The Old Testament of the Holy Bible
Leitung-khuavannuai Siamna
1 A chilin Pathian in lei leh vaante a siam. 2 Ahihhangin, tui thukpi in lei a khuh a, lei pen lim leh mel neiin a dawk kei. Tua tuipi thukpi mial in a khuh a, tua tung ah Pathian' Kha in a opkhum hi. 3 Tua khitin Pathian in: Khawvak om hen, a schi a, khawvak hong om hi. 4 Pathian in tua khawvak a hoih chih a mu hi. Tua khitin Pathian in khawvak leh khawmial a kikhensak a, 5 khawvak pen, sun, chi-in a minvawh a, khawmial pen, zaan, chi-in a minvawh hi. Tua bangin nitaklam a om a, zingsang lam a om a, a ni khat ni ahi. 6 Tua khitin, Pathian in: Tuite kikal ah huihkhua zapi om henla, tuite kikhen hen, a chi a, tua bangin hong om hi. 7 Tua bangin, Pathian in huihkhua zapi a omsak a, huihkhua tunga tuite leh huihkhua nuaia tuite a kikhensak hi. 8 Pathian in tua huihkhua zapi pen, vaan, chi-in a minvawh hi. Tua bangin nitaklam a om a, zingsang lam a om a, a ni nih ni ahi. 9 Tua khitin, Pathian in: Huihkhua nuaia tui omte mun khat ah kigawm henla, gamhul hong dawk hen, a chi a, tua bangin hong om hi. 10 Pathian in tua gamhul pen Leitung, chi-in a minvawh a, tuipi kigawmkhawm pen Tuipite, chi-in a minvawh hi. Pathian in tua a hoih chih a mu hi. 11 Tua khitin, Pathian in: Leitung in sing-le-lou hingte pousak henla, tua sing-le-loute'n amau' chi tek chitang nei gahte suang hen, a chi a, tua bangin hong om hi. 12 Tua bangin, leitung in sing-le-lou hingte a pousak a, tuate'n amau' chi tek chitang nei gah a suang uh a, tua gahte sung ah chitangte a om hi. Pathian in tua a hoih chih a mu hi. 13 Tua bangin nitaklam a om a, zingsang lam a om a, a ni thum ni ahi. 14 Tua khitin, Pathian in: Sun leh zan kikhensak dingin vansang zapi ah vakte om henla, tuate mah khawhunte, nite leh kumte theih theihna chiamtehnate hi henla, 15 leitunga khawvak tangsak dingin vansang zapi-a vakte hi uhen, a chi a, tua bangin hong om hi. 16 Tua bangin, Pathian in vak lian nih a bawl a, sun hun uk dingin vak lianzaw pen a sep a, zan hun uk ding vak neuzaw pen a sep hi. Ama'n aksite zong a bawl hi. 17 Leitung tanvak dingin Pathian in vansang zapi ah, tuate a koih hi. 18 Tua bangin, sun hun leh zan hun uk ding leh, khawmial leh khawvak kikhensak dingin amaute a sep hi. Pathian in tua a hoih chih a mu hi. 19 Tua bangin nitaklam a om a, zingsang lam a om a, a ni li ni ahi. 20 Tua khitin, Pathian in: Tuipite sung ah ganhingte dim henla, tunglam ah, huihkhua zapi ah a leng thei ganhingte leng hen, a chi hi. 21 Tua bangin, Pathian in tuipi sunga ganhing lianpipite a siam a, tuia pai thei ganhingte zong a siam a, amau chitek suangthei ganhingtein tuipite sung a dim hi. Amau' chitek suang thei, kha neia leng thei ganhingte zong a siam hi. Pathian in tua a hoih chih a mu hi. 22 Pathian in amaute a vualzawl a: Chipha unla, hong pung unla, tuipi tuite' sung dim un. Tunga leng thei ganhingte zong hong pung unla, leitung hong dim un, a chi hi. 23 Tua bangin nitak lam a om a, zingsang lam a om a, a ni nga ni ahi. 24 Tua khitin, Pathian in: Leitung in amau chichi suang thei ganhingte suah henla, ganhonte, bokvak ganhingte, gamsate'n amau chi tek suang uhen, a chi a, tua bangin hong om hi. 25 Ahang bel, Pathian in amau chichi suang thei leitung gamsate leh ganhonte a bawla ahi. Leilaka bokvak ganhing, amau chitek suang theite khempeuh zong a bawl hi. Pathian in tua a hoih chih a mu hi. 26 Tua khitin, Pathian in: Eimah mel sun, i kibatpih mihing bawl ni. Ama'n tuipi sunga ngasate, huihkhua-a leng ganhingte, leitunga gamta gantate leh leilaka bokvak ganhingte khempeuh uk hen, a chi hi. 27 Tua bangin, Pathian in ama' kibatpihin mihing a siam hi. Pathian melsunin amah a siam a, pasal leh numei a siam hi. 28 Tua khitin, Pathian in amaute a vualzawl a: Chipha unla, hong pung unla, leitung hong dim unla, nuaisiah un. Tuipi sunga ngasate, huihkhua-a leng ganhingte, leitunga gamta ganhingte khempeuh uk un, a chi hi. 29 Tua khitin, Pathian in amaute kiang ah: En un, leitung maikaiha om louhing chitang nei khempeuh na an dingun kon pia ahi. Gah nei a, chitang nei singkung peuhmah zong kon pia hi. Noute dingin an ahi ding. 30 Leitunga gamsate khempeuh, huihkhua-a leng ganhingte khempeuh, leilaka gamta ganhingte khempeuh, nak thei khempeuhte' an dingin sing-le-lou hingte ka pia hi, a chi hi. Tua bangbangin hong om hi. 31 Pathian in a bawlsate khempeuh a mu a, hoih mahmah a sa hi. Tua bangin nitaklam a om a, zingsang lam a om a, a ni guk ni ahi.
1 Tua bangin, Pathian in lei leh vante leh a sunga omte khempeuh a siamkhinta hi. 2 A ni sagih ni chiangin, Pathsian in a nasepte khempeuh a zoukhinta hi. Tua bang ahih manin, a ni sagih ni-in, a nasepte khempeuh apan a tawlngata hi. 3 Pathian in a thilsiamte khempeuh a zawhkhittak manin, tua ni sagih ni a vualzawl a, a septuamta hi.
Adam leh Evi
4 Pathian in lei leh vante a siam laia lei leh vante thu hiai ahi. Tangtawn Toupa Pathian in lei leh vante a bawl laiin, 5 leitung ah gamlak loupate a om nai kei a, sing-le-loute zong a pou nai kei hi. Ahang bel, Tangtawn Toupa Pathian in leitung ah vuah a zusak nai kei a, loukhou dingin mihing zong a om nai kei hi. 6 Ahihhangin, leitung apanin tuihu a pawttou a, tua in leitung khempeuh a nomsak hi. 7 Tangtawn Toupa Pathian in leilak leivui apanin mi a bawl a, a nakvangte ah hinna hu a naklut a, tua mi hinna nei mihing a hong suak hi. 8 Tangtawn Toupa' n suahlama Eden ah, huan khat a bawl a, tua ah a mi bawl pasal a koih hi. 9 Tangtawn Toupa Pathian in tua ah singkung chi chih, eta kilawm leh neka limte a pousak hi. Tua huan laizang ah, hinna singkung leh a sia a pha theihna singkung a pousak hi. 10 Eden apanin, tua huan tui buak dingin lui khat a luang a, tua apanin tua lui a ka a, luinak li a kisuah hi. 11 Lui khatna Pishon ahi a, Havila gam sung khempeuh ah a kawiluan hi. Tua gam ah kham sik a om hi. 12 Tua gam kham sik a hoih mahmah hi. Singnai namtui manpha leh Onik suangmanpha zong a om hi. 13 Lui nihna Gihon ahi a, Kush gam kimkot ah a luang hi. 14 Lui thumna Hidekel ahi a, Ashur gam suahlam ah a luang hi. Lui lina Iufratis ahi. 15 Tangtawn Toupa Pathian in tua pasal a pii a, Edena huan khoua kem dingin a koihta hi. 16 Tangtawn Toupa Pathian in tua pasal thu a pia a: Huana singkung khatpeuh apan gah na ne thei ding. 17 Ahihhangin, a sia a pha theihna singkung apan gah bel na nek louh ding ahi. Ahang bel, tua singkung apan gah na nek ni ni-in na si ngeingei ding hi, a chi hi. 18 Tangtawn Toupa Pathian in: Pasal amah kia-a tangom a hoih kei. Amah adingin a kituak huhmi ka bawl ding, a chi hi. 19 Tangtawn Toupa Pathian in leilak apanin gamlak gamsa chi chih a bawlta a, huihkhua-a leng ganhing chi chih a bawlta. Tuate minphuah dingin, tua pasal kiang ah hon paipih a, ama'n a na phuah min tek ganhing min a hidenta hi. 20 Tua bangin, pasal in gantate' min, huihkhua-a leng ganhingte, gama ta ganhingte' min a phuak vek hi. Ahihhangin, pasal adingin a kituak huhmi a om kei. 21 Tua bang ahih manin, Tangtawn Toupa Pathian in Adam ihmut limtakin a ihmusak a, a ihmut kalin, a Nakguhte khat a lakhia a, a lakkhiakna mun sain a dimsak kik hi. 22 Tangtawn Toupa Pathian in Adam' nakguh a lak apanin numei khat a bawl a, Adam kiang ah hon paipih hi. 23 Adam in: Hiai, ka guhte apana guh, ka sa apana sa ahi. Pathian in pasal apan a lakkhiak ahih manin, Numei chi-in ka minvawh ding, a chi hi. 24 Hiai hang mahin, pasal in a nu a pa a nuse ding a, a zi tawh a kigawm ding a, amaute sa pum khat hong suak ding uhi. 25 Adam leh a zi vuaktang ahi tuak uh a, ahihhangin, a maizum kei uhi.
Mihing Zolna
1 Tangtawn Toupa Pathian in a siamsa gamsate lak ah gul a gitlouh pil pen hi. Tua gul in numei kiang ah: Huan sunga singkung peuhpeuh apan na nek louh ding uh ahi, Pathian in hon chi taktak maw? a chi hi. 2 Tua numei in gul kiang ah: Huan sunga sing gahte ne thei mah n'ung. 3 Ahihhangin, Pathian in: Huan laizanga sing pen bel a gah na nek louh ding uh ahi, khoih zong na khoih louh ding uh ahi, na nek uleh na si ding uh, hon chi ahi, a chi hi. 4 Tua gul in numei kiang ah: Si peuhmah kei n'u teh. 5 Tua sing gah na nek nini-un, na mitte uh hong vak ding a, a sia a pha theia Pathian bang ding na hi uh, chih Pathian in a theih man ahi zaw, a chi hi.
Mihing Pukna
6 Tua bangin, numei in tua sing gah nek dingin a duh a, a mitin a enlah a, amah pilsak dingin a lunggulh hi. Tua bangin, ama'n sing gah a lou a, a neta hi. Amah tawh omkhawm a pasal zong a pia a, a pasal in zong a neta hi. 7 A mitte uh hong vakta a, vuaktang ahih lam uh hong kiphawkta uh a, theipi tehte a khuikhawm uh a, kikhuhnain a nei uhi.
Mihing tunga Thukhenna
8 Tua khitin, Tangtawn Toupa Pathian, tua huan sung ah, nitaklam nineem laiin hong pai hi. Amaute'n a aw a za uh a, huan sunga sing lak ah Pathian apanin a kiseel uhi. 9 Tangtawn Toupa Pathian in tua pasal a sam a: Adam, koia om na hia? a chi hi. 10 Ama'n: Huan sunga nong pai laiin, na aw ka za a, vuaktang ka hih manin, ka lau a, ka kiseel hi, a chi hi. 11 Tangtawn Toupa Pathian in: Kua'n vuaktang na hi, chi-a hon hilh ahia? Nek louh ding, chi-a kon kham sing gah ne na hita maw? a chi hi. 12 Adam in: Ka ompih dinga non piak numei in sing gah hon pia a, ka neta ve, a chi hi. 13 Tangtawn Toupa Pathian in numei kiang ah: Bang hih na hita maia? a chi hi. Numei in: Gul in hon khemzou a, ka neta ve, a chi hi. 14 Tangtawn Toupa Pathian in gul kiang ah: Hiai thil na hih manin, ganta leh gamsa khempeuh sanga hamsiat zawk na hi. Na gilin na kitholhta ding a, na damsung teng leivui na neta ding. 15 Nang leh numei kal ah, na suan leh numei suan kal ah, kimelmakna ka koih. Numei' suan in na lutang a gawpsak ding a, nang a khetul na tu ding, a chi hi. 16 Tangtawn Toupa Pathian in numei kiang ah: Na lungkhamna leh na nau neih thuakgimna nakpitakin ka behlap ding a, natakin nau na nei ding. Na lunggulh na pasal ahi ding a, ama'n nang hon uk ding, a chi hi. 17 Tangtawn Toupa Pathian in Adam kiang ah: Na zi thu na mang a, Tua sing apan na nek hetlouh ding ahi, chi-a tua sing tawh kisaia kon kham sing gah na nek manin, nang ziakin lei ka hamsiatta. Na damsung teng gimtak leh tawltakin lei gah na neta ding. 18 Lei in nang adingin lingte leh loulingneite a suah ding a, gamlak louhingte na neta ding. 19 Leia na kiknawn mateng, na maitanga khawul luangin an na neta ding. Lei apan lakkhiak leivui na hih manin, leivui ah na kiknawn ding, a chi hi. 20 Adam in a zi, mihing teng khempeuh' nu hong hi ding ahih manin, a min dingin Evi a sa hi. 21 Tua khitin, Tangtawn Toupa Pathian in Adam leh a zi adingin, savun puanakte a bawlsak a, amaute a silhsak hi. 22 Tua baan ah, Tangtawn Toupa Pathian in: Ngai un, tua mihing, a sia a pha theiin eite laka khat a bangta. A khuta sawk in hinna sing gah louin a ne kha ding a, tua banga a hinden louh nadingin hih ni, a chi hi. 23 Tua bangin, Tangtawn Toupa Pathian in amah a lakkhiakna lei mah khou dingin, tua Eden huan sung apanin Adam a hawlkhia hi. 24 Tangtawn Toupa Pathian in amah a hawlkhiak nungin, hinna sing kung zotna lampi veng dingin, Edena Huan suahlam pang ah Cherubte leh namsau kuang zualzual, lehlam lehlama kipei thei khat a koih hi. Judall.
Kaina leh Abel
1 Adam in a zi Evi a luppih a, a zi a gai a, a nau a suak a, Evi in: Tangtawn Toupa' huhnain ta pasal ka neita, chi-in Kaina a sa hi. 2 Tua nungin Kaina' sanggampa Abel zong a nei hi. Abel bel belam vulmi ahi a, Kaina bel loukhou mi ahi. 3 Hun bangtan hiam nungin hibang thil hong om hi. Kaina in a lou apan haigahte hon tawi a, Tangtawn Toupa' mai ah thawnpiak thillatin a laan hi. 4 Abel in bel a belam hon laka piang masate apan, a thau beute a laan hi. Tangtawn Toupa'n Abel leh a thillat a sang a, 5 ahihhangin, Kaina leh a thillat bel a sang kei hi. Tua bang ahih manin, Kaina a heh mahmah a, a maigumta hi. 6 Tangtawn Toupa'n Kaina a houpih a: Banghanga heh mahmah a, banghanga maigum na hia? 7 A dik hih lechin, saana om lou ding na hi maw? A dik na hih kei leh bel, khelhna kongkhak bula kual a, nang hon uk nuam gige ahi. Nang amah na uk zawk ding ahi vo oi, a chi hi. 8 Kaina in a sanggampa Abel a zolkhia a, gamlaka a om laiun, a sanggampa Abel a sual a, a that hi. 9 Tangtawn Toupa'n Kaina kiang ah: Na sanggampa Abel koia om ahia? a chi hi. Kaina in a dawng a: Thei ke'ng. Ka sanggampa donpa ka hi-a hia? a chi hi. 10 Tangtawn Toupa'n: Bang hih na hita maia? Ngai in! Na sanggampa' sisan in leilak apan kei hon sam hi. 11 Tuin lei in nang hon hamsiatta. Na khut tung apan, na sanggampa' sisan saang dingin lei a kamka hi. 12 Lou na khawh chiangin, lei in nang adingin gah a suah nawn kei ding. Leitung ah galtai leh vakvai na hi gige ding, a chi hi. 13 Kaina in Tangtawn Toupa kiang ah: Non gawtna ka thuak zawh ding ahi kei. 14 En in, tuni'n hiai gam apan non hawlkheta. Kei apan na mai na selta ding a, leitung ah galtai leh vakvai ka suakta ding. Kei hon mu kuapeuh in hon that ding hi, a chi hi.
Pathian Phawklou Kaina Khanggui
15 Tangtawn Toupa'n amah kiang ah: Kaina that mi kuapeuh a leh sagihin ka thuk ding, a chi a, Kaina mu peuhmah in a thah louh nadingin, Kaina' sa tung ah chiamtehna khat a koih hi. 16 Tua bangin, Kaina, Tangtawn Toupa' ompihna apan a paikhia a, Eden suahlam ah Nod gama teng dingin a paita hi. 17 Kaina in a zi a luppih a, a zi a gai a, Enokh a nei hi. Kaina in khawpi khat a lam a, tua khawpi min dingin, a tapa tamin Enokh a sa hi. 18 Enokh in tapa Irad a nei a, Irad in Mehujael a nei a, Mehujael in Methushael a nei a, Methushael in Lamekh a nei hi. 19 Lamekh in zi nih a nei a, khat' min Ada ahi a, a dang khat' min Zila ahi. 20 Ada in tapa Jabal a nei a, Jabal bel puanbuka teng mite leh panvulmite laka mi masa ahi. 21 Jabal' sanggampa Jubal ahi. Jubal bel kaihging leh tamngai tum siamte laka mi masa ahi. 22 Zila in zong tapa a nei a, Tubal Kaina ahi. Amah sumsan leh sik hiamhei sekmi ahi. Tubal Kaina' sanggamnu Naama ahi. 23 Lamekh in a zite kiang ah: Ada leh Zila, ka thu ngai un, Lamekh' zite aw, ka thute ngai un: Pasal khat in hon liamsak manin, amah ka that. Tangvalnou khat in hon liamsak manin, amah ka that. 24 Tangtawn Toupa'n Kaina' phuba a lehsagiha a lak leh, Lamekh' phuba a leh 77-in a la ding, a chi hi.
Pathian Phawk Seth Khanggui
25 Adam in a zi a luppih kik a, a zi in tapa khat a nei hi. Pathian in Kaina' thah Abel tangin suan dang khat hon peta, chi-in Seth a sa hi. 26 Seth in zong tapa a nei a, haksapi-in Enosh a piang hi. Tua hun laiin, Seth in dahna hangin Tangtawn Toupa' min a lou panta hi.
Adam' Suante Noa dong
1 Adam' suante khangthu hiai ahi. Pathian in mihing a siam laiin, Pathian batpihin amah a bawl hi. 2 Ama'n pasal leh numeiin amaute a siam a, amaute a vualzawl hi. Amaute a siam ni-in, amaute mihing" chi-in a minvawh hi. 3 Adam bel kum 130 a nuntak nungin, amah batpih amah bangbang tapa khat a nei a, a min dingin Seth a sa hi. 4 Seth a pian nungin Adam kum 800 a nungta lai a, tapa dangte leh tanu dangte zong a nei lai hi. 5 Adam' nuntak sung khempeuh kum 930 ahi a, tua khitin a sita hi. 6 Seth kum 105 a nuntak nungin tapa Enosh a nei hi. 7 Enosh a neih nungin Seth kum 807 a nungta lai a, tapa dangte leh tanu dangte zong a nei lai hi. 8 Seth nuntak sung khempeuh kum 912 ahi a, tua khitin a sita hi. 9 Enosh kum 90 a nuntak nungin tapa Kenan a nei hi. 10 Kenan a neih nungin, Enosh kum 815 a nungta laia, tapa dangte leh tanu dangte zong a nei lai hi. 11 Enosh' nuntak sung khempeuh kum 905 ahi a, tua khitin a sita hi. 12 Kenan kum 70 a nuntak nungin tapa Mahalalel a nei hi. 13 Mahalalel a neih nungin, Kenan kum 840 a nungta lai a, tapa dangte leh tanu dangte zong a nei lai hi. 14 Kenan' nuntak sung khempeuh kum 910 ahi a, tua khitin a sita hi. 15 Mahalalel kum 65 a nuntak nungin tapa Jared a nei hi. 16 Jared a neih nungin, Mahalalel kum 830 a nungta lai a, tapa dangte leh tanu dangte zong a nei lai hi. 17 Mahalalel' nuntak sung khempeuh kum 895 ahi a, tua khitin a sita hi. 18 Jared kum 162 a nun tak nungin tapa Enokh a nei hi. 19 Enokh a neih nungin, Jared kum 800 a nungta lai a, tapa dangte leh tanu dangte zong a nei lai hi. 20 Jared' nun tak sung khempeuh kum 962 ahi a, tua khitin a sita hi. 21 Enokh kum 65 a nuntak nungin tapa Methusela a nei hi. 22 Methusela a neih nungin, Enokh kum 300 sung Pathian tawh kikhawlin a nungta a, tapa dangte leh tanu dangte zong a nei lai hi. 23 Enokh' nuntak sung khempeuh kum 365 ahi. 24 Enokh bel Pathian tawh kikhawla nungta gige a hih laitakin, Pathian in a lamang a, leitung ah a om nawn kei hi. 25 Methusela kum 187 a nuntak nungin tapa Lamekh a nei hi. 26 Lamekh a neih nungin, Methusela kum 782 a nungta lai a, tapa dangte leh tanu dangte zong a nei lai hi. 27 Methusela' nuntak sung khempeuh kum 969 ahi a, tua khitin a sita hi. 28 Lamekh kum 182 a nuntak nungin tapa khat a nei a, 29 ama'n: Tangtawn Toupa'n lei a hamsiatna hanga i khut nasep leh sepgimna apan hiai tapa in hon khamuan ding hi tah, chi-in, a tapa' min dingin Noa a sa hi. 30 Noa' pian nungin, Lamekh kum 595 a nungta lai a, tapa dangte leh tanu dangte zong a nei lai hi. 31 Lamekh' nuntak sung khempeuh kum 777 ahi a, tua khitin a sita hi. 32 Noa kum 500 a nuntak nungin tapate Shem, Ham leh Jafeth a nei hi.
Tuichiimpi-a Gawtna
1 Leitung ah mihing hong tam semsem a, tanute tampi hon neih chiangun, hibang thu hong tung hi: 2 Pathian' tapate'n mihing' tanute melhoih a sa uh a, a deih peuh uh a kitenpih uhi. 3 Tua bang ahih manin, Tangtawn Toupa'n: Mihing a si thei si-le-sa ahih manin, ka Kha in buan nilouh lou ding a, a nite kum 120 hi ding hi, a chi hi. 4 Tua hun lai leh a nungin zong, Pathian' tapate'n mihing tanute a luppih ua, tate a nei uh a, a tate uh Nefilimte, tanglai galhat minthangte ahi uhi.
Pathian Limsakloute Gawt ding
5 Tangtawn Toupa'n mihing' gitlouhna hong khan dan a mu a, a lungsim suangtuahte uh a gilou lam kia ahi gige, chih a thei hi. 6 Tua bangin leitunga mihing a bawl thu ah Tangtawn Toupa a lungkham a, a lungtang a na mahmah hi. 7 Ama'n: Mihing ka na siamta a, leitung maikaih apan amaute ka nulmang mai ding. Mihing leh gamsa leh bokvaka kitholhte leh huihkhua-a leng ganhingte peuhmah ka nulmang vek ding. Amaute ka siamna thu ah ka lungkham hi, a chi hi.
Pathian Limsakte Hotdam ding
8 Ahihhangin, Noa in Tangtawn Toupa' mitmuhin deihsakna a tang hi. 9 Noa' suante' khangthu laibu hiai ahi. Noa midiktat ahi a, ama' hunlaia mite laka gensiat baanglou ahi a, Pathian tawh kikhawlin a nungta hi. 10 Noa in tapa thum a nei a, amaute Shem, Ham leh Jafeth ahi uh. 11 Pathian' mitmuhin mihingte'n leitung ninsakin a segawpsak uh a, hiamgamna tawh a kidimsak uhi. 12 Mihingte' gamtat nina kisia ahih manin, leitung a sekhinta, chih Pathian in a mu hi. 13 Tua bangin, Pathian in Noa kiang ah: Mihingte hanga leitung hiamgamna tawh kidimta ahih manin, hinna nei khempeuh ka beisak ding. Ngai in, tuin, amaute leitung tawh ka hihsekhawm ding. 14 Tua bang ahih manin nang adingin gofar singin longpi bawl inla, a sung ah dantante bawl in. A sung leh a pua alkatara in zut in. 15 Hibangin long na bawl ding ahi: A dunglam tong 300-a sau, a vailam tong 50-a lian, a sanlam tong 50-a sang ahi ding ahi. 16 A inntung khuhna leh a baang dawn kikal ah, khawvak lutna tawhlet, tong khata lian na bawl paisuak ding ahi. A pang ah kongkhak na bawl ding a, longpi chial thum neiin, chial khatna, chial nihna, chial thumna a om ding ahi. 17 Vaan nuaia thilsiam khempeuh, hinna neia nak thei khempeuh hihmang dingin tuichimpi ka tungsak ding a, leitunga hinna nei khempeuh a mangthang ding. 18 Ahihhangin nang tawh kal ah ka thukhun ka kipsak ding. Nang bel, na tapate, na zi leh na tapate' zite tawh longpi ah na lut ding uh ahi. 19 Ganhing khempeuh kop khat zel, a nu leh a pa, na lutpih ding a, nang hinna leh amaute hinna longpi sung ah na humbitkhawm ding hi. 20 Vasa nam kim, ganta leh leia bokvak ganhing nam kim kop khat zel na kiang ah hong pai ding uh a, nang amaute' nuntakna na humbit ding ahi. 21 Nang leh amaute' nek ding an tuamtuam na kaikhawm ding a, amaute leh nang adingin an ahi ding hi, a chi hi. 22 Tua bangin, Pathian' thupiak bangbangin Noa in bangkim a hihvek hi.
Longpi Sung Lutna
1 Tangtawn Toupa'n Noa kiang ah: Na khawpihte laka, ka maia na diktatna ka muhtak manin, nang leh na inkawte longpi sung ah hong lut un. 2 Ganhing sa siangte lak ah kop sagih tek, a nu leh a pa, tua khit chiangin, ganhing sa siangloute lak ah kop khat tek, a nu leh a pa, hon lutpih in. 3 Tua baan ah, huihkhua-a leng ganhingte zong, leitunga a nam nama a kisuansawn theih nadingin, kop sagih tek hon lutpih in. 4 Ahang bel, tu apan ni sagih nung chiangin, letung ah ni 40 leh zan 40 sung vuah ka zusak ding a, ka bawlsa, a nak thei thilhing peuhmah leitung maikaih apan phiatmang ding ka hi, a chi hi. 5 Tua bangin, Noa in Tangtawn Toupa' thupiak bangbangin a hih vek hi. 6 Leitunga tuichimpi a tun laiin, Noa kum 600-a upa ahita. 7 Noa leh a zi leh a tapate leh a tapate' zite, tuichimpi apan a bit nadingun longpi sung ah a lut uhi. 8 Ganhing sa siangte leh sa siangloute zong a kopkopin longpi sung ah a lut uhi. Huihkhua-a leng ganhingte leh leia bokvaka kitholh ganhingte zong long sung ah a lut uhi. 9 A nu leh a pa, a kopkopin Noa kiang ah, Pathian in Noa thu a piak bangin, longpi sung ah a lut uhi. 10 Ni sagih nungin, tuichimpi leitung ah hong tung panta hi. 11 Noa kum 600 ahih kum, a kha nihna, a ni sawmlenih ni-in, tuichimpi hong tung panta hi. Tua ni mahin Pathian in tui thukpi apan tuinakte a phultousak a, van vuah kongpite a hong a, 12 leitung ah ni 40 leh zan 40 sung vuahpi a chiinin a chiin hi. 13 Tua ni mah-in, Noa leh a tapate Shem, Ham leh Jafeth, tua banin, a zi leh a tapate' zite thum tawh longpi sung ah a lut uhi. 14 Amaute leh gamsa peuhmah, ganta peuhmah, leia bokvak ganhing peuhmah, lengthei ganhing peuhmah, khanei vasa peuhmah a nam namin a lut uhi. 15 Tua bangin, nak thei ganhing namkim, a kop kopin longpi sung ah Noa kiang ah a lut uhi. 16 Noa kianga Pathian' thupiak bangbanga longpi sunga lut ganhing namkimte a nu leh a pa ahi. Tua khitin, Tangtawn Toupa'n amah long kongkhak a khakkhum hi. 17 Ni 40 sung, leitung ah tuichimpi a khang a, tui a saan semsem chiangin, tui in lei tunglam ah longpi a laamtou tou hi. 18 Tui a sang semsem a, leitung ah a tam semsem a, tui tung ah longpi a kilaam tou hi. 19 Leitung ah tui a tam law mahmah a, vannuai mualsangte khempeuh a tum hi. 20 Mualsangte tung nangawn ah tong sawmlenga sanga sangzaw nangawn dongin tui a vung hi. 21 Tua bangin, leitunga paithei ganhingte, lengthei ganhingte, gantate, gamsate, leitunga bokvaka kitholh ganhingte leh mihing teng khempeuh a si hi. 22 Leihula om, nakvanga nakthei ganhingte khempeuh a si uhi. 23 Leitung maikaiha ganhing khempeuh phiatmang ahi vek hi. Mihingte, ganhingte, leia bokvak ganhingte, huihkhua-a leng ganhingte khempeuh leitung apan phiatmang ahi vek hi. Noa leh longpi sunga amah tawh omte kia a bit uhi. 24 Tua bangin ni 150 sung leitung ah tuichimpi a uang mahmah hi.
Tuichimpi Kiam
1 Pathian in Noa leh longpi sunga a ompih gamsate leh gantate a phawk gige a, leitung ah huih a nungsak a, tuite hong kiam panta hi. 2 Tui thukpi apan tuinakte leh vana vuah kongkhakte a khaak a, vuah a zusak nawn kei hi. 3 Leitung apan tui a kiam hiaihiai a, ni 150 sung a kiam nungin, 4 a kha sagihna, a ni sawmlesagih ni-in, tua longpi, Ararat mualte tung ah a kinga hi. 5 Tui a kiamsuk lailai a, kha sawmna, a ni khat ni-in mualdawnte a dawk panta hi. 6 Ni 40 a bei nungin, Noa in long tawhlet a bawl a hong a, 7 va-ak khat a khah a, leitunga tui a kan mateng tua va-ak a lengkhe zel a, hong kik zel hi. 8 Tua nungin ama'n leitung ah tui a kiamta hiam, chih theih nadingin, vakhu khat a khah leuleu hi. 9 Ahihhangin, leitung teng tui in a khuh lai manin, tua vakhu in khengak nading a mu kei a, longpi ah amah kiang ah hong kilehkik nawn hi. Ama'n a khut a nazankhia a, tua vakhu longpi sung ah amah kiang ah a lalut hi. 10 Ama'n ni sagih dang a ngak nungin, longpi apanin vakhu khat a khah kik leuleu hi. 11 Nitaklam in tua vakhu hong kik nawn a, a mukin oliv singteh khat hon tuah hi. Tua bangin, Noa in leitung apan tui a kiamta, chih a thei hi. 12 Ama'n ni sagih dang a ngak nungin, vakhu khat a khah kik leuleu a, ahihhangin, tua vakhu amah kiang ah hong kilehkik nawn kei hi. 13 Noa' upat kum 601-na, a kha khatna, a ni khat ni-in, hibang thil hong tung hi: Leitung apan tui a kangta a, Noa in a longpi tung a hawkkhia a, a khawdak a, leitung apan tui a kangta, chih a mu hi. 14 A kha nihna, a ni 27 ni-in lei a hulta hi. 15 Pathian in Noa kiang ah: 16 Long apan pawtkhia inla, na zi, na tapate leh na tapate' zite pawt-khiakpih in. 17 Na ompih ganhing teng khempeuh, a leng thei ganhingte, gantate, leia bokvaka kitholh ganhingte pawtkhesak in. Leitung ah a kithehdalh ding uh a, chiphatakin leitung ah hong pung ding uhi, a chi hi. 18 Tua bangin, Noa, a tapate tawh, a zi tawh, a tapate' zite tawh a pawtkhia uhi. 19 Leitunga a pai thei ganhingte khempeuh, a leng thei ganhingte khempeuh, a nam namin, longpi apan a pawtkhia uhi.
Noa in Pathian Bia
20 Tua chiangin, Noa in Tangtawn Toupa' mai ah maitam a dawh a, ganhing sa siangte leh leng thei ganhing sa siangte khempeuh apan la-in, maitam tung ah haltum thillatte a laan hi. 21 Tangtawn Toupa'n tua haltum thillat gim namtui a za a, a lungsung ah: Mihing a neu apan gilou ngenta suangtuah hi mah leh, mihing hangin lei ka hamsiat nawn kei ding a, tu-a hinna khempeuh ka phiatmang bangin ka phiatmang ngei nawn kei ding hi. 22 Leitung a om lai teng, hai pawi hun leh anlak hun, nipi khawlum hun leh phalbi khawvot hun a om ding a, sun leh zan a bei kei ding, a chi hi.
Noa tawh kala Pathian' Thukhun.
1 Tua nungin, Pathian in Noa leh a tapate a vualzawl a, amaute kiang ah: Hong chipha unla, hong pung unla, leitung luahdim un. 2 Noute launa leh kihtakna, leitung gamsate leh huihkhua-a leng thei ganhingte leh leia bokvaka kitholh ganhingte leh tuipi sunga ganhingte tung ah a om ding. Amaute khempeuh, noute' khut sung ah kon pia a, 3 hinna neia nak thei leh leitunga gamta ganhingte khempeuh na an uh ahi ding. Louhingte kon piak bangin, tuate a vekin kon pia ahi. 4 Ahihhangin, sa peuhpeuh a hinna sisan tawh na nekkhawm peuhmah louh ding uh ahi. 5 Na hinna sisan taangin ditna sisan ka ngiat ding. Ganhing khempeuh tung ah zong ka ngiat ding a, mihing tung ah zong, a sanggam' sisan taangin ama' sisan ka ngiat ding hi. 6 Pathian in ama' batpiha mihing a bawl a hih manin, mihing' sisan suah mi' sisan mihing mah in a suah ding. 7 Noute bel hong chipha unla, hong pung un. Leitung ah hong pung unla, leitung luahdim un, a chi hi. 8 Tua khitin, Pathian in Noa leh a ompih a tapate kiang ah: 9 Ngai un, noute leh na suante uh tawh kal ah ka thukhun ka kipsak ding. 10 Na ompih ganhing, longpi apan na pawtkhiakpih khempeuh uh, a leng thei ganhingte, gantate, leh gamsa khempeuh, leitunga ganhing khempeuh tawh kala thukhun zong ahi ding hi. 11 Noute tawh kal ah ka thukhun ka kipsakta: Tuichim tuite'n hinna nei khempeuh a mangthangsak ngei nawn kei ding a, leitung hihse dingin tuichimpi a tung ngei nawn kei ding hi, a chi hi. 12 Tua chi-in, Pathian in: Noute leh na ompih ganhing khempeuh tawh kala thukhun ka bawl, khangsawn sawna thukhun hi ding chiamtehna hiai ahi: 13 Meikaite lak ah ka sakhituihup ka koihta, leitung leh kei kala thukhun chiamtehna ahi ding hi. 14 Leitunga meite ka kaisak a, tua meikaite laka sakhituihup hong kilat peuhmah chiangin, 15 nang leh ganhing namkim tawh kei kala ka thukhun ka thei gige ding. Hinna neite mangthangsak dingin tuite, tuichimpi a suak ngei nawn kei ding. 16 Meikaite laka sakhituihup hong kilat chiangin, ka en ding a, leitunga hinna nei namkim leh Pathian kala Tangtawn thukhun ka thei gige ding, a chi hi. 17 Tua bangin, Pathian in Noa kiang ah: Leitunga hinna nei khempeuh leh kei kala ka kipsak thukhun chiamtehna hiai ahi, a chi hi.
Noa' Tapate
18 Long apan hong pawtkhia Noa' tapate Shem, Ham leh Jafeth ahi. Ham bel Kanan' pa ahi. 19 Hiaite Noa' tapa thumte ahi uh a, amaute apanin leitung luah mihingte hong piang ahi.
Ham' Khelhna
20 Noa bel loukhou mi ahi a, grep huan a bawl hi. 21 Tua grepzu a dawn takin a kham a, a puanbuk sung ah puan beiin a lum hi. 22 Kanan' pa Ham in a pa' vuaktanna a mu a, a inn pua-a a sanggam nihte a hilh hi. 23 Shem leh Jafeth in bel puan khat a la uh a, a liangkou tuak uah a zawng uh a, nungtawnin a pa uh vuaktanna a vakhuh uhi. A pa uh vuaktanna mu lou dingin lehlam a nga uh a, a pa uh vuaktanna a mu kei uhi. 24 Noa zukham a khanlawh takin, a tapa naupangpen in ama' tunga a thilhih a thei hi.
Kanan Hamsiatna
25 Noa in: Kanan ka hamsiat hi! A sanggamte nuaia sila niampen ahi ding, a chi hi.
Shem leh Jafeth Vualzawlna
26 Tua khitin, Noa in: Tangtawn Toupa, Shem' Pathian phatin om hen! Kanan zaw Shem' silain om hen. 27 Pathian in Jafeth' gam keklian henla, Shem puanbukte ah amah teng henla, a silain Kanan om hen, a chi hi.
Noa' Sihna
28 Tuichimpi tun nungin, Noa kum 350 a nungta lai hi. 29 Noa nuntak sung khempeuh kum 950 ahi a, tua khitin a sita hi.
Leitunga Minamte Kipatna
1 Noa tapate Shem' Ham leh Jafeth khangthu hiai ahi. Tuichimpi tun nungin, amaute'n tapate a nei uhi.
Jafeth' Suante
2 Jafeth' tapate Gomer, Magog, Madai, Javan, Tubal, Meshek leh Tiras ahi. 3 Gomer' tapate Ashkenaz, Rifath leh Togarma ahi. 4 Javan' tapate Elisha, Tarshish, Kitim leh Dodanim ahi. 5 Pathian in hiaite lak ah tuipi gei gamte a hawm a, a nam nam, a beh beh leh a innkuan kuanin gam a nei uh a, amau' pau tekin a pau uhi.
Ham' Suante
6 Ham' tapate Kush, Mizraim, Put leh Kanan ahi. 7 Kush' tapate Seba, Havila, Sabta, Raama leh Sabteka ahi. Raama' tagate Sheba leh Dedan ahi. 8 Kush bel Nimrod' pa hong hi ahi. Nimrod bel leitunga galhat khawkheng hong hi ahi. 9 Amah Tangtawn Toupa' mai ah sabengmi hattak ahi a, mite'n: Amah zaw Tangtawn Toupa' maia sabeng mihat Nimrod ahi, chi-in paunakin a nei hiai uhi. 10 Shinar gama Nimrod vaihawmna khawpi masate Babel, Erek, Akad leh Kalne ahi. 11 Amah tua gam apanin Asuria gam ah a pai a, Ninevi, Rehoboth, Ir, Kala khawpite a lam hi. 12 Ninevi leh Kala kikala Resen khawpi zong a lam hi. Tua bel, khawpi thupi mahmah khat ahi. 13 Mizraim bel Ludte, Anamte, Lehabte leh Naftute, 14 Pathruste, Kaslute leh Kaftorte' pu bul ahi. Kaslute apan Filistiate hong piang ahi.
Kanan' Suante
15 Kanan' tapa upapen Sidon ahi a, a nihna Heth ahi. 16 Tua baan ah Kanan bel Jebuste, Amorte, Girgaste, 17 Hivte, Arkate, Sinte, 18 Arvadte, Zemarte leh Hamathte' pa ahi. Tua nunglamin Kanan' suante a kithehdalh uhi. 19 Tua bangin, Kanante gamgi, Sidon apan Gerar lam ah Gaza dong ahi a, tua baan ah, Sodom, Gomora, Adma leh Zeboim lam ah Lasha dong ahi. 20 Hiaite Ham' suante, a nam a nam, a beh a beh leh a innkuan kuan ua kikhen ahi uh a, amau' pau tekin a pau uhi.
Shem' Suante
21 Shem in zong tapate a nei hi. Amah Eber suante' pu bul ahi. Amah Jafeth upa ahi. 22 Shem' tapate Elam, Ashur, Arfaksad, Lud leh Aram ahi. 23 Aram' tapate Uz, Hul, Gether leh Mesh ahi. 24 Arfaksad' tapa Shela ahi a, kichihna zong om. Shela' tapa Eber ahi. 25 Eber in tapa nih a nei a, khat min Peleg ahi. Ama' huna leitung gam kikhen ahih mana tua min kisa ahi. Peleg' sanggampa' min Joktan ahi. 26 Joktan bel Almodad, Shelef, Hazarmaveth, Jera, 27 Hadoram, Uzal, Dikla, 28 Obal, Abimael, Sheba, 29 Ofir, Havila leh Jobab pa hong hi ahi. Hiaite khempeuh Joktan' tapate ahi. 30 Amaute tenna gam Mesha khawpi apan suahlam tanggama Sefar lama kizalh ahi. 31 Hiaite Shem' tapate, a khang a khang, a nam a nam leh a beh a beh-a kikhente ahi uh a, amau' pau tekin a pau uhi. 32 Hiaite Noa' tapate, amau nam nama khang kisuansawn dan ahi. Tuichimpi tun nungin, hiaite apanin leitung namte, leitung ah a kithehzak uhi.
Babel Inn-sang
1 Leitung mi khempeuh pau khat neia, pau khata pau a na hi uhi. 2 Mite suahlam apan a kikhinsuk laiun, Shinar gam ah phaizang khat a mu uh a, tua ah a teeng uhi. 3 Amaute'n: Kisa ni, teklei vel ni-in, haltak ve ni, a kichi uhi. Tua bangin, suang taangin teklei a zang uh a, a belhkip nadingin simen taangin alkatara a zang uhi. 4 Tua baan ah, amaute'n: Kisa ni, leitung gam tenga i kithehzak louh nadingin, khawpi khat leh van sun ding innsang khat lamin i min thangsak ve ni, a kichi uhi. 5 Tua khitin, mihing tate' khawpi lam leh innsang lam en dingin, Tangtawn Toupa hong paisuk hi. 6 Tangtawn Toupa'n: En dih ua, amaute minam khat, pau khata pau ahi uh a, hibang thil hih kipanta ahi uh. A tup peuh uh hih zou mawk ding a hita uh. 7 Kisa ni, paisukin, pau a kitheihtuah louh nadingun a pau uh hihbuai ni, a chi hi. 8 Tua bangin, Tangtawn Toupa'n amaute tua apanin leitung gam teng ah a kithehzaksak a, khawpi lam a tawpsan uhi. 9 Tua banga Tangtawn Toupa'n leitung pau a hihbuai manin, tua khawpi min dingin Babel a sa uhi. Tangtawn Toupa'n tua apanin amaute leitung gamteng ah a kithehzaksakta hi.
Shem' Suante Abraham dong
10 Shem' suante khangthu hiai ahi. Tuichimpi tun nung kum nihin, Shem in tapa Arfakshad a nei a, tua laiin, amah kum 100-a upa ahita. 11 Arfakshad a neih nungin, kum 500 a nungta lai a, tapa dangte leh tanu dangte zong a nei lai hi. 12 Arfakshad kum 35 a hihin, tapa Shela a nei hi. 13 Shela a neih nungin, kum 403 a nungta lai a, tapa dangte leh tanu dangte zong a nei lai hi. 14 Shela kum 30 a hihin, tapa Eber a nei hi. 15 Eber a neih nungin, kum 403 a nungta lai a, tapa dangte leh tanu dangte zong a nei lai hi. 16 Eber kum 34 a hihin, tapa Peleg a nei hi. 17 Peleg a neih nungin, kum 430 a nungta lai a, tapa dangte leh tanu dangte zong a nei lai hi. 18 Peleg kum 30 a hihin, tapa Reu a nei hi. 19 Reu a neih nungin, kum 209 a nungta lai a, tapa dangte leh tanu dangte zong a nei lai hi. 20 Reu kum 32 a hihin, tapa Serug a nei hi. 21 Serug a neih nungin, kum 207 a nungta lai a, tapa dangte leh tanu dangte zong a nei lai hi. 22 Serug kum 30 a hihin, tapa Nahor a nei hi. 23 Nahor a neih nungin, kum 200 a nungta lai a, tapa dangte leh tanu dangte zong a nei lai hi. 24 Nahor kum 29 a hihin, tapa Tera a nei hi. 25 Tera a neih nungin, kum 119 a nungta lai a, tapa dangte leh tanu dangte zong a nei lai hi. 26 Tera kum 70 a hih nungin, tapate Abram, Nahor leh Haran a nei hi.
Tera' Suante
27 Hiai Tera' suante' khangthu ahi. Tera' tapate Abram, Nahor leh Haran ahi. Haran' tapa Lot ahi. 28 Tera' nuntak lai mahin, Haran bel a pianna gam, Kaldai mite gama Ur khua ah a si hi. 29 Abram leh Nahor in zi a nei tuak uh a, Abram' zi Sarai ahi a, Nahor' zi Milka ahi. Milka bel Haran' tanu ahi. Haran in tanu Milka leh Iska a nei hi. 30 Sarai bel a chiing a, ta a nei kei hi. 31 Tua nungin, Tera in a tapa Abram tawh, Haran' tapa, ama' tupa Lot tawh, a tapa Abram' zi, ama' mou Sarai tawh a tonpih a, Kaldaite gam Ur khua apan Kanan zuanin a pempih hi. Ahihhangin, Haran gam hong tun takun, tua ah a teeng uhi. 32 Tera nuntak sung khempeuh kum 205 ahi a, tua khitin, Haran gam ah a si hi.
Abram Sapna
1 Tangtawn Toupa'n Abram kiang ah: Na gam leh na mite apan hong paikhia in. Na pa' innkawte apan hong paikhia inla, kon etsak ding gam zuan in. 2 Nam thupitakin kon bawl ding a, kon vualzawl ding. Na min ka liansak ding a, vualzawlna na hi ding. 3 Nang hon vualzawlte ka vualzawl ding a, nang hon hamsiatte ka hamsiat ding. Nang tungtawnin leitung mite khempeuh ka vualzawl ding a na-chi khinta hi. 4 Tangtawn Toupa'n amah a na-hilhtak bangin, Abram a kipankhia a, Lot in a zui hi. Haran apan a paikhiak laiin, Abram bel kum 75 a hita. 5 Abram in a zi Sarai leh a sanggampa' tapa Lot a tonpih a, ama'n Harana neih leh lam a khopte leh mihing a neihte khempeuh tawh a paipih hi. Amaute Kanan gam zuanin hong pai uh a, tua bangin Kanan gam a tung uhi. 6 Abram Kanan gam sung ah a pai a, Shekhem muna More' tawsaw sing lianpi dong a pai hi. Tua gam ah Kanan mite a na teeng uhi. 7 Tangtawn Toupa, Abram kiang ah hong kilaak a: Na suante kiang ah hiai gam ka pia hi, a chi hi. Abram in tua mun ah, amah kianga hong kilaak Tangtawn Toupa' mai ah maitam khat a dawh hi. 8 Tua khitin, amah tua mun apan a paikhia a, Bethel khawpi suahlama mual lam ah a pai a, tumlama Bethel khawpi leh suahlama Ai khawpi kikal ah puanbuk a kai hi. Tua mun ah Tangtawn Toupa' mai ah maitam khat a dawh a, Tangtawn Toupa' min a lou hi. 9 Tua khitin, Abram a kipankhia a, Negev lam manawhin a pai hi.
Aigupta Gama Abram
10 Tua nungin, tua gam ah kial a kia hi. Tua kial a nat mahmah manin, Abram bel Aigupta gam ah a paisuk a, mikhualpi-in a va-teeng hi. 11 Aigupta gam sung a lut ding kuanin, hibang thu hong tung hi: Ama'n a zi Sarai kiang ah: Ngai dih, na mel lah hoih tabuang a, 12 Aigupta mite'n nang hon muh chiangun: Hiai a zi hi a, a kichi ding uh a, kei hon that maimah ding uh a, nang hon hinghawi ding uhi. 13 Nangma' vaanga ka tunga a siam ua, ka hinna a bit theih nadingin, Ka sanggamnu kichi mai ve aw, a chi ni. 14 Abram, Aigupta gam sung hong tun takin, Aigupta mite'n Abram' zi a mu uh a, melhoih a sa mahmah uhi. 15 Kumpipa Faro' uliante'n zong amah a mu uh a, Faro kiang ah a phat uh a, Faro' inn ah a tonpih uhi. 16 Faro bel Abram tung ah, a zi hangin a siam mahmah a, Abram in belamte, bawngtalte, sabiltungte, sabiltungnute, sangawngsaute, sila pasalte leh sila numeite a neihlawh hi. 17 Ahihhangin, Tangtawn Toupa'n, Abram' zi Sarai hangin Faro leh a innkawte tung ah hi nasetak a tungsak hi. 18 Tua khitin, Faro in Abram a samsak a: Ka tunga bang hih na hita mai ale? Banghanga amah na zi a hih lam hon hilh lou na hia? 19 Banghanga: Ka sanggamnu ahi, chi peuhmah na hia? Ka zi dinga na pii ka hi vele! En aw na zi! Pii inla, paikhia in! a chi hi. 20 Tua khitin, Faro in a mite kiang ah Abram tawh kisaiin thu a pia a, amaute'n amah, a zi tawh, a neih teng tawh a khakhia uhi.
Abram leh Lot Kikhenna
1 Tua khitin, Abram bel a zi tawh a neih khempeuh tawh, Aigupta gam apan a paikhia a, Lot a tonpih a; Negev ah a paitou uhi. 2 Abram in gantate leh ngun leh kham a hau mahmah hi. 3 Amah, Negev ah a vialpai pai a, Bethel dong a pai a, Bethel leh Ai kikala a puanbuk kaihna mun hong tung hi. 4 Tua mun bel, hun paisa-a maitam a dawhna mun ahi. Abram in tua mun ah Tangtawn Toupa' min a lou hi. 5 Abram tawh ton Lot in zong belamte, gantate leh puanbukte a nei hi. 6 Ahihhangin, amaute' khawsak khawm nadingin gam a kiching kei hi. A neih a lam uh a tam manin, a tengkhawm thei kei uhi. 7 Ahang bel, Abram' ganchingte leh Lot' ganchingte kal ah kinak kiselna hong pianga ahi. Tua hun laiin, tua gam ah Kanante leh Perizte zong a teeng uhi. 8 Tua bang ahih manin, Abram in Lot kiang ah: Ka ganchingte leh na ganchingte kal ah kinakkiselna omsak kei ni. Eite unau sanggam i hi. 9 Na mai ah gam lianpi om hi lou hiam, kikhen mai ni. Nang veilama na pai leh kei taklam ah ka pai ding a, taklama na pai leh kei veilam ah, a chi hi. 10 Lot a khawdak a, Jordan lui phaizang teng a en a, tua gam in tui hoih a neih dan a mu hi. Tangtawn Toupa' huan mah a bang a, Zoar zotna lam lah Aiguta gam mah a bang hi. Hiai bel, Tangtawn Toupa'n Sodom khawpi leh Gomora khwpi a hihsiat ma ahi. 11 Tua bang ahih manin, Lot in Jordan lui phaizang teng a teel a, suahlam manawhin a paita a, amaute a kikhenta uhi. 12 Abram, Kanan gam ah a teeng a, Lot bel phaizang khawpite ah a teeng a, Sodom khawpi kiang ah puanbuk a kai hi. 13 Sodom khawmite bel a gilou mahmah uh a, Tangtawn Toupa tung ah nakpitakin a khial uhi. 14 Abram leh Lot a kikhen nungun, Tangtawn Toupa'n Abram kiang ah: Na omna apan khawdak inla, simlam, mallam, suahlam, tumlam en in. 15 Na muh gam teng, nang leh na chisuan adingin kon peden ding hi. 16 Na chisuan leia leivui zah ka phasak ding a, mi'n leia leivui a sim zawh leh na suante a sim zou ding. 17 Thou inla, gam sung teng, a dung a vaiin tuansuak in, nang hon pia ding ka hi, a chi hi. 18 Tua bangin, Abram in Hebron-a om, Mamre' singkung lianpipite kianga teeng dingin a puanbukte a tuah hi. Tua ah Tangtawn Toupa' mai ah maitam khat a dawh hi.
Abram in Lot a Hutkhiakna
1 Shinar kumpipa Amrafel nuntak laiin, hibang thu hong om hi. Amah tawh Elasar kumpipa Ariokh tawh, Elam kumpipa Khedorlaomer tawh, Goim kumpipa Tidal tawh a pangkhawm uh a, 2 Sodom kumpipa Bera, Gomora kumpipa Birsha, Adma kumpipa Shinab, Zeboim kumpipa Shemeber leh Bela kumpipa tung ah gal a bawl uhi. Bela bel Zoar kichi ahi. 3 Hiai kumpipa ngate, Sidim Phaizang ah a pangkhawm uhi. Sidim bel Chi Tuipi kichi ahi. 4 Hiai kumpipate bel kum sawmlenih sung Khedorlaomer' ukna nuai ah a toukai uhi. A kum sawmlethum kumin a kiphin uhi. 5 A kum sawmleli kumin, Khedorlaomer leh a pankhawmpihte hong kuan uh a, Ashteroth Karnaim khawpi-a teeng Refaimte, Ham muna teeng Zuzte leh Shave Kiriathaim khawta-a teeng Emte a dou uh a, a zou uhi. 6 Tua baan ah, Seir mual tunga Horte, gamdai-gamkeu geia Elparan dongin a zou uhi. 7 Tua khitin, amaute hong kilehkik uh a, En Mispat hong tung uhi. En Mispat bel Kadesh kichi ahi. Amalekte' gam khempeuh leh Hazazon Tamara teeng Amorte zong a zou uhi. Tua Amalekte leh Amorte bel, Hazazon Tamara teeng ahi uhi. 8 Tua bangin, Sodom kumpipa, Gomora kumpipa, Adma kumpipa, Zeboim kumpipa leh Bela kumpipa a kuankhia uh a, Sidim Phaizang ah galdou dingin a pang uhi. Bela bel Zoar ahi. 9 Amaute bel Elam kumpipa Khedorlaomer, Goim kumpipa Tidal, Shinar kumpipa Arafel leh Elasar kumpipa Ariokh dou dinga pang ahi uhi. Tua banga kumpipa li dou dinga kumpipa nga kisa ahi uhi. 10 Sidim Phaizang bel alkatara khuka dim ahi. Sodom leh Gomora kumpipate a taikek takun, mi pawlkhat tua alkatara khuk ah a kia uh a, midangte bel mual tung lam ah a taisuak uhi. 11 Kumpipa lite'n Sodom leh Gomora neih-le-lam teng leh an teng a la uh a, a chiahkikta uhi, 12 Abram' sanggampa' tapa Lot zong Sodom khawpi-a teeng ahih manin, amah zong a neih teng tawh a kaimang uhi. 13 A suakta mi khat hong pai a, Hebru mi Abram kiang ah thu a tun hi. Abram bel, Amor mi Mamre' singkung lianpipite kiang naia teeng ahi. Mamre bel, Eshkhol leh Aner' sanggampa ahi. Hiai mite Abram tawh pangkhawmte ahi uhi. 14 Galte'n a tanau nai salin a kaita uh, chih Abram in a zak takin, ama' innsunga piang, galvan tawimi 318 tawh a kuankhia a, Dan dongin galte a delh uhi. 15 Zan khangin, Abram in gaalte dou dingin a mite a pawlpawlin a khen a, Damaska khawpi mallam panga om Hoba khawpi dong amaute a delh a, galte a zougawp hi. 16 Neih-le-lamte khempeuh a sutkik a, a tanau nai Lot leh a neihsa khempeuh, numeite leh midangte tawh, hon piikik vek hi. 17 Khedorlaomer leh a pankhawm-pih kumpipate zoua Abram hong kiknawn lamin, amah dawn dingin Sodom kumpipa, Shave Phaizang ah hong kuan hi. Shave Phaizang bel, Kumpipa' Phaizang kichi ahi. 18 Tua lai ah Salem kumpipa Melkhisedek in tanghou leh grepzu hon tawi hi. Amah bel, Pathian Tungnungpen' siampi ahi. 19 Ama'n Abram a vualzawl a: Lei leh van Siampa Pathian Tungnungpen in Abram hon vualzawl hen. 20 Na galte na khut sunga hon pepa Pathian Tungnungpen phatin om hen, a chi hi. Tua laiin, Abram in a gallak thil bangkim sawma khat amah a pia hi. 21 Sodom kumpipa'n Abram kiang ah: A mihingte hon pia inla, neih-le-lam teng zaw nang tang in, a chi hi. 22 Ahihhangin, Abram in Sodom kumpipa kiang ah: Lei leh van kipsakpa Pathian Tungnungpen, Tangtawn Toupa' mai ah kichiamin khut ka liikta. 23 Nang' neihsa peuhmah bangmah kei adingin ka la kei ding. Khau zang khat nangawn, khedap khau khat nangawn ka la kei ding. Tua bang hi kei leh, Abram ka hihhauhsa ahi, na chi kha ding. 24 Tangvalte' neksa teng bel ka lak ahi dia, tua baan ah, kei hon zui Aner, Eshkhol leh Mamre in a tan uh la uhen, a chi hi.
Abram tawh Kala Pathian' Thukhun
1 Hiai thilte nungin, Tangtawn Toupa'n mengmuhna tung-tawnin Abram a houpih a: Abram, lau ken, keimah mah na lum ka hi ding a, na pahtakman thupi mahmah ka hi ding hi, a chi hi. 2 Ahihhangin, Abram in: Toupa, Tangtawn Pathian aw, bang hon pe ding na hia? Kei lah ta neilouin ka om lailai a, Damaska mi Eliezer mah ka gouluahpa ding hilou ding maw? a chi hi. 3 Tua khitin, Abram in: Ta lah non pe kei a, ka innsunga piang pen mah ka gouluahpa hi ding ahi, a chi hi. 4 Tua nungin, Tangtawn Toupa' thu amah kiang ah hong tung a: Hiai pa na gouluahpa ahi kei ding a, nangma' ta mahmah na gouluahpa ahi zaw ding, a chi hi. 5 Tua khitin, ama'n amah innpua ah a pawtkhiakpih a: Vante en inla, aksite sim dih, na sim seng hiam. Na chisuan hibang zah pha ding ahi, a chi hi. 6 Abram in Tangtawn Toupa a um a, ama'n tua a upna a diktatnain a simsak hi. 7 Ama'n amah kiang ah: Hiai gam na gouluah dinga hon pe dingpa, Kaldai mite gama Ur apan hon piikhepa Tangtawn Toupa kei ka hi, a chi lai hi. 8 Ahihhangin, Abram in: Toupa, Tangtawn Pathian aw, hiai gam ka luah ding, chih bangchi-a thei ding ka hia? a chi hi. 9 Tangtawn Toupa'n amah kiang ah: Bawngla khat, keltal khat leh belamtal khat kum thuma upa ngen hon la inla, vakhu khat leh kawl vakhu vual khat zong hon la in, a chi hi. 10 Abram in hiaite amah kiang ah a hon la a, tuate a kimlai ah a phelkhap a, a phelte kimaituahin a vualin a koih a, vasate bel tua bangin a phelkhap kei hi. 11 Tua khitin, sasialne vasate'n tua saluangte a bawhsuk chiangun, Abram in a hawlkhe zel hi. 12 Ni a tumsuk dektakin, Abram ihmut limtakin a ihmu hithit a, mial lauhuaitakin amah a khuhta hi. 13 Tangtawn Toupa'n Abram kiang ah: Na suante amau' gam hilou ah, mikhualin a om ding uh a, tua gam mite'n kum 400 sung suak leh salin gentheitakin a bawl ding uh, chih thei in. 14 Ahihhangin, keimah in amaute sala nei nam ka gawt ding a, tua nungin, na suante hauhna thupitak tawh hong paikhe ding uh. 15 Ahihhangin, nang bel, lungmuangtakin, na pu na pate kiang ah na pai ding a, teekkunin na kivui ding hi. 16 A khang Una ah na suante hiai mun ah hong kik ding uhi. Ahang bel, Amorte' khelhna a buchin nai louh man ahi, a chi hi. 17 Ni a tum a, khua a mial takin, meichihna bel khu lunglung leh meisel kuang zuapzuap hong kilang a, tua saluang phelte kal ah a pai uhi. 18 Tua ni-in, Tangtawn Toupa'n Abram tawh kal ah thukhun a bawl a: Na suante kiang ah hiai gam pekhin ka hi. Tua bel, Aigupta luipi leh lui lian Iufratis lui kal, 19 Kente, Kenizte, Kadmonte, 20 Hitte, Perizte, Refaimte, 21 Amorte, Kanante, Girgaste leh Jebuste gam teng ahi, a chi hi.
Mihing' Lemtheihna' Ta
1 Abram' zi Sarai in Abram adingin ta a nei kei hi. Ahihhangin, Aigupta numei khat Hagar kichi, innsung nasemin a nei hi 2 Sarai in Abram kiang ah: En mah mah dih. Tangtawn Toupa'n lah tabeia hon koih a, hiai ka nasemnu luppih mai in. Ama' tungtawnin innkuan kon bawl thei khamawh dia hia, a chi hi. Abram in Sarai' thu a mang a, 3 Abram Kanan gama kum sawm a teen nungin, Sarai in a silanu, tua Aigupta numei Hagar a tonpih a, a pasal Abram kiang ah a zi dingin a pia hi. 4 Abram in Hagar a luppih a, a gaita hi. Hagar in a gaita, chih a kitheih takin, a tounu a simmawh panta hi. 5 Tua bang ahih takin, Sarai in Abram kiang ah: Nang' mawhna hanga thuak ka hi ve. Ka silanu na kawi dingin kon pia a, a gai, chih a kitheih takin, kei hon simmawh mahmahta ve. Tangtawn Toupa'n nang leh kei kal ah thu khen hen aw, a chi hi. 6 Abram in Sarai kiang ah: En in, na silanu na khut sunga om ahi. Hoih na sak bangbangin hih in, a chi hi. Tua bangin, Sarai in Hagar a hihgenthei a, amah apan Hagar a taikhia hi. 7 Tua khitin, Tangtawn Toupa' vansawltak in gamdai-gamkeua Shur zotna lampi kianga om tuikhuk kiang ah Hagar a mu hi. 8 Ama'n: Sarai' silanu Hagar, koi apan hong pai a, koia hawh dek na hia? a chi hi. Hagar in: Ka tounu Sarai mai apan tai ka hi, a chi hi. 9 Tangtawn Toupa' vansawltak in: Na tounu kiang ah kik nawn inla, a nuai ah lut in, a chi hi. 10 Tua Tangtawn Toupa' vansawltak in: Na suante nakpitakin ka tamsak ding a, a tam mahmah ding uh a, simseng ahi kei ding uhi, a chi lai hi. 11 Tangtawn Toupa' vansawltak in Hagar kiang ah: Tuin nau pai na hi a, tapa khat na nei ding hi. Na gentheihna Tangtawn Toupa'n a zaktak manin, na tapa' min dingin, Ishmaef na sa ding ahi. 12 Amah, gamlak sabiltung bangin, mi genhak ahi ding a, mi chih a dou ding a, a sanggamte khempeuh tawh kihou theilouin a nungta ding, a chi lai hi. 13 Hagar in: Mutheipa muta a, nungtalai hilou ka hi hiam, a chi a, amah houpihpa Tangtawn Toupa' min dingin El Roi a sa hi. 14 Tua bang ahih manin, tua tuikhuk, Beer Lahai Roi, a kichi hi. Kadesh leh Bered kal ah tua tuikhuk a om lai hi. 15 Tua khitin, Hagar in Abram adingin tapa khat a nei a, Abram in Hagar' neihsak a tapa' min dingin Ishmael a sa hi. 1 Amah adinga Hagar in Ishmael a neih laiin, Abram kum 86 ahita hi.
Thukhun Chiamtehna
1 Abram kum 99 a hih kumin, Tangtawn Toupa ama' kiang ah hong kilaak a, a kiang ah: Kei, Pathian Vanglianpen ka hi. Ka mai ah gamtat hoihin nungta inla, paubannain om ken. 2 Nang leh kei kal ah ka thukhun ka kipsak dinga, nakpitakin kon tamsak semsem ding, a chi hi. 3 Abram, a maia lei si-in a bok a, Pathian in amah a houpih a: 4 Kei lampang ah hibang ahi ding: Nang tawh kala ka thukhun hiai ahi ding a, mi tampite' pa na hi dinga, 5 na min Abram a kichi nawn kei ding a, Abraham ahita ding. 6 Chipha mahmahin kon bawl ding a, nam tampi-in kon bawl ding a, nang apanin kumpipate hong piang ding. 7 Khang sawn sawn dongin, nang leh na suante leh kei kal ah ka thukhun ka kipsak ding a, Tangtawn thukhun ahi ding. Nang leh na nunga na suante' Pathian ka hi ding hi. 8 Tu-a mikhuala na omna Kanan gam buppi, nang leh na suante' tandet dingin kon pe ding a, na Pathian ka hi ding hi, a chi hi. 9 Tua khitin, Pathian in Abraham kiang ah: Nang lam pang ah hibang ahi ding: Ka thukhun na zuih ding ahi a, nang leh na nunga na suante'n khangsawn sawna na zuih ding uh ahi. 10 Nang leh na nunga na suante'n na zuih ding uh ka thukhun hiai ahi: Na lak ua pasal peuhmah zeksum ding ahi. 11 Zekmuk vun na sum ding uh a, noute leh kei kala thukhun chiamtehna ahi ding. 12 Khangsawn sawn dongin, na tate uh, pasal peuhmah, ni giata upa chiang tunglam leh, na innsunga piang hilou, dangka suma na lei uh gamdang mi nangawn tawh, zeksum vek ding ahi. 13 Na innsunga piang hita leh, gamdang mi dangka suma na lei hita leh, a vekun, zeksum ding ahi. Ka thukhun pen, Tangtawn thukhun hi dingin na satung ah a om ding ahi. 14 Zeksum louh pasal peuhmah, a sa tunga zeksum louh peuhmah, ka thukhun palsat ahih manin, a mite lak apan satkhiak ahi ding, a chi hi. 15 Tua baan ah, Pathian in Abraham kiang ah: Na zi a hih leh, Sarai chi-in na sam nawn kei ding a, a min Sara ahita ding hi. 16 Amah ka vualzawl ding a, amah tungtawnin tapa khat kon pe ding. Amah, namte' nu ahih nadingin ka vualzawl ding a, amah apanin, kumpipate hong piang ding, a chi lai hi. 17 Tua khitin, Abraham lei si-in a bok a, a nui hi. Ama'n a lungsung ah: Kum 100 phata mi in tapa ka nei tel dia hia? a chi hi. 18 Tua khitin, Abraham in Pathian kiang ah: Ishmael in na vualzawlna tang mai leh chi na'ng e! a chi hi. 19 Pathian in bel: Na zi Sara mahmah in nang ading tapa khat nei ding a, a min dinga Isak na sak ding ahi. Ke'n ama' nunga a suante tawh kala Tangtawn thukhun hi dingin amah tawh kala ka thukhun kipsak ding ka hi. 20 Ishmael ahih leh, na nget ka zata a, amah ka vualzawl ngeingei ding. Amah ka chiphasak ding a, nakpitakin ka pungsak ding. Amah, vaihawmmi sawmlenihte' pa ka hisak ding a, amah nam thupitak ka suah ding. 21 Ahihhangin, ka thukhun zaw, kum nawn tubang huna, Sara in nang adinga a neih ding Isak tawh kal ah ka kipsak ding, a chi hi. 22 Pathian in Abraham a houpih khitin amah a nuseta hi. 23 Pathian in amah a hilh bangbangin, Abraham in tua ni mahmah-in a tapa Ishmael leh, innsunga piang hita leh, dangka suma a leite hita leh, pasal khempeuh zek a sumsak vek hi. 24 Abraham sa-a zeksum ahih laiin, kum 99 a phata hi. 25 A tapa Ishmael bel a sa-a zeksum a hih laiin kum sawmlethum a phata hi. 26 A ni kibangin, Abraham leh a tapa Ishmael zeksum ahi uhi. 27 Abraham' innsunga teeng pasal khempeuh, a innsunga piang hita leh, dangka suma a lei gamdang mi hita leh, amah tawh zeksum ahi vek uhi.
Thuchiam Tapa
1 Tua nungin, Mamre-a singkung lianpipite omna ah, Tangtawn Toupa Abraham kiang ah hong kilaak hi. Abraham bel, sun nisa nuaia a puanbuk kongkhaka a tut laitak ahi. 2 Abraham a dak touh leh, a kianga mi thum ding a mu hi. Amaute a muh takin, amaute muak dingin a puanbuk kongkhak apan a vatai a, amaute' mai ah lei si-in a bok hi. 3 Abraham in: Ka toupa aw, na mit muha deihsakna non tansak leh, kei na silapa hon kheng ken. 4 Tui kon la ding a, sing nuaia tawlngain na khe uh sil un. 5 Na silapa kianga hong hawh na hih buang chiangin, an kon lui ding a, tamnemin ne un aw, tua khit chiangin, amaban na sawn kei ding ua hia, a chi hi. Amaute'n: Na gen bangin hon hih ve, a chi uhi. 6 Tua bangin, Abraham a puanbuk sung ah, Sara kiang ah a lut pah a: Kinawh inla, anvui neel sea thum hon meek zok inla, tanghou hon kang in, a chi hi. 7 Abraham in, a bawnghon laka vatailutin, bawngtuai khat hon kai a, tangval nou khat kiang ah a pia a, ama'n tua bawngtuai sa a vabawl hi. 8 Abraham in bawngnawi dat thuuk leh bawngnawi tawh, tua bawngsa tawh amaute mai ah a lui hi. Amaute' annek sung teng, Abraham amaute kiang ah, sing nuai ah a ding hi. 9 Amaute'n: Na zi Sara koia om ahia? chi-in a dong uh a, ama'n: Puanbuk sung ah a om, a chi hi. 10 Tangtawn Toupa'n: Ngai in, hinna hunbi ngeina bangbangin, na kiang ah kong pai kik ngeingei ding a, na zi Sara in tapa khat a nei ding, a chi hi. Ama'n puanbuk kongkhak nungngat hi ven, Sara in tua kongkhak ah, tua thu a na ngaikhia hi. 11 Abraham leh Sara bel a upata uh a, a teekta uhi. Sara in zong numei ta neih theih ngeina hun a khengta hi. 12 Tua ahih manin, Sara in: Kei lah teekta, ka pasal lah teekta a, ta neih lungnopna mel ka mu nawn tel dia hia? a chi a, a lungsung ah a nui hi. 13 Tangtawn Toupa'n Abraham kiang ah: Banghanga Sara in: Ka teek nungin ta ka nei taktak tel dia hia? chi-a nui ahia? 14 Tangtawn Toupa adingin thil haksa lua a om thei ahia? Ka hun seh a tun chiangin, na kiang ah kong hawh kik ding a, hinna hunbi ngeina bangbangin, Sara in tapa khat a nei ding, a chi hi. 15 Sara bel a lau a, zuau genin: Nui kei veng e, a chi hi. Ahihhangin, Ama'n: Nui mah teh, a chi hi. Sodom ading Abraham ngetsakna 16 Tua khitin, tua mite a dingkhia uh a, Sodom khawpi lam a ensuk uhi. Abraham in amaute a zui a, a vakha hi. 17 Tua laiin, Tangtawn Toupa'n: Ka thilhih dek Abraham ka im dia hia? 18 Amah lah nam lian leh nam thupi hong suak ding a, ama' tungtawna leitung namte khempeuh kivualzawl taktak ding hi a. 19 Ahang bel, ke'n Abraham ka teltak man hi a, tua lah, ama'n a tate leh a nunga a suante a thuhilh theih nading hi a, tua baana, amaute'n Tangtawn Toupa' lampi tawna, a dik a tanga a gamtat nading ua a thuhilh nading leh, Tangtawn Toupa'n a chiamsa ama' tungtawna a tangtunsak nading ngimna hi sawnsawn hiven, a chi hi. 20 Tua baan ah, Tangtawn Toupa'n: Sodom leh Gomora mawhsakna kikouna a thupi mahmah a, amaute' khelhna lah a nase mahmah hi. 21 Tu'n ka paisuk ding a, mawhsakna kikou ka kiang hong tung banga gamta hi uhiam ka vaen ding. Tua banga gamta ahih kei uleh lah ka thei ding, a chi hi. 22 Tua mite, tua apan a paikhia uh a, Sodom leh Gomora manawhin a paisuk uhi. Ahihhangin, Abraham bel, Tangtawn Toupa' mai ah a ding nilouh hi. 23 Abraham in amah a vanaih a: Mi diktatte, migiloute tawh na mangthangkhawmsak taktak tel dia hia? 24 Tua khawpi sung ah mi diktat 50 om leh, mi diktat 50-te hangin, tua khawpi hihse louin, na hawi kei dia hia? 25 Mi diktatte migiloute tawh thatkhawm mahmah ken. Nang tel in zaw, migiloute tunga na hih bangbangin mi diktatte tung ah hih ken! Leitung teng khempeuh tunga Thukhenpa'n a dik a tangin thu khen lou ding maw? a chi hi. 26 Tangtawn Toupa'n: Sodom khawpi sunga mi diktat 50 ka muh leh, amaute hangin tua khawpi ka hawi ding, a chi hi. 27 Abraham in a dawng a: Ngai dih, kei lah leivui leh meivu leltak ka hi a, hinapi-in, Tangtawn Toupa kon houpihta mawk a! 28 Ahih leh, mi diktat 50 a chin louhna ngain samta leh, nga a sap manin, tua khawpi na hihse veve dia hia? a chi hi. Tangtawn Toupa'n: Tua khawpi-a mi diktat 45 ka muh leh, tua khawpi ka hihse kei ding, a chi hi. 29 Abraham in amah a houpih kik a: Tua khawpi ah mi diktat 40 kia muta lete lah! a chi hi. Tangtawn Toupa'n: Mi diktat 40-te hangin, tua khawpi ka hihse kei ding, a chi hi. 30 Tua khitin, Abraham in: Tangtawn Toupa aw, heh kenla, hon gensak lai in. Tua khawpi ah mi diktat 30 kia muta lete lah? a chi hi. Tangtawn Toupa'n: Mi diktat 30 ka muh leh, tua khawpi ka hihse kei ding, a chi hi. 31 Tua khitin, Abraham in: Ngai dih, Tangtawn Toupa kon houpih ngamta mawk a, tua khawpi ah mi diktat 20 kia muta lete lah? a chi hi. Tangtawn Toupa'n: Mi diktat 20-te hangin, tua khawpi ka hihse kei ding, a chi hi. 32 Tua khitin, Abraham in: Tangtawn Toupa aw, heh kenla, khatvei ka gen lai aw. Tua khawpi ah mi diktat sawmkhat kia muta lete lah? a chi hi. Tangtawn Toupa'n: Mi diktat sawmkhatte hangin, tua khawpi ka hihse kei ding, a chi hi. 33 Abraham kianga thu a gen khitin, Tangtawn Toupa a paikhia hi. Abraham zong a inn ah a kilehkikta hi.
Sodom Gitlouhna
1 Nitak lamin, tua vansawltak nihte Sodom khawpi hong tung uhi. Lot bel, Sodom kongpi ah a tu a, amaute a muh takin, amaute muak dingin a dingkhia a, a maitanga lei si-in a kun hi. 2 Ama'n amaute kiang ah: Toute aw, na silapa uh' inn ah hong lut unla, zan giak unla, na khete uh sil un. Zingsang beltakin na kipankhe kik ding uhi, a chi hi. Amaute'n: Hi lou e, konglak ah zan giak n'ung, a chi uhi. 3 Ahihhangin, Lot in amaute a chial ngutngut a, amaute'n inn sung ah amah a zuilut uhi. Ama'n amaute ading tanghou silngou sawh louh bawlin ankuang a lui a, amaute'n tua a ne uhi. 4 Amaute a lup maun, tua khawpi mite, Sodom pasalte a teek a khang, mi khempeuh in tua in kimkot ah a umchip uhi. 5 Amaute'n: Lot kiang ah: Tuzana na inna hong tungte koia om ahi ua? Amaute ka luppih dingun hon piikhia in, a chi uhi. 6 Lot bel, kongkhaka pawtin amaute kiang ah a vapusuak a, kongkhak a khak hi. 7 Ama'n amaute kiang ah: Ka sanggamte aw, hehpihtakin, hibang lawmlawmin gilou dah ve ua. 8 Ngai un, pasal' luppih ngei louh tanu nih ka nei hi. Hon hehpih unla, amaute kon piikhe ding a, na lawh lawh uh lawh un. Ka innsung hong beel hiaite zaw bangmah lawh mahmah kei un, a chi hi. 9 Sodom khaw mite'n: Lam dalin om ken, a chi uhi. Tua khitin: Hiai mipa, mikhual leltaka hong lut hinapi-in, thukhenpa bangin a gamta gige maw! Amaute tunga ka hih sang ua nase zawin, nang tung ah ka hih ding uh, a chi uhi. Tua bangin, Lot a phu phei uh a, kongkhak tuanhong dingin a naih uhi. 10 Ahihhangin, inn sunga mite'n khuta sawkin, inn sung ah Lot a kailut uh a, kongkhak a khak uhi. 11 Amaute'n kongkhaka omte' mit, a tek a khangin, a tawsak uh a, kongkhak a zong mu zou kei uhi. Sodom leh Gomora Hihsiatna 12 Tua khitin, tua mite'n Lot kiang ah: Hiai ah mi dang himhim na nei hia makpate, tapate, tanute leh khawpi sunga tanau laina himhim? Amaute khempeuh hiai mun apan taikhiakpih vek in! 13 Ahang bel, hiai khaw mite mawhsakna kikou Tangtawn Toupa' maia a ot luat mahmah tak manin, hiai mun hihse ding ka hita uh, a chi uhi. 14 Tua khitin, Lot a paikhia a, a tanu kitenpih dinga kham a makpate kiang ah thu a gen a: Kisa unla, hiai mun apan taikhia un. Tangtawn Toupa'n hiai khawpi hihse ding ahi! a chi hi. Ahihhangin, a makpate ngaihin amah chiamnui bang lei ahi. 15 Zingsang phalvakin, tua vansawltakte'n Lot a nawh uh a: Kinawh in! Na zi leh hiaia om na tanute gel taikhiakpih in. Tua ahih keileh, hiai khawpi gawtna ah na mangthangkhawm ding uhi, a chi uhi. 16 Ahihhangin, Lot a thaduai mahmah hi. Tangtawn Toupa'n amah a lainat mahmah manin, tua mite'n amah, a zi tawh, a tanute gel tawh, bantangin a kaikhia uh a, khawpi pawlam ah a koih uhi. 17 Lot a paikhiakpih nungun, hibang hong tung hi. Khat pen in: Na hinna humbit dingin taikhia in! Nunghei het kenla, phaizang ah zong khawl het ken. Mual tung lam ah tai in. Na tai kei leh, gawtna in hon phiatmang petmah ding ahi! a chi hi. 18 Ahihhangin, Lot in amaute kiang ah: Toute aw, hibang hi peuhmah kei hen! 19 Na sila in na mitmuhun deihsakna ka tang a, ka hinna huin zahngaihna na liansakta uhi. Tu'n kei hua mual tung lama tai zoulou ding hi'ng. Tai leng, siatna khattou in hon lap ding a, ka si kha ding hi. 20 En un, hiai ah tun zawh nadinga nai khua khat a om a, neu zong a neu hi. Hiai khua neu mahmah hilou hia? Hiai ah hon taisak mai un, ka bit ding, a chi hi. 21 Ama'n a kiang ah: Ngai in, nang kon sangta. Hiai na ngetna zong kon sang ding a, na gen tua khua ka hihse kei ding hi. 22 Ahihhangin, kintakin tua ah tai meng in, tua khua na tun mateng, bangmah hih thei lou hi'ng, a chi hi. Hiai hang ahi, tua khua Zoar a kichih. 23 Lot, Zoar khua a tun takin, leitung ah ni hong suakta hi. 24 Tua khitin, Tangtawn Toupa'n van apanin, Sodom leh Gomora tung ah kaat kaang a zusak a, 25 hiai khawpite, a kimkot phaizang teng tawh, tua khawpite sunga teng mi khempeuh leh leitunga pou sing leh lou teng tawh a hihse vek hi. 26 Ahihhangin, Lot' zi bel a nunghei a, chi khuampi a suak hi. 27 A zingchiangin, Abraham bel, Tangtawn Toupa' maia a dinna mun ah a ding kik hi. 28 Ama'n Sodom leh Gomora leh a kimkot phaizang gam teng a gal et a, haltuina meiphualpi khu bangin, tua gam meikhu a kitungtou lunglung hi. 29 Tangtawn Toupa'n tua phaizang khawpite a hihsiat laiin, Abraham a phawk gige a, Lot' tenna khawpite a hihsiat laiin zong, a siatna lak apanin Lot a piikhia hi.
Lot' Khelhna
30 Tua nungin, Lot bel a lau manin, Zoar apan a taikhia a, a tanute gel tawh mual tung ah, kawkhuk sung khat ah a teeng hi. 31 Nikhat bel, a tanu uzaw pen in, a nauzaw pen kiang ah: I pa lah teekta a, leitung dana hon luppih ding lah leitunga pasal khat zong om lou a, 32 i pa zu dawn khamsakin luppih lehang, i pa suanmang loua koih ding hi hang, a chi hi. 33 Tua zanin, amaute'n a pa uh zu a dawnkhamsak uh a, a tanu uzaw in amah a valuppih hi. A pa'n lah a tanu' luppih lai leh a thawhkhiak lai a phawk himhim kei hi. 34 A zing chiangin, a tanu uzaw in a nauzaw kiang ah: Zan zanin ka pa valuppih ka hi ve. Tuzanin, amah zu i dawnkhamsak kik ding a, nang valuppih in aw, hi leh, i pa suanmang loua koih ding hi hang, a chi hi. 35 Tua bangin, tua zanin zong a pa uh zu a dawnkhamsak uh a, a tanu nauzaw in a valuppih hi. A pa'n a tanu' luppih lai leh a thawhkhiak lai a phawk himhim kei hi. 36 Tua bangin, Lot' tanute gel in a pa uapan nau a pai tuak uhi. 37 Tanu uzaw in tapa a nei a, ama'n a min dingin, Moab a sa hi. Amah tulai Moabte' pubul hong hi ahi. 38 Tanu nauzaw in zong tapa a nei a, a min dingin Ben Ami a sa hi. Amah tulai Amonte' pubul hong hi ahi.
Abimelekh Ze-etna
1 Tua nungin, Abraham Negev zuanin a pai a, Kadesh khawpi leh Shur khawpi kikal ah a teeng a, hun bangtan hiam, Gerar gam ah a taam hi. 2 Tua ah Abraham in a zi Sara. Ka sanggamnu ahi, a chi hi. Tua bangin, Gerar kumpipa Abimelekh in mi a sawl a, Sara a piisakta hi. 3 Ahihhangin, zan khat, Abimelekh' mangin Pathian amah kiang ah hong pai a: Na numei pii pen mi' zi ahih manin si ding na hi, a chi hi. 4 Abimelekh in Sara a luppih nai louh manin, Pathian kiang ah: Toupa, nang mawh neilou nam na hihmangthang dia hia? 5 Amah mah in ka kiang ah: Amah ka sanggamnu ahi, chi hilou maw? Numei in zong: Amah ka sanggampa ahi, chi hilou maw? Hibanga amah ka pii laiin, ka sia-le-pha theihna a siang a, ka khut zong mawh lou ahi, a chi hi. 6 Pathian in Abimelekh mang mahin: Ahi, hibanga amah na pii laiin, na sia-le-pha theihna a siang a, na khut zong a mawh kei, chih ka thei a, ka tunga na khelh louh nadingin kon kham a, amah na khoih ding ka phal kei. 7 Tu'n hiai mipa' zi pe kik in. Amah kamsang khat ahi a, nang hon thumsak ding a, na hing ding. Ahihhangin, amah na piak kik kei leh bel, nang leh na innkawte na si vek ding uh chih thei in, a chi hi. 8 Abimelekh zingkhangpi-in a thou a, a silate khempeuh a sam a, hiai thute khempeuh a hilh a, amaute a lau mahmah uhi. 9 Tua khitin, Abimelekh in Abraham a samlut a: Route tunga bang hih na hita maia? Na tung ah bang ka hih a, nang kei leh ka gam tunga khelhna thupi hon tun na hia? Hih louh dingpi ka tunga hih na hi ve, a chi hi. 10 Tua baan ah, Abimelekh in Abraham kiang ah: Hibang na hih peuhmah, asan a haang bang ahia? a chi lai hi. 11 Abraham in: Hiai muna Pathian launa lah om lou a, ka zi hangin hon that mahmah ve unchin, ka chi a, hibanga hih ka hi. 12 Amah ka sanggamnu zong hi taktak eive. Amah ka pa' tanu hi a, ka nu' tanu bel hilou lei hi a, tu-a ka zi hong hi hi lei zaw ahi. 13 Hibang dan ahi. Pathian in ka pa' inn apan hon paikhiaksak laiin, ka zi kiang ah: Ka tung ah siamna hibangin hon langsak in aw. I paina peuh a, Amah ka sanggampa ahi, non chi ding aw, ka na chihsa mawng ahi, a chi hi. 14 Tua khitin, Abimelekh in belamte, bawngtalte, sila pasalte leh sila numeite Abraham a pia a, a zi Sara zong a pe kik hi. 15 Tua tham louin, ama'n: En in, na mai ah ka gam kiphah hilou hia, na ut nana ah teeng in, a chi hi. 16 Tua baan ah, Sara kiang ah: En in, na sanggampa khut ah ngun tang shekel 1,000 ka pia. Na ompihte khempeuh' mai ah, na zumselna ahi ding a, nang na dik chih genna ahi ding, a chi hi. 17 Abraham Pathian kiang ah a thum a, Pathian in Abimelekh leh a zi leh a sila numeite a damsak a, tate a nei thei kik uhi. 18 Ahang bel, Tangtawn Toupa'n Abraham' zi Sara hanga Abimelekh' innkawte peuhmah ta nei theiloua, na koih khinta hiven.
Isak Pianna
1 Tua nungin, Tangtawn Toupa'n a gensa bangin, Sara tung ah hehpih a siam a, Sara adinga a chiamsa a hihsak hi. 2 Sara hong gai a, Abraham' tek nungpi-in tapa khat a neihsak hi. Pathian in hun a seh, amah a hilh bang geiha tangtung ahi. 3 Abraham in Sara' neihsak tapa min dingin Isak a sa hi. 4 Isak ni giata upa a hih-in, Pathian' thupiak bangin Abraham in a zek a sumsak hi. 5 A tapa Isak a pian laiin, Abraham kum 100-a upa a hita hi. 6 Sara in: Pathian in hon nuisakta a, a zakha peuhmah in hon nuihpih ding, a chi hi. 7 Amah mah in: Kua'n Abraham kiang ah, Sara in tate hon pom ding ahi! Na chi nuam mahmah ding ahia? A tek nungpi-a tapa kineihsak hi a! a chi lai hi.
Silanu Hagar Hawlkhiakna
8 Naungek Isak hong khang a, Sara in nawinek a tawpsakta hi. Isak nawinek a tawp ni-in, Abraham in ankuang thupitak a lui hi. 9 Aigupta numei Hagar in Abraham adinga a neihsak tapa in Isak a simmawh, chih Sara in a mu hi. 10 Tua bangin, Abraham kiang ah: Hiai sila numei leh a tapa hawlkhia in. Sila numei' tapa inka tapa Isak tawh gou a luahkhawm ngei kei ding, a chi hi. 11 A tapa mahmah tawh kisai thu a hih manin, Abraham in hiai thu a lungzinpih hi. 12 Ahihhangin, Pathian in amah kiang ah: Isak tungtawna na chisuan kisim ding ahih manin, naupang leh sila numei lungzinpih ken. Sara in na kianga a gen khempeuh zui in. 13 Silanu' tapa zong na suan ahih manin, amah nam thupi-in ka bawl ding, a chi hi. 14 Abraham zingkhangpi-in a thou a, tanghou leh savun tuithawl a la a, Hagar liangkou ah a suan a, naupangpa tawh amah a sawlkhia hi. Tua bangin, Hagar a paikhia a, Beersheba gamdai-gamkeu ah a vialpai hi. 15 Savun tuithawla tui a bei takin, Hagar in naupangpa sawlbawk nuai khat ah a nusia a: 16 Naupang si ding ka en ngam kei, a chi a, a pai a, gamla lou, thala kap phakna ah a tu a, a kapkhia hi. 17 Pathian in tua naupang' aw a za a, Pathian' vansawltak in van apanin Hagar a sam a, a kiang ah: Hagar, bang chi na hia? Pathian in naupang omna apan a aw za ahi, lau ken. 18 Dingkhia inla, naupang phong inla, a banin len in. Amah nam thupi-a bawl ding ka hi, a chi hi. 19Tua khitin, Pathian in Hagar mit a vaksak a, tuikhuk khat a mu hi. Tua bangin, amah a vapai a, savun tuithawlin tui a vadim a, naupang a dawnsak hi. 20 Pathian in tua naupang a ompih a, naupang hong khanglian a, gamdai-gamkeu ah a teeng a, thalkap siam hong hi hi. 21 Amah Paran gamdai-gamkeua a teen laiin, a nu'n Aigupta gam apan zi a piisak hi.
Beersheba-a Kilemna
22 Tua laiin, hibang thu hong om a: Abimelekh in a sepaihhon makaipa Fikol a tonpih a, Abraham a houpih a: Pathian in na thil hih ieuhmah ah hon ompih hi. 23 Keima' tung hiam, ka tapa tung hiam, ahih kei leh, ka suante' tung hiama lepchiah taka gamta lou ding leh, na tunga siam ka suah banga, kei tung leh, na khualtamna hiai gam tunga siam suah dingin tuin Pathian mai ah ka kiang ah kichiam in, a chi hi. 24 Aw, ka kichiam ding, a chi hi. 25 Ahihhangin, Abimelekh' silate'n a tuileh khat a laksakna thu uah, Abraham in Abimelekh a tai hi. 26 Abimelekh in: Hibanga thil hih kua ahia ka thei kei. Nang lah ka theih nadingin non hilh kei a, tuni-a hibang thu ka zak pat ahi ve, a chi hi. 27 Abraham in belamte leh bawngtalte a kai a, Abimelekh a pia a, amau gel kal ah thukhun a bawl uhi. 28 Abraham in belamhon lak apan belamnounu sagih a tuamkoih hi. 29 Abimelekh in amah kiang ah: Hiai belamnounu na tuamkoihte bang na chihna ahia? a chi hi. 30 Abraham in: Hiai tuileh kei tawhsa ahi, chih theihpihna hi dingin hiai belamnounu sagih ka khut apan sang in, a chi hi. 31 Tua bangin, amau gel in tua laia kichiamna a bawlkhawm manun, tua mun min dingin Beersheba" a sa uhi. 32 Hibanga thukhun a bawl khitin, Abimelek leh a sepaihhon makai Fikol bel, Filistia gam ah a paita uhi. 33 Abraham in Beersheba ah tawsaw sing a suan a, tua ah Tangtawn Toupa, a nungtaden Pathian' min a lou hi. 34 Tua bangin, Abraham Filistia gam ah hun sawtpi a teeng hi.
Isak Latna
1 Hiai thilte nungin, hibang thu hong om a: Pathian in Abraham a ze-et a, a kiang ah: Abraham, a chi hi. Ama'n: Hiai ah ka om, a chi hi. 2 Pathian in: Na tapa tang neihsun, na it mahmah Isak tonpih inla, Moria gam ah pai inla, tua mualte laka khat kon hilh ding pen tung ah, haltum thillatin lan in, a chi hi. 3 A zingchiang, zingkhangpi-in, Abraham a thou a, a sabiltung tung ah tuanphah a phah a, a silate nih leh a tapa a tonpih hi. Haltum thillat ading sing a ehkhitin, Pathian in a hilhna mun zuanin a kipankhia hi. 4 A ni thum ni-in, Abraham a khawdak a, gamlapi ah, a hawh nading mun a galmuh hi. 5 Ama'n a silate kiang ah: Noute gel hiai ah, sabiltung tawh na om unla, kei leh naupang hua lai ah ka vahawh ding uh a, Pathian ka vabe ding uh. Tua khit chiangin koute gel kong kilehkik ding uhi, a chi hi. 6 Abraham in haltum thillat nading sing a dom a, a tapa Isak a suan a, ama'n mei leh temta a tawi a, a nihun a ton uhi. 7 Tua banga a ton laiun, Isak in a pa Abraham a houpih a: Pa, a chi hi. Ama'n: Ka tapa aw, hiai ah ka om, a chi hi. Isak in: Mei leh sing om a, haltum thillat ding belam koia om ahia? a chi hi. 8 Abraham in: Ka tapa aw, Pathian mahmmah in haltum thillat ding tua belam hon ngaihtuah tawm na ding ahi, a chi hi. Tua bangin, amau gel tonin a paipai uhi. 9 Tua bangin, amau gel, Pathian in amah a hilhna mun hong tung uhi. Abraham in tua ah maitam a dawh a, maitam tung ah sing a chiangkhawm hi. Tua khitin, ama'n a tapa Isak a hen a, maitama sing tung ah a sial hi. 10 Tua khitin, Abraham in a khut in a sawk a, a tapa that dingin temta a la hi. 11 Ahihhangin, Tangtawn Toupa' vansawltak in van apanin amah a sam a: Abraham, Abraham, a chi hi. Abraham in: Hiai ah ka om, a chi hi. 12 Tua khitin, Tangtawn Toupa' vansawltak in: Naupang tung ah khut kha ken, amah bangmah lawh ken. Na tapa, na tapa tang neihsun nangawn na siit louh manin, Pathian na lau, chih tu'n ka theita, a chi hi. 13 Abraham a daktouh leh, a nunglama singbawk laka a ki-a awk belamtal khat a mu hi. Abraham a vapai a, tua belamtal a la a, a tapa sik leh tangin, haltum thillatin a lan hi. 14 Abraham in tua mun min dingin, Jehova Jire chih a sa hi. Tuni dongin, Tangtawn Toupa' Mual ah piak hi na-ve, a kichi lai hi. 15 Tua nungin, Tangtawn Toupa' vansawltak in van apanin, a nihveina dingin, Abraham a houpih a: 16 Tangtawn Toupa'n: Na tapa, na tapa tang neihsun siit lou a, hiai thil na hihtak manin, 17 nang kon vualzawl ngeingei ding, chi-in keimah mah ka kichiamta. Na suante vana aksi zah leh, tuipi piaua sehnel zahin nakpitakin ka pungsak ding. Na suante'n a melmate uh' kongpi a tang ding uh. 18 Ka aw na ngaihkhiak manin, na chisuan tungtawnin leitung namte khempeuh ka vualzawl ding, a chi hi. 19 Tua bangin, Abraham a silate kiang ah a kilehkikta a, tua apan a kipankhia uh a, Beersheba lam manawhin a ton uhi. Abraham bel, Beersheba ah a teeng hi.
Nahor' Tapate
20 Hiai thilte nungin, kua hiam khat in Abraham kiang ah: Ngai dih, Milka in zong na sanggampa Nahor adingin tapate a neita. 21 Amaute, Nahor' tapa upapen Uz tawh, a sanggampa Buz tawh, Aram' pa Kemuel tawh, 22 tua ban ah, Kesed, Hazo, Pildash, Jidlaf leh Bethuel tawh ahi uh, a chi hi. 23 Bethuel in tanu Rebek a nei hi. Milka in Abraham' sanggampa Nahor adinga a neih hiai tapa giatte ahi uhi. 24 Nahor' mei in zong tapate a nei a, Teba, Gaham, Tahash leh Maaka ahi. Nahor' meinu bel Reuma ahi.
Sara Sihna leh Kivuina
1 Sara kum 127 a nungta hi. 2 Amah Kanan gama Kiriath Arba ah a si hi. Kiriath Arba bel Hebron kichi ahi. Abraham zong Sara vasuun ding leh vakah dingin a vahawh hi. 3 Tua nungin, a zi sisa kiang apan a dingkhia a, Hit' suante a houpih a: 4 Kei mahmah zong gamdang mi ka hi a, noute laka khualtam lei ka hi. Ka muh phak louha ka misi ka vuikhiak nading, noute lak ah gam hon leisak un aw, a chi hi. 5 Hit' suante'n Abraham a dawng uh a, a kiang ah: 6 Pu aw, ka thu uh na ngai in. Nang, koute lak ah Pathian' kumpi tapa na hi. Ka hankhukte uh a hoih penpen ah na misi vui in. Koute laka kuama'n sivui nading hankhuk hon it lou ding hi, a chi hi. 7 Tua bangin, Abraham a dingkhia a, tua gam mi Hit' suante' mai ah a kun a, 8 amaute a houpih a: Ka misi ka muh phak louha ka vuikhiak ding non deihsak uleh, kei tangin Zohar' tapa Efron kiang ah hon ngetsak un. 9 Ama' gam bana ama' neihsa mah Makhpela kawkhuk hon leisak hen aw, noute laka han muna ka neih dingin tua mun a man kimsip sipin hon leisak hen, a chi hi. 10 Tua Hit mi Efron in, a mite laka tuin a khawpi kongpi-a hong lut Hit' suante khempeuh zakin, Abraham a dawng a: 11 Hilou e, toupa hon ngaikhia in. Tua gam kon pia a, a sunga kawkhuk hon pekhawm ka hi. Ka mite' theihpiha kon piak ahi. Kon pia a, na misi vui in! a chi hi. 12 Abraham tua gam mite mai ah a kun kik a, 13 amaute zakin Efron a houpih a: Tua gam non piak nop leh, ka thu hon ngaihkhiaksak in. Gam man ding sum kon pe ding a, saang inla, tua ah ka misi ka vui ding, a chi hi. 14 Efron in Abraham a dawng a, a kiang ah: 15 toupa aw, ngaidih. Tua gam man ngun tang shekel 400 lei hi a, nang leh kei kal adingin gentham ahi-a hia? Na misi vui mai in, a chi hi. 16 Abraham in Efron' gen a zui a, Hit' suante zaka a gen zah, amah adingin ngun tang a buk a, tua hun laia sumsinmf zat bukna-a buk shekel 400 ahi. 17 Tua bangin, Efron in, Mamre zawna Makhpela tawh kizom gam, a sunga kawkhuk tawh, gamgi sunga singkung teng tawh a peta hi. 18 Abraham khut ah, a gou dingin, Hit' suante, a khawpi kongpi-a lut khempeuhte' mai ah tua gam a peta hi. 19 Hiai nungin, Abraham in Kanan gama Mamre kianga Makhpela gam sunga kawkhuk ah a zi Sara a vui hi. Mamre bel, Hebron-a om ahi. 20 Tua bangin, tua gam leh a sunga kawkhuk bel, Hit' suante'n Abraham in han mun dinga a neih dinga a piakkhiak uh ahi.
