌา เดะ บาลัย นะ ตูฮัด นู ฌาดี ซือรูปา บือกะ จูตอ บือกะ บายัก นะ บาลัย นู ซูโงฮ เดะ อาตัซ ลาแงะ เลอ. บือกะ ซือรูปา ลาฆู นะ มูซา เตอ กาลา ญา นะ อาเกะ บาลัย กาเยด อีตู ตูฮัด บือเลฮ ปรีงัจ กะ ญา จะ "กือนา ฌาฆา บรี บาฌิ เลอ บูวัจ บารัก ราตา บรี ซียะ ฆือนะ ดัฮ ตูโรจ บือกะ นู กู บือเลฮ ปลีฮัจ กะ เกา เดะ อาตัซ บูเกะ อีตู เลอ." 6 ตาปี เยซู ญา บือเลฮ ซาโมจ ลาฆู บือกรือฌา ฌาดี ซามี นู บาฌิ ลือเบฮ เดะ ลาฆู นะ กูญา อีตู ลาฆี เลอ ซือรูปา บือกะ ปือมือเลา บือปาคัจ บือตือตู นู ญา ฌาดี ซือมียา ตืองะ ดัฮ ญา บาฌิ เดะ ปือมือเลา บือปาคัจ นู ลามา. นู ฌาดี กะฆีเตอ กรานา-จะ ตูฮัด ญา บือเลฮ บือฌาญี ลาฆู นู บาฌิ ลือเบฮ เดะ นู ดูลู. 7 ซาเบะ-จะ ดัฮ ปือมือเลา บือปาคัจ นู ลามูลา ฮอย ตือปัจ ซาลัฮ เตอ กะฆีเตอ เตด ฆาโดฮ นะ อาดา ปือมือเลา บือปาคัจ นู ดูวา ปูลัก เลอ. 8 ตาปี ตูฮัด มือเลา อูจะ กะ ลูมอฮ นะ ญา จะ "ตูฮัด เดะ อาตัซ มือเลา จะ 'อาดา ซืออารี นู นะ มาแรฮ นู กู นะ บูวัจ ปือมือเลา บือปาคัจ นู บารู ฌางัน ลูมอฮ อิซราเอน ฌางัน ลูมอฮ ยูดา ฌูฆา. 9 ฌาดี ปือมือเลา บือปาคัจ นู เตด ซือรูปา กะ ปือมือเลา นู กู บือเลฮ บือฌาญี ฌางัน โกะ บีลาแก นะ กูญา เดะ อารี นู กู ตูโตด บาวา กูญา บือตรือเบะ เดะ นังฆรี อียิบ. กูญา อีตู เตด บือเลฮ ตือตู-ฮาตี ตูโรจ กะ ปือมือเลา บือปาคัจ นะ กู. กะฆีเตอ กู เตด ปือดูลี กะ กูญา ดัฮ เลอ.' ตูฮัด ญา จะ. 10 ตูฮัด มือเลา ปูลัก จะ 'นี เลอ ฌาดี ปือมือเลา บือปาคัจ นู กู นะ บูวัจ ฌางัน ลูมอฮ อิซราเอน เดะ ฮาดัจ กะ โซะ ฮึลด อีตู. กู นะ บรี กูญา บรีงัจ กะ ปือมือเลา ฮูโกบ นะ กู. กู นะ ฆาแรฮ ปือมือเลา ฮูโกบ อีตู เดะ ฮาตี นะ กูญา. กู นะ ฌาดี ตูฮัด นะ กูญา กูญา โปด นะ ฌาดี ลูมอฮ บักซา นะ กู. 11 กูญา นะ เตด อาฌัยํ โกะ กาวัด ฌางัน โกะ นะบรานะ นะ กูญา จะ "กือนา กราลา ตูฮัด บรี บาฌิ เลอ." กรานา-จะ ราตา ซือมียา นะ กราลา กู ดัฮ ฮึนตะ เดะ ซือมียา นู มิดือมิ ยู รอจ กะ ซือมียา ซัยํ-บือซัยํ เดะ กาวัด. 12 ซาเบะ กู นะ จีฮัด กะ ลาฆู นู กูญา บูวัจ ซาลัฮ กู นะ เตด อาเมด บอฮ เดะ ฮาตี ลาฆู บูวัจ ดูซา นะ กูญา ลาลู เลอ.' ตูฮัด ญา จะ." 13 นู ตูฮัด ญา มือเลา กะ ปือมือเลา บือปาคัจ นู บารู เตอ ญา บูวัจ บรี ปือมือเลา บือปาคัจ นู ลามูลา ญา ฮาบิฮ ฮาดัจ ดัฮ. ลาฆู นู ฮาบิฮ ฮาดัจ นู ลามา ดัฮ เตอ นะ ลือแงะ ปี ฮาบิฮ ดัฮ เลอ.
1 โซะ ปือมือเลา บือปาคัจ นู ดูลู เตอ ญา อาดา โกะ ฮาดัจ ฮูโกบ ปาซัน ลาฆู มือญือมัฮ อาดา ตือปัจ มือญือมัฮ กะ ตูฮัด นู อูมัจ-ซือมียา บูวัจ ดัฮ เตอ. 2 กูญา บูวัจ บาลัย กาเยด นู อาดา ดูวา รูวัก ซุจ ดัฮ. รูวัก นู โซะ ฮึลด เตอ ญา อาดา ตือปัจ ตืองะ ปลีตา อีตู อาดา ฌูฆา ปาปัด โตะ ฌางัน โกะ ตือโปก โรตี นู มือนืองะ กะ ตูฮัด. รูวัก อีตู เตอ บลาโลก จะ รูวัก นู บาฌิ บือซรี. 3 ตาปี โซะ ดาลับ กาเยด กือตัก นู ดูวา อาดา รูวัก นู ซา ปูลัก นู บลาโลก จะ รูวัก นู บาฌิ บือซรี โตระ เลอ. 4 โซะ อีตู อาดา ตือปัจ อาซะ กือมียัน นู บูวัจ ฌางัน มัซ อาดา ปือตี นู ตาแปะ ฌางัน มัซ ราตา นู ฌาดี ปือนานา เดะ ปือมือเลา บือปาคัจ บือตือตู นะ ตูฮัด. เดะ ดาลับ ปือตี อีตู อาดา คือมุ มัซ นู บอฮ ตือโปก มานา อาดา ตูกัจ นะ อาโรน ฌูฆา นู ตรือเบะ ปูโจะ. อาดา ฌางัน บาตู ลีบัยํ ดูวา บีฌี นู ฆาแรฮ ฌาดี ปือมือเลา บือปาคัจ นะ ตูฮัด ซือปูโลฮ ลาฆู. 5 เดะ โซะ อาตัซ ปือตี อีตู อาดา โกะ ฆามัยํ เครุบ นู บือซรี บือซายา นู ดือดี ซายะ ตูโดก ลีนง ตาโปะ ปือตี ฌาดี-จะ ตือปัจ ดูโดะ ตือปัจ นะ อาเกะ ดูซา. ตาปี เดะ วะตู อีนี นะ มือญาเระ ปาซัน ลาฆู กะฆีเตอ บรี ฮาบิฮ เตด บือเลฮ เลอ. 6 กาลา ซียะ ลาฆู กะฆีเตอ ฆือนะ ดัฮ โกะ ซามี โปด นะ มาโซะ ปี บีลัก อารี บีดา บือกรือฌา มือญือมัฮ เดะ ดาลับ บาลัย กาเยด อีตู เดะ รูวัก โซะ ฮึลด. 7 ตาปี โซะ รูวัก นู ดูวา เตอ อาดา ซา กือปาลา ซามี ซา อูรัก นู มาโซะ กะ ดาลับ อีตู บือเลฮ ซา ตาโฮด ซือกาลี. ญา ฆาโดฮ อาเมด ดารัฮ บือนาตัก มาโซะ ปี มือญือมัฮ บีดา ญาวา นะ ญา ตะอาซิก บีดา ลาฆู ซาลัฮ นะ โกะ ลูมอฮ ซือมียา ฌูฆา เลอ นู กูญา เตด ตาฮู จะ กูญา บูวัจ ซาลัฮ. 8 กรานา ลาฆู ปือบูวัจ กะฆีเตอ เลอ ซือมืองัจ นะ ตูฮัด บือเลฮ ปลีฮัจ จะ ฌาลัด นู บาวา ปี มาโซะ กะ รูวัก นู บาฌิ บือซรี โตระ นู ซูโงฮ เตอ ญา เตด บูกา กาลา อาดา ซูโรฮ บาลัย กาเยด นู ลามา อีตู ลาฆี. 9 ลาฆู ปาซัน บาลัย อีตู ฌาดี ปือนานา ตูโญะ กะ ลาฆู ฮาดัจ อีนี. ลาฆู อาเมด บารัก มาแรฮ มือนืองะ มือญือมัฮ กะ ตูฮัด เตอ เตด-จะ ฌาดี บือนาตัก นู บูนอฮ มือญือมัฮ เฆอ-จะ บารัก อาซิกๆ โปด ลาฆู กะฆีเตอ นะ เตด บือเลฮ บูวัจ บรี ฮาตี นะ ซือมียา มือญือมัฮ อีตู ปือนอฮ บาฌิ ดัฮ. 10 กรานา ลาฆู กะฆีเตอ ฌาดี ลาฆู ปาซัน โกะ บารัก มากัด บารัก โอะ ปาซัน ลาฆู ปือบูวัจ บาโซฮ แนฮ-ฌือแนฮ เตอ. นู ปือบูวัจ กะฆีนี ฌาดี ฮาดัจ ฮูโกบ นู มาโซะ เตด รอจ กะ ฮาตี นะ ซือมียา นู อาดา ตืองะ ดัฮ ตือดะ รอจ กะ อารี นู ตูฮัด นะ รีบัยํ บารัก ราตา ฌือแนฮ บรี บารู. 11 ตาปี เยซู คริด เตอ ญา มาแรฮ ดัฮ ฌาดี กือปาลา ซามี นู บาวา โกะ บือนา บาฌิ นู กีตา ซาโมจ ดัฮ. ญา โปด บือเลฮ มาโซะ กะ บาลัย มือญือมัฮ นู บือซัยํ ซูโงฮ นู ฆือนะ บาฌิ ลือเบฮ เดะ บาลัย กาเยด นู ลามา อีตู ฌาดี บาลัย มือญือมัฮ นู อูมัจ-ซือมียา เตด บือเลฮ บือฌาดี จะ บูกัด บารัก นู อาดา บือฌาดี เดะ ดือนียา อีนี. 12 บูกัด ดารัฮ โกะ แบะ โกะ อานะ ลือมู นู บูวัจ บรี เยซู มาโซะ บือเลฮ. ตาปี นู อีซี ญา ตะอาซิก มาตี ดัฮ ดารัฮ มือนีเลฮ กะฆีเตอ เลอ ญา บือเลฮ มาโซะ กะ รูวัก นู บาฌิ บือซรี โตระ แนฮ ซา กาลี อีตู บีดา นะ ตือบุซ กีตา บรี ลือปัซ เดะ ดูซา ปี ซือลาลู เลอ. 13 ดารัฮ โกะ แบะ โกะ ลือมู บาปา เฆอ-จะ ฮาบู นะ อานะ ลือมู อายา นู มาแรฮ ปรือจิ เดะ อาตัซ ลูมอฮ ซือมียา นู อาดา ซาลัฮ เตอ นะ บูวัจ บรี กูญา ฌาดี ซือมียา ฮอย ซาลัฮ ดัฮ. 14 กะฆีเตอ บาญะ ลือเบฮ เดะ อีตู ดารัฮ นะ เยซู คริด เลอ นะ บาโซฮ ฮาตี กีตา บรี จรัฮ. นู เยซู อาดา ซือมืองัจ นะ ตูฮัด นู ซือลาลู ตูโลก ญา กะฆีเตอ ญา บือเลฮ ซรัฮ ญาวา นะ ญา กะ ตูฮัด บือซัยํ เดะ อาตัซ ฌาดี บารัก มือญือมัฮ นู ฮอย ปะออย นามา ลาลู โปด. กะฆีเตอ ดารัฮ นะ ญา นะ บาโซฮ ฮาตี กีตา บรี จรัฮ บรี กีตา นะ ตีงัน โกะ ลาฆู ปือบูวัจ นู นะ บาวา บือปี กะ ลาฆู มาตี บรี บราเลฮ มาแรฮ บือกรือฌา ลาฆู นะ ตูฮัด ญา นู อาดา ฮีโดะ ซูโงฮ เลอ. 15 ซาเบะ กะฆีนี ฌูฆา เยซู ญา ฌาดี ซือมียา นู ตืองะ ปือมือเลา บือปาคัจ บือตือตู นู บารู ฌาดี-จะ บีดา โกะ ซือมียา นู ตูฮัด บือเลฮ ปาเงน ดัฮ นะ ซาโมจ โกะ บือนา บาฌิ อีตู นู ตูฮัด บือเลฮ บือฌาญี ดัฮ ฌาดี ปือซากา นะ กูญา ปี ซือลาลู. กรานา-จะ นู เยซู มาตี ดัฮ ญา บือเลฮ ตือบุซ โกะ ซือมียา บรี ลือปัซ เดะ ลาฆู ซาลัฮ นู กูญา บูวัจ กาลา ปือมือเลา บือปาคัจ นู ลามา อาดา ฮูโกบ ลาฆี. 16 ลาฆู ปือมือเลา บือปาคัจ อีตู ญา ซือรูปา ลาฆู ซูรัจ บือฌาญี ปือซากา เตอ. ปาซัน ลาฆู ซูรัจ บือฌาญี ปือซากา เตอ ฆาโดฮ มือญาซัจ ลีฮัจ จะ ซือมียา นู บูวัจ ซูรัจ อีตู ญา มาตี ดัฮ เฆอ. 17 กะฆีเตอ กือนา บรี กะ ซือมียา นู บูวัจ ซูรัจ บือฌาญี ปือซากา อีตู ญา มาตี ดูลู บารู ซูรัจ อีตู นะ ตือตู ดัฮ. ตาปี ดัฮ ซือมียา นู บูวัจ ซูรัจ อีตู ญา อาดา ฮีโดะ ลาฆี เตอ ซูรัจ อีตู โปด นะ ซูโรฮ ฮอย เตด บือเลฮ เลอ. 18 กะฆีเตอ มีเซ-จะ ปือมือเลา บือปาคัจ นู ดูลู นู นะ ตืองะ บรี ตือตู เตอ ฆาโดฮ บูวัจ ฌางัน ดารัฮ เลอ. 19 ซาเบะ กาลา นู มูซา ญา บือเลฮ มือญาเระ ปือมือเลา ฮูโกบ ราตา ตือนอซ บรี กะ โกะ ซือมียา ดืองัยํ ดัฮ ญา โปด อาเมด ฌามัยํ ปูโฮด ฮูซบ อีกัจ บูลู กาเมก ซี มีรัฮ จือลุ ดารัฮ อานะ ลือมู ดารัฮ แบะ นู จาโปยํ ฌางัน อาเย เตอ อาเมด มาแรฮ ปรือจิ เดะ ซูรัจ อีตู ปรือจิ เดะ โกะ ซือมียา ซือมูฮา ฌูฆา. 20 ญา บือเลฮ มือเลา จะ "นี เลอ ฌาดี ดารัฮ นู บูวัจ บรี ปือมือเลา บือปาคัจ นะ ตูฮัด ตือตู ดัฮ ฌาดี ปือมือเลา นู ญา ซูโรฮ กาเญา บรี บูวัจ ตูโรจ เลอ." 21 กะฆีเตอ ปูลัก มูซา ญา บือเลฮ อาเมด ดารัฮ ปรือจิ เดะ บาลัย กาเยด มือญือมัฮ กะ ตูฮัด ฌางัน บารัก ราตา ฌือแนฮ นู ฆาโดฮ นะ ซูโรฮ เดะ ลาฆู มือญือมัฮ. 22 โงฮ-ซูโงฮ ตูโรจ กะ ปือมือเลา ฮูโกบ เตอ บารัก ฆามะ ราตา ฌือแนฮ ฆาโดฮ นะ บูวัจ บรี จรัฮ บาฌิ ฌางัน ดารัฮ เลอ. ดัฮ เตด บูวัจ บรี ดารัฮ ตรือเบะ เตอ ตูฮัด โปด นะ เตด อาเกะ ดูซา เลอ. 23 กะฆีเตอ โกะ บือนา บารัก ซีงี นู ฌาดี ซือรูปา ฆามัยํ บูวัจ ตูโรจ กะ จูตอ นู อาดา โซะ ลาแงะ เตอ ฆาโดฮ นะ บูวัจ บรี ญา จรัฮ บาฌิ ตูโรจ กะ ฮาดัจ ฮูโกบ กะฆีเตอ เลอ. ตาปี บือนา นู ซูโงฮ นู โซะ ลาแงะ เตอ ฆาโดฮ อาดา บารัก มือญือมัฮ นู บาฌิ ลือเบฮ เดะ นู ซีงี เลอ. 24 ซาเบะ-จะ เยซู คริด ญา เตด บือเลฮ มาโซะ กะ รูวัก นู บาฌิ บือซรี อีตู นู อูมัจ-ซือมียา บูวัจ ฌางัน ตางัน นู บูวัจ ดัฮ ตูโรจ กะ จูตอ บาลัย นู ซูโงฮ. ตาปี ญา ปี กะ อาตัซ ลาแงะ ดัฮ มาโซะ รอจ กะ โซะ ฮึลด มูคา นะ ตูฮัด บือซัยํ เดะ อาตัซ เตอ บีดา กีตา ซือมูฮา เลอ. 25 เยซู ญา เตด ฆาโดฮ มาโซะ มือญือมัฮ ญาวา ตะอาซิก บาญะ กาลี เตอ ซือรูปา บือกะ กือปาลา ซามี อีตู นู ฆาโดฮ นะ อาเมด ดารัฮ นะ บือนาตัก นู บูกัด ดารัฮ นะ ญา ตะอาซิก มาโซะ ปี กะ รูวัก นู บาฌิ บือซรี โตระ บีลัก ตาโฮด. 26 ดัฮ เยซู บูวัจ บือกะ ฆีเตอ ญา โปด ฆาโดฮ นะ ซูซัฮ โตระ บาญะ กาลี ตะเดะ บือฌาดี ดือนียา มาแรฮ. ตาปี วะตู อีนี นู ฌาดี ฮาดัจ ปือญูดัฮ เตอ เยซู ญา ปลีฮัจ แนฮ ซา กาลี ดัฮ. ญา บือเลฮ ซรัฮ ญาวา นะ ญา ตะอาซิก บรี ฌาดี บารัก มือญือมัฮ บีดา นะ บาโซฮ ดูซา บรี ฮาบิฮ ปี เลอ. 27 ตูฮัด บือเลฮ ตืองะ ดัฮ บรี โกะ อูมัจ-ซือมียา ฆาโดฮ มาตี แนฮ ซา กาลี ลือปัซ เดะ อีตู ตูฮัด นะ บือดะวา กรัจ ฮูโกบ กูญา. 28 ซือรูปา กะฆีเตอ ฌูฆา เยซู คริด โปด ญา มาตี แนฮ ซา กาลี ฌาดี-จะ ญา ซรัฮ ญาวา นะ ญา ฌาดี บารัก มือญือมัฮ บีดา นะ ซาโมจ ตาโงก ดูซา นะ โกะ ซือมียา บาญะ. ญา นะ ปลีฮัจ ปูลัก มาโซะ กะ ดูวา กาลี บูกัด บีดา นะ บาโซฮ ดูซา ตาปี บีดา นะ ตูโลก โกะ ซือมียา นู นาตี บือดาปัจ ฌางัน ญา บรี กูญา นะ ฮีโดะ ลือปัซ บาฌิ ดัฮ เลอ.
1 ลาฆู ปือมือเลา ฮูโกบ นะ ลูมอฮ ยิว ญา บูกัด ลาฆู นู ซูโงฮ ตาปี ฌาดี ซือรูปา บือกะ บายัก นะ โกะ ลาฆู บาฌิ นู นะ มาแรฮ เดะ วะตู กะ โซะ ฮึลด. กูญา ฆาโดฮ อาเมด โกะ บารัก มือญือมัฮ ปา-ซือรูปา มาแรฮ มือนืองะ ซือรูโลยํ บีลัก ตาโฮด. นู ปือมือเลา ฮูโกบ กะฆีเตอ บูวัจ บรี กะ ซือมียา นู มือนืองะ นะ ปือนอฮ บาฌิ ฮอย เตด บือเลฮ ลาลู เลอ. 2 ซาเบะ-จะ ดัฮ ฌาดี กะฆีเตอ บือเลฮ กูญา โปด ฆามะ นะ บราดู ลาฆู อาเมด บารัก มาแรฮ มือนืองะ บูกัด เฆอ? ดัฮ ซือมียา นู มือญือมัฮ เตอ ญา กือนา บาโซฮ บรี จรัฮ บาฌิ ซือกาลี ดัฮ กูญา โปด นะ เตด อีงัจ จะ อาดา ดูซา ลาฆี ดัฮ. 3 ตาปี โงฮ-ซูโงฮ ลาฆู มือนืองะ บารัก มือญือมัฮ เตอ บูวัจ บรี กูญา บรีงัจ บือฮีมัจ กะ ลาฆู ดูซา บีลัก ตาโฮด. 4 ซาเบะ ดารัฮ ลือมู ดารัฮ แบะ นะ อาเมด มาแรฮ บาโซฮ ดูซา บรี ฮาบิฮ เตอ ฮอย เตด บือเลฮ เลอ. 5 กะฆีเตอ ตานา เยซู คริด ญา นะ มาแรฮ กะ ดือนียา เตอ ญา มือเลา ฌางัน ตูฮัด เดะ อาตัซ จะ "นู นะ มือนืองะ มือญือมัฮ โกะ บือนาตัก ฌางัน บารัก มือญือมัฮ นู อาซิกๆ เตอ เกา ฮอย เตด ซูกา เลอ. ตาปี เกา บือเลฮ ซียะ ญาวา ซา บีดา กู ดัฮ. 6 ตูฮัด เออ เกา เตด ซูกา-ฮาตี เดะ ลาฆู ตูนู บือนาตัก มือนืองะ กะ ตูฮัด เตด ซูกา-ฮาตี เดะ ลาฆู มือนืองะ บารัก บีดา บาโซฮ ดูซา." 7 กะฆีเตอ เยซู ญา มือเลา จะ "ตูฮัด เออ กู อาดา โตะ อีนี ดัฮ. กู นะ บูวัจ ราตา ฌือแนฮ ตูโรจ บือกะ ฮาตี นะ ตูฮัด บือกะ อาดา ฆาแรฮ ดัฮ เดะ ซูรัจ ปือมือเลา ฮูโกบ อีตู ปาซัน ลาฆู นะ กู." 8 ลามูลา เยซู ญา มือเลา กะฆีนี ดัฮ จะ "นู นะ มือนืองะ มือญือมัฮ โกะ บือนาตัก ฌางัน บารัก มือญือมัฮ นู อาซิกๆ เตอ ลาฆู ตูนู มือนืองะ บือนาตัก ลาฆู มือนืองะ บีดา บาโซฮ ดูซา โปด ลาฆู กะฆีนี ซือมูฮา ตูฮัด ญา ตีเมา เตด ซูกา เดะ ฮาตี เลอ." ญา มือเลา กะฆีนี ดัฮ มีเซ-จะ นู กูญา มือนืองะ บารัก กะฆีเตอ กูญา ตูโรจ บือกะ ซูรัจ ปือมือเลา ฮูโกบ เลอ. 9 บารู เยซู ญา บือเลฮ มือเลา ปูลัก ดัฮ จะ "กู อาดา โตะ อีนี ดัฮ เลอ บีดา นะ บูวัจ ตูโรจ กะ ฮาตี นะ เกา." กะฆีเตอ ตูฮัด โปด บือเลฮ อาเกะ ฮาดัจ ลาฆู มือญือมัฮ นู ลามา บูวัก บีดา นะ ตืองะ เยซู ฌาดี บารัก มือญือมัฮ นู บารู ฆาตี เลอ. 10 นู เยซู คริด บือเลฮ บูวัจ ตูโรจ กะ ฮาตี นะ ตูฮัด กะฆีเตอ กีตา ซือมูฮา กือนา บาโซฮ บรี จรัฮ บาฌิ ดัฮ กรานา นู เยซู ญา ซรัฮ ญาวา นะ ญา ฌาดี บารัก มือญือมัฮ แนฮ ซา กาลี เตอ เลอ. 11 โกะ ซามี ลูมอฮ ยิว ราตา อูรัก กูญา บือดีรี บือกรือฌา บีลัก อารี อาเมด บารัก มือญือมัฮ มาแรฮ มือนืองะ ซือรูปา บือกะ บีลัก อารี เตอ. ตาปี บารัก มือญือมัฮ อีตู นะ อาเกะ ดูซา บูวัก ฮอย เตด บือเลฮ เลอ. 12 ตาปี เยซู คริด ญา ซรัฮ ญาวา นะ ญา ดัฮ บรี ฌาดี บารัก มือญือมัฮ นู มือญือมัฮ แนฮ ซา กาลี บีดา นะ บาโซฮ ดูซา บรี ฮาบิฮ ปี ซือลาลู. กะฆีเตอ ญา ปี ดูโดะ โซะ กานัน นะ ตูฮัด บือซัยํ เดะ อาตัซ ดัฮ. 13 โซะ อีตู ญา อาดา นาตี ตือดะ จะ ตูฮัด เดะ อาตัซ นะ บาวา ซือตรู นะ ญา มาแรฮ ฌาดี บือกะ ปาปัด ซาโมจ ตาปะ กากี นะ ญา. 14 นู เยซู ญา มือญือมัฮ ญาวา นะ ญา แนฮ ซา กาลี ดัฮ กะฆีเตอ ญา บือเลฮ บูวัจ บรี โกะ ซือมียา นู กือนา บาโซฮ บรี จรัฮ บาฌิ เตอ มาแรฮ ฌาดี ซือมียา ปือนอฮ บาฌิ ปี ซือลาลู ดัฮ เลอ. 15 ซือมืองัจ นะ ตูฮัด โปด ญา ฌาดี ซะซี บรี กะ กีตา ฌูฆา ซาเบะ ญา บือเลฮ มือเลา ดัฮ จะ 16 "ตูฮัด บือซัยํ เดะ อาตัซ มือเลา จะ นี เลอ ฌาดี ปือมือเลา บือปาคัจ นู กู นะ บูวัจ ฌางัน กูญา เดะ ฮาดัจ กะ โซะ ฮึลด อีตู. กู นะ บรี กูญา บรีงัจ กะ ปือมือเลา ฮูโกบ นะ กู. กู นะ ฆาแรฮ ปือมือเลา ฮูโกบ อีตู เดะ ฮาตี นะ กูญา." 17 บารู ญา มือเลา ปูลัก จะ "ลาฆู บูวัจ ดูซา ฌางัน ลาฆู ฌาฮัจ นะ กูญา กู นะ เตด บอฮ เดะ ฮาตี ลาฆี เลอ." 18 กะฆีเตอ นู ตูฮัด บือเลฮ อาเกะ โกะ ลาฆู ดูซา ฌางัน ลาฆู ฌาฮัจ อีตู ฮาบิฮ ดัฮ ฮอย เตด ฆาโดฮ นะ อาดา ลาฆู มือนืองะ มือญือมัฮ บีดา นะ บาโซฮ ดูซา ปูลัก เลอ. 19 โกะ ดีบราดี เออ ซาเบะ ลาฆู กะฆีเตอ นู เยซู มาตี ดารัฮ มือนีเลฮ ดัฮ บือเลฮ บูวัจ บรี กีตา อาดา ฮาตี บรานี นู นะ มาโซะ กะ รูวัก นู บาฌิ บือซรี โตระ. 20 กีตา นะ บือเลฮ มาโซะ ตูโรจ กะ ฌาลัด นู บารู ฌาลัด นู บรี ฮีโดะ ฌาดี ฌาลัด นู เยซู บือเลฮ บูกา บรี กะ กีตา นะ มาโซะ ลาลู กาเยด กือตัก อีตู นู ฌาดี บือกะ อีซี ญาวา นะ ญา เลอ. 21 กีตา อาดา ซามี นู บือซัยํ นู บือบือลา โกะ ซือมียา เดะ รูมัฮ นะ ตูฮัด. 22 กะฆีเตอ เลอ บรี กีตา มาโซะ ปี ดาปิก กะ ตูฮัด อาดา ฌางัน ฮาตี รือมัก ซูโงฮ ปือจายา ปือนอฮ บาฌิ ดัฮ เตอ อาดา ฮาตี นู กือนา ปรือจิ บรี จรัฮ ดัฮ เตด บราซา จะ อาดา ลาฆู ฌาฮัจ ลาฆี เตอ อาดา ญาวา นู บือเลฮ บาโซฮ ดัฮ ฌางัน อาเย นู จรัฮ บาฌิ เลอ. 23 นู กีตา ซาโงะ จะ จาดัก นะ บือเลฮ บาฌิ เตอ กีตา กือนา ปือฆัก บรี กือฌะ-กือมัซ เลอ อาดา ฮาตี นู เตด บรูบัฮ. ซาเบะ-จะ ตูฮัด นู บือเลฮ บือฌาญี กะฆีเตอ ญา ฮาตี รือมัก เลอ. 24 กะฆีเตอ บรี กีตา บือฮีมัจ ลีฮัจ จะ นะ บูวัจ กะฮามี นู นะ ปูโฌะ-ฮาตี บือซามา-ซามา บรี อาดา ฮาตี นู ซายัก บูวัจ ซา ลาฆู นู บาฌิ. 25 ฌางัน บรี กีตา ปูตุซ นู นะ บือมุน บือซามา ซือรูปา บือกะ ซือมียา ซือตืองัฮ นู ปูตุซ เตอ. ตาปี กือนา บรี กีตา ปาคัจ มือเลา ปูโฌะ-ฮาตี บรี บาญะ ซือรูโลยํ ซาเบะ กาเญา ตาฮู จะ อารี นู ตูฮัด เยซู นะ บาลิ ปาเระ ดาปิก นะ รอจ ดัฮ เลอ. 26 ดัฮ กีตา ซืองาฌา ปี บูวัจ ดูซา ปูลัก วะตู กีตา บือเลฮ ตาฮู ลาฆู นู ซูโงฮ ดาตัก เดะ ตูฮัด ดัฮ เตอ บารัก มือญือมัฮ นู นะ อาเกะ ดูซา นะ กีตา โปด ญา ฮอย นามา ลาลู เลอ. 27 ตาปี นะ อาดา ลาฆู ตาโกจ นาตี นะ กือนา บือดะวา กรัจ ฮูโกบ ฌางัน อาปี นู ฮางัจ โตระ เตอ เลอ นู นะ ตูนู โกะ ซือมียา นู บลาวัด ฌางัน ตูฮัด. 28 ซือมียา ดีฮา นู ตีเมา บูวัจ ตูโรจ กะ ปือมือเลา ฮูโกบ นะ มูซา เตอ ดัฮ อาดา ซะซี ดูวา ตีฆา อูรัก ญา เตอ กือนา ฮอย เตด จีฮัด ตาปี ญา ฆาโดฮ นะ กือนา บูนอฮ บรี มาตี เลอ. 29 ดัฮ กะฆีเตอ กาเญา บรีงัจ ลีฮัจ เลอ จะ ซือมียา นู กาจะ ลาตับ นานะ นะ ตูฮัด เตอ ญา นะ ฌาดี กะฮามี เลอ. ฌาดี-จะ ซือมียา นู มือเลา จะ ดารัฮ นะ เยซู คริด นู บาโซฮ ญา บรี จรัฮ ตูโรจ กะ ปือมือเลา บือปาคัจ บือตือตู อีตู ญา ฮอย เตด ฌาดี นามา เลอ ซือมียา นู มือเลา ฌาฮัจ กะ ซือมืองัจ นะ ตูฮัด นู ฮาลัย บรี ซือลามัจ กะ ญา เตอ. กือนา บรีงัจ ลีฮัจ เลอ จะ โกะ ซือมียา กะฆีนี ฆามะ นะ บรี กือนา ฮูโกบ บาญะ โตระ ลือเบฮ เดะ อีตู เลอ. 30 ซาเบะ กีตา ตาฮู จะ ฌาดี ตูฮัด เลอ นู บือเลฮ มือเลา จะ "ลาฆู นู นะ บูวัจ บาลัซ ฌาดี ลาฆู นะ กู. กู ตะอาซิก นะ บาลัซ กูญา." ญา มือเลา ปูลัก จะ "ตูฮัด ญา นะ กรัจ ฮูโกบ โกะ ลูมอฮ ซือมียา นะ ญา เลอ." 31 ตูฮัด เดะ อาตัซ ตูฮัด นู ฮีโดะ เตอ ดัฮ ญา รีฆะ ซือมียา ฆืองับ กือปิ ฌาดี ลาฆู นู ตาโกจ ซูโงฮ เลอ. 32 ตาปี บรี กาเญา บรีงัจ กะ กาลา ดูลู เตอ ลือปัซ เดะ กาเญา บือเลฮ ซาโมจ ลาฆู จรัฮ ดัฮ กาเญา โปด บือเลฮ ตาฮัด บลาวัด เดะ ลาฆู ซูซัฮ บาญะ โตระ เลอ. 33 ดักกาดัก กูญา ปรือกัด กาเญา มือเลา มือฌัฮ อูจะ กะ กาเญา. ดักกาดัก กาเญา โปด ยอม มาโซะ บือซามา ฌางัน โกะ ซือมียา นู กือนา ปรือกัด อีตู. 34 ซาเบะ กาเญา อาดา ฮาตี ตือจีฮัด กะ โกะ ซือมียา นู กือนา ราตัย อีตู เลอ. วะตู อาดา ซือมียา ราปัซ อาเมด โกะ ซือบารัก นะ กาเญา ปี เตอ กาเญา โปด ซูกา-ฮาตี นะ อาเกะ บรี กะ กูญา กรานา กาเญา ตาฮู ดัฮ จะ กาเญา อาดา ซือบารัก นู บาฌิ โตระ เดะ อีตู ลาฆี นู อาดา ซือลาลู. 35 กะฆีเตอ ฌางัน บรี กาเญา ตีงัน บูวัก ลาฆู นู กาเญา อาดา ฮาตี บรานี เตอ นู นะ บรี กาเญา บือเลฮ บาฮาเฆด บาญะ ซูโงฮ เลอ. 36 กาเญา กือนา กูวาซา ตาฮัด-ฮาตี ลามา บีดา นะ บือเลฮ บูวัจ ลาฆู นู บูวัจ บรี ตูฮัด ซูกา-ฮาตี. กะฆีเตอ กาเญา นะ บือเลฮ ซาโมจ บือนา นู ตูฮัด ญา บือเลฮ บือฌาญี ดัฮ. 37 บือกะ ซูรัจ ปือมือเลา นะ ตูฮัด จะ " 'เตด ลามา อีนี ดัฮ ซือมียา นู นะ มาแรฮ เตอ ญา นะ มาแรฮ รอจ. ญา นะ มาแรฮ เตด ลามัจ เลอ. 38 โซะ ซือมียา นู บาฌิ-ตือปัจ นะ กู เตอ ญา นะ อาดา ฮีโดะ ฌางัน ฮาตี นู ปือจายา เลอ. ตาปี ดัฮ ซือมียา ดีฮา อูโนยํ ปาเระ เตอ กู นะ ฮอย เตด ซูกา-ฮาตี เดะ ซือมียา อีตู เลอ.' ตูฮัด ญา จะ." 39 กีตา อีนี บูกัด ซือมียา นู อูโนยํ ปาเระ กะฆีเตอ นะ รอจ กะ ลาฆู ฌาฮานัม เตอ. ตาปี กีตา ฌาดี ซือมียา นู ปือจายา กะ ตูฮัด กะฆีเตอ นะ ฮีโดะ ลือปัซ ดัฮ เลอ.
1 นู ซือมียา นะ ปือจายา เตอ ฌาดี-จะ ญา ตือตู เดะ ฮาตี กะ บือนา บารัก นู ญา จาดัก นะ บือเลฮ. บือกะ นะ บราซา เดะ ฮาตี จะ บือนา บารัก นู ลีฮัจ เตด บือฆารี เตอ ญา อาดา ซูโงฮ เลอ. 2 กรานา โกะ ซือมียา กาลา นูตู บือเลฮ ปือจายา กะ ตูฮัด กะฆีนี เลอ กะฆีเตอ ตูฮัด บือเลฮ ซูกา กะ กูญา ดัฮ. 3 ซาเบะ กีตา ปือจายา ดัฮ กะฆีเตอ กีตา มาโซะ เดะ ฮาตี จะ ตูฮัด เตอ ญา ซูโรฮ ปือมือเลา นะ ญา บรี บือฌาดี ลาแงะ ฌางัน ดือนียา ซือมูฮา. กะฆีเตอ บารัก นู กีตา ลีฮัจ บือฆารี เตอ ญา บือฌาดี ดาตัก เดะ บือนา บารัก นู ลีฮัจ เตด บือฆารี เลอ. 4 ซาเบะ เฮเบน ญา ปือจายา กะ ตูฮัด กะฆีเตอ ญา อาเมด บารัก มือญือมัฮ มาแรฮ มือนืองะ กะ ตูฮัด นู บาฌิ เดะ บารัก มือญือมัฮ นะ คาอิน ลาฆี. นู ญา ปือจายา บูวัจ บรี ลีฮัจ จะ ญา ฌาดี ซือมียา บาฌิ-ตือปัจ กรานา ตูฮัด ซูกา-ฮาตี เดะ บารัก มือญือมัฮ นะ ญา. เตด-จะ เฮเบน ญา มาตี ปี ลามา ดัฮ ตาปี นู ญา ปือจายา กะ ตูฮัด เตอ ฌาดี ลาฆู นู อาดา อาฌัยํ กีตา ยู ตือดะ รอจ กะ ฮาดัจ อีนี เลอ. 5 ซาเบะ เอโนก ญา ปือจายา กะ ตูฮัด กะฆีเตอ ตูฮัด บือเลฮ ซาโมจ ญา บือปี ตีเมา บรี ญา ฆาโดฮ มาตี. ฮอย ซาปา บือเลฮ ดาปัจ ญา กรานา ตูฮัด บือเลฮ ซาโมจ ญา บือปี ดัฮ. ซูรัจ ปือมือเลา นะ ตูฮัด ฌาดี ซะซี จะ ดูลู เดะ ตูฮัด นะ บือปี ญา เตอ ญา ฌาดี ซือมียา นู ตูฮัด ซูกา เดะ ฮาตี ซูโงฮ. 6 ตาปี ดัฮ ซือมียา เตด ปือจายา เตอ นะ ฌาดี ซือมียา นู ตูฮัด ซูกา เดะ ฮาตี ฮอย เตด บือเลฮ ลาลู. ซาเบะ-จะ ซือมียา ดีฮา นู นะ มาโซะ รอจ กะ ตูฮัด เดะ อาตัซ เตอ ฆาโดฮ นะ ปือจายา จะ ตูฮัด ญา อาดา ซูโงฮ เตอ ตูฮัด ญา นะ บรี บือนา บาฌิ กะ ราตา ซือมียา นู มือโซะ ปี มียา ญา เลอ. 7 ซาเบะ โนฮา ญา ปือจายา กะ ตูฮัด เตอ วะตู ตูฮัด ญา ปรีงัจ กะ ญา ปาซัน ลาฆู นู ลีฮัจ เตด บือฆารี ลาฆี กะฆีเตอ ญา มือนีงัย กะ ตูฮัด ญา บูวัจ กาปัน บือซัยํ บีดา นะ ตูโลก โกะ ซือมียา เดะ ซือรูมัฮ นะ ญา บรี ลือปัซ เดะ มาตี. ซาเบะ ญา ปือจายา กะฆีเตอ ญา บรี ลีฮัจ จะ โกะ อูมัจ-ซือมียา เดะ ดือนียา กูญา ฌาฮัจ ซือมูฮา. ตาปี อีซี ญา ตะอาซิก เตอ นู ญา ปือจายา ดัฮ กะฆีเตอ ตูฮัด บือเลฮ กีรา จะ ญา ฌาดี ซือมียา บาฌิ-ตือปัจ. 8 ซาเบะ อับราฮัม ญา ปือจายา กะ ตูฮัด กะฆีเตอ ตานา ตูฮัด ปาเงน ญา บรี ตรือเบะ บือฌาลัด ปี กะ นังฆรี นู ญา นะ ซาโมจ ฌาดี ปือซากา เตอ ญา โปด บือเลฮ มือนีงัย บือฌาลัด ตรือเบะ ปี ฮอย เตด ตาฮู จะ นะ ปี กะ โซะ ดีฮา. 9 กรานา นู ญา ปือจายา ดัฮ ญา บือเลฮ มือนูปัก ดูโดะ ฌาดี ซือรูปา บือกะ ซือมียา นังฆรี อาซิก เดะ ตือปัจ นังฆรี อีตู นู ตูฮัด บือเลฮ บือฌาญี จะ นะ บรี กะ ญา ดัฮ. ญา บือเลฮ ดูโดะ เดะ ซาเราะ กาฌัก บือซามา ฌางัน อีซัก ฌางัน ยาโกบ ฌูฆา นู ฌาดี ซือมียา นู นะ ซาโมจ ลาฆู นู ตูฮัด บือฌาญี อีตู บือซามา เลอ. 10 อับราฮัม ญา บือเลฮ นาตี นะ ดูโดะ เดะ นังฆรี อีตู นู ตืองะ เดะ อาตัซ ตือปัจ นู กือฌะ ซูโงฮ. ตูฮัด เตอ ฌาดี ซือมียา บูวัจ จูตอ ฌาดี ตูกัก นู บือฌาดี นังฆรี อีตู เลอ. 11 ซาเบะ อับราฮัม ญา ปือจายา กะฆีเตอ ตูฮัด บูวัจ บรี ญา บือเลฮ นานะ ดัฮ มีเซ-จะ อีซี ญา ตูฮา โตระ ซารา บีนี นะ ญา โปด ฌาดี ซือมือโฆจ. ตาปี อับราฮัม ญา ตือตู เดะ ฮาตี จะ ตูฮัด นะ บูวัจ ตูโรจ บรี รือมัก ฌางัน ปือมือเลา บือฌาญี นะ ญา. 12 กะฆีเตอ อับราฮัม นู ฆามะ นะ มือเลา บือเลฮ จะ ฌาดี ซือมียา นู มาตี ดัฮ เตอ ญา ซืออูรัก อีนี เลอ นู บือเลฮ โกะ อานะ จูจู ฌาดี บือแนฮ บาญะ โตระ บือกะ โกะ บีตัก เดะ ลาแงะ บือกะ โกะ บีฌี ตานัฮ ปาตัย เดะ บีดิก ลาโวจ นู กีรา เตด ตือตู เลอ. 13 โกะ ซือมียา อีตู ซือมูฮา กูญา ปือจายา ยู ตือดะ มาตี. กูญา เตด บือเลฮ ซาโมจ ลาฆู นู ตูฮัด บือฌาญี ดัฮ เตอ ตาปี บือกะ กูญา ลีฮัจ ตะเดะ ฌาโวฮ ซียะ นาตี นะ ซาโมจ ลาฆู อีตู. กูญา ซาโงะ จะ กูญา ฌาดี ลูมอฮ ซือมียา บักซา อาซิก นู อาดา บักซัจ ปี มาแรฮ เดะ ดือนียา อีนี. 14 ซาเบะ-จะ ซือมียา นู มือเลา ลาฆู กะฆีเตอ กูญา บรี ลีฮัจ ซัฮ ดัฮ จะ กูญา ตืองัฮ มียา นังฆรี นู นะ ฌาดี นังฆรี นะ กูญา ตะอาซิก. 15 ดัฮ กูญา อาดา บรีงัจ กะ นังฆรี อีตู นู กูญา ตีงัน มาแรฮ เตอ กูญา โปด นะ อาดา จือลัฮ นู นะ บาลิ ปี บือเลฮ. 16 ตาปี โงฮ-ซูโงฮ เตอ กูญา บือคานะ นะ ปี ดูโดะ นังฆรี นู บาฌิ เดะ อีตู นู ฌาดี นังฆรี โซะ ลาแงะ. กรานา กะฆีเตอ เลอ ตูฮัด ญา เตด จือและ นู นะ บรี กูญา บลาโลก กะ ญา จะ ฌาดี ตูฮัด นะ กูญา. ซาเบะ ตูฮัด ญา ซียะ นังฆรี ซา นังฆรี บีดา กูญา ดัฮ. 17 ซาเบะ อับราฮัม ญา ปือจายา กะ ตูฮัด กะฆีเตอ วะตู ตูฮัด ลกลีฮัจ ญา ญา บือเลฮ อาเมด อีซัก บือปี บีดา นะ อาเกะ ฌาดี บารัก มือญือมัฮ กะ ตูฮัด. อับราฮัม เตอ ฌาดี ซือมียา นู บือเลฮ ซาโมจ ปือมือเลา บือฌาญี นะ ตูฮัด ตาปี ญา ปือนอฮ เดะ ฮาตี ดัฮ นู นะ อาเกะ มือญือมัฮ นานะ ตูงัน นะ ญา. 18 ตูฮัด บือเลฮ มือเลา กะ อับราฮัม จะ "เกา นะ อาดา บือแนฮ นู บือฌาดี ดาตัก มาแรฮ เดะ อีซัก เลอ." 19 อับราฮัม ญา ตือตู เดะ ฮาตี จะ ตูฮัด ญา มือฆัฮ นะ บือเลฮ บูวัจ บรี ซือมียา มาตี นะ ฮีโดะ ปาเระ. กะฆีเตอ นะ มือเลา กะฆีนี บือเลฮ จะ อับราฮัม บือเลฮ ซาโมจ นานะ นะ ญา บาลิ ปาเระ เดะ มาตี ดัฮ. 20 ซาเบะ อีซัก ญา ปือจายา กะ ตูฮัด กะฆีเตอ ญา บือเลฮ มีตา ซือลามัจ เดะ ตูฮัด บรี กะ ยาโกบ ฌางัน เอเซา บีดา กูญา นะ บือเลฮ ลาฆู บาฌิ เดะ กาลา โซะ ฮึลด. 21 ซาเบะ ยาโกบ ญา ปือจายา กะฆีเตอ ตานา ดาปิก นะ มาตี ดัฮ ญา มีตา ซือลามัจ เดะ ตูฮัด บรี กะ นานะ ดูวา อูรัก นะ โยเซบ. ญา บราดัด ตาฮัด เดะ ตูกัจ นะ ญา บีดา นะ บือซาโวจ มือญือมัฮ กะ ตูฮัด. 22 ซาเบะ โยเซบ ญา ปือจายา กะฆีเตอ ตานา ญา นะ มาตี ญา บือเลฮ มือเลา ปาซัน ลาฆู นู ลูมอฮ อิซราเอน นะ บราเกะ ตรือเบะ เดะ นังฆรี อียิบ. ญา บือเลฮ ปือซัด จะ นะ บูวัจ กะฮามี ฌางัน บาดัด นะ ญา เตอ. 23 กรานา โกะ มะปะ นะ มูซา กูญา ปือจายา กะ ตูฮัด กะฆีเตอ ตานา มูซา บือฌาดี ดัฮ กูญา บาวา ญา ปี บูนี รอจ กะ ตีฆา บูลัด. กูญา ลีฮัจ จะ ญา ฌาดี นานะ นู บือฆาจะ กะฆีเตอ กูญา โปด เตด ตาโกจ นู นะ บูวัจ ซาลัฮ เดะ ปือมือซัด นะ ราฌา ลาลู เลอ. 24 ซาเบะ มูซา ญา ปือจายา เตอ ตานา ญา บือซัยํ ดัฮ ญา ตีเมา บรี ซาปา บลาโลก กะ ญา จะ ฌาดี จูจู นะ ราฌา ฟาโร. 25 ญา ปีเลฮ นู นะ ดูโดะ ซูซัฮ บือซามา ฌางัน ลูมอฮ ซือมียา นะ ตูฮัด บาฌิ เดะ นู นะ ปี บรามัย บือซามา ซัจ เดะ ลาฆู ดูซา เลอ. 26 ญา บรีงัจ จะ นู ญา ตาฮัด ลาฆู อูจะ มือฌัฮ ซือรูปา บือกะ ราฌา นู นะ บรี ซือลามัจ เตอ ญา ฌาดี ลาฆู บาฌิ ลือเบฮ เดะ โกะ บารัก บรือฆา นะ นังฆรี อียิบ ราตา ซือมูฮา. ซาเบะ ญา ซือมาตา ตีญูง ลีฮัจ กะ บาฮาเฆด อีตู นู ญา นะ ซาโมจ. 27 ซาเบะ มูซา ปือจายา กะฆีเตอ ญา โปด ตรือเบะ เดะ นังฆรี อียิบ ญา เตด ตาโกจ เดะ ลาฆู นู ราฌา นะ มูซัยํ. ญา ตือตู เดะ ฮาตี ดัฮ ซือรูปา บือกะ ญา บือเลฮ บือฆารี ตูฮัด นู ลีฮัจ ฌางัน มาตา เตด บือฆารี. 28 นู ญา ปือจายา เตอ ญา บือเลฮ ตืองะ อารี บรามัย ลือปัซ ปี. ญา ปือซัด บรี กูญา อาเมด ดารัฮ ปรือจิ เดะ บีดิก ปีตู เตอ บีดา ตีเมา บรี ฮูลู-บาลัก นู บูนอฮ ซือมียา ปี บูนอฮ นานะ ซูโลก นะ ลูมอฮ อิซราเอน เลอ. 29 ซาเบะ ลูมอฮ อิซราเอน ปือจายา กะฆีเตอ กูญา บือเลฮ มือลากัฮ ลาโวจ มีรัฮ ซือรูปา บือกะ กูญา บือฌาลัด เดะ ตานัฮ ตูโฮยํ เตอ. ตาปี ตานา ลูมอฮ อียิบ กูญา กูวาซา นะ มือลากัฮ ปี ฌูฆา อาเย โปด อาโปฮ ปาเระ บูวัจ บรี กูญา มาตี ฮาบิฮ ดัฮ. 30 นู ลูมอฮ อิซราเอน ปือจายา เตอ บูวัจ บรี ดีนิง นะ นังฆรี เยริโค รูโตฮ ฮาบิฮ ลือปัซ เดะ ลูมอฮ กูญา บือฌาลัด กือลีลิก นังฆรี อีตู ตูโฌฮ อารี ดัฮ. 31 ซาเบะ ญา ปือจายา ราฮับ นู นีบีนี ฌาลัก เตอ ญา เตด มาตี ปี มารือมา ฌางัน โกะ ซือมียา อีตู นู ฮอย เตด มือนีงัย กะ ตูฮัด ซาเบะ ญา บือเลฮ ซาโมจ บาฌิ โกะ ซือมียา ลูมอฮ อิซราเอน นู มาแรฮ มือฮึนะ มือญาซัจ เตอ. 32 กู นะ มือเลา นามา ปูลัก เลอ? ซาเบะ-จะ ฮอย วะตู ดัฮ นู นะ จรือตา ปาซัน นะ ฆีเดโอน บาราก แซมซัน เยบทา ดาวิด ฌางัน ซามูเอน ฌางัน โกะ ซือมียา นู ตูโดฮ ลาฆู นะ ตูฮัด. 33 นู กูญา ปือจายา เตอ บูวัจ บรี กูญา บือปรัก ฌือนัฮ เดะ โกะ นังฆรี อาซิกๆ เตอ. กูญา ตืองะ ฮาดัจ นู บาฌิ-ตือปัจ กูญา ซาโมจ ลาฆู บาฌิ นู ตูฮัด บือฌาญี ดัฮ กูญา บือเลฮ กาปุซ มูโลจ ซีงา. 34 กูญา บือเลฮ ปาดับ อาปี นู ตืองัฮ บลือกัจ บือฌาฮุยํ บือเลฮ ลือปัซ เดะ ปือดัก นู ตาฌับ. นู ลาฆู ลือมัฮ ฮอย อูรัจ นะ กูญา โปด ปาเระ มาแรฮ ฌาดี ลาฆู ตือฆัยํ-อูรัจ บาญะ เลอ. กูญา ฌาดี ตาฮัน นู อาดา ลาฆู ปานัย ตือฆัยํ-อูรัจ นู นะ บือปรัก ฌางัน ลูมอฮ ตาฮัน นังฆรี อาซิกๆ บรี กูญา อาลัฮ เลอ. 35 ซาเบะ กูญา ปือจายา โกะ นีบีนี ซือตืองัฮ กูญา บือเลฮ ซาโมจ โกะ นะบรานะ นะ กูญา นู มาตี บรี ฮีโดะ ปาเระ เดะ มาตี ปูลัก. ตาปี โซะ ซือมียา อาซิก กูญา ตีเมา ซาโมจ ลาฆู บรี ลือปัซ กะฆีเตอ กูญา กือนา ตาฮัด ซูซัฮ ซาเกะ โตระ บีดา กูญา นะ บือเลฮ ซาโมจ ลาฆู ฮีโดะ นู บาฌิ เดะ อีตู ลาฆี เลอ. 36 ซือตืองัฮ ฆาโดฮ ตาฮัด เดะ ลาฆู นู กือนา อาฆัฮ-ฆือละ ฌางัน ลาฆู นู กือนา รือเปะ ตือดะ รอจ กะ กือนา ราตัย บอฮ เดะ ปือฌารา ฌูฆา. 37 กูญา กือนา ลีปัยํ ฌางัน บาตู ยู มาตี กือนา ฆาฌี กรัจ ฌาดี ดูวา กูตก กือนา บาโฮะ มาตี ฌางัน ปือดัก. กูญา บือฌาลัด ปี มาแรฮ ปากัย ซา โกะ กูเละ กาเมก กูเละ แบะ. กูญา ฮาฌะ โตระ กือนา ปรือกัด กือนา บูวัจ ฌาฮัจ เลอ. 38 ดือนียา อีนี เตด บือฆูนา ฌางัน โกะ ซือมียา กะฆีเตอ เลอ. กูญา บือฌาลัด ปี ราตา เดะ ปาดัก ตานัฮ ตูโฮยํ นู ลือฆา เดะ โซะ บูเกะ โปด. กูญา ดูโดะ เดะ โกะ ฆูฮา เดะ โกะ ลูบัก ฌูฆา. 39 โกะ ซือมียา กะฆีเตอ ซือมูฮา ตูฮัด ซูกา-ฮาตี กะ กูญา ซาเบะ กูญา ปือจายา ดัฮ. ตาปี กูญา เตด บือเลฮ ซาโมจ ลาฆู อีตู นู ตูฮัด บือฌาญี ดัฮ. 40 ซาเบะ ตูฮัด ญา บือเลฮ บือกีรา ลาฆู นู บาฌิ ลือเบฮ เดะ อีตู ลาฆี บีดา กีตา. ญา บือคานะ นะ บรี กูญา นะ บือเลฮ ฌาดี ซือมียา นู ปือนอฮ บาฌิ บือซามา ฌางัน กีตา ตารา อีตู เลอ.
1 โซะ กีตา โปด อาดา ลูมอฮ ซะซี บาญะ อูรัก อีตู นู กือลีลิก ญาวา กีตา. กะฆีเตอ โกะ ซือบารัก ราตา ฌือแนฮ นู ตาฮัด กีตา ฌางัน ลาฆู ดูซา อีตู นู งาปอ กือฌะ เดะ ญาวา นะ กีตา เตอ บรี กีตา ตีงัน บูวัก เลอ. บรี กีตา ราเฌด บือลูมา บลารี ซือมาตา ตูโรจ ปี กะ ฌาลัด โซะ ฮึลด. 2 บรี กีตา ซือมาตา ตีญูง ลีฮัจ กะ เยซู. ญา เลอ นู บาวา กีตา บรี ปือจายา กะ ตูฮัด นู บูวัจ บรี กีตา ปือจายา ปือนอฮ บาฌิ ดัฮ. ญา ตาฮู จะ อาดา ลาฆู ซูกา-ฮาตี ซูโงฮ ตาโรฮ โซะ ฮึลด บรี กะ ญา. กะฆีเตอ ญา ตาฮัด ซูซัฮ เดะ กายู ปลีตัก เตด กีรา จะ ฌาดี ลาฆู นู นะ จือและ เลอ. วะตู อีนี เลอ ญา อาดา ดูโดะ โซะ กานัน นะ ตูฮัด บือซัยํ เดะ อาตัซ. 3 บรี กาเญา บรีงัจ ลีฮัจ จะ เยซู ญา ตาฮัด เดะ ลาฆู นู โกะ ซือมียา บือดูซา บือชี กะ ญา บาญะ ซูโงฮ เตอ บีดา กาเญา นะ เตด อูโนยํ-ฮาตี ตีงัน ลาฆู ปือจายา. 4 นู กาเญา บลาวัด ฌางัน ลาฆู ดูซา เตอ กาเญา เตด บือเลฮ ลาวัด ยู ตือดะ มาตี เลอ. 5 กาเญา ลูปา ดัฮ เฆอ กะ ปือมือเลา นู ตูฮัด บือเลฮ มือเลา บรี ปูโฌะ ฮาตี นะ กาเญา บือกะ กาเญา ฌาดี นานะ นะ ญา จะ "นานะ เออ กาลา ตูฮัด ญา กาเตาะ อาฌัยํ เกา กือนา บรีงัจ บรี บาฌิ ฌางัน นะ อูโนยํ เดะ ลาฆู นู ตูฮัด ญา มือเลา อูจะ กะ เกา เลอ. 6 ซาเบะ-จะ ตูฮัด ซายัก กะ ซือมียา ดีฮา ญา นะ กาเตาะ อาฌัยํ ซือมียา อีตู เลอ. ดัฮ ญา ซาโมจ ซือมียา ดีฮา ฌาดี นานะ ญา นะ รือเปะ ซือมียา อีตู เลอ." ญา จะ. 7 กาเญา กือนา ตาฮัด เลอ เดะ ลาฆู นู กาเตาะ อาฌัยํ กาเญา เตอ ซาเบะ ตูฮัด ญา บูวัจ บือกะ จะ กาเญา ฌาดี นานะ นะ ญา. กรานา โกะ นานะ ดีฮา เลอ นู ปะ เดะ ญา เตด ดือละ กาเตาะ อาฌัยํ ซือตืองัฮ เตอ? 8 ตาปี ดัฮ กาเญา เตด กือนา กาเตาะ อาฌัยํ ซือรูปา กะ โกะ ซือมียา อาซิกๆ ซือมูฮา กาเญา โปด เตด ฌาดี นานะ ซูโงฮ ตาปี ฌาดี บือกะ นานะ นู ฮอย อาโปก เลอ. 9 กะฆีเตอ ปูลัก โกะ ปะ เดะ กีตา นู ฌาดี อูมัจ-ซือมียา เตอ กูญา กาเตาะ อาฌัยํ กีตา. กะฆีเตอ กีตา โปด ตูเฮะ กะ กูญา. บาญะ ลือเบฮ เดะ อีตู เลอ กีตา กือนา ดูโดะ เดะ บาวัฮ ฮูโกบ อาโปก นะ กีตา นู โซะ ลาแงะ เตอ บีดา กีตา นะ ดูโดะ ซือนัง ซือลามัจ บูกัด เฆอ? 10 ซาเบะ โกะ ปะ เดะ กีตา นู ฌาดี อูมัจ-ซือมียา กูญา กาเตาะ อาฌัยํ กีตา วะตู กิดีกิ ตูโรจ กะ ลาฆู นู กูญา ลีฮัจ จะ บาฌิ เตอ. ตาปี ตูฮัด ญา กาเตาะ อาฌัยํ กีตา บีดา บรี กีตา บือเลฮ อูโตก บีดา กีตา นะ อาดา บาฮาเฆด เดะ ลาฆู บาฌิ บือซรี นะ ญา. 11 วะตู ดีฮา กีตา ตืองัฮ กือนา ลาฆู กาเตาะ อาฌัยํ กีตา ลีฮัจ จะ ฌาดี ลาฆู นู ซูซัฮ บูกัด ฌาดี ลาฆู นู ซูกา เดะ ฮาตี เลอ. ตาปี ลือปัซ เดะ อีตู ญา บูวัจ บรี อาดา บาฮาเฆด นู บาฌิ กะ โกะ ซือมียา นู ตาฮัด บลาฌัยํ เดะ ลาฆู กาเตาะ อาฌัยํ อีตู เตอ ฌาดี-จะ กูญา ดูโดะ ซือนัง ซือลามัจ ฌาดี ซือมียา นู กือนา เดะ ฮาตี นะ ตูฮัด เลอ. 12 กะฆีเตอ บรี อาเกะ โกะ ตางัน นู ฮอย อูรัจ เลอ กือนา บูวัจ โกะ ลูโตจ นู ลือมัฮ บรี กะ ญา ตือฆัยํ-อูรัจ ปูลัก. 13 กือนา บูวัจ ฌาลัด นู รือมัก บรี กะ กากี นะ กาเญา นะ บือฌาลัด ปี เตอ บีดา กากี นู เตะ-ฌือเตะ ญา เตด ซาลัฮ อูรัจ ตาปี ญา นะ ซือนัง บาฌิ ดัฮ เลอ. 14 กือนา กูวาซา นู นะ ดูโดะ บรี ฮาตี กือเมน งะซืองะ ฌางัน โกะ ซือมียา ซือมูฮา กูวาซา นู นะ อาดา ฮาตี นู จรัฮ บาฌิ. ดัฮ ฮาตี เตด จรัฮ ฮอย ซาปา เลอ นู นะ ลีฮัจ บือฆารี ตูฮัด ลาลู. 15 กือนา ฌาฆา บรี บาฌิ ฌางัน บรี ซาปา อูโนยํ ปาเระ เดะ ลาฆู นู ตูฮัด ฮาลัย บรี ซือลามัจ กะ ญา ดัฮ. กือนา ฌาฆา ฌางัน บรี ลาฆู นามา นู ซือรูปา ฌากัยํ นะ ปูโฮด ตาโระ ปาเฮะ บือตูโมฮ เดะ ฮาตี นะ กาเญา บูวัจ บรี อาดา ลาฆู ฆาโดฮ นู นะ บรี โกะ ซือมียา บาญะ นะ ตะอารัฮ. 16 ฌางัน บรี ซาปา ฌาดี ซือมียา บือกาเซฮ นู เตด ตูเฮะ กะ ลาฆู บาฌิ ซือรูปา บือกะ เอเซา. ญา นู อาเมด ปือซากา นะ ญา จะ ฌาดี นานะ ซูโลก เตอ ปี รีบัยํ ฌางัน อานะ นาซี แนฮ ซือฌับ โปด. 17 ซาเบะ กาเญา ตาฮู ดัฮ จะ ลือปัซ เดะ บลากัก วะตู เอเซา ญา ซูกา นะ ซาโมจ ลาฆู ซือลามัจ เดะ อาโปก นะ ญา ฌาดี ปือซากา เตอ ญา โปด กือนา มือเลา กีปัซ ดัฮ. ญา ฮอย เตด ดาปัจ ฌาลัด นู นะ อาเลฮ ลาฆู อีตู บรี บาฌิ ปาเระ มีเซ-จะ ญา มียา ยู ตือดะ อาเย มาตา มือนีเลฮ โปด. 18 กาเญา เตด บือเลฮ มาแรฮ กะ ตือปัจ นู นะ ปือเตาะ บือเลฮ ซือรูปา กะ ลูมอฮ อิซราเอน บือกะ กูญา มาแรฮ รอจ กะ บูเกะ ซีนัย นู อาดา ฌางัน อาปี นู ตืองัฮ บลือกัจ บือฌาฮุยํ ฌางัน ตือปัจ นู กือลับ นู กือลับ ฮีตับ เตอ อาดา ฌางัน อาเงน รีโบจ ฌูฆา เลอ 19 ฌางัน ซูวารา นะ ซือลูนัย นู บูงี มือฮาโมก ฌางัน ซูวารา นะ ตูฮัด มือเลา เตอ. โกะ ซือมียา นู ดืองัยํ ซูวารา นะ ตูฮัด อีตู กูญา มีตา กือมัซๆ ตีเมา บรี มือเลา ปือดืองัยํ กะ กูญา ปูลัก. 20 ซาเบะ กูญา ตาฮัด มือนีงัย ฮอย เตด บือเลฮ นู ตูฮัด ฮูโกบ มือเลา จะ "มีเซ-จะ บือนาตัก โปด ดัฮ ปือเตาะ บูเกะ อีนี กือนา นะ ลีปัยํ ฌางัน บาตู บรี มาตี เลอ." 21 ลาฆู นู บือเลฮ ลีฮัจ อีตู เตอ ฌาดี ลาฆู นู บรี ตาโกจ ซูโงฮ ยู มูซา ตะอาซิก โปด บือเลฮ มือเลา จะ "กู ตาโกจ ยู ญาวา กือตัยํ." 22 ตาปี กาเญา มาแรฮ รอจ กะ บูเกะ ซีโอน มาแรฮ รอจ กะ นังฆรี นะ ตูฮัด นู อาดา ฮีโดะ ฌาดี นังฆรี เยรูซาเลม นู โซะ ลาแงะ เตอ นู อาดา โกะ ฮูลู-บาลัก บือละซา-ละซา. 23 กาเญา มาแรฮ รอจ กะ ลาฆู บือมุน นะ โกะ ซือมียา นู ฌาดี ซือรูปา บือกะ ลูมอฮ นานะ ซูโลก นะ ตูฮัด นู ตืองัฮ บือรามัย บือซามา. นามา นะ กูญา เตอ อาดา ฆาแรฮ ตาโรฮ ดัฮ เดะ โซะ ลาแงะ. กาเญา มาแรฮ รอจ กะ ตูฮัด เดะ อาตัซ ญา นู กรัจ ฮูโกบ อูมัจ-ซือมียา ซือมูฮา รอจ กะ โกะ ซือมืองัจ นะ ซือมียา บาฌิ-ตือปัจ นู ตูฮัด บูวัจ บรี กูญา ปือนอฮ บาฌิ ดัฮ เลอ. 24 กาเญา มาแรฮ รอจ กะ เยซู ซือมียา นู ตืองะ ปือมือเลา บือปาคัจ บือตือตู นู บารู มาแรฮ รอจ กะ ดารัฮ นะ ญา นู ปรือจิ ดัฮ นู มือเลา ตูโญะ กะ ลาฆู นู บาฌิ ลือเบฮ เดะ ดารัฮ นะ เฮเบน บาญะ ซูโงฮ เลอ. 25 กือนา ฌาฆา บรี บาฌิ ฌางัน ตีเมา นะ มือนีงัย กะ ตูฮัด นู ตืองัฮ มือเลา ฌางัน กาเญา เตอ. กูญา อีตู นู ตีเมา มือนีงัย กะ ตูฮัด วะตู ญา ปรีงัจ กะ กูญา เดะ ดือนียา อีนี เตอ กูญา โปด ลารี บรี ลือปัซ เดะ ฮูโกบ เตด บือเลฮ ดัฮ เลอ. บาญะ ลือเบฮ เดะ อีตู เตอ ดัฮ กีตา มืองือละ ปี เดะ ตูฮัด ญา นู ปรีงัจ กะ กีตา ดาตัก เดะ ลาแงะ กีตา โปด นะ เตด ลือปัซ ฮูโกบ เลอ. 26 กาลา ดูลู ซูวารา นะ ตูฮัด ญา บูวัจ บรี ดือนียา บรีเงาะ ดัฮ. ตาปี วะตู อีนี ตูฮัด ญา บือเลฮ มือเลา บือฌาญี จะ "ซือกาลี ลาฆี กู นะ บูวัจ บรี บรีเงาะ บูกัด ซา ดือนียา ตาปี ฌางัน ลาแงะ ฌูฆา เลอ." 27 นู จะ "ซือกาลี ลาฆี" เตอ บรี ลีฮัจ จะ บือนา บารัก นู นะ บรีเงาะ อีตู กือนา นะ กีปัซ บรี ฮาบิฮ บูวัก ซือรูปา ฌาดี บารัก นู บือเลฮ บือฌาดี ดัฮ บีดา ซือบารัก นู เตด บรีเงาะ นะ อาดา ดูโดะ ซือรูโลยํ. 28 นังฆรี นู กีตา บือเลฮ ซาโมจ เตอ ฌาดี นังฆรี นู นะ บรีเงาะ เตด บือเลฮ. กะฆีเตอ บรี กีตา บรี ซือลามัจ กะ ตูฮัด เลอ บรี กีตา มือญือมัฮ กะ ตูฮัด ฌางัน ฮาตี นู ตูเฮะ อาดา ฮาตี นู ตาโกจ ตูโรจ กะ ลาฆู นู นะ บรี ญา ซูกา-ฮาตี. 29 ซาเบะ ตูฮัด นะ กีตา เตอ ญา ฌาดี ซือรูปา อาปี นู มือญาลา บือฌาฮุยํ เลอ.
1 โกะ ซือมียา นู ปือจายา กือนา ซายัก บือซามา-ซามา ปี ซือลาลู บือกะ อาดี-บราดี เลอ. 2 ฌางัน ซือฆัด นู นะ ซาโมจ ลูมอฮ ซือมียา นู กีตา เตด กราลา กรานา ซือมียา ซือตืองัฮ นู บูวัจ กะฆีเตอ กูญา บือเลฮ ซาโมจ ฮูลู-บาลัก นะ ตูฮัด ดัฮ ตาปี เตด ตาฮู จะ ฌาดี ฮูลู-บาลัก เลอ. 3 กือนา บรีงัจ กะ โกะ ซือมียา นู กือนา ราตัย ซือรูปา จะ กาเญา โปด กือนา ราตัย บือซามา ฌางัน กูญา ฌูฆา. กือนา บรีงัจ กะ ซือมียา นู กือนา บูวัจ ฌาฮัจ บือกะ-จะ กาเญา โปด อาดา ญาวา นู ตาฮู ซาเกะ ฌูฆา ซือรูปา บือกะ กูญา เลอ. 4 กือนา บรี ราตา ซือมียา ตูเฮะ กะ ลาฆู บือลากี-บีนี เลอ. นู ลากี ฌางัน บีนี นะ บือซามา ฌางัน บรี ซาปา บูวัจ ลาฆู ตะอารัฮ เลอ. ซาเบะ ซือมียา บือกาเซฮ ฌางัน ซือมียา ซาลัฮ ลากี บีนี นะ กาวัด เตอ ตูฮัด นะ กรัจ ฮูโกบ กูญา เลอ. 5 เกา เลอ ฌางัน ฌาดี ซือมียา นู ซายัก กะ ดูเวะ กือนา ซูกา-ฮาตี กะ ซือบารัก นู เกา อาดา เตอ. ซาเบะ ตูฮัด ญา บือเลฮ มือเลา จะ "กู นะ เตด มืองือละ เดะ เกา นะ ฮอย เตด ตีงัน เกา บูวัก เลอ." 6 ซาเบะ กะฆีเตอ กีตา นะ มือเลา ฌางัน ฮาตี บรานี จะ "ตูฮัด เตอ ญา เลอ นู มาแรฮ ตูโลก กู กู นะ เตด ตาโกจ ลาลู. อูมัจ-ซือมียา นะ เตด บือเลฮ บูวัจ ลาฆู นามา กะ กู เลอ." 7 กาเญา กือนา บรีงัจ กะ โกะ ซือมียา นู บือเลฮ บาวา บือบือลา กาเญา กาลา ดูลู นู ฌาดี ซือมียา มือญาเระ ปือมือเลา นะ ตูฮัด บรี กะ กาเญา ตาฮู. กือนา บือฮีมัจ ลีฮัจ จะ กูญา ดูโดะ กะฮามี มาตี กะฮามี. กะฆีเตอ บรี กาเญา ตูโรจ ซือรูปา บือกะ นู กูญา บือเลฮ ปือจายา ดัฮ. 8 เยซู คริด ญา ฌาดี ซือรูปา ซา อีตู เดะ อารี กือมารี ฌางัน อารี อีนี ปี ซือมาญัก-รอจ เลอ. 9 ฌางัน นะ ตูโรจ ปี กะ โกะ ปือมือเลา อาฌัยํ แนฮ-ฌือแนฮ นู ปือและๆ บรี ซือซัจ ฌาลัด เลอ. ซาเบะ-จะ ฌาดี ลาฆู บาฌิ ดัฮ นู นะ บรี ฮาตี นะ กาเญา กือฌะ-กือมัซ ซือรูโลยํ กรานา ตูฮัด ญา ฮาลัย บรี ซือลามัจ กะ กาเญา บูกัด กรานา ลาฆู ตูโรจ กะ ฮาดัจ ฮูโกบ ปาซัน บารัก มากัด. โกะ ฮาดัจ ฮูโกบ กะฆีเตอ เตด ดือละ บรี อูโตก นามา กะ ซือมียา นู บูวัจ ตูโรจ เลอ. 10 กีตา อาดา ตือปัจ มือนืองะ มือญือมัฮ กะ ตูฮัด นู โกะ ซามี บือกรือฌา เดะ บาลัย กาเยด อีตู เตอ กูญา นะ มากัด บารัก มือญือมัฮ เดะ ตือปัจ มือนืองะ นะ กีตา เตด บือเลฮ เลอ. 11 ซาเบะ จะ กือปาลา ซามี ลูมอฮ ยิว ญา ดือละ อาเมด ดารัฮ นะ โกะ บือนาตัก บาวา บือปี มาโซะ กะ รูวัก นู บาฌิ บือซรี โตระ บีดา ฌาดี บารัก มือญือมัฮ นู นะ บาโซฮ ดูซา เตอ. ตาปี บาดัด นะ บือนาตัก อีตู กูญา อาเมด ปี ตูนู โซะ ลูวัยํ ตูโปะ ดัฮ. 12 ซือรูปา กะฆีเตอ เยซู โปด ญา บือเลฮ ตาฮัด ซูซัฮ โตระ ยู มาตี โซะ ลูวัยํ ปีตู นังฆรี บีดา นะ บาโซฮ ดูซา นะ โกะ ลูมอฮ ซือมียา บรี จรัฮ บาฌิ ฌางัน ดารัฮ นะ ญา ตะอาซิก เลอ. 13 กะฆีเตอ บรี กีตา ตรือเบะ ปี มียา เยซู โซะ ลูวัยํ ตูโปะ เตอ บรี กีตา ซาโมจ ลาฆู มือเลา มือฌัฮ ซือรูปา บือกะ ญา. 14 ซาเบะ-จะ เดะ ดือนียา อีนี กีตา ฮอย นังฆรี นู กือฌะ บาฌิ ซือลาลู. ตาปี กีตา กูวาซา มียา นังฆรี นู นะ อาดา กาลา เดะ โซะ ฮึลด เลอ. 15 กะฆีเตอ กีตา กือนา ซือมาตา ปูฌี กะ ตูฮัด ปี ซือรูโลยํ ตูโรจ กะ ฌาลัด นะ เยซู เตอ เลอ. นู บูวัจ กะฆีเตอ ฌาดี ซือรูปา ลาฆู อาเกะ บารัก มือญือมัฮ กะ ตูฮัด ฌาดี ปือมือเลา ปูฌี นะ ซือมียา นู ซาโงะ จะ เยซู ฌาดี ตูฮัด เลอ. 16 ฌางัน บรี กีตา ซือฆัด นู นะ บูวัจ ลาฆู บาฌิ กือนา ปาฮาฆิ-ฮาฆิ โกะ บือนา บารัก บือซามา ซาเบะ ลาฆู กะฆีนี เลอ ฌาดี ซือรูปา บารัก มือญือมัฮ นู ตูฮัด ซูกา เดะ ฮาตี เลอ. 17 กาเญา กือนา มือนีงัย บูวัจ ตูโรจ กะ โกะ ซือมียา นู บาวา กาเญา ซาเบะ กูญา ฌาดี ซือมียา ฌาฆา บือบือลา ฮาตี นะ กาเญา นู นะ ฆาโดฮ มือญาเระ ลาฆู บือกรือฌา นะ กูญา กะ ตูฮัด. ดัฮ กาเญา บูวัจ ตูโรจ กะฆีเตอ กูญา นะ บือเลฮ บือกรือฌา ฌางัน ลาฆู ซูกา-ฮาตี บูกัด ฌางัน ลาฆู ซูซัฮ-ฮาตี นู นะ เตด ฌาดี ลาฆู ตูโลก กาเญา ลาลู เลอ. 18 กือนา บือซาโวจ ปี ซือรูโลยํ บีดา กามี กรานา กามี ตือตู ดัฮ จะ ฮาตี นะ กามี ฮอย ซาลัฮ นามา โปด บือคานะ นู นะ บูวัจ บรี กือนา ลาฆู ราตา ฌือแนฮ. 19 กู มีตา กือมัซๆ เดะ กาเญา บรี บือซาโวจ กะฆีเตอ บีดา กู นะ บือเลฮ ปาเระ มาแรฮ ดูโดะ ฌางัน กาเญา งัจบางัจ เลอ. 20 กู บือซาโวจ มีตา เดะ ตูฮัด บือซัยํ เดะ อาตัซ ตูฮัด นู บรี โกะ ซือมียา ดูโดะ ซือนัง ซือลามัจ. ญา เลอ นู บือเลฮ บาวา เยซู ตูฮัด นะ กีตา บรี ฮีโดะ ปาเระ เดะ มาตี ดัฮ. นู เยซู มาตี ดารัฮ มือนีเลฮ บีดา นะ บูวัจ บรี ปือมือเลา บือปาคัจ นู ซือลาลู ฌาดี ตือตู ดัฮ กะฆีเตอ เลอ ญา ฌาดี ซือมียา บือบือลา กาเมก นู บาฌิ ซูโงฮ. 21 กู มีตา เดะ ตูฮัด นู อีตู เลอ นะ บูวัจ บรี กาเญา อาดา ลาฆู นู บาฌิ ซือมูฮา บีดา กาเญา นะ บือเลฮ บูวัจ ตูโรจ กะ ฮาตี นะ ญา. มีตา บรี ญา บือกรือฌา เดะ ฮาตี กีตา ลาฆู นู ซูกา เดะ ฮาตี นะ ญา กรานา เยซู คริด เลอ. บรี โกะ ซือมียา ปูฌี มือโอจ กะ เยซู ปี ซือมาญัก-รอจ เลอ. อาเมน. 22 โกะ ดีบราดี นะ กู เออ กู มีตา เดะ กาเญา บรี ตาฮัด มือนีงัย กะ ลาฆู ปือมือเลา อูจะ ปรีงัจ อีนี ซาเบะ กู บือเลฮ ฆาแรฮ ซูรัจ กีเรบ บรี กะ กาเญา ฌาดี ซูรัจ ปานะๆ เลอ. 23 กู นะ บรี กาเญา ตาฮู ฌูฆา จะ กูญา บือเลฮ ปลือปัซ ทิโมที อาดี เดะ กีตา บรี ตรือเบะ เดะ ปือฌารา ดัฮ. กะ ญา มาแรฮ กือตะ กู นะ บาวา ญา ปี บือดาปัจ ฌางัน กาเญา บือซามา. 24 กู กีเรบ บรีงัจ กะ โกะ กือปาลา นะ กาเญา ฌางัน โกะ ซือมียา นะ ตูฮัด ซือมูฮา. โกะ ลูมอฮ ดีบราดี นู มาแรฮ ดาตัก เดะ นังฆรี อิตาลี โปด กูญา กีเรบ บรีงัจ กะ กาเญา ฌูฆา. 25 มีตา บรี ตูฮัด นะ บรี ซือลามัจ กะ กาเญา ซือมูฮา เลอ.
1 กู ยากอบ นู ฌาดี ปราโซฮ นะ ตูฮัด บือซัยํ เดะ อาตัซ ฌางัน เยซู คริด เตอ กู กีเรบ บรีงัจ กะ ลูมอฮ ซือมียา นะ ตูฮัด ซือมูฮา นู กือจัย ปี ราตาๆ ดัฮ. 2 โอ อาดี-บราดี นะ กู ซือมูฮา เออ วะตู กาเญา กือนา ลาฆู ซูซัฮ บาญะ ฌือแนฮ เตอ บรี กาเญา อีงัจ จะ ฌาดี ลาฆู ซูกา-ฮาตี ซูโงฮ ดัฮ เลอ. 3 กรานา กาเญา ตาฮู จะ ลาฆู ซูซัฮ อีตู ญา ลกลีฮัจ จะ กาเญา ปือจายา กือฌะ-กือมัซ ดัฮ เฆอ. กะฆีเตอ ญา นะ บูวัจ บรี กาเญา ตาฮัด-ฮาตี บือเลฮ. 4 กะฆีเตอ บรี กาเญา ตาฮัด-ฮาตี บรี ปือนอฮ ฮอย เตด บรูบัฮ ลาลู. กะฆีเตอ ฮาตี นะ กาเญา นะ ฆือนะ ปือนอฮ บาฌิ ดัฮ ฮอย เตด กูรัก นามา โปด. 5 กะ ซือมียา ดีฮา เดะ ลูมอฮ กาเญา ฮอย อากัน เตอ บรี ญา มีตา เดะ ตูฮัด เดะ อาตัซ เลอ. กะฆีเตอ ตูฮัด นะ บรี ญา อาดา อากัน. กรานา ตูฮัด เตอ ญา ฮาลัย บรี กะ ซือมียา ซือมูฮา เตด อูจะ นามา ลาลู. 6 ตาปี ซือมียา นู มีตา เตอ บรี ญา มีตา ฌางัน ฮาตี ปือจายา ฮอย เตด บรีงัจ ปี มาแรฮ. ซาเบะ-จะ ซือมียา นู บรีงัจ กะฆีเตอ ญา ซือรูปา อูมะ เดะ ลาโวจ นู อาเงน ตีโยะ ปี มาแรฮ เลอ. 7 ซือมียา กะฆีเตอ ฌางัน บรี ญา อีงัจ จะ นะ บือเลฮ นามา เดะ ตูฮัด เลอ. 8 ซือมียา อีตู เตอ ฮาตี นะ ญา บือดูวา เลอ ญา เตด ตือตู จะ นะ ปี ฌาลัด โซะ ดีฮา. 9 โซะ ดีบราดี นู ฮาฌะ ซูโงฮ เตอ บรี ญา งันตืองัน เลอ นู ตูฮัด นะ อาเกะ ญา บรี ตีงี ดัฮ. 10 โซะ ซือมียา นู กายา เตอ บรี ญา งันตืองัน เดะ ลาฆู นู ตูฮัด นะ บูวัจ บรี ญา รือนัฮ ดัฮ. กรานา ญา เตอ นะ ลือแงะ ปี ดัฮ ซือรูปา บูงา รูโปจ. 11 วะตู มาตาอารี ญาแญะ ตีงี ญา นะ ฮางัจ โตระ เลอ บูวัจ บรี รูโปจ ลายู ตูโฮยํ บูงา รูโปจ โปด ฆูรก. นู บูงา อีตู ญา บือฆาจะ เตอ ลือแงะ ฮาบิฮ ปี ดัฮ. อูรัก กายา โปด ญา นะ บือนาซา ฮาบิฮ กะฆีเตอ ฌูฆา ตืองัฮ ญา อาดา บือกรือฌา โกะ ปือบูวัจ นะ ญา เลอ. 12 ซือนัง ซือลามัจ เลอ ซือมียา นู กือนา ลาฆู ซูซัฮ ตาปี ญา ตาฮัด บือเลฮ. วะตู ลีฮัจ ดัฮ จะ นู ญา ตาฮัด บือเลฮ ดัฮ ญา นะ ซาโมจ ลาฆู ฮีโดะ ซูโงฮ นู ซือลาลู ฌาดี ซือรูปา จูบุก บือซรี นู ตูฮัด บือฌาญี ดัฮ นะ บรี กะ ลูมอฮ ซือมียา นู ซายัก กะ ญา. 13 วะตู ซือมียา กือนา ลาฆู ซูซัฮ บาอาฌะ ญา บรี บูวัจ ดูซา ฌางัน บรี ญา มือเลา จะ ตูฮัด เลอ นู บาอาฌะ ญา. กรานา ตูฮัด เดะ อาตัซ เตอ ญา นะ กือนา บาอาฌะ บรี บูวัจ ฌาฮัจ เตด บือเลฮ เลอ. ญา โปด เตด บาอาฌะ ซาปา บรี บูวัจ ดูซา. 14 นู ซือมียา กือนา บาอาฌะ กะฆีนี เตอ กรานา กูญา ซิกมาซิก ฆาละ นะ บูวัจ นู ฌาฮัจ. กะฆีเตอ ซือรูปา อีกัด นู มากัด อูปัด ลือกัจ เดะ มาตา กาเยน กือนา รีฆะ ดัฮ กูญา โปด นะ กือนา รีฆะ กะฆีเตอ ฌูฆา. 15 นู กูญา ฆาละ นะ บูวัจ นู ฌาฮัจ เตอ ซือรูปา ดูซา อาดา ดาลับ โปรจ ดัฮ. ลือปัซ เดะ โปรจ ฌาดี ลาฆู บูวัจ ดูซา ดัฮ เลอ. วะตู ดูซา อีตู บือซัยํ ดัฮ ญา บือฌาดี ลาฆู มาตี ปูลัก. 16 อาดี-บราดี นู กู ซายัก เออ ฌางัน ซือซัจ เลอ. 17 บือนา บารัก นู บาฌิ แนฮ-ฌือแนฮ ดาตัก เดะ โซะ อาตัซ. ตูฮัด เตอ เลอ ญา ฮาลัย บรี ซือมูฮา. บือนา อีตู ตูโรด มาแรฮ ดาตัก เดะ อาโปก เดะ อาตัซ. ญา เตอ นู บือฌาดี โกะ ตือปัจ จรัฮ เดะ อาตัซ ซือมูฮา. ตูฮัด อาดา กะฮามี เตอ ญา อาดา กะฆีเตอ เลอ. ญา เตด บรูบัฮ ดัฮ. ญา เตด อาเลฮ บูวัจ บายัก นู กือลับ เลอ. 18 ตูโรจ กะ ฮาตี นะ ญา ตะอาซิก ตูฮัด ญา ซูโรฮ ปือมือเลา นู ซูโงฮ บีดา นะ บือฌาดี กีตา นะ บรี กีตา ซือรูปา บูวัฮ นู ลามูลา เดะ โกะ บือนา บารัก นู ญา บือฌาดี ดัฮ ซือมูฮา. 19 อาดี-บราดี นู กู ซายัก เออ บรี กาเญา ตาฮู ลาฆู กะฆีนี. บรี ราตา ซือมียา มือนีงัย งัจบางัจ ตาปี ลามัจ นะ มือเลา ลามัจ นะ มูซัยํ เลอ. 20 กรานา นู ซือมียา นะ มูซัยํ เตอ เตด บูวัจ บรี อาดา ลาฆู นู บาฌิ ตูโรจ กะ ฮาตี นะ ตูฮัด. 21 กะฆีเตอ กือนา ตีงัน บูวัก เลอ ลาฆู นู ตะอารัฮ ลาฆู เตด บือฆูนา ซือมูฮา. กือนา มือนูโนะ-ฮาตี ซาโมจ ปือมือเลา นู ตูฮัด ตานัม เดะ ฮาตี นะ กาเญา ดัฮ. ปือมือเลา อีตู เลอ นู นะ บือเลฮ ตูโลก กาเญา บรี ฮีโดะ ลือปัซ บาฌิ. 22 กาเญา ฌางัน ตีปู ญาวา ตะอาซิก. ฌางัน ซือมาตา มือนีงัย กะ ปือมือเลา นะ ตูฮัด ตาปี กือนา บูวัจ ตูโรจ ฌูฆา. 23 กรานา-จะ ดัฮ ซือมียา ดีฮา มือนีงัย กะ ปือมือเลา นะ ตูฮัด ตาปี เตด บูวัจ ตูโรจ ญา เตอ ซือรูปา ซือมียา นู ลีฮัจ มูคา นะ ตะอาซิก เดะ จรือเมน. 24 ซูดัฮ ลีฮัจ บรี บาฌิ ญา โปด ปี ดัฮ. ดัดดัด ญา ลูปา จะ มูคา นะ ญา ฌาดี กะฮามี. 25 ปือมือเลา นะ ตูฮัด อีตู ฌาดี ปือมือเลา ฮูโกบ นู ปือนอฮ บาฌิ นู บูวัจ บรี ซือมียา ลือปัซ ดัฮ. กะฆีเตอ ซือมียา ดีฮา นู ลีฮัจ บรี บาฌิ เดะ ปือมือเลา ฮูโกบ อีตู นู บือฮีมัจ เตด บราดู เตอ นู บูกัด ฌาดี ซือมียา ซัจ มือนีงัย ซัจ ลูปา ตาปี ญา ฌาดี ซือมียา บูวัจ ตูโรจ เตอ ซือมียา อีตู เลอ ตูฮัด นะ บรี กะ ญา ซือนัง ซือลามัจ เดะ โกะ ปือบูวัจ นะ ญา. 26 ดัฮ ซือมียา ดีฮา อีงัจ จะ อีซี ญา ฌาดี ซือมียา ตูเฮะ กะ ตูฮัด นะ ญา เตอ ตาปี ญา มือเลา เตด บือฮีมัจ ดูลู กะฆีเตอ ญา ตีปู ญาวา นะ ญา ตะอาซิก. นู ญา ตูเฮะ โปด เตด ฌาดี นามา เลอ. 27 ลาฆู ตูเฮะ นู ตูฮัด อาโปก เดะ อาตัซ ลีฮัจ จะ ฌาดี ลาฆู ตูเฮะ นู บาฌิ บูกัด ลาฆู ตูเฮะ นู ตะอารัฮ ฌาดี กะฆีนี เลอ. บรี ซือมียา ยอม บือบือลา โกะ นานะ นู ฮอย เอด ฮอย อาโปก เตอ ยอม บือบือลา โกะ นีบีนี ฌานา นู ฮาฌะ เตอ. บรี ซือมียา ตีเมา นะ บูวัจ ลาฆู นู ตะอารัฮ บือกะ ซือมียา โซะ ดือนียา บูวัจ เตอ. ซือมียา อีตู เลอ นู ตูเฮะ ซูโงฮ.
1 อาดี-บราดี นะ กู เออ นู กาเญา อาดา ปือจายา กะ เยซู คริด ตูฮัด นู บือซรี บือซายา นะ กีตา เตอ ซือมียา ดีฮา โปด ฌางัน นะ ซายัก บรัจ ลัฮ-บือลัฮ. 2 นะ ฌาดี กะฮามี? ดัฮ ซือมียา อาดา จีเจด มัซ อาดา กาเยด บือฆาจะ มาโซะ บือมุน นะ กาเญา เตอ อาดา ซือมียา ฮาฌะ ปากัย กาเยด จีแจะ มาโซะ ปี ซามา กาเญา นะ บูวัจ กะฮามี? 3 อูรัก กาเยด บือฆาจะ กาเญา นะ ซาโมจ บาฌิ เฆอ นะ มือเลา ฌางัน ญา จะ "บรี เกา มาโซะ ดูโดะ เดะ ตือปัจ นู บาฌิ อีนี เลอ." ตาปี นะ มือเลา ฌางัน ซือมียา ฮาฌะ จะ "เกา บือดีรี โตะ อีตู เลอ." เฆอ จะ "เกา ดูโดะ โซะ กากี นะ กู เลอ." 4 ดัฮ กาเญา บูวัจ กะฆีเตอ กาเญา ปีเลฮ มูคา ดัฮ ฌาดี ซือมียา นู กรัจ ฮูโกบ ตูโรจ กะ ฮาตี นู ฌาฮัจ นะ กาเญา. 5 อาดี-บราดี นู กู ซายัก เออ มือนีงัย เลอ. ตูฮัด เดะ อาตัซ บือเลฮ ปีเลฮ โกะ ซือมียา นู ฮาฌะ โซะ ดือนียา บูกัด เฆอ? ญา ปีเลฮ กูญา บรี ฌาดี ซือมียา กายา โซะ ฮาตี กรานา กูญา ปือจายา ดัฮ. กูญา เตอ นะ ซาโมจ ปือซากา ฌาดี ลูมอฮ ซือมียา นู อาดา ตูฮัด ฌาดี ราฌา บือกะ ตูฮัด บือเลฮ บือฌาญี นะ บรี กะ ลูมอฮ ซือมียา นู ซายัก กะ ญา. 6 ตาปี โซะ กาเญา เลอ กาเญา มือฌัฮ กะ โกะ ซือมียา ฮาฌะ ดัฮ. ตาปี ซาปา เลอ นู ปรือกัด กาเญา_ นู บาวา กาเญา บือปี กะ ซัน? ฌาดี อูรัก กายา บูกัด เฆอ? 7 ญา เตอ นู มือเลา ตะอารัฮ กะ นามา นู บาฌิ นู กาเญา ซาโมจ เดะ ตูฮัด ดัฮ บูกัด เฆอ? 8 เดะ ซูรัจ ปือมือเลา นะ ตูฮัด อาดา ปือมือเลา ฮูโกบ บือกะ ฮูโกบ นะ ราฌา นู จะ "เกา กือนา ซายัก กะ กาวัด ซือรูปา ซายัก กะ ญาวา ตะอาซิก." ดัฮ กาเญา ตูโรจ ฮูโกบ อีนี รือมัก ดัฮ กาเญา บูวัจ บาฌิ ดัฮ เลอ. 9 ตาปี ดัฮ กาเญา ซายัก บรัจ ลัฮ-บือลัฮ เตอ กาเญา บูวัจ ดูซา ดัฮ. ปือมือเลา ฮูโกบ นะ ตูฮัด โปด บรี ลีฮัจ จะ กาเญา ฌาดี อูรัก ซาลัฮ ดัฮ. 10 ดัฮ ซือมียา ดีฮา ตูโรจ กะ ปือมือเลา ฮูโกบ ซือมูฮา รือมัก ดัฮ เตอ ตาปี ญา บูวัจ ซาลัฮ ซา ตือนอซ ซือมียา อีตู ญา ซาลัฮ เดะ ปือมือเลา ฮูโกบ ซือมูฮา เลอ. 11 ซาเบะ ตูฮัด นู มือเลา จะ "ฌางัน บือกาเซฮ เลอ" ญา โปด มือเลา ปูลัก จะ "ฌางัน บูนอฮ ซือมียา เลอ". กะฆีเตอ ดัฮ กาเญา เตด บูวัจ ลาฆู บือกาเซฮ เตอ ตาปี บูนอฮ ซือมียา ดัฮ กาเญา ฌาดี อูรัก ซาลัฮ เดะ ฮูโกบ ฌูฆา เลอ. 12 กาเญา กือนา มือเลา กือนา บูวัจ ฌูฆา ฌาดี ซือมียา นู นะ กือนา กรัจ ฮูโกบ ตูโรจ บือกะ ปือมือเลา ฮูโกบ นะ ตูฮัด นู นะ บรี ซือมียา ลือปัซ เตอ. 13 ซือมียา นู เตด ตือจีฮัด กะ กาวัด ตูฮัด นะ กรัจ ฮูโกบ ญา ฮอย เตด ตือจีฮัด เลอ. ตาปี ซือมียา นู ตือจีฮัด กะ กาวัด ญา นะ บือเลฮ ฌือนัฮ เดะ อารี กรัจ ฮูโกบ. 14 อาดี-บราดี นะ กู เออ กะ ซือมียา ดีฮา มือเลา จะ "ปือจายา ดัฮ" ตาปี ญา เตด บูวัจ ตูโรจ เตอ ญา นะ อูโตก กะฮามี เลอ? ลาฆู ปือจายา กะฆีเตอ นะ ตูโลก ญา บรี ฮีโดะ ลือปัซ บาฌิ บือเลฮ เฆอ? เตด โบะ. 15 ดัฮ-จะ อาดี-บราดี ซือมียา ดีฮา ฮอย กาเยด นะ ปากัย ฮอย บารัก นะ มากัด 16 บารู อาดา ซืออูรัก เดะ ลูมอฮ กาเญา มือเลา ฌางัน กูญา จะ "เกา ปี ซือนัง ซือลามัจ เลอ. บรี ดูโดะ ซือนัง มากัด กือญัง เลอ." ตาปี เตด ฮาฆิ บือนา บารัก นู กูญา บือคานะ เตอ นู บูวัจ กะฆีเตอ นะ อูโตก กะฮามี เลอ? 17 ฌาดี กะฆีเตอ ฌูฆา เลอ ดัฮ กาเญา อาดา ปือจายา ซา ลาฆู ตาปี ฮอย เตด บูวัจ ตูโรจ เตอ ฌาดี ลาฆู ปือจายา นู ฮอย เตด ฌาดี นามา บือกะ ญา มาตี ดัฮ เลอ. 18 อาดา ซือมียา ซืออูรัก นะ มือเลา จะ "นู ซืออูรัก ญา ปือจายา นู ซืออูรัก ญา บูวัจ ตูโรจ." กือนา บรี กู ลีฮัจ จะ นู เกา ปือจายา ตาปี ฮอย เตด บูวัจ ตูโรจ ฌาดี กะฮามี. ตาปี โซะ กู นี นู กู ปือจายา เตอ เกา นะ บือเลฮ ลีฮัจ เดะ ลาฆู บูวัจ ตูโรจ นะ กู เลอ. 19 เกา ปือจายา จะ ตูฮัด อาดา แนฮ ซา. โบะ บาฌิ ดัฮ เลอ. โกะ ลูมอฮ ฮาตู โปด กูญา ปือจายา กะฆีเตอ ตาปี กูญา ตาโกจ ยู ญาวา กือตัยํ. 20 ซือมียา บูดอ เออ เกา นะ บรี กู มือญาเระ บรี เกา ลีฮัจ เฆอ จะ นู เกา ปือจายา ตาปี เตด บูวัจ ตูโรจ เตอ ญา เตด ฌาดี นามา เลอ. 21 บรีงัจ ลีฮัจ เลอ. อับราฮัม นู บีลาแก นะ กีตา กาลา นูตู ญา บือเลฮ อาเกะ อีซัก นานะ นะ ญา บีดา นะ มือญือมัฮ กะ ตูฮัด เดะ อาตัซ ตือปัจ ตูนู บารัก มือนืองะ อีตู. กะฆีเตอ เลอ ญา ฌาดี ซือมียา บาฌิ-ตือปัจ ฌางัน ตูฮัด ดัฮ กรานา ญา บูวัจ ตูโรจ บูกัด เฆอ? 22 กาเญา ฆาโดฮ ลีฮัจ จะ อับราฮัม เตอ ญา ปือจายา ญา บูวัจ ตูโรจ ซามา. โกะ ปือบูวัจ นะ ญา บูวัจ บรี ญา ปือจายา ปือนอฮ เดะ ฮาตี. 23 กะฆีเตอ รือมัก ดัฮ เลอ ตือนอซ ซูรัจ ปือมือเลา นะ ตูฮัด นู จะ "อับราฮัม ปือจายา กะ ตูฮัด เดะ อาตัซ ดัฮ. ซาเบะ กะฆีเตอ เลอ ตูฮัด บือเลฮ กีรา ดัฮ จะ ญา ฌาดี ซือมียา บาฌิ-ตือปัจ." กะฆีเตอ อับราฮัม บือเลฮ ปือนามา จะ "ซาบัจ นะ ตูฮัด." 24 กาเญา ลีฮัจ จะ ซือมียา นะ กือนา กีรา จะ ฌาดี ซือมียา บาฌิ-ตือปัจ ดัฮ กรานา ญา บูวัจ ตูโรจ เลอ บูกัด กรานา ซา ลาฆู ญา ปือจายา. 25 ซือรูปา กะฆีเตอ ราฮับ นีบีนี ฌาลัก เตอ ญา บือเลฮ ซาโมจ โกะ ปือญูโรฮ นะ ลูมอฮ อิซราเอน ญา อาตัจ กูญา ปี เดะ ฌาลัด อาซิก ปูลัก. กะฆีเตอ ญา โปด ฌูฆา กือนา กีรา จะ ฌาดี ซือมียา บาฌิ-ตือปัจ กรานา โกะ ปือบูวัจ นะ ญา บูกัด เฆอ? 26 กะ ญาวา ฮอย ซือมืองัจ ญา มาตี ดัฮ. กะฆีเตอ ฌูฆา ลาฆู ปือจายา นู เตด บูวัจ ตูโรจ เตอ ญา มาตี ฌูฆา ดัฮ.
1 อาดี-บราดี นะ กู เออ ฌางัน บรี กาเญา ฌาดี ซือมียา อาฌัยํ บาญะ อูรัก เลอ. กรานา ตาฮู จะ กามี นู ฌาดี ซือมียา อาฌัยํ เตอ นะ กือนา กรัจ ฮูโกบ ลือเบฮ เดะ กาวัด. 2 กรานา กีตา ซือมูฮา บียาซา บูวัจ ซาลัฮ บาญะ ลาฆู. กะ ซือมียา ดีฮา ฮอย ซาลัฮ เดะ ปือมือเลา นะ ญา เตอ ซือมียา อีตู ญา ฌาดี ซือมียา ปือนอฮ บาฌิ ดัฮ นู นะ บือเลฮ ฮูโกบ ญาวา ตะอาซิก ซือมูฮา เลอ. 3 กีตา บอฮ ตาลี เดะ มูโลจ กูดา บรี ญา มือนีงัย ตูโรจ กะ กีตา. กะฆีเตอ กีตา นะ บูวัจ บรี ญาวา นะ กูดา อีตู ลีเกาะ ปี โซะ ดีฮา โปด บือเลฮ. 4 บรีงัจ ลีฮัจ เลอ โกะ กาปัน เฆอ-จะ โกะ ซาโฆยํ บือซัยํ เตอ ญา บลายัยํ มือนูโรจ อาเงน ตือฆัยํ. ตาปี มีเซ-จะ กือมูดี ญา ดือมิ-ตอจ ซือมียา ปือฆัก กือมูดี อีตู ญา นะ บูวัจ บรี กาปัน ลีเกาะ ปี ตูโรจ กะ ฮาตี นะ ญา. 5 กะฆีเตอ ลีดัฮ โปด มีเซ ญา ฌาดี กลือกะ นู ดือมิ ตาปี ญา มือเลา มือโอจ มือเลา บือซัยํ. ลีฮัจ เลอ ฮูตัด บือซัยํ เตอ กือนา ปรือติก อาปี ปือลัฮ ฮาบิฮ ดัฮ เลอ. 6 ลีดัฮ โปด ญา ซือรูปา อาปี. ญา ฌาดี บือกะ ลาฆู ฌาฮัจ ดูโดะ เดะ ดาลับ ญาวา กีตา. ญา บูวัจ บรี ญาวา กีตา ตะอารัฮ ฮาปา บูวัจ บรี ญาวา กีตา ปือลัฮ ฮางอซ ฌางัน อาปี นู ปลือกัจ มาแรฮ ดาตัก เดะ นอรากา. 7 โกะ บือนาตัก ราตา มาจับ โกะ บูโรก โกะ บือนาตัก มือรากะ เตอ โกะ บือนาตัก เดะ อาเย โปด ลูมอฮ อีนี ซือมูฮา ซือมียา นะ อาฌัยํ บรี ฌีนะ บือเลฮ. ตะเดะ ดูลู เตอ โกะ ซือมียา ดือละ อาฌัยํ โกะ บือนาตัก บรี ฌีนะ กะฆีเตอ ดัฮ. 8 ตาปี ลีดัฮ เตอ ฮอย ซือมียา ดีฮา นู นะ อาฌัยํ บรี ฌีนะ บือเลฮ. ลีดัฮ ญา ฌาดี บือนา บารัก นู ฌาฮัจ ฮอย เตด ตาฮู ดูโดะ ซืองะ. ญา เตอ ซือรูปา อาเย บีซา นู บูวัจ บรี ซือมียา มาตี. 9 ลีดัฮ อีตู เตอ ซัจ กีตา ซูโรฮ มือเลา บรี ซือลามัจ กะ ตูฮัด นู อาโปก เดะ อาตัซ ซัจ มือเลา ซูปัฮ อาโบยํ โกะ ซือมียา นู ตูฮัด บือเลฮ บือฌาดี ดัฮ บรี ซือรูปา รูปา นะ ญา. 10 มูโลจ ซา อีตู ญา มือเลา ดูวา มาจับ ปือมือเลา นู บรี ซือลามัจ ฌางัน ปือมือเลา ซูปัฮ อาโบยํ. อาดี-บราดี นะ กู เออ เตด บือฆูนา นะ บูวัจ ลาฆู อีนี เลอ. 11 มาตา อาเย นะ ตรือเบะ อาเย ตาวัยํ ฌางัน อาเย มาเซด ซา ราวัก บือเลฮ เฆอ? 12 อาดี-บราดี นะ กู เออ ปูโฮด กรายา-บูดี นะ ตรือเบะ บูวัฮ กือดูโนด บือเลฮ เฆอ? ปูโฮด อางุน นะ ตรือเบะ บูวัฮ กรายา-บูดี บือเลฮ เฆอ? กะฆีเตอ ฌูฆา มาตา อาเย นะ ตรือเบะ อาเย มาเซด ฌางัน อาเย ตาวัยํ มาซามา เตด บือเลฮ เลอ. 13 เดะ ลูมอฮ กาเญา อาดา ซาปา นู ปานัย อากัน นู บือเลฮ ตาฮู ลาฆู บาฌิ เฆอ? บรี ซือมียา อีตู บูวัจ ตูโรจ กะ ลาฆู นู บาฌิ. กะฆีเตอ โกะ ปือบูวัจ นะ ญา นะ บรี ลีฮัจ จะ ญา ปานัย อากัน ฮาตี บือแฌะ เลอ. 14 ตาปี ดัฮ กาเญา อาดา ฮาตี กรัซ ดือกี กะ กาวัด ซูกา นะ บือซัยํ เดะ กาวัด เตอ ฌางัน บือตืองัน ฌางัน มือเลา มืออูปัย ปาซัน ลาฆู นู ซูโงฮ เลอ. 15 ลาฆู นู อาดา อากัน กะฆีนี ฮอย เตด มาแรฮ เดะ โซะ อาตัซ ลาแงะ ตาปี ฌาดี ลาฆู โซะ ดือนียา ลาฆู นู ฮอย ซือมืองัจ นะ ตูฮัด เตอ ฌาดี ลาฆู นู ดาตัก เดะ ฮาตู ซีตัด เลอ. 16 เตด-จะ ตือปัจ ดีฮา นู อาดา ลาฆู ดือกี ซูกา นะ บือซัยํ เดะ กาวัด เตอ ตือปัจ อีตู อาดา ลาฆู จาเจา ลาฆู ฮอย เตด บือฆูนา ราตา. 17 ตาปี ซือมียา นู อาดา อากัน ดาตัก เดะ โซะ อาตัซ ลาแงะ เตอ ลามูลา ญา ฮาตี จรัฮ บาฌิ ลือปัซ อีตู ญา บูวัจ บรี ดูโดะ ซือนัง บือซามา ญา ฮาตี บือแฌะ เตอ ฌาดี ซือมียา นู กือนา อูจะ กะ ญา ญา โปด เตด ลาวัด เลอ. ญา อาดา ฮาตี ตือจีฮัด บูวัจ บาฌิ กะ กาวัด ซือรูปา ฌาดี ปูโฮด กายู นู บือตรือเบะ บูวัฮ นู บาฌิ. ญา ฮอย เตด ซายัก บรัจ ลัฮ-บือลัฮ เตอ เตด ฌาดี ซือมียา มูคา มาเนฮ ฮาตี ฌาฮัจ เลอ. 18 ซือมียา กะฆีนี นู บูวัจ บรี ดูโดะ ซือนัง บือซามา เตอ ซือรูปา กูญา ตานัม ลาฆู นู ซือนัง ซือลามัจ บือกะ ฌาดี บีฌี นู นะ บือตูโมฮ บือตรือเบะ บูวัฮ บาญะ ฌาดี ลาฆู นู รือมัก บาฌิ เลอ.
1 ปาซัน นามา บูวัจ บรี กาเญา อาดา บลาวัด อาดา บือตือฆัฮ บือซามา-ซามา? ซาเบะ ฮาตี นะ กาเญา ฆาละ นะ บรามัย บูวัจ บรี อาดา ซือรูปา ลาฆู บือปรัก เดะ กลือกะ ญาวา นะ กาเญา บูกัด เฆอ? 2 กาเญา ฆาละ นะ บือเลฮ ตาปี ฮอย เตด บือเลฮ. กาเญา บูนอฮ กาวัด ฌางัน ฮาตี บือดือกี-ดือกี ตาปี เตด บือเลฮ นามา เลอ. กาเญา บือตือฆัฮ บลาวัด บือซามา-ซามา ตาปี เตด บือเลฮ ซาเบะ กาเญา เตด มีตา เดะ ตูฮัด. 3 มีเซ-จะ มีตา โปด ตาปี กาเญา เตด ซาโมจ นามา ซาเบะ กาเญา มีตา ซาลัฮ อีงัจ นะ ตูโรจ กะ ฮาตี นะ กาเญา นู ฆาละ นะ บรามัย. 4 โอ ลูมอฮ ซือมียา บือกาเซฮ เออ กาเญา เตด ตาฮู เฆอ? ซือมียา นู ฌาดี กาวัด โซะ ดือนียา เตอ ญา นะ ฌาดี ซือตรู นะ ตูฮัด. กะฆีเตอ ซือมียา ดีฮา นู อาดา ฮาตี นะ ฌาดี กาวัด โซะ ดือนียา ญา เตอ ฌาดี ซือตรู นะ ตูฮัด ดัฮ เลอ. 5 กาเญา กีรา จะ ซูรัจ ปือมือเลา นะ ตูฮัด มือเลา เตด ฌาดี นามา เฆอ นู จะ "ตูฮัด เตอ ญา บรีงัจ บาญะ กะ ซือมืองัจ อีตู นู ญา บูวัจ บรี ดูโดะ เดะ ฮาตี กีตา." 6 ตาปี ตูฮัด เตอ ญา นะ ฮาลัย บรี ซือลามัจ กะ กีตา บรี บือตามัฮ บาญะ เลอ. กะฆีเตอ อาดา เดะ ซูรัจ ปือมือเลา นะ ตูฮัด นู จะ "ตูฮัด เดะ อาตัซ ญา บลาวัด ฌางัน ซือมียา นู อาดา ฮาตี งันตืองัน ตาปี ญา ฮาลัย บรี ซือลามัจ กะ ซือมียา นู ฮาตี มือนูโนะ." ญา จะ. 7 กะฆีเตอ บรี กาเญา มือนูโนะ-ฮาตี บูวัจ ตูโรจ กะ ตูฮัด เลอ. บลาวัด เลอ ฌางัน กือปาลา ฮาตู ซีตัด บรี กะ ญา ลารี เดะ กาเญา. 8 กาเญา กือนา มาโซะ ดาปิก ตูฮัด เลอ ตูฮัด โปด นะ มาแรฮ ดาปิก กาเญา. อูรัก บือดูซา ซือมูฮา เออ กือนา บาโซฮ ตางัน นะ กาเญา บรี บาฌิ เลอ. โอ อูรัก ฮาตี บือดูวา เออ กือนา บาโซฮ ฮาตี นะ กาเญา บรี จรัฮ บาฌิ เลอ. 9 กือนา บาฮาตี บรี ซูโงฮ มือนาแงฮ บือปาโตด เลอ. บรี ลาฆู บือฆือละ นะ กาเญา ซาเลด ฌาดี ลาฆู บาฮาตี. บรี ลาฆู ซูกา-ฮาตี ฌาดี ลาฆู ฌาโวฮ-ฮาตี เลอ. 10 บรี กาเญา มือนูโนะ-ฮาตี ซูโงฮ โซะ ฮึลด ตูฮัด เดะ อาตัซ. กะฆีเตอ ญา โปด นะ อาเกะ ฌูโญก กาเญา. 11 เออ อาดี-บราดี ซือมูฮา ฌางัน มือเลา มืออูปัจ บือซามา-ซามา เลอ. ซือมียา นู มืออูปัจ กาวัด นู กรัจ ฮูโกบ กาวัด นะ ญา เตอ ซือรูปา ญา มือเลา มืออูปัจ กะ ปือมือเลา ฮูโกบ นะ ตูฮัด ซือรูปา อีซี ญา กรัจ ฮูโกบ ปือมือเลา ฮูโกบ อีตู เลอ. ตาปี กะ เกา กรัจ ฮูโกบ ตูโรจ บือกะ ปือมือเลา ฮูโกบ นะ ตูฮัด กะฆีเตอ ซือรูปา เกา บูกัด ซือมียา ตูโรจ ฮูโกบ อีตู ตาปี ฌาดี ซือมียา กรัจ ฮูโกบ ดัฮ. 12 อาดา ตูฮัด แนฮ ซา ญา เตอ นู บือเลฮ ตืองะ ปือมือเลา ฮูโกบ อีตู ญา เลอ ฌาดี ตูฮัด นู กรัจ ฮูโกบ. ญา ตูโลก บรี ฮีโดะ ลือปัซ บาฌิ ญา บูวัจ บรี บือนาซา ฌูฆา เลอ. กะฆีเตอ เกา ฌาดี ซาปา นู นะ กรัจ ฮูโกบ กาวัด นะ เกา? 13 มือนีงัย เลอ กาเญา นู มือเลา จะ "อารี อีนี เฆอ-จะ มัฮปาฆี โปด กามี นะ ปี กะ ตูโปะ อีตู เตอ นะ ดูโดะ โซะ อีตู ซือตาโฮด นะ บือกรือฌา นะ บือลี นะ ฌูวัน ซารี อูโตก กะฆีเตอ เลอ." 14 ตาปี กาเญา เตด ตาฮู จะ มัฮปาฆี นะ ฌาดี กะฮามี ญาวา นะ กาเญา โปด นะ ฌาดี กะฮามี. กาเญา ซือรูปา กะ กาโบจ เตอ ซัจ อาดา ซัจ ฮอย ดัฮ เลอ. 15 กาเญา เตด บือฆูนา นะ มือเลา กะฆีเตอ ตาปี ฆาโดฮ มือเลา จะ "ดัฮ ตูฮัด ซูกา-ฮาตี เตอ กามี นะ ฮีโดะ นะ บือเลฮ บูวัจ ลาฆู อีนี ลาฆู อีตู." 16 ตาปี กาเญา มือเลา งันตืองัน มือโอจ กะ ญาวา ตะอาซิก เลอ. ลาฆู นู มือเลา งันตืองัน กะฆีเตอ ฌาดี ลาฆู ซาลัฮ ซือมูฮา. 17 กะฆีเตอ ซือมียา ดีฮา นู ตาฮู ลาฆู นู บาฌิ เตอ ตาปี ญา เตด บูวัจ ตูโรจ เตอ ซือมียา อีตู ฌาดี ซือมียา บือดูซา เลอ.
1 มือนีงัย เลอ กาเญา ซือมียา กายา เตอ บรี มือนาแงฮ บือปาโตด เลอ กรานา ลาฆู ซูซัฮ ฮาฌะ นู นะ มาแรฮ รอจ กะ กาเญา ดัฮ. 2 บือนา บารัก นู บรือฆา นะ กาเญา บูโระ ฮาบิฮ ดัฮ. กาเยด นะ กาเญา โปด นอยํ-อานอยํ มากัด ฮาบิฮ ดัฮ. 3 โกะ มัซ ปีระ นะ กาเญา ฮาบิฮ บือการัจ ดัฮ. นู การัจ อีตู เตอ นะ ฌาดี ซะซี นู อาดู ลาฆู นะ กาเญา. การัจ อีตู นะ มากัด ลูลู นะ กาเญา ซือรูปา กะ อาปี เลอ. กาเญา บือเลฮ ปือมุน ตาโรฮ โกะ บือนา บารัก บาญะ เดะ วะตู นู ปือญูดัฮ อีนี เลอ. 4 นี เลอ ฆาฌี นะ ซือมียา กือตับ ปาดี เดะ บือนัก นะ กาเญา นู กาเญา กีจอฮ ดัฮ เตอ ฆาฌี อีตู เลอ ญา บือซูระ อาดู กาเญา. นู ซือมียา กือตับ ปาดี บือซูระ เตอ รอจ กะ ตือลีงา นะ ตูฮัด นู มือฆัฮ ซูโงฮ ดัฮ. 5 กาเญา บียาซา ซูโรฮ ดูเวะ ราฮูรา มากัด บาฌิ ซือมาตา ซูกา กะ รามัย. กาเญา มากัด บาฌิ บรี ฮาตี ลือมัฮ นาตี อารี นู กือนา นะ บูนอฮ. 6 กาเญา บือเลฮ กรัจ ฮูโกบ บือเลฮ บูนอฮ ซือมียา บาฌิ-ตือปัจ ตาปี กูญา เตด บลาวัด เลอ. 7 กะฆีเตอ อาดี-บราดี เออ บรี กาเญา ตาฮัด-ฮาตี เลอ ตือดะ รอจ กะ อารี นู ตูฮัด นะ ปาเระ มาแรฮ. บรีงัจ ลีฮัจ ลาฆู นะ ซือมียา นู บือบือลา กือโบด. ญา กือนา ตูงู กือนา ตาฮัด-ฮาตี นาตี มูเซด ฮูฌัด นู ลามูลา มูเซด ฮูฌัด ปือญูดัฮ ปูลัก บีดา นะ บือเลฮ โกะ บูวัฮ นู บาฌิ เดะ กือโบด อีตู เลอ. 8 กาเญา กือนา ตาฮัด-ฮาตี กะฆีเตอ เลอ. บรี กาเญา ตือตู-ฮาตี เลอ ซาเบะ ซรือปะ กะ อารี นู ตูฮัด นะ มาแรฮ ปาเระ ดัฮ. 9 อาดี-บราดี เออ ฌางัน บือซูงุจ กะ กาวัด บือซามา เลอ บีดา กาเญา นะ เตด กือนา ฮูโกบ. นี เลอ ตูฮัด นู นะ กรัจ ฮูโกบ เตอ ญา อาดา เดะ โซะ ปีตู ดัฮ. 10 อาดี-บราดี เออ บรีงัจ ลีฮัจ เลอ ลาฆู นะ โกะ ซือมียา ตูโดฮ ลาฆู นะ ตูฮัด นู บือเลฮ มือญาเระ เดะ นามา นะ ตูฮัด. กูญา กือนา ซูซัฮ ปายัฮ ตาปี กูวาซา ตาฮัด-ฮาตี ลามา. กะฆีเตอ กูญา ฌาดี จูตอ บรี กะ กีตา นะ ตูโรจ. 11 นี เลอ กีตา กีรา จะ ลูมอฮ อีตู นู ตาฮัด-ฮาตี กูญา บือเลฮ ลาฆู ซือนัง ซือลามัจ ดัฮ. กาเญา บือเลฮ ดืองัยํ ลาฆู นะ โยบ ดัฮ นู ญา ตาฮัด-ฮาตี ซูโงฮ. กาเญา ตาฮู ฌูฆา จะ นู ตูฮัด บือเลฮ บูวัจ บรี ลาฆู นะ โยบ ซือลือซัย บาฌิ กะฮามี. ลาฆู กะฆีเตอ บรี ลีฮัจ จะ ตูฮัด เตอ ญา ฮาตี บาฌิ ซูโงฮ ตือจีฮัด กะ อูมัจ-ซือมียา กีตา เลอ. 12 อาดี-บราดี นะ กู เออ ลือเบฮ เดะ มานามา เตอ ฌางัน บรี กาเญา อาเกะ มือเลา บือซูปัฮ เลอ. เตด-จะ ลาฆู โซะ ลาแงะ ลาฆู โซะ ดือนียา ลาฆู อาซิก โปด ฌางัน นะ อาเมด มาแรฮ มือเลา บือซูปัฮ ลาลู เลอ. ดัฮ ซูโงฮ จะ "ซูโงฮ." ดัฮ บูกัด จะ "บูกัด." ฌางัน มือเลา ลือเบฮ ตาโกจ-จะ กาเญา นะ กือนา กรัจ ฮูโกบ เลอ. 13 เดะ ลูมอฮ กาเญา อาดา ซาปา กือนา ซูซัฮ ปายัฮ เฆอ? บรี ญา บือซาโวจ เลอ. อาดา ซาปา นู ซือนัง-ฮาตี เฆอ? บรี ญา มือญาญี ปูฌี กะ ตูฮัด. 14 เดะ ลูมอฮ กาเญา อาดา ซาปา นู เตด ซือนัง ญาวา เฆอ? บรี ญา บลาโลก โกะ ซือมียา บือบือลา ลูมอฮ นะ ตูฮัด มาแรฮ บรี กูญา นะ บือซาโวจ บีดา ญา อาเมด มีญะ ลือมัยํ ญาวา นะ ญา เดะ นามา นะ ตูฮัด. 15 นู กูญา บือซาโวจ ฌางัน ฮาตี ปือจายา เตอ นะ ตูโลก ซือมียา ซาเกะ บรี ลือฆา. ตูฮัด โปด นะ ตูโลก อาเกะ ญาวา ญา บรี ซือนัง ปูลัก. กะ ซือมียา อีตู บูวัจ ดูซา ดัฮ ตูฮัด นะ อาเกะ ดูซา นะ ญา บูวัก เลอ. 16 กะฆีเตอ บรี กาเญา ซาโงะ ดูซา บือซามา บรี บือซาโวจ บือซามา-ซามา บีดา กาเญา นะ ซือนัง บาฌิ ซือมูฮา. นู ซือมียา บาฌิ-ตือปัจ บือซาโวจ เตอ อาดา ปือมือฆัฮ เลอ นะ บูวัจ บรี ฌาดี ลาฆู บือซัยํ. 17 เอลียา เตอ ญา ฌาดี ซือมียา ซือรูปา บือกะ กีตา เลอ. ญา บือซาโวจ งูฆางู บรี ฮอย ฮูฌัด. กะฆีเตอ ตีฆา ตาโฮด นัม บูลัด ฮอย ฮูฌัด ลาลู เดะ นังฆรี. 18 กะฆีเตอ ญา บือซาโวจ ปูลัก บูวัจ บรี ฮูฌัด ตูโตฮ บาญะ บรี อาดา บูวัฮ แนฮ-ฌือแนฮ บือตูโมฮ เดะ ตานัฮ เลอ. 19 อาดี-บราดี นะ กู เออ เดะ ลูมอฮ กาเญา กาเลา-จะ อาดา ซือมียา ซือซัจ เดะ ลาฆู นู ซูโงฮ บารู อาดา ซือมียา อาซิก บูวัจ บรี ญา บราเลฮ-ฮาตี ปาเระ เตอ 20 บรี กะ ญา ตาฮู จะ ซือมียา นู บาวา อูรัก บือดูซา ปาเระ เดะ ฌาลัด นู ซือซัจ ซีงี เตอ ญา นะ ตูโลก ญาวา ซือมียา อีตู บรี ลือปัซ เดะ มาตี นะ บูวัจ บรี ดูซา บาญะ นะ ญา ตูโดก ดัฮ.