Isak' Zineihna
1 Abraham hong upata a, hong teekta a, ahihhangin, Tangtawn Toupa'n lam chiteng ah amah a vualzawl hi. 2 Abraham in a innsunga a sila upapen, a neih a lam khempeuh kempa kiang ah thu a gen a: Hehpihtakin, na khut ka pheipi kal ah golh in. 3 Tangtawn Toupa, van Pathian leh, lei Pathian' min siala hon kichiamsak ding ka hi. Ka tenna gama Kanante' tanute laka mi peuhmah ka tapa zi dinga pii lou ding, 4 ahihhanga, ka gama ka tanaute kianga pai a, ka tapa Isak zi ding pii zaw dinga na kichiam ding ahi, a chi hi. 5 Tua silapa'n Abraham kiang ah: Numei in hiai gam lam ah kei hon zui nuam kei taleh, nong kipatna gama na tapa ka piikik ding ahi diam? a chi hi. 6 Abraham in: Ka tapa tua lama na piikik het louh ding ahi. 7 Ka pa' innkawte leh, ka pianna gam apan hon piikhepa leh, hon houpih a, kichiama thu hon chiampa Tangtawn Toupa van Pathian ahi. Ama'n: Na chisuan kiang ah hiai gam ka pe ding, chi-a hon chiam ahi. Ama'n tuin a vansawltak na mai ah a na sawl ding a, tua gam apan ka tapa' zi ding na pii ding hi. 8 Numei in nang hon zuih nop kei leh, kon kichiamsakna apan na siang ding hi. Ka tapa bel tua gam ah piikik kei peuhmah in, a chi hi. 9 Tua bangin, tua silapa'n a Toupa Abraham pheipi kal ah a khut a golh a, hiai thu tawh kisaiin a kichiam hi. 10 Tua khitin, tua silapa'n a toupa' sangawngsau sawmkhat kaiin, a kipankhia hi. A toupa' van hoih namkim a pua a, Nahor' khawpi zuanin, Aram Naharaim lam ah a kuanta hi. 11 Nitaklama numeite' tuitawi hunin, ama'n tua khawpi geia tuileh kiang ah, a sangawngsaute a khukdinsak hi. 12 Tua khitin, ama'n: Tangtawn Toupa, ka toupa Abraham' Pathian aw, hehpihtakin, tuni-in hon lawhchingsak in. Nitaklam, numeite' tuitawi hun ahi. 13 En in, hiai tuikhuk gei ah ka ding a, khawpi mite' tanute tui tawi dingin hong kuan uhi. 14 Hibang hi hen: Hehpihtakin, ka dawn dingin na tuibel hon niamsak dih ve, ka chih a, aman: Dawn inla, na sangawngsaute zong tui pia ning, chi-a hon dawng nungak pen, na sila Isak adinga na teel hi hen aw. Hibangin, ka pu tung ah zahngaihna na langsak, chih ka thei ding hi, a chi hi. 15 Tua banga a genkhit main, Rebek, a liangkoua tuibel puain hong pai hi. Amah, Bethuel' tanu ahi a, Bethuel bel, Abraham' sanggampa Nahor' zi Milka' tapa ahi. 16 Rebek bel, nungak melhoih mahmah, nungak siangthou, pasal tawh lumkhawm ngei nailou ahi. Amah tuikhuk ah a paisuk a, a tuibel dima tui a dip khitin hong paikhetou hi. 17 Tua laitakin, tua silapa a vatai pah a, nungak kiang ah: Hehpihtakin na tuibel apan tui hon dawnsak zek ve aw, a chi hi. 18 Ama'n: toupa aw, dawn in, a chi a, a tuibel a kisangkhe pah a, a khut apan a dawnsak hi. 19 Tua banga a dawnsak khitin: Na sangawngsaute'n zong a dawnkham mateng tui ka tawi ding, a chi a, 20 gan tuipiakna kuang ah a tuibela tui a sungkhe pah a, sangawngsaute dawn ding kiching tui tawi dingin tuikhuk ah a taikik hi. 21 Tua silapa'n bel, pau sese louin, Tangtawn Toupa'n a zinna a lawhchingsak hia, lawhchingsak lou, chi-in nungaknu gamtat a enen hi. 22 Sangawngsaute'n tui a dawnkhit takun, tua silapa'n, kham nakbah khat shekel kimkhata gik leh, a khut ading kham tau nih, shekel sawma gik a lakhia a: 23 Nang kua' tanu na hia leh, hehpihtakin, hon hilh dih ve. Na pa' inn ah koute' giah nading om diam? a chi hi. 24 Nungaknu'n a dawng a: Milka in Nahor adinga tapa a neihsak Bethuel' tanu ka hi, a chi hi. 25 Tua baan ah: Buhpawl zong, ganan zong a kiching ka nei uh a, giah nading mun awng zong a om, a chi lai hi. 26 Tua khitin, tua silapa a kun a, Tangtawn Toupa a bia a: 27 Ka toupa tunga a zahngaihna leh thutak lakik ngeilou, Tangtawn Toupa, ka toupa Abraham' Pathian phatin om hen. Kei mahmah zong, hiai lama ka zinna ah, Tangtawn Toupa mah in ka toupa' tanute' inn hon tun hi, a chi hi. 28 Tua nungaknu a tai vengveng a, a nu' inkawte kiang ah, hiai thilte tawh kisai thu a tun hi. 29 Rebek in bel, sanggam pasal khat a nei a, a min Laban ahi. Amah, tua silapa muak dingin tuikhuk lam ah a vatai a, 30 a sanggamnu' naka nakbah leh, a khuta taute a mu a, a sanggamnu' thugen: Tua mipa'n hibanga ka kianga thu gen ahi, a chih a zak pheta vatai ahi. Tua silapa, tuikhuk kiang ah a sangawngsaute tawh a na-ding a, 31 Laban in: Tangtawn Toupa' vualzawlpa, hong lut in. Banghanga hiai mun peka ding nilouh na hia? Keimah mah in inn ka na awngsak a, sangawngsaute adingin zong mun om ahi, a chi hi. 32 Tua bangin, tua silapa tua inn ah a vapai a, sangawngsaute' vante a sangkhia a, Laban in sangawngsaute ading buhpawl leh ganan a pia a, tua silapa leh a tonpihte' khesil nading tui zong a pia hi. 33 Tua khitin, nek ding an a mai ah a lui hi. Ahihhangin, tua silapa'n: Ka hong hawhna san ka gen main bangmah ne kei ning, a chi a, Laban in: Hon gen vele, a chi hi. 34 Tua bangin, silapa'n: Kei Abraham' silapa ka hi. 35 Tangtawn Toupa'n ka toupa nakpitakin a vualzawl a, amah hong thupita mahmah hi. Ama'n belamhonte, bawnghonte, ngun leh kham sikte, sila pasalte leh sila numeite, sangawngsaute leh sabiltungte amah a pia hi. 36 Ka toupa' zi Sara in a teek nungpi-in, ka toupa adingin tapa khat a nei a, ka toupa'n tua a tapa kiang ah a neihsa khempeuh a pia hi. 37 Hibang ahi a, ka toupa'n hon kichiamsak a: Ka tapa zi dingin ka tenna gam Kanante' tanute laka mi na piisak louh ding ahi. 38 Ka pa' innkawte leh, keima behte mahmah kiang ah pai zaw inla, ka tapa' zi ding piisak in, hon chi hi. 39 Ke'n ka toupa kiang ah: Numei in kei hon na zui nuam kei kha ding, ka chi hi. 40 Ahihhangin, ka toupa'n: A thu ka man Tangtawn Toupa'n, a vansawltak hon sawl ding a, nang tawh hon tonsak ding a, hon lawhchingsak ding a, ka pa' innkawte leh ka behte laka panin, ka tapa' zi ding na pii ding hi. 41 Ka behte lak na tun chiangin, a tanu uh hon na pe nuam kei kha thei uhi. Tua bang a hih leh, hiai na kichiamna apan na siang ding, hon chi hi. 42 Hibangin, tuin, tuikhuk kong tun takin: Ka toupa Abraham' Pathian, Tangtawn Toupa aw, na deihlam ahih leh, tuin, ka zinna hon lawhchingsak in. 43 Ngai in, tuikhuk kiang ah ka ding hi. Nungak siangthou tuitawi dingin hong kuan ding a, ke'n amah kiang ah: Hehpihtakin na tuibel apan tui hon dawnsak zek ve aw, ka chi ding hi. 44 Ama'n: Dawn in, na sangawngsaute ading zong tui tawi ning, a chih leh, tua nungak mah ka toupa' tapa adinga Tangtawn Toupa' teel hi hen aw, chi-in ka thum hi. 45 Ahihhangin, ka lungsunga ka thum khit main, Rebek a liangkoua tuibel puain hong pai a, tuikhuka kumsukin tui a thai hi. Tua laitakin ke'n: Hehpihtakin tui hon dawnsak ve aw, ka chi hi. 46 Ama'n a liangkou apanin a tuibel a kisangkhe pah a: Dawn in. Na sangawngsaute zong tui ka dawnsak ding, a chi hi. Tua bangin, ke'n tui ka dawn a, sangawngsaute zong a dawnsak hi. 47 Tua nungin, ke'n: Kua tanu na hia le? ka chi a, ama'n: Nahor adinga Milka in tapa a neih, Bethuel' tanu ka hi, a chi hi. Tua bangin, a nak ah nakbah ka batsak a, a khut ah taute ka bunsak hi. 48 Tua khitin, ka kun a, Tangtawn Toupa ka bia a, ka toupa Abraham' Pathian, Tangtawn Toupa ka phat hi. Amah zaw, ka pu' tapa adinga, a sanggampa' tanu pii dinga lamdika hon piipa Pathian ahi 49 Taklam hiam, veilam hiama ka kihei theih nadingin ka toupa tunga na muanhuaina leh deihsakna na latsak nop leh hon hilh in, ka chi hi, a chi hi. 50 Tua banga a gen khitin, Laban leh Bethuel in a dawng uh a: Hiai thil Tangtawn Toupa apan hong piang ahi. Koute'n a hoih leh hoihlou banglam mah kon hilh thei kei uhi. 51 Ngai in, hiai ah Rebek na mai ah a om. Amah paipih inla, paita in. Tangtawn Toupa' gen bangin, na toupa' tapa zi hita hen, a chi uhi. 52 Abraham' silapa'n amaute' thugen a zak takin, lei si-in a kun a, Tangtawn Toupa a bia hi. 53 Ama'n numei kizepna van ngun sika bawlte, kham sika bawlte leh, puansilhte a lakhia a, Rebek a pia hi. Rebek' sanggampa leh a nu zong thawnpiak manphapipi a pia hi. 54 Tua bangin, ama'n ama' mite tawh, nein a dawn a, tua ah a zan giak uhi. A zing chiangin zingsanga hong thawhkhiak takun, ama'n: Ka toupa kiang ah hon paisakta ve ua le, a chi hi. 55 Ahihhangin, Rebek sanggampa leh a nu'n a dawng uh a: Nungaknu, ni sawm khawng beek hon ompihsak lai in, tua khit chiangin, hon zui na'nte, a chi uhi. 56 Ahihhangin, ama'n amaute kiang ah: Tangtawn Toupa'n hon lawhchingsakta ahih chiangin, hon zekaisak dah unla, hon paisakta un, ka toupa kiang ah paita ning, a chi hi. 57 Amaute'n: Nungaknu ka sam ding uh a, amah mah kon dong ding uh, a chi uhi. 58 Tua bangin, Rebek a sam uh a: Hiai mipa na zui nuam ding maw? a chi uh a, He, ka zui nuam, a chi hi. 59 Tua khitin, amaute'n a sanggamnu uh Rebek tawh, amah donnu tawh, Abraham' silapa leh ama' mite tawh, a khakhia uhi. 60 Amaute'n Rebek a vualzawl uh a: Ka sanggamnu uh aw, sangsawma sim sang tampite' nu hong hi inla, na suante'n amau mudahte' kongpite laksakin tang uhen, a chi uhi. 61 Tua khitin, Rebek bel, ama' nasem numeite tawh a kisa uh a, a sangawngsaute uh tunga tuangin, tua mipa a zui uhi. Tua bangin, tua silapa'n Rebek a pii a, a kipankhia uhi. 62 Isak bel, Simlam gama teeng ahih manin, Beer Lahai Roi apan hong pai a, 63 nitaklama gamlaka Pathian thu suta thum dinga hong paikhia ahi. Amah a dakkhiak leh, ngai dih, amah lama hong pai sangawngsaute a mu hi. 64 Rebek zong a dakkhia a, Isak a mu a, sangawngsau tung apan hong kumkhia hi. 65 Ama'n tua silapa kiang ah: Eite muak dinga gamlaka hong pai hiai mi kua ahia? a chi hi. Tua silapa'n a dawng a: Amah ka toupa ahi ve, a chi hi. Tua a zak takin, Rebek in maikhuh puan a la a, a kikhuh hi. 66 Tua silapa'n a thilhih khempeuh Isak a hilh hi. 67 Isak in a nu Sara' puanbuk sung ah Rebek a piilut a, zi-in a neita a, a it mahmah hi. Tua bangin, Isak in a nu sih nungin, kihehnepna a muta hi.
Abraham Sihna
1 Abraham in zi a neih beh kik a, a min Ketura ahi. 2 Ama'n Abraham' tapate Zimran, Jokshan, Medan, Midian, Ishbak leh Shua a nei hi. 3 Jokshan in tapate Sheba leh Dedan a nei hi. Dedan' suante bel, Ashurte, Letushte leh Leumte ahi, 4 Midian' tapate bel, Efa, Efer, Hanok, Abida leh Eldaa ahi. 5 Abraham in a neihsa khempeuh Isak a nutsiat hi. 6 Ahihhangin, a meite' tate kiang ah thawnpiakte a pia a, a dam sung mah-in, Isak apanin amaute suahlam gam ah a sawlkhia hi. 7 Abraham' nuntak sung khempeuh kum 175 ahi. 8 Tua khitin, Abraham a sita hi. Amah teekkun a, kum tampi damin, lungkimtakin a sita a, a mite kiang ah pii ahita hi. 9 A tapate Isak leh Ishmael in Mamre kianga Makhpela kawkhuk ah amah a vui uhi. Makhpela bel, Hit mi Zohar tapa Efron' gam sunga om ahi a 10 Abraham in Hitte khut apan a na leikhiak ahi. Tua ah, Abraham a zi Sara kiang ah a kivui hi. 11 Abraham sih nungin, Pathian in Abraham tapa Isak a vualzawl a, Isak bel, Beer Lahai Roi ah a teeng lailai hi.
Ishmael' Suante
12 Ishmael' suante hiaite ahi. Amah bel, Abraham in Sara' silanu, tua Aigupta numei Hagar tawh kala a neih ahi. 13 Hiaite Ishmael' tapate ahi uh a, amaute kisuan danin, a minte uh hiaite ahi: Ishmael' tapa upen Nebaioth ahi a, tua ban ah Kedar, Adbeel, Mibsam, 14 Mishma, Duma, Masa, 15 Hadad, Tenia, Jetur, Nafish leh Kedema ahi. 16 Hiaite Ishmael' tapa kumpi sawmlenihte' minte, a nam dan leh a khawpi dan leh, giahphual dana genin ahi. 17 Ishmael' nuntak sung khempeuh kum 137 ahi. Tua khitin, a laitatta a, a sita a, a mite kiang ah pii ahita hi. 18 Ishmael' suante bel Aigupta suahlam, Ashur zotna lam panga Havila leh Shur gamdai-gamkeu kikal ah a teeng uhi. Amaute bel a sanggamte khempeuh uh tunga helin a nungta uhi.
Isak' Innkawte
19 Abraham' tapa Isak khangthu hiai ahi: Isak bel, Abraham' suan ahi. 20 Zi dinga Rebek a neih laiin, Isak kum 40 ahi. Rebek bel Bethuel' tanu ahi. Bethuel bel Padan Arama teeng, Aram mi ahi. Tua ahi a, Rebek lah Aram mi Laban' sanggamnu ahi. 21 Isak bel, a zi chiing ahih manin, Tangtawn Toupa kiang ah a thum hi. Tangtawn Toupa'n a thumna a dawng a, a zi Rebek a gai hi. 22 Ahihhangin, Rebek sung ah naungekte a kisual uhi. Ama'n: Bangkim hoih ahih leh, banghanga hibanga om ka hia? a chi a, Tangtawn Toupa dong dingin a kuan hi. 23 Tangtawn Toupa'n amah kiang ah: Na sul ah minam nih a om a, na gil apan minam nih a kikhen ding. Minam khat pen a dang khat Sangin a hatzaw ding a, a uzaw in a nauzaw' nna a sem ding, a chi hi. 24 Ama' nau suah hun hong tungta a, ngai in, a sul ah tapa phik a om petmah hi. 25 A suak masapen a san a, a pum tangin puansilh mul bangin a mul hi. Tua bang ahih manin, a min dingin Esau a sa uhi. 26 A den chiangin, a sanggampa, a khuta Esau' khetul lenin hong suakkhia hi. Tua bang ahih manin, a min dingin Jakob a sa uhi. Rebek in amaute a neih laiin, Isak kum 60-a upa ahita hi. 27 Tua naupangte hong khanglian uh a, Esau bel sabeng siamtak, gamvak mi hong hi a, Jakob ahih leh, mi om hiathiat, puanbuk khawnga khawsa mi ahi. 28 Isak in gamlak sa lim a sa a, Esau a it hi. Ahihhangin, Rebek in bel Jakob a it hi. 29 Khatvei, Jakob in bechim a huan laitakin, Esau gamlak apan gilkial mahmahin hong tung hi. 30 Ama'n Jakob kiang ah: Ka gil kial lua! Na besan chiim hon nesak zek zok ve! a chi hi. Hiai hangin, amah Edom, chi-in zong a minvawh uhi. 31 Ahihhangin, Jakob in: Tu mahmahin ta masa na hihna hon leisak in, a chi hi. 32 Esau in: En dih, si dinga kisa ka hita, kei adinga ta masa hih bang phatuam ahia? a chi hi. 33 Ahihhangin, Jakob in: Tu mahmahin ka mai ah kichiam in, a chi hi. Tua bangin, Esau in Jakob' maia kichiamin, a tamasa hihna Jakob kiang ah a khawngta hi. 34 Tua khitin, Jakob in Esau kiang ah, tanghou leh bechim a pia hi. Esau in ne a, a dawn khitin, a dingkhia a, a paikheta hi. Hibangin, Esau in a tamasa hihna a simmawh hi.
Isak' Lawhsapna
1 Abraham' nuntak laia kial ke masapen chih louh, tua gam ah kial hong ke kik hi. Tua bangin, Isak bel, Gerar gam ah, Filistiate' kumpipa Abimelekh kiang ah a va-hawh hi. 2 Tangtawn Toupa, Isak kiang ah hong kilaak a: Aigupta gam ah paisuk kenla, Teeng in, kon chihna gam ah teeng in. 3 Hiai gam ah om tadih in. Kon ompih ding a, kon vualzawl ding. Nang leh na suante kianga hiai gam khempeuh hon pia ka hi. Na pa Abraham kianga ka kichiamna tangtungsak ding ka hi. 4 Na suante vana aksi zahin ka pungsak ding a, hiai gam khempeuh na suante ka pe ding. Na chisuan tungtawnin, leitung namte khempeuh nakpitakin ka vualzawl ding. 5 Ahang bel, Abraham in ka aw ngaikhia a, ka thu mang a, ka thupiakte, ka thusehte leh ka dankhunte zui hi ven, a chi hi. 6 Tua bangin, Isak bel, Gerar gam ah a taam lai hi. 7 Tua nungin, tua muna teeng mite'n a zi tungthu a dong uh a, ama'n: Amah ka zi ahi, a chih ding a lau manin, Amah ka sanggamnu ahi, a chi hi. Ahang bel, ama'n: Ka zi Rebek melhoih lua ahih chiangin, ama' hangin hiai mite'n hon that kha un teh, chi-in a ngaihsuna ahi. 8 Tua muna Isak sawtpi a teen nungin, Filistiate' kumpipa Abimelekh bel khatvei a tawhleta a dakkhiak leh, Isak in a zi Rebek a zawt thiamthiam lai a mu hi. 9 Abimelekh in Isak a samsak a: Ngai dih, amah lah na zi ahi tawk a, banghanga: Amah ka sanggamnu ahi, chi peuhmah na hia? a chi hi. Isak in amah kiang ah: Ama' hangin si kha mahmah ning, ka chih mana hibanga hih ka hi ve, a chi hi. 10 Abimelekh in: Ka tung ua bang hih na hita maia? Hiai mite khat peuh in na zi luppih mawk leh, ka tung ua mawhna hon tungsak ding na hi vele, a chi hi. 11 Tua khitin, Abimelekh in a mite khempeuh thu a pia a: Hiai mi hiam, a zi hiam tunga tatsia peuhmah thah ngeingei ding ahi, a chi hi. 12 Isak in tua gam ah hai a pawi a, Tangtawn Toupa'n nakpitaka a vualzawl manin, tua kum mahin a lehza a at hi. 13 Tua bangin, amah hong mavang semsem a, hong hau mahmahta hi. 14 Belamhonte, bawnghonte leh silate a hau mahmah a, Filistiate'n amah a haza mahmah uhi. 15 A pa Abraham dam laia, a silate' tawhsa tuikhukte khempeuh Filistiate'n lei a va-vukdim uh a, a kangsak vek uhi. 16 Tua bang nungin, Abimelekh in Isak kiang ah: Koute sangin lah nong hatzawta a, hon paimangsan mai in, a chi hi. 17 Tua bangin, tua mun apan Isak a kikhinkhia a, Gerar phaizang mah ah giahphual a sat a, tua ah a teeng hi. 18 Ama'n a pa Abraham damlaia kitou tuikhukte, a sih nunga Filistiate'n a na vuhdim ua, a kansaksate uh a tou thak vek a, a pa'n tuikhuk min a phuahte mah a minvawh kik tek hi. 19 Isak' silate'n zong tua phaizang ah tuikhuk khat a tou uh a, tua ah tuinak khat a mu uhi. 20 Ahihhangin, Gerar ganchingte'n, Isak' ganchingte a tuh uh a: Hiai tui koute'-a ahi, a chi uhi. Tua banga, tuikhuk a kituhpih manun, Isak in tua tuikhuk min dingin Esek a sa hi. 21 Tua nungin, Isak' silate'n tuikhuk dang khat a tou leuleu uh a, ahihhangin, Gerar ganchingte'n tua zong a tuh uhi. Tua bang ahih manin, Isak in tua tuikhuk min dingin Sitna a sa hi. 22 Isak bel tua apan a peem a, tuikhuk dang khat a tou a, tua bel a tuh nawn kei uhi. Tua bang ahih manin, ama'n: Tu'n zaw Tangtawn Toupa'n eite adingin mun hon peta a, hiai gam ah i chiphata ding, chi-in, tua tuikhuk min dingin Rehoboth a sa hi. 23 Tua apanin, Isak bel Beersheba ah a kisuantou hi. 24 Tua zanin, Tangtawn Toupa amah kiang ah hong kilaak a: Kei na pa Abraham' Pathian ka hi. Lau ken, kon ompih hi. Ka sila Abraham' hangin kon vualzawl ding a, na suante ka pungsak ding, a chi hi. 25 Tua bangin, ama'n tua ah maitam khat a dawh a, Tangtawn Toupa' min a lou a, tua ah puanbuk a kai hi. Isak' silate'n tua ah tuikhuk khat a tou uhi. 26 Tua nungin, Abimelekh amah huhpipen Ahuzath tawh, a sepaihhon makaipa Fikol tawh Gerar apanin amah kiang ah hong hawh uhi. 27 Isak in amaute kiang ah: Banghanga ka kianga hong hawh na hi ua, hon mudah a, noute apan hon hawlmang hilou na hi umaw? a chi hi. 28 Amaute' n: Tangtawn Toupa'n nang hon ompih chih kiteltakin ka muta uh a, tua bang ahih manin, i kal ah, nang leh koute kal ah, kichiamna om hen, ka chi ua ahi. Nang tawh kal ah thukhun hon bawlsak ve. 29 Hi leh, na tunga tatse lou a, a hoih lam lou ngai na tunga bangmah hihlou a, khamuangtaka kon paikhiaksak bangin, nang zong koute tung ah na tatse kei ding hi. Tuin, Tangtawn Toupa' vualzawlpa na hi mahmah hi, a chi hi. 30 Tua bangin, Isak in amaute ankuang a lui a, amaute'n a ne uh a, a dawn uhi. 31 A zing chiang zingkhangpi-in a thou uh a, thu a chiamkhawm uh a, tua bangin, Isak in amaute a khakhia a, khamuangtakin a paita uhi. 32 Tua ni mahin, Isak' silate hong pai uh a, a tuikhuk tawh thu uh hong hilh uhi. Amaute'n: Tui ka muta uh! a chi uhi. 33 Ama'n tua tuikhuk min dingin Shiba a sa a, tuni dongin, tua khawpi min Beersheba ahi.
Esau' Lawhsapna
34 Esau kum 40-a upa a hihin, Hit mi Beri' tanu Judith leh, Hit mi Elon' tanu Basemath zi-in a nei hi. 35 Isak leh Rebek adingin amaute lunggimna bul ahi uhi.
Jakob in Esau' Vualzawlna Tang
1 Isak hong tekta a, a mit a mial a, khua a mu thei nawn kei hi. Ama'n a tapa uzawpen Esau a sam a, a kiang ah: Ka tapa aw, a chi hi. A tapa in a dawng a: Hiai ah ka om, a chi hi. 2 Isak in amah kiang ah: Ngai in, tu'n putek ka hita a, ka sih ni ding thei lou lei ka hi. 3 Tu'n na gamvak vante, na thalbawm leh na thalphel tawiin gam vavak inla, gamsa hon vamatsak in, 4 Ka duh lam takin, meh limtak hon bawlsak inla, ka nek dingin hon tawi in. Ka sih main hon vualzawl nuam ka hi, a chi hi. 5 Isak in a tapa Esau tua banga a houpih lai Rebek in a naza hi. Tua banga Esau gamsa benga a paw dinga a gamkuan khiak kalin, 6 Rebek in a tapa Jakob kiang ah: Ngai dih, na pa'n na sanggampa Esau a houpih lai ka za: 7 Gamsa hon matsak inla, a sa limtakin hon huansak in. Ka ne ding a, ka sih main Tangtawn Toupa' maia hon vualzawl nuam ka hi, chi eive. 8 Tua bang ahih manin, ka tapa aw, kon thupiak ding ngaikhia inla, ka thu mang in. 9 Ganhon lak ah vapai inla, kei vual sahoih nih hon la in. Na pa' duh lamtakin mehlim ka bawl ding a, 10 a sih ma-a, nang hon vualzawl theih nadingin, nang na pa kiang ah a nek dingin na vape ding aw, a chi hi. 11 Jakob in a nu Rebek kiang ah: Nu, ngai dih ka sanggampa Esau mul haupi hi a, kei, mul hau loua mai ka hi. 12 Ka pa'n hon na zawt kha dia a mitmuhin mikhem ka suak ding a, vualzawlna ngah naksangin hamsia ka kibuak zaw kha mahmah ding, a chi hi. 13 Ama'n a kiang ah: Ka tapa aw, hamsia na thuak taang kei tung ah tung hen. Ka thu mangin vapai inla, kelvualte hon la zok mai in, a chi hi. 14 Tua bangin, Jakob a va-pai a, kelvualte a nu kiang ah hon la hi. A nu'n a pa' duh lamtakin mehlim a bawlsak hi. 15 Tua khitin, Rebek in a tapa uzaw Esau' puansilh hoihpente, innsunga ama' kianga om, a va-la a, a tapa nauzaw Jakob a silhsak hi. 16 Tua baan ah, ama'n tua kei vualte' vuntein Jakob' khutte leh, a mul omlouhna a ngawng a khuh hi. 17 Tua khitin, a mehlim bawl leh tanghou Jakob khut ah a pia hi. 18 Tua bangin, Jakob a pa kiang ah a vapai a: Pa aw, a chi a, a pa'n: Hiai ah ka om. Ka tapa kua pen na hia? a chi hi. 19 Jakob in a pa kiang ah: Na tapa uzaw Esau ka hi. Non sawl bangbangin ka hih khinta. Hehpihtakin, thou inla, tu inla, non vualzawl theih nadingin ka sakhi sa neta in, a chi hi. 20 Isak in a tapa kiang ah: Ka tapa aw, bangchi dan ahia, vaman baih na maizen chia? a chi hi. Ama'n bel: Tangtawn Toupa, na Pathian in hon pia ahi, a chi hi. 21 Isak in Jakob kiang ah: Hehpihtakin hon naih dih ve, ka tapa kon zawt nuam. Ka tapa Esau na hi taktak hia, hi taktak lou, ka thei nuam vele, a chi hi. 22 Tua bangin, Jakob in a pa Isak a naih a, Isak in amah a na zawt a: A aw lah Jakob' aw hitah, a khutte lah Esau' khutte hitah, a chi hi. 23 Jakob' khutte bel, a sanggampa Esau' khutte banga a mul om ahih manin, Isak in Jakob a theitel kei hi. Tua bang ahih manin, Isak in Jakob a vualzawlta hi. 24 Ahihhangin, ama'n: Ka tapa Esau na hi taktak maw? a chi phapha a, Jakob in: Hi mah ing, a chi hi. 25 Tua khitin, Isak in: Ka tapa aw, nang kon vualzawl theih nadingin na sa hon tawi in, a chi a, Jakob in a sa hon tawi a, Isak in a ne hi. Grepzu zong hon tawi a, Isak in a dawn hi. 26 Tua khitin, a pa Isak in amah kiang ah: Ka tapa aw, hon naih inla, hon tawp in, a chi hi. 27 Jakob in amah a naih a, a tawp hi. Isak in a puansilh gim a za a, amah a vualzawl a: Ka tapa' gim zaw, Tangtawn Toupa' vualzawl gam gim a nam. 28 Pathian in van daitui hon pia henla, lei hoih hon pia henla, buh tampi leh grepzu tampi hon pia hen. 29 Namte'n na nna sem henla, namte na mai ah kun hen. Nang na sanggamte tunga thuneiin om inla, na nu' tapate na mai ah kun hen. Nang hon hamsiatte hamsiatin om henla, nang hon vualzawlte vualzawlin om hen, a chi hi. 30 Isak in Jakob a vualzawl khita Jakob in a pa Isak nusia a, sangkil a kan khit phetin, a sanggampa Esau sabeng gamvak hong tung hi. 31 Esau in zong mehlim a bawl a, a pa kiang ah hon tawi a, a pa kiang ah: Pa aw, thoutou inla, non vualzawl theih nadingin na tapa' samat sa ne in, a chi hi. 32 A pa Isak in amah kiang ah: Nang kua na hia? a chi a, Esau in: Na tapa uzaw Esau ka hi, a chi hi. 33 Isak bel nakpitakin a ling a: A hih leh, gamsa vaman a, a sa ka kianga hon tawipa kua ahia? Nong tun ma-a na nekhin a, amah na vualzawl khinta ka hih manin, Pathian in amah vualzawl taktak ding ahi, a chi hi. 34 Esau in a pa' thugen a zak takin, khase mahmahin a kapkhia a, a pa kiang ah: Pa aw, hon vualzawl mahmah in, kei zong hon vualzawl sam in! a chi hi. 35 Isak in: Na sanggampa'n kei hon khem a, na vualzawlna hon laksak ahita ve! a chi hi. 36 Esau in: A min Jakob ahi namah a, nihvei tak hon kheemta eive! Tamasa ka hihna hon laksak a, tuin ka vualzawlna nangawn hon laksakta! a chi hi. Tua khitin, a pa kiang ah: Kei adinga vualzawlna siit lou maw? a chi hi. 37 Isak in Esau a dawng a: Ngai in, amah nang tunga thunei dingin ka koihta a, a sanggamte khempeuh a sila dingin ka peta. Buh leh grepzu ka peta. Nang ading bang hon hihsak thei mahmah ding ka hia, ka tapa aw! a chi hi. 38 Esau in a pa kiang ah: Pa aw, vualzawlna khat kia nei na hi maw? Pa aw, kei zong hon vualzawl sam mahmah in, chi-in khasetakin a kap hi. 39 A pa Isak in a dawng a, amah kiang ah: Ngai in, lei hoihna mun apan gamla ah na teeng ding a, van daitui kiakna mun apan gamla ahi dia, 40 Na namsau pansanin na nungta ding a, ahihhangin, na sanggampa' nna na sem ding. Ahihhangin, chimtaaka na kitutkhiak chiangin, na ngawng apan a hakkol na paikhe ding, a chi hi. 41 A pa'n Jakob a vualzawl manin, Esau in Jakob a mudah a, a lungsung ah: Ka pa ka suun hun hong tung dekta, tua khit chiangin, ka sanggampa Jakob ka that ding, a chi hi. 42 Rebek tapa uzaw Esau' thugente, Rebek kiang ah mi kua hiam khat in a hilh a, Rebek in a tapa nauzaw Jakob a sam a, a kiang ah: Ngai in, na saanggampa Esau, nang hon thah sawmin a kihehnem dek hi. 43 Ka tapa aw, ka thugen ngaikhia in. Thou inla, Haran gam ah, ka sanggampa Laban kiang ah tai pah in. 44 Na sanggampa' hehna a dam mateng, Laban kiang ah ni bangzah hiam vatam inla, 45 na sanggampa na tunga a hehna a dam a, a tunga na thilhih a mangngilh mateng tua ah va taam in. Tua khit chiangin, nang kon samsak ding a, kon piisak ding. Banghanga ni khat thu-a na nih ua hon mansuaha dah ding ka hia? a chi hi. 46 Tua khitin, Rebek in Isak kiang ah: Hit mite' tanute hangin hin ka chimtak mahmah hi. Jakob in Hit mite' tanu, hiai gam numei khat zi-in hon nei zel leh, kei adingin hin bang phatuam ding ahia? a chi hi.
1 Tua bangin, Isak in Jakob a sam a, a vualzawl a: Kanan numei zaw kitenpih ken. 2 Padan Aram ah hawh pah inla, na nu' pa Bethuel' inn ah hawh inla, na nu' sanggampa Laban' tanute khat na zi dingin pii in, chi-in thu a pia hi. 3 Tua baan ah, ama'n: Pathian Vanglianpen in nang hon vualzawl henla, chiphatakin hon bawl henla, nam tampi na phak mateng hon pungsak hen, 4 tu-a mikhuala na tenna gam na tan theih nadingin, Abraham kianga a piak vualzawlna nang leh na suante hon pia hen. Pathian in hiai gam Abraham kianga a piak ahi, a chi hi. 5 Tua bangin Isak in Jakob a kuankhesak a, Padan Aram gam ah, Aram mi Bethuel' tapa Laban kiang a vatung hi. Laban bel, Rebek' sanggampa ahi a, Rebek lah Esau leh Jakob' nu ahi. Esau' Zineihna 6 Isak in Jakob a vualzawl a, Padan Aram lam ah zi zong dingin a sawl a, Kanan numei kitenpih ken, chi-in thu a pia, chih leh, 7 Jakob in a nu leh pa' thu a mang a, Padan Aram zuanin a kuankhia, chih Esau in a thei hi. 8 A pa Isak in Kanan numeite a deih het kei, chih Esau in a theita a, 9 Ishmael kiang ah a hawh a, Ishmael' tanu Nebaioth' sanggamnu Mahalath a kitenpih hi. Ishmael bel Abraham' tapa ahi a, Esau in Mahalath a kitenpih bel, a zi neihsate bana a neihbeh ahi. Bethel-a Jakob' Thuchiam 10 Jakob in Beersheba a nusia a, Haran zuanin a kuankhia hi. 11 Mun khat a tunin, ni a tumtak manin, tua ah a giak hi. Suang khat a la a, a kham a, a ihmu hi. 12 Ama'n mang khat a man a, a mangin, leia kinga kellei khat, a dawn van suntou a mu a, tua ah Pathian' vansawltakte a suk a tunga kileh a mu hi. 13 Tua kellei dawn ah, Tangtawn Toupa a ding a: Kei Tangtawn Toupa, na pa Abraham' Pathian leh Isak' Pathian ka hi. Tu-a na lupna gam nang leh na suante adingin kon pia hi. 14 Na suante leia leivui zah a pha ding a, suahlam, tumlam, mallam leh simlam ah na kizalh ding uh. Nang ah leh na suan ah leitunga innkuante khempeuh ka vualzawl ding. 15 Ngai in, ke'n nang kon ompih a, na paina peuh ah kon veng ding. Nang kon hilhsa ka tangtunsak mateng, kon nutsiat louh ding manin, hiai gam ah kon piikik ding, a chi hi. 16 Jakob a ihmu a khanglou a: Tangtawn Toupa hiai laia om taktak ahi a, ke'n lah ka na phawk kei a, chi-in a ngaihsun hi. 17 Tua bang a ngaihsut leh, a lauta a: Hiai mun lauhuai na maizen e! Hiai mun, mun dang ahi kei a, Pathian' inn a na hi! Hiai mun van kongpi ahi! a chi hi. 18 Zingsang beltakin Jakob a thou a, lukhama a zat tua suang a la a, suangphuhin a phut a, a tung ah sathau a buak a, 19 tua mun min dingin, Bethel a sa hi. Tua khawpi min masa bel Luz ahi. 20 Tua khitin, Jakob in kichiamna a bawl a: Nang Pathian in non ompih a, ka paina lampi-a non ven a, nek ding an non piak a, silh ding puan non piak a, ^ittaka ka pa' inn ka tun kik leh, nang Tangtawn Toupa ka Pathianin kon nei ding. 22 Tua baan ah, hiaia suangphuh ka phuh, Pathian' inn ahi ding a, non piak ding teng khempeuh sawma khat kon pe ding, a chi hi.
Jakob leh Rakhel
1 Tua nungin, Jakob a zinna lam ah a pai a, suahlam mite' gam a tung hi. 2 Amah a khawdak a, gamlak ah a kitousa tuikhuk khat a mu hi. Tua tuikhuk kiang ah belamhon hon thum a kual uhi. Tua tuikhuk bel, belamte tui piakna ahi. Tua tuikhuk tung sitna suang lianpi ahi a, 3 belamhonte khempeuh tua muna a hawlkhawm chiangun, belamchingte'n tua tuikhuk sitna suang a khukkhia uh a, belamte tui a pia uhi. Tua khit chiangin, tuikhuk a sin kik zel uhi. 4 Jakob in belamchingte kiang ah: Ka sanggamte aw, koi akipan na hi ua? a chi hi. Amaute'n: Haran khua akipan ka hi uh, a chi uhi. 5 Ama'n amaute kiang ah: Nahor' tapa Laban na thei uhia? a chi hi. Amaute'n: He, amah ka thei uh, a chi uhi. 6 Jakob in amaute a dong a: Amah a dam hia? a chi hi. Amaute'n: He, dam mah e. Hiai ah, a tanu Rakhel, a belamte tawh hong pai ve le, a chi uhi. 7 Ama'n: Ngai dih ua. Ni sang lai a, belamte hawi hun nai lou hi. Tui pia unla, gamtasak lai ve ua, a chi hi. 8 Amaute'n a dawng uh a: Tua bangin hih thei kei n'ung. Belam-honte khempeuh hong paikhawm a, tuikhuk sitna suang a kikhukkhiak chiangin, tui ka pe thei phet ding uh, a chi uhi. 9 Tua banga amaute tawh a kihou sungun, Rakhel, a pa' belamte tawh hong tung hi. Amah belamching numei ahi. 10 Jakob in a nu' sanggampa Laban' tanu Rakhel leh, Laban' belamte a muh takin, a vapai a, tuikhuk sitna suang a khukkhia a, a nu' sanggampa Laban' belamte tui a pia hi. 11 Tua khitin, Jakob in, Rakhel a tawp a, a kapkhia hi. 12 Ama'n Rakhel kiang ah, amah a pa' tanau leh Rebek' tapa a hih lam a hilh hi. Tua khitin, Rakhel a tai a, a pa a vahilh hi. 13 Laban in a sanggamnu' tapa Jakob thu a zak takin, amah muak dingin kintakin a vatai hi. Ama'n amah a pom a, a tawp a, inn ah a paipih hi. Jakob in Laban kiang ah, hiai thute khempeuh a hilh a, 14 Laban in amah kiang ah: Nang ka sa leh ka sisan mahmah na hive, a chi hi.
Jakob in Lea leh Rakhel Kitenpih
Laban kianga Jakob kha khat a om nungin, 15 Laban in amah kiang ah: Ka tanau na hih man lelin, amawknain ka nna na sem dia hia? Na thaman ding bang hi ding hiam, hon hilh in, a chi hi. 16 Laban in tanu nih a nei a, a uzawpen Lea ahi a, a nauzawpen Rakhel ahi. 17 Lea mit a haat kei a, Rakhel bel a duang a ching a, a mei a hoih hi. 18 Jakob in Rakhel a it a, Laban kiang ah: Na tanu nauzaw Rakhel thalawhin, na nna kum sagih ka sem nuam, a chi hi. 19 Laban in: Amah mi dang ka piak sangin, nang hon pe leng hoihzaw mah inte, ka kiang ah om in, a chi hi. 20 Tua bangin, Jakob in Rakhel thalawh dingin, Laban' nna kum sagih a sem a, ahihhangin, Rakhel a it manin, ni tawmchik bangin a thei hi. 21 Tua nungin, Jakob in Laban kiang ah: Ka zi hon peta in. Ka nasep hun sung chingta hi. Amah luppih nuamta ing, a chi hi. 22 Laban in tua khawmite a samkhawm a, ankuang a lui hi. 23 Ahihhangin, nitak hong hih takin, a tanu Lea a tonpih a, Jakob adingin a pia a, Jakob in amah a luppih hi. 24 Laban in a sila numei Zilpa, a tanu Lea' silanu dingin a pia hi. 25 Zing khua hong vak takin, ngai in, Lea a na hi maimah hi. Jakob in Laban kiang ah: Bang hon lawh na hita maia? Rakhel thalawh dinga na nna sem hilou ka hi maw? Banghanga hon khem na hia? a chi hi. 26 Laban in a dawng a: Tanu uzaw ma-a tanu nauzaw pasal neihsak ka ngeina uh hilou hi, 27 Hiai ka tanu' mouthak hun nipikal zatbeipih inla, tua khit chiangin, kum sagih dang sem lai lechin, a nauzaw pen zong hon pe ding hi'ng, a chi hi. 28 Tua bangin Jakob in a hih a, Lea' mouthak hun nipikal a zatbeipih a, Laban in Jakob' zi dingin a tanu Rakhel zong a pia hi. 29 Laban in a silanu Bilha, a tanu Rakhel' silanu dingin a pia hi. 30 Jakob in Rakhel zong a luppih a, Lea sangin Rakhel a itzaw hi. Tua bangin Jakob in Laban adingin kum sagih dang nna a sem hi.
Jakob' Tate
31 Lea in itna a tan louh dan, Tangtawn Toupa'n a mu a, a sul a honsak a, ahihhangin, Rakhel bel a chiing hi. 32 Lea a gai a, tapa a nei a, Lea in: Tangtawn Toupa'n ka lunggimna a muta. Tu'n zaw ka pasal in hon itta ding, chi-in, a tapa min dingin Reuben a sa hi. 33 Amah a gai kik a, tapa a neih takin: Itna ka tan louh dan Tangtawn Toupa'n a mu a, hiai zong hon pia ahi, chi-in, a min dingin Simeon a sa hi. 34 Amah a gai kik leuleu a, tapa a neih takin: Ka pasal adingin tapa thum ka neihsaktak manin, tu'n zaw ka pasal in hon deihthawh tain teh, chi-in, a min dingin Levi a sa hi. 35 Amah a gai kik leuleu a, tapa a neih takin: Tutung zaw, Tangtawn Toupa ka phat ding, chi-in, a min dingin Judah a sa hi. Tua nung siah ama'n ta a nei nawn kei hi.
1 Rakhel in Jakob ading ta nei lou a hihna theiin, a sanggamnu a haza a, Jakob kiang ah: Tate hon pia in, non piak kei leh zaw ka si ding, a chi hi. 2 Jakob bel Rakhel tung ah a heh a: Nang ta neilou dinga hon bawlpa Pathian' muna ding ka hi-a hia? a chi hi. 3 Rakhel in: Hiai ah ka silanu Bilha a om. Ama'n kei adinga tate hon neihsak a, amah tungtawna innkuan ka bawl theih sam nadingin, amah luppih in, a chi hi. 4 Tua bangin, Rakhel in Jakob zi dingin Bilha a pia a, Jakob in amah a luppih hi. 5 Bilha a gai a, tapa a nei a, 6 Rakhel in: Pathian in a dikin vai hon hawmsak a, ka ngetna hon za a, tapa hon peta, a chi a, a min dingin Dan a sa hi. 7 Rakhel' silanu Bilha a gai kik a, Jakob adingin tapa nihna a nei a, 8 Rakhel in: Ka sanggamnu tawh nakpitakin ka kibuan uh a, kei ka vualzouta, a chi a, tua tapa' min dingin Naftali a sa hi. 9 Lea in ta a nei nawn kei, chih a kithei a, a silanu Zilpa a tonpih a, Jakob zi dingin a pia hi. 10 Lea' silanu Zilpa in Jakob adingin tapa a nei a, 11 Lea in: Vangpha na-maizen ing e! a chi a, tua tapa' min dingin Gad a sa hi. 12 Lea' silanu Zilpa in Jakob adingin, tapa nihna a nei a, 13 Lea in: Lungdam na maizen ing e! Tanu teng khempeuh in mi nunnuam hon chi ding, a chi a, tua tapa' min dingin Asher a sa hi. 14 Huit buh lak laiin, Reuben in gamlak ah zawl-ai gahte a mu a, a nu Lea kiang ah hon pua hi. Rakhel in Lea kiang ah: Na tapa' zawl-ai gahte hon hawm in, a chi hi. 15 Ahihhangin, Lea in Rakhel kiang ah: Ka pasal non suh bawn thil neu liai na sa-a hia? Ka tapa' zawl-ai gahte nangawn hon sut nuam zel na hi maw? a chi hi. Rakhel in: Ahih leh, na tapa' zawl-ai gahte hon pe lechin, tuzan ka pasal in hon luppih na ke, a chi hi. 16 Tua bangin, tua nitak lama Jakob gamlak apan hong tun takin, Lea in a vamuak a, a kiang ah: Tuzan non luppih ding ahi. Ka tapa' zawl-ai gaha kon khelhsa na hi, a chi hi. Jakob in tua zan Lea a luppih hi. 17 Pathian in Lea' thumna a ngaikhia a, Lea a gai a, Jakob adingin tapa ngana a nei hi. 18 Lea in: Ka pasal adinga ka silanu ka piak manin, Pathian in pahtakman hon pia ei ve, a chi a, a tapa' min dingin Isakhar a sa hi. 19 Lea a gai kik a, Jakob adingin tapa gukna a nei a: 20 Pathian in thawnpiak manpha khat hon pia ei ve, a chi a, a tapa' min dingin Zebulun a sa hi. 21 Hun bangtan hiam nungin, Lea in tanu khat a nei a, a min dingin Dina a sa hi. 22 Tua nungin, Pathian in Rakhel a phawk a, a thumna a ngaikhia a, a sul a honsak hi. 23 Amah a gai a, tapa khat a nei a: Pathian in ka zahlakna a lamangta, a chi a, 24 a tapa' min dingin Josef a sa a, Tangtawn Toupa'n tapa khat hon piakbeh hen aw, a chi hi.
Jakob leh Laban' Kithukimna
25 Rakhel in Josef a neih nungin, Jakob in Laban kiang ah: Ka gam lama ka pai theih nadingin hon paisakta in. 26 Na nna sema ka thalawhsa, ka zite leh ka tate hon pia inla, ka paita ding. Na nna bangzah semta ka hi hiam, na thei hi, a chi hi. 27 Ahihhangin, Laban in amah kiang ah: Na mitmuha deihsakna ka ngah leh hehpihtakin taam lai in. Nangma' hanga Tangtawn Toupa'n kei hon vualzawl ahi, chih ka thei hi. 28 Na thaman ding gen in, hon pia ning, a chi hi. 29 Tua bangin, Jakob in: Na nna bangzah semta ka hi hiam, chih leh, na ganhonte ka kepna nuai ah bang suak uhiam, chih na thei hi. 30 Kong tun main tawmchik na nei a, kong tun nungin, Tangtawn Toupa'n hon vualzawl a, tawmchik na neihte nakpitakin a pung hi. Hita mah leh, ke'n ka innkawte ading bang chik chianga sem ding ka hia? a chi hi. 31 Laban in: Bang hon pe ding ka hia? a chi hi. Jakob in: Hiai thil khat kei adingin hon hihsak lechin, bangmah dang non piak kul kei. Hiai non hihsak leh, na ganhonte ka ching ding a, ka veng nawn ding. 32 Tuni-in, na belamhonte lak ah hon paisak inla, na belamte laka a gial iim iam peuhmah, ahih kei leh, a bema gialte leh, a san thiuthiaute, tua baan ah, na kelte laka a gial iim iam, ahih kei leh, a bem a gialte ka khenkhe ding a, ka thaman hi uhen. 33 Hi leh, tunung chianga, ka thaman gante na et chiangin, amaute'n ka diktatna hon lak ding uhi. Ka kelte laka a gial iim iam hilou, ahih kei leh, a bema gial hilou, ahih kei leh, belam nou a san thiuthiau hilou a om leh, tuate a kiguk thawh ahi, chi-in sim in, a chi hi. 34 Laban in: Hi mah hen. Na gen bangbang hi hen, a chi hi. 35 Tua ni mah-in, kelpate, a gial iim-iam, ahih kei leh, a bema gialte, a kaang bema gial zek peuhmah, tua baan ah, belarnnou san thiuthiaute a khenkhia a, Jakob' tapate a chingsak hi. 36 Amah leh Jakob kikal, ni thum lama kihal dingin, a paisak a, Jakob in bel Laban' ganhonte a ching hi. 37 Ahihhangin, Jakob in hiangzau sing leh, makha sing leh, se sing hiang satkhiakte a la a, a kimvela atin a hawng a khok a, a sung ngoute dawksakin, chianggelhte a bawl hi. 38 Tua chianggelhte, ganhonte'n tui a dawn chiangua a maizawn ua om dingin tuikuang ah a koih hi. Ganhonte a huk laia, tui dawn dinga hong pai chiangun, 39 tua chianggelhte mai ah a talte'n a bawh uhi. Tua hangin, a nou gial hiikheekte, gial iim iamte, a bema gialte a nei uhi. 40 Jakob in ganhonte a tuam koih a, ahihhangin, gannou pa a gialte leh san thiuthiaute bel, Laban ganhonte lam a ngasak hi. Ama' gante bel a tuamin a koih a, Laban' gante tawh a koihkhawm kei hi. 41 Gannu a hatzawte a huk chianga, a talte'n a chianggelhte' maia a bawh ding uh deihin, tua chianggelhte tuikuang ah a koih zel hi. 42 Ahihhangin, gan hatloute leh zawngkhalte' mai ah bel chianggelhte a koih kei hi. Tua bangin, gan hatlou zawngkhalte Laban in a tang a, a hatte Jakob in a tang hi. 43 Hibangin, Jakob hong lawhching a, ganhonte, sila numei leh sila pasal leh, sangawngsaute leh sabiltungte a hauta hi.
Laban apan Jakob Tai
1 Laban' tapate'n: Jakob in i pa' neihsa teng khempeuh sut a, a hauhna khempeuh i pa apan a ngah ahi, a chih uh Jakob in a za hi. 2 Tua bangin, Jakob in amah lama Laban' lungput a ngei a bang nawn kei, chih a mu hi. 3 Tua nungin, Tangtawn Toupa'n Jakob kiang ah: Na pa' gam ah leh, na tanaute kiang ah chiah kikta inla, kon ompih ding, a chi hi. 4 Tua bangin, Jakob in Rakhel kiang leh Lea kiang ah, a belamhonte omna gamlaka hong paikhe dingin thu a khak hi. 5 Amaute kiang ah: Kei lama na pa uh' lungput a ngei a bang nawn kei, chih ka mu. Ahihhangin, ka pa' Pathian in hon ompih hi. 6 Ka tha neih tengin na pa uh' nna ka sem, chih na thei uhi. 7 Hinapi-in, na pa un hon khem a, ka thaman sawmvei tak a khengkheng hi. Ahihhangin, ama'n kei hon hihsiat ding Pathian in a phal kei hi. 8 Ama'n: A gial iim iam teng na thaman ahi ding, a chih chiangin, belamte'n nou a gial iim iam a nei uh a, a gial hiikheek teng na thaman ahi ding, a chih chiangin, belamte'n nou gial hiikheek a nei zel uh. 9 Tua bangin, Pathian in na pa uh' ganhonte laksakin kei hon pe zel hi. 10 Gantate a gai hun laiin, khatvei mang ka nei a, ka dak tou a, ganhonte bawh a take a gial hikheek, a gial iim iam leh a bema gial liante a na hi uhi. 11 Tua ka mangin, Pathian' vansawltak in ka kiang ah: Jakob, hon chi a, ke'n: Hiai ah ka om, ka chi hi. 12 Ama'n: Daktou inla, ganhonte bawh keltalte, a gial hiikheekte, a gial iim iamte, a bema gialte ahi, chih chiamteh in. Laban in nang hon bawldan khempeuh ka muta. 13 Suang na phuhna leh, ka kianga kichiamna na bawlna Bethela na tuah tua Pathian kei ka hi. Tuin, hiai gam nuse meng inla, na pianna gam ah kilehkik in, hon chi ahi, a chi hi. 14 Tua khitin, Rakhel leh Lea in a dawng uh a: Ka pa uh' inn ah goutan ka nei lai ua hiam? 15 Ama'n koute gamdang mi bawla hon bawl hilou maw? Koute hon khotkhiak chih thamlouh, koute adinga piaksate nangawn gaikhin hilou maw? 16 Ataktakin, Pathian in ka pa uh' hauhna a laksakte khempeuh eite'-a ahi ve le. Tua bang ahih manin, Pathian in hon hilh peuhmah hih mai in, a chi uhi. 17 Tua khitin, Jakob in a tate leh a zite sangawngsau tung ah a tuangsak a, 18 a ganhonte leh Padan Arama a kaihkhawm vante khempeuh a mai ah a paisak a, Kanan gama a pa Isak kiang zuanin a kipankhia hi. 19 Laban, a belam mulmet dinga a kuan kalin, Rakhel in a pa' innsung milim pathiante a guksak hi. 20 Jakob bel, tua Aram mi Laban hilh louin a simtai hi. 21 Tua bangin, Jakob a neih teng khempeuh tawh a tai a, Luipi a kan a, Gilead tanggam a manawh hi.
Laban in Jakob Nungdelh
22 Jakob a taita, chih Laban kiang ah a ni thum ni-in a hilh uhi. 23 Laban in a sanggamte a tonpih a, ni sagih lam a delh nungin, Gilead tanggam ah, Jakob a delhpha hi. 24 Ahihhangin, tua Aram mi Laban kiang ah, a mangin, Pathian a kilaak a, amah kiang ah: Jakob kiang ah a sia hita leh, a pha hita leh, bangmah gen lou dingin pilvang in, a chi hi. 25 Tua bangin, Laban in Jakob a delhpha a, Jakob in tanggam ah a puanbuk a na kai a, Laban leh a sanggamte'n zong Gilead tanggam ah puanbuk a kai uhi. 26 Laban in Jakob kiang ah: Bang hih na hita mai a, ka theih louh kala na simtai a, ka tanute gallak taka na lakmang? 27 Banghanga simtai a, hon taisan a, hon hilh lou mahmah na hia? Ke'n lungnuamtaka, late, tumgingte leh, kaihgingte tawh hon kha nuam mah hi vengin. 28 Ka tute leh ka tanute nangawn hon tawpsak lou a, haihuaipi-a gamta na hi ve. 29 Nang hon hihsiat ut leng, hon hihse thei ka hi. Ahihhangin, na pa' Pathian in zan zanin hon houpih a: Jakob kiang ah a sia hita leh, a pha hita leh, bangmah gen lou dingin pilvang in, hon chi hi. 30 Na pa' inn na ngaih mahmah mana tai zaw na hi peuhmah a, hita mah leh, banghanga ka pathiante hon guksak na hia oi? a chi hi. 31 Jakob in a dawng a, Laban kiang ah: Thagumin na tanute non sut kha ding ka chi a, ka laua ahi. 32 Na pathiante ahih leh, na muhna mi penpen hinghawi ken. I tanaute' mitmuhin ka neih ka lam teng vel inla, nang'-a ka lak khak om leh lakik in, a chi hi. Jakob in bel Rakhel in tua pathiante a guk lam a thei kei hi. 33 Tua bangin, Jakob' puanbuk ah, Lea' puanbuk ah leh, tua sila numei nihte' puanbuk ah Laban a lut a, ahihhangin, a pathiante a mu kei. Lea puanbuk apan a pawtkhia a, Rakhel' puanbuk ah a lut hi. 34 Rakhel in tua innsung pathiante a la a, sangawngsau tuanphaha selin, a tung ah a tu hi. Laban in puanbuk teng a mai a, ahihhangin, tua pathiante a mu kei hi. 35 Rakhel in a pa kiang ah: Na maia ka din theih louh, ka toupa'n zadah ken aw, numei' ngeina ka neih laitak ahi-a ahi, a chi hi. Tua bangin, Laban in zong mah leh, tua innsung pathiante a mu kei hi. 36 Jakob a heh a, Laban a sal a, a kiang ah: Ka helna bang ahia? Ka khelhna bang ahia, hibanga non nungdelh? 37 Ka van teng na pheklek a, na innsung van bang na mu-a eita? Na tanaute leh, ka tanaute' mai ah na muh pen hon koih inla, amaute'n eite gel kal ah thu khen uhen aw. 38 Na kiang ah kum 20 sung vingveng ka omta a, na belampite leh, na kelpite'nou a se ngei kei. Na ganhon laka belampate zong kon neksak ngei kei. 39 Na gantate gamsa keihlupin zong kon tun ngei kei. Ke'n manna ka thuak zaw zel. Sun laia kigu hita leh, zan khanga kigu hita leh, kei non dinsak zel. 40 Ka thuak hibang ahi ve: Sun nisa ka thuak a, zan khawdam ka thuak a, ihmut ka mu ngei kei. 41 Kum 20 na inn sunga ka om sung, ka thuak hibang ahi tawntung ahi. Na tanute thalawhin kum sawmleli na nna ka sem a, na gante thalawhin kum guk nna ka sem a, ka thamante sawmvei non kheksak hi. 42 Ka pa' Pathian, Abraham' Pathian leh Isak' Kihtakpa in hon na ompih lou hi leh, khutvuaka hon paisak ding na hi vele. Ahihhangin, Pathian in ka haksatna leh ka khut sepgimna a muta a, zanni zaanin nang hon tai ahi ve, a chi hi. 43 Laban in Jakob a dawng a: Hiai tanute ka tanute ahi a, hiai naupangte ka tute ahi a, hiai gantate ka gantate ahi. Na muh teng khempeuh kei'-a ahi. Tuni-in, hiai ka tanute, ahih kei leh, a ta neihte uh ading bang hihsak thei ding ka hia? 44 Tua bang ahih manin, kisa inla, nang leh ke'n thukhun khat bawl ni, i kal ah theihpihna hi hen, a chi hi. 45 Tua bangin, Jakob in suang khat a la a, suangkhuam dingin a phut a, 46 a tanaute kiang ah: Suang hon tomkhawm un, a chi hi. Tua bangin, amaute'n suangte hon tomkhawm uh a, tuate a chiangkhawm uh a, tua suang chiankhawm kiang ah an a ne uhi. 47 Laban in tua suangchian, Jegar Sahadutha, chi-in a minvawh a, Jakob in bel, Galeed, chi-in a minvawh hi. 48 Laban suangchian, theihpihna bangin, tua in: Tuni-in, hiai nang leh kei kala ahi, a chi hi. Tua suangchian, Galeed, a kichi a, 49 Mizpa zong a kichi hi. Ahang bel, Laban in: Eite i kikhen sung teng, Tangtawn Toupa'n nang leh kei hon veng tuak hen. 50 Ka tanute tunga na tatsiat a, a hih kei leh, amaute lou zi dangte na neih leh, eite kiang ah kuamah om kei mah leh, nang leh kei kala theihpihna Pathian ahi, a chi-a ahi. 51 Laban in Jakob kiang ah: Hiai ah suangchian a om a, hiai ah suangkhuam a om. Nang leh kei kala ka koih ahi. 52 Nang hon hihse dingin hiai suangchian khengin nang lam ah kong pai kei ding a, kei hon hihse dingin hiai suangchian leh suangkhuam khengin kei lam ah nong pai kei ding, chihnain hiai suangchian, theihpihna ahi a, hiai suangkhuam, theihpihna ahi. 53 Abraham' Pathian leh Nahor' Pathian leh, a pa uh' Pathian in eite kal ah thu khen hen, a chi lai hi. Tua bangin, a pa Isak' Kihtakpa' min louin, Jakob a kichiam hi. 54 Ama'n tua tanggam ah kithoihna a lan a, an ne dingin a tanaute a chial hi. Amaute'n an a nek khitun, tua mun ah tua zaan a taam uhi. 55 A zing chiang, zingsang beltakin, Laban in a tute leh a tanute a tawp a, amaute a vualzawl hi. Tua khitin, a kipankhia a, inn ah a kilehkikta hi.
Esau Tuak dinga Jakob Kisa
1 Jakob zong a pai a, Pathian' vansawltakte' n amah a na-tuak uhi. 2 Jakob in amaute a muh takin: Hiai lah Pathian' giahphual ahi! a chi a, tua mun min dingin, Mahanaim a sa hi. 3 Jakob in Edom gam, tua Seir gam ah a sanggampa Esau kiang ah, thangkoute a sawl masa a, 4 amaute a thuhilh a: Ka toupa Esau kianga hiai na gen ding uh ahi. Na silapa Jakob in: Laban kianga tutan dong om ka hi a, 5 bawnghonte leh sabiltungte, belamte leh kelte, sila pasalte leh sila numeite ka nei hi. Tuin ka toupa' maipha ka muh theih nadingin, na kiang ah thangkoute kon sawl ahi, a chi, va-chi un, a chi hi. 6 Tua thangkoute, Jakob kiang hong tun kik takun: Na sanggampa Esau kiang ka vatung uh a, tuin amah nang muak dingin mi 400 tawh hong pai ding ahi, a chi uhi. 7 Jakob a lau a, a patau mahmah a, a tonpihte pawl nihin a khen a, a belam leh kelhonte leh sabiltungte zong tua bangin a khen hi. 8 Ahang bel, ama'n: Esau hong pai a, pawl khat a sual leh, pawl dang khat pen a suakta thei khamawh ding hiam, chi-in a ngaihsuna ahi. 9 Tua bangin, Jakob a thum a: Ka pa Abraham' Pathian, ka pa Isak' Pathian aw, ka kianga: Na gam lam leh na tanaute kiang ah kilehkikta in, kon lawhchingsak ding, chipa Tangtawn Toupa aw, 10 kei na silapa tunga na chitna leh muanhuaina khempeuh tang taak ka hi kei. Hiai Jordan lui ka kan laiin, ka chiangkhun kia lei ka nei a, tuin mi pawl nih tak kong phata. 11 Kon ngen ahi. Ka sanggampa Esau khut apan hon hinghawi in. Amah hong paiin, kei leh ka tate leh, a nute uh hon sual kha ding, chih ka lau ahi. 12 Ahihhangin, nang ka kiang ah: Kon lawhchingsak ngeingei ding a, tuipi-a sehnel simsenglouh bangin, na suante ka tamsak ding, non chita hi, a chi hi. 13 Tua mun ah, tua zan a giak a, a neihsa lak ah, a sanggampa Esau adingin thawnpiak ding a telkhia hi: 14 Kelpi 200 leh keltal 20, belampi 200 leh belamtal 20, 15 sangawngsaupi nawisuklai 30 leh a noute tawh, bawngpi 20 leh bawngtal sawmkhat, sabiltung 20 leh sabiltung nou sawmkhat a telkhia hi. 16 Hiaite a honhonin a silate a hawlsak a, amaute kiang ah: Ka mai ah na pai masa unla, ganhonte kal kihalsak un, a chi hi. 17 Ama'n amasapen a thuhilh a: Ka sanggampa Esau in nang hon tuah chianga: Nang kua-a na hia? Koia hawh dek na hia? Hiai gantate khempeuh kua-a ahia? hon chih chiangin, 18 nang: Hiaite na silapa Jakob-a ahi a, ka toupa Esau adinga thawnpiak hon piak ahi a, amah koute nunga hong pai ahi, na chi ding ahi, a chi hi. 19 Tua bangin, a nihna, a thumna leh ganhon hawi dangte zong a thuhilh a: Esau na tuah chiangun, tua bang teng mah na gen ding uh ahi. 20 Na silapa Jakob koute nunga hong pai ahi, chi khial kei un, a chi hi. Ahang bel, ama'n: Hiai thawnpiakte ka paisak masaktein amah ka lungtaisak ding a, tua nungin, amah ka tuah hun chiangin, kei hon sang nante, chi-in a ngaihsuna ahi. 21 Tua bangin, Jakob' thawnpiakte a pai masa a, amah bel giahphual ah a giak lai hi.
Jakob in Pathian Buan
22 Tua zanin Jakob a thou a, a zite gel, sila numeite gel leh, a tapa sawmlekhatte a tonpih a, Jabok lui ngahna ah a galkah hi. 23 Amaute lui a kansak nungin, a neihsate khempeuh zong a kha galkai vek hi. 24 Tua khitin, Jakob amah kiain a om a, mi khat in zing khawvak dong amah a buan nilouh hi. 25 Tua mipa'n amah a zou kei, chih a theih takin, Jakob pheipi leh ngum kituahna kuak a khoihsak a, Jakob in tua mipa a buan laiin, a pheipi leh ngum kituahna a kilawi hi. 26 Tua mipa'n: Hon khah in, khua vak ahita, a chi hi. Ahihhangin, Jakob in: Non vualzawl kei leh, kon khah kei ding, a chi hi. 27 Tua mipa'n: Na min bang ahia? chi-in a dong hi. Jakob in a dawng a: Jakob, a chi hi. 28 Tua mipa'n: Na min Jakob ahi nawn kei ding a, Israel ahita ding. Ahang bel, Pathian leh mihing na buan a, na zouta hi, a chi hi. 29 Jakob in: Hehpihtakin, na min hon hilh in, a chi hi. Ahihhangin, tua mipa'n a dawng a: Banghanga ka min hon dong na hia? a chi a, tua mun ah amah a vualzawlta hi. 30 Tua khitin, Jakob in: Pathian kimaituahin ka muta a, hinapi-in, ka hinna hon hawisak lai, chi-in, tua mun min dingin, Peniel a sa hi. 31 Ama'n Peniel a khen takin, ni a suakta hi. A ngum guhtuah kilawi ahih manin a bai hi. 2 Tuni dongin, Israelte'n gamsa leh sa peuhpeuh, a pheipi leh ngum guhtuaha thaguipi leh satak kizom a ne ngei kei uhi. Ahang bel, Pathian in Jakob' pheipi leh ngum guhtuaha thaguipi leh satak kizopna a khoih man ahi.
Jakob leh Esau Kituahna
1 Jakob a khawdak a, Esau, a mi 400-te tawh hong pai a mu hi. Ama'n a tate teng, Lea, Rakhel leh sila numeite lak ah a hawm a, 2 sila numeite leh a tate uh a masasak a, tua nung ah, Lea leh a tate a zomsak a, Rakhel leh Josef a nunungsak hi. 3 Amah madawkin a vapai a, a sanggampa lam ngain, sagihvei leisi-in a kun hi. 4 Ahihhangin, Esau bel, Jakob tuak dingin hong tai a, amah a pom a, a ngawngkawi a, a tawp a, a nihun a kap uhi. 5 Tua khitin, Esau a khawdak a, tua numeite leh tate a mu a: Hiai na tonpihte kuate ahi ua le? a chi hi. Jakob in a dawng a: Pathian in hehpihtaka na silapa a piak tate ahi uhi, a chi hi. 6 Sila numeite leh a tate un hon naih uh a, Esau' mai ah hong kun uhi. 7 Tua khitin, Lea leh a tate hong pai uh a, tua bangin hong kun uhi. A nunungpenin Josef leh Rakhel hong pai uh a, amaute zong Esau' mai ah hong kun uhi. 8 Esau in: Hiai ganhon hong kihawl kon tuahte bang na chihna ahia? a chi hi. Jakob in: Ka toupa aw, na maipha ka zonna ahi, a chi hi. 9 Ahihhangin, Esau in: Ka sanggam aw, ke'n ganhon hauta veng e. Na neih teng nang adingin neiden in, a chi hi. 10 Jakob in: Hehpihtakin tua zaw hi kei hen aw. Na maipha hon musak na hih leh, hiai ka thawnpiakte hon sang in. Deihsakna tawh kei non santak manin, na maitang ka muh, Pathian' maitang mu bang ka hi. 11 Pathian ka tung ah a siam a, ka deihkhop ka nei a, hehpihtakin, thawnpiak hong kipia sang mahmah in, a chi hi. Tua banga Jakob in a piak teitei manin, Esau in thawnpiakte a sang hi. 12 Tua khitin, Esau in: Paita ni. Ken hon makaih ning, a chi hi. 13 Ahihhangin, Jakob in amah kiang ah: Naupangte lah a neu lai uh a, noungek nei belampi leh kelpite leh ganpite ka kep a kul, chih ka toupa'n na thei hi. Ni khat lei zong kihatpaipih leh, ganhonte si ding uhi. 14 Tua bang ahih manin, na silapa' mai lam ah, ka toupa na pai masa in. Kei zaw Seir muala ka toupa kon tuah mateng, ganhonte leh naupangte hat dandanin, awlawlin hong pai ning, a chi hi. 15 Esau in: Tua bang ahih leh, ka mite pawl khat hon nutsiat ning, a chi hi. Jakob in: Bang kul se ding ahia? Ka toupa'n na maipha non muhsak kiching khin lei hi, a chi hi. 16 Tua ni-in, Seir lam zuan kik dingin Esau a kipankhia hi. 17 Ahihhangin, Jakob bel, Sukoth ah a pai a, tua ah amah adingin in a lam a, a gantate adingin buktate a lam hi. Tua hang mah ahi, tua mun Sukoth a kichih. 18 Tua banga Jakob, Padan Aram apan hong paikhiak nungin, Kanan gama Shekhem khawpi bittakin a tung a, tua ah khawpi kigalmuhna ah, giahphual a sat hi. 19 Ama'n Hamor' tate apanin, nguntang 100 in mun khat a lei a, tua ah puanbuk a kai hi. Hamor bel, Shekhem' pa ahi. 20 Tua ah maitam a dawh a, tua mun min dingin, El Elohe Israel a sa hi.
Dina leh Shekhemte
1 Jakob in Lea tawh kala tanu a neih Dina ahi. Amah tua gam nungakte veh dingin a vapawtkhia hi. 2 Hamor' tapa Shekhem in Dina a muhtakin, a tonpih a, a luppih hi. Hamor bel Hiv mi ahi a, tua gam kumpipa' tapa ahi. 3 Jakob' tanu in Shekhem' lungtang a lazou mahmah a, Shekhem in tua nungak a it a, kamsiam takin a houpih hi. 4 Shekhem in a pa Hamor kiang ah: Hiai nungak ka zi dingin hon piisak in, a chi hi. 5 Jakob in a tanu hihbuahin a om, chih a zak laiin, a tapate gamlak ah, a ganhonte utawh a om uhi. Amaute inn hong tun mateng uh bangmah gen louin a om hi. 6 Tua sungin, Jakob houpih dingin Shekhem' pa Hamor hong kuan hi. 7 Jakob' tapate'n thu a zak takun, gamlak apan hong pai uhi. Shekhem in Jakob' tanu luppih a, ahih louh dingpi, thil zahlakhuaipi Israel gama a hih manin amaute'n a ngaidah lua uh a, a heh mahmah uhi. 8 Ahihhangin, Hamor in amaute kiang ah: Ka tapa Shekhem in na tanu uh lunggulh mahmah a, hehpihtakin a zi dingin hon pia un. 9 Koute tawh kitentuahna bawl unla, na tanute uh hon pia unla, noute adingin ka tanute uh pii un. 10 Hi leh, koute lak ah na teeng ding uh a, nou adingin gam a awng ding hi. Teeng unla, sum sin unla, a sung ah neih leh lam khawm un, a chi hi. 11 Shekhem in Dina' pa leh sanggamte kiang ah: Na deihsakna uh hon musak unla, non nget peuhmah uh hon pia ning. 12 Mou man ding leh thawnpiak ding na ut zah zah uh gen unla, na gen dandan uh hon pia ning. Nungaknu bel ka zi dingin hon pe mahmah un, a chi hi. 13 Shekhem in a sanggamnu uh Dina hihbuahta ahih manin, Jakob' tate'n Shekhem leh a pa Hamor tawh a kihou laiun, zekhemin a dawng uhi. 14 Amaute kiang ah: Tua bangin hih thei kei n'ung. Zeksumlouh pasal adingin ka sanggamnu uh pe thei kei n'ung. 15 Ka lemsak theihna uh thil khat kia a om. Koute bangin pasal khempeuh in zeksum un. 16 Tua hi leh, ka tanute uh kon pe ding uh a, na tanute uh ka nei sam ding uh. Tua khit chiangin, noute lak ah ka teeng ding uh a, noute tawh minam khat ka suak ding uh. 17 Ahihhangin, zeksum dinga ka thu uh na ngaihkhiak nop kei uleh bel, ka sanggamnu uh tonpihin ka pai ding uh, a chi uhi. 18 Tua banga a thu sawm uh, Hamor leh a tapa Shekhem in pha a sa uhi. 19 Tua tangvalpa, a pa' innsunga pahtawipen in Jakob' tanu deih mahmah ahih manin, amaute' gen bangin a hih pah hi. 20 Tua bangin, Hamor leh a tapa Shekhem in, amaute' khawpi kongpia paiin, a khawmite uh a houpih uh a: 21 Hiai mite'n eite hon lawmbawl uh a, i gam ah teeng uh henla, sumsin uhen. Amaute adingin gam kiching mahmah hi. A tanute uh eite'n zi dinga nei thei ding a, eite' tanute zong amaute'n zidinga nei thei ding uhi. 22 Ahihhangin, thil khat ngiat a nei uh a, eite laka pasalte, amaute banga zeksum ding, hi leh eite laka teeng a, eite tawh minam khat suak ding, chi uhi. 23 Tua hileh, amaute' gante, amaute' neih leh lamte leh, ganta dangte khempeuh eite'-a hi ding hilou maw? Tua bang ahih manin, a thusawm uh lemsakpih ni. Tua hi leh, amaute eite laka teeng ding uhi, a chi uhi. 24 Tua khawpi kongpi apana paikhia pasal teng khempeuh in Hamor leh a tapa Shekhem a kithukimpih uh a, khawpi-a pasal teng khempeuh zek a sumsak uhi. 25 Ni thum nungin, amaute khempeuh in na a thuak laitakun, Jakob' tapa nih, Dina' sanggamte Simeon leh Levi in a namsaute uh tawiin, tua khawpi bangmah lau ding omlou, galmuangtaka om a buluh uh a, pasal teng khempeuh a that uhi. 26 Hamor leh a tapa Shekhem zong namsauin a that uh a, Shekhem' inn apanin Dina a piikhia uh a, a paikhia uhi. 27 Jakob' tapa dangte'n mithah luangte a mu uh a, a sanggamnu uh hihnit a hihna tua khawpi a lok uhi. 28 Amaute' belamhon leh kelhonte leh, bawnghonte leh sabiltungte leh, tua khawpi sung leh gamlaka om, amaute'-a ahi khempeuh a la uhi. 29 Amaute' hauhnate khempeuh, amaute' numeite leh tate khempeuh leh, innsunga om van khempeuh, gallakin a pawmang vek uhi. 30 Jakob in Simeon leh Levi kiang ah: Hiai gama teeng Kanante leh Perizte' mai ah kihhuai non suaksakta uhi. Kei leh ka innkawte lah tawm mahmah a, amaute khempeuh pangkhawmin kei hon dou ding uh a, kei leh ka innkawte hon thatgam ding uhi, a chi hi. 31 Ahihhangin, amaute'n a dawng uh a: Ama'n ka sanggamnu uh kizuak bawlin a bawl thei vial dia hia? a chi uhi.
Bethel ah Jakob Kiknawn
1 Tua nungin, Pathian in Jakob kiang ah: Bethel ah paitou inla, tua ah teeng in. Na sanggampa Esau apan na taai laia, na kianga hong kilaak Pathian adingin tua ah maitam dawh in, a chi hi. 2 Tua bangin, Jakob in a innkawte leh a ompihte khempeuh kiang ah: Gamdang pathian na kepte khempeuh uh paimang unla, kihahsiangthou unla, na puansilhte uh khek un. 3 Tua khit chiangin, kisa ni-in, Bethel ah paitou ni. Ka mangbat laia hon dawng a, ka paina peuha hon ompihpa Pathian adingin tua ah maitam dawh ni, a chi hi. 4 Tua bangin, amaute'n gamdang pathian a kepte uh leh a bilbahte uh, Jakob' khut ah a pia uh a, ama'n Shekhema tawsaw sing nuai ah tuate a phum hi. 5 Tua khitin, amaute a kisa uh a, a paikhia uhi. Amaute' kimkota khuate khempeuh tung ah Pathian lauluatna a tung a, amaute a delh kei uhi. 6 Jakob leh a tonpihte khempeuh, Luz kichi mun hong tung uhi. Tua khawpi bel Bethel ahi a, Kanan gama om ahi. 7 Tua ah, ama'n maitam khat a dawh a, tua mun min dingin El Bethel a sa hi. Ahang bel, a sanggampa apan a tai laia, a kianga Pathian a kilaakna mun ahih man ahi. 8 Rebek donnu Debora a sita a, Bethel khanga tawsaw sing nuai ah a kivui hi. Tua mun min dingin Alon Hakhut a kisa hi. 9 Padan Aram apan Jakob a kilehkik nunga, amah kianga Pathian hong kilaak kik laiin amah a vualzawlta hi. 10 Pathian in amah kiang ah: Na min Jakob ahi. Ahihhangin, Jakob na hi nawn kei ding a, na min Israel ahita ding, a chi a, tua bangin, Pathian in a min dingin Israel a sata hi. 11 Pathian in amah kiang ah: Kei Pathian Vanglianpen ka hi. Hong chipha inla, hong pung in. Nang apanin minam khat leh minam tampi hong piang ding a, na pumpi apanin kumpipate hong piangkhe ding hi. 12 Abraham leh Isak kianga ka piak gam, nang kiang ah zong kon pia a, na nunga hong om ding na suante kiang ah zong ka pia hi, a na chita hi. 13 Tua khitin, amah a houpihna mun apanin Pathian in a paitouhsanta hi. 14 Pathian in amah a houpihna mun ah, Jakob in suang a phut a, tua tung ah dawn thillat a sung a, sathau zong a buak hi. 15 Pathian in amah a houpihna mun min dingin Jakob in Bethel a saksa ahi.
Rakhel leh Isak Sihna
16 Amaute Bethel apanin a kipankhia uh a, Efrath mun tun ma, gamla lou a tun laiun, Rakhel in haksapi-in nau a nei hi. 17 Ama'n nau neih haksa a sak mahmah takin, naudomnu'n amah kiang ah: Lau ken, tapa dang khat nei na hi, a chi hi. 18 Amah si dek a, laitat dinga a kisak laiin, a tapa' min dingin Ben Oni a sa hi. Tua khitin, Rakhel a si hi. Ahihhangin, a pa'n bel, a min dingin Benjamin a sa hi. 19 Tua bangin, Rakhel a sita a, Efrath lampi ah a kivui hi. Efrath bel, Bethlehem ahi. 20 Rakhel' han tung ah, Jakob in suang a phut a, tuni dongin Rakhel' han chiamtehna ahi. 21 Israel a kipankhe kik a, Migdal Eder khen ah a puanbuk a kai hi. 22 Tua gama Israel a om laiin, Reuben in a pa' mei Bilha a valuppih a, Israel in tua thu a za hi. Jakob in tapa sawmlenih a nei hi. 23 Lea tawh kala a tapate: Jakob' tamasa Reuben, Simeon, Levi, Judah, Isakhar leh Zebulun ahi. 24 Rakhel tawh kala a tapate: Josef leh Benjamin ahi. 25 Rakhel' silanu Bilha tawh kala a tapate: Dan leh Naftali ahi. 26 Lea' silanu Zilpa tawh kala a tapate: Gad leh Asher ahi. Hiaite Padan Aram-a a om laia piang, Jakob tapate ahi. 27 Mamre-a Kiriath Arba ah, Jakob bel a pa Isak kiang ah, inn hong tungta hi. Kiriath Arba bel, Hebron ahi a, Abraham leh Isak a nakhualtamna mun ahi. 28 Isak kum 180 a nungta a, 29 tekkuna damin a laitat a, a sita hi. Tua bangin, ama' mite kianga pii-in a om samta a, a tapate Esau leh Jakob in a vui uhi.
Esau' Suan leh Khakte
1 Hiai Esau' khangthu ahi. Amah bel, Edom ahi. 2 Esau in Kanan numeite zi-in a nei a, amaute Hit mi Elon' tanu Ada tawh, Hiv mi Zibeon' tapa Ana' tanu Oholibama tawh, 3 tuate ban ah, Ishmael' tanu Nebaioth' sanggamnu Basemath tawh zong ahi. 4 Ada in Esau adingin Elifaz a nei a, Basemath in Reuel a nei a, 5 Oholibama in Jeush, Jalam leh Kora a nei hi. Hiaite Kanan gama piang Esau' tapate ahi. 6 Esau in a zite, a tapate leh a tanute leh innkawte khempeuh tawh a gantate leh a gan dangte khempeuh tawh, Kanan gama a lamkhiak vante khempeuh tawh, a sanggampa Jakob apan gamla sim ah a pem hi. 7 Neih leh lam a hauh manun, amaute a tengkhawm thei kei uhi. Ahang bel, a gantate uh hangin, a khualtamna gam un amaute a vak zou keia ahi. 8 Tua bangin, Seir tanggam ah Esau a teng hi. Esau bel Edom ahi. 9 Seir Muala Edomte' pa Esau khangthu hiai ahi: 10 Esau' tapate hiaite ahi. Ada tawh kala a tapa Elifaz ahi a, Basemath tawh kala a tapa Reuel ahi. 11 Elifaz' tapate hiaite ahi: Teman, Omar, Zefo, Gatam leh Kenaz ahi. 12 Esau' tapa Elifaz in zong Timna kichi, mei khat a nei a, tua tawh kal ah Amalek a nei hi. Hiaite bel, Esau' zi Ada' tapate ahi. 13 Reuel' tapate hiaite ahi: Nahath, Zera, Shama leh Miza ahi. Hiaite, Esau' zi Basemath tapate ahi. 14 Oholibama, Esau' zi ahi a, Ana' tanu ahi. Ana lah Zibeon' tanu ahi. Oholibama in Esau adinga a neih tapate Jeush, Jalam leh Kora ahi. Edom Makaipente 15 Hiaite Esau' suante laka makaipente ahi: Esau' tamasa Elifaz' tapate: Makaipente Teman, Omar, Zefo, Kenaz, 16 Kora, Gatam leh Amalek ahi. Hiaite, Elifaz' suante laka makaipente, Edom gama piangte ahi a, Ada' tapate ahi. 17 Esau' tapa Reuel' tapate: Makaipente Nahath, Zer, Shama leh Miza ahi. Hiaite Reuel' suante laka makaipente ahi a, Esau' zi Basemath' tapate ahi. 18 Esau' zi Oholibama' tapate: Makaipente Jeush, Jalam leh Kora ahi. Hiaite Esau' zi Oholibama' tapate laka makaipente ahi. Oholibama bel Ana' tanu ahi. 19 Hiai Esau' tapate ahi a, hiaite amaute laka makaipente ahi. Esau bel Edom ahi.
Seir' Tapate
20 Hiaite Hor mi Seir' tapate, tua gama teengte ahi: Lotan, Shobal, Zibeon, Ana, 21 Dishon, Ezer leh Dishan. Edom gama Seir' tapa Horte' makaipente ahi uhi. 22 Lotan' tapate: Hori leh Hemam ahi, Lotan' saggamnu bel Timna ahi. 23 ShobaL tapate: Alvan, Manahath, Ebal, Shefo leh Onam ahi, 24 Zibeon' tapate: Aia leh Ana ahi. Hiai Ana ahi gamdai-gamkeua a pa Zibeon' sabiltungte a chin laia, tuilum nakte mukhepa. 25 Ana' tate: Dishon leh Ana tanu' Oholibama ahi. 26 Dishon' tapate: Hemdan, Eshban, Ithran leh Reran ahi. 27 Ezer' tapate: Bilhan, Zaavan leh Akan ahi. 28 Dishan' tapate: Uz leh Aran ahi. 29 Hiaite Horte' makaipente ahi: Lotan, Shobal, Zibeon, Ana, 30 Dishon, Ezer leh Dishan ahi. Seir gama a pawlpawla a kikhen dan ua, Horte' makaipente ahi.
Edom Kumpipa
31 Israel kumpipa kuamah in vai a hawm ma-a, Edom gama vaihawm kumpipate hiaite ahi: 32 Beor' tapa Bela, Edom kumpipa hong hi a, a khawpi Dinhaba a kichi hi. 33 Bela a sih takin, Bozra khawmi Zera' tapa Jobab in a kumpi hihna a luah hi. 34 Jobab a sih takin, Teman gam mi Husham in a kumpi hihna a luah hi. 35 Husham a sih takin, Bedad' tapa Hadad in a kumpi hihna a luah a, a khawpi Avith a kichi hi. Bedad bel Moab gama Midian zoupa ahi. 36 Hadad a sih takin, Masreka khawmi Samla in a kumpi hihna a luah hi. 37 Samla a sih takin, luipi geia om Rehoboth khawmi Shaul in a kumpi hihna a luah hi. 38 Shaul a sih takin, Akbor' tapa Baal Hanan in a kumpi hihna a luah hi. 39 Akbor' tapa Baal Hanan a sih takin, Hadad in a kumpi hihna a luah hi. A khawpi Pau a kichi. A zi' min Mehetabel ahi a, Matred' tanu ahi. Matred bel Me Zahab' tanu ahi. 40 Esau' suan makaipente' minte, a beh a beh, a gam a gamin, hiaite ahi: Timna, Alva, Jetheth, 41 Oholibama, Ela, Pinon, 42 Kenaz, Teman, Mibzar, 43 Magdiel leh Iram. Hiaite Edom makaipente, a luah gam ua a tenna mun uh bang zela a min uh ahi. Hiai Esau ahi Edomte' pa hong hi.
Josef Mang
1 Jakob a pa' khualtamna Kanan gam ah a teeng hi. 2 Hiai Jakob' suante khankhiak dan ahi: Josef kum sawmlesagih a hih laiin, a sanggamte tawh gan a ching uhi. A sanggamte bel a pa' zite Bilha leh Zilpa' tapate ahi uhi. Ama'n amaute tawh kisai thuthang hoihlou a pa kiang a tun hi. 3 Israel in a teek nunga Josef a neih ahih manin, a tapa dangte sangin a itzaw a, amah adingin puanaktual gial kilawm mahmah a bawlsak hi. 4 A pa un amaute sangin Josef a itzaw, chih a sanggamte'n a muh takun, amah a mudah uh a, kampha khatin zong a houpih thei kei uhi. 5 Josef in mang a man a, a sanggamte kianga a hilh takin, amah a mudah semsem uhi. 6 Ama'n amaute kiang ah: Hiai ka mang ngai dih uh: 7 Eite'n lou ah buhphal i na hen a, i na koih a, ngai dih ua, kei' buhphal hong dingtang tou a, noute' buhphalte a kimkot ah hong ding uh a, kei' buhphal mai ah a kun uh, a chi hi. 8 A sanggamte'n amah kiang ah: Nang maw koute tunga vaihawm na sawm? Nang maw koute non uk peuhmmah ding? a chi uhi. Tua bangin, amaute'n a mang leh a thugente hangin amah a mudah semsem uhi 9 Tua nungin, Josef in mang dang khat a man leuleu a, a sanggamte kiang ah a hilh hi. Ama'n: Ngai dih uh, mang dang khat ka man a, ka mangin ni leh khapi leh aksi sawmlekhatte ka mai ah a kun uh, a chi hi. 10 Ama'n a pa leh a sanggamte kianga a mang a hilh takin, a pa'n amah a taai hilh a: Bang mang man na hi maizen a? Na nu leh kei leh na sanggamte maw na maia ka kun taktak ding uh? a chi hi. 11 A sanggamte'n amah a haza uh a, ahihhangin, a pa'n bel hiai thu a lungsimin a chiamteh hi.
Josef, a Sanggamte' Zuakna
12 Tua nungin, a sanggamte'n Shekhem ah a pa uh' belamhon a ching uhi. 13 Israel in Josef kiang ah: Na sanggamte'n Shekhem ah ganhon a ching uhi, kisa inla, amaute kiang ah kon sawl ding, a chi hi. Josef in: Hiai ah ka om, a chi hi. 14 Tua bangin, Israel in amah kiang ah: Vapai inla, na sanggamte leh ganhonte bang chichi'n a om uhiam vaen inla, ka kiang ah hong gen kik in, a chi hi. Tua bangin, Hebron Phaizang apanin amah a sawlkhia hi. Josef, Shekhem hong tun takin, 15 mi khat in amah gamlaka vialvak a mu a, amah kiang ah: Bang zong na hia? a chi hi. 16 Ama'n a dawng a: Ka sanggamte zong ka hi. Ganhonte koia ching uhiam, non hilh thei diam? a chi hi. 17 Tua mipa'n a dawng a: Hiai apanin a paikhia uh a: Dothan ah pai ni, a kichih lamtak uh ka za, a chi hi. Tua bangin, Josef in a sanggamte a nungdelh a, Dothan ah amaute a mu hi. 18 Amaute'n amah a na galmuh uh a, amaute kiang a tun main, amah thah ding a na sawm uhi. 19 Amaute'n: Hiai ah mangneipa hong pai e! 20 Kisa ni-in, amah thatin, kawkhuk khat ah khia ni-in, gamsa gilou in a ne, chi ni. A mang bang a suak na hiam en ni, a kichi uhi. 21 Reuben in hiai thu a zak takin, amaute khut apan Josef hutkhiak a sawm a: A hinna zaw la kei ni, a chi a, 22 tua khitin, amaute kiang ah: Sisan suah kei un. Gamdai-gamkeua om hiai tuikul ah khia unla, a tung ah khut kha kei un, a chi hi. Reuben' in bel, amaute khut apan amah hinghawi a, a pa kianga piikik ding a tup mana hiai thu gen ahi. 23 Tua bangin, Josef a sanggamte kiang hong tun takin, amaute'n a puanaktual zemtampi-a gial, a silhlai a suahsak uh a, 24 amah tonpihin tuikul khat ah a khia uhi. Tua tuikul bel a vuak ahi a, tui a om kei hi. 25 Amaute an ne dingin a tu uh a, a khawdah uleh, Ishmaelte pawlkhat hong pai a galmuh uhi. Tua Ishmaelte bel, Gilead apan hong paia, sangawngsautea thil gimnamtui tuamtuam, singnai damdawite leh murate pua-a Aigupta gama paisuk dinga hong pai ahi uhi. 26 Judah in a sanggamte kiang ah: I sanggampa that a, a sisan i ima bang lawhtak ding i hi ua? 27 Khai, Ishmaelte kiang ah amah zuak ni, a tung ah khut kha kei ni, amah i sanggampa, i si leh sa mahmah hi buang lou maw, a chi hi. Tua bangin, a sanggamte'n a thugen a mang uhi. 28 Tua Midian sumsin mite amaute kiang hong tun takun, Josef sanggamte'n tua tuikul apanin amah a kaikhetou uh a, tua Ishmaelte kiang ah ngun dangka Shekel 20-in a khawngta uh a, Ishmaelte'n amah Aigupta gam ah a paipih uhi. 29 Reuben tua tuikula hong pai takin, tua ah Josef a na omta kei hi. Ama'n a puansilhte a botkek a, 30 a sanggamte kiang ah hong pai a: Naupangpa lah tuikul ah om nawn kei a, kei koilam ngata ding ka hia! a chi hi. 31 Tua nungin, amaute'n Josef puanaktual a la uh a, kei khat gouin a sisan ah tua puanaktual a diah uhi. 32 Amaute'n tua puanaktual gial a pa uh kiang ah hon tawi uh a: Hiai ka muh uh ahi. Na tapa' puanaktual ahi hiam, hi lou vel in, a chi uhi. 33 Ama'n tua puanaktual a meltheih a: Ka tapa' puanaktual ahi mah ve! Gamsa gilou in neta ahi ve! Josef kibalzanta ahi mahmah ve! a chi hi. 34 Tua bangin, Jakob in a puansilhte a botkek a, sai ip puan a silh a, ni tampi sung a tapa a suun hi. 35 A tapate leh a tanute khempeuh hong paiin, amah a nem uh a, ahihhangin, nep zawh ahi kei hi. Ama'n: Khakham veiin misikhua ah ka tapa kiang ah ka pai ding hi, a lankhuk chi a, a tapa suunin a kap kap mai hi. 36 Tua sungin, Midiante'n Aigupta gama Potifar kiang ah, Josef a khawng uhi. Potifar bel, Faro' nasem ulian, vengmite laka makai khat ahi.
Judah leh Tamar
1 Tua hun lai khawng mahin, Judah in a sanggamte nusiain, Adulam khawmi Hira kichi beel dingin a kuan hi. 2 Tua ah, Kanan mi Shua' tanu a kitenpih hi. Ama'n a zi a luppih a, 3 a zi a gai a, tapa a nei a, a min dingin Er a sa hi. 4 A zi a gai kik a, tapa a nei a, a min dingin Onan a sa hi. 5 A zi in tapa dang khat a nei leuleu a, a min dingin Shela a sa hi. A zi in Shela a neih laiin, Judah bel Kezib-a a om lai ahi. 6 Judah in a tapa upapen Er adingin zi a piisak a, a min Tamar ahi. 7 Ahihhangin, Judah' tamasapen Er bel, Tangtawn Toupa' mitmuhin migiloupi ahi a, amah a that hi. 8 Tua khitin, Judah in Onan kiang ah: Na sanggampa tunga na mawhpuakna tangtun dingin na sanggampa' zi luppih inla, na sanggampa ading chisuan neihsak in, a chi hi. 9 Ahihhangin, Onan in tua banga ta a neihsak ding pen, ama' gouluahpa hi tuan lou ding ahi, chih a theih manin, a sanggampa' zi a luppih takin, a sanggampa ading chisuan a pian louh nadingin, leilak ah a chi a bung vek maimah hi. 10 10 Tangtawn Toupa' mitmuhin Onan' thilhih a gilou a, amah zong a that hi. 11 Tua bang teng nungin, Judah in a mounu Tamar kiang ah: Ka tapa Shela a pichin mateng, na pa' innsung ah meigongin na om phot in, a chi hi. Ama'n: A sanggamte mah bangin Shela zong si khamawh lou ding hi a, chi-in a ngaihsun hi. Tua bangin, Tamar a nawkik a, a pa' inn sung ah a om hi. 12 Hun sawtpi nungin, Shua' tanu, Judah' zi a si hi. Judah' sisuun hun a bei takin, Timna-a a belam mulmette kiang ah a hawhtou a, a lawmpa Adulam mi Hira in amah a zui hi. 13 Mi'n Tamar kiang ah: Na pasal' pa a belam mulmet dingin Timna ah a hawhtou dek, chi-in a hilh uhi. 14 Tamar in a meigong puante a hawkkhia a, meltheih louh dingin, maikhuhna a kikhuh a, Timna lampi-a gam daihna khat ah a na tu hi. Ama'n Shela pichingta napi, ama' zi dingin amah piak ahi kei, chih a mu gige hi. 15 Judah in Tamar a muh takin, a mai kikhuh ahih manin, kizuak khat a sa hi. 16 A mounu a hih lam phawk louin, lampi pam ah a vanaih a: Khai hon luppih ning aw? a chi hi. Tamar in: Non luppih ding manin, bang non pe dia eita? a chi hi. 17 Judah in: Ka ganhonte laka kelnou khat hong koihsak na-ning, a chi hi. Tamar in: Kelnou nong piaksak ma adingin, kichiamna thil bang non pe dia? a chi hi. 18 Judah in: Kichiamna thil bang kon pe dia eita? a chi hi. Ama'n a dawng a: Na suainamna zungbuh leh na khaupumphan leh na khuta na chiangkhun, a chi hi. Tua bangin, Judah in tuate a pia a, amah a luppih a, a gaita hi. 19 Tamar a paikhiak nungin, a maikhuhna a hawk a, a meigong puan a silh kik hi. 20 Tua nungin, Judah in tua numeinu apan, a kichiamna thilte la kik dingin a lawmpa Adulam mi tungtawnin kelnou khat a pesak hi. Ahihhangin, Adulam mi in tua numeinu a vamu kei hi. 21 Ama'n tua muna omte kiang ah: Enaim-a lam kianga tu, kizuaknu koia om ahia? a chi hi. Amaute'n: Hiaia kizuak a om louhpi, a chi uhi. 22 Tua bangin, amah Judah kiang ah a vapai kik a: Numeinu ka mu kei. Tua tham louin, tua muna omte'n: Hiaia kizuak a om louhpi, a na chi uhi, a chi hi. 23 Judah in: A thil lakte tang mai hen aw. Tuachi louin zaw, mi' nuihzabuk suak kha ni. Kelnou hon pesak ing a, amah vamu lou hi ve chin, a chi hi. 24 Kha thum khawng nungin, mi'n Judah kiang ah: Na mounu Tamar kizuak veh aw, nau pai zawmah veh, chi-in a hilh uhi. 25 Amah hon pikhiak takun, ama'n a pasal' pa kiang ah, a thilkepte a khak a: Hiai thilte neipa apan naupai ka hi. Hiai suainamna leh khaupumphan leh chiangkhun kua-a hi hiam, na meltheih hiam, a chisak hi. 26 Judah in tuate a meltheih a: Ka tapa' Shela' zi dinga amah pelou ka hih manin, kei sanga amah diktatzaw ahi ve, a chi a, amah a luppih nawn kei hi. 27 Tamar nau suah hun hong tun takin, ngai un, a sula phik om a na hi. 28 Naungekte hong suah takin, khat in a khut hon golhkhia hi. Naudomnu'n: Hiai pen a suak masa, chi-in tua naungek khut ngawng ah khausan a na bunsak hi. 29 Ahihhangin, tua naungek in a khut a doktum kik a, a sanggampa hong suak masa hi. Naudomnu'n: Bangchi dana nang hon phusuak mawk na hia? A mawh khu awh! a chi hi. Tua bangin, Judah in a min dingn, Perez a sa hi. 30 Tua nungin, a sanggampa, a khut ngawnga khausan bun pen hong suakkhia a, Judah in a min dingin Zera a sa hi.
Aigupta-a Josef
1 Josef bel, Aigupta gama paipihsuk ahita a, Aigupta mi Potifar in Ishmaelte khut apan a na-lei hi. Aigupta gama Josef paipihsukte amaute mah ahi. Potifar bel, Faro' nasem ulian, innpi veng sepaih makai ahi, 2 Josef a toupa tua Aigupta mi' inn sung ah a om a, Tangtawn Toupa'n amah khut ah bangkim a lawhchingsak hi. 3 A toupa in, Tangtawn Toupa'n amah a ompih, chih leh, Tangtawn Toupa'n ama' sep peuhmah a lawhchingsak, chih a mu hi. 4 Josef in a toupa' deihsakna a tang a, a nna a sem hi. Potifar in ama' inn sung leh, a neih khempeuh ama' khut ah a koih a, 5 tua banga a inkuan leh a neih khempeuh tunga amah a koih apanin, Josef hangin Tangtawn Toupa'n a inn sung leh gama a neihte khempeuh zong a vualzawl hi. 6 Tua bangin, Potifar in a neih khempeuh Josef khut ah a koih a, a nek a dawnte loungal bangmah ah a kikum nuam se kei hi. Josef bel pianpha mahmah leh melhoih mahmah ahi. 7 Hun sawtlou nungin, a toupa' zi in amah a ngaih-et panta a, a kiang ah: Hong luppih in! a chi hi. 8 Ahihhangin, Josef in a nial a: Ka toupa'n a neih khempeuh ka khut ah a koih a, a inn sung ah bangmah ah a kikum nuam se kei hi. 9 Hiai inn sung ah kei sanga lianzaw om kei. Ka toupa'n nang lou ngai, kei adingin it a nei kei. Nang bel a zi na hi. Hibang thil gilou hihin bangchi'n Pathian tung ah ka khial thei dia? a chi hi. 10 Potifar' zi in a nisimin kun mah leh, Josef in a luppih nuam kei a, a kiang nai ah zong a om nuam kei hi. 11 Ni khat bel, nasep ding neiin, Josef tua inn sung ah a valut a, silate lah kuamah a om kei hi. 12 Potifar' zi in a puanaktualin a na-man a: Hon luppih mahmah in! a chi hi. Ahihhangin, Josef bel puanaktual nusiain inn sung apan a taikhia hi. 13 Josef a puanaktual nusiain a tai, chih Potifar' zi in a muh takin, 14 silate a sam a: En dih uh, Potifar in eite hon zahlaksak dingin hiai Hebru mi hon piilut a, tu'n hon luppih sawmin hong lut hi. Ahihhangin, nakpi-in ka kikou a, 15 ka kikou a zak takin, a puanaktual nusia-in, inn sung apan a taikhia hi, a chi hi. 16 Tua bangin, ama'n Josef puanaktual, a toupa hong tun mateng a kem a, 17 Josef toupa inn hong tun takin, hibangin thu a na tun hi: Tua Hebru sal non piilut in hon zahlaksak sawmin, ka kiang ah hong pai hi. 18 Ahihangin, nakpitaka ka kikou takin, a puanaktual ka kianga nusia-in, inn sung apan a taikhia hi, a chi hi. 19 Josef toupa'n a zi' thugen, Hibanga na silapa'n hon bawl ahi, a chih a zak takin, a hehna a kuang hi. 20 Tua bangin, Josef a man a, kumpipa' hentate kikhumna suangkul sung ah a khum hi. Tua bangin, Josef suangkul sung ah a om a, 21 Tangtawn Toupa'n amah a ompih a, a tung ah a zahngaihna a langsak hi. Tua bang mahin, suangkul ukpa' deihsakna a tangsak hi. 22 Suangkul ukpa'n suangkultangte khempeuh tunga heutuin Josef a bawl a, suangkul sunga thilhih peuhmah ah mawhpuakna a pia hi. 23 Tangtawn Toupa'n Josef a ompih a, a sep a bawl khempeuh a lamzangsak a, Josef khuta om peuhmah ah suangkul ukpa a kikum ngei kei hi.
Suangkultangte' Mang
1 Ni bangzah hiam nungin, kumpipa' zupepa leh tanghou bawlpa'n Aigupta kumpipa a hihlungkim kei uhi. 2 Faro a nasemte nih, zu pepa lianpen leh tanghou bawlpa lianpen tung ah a heh a, 3 vengmite makaipa' inn ah amaute a khum hi. Tua bel, Josef kikhumna suangkul mah ahi. 4 Vengmite makaipa'n amaute Josef khut ah a koih a, Josef in amaute a kem hi. 5 Aigupta kumpipa' zu pepa leh tanghou bawlpa, suangkula tangte'n zan khat thuin mang a nei tuak uhi. Tua mangte a khiakna nei tuak ahi. 6 A zingsanga Josef amaute kianga hong hawh takin, amaute dah mei taka om a mu hi. 7 Tua bangin, ama'n Faro' nasem ulian, suangkultangte kiang ah: Bang achia tuni-a hibanga na mai uh dahmel ahia le? a chi hi. 8 Amaute'n a dawng uh a: Mang ka nei tuak uh a, hon khiaksak thei lah kuamah om keia, a chi uhi. Josef in amaute kiang ah: Mang khiaknate Pathian-a ahi kei-a hia? Na mang uh hon hilh dih ve ua, a chi hi. 9 Tua bangin, zu pepa lianpen in a mang Josef a hilh a: Ngaidih, ka mangin ka mai ah grepgui khat ka na mu a, 10 tua grepgui ah kahiang thum a om uh a, hong pakmuum uh a, hong pakpalh a, tua ah gahbomte hong om hi. 11 Ke'n Faro' nou ka tawi a, grepgahte ka lou a, Faro' nou sung ah ka suk a, tua nou Faro' khut ah ka na pia, a chi hi. 12 Josef in amah kiang ah: Na mang khiakna hiai ahi: Tua grep kahiang thumte ni thum ahi. 13 Ni thum sungin Faro in na lutang a domkang ding a, na dinmun hon pe kik ding a, ni danga a zu pepa na hih lai bangin, Faro' nou a khut ah na pe ding. 14 Ahihhangin, na tan a hoih hun chiangin, kei hon thei gige inla, Faro kianga ka tungthu tunin hiai inn apan kei hon lakhia in aw. 15 Kei Hebrute' gam apan thagum hata puakmanga om ing a, hiaia zong suangkula hon khum nading un bangmah hihkhial lou ka hi, a chi hi. 16 Tanghou bawlpa lianpen in zong, Josef in tua mang a hoih lam takin a hilhchian chih a mu a, Josef kiang ah: Ke'n zong mang ka nei. Ka mangin, ka lutung ah tanghou lawh thum thuapin ka na khu hi. 17 Tua lawh tungnungpen ah, Faro ading tanghou emsa nam kim a om hi. Ahihhangin, vasate'n ka lutunga lawh apan, tua tanghoute a na negai vek uh, a chi hi. 18 Josef in a dawng a: na mang khiakna hiai ahi. Lawh thumte ni thum ahi. 19 Ni thum sungin, Faro in nang apan na lutang a domkhe ding a, singkung ah hon khai ding a, vasate'n na sa a negai vek ding uh, a chi hi. 20 A ni thum ni bel, Faro' pianni hun tunni ahi a, ama'n a nasemte adingin ankuang a lui hi. Ama'n a nasemte' mai ah a zu pepa lianpen lutang a domkang a, a tanghou bawlpa lianpen lutang a domkhia hi, 21 A zu pepa lianpen bel, a dinmun ngei ah a koih kik a, ama'n Faro' khut ah zu nou a pia hi. 22 Ahihhangin, a tanghou bawlpa lianpen bel, Josef in amaute' mang a khiak bangbangin a khailum hi. 23 Tua bang teng hinapi-in, zu pepa lianpen in Josef a thei gige kei a, a mangngilhta hi.
Faro Mangte
1 Kum nih vingveng a bei nungin, Faro in mang khat a man a: A mangin, Nail Luipi gei ah a na ding hi. 2 Tua luipi apanin, bawngpi hoih leh thau mahmah sagih hong paikhetou uh a, luipi gei loupa mun ah a gamta uhi. 3 Tuate nungin, bawngpi sangsia leh gawng mahmah sagih dang hong paikhetou uh a, tua bawngpi hoih leh thaute kiang ah hong ding uhi. 4 Tua bawngpi sangsia leh gawngte'n bawngpi hoih leh thaute a negai uhi. Tua khitin, Faro a khanglou hi. 5 Faro a ihmu kik a, a nihvei nadingin mang a man kik a: A mangin, buhkung khat ah buhvui hoih leh gahpha mahmah sagih a om hi. 6 Tua nungin buhvui sia leh suahlam huih in a mut geu semsom sagih dang hong om hi 7 Tua buhvui sia leh geu semsomte'n buhvui hoih gahphate a valh uhi. Tua khitin, Faro a khanglou a, a mang a nahi hi. 8 Zingsang hong hi a, Faro a lungnuam kei mahmah hi. Tua bangin, Aigupta gam sunga mitkhialdawi siam leh mipil teng khempeuh a samsak hi. Ama'n amaute kiang ah a mangte a gen a, ahihhangin, kuama'n ama' adingin tua mangte a khiaksak thei kei uhi. 9 Tua laitakin, Faro zu pepa liapen in amah kiang ah: Tuni-in ka khelhna ka phawk khia. 10 Khatvei, Faro a silate tung ah a heh a, kei leh tanghou bawlpa lianpen tangveng makaipa' inn ah hon khum hi. 11 Koute gel in zan khat thuin mang ka nei tuak uh a, tua mangte'n a khiakna a nei tuak uhi. 12 Tua tangveng makaipa' sila, Hebru tangval khat zong koute kiang ah a taang hi. Koute'n ka mangte uh amah kianga ka gen uleh, ama'n ka mangte uh hon khiaksak a, ka mang tuak uh khiakna hon hilh hi. 13 Ama'n ka mangte uh hon khiaksak bangbangin hong tung taktak a, kei pen ka dinmun ngei piakin ka om a, tua tanghou bawlpa lianpen bel khailupin a om, a chi hi. 14 Tua khitin, Faro in Josef a samsak a, amah suangkul apan kintakin hon tonpih uhi. Josef in a mul a met a, a puansilhte a kheng a, Faro' mai ah hong pai hi. 15 Faro in Josef kiang ah: Mang khat ka nei a, kuama'n lah hon khiaksak thei kei a, ahihhangin, nang bel mang na zak chiangin na khe thei, chih ka za hi, a chi hi. 16 Josef in Faro a dawng a: Ke'n zaw ka khe thei kei a, ahihhangin, Pathian in Faro adingin a khiakna kim hon pe ding, a chi hi. 17 Faro in Josef kiang ah: Ka mangin, Nail Luipi gei ah ka na ding a, l8 tua luipi apanin bawngpi hoih leh thau mahmah sagih hong paikhetou a, tua luipi gei loupa mun ah a gamta uhi. 19 Tuate nungin, bawngpi sangsia leh gawng mahmah sagih dang hong paikhetou uhi. Aigupta gam sung teng ah, tua banga bawngpi melsia ka mu ngei kei hi. 20 Tua bawngpi melsia leh gawngte'n bawngpi thau hong paikhe masate a negai uhi. 21 Tua banga a nekgaih hangun a nek ma uh bangin, a melse lai veve uh a, a nek uh a kithei tuan kei hi. Tua nungin, thakhatin ka khanglou hi. 22 Tua baan ah, mang ka nei kik a, ka mangin, buhkung khata buhvui hoih leh gahpha mahmah sagih om ka mu hi. 23 Tuate nungin, buhvui sia leh suahlam huih in a mut geu semsom sagih dang hong om hi. 24 24 Tua buhvui siate'n, buhvui hoih sagihte a valh uhi. Hiai mangte dawisiamte kiang ah ka gen a, ahihhangin, amaute kuamah in a khiakna a gen thei kei uhi, a chi hi. 25 Tua khitin, Josef in Faro kiang ah: Faro' mangte khat ahi a, a kibang ahi. Pathian in a thilhih dek, Faro kianga theisak ahi. 26 Bawngpi hoih sagihte kum sagih ahi a, buhvui hoih sagihte zong kum sagih ahi. Mang khat leh kibang ahi. 27 Tua nunga hong paikhia, bawngpi gawng leh melsia sagihte kum sagih ahi a, buhvui sia leh suahlam huih mut keu sagihte zong kum sagih ahi. Tuate kial kum, kum sagih ahi. 28 Faro kianga ka gen bangbang ahi: Pathian in a thilhih dek, Faro kianga theisak ahi. 29 Aigupta gam sung teng ah, hauh kum, kum sagih a om ding a, 30 ahihhangin, kial kum, kum sagih in a zui ding. Tua hun chiangin, Aigupta gama hauh kumte a kimangngilh ding a, tua kialpi in a gam a negawp khin ding. 31 A nunga kial nase mahmah ding ahih manin, gam sunga hauhna kuama'n a thei gigeta kei ding. 32 Faro kianga nam niha mang a kipiakna hang bel, Pathian in hiai thu kiptaka a sehsa ahi a, Pathian tak in ahih pah ding man ahi. 33 Tuin, Faro in mi thil theisiam leh pii khat zong henla, Aigupta gam tung ah thu neisak hen. 34 Faro in hiai hih henla, tua baan ah, gam sung ah nasem uliante sep henla, hauh kum, kum sagih sunga Aigupta gama buh piangte seh nga-a seh khat kaikhawmsak hen. 35 Amaute'n hauh kumte-a buh piangte kaikhawmin, Faro thuneihna nuai ah, khawpite ah an koihching uhen. 36 Aigupta gama tung ding kial kum, kum sagih sung nek dingin, gam buppi adingin tuate kisiit hen. Tua bangin, kial hun sunga gambup a manthat louh nading ahi ding hi, a chi hi. 37 Faro leh a nasem uliante'n hiai thusawm hoih a sa uhi. 38 Tua bangin, Faro in amaute kiang ah: Pathian' Kha omna hibang mi peuhmah mu zou ding i hi maw? a chi hi. 39 Tua khitin, Faro mah in Josef kiang ah: Pathian in hibang teng nang hon theisak ahih chiangin, nang banga thil theisiam leh pii dang om lou hi. 40 Nang ka innpi ukpa na hi ding a, ka mite khempeuh in na kama thupiakte a man ding uh ahi. Kumpitutphah tawh kisai kia ah, nang sangin ka lianzaw ding hi, a chi hi.
Josef in Aigupta Gam Uk
41 Tua bangin, Faro in Josef kiang ah: En in, Aigupta gambup tunga thuneiin kon koih hi, a chi a, 42 a khut apan a suainamna zungbuh a lakhia a, Josef khut ah a bunsak hi. Puan malngata kibawl kumpi puanaktual a silhsak a, a ngawng ah khama kibawl khainiang a oksak hi. 43 Ama'n kangtalai ah anuaia thuneipen nihna hi-in Josef a tuangsak a: A mai ah khukdin un! chi-in mi a tangkousak hi. Tua bangin, Aigupta gam bup ukpain Josef a bawl hi. 44 Faro in Josef kiang ah: Kei Faro ka hi. Ahihhangin, nang' thu louin Aigupta gambup ah kuama'n khut hita leh khe hita leh a lik kei ding, a chi hi. 45 Faro in Josef min dingin Zafenath Panea a sa a, zi zong a guan a, On khua siampi Potifera' tanu Asenath a pia hi. Tua khitin, Josef in Aigupta gambup a tawnsuak hi. 46 Aigupta kumpipa Faro' nna a sep chil laiin, Josef kum 30-a upa ahi. Amah Faro kiang apan a kipankhia a, Aigupta gam sung teng ah a zin hi. 47 Hauh kum, kum sagih sungin, gam sung ah buh tampi mahmah a piang hi. 48 Aigupta gama hauh kum, kum sagih sung buh piangte Josef in a kaikhawm a, khawpite ah a koihching hi. Khawpi teng ah, a kimkot loua buh piangte a koih hi. 49 Josef in buh tampi mahmah a koihching a, tuipi piaua sehnel bang mai ahi. Buh a tamluat manin, teh seng zong ahi kei a, a chiamteh nawn se kei hi. 50 Kial kumte hong tun main, Josef in, On siampi Potifera' tanu Asenath tawh kal ah tapa nih a nei hi. 51 Josef in: Pathian in ka lungkhamnate khempeuh leh ka pa' innkawte hon mangngilhsakta, chi-in a tamasapen' min dingin, Manase a sa hi. 52 A tapa nihna a hih leh: Pathian in ka thuakgimna gam ah hon chiphasakta, chi-in a min dingin, Efraim a sa hi. 53 Aigupta gam ah, hauh kum, kum sagih a beita a, 54 Josef in a genkholh bangbangin, kial kum, kum sagih a kipanta hi. Gam teng khempeuh ah kial a kia a, ahihhangin, Aigupta gam sung khempeuh ah an a om hi. 55 Tua bangin, Aigupta gam khempeuh in kial a thuak takin, Faro kianga an ngenin mite a kikou uhi. Faro in Aigupta mite kiang ah: Josef kiang ah pai unla, hon hilh bangbangin gamta un, a chi hi. 56 Gam sung khempeuh ah kial a kia a, Josef in buhbukte khempeuh a hong a, Aigupta mite kiang ah buh a zuak hi. Aigupta gam sung khempeuh ah kial a na mahmah hi. 57 Gam tenga kial nakpitaka a kiak manin, Josef apan buh lei dingin gam teng apan mi Aigupta gam ah hong kuan uhi.
Josef Sanggamte Aigupta ah
1 Aigupta gam ah buh a lu om, chih Jakob in a theih takin, a tapate kiang ah: Banghanga noute kientuah maimah na hi ua? 2 Aigupta gam ah an a om, chih ka za hi. Eite i nuntak theih a, i sih louh nadingin kuan unla, eite ading buh valei un, a chi hi. 3 Tua bangin, Josef sanggamte sawm, Aigupta-a buh lei dingin a kuansuk uhi. 4 Ahihhangin, Jakob in Josef sanggampa Benjamin bel, a sanggamte a zuisak kei hi. Ahang bel, Benjamin in tuahsia khattou a tuak kha ding, a chi-a ahi. 5 Kanan gama zong kial kia a hih manin, buh lei dinga kuante lak ah Israel' tapate zong a kuan uhi. 6 Josef bel, tua gam ukpipa ahi a, tua gam mite khempeuh kianga buh zuakpa amah ahi. Tua bangin, Josef sanggamte hong pai uh a, a mai ah leisi-in hong kun uhi. 7 Josef in a sanggamte a muh takin, amaute a meltheih a, ahihhangin, a kitheihmawhbawl a, amaute aw khauhtakin a houpih a: Koi apana hong pai na hi ua? a chi hi. Amaute'n a dawng uh a: Buh lei dinga Kanan gam apan hong pai hi ung, a chi uhi. 8 Josef in a sanggamte meltheih mah leh, amaute'n bel amah a meltheih kei uhi. 9 Ama'n amaute tungthu, a manga a matte a theikhia a, amaute kiang ah: Noute enkhemi na hi ve ua! Ka gam uh koi lailai venlouha om hiam, chih ensim dinga hong pai na hi tawk ve ua! a chi hi. 10 Amaute'n a dawng uh a: Toupa aw, hi peuhmah kei ve ung e. Na silate, buh lei dinga hong pai hi zaw ve ung aw. 11 Koute khempeuh mi khat' tapa ngen ka hi uh a, na silate mi muanhuai ka hi uh a, enkhemi ka hi kei uhi, a chi uhi. 12 Ama'n: Hi kei uteh! Ka gam uh koi lailai venlouha om hiam, chih ensim dinga hong pai hi uteh, a chi hi. 13 Ahihhangin, amaute 'n: Na silate, Kanan gama teng mi khat' tate, unau pasal sawmlenih pha ka hi uh a, a nautum pen ka pa uh kiang ah a om a, khat ahih leh a om nawn kei, a chi uhi. 14 Josef in amaute kiang ah: Enkhemi hi mah uteh! Ka chih bangbang hi mah uteh! 15 Tu'n hibanga ettel na hi ding uhi: Na nautum pen uh hiaia hong pai kei leh, Faro' hinna louin kon hilh ahi: Hiai mun na nuse kei hiai ding uhi. 16 Thutak gen na hina uhiam, chih a kitel nadingin na lak ua mi khat kisawl unla, na sanggampa uh vapi hen. A dang teng hiai ah suagkul na taang ding uhi. Tua bang ahih kei leh, Faro' hinna louin kon hilh ahi: Enkhemi na hi taktak uh, chihna ahi mai! a chi hi. 17 Tua bangin, amaute khempeuh suangkul ah ni thum a khum hi. 18 A ni thum ni-in, Josef in amaute kiang ah: Ke'n Pathian kihta ka hih manin, hibangin hih unla, hing un. 19 Mi muanhuai na hih uleh, na lak ua khat hiai ah suangkul ah tang henla, a dang teng pai unla, gilkiala om na inkawte uh an vapuak un. 20 Ahihhangin, na nautum pen uh ka kianga non pii ngeingei ding uh ahi. Tua hi leh, na thugente uh ettelna ahi ding a, na si kei ding uhi, a chi a, amaute'n tua bangin a hih panta uhi. 21 Amaute'n bel: I sanggampa hanga gawtna thuak i hi taktakta ve. A hinna hondam dinga hon nget ngutngut laiin, dahin a lungkham mahmah a, hinapi-in, eite'n a ngetna i ngaikhe nuam kei ua, tu'n ama' mangbatna eite tunga tu ahita ve! a kichi uhi. 22 Reuben in a dawng a: Naupang tung ah khial kei un, kon chi tawk hi lou maw? Ahihhangin, na ta kei teitei uh a, tu'n a sisan man eite tunga hong kisik a hita ve! a chi hi. 23 Josef in bel kamlet zang ahih manin, a thugen uh a thei, chih lam himhim amaute'n a phawk kei uhi. 24 Josef in lehlam a nga a, a kap a, ahihhangin, amaute' lam ngain amaute a houpih kik hi. Ama'n Simeon a tuamin a piikhia a, amaute' mitmuhin a hen hi. 25 Josef in amaute' buh ip teka buh guansak a, a sumte uh a ip tek ua guankiksak ding leh, a lam an ding uh piak ding thu a pia hi. Hibanga a hihsak khitin, 26 amaute'n a sabiltungte uh, buh ipte a suan uh a, a kipankhia uhi. 27 Amaute a zan giahna mun uah, amaute laka khat in, sabiltung an pe dinga kisain, a buh ip a phel a, a buh-ip sung ah a sum a na om hi. 28 Ama'n a sanggamte kiang ah: Ka Amaute diphawmin a om uh a, Rom lauin a kientuah uh a: Pathian in eite bang hon lawh ahita maia? a kichi uhi. 29 Amaute Kanan gama a pa uh Jakob kiang hong tun takun, amaute tunga thil tungte khempeuh amah a hilh uhi. 30 Amaute'n: Tua gam khempeuh tunga toupa a hipa'n koute aw khauhtakin hon houpih a, a gam enkhemi bangin hon bawl hi. 31 Ahihhangin, koute'n amah kiang ah: Koute mi muanhuai ka hi uh a, enkhemi ka hi zenzen kei uh. 32 Koute pa khat suan unau pasal sawmlenih ka hi uh. Khat bel a om nawn kei a, ka nautum pen uh Kanan gam ah, ka pa uh kianga om ahi, ka chi uhi. 33 Tua khitin, tua gam toupa a hipa'n koute kiang ah: Mi muanhuai na hina uhiam, chih hibanga theitel ding ka hi. Na sanggamte uh khat, hiai ah ka kiang ah nusia unla, gilkiala om na innkawte uh ading buh puain a dang teng pai un. 34 Ahihhangin, na nautum pen uh ka kiang ah hon pii un, hi leh, noute enkhemi hilouin, mi muanhuai na hi uh, chih ka theitel ding. Tua khit chiangin, na sanggampa uh kon pe kik ding a, hiai gam ah sum na sin thei ding uh, hon chi mawk hi, a chi uhi. 35 Tua banga a buh ip tek uh a but uleh, a buh ip uah a dangka ip uh a om tek hi. Amaute leh a pa un, a dangka ipte uh a muh takun, a lau mahmah uhi. 36 A pa uh Jakob in amaute kiang ah: Noute'n ka tate non taansakta ve ua le! Josef lah om nawn lou, Simeon lah om nawn lou, tu'n Banjamin tonpih ding na sawm lai uh, bang teng kei adinga hoihlou ngen a hita ve! a chi hi. 37 Reuben in a pa kiang ah: Amah kon tonpih kik kei ngeingei leh ka tapate gel that in. Amah ka mawhpuaknain koih inla, na kiang ah kon tonpihkik teitei ding, a chi hi. 38 Ahihhangin, Jakob in: Ka tapa in noute hon zuisuk peuhmah ken teh. A upa lah sita a, amah kia ka neih hita. Ama' tung ah tuahsiatna hong tung leh, ka samkangpi tawh, khakham veia misikhua hon zuansak ding hi uteh, a chi hi.
Josef Sanggamte Aigupta Hawhkik
1 Gam sung ah kial a na mahmah lai hi. 2 Aigupta gam apan a puak uh buh a gaih takun, a pa un amaute kiang ah: Kuansuk kik unla, buh va-lei zek un, a chi hi. 3 Ahihhangin, Judah in amah kiang ah: Tua mipa'n khauhtaka hon vau a: Na sanggampa uh non tonpih kei uleh, ka maitang na mu nawn kei ding uh, hon chi mawk ahih chiangin, 4 ka sanggampa uh non zuihsak nop ding leh, ka kuansuk ding uh a, nang ading buh ka valei ding uh. 5 Ahihhangin, ka sanggampa uh non zuihsak nop kei ding lebel, tua mipa'n: Na sanggampa uh non tonpih kei uleh, ka maitang na mu nawn kei ding uh, hon chi mawk ahih chiangin, ka kuansuk kei ding uh, a chi hi. 6 Israel in: Banghanga sanggam dang na neih uh, tua mipa vahilh sese a, ka tunga thil hoihlou hon tun na hi mahmah ua? a chi hi. 7 Amaute'n a dawng uh a: Tua mipa'n koute leh, ka innkuan sung thu uh hon teldot lua a: Na pa uh dam lai maw? Sanggam dang na nei uhia? hon chi a, koute'n a dotnate ka dawn uh hi lei a, Na sanggampa uh hiai ah hon tonpih un, a chih se ding lam bangchi-a thei chitchiat ding ka hi ua? a chi uhi. 8 Tua khitin, Judah in a pa Israel kiang ah: Naupangpa kei hon zuisak in, kuan pah n'ung. Hi leh, koute leh nang leh, ka tate uh nungta ding a, si lou ding hi hang. 9 Ama' tungthu ah, keimah mahin mawhpua ning. Amah na kianga kon tonpih kik kei a, hiaia na mai kon tut kei leh, na mai ah a mawh khuden ning. 10 Kizekai lou hi leh, tuin a nihveina hong tungkik khinta ding hi ung, a chi hi. 11 Tua bangin, a pa uh Israel in: Tua bang hilou theilou ahih leh, hibangin hih un: Gamsung theigah hoihpente na ip sung uah guang unla, tua mipa kiang ah thawnpiak dingin pia un. Tua baan ah, singnai damdawi tawmkha, khuaizu, thil namtui tuamtuam mura khawng, makha tang leh almon tang tawmkha tek tawh pua un. 12 Na ip sung ua dangka kikoihkikte na ditkik uh kul ding ahih manin, dangka sum a lehniha tam keng un. Theihkhelh hi mahmah ding hi. 13 Na sanggampa uh zong tonpih unla, tua mipa kiang ah hawhsuk pah un. 14 Ama'n na sanggampa uh khatpen leh Benjamin hon zuihkiksak nadingin, Pathian Vanglianpen in amah mai ah, noute zahngaihna hon musak hen aw. Kei zaw, ka tate taana ka dah leh dah hita mai ning, a chi hi. 15 Tua bangin, amaute'n tua thawnpiakte tawh, dangka sum a lehniha tam tawh a tawi uh a, Benjamin zong a tonpih uhi. Amaute Aigupta gam ah, kintakin a kuansuk uh a, Josef mai ah a vakilak uhi. 16 Josef in amaute tawh omkhawm Benjamin a muh takin, a innsung kempa kiang ah: Hiai mite ka inn ah pii inla, gan gou inla ankuang lui dingin na kisa in. Tusuna hiai mite'n kei tawh ankuang umkhawm ding uh ahi, a chi hi. 17 Tua mipa'n Josef hilh bangbangin a hih a, tua mite, Josef inn ah a tonpih hi. 18 Tua banga Josef inna tonpih ahih takun, amaute a lau mahmah uhi. Amaute'n: Hun masa-a, i buh ipte dangka sum kikoih kikte hanga hiaia hon tonpih ahi peuhmah uh. Ama'n eite hon sual a, i sabiltungte tawh hon man a, sala hon bawl theih na'ng hunlem zong a hita, a kichi uhi 19 Tua bangin, amaute Josef inn sung kempa' mai ah a hong pai uh a, inn sung lutna kong bul ah, amah a houpih uhi, 20 Amaute'n: Toupa aw, hiaia kong pai masak laiun, buh lei dinga hong pai ka hi uhi. 21 Ahihhangin, zan giak dinga ka khawlna mun ua, mi chih in ka ipte uh ka phel uleh, ka ip gong tek uah ka dangka sum uh, a ngei zahzah ka mu uhi. Tua bang ahih manin, tuin tua dangka sumte kon pua uhi. 22 Tua baan ah, buh lei nading dangka sum kon puak beh uhi. Koumau' dangka sumte mah, kua'n ka ip sung ua na koih kik hi mahmah ding hiam, ka thei zou kei uhi, a chi uhi. 23 Ama'n: Khamuangtakin om unla, lau kei un. Noute' Pathian, na pa uh' Pathian in na ip sung ua gou hon na koihsak ahi ve. Na dangka sumte uh lah ke'n zangkhinta ing a, a chi hi. Tua khitin, ama'n Simeon amaute kiang ah hon piikhia hi. 24 Tua inn sung kempa'n Josef inn sung ah amaute a lutpih a, khe sil nading tui a lui a, a sabiltungte uh gan an a pia hi. 25 Amaute'n tua laia an ne ding ahi uh, chih zakhin ahih manun, Josef hong pai chianga thawnpiak a piak dingte uh a na bawlkhol uhi. 26 Josef inn hong tun takin, amaute'n tua inn sunga thawnpiak hon tawilutte uh, amah kiang ah a pia uh a, a mai ah leisi-in a kun uhi. 27 Josef in amaute' chidamna thu khawng a kan a, tua baan ah: A thu non hilh uh, na pa teek uh bang a chi a, dam lai ahi-na maw? a chi hi. 28 Amaute'n a dawng uh a: Na sila ka pa uh dam lai a, chidam mahmah eive, a chi uhi. Tua bangin, amaute'n amah zahna piain, a mai ah a khukdin uhi. 29 Josef a dakkhia a, a sanggampa, a nu' tapa a laigui zom Benjamin a mu a: A thu non hilh uh, na sanggampa uh hiai ahi maw? a chi a, tua khitin, Benjamin kiang ah: Ka tapa aw, Pathian na tung ah hehpihsiam hen, a chi hi. 30 Josef bel a sanggampa a muhin a khase mahmah a, kah nading mun zongin kintakin a paikhia hi. Ama' inndan tuam sung ah a lut a, a vakap hi. 31 Josef in a mai a phiat khitin, hong pawtkhia a, a ki-ip teitei a: An hon luita un, a chi hi. 32 Josef a tuamin an a lui uh a, a sanggamte a tuamin, amaute ankuang umpih Aiguptate a tuamin, a lui uhi. Aiguptate'n bel Hebrute tawh ankuang umkhawm ngeilou uh ahi. Amau adingin thil sianglou ahi. 33 Josef sanggamte'n Josef mai ah ankuang a um uh a, a upat danun, a upapen apan a naupangpen dongin a kivual uhi. Amaute bel lamdangsain a ki-entuah uhi. 34 Josef dawhkan apan amaute' tan ding a kihawmsak laiin, Benjamin' tan bel midangte' tan lehnga ahi. Tua bangin, amaute'n Josef tawh nuamtaka nein a dawnkhawm uhi.
Josef Nou
1 Josef in a innsung kempa kiang ah thu a pia a: Hiai mite' ipte ah, a puakzawh zahzah uh buh guang inla, a ip gong tek uah a dangka sumte tek uh guang in. 2 Tua khit chiangin, a naupangpen' ip gong ah, nguna kibawl ka nou leh a buh leina dangka sum guangkhawm in, a chi hi. Tua bangin, Josef gen bangbangin, a innsung kempa'n a hih hi. 3 Zingkhua hong vak phetin, tua mite, a sabiltungte uh tawh a kipankhia uhi. 4 Khawpi apan gamla a pai maun, Josef in innsung kempa kiang ah: Tua mite delh mengmeng inla, na phak chiangin, amaute kiang ah: Banghanga noute'n hoihna gilou-a thuk na hi ua? 5 Hiai nou ka pu zudawnna nou, a aisanna-a a zat mahmah hilou maw? Na thilhih uh thil gilou mahmah ahi, chi in, a chi hi. 6 Josef insung kempa'n amaute a phak takin, hiai thute amaute kiang ah a gen a, 7 ahihhangin, amaute'n: Banghanga ka toupa un hibang thute gen na hia? Na silate'n hibang thil hih peuhmah lou e! 8 Ka ip gong ua dangka sum ka muh laiun zong, Kanan gam apan kon pawkik uhi. Banghanga na pu' inn sung apan, kham hita leh ngun hita leh, gu nuam peuhmah ding ka hi ua oi? 9 Na silate laka khat peuh zong, tua nou na muhna penpen a si ding ahi. Adangte khempeuh zong ka toupa uh' silain taang pah n'ung, a chi uhi. 10 Ama'n: Na gen bangbang uh hita hen. Hiai nou kimuhna penpen ka salin a taang ding a, midangte'n mawh na paw kei ding uh, a chi hi. 11 Amaute'n a ipte uh leilak ah a ngakhe pah uh a, amaua tek a phel uhi. 12 Tua bangin, Josef innsung kempa'n, a upapen' ip apan a naupangpen' ip sung a zong a, tua nou pen, Benjamin' ip sung ah a na om hi. 13 Hibang thu a theih takun, amaute'n a puansilhte uh a botkek uhi. Tua khitin, a sabiltungte uh van a suan uh a, khawpi ah a kilehkik uhi. 14 Judah leh a sanggamte, Josef inn hong tun laiun, Josef bel inn sung ah a na om lai hi. Amaute a mai ah lei si-in a bok uhi. 15 Josef in amaute kiang ah: Bang hih na hita mai ua? Kei bang, ai saana hiai bang thilte mukhe thei mi ka hi, chih na thei kei ua hia? 16 Judah in a dawng a: Ka toupa kianga bang gen ding ka hita mai ua? Bang gen mahmah ding! Bangchi-a koute kihahsiang thei ding? Pathian in na silate' lungsimsiatna hon mukhia a hita. Ka toupa' sal ka hita uh, koute leh tua nou a kimuhnapa tawh, a chi hi. 17 Ahihhangin, Josef in: Ke'n hibang hih maizen lou e! Nou kimuhnapa kia ka sal ahi ding. A dangte bel, lungmuangtakin na pa uh kiang ah na pai thei ding uh, chi hi. 18 Judah in Josef a va-naih a: Ka toupa aw, hehpihtakin, thu kamkhat hon gensak in, kon ngen ahi. Faro tawh kikim himah lechin, na silapa tung ah heh ken. 19 Ka toupa'n na silate kiang ah non dong a: Pa na nei uhiam, sanggam na nei uhiam? non chi a, 20 koute'n kon dawng uh a: Pa ka nei uh a, puteek a hita. A teek nunga a neih tapa naupang lai khat a om. A sanggampa a sihtak manin, a nu' tapate laka omsun amah kia a hita a, a pa'n amah it mahmah ahi, chi-in kon hilh uhi. 21 Tua khitin, nang na silate kiang ah: Ka mit mahmah-a ka muh dingin, tua naupangpa ka kiang ah hon tonpih un, non chi a, 22 koute'n ka toupa uh kiang ah: Naupangpa'n a pa nuse leh a pa si zou ding hi. Ama'n a pa nuse thei lou ding ahi, chi-in kon dawng uhi. 23 Ahihhangin, nang na silate kiang ah: Na nautumpen uh, noute tawh hong ton kei leh, ka maitang na mu nawn kei ding uh, chi-in hon hilh hi. 24 Tua bang ahi a, na sila, ka pa uh kianga ka paitouh takun, ka toupa un koute kianga na thugente amah ka hilh uhi. 25 Ka pa un: Kuansuk kik unla, eite ading buh tam deuh va-lei beh un, hon chi hi. 26 Ahihhangin, koute'n: Kuansuk thei lou e. Ka nautumpen un hon zuih leh, ka kuansuk ding ua, ka nautumpen utawh ka hih kei ding uleh, tua mipa' maitang mu thei lou ding hi ungj, ka chi uhi. 27 Tua khitin, na sila, ka pa un: Ka zi in kei adingin tapa nih hon neihsak, chih noute'n na thei uhi. 28 Khat in kei hon nusia a, ke'n: Balzana om ahita mahmah ve maw, ka chi hi. Tua nung himhim amah ka mu nawn kei hi. 29 Hiai tapa pen zong hon lakmangsak zel le uchin, tuahsia khat tuak zel leh, ka samkangpi tawh, khakham veia misikhua hon zuansak ding hi uteh, a chi hi. 30 Tu'n kei na silapa, ka pa kianga vatungin hiai naupangpa koute kiang ah om kei leh, hiai naupangpa hinna leh a pa' hinna kizom ahih chiangin, 31 hiai tangvalnou a om nawn kei, chih a muh tak chiangin amah si mahmah ding ahi. Tua hi leh, na silate'n, na sila ka pa uh, a samkangpi tawh khakham veia misikhua tun petmah ding hi ung. 32 Kei na silapa mahmah in naupangpa tungthu-a mawhpaw dinga kipia ing a, ka pa kianga: Amah na kiang kon tut kei leh, nang ka pa mai ah, ka damsung teng a mawh khuden ning! chi ka hi. 33 Tua bang ahih manin, hiai naupangpa taangin kei na silapa mah hiai ah ka toupa' sal hiden dingin hon omsak inla, hiai naupangpa zaw a sanggamte tawh tonsak mahmah in. 34 Hiai naupangpa tonpih loua, kei ka pa kiang bangchi tun mahmah ding ka hia? Hi thei lou hi. Ka pa tunga lungkham-sinkham tung ding hon musak mahmah ken, a chi hi.
Josef Kipulakna
1 Tua khitin, Josef a maia dingte' mai ah a ki-ip zou nawn kei a, a kikoukhia a: Ka mai apan michih pawtkhesak un, a chi hi. Tua bangin, Josef a sanggamte kianga a kipulak laitakin mi dang kuamah a om kei hi. 2 Josef nakpitakin a kapkhia a, Aiguptate leh Faro' innkawte'n a za uhi. 3 Josef in a sanggamte kiang ah: Kei Josef ka hi! Ka pa damlai maw? a chi hi. Ahihhangin, a sanggamte bel a mai ah lau luain a om uh a, a dawng thei himhim kei uhi. 4 Josef in a sanggamte kiang ah: Hon naih un, a chi a, tua banga amaute'n a naih takun, ama'n: Kei Aigupta gama na zuak uh, na sanggampa uh Josef ka hi! 5 Ahihhangin, tuin lungkhamin mangbang kei unla, hiai gama non zuakkhiak manun zong kihehsan sam kei un. Ahang bel, hinnate hu dinga Pathian in noute ma-a kei hon na-sawl masa ahi zaw. 6 Tuin, kum nih sung kial a keta a, tu baan kum nga sung zong leileh leh buhlaak omlou lai ding ahi. 7 Ahihhangin, gam sunga noute adinga a khangsawn ding hon hawisak ding leh, hutkhiakna thupitaka noumau' hinna hon hutkhiak nadinga Pathian in noute ma-a kei hon na-sawl masa ahi. 8 Tua bang ahih manin, hiaia hon sawlsuk noute na hi kei uh a, Pathian ahi zaw. Ama'n, Faro adinga pa hi ding, a innsung adinga toupa hi ding leh, Aigupta gam sung teng vaihawmpa hi dingin kei hon bawlta hi. 9 Tuin, ka pa kiang ah paikik mengmeng unla, a kiang ah: Na tapa Josef in hiai a gen a: Pathian in Aigupta gam sung teng toupain kei hon bawlta. Zekai louin, ka kiang ah hong paisuk meng in. 10 Goshen gam ah na teeng ding a, nang leh na tate leh, na tute tawh, na belamhonte leh na ganhonte leh na neih khempeuh tawh, ka kiang nai ah na om ding. 11 Kum nga dang kial ke lai ding ahih manin, tua ah noute adingin nek ding kon suktuahsak ding. Tua hi kei leh, nang leh na innkawte leh na mite khempeuh na kialgawp ding uhi, a chi, chi un. 12 Noute kianga thugenpa kei mah ka hi, chih noute mahmah in mitin non mu uh a, Benjamin in zong hon mu hi. 13 Aigupta gama pahtawina khuksaka ka om thu khempeuh leh, mita na muhte khempeuh uh ka pa hilh unla, amah hiai ah hon piisuk pah un, a chi hi, 14 Tua bangin, ama'n a sanggampa Benjamin a ngawngkawi a, a kap hi. Benjamin in zong amah a ngawngkawi a, a kap hi. 15 Ama'n a sanggamte khempeuh zong a tawp a, amaute a kahkhum hi. Tua nungin, a sanggamte'n amah a houpih ngamta uhi. 16 Josef sanggamte, Aigupta gam ah hong paisukta uh, chih thu Faro' innpi a tung a, Faro leh a nasem uliante khempeuh a kipak uhi. 17 Faro in Josef kiang ah: Na sanggamte kiang ah: Hibangin hih un: Na gante uh buh puakkhopin pawsak unla, Kanan gam ah kilehkik un. 18 Na pa uleh na innkuante uh ka kiang ah hon piisuk un. Aigupta gam hoihna pen kon pe ding a, a gam hoihna na ne ding uhi, chi-in hilh in, a chi hi. 19 Tua baan ah, hibanga amaute hilh dingin thu kon pia hi: Hibangin hih un. Na tate uleh na zite uleh, na pa uh adingin Aigupta apanin kangtalaite keng unla, na pa uh vapii unla, hong pai un. 20 Na neih na lamte uh khelah kei un. Aigupta gam teng noute-a hi ding ahi, chi un, a chi lai hi. 21 Tuachi-in, Israel' tapate'n tua bangin a hih uhi. Josef in Faro' thupiak bangin, a sanggamte kiang ah kangtalaite a pia a, a lam an ding uh zong a guan hi. 22 Amaute puansilh thakte a pe tek a, Benjamin bel ngun sik shekel 300 leh a kikhen nading puansilh kop nga a pia hi. 23 Josef in a pa adinga a khakte hiaite ahi: Aigupta van hoihte puakkhopa pua sabiltung sawm khat, a hong paina-a a lam an ding buh leh tanghou puakkhopa pua sabiltungnu sawm khat. 24 Tua bangin, Josef in a sanggamte a khakhia a, amaute a kipatkhiak ding laiun amaute kiang ah: Lampi ah kina-kiselin om kei un aw! a chi hi. 25 Tua bangin, amaute Aigupta apanin a kipankhia uh a, Kanan ah a pa uh Jakob kiang hong tung uhi. 26 Amaute'n a pa uh kiang ah: Josef damlai ahi! Tham louin, Aigupta vaihawmpa-a pang ahi, chi-in a hilh uhi. Jakob in bel a thugente uh a um ngam zawzen kei a, a lungtang vana khai a bang hi. 27 Ahihhangin, Josef in amaute a hilhte khempeuh amah a hilh takun leh, amah puak nadinga Josef in kangtalai a khakte a muh takin, a pa uh Jakob' lungtang a halhta hi. 28 Tua bangin, Israel in: Tu'n ka taksangta! Ka tapa Josef damlai ahi. Ka sih main ka paisuk ding a, amah ka vamu ding, a chi hi.
Jakob Aigupta Gam Tung
1 Tuachi-in, Israel, a neih teng tawh a kipankhia hi. Amah Beersheba a tun takin, a pa Isak' Pathian mai ah kithoihna a bawl hi. 2 Tua zanin, Pathian in mengmuhna tungtawnin Israel a houpih a: Jakob! Jakob! chi-in a sam hi. Jakob in a dawng a: Hiai ah ka om, a chi hi. 3 Pathian in: Kei Pathian tak, na pa' Pathian ka hi. Aigupta gama paisuk ding lau ken. Tua ah minam thupi khata hon bawl ding ka hi. 4 Aigupta gama na paisukna ah kon ompih ding a, tua apanin kon pikik ngeingei ding. Na sih chiangin, na tapa Josef khut mahmah in na mit hon mitsisak ding hi, a chi hi. 5 Tua nungin, Jakob in Beersheba a nusia a, Israel' tapate'n a pa uh Jakob leh, amaute' tate leh, a zite uh, kangtalaite ah a tuangsak uhi. Tua kangtalaite bel, Faro in ama' tuan nading maha a khakte ahi. 6 Amaute'n a gantate uh zong hon kai uh a, Kanan gama neih leh lam a khopte uh zong hon pua uhi. Tua bangin, Jakob leh a suante khempeuh Aigupta gam hong tung uhi. 7 Ama'n a suante khempeuh, a tapate leh tupate leh, a tanute leh a timute hon paipih hi. 8 Aigupta gama paisuk, Jakob leh a suante, tua Israel' tapate' minte hiaite ahi: 9 Jakob' tamasa Reuben' tapate: Hanokh, Palu, Hezron leh Karmi ahi. 10 Simeon' tapate: Jemuel, Jamin, Ohad, Jakhin, Zohar leh Kanan numei' tawh kala a neih tapa Shaul ahi. 11 Levi' tapate: Gershon, Kohath leh Merari ahi. 12 Judah' tapate: Er, Onan, Shela, Perez leh Zera ahi. Ahihhangin, Er leh Onan bel Kanan gam ah a si uhi. Perez' tapate: Hezron leh Hamul ahi. 13 Isakhar' tapate: Tola, Pua, Jashub leh Shimron ahi. 14 Zebulun' tapate: Sered, Elon leh Jaleel ahi. 15 Hiaite bel, Padan Aram-a Jakob in Lea tawh kala a neih, a tanu Dina simlouh a, a tapate ahi. A tapate leh tanute a vekun 33 ahi. 16 Gad' tapate: Zefon, Hagi, Shuni, Ezbon, Eri, Arodi leh Areli ahi. 17 Asher' tapate: Imna, Ishva, Ishvi leh Beria ahi. Amaute' sanggamnu Sera ahi. Beria' tapate: Heber leh Malkiel ahi. 18 Hiaite bel, Jakob in Zilpa tawh kala a neih tate ahi. Zilpa bel, Laban in a tanu Lea a piak silanu ahi. Avekun sawmleguk ahi. 19 Jakob' zi Rakhel' tapate: Josef leh Benjamin ahi. 20 Aigupta gama Josef in Asenath tawh kala a neih Manase leh Efraim ahi. Asenath bel, On khua siampi Potifera' tanu ahi. 21 Benjamin' tapate: Bela, Beker, Ashbel, Gera, Naaman, Ehi, Rosh, Mupim, Hupim leh Arda ahi. 22 Hiaite bel, Jakob in tawh kala a neih tapate avekun sawmleli ahi. 23 Dan' tapa: Hushim ahi. 24 Naftali' tapate: Jaziel, Guni, Jezer leh Shilem ahi. 25 Hiaite bel, Jakob in Bilha tawh kala a neih tapate ahi. Bilha bel, Laban in a tanu Rakhel a piak silanu ahi. Avekun sagih ahi. 26 Aigupta gama Jakob tawh paisuk, ama' suan mahmah, a tupate' zite sim louhin, mi 66 ahi. 27 Aigupta gama Josef tapa nihte tawh simin, Aigupta gama gaisuk Jakob' innkuan mi, a vekun, 70 ahi. 28 Goshen gam tun nading lampi dong dingin Jakob in Josef kiang ah Judah a sawl masa hi. Tua bangin, amaute Goshen gam hong tung uhi. 29 Josef in a kangtalai kisasakin, a pa Israel mu dingin Goshen gam ah hong hawh hi. Josef a pa' maia a va-kilat takin, a pa a ngawngkawi a, a kap nilouh hi. 30 Israel in Josef kiang ah: Nang damlai chin a, ka mit mahmah-a kon muhtak manin si dingin ka kimanta, a chi hi. 31 Tua khitin, Josef in a sanggamte leh a pa' innkawte kiang ah: Ka paitou ding a, Faro ka vahoupih ding a, a kiang ah: Kanan gama teeng ka sanggamte leh ka pa' innkawte ka kiang hong tung uhi. 32 Amaute belamchingte, ganvul mite ahi uh a, a ganhonte uleh gantate leh a neih khempeuh utawh hong pai uh ahi, ka chi ding. 33 Ama'n noute hon sap a: Na nekzonna nasep uh bang ahia? chi-a hon dot chiangin, 34 noute'n: Ka pu ka pate uh bangin, na sila koute zong, ka neu ua-pan ganvulmi ka hi uh, chi-a na dawn ding uh ahi. Belamchingte zaw Aiguptate' mitmuha kihhuai ahih manin, Goshen gama hon teengsak ding ahi, a chi hi.
1 Tua bangin, Josef a pai a, Faro a vahilh a: Ka pa leh ka sanggamte, a belamhonte uleh ganhonte utawh, a neih khempeuh utawh, Kanan gam apan hong pai uh a, tuin Goshen gam ah a om uhi, a chi hi. 2 Josef in a sanggamte nga a telkhia a, Faro' mai ah a lak hi. 3 Faro in tua sanggamte kiang ah: Na nekzonna nasep uh bang ahia? chi-in a dong hi. Amaute'n Faro a dawng uh a: Ka pu ka pate uh bangin, na sila koute, belamchingte ka hi uh, a chi uhi. 4 Tua baan ah, amaute'n: Kanan gama kial a nat mahmah man leh, na sila koute' belamte nek ding loupa om nawnlouh manin, hiai laia teeng tadih dinga hong pai hi ung. Tua bang ahih manin, na sila koute Goshen gam ah hon teengsak in, a chi lai uhi. 5 Faro in Josef kiang ah: Na pa leh na sanggamte, na kiang hong tungta uh hiven, 6 Aigupta gam kiching mahmah lei ahih chiangin, na pa leh na sanggamte, gam hoihna laitak ah teengsak inla, Goshen gam ah teeng uhen aw. Amaute laka siamna tuam nei na theih leh, keima' ganhonte kepna mawh paw dingin bawl in, a chi hi. 7 Tua khitin, Josef in a pa Jakob a piilut a, Faro' mai ah a lak hi. Jakob in Faro a vualzawl khitin, 8 Faro in Jakob kiang ah: Kum bangzaha upa na hita a? chi-in a dong hi. 9 Jakob in Faro kiang ah: Ka damsung khualzin sung kum 130 a hita. Ka damsung kumte a tawm a, a haksa mahmah a, ka pu ka pate' khualzin sung kum zah a pha het kei hi, a chi hi. 10 Tua khitin, Jakob in Faro a vualzawl kik a, Faro kiang apanin a paikhia hi. 11 Tuachi-in, Josef in a pa leh a sanggamte, Aigupta gam ah a teengsak hi. Faro' thupiak bangin, Aigupta gam hoihna pen Rameses gam sehkhen sung ah gam a pia hi. 12 Josef in a pa leh a sanggamte leh a pa' innkawte kiang ah, a innkuante uh tam dan bang zelin an a pia hi.
Kial tawh kisai Josef Nasep
13 Kial a nat mahmah manin, tua gam bup ah an a om kei hi. Tua kialpi hang mahin, Aigupta gam leh Kanan gam ah bangmah a om nawn kei hi. 14 Tua bang ahih manin, Josef in Aigupta gam leh Kanan gama sum om teng, buh manin a khawmkhinta a, Faro' innpi ah hon koih hi. 15 Tua banga Aigupta gam mite leh Kanan gam mite' sum a om nawn louh takin, Aigupta gam mite khempeuh Josef kiang ah hong tai uh a: An hon pia in. Banghanga na muh gegu-a koute si ding ka hi ua oi? Ka sum uh beita ahi, a chi uhi. 16 Josef in amaute kiang ah: Tua bang ahih leh, na gantate uh hon la un. Na sumte uh beita ahih manin, gantatein buh kon leisak ding, a chi hi. 17 Tua bangin, amaute'n a gantate uh, Josef kiang ah hon la uh a, ama'n amaute' sakolte, belamte, bawngte leh, sabiltungte kheknain buh a pia hi. Tua bangin, tua kumin, a gantate uh kheknain amaute anin a vak hi. 18 Tua kum hong bei takin, a kum nawnin, amaute Josef kiang ah hong pai uh a: Koute'n ka toupa uh hon im thei lou hi ung. Ka sum ulah beita, ka gantate ulah nanga suak vekta. Nang ka toupa uh mai ah, ka pumpi uleh ka gamte uh loungal bangmah om nawn lou hi. 19 Banghanga na muh gegu-a koute, ka gamte utawh mangthang ding ka hi ua oi? Koute leh ka gamte uh anin hon lei mai in. Koute, ka gamte utawh, Faro nuai ah salin tang mai n'ung. Koute ka nuntak theih ua, ka sih louh nading uleh gam a siat louh nadingin, khaichi hon pia in, a chi uhi. 20 Tua bangin, Josef in Aigupta gama gam khempeuh Faro adingin a lei vekta hi. Kial a nat mahmah manin, Aigupta mite khempeuh in a gamte uh a khawngkhe vek uh a, gamteng Faro-a a suakta hi. 21 Josef in mite khempeuh, Aigupta gamgi langkhat apan langkhat dong khawpite ah a pemlutsak hi. 22 Ahihhangin, siampite bel Faro in a tan ding uh an sehsaksa a nei a, nek khop a nei uhi. Tua ahih manin, Josef in amaute' gam a leikhiaksak kei hi. Amaute'n zong gam a zuak uh a kul kei hi. 23 Josef in mite kiang ah: Tuni-a noute leh na gamte uh, Faro adinga hon leikhin ka hita. Hiai ah noute adingin khaichi a om. Gam ah hai na ching thei ding uh. 24 Ahihhangin, buhlak chiangin, Faro kiang ah sehnga-a seh khat na pe ding uh a, sehli noute ading ahi ding. A chi ding leh, noute leh na innkawte uh leh na tate uh adinga nek ding ahi ding, a chi hi. 25 Amaute'n: Nang koute' nuntakna non hukheta. Toupa aw, na mitmuhin deihsakna hon tangsak inla, Faro nuai ah silain om n'ung, a chi uhi. 26 Tuachi-in, Josef in Aigupta gam sunga gam tawh kisai dan a bawl a, tuni dong a kizang hi. Tua dan bel hibang ahi: Gama piang peuhmah sehnga-a sehkhat Faro tan ahi ding. Siampite' gamte bel, Faro-a ahi kei ding, chih ahi. 27 Israelte bel Aigupta-a Goshen gam ah a teeng uhi. Tua ah, amaute'n neih leh lam a khawm uh a, chipha takin a om uh a, nakpitakin a hong pung uhi. 28 Jakob zong, Aigupta gam ah kum sawmlesagih a nungta lai a, a damsung khempeuh kum 147 ahi. 29 Israel' sih hun hong naita a, ama'n a tapa Josef a samsak a, a kiang ah: Na mitmuha deihsakna tang ka hih leh, na khut ka pheipi kal ah golh inla, siamna leh muanhuaina hon musak dingin thu chiam in. Aigupta gam ah hon vui het ken. 30 Ka pu ka pate kianga ka tawlngak chiangin, Aigupta gam apan hon pua inla, ka pu ka pate kivuina hankhuk ah kei zong hon vui in, a chi hi. Josef in: Na gen bangbangin ka hon hih ding, a chi hi. 31 Israel in: Ka kiang ah kichiam in, a chi a, Josef a kichiam hi. Tua bangin, Israel in a lupna khunga kunin Pathian a bia hi.
Jakob in Josef Tapate Vualzawl
1 Hiaite nungin, Josef kiang ah: Na pa china ahi, chih thu a hilh uhi. Josef in a tapa nihte Manase leh Efraim a tonpih a, 2 Jakob kiang ah: Na tapa Josef na kianga hong hawh eive, chi-in a hilh uhi. Israel a kihalhsak a, lupna tunga lum, a tutou hi. 3 Jakob in Josef kiang ah: Kanan gama Luz khua ah Pathian Vanglianpen ka kiang ah hong kilak a, hon vualzawl a, ka kiang ah: 4 Chiphatakin kon bawl ding a, kon pungsak ding. Nang apanin mi tampi ka bawl ding a, na nunga na suante'n hiai gam a neihden dingun ka pe ding, hon chi ahi. 5 Aigupta gama na kiang kong tun ma-a na neih na tapa nihte keia ahi ding uh. Reuben leh Simeon keia ahih bangbangin, Efraim leh Manase keia ahi ding. 6 Amaute na neih nunga na neih tate bel nanga ahi ding. Amaute' luahgam ah a sanggamte uh lak ah a min uh a kisimtel ding hi. 7 Padan Aram apan kong kilehkik a, lampi-a ka pai laiin, Efrath apan gamla lou ah Rakhel in hon sihsan a, Efrath lampi gei ah amah ka vui hi, a chi hi. Efrath bel Bethlehem ahi. 8 Israel in Josef tapate a muh takin: Hiaite kuate ahi ua? a chi hi. 9 Josef in a pa kiang ah: Amaute, hiai laia Pathian hon piak ka tapate ahi ve ua, a chi hi. Israel in: Hehpihtakin amaute ka kiang ah hon pii in, amaute ka na-vualzawl ding, a chi hi. 10 Israel bel teekta ahih manin a mit a mial a, khua a mu thei kei hi. Josef in a tapate amah kiang ah hon pii a, a pa'n amaute a tawp a, a na ngawngkawi hi. 11 Israel in Josef kiang ah: Na mei muh kik ding kinem lou mah hi vengin, tu'n Pathian in na tate nangawn tawh hon musakta, a chi hi. 12 Tua khitin, Josef in amaute Israel' khuk kal apan a hemkhia a, amah lei si-in a kun hi. 13 Tua khitin, Josef in amaute gel a kai a, Efraim pen ama' taklam, tua bel Israel' veilam ah, Manase pen ama' veilam, tua bel Israel' taklam ah, Israel' mai ah hon pii nai hi. 14 Ahihhangin, Israel in a khut taklam a zan a, a nauzaw Efraim lutung ah a nga hi. Manase uzaw hi mah leh, Israel in a khutte a sawkkalh a, a khut veilam Manase lutung ah a nga hi. 15 Tua bangin, Israel in Josef a vualzawl a: Ka pu ka pate Abraham leh Isak in a nna a sep uh Pathian, ka dam sung teng, tuni donga kei hon Chingpa tua Pathian, 16 gitlouhna khempeuh apana kei hon tankhia tua Vansawltak in hiai naupangte vualzawl hen aw. Amaute'n keima' min leh, ka pu ka pate Abraham leh Isak' min pu uhenla, leitung ah mi tampitak hong pha uhen, a chi hi. 17 Josef in, a pa'n a khut taklam Efraim lutunga a koih a muh takin, a lungkim kei a, a pa' khut a len a, Efraim lutunga om Manase' lutunga koih a sawm hi. 18 A pa kiang ah: Hi lou e, pa aw, hiai pen tamasa ahi a, na khut taklam a lutung ah nga in, a chi hi. 19 Ahihhangin, a pa a ut kei a: Ka thei hi, ka tapa aw, ka thei hi. Amah zong nam khat hong suak veve ding a, hong lian ding ahi. Ahihhangin, amah sangin a naupa a lianzaw ding a, a suante nam tampi a suak ding, a chi hi. 20 Ama'n tua ni-in, amaute a vualzawl a: Israel in vualzawlna a gen chiangin, Pathian in Efraim leh Manase bangin nang hon vualzawl hen, chi-in noute min louin mi a vualzawl ding, a chi hi. Tua bangin, ama'n Manasesanga masazawin Efraim a koih hi. 21 Tua khitin, Israel in Josef kiang ah: Ngai in, kei si ding ka hita, ahihhangin, Pathian in nang hon ompih ding a, na pu na pate' gam ah hon piikik ding ahi. 2 Tua thamlouin, na sanggamte' tan sanga tantuan khata tamzaw tuin kon pia hi. Tua bel, ka namsau leh ka thalphel, Amorte apana gam ka lak pen ahi tantuan kon piak, a chi hi.
Jakob' Thu Nunungte
1 Tua nungin, Jakob in a tapate a sam a: Hong paikhawm un, tunung chianga na tung ua thil tung dingte kon hilh ding: 2 Nou Jakob' tapate aw, hong paikhawm unla, ngai un. Na pa uh Israel' thugen ngai un. 3 Reuben, nang ka tamasa na hi. Ka vangletna hi chin a, ka hatna gah masa hi na hi. Ka zahtakhuaina tungnung, ka vangletna tungnung hi na hi. 4 Om kinken theilou tui bang hi chin a, tungnung nawn lou ding na hi. Ahang bel, na pa' lupnapi-a kal a, ka lupna na buahsak hi vechin. 5 Simeon leh Levi unau hi uh a, a namsaute uh sisan suahna vanzatte hi ahi. 6 A vaihawmna uah kihel lou ding ing a, a kikhopna ua tel lou ding hi'ng A ut-ut ua bawngtal zapigui sattat uhi. 7 A hehna uh hamsiatin om hen: A hehna uh lauhuai a, a thangpaihna uh kihtakhuai hi. Amaute Jakob lak ah khenzak ding ing a, Israelte lak ah thehthang ding hi'ng. 8 Judah, nang na sanggamte' phatlawhpa hi ding na hi. Na galte gawlmek ding chin a, na pa' tate na mai ah kun ding hi. 9 Judah aw, humpinelkai nou bang hi na hi: Ka tapa aw, na sa matsa apan kilehkik na hi. Amah humpinelkai bangin bok a, humpinelkainu bangin kualsuk a, kua'n amah tokthou ngam ding? 10 Kumpi chiangin Judah nuse ngei lou ding a, a neipa Shilo hong tun masiah, a suan a khakte laka ukpa' kumpichiang kisam ngei lou ding a, minam dangte'n a thu mang ding hi. 11 Ama'n a sabiltung grepgui ah khih ding a, a sabiltungnou grepgui hoihpen ah khih ding a,a puansilhte greptuiin sawp ding a, a kumpipuante grep sisan ah sawp ding hi. 12 A mitte zu sangin dup zaw ding a, a hate nawitui sangin ngou zaw ding hi. 13 Zebulun, tuipi gei ah teng ding a, longte khawlna mun hi ding a, Sidon tawh kigamgi-in om ding hi. 14 Isakhar, sabiltung thahat bang hi a, vangik nih kikal ah kual hi. 15 A tawlngakna mun hoih dan mu a, a gam nop dan a muh chianga, vangikte paw dinga a liang niamsak ding a, saltang banga nna sem ding hi. 16 Dan in Israelte laka nam khat banga a mite tunga thu khen ding hi. 17 Dan bel, lampi geia gulpi bang hi ding a, lampi geia gul dekpak bang hi ding hi. Sakol khetul tu ding a, sakol tungtuangpa thalkiak ding hi. 18 Tangtawn Toupa aw, ke'n na hut- khiakna ngak hi'ng. 19 Gad bel, galsimpawl in dou ding a, ahihhanga a tawpa amaute delhzak ding hi. 20 Asher apan nek leh tak hoih ding a, ama'n kumpi adinga kilawm ante piangsak ding hi. 21 Naftali sazukpi khahkhiak bang hi ding a, thu hoihpi pi gen ding hi. 22 Josef sing gahpha bang hi a, tuiluang kianga sing gahpha bang hi ding hi. A hiangte kulhbaang tunga zam bang hi ding hi. 23 Thaltawite'n mudah mahmaha amah dou uh a, heh mahmaha kaap uhi. 24 Ahihhanga a thalphel khauh a, a bantha hat hi. Tua bel Jakob' Mihatpa' khut hang leh, Belamchingpa tua Israel Suangpi' hang leh, 25 na pa' Pathian, nang hon huhpa hang hi a, nang hon vualzawlpa a Vanglianpen' hang hi ahi. Ama'n tung vanlama vualzaawlnate leh nuailam tuipi-a vualzawlnate leh, nawi leh sula vualzawlnatein nang hon vualzawl ding hi. 26 Na pa' vulzawlnate'n ka pu ka pate vualzawlnate khup a, tanglai tangte leh mualte' vualzawlnate khup hi. Hibang vualzawlnate khempeuh Josef lutung ah om ding a, a sanggamte laka vaihawma ompa' lutung ah om ding hi. 27 Benjamin ahih leh, a samat botzan ngia duhgawl bang hi ahi. Zingsangin a samat ne ding a, nitaklamin a gallak hawm ding hi, a chi hi. 28 Hiaite khempeuh, Israel namte ahi uh a, hiaite amaute kianga a pa un a gen ahi. Ama'n amaute a vualzawl a, amaute tawh kituakin a vualzawl tek hi.
Jakob' Sihna
29 Ama'n a tate thu a nutsiat a: Ka mite kianga laak ding ka hita. Hit mi Efron' gam sung ah, ka pu ka pate kivuina hankhuk ah hon vui un. 30 Tua kawkhuk bel, Kanan gama Mamre zawna, Makhpela' gam sunga om ahi. Tua gam, hanmun dinga Abraham in Hit mi Efron apan a leikhiak ahi. 31 Tua ah Abraham leh a zi Sara a kivui a, Isak leh a zi Rebek a kivui a, tua ah ke'n Lea ka vui hi. 32 Tua gam leh tua-a om kawkhuk, Hit' tapate apan kileikhia ahi, a chi hi. 33 Jakob in a tapate thu a hilh khitin, lupna ah a khete a liktou a, a laitata, a mite kianga lakin a omta hi.
1 Josef in a pa' mai ah kunsukin, a kah a, a tawp hi. 2 Tua khitin, ama'n a pa Israel' luang muat thei lou dinga bawlsak dingin a nuaia sem daktorte thu a pia hi. Tua bangin, tua daktorte'n amah muat thei lou dingin a bawl uhi. 3 Tua banga bawl nadingin ni 40 sung a kul hi. Tua bangin Aiguptate'n ni 70 sung amah a suun uhi. 4 Sisuun nite a bei takin Josef in Faro' innkawte a houpih a: Na mitmuh ua maipha non muhsak uleh, hehpihtakin, Faro kiang ah kei adingin thu hon ngetsak un. 5 Ka pa'n hon kichiamsak a: Kei si ding ka hita a, Kanan gama kei adinga kawkhuk ka laih ah hon vui un, a chi hi. Tua bang ahih manin, Faro in hon paitousak henla, ka pa vavui ning. Tua khit chiangin hong kilehkik ning, a chi hi. 6 Faro in: Paitou inla, na pa'n hon kichiamsak bangin amah vavui in, a chi hi. 7 Tua bangin Josef a paitou a, a pa a vavui hi. Faro' nasem uliante khempeuh in Josef a zuitou uhi, Amaute, Faro' vaihawm uliante, Aigupta gam uliante ahi uhi. 8 Josef innkawte leh a sanggamte leh a pa' innkawte baan ah, hiai uliante'n a zuitou uhi. A taneute uleh a belamhonte uleh a ganhonte uh bel, Goshen gam ah a nusia uhi. 9 Kangtalai leh sakol tungtuangte'n zong amah a zuitou uh a, a vekun mi tampi a pha uhi. 10 Amaute Jordan lui gala om Atad' buhphual a tung uh a, nakpitaka khasia-a kahna a om hi. Tua mun ah Josef in a pa suunna hun ni sagih a tang hi. 11 Kanan mite'n Atad' buhphuala sisuunna a muh takun: Hiai Aigupta' sisuunna thupi mahmah ahi, a chi uhi. Tua bang ahih manin, tua mun min dingin Abel Mizraim chih a kiphuak hi. Tua bel, Jordan lui gala om ahi. 12 Tua bangin Jakob' tapate'n ama' thupiak bangbangin a hih uhi: 13 Amaute'n a luang a pua uh a, Makhpela gam sunga kawkhuk ah a vui uhi. Tua bel Mamre kianga om ahi a, hanmun dinga Abraham in Hit mi Efron apan a gam tawh a leikhawm ahi. 14 Josef in a pa a vui khitin, a sanggamte leh a pa vui dinga zuitoute khempeuh tawh, Aigupta gam ah a kiksuk hi.
Josef In a Sanggamte Khamuan
15 Josef sanggamte'n a pa uh a sita, chih a muh takun: Josef eite tung ah lungkim lou nilouhin, ama' tunga i tatsiatna khempeuh hon thuk kha ding ahi, a kichi uhi. 16 Tua bang ahih manin, amaute'n Josef kiang ah thu a khak uh a: Na pa'n a sih main hibangin thusiah hon nutsiat ahi: 17 Josef kiang ah: Na sanggamte na tunga tatsia a, a gitlouhna uleh a khelhna uh na ngaihdam ding kon ngen hi, chi ahi. Tuin, hehpihtakin, na pa' Pathian' silate' tatlekna ngaidamta in, a chi uhi. Hiai thu Josef in a zak takin a kap hi. 18 A sanggamte hong pai uh a, a mai ah a bok uh a: Ngai in, koute na silate ka hi uh, a chi uhi. 19 Ahihhangin, Josef in amaute kiang ah: Lau kei un. Kei, Pathian muna ding ka hi-a hia? 20 Noute'n bel ka siat nading na tum uh a, ahihhangin, Pathian in a hoih lamin a zang a, tuni-a hong tung bangbang mi tampite' nuntakna hut nadingin a zang hi. 21 Tuin lau kei un. Noute leh na tate uh nek ding tak ding kon suktuahsak ding, a chi hi. Ama'n tua bangin amaute a khamuan a, kamdamin a houpih hi.
Josef Sihna
22 Josef a pa' innkawte teng tawh, Aigupta gam ah a teeng lai hi. Kum 110 a nungta a, 23 Efraim' tate a khang thum dong a mu hi. Makir' tate zong Josef khuk tung ah a piang uhi. Makir bel Manase' tapa ahi. 24 Tuate nungin, Josef in a sanggamte kiang ah: Kei si ding ka hita. Ahihhangin, Pathian in noute hong veh ngeingei ding a, hiai gam apan hon piikhe ding a, Abraham kiang, Isak kiang leh Jakob kianga piak dinga a chiamsa gam hon tun ding ahi, a chi hi. 25 Tua bangin Josef in Israel' tapate a kichiamsak a: Pathian in noute hong veh ngeingei ding a, hiai mun apan ka guhte na puaktouh ding uh ahi, a chi hi. 26 Tua bangin Josef kum 110-a upa ahihin a sita hi. Amaute'n damdawi zangin a luang muat thei lou dingin a bawl uh a, Aigupta gam ah hankuang sung ah a koih uhi.
Israelte Nuaisiahna
1 Innkuan kuana Jakob tawh Aigupta gama paisuk Israel' tapate hiaite ahi: 2 Reuben, Simeon, Levi leh Judah, 3 Isakhar, Zebulun leh Benjamin, 4 Dan leh Naftali, Gad leh Asher. 5 Jakob' suante avekpiun 70 a pha uhi. Josef ahih leh Aigupta gam ah a na omkhinta hi. 6 Josef leh a sanggamte leh amau khanga mite khempeuh hong sita uhi. 7 Ahihhangin, Israel' tate a chipha uh a, nakpitakin a pung uh a, hong hat mahmah uh a, tua gam hong dim uhi. 8 Tua hun laiin, Aigupta gam ah Josef theilou kumpipa dang khat hong lian a, 9 ama'n a mite kiang ah: En dih ua, eite adingin Israel tate a tam lawta uh. 10 Kisa ni-in, piltakin amaute tung ah gamta ni. Tua banga i hih kei leh, hong tam semsem lai ding uh a, sa leh gal kidouna khat hong om henla, amaute i galte lam ah pang kha le uh, eite hon douin, i gam a nuse kha ding uh, a chi hi. 11 Tua bang ahih manin, Aiguptate'n Israel tate nagum semsak a, zawhthawhna tawh gimsak dingin amaute tung ah sila heutute a sep uh a, Israelte'n Faro adingin an koihna khawpite Pithom leh Rameses a lam uhi. 12 Ahihhangin, zawhthawhna uang semsem mah leh, Israel tate a pung semsem uh a, hong kithehdalh semsem uhi. Aiguptate'n Israel tate a lau mahmah uh a, 13 dawm louin nna a semsak uhi. 14 Teklei leh buanmante bawlsakin, lou khawnga nna tuamtuam gimtakin a semsak uh a, a hinna uh a hihgenthei mahmah uhi. Tua banga a sepgim laiun, Aiguptate'n amaute a dawm mahmah kei uhi. 15 Tua laiin, Aigupta kumpipa'n Hebru naudomte Shifra leh Pua kiang ah: 16 Hebru numeite' nau na dop chiangun, nausuahna toukhom ah na pang unla, nausuak pen pasal a hih leh, na that unla, numei ahih lebel hinghawi un, a chi hi. 17 Ahihhangin, Hebru naudomte'n Pathian a lau uh a, Aigupta kumpipa' thupiak bangin a hih kei uh a, pasal naungekte zong a hinghawi uhi. 18 Aigupta kumpipa'n tua naudomte a sam a: Banghanga hibang hih na hi ua? Banghanga pasal naungekte hinghawi na hi ua? a chi hi. 19 Naudomte'n a dawng uh a: Hebru numeite zaw Aigupta numeite bang lou uh a, chidama thahat uh a, naudomte tun ma-a, nau suakkhin pahpah hi, a chi uhi. 20 Tua bang ahih manin, Pathian in tua naudomte a deihsak a, Israel tate hong pung uh a, hong tam semsem lai uhi. 21 Tua banga naudomte'n Pathian lau uh ahih manin, Ama'n amaute adingin innkuante a bawlsak hi. 22 Tua nungin, Faro in a mite khempeuh thu a pia a: Pasal naungek piang peuhmah Nail luipi-a na paih zel ding uh, numei naungek peuhmah bel na hinghawi ding uh ahi, a chi hi.
Mosi Pianna
1 Tua laiin, Levi innkawte pasal khat in Levi numei khat zi-in a nei hi. 2 Tua nu hong gai a, tapa a nei hi. Ama'n tua tapa a pianhoih mahmah chih a muh takin, kha thum sung a sel hi. 3 Ahihhangin, a sel theih nawn louh takin, phaiphek lawh khat a la a, buanman leh alkatara in a zut a, tua sung ah tua naungek a sial a, Nail luipi geia pumpeng lak ah a koih hi. 4 Tua naungek' sanggamnu'n tua naungek bang hong suak hiam, chi-a gal etin gamla kuam ah a ding hi. 5 Tua nungin, Faro' tanu Nail luipi-a kisil dingin hong paisuk a, ama' sila numeite luipi gei zuiin a pai uhi. Faro' tanu in pumpeng laka lawh om a mu a, tua lawh vala dingin a sila numei khat a sawl hi. 6 Ama'n tua lawh a hong a, tua naungek a mu hi. Tua naungek a kap a, ama'n amah a lainat a: Hiai Hebru naungekte laka khat hi mahmah e, a chi hi. 7 Tua khitin, naungek' sanggamnu'n Faro' tanu kiang ah: Nang adinga naungek hon donsak dingin Hebru numei khat kon vasapsak diam? a chi hi. 8 Ama'n: He, vakuan in, a chi hi. Tua nungaknou a va-kuan a, a naungek' nu mah a vasam hi. 9 Faro' tanu in tua nu kiang ah: Hiai naungek la inla, kei adingin hon donsak in, na thaman hon pia ning, a chi hi. Tua nu'n tua naungek a la a, a donta hi. 10 Tua naungek hong khanlet deuh takin, ama'n Faro' tanu kiang ah hon paipih a, Faro' tanu' tapa hong hita hi. Faro' tanu in: Amah tui apan ka lakkhiak ahi, chi-in, a min dingin Mosi a sa hi.
Mosi Midian Gama Taina
11 Mosi hong pichin takin, ni khat, ama' mite omna mun ah hong pawtkhia a, amaute sepgim dan a vamu hi. Tua hunin, Aigupta mi khat in ama' mi Hebrute khat a vuak lai a mu hi. 12 Mosi in a sak a khang a en a, kuamah a muh louh takin, tua Aigupta mi a that a, sehnel lak ah a luang a phuum hi. 13 A zingchiangin, Mosi a vapawtkhia a, Hebru mi nih kisual a mu hi. Ama'n a gilou zawpa kiang ah: Banghanga nang na sanggam Hebru mi tum na hia? a chi hi. 14 Tua pa'n: Koute tunga kumpi thukhen dinga kua'n nang hon sep a zenzen a? Aigupta mi na thah banga hon thah sawm na hi maw? a chi hi. Tua a zak takin, Mosi a lau a: Ka thilhih kiphawkkhia hita mahmah veh e, chi-in a ngaihtuah hi. 15 Faro in tua thu a zak takin, Mosi thah a sawm hi. Mosi bel Faro apan a tai a, Midian gama teng dingin a pai hi. Tua gam ah tuileh khat kiang ah a tu hi. 16 Tua hun laiin, Midian siampi khat a om a, ama'n tanu sagih a nei hi. Tua siampi' tanute tuikhuka tuikuang sunga a pa uh' belamhonte tui pe dingin tua ah hong kuan uhi. 17 Tua lai mahin, belamching pawlkhat hong pai uh a, tua belamhonte a hawlmangsak uhi. Ahihhangin, Mosi a dingtou a, tua nungakte a hukhia a, a belam honte uh tui a pia hi. 18 Tua nungakte a pa uh Reuel kiang hong tunkik takun, ama'n: Tuni-a bang achi-a, hong hichi tun baih na hi ua le? a chi hi. 19 Amaute'n a dawng uh a: Aigupta mi khat in belamchingte' khut apan koute hon humbit a, tui hawng dipsak a, belamhonte tui a pe lai hi, a chi uhi. 20 Ama'n a tanute kiang ah: Amah koia om ahia? Banghanga amah hon nusia na hi ua? An ne dingin vachial ve ua, a chi hi. 21 Mosi bel tua mipa kianga ten a lungkim a, tua mipa'n a tanu Zipora a zi dingin a pia hi. 22 Zipora in tapa a nei a, Mosi in: Gamdang ah, melmak mi-in ka om, chi-in tua tapa min dingin Gershom a sa hi. 23 Tua hun sawtpi sungin, Aigupta kumpipa a sita hi. Israelte bel saltanna nuaia thuum leh mauin a kikou kou uh a, saltanna hanga huhna ngen-a a kikou uh Pathian kiang a tungtou hi. 24 Pathian in amaute' thum leh mau a za a, Abraham leh Isak leh Jakob tawh kala a thukhun a phawk gige hi. 25 Tua hangin, Pathian in Israel tate a en a, amaute a awlmawh hi.
Mosi leh Loupabuk Kuang
1 Mosi in a sungpa Jethro, tua Midian siampi' belamhonte a ching a, gamdai-gamkeu khenlam ah belamhonte a paipih a, Horeb kichi, Pathian' Mual hong tung hi. 2 Tua ah, Tangtawn Toupa' vansawltak amah kiang ah loupabuk meia kuang lak apan hong kilaak hi. Mosi in tua loupabuk kuang a, ahihhanga kangtum lou a mu hi. 3 Tua bang ahih manin, Mosi in: Ka vanaih ding a, hiai thillamdang kimu ka vaen ding. Banghanga loupa kangtum lou ahia, chi-in a ngaihtuah hi. 4 Mosi in a vanaih, chih Tangtawn Toupa'n a muh takin, loupa lak apan amah a sam a: Mosi! Mosi! a chi hi. Mosi in a dawng a: Hiah ka om, a chi hi. 5 Ama'n: Hiai baan hon naih ken. Na khedapte suah in, na dinna mun, mun siangthou ahi, a chi hi. 6 Tua khitin, Ama'n: Kei na pa' Pathian, Abraham' Pathian, Isak' Pathian leh Jakob' Pathian ka hi, a chi hi. Hiai a zak takin, Mosi in Pathian a et ngam louh manin a maitang a hum hi. 7 Tangtawn Toupa'n: Aigupta gama ka mite' gimna ka muta. Amaute sala kaia nasemsakte hanga a kikou husa uh ka zata. A thuakna uh hangin ka awlmawh hi. 8 Tua bang ahih manin, Aiguptate khut sung apan amaute hinna hawi ding leh, tua gam apan amaute piikhia a, gam lianpi, nawitui leh khuaizu-a luang gama piilut dinga hong paisuk ka hi. Tua gam bel Kanante, Hitte, Amorte, Perizte, Hivte leh Jebuste tenna gam ahi. 9 Tuin, Israelte' kikouna ka kiang hong tungta a, Aiguptate'n amaute a zawhthawh dan uh ka muta. 10 Tua bang ahih manin, kuan inla, Aigupta gam apan ka mi Israel tate piikhe dingin, Faro kianga hon sawl ka hi, a chi hi. 11 Ahihhangin, Mosi in Pathian kiang ah: Faro kianga hawh ding leh Aigupta gam apan Israel tate piikhe dingin kei kua ka hia? a chi hi. 12 Pathian in: Nang kon ompih ngeingei ding a, nang hon sawlpa kei ka hi, chih chiamtehna hiai ahi ding: Aigupta gam apan Israelte na piikhiak khit chiangin, hiai Mual ah Pathian na be ding, a chi hi.
Jehova' Min
13 Tua khitin, Mosi in Pathian kiang ah: En dih, kei Israel tate kiang ah vahawh lengla, amaute kiang ah: Na pu na pate uh' Pathian in noute kianga kei hon sawl ahi, vachi lengla, amaute'n: A min bang ahia? hon chi le uh, ke'n bang gen ding ka hia? a chi hi. 14 Pathian in Mosi kiang ah: KEIMAH A OMPA KA HI. Israelte kiang ah: A OMPA in kei noute kianga hon sawl ahi, na chi ding ahi, a chi hi. 15 Tua baan ah, Pathian in Mosi kiang ah: Israel tate kianga na gen ding hiai ahi: Tangtawn Toupa, na pu na pate uh' Pathian, tua Abraham' Pathian, Isak' Pathian leh Jakob' Pathian in kei noute kianga hon sawl ahi. Hiai ka min ahi tawntung a, a khang a khanga kei theih gigena min ahi ding hi. 16 Kuan inla, Israel upate kaikhawm inla, amaute kiang ah: Tangtawn Toupa, na pu na pate uh' Pathian, Abraham' Pathian, Isak' Pathian leh Jakob' Pathian ka kiang ah hong kilaak a, ka kiang ah: Noute kong veh ngeingei ding. Aigupta gama hon engbawl dan uh ka muta a, 17 Aigupta gama na gimna uapan kon piikhe ding. Kon piikhe ding a, Kanante, Hitte, Amorte, Perizte, Hivte leh Jebuste gam, nawitui leh khuaizu-a luang tua gam kon tun ding, ka na chita, a chi, chi in. 18 Israel upate'n na aw a ngaikhe ding uh. Kuan inla, nang leh Israel upate Aigupta kumpipa kiang ah hawh unla, amah kiang ah: Tangtawn Toupa, Hebrute' Pathian in Amah tawh koute hon kimusak hi. Tuin, Tangtawn Toupa, ka Pathian uh kianga kithoihna laan dingin, ni thum lam gamdai-gamkeu ah, hehpihtakin koute hon paisak in, chi in. 19 Ahihhangin, Aigupta kumpipa'n noute hon paisak dingin phalna nang hon pe kei ding. Ban thahata nawh louh ngalin noute hon paisak dingin, nang phalna hon pe kei ding, chih ka thei. 20 Tua bang ahih manin, ka khut ka likkhe ding a, Aigupta gama thillamdangte ka hih dingte khempeuhin Aiguptate ka dou ding. Tua khit chiangin, ama'n noute hon paisak ding. 21 Aiguptate' mit ah hiai Israelte deihsakna ka neisak ding a, na paikhiak chiangun, khutvuakin na paikhe kei ding uh. 22 Israel numei peuhmah in a innveng kiang ah leh a inn sunga mikhuala teeng kiang ah, ngun leh khama kibawl vante leh puansilhte a ngen ding ahi. Tuate na tapate uleh, na tanute uh tung ah na baat ding uh a, tua bangin, Aiguptate na lok ding uh, a chi hi.
Mosi' Niaina
1 Tua khitin, Mosi in a dawng a: Ahihhangin, ngai dih, amaute'n kei hon um kei ding uh a, ka aw zong a ngaikhe kei ding uh. Tangtawn Toupa na kiang ah hong kilaak kei, a chi tham ding uh, a chi hi. 2 Tua khitin, Tangtawn Toupa'n amah kiang ah: Na khuta om bang ahia? a chi hi. Mosi in a dawng a: Chiangkhun, a chi hi, 3 Tangtawn Toupa'n: Leilak ah paai in, a chi hi. Mosi in leilaka tua chiangkhun a paih leh, gul hong suak a, Mosi a taai hi. 4 Tua khitin, Tangtawn Toupa'n Mosi kiang ah: Na khutin sawk inla, a meiin man in, a chi hi. Mosi in a khuta sawka, tua gul a mat leh, a khut ah chiangkhun a suak nawn hi. 5 Tangtawn Toupa'n: Kei Tangtawn Toupa, a pu a pate uh' Pathian, Abraham' Pathian, Isak' Pathian, leh Jakob' Pathian na kiang ah hong kilaak, chih amaute'n a up nadingun hiai hih ka hi, a chi hi. 6 Tua baan ah, Tangtawn Toupa'n amah kiang ah: Na puanak nuai na awm ah na khut golh in, a chi a, Mosi in a puanak nuai ah a khut a golh a, a dawhkhiak takin, ngai dih, a khut a phak a, vuk bangin a ngou hi. 7 Tua khitin, Tangtawn Toupa'n: Na puanak nuai na awm ah na khut golh kik in, a chi a, Mosi in a puanak nuai ah a khut a golh a, a dawhkhiak takin, ngai dih, a damkik a, a sa ngei a pu kik hi. 8 Tua khitin, Tangtawn Toupa'n: Amaute'n nang hon up kei uleh, ahih kei leh, chiamtehna masa theihpihna a up kei uleh, chiamtehna nihna theihpihna a um ding uhi. 9 Amaute'n hiai chiamtehna nihte' theihpihnate a up kei uleh, ahih kei leh, na aw a ngaihkhiak kei uleh, Nail luipi apan tui la inla, leikeu tung ah sung in, tua tui leilak ah sisan a suak ding, a chi hi. 10 10 Mosi in Tangtawn Toupa kiang ah: Toupa aw, kei zaw mi dangnal hi ngeilou ka hi. Kei na sila nidanga zong, tu-a non houpih nunga zong mi dangnal hi tuan lou ka hi. Dangawkpi leh thugen siamloupi ka hi, a chi hi. 11 Tangtawn Toupa'n amah kiang ah: Mihing adia kam bawlpa kua ahia? Ahih kei leh, mihing pauthei loua bawlpa, ahih kei leh nangongsakpa, ahih kei leh mittawsakpa kua ahia oi? Tua banga bawlpa Keimah Tangtawn Toupa ka hi keia hia? 12 Tu'n kuan mai in. Keima'n na kam ka ompih ding a, na gen ding kon hilh ding, a chi hi. 13 Ahihhangin, Mosi in: Toupa aw, hehpihtakin, midang na sawl nopnop sawl zaw mai in, a chi hi. 14 Tua a zak takin Mosi tung ah Tangtawn Toupa' hehna a kuang a, amah kiang ah: Levi' suan Aron, na upa hilou maw? Amah thugen thei mahmah ahi chih ka thei. Amah nang tuak dingin hong paikhe ding a, nang hon muh chiangin a lungnuam mahmah ding. 15 Amah na houpih ding a, a thugen ding na muam ding ahi. Ke'n na nih-ua' kam ka ompih ding a, na hih ding uh kon hilh ding. 16 Nang' sik leh tangin ama'n Israelte kiang ah thu a gen ding a, amah na kam bang ahi ding a, nang amah adingin Pathian bang na hi ding. 17 Na khutin hiai chiangkhun tawi inla, hiai chiangkhunin thillamdangte na hih ding ahi, a chi hi.
Aigupta Gama Mosi
18 Tua khitin, Mosi a sungpa Jethro kiang ah a kilehkik a, amah kiang ah: Aigupta gama ka sanggamte damlai uhiam ka mu nuam a, hehpihtakin hon paisak in, a chi a, Jethro in Mosi kiang ah: Khamuangtakin paita in, a chi hi. 19 Tua khitin, Tangtawn Toupa'n Midian gam ah Mosi kiang ah: Pai inla, Aigupta gam ah kik in. Na hinna lak sawmte khempeuh sita uhi, a chi hi. 20 Mosi in a zi leh a tapate a tonpih a, sabiltung tung ah a tuangsak a, Aigupta gam lam ah a kilehkik a, tua Pathian' chiangkhun zong a khutin a tawi hi. 21 Tangtawn Toupa'n Mosi kiang ah: Aigupta gam na tun chiangin, na khuta thillamdang ka koihte khempeuh Faro' mai ah hih in. Ahihhangin, Ke'n a lungtang ka khauhsak ding a, Israel tate a paisak kei ding. 22 Tua khit chiangin, nang Faro kiang ah: Tangtawn Toupa'n hiai a gen: Israel ka tapa masapen ahi. 23 Ka tapa in kei hon biak theih nadingin amah paisak in, hon chi ahi. Ahihhangin, amah paisak ding na nial leh, ngai in, na tapa masapen ka that ding, chi ahi, chi in, a chi hi. 24 Tua banga Mosi a khualzin laiin, a giahphual ah Tangtawn Toupa'n Mosi a na tuak a, amah thah a sawm hi. 25 Tua bang thil a om takin, Zipora in meisah suang hiam khat a la a, a tapa' zek a sumsak a, tua zekvun sumkhiak Mosi' khebul ah a khia a: Kei adingin sisan kai pasal na hi taktak ve, a chi hi. 26 Tua hangin, Tangtawn Toupa'n Mosi thah a sawm nawn kei a, Zipora in Mosi kiang ah: Zeksum sisan kai pasal na hi ve, a chi hi. 27 Tua nungin, Tangtawn Toupa'n Aron kiang ah: Mosi tuak dingin, gamdai-gamkeu ah vapai in, a chi a, Aron zong tua bangin a vapai a, Pathian' Mual ah Mosi a tuak a, amah a tawp hi. 28 Tua ah Mosi in, Tangtawn Toupa'n amah a sawl dan khempeuh leh hih dinga a thupiak chiamtehnna lamdangte khempeuh Aron a hilh hi. 29 Mosi leh Aron in Israel upate khempeuh a kaikhawm uh a, 30 Mosi kianga Tangtawn Toupa' thugente khempeuh Aron in amaute a hilh a, Mosi in Israelte' mai ah chiamtehnate a hih a, 31 amaute'n a um uhi. Tangtawn Toupa'n amaute a phawk gige a, haksatna a thuakte khempeuh uh a mu chih Israelte'n a za uhi. Tua bang ahih manin, kunin Pathian a bia uhi.
Buhpawl bela Teklei Velna
1 Tua nung lamin, Mosi leh Aron a pai uh a, Faro kiang ah thu a gen uh a: Israelte' Pathian ahipa Tangtawn Toupa'n: Gamdai-gamkeua ka maia ankuang a lui theih nadingun, ka mite paikhesak in, chi ahi, a chi uhi. 2 Ahihhangin, Faro in: A thu ka ngaihkhiak a, Israelte ka paisak nading, Tangtawn Toupa kua ahia? Ke'n Tangtawn Toupa thei keng. Israelte zong paikhesak kei ning, a chi hi. 3 Tua khitin, Mosi leh Aron in: Hebrute' Pathian in koute amah tawh hon kimusak ahi. Gamdai-gamkeua ni thum lam pai dingin hon phal in. Tangtawn Toupa ka Pathian uh maia kithoihna laan dingin pai nuam hi ung. Tua banga ka pai kei uleh, ama'n natna hiam, namsau hiamin koute hon that kha ding ahi, a chi uhi. 4 Aigupta kumpipa'n amaute kiang ah: Mosi leh Aron aw, Israelte nasem lai banghanga thadahsak ding na hi ua? Na nasepna uah kuan un! a chi hi. 5 Tua khitin, Faro in: En un, Aigupta gam sunga Israelte a tamtam utawh, noute'n amaute nasem loua koih ding maw! a chi hi. 6 Tua ni mahin Faro in, Israel tate tunga nasep guan ding leh uliante seh ding thu a pia a: 7 Nidanga na piak bangun buhpawl pe nawn kei un. Amaute kuanin buhpawl kizon uhen. 8 Ahihhangin, nidanga teklei a vel zah mah uh a vel teitei ding uh, na kiamsak louh ding uh ahi. Ahang bel, amaute hong thadah ua: Ka Pathian uh maia kithoihna laan dingin koute hon paisak in, chi-a a kikou uh hiai hang ahi. 9 Amaute'n na sem a, Mosi leh Aron' zuauthu peuh a limsak louh nadingun, na haksa semsem guan un, a chi hi. 10 Tua bangin, Israel tate' tunga nasep guante leh uliante a kuan uh a, amaute kiang ah thu a gen uh a: Faro in: buhpawl hon pe lou ding ka hi. 11 Kuan unla, na muh theihna-na uah buhpawl kizon un, ahihhangin, na nasep uh kikiamsak tuan het lou ding ahi, chi ahi, a chi uhi. 12 Tua bang ahih manin, Israel tate buhpawl taanga zat theih loupa keu zongin, Aigupta gam sung teng ah a kithehdalh uhi. 13 Amaute tunga nasep guan heutute'n amaute thagumin a nawh uh a: Buhpawl na neih lai ua, ni khata na sepkhiak zah mah uh, tuni'n semkhia un, a chi uhi. 14 Tua thamlouin, Faro in nasep guan heutu-a a sehte'n Israel nasep makaite kiang ah: Zan leh zanhal khawnga teklei na vel zah uh, tuni-a banghanga vel lou na hi ua? a chi uh a, nakpipi-in a vua uhi. 15 Tua banga nasem makai Israel tate Faro' mai ah a vapai uh a, a vakap uh a: Banghanga na silate hibang lawmlawma hon bawl na hia oi? 16 Nasep guan heutute'n buhpawl lah hon pe lou uh a: Teklei vel un! chi-a, na silate hon vuavua uh a, nangma' mite khelhna hi zaw ahi, a chi uhi. 17 Ahihhangin, Faro in: Thadah na hi ve ua, zongzaw na hi ve ua! Na thadah man ua: Tangtawn Toupa' maia kithoihna laan dingin hon paisak in, chi na hi ve ua! 18 Tu'n kuan unla, nasem un. Ahihhangin, buhpawl hon kipe lou ding ahi. Teklei bawl ding chiam zah na vel veve ding uh ahi, a chi hi. 19 Faro in: Ni khata teklei vel ding zah na kiamsak louh ding uh, chi-a amaute a hilh a zaktakun, Israel nasem makaite'n a dinmun uh haksat dan a kiphawk uhi. 20 Faro kiang apan a paikhia uh a, Mosi leh Aron bel amaute ngakin a na ding uhi. 21 Amaute'n Mosi leh Aron kiang ah: Tangtawn Toupa'n noute gel hon en henla, na tung uah thu khen hen! Faro leh a uliante mai ah koute kihhuai non suaksak uh a, na thilhih-un koute thah nading namsau a khut uah na koihta uhi, a chi uhi.