1 กู เปโตร ฌาดี ปือญูโรฮ นะ เยซู คริด. กู ฆาแรฮ ซูรัจ อีนี กีเรบ บรี กะ ลูมอฮ ซือมียา นู ตูฮัด ปีเลฮ ดัฮ นู ปือจัฮ-บือลัฮ ปี นูปัก ดูโดะ โซะ นังฆรี ปอนโตด โซะ นังฆรี ฆาลาเตีย โซะ นังฆรี กับปาโดเซีย โซะ นังฆรี เอเซีย ฌางัน นังฆรี บิทีเนีย. 2 นู กาเญา กือนา ปีเลฮ ดัฮ ญา ตูโรจ ลาฆู นู ตูฮัด อาโปก เดะ อาตัซ ญา บือกีรา ดูลู ดัฮ. ซือมืองัจ นะ ตูฮัด ญา บือเลฮ บาโซฮ กาเญา บรี จรัฮ บีดา กาเญา นะ มือนีงัย กะ เยซู คริด บีดา กาเญา นะ ซาโมจ ลาฆู ลือมัยํ ฌางัน ดารัฮ นะ เยซู ฌูฆา. มีตา เดะ ตูฮัด นะ บรี ซือลามัจ กะ กาเญา บือตามัฮ บาญะ บรี ดูโดะ ซือนัง ซือลามัจ บือตามัฮ บรี บาญะ ฌูฆา เลอ. 3 บรี ซือลามัจ เลอ กะ ตูฮัด เดะ อาตัซ นู ฌาดี อาโปก นะ เยซู คริด ตูฮัด นะ กีตา. ญา เลอ ตือจีฮัด บาญะ กะ กีตา ดัฮ บูวัจ บรี กีตา บือฌาดี บารู ดัฮ ซาเบะ เยซู คริด ญา ฮีโดะ ปาเระ เดะ มาตี ดัฮ. กะฆีเตอ กีตา อาดา ลาฆู ฮาระ กะ ตูฮัด นู ลาฆู ฮาระ อีตู ญา อาดา ซือลาลู เลอ. 4 กะฆีเตอ ฌูฆา กีตา นะ ซาโมจ ปือซากา นู ฮอย เตด บูโระ บูโซะ นู ฮอย ตือปัจ ตะอารัฮ นู ฮอย เตด ลายู มืองูรก. ปือซากา อีตู ตูฮัด ญา ซียะ ตาโรฮ เดะ โซะ อาตัซ ลาแงะ ดัฮ บีดา กาเญา. 5 กาเญา นู ปือจายา เลอ ตูฮัด ญา ฌาฆา กาเญา ฌางัน นู ปือมือฆัฮ นะ ญา. กะฆีเตอ กาเญา นะ รอจ กะ ลาฆู ฮีโดะ ลือปัซ บาฌิ นู ตูฮัด ซียะ ฆือนะ ดัฮ นะ อาเมด มาแรฮ ปลีฮัจ เดะ วะตู ปือญูดัฮ. 6 ซาเบะ ลาฆู อีตู ซือมูฮา กาเญา ซูกา-ฮาตี ซูโงฮ มีเซ-จะ วะตู อีนี กาเญา ฆาโดฮ ตาฮัด ซูซัฮ ซา วะตู เดะ ลาฆู ลกลีฮัจ ฌือแนฮๆ. 7 ลาฆู ปือจายา นะ กาเญา ญา อาดา รือฆา มาฮัน ลือเบฮ เดะ มัซ เลอ. โกะ มัซ อีตู เตอ ญา ฌาดี ซือบารัก นู นะ บือนาซา ปี ฮาบิฮ ตาปี มัซ โปด กือนา ลกลีฮัจ ฌางัน อาปี บรี ลีฮัจ จะ ฌาดี มัซ ซูโงฮ. กะฆีเตอ ฌูฆา นู กาเญา ตืองัฮ กือนา ลกลีฮัจ เตอ ญา มือญาซัจ บรี ลีฮัจ จะ ลาฆู ปือจายา นะ กาเญา ญา ฌาดี ลาฆู ซูโงฮ เลอ. กะฆีเตอ กาเญา นะ กือนา ปูฌี นะ บือซรี นะ บือซัยํ มูคา เดะ วะตู อีตู นู เยซู คริด ญา นะ บาลิ ปาเระ มาแรฮ ปลีฮัจ. 8 เยซู เตอ กาเญา เตด ดือละ ลีฮัจ บือฆารี ฌางัน มาตา ตาปี กาเญา อาดา ซายัก กะ ญา. มีเซ-จะ วะตู อีนี กาเญา เตด บือฆารี ญา ตาปี กาเญา อาดา ปือจายา กะ ญา. กะฆีเตอ กาเญา ซูกา-ฮาตี บาญะ ซูโงฮ ลือเบฮ เดะ กีตา นะ มือเลา. 9 นู กาเญา ปือจายา กะ ญา บูวัจ บรี กาเญา ตืองัฮ ซาโมจ ลาฆู ฮีโดะ ลือปัซ บาฌิ เลอ. 10 ลูมอฮ ซือมียา ตูโดฮ ลาฆู นะ ตูฮัด เตอ นู บือเลฮ มือเลา ตูโดฮ จะ ญา นะ ฮาลัย บรี ซือลามัจ กะ กาเญา เตอ กูญา โปด บือเลฮ กูวาซา มือโซะ มียา ปาซัน ลาฆู ฮีโดะ ลือปัซ บาฌิ ซีงี เลอ. 11 ลูมอฮ ซือมียา ตูโดฮ อีตู กูญา อาดา ซือมืองัจ นะ เยซู คริด ดูโดะ เดะ ดาลับ ญาวา นะ กูญา เตอ บูวัจ บรี กูญา ตูโดฮ ดูลู ปาซัน ลาฆู นู เยซู คริด นะ ตาฮัด ซูซัฮ ปายัฮ นู ญา นะ อาดา ลาฆู บือซรี เดะ บลากัก เลอ. กะฆีเตอ กูญา อีตู ซีงี กูญา บือเลฮ มือโซะ มียา จะ ซือมืองัจ อีตู ตูโญะ กะ ซือมียา ดีฮา กะ วะตู ดีฮา เตอ. 12 ตูฮัด บือเลฮ ปลีฮัจ บรี กูญา ตาฮู จะ นู กูญา มือเลา ตูโดฮ ลาฆู กะฆีเตอ บูกัด กรานา กูญา ตะอาซิก ตาปี กรานา กาเญา เลอ. วะตู อีนี เลอ กาเญา บือเลฮ ดืองัยํ ลาฆู อีตู ดัฮ เดะ โกะ ซือมียา นู มาแรฮ มือญาเระ บรีตา นู บาฌิ นะ ตูฮัด. อาดา ซือมืองัจ นะ ตูฮัด นู ดาตัก เดะ โซะ อาตัซ ลาแงะ ตูโลก กูญา ซามา. ลาฆู อีตู ซีงี โกะ ฮูลู-บาลัก นะ ตูฮัด โปด กูญา ซูกา นะ มือนาตะ ลีฮัจ ฌูฆา. 13 กะฆีเตอ เลอ กาเญา กือนา ซียะ ฮาตี นะ กาเญา บรี บาฌิ เลอ กือนา ตาฮัด-ฮาตี เลอ. กาเญา กือนา ฮาระ บรี ปือนอฮ เลอ กะ ลาฆู นู ตูฮัด ญา นะ ฮาลัย บรี ซือลามัจ กะ กาเญา วะตู เยซู คริด นะ มาแรฮ ปลีฮัจ ดัฮ. 14 วะตู ดูลู กาเญา เตด ตาฮู อารัฮ เตอ กะฆีเตอ กาเญา ตูโรจ กะ ลาฆู นู ฮาตี กาเญา ฆาละ นะ บูวัจ. ตาปี วะตู อีนี กาเญา ฌาดี ซือรูปา โกะ นานะ นู มือนีงัย กะ ปะ เดะ ญา เตอ. กะฆีเตอ ฌางัน บรี กาเญา บูวัจ ตูโรจ ลาฆู กะฆีเตอ ลาฆี เลอ. 15 ตาปี นู ตูฮัด ญา นู บือเลฮ ปาเงน กาเญา ดัฮ เตอ ญา จรัฮ บาฌิ ซูโงฮ เลอ กาเญา กือนา ฌาดี ซือมียา จรัฮ บาฌิ ราตา มาจับ กะฆีเตอ ฌูฆา. 16 ซาเบะ-จะ อาดา ซูรัจ ปือมือเลา นะ ตูฮัด นู จะ "กาเญา กือนา ฌาดี ซือมียา จรัฮ บาฌิ ซาเบะ กู นี จรัฮ บาฌิ ซูโงฮ เลอ." ตูฮัด ญา จะ. 17 กาเญา ซือโบจ กะ ตูฮัด จะ "อาโปก". ญา เตอ นู กรัจ ฮูโกบ ราตา ซือมียา บือกะ ปือบูวัจ นะ กูญา ฮอย เตด ปีเลฮ มูคา เลอ. กะฆีเตอ กาลา กาเญา อาดา เดะ ดือนียา อีนี กาเญา กือนา บูวัจ ตูโรจ อาดา ฮาตี ตาโกจ มือนูโนะ กะ ตูฮัด เลอ. 18 ดูลู กาเญา บูวัจ ตูโรจ ฮาดัจ ฮอย เตด ตือปากัย นู กาเญา ซาโมจ เดะ โกะ บีลาแก นะ กาเญา ดัฮ เตอ. ตาปี กาเญา ตาฮู จะ ตูฮัด บือเลฮ ตือบุซ กาเญา ดัฮ เดะ โกะ ฮาดัจ อีตู. รือฆา ตือบุซ อีตู บูกัด บารัก นู นะ บูโระ บือการัจ ซือรูปา โกะ มัซ โกะ ปีระ เตอ 19 ตาปี ตือบุซ ดัฮ ฌางัน ดารัฮ นะ เยซู คริด นู ฌาดี รือฆา มาฮัน โตระ เลอ. ญา เตอ ซือรูปา อานะ กาเมก นู ฮอย บือกัซ ตะอารัฮ ฮอย บือกัซ ลูกา โตะ ดีฮา โปด. 20 ซูโงฮ เลอ ดูลู เดะ ตูฮัด บือฌาดี ดือนียา ดัฮ ญา บือกีรา นะ บรี เยซู คริด อีตู นะ ตือบุซ กาเญา กะฆีเตอ. ตาปี วะตู ปือญูดัฮ อีนี เยซู ญา มาแรฮ ปลีฮัจ ดัฮ กรานา กาเญา 21 นู ญา บือเลฮ ตูโลก บรี ปือจายา กะ ตูฮัด เดะ อาตัซ ดัฮ. เยซู อีตู เลอ ตูฮัด เดะ อาตัซ บือเลฮ บูวัจ บรี ญา ฮีโดะ ปาเระ เดะ มาตี ดัฮ บรี ญา บือซรี โตระ. กะฆีเตอ ฌูฆา กาเญา อาดา ปือจายา กะ ตูฮัด อาดา ฮาระ กะ ญา ดัฮ เลอ. 22 นู กาเญา บือเลฮ มือนีงัย กะ ลาฆู นู ซูโงฮ กะฆีเตอ กาเญา บาโซฮ ฮาตี นะ กาเญา บรี จรัฮ ดัฮ บีดา นะ ซายัก โกะ ดีบราดี โงฮ-ซูโงฮ. กะฆีเตอ เลอ บรี กาเญา บือซายัก บือซามา-ซามา บรี บาญะๆ อาดา ฮาตี รือมัก ซูโงฮ. 23 กาเญา บือเลฮ บือฌาดี บารู ดัฮ บูกัด เดะ บือแนฮ นู นะ บูโระ บูโซะ ตาปี เดะ บือแนฮ นู ฮอย เตด บูโระ บูโซะ เลอ ฌาดี-จะ บือฌาดี บารู ฌางัน ปือมือเลา นะ ตูฮัด ปือมือเลา นู อาดา ฮีโดะ นู อาดา ซือลาลู เลอ. 24 ซาเบะ-จะ ซูรัจ ปือมือเลา นะ ตูฮัด จะ "อูมัจ-ซือมียา ซือมูฮา ญา ซือรูปา โกะ ปูโฮด รูโปจ. โกะ ลาฆู บาฌิ บือฆาจะ นะ ญา โปด ซือรูปา บูงา รูโปจ. ปูโฮด รูโปจ ญา ตูโฮยํ ลายู ปี บูงา นะ ญา โปด ญา นะ ฆูรก ฆูโฆยํ. 25 ตาปี ปือมือเลา นะ ตูฮัด อาดา ซือลาลู ซือมาญัก-รอจ เลอ." ปือมือเลา อีตู เลอ ฌาดี บรีตา นู บาฌิ นู บือเลฮ มือญาเระ บรี กาเญา ตาฮู ดัฮ.
1 กะฆีเตอ เลอ บรี กาเญา มืองือละ บูวัก เดะ ลาฆู ฌาฮัจ ซือมูฮา เดะ ลาฆู กีจอฮ ราตาๆ ลาฆู ฮาตี ปีเกาะ ลาฆู ซาเกะ-ฮาตี กะ กาวัด เดะ ลาฆู มือเลา มืออูปัจ กะ กาวัด ราตา ซือมูฮา. 2 ซือรูปา กะ นานะ นู บารู ดูโดะ เดะ อาปี ดัฮ บรี กาเญา ซูกา นะ บือเลฮ อาเย ดาดา นู ฮอย เตด จาโปยํ นามา เตอ บีดา ฮาตี นะ กาเญา. บรี อาเย ดาดา อีตู นะ บูวัจ บรี กาเญา บือซัยํ ซือรูโลยํ รอจ กะ ลาฆู ฮีโดะ ลือปัซ บาฌิ. 3 ซาเบะ-จะ กาเญา บือเลฮ ฌือเลบ บรี ลีฮัจ ดัฮ นู ตูฮัด ญา ฮาตี บาฌิ กะ กีตา ปือนอฮ ดัฮ. 4 กาเญา ตืองัฮ มาแรฮ ดาปัจ ตูฮัด เยซู นู ฌาดี ซือรูปา บาตู บือซัยํ นู อาดา ฮีโดะ นู โกะ ซือมียา บือเลฮ กีปัซ ตีเมา อาเมด มาแรฮ ซูโรฮ. ตาปี บาตู อีตู ตูฮัด เดะ อาตัซ บือเลฮ ปีเลฮ ดัฮ อาดา รือฆา บาญะ ซูโงฮ เลอ. 5 กะฆีเตอ เลอ กาเญา ฌูฆา ฌาดี ซือรูปา โกะ บาตู บือซัยํ นู อาดา ฮีโดะ นู กือนา อาเมด มาแรฮ ซูโซด บรี ฌาดี รูมัฮ มือญือมัฮ ตูฮัด รูมัฮ นู อาดา ซือมืองัจ นะ ตูฮัด ดูโดะ. กาเญา ฌาดี ซือรูปา ลูมอฮ ซามี นู จรัฮ บาฌิ ฌูฆา บีดา นะ มาแรฮ มือญือมัฮ กะ ตูฮัด บือกะ ซือมืองัจ นะ ตูฮัด บาวา เดะ นามา นะ เยซู คริด เตอ. โกะ ซือบารัก อีตู นะ บูวัจ บรี ตูฮัด ซูกา-ฮาตี เลอ. 6 ซาเบะ อาดา ฆาแรฮ เดะ ซูรัจ ปือมือเลา นะ ตูฮัด จะ "ลีฮัจ เลอ กู บือเลฮ ปีเลฮ บาตู บือซัยํ ซือกือโตน นู อาดา รือฆา บาญะ บอฮ ตาโรฮ เดะ ดาลับ นังฆรี ซีโอน ฌาดี บาตู กือปาลา ซาฆี เลอ. ซือมียา ดีฮา นู ปือจายา กะ บาตู อีตู ญา ฮอย ลาฆู นะ มือญือซัน ลาลู เลอ." 7 ซูโงฮ โซะ กาเญา นู ปือจายา ญา อาดา รือฆา บาญะ ตาปี โซะ ซือมียา นู เตด ปือจายา อีตู ซือรูปา อานู "บาตู อีตู นู โกะ ตูกัก รูมัฮ กีปัซ บูวัก ดัฮ บาตู อีตู เลอ ปาเระ มาแรฮ ฌาดี บาตู กือปาลา ซาฆี นู บือซัยํ เดะ กาวัด." ซูรัจ นะ ตูฮัด ญา จะ. 8 อาดา ฌูฆา นู จะ "ญา เลอ ฌาดี บาตู นู บูวัจ บรี ซือมียา ตือซีปะ ฌาดี บาตู นู บูวัจ บรี กูญา รือบัฮ." ญา จะ. นู กูญา ตือซีปะ กะฆีเตอ ซาเบะ กูญา ตีเมา มือนีงัย กะ ปือมือเลา นะ ตูฮัด บือกะ ซือรูปา ตูฮัด บือเลฮ บือกีรา ดูลู ดัฮ. 9 กะฆีเตอ กาเญา ฌาดี ซา ลูมอฮ ซือมียา นู ตูฮัด ปีเลฮ ดัฮ ฌาดี บือกะ ลูมอฮ ซามี นะ ราฌา ฌาดี ซา บักซา นู จรัฮ บาฌิ ฌาดี ลูมอฮ ซือมียา นะ ตูฮัด ซูโงฮๆ ดัฮ เลอ. ฌาดี กะฆีเตอ บีดา กาเญา นะ บือเลฮ มือญาเระ โกะ ปือบูวัจ นู บาฌิ ซูโงฮ นะ ตูฮัด. ตูฮัด เลอ นู บือเลฮ ปาเงน กาเญา บรี ตรือเบะ เดะ โซะ กือลับ มาแรฮ มาโซะ กะ ตือปัจ นู จรัฮ นู บือซายา บือซรี นะ ญา. 10 กาลา ดูลู กาเญา เตด ฌาดี ซา ลูมอฮ ซือมียา ลาลู เตอ ตาปี วะตู อีนี กาเญา ฌาดี ซือลูมอฮ ซือมียา นะ ตูฮัด เดะ อาตัซ ดัฮ เลอ. กาลา ดูลู กาเญา เตด บือเลฮ ซาโมจ ลาฆู นู ตูฮัด ญา ตือจีฮัด กะ กาเญา ตาปี วะตู อีนี กาเญา บือเลฮ ซาโมจ ดัฮ. 11 ลูมอฮ กาเญา นู กู ซายัก เออ กู มีตา เดะ กาเญา บรี กือมัซๆ กาเญา เลอ นู ดูโดะ เดะ ดือนียา อีนี ซือรูปา บือกะ ฌาดี ซือมียา มือนูปัก ดูโดะ ซัจ เตอ บรี กาเญา มืองือละ บูวัก เลอ เดะ ลาฆู นู ปรางัย บือดูซา นะ กาเญา ฆาละ นะ บูวัจ เตอ. ซาเบะ ลาฆู กะฆีเตอ ฌาดี ซือรูปา ซือตรู นู บลาวัด ฌางัน ฮาตี นะ กาเญา. 12 กาเญา กือนา บูวัจ ตูโรจ กะ โกะ ปือบูวัจ นู บาฌิ เดะ ตืองัฮ ลูมอฮ ซือมียา นู เตด ปือจายา เตอ. กะฆีเตอ กะ ซือมียา ดีฮา นะ มืออูปัจ กะ กาเญา จะ บูวัจ ซาลัฮ ดัฮ ญา นะ บือเลฮ ลีฮัจ โกะ ปือบูวัจ นู บาฌิ นะ กาเญา. ญา นะ มือโอจ กะ ตูฮัด เดะ อารี นู ตูฮัด นะ มาแรฮ กรัจ ฮูโกบ. 13 บรี กาเญา มือนีงัย กะ ซือมียา ฮูโกบ ราตาๆ นู ตูฮัด บือเลฮ ตืองะ ดัฮ ซาเบะ กาเญา ตูเฮะ กะ ตูฮัด. บรี มือนีงัย กะ กูญา มีเซ-จะ ฌาดี ราฌา นู บือซัยํ โตระ 14 เฆอ-จะ ฌาดี โกะ ตูฮัด นังฆรี นู ราฌา ซูโรฮ ปี บรี กรัจ ฮูโกบ โกะ ซือมียา บูวัจ ซาลัฮ บรี ปูฌี กะ โกะ ซือมียา บูวัจ บาฌิ. 15 กือนา บูวัจ กะฆีนี ซาเบะ ตูฮัด เดะ อาตัซ ญา ซูกา บรี โกะ ปือบูวัจ นะ กาเญา นะ ปาดับ ลาฆู บูดอ บูวัก นะ ซือมียา นู เตด ตาฮู อารัฮ. 16 บรี กาเญา ดูโดะ ซือรูปา ฌาดี ซือมียา นู ลือปัซ ซูโงฮ. ตาปี นู กาเญา ลือปัซ กะฆีเตอ ฌางัน อาเมด มาแรฮ ตูโดก ลาฆู ฌาฮัจ ตาปี กาเญา กือนา ดูโดะ ซือรูปา ฌาดี ปราโซฮ นะ ตูฮัด เดะ อาตัซ. 17 กือนา บรี มูคา กะ โกะ ซือมียา ซือมูฮา ซายัก โกะ ดีบราดี ปือจายา เลอ. กือนา มือนูโนะ-ฮาตี ตาโกจ เดะ ตูฮัด บรี มูคา กะ ราฌา ซามา. 18 กาเญา นู ฌาดี ปราโซฮ เออ กือนา มือนีงัย กะ โกะ กือปาลา นะ กาเญา มือนูโนะ-ฮาตี ตาโกจ ซูโงฮ บูกัด ซา กือปาลา นู ฮาตี บาฌิ ฮาตี บือแฌะ ตาปี กือนา มือนีงัย กะ กือปาลา นู ฮาตี ฌาฮัจ ฌูฆา. 19 ซาเบะ-จะ ซือมียา ดีฮา นู ตูเฮะ กะ ตูฮัด กะฆีเตอ ญา ยอม ตาฮัด ซูซัฮ นู เตด กือนา ลาฆู เตอ ญา เลอ ตูฮัด นะ ลีฮัจ จะ ญา บาฌิ ดัฮ. 20 ซาเบะ-จะ กะ กาเญา กือนา รือเปะ กือนา กาเตาะ ซาเบะ บูวัจ ซาลัฮ ดัฮ นู กาเญา ตาฮัด-ฮาตี เดะ ลาฆู ซูซัฮ อีตู นะ ฌาดี บาฌิ กะฮามี? ตาปี กะ กาเญา นะ ตาฮัด-ฮาตี เดะ ลาฆู ซูซัฮ มีเซ-จะ บูวัจ บาฌิ ฮาปา เตอ กาเญา นะ บูวัจ บรี ตูฮัด ซูกา-ฮาตี กะฆีเตอ เลอ. 21 ตูฮัด บือเลฮ ปาเงน กาเญา บรี บูวัจ กะฆีเตอ ซาเบะ-จะ เยซู คริด ญา บือเลฮ กือนา ซูซัฮ ปายัฮ กรานา กาเญา ฌาดี จูตอ บรี กาเญา นะ บือฌาลัด ตูโรจ เดะ บือกัซ ฌาลัด นะ ญา. 22 เยซู เตอ ญา เตด ดือละ บูวัจ ดูซา เลอ เตด ดือละ มือเลา มืออูปัย ซือปาตัฮ โปด. 23 มีเซ-จะ กูญา มือเลา กาซัยํ กะ ญา ตาปี ญา เตด บือเลฮ มือเลา กาซัยํ บาลัซ ปาเระ. ตานา ญา ตาฮัด ซูซัฮ ญา เตด บือเลฮ มือเลา มืออารับ กะ กูญา ตาปี ปาซัน ซือมูฮา นะ ญา ญา บือเลฮ ซรัฮ กะ ตูฮัด เดะ อาตัซ นู กรัจ ฮูโกบ บาฌิ-ตือปัจ. 24 วะตู เยซู มาตี เดะ กายู อีตู ญา บือเลฮ ซาโมจ ดูซา นะ กีตา มาแรฮ ตาโงก เดะ ญาวา นะ ญา ตะอาซิก บีดา กีตา นะ บือเลฮ มาตี เดะ โซะ ลาฆู ดูซา อีตู บรี กีตา นะ บือเลฮ บือฌาลัด เดะ ลาฆู นู บาฌิ-ตือปัจ. กรานา เยซู กือนา กาเตาะ บือลียัก กะฆีเตอ ญา บือบือลา กาเญา บรี ซือนัง บาฌิ ดัฮ. 25 ซาเบะ-จะ กาเญา ฌาดี ซือรูปา โกะ กาเมก นู ซือซัจ ฌาลัด ดัฮ ตาปี วะตู อีนี กาเญา บาลิ ปาเระ ดาปัจ ซือมียา นู บือบือลา ซือมียา นู ฌาฆา ฮาตี นะ กาเญา ดัฮ เลอ.
1 กะฆีเตอ ฌูฆา โซะ กาเญา นู ฌาดี บีนี เตอ บรี กาเญา มือนีงัย กะ ลากี นะ กาเญา. กะฆีเตอ มีเซ-จะ ลากี ซือตืองัฮ นะ เตด มือนีงัย กะ ปือมือเลา นะ ตูฮัด เตอ ตาปี โกะ ปือบูวัจ นะ กาเญา นะ บาอาฌะ ญา มาแรฮ ตูโรจ กะ ตูฮัด. กาเญา ฮอย เตด ปายัฮ นะ มือเลา นามา ซือปาตัฮ โปด 2 ตาปี กูญา นะ บือฆารี โกะ ปือบูวัจ นะ กาเญา นู บาฌิ ซูโงฮ อาดา ฮาตี มือนูโนะ. 3 ลาฆู ปือตัด ญาวา นะ กาเญา บรี บือฆาจะ เตอ ฌางัน บรี ฌาดี ซา โซะ ลูวัยํ ซือรูปา ซาโงน โบะ ปากัย โกะ มัซ โกะ กาเยด บาฌู นู บือฆาจะ. 4 ตาปี บรี ปือตัด ลาฆู บาฌิ นู บูนี ดัฮ โซะ ดาลับ ฮาตี นะ กาเญา อาดา ฮาตี บือแฌะ ฮาตี ซืองะ เลอ. ลาฆู กะฆีเตอ ญา ฮอย เตด นะ ลือแงะ ปี กะ ดีฮา ญา อาดา รือฆา บาญะ ซูโงฮ โซะ ฮึลด มูคา นะ ตูฮัด. 5 โกะ นีบีนี ฮาตี จรัฮ บาฌิ กาลา นูตู เตอ นู ปือจายา กะ ตูฮัด ดัฮ กูญา บือเลฮ ปือตัด ญาวา กะฆีเตอ กูญา บือเลฮ มือนีงัย กะ ลากี นะ กูญา ตะอาซิก. 6 บือกะ ซารา เลอ ญา บือเลฮ มือนีงัย กะ อับราฮัม บือเลฮ บลาโลก กะ ญา จะ "ตูวัด ". นู กาเญา บูวัจ บาฌิ ฮอย เตด ตาโกจ ลาฆู นามา เตอ กะฆีเตอ กาเญา ฌูฆา ฌาดี โกะ อานะ จูจู นะ ซารา อีตู ดัฮ เลอ. 7 กะฆีเตอ ฌูฆา โซะ กาเญา นู ฌาดี ลากี เตอ กาเญา กือนา ดูโดะ ฌางัน บีนี นะ กาเญา อาเมด ฮาตี นะ กูญา ซาเบะ-จะ กูญา ฌาดี ซือรูปา ซือบารัก นู ลือมัฮ ลาฆี. กือนา บรี มูคา กะ กูญา ซาเบะ กาเญา กือดูวา นะ ซาโมจ ลาฆู ฮีโดะ นู ตูฮัด นะ ฮาลัย บรี ฌาดี ปือซากา นะ กาเญา. กะฆีเตอ เลอ ฮอย นามา นะ ซือกัจ ปือมือเลา บือซาโวจ นะ กาเญา. 8 เดะ บลากัก อีนี บรี กาเญา ซือมูฮา บือซามา ซา ฮาตี บรีงัจ รอจ กะ ลาฆู ซูซัฮ นะ กาวัด ซายัก บือซามา-ซามา ซือรูปา ฌาดี อาดี-บราดี ตือจีฮัด บือซามา-ซามา อาดา ฮาตี มือนูโนะ เลอ. 9 ตานา กือนา บูวัจ ฌาฮัจ ฌางัน บูวัจ ลาฆู ฌาฮัจ บาลัซ ปาเระ. ตานา กือนา บือมากี ฌางัน บือมากี บาลัซ ปาเระ. ตาปี ฆาตี ลาฆู กะฆีเตอ กือนา บรี ซือลามัจ กะ กูญา ซาเบะ-จะ ตูฮัด บือเลฮ ปาเงน กาเญา บรี กาเญา นะ บูวัจ กะฆีเตอ เลอ บีดา ตูฮัด นะ บือเลฮ บรี ซือลามัจ กะ กาเญา ฌาดี บือกะ ปือซากา นะ กาเญา เลอ. 10 ซาเบะ ซูรัจ ปือมือเลา นะ ตูฮัด มือเลา จะ "กะ ซือมียา ดีฮา ซูกา นะ ดูโดะ ซือนัง บาฌิ ซูกา นะ ดาปัจ โกะ อารี ซือมูฮา นู บาฌิ ซือมียา อีตู กือนา ฆารอจ ลีดัฮ นะ ญา ตีเมา บรี มือเลา ฌาฮัจ กือนา ฌาฆา มูโลจ นะ ญา ตีเมา บรี มือเลา มืออูปัย. 11 บรี ญา มืองือละ เดะ ลาฆู ฌาฮัจ อาเลฮ ปี บูวัจ ลาฆู บาฌิ. บรี ญา กูวาซา มียา ลาฆู ซือนัง ซือลามัจ ซือมาตา ปี ตูโรจ ฌาลัด อีตู. 12 ซาเบะ ตูฮัด บือซัยํ เดะ อาตัซ ญา ฌาฆา ลีฮัจ โกะ ซือมียา นู บาฌิ-ตือปัจ ญา มือนีงัย กะ โกะ ปือมือเลา บือซาโวจ นะ กูญา ตาปี ญา บลาวัด ฌางัน โกะ ซือมียา นู บูวัจ ฌาฮัจ เลอ." ญา จะ. 13 กะ กาเญา อาดา ฮาตี นะ บูวัจ บาฌิ อาดา ซาปา เลอ นู นะ บูวัจ ฌาฮัจ กะ กาเญา? 14 ตาปี มีเซ-จะ กาเญา กือนา ตาฮัด ซูซัฮ ซาเบะ กาเญา บูวัจ ลาฆู บาฌิ-ตือปัจ เตอ ตาปี กาเญา นะ อาดา ลาฆู ซือนัง ซือลามัจ นู ซูโงฮ. ฌางัน ตาโกจ เดะ กูญา ฌางัน ฆาโดฮ-ฮาตี ลาฆู นามา เลอ. 15 ตาปี เดะ ดาลับ ฮาตี นะ กาเญา กือนา ตูเฮะ กะ เยซู คริด ซาโงะ จะ ญา ฌาดี ตูฮัด นะ กาเญา. กาเญา กือนา อาดา ฮาตี ซียะ ดัฮ บีลัก วะตู บีดา กาเญา นะ บือเลฮ ตีกัฮ ราตา ซือมียา นู ตาญา กาเญา จะ บูวัจ นามา กาเญา จาดัก เดะ ลาฆู อีนี. 16 ตาปี บรี กาเญา ตีกัฮ ฌางัน ฮาตี บือแฌะ อาดา ฮาตี มือนูโนะ กะ ตูฮัด ฮาตี นู ตาฮู จะ ฮอย ซาลัฮ ดัฮ. กะฆีเตอ วะตู ซือมียา ดีฮา มือเลา มืออูปัจ กะ กาเญา ญา นะ จือและ มาตา กรานา ญา มือเลา มืออูปัจ ปาซัน ลาฆู นู กาเญา บูวัจ บาฌิ ตูโรจ เยซู คริด. 17 ซาเบะ-จะ นู กาเญา ตาฮัด ซูซัฮ ซาเบะ บูวัจ บาฌิ ดัฮ กะ กือนา ฮาตี นะ ตูฮัด เตอ ญา บาฌิ เดะ ลาฆู ตาฮัด ซูซัฮ ซาเบะ บูวัจ ฌาฮัจ. 18 ซาเบะ-จะ เยซู คริด เตอ ญา ตาฮัด ซูซัฮ แนฮ ซือกาลี อีตู กรานา ลาฆู ดูซา. ญา เลอ ซือมียา บาฌิ-ตือปัจ มาตี ฆาตี โกะ ซือมียา เตด บาฌิ-ตือปัจ บีดา นะ บาวา กีตา ปี รอจ กะ ตูฮัด เดะ อาตัซ. นู เยซู ฌาดี ซือมียา นู อาดา ญาวา เตอ กะฆีเตอ ญา กือนา บูนอฮ มาตี ดัฮ. ตาปี นู ญา ฌาดี ซือมืองัจ เตอ กะฆีเตอ ญา กือนา บูวัจ บรี ฮีโดะ ปาเระ เดะ มาตี ดัฮ เลอ. 19 นู ญา ฌาดี ซือมืองัจ กะฆีเตอ ญา บือเลฮ ปี มือญาเระ บรี กะ โกะ ฮาตู นู กือนา กานัก ดัฮ นะ ตาฮู เลอ. 20 กูญา อีตู ฌาดี ฮาตู นู เตด บือเลฮ มือนีงัย กะ ตูฮัด กาลา ดูลู เตอ. วะตู โนฮา ตืองัฮ นีเมา กาปัน นะ ญา ตูฮัด ญา ตาฮัด-ฮาตี ลามา ดัฮ ตาปี กูญา อีตู ฮอย เตด บือเลฮ มือนีงัย. เดะ กาปัน อีตู อาดา ซือมียา เตด บาญะ อูรัก ฌาดี-จะ กือมูฮา ลาปัด อูรัก นู ลือปัซ ดัฮ เดะ ลาฆู อาเย อาโปฮ. 21 ลาฆู อีตู ฌาดี ปือนานา ตูโญะ รอจ กะ ลาฆู ซือลับ เดะ อาเย นู บูวัจ บรี กาเญา ลือปัซ ดัฮ วะตู อีนี เลอ. บูกัด-จะ ญา บาโซฮ ดากี เดะ โซะ ลูวัยํ ญาวา เตอ ตาปี ญา ฌาดี ซือรูปา ปือมือเลา นู กาเญา บือฌาญี กะ ตูฮัด ดาตัก เดะ ฮาตี นู ตาฮู จะ ฮอย ซาลัฮ ดัฮ. ลาฆู อีตู ญา บูวัจ บรี กาเญา ฮีโดะ ลือปัซ บาฌิ ดัฮ ซาเบะ เยซู คริด บือเลฮ ฮีโดะ ปาเระ เดะ มาตี ดัฮ. 22 ญา เลอ บือเลฮ ญาแญะ ปี กะ อาตัซ ลาแงะ. ญา ดูโดะ โซะ ซือบือลัฮ กานัน นะ ตูฮัด เดะ อาตัซ เตอ อาดา โกะ ฮูลู-บาลัก โกะ ฌิด โกะ ฮาตู ซือมูฮา ดูโดะ เดะ บาวัฮ ฮูโกบ นะ ญา เลอ.
1 กะฆีเตอ นู เยซู คริด บือเลฮ ตาฮัด ซูซัฮ โซะ ญาวา ดัฮ บรี กาเญา อีงัจ เดะ ฮาตี ซือรูปา กะ ญา เลอ นู ลาฆู อีงัจ กะฆีเตอ ฌาดี ซือรูปา ซือนาตา นะ กาเญา. กรานา ซือมียา ดีฮา นู บือเลฮ ตาฮัด ซูซัฮ โซะ ญาวา ดัฮ เตอ ญา บราดู บูวัจ ดูซา ดัฮ เลอ. 2 กะฆีเตอ วะตู กาเญา อาดา ฮีโดะ ลาฆี โซะ ญาวา ฌางัน บรี กาเญา นะ ตูโรจ ลาฆู นู ฮาตี ซือมียา ฆาละ นะ บูวัจ เตอ ตาปี บรี ตูโรจ ฮาตี นะ ตูฮัด เลอ. 3 วะตู นู ลาลู ฮาบิฮ ดัฮ นู กาเญา บูวัจ ตูโรจ ฮาตี นะ ลูมอฮ ซือมียา เตด ปือจายา ตารา อีตู ฌาดี ดัฮ เลอ. วะตู อีตู เตอ กาเญา บือเลฮ ตูโรจ ลาฆู บือกาเซฮ ฌือแนฮๆ ตูโรจ ลาฆู ฮาตี ฆาละ นู ฌาฮัจ มาโบะ อาระ มากัด อาระ บือรามัย บือซามา มาโบะ แจะ-บีแระ ซือซัจ มือญือมัฮ โกะ บราลา นู รูบือฮีรู เลอ. 4 นู กาเญา เตด มาโซะ บือซามา ฌางัน กาวัด เดะ ลาฆู ฌาฮัจ อีตู นู กือลือเบฮ โตระ เลอ กูญา ปือและ-ฮาตี ซูโงฮ มืออูปัจ กะ กาเญา. 5 โกะ ซือมียา อีตู กูญา กือนา นะ บือปูลัซ โซะ ฮึลด มูคา นะ ตูฮัด ปาซัน ปือมือเลา มืออูปัจ อีตู. ตูฮัด เตอ ญา ซียะ ดัฮ นะ กรัจ ฮูโกบ ฌางัน ซือมียา ฮีโดะ ฌางัน ซือมียา มาตี โปด. 6 กะฆีเตอ เลอ บรีตา นู บาฌิ กือนา มือญาเระ ดัฮ บรี กะ ซือมียา นู มาตี นะ ตาฮู. กะฆีเตอ มีเซ-จะ เดะ ญาวา กูญา กูญา กือนา กรัจ ฮูโกบ โซะ ฮึลด มูคา นะ โกะ อูมัจ-ซือมียา ซือมูฮา เตอ ตาปี โซะ ซือมืองัจ นะ กูญา กูญา นะ อาดา ฮีโดะ โซะ ฮึลด มูคา นะ ตูฮัด. 7 อารี ปือญูดัฮ นะ โกะ บือนา ซือมูฮา ดาปิก นะ รอจ ดัฮ. กะฆีเตอ บรี กาเญา ตาฮู ฮูโกบ ญาวา ตะอาซิก ฌาฆา ฮาตี ตะอาซิก บีดา นะ บือเลฮ บือซาโวจ. 8 ลือเบฮ เดะ มานามา เตอ บรี กาเญา บือซายัก บือซามา-ซามา บรี บาญะ เลอ ซาเบะ-จะ นู กาเญา ซายัก กะฆีเตอ กาเญา นะ อาเกะ ซาลัฮ ซามาๆ บาญะ ฌือแนฮ. 9 บรี กาเญา ซาโมจ กาวัด บือซามา-ซามา ฮอย เตด บือซูงุจ เลอ. 10 ตูฮัด บือเลฮ กีเรบ บรี กะ กาเญา โซก ซืออูรัก อาดา อากัน นู ปานัย. กะฆีเตอ กาเญา กือนา อาเมด อากัน อีตู ปี ซูโรฮ บีดา นะ ตูโลก กาวัด บือซามา-ซามา. กะฆีเตอ กาเญา นะ ฌาดี ปราโซฮ ฮาตี รือมัก นู ฮาฆิ ราตาๆ โกะ บือนา บาฌิ ฌือแนฮๆ นู ตูฮัด ฮาลัย บรี ดัฮ. 11 กะ ซือมียา ดีฮา นะ มือญาเระ บรี ญา มือญาเระ บือกะ ปือมือเลา นะ ตูฮัด เลอ. กะ ซือมียา ดีฮา นะ บือกรือฌา ตูโลก กาวัด บรี ญา บือกรือฌา บือกะ ตูฮัด บรี ญา อาดา อูรัจ เลอ. กะฆีเตอ เดะ ลาฆู ซือมูฮา บรี โกะ ซือมียา นะ มือโอจ กะ ตูฮัด เดะ นามา นะ เยซู คริด. เยซู เลอ ญา บือซรี ซูโงฮ ญา มือฆัฮ ซูโงฮ ซือลาลู ซือมาญัก-รอจ. อาเมน. 12 โกะ อาดี-บราดี นู กู ซายัก เออ ฌางัน ปือและ-ฮาตี เลอ นู กาเญา กือนา บือตือโปฮ ฌางัน ลาฆู ซูซัฮ ปายัฮ ซือรูปา อาปี นู นะ มือญาซัจ ลีฮัจ ฮาตี นะ กาเญา. ฌางัน นะ อีงัจ จะ ลาฆู นู กาเญา บือตือโปฮ อีนี ฌาดี ลาฆู นู ปือและ 13 ตาปี บรี กาเญา ซูกา-ฮาตี ซูโงฮ นู กาเญา บือเลฮ บาฮาเฆด เดะ ลาฆู ซูซัฮ ปายัฮ นะ เยซู คริด เลอ. กะฆีเตอ วะตู ญา มาแรฮ ปลีฮัจ ฌางัน ลาฆู บือซรี กาเญา นะ ซูกา-ฮาตี บาญะ ซูโงฮ. 14 กะ กาเญา กือนา อูจะ มือฌัฮ กรานา นามา นะ เยซู คริด กาเญา ซือนัง ซือลามัจ ดัฮ เลอ ซาเบะ-จะ ซือมืองัจ นู บือซรี ซือมืองัจ นะ ตูฮัด เตอ ญา ดูโดะ ฌางัน กาเญา ซือมูฮา เลอ. 15 เดะ ดาลับ ลูมอฮ กาเญา ฌางัน บรี ซือมียา ดีฮา นะ กือนา ฮูโกบ ซาเบะ ญา บูนอฮ ซือมียา ญา จูรี บารัก นะ กาวัด ฌาดี ซือมียา บูวัจ ฌาฮัจ ฌาดี ซือมียา ปี ฆาโดฮ เดะ ลาฆู กรือฌา นะ กาวัด เลอ. 16 ตาปี กะ ซือมียา ดีฮา กือนา ลาฆู ฌาฮัจ ซาเบะ ญา ฌาดี ซือมียา นะ เยซู คริด ฌางัน บรี ญา จือและ นามา เลอ ตาปี บรี ญา มือโอจ กะ ตูฮัด ซาเบะ ญา ฌาดี ซือมียา นะ เยซู กะฆีเตอ. 17 ซาเบะ-จะ รอจ วะตู ดัฮ นู ตูฮัด ญา นะ กรัจ ฮูโกบ ฮึนตะ เดะ ลูมอฮ ซือมียา นะ ญา. กะ ฮึนตะ เดะ ลูมอฮ กีตา ดูลู เดะ ฮูโฌก ฌาลัด นะ โกะ ซือมียา นู เตด บือเลฮ มือนีงัย กะ บรีตา นู บาฌิ นะ ตูฮัด เตอ นะ ฌาดี กะฮามี เลอ? 18 ซูรัจ ปือมือเลา นะ ตูฮัด มือเลา จะ "บูกัด ลาฆู ซือนัง นู โกะ ซือมียา บาฌิ-ตือปัจ นะ ฮีโดะ ลือปัซ บาฌิ. ตาปี โซะ ซือมียา เตด ตูโรจ กะ ตูฮัด ซือมียา บือดูซา ลาฆู นะ กูญา นะ ลือปัซ ปี กะ ดีฮา เลอ?" 19 กะฆีเตอ ซือมียา ซือมูฮา นู กือนา ซูซัฮ ตูโรจ ลาฆู นู ตูฮัด บือคานะ เตอ บรี กูญา บูวัจ บาฌิ บรี กูญา ซรัฮ ฮาตี นะ กูญา ฌางัน ตูฮัด เตอ ตูฮัด นู บือฌาดี ตูฮัด นู รือมัก ซูโงฮ เลอ.
1 กะฆีเตอ กู ปรีงัจ โกะ ซือมียา บือบือลา ลูมอฮ นะ ตูฮัด โซะ กาเญา เลอ. กู นี ฌาดี ซือมียา บือบือลา ลูมอฮ นะ ตูฮัด ฌูฆา เตอ นู ฌาดี ซะซี นู ลีฮัจ เยซู คริด ตาฮัด ซูซัฮ ซาเกะ โตระ ดัฮ. ตานา ญา นะ ปลีฮัจ ฌางัน นู บือซายา บือซรี เตอ กู นี เลอ นะ อาดา บาฮาเฆด บือซามา. กะฆีเตอ กู ปรีงัจ กะ กาเญา จะ 2 บรี บือบือลา ลูมอฮ ซือมียา นู ตูฮัด ซรัฮ บรี กะ กาเญา ดัฮ ซือรูปา บือบือลา กาวัด กาเมก นะ ตูฮัด เลอ. กือนา ฌาฆา กูญา บูกัด บือกะ กาเญา กือนา ปรือกัด เตอ ตาปี บรี กาเญา ซูกา-ฮาตี นะ บูวัจ ตูโรจ นู ตูฮัด บือคานะ บูกัด บือกะ กาเญา ฆาละ นะ บือเลฮ โกะ ซือบารัก ตาปี อาดา ฮาตี นะ บูวัจ. 3 ฌางัน บรี กาเญา ฌาดี ซือรูปา กือปาลา ฮาตี กรัซ นู ฮูโกบ โกะ ซือมียา นู ดูโดะ เดะ บาวัฮ ญา ตาปี บรี กาเญา ฌาดี จูตอ บรี กะ กาวัด กาเมก นะ ตูฮัด อีตู นะ ตูโรจ. 4 กาลา ซือมียา บือบือลา นู บือซัยํ นะ มาแรฮ ปลีฮัจ กาเญา นะ ซาโมจ จูบุก นู บือซายา บือซรี นู เตด ดือละ นะ บูโระ. 5 กะฆีเตอ ฌูฆา บรี โกะ อูรัก มูดา มือนีงัย กะ โกะ ซือมียา บือบือลา ลูมอฮ นะ ตูฮัด. บรี กาเญา ซือมูฮา อาดา ฮาตี มือนูโนะ ยอม ตูโลก กาวัด บือซามา-ซามา. ซาเบะ ซูรัจ ปือมือเลา นะ ตูฮัด มือเลา จะ "ตูฮัด เดะ อาตัซ ญา บลาวัด ฌางัน ซือมียา นู อาดา ฮาตี งันตืองัน ตาปี ญา ฮาลัย บรี ซือลามัจ กะ ซือมียา นู ฮาตี มือนูโนะ." ญา จะ. 6 กะฆีเตอ กาเญา กือนา มือนูโนะ-ฮาตี เดะ บาวัฮ ตาปะ ตางัน นู มือฆัฮ นะ ตูฮัด เดะ อาตัซ บรี ตูฮัด นะ อาเกะ ฌูโญก กาเญา เดะ วะตู นู บาฌิ. 7 นู กาเญา ฆาโดฮ-ฮาตี ลาฆู นามา โปด กือนา ซรัฮ ฌางัน ตูฮัด ซือมูฮา เลอ. ซาเบะ ตูฮัด ญา บรีงัจ กะ กาเญา บือบือลา กาเญา ซามา. 8 กาเญา กือนา ฌาฆา ฮาตี นะ กาเญา กือนา ตูงู บรี บาฌิ เลอ. ซือตรู นะ กาเญา นู กือปาลา ฮาตู ซีตัด เตอ ญา ฌาลัด ปี มาแรฮ ซือรูปา บือกะ ซีงา นู มือรียัน มือฮาโมก ซูวารา บือซัยํ ซารี ซือมียา นะ มากัด. 9 กือนา ตือตู-ฮาตี ปือจายา บลาวัด ฌางัน ซือตรู อีตู ตาฮู จะ ลูมอฮ ซือมียา ปือจายา ราตา ดือนียา นู ฌาดี ซือรูปา อาดี-บราดี นะ กาเญา เตอ กูญา กือนา ตาฮัด ซูซัฮ ปายัฮ กะฆีเตอ ฌูฆา. 10 ตูฮัด เตอ นู ฮาลัย บรี ซือลามัจ กะ อูมัจ-ซือมียา ปือนอฮ ดัฮ ญา เลอ นู ปาเงน กาเญา บรี มาโซะ เดะ ลาฆู บือซายา บือซรี ซือลาลู นะ ญา บือซามา ฌางัน เยซู คริด. กะฆีเตอ วะตู กาเญา บือเลฮ ตาฮัด ซูซัฮ ปายัฮ อีนี ซา วะตู ดัฮ ตูฮัด ตะอาซิก เลอ นะ บูวัจ บรี ฮาตี นะ กาเญา บาฌิ ปาเระ ดัฮ นะ บรี กาเญา ตือตู-ฮาตี นะ บรี กาเญา ตือฆัยํ-อูรัจ เดะ โซะ ฮาตี นะ ตืองะ กาเญา เดะ ตือปัจ กือฌะ โตระ. 11 ตูฮัด เลอ ญา มือฆัฮ ซูโงฮๆ ซือลาลู ซือมาญัก-รอจ. อาเมน. 12 ซูรัจ ปานะๆ อีนี กู บือเลฮ ฆาแรฮ ดัฮ กีเรบ ฌางัน ซีละวานัด นะ ปี อาตัจ กะ ลูมอฮ กาเญา. ซีละวานัด อีตู กู กีรา จะ ญา ฌาดี อาดี-บราดี ฮาตี รือมัก ซืออูรัก. กู นะ ปรีงัจ กะ กาเญา นะ ฌาดี ซะซี จะ ลาฆู นู ตูฮัด ญา ฮาลัย บรี ซือลามัจ กะ กีตา กะฆีนี ดัฮ ฌาดี ลาฆู ซูโงฮๆ เลอ. บรี กาเญา บือตือตู-ฮาตี เดะ ลาฆู อีตู. 13 ลูมอฮ ซือมียา นะ ตูฮัด เดะ นังฆรี บาบิโลน นู กือนา ปีเลฮ ดัฮ บือซามา ฌางัน กาเญา กูญา กีเรบ บรีงัจ กะ กาเญา เลอ. อาดา มาระโก ฌูฆา นู ซือรูปา บือกะ นานะ นะ กู เตอ ญา กีเรบ บรีงัจ กะ กาเญา กะฆีเตอ เลอ. 14 ตานา กาเญา ดาปัจ โกะ ดีบราดี ปือจายา บรี มือญาบัจ ตางัน ฌาดี ปือนานา บรี ลีฮัจ จะ กาเญา ซายัก บือซามา. กาเญา ซือมูฮา นู ฌาดี ซือมียา นะ เยซู คริด มีตา บรี กาเญา นะ ดูโดะ ซือนัง ซือลามัจ เลอ.
1 กู เปโตร นู ฌาดี ปราโซฮ ฌางัน ปือญูโรฮ นะ เยซู คริด กู ฆาแรฮ ซูรัจ อีนี กีเรบ บรี กะ กาเญา นู บือเลฮ ซาโมจ ลาฆู ปือจายา นู บรือฆา บาฌิ ซามา บายา ฌางัน กามี. นู กีตา ซาโมจ ลาฆู ปือจายา กะฆีเตอ ดัฮ เตอ กรานา-จะ เยซู คริด นู ฌาดี ตูฮัด บือซัยํ นะ กีตา นู บูวัจ บรี กีตา ฮีโดะ ลือปัซ ซูโงฮ ญา เตอ ฮาตี รือมัก ซูโงฮ เลอ. 2 มีตา เดะ ตูฮัด นะ บรี ซือลามัจ กะ กาเญา บือตามัฮ บาญะ บรี ดูโดะ ซือนัง ซือลามัจ บือตามัฮ บรี บาญะ บือกะ นู กาเญา บือเลฮ กราลา ตูฮัด เดะ อาตัซ ฌางัน เยซู ตูฮัด นะ กีตา ดัฮ. 3 นู ปือมือฆัฮ นะ ตูฮัด บือเลฮ บรี ลาฆู ซือมูฮา กะ กีตา นู นะ บรี กีตา อาดา ฮีโดะ บาฌิ ตูโรจ กะ ฌาลัด นะ ตูฮัด. นู ฌาดี กะฆีเตอ ซาเบะ กีตา กราลา ตูฮัด นู ปาเงน กีตา ดัฮ บรี มาโซะ บือซามา เดะ ลาฆู บือซรี บือซายา ฌางัน ลาฆู บาฌิ โตระ นะ ญา. 4 กะฆีเตอ ตูฮัด ญา บือเลฮ บรี กะ กีตา โกะ ปือมือเลา ฌาญี นู บาฌิ นู บือซัยํ ซูโงฮ บีดา-จะ ซาเบะ ลาฆู กะฆีเตอ กาเญา นะ บือเลฮ บาฮาเฆด นู บาฌิ ฌาดี-จะ ตูฮัด ฌาดี กะฮามี กาเญา นะ ฌาดี กะฆีเตอ ฌูฆา. กะฆีเตอ กาเญา นะ บือเลฮ ลือปัซ ดัฮ เดะ ลาฆู นู นะ บูโระ บูโซะ นู อาดา เดะ ดือนียา อีนี เตอ กรานา ลาฆู ฆาละ. 5 ซาเบะ กะฆีเตอ เลอ บรี กาเญา กูวาซา ยู ตือดะ ฮาบิฮ อูรัจ บรี บือตามัฮ ลาฆู บาฌิ. นู กาเญา ปือจายา ดัฮ บรี ฌาดี ซือมียา บาฌิ โตระ ปูลัก. นู ฌาดี ซือมียา บาฌิ ดัฮ บรี ตาฮู บาญะ ลาฆู ปูลัก. 6 นู ตาฮู บาญะ ลาฆู ดัฮ บรี ตาฮู ตาฮัด ญาวา ตะอาซิก ปูลัก. นู ตาฮัด ญาวา ตะอาซิก ดัฮ บรี อาดา ฮาตี กือฌะ-กือมัซ ปูลัก. นู อาดา ฮาตี กือฌะ-กือมัซ ดัฮ บรี ตูโรจ กะ ฌาลัด นะ ตูฮัด ปูลัก. 7 นู ตูโรจ กะ ฌาลัด นะ ตูฮัด ดัฮ บรี ซายัก ซามา ดีบราดี ปูลัก. นู ซายัก ซามา ดีบราดี เตอ บรี ซายัก กะ ซือมียา ซือมูฮา ปูลัก เลอ. 8 กะ อาดา ฮาตี กะฆีเตอ ดูโดะ เดะ กาเญา ปือนอฮ บาฌิ ดัฮ ญา นะ บูวัจ บรี กาเญา บือเลฮ อูโตก บือบูวัฮ ลือบัจ เดะ ลาฆู นู กาเญา กราลา เยซู คริด ตูฮัด นะ กีตา. 9 กรานา-จะ ดัฮ ซือมียา ดีฮา ฮอย ลาฆู บาฌิ กะฆีเตอ ญา ฌาดี ซือมียา มาตา บูตา ลีฮัจ บือฆารี เตด ซัฮ เลอ ลูปา ดัฮ จะ นู ตูฮัด บือเลฮ บาโซฮ ญา ดัฮ บรี ลือปัซ เดะ ดูซา นู ดูลู นะ ญา. 10 ซาเบะ กะฆีเตอ ลูมอฮ ดีบราดี เออ กือนา กูวาซา บูวัจ ตูโรจ บรี กือฌะ-กือมัซ บือกะ ลาฆู นู ตูฮัด ปาเงน กาเญา ปีเลฮ กาเญา ดัฮ. กรานา-จะ ดัฮ กาเญา บูวัจ กะฆีเตอ นะ เตด ดือละ ซือซัจ ฌาลัด ตีงัน ลาฆู ปือจายา. 11 กะฆีเตอ ตูฮัด นะ บูกา ปีตู นู ลือฆา บาฌิ บรี กะ กาเญา นะ มาโซะ กะ ดือนียา นู ซือลาลู อีตู นู อาดา ตูฮัด เยซู คริด ฌาดี ราฌา ญา เลอ นู ตูโลก กีตา บรี ฮีโดะ ลือปัซ บาฌิ. 12 ซาเบะ กะฆีเตอ มีเซ-จะ กาเญา ตาฮู ดัฮ กาเญา กือฌะ-กือมัซ เดะ ลาฆู ซูโงฮ นู กาเญา ซาโมจ ดัฮ ตาปี กู โปด อาดา ฮาตี นะ ปรีงัจ กะ กาเญา ซือลาลู บรี อีงัจ กะ ลาฆู กะฆีนี ซือมูฮา. 13 กาลา กู อาดา ดูโดะ เดะ ญาวา นู อีนี ลาฆี กู ฆามะ ลีฮัจ บาฌิ ดัฮ นู นะ ปรีงัจ กะ กาเญา เดะ ลาฆู กะฆีนี. 14 กรานา กู ตาฮู จะ เตด บราปา ลามา กู นะ มือนีงัน ญาวา นะ กู ปี บือกะ นู เยซู คริด ตูฮัด นะ กีตา ญา บือเลฮ ปลีฮัจ กะ กู ดัฮ. 15 กู กูวาซา นะ มียา ฌาลัด บรี กะ กาเญา นะ บรีงัจ รอจ กะ ลาฆู กะฆีนี บือเลฮ วะตู กู มือนีงัน ปี เดะ ดือนียา อีนี ดัฮ. 16 กรานา-จะ กาลา กามี บือเลฮ บรี กะ กาเญา ตาฮู ปาซัน นะ เยซู คริด ตูฮัด นะ กีตา นู ญา นะ มาแรฮ ฌางัน ลาฆู มือฆัฮ เตอ กามี เตด บือเลฮ ตูโรจ กะ ลาฆู จรือตา นู กูญา ปานัย อีงัจ เตอ ตาปี กามี ฌาดี ซะซี บือเลฮ ลีฮัจ ฌางัน มาตา นะ กามี จะ เยซู ญา บือซัยํ บือซรี เลอ. 17 ซาเบะ จะ กามี อาดา บือซามา ฌูฆา กาลา ตูฮัด นู อาโปก เดะ อาตัซ บือเลฮ ปูฌี กะ เยซู บรี ญา ซาโมจ ลาฆู บือซรี บือซายา เตอ. อาดา ซูวารา มาแรฮ รอจ กะ ญา ฌูฆา ดาตัก เดะ นู บือซรี ซูโงฮ นะ ตูฮัด นู จะ "ซือมียา อีนี เลอ ฌาดี นานะ นะ กู นู กู ซายัก. กู ซูกา-ฮาตี กะ ญา ซูโงฮ เลอ." 18 กามี โปด บือเลฮ ดืองัยํ ซูวารา อีตู บูงี ดาตัก มาแรฮ เดะ โซะ ลาแงะ กรานา-จะ กามี อาดา ดูโดะ ฌางัน เยซู เดะ บูเกะ นู บาฌิ บือซรี อีตู เตอ. 19 กะฆีเตอ กีตา ซือมูฮา บือเลฮ ตือตู-ฮาตี บาญะ ลาฆี เดะ ปือมือเลา นะ โกะ ซือมียา นู ตูโดฮ ลาฆู นะ ตูฮัด. นะ ฌาดี ลาฆู บาฌิ เลอ บรี กาเญา ตูโรจ กะ ปือมือเลา อีตู ซาเบะ ปือมือเลา อีตู ฌาดี ซือรูปา ซายา ปลีตา นู ซูวัยํ ปี กะ โซะ กือลับ ตือดะ อารี อีตู นะ บือบีฮัก ตือดะ บีตัก มูกัยํ นะ ตีโมน เดะ ฮาตี นะ กาเญา. 20 กาเญา กือนา ตาฮู ลาฆู อีนี ดูลู จะ ปือมือเลา ตูโดฮ ราตา นู อาดา ฆาแรฮ เดะ ซูรัจ ปือมือเลา นะ ตูฮัด ดัฮ เตอ ฮอย ซือมียา ดีฮา นะ บือเลฮ มาโซะ เดะ ฮาตี บรีงัจ ตูโรจ กะ ฮาตี นะ ญา ตะอาซิก เตอ. 21 กรานา-จะ ฮอย ปือมือเลา ตูโดฮ นู ดีฮา โปด นู ดือละ บือฌาดี มาแรฮ ตูโรจ กะ ฮาตี นะ ซือมียา ตาปี-จะ ซือมืองัจ นะ ตูฮัด บาวา โกะ ซือมียา บือปี บรี กูญา มือเลา ตูโรจ กะ ปือมือเลา นู มาแรฮ ดาตัก เดะ ตูฮัด เดะ อาตัซ เลอ.