Hutkhiak nading Thuchiam
22 Tua bang ahih manin, Mosi bel Tangtawn Toupa kiang ah a kilehkik a: Toupa aw, bang dinga hiai mite tunga hibang thil haksa hon tun na hia? Hiai dinga kei hon sawl na hi maw? 23 Faro' maia na mina thu gen dinga ka vahawh apan, ama'n hiai na mite tunga thil gilou ngen hih a, nang lah amaute hukhe lou china! a chi hi.
1 Tua khitin, Tangtawn Toupa'n Mosi kiang ah: Faro tunga ka thilhih ding na mu ding. Ka ban thahat ziakin, ama'n amaute a paisak ngeingei ding. Ka ban thahatna hangin, ama'n amaute a gam sung apan a hawlkhiak thawh din^, a chi hi. 2 Pathian in Mosi a houpih lai a: Kei Tangtawn Toupa ka hi. 3 Abraham kiang leh Isak kiang leh Jakob kiang ah Pathian Vanglianpen ka hihna minin ka kilaak a, ahihhangin, Tangtawn Toupa ka hihna minin ka kitheisak nai kei. 4 Khualtaam bang leia a ten takdihna gam uh, Kanan gam piak dingin, amaute tawh kal ah ka thukhun zong ka bawl lai hi. 5 Tua ban ah, Aiguptate'n sala a kaihna uh hanga Israel tate' thuum leh mauna ka zata a, ka thukhun ka phawk gige hi. 6 Tua bang ahih manin, Israel tate kiang ah gen unla, Tangtawn Toupa'n: Kei Tangtawn Toupa ka hi. Aiguptate nuaia saltanna koi apan noute kon pikhe ding. Amaute' nuaia saltanna gimna apan kon hawi ding a, ka ban thahat likin, thukhenna thupitaktein kon tankhe ding. 7 Keima' mite mahmah hi dingin kon la ding a, noute' Pathian ka hi ding. Tua hun chiangin, Aiguptate nuaia saltanna apan hon pikhepa, Kei Tangtawn Toupa na Pathian uh ka hi, chih na thei ding uh. 8 Banzaka ka kichiama Abraham leh Isak leh Jakob kianga piak ding ka chih gam kon tun ding. Na goutan dingun tua gam kon pe ding. Kei Tangtawn Toupa ka hi, chi ahi, chi-in gen un, a chi hi. 9 Mosi in Israelte kiang ah hiai thu a gensawn a, ahihhangin, a saltanna uh haksa a, lungkia uh ahih manin, Mosi' thugen a ngaikhe kei uhi. 10 Tua khitin, Tangtawn Toupa'n Mosi a houpih a: 11 Pai inla, Aigupta kumpipa Faro kiang ah a gam apan Israelte a paisak ding ahi, chi-in thu vagen in, a chi hi. 12 Ahihhangin, Mosi in Tangtawn Toupa' mai ah thu a gen a: Ngai dih, Israel tate'n ka thugen a ngaihkhiak kei uleh, kei muk sumlouhpi bangchi-a Faro in ka thugen ngaikhe ding ahia? a chi hi.
Mosi leh Aron Khangthu
13 Tua khitin, Tangtawn Toupa'n Mosi leh Aron a houpih a, Israel tate leh Faro tawh kisai amaute thu a pia a, Aigupta gam apan Israelte piikhe dingin amaute thu a pia hi. 14 Hiaite a pu a pate uh' innkawte lutangte ahi uhi: Israel' tapa masapen Reuben' tapate Hanokh, Palu, Hezron leh Karmi ahi. Hiaite Reuben nama beh omte ahi. 15 Simeon' tapate Jemuel, Jamin, Ohad, Jakhin, Zohar leh Kanan numei' tapa Shaul ahi. Hiaite Simeon nama beh omte ahi. 16 Levi' tapate minte leh suante hiai ahi: Gershon, Kohath leh Merari. Levi damsung khempeuh kum 137 ahi. 17 Gershon' tapate a behbehin Libni leh Shimei ahi. 18 Kohath' tapate Amram, Izhar, Hebron leh Uziel ahi. Kohath damsung khempeuh kum 133 ahi. 19 Merari' tapate Mali leh Mushi ahi. Hiaite Levi nama beh omte ahi. 20 Amram in a pa' sanggamnu Jokhebed zi-in a nei a, tua in Amram adingin Aron leh Mosi a nei hi. Amram dam sung khempeuh kum 137 ahi. 21 Izhar' tapate Kora, Nefek leh Zikri ahi. 22 Uziel' tapate Mishael, Elzafon leh Sithri ahi. 23 Aron in Aminadab' tanu Nahshon' sanggamnu Elisheba a kitenpih a, tua in Aron adingin Nadab, Abihu, Eleazar leh Ithamar a nei hi. 24 Kora' tapate Azir, Elkana leh Abiasaf ahi. Hiaite Kora suana beh omte ahi. 25 Aron' tapa Eleazar in Putiel' tanute khat a kitenpih a, tua in Eleazar adingin Fineha a nei hi. Hiaite Levi nama beh omte ahi. 26 Hiai Aron leh Mosi mah ahi, Tangtawn Toupa'n a houpih a: Noute'n Aigupta gam apanin Israelte a nam namin piikhia un, a chih. 27 Amaute mah ahi, Aigupta gam apan Israelte piikhiak ding thu, Aigupta gam kumpipa Faro kianga vagente. Hiai Mosi leh Aron mah ahi uhi.
Tangtawn Toupa'n Mosi Houpih
28 Tangtawn Toupa'n Aigupta gama Mosi a houpih laiin a kiang ah: 29 Kei Tangtawn Toupa ka hi. Na kianga ka gen peuhmah Aigupta kumpipa Faro kiang ah gen in, a chi hi. 30 Ahihhangin, Mosi in Tangtawn Toupa kiang ah: Ngai dih, kei muk sumlouhpi, banghanga Faro in ka thugen ngaikhe ding ahia? a chi hi.
1 Tangtawn Toupa'n Mosi kiang ah: En dih, ke'n nang Faro' mai ah Pathian bangin kon bawl ding a, na upa Aron nang adingin kamsang ahi ding. 2 Kon thupiak peuhmah na gen ding a, na sanggampa Aron in Faro kiang ah, a gam sung apan Israelte sawlkhe dingin tua a gen ding hi. 3 Ahihhangin, ke'n Faro' lungtang ka khauhsak ding a, Aigupta gam ah ka chiamtehnate leh thillamdangte tam semsem ka hih ding. 4 Faro in na thugen a ngaikhe kei ding a, tua chiangin, ke'n Aigupta gam tung ah khut ka kha ding a, gawtna thupitak pansanin ka mi Israel tate a pawlpawlin Aigupta gam apan ka piikhe ding. 5 Aigupta gam tunga khut kha a, amaute lak apan Israel tate ka piikhiak chiangin, Aiguptate'n, kei Tangtawn Toupa ka hi, chih a thei ding uh, a chi hi. 6 Tua khitin, Mosi leh Aron in Tangtawn Toupa' thupiak bangbangin a hih uhi. 7 Faro' maia thu a gen lai un Mosi kum 80-a upa ahi a, Aron kum 83-a upa ahi.
Chiangkhun Gul Suak
8 Tangtawn Toupa'n Mosi leh Aron kiang ah: 9 Faro in: Na thillamdang uh hih un, a chih chiangin, Mosi aw, Aron kiang ah: Na chiangkhun la inla, Faro mai ah leilak ah khia in, gul hong suak ding, na chi ding ahi, a chi hi. 10 Tua khitin, Mosi leh Aron, Faro kiang ah a va-hawh uh a, Tangtawn Toupa' thupiak bangbangin a hih uhi. Aron in Faro leh a uliante' mai ah, leilak ah a chiangkhun a khia a, gul a suak hi. 11 Faro in zong a mipilte leh dawi aisansiamte leh mitkhialdawi tawite a samsak a, Aigupta dawisiamte'n zong dawisiamna zangin tua bangbang a hih uhi. 12 Tua dawisiamte'n a chiangkhun uh leilak ah a khe tek uh a, gul hong suak uhi. Ahihhangin, Aron' chiangkhun in amaute' chiangkhun a valh hi. 13 Hinapi-in, Tangtawn Toupa' gen bangin, Faro lungtang a khauh a, amaute' thu a ngaikhe kei hi.
Sisana Gawtna
14 Tua khitin, Tangtawn Toupa'n Mosi kiang ah: Faro' lungtang a khauh a, Israel tate a paisak nuam kei. 15 Zingsangin, Faro kiang ah vahawh in. Ngai dih, amah Nail luipi-a vahawh ding ahi. Tua chiangkhun gul hong suak pen tawi inla, amah tuak dingin tua luipi gei ah na ngak in. 16 Amah hong pai chiangin amah kiang ah: Tangtawn Toupa, Hebrute' Pathian in na kiang ah kei hon sawl a: Ka mite'n gamdai-gamkeua kei hon biak theih nadingun paisak in hon chisak a, ahihhangin tu dongin na ngaikhe kei lai. 17 Tangtawn Toupa'n hiai a gen: Kei Tangtawn Toupa ka hi, chih hiai in na thei ding. Ngai in, tu mahmahin, ka khuta chiangkhunin Nail luipi tui ka sat ding a, Pathian in tua lui sisan a suaksak ding. 18 Tua hun chiangin, luipi-a ngasate a si ding a, tua luipi a uih ding a, Aiguptate'n a tui a dawn thei kei ding uh, a chi hi. 19 Tua khitin, Tangtawn Toupa'n Mosi kiang ah: Aron houpih inla: Na chiangkhun la inla, Aigupta tuite sisan hong suah nadingin luite, tuilamte, dilte leh tuikholkhawmte tung ah lik in. Aigupta gam sung teng ah sisan a om ding a, singbelte leh suangbelte sung ah a om ding, chi in, a chi hi. 20 Mosi leh Aron in Tangtawn Toupa' thupiak bangbangin a hih uhi. Aron in Faro leh a uliante' mitmuhin chiangkhun a lik a, tua Nail luipi tuite a sat a, Pathian in tua luipi tuite khempeuh sisan a suaksak hi. 21 Nail luipi-a ngasate a si a, tua luipi a uih a, Aiguptate'n tua tui a dawn thei kei uhi. Aigupta gam sung teng ah zong sisan a om hi. 22 Ahihhangin, Aigupta dawisiamte'n zong aisan-in tua bang mahin a hih uhi. Tangtawn Toupa' gensa bangin, Faro' lungtang a khauh sem a, Mosi leh Aron' thugen a ngaikhe kei hi. 23 Faro a kihei a, a innpi ah a pai a, hiai thu a ngaihtuah pha mahmah kei hi. 24 Aigupta mi khempeuh in Nail luipi tui dawn thei lou ahih manun, tui dawn ding zongin luipi dung tawnin, tuilehte a tou uhi. 25 Tu'n Tangtawn Toupa'n Nail luipi a sat nung ni sagih a beita hi.
Upite-a Gawtna
1 Tua khitin, Tangtawn Toupa'n Mosi kiang ah: Faro kiang ah vahawh inla: Tangtawn Toupa'n hiai a gen: Ka mite'n kei hon biak theih nadingun, sawlkhia in. 2 Amaute na sawlkhiak nop kei lai leh, ngai in, na gam sung khempeuh upitein ka gawt ding. 3 Tua luipi upitein a dim ding a, hong paikhetouin na innpi sung khawng leh na lupna indan sung leh lupna a dim ding. Na uliante leh na mite' innsung khawng ah a lut ding uh a, na thukkhuk khawng leh na anvuinel mekna kuang sung khawng a dim ding uh. 4 Na satung ahte, na mite satung ahte, na uliante' satung ahte a kal ding uh, chi ahi, chi in, a chi hi. 5 Tua khitin, Tangtawn Toupa'n Mosi kiang ah: Aron houpih inla: Na khuta chiangkhun Nail luipi tung leh luite leh tuilamte leh dilte tung ah lik inla, Aigupta gam teng upite dimsak in, chi in, a chi hi. 6 Tua bangin, Aron in Aigupta tuite tung ah a khut a lik a, upite hong pawt touin Aigupta gam sung teng a dim uhi. 7 Ahihhangin, Aigupta dawisiamte'n zong aisanin tua bangin a hih uh a, Aigupta gam tung ah upite a pawttousak uhi, 8 Tua khitin, Faro in Mosi leh Aron a sam a: Kei leh ka mite apan upite lakhe dingin Tangtawn Toupa kiang ah hon thumsak un. Tangtawn Toupa' maia kithoihna laan dingin Israel tate ka paisak ngeingei ding, a chi hi. 9 Mosi in Faro kiang ah: Nang leh na innte apan upite ka lakmang nadinga nang leh na uliante leh na mite adinga kon thumsak nading hun seh ding nang thuneihnain ka koih hi, a chi hi. 10 Faro in: Zing chiang hi heh, a chi hi. Tua khitin, Mosi in: Tangtawn Toupa ka Pathian uh bang kuamah dang om lou ahi, chih na theih nadingin, na deih bangbang ahi ding. 11 Upite'n nang leh na mite leh na uliante leh na mite a nuse ding uh a, Nail luipi kia ah a om ding uh, a chi hi. 12 Tua khitin, Mosi leh Aron, Faro omna apan a paikhia uh a, Faro tunga upite a tunsak thu tawh kisaiin, Tangtawn Toupa kiang ah Mosi thuumin a tau hi. 13 Tangtawn Toupa'n Mosi nget bangin a hih a, innsungte leh huangsungte leh loute apan upite a si uhi. 14 Mite'n tua upi site a vuma vum venvona, a gam a gama uih vengvung a mu uhi. 15 Faro in a tung a zangta, chih a theihin, Tangtawn Toupa' gensa bangin, a lungtang a khauhsak a, Mosi leh Aron' thu a ngaikhe kei hi.
Thouvaia Gawtna
16 Tua khitin, Tangtawn Toupa'n Mosi kiang ah: Aron houpih inla: Na chiangkhun lik inla, leilak leivui sat in, leivuite Aigupta gam sung teng ah, thouvai hong suak ding, chi in, a chi hi. 17 Tua bangin Aron in a hih a, a khuta chiangkhun a lik a, leilak leivui a sat hi. Aigupta gam sung teng ah, tua leivuite thouvai a suak a, mihingte leh gantate tung ah a dim hi. 18 Ahihhangin, dawisiamte'n aisana tua banga hih a sawm uleh, thouvaite a omsak thei kei uh a, tua thouvaite mihingte leh gantate tung ah a dimin a dim lailai hi. 19 Tua dawisiamte'n Faro kiang ah: Hiai zaw Pathian khut zung apan ahi, a chi uhi. Ahihhangin, Tangtawn Toupa' gensa bangin, Faro' lungtang a khauhsak a, Mosi leh Aron thu a ngaikhe kei hi.
Chippi-a Gawtna
20 Tua khitin, Tangtawn Toupa'n Mosi kiang ah: Zingkhangpi-in thou inla, Faro Nail luipi-a hawh ding mai tuah inla, a kiang ah: Tangtawn Toupa'n hiai a gen: Kei hon biak theih nadingun, ka mite paisak in. 21 Ka mite na paisak kei leh, ngai in, na tung ah leh na uliante tung ah leh na mite tung ah leh na innpi sung ah chippihon kon sawl ding a, Aiguptate' innte leh leilak teng a dim ding uh. 22 Ahihhangin, kei Tangtawn Toupa, Aigupta gam sung ah ka om, chih na theih nadingun, ka mite' tenna Goshen gam ka hum tuam ding a, tua ah chippite a om kei ding. 23 Na mite leh ka mite kal ka deidan ding a, zing chiangin, hiai chiamtehna hong tung ding, a chi, chi in, a chi hi. 24 Tua bangin, Tangtawn Toupa'n a hih a, Faro' innpi sung ahte, a uliante' innsung ahte leh Aigupta gam sung teng ah chippihon a lut uh a, gam sung teng a susia uhi. 25 Tua khitin, Faro in Mosi leh Aron a sam a: Pai un! Hiai gam sung ah na Pathian uh mai ah kithoihna laan un, a chi hi. 26 Ahihhangin, Mosi in: Tua banga hih theih ahi kei. Tangtawn Toupa, ka Pathian uh maia kithoihna ka lat ding uh, Aiguptate mitmuha kihhuai hi ding ahi. Aiguptate adinga kihhuai kithoihna ka latun, suanga hon deng lou ding uhia? 27 Gamdai-gamkeu ah ni thum lama pai ding hon phal in. Tangtawn Toupa ka Pathian un ka kiang ua a gen bangin, tua ah a mai ah kithoihna ka laan dinguh, a chi hi. 28 Faro in: Gamdai-gamkeua Tangtawn Toupa na Pathian uh maia kithoihna laan dingin kon paisak ding. Ahihhangin, gamla pai kei peuhmah unla, tu'n kei adingin hon thuumsak malam un, a chi hi. 29 Mosi in a dawng a: Nang apan ka paikhiakphet chiangin, Tangtawn Toupa kiang ah ka thuum ding a, zing chiangin, Faro apan leh a uliante apan leh a mite apan chippi honte a bei ding. Tangtawn Toupa' maia kithoihna a lat theih nadingun Israelte paisak louin, Faro zuautat nawn kei peuhmah hen, a chi hi. 30 Tua khitin, Mosi in Faro a nusia a, Tangtawn Toupa kiang ah a thuum a, 31 Tangtawn Toupa'n a nget bangin a hih hi. Chippi honte'n Faro leh a uliante leh a mite a nusia uh a, khat lei zong a om nawn kei hi. 32 Ahihhangin, Faro in tua hunin zong a lungtang a khauhsak a, Israel tate a paisak kei hi.
Gantate a Gawtna
1 Tua khitin, Tangtawn Toupa'n Mosi kiang ah: Faro kiang ah valut inla, a kiang ah: Tangtawn Toupa, Hebrute' Pathian in hiai a gen: Ka mite'n kei hon biak theih nadingun, amaute paisak in. 2 Amaute na paisak nop kei lai a, na lettang lai leh, 3 ngai in, gama na gantate uh tung ah Tangtawn Toupa'n khut a kha ding. Na sakolte, na sabiltungte, na sangawngsaute, na bawnghonte uleh na belamhonte uh tune ah gawtna nasetak a tung ding. 4 Kei, Tangtawn Toupa'n Israel tate' gantate leh Aiguptate' gantate kal ka deidan ding a, Israel tate' gantate a si kei ding, chi ahi, chi in, a chi hi. 5 Tangtawn Toupa'n hun khat a sep a: Zing chiangin gam sung ah hiai a tung ding, a chi hi. 6 A zing chiangin, Tangtawn Toupa'n hiai a hih a, Aiguptate' gantate khempeuh a si a, Israel tate' gantate bel khat zong a si kei hi. 7 Faro in mi sawlin a ensak a, ngai dih, Israel tate' gantate khat zong a si kei hi. Hinapi-in, Faro' lungtang a khauh a, Israelte a paisak kei hi.
Meimatuma Gawtna
8 Tua khitin, Tangtawn Toupa'n Mosi leh Aron kiang ah: Haltuina meiphualpi apan meivu khut dimin pham unla, Faro muhin vanlam ah thehtou un. 9 Aigupta gam sung teng ah leivui a suak ding a, mihingte leh gantate tung ah meimatum nasetakin a leng ding, a chi hi. 10 Tua bangin, amaute'n haltuina meiphualpi apan meivu a pham uh a, Faro' mai ah a ding uhi. Mosi in vanlam ah a thehtou a, mihingte leh gantate tung ah meimatum a leng hi. 11 Tua meimatumte dawisiamte leh Aiguptate khempeuh in a vei uh a, dawisiamte Mosi' mai ah a ding thei kei uhi. 12 Ahihhangin, Tangtawn Toupa'n Faro lungtang a khauhsak a, Tangtawn Toupa' gensa bangin, Mosi leh Aron' thu a ngaikhe kei hi.
Gialpi-a Gawtna
13 Tua khitin, Tangtawn Toupa'n Mosi kiang ah: Zingkhangpi-in thou inla, Faro' mai ah va-ding inla: Tangtawn Toupa, Hebrute' Pathian in: Ka mite'n kei hon biak theih nadingun, amaute paisak in. 14 Tutunga tua banga na hih kei leh, leitung khuavannuai ah kei bang kuamah a om kei, chih na theih nadingin, nangma' tung ah leh mite tung ah a nasetawpkhawk ka hipi ka tungsak ding. 15 Ahang bel, tu'n zong ka khut khain, nang leh na mite hon gawt leng, leitung apan hon phiatmang vek khin tham ding ka hi. 16 Hinapi-in, hiai dingin kon hinghawi a, ka vangletna kon etsak nading leh leitung khempeuha ka min a kiphuanzak nadingin kon hinghawi a, kon kembit hi. 17 Tu'n zong ka mite douin na kiliansak lailai a, amaute na paisak nuam kei hi. 18 Tua bang ahih manin, ngai in, zing chiang tubang hunin, gialpi lianpipi, Aigupta gam a din apan tudonga ke ngeilou, ka zusak ding. 19 Tuin thu pia inla, gama om na gantate leh na neih khempeuh a bitna mun ah kaikhawmsak in, Tua bangin gama om na mite leh gantate tung ah gialpi a ke ding a, a si ding uhi, chi ahi, chi in, a chi hi. 20 Tangtawn Toupa' thugen lau thei Faro' uliante peuhmah in, kintakin, a silate uleh a gantate uh inn ah a kaikhawm uhi. 21 Ahihhangin, Tangtawn Toupa' thugen ngeingaihloute'n bel a silate uleh gantate uh lou ah leh gam ah a nusia uhi. 22 Tangtawn Toupa'n Mosi kiang ah: Aigupta gam sung khempeuha gialpi a kiak nadingin, na khut vanlam ah liktou in. Aigupta gama mihingte, gantate leh gama sing leh louhing khempeuh tung ah gialpi a ke ding, a chi hi. 23 Mosi in a chiangkhun vanlam ah a liktou a, Tangtawn Toupa'n vanpiging leh gialpi a sawl a, kekkia in leilak a sunsuk zolzol hi. Tua bangin Tangtawn Toupa'n Aigupta gam ah gialpi a zusak a, 24 gialpite kiain khawphia a phe zolzol hi. Aigupta gam a dinkhiak apan tu dong tua gama huihpi nasepen ahi lai hi. 25 Aigupta gam sung khempeuha mihing leh gantate hita leh, lou leh gama sing leh louhing hita leh gialpi in a deng a, singte khempeuh a geukhin vek hi. 26 Gialpi kiak louhna Israel tate' tenna Goshen gam kia ahi. 27 Tua khitin, Faro in Mosi leh Aron a samsak a, amaute kiang ah: Tutung in zaw ka khial ahi. Tangtawn Toupa a diktat a, kei leh ka mite ka gilou uh ahi. 28 Vanpiging leh gialpi ka thuak gimta uh. Tangtawn Toupa kiang ah hon thuumsak un. Hiai ah na om nawn kei ding uh, kon paisakta ding, a chi hi. 29 Mosi in a dawng a: Khawpi apan ka pawtkhiak chiangin, thumin Tangtawn Toupa lam ah ka khut ka zak ding a, leitung Tangtawn Toupa-a ahi, chih na theih nadingin vanpiging a dai ding a, gialpi a ke nawn kei ding. 30 Ahihhangin, nang leh na uliante'n Tangtawn Toupa Pathian lauh nadan na thei nai kei uh, chih ka thei, a chi hi. 31 Ziza leh barli buh a segawp vek hi. Ahang bel, barli buh a vuihsan laitak ahi a, ziza zong a pak san laitak ahi. 32 Huitbuh leh huitbuh ham bel a gei deuh ahih manin a se kei hi. 33 Tua khitin, Mosi in Faro a paisan a, khawpi a nusia a, Tangtawn Toupa lam ah a khut a zak hi. Tua khitin, vanpiging a dai a, gialpi a thengta a, gam sung ah vuahpi a zu nawn kei hi, 34 Faro in, vuah leh gialpi leh vanpiging a beita, chih a muh takin, a khial lai lai a, amah leh a uliante'n a lungtang uh a khauhsak uhi. 35 Tua bangin, Tangtawn Toupa'n Mosi tungtawna a gensa bangin, Faro' lungtang a khauhsak a, Israelte a paisak nuam kei hi.
Khaupete-a Gawtna
1 Tua khitin, Tangtawn Toupa'n Mosi kiang ah: Faro kiang ah valut in, amaute laka hiai ka chiamtehna lamdangte ka hih theih nadingin, Faro leh a uliante' lungtang ka khauhsakta. 2 Tua bel, Aiguptate mihai ka suahsak dan leh, amaute laka ka chiamtehnate ka hih dan, na tate uleh na tute uh zaka na gensawn theih nading uleh, kei Tangtawn Toupa ka hi, chih na theih nading uh ahi, a chi hi. 3 Tua bangin, Mosi leh Aron Faro kiang ah a valut uh a, a kiang ah: Tangtawn Toupa, Hebrute' Pathian in: Ka maia bangtan kiniamkhiak nuam lou ding na hia? Kei hon biak theih nadingun, ka mite paisak in. 4 Ka mite na paisak nop kei lai leh, ngai in, zing chiangin na gamsung ah khaupete kon sawllut ding. 5 Lei mai a tuam dim ding uh a, leilak a kimu kei ding. Gialpi den-gawp bang omsunte, lou leh gama sing-le-lou, anteh-louhing pou sunte nangawn a ne gai ding uh. 6 Na innpite leh na uliante' innte leh Aiguptate' innte a dim ding uh. Na pu na pate uh hiai gama a ten uapan tuni dong, tua bang himhim a muh ngei nai louh uh ahi ding, chi ahi, a chi uhi. Tua khitin, Mosi a kihei a, Faro a paisan hi. 7 Faro' uliante'n Faro kiang ah: Hiai mipa bangtan eite adinga thang hi ding ahia? Tangtawn Toupa, a Pathian uh a biak theih nadingun Israel tate paisak mai in. Aigupta gam segawpta ahih lam phawk nailou na hi hiam? a chi uhi. 8 Tua khitin, Mosi leh Aron bel Faro' maia piikikin a om uh a, Faro in amaute kiang ah: Pai unla, Tangtawn Toupa, na Pathian uh vabia un. Ahihhangin, kua teng pai ding na hi ua? a chi hi. 9 Mosi in a dawng a: Tangtawn Toupa' ankuang lui ding ka hih manun, a tek a khang, ka vekun ka tapate uleh ka tanute utawh, ka bawnghonte uleh ka belamhonte utawh ka pai ding uh ahi, a chi hi. 10 Faro in amaute kiang ah: Na numeite uleh na taneute utawh kon paisak hiai leh, Tangtawn Toupa'n hon ompih hen aw. Ahihhangin, a selam khat sawm hi peuhmah uteh. 11 Hibang hi thei ken teh! Pasalte kia na pai ding uh. Na ngetnget uh ahih chiangin, Tangtawn Toupa vabia un, a chi hi. Tua khitin, Faro in Mosi leh Aron a hawlkhesak hi. 12 Tua khitin, Tangtawn Toupa'n Mosi kiang ah: Aigupta gama khaupe a dim a, gialpi hihsiat bang omsun leh gama pou khempeuh a nek gaih nading-un Aigupta gam tung ah na khut lik in, a chi hi. 13 Tua bangin, Mosi in Aigupta gam tung ah a chiangkhun a lik a, Tangtawn Toupa'n, tua ni nitumin leh zankhawvakin, suahlam huih a nungsak a, zingsang hong hih takin tua suahlam huih in khaupete a na tunkhin hi. 14 Khaupete'n Aigupta gam khempeuh a tuam uh a, mun chih ah a om noinoi uhi. Tua bang lawmlawma khaupe tam a om ngei nai kei a, om zong a om nawn kei ding hi. 15 Lei lak a tuam dim uh a, a vomin a vom muimui uh a, gialpi den-gawp bang, lou leh gama sing leh anteh louhing leh sing gah khempeuh a negai uhi. Aigupta gam ah sing hing louhing himhim a omta kei hi. 16 Faro in Mosi leh Aron kintakin a samsak a, amaute kiang ah: Tangtawn Toupa na Pathian uleh, noute tung ah ka khial ahi. 17 Tutung beek ka khelhna hon ngaidam unla, kei apan hiai sihna gawtna lakhe dingin Tangtawn Toupa na Pathian uh kiang ah hon thuumsak peuhmah un, a chi hi. 18 Mosi in Faro a paisan a, Tangtawn Toupa kiang ah a thuum hi. 19 Tangtawn Toupa'n tua suahlam huih, tumlam huih hattak a suaksak a, tua in khaupete a lenmang a, Tuipi San a tun a, Aigupta gam ah khaupe khat lei zong muh ding a om nawn kei hi. 20 Ahihhangin, Tangtawn Toupa'n Faro lungtang a khauhsak a, Faro in Israel tate a paisak nuam kei hi.
Khawmiala Gawtna
21 Tua khitin, Tangtawn Toupa'n Mosi kiang ah: Aigupta gam khawmial in a khuh a, khoih theih hiaia mial a sah nadingin, vanlam ah na khut liktou in, a chi hi. 22 Tua bangin, Mosi in vanlam ah a khut a liktou a, ni thum sung, Aigupta gam khempeuh a mial bikbek hi. 23 Aiguptate ni thum sung, khat leh khat a kimu thei kei uh a, om mun zong a suan thei kei uhi. Ahihhangin, Israel tate' tenna ah khua a vak hi. 24 Tua khitin, Faro in Mosi a samsak a, a kiang ah: Pai unla, Tangtawn Toupa vabia un. Na numeite uleh na taneute'n zong hon zui thei ding uh. Ahihhangin, na belamhonte uleh na bawnghonte uh bel nusia un, a chi hi. 25 Mosi in: Tangtawn Toupa ka Pathian uh maia lat ding kithoihna leh haltum thillat ding non phalsak ding ahi. 26 Ka gantate un zong koute hon zuih ding ahi. Gan khechin khat lei zong nutsiat ahi ding ahi kei hi. Ganta pawlkhat Tangtawn Toupa ka Pathian uh biakna-a zat ding ahi a, a mun ka tun mateng uh, Tangtawn Toupa biakna ding bang ganta zang ding ka hi uhiam, ka thei kei uhi, a chi hi. 27 Ahihhangin, Tangtawn Toupa'n Faro' lungtang a khauhsak a, ama'n amaute a paisak nuam kei hi. 28 Faro in Mosi kiang ah: Ka muh phakna ah om ken! Ka maia hong kilang nawn lou dingin pilvang in! Ka maitang na muh ni-ni na sih ni ahi ding, a chi hi. 28 Mosi in a dawng a: Na gen bang bangin, na maitang ka mu nawn kei ding, a chi hi.
Tamasa-a Gawtna
1 Tangtawn Toupa'n Mosi kiang ah: Faro leh Aigupta gam tung ah gawtna khat ka tungsak lai ding. Tua nung chiangin, Faro in hiai apan noute hon paisak ding a, na vek sipsipun, hon hawlkhiak thawh ding, a chi hi. 2 Ama'n: Israel tate kiang ah thu gen inla, michih in a mei apain, a innveng kiang ah ngun leh khama kibawl vante ngen uhen, a na chikhinta hi. 3 Tua bangin, Tangtawn Toupa'n Aiguptate' mit ah Israelte deihsakna a neisak a, Mosi mahmah zong Aigupta gam ah Faro' uliante leh midangte'n a ngaisang mahmah uhi. 4 Tua bangin, Mosi in Faro kiang ah: Tangtawn Toupa'n hiai a gen: Zankim lai khawngin Aigupta gam sung teng ka tawnsuak ding a, 5 Aigupta gama tamasa peuhmah a si ding. Kumpitutphah tunga tu Faro' tamasa apan buhhek sila numei' tamasa leh ganta piang masa dong a si ding. 6 Aigupta gam sung teng ah kahna mauna thupitak a om ding, Tua bang himhim a om ngei nai kei a, om zong a om ngei nawn kei ding. 7 Ahihhangin, Israelte lak ah bel, ui in zong mihing leh ganta nangawn a na kei ding, Tangtawn Toupa'n Israelte leh Aiguptate a deidantuam, chih na thei ding, chi ahi, a chi hi. 8 Tua hun chiangin, na uliante khempeuh ka kiang ah hong pai ding uh a, ka mai ah hong kun ding uh a: Pai un, pai un, nang leh nang hon zuite khempeuh pai un, hong chi ding uh. Tua chiangin ka paikhe ding, a chi a, heh mahmah in Faro a paikhiaksanta hi. 9 Tua khitin, Tangtawn Toupa'n Mosi kiang ah: Ke'n Aigupta gam ah ka thillamdangte tamsem sem ka hih nadingin, Faro in na thu a ngaikhe kei ding, a na chi khin hi. 10 Mosi leh Aron in Faro' mai ah hiai thillamdangte khempeuh a hih uh a, ahihhangin, Tangtawn Toupa'n Faro' lungtang a khauhsak a, a gam apan Israelte a paisak nuam kei hi.
Paikan Ankuang
1 Tangtawn Toupa'n Aigupta gam ah Mosi leh Aron kiang ah: 2 Noute adinga tu kha, kha masa kum khata kha khatna hi ding ahi. 3 Israel tate khempeuh kiang ah thu gen unla, tu kha a ni sawm ni-in, michih in a pa' innkawte tek adingin belamnou khat la hen. 4 Belamnou pum khat ne dinga innkuan tawm lua om leh, innkuan mi tam leh tawm thu enin, a innveng nai tawh tua belamnou kikop hen. Michih kham khop ding ngaihtuaha belamnou teel ding ahi. 5 Tua banga belamnou na teel chiangun, a pa, kum khata upa, melhemnabei ahi ding ahi. Belamhon lak apan hiam, kelhon lak apan hiam na teel ding uh ahi. 6 Tua belamtuai, tua kha a ni sawmleli dong hoihtakin na kem ding uh a, a ni a chin chiangin, Israelte, mi khempeuh in nitak khawmuiin a gou ding uh ahi. 7 Tua belam sisan bang zah hiam a la ding uh a, tua belam a sa a nekna innte uh kong biang tuak leh kong tung, a pawlam ah a tat ding uh ahi. 8 Tua zan mahmahin, tua belam sa meia haimin, loukha tawh, silngou sawh louh tanghou tawh a ne ding uh ahi. 9 Tua belam a sa a sialin hiam, tuia huanin hiam na ne ding uh ahi kei. A lu, a khete leh a sungkua tawh meia haiminkhawm ahi ding ahi. 10 Zingsang dong khamval na koih ding uh ahi kei. Khamval zingsang donga a om leh, haltum ding ahi. 11 Na nek ding dan uh hibang ahi: Kawnggak gaksain, na khe ua khedap bunsain, na khut ua chiangkhun tawi kawmin, kintakin na ne ding uh ahi. Tangtawn Toupa' Paikan Ankuang ahi. 12 Tua zan mahmahin, Aigupta gam sung ka tawnsuak ding a, tamasa ding peuhmah, mihing hita leh, ganta hita leh, ka that ding. Aigupta pathiante khempeuh tung ah gawtna tun ding ka hi, kei Tangtawn Toupa ka hi. 13 Tua sisan, na omna innte uah, noute adingin chiamtehna ahi ding a, tua sisan ka muh chiangin, kon paikan ding. Aigupta gam ka gawt chiangin, tua gawtna in noute hon khoih kha kei ding. 14 Tua ni noute adingin theihgigena ahi ding a, a khang a khanga Tangtawn Toupa' maia ankuangluina ahi ding a, danthuseha na neihden ding uh ahi. 15 Ni sagih sung silngou sawh louh tanghou na ne ding uh ahi. A ni khatna ah na innte uapan silngou paimang vek un. Ni khatna apan ni sagih ni dong sung peuhmaha silngou sawh ne peuhmah Israelte lak apan satkhiak ahi ding ahi. 16 A ni khat ni-in khawmpi siangthou na nei ding uh a, a ni sagih ni-in zong khawmpi siangthou na nei nawn ding uh ahi. Tua ni sagih sung peuhmah nek bawl louh ngai nna dang himhim na sep louh ding uh ahi. 17 Tua ni-in Silngou Sawhlouh Tanghou Ankuang na lui pan ding uh ahi. Ahang bel, tua ni mahmaha Aigupta gam apan noute a pawlpawla hon piikhe ding ka hi. Akhang akhanga thuseh omden dingin hiai ni-in ankuang lui un. 18 A kha khatna, a ni sawmleli ni, nitak apan ni sawmnihlenikhat nitak dong silngou sawhlouh tanghou na ne ding uh ahi. 19 Ni sa gih sung peuhmah na innte uah silngou a kimuh louh ding ahi. Tua sunga silngou sawh ne peuhmah Israelte lak apan satkhiak ahi ding ahi. 20 Silngou sawh bangmah ne kei un. Na tenna peuh uah silngou sawh louh tanghou na ne ding uh ahi, a chi hi. 21 Tua khitin, Mosi in Israel upate khempeuh a samkhawm a, amaute kiang ah: Kintakin kisa unla, na innkuan kuan ua ding gantate vateelkhia unla, na Paikan Belamnou uh gou un. 22 Husop sawl la unla, kuanga belamnou sisan ah diah unla, kong biang tuak leh kong tung ah taat un. Zingsang masiah kuamah kong pua-a pusuaka na pawtkhiak louh ding uh ahi. 23 Aiguptate that dinga Tangtawn Toupa'n Aigupta gam sung a totsuak chiangin, na kong biang uleh, na kong tungte ua sisan a mu ding a, tua bang a muhna kongkhakte a paikan ding a, hihmangthangpa na inn sung ua hong lut a, noute hong thah a phal kei ding hi, 24 Noute leh na suante uh adinga thuseh omden hi dingin, hiai thu zui un. 25 Tangtawn Toupa'n hon chiamsa banga hon piak ding gam na lut chiangun, hiai biakna thilzekin hih gige un. 26 Na tate un: Hiai biakna thilzeka na hih uh, bang na chihna uh ahia? chi-a hon dot chiangun, noute'n: 27 Tangtawn Toupa'n Aiguptate a thah laia, Aigupta gama Israelte' innte paikan a, ka innkuante uh hinna hon hawisakpa, Tangtawn Toupa' maia Paikan kithoihna ahi, chi-in na hilh ding uh ahi, a chi hi. Tua khitin, Israelte'n kunin Pathian a bia uhi. 28 Tua bangin, Tangtawn Toupa'n Mosi leh Aron thu a piak bangbangin, Israel tate'n a hih uhi. 29 Zankim laiin, Tangtawn Toupa'n Aigupta gama tamasa khempeuh a that a, kumpitutphah tunga tu Faro' tamasa apan suangkul sunga henta kolbuna om mi' tamasa leh ganta khempeuh' tamasa dong a that hi, 30 Faro leh a uliante khempeuh leh Aiguptate khempeuh zankhang laiin a thou uh a, misi omlouhna inn khat beek zong om lou ahih manin, Aigupta gam sung ah nakpitaka kahna leh mauna a om hi.
Pemkhiakna
31 Zan laiin, Faro in Mosi leh Aron a samsak a, amaute kiang ah: Kisa zok un! Noute leh Israelte'n ka mite nusia un! Pai unla, na nget bangun, Tangtawn Toupa bia un. 32 Na gen bangun, na belamhonte uleh na ganhonte uh tonpih unla, pai un. Kei zong hon vualzawl malam un, a chi hi. 33 Aigupta gam nuse meng dingin Aiguptate'n Israelte a nawh uh a: Na paikhiak zok kei uleh, sikhin vek petmah hita ung, a chi uhi. 34 Tua bangin, Israel tate'n a anvui nei mekmante uh silngou sawh louhin, anvuinel mekna kuang tawh puana tunin a kisuan uh a, a pua uhi. 35 Israel tate'n Mosi' thuhilh bangin, Aiguptate kiang ah, ngun leh khama kibawl vante leh puansilhte a ngen uhi. 36 Tangtawn Toupa'n Aiguptate' mit ah Israelte deihsakna a neisak a, a ngette uh a pia uhi. Tua bangin, Israel tate'n Aiguptate lok ahi mai uhi. 37 Israelte Rameses apan pemkhiain Sukoth a tung uhi. Amaute, numei leh naupang sim louhin pasal hat khe-a pai 6,00,000 a pha uhi. 38 Mikihel Arabmi tampi in zong amaute a zuitou uh a, belamhon leh bawnghon, ganta tampi zong a hawi uhi. 39 Aigupta gam apan hon puak uh anvui nei mekmanin silngou sawhlouh tanghou peite a bawl uhi. Aigupta gam apan a hawla hawlkhiak thawh ahih manun, anvui nei mekmante silngou a sawh man kei uh a, tanghou zong a kibawl man kei uhi. 40 Israel tate Aigupta gama a khualtam sung uh kum 430 ahi. 41 Tua kum 430 a bei ni geihin Tangtawn Toupa' mite'n a pawl pawlin Aigupta gam a nusia uhi. 42 Tangtawn Toupa'n amaute Aigupta gam apan pikhe dinga, zankhua-a amaute pilvangtaka ching ahih manin, Tangtawn Toupa pahtawinain Israelte khempeuh in zong a khang a khangin tua zan pilvangtaka a tan ding uh ahi.
Paikan tawh kisai Dante
43 Tangtawn Toupa'n Mosi leh Aron kiang ah: Paikanankuang tawh kisai dante hiaite ahi: Gamdang mi kuamah in a ne ding ahi kei. 44 Sumtanga na lei uh sila peuhmah in bel, zek na sumsak khit chiangun a ne thei ding uh. 45 Ahihhangin, na lak ua khualtam lei leh goih nasem mi in a ne thei kei ding. 46 Inn sunga na nek teitei ding uh ahi a, innpua-a a sa bangmah tawikhiak louh ding ahi. A guhte sattan louh ding ahi. 47 Israel mipite peuhmah in Paikanankuang a um ding ahi. 48 Na lak ua om gamdang mi in Tangtawn Toupa' Paikanankuang a lui nop leh, a innkuan sunga pasal khempeuh zek a sum ding ahi. Tua khit chiangin, gamsunga piang bangin Paikanankuang a lui thei ding hi. Zeksum louh pasal peuhmah in a nek ding ahi kei. 49 Hiai dan, gamsunga piangte leh na lak ua teng gamdang mite tung ah a kibangin a kizang ding ahi, a chi hi. 50 Tangtawn Toupa'n Mosi leh Aron thu a piak bangbangin, Israel tate khempeuh in a hih uhi. 51 Tua ni mahin, Tangtawn Toupa'n Aigupta gam apanin Israelte a pawl pawlin a piikhia hi.
Tamasa Sehtuamna
1 Tua khitin, Tangtawn Toupa'n Mosi a houpih a: 2 Kei adingin Israel suante laka tamasa, sul hong peuhmah, mihing hi-in ganta hita leh, siangthouin hon sehtuamsak un, keia ahi, a chi hi.
Silngou Sawhlouh Tanghou-ankuang
3 Mosi in Israel tate kiang ah: Aigupta gam leh saltanna apan na pemkhiak ni uh tuni theih gigena bawl un. Ahang bel, Tangtawn Toupa'n ban thahata hon piikhiak na hi uhi. Silngou sawh tanghou peuhmah na nek louh ding uh ahi. 4 Abib kha, tuni-in paikhe ding na hi uhi. 5 Tangtawn Toupa'n na pu na pate uh kianga a chiamsa, nawitui leh khuaizu-a luang gam, Kanante, Hitte, Amorte, Hivte leh Jebuste gama hon piilut chiangin, hiai ankuang lui lui gige un. 6 Ni sagih sung silngou sawh louh tanghou na ne ding uh a, a ni sagih ni Tangtawn Toupa adingin ankuang lui ni ahi ding ahi. 7 Tua ni sagih sung silngou sawh louh tanghou ne unla, ahihhangin, silngou sawh thil himhim na gam sung uah a kimu ding ahi kei. 8 Tua ni-in na tapa kiang ah: Aigupta gam apan kong paikhiak laia Tangtawn Toupa'n kei adinga hon hihsak thil ziaka hiai hih ka hi, chi-in na hilh ding uh ahi: 9 Tangtawn Toupa' dan na kama a om gige theih nadingin, na khuta velh chiamtehna banvial ahi ding a, na mit kikala khip theihgigena bawm ahi ding. 10 A hun kon sehsak ah, a kum akumin hiai thuseh na hih ngeingei ding uh ahi.
Tamasa tawh kisai Dan
11 Noute leh na pu na pate uh kianga a kichiam bangin, Tangtawn Toupa'n noute Kanan gam ah hon pnlut ding a, tua gam hon pe ding. 12 Ganta tamasa, sul hong peuhmah Tangtawn Toupa' maia lat ding ahi. Na gantate laka a nou, 13 sabiltung nou piang masa peuhmah belamnou khata na tat ding ahi. Na tat nop kei leh, a ngawng na hektan ding ahi. Ahihhangin, na tapate' tamasa peuhmah na tat ding ahi. 14 Tunung chianga, na tapa in: Hiai bang chihna ahia? chi-a hon dot chiangin, Tangtawn Toupa'n ban thahatin Aigupta saltanna apan koute hon piikhia ahi. 15 Faro in genhaktaka, koute hon paisak noplouh laiin, Tangtawn Toupa'n Aigupta gama tamasa khempeuh mihing hita leh, ganta hita leh, a that hi. Hiai hang ahi, ganta piang masa, sul hong a pa peuhmah Tangtawn Toupa kianga ka lat a, ka tapate' tamasa peuhmah ka tat, na chi ding ahi. 16 Tangtawn Toupa'n ban thahata, Aigupta gam apan koute hon piikhia ahih manin, hiai na khuta velh theihgigena banvial ahi ding a, na mitkala khip theihgigena bawm ahi ding, a chi hi.
Gamdai-gamkeu Lampi
17 Faro in Israel tate a paikhiaksak laiin, Filistiate' gam tawna paina nai zaw hi napi-in, Pathian in tua lam tawnin a pii kei hi. Ahang bel, Pathian in: Kidouna tuak le uh, lungheiin Aigupta gam ah a kilehkik kha ding uh, a chi-a ahi. 18 Tua bang ahih manin, Pathian in Tuipi San lam ah, gamdai-gamkeu tawnin amaute a pii hi. Tua bangin, Aigupta gam apanin Israel tate a pawl pawla kizomin a piitou hi. 19 Josef in Israel suante a na kichiamsak a: Pathian in noute hong veh ngeingei ding a, tua hun chiangin, ka guhte hiai apan na puaktouh ding uh ahi, a na chih manin, Mosi in Josef guhte a pua hi. 20 Amaute'n Sukoth a nutsiat nungun, gamdai-gamkeu gei Etham ah giahphual a sat uhi. 21 Sun chiangin, Tangtawn Toupa amaute' mai ah, meipi khuampi dinga paiin ama uh a kai a, zan chiangin, amaute taan dingin meikuang khuampi dingin a pai hi. Tua bangin, sun leh zanin a pai uhi. 22 Suna meipi khuampi ding in zong, zana meikuang khuampi ding in zong, Israel tate' mai a paina a nuse ngei kei hi.
Tuipi San Kanna
1 Tangtawn Toupa'n Mosi kiang ah: 2 Kinungheia Migdol leh tuipi kala Pihahiroth kiang naia giahphual sat dingin Israel tate hilh in. Tuipi gei, Baal Zefon gal taka giahphual a saat ding uh ahi. 3 Faro in: Gamdai-gamkeu umtuah sung ah Israel tate gammangta, buaigawpta uh e, chi-in a ngaihtuah ding. 4 Ke'n Faro' lungtang ka khauhsak ding a, amaute a nungdelh ding. Ahihhangin, ke'n Faro leh a sepaihte tungtawnin pahtawina ka kilak ding. Tuachi-in, kei Tangtawn Toupa ka hi, chih Aiguptate'n a thei ding uh, a chi hi. Israelte'n tua bangin a hih uhi. 5 Israel tate taikheta uh, chih Aigupta kumpipa kianga a hilh takun, Israelte tawh kisaiin Faro leh a uliante lungtang a kihei a: Israel tate i nasem kimlai i paisak, bang hih i hita maia! a kichi uhi. 6 Tua bangin, Faro in a kangtalaite leh a sepaihte a kisasak a, 7 a kangtalai hoihpen pente 600 leh a Aigupta gam kangtalai khempeuh leh, kangtalai tungtuang sepaih makaite tawh, 8 Israelte a nungdelh hi. Ahang bel, Tangtawn Toupa'n Aigupta kumpipa Faro' lungtang a khauhsaka ahi, Israel tate bel hangsantakin a pai uhi. 9 Tua bangin, Aiguptate'n Faro' sakolte leh kangtalaite, sakol tungtuangte leh sepaihhon tawh, Israelte a delh uh a, Baal Zefon gala tuipi geia Pi Hahiroth kianga a giahphual uah a delhpha uhi. 10 Faro hong nai takin, Israelte a daktouh uleh, ngai in, Aiguptate a nung uah hong pai uhi. Israel tate a lau mahmah uh a, patauin Tangtawn Toupa kiang ah a toukou uhi. 11 Amaute'n Mosi kiang ah: Aigupta gama hankhuk a om louh mana, hiai gamdai-gamkeua si dinga hon piikhia na hi maw? Aigupta gam apan non piikhiak, bang hon lawh na hia? 12 Aigupta gama ka om laiun: Hong hihbuai se ke'n, Aiguptate' nna sem n'ung ka chi uh hilou maw? Gamdai-gamkeua sih sanga Aiguptate nasep koute adinga hoih zaw tham ding hi! a chita mawk uhi. 13 Mosi in Israel tate kiang ah: Lau kei un. Tuni-a Tangtawn Toupa' hon hotdam nading ngakin ding kinken un. Tuni-a Aiguptate na muh uh, na mu ngei nawn kei ding uhi. 14 Tangtawn Toupa'n noute adinga gal hon dousak ding ahi, ding kinken lei un, a chi hi. 15 Tangtawn Toupa'n Mosi kiang ah: Banghanga pataua ka kianga toukou na hia? Israel tate mainawta pai dingin hilh in. 16 Na chiangkhun liktou inla, tuipi tung ah na khut zak inla, kikhensak in. Israel tate tuipi laizang leihul ah a pai ding uh. 17 Ngai in, ke'n Aiguptate' lungtang ka khauhsak ding a, Israel tate a delhzui ding uh. Ke'n Faro leh a sepaihhonte, a kangtalaite leh sakol tungtuangte tung ah pahtawina ka kilak ding. 18 Tua banga Faro leh a sepaihhonte leh a kangtalaite leh sakol tungtuangte tunga pahtawina ka kilak chiangin, Kei Tangtawn Toupa ka hi, chih Aiguptate'n a thei ding uh, a chi hi. 19 Tua khitin, Israel tate' maia pai Pathian' Vansawltak a nungkik a, amaute nung ah a pai hi. Tua meipi khuampi ding zong, mailam apanin a kisuan a, amaute nunglam ah a ding hi. 20 Tua bangin, Aiguptate' giahphual leh Israel tate' giahphual kikal ah a om a, lang khat adingin meipi leh mial a omsak a, lang khat adingin zana vak a omsak a, zan khawvakin a kinaih thei zawsam a om kei uhi. 21 Tua khitin, Mosi in tuipi tung ah a khut a lik a, zan khawvakin Tangtawn Toupa'n tua tuipi suahlam huih hattak a lehmutsak a, tuipi tui a kikhensak a, a laizang ah leihul a dawksak hi. 22 Tua bangin, Israel tate tuipi laizang ah lei hul ah a pai uh a, tua tuite a taklam uleh a veilam uah tui baang a suak hi. 23 Aiguptate'n Faro' sakolte, kangtalaite leh sakol tungtuangte khempeuh tawh, tuipi laizang ah Israel tate a delhzui uhi. 24 Zinglam hong hih takin, Tangtawn Toupa'n meipi khuampi ding leh meikuang khuampi ding apanin Aigupta sepaihte a ensuk a, a buaizaksak hi. 25 A kangtalai peite uh a kitolkhesak a, haksapi-in a hawi uhi. Aiguptate'n: Israel tate' mai apan tai ni, Tangtawn Toupa'n amaute adinga Aiguptate dou ahi, a kichi uhi. 26 Tua khitin, Tangtawn Toupa'n Mosi kiang ah: Aiguptate leh a kangtalaite uleh, sakol tungtuangte tunga tuite a kichih kik nadingin, tuipi tung ah na khut lik in, a chi hi. 27 Mosi in tuipi tung ah a khut a lik a, zingsang phalvakin, Aiguptate tuipi sunglama a tailut laiun, tuipi tuite a ngeiin a kichih kik hi. Tua bangin, Tangtawn Toupa'n Aiguptate tuipi sung ah a phiatlut vek hi. 28 Tuipi tuite hong kichih kik takin, Israel tate delha tuipi sung hong tung Faro' kangtalaite, sakol tungtuangte leh sepaihhonte khempeuh tui in a tummang vek a, khat lei zong a suakta kei uhi. 29 Ahihhangin, Israel tate bel, a taklam uleh a veilam ua tui baang omte kal ah, leihul ah a paisuak uhi. 30 Tua bangin, tua ni-in, Tangtawn Toupa'n Aiguptate' khut apan Israel tate a hukhia a, 31 Israel tate'n tuipi piaua Aiguptate luangte a mu uhi. Israel tate'n Aiguptate tunga Tangtawn Toupa' vangletna lianpi kilang a mu uh a, Tangtawn Toupa a lau uh a, Tangtawn Toupa leh a sila Mosi a muangta uhi.
Mosi' La
1 Tua khitin, Mosi leh Israel tate'n Tangtawn Toupa' mai ah hiai la a sa uh a: Tangtawn Toupa sangpi-a tawisanga om a hih manin, a mai ah la sa ding hi'ng. Sakol leh a tungtuangte tuipi ah pailutta. 2 Tangtawn Toupa ka thahatna leh ka la hi ahi. Amah ka hotdamna ahi. Amah ka Pathian hi a, amah phat ding hi'ng, amah ka pu ka pate' Pathian hi a, tawisang ding hi'ng 3 Tangtawn Toupa galhat hi a, a min Tangtawn Toupa hi ahi. 4 Ama'n Faro kangtalaite leh sepaihhonte tuipi ah pailutta. Faro' sepaih makaite Tuipi San ah kelumta, 5 Tui thukpi in amaute tum a, suang bangin tui thuk ah tumta uhi. 6 Tangtawn Toupa aw, na khut taklam vangletna khusak chin a, Tangtawn Toupa aw, na khut taklam in melma satzanta. 7 Na kumpi thupina lian in nang hon doute zouta. Na thangpaihna kuangsak chin a, amaute buhpawl bangin kangtumta. 8 Na nak na phit leh, tuite kivum hi. Tuipi luanglai baang bangin dingkip a, tuipi laia tuite datta. 9 Melmapa ki-uangsak a: Ka delh ding a, amaute ka pha ding. Gallakte ka hawmzak ding, amaute hangin ka lungkimna ka mu ding. Ka namsau ka phawi ding a, ka khutin amaute ka hihmangthang ding, chi hi. 10 Ahihhanga, nang na hu-a na mut chin a, tui in amaute tumta. Tui thukpi ah ngen bangin tumsuk uhi. 11 Tangtawn Toupa aw, pathiante lak ah, nang bang kua om hiam? Siangthouna-a thupi, thupina-a lauhuai, thillamdangte hih nang bang kua om hiam? 12 Nang na khut taklam likkhia chin a, lei in amaute valhkhinta. 13 Nang na zahngaihna nou ngiingeia na tatsate pii ding chin a, nang na thahatna-a na tenna mun siangthoua, amaute tun ding na hi. 14 Namte'n za ding uh a, ling ding uh a, Filistiate launa in man ding hi. 15 Tua hun chianga, Edom kumpipate lausak ding chin a, Moab mihatte linna'n man ding a, Kanante zulmang ding hi. 16 Amaute tung ah launa leh mulkimna tung ding a, Tangtawn Toupa aw, na mite a paisuak mateng, na leisa mite a paisuak mateng, na ban thahatna in amaute suang bangin daisak dide ding hi. 17 Tangtawn Toupa aw, na gouluah mual siangthou ah, na tenna mun dinga na bawl ah, Tangtawn Toupa aw, na khuta na bawl, na mun siangthou ah, na mite piilut ding chin a, sing bangin suan ding na hi. 18 Tangtawn Toupa'n Tangtawn, Tangtawnin vai hawm ding hi, a chi uhi. 19 Ahang bel, Faro' sakolte, kangtalaite leh a tungtuangte tuipi sung ah a paisuk uh a, Tangtawn Toupa'n amaute tung ah tui a kichihsak a, ahihhangin, Israel tate bel tuipi sung ah leihul ah a pai uhi.
Miriam' La
20 Tua khitin, Aron sanggamnu, tua kamsang numei Miriam in khuangta a la a, numeite khempeuh in khuangtate tawia lamin a zui uhi. 21 Miriam in mipite lain a dawng a: Tangtawn Toupa' mai ah la sa un, amah thupitakin vualzouta! Sakol leh a tungtuangte tuipi sung ah pailutta! a chi hi.
Tuikha Tuilim Suahsakna
22 Mosi in Israel tate Tuipi San apan a kipankhesak a, Shur gamdai-gamkeu ah ni thum a pai uh a, tui a mu kei uhi. 23 Mara mun hong tung uh a, Mara tuite kha ahih manin a dawn thei kei uhi. Tua hangin, tua mun Mara a chi uhi. 24 Tua ah Israel tate Mosi demin a phun uh a: Bang dawn ding ka hi ua? a chi uhi. 25 Mosi in Tangtawn Toupa a sam a, Tangtawn Toupa'n sing them khat a ensak a, Mosi in tua sing them tui laka a khiak leh, tua tuite hong lim hi. Tua mun ah Tangtawn Toupa'n dan thukhun leh thuseh khat a bawl a, amaute a ze-et hi. 26 Ama'n: Tangtawn Toupa na Pathian uh' aw pilvangtaka na ngaihkhiak uh a, a mitmuha thildik na hih ua, a thupiakte na limsak ua, a dankhunte khempeuh na zuih uleh, Aiguptate tunga ka tunsak natnate koimah noute tung ah ka tungsak kei ding. Kei Tangtawn Toupa, noute hon damsakpa ka hi, a chi hi. 27 Tua khitin, Israel tate tuinak sawmlenih leh tum sing 70 a omna mun Elim hong tung uh a, tua tuite gei ah giahphual a sat uhi.
Van apan Tanghou
1 Israel suan mipite Elim apan a kipankhia uh a, Sin gamdai-gamkeu a tung uhi. Tua bel, Elim leh Sinai kikala om ahi. Amaute Aigupta apan hong pemkhiak nung uh kha nihna, ni sawmlenga ahita hi. 2 Israel suan mipite gamdai-gamkeu ah Mosi leh Aron tung ah a phun uh a: 3 Aigupta gama sabel bula ka tut ua, gihvah-a an ka nek laiun Tangtawn Toupa khut thuakin na si zawta mahmah mai le-ung maw! Tu'n lah gilkiala si dingin hiai gamdai-gamkeu ah hon piikheta ve uchin! a chi uhi. 4 Tangtawn Toupa'n Mosi kiang ah: Ngai in, noute adingin van apan an kon zusak ding. Israelte'n nisimin a kiching lei a valakhawm ding uh ahi. Hibangin, ka dan a zui uhiam, zuilou, amaute ka ze-et ding. 5 A niguk ni-in a lakkhawm zahzah uh nek dingin a bawl ding uh a, tua bel nidanga a khop zah nih uh ahi ding ahi, a chi hi. 6 Tua khitin, Mosi leh Aron in Israel suan mipite kiang ah: Aigupta gam apan noute hon pikhepa Tangtawn Toupa ahi, chih nitaklam in na thei ding uh a, 7 zingsangin, Tangtawn Toupa' thupina na mu ding uh. Ama'n Tangtawn Toupa' tunga na phunna uh a zata hi. Ahihhangin, koute tunga na phun uh, koute kua ka hi ua ahia? a chi uhi. 8 Mosi in zong: Tangtawn Toupa'n nitaklama sa hon piak a, zingsanga tanghou na duh zahzah uh na nek chiangun, Tangtawn Toupa thilhih ahi, chih na mu ding uh. Ama'n ama' tunga na phunna uh a zata. Koute zenzen bang ka hi ua? Koute tunga phun na hi kei uh a, Tangtawn Toupa tunga phun na hi zaw uhi, a chi lai hi. 9 Tua khitin, Mosi in Aron a houpih a: Israel suan mipite khempeuh kiang ah: Tangtawn Toupa'n na phunna uh a zata a, ama' mai ah hong paikhawm un, chi-in, a chi hi. 10 Tua banga Aron in Israel suan mipite khempeuh kianga thu a gen laiin, gamdai-gamkeu lam a et uleh, meipi laka Tangtawn Toupa' thupina hong kilang a mu uhi. 11 Tua khitin, Tangtawn Toupa'n Mosi kiang ah: 12 Israel tate' phunna ka zata. Amaute houpih inla: Khawmui chiangin sa na ne ding uh a, zingsangin kei Tangtawn Toupa na Pathian uh ka hi, chih na thei ding uh, Tangtawn Toupa'n a chi, chi in, a chi hi. 13 Tua nitaklamin vengkengte hong tung a, giahphual a dim uh a, zingsangin giahphual kimkot teng ah daitui thuahkhatin a kia hi. 14 Tua daitui a kap takin, gamdai-gamkeu leilak tengkhempeuh ah thil neu chikchik, a bema pek leilaka vuk kia bang a om hi. 15 Israel tate'n tua a muh takun, bang hi hiam, chih theilou uh ahih manun: Bang ahia? a kichi uhi. Mosi in amaute kiang ah: Tangtawn Toupa'n noute' nek dinga hon piak tanghou hiai ahi. 16 Tangtawn Toupa' thupiak hiai ahi: Michih in ama' nekkhop tek, mi khat adinga omer khat, ama' innkuan mi zah ading khawm henla, michih in a puanbuka omte ading lakkep hen, a chi hi. 17 Israel tate'n tua bangin tua a lakhawm uh a, pawlkhat in tam deuh, pawl khat in a tawm deuh a lakhawm uhi. 18 Tuate omer-in a teh uh a, a lakhawm tamin a vai a nei kei a, a lakhawm tawmin zong a tasam kei hi. Michih in a nekkhop tek a lakhawm hi. 19 Tua khitin Mosi in amaute kiang ah: Kuama'n zingsang dongin valsak kei hen, a chi hi. 20 Ahihhangin, mi pawlkhatte'n Mosi' thugen a limsak kei uh a, zingsang donga sit pawl a nei uhi. Ahihhangin, tua a sitte uh a than a, a uih hi. Tua bang ahih manin, amaute tung ah Mosi a heh hi. 21 Zingsang tengin, michih in a nekkhop a lakhawm tek uh a, ni hong sat chiangin, lei laka omlaite a tuimang zel hi. 22 A niguk ni-in, an a lehnih, tua bel, mi khat adinga omer nih, a lakhawm uh a, mipite' makaite'n Mosi kiang ah a vagen zel uhi. 23 Ama'n amaute kiang ah: Tangtawn Toupa' thupiak hiai ahi: Zingchiang Tangtawn Toupa adinga Sabbath siangthou hi ding ahi. Tua an tanghoua na kan nop uleh na ut zah uh kang unla, na huan nop zah uh huan un. Avalte zingsang dong sit un, a chi, a chi hi. 24 Tua bangin Mosi thupiak bangin, zingsang dong a sit uh a, a than kei a, uih zong a uih kei hi. 25 Mosi in: Tuni Tangtawn Toupa adinga Sabbath ahih manin, tuni'n tua ne un. Gamlaka bangmah lakkhawm ding om lou ding ahi. 26 Ni guk sung an na lakhawm ding uh a, a ni sagih ni, Sabbath ni-in lakkhawm ding bangmah omlou ding ahi, a chi hi. 27 Hinapi-in, Israel tate laka pawlkhat an lakhawm dingin Sabbath ni-in a kuankhia uh a, ahihhangin, bangmah a mu kei uhi. 28 Tua khitin, Tangtawn Toupa'n Mosi kiang ah: Ka thupiakte leh ka dante zui nuamloua bangtan om ding na hi ua? 29 En un. Tangtawn Toupa'n noute adingin Sabbath hon pia. Tua bang ahih manin, ni guk ni-in ni nih ading an hon pia ahi. Ni sagih ni-in, michih ama' inn ah om henla, pawtkhe kei hen, a chi hi. 30 Tua bangin, ni sagih ni-in amaute a khawl tawlnga uhi. 31 Israel tate'n tua an Mana, a chi uhi. Koriandar tang bangin a ngou a, a limna bel khuaizu sawh tanghou kan pei neu a bang hi. 32 Mosi in: Tangtawn Toupa' thupiak hiai ahi: Aigupta apan kon piikhiak laia, gamdai-gamkeua na nek ding ua an kon piak hiai ahi, chih khangsawnsawnte' muh dingin, tua mana omer khat la unla, koihching un, a chi, a chi hi. 33 Tua bangin, Mosi in Aron kiang ah: Bel khat la inla, a sung ah mana omer khat koih in. Tua bel khangsawn sawnte adingin koihching ahi ding a, Tangtawn Toupa' mai ah koih in, a chi hi. 34 Tangtawn Toupa'n Mosi a thupiak bangin, Aron in Theihpihna' mai ah tua mana a koihching hi. 35 Israel tate mihing tenna gam a tun mateng uh, kum 40 sung tua mana a ne uh a, Kanan gamgi hong tun mateng uh, tua mana a ne uhi. 36 Omer khat bel, ephah khat seh sawm suah seh khat ahi.
Suangpi apan Tui
1 Tua nungin, Tangtawn Toupa' thupiak bangin, Israel suan mipite khempeuh Sin gamdai-gamkeu apan a kipankhe kik uh a, Refidim ah giahphual a sat uhi. Ahihhangin, tua ah tui dawn ding a om kei hi. 2 Tua bang ahih manin, amaute'n Mosi a tawng uh a: Tui dawn ding hon pia in, a chi uhi. Mosi in amaute kiang ah: Banghanga kei hon tawng na hi ua? Banghanga Tangtawn Toupa ze-et na hi ua? a chi hi. 3 Ahihhangin, tui om lou, mipite lah dangtak uh ahih manin, Mosi tung ah a phun uh a: Dangtaka hon sisak dinga banghanga koute, ka tate uh leh ka gantate utawh Aigupta gam apan hon pikhetou se na hia? a chi hi. 4 Mosi bel Tangtawn Toupa' maia thuumin a mau a: Hiai mite bang lawh ding ka hia? Suanga hon deng nuam phial uh hilou maw! a chi hi. 5 Tangtawn Toupa'n Mosi a dawng a: Mipite' mailam ah pai inla, Israel upate pawlkhat tonpih inla, Nail lui na satna chiang tawi inla paiin. 6 Ngai in, na maia Horeb ah suangpi tung ah ka na ding ding. Mipite' dawn ding tui hong pawt nadingin tua suangpi sat in, a chi hi. Tua bangin, Mosi in Israel tate' mitmuhin a hih hi. 7 Israel tate'n Tangtawn Toupa tawngin, a ze-et uh a: Tangtawn Toupa eite laka om hia, om lou? a chih manun, tua mun min dingin, Masa leh Meriba a sa hi.
Amalekte Zawhna
8 Tua laiin, Amalekte hong kuan uh a, Refidim ah Israel tate hong dou uhi. 9 Mosi in Joshua kiang ah: I mite laka pawlkhat telkhia inla, Amalekte vadou in. Zing chiangin, Pathian' chiangkhun ka khuta tawiin mual tung ah kei ka na ding ding, a chi hi. 10 Tua bangin, Joshua in Mosi' thupiak bangin, Amalekte a dou a, Mosi leh Aron leh Hur, tua mual tung ah a kaltou uhi. 11 Mosi in a ban a lik laiteng, Israel tate a vualzou uh a, a ban a khiaksuk chiangin, Amalekte a vualzou uhi. 12 Mosi ban hong kham a, amaute'n suang khat a la uh a, Mosi nuai ah a koih uh a, a tung ah Mosi a tu hi. Aron leh Hur in Mosi ban langtuak a dom uh a, ama'n ni tum dong a bante a lik hi. 13 Tua bangin, Joshua in Amalek leh a mite namsauin a vatmai vek hi. 14 Tangtawn Toupa'n Mosi kiang ah: Hiai theih gige ding laibuzial ah gelh inla, Joshua zakin sim in. Ke'n vannuai apan Amalekte theih gigena phiatmang ding ka hi, a chi hi. 15 Mosi in tua ah maitam a dawh a, a min dingin, Jehova Nisi a sa hi. 16 Ahang bel, Tangtawn Toupa' a kichiam a, Tangtawn Toupa'n Amalekte a khang a khangin a dou gige ding, a chi hi.
Jethro in Mosi Veh
1 Tua laiin, Mosi' sungpa, tua Midian siampi Jethro in, Mosi leh a mi Israel tate adinga Pathian' thilhih, Aigupta gam apan amaute a piikhiak dan a na za hi. 2 Mosi in a zi Zipora a sawlkhiak laiin, a sungpa Jethro in Zipora leh 3 a tapa nihte a na kem hi. Mosi in: Gamdang mi' gam ah melmakmi-in ka om, chi-in a tapa khat min dingin Gershom a sa hi. 4 Tua baan ah: Ka pu ka pate' Pathian kei hon huhpa ahi a, ama'n Faro' namsau apan hinna hon hawisak, chi-in, a tapa khat pen' min dingin Eliezar a sa hi. 5 Jethro bel, Mosi' tapate leh Mosi zi tawh hong pai a, Pathian' Mual kianga, gamdai-gamkeu Mosi in giahphual a satna mun ah, Mosi kiang ah hong hawh hi. 6 Jethro in Mosi kiang ah: Kei na sungpa Jethro, na zi leh na tapa nihte tonpihin, na kiang ah kong hawh dek, a chi hi. 7 Mosi in a sungpa a vamuak a, a kun a, a tawp hi. Dam leh dam louh thu khawng kidongin, puanbuk sung ah a lut uhi. 8 Mosi in a sungpa kiang ah, Israel tate tungtawna Tangtawn Toupa'n Faro leh Aiguptate tunga a thil hih khempeuh, lampi-a haksa a tuahte khempeuh uleh, Tangtawn Toupa'n amaute hinna a hawisak dan a hilh hi. 9 Tangtawn Toupa'n Israelte adinga thil hoih a hih khempeuh leh Aiguptate khut sung apan Israel tate a hutkhiak dan Jethro in a zak takin a lungnuam mahmah a: 10 Aiguptate khut sung apan leh Faro khut sung apan nang hon hukhepa Tangtawn Toupa nunnuam hen. 11 Tangtawn Toupa'n Israel tate tunga kisathei taka gamtate tunga hiai a hih tak manin, pathian dangte sanga tungnung zaw ahi, chih tu'n ka theita, a chi hi. 12 Tua khitin, Mosi' sungpa Jethro in haltum thillat leh thillat dangte Pathian' mai ah a laan a, Pathian maia ankuang umkhawm dingin Aron leh Israel upate khempeuh hong pai uhi. 13 A zing chiangin, Israel tate tunga thukhen dingin Mosi a tu a, Israel tate a kimkot ah, zingsang apan nitak dong a ding uhi. 14 Mosi in Israel tate tunga a hih khempeuh a sungpa'n a mu a: Israel tate tunga na thil hih bangchi dan ahia? Banghanga nang kia tu a, Israel tate khempeuh na maia zingsang apan nitak donga ding uh ahia? a chi hi. 15 Mosi in a sungpa kiang ah: Pathian apan thukhenna dik zong dinga mite 16 Thubuai hong pai uh hiven. a neih chiang ua, kei kianga hong pai uh a, ke'n mi kikhingte kala thu na khen ing a, Pathian' thusehte leh dante na hilh zel ka hi, a chi hi. 17 Mosi' sungpa'n Mosi kiang ah: Na thil hih dan hoih lou ahi. 18 Nang zong na tawlgawp ding a, na kianga hong paite zong a tawlgawp ding uh. Nang kia adingin nna a gik lua. Nang kia'n na sem zou kei ding. 19 Tu'n ka thu ngai in, kon thu hilh ding. Pathian in hon ompih hen: Pathian' mai ah nang mipite' palai na hi ding a, a thubuaite uh Pathian' mai ah na tun ding a, 20 Pathian' thusehte leh dante hilhin amaute na vauhilh ding a, tua dante zuia bangchi nuntak ding, a mawhpuakna uh bangchi hih ding, chihte na lak ding a, na sinsak ding ahi. 21 Ahihhangin, mipite khempeuh laka chinna nei, Pathian lau leh muanhuai, golhgukna sum enlahloute na telkhe ding a, 1000 pawlpawl tunga makaite, 100 pawlpawl tunga makaite, 50 pawlpawl leh sawm khat pawlpawl tunga uliante hi dingin na sep ding ahi. 22 Amaute mipite tunga hunbita thukhentein koih inla, thu haksate kia na kiang hong tun uhen. Thu haksaloute amau kikhen uhen. Tua bangin hon puakpih le uh, na puak zang ding ahi. 23 Hibanga na hih a, Pathian in zong tua banga thu hon piak leh, puakgik na paw zou ding a, mipite khempeuh zong lungkim takin innlam a zuan ding uhi, a chi hi. 24 Mosi in a sungpa' thugen a ngaikhia a, a gen teng khempeuh a hih a, 25 Israel tate khempeuh lak apan chinna neite a telkhia a, mipite tunga makai ding, 1,000 pawlpawl, 100 pawlpawl, 50 pawlpawl leh sawm khat pawlpawl tunga vaihawm dingin a sep hi. 26 Amaute'n mipite adinga thukhenin hunbitin a pang uh hi. Thu haksate Mosi kiang a tun uh a, thu haksa loute amau a khen uhi. 27 Tua khitin, Mosi in a sungpa Jethro a paisak a, amah kia-in a gam lam ah a kilehkikta hi.
Sinai Mual ah
1 Israel tate Aigupta gam apan a pemkhiak nung uh a kha thumna a hita a, tua ni-in, Sinai Gamdai-gamkeu a tung uhi. 2 Refidim apan kipankhiain Sinai gamdai-gamkeu sung a lut uh a, tua Mual zawn ah giahphual a sat uhi. 3 Mosi in Pathian a naih tou a, Tangtawn Toupa'n tua Mual apanin amah a houpih a: Jakob innkawte kianga na gen ding leh Israel tate kianga na hilh ding hiai ahi: 4 Aiguptate tunga ka thil hih na muta uh a, muvanlai kha tunga kon puak a, keima kianga kon pii dan na muta uh. 5 Tu'n ka aw pilvangtakin ngaikhia unla, ka thukhun zui un. Namte laka ka gou manpha na hi ding uhi. Leitung khempeuh keia hi mah leh, 6 noute kei adingin siampi kumpigam leh nam siangthou na hi ding uhi, chi in. Hiai thute Israel tate kianga na hilh ding ahi, a chi hi. 7 Tua bangin, Mosi a pai a, Israel upate a samkhawm a, Tangtawn Toupa'n amah kianga a thupiak hiai thute khempeuh amaute' mai ah a luikhia hi. 8 Israel tate khempeuh in kituak takin a dawng uh a: Tangtawn Toupa' gen peuhmah ka hih ding uh, a chi uhi. Mosi in a dawnna uh Tangtawn Toupa kiang ah a tunkik hi. 9 Tua khitin, Tangtawn Toupa'n Mosi kiang ah: Ngai in, meipi sahtakin na kiang ah kong pai ding a, Israel tate zak dingin nang kon houpih ding a, nang hon muang gige ding uh, a chi hi. Tua khitin, Mosi in Israel tate' thugente Tangtawn Toupa kiang a tun hi. 10 Tua baan ah, Tangtawn Toupa'n Mosi kiang ah: Mipite kiang ah hawh inla, tuni leh zing chiangin amaute siangthoua sehtuamna bawl in. A puansilhte uh sawpsiang uhen-la, 11 a ni thum ni adingin kisakhol uhen. Tua ni chiangin, mipite khempeuh' muhin, Tangtawn Toupa Sinai Mual ah hong kumsuk ding ahi. 12 Mipite kimkot ah gamgi khung inla, amaute kiang ah: Mual tunga kaltou lou ding leh, a khoih zong khoih lou dingin pilvang un. Tua mual khoih peuhmah a si ngeigngei ding. 13 Kuama'n tua Mual a khoih louh ding ahi, a khoih mi peuhmah suanga denlup hiam, thala kap pailet hiam, teia sut pailet hiam, ahi ding ahi. Mihing hita leh, ganta hita leh, tua Mual khoih peuhmah, hinghawi louh ding ahi. Pengkul saugin a kimut zonzon chiang kiain Mual a naih thei ding uhi, a chi hi. 14 Mosi tua Mual apan mipite kiang ah a paisuk a, mipite siangthoua sehtuamna a bawl a, a puansilhte uh a sawp siang uhi. 15 Tua khitin, ama'n mipite kiang ah: Ni thum ni adingin kisakhol un. Numei naih kei un, a chi hi. 16 Ni thum ni, zingsangin, Mual tung ah vanpi gingte, khawphiate, meipi sahtakte hong om a, pengkul ngaihtakin a ging a, giahphuala om michih a liing uhi. 17 Tua khitin, Pathian tuak dingin, Mosi in mipite a piikhia a, Mual bul ah a ding uhi. 18 Tangtawn Toupa tua Mual tunga meikuanga hong kumsuk manin, tua Mual meikhuin a dim hi. Tua meikhu, haltuina meiphualpi khu bangin a kitungtou a, tua Mual nakpitakin a liing a, 19 pengkul ging a ngaih semsem hi. Tua laitakin, Mosi in Pathian a houpih a, Pathian in awin a dawng hi. 20 Tangtawn Toupa Sinai Mual tung ah hong kumsuk a, Mosi a samtou a, Mual tung ah Mosi a kaltou hi. 21 Tangtawn Toupa'n Mosi kiang ah: Kumsuk inla, mipite vauhilh in. Tangtawn Toupa en dingin hon phu paisuak kha ding uh a, tampi'n a sihlawh kha ding uh. 22 Tangtawn Toupa naih zel siampite nangawn siangthoua a kisehtuam ding uh ahi. Tua banga a hih kei uleh, Tangtawn Toupa' hehna amaute tung ah a kuang kha ding, a chi hi. 23 Mosi in Tangtawn Toupa kiang ah: Nang koute hon vauhilhta na hih chiangin, mipite Mual tung ah hong kaltou thei lou ding uhi. Nangma'n: Mual kimkot ah gamgi khung inla, siangthoua sehtuamin bawl in, non chita, a chi hi. 24 Tangtawn Toupa'n a dawng a: Paisuk inla, Aron hon tonpihtou in. Ahihhangin, siampite leh mipite'n zaw Tangtawn Toupa naih dingin hon phu paisuak kei uhen. Tangtawn Toupa hehna amaute tung ah a kuang kha ding, a chi hi. 25 Tua bangin, Mosi a paisuk a, mipite kiang ah thu a gen hi.
Thupiak Sawmte
1 Tua khitin, Pathian in hiai thute khempeuh a pia hi: 2 Kei Tangtawn Toupa na Pathian ka hi. Aigupta gam saltanna apan hon pikhepa ka hi. 3 Kei loungal pathian dang ka mai ah na nei ding ahi kei. 4 Tung vana thil hiam, nuai leia thil hiam, nuaia tui sunga thil hiam, batpih milim na kibawl ding ahi kei hi. 5 Amaute biain a mai ua na kun ding ahi kei hi. Kei Tangtawn Toupa na Pathian, thikthusia Pathian ka hi. Kei hon mudahte laka pate tatkhelhnate, tate tunga a khang thumna, a khang lina donga gawta thukpa, 6 ahihhanga, kei hon it a, ka thupiakte zui mi bel khang sang tampi tunga chitna suahpa ka hi. 7 Tangtawn Toupa na Pathian' min na mawkzat ding ahi kei hi. Tangtawn Toupa'n a min mawkzat peuhmah mawhtangin a koih ding hi. 8 Sabbath ni siangthoua sehtuam ding thei gige in. 9 Ni guk sung na nna sem inla, 10 ahihhangin, a ni sagih ni bel, Tangtawn Toupa na Pathian' Sabbath ahi. Nna na sep louh ding ahi. Nang zong, na tapa in zong, na tanu in zong, na silapa'n zong, na silanu'n zong, na ganhon in zong, na huang sunga om mikhual in zong, nna himhim na sep louh ding uh ahi. 11 Ahang bel, ni guk sung Tangtawn Toupa'n lei leh vante leh tuipi leh a sunga omte khempeuh a bawl a, nna a sem a, a ni sagih ni-in a tawlnga hi. Tua hangin, Tangtawn Toupa'n Sabbath a vualzawl a, siangthouin a septuam ahi. 12 Na nu leh na pa zahtakin in. Tangtawn Toupa'n nang hon piak ding gama na khankhua a sawt theih nadingin, amaute pahtawi in. 13 Tual na that ding ahi het kei. 14 Ang na kawm ding ahi het kei. 15 Guk na gu ding ahi het kei. 16 Na innveng tung ah theihpihna zuau na gen ding ahi het kei. 17 Na innveng' inn na deihgawh ding ahi het kei. Na innveng' zi hita leh, a silapa hita leh, a silanu hita leh, a sabiltung hita leh, a neihsa bangpeuh na deihgawh ding ahi het kei, a chi hi. 18 Israel tate khempeuh in tua vanpigingte leh khawphiate mu a, pengkul ging za a, tua Mual khu lunglung a muh takun, lauin a liing uhi. Gamlapi-a dingin, 19 Mosi kiang ah: Nang koute kiang ah thu gensawn in, ka ngaikhe ding uh. Pathian zaw ka kiang uah thu gensak ken, ka si kha ding uh, a chi uhi. 20 Mosi in mipite kiang ah: Lau kei un. Pathian laudan na theih ua, na khelh louh nading ua, noute hon ze-et dinga Pathian hong pai ahi, a chi hi. 21 Mosi in Pathian' omna tua mial sahtak a va-naih laiin, mipite bel gamlapi ah a ding uhi.
Militate leh Maitamte
22 Tua khitin, Tangtawn Toupa'n Mosi kiang ah: Israel tate hiai hilh in: Vantung apanin noute kon houpih, chih noumau mah in na muta uh. 23 Kei lou pathian dang kibawl kei un. Kei tawh non biakkhawm ding in, kham leh ngunin pathiante kibawl beh kei un. 24 Leitangin kei ading maitam dawh inla, tua tung ah, na haltum thillatte leh na lemna thillatte laan in. Ka min na theih gige nading uh mun kon sehsak peuh ah, na bawngte leh na belamte laan in. Na kiang ah kong pai ding a, kon vualzawl ding. 25 Kei adinga suang maitam na dawh leh, suang sekthawhin dawh ken. Vanzata suang na sek leh, na ninsak ding hi. 26 Ka maitam ah kalbi dawhin kaltou ken, na savuakna a dawk kha ding hi, Tangtawn Toupa'n a chi, chi in.
Dan Tuamtuamte
1 Dan tuamtuam amaute' maia na lui ding hiaite ahi:
Hebru Silate
2 Hebru mi sila dinga na lei chiangin, kum guk sung na nna a sem ding a, a kum sagihna ah sum liau louin, noplenin a paikhe thei ding ahi. 3 Amah kia-a hong lut ahih leh, amah kia mahin noplenin a paikhe ding ahi. A zi tawh hong lutkhawm a hih leh a zi tawh noplenin a paikhekhawm ding ahi. 4 A toupa in zi a got ahih a, a toupa' innsunga tapate, tanute a neih leh, a zi leh a tate a toupa-a ahi ding a, silapa amah kiain noplenin a paikhe ding ahi. 5 Ahihhangin, tua silapa'n: Ka toupa kon it a, ka zi leh ka tate zong ka it a, noplenin ka paikhe kei ding, a chih leh, 6 a toupa'n thukhente' mai ah hon tonpih ding a, kongkhak ah hiam, kongbiang ah hiam, a toupa'n tukkilhin a bil a vuhsak ding a, a damsung teng a toupa' nna a sem ding hi. 7 Mi'n a tanu sila dinga a zuak leh, sila pasal bangin, noplenin a paikhe thei kei ding. 8 A toupa'n zi dinga a neih a, a toupa a lungkimsak kei leh, a pa a tankiksak thei ding hi. Ama' tunga muanhuai loutaka gamta ahih leh, gamdang mi kiang ah a zuak thei kei ding hi. 9 A toupa'n, a tapa' zi dinga tua sila numei a piisak leh, a toupa'n a tanute khat banga a bawl ding ahi. 10 Ama'n zi dang a neih thuah leh, a zi masa nek leh tak, silh leh ten a piak tawm tuan louh ding, a piak dinga kilawm a piak tuak ding ahi. 11 Hiaite a hihsak kei leh, tua silanu, sum liau louin noplenin a paikhe thei ding hi.
Satung Liamnate
12 Mi'n midang khat a vuak a, a sih leh, tua mi thah ngeingei ding ahi. 13 Mi'n midang khat thah sawma, a buk ahih kei a, Pathian in ama' khut sunga thah dinga a piakkhiak ahih leh, keima'n a tai nading mun khat ka sehsak ding. 14 Ahihhangin, mi khat peuh a innveng tunga heh a, gitlouh piltaka a thah leh, ka maitam apan amah lakhia inla, that teitei in. 15 A nu hiam, a pa hiam, that peuhmah na thah teitei ding ahi. 16 Mi'n midang khat guin zuak leh, ahih kei leh, a khuta muhin om leh, amah na thah teitei ding ahi. 17 A nu hiam, a pa hiam hamsiat peuhmah na thah teitei ding ahi, 18 Mi nih kinain, khat in a khat pen suanga deng hiam, ahih kei leh, khuttumin tuum henla, silouin lupna ngakin om leh, 19 thoua chiangkhun khuna a vakkhiak zawh nak leh, amah deeng hiam, tuum hiam pen in gawtna a thuak kei ding. Ahihhangin, a liam pen a damkik matenga a hun mansak hu a din ding ahi. 20 Mi'n a silapa hiam, a silanu hiam, chianga a sat a, tua sila a sih leh, ama' tunga phuba na lak teitei ding ahi. 21 Ahihhangin, tua sila ni nih, ni thum nunga dama a thawhkhiak zawh lebel, a toupa' vanneih hi lei ahih manin, phuba lak louh ding ahi. 22 Mi nih kisual a, numei gailai hihkhain a nau tolh leh, liamna thupitak bel om kei leh, tua nu hiam, a pasal hiam in a ngiat zah bangbang, a hihkhapa liausak inla, thukhente tungtawna a piak teitei ding ahi. 23 Ahihhangin, siatna thupitak a om leh, hinna tanga hinna, 24 mit tanga mit, ha tanga ha, khut tanga khut, khe tanga khe, 25 meia hal tanga meia hal, liamma tanga liamma, satna sat golh tanga satna golh na lak teitei ding ahi. 26 Mi'n a silapa hiam, a silanu hiam' mit a tupsak a, a mit a siat leh, a mit tangin a toupa in amah a khah a, a noplensak ding ahi. 27 Mi'n a silapa hiam, a silanu hiam, ha a tupkhiaksak leh, a ha tangin a toupa'n amah a khah a, a noplensak ding ahi. 28 Bawngtal in pasal hiam, numei hiam, a sik a, a sih leh, tua bawngtal na denlup teitei ding a, kuama'n a sa a nek louh ding ahi. Bawngtal neipa bel gawt louhin a suakta ding ahi. 29 Ahihhangin, tua bawngtal in mi na si ngeita ahih a, mi'n a neipa a na-vauhilh a, ahihhanga ama'n a bawng ching loua khahzana, pasal hiam, numei hiam, silum ahih leh, a bawngtal na denlup teitei ding a, a neipa zong na thah teitei ding ahi. 30 Ahihhangin, a hinna tat nadinga sum a kingiat leh, a kingiat zahzah piain a hinna a tan thei ding. 31 Tua bawngtal in tanu hiam, tapa hiam a sik leh, hiai dan a kizang ding a, thukhente' khen bangin na hih ding ahi. 32 Tua bawngtal in sila pasal hiam, sila numei hiam a sik leh, bawngtal neipa'n tua sila' toupa kianga ngun shekel 30 a piak ding ahi. A bawngtal zong denlup teitei ding ahi. 33 Mi khat peuh in gum sitna lakhia hiam, kawkhuk touin sin kei henla, tua ah bawngtal hiam, sakolneu hiam kia hita leh, 34 tua kawkhuk neipa in a dit teitei ding, gan neipa kianga sum a piak teitei ding ahi. A gan bel a liaupa'n a tan ding ahi. 35 Mi khat' bawngtal in a innveng' bawngtal a siklup leh, a bawngtal hinglai pen a kizuak ding a, a ma'n a kimhawm ding uh ahi. A bawng si pen sa zong a kikimhawm ding uh ahi. 36 Ahihhangin, tua bawngtal gan sik hat ahi, chih a kitheih a, a neipa'n a chin kei leh, bawngtal tangin bawngtal a liau ding a, a siklup sa bel a man a tang ding hi.
Neihsa Hutna
1 Mi'n bawngtal hiam, belam hiam a guk a, gou hiam, zuak hiam ahih leh, bawngtal tangin bawngtal nga a liau ding a, belam tangin belam li a liau ding ahi. 2 Guta inn luh lai a kimat a, a kivuak a, a sih leh, a vawpa pen sisan suah chi-a mawhtansak theih ahi kei ding hi. 3 Ahihhangin, ni suah nung a hih lebel, sisan suah chi-a mawhtansak ahi ding hi. Guta thah ahih kei leh, ditna a piak teitei ding ahi. Piak ding a neih kei leh, a van guk man dinga amah zuak ding ahi. 4 Mi'n ganta a guk a, a khuta ganta hinga a kimuh leh, bawngtal hi-in, sabiltung hi-in, belam hita leh, a leh nih-a a dit teitei ding ahi. 5 Mi'n a ganta lou hiam, grephuan hiama a tatsak a, midang loua a lutsak leh, ama' lou hiam, ama' grephuan hiam apan gah hoihpena a dit teitei ding ahi. 6 Mi'n gama mei a khah a, gam kang a, buh hiam, hai dinglai hiam, lou hiam a kat leh, mei khahpa'n a dit teitei ding ahi. 7 Mi'n sumtang hiam, tuium belsuan hiam, a innveng a kepsak a, mi'n tua a kempa' inn apan a guksak a, guta a kimat leh, guta in a leh niha a dit teitei ding ahi. 8 Ahihhangin, guta a kimat kei leh, tua innneipa'n thukhente' maia a tut a, ama'n a innveng van gu hiam, chih chet ding ahi. 9 Bawngtal hiam, sabiltung hiam, belam hiam, puansilh hiam mang kituhna thubuai a om a, mi nih in: Hiai keia ahi, a chih tuak uleh, a nihun Pathian maia thu hon tut ding uh ahi. A mawh zawzaw in a innveng kianga a leh nih-a a dit teitei ding ahi. 10 Mi'n sabiltung hiam, bawngtal hiam, belam hiam, ganta khat peuh, a innveng a kepsak a, muh louh a, si hiam, Ham hiam, kikaimang hiam, ahih leh, 11 a kempa'n a innveng thil neih khoih lou ahi, chi-a Tangtawn Toupa' maia a kichiamna tawh a thu khen ahi ding ahi. A neipa'n zong tua bang thukhenna a san ding ahi a, a kempa'n a liau kei ding hi. 12 Ahihhangin, a kempa apan ganta kigu ahih leh a kempa'n a dit teitei ding ahi. 13 Tua ganta gamsa nek a hih leh, a kitelna dinga a sa hiam beek hon tawi ding a, a dit a kul kei ding hi. 14 Mi'n a innveng' ganta a khelh a, a neipa om louh kala liam hiam, si hiam a hih leh, a khelpa'n a dit teitei ding ahi. 15 A neipa om gegu a hih lebel, a dit a kul kei. Tua ganta khelh ding mawnga koih ahih leh, a khelh man piakin a dinkhin lei hi.
Mihing Kal Thu
16 Mi'n khamlouh nungak siangthou zolin, luppih leh, mou man a piak teitei a, a kitenpih ding ahi. 17 A nungak pa'n a phal het kei leh, a luppihpa'n nungak siangthou man a liau veve ding ahi. 18 Dawisiamnu na hinghawi louh ding ahi. 19 Ganta luppih peuhmah na thah teitei ding ahi. 20 Tangtawn Toupa hilou pathian dang' maia kithoihna laan peuhmah na hihmanthat teitei ding ahi. 21 Gamdang mi mikhual na mawkbawl ding ahi kei a, na zawhthawhbawl ding ahi kei. Noute zong Aigupta gama mikhuala om na hi uhi. 22 Meigong hiam, pabei hiam na neksiat louh ding ahi. 23 Tua banga na neksiat leh, amah ka mai ah hong toukou ding a, a kahna ka ngaikhe mahmah ding hi. 24 Ka hehna a kuang ding a, namsauin kon that ding a, na zite uh meigong a suak ding uh a, na tapate uh pabei a suak ding uhi. 25 Ka mite laka tasam khattou sum na leitawisak leh, sum leitawisakte hih banga sumpung na nek louh ding ahi. 26 Kichiam nadana na innveng' puanak na lak leh, ni tum chianga na piakkik teitei ding ahi. 27 A pumpi khuhna dinga a neihsun ahi. Bang silha ihmu ding ahia? Ka kiang ah hong toukou ding a, kei hehpih siam ka hi a, a kahna ka ngaikhe mahmah ding hi. 28 Pathian na gense ding ahi kei. Na mite tunga vaihawmmi zong na hamsiat ding ahi kei. 29 Na buh na bal apan hiam, na greptui apan hiam thillat ding it a, na khut na kiksak ding ahi kei. 29 Na tapa piang masa kei non piak ding ahi. 30 Na bawngte leh na belamte zong tua banga non piak ding ahi. Ni sagih sung a pi tawh kithuahsak inla, a ni giat ni-in hon pia in. 31 Noute kei adinga mi siang-thoute na hih ding uh ahi. Tua bang ahih manin, gamlaka gamsa nek bang sa himhim na nek het louh ding uh, uite na piak zawk ding uh ahi.
Dika Thukhenna leh Zahngaihna
1 Thutut zuau na thehzak ding ahi kei. Theihpih zuaua panga migilou na gup ding ahi kei. 2 Thil gilou hih dinga mi tam lamlam na zuih ding ahi kei. Thubuaia kihekna theihpiha na pan chiangin, thudika vaihawmna kaikawi dinga mi tam lamlam na gup ding ahi kei. 3 Thubuai genna ah mi zawng douin, guptuam na nei ding ahi kei. 4 Na melmapa' bawngtal hiam, sabiltung hiam vakmang na muh leh, a neipa kiang na tut kik teitei ding ahi. 5 Nang hon mudahpa' sabiltung vanlela puk na muh leh, taisan loua na huh teitei ding ahi. 6 Thubuaia kihekna ah mizawngte adinga thukhenna na kaihkawi ding ahi kei. 7 Zuauthu-a kingawhna ah na kikum ding ahi kei a, mawhna neilou hiam, midiktat hiam na that ding ahi kei. Migilou himhim diktangsak lou ding ka hi. 8 Golhgukna na la ding ahi kei. Golhgukna in mitvak a tawsak a, midiktat' thugen a kaikawi hi. 9 Gamdang mi mikhual na zawhthawh bawl ding ahi kei. Gamdanga mikhuala om bangchi hiam, chih na thei hi. Nang zong Aigupta gama mikhuala omta na hi.
Sabbath Dante
10 Kum guk sung na loute ah hai na pawi ding a, a gah na kaikhawm ding ahi. 11 Ahihhangin, a kum sagihna ah na lou khawhlouh-a na koih ding ahi. Na mite laka mi zawngte'n tua lou apan hong poute a na ne ding uh ahi. Amaute' nek vai gamsate'n a ne ding uh ahi. Na grephuan hita leh, na oliv huan hita leh tua bang maha na nutsiat ding ahi. 12 Ni guk sung nna na sep ding, a ni sagih ni-a na tawlngak ding ahi. Na bawngtal leh na sabiltung leh na silanu' tapa leh na inn-a mikhual zong a tawldam nadingin a ni sagih ni-a na tawlngaksak ding ahi. 13 Noute kianga ka thugen peuhmah zui dingin pilvang in. Pathian dangte' min kouin na thum ding ahi kei. Na kam ah a min uh a kiza ding ahi kei.
Ankuanglui Thumte
14 Kum khat sungin ankuang lui thumvei na bawl ding ahi. 15 Silngou Sawhlouh Tanghou ankuang luina bawl inla, kon thupiak bangin, ni sagih sung silngou sawhlouh tanghou na ne ding ahi. Abib kha, a hun seh ah hiai hih in, tua kha-a Aigupta gam apan hong pemkhia na hi. Kuamah ka maia khutvuaka hong kilat louh ding ahi. 16 Na loua na pawi haigah masate-in Buhlak Ankuanglui na bawl ding ahi. Lou apan an na kaihkhawm chiangin kum tawp ah, An Puaklut Ankuanglui na bawl ding ahi. 17 Pasal teng khempeuh kum khata thumvei Toupa, Tangtawn Toupa' maia hong kilat ding uh ahi. 18 Ka maia kithoihna sisan, silngou sawh tanghou tawh na lat louh ding ahi. Ka ankuangluina sathaute zingsang dong na koih louh ding ahi. 19 Na loua gah masa hoihpente Tangtawn Toupa na Pathian' inn-a non puaklut ding ahi. Kelnou a pi' nawituia na huan louh ding ahi.
Pathian' Vansawltak
20 En in, lampi-a nang hon veng dingin, na mai ah vansawltak khat ka sawl ding. Ama'n nang adinga ka bawlkholh mun a hon tun ding hi. 21 Ama' mai ah pilvang inla, a aw ngaikhia in. Ama' tung ah hel ken. Amah-a ka min om a hih manin, na tatlekna hon ngaidam lou ding ahi. 22 A aw limtaka na ngaihkhiak a, ka gen khempeuh na zuih leh, na melmate' melma ka hi ding a, nang hon doute ka dou ding. 23 Ka vansawltak na mai ah a pai ding a, Amorte, Hitte, Perizte, Kanante, Hivte leh Jebuste' gam hon tun ding. Ke'n amaute ka phiatmang vek ding. 24 Amaute' pathiante mai ah na kun ding ahi kei a, biak zong na be ding ahi kei. Amaute tat dan zong na zui ding ahi kei. Amaute' milimte na phelzak ding a, a suang milimte uh na hihsiat dimdem ding ahi. 25 Tangtawn Toupa na Pathian bia in, Ama'n na an leh na tui a vualzawl ding. Ke'n na lak uapan chinatna peuhmah ka lamang ding a, 26 na gam ah nausiat leh chiinna a om kei ding. Ke'n na hinkhua ka sawtsak ding. 27 Ke'n na mai ah kei launa leh mulkimna ka sawl ding a, na tuah ding uh mite khempeuh lak ah buaizakna ka omsak ding a, na melmate ka taikeksak ding. 28 Na mai ah tunpite ka sawl ding a, Hivte leh Kanante leh Hitte na mai ah a hawlkhe ding uh. 29 Ahihhangin, kum khat thuin amaute ka hawlkhe kei ding. Gam luah louha om a, noute adinga gamsate a pun luat louh nading ahi. 30 Nong pun ua gam na luah mateng uh, amaute na mai ah tawmtawmin ka hawlkhe ding. 31 Na gamgi ding Tuipi San apan Filistia Tuipi dong, Gamdai-gamkeu apan Luipi dong ka hisak ding. Tua gama teengte na khut ah kon pe ding a, amaute na mai ah na hawlkhe ding. 32 Amaute leh a pathiante utawh kal ah thukhun na bawl ding ahi kei. 33 Na gam sung ah amaute na tengsak ding ahi kei. A pathiante uh na be kha ding a, nanga dingin a pathiante uh thang a suak kha ding a, ka tung ah noute hon khialsak kha ding uh, a chi hi.
Thukhun Hihkipna
1 Tua nungin, Pathian in Mosi kiang ah: Tangtawn Toupa' mai ah hong paitou inla, Aron tawh Nadab leh Abihu tawh Israel upa 70-te hon tonpih in. Gamlapi apan Pathian bia unla, 2 Mosi kia in Tangtawn Toupa naih hen, a dangte'n hon naih kei uhen. Mipite'n Mosi hon zuitou kei uhen, a chi hi. 3 Tua khitin, Mosi a pai a, Tangtawn Toupa' thugente leh dante mipite a hilh hi. Mipite khempeuh in aw khata kituakin a dawng uh a: Tangtawn Toupa' gente khempeuh ka hih ding uh, a chi uhi. 4 Mosi in Tangtawn Toupa' thugente khempeuh a gelh vek hi. Mosi zingkhangpi-in a thou a, tua mual bul ah maitam a dawh a, Israel nam sawmlenihte adingin theihgigena suangkhuam sawmlenih a phut hi. 5 Tua khitin, Israel tuailaite a sawl a, haltum kithoihnate a laan uh a, Tangtawn Toupa' mai ah lemna thillatin bawngtalte a laan uhi. 6 Mosi in tua thillat sisan kimkhat a la a, bel sung ah a koih a, a kimkhat dangin maitam a theh hi. 7 Tua khitin, Thukhun Laibu a la a, mipite zakin a sim hi. Mipite'n: Tangtawn Toupa' gensa khempeuh ka hih ding uh a, ka zui ding uh, a chi uhi. 8 Tua khitin, Mosi in tua sisan a la a, mipite a theh a: En un, hiai thute tawh kisaia Tangtawn Toupa'n noute tawh kala a thukhunna sisan hiai ahi, a chi hi. 9 Mosi, Aron, Nadab, Abihu leh Israel upa 70-te a paitou uh a, 10 Israelte' Pathian a mu uhi. A khepek nuai ah safaiar suang kiphaha kibawl lampi bangbang khat a om a, van bangin a siang hi. 11 Ahihhangin, Pathian in Israel upate douin a khut a lik kei. Amaute'n Pathian mu napi-in hingdama omin a neun a dawn uhi. 12 Tangtawn Toupa'n Mosi kiang ah: Ka mai ah mual tung ah hong paitou inla, amaute adinga ka gelh dan leh thupiakte gelhna suangpekte kon pe ding, a chi hi. 13 Tua khitin, Mosi leh amah huhpa Josua a dingkhia uh a, Pathian' mual tung ah Mosi a kaltou hi. 14 Mosi in upate kiang ah: Koute gel kong kilehkik mateng uh hiaia tuin hon na ngak un. Ngai un, Aron leh Hur in noute hon ompih ding uh a, thubuai nei na om uleh, amaute kiang ah na pai un, a chi hi. 15 Mosi mual tunga a kaltouh takin, meipi in tua mual a khuh a, 16 Tangtawn Toupa' thupina, tua Sinai Mual ah a om a, ni guk sung tua bangin a om hi. Tangtawn Toupa'n a ni sagih ni-in tua meipi lak apanin Mosi a sam hi. 17 Tua mual tunga Tangtawn Toupa' thupina Israel tate'n a muh uh, meikuang zuazua a bang hi. 18 Mosi, tua mual tunga meipi lak ah a luttou a, tua mual tung ah ni 40 leh zan 40 a taam hi.
Biakbuk ading Thillatte
1 Tua khitin, Tangtawn Toupa'n Mosi a houpih a: 2 Israel tate kiang ah thu gen inla, kei adingin ut thillatte hon puak uhen. 3 Amaute apan lungtanga tup leh ut bangbanga thillat na san ding kham leh ngun leh sumsan, 4 khau dum leh sandup leh sanau leh ziza khau zangngat, tua baan ah kelmul, 5 belamtal vun huansan leh sahamvun leh akasia sing, 6 tua baan ah, det ding oliv thau leh nilh sathau ading leh hal ding gimnamtui ading singgah namtuite, 7 tua baan ah, siampi puanakzem leh awmphaw ading oniks suangte leh suang manpha dangte ahi ding ahi. 8 Amaute laka ka teen theih nadingin, mun siangthou hon bawlsak uhen. 9 Biakbuk leh a sunga vanzat khempeuh etteh ding kon lak ding a, tua ettehte bangbanga na bawl ding ahi.
Thukhun Singkuang
10 Akasia singin singkuang khat bawl inla, a dunglam tong nih leh a kim, a vailam tong khat leh a kim, a sanlam tong khat leh a kim ahi ding ahi. 11 Tua singkuang sunglam leh pawlam khamsik siang pekin na tuam ding a, kham sikin a geivual na bawl ding ahi. 12 Tua baan ah, khamsik bil li sung inla, a kiu lite ah, pang khat ah nih, pang lehlam ah nih, vawh in. 13 Akasia singin zawl nih bawl inla, khamsik siang pekin tuam inla, 14 tua zawl nihte tua singkuang pang tuaka a bilte ah khum in, a zawn nading ahi ding hi. 15 Tua zawlte tua singkuang bilte ah a om gige ding uh a, kuama'n a lakkhiak louh ding ahi. 16 Tua singkuang sung ah kon piak ding Theihpihna koih in. 17 Khelhna khuhna sin hi dingin tua singkuang sin, kham sik siangin bawl inla, a dunglam tong nih leh a kim, a vailam tong khat leh a kim ahi ding ahi. 18 Tua baan ah sekthawh kham sikin cherub nih bawl in. Thoihdamna mun tua singkuang sin mong tuak ading ahi ding. 19 Singkuang sin mong khat ading cherub khat, mong lehlam ading cherub khat mah bawl inla, tua singkuang mong tuak ah na koih ding ahi. 20 Tua cherubte, tunglama kha zakin, khelhna khuhna sin zakkhumin tua singkuang sin lam ngasuka kimaituahin a om ding uh ahi. 21 Nang kon piak ding Theihpihna, tua singkuang sung ah na koih ding a, khelhna khuhna sin, tua singkuang sinin tua singkuang na sin ding ahi. 22 Tua thoihdamna mun, Theihpihna singkuang sin monga cherubte kikal ah nang kon kimuhpih ding a, kon houpih ding hi. Israel tate tawh kisaia kon thupiak dingte tua ah kon hilh ding hi.
Dawhkan
23 Akasia singin dawhkan khat bawl inla, a dunglam tong nih, a vailam tong khat, a sanlam tong khat leh a kim ahi ding ahi. 24 Kham sik siang pekin tua dawhkan tuam inla, kham sikin a geivel bawl in. 25 Tua dawhkan geivel, a kimvel suaka khutpek chia-a sangin na bawl ding a, tua geivel in geivel a neisawn ding ahi. 26 Tua dawhkan ading kham sikbil li bawl inla, dawhkan khete katkhiakna kiu lite ah bulh in. 27 Tua a bilte dawhkan geivel nuai ah bulh inla, dawhkan zawnna zawl nihte khum nading ahi ding ahi. 28 Akasia singin zawl nihte bawl inla kham sik siangin tuamin, dawhkan zawn nading ahi ding hi. 29 Kham sik siangin kuangte, belkuangte, tuidopna bel gonggekte, thillat sunbuak nading keupite na bawl ding ahi. 30 Ka mai ah tua dawhkan tung ah Ompihna Tanghoubeute na koih gige ding ahi.
Meivak Mung
31 Kham sik siang sekthawhin meivak mung khat na bawl ding a, meivak mung bul, a mungpi, a kahiangte, a noute leh a pakte leh a nun bulbawkte zong na bawl ding ahi. 32 Meivak mungpi kahiang guk, a pang tuak ah kahiang thum tuak na bawl ding ahi. 33 Kahiang khat zel ah almon pak bang leh a nunbulbawk bang nou thum, na bawl ding ahi. A kahiang zom ah tua bangin thum mah na bawl ding ahi. Tua bangin meivak mung apan kakhia hiang gukte ah a om ding ahi. 34 Tua meivak mungpi ah almon pak bang, a nunbulbawk tawh kithuah, nou li a om ding ahi. 35 Meivak mung kahiang kop khatna bul nuai tak ah almon paknun-bulbawk khat a om ding a, paknun bulbawk nihna kahiang kop nihna bul nuai tak ah pak-nunbulbawk khat kahiang kop thumna bul nuai tak ah, paknunbulbawk khat mah a om ding ahi. A vekin kahiang gukte kikatna nuai tak ah na koih ding ahi. 36 Meivak munga pak nunbulbawkte leh a kahiangte sakhata kizomin sekthawh kham sik siangin na bawl ding ahi. 37 Tua ban ah, meivak sagih na bawl ding a, tua meivak mung ah na koih ding a, a kimkot a tanvak ding ahi. 38 Kham sik siangin meivu siak nading leh meivu khol nading kuangdai na bawl ding ahi. 39 Tua meivak mung leh hiai a vanzatte khempeuh bawl nading kham sik siang talen khat na zang ding ahi. 40 Ngai in, mual tunga etteh kon etsak bangbanga tuate khempeuh na bawl ding ahi.
Biakbuk
1 Biakbuk, khuhna puanzak sawm neiin na bawl ding ahi. Tua puanzakte ziza khau zangngat khuk, khau dum, a sandup, leh a sanau kigan puan ahi ding ahi. Tua puanzakte tung ah khutsiamtaka khui cherubte na bawl ding ahi. 2 Tua puanzakte tong 28-a sau, tong 4-a za, a kikim ahi ding ahi. 3 Tua puanzakte nga tuakin a dunglamin, bup nihin na bup ding ahi. 4 Puanzakte gei ah khau dumin a bilte na bawl ding a, tua a bilte khihkhawma, puanzakte kibuptuah nading ahi ding hi. Tua bangin, kibuptuah puanzak nawlnungte ah zong a bil na bawl ding ahi. 5 Puanzak bup khat zel ah bil 50, bup dang pen ah zong 50 mah, a kizawnin na bawl ding a, tuatein puanzakte na khihkhawm ding a, na bup ding ahi. 6 Tua baan ah, kham sikin mekkilh 50 na bawl ding a, tuatein puanzak bup khat leh a bup dang khat pen na khihkhawm ding a, biakbuk tung khuhna puanzak khat hong suak ding ahi. 7 Tua baan ah, biakbuk tung khuh nading kelmulin puanzak sawmlekhat na bawl ding ahi. 8 Tua puanzakte tong 30-a sau, tong 4-a za, kikim chiat ahi ding ahi. 9 Tua puanzakte nga na buptuah ding a, a dang gukte zong a tuamin na buptuah ding ahi. Puanzak gukna pen, biakbuk lutna tung ah khepnih-a khepa khuhna ahi ding ahi. 10 Tua puanzak bupa a nawlnung gei ah a bil 50 na bawl ding a, tua bang mahin a bup khat pena a nawlnung ah zong a bil 50 mah na bawl ding ahi. 11 Sumsanin mekkilh pin 50 na bawl ding a, tuatein puanzak bilte na khihkhawm ding a, biakbuk tung khuhna puanzak khat hong suak ding ahi. 12 Tua biakbuk khuhna puanzak kimkhat valkhia pen, biakbuk nunglam ah a kaikhesuk ding ahi. 13 Tua puanzak mong valte, biakbuk pang khat ah tong khat a kaikhe ding ahi. Tua bangin, apang lang nih ah a kaikhe ding puanzakte na bawl ding a, 14 biakbuk tung khuh nadingin belamtal vun huansan na bawl ding a, saham vunin zong biakbuk tung khuhna puanzakte na bawl sawn lai ding ahi. 15 Akasia singin singpek tun dingte na bawl ding a, 16 tua singpekte tong sawma sau, tong khat leh a kima za ahi ding ahi. 17 Tua singpek khat zel ah, a tun nadingin, a mong dawk nih chiat a kizawmin na bawl dine ahi. 18 Biakbuk simlam pang ading singpek tun dingte 20 na bawl ding a, 19 tua singpekte tun nading ngunsik khuakkuak 40 na bawl ding ahi. Singpek khat zela mong dawk nih tun nading khuakkuak nih, tua bangin a bana singpekte tun nading zong na bawl vek ding ahi. 20 Biakbuk lehlam, mallam pang ading singpek 20 mah na bawl ding a, 21 tua singpek tunna ding ngunsik khuakkuak 40 mah na bawl ding ahi. Singpek mong dawk nih tunna ding, khuakkuak nih ahi ding ahi. 22 Biakbuk phaitam lam, tumlam pang ading singpek guk na bawl ding a, 23 tua phaitam lam kiute ading singpek nih tuak na bawl ding ahi. 24 Tua phaitam lam kiu nihte-a singpekte thuah nih ahi ding a, a bul apan a khung dong khat bang ahi ding a, sikbil khata henkhawm ahi ding ahi. 25 Tua bangin, singpek giat leh a tunna ngun khuakkuak sawmleguk, singpek khat nuaia nih zel, a om ding ahi. 26 Biakbuk pang khat ading, singpekte khilkhawm nading akasia sing zawl nga na bawl ding ahi. 27 Tua bang mahin, biakbuk pang lehlam ading zawl nga, biakbuk phaitam lam, a tumlam ading zawl nga mah na bawl ding ahi. 28 A zawl laita pen in singpekte laizang ah, mong langkhat apan mong lehlam dong a khil paisuak ding ahi. 29 Singpekte ading kham sikbil kualte na bawl ding a, a zawlte khum nading ahi ding hi. Tua zawlte zong kham sikpekin na tuam ding ahi. 30 Mual tunga etteh kon etsak bangbangin biakbuk na tungkhe ding ahi.
Dantanna Puanzak
31 Khau dum, khau sandup leh khau sanau ziza khau zangngat khuk kigan puanzak sah, a tunga khutsiamtaka khui cherubte na bawl ding ahi. 32 Akasia sing khuam li, kham sik peka tuam, ngun khuakkuak li tunga tunte ah kham sikkawite na vawh ding a, tua sikkawite ah tua puanzak na khai ding ahi. 33 Tua puanzak pen a mekkilhte apan khai inla, tua puanzak liah ah Theihpihna singkuang na koih ding ahi. Tua puanzak pen Mun Siangthou leh Mun Siangthoupen kikal dantanna ahi ding ahi. 34 Tua Mun Siangthoupena Theihpihna singkuang tung ah a sin, tua Thoihdamna mun, na koih ding ahi. 35 Tua puanzak pua ah biakbuk mallam pang ah, tua dawhkan na koih ding a, a kizawnin a simlam pang ah meivak mung na koih ding ahi. 36 Biakbuk lutna kongkhak dingin puanzak khat na bawl ding ahi. Tua bel, khau dum leh sandup leh sanau ziza khau zangngat khuk kigan siamtaka zep ahi ding ahi. 37 Tua puanzak khai nading kham sikin sikkawite na bawl ding a, kham sikpeka tuam akasia khuam nga leh a tunna sumsan sun khuakkuak nga na bawl ding ahi.
Haltum Thillatna Maitam
1 Akasia singin maitam Ld I khat na bawl ding a, a dunglam tong nga, a vailam tong nga, a dung a vai kikim, pang li nei, a sanlam tong thum ahi ding ahi. 2 A kiu li ah a ki lite na bawl ding a, a maitam leh a kite a kizom, sa khat ahi ding ahi. Tua maitam sumsan sikpekin na tuam ding ahi. 3 Tua baan ah, meivu kholna belte leh suahdulte, sisan thehna keupite, sa suahna sikkhutte leh, meiluahna kuangdaite na bawl ding a, tua vanzatte sumsanin na bawl vek ding ahi. 4 Maitam adinga sumsan siklen na bawl ding a, tua sumsan leen kiu lite ah a bil lite na bawl ding ahi. 5 Tua maitam geivel nuai, a sung lam ah tua sumsan leen na koih ding a, a kim chiang phatouin a om ding ahi. 6 Maitam adingin akasia sing zawlte na bawl ding a, sumsan sikpekin na tuam ding ahi. 7 Tua zawlte maitam pang tuaka bilte ah na khum ding a, a zawn nading ahi ding ahi. 8 8 Singpekin tua maitam a sung hawmin na bawl ding a, mual tunga etteh kon etsak bangbangin na bawl ding ahi.
Biakbuk Huang
9 Biakbuk huang na bawl ding ahi. Pang khat, a simlam pang huang um nading, ziza khau zangngat khuk kigan puanzakte na bawl ding ahi. Tua puanzakte tong 100-a sau ahi ding ahi. 10 A khuam 20 leh a tunna khuakkuak 20, sumsanin na bawl ding ahi. Khuam tunga sikkawite leh a gaknate, ngun sik ahi ding ahi. 11 Tua mah bangin, a mallam pang huang umna puanzakte tong 100-a sau ahi ding ahi. A khuam 20 leh a tunna 20 sumsan ahi ding a, khuam tunga sikkawite leh a gaknate ngun sik ahi ding ahi. 12 Tumlam pang huang umna puanzakte tong 50-a sau ahi ding a, khuam sawm leh a tunna khuakkuak sawm a om ding ahi. 13 Suahlam pang, ni suahna lam pang huang umna puanzakte tong 50-a sau ahi ding ahi. 14 Kongpi pang khat ah, tong 15-a sau huang umna puanzakte, a khuam thum leh a tunna khuakkuak thum a om ding ahi. 15 Kongpi pang lehlam ah, tong 15-a sau huang umna puanzakte, a khuam thum leh a tunna khuakkuak thum mah a om ding ahi. 16 Huang sung lutna kelkong adingin, tong 20-a sau khau dum, a sandup leh a sanau, ziza khau zangngat a khuka kigan, khutsiam-taka zep puanzakte a om ding ahi. Tua puanzakte'n khuam li leh a tunna li a nei ding ahi. 17 Huang umna khuamte khempeuh in nguna bawl, a hennate leh sikkawite a nei ding a, khuam tunnate sumsana bawl ahi ding ahi. 18 Huang sung tong 100-a sau, tong 50-a za, ahi ding a, a puanzakte tong nga-a sang, ziza khau zangngat khuk kigan ahi ding a, khuam tunna sumsana bawl ahi ding ahi. 19 Biakbuka vanzatte, a kizatna bang teng na hita leh, a kaihna khetphimte khempeuh leh, huang umna kaihna khetphim khempeuh sumsana bawl ahi ding ahi.
Meivakmung Kep ding Dan
20 Meivak a kuan gige theih nadingin, Israel tate'n oliv thau sukthawh, a siang bangmah hellouh, na kianga hon tawi dingun, thu na pe ding ahi. 21 Kihoupihna Puanbuk sunga Theihpihna maia dantanna puanzak pua ah, Aron leh a tapate'n nitak apan zingsang dong, Tangtawn Toupa' mai ah tua meivakte a kuangsak gige ding uh ahi. Israel tate lak ah, a khang a khangin, hiai thuseh a omden ding ahi.
Siampi Puansilhte
1 Israel tate lak apan, na sanggampa Aron leh a tapate, siampi-a panga ka nna a sep theih nadingun la in. Aron leh a tapate Nadab, Abihu, Eleazer leh Ithamar la in. 2 Na sanggampa Aron adingin, dinmun sanna leh pahtawina hi dingin, puansilh siangthoute bawl in. 3 Aron siampi-a panga ka nna a sep theih nadinga sehtuam ahih theih nadingin, pilna kha-a ka dimsak khutsiamte khempeuh houpih inla, amaute'n Aron ading puansilh siangthoute bawl uhen. 4 Puansilh a bawl dingte uh hiaite ahi ding ahi: awmphaw, siampi puanakzem, puanaktual, khutsiamtaka gat puanak sungsilh, dialkhip, leh puanduang kawnggak ahi ding ahi. Tua bangin, na sanggampa Aron leh a tapate'n siampi-a panga ka nna a sep theih nadingun amaute ading puansilh siangthoute a bawl ding uh ahi. 5 Amaute'n kham khau, khau dum, a sandup leh a sanau leh ziza khau zangngat kigan a zang ding uh ahi.
Siampi Puanakzem
6 Siampi puanakzem dingin, kham khau leh khau dum, khau sandup leh khau sanau ziza khau zangngat khuk khutsiamtaka gat a zang ding uh ahi. 7 A liangzanga kaihtuah nadingin, a nunglam leh a malam pang ah khihna nih a om ding ahi. 8 Siampi puanakzem gakna, puanduang kawnggak, kham khau tawh, khau dum, khau sandup leh khau sanau khutsiamtaka gat puanmalngatin a bawl ding uh ahi. 9 Tua baan ah, oniks suang manpha nih na la ding a, a tung ah Israel' tapate' min, a khuakin na gelh ding a, 10 tua suang manpha khat ah min guk, suang manpha dang khat ah min guk mah, a upat dan ua kizomin na gelh ding hi. 11 Suainamna zungbuh khuaka kigelh bangin, suang manpha khuaka gelhsiamte' gelh, tua suang manpha nihte ah, Israel' tapate' min na gelh ding a, tua suang manphate kham sik khuak sunga phum ahi ding ahi. 12 Israel' tapate theih gigena hi dingin, tua suang nihte, siampi puanakzem liangzang kaihtuahna ah na suang ding ahi. Tua bangin Aron in, Tangtawn Toupa' mai ah a minte uh theih gigena hi dingin, a liangzang ah a paw ding ahi. 13 Tua baan ah, suang manphate phum nading khamsik phanthawh nih na bawl ding a, 14 kham sik siang mahin, khainiang phek nih na bawl ding a, tua suang manphate phumna kham sikte ah na khih ding ahi.
Siampi Awmphaw
15 Thu khentatna bawlna-a zat dingin, siampi awmphaw na bawl ding a, khutsiamtaka bawl ahi ding ahi. Siampi puanakzem bawl bangin na bawl ding a, kham khau leh khau dum, khau sandup leh khau sanau ziza khau zangngat khuk kigan na bawl ding ahi. 16 Khep niha kikhep ding, a khepa a dung a vai kikim, khap khata sau, khap khata za ahi ding ahi. 17 Tua tung ah suang manphate vual li-in na suang ding a, vual khatna ah suang manpha nam thum, rubi suang, topaz suang leh beril suang ahi ding ahi. 18 A vual nihna ah, suang manpha sardi suang, safaiar suang leh daimon suang ahi ding ahi. 19 A vual thumna ah, suang manpha zasin suang, ageit suang leh amethi suang ahi ding ahi. 20 A vual Una ah, suang manpha khrusolait suang, oniks suang leh jaspar suang ahi ding ahi. 21 Tua suang manphate ah Israel' tapa sawmlenihte' minte khat chiat a tuang ding ahi. Suainamna zungbuh khuaka kigelh bangin a khuaka gelh, Israel nam sawmlenihte' minte ahi ding ahi. 22 Kham sik siangin khainiang phek nih na bawl ding a, tua siampi awmphaw tunglam kiu nihte-a khih ding ahi ding hi. 23 Tua khainiang khih nading, siampi awmphaw tunglam kiu nih ah kham sikbil nih na bawl ding ahi. 24 Tua khit chiangin, tua siampi awmphaw tunglam kiu nih-a sikbil nihte ah, tua kham sik khainiang phek nihte na khih tuak ding ahi. 25 Tua khainiang phek mong langkhatte suang manpha kiphumna khamsik phanthawh nihte ah na khih ding a, siampi puanakzem kibaatna khau ah, a anglama kimu dingin na khai ding ahi. 26 Kham sik siangin kham sikbil nih dang bawl inla, tua awmphaw nuailam kiu nih ah, siampi puanakzem tawh khihkhawm nadingin na bulh ding ahi. Tua bel siampi puanakzem anglam panga koih ding ahi. 27 Tua ban ah, kham sikbil nih dang na bawl ding a, siampi puanakzem Hang kituahna khau mong, a sunglam ah, siampi puanakzem leh puanduang kawnggak kimatna tung tak ah na koih ding ahi. 28 Siampi awmphaw-a sikbilte leh siampi puanakzema sik bilte khau dumin na khihkhawm ding ahi. Tua bangin, siampi awmphaw pen siampi puanakzem tung ah a om ding a, siampi awmphaw pen siampi puanakzem apan tolhkhe louin a om ding ahi. 29 Mun Siangthou sunga Aron a lut chiangin, Tangtawn Toupa' maia theihgigena hiden dingin, a lungtang zawn tak ah, thukhentatna awmphaw tung ah, Israel' tapate' minte a paw gige ding ahi.
Urim leh Thumim
30 Tua baan ah, tua thu khentatna awmphaw ah, Urim leh Thumim na koih ding ahi. Tua bangin, Tangtawn Toupa' maia Aron a lut chiangin, tua Urim leh Thumim, a lungtang zawn tak ah a om ding a, Tangtawn Toupa' maia, Israel tate adinga thukhentatna a bawl chiangin a lungtang zawn tak ah a paw gige ding ahi.
Siampi Puanaktual
31 Siampi puanaktual, a vekpi-a dum na bawl ding ahi. 32 Tua puanaktual laizang ah, a lutang khum nading a ngawng vang a om ding ahi. Tua puanaktual ngawng vang gei a kikek louh nadingin, a kual suaka pehna puanak ngawng gat thawh ahi ding ahi. 33 Tua puanaktual mong ah, khau dum, khau sandup leh khau sanaua kibawl mimthei gah bangbang, a vangkimin na khai ding a, tuate kal ah kham sika bawl long na khai ding ahi. 34 Tua kham longte leh mimtheite puanaktual mong ah, a kikalhelhin a om ding uh ahi. 35 Aron in nna a sep chiangin, tua puanaktual a silh ding a, Mun Siangthoua Tangtawn Toupa' maia a lut chiangin leh, a pawtkhiak chiangin, tua long ging a kiza ding a, a si kei chih a kithei ding hi.
Siampilukhu Siangthou
36 Tua baan ah, kham sik siangin sikpek na bawl ding a, suainamna zungbuh khuak banga khuakin, SIANGTHOUNA Tangtawn TOUPA-A AHI chih na gelh ding ahi. 37 Tua laigelhna sikpek pen siampi dialkhip ah, a mailam ah khau dumin na khihbelh ding ahi. 38 Tua pen Aron' taltang ah a om ding a, ama'n Israelte thillat siangthou tawh kisaia, Israel' tate' mawhna a paw ding ahi. Tua pen, Aron' taltang ah a om gige ding a, thillat siangthoute Tangtawn Toupa' maia san ahi ding hi.
Siampi Puanak Sungsilh
39 Siampi puanaktual sungsilh, ziza khau zangngat khut siamtaka gat, na bawl ding ahi. Ziza khau zangngat mahin, dialkhip na bawl ding a, tua baan ah, a gat thawh puanduang kawnggak na bawl ding ahi. 40 Aron' tapate adingin, puanaktual sungsilhte leh puanduang kawnggakte, dialkhipte na bawl ding a, amaute' dinmun sanna pahtawina ahi ding hi. 41 Tua bangin, na sanggampa Aron leh a tapate, siampi-a panga ka nna a sep theih nadingun, tuatein na zem ding a, amaute thaunilhin siangthoua sehtuamna na bawl ding ahi. 42 Amaute' vuaktanna khuh ding, ziza khau zangngat-in pheituam tomte na bawl ding a, a kawng uapan a pheipizum chiang uh a khuh ding ahi. 43 Aron leh a tapate, Kihoupihna Puanbuk sunga hong lut chiang uh hiam, ahih kei leh, Mun Siangthoua nasem dinga maitam a naih chiangun mawhna khattou nei a, a sih louh nadingun, tuate a sa tung uah a om gige ding ahi. Aron leh a nunga suante adingin hiai thusehin a omden ding ahi.
Aron leh a Tapate Siangthoua Sehtuamna
1 Siampi-a panga ka nna a sep theih nadingun, Aron leh a tapate siangthoua sehtuamna na bawl ding dan hibang ahi: Bawnghon lak apan bawngtal tuai khat leh belamtal nih, genbaanglou, na la ding ahi. 2 Tua baan ah, huit vui nei, silngou sawh louhin tanghou beute, sathau tawh kihel tanghou pei tawh, silngou sawh louh, sathau nuh tanghou pei neu tawh, na bawl ding ahi. 3 Tuate lawh sung khat ah na koih ding a, tua lawh tawh, tua bawngtal tuai tawh, tua belamtal nihte tawh biakbuk ah non la ding ahi. 4 Aron leh a tapate tua Kihoupihna Puanbuk kongkhak ah non paipih ding a, tuiin amaute na sil ding ahi. 5 Tua khit chiangin, siampi puansilhte na la ding a, puanaktual sungsilh, Aron na silhsak ding a, tua khitin, siampi puanaktual leh siampi puanakzem leh, awmphaw na silhsak ding a, khutsiamtaka kigan puanduang kawnggak na gaksak ding ahi. 6 A lutang ah dialkhip na khimsak ding a, dialkhip tung ah siampilukhu siangthou na khihbelh ding ahi. 7 Tua khitin, thaunilh sathau na la ding a, a luzanga buakin thau na nilh ding ahi. 8 Tua khitin, a tapate non paipih ding a, puanak sungsilhte na silhsak ding ahi. 9 Tua khitin, dialkhipte na khimsak ding a, tua khitin, puanduang kawnggakte Aron leh a tapate na gaksak ding ahi. Thuseh omden ding pansanin, siampi hihna amaute-a ahi ding ahi. Hibangin, Aron leh a tapate sehtuamna na hihkip ding ahi. 10 Kihoupihna Puanbuk mai ah tua bawngtal tuai non la ding a, tua bawngtal tuai lutung ah Aron leh a tapate'n khut a nga ding uh ahi. 11 Tua khit chiangin, Tangtawn Toupa' mai ah, tua Kihoupihna Puanbuk kongvang kiang ah, tua bawngtal tuai na gou ding ahi. 12 Tua bawngtal tuai sisan bangzah hiam na la ding a, na khuttal in maitam kite na nuh ding a, tua sisan khempeuh maitam bul ah na sung ding ahi. 13 A sungthau khempeuh, a sin leh a kailing nihte-a a thaute tawh na la ding a, tua maitam tung ah na haltum ding ahi. 14 A sa bel a vun tawh, a sungkua leh a ek tawh, giahphual pawlam ah meiin na haltum ding ahi. Hiai khelhna thillat ahi. 15 Tua belamtalte laka khat na la ding a, a lutung ah Aron leh a tapate'n khut a nga ding uh ahi. 16 Tua belamtal na gou ding a, a sisan na la ding a, tua maitam pang, a kimkotin na theh ding ahi. 17 A sa na at nen ding a, a sungkua leh a khete na silsiang ding a, a sate leh a lutang tawh na koihkhawm ding ahi. 18 Tuate khempeuh, a vekpi-in, maitam tung ah na haltum ding ahi. Tangtawn Toupa' maia haltum thillat ahi a, Tangtawn Toupa' maia gim namtui, meia thillat ahi. 19 Tua baan ah, tua belamtal dang khat pen zong na la ding a, Aron leh a tapate'n a lutung ah khut a nga ding uh ahi. 20 Tua belam tai na gou ding a, a sisan bangzah hiam na la ding a, Aron leh a tapate' taklam bilteep mong leh taklam khutpite na nuh ding a, tua sisanin maitam pang, a kimkotin na theh ding ahi. 21 Tua baan ah, maitam tunga sisan leh nilh sathau bangzah hiam na la ding a, Aron leh a tapate leh a puansilhte uh na theh ding ahi. Tua bangin, Aron leh a tapate leh a puansilhte uh siangthoua sehtuam ahita ding hi. 22 Tua belamtal thaute, a mei thau, a sungthau, a sin leh a kailing nihte leh a thaute, a taklam phei tawh, na la ding ahi. Hiai bel, siangthoua sehtuamna belam tai ahih man ahi. 23 Tua baan ah, Tangtawn Toupa' maia lawhbeua om silngou sawh louh tanghou kikoihte laka tanghou beu khat tawh, sathaua kikang tanghou pei khat tawh, tanghou kan pei neu khat tawh na la ding a, 24 tuate khempeuh Aron leh a tapate' khut ah na koih ding a, Tangtawn Toupa' mai ah vei thillatin na veisak ding ahi. 25 Tua khitin, amaute' khut apan tuate na la ding a, Tangtawn Toupa' maia gim namtui hi dingin, maitam ah na haltum ding ahi. Tangtawn Toupa' maia meia thillat ahi. 26 Tua khitin, Aron siangthoua sehtuamna belamtal awmsa na la ding a, Tangtawn Toupa' mai ah vei thillatin na vei ding a, tua sa pen nangma' tan ahi ding ahi. 27 Tua siangthoua sehtuamna belamtal apan, vei thillata veisa a awm tawh, vei thillata veisa a phei tawh, Aron' tan leh a tapate' tante na hihsiangthou ding hi. 28 Hiai Israel suante apana Aron leh a tapate' tan ngeina ahi gige ding ahi. Tua bel, Israel suante'n a lemna thillatte uapan Tangtawn Toupa adinga a piak ding uh ahi. 29 Aron' puansilh siangthoute, ama' nunga a suante ading ahi suksuk ding a, tuate silha thaunilhna tawh seh kip ahi ding uh ahi. 30 Ama' tapate laka, ama' muna siampi hong hi a, Mun Siangthoua nasem dinga Kihoupihna Puanbuk sunga lut penpen in tua puansilhte ni sagih sung a silh ding ahi. 31 Sehkipna belamtal na la ding a, mun siangthou khat ah na huan ding ahi. 32 Aron leh a tapate'n Kihoupihna Puanbuk kongkhak kiang ah, tua belamtal sa leh, lawhbeua tanghou a ne ding uh ahi. 33 Amaute sehkip nading leh hihsiangthou nadinga khelhna thoihna thillatte a nek ding uh ahi. Thil zek leh siangthou ahih manin, kuamah dangin tuate a ne ding ahi kei hi. 34 Tua namkipna belamtal sa leh tanghou nekbangte, zingsang donga om a om leh, meia haltum ding ahi. Thil zek leh siangthou ahih manin, nek ding ahi kei hi. 35 Thu kon piak bangbangin, Aron leh a tapate tung ah na hih ding ahi. Amaute namkipna saina in ni sagih sung a daih ding ahi. 36 Tua ni sagih sung, khelhna khuhna hi dingin, nisimin bawngtal khat, khelhna thillatin na laan ding ahi. Maitam ading khelhna thoihdamna bawlin, maitam na siansuah ding a, siangthoua sehtuam hi dingin, tua maitam sathau na nilh ding ahi. 37 Ni sagih sung tua maitam ading, khelhna thoihna bawlin, siangthoua sehtuamna na bawl ding ahi. Tua khit chiangin, tua maitam a siangthou penpen ahi ding a, tua maitam tawh kisukha peuhmah siangthou a hita ding hi.
Siampite' Thillat-gigete
38 Nisima maitam tunga na lat gige ding hiai ahi: Kum khata upa belamnou nih, 39 zingsangin khat, nitaklam khawmuiin khat na laan ding ahi. 40 Zingsanga belamnou khat na lat chiangin, anvui nei ephah khat seh sawm suah seh khat, leh sukthawh oliv thau hin khat seh li suah sehkhat tawh kihel na laan ding a, grepzu hin khat sehli suah seh khat, dawn thillatin na laan ding ahi. 41 Nitak lam khawmuiin, belamnou khat pen zong, zingsang thillata bangin an thillat leh dawn thillat tawh na laan ding ahi. Hiai Tangtawn Toupa' maia, meia thillat gim namtui ahi. 42 Kihoupihna Puanbuk kongkhaka, Tangtawn Toupa' maia thillat, a khang a khanga na bawl gige ding uh ahi. Tua ah, nang kon kimuhpih ding a, kon houpih ding. 43 Tua ah, Israel tate zong ka kimuhpih ding a, ka thupina in tua mun a hihsiangthou ding hi. 44 Tua bangin, Kihoupihna Puanbuk leh maitam ka hihsiangthou ding a, Aron leh a tapate zong siampi-a panga ka nna sem dingin ka hihsianghtou ding. 45 Tuachi-in, Israel tate lak ah ka teeng ding a, amaute' Pathian ka hi ding. 46 Amaute'n amaute laka ka teen theih nadinga, Aigupta gam apan amaute piikhepa Tangtawn Toupa, a Pathian uh kei ka hi, chih hon thei ding uh. Tangtawn Toupa, a Pathian uh kei ka hi.
Gimnamtui Halna Maitam
1 Gimnamtui hal nading maitam khat, akasia singin na bawl ding ahi. 2 Tua maitam dung lam tong khat, a vailam tong khat, a dung leh a vai kikim, a sanlam tong nih ahi ding ahi. A kite zong a maitam tawh sakhata kizom ahi ding ahi. 3 A tung leh a pang teng leh a kite, kham sik peka na tuam ding ahi. A gei kimvel ah khamsikin a geivel na bawl ding ahi. 4 Kham sik bilkual nih, a pang nih ading na bawl ding a, maitam pang nih ah na bulh ding a, a zawnna zawlte khum nading ahi ding ahi. 5 A zawnna zawlte akasia singin na bawl ding a, kham sik pekin na tuam ding ahi. 6 Theihpihna singkuang, a tung sin, thoihdamna mun kichi, maia dantan puanzak mai ah, tua gimnamtui halna maitam na tung ding ahi. Tua thoihdamna mun ah nang kon kimuhpih ding hi. 7 Aron in zingsang tengin, meivakte a kep chiangin, tua maitam tung ah gimnamtui a hal ding ahi. 8 Aron in nitaklam khawmuia meivakte a det chiangin, tua maitam tung ah gimnamtui a hal ding a, a khang a khanga Tangtawn Toupa' maia gimnamtui a nam gige ding ahi. 9 Tua maitam tung ah, gimnamtui dang himhim hiam, haltum thillat hiam, an thillat hiam na laan ding ahi kei a, dawn thillat zong na sung ding ahi kei. 10 Aron in kum khatin khatvei tua maitam kite ah, khelhna khuhna thillat sisan a tat ding a, thoihdamna a bawl ding ahi. A khang a khanga lat ding, Tangtawn Toupa adinga thil siangthou penpen ahi ding ahi, a chi hi.
Tatna Sum
11 Tua baan ah, Tangtawn Toupa'n Mosi a houpih lai a: 12 Israel tate a tam dan uh theih nading kisimpina na bawl chiangin, pasal chih in a hinna tatna sum, Tangtawn Toupa kiang ah a laan ding ahi. Hiai bel, amaute na sim chianga, amaute laka hipi a len louh nading ahi ding hi. 13 Simtela om mi chih in, tatna sum a piak ding ahi: Mun Siangthou sum shekel kimkhat ahi ding ahi. Shekel bel gera 20-a gik ahi. Tua shekel kimkhat, Tangtawn Toupa' maia thillat ahi ding ahi. 14 Simtela om, kum 20-a upa leh a tunglam kuapeuh in, Tangtawn Toupa' maia thillat a lat ding ahi. 15 Noute adinga hinna tatna bawl a, Tangtawn Toupa' maia thillat na lat chiangin, a haute'n shekel kimkhat sanga tam a laan kei ding a, a zawngte'n zong shekel kimkhat sanga tawm a laan kei ding ahi. 16 Israel tate tatna sum na la ding a, Kihoupihna Puanbuka nasep nadingin, na sep ding ahi. Noute' hinna tatna hi dingin, Tangtawn Toupa' mai ah, Israel tate adingin, theihgigena ahi ding ahi, a chi hi.
Tuikuang
17 Tua baan ah, Tangtawn Toupa'n Mosi a houpih lai a: 18 Kisil nadingin sumsanin tuikuang na bawl ding a, a tunna khete zong sumsanin na bawl ding ahi. Tua tuikuang pen Kihoupihna Puanbuk leh maitam kikal ah na koih ding a, a sung ah tui na sung ding ahi. 19 Aron leh a tapate'n tua tuikuang ah a khut a khe uh a sil ding uh ahi. 20 Kihoupihna Puanbuk sung a lut ding chiang uhiam, nna sem dinga Tangtawn Toupa' maia, meia thillat laan dinga maitam a naih ding chiang uhiam, tuiin a kisil ding uh ahi, tua ahih kei leh, a si ding uhi. 21 Tua banga a sih louh nadingun, a khut a khe uh a sil ding uh ahi. Hiai, Aron leh a tate ading a khang kizang English a atonement, khuhna chi a kilet sek kammal ahi. akhanga thuseh hi tawntung ding ahi, a chi hi.
Nilh Sathau Siangthou
22 Tua baan ah, Tangtawn Toupa'n Mosi a houpih lai a, Tangtawn Toupa'n: 23 Thil namtuite mura tui shekel 500 tawh, singguithak namtui tua zah kimkhat, shekel 250 tawh, sialluang namtui shekel 250 tawh, 24 nahnam, munsiangthou shekel 500 tawh, oliv thau hin khat tawh na la ding ahi. 25 Tuate-in gimnamtui bawl siamte' hel banga helin, nilh sathau siangthou na bawl ding a, nilh sathau siangthou ahi ding ahi. 26 Tua sathau siangthouin Kihoupihna Puanbuk leh Theihpihna singkuang, 27 tua dawhkan leh a vanzatte, meivak mung leh a vanzatte, tua gimnamtui halna maitam, 28 haltum thillatna maitam leh a vanzatte khempeuh, tuikuang leh a tunna khete, na nilh ding ahi. 29 Tuate, tua banga a siangthoua sehtuamna na bawl ding a, thil siangthou penpen hong hi ding ahi. Tuate tawh kisukhate peuhmah siangthou a hita ding hi. 30 Aron leh a tapate'n siampi-a panga ka nna a sep theih nadingun, amaute nilh sathau na nilh ding a, siangthoua sehtuamna na bawl ding ahi. rTua bangin, Israel tate kiang ah thu na gen ding a: Hiai a khang akhanga kei adinga nilh sathau siangthou hi gige ding ahi. 32 Mihing satung hiam ah na sung ding uh ahi kei a, a kihel dan bangbangin, a batpih dang zong na bawl ding uh ahi kei. Nilh sathau siangthou ahi a, noute adinga siangthou ahi ding hi. 33 Hiai bangbanga hel a, a batpih sathau bawl hiam, siampi hilou mi dang tunga zang hiam peuhmah a mite lak apan ka satkhe ding, chi ahi, chi in, a chi hi.
Gimnamtui
34 Tua baan ah, Tangtawn Toupa'n Mosi kiang ah: Thil namtuite' singnaite leh onichate leh galbanamte leh, begawte a kikim chiat la in. 35 Hiaite apan gimnamtui na bawl ding ahi. Gimnamtui bawl siamte' hel bangin na hel ding ahi. Chi sawh, a siang leh a zeka siangthou hi ding hi. 36 Tua gimnamtui kihel bangzah hiam na la ding a, na gawi nei dimdem ding a, bangzah hiam tawiin, nang kon kimuhpih nading puanbuk sunga Theihpihna singkuang mai ah na koih ding ahi. Noute adingin thil siangthou penpen ahi ding. 37 Hiai gimnamtui na bawl ding tawh kisaiin, a hel dana a batpih noute aituam ding na kibawl ding uh ahi kei. Noute adingin, Tangtawn Toupa' maia thil siangthou ahi ding ahi. 38 A gimnam diik dinga a batpih bawl mi peuhmah a mite lak apan ka satkhe ding, a chi hi.
Biakbuk Lam Khutsiamte
1 Tua baan ah, Tangtawn Toupa'n Mosi a houpih a: 2 En in, Judah nama Hur' tapa Uri' tapa Bezalel, a minin ka samta. 3 Pathian' Kha leh pilna leh theihsiamna leh theihna leh, khutsiamna namkimin amah ka luahdimsakta. 4 Ama'n khutsiamna thil lim leh mei neiin a gel ding a, kham sik, ngun sik leh sumsan siktein thil a bawl ding. 5 Tua baan ah, suangmanphate a at ding a, singte lim leh mei neiin, khutsiamtakin a bawl ding. 6 Ama' seppih dingin, Dan nama mi Ahisamak' tapa Aholiap ka septa. Khutsiamna neite khempeuh zong pilna lungtang ka pia a, amaute'n nang kon thupiak bangin thil khempeuh a bawl ding uhi: 7 Kihoupihna Puanbuk, Theihpihna Singkuang leh a tunga Thoihdamna Mun leh biakbuk sung vanzatte khempeuh, 8 dawhkan leh a vanzatte, kham sianga bawl meivak mung leh a vanzatte khempeuh, gimnamtui halna maitam, 9 haltum thillatna maitam leh a vanzatte khempeuh leh tuikuang leh a tunna khete, 10 siampi puansilhte, siampi-a panga nna sem ding siampi Aron' puansilh siangthoute leh a tapate' puansilhte leh, 11 nilh sathau leh mun siangthou ading gimnamtui a bawl ding uh a, kon thupiak khempeuh bangin a bawl ding uh ahi, a chi hi.
Sabbath
12 Tua baan ah, Tangtawn Toupa'n Mosi a houpih a: 13 Israel tate kiang ah thu gen inla: Ka Sabbath na tan teitei ding uh ahi. Noute siangthoua hon septuam Tangtawn Toupa kei ka hi, chih na theih nadingun, noute leh kei kala chiamtehna, a khang a khanga omden ding ahi ding ahi. 14 Tua bang ahih manin, Sabbath, noute adinga siangthou ahi a, na tan ding uh ahi. Sabbath hihbuah kuapeuh noute lak apan ka satkhe ding. Sabbath ni-a nasem peuhmah, a mite lak apan ka satkhe ding. 15 15 Ni guk sung nna na sem ding uh a, ahihhangin, ni sagih ni bel tawlngakna Sabbath, Tangtawn Toupa adinga siangthou ahi. Sabbath ni-a nasem peuh-mah a si teitei ding ahi. 16 Tua bang ahih manin, Israel tate'n a khang a khanga thukhun omden hi dingin, Sabbath siangthouin a tang ding uh ahi. 17 Sabbath bel, Israel tate leh kei kala omden ding chiamtehna ahi. Ahang bel, Tangtawn Toupa'n ni guk sungin lei leh vante a bawl a, ni sagih ni-in nnasep a tawlnga a, a tawldamta hi, chi in, a chi hi. 18 Tangtawn Toupa'n Sinai Mual tunga Mosi houpih a, thu a genkhit-in, tua Theihpihna suangpek nih, Pathian in khuttala a gelh, Mosi a pia hi.
Khamsika Bawl Bawngnou
1 Tua mipite'n, Mual tung apan Mosi hong paisuk zekai a theih takun, Aron kiang ah hong paikhawm uh a: Kisa inla, koute' maia pai ding pathiante hon bawlsak in. Aigupta gam apan hon piikhia hiai Mosi lah bang suakta hiam, ka thei kei uh, a chi uhi. 2 Aron in amaute kiang ah: Na zite uleh na tapate uleh, na tanute uh' bil apan kham bilbahte suahkhia unla, ka kiang ah hon tawikhawm un, a chi a, 3 mi khempeuh in a bil ua kham bilbahte sutin, Aron kiang ah hon tawikhawm uhi. 4 Ama'n amaute khut apan tua kham bilbahte a sang a, a sun thawh-in bawngnou lim a bawl a, tua bangin khamsik bawngnou limin a sung hi. Tua khitin, amaute'n: Israel aw, Aigupta gam apan nang hon piikhia na pathian hiai ahi! a kichi uhi. 5 Aron in tua a muh tak in, tua bawngnou mai ah maitam khat a dawh a, thu a phuang a: Zing chiangin, Tangtawn Toupa' maia ankuang luina om ding ahi, a chi hi. 6 A zingchiang zingkhangin, amaute beltakin a thou uh a, haltum thillatte a laan uh a, lemna thillatte a laan uhi. Mipite ne ding leh dawn dingin a tu uh a, noptal dingin a ding uhi. 7 Tua bang ahih manin, Tangtawn Toupa'n Mosi kiang ah: Vapaisuk in! Aigupta gam apan na piikhiak na mite kisegawp uhi. 8 Ka thupiak pialsan pah uhi. Sunthawh bawngnou lim kibawlin bia uh a, a mai ah thillatte laan uh a: Israel aw, Aigupta gam apan hon piikhia na pathian hiai ahi, kichi uhi! a chi hi. 9 Tua baan ah, Tangtawn Toupa'n Mosi kiang ah: Hiai mite ka muta a, mi genhak ahi taktak uhi! 10 Tua bang ahih manin, amaute tunga ka thangpaihna a kuang a, ka kattum theih nadingin, ka ut uta gamta dingin hon khahzan in. Nang apanin nam thupi ka bawl ding, a chi hi. 11 Tua khitin, Mosi in Tangtawn Toupa, a Pathian a ngen ngutngut a: Tangtawn Toupa aw, banghanga Aigupta gam apan vangletna thupitak leh khut hattaka na piikhiak na mite tunga na thangpaihna kuangsak dek na hia? 12 Banghanga Aiguptate'n: Amaute siat nading deih a, mual tung khawnga that ding leh leitung apan chiman dinga piikhia aka, hon chi peuhmah ding uh ahia? Na thangpaihna lauhuai apan lunghei inla, na mite' siat nading na gel lakik mahmah in. 13 Na suante vana aksi zahin ka pungsak ding a, hiai gam khempeuh na suante kiang ah ka pe ding a, a luahden ding uh, chi-a nangma' min kiloua na kichiamna, na silate Abraham leh Isak leh Israel theigige in, a chi hi. 14 Tua bangin, a mite tunga siatna tut a sawm apan Tangtawn Toupa a lungheita hi. 15 Tua khitin, Mosi a kihei a, mual tung apan a kumsuk a, Theihpihna suangpek nihte a tawi hi. Tua suangpek nihte a pang langnih-a kigelh ahi a, a mailam leh nunglam kigelh ahi. 16 Tua suangpekte Pathian' nasep ahi a, a kigelh zong suangpeka khuaka Pathian' gelh ahi. 17 Joshua in tua mite kikou husa a zak takin, Mosi kiang ah: Giahphual ah kikou husa a om, a chi hi. 18 Mosi in: Vualzawh husa hi kei veh aw, vuallelh husa zong hi kei veh. Ka zak zaw, lasa aw hi veh, a chi hi. 19 Mosi tua giahphual naih hong tun takin, tua bawngnou leh laam a mu hi. Mosi' hehna a kuang a, a khut apan tua suangpekte a paikhia a, tua mual bul ah a paitam hi. 20 Amaute'n a na-bawl uh bawngnou a la a, meiphual ah a khul a, a gawivui a, tui tung ah a theh a, Israel tate a dawnsak hi. 21 Tua khitin, Mosi in Aron kiang ah: Hiai mite'n bang hon lawh a, amaute tunga hibang khelhna thupi tun tamai na hia? a chi hi. 22 Aron in: Ka toupa aw, na hehna kuangsak ken. Mipite na thei a, thilse lama a awn gige dan uh na thei hi. 23 Ka kiang ah: Koute' maia pai ding pathiante hon bawlsak in, Aigupta gam apan hon piikhia hiai Mosi lah bang suakta hiam, chih ka thei kei uh, chi uhi. 24 Ke'n amaute kiang ah: Khama kibawl kizepna neite peuhmah in hon suahkhia un, ka chi a, tua bangin hon pia uh a, ke'n meikhuk ah ka khul a, hiai bawngnou hong suak ahi, a chi hi. 25 Aron in ututa om dinga mipite a taizak uh a phal a, nuihzabuk hong suakta uh, chih Mosi in a mu hi. 26 Giahphual kongpi ah a ding a: Tangtawn Toupa lama pang peuhmah ka kiang ah hong pai hen, a chi hi. Tua bangin, Levi' tapate khempeuh amah kiang ah, a kimkot ah hong paikhawm uhi. 27 Mosi in amaute kiang ah: Tangtawn Toupa, Israel Pathian in: Pasal chih in a namsau kuah henla, giahphual kongpi lang khat apan kongpi lehlam dong paisuak henla, mi chih in a sanggam, mi chih in a lawm, mi chih in a innveng that hen, chi ahi, a chi hi. 28 Tua bangin, Levi' tapate'n Mosi thugen bangin a hih uhi. Tua ni-in, mipite laka mi 3,000 a si uhi. 29 Tua khitin, Mosi in: Michih in a tapate leh a sanggam douta ahih manin, Tangtawn Toupa adingin kihihsiangthou un, a chi hi. 30 A zing chiangin, Mosi in mipite kiang ah: Khelhna thupitak hih na hita uh. Tangtawn Toupa' mai ah ka va-paitou peuhmah ding a, noute' khelhna thoihdamna ka bawl thei khamaithei hi, a chi hi. 31 Tua khitin, Mosi Tangtawn Toupa kiang ah a kilehkik a: Hiai mite'n khelhna thupi hih na maizen uh e! Kham pathiante lah a kibawl tazen ua! 32 Hinapi-in, tuin amaute' khelhna ngaidam in. Na ngaihdam kei ding leh, na gelhsa laibu apan ka min thaimang mai in, kon ngen ahi, a chi hi. 33 Tangtawn Toupa'n Mosi kiang Ka tunga khial peuhmah ka laibu apan a min ka thaimang ding. 34 Tuin pai inla, kon hilhsa gam ah mipite pii in. Ngai in, ka vansawltak na maia pai ding ahi. Ahihhangin, ka gawt hun hong tun chiangin, a khelhna uh hangin amaute ka gawt ding, a chi hi. 35 Aron' bawlsa bawngnou maia a thillatte uh hangin, Tangtawn Toupa'n mipite hipi-in a gawt hi.
Sinai Nuse dinga Thupiak
1 Tua khitin, Tangtawn Toupa'n Mosi kiang ah: Abraham, Isak leh Jakob kiang ah ka kichiam a: Na suante kiang ah gam ka pe ding, ka na chi hi. Tu'n paikhia unla, nang leh Aigutpa gam apan na piikhiakte tawh ka chiam gam ah paitou un. 2 Na mai ah vansawltak ka sawl ding a, Kanante Amorte leh Hitte leh Perizte leh Hivte leh Jebuste ka hawlkhe ding. 3 Nawitui leh khuaizu-a luang tua gam ah paitou un. Mi genhakte na hih manun, kon kangtum kha ding a, na lak uah zaw ka paitou kei ding, a chi hi. 4 Mipite'n tua thu lungkhamhuai a zak takun, a dah uh a, kuama'n buh leh bah kizepnate a zang kei uhi. 5 Ahang bel, Tangtawn Toupa'n Mosi kiang ah: Israel tate kiang ah thugen inla: Mi genhakte na hi uh a, na lak uah pai leng, mitphialkal louin kon kangtum kha ding. Tua bang ahih manin, buh leh bah na kizepnate uh suahkhia un, bang hon lawh ding ka hiam, ka ngaihtuah ding, a chi, chi in, a na chikhinta hi. 6 Tua bangin, Israel tate'n Horeb Mual ah, a kizepnate uh a suahkhevek uhi.
Mosi in Tangtawn Toupa Kimuhpih
7 Mosi in puanbuk puain, giahphual pawlam gamlapi ah, tua puanbuk a kai zel a, tua puanbuk pen Kihoupihna Puanbuk chi-in a minvawh hi. Tangtawn Toupa apan thu dong nuam peuhmahte giahphual pawlam ah tua Kihoupihna Puanbuk ah a vapai zel uhi. 8 Tua Puanbuka Mosi a vapai peuhmah chiangin, mipite khempeuh a ding uh a, Mosi tua Puanbuk sung a lut mateng a en uhi. 9 Mosi, tua Puanbuk sung a lut peuhpeuh chiangin, meipi khuampi hong niamsuk a, Puanbuk kongvang ah a ding a, Tangtawn Toupa'n Mosi a houpih hi. 10 Mipite khempeuh in tua Puanbuk kongvanga tua meipi khuam ding a mu uh a, a ding uh a, michih in ama' puanbuk kongvang ah a bia uhi. 11 Tangtawn Toupa'n kimaituahin Mosi a houpih a, mi'n a lawm a houpih bangin a houpih hi. Mosi bel, giahphual ah a kik zel a, a huhpa Nun' tapa tangval Joshua in bel tua Puanbuk a nuse ngei kei hi.
Pathian' Ompihna Thuchiam
12 Mosi in Tangtawn Toupa kiang ah: En dih, hiai mite piitou in, non chi gige a, ahihhangin, kei tawh tona kua hon sawl ding na hia, chih non theisak nai kei. Hinapi-in, nang ka kiang ah: Na minin kon thei a, ka mitmuhin deihsakna na tang, non chi hi. 13 Tua banga na mitmuha deihsakna tang ka hih leh, nang kon theih nading leh na deihsakna ka tan lailai nadingin, na lampite hon sinsak in, kon ngen hi. Hiai nam nangma' mite ahi, chih theigige in, a chi hi. 14 Tua khitin, Tangtawn Toupa'n: Keimah mah' Ompihna in hon tonpih ding a, tawlngakna kon pe ding, a chi hi. 15 Mosi in: Nangmah mah' Ompihna in hon tonpih kei ding leh, hiai apan hon piitou se ken. 16 Non tonpih kei leh, bangchi-a na mite leh ke'n na deihsakna ka tang uh, chih kithei ding ahia? Leitung maikaiha nam dangte apan, na mite leh kei a tuam ka hi uh, chih bang thilin kitelsak ding ahia? a chi hi. 17 Tangtawn Toupa'n Mosi kiang ah: Ka mitmuhin deihsakna na tang a, na minin kon theita a, hiai na nget pen mahmah zong kon hihsak ding, a chi hi. 18 Tua khitin, Mosi in: Na thupina hon ensak in, a chi hi. 19 Tangtawn Toupa'n: Na mai ah ka hoihna khempeuh ka kilangsak ding a, na mai ah Tangtawn Toupa' min ka phuang ding. Ka zahngaih nopna mi tung ah zahngaihna ka nei ding a, ka lainat nopna mi tung ah lainatna ka nei ding. 20 Ahihhangin, ka maitang bel na mu thei kei ding. Kei hon mu a hing om thei kei hi, a chi hi. 21 Tua khitin, ama'n: Ka kiang ah mun khat a om a, tua ah suangpi tung ah na ding in. 22 Ka thupina in hon khen sungin, tua suangpi khi sung ah nang kon koih ding a, kon khen sungin, ka khutin kon hum ding. 23 Tua khit chiangin, ka khut ka lakhe ding a, ka nunglam na mu ding. Ahihhangin, ka maitang bel muh ahi het kei ding hi, a chi hi.
Mosi' Bawl Suangpek Thakte
1 Tua nungin, Tangtawn Toupa'n Mosi kiang ah: Suangpek nih, a masate bangbang, sek inla, tuate tung ah na suktap suangpeka thu kigelhte bangbang ke'n ka gelh ding. 2 Zingsangin kisa inla, Sinai Mual ah hong paitou inla, ka mai ah hong kilak in. 3 Kuama'nnang hon zuih louh ding, kuamah mual tung koimaha a kimuh louh ding ahi. Belamhon zong, bawnghon zong tua mual mazawna a gamtat louh ding ahi, a chi hi. 4 Tua bangin, Mosi in suangpek nih, a masate bangbang, a sek hi. Zingsangin, beltakin a thou a, Tangtawn Toupa' thupiak bangin, Sinai Mual tung ah a paitou a, tua suangpek nihte a tawitou hi. 5 Tua khitin, Tangtawn Toupa, meipi lak ah hong kumsuk a, Mosi kianga dingin, Tangtawn Toupa' min a phuang hi. 6 Tangtawn Toupa, Mosi' mai ah a pai a: Tangtawn Toupa, Tangtawn Toupa Pathian zahngaithei leh hehpihsiam, hehhak, hoihna leh thutaka dim, 7 sang tampite tunga zahngai, lungsimsiatna leh tatlekna leh khelhna ngaidampa ahi. Hinapi-in, a mawhte gawtlouin a hawi kei a, pate' lungsimsiatna tate tung ah leh a tate uh tate tung ah, khang thum khang li dongin a thuk, chi-in a phuang hi. 8 Mosi kintakin lei si-in a kun a, khupbawhin amah a bia a: 9 Toupa aw, tuin na mitmuha deihsakna ka tan leh, Toupa aw, kon ngen hi: Mi genhakte hi mah le-ung, ka Toupa koute lak ah pai hen. Ka lungsimsiatna uleh ka khelhna uh ngaidam inla, na gou dingin hon sang in, a chi hi.
Thukhun Piakthakna
10 Tangtawn Toupa'n: Ngai in, noute tawh kal ah thukhun ka bawl ding a, leitung koimaha kihih ngeilou leh nam kuamah laka kihih ngeilou thillamdangte na mite khempeuh mai ah ka hih ding. A lak ua na omna mite khempeuh in, kei Tangtawn Toupa'n nou adinga thil lauhuai ka hih dingte a mu ding uh. 11 Tuni-a thu kon piak zui in. Noute' mai ah Amorte leh Kanante leh Hitte leh Perizte leh Hivte leh Jebuste ka hawlkhe ding. 12 Na pem nading gam ua mipi tawh kal ah thukhun na bawl kha ding ua, noute adingin thang ahi kha ding uh, pilvang un. 13 Amaute' maitamte na sawichim ding uh, a milim suangphuhte uh na hihtam ding uh, Ashera songte na phuk ding uh ahi. 14 Ahang bel, Tangtawn Toupa' min Thikthusia ahi a, thikthusia Pathian ahi a, pathian dang na biak louh ding uh ahi. 15 Tua gama tengte tawh kal ah thukhun na bawl kha mahmah ding uh ahi. A pathiante uh adinga kizuak a, a pathiante uh maia kithoihnate a lat chiangun, khattei in noute hon chial ding a, tua kithoihna sa na ne kha mahmah ding uh ahi. 16 Na tapate uh adingin, a tanute uh na pii kha mahmah ding uh a, a pathiante uh adinga a kizuak chiangun, na tapate uh zong amaute hih banga, a milim pathiante uh be dingin a khempuk kha mahmah ding uh ahi. 17 Sun thawh pathiante na kibawl ding uh ahi kei hi. 18 Silngou Sawhlouh Tanghou Ankuanglui na bawl ding uh ahi. Kon thupiak bangin, Abib khain, ka hun seh ah, ni guk sung, silngou sawhlouh tanghou na ne ding uh ahi. Ahang bel, Abib khain, Aigupta gam apan hong pemkhia na hi uhi. 19 Sul hong ta masa peuhmah keia ahi. Na gantate uh, bawng hita leh, belam hita leh, a pa piang masa peuhmah keia ahi. 20 Sabiltung piang masa peuhmah belamnoua na tat ding uh ahi. Na tat nop kei uleh, a ngawng na hektan ding uh ahi. Na tapate uh laka piang masate na tat ding uh ahi. Na tapate uh kuamah ka maia khutvuaka hong kilat ding uh ahi kei hi. 21 Ni guk sung nna na sem ding uh a, ahihhangin, ni sagih ni-in na tawlnga ding uh ahi. Lou kaih laiin zong, anlak laiin zong na tawlnga ding uh ahi. 22 Nipikalte Ankuanglui leh huitbuh lak gahmasa Buhlak Ankuanglui leh kumtawpa Anpuak-lut Ankuanglui na bawl ding uh ahi. 23 Kum khat sungin, thumvei Tangtawn Toupa Thuneipen, Israel Pathian' mai ah pasal peuhmah na kilang ding uh ahi. 24 Noute' mai ah namte ka hawlkhe ding a, na gamgi uh ka keeklian ding. Kum khata thumvei, Tangtawn Toupa na Pathian uh maia kilang dinga na kuantouh sungun, na gam uh kuama'n hon deihgawh kei ding hi. 25 Ka maia kithoihna thillat sisan ah silngou helin na lankhawm ding uh ahi kei. Paikan Ankuang thillat zong, zingsang dong na koih ding uh ahi kei. 26 Na gam gah masate laka a hoihpen, Tangtawn Toupa na Pathian' inna non tawi ding uh ahi. Kelnou, a pi' nawituiin na huan ding uh ahi kei hi, a chi hi. 27 Tua khitin, Tangtawn Toupa'n Mosi kiang ah: Hiai thute gelh in. Ahang bel, hiai thute bangbanga noute leh Israel tawh kala thukhun bawl ka hi, a chi hi. 28 Mosi tua ah ni 40 leh zan 40 sung, an ne lou, tui dawn louin, Tangtawn Toupa tawh a omkhawm hi. Tangtawn Toupa'n tua suangpekte tung ah a thukhun thute, tua Thupiak Sawmte mah a gelh hi.
Mosi' Maitang Taang
29 Sinai Mual tung apan, tua Theihpihna suangpek nihte tawia Mosi hong kumsuk takin, Tangtawn Toupa tawh a kihou sungin, a maitang a taang, chih a phawk kei hi. 30 Aron leh Israel suante khempeuh in Mosi a muh takun, ngai dih, a maitang a taang a, amah a naih ngam kei uhi. 31 Ahihhangin, Mosi in amaute a sam a, Aron leh tua Israel mipite' makaite khempeuh amah kiang ah hong hawh kik uh a, ama'n amaute a na houpih hi. 32 Tua nungin, Israel tate khempeuh in hong naih uh a, a ma'n, Tangtawn Toupa'n Sinai Mual tunga amah kianga a piak thupiakte khempeuh amaute a pia hi. 33 Mosi in amaute a houpih khitin, khuhnain a maitang a khuh hi. 34 Ahihhangin, Tangtawn Toupa houpih dinga a maia a lut peuhmah chiang-in, a hong pawtkhiak kik mateng, a maitang khuhna a hawkkhia hi. Amah hong pawtkhia a, ama' kianga thupiakte, Israel tate a hilh peuhmah chiangin, 35 Israel tate'n Mosi maitang taang a mu uhi. Tua bang ahih manin, Mosi in Tangtawn Toupa houpih dinga a lut kik mateng a maitang a khuh zel hi.
Sabbath tawh kisai Dante
1 Tua khitin, Mosi in Israel mipite khempeuh a sam-khawm a: Tangtawn Toupa'n noute hon thupiak na zuih ding uh hiaite ahi: 2 Ni guk sung nna na sem ding uh a, ahihhangin, ni sagih ni nou adinga siangthou ahi ding ahi. Tangtawn Toupa' Sabbath tawlngakna ahi. Sabbath ni-a nna sem peuhmah thah ding 3 Sabbath ni-in na tenna ahi. ni-in na tenna sung khempeuh uah mei na chih ding uh ahi kei, a chi hi.
Biakbuk ading Thilpiakte
4 Tua khitin, Israel mipite khempeuh kiang ah: Tangtawn Toupa'n noute hon thupiak hiai ahi: 5 Tangtawn Toupa adingin na lak uah thilpiakte lakhawm un. Lungtanga utna nei peuhmah in Tangtawn Toupa adingin thilpiakte kham leh ngun leh sumsan, 6 khau dum, khau sandup leh khau sanau, ziza khau zangngat leh kelmul, 7 belamtal vun huan sante, saham vunte leh akasia sing, 8 meivaka det ding sathau, thaunilhna ading thil gah namtuite leh gim namtui hal ding leh, 9 oniks suangte, siampi puanakzem leh awmphaw ading suang manphate hon tawikhawm uhen.
Biakbuk ading Vante
10 Na lak ua khutsiamte khempeuh hong pai uh henla, Tangtawn Toupa'n bawl ding, chi-a hon thupiak khempeuh bawl uhen: 11 Biakbuk, a puanbuk, a tungkhuhna, a mekkilhte, a singpekte, a zawlte, a khuamte, leh a tunna khuakkuakte bawl uhen. 12 Singkuang leh a zawnna zawlte, a tungsin thoihdamna mun leh dantanna puanzak bawl uhen. 13 Dawhkan leh a zawnna zawlte leh, a vanzatte, Ompihna tanghou, 14 meivak sak ding meivak mung leh a vanzatte, meivakte leh meivak ading sathau bawl uhen. 15 Gimnamtui halna maitam, a zawnna zawlte, thaunilh ding sathau leh gimnamtui bawl uhen. Biakbuk kongpi puanzak bawl uhen. 16 Haltum thillat halna maitam, a sumsan len tawh, a zawnna zawlte leh vanzatte khempeuh leh tuikuang leh a tunna khete bawl uhen. 17 Huang umna puanzakte, a khuamte, a tunna khuakkuakte, huang kongpi puanzak, 18 biakbuk khetphimte, huang umna khetphimte leh a kaihna khaute bawl uhen. 19 Mun Siangthoua nasep nading puansilh, siampi-a panga nasepna ding Aron leh a tapate' puansilh siangthoute bawl uhen, a chi hi.
Biakbuk ading Thilpiakte Latna
20 Tua khitin, Israel mipi omkhawmte, Mosi kiang apan a paikhia uhi. 21 Tua khitin, a lungtang uh tawhthawha om peuhmah, lungtanga utna nei peuhmah hong pai uh a, Kihoupihna Puanbuk lam nading leh a sunga nasepna ding leh puansilh siangthoute bawl nading, Tangtawn Toupa kianga thilpiak hon tawi uhi. 22 Lungtanga utna nei numeite leh pasalte hong pai uh a, khama kibawl thil tuamtuam bilbahte, nakbahte, zungbuhte, awh leh but kizepnate hon tawi uh a, amaute khempeuh in Tangtawn Toupa' mai ah khama kibawl thilte hong laan uhi. 23 Khau dum, khau sandup, khau sanau, ahih kei leh ziza khau zangngat, kelmul leh belamtal vun huansan, saham vun nei michih in hon tawi uhi. 24 Thilpiak dinga ngun hiam, sumsan hiam, nei peuhmah in Tangtawn Toupa' maia thilpiak dingin hon tawi uhi. Akasia sing zat theih nei peuhmah in zong hon tawi uhi. 25 Numei khutsiam khempeuh in khutin khau a khek uh a, khau dum, khau sandup leh khau sanau leh ziza khau zangngat hon tawi uhi. 26 Lungtang tawhthawh numei khempeuh in kelmul a khek uhi. 27 Makaite'n oniks suang manphate leh siampi puanakzem leh awmphaw-a koih ding suang manphate hon tawi uh a, 28 gimnamtui hal ding sing gah namtui leh det ding meivak leh nilh sathaua zat ding leh gimnamtuia hel ding sathau hon tawi uhi. 29 Tangtawn Toupa'n Mosi' khut tungtawna thu a piak a, van bawl ding, a chih khempeuh bawl nadingin, Israel tate numei leh pasal khempeuh in amau utthu-a thilpiakte, Tangtawn Toupa' mai ah hon tawi uhi.
Pathian' Sap Khutsiamte
30 Tua khitin, Mosi in Israel tate kiang ah: En un, Tangtawn Toupa'n Judah nama Hur' tapa Uri' tapa Bezalel a minin a sam a, 31 Pathian' Kha leh theihsiamna leh theihna leh khutsiamna namkimin amah a luahdimsak hi. 32 Tua bel, khutsiamtaka bawl dingte, a zia gel siamna, kham leh ngun leh sumsana thilbawl siamna ahi a, 33 bulh ding suang manphate at siamna, singlam siamna leh khutsiam silbawl namkima siamna ahi. 34 Tua baan ah, amah leh Dan nama Ahisamak' tapa Aholiab zong midangte sinsak siamna a pia a, 35 amaute khempeuh khuakthawha silbawl siamna namkim leh, khau dum, khau sandup leh khau san-au, ziza khau zangngat gat zep siamna, gat siamna, ze tuamtuam gel siamna nei dingin amaute pilna a pia hi.
1 Tua bangin, Bezalel leh Aholiab leh mun siangthou vanzatte bawl ding dan thei dinga Tangtawn Toupa'n pilna leh theihsiamna a piak khutsiamte'n, Tangtawn Toupa' thupiak bangin vanzatte a bawl ding uh ahi, a chi hi.
Mite'n a Kichingval Pia
2 Tua khitin, Mosi in Bezalel leh Aholiab leh Tangtawn Toupa'n pilna a piak, a lungtang uh a tawhthawh khutsiam peuhmah hong pai ding leh na sem dingin a sam hi. 3 Amaute'n, mun siangthou vanzat dingte bawl dinga Israel tate' thilpiakte, Mosi' khut apanin a sang uhi. Ahihhangin, Israel tate'n zingsang tengin, tua bang thilpiakte hon tawi lailai uhi. 4 Tua khitin, mun siangthou vanzatte bawl khutsiamte'n a nasep uh nusiain hong pai chiat uh a, 5 Mosi a houpih uh a: Tangtawn Toupa'n thil bawl dinga hon thupiak banga bawl nadinga mipite' hon tawite a kichingvalta, a chi uhi. 6 Tua khitin, Mosi in thu a pia a, amaute'n giahphual sung teng ah a phuangsuak uh a: Numei hiam, pasal hiam in mun siangthou ading thilpiak pe nawn kei hen, a chisak uh a, mipite'n thilpiak hon tawi nawn kei uhi. 7 Ahang bel, thil khempeuh bawl nadinga vanzat a neihte uh a kichingta a, a kichingval zawmah hi.
Biakbuk Lamna
8 Tua khitin, nasemte' laka khutsiamte'n biakbuk khuh nading khutsiamtakin a khui cherubte lim tuanna puanzak sawm, khau dum, khau sandup leh khau sanau khukin a bawl uhi. 9 Tua puanzakte a kikim chiat, tong 28-a sau, tong li-a za ahi. 10 Puanzak nga a buptuah uh a, nga dang zong a buptuah uhi. 11 Tua puanzak bup khata nawlnung gei ah khau dumin a bilte a bulh uh a, a bup dang khata nawlnung gei ah zong tua bangin a bilte a bulh uhi. 12 Puanzak khat ah a bil 50, a bup danga puanzak nawlnung ah a bil 50 mah, a bilte a kizawnin a bawl uhi. 13 Khamsikin mekkilh pin 50 a bawl uh a, tuatein tua puanzak bup nihte a buptuah uh a, a bulh uh a, biakbuk khat a suak hi. 14 Tua biakbuk tung khuh nadingin, kelmulin puanzak sawmlekhat a bawl uhi. 15 Puanzakte tong 30-a sau, tong li-a za hi chiat, puanzak sawmlekhatte kikim chiat ahi. 16 Puanzak nga a buptuah uh a, puanzak dang suk zong a tuamin a buptuah uhi. 17 Tua puanzak bup khata nawlnung gei ah a bil 50, a bup dang khata nawlnung gei ah zong a bil 50 mah a bawl uhi. 18 Tua puanzak bupte buptuaha bup khat suaksak dingin, sumsanin mekkilh pin 50 a bawl uhi. 19 Tua baan ah, biakbuk tung khuhsawn nadingin, belamtal vun huansan puanzakte a bawl uh a, tua tung khuhsawn nadingin saham vun puanzakte a bawl lai uhi. 20 Biakbuk ading akasia singin singpek tun dingte a bawl uh a, 21 singpekte tong sawm-a sau, tong khat leh a kima za ahi chiat hi. 22 Singpek khat zel ah atun nading a mongdawk nih chiat a kizawnin a bawl uh a, hibangin singpek 20 a bawl uhi. 23 Biakbuk simlam pang adingin, singpek 20 a bawl uh a, 24 tua singpek 20-te tun nading ngun khuakkuak 40 a bawl uh a, singpek khat nuaia a monglawk nihte tun nading khuakkuak nih zel, tua bangin singpek dang teng ading khuakkuak nihnih a bawl uhi. 25 Biakbuk pang langkhat, a mallam pang ading, singpek 20 mah, 26 tua baan ah, tuate tun nading ngun khuakkuak 40, singpek khat nuaia khuakkuak nihnih a bawl uhi. 27 Biakbuk tumlam, a phaitam mong ading singpek guk a bawl uh a, 28 biakbuk phaitam kiu nih ading singpek nih a bawl uhi. 29 Tua singpekte a taw apan a dawn dong kithuap dingin sikkualin a gakkhawm uh a, a kiu nih tuak tua bangin a bawl uhi. 30 Tua bangin, singpek giat leh a tunna ngun khuakkuak 16, singpek khat ading khuakkuak nih zel a om hi. 31 Singpek khil nading akasia singzawlte a bawl uh a, biakbuk pang khata zawl nga, 32 apang langkhat ading zawl nga mah, leh tumlam pang, a phaitam lam ading zawl nga mah a bawl uhi. 33 Tua baan ah, a sung vuh, a laizang, mong khat apan mong khat dong khil paisuak nading zawl laita a bawl uhi. 34 Tua singpekte kham sik pekin a tuam uh a, a zawlte khum nading khamsik bilte a bawl uh a, a zawlte zong kham sikpekin a tuam uhi. 35 Khau dum, khau sandup leh khau sanau khuk leh ziza khau zangngat khuk kigan a tunga khutsiamte khui cherub tawh dantanna puanzak a bawl uhi. 36 Dantanna puanzak zak nading akasia khuam li, kham sikpeka tuam leh a khai nading kham sikkawite tawh a bawl uhi. Tua khuamte tun nading ngun khuakkuak sun thawh zong a bawl uhi. 37 Biakbuk kongkhaka puankhai ding khat, khau dum, khau sandup leh khau sanau a khuk ziza khau zangngat gat khutsiamtaka zep a bawl uh a, 38 a khuam 5-te, puanzak khai nading sikkawite tawh a bawl uhi. Tua khuam lukhu leh a sikkawite kham sikpekin a tuam uh a, a tunna khuakkuakte bel sumsanin a bawl uhi.
Theihpihna Singkuang Bawlna
1 Tua khitin, Bezalel in akasia singin Theihpihna singkuang a bawl a, a dunglam tong nih leh a kima sau, a vailam tong khat leh a kima za, a sanlam tong khat leh a kim a bawl hi. 2 Kham siksiang pekin a sung leh pua a tuam a, a gei kimvel ah kham geivel a bawl suak hi. 3 Kham sikbil li a sung a, tua singkuang khe li ah, pang khat ah nih, pang langkhat ah nih, a bulh hi. 4 Akasia singin zawlte a bawl a, kham sik pekin a tuam hi. 5 Tua zawlte, singkuang panga sikbilte ah a zawn nadingin a khum hi. 6 Ama'n kham siangin khelhna khuhna sin zong a bawl hi. A dunglam tong nih leh a kima sau, a vailam tong khat leh a kima za ahi. 7 Kham sekthawhin cherub nih a bawl a, khelhna thoihna sin mong tuak ah, tua tawh kizoma sakhatin a bawl hi. 8 Cherub khat a mong khat ah, cherub dang, mong langkhat ah, thoihdamna mun tawh kizom sakhatin a bawl hi. 9 Tua cherubte, khelhna khuhna sin khazak khumin, a maitang uh thoihdamna mun lam ngasuka kimaituahin a om uhi.
Pathian Ompihna Tanghou Koihna Dawhkan
10 Ama'n akasia singin dawhkan khat a bawl a, a dunglam tong nih-a sau, a vailam tong khata za, a sanlam tong khat leh a kima sang ahi. 11 Tua dawhkan kham sik pekin a tuam a, kham sikin geivel a bawlsuak hi. 12 Tua baan ah, a gei kimvel ah khutpek chia geivel kisuangsawn a bawl a, tua ah zong khamin a geivel a bawlsuak lai hi. 13 Khamin sikbilte a sung a, dawhkan khe li omna kiu lite ah, a bulh uhi, 14 ahihhangin a geivel nehin a bulh a, tuate dawhkan zawn nading zawlte khumna ahi. 15 Tua dawhkan zawn nadingin, akasia zawlte a bawl uh a, kham sikpekin a tuam hi. 16 Tua dawhkana zat tuium belsuan, kuangte, noute, belkuangte leh dawn thillat sunna bel gonggek khamin a bawl uhi.
Kham Meivak Mung
17 Kham siangin sekthawhin meivak mung zong a bawl hi. A mungpi, a kahiangte, a noute, a nun bulbawkte leh a pakte a kizoma sakhatin a bawl hi. 18 Meivak mungpi kahiang guk a kakhia a, a pang tuak ah thum tuak a kakhia hi. 19 Kahiang khat ah, almon pak bang leh nun bilbawk bang nou thum a om a, tua bangin kahiang dangte ah zong a om a, a mungpi apan kakhia kahiang gukte ah tua bangin a om vek hi. 20 A mungpi pen ah nou li almon pak banga bawl, paknun bulbawk leh pakpalh kithuah a om hi. 21 Kahiang kop khatna kikatna nuai takah a paknun bulbawk khat a om a, kahiang kop nihna kikatna nuai tak ah a paknun bulbawk khat mah a om a, kahiang kop thumna kikatna nuai tak ah paknun bulbawk khat mah a om hi. Kahiang gukte a mungpi apan a kakhia uhi. 22 A paknun bulbawkte leh kahiangte sakhata kizoma kibawl, kham sik siang sekthawha kibawl ahi. 23 Tua baan ah, meivak sagih, meivu siaknate leh meivu kholnate, khamsik siangin a bawl hi. 24 Tua meivak mung leh a vanzatte khempeuh bawl nadingin khamsik siang talen khat a zang hi.
Gimnamtui Halna Maitam
25 Ama'n akasia singin gimnamtui halna maitam a bawl a, a dunglam tong khata sau, a vailam tong khata za, a dung a vai kikim, a sanlam tong niha sang ahi a, a kite tawh kizoma sakhata kibawl ahi, 26 Kham sik siang pekin maitam tung, a pangte leh a kite a tuamvek hi. Khamsik mahin a kimvelin a geivel a bawlsuak hi. 27 A pang nih-a a kizawnin, a kiu nihte ah, a geivel nuai ah, kham sikbil nih nih a bawl a, tuate gimnamtui halna maitam zawnna zawlte kikhumna ahi. 28 Akasia singin tua zawlte a bawl a, kham sikpekin a tuam hi.
Nilh Sathau leh Gimnamtui
29 Ama'n nilh sathau siangthou a bawl a, gimnamtui siangthou leh namtui mahmah a bawl a, gimnamtui bawlsiamte bawl bangbangin a bawl hi.
Haltum Thillatna Maitam
1 Ama'n akasia singin, haltum thillatna maitam a bawl a, a dunglam tong nga-a sau, a vailam tong nga-a za, a dung a vai kikim, a sanlam tong thum ahi. 2 A kiu lite ah a kite a bawl a, tua a kite leh a maitam kizomin sakhat ahi. Tua maitam bel sumsan sikpekin a tuam hi. 3 Ama'n tua maitama tuium belsuan khempeuh, suahdulte, sisan thehna keupite, sikkhutte leh meiluah kuangte sumsanin a bawl hi. 4 Maitam adingin meichihna sumsan len a bawl a, a gei nuai, a taw apan a kimchiang ah a koih hi. 5 Tua meichihna sumsan len kiu lite ading, a zawlte khum nadingin, sunthawh sumsan sikbil li a bawl hi. 6 Akasia singin zawnna zawlte a bawl a, sumsan pekin a tuam hi. 7 Tua zawlte bel, maitam panga sikbiltea khuma a zawnna ahi. Singpekin a sung hawmin tua maitam a bawl hi.
Sumsan Tuikuang
8 Kihoupihna Puanbuk kongkhaka nasem numeite' sumsan limlangte apanin sumsan tuikuang leh a tunna sumsan khete a bawl hi.
Biakbuk Huang
9 Tua baan ah, ama'n biakbuk huang a bawl hi. A simlam pang tong 100-a sau ahi a, huang umna puanzakte bel ziza khau zangngat khuk kigan ahi. 10 Tua huang umna puanzak adingin khuam 20 leh a tunna sumsan 20 a om a, khuama puanzak khaina sikkawite leh a khuam hennate nguna kibawl ahi. 11 A mallam pang huang tong 100-a sau ahi a, puanzak khaina khuam 20 leh a tunna sumsan 20 a om hi. Khuama puanzak khaina sikkawite leh khuam hennate nguna kibawl ahi. 12 Tumlam pang huang tong 50-a za ahi a, puanzak khaina khuam sawm leh a tunna sawm a om hi, Khuama puanzak khaina sikkawite leh khuam hennate nguna kibawl ahi. 13 Suahlam pang huang tong 50-a za ahi. 14 Huangsung lutna kong vang pang khat puanzak khaite tong sawmlenga-a sau ahi a, khuam thum leh a tunna thum a om hi. 15 Kongvang pang lang khat ah tua bang mahin puanzak khaite tong sawmlenga a sau ahi a, khuam thum leh a tunna thum a om hi. 16 Huang kimvela a umna puanzak khaite khempeuh gat thawh puanmalngat ahi. 17 Khuam tunnate sumsan ahi a, khuama puanzak khaina sikkawite leh khuam hennate nguna bawl ahi a, khuam lukhute ngun sikpeka tuam ahi. Tua huang umna khuam hennate zong nguna bawl ahi. 18 Huangsung lutna kelkong puanzak pen khau dum, khau sandup, khau sanau leh ziza khau zangngat khuk kigan ahi a, khutsiamtaka zep ahi. A kongvang puanzak tong 20-a sau ahi a, a sanlam, huang umna puanzak khaite bangin tong nga ahi. 19 Tua baan ah, khuam li leh a tunna sumsan li a om a, a sikbilte leh a hennate ngun ahi a, khuam lukhute ngun sikpeka tuam ahi. 20 Biakbuk kaihna khetphimte leh a huang kaihna khetphimte khempeuh sumsan ahi.
Biakbuk Lamna Vanzatte
21 Biakbuk, tua Theihpihna puanbuk lamna-a vanzatte tam dan hibang ahi. Levite kama Mosi thupiak, siampi Aron' tapa Ithamar makaihna nuaia kichiamteh ahi. 22 Tangtawn Toupa'n bawl ding chi-a Mosi kianga a thupiakte khempeuh, Judah nama Hur' tapa Uri' tapa Bezalel in a bawl hi. 23 Amah tawh semkhawm Dan nama Ahisamak' tapa Aholiab ahi a, amah a khuak lam siam leh thil pian ding dan a zia gelsiam, khau dum leh sandup leh a sanau leh ziza khau zangngat gan siam ahi. 24 Mun siangthou lam nadinga kizang kham thilpiakte talen 29 leh mun siangthou shekel bukna dana shekel 730 ahi. 25 Kisimpina-a kisim mipite lak apan kingah, ngun ahih leh talen 100 leh mun siangthou shekel bukna dana shekel 1,775 ahi. 26 Kisimpina-a kisim, kum 20 chiang tunglam pasal khat zela kila beka khat ahi. Beka khat bel mun siangthou shekel bukna dana shekel kim khat ahi. Pasal 603,550 apan kila ahi. 27 Ngun talen 100 apanin biakbuk khuam tunna khuakkuakte leh dantanna puanzak tunnate sunthawh ahi a, a vekin talen 100-in khuakkuak 100 a kisung a, talen khat zelin khuakkuak khat a bawl hi. 28 Tua ban ah, ngun shekel 1,775 apanin khuama vankhai sikkawite, khuamlukhu tuamna leh gaknate a kibawl hi. 29 Sumsan thilpiakte talen 70 leh shekel 2,400 ahi. 30 Tua apanin, Kihoupihna Puanbuk kongpi khuam tunnate, sumsan maitam leh tua ading sumsan len leh tua maitam tuium belsuante khempeuh a kibawl hi. 31 A kimkot huang umna khuam tunnate, huang kongpi khuam tunnate, biakbuk kaihna khetphimte leh a huang umna kaihna khetphimte khempeuh sumsana kibawl ahi.
Siampi Puansilhte
1 Khau dum leh khau sandup leh a san-au kiganin mun siangthoua nasep nading siampi puansilhte a bawl uh a, Aron' puansilh siangthoute a bawl uhi. Tangtawn Toupa'n Mosi thu a piak banga kibawl ahi.
Siampi' Puannakzem
2 Kham khau leh khau dum, khau sandup leh khau sanau leh, ziza khau zangngat a khuka kigan siampi puanakzem a bawl uhi. 3 Tua khamsik pachikin a sek uh a, zang ngat chikchikin a phelkhap uh a, tua khaudum, khau sandup leh khau sanau leh ziza khau zangngat kigan ah, khutsiamtakin, a zem uhi. 4 A nunglam leh malam tawh kaih-khawm nading, a liangzang ah a kaihna a bawl uh a, a tunglam gei tuak a khihkhawm uhi. 5 Siamneltaka gat, siampi puanakzem tunga puanduang kawnggak zong kham khau leh khau dum leh khau sandup leh khau sanau leh ziza khau zangngat khuka kigan a bawl uhi. Tangtawn Toupa'n Mosi thu a piak banga kibawl ahi. 6 Oniks suangte, a phum nadinga kibawl kham kuakte ah a bulh uhi. Tuate tung ah suai namna zungbuh khuak banga khuakin Israel tapate' minte a gelh uhi. 7 Bezalel in tuate siampi puanakzem liangzang ah a khih a, Tangtawn Toupa'n Mosi thu a piak bangin, Israel' tapate theih gigena ahi uhi.
Siampi Awmphaw
8 Amaute'n siampi puanakzem bangin, khutsiamte'n siamneltaka bawl awmphaw a bawl uh a, kham khau leh khau dum leh khau sandup leh khau san-au leh ziza khau zangngat a khuka kigan a bawl uhi. 9 Tua awmphaw bel, a khepa a dung a vai kikimin a bawl uh a, a khepin khutpek chia ahi. 10 Tua tung ah vual li-in suangmanphate a koih uh a, vual khatna ah rubi suang, topaz suang leh beril suang a koih uhi. 11 A vual nihna ah sardi suang, safaiar suang leh daimon suang a koih hi, 12 A vual thumna ah, zasin suang, ageit suang leh amethi suang a koih uhi. 13 A vual lina ah, khrusolait suang, oniks suang leh jaspar suang a koih uhi. 14 Israel tapate' min zah banga suang sawmlenih kikoih ahi a, suai namna zungbuh khuak banga khuaka, Israel nam sawmlenih, suang khat tunga min khat chiat, kigelh ahi. 15 Tua awmphaw adingin, kham siang khainiang phek bangbang, khainiangte a bawl uhi. 16 Kham kuak nih leh kham sikbil nih a bawl uh a, tua sikbilte, awmphaw tunglam kiu nih ah a bulh uhi. 17 Tua awmphaw tunglam kiute-a om sikbilte ah tua khainiang phek nihte a khum uhi. 18 Khainiang phek mong nihte, tua kham kuak nihte ah a khih uh a, siampi puanakzema liang-kaihna ah, a anglam pang ah a koih uhi. 19 Tua baan ah, kham sikbil nih dang a bawl uh a, awmphaw nuailam kiu nih dang ah a sunglam, siampi puanakzem tawh kisukha lam ah a bulh hi. 20 Tua baan ah kham sikbil nih dang mah a bawl uh a, liangkaihna khaute tung ah, a anglam ah, siampi puanakzem nuai ah, puanakzem kawnggak hoihtaka kigan tawh a kimatna tak ah a bulh uhi. 21 Awmphaw-a sikbilte leh siampi puanakzema sikbilte, khau dumin a khihkhawm uh a, siampi puanakzem kawnggak hoihtaka kigan tung tak ah a om a, siampi puanakzem apan awmphaw a kiveikhiak louh nading ahi. Tangtawn Toupa'n Mosi thu a piak banga kibawl ahi.
Siampi Puansilh Dangte
22 Bezalel in siampi puanaktual, a veka dum suaka kigan a bawl hi. 23 Tua puanaktual laizang ah a ngawngvang, a keklouh nadinga a ngawngpehna nei, a bawl hi. 24 Tua puanaktual mong ah khaudum leh khau sandup leh khau sanau khukin mimthei gahte a bawl hi. 25 Kham sik siangin longte a bawl uh a, tua puanaktual monga mimthei gahte kal ah, a koih uh a, 26 long khat leh mimthei khat kikalhelhin, puanaktual mong ah a om suak hi. Tangtawn Toupa'n Mosi thu a piak banga, siampi nasep chianga silh ding puanaktual kibawl ahi. 27 Aron leh a tapate adingin, puanmalngat siamneltaka kiganin, puanaktual tungsilhte a bawl uhi. 28 Puan malngat dialkhipte, puan malngat lugakna dialte, puanmalngat pheituam tomte zong a bawl uhi. 29 Tua lugakna dialte bel khaudum, khau sandup leh khau sanau leh ziza khau zangngat a khuka kigan puan malngata kibawl, kilawmtaka zep ahi. Tangtawn Toupa'n Mosi thu a piak banga kibawl ahi. 30 Khamsik siang pekin siampi-lukhu siangthou a bawl uh a, suainamna zungbuh khuak bangin khuakthawhin: SIANGTHOUNA Tangtawn TOUPA-A AHI chiin a gelh uhi. 31 Tua kham sik pek ah khaudum a khih uh a, tuain dialkhip tung ah tua siampilukhu a henbelh uhi. Tangtawn Toupa'n Mosi thu a piak banga a bawl uh ahi.
Mosi in Biakbuk Vel
32 Tua bangin, Kihoupihna Puanbuk bawlna khempeuh zawh ahita a, Tangtawn Toupa'n Mosi thu a piak bangin, Israel tate'n bangkim a bawl vek uh a, a zousiangta uhi. 33 Amaute'n tua biakbuk, Mosi' mai ah hon pua uh a, a puanbuk leh a vanzatte khempeuh, mekkilhte, singpekte, zawlte, khuamte, a tunnate, 34 a tungkhuhna belamtal vun huansante, a tungkhuhna saham vunte, a tungkhuhna puanzak, 35 Theihpihna singkuang leh a zawnna zawlte leh thoihdamna mun, 36 dawhkan leh a vanzatte, Pathian Ompihna tanghou, 37 kham siang meivak mung leh meivakte tawh lep ding bangtaka kilemsa, a vanzat khempeuhte leh a det sathau, 38 kham maitam, nilh sathau, gimnamtui, biakbuk kongkhak puanzak, 39 sumsan maitam leh a sumsan len, a zawnna zawlte, a vanzat tuium belsuante khempeuh, tuikuang leh a tunna khete, 40 huang umna puanzakte, a khuamte leh a tunnate, huang umna puanzak, a khaute, a sik khetphimte, biakbuk, tua Kihoupihna Puanbuk sung nasep nading vanzatte khempeuh, 41 mun siangthoua zat ding siampi nasepna puansilhte, siampi Aron' puansilh siangthoute leh a tapate' siampi nasepna puansilh gat thawhte tawh, a vekin hon pua uhi. 42 Tangtawn Toupa'n Mosi thu a piak bangbangin, Israel tate'n na khempeuh a semkhinta uhi. 43 Tua khitin, Mosi in na khempeuh a vel a, Tangtawn Toupa' thupiak bangbangin a semkhin taktak uh, chih a mu hi. Tua khitin, Mosi in amaute a vualzawl hi.