1 ตาปี-จะ กาลา ดูลู อาดา ซือมียา ตูโดฮ มืออูปัย เดะ ตืองัฮ โกะ ลูมอฮ บักซา อิซราเอน อีตู. กะฆีเตอ ฌูฆา เลอ นะ อาดา ซือมียา อาฌัยํ ลาฆู มืออูปัย เดะ ตืองัฮ ลูมอฮ กาเญา. กูญา นะ จูรี อาเมด ลาฆู ซาลัฮ มาแรฮ อาฌัยํ นู นะ บาวา ปี รอจ กะ ลาฆู ฌาฮานัม. กูญา นะ กีปัซ ตูฮัด ญา นู บือเลฮ ตือบุซ กูญา ดัฮ. กะฆีเตอ ลาฆู ฌาฮานัม นะ บางัจ มาแรฮ รอจ กะ กูญา ตะอาซิก เลอ. 2 อาดา บาญะ ซือมียา นะ บูวัจ ตูโรจ กะ ลาฆู ฌาฮัจ เตด บือฆูนา นะ กูญา อีตู. ปือบูวัจ นะ กูญา อีตู เตอ นะ บูวัจ บรี บาญะ ซือมียา นะ มือเลา ตะอารัฮ กะ ฌาลัด นู ซูโงฮ. 3 ตูโรจ กะ ฮาตี ฮาลูบา นะ กูญา ตะอาซิก เตอ กูญา อีตู นะ มือเลา จรือเกาะ ตือลือตัก นะ บือฌูวัน อาเมด อูโตก เดะ กาเญา. ตูฮัด นู นะ กรัจ ฮูโกบ โกะ ซือมียา กะฆีเตอ ญา อาดา ซียะ ลามา ดัฮ. ตูฮัด นู นะ บูวัจ ลาฆู ฌาฮานัม กะ กูญา ญา ฮอย เตด ตือปือฌับ ลีนา เลอ. 4 ตูฮัด เดะ อาตัซ ญา เตด บือเลฮ อาเกะ ลาฆู ซาลัฮ นะ ลูมอฮ ฮูลู-บาลัก นู บูวัจ ดูซา เตอ ตาปี ตูละ กูญา บรี ฆูโฆยํ ปี กะ นังฆรี ฮาตู บือเลฮ กานัก กูญา ตาโรฮ เดะ ลูบัก นู กือลับ ฌาฆา ตาโรฮ ยู รอจ กะ อารี นู นะ กรัจ ฮูโกบ เลอ. 5 กะฆีเตอ ฌูฆา ตูฮัด ญา ฮอย เตด บือเลฮ อาเกะ ลาฆู ซาลัฮ นะ อูมัจ-ซือมียา กาลา นูตู เตอ ตาปี บูวัจ บรี อาเย อาโปฮ ดือนียา นะ โกะ ซือมียา ฌาฮัจ. กาลา อีตู เตอ ตูฮัด บือเลฮ ตูโลก ฌาฆา โนฮา ซือมียา นู มือญาเระ บรี ตาฮู ปาซัน ลาฆู บาฌิ-ตือปัจ ฌางัน ซือมียา อาซิก ตูโฌฮ อูรัก ฌูฆา. 6 กะฆีเตอ ปูลัก ตูฮัด ญา บือเลฮ กรัจ ฮูโกบ นังฆรี โซโดม ฌางัน นังฆรี โฆโมรา บรี บือนาซา ฮาบิฮ ปือลัฮ ฌาดี ฮาบู บีดา นะ ฌาดี จูตอ บรี ลีฮัจ จะ โกะ ซือมียา ฌาฮัจ นะ กือนา ลาฆู นามา. 7 ญา บือเลฮ ตูโลก โลด ซือมียา ซืออูรัก นู บาฌิ-ตือปัจ บรี ลือปัซ เดะ ลาฆู ฌาฮานัม. โลด เตอ ฆาโดฮ-ฮาตี บาญะ กรานา ลาฆู ปือบูวัจ เตด บือฆูนา นะ โกะ ซือมียา นู ฌาฮัจ อีตู. 8 กรานา-จะ ซือมียา นู บาฌิ-ตือปัจ อีตู ญา ดูโดะ เดะ ตืองัฮ ลูมอฮ ซือมียา ฌาฮัจ. กะฆีเตอ บีลัก อารี บีลัก มาลับ ฮาตี นู บาฌิ นะ ญา บรีงัจ บาญะ ซูซัฮ-ฮาตี กรานา ลาฆู ปือบูวัจ นู ฌาฮัจ นะ กูญา นู ญา บือเลฮ ลีฮัจ บือเลฮ ดืองัยํ ดัฮ. 9 โกะ ลาฆู นู อีตู ซือมูฮา บรี ลีฮัจ จะ ตูฮัด ญา ตาฮู นู นะ ตูโลก โกะ ซือมียา นู ตูโรจ กะ ฌาลัด นะ ตูฮัด บรี ลือปัซ เดะ ลาฆู ลกลีฮัจ. ญา ตาฮู นู นะ ฮูโกบ โกะ ซือมียา ฌาฮัจ กานัก กูญา ตาโรฮ ตือดะ รอจ กะ อารี นู นะ กรัจ ฮูโกบ เตอ. 10 ลือเบฮ เดะ กาวัด เตอ ญา นะ ฮูโกบ กูญา อีตู นู ปลือปัซ ญาวา ตะอาซิก บรี ตูโรจ กะ ลาฆู ฆาละ นู ตะอารัฮ โตระ นู มือเลา มือฌัฮ กะ ลาฆู ปือมือฆัฮ นะ ตูฮัด. โกะ ซือมียา อาฌัยํ ซาลัฮ อีตู กูญา บรานี นะ บูวัจ ตูโรจ กะ ฮาตี ตะอาซิก เตด บรีงัจ นะ ตาโกจ เดะ ลาฆู นู กูญา มือเลา ตะอารัฮ กะ ลูมอฮ ฌิด นู ซัยํ-บือซัยํ. 11 ตาปี โซะ โกะ ฮูลู-บาลัก เตอ มีเซ-จะ กูญา มือฆัฮ ตือฆัยํ-อูรัจ ลือเบฮ เดะ โกะ ฌิด โปด ตาปี กูญา เตด บือเลฮ มือเลา ตะอารัฮ อาดู โกะ ฌิด โซะ ฮึลด มูคา นะ ตูฮัด. 12 ตาปี โกะ ซือมียา อีตู ซีงี กูญา ฌาดี ซือรูปา บือนาตัก นู ฮอย อากัน ตูโรจ กะ ฮาดัจ นะ กูญา เตอ นู บือฌาดี มาแรฮ บีดา นะ กือนา รีฆะ กือนา บูนอฮ บือนาซา เลอ. ซือมียา กะฆีเตอ มือเลา ตะอารัฮ โกะ ลาฆู อีตู นู กูญา เตด มาโซะ เดะ ฮาตี ลาลู เลอ. กูญา นะ ฆาโดฮ ฌาฮานัม ซือรูปา บือกะ บือนาตัก นู อีตู. 13 กูญา นะ กือนา ลาฆู ซูซัฮ ปายัฮ บาลัซ ปาเระ ลาฆู ซูซัฮ ปายัฮ นู กูญา บูวัจ ดัฮ. โซะ กูญา เตอ นู นะ รามัย มาโบะ แจะ-บีแระ เดะ ตืองัฮ อารี ฌาดี ลาฆู บรามัย ซูกา-ฮาตี เลอ. กูญา ซือรูปา กะ ปะออย ซือรูปา บือกัซ ลียัก บรามัย แจะ-บีแระ เดะ ลาฆู ตีปู นะ กูญา กาลา ตืองัฮ บือฮีมุน มากัด บือซามา ฌางัน กาเญา. 14 มาตา นะ กูญา ซูกา นะ ลีฮัจ นีบีนี บือฌูวัน. กูญา ซูกา นะ บูวัจ ดูซา ฮอย เตด ฮาบิฮ ลาลู ตีปู บาอาฌะ ซือมียา นู ฮาตี เตด กือฌะ-กือมัซ. ฮาตี นะ กูญา ลาดัจ บูวัจ ตูโรจ กะ ลาฆู ฮาลูบา. กูญา ฌาดี ซือมียา นู กือนา ซูปัฮ ดัฮ เลอ. 15 กูญา ตีงัน ฌาลัด นู รือมัก ซือซัจ ปี ตูโรจ กะ ฌาลัด นู ซาลัฮ ปี บูวัจ ตูโรจ กะ ฌาลัด นะ บาลาอัม นานะ นะ เบโอ ซือมียา นู ซูกา บือเลฮ อูโตก นู ดาตัก มาแรฮ เดะ ลาฆู ฌาฮัจ. 16 ตาปี บาลาอัม กือนา อูจะ กรานา ญา บูวัจ กือลือเบฮ เตอ. อานะ กูดา นู มือเลา เตด บือเลฮ เตอ ญา โปด บือเลฮ มือเลา ฌาดี บาซา อูมัจ-ซือมียา ญา บือเลฮ ซาฆัก ลาฆู ราโซะ นะ ซือมียา ตูโดฮ อีตู. 17 โกะ ซือมียา กะฆีนี กูญา บือกะ ตือลาฆา นู ฮอย อาเย บือกะ โกะ กือมูวัง นู กือนา อาเงน รีโบจ ตีโยะ ปี เลอ. ตูฮัด ญา ซียะ ตือปัจ กือลับ ซูโงฮ เดะ นอรากา บรี กะ โกะ ซือมียา กะฆีเตอ. 18 ซาเบะ-จะ กูญา มือเลา บือซัยํ งันตืองัน ลาฆู บูดอ นะ กูญา. กูญา ซูโรฮ ลาฆู ฆาละ โซะ ญาวา ลาฆู ฮอย เตด บือฆูนา เตอ มาแรฮ ตีปู บาอาฌะ โกะ ซือมียา อีตู นู บารู ลารี ลือปัซ ดัฮ เดะ โกะ ซือมียา นู บือฌาลัด ตูโรจ กะ ฌาลัด นู ซือซัจ. 19 กูญา ฌาญี จะ นะ บรี โกะ ซือมียา อีตู ลือปัซ เดะ ลาฆู ฌาดี ปราโซฮ ตาปี อีซี กูญา ตะอาซิก ฌาดี ปราโซฮ นะ โกะ ลาฆู อีตู นู บรี ญาวา กูญา บูโระ บูโซะ. กรานา-จะ ดัฮ ซือมียา ดีฮา อาลัฮ เดะ ลาฆู มานามา ญา นะ ฌาดี ปราโซฮ นะ ลาฆู อีตู เลอ. 20 กรานา-จะ อาดา ซือมียา ซือตืองัฮ นู บือเลฮ ลือปัซ เดะ ลาฆู ตะอารัฮ โซะ ดือนียา อีนี ดัฮ ซาเบะ กูญา บือเลฮ กราลา เยซู คริด ตูฮัด นะ กีตา นู ตูโลก บรี กีตา ฮีโดะ ลือปัซ บาฌิ ดัฮ. ตาปี ดัฮ โกะ ซือมียา อีตู กือนา รีฆะ เดะ ลาฆู ตะอารัฮ อีตู ปูลัก อาลัฮ ดัฮ เตอ เดะ บลากัก กูญา โปด ซูซัฮ ปายัฮ ลือเบฮ เดะ นู ลามูลา เลอ. 21 ซาเบะ-จะ ดัฮ เตด บือเลฮ ตาฮู ฌาลัด นู บาฌิ-ตือปัจ อีตู ลาลู กะฆีเตอ โปด บาฌิ เดะ นู นะ บือเลฮ ตาฮู ฌาลัด อีตู ดัฮ ตาปี อาเลฮ บลากัก กะ ปือมือซัด ฮูโกบ นู จรัฮ บาฌิ นู บือเลฮ กีเรบ บรี กะ กูญา ดัฮ. 22 ลาฆู นู บือฌาดี ฌางัน กูญา ตูโรจ กะ ปือมือเลา นูตู นู ซูโงฮ นู มือเลา จะ "อาซู ญา ปาเระ มาแรฮ มากัด บารัก นู ญา มูตัฮ ซีงี เตอ." อาดา ฌูฆา นู จะ "บาบี นู ซือมียา บาโซฮ บรี จรัฮ ดัฮ ญา ปาเระ ปี ฆูแลก เดะ กูบัก ลูโปยํ ปูลัก เลอ."
1 ลูมอฮ นู กู ซายัก เออ นี ฌาดี ซูรัจ นู ดูวา นะ กู นู บือเลฮ ฆาแรฮ รอจ กะ กาเญา เตอ. เดะ ดาลับ ซูรัจ กือดูวา อีนี กู บือเลฮ ปรีงัจ กะ ฮาตี นู รือมัก นะ กาเญา บรี อีงัจ กะ ลาฆู กะฆีนี. 2 อาดา โกะ ปือมือเลา อีตู นู โกะ ซือมียา ตูโดฮ นู จรัฮ บาฌิ บือเลฮ มือเลา กาลา ดูลู ดัฮ เตอ อาดา ฌูฆา โกะ ปือมือซัด นะ ตูฮัด นู ตูโลก กีตา บรี ลือปัซ เตอ นู ญา บือเลฮ กีเรบ บรี กะ โกะ ปือญูโรฮ นะ มือญาเระ กะ กาเญา. ลาฆู อีตู เตอ กู นะ บรี กาเญา จับ บรี บาฌิ เลอ. 3 กาเญา กือนา มาโซะ เดะ ฮาตี ตือนอซ อีนี ดูลู จะ เดะ กาลา ปือญูดัฮ อาดา โกะ ซือมียา นู ซูกา อาฆัฮ-ฆือละ นู บูวัจ ตูโรจ กะ ฮาตี ฆาละ นะ กูญา ตะอาซิก. กูญา นะ มาแรฮ อาฆัฮ-ฆือละ กะ กาเญา 4 ตาญา จะ "ปือมือเลา นู ฌาญี จะ ตูฮัด นะ มาแรฮ เตอ อาดา ซูโงฮ เฆอ? กรานา-จะ ตะเดะ โกะ บีลาแก มาตี ปี ดัฮ ลาฆู ซือมูฮา โปด อาดา ดูโดะ ซือรูปา กะฆีเตอ ตะเดะ ดูลู นู ตูฮัด บือเลฮ บือฌาดี ดือนียา เลอ." 5 ซาเบะ กูญา วัจบูวัจ ลูปา ลาฆู นู อีนี บูวัก ดัฮ นู จะ กาลา นูตู เตอ ปือมือเลา นะ ตูฮัด บือเลฮ บือฌาดี ลาแงะ ฌางัน ดือนียา. ดือนียา โปด บือเลฮ บือฌาดี มาแรฮ ดาตัก เดะ อาเย บือฌาดี มาแรฮ ฌางัน อาเย ฌูฆา เลอ. 6 กะฆีเตอ ฌูฆา อาเย อีตู โปด ญา อาโปฮ บรี ดือนียา เดะ กาลา อีตู บือนาซา ฮาบิฮ ดัฮ. 7 ตาปี ลาแงะ ฌางัน ดือนียา นู อาดา เดะ ฮาดัจ อีนี เตอ นู ซา ปือมือเลา นะ ตูฮัด อีตู ญา ปือซัด ตาโรฮ บีดา นะ บรี กะ อาปี ตูนู บรี ปือลัฮ ฮาบิฮ เตอ ตาโรฮ ตือดะ นะ รอจ กะ อารี นู ตูฮัด นะ กรัจ ฮูโกบ โกะ ซือมียา ฌาฮัจ บรี บือนาซา ฮาบิฮ เลอ. 8 ตาปี ลีฮัจ เลอ กาเญา ลูมอฮ นู กู ซายัก เออ ฌางัน ลูปา ตือนอซ อีนี เลอ นู จะ โซะ ตูฮัด เตอ ซืออารี ญา ซือรูปา กะ ซือรีบู ตาโฮด ซือรีบู ตาโฮด โปด ซือรูปา กะ ซืออารี เลอ. 9 ตูฮัด ญา เตด ลามัจ เดะ ลาฆู นู ญา บือฌาญี ดัฮ บือกะ ซือมียา ซือตืองัฮ อีงัจ เตอ ตาปี ญา ตาฮัด-ฮาตี ลามา กรานา ลีฮัจ กะ กาเญา. ตูฮัด ญา เตด บือคานะ บรี กะ ซือมียา ซืออูรัก โปด นะ กือนา ฌาฮานัม ตาปี ญา บือคานะ นะ บรี โกะ ซือมียา ซือมูฮา บราเลฮ-ฮาตี ปาเระ. 10 ตาปี อารี นะ ตูฮัด นะ มาแรฮ ซือรูปา บือกะ อูรัก ปือญูรี มาแรฮ. เดะ อารี อีตู ลาแงะ ซือมูฮา นะ ลือแงะ ปี ฌางัน ซูวารา บูงี บาฮานา. โกะ บีตัก ซือมูฮา โปด นะ บือนาซา ฌางัน อาปี. ดือนียา อีนี ฌางัน ซือบารัก ซือมูฮา นู อาดา เดะ ดือนียา นะ ฮางอซ ฮาบิฮ เลอ. 11 กรานา ลีฮัจ ดัฮ จะ บารัก ซือมูฮา อีนี ญา ฆาโดฮ บือนาซา ปี ฮาบิฮ ดัฮ กาเญา เตอ ปาโตจ นะ ฌาดี ซือมียา กะฮามี เลอ? กือนา บูวัจ ตูโรจ กะ ปือบูวัจ นู บาฌิ บือฆาจะ ตูโรจ กะ ฌาลัด นะ ตูฮัด 12 ตืองัฮ กาเญา นาตี บรี อารี นู ตูฮัด นะ มาแรฮ รอจ กูวาซา บูวัจ บรี อารี อีตู นะ มาแรฮ ปัจ-จือปัจ ฌูฆา เลอ. เดะ อารี อีตู ลาแงะ กือนา นะ ตูนู บรี ปือลัฮ ฮาบิฮ ปี เลอ. โกะ บีตัก โปด นะ ปือลัฮ ลัย ปี ฌูฆา เดะ อาปี นู ฮางัจ โตระ. 13 ตาปี-จะ ตูโรจ กะ ลาฆู นู ตูฮัด บือฌาญี เตอ กีตา อาดา นาตี ลีฮัจ ลาแงะ นู บารู ฌางัน ดือนียา นู บารู ตือปัจ นู อาดา ลาฆู บาฌิ-ตือปัจ ดูโดะ ซือลาลู เลอ. 14 ซาเบะ กะฆีเตอ ลูมอฮ นู กู ซายัก เออ นู กาเญา อาดา นาตี อารี อีตู ซีงี เตอ กาเญา กือนา กูวาซา บรี ตูฮัด ดาปัจ กาเญา ดูโดะ ซือนัง ซือลามัจ ฮอย ตือปัจ ตะอารัฮ ฮอย ซาลัฮ เลอ. 15 กือนา บรีงัจ จะ ตูฮัด นะ กีตา ตาฮัด-ฮาตี ลามา เตอ บีดา กีตา นะ บือเลฮ ฮีโดะ ลือปัซ บาฌิ บือกะ ซือรูปา นู เปาโล ดีบราดี นู กีตา ซายัก บือเลฮ ฆาแรฮ ซูรัจ อาตัจ กะ กาเญา ตูโรจ กะ ลาฆู ปานัย อากัน นู ตูฮัด บือเลฮ บรี กะ ญา เตอ. 16 เดะ ซูรัจ ราตา ลามัยํ นะ ญา โปด ญา บือเลฮ ฆาแรฮ ปาซัน ลาฆู กะฆีนี ดัฮ. เดะ โกะ ซูรัจ อีตู เตอ อาดา ลาฆู ซือตืองัฮ นู มาโซะ เดะ ฮาตี ปายัฮ นู โกะ ซือมียา นู เตด ตาฮู อารัฮ อาดา ฮาตี เตด ตือตู เตอ กูญา บือเลฮ ซาเลด มือญาเระ บรี ซาลัฮ บือกะ ซือรูปา นู กูญา บูวัจ เดะ โกะ ซูรัจ ปือมือเลา นะ ตูฮัด นู ฆีลาฆี. ลาฆู กะฆีเตอ บูวัจ บรี กะ ญาวา กูญา ตะอาซิก นะ ฌาฮานัม. 17 ซาเบะ กะฆีเตอ กาเญา เลอ ลูมอฮ นู กู ซายัก เออ นู กาเญา ตาฮู ลาฆู กะฆีนี ดูลู ดัฮ กาเญา กือนา ฌาฆา บรี บาฌิ ตาโกจ-จะ กาเญา นะ ซือซัจ ฌาลัด ตูโรจ กะ ฌาลัด ซาลัฮ นะ โกะ ซือมียา ฌาฮัจ เลอ. กะฆีเตอ กาเญา นะ ฆูรก ดัฮ เดะ ตือปัจ กือฌะ-กือมัซ นะ กาเญา เตอ. 18 ตาปี บรี กาเญา บาฌิ ซือรูโลยํ บือกะ นู ตูฮัด ฮาลัย บรี ซือลามัจ กะ กาเญา. บรี กาเญา กราลา เยซู คริด บรี บาญะ ซือรูโลยํ ฌูฆา. ญา เลอ ตูฮัด นะ กีตา นู ตูโลก กีตา บรี ฮีโดะ ลือปัซ บาฌิ. บรี กีตา ปูฌี กะ ญา ตะเดะ อีนี ปี ซือลาลู เลอ. อาเมน.
1 อาดา ลาฆู ปาซัน ปือมือเลา นะ ตูฮัด นู บรี ฮีโดะ จะ ปือมือเลา อีตู นู อาดา ตะเดะ ดูลู นูตู เตอ. นู บลาโลก จะ ปือมือเลา นะ ตูฮัด อีตู กามี บือเลฮ ดืองัยํ ดัฮ กามี ลีฮัจ บือฆารี ฌางัน มาตา ดัฮ กามี ตีญูง ลีฮัจ ดัฮ กามี ปือเตาะ ฌางัน ตางัน นะ กามี ดัฮ. 2 ซือมียา นู บรี ฮีโดะ อีตู ญา มาแรฮ ปลีฮัจ ดัฮ. กามี โปด บือเลฮ ลีฮัจ บือฆารี ญา กะฆีเตอ กามี ฌาดี ซะซี นู นะ มือญาเระ ปาซัน ลาฆู นู นะ ฮีโดะ ซูโงฮ ซือลาลู เตอ บรี กะ กาเญา ตาฮู. ซือมียา นู บรี ฮีโดะ อีตู ญา อาดา ฌางัน อาโปก เดะ อาตัซ เลอ ตาปี ญา บือเลฮ มาแรฮ ปลีฮัจ กะ กามี ดัฮ. 3 กามี บือเลฮ บือมุน บรามัย บือซามา ฌางัน อาโปก เดะ อาตัซ ฌางัน เยซู คริด นานะ นะ ญา เตอ. กะฆีเตอ กามี มือญาเระ กะ กาเญา จะ ลาฆู นู กามี บือเลฮ ลีฮัจ บือฆารี บือเลฮ ดืองัยํ ดัฮ บีดา บรี กาเญา นะ บือเลฮ บือมุน บรามัย บือซามา ฌางัน กามี. 4 ลาฆู อีนี กามี ฆาแรฮ บรี กะ กาเญา นะ บรี กีตา ซือมูฮา ซูกา-ฮาตี ปือนอฮ มีเม เลอ. 5 นี เลอ ฌาดี ลาฆู นู กามี บือเลฮ ดืองัยํ ดาตัก มาแรฮ เดะ ตูฮัด ดัฮ นู นะ มือญาเระ กะ กาเญา จะ ตูฮัด เตอ เลอ ญา ฌาดี นู จรัฮ เลอ. ฮอย ลาฆู นู กือลับ เดะ ตูฮัด เลอ. 6 ดัฮ กีตา มือเลา จะ "กีตา เลอ บือมุน บรามัย ฌางัน ตูฮัด" ตาปี กีตา ตูโรจ กะ ลาฆู นู โซะ กือลับ กะฆีเตอ กีตา มือเลา มืออูปัย กีตา เตด ตูโรจ กะ ลาฆู นู ซูโงฮ. 7 ตาปี ดัฮ กีตา บูวัจ ตูโรจ กะ ลาฆู โซะ จรัฮ เตอ บือกะ ซือรูปา นู ตูฮัด ญา อาดา โซะ จรัฮ กะฆีเตอ กีตา บือมุน บรามัย บือซามา-ซามา. กะฆีเตอ ปูลัก ดารัฮ นะ เยซู นานะ นะ ตูฮัด เดะ อาตัซ ญา บาโซฮ กีตา บรี ลือปัซ เดะ ดูซา ซือมูฮา เลอ. 8 ดัฮ กีตา มือเลา จะ "ฮอย ดูซา ดัฮ" กะฆีเตอ กีตา ฌาดี ซือมียา ตีปู กะ ญาวา ตะอาซิก ฮอย ลาฆู นู ซูโงฮ เดะ ฮาตี นะ กีตา เลอ. 9 ดัฮ กีตา ซาโงะ ฌางัน ตูฮัด จะ กีตา ดูซา ดัฮ กะฆีเตอ ตูฮัด ญา ฮาตี รือมัก ญา บาฌิ-ตือปัจ ญา ยอม อาเกะ ดูซา นะ กีตา. ญา ยอม บาโซฮ กีตา บรี ลือปัซ เดะ ลาฆู นู เตด บือฆูนา ซือมูฮา เลอ. 10 ดัฮ กีตา มือเลา จะ "กู เตด บือเลฮ บูวัจ ดูซา ดัฮ" ญา เตอ ซือรูปา บือกะ กีตา มือเลา จะ "ตูฮัด มือเลา มืออูปัย". กะฆีเตอ ปือมือเลา นะ ตูฮัด ฮอย เตด ดูโดะ เดะ ฮาตี นะ กีตา เลอ.
1 โอ โกะ นานะ ดือมิ นะ กู เออ กู ฆาแรฮ ลาฆู อีนี บรี กะ กาเญา บีดา ตีเมา บรี กาเญา นะ บูวัจ ดูซา. ตาปี ดัฮ ซาปา บูวัจ ดูซา ดัฮ กีตา อาดา ซือมียา ตูโลก มือเลา ปาซัน นะ กีตา ฌางัน อาโปก เดะ อาตัซ. ญา เตอ เยซู คริด นู บาฌิ-ตือปัจ เลอ. 2 ญา เตอ เลอ นู ฌาดี ซือรูปา บารัก มือญือมัฮ นู มือนืองะ บรี กะ ตูฮัด บรี ญา นะ อาเกะ ดูซา นะ กีตา. บูกัด ซา ลาฆู ดูซา นะ กีตา เตอ ตาปี ดูซา นะ โกะ อูมัจ-ซือมียา เดะ ดือนียา ซือมูฮา เลอ. 3 นู กีตา ตูโรจ กะ โกะ ปือมือซัด นะ ตูฮัด บูวัจ บรี กีตา ตือตู-ฮาตี จะ กีตา กราลา ตูฮัด ดัฮ. 4 ซือมียา นู มือเลา จะ "กู กราลา ตูฮัด" ตาปี เตด บูวัจ ตูโรจ กะ ปือมือซัด นะ ญา ซือมียา อีตู เตอ ฌาดี ซือมียา มือเลา มืออูปัย. ฮอย ลาฆู นู ซูโงฮ เดะ ฮาตี นะ ญา. 5 ตาปี ซือมียา ดีฮา นู ตูโรจ กะ ปือมือเลา นะ ตูฮัด ซือมียา อีตู เลอ นู อาดา ฮาตี ซายัก กะ ตูฮัด ปือนอฮ บาฌิ ดัฮ. ลาฆู กะฆีนี บรี กีตา ตาฮู จะ กีตา อาดา ลือกัจ บือซามา ฌางัน ตูฮัด เลอ. 6 ฌาดี-จะ ซือมียา นู จะ "กู ลือกัจ บือซามา ฌางัน ตูฮัด" ซือมียา อีตู เลอ ฆาโดฮ บูวัจ ตูโรจ บือกะ ลาฆู นู เยซู คริด บือเลฮ บูวัจ ดัฮ. 7 โกะ กาวัด นู กู ซายัก เออ ปือมือซัด นู กู ฆาแรฮ บรี กะ กาเญา เตอ บูกัด ปือมือซัด บารู ตาปี ฌาดี ปือมือซัด นู ลามา นู กาเญา อาดา ตะเดะ ลามูลา ดัฮ. ปือมือซัด นู ลามา อีตู ฌาดี ปือมือเลา นู กาเญา บือเลฮ ดืองัยํ ดัฮ. 8 มีเซ กะฆีเตอ โปด ตาปี ฌาดี ปือมือซัด นู บารู นู กู ฆาแรฮ บรี กะ กาเญา ฌูฆา ฌาดี ลาฆู ซูโงฮ นู อาดา เดะ ฮาตี นะ ตูฮัด อาดา เดะ ฮาตี กาเญา ฌูฆา. ฌาดี-จะ ลาฆู กือลับ ลือปัซ ปี ดัฮ ลาฆู จรัฮ นู ซูโงฮ เตอ ตืองัฮ ซูโลฮ มาแรฮ เลอ. 9 ซือมียา นู จะ "กู อาดา ดูโดะ เดะ โซะ จรัฮ ดัฮ" ตาปี ญา บือชี กะ ดีบราดี นะ ญา ซือมียา อีตู เตอ ฌาดี ซือมียา นู ดูโดะ โซะ กือลับ ลาฆี. 10 ตาปี ซือมียา นู ซายัก กะ ดีบราดี นะ ญา เตอ ญา อาดา ดูโดะ โซะ เดะ จรัฮ เตอ เลอ ญา ฮอย นามา นู นะ บรี กะ ซือมียา ตือซีปะ รือบัฮ. 11 ตาปี ซือมียา นู บือชี กะ ดีบราดี นะ ญา เตอ ญา ดูโดะ เดะ โซะ กือลับ เลอ. ญา บือฌาลัด ปี กะ โซะ กือลับ. ลาฆู กือลับ อีตู เตอ นะ บูวัจ บรี ญา มาตา บูตา. ญา นะ ปี กะ ดีฮา โปด ญา ปี เตด กือนา. 12 โกะ นานะ ดือมิ เออ กู ฆาแรฮ ซูรัจ อีนี อาตัจ บรี กะ กาเญา ซาเบะ-จะ ดูซา นะ กาเญา กือนา อาเกะ ดัฮ กรานา นามา นะ ตูฮัด เลอ. 13 โกะ ปะ เออ กู ฆาแรฮ ซูรัจ อีนี อาตัจ บรี กะ กาเญา ซาเบะ-จะ กาเญา บือเลฮ กราลา ตูฮัด นู อาดา ตะเดะ ดูลู นูตู เลอ. โกะ อูรัก มูดา เออ กู ฆาแรฮ ซูรัจ อีนี อาตัจ บรี กะ กาเญา ซาเบะ-จะ กาเญา บือเลฮ ฌือนัฮ เดะ ฮาตู ซีตัด นู ฌาฮัจ ดัฮ เลอ. โกะ นานะ ดือมิ เออ กู บือเลฮ ฆาแรฮ ซูรัจ อีนี อาตัจ บรี กะ กาเญา ซาเบะ-จะ กาเญา บือเลฮ กราลา อาโปก เดะ อาตัซ ดัฮ เลอ. 14 โกะ ปะ เออ กู บือเลฮ ฆาแรฮ ซูรัจ อีนี อาตัจ บรี กะ กาเญา ซาเบะ-จะ กาเญา บือเลฮ กราลา ตูฮัด นู อาดา ตะเดะ ดูลู นูตู เลอ. โกะ อูรัก มูดา เออ กู บือเลฮ ฆาแรฮ ซูรัจ อีนี อาตัจ บรี กะ กาเญา ซาเบะ-จะ กาเญา บือเลฮ ตือฆัยํ-อูรัจ ดัฮ เลอ. ปือมือเลา นะ ตูฮัด ญา ดูโดะ เดะ ฮาตี นะ กาเญา. กาเญา โปด ฌือนัฮ เดะ ฮาตู ซีตัด นู ฌาฮัจ ดัฮ. 15 ฌางัน ซายัก กะ ดือนียา อีนี เฆอ-จะ โกะ ซือบารัก โซะ ดือนียา อีนี. ดัฮ ซือมียา ดีฮา ซายัก กะ ดือนียา ญา เตอ ฮอย ลาฆู นะ ซายัก กะ อาโปก เดะ อาตัซ เดะ ฮาตี นะ ญา. 16 ซาเบะ บือนา ซือมูฮา เดะ ดือนียา อีนี เตอ อาดา กะฆีนี อาดา ลาฆู นู ฮาตี นะ กีตา ฆาละ นะ บูวัจ ลาฆู นู ฌาฮัจ เตอ อาดา นู มาตา กีตา ฆาละ นะ ลีฮัจ นามาๆ เตอ อาดา ลาฆู นู มูโลจ นะ กีตา ลาดัจ มือเลา มือโอจ กะ ญาวา ตะอาซิก เตอ. ลาฆู อีนี ซือมูฮา เตด มาแรฮ ดาตัก เดะ อาโปก เดะ อาตัซ เตอ ตาปี มาแรฮ เดะ โซะ ดือนียา เตอ เลอ. 17 ดือนียา อีนี ฌางัน บือนา บารัก ซือมูฮา เดะ ดือนียา นู ซือมียา ฆาละ นะ บูวัจ ญา นะ ลือแงะ ปี ฮาบิฮ ดัฮ ตาปี ซือมียา นู ตูโรจ กะ ฮาตี นะ ตูฮัด ญา นะ ดูโดะ ซือลาลู เลอ. 18 โกะ นานะ เออ วะตู อีนี ฌาดี วะตู ปือญูดัฮ ดัฮ. บือกะ กาเญา บือเลฮ ดืองัยํ ดัฮ อาดา ซือมียา ซืออูรัก นู ลาวัด ฌางัน เยซู คริด ญา นะ มาแรฮ. วะตู อีนี เลอ อาดา ซือมียา ลาวัด ฌางัน เยซู คริด บาญะ อูรัก ดัฮ. กะฆีเตอ กีตา ตาฮู จะ นี เลอ ฌาดี วะตู ปือญูดัฮ ดัฮ เลอ. 19 ลูมอฮ กูญา อีตู ตรือเบะ ปี เดะ ลูมอฮ กีตา ดัฮ. ตาปี กูญา อีตู บูกัด ลูมอฮ นะ กีตา. ดัฮ กูญา ฌาดี ลูมอฮ นะ กีตา กูญา กือนา ดูโดะ บือซามา ฌางัน กีตา ลาฆี. ตาปี กูญา ตรือเบะ ดัฮ บีดา บรี ลีฮัจ จะ กูญา บูกัด ลูมอฮ นะ กีตา ราตา ซือมียา เลอ. 20 ตาปี ตูฮัด นู บาฌิ ซูโงฮ ญา อูแร ซือมืองัจ นะ ญา เดะ ลูมอฮ กาเญา ดัฮ. กะฆีเตอ กาเญา ตาฮู ลาฆู นู ซูโงฮ นะ ตูฮัด ราตา ซือมียา เลอ. 21 กู ฆาแรฮ ซูรัจ บรี กะ กาเญา บูกัด กรานา กาเญา เตด ตาฮู ลาฆู นู ซูโงฮ ตาปี กรานา กาเญา ตาฮู ดัฮ. กาเญา ตาฮู จะ ปือมือเลา มืออูปัย ซือปาตัฮ โปด ฮอย เตด มาแรฮ ดาตัก เดะ ลาฆู นู ซูโงฮ เลอ. 22 ซาปา เลอ นู ฌาดี ซือมียา มือเลา มืออูปัย? ญา เตอ เลอ ซือมียา นู มือเลา กีปัซ ฮอย เตด ซาโงะ จะ เยซู ฌาดี ราฌา นู บรี ซือลามัจ. ญา เตอ เลอ นู ฌาดี ซือมียา นู ลาวัด ฌางัน เยซู คริด เตอ ญา กีปัซ อาโปก เดะ อาตัซ ฌางัน นานะ นะ ญา ซามา. 23 ซือมียา ดีฮา กีปัซ นานะ นะ ตูฮัด ซือมียา อีตู ญา ฮอย ตูฮัด ฌาดี อาโปก นะ ญา. ตาปี ซือมียา ดีฮา ซาโมจ นานะ นะ ตูฮัด เตอ ญา เลอ อาดา ตูฮัด ฌาดี อาโปก ฌูฆา เลอ. 24 กาเญา อาดา ลาฆู นู กาเญา บือเลฮ ดืองัยํ ตะเดะ ลามูลา ดัฮ บรี ลาฆู อีตู อาดา ดูโดะ ฌางัน กาเญา เลอ. ดัฮ ลาฆู อีตู อาดา ดูโดะ ฌางัน กาเญา กะฆีเตอ กาเญา นะ ดูโดะ ลือกัจ บือซามา ฌางัน นานะ นะ ตูฮัด ฌางัน อาโปก เดะ อาตัซ ฌูฆา. 25 อีนี เลอ ฌาดี ปือมือเลา นู ตูฮัด บือเลฮ บือฌาญี ฌางัน กีตา ฌาดี-จะ นะ บรี กีตา ฮีโดะ ซูโงฮ ซือลาลู. 26 ลาฆู อีนี กู ฆาแรฮ บรี กะ กาเญา มือญาเระ ลาฆู นะ ลูมอฮ ซือมียา นู นะ ตีปู กาเญา บรี ซือซัจ. 27 ตาปี นู ตูฮัด อูแร ซือมืองัจ นะ ญา เดะ กาเญา ดัฮ ญา เตอ อาดา ดูโดะ เดะ ฮาตี นะ กาเญา เลอ. กะฆีเตอ เตด ปายัฮ บรี กาวัด อาฌัยํ กาเญา กรานา ซือมืองัจ นู บือเลฮ อูแร ดัฮ ญา เตอ นะ อาฌัยํ กาเญา เดะ ราตา ลาฆู ราตา มาจับ. ลาฆู นู ซือมืองัจ นะ ตูฮัด อาฌัยํ กะฆีนี ฌาดี ลาฆู นู ซูโงฮ บูกัด ลาฆู มืออูปัย. กะฆีเตอ นู ญา อาฌัยํ กาเญา กะฮามี กาเญา กือนา ดูโดะ ลือกัจ บือซามา ฌางัน ตูฮัด กะฆีเตอ เลอ. 28 กะฆีเตอ นานะ ดือมิ เออ บรี กาเญา ดูโดะ ลือกัจ บือซามา ฌางัน ตูฮัด เตอ เลอ. กะฆีเตอ ตานา ตูฮัด นะ มาแรฮ ปลีฮัจ กีตา นะ อาดา ฮาตี บรานี ฮอย ลาฆู ปือญือและ โซะ ฮึลด มูคา นะ ตูฮัด เดะ วะตู นู ญา มาแรฮ. 29 ดัฮ กาเญา ตาฮู จะ ตูฮัด เตอ ญา เลอ นู บาฌิ-ตือปัจ กะฆีเตอ กาเญา ตาฮู จะ ราตา ซือมียา นู ตูโรจ กะ ลาฆู บาฌิ-ตือปัจ นู ญา บือฌาดี ดาตัก เดะ โซะ ตูฮัด เตอ เลอ.
1 ลีฮัจ เลอ อาโปก เดะ อาตัซ ญา ซายัก กะ กีตา บาญะ กะฆีนี เลอ นู ญา บรี กะ กีตา ปือนามา จะ โกะ นานะ นะ ตูฮัด เลอ. ซูโงฮ กีตา ฌาดี นานะ นะ ตูฮัด เตอ เลอ. กะฆีเตอ ซือมียา เดะ ดือนียา เตด กราลา กีตา กรานา-จะ กูญา เตด กราลา ตูฮัด เลอ. 2 กาวัด นู กู ซายัก เออ วะตู อีนี กีตา ฌาดี นานะ นะ ตูฮัด ดัฮ. เตด ดือละ ลีฮัจ จะ อาดา ซืออารี โซะ ฮึลด กีตา นะ ฌาดี กะฮามี เลอ. ตาปี กีตา ตาฮู จะ ตานา เยซู คริด นะ มาแรฮ ปลีฮัจ เตอ กีตา นะ ฌาดี ซือรูปา บือกะ ญา เลอ กรานา-จะ ตูฮัด เยซู ฌาดี กะฮามี กีตา นะ ลีฮัจ บือฆารี ญา กะฆีเตอ เลอ. 3 กะฆีเตอ ราตา ซือมียา นู จาดัก นะ ลีฮัจ ตูฮัด กะฆีนี ญา ยอม บาโซฮ ญาวา ตะอาซิก บรี จรัฮ บาฌิ ซือรูปา กะ ตูฮัด นู จรัฮ บาฌิ เลอ. 4 ซือมียา ดีฮา นู บูวัจ ดูซา ญา เตอ ซาลัฮ เดะ ปือมือเลา ฮูโกบ นะ ตูฮัด. กรานา ลาฆู บูวัจ ดูซา เตอ ฌาดี ลาฆู ซาลัฮ เดะ ปือมือเลา ฮูโกบ นะ ตูฮัด. 5 กาเญา ตาฮู ดัฮ จะ นู เยซู ญา มาแรฮ ปลีฮัจ ดัฮ บีดา นะ บาวา โกะ ดูซา บือปี บูวัก. ตาปี อีซี ญา โปด ฮอย ดูซา ลาลู. 6 ซือมียา ดีฮา นู ดูโดะ ลือกัจ บือซามา ฌางัน ตูฮัด ญา เตอ เตด ลาดัจ บูวัจ ดูซา. ซือมียา ดีฮา นู ลาดัจ บูวัจ ดูซา ญา เตด บือเลฮ บือฆารี ตูฮัด ดัฮ เตด บือเลฮ กราลา ตูฮัด ดัฮ เลอ. 7 นานะ ดือมิ เออ ฌางัน บรี ซือมียา ดีฮา บืออาฌะ กาเญา บรี ซือซัจ ฌาลัด. ซาปา นู บูวัจ ลาฆู บาฌิ-ตือปัจ ญา เตอ ฌาดี ซือมียา บาฌิ-ตือปัจ ดัฮ ซือรูปา บือกะ ตูฮัด ญา นู บาฌิ-ตือปัจ เลอ. 8 ซือมียา นู ลาดัจ บูวัจ ดูซา เตอ ฌาดี ซือมียา นะ กือปาลา ฮาตู ซีตัด ซาเบะ-จะ กือปาลา ฮาตู ซีตัด ญา บูวัจ ดูซา ตะเดะ ลามูลา นูตู เลอ. กะฆีเตอ นานะ นะ ตูฮัด ญา มาแรฮ ปลีฮัจ ดัฮ บีดา นะ บูวัจ บรี โกะ ปือบูวัจ นะ ฮาตู ซีตัด อีตู บือนาซา ดัฮ เลอ. 9 ซือมียา ดีฮา นู ฌาดี นานะ นะ ตูฮัด ญา เตอ เตด ลาดัจ บูวัจ ดูซา ซาเบะ อีซี ตูฮัด ตะอาซิก อาดา ดูโดะ เดะ ฮาตี นะ ซือมียา อีตู. ญา ฌาดี นานะ นะ ตูฮัด ดัฮ กะฆีเตอ ญา นะ ลาดัจ บูวัจ ดูซา เตด บือเลฮ เลอ. 10 กะฆีเตอ นะ ลีฮัจ บือเลฮ จะ ซาปา นู ฌาดี นานะ นะ ตูฮัด ซาปา นู ฌาดี นานะ นะ ฮาตู ซีตัด. ซือมียา ดีฮา นู เตด ตูโรจ กะ ปือบูวัจ นู บาฌิ-ตือปัจ นู เตด ซายัก โกะ ดีบราดี เตอ ญา เลอ บูกัด นานะ นะ ตูฮัด. 11 นี เลอ ฌาดี ปือมือเลา อาฌัยํ นู กาเญา บือเลฮ ดืองัยํ ตะเดะ ลามูลา ดัฮ เตอ จะ บรี กีตา บือซายัก-ซายัก เลอ. 12 ฌางัน บูวัจ ตูโรจ บือกะ คาอิน นู ญา มาแรฮ ดาตัก เดะ กือปาลา ฮาตู ซีตัด นู ฌาฮัจ ญา บือเลฮ บูนอฮ อาดี เดะ ญา ตะอาซิก. ซาเบะ นามา ญา บูนอฮ อาดี เดะ ญา เตอ? กรานา-จะ ปือบูวัจ นะ อีซี ญา ฌาฮัจ ตาปี ลาฆู ปือบูวัจ นะ อาดี เดะ ญา ฌาดี ลาฆู นู บาฌิ เลอ. 13 ลูมอฮ ดีบราดี เออ ฌางัน นะ ฆาโดฮ-ฮาตี เลอ นู ซือมียา เดะ ดือนียา บือชี กะ กาเญา. 14 นู กีตา ซายัก กะ ลูมอฮ ดีบราดี บูวัจ บรี กีตา ตาฮู จะ กีตา บือเลฮ ลือปัซ เดะ มาตี รอจ กะ ลาฆู นู ฮีโดะ ซูโงฮ ดัฮ. ซือมียา ดีฮา นู เตด ซายัก โกะ ดีบราดี ญา เตอ อาดา ดูโดะ โซะ ลาฆู มาตี ลาฆี. 15 ซือมียา ดีฮา นู บือชี กะ ดีบราดี ญา เตอ เลอ นู ฌาดี ซือมียา บูนอฮ กาวัด. กาเญา ตาฮู จะ ซือมียา บูนอฮ กาวัด ญา เตอ ฮอย ลาฆู ฮีโดะ นู ซือลาลู ดูโดะ เดะ ญา เลอ. 16 กะฆีนี เลอ กีตา ตาฮู จะ ลาฆู นู ซายัก ฌาดี ลาฆู กะฮามี นู เยซู ซรัฮ ญาวา นะ ญา ดัฮ กรานา กีตา. กะฆีเตอ กีตา โปด กือนา นะ ซรัฮ ญาวา นะ กีตา กรานา โกะ ลูมอฮ ดีบราดี ฌูฆา เลอ. 17 ดัฮ ซือมียา ดีฮา นู อาดา โกะ บือนา บารัก ฆือนะ บาฌิ ดัฮ ญา ลีฮัจ ดีบราดี นะ ญา ฮาฌะ โตระ ตาปี ญา บูวัจ ฮาตี กรัซ ญา เตด ตูโลก ดีบราดี อีตู ซือมียา อีตู นะ มืองากู จะ ญา ซายัก กะ ตูฮัด บือเลฮ กะฮามี เลอ? 18 โกะ นานะ ดือมิ เออ นู กีตา ซายัก เตอ ฌางัน บรี ฌาดี ซา ลาฆู นู ปือมือเลา เดะ มูโลจ เลอ ตาปี บรี กีตา ซายัก เดะ ลาฆู ปือบูวัจ ฌางัน ลาฆู นู ซูโงฮ. 19 กะฆีนี เลอ กีตา ตาฮู จะ กีตา อาดา ดูโดะ โซะ ลาฆู นู ซูโงฮ นะ บรี กีตา ตือตู-ฮาตี โซะ ฮึลด มูคา นะ ตูฮัด. 20 มีเซ-จะ ฮาตี นะ กีตา บราซา จะ ซาลัฮ ดัฮ ตาปี ตูฮัด บือซัยํ เดะ อาตัซ ญา เตอ บือซัยํ เดะ ฮาตี นะ กีตา ลาฆี ญา ตาฮู ลาฆู ซือมูฮา ราตา. 21 โอ โกะ ซือมียา นู กู ซายัก เออ ดัฮ ฮาตี นะ กีตา เตด บราซา จะ ซาลัฮ เตอ กะฆีเตอ กีตา บรานี โซะ ฮึลด มูคา นะ ตูฮัด เลอ. 22 ดัฮ กีตา บูวัจ ตูโรจ กะ ปือมือซัด นะ ตูฮัด ตูโรจ กะ ลาฆู นู กือนา เดะ ฮาตี นะ ญา เตอ กะฆีเตอ ลาฆู นามา นู กีตา มีตา เดะ ตูฮัด โปด ญา นะ บรี เลอ. 23 นี เลอ ฌาดี ปือมือซัด นะ ตูฮัด ฌาดี-จะ บรี กีตา ปือจายา กะ นามา นะ เยซู คริด นานะ นะ ตูฮัด เตอ เลอ. บรี กีตา บือซายัก-ซายัก เลอ บือกะ ตูฮัด ปือซัด กะ กีตา ดัฮ. 24 ราตา ซือมียา นู บูวัจ ตูโรจ กะ ปือมือซัด นะ ตูฮัด เตอ กูญา ดูโดะ ลือกัจ บือซามา ฌางัน ตูฮัด. ตูฮัด โปด ญา ดูโดะ ลือกัจ บือซามา ฌางัน กูญา. กะฆีนี เลอ กีตา ตาฮู จะ ตูฮัด ญา ดูโดะ ลือกัจ บือซามา ฌางัน กีตา กรานา ซือมืองัจ นะ ญา นู ญา บรี กะ กีตา ดัฮ.
1 โอ ลูมอฮ กาวัด นู กู ซายัก เออ ฌางัน ปือจายา กะ ราตา ซือมียา นู มืองากู จะ ญา อาดา ซือมืองัจ นะ ตูฮัด. กือนา มือญาซัจ บรี ลีฮัจ จะ ซือมืองัจ อีตู ดาตัก ตือปัจ ดีฮา? ดาตัก เดะ ตูฮัด บือซัยํ เดะ อาตัซ เฆอ เตด. กรานา-จะ อาดา ลูมอฮ ซือมียา ตูโดฮ มือเลา มืออูปัย บาญะ อูรัก นู บือเลฮ ปี กะ ดือนียา ราตา ดัฮ. 2 กะฆีนี เลอ กาเญา นะ บือเลฮ กราลา ซือมืองัจ นะ ตูฮัด. ราตา ซือมียา นู ซาโงะ จะ "เยซู คริด มาแรฮ ฌาดี ซือมียา ดัฮ" ซือมียา อีตู ญา อาดา ซือมืองัจ นู มาแรฮ ดาตัก เดะ ตูฮัด เดะ อาตัซ. 3 ราตา ซือมียา นู ตีเมา นะ ซาโงะ เยซู กะฆีเตอ ญา เตอ อาดา ซือมืองัจ นู เตด มาแรฮ ดาตัก เดะ ตูฮัด บือซัยํ เดะ อาตัซ เลอ. ญา เตอ อาดา ซือมืองัจ นะ ซือมียา นู ลาวัด ฌางัน เยซู คริด. กาเญา บือเลฮ ดืองัยํ ดัฮ จะ นู ซือมืองัจ นู บลาวัด อีตู นะ มาแรฮ. ตาปี วะตู อีนี เลอ ญา อาดา เดะ ดือนียา ดัฮ. 4 โกะ นานะ ดือมิ เออ กาเญา ฌาดี โกะ ซือมียา นะ ตูฮัด บือซัยํ เดะ อาตัซ ดัฮ เลอ. กาเญา ฌือนัฮ เดะ ซือมียา ตูโดฮ มืออูปัย อีตู ดัฮ กรานา-จะ ซือมืองัจ นะ ตูฮัด นู อาดา ดูโดะ เดะ ฮาตี นะ กาเญา ญา เตอ บือซัยํ ลือเบฮ เดะ ซือมืองัจ อีตู นู ดูโดะ เดะ ดือนียา เลอ. 5 กูญา อีตู ฌาดี ซือมียา โซะ ดือนียา เลอ. กะฆีเตอ กูญา มือเลา ลาฆู นู โซะ ดือนียา. โกะ ซือมียา เดะ ดือนียา โปด กูญา ซูกา มือนีงัย. 6 กีตา นี เลอ ฌาดี โกะ ซือมียา นะ ตูฮัด บือซัยํ เดะ อาตัซ. ซาปา นู กราลา ตูฮัด เดะ อาตัซ เตอ กูญา ซูกา นะ มือนีงัย กะ กีตา เลอ. ซาปา เตด กราลา ตูฮัด เดะ อาตัซ เตอ กูญา ตีเมา นะ มือนีงัย กะ กีตา. กะฆีเตอ เลอ กีตา นะ บือเลฮ กราลา ซือมืองัจ นู ซูโงฮ ฌางัน ซือมืองัจ นู ซือซัจ. 7 โอ ลูมอฮ กาวัด นู กู ซายัก เออ บรี กีตา ซายัก บือซามา-ซามา เลอ กรานา-จะ ลาฆู นู ซายัก ดาตัก มาแรฮ เดะ โซะ ตูฮัด บือซัยํ เดะ อาตัซ. ราตา ซือมียา นู บือซายัก-ซายัก เตอ ญา บือฌาดี มาแรฮ เดะ ตูฮัด ญา กราลา ตูฮัด เลอ. 8 ซือมียา ดีฮา นู เตด ซายัก ญา เตอ เตด กราลา ตูฮัด กรานา-จะ ตูฮัด เดะ อาตัซ เตอ เลอ ฌาดี นู ซายัก. 9 นู ตูฮัด เดะ อาตัซ ซายัก กีตา เตอ ญา ปลีฮัจ กะ กีตา กะฆีนี จะ ญา บือเลฮ ซูโรฮ นานะ ตูงัน นะ ญา มาแรฮ มาโซะ กะ ดือนียา บีดา นะ บรี กีตา บือเลฮ ฮีโดะ กรานา นานะ อีตู เลอ. 10 ลาฆู นู ซายัก เตอ ฌาดี กะฆีนี บูกัด บือกะ กีตา ซายัก กะ ตูฮัด เตอ ตาปี บือกะ ตูฮัด เตอ เลอ ญา ซายัก กะ กีตา ดัฮ ญา ซูโรฮ นานะ นะ ญา มาแรฮ มาตี ฌาดี ซือรูปา บารัก มือญือมัฮ มือนืองะ กะ ตูฮัด บรี ญา นะ อาเกะ ดูซา นะ กีตา เลอ. 11 ลูมอฮ กาวัด นู กู ซายัก เออ นู ตูฮัด เดะ อาตัซ บือเลฮ ซายัก กีตา กะฆีเตอ ดัฮ กีตา กือนา ซายัก บือซามา-ซามา ฌูฆา. 12 ฮอย ซาปา ดือละ ลีฮัจ ตูฮัด บือซัยํ เดะ อาตัซ. ตาปี ดัฮ กีตา ซายัก บือซามา-ซามา เตอ ตูฮัด เลอ ญา นะ ดูโดะ ลือกัจ บือซามา ฌางัน กีตา ญา นะ บูวัจ บรี กีตา อาดา ฮาตี ซายัก ซือรูปา กะ ญา ปือนอฮ มีเม ดัฮ เลอ. 13 กะฆีนี เลอ กีตา นะ ตาฮู จะ กีตา ดูโดะ ลือกัจ บือซามา ฌางัน ตูฮัด ดัฮ ตูฮัด โปด ญา ดูโดะ ลือกัจ บือซามา ฌางัน กีตา ฌูฆา กรานา ตูฮัด เตอ เลอ บือเลฮ บรี ซือมืองัจ นะ ญา กะ กีตา ดัฮ. 14 กะฆีเตอ กีตา บือเลฮ ลีฮัจ ดัฮ นะ มือญาเระ ฌาดี ซะซี ปูลัก จะ อาโปก เดะ อาตัซ ญา ซูโรฮ นานะ นะ ญา มาแรฮ ฌาดี ซือมียา บีดา นะ ตูโลก โกะ อูมัจ-ซือมียา เดะ ดือนียา บรี ฮีโดะ ลือปัซ บาฌิ ดัฮ. 15 ดัฮ ซือมียา ดีฮา ซาโงะ จะ เยซู ฌาดี นานะ นะ ตูฮัด บือซัยํ เดะ อาตัซ เตอ ตูฮัด เตอ เลอ นะ ดูโดะ ลือกัจ บือซามา ฌางัน ซือมียา อีตู. ซือมียา อีตู โปด นะ ดูโดะ ลือกัจ บือซามา ฌางัน ตูฮัด เลอ. 16 กะฆีเตอ เลอ กีตา ตาฮู ดัฮ กีตา ปือจายา ดัฮ จะ ตูฮัด ญา ซายัก กะ กีตา ซูโงฮ เลอ. ตูฮัด บือซัยํ เดะ อาตัซ เตอ เลอ นู ซายัก. ซือมียา นู ซายัก ปือนอฮ เดะ ฮาตี เตอ ญา เลอ ดูโดะ ลือกัจ บือซามา ฌางัน ตูฮัด. ตูฮัด โปด ดูโดะ ลือกัจ บือซามา ฌางัน ญา. 17 นู กีตา ซายัก ญา ปือนอฮ บาฌิ ดัฮ บีดา บรี กีตา นะ ฌาดี ซือมียา ฮาตี บรานี เดะ อารี นู ตูฮัด นะ กรัจ ฮูโกบ. กรานา ตูฮัด ฌาดี กะฮามี กีตา อีนี นะ ฌาดี กะฆีเตอ เดะ ดือนียา อีนี ฌูฆา. 18 ซือมียา นู ซายัก ญา เตด ฆรานา ตาโกจ ลาฆู นามา. กรานา-จะ นู ซายัก ปือนอฮ บาฌิ เตอ ซือรูปา ญา โปรฮ ลาฆู ตาโกจ ปี ฮาบิฮ เลอ. ซาเบะ นู ซือมียา นะ ตาโกจ เตอ ฌาดี ปาซัน ลาฆู กรัจ ฮูโกบ. โกะ ซือมียา นู ตาโกจ กะฆีเตอ กูญา เตด ซายัก ปือนอฮ บาฌิ เลอ. 19 นู กีตา ซายัก เตอ ซาเบะ-จะ ตูฮัด ตะอาซิก ญา บือเลฮ ซายัก กะ กีตา ดูลู. 20 ซือมียา ดีฮา นู จะ "กู ซายัก กะ ตูฮัด เดะ อาตัซ" ตาปี ดัฮ ญา บือชี กะ ดีบราดี เตอ ญา มือเลา มืออูปัย ฮาปา. ซือมียา นู เตด ซายัก กะ ดีบราดี นู ญา ลีฮัจ บือฆารี ดัฮ เตอ ญา นะ ซายัก กะ ตูฮัด บือซัยํ เดะ อาตัซ นู ญา ลีฮัจ เตด ดือละ บือฆารี บือเลฮ กะฮามี เลอ? 21 ปือมือซัด อีนี นู กีตา อาดา เตอ ญา มาแรฮ ดาตัก เดะ ตูฮัด ฌาดี-จะ ซือมียา นู ซายัก กะ ตูฮัด บือซัยํ เดะ อาตัซ เตอ บรี ญา ซายัก กะ ดีบราดี นะ ญา ฌูฆา.