Biakbuk Tunkhiakna
1 Tua teng khitin, Tangtawn Toupa'n Mosi a houpih a: 2 Kha khatna, ni masapen ni-in, biakbuk, tua Kihoupihna Puanbuk na tungkhe ding ahi. 3 A sung ah Theihpihna singkuang na koih ding a, dantanna puanzakin tua singkuang na deidan ding ahi. 4 Dawhkan na lalut ding a, a tung ah bangkim a kilep ding bangtakin na lem ding ahi. Meivak mung na lalut ding a, meivakte na tung ding ahi. 5 Theihpihna singkuang mai ah, gimnamtui halna kham maitam na koih ding a, biakbuk kongkhak puanzak na khai ding ahi. 6 Tua khit chiangin, biakbuk, tua Kihoupihna Puanbuk kongkhak mai ah, haltum thillatna maitam na tung ding ahi. 7 Kihoupihna Puanbuk leh tua maitam kal ah, tuikuang na koih ding a, a sung ah tui na sung ding ahi. 8 A kimkotin huang na um ding a, huang sung lutna kelkong ah puanzak na khai ding ahi. 9 Tua khit chiangin, nilh sathau na la ding a, biakbuk leh a sunga om thil bangkim thau na nilh ding a, tua biakbuk siangthoua sehtuamna na bawl ding ahi. 10 Haltum thillatna maitam leh a vanzat tuium belsuante khempeuh nilh sathau na nilh ding a, siangthoua sehtuamna na bawl ding ahi. Tua bangin, maitam siangthou a suak ding hi. 11 Tuikuang leh a tunna khete nilh sathau nilhin, siangthoua sehtuamna na bawl ding ahi. 12 Tua khit chiangin, Aron leh a tapate, Kihoupihna Puanbuk kongkhak ah na paipih ding a, tuiin amaute na sil ding ahi. 13 Puansilh siangthoute Aron na silhsak ding a, nilh sathau amah na nilh ding a, siangthoua sehtuamna na bawl ding a, tua bangin, siampi-a pangin ka nna a sem ding ahi. 14 Aron' tapate na paipih ding a, puansilh siangthoute na silhsak ding ahi. 15 A pa uh nilh sathau na nilh bangin, amaute zong nilh sathau na nilh ding a, kei adingin siampite ahi ding uh a, ka nna a sem ding uhi. Ahang bel, nilh sathau nilh a tanna uh khangsawn sawna siampi hihdenna ahi ding ahi, a chi hi. 16 Tua bangin, Mosi in a hih a, Tangtawn Toupa'n thu a piak khempeuh a hih vek hi. 17 Tua bangin, a kum nihna, a kha khatna, a ni masapen ni-in, Mosi in biakbuk a tungkhia hi. 18 Mosi in biakbuk a tungkhia a, a khuakkuakte a omna ding munte ah a koih a, singpekte a tung a, a zawlte a khum a, a khuamte a phut hi. 19 Tua khitin, biakbuk tung ah puanzak a zak a, tua tung ah biakbuk tung khuhsawnna a khuh a, Tangtawn Toupa'n thu a piak bangbangin a hih hi. 20 Mosi in Theihpihna suangpekte a la a, singkuang sung ah a koih hi. A zawnna zawlte tua sikbilte ah a khum a, singkuang tung ah a sin, thoihdamna mun a koih hi. 21 Tua singkuang biakbuk sung ah a lalut a, dantanna puanzak a khai a, Tangtawn Toupa' thupiak bangin Theihpihna singkuang a deidan hi. 22 Mosi in Kihoupihna Puanbuk sung ah, a mallam pang ah, dantanna puanzak pua ah, dawhkan a koih a, 23 Tangtawn Toupa' thupiak bangin tua dawhkan tung ah, Tangtawn Toupa' mai ah, tua tanghoute a vualin a koih hi. 24 Kihoupihna Puanbuk sung ah, dawhkan zawn ah, a simlam pang ah, meivak mung a tung a, 25 Tangtawn Toupa'n Mosi thu a piak bangin, Tangtawn Toupa' mai ah meivakte a de hi. 26 Kihoupihna Puanbuk sung ah, dantanna puanzak mai ah, kham maitam a koih a, 27 Tangtawn Toupa'n Mosi thu a piak bangin, gimnamtui a hal hi. 28 Tua khitin, biakbuk kongkhak ah puanzak a khai hi. 29 Kihoupihna Puanbuk kongkhak mai ah, haltum thillat maitam a koih a, tua tung ah, Tangtawn Toupa'n Mosi thu a piak bangin, haltum thillat leh anvui nei thillat a lan hi. 30 Kihoupihna Puanbuk leh maitam kal ah tuikuang a koih a, a sung ah kisil nading tui a sung a, 31 tua tui ah Mosi leh Aron leh a tapate'n khut leh khe a sil uhi. 32 Amaute Kihoupihna Puanbuka va-hawh leh maitam vanaiha a lut ding chiangun, Tangtawn Toupa'n Mosi thu a piak bangin, a kisil uhi. 33 Tua khitin, biakbuk leh maitam kimkot ah, huang a bawl a, huangsung lutna kelkong puanzak a khai hi. Tua bangin, Mosi in tua nasep a semkhinta hi.
Pathian' Thupina
34 Tua khitin, meipi in Kihoupihna Puanbuk a khuh a, Tangtawn Toupa' thupina in biakbuk a luahdimsak a, 35 Kihoupihna Puanbuk tung ah meipi a om hi. Tua banga Tangtawn Toupa' thupina in biakbuk sung a luahdimsak manin, biakbuk sung ah Mosi a lut thei kei hi. 36 Biakbuk tung apan tua meipi a tungkah chiangin, Israel tate a khualzinna uah maban a sawn uhi. 37 Meipi a tungkah louh chiangin, a tungkahni a tun mateng khualzin louin a om uhi. 38 Amaute' khualzin sung khempeuh, Israel mipite khempeuh' mitmuhin, sun chiangin Tangtawn Toupa' meipi biakbuk tung ah a om a, zan chiangin meikuang a om hi.
Haltum Thillat
1 Tangtawn Toupa'n Mosi a sam a, Kihoupihna Puanbuk apan amah a houpih a: 2 Israelte kiang ah thu gen inla: Na lak ua kuapeuh in Tangtawn Toupa maia thillat hon tawi chiangin, tua thillat dingin bawnghon laka hiam, belam leh kelhon lak apan hiam ganta hon tawi ding ahi. 3 Tua thillat pen bawnghon lak apan haltum thillat a hih leh, a pa genbaanglou a lan ding ahi. Tua Kihoupihna Puanbuk lutna ah a lan ding ahi, tuachi-in Tangtawn Toupa' san theih ahi ding. 4 Thillanpa in tua haltum thillat ganta lutung ah a khut a nga ding ahi, tuachi-in, ama' adinga khelhna khuhna bawl nadingin, ama' sik leh tangin a kisang ding hi. 5 Ama'n Tangtawn Toupa' mai ah tua bawngtaltuai a gou ding ahi. Aron' tapa siampite'n a sisan hon tawiin, tua Kihoupihna Puanbuk lutna a maitam pangte a theh ding uh ahi. 6 Ama'n tua haltum thillat ganta a vunhawk ding a, a sa a sem ding ahi. 7 Aron' tapa siampite'n maitam tung ah mei a tawh ding uh a, tua mei tung ah sing a lem ding uh ahi. 8 Tua khit chiangin, Aron' tapa siampite'n tua sa semnente a lu leh a thau tawh maitam tunga meia kuang sing tung ah a lem ding uh ahi. 9 Ama'n a sungkua teng leh a khete tuiin a sawpsiang ding a, siampi in tuate a vekpi-in maitam tung ah a haltum ding hi. Haltum thillat, meia hal thillat, Tangtawn Toupa' lungkimna gim namtui ahi. 10 Tua thillat pen belam leh kelhon lak apan belam hi-in kei hita leh, haltum thillat ahih leh, a pa genbaanglou ahi ding ahi. 11 A laanpa'n Tangtawn Toupa' mai ah, maitam mallam pang ah tua ganta a gou ding ahi. Aron' tapa siampite'n maitam pang kimkot tua sisanin a theh ding uh ahi. 12 Ama'n a sa a semnen ding a, siampi in tuate, a lu leh a thau tawh, maitam tunga meia kuang sing tung ah a lem ding ahi. 13 A sungkua teng leh a khete tuiin a sawpsiang ding a, siampi in a vekpi-in, maitam tung ah a haltum ding ahi. Haltum thillat, meia hal thillat, Tangtawn Toupa' lungkimna gim namtui ahi. 14 Tangtawn Toupa' maia thillat pen vasa haltum thillat a hih leh, vakhu hiam, kawlvakhu nou hiam a lan ding ahi. 15 Siampi in tua vasa maitam ah hon tawi ding a, a lu a hektankhe ding a, maitam tung ah a haltum ding ahi. A sisan bel maitam pang ah a kaikangsak ding ahi. 16 A gongkholh bel, a sunga om teng tawh, maitam suahlam panga vut buakna ah a pai ding ahi. 7 Tua vasa a kha tuak laikhe siang louin, a laiphel ding a, siampi in maitam tunga meia kuang sing tung ah a haltum ding ahi. Haltum thillat, meia hal thillat, Tangtawn Toupa' lungkimna gim namtui ahi.
An thillat
1 Mi khat peuh in Tangtawn Toupa' maia an thillat hon tawi chiang in, a thillat pen anvui nei dimdem ahi ding ahi. Sathau a buak ding a, a tung ah gim namtui a koih ding a, 2 Aron' tapa siampite kiang ah hon tawi ding ahi. Siampi in tua anvui nei leh sathau kihel leh gim namtui teng tawh, khutdim khat a pham ding a, maitam tung ah theihgigena hi dingin a haltum ding ahi. Hiai meia thillat Tangtawn Toupa' lungkimna gim namtui ahi. 3 Tua an thillat vai teng Aron leh a tapate' tan ding ahi. Hiai bel, Tangtawn Toupa' maia meia thillat apan sehkhiak siangthoupen ahi. 4 An thillat, thukkhuka em non tawi leh, anvui nei dimdem apan silngou sawh louh, sathau tawh kihel, a beua bawl ahi ding ahi. Ahih kei leh, a peineu silngou sawh louh sathaua zut ahi ding ahi. 5 Na an thillat pen belsunga kan ahih leh, anvui nei dimdem, sathau tawh kihel, silngou sawhlouh ahi ding ahi. 6 Balnen inla sathau buak in An thillat ahi. 7 Na an thillat pen bela kihuan ahih leh, anvui nei dimdem, sathau tawh kihel ahi ding ahi. 8 Hibanga kibawl an thillat, Tangtawn Toupa' mai ah hon tawi inla, siampi khut ah pia in. Ama'n maitam ah a tawi ding ahi. 9 Ama'n tua an thillat apan theihgigena sehkhiak a lakhe ding a, maitam tung ah, meia thillatin a haltum ding ahi. Tua bel, Tangtawn Toupa' lungkimna gim namtui ahi. 10 Tua an thillat vai teng bel Aron leh a tapate tan ding ahi. Tangtawn Toupa' maia meia thillat apan sehkhiak siangthoupen ahi. 11 Tangtawn Toupa' maia an thillat non tawi peuhmah, silngou sawh louh ahi ding ahi. Ahang bel, Tangtawn Toupa' maia meia thillat peuhmah ah silngou hiam, khuaizu hiam hel ding ahi kei hi. 12 Tuate, Tangtawn Toupa' mai ah gahmasa thillatin non tawi thei, ahihhangin, gim namtui hi dinga maitam tunga hal ding ahi kei hi. 13 Na an thillatte bel, chi na sawh vek ding ahi. Na an thillat apan na Pathian thukhun' chi na pawsiah ding ahi kei. Na thillatte chi sawh in. 14 Tangtawn Toupa' maia an thillat, gahmasa thillata non tawi leh, a tangte sukpek, meia haimin hiam, ahih kei leh aminsa hiama na hon tawi ding ahi. 15 Tuate tung ah sathau leh gim namtui zong koih in, an thillat ahi, 16 Siampi in tua buhtang sukpek lak apan theihgigena sehkhiak, sathau leh gim namtui tawh, a lakhe ding a, Tangtawn Toupa' mai ah meia thillatin a lan ding ahi.
Lemna Thillat
1 Mi khat peuh' thillat pen, lemna thillat ahih a, bawnghon lak apan ganta khat, a pa hi-in, a nu hiam hita leh, Tangtawn Toupa' mai ah ganta genbaanglou a lan ding ahi. 2 Ama'n a ganta lu tung ah a khut a nga ding a, Kihoupihna Puanbuk lutna ah a gou ding ahi. Tua khit chiangin, Aron' tapa siampite'n a sisanin maitam pang a kimkotin a theh ding uh ahi. 3 Tua lemna thillat apan Tangtawn Toupa' maia meia thillat ding a hon tawi ding ahi, Tua dingin, a sungthau teng, a hih kei leh, tuate tawh kizom teng, 4 a kailing nihte leh a phuka tuate tuam a thaute leh a sin tuam teng, a kailing tawh lakkhiak khawm teng ahi ding ahi. 5 Tua khit chiangin, Aron' tapate'n maitam tunga meia kuang sing tung ah a haltum ding uh ahi. Hiai meia thillat ahi a, Tangtawn Toupa' lungkimna gim namtui ahi. 6 Belam leh kelhon lak apan ganta, Tangtawn Toupa' maia lemna thillat ding a lat leh, a pa hiam, a nu hiam, genbaanglou ahi ding ahi. 7 Belamnou a lat leh, Tangtawn Toupa' maia tawi ding ahi. 8 Ama'n a ganta' lutung ah a khut a nga ding a, Kihoupihna Puanbuk mai ah a gou ding ahi. Tua khit chiangin, Aron' tapate'n a sisanin maitam pang teng, a kimkotin a theh ding uh ahi. 9 Tua lemna thillat apan Tangtawn Toupa' maia meia thillat ding a hon tawi ding ahi. Tua dingin, a thau, a ngum guh apan atkhiak a mei tuam teng, a sungthau teng, ahih kei leh, tuate tawh kizom teng, 10 a kailing nihte leh a phuk sunga tuate tuam a thaute leh a sin tuam teng, a kailingte tawh lakkhiak khawm teng ahi ding ahi. 11 Siampi in tuate maitam tung ah an thillatin a haltum ding ahi. Hiai Tangtawn Toupa' maia thillat ahi. 12 Tua thillat pen kei a hih leh, Tangtawn Toupa' maia hon tawi ding ahi. 13 Tua ganta lu tung ah a khut a nga ding a, Kihoupihna Puanbuk mai ah a gou ding ahi. Tua khit chiangin, Aron' tapate'n a sisanin maitam kimkot ah a theh ding uh ahi. 14 Tua thillat apan Tangtawn Toupa' maia meia thillat ding a lakhe ding ahi. Tua dingin, a sungthau teng, ahih kei leh tuate tawh kizom teng, 15 a kailing nihte leh a phuk sunga tuate tuam a thaute leh a sin tuam teng, a kailingte tawh lakkhiak khawm teng ahi ding ahi. 16 Siampi in tuate maitam tung ah an thillatin a haltum ding ahi. Hiai Tangtawn Toupa' lungkimna gim namtui ahi. A thau khempeuh Tangtawn Toupa a ahi. 17 Hiai na tenna peuh ua, khangsawn sawn adinga omden ding thuseh ahi. A thau hiam, sisan himhim hiam na ne ding uh ahi kei hi, chi in, a chi hi.
Khelhna Thillat
1 Tangtawn Toupa'n Mosi a houpih a: 2 Israelte kiang ah thu gen inla: Mi khat peuh, tup mawng hilou a, a khelh khak a, Tangtawn Toupa' thupiakte khat peuh in a kham thil khat peuh a hih khak chiangin 3 Thaunilhsa siampi in a khelh a, mipite tunga tua khelhna a tut leh, a khelhna thillat dingin bawngtaltuai genbaanglou khat, Tangtawn Toupa' maia hon tawi ding ahi. 4 Kihoupihna Puanbuk lutna ah tua bawngtaltuai hon keng ding ahi. Tua ganta lutung ah a khut a nga ding a, Tangtawn Toupa' mai ah a gou ding ahi. 5 Tua khit chiangin, thaunilhsa siampi in tua bawngtal sisan bangzah hiam a la ding a, Kihoupihna Puanbuk sung ah a tawi lut ding ahi. 6 A khut zung sisan ah a diah ding a, tua mun siangthou puanzak mai ah, Tangtawn Toupa' mai ah sagihvei a theh ding ahi. 7 Tua baan ah, tua siampi in sisan bangzah hiamin Kihoupihna Puanbuk sunga Tangtawn Toupa' maia om gim namtui halna maitam kite ah a tat ding ahi. Bawngtaltuai sisan om lai teng bel, Kihoupihna Puanbuk lutna-a haltumna maitam bul ah a sungbaw ding ahi. 8 Ama'n khelhna thillat bawngtal apan a thau teng a sungthau, ahih kei leh, tuate tawh kizom teng, 9 a kailing nihte leh a tuam a thaute leh a sin tuamte, a kailingte tawh a lakhe khawm ding ahi. 10 Lemna thillata lat bawngtal apan a thau lakkhiak bangin a lakhe ding ahi. Tua khit chiangin, siampi in tuate haltum thillatna maitam tung ah a haltum ding ahi. 11 Ahihhangin, bawngtal vun leh a sa teng, a lu leh a khete, a sungkua leh a ek tawh, 12 tua bel, tua bawngtal sa om lai teng chihna ahi a, giahphual pawlama Mun Siangthoua ngaih tua vut buakna tung ah sing chih-in a haltum ding ahi. 13 Israelte'n a vekpi-un tup mawng hiloua Tangtawn Toupa' thupiakte khat peuh in a kham thil khat peuh a hih khak uleh, tua thil amaute'n phawk kei mah le uh, a mawh veve uhi. 14 Tua khelhna ahih khak uh a phawkkhiak chiangun, tua mipite'n khelhna thillat dingin bawngtaltuai hon keng ding uh a, Kihoupihna Puanbuk mai ah a pe ding uh ahi. 15 Tua mipite' upate'n Tangtawn Toupa' mai ah, tua bawngtal lu tung ah khut a nga ding uh a, Tangtawn Toupa' mai ah a kigou ding ahi. 16 Tua khit chiangin, seh-a om siampi pen in tua bawngtal sisan bangzah hiam, Kihoupihna Puanbuk sung ah a tawilut ding ahi. 17 Tua sisan ah a khutzung diah in, tua puanzak mai ah, Tangtawn Toupa' mai ah sagihvei a theh ding ahi. 18 Tua sisan bangzah hiam mah, Kihoupihna Puanbuk sunga Tangtawn Toupa' maia om maitam kite ah a tat ding ahi. Sisan omlai teng bel Kihoupihna Puanbuk lutna ah, haltum thillatna maitam bul ah a sungbaw ding ahi. 19 Bawngtal thau teng a lakhe ding a, maitam tung ah a haltum ding a, 20 khelhna thillat bawngtal a sai bangin, tua bawngtal zong a sai ding ahi. Hibangin, siampi in amaute adingin khelhna khuhna a bawlsak ding a, amaute ngaihdam ahi ding uhi. 21 Tua khit chiangin, tua bawngtal pen giahphual pawlam ah a pawkhe ding a, bawngtal masa a haltum bangin a haltum ding ahi. Hiai mipite adinga khelhna thillat ahi. 22 Makai khat in tupmawng hilou-a a khelh a, Tangtawn Toupa a Pathian' thupiakte khat peuh in a kham thil khat peuh a hih khak leh, a mawh ahi. 23 Khelhna a hih pen phawksaka a om chiangin, a thillat dingin keltal genbaanglou khat hon kai ding ahi. 24 Ama'n keltal lutung ah a khut a nga ding a, Tangtawn Toupa' maia haltum thillat latna mun ah a gou ding ahi. Khelhna thillat ahi. 25 Tua khit chiangin, siampi in khelhna thillat sisan bangzah hiam a khuttal-in a la ding a, haltum thillat latna maitam kite ah a tat ding a, a dang teng tua haltumna maitam bul ah a sungbaw ding ahi. 26 Ama'n a 27 thau teng lemna thillat thau a haltum bangin, maitam tung ah a haltum ding ahi. Hibangin, siampi in tua mipa' khelhna adingin khuhna a bawlsak ding a, amah ngaihdam ahi ding hi. Mipite laka mi khat peuh tup mawng hilou-a a khelh a, Tangtawn Toupa' thupiakte khat peuh in a kham thil a hih leh, a mawh ahi. 28 A khelhna thilhih phawksak ahih chiangin, khelhna thilhih adinga a thillat dingin, kelpi genbaanglou a hon kai ding ahi. 29 Ama'n tua khelhna thillat lutung ah a khut a nga ding a, haltum thillatna mun ah khelhna thillat a gou ding ahi. 30 Tua khit chiangin, siampi in a khuttal in a sisan a la ding a, haltum thillatna maitam kite ah a tat ding a, a dang teng bel, tua maitam bul ah a sungbaw ding ahi. 31 Lemna thillat apan a thaute a kilakkhiak bangin, a thau teng a lakhe ding a, siampi in Tangtawn Toupa' maia gim namtui hi dingin maitam tung ah a haltum ding ahi. Hibangin, siampi in ama' adingin khuhna a bawlsak ding a, ngaihdam ahi ding hi. 32 Khelhna thillat dinga belamnou a hon tawi leh, a nu genbaanglou a hon tawi ding ahi. 33 Ama'n tua thillat lutung ah a khut a nga ding a, khelhna thillat hi dingin, haltum thillat kigawhna mun ah tua gan a gou ding ahi. 34 Tua khit chiangin, siampi in a khuttal-in tua khelhna thillat sisan a la ding a, haltum thillat latna maitam kite ah a tat ding a, a dang teng bel, tua maitam bul ah a sungbaw ding ahi. 35 A thau teng, lemna thillat belam apan a thau teng a kilakkhiak bangin, a lakhe ding a, siampi in Tangtawn Toupa' maia maitam tunga meia thillat tung sawn ah a haltum ding ahi. Hibangin, siampi in, tua mipa adingin khelhna khuhna a bawlsak ding a, amah ngaihdam ahi ding hi.
1 Mi khat peuh in mi khat khelhna tawh kisaia vantang' hekna thu a zak a, a muh gegu leh a zak gegu tawh kisaia theihpihna thu gen khe loua a khelh leh tua genkhiak louhna mawh a khu din|; ahi. 2 Ahih kei leh, mi khat peuh in thil siangloua ngaih thil khatpeuh, gamsa sianglou luang hiam, ganta sianglou hiam, leia bokvak ganhing sianglou luang hiam a lawnkhak leh, ama'n phawk kei mah leh, a sianglou a suak a, a mawh ahi. 3 A hih kei leh, mihing' sianlouhna amah sianglou suaksak thei thil zong a lawnkhak leh, ama'n phawk kei mah leh, a phawk chiangin a mawh ahi ding ahi. 4 Mi khat peuh in thil khat peuh, a sia hiam, a pha hiam hita leh, hih dinga pilvanglou taka kichiamna a bawl leh, pilvanglou taka kichiam theihna thil peuhpeuh ah, ama'n phawk kei mah leh, tua thil a phawk chiangin a mawh ahi ding ahi. 5 Hibangte-a mi khat peuh a mawh leh, bangchi banga na khial hiam, chih a kiphuang ding ahi. 6 Tua bang khelhna a na hihtak manin, ama'n belam leh kelhon lak apan belamnou nu hiam, kei nou hiam, a mawhna thillat dingin Tangtawn Toupa' mai ah a hon tawi ding ahi. Siampi in ama' khelhna ading, ama' adingin khuhna a bawlsak ding ahi. 7 Ama'n belamnou a neih zawh kei leh, vakhu nih hiam, kawl vakhu nih hiam, Tangtawn Toupa' mai ah a hon tawi ding a, a khelhna gawtna ahi ding hi. Khat pen khelhna thillat ding ahi ding a, a dang khat pen, haltum thillat ding ahi ding hi. 8 Ama'n tuate siampi' mai ah a hon tawi ding a, siampi in khelhna thillatin khat a lan masa ding ahi. A ngawng hektankhiak louhin a hektan ding a, 9 tua khelhna thillat sisan khenkhat maitam pang a theh ding ahi. Sisan dangte tua maitam bul ah a kaikangsak ding ahi. Khelhna thillat ahi. 10 Siampi in a dang teng bel, a lat ding dan seh bangbangin, haltum thillatin a lan ding a, khelhna a na hihtak tawh kisaiin, amah adingin khuhna a bawlsak ding a, amah ngaihdam ahi ding hi. 11 Ahihhangin, ama'n vakhu nih, ahih kei leh, kawlvakhu nih a neih zawh kei leh, a khelhna thillat dingin, anvui nei ephah khat sehsawm suah seh khat a hon tawi ding ahi. A tung ah sathau a koih ding ahi kei a, gim namtui zong a koih ding ahi kei. Khelhna thillat ahih man ahi. 12 Ama'n siampi' mai ah hon tawi ding a, theihgigena hi dingin tua anvui khutdim khat a phamkhe ding a, Tangtawn Toupa' maia meia thillat tung sawn ah, maitam tung ah a haltum ding ahi. Khelhna thillat ahi. 13 Hibangin khelhna hibang khat peuh a na hih tawh kisaiin, siampi in ama' adingin khuhna a bawlsak ding a, ngaihdam ahi ding hi. Tua thillat vai teng, an thillat mah bangin, siampi tan ding ahi, chi in, a chi hi.
Mawhna Thillat
14 Tangtawn Toupa'n Mosi a houpih a: 15 Mi khat peuh muanhuailou-a a om a, Tangtawn Toupa' thil siangthou khat peuh tawh kisaia, tup mawng hiloua a khelh leh, a mawhna-a dingin belamhon lak apan belamtal khat, genbaanglou aman dinga seh diktak, mun siangthou shekela tuat ngun, Tangtawn Toupa' mai ah hon tawi ding ahi. Mawhna thillat ahi. 16 Thil siangthou tawh kisaia a khelhna ditna a bawl ngeingei ding ahi. Tua baan ah, tua man seh nga suah seh khat a behlap lai ding a, a vekpi-in siampi khut ah a pe ding a, ama'n mawhna thillatin tua belam a lan ding a, ama' adingin khuhna a bawlsak ding a, ngaihdam ahi ding hi. 17 Mi khat peuh in a khelh a, Tangtawn Toupa' thupiakte khat peuh in a kham a hih leh, ama'n phawk kei mah leh, a mawh ahi a, ama' mawhpuak hi veve ahi. 18 Tua bang mi in mawhna thillat dingin belamhon lak apan belamtal khat, genbaanglou, aman dia seh diktak zah man, siampi' mai ah hon tawi ding ahi. Hibangin, ama'n a tup mawng hiloua a phawklouh thilhih khelh tawh kisaiin, siampi in ama' adingin khuhna a bawlsak ding a, ngaihdam ahi ding hi. 19 Mawhna thillat ahi. Tangtawn Toupa' tung ah thil hihkhialin a mawh ahi, a chi hi.
1 Tangtawn Toupa'n Mosi a houpih a: 2 Mi khat peuh khial a, a innveng in amah a kepsak thil hiam, kichiamna thil hiam, guktak thu hiam tawh kisaia a innveng khem hiam, thil laksuh hiama om a, Tangtawn Toupa' tunga a muanhuai kei leh, 3 a hih kei leh, van mang khat peuh a muh a, tua tawh kisaia zuau a gen leh, ahih kei leh zuauthu-a a kichiam leh, ahih kei leh, mihing khelh theihna thil hibang khat peuh-a a khelh leh, 4 hibanga khiala a mawh chiangin, a van guk hita leh, a laksuh hita leh, amah kepsak hita leh, van mang a muh hita leh, 5 ahih kei leh zuauthu-a a kichiamna thil hita leh, a piakkhiak ngeingei ding ahi. A mana tuat seh nga suah seh khat behlap a, a dit vek ding, mawhna thillat a lat ni a, a neipa khuta a vekpi-a a piak ding ahi. 6 Ama'n gawtna danin siampi' mai ah, tua bel, Tangtawn Toupa' mai ah, a mawhna thillat, belamhon lak apan belamtal khat, genbaanglou, gan man dinga seh zah man gan a tawi ding ahi. 7 Hibangin, siampi in Tangtawn Toupa' mai ah, ama' adingin khuhna a bawlsak ding a, amah mawhsak hiai thilte khatpeuh apan amah ngaihdam ahi ding hi, a chi hi.
Haltum Thillat
8 Tangtawn Toupa'n Mosi a houpih a: 9 Aron leh a tapate kiang ah hiai thupiak pia in: Hiaite haltum thillat tawh kisai dan ahi: Haltum thillat pen maitam tunga meichihna ah zan khawvakin zingsang dongin a om ding ahi. Maitam tunga mei zong a kuan nilouh ding ahi. 10 Siampi in a puan malngat puansilh, ama' sa tawh kisukha ding puan malngat puannuaisilh tawh a silh ding ahi. Tua khit chiangin, maitam tunga haltum thillat, mei in a kattum vu vutte a luakkhe ding a, maitam kiang ah a koih ding ahi. 11 Tua khit chiangin, a puansilhte a suahkhe ding a, puansilh dang a silh ding a, tua vut pen giahphual pawlam ah mun siang a seh ah a baw ding ahi. 12 Maitam tunga mei a kuan nilouh ding ahi a, a mih ding ahi kei hi. Kawla nisuak simin siampi in sing a khul thuah ding a, haltum thillat tua tung ah a lem ding a, tua tung ah lemna thillat thaute a haltum ding ahi. 13 Maitam tunga mei a kuan gige ding ahi a, a mih ding ahi kei hi.
An Thillat
14 Hiaite an thillat tawh kisai dan ahi: Aron' tapate'n Tangtawn Toupa' mai ah, maitam mai ah, an thillat hon tawi ding uh ahi. 15 Siampi in tua anvui nei leh sathau, an thillat tunga gim namtui teng tawh, khutdim khat a pham ding a, Tangtawn Toupa' lungkimna gim namtui dingin tua theihgigena hi dinga sehkhiak tawh maitam tung ah a haltum ding ahi. 16 Aron leh a tapate'n a vai teng a ne ding uh ahi. Ahihhangin, mun siangthou khat ah silngou sawh louh-in a ne ding uh ahi. Kihoupihna Puanbuk huang sung ah a ne ding uh ahi. 17 Silngou sawh-a em ding ahi kei hi. Ka maia meia thillat apan amau tan dinga ka piak ahi. Khelhna thillat leh mawhna thillata bangin a siangthou penpen ahi. 18 Aron' suan pasal peuh peuh in a ne thei ding hi. Tangtawn Toupa' maia meia thillat apan ama' tantuan ahi. A khang akhanga omden thuseh ahi den ding ahi. Tuate tawh kisukha peuhpeuh a siangthou hong suak ding hi, a chi hi. 19 Tua baan ah, Tangtawn Toupa'n Mosi kiang ah: 20 Aron leh a tapate'n Aron thaunilh-a a om ni-in, Tangtawn Toupa' mai ah hiai thillat hon tawi ding uh ahi: Anvui nei dimdem ephah khat seh sawm suah seh khat, ngeina-a an thillat dingin, a kim khat zingsang lamin, a kim khat nitak lamin, a hon tawi ding uh ahi. 21 Sathau-in kuangdai sung ah na kang ding a, sathaua a tawksuak chiangin, na balnen ding a, Tangtawn Toupa' lungkimna gim namtui hi dingin an thillatin non lalut ding ahi. 22 Ama' thakheng ding, thaunilhna tang tapa in tua a lan ding ahi. Tangtawn Toupa' tantuan a khang a khanga omden thuseh ahi ding a, haltum sipsip ding ahi. 23 Siampi' an thillat peuhmah haltum sipsip ding ahi a, nek ding ahi kei hi, a chi hi.
Khelhna thillat
24 Tangtawn Toupa'n Mosi a houpih a: 25 Aron leh a tapate kiang ah hiai gen in: Hiai khelhna thillat tawh kisai dan ahi: Tua khelhna thillat pen, haltum thillat a kigawhna mun ah, Tangtawn Toupa' maia gawh ding ahi. 26 Hiai khelhna thillat a lanpa siampi in a ne ding ahi. Kihoupihna Puanbuk huang sunga mun siangthou khat-a a nek ding ahi. 27 Hiai sa tawh kisukha thil peuhmah a siangthou a suak ding hi. A sisan in puansilh a theh khak leh, mun siangthou khat-a na sawpsiang ding ahi. 28 A sa huanna leibel sattap ngei ngei ding ahi. Sumsan bela a kihuan leh bel, hoihtaka kiat siang a, tuia silsiang ding ahi. 29 Siampi innkuan sunga pasal peuhmah in a ne thei ding hi. A siangthou penpen ahi. 30 Ahihhangin, khelhna thillat peuhmah, khuhna bawlsak nadinga a sisan, Kihoupihna Puanbuk sunga Mun Siangthoua a kitawilut leh, a sa nek louh ding ahi a, haltum ngeingei ding ahi.
Mawhna Thillat
1 Hiaite mawhna thillat tawh kisai dante ahi a, a siangthou penpen ahi: 2 Mawhna thillat bel, haltum thillat a kigawhna muna gawh ding ahi a, a sisan zong maitam pang, a kimkota theh ding ahi. 3 A thau teng lat ding ahi: A mei thau leh a sung thau teng, 4 a kailing, a phuk sunga a thau, a kailing tuam teng, a sin tuam teng, a kailingte tawh lakkhiak khawm a vekpi-a lat ding ahi. 5 Siampi in Tangtawn Toupa' maia meia thillat hi dingin, tuate maitam tung ah a haltum ding ahi. Hiai mawhna thillat ahi. 6 Siampi innkuan sunga pasal peuhmah in hiai thillat a ne thei ding hi. Ahihhangin, a siangthou penpen ahih manin, mun siangthou khata nek ding ahi. 7 Khelhna thillat leh mawhna thillat ah dan kibang a kizang ding ahi: Khelhna khuhna bawlsakpa siampi' tan hiaite ahi: 8 Mi khat peuh adinga haltum thillat lanpa siampi in a vun a tang ding ahi. 9 An thillat, thukkhuka kiem, ahih kei leh, bela kihuan, peuhmah a lanpa siampi tan ding ahi. 10 An thillat, sathau tawh kihel hi-in, kihel lou hita leh, Aron' tapate'n kikim chiata a tan ding uh ahi.
Lemna Thillat
11 Hiaite Tangtawn Toupa' maia lemna thillat, mi khat peuh in a lat tawh kisai dan ahi: 12 Mi khat peuh in lungdamthu genna dana a lat leh, hiai lungdamthu genna thillat tawh kitonin, silngou sawh louh tanghou beu sathau tawh kihel, tua baan ah, tanghou pei, silngou sawh louh, sathaua zut, tua baan ah, anvui nei, hoihtaka mekman, sathau tawh kihel a lan khawm ding ahi. 13 Lungdamthu genna-a lemna thillat tawh kitonin, silngou sawh tanghou beu a lan ding ahi. 14 Hiaite a chi kimin khat chiat, Tangtawn Toupa kianga thilpiak hi dingin, a lan ding ahi. Hiai thillatte bel, lemna thillat sisan thehpa siampi in a tang ding ahi. 15 Hiai lungdamthu genna lemna thillat sa pen, thillat kilat ni mah a nek khit teitei ding ahi. Zingsang dongin a vai bangmah nutsiat ding ahi kei hi. 16 Ahihhangin, a thillat pen, kichiamna tangtunsakna hiam, ahih kei leh, utthu-a thillat hiam, ahih leh, tua thillat pen a kilat ni maha nek ding ahi a, a vai a om leh, a zing chianga nek theih ahi ding ahi. 17 Thillat sa pen a ni thum ni donga a vai a om leh, haltum ding ahi. 18 Lemna thillat sa, a ni thum ni-a a kinek leh, a sianglou a hih manin, tua thillat a kisang kei ding a, a lanpa zong a lana sim ahi kei ding a, a sa ne kuapeuh zong a mawhkhuksak ahi ding hi. 19 Siangloua ngaih thil sukha sa peuhmah nek ding ahi kei a, haltum ding ahi. Sa dang peuhmah bel, a sianga ngaih mi khat peuh in a ne thei ding hi. 20 Ahihhangin, a sianglou mi peuhmah in, lemna thillata Tangtawn Toupa' tan sa a nek leh, tua pa a mite lak apan satkhiak ahi ding ahi. 21 Mi khat peuh in a sianglou thil, mihing sianlouhna, ganta sianlouhna hi-in, thil sianglou kihhuai peuhmah hita leh, a sukkhak a, lemna thillata Tangtawn Toupa' tan sa a nek leh, tua pa a mite lak apan satkhiak ahi ding ahi, chi in, a chi hi.
Sathau leh Sisan Khamna
22 Tangtawn Toupa'n Mosi kiang ah: 23 Israelte kiang ah thu gen inla: Bawngte, belamte, ahih kei leh, kelte' thau himhim ne kei un. 24 Ganta a sisa-a kimu, ahih kei leh gamsa keih ganta' thau peuhmah thildang adingin zat theih ahi a, nek bel na nek het louh ding uh ahi. 25 Tangtawn Toupa' maia meia thillat ganta apan a thau ne mi peuhmah, a mite lak apan satkhiak ahi ding ahi. 26 Tua baan ah, na tenna peuh uah, vasa hiam, ganta hiam sisan peuhmah na ne ding uh ahi kei hi. 27 Mi kua peuh in sisan a nek leh, a mite lak apan satkhiak ahi ding ahi, chi in, a chi hi.
Siampite' Tan
28 Tangtawn Toupa'n Mosi kiang ah, 29 Israelte kiang ah thu gen inla: Tangtawn Toupa' maia lemna thillate hon tawi kuapeuh in tua a thillat apan bangzah hiam Tangtawn Toupa' maia kithoihna thillat hi dingin hon tawi ding ahi. 30 Ama' khut mah mahin tua Tangtawn Toupa' maia meia thillat pen hon tawi ding ahi. A thau leh a awm hon tawi ding a, a awm pen Tangtawn Toupa' mai ah vei thillatin a vei ding ahi. 31 Siampi in tua a thau pen maitam tung ah a haltum ding a, a awm pen ahih leh Aron leh a tapate' tan ahi ding hi. 32 Tua na lemna thillat ganta taklam pheipi siampi kiang ah thilpiakin na pe ding ahi. 33 Lemna thillat sisan leh thau lanpa siampi, tua Aron' tapa in tua thillat taklam pheipi ama' aituam dingin a tang ding ahi. 34 Israelte' lemna thillatte apanin tua vei thillata kivei a awm leh a kilansa a pheipi ka la a, siampi Aron leh a tapate ka peta a, Israelte apan a tan gige ding uh ahi, chi in, a chi hi. 35 Aron leh a tapate siampi-a panga tua Tangtawn Toupa' nasem dinga sehtuam a hih ni ua, amau' aituam dinga kipia, Tangtawn Toupa' maia meia thillat apan sehkhiak hiai ahi. 36 Amaute thaunilh ahih ni un, Tangtawn Toupa'n Israelte kiang ah, hiai siampite' aituam hi dingin a khangsawn sawn donga a piak dingun thu a pia hi. 37 Tuachi-in, hiaite haltum thillat, an thillat, khelhna thillat, mawhna thillat, namkipna thillat leh lemna thillat tawh kisai dante hong hita hi. 38 Tuate mah Sinai Gamdai-gamkeua Tangtawn Toupa' maia a thillatte uh hon tawi dinga Tangtawn Toupa'n Israelte thu a piak ni-a Sinai Muala Mosi a piak ahi.
Aron leh a Tapate Namkipna
1 Tangtawn Toupa'n Mosi kiang ah: 2 Aron leh a tapate, a puansilhte uh, nilh sathau, khelhna thillat ding tua bawngtal, tua belamtal nih leh silngou sawhlouh tanghou koihna lawhbeu hon tawi inla, 3 Kihoupihna Puanbuk lutna ah mipite khempeuh samkhawm in, a chi hi. 4 Tangtawn Toupa' thupiak bangin Mosi in a hih a, Kihoupihna Puanbuk lutna ah mipite khempeuh hong paikhawm uhi. 5 Mosi in mipi kikhawmte kiang ah: Tangtawn Toupa'n hih dinga hon thupiak hiai ahi, a chi hi. 6 Tua khitin, Mosi in mailam ah Aron leh a tapate hon tonpih a, tuiin amaute a sil hi. 7 Puanak sungsilh tuai Aron a silhsak a, puanduang a vetsak a, puanakpi a silhsak a, siampi puanak a silhsak hi, Siamneltaka gat puanduang kawnggakin tua siampi puanak tung ah a khihkip hi. Tuachi-in, ama' tung ah tua siampi puanak khihkip a hita hi. 8 Awma belh a belhsak a, tua tung ah Urim leh Thumim a khihkip hi. 9 Tua khitin, Aron lutang ah dialkhip a khimsak a, tua tung ah, kham sikpek a bulh a, tua mailam ah siampilukhu siangthou a khihbelh hi. Hiai bel, Tangtawn Toupa'n Mosi thu a piak bangbanga a hih ahi. 10 Tua khitin, Mosi in nilh sathau a la a, biakbuk leh a sunga om thil khempeuh sathau nilhin, sehtuam siangthouin a bawl hi. 11 Tua sathau bang zah hiam a la a, tua maitam sagihvei a theh a, tua maitam leh a tuium belsuante leh a tuikuang dai leh a khete, sehtuam siangthoua bawlin, sathau a nilh hi. 12 Tua sathau bang zah hiam Aron luzang ah a sung a, amah sehtuam siangthouin a bawl hi. 13 Tua khitin, Aron' tapate hon tonpih a, puanaksungsilh tualte a silhsak a, awmgakna puanduang a vetsak a, lugaknain a gaksak hi. Hiai bel, Tangtawn Toupa'n Mosi thu a piak bangbanga a hih ahi. 14 Tua khitin, ama'n khelhna thillat dingin bawngtal a hon la a, Aron leh a tapate'n tua khelhna thillat bawngtal lutung ah a khut uh a nga uhi. 15 Mosi in tua bawngtal a gou a, a sisan bangzah hiam a la a, a khuttal in tua maitam kite khempeuh ah a tat hi. Tua bel, tua maitam siansuahna ahi. Bawngtal sisan dangte bel, maitam bul ah a sungbua hi. Tua bangin, maitam sehtuam siangthouin a bawl a, maitam adingin khuhna a bawlsak hi. 16 Mosi in tua gan sungthau khempeuh, a sin tuamte leh a kailing tuamte leh a thaute a la a, maitam tung ah a haltum hi. 17 Ahihhangin, tua bawngtal, a vun tawh, a sa tawh, a ek tawh, giahphual pawlam ah a haltum hi. Hiai bel, Tangtawn Toupa'n Mosi thu a piak bangbanga a hih ahi. 18 Tua khitin, haltum thillat dingin, belamtal pen hon la a, Aron leh a tapate'n tua belamtal lutung ah a khut uh a nga uhi. 19 Tua khitin, Mosi in tua belamtal a gou a, a sisanin tua maitam pangte a kimkotin a theh hi. 20 Mosi in tua belamtal a semnen a, tuate a lutang tawh, a thau tawh a haltum hi. 21 A sungkua leh a khete tuiin a silsiang a, tua belamtal a pumin haltum thillatin maitam ah a haltum hi. Tangtawn Toupa' maia meia thillat, a lungkimna gim namtui ahi. Hiai bel, Tangtawn Toupa'n Mosi thu a piak bangbanga a hih ahi. 22 Tua khitin, Mosi in belamtal dang khat pen, tua namkip nading belamtal hon la hi. Aron leh a tapate'n tua belamtal lutung ah a khut uh a nga uhi. 23 Mosi in tua belamtal a gou a, a sisan bang zah hiam a la a, Aron' taklam bilteep, a taklam khutpi leh a taklam khepi a nuh hi. 24 Mosi in Aron' tapate zong hon tonpih a, sisan bang zah hiamin a taklam bilmong uh, a taklam khutpi uh leh a taklam khepi uh a nuh hi. Tua baan ah, maitam pangte a kimkotin sisan a theh hi. 25 A thaute, a mei thau, a sungthau, a sin leh a kailingte leh tua-a a thaute leh a taklam pheipi a la hi. 26 Tua khitin, Tangtawn Toupa' maia om, silngou sawh louh tanghou lawh apan tanghou pei khat a la a, sathau tawh kihel pei khat leh sathau hellouh pei neu khat tawh a la a, gan thaute leh a taklam pheipi tung ah a koih hi. 27 Hiaite khempeuh, Aron leh a tapate' khut ah a koih a, Tangtawn Toupa' mai ah vei thillatin Mosi in a vei hi. 28 Tua khitin, Mosi in amaute' khut apan tuate a la a, maitam tunga haltum thillat tunga koihin a haltum hi. Hiai namkipna thillat ahi a, Tangtawn Toupa' maia meia thillat, a lungkimna gim namtui ahi. 29 Namkipna belamtal apan Mosi' tan, a awm a la a, vei thillatin Tangtawn Toupa' mai ah a vei hi, Hiai bel, Tangtawn Toupa'n Mosi thu a piak bangbanga a hih ahi. 30 Tua khitin, Mosi in nilh sathau bang zah hiam leh maitam apan sisan bang zah hiam a la a, tuatein Aron leh a puansilhte leh a tapate leh a puansilhte uh a theh hi. Tua bangin, Aron leh a puansilhte leh a tapate leh a puansilhte uh sehtuam siangthouin a bawl hi. 31 Tua khitin, Mosi in Aron leh a tapate kiang ah: Aron leh a tapate'n a nek ding uh ahi, chi-a thu ka piak bangin, Kihoupihna Puanbuk lutna ah, a sa huan unla, tua ah namkipna thillat lawhbeu sunga tanghou tawh ne un. 32 Nek vai sa leh tanghou bel, haltum un. 33 Noute kinamkipna ni sagih sung hi ding ahih manin, noute kinamkipna nite a kim mateng, ni sagih sung peuhmah Kihoupihna Puanbuk lutna nuse kei un. 34 Tuni-a thil kihih bel, noute adinga khuhna a kibawl nadinga Tangtawn Toupa' thupiak ahi. 35 Ni sagih sung, sun leh zanin Kihoupihna Puanbuk lutna ah na om ding uh a, Tangtawn Toupa' ngiat bangbang na hih ding uh ahi. Tuachi-in na si kei ding uhi. Ahang bel, tua mah kei kianga thupiak ahi, a chi hi. 36 Tua bangin, Tangtawn Toupa'n Mosi tungtawna thu a piak bangbangin, Aron leh a tapate'n hih ding khempeuh a hih uhi.
Siampite' Nasep Patna
1 A ni giat ni-in, Mosi in Aron leh a tapate leh Israel upate a sam hi. 2 Ama'n Aron kiang ah: Na khelhna thillat ding bawngnou pa khat, na haltum thillat ding belamtal khat, a niha genbaanglou, Tangtawn Toupa' mai ah hon kai in. 3 Tua baan ah, Israelte kiang ah: Khelhna thillat ding keltal khat, haltum thillat ding bawngnou khat leh belamnou khat, a niha kum khata upa leh genbaanglou, 4 tua baan ah, Tangtawn Toupa' maia lat ding sathau tawh kihel an thillat tawh latkhawm ding, lemna thillata lat dingin bawngtal khat leh belamtal khat hon kai un. Tuni a Tangtawn Toupa na kiang ua hong kilang ding ahi, chi-in gen in, a chi hi. 5 Amaute'n Mosi' thupiak thilte Kihoupihna Puanbuk mai ah hon tawi uh a, mipite khempeuh in hon naih uh a, Tangtawn Toupa' mai ah a ding uhi. 6 Tua khitin, Mosi in: Tangtawn Toupa' thupina noute kianga hong kilak theih nadingin, Tangtawn Toupa'n noute hih dinga thu hon piak hiai ahi, a chi hi. 7 Mosi in Aron kiang ah: Maitam ah hong pai inla, na khelhna thillat leh na haltum thillat lan inla, nang leh mipite adingin khuhna bawl in. Tangtawn Toupa' thupiak bangin, mipite adingin khelhna thillat lan inla, amaute adingin khuhna bawlsak in, a chi hi. 8 Tuachi-in, Aron in maitam hon naih a, amah adingin khelhna thillat bawngnou a gou hi. 9 A tapate'n tua gan sisan amah kiang ah hon tawi uh a, ama'n tua sisan ah a khuttal a diah a, tua maitam kite ah a tat hi. Sisan dangte bel, maitam bul ah a sungbua hi. 10 Tangtawn Toupa' thupiak bangbangin, tua khelhna thillat thaute, a kailingte leh a sin tuamte, tua maitam tung ah a haltum hi. 11 A sa leh a vun bel giahphual pawlam ah meiin a haltum hi. 12 Tua khitin, haltum thillat ganta a gou hi. Aron' tapate'n tua gan sisan amah a pia uh a, ama'n tua-in maitam pangte, a kimkotin a theh hi. 13 Amaute'n tua haltum thillat ganta a beubeu-in, a lutang tawh a pia uh a, ama'n tuate maitam tung ah a haltum hi. 14 A sungkua leh a khete tuiin a silsiang a, maitam tunga haltum thillat tung ah a haltum hi. 15 Tua khitin, Aron in mipite ading thillat hon la hi. Mipite ading khelhna thillat dingin tua kei a la a, a gou a, amasa a lat bangbangin, khelhna-a dingin a lan hi. 16 Haltum thillat zong a hon la a, lat ding dan bangbangin a lan hi. 17 An thillat zong a hon la a, tua apan khutdim khat a phamkhia a, zingsang thillat baan ah, tuate maitam tung ah haltum thillatin a haltum hi. 18 Tua baan ah, mipite adinga lemna thillat hi dingin, tua bawngtal leh tua belamtal a gou hi. A tapate'n tua ganta' sisan a pia uh a, ama'n tua-in maitam pangte, a kimkotin a theh hi. 19 Ahihhangin, tua bawngtal leh belamtal thaute, a mei thau, a gil thaute, a kailingte leh a sin tuamte bel, 20 a awmte tung ah a koih uh a, Aron in maitam tung ah tua thaute a haltum hi. 21 Aron in Mosi' thupiak bangbangin, a awmte leh a taklam pheipite Tangtawn Toupa' mai ah vei thillatin a vei hi. 22 Tua khitin, Aron in a khutte mipi lam ah a liktou a, amaute a vualzawl hi. Khelhna thillat, haltum thillat leh lemna thillatte lankhin-in Aron hong kumsuk hi. 23 Tua khitin, Mosi leh Aron, tua Kihoupihna Puanbuk sung ah a lut uhi. Hong pusuah takun, mipite a vualzawl uhi. Tua khitin, Tangtawn Toupa' thupina mipite khempeuh muhin hong kilang hi. 24 Tangtawn Toupa' omna apan meikuang hong paikhia a, maitam tunga haltum thillat leh a thaute a kangtum hi. Mipite khempeuh in tua a mu uh a, lungnuam lua-in a awng uh a, maitangin lei a si uhi.
Nadab leh Abihu Sihna
1 A Aron tapate Nadab leh Abihu in a gim namtui halna kuang uh a la uh a, mei am luakin gim namtui a sunkhum uhi. Tangtawn Toupa' mai ah, a thupiak tawh kikalhin, phallouh mei a lan uhi. 2 Tuachi-in, Tangtawn Toupa' omna apan mei hong paikhia a, amaute a kangtum a, Tangtawn Toupa' mai ah a si uhi. 3 Mosi in Aron kiang ah: Hiai Tangtawn Toupa' thugen ahi: Kei hong naih mite lak ah, a siangthouin ka kilaak ding. Mi khempeuh mitmuhin pahtawiin ka om ding, a chi, a chi a, Aron bel a dai dide hi. 4 Mosi in Aron' pangak Uziel' tapate Mishael leh Elzafan a samsak a, amaute kiang ah: Hiai ah hong pai unla, mun siangthou mai apan giahphual pawlam ah na sanggamte uh pawkhia un, a chi hi. 5 Tuachi-in, amaute hong pai uh a, Mosi thupiak bangin a sanggamte uh puanaknuai tuai silhsain giahphual pawlam ah a pawkhia uhi. 6 Tua khitin, Mosi in Aron leh a tapate Eleazar leh Ithamar kiang ah: Lukhuhna beiin om kei unla, na puansilhte uh botkek kei un. Tuachi louin zaw na si ding uh a, Israel mi khempeuh tung ah Tangtawn Toupa a heh kha ding. Na tanaute uleh Israel innkawte khempeuh in bel, tua Tangtawn Toupa'n meia a hihmanthatte a kah thei ding uhi. 7 Kihoupihna Puanbuk lutna nuse kei un. Tua chilouin zaw Tangtawn Toupa' thaunilh na hih manun, na si ding uhi, a chi hi. Tuachi-in, amaute'n Mosi gen bangin a hih uhi. 8 Tua khitin, Tangtawn Toupa'n Aron kiang ah: Nang leh na tapate'n Kihoupihna Puanbuk sunga na lut ding chiangun, zu hita leh, silngou sawh dawn theih himhim na dawn ding uh ahi kei hi. Tua chilouin zaw na si ding uhi. 9 Hiai suansawn sawna a khang a khang adinga thuseh omden ding ahi. 10 A siangthou leh a nautaang na khen ding uh a, a nin leh a siang zong na khen ding uhi. 11 Tua bangin, Tangtawn Toupa'n Mosi tungtawna thuseh a piakte khempeuh Israelte na sinsak ding uh ahi, a chi hi.
Eleazar leh Ithamar' Khelhna
12 Mosi in Aron leh a tapa omlaite Eleazar leh Ithamar kiang ah: Tangtawn Toupa' maia meia an thillat laka a valte la unla, silngou sawh louha kibawl, maitam kiang ah ne un, thil siangthoupen ahi. 13 A sianga seh mun khat peuh ah ne un, Tangtawn Toupa' maia meia thillat apan noute' tan leh na tapate uh' tan ahi. Tua bang dingin thu kon pia ahi. 14 Ahihhangin, thillat ganta' awm vei thillata kilan leh, a pheipi latsa bel, noute leh na tapate uleh na tanute un na ne thei ding uh. Mun sianga ngaih khat peuh ah tuate ne un. Israelte' lemna thillatte apan noute leh na tate uh tan dinga piak ahi. 15 A pheipi hong kitawi pen leh a kiveisa a awm bel, meia thillat thaute tawh, Tangtawn Toupa' maia vei ding ahi. Hiai bel Tangtawn Toupa' thupiak banga noute leh na tate uh tan hi gige ding ahi, a chi hi. 16 Mosi in khelhna thillat kei a kan leh, a kihaltumta, chih a thei a, Aron' tapa omlaite Eleazar leh Ithamar tung ah a heh a: 17 Banghanga mun siangthou huang sunga tua khelhna thillat ne lou na hi ua? A siangthou penpen ahi vele. Tangtawn Toupa' maia mipite adinga khuhna bawlsak a, amaute' mawhna na lakmang nading ua noute kianga hong kipia ahi vele. 18 A sisan Mun Siangthou sunga kilalut lou ahih manin, thu kon piak banga mun siangthou huang sunga tua kei sa na nek ding uh ahi, a chi hi. 19 Aron in Mosi a dawng a: Tuni-in a khelhna thillat uleh a haltum thillat uh, Tangtawn Toupa' mai ah a lan uh a, ahihhangin, hibang thil ka tung ah hong tungta. Tuni-in tua khelhna thillat sa na ne taleng, Tangtawn Toupa a lungkim diam? a chi hi. 20 Mosi in hiai a zak takin, a lungkimta hi.
An siang leh Sianglou
1 Tangtawn Toupa'n Mosi leh Aron kiang ah: 2 Israelte kiang ah gen un: Leia gamta ganhingte lak ah, hiaite na ne thei ding uh. 3 Ganhing khechin niha ka paisuak, eknel hai ganhing khat peuh na ne thei ding uh. 4 Ganhing pawl khat, eknel hai kia hiam, khechin niha ka paisuak kia hiam a om. Tuate na nek ding uh ahi kei hi. Sangawngsau in eknel hai mah leh, khechin niha ka paisuak ahi kei. Noute adingin sangawngsau sa sianglou ahi. 5 Sakik in eknel hai mah leh, khechin niha ka paisuak ahi kei. Noute adingin sakik sa sianglou ahi. 6 Bilpi in eknel hai mah leh, khechin niha ka paisuak ahi kei. Noute adingin bilpi sa sianglou ahi. 7 Vok chin niha ka paisuak himahleh eknel a hai kei. Noute adingin vok sa sianglou ahi. 8 Tua bangte' sa na ne ding uh ahi kei a, a siluang zong na lawng ding uh ahi kei. Noute adinga a sianglou ahi.
Tuia Gamta Sa Siang leh Sianglou
9 Tuipite hiam, luite hiama gamta ganhingte lak ah, a pheh leh a lip neite khat peuh na ne thei ding uhi. 10 Ahihhangin, tuipite leh luitea gamta ganhing, pheh leh lip neiloute khempeuh tui liau thei hita leh, tuia teng peuhmah na kih ding uh ahi. 11 Tuate na kih ding uh a hih manin, a sa na ne ding uh ahi kei a, a si luang zong na kih ding uh ahi. 12 Tuia teeng pheh leh lip neilou ganhing peuhmah noute adingin kihhuai ahi.
Huihkhua a Gamta Sa Siang leh Sianglou
13 Noute adinga kihhuai a hih mana na kih ding uh vasa hiaite ahi: Muvanlai, musane, musane vom, 14 musi san, musi vom peuhpeuh, 15 va-ak peuhpeuh, 16 simbu kinei, simbu ham ngaih, tuiva awmpak, mu himhim, 17 simbu tanglit, nga gal, simbupi, 18 simbu kang, gamdai simbu, tui vapi, 19 tuiva kengsang, tuiva himhim, huihtun leh bak.
Kha nei Ganhingte
20 A lengthei ganhing neu, khe li neia vakte khempeuh noute adinga kihhuai ahi. 21 Ahihhangin, a lengthei ganhing neu, kheli neia vak pawl khat bel, na nek theih ding uh a om. Tuate bel, lei laka a tawm theih nading ua kheguh taang neite ahi. 22 Tuate lak ah khaupe chi peuhmah, kelkum, khuangbai, ahih kei leh, khaukhup. 23 Ahihhangin, khanei ganhing, khe li nei dangte peuhmah na kih ding uh ahi.
Ganhing Sisa Siangloute
24 Hiaite hangin a sianglou na suak thei uhi: Hiai ganhing siangloute sisa tawh kisukha peuhmah nitak lam dongin a sianglou ahi ding, 25 Hiai ganhingte a sisa khuta la peuhmah in a puansilhte a sawp ngeingei ding ahi. Nitak lam dongin a sianglou ahi ding ahi. 26 Khechin ka hinapi-a niha ka paisuak lou, ahih kei leh, eknel hai lou peuhmah noute adingin a sianglou ahi ding. Hibang ganhingte a siluang khat peuh tawh kisukha mi peuhmah a sianglou a suak ding. 27 Khe li neia pai ganhingte lak ah, a khechin boma paite peuhmah noute adingin a sianglou ahi. Tua bangte si luang tawh kisukha mi peuhmah nitak lam dongin a sianglou ahi ding hi. 28 Tua bang ganhing siluang khuta la mi peuhmah in a puansilhte a sawp ngeingei ding ahi. Nitak lam dongin a sianglou ahi ding ahi. Hiaite noute adinga sianglou ahi.
Bokvak Ganhingte
29 Leitunga bokvaka pai ganhingte noute adingin a sianglou ahi. Tuate bel, bui, zusa, tang chi peuhmah, 30 inhik, thankik, tangteuh, gamkeu thankik, thankik ngawngsan ahi. 31 Bokvaka pai ganhingte lak ah hiaite noute adinga sianglou ahi. Hiaite a sisa sukha mi peuhmah nitaklam dongin a sianglou ahi ding. 32 Hiaite khat peuh a sih a, vanzat bang peuh tunga a kiak leh, a zatna bang peuh na hita leh, singa kibawl, puana kibawl, savuna kibawl hi-in, saiip puana kibawl hita leh, a sianglou a suak hi. Tua bang vanzat pen tui ah diah in. Nitak lam dongin a sianglou ahi ding, tua khit chiangin a siang ding. 33 Tua ganhingte kiakna leibel leh, tua leibel sunga om peuhmah a sianglou a suak ding a, a bel na khettap ding ahi, 34 Tua bel sianglou sunga tui in nek theih an khat peuh a sukkhak leh, tua an a sianglou ahi. Tua bang mah in, dawn theih tui a sukkhak leh, tua tui a sianglou ahi. 35 Tua bang ganhing sisa in a kiakkhum thil peuhmah a sianglou ahi. Thuk hi-in, anhuan bel hita leh, khettap ding ahi. A sianglou ahi a, a sianglou a na ngaih ding uh ahi. 36 Ahihhangin, tuinak, ahih kei leh, tui kholna khuk hiam a hih leh bel, a siang gige ding. Ahihhangin, tua bang ganhing sisa sukha mi bel, a sianglou ahi ding. 37 Tua bang ganhing sisa pen pawi ding khaichi khat peuh tunga a kiak leh, noute adingin tua khaichi a sianglou ahi. 38 Ahihhangin, tua bang khaichi tui a kibuah a, tua nunga ganhing sisa a tunga kia ahih leh zong, noute adingin tua khaichi a sianglou ahi. 39 Noute adinga nek siang ganhing peuh a sih leh, tua a siluang tawh kisukha mi peuhmah a nitak lam dongin a sianglou ahi ding. 40 Tua siluang apan nekha peuhmah in a puansilhte a sawp ding ahi. Nitaklam dongin a sianglou ahi ding. Tua ganhing sisa khuta tawi peuhmah in a puansilhte a sawp ding ahi, amah nitak lam dongin a sianglou ahi ding hi.
Nek leh Tak tawh kisai Dante' Thil tup
41 Leia bokvak ganhing peuhmah kihhuai ahi. Nek ding ahi kei hi. 42 Leia bokvak ganhing peuhmah na ne ding ahi kei hi, a gila kitholh hiam, khe li a pai hi-in, khe tampi-a pai hita leh, kihhuai ahi. 43 Hiai ganhingte apan kisunin kei un. Hiai ganhingte apanin a sianglou kisuaksak kei unla, ahih kei leh, hon sianglousak dingin kiphal kei un. 44 Kei Tangtawn Toupa na Pathian uh ka hi. Kei a siangthou ka hih manin, noute sehtuam siangthoua kibawlin siangthou un. Leia bokvak ganhingtein a sianglou kisuaksak kei un. 45 Kei Tangtawn Toupa, na Pathian uh hi dinga Aigupta gam apan hon piikhetoupa ka hi. Tua hangin, kei ka siangthou manin, noute siangthou un. 46 Hiai ganhingte, vasate, tuia gamta ganhingte leh leikeu tunga gamta ganhingte tawh kisai dante ahi. 47 A sianglou leh a siang na khen ding uh a, nek theih ding ganhingte leh nek louh ding ganhingte na khen ding uh ahi, chi-in gen un, a chi hi.
Nausuah nunga Siansuahna
1 Tangtawn Toupa'n Mosi a houpih a: 2 Israelte kiang ah thu gen inla: Numei a gai a, tapa a neihkhiak leh, tua numei, ni sagih sung a siangloua ngaih ahi ding, tua bel, a kha teng si neih-a sianglou ahih bangbang ahi ding hi. 3 A ni giat ni-in, tua tapa zeksum ding ahi. 4 Tua khit chiangin, tua numei in a si pawtna apan siansuah nadingin, ni 33 a ngak ding ahi. A siangthou thil himhim a lawng ding ahi kei a, a kisiansuahna nite a kim masiah mun siangthou ah zong a hawh ding ahi kei hi. 5 Numei in tanu a neihkhiak leh bel, nipikal nih sung a siangloua ngaih ahi ding hi. Tua bel, a khateng si neih-a a sianglou ahih bangbang ahi ding hi. Tua khit chiangin, a si pawtna apan kisiansuah nadingin, ni 66 a ngak ding ahi. 6 Tapa hiam, tanu hiam neihna hanga siansuahna nite a bei chiangin, Kihoupihna Puanbuk lutna ah, siampi kiang ah, haltum thillat dingin belamnou kum khata upa leh khelhna thillat dingin vakhu hiam, kawlvakhu nou hiam a hon tawi ding ahi. 7 Ama' adinga khuhna bawl nadingin, Tangtawn Toupa' mai ah tuate a lan ding a, tua khit chiangin, sisan pawtna apan tua numei a sianga ngaih ahi ding hi. Tapa hiam, tanu hiam neikhia numei adingin dan hiaite ahi. 8 Belamnou a neih zawh kei leh, vakhu nih hiam, kawlvakhu nou nih hiam a hon tawi ding ahi. Khat pen haltum thillat ding ahi ding a, a dang khat pen khelhna thillat ding ahi ding hi. Hibangin, siampi in tua numei adingin khuhna a bawlsak ding a, a siang ding hi, chi in, a chi hi.
Vun Natna tawh kisai Dante
1 Tangtawn Toupa'n Mosi leh Aron a houpih a: 2 Mi khat peuh in a vuna chibawk hiam, a dulh hiam, a kaang tuam hiam, kilawh theih a neih leh, siampi Aron kiang ah hiam, ahih kei leh, siampi nasem a tapate laka khat peuh kianga paipih ding ahi. 3 Siampi in tua mipa' vuna natna a vel ding a, tua natna muna a mul a kaan a, a natna zong a vun sanga thukzaw hi-a a kilat leh, kilawh theih vun natna ahi. Siampi in a vel khit chiangin, tua mipa a siangloua ngaih ahi, chi-in a phuang ding ahi. 4 Tua a vuna mun khat a kaang tuam a hih a, vun sanga thukzaw hi-a a kilat kei a, a mul zong a kaan kei leh, siampi in tua mipa ni sagih sung a khumtuam ding ahi. 5 A ni sagih ni-in, siampi in amah a vel kik ding a, a vun natna kilamdang tuan loua, a om a, vuna a ban a peh tuan kei leh, ni sagih dang a khumtuam kik ding ahi. 6 A ni sagih ni-in, siampi in amah a vel kik ding a, a natna a kiam a, a vuna a kizalh kei leh, siampi in tua mipa a sianga ngaih ahi, a dulh maimai ahi, chi-in a phuang ding hi. Tua mipa'n a puansilhte a sawp ding a, amah a siang ding hi. 7 Ahihhangin, a siang ahi, chi-a phuan dinga siampi' maia a kilak nunga, tua a dulh pen a vuna a ban peh-a a om leh, siampi' maia a kilah kik ding ahi. 8 Siampi in amah a veel ding a, tua a dulh pen a vuna a ban peh a na hih leh, tua mipa a sianglou ahi, chi-in a phuang ding ahi. Kilawh theih natna khat ahi. 9 Mi khat peuh in kilawh theih vun natna a neih leh, siampi' maia paipih ding ahi. 10 Siampi in amah a vel ding a, tua vun natna pen a kaanga a bawk a, a mul a kaan a, tua a bawkna dulha a keh leh, 11 vun natna dam thei lou ahi a, siampi in tua mipa a sianglou ahi, chi-in a phuang ding ahi. A sianglou hi khin ahih manin, a khumtuam ding ahi kei hi. 12 Tua natna pen a vun tenga a kithehzak leh, siampi muh dana tua vun natna neipa a khe apan a luzang donga a vun tenga a om leh, 13 siampi in a vel ding a, tua mipa a pumpi-a tua natna in a khuh leh, a siang ahi, chi-in a phuang ding ahi. A pumpi-a a kaang vek ahih manin, a siang ahi. 14 Ahihhangin, tua banga dulha kehna a satunga hong kilat peuhpeuh chiangin, a sianglou ahi ding hi. 15 Siampi in tua banga dulha keh a muh chiangin, tua mipa a sianglou ahi, chi-in a phuang ding ahi. Dulha keh pen kilawh theih natna ahih manin a sianglou ahi. 16 Tua dulha chikeh mei hong lamdang a, hong kaan leh, siampi a naih ding a, 17 siampi in a vel ding a, tua a meimatna hong kaang ahih leh, tua mipa a siang ahi, chi-in a phuang ding a, a siang ahi ding hi. 18 Mi khat peuh in a vuna meimatum a vei a, a dam chianga, 19 tua meimatum omna mun a bol a, a kaang hiam, a sansim hiam hong kilat leh, siampi kianga a kilah teitei ding ahi. 20 Siampi in tua a natna mun a vel ding a, a vun sanga thukzaw hi-a a kilat a, a mul zong a kaan leh, siampi in amah a sianglou ahi, chi-in a phuang ding ahi. Meimatum omna muna kilawh theih vun natna hong om ahi. 21 Ahihhangin, siampi in a vel a, a mul kaang lah om lou, tua natna a vun sanga thukzaw lah hilou ahih leh, siampi in ni sagih sung amah a khumtuam ding ahi. 22 Tua natna in a ban a peh leh, siampi in amah a sianglou ahi, chi-in a phuang ding ahi. Kilawh theih natna ahi. 23 Ahihhangin, tua a natna mun a mei a kikhek kei a, a ban lah a peh kei leh, meimatum pawn ahi lei a, siampi in amah a siang ahi, chi-in a phuang ding hi. 24 Mi khat peuh' vun mei in a kat a, a katna keh a, san sima kaang sim hiam, a kaang hiam hong kilat leh, 25 siampi in tua a katna mun a vel ding a, a mul hong kaang a, a vun sanga thukzawa pehsuk leh, tua a kaatna muna kilawh theih natna hong piang ahi. Siampi in amah a sianglou ahi, chi-in a phuang ding ahi. Kilawh theih vun natna ahi. 26 Ahihhangin, siampi in a vel a, a mul kaang lah a om kei a, a vun sanga thukzaw lah peh lou ahih a, ahihhanga ama sipa mual ahih leh, siampi in ni sagih sung amah a khumtuam ding ahi. 27 A ni sagih ni-in, siampi in amah a vel ding a, a ban a peh leh, siampi in amah a sianglou ahi, chi-in a phuang ding ahi. Kilawh theih vun natna ahi. 28 Tua a natna mun a mei kikheng tuan lou, a ban lah peh lou a, a ma sipa mual ahih leh, siampi in amah a siang ahi, chi-in a phuang ding ahi. A kaatna pawn lei ahi ahi. 29 Pasal hiam, numei hiam khat peuh in a lutang ah hiam, a khabe ah hiam meima a vei leh, 30 siampi in tua meima a vel ding a, a vun sanga thukzaw hi-a a kilat a, tua-a a mul hiam, a sam hiam zong eng a, a ngaat leh, siampi in amah a sianglou ahi, chi-in a phuang ding ahi. Vunthak, kilawh theih natna a lutang hiam, a khabe hiama om ahi. 31 Ahihhangin, siampi in hibang meima a vel khit nunga, a vun sanga thukzaw hi-a a kilat kei a, tua muna mul vom a om kei leh, siampi in ni sagih sung tua bang vunthak meima vei pen a khumtuam ding ahi. 32 A ni sagih ni-in, siampi in tua meima a vel ding a, tua chithak in a ban a peh kei a, a mul eng a om kei a, a vun sanga thukzaw hi-a a kilat kei leh, 33 a meimatna mun chih louh peuh mul hiam, sam hiam metmai ding a, ni sagih dang amah a khumtuam lai ding ahi. 34 A ni sagih niin siampi in tua vunthak a vel kik ding a, a ban peh lou a, a vun sanga thukzaw hi a a kilat kei leh, siampi in amah a siang ahi, chi-in a phuang ding ahi. Ama'n a puansilhte a sawp ding a, amah a siang ding. 35 Ahihhangin, amah a siang ahi, chi-a a kiphuan nunga, tua vunthak in a ban a peh leh, 36 siampi in amah a vel ding a, tua chithak in a ban peh ahih leh, siampi in mul eng a om hiam, chi-a a zon a kul kei. Tua mipa a sianglou ahi. 37 Ahihhangin, siampi et dana a mei kikhekna a om kei a, a muna mul vom a pou tak leh, tua vunthak damta ahi. Amah a siang ahi a, siampi in amah a siang ahi, chi-in a phuang ding ahi. 38 Pasal hiam, numei hiam khat peuh in a vuna a kaan tuamna a neih leh, 39 siampi in tuate a vel ding ahi. Tua a kaannate a mual pian ahih leh, a vun a dulh maimai a lauhuai lou ahi. Tua bang mi a siang ahi. 40 Mi khat peuh sam a pulh a, a lu a giau leh, amah a siang ahi. 41 A sam a pulh a, a mailam a giau a, talkolha a om leh, amah a siang ahi. 42 Ahihhangin, tua a lu giauna hiam, a tai kolhna hiama sansim ngousim meima a om leh, a lutang hiam, a tai hiam apan kilawh theih natna om ahi. 43 Siampi in amah a vel ding a, tua a lutang hiam, taltang hiama a dulha meimatna a bawk a, kilawh theih natna banga sansim ngousim a om leh, 44 tua natna veipa a sianglou ahi. A lutanga meima hangin amah a sianglou ahi, chi-in siampi in a phuang ding ahi. 45 Tua banga kilawh theih natna vei mi in, puan sesa a silh ding a, sam gumsakin, a mai nuailam puan khuhin: Siang lou! Siang lou! chi-in a kikou ding ahi. 46 Kilawh theih natna a vei sung teng, amah a sianglou ahi. Amah kia in a token ding a, giahphual pawlam ah a teeng ding ahi.
Apna tawh kisai Dante
47 Apna in puansilh khat peuh a neksiat leh samul puan hi-in, ziza puan hita leh, 48 gatthawh hi-in phanthawh ziza hiam, samul hiam hita leh, ahih kei leh, savun hiam, savuna kibawl van khat peuh, 49 tua puansilh hiam, savun van hiam, gat thawh himhim hiam hita leh, a kineksiatna hing zelhzulh pian hiam, san sim pianin om ta leh, a ban peh thei apna ahih leh, siampi kianga etsak teitei ding ahi. 50 Siampi in tua apna a vel ding a, ni sagih sung tua puansilh a tuam koih ding ahi. 51 A ni sagih ni-in, siampi in a vel kik ding a, tua apna in a ban a peh leh, tua gat thawh ahih keileh phanthawh puansilh, ahih kei leh savun puansilh a kizatna bang teng hita leh zong, nesia thei apna ahi a, tua puan a sianglou ahi. 52 Tua apna, thil nesia thei apna ahih manin, tua apna in a lawh puansilh, gat thawh hi-in, phanthawh hita leh, ziza khau hiam, samul khau hiam, savun van hiam a haltum ding ahi. Tua vanzat haltum ngeingei ding ahi. 53 Ahihhangin, siampi in tua puansilh a vel chiangin, a apna in tua gat thawh ahih kei leh phanthawh puansilh hi-in, savuna bawl van hita leh, a ban a peh kei leh, 54 tua ap thil pen sawp dingin thu a pe ding ahi. Tua khit chiangin, ni sagih dang a tuam koih lai ding ahi. 55 Tua a ap puan a kisawp khit chiangin, siampi in a vel ding a, tua apna mei a kikhen tuan kei leh, a ban peh kei mah leh, a sianglou ahi. Tua apna in pang khat peuhpeuh peh ahih nak leh, meiin haltum un. 56 Siampi in a vel chiangin, apna in a nek pen a kisawp nunga na mualta ahih leh, tua puansilh gat thawh hiam, phanthawh ziza puan hiam, samul puan hiam, savun hiam hita leh, a apna teng a atkhia ding ahi. 57 Ahihhangin, puansilh ah hiam, gat thawh ahih kei leh phanthawh puan hiam, savun puan hita leh, apna hong kilat kik leh, a ban peh ahi a, tua banga ap puan peuhmah meia haltum ding ahi. 58 A kisawpsa tua puansilh, gat thawh hi-in phanthawh, ahih kei leh savuna kibawl van khat peuh, a apna beisa zong sawp kik teitei ding ahi. Tua khit chiangin, a siang ahi ding hi, chi-in gen in, a chi hi. 59 Hiai dante, samul puan hi-in, ziza khau zangngat puan hita leh, gat thawh hi-in phanthawh hita leh, ahih kei leh, savuna kibawl van khat peuh, apna in a nitsakte, a siang hiam, a siang lou hiama phuan ding dan tawh kisai ahi.
Vun Natna apan Mihing Siansuahna
1 Tangtawn Toupa'n Mosi a houpih a: 2 Chinatna vei mi, siampi' maia hong kipaipih a, a kisiansuah chianga zat ding dan hiaite ahi. 3 Giahphual pawlam ah siampi a paikhe ding a, tua natna vei mi a vel ding ahi. Tua natna vei mi, kilawh theih vun natna apan a damtaak leh, 4 siampi in a kisiansuah nadingin vasa siang, a hing nih, sidar sing them bang zah hiam tawh khausan leh husawp hon tawi dingin thu a pe ding ahi. 5 Tua khit chiangin, siampi in lei bel sunga tui thak siang tunga tua vasate khat gawh dingin thu a pe ding ahi. 6 Siampi in vasa hing lai pen a la ding a, tua tui siang tunga kigou vasa sisan ah, tua sidar sing them tawh, tua khausan tawh, tua husawp tawh a diah ding ahi. 7 Tua-in kilawh theih natna vei mi sagihvei a theh ding a, amah a siang ahi, chi-in a phuang ding ahi. Tua khit chiangin, vasa hing lai pen gampalak ah a khah ding ahi. 8 Siansuah ding mi in a puansilhte a sawp ding a, a sam a metmai ding a, tuiin a kisil ding ahi. Tuachi-in, amah a sianga ngaih ahi ding hi. Hiai nungin, giahphual sung ah hong lut thei ding a, ahihhangin, ama' puanbuk pua ah ni sagih sung a giak ding ahi. 9 A ni sagih ni-in, a mul a metmai ding ahi. A lu tunga sam, a khamul, a mitkhu mul leh a mul khempeuh a metmai ding ahi. A puansilhte a sawp ding a, tuiin a kisil ding a, a siang ahita ding hi. 10 A ni giat ni-in, ama'n belamnoupa nih leh belamnounu khat, kum khata upa, genbaanglou chiat tawh, an thillat ding anvui nei ephah seh sawm suah seh thum, sathau tawh kihel leh sathau log khat hon tawi ding ahi. 11 Amah a siang ahi, chi-a phuangpa siampi in siansuah ding mipa leh a thillatte Kihoupihna Puanbuk lutna ah, Tangtawn Toupa' mai ah a paipih ding ahi. 12 Tua khit chiangin, siampi in tua belamnoupate laka khat a la ding a, tua sathau log khat tawh, mawhna thillatin a lan ding ahi. Tuate mah vei thillatin, Tangtawn Toupa' mai ah a vei ding ahi. 13 Ama'n mun siangthou, khelhna thillat leh haltum thillat a kigawhna mun ah, tua belamnou a gou ding ahi. Khelhna thillat bang mahin, mawhna thillat pen siampi' tan ahi. A siangthou penpen ahi. 14 Siampi in tua mawhna thillat a sisan bang zah hiam a la ding a, siansuah ding mipa' taklam bilteep, a taklam khutpi leh a taklam khepite a nuh ding ahi. 15 Tua khit chiangin, siampi in tua sathau log khat apan sathau bang zah hiam a la ding a, a veilam khutpek sung ah a sung ding a, 16 a taklam khuttal, tua sathau ah a diah ding a, Tangtawn Toupa' mai ah sagih vei a theh ding ahi. 17 Tua khit chiangin, a khut pek sunga sathau om lai apan bang zah hiam, tua siansuah ding mipa' taklam bilteep, a taklam khutpi, a taklam khepi ah, tua mawhna thillat sisan kitatte tung ah a tat ding ahi. 18 Siampi in tua khutpek sunga sathau omlai tengin, siansuah ding mipa' luzang ah a tat ding a, Tangtawn Toupa' mai ah, ama' adingin khuhna a bawlsak ding ahi. 19 Tua khit chiangin, tua khelhna thillat a lan ding a, siansuah ding mipa adingin, sianlouhna khuhna a bawl sak ding ahi. Tua khit chiangin, siampi in haltum thillat a gou ding a, 20 maitam tung ah, an thillat tawh a lan ding a, ama' adingin khuhna a bawlsak ding a, amah a siang ahita ding hi. 21 Ahihhangin, amah pen a zawng a hih a, hiaite a neih zawh kei leh, mawhna thillat dingin belamnoupa khat hon tawi ding a, amah adinga khuhna bawlsak nadinga vei ding ahi. Hiai tawh kitonin, an thillat anvui nei dimdem ephah seh sawm suah seh khat, sathau tawh kihel, sathau log khat leh 22 vakhu nih, ahih kei leh, kawl vakhu nou nih, ama' neih zawh dan dan, veikhawm ding ahi. Vasa khat pen khelhna thillat ding ahi ding a, a dang khat pen haltum thillat ding ahi ding hi. 23 A ni giat ni-in, a kisiansuah nadingin, Kihoupihna Puanbuk lutna ah, Tangtawn Toupa' mai ah, siampi kiang ah hiaite hon tawi ding ahi. 24 Siampi in mawhna thillat belamnou a la ding a, tua sathau log khat tawh, Tangtawn Toupa' mai ah vei thillatin a vei ding ahi. 25 Ama'n mawhna thillat dingin tua belamnou a gou ding a, a sisan bang zah hiam a la ding a, siansuah ding mipa' taklam bilteep, a taklam khutpi, leh a taklam khepi ah a tat ding ahi. 26 Siampi in tua sathau bang zah hiam a veilam khutpek sung ah a sung ding a, 27 a taklam khuttalin tua sathau, Tangtawn Toupa' mai ah sagih vei a theh ding ahi. 28 A khut pek sunga bang zah hiam lain, mawhna thillat sisan a tatna munte, siansuah ding mipa' taklam bilteep, taklam khutpi leh taklam khepi ah a tat ding ahi. 29 A khutpek sunga sathau om laite, siampi in siansuah ding mipa' luzang ah a tat ding a, Tangtawn Toupa' mai ah, amah adingin khuhna a bawlsak ding ahi. 30 Tuachi-in, tua vakhute, ahih kei leh kawl vakhu, tua mipa' neih zawh dan dan, a lan ding ahi. 31 Vasa khat khelhna thillat ding, a dang khat haltum thillat ding ahi ding, an thillat tawh latkhawm ding ahi. Hibangin, siampi in, siansuah ding mipa adingin, Tangtawn Toupa' mai ah, khuhna a bawlsak ding ahi, a chi hi. 32 Hiai dante, kilawh theih vun natna vei a, a kisian suah nadinga thillat ngeinate nei zouloute mi khat peuh' kisiansuahna dan ahi.
Apna apan Inn Siansuahna
33 Tangtawn Toupa'n Mosi leh Aron a houpih a: 34 Na luah ding ua kon piak ding Kanan gam na lut chiang ua, tua gama inn khat peuh a, a pehlawh thei apna ka koih chiangin, 35 tua inn neipa, siampi kianga va paiin: Ka inn ah apna hileh kilawm khat ka mu hi, chi-in a va hilh ding ahi. 36 Siampi in tua apna a vel main, inn awngsak dingin thu a pe ding ahi. Tua bel, tua inn-a thil khat peuh a siangloua phuan ahih louh nading ahi. Hiai nungin, siampi, tua inn ah a lut ding a, inn a vel ding ahi, 37 Baangte-a apte a vel ding a, a hing zelhzulh pian hiam, a san pian 38 kong vang ah siampi a pawtkhe ding a, ni sagih sung tua inn a khakchip ding ahi. 39 A ni sagih ni-in, tua inn vel dingin tua siampi hong pai kik ding ahi. Tua baangte-a apna in a baan a peh leh, 40 a pehlawh suangte lakkhiak a, khaw pawlama a sianglou muna paih dingin thu a pe ding hi. 41 Tua inn sung lam baangte kiat siang ding leh a kikiatkhete, khaw pawlama a sianglou muna buakkhiak dingin thu a pe ding ahi. 42 Tua khit chiangin, suang dangin a kilakkhiakna munte kihuin, leiman thakin inn a kizut thak ding ahi. 43 Suangte a kilakkhiak a, a kikiatsiang a, a kizut thak nung a, tua inn-a apna hong kilat kik leh, 44 siampi in va paiin, a va vel ding ahi, tua ap in a ban peh ahih leh, hihse thei apna ahi. Tua inn a siang lou ahi. 45 Tua inn phei ding a, a suangte, a singzawlte leh baangzutnate, phelkhiak vek ding, khaw pawlama a sianglou muna paih ding ahi. 46 Tua inn a kikhak chip sunga mi khat peuh a va lut leh, amah nitak lam dong a sianglou ahi ding hi. 47 Tua inn sunga va lum hiam, an va ne hiam peuhmah in a puansilhte a sawp ding ahi. 48 Ahihhangin, siampi hong pai a, tua inn a vel a, tua inn baangte a kizut nunga apna in a ban peh lou ahih leh, tua apna damta ahih manin, tua inn a siang ahi, chi-in a phuang ding ahi. 49 Tua inn siansuah dingin, vasa nih leh sidar singthem i Kum bang zah hiam tawh khausan leh husawp a tawi ding ahi. 50 Tua vasa khat, leibel sunga tui siang thak tung ah a gou ding ahi. 51 Tua khit chiangin, sidar sing them, husawp leh khausan leh vasa hing, vasa sipen' sisan leh tui siang ah a diah ding a, tua inn sagih vei a theh ding ahi. 52 Tua vasa sisan, tua tui siang, tua a hing lai vasa, tua sidar sing them, tua husawp leh tua khausanin tua inn a siansuah ding ahi. 53 Tua khit chiangin, tua a hing lai vasa pen, khaw pawlam gam lak ah a khah ding ahi. Hibangin, tua inn adingin khuhna a bawlsak ding a, a siang hong hi ding hi, a chi hi.
Vun Natna tawh kisai Dan Thiltup
54 Hiai dante, kilawh theih vun natna khempeuh, chithak, 55 puansilh hiam, inn hiama apna leh, 56 chi bawk, dulh, ahih kei leh, chikaang chihte tawh kisaia, 57 thil khat peuh a siang leh a siang lou theih nading dan ahi. Hiai, kilawh theih vun natna leh apna tawh kisai dan ahi.
Sa a Thilpawta Nitna
1 Tangtawn Toupa'n Mosi leh Aron a houpih a: 2 Israelte kiang ah thu gen unla: Mi khat peuh in a sa apan thilpawt a neih leh, tua thil pawt a sianglou ahi. 3 Tua thilpawt a sa apana luang lailai hiam, luang nawn lou hita leh, amah a sianglou a suaksak veve ding hi. A sa apan thilpawtin amah a sianglou a suahsak dan hibang ahi: 4 A sa apan thilpawt nei mi' lupna peuhpeuh a sianglou a suak hi. A tutna peuhpeuh zong a sianglou a suak hi. 5 Tua a lupna va sukha peuhmah in a puansilhte a sawp ding, amah zong tuia a kisil ding ahi a, nitaklam dong a sianglou ahi ding ahi. 6 Tua banga thilpawt nei mi' tutna-a va tukha peuhmah in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 7 Tua bang thilpawt nei mi lawngkha mi peuhmah in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 8 A sianglou mi in a siang mi khat peuh a chilphih leh, tua a chilphih mi in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 9 Tua bang mi sakol tunga a tuan leh, a tutna peuhmah a sianglou a suak ding hi. 10 Tua banga a sianglou mi nuaia om thil khat peuh sukha mi peuhmah, nitaklam dong a sianglou ahi ding hi. Tua bang thil khuta la mi in a puansilhte a sawp ding a, tuia a kisil ding ahi. Amah nitak lam dong a sianglou ahi ding hi. 11 Tua banga thilpawt nei mi in khutsil loua a lawnkhak mi peuhmah in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 12 Tua banga a sianglou mi in a lawnkhak leibel peuhmah sattap ding ahi. Singa kibawl vanzat peuhmah tuia sil ding ahi. 13 Thilpawt apan mi a kisiansuah khit chiangin, a sianga ngaih ahih nadingin, ni sagih a sim ding ahi, A puansilhte a sawp ding a, tui siangin a kisil ding a, a siang ahi ding hi. 14 A ni giat ni-in, vakhu nih hiam, kawl vakhu nou nih hiam, Kihoupihna Puanbuk lutna ah, Tangtawn Toupa' mai ah, hon tawi ding a, siampi khut ah a pe ding hi. 15 Siampi in tuate a lan ding a, khat khelhna thillat ding, a dang khat pen haltum thillat ding ahi ding. Hibangin, thilpawt nei mi adingin, Tangtawn Toupa' mai ah khuhna a bawlsak ding ahi. 16 Pasal in bawtui pawt a neih leh, tuiin a kipumsil ding a, nitaklam dong a sianglou ahi ding hi. 17 Tua bawtui banna puansilh khat peuh hiam, savun khat peuh, tuia sil ding ahi a, nitaklam dong a sianglou ahi ding hi. 18 Pasal in numei a luppih a, bawtui pawt a om leh, nitaklam dong a sianglou ahi ding uhi.
Numei' Sa a Thilpawta Nitna
19 Numei in a khateng si neih a neih chiangin, a khateng sianlouhna in ni sagih a daih ding a, tua bang numei lawngkha peuhmah, nitaklam dong a sianglou ahi ding hi. 20 Tua bang numei in khateng sineih a neih sunga a lupna peuhmah a sianglou a suak a, a tutna peuhmah zong a sianglou a suak hi. 21 A lupna lawngkha peuhmah in a puansilhte a sawp ding a, tuia a kisil ding ahi. Nitaklam dongin amah a sianglou ahi ding hi. 22 A tutna lawngkha peuhmah in a puansilhte a sawp ding a, tuia a kisil ding ahi. Amah nitaklam dong a sianglou ahi ding hi. 23 A lupna hiam, a tutna hiam bang peuh hita leh, mi khat peuh in a lawnkhak leh a lawngkha mi a nitak lam dongin a sianglou ahi ding hi. 24 Pasal in amah a luppih a, a sineih siluang in amah a sukkhak leh, tua pasal ni sagih sung a sianglou ahi ding a, a lupna peuhmah zong a sianglou a suak ding hi. 25 Numei in a sineih ngeina bang hilou, khatvei thu-a ni tampi sung si pawt a neih chiangin, ahih kei leh, a sineih ngei sung sanga sawt zaw sipawt a neih chiangin, a sineih ngeina sung bang mahin, tua sipawt a neih sung teng, amah a sianglou ahi ding hi. 26 Tua bang sipawt a neih sunga a lupna peuhmah, a sineih ngeina sunga bang mahin, a sianglou a suak ding hi. Tua bang mahin a tutna peuhmah zong a sianglou a suak ding hi. 27 Tuate lawngkha peuhmah a sianglou a suak ding a, tua bang mi in a puansilhte a sawp ding a, tuia a kisil ding ahi. Nitaklam dong a sianglou ahi ding hi. 28 A thilpawt apan siansuah ahih chiangin, ni sagih a sim ding a, tua nungin a sianga ngaih ahi ding hi. 29 A ni giat ni-in, vakhu nih hiam, ahih kei leh kawl vakhu nou nih, Kihoupihna Puanbuk lutna ah, siampi kiang ah a hon tawi ding ahi. 30 Siampi in tua vasa khat, khelhna thillatin a lan ding a, a dang khat pen, haltum thillatin a lan ding ahi. Hibangin, a thilpawt hanga sianlouhna tawh kisaiin, siampi in amah adingin, Tangtawn Toupa' mai ah khuhna a bawlsak ding ahi.
Thilpawt tawh kisai Dan Thiltup
31 Amaute laka ka tenna mun ninsak a, a sianlouhna ua a sih louh nading-un, amaute a ninsak thei thil peuhmah apan Israelte na kisehtuam ngei ngei ding uh ahi, chi un, a chi hi. 32 Hiai dante, sa apan thilpawt mi ading, bawtui pawta a sianglou suak mi khat peuh ading, 33 khateng sineih nei numei ading, pasal hi-in, numei hita leh, sa apan thilpawt nei mi ading leh, a siangloua ngaih numei luppih pasal ading ahi.
Khelhna Khuhna Ni
1 Aron' tapa nihte'n Tangtawn Toupa a va naih ua, a sih nungun, Tangtawn Toupa'n Mosi a houpih hi. 2 Tangtawn Toupa'n Mosi kiang ah: Na sanggampa Aron hilh inla, puanzak liah a, tua thukhun singkuang tung sin, Khelhna khuhna sin maia Mun Siangthoupen sung ah a ut hun peuhin lut mawk mawk kei hen, tua chilouin zaw a si mahmah ding hi. Ahang bel, tua khelhna khuhna sin tunga meipi laka kei hong kihil ka hi. 3 Mun Siangthou sunga Aron a lut ding dan hibang ahi: Khelhna thillat ding bawngtaltuai khat leh haltum thillat ding belamtal khat kengin a lut ding ahi. 4 Puan malngat tungsilh tuai, a zeka siangthou a silh ding ahi. Puan malngat duang a vet ding a, puan malngat dialkhip a khim ding ahi. Hiaite puansilh a zeka siangthou ahi. Hiaite a silh main, tuiin a kisilsiang ding ahi. 5 Israel mite lak apanin khelhna thillat ding keltal nih leh haltum thillat ding belamtal khat a la ding ahi.
Thillat Dingte
6 Aron in ama' ading leh a innkawte adinga khelhna khuhna bawl nadingin, ama' aituam khelhna thillat dingin, tua bawngtal a lan ding ahi. 7 Tua khit chiangin, tua keltal nihte a la ding a, Kihoupihna Puanbuk lutna ah, Tangtawn Toupa' mai ah, a kai ding ahi. 8 Tua keltal nihte tung ah ai a san ding a, ai khat Tangtawn Toupa' ading ahi ding a, ai dang khat pen thuaksik thuak kei ading ahi ding hi. 9 Aron in tua Tangtawn Toupa' adinga ai a tukna kei pen a la ding a, khelhna thillatin a lan ding ahi. 10 Thuaksik thuak kei adinga ai a tukna kei pen bel, Tangtawn Toupa' mai ah, a hingin hon kai ding ahi. Tua bel, tua kei pen thuaksik thuak kei hisak a, gamdaia kha mangin, khelhna khuhna bawlnain a kizang ding ahi.
Siampi ading Khelhna Khuhna
11 Aron in ama' aituama khelhna thillat dingin, tua bawngtal hon kai ding ahi. Tua bel, amah leh a innkawte adinga khuhna bawlsak nading ahi ding hi. Tuachi-in, ama' aituam khelhna thillat dingin, tua bawngtal a gou ding ahi. 12 Tangtawn Toupa' maia maitam apan meiam kila-a hihdim, gim namtui kuangdai leh gim namtui gawivui nei dimdem khutdim nih a la ding a, puanzak liah ah a lutpih ding ahi. 13 Tua ah, Tangtawn Toupa' mai ah, tua meiamte tung ah, gim namtui vui a buak ding a, tua gim namtui khu in Theihpihna singkuang tunga khelhna khuhna sin a liah ding a, tuachi-in, amah a si kei ding hi. 14 Tua bawngtal sisan bangzah hiam a la ding a, a khuttalin tua khelhna khuhna sin tung leh mai a theh ding ahi. Tua khit chiangin, a khuttalin khelhna khuhna sin mai zawn ah sagih vei a theh ding ahi.
Kihoupihna Puanbuk ading Khuhna
15 Tua khit chiangin, mipite adinga khelhna thillat dingin, tua keltal a gou ding a, puanzak liah ah a sisan a lutpih ding a, bawngtal sisan ahih bangbangin, tua sisan a hih ding ahi. Khelhna khuhna sin tung leh mai a theh ding ahi. 16 Israelte' sianlouhna leh helna, a khelhna uh bang teng hita leh, tuate hangin, hibangin Mun Siangthoupen adingin siansuahna a bawlsak ding ahi. 17 Mun Siangthoupena siansuahna bawl dinga, Kihoupihna Puanbuk sunga Aron a lut apan, ama' ading, a innkawte ading leh Israel mipi khempeuh adinga khelhna khuhna bawlkhin a, a hong pusuah kik mateng, Kihoupihna Puanbuk sung ah kuamah a om ding ahi kei hi. 18 Tua khit chiangin, hong pusuak ding a, Tangtawn Toupa' maia maitam a naih ding a, tua maitam adingin siansuahna a bawl ding ahi. Tua bawngtal sisan bangzah hiam leh kei sisan bang zah hiam a la ding a, tua maitam kite ah a tat kimvek ding ahi. 19 Israelte' sianlouhna apan tua maitam siansuaha, sehtuam siangthou hisak ding a, ama'n tua sisan khuttala lain, maitam tung sagih vei a theh ding ahi.
Mipite ading Khuhna
20 Aron in Mun Siangthoupen, Kihoupihna Puanbuk leh maitam adinga siansuahna a bawl khit chiangin, a hing lai kei pen hon kai ding ahi. 21 Tua a hing lai kei lutung ah a khut lang nih a nga ding a, a tung ah Israelte' gitlouhna leh helna-a khelhna khempeuh a pulak ding a, tua kei lutung ah a nga ding ahi. Tua nasem dinga seh mipa khuta pekhiain, tua kei gamdai ah a khamang ding ahi. 22 Tua mipa'n tua kei gamdai kuamah om louhna mun ah a khamang ding a, tua kei in amaute' khelhna khempeuh a pawmang ding hi. 23 Tua khit chiangin, Aron, Kihoupihna Puanbuk sung ah a lut ding a, Mun Siangthoupen sung a lut ma-a a silh tua a puan malngat puansilhte a suahkhe ding a, tua ah a nuse ding ahi. 24 Mun siangthou khat ah, tuiin a kisil ding a, a puansilh ngeinate a silh ding ahi. Tua khit chiangin, hong pusuak ding a, ama' ading leh mipite adinga khuhna bawl dingin, ama' ading haltum thillat, mipite ading haltum thillat a lan ding ahi. 25 Khelhna thillat thau zong maitam tung ah a haltum ding ahi. 26 Tua thuaksikthuak kei va khahpa'n a puansilhte a sawp ding a, tui-a a kisil ding ahi. Tua nungin, giahphual sung a lut thei ding hi. 27 Tua khelhna thillat ding bawngtal leh kei, khelhna khuhna bawl nadinga a sisan Mun Siangthoupen sunga kitheh, giahphual pawlama puakkhiak a, a vunte, a sate leh a ek haltum ding ahi. 28 Tua a haltumpa'n a puansilhte a sawp ding a, tuia a kisil ding ahi. Tua nungin, giahphual sung a lut thei ding hi.
Khuhna Ni Thiltup
29 Hiai noute adinga a omden ding thuseh ahi; A kha sagihna, a ni sawm ni-in, noute na kizangsak ding uh a, nna himhim na sem ding uh ahi kei hi a gama piang hi-in, gamdang mi na lak ua tengte hita leh, kuama'n nna a sem ding ahi kei hi. 30 Ahang bel, hiai ni-in, noute' kisiansuah nadingin, noute adingin khuhna kibawl ding ahi. Tua khit chiangin, Tangtawn Toupa' mai ah, noute na khelhnate khempeuh uapan na siang ding uhi. 31 Sabbath khawlni ahi a, noute na kizangsak ding uh ahi. A omden ding thuseh ahi. 32 Thaunilhsa leh namkipsa siampi, siampilian nasem dinga a pa' thakhengpa in khelhna khuhna a bawl ding ahi. Ama'n puan malngat puansilh a zeka siangthoute a silh ding a, 33 Mun Siangthoupen ading, Kihoupihna Puanbuk ading leh maitam ading, tua baan ah, siampite ading leh mipite khempeuh adingin khuhna a bawl ding ahi. 34 Hiai noute adinga a omden ding thuseh ahi. Israelte' khelhnate khempeuh adingin kum khatin khatvei khuhna a kibawl ding ahi, a chi hi. Tangtawn Toupa'n Mosi thu a piak bangin, a kihih hi.
Thillat Latna Mun
1 Tangtawn Toupa'n Mosi a houpih a: 2 Aron leh a tapate leh Israelte khempeuh kiang ah thu gen inla: Tangtawn Toupa' thupiak hiai ahi: 3 Giahphual sung hiam, a pua hiama bawngtal, belamnou, ahih kei leh, kei lan Israel mi khat peuh in, 4 Tangtawn Toupa' biakbuk maia, Tangtawn Toupa' maia lat dinga Kihoupihna Puanbuk lutna a hon kai ahih kei leh, tua mipa, sisan suah a mawha ngaih ahi ding hi. Amah sisan suah ahi a, a mite lak apan satkhiak ngeingei ding ahi. 5 Tua bel, Israelte'n tu-a gampalak peuha kithoihna a bawlte uh, Tangtawn Toupa' maia hon kaih ding uh deihna ahi. Amaute'n tua kithoihna thillatte siampi' maia hon kaih ngeingei ding uh ahi. Tua bel, Tangtawn Toupa' mai ah, Kihoupihna Puanbuk lutna ah, lemna thillata a lat ding uh ahi, chihna ahi. 6 Siampi in tua thillat sisanin Kihoupihna Puanbuk lutna ah, Tangtawn Toupa' maitam a theh ding a, Tangtawn Toupa' lungkimna gim namtui hi dingin, a thaute a haltum ding ahi. 7 Amaute a kizuakna uh kei limte mai ah, kithoihnate himhim a lan nawn ding uh ahi kei hi. Hiai amaute leh a suante uh adinga omden ding thuseh ahi, chi in. 8 Amaute kiang ah: Israel mi khat peuh hi-in, amaute laka teng gamdang mi khat peuh hita leh, haltum thillat hiam, kithoihna hiam, 9 Tangtawn Toupa' maia lan dinga Kihoupihna Puanbuk lutna-a hon tawi lou peuhmah a mite lak apan satkhiak ding ahi, chi in.
Sisan Zatna Dan
10 Israel mi khat peuh hi-in, amaute laka teeng gamdang mi khat peuh hita leh, sisan ne peuhmah tua banga sisan ne mi peuhmah tung ah ka maigum ding a, a mite lak apan ka satkhe ding hi. 11 Ahang bel, ganhing peuhmah hinna a sisana om hi a, noute ading maitam tunga khelhna khuhna bawl nadinga kon piak sisan ahi. Mihing' hinna tatna bawlna sisan ahi. 12 Tua bang ahih manin, Israelte kiang ah: Na lak ua kuamah in sisan na ne thei kei ding uh, na lak ua teeng gamdang mi in zong sisan a ne thei kei ding, ka chi ahi. 13 Israel mi khat peuh hi-in, na lak ua teeng gamdang mi hita leh, nek siang gamsa hiam, vasa hiam a mat aleh, a sisan a kaikangsak ding a, leivui a vuk ding ahi. 14 A hang bel, ganhing hinna a sisana om ahi. Hiai hang ahi, Israelte kiang a: Ganhing hinna a sisan ahih manin, ganhing sisan na ne ding uh ahi kei, sisan ne peuhmah satkhiak ahi ngeingei ding, ka chih. 15 Gam sunga piang khat peuh hi-in, gamdang mi hita leh, ganhing sisa hiam, gamsa thahsa ne mi peuhmah in a puansilhte a sawp ding a, tuia a kisil ding ahi. Nitaklam dong a siangloua ngaih ahi ding a, tua khit chiangin a siang ding. 16 Ahihhangin, a puansilhte a sawp kei a, tuia a kisil kei leh, mawh a paw ding, chi in, a chi hi.
Lupkhawmna Sianglou tawh kisai Dante
1 Tangtawn Toupa'n Mosi a houpih a: 2 Israelte kiang ah thu gen inla: Kei Tangtawn Toupa na Pathian uh ka hi. 3 Na vakhualtamna uh Aigupta gam mite' hih bangin na hih ding uh ahi kei. Kon pilut nading Kanan gama a hih bangun na hih ding uh ahi sam kei. Amaute' gamtat zui kei un. 4 Ka dan piakte na zui ngeingei ding uh ahi. Ka thusehte zui dingin pilvang un. Kei Tangtawn Toupa na Pathian uh ka hi. 5 Ka thusehte leh dan piakte zui un. Hiaite zui mi peuhmah hiaite tungtawnin a nungta ding ahi, kei Tangtawn Toupa ka hi. 6 Kuamah in luppih dingin tanau nai a naih ding ahi kei. Kei Tangtawn Toupa ka hi. 7 Na nu luppihin na pa na zahlaksak ding ahi kei. Amah na nu ahi, luppih ken. 8 Na pa' zi luppih ken, tua in na pa zahlaksak ding ahi. 9 Na pa' tanu hiam, na nu' tanu hiam, innsung khata na pianpih hi-in, mun danga piang hita leh, tua na sanggam nu luppih ken. 10 Na tapa' tanu hiam, na tanu' tanu hiam luppih ken, na zahlakna ahi ding hi. 11 Na pa' zi' tanu, na pa' suan luppih ken, na sanggamnu ahi. 12 Na pa' sanggamnu luppih ken, na pa' tanau nai ahi. 13 Na nu' sanggamnu luppih ken, na nu' tanau nai ahi. 14 Luppih dinga na pa' sanggampa' zi naihin na pa zahlaksak ken. Amah na nungak ahi. 15 Na tapa' zi luppih ken. Na tapa' zi ahi. Amah tawh lumkhawm kei un. 16 Na sanggampa' zi luppih ken, na sanggampa zahlaksak na hi ding hi. 17 Numei khat leh a tanu luppih tuaktuak ken. Tua nu' tapa' tanu hiam, a tanu hiam luppih ken. Amaute kitanau nai ahi uh. Tua bang gamtat gilou ahi. 18 Na zi dam sungin, a sanggam nu tawh neikhawmin luppih ken. 19 Numei khateng sineih neia a sianlouh sungin, luppih dingin naih ken. 20 Na innvengpa' zi ang kawm kenla, nang leh nang kininsak ken. 21 Na tate kuamah Molekh kianga lat dingin pe ken. Na Pathian' min ninsak ding na hi. Kei Tangtawn Toupa ka hi. 22 Numei luppih bangin pasal luppih ken, thil kihhuai ahi. 23 Ganta khat peuh luppihin nang leh nang kihihnin ken. Ganta tawh lumkhawm dingin numei a kipe ding ahi kei. Tatsiatna ahi. 24 Na mai ua ka hawlkhiak dingte hibanga gamta-a, kihihnin uh ahih manin, hibangte peuhmahin noute kihihnin kei un. 25 A gam nangawn hihnit ahi a, tua gam a khelhna hangin ka gawt a, a sunga teengte a lawkhia hi. 26 Ahihhangin, noute'n zaw ka thusehte leh ka dan piakte na zuih ding uh ahi. Gam sunga piang hi-in, na lak ua teeng gamdang mite hita leh, kuama'n hibang thil kihhuai na hih ding uh ahi kei hi. 27 Na mai ua gama teengte'n hibangte a hih uh a, a gam hihnitin a om hi. 28 Gam na hihnit uleh, na mai ua namte a luakkhiak bangin, noute zong hon lawkhe ding ahi. 29 Hibang thil kihhuai hih mi peuhmah, tua bang mite peuhmah a mite uh lak apan satkhiak ahi ngeingei ding uhi. 30 Ka ngiatte hih unla, nong pai ma ua kihhuai tatdan ngeina a neihte uh khat beek zui kei unla, tuatein kihihnin kei un. Kei Tangtawn Toupa na Pathian uh ka hi, chi-in gen in, a chi hi.
Khawtang ading Dante
1 Tangtawn Toupa'n Mosi a houpih a: 2 Israel kikhawmte khempeuh kiang ah thu gen inla, Tangtawn Toupa'n: kei Tangtawn Toupa na Pathian uh ka siangthou bangin siangthou un. 3 Noute kuapeuh in a nu leh a pa a zah ding ahi. Ka Sabbathte na tan ding uh ahi. Kei Tangtawn Toupa na Pathian uh ka hi. 4 Milimte lam ah kihei nawn kei unla, sunthawh sikin zong pathiante kibawl kei un. Kei Tangtawn Toupa na Pathian uh ka hi. 5 Tangtawn Toupa' maia lemna thillat na lat chiangun, noute taanga a kisan theih nading dana na lat ding uh ahi. 6 Na lat ni-un hiam, a zing chiangin hiam, a sa a kinek ding ahi. A ni thum ni chianga a vai om peuhmah haltum ding ahi. 7 A ni thum ni-a a kinek leh, a sianglou ahi a, a kisang kei ding hi. 8 Tua bang ne mi peuhmah in Tangtawn Toupa a siangthoupa siangthoulousak ahih manin, mawhkhuksak ahi ding hi. Tua bang mi, amaute lak apan satkhiak ahi ding ahi. 9 Na lou ua buh na lak chiangun, na lou nawl dong uh la kei un, ahih kei leh, a sang zong khawm kei un. 10 Na grephuan uah zong a sang zong kei un, ahih kei leh, a pulhte zong tawm kei un. Mizawngte leh gamdang mite adingin siit un. Kei Tangtawn Toupa na Pathian uh ka hi. 11 Gu ken. Zuau gen ken. Kikhemtuah kei un. 12 Zuauthu-a ka mina kichiamin na Pathian' min ninsak ken. Kei Tangtawn Toupa ka hi. 13 Na veeng na pam khem kenla, lok ken. Sum thalawh mi' thaman zan khat zong hen ken. 14 Nangongte hamsiat kenla, mittawte' mai ah kisuih na'ng koih ken. Na Pathian lau in. Kei Tangtawn Toupa ka hi. 15 Thudika thukhen kaikawi kenla, mizawngte lam ah thukhenna leisak kenla, miliante lah deihsak tuam ken. Na veeng na pam tung ah thutangin vai hawm in. 16 Na mite lak ah gensiatna thu leengsak ken. Na veeng na pam' hinna thawmhausak dingin bangmah hih ken. Kei Tangtawn Toupa ka hi, 17 Na lungsung ah na sanggampa mudah ken. Na veeng na pam a langtangin taihilh in, tua hi leh, a khelhna ah na kihel kei ding. 18 Phu la ken. Na mite laka kuapeuh tung ah lungkimlouhna paai ken. Nang na ki -it bangin na veeng na pam it in. Kei Tangtawn Toupa ka hi. 19 Ka thusehte zui in. Ganta chi tuam kibahsak ken. Na lou ah khaichi chi nih pawikhawm ken. Khau chi tuam nih kigankhawm puan silh ken. 20 Pasal khat peuh in sila nungak, midang tawh kikhamsa, ahihhanga tat nai louh, ahih kei leh, noplenna ngah nailou, a luppih leh gawtna a kituak piak ding ahi. Ahihhangin, ama'n noplenna ngah nailou ahih manin, amaute thah ding ahi kei uhi. 21 Pasal pen in bel, Tangtawn Toupa' maia mawhna thillat dingin, Kihoupihna Puanbuk lutna ah, belamtal khat hon kaih ding ahi. 22 Tua mawhna thillat belamtalin siampi in amah adingin, khelhna a na hihtak tawh kisaiin, Tangtawn Toupa' mai ah khuhna a bawlsak ding ahi. Tuachi-in, a khelhna ngaihdam ahi ding hi. 23 Tua gam na lut chiang ua, theikung bangpeuh na suan chiangun, a gah pen a sianglouin ngai un. Kum thum sung tua bangin, a sianglouin na ngai ding uh a, 24 a kum lina ah a gah khempeuh a siangthou, Tangtawn Toupa' maia phatna thillat ahi ding ahi. 25 Ahihhangin, a kum ngana ah, a gah na ne thei ding uhi. Hibangin, na sep gah uh a pung ding hi. Kei Tangtawn Toupa na Pathian uh ka hi. 26 Sa peuhmah a sisan tawh na nekhawm ding uh ahi kei hi. Aisan ching kei unla, bum zong ching kei un. 27 Na sam uh haizek tan ah met kei unla, na khamul uh zong sumkhe sam kei un. 28 Misite hangin na sa uh kiatkeh kei unla, ahih kei leh, na sa tung uh gelhgial kei un. Kei Tangtawn Toupa ka hi. 29 Na tanute uh kizuaka bawlin thanghuaisak kei un. Tua a hih kei leh, gam pen kizuak a suak ding a, gitlouhna tawh a kidim ding hi. 30 Ka Sabbathte tang unla, ka mun siangthou zah un. Kei Tangtawn Toupa ka hi. 31 Dawi zawlte lam ah awn kei unla, aisansiamte naih kei un. Amaute'n hon ninsak ding uhi. Kei Tangtawn Toupa na Pathian uh ka hi. 32 A teekte' maia na om chiangun, ding unla, upate zahna pia un. Tua bangin na Pathian uh zah un. Kei Tangtawn Toupa ka hi. 33 Na gam ua gamdang mi tawh na tenkhawm chiangun, amah mawkbawl kei un. 34 Na kiang ua teng gamdang mi, gamdanga piang bangin en kei un. Nang na ki it bangin amah it in. Ahang bel, noute zong Aigupta gam ah gamdang mi, mikhualin na om uhi. Kei Tangtawn Toupa na Pathian uh ka hi. 35 Sau dan, gik dan, ahih kei leh, tam dan na teh chiangun, tehna diklou zang kei un. 36 Tehna dik, bukna dik, ephah dik leh hin dik zang un. Kei Aigupta gam apan noute hon piikhia, Tangtawn Toupa na Pathian uh ka hi, ka thusehte khempeuh leh ka dante khempeuh kem unla, zui un, chi ahi, chi in, a chi hi.
Molekh Bete Gawtna
1 Tangtawn Toupa'n Mosi a houpih a: 2 Israelte kiang ah: Israelte khat peuh, ahih kei leh, Israel gama teeng gamdang mi khat peuh, a tate Molekh kianga pe peuhmah thah ding ahi. Mipite'n suangin amah a denglum ding uh ahi. 3 Ke'n tua bang mi tung ah ka mai ka gumsak ding a, a mite lak apan ka satkhe ding hi. Ahang bel, ama'n a tate Molekh kianga pia a, ka mun siangthou ninsak a, ka min siangthou ninsak hiven. 4 Tua bang mi in a tate Molekh kianga a piak laia mipite tua mu lou dinga a mitsin uh a, amah a thah kei uleh, 5 ke'n tua mipa leh a innkawte tung ah ka mai ka gumsak ding a, amah leh Molekh kianga kizuak dinga amah zuite, a mite uh lak apan ka satkhe ding hi.
Dawi aisan Gawtna
6 Dawizawlte leh aisansiamte lama awn a, amaute zui dinga kizuak mi tung ah ka mai ka gumsak ding a, a mite lak apan ka satkhe ding hi. 7 Kei Tangtawn Toupa na Pathian uh a siangthou ka hih manin, noute a siangthoua sehtuamin kibawl unla, siangthou un. 8 Ka thusehte lenkip unla, zui un. Kei noute hon hihsiangthoupa Tangtawn Toupa ka hi. Nu leh Pa Hamsiatte Gawtna 9 Mi khat peuh in a nu hiam, a pa hiam, a hamsiat leh, amah thah ngeingei ding ahi. A nu hiam, a pa hiam a hamsiat manin, a sisan mawh ama' lutung a tu ding hi.
Angkawmna Gawtna
10 Pasal khat peuh in midang, a veng a pam zi' ang a kawm leh angkawmpa leh angkawmnu thah ding ahi. 11 Pasal khat peuh in a pa' zi a luppih leh, a pa a zahlaksak ahi. Tua mipa leh tua numei thah ding ahi. A sisan mawh uh amau' lutung a tu ding hi. 12 Pasal khat peuh in a tapa' zi a luppih leh, a nih ua thah ding ahi. A thilhih uh tatsiatna ahi. A sisan mawh uh amau' lutung a tu ding hi. 13 Pasal khat peuh in, numei luppih banga pasal mah a luppih leh, a nih ua tatsia ahi uhi. A nih un thah ding ahi. A sisan mawh uh amau' lutung a tu ding hi. 14 Pasal khat peuh in, numei khat peuh a tanu tawh a kitenpih leh, gitlouhna ahi. Na lak ua gitlouhna a om louh nadingin, amah leh amaute meia hallup ding ahi. 15 Pasal khat peuh in, ganta a luppih leh, amah thah ding ahi. Tua ganta zong thah ding ahi. 16 Numei khat peuh in, luppih dinga ganta a naih leh, tua numei leh tua ganta that un. Amaute thah ngeingei ding ahi uhi. A sisan mawh uh amau' lutung a tu ding hi. 17 Pasal khat peuh in, a sanggamnu a pa' tanu hiam, a nu' tanu hiam hita leh a kitenpih a, a lupkhawm uleh, zahlakna ahi. A mite uh mitmuh apan satkhiak ding ahi uhi, Tua pasal in a sanggamnu zahlaksak ahi a, mawh khuksak ahi ding hi. 18 Pasal khat peuh in, numei a khateng sineih a neih laia a luppih leh, a si luanna nak phoulak ahi a, tua numei in zong phoulak ahi. A nih-un a mite uh lak apan satkhiak ding ahi uhi. 19 Na nu' sanggamnu hiam, na pa' sanggamnu hiam na luppih ding ahi kei. Tua in na sanggam nai zahlaksak ahi ding hi. Na nih-un mawh khuksak na hi ding uhi. 20 Pasal khat peuh in, a nungak a luppih leh, a pa' sangampa zahlaksak ahi. A nih un a khelhna uh khuksak ahi ding uh a, suan leh khak beiin a om ding uhi. 21 Pasal khat peuh in, a sanggampa' zi a kitenpih leh, sianlouhna thilhih ahi. A sanggampa a zahlaksak ahi. A nih un suan leh khak beiin a om ding uhi.
Hihsiangthoua Sehtuamna in a Thiltup
22 Ka thusehte leh ka dan piakte khempeuh lenkipin zui un. Tuachi-in, na luah ding ua kon piilutna gam in hon lawkhe kei ding hi. 23 Noute maia ka hawlkhiak ding namte tatdan ngeinate na zui ding uh ahi kei. Amaute'n hiai thilte khempeuh a hih manun, amaute ka kih ahi. 24 Ahihhangin, noute kiang ah bel: Amaute' gam na tang ding uh. Ke'n tua nawitui leh khuaizu-a luang gam na goutan dingun kon pe ding, ka chi hi. Kei namte lak apan noute hon septuampa Tangtawn Toupa na Pathian uh ka hi. 25 Tua bang ahih manin, ganhing siang leh sianglou na khen kak ding uh a, vasa siang leh sianglou na khenkak ding uh ahi. Noute adingin a sianglou chi-a ka khenkhiak tua bang ganhing, vasa, ahih kei leh, leia bokvaktein kihihnin kei un. 26 Kei Tangtawn Toupa a siangthou ka hih manin, noute a siangthou na hih ding uh ahi. Noute keia hi dingin, namte lak apan kon sehtuam na hi uhi. 27 Na lak ua dawizawl, ahih kei leh, aisansiam, pasal hi-in numei hita leh, thah ding ahi, Tua bang mite na denlup ding uh ahi. A sisan mawh uh amau lutung a tu ding hi, chi in, a chi hi.
Siampite tawh kisai Dante
1 Tangtawn Toupa'n Mosi a houpih a: Siampite, Aron' tapate kiang ah thu gen inla: Siampi in a mite laka misi khat peuh hangin, a siangloua ngaihin a kibawl ding ahi kei hi. 2 A tanau, a nu hiam, a pa hiam, a tapa hiam, a tanu hiam, a sanggampa hiam, 3 pasal nei nailou a sanggamnu hiam ama' vaksa a hih leh bel, a sianglouin a kibawl thei ding hi. Tua sanggamnu'n pasal neilou a hih manin, ama' adingin bel, a sianglouin a kibawl thei ding hi. 4 Kitenna hanga a kitanaupih mi adingin bel, a sianglouin a kibawl ding ahi kei hi. 5 Siampite'n a sam uh a metmai ding uh ahi kei a, a khamul uh zong a mettom ding uh ahi kei a, a satung uh zong a at keh ding uh ahi kei hi. 6 A Pathian uh adingin a siangthou ding uh ahi a, a Pathian uh' min a ninsak ding uh ahi kei hi. Tangtawn Toupa' maia meia thillatte, a Pathian uh' an laan ahih manun, amaute a siangthou ding uh ahi. 7 Siampite bel, Pathian adinga siangthou ahih manun, kizuaka kihihnin hiam, maksa numeite hiam, a kitenpih ding uh ahi kei hi. 8 Amaute'n na Pathian uh an lan a hih manun, amaute siangthoua na ngaih ding uh ahi. Kei Tangtawn Toupa a siangthou ka hih manin, amaute a siangthouin ngai un. Kei noute a siangthoua hon bawlpa ka hi. 9 Siampi' tanu kizuaka, a kihihnit leh, a pa a zahlaksak ahi. Tua bang numei meia hallup ding ahi.
Siampiiian tawh kisai Dante
10 A sanggampate laka siampiliana pang, a luzanga sathau kisung a, thaunilhna tang, siampi puansilhte silh dinga namkip pen in, a lukhu a lakhe ding ahi kei a, a puansilhte zong a botkek ding ahi kei hi. 11 Misi luang khat peuh omna ah a lut ding ahi kei. A pa hiam, a nu hiam nangawn hangin zong a sianglouin a kibawl ding ahi kei hi. 12 Amah a Pathian' thaunilhna tungtawna kinamkip ahih manin, a Pathian' mun siangthou a nuse ding ahi kei hi. Nin zong a ninsak ding ahi kei hi. Kei Tangtawn Toupa ka hi. 13 Numei a kitenpih zong nungak siangthou ahi ding ahi. 14 Meigong a kitenpih ding ahi kei a, maksa numei hiam, ahih kei leh, kizuaka kihihnin numei a kitenpih ding ahi kei. Ama' mite laka nungak siangthou kia a kitenpih ding ahi. 15 Tuachi-in, a mite lak ah, a suan a khakte a ninsak kei ding hi. Kei amah hihsiangthoupa Tangtawn Toupa ka hi, chi in, a chi hi.
Siampi Nasem Theilou Mite
16 Tangtawn Toupa'n Mosi a houpih a: 17 Aron kiang ah thu gen inla: Hong tung ding khangsawn sawnte lak ah zong, na suan na khakte laka melhemna nei mi peuhmah in a Pathian' an lan dingin hon naih ding ahi kei hi. 18 Melhemna nei kuamah, a mittaw hiam, a khebai hiam, a mei kisia hiam, poihlong hiam kuamah in hon naih kei hen. 19 Khe kitan hiam, khut kitan hiam, 20 ahih kei leh, nungkul hiam, neupian tuam hiam, mit sia hiam, meima dam theilou tuikai huphup hiam, chiltang kitam hiam kuamah in thillan dingin hon naih kei hen. 21 Siampi Aron' suan, melhemna nei kuamah in Tangtawn Toupa' maia meia thillat dinga kisa dingin hon naih ding ahi kei. Melhemna nei ahi a, a Pathian' an lan dingin hon naih ding ahi kei hi. 22 A Pathian an siangthoupen leh an siangthou bel a ne thei ding. 23 Ahihhangin, a melhemna hangin, puanzak kaanin a lut ding ahi kei a, maitam zong a naih ding ahi kei hi. Tua banga paiin ka mun siangthou a ninsak ding ahi kei. Kei tuate hihsiangthoupa Tangtawn Toupa ka hi, chi in, a chi hi. 24 Tuachi-in, Mosi in Aron leh a tapate leh Israelte khempeuh kiang ah tua bangin thu a gen hi.
Siampi' Hih Siangthou
1 Tangtawn Toupa'n Mosi a houpih a: 2 Aron leh a tapate hilh inla, Israelte'n ka maia thillat siangthou, kei adinga seh siangthou a latte uh zahtak takin sai uhen. Ka min siangthou a hihnin kha ding uhi. Kei Tangtawn Toupa ka hi. 3 Amaute kiang ah gen inla: Khangsawn sawn dongin, na suan na khakte uh laka khat peuh, siangloua ngaih a om a, tua bang mi in, Israelte'n Tangtawn Toupa adinga a sehtuam uh thillat siangthou a naih leh, ka mai apan amah satkhiak ding ahi. Kei Tangtawn Toupa ka hi. 4 Aron' suan leh khak khat peuh in, kilawh theih vun natna a vei leh, ahih kei leh, sa-a thilpawt a neih leh, amah siansuah ahih mateng, thillat siangthoute a ne thei kei ding hi. Siluang in a nitsak thil a lawnkhak leh, ahih kei leh, bawtui pawt in a nitsak thil a lawnkhak leh, amah zong a sianglou a suak ding hi. 5 Ahih kei leh, amah sianglou suaksak thei, bokvak ganhing a lawn khak leh, bangchi bang sianlouhna na hita leh zong, amah a sianglou a suak ding hi. 6 Tua bang thil lawngkhapa pen, nitaklam dong a sianglou ahi ding. Amah tuia a kisil masak kei leh, thillat siangthoute a ne ding ahi kei hi. 7 Ni a tum chiangin, amah a siang ding. Tua nungin, thillat siangthoute a ne thei ding, ama' an hiven. 8 A sisa a kimu thil peuhmah, ahih kei leh, gamsate' thahsa ganhing hiam, a ne ding ahi kei a, tua bang nein sianglou a kisuaksak ding ahi kei. Kei Tangtawn Toupa ka hi. 9 Siampite'n ka thil ngiatte simmawh taka saia, khelhna hanga a sih louh nadingun, ka ngiat bangbanga a hih ding uh ahi. Kei amaute hihsiangthoupa Tangtawn Toupa ka hi. 10 Siampi innkuan sung pawlam mi kua mah in thillat siangthou a ne ding ahi kei. Siampi' inn-a om mikhual hiam, a inna sum thalawha nasem mi in zong a ne ding ahi kei hi. 11 Ahihhangin, siampi in suma a lei sila khattou hiam, ahih kei leh, a innsunga piang sila in bel siampi an a ne thei ding. 12 Siampi' tanu in, siampi hilou midang a kitenpih leh, a zek thilpiakte khat beek a ne thei kei ding. 13 Ahihhangin, siampi' tanu meigong hong suak hiam, a pasal mak hiam a hih a, tate neiloua a nungak lai mah banga a pa' inn-a om dinga hong nawkik ahih leh, a pa' an a ne thei ding hi. Ne dinga phalna nei lou mi in bel a ne thei kei ding hi. 14 Mi khat peuh in theihlouha thillat siangthou a nek khak leh, tua thillat taang tua siampi kiang ah a din ding a, a man zah seh nga suah seh khat a behlap ding ahi. 15 Israelte'n Tangtawn Toupa' maia thillat siangthou a latte uh siampite'n 16 amaute nesakin tua thil siangthoute a ninsak ding uh ahi kei. Tua bang a neksakte uh tung ah mawhna a tungsak kha ding uhi. Kei tuate hihsiangthoupa Tangtawn Toupa ka hi, chi in, a chi hi.
Saan Theihlouh Kithoihnate
17 Tangtawn Toupa'n Mosi a houpih a: 18 Aron leh a tapate leh Israelte khempeuh kiang ah thu gen inla: Na lak ua mi khat peuh in Israel mi hi-in, na lak ua teeng gamdang mi hita leh thuchiam tangtunsak nading hiam, ahih kei leh, ut thillat ding hiama Tangtawn Toupa' maia haltum thillat ding thawnpiak na piak uleh, 19 noute taanga a kisaan theih nadinga bawnghon lak apan hiam, belam leh kelhon lak apan hiama ganta a pa, genbaanglou, na piak ding uh ahi. 20 Gensiat baang himhim na piak louh ding uh ahi. Noute taanga kisaang lou ding ahi. 21 Mi khat peuh in, a thuchiam tangtunsak nading hiam, ahih kei leh, ut thillat ding, bawnghon lak apan hiam, belam leh kelhon lak apan hiam ganta hon tawi chiangin, a kisaan theih nadingin, genbaanglou leh melhemna bei ahi teitei ding hi. 22 Tangtawn Toupa' mai ah a mittaw peuh, a liamsa peuh, a poihlong peuh, chivom nei peuh, meima leh meima tui huphup nei peuh na lan ding uh ahi kei hi. Tangtawn Toupa' maia meia thillatin tua bang peuhmah koih kei un. 23 Ahihhangin, ut thillat dingin bel, bawngtal hiam, belam hiam a pianchinglou leh a poihlong zong na lan thei ding uhi. Thuchiam tangtunsak nadingin bel, a kisaang thei kei ding hi. 24 Tangtawn Toupa' mai ah ganta, a chiltang dulh hiam, a kitam hiam, a hem hiam, a ki-atkeh hiam na lan ding uh ahi kei. Na gamsung uah hibang peuhmah na hih ding uh ahi kei. 25 Gamdang mi khut apan hibang ganta saangin na Pathian uh an dingin na lan ding uh ahi kei. A piangchinglou leh a melhem ahih manun, tua bang gantate na sik na taangun a kisaang kei ding hi, chi in, a chi hi. 26 Tangtawn Toupa'n Mosi a houpih a: 27 Bawngnou hiam, belamnou hiam, kelnou hiam a suah chiangin, ni sagih sung a pi tawh a omkhawm ding ahi. A ni giat ni apanin, Tangtawn Toupa' maia meia thillat dingin a saan theih ding hi. 28 Bawng hiam, belam hiam, a nou tawh ni khat thuin na goukhawm ding uh ahi kei hi. 29 Tangtawn Toupa' maia lungdamthu genna thillat na lat chiangun, noute taanga a kisaan theih ding danin lan un. 30 Tua thillat a ni maha a nek ding uh ahi a, a zing chiang dong a vai sit louh ding ahi. Kei Tangtawn Toupa ka hi. 31 Ka thupiakte lenkip unla, zui un. 32 Ka min siangthou ninsak kei un. Israelte'n ka min a siangthouna banga a saan ding uh ahi. Kei noute hon hihsiangthoupa Tangtawn Toupa ka hi a, 33 na Pathian uh hi dingin, Aigupta gam apan hon piikhepa ka hi. Kei Tangtawn Toupa ka hi, chi in, a chi hi.
1 Tangtawn Toupa'n Mosi a houpih a: 2 Israelte kiang ah thu gen inla: Hiaite hunbinei ankuanglui Tangtawn Toupa' ankuanglui hunbite ahi. Hiaite kikhawmpi siangthoute hi dinga na phuan ding uh ahi.
Sabbath
3 Ni guk sung nna na sem ding uh a, ahihhangin, a ni sagih ni Sabbath khawlna ahi a, khawmpi siangthou neih ni ahi. Na nna ngeinate uh na sem ding uh ahi kei. Na teenna peuh uah, Tangtawn Toupa' Sabbath ahi.
Paikan Ankuang leh Silngou sawhlouh Tanghou
4 Hiaite Tangtawn Toupa' ankuanglui hunbite, a hun huna na phuan ding uh khawmpi siangthoute ahi: 5 Tangtawn Toupa' Paikanankuang a kha khatna, a ni sawmleli ni, khawmuia kipan ahi. 6 Tua kha, a ni sawmlenga ni-in, Tangtawn Toupa' Silngou sawhlouh Tanghou-ankuang a kipan hi. Ni sagih sung silngou sawhlouh tanghou na ne ding uh ahi. 7 A ni khat ni-in, kikhawmpi siangthou nei unla, nna sem kei un 8 Ni sagih sung Tangtawn Toupa mai ah meia thillat lan un. A ni sagih ni-in, khawmpi siangthou nei unla, na nna ngeinate uh sem kei un, chi in, a chi hi.
Gah masa Ankuang
9 Tangtawn Toupa'n Mosi a houpih a: 10 Israelte kiang ah thu gen inla: Noute kon piak ding gam na lut chiang ua, a gam gah na khop chiangun, na buhvui lak masak uh, phal khat siampi mai ah non tawi ding uh ahi. 11 Ama'n Tangtawn Toupa' mai ah tua buhphal a vei ding a, noute taangin a kisaang ding hi. Siampi in tua buhphal, Sabbath zing chiangin, a vei ding ahi. 12 Tua buhphal na vei ni-un, Tangtawn Toupa' mai ah, belamnou kum khata upa, genbaanglou khat, haltum thillatin na lan ding uh ahi. 13 Tua thillat tawh kitonin, an thillat dingin anvui nei dimdem ephah seh sawm suah seh nih, sathau tawh kihel, na lankhawm ding uh ahi. Hiai Tangtawn Toupa' maia meia thillat, a lungkimna gim namtui ahi. Tua tawh kitonin, grepzu hin khat seh li suah seh khat, dawn thillatin na lankhawm ding uh ahi. 14 Na Pathian uh maia hiai thillat na lat ni uh a tun mateng, tanghou himhim, a hih kei leh, kan thawh hi-in, an thak hita leh, na ne ding uh ahi kei. Hiai na tenna peuh ua, khangsawn sawn donga a omden ding thuseh ahi.
Nipikalte Ankuang: Pentikos
15 Sabbath zing chiang, buhphal vei thillat ni apan nipikal sagih ching sipsip sim un. 16 Sabbath sagihna chiang dong ni 50 sim unla, Tangtawn Toupa' mai ah an thak thillat lan un. 17 Na tenna mun ua panin, anvui nei dimdem ephah seh sawm suah seh nih, silngou sawh-a kiem tanghou beu nih hon tawi unla, Tangtawn Toupa' mai ah gah masa vei thillatin lan un. 18 Hiai tanghou tawh, belamnou a pa sagih, kum khata upa genbaanglou chiat tawh, bawngtaltuai khat tawh, belamtal nih tawh haltum thillatin lan un. Tangtawn Toupa' maia an thillatte leh dawn thillatte tawh latkhawm tuate haltum thillat ahi ding ahi. Meia thillat Tangtawn Toupa' lungkimna gim namtui ahi. 19 Tua khit chiangin, khelhna thillat ding keltal khat leh lemna thillat ding belamnou nih, kum khata upa tuak lan un. 20 Siampi in Tangtawn Toupa' mai ah, tua belamnou nihte vei thillatin, gah masa apan tanghou tawh, a veikhawm ding ahi. Tuate siampi adingin, Tangtawn Toupa' maia thillat siangthou ahi. 21 Tua ni mahin, khawmpi siangthou na phuang ding uh a, nna na sem ding uh ahi kei hi. Hiai na tenna peuh ua, khangsawn sawnte adinga omden ding thuseh ahi. 22 Na gam gah uh na khop chiangun, lou nawl dong khawm kei unla, buh sang nangawn zong kei un. Mizawngte leh gamdang mite adingin siit un. Kei Tangtawn Toupa na Pathian uh ka hi, chi in, a chi hi.
Pengkulte Ankuang
23 Tangtawn Toupa'n Mosi a houpih a: 24 Israelte kiang ah thu gen inla: Kha sagihna, a ni khat ni-in, tawlngakna na nei ding uh a, pengkul muta theih gige khawmpi siangthou na zang ding uh ahi. 25 Nna sem kei unla, Tangtawn Toupa' maia meia thillat lan un, chi in, a chi hi.
Khuhna Ni
26 Tangtawn Toupa'n Mosi kiang ah thu a gen a: 27 Hiai kha sagihna, a ni sawm ni Khelhna Khuhna Ni ahi. Khawmpi siangthou nei unla, noumau kizangsak unla, Tangtawn Toupa' maia meia thillat lan un. 28 Tangtawn Toupa na Pathian uh maia noute adinga khuhna kibawl ni, Khelhna Khuhna Ni ahih manin, tua ni-in nna sem kei un. 29 Tua ni-a amah kizangsak lou mi peuhmah a mite lak apan satkhiak ahi ding hi. 30 Tua ni-a nna sem peuhmah a mite lak apan ka hihmangthang ding hi. 31 Nna himhim na sem ding uh ahi kei hi. Hiai na tenna peuh ua, khangsawn sawn hong om dingte adinga omden ding thuseh ahi ding ahi. 32 Noute adinga tawlngakna Sabbath ahi a, noute na kizangsak ding uh ahi. Tua kha, a ni kua ni nitaklam apan a zingchiang nitaklam dong na Sabbath uh na tang ding uh ahi, chi in, a chi hi.
Bawktate Ankuang
33 Tangtawn Toupa'n Mosi a houpih a: 34 Israelte kiang ah thu gen inla: Kha sagihna, a ni sawmlenga ni-in, Tangtawn Toupa' Biakbukte Ankuanglui a kipan a, ni sagih sung a daih hi. 35 A ni khat ni khawmpi siangthou ahi. Nna sem kei un. 36 Ni sagih sung Tangtawn Toupa' maia meia thillatte lan unla, a ni giat ni-in khawmpi siangthou nei unla, Tangtawn Toupa' maia meia thillatte lan un. Khawmpi bei ni ahi. Nna sem kei un. 37 Hiaite a hunbi bi a ankuangluite, Tangtawn Toupa-a ahi. Tangtawn Toupa' maia meia thillatte lan dingin khawmpi siangthoute na phuan ding uh ahi. Tuate bel, nisima lat dinga ngiat haltum thillatte, an thillatte, kithoihnate leh dawn thillatte ahi. 38 Hiai thillatte bel Tangtawn Toupa' Sabbathte adinga thillatte leh na thawnpiakte uh leh na chiamsa uh khatpeuh leh Tangtawn Toupa' maia ut thillat na latte uh bana a behlapna ahi. 39 Kha sagihna, na ni sawmlenga ni apanin, gam gah na khop khit nungun, ni sagih sung Tangtawn Toupa' mai ah ankuanglui na bawl ding uh ahi. A ni khat ni tawlngakni ahi a, a ni giat ni zong tawlngakni ahi. 40 A ni khat ni-in, theikungte apan thei gah hoih hoih, tua baan ah, nisuh hiang khawng, tawsaw sawlbawk pha khawng leh muisum hiang khawng na tawi ding uh a, Tangtawn Toupa na Pathian uh mai ah ni sagih sung, nuamsain na om ding uh ahi. 41 Kumsimin, ni sagih sung, Tangtawn Toupa' mai ah ankuanglui na bawl ding uh ahi. Hiai khangsawn sawn adinga a omden ding thuseh ahi ding ahi. A kha sagihna ah hiai ankuanglui bawl un. 42 Ni sagih sung bawktate ah teeng un: Gam sunga piang Israelte khempeuh bawktatea a teen ding uh ahi. 43 Tuachi-in, na suan na khakte un, Aigupta gam apan Israelte ka piikhiak laiin, bawktate ah ka teengsak, chih a thei ding uhi. Kei Tangtawn Toupa na Pathian uh ka hi, chi in, a chi hi. 44 Tua bangin Mosi in a hunbi bi-a Tangtawn Toupa' ankuangluite Israelte kiang ah a phuang hi.
Meivak ading Sathau
1 Tawngtawn Toupa'n Mosi a houpih a: 2 Meivak a kuan gige theih nadingin, meivak ading a sukthawh oliv thau siang hon tawi dingin Israelte thu pia in. 3 Kihoupihna Puanbuk sunga Theihpihna puanzak pua ah, Aron in nitaklam apan a zingsang dong, Tangtawn Toupa' mai ah meivakte a kuangsak gige ding ahi. Hiai khangsawn sawnte adinga omden ding thuseh ahi ding ahi. 4 Tangtawn Toupa' maia kham sianga kibawl meivak mung tunga meivakte a kuang gige ding ahi.
Theihgigena Tanghoute
5 Anvui nei dimdem la inla, tanghou beu sawm leh nih em in. Beu khat adingin anvui ephah seh sawm suah seh nih ahi ding ahi. 6 Tuate vual nihin, vual khata guk zel, tua Tangtawn Toupa' maia, kham sianga kibawl dawhkan tung ah koih in. 7 Tua vual tegel ah gim namtui koih in. Tua tanghoute tunga theihgigena tantuan hi ding leh, Tangtawn Toupa' maia meia thillat hi ding ahi. 8 Hiai tanghou, Tangtawn Toupa' maia om gige ding, Sabbath tenga koih thak zel ding ahi. Hiai tanghou, Israelte taanga a omden ding thukhun ahi ding ahi. 9 Hiai Aron leh a tapate tan ahi a, Tangtawn Toupa' maia meia thillatte apan a tantuan gige uh laka a siangthou penpen ahi a, mun siangthou khat ah a ne ding uh ahi, chi in, a chi hi.
Pathian' Min Siangthou tawh kisai Dan
10 Hichi hong hi a, Israel numei leh Aigupta pasal' tapa khat Israelte lak ah a va hawh a, tua giahphual ah amah leh Israel pasal khat a kisual uhi. 11 Tua Israel' numei' tapa in hamsia louin, Tangtawn Toupa' min a gensia a, amah Mosi kiang ah a paipih uhi. A nu' min bel, Shelomith ahi. Shelomith bel, Dan mi Dibri' tanu ahi. 12 Amaute'n Tangtawn Toupa' deihlam a theih mateng uh, amah a khum uhi. 13 Tua khitin, Tangtawn Toupa'n Mosi a houpih a: 14 Pathian' min gensepa giahphual pawlam ah kaikhia un. Ama' kampau zate khempeuh in a lutung ah khut nga uh henla, mite khempeuh in amah suangin denglum uhen. 15 Israelte kiang ah thu gen inla: Mi khat peuh in a Pathian a hamsiat leh, a khelhna puaksak ahi ding. 16 Mi khat peuh in Tangtawn Toupa min a gensiat leh, thah teitei ding ahi. Mite khempeuh in amah suangin a denglum ding uh ahi. Gamdang mi hi-in, gam sunga piang hita leh, Tangtawn Toupa' min gensia peuhmah thah ding ahi. 17 Mi khat peuh in mihing' hinna a lak leh, amah thah ding ahi. 18 Midang' ganta' hinna la peuhmah in ditna a bawl ding ahi, hinna taanga hinna ahi ding ahi. 19 Mi khat peuh in, a veng a pam a sukliam leh, ama' hih bangbang ama' tunga hih ding ahi. 20 Guh kitan taanga guh suktan, mit taanga mit, ha tanga ha ahi ding ahi. Ama'n midang a liamsak bangbanga amah liamsak ahi ding ahi. 21 Ganta that peuhmah thah ding ahi. 22 Gamdang mi leh gam sunga piang mi adingin daan kibang na zang ding uh ahi. Kei Tangtawn Toupa na Pathian uh ka hi, chi in, a chi hi. 23 Tua khitin, Mosi in Israelte kiang ah thu a gen a, tua Pathian gensepa, giahphual pawlam ah a kaikhia uh a, suangin a denglum uhi. Tangtawn Toupa'n Mosi thu a piak bangbangin, Israelte'n a hih uhi.
Kum Sabbath tawh kisai Dan
1 Tangtawn Toupa'n Sinai Mual ah Mosi a houpih a: 2 Israelte kiang ah thu gen inla: Noute kon piak ding gam na lut chiangun, a gam in zong Tangtawn Toupa' mai ah Sabbath a tang ding ahi. 3 Kum guk sung na loute uah hai na pawi ding uh a, kum guk sung na grepguite uh na heuh ding uh a, a gahte na khawm ding uh ahi. 4 Ahihhangin, a kum sagihna ah bel, gam in Tangtawn Toupa' mai ah Sabbath khawlna a nei ding ahi. Na loute uah hai pawi kei unla, na grepguite uh hah kei un. 5 Amaha gahte khawm kei unla, kep louh na grep gahte uh zong khawm kei un. Gam in khawl kum a nei ding ahi. 6 Kum sabbath sunga gam in gah a suahte noute adingin an ahi ding, noute leh na sila pasalte uh leh numeite, sum thalawha nasemte leh, na lak ua hong khualtamte leh, 7 na gante uh leh, na gam ua gamsate' an ahi ding. Gam in gah a suah peuhmah an ahi ding hi.
Jubili Kum
8 Kum Sabbath sagih, kum sagih mun sagih simtou le uchin, kum 49 a pha ding hi. 9 Tua khit chiangin, a kha sagihna, a ni sawm ni-in koi peuh ah, belamki pengkul mutsak un. Khuhna Ni in na gam sung teng uah belamki pengkul mutsak un. 10 A kum 50-na sehtuam siangthou kumin bawl unla, gam sung khempeuh ah, gam sunga teengte khempeuh kiang ah, noplenna phuang un. Noute adingin Jubili ahi ding ahi. Noute tek noumau' innkaw' gam ah, noumau' behte kiang ah na kik nawn ding uh ahi. 11 A kum 50-na Jubili kum ahi ding a, noute ading ahi ding hi. Hai lah pawi kei unla, amaha poute lah a gah khawm kei unla, kep louh grep gahte lah khawm kei un. 12 Jubili ahi a, noute adinga siangthou ahi ding ahi. Na lou tui uapan piangte kia na ne ding uh ahi. 13 Hiai Jubili Kumin mi chih ama' gam neihsa ah a kiknawn ding ahi. 14 Na chi na sa khat peuh kianga bangpeuh na zuak hiam, ahih kei leh, amah apan na lei leh, kuama'n kinekna lemtanga na zat ding uh ahi kei hi. 15 Na chi na sa khat peuh apan na lei ding leh, Jubili apan a kum tam dan tuatin na lei ding ahi. Ama'n kum bang zah a gam gah kikhop lai ding hiam, chih tuatin hon zuak ding ahi. 16 A kum a tam lai leh, ama'n na khangsak ding a, a kum a tawmtak leh, a man na kiamsak ding ahi. Na kianga hon zuak pen a gam gah kikhop ding kum zah ahi lei hi. 17 Kinekna lemtangin zang kei un, na Pathian uh lau zaw un. Kei Tangtawn Toupa na Pathian uh ka hi. 18 Ka thusehte zui unla, ka dan piakte zui dingin pilvang un. Hi leh, gam ah bitin na teeng ding uhi. 19 Gam in zong gah a suah ding a, niang leh taiin na ne ding uh a, bitin na teeng ding uhi. 20 Kum sagihna-a hai pawi lou, gama gah lah khawm louin, bang ne ding ka hi ua? na chi mai thei uhi. 21 Ke'n a kum gukna ah vualzawlna kon sawl ding a, gam in kum thum kham ding gah a suah ding hi. 22 A kum giatna a, hai na pawi sungun, buhlui na ne ding uh a, a kum kuana buh lak hun dong na ne lai ding uhi, 23 Gam keia ahi a, noute gam dang mi lei, a khawhlawh lei na hih man un, a denden dingin gam na khotkhiak ding uh ahi kei hi. 24 Na gam luah teng uh gam tatkik nading kong na hong ding uh ahi. 25 Na chi na sate khat peuh hong zawng gawp a, a gam bang chia hiam a zuak leh, a tanau naipen tua gam tan dinga hong pai leh, a chi a sa' gam zuak a tan ding ahi. 26 Tua banga tatsak ding mi nei kei mah leh amah hong mavang a, tua gam tankik thei dinga hong om leh, 27 a zuakkhiak nung kum sim touin aman ding a tuat ding a, aman om lai teng, a zuakna pen kiang ah a leh ding ahi. Tua bangin, ama' gam a tankik thei ding hi. 28 Ahihhangin, dit kik nading neih leh lam a neih kei leh, tua gam pen a leipa khut ah Jubili kum a tun mateng a om ding hi. Jubili-in tua gam piak kik ahi ding a, ama' gam ah a kik thei ding hi. 29 Kulhbaang nei khawpi sunga mi khat peuh in a inn a zuak leh, a zuak kum khat sunga tat kik theihna hamphatna a nei hi. Tua sungin a tan kik thei ding hi. 30 Tua kum khat a bei ma-a a kitat kik kei leh, tua kulhbaang nei khawpi sunga inn, a leipa leh a suante'n a tangden ding uh ahi. 31 Ahihhangin, kulhbaang neilou khawtate bel, gam awnga ngaih ahi. Tat kik theih ahi ding a, tua baan ah Jubili-a piak kik ahi ding hi. 32 Levite'n, Levite' khawpite-a inn a neihte uh tat kik theih nading hamphatna a nei uhi. 33 Hiai Levite' gou neihte tat kik theih ahi. Chih bel, Levite' luah khawpite-a innte, Israelte laka a zuakte uh genna ahi. Tua zong Jubili chianga amaute kianga piak kik ding ahi. 34 Ahih-hangin, tua a khawpite ua, gantatna gamte bel zuak ding ahi kei. A neih den ding uh ahi. 35 Na chi na sate uh laka khat peuh hong zawng gawp a, noute laka a kivak zawh kei leh, na lak ua a teen lai theih nadingin, gam dang mi hiam, hong khualtam mi hiam, na huh ding zah mahun, amah huh un. 36 Na lak ua na chi na sa uh a teen theih nadingin, amah apan a pung la kei unla, na Pathian uh lau zaw un. 37 A pung delhin amah sum leitawisak kei unla, a pung delhin amah an leisak kei un. Kei na Pathian uh hi dinga, Kanan gam hon tun dinga Aigupta gam apan hon piikhepa, Tangtawn Toupa na Pathian uh ka hi. 39 Na chi na sate uh khat peuh na lak ua hong zawng gawp a, na kianga amah hong kizuakkhiak leh, sila bangin nna semsak ken. 40 Sum thalawh a nasem na goih bangin en in. Ahih kei leh, tom khat hong khualtam bangin en in. Ama'n Jubili dong na nna a sem ding hi. 41 Tua khit chiangin, amah leh a tate khahkhiak ding ahi. Amah a behte lak leh a pu a pa gam ah, a kik nawn ding ahi. 42 Israelte, Aigupta gam apan ka piikhiak ka silate ahih manun, sala zuakkhiak ding ahi kei uhi. 43 Amaute tung ah huhamtakin gamta kei unla, na Pathian uh lau zaw un. 44 Na sila pasalte uh leh sila numeite uh bel, na kim na pam ua namte lak apan na lakte uh ahi ding ahi. Amaute apan silate lei un. 45 Na gam sung ua khualtamte leh na gam sung ua piang a behte uapan zong na lei thei ding uhi. Amaute na van neih uh a suak ding uhi. 46 Gouluaha luah dingin na tate uh kiang ah amaute na pesawn thei ding uh a, damsung silain na bawl thei ding uhi. Ahihhangin, na Israel mipihte uh tung ah bel, huham takin na gamta ding uh ahi kei hi. 47 Noute laka gamdang mi hiam, hong khualtam mi hiam, hong hau a, na chi na sate uh khat peuh hong zawnggawp a, tua na lak ua teeng gamdang mi hiam, a behte hiam khat peuh kianga a kizuakkhiak leh, 48 a kizuakkhiak khit nungin zong kitatkik theihna hamphatna a nei hi. A tanaute khat peuh in amah tankhe thei ding hi. 49 A pa' sanggampa hiam, a pa' sanggampa' tapa hiam in amah a tan thei ding, ahih kei leh, a behte laka tanau khat peuh in amah a tan thei ding hi. Ahih kei leh, amah mah zong a hong mavan leh, amah a kitan thei ding hi. 50 Amah leh a leipa'n a kizuakkhiak kum apan Jubili kum dong a sim tou ding uh ahi. Amah a kikhahkhiak nading man bel, a kum om lai zah ading, nasema goih mi, sum thalawh dana tuat ahi ding ahi. 51 Kum tam a sap lai leh, ama' man dinga kipia lak ah, a kitat nading sum a tam lai ding. 52 Jubili kum dong ading kum tawm a sap lai leh, tua kum zah ading tuatin, a kitatna man a pe ding ahi. 53 Tua bang mi pen, a kum a kuma sum thalawha goih banga et ding ahi. Amah neipa a tunga huham taka na gamtatsak louh ding uh ahi. 54 Hibang lampite khat beeka zong amah tatkhiak ahih kei leh, amah leh a tate Jubili kuma khahkhiak ding ahi uhi. 55 Ahang bel, Israelte kei silate ahi uhi. Ka silate ahi uh a, Aigupta gam apan ka piikhiakte ahi uhi. Kei Tangtawn Toupa na Pathian uh ka hi.
Thumanna Pahtakman
1 Milimte kibawl kei unla, batpih milim kitunkhiak kei unla, suang zek siangthou zong kitunkhiak kei un. A mai ua kuna na biak dingun, na gam sung uah khuakthawha kigelh suang koih kei un. Kei Tangtawn Toupa na Pathian uh ka hi. 2 Ka Sabbathte tang unla, ka mun siangthou zah un. Kei Tangtawn Toupa ka hi. 3 Ka thuseh na zuih ua, ka thupiakte zui dinga na pilvang uleh, 4 a hun hunin vuah kon sawl ding a, lei in gah a suah ding a, gama singte'n gah a suang ding. 5 Phuala na buh chil un grep gah lawh hun a banpha ding a, na grep gah lawh un, a suan hun a banpha ding. Na duh zahzah uh an na ne ding uh a, na gam uah bitin na teeng ding uhi. 6 Gam sung ah galmuanna ka omsak ding a, lungmuangin na lum pihpeh ding uh a, kuama'n hon lausak kei ding. Gam sung apan gamsa giloute ka hawlmang ding a, na gam sung uah namsau a leng kei ding. 7 Na galte uh na delh ding uh a, na mai uah namsauin a puk ding uh. 8 Mi nga in mi 100 khat na delhzak ding uh a, mi 100 khat in mi 10,000 khat na delhzak ding uh. Na melmate uh na mai uah namsauin a puk ding uhi. 9 Noute deihsak takin kon en ding a, chipha takin kon bawl ding a, kon pungsak ding. Noute tawh kala ka thukhun ka lenkip ding hi. 10 Buh thak koih nadinga buhlui na hepkhiak dong uh, kumlui buh na ne lai ding uh. 11 Noute lak ah ka tenna mun ka koih ding a, noute kon kih kei ding. 12 Noute lak ah ka pai ding a, noute' Pathian ka hi ding a, noute ka mite na hi ding uhi. 13 Kei Tangtawn Toupa, na Pathian uh Aigupta gam apan hon piikhepa ka hi. Aiguptate' salin na om nawn kei ding uhi. Na hakkolte uh ka tansak a, dingtangin kon paisak hi.
Thumanlouhna Gawtna
14 Ahihhangin, ka thu na ngaihkhiak kei ua, hiai thupiakte na zuih kei ua, 15 ka thusehte na nial ua, ka dan piakte na kih ua, ka thupiakte khempeuh na zuih kei ua, ka thukhun na palsat uleh bel, 16 16 na tung uah hiai ka hih ding: Na tung uah thakhata laua mulkimna, kumzawnna leh nattunna kon tun ding a, tua chinatnate'n hon mittawsak ding a, na hinna uh a kaikangsak ding. A mawknain khaichi na pawi ding uh. Ahang bel, na melmate un ne ding uh hiven. 17 Na tung uah ka maigum ding a, na galte un hon zougawp ding. Nou hon mudahte'n na tung uah vai a hawm ding uh a, kuamah delh louhpi-in zong na tai ding uhi. 18 Hibang teng nunga ka thu na ngaihkhiak kei lai uleh, na khelhnate uh hangin sagih vei kon gawt tuantuan ding. 19 Na kisaktheihna uleh genhakna uh ka gawpsak ding a, na tung ua van sik bangin, na nuai ua lei sumsan bangin ka bawl ding. 20 Na thahatna uh a mawkna-in kigawp ding a, na lei un gah suah lou ding a, gama singte'n gah suang lou ding hive-un. 21 Ka tunga na helhat lailai ua, ka thu na ngaihsak nop kei uleh, na khelhnate uh tawh kikhomin na thuakgimna uh sagih vei ka behlap ding. 22 Gamsa giloute kon dousak ding a, na tate uh hon laksak ding uh a, na ganhonte uh a hihmangthang ding uh. Noute nong tawm mahmah ding uh a, na lampite uh a kitaisan ding hi. 23 Hibang teng nunga, ka bawlhoihna na saan kei ua, ka tunga na helhat lailai uleh, 24 kei mahmah na tung uah ka helhat ding a, na khelhnate uh hangin, sagih vei kon gimsak tuantuan ding hi. 25 Thukhun na palsat uh phu lain, na tung uah namsau ka lengsak ding. Na khawpite ua na tailut chiangun, hipi kon delhsak ding a, na melmate uh khut sunga piakkhiak na hi ding uh. 26 Na ante uh ka beisak chiangin, numei sawm in thuk khat ah na tanghou uh a emkhawm ding uh a, teh detdetin tanghou a hawm ding uh. Na ne ding uh a, na kham zou kei ding uhi. 27 Hiai nunga, ka thu na ngaihkhiak kei lai ua, ka tunga na helhat lai uleh, 28 heh in na tung uah ka helhat ding a, kei mahmah in na khelhnate uh hangin sagih vei kon gawt tuantuan ding. 29 Na tapate uleh na tanute uh' sa na ne ding uh. 30 Na mun sangte uh ka hihmangthang ding a, na gim namtui halna maitamte uh ka phukpai ding. Hinnabei na milimte uh tung ah na luangte uh ka sevum venvon ding a, noute kon kih ding. 31 Na khawpite uh ka chimgawpsak ding a, na mun siangthoute uh ka segawpsak ding a, lungkimsak nadinga na thillat gim namtuite uh ka kipahpih kei ding. 32 Gam ka hihse ding a, tua-a teeng na melmate un lamdang a sa ding uhi. 33 Namte lak ah kon thehzak ding a, ka namsau phawiin kon delh ding. Na gam uh a se dimdem ding a, na khawpite uh a segawp ding. 34 Tua hun chiangin, gam in a siat sung teng leh na melmate uh gama na teen sung teng uh, sabbath kumte a zang ding a, gam a khawl tawlnga ding a, sabbathte a zang ding. 35 Gam sunga na teen sung ua, gam in sabbath khawlna a ngah louh hu, tuin gam siat dimdem sungin a ngahta ding hi. 36 Noute laka khawsuak omsunte lah, a melmate uh gam ah a lungtangte uh launain ka dimsak ding a, nahthel huihmut ging nangawn in amau a taisak ding a, kuamah delh louhpi-in, namsau apan tai bangin a tai ding uh a, a puk ding uhi. 37 Kuamah delh louhpi-in, namsau apan tai bangin a tai ding uh a, a kipalpuk lemlum ding uh. Tuachi-in, na melmate uh maia ding zou na om kei ding uh. 38 Na melmate uh lak ah na mangthang ding uh a, na melmate uh' gam in noute hon nawmvalh ding. 39 Noute laka a khawsuak omsunte, a khelhnate uh hangin, a melmate uh' gam ah a muih huaihuai ding uh. A pu a pate uh' khelhnate hangin, a muih mang ding uhi.
Tundingkikna Thuchiam
40 Ahih hangin, amaute' khelhnate leh a pu a pate uh' khelhnate tua ka tunga a lepchiahnate uh, ka tunga a helhatnate uh a pulak nop uleh 41 kei tunga a helhatna un kei amaute tunga hon helhatsak a, a melmate uh gama amaute khamang hi vengin tua baan ah, a lungtang sum louhnate uh a niamkhiak ua, a khelhna man uh a piak chiangun, 42 ke'n Jakob tawh kala ka thukhun leh, Isak tawh kala ka thukhun leh, Abraham tawh kala ka thukhun ka thei gige ding a, tua gam ka thei gige ding. 43 Ahang bel, tua gam amaute' taisana om ding a, amaute om lou a, gam a siat sunga gam in a sabbathte ngah ding hiven. Amaute'n ka dan nial a, ka thusehte kih a hih manun, a khelhnate uh man a pe ding uh. 44 Hibang hinapi-in, ke'n a melmate uh gama a om sungun, amaute ka nial kei ding a, ka kih kei ding. Amaute tawh kala ka thukhun palsat a, amaute hihmangthang sipsip dingin amaute ka nialin ka kih kei ding. Kei Tangtawn Toupa a Pathian uh ka hi. 45 Ahihhangin, amaute hangin, a pu a pate uh tawh kala thukhun ka thei gige ding. A Pathian uh hi dingin, namte' mitmuhin, Aigupta gam apan a pu a pate uh ka piikhia hi. Kei Tangtawn Toupa ka hi, chi in, a chi hi. 46 Hiaite, Tangtawn Toupa'n Sinai Mual tunga Mosi tungtawna, amah leh Israelte tawh kala a hihkip thusehte, dante leh makaihna dante ahi.
Mihing Lat Dan
1 Tangtawn Toupa'n Mosi a houpih a: 2 Israelte kiang ah thu gen inla: Mi khat peuh in, midangte Tangtawn Toupa adinga sehtuama lan ding a, a man gun pia a, thuchiam a bawl leh, 3 kum 20 leh kum 60 kikala upa pasal man dingin ngun dangka, mun siangthou shekela buk, ngun shekel 50-in bikhiah un. 4 Numei ahih leh, ngun dangka shekel 30-in bikhiah un. 5 Tua mihing pen kum nga leh kum 20 kikala upa ahih leh, pasal adingin ngun shekel 20-in bikhiah unla, numei adingin ngun shekel sawmin bikhiah un. 6 Tua mihing pen kha khat leh kum nga kikala upa ahih leh, pasal adingin ngun dangka shekel nga-in bikhiah unla, numei adingin ngun dangka shekel thumin bikhiah un. 7 Tua mihing pen kum 60 hiam, a sanga tamzaw hiama upa ahih leh, pasal adingin shekel sawm leh ngain bikhiah unla, numei adingin shekel sawmin bikhiah un. 8 Tua mihing thuchiam bawl pen in sum bikhiah pe zou lou zaha zawng ahih leh, ama'n a mi lat ding pen siampi' mai ah hon tonpih ding a, siampi in a man a bikhiah ding a, tua thuchiam bawlpa piak zawh zahin a bikhiah ding ahi.
Ganta Lat Dan
9 Tua a chiam ganta ahih a, Tangtawn Toupa' maia thillat a saan theih ganta a hih leh, Tangtawn Toupa' maia piak ganta pen, a siangthou a suak hi. 10 Ganta dang tawh a khek tuah ding ahi kei a, a phain a sia a khek ding ahi kei: A sia-a a pha a khek ding zong ahi kei hi. Ganta khata ganta dang a khek leh tua ganta leh a khekna ganta, a nihin a siangthou a suak uhi. 11 A chiam pen a siangloua ngaih ganta ahih a, Tangtawn Toupa' maia thillata saan theih louh ganta ahih leh, tua ganta siampi' maia piak ding ahi. 12 Ama'n a siat a phat thu a khentel ding ahi. Siampi in a man ding a bikhiah dandan a man ahi ding. 13 A neipa'n tua ganta a tat nop leh, a man seh nga suah seh khat a behlap ding ahi.
Inn Lat Dan
14 Mi'n a inn, Tangtawn Toupa adinga thil siangthou hi dinga a lat leh, siampi in a siat a phat a khentel ding ahi. Siampi in a man dinga a bikhiah dandan a man ahi den ding hi. 15 A inn lanpa'n a tat kik nop leh, a man seh nga suah seh khat a behlap ding a, tua inn ama-a a suak kik ding hi.
Gam Lat Dan
16 Mi'n a innkuan' gam khenkhiak bangchia hiam, Tangtawn Toupa adinga a lat leh, tua gam adinga buh chi bei zah tuat a, tua gam man bikhiah ding ahi. Barli buh chi homer khat man ngun dangka shekel 50-a bikhiah ding ahi. 17 Ama'n Jubili kum sunga a lou a lat leh, aman kibikhiahsa bangbang ahi ding. 18 Ahihhangin, a lou lanpa'n, Jubili nunga lan a hih leh, siampi in, Jubili nawn tawh kal zah tuatin a man a bikhiah ding a, a man a kiamsak ding hi. 19 A lou lanpa'n a tat kik nop leh, a man seh nga suah seh khat a behlap ding a, tua lou ama-a a suak kik ding hi. 20 Ahihhangin, a lou a tatkik kei leh, ahih kei leh, mi dang kianga a zuakkhiak leh, tua lou tat kik theih ahi kei ding hi. 21 Jubili-a tua lou a kikhahkhiak chiangin, a siangthou a suak ding. Tangtawn Toupa adinga gam lat tawh a kibang ding a, siampite' tan ahi ding hi. 22 Mi'n a leisa lou, a innkaw gam hilou, Tangtawn Toupa adinga a lat, 23 siampi in Jubili Kum dong a man a tuat ding a, Tangtawn Toupa adinga thil siangthou bangin, tua ni mahin, a man a pe ding ahi. 24 Jubili Kumin a leinapa, a lou nei masapa kiang ah tua lou a kik ding ahi. 25 Thillat man peuhmah, mun siangthou shekel tawh kituaka bikhiah ding ahi. Tua bel, shekel khat gera 20 ahi.
Ganta Suak Masa
26 Ganta suak masapen bel, Tangtawn Toupa-a sa ahih manin, kuama'n a lan thei kei ding hi. Bawngpi hi-in, belam hita leh, Tangtawn Toupa-a ahi. 27 Ganhing sianglou khat a hih leh, a man ding bikhiah zahin a tat kik theih ding a, ahihhangin, a man seh nga suah seh khat a behlap ding ahi. Ama'n a tat kik kei leh, a man kibikhiah zaha zuak ding ahi.
Thilzek a Sehtuam
28 Ahihhangin, mi'n a neihsa, Tangtawn Toupa adinga a lat mihing hiam, ganta hiam, innkaw gam hiam hita leh, zuak theih ahi kei ding a, tat theih zong ahi kei ding ahi. Tua banga thillatsa peuhmah, Tangtawn Toupa adinga a siangthoupen a hita hi. 29 Hihmanthat dinga mawhtansak mihing peuhmah, tat theih ahi kei ding. Thah teitei ding ahi.
Sawma Khat
30 Gam apana thilpiang peuhmah laka sawma khat, leia gah buh hi-in, sing apan gah hita leh, Tangtawn Toupa-a ahi. Tangtawn Toupa adinga a siangthoupen ahi. 31 Mi'n a sawma khat a tat kik nop leh, a man seh nga suah seh khat behlapin a tan ding ahi. 32 Ganhon leh belam leh kelhon apan sawma khat, ganching mi' chiang nuaia pai a sawm chinna peuhmah, Tangtawn Toupa adinga siangthou ahi ding. 33 Ama'n a sia lak apan a pha a tengkhe ding ahi kei a, a khek tuah ding zong ahi kei hi. A khek tuah leh, a khekna leh a khek pen a nihin a siangthou a suak a, tat kik theih ahi kei ding hi, chi in, a chi hi.
Thukhitna
34 Hiaite Tangtawn Toupa'n Israelte adinga Sinai Mual tunga Mosi kianga thupiak a piakte ahi.
Kisimpina
1 Aigupta gam apan Israelte hong paikhiak nung un, a kum gukna, a kha nihna, a ni khat ni-in, Sinai Gamdai-gamkeua Kihoupihna Puanbuk ah, Tangtawn Toupa'n Mosi a houpih a: 2 Israel mipite khempeuh, a beh beh, a innkuan kuanin simpina bawl inla, a min min-un, khatkhatin minkhumna bawl in. 3 Nang leh Aron in Israel pasalte khempeuh sepaih-a pang thei kum 20 leh a tunglam peuhmah a pawlpawlin sim un. 4 Nam khat laka mi khat zel, ama' behtuulpite'n noute hon huh ding uh ahi. 5 Noute hon huh ding mite' min hiaite ahi: Reuben nam apan Shedeur' tapa Elizur; 6 Simeon nam apan Zurishadai' tapa Shelumiel; 7 Judah nam apan Aminadab' tapa Nashon; 8 Isakhar nam apan Zuar' tapa Nathanel; 9 Zebulun nam apan Helon' tapa Eliab; 10 Josef tapate lak apan: Efraim nam apan Amihud' tapa Elishama; Manase nama apan Pedazur' tapa Gamaliel; 11 Benjamin nam apan Gideoni' tapa Abidan; 12 Dan nam apan Amishadai' tapa Ahiezer; 13 Asher nam apan Okran' tapa Pagiel; 14 Gad nam apan Deuel' tapa Eliasaf; 15 Naftali nam apan Enan' tapa Ahira, a chi hi. 16 Hiai mipite lak apan sehkhiak pasalte ahi uh a, a behbul lak ua makaite ahi uh a, Israel behte laka a tuulpite ahi uhi. 17 Mosi leh Aron in hiai min kigente a tonpih uh a, 18 amaute'n tua kha nihna, a ni khat ni-in, mipite khempeuh a kaikhawm uhi. Mipite a khanggui ua a beh behin, a innkuan kuanin a gen uh a, pasal kum 20 leh a tunglam teng, a min minun, khat khatin min a khum uh a, 19 Tangtawn Toupa'n Mosi thu a piak bangin a hih uhi. Tuachi-in, Sinai Gamdai-gamkeu ah amaute a sim hi. 20 Israel tapa piang masapen Reuben' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaih-a pang thei khempeuh khat khatin min a kikhum a, 21 Reuben nam apan tua bang pasal 46,500 a pha hi. 22 Simeon' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a kisim a, khat khatin min a kikhum a, 23 Simeon nam apan tua bang pasal 59,300 a pha hi. 24 Gad' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 25 Gad nam apan tua bang pasal 45,650 a pha hi. 26 Judah' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 27 Judah nam apan tua bang pasal 74,600 a pha hi. 28 Isakhar' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 29 Isakhar nam apan tua bang pasal 54,400 a pha hi. 30 Zebulun' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 31 Zebulun nam apan tua bang pasal 57,400 a pha hi. 32 Josef suante lak apan: Efraim suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 33 Efraim nam apan tua bang pasal 40,500 a pha hi. 34 Manase' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 35 Manase nam apan tua bang pasal 32,200 a pha hi. 36 Benjamin' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 37 Benjamin' nam apan tua bang pasal 35,400 a pha hi. 38 Dan' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa sepaiha pang thei khempeuh a min minun a kikhum a, 39 Dan nam apan tua bang pasal 62,700 a pha hi. 40 Asher' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a min minun a kikhum a, 41 Asher nam apan tua bang pasal 41,500 a pha hi. 42 Naftali' suante lak apan: Amau' behte leh innkuante khangthu bu-a kigelh bangin, pasal kum 20 leh a tunglama upa, sepaiha pang thei khempeuh a minminun a kikhum a, 43 Naftali nam apan tua bang pasal 53,400 a pha hi. 44 Hiaite Mosi leh Aron leh Israel makai sawm leh nihte'n a sim uh pasalte ahi uh a, tua makaite amau' innkuan chiat taangin a ding uhi. 45 Israel pasalte, kum 20 leh a tunglama upa, sepaiha pang theite amau innkuan bang zelin a kisim hi. 46 Avekpi-un 603,550 a pha hi. 47 Levi nama innkuante ahih lebel, midangte tawh a kisim khawm kei hi. 48 Tangtawn Toupa'n Mosi kiang ah: 49 Levi nam na sim ding ahi kei a, Israel dangte' minkhumna ah zong na khumkhawm ding ahi kei. 50 Levite zaw Theihpihna biakbuk sunga vanzat khempeuh leh tua tawh kisai van dangte khempeuh mawhpuain na sep zaw ding ahi. Amaute'n biakbuk leh a sunga vanzatte khempeuh a paw ding uh a, a keem ding uh a, a kimkot ah giahphual a sat ding uh ahi. 51 Biakbuk a kisuan ding peuhpeuh chiangin, Levite'n a phei ding uh a, akilam ding peuhpeuh chiangin, amaute'n a lam ding uh ahi. 52 Israelte'n a pawlpawlin a puanbukte uh a kai ding uh a, mi chih in ama' giahphual ah, ama' puanlap nuai ah a kai ding ahi. 53 Levite'n bel Theihpihna biakbuk kimkot ah a puanbukte uh a kai ding uh ahi. Tuachi-in, Israelte tung ah hehna a tung kei ding hi. Levite zaw, Theihpihna biakbuk kepna mawhpuain a om ding uh ahi, a na chikhinta hi. 54 Tangtawn Toupa'n Mosi thu a piak bangbangin Israelte'n a hih uhi.
Giahphual Lepdan
1 Tangtawn Toupa'n Mosi leh Aron kiang ah thu a gen a: 2 Israelte'n Kihoupihna Puanbuk kimkot, bangtan hiama gamla ah, Kihoupihna Puanbuk lam ngain giahphual a sat ding uh a, michih ama' puanlap nuai ah a innkuan chiamtehna tawh a om ding uh ahi, a chi hi. 3 Nisuahna lam, suahlam pang ah Judah giahphuala giak ding pawl, amau' puanlap nuai ah, giahphual a sat ding uh ahi, Judah nam makai Aminadab' tapa Nashon ahi. 4 Ama' pawl mi 74,600 a pha hi. 5 Amaute zomin Isakhar nam in giahphual a sat ding uh ahi. Isakharte' makai Zuar' tapa Nethanel ahi. 6 Ama' pawl mi 54,400 a pha hi. 7 A zomin Zebulun nam ahi ding hi. Zebulunte' makai Helon' tapa Eliab ahi. 8 Ama' pawl mi 57,400 a pha hi. 9 Judah giahphuala giak dingte a pawlpawlin, mi 186,400 a pha hi. Amaute a kipankhe masa ding uh ahi. 10 Simlam pang ah, Reuben giahphuala giak ding pawl, amau puanlap nuai ah, a om ding uh ahi. Reuben' pawl makai Shedeur' tapa Elizur ahi. 11 Ama' pawl mi 46,500 a pha hi. 12 Amaute zomin Simeon nam in giahphual a sat ding uh ahi. Simeonte' makai Zurishadai' tapa Shelumiel ahi. 13 Ama' pawl mi 59,300 a pha hi. 14 Tua ban ah, Gad nam in a zom ding ahi. Gadte' makai Deuel' tapa Eliasaf ahi. 15 Ama' pawl mi 45,650 a pha hi. 16 Reuben giahphuala giak dingte, a pawlpawlin mi 151,450 a pha hi. Amaute a kipankhe zom ding uh ahi. 17 Kihoupihna Puanbuk leh Levite giahphuala mite a laizang ah a pai ding uh ahi. Giahphual sat dana kizomin a kipankhe ding uh a, michih ama' mun ah, ama' puanlap nuai ah a pai ding ahi. 18 Tumlam pang ah Efraim giahphuala giak ding pawl, amau puanlap tawh a om ding ahi. Efraimte' makai Amihud' tapa Elishama ahi. 19 Ama' pawl mi 40,500 a pha hi. 20 Amaute zomin, Manase nam ahi ding ahi. Manasete' makai Pedazur' tapa Gamaliel ahi. 21 Ama' pawl mi 32,200 a pha hi. 22 A zomin Benjamin nam ahi ding ahi. Benjaminte' makai Gideoni' tapa Abidan ahi. 23 Ama' pawl mi 35,400 a pha hi. 24 Efraim giahphuala giak dingte, a pawlpawlin, mi 108,100 a pha hi. Amaute a thumna-a pangin a kipankhe ding uh ahi. 25 Mallam pang ah Dan giahphuala giak ding pawl, amau puanlap nuai ah a om ding uh ahi. Dante makai Amishadai' tapa Ahiezer ahi. 26 Ama' pawl mi 62,700 a pha hi. 27 Amaute zomin Asher nam in giahphual a sat ding ahi. Asherte' makai Okran' tapa Pagiel ahi. 28 Ama' pawl mi 41,500 a pha hi. 29 Naftali nam in a zom ding ahi. Naftalite' makai Enan' tapa Ahira ahi. 30 Ama' pawl mi 53,400 a pha hi. 31 Dan giahphuala giak dingte a pawlpawlin mi 157,600 a pha hi. Amaute amau' puanlap nuai ah, a nunung penin a kipankhe ding uhi. 32 Hiaite, a innkuankuana kisim Israelte ahi uhi. Giahphuala om khempeuh, a pawlpawlin mi 603,550 a pha hi. 33 Tangtawn Toupa'n Mosi thu a piak bangin, Levite bel Israel dangte tawh simkhawm ahi kei uhi. 34 Tuachi-in, Tangtawn Toupa'n Mosi thu a piak peuhmah a hih uhi. Amaute giahphuala amau puanlapte nuaia a giah dan uh tua bang ahi a, tua bang mahin a kipankhia uh a, michih ama' beh leh ama' innkuan tawh a ton hi.
Levite' Mawhpuakna
1 Tangtawn Toupa'n Sinai Muala Mosi a houpih laia, Aron leh Mosi innkuan tangthu hiai ahi: 2 Aron' tapate hiaite ahi: Nadab a piang masapen ahi a, tua baan ah Abihu, Eleazar leh Ithamar ahi. 3 Aron' tapate' min tuate ahi. Amaute thaunilh siampite ahi uh a, siampi nasem dinga namkip ahi uhi. 4 Nadab leh Abihu bel Gamdai-gamkeua, Tangtawn Toupa' maia, phallouh meia thillat a lat laiun Tangtawn Toupa' mai ah a si uhi. Tapate a neih louh manun, a pa uh Aron dam sung teng Eleazar leh Ithamar kiain siampi nna a sem uhi. 5 Tangtawn Toupa'n Mosi kiang ah: 6 Levi nam hon tonpih inla, siampi' Aron huh dingin a mai ah pia in. 7 Aron ading leh Israel mi khempeuh adingin Kihoupihna Puanbuk ah, biakbuk nna a sem ding uh ahi. 8 Tua banga biakbuk nna semin, Israelte hih ding khempeuh hihin Kihoupihna Puanbuk vanzat khempeuh a keem ding uh ahi. 9 Aron leh a tapate mai ah Levite pia in. Amaute zaw ama' maia pumpiak ding Israelte ahi uhi. 10 Siampi nasem dingin Aron leh a tapate sep in. Midang himhim in mun siangthou a naih leh tuabang mi thah teitei ding ahi, a chi hi.
Kisimna
11 Tangtawn Toupa'n Mosi a houpih lai a: 12 Israel numei apan pasal piang masapen sik leh tangin, Israelte lak apan Levite ka lata hi. Levite keia ahi uh. 13 Tapa piang masapen khempeuh keia hiven. Aigupta gama tapa piang masapente ka satlup laiin Israelte laka tapa piang masapen peuhmah mihing hi-in ganta hita leh, kei adingin ka septuam hi. Amaute keia ahi ding uh ahi. Kei Tangtawn Toupa ka hi, a chi hi. 14 Tangtawn Toupa'n Sinai Gamdai-gamkeu ah Mosi a houpih a: 15 Levite a innkuan kuanun a beh behin sim in. Pasal peuhmah kha khat leh a tunglama upa sim in, a chi hi. 16 Tuachi-in, Mosi in Tangtawn Toupa' thupiak bangin, amaute a sim hi. 17 Levi' tapate min hiaite ahi: Gershon, Kohath leh Merari. 18 Gershon behte minte hiaite ahi: Libni leh Shimei. 19 Kohath behte minte hiaite ahi: Amram, Izhar, Hebron leh Uziel. 20 Merari behte minte hiaite ahi: Mali leh Mushi. Hiaite Levi behte, a innkuan kuana kiminlawh ahi.
Gershon Suante Simna
21 Libni behte leh Shimei behte bel Gershon suante ahi uh a, Gershon behte kichi ahi uhi. 22 Gershon behte laka pasal kha khat leh a tunglama upa khempeuh 7,500 a pha hi. 23 Gershon behte'n tumlam ah biakbuk nung ah giahphual a nei ding uh ahi. 24 Gershon behte laka makai Lael' tapa Eliasaf ahi. 25 Kihoupihna Puanbuk ah, Gershonte' mawhpuakna bel, biakbuk, tua baan ah, puanbuk leh a tungkhuhnate, Kihoupihna Puanbuk lutna-a puanzak, 26 kongtual umna puanzakte, biakbuk kimkot kongtual lutna puanzak leh maitam leh a khauhualte leh a zatna tawh kisai khempeuh kep ahi. 27 Amram behte, Izhar behte, Hebron behte leh Uziel behte bel Kohath suante ahi uh a, Kohath behte kichi ahi uhi. 28 Kohath behte, pasal kha khat leh a tunglama upa khempeuh 8,600 a pha hi. Kohathte' mawhpuak bel, mun siangthou kep ahi. 29 Kohath behte giahphual biakbuk simlam pang ah a om ding ahi. 30 Kohath behte laka makai bel Uziel' tapa Elizafan ahi. 31 Amaute' mawhpuak bel thukhun singkuang, meivak mung, maitamte, mun siangthou, tua-a nasepna tawh kisai vanzatte, puanzak leh tuate zatna tawh kisai khempeuh kep ahi. 32 Levite laka makaipipen bel siampi Aron' tapa Eleazar ahi. Mun Siangthou kema mawhpawte tunga makaia seh ahi.
Merari Suante Simna
33 Merari suante laka behte Malite leh Mushite ahi a, Merari behte kichi ahi uhi. 34 Pasal kha khat leh a tung lama upa khempeuh 6,200 a pha hi. 35 Merari behte laka makai bel, Abihail' tapa Zuriel ahi. 36 Merari behte bel, biakbuk guhgelte, a zawlte, a khuamte, khuamtunnate, a vanzatte leh hiaite zatna tawh kisai thilte, 37 a huang umna khuamte leh a tunnate, puanbuk khetphimte leh a khauhualte kepna mawhpaw dinga seh ahi uhi.
Kisimna Lakkhawm
38 Mosi leh Aron leh a tapate'n bel, Kihoupihna Puanbuk maia biakbuk suah lampang nisuahna lam ah giahphual a nei ding uh ahi. Israel sik leh tangin, munsiangthou kepna amaute' mawhpuak ahi. Midang, mun siangthou vanaih peuhmah thah ding ahi. 39 Mosi leh Aron tungtawna Tangtawn Toupa' thupiak banga a behbeh-a kisim pasal kha khat leh a tunglama upa 22,000 a pha hi.
Tamasate taanga Levite Lakna
40 Tangtawn Toupa'n Mosi kiang ah: Israelte' tamasa pasal kha khat leh a tunglama upa khempeuh sim inla, a min minun khum in. 41 Kei adingin Israel suan' tamasa khempeuh taangin Levite la inla, Israel suante' ganta piang masate taangin Levite' gantate la in, Kei Tangtawn Toupa ka hi, a chi hi. 42 Tuachi-in, Tangtawn Toupa'n amah thu a piak bangin, Mosi in Israel suan tamasapente khempeuh a sim a, 43 tamasa pasal kha khat leh a tunglama upa khempeuh, a min mina kikhum 22,273 a pha hi. 44 Tangtawn Toupa'n Mosi kiang ah: 45 Israel suan tamasa khempeuh taangin Levite la inla, Israel suante' gantate taangin Levite' gantate la in. Levite keia ahi. Kei Tangtawn Toupa ka hi. 46 Levite sanga Israel suan tamasate tamzawkna 273 tat nadingin, 47 mi khat zel ah mun siangthou shekel buk shekel nga la in. Shekel khat bel gera 20 buk ahi. 48 Israel suan tamasa tamzawkna tatna sum pen Aron leh a tapate khut ah pia in, a chi hi. 49 Tuachi-in, Levite' tat zah valte tatna sum Mosi in a la hi. 50 Israel suante' tamasa tatna a lak ngun shekel 1,365 buk a hi a, tua bel mun siangthou shekel buk zah ahi. 51 Tangtawn Toupa'n thu a piak bangin, Mosi in tua tatna sum, Aron leh a tapate' khut ah a pia hi.
Kohath-te' Nasep
1 Tangtawn Toupa'n Mosi leh Aron kiang ah thu a gen a: 2 Levite laka Kohath suante a behbehin, a innkuan kuanin sim in. 3 Kihoupihna Puanbuk sunga nasem dinga kisa, pasal kum 30 apan kum 50-a upate khempeuh sim in. 4 Kihoupihna Puanbuk sunga Kohath suante' nasep ding hiai ahi: Thil siangthoupente kep. 5 Giahphual a kisuan ding chiangin, Aron leh a tapate a lut ding uh a, dantanna puanzak a lakhe ding uh a, Theihpihna singkuang a khuh ding uhi. 6 Tua khit chiangin, saham vunin a khuh ding uh a, tua tung ah puan dumin a khuh ding uh a, a zawlte a khum ding uh ahi. 7 Ompihna tanghou dawhkan tung ah puan dum a phah ding uh a, tua tung ah kuangte, beldaite, belkuangte, dawn thillat sunna bel gonggekte, tua-a om gige ding tanghoute a koih ding uh ahi, 8 Hiaite tung ah puan sandup in a khuh ding uh a, saham vunin a khuh ding uh a, a zawlte a khum ding uh ahi. 9 Puan dum a la ding uh a, det ding meivak koihna meivak mung leh a meivakte, a eksiakna leh meivu kholnate, det ding sathau koihna bel gonggek khempeuhte tawh a khuh ding uh ahi. 10 Tua khit chiangin, tua meivak mung leh a vanzatte khempeuh tua saham vunin a tuun sawn ding uh a, a zawn nading laang tung ah a koih ding uh ahi. 11 Kham maitam tung ah puan dum a phah ding uh a, tua pen saham vunin a khuh ding uh a, a zawnna zawlte a khum ding uh ahi. 12 Mun siangthou sunga nasepna vanzatte khempeuh lain, puan dumin a tuun ding uh a, tua tung ah saham vunin a tuun sawn ding uh a, a zawnna laang tung ah a koih ding uh ahi. 13 Sumsan maitam apan meivute a luakkhe ding uh a, puan sandupin tua maitam a khuh ding uh ahi. 14 Tua tung ah maitama kizang tuium belsuante khempeuh, meiluah kuangdaite, sikkhutte, suahdulte leh, tui thehna belkuangte tawh a koih vek ding uh ahi. Tuate, saham vunin a khuh ding uh a, a zawnna zawlte a khum ding uh ahi. 15 Aron leh a tapate'n vanzat siangthoute leh tuium belsuan siangthoute a khuh khit chiangun leh giahphual kisuan dinga a kisakkhit chiangun Kohathte a paw dingin a kisa ding uh ahi, Ahihhangin, tua thil siangthoute a lawng ding uh ahi kei. A lawn uleh a si ding uhi. Tua Kihoupihna Puanbuk sunga vante Kohathte'n a paw ding uh ahi. 16 Siampi Aron' tapa Eleazar in meivak ading sathau, gim namtui, an thillat ngeinate leh nilh sathau a kern ding ahi. Biakbuk leh a sunga vante, a vanzat siangthoute leh tuium belsuan siangthoute ama' mawhpuak ahi ding ahi, a chi hi. 17 Tangtawn Toupa'n Mosi leh Aron kiang ah: 18 Levite lak apan Kohath behte satkhiak a hih louh nadingun ching un. 19 Thil siang-thoupente a naih chiang ua, si lou a, a hin theih nadingun amaute adingin hibangin hih un: Aron leh a tapate Mun Siangthou sung ah a lut ding uh a, michih sep ding, michih puak ding a hawm ding uh ahi. 20 Kohathte' bel valutin thil siangthoute mitphiat kal lei zong a va en ding uh ahi kei. A et uleh a si ding uhi, a chi hi.
Gershonte' Nasep
21 Tangtawn Toupa'n Mosi kiang ah: 22 Gershonte zong a innkuan kuan leh a beh behin sim in. 23 Pasal kum 30 apan kum 50-a upa, Kihoupihna Puanbuka nasem dinga hong kuan khempeuh sim in. 24 Hiai Gershonte' nasep leh vante puak a nasep uh ahi. 25 Kihoupihna Puanbuk, tua biakbuka puanzakte, a tungkhuhna tungnung saham vun, Kihoupihna Puanbuk lutna kongkhak puanzakte, 26 biakbuk huang leh maitam umna puanzakte leh Kihoupihna Puanbuk lutna puanzak, khauhualte leh biakna vanzatte khempeuh a puak ding uh ahi. Gershonte'n hiai thilte tawh kisai sep ding khempeuh a sem ding uh ahi. 27 A nasepte khempeuh uh, van puak hi-in nasep dang hita leh, Aron leh a tapate' vaisai bangbanga a sep ding uh ahi. A van puak ding khempeuh uh, a mawhpuakna uh amaute lak ah na hawm ding ahi. 28 Hiaite Kihoupihna Puanbuka Gershon behte' nasep ahi. A uh siampi Aron' tapa vaisaina nuaia a sep ding nasepte Ithamar' uh ahi.
Merarite' Nasep
29 Merarite a beh beh leh a innkuan kuanin sim in. 30 Pasal kum 30 apan kum 50 chianga upa, Kihoupihna Puanbuka nasem dinga hong kuan khempeuh sim in. 31 Kihoupihna Puanbuka nasep ding a mawhpuak uh hiaite ahi: Amaute'n biakbuk guhgel, a zawlte, a khuamte leh a tunnate, 32 a huang umna khuamte leh a tunnate, khetphimte, khauhualte a paw ding uh ahi, Michih in a puak ding nang sehsak in. 33 Hiai Merari behte' nasep, siampi Aron' tapa Ithamar' vaisaina nuaia Kihoupihna Puanbuk-a a sep uh ahi, a chi hi.
Levi Behte Simna
34 Mosi, Aron leh nam makaite'n Kohathte a behbeh, a innkuan kuanin a sim uhi. 35 Kihoupihna Puanbuk-a nasem dinga hong kuan pasal kum 30 apan kum 50-a upa khempeuh 36 a behbeha simin mi 2,750 a pha hi. 37 Kihoupihna Puanbuka nasem Kohath behte a vekpi-in hiai zah ahi. Tangtawn Toupa'n Mosi tungtawna thu a piak bangin, Mosi leh Aron in amaute a sim uhi. 38 Gershonte a behbeh leh a innkuan kuanin a kisim hi. 39 Kihoupihna Puanbuka nasem dinga hong kuan pasal kum 30 apan kum 50-a upa, 40 a beh beh leh a innkuan kuana kisim 2,630 a pha hi. 41 Kihoupihna Puanbuka nasem Gershon behte a vekpi-in hiai zah ahi. Tangtawn Toupa' thupiak bangin Mosi leh Aron in amaute a sim uhi. 42 Merarite a behbeh leh a innkuan kuanin a kisim hi. 43 Kihoupihna Puanbuka nasem dinga hong kuan pasal kum 30 apan kum 50-a upa, 44 a beh beh leh a innkuan kuana kisim 3,200 a pha hi. 45 Merari behte a vekpi-in hiai zah ahi. Tangtawn Toupa'n Mosi tungtawna thu a piak bangin, Mosi leh Aron in amaute a sim uhi. 46 Tua bangin, Mosi, Aron leh nam makaite'n Levite, a behbeh leh a innkuan kuanin a sim uhi. 47 Kihoupihna Puanbuka nasem dinga hong kuan pasal kum 30 apan kum 50-a upa 48 kisim mi 8,580 a pha hi. 49 Mosi tungtawna Tangtawn Toupa' thupiakin michih kiangah bang sep ding, bang puak ding chih mawhpuakna a kipia hi. Tangtawn Toupa'n Mosi thu a piak bangin, amaute a kisim hi.
Giahphual Siangthouna
1 Tangtawn Toupa'n Mosi kiang ah thu a gen a: 2 Israelte thu pia inla, kilawh theih vun natna vei hiam, sa apan thilpawt khat peuh nei hiam, siluang tawh kisaia siangloua ngaih hiam, mi khat peuh giahphual apan sawlkhia uhen. 3 Amaute laka ka tenna a giahphual uh a buahsak louh nadingin, numei hi-in pasal hita leh tua bang mi, giahphual apan sawlkhia in, a chi hi. 4 Israelte'n tua bangin a hih uh a, tua mite giahphual pawlam ah a sawlkhia uhi. Tangtawn Toupa'n Mosi a thuhilh bangbanga a hih uh ahi.
Khelhna Ditna
5 Tangtawn Toupa'n Mosi kiang ah: 6 Israelte thu pia inla: Numei hi-in pasal hita leh, mi khat peuh in midang tunga khelhna a hih a, Tangtawn Toupa tunga muanhuai lou-a a om leh, tua mi a mawh ahi. 7 Ama'n manna tun khelhna a hih pen a phuankhiak ding ahi. A mawhna in manna a tut ditna kim a bawl ding a, seh nga suah seh khat a behlap ding a, a tunga a mawhna mi a pe ding ahi. 8 Ahihhangin, tua mi in ditna piak nading tanpa tanau nai a neih kei leh, tua ditna pen Tangtawn Toupa' a ahi ding a, tua ditna leh a khialpa adinga khuhna bawlsakna belamtal siampi kianga piak ding ahi. 9 Israelte'n siampi kianga thilpiak siangthou a piakte khempeuh uh siampi-a ahi. 10 Michih in thawnpiak siangthou a neih ama-a ahi. Ahihhangin, siampi kianga a piakte bel siampi-a ahi, chi in, a chi hi.
Zi Muanhuailou Ettelna
11 Tangtawn Toupa'n Mosi kiang ah: 12 Israelte kiang ah thu gen inla: Pasal khatpeuh' zi a lampial a, ama' adinga muanhuailou a suah a, 13 pasal dang tawh a lupkhawm a, a pasal in a phawk kei a, tua numei' sianthoulouhna phawkkhiak ahih kei a, tua bel a theihpih mi omlou, a khelh laitak lah mat hilou a hih a, 14 ahihhanga a pasal thikthu hong siat a, a zi a muanmawh a, a zi lah a siangthou lou mah ahih leh, ahih kei leh, thikthusiatna muanmawhna nei mah leh a zi a siangthou ahih leh, 15 pasal in a zi siampi kiang ah a paipih ding ahi. Tua nu taangin barli anvui nei ephah seh sawm suah seh khat zong a laan ding ahi. Tua anvui nei tung ah sathau a buak ding ahi kei a, gim namtui zong a koih ding ahi kei hi. Thikthusiatna tawh kisai thillat ahih man leh mawhna ngaihtuah-a phawkthaksakna thillat ahih man ahi. 16 Siampi in tua numei a tonpih ding a, Tangtawn Toupa' mai ah a dingsak ding ahi. 17 Tua khit chiangin, leibel daiin tui siangthou bangzah hiam a la ding a, biakbuk suai leivui bangzah hiam tua tui lak ah a hel ding ahi. 18 Tangtawn Toupa' maia tua numei a dinsak khit chiangin, a sam a phelsak ding a, numei khut sung ah tua phawkthaksakna thillat, tua thikthusiatna an thillat a koih ding a, ama'n tua hamsia tun tui kha a tawi ding ahi. 19 Tua khit chiangin, siampi in tua numei a kichiamsak ding a: Na pasal tawh na kiten sunga pasal dang tawh lumkhawm lou, lampial lou, kibuahsak lou na hih leh, hamsia tun hiai tui kha in bangmah hon lawh kei hen. 20 Ahihhangin, na pasal tawh na kiten sunga, lampial a, na pasal hilou, pasal dang tawh lumkhawm a, na kibuahsak na hih leh 21 hiai chi kawmin siampi in tua numei kichiamna hamsia nuai ah a koih ding ahi. Tangtawn Toupa'n na pheipi teemsak a, na gil a puaksak dinga, na mite'n zong hon hamsiatin, mawh hon tangsak uhen aw. 22 Hamsia tun hiai tui kha na pumpi sung ah lut henla, na gil puaksak henla, na pheipi teemsak hen, a chi ding ahi. Tua khitin, numei in: Amen. Tua bang hita hen, a chi ding ahi. 23 Siampi in hiai hamsiate laibuzial ah a gelh ding a, tua tui kha in a silkhe ding ahi. 24 Tua hamsia tui kha tua numei a dawnsak ding a, tua tui a sung ah a lut ding a, gimthuakna thupitak a tun ding hi. 25 Siampi in tua numei' khut apana thikthusiatna om thillat a la ding a, Tangtawn Toupa' mai ah a vei ding a, maitam ah hon tawi ding ahi. 26 Siampi in tua an thillat apan theih gigena thillat dingin khutdim khat a pham ding a, maitam tung ah a haltum ding ahi. Tua nungin, a tui tua numei a dawnsak ding ahi. 27 Tua numei na kibuahsak a, a pasal adinga muanhuailou a na hih leh, tua hamse tun tui dawnsak ahih chiangin, a sung ah a lut ding a, gimthuakna thupitak a tun ding hi. A gil a puaksak ding a, a pheipi a teem ding a, a mite lak ah hamsethuak ahi ding hi. 28 Ahihhangin, tua numei na kihihbuah lou, sianlouhna neilou ahih leh, mawhna neiloua siansak ahi ding a, tate a nei thei ding hi. 29 Hiai bel, numei pasal nei gegu lampial a, a kihihbuah chianga thikthusiatna tawh kisai dan, 30 ahih kei leh, pasal in a zi muangmawh a, a thikthusiatna tawh kisai dan ahi. Siampi in tua numei, Tangtawn Toupa' mai ah a dingsak ding a, hiai dan khempeuh a tung ah a zang ding ahi. 31 A pasal thil gilou hih ahi kei ding, ahihhangin, numei in a khelhna gah a khu ding hi, chi in, a chi hi.
Nazir Suaka Kisehtuamna
1 Tangtawn Toupa'n Mosi kiangah thu a gen a: 2 Israelte kiang ah thu gen inla: Pasal hiam numei hiam in thuchiam poimawh, Tangtawn Toupa adinga nasem mi suak dinga kisehtuamna thuchiam bawla Nazirmi a suah nop leh, 3 zu hi-in, silngou sawh dawn thil hiam hita leh, tuate apan a kihemkhe ding a, greptui thuk zong a dawn ding ahi kei hi. Greptui a dawn ding ahi kei a, grep gah leh grepgah keu zong a ne ding ahi kei hi. 4 Nazirmi a hih lai teng grepgui apan thil himhim, a tang leh a hawng zong, a ne ding ahi kei hi. 5 Tua banga kisehtuamna thuchiam a om sung teng, a lu ah mulmet tern himhim zat louh ding ahi. Tangtawn Toupa adinga sehtuam a hihna a bei mateng, amah a siang ahi ding a, a lu-a sam a hawisau ding ahi. 6 Tangtawn Toupa adinga a kisehtuam sung teng siluang naihin a pai ding ahi kei. 7 Ama' pa mahmah, a nu mahmah, a sanggampa mahmah, a sanggamnu mahmah zong a sih leh, tuate hanga siangloua ngaih dingin a kikoih ding ahi kei hi. Pathian adinga sehtuam a hihna chiamtehna a lutunga om ahi. 8 A kisehtuam sung khempeuh, Tangtawn Toupa adinga sehtuam siangthou ahi. 9 Ama' omna muna mi khatpeuh a sih guih a, tua in, a latsa a sam a hihbuah leh, a kisiansuah ni, a ni sagih ni-in a metkhiak ding ahi. 10 A ni giat ni-in Kihoupihna Puanbuk lutna ah, siampi kiang ah vakhu nih, ahih kei leh, kawl vakhu nih a hon tawi ding ahi. 11 Siampi in khelhna thillat dingin khat a laan ding a, haltum thillat dingin khat pen a laan ding hi. Misi luang omna-a om a hih mana khial ahih manin, tua bangin ama' adingin khuhna a bawlsak ding ahi. Tua ni mahin, a lutang sehtuam siangthouin a bawl ding ahi. 12 Amah a kisehtuam sung teng adingin Tangtawn Toupa' mai ah a kilaan ding ahi. Tua dingin, mawhna thillat dingin belamnoupa kum khata upa hon kai ding ahi. Amah a kisehtuam sunga kihihbuah ahih manin, a malam nite a kisim kei ding hi. 13 Nazirmi adingin, a kisehtuam hun a bei chianga zat ding hiai daan ahi. Amah Kihoupihna Puanbuk lutna-a tonpih ding ahi. 14 Ama'n Tangtawn Toupa' mai ah haltum thillat ding belamnoupa kum khata upa khat, khelhna thillat ding belamnounu kum khata upa genbaanglou khat, lemna thillat ding belamtal khat, thillatin a pe ding ahi. 15 Tuate tawh kitonin an thillatte, dawn thillatte leh silngou sawhlouh tanghou lawhbeu khat, tua bel, anvui nei, sathau tawh kihel tanghou peite leh tanghou pei neu, sathaua zut tawh a laankhawm ding ahi. 16 Siampi in hiaite Tangtawn Toupa' mai ah a laan ding a, khelhna thillat leh haltum thillat a bawl ding ahi. 17 An thillat tawh kitonin Tangtawn Toupa' mai ah silngou sawh louh tanghou lawhbeu a lui ding a, tua belamtal lemna thillatin a laan ding ahi. 18 Tua khit chiangin, Kihoupihna Puanbuk lutna ah tua Nazirmi in a latsa a sam a metkhe ding ahi. Tua sam a la dinga lemna thillat nuaia mei ah a khul ding ahi. 19 Tua Nazirmi in a kilatna sam a met khit chiangin, siampi in tua belamtal liang kihuan tawh, lawhbeu sunga tanghou pei leh a pei neu silngou sawhlouh tuak tawh, tua mipa khut ah a pe ding ahi. 20 Siampi in Tangtawn Toupa' mai ah vei thillatin tuate a vei ding ahi. Hiaite a siangthou ahi a, a kiveisa a awm tawh, a kilaansa a phei tawh siampi' tan ahi. Tua khit chiangin, tua Nazirmi in zu a dawn theita ding hi. 21 Nazirmi in a piak theih khatpeuh bana a kisehtuamna banga Tangtawn Toupa' maia thillat ding chiampa Nazirmi tawh kisai dan hiai ahi. Ama'n a chiamsa thil pen, Nazirmi a kisehtuamna dan bangbanga a tangtun teitei ding ahi, chi in, a chi hi.