1 ซือมียา ดีฮา นู ปือจายา จะ "เยซู เตอ ญา ฌาดี ราฌา นู บรี ซือลามัจ" ซือมียา อีตู เลอ ฌาดี นานะ นะ ตูฮัด ดัฮ. ราตา ซือมียา นู ซายัก กะ อาโปก เตอ ญา กือนา ซายัก กะ นานะ นะ ญา ฌูฆา. 2 วะตู กีตา ซายัก กะ ตูฮัด บือซัยํ เดะ อาตัซ ตูโรจ โกะ ปือมือซัด นะ ญา เตอ กะฆีเตอ กีตา ตาฮู จะ กีตา ซายัก กะ ลูมอฮ นานะ นะ ตูฮัด ฌูฆา. 3 นี เลอ ฌาดี ลาฆู นู กีตา ซายัก กะ ตูฮัด เดะ อาตัซ ฌาดี-จะ นู กีตา ตูโรจ กะ โกะ ปือมือซัด นะ ญา. โกะ ปือมือซัด นะ ญา โปด ฮอย ตือนอซ นู ปายัฮ ลาลู. 4 ซือมียา ดีฮา นู ฌาดี นานะ นะ ตูฮัด ดัฮ กูญา เตอ ฌือนัฮ เดะ ดือนียา เลอ. กะฆีนี เลอ นู กีตา ฌือนัฮ เดะ ดือนียา เตอ กรานา-จะ กีตา ปือจายา. 5 ซาปา นู ฌือนัฮ เดะ ดือนียา? ซือมียา อีตู เลอ นู ปือจายา จะ "เยซู ฌาดี นานะ นะ ตูฮัด บือซัยํ เดะ อาตัซ." 6 เยซู คริด นี เลอ นู มาแรฮ กะ ดือนียา ดัฮ อาดา ฌางัน อาเย อีตู นู ญา ซาโมจ ลาฆู ซือลับ เดะ อาเย เตอ อาดา ฌางัน ดารัฮ นู ญา มาตี ดัฮ เลอ. บูกัด-จะ ซา ลาฆู อาเย ตาปี อาดา ฌางัน อาเย ฌางัน ดารัฮ ฌูฆา. 7 นี เลอ ซือมืองัจ นะ ตูฮัด นู ฌาดี ซะซี ซาเบะ ซือมืองัจ อีตู เตอ ญา เลอ นู ซูโงฮ. 8 อาดา ซะซี ตีฆา มาตา ฌาดี-จะ ซือมืองัจ นะ ตูฮัด ซา อาเย ซา ดารัฮ ซา. ซะซี นู ตีฆา อีนี อาดา ปือมือเลา ซือรูปา ซือมูฮา เลอ. 9 กีตา บียาซา มือนีงัย ปือมือเลา นู ซือมียา ฌาดี ซะซี เตอ ตาปี ปือมือเลา ซะซี นะ ตูฮัด บือซัยํ เดะ อาตัซ เตอ ญา บรัจ ลาฆี. กรานา-จะ ตูฮัด เดะ อาตัซ เตอ เลอ ญา ฌาดี ซะซี ดัฮ ปาซัน ลาฆู นานะ นะ ญา. 10 ซือมียา นู ปือจายา กะ นานะ นะ ตูฮัด ญา อาดา ปือมือเลา ซะซี อีนี เลอ เดะ ฮาตี นะ ญา. ซือมียา นู เตด ปือจายา กะ ตูฮัด ญา บูวัจ ลาฆู ซือรูปา จะ ตูฮัด มือเลา มืออูปัย กรานา ซือมียา อีตู เตอ ญา เตด ปือจายา ปือมือเลา ซะซี นู ตูฮัด บือซัยํ เดะ อาตัซ บือเลฮ มือเลา ปาซัน นานะ นะ ญา. 11 ปือมือเลา ซะซี นะ ตูฮัด เดะ อาตัซ ฌาดี กะฆีนี นู ตูฮัด บรี กีตา นะ ฮีโดะ ซูโงฮ ซือลาลู ดัฮ เลอ. นู นะ ฮีโดะ ซูโงฮ ซือลาลู กะฆีนี อาดา เดะ โซะ นานะ นะ ตูฮัด เลอ. 12 ซือมียา อาดา นานะ นะ ตูฮัด เตอ ญา เลอ อาดา ฮีโดะ ซูโงฮ ซือลาลู ดัฮ. ซือมียา ดีฮา ฮอย นานะ นะ ตูฮัด เตอ ญา เตอ ฮอย เตด ฮีโดะ เลอ. 13 ลาฆู กะฆีนี กู บือเลฮ ฆาแรฮ บรี กะ ลูมอฮ กาเญา นู ปือจายา กะ ปือนามา นานะ นะ ตูฮัด บีดา นะ บรี กาเญา ตาฮู จะ กาเญา อาดา ฮีโดะ ซูโงฮ ซือลาลู ดัฮ เลอ. 14 กีตา อาดา ฮาตี บรานี โซะ ฮึลด มูคา นะ ตูฮัด กะฆีนี เลอ จะ บือกะ กีตา มีตา ลาฆู นามา นู รือมัก ฌางัน ฮาตี นะ ตูฮัด เตอ ตูฮัด ญา นะ มือนีงัย เลอ. 15 ดัฮ กีตา ตาฮู จะ วะตู กีตา นะ มีตา นามาๆ โปด ตูฮัด นะ มือนีงัย เตอ กะฆีเตอ กีตา ตาฮู ปูลัก จะ ลาฆู นู กีตา มีตา ดัฮ ตูฮัด ญา นะ บรี กะ กีตา เลอ. 16 ดัฮ ซือมียา ดีฮา ลีฮัจ ดีบราดี ซืออูรัก บูวัจ ดูซา นู เตด รอจ กะ ลาฆู มาตี เตอ ญา กือนา มีตา เดะ ตูฮัด ปาซัน ซือมียา อีตู เตอ กะฆีเตอ ตูฮัด นะ บรี ซือมียา อีตู นะ ฮีโดะ. นู มือเลา กะฆีเตอ ปาซัน โกะ ซือมียา นู บูวัจ ดูซา นู เตด รอจ กะ มาตี เตอ. ตาปี อาดา ฌูฆา นู จะ กูญา บูวัจ ดูซา นู รอจ กะ ลาฆู มาตี. กู เตด มือเลา จะ ฆาโดฮ บือซาโวจ ปาซัน ซือมียา นู บูวัจ ดูซา รอจ กะ มาตี ดัฮ. 17 ลาฆู นู บูวัจ เตด บือฆูนา ราตา มาจับ เตอ ฌาดี ดูซา ดัฮ เลอ. ตาปี อาดา ดูซา นู เตด บาวา ปี รอจ กะ มาตี ฌูฆา เลอ. 18 กีตา ตาฮู จะ ซือมียา นู ฌาดี โกะ นานะ นะ ตูฮัด ดัฮ เตอ กูญา เตด ลาดัจ บูวัจ ดูซา ตาปี เยซู นู นานะ นะ ตูฮัด เตอ ญา ฌาฆา บือบือลา กูญา. กะฆีเตอ ฮาตู นู ฌาฮัจ อีตู นะ บูวัจ กูญา เตด บือเลฮ เลอ. 19 กีตา ตาฮู จะ กีตา ฌาดี ซือมียา นะ ตูฮัด เดะ อาตัซ ดัฮ ตาปี ซือมียา เดะ ดือนียา ซือมูฮา ราตา อาดา เดะ ตางัน นะ กือปาลา ฮาตู ซีตัด นู ฌาฮัจ อีตู เลอ. 20 กีตา ตาฮู จะ นานะ นะ ตูฮัด มาแรฮ ดัฮ. ญา บือเลฮ บูวัจ บรี กีตา ปานัย อากัน ดัฮ บือเลฮ บรี กีตา กราลา ตูฮัด นู ซูโงฮ บรี กีตา ลือกัจ บือซามา ฌางัน ตูฮัด นู ซูโงฮ ลือกัจ บือซามา ฌางัน นานะ นะ ญา เตอ เยซู คริด เลอ. นี เลอ ฌาดี ตูฮัด นู ซูโงฮ. นี เลอ ฌาดี ลาฆู ฮีโดะ ซูโงฮ นู ซือลาลู. 21 โกะ นานะ ดือมิ เออ กือนา ฌาฆา บือบือลา ญาวา ตะอาซิก บรี ลือปัซ เดะ ลาฆู มือญือมัฮ โกะ บราลา เลอ.
1 กู นู ซือมียา บือบือลา ลูมอฮ นะ ตูฮัด กู ฆาแรฮ ซูรัจ อีนี กีเรบ บรี กะ นีบีนี นู ตูฮัด ปีเลฮ ดัฮ ฌางัน โกะ นานะ นะ ญา นู กู ซายัก ซูโงฮๆ. บูกัด กู ซายัก ซืออูรัก ตาปี ราตา ซือมียา นู กราลา ลาฆู นู ซูโงฮ กูญา ซายัก ฌูฆา. 2 ซาเบะ นามา? ซาเบะ ลาฆู นู ซูโงฮ นู ดูโดะ ตือตู เดะ ฮาตี กีตา นู นะ ดูโดะ บือซามา ฌางัน กีตา ซือลาลู เลอ. 3 กู มีตา เดะ ตูฮัด นู อาโปก บือซัยํ เดะ อาตัซ ฌางัน เยซู คริด นานะ นะ อาโปก เดะ อาตัซ มีตา บรี กูญา นะ บรี ซือลามัจ กะ กาเญา นะ ตือจีฮัด กะ กาเญา นะ บรี กาเญา ดูโดะ ซือนัง ซือลามัจ เลอ. บรี บือนา อีนี ดูโดะ ฌางัน กาเญา นู ตูโรจ กะ ลาฆู นู ซูโงฮ นู ซายัก บาญะ เลอ. 4 กู ซูกา-ฮาตี ซูโงฮ กรานา-จะ ดาปัจ โกะ นานะ นะ เกา ซือตืองัฮ ลีฮัจ จะ กูญา ตูโรจ กะ ลาฆู นู ซูโงฮ บือกะ อาโปก เดะ อาตัซ บือเลฮ ปือซัด กะ กีตา ดัฮ. 5 นีบีนี เออ กู มีตา เดะ เกา บรี กีตา ซายัก บือซามา-ซามา เลอ. นี เลอ บูกัด กู ฆาแรฮ ปือมือซัด นู บารู บรี กะ เกา ตาปี ฌาดี ปือมือซัด นู อาดา ตะเดะ ลามูลา ดัฮ. 6 นู ลาฆู ซายัก เตอ ฌาดี กะฆีนี เลอ นู กีตา ตูโรจ กะ ปือมือซัด นะ ตูฮัด. ปือมือซัด อีตู ฌาดี กะฆีนี บือกะ นู กาเญา บือเลฮ ดืองัยํ ตะเดะ ลามูลา บรี กาเญา บูวัจ ตูโรจ กะฆีเตอ เลอ. 7 กรานา-จะ อาดา ซือมียา ตีปู บาญะ อูรัก นู กือจัย ปี ราตา เดะ ดือนียา ดัฮ. ลูมอฮ อีนี ฮอย เตด ซาโงะ จะ นู เยซู คริด มาแรฮ ฌาดี ซือมียา ดัฮ. ซือมียา กะฆีเตอ ฌาดี ซือมียา ตีปู เลอ ฌาดี ซือมียา นู ลาวัด ฌางัน เยซู คริด. 8 กาเญา กือนา ฌาฆา ญาวา บรี บาฌิ ตีเมา บรี ปูตุซ อูโตก เดะ ลาฆู บือกรือฌา นะ กามี ตาปี นะ บือเลฮ ซาโมจ บาฮาเฆด ปือนอฮ บาฌิ ดาตัก เดะ ตูฮัด. 9 ซือมียา นู เตด ดูโดะ กือฌะ-กือมัซ เดะ ปือมือเลา อาฌัยํ นะ เยซู คริด ตาปี ญา บูวัจ กือลือเบฮ ซือมียา อีตู เตอ ญา ฮอย ตูฮัด บือซัยํ เดะ อาตัซ เลอ. ซือมียา นู ดูโดะ กือฌะ-กือมัซ เดะ ปือมือเลา อาฌัยํ นะ เยซู คริด อีตู เตอ ญา เลอ อาดา อาโปก บือซัยํ เดะ อาตัซ อาดา ฌางัน นานะ นะ ญา ซามา เลอ. 10 ดัฮ อาดา ซาปา มาแรฮ มียา กาเญา ตาปี กูญา เตด บาวา ปือมือเลา อาฌัยํ ซือรูปา กะฆีนี มาแรฮ ซามา เตอ ฌางัน นะ ซาโมจ กูญา มาโซะ นูปัก เดะ รูมัฮ. ฌางัน บรี ซือลามัจ กะ กูญา. 11 ซือมียา ดีฮา นู บรี ซือลามัจ กะ กูญา ซือรูปา จะ ญา บือฮาโบด บือซามา เดะ ลาฆู ปือบูวัจ นู ฌาฮัจ นะ กูญา ฌูฆา เลอ. 12 กู อาดา ลาฆู อาซิก นะ มือเลา ฌางัน กาเญา บาญะ ลาฆู ตาปี ตีเมา ฆาแรฮ ฌาดี ซูรัจ. ตาปี กู จาดัก จะ นะ บือเลฮ มาแรฮ ซารี กาเญา นะ มือเลา บือซูวา มูคา. กะฆีเตอ กีตา ซือมูฮา นะ ซูกา-ฮาตี บรี ปือนอฮ บาฌิ เลอ. 13 โกะ นานะ นะ อาดี นีบีนี นะ เกา นู ตูฮัด ปีเลฮ ดัฮ เตอ กูญา กีเรบ บรีงัจ กะ เกา ฌูฆา.
1 กู นู ซือมียา บือบือลา ลูมอฮ นะ ตูฮัด กู ฆาแรฮ ซูรัจ อีนี กีเรบ บรี กะ ฆาโย ซือมียา นู กู ซายัก ซูโงฮ. 2 กาวัด นู กู ซายัก เออ กู บือซาโวจ มีตา เดะ ตูฮัด นะ บรี เกา ดูโดะ บาฌิ ดูโดะ ซือนัง ญาวา ซือรูปา ฮาตี นะ เกา ซือนัง บาฌิ ดัฮ. 3 อาดา อาดี-บราดี ซือตืองัฮ มาแรฮ มือญาเระ จะ ฮาตี นะ เกา รือมัก ซูโงฮ บือกะ นู เกา อาดา ตูโรจ กะ ลาฆู นู ซูโงฮ อีตู บูวัจ บรี กู ซูกา-ฮาตี บาญะ เลอ. 4 ฮอย นามา อาซิก ดัฮ นู นะ บูวัจ บรี กู ซูกา-ฮาตี บาญะ ลือเบฮ เดะ อีนี จะ นู กู นะ ดืองัยํ ปาซัน โกะ นานะ นะ กู จะ กูญา ตูโรจ กะ ลาฆู นู ซูโงฮ อีนี ฌูฆา เลอ. 5 กาวัด นู กู ซายัก เออ วะตู เกา บูวัจ ลาฆู นามา ตูโลก โกะ ดีบราดี มีเซ-จะ กูญา ฌาดี ซือมียา ตูโปะ อาซิก เกา บือเลฮ บูวัจ ฌางัน ฮาตี รือมัก เลอ. 6 กูญา อีตู บือเลฮ มือญาเระ บรี กะ ลูมอฮ นะ ตูฮัด ตาฮู นู เกา บือเลฮ ซายัก กะฆีนี. ดัฮ เกา นะ ตูโลก อาตัจ กูญา อีตู บรี กูญา บือฌาลัด ปี ซือนัง เตอ บือกะ นู บือฆูนา ฌางัน ซือมียา บือกรือฌา ลาฆู นะ ตูฮัด เกา นะ บูวัจ บาฌิ ดัฮ เลอ. 7 ลูมอฮ อีตู ตรือเบะ ปี บีดา นะ มือญาเระ ปาซัน นามา นะ เยซู. กูญา ตีเมา บรี ซือมียา นู เตด ปือจายา ตูโลก. 8 กะฆีเตอ กีตา อีนี กือนา บือบือลา กูญา บรี กีตา ฌาดี ซือมียา มาโซะ บือกรือฌา บือซามา เดะ ลาฆู นู ซูโงฮ. 9 กู บือเลฮ ฆาแรฮ ซูรัจ นู ปานะ บรี กะ ลูมอฮ นะ ตูฮัด ดัฮ ตาปี อาดา ดีโยเตรเฟ นู ซูกา นะ ฌาดี บือซัยํ เดะ กาวัด ญา เตอ ตีเมา มือนีงัย กะ กู. 10 กะฆีเตอ ดัฮ กู นะ มาแรฮ เตอ กู นะ มือญาเระ ลาฆู นะ ญา นู ญา มือเลา กาซัยํ ปาซัน ลาฆู นะ กู บาญะ ฌือแนฮ เตอ ฌาดี ลาฆู มือเลา มืออูปัย. นู ญา บูวัจ กะฆีเตอ โปด เตด ฆือนะ ลาฆี. กะฆีเตอ ญา ตีเมา นะ ซาโมจ ดีบราดี นู มาแรฮ เตอ. ดัฮ ซือมียา อาซิก นะ ซาโมจ ญา นะ บลารัก ญา นะ โปรฮ ซือมียา อีตู บรี ตรือเบะ เดะ ลูมอฮ นะ ตูฮัด. 11 เกา นู กู ซายัก เออ ฌางัน ตูโรจ กะ จูตอ นู ฌาฮัจ กือนา ตูโรจ กะ นู บาฌิ เลอ. ซือมียา นู บูวัจ บาฌิ ฌาดี ซือมียา นะ ตูฮัด เดะ อาตัซ. ซือมียา นู บูวัจ ฌาฮัจ เตด ดือละ บือฆารี ตูฮัด เดะ อาตัซ เลอ. 12 ราตา ซือมียา ฌาดี ซะซี ปูฌี กะ เดเมตรีโย. ลาฆู นู ซูโงฮ ปูฌี กะ ญา ฌูฆา. กู โปด ฌาดี ซะซี กะฆีเตอ เลอ. เกา ตาฮู ปือมือเลา นะ กู จะ ฌาดี ปือมือเลา นู ซูโงฮ. 13 กู อาดา บาญะ ลาฆู นะ มือญาเระ กะ เกา ตาปี กู ตีเมา ฆาแรฮ เดะ ซูรัจ. 14 กู จาดัก จะ นะ ดาปัจ เกา บางัจๆ เลอ นะ บือเลฮ มือเลา บือซูวา มูคา ฌางัน เกา. 15 มีตา บรี เกา ดูโดะ ซือนัง ซือลามัจ เลอ. โกะ ดีบราดี กีเรบ บรีงัจ กะ เกา ฌูฆา. มีตา กีเรบ บรีงัจ กะ โกะ ดีบราดี โซก ซืออูรัก ราตา ซือมียา เลอ.
1 กู ยูดา ฌาดี ปราโซฮ นะ เยซู คริด ฌาดี อาดี เดะ ยากอบ ฌูฆา. กู กีเรบ ซูรัจ อีนี อาตัจ บรี กะ กาเญา นู ตูฮัด บือเลฮ ปาเงน ดัฮ. กาเญา ฌาดี ลูมอฮ ซือมียา นู ตูฮัด อาโปก เดะ อาตัซ ซายัก ซือมียา นู ญา ฌาฆา บีดา เยซู คริด. 2 มีตา บรี ตูฮัด นะ ตือจีฮัด กะ กาเญา นะ ซายัก กะ กาเญา นะ บรี กาเญา ดูโดะ ซือนัง ซือลามัจ บือตามัฮ บรี บาญะ เลอ. 3 กาเญา นู กู ซายัก เออ กู บือเลฮ ตือตู-ฮาตี นะ ฆาเเรฮ ซูรัจ รอจ กะ กาเญา ปาซัน ลาฆู นู กีตา ฮีโดะ ลือปัซ บาฌิ บือซามา. ตาปี-จะ นี เลอ กู ฆาโดฮ ฆาเเรฮ ซูรัจ ปรีงัจ กะ กาเญา บรี บลาวัด ฌาฆา ลาฆู นู กีตา ปือจายา นู ตูฮัด บือเลฮ กีเรบ เเนฮ ซือกาลี ดัฮ บรี กะ โกะ ซือมียา นู จรัฮ บาฌิ นะ ญา. 4 กรานา-จะ อาดา ซือมียา ซือตืองัฮ จูรี มาโซะ มาเเรฮ กะ ดาลับ ลูมอฮ กีตา ดัฮ นู เดะ ซูรัจ นะ ตูฮัด อาดา ฆาเเรฮ ลามา ดัฮ จะ กูญา นะ ฆาโดฮ กือนา บือดะวา กรัจ ฮูโกบ กะฆีนี. ลาฆู นู ตูฮัด นะ กีตา ญา ฮาลัย บรี ซือลามัจ กะ กีตา เตอ โกะ ซือมียา ฌาฮัจ อีตู กูญา อาเมด ปี กาเลฮ ฌาดี ปาซัน บูวัจ ลาฆู ฌาฮัจ นู ฆาละ. กูญา บือเลฮ กีปัซ เยซู คริด ญา นู ฌาดี กือปาลา เเนฮ ซา นู ฌาดี ตูฮัด นะ กีตา เลอ. 5 กะฆีเตอ มีเซ-จะ กาเญา บือเลฮ ตาฮู ลาฆู ซือมูฮา ฮาบิฮ ซือกาลี ดัฮ โปด ตาปี กู บือคานะ นะ บรี กาเญา บรีงัจ กะ ลาฆู อีนี จะ ตูฮัด บือเลฮ ตูโลก บรี ลูมอฮ ซือมียา ซา บักซา ฮีโดะ ลือปัซ เดะ นังฆรี อียิบ ดัฮ. เดะ บลากัก ญา บือเลฮ บูวัจ บรี โกะ ซือมียา อีตู นู เตด ปือจายา บือนาซา ฮาบิฮ เลอ. 6 กะฆีเตอ ฌูฆา โกะ ฮูลู-บาลัก อีตู นู เตด ซือนัง-ฮาตี เดะ ลาฆู ฌาดี บือซัยํ นะ กูญา ตะอาซิก ดาปี บือเลฮ ตีงัน ตือปัจ ดูโดะ นู บาฌิ นะ กูญา เตอ ลูมอฮ ฮูลู-บาลัก อีตู ตูฮัด บือเลฮ กานัก อีกัจ ฌางัน ราตัย นู เตด ดือละ ปูตุซ กานัก ตาโรฮ เดะ ตือปัจ กือลับ ตือดะ นะ รอจ กะ อารี กรัจ ฮูโกบ นู บือซัยํ อีตู. 7 ซือรูปา กะฆีเตอ เลอ โกะ ซือมียา นังฆารี โซโดม นังฆารี โฆโมรา ฌางัน โกะ ตูโปะ ปีกดาปีก เตอ กูญา บือเลฮ บูวัจ ตูโรจ กะ ลาฆู เตด บือฆูนา บือกะ ซือรูปา โกะ ฮูลู-บาลัก ซีงี เตอ มาโบะ เดะ ลาฆู ฆาละ นู รูบือฮีรู. ตูฮัด ญา ฮูโกบ กูญา ฆาโดฮ ซูซัฮ โตระ เดะ อาปี นู เตด ดือละ ปาดับ เลอ บีดา ฌาดี จูตอ บรี กะ โกะ ซือมียา ซือมูฮา ลีฮัจ. 8 ตาปี มีเซ กะฆีเตอ โปด โกะ ซือมียา อาฌัยํ ลาฆู ซาลัฮ ซีงี กูญา บูวัจ ซือรูปา. กูญา มีปี ลาฆู เเนฮ-ฌือเเนฮ นู อาโจบ กูญา บรี บูวัจ ลาฆู ตะอารัฮ เดะ ญาวา บรี กีปัซ ลาฆู ปือมือฆัฮ นะ ตูฮัด บรี มือเลา ตะอารัฮ กะ โกะ ฌิด นู ซัยํ-บือซัยํ เลอ. 9 ตาปี โซะ กือปาลา ฮูลู-บาลัก มีคาเอน กาลา ญา บลาวัด ฌางัน กือปาลา ฮาตู ซีตัด ลาฆู บาดัด นะ มูซา ญา โปด เตด บือเลฮ มือเลา ตะอารัฮ ฮูโกบ กะ กือปาลา ฮาตู ซีตัด ลาลู เตอ. ญา อูซิ มือเลา จะ "บรี กะ ตูฮัด บลารัก เกา เลอ." 10 ตาปี โกะ ซือมียา ซีงี เตอ กูญา มือเลา ตะอารัฮ รอจ กะ ลาฆู นามา ๆ นู อีซี กูญา ตะอาซิก เตด ตาฮู. โซะ โกะ ลาฆู นู กูญา ตาฮู บรีงัจ เตอ กูญา อูซิ ตูโรจ กะ ฮาดัจ นะ กูญา ซือรูปา บือกะ โกะ บือนาตัก นู ฮอย อากัน. ลาฆู อีตู เลอ นะ บูวัจ บรี กูญา บูโระ บูโซะ ดัฮ. 11 กูญา นะ ฌาฮานัม เลอ กรานา-จะ กูญา บือเลฮ ตูโรจ กะ ฌาลัด นะ คาอิน. กูญา บือเลฮ ปลือปัซ ญาวา ตะอาซิก ตูโรจ กะ ลาฆู ซาลัฮ นะ บาลาอัม กรานา ลีฮัจ กะ อูโตก. กะฆีเตอ กูญา นะ ฌาฮานัม ปี ดัฮ ซือรูปา กะ กูรา ซือมียา นู มือเลา บลาวัด ฌางัน มูซา เลอ. 12 โกะ ซือมียา กะฆีนี ฌาดี ซือรูปา ตูกด เดะ ลาฆู บือมุน มากัด บือซามา นะ กาเญา. กูญา อาดา ฮาตี บรานี นะ อูซิ บรามัย บือซามา ฌางัน กาเญา ตาปี ซือมาตา บือบือลา ญาวา นะ กูญา ตะอาซิก. กูญา ฌาดี ซือรูปา กือมูวัง นู ฮอย ฮูฌัด ฮาญอจ ตูโรจ กะ อาเงน เตอ. ซือรูปา โกะ ปูโฮด กายู นู ฮอย บูวัฮ เดะ มูเซด บือบูวัฮ เตอ กูญา มาตี ดูวา กาลี ดัฮ กือนา ซีตะ ฮาบิฮ ฌางัน โกะ ฌากัยํ ๆ. 13 กูญา ซือรูปา โกะ อูมะ บือซัยํ บือปือจัฮ เดะ บีดิก ลาโวจ บือกือเมาะ ตีโมน ลาฆู จือและ นะ กูญา ตะอาซิก. กูญา ซือรูปา บีตัก นู ฮาญอจ ซือซัจ ปี มาแรฮ นู ตูฮัด บือเลฮ ซียะ ตือปัจ กือลับ โตระ บรี กะ กูญา ดูโดะ ซือลาลู เลอ. 14 เอโนก ซือมียา นู ตูโฌฮ กีรา ตะเดะ อาดับ เตอ ญา โปด บือเลฮ มือเลา ตูโดฮ กะ ซือมียา กะฆีนี จะ "นี เลอ ตูฮัด ญา นะ มาแรฮ มารือมา ฌางัน โกะ ฮูลู-บาลัก นู จรัฮ บาฌิ นะ ญา บาญะ รีบู อูรัก เลอ. 15 ญา มาแรฮ บีดา นะ บือดะวา กรัจ ฮูโกบ โกะ ซือมียา ซือมูฮา. ญา นะ ฮูโกบ ซือมียา ราตา ๆ กรานา โกะ ปือบูวัจ นู ฌาฮัจ นู กูญา บือเลฮ บูวัจ ตูโรจ กะ ฮาตี ฌาฮัจ นะ กูญา. ญา ฮูโกบ โกะ ซือมียา ฌาฮัจ นู บือดูซา กรานา โกะ บือมือเลา กรัซ ซือมูฮา นู กูญา บือเลฮ มือเลา อูจะ กะ ตูฮัด." 16 โกะ ซือมียา กะฆีนี ฌาดี ซือมียา ซือมาตา บือซูงุจ มือเลา งูงัม ๆ เตอ ฌาดี ซือมียา บูวัจ ตูโรจ กะ ลาฆู ฆาละ นู ฌาฮัจ นะ ญาวา ตะอาซิก. กูญา ฌาดี ซือมียา มือเลา งันตืองัน มือโอจ กะ ญาวา ตะอาซิก ปูฌี กะ กาวัด ฌูฆา บีดา นะ บือเลฮ บาฌิ กะ ญาวา ตะอาซิก. 17 ตาปี กาเญา นู กู ซายัก กาเญา กือนา บรีงัจ รอจ กะ ปือมือเลา อีตู นู ลูมอฮ ปือญูโรฮ นะ เยซู ครีด ตูฮัด นะ กีตา บือเลฮ มือเลา กาลา ดูลู. 18 กูญา บือเลฮ มือญาเระ กะ กาเญา จะ "เดะ กาลา ปือญูดัฮ นะ อาดา ซือมียา อาฆัฮ-ฆือละ มาแรฮ นู นะ บูวัจ ตูโรจ กะ ลาฆู ฆาละ นู ฌาฮัจ นะ ญาวา ตะอาซิก." 19 โกะ ซือมียา กะฆีนี เลอ ฌาดี ซือมียา นู บูวัจ บรี ปือจัฮ-บือลัฮ ฌาดี ซือกาวัด ๆ นู ตูโรจ กะ ปรางัย เดะ ฮาตี นะ กูญา นู ฮอย ซือมืองัจ นะ ตูฮัด. 20 ตาปี ลูมอฮ กาเญา นู กู ซายัก กือนา ตูโลก บือกรือฌา บือซามา บรี กาเญา นะ กือฌะ-กือมัซ บือตามัฮ บาฌิ เดะ ลาฆู นู จรัฮ บาฌิ ซูโงฮ นู กาเญา ปือจายา ดัฮ. กือนา บือซาโวจ ตูโรจ บือกะ นู ซือมืองัจ นะ ตูฮัด นะ บาวา ปี. 21 กือนา ฌาฆา ญาวา บรี ดูโดะ ตือตู เดะ ลาฆู นู ตูฮัด ซายัก กาเญา เตอ ตืองัฮ กาเญา มือนาตี ลีฮัจ เยซู คริด ตูฮัด นะ กีตา นู นะ ตือจีฮัด กะ กาเญา บรี กาเญา อาดา ฮีโดะ ซูโงฮ ซือลาลู. 22 โซะ ซือมียา นู ฮาตี เตด ตือตู กือนา ตูโลก บรี กูญา ปือจายา ตือตู ดัฮ. 23 โซะ ซือมียา อาซิก กือนา รือฆัก กูญา บรี ฮีโดะ ลือปัซ เดะ อาปี. โซะ ซือมียา อาซิก ปูลัก กือนา ตือจีฮัด กะ กูญา อาดา ฮาตี ตาโกจ เดะ ตูฮัด. ตาปี มีเซ-จะ โกะ กาเยด บาฌู นะ กูญา นู บือซีมอยํ เดะ ลาฆู ฆาละ โซะ ญาวา กือนา บือชี เลอ. 24 ปูฌี เลอ กะ ตูฮัด บือซัยํ เดะ อาตัซ ตูฮัด แนฮ ซา ญา เลอ นู บรี กีตา ฮีโดะ ลือปัซ บาฌิ. ญา มือฆัฮ บือเลฮ ฌาฆา กาเญา ตีเมา บรี กาเญา รือบัฮ เดะ ลาฆู ปือจายา บาวา กาเญา ปี รอจ กะ โซะ ฮืลด มูคา นะ ญา นู บือซรี บือซายา ฮอย ตือปัจ ตะอารัฮ ลาลู ตาปี อาดา ลาฆู ซูกา-ฮาตี บาญะ ซูโงฮ เลอ. บือกะ เยซู คริด ตูฮัด นะ กีตา ญา ตูโลก กีตา กะฆีเตอ กีตา ปูฌี กะ ตูฮัด บือซัยํ เดะ อาตัซ ซาเบะ ญา เลอ นู บือซรี ซูโงฮ มือฆัฮ โตระ ฌาดี ราฌา ซัยํ-บือซัยํ ลือเบฮ เดะ มานามา ตะเดะ กาลา นูตู เดะ กาลา อีนี ปี ซือลาลู ซือมาญัก-รอจ. อาเมน.
1 ซูรัจ อีนี มือญาเระ ลาฆู นู เยซู คริด บือเลฮ ปลีฮัจ ฌาดี ลาฆู นู ตูฮัด เดะ อาตัซ ปลีฮัจ บรี กะ ญา บีดา ญา นะ บรี ตาฮู กะ โกะ ปราโซฮ นะ ญา จะ เตด ลามา อีนี อาดา ลาฆู นามา ฆาโดฮ นะ บือฌาดี. ลาฆู กะฆีเตอ เยซู ซูโรฮ ฮูลู-บาลัก นะ ญา ปี บรี ลีฮัจ กะ โยฮัน ซือมียา นู ฌาดี ปราโซฮ นะ ญา. 2 โยฮัน เตอ บือเลฮ มือญาเระ ฌาดี ซะซี ปาซัน เดะ ลาฆู นู ญา บือเลฮ ลีฮัจ ซือมูฮา ฌาดี-จะ ลาฆู ปือมือเลา นะ ตูฮัด ฌางัน ปือมือเลา ซะซี นู เยซู คริด บือเลฮ บรี ตาฮู. 3 ซือนัง ซือลามัจ เลอ ซือมียา นู บาจา ซูรัจ ปือมือเลา ตูโดฮ อีนี. ซือนัง ซือลามัจ เลอ โกะ ซือมียา ซือมูฮา นู ดืองัยํ นู มือนีงัย บูวัจ ตูโรจ กะ ลาฆู นู อาดา ฆาแรฮ เดะ ซูรัจ อีนี. กรานา-จะ วะตู นู ตูฮัด บือเลฮ ตืองะ ดาปิก นะ รอจ ดัฮ เลอ. 4 กู โยฮัน ฆาแรฮ ซูรัจ อีนี อาตัจ บรี กะ โกะ ลูมอฮ นะ ตูฮัด กือตูโฌฮ ตือปัจ นู อาดา เดะ นังฆรี เอเซีย. มีตา เดะ ตูฮัด เดะ อาตัซ นะ ฮาลัย บรี ซือลามัจ กะ กาเญา บรี กาเญา นะ ดูโดะ ซือนัง ซือลามัจ ซูโงฮ. ตูฮัด เตอ ญา เลอ นู อาดา เดะ วะตู อีนี นู อาดา เดะ กาลา ดูลู นู นะ มาแรฮ เดะ วะตู โซะ ฮึลด. มีตา เดะ ซือมืองัจ นะ ตูฮัด จะ ซือมืองัจ กือตูโฌฮ นู อาดา เดะ โซะ ฮึลด ปาปัด กรือซี ตือปัจ ดูโดะ นะ ตูฮัด เตอ นะ บรี ซือลามัจ กะ กาเญา กะฆีเตอ. 5 มีตา เดะ เยซู คริด ฌูฆา ญา นู ฌาดี ซะซี รือมัก ซูโงฮ นู ฌาดี ซือมียา ลามูลา นู ฮีโดะ ปาเระ เดะ มาตี ดัฮ ฌาดี ซือมียา นู ฮูโกบ โกะ ราฌา เดะ ดือนียา ราตา เตอ. มีตา บรี ญา นะ บรี ซือลามัจ กะ กาเญา กะฆีเตอ ฌูฆา เลอ. กือนา บรี ซือลามัจ กะ เยซู คริด ญา เลอ นู ซายัก กีตา นู ยอม มาตี ดารัฮ มือนีเลฮ บีดา นะ บูวัจ บรี กีตา ลือปัซ เดะ ดูซา ดัฮ. 6 ญา บือเลฮ ตืองะ กีตา บรี ฌาดี ลูมอฮ ซือมียา นะ ญา ฌาดี ลูมอฮ ซามี นู นะ มือญือมัฮ กะ ตูฮัด เดะ อาตัซ นู อาโปก เดะ ญา. มีตา บรี เยซู นะ บือซรี บือซายา นะ มือฆัฮ ซือลาลู ซือมาญัก-รอจ. อาเมน. 7 ลีฮัจ เลอ เยซู นะ มาแรฮ ดูโดะ เดะ อาตัซ โกะ กือมูวัง. มาตา ราตา บีฌี นะ ลีฮัจ บือฆารี ญา. โกะ ซือมียา อีตู นู ตีกับ ญา กูญา นะ บือเลฮ ลีฮัจ ญา เตอ เลอ. โกะ อูมัจ-ซือมียา ราตา บือแนฮ เดะ ดือนียา นะ มือนาแงฮ บือปาโตด กรานา ญา. กือนา บรี ฌาดี กะฆีเตอ เลอ. อาเมน. 8 ตูฮัด บือซัยํ เดะ อาตัซ นู มือฆัฮ ลือเบฮ เดะ มานามา ญา นู อาดา เดะ วะตู อีนี นู อาดา เดะ กาลา ดูลู นู นะ มาแรฮ เดะ วะตู โซะ ฮึลด เตอ ญา มือเลา จะ "กู นี เลอ ฌาดี นู ลามูลา ฌางัน นู ปือญูดัฮ. " ญา จะ. 9 กู โยฮัน ฌาดี ดีบราดี นะ กาเญา ฌาดี กาวัด นู ตูโรจ กะ เยซู บือซามา ฌางัน กาเญา. กะฆีเตอ กู โปด ฆาโดฮ ตาฮัด เดะ ลาฆู ซูซัฮ ปายัฮ บือกะ ฌาดี ซือมียา เดะ ลูมอฮ นะ ตูฮัด บือซามา ฌูฆา. กู กือนา อาตัจ ปี กานัก เดะ ปูเลา ปือนามา ปัดมอด ซาเบะ กู บือเลฮ มือญาเระ ปือมือเลา นะ ตูฮัด ฌางัน ปือมือเลา ซะซี นู เยซู บือเลฮ บรี ตาฮู ดัฮ. 10 เดะ อารี นะ ตูฮัด เตอ ซือมืองัจ นะ ตูฮัด ญา บือกรือฌา เดะ ฮาตี นะ กู. กะฆีเตอ กู ดืองัยํ บูงี บือกะ ซูวารา ซือลูนัย โซะ บลากัก นะ กู 11 มือเลา จะ "ลาฆู นู เกา นะ บือเลฮ บือฆารี กือนา ฆาแรฮ ตาโรฮ เดะ ซูรัจ เลอ กีเรบ อาตัจ บรี กะ โกะ ลูมอฮ นะ ตูฮัด กือตูโฌฮ ตือปัจ เดะ โซะ นังฆรี เอเซีย ฌาดี-จะ นังฆรี เอเฟซัด นังฆรี ซะมรือนา นังฆรี ปือฆามัม นังฆรี เทียตีรา นังฆรี ซาดิด นังฆรี ฟีลาเดนเฟีย ฌางัน นังฆรี เลาดีเซีย." 12 กู กรือเลฮ มาแรฮ บีดา นะ ลีฮัจ ซาปา นู มือเลา ฌางัน กู. กะฆีเตอ กู บือเลฮ ลีฮัจ ตือปัจ ตืองะ ปลีตา มีญะ ตูโฌฮ บาตัก นู บูวัจ ฌางัน มัซ. 13 เดะ ตืองัฮ โกะ ตือปัจ ตืองะ ปลีตา อีตู อาดา ซืออูรัก ซือรูปา กะ ซือมียา นู บือปากัย บาฌู ซรือโกะ ญาวา รอจ กะ กากี อาดา กาเยด มัซ บือเละ ตาฮะ ดาดา. 14 โบะ เดะ ปาลา นะ ญา ปูเตฮ มรือแจว ซือรูปา กะ ซายา กือมูวัง ปูเตฮ บือกะ กาปัซ เลอ. มาตา นะ ญา ซือรูปา ญาลา อาปี. 15 กากี นะ ญา บือกะ ตือมาฆา นู กือนา ปือลัย เดะ อาปี ฆีเญฮ บรี บือตือแล บือซายา บาฌิ ดัฮ. ซูวารา นะ ญา บูงี บือกะ อาเย ฆูโฆยํ ตะเดะ อาตัซ บูเกะ เลอ. 16 ตางัน โซะ กานัน นะ ญา ปือฆัก บีตัก ตูโฌฮ บีฌี. อาดา ปือดัก ตาฌับ ดูวา บือลัฮ ตรือเบะ เดะ มูโลจ. มูคา นะ ญา โปด บือซายา บือกะ มาตาอารี นู ซูโลฮ จรัฮ โตระ. 17 ตานา กู ลีฮัจ ญา กู รือบัฮ เดะ โซะ กากี นะ ญา ซือรูปา กะ ซือมียา มาตี ดัฮ. ตาปี ญา อาเงา ตางัน โซะ กานัน นะ ญา กือนา เดะ ญาวา นะ กู มือเลา จะ "ฌางัน ตาโกจ เลอ กู ฌาดี โซะ ปรือดู ฌางัน โซะ ฮูโฌก เตอ. 18 กู ฌาดี ซือมียา นู อาดา ฮีโดะ ซือลาลู. กู มาตี ดัฮ ตาปี นี เลอ กู อาดา ฮีโดะ ซือลาลู ซือมาญัก-รอจ. กู นี เลอ ปือฆัก กูจี นู นะ บูกา บรี โกะ ซือมียา มาตี โซะ นังฆรี ฮาตู นะ ฮีโดะ ปาเระ. 19 กะฆีเตอ เลอ กือนา ฆาแรฮ เดะ ซูรัจ ลาฆู นู เกา นะ ลีฮัจ ลาฆู นู บือฌาดี เดะ วะตู อีนี ฌางัน ลาฆู นู ฆาโดฮ นะ บือฌาดี โซะ ฮึลด ฌูฆา. 20 ลาฆู ดาลับ ซูโงฮ อีตู ปาซัน โกะ บีตัก กือตูโฌฮ บีฌี นู เกา ลีฮัจ เดะ ตางัน โซะ กานัน นะ กู เตอ ฌางัน ตือปัจ ตืองะ ปลีตา มีญะ ตูโฌฮ บาตัก ฌาดี กะฆีนี เลอ. นู บีตัก ตูโฌฮ บีฌี ฌาดี ฮูลู-บาลัก นู ฌาฆา โกะ ลูมอฮ นะ ตูฮัด กือตูโฌฮ ตือปัจ. นู ตือปัจ ตืองะ ปลีตา ตูโฌฮ บาตัก โปด ฌาดี ลูมอฮ นะ ตูฮัด นู กือตูโฌฮ อีตู เลอ." ตูฮัด ญา จะ.
1 ตูฮัด มือเลา ปูลัก จะ "กือนา ฆาแรฮ ซูรัจ กีเรบ บรี กะ ฮูลู-บาลัก นู ฌาฆา ลูมอฮ นะ ตูฮัด ตือปัจ นังฆรี เอเฟซัด จะ 'ญา นู ปือฆัก บีตัก กือตูโฌฮ บีฌี เดะ ตางัน โซะ กานัน นะ ญา นู บือฌาลัด เดะ ตืองัฮ ตือปัจ ตืองะ ปลีตา มีญะ นู บูวัจ ฌางัน มัซ ตูโฌฮ บาตัก ญา มือเลา กะฆีนี จะ 2 กู ตาฮู ลาฆู บือกรือฌา นะ กาเญา นู กาเญา ตาฮัด-ฮาตี ลามา ตูโรจ ยู รือมัย กะ ฌาลัด นะ ตูฮัด. กู ตาฮู จะ กาเญา ตาฮัด เตด บียัซ เดะ โกะ ซือมียา นู ฌาฮัจ. กาเญา บือเลฮ มือญาซัจ โกะ ซือมียา อีตู นู มืองากู จะ กูญา ฌาดี ปือญูโรฮ นะ ตูฮัด เตอ ตาปี ฮอย เตด ฌาดี กะฆีเตอ เลอ. กาเญา บือเลฮ มือญาซัจ ลีฮัจ จะ กูญา ฌาดี ซือมียา มืออูปัย. 3 กู ตาฮู จะ ลูมอฮ กาเญา ตาฮัด-ฮาตี ยู รือมัย เดะ ลาฆู ซูซัฮ กรานา ลีฮัจ กะ นามา นะ กู ตีเมา นะ อาลัฮ ดัฮ เลอ. 4 ตาปี กู อาดา ลาฆู นู นะ อูจะ กะ กาเญา ซือตืองัฮ กรานา-จะ กาเญา เตด ซายัก กะ กู ซือรูปา บือกะ บือเลฮ ซายัก ดัฮ วะตู บารู ปือจายา. 5 ซาเบะ กะฆีเตอ กือนา บรีงัจ บรี บาฌิ จะ กาเญา บือเลฮ ตือซีเป บรี ซือซัจ เดะ ลาฆู นามา ซือตืองัฮ. บราเลฮ-ฮาตี ปาเระ เลอ ตูโรจ กะ ลาฆู นู ดูลู. ดัฮ เตด กะฆีเตอ ดัฮ กาเญา เตด บราเลฮ-ฮาตี กู นะ มาแรฮ มียา กาเญา นะ อาเกะ ปลีตา นะ กาเญา บือตรือเบะ เดะ ตือปัจ นะ ญา. 6 ตาปี ลูมอฮ กาเญา อาดา ลาฆู นู บาฌิ ซือตืองัฮ จะ กาเญา บือชี กะ ลาฆู ปือบูวัจ นะ โกะ ลูมอฮ นีโกลัย นู กู บือชี ฌูฆา เลอ. 7 'ซาปา อาดา ตือลีงา เตอ บรี ญา มือนีงัย กะ ลาฆู อีนี นู ซือมืองัจ นะ ตูฮัด มือเลา กะ โกะ ลูมอฮ นะ ตูฮัด ซือมูฮา เลอ. 'ซือมียา ดีฮา นู ฌือนัฮ กู นะ บรี กะ ญา มากัด บูวัฮ เดะ ปูโฮด กายู นู บรี ฮีโดะ ซือลาลู นู อาดา ตือปัจ กือโบด นะ ตูฮัด โซะ อาตัซ ลาแงะ.' ตูฮัด ญา จะ." 8 "กือนา ฆาแรฮ ซูรัจ กีเรบ บรี กะ ฮูลู-บาลัก นู ฌาฆา ลูมอฮ นะ ตูฮัด ตือปัจ นังฆรี ซะมรือนา จะ ญา นู ฌาดี โซะ ปรือดู ฌางัน โซะ ฮูโฌก นู มาตี ดัฮ ตาปี ฮีโดะ ปาเระ เตอ ญา มือเลา กะฆีนี จะ 9 'กู ตาฮู จะ ลูมอฮ กาเญา ตืองัฮ กือนา ลาฆู ซูซัฮ ปายัฮ ฌาดี ซือมียา ฮาฌะ โตระ. ตาปี โงฮ-ซูโงฮ กาเญา กายา เลอ. กู ตาฮู จะ อาดา ซือมียา มือเลา ตะอารัฮ กะ กาเญา ฌาดี-จะ โกะ ซือมียา อีตู นู มืองากู จะ อีซี กูญา ฌาดี ซือมียา บักซา ยิว ตาปี ฮอย เตด ฌาดี กะฆีเตอ. โงฮ-ซูโงฮ กูญา ฌาดี ลูมอฮ นะ กือปาลา ฮาตู ซีตัด เลอ. 10 ฌางัน ตาโกจ เลอ เดะ ลาฆู ซูซัฮ นู กาเญา ฆาโดฮ นะ ตาฮัด. นี เลอ กือปาลา ฮาตู ซีตัด นะ รีฆะ ซือมียา ซือตืองัฮ เดะ ลูมอฮ กาเญา นะ กานัก เดะ ปือฌารา บีดา นะ ลกลีฮัจ กาเญา ซือมูฮา. กาเญา นะ ซูซัฮ ปายัฮ รอจ กะ ซือปูโลฮ อารี. ตาปี บรี กาเญา อาดา ฮาตี รือมัก ซูโงฮ ตือดะ รอจ กะ มาตี. กะฆีเตอ กู นะ บรี กะ กาเญา นะ ฮีโดะ ซือลาลู ฌาดี ซือรูปา จูบุก นะ กาเญา เลอ. 11 'ซาปา อาดา ตือลีงา เตอ บรี ญา มือนีงัย กะ ลาฆู อีนี นู ซือมืองัจ นะ ตูฮัด มือเลา กะ โกะ ลูมอฮ นะ ตูฮัด ซือมูฮา เลอ. 'ซือมียา ดีฮา นู ฌือนัฮ ญา นะ เตด กือนา ลาฆู มาตี มาโซะ กะ ดูวา กาลี เลอ.' ตูฮัด ญา จะ." 12 "กือนา ฆาแรฮ ซูรัจ กีเรบ บรี กะ ฮูลู-บาลัก นู ฌาฆา ลูมอฮ นะ ตูฮัด ตือปัจ นังฆรี ปือฆามัม จะ ซือมียา นู อาดา ปือดัก ตาฌับ ดูวา บือลัฮ ญา มือเลา กะฆีนี จะ 13 'กู ตาฮู จะ ลูมอฮ กาเญา ดูโดะ ตือปัจ ดีฮา ฌาดี-จะ ตือปัจ อีตู นู กือปาลา ฮาตู ซีตัด ดูโดะ บือบือลา ฌาดี ราฌา. กู ตาฮู จะ กาเญา ซือมาตา ตูเฮะ กะ นามา นะ กู บรี กือฌะ-กือมัซ เตอ. ตือกาลา อีตู อันตีปัด ซือมียา ฮาตี รือมัก นู มือเลา ฌาดี ซะซี ปาซัน ลาฆู นะ กู ญา กือนา บูนอฮ ดัฮ เดะ ตืองัฮ ลูมอฮ กาเญา เดะ ตือปัจ อีตู นู กือปาลา ฮาตู ซีตัด ดูโดะ เตอ. ตาปี กะฆีเตอ โปด กาเญา ฮอย เตด บือเลฮ มือเลา กีปัซ กะ ลาฆู นู กาเญา ปือจายา กะ กู เลอ. 14 ตาปี กู อาดา ลาฆู นะ อูจะ กะ กาเญา ดูวา ตีฆา ตือนอซ จะ อาดา ซือมียา ซือตืองัฮ เดะ ลูมอฮ กาเญา นู ตูโรจ กะ ลาฆู นู บาลาอัม อาฌัยํ ดัฮ นู ญา อาฌัยํ บรี ราฌา บาลัก นะ บูวัจ กะฮามี บีดา นะ บรี ลูมอฮ อิซราเอน ตือซีปะ รือบัฮ บูวัจ ซาลัฮ. กะฆีเตอ กูญา อีตู มากัด บารัก นู กือนา อาเกะ มือนืองะ กะ บราลา ดัฮ กูญา บูวัจ ลาฆู บือกาเซฮ ปูลัก. 15 กะฆีเตอ ฌูฆา อาดา ซือตืองัฮ เดะ ลูมอฮ กาเญา นู ตูโรจ กะ ปือมือเลา อาฌัยํ นะ ลูมอฮ นีโกลัย เตอ. 16 ซาเบะ กะฆีเตอ กือนา บราเลฮ-ฮาตี ปาเระ เลอ. ดัฮ เตด กะฆีเตอ กู นะ ฆางู มาแรฮ มียา กาเญา นะ บลาวัด ฌางัน โกะ ซือมียา อีตู ฌางัน ปือดัก นู อาดา เดะ มูโลจ นะ กู เลอ. 17 'ซาปา อาดา ตือลีงา เตอ บรี ญา มือนีงัย กะ ลาฆู อีนี นู ซือมืองัจ นะ ตูฮัด มือเลา กะ โกะ ลูมอฮ นะ ตูฮัด ซือมูฮา เลอ. 'ซือมียา ดีฮา นู ฌือนัฮ กู นะ บรี กะ ญา ตือโปก มานา อีตู นู บูนี ดัฮ นะ บรี บาตู ปูเตฮ กะ ญา ฌูฆา. เดะ บาตู อีตู อาดา ปือนามา บารู ฆาแรฮ ตาโรฮ ดัฮ นู ฮอย ซือมียา ดีฮา นะ ตาฮู ลือเบฮ ซา ซือมียา นู บือเลฮ ซาโมจ เลอ.' ตูฮัด ญา จะ." 18 "กือนา ฆาแรฮ ซูรัจ กีเรบ บรี กะ ฮูลู-บาลัก นู ฌาฆา ลูมอฮ นะ ตูฮัด ตือปัจ นังฆรี เทียตีรา จะ ญา นู ฌาดี นานะ นะ ตูฮัด นู อาดา มาตา บือกะ ญาลา อาปี อาดา กากี บือกะ ตือมาฆา นู กือนา ฆีเญฮ บรี บือตือแล ญา มือเลา กะฆีนี จะ 19 'กู ตาฮู ลาฆู บือกรือฌา นะ กาเญา นู กาเญา ซายัก บือซามา นู กาเญา ปือจายา ฮาตี รือมัก นู กาเญา บือกรือฌา ตูโลก กาวัด บือซามา ตาฮัด-ฮาตี ลามา ฌูฆา. กู ตาฮู จะ ลาฆู บือกรือฌา นะ กาเญา เดะ วะตู อีนี ลือเบฮ บาญะ เดะ วะตู ลามูลา นู กาเญา บารู ปือจายา เตอ. 20 ตาปี กู อาดา ลาฆู นู นะ อูจะ กะ กาเญา ซือตืองัฮ นู ลูมอฮ กาเญา ตาฮัด มือนีงัย กะ นีบีนี ปือนามา เยเซเบน นู มืองากู จะ ญา ฌาดี ซือมียา ตูโดฮ ลาฆู นะ ตูฮัด. นีบีนี อีตู ญา ตีปู อาฌัยํ ลาฆู มืออูปัย กะ ลูมอฮ ปราโซฮ นะ กู บรี กูญา ซือซัจ บูวัจ ลาฆู บือกาเซฮ บรี กูญา มากัด บารัก นู กือนา อาเกะ มือนืองะ กะ บราลา ดัฮ. 21 กู บือเลฮ บรี จือลัฮ กะ นีบีนี อีตู บรี ญา นะ บราเลฮ-ฮาตี ปาเระ เดะ ลาฆู บือกาเซฮ นะ ญา เตอ ตาปี ญา ตีเมา บราเลฮ-ฮาตี เลอ. 22 นี เลอ กู นะ ตีงัน นีบีนี อีตู บูวัก เดะ ลือปัจ บรี ญา เตด ซือนัง ญาวา. โกะ ซือมียา นู บือกาเซฮ บือซามา ฌางัน นีบีนี อีตู เตอ ดัฮ กูญา นะ เตด บราเลฮ-ฮาตี ปาเระ เดะ ลาฆู ปือบูวัจ นะ นีบีนี อีตู เตอ กู นะ ตีงัน กูญา บูวัก บรี ซูซัฮ ปายัฮ โตระ เลอ. 23 โกะ ซือมียา นู ตูโรจ กะ นีบีนี อีตู โปด กู นะ บูนอฮ บรี มาตี ฮาบิฮ. กะฆีเตอ โกะ ลูมอฮ นะ ตูฮัด ซือมูฮา นะ บือเลฮ ตาฮู จะ กู ฌาดี ซือมียา นู ซาซัจ บรี ตาฮู ลาฆู บือฮีมัจ เดะ ฮาตี. กู นะ บูวัจ บาลัซ กะ กาเญา ราตา ซือมียา บือกะ ลาฆู ปือบูวัจ นะ ลูมอฮ กาเญา ซิกมาซิก. 24 ตาปี กู นะ มือญาเระ กะ ลูมอฮ กาเญา เดะ นังฆรี เทียตีรา นู ฆีลาฆี นู เตด บือเลฮ ตูโรจ กะ ปือมือเลา อาฌัยํ อีตู เตด บือเลฮ กราลา ลาฆู อีตู นู กูญา บลาโลก จะ ลาฆู ดาลับ นะ ฮาตู ซีตัด เตอ. กู นะ เตด บรี ลาฆู ฆาโดฮ แนฮ-ฌือแนฮ กะ กาเญา. 25 ตาปี ลาฆู นู กาเญา อาดา ดัฮ เตอ กือนา ปือฆัก บรี กือฌะ-กือมัซ ตือดะ กู นะ มาแรฮ. 26 'ซือมียา ดีฮา นู ฌือนัฮ นู บูวัจ ตูโรจ กะ กู ตือดะ รอจ กะ ปือญูดัฮ เตอ กู นะ บรี กะ ซือมียา อีตู อาดา มือฆัฮ ซือรูปา บือกะ นู อาโปก บือเลฮ ซรัฮ บรี กะ กู อาดา มือฆัฮ เลอ. กะฆีเตอ ญา นะ บือเลฮ บือบือลา ลูมอฮ นังฆรี ราตา. ญา นะ บือบือลา กูญา ฌางัน ตูกัจ นู มือฆัฮ นะ กาเตาะ กูญา บรี ปือจัฮ ฮาโจยํ บือกะ โกะ ปีโยะ ตานัฮ เลอ. ซือมียา นู ฌือนัฮ อีตู เตอ กู นะ บรี บีตัก มูกัยํ กะ ญา ฌูฆา. 29 'ซาปา อาดา ตือลีงา เตอ บรี ญา มือนีงัย กะ ลาฆู อีนี นู ซือมืองัจ นะ ตูฮัด มือเลา กะ โกะ ลูมอฮ นะ ตูฮัด ซือมูฮา เลอ.' ตูฮัด ญา จะ."
1 ตูฮัด ญา มือเลา ปูลัก จะ "กือนา ฆาแรฮ ซูรัจ กีเรบ บรี กะ ฮูลู-บาลัก นู ฌาฆา ลูมอฮ นะ ตูฮัด ตือปัจ นังฆรี ซาดิด จะ ญา นู อาดา ซือมืองัจ นะ ตูฮัด นู กือตูโฌฮ ฌางัน บีตัก ตูโฌฮ บีฌี เตอ ญา มือเลา กะฆีนี จะ 'กู ตาฮู ลาฆู บือกรือฌา นะ ลูมอฮ กาเญา นู กาเญา อาดา นามา จะ ฮีโดะ ลาฆี ตาปี กาเญา มาตี ดัฮ เลอ. 2 กือนา ซือดัยํ เลอ. โกะ ลาฆู มานามา นู กาเญา อาดา บูวัจ ตูโรจ ลาฆี นู ซรือปะ นะ มาตี ฮาบิฮ ดัฮ เตอ กือนา บูวัจ บรี ญา ตือฆัยํ-อูรัจ ปาเระ เลอ. ซาเบะ กู ดาปัจ ลาฆู บือกรือฌา นะ กาเญา จะ ญา เตด ฆือนะ บาฌิ โซะ ฮึลด มูคา นะ ตูฮัด นะ กู. 3 ซาเบะ กะฆีเตอ กาเญา กือนา บรีงัจ กะ ลาฆู อีตู นู กาเญา บือเลฮ ซาโมจ บือเลฮ ดืองัยํ ดัฮ. กือนา บราเลฮ-ฮาตี ปาเระ บูวัจ ตูโรจ กะ ลาฆู กะฆีเตอ. ดัฮ กาเญา เตด ซือดัยํ กู นะ มาแรฮ ซือรูปา กะ อูรัก ปือญูรี. กาเญา นะ เตด ตาฮู วะตู นู กู นะ มาแรฮ มียา กาเญา เลอ. 4 ตาปี อาดา ลูมอฮ กาเญา ดูวา ตีฆา อูรัก ตือปัจ นังฆรี ซาดิด นู เตด บือเลฮ บูวัจ บรี บาฌู บือซีมอยํ เดะ ลาฆู ตะอารัฮ. โกะ ซือมียา อีตู นะ บือปากัย บาฌู ปูเตฮ บือฌาลัด ปี ฌางัน กู กรานา-จะ กูญา ฌาดี ซือมียา นู บือฆูนา ดัฮ. 5 'ซือมียา ดีฮา นู ฌือนัฮ ซือมียา อีตู ญา นะ บือปากัย บาฌู ปูเตฮ กะฆีเตอ. กู นะ เตด ปาดับ ปือนามา นะ ซือมียา อีตู เดะ ซูรัจ ปือนามา ลูมอฮ ซือมียา ฮีโดะ ตาปี กู นะ ซาโงะ ปือนามา นะ ซือมียา อีตู โซะ ฮึลด มูคา นะ อาโปก เดะ กู โซะ ฮึลด มูคา โกะ ฮูลู-บาลัก นะ ตูฮัด เลอ. 6 'ซาปา อาดา ตือลีงา เตอ บรี ญา มือนีงัย กะ ลาฆู อีนี นู ซือมืองัจ นะ ตูฮัด มือเลา กะ โกะ ลูมอฮ นะ ตูฮัด ซือมูฮา เลอ.' ตูฮัด ญา จะ." 7 "กือนา ฆาแรฮ ซูรัจ กีเรบ บรี กะ ฮูลู-บาลัก นู ฌาฆา ลูมอฮ นะ ตูฮัด ตือปัจ นังฆรี ฟีลาเดนเฟีย จะ ญา นู บาฌิ บือซรี นู รือมัก ซูโงฮ ญา นู ปือฆัก กูจี นะ ราฌา ดาวิด ญา เตอ ดัฮ ญา บูกา ปีตู ฮอย ซือมียา ดีฮา กาปุซ บือเลฮ ดัฮ ญา กาปุซ ปีตู ฮอย ซือมียา ดีฮา นะ บูกา บือเลฮ. ญา มือเลา กะฆีนี จะ 8 'กู ตาฮู ลาฆู บือกรือฌา นะ กาเญา จะ กาเญา อาดา อูรัจ กิดีกิ ตาปี กะฆีเตอ โปด กาเญา บือเลฮ บูวัจ ตูโรจ กะ ปือมือเลา นะ กู เตด บือเลฮ กีปัซ ปือนามา นะ กู. ลีฮัจ เลอ กู บือเลฮ บูกา ปีตู ตาโรฮ โซะ ฮึลด มูคา นะ กาเญา ดัฮ นู ฮอย ซือมียา ดีฮา กาปุซ บือเลฮ. 9 ลีฮัจ เลอ โซะ โกะ ซือมียา ลูมอฮ นะ กือปาลา ฮาตู ซีตัด นู มือเลา มืออูปัย จะ อีซี กูญา ฌาดี ซือมียา บักซา ยิว ตาปี เตด ฌาดี เตอ กู นะ บูวัจ บรี กูญา มาแรฮ มือญือมัฮ เดะ ตาปะ กากี นะ กาเญา บรี กูญา ตาฮู จะ กู ซายัก ลูมอฮ กาเญา เลอ. 10 ซาเบะ กาเญา บือเลฮ ฌาฆา บูวัจ ตูโรจ กะ ปือมือซัด นะ กู นู จะ กือนา ตาฮัด ลามา เลอ กะฆีเตอ กู โปด นะ ฌาฆา กาเญา บรี ลือปัซ เดะ วะตู นู ซูซัฮ ปายัฮ นู นะ อาดา ราตา เดะ ดือนียา บีดา นะ ลกลีฮัจ ฮาตี นะ โกะ ซือมียา ซือมูฮา นู ดูโดะ เดะ ดือนียา. 11 กู นะ มาแรฮ งัจบางัจ เลอ. ลาฆู นู กาเญา อาดา เตอ กือนา ปือฆัก บรี กือฌะ-กือมัซ บีดา ตีเมา บรี กะ ซือมียา ดีฮา นะ บือเลฮ ราปัซ อาเมด จูบุก นะ กาเญา เลอ. 12 'ซือมียา ดีฮา นู ฌือนัฮ กู นะ ตืองะ ซือมียา อีตู บรี ฌาดี จาวัก เดะ บาลัย นะ ตูฮัด นะ กู. ญา นะ เตด ตรือเบะ เดะ บาลัย อีตู ปูลัก ดัฮ เลอ. กู นะ ฆาแรฮ ปือนามา นะ ตูฮัด บือซัยํ เดะ อาตัซ ตูฮัด นะ กู เดะ ซือมียา อีตู ฌางัน ปือนามา นังฆรี นะ ตูฮัด ฌาดี-จะ นังฆรี เยรูซาเลม บารู นู นะ ฮาญอจ มาแรฮ ดาตัก เดะ ตูฮัด เดะ โซะ อาตัซ ลาแงะ. กู นะ ฆาแรฮ ปือนามา บารู นะ กู เดะ ซือมียา อีตู ฌูฆา. 13 'ซาปา อาดา ตือลีงา เตอ บรี ญา มือนีงัย กะ ลาฆู อีนี นู ซือมืองัจ นะ ตูฮัด มือเลา กะ โกะ ลูมอฮ นะ ตูฮัด ซือมูฮา เลอ.' ตูฮัด ญา จะ." 14 "กือนา ฆาแรฮ ซูรัจ กีเรบ บรี กะ ฮูลู-บาลัก นู ฌาฆา ลูมอฮ นะ ตูฮัด ตือปัจ นังฆรี เลาดีเซีย จะ ญา นู บลาโลก จะ อาเมน ฌาดี-จะ ญา นู ฌาดี ซะซี นู รือมัก นู ซูโงฮ นู ฌาดี ตือปัจ บือฌาดี นะ บือนา บารัก ซือมูฮา นู ตูฮัด เดะ อาตัซ บือฌาดี ดัฮ ญา มือเลา กะฆีนี จะ 15 'กู ตาฮู ลาฆู บือกรือฌา นะ ลูมอฮ กาเญา. กาเญา เตด บือแฌะ เตด ฮางัจ กู บือคานะ ซูโงฮ นู นะ บรี กาเญา ฮางัจ เฆอ-จะ บือแฌะ. 16 ตาปี ซาเบะ กาเญา ซาอบๆ เตด บือแฌะ เตด ฮางัจ กะฆีเตอ กู นะ ซือบุยํ กาเญา ตรือเบะ เดะ มูโลจ นะ กู บูวัก. 17 กรานา กาเญา มือเลา จะ "กู ฌาดี ซือมียา กายา อาดา บารัก บรือฆา บาญะ กู เตด บือคานะ ซือบารัก นามา ลาลู เลอ." ตาปี กาเญา เตด ตาฮู จะ กาเญา ฌาดี ซือมียา ซูซัฮ-ฮาตี ฌาดี ซือมียา ฮาฌะ โตระ ซือมียา ปาปา ฌาดี ซือมียา มาตา บูตา ซือมียา ญัก-ตือลาญัก เตอ. 18 กะฆีเตอ กู ปรีงัจ กะ ฮาตี นะ กาเญา บรี บือลี มัซ เดะ กู จะ มัซ นู ปือลัย เดะ อาปี บรี จรัฮ บาฌิ ดัฮ บีดา กาเญา นะ ฌาดี ซือมียา กายา บือเลฮ. บรี กาเญา บือลี บาฌู เตฮ-ปูเตฮ บีดา นะ บือปากัย บีดา ตีเมา บรี กาเญา จือและ มาตา ซาเบะ กาเญา ญัก-ตือลาญัก เตอ. บรี กาเญา บือลี อูบัจ ซาปัก มาตา บีดา กาเญา นะ บือเลฮ ลีฮัจ บือฆารี. 19 ดัฮ กู ซายัก กะ ซือมียา ดีฮา กู โปด นะ กาเตาะ อูจะ-อาฌัยํ ซือมียา อีตู. กะฆีเตอ บรี กาเญา อาดา ฮาตี ราเฌด บราเลฮ-ฮาตี ปาเระ เลอ. 20 นี เลอ กู อาดา บือดีรี เดะ ปีตู บลาโลก มีตา มาโซะ. ดัฮ ซือมียา ดีฮา นะ มือนีงัย ซูวารา นะ กู นะ บูกา ปีตู กู โปด นะ มาโซะ ปี ดาปัจ ซือมียา อีตู นะ มากัด บือซามา ฌางัน ญา. ญา โปด นะ มากัด บือซามา ฌางัน กู. 21 'ซือมียา ดีฮา นู ฌือนัฮ กู นะ บรี ซือมียา อีตู ดูโดะ เดะ ปาปัด กรือซี ตือปัจ ดูโดะ นะ ราฌา บือซามา ฌางัน กู ซือรูปา บือกะ กู บือเลฮ ฌือนัฮ ดัฮ บือเลฮ ดูโดะ บือซามา ฌางัน อาโปก เดะ กู เดะ ตือปัจ ดูโดะ นะ ญา. 22 'ซาปา อาดา ตือลีงา เตอ บรี ญา มือนีงัย กะ ลาฆู อีนี นู ซือมืองัจ นะ ตูฮัด มือเลา กะ โกะ ลูมอฮ นะ ตูฮัด ซือมูฮา เลอ.' ตูฮัด ญา จะ."
1 ลือปัซ ลาฆู กะฆีเตอ กู บือเลฮ มีปี ปูลัก ลีฮัจ ปีตู โซะ ลาแงะ นู กาบูกา ดัฮ. อาดา ซูวารา นู กู บือเลฮ ดืองัยํ ดูลู เตอ บูงี บือกะ ซูวารา ซือลูนัย มือเลา ฌางัน กู จะ "ญาแญะ กะ อาตัซ อีนี เลอ. กู นะ บูวัจ บรี เกา ลีฮัจ โกะ ลาฆู นู ฆาโดฮ นะ บือฌาดี เดะ วะตู โซะ ฮึลด." 2 ดัดดัด อีตู เตอ ซือมืองัจ นะ ตูฮัด บือกรือฌา เดะ ฮาตี นะ กู. นี เลอ อาดา ปาปัด กรือซี ตือปัจ ดูโดะ นะ ราฌา ตืองะ เดะ โซะ ลาแงะ. อาดา ซาปา ดูโดะ เดะ ตือปัจ อีตู เลอ. 3 ญา นู ดูโดะ เดะ ตือปัจ ดูโดะ อีตู เตอ ญา ลีฮัจ ซือรูปา กะ บาตู อีตัด นู บือซายา จรัฮ บือกะ อีตัด มีรัฮ เตอ. อาดา บือกะ ลายัยํ นะ ตูฮัด นู ซายา จรัฮ กือลีลิก ตือปัจ ดูโดะ อีตู บือตือแล ซือรูปา กะ อีตัด ฮีเฌา. 4 นู กือลีลิก ตือปัจ ดูโดะ นะ ราฌา อีตู เตอ อาดา ปาปัด กรือซี ดูวา-ปูโลฮ ปัจ กรือซี. อาดา ฮูลู-บาลัก นู ซัยํ-บือซัยํ ดูวา-ปูโลฮ ปัจ อูรัก บือปากัย กาเยด ปูเตฮ ดูโดะ เดะ อาตัซ ตือปัจ อีตู. กูญา ปากัย จูบุก มัซ เดะ ปาลา นะ กูญา. 5 อาดา กีลัจ ฌางัน ฆูโตยํ ซูวารา แนฮ-ฌือแนฮ ตรือเบะ มาแรฮ เดะ ตือปัจ ดูโดะ นะ ราฌา อีตู. อาดา ดามัยํ ตูโฌฮ บาตัก นู กือนา จูโจฮ ตาโรฮ เดะ โซะ ตือปัจ ดูโดะ อีตู นู ฌาดี ซือมืองัจ นะ ตูฮัด กือตูโฌฮ. 6 โซะ ฮึลด ตือปัจ ดูโดะ อีตู ปูลัก อาดา นู ลีฮัจ ซือรูปา กะ ลาโวจ กาจา นู บือตือแล บือกะ อีตัด. กือลีลิก ตือปัจ ดูโดะ นะ ราฌา อีตู ปัจ บือดาฮะ เตอ อาดา ซือรูปา บือกะ บือนาตัก ปัจ อีโกยํ นู อาดา มาตา ปือนอฮ เดะ โซะ ฮึลด ฌางัน โซะ บลากัก. 7 บือนาตัก นู ซา เตอ ซือรูปา กะ ซีงา บือนาตัก นู ดูวา ซือรูปา กะ ลือมู บาปา บือนาตัก นู ตีฆา อาดา มูคา ซือรูปา อูมัจ-ซือมียา บือนาตัก นู ปัจ ซือรูปา กะ บูโรก ราฌาวาลี ตืองัฮ ตรือบัก. 8 บือนาตัก นู ปัจ อีโกยํ ซือมูฮา เตอ โซกซา อีโกยํ อาดา ซายะ นัม ซายะ. ญาวา นะ กูญา ปือนอฮ ฌางัน มาตา กือลีลิก ฌางัน โซะ บาวัฮ ซายะ ฌูฆา. กูญา มือญาญี ซียัก มาลับ เตด บราดู จะ "บาฌิ บือซรี บาฌิ บือซรี ซือซูโงฮ เลอ. ตูฮัด บือซัยํ เดะ อาตัซ นู มือฆัฮ ลือเบฮ เดะ มานามา 3 ญา บาฌิ บือซรี. ญา เลอ นู อาดา เดะ กาลา ดูลู นู อาดา เดะ วะตู อีนี นู นะ มาแรฮ เดะ วะตู โซะ ฮึลด เตอ." กูญา จะ. 9 โกะ บือนาตัก อีตู กูญา อาดา มือญาญี ปูฌี มือโอจ กะ ตูฮัด บรี ซือลามัจ กะ ญา นู ดูโดะ เดะ ตือปัจ ดูโดะ นะ ราฌา ญา นู อาดา ซือลาลู เตอ. ตานา กูญา บูวัจ กะฆีเตอ 10 โกะ ฮูลู-บาลัก นู ซัยํ-บือซัยํ ดูวา-ปูโลฮ ปัจ อูรัก อีตู เตอ กูญา ตือมะ กะ ตานัฮ มือญือมัฮ กะ ตูฮัด นู ดูโดะ เดะ ตือปัจ ดูโดะ อีตู ตูฮัด นู อาดา ซือลาลู เลอ. กูญา อูฆัย จูบุก บูวัก โซะ ฮึลด ตือปัจ ดูโดะ นะ ญา มือญาญี จะ 11 "ตูฮัด บือซัยํ เดะ อาตัซ เออ ตูฮัด นะ กามี ซือมูฮา เตอ เกา เลอ บือฆูนา นะ บรี ราตา ซือมียา ปูฌี กะ เกา ตูเฮะ กะ เกา มือโอจ กะ ลาฆู มือฆัฮ นะ เกา. กรานา-จะ เกา บือเลฮ บือฌาดี บือนา บารัก ราตา ซือมูฮา. บือนา บารัก นู อาดา เตอ บือฌาดี ดัฮ ตูโรจ กะ ฮาตี นะ เกา เลอ." กูญา จะ.
1 กู มีปี ลีฮัจ ปูลัก เดะ โซะ ตางัน กานัน นะ ญา นู ดูโดะ เดะ ตือปัจ ดูโดะ นะ ราฌา เตอ อาดา ซูรัจ ซือฆูโลก นู อาดา ปือมือเลา ฆาแรฮ ปือนอฮ ดัฮ เดะ โซะ ดาลับ ฌางัน โซะ ลูวัยํ ตูโดก ตาแปะ ฌางัน มือกรา ตูโฌฮ บีฌี. 2 กู ลีฮัจ ปูลัก อาดา ฮูลู-บาลัก ซืออูรัก นู มือฆัฮ บือซูระ ซูวารา บือซัยํ จะ "ซาปา นู ฌาดี ซือมียา บือฆูนา นะ ปือเลาะ มือกรา นะ บูกา ซูรัจ โลก-ฆูโลก อีตู?" 3 ฮอย ซือมียา ดีฮา เดะ โซะ ลาแงะ เดะ โซะ ดือนียา เฆอ-จะ เดะ บาวัฮ ดือนียา โปด ฆามะ นะ บูกา ซูรัจ อีตู นะ บาจา ลีฮัจ เดะ ดาลับ ซูรัจ อีตู บือเลฮ. 4 กะฆีเตอ กู มือนาแงฮ บาญะ ซูโงฮ ซาเบะ ฮอย เตด ดาปัจ ซือมียา ซืออูรัก โปด นู บือฆูนา นะ บูกา ซูรัจ อีตู นะ บาจา ลีฮัจ เดะ ดาลับ ซูรัจ อีตู บือเลฮ. 5 ตาปี เดะ ลูมอฮ ฮูลู-บาลัก นู ซัยํ-บือซัยํ เตอ อาดา ซืออูรัก มือญาเระ กะ กู จะ "ฌางัน มือนาแงฮ. นี เลอ ซีงา เดะ ลูมอฮ ยูดา นู ฌาดี บือแนฮ นะ ราฌา ดาวิด เตอ ญา ฌือนัฮ ดัฮ. กะฆีเตอ ญา เลอ นะ บือเลฮ ปือเลาะ มือกรา กือตูโฌฮ บีฌี นะ บูกา ซูรัจ อีตู เลอ." 6 กะฆีเตอ กู ลีฮัจ ปูลัก โซะ บีดิก ตือปัจ ดูโดะ นะ ราฌา เดะ ตืองัฮ โกะ บือนาตัก ปัจ อีโกยํ เตอ เดะ ตืองัฮ ลูมอฮ ฮูลู-บาลัก นู ซัยํ-บือซัยํ โปด กู ลีฮัจ บือฆารี อานะ กาเมก ซา อีโกยํ อาดา บือดีรี ลีฮัจ ซือรูปา กือนา บูนอฮ มือญือมัฮ ดัฮ เลอ. อานะ กาเมก อีตู อาดา ตูโฌฮ ตาโนะ อาดา มาตา ตูโฌฮ บีฌี นู ฌาดี ซือมืองัจ กือตูโฌฮ นะ ตูฮัด นู กือนา ซูโรฮ ปี ราตา เดะ ดือนียา. 7 อานะ กาเมก อีตู เตอ ญา มาโซะ ปี ซาโมจ อาเมด ซูรัจ เดะ ตางัน โซะ กานัน นะ ญา นู ดูโดะ เดะ อาตัซ ตือปัจ ดูโดะ อีตู เตอ. 8 ตานา ญา ซาโมจ ซูรัจ อีตู ดัฮ บือนาตัก ปัจ อีโกยํ ฌางัน โกะ ฮูลู-บาลัก นู ซัยํ-บือซัยํ ดูวา-ปูโลฮ ปัจ อูรัก อีตู โปด กูญา ตือมะ มือญือมัฮ กะ อานะ กาเมก เลอ. กูญา ซือมูฮา ปือฆัก กลาติก ฌางัน บาเตน มัซ นู อาดา กือมียัน ปือนอฮ นู ฌาดี ปือมือเลา บือซาโวจ นะ โกะ ซือมียา นะ ตูฮัด. 9 กูญา มือญาญี ปูฌี กะ อานะ กาเมก ฌาดี ลาฆู มือญาญี บารู จะ "เกา เลอ ฌาดี ซือมียา บือฆูนา นะ ซาโมจ ซูรัจ ฆูโลก อีตู นะ ปือเลาะ มือกรา เดะ ซูรัจ ตรือเบะ เลอ กรานา-จะ เกา กือนา บูนอฮ มือญือมัฮ ดัฮ. ฌางัน ดารัฮ นะ เกา เตอ เกา บือเลฮ ตือบุซ อูมัจ-ซือมียา บรี ฌาดี ซือมียา นะ ตูฮัด เดะ อาตัซ จะ ซือมียา ราตา บักซา ราตา บือแนฮ 3 ราตา บาซา ราตา นังฆรี 10 เกา บือเลฮ ตืองะ กูญา บรี ฌาดี ลูมอฮ ซือมียา นะ ตูฮัด ฌาดี ลูมอฮ ซามี นู นะ มือญือมัฮ 3 กะ ตูฮัด นะ กีตา เตอ. กูญา โปด นะ บือเลฮ บือบือลา โกะ นังฆรี เดะ ดือนียา อีนี เลอ." 11 กะฆีเตอ กู ลีฮัจ ปูลัก กู ดืองัยํ ซูวารา โกะ ฮูลู-บาลัก บาญะ โตระ บือรีบู-รีบู บือละซา-ละซา โปด บือกลีลิก ตือปัจ ดูโดะ นะ ราฌา บือกลีลิก โกะ บือนาตัก ฌางัน โกะ ฮูลู-บาลัก นู ซัยํ-บือซัยํ เตอ. 12 กูญา มือญาญี ซูวารา บือซัยํ จะ "อานะ กาเมก อีตู นู กือนา บูนอฮ มือญือมัฮ ดัฮ ญา เลอ บือฆูนา นะ ซาโมจ ลาฆู ปูฌี มือโอจ กรานา-จะ ญา เลอ มือฆัฮ ญา กายา โตระ อาดา อากัน ซูโงฮ ญา เตอ เลอ นู ตือฆัยํ-อูรัจ นู ซัยํ-บือซัยํ นู บือซรี บือซายา เลอ." 13 กะฆีเตอ กู ดืองัยํ ซูวารา บือนา บารัก นู บือฌาดี บรี ฮีโดะ ซือมูฮา เดะ โซะ ลาแงะ โซะ ดือนียา โซะ บาวัฮ ดือนียา เดะ อารก โปด ฌูฆา โกะ มานามา นู อาดา ฮีโดะ ราตาๆ มือญาญี จะ "ปูฌี มือโอจ เลอ กะ ญา นู อาดา ดูโดะ เดะ ตือปัจ ดูโดะ นะ ราฌา เตอ ปูฌี มือโอจ กะ อานะ กาเมก บือซามา กรานา-จะ กูญา เลอ นู ซัยํ-บือซัยํ นู บือซรี บือซายา ตือฆัยํ-อูรัจ เลอ. ปูฌี มือโอจ ซือมาญัก-รอจ ซือลาลู เลอ." 14 กะฆีเตอ โกะ บือนาตัก ปัจ อีโกยํ เตอ บือซูระ จะ "อาเมน. กะฆีเตอ เลอ.". โกะ ฮูลู-บาลัก นู ซัยํ-บือซัยํ อีตู โปด ตือมะ มือญือมัฮ.
1 กะฆีเตอ กู มีปี ลีฮัจ ปูลัก อานะ กาเมก อีตู ญา ปือเลาะ มือกรา นู ซา เดะ ดาลับ ตูโฌฮ บีฌี อีตู บรี ตรือเบะ ดัฮ. กู บือเลฮ ดืองัยํ บือนาตัก ซืออีโกยํ เดะ ดาลับ ปัจ อีโกยํ อีตู ญา มือเลา ซูวารา บูงี บือกะ ฆูโตยํ จะ "มาแรฮ เลอ." 2 กะฆีเตอ กู ลีฮัจ นี เลอ อาดา กูดา ปูเตฮ ซืออีโกยํ. ซือมียา นู ดูโดะ เดะ อาตัซ กูดา เตอ ญา ปือฆัก ปานัฮ ญา บือเลฮ ซาโมจ จูบุก. ญา โปด ตรือเบะ ปี บือกะ ซือมียา นู ฌือนัฮ ดัฮ บีดา นะ ฌือนัฮ ปูลัก เลอ. 3 ตานา อานะ กาเมก ญา ปือเลาะ มือกรา นู ดูวา ดัฮ กู โปด บือเลฮ ดืองัยํ บือนาตัก นู ดูวา มือเลา จะ "มาแรฮ เลอ." 4 อาดา กูดา ซืออีโกยํ ปูลัก ตรือเบะ มาแรฮ ฌาดี กูดา มีรัฮ บือกะ อาปี. ซือมียา นู ดูโดะ เดะ อาตัซ กูดา อีตู เตอ ตูฮัด ญา บรี กะ ญา นะ บือเลฮ บูวัจ บรี ฮอย ลาฆู ซือนัง เดะ ดือนียา บีดา นะ บรี โกะ ซือมียา บือบูนอฮ-บูนอฮ. ซือมียา อีตู ญา บือเลฮ ซาโมจ ปือดัก บือซัยํ ซือบีลัฮ. 5 ตานา อานะ กาเมก ญา ปือเลาะ มือกรา นู ตีฆา ดัฮ กู โปด บือเลฮ ดืองัยํ ซูวารา บือนาตัก นู ตีฆา มือเลา จะ "มาแรฮ เลอ." กะฆีเตอ กู ลีฮัจ นี เลอ อาดา กูดา ฮีตับ ซืออีโกยํ. ซือมียา นู ดูโดะ เดะ อาตัซ กูดา อีตู เตอ ญา ปือฆัก ฌูโญก ตือปัจ ตีมัง. 6 กู ดืองัยํ ซูวารา บูงี บือกะ-จะ มาแรฮ ดาตัก เดะ ซามา ตืองัฮ บือนาตัก ปัจ อีโกยํ อีตู บือซูระ จะ "บรัซ ซาลี ซือกีโล ซือรีเงะ บรัซ บาลี ตีฆา กีโล ซือรีเงะ เลอ. ตาปี เกา ฌางัน บูวัจ บรี มีญะ รือนัก ฌางัน อาระ อางุน นะ บือนาซา." 7 ตานา อานะ กาเมก ญา ปือเลาะ มือกรา นู ปัจ ดัฮ กู โปด ดืองัยํ ซูวารา บือนาตัก นู ปัจ มือเลา จะ "มาแรฮ เลอ." 8 กะฆีเตอ กู ลีฮัจ นี เลอ อาดา กูดา ซี ปูจัจ ซืออีโกยํ. ซือมียา นู ดูโดะ เดะ อาตัซ กูดา เตอ ญา ปือนามา จะ ลาฆู มาตี. นู บลาโลก จะ นังฆรี ฮาตู โปด ตูโรจ ปี ฌูฆา. ตูฮัด บือเลฮ บรี กือดูวา อีนี อาดา มือฆัฮ นู นะ บูนอฮ ซือมียา เดะ ดือนียา เดะ ดาลับ ปัจ กาวัด นะ บูนอฮ ซือกาวัด. นะ บูนอฮ กูญา ฌางัน ปือดัก ฌางัน ลาฆู บือตาฮัด บารัก มากัด ฌางัน โกะ ปือญาเกะ ฮาวัยํ รูบือฮีรู ฌางัน โกะ บือนาตัก ฌาฮัจ ฌูฆา. 9 ตานา อานะ กาเมก ญา ปือเลาะ มือกรา นู ลีมา ดัฮ กู โปด ลีฮัจ บือฆารี เดะ บาวัฮ ตือปัจ ตูนู บารัก มือนืองะ กะ ตูฮัด เตอ อาดา ซือมืองัจ นะ โกะ ซือมียา ซือมูฮา นู กือนา บูนอฮ ดัฮ กรานา ปือมือเลา นะ ตูฮัด กรานา ปือมือเลา นู กูญา บือเลฮ มือเลา ฌาดี ซะซี เตอ. 10 กูญา อีตู บือซูระ ซูวารา บือซัยํ จะ "ตูฮัด บือซัยํ เออ เกา นู บาฌิ บือซรี นู รือมัก ซูโงฮ เลอ บราปา ลามา ลาฆี ตือดะ เกา นะ กรัจ ฮูโกบ นะ บูวัจ บาลัซ ปาเระ กะ ลูมอฮ ซือมียา นู อาดา ดูโดะ เดะ ดือนียา กรานา กูญา บือเลฮ บูนอฮ กามี?" ญา จะ. 11 ตูฮัด ญา บือเลฮ บรี บาฌู ปูเตฮ กะ โกะ ซือมียา อีตู ราตา อูรัก ญา ปือซัด กะ กูญา จะ บรี นาตี งะซืองะ ดีกิ ลาฆี ตือดะ กาวัด ปราโซฮ นะ กูญา ฌาดี-จะ ลูมอฮ นะบรานะ นะ กูญา นะ กือนา บูนอฮ ซือรูปา กะ กูญา บรี ฆือนะ ฮาบิฮ ดัฮ. 12 กะฆีเตอ กู ลีฮัจ ปูลัก ตานา อานะ กาเมก ญา ปือเลาะ มือกรา นู นัม ดัฮ ตานัฮ บรีเงาะ บาญะ ซูโงฮ มาตาอารี กือลับ ฮีตับ ดัฮ บือกะ กาเยด ฆูนี นู ฮีตับ. บูลัด โปด มีรัฮ ซือรูปา กะ ดารัฮ. 13 บีตัก ซือมูฮา เดะ โซะ ลาแงะ โปด ฆูโฆยํ กะ ดือนียา ซือรูปา กะ ปูโฮด กรายา-บูดี นู กือนา อาเงน ตือฆัยํ ตีโยะ ยู ตือดะ บูวัฮ เตด ดัด นะ มาซะ ฆูรก กะ ตานัฮ. 14 ลาแงะ โปด ลือแงะ ปี ซือรูปา ซูรัจ นู กูญา ฆูโลก ฮาบิฮ ดัฮ เตอ. โกะ บูเกะ ราตา บีฌี ฌางัน ปูเลา ราตา ปูเลา กือนา อูบัฮ ปี เดะ ตือปัจ ลามา นะ ญา. 15 โกะ ราฌา ราตา เดะ ดือนียา ลูมอฮ ซือมียา ซัยํ-บือซัยํ โกะ กือปาลา ตาฮัน ซือมียา กายา ซือมียา นู อาดา มือฆัฮ ราตา โกะ ซือมียา นู ฌาดี ปราโซฮ นู เตด ฌาดี ปราโซฮ โปด กูญา ซือมูฮา ปี ซือลูนี เดะ โกะ ฆูฮา เดะ จือลัฮๆ บาตู เดะ โกะ บูเกะ. 16 ลูมอฮ กูญา บือซูระ มือญาเระ กะ บูเกะ ฌางัน บาตู จะ "กือนา รูโตฮ ตือกัด กามี เลอ. บูนี กามี ตาโรฮ บรี ลือปัซ เดะ มูคา นะ ญา นู อาดา ดูโดะ เดะ ตือปัจ ดูโดะ นะ ราฌา บรี ลือปัซ เดะ ลาฆู นู อานะ กาเมก นะ มูซัยํ เตอ. 17 ซาเบะ-จะ อารี นู บือซัยํ ซูโงฮ นู กูญา กือดูวา นะ มูซัยํ กรัจ ฮูโกบ ญา มาแรฮ รอจ ดัฮ. ซือมียา ดีฮา นะ ตาฮัด บือเลฮ เลอ?"
1 ลือปัซ ลาฆู อีตู กู มีปี ลีฮัจ ฮูลู-บาลัก นะ ตูฮัด ปัจ อูรัก บือดีรี ปัจ บือดาฮะ โซะ ดือนียา ซาฆัก อาเงน เดะ ดือนียา ปัจ บือดาฮะ ตาโรฮ บีดา ตีเมา บรี อาเงน ตีโยะ กือนา เดะ ฮูตัด ฌางัน ลาโวจ เฆอ-จะ เดะ ปูโฮด กายู ฮาดีฮา โปด. 2 กะฆีเตอ กู ลีฮัจ ปูลัก บือฆารี ฮูลู-บาลัก นู ซืออูรัก เตอ ญาแญะ มาแรฮ เดะ โซะ อาตัซ มาตาอารี ปือฆัก มือกรา นะ ตูฮัด ญา นู อาดา ฮีโดะ ซือลาลู. ญา บือเลฮ บือซูระ ซูวารา บือซัยํ กะ ฮูลู-บาลัก ปัจ อูรัก อีตู นู ตูฮัด บือเลฮ บรี กะ กูญา นะ อาดา มือฆัฮ นะ บูวัจ ลาฆู ฌาฮานัม กะ ดือนียา ฌางัน ลาโวจ เตอ. 3 ญา มือเลา จะ "ฌางัน บูวัจ ลาฆู ฌาฮานัม เดะ ดือนียา เฆอ-จะ เดะ ลาโวจ เฆอ-จะ เดะ โกะ ปูโฮด กายู เตอ ตือดะ กามี นะ บือเลฮ ตาแปะ มือกรา เดะ กือนิง นะ โกะ ซือมียา ซือมูฮา นู ฌาดี ปราโซฮ นะ ตูฮัด เดะ อาตัซ นะ กีตา." 4 กู ดืองัยํ จะ โกะ ซือมียา นู กือนา ตาแปะ มือกรา เดะ กือนิง เตอ อาดา กือมูฮา 144,000 อูรัก ฌาดี ซือมียา นู มาแรฮ เดะ ราตา ปาลัฮ นะ ลูมอฮ อิซราเอน เลอ. 5 ดูวา-บือลัซ ปาลัฮ อีตู เตอ อาดา ปาลัฮ นะ ยูดา รูเบน ฆาด อาเซอ นับทาลี มานาเซฮ ซีเมโอน เลวี อีซาคา เซบูโลน โยเซบ เบนยามิน. โซกซา ปาลัฮ อาดา ซือมียา นู กือนา ตาแปะ มือกรา 12,000 อูรัก เลอ. 9 ลือปัซ ลาฆู กะฆีเตอ กู มีปี ลีฮัจ ปูลัก นี เลอ อาดา ลูมอฮ ซือมียา บาญะ ซูโงฮ บือกะ ฮอย ซือมียา ดีฮา ตือฆามะ นะ กีรา บือเลฮ. กูญา มาแรฮ ดาตัก เดะ ราตา บักซา ราตา บือแนฮ ราตา บาซา ราตา นังฆรี เตอ. กูญา อีตู ปากัย บาฌู ปูเตฮ ปือฆัก ดาโวด ตือโนจ บือดีรี โซะ ฮึลด ปาปัด กรือซี ตือปัจ ดูโดะ นะ ตูฮัด โซะ ฮึลด มูคา นะ อานะ กาเมก เตอ. 10 กูญา อีตู บือซูระ ซูวารา บือซัยํ จะ "ตูฮัด บือซัยํ เดะ อาตัซ นะ กีตา ญา นู อาดา ดูโดะ เดะ ตือปัจ ดูโดะ นะ ราฌา ฌางัน อานะ กาเมก อีตู บือซามา เตอ กูญา เลอ นู ตูโลก กีตา บรี ฮีโดะ ลือปัซ บาฌิ." 11 โกะ ฮูลู-บาลัก ซือมูฮา กูญา อาดา บือดีรี กือลีลิก ตือปัจ ดูโดะ นะ ราฌา กือลีลิก โกะ ฮูลู-บาลัก นู ซัยํ-บือซัยํ กือลีลิก โกะ บือนาตัก ปัจ อีโกยํ อีตู เตอ. กะฆีเตอ กูญา ตือมะ มูคา รอจ กะ ตานัฮ โซะ ฮึลด ตือปัจ ดูโดะ อีตู มือญือมัฮ กะ ตูฮัด 12 มือเลา จะ "ซูโงฮ เลอ. ตูฮัด บือซัยํ เดะ อาตัซ ตูฮัด นะ กามี เตอ เกา เลอ นู บือซรี บือซายา ปานัย อากัน มือฆัฮ ซีดี ซูโงฮ. กือนา ปูฌี มือโอจ บรี ซือลามัจ กะ ญา ซือลาลู ปี ซือมาญัก-รอจ เลอ. อาเมน" 13 กะฆีเตอ อาดา ซืออูรัก เดะ ลูมอฮ ฮูลู-บาลัก นู ซัยํ-บือซัยํ อีตู ตาญา กู จะ "โกะ ซือมียา นู บือปากัย บาฌู ปูเตฮ อีนี เตอ ฌาดี ซาปา เลอ มาแรฮ ดาตัก ปัจ ดีฮา?" 14 กู ตีกัฮ กะ ญา จะ "จา เออ โบะ เกา เลอ นู ตาฮู." ญา ตีกัฮ กะ กู จะ "โกะ ซือมียา อีนี ฌาดี ซือมียา นู บือเลฮ ตาฮัด ยู ลือปัซ เดะ วะตู นู ซูซัฮ ปายัฮ โตระ อีตู เลอ. กูญา บาโซฮ โกะ บาฌู นะ กูญา เดะ ดารัฮ นะ อานะ กาเมก ตือดะ บาฌู นะ กูญา บาฌิ ปูเตฮ ดัฮ. 15 ซาเบะ กะฆีเตอ กูญา อาดา ดูโดะ โซะ ฮึลด ปาปัด กรือซี นะ ตูฮัด เดะ อาตัซ ซียัก มาลับ บือกรือฌา มือญือมัฮ กะ ญา เดะ ดาลับ บาลัย นะ ตูฮัด. ญา นู ดูโดะ เดะ ปาปัด กรือซี ตือปัจ ดูโดะ นะ ราฌา เตอ ญา นะ ดูโดะ บือซามา ฌางัน กูญา นะ ตูโดก บูนี กูญา เลอ. 16 ลูมอฮ กูญา นะ เตด ลาปัยํ บารัก มากัด นะ เตด ดาฆา อาเย ลาลู ดัฮ. ซายา มาตาอารี ฌางัน ลาฆู ฮางัจ มานามา โปด นะ เตด ซูโลฮ กือนา กูญา ลาลู เลอ. 17 กรานา-จะ อานะ กาเมก อีตู ญา นู อาดา เดะ ตืองัฮ ตือปัจ ดูโดะ นะ ราฌา เตอ นะ ฌาฆา ฮัจ-ลีฮัจ กูญา ซือรูปา ซือมียา บือบือลา กาเมก นะ บาวา กูญา บือปี รอจ กะ มาตา อาเย ซือบุยํ นู บรี ฮีโดะ. ตูฮัด เดะ อาตัซ นะ อีซุจ อาเย มาตา ราตา บีฌี นู มือนีเลฮ เดะ มาตา นะ กูญา."
1 ตานา อานะ กาเมก ญา ปือเลาะ มือกรา นู ตูโฌฮ อีตู ดัฮ เดะ โซะ ลาแงะ โปด ซืองะ ซือฌูรุซ บือเลฮ ฆามะ ตืองัฮ ฌับ. 2 กะฆีเตอ กู มีปี ลีฮัจ ปูลัก อาดา ฮูลู-บาลัก ตูโฌฮ อูรัก อีตู เตอ นู บือดีรี โซะ ฮึลด มูคา นะ ตูฮัด เดะ อาตัซ กูญา ซาโมจ ซือลูนัย ตูโฌฮ บาตัก. 3 ฮูลู-บาลัก นู ซืออูรัก ลาฆี เตอ ญา ปือฆัก ปาซู มัซ ตือปัจ บอฮ กือมียัน ญา มาแรฮ บือดีรี เดะ บีดิก ตือปัจ ตูนู บารัก มือนืองะ กะ ตูฮัด. ฮูลู-บาลัก นู อีตู ญา ซาโมจ กือมียัน บาญะ บีดา นะ ปี ตูนู มือญือมัฮ บือซามา ฌางัน ปือมือเลา บือซาโวจ นะ โกะ ซือมียา นะ ตูฮัด. ญา ตูนู มือญือมัฮ กือมียัน อีตู เดะ อาตัซ ตือปัจ ตูนู กือมียัน นู บูวัจ ฌางัน มัซ นู ดูโดะ โซะ ฮึลด ปาปัด กรือซี ตือปัจ ดูโดะ นะ ตูฮัด เตอ. 4 อาซะ กือมียัน ฌางัน ปือมือเลา บือซาโวจ นะ โกะ ซือมียา นะ ตูฮัด ฮาญอจ ญาแญะ ปี เดะ ตางัน นะ ฮูลู-บาลัก ปี รอจ กะ โซะ ฮึลด มูคา นะ ตูฮัด. 5 ฮูลู-บาลัก นู อีตู เตอ ญา บาวา ปาซู มัซ ปี อาเมด อาปี เดะ ตือปัจ ตูนู บารัก มือนืองะ บอฮ บรี ปือนอฮ ตูโฮะ กะ ดือนียา บูวัจ บรี อาดา ฆูโตยํ ซูวารา แนฮ-ฌือแนฮ อาดา กีลัจ ดือนียา โปด บรีเงาะ. 6 กะฆีเตอ ฮูลู-บาลัก ตูโฌฮ อูรัก นู ปือฆัก ซือลูนัย ตูโฌฮ บาตัก อีตู เตอ กูญา ซียะ นะ ตีโยะ ดัฮ. 7 ฮูลู-บาลัก นู ลามูลา เตอ ญา ตีโยะ ซือลูนัย. กะฆีเตอ อาดา ฮูฌัด บาตู ฌางัน อาปี นู จาโปยํ ฌางัน ดารัฮ กือนา บูวัก กะ ดือนียา บูวัจ บรี ตือปัจ ตานัฮ เดะ ดือนียา ฮางอซ ดัฮ ซือบือลัฮ เดะ ดาลับ ตีฆา บือลัฮ. โกะ ปูโฮด กายู ฮางอซ ดัฮ ฌูฆา ซือบือลัฮ เดะ ดาลับ ตีฆา บือลัฮ. รูโปจ ฮีเฌา โปด ฮางอซ ฮาบิฮ เลอ. 8 ฮูลู-บาลัก นู ดูวา ญา ตีโยะ ซือลูนัย. กะฆีเตอ อาดา ซือรูปา บือกะ บูเกะ บือซัยํ นู ตืองัฮ กือนา อาปี ปือลัฮ ฮางอซ กือนา บูวัก ฆูโฆยํ เดะ ลาโวจ. ลาโวจ โปด ฌาดี ดารัฮ ดัฮ ซือบือลัฮ เดะ ดาลับ ตีฆา บือลัฮ. 9 บือนาตัก ซือมูฮา นู อาดา ฮีโดะ เดะ ลาโวจ เตอ มาตี ดัฮ ซือบือลัฮ เดะ ดาลับ ตีฆา บือลัฮ. โกะ ปราฮู ฌางัน กาปัน ราตา โปด ปือจัฮ บือนาซา ดัฮ ซือบือลัฮ เดะ ดาลับ ตีฆา บือลัฮ. 10 ฮูลู-บาลัก นู ตีฆา ญา ตีโยะ ซือลูนัย. กะฆีเตอ อาดา บีตัก บือซัยํ ซือบีฌี นู อาดา อาปี ญาลา จรัฮ บือกะ ดามัยํ เตอ ฆูโฆยํ ดาตัก เดะ โซะ ลาแงะ. บีตัก อีตู ญา ฆูโฆยํ เดะ ซูงัย ซือบือลัฮ เดะ ดาลับ ตีฆา บือลัฮ. ญา ฆูโฆยํ เดะ อาตัซ โกะ มาตา อาเย ตาวัยํ ฌูฆา. 11 บีตัก อีตู ปือนามา จะ อับซินโต ฌาดี-จะ อูบัจ ปาเฮะ. โกะ อาเย ตาวัยํ ราตา ฌาดี อาเย ปาเฮะ ดัฮ ซือบือลัฮ เดะ ดาลับ ตีฆา บือลัฮ. โกะ ซือมียา บาญะ โปด กูญา มาตี กรานา มากัด อาเย อีตู ซาเบะ ญา ฌาดี อาเย ปาเฮะ ดัฮ เลอ. 12 ฮูลู-บาลัก นู ปัจ ญา ตีโยะ ซือลูนัย. กะฆีเตอ มาตาอารี กือนา กาเตาะ บรี บือนาซา ซือบือลัฮ เดะ ดาลับ ตีฆา บือลัฮ. บูลัด ฌางัน บีตัก ซือมูฮา โปด ซือรูปา กะฆีเตอ ฌูฆา ซือบือลัฮ เดะ ดาลับ ตีฆา บือลัฮ บีดา เดะ ดาลับ ตีฆา บือลัฮ อาดา ซือบือลัฮ ญา นะ กือลับ ฮอย จรัฮ. กะฆีเตอ ซียัก ญา เตด จรัฮ ซือบือลัฮ เดะ ดาลับ ตีฆา บือลัฮ. มาลับ โปด ซือรูปา กะฆีเตอ ฌูฆา เลอ. 13 กะฆีเตอ กู มีปี ลีฮัจ ปูลัก บือเลฮ ดืองัยํ บูโรก ราฌาวาลี ซืออีโกยํ นู ตรือบัก ตีงี เดะ โซะ ลาแงะ บือซูระ ซูวารา บือซัยํ จะ "จือลากา จือลากา จือลากา ดัฮ เลอ โกะ ซือมียา ซือมูฮา นู ดูโดะ โซะ ดือนียา ตานา บูงี ซูวารา ซือลูนัย นะ ฮูลู-บาลัก ตีฆา อูรัก ลาฆี นู กูญา ฆามะ นะ ตีโยะ เตอ."
1 ฮูลู-บาลัก นู ลีมา ญา ตีโยะ ซือลูนัย. กะฆีเตอ กู มีปี ลีฮัจ บีตัก ซา บีฌี นู ฆูโฆยํ เดะ ลาแงะ มาแรฮ รอจ กะ ดือนียา ดัฮ. บีตัก อีตู ญา ซาโมจ กูจี ฌาดี กูจี นะ มือนางา ลาเฮา นังฆรี ฮาตู นู ดาลับ โตระ เตอ. 2 ตานา ญา บูกา มือนางา นังฆรี ฮาตู เตอ อาดา อาซะ ซือบุยํ ญาแญะ เดะ มือนางา อีตู ซือรูปา บือกะ อาซะ เดะ ตูกู บือซัยํ โตระ. กะฆีเตอ มาตาอารี ฌางัน ลาแงะ โปด กือลับ ฮาบิฮ ดัฮ ซาเบะ อาซะ นู ตรือเบะ เดะ มือนางา อีตู. 3 อาดา กาวัด บลาลัก ตรือบัก ตรือเบะ เดะ อาซะ อีตู มาแรฮ กะ ดือนียา. ตูฮัด บรี กะ บลาลัก นู อีตู นะ อาดา บีซา ซือรูปา บือกะ บีซา ลางือลา เดะ ดือนียา. 4 ตูฮัด บลารัก ตีเมา บรี กูญา บูวัจ บรี โกะ รูโปจ เฆอ-จะ ดาโวด ฮีเฌา โกะ ปูโฮด กายู โปด นะ บือนาซา. ตาปี นะ บูวัจ บรี ซาเกะ โตระ ซา โกะ ซือมียา อีตู นู ฮอย มือกรา นะ ตูฮัด เดะ กือนิง นะ กูญา เตอ. 5 ตูฮัด ตีเมา บรี บูนอฮ โกะ ซือมียา อีตู. ตาปี บรี กูญา ซาเกะ โตระ บรี ฆือนะ ลีมา บูลัด. ลาฆู ซาเกะ อีตู เตอ ซือรูปา บือกะ ลาฆู ซาเกะ วะตู กือนา ลางือลา ซืองัจ. 6 เดะ วะตู นู อีตู เตอ โกะ ซือมียา ซูกา นะ มาตี ตาปี มาตี เตด บือเลฮ เลอ. กูญา บือคานะ โตระ นะ มาตี. ตาปี ลาฆู มาตี นะ ลารี ปี เดะ กูญา. 7 โกะ บลาลัก อีตู กูญา ซือรูปา กะ กูดา นู บือปากัย ซือบารัก ซียะ นะ บือปรัก ดัฮ. เดะ อาตัซ ปาลา นะ กูญา อาดา ซือมาตา นู ลีฮัจ ซือรูปา กะ จูบุก มัซ. มูคา นะ กูญา ซือรูปา กะ มูคา นะ ซือมียา. 8 โบะ นะ กูญา ซือรูปา กะ โบะ นะ นีบีนี ฆีฆี นะ กูญา ซือรูปา กะ ฆีฆี ซีงา. 9 กูญา อาดา ตือปัจ ตูโดก ตาฮะ ดาดา ซือรูปา กะ บาฌู บือซี. ซูวารา ซายะ นะ กูญา ซือรูปา ซูวารา ซือตรี กูดา นู บาญะ ปาคัจ บลารี มาโซะ ปี บือปรัก ฌางัน กาวัด. 10 กูญา อาดา อีโกยํ ซือรูปา อีโกยํ ลางือลา อาดา ฌาโรบ นู บีซา เตอ. อีโกยํ นะ กูญา เลอ นู บรี กูญา อาดา บีซา นู นะ บูวัจ บรี อูมัจ-ซือมียา ซาเกะ โตระ กือมูฮา ลีมา บูลัด อีตู. 11 กูญา อาดา ราฌา ซืออูรัก นู บือบือลา กูญา ฌาดี ฮูลู-บาลัก นู บือบือลา ลาเฮา นังฆรี ฮาตู เตอ. ปือนามา นะ ญา บาซา ฮีบรู บลาโลก จะ อับบาโดน ตาปี ตูโรจ บาซา กรีก บลาโลก จะ อับปอลีโยน ฌาดี-จะ ซือมียา นู บูวัจ ฌาฮานัม. 12 ลาฆู จือลากา นู ซา ลือปัซ ดัฮ. ลีฮัจ เลอ อาดา ลาฆู จือลากา ดูวา ลาฆู นู นะ บือฌาดี ลือปัซ อีนี เตอ. 13 กะฆีเตอ ฮูลู-บาลัก นู นัม ญา ตีโยะ ซือลูนัย. กู โปด ดืองัยํ ซูวารา ตรือเบะ มาแรฮ เดะ ฮูโฌก ปัจ บือดาฮะ นะ ตือปัจ ตูนู บารัก มือนืองะ นู บูวัจ ฌางัน มัซ เตอ นู อาดา โซะ ฮึลด มูคา นะ ตูฮัด เดะ อาตัซ. 14 ซูวารา อีตู ญา ปือซัด กะ ฮูลู-บาลัก นู นัม นู ปือฆัก ซือลูนัย จะ "กือนา อูฆัย ปลือปัซ โกะ ฮูลู-บาลัก ปัจ อูรัก นู กือนา อีกัจ ตาโรฮ เดะ ซูงัย บือซัยํ นู ฌาดี ซูงัย ยูเฟรติด เลอ." 15 กะฆีเตอ ญา ปลือปัซ โกะ ฮูลู-บาลัก ปัจ อูรัก อีตู นู ตูฮัด ซียะ ตาโรฮ ดัฮ ตือดะ รอจ กะ วะตู อีนี เดะ อารี บูลัด ตาโฮด อีนี โปด บีดา นะ บูนอฮ โกะ ซือมียา ซือบือลัฮ เดะ ดาลับ ตีฆา บือลัฮ. 16 อาดา ตาฮัน กูดา 200,000,000 อูรัก. กู ดืองัยํ ดัฮ จะ อาดา บาญะ กะฆีเตอ. 17 เดะ ลาฆู มีปี เตอ กู บือเลฮ ลีฮัจ บือฆารี กาวัด กูดา ฌางัน โกะ ลูมอฮ อีตู นู ดูโดะ เดะ อาตัซ กูดา เตอ ฌาดี กะฆีนี จะ กูญา อาดา บาฌู บือซี ตูโดก ตาฮะ ดาดา นู มีรัฮ บือกะ อาปี นู ฮีเฌา บือกะ อีตัด ฮีเฌา นู กูนิง บือกะ บลีรัก ฌูฆา. ปาลา นะ ลูมอฮ กูดา ซือมูฮา เตอ ซือรูปา กะ ปาลา ซีงา อาดา อาปี ฌางัน อาซะ ฌางัน บลีรัก โปด ซือบุยํ ตรือเบะ เดะ มูโลจ เลอ. 18 โกะ อูมัจ-ซือมียา เตอ กือนา บูนอฮ ดัฮ ซือบือลัฮ เดะ ดาลับ ตีฆา บือลัฮ กรานา ลาฆู จือลากา ตีฆา มาตา อีนี ฌาดี-จะ อาปี อาซะ ฌางัน บลีรัก นู ซือบุยํ ตรือเบะ เดะ มูโลจ นะ กูดา อีตู. 19 ซาเบะ-จะ โกะ กูดา อีตู เตอ ญา อาดา มือฆัฮ เดะ โซะ มูโลจ ฌางัน โซะ อีโกยํ. กรานา-จะ อีโกยํ นะ ญา ซือรูปา กะ อูลัยํ อาดา ปาลา ฌูฆา บูวัจ บรี อูมัจ-ซือมียา ซาเกะ บือเลฮ. 20 โกะ อูมัจ-ซือมียา นู อาดา ลือเบฮ เตอ นู เตด กือนา บูนอฮ เดะ ลาฆู ฌาฮานัม กะฆีเตอ กูญา เตด บือเลฮ บราเลฮ-ฮาตี ปาเระ ตีงัน บูวัก โกะ ซือบารัก นู ตางัน นะ กูญา บือเลฮ บูวัจ ดัฮ. กูญา เตด บือเลฮ บราดู ลาลู เดะ ลาฆู มือญือมัฮ กะ โกะ ฮาตู มือญือมัฮ กะ บราลา นู บูวัจ ฌางัน โกะ มัซ โกะ ปีระ โกะ ตือมาฆา นู บูวัจ ฌางัน บาตู ฌางัน กายู โปด. โกะ บราลา กะฆีเตอ นะ ลีฮัจ เตด บือฆารี นะ มือนีงัย เตด บือเลฮ นะ บือฌาลัด โปด เตด บียัซ. 21 โกะ ซือมียา อีตู เตด บือเลฮ บราเลฮ-ฮาตี เดะ ลาฆู นู กูญา บือบูนอฮ-บูนอฮ เดะ ลาฆู อาเย-ลือมู ลาฆู บือกาเซฮ ลาฆู มือญูรี นู กูญา ปาคัจ บูวัจ เตอ.
1 กะฆีเตอ กู มีปี ลีฮัจ ปูลัก อาดา ฮูลู-บาลัก นู มือฆัฮ โตระ ซืออูรัก ลาฆี ตูโรด มาแรฮ ดาตัก เดะ โซะ ลาแงะ อาดา กือมูวัง กือลีลิก บือกะ ฌาดี กาเยด นะ ญา อาดา บือซายา ลายัยํ นะ ตูฮัด เดะ อาตัซ ปาลา. มูคา นะ ญา ซือรูปา ซายา มาตาอารี กากี ญา ซือรูปา จาวัก อาปี นู บลือกัจ. 2 โซะ ตางัน นะ ญา อาดา ปือฆัก ซูรัจ มิดือมิ ซา ฆูโลก นู บูกา ดัฮ. กากี โซะ กานัน นะ ญา อาดา บือดีรี โซะ ลาโวจ. กากี โซะ กีรี บือดีรี โซะ ฮูตัด. 3 ญา บือซูระ บูริ บือกะ ซูวารา ซีงา มือรียัน. ตานา ญา บือซูระ ซูวารา ฆูโตยํ กือตูโฌฮ โปด บูงี. 4 ตานา ซูวารา ฆูโตยํ กือตูโฌฮ บูงี ดัฮ กะฆีเตอ กู ฆามะ นะ ฆาแรฮ. ตาปี กู ดืองัยํ ซูวารา ดาตัก เดะ ลาแงะ มือเลา จะ "กือนา ตาแปะ มือกรา บูนี ตาโรฮ เลอ. ลาฆู นู ฆูโตยํ กือตูโฌฮ บือเลฮ บือซูระ ซีงี ฌางัน นะ ฆาแรฮ เลอ." 5 โซะ ฮูลู-บาลัก อีตู นู กู บือเลฮ ลีฮัจ บือดีรี โซะ ลาโวจ ฌางัน โซะ ฮูตัด เตอ ญา บือเลฮ อาเกะ ตางัน กะ อาตัซ ลาแงะ 6 อาเกะ มือเลา บือฌาญี ตรือเบะ ปือนามา นะ ตูฮัด ญา นู อาดา ฮีโดะ ซือลาลู ญา นู บือเลฮ บือฌาดี ลาแงะ ฌางัน บือนา ซือมูฮา นู อาดา เดะ โซะ ลาแงะ เตอ นู บือฌาดี ดือนียา ฌางัน บือนา ซือมูฮา นู อาดา เดะ โซะ ดือนียา เตอ นู บือฌาดี ลาโวจ ฌางัน บือนา ซือมูฮา นู อาดา เดะ โซะ ลาโวจ เลอ. ฮูลู-บาลัก อีตู ญา มือเลา บือฌาญี จะ "นะ ฮอย เตด ลามัจ ลาฆี เลอ. 7 ตาปี ตานา ฮูลู-บาลัก นู ตูโฌฮ นะ ตีโยะ ซือลูนัย เตอ ลาฆู ดาลับ ซูโงฮ นะ ตูฮัด นะ ซุจ รือมัก ฮาบิฮ เลอ บือกะ ตูฮัด บือเลฮ มือญาเระ ดัฮ กะ ลูมอฮ ซือมียา ตูโดฮ นู ฌาดี ปราโซฮ นะ ญา." ญา จะ. 8 ซูวารา นู กู บือเลฮ ดืองัยํ ดาตัก มาแรฮ เดะ โซะ ลาแงะ เตอ มือเลา กะ กู ปูลัก จะ "ซูรัจ มิดือมิ อีตู นู อาดา บูกา ดัฮ เดะ ตางัน นะ ฮูลู-บาลัก นู บือดีรี เดะ โซะ ลาโวจ ฌางัน โซะ ฮูตัด เตอ เกา กือนา ปี ซาโมจ เลอ." ญา จะ. 9 กะฆีเตอ กู ปี มียา ฮูลู-บาลัก อีตู มีตา ซูรัจ ฆูโลก มิดือมิ เดะ ญา. ญา ตีกัฮ กะ กู จะ "อาเมด ปี มากัด บูวัก เลอ. ญา นะ บูวัจ บรี โปรจ นะ เกา ปาเฮะ ตาปี เดะ มูโลจ นะ เกา ญา มาเนฮ ซือรูปา กะ มีซัด มาทู." 10 กะฆีเตอ กู ซาโมจ อาเมด ซูรัจ มิดือมิ เดะ ตางัน นะ ฮูลู-บาลัก อีตู มากัด ดัฮ. กาลา ญา อาดา เดะ มูโลจ นะ กู เตอ ญา โปด มาเนฮ ซือรูปา บือกะ มีซัด มาทู. ตาปี ตานา กู ตือลัด ดัฮ ญา บูวัจ บรี โปรจ นะ กู ปาเฮะ เลอ. 11 กะฆีเตอ ฮูลู-บาลัก อีตู ญา มือเลา ปือซัด กะ กู จะ "เกา ฆาโดฮ มือเลา ตูโดฮ ปูลัก ปาซัน ลาฆู นะ โกะ ซือมียา บาญะ บักซา บาญะ นังฆรี บาญะ บาซา ฌางัน โกะ ราฌา บาญะ อูรัก ฌูฆา เลอ." ญา จะ.