Siampi' Vualzawlna
22 Tangtawn Toupa'n Mosi kiang ah: 23 Aron leh a tapate kiang ah thu gen inla: Israelte na vualzawl dingdan uh hibang ahi: Amaute kiang ah: 24 Tangtawn Toupa'n noute hon vualzawl henla, hon ching hen. 25 Tangtawn Toupa'n noute tung ah a mai taangsak henla, na tung uah hehpih siam hen. 26 Tangtawn Toupa noute' lam hong nga henla, lungmuanna hon pia hen, chi-in hilh in. 27 Tuachi-in, Ka min Israelte tung ah a koih ding uh a, ke'n amaute ka vualzawl ding hi, a chi hi.
Israelte' Thilpiakte
1 Mosi in biakbuk a tunkhiak khit takin, sathau a nilh a, biakbuk vanzatte khempeuh tawh sehtuam siangthouin a bawl hi. Maitam leh a tuium belsuante khempeuh zong sathau a nilh a, sehtuam siangthouin a bawl hi. 2 Tua khitin, Israel makaite, a kisimte laka nam makai, tua innkuan lutangte'n thilpiakte a laan uhi. 3 Tangtawn Toupa' maia a thawnpiak dingun, tungkhuhna nei kangtalai guk leh bawngtal sawmlenih, makai khat zel apan bawngtal khat leh makai nih zel apan kangtalai khat hon paipih uhi. Hiai thilpiakte biakbuk mai ah hong pia uhi. 4 Tangtawn Toupa'n Mosi kiang ah: 5 Amaute apanin hiaite na sang in, Kihoupihna Puanbuka nasep nadinga zat ding ahi ding hi. Michih' nasep nadinga kisam bang zelin tuate Levite khut ah pia in, a chi hi. 6 Tuachi-in, Mosi in tua kangtalaite leh bawngtalte a la a, Levite khut ah a pia hi. 7 Gershonte khut ah kangtalai nih leh bawngtal li a pia a, amaute' nasep nadinga kisam bangbanga a piak ahi. 8 Merarite khut ah kangtalai li leh bawngtal giat a pia a, a nasep nading ua kisam bangbanga a piak ahi. 9 Ahihhangin, Kohathte mawhpuak bel, liangkoua thil siangthoute puak ding ahih manin, Mosi in amaute khut ah piak a nei kei hi. 10 Maitam, sathau a kinilh takin, a lat nadingin makaite'n a thilpiakte uh hon tawi uh a, maitam mai ah a laan uhi. 11 Tangtawn Toupa'n Mosi kiang ah: Ni khatin makai khat in maitam lat nadinga thilpiak a piak zel ding ahi, a na chikhin hi. 12 A ni khat ni-a a thilpiak hon tawipa Aminadab' tapa Nashon ahi. Amah Judah nama mi ahi. 13 Ama' thilpiak bel ngun kuang khat, shekel 130-a gik, tui thehna ngun belkuang khat, shekel 70-a gik ahi. Tua shekelte Mun Siangthou shekel buk zah ngen ahi. Tuate in thillat ding anvui nei, sathau tawh kihela dim ahi. 14 Tua baan ah gimnamtuia dim kham kuang shekel sawma gik ahi. 15 Tua baan ah, haltum thillat ding bawngtal khat, belamtal khat leh belamnoupa kum khata upa khat ahi. 16 Tua baan ah, khelhna thillat ding keltal khat, 17 tua baan ah, lemna thillat ding bawngtal nih, belamtal nga, keltal nga leh belamnoupa kum khata upa khat ahi. Hiai bel, Aminadab' tapa Nashon' thilpiak ahi. 18 A ni nih ni-in, Zuar' tapa Nathanel in a thilpiak hon tawi hi. Amah Isakharte makai ahi. 19 Ama' thilpiak bel ngun kuang khat, shekel 130-a gik leh tui thehna ngun belkuang khat, shekel 70-a gik ahi. Tua shekelte munsiangthou shekel buk zah ngen ahi. Tuate an thillat ding anvui nei, sathau tawh kihela dim tuak ahi. 20 Tua baan ah, kham kuang shekel sawma gik, gim namtuia dim ahi. 21 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 22 tua baan ah, khelhna thillat ding keltal khat, 23 tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Zuar' tapa Nathanel' thilpiak ahi. 24 A ni thum ni-in, Helon' tapa Eliab in a thilpiak hon tawi hi. Amah Zebulunte makai ahi. 25 Ama' thilpiak bel, ngun kuang khat, shekel 130-a gik leh tui thehna ngun belkuang khat, shekel 70-a gik ahi. Tuate munsiangthou shekel gik dana buk ahi tuak hi. Tua thilpiakte an thillat ding anvui nei, sathau tawh kihela dim ahi. 26 Tua baan ah, kham kuang khat shekel sawma gik, gimnamtuia dim ahi. 27 Tua baan ah haltum thillat ding bawngtaltuai khat, belamtal khat leh belamnoupa kum khata upa khat ahi. 28 Tua baan ah, khelhna thillat ding keltal khat ahi. 29 Tua baan ah, lemna thillata gawh ding bawngtal nih, belamtal nga, keltal nga leh belamnoupa kum khata upa nga ahi. Hiai Helon' tapa Eliab' thilpiak ahi. 30 A ni li ni-in, Shedeur' tapa Elizur in a thilpiak hon tawi hi. Amah Reubente' makai ahi. 31 Ama' thilpiak bel, ngun kuang khat, shekel 130-a gik leh tui thehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 32 Tua baan ah, kham kuang shekel sawma gik khat, gim namtuia dim ahi. 33 Tua ban ah, haltum thillat ding bawngtaltuai khat, belamtal khat leh belamnoupa kum khata upa khat ahi. 34 Tua baan ah, khelhna thillat ding keltal khat ahi. 35 Tua baan ah, lemna thillata gawh ding bawngtal nih, belamtal nga, keltal nga leh belamnoupa kum khata upa nga ahi. Hiai Shedeur' tapa Elizur' thilpiak ahi. 36 A ni nga ni-in, Zurishadai' tapa Shelumiel in a thilpiak hon tawi hi. Amah Simeonte makai ahi. 37 Ama' thilpiak bel, ngun kuang khat shekel 130-a gik leh tui thehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 38 Tua baan ah, kham kuang shekel sawma gik khat, gimnamtuia dim ahi. 39 Tua baan ah, haltum thillat ding bawngtaltuai khat, belam-tal khat, belamnoupa kum khata upa khat ahi. 40 Tua baan ah, khelhna thillat ding keltal khat ahi. 41 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Zurishidai' tapa Shelumiel' thilpiak ahi. 42 A ni guk ni-in, Deuel' tapa Eliasaf in a thilpiak hon tawi hi. Amah Gadte' makai ahi. 43 Ama' thilpiak bel, ngun kuang khat, shekel 130-a gik leh tui thehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 44 Tua baan ah, ngun kuang khat shekel sawma gik, gimnamtuia dim ahi. 45 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 46 Tua baan ah, khelhna thillat ding keltal khat ahi. 47 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Deuel' tapa Eliasaf thilpiak ahi. 48 A ni sagih ni-in, Amihud' tapa Elishama in a thilpiak hon tawi hi. Amah Efraimte' makai ahi. 49 Ama' thilpiak bel, ngun kuang khat, shekel 130-a gik, tuithehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillatte ding anvui nei, sathau tawh kihela dim ahi. 50 Tua baan ah, kham kuang shekel sawma gik khat, gimnamtuia dim ahi. 51 Tua baan ah, haltum thillat ding bawngtaltuai khat, belam tai khat, belamnoupa kum khata upa khat ahi. 52 Tua baan ah, khelhna thillat ding keltal khat ahi. 53 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Amihud' tapa Elishama' thilpiak ahi. 54 A ni giat ni-in, Pedazur' tapa Gamaliel in a thilpiak hon tawi hi. Amah Manasete' makai ahi. 55 Ama' thilpiak bel, ngun kuang khat, shekel 130-a gik, tuithehna ngun belkuang khat, shekel 70-a gik ahi. Tuate munsiangthou shekel gik dana buk ahi.Tuate an thillat ding anvui nei, sathau tawh kihela dim ahi. 56 Tua baan ah, kham kuang shekel sawma gik khat, gimnamtuia dim ahi. 57 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 58 Tua baan ah, khelhna thillat ding keltal khat ahi. 59 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Pedazur' tapa Gamaliel thilpiak ahi. 60 A ni kua ni-in, Gideoni' tapa Abidon in a thilpiak hon tawi hi. Amah Benjaminte' makai ahi. 61 Ama' thilpiak bel, ngun kuang khat, shekel 130-a gik leh tuithehna belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 62 Tua baan ah, kham kuang khat shekel sawma gik, gimnamtuia dim ahi. 63 Tua ban ah, haltum thillat ding bawngtaltuai khat, belamtal khat leh belamnoupa kum khata upa khat ahi. 64 Tua baan ah, khelhna thillat ding keltal khat ahi. 65 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Gideon' tapa Abidon' thilpiak ahi. 66 A ni sawm ni-in, Amishadai' tapa Ahiezer in a thilpiak hon tawi hi. Amah Dante' makai ahi. 67 Ama' thilpiak bel, ngun kuang khat, shekel 130-a gik leh tuithehna ngun belkuang khat, shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 68 Tua baan ah, kham kuang shekel sawma gik khat, gimnamtuia dim ahi. 69 Tua baan ah, haltum thillat ding bawngtaltuai khat, belamtal khat leh belamnoupa kum khata upa khat ahi. 70 Tua baan ah, khelhna thillat ding keltal khat ahi. 71 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Amishadai' tapa Ahiezer' thilpiak ahi. 72 A ni sawmlekhat ni-in, Okran' tapa Pagiel in a thilpiak hon tawi hi. Amah Asherte' makai ahi. 73 Ama' thilpiak bel, ngun kuang, khat shekel 130-a gik leh tuithehna ngun belkuang shekel 70-a gik ahi. Tuate munsiangthou shekel gik dana buk ahi. Tuate, an thillat ding anvui nei, sathau tawh kihela dim ahi. 74 Tua baan ah, kham kuang shekel sawma gik, gimnamtuia dim ahi. 75 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 76 Tua baan ah, khelhna thillat ding keltal khat ahi. 77 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Okram' tapa Pagiel' thilpiak ahi. 78 A ni sawmlenih ni-in, Enan' tapa Ahira in a thilpiak hon tawi hi. Amah Naftalite' makai ahi. 79 Ama' thilpiak bel, ngun kuang khat, shekel 130-a gik leh tuithehna belkuang khat shekel 70-a gik ahi. Tuate munsiangthou shekel gik dana buk ahi. Tuate an thillat ding anvui nei, sathau tawh kihela dim ahi. 80 Tua ban ah, kham kuang shekel sawma gik, gimnamtuia dim ahi. 81 Tua baan ah, haltum thillat ding bawngtaltuai khat, belamtal khat, belamnoupa kum khata upa khat ahi. 82 Tua baan ah, khelhna thillat ding keltal khat ahi. 83 Tua baan ah, lemna thillat ding bawngtal nih, belamtal nga, keltal nga leh belamnoupa kum khata upa nga ahi. Hiai Enan' tapa Ahira' thilpiak ahi. 84 Hiaite, maitam, sathau a kinilh laia maitam lat nadinga Israel makaite' thilpiak ahi. Ngun kuang sawmlenih, tuithehna ngun belkuang sawmlenih, leh kham kuang sawmlenih ahi. 85 Ngun kuangte shekel 130-a gik chiat, tuithehna belkuang shekel 70-a gik chiat ahi. Avekpi-in ngun kuangte shekel 2,400 a pha hi. Tuate munsiangthou shekel gik dana buk ahi. 86 Gimnamtuia dim kham kuang sawmlenihte, munsiangthou shekel gik dana buk, shekel sawma gik chiat ahi. Avekpi-in, kham kuangte shekel 120 a pha hi. 87 Haltum thillat ding ganta avekpi-in an thillatt tawh bawngtaltuai sawmlenih, belamtal sawmlenih leh belamnoupa kum khata upa sawmlenih a pha hi. Khelhna thillat ding ganta keltal sawmlenih a kizang hi. Tuate an thillat tawh ahi. 88 Lemna thillat kithoihna ading ganta avekpi-in bawngtal 24, belamtal 60, keltal 60 leh belamnoupa kum khata upa 60 a pha hi. Hiaite khempeuh maitam, sathau a kinilh nunga a lat nadinga thilpiakte ahi. 89 Tangtawn Toupa tawh kihoupih dinga Kihoupihna Puanbuk sunga Mosi a lut takin, Theihpihna singkuang tunga khelhna khuhna mun tunga cherubte kikal apan amah houpih aw a za a, amah tawh a kihou uhi.
Meivakte Tunkhiakna
1 Tangtawn Toupa'n Mosi a houpih a: 2 Aron houpih inla: Tua meivak sagihte na tunkhiak chiangin, meivak tunna mailam teng a tanvak ding ahi, chi in, a chi hi. 3 Aron in tua bangin a hih hi. Tangtawn Toupa'n Mosi thu a piak bangin, meivak mung teng ah a mailam ngain meivakte a tangkhia hi. 4 Tua meivak mung a kibawl dan hibang ahi: Meivak mung a bul apan a pakte tanin sekthawh khama kibawl ahi. Tangtawn Toupa'n Mosi a lah bangbanga kibawl ahi.
Levite Sehtuamna
5 Tangtawn Toupa'n Mosi a houpih a: 6 Israel dangte apan Levite khenkhia inla, a sianga ngaih dinmun neiin bawl in. 7 Amaute siansuah nadingin hiai hih in: Amaute tung ah siansuahna tui theh in. Tua khit chiangin a pumpite ua mul metsiangsak uhenla, a puansilhte uh sawp uhen la, kisiansuah uhen. 8 Bawngtaltuai khat, an thillat ding annel vui, sathau tawh kihel tawh, lasak in. Tua khit chiangin, khelhna thillat ding bawngtaltuai dang khat la in. 9 Kihoupihna Puanbuk mai ah Levite hon tonpih inla, Israelte khempeuh kaikhawm in. 10 Tangtawn Toupa' mai ah Levite non tonpih ding a, Israelte'n amaute tung ah khut a nga ding uh ahi. 11 Amaute'n Tangtawn Toupa' nna a sep theih nadingun, Israelte apan vei thillatin Aron in Tangtawn Toupa' mai ah amaute a lan ding ahi. 12 Levite'n tua bawngtalte lutunga khut a ngak khit chiang-un, khat pen Tangtawn Toupa' maia khelhna thillat dingin zang in. A dang khat pen bel, Levite adinga khelhna khuhna bawlsak nadingin, haltum thillat dingin zang in. 13 Aron leh a tapate mai ah Levite dingsak inla, Tangtawn Toupa' mai ah vei thillatin amaute laan in. 14 Hibangin, Israel dangte apan Levite na septuam ding a, Levite kei-a ahi ding uhi. 15 Levite na siansuah khit a, vei thillata na lat khit chiangin, Kihoupihna Puanbuk ah nasem dingin hong kuan ding uh ahi. 16 Amaute keia dinga pumpiakkhiak Israelte ahi ding uh ahi. 17 Israela ta pasal piang masa peuh mah, mihing hi-in, ganta hita leh, keia ahi. Aigupta gama tamasa khempeuh ka satlup laiin, amaute kei adingin ka septuamta hi. 18 Israela ta pasal piang masate khempeuh taanga Levite ka lak ahi. 19 Israel khempeuh lak apana Levite zaw Israel taanga Kihoupihna Puanbuka nasem ding leh amaute adinga khelhna khuhna bawlsak dingin Aron leh a tapate kiang ah thawnpiakin ka pia hi. Tua bel, Israelte'n mun siangthou a naih chiang ua hipi bangmah in amaute a thah louh nading ahi, a chi hi. 20 Tangtawn Toupa'n Mosi thu a piak bangbangin, Mosi, Aron leh Israelte khempeuh in Levite tung ah thil a hih uhi. 21 Levite a kisiansuah uh a, a puansilhte uh a sawpsiang uhi. Tua khitin, Aron in amaute Tangtawn Toupa' mai ah vei thillatin a pia a, amaute siansuah dingin amaute adingin khuhna a bawlsak hi. 22 Tua nungin, Aron leh a tapate vaisaina nuai ah, Kihoupihna Puanbuka nasem dingin Levite hong kuan uhi. Tangtawn Toupa'n Mosi thu a piak bangbangin, Israelte'n Levite tung ah thil a hih uhi. 23 Tangtawn Toupa'n Mosi kiang ah: 24 Hiai Levite' nasep ding dan ahi: Pasal kum 25 apan a tunglama upate Kihoupihna Puanbuka nasepna ah a pang ding uh ahi. 25 Ahihhangin, kum 50 a phak chiangun nasep ngeina apan a tawlnga ding uh a, a sem nawn kei ding uh ahi. 26 A sanggamte un, Kihoupihna Puanbuka a sep ding uh a sepna uah bel a huh thei ding uhi. Ahihhangin, amau mah a sempipenin bel a pang ding uh ahi kei hi. Levite mawhpuakna na got ding dan hibang ahi, a chi hi.
Paikan Ankuang
1 Aigupta gam apan hong paikhiak nung uh a kum nihna, a kha khatna ah, Tangtawn Toupa'n Sinai Gamdai-gamkeu ah Mosi a houpih a: 2 A hun seh ah Israelte Paikan Ankuang luisak in. 3 A hun seh ah, hiai kha, a ni sawmleli ni nitak khawmuiin a dan bang tektekin tua ankuanglui uhen, a chi hi. 4 Tuachi-in, Mosi in Israelte khempeuh Paikanankuang lui dingin a hilh a, 5 amaute'n a kha khatna, a ni sawmleli ni, nitak khawmuiin tua Sinai Gamdai-gamkeu ah Tangtawn Toupa'n Mosi a thupiak bangbangin, ankuang a lui uhi. 6 Ahihhangin, amaute pawlkhat siluang tawh kisaia siangloua ngaih ahih manun, tua ni-in Paikan Ankuang lui theilouin a om uhi. Tuachi-in, tua ni mah-in, amaute Mosi leh Aron kiang ah hong pai uh a, 7 Mosi kiang ah: Siluang tawh kisaiin koute a siangloua ngaih ka hi uhi. Ahita zongin, banghanga koute'n a hun seh-a, Israel dangte tawh Tangtawn Toupa' thillat laan thei lou ding ka hi ua oi? a chi uhi. 8 Mosi in amaute a dawng a: Noute tawh kisaia Tangtawn Toupa'n bang thute pia hiam, chih ka theih mateng na ngak un, a chi hi. 9 Tua khitin, Tangtawn Toupa'n Mosi kiang ah: 10 Israelte hilh inla: Noute laka khatpeuh, ahih kei leh, na suante uh siluang tawh kisaia a siangloua ngaih a hih uleh, ahih kei leh, khualtama zinkhia hiam ahih aleh, Tangtawn Toupa' Paikan Ankuang a lui thei vek ding uhi. 11 A kha nihna, a ni sawmleli ni, nitak khawmuiin Paikan Ankuang a lui ding uh ahi. Silngou sawhlouh tanghou tawh, loukha tawh, tua Paikan belamnou a ne ding uh ahi. 12 Nek bang himhim a zingsang dong a sit ding uh ahi kei a, a guh himhim zong a sattan ding uh ahi kei. Paikan Ankuang a lui chiangun, a dan bang tektek a zui ding uh ahi. 13 Ahihhangin, khualtama zinkhia hilou a sianga ngaih, khat peuhin Paikan Ankuang a lui kei leh, a hun seha Tangtawn Toupa' thillat laan lou ahih manin, amaute lak apan satkhiak teitei ding ahi. Tua bang mi in a khelhna gah a paw ding ahi. 14 Na lak ua om gamdang mi in Paikan Ankuang a lui nop leh, a dan bang tektek a zui ding ahi. Gamsung mi leh gamdang mi adingin dan kibang na nei ding uh ahi, chi in, a chi hi.
Biakbuk tunga Meipi
15 Biakbuk, tua Theihpihna Puanbuk a kitunkhiak ni-in, meipi in a khuh hi. Nitaklam apan zingsang dongin tua biakbuk tunga meipi pen meikuang a bang hi. 16 A omdan tua bang ahi. Meipi in biakbuk a khuh a, zan chiangin meikuang a bang hi. 17 Tua Puanbuk tung apan meipi a tungkah peuhpeuh chiangin, Israelte a kipankhia uh a, tua meipi a niamkiak chiangin Israelte'n giahphual a sat zel uhi. 18 Tangtawn Toupa' thupiakin Israelte a kipankhia uh a, a thupiakin giahphual a sat uhi. Biakbuk tunga meipi a om lai teng giahphual ah a taam uhi. 19 Biakbuk tunga meipi a sawt om chiangin Israelte'n Tangtawn Toupa' thupiak mangin, a kipankhe kei uhi. 20 Khatvei vei tua meipi biakbuk tung ah ni tawmchik kia a om hi. Tua bang hun chiangin Tangtawn Toupa' thupiakin giahphual a sat uh a, Ama' thupiak mah-in a kipankhia uhi. 21 Khatvei vei tua meipi, nitak lam apan zingsang chiang lei a taam hi. Zingsanga a tungkah chiangin, a kipankhia uhi. Sun hi-in, zan hita leh, meipi a tungkah peuhpeuh chiangin, a kipankhia uhi. 222 Tua meipi, biakbuk tung ah ni nih hita leh, kha khat hita leh, kum khat hita leh, a taam sung teng Israelte giahphual ah a taam uh a, a kipankhe kei uh a, a tungkah peuhpeuh chiangin a kipankhia uhi. 23 Tangtawn Toupa' thupiakin giahphual a sat uh a, Tangtawn Toupa' thupiakin a kipankhia uhi. Mosi' tungtawna a thupiak bangbangin Tangtawn Toupa' thupiak a zui uhi.
Ngun Pengkulte Zatna
1 Tangtawn Toupa'n Mosi kiang ah: 2 Ngunsik sekthawhin pengkul nih bawl inla, mipite sapkhawm nading leh giahphual kisuankhiak nadingin zang in. 3 A niha a kimut chiangin, mipite khempeuh na maia Kihoupihna Puanbuk lutna ah hong paikhawm ding uh ahi. 4 Khat kia a kimut chiangin, makaite, Israel beh tuulpite na maia hong paikhawm ding uh ahi. 5 Pengkul saugina a gin chiangin suahlam pang giahphual sat namte a kipankhe ding uh ahi. 6 Pengkul saugin a nihveina a gin chiangin, simlam panga giahphual sat namte a kipankhe ding uh ahi. Pengkul sauginte kipatkhiak ding genna ahi ding hi. 7 Mipite kaihkhawm nadingin pengkulte mut in. Ahihhangin, gin dan kibangin na mut ding ahi kei hi. 8 Aron tapa siampite'n tua pengkulte a mut ding uh ahi. Hiai noute leh khangsawn sawnte adinga omden ding thuseh ahi. 9 Noute hon nuaisiahte tawh noumau' gamsunga na kidou chiangun pengkulte sauginin mut un. Tangtawn Toupa na Pathian un noute hon theigige ding a, na melmate uapan hon hukhe ding hi. 10 Na kipah hunte uh a hunhuna ankuangluite leh Kha Thak ankuangluite ah na haltum thillatte uleh lemna thillatte uh tung ah pengkulte mut un. Na Pathian uh mai ah noute adingin theihgigena ahi ding hi. Kei Tangtawn Toupa na Pathian uh ka hi, a chi hi.
Sinai apan Kipatkhiakna
11 A kum nihna, a kha nihna, a ni 20 ni-in, Theihpihna biakbuk tung apan meipi a tungkah hi. 12 Tua bangin, Israelte Sinai Gamdai-gamkeu apan a kipankhia uh a, tua meipi Paran Gamdai-gamkeua hong niamkiak masiah mun khat apan mun dang ah a vialzin uhi. 13 Mosi tungtawna Tangtawn Toupa' thupiak bangin, a kipatkhiakna masapen uh ahi. 14 Judah giahphuala apawl pawla kikhente amau' puanlap nuai ah a pai masa uhi. Amaute' makaiin Aminadab' tapa Nashon a pang hi. 15 Isakhar nama pawlpi makai in Zuar' tapa Nethanel a pang hi. 16 Zebulun nama pawlpi makaiin Helon' tapa Eliab a pang hi. 17 Tua khitin, biakbuk a kiphelkhia a, tua biakbuk van pua Gershonte leh Merarite a kipankhia uhi. 18 Judah nam zomin Reuben giahphuala apawl pawla kikhente, amau puanlap nuai ah, a pai uhi. Amaute' makaiin Shedeur' tapa Elizur a pang hi. 19 Simeon nama pawlpi makai in Zurishadai' tapa Shelumiel a pang hi. 20 Gad nama pawlpi makaiin Deuel' tapa Eliasaf a pang hi. 21 Tua khitin, Kohathte, thil siangthoute puain a kipankhia uhi. Amaute hong tun ma-a biakbuk tunkhiak ding ahi. 22 A zomin Efraim giahphuala a pawl pawla kikhente amau puanlap nuai ah a pai uhi. Amaute' makaiin Amihud' tapa Elishama a pang hi. 23 Manase nama pawlpi makaiin Pedazur' tapa Gamaliel a pang hi. 24 Benjamin nama pawlpi makaiin Gideoni' tapa Abidan a pang hi. 25 A tawpin, pawl dangte nungdalin Dan giahphuala pawl tuamtuamte, amau puanlap nuai ah a kipankhia uhi. Amaute' makaiin Amishadai' tapa Ahiezer a pang hi. 26 Asher nama pawlpi makaiin Okran' tapa Pagiel a pang hi. 27 Naftali' nama pawlpi makaiin Enan' tapa Ahira a pang hi. 28 Israelte a pawl pawla kizoma a pai dan uh hibang ahi. 29 Mosi in Midian mi Reuel' tapa Hobab a houpih hi. Reuel bel Mosi' sungpa ahi. Ama'n a kiang ah: Tangtawn Toupa'n: Gam kon pe ding, a chihna mun zuana kipankhia ka hi uh a, hon zui in, Tangtawn Toupa'n Israelte kianga thil hoih chiamta hiven, na tung ah siam ka suah mahmah ding uhi, a chi hi. 30 Hobab in a dawng a: Hilou e, kon zui dah mai ding. Keima' gam ah ka mite kiang ah ka kik nawn ding, a chi hi. 31 Ahihhangin, Mosi in: Koute hon nuse ken. Gamdai-gamkeua koi mun ah giahphual sat le-ung hoih ding hiam chih nang thei zaw na hih chiangin, koute adinga ka mit uh hi ding na hi. 32 Non zuih leh bel, Tangtawn Toupa'n thil hoih hon piak peuhmah kon hawm sam ding uhi, a chi hi. 33 Tua bangin, Tangtawn Toupa' mual apan a kipankhia uh a, ni thum a pai uhi. Tua ni thum sung teng Tangtawn Toupa' Thukhun singkuang amaute maia paiin amaute adingin tawlngakna mun a zong hi. 34 Giahphual apan a kipatkhiak chiangun, sun in Tangtawn Toupa' meipi amaute tung ah a om hi. 35 Tua singkuang a kipatkhiak chiangin Mosi in: Tangtawn Toupa aw, kisa in! Na melmate thehzakin om uhen, na mai ah na galte taikek uhen, a chi hi. 36 Singkuang a khawl chiangin, ama'n Tangtawn Toupa aw, hong kik in. Simsenglouh Israel sang tampite kiang ah hong kik in, a chi hi.
Tangtawn Toupa apan Meikuang
1 Mipite Tangtawn Toupa zakin a phun uhi. Tua a phunna uh Tangtawn Toupa muhin thil gilou ahi. Ama'n amaute phunna a zak takin a hehna a kuang hi. Tangtawn Toupa' mei amaute lak ah a kuang a, giahphual nawlnung pawlkhat a kang hi. 2 Mipite'n Mosi a sam uh a, amah Tangtawn Toupa' mai ah a thum a, mei a mit hi. 3 Tua bang ahih manin, tua mun min dingin Tabera a sa uhi. Tangtawn Toupa' mei in amaute a kat man ahi.
Tangtawn Toupa apan Vengkengte
4 Amaute' laka pawl khat in an dang a lunggulh uh a, Israelte lak ah phunna hong kipan a: Nek ding sa nei beek lehang zaw! 5 Aigupta gama manbeia ngasa i nekte ngaina hang e tangmaite, dawnpawlte, phulun dawngte, phulun bulbalte, phulun thakte khawng tawh. 6 Tu'n lah i anduh tha suakta kei. Hiai mana lou lah bangmah muphata kei hang! a chi uhi. 7 Mana bel koriandar tang bang leh grepgah keu bang ahi. 8 Mite'n a tomkhawm uh a, buhgawinain a gawivui uh a, ahih kei leh, sum ah a suvui uh a, beiin a huan uhi. Ahih kei leh tanghou peiin a bawl uhi. A lim dan bel oliv thaua kan bang ahi. 9 Zan kala, giahphuala daitui a kiak chiangin, mana zong hong kesuk ahi.
Mosi Phunna
10 Michih a puanbuk kongbula a phunnate Mosi in a za hi. Tangtawn Toupa a heh mahmah a, a hehna a hong kuangkhia hi. Mosi lungkhamin a mangbang hi. Tangtawn Toupa kiang ah: 11 Banghanga na silapa tunga hiai lungkham mangbatna hon tungsak na hia? Ke'n na mit tunlahna bang ka hih-a ahia, hiai mite puakgika non got? 12 Hiaite khempeuh ka paaisa ahi ua hia? Ka suan ka khakte ahi ua hia? Banghanga naungek don banga angsunga pom a, a pu a pate uh kianga kichiama piak ding na chiam gama pii dinga hon hilh na hia? 13 Mi hiai zahzah ading sa koi ah ka la dia ahia? Ka kiang ah a kapkap uh a: Nek ding sa hon pia in, a chi ve ua le! 14 Hiai mite kei kia'n paw zoulou ka hi. Kei adinga puakgik lua ahi. 15 Non bawl dan hibang ding a hih leh, tu mahmahin hon that mai in. Na mitmuha deihsakna tang ka hih leh, ka siatna hon maituahsak ken, a chi hi. 16 Tangtawn Toupa'n Mosi kiang ah: Mipite laka makai leh ulian ding hi-a na theih Israel upate laka mi 70 hon tonpih in. Nang tawh dingkhawm dingin, Kihoupihna Puanbuk ah amaute hon paisak in. 17 Kong kumsuk ding a, tua ah kon houpih ding a, na tunga Kha om apan ka la ding a, amaute tung ah tua Kha ka koih ding. Hiai mipite tawh kisaia puakgik nang kia-a paw louin amaute'n hon puakpih ding uhi. 18 Mipite hilh inla: Zingchiangin sa na ne ding uh. Tua dinga kisakholin ki siangsak un, Tangtawn Toupa'n na kah ua: Nek ding sa nei beek leng zaw! Aigupta gam ah nuam i sa zaw! na chih uh a zata. Tangtawn Toupa'n sa hon pe ding a, na ne ding uh. 19 Ni khat kia, ni nih kia, ahih kei leh, ni nga, ni sawm, ni 20 kia na ne kei ding uh. 20 Kha khat sung na nakvang uapan a pawt a, na kih mateng uh na ne ding uh. Na lak ua om Tangtawn Toupa nial a, a maia kap zawzena: Banghanga Aigupta gam nuse peuhmah i hia? chi hi ve uchin, chi in, a chi hi. 21 Ahihhangin, Mosi in: Ka ompih mite khea pai thei 600,000 ahi, Nang kha khat sung a nek ding uh sa ka pe ding, na chi a! 22 Belam leh kelte leh bawngtal a honhonin kigou leh zong a kham ding ua hia? Tuipi-a ngasate a vekpi-in amaute adingin kiman leh zong a kham ding ua hia? a chi hi. 23 Tangtawn Toupa'n Mosi a dawng a: Tangtawn Toupa' baan a tom lua ahia? Ka gente na muhin a tangtung hia, tangtung lou na mu ding, a chi hi. 24 Tuachi-in, Mosi a paikhia a, Tangtawn Toupa' thugen mipite a hilh hi. A upate uh 70 a kaikhawm a, tua Puanbuk kimkot ah a dingsak hi. 25 Meipi lak ah Tangtawn Toupa hong kumsuk a, amah a houpih hi. Ama' tunga om Kha apan a la a, upa 70-te tung ah tua Kha a koih hi. Amaute tunga Kha a om takin kamsang thugenin thu a gen uhi. Tua bangin bel a gengen nawn kei uhi. 26 Ahihhangin, mi nih Eldad leh Medad kichite bel giahphual ah a om lailai uhi. Upate laka minkhum ahi uh a, ahihhangin tua Puanbuk ah a va-pai kei uhi. Hinapi-in amaute tung ah zong Kha a om a, giahphual ah kamsang thugenin thu a gen uhi. 27 Tangval khat a tai a, Mosi a vahilh a: Eldad leh Medad in giahphual ah kamsang thugenin thu a gen uh, a chi hi. 28 Nun' tapa Joshua, a tuailai hun apan Mosi panpihpa'n thu a gen a: Ka toupa Mosi aw, amaute khou in, a chi hi. 29 Ahihhangin, Mosi in a dawng a: Kei guma na thikthu sia ahi maw? Tangtawn Toupa' mite khempeuh kamsang hi uhenla, Tangtawn Toupa'n amaute tungah a Kha koih leh ka chi tel ve! a chi hi. 30 Tua khitin, Mosi leh Israel upate, giahphual ah a kik uhi.
Vengkeng Piakna
31 Hichi hong hi a, Tangtawn Toupa apan huih hong nung a, tuipi lam apan vengkeng hon hawi hi. Giahphual kimkot, ni khat lam dongin, tong niha sahin vengkengte hon mutkhesuk hi. 32 Tua ni sun nitum leh a zan khawvak, a zing chiang sun nitum in, mipite a kuankhia uh a, vengkengte a tomkhawm uhi. Mi khat in homer sawm sanga tawmzaw lou a tomkhawm hi. Tua khitin, giahphual ah a zalh zezua uhi. 33 Tua sa a kam sung ua a om laitakin, a valhkhit maun, mipite tung ah Tangtawn Toupa' thangpaihna a kuang a, amaute hipi in a nuai hi. 34 Tua bang ahih manin, tua mun min dingin Kibroth Hatava a sa uhi. Ahang bel, tua muna an dang lunggulh mite kivui hi ve-un. 35 Kibroth Hatava apan mipite Hazeroth dong a pai uh a, tua ah a giak uhi.
Miriam leh Aron' Helna
1 Mosi in Kush numei zi-a nei hiven, tua a Kush zi hangin, Miriam leh Aron in Mosi a gense panta uh a: 2 Tangtawn Toupa'n Mosi tungtawn kia-a thu gen hia? Eite tungtawna zong thu gen lou hia? a chi uhi. Tangtawn Toupa'n hiai a za hi. 3 Mosi bel mi kingainiam mahmah ahi a, leitung maikaiha midang teng sangin zong a kingainiam zaw hi. e hihna.
Miriam Gawtna
4 Tangtawn Toupa'n Mosi, Aron leh Miriam kiang ah thu a gen pah a: Na thumun hong paikhia unla, Kihoupihna Puanbuk ah hong pai un, a chi hi. Tuachi-in, a thumun a vapai uhi. 5 Tua khitin, Tangtawn Toupa' meipi khuamin hong kumsuk a, Puanbuk lutna ah a ding a, Aron leh Miriam a sam hi. Amau gel in hon naih takun, 6 Ama'n: Ka thugen ngai un: Noute laka Tangtawn Toupa' kamsang a om chianga, a kianga mengmuhnate tungtawna kilak ing a, mangte-a houpih hi'ng. 7 Ahihhanga, ka sila Mosi tawh kisaia tua bang hi lou hi. Amah zaw ka insung khempeuha muanhuai ahi. 8 Amah zaw kimaituah-a houpih ing a, thu theihhak hi lou-a, kiteltaka thu gen zel hi'ng. Ama'n zaw Tangtawn Toupa lim leh mei mu hi. Banghanga ka sila Mosi gensiat ding lau lou na hi ua? a chi hi. 9 Amaute tung ah Tangtawn Toupa hehna a kuang a, amaute a nusia hi. 10 Tua Puanbuk tung apan meipi a tungkah takin, Miriam, a dinna ah a phaak a, vuk bang maiin a ngou hi. Aron amah lam ah a kihei a, Miriam a phaak ahi chih a mu hi. 11 Mosi kiang ah: Ka toupa aw, haihuaipi-a ka na khelhna uh mawh hon khusak ken. 12 Naungek a nu sung apan sisa-a suak, a sa kimkhat kinegaisa bangin amah omsak ken, a chi hi.
Mosi' Thumsakna
13 Tuachi-in, Mosi in Tangtawn Toupa' mai ah a ngen a: Pathian aw, amah damsak in! a chi hi. 14 Tangtawn Toupa'n Mosi a dawng a: A pa'n a maitang ah chilphih leh, ni sagih sung zahlakin om lou ding hiam? Ni sagih sung giahphual pawlam ah amah khum tuam in. Tua khit chiangin amah laklut theih ahi ding, a chi hi. 15 Tuachi-in, ni sagih sung Miriam, giahphual pawlam ah khumtuamin a om a, laklut kik a hih masiah mipite a kisuankhe kei uhi. 16 Tua nungin, mipite'n Hazeroth a nusia uh a, Paran Gamdai-gamkeu ah giahphual a sat uhi.
Kanan Gam Velna
1 Tangtawn Toupa'n Mosi a houpih a: 2 Israelte ka piak ding Kanan gam va vel ding pawl khat sawl in. Nam khat laka a makaite uh laka khat zel sawl in, a chi hi. 3 Tuachi-in, Tangtawn Toupa' thupiak bangin Mosi in Paran Gamdai-gamkeu apan amaute a sawlkhia hi. Amaute Israel makaite ngen ahi uhi. 4 A minte uh hiaite ahi: Reuben nam apan Zakur' tapa Shamua, 5 Simeon nam apan Had' tapa Shafat, 6 Judah nam apan Jefune' tapa Kaleb, 7 Isakhar nam apan Josef tapa Igal 8 Efraim nam apan Nun' tapa Hoshea, 9 Benjamin nam apan Rafu' tapa Palti, 10 Zebulun nam apan Sodi' tapa Gadiel, 11 Manase nam apan Susi' tapa Gadi, Manase bel Josef nam khat ahi. 12 Dan nam apan Gemali' tapa Amiel, 13 Asher nam apan Mikhael' tapa Sethur, 14 Naftali nam apan Vofsi' tapa Nabi, 15 Gad nam apan Maki' tapa Geuel. 16 Gam vel dinga Mosi in a sawlte' min hiaite ahi. Mosi in Nun' tapa Hoshea' min dingin Joshua a phuak hi. 17 Mosi in Kanan gam vel dinga a sawlkhiak laiin, amaute kiang ah: Negev tawnin paitou unla, tanggam ah lut un. 18 A gam bang chi bang hi hiam, tua-a tengte mihat hi uhiam, hat lou, tam uhia, tawm uhiam chihte en un. 19 A tenna uh bangchi bang gam hi hiam, gam hoih hi hiam, hoihlou chihte, a gam khawpite bangchi bang hi hiam, kulhbaang nei hiam, neilou chihte, 20 a leitang bangchi bang hi hiam, lei hoih hi hiam, hoih lou chihte, singkungte a pou hiam, pou lou chihte en un. A gam gah hon paw teitei un, a chi hi. Tua hun bel, grep gah masate min hun ahi. 21 Tuachi-in, a kuantou uh a, Zin Gamdai-gamkeu apan Lebo Hamath lampanga Rehob dong a vel uhi. 22 Negev tawnin a paitou uh a, Hebron a tung uhi. Tua ah Anak suante Ahiman, Sheshai leh Talmai a teng uhi, Hebron bel Aigupta gama Zoan a kilam ma kum sagiha kilam ahi. 23 Amaute Eshkol Phaizang a tun takun grep hiang khat, grep gah bom khat gah a sattan uh a, mi nih in singzawlin a zawng uhi. Mimthei leh theipi bangzah hiam tawh a pua uhi. 24 Tua mun bel Israelte'n tua laia grepgah bom a satkhiak manua Eshkol Phaizang kiminvawh ahi. 25 Ni 40 a bei takin gam velna apan a chiahkik uhi.
Gam Velna Thutut
26 Amaute, Paran Gamdai-gamkeua Kadesh mun ah Mosi, Aron leh Israel mipite khempeuh kiang hong tungkik uhi. Tua ah, amaute leh mipite kiang ah thu a tun uh a, a gam gah zong a lak uhi. 27 Mosi kiang ah hiai thu a tun uhi: Non sawlna gam ah ka valut uh a, nawitui leh khuaizuin a luang taktak hi! Hiai ah a gam gah a om. 28 Ahihhangin, tua-a teng mite a hat uh a, khawpite kulhbaang nei lianpipi ahi. Anak suante nangawn tua ah ka mu uhi. 29 Negev ah Amalekte a teng uh a, tanggam teng ah Hitte, Jebuste leh Amorte a teng uh a, tuipi gei leh Jordan lui dung teng ah Kanante a teng uhi, a chi uhi. 30 Tua laitakin, Kaleb in Mosi mai ah mipite a khamdai a: Kuantouin a gam i valuah ding uh ahi. Hih zou mahmah ding i hi, a chi hi. 31 Ahihhangin, amah tawh kuantoukhawmte'n: Tua mite dou zou talou zen ni ei! Eite sanga hat zaw hi uh, a chi uhi. 32 Tua bangin a vavel uh tua gam thu Israelte lak ah a selamin a thangsak uhi. Amaute'n: Ka vavel uh tua gam zaw a sunga tengte' nawmvalh gam ahi. Ka vamuh uh mite zong mi lianpipi ahi uh. 32 Tua ah Nefilimte ka mu uhi. Anak' suante bel Nefilimte apan hong khangkhia ahi uhi. Koumau' mitmuhin khaukhup bang lelin ka kimu uh a, amaute' mitmuh in zong tua bang mah ka hi uhi, a chi uhi.
Mipite' Helna
1 Tua zanin, mipite khempeuh ngaihtakin a kap uhi. 2 Israelte khempeuh Mosi leh Aron tung ah a phun uh a, mipite khempeuh in amaute kiang ah: Aigupta gam ah sita houh lehang hoih zaw ding! Ahih kei leh, hiai gamdai-gamkeu ah sita houh lehang! 3 Namsaua si ding leia banghanga Tangtawn Toupa'n hiai gam hon tun ahia? I zite leh i tate gallaaka puakmanga om ding ahita ve ua! Aigupta gam ah kilehkik nawn lehang eite adingin hoih zaw lou ding hiam? a chi uhi. 4 Tua baan ah: Makai khat teelkhiain Aigupta gam ah kilehkik ni, a kichi uhi. 5 Tua bang hong hih takin, Mosi leh Aron bel tua laia Israel kikhawmte khempeuh mai ah a khupbawh uhi. 6 Gam vela kuantoute laka kihel Nun' tapa Joshua leh Zefune' tapa Kaleb in a puansilh uh a botkek uh a, 7 Israel kikhawmte khempeuh kiang ah: Ka vatotsuak uleh ka vavel uh gam hoih law mahmah ahi. 8 Tangtawn Toupa' mittunna a hih peuhmah leh, ama'n tua gam nawitui leh khuaizu-a luang gam hon tun ding a, eite kianga hon pe ding ahi. 9 Tangtawn Toupa tung ah hel kei peuhmah phot un. Tua gam mite lau kei un, nawmvalh nading i hi. A kihutna uh beita a, Tangtawn Toupa'n eite hon ompih ahi. Amaute lau kei un, a chi uhi. 10 Ahihhangin, kikhawmte khempeuh in amaute suanga den a sawm uhi. Tua laitakin Tangtawn Toupa' thupina Israelte khempeuh kiang ah, tua Kihoupihna Puanbuk ah hong kilang hi. 11 Tangtawn Toupa'n Mosi kiang ah: Hiai mite'n kei bangtan hon simmawhbawl lai ding uh ahia? Amaute laka chiamtehna thillamdang hizahta ka hih nunga bangtan kei hon um nuamlou lai ding uh ahia? 12 Hipi-in amaute ka that ding a, ka hihmangthang ding. Amaute sanga hatzaw leh thupizaw namin nang kon bawl ding, a chi hi. 13 Mosi in Tangtawn Toupa kiang ah: Tua banga na hih leh, Aiguptate'n za mahmah ding uhi! Na khut thahata amaute lak apan hiai mite na pikhiaktouh ahi. 14 Amaute'n hiai thu, hiai gama tengte a hilh ding uh. Tuin zong Tangtawn Toupa aw, hiai mite na ompih chih leh, Tangtawn Toupa aw, kimaituah-a melmuh in na om a, amaute tung ah na meipi a om gige chih leh, amaute' mai ah sun chiangin meipi khuampi-in, zan chiangin meikuang khuampi-in na pai chih a zakhinta uhi. 15 Sikkhat thu-a hiai mite na thah siang leh, nangma' thu zakhin namte'n: 16 Tangtawn Toupa'n kichiam zena a chiamsa gam ah hiai mite a piilut thei kei a, gamdai-gamkeu ah a that vekta ve, hon chi ding uhi, a chi hi. 17 Tu'n na gensa bangbangin Toupa' thahatna hong kilang hen, 18 Nang: Tangtawn Toupa zaw hehhak lungnel, itna hau, khelhna leh helna ngaidam ahi. Hinapi-in, a mawhte lah gawt louhin a nuse kei a, khang thum, khang li dongin pate' khelhna hangin tate a gawt zel, na chikhin vele. 19 Aigupta gam a nutsiat uapan tu dong amaute na ngaihdamtak bangin, na itna thupina zahzahin hiai mite' khelhna ngaidam in, a chi hi. 20 Tangtawn Toupa'n a dawng a: Na nget bangin, amaute ka ngaidamta. 21 Ahihhangin, kei a nungta ka hih bangbangin leh, Tangtawn Toupa' thupina in leitung a kidimsak bangbangin, 22 ka thupina leh, Aigupta gam leh gamdai-gamkeua ka hih thillamdangte mu a, ahihhanga sawmveitak ka thu manglou a, hon ze-et kua mah, 23 a lak ua khat lei in zong, a pu a pate uh kianga kichiama piak ka chiam gam a mu ngei kei ding uh. Kei, simmawhtaka hon bawl kuamah in a mu ngei kei ding. 24 Ahihhangin ka sila Kaleb in lungsim tuam neia, lungtang teng khempeuh tawh kei hon zuih manin, a va lutna gam ah ka pilut ding a, a suante'n a luah ding uh. 25 Phaizanga Amalekte leh Kanante teeng uh ahih manin, zing chiangin kihei inla, Tuipi San lam manawhin, gamdai-gamkeu lam ah kipankhia in, a chi hi. 26 Tangtawn Toupa'n Mosi leh Aron kiang ah: 27 Hiai nam gilou bangtan ka tunga phun ding ahi ua? Hiai Israel phunhatte' phunnate ka zata. 28 Amaute hilh unla: A nungta ka hih bangbangin, na gen uh ka zak bangbang na tung uah ka hih ding, chi-in Tangtawn Toupa'n a phuang a: 29 Hiai gamdai-gamkeu ah na luangte uh a puk ding. Na lak ua kum 20 leh a tunglama upa, kisimna-a min khum, ka tunga phun peuhmah a puk ding. 30 Na lak ua khat lei zong, Jefune' tapa Kaleb leh Nun' tapa Joshua chih louh siah, banzaka ka chiam gam lutin na teeng kei ding uh. 31 Na tate uh, gallaaka kipawmang ding, na chihte uh bel noute'n na nolh uh gam ah ka piilut ding a, a gamgah a ne ding uh. 32 Noute na hih uleh, na luang uh hiai gamdai-gamkeu ah a puk ding. 33 Na tate uh hiai ah kum 40 sung belam chingin a om ding uh a, noute laka a si nunungpen' luang gamdai-gamkeua a lup mateng, noute' muanhuai louhna hangin a thuak ding uh. 34 Gam vela na taam sung uh ni 40-te, ni khat zel kum khata tuatin, kum 40 sung, na khelhna uh hangin, na thuak ding uh a, noute' lang panga non neih uh bangchi bang hi hiam, chih na thei ding uh, a chi, chi un. 35 Kei, Tangtawn Toupa'n thu ka genta a, kei hon dou-a kikaikhawm hiai giloute tung ah hiai thilte ka hih taktak ding hi. Hiai gamdai-gamkeu ah a beina uh a tuak ding uh a, hiai ah a si ding uh, a chi hi. 36 Tuachi-in, Mosi in gam vel dinga a sawlte a hong kik nawn tak ua, thutut a siasia-a thangsak a, mipite Mosi tunga phunsakte, 37 gamthu thutut a selama thangsaka, mawhpawte Tangtawn Toupa' maia phukpaihin a om uh a, hipi-in a si uhi. 38 Gam vel dinga kuantoute lak ah Nun' tapa Joshua leh Jefune' tapa Kaleb kia a suakta uhi. 39 Mosi in hiai thu Israelte khempeuh kianga a tut takin nakpitakin a kap uhi. 40 A zing chiang zingkhangpi-in tanggam saang lam ah a paitou uh a: I na khialta uh. Tangtawn Toupa' chiamsa mun ah i kuan ding, a chi uhi. 41 Ahihhangin, Mosi in: Banghanga Tangtawn Toupa' thupiak manglou na hi ua? Hiai lawhching ken teh! 42 Tangtawn Toupa'n noute hon ompih lou a hih manin, kuantou kei un. Na melmate uh zawhin na om ding uh. 43 Amalekte leh Kanante'n hon na maituah ding uh ahi. Tangtawn Toupa apan kiheimang na hih manun ama'n hon ompih lou dinga, namsaua puk ding hi uteh, a chi hi, 44 Hinapi-in, Mosi hita leh, Tangtawn Toupa' thukhun singkuang hita leh, giahphual apan kisuan loupi, amau kimawk muanin tanggam saang lam ah a kuantou uhi. 45 Tanggama teeng Amalekte leh Kanante hong kuansuk uh a, amaute a dou uh a, Horma dongin amaute a zougawp suk uhi.
Thillat Dangte
1 Tangtawn Toupa'n Mosi a houpih a: 2 Israelte kiang ah thu gen inla: Teen nadinga kon piak ding gam na lut kik chiang un leh, 3 Tangtawn Toupa' maia belam leh kelhon lak, ahih kei leh, bawnghon lak apan meia thillatte, tua Tangtawn Toupa' lungkimna gim namtui, thuchiam tangtunna haltum thillatte hi-in, kithoihnate hita leh, ahih kei leh, ut thillatte hi-in ankuang luina thillatte hita leh, na lat chiangun, 4 a thillatte laanpa'n Tangtawn Toupa' mai ah an thillat anvui nei ephah khat sehsawm suah seh khat, sathau hin khat sehli suah seh khat tawh kihel, a laan ding ahi. 5 Haltum thillat ding hiam, kithoih nading hiam belamnou tawh kitonin dawn thillat ding zu hin khat sehli suah seh khat tawh na bawl ding uh ahi. 6 Belamtal tawh kitonin an thillat ding anvui nei ephah khat seh sawm suah seh nih, sathau hin khat seh thum suah seh khat tawh kihel, 7 tua baan ah dawn thillat ding zu hin khat sehthum suah seh khat bawl un. Tangtawn Toupa' lungkimna gim namtui hi dingin tua laan un. 8 Tangtawn Toupa' maia thuchiam tangtun nading hiam, haltum thillat ding hiam, kithoih nading hiama bawngtaltuai na bawl chiangun, 9 tua bawngtaltuai tawh an thillat, anvui nei ephah khat sehsawm suah sehthum, sathau hin kimkhat tawh kihel hon tawi un. 10 Tua baan ah, dawn thillat dingin zu hin kimkhat zong hon tawi un. Tangtawn Toupa' lungkimna meia thillat gimnamtui ahi ding hi. 11 Tua bawngtaltuai, belamtal, belamnou, ahih kei leh kelnou, tua bang taka bawl ding ahi. 12 Amaute na lat ding zahzah uh tua bangin bawl un. 13 Gam sunga piang kuapeuh in Tangtawn Toupa' lungkimna gimnamtui hi dingin meia thillat hon tawi chiangun, hiaite hibangin a hih ding uh ahi. 14 Khangsawn sawnte adingin gamdang mi hiam, midang na lak ua teeng khatpeuh in, Tangtawn Toupa' lungkimna gim namtui hi dinga meia thillat a lat chiangin noute hih bangbanga a hih ding ahi. 15 Mun khata tengkhawmte'n noute ading leh na lak ua teeng gamdang mi adinga hibang dan a neih ding ahi. Hiai khangsawn sawn dong adinga omden ding thuseh ahi. Tangtawn Toupa' mai ah noute leh gamdang mite a kibang na hi ding uh ahi. 16 Dante leh kimakaihna dante a kibangin, noute leh na lak ua teeng gamdang mite tung ah a kizang ding ahi, chi in, a chi hi. 17 Tangtawn Toupa'n Mosi kiang ah: 18 Israelte kiang ah thu gen inla: Noute kon pii nading gam na lut chiangun, leh 19 tua gam an na nek chiangun, bangzah hiam Tangtawn Toupa' maia thillatin na laan ding uh ahi. 20 Na anvui nei masapen uapan tanghou pei khat, buhphual apan thillat hi dingin na laan ding uh ahi. 21 Hong om ding khangsawn sawn dongin, na anvui nei masapen uapan hiai thillat Tangtawn Toupa' mai ah na lan ding uh ahi, chi in, a chi hi.
Khut Khelhna Thillat
22 Tangtawn Toupa'n Mosi kianga a piak hiai thupiakte laka khat peuh, tup mawng hilou-a, zuihkhak louh na neih uleh, 23 ama' tungtawna Tangtawn Toupa'n noute hon piak thupiakte khatpeuh, Tangtawn Toupa'n hon piak ni apan hong om lai ding khangsawn sawn dongin chihna ahi. 24 Tup mawng hilou-a, mipite' phawk louh a, hibang na hih khak uleh, mipite'n Tangtawn Toupa' lungkimna gimnamtui hi dingin, haltum thillat bawngtaltuai a laan ding uh ahi. Tua tawh kitonin, sehsa bangin an thillat leh dawn thillat, tua baan ah, khelhna thillat ding keltal khat a laan ding uh ahi. 25 Siampi in Israel nam buppi khuhna a bawlsak ding a, tuachi-in ngaihdam ahi ding uhi. Ahang bel, tup mawnga thil hih hi loua, a thil hih khelh uh banga Tangtawn Toupa' maia meia thillat leh khelhna thillat laanta uh hiven. 26 Tua tup mawng hilou khelhna-a kihel vek ahih manun, Israel nam buppi leh a lak ua teeng gamdang mite ngaihdam ahi vek ding uhi. 27 Ahihhangin, mimal khat in tup mawng hiloua a na khelh leh, khelhna thillat dingin kelnou, kum khata upa khat hon tawi ding ahi, 28 Mi khatpeuh in Tangtawn Toupa mai-a tup mawng hilou-a a khelh leh siampi in tup mawng hiloua khialpa adingin, Tangtawn Toupa' mai ah khuhna a bawlsak ding ahi. Ama' adinga khuhna a kibawlsak khit chiangin, amah ngaihdam ahi ding hi. 29 Israel mi a gam sunga piang hi-in, gamdang mi hita leh, tup mawng hiloua khialte adingin dan khat leh a kibang a kizang ding ahi. 30 Ahihhangin, tup mawnga khial mi khatpeuh, gamsunga piang hi-in, gamdang mi hita leh, Tangtawn Toupa gensia ahi a, tua bang mi pen a mite lak apan satkhiak teitei ding ahi. 31 Ama'n Tangtawn Toupa' thu simmawh a, a thupiakte palsat ahih manin, tua bang mi satkhiak teitei ding ahi. A mawhna ama' tung ah a thamden hi, chi in, a chi hi.
Sabbath Tanlouh Gawtna
32 Gamdai-gamkeua Israelte a om lai un, mi khat Sabbath ni-a singtom a kiman hi. 33 A singtom lai mute'n amah Mosi, Aron leh kikhawmte mai ah hon paipih uhi. 34 Amah bang lawh ding hiam, chih a kitel louh manin, amah a khum uhi. 35 Tua khitin, Tangtawn Toupa'n Mosi kiang ah: Tua mi a sih teitei ding ahi. Kikhawmte'n giahphual pawlam ah amah suangin a denglum ding uh ahi, a chi hi. 36 Tuachi-in, kikhawmte'n amah giahphual pawlam ah a pikhia uh a, Tangtawn Toupa'n Mosi a thupiak bangin, amah suangin a denglum uhi.
Puanmong Nelkai
37 Tangtawn Toupa'n Mosi kiang ah: 38 Israelte kiang ah thu gen inla: Hong om ding khangsawn sawn dongin na puansilhte uh a mong kiute ah nelkai na bawl ding uh, tua nelkaite-a khau dum na hen ding uh ahi. 39 Hiai puanmong nelkaite na et ding uh, na et chiang ua Tangtawn Toupa' thupiakte na theihgige nading uh ahi. Thupiakte theigige-a na zuih ua, na lungtang uleh na mit uh' duhgawlna zuia na kizuak louh nading uh ahi. 40 Tuachi-in, ka thupiakte khempeuh zuih ding na thei gige ding uh a, na Pathian uh adinga sehtuam siangthou na hi ding uhi. 41 Kei Tangtawn Toupa na Pathian uh, na Pathian uh hi dinga Aigupta gam apan noute hon pikhepa ka hi. Kei Tangtawn Toupa na Pathian uh ka hi, chi in, a chi hi.
Kora, Dathan leh Abiram
1 Izhar' tapa Kora ahi. Izhar bel Kohath' tapa ahi a, Kohath lah Levi' tapa ahi. Kora tawh Reubente pawlkhat, Dathan leh Abiram leh On a kisathei uhi. Dathan leh Abiram bel Eliab' tapate ahi uh a, On lah Peleth' tapa ahi. 2 Hiai mite'n Mosi a dou uhi. Amaute lam ah Israelte nam makai ngen, vaihawm pawla pang ngenta 250 a pang uhi. 3 Amaute a hon-a pangin, Mosi leh Aron a khing uh a: Na uang lua uh! Minam buppi a siangthou uh a, a vekun a siangthou uh a, Tangtawn Toupa'n amaute a ompih hi. Banghanga Tangtawn Toupa' mi kikhawmte tunga kikoih na hi ua? a chi uhi. 4 Mosi in hiai a zak takin, a maia lei si-in a bok a, 5 Kora leh a nungzuite khempeuh kiang ah: Zingsang chiangin Tangtawn Toupa'n amah-a kua hi a, kua siangthou hiam, chih hon lak ding a, tua mi amah kiang a naihsak ding. Ama' teelpa pen amah naihin a paisak ding. 6 Noute, Kora leh na nungzuite khempeuh in hiai hih un. Gim namtui halna kuang la unla, 7 zingchiangin Tangtawn Toupa' mai ah meiam luak unla, tuate tung ah gim namtui koih un. Tangtawn Toupa'n a teelpa pen a siangthoupa ahi ding. Nou Levite na uang lua uhi! a chi hi. 8 Tua baan ah, Mosi in Kora kiang ah: Nou Levite'n ngai un! 9 Israel Pathian in Israel dangte lak apan hon septuam a, Tangtawn Toupa' biakbuka nasem ding leh mipite maia dinga amaute' nna sepsak dinga, ama' kiang hon naihsak kiching lou hia? 10 Nang leh na Levipihte khempeuh ama' kiang hon naihsak a, ahihhangin, tu'n siampi hihna zong suh na sawm lai uh. 11 Nang leh na nungzuite na pankhawm uh Tangtawn Toupa douna ahi. Na phunsan vial ding uh Aron kua ahia? a chi hi. 12 Tua khitin, Mosi in Eliab' tapate Dathan leh Abiram a sam a, ahihhangin, amaute'n: Kong pai kei ding uh! 13 Gamdai-gamkeua thah dinga nawitui leh khuaizu-a luang gam apan non pikhiak kiching lou lai hia? Tu'n koute tunga kiletsak na sawm lai. 14 Tua kia hilouin, nawitui leh khuaizu-a luang gam ah non piilut kei. Gou-a luah ding loute leh grephuante non pe kei. Hiai mite' mittang khelkhiak sawm na hi maw? Pai lou e, kong pai kei ding uh, a chi uhi.
Kora Gawtna
15 Mosi a heh mahmah a, Tangtawn Toupa kiang ah: Amaute' thillat sang ken. Amaute apan sakolneu khat zong ka la kei, amaute khatpeuh tung ah zong ka khial kei, a chi hi. 16 Mosi in Kora kiang ah: Nang leh na nungzuite khempeuh nang leh amaute leh Aron, zing chiangin Tangtawn Toupa' maia kilang dingin kisa un. 17 Michih in a gimnamtui halna kuang tawi chiat henla, a sung ah gim namtui koih chiat uhen. Avekin gimnamtui halna kuang 250 ahi. Tua gimnamtui Tangtawn Toupa' mai ah laan uhen. Nang leh Aron in gim namtui halna kuang tawi un, a chi hi. 18 Tua bangin, michih in a gim namtui halna kuang a tawi chiat uh a, mei leh gim namtui a koih chiat uh a, Kihoupihna Puanbuk lutna ah Mosi tawh Aron tawh a dingkhawm uhi. 19 Kora, amaute doua nungzuite kaikhawm a, Kihoupihna Puanbuk lutna-a a din takin Tangtawn Toupa' thupina tua kikhawm mipite khempeuh kiang ah hong kilaak hi. 20 Tangtawn Toupa'n Mosi leh Aron kiang ah: 21 Amaute ka beisak pah theih nadingin hiai kikhawmte apan kihem un, a chi hi. 22 Ahihhangin, Mosi leh Aron bel maitanga lei si-in a bok uh a: Pathian, mihing khempeuh' khate' Pathian aw, mi khat kia khelhna ah, kikhawmte khempeuh tung ah na heh dia hia? chi-in a kikou uhi. 23 Tua khitin, Tangtawn Toupa'n Mosi kiang ah: 24 Kikhawmte kiang ah thu gen inla: Kora, Dathan leh Abiram' puanbukte apan kihem un, chi in, a chi hi. 25 Mosi a thoutou a, Dathan leh Abiram kiang ah a va pai a, Israel upate'n amah a zui uhi. 26 Kikhawmte a vauhilh a: Hiai migiloute' puanbukte apan kihem un! Amaute' neihsa bangmah lawng kei un. Tuachilou-in zaw, amaute khelhnate hanga phiatmang khawmin na om ding uhi, a chi hi. 27 Tuachi-in, Kora, Dathan leh Abiramte' puanbukte apan amaute a kihemkhia uhi. Dathan leh Abiram hong pawt khia uh a, a puanbuk lutna uah a zite uh, a tate uleh tanaute utawh a dingkhawm uhi. 28 Tua khitin, Mosi in: Hiai thilte hih dinga Tangtawn Toupa'n kei hon sawl ahi a, keima' ngaihdan hilou ahi, chih na theih nading uh hibang ahi: 29 Hiai mite sih dan ngeina-a a sih ua, mihingte tunga thiltung zelte bang lei a tung ua a tun leh, Tangtawn Toupa'n kei hon sawl lou ahi ding. 30 Ahihhangin, Tangtawn Toupa'n thil thak khat a hih a, lei hong kamka a, amaute leh a neihsa khempeuh uh a valh a, hankhuka a hinga a lutsuk uleh bel, hiaia omte'n Tangtawn Toupa a simmawh uh, chih na thei ding uh, a chi hi. 31 Hiai teng a gen khit phetin, amaute nuaia lei a khi a, 32 lei a kamka a, amaute, a innkuante utawh, Kora' mite khempeuh leh a neihsa khempeuh utawh, avekun a valh hi. 33 Amaute, a neihsa khempeuh utawh hankhuk ah a lutsuk uh a, lei a kichih kik a, amaute a mangthang uh a, tua nam apan a beita uhi. 34 Amaute kikou aw zain, amaute kim leh pama om Israel khempeuh a tai uh a: Lei in eite zong hon valh ding hita! chi-in a kikou uhi. 35 Tangtawn Toupa apan meikuang hong pawt a, tua gim namtui laan mi 250-te a kangtum hi. 36 Tangtawn Toupa'n Mosi kiang ah: 37 Tua thil kangte lak apan gimnamtui halna kuangte la a, a meiamte gamla kuama thehzak dingin Aron tapa siampi Eleazar hilh in. Tua gim namtui halna kuangte thil siangthou ahi. 38 A hinna uh mansuah hiaia khialte' gimnamtui halna kuangte a siangthou ahi. Tua gim namtui halna kuangte sek inla, maitam tuamnain zang in. Tangtawn Toupa' maia kilaansa, a siangthou ahi uhi. Israelte adingin chiamtehnain omta hen, a chi hi. 39 Tuachi-in, siampi Eleazar in sumsana kibawl tua gim namtui halna kuang, a kangtum mite' hon tawite a lakhawm a, maitam tuam nadingin a sek hi. 40 Tangtawn Toupa'n Mosi tungtawna amah a hilh banga a hih ahi. Hiai bel Tangtawn Toupa' maia gim namtui hal dingin Aron suante loungal kuamah a kuan ding ahi kei, chih Israelte theihsakna ahi. Tua hi kei leh Kora leh a nungzuite a hing ding uhi. Israelte' Helna leh Gawtna 41 A zing chiangin, Israel nam buppi Mosi leh Aron tung ah a phun uh a: Tangtawn Toupa' mite na thatta ve ua, a chi uhi. 42 Ahihhangin, kikhawmte Mosi leh Aron doua a kikhop ua, Kihoupihna Puanbuk lam a ngat laiun thakhatin meipi in tua Puanbuk a khuh a, Tangtawn Toupa' thupina hong kilang hi. 43 Tua khitin, Mosi leh Aron tua Kihoupihna Puanbuk mai ah a va pai uhi. 44 Tangtawn Toupa'n Mosi kiang ah: 45 Hiai kikhawmte apan kihem un, amaute thakhatin ka beisak ding, a chi hi. Amaute bel lei si-in a bok uhi. 46 Tua khitin, Mosi in Aron kiang ah: Na gim namtui halna kuang la inla, a sung ah gim namtui leh maitam apan mei hon la inla, kikhawmte kiang delh in, Tangtawn Toupa apan thangpaihna a pawtkhiaa, hipi a kipanta, a chi hi. 47 Tuachi-in, Aron in Mosi gen bangin a hih a, kikhawmte lak ah a tailut hi. Mipite lak ah hipi a kipankhin a, ahihhangin, Aron in gim namtui a laan a, amaute adingin khelhna khuhna a bawlsak hi. 48 Amah a site leh a hingte kal ah a ding a, hipi a khawlta hi. 49 Ahihhangin, Kora hanga site baan ah, mipite lak apanin mi 14,700 hipi-in a si man uhi. 50 Tua khitin, hipi khawlta ahih manin, Aron zong Mosi kiang ah a kilehkikta hi.
Aron9 Chiangsel
1 Tangtawn Toupa'n Mosi kiang ah: 2 Israelte kiang ah thu gen inla, amaute apan chiang sawmlenih la in, nam khat makai apan chiang khat zel ahi ding ahi. Tuate' min a chiang tung chiat uah gelh in. 3 Levi' chiang tung ah Aron' min gelh in. Nam khat tuulpi adinga chiang khat chiat hi ding ahi. 4 Kihoupihna Puanbuk sung ah nang kon kimuhpihna Theihpihna mai ah tua chiangte koih in. 5 Ka teelpa' chiang a sel ding a, Israelte nang dema a phun gigena uh kei apan ka koihmang ding, a chi hi. 6 Tuachi-in, Mosi in Israelte kiang ah thu a gen a, a makaite un chiang sawmlenih a pia uhi. Nam khat makai apan chiang khat zel ahi a, tuate lak ah Aron' chiang zong a om hi. 7 Mosi in tua chiangte Theihpihna Puanbuk sung ah Tangtawn Toupa' mai ah a koih hi. 8 A zing chiangin, tua Theihpihna Puanbuk sung ah Mosi a lut a. Levi' innkuan tanga ding Aron' chiang a sel kia hilouin a pakmum a, a pakpalh a, almon gahte a suah chih a mu hi. 9 Tua khitin, Mosi in Tangtawn Toupa' omna apan Israelte khempeuh mai ah tua chiangte hon lakhia hi. Amaute'n tua chiangte a en uh a, michih in ama' chiang a la hi. 10 Tangtawn Toupa'n Mosi kiang ah: Helhatte adinga chiamtehna hi dingin, Aron chiang, Theihpihna mai ah koih kik in. Hiai in ka tunga amaute' phunna a beisak ding a, a si kei ding uh, a chi hi. 11 Mosi in Tangtawn Toupa' thupiak bangbangin a hih hi. 12 Israelte'n Mosi kiang ah: Koute ka si ding uh! Mangthang ka hita uh, ka vekpi-un mangthang ka hita uh. 13 Tangtawn Toupa' biakbuk naiha hong pai peuhmah nangawn a si ding. Ka vekpi-ua si ding ka hita uh maw? a chi uhi.
Siampite leh Levite' Mawhpuakna
1 Tangtawn Toupa'n Aron kiang ah: Nang leh na tapate leh na pa' inkawte'n mun siangthou tunga khelhna tawh kisaia mawhpuakna na lak ding uh ahi. Nang leh na tapate kia in siampi hihna tawh kisaia thil hihkhelhte-a mawhpuakna na puak ding uh ahi. 2 Nang leh na tapate'n Theihpihna Puanbuk maia nna na sep chiang ua noute tawh pangkhawma hon huh dingin na beh lak uapan na Levipihte hon tonpih in. 3 Amaute nang nuaia sem mawhpua ahi ding uh a, Puanbuka sep ding khempeuh a sem ding uh ahi. Ahihhangin, munsiangthou vanzatte hiam, maitam hiam, a naih ding uh ahi kei. Tua banga a naih uleh amaute leh nang na si ding uhi. 4 Amaute'n nang hon kithuahpih ding uh a, Kihoupihna Puanbuk kepna ah mawh a paw ding uh ahi. Puanbuka nasepna khempeuh ah mawh a paw ding uh, chihna ahi. Na omna mun ah kuamah dang hong pai nai ding ahi kei hi. 5 Israelte tunga thangpaihna a tun nawn louh nadingin, munsiangthou leh maitam kepna ah mawh na paw ding ahi. 6 Kei mahmah in Israelte lak apan na Levi-pihte ka teel a, na kianga thawnpiak bangin Kihoupihna Puanbuka nna sem dinga Tangtawn Toupa' maia ka lat ahi uh. 7 Ahihhangin, maitam ah leh puanzak sunga thil peuhmah tawh kisaiin bel nang leh na tapate kia in siampi' nna na sem thei ding uhi. Hiai siampi nasepna na kiang uah thawnpiakin kon pia ahi. Munsiangthou hon naih mi dang peuhmah thah teitei ding ahi, a chi hi.
Siampite leh Levite ding Thillatte
8 Tua khitin, Tangtawn Toupa'n Aron kiang ah: Ka kianga thillatte tawh kisaia thuneiin kei mahmah in nang kon koih ahi. Israelte'n thil siangthou kei hon piak khempeuh uh nang leh na tapate' tantuan dingin leh a ngeina-a na tan gige dingun kon pia ahi. 9 Mei apan keptuam thillat siangthoupente laka tan na neih ding uh ahi. Thillat siangthoupen ka kianga hon tawi uh thawnpiakte khempeuh apan, an thillat hi-in, khelhna thillat khempeuh hi-in, mawhna thillat khempeuh hita leh, tantuan nang leh na tapatea ahi. 10 Thil siangthoupenin ne un. Pasal peuhmah in a ne ding uh a, a siangthouin na ngai ding uh ahi. 11 Hiai zong noutea ahi: Israelte' vei thillat khempeuha thawnpiakte apana koihtuam bang peuh noutea ahi. Nang leh na tapate leh na tanaute'n na tan gige dingun kon pia hi. Na innkuan sung ua a sianga ngaihte teng in na ne thei ding uhi. 12 Anlaak laka gah masate banga Tangtawn Toupa kianga a piak uh oliv thau hoihpente, zu thak hoihpente leh an khempeuh nang kon pia ahi. 13 Tangtawn Toupa kianga hon tawi uh gam gah masate nanga ahi ding. Na insunga a sianga ngaihte teng in a ne thei ding uhi. 14 Israel gama Tangtawn Toupa kianga piak thil teng nanga ahi. 15 Sula piang masa mihing hi-in ganta hita leh, Tangtawn Toupa kianga lat peuhmah nanga ahi. Ahihhangin, tapa masa peuhmah na tat teitei ding uh, tua baan ah, ganta sianglou apan a pa piang masa peuhmah na tat teitei ding uh ahi. 16 Kha khata a upat chiangun tatna man ding kisep ngun shekel nga zela tat ding ahi. Tua shekel bel, munsiangthou shekel gik dana buk ahi a, shekel khat lah gera 20 ahi. 17 Ahihhangin, bawngtal hi-in, belam hi-in, kei hita leh a piang masa na tat het louh ding uh ahi. A siangthoua ngaih ahi uhi. A sisan uh maitam tung ah theh un. A thau uh meia thillatin haltum un, Tangtawn Toupa' lungkimna gim namtui ahi. 18 Vei thillat a awm leh a taklam pheipi noua ahih bangin, tua gantate' sa noua ahi. 19 Tangtawn Toupa' maia Israelte'n a piak uh thillat siangthou apan koihkhiak peuhmah na tan gige dingun nang leh na tapate na tanute kiang ah kon pia hi. Tua bel, nang leh na suan adinga Tangtawn Toupa' maia Tangtawn chithukhun ahi, a chi hi. 20 Tangtawn Toupa'n Aron kiang ah: Amaute' gam ah goutan na nei kei ding a, amaute lak ah zong tan na nei kei ding hi. Israelte laka na tan leh na goutan keimah ka hi. 21 Levite'n Kihoupihna Puanbuka a sep sung ua, a nasep manun, Israela sawma khat khempeuh Levite ka pia ahi. 22 Tua kipanin Israelte, Kihoupihna Puanbuk naihin a pai ding uh ahi kei. Tua ahih kei leh, a khelhna uh thaman a paw ding uh a, a si ding uhi. 23 Kihoupihna Puanbuka nasem ding leh tua tunga khelhna tawh kisaiin mawhpuakna la ding Levite ahi uh. Hiai khangsawn sawn dong adinga thuseh omden ding ahi. Israelte lak ah goutan a ngah kei ding uhi. 24 Tua hi louin, Levite' goutan dingin, Israelte'n Tangtawn Toupa kianga thillata a piak uh tua sawma khatte ka pe zaw hi. Hiai hang ahi amaute tungthu-a: Israelte lak ah goutan a nei kei ding uh, ka chih, a chi hi. 25 Tangtawn Toupa'n Mosi kiang ah: 26 Levite kiang ah thu gen inla: Gouluah dinga kon piak Israelte apan sawma khat na saan chiangun tua sawma khat laka sawma khat mah thillata Tangtawn Toupa na piak teitei ding uh ahi. 27 Na thillat uh, buhphual apan an hiam, ahih kei leh, grep sukna khuka theitui hiam bangin a kisim ding ahi. 28 Hibangin, Israelte apan sawma khat na saan khempeuh uapanin Tangtawn Toupa' maia thillat na pe ding uh ahi. Hiai sawma khatte apan Tangtawn Toupa' tantuan pen siampi Aron na pe ding uh ahi. 29 Noute kianga thilpiak peuhmah apan a hoihpen leh siangthoupen zel Tangtawn Toupa' tantuanin na pe teitei ding uh ahi, chi in, a chi hi. 30 Levite kiang ah: Tua banga a seh hoihpen na piak chiangun, noute adingin buhphual apan piang, ahih kei leh grep sukna khuk apan piang bangin a kisim ding hi. 31 Noute leh na sungte un a vai teng koi mun peuh ah na ne thei ding uh. Tua bel, Kihoupihna Puanbuka na nasep thaman uh ahi. 32 A seh hoihpen piakna tungtawnin, hiai thu-a a khiallou na hi ding uhi. Tuachi-in, Israelte' thillat siangthoute a siangthou lou na suaksak kei ding uh a, na si kei ding uh, chi in, a chi hi.
Kisiansuahna Tui
1 Tangtawn Toupa'n Mosi leh Aron a houpih a: 2 Hiai Tangtawn Toupa' thupiak tua dan in a ngiat ahi: Noute kianga bawngla san, melhem lou leh genbaanglou, hakkol zong paw ngeilou hon pe dingin Israelte hilh un. 3 Siampi Eleazar kiang ah tua bawngla san pia un. Giahphual pawlama koih a, amaute maia gawh ding ahi. 4 Tua khit chiangin, siampi Eleazar in a khuttal in a sisan bangzah hiam a la ding a, Kihoupihna Puanbuk mailam sagihvei a theh ding ahi. 5 Ama' et sungin tua bawngla a vun, a sa, a sisan leh a ek tawh a kihaltum ding ahi. 6 Siampi in sidar sing them bangzah hiam leh husawp leh samul khau san a la ding a, tua bawngla kihalna ah a pailut ding ahi. 7 Tua nungin siampi in a puansilhte a sawpsiang teitei ding a, amah zong tuiin a kisilsiang ding ahi. Tua khit chiangin, giahphual sung ah hong lut thei ding a, ahihhangin, nitaklam mateng a siangloua ngaih ahi ding hi. 8 Tua bawngla halpa in zong a puansilhte a sawpsiang ding a, tuiin a kisilsiang ding ahi. Amah zong nitaklam mateng a sianglou-a ngaih ahi ding hi. 9 A sianga ngaih mi khat in, tua bawngla vute a khawm ding a, giahphual pawlam ah a siangthoua ngaih mun khat ah a koih ding ahi. Israelte'n siansuahna tui laka zat dingin tua meivute a kem ding uh ahi. Khelhna apan siansuahna-a zat ding ahi. 10 Tua bawngla vute lakhawmpa in zong a puansilhte a sawpsiang ding a, amah zong nitaklam ahih mateng a sianglou-a ngaih ahi ding hi. Hiai Israelte leh a lak ua teeng gamdang mite adinga thuseh omden ahi ding ahi. 11 Siluang khat peuh lawngkha kuapeuh ni sagih sung a sianglou ahi ding. 12 A ni thum ni leh a ni sagih ni-in tuiin a kisiansuah ding ahi. Tua khit chiangin a siang ahi ding hi. 13 Siluang khat peuh lawngkha kua peuh a kisiansuah kei leh, Tangtawn Toupa' biakbuk a buahsak ahi. Tua bang mi pen Israelte lak apan satkhiak teitei ding ahi. Siansuahna tui ama' tunga kitheh lou ahih manin, amah a sianglou ahi. A sianlouhna ama' tunga omden ahi. 14 Puanbuk sunga mi a sih chiangin hiai dan a kizang hi: Tua puanbuk sunga valut leh a sunga omsa peuhmah ni sagih sung a sianglou a suak ding a, 15 van koihna sinbei kihongsa peuhmah zong a sianglou a suak ding hi. 16 Gamlaka om a, namsaua si khat peuh, sih ngeina-a si khat peuh lawngkha hiam, mihing guh hiam, hankhuk hiam lawngkha hiam peuhmah ni sagih sung a sianglou ahi ding hi. 17 Mi sianglou adingin, khelhna siansuahna thillat haltum apan a vu bang zah hiam beldai khat sung ah koih unla, a tung ah tui siang sung un. 18 Tua khit chiangin, a sianga ngaih mi khat in husawp hiangte a la ding a, tua tui ah a diah ding a, tua puanbuk leh a vanzatte leh a sunga mi omte a theh ding ahi. Mihing guh hiam, hankhuk hiam, sih ngeina-a si hiam lawngkha kuapeuh zong a theh ding ahi. 19 A siang mi in a sianglou mi, a ni thum ni leh a ni sagih ni-in a theh ding a, a ni sagih ni-in a siansuah ding ahi. Tua banga siansuaha ompa in a puansilhte a sawpsiang ding a, amah zong tuiin a kisilsiang ding a, tua nitak lamin a siang ding hi. 20 Ahihhangin, a sianglou mi a kisiansuah kei leh, ama'n Tangtawn Toupa' munsiangthou buahsak ahih manin, a mite lak apan satkhiak teitei ding ahi. Siansuahna tui ama' tung ah a kitheh kei a, amah a sianglou ahi. 21 Hiai amaute adinga omden ding thuseh ahi. Siansuahna tui thehpa in zong a puansilhte a sawpsiang ding ahi. Tua siansuahna tui lawngkha peuhmah, a nitaklam dongin a sianglou ahi ding. 22 A sianglou mi in a lawnkhak thil peuhmah a sianglou a suak a, tua lawng kha mi peuhmah a nitaklam dongin a sianglou a suak hi, a chi hi.
Miriam' Sihna
1 A Kha khatna ah, Israel nam mipite khempeuh Zin Gamdai-gamkeu hong tung uh a, Kadesh ah a giak uhi. Tua ah Miriam a si a, vui-in a om hi.
Israelte' Khelhna
2 Mipite adingin tui a om kei a, Mosi leh Aron langa pang dingin mipite a kikhawm uhi. 3 Amaute'n Mosi a kinakpih uh a: Tangtawn Toupa' maia ka sanggamte uh a sih laiun si tei mai le ung hoih ding! 4 Koute leh ka gantate uh hiaia si ding leia banghanga Tangtawn Toupa' mite hiai gamdai-gamkeua hon piilut na hia? 5 Hiai mun mulkimhuai dong banghanga Aigupta gam apan hon piikhetou na hia? Buh hiam, theipi hiam, grep hiam, mimthei hiam lah om lou a, dawn ding tui lah omlou hi! a chi uhi. 6 Mosi leh Aron, mipite apan paikhia-in Kihoupihna Puanbuk lutna ah a pai uh a, a khupbawh uh a, amaute kiang ah Tangtawn Toupa thupina hong kilang hi. 7 Tangtawn Toupa'n Mosi kiang ah: 8 Tua chiang la inla, nang leh na sanggampa Aron in kikhawmte kaikhawm unla, amaute mitmuhin tua suangpi houpih in. Ama'n a tui a pawtkhesak ding. Amaute leh a gantate un tui a dawn theih nadingun, tua suangpi apan tui na lakhe ding hi, a chi ahi.
Mosi' Khelhna
9 Tuachi-in, Tangtawn Toupa'n thu a piak bangin Mosi in Tangtawn Toupa' omna apanin chiang a la hi. 10 Amah leh Aron in tua suangpi mai ah kikhawmte a kaikhawm uh a, Mosi in amaute kiang ah: Nou helhatte'n ngai un. Hiai suangpi apan tui kon piak uh kul hia? a chi hi. 11 Tua khitin, Mosi in a khut a liktou a, a chiangin suangpi nihvei a sat hi. Tui a hong pawt a, mipite leh a gantate un a dawn uhi. 12 Ahihhangin, Tangtawn Toupa'n Mosi leh Aron kiang ah: Israelte' mitmuha a siangthoua kei non pahtawi ding zaha non muan louh manun hiai mite, gam ka piakna ah amaute na piilut kei ding uh, a chi hi. 13 Israelte'n Tangtawn Toupa a kinakpihna mun uleh amaute laka amah siangthoua a kilahna mun hiai Meriba tuite ahi.
Edomte'n Israelte Paisak lou
14 Mosi in Kadesh apanin Edom kumpipa kiang ah thupawte a sawl a: Hiai na sanggampa Israel in a gen ahi: Koute tunga haksatna hong tungte khempeuh thu na thei hi. 15 Ka pu ka pate uh Aigupta gam ah a paisuk uh a, tua ah kum tampi ka taam uhi. Aiguptate'n koute leh ka pu ka ate uh hon mawkbawl uhi. 16 Ahihhangin, Tangtawn Toupa' maia thuma ka kikou takun, ama'n ka kikouna uh a za a, vansawltak khat hon sawlin, Aigupta gam apan hon piikhia hi. Tuin, hiai Kadesh, na gamgi geichin ua, khawpi ah ka om uhi. 17 Hehpihtakin na gam ua paisuak ding hon phal in. Lou tawnin hiam, grephuan tawnin hiam ka pai kei ding uh a, tuileh khatpeuh apan zong tui ka dawn kei ding uh. Kumpi Lamlianpi tawnin ka pai ding uh a, na gam uh ka khen mateng uh taklam hiam, veilam hiam ah zong ka pial kei ding uh, a chisak hi. 18 Ahihhangin, Edom in a dawng a: Hiai ah na paisuak thei kei ding uh. Paisuak na sawm leh, kong kuan ding uh a, namsauin kon dou ding uh, a chi uhi. 19 Israelte'n a dawng uh a: Lam taangpi tawnin ka pai ding uh a, koute hiam, ka gantate uh hiam in na tui uh khat peuh ka dawn uleh, aman kon pe ding uh. Khea paisuak ut lei ka hi uh a, bangmah dang ka deih kei uhi, a chi uhi. 20 Amaute'n a dawng kik uh a: Na paisuak thei kei ding uh, a chi uhi. Tua khitin, Edomte' sepaihhon tampi leh hattak tawh hong kuankhia uhi. 21 Edom in a gam ua amau paisuaksak ding a nial manin, Israelte amaute apan a kiheikhia uhi.
Aron Sihna
22 Israel mipite a vekpi-un Kadesh apan a kipankhia uh a, Hor Mual hong tung uhi. 23 Hor Mual ah Edom gamgi kiang ah, Tangtawn Toupa'n Mosi leh Aron kiang ah: 24 Aron a mite kianga laak ahi ding. Meriba tuitea na nih ua ka thupiak na helsan manun, Israelte ka piak gam ah na lut kei ding uh. 25 Aron leh a tapa Eleazar tonpih inla, Hor Mual ah paitoupih in. 26 Aron' puansilhte suahkhiaksak inla, a tapa Eleazar silhsak in. Aron zaw a mite kianga pii hi ding ahi. Hiaia si ding ahita, a chi hi. 27 Mosi in Tangtawn Toupa' thupiak bangin a hih a: Mipite' muhin, Hor Mual ah a kaltou uhi. 28 Mosi in Aron' puansilhte a suahkhia a, a tapa Eleazar a silhsak hi. Tua Mual ah Aron a sita hi. Tua khitin, Mosi leh Eleazar tua Mual tung apan hong kumsuk uh a, 29 mipite'n Aron a sita chih a theih takun, Israel innkuan buppi in ni 30 sung amah a suun uhi.
Kanante tunga Vualzawhna
1 Arad kumpipa, tua Kanan mi, Negev-a teeng in, Atharim sun lampi ah Israelte hong pai uh, chih a zak takin, Israelte a dou a, a lak ua bangzah hiam a man hi. 2 Tua khitin, Israel in Tangtawn Toupa' mai ah hiai kichiamna a bawl hi: Hiai mite ka khutsung ua non piak leh, a khawpite uh ka hihgawp dimdem ding uhi, a chi uhi. 3 Tangtawn Toupa'n Israel' ngetna a ngaikhia a, Kanante amaute' khut sung ah a pia hi. Israelte'n amaute leh a khawpite uh a hihgawp dimdem uh a, tua mun min dingin Horma a kiphuak hi.
Israel' Phunna
4 Hor Mual apan a kipankhia uh a Edom paikual khum dingin Tuipi San zawtna lampi zuiin a zin uhi. Ahihhangin, mipite'n lampi ah thuakzawhna a tasam uh a, 5 Pathian tunga phun leh Mosi tunga phunin thu a gen uh a: Banghanga gamdai-gamkeua si dinga Aigupta gam apan hon piikhetou se na hia? An lah om lou! Tui lah om lou! Hiai an thulim lou lah ka kih uhi! a chi uhi.
Sumsan Gul
6 Tua khitin, Tangtawn Toupa'n a lak uah gul guneite a sawl a, mipite a tu uh a, Israelte tampitak a si uhi. 7 Mipite Mosi kiang ah hong pai uh a: Tangtawn Toupa' tunga phun a, nang tunga ka phun uh, ka khial uh ahi. Tangtawn Toupa'n ka lak uapan gulte a lakkhiak nadingin hon thumsak in, a chi uhi. Tuachi-in, mipite adingin Mosi a thum hi. 8 Tangtawn Toupa'n Mosi kiang ah: Gul bawl inla, chiang dawn ah suang in. Gultuk kuapeuh in a en thei ding a, a hing ding hi, a chi hi. 9 Tuachi-in, Mosi in sumsan gul a bawl a, chiang dawn ah a suang hi. Mi kuapeuh gul in a tuk chianga tua sumsan gul a et chiangin, a hing zel hi.
Moab-a Zinna
10 Israelte mailam nawtin a pai zel uh a, Oboth ah giahphual a sat uhi. 11 Oboth apan a kipankhia uh a, Ije Abarim ah giahphual a sat uhi. Ije Abarim bel, suahlam panga Moab gala gamdai-gamkeua om ahi. 12 Tua apan mailam nawtin a pai uh a, Zered Phaizang ah giahphual a sat uhi. 13 Tua apan a kipankhia uh a, Amon zawn ah giahphual a sat uhi. Amon bel, Amor gam sun gamdai-gamkeua om, Moab leh Amorte kala Moab gamgi ahi. 14 Tua hang ahi Tangtawn Toupa' Galdouna Laibu sung a: Sufa-a Vaheb leh kawlkal guamte, Amon leh 15 Ar dong tung a, Moab gamgi-a om, tua guamgal keente, a chih. 16 Amaute tua apan Beer ah a pai uh a, tua bel tuileh ahi a, Tangtawn Toupa'n Mosi kianga: Mipite kaikhawm in, amaute tui ka pe ding, a chihna mun ahi. 17 Tua khitin, Israelte'n hiai la a sa uhi: Tuileh aw, hong phulkhetou in! A thu lain sa un, 18 Makaite'n a leh uh tuileh, mipite laka miliante laih, mipite laka miliante'n kumpi chiangte leh khetbukte tawi kawma a tawh uh, chi-in. Tua khitin, tua gamdai-gamkeu apan Matana ah, 19 Matana apan Nahaliel ah, Nahaliel apan Bamoth ah, 20 Bamoth apan Moab gama phaizang dong a pai uhi. Tua ah, Pisga Mualdawn in gamsia a depsuk hi.
Sihon leh Og Zawhna
21 Israelte'n Amorte' kumpipa Sihon kianga hiai thu gen dingin thupawte a sawl uh a: 22 Na gam uh kantanin koute hon paisuaksak in. Lou hiam, grephuan hiam ah pial lou ding hi ung. Tuileh koimaha tui dawn lou ding hi ung. Na gam sung uh ka khen mateng uh, Kumpi' Lamlianpi zui ding hi ung, a chisak uhi. 23 Ahihhangin, Sihon in Israelte a gam sung ah a paisuaksak nuam kei hi. A sepaihhonte khempeuh a khawm a, Israel dou dingin gamdai-gamkeu ah a kuankhia hi. Jahaz a tun takin, Israel a dou hi. 24 Ahihhangin, Israel in amah namsauin a sat a, a gam Amon apan Jabok dong a la hi. Ahihhangin, Amonte' gamgi kulhnei a hih manin, Amonte' gam chiang lei a la hi. 25 Israel in Amor gam khawpite khempeuh a la a, Heshbon leh a kima khuate khempeuh a luah hi. 26 Heshbon bel, Amor kumpipa Sihon' khawpi ahi. Ama'n Moab kumpipa masa a na dou a, a gam khempeuh, Amon dong a na laak ahi. 27 Tua hang ahi laphuakpa in: Heshbon ah hong pai in, kilamthak hen. Sihon' khawpi kilamthak hen. 28 Heshbon apan mei pawtkhia a, Sihon' khawpi apan meikuang pawtkhia a, Moaba Ar kangtum a, Amon vumtea teengte kangtum hi. 29 Moab aw, na tung gik hi! Khemosh mite aw, hihmanthat na hi uhi! Ama'n Amorte kumpipa Sihon kianga a tapate galtaite banga, a tanute saltangte banga pia hi. 30 Ahihhanga koute'n amaute lumlet ung a, Dibon donga Heshbon hihsiat hita. Nofa donga amaute phelzak ung a, tua lah Medeba donga kizalh ahi, a chih. 31 Tuachi-in, Amorte' Israel a teeng hi. 32 Mosi in gam enkhete Jazera a sawl nungin, Israelte'n a kim a kiang khuate a la uh a, tua-a om Amorte a hawlkhia uhi. 33 Tua khitin a kihei uh a, Bashan lam zuan lampi a zuitou uhi. Bashan kumpipa Og leh a sepaihhon khempeuh amaute Edreia kidoupih dingin a kuankhia uhi. 34 Tangtawn Toupa'n Mosi kiang ah: Amah lau ken, amah, a sepaihhon tawh, a gam tawh, na khuta hon pekhin ka hi. Heshbona vaihawmpa Amorte' kumpipa Sihon na bawl bangin amah bawl in, a chi hi. 35 Tuachi-in, amah, a tapate tawh, a sepaihhon tawh, a satlum uh a, a suakta khat beek a hawi kei uhi. A gam a tang uh a, a luahta uhi.
Balak leh Balaam
1 Tua khitin, Israelte Moab phaizang zuanin a zin uh a, Jerikho gal ah, Jordan lui dung ah giahphual a sat uhi. 2 Zipor' tapa Balak in Amorte tunga Israel thilhih khempeuh a mu a, 3 Isaelte a tam mahmah manun, Moab a lauta hi. Israelte hangin, Moab lau chihtakin a lau hi, 4 Moabte'n Midian upate kiang ah: Bawngtal in gampalak loupa a nek gaih banga hiai mihonpite'n i kim i pama thil khempeuh ne gai ding uh ahi, a chi uhi. Tuachi-in, Zipor' tapa Balak bel tua hun laiin Moab kumpipa ahi. 5 Ama'n Beor' tapa Balaam sam dingin mite a sawl hi. Balaam bel, ama' gam ah, tua Luipi kianga Pethor ah a om hi. Balak in: Aigupta gam apan mi nam khat hong paikhia uh a, leitung maikaih a tuam dim uh a, kei zomin hong teeng uhi. 6 Amaute kei adinga hat lua uh ahih manin, hong pai inla, amaute hamsiat in. Tua hi leh, amaute ka zou mai thei a, gam apan ka hawlkhe thei mai thei hi. Na vualzawlte vualzawlna tangin om uh a, na hamsiatte hamse thuakin a om uh, chih ka thei hi, a chisak hi. 7 Moab leh Midian upate a kuankhia uh a, aisan man ding a keng uhi. Balaam kiang hong tun takun, Balak thugen amah a hilh uhi. 8 Balaam in amaute kiang ah: Hiai ah zan giak unla, Tangtawn Toupa' dawnna hon piak kon hilh kik ding, a chi hi. Tuachi-in, Moab makaite amah kiang ah a taam uhi. 9 Balaam kiang ah Pathian hong pai a: Na kianga om hiaite kuate ahi ua? a chi hi. 10 Balaam in Pathian kiang ah: Zipor' tapa Balak, Moab kumpipa'n hiai thu hon khak a: 11 Aigupta gam apan nam khat hong paikhia uh a, leitung maikaih a dim uh. Hong pai inla, kei adingin amaute tung ah hamsia lou in. Tua hi leh, amaute ka dou thei mai ding a, ka hawlmang thei kha ding, chi ahi, a chi hi. 12 Ahihhangin, Pathian in Balaam kiang ah: Amaute zui ken. Tua mite vualzawlsa ahih manun, amaute tung ah hamsia na lou ding ahi kei, a chi hi. 13 A zingchiangin, Balaam a kisa a, Balak' makaite kiang ah: Na gam uah kik nawnta un, Tangtawn Toupa'n noute kon zuih ding nial ahi, a chi hi. 14 Tuachi-in, Moab makaite Balak kiang ah a kilehkik uh a: Balaam in koute hon zuih ding a nial hi, a chi uhi. 15 Tua khitin, Balak in a maute sanga tamzaw leh zahtakhuai zaw makaite a sawl kik a, 16 Balaam kiang ah hong pai uh a: Zipor' tapa Balak