1 กะฆีเตอ อาดา ซาปา อาเมด กายู รีโยก ซือกูตก บรี กะ กู ซือรูปา ตูกัจ นู ฌาดี กายู ปืออูโกยํ. กะฆีเตอ ตูฮัด ญา ปือซัด กะ กู จะ "กือนา บีกัซ ปี อูโกยํ บาลัย นะ ตูฮัด ฌางัน ตือปัจ ตูนู บารัก มือนืองะ กะ ตูฮัด. กีรา ลีฮัจ ซามา โกะ ซือมียา นู ปี มือญือมัฮ เดะ ดาลับ อีตู. 2 ตาปี ลามัน โซะ ลูวัยํ เตอ กือนา บือบียัยํ ฌางัน นะ อูโกยํ เลอ. ซาเบะ-จะ ตือปัจ อีตู บือเลฮ อาเกะ บรี กะ ลูมอฮ บักซา อาซิก ดัฮ. กูญา นะ ฮูโกบ บูวัจ ตะอารัฮ กะ นังฆรี นู จรัฮ บาฌิ อีตู ตือดะ ปัจ-ปูโลฮ ดูวา บูลัด. 3 กู นะ ซูโรฮ โกะ ซะซี ดูวา อูรัก นะ กู บรี กูญา ปี มือเลา ตูโดฮ ลาฆู นะ กู. กูญา นะ บือปากัย กาเยด ฆูนี นู กาซัยํ นะ มือเลา ตูโดฮ ตือดะ 1,260 อารี. " 4 ซะซี กือดูวา อีตู เตอ ฌาดี ปูโฮด กือดูโนด ดูวา ปูโฮด ฌางัน ตือปัจ ตืองะ ปลีตา ดูวา บาตัก. กูญา อาดา บือดีรี โซะ ฮึลด มูคา นะ ตูฮัด ญา นู บือบือลา ดือนียา ราตา. 5 ดัฮ ซือมียา ดีฮา บรีงัจ นะ บูวัจ บรี โกะ ซะซี กือดูวา อูรัก อีตู นะ ซาเกะ เตอ อาปี นะ ซือบุยํ ตรือเบะ เดะ มูโลจ นะ กูญา ดูวา อูรัก บูวัจ บรี ซือตรู ฮางอซ ฮาบิฮ เตอ. ดัฮ ซือมียา ดีฮา บรีงัจ นะ บูวัจ บรี ซะซี กือดูวา อูรัก อีตู นะ ซาเกะ เตอ ซือมียา อีตู ญา ฆาโดฮ กือนา บูนอฮ มาตี กะฆีเตอ เลอ. 6 โกะ ซะซี ดูวา อูรัก อีตู กูญา อาดา มือฆัฮ นู นะ กาปุซ ลาแงะ บือเลฮ ตีเมา บรี อาดา ฮูฌัด ตูโรด เดะ วะตู นู กูญา ตืองัฮ มือเลา ตูโดฮ ลาฆู นะ ตูฮัด. กูญา อาดา มือฆัฮ นู นะ บรี โกะ อาเย ฌาดี ดารัฮ เตอ นะ บูวัจ ลาฆู ฌาฮานัม แนฮ-ฌือแนฮ กะ ดือนียา บราปา กาลี โปด บือเลฮ ตูโรจ กะ ฮาตี นะ กูญา. 7 ตานา กูญา มือเลา ฌาดี ซะซี บรี ซุจ ฮาบิฮ ดัฮ อาดา บือนาตัก ฌาฮัจ โตระ นะ ญาแญะ มาแรฮ ดาตัก เดะ ลาเฮา นังฆรี ฮาตู นะ บลาวัด ฌางัน กูญา นะ ฌือนัฮ เดะ กูญา นะ บูนอฮ กูญา บูวัก. 8 บาดัด นะ กูญา นะ อาดา แลก-ฆูแลก เดะ ฌาลัด ลือฆา ปัจ นังฆรี บือซัยํ อีตู เตอ ตือปัจ นู ตูฮัด นะ กูญา กือนา กาจิก เดะ กายู ปลีตัก ดัฮ. ปือนามา นังฆรี อีตู กือนา อาเกะ มือเลา ปือซือรูปา จะ นังฆรี โซโดม เฆอ-จะ นังฆรี อียิบ. 9 โกะ ซือมียา นะ มาแรฮ ดาตัก เดะ บาญะ บักซา บาญะ บือแนฮ บาญะ บาซา บาญะ นังฆรี นะ ฌือเงาะ ลีฮัจ บาดัด นะ กูญา ตือดะ รอจ กะ ตีฆา อารี ลือเบฮ ตีเมา บรี อาเมด บาดัด อีตู ปี ตานัม. 10 โกะ ซือมียา นู ดูโดะ โซะ ดือนียา นะ ซูกา-ฮาตี นู กูญา กือดูวา มาตี ดัฮ กูญา นะ ปาคัจ บรามัย นะ บรี โกะ บารัก บือซามา-ซามา ซาเบะ โกะ ซือมียา ตูโดฮ ดูวา อูรัก อีตู บือเลฮ บูวัจ บรี โกะ ซือมียา โซะ ดือนียา ซูซัฮ โตระ. 11 ตานา ลือปัซ ตีฆา อารี ลือเบฮ ดัฮ อาดา อาเงน นู บรี ฮีโดะ เตอ ดาตัก มาแรฮ เดะ ตูฮัด เดะ อาตัซ มาโซะ กะ ดาลับ บาดัด นะ กูญา ปูลัก. กะฆีเตอ กูญา โปด บีกัซ บือดีรี. โกะ ซือมียา นู ลีฮัจ กูญา เตอ กูญา ซือมูฮา ตาโกจ บาญะ ซูโงฮ. 12 กะฆีเตอ กูญา กือดูวา ดืองัยํ ซูวารา บูงี ดาตัก มาแรฮ เดะ โซะ ลาแงะ เตอ มือเลา กะ กูญา จะ "กือนา ญาแญะ มาแรฮ กะ อีนี เลอ." โกะ ลูมอฮ ซือตรู โปด ลีฮัจ กูญา ญาแญะ กะ ดาลับ กือมูวัง ปี กะ อาตัซ ลาแงะ. 13 ดัดดัด อีตู ดือนียา ญา บรีเงาะ. นังฆรี อีตู โปด รูโตฮ ซา บือลัฮ เดะ ดาลับ ซือปูโลฮ. อาดา ซือมียา มาตี กรานา ดือนียา บรีเงาะ ตูโฌฮ รีบู อูรัก. โกะ ซือมียา ซือมูฮา นู อาดา ลือเบฮ เตอ กูญา ตาโกจ บาญะ ซูโงฮ. กูญา มือโอจ กะ ตูฮัด นู เดะ อาตัซ ลาแงะ. 14 ลาฆู จือลากา นู ดูวา ลือปัซ ปี ดัฮ. ลีฮัจ เลอ ลาฆู จือลากา นู ตีฆา โปด เตด บราปา ลามา ญา นะ บือฌาดี มาแรฮ ฌูฆา. 15 ลือปัซ อีตู ฮูลู-บาลัก นู ตูโฌฮ ญา ตีโยะ ซือลูนัย. กะฆีเตอ อาดา บาญะ ซูวารา บือซูระ บูริ เดะ โซะ ลาแงะ จะ "ลาฆู มือฆัฮ นู นะ ฌาดี ราฌา เดะ ดือนียา อีนี ปาเระ ฌาดี ปือมือฆัฮ นะ ตูฮัด นะ กีตา ดัฮ ฌาดี ปือมือฆัฮ นะ ราฌา นู บรี ซือลามัจ นู ตูฮัด บือฌาญี ดัฮ เตอ. ญา นะ บือบือลา ฌาดี ราฌา ซือลาลู ปี ซือมาญัก-รอจ เลอ." 16 กะฆีเตอ โกะ ฮูลู-บาลัก นู ซัยํ-บือซัยํ ดูวา-ปูโลฮ ปัจ อูรัก อีตู นู อาดา ดูโดะ เดะ ปาปัด กรือซี นะ กูญา โซะ ฮึลด มูคา นะ ตูฮัด เดะ อาตัซ เตอ กูญา ตือมะ มูคา กะ ตานัฮ มือญือมัฮ กะ ตูฮัด 17 มือเลา จะ "เออ ตูฮัด บือซัยํ เดะ อาตัซ นู มือฆัฮ ลือเบฮ เดะ มานามา เกา นู อาดา เดะ วะตู อีนี นู อาดา เดะ กาลา ดูลู เตอ กามี บรี ซือลามัจ กะ เกา นู เกา บือเลฮ ซูโรฮ ปือมือฆัฮ นู บือซัยํ ซูโงฮ นะ เกา นู เกา ฮึนตะ นะ บือบือลา ดือนียา ฌาดี ราฌา ดัฮ. 18 โซะ โกะ ลูมอฮ บักซา อาซิก เตอ อาดา ฮาตี มูซัยํ บืออีเซด ตาปี วะตู นู ตูฮัด นะ มูซัยํ กรัจ ฮูโกบ 3 มาแรฮ รอจ ดัฮ รอจ วะตู นู ตูฮัด นะ กรัจ ฮูโกบ 3 โกะ ซือมียา นู มาตี ปี ดัฮ. รอจ วะตู นู นะ บรี บาฮาเฆด กะ โกะ ปราโซฮ นะ ตูฮัด ฌาดี ลูมอฮ ซือมียา ตูโดฮ ฌางัน โกะ ซือมียา นะ ตูฮัด ซือมูฮา จะ ราตา ซือมียา นู ตูเฮะ 3 กะ นามา นะ ตูฮัด ฌางัน ซือมียา ซัยํ-บือซัยํ 3 ฌางัน ซือมียา มิดือมิ โปด. รอจ วะตู ดัฮ นู ตูฮัด นะ บูวัจ บรี โกะ ซือมียา อีตู ฌาฮานัม จะ โกะ ซือมียา นู บูวัจ 3 บรี ดือนียา ฌาฮานัม เลอ." 19 กะฆีเตอ บาลัย นะ ตูฮัด เดะ โซะ ลาแงะ โปด กือนา บูกา ดัฮ. เดะ บาลัย อีตู เตอ ลีฮัจ อาดา ปือตี นะ ตูฮัด จะ ปือตี ปือนานา นะ ปือมือเลา บือปาคัจ บือตือตู นะ ตูฮัด. กะฆีเตอ อาดา กีลัจ ฌางัน ฆูโตยํ ซูวารา แนฮ-ฌือแนฮ. ดือนียา โปด ญา บรีเงาะ อาดา ฮูฌัด บาตู ฆูโฆยํ บาญะ ฌูฆา เลอ.
1 กะฆีเตอ อาดา ปือนานา ซีดี นู มือฆัฮ บือฆารี เดะ โซะ ลาแงะ ฌาดี นีบีนี ซืออูรัก ญา อาดา มาตาอารี บือเละ ญาวา บือกะ ฌาดี กาเยด นะ ญา อาดา บูลัด ดูโดะ เดะ บาวัฮ ตาปะ กากี. เดะ อาตัซ ปาลา เตอ อาดา บีตัก ดูวา-บือลัซ บีฌี ฌาดี จูบุก. 2 นีบีนี อีตู เตอ ญา โปรจ บือซัยํ. ญา มือนาแงฮ กรานา ญา ซาเกะ โปรจ โตระ ดาปิก นะ ดูโดะ เดะ อาปี ดัฮ. 3 อาดา ปือนานา ซีดี นู ซา ปูลัก นู บือฆารี เดะ โซะ ลาแงะ. ลีฮัจ เลอ อาดา นาฆา บือซัยํ ซืออีโกยํ นู มีรัฮ บือกะ อาปี อาดา ตูโฌฮ ปาลา ฌางัน ซือปูโลฮ ตาโนะ. เดะ ปาลา นะ ญา เตอ อาดา จูบุก ตูโฌฮ จูบุก. 4 อีโกยํ นาฆา เตอ ญา กีปัซ บีตัก เดะ โซะ ลาแงะ ฆูโฆยํ มาแรฮ กะ ดือนียา ดัฮ ซือบือลัฮ เดะ ดาลับ ตีฆา บือลัฮ. นาฆา อีตู เตอ ญา บือดีรี โซะ ฮึลด มูคา นะ นีบีนี อีตู ซีงี นู ตืองัฮ นะ ดูโดะ เดะ อาปี เตอ บีดา นะ มากัด นานะ นะ ญา ตานา บือโปรจ ตรือเบะ มาแรฮ. 5 นีบีนี อีตู ญา รูโตฮ เดะ อาปี ดัฮ ฌาดี นานะ กีลากี ญา นู นะ บือบือลา นังฆรี ซือมูฮา ฌางัน ตูกัจ นู มือฆัฮ. ตาปี นานะ อีตู กือนา ราปัซ บาวา บือปี ญาแญะ อาตัจ บรี กะ ตูฮัด เดะ โซะ ปาปัด กรือซี ตือปัจ ดูโดะ นะ ญา เตอ. 6 นีบีนี อีตู โปด ญา ลารี ปี กะ ปาดัก ตานัฮ ตูโฮยํ นู ลือฆา ฌาดี ตือปัจ ดูโดะ นู ตูฮัด บือเลฮ ซียะ ตาโรฮ บรี กะ ญา บีดา กูญา นะ บือบือลา ญา เดะ ตือปัจ อีตู ตือดะ รอจ กะ 1260 อารี. 7 เดะ วะตู อีตู อาดา ลาฆู บือปรัก เดะ โซะ อาตัซ ลาแงะ. อาดา ฮูลู-บาลัก บือซัยํ มีคาเอน ฌางัน กาวัด ฮูลู-บาลัก นะ ญา บือเลฮ บลาวัด บือปรัก ฌางัน นาฆา เตอ. นาฆา ฌางัน กาวัด ฮูลู-บาลัก นะ ญา โปด บือเลฮ บลาวัด บือปรัก ฌางัน มีคาเอน. 8 ตาปี โซะ นาฆา ญา อาลัฮ. กะฆีเตอ ญา ฌางัน ฮูลู-บาลัก นะ ญา กูญา ฮอย ตือปัจ ดูโดะ เดะ โซะ อาตัซ ลาแงะ ลาลู เลอ. 9 นาฆา บือซัยํ อีตู นู ฌาดี อูลัยํ กาลา นูตู นู กือนา บลาโลก จะ กือปาลา ฌิด เฆอ-จะ กือปาลา ฮาตู ซีตัด ญา นู ตีปู โกะ ซือมียา ซือมูฮา เดะ ดือนียา เตอ ญา กือนา บูวัก เดะ ลาแงะ บรี ฆูโฆยํ ปี ดัฮ. นาฆา ฌางัน กาวัด ฮูลู-บาลัก นะ ญา ซามา กือนา ตูละ ฆูโฆยํ มาแรฮ กะ ดือนียา. 10 กะฆีเตอ กู ดืองัยํ บูงี ซูวารา บือซัยํ เดะ โซะ ลาแงะ บือซูระ จะ "ฮาดัจ อีนี เตอ ตูฮัด นะ ตูโลก โกะ ซือมียา นะ ญา บรี ฮีโดะ ลือปัซ บาฌิ. ฮาดัจ อีนี ตูฮัด นะ กีตา ญา ปลีฮัจ จะ นู ญา มือฆัฮ ซูโงฮ ฌาดี ราฌา เลอ. ฮาดัจ อีนี โปด ราฌา นู บรี ซือลามัจ นู ตูฮัด บือฌาญี ดัฮ ญา มาแรฮ ปลีฮัจ ฌาดี มือฆัฮ ดัฮ. กรานา-จะ ซือมียา อีตู นู มืออาดู ลูมอฮ นะบรานะ นะ กีตา โซะ ฮึลด มูคา นะ ตูฮัด ซียัก มาลับ เตอ ญา เลอ กือนา ตูละ บรี ฆูโฆยํ ปี บูวัก ดัฮ. 11 โกะ ซือมียา อีตู เลอ บือเลฮ ฌือนัฮ เดะ กือปาลา ฮาตู ซีตัด ดัฮ กรานา อานะ กาเมก อีตู กือนา บูนอฮ มือญือมัฮ ดารัฮ มือนีเลฮ ดัฮ กรานา ปือมือเลา ฌาดี ซะซี นู ลูมอฮ กูญา บือเลฮ มือญาเระ ฌูฆา ซาเบะ กูญา เตด มือญือซัน นู นะ ซรัฮ ญาวา นะ กูญา รอจ กะ มาตี. 12 กรานา กะฆีเตอ ลาแงะ ฌางัน ลูมอฮ กาเญา นู ดูโดะ โซะ ลาแงะ เออ กือนา บรามัย ซูกา-ฮาตี เลอ. ตาปี โซะ ดือนียา ฌางัน ลาโวจ นะ กือนา ลาฆู จือลากา เลอ ซาเบะ กือปาลา ฮาตู ซีตัด ญา บือเลฮ ตูโรด มาแรฮ มียา กาเญา. ญา มูซัยํ โตระ กรานา ญา ตาฮู จะ วะตู นะ ญา อาดา กิดีกิ ดัฮ เลอ." 13 ตานา นาฆา อีตู ลีฮัจ จะ ญา กือนา ตูละ ปี ฆูโฆยํ กะ ดือนียา ดัฮ ญา โปด ปี อูเซ นีบีนี อีตู นู ซูดัฮ ดูโดะ เดะ อาปี นานะ กีลากี เตอ. 14 ตาปี ตูฮัด บือเลฮ บรี ซายะ บูโรก ราฌาวาลี บือซัยํ ดูวา ซายะ กะ นีบีนี อีตู บีดา นะ บรี ญา ตรือบัก ลารี ปี กะ ปาดัก ตานัฮ ตูโฮยํ นู ลือฆา ปี รอจ ตือปัจ นู กูญา นะ ฌาฆา บือบือลา ญา บรี ลือปัซ เดะ นาฆา ตือดะ รอจ ตีฆา ตาโฮด ลือเบฮ. 15 นาฆา อีตู ญา ซือบุยํ อาเย ตรือเบะ เดะ มูโลจ นะ ญา ซือรูปา บือกะ ซูงัย นู มือนีเลฮ อูเซ ตูโรจ นีบีนี อีตู บีดา นะ บรี อาเย กาเตาะ บาวา นีบีนี อีตู ปี. 16 ตาปี ตานัฮ บือเลฮ ตูโลก นีบีนี อีตู ดัฮ. ญา ปือจัฮ ฌาดี จือลัฮ บือกะ ญา บูกา มูโลจ อีซะ ตือลัด อาเย อีตู นู นาฆา ซือบุยํ ตรือเบะ เดะ มูโลจ เตอ บรี ฮาบิฮ ดัฮ. 17 โซะ นาฆา ญา มูซัยํ กะ นีบีนี อีตู. ญา ตรือเบะ ปี บือปรัก ฌางัน บือแนฮ นะ นีบีนี อีตู นู ลือเบฮ เตอ ฌาดี ซือมียา นู บูวัจ ตูโรจ กะ ปือมือซัด นะ ตูฮัด เดะ อาตัซ ซือมียา นู รือมัก ฌางัน ปือมือเลา ซะซี นู เยซู บือเลฮ บรี ตาฮู. 18 ญา โปด อาดา บือดีรี เดะ โซะ ปาตัย บีดิก ลาโวจ.
1 กะฆีเตอ กู มีปี ลีฮัจ ปูลัก อาดา บือนาตัก ฌาฮัจ โตระ ซืออีโกยํ ญาแญะ ดาตัก มาแรฮ เดะ โซะ ลาโวจ. ญา อาดา ตูโฌฮ ปาลา ซือปูโลฮ ตาโนะ. เดะ ตาโนะ นู ซือปูโลฮ เตอ อาดา จูบุก ซือปูโลฮ จูบุก. เดะ ปาลา ตูโฌฮ ปาลา เตอ อาดา ปือนามา นู ฌาดี ลาฆู มือเลา ตะอารัฮ กะ ตูฮัด ฆาแรฮ ตาโรฮ ดัฮ. 2 บือนาตัก นู กู ลีฮัจ เตอ ญาวา นะ ญา ซือรูปา บรูตัด บือตือเบาะ กากี นะ ญา ซือรูปา กากี บรูวัก มูโลจ นะ ญา ซือรูปา กะ มูโลจ ซีงา. นาฆา อีตู ญา บรี ลาฆู มือฆัฮ นู นะ บือบือลา ฌาดี ราฌา ลาฆู นู นะ ฌาดี บือซัยํ ซูโงฮ นะ ญา ซือมูฮา เตอ ญา อาเกะ บรี กะ บือนาตัก ฌาฮัจ อีตู. 3 ปาลา นู ซา นะ ญา ลีฮัจ ซือรูปา กือนา บาโฮะ ยู นะ มาตี ตาปี ลียัก นู กือนา บาโฮะ เตอ ซือโมฮ บาฌิ ดัฮ. โกะ ซือมียา ราตา ดือนียา กูญา ปือและ-ฮาตี ซูโงฮ ตูโรจ กะ บือนาตัก นู ฌาฮัจ อีตู. 4 ราตา ซือมียา มือญือมัฮ กะ นาฆา กรานา นาฆา บือเลฮ บรี ลาฆู มือฆัฮ กะ บือนาตัก อีตู. กูญา มือญือมัฮ กะ บือนาตัก ฌาฮัจ เตอ มือเลา จะ "ซาปา นะ ซือรูปา บือกะ บือนาตัก อีนี เลอ? ซือมียา ดีฮา นู ฆามะ นะ บลาวัด ฌางัน ญา บือเลฮ?" 5 ตูฮัด ญา ยอม บรี กะ บือนาตัก ฌาฮัจ อีตู นะ มือเลา บือซัยํ มือเลา ตะอารัฮ กะ ญา บรี กะ ญา อาดา ลาฆู มือฆัฮ ตือดะ ปัจ-ปูโลฮ ดูวา บูลัด. 6 กะฆีเตอ ญา ฮึนตะ นะ มือเลา ตะอารัฮ กะ ตูฮัด ตรือเบะ ปือมือเลา ตะอารัฮ กะ นามา นะ ตูฮัด ฌางัน ตือปัจ ดูโดะ นะ ตูฮัด ฌางัน โกะ ซือมียา นู ดูโดะ โซะ ลาแงะ เตอ. 7 ตูฮัด ยอม บรี กะ ญา บือเลฮ บือปรัก ฌางัน โกะ ซือมียา นะ ตูฮัด นะ ฌือนัฮ เดะ กูญา เตอ. ตูฮัด บรี กะ ญา อาดา มือฆัฮ นะ ฮูโกบ โกะ ซือมียา ราตา บักซา ราตา บือแนฮ ราตา บาซา ราตา นังฆรี. 8 โกะ ซือมียา ซือมูฮา นู ดูโดะ โซะ ดือนียา เตอ กูญา นะ มือญือมัฮ กะ บือนาตัก นู ฌาฮัจ อีตู ลือเบฮ เดะ โกะ ซือมียา นู อาดา ปือนามา ฆาแรฮ ดัฮ เดะ ซูรัจ ปือนามา ลูมอฮ ซือมียา ฮีโดะ ฆาแรฮ ตาโรฮ ดัฮ ตะเดะ ลามูลา นู ตูฮัด บือฌาดี ดือนียา. ซูรัจ อีตู ฌาดี ซูรัจ นะ อานะ กาเมก ญา นู กือนา บูนอฮ ดัฮ. 9 "ซาปา อาดา ตือลีงา บรี ญา มือนีงัย เลอ. 10 ซือมียา ดีฮา นู ฆาโดฮ กือนา รีฆะ ฌาดี ปราโซฮ เตอ ซือมียา อีตู ญา นะ ปี ฌาดี ปราโซฮ ซูโงฮ เลอ. ซือมียา ดีฮา นู ฆาโดฮ กือนา บูนอฮ ฌางัน ปือดัก เตอ ซือมียา อีตู โปด นะ กือนา บูนอฮ ฌางัน ปือดัก ฌูฆา เลอ. " กรานา กะฆีเตอ เลอ โกะ ซือมียา นะ ตูฮัด ฆาโดฮ นะ ตาฮัด ซูซัฮ บือเลฮ อาดา ฮาตี นู ปือจายา เลอ. 11 กะฆีเตอ กู มีปี ลีฮัจ บือนาตัก นู ฌาฮัจ โตระ นู ซา อีโกยํ ปูลัก ญา ญาแญะ มาแรฮ ดาตัก เดะ ดือนียา. บือนาตัก ฌาฮัจ อีตู เตอ ญา อาดา ดูวา ตาโนะ ซือรูปา กะ อานะ กาเมก ญา มือเลา ซือรูปา กะ นาฆา. 12 ญา ซูโรฮ ลาฆู มือฆัฮ นะ บือนาตัก ฌาฮัจ นู ดูลู ฆือนะ ซือมูฮา ดัฮ โซะ ฮึลด มูคา นะ บือนาตัก นู ดูลู อีตู. ญา บูวัจ บรี ราตา ดือนียา ฌางัน โกะ ซือมียา นู ดูโดะ เดะ ดือนียา มือญือมัฮ กะ บือนาตัก ฌาฮัจ นู ลามูลา เตอ นู อาดา ลียัก บาโฮะ นู ซรือปะ นะ มาตี ตาปี ซือโมฮ บาฌิ ดัฮ. 13 บือนาตัก มาโซะ กะ นู ดูวา อีนี ญา ปลีฮัจ ปือนานา ซีดี นู มือฆัฮ ตือดะ บูวัจ บรี อาปี ฆูโฆยํ ดาตัก เดะ ลาแงะ มาแรฮ กะ ดือนียา บือฆารี ซัฮ เดะ มาตา นะ โกะ อูมัจ-ซือมียา เลอ. 14 ญา ตีปู โกะ ซือมียา ซือมูฮา นู อาดา ดูโดะ เดะ ดือนียา ฌางัน โกะ ปือนานา นู ซีดี อีตู นู ตูฮัด ยอม บรี กะ ญา บูวัจ โซะ ฮึลด มูคา นะ บือนาตัก ฌาฮัจ นู ลามูลา เตอ. ญา ปือซัด โกะ ซือมียา เดะ ดือนียา บรี กูญา บูวัจ ฆามัยํ นะ บือนาตัก ฌาฮัจ นู กือนา บาโฮะ ฌางัน ปือดัก ตาปี เตด มาตี. 15 ตูฮัด ยอม บรี กะ ญา นะ บูวัจ บรี ฆามัยํ บือนาตัก อีตู นะ บือเลฮ บือญาวา บีดา ฆามัยํ บือนาตัก นะ มือเลา นะ ปือซัด บรี โกะ ซือมียา นู ตีเมา มือญือมัฮ กะ ฆามัยํ อีตู นะ กือนา บูนอฮ ดัฮ. 16 บือนาตัก นู ดูวา เตอ ญา ปรือกัด โกะ ซือมียา ซือมูฮา ฌางัน ซือมียา บือซัยํ ฌางัน ซือมียา ดือมิ ซือมียา กายา ฌางัน ซือมียา ฮาฌะ ซือมียา ฌาดี ปราโซฮ ฌางัน ซือมียา เตด ฌาดี ปราโซฮ บรี กูญา ซือมูฮา ซาโมจ ปือนานา ตานา ตาโรฮ เดะ ตางัน โซะ กานัน เฆอ-จะ เดะ กือนิง นะ กูญา 17 บีดา ตีเมา บรี ซือมียา ดีฮา นะ บือบือลี-บือลี บือฌูวัน-ฌูวัน บือเลฮ ลือเบฮ เดะ ซือมียา อีตู อาดา ปือนานา ตาเอาะ เตอ นู ฌาดี ปือนามา บือนาตัก ฌาฮัจ นู ดูลู อีตู เฆอ-จะ นูโมยํ ปือนามา นะ ญา. 18 เดะ ลาฆู อีนี กือนา ซูโรฮ อากัน บรี บาฌิ. ดัฮ ซือมียา ดีฮา ปานัย อากัน เตอ บรี ญา บรีงัจ บือฮีมัจ นูโมยํ นะ บือนาตัก ฌาฮัจ อีตู ซาเบะ-จะ ฌาดี นูโมยํ นะ ซือมียา ซืออูรัก. นูโมยํ นะ ญา ฌาดี 666 เลอ.
1 กะฆีเตอ กู มีปี ลีฮัจ ปูลัก นี เลอ อาดา อานะ กาเมก อีตู ญา บือดีรี เดะ บูเกะ ซีโอน บือซามา ฌางัน โกะ ซือมียา 144,000 อูรัก อีตู นู อาดา ปือนามา นะ อานะ กาเมก ฌางัน ปือนามา นะ อาโปก เดะ ญา ฆาแรฮ ดัฮ เดะ กือนิง นะ กูญา. 2 กู บือเลฮ ดืองัยํ ซูวารา บูงี ดาตัก มาแรฮ เดะ ลาแงะ บือกะ ซูวารา อาเย ฆูโฆยํ ตะเดะ อาตัซ บูเกะ บูงี ซือรูปา บือกะ ฆูโตยํ. ซูวารา นู กู ดืองัยํ เตอ ซือรูปา โกะ ลูมอฮ ซือมียา ตืองัฮ กาเตฮ กลาติก บือซัยํ เตอ. 3 โกะ ซือมียา 144,000 อูรัก อีตู เตอ กูญา อาดา โซะ ฮึลด ปาปัด กรือซี ตือปัจ ดูโดะ นะ ราฌา โซะ ฮึลด มูคา นะ บือนาตัก ปัจ อีโกยํ เตอ โซะ ฮึลด มูคา โกะ ฮูลู-บาลัก นู ซัยํ-บือซัยํ ฌูฆา. กูญา มือญาญี ลาฆู บารู นู ฮอย ซือมียา อาซิก นะ บลาฌัยํ มือญาญี ลาฆู อีตู บือเลฮ ซา กูญา เลอ นู ตูฮัด บือเลฮ ตือบุซ ดัฮ ดาตัก เดะ อูมัจ-ซือมียา ราตา ดือนียา. 4 ซือมียา กะฆีนี ฌาดี กีลากี นู บือเลฮ ฌาฆา ญาวา บรี จรัฮ บาฌิ นู เตด ดือละ บือซามา ฌางัน นีบีนี เตอ. อานะ กาเมก ญา ปี กะ ดีฮา โกะ ซือมียา อีนี ตูโรจ ปี ฌูฆา. กูญา ฌาดี ซือมียา นู กือนา ตือบุซ ดัฮ เดะ ตืองัฮ ลูมอฮ อูมัจ-ซือมียา ฌาดี ซือมียา ลามูลา นู กือนา อาเกะ มือญือมัฮ บรี กะ ตูฮัด บรี กะ อานะ กาเมก ฌูฆา. 5 กูญา เตด ดือละ มือเลา มืออูปัย ลาลู ฌาดี ซือมียา นู ฮอย ตือปัจ ตะอารัฮ เลอ. 6 กะฆีเตอ กู มีปี ลีฮัจ ฮูลู-บาลัก นู ซืออูรัก ตรือบัก ตีงี เดะ โซะ ลาแงะ. ญา อาดา บรีตา นู บาฌิ นู อาดา ซือลาลู นะ มือญาเระ บรี กะ โกะ ซือมียา โซะ ดือนียา ซือมูฮา ราตา บักซา ราตา บือแนฮ ราตา บาซา ราตา นังฆรี. 7 ญา บือซูระ ซูวารา บือซัยํ จะ "กือนา ตาโกจ เดะ ตูฮัด บือซัยํ เดะ อาตัซ เลอ. กือนา ปูฌี มือโอจ กะ ญา กรานา รอจ วะตู ดัฮ นู ตูฮัด นะ กรัจ ฮูโกบ เตอ. กือนา มือญือมัฮ กะ ตูฮัด ญา นู บือฌาดี ลาแงะ นู บือฌาดี ดือนียา ฌางัน ลาโวจ ฌางัน โกะ มาตา อาเย ตาวัยํ ซือมูฮา." 8 กะฆีเตอ อาดา ฮูลู-บาลัก นู ซา ปูลัก ฌาดี นู ดูวา เตอ ญา ตูโรจ มาแรฮ ฌูฆา มือญาเระ จะ "รูโตฮ รูโตฮ เลอ นังฆรี บาบิโลน นู บือซัยํ ญา รูโตฮ ฮาบิฮ ดัฮ. กรานา-จะ ญา บือเลฮ บูวัจ บรี โกะ ซือมียา ราตา นังฆรี โอะ อาระ อางุน นะ ญา จะ มาโซะ บือซามา เดะ ลาฆู ฆาละ นะ บือกาเซฮ." 9 ฮูลู-บาลัก นู ซา ปูลัก ฌาดี นู ตีฆา เตอ ญา ตูโรจ มาแรฮ กะ นู ดูวา อีตู มือเลา ฌางัน ซูวารา บือซัยํ จะ "ซือมียา ดีฮา นู มือญือมัฮ กะ บือนาตัก ฌาฮัจ โตระ ฌางัน ฆามัยํ นะ ญา นู อาดา ปือนานา เดะ กือนิง เฆอ-จะ เดะ ตางัน เตอ 10 ซือมียา อีตู เลอ นะ กือนา ตูฮัด กรัจ ฮูโกบ ดัฮ ซือรูปา บือกะ กูญา ฆาโดฮ โอะ อาระ อางุน นู เตด บือเลฮ จาโปยํ ฌางัน อาเย นามา นู ตูฮัด อูแร เดะ เจาะ. ลาฆู อีตู ตูโญะ กะ ลาฆู มูซัยํ โตระ นะ ตูฮัด บือซัยํ เดะ อาตัซ. กูญา ฆาโดฮ นะ กือนา ซูซัฮ โตระ เดะ อาปี บลีรัก โซะ ฮึลด มูคา นะ โกะ ฮูลู-บาลัก นู จรัฮ บาฌิ โซะ ฮึลด มูคา นะ อานะ กาเมก ฌูฆา. 11 กะฆีเตอ อาซะ เดะ ลาฆู ซูซัฮ นะ กูญา นะ ซือบุยํ ญาแญะ ซือลาลู เลอ. โกะ ซือมียา ซือมูฮา นู มือญือมัฮ กะ บือนาตัก ฌาฮัจ ฌางัน ฆามัยํ นะ ญา นู ซาโมจ ปือนานา เดะ นามา นะ ญา เตอ กูญา นะ ฮอย ลาฆู บราดู รือมัย ลาลู ซียัก มาลับ กูญา ฆาโดฮ ซูซัฮ เลอ." 12 ซาเบะ ลาฆู กะฆีเตอ โกะ ซือมียา นะ ตูฮัด นู บูวัจ ตูโรจ กะ ปือมือซัด นะ ญา นู ปือจายา กือฌะ-กือมัซ กะ เยซู เตอ กูญา ฆาโดฮ นะ ตาฮัด ลามา บือเลฮ เลอ. 13 กะฆีเตอ กู ดืองัยํ ซูวารา โซะ ลาแงะ ปือซัด จะ "กือนา ฆาแรฮ เลอ จะ ตะเดะ อีนี ปี โกะ ซือมียา ซือมูฮา นู นะ มาตี กรานา ลาฆู นะ ตูฮัด กูญา นะ ซือนัง ซือลามัจ เลอ." โซะ ซือมืองัจ นะ ตูฮัด มือเลา จะ "ซูโงฮ เลอ กูญา นะ บือเลฮ บราดู เดะ ลาฆู บือกรือฌา โตระ นะ กูญา กรานา ลาฆู ปือบูวัจ นะ กูญา เตอ นะ ตูโรจ กูญา ปี ฌูฆา." 14 กะฆีเตอ กู มีปี ลีฮัจ ปูลัก นี เลอ อาดา กือมูวัง ปูเตฮ อาดา นู ลีฮัจ ซือรูปา กะ อูมัจ-ซือมียา ซืออูรัก ดูโดะ เดะ กือมูวัง เตอ เดะ ปาลา อาดา จูบุก มัซ. ตางัน นะ ญา อาดา รีโจก กือตับ ปาดี นู ตาฌับ. 15 อาดา ฮูลู-บาลัก ซืออูรัก ลาฆี ตรือเบะ เดะ บาลัย นะ ตูฮัด บือซูระ ซูวารา บือซัยํ กะ ญา นู ดูโดะ เดะ อาตัซ กือมูวัง จะ "กือนา ซูโรฮ รีโจก กือตับ ปาดี นะ เกา กือตับ ปี เลอ ซาเบะ รอจ วะตู กือตับ ดัฮ. กรานา ซือบารัก นู นะ ฆาโดฮ กือตับ ปูงอจ เดะ ดือนียา เตอ มาซะ ดัฮ." 16 กะฆีเตอ ซือมียา อีตู นู ดูโดะ เดะ อาตัซ กือมูวัง เตอ ญา รีวัก รีโจก กือตับ ปาดี นะ ญา เดะ อาตัซ ดือนียา. กะฆีเตอ ดือนียา โปด กือนา กือตับ ตาโรฮ ฮาบิฮ ดัฮ. 17 ฮูลู-บาลัก นู ซืออูรัก ปูลัก ญา ตรือเบะ มาแรฮ ดาตัก เดะ บาลัย นะ ตูฮัด โซะ อาตัซ ลาแงะ. ญา โปด ปือฆัก รีโจก ซายัจ บูวัฮ อางุน นู ตาฌับ ฌูฆา. 18 กะฆีเตอ อาดา ฮูลู-บาลัก ซืออูรัก ลาฆี นู อาดา มือฆัฮ นะ บือเลฮ ฮัจ-ลีฮัจ อาปี เตอ ญา ตรือเบะ มาแรฮ เดะ ตือปัจ ตูนู บารัก มือนืองะ บือซูระ มือญาเระ กะ ฮูลู-บาลัก นู ปือฆัก รีโจก ตาฌับ อีตู ฌางัน ซูวารา บือซัยํ จะ "กือนา ซูโรฮ รีโจก นู ตาฌับ นะ เกา เลอ ซายัจ มูงอจ โกะ บูวัฮ อางุน เดะ กือโบด อางุน โซะ ดือนียา. กรานา-จะ บูวัฮ อางุน เตอ มาซะ บาฌิ ดัฮ." 19 กะฆีเตอ ฮูลู-บาลัก อีตู โปด ญา รีวัก รีโจก นะ ญา อาตัซ ดือนียา ซายัจ มูงอจ บูวัฮ อางุน เดะ ดือนียา บูวัก เดะ ตือลาฆา กาจะ บูวัฮ อางุน นู บือซัยํ นู ฌาดี บือกะ ลาฆู มูซัยํ โตระ นะ ตูฮัด เลอ. 20 ตือลาฆา กาจะ บูวัฮ อางุน เตอ กือนา กาจะ โซะ ลูวัยํ นังฆรี. กะฆีเตอ ดารัฮ โปด มือนีเลฮ ตรือเบะ เดะ ตือลาฆา กาจะ บูวัฮ อางุน อีตู ซือรูปา บือกะ ซูงัย อาโปฮ ดาลับ ฆามะ บือเลฮ ซือดือปา อาโปฮ ตือดะ รอจ กะ ตีฆา ราตุซ กีโลเมด.
1 กะฆีเตอ กู มีปี ลีฮัจ อาดา ปือนานา ซีดี นู ซา ปูลัก เดะ โซะ อาตัซ ลาแงะ ฌาดี ปือนานา นู มือฆัฮ ปือและ ซูโงฮ จะ อาดา ฮูลู-บาลัก ตูโฌฮ อูรัก บาวา ลาฆู ฌาฮานัม ตูโฌฮ มาจับ มาแรฮ ฌาดี ลาฆู ฌาฮานัม นู ปือญูดัฮ ซาเบะ เดะ ลาฆู ฌาฮานัม อีตู ลาฆู มูซัยํ นะ ตูฮัด นะ ซุจ ฮาบิฮ ดัฮ. 2 กู ลีฮัจ ซือรูปา กะ ลาโวจ กาจา จาโปยํ ฌางัน อาปี อาดา ลูมอฮ ซือมียา นู ฌือนัฮ เดะ บือนาตัก ฌาฮัจ ฌางัน ฆามัยํ นะ ญา นู อาดา ปือนามา ฌาดี นูโมยํ เตอ กูญา บือดีรี เดะ บีดิก ลาโวจ กาจา ปือฆัก โกะ กลาติก นะ ตูฮัด เลอ. 3 กูญา มือญาญี ลาฆู ปือญาญี นะ มูซา ซือมียา นู ฌาดี ปราโซฮ นะ ตูฮัด ฌางัน ลาฆู ปือญาญี นะ อานะ กาเมก จะ "โอ ตูฮัด บือซัยํ เดะ อาตัซ เออ เกา นู มือฆัฮ ลือเบฮ เดะ มานามา บือกรือฌา นะ เกา บือซัยํ โตระ ปือและ ซูโงฮ เลอ. โอ ตูฮัด นู ฌาดี ราฌา เดะ นังฆรี ซือมูฮา ราตา โกะ ลาฆู ปือบูวัจ นะ เกา บาฌิ-ตือปัจ รือมัก ซูโงฮ เลอ. 4 โอ ตูฮัด เออ อาดา ซือมียา ดีฮา นู เตด ตาโกจ เดะ เกา? ซือมียา ดีฮา นู เตด ปูฌี มือโอจ กะ นามา นะ เกา? ซาเบะ ซา เกา เลอ นู บาฌิ บือซรี ซูโงฮ. โกะ ซือมียา ราตา นังฆรี นะ มาแรฮ มือญือมัฮ กะ เกา กรานา ลาฆู กรัจ ฮูโกบ นู รือมัก นะ เกา ปลีฮัจ บรี ซัฮ ดัฮ. 5 ลือปัซ อีตู กู มีปี ลีฮัจ บาลัย เดะ รูมัฮ กาเยด ตือปัจ มือญือมัฮ กะ ตูฮัด นู อาดา เดะ อาตัซ ลาแงะ เตอ ญา กือนา บูกา ดัฮ. 6 โกะ ฮูลู-บาลัก ตูโฌฮ อูรัก นู บาวา ลาฆู ฌาฮานัม ตูโฌฮ มาจับ เตอ กูญา ตรือเบะ มาแรฮ เดะ บาลัย อีตู บือปากัย กาเยด นีปิฮ นู ปูเตฮ มรือแจว อาดา ฌางัน กาเยด มัซ ซาโปจ ตาฮะ ดาดา. 7 บือนาตัก ซืออีโกยํ เดะ ดาลับ ปัจ อีโกยํ เตอ ญา อาเมด บาเตน มัซ ตูโฌฮ บีฌี ปือนอฮ ฌางัน ลาฆู มูซัยํ นะ ตูฮัด เดะ อาตัซ นู อาดา ฮีโดะ ซือลาลู เตอ ญา บรี กะ ฮูลู-บาลัก ตูโฌฮ อูรัก อีตู. 8 กะฆีเตอ บาลัย นะ ตูฮัด ญา ปือนอฮ ฌางัน อาซะ นู ดาตัก มาแรฮ เดะ นู บือซรี บือซายา นะ ตูฮัด ฌางัน นู มือฆัฮ นะ ญา. ฮอย ซือมียา ดีฮา มาโซะ ปี กะ บาลัย อีตู บือเลฮ ตือดะ ลาฆู ฌาฮานัม กือตูโฌฮ นู โกะ ฮูลู-บาลัก ตูโฌฮ อูรัก บาวา มาแรฮ นะ ซุจ ฮาบิฮ เลอ.
1 กะฆีเตอ กู ดืองัยํ บูงี ซูวารา บือซัยํ ญา ตรือเบะ มาแรฮ ดาตัก เดะ บาลัย นะ ตูฮัด ปือซัด กะ ฮูลู-บาลัก กือตูโฌฮ จะ "กือนา ปี เลอ อาเมด บาเตน มัซ นู อาดา ลาฆู มูซัยํ นะ ตูฮัด อูแร กะ อาตัซ ดือนียา." 2 กะฆีเตอ ฮูลู-บาลัก นู ลามูลา ญา ตรือเบะ ปี อูแร บาเตน นะ ญา เดะ อาตัซ ดือนียา. กะฆีเตอ โกะ ซือมียา นู อาดา ปือนานา นะ บือนาตัก ฌาฮัจ ฌางัน โกะ ซือมียา นู มือญือมัฮ กะ ฆามัยํ นะ ญา เตอ กูญา ฌาดี ลียัก บรา นู บือนานัฮ เดะ ญาวา นะ กูญา. 3 ฮูลู-บาลัก นู ดูวา โปด อาเมด บาเตน นะ ญา อูแร เดะ ลาโวจ. กะฆีเตอ ลาโวจ อีตู โปด ญา ฌาดี ซือรูปา บือกะ ดารัฮ นะ ซือมียา มาตี. โกะ บือนาตัก นู อาดา ฮีโดะ เดะ ลาโวจ เตอ โปด มาตี ฮาบิฮ ดัฮ เลอ. 4 ฮูลู-บาลัก นู ตีฆา ญา อูแร บาเตน นะ ญา ตูโรด เดะ โกะ ซูงัย ฌางัน โกะ มาตา อาเย ตาวัยํ ซือมูฮา. กะฆีเตอ อาเย อีตู โปด รีบัยํ ฌาดี ดารัฮ. 5 กะฆีเตอ กู ดืองัยํ ฮูลู-บาลัก นู ฌาฆา บือบือลา โกะ อาเย เตอ มือเลา จะ "ตูฮัด นู บาฌิ บือซรี เออ เกา นู อาดา เดะ วะตู อีนี นู อาดา เดะ กาลา ดูลู เตอ นู เกา กรัจ ฮูโกบ กะฆีเตอ ดัฮ บาฌิ-ตือปัจ เลอ. 6 ซาเบะ โกะ ซือมียา บือเลฮ บูวัจ บรี ดารัฮ นะ โกะ ซือมียา นะ ตูฮัด ฌางัน ดารัฮ นะ โกะ ซือมียา ตูโดฮ ลาฆู นะ ตูฮัด มือนีเลฮ ตรือเบะ ดัฮ. กะฆีเตอ เกา บือเลฮ บรี กูญา โอะ ดารัฮ บือกะ ปาโตจ เดะ ดูซา นะ กูญา เลอ." ญา จะ. 7 กะฆีเตอ กู ดืองัยํ ซูวารา เดะ ตือปัจ ตูนู บารัก มือนืองะ มือเลา จะ "ซูโงฮ เลอ ตูฮัด บือซัยํ เดะ อาตัซ เออ เกา นู มือฆัฮ ลือเบฮ เดะ มานามา ลาฆู กรัจ ฮูโกบ นะ เกา บาฌิ-ตือปัจ รือมัก ซูโงฮ เลอ." 8 กะฆีเตอ ฮูลู-บาลัก นู ปัจ ญา อาเมด บาเตน นะ ญา อูแร เดะ มาตาอารี. กะฆีเตอ ตูฮัด บรี กะ มาตาอารี ซูโลฮ โกะ ซือมียา ฌางัน ซายา นะ ญา บรี ฮางอซ. 9 ลาฆู ฮางัจ โตระ ญา บูวัจ บรี โกะ อูมัจ-ซือมียา ซือมูฮา ฮางอซ ฮาบิฮ. ลูมอฮ กูญา มือเลา ตะอารัฮ กะ นามา นะ ตูฮัด เดะ อาตัซ นู อาดา มือฆัฮ นะ บูวัจ โกะ ลาฆู ฌาฮานัม กะฆีเตอ. ตาปี โกะ ลูมอฮ กูญา เตด บราเลฮ-ฮาตี ปาเระ เตด ปูฌี มือโอจ กะ ตูฮัด เลอ. 10 กะฆีเตอ ฮูลู-บาลัก นู ลีมา ญา อาเมด บาเตน นะ ญา อูแร เดะ ปาปัด กรือซี ตือปัจ ดูโดะ นะ บือนาตัก ฌาฮัจ อีตู. กะฆีเตอ นังฆรี นู บือนาตัก อีตู บือบือลา ฌาดี ราฌา โปด ญา กือลับ ดัฮ เลอ. โกะ ลูมอฮ ซือมียา อีตู เตอ กูญา กาจิ ลีดัฮ นะ กูญา ซาเบะ ลาฆู ซาเกะ โตระ. 11 กูญา มือเลา ตะอารัฮ กะ ตูฮัด นู เดะ อาตัซ ลาแงะ กรานา ลาฆู ซาเกะ โตระ กรานา โกะ ลียัก เดะ ญาวา นะ กูญา. ตาปี กูญา เตด บราเลฮ-ฮาตี ปาเระ เดะ โกะ ปือบูวัจ ฌาฮัจ นะ กูญา เลอ. 12 กะฆีเตอ ฮูลู-บาลัก นู นัม เตอ ญา อาเมด บาเตน นะ ญา อูแร เดะ ซูงัย บือซัยํ ปือนามา ซูงัย ยูเฟรติด บูวัจ บรี อาเย เดะ ซูงัย กริก บีดา นะ ซียะ ฌาลัด ตาโรฮ บรี กะ โกะ ราฌา นู นะ มาแรฮ ดาตัก เดะ โซะ อาตัซ มาตาอารี. 13 กะฆีเตอ กู มีปี ลีฮัจ ฮาตู ตะอารัฮ ตีฆา อูรัก ซือรูปา กะ บือฆาตะ ตรือเบะ เดะ มูโลจ นะ นาฆา เดะ มูโลจ นะ บือนาตัก ฌาฮัจ เตอ เดะ มูโลจ นะ ซือมียา ตูโดฮ นู มืออูปัย ฌูฆา. 14 กรานา-จะ โกะ ฮาตู อีตู เตอ ฌาดี ฮาตู ฌาฮัจ นู บูวัจ ปือนานา นู ซีดี. กูญา ปี มียา โกะ ราฌา ซือมูฮา ราตา เดะ ดือนียา บีดา นะ บือเลฮ บือมุน บือซามา โกะ ราฌา อีตู บูวัจ ลาฆู บือปรัก เดะ อารี บือซัยํ นะ ตูฮัด ญา นู มือฆัฮ ซูโงฮ. 15 "นี เลอ กู นะ อูซิ มือฮึนะ มาแรฮ ซือรูปา กะ อูรัก ปือญูรี. ซือมียา ดีฮา นู อาดา ฌาฆา ลีฮัจ บือบือลา กาเยด บาฌู นะ ญา บรี บาฌิ ญา นะ ซือนัง ซือลามัจ เลอ. ซาเบะ-จะ ญา เตด ฆาโดฮ บือฌาลัด ญัก-ตือลาญัก บรี กะ โกะ ซือมียา ซือมูฮา ลีฮัจ ลาฆู ปือญือและ นะ ญา." ตูฮัด ญา จะ. 16 กะฆีเตอ โกะ ฮาตู ตีฆา อูรัก ซีงี กูญา บือเลฮ บือมุน ลูมอฮ ราฌา เดะ ตูโปะ ซา ตูโปะ นู บาซา ฮีบรู บลาโลก จะ อามาเฆดโดน. 17 กะฆีเตอ ฮูลู-บาลัก นู ตูโฌฮ ญา อูแร บาเตน นะ ญา เดะ อาเงน. อาดา บูงี ซูวารา บือซัยํ ตรือเบะ มาแรฮ เดะ บาลัย นะ ตูฮัด ดาตัก เดะ ปาปัด กรือซี ตือปัจ ดูโดะ นะ ราฌา จะ "ซุจ ฮาบิฮ ดัฮ เลอ." 18 กะฆีเตอ อาดา กีลัจ ฆูโตยํ ฌางัน ซูวารา แนฮ-ฌือแนฮ. ดือนียา โปด ญา บรีเงาะ โตระ. ตะเดะ อาดา อูมัจ-ซือมียา มาแรฮ บือฌาดี เดะ ดือนียา อีนี ฮอย เตด ดือละ อาดา ดือนียา บรีเงาะ โตระ กะฆีนี เลอ. 19 นังฆรี บือซัยํ อีตู โปด ปือจัฮ ฌาดี ตีฆา บือลัฮ. โกะ นังฆรี ราตา เดะ ดือนียา โปด บือนาซา ฮาบิฮ ดัฮ. ตูฮัด ญา เตด ลูปา นังฆรี บาบิโลน นู ฌาดี นังฆรี บือซัยํ. กะฆีเตอ ญา ปรือกัด บรี นังฆรี อีตู ฆาโดฮ โอะ อาระ อางุน เดะ เจาะ นู ปือนอฮ ฌางัน ลาฆู นู ตูฮัด เดะ อาตัซ ญา มูซัยํ บาญะ โตระ เลอ. 20 โกะ ปูเลา ราตา ซือมูฮา โปด ลือแงะ ปี ฮาบิฮ. โกะ บูเกะ เตอ ฮอย ซือมียา ดีฮา ดาปัจ เลอ. 21 อาดา ฮูฌัด บาตู ฆูโฆยํ ดาตัก เดะ ลาแงะ กือนา โกะ ซือมียา ซือมูฮา. ตาปี ฮูฌัด ซา ซา กือโตน บรัจ บือเลฮ ฆามะ ลีมา-ปูโลฮ กีโล. โกะ อูมัจ-ซือมียา ซือมูฮา กูญา มือเลา ตะอารัฮ กะ ตูฮัด ซาเบะ ลาฆู ฌาฮานัม นู ฌาดี ดาตัก เดะ ฮูฌัด บาตู เตอ. กรานา-จะ ลาฆู ฌาฮานัม อีตู ญา บือซัยํ ซูโงฮ เลอ.
1 ฮูลู-บาลัก ซืออูรัก เดะ ดาลับ ตูโฌฮ อูรัก อีตู นู ปือฆัก บาเตน ตูโฌฮ บีฌี เตอ ญา มาแรฮ มือเลา ฌางัน กู จะ "มาแรฮ กียัด เลอ. กู นะ บรี เกา ลีฮัจ จะ นู ตูฮัด นะ กรัจ ฮูโกบ นีบีนี ฌาลัก นู ซัยํ-บือซัยํ นู ดูโดะ บีดิก โกะ อาเย บาญะ ญา นะ บูวัจ กะฮามี. 2 นีบีนี อีตู เตอ นู โกะ ราฌา ราตา ดือนียา บือเลฮ บือกาเซฮ ฌูฆา. โกะ ซือมียา ซือมูฮา นู ดูโดะ เดะ ดือนียา โปด กูญา บือเลฮ มาโบะ ปี ฌางัน อาระ อางุน นู ฌาดี ลาฆู บือกาเซฮ นะ ญา." ญา จะ. 3 กะฆีเตอ ฮูลู-บาลัก อีตู ญา บาวา กู ปี บือกะ ซือมืองัจ นะ ตูฮัด บือกรือฌา เดะ ฮาตี นะ กู บาวา กู ปี กะ ปาดัก ตานัฮ ตูโฮยํ นู ลือฆา. ตือปัจ อีตู กู ลีฮัจ นีบีนี ซืออูรัก ญา ดูโดะ เดะ อาตัซ บือนาตัก ฌาฮัจ ซี มีรัฮ ฮีตับ ซืออีโกยํ นู อาดา บาญะ ปือนามา ฌาดี ลาฆู มือเลา ตะอารัฮ กะ ตูฮัด ปือนอฮ เดะ ญาวา นะ ญา. บือนาตัก อีตู อาดา ตูโฌฮ ปาลา ซือปูโลฮ ตาโนะ เตอ. 4 นีบีนี อีตู ญา บือปากัย กาเยด ซี แนบปริง ซี มีรัฮ ฮีตับ อาดา ฌางัน บารัก ปากัย โกะ มัซ โกะ อีตัด แนฮ-ฌือแนฮ อาดา ฌางัน ตือมีกา ฌูฆา. เดะ ตางัน นีบีนี อีตู ญา ปือฆัก เจาะ มัซ นู ปือนอฮ ฌางัน บือนา บูโซะ ตะอารัฮ เตด บือฆูนา เดะ ลาฆู บือกาเซฮ นะ ญา. 5 เดะ กือนิง นะ นีบีนี อีตู อาดา ปือนามา ฆาแรฮ ตาโรฮ นู ตูโญะ กะ ลาฆู ดาลับ ซูโงฮ จะ " นังฆรี บาบิโลน นู บือซัยํ มะ เดะ โกะ นีบีนี ฌาลัก มะ เดะ โกะ บือนา บูโซะ เตด บือฆูนา โซะ ดือนียา ซือมูฮา เลอ." 6 กู ลีฮัจ นีบีนี อีตู ญา มาโบะ ฌางัน ดารัฮ นะ โกะ ซือมียา นะ ตูฮัด ดารัฮ นะ โกะ ซือมียา นู ฌาดี ซะซี นะ เยซู รอจ กะ มาตี ดัฮ. ตานา กู ลีฮัจ นีบีนี อีตู ดัฮ กู ปือและ เดะ ฮาตี ซูโงฮ เลอ. 7 ฮูลู-บาลัก อีตู ญา ตาญา กู จะ "ซาเบะ นามา เกา ปือและ-ฮาตี? กู นะ มือญาเระ บรี เกา ตาฮู ปาซัน ลาฆู ดาลับ ซูโงฮ นะ นีบีนี อีตู นะ บือนาตัก ฌาฮัจ นู อาดา ตูโฌฮ ปาลา ซือปูโลฮ ตาโนะ นู ฌาดี ตือปัจ นีบีนี อีตู ดูโดะ. 8 บือนาตัก ฌาฮัจ นู เกา ลีฮัจ ซีงี เตอ ญา อาดา เดะ กาลา ดูลู ตาปี ฮาดัจ อีนี ญา ฮอย ดัฮ. ญา ซรือปะ นะ ญาแญะ มาแรฮ ดาตัก เดะ ลาเฮา นังฆรี ฮาตู ปี รอจ กะ ลาฆู ฌาฮานัม. โกะ ซือมียา ซือมูฮา นู อาดา ดูโดะ เดะ ดือนียา นู ฮอย ปือนามา ฆาแรฮ ตาโรฮ เดะ ซูรัจ ลูมอฮ ซือมียา ฮีโดะ ตะเดะ ลามูลา นู ตูฮัด บือฌาดี ดือนียา เตอ โปด กูญา นะ ปือและ-ฮาตี ซูโงฮ เลอ ตานา กูญา ลีฮัจ บือนาตัก ฌาฮัจ อีตู นู อาดา เดะ กาลา ดูลู นู ฮาดัจ อีนี ญา ฮอย ดัฮ ตาปี เดะ กาลา โซะ ฮึลด ญา นะ บือฌาดี มาแรฮ ปูลัก เลอ. 9 "ลาฆู อีนี เลอ ฆาโดฮ บือฮีมัจ ฌางัน อากัน จะ ปาลา กือตูโฌฮ ฌาดี บูเกะ ตูโฌฮ บีฌี นู นีบีนี อีตู ดูโดะ เดะ อาตัซ มูจะ เตอ. 10 ฌาดี ราฌา ตูโฌฮ อูรัก ฌูฆา ตาปี นู ลีมา อูรัก ลือปัซ ปี ดัฮ. นู ซืออูรัก ญา ฌาดี ราฌา เดะ กาลา อีนี. นู ซืออูรัก ปูลัก เตอ ญา เตด บือเลฮ บือฌาดี มาแรฮ ลาฆี. ตานา ญา มาแรฮ ดัฮ ญา ฆาโดฮ ดูโดะ ฌาดี ราฌา แนฮ ซือฌูรุซ. 11 โซะ บือนาตัก ฌาฮัจ อีตู นู อาดา เดะ กาลา นูตู ตาปี วะตู อีนี ญา ฮอย ดัฮ เตอ ญา ฌาดี ราฌา นู ลาปัด ตาปี ฌาดี ซืออูรัก เดะ ดาลับ ตูโฌฮ อูรัก อีตู เตอ. ญา นะ ปี กะ ลาฆู ฌาฮานัม เลอ. 12 "โซะ ตาโนะ ซือปูโลฮ ตาโนะ นู เกา บือเลฮ ลีฮัจ เตอ ฌาดี ราฌา ซือปูโลฮ อูรัก นู เตด บือเลฮ บือบือลา นังฆรี ลาฆี ตาปี นะ ซาโมจ ลาฆู มือฆัฮ ฌาดี ราฌา แนฮ ซือฌับ บือซามา ฌางัน บือนาตัก ฌาฮัจ อีตู เลอ. 13 โกะ ราฌา อีตู เตอ อาดา ซา ฮาตี ซือมูฮา เลอ. กูญา นะ ซรัฮ ลาฆู มือฆัฮ ฌางัน ลาฆู ฌาดี บือซัยํ นะ กูญา บรี กะ บือนาตัก ฌาฮัจ. 14 กูญา ซือมูฮา นะ บือปรัก ฌางัน อานะ กาเมก อีตู. ตาปี อานะ กาเมก นะ ฌือนัฮ เดะ กูญา ซาเบะ-จะ ญา เตอ ฌาดี ตูฮัด เดะ อาตัซ ตูฮัด ซือมูฮา ฌาดี ราฌา เดะ อาตัซ ราฌา ซือมูฮา เลอ. โกะ ซือมียา นู อาดา บือซามา ฌางัน ญา เตอ โปด กูญา ฌาดี ซือมียา นู ตูฮัด ญา ปาเงน ดัฮ ปีเลฮ ดัฮ ฌาดี ซือมียา นู รือมัก ซูโงฮ เลอ." 15 ฮูลู-บาลัก นู อีตู ญา มือญาเระ กะ กู ปูลัก จะ "โกะ อาเย บาญะ นู เกา ลีฮัจ ดัฮ ตือปัจ นู นีบีนี ฌาลัก อีตู ดูโดะ เตอ ตูโญะ กะ ลูมอฮ บักซา บาญะ อูรัก บาญะ บาซา บาญะ นังฆรี. 16 ตาโนะ ซือปูโลฮ ตาโนะ นู เกา บือเลฮ ลีฮัจ ฌางัน บือนาตัก ฌาฮัจ เตอ กูญา นะ ปาคัจ บือชี กะ นีบีนี ฌาลัก เลอ นะ อาเมด โกะ ซือบารัก นะ ญา บือปี ซือมูฮา บูวัจ บรี ญา ญัก-ตือลาญัก เลอ. กูญา นะ มากัด ลูลู นะ นีบีนี อีตู นะ อาเมด อาปี ตูนู ญา บูวัก. 17 กรานา-จะ ตูฮัด บือกรือฌา เดะ ฮาตี นะ กูญา บรี บูวัจ ตูโรจ กะ ฮาตี นะ ญา บรี อาดา ซา ฮาตี ซือมูฮา จะ ลาฆู นู กูญา ฌาดี ราฌา เตอ กูญา นะ ปาคัจ ซรัฮ บรี กะ บือนาตัก ฌาฮัจ อีตู ตือดะ โกะ ปือมือเลา นะ ตูฮัด นะ ซุจ ฮาบิฮ ดัฮ เลอ. 18 "นีบีนี นู เกา ลีฮัจ อีตู เตอ ฌาดี นังฆรี นู บือซัยํ นู อาดา บือบือลา ฌาดี ราฌา เดะ อาตัซ ราฌา ซือมูฮา ราตา ดือนียา ดัฮ." ฮูลู-บาลัก ญา จะ.
1 ลือปัซ ลาฆู กะฆีเตอ กู มีปี ลีฮัจ ปูลัก อาดา ฮูลู-บาลัก นู ซืออูรัก ลาฆี ญา ตูโรด มาแรฮ ดาตัก เดะ ลาแงะ ญา อาดา มือฆัฮ บือซัยํ ซูโงฮ. นู บือซรี บือซายา นะ ญา บูวัจ บรี ดือนียา จรัฮ เลอ. 2 ญา บือซูระ มือญาเระ ซูวารา บือซัยํ จะ "รูโตฮ รูโตฮ เลอ นังฆรี บาบิโลน นู บือซัยํ ญา รูโตฮ ฮาบิฮ เลอ. ฌาดี ตือปัจ กรามัจ นะ โกะ ฮาตู ซีตัด ฌาดี ตือปัจ กรามัจ นะ โกะ ฮาตู ตะอารัฮ ซือมูฮา ฌาดี ซารัก นะ โกะ บูโรก นู ตะอารัฮ นู กือนา บือชี ราตา ฌือแนฮ เลอ. 3 กรานา-จะ โกะ ซือมียา ราตา นังฆรี บือเลฮ โอะ อาระ อางุน นะ ญา ฌาดี-จะ มาโซะ บือซามา เดะ ลาฆู ฆาละ นะ บือกาเซฮ. โกะ ราฌา เดะ ดือนียา บือเลฮ บือกาเซฮ ฌางัน นังฆรี อีตู. โกะ ตกเก ซือมูฮา เดะ ดือนียา โปด กูญา กายา ดัฮ กรานา นังฆรี อีตู ซูโรฮ ดูเวะ บาญะ ตือลาลู เดะ ลาฆู เตด บือฆูนา เลอ." ญา จะ. 4 กะฆีเตอ กู ดืองัยํ อาดา บูงี ซูวารา นู ซา ปูลัก ดาตัก มาแรฮ เดะ โซะ ลาแงะ จะ "เออ ลูมอฮ ซือมียา นะ กู กือนา ตรือเบะ มาแรฮ เดะ นังฆรี อีตู เลอ บีดา ตีเมา บรี กาเญา นะ อาดา บาฮาเฆด เดะ ลาฆู ดูซา นะ ญา บีดา ตีเมา บรี กาเญา นะ ซาโมจ ลาฆู ฌาฮานัม นู นะ บือฌาดี เดะ ญา เลอ. 5 กรานา-จะ ดูซา นะ นังฆรี อีตู เตอ ลูโงะ ตีงี รอจ กะ ลาแงะ ดัฮ. ตูฮัด เดะ อาตัซ โปด ญา เตด ลูปา กะ ลาฆู บูวัจ ซาลัฮ นะ ญา. 6 นังฆรี อีตู บือเลฮ บูวัจ กะฮามี กือนา บูวัจ บาลัซ กะ ญา กะฆีเตอ เลอ. กือนา บาลัซ ปาเระ ดูวา กาลี บือกะ ลาฆู ปือบูวัจ นะ ญา. นู นังฆรี อีตู บือเลฮ จาโปยํ อาระ เดะ เจาะ กะฮามี เตอ กือนา จาโปยํ บรี กะ ญา ซา เจาะ นู บอฮ อาระ ดูวา กาลี เลอ. 7 นังฆรี บาบิโลน ญา บือเลฮ งันตืองัน ญาวา กะฮามี เดะ ลาฆู ซูโรฮ ดูเวะ บาญะ ตือลาลู เดะ ลาฆู เตด บือฆูนา. กือนา บรี กะ ญา ซูซัฮ โตระ บือนาซา-ฮาตี บาญะ กะฆีเตอ เลอ ซาเบะ-จะ นังฆรี อีตู มือนูโญะ เดะ ฮาตี จะ 'กู อาดา ดูโดะ ฌาดี บีนี ราฌา เลอ บูกัด นีบีนี ฌานา กู นะ เตด ตาฮู ลาฆู บือนาซา-ฮาตี ลาลู เลอ.' 8 ซาเบะ กะฆีเตอ ลาฆู ฌาฮานัม แนฮ-ฌือแนฮ นะ นังฆรี อีตู เตอ นะ บือฌาดี เดะ ซา อารี อีตู เลอ ฌาดี โกะ ปือญาเกะ รูบือฮีรู 3 ลาฆู บือนาซา-ฮาตี 3 ลาฆู บือตาฮัด บารัก มากัด อาปี นะ ตูนู นังฆรี อีตู บรี ฮางอซ ฮาบิฮ กรานา ตูฮัด บือซัยํ เดะ อาตัซ ญา นู กรัจ ฮูโกบ นังฆรี อีตู เตอ 3 ญา มือฆัฮ ซูโงฮ เลอ." ญา จะ. 9 โกะ ราฌา เดะ ดือนียา นู บือเลฮ บือกาเซฮ ฌางัน นังฆรี อีตู เตอ นู บือเลฮ ซูโรฮ ดูเวะ บาญะ ตือลาลู เดะ ลาฆู เตด บือฆูนา บือซามา เตอ ตานา กูญา นะ ลีฮัจ อาซะ เดะ นังฆรี ฮางอซ เตอ โกะ ราฌา อีตู นะ มือนาแงฮ บือปาโตด. 10 กูญา นะ บือดีรี โวฮ-ฌาโวฮ ซาเบะ ตาโกจ จะ ลาฆู ซูซัฮ นะ นังฆรี อีตู กูญา นะ กือนา ฌูฆา. กูญา มือเลา จะ "จือลากา จือลากา ดัฮ บาบิโลน นังฆรี นู บือซัยํ นู มือฆัฮ เตอ. เดะ ดาลับ ซือฌับ อีตู เกา กือนา ฮูโกบ บรี ฌาฮานัม ปี ดัฮ เลอ." 11 โกะ ตกเก เดะ ดือนียา ซือมูฮา นะ มือนาแงฮ บือปาโตด กรานา นังฆรี อีตู ซาเบะ-จะ ซือบารัก นู กูญา ปือโดะ มาแรฮ ดัฮ เตอ ฮอย ซาปา นะ บือลี ปูลัก เลอ. 12 ซือบารัก อีตู ฌาดี โกะ มัซ โกะ ปีระ โกะ อีตัด แนฮ-ฌือแนฮ โกะ ตือมีกา เตอ โกะ กาเยด แนฮ-ฌือแนฮ จะ กาเยด ปูเตฮ นู บาฌิ กาเยด ลูลู ลือมัฮ กาเยด ซี แนบปริง ซี มีรัฮ ฮีตับ เตอ. อาดา โกะ กายู บือบาวู ราตา ฌือแนฮ โกะ ซือบารัก นู บูวัจ ฌางัน ฆาดิก ฆาฌัฮ นู บูวัจ ฌางัน กายู รือฆา มาฮัน โตระ ฌางัน ตือมาฆา ฌางัน บือซี ฌางัน บาตู มูดา เตอ. 13 อาดา โกะ มีญะ บาวู โกะ กือมียัน ราตา ฌือแนฮ เตอ อาดา อาระ อางุน มีญะ รือนัก ตือโปก นู ลูมัจ บรัซ ซาลี. อาดา โกะ ลือมู โกะ กาเมก โกะ กูดา ฌางัน ซือตรี กูดา โกะ ซือมียา ฌาดี ปราโซฮ ฌางัน ญาวา ฌางัน ฮาตี นะ กูญา ฌูฆา. 14 โกะ ตกเก นะ มือเลา ฌางัน นังฆรี อีตู จะ "ลาฆู บาฌิ แนฮ-ฌือแนฮ นู เกา บรีงัจ ตือตาเฆฮ นะ บือเลฮ เตอ ลือแงะ ปี ฮาบิฮ เดะ เกา ดัฮ. โกะ บารัก มากัด มัฮ-ลือมัฮ โกะ บารัก บือปากัย นู จะ-บือฆาจะ นะ เกา ซือมูฮา เตอ บือนาซา ปี เดะ เกา ดัฮ. เกา นะ เตด ดาปัจ บารัก อีตู ลาลู เลอ." 15 โกะ ตกเก นู ฌูวัน โกะ บือนา บารัก อีตู ซีงี นู ฌาดี อูรัก กายา กรานา ลาฆู เวะ-บือดูเวะ เดะ นังฆรี บาบิโลน เตอ กูญา นะ บือดีรี โวฮ-ฌาโวฮ ซาเบะ ตาโกจ เดะ ลาฆู ซูซัฮ นะ นังฆรี อีตู. ลูมอฮ กูญา นะ มือนาแงฮ บือปาโตด ซูวารา บูริ 16 จะ "จือลากา จือลากา ดัฮ นังฆรี บือซัยํ อีตู เตอ นู บือเลฮ บือปากัย กาเยด ปูเตฮ นู บาฌิ ฌางัน กาเยด ซี แนบปริง ซี มีรัฮ ฮีตับ นู บือเลฮ บือปากัย บอฮ โกะ มัซ โกะ อีตัด แนฮ-ฌือแนฮ 3 ฌางัน โกะ ตือมีกา เตอ. 17 เดะ ดาลับ แนฮ ซือฌับ โกะ ซือบารัก รือฆา บาญะ อีตู โปด 3 ฌาฮานัม ปี ฮาบิฮ ดัฮ." โกะ เตกก กาปัน ราตา ฌางัน ราตา โกะ ซือมียา ซือมูฮา นู มือนูปัก เดะ กาปัน ฌางัน โกะ อานะ ตางัน กาปัน ซือมูฮา จะ ซือมียา ซือมูฮา นู มียา มากัด โซะ ลาโวจ โปด กูญา บือดีรี โวฮ-ฌาโวฮ. 18 ตานา กูญา ลีฮัจ อาซะ อาปี นู ปือลัฮ นังฆรี อีตู เตอ กูญา บือซูระ จะ "นังฆรี ดีฮา เลอ นู นะ บือซัยํ ซือรูปา กะ นังฆรี อีนี?" 19 กูญา โปด ปุย-ปรุย ฮาบู เดะ ปาลา นะ ตะอาซิก ซาเมน มือนาแงฮ บือปาโตด จะ "จือลากา จือลากา ดัฮ นังฆรี นู บือซัยํ อีตู เตอ นังฆรี อีตู เลอ นู ราตา โกะ ซือมียา นู อาดา กาปัน บือฌาลัด เดะ ลาโวจ กูญา ฌาดี ซือมียา กายา ดัฮ กรานา โกะ บารัก บรือฆา เดะ นังฆรี. เดะ ดาลับ แนฮ ซือฌับ นังฆรี อีตู โปด 3 ฌาฮานัม ปี ฮาบิฮ ดัฮ เลอ." 20 นังฆรี ลาแงะ เออ โกะ ซือมียา นะ ตูฮัด เออ โกะ ปือญูโรฮ นะ ตูฮัด เออ โกะ ซือมียา ตูโดฮ ลาฆู นะ ตูฮัด ซือมูฮา เออ กาเญา กือนา บรามัย ซูกา-ฮาตี กรานา ลาฆู นู บือฌาดี ดัฮ เดะ นังฆรี อีตู เลอ. ซาเบะ ตูฮัด เดะ อาตัซ เตอ ญา บือเลฮ กรัจ ฮูโกบ บาลัซ ปาเระ ฆาตี ลาฆู นู นังฆรี อีตู บูวัจ กะ กาเญา ดัฮ. 21 กะฆีเตอ ฮูลู-บาลัก นู ซืออูรัก นู อาดา มือฆัฮ โตระ ญา อาเกะ บาตู ซือกือโตน ซือรูปา บือกะ บาตู ลือโซก นู บือซัยํ ฮึมปัซ บูวัก กะ ลาโวจ มือเลา จะ "นังฆรี บาบิโลน นู บือซัยํ เตอ กือนา นะ อาเกะ ฮึมปัซ 3 ฌางัน อูรัจ กะฆีนี เลอ. ฮอย ซาปา นะ บือเลฮ ดาปัจ 3 นังฆรี อีตู ปูลัก ดัฮ เลอ. 22 ซูวารา นะ ซือมียา อูซิ กลาติก ซือมียา ปานัย มือญาญี ซือมียา ตีโยะ ซือลูนัย บูลัจ 3 ซือลูนัย มูโลจ บือซัยํ ฮอย ซือมียา ดีฮา นะ บือเลฮ ดืองัยํ เดะ เกา ปูลัก เลอ. โกะ ตูกัก ซือมูฮา บือกรือฌา ลาฆู แนฮ-ฌือแนฮ เตอ ฮอย ซือมียา ดีฮา นะ บือเลฮ ดาปัจ เดะ เกา ปูลัก. ซูวารา ซือมียา ฆีลิก ตือโปก เตอ ฮอย ซือมียา ดีฮา นะ บือเลฮ ดืองัยํ เดะ เกา ปูลัก ดัฮ. 23 ซายา ปลีตา นู จรัฮ เตอ นะ ฮอย เตด ซูโลฮ ปี เดะ เกา ปูลัก. ซูวารา นะ เจาเบา เจาเซา เตอ โปด ฮอย ซือมียา ดีฮา นะ บือเลฮ ดืองัยํ เดะ เกา ปูลัก เลอ. ซาเบะ-จะ โกะ ตกเก นะ เกา กูญา ดือละ ฌาดี ซือมียา ซัยํ-บือซัยํ เดะ ดือนียา กรานา-จะ ลาฆู อาเย-ลือมู นะ เกา เตอ บือเลฮ ตีปู โกะ ซือมียา ราตา นังฆรี เลอ. 24 "นู ฌาดี กะฆีเตอ กรานา-จะ นังฆรี อีตู เลอ นู บือเลฮ บูนอฮ โกะ ซือมียา นะ ตูฮัด ฌางัน โกะ ซือมียา ตูโดฮ ลาฆู นะ ตูฮัด ฌางัน ลูมอฮ ซือมียา ซือมูฮา นู กือนา บูนอฮ เดะ ดือนียา."
1 ลือปัซ ลาฆู กะฆีเตอ กู ดืองัยํ บูงี ซูวารา บูริ บือกะ ซูวารา โกะ ซือมียา บาญะ เดะ ลาแงะ บือซูระ จะ "อาเลลูยา ปูฌี เลอ กะ ตูฮัด บือซัยํ เดะ อาตัซ 3 ตูฮัด นะ กีตา เตอ ญา เลอ นู ตูโลก บรี ฮีโดะ ลือปัซ บาฌิ ญา เลอ นู บือซรี บือซายา 3 นู มือฆัฮ ซูโงฮ. 2 ซาเบะ-จะ ลาฆู กรัจ ฮูโกบ นะ ญา บาฌิ-ตือปัจ รือมัก ซูโงฮ เลอ. กรานา-จะ ตูฮัด ญา บือเลฮ บือดะวา กรัจ ฮูโกบ นีบีนี ฌาลัก นู ซัยํ-บือซัยํ อีตู เตอ นู บือเลฮ บูวัจ บรี ดือนียา 3 ฌาฮัจ เตด บือฆูนา ดัฮ ฌางัน ลาฆู บือกาเซฮ นะ ญา. ตูฮัด บือเลฮ บูวัจ บาลัซ ปาเระ กะ นีบีนี อีตู ซาเบะ ญา บือเลฮ บูนอฮ 3 โกะ ปราโซฮ นะ ตูฮัด." 3 กะฆีเตอ โกะ ซือมียา อีตู บือซูระ ปูลัก ฌาดี ดูวา กาลี ดัฮ จะ "อาเลลูยา ปูฌี กะ ตูฮัด เลอ. อาซะ อาปี นู บือฌาดี ดาตัก เดะ นังฆรี อีตู ซือบุยํ ญาแญะ ปี ซือลาลู ซือมาญัก-รอจ เลอ." 4 โกะ ฮูลู-บาลัก นู ซัยํ-บือซัยํ ดูวา-ปูโลฮ ปัจ อูรัก ฌางัน บือนาตัก ปัจ อีโกยํ โปด กูญา บือเลฮ ตือมะ มือญือมัฮ กะ ตูฮัด ญา นู อาดา ดูโดะ เดะ ปาปัด กรือซี ตือปัจ ดูโดะ นะ ราฌา บือซูระ จะ "อาเมน บรี ฌาดี กะฆีเตอ เลอ. อาเลลูยา ปูฌี กะ ตูฮัด เลอ." 5 อาดา บูงี ซูวารา ตรือเบะ มาแรฮ ดาตัก เดะ ปาปัด กรือซี ตือปัจ ดูโดะ นะ ราฌา จะ "กือนา ปูฌี กะ ตูฮัด เลอ กาเญา นู ฌาดี ปราโซฮ นะ ญา ซือมูฮา ฌางัน โกะ ซือมียา นู ตูเฮะ กะ ตูฮัด ฌางัน โกะ ซือมียา ซัยํ-บือซัยํ 3 ซือมียา นัฮ-รือนัฮ โปด กือนา มือโอจ กะ ตูฮัด นะ กีตา เลอ." 6 กะฆีเตอ กู ดืองัยํ บือกะ ซูวารา โกะ ซือมียา บาญะ บือกะ อาเย ฆูโฆยํ ตะเดะ อาตัซ บูเกะ บือกะ ซูวารา ฆูโตยํ นู บูงี บาฮานา จะ "อาเลลูยา ปูฌี กะ ตูฮัด เลอ. กรานา ตูฮัด บือซัยํ เดะ อาตัซ นู มือฆัฮ ลือเบฮ เดะ มานามา 3 ตูฮัด นะ กีตา เตอ ญา อาดา บือบือลา ฌาดี ราฌา ดัฮ เลอ. 7 บรี กีตา ซือมูฮา บรามัย ซูกา-ฮาตี ปูฌี มือโอจ กะ ตูฮัด นะ กีตา เลอ กรานา รอจ วะตู มือนีกัฮ นะ อานะ กาเมก ดัฮ. กรานา เจาเซา นะ ญา ซียะ ฆือนะ ดัฮ. 8 ตูฮัด บรี เจาเซา บือปากัย กาเยด ปูเตฮ กาเยด นู บือตือแล จรัฮ บาฌิ เลอ." ซาเบะ กาเยด ปูเตฮ อีตู เตอ ฌาดี ลาฆู ปือบูวัจ บาฌิ นะ โกะ ซือมียา นะ ตูฮัด. 9 กะฆีเตอ ฮูลู-บาลัก นู อีตู ญา ปือซัด กะ กู จะ "กือนา ฆาแรฮ กะฆีนี เลอ จะ ซือนัง ซือลามัจ เลอ ลูมอฮ ซือมียา นู กือนา บลาโลก กะ มือนีกัฮ นะ อานะ กาเมก." ญา มือเลา ปูลัก กะ กู จะ "ปือมือเลา กะฆีเตอ ฌาดี ปือมือเลา นู ซูโงฮ นะ ตูฮัด เดะ อาตัซ เลอ." 10 กะฆีเตอ กู ตือมะ เดะ กากี นะ ญา ฆามะ นะ มือญือมัฮ กะ ญา. ตาปี ญา มือเลา กะ กู จะ "ฌางัน เลอ กู ฌาดี ปราโซฮ นะ ตูฮัด ซือรูปา บือกะ เกา ฌางัน ลูมอฮ ดีบราดี นะ เกา นู รือมัก ฌางัน ปือมือเลา ซะซี นู เยซู บือเลฮ บรี ตาฮู. กือนา มือญือมัฮ กะ ตูฮัด เดะ อาตัซ เลอ." ซาเบะ-จะ ปือมือเลา ซะซี นู เยซู บือเลฮ บรี ตาฮู เตอ ฌาดี ลาฆู นู บือกรือฌา เดะ ฮาตี นะ โกะ ซือมียา ตูโดฮ ลาฆู นะ ตูฮัด เลอ. 11 กะฆีเตอ กู มีปี ลีฮัจ ปูลัก จะ ลาแงะ ญา บูกา ดัฮ. นี เลอ อาดา กูดา ปูเตฮ ซืออีโกยํ. ซือมียา นู ดูโดะ เดะ อาตัซ กูดา เตอ ปือนามา จะ ซือมียา รือมัก บาฌิ รือมัก ซูโงฮ. ญา กรัจ ฮูโกบ ญา บือปรัก บือกะ ลาฆู นู บาฌิ-ตือปัจ ซูโงฮ เลอ. 12 มาตา นะ ญา บือกะ ญาลา อาปี เดะ ปาลา นะ ญา โปด อาดา โกะ จูบุก บาญะ. ญา อาดา ปือนามา ฆาแรฮ เดะ ญาวา นู ฮอย ซือมียา ดีฮา นะ ตาฮู เลอ. ซา ญา ตะอาซิก เลอ นู ตาฮู. 13 ญา บือปากัย บาฌู ซรือโกะ ญาวา นู จือลุ เดะ ดารัฮ ดัฮ. ปือนามา นะ ญา กือนา บลาโลก จะ "ปือมือเลา นะ ตูฮัด." 14 โกะ ลูมอฮ ตาฮัน เดะ โซะ ลาแงะ บือปากัย กาเยด ปูเตฮ นู จรัฮ บาฌิ ดูโดะ เดะ อาตัซ โกะ กูดา ปูเตฮ ตูโรจ ปี ฌางัน ญา. 15 อาดา ปือดัก ตาฌับ ตรือเบะ มาแรฮ ดาตัก เดะ มูโลจ นะ ญา บีดา ญา นะ บือเลฮ บลาวัด ฌือนัฮ เดะ ราตา นังฆรี ฌางัน ปือดัก อีตู. ญา เตอ นะ บือบือลา กูญา ฌางัน ตูกัจ นู มือฆัฮ ญา เตอ นะ กาจะ ตือลาฆา อาเย อางุน นู ฌาดี ลาฆู มูซัยํ โตระ นะ ตูฮัด เดะ อาตัซ ญา นู มือฆัฮ ลือเบฮ เดะ มานามา เลอ. 16 ญา อาดา ปือนามา ฆาแรฮ เดะ บาฌู เดะ อาตัซ ปาฮา นะ ญา จะ "ราฌา เดะ อาตัซ ราฌา ซือมูฮา ตูฮัด เดะ อาตัซ ตูฮัด ซือมูฮา." 17 กะฆีเตอ กู มีปี ลีฮัจ ฮูลู-บาลัก ซืออูรัก บือดีรี เดะ มาตาอารี ญา บือซูระ ซูวารา บือซัยํ ปาเงน โกะ บูโรก ซือมูฮา นู ตรือบัก ตีงี เดะ โซะ ลาแงะ จะ "มาแรฮ เลอ บือมุน บือซามา เดะ ลาฆู มากัด บรามัย บือซัยํ นะ ตูฮัด เดะ อาตัซ. 18 มาแรฮ มากัด ลูลู โกะ ราฌา ลูลู โกะ กือปาลา ตาฮัน ลูลู โกะ ตาฮัน นู ตือฆัยํ-อูรัจ ลูลู กูดา ลูลู นะ ซือมียา นู ดูโดะ เดะ อาตัซ กูดา ลูลู นะ ซือมียา ซือมูฮา ฌาดี ปราโซฮ ซือมียา เตด ฌาดี ปราโซฮ ซือมียา ซัยํ-บือซัยํ ซือมียา นัฮ-รือนัฮ เตอ." 19 กะฆีเตอ กู มีปี ลีฮัจ บือนาตัก ฌาฮัจ อีตู ฌางัน โกะ ราฌา เดะ ดือนียา ฆือนะ ฌางัน โกะ ลูมอฮ ตาฮัน นะ ราฌา อีตู เตอ กูญา มาแรฮ บือมุน บือซามา นะ บือปรัก ฌางัน ญา นู ดูโดะ เดะ อาตัซ กูดา ฌางัน ลูมอฮ ตาฮัน นะ ญา. 20 บือนาตัก ฌาฮัจ เตอ ญา กือนา รีฆะ บือซามา ฌางัน ซือมียา ตูโดฮ นู มืออูปัย นู บือเลฮ บูวัจ ปือนานา ซีดี โซะ ฮึลด มูคา นะ บือนาตัก อีตู. กรานา ปือนานา อีตู เตอ ญา บือเลฮ ตีปู โกะ ซือมียา นู ซาโมจ ปือนานา นะ บือนาตัก อีตู นู มือญือมัฮ กะ ฆามัยํ นะ ญา. บือนาตัก อีตู ฌางัน ซือมียา ตูโดฮ นู มืออูปัย เตอ กูญา กือดูวา กือนา บูวัก โดะ-ฮีโดะ เดะ ลูนัก อาปี บลีรัก นู ฮางอซ. 21 ลูมอฮ ตาฮัน นะ กูญา โปด กือนา บูนอฮ ฌางัน ปือดัก นู ตรือเบะ เดะ มูโลจ นะ ญา นู อาดา ดูโดะ เดะ อาตัซ กูดา อีตู. บูโรก ซือมูฮา โปด มากัด ลูลู โกะ ซือมียา อีตู ยู กือญัง ดัฮ.
1 กะฆีเตอ กู มีปี ลีฮัจ ปูลัก บือฆารี ฮูลู-บาลัก ซืออูรัก ตูโรด มาแรฮ ดาตัก เดะ ลาแงะ. ญา ปือฆัก กูจี นะ ลาเฮา นังฆรี ฮาตู ปือฆัก ราตัย บือซัยํ ฌูฆา. 2 ญา รีฆะ นาฆา อีตู ฌาดี-จะ อูลัยํ กาลา นูตู นู ฌาดี กือปาลา ฌิด กือปาลา ฮาตู ซีตัด เตอ. ญา อีกัจ ราตัย ตาโรฮ ตือดะ ฮาบิฮ ซือรีบู ตาโฮด. 3 กะฆีเตอ ญา บูวัก นาฆา ปี กะ ลาเฮา นังฆรี ฮาตู ญา บอฮ กูจี ตาแปะ มือกรา ตาโรฮ บีดา ตีเมา บรี นาฆา นะ ตีปู โกะ ซือมียา ราตา นังฆรี ปูลัก ตือดะ ฆือนะ ซือรีบู ตาโฮด ดัฮ. ลือปัซ อีตู นาฆา นะ ฆาโดฮ กือนา ปลือปัซ ปี ซือฌูรุซ. 4 กะฆีเตอ กู มีปี ลีฮัจ อาดา ปาปัด กรือซี ตือปัจ ดูโดะ นะ ราฌา บาญะ ตือปัจ. อาดา โกะ ซือมียา ดูโดะ เดะ อาตัซ ตือปัจ ดูโดะ อีตู ฌาดี ลูมอฮ ซือมียา นู ตูฮัด นะ บรี บือดะวา กรัจ ฮูโกบ. กูญา อีตู ฌาดี บือกะ โกะ ซือมืองัจ นะ ลูมอฮ ซือมียา ซือมูฮา นู กือนา กรัจ ปาลา กรานา กูญา บือเลฮ มือญาเระ ปือมือเลา ซะซี นู เยซู บรี ตาฮู ดัฮ บือเลฮ มือญาเระ ปือมือเลา นะ ตูฮัด เดะ อาตัซ เลอ. กูญา เตด บือเลฮ มือญือมัฮ กะ บือนาตัก ฌาฮัจ เตอ เฆอ-จะ ฆามัยํ นะ ญา กูญา เตด บือเลฮ ซาโมจ ปือนานา นะ ญา เดะ กือนิง เฆอ-จะ เดะ ตางัน นะ กูญา. โกะ ซือมียา อีตู ปาเระ มาแรฮ ฮีโดะ ปูลัก บือเลฮ บือบือลา ฌาดี ราฌา บือซามา ฌางัน เยซู คริด ตือดะ ฮาบิฮ ซือรีบู ตาโฮด. 5 ลือเบฮ เดะ ซือมียา อีนี โกะ ซือมียา ฆีลาฆี นู มาตี ดัฮ เตอ กูญา เตด บือเลฮ ปาเระ มาแรฮ ฮีโดะ ปูลัก ตือดะ ฆือนะ รอจ ซือรีบู ตาโฮด. ลาฆู อีตู ซีงี ฌาดี ลาฆู ฮีโดะ ปาเระ เดะ มาตี นู ลามูลา. 6 ลูมอฮ ซือมียา นู อาดา บาฮาเฆด เดะ ลาฆู ฮีโดะ ปาเระ เดะ มาตี นู ลามูลา อีตู กูญา ซือนัง ซือลามัจ เตอ กูญา ฌาดี โกะ ซือมียา นะ ตูฮัด เตอ เลอ. ซือมียา กะฆีเตอ ลาฆู มาตี นู ดูวา นะ ฮอย เตด บือเลฮ ฮูโกบ กูญา เลอ ตาปี กูญา นะ ฌาดี ลูมอฮ ซามี นู บือกรือฌา มือญือมัฮ กะ ตูฮัด เดะ อาตัซ ฌางัน เยซู คริด. กูญา นะ บือบือลา ฌาดี ราฌา บือซามา ฌางัน เยซู ตือดะ ฮาบิฮ ซือรีบู ตาโฮด เลอ. 7 กาลา ซือรีบู ตาโฮด ลือปัซ ปี ดัฮ กือปาลา ฮาตู ซีตัด นะ กือนา ปลือปัซ บือตรือเบะ เดะ ปือฌารา นู กานัก ญา ตาโรฮ. 8 กะฆีเตอ ญา นะ ตรือเบะ ปี ตีปู โกะ ซือมียา ราตา นังฆรี นู ปือจัฮ-บือลัฮ ราตา เดะ ดือนียา ฌาดี-จะ นังฆรี โฆก ฌางัน นังฆรี มาโฆก เตอ บรี โกะ ซือมียา มาแรฮ บือมุน บือซามา บีดา นะ บือปรัก. ดัฮ นะ กีรา โกะ ซือมียา อีตู กูญา บาญะ โตระ ฆามะ บือกะ โกะ บีฌี ตานัฮ ปาตัย เดะ บีดิก ลาโวจ เลอ. 9 โกะ ซือมียา อีตู ซือมูฮา เตอ บือเลฮ ตรือเบะ ปี ราตา เดะ ดือนียา บือเลฮ ปี กือลีลิก ตือปัจ บราดู กาวัด ตาฮัน นะ ตูฮัด กือลีลิก นังฆรี นู ตูฮัด ซายัก เลอ. ตาปี อาปี บือเลฮ ฆูโฆยํ ดาตัก เดะ ลาแงะ ตูนู โกะ ซือมียา อีตู ฮาบิฮ ดัฮ เลอ. 10 โซะ กือปาลา ฮาตู ซีตัด นู ตีปู กูญา อีตู โปด ญา กือนา ตูโฮะ ปี เดะ ลูนัก อาปี นู อาดา ฌางัน บลีรัก ตือปัจ นู บือนาตัก ฌาฮัจ อีตู ฌางัน ซือมียา ตูโดฮ นู มืออูปัย กูญา ฆูโฆยํ ปี ดัฮ. กูญา นะ ฆาโดฮ ตาฮัด ซูซัฮ โตระ ซียัก มาลับ ซือลาลู ปี ซือมาญัก-รอจ เลอ. 11 กะฆีเตอ กู มีปี ลีฮัจ ปูลัก อาดา ปาปัด กรือซี ตือปัจ ดูโดะ นะ ราฌา นู บือซัยํ นู ปูเตฮ มรือแจว. อาดา ตูฮัด เดะ อาตัซ ดูโดะ โตะ อีตู. ดือนียา ฌางัน ลาแงะ โปด ลารี ปี เดะ โซะ ฮึลด มูคา นะ ญา ลือแงะ ฮาบิฮ ดัฮ. 12 กะฆีเตอ กู ลีฮัจ ลูมอฮ ซือมียา นู มาตี ดัฮ อาดา ซือมียา ซัยํ-บือซัยํ ฌางัน ซือมียา นัฮ-รือนัฮ เตอ กูญา บือดีรี โซะ ฮึลด ตือปัจ ดูโดะ อีตู. อาดา ซูรัจ แนฮ-ฌือแนฮ กือนา บูกา ดัฮ. อาดา ซูรัจ ซือปาลา นู ซา บูกา ฌูฆา ฌาดี ซูรัจ ลูมอฮ ซือมียา ฮีโดะ เตอ. โกะ ซือมียา มาตี ซือมูฮา โปด กือนา กรัจ ฮูโกบ ดัฮ ตูโรจ บือกะ กูญา บือเลฮ บูวัจ กะฮามี ตูโรจ บือกะ นู อาดา ฆาแรฮ ตาโรฮ เดะ โกะ ซูรัจ บาญะ ปาลา ซีงี เตอ. 13 โกะ ซือมียา นู มาตี เดะ ลาโวจ เตอ กือนา อาตัจ ปาเระ ดัฮ. โกะ ซือมียา มาตี ราตาๆ โกะ ซือมียา นู ดูโดะ เดะ นังฆรี ฮาตู โปด กูญา กือนา อาตัจ ปาเระ ฌูฆา. กะฆีเตอ ราตา ซือมียา กือนา กรัจ ฮูโกบ กือมูฮา ตูโรจ กะ ลาฆู ปือบูวัจ นะ กูญา ซิกมาซิก. 14 กะฆีเตอ ลาฆู มาตี ฌางัน นังฆรี ฮาตู เตอ กือนา บูวัก เดะ ลูนัก อาปี ดัฮ. ลูนัก อาปี อีนี เลอ ฌาดี ลาฆู มาตี นู ดูวา. 15 ดัฮ นามา นะ ซือมียา ดีฮา ฮอย เตด ฆาแรฮ เดะ ซูรัจ ลูมอฮ ซือมียา ฮีโดะ เตอ ซือมียา อีตู กือนา บูวัก เดะ ลูนัก อาปี ดัฮ เลอ.
1 กะฆีเตอ กู มีปี ลีฮัจ นังฆรี ลาแงะ นู บารู ฌางัน ดือนียา นู บารู กรานา ลาแงะ ฌางัน ดือนียา นู ลามา ญา ลือแงะ ปี ฮาบิฮ เลอ. ลาโวจ โปด ญา ฮอย ปูลัก ดัฮ. 2 กะฆีเตอ กู ลีฮัจ นังฆรี นู บาฌิ บือซรี ปือนามา จะ นังฆรี เยรูซาเลม นู บารู เตอ ญา มือลายัก มาแรฮ เดะ โซะ ลาแงะ ดาตัก เดะ ตูฮัด เดะ อาตัซ. นังฆรี บารู อีตู ซียะ ดัฮ บือกะ เจาเซา นู บือปากัย บือฆาจะ นาตี เจาเบา นะ มาแรฮ มือนีกัฮ. 3 กะฆีเตอ กู ดืองัยํ บูงี ซูวารา นู บือซัยํ ดาตัก มาแรฮ เดะ ปาปัด กรือซี ตือปัจ ดูโดะ นะ ราฌา อีตู จะ "นี เลอ ตูฮัด เดะ อาตัซ อาดา ตือปัจ ดูโดะ บือซามา ฌางัน อูมัจ-ซือมียา ดัฮ. ตูฮัด นะ ดูโดะ บือซามา ฌางัน ลูมอฮ กูญา. กะฆีเตอ กูญา นะ ฌาดี ลูมอฮ บักซา นะ ญา. อีซี ญา ตะอาซิก โปด นะ อาดา บือซามา ฌางัน กูญา นะ ฌาดี ตูฮัด นะ กูญา. 4 ตูฮัด นะ อีซุจ อาเย มาตา ราตา บีฌี นู มือนีเลฮ เดะ มาตา นะ กูญา ซือมูฮา. กะฆีเตอ ลาฆู มาตี นะ ฮอย ดัฮ ลาฆู บาฮาตี ลาฆู มือนาแงฮ ลาฆู ซาเกะ โปด นะ ฮอย ปูลัก กรานา บือนา กาลา ดูลู เตอ ญา ลือแงะ ปี ฮาบิฮ ดัฮ เลอ." ญา จะ. 5 กะฆีเตอ ตูฮัด ญา นู ดูโดะ เดะ อาตัซ ปาปัด กรือซี ตือปัจ ดูโดะ นะ ราฌา อีตู เตอ ญา มือเลา จะ "ลีฮัจ เลอ กู บูวัจ บือนา บารัก ซือมูฮา ฌาดี บารู." ญา มือเลา ปูลัก จะ "กือนา ฆาแรฮ ลาฆู กะฆีนี เลอ กรานา-จะ ปือมือเลา อีนี ฌาดี ปือมือเลา นู ซูโงฮ ปือมือเลา นู รือมัก." 6 กะฆีเตอ ตูฮัด มือเลา ฌางัน กู จะ "ลาฆู กะฆีนี บูวัจ ซุจ ดัฮ. กู นี เลอ ฌาดี นู ลามูลา ฌางัน นู ปือญูดัฮ ฌาดี ตูฮัด ตะเดะ ลามูลา นูตู ตือดะ ฮาบิฮ ปือญูดัฮ เลอ. ดัฮ ซือมียา ดีฮา ดาฆา อาเย เตอ กู นะ บรี กะ ซือมียา อีตู นะ โอะ อาเย ดาตัก เดะ มาตา อาเย นู บรี ฮีโดะ ตาปี ฮอย เตด ฆาโดฮ นะ บายัยํ นามา เลอ. 7 ซือมียา ดีฮา นู ฌือนัฮ ซือมียา อีตู นะ บือเลฮ ซาโมจ ลาฆู กะฆีเตอ ฌาดี ปือซากา นะ ญา. กู โปด นะ ฌาดี ตูฮัด นะ ญา ญา นะ ฌาดี นานะ นะ กู เลอ. 8 ตาปี โกะ ซือมียา มือนาโกจ โกะ ซือมียา เตด ปือจายา โกะ ซือมียา บูโซะ เตด บือฆูนา โกะ ซือมียา บูนอฮ กาวัด เตอ โกะ ซือมียา บือกาเซฮ โกะ ซือมียา บือฆูรู อาเย-ลือมู โกะ ซือมียา มือญือมัฮ กะ บราลา ฌางัน โกะ ซือมียา มือเลา มืออูปัย ซือมูฮา เตอ ลูมอฮ อีตู ซือมูฮา นะ ดาปัจ ตือปัจ นะ กูญา เดะ ลูนัก อาปี อีตู นู มือญาลา ฌางัน อาปี บลีรัก เลอ. นี เลอ ฌาดี ลาฆู มาตี มาโซะ กือดูวา ดัฮ." ตูฮัด ญา จะ. 9 ฮูลู-บาลัก ซืออูรัก เดะ ดาลับ ตูโฌฮ อูรัก อีตู นู บาวา บาเตน ตูโฌฮ บีฌี ปือนอฮ ฌางัน ลาฆู ฌาฮานัม นู ปือญูดัฮ ตูโฌฮ ลาฆู เตอ ญา บือเลฮ มือเลา ฌางัน กู จะ "มาแรฮ กะ อีนี เลอ กู นะ บรี กะ เกา ลีฮัจ เจาเซา นู นะ ฌาดี บีนี นะ อานะ กาเมก นู อีตู." 10 กะฆีเตอ ฮูลู-บาลัก อีตู ญา บาวา กู ปี บือกะ ซือมืองัจ นะ ตูฮัด บือกรือฌา เดะ ฮาตี นะ กู บือญาแญะ กะ อาตัซ บูเกะ นู บือซัยํ ตีงี. ญา ปลีฮัจ บรี กะ กู ลีฮัจ นังฆรี นู บาฌิ บือซรี จะ นังฆรี เยรูซาเลม ตืองัฮ มือลายัก มาแรฮ เดะ โซะ อาตัซ ลาแงะ ดาตัก เดะ ตูฮัด. 11 นังฆรี อีตู อาดา ฌางัน บือซรี บือซายา นะ ตูฮัด นู จรัฮ ฌรือแนฮ บือกะ บาตู อีตัด รือฆา มาฮัน ซือรูปา กะ อีตัด มีรัฮ ฌางัน ฮีเฌา นู ฌรือแนฮ ซูโงฮ เลอ. 12 นังฆรี อีตู อาดา ดีนิง บือซัยํ ตีงี อาดา ปีตู ดูวา-บือลัซ ปีตู. เดะ ปีตู โซกซา ปีตู อาดา ฮูลู-บาลัก ซืออูรัก กือมูฮา ดูวา-บือลัซ อูรัก. โซกซา ปีตู โปด อาดา ฆาแรฮ ปือนามา นะ ปาลัฮ บักซา อิซราเอน ซา ปาลัฮ กือมูฮา ดูวา-บือลัซ ปาลัฮ. 13 โซะ ตีมอยํ อาดา ตีฆา ปีตู โซะ ตารา อาดา ตีฆา ปีตู โซะ บารัจ-ดายา อาดา ตีฆา ปีตู โซะ บารัจ อาดา ตีฆา ปีตู. 14 นู ดีนิง นังฆรี อีตู อาดา บาตู ปือนาฮัด ดูวา-บือลัซ กือโตน. เดะ บาตู ปือนาฮัด อีตู เตอ ฆาแรฮ ปือนามา นะ โกะ ปือญูโรฮ นะ อานะ กาเมก ดูวา-บือลัซ อูรัก ซือกือโตน ซืออูรัก. 15 ฮูลู-บาลัก นู มือเลา ฌางัน กู เตอ ญา ปือฆัก กายู ปืออูโกยํ นู บูวัจ ฌางัน มัซ บีดา นะ อูโกยํ นังฆรี นะ อูโกยํ ปีตู ฌางัน ดีนิง นะ นังฆรี อีตู. 16 นังฆรี อีตู ฌาดี ปัจ ซาฆี ปาญัก ซามา บายา. ญา อาเมด กายู ปืออูโกยํ ปี อูโกยํ นังฆรี อีตู บือเลฮ 2400 กีโลเมด ลือฆา ปาญัก ตีงี ซามา บายา ฮาปา. 17 ญา อูโกยํ ดีนิง นะ นังฆรี อีตู บือเลฮ ตีงี ซือราตุซ ปัจ-ปูโลฮ ปัจ ตก ตูโรจ กะ ปืออูโกยํ นะ อูมัจ-ซือมียา นู ซือรูปา ฌางัน ปืออูโกยํ นู ฮูลู-บาลัก อีตู ซูโรฮ. 18 ดีนิง นะ นังฆรี อีตู บูวัจ ฌางัน อีตัด มีรัฮ ฌางัน อีตัด ฮีเฌา. นังฆรี อีตู เตอ บูวัจ ฌางัน มัซ นู จรัฮ นู บาฌิ ฌรือแนฮ บือกะ กาจา เลอ. 19 บาตู ปือนาฮัด นะ ดีนิง นังฆรี อีตู ปือตัด บรี บือฆาจะ ฌางัน โกะ บาตู อีตัด รือฆา มาฮัน ราตา มาจับ. บาตู ปือนาฮัด ดูวา-บือลัซ บีฌี ซิกมาซิก ปือตัด ฌางัน อีตัด นู ซี แนฮ-ฌือแนฮ ดูวา-บือลัซ มาจับ. 21 ปีตู กือดูวา-บือลัซ ปีตู อีตู บูวัจ ฌางัน ตือมีกา ดูวา-บือลัซ บีฌี ซา ปีตู ซือบีฌี. ฌาลัด บือซัยํ เดะ นังฆรี เตอ ฌาดี มัซ นู จรัฮ นู บาฌิ ฌรือแนฮ บือกะ กาจา เลอ. 22 กู เตด บือเลฮ ลีฮัจ อาดา บาลัย นะ ตูฮัด เดะ นังฆรี อีตู ลาลู เลอ กรานา-จะ อาดา ตูฮัด บือซัยํ เดะ อาตัซ นู มือฆัฮ ลือเบฮ เดะ มานามา ฌางัน อานะ กาเมก นะ ตูฮัด เตอ อีซี กูญา อาดา ฆาตี บาลัย นะ ตูฮัด เดะ นังฆรี อีตู ดัฮ. 23 นังฆรี อีตู เตด ฆาโดฮ นะ อาดา ซายา มาตาอารี ฌางัน บูลัด กรานา-จะ บือซรี บือซายา นะ ตูฮัด ฌาดี ตือปัจ จรัฮ นะ นังฆรี อีตู ดัฮ. อานะ กาเมก อีตู เตอ ฌาดี ปลีตา บือซายา นะ นังฆรี เลอ. 24 โกะ ลูมอฮ ซือมียา ราตา นังฆรี นะ บือฌาลัด ปี มาแรฮ เดะ ซายา จรัฮ นะ นังฆรี อีตู. โกะ ราฌา เดะ ดือนียา นะ อาเมด บารัก บรือฆา นู บือซรี นะ กูญา มาโซะ กะ นังฆรี อีตู. 25 โกะ ปีตู ดีนิง นังฆรี ราตา ปีตู นะ ฮอย เตด ดือละ กาปุซ เดะ วะตู ซียัก กรานา-จะ ฮอย วะตู มาลับ ลาลู เดะ นังฆรี อีตู เลอ. 26 ลูมอฮ ซือมียา ราตา นังฆรี นะ บาวา บารัก บรือฆา บารัก บาฌิ นู กือนา มือโอจ นะ กูญา มาโซะ กะ ดาลับ นังฆรี อีตู. 27 บารัก นามา นู ตะอารัฮ เฆอ-จะ ซือมียา ดีฮา บูวัจ ลาฆู บูโซะ เตด บือฆูนา ลาฆู มืออูปัย เตอ นะ มาโซะ ปี กะ นังฆรี อีตู เตด บือเลฮ ลาลู เลอ. ซา โกะ ซือมียา นู อาดา ปือนามา นะ กูญา ฆาแรฮ ตาโรฮ เดะ ซูรัจ ลูมอฮ ซือมียา ฮีโดะ นะ อานะ กาเมก เตอ ซา กูญา นะ มาโซะ ปี บือเลฮ.
1 กะฆีเตอ ฮูลู-บาลัก อีตู ญา ตูโญะ บรี กู ลีฮัจ ซูงัย อาเย นู บรี ฮีโดะ บือตือแล บือกะ กาจา นู ฌรือแนฮ มือนีเลฮ มาแรฮ ดาตัก เดะ ปาปัด กรือซี ตือปัจ ดูโดะ นะ ตูฮัด เดะ อาตัซ ฌางัน อานะ กาเมก นะ ญา. 2 อาเย อีตู มือนีเลฮ ปี เดะ ตืองัฮ ฌาลัด บือซัยํ เดะ นังฆรี อีตู. เดะ บีดิก ซูงัย ดูวา บือลัฮ อาดา ปูโฮด กายู นู บรี ฮีโดะ นู ตรือเบะ บูวัฮ บีลัก บูลัด ฌาดี-จะ ซา ตาโฮด ดูวา-บือลัซ กาลี. ดาโวด นะ ญา เตอ อาดา บีดา นะ บือบือลา โกะ ลูมอฮ ซือมียา ราตา นังฆรี บรี ซือนัง. 3 เดะ นังฆรี อีตู ฮอย ลาฆู นามา ปูลัก นู กือนา ซูปัฮ อาโบยํ ดัฮ เลอ. ปาปัด กรือซี ตือปัจ ดูโดะ นะ ตูฮัด เดะ อาตัซ ฌางัน นะ อานะ กาเมก อีตู เตอ นะ อาดา เดะ นังฆรี อีตู. โกะ ลูมอฮ ปราโซฮ นะ ตูฮัด กูญา นะ มือญือมัฮ ปูฌี กะ ญา 4 กูญา นะ บือเลฮ ลีฮัจ มูคา นะ ญา. ปือนามา นะ ญา โปด นะ อาดา ฆาแรฮ เดะ กือนิง นะ กูญา. 5 กะฆีเตอ วะตู มาลับ นะ ฮอย ดัฮ. กูญา นะ เตด ฆรานา อาดา ซายา ปลีตา เฆอ-จะ ซายา มาตาอารี. ซาเบะ ตูฮัด บือซัยํ เดะ อาตัซ นะ ฌาดี ตือปัจ จรัฮ นะ กูญา. กูญา นะ อาดา บือบือลา ฌาดี ราฌา ซือลาลู ปี ซือมาญัก-รอจ เลอ. 6 ฮูลู-บาลัก นู อีตู มือญาเระ กะ กู จะ "ปือมือเลา อีนี ซือมูฮา ฌาดี ปือมือเลา นู ซูโงฮ ปือมือเลา นู รือมัก. ตูฮัด บือซัยํ เดะ อาตัซ ตูฮัด นู บรี ซือมืองัจ นะ ญา กะ ลูมอฮ ซือมียา ตูโดฮ ญา เตอ ซูโรฮ ฮูลู-บาลัก นะ ญา นะ บรี ตาฮู กะ ลูมอฮ ปราโซฮ นะ ญา จะ เตด ลามา อีนี ลาฆู นามา นู ฆาโดฮ นะ บือฌาดี." ญา จะ. 7 "ลีฮัจ เลอ กู นะ มาแรฮ งัจบางัจ เลอ. ซือนัง ซือลามัจ เลอ ลูมอฮ ซือมียา นู ตูโรจ กะ ปือมือเลา ตูโดฮ เดะ ซูรัจ อีนี." เยซู ญา จะ. 8 กู โยฮัน ฌาดี ซือมียา นู บือเลฮ ดืองัยํ บือเลฮ ลีฮัจ ลาฆู กะฆีนี เลอ. กะฆีเตอ ซูดัฮ กู ดืองัยํ ดัฮ ลีฮัจ ดัฮ กู โปด ตือมะ ฆามะ นะ มือญือมัฮ เดะ กากี นะ ฮูลู-บาลัก นู บือเลฮ บรี กู ลีฮัจ ลาฆู กะฆีเตอ. 9 ตาปี ญา มือเลา บลารัก กะ กู จะ "ฌางัน เลอ. กู ฌาดี ปราโซฮ นะ ตูฮัด ซือรูปา บือกะ เกา ฌางัน ลูมอฮ ดีบราดี นะ เกา นู ฌาดี ซือมียา ตูโดฮ ซามา ฌางัน ลูมอฮ ซือมียา ซือมูฮา นู บูวัจ ตูโรจ กะ ปือมือเลา เดะ ซูรัจ อีนี. กือนา มือญือมัฮ กะ ตูฮัด บือซัยํ เดะ อาตัซ เลอ." ญา จะ. 10 ญา มือญาเระ กะ กู ปูลัก จะ "ฌางัน ตูโดก บูนี ปือมือเลา ตูโดฮ เดะ ซูรัจ อีนี. กรานา-จะ วะตู นู ลาฆู อีนี นะ บือฌาดี ซรือปะ นะ รอจ ดัฮ เลอ. 11 ซือมียา นู ฌาฮัจ บรี กะ ญา บูวัจ ฌาฮัจ ซือรูโลยํ. ซือมียา นู บูวัจ รูบือฮีรู บรี กะ ญา บูวัจ รูบือฮีรู ปี ซือรูโลยํ. ซือมียา นู บาฌิ บรี กะ ญา บูวัจ ลาฆู บาฌิ ซือรูโลยํ โปด. ซือมียา นู ฌาดี ซือมียา นะ ตูฮัด บรี กะ ญา ตูโรจ บือกะ ซือมียา นะ ตูฮัด ปี ซือรูโลยํ เลอ." 12 เยซู ญา มือเลา กะฆีนี จะ "ลีฮัจ เลอ กู นะ มาแรฮ งัจบางัจ. กู นะ อาเมด รังวัน นะ กู บาวา มาแรฮ ซามา บีดา นะ บรี กะ ราตา ซือมียา ตูโรจ บือกะ โกะ ปือบูวัจ นะ ญา. 13 กู นี เลอ ฌาดี นู ลามูลา ฌางัน นู ปือญูดัฮ ฌาดี โซะ ปรือดู ฌางัน โซะ ฮูโฌก ฌาดี ตูฮัด ตะเดะ ลามูลา นูตู ตือดะ ฮาบิฮ ปือญูดัฮ เลอ." ญา จะ. 14 ซือนัง ซือลามัจ เลอ โกะ ซือมียา นู บาโซฮ กาเยด บาฌู นะ กูญา บีดา กูญา นะ บือเลฮ มาโซะ รอจ กะ ปูโฮด กายู นู บรี ฮีโดะ เตอ บีดา กูญา นะ บือเลฮ มาโซะ ปี เดะ ปีตู นังฆรี อีตู. 15 โซะ ลูวัยํ นังฆรี อาดา โกะ อาซู อาดา โกะ ซือมียา บือฆูรู อาเย-ลือมู เตอ โกะ ซือมียา บือกาเซฮ โกะ ซือมียา บูนอฮ กาวัด โกะ ซือมียา มือญือมัฮ กะ บราลา โกะ ซือมียา นู ซูกา นะ มืออูปัย นู บูวัจ ลาฆู มืออูปัย เตอ กูญา ซือมูฮา อาดา โซะ ลูวัยํ เลอ. 16 "กู นี เยซู กู บือเลฮ ซูโรฮ ฮูลู-บาลัก นะ กู บรี ญา ปี มือญาเระ ปือมือเลา อีนี กะ กาเญา นู อาดา เดะ โกะ ลูมอฮ นะ ตูฮัด. กู นี เลอ ฌาดี บือแนฮ นะ ราฌา ดาวิด ฌาดี บีตัก มูกัยํ นู บือซายา." เยซู ญา จะ. 17 ซือมืองัจ นะ ตูฮัด ฌางัน เจาเซา นู อีตู มือเลา จะ "มาแรฮ เลอ." ซือมียา นู ดืองัยํ ลาฆู อีนี บรี ญา มือเลา จะ "มาแรฮ เลอ." ซือมียา ดีฮา นู ดาฆา อาเย บรี ญา มาแรฮ เลอ. ซาปา นู อาดา ฮาตี บือคานะ โปด บรี ญา โอะ อาเย อีตู นู บรี ฮีโดะ ฮอย เตด ฆาโดฮ บายัยํ รือฆา นามา เลอ. 18 กู โยฮัน ปรีงัจ กะ ราตา ซือมียา นู ดืองัยํ กะ ปือมือเลา ตูโดฮ เดะ ซูรัจ อีนี. ดัฮ อาดา ซือมียา ดีฮา นะ บือตามัฮ ปือมือเลา บอฮ เดะ ซูรัจ อีนี ตูฮัด เดะ อาตัซ โปด นะ บือตามัฮ ลาฆู ซูซัฮ โตระ นู ฆาแรฮ เดะ ซูรัจ ดัฮ บรี กะ ซือมียา อีตู เลอ. 19 ดัฮ อาดา ซือมียา ดีฮา นะ กรัจ บูวัก ลาฆู นามา นู อาดา เดะ ซูรัจ ตูโดฮ อีนี ตูฮัด โปด นะ กรัจ บูวัก บาฮาเฆด นะ ซือมียา อีตู นู ญา อาดา เดะ ปูโฮด กายู นู บรี ฮีโดะ นู ญา อาดา ปัจ นังฆรี บาฌิ บือซรี เตอ บือกะ นู ฆาแรฮ เดะ ซูรัจ อีนี ดัฮ เลอ. 20 ซือมียา นู มือเลา ฌาดี ซะซี เดะ ลาฆู กะฆีนี กือมูฮา ญา มือเลา จะ "ซูโงฮ เลอ กู นะ มาแรฮ งัจบางัจ." บรี ฌาดี กะฆีเตอ เลอ. ตูฮัด เยซู เออ มาแรฮ เลอ. 21 มีตา เดะ ตูฮัด เยซู นะ ฮาลัย บรี ซือลามัจ กะ โกะ ซือมียา ซือมูฮา เลอ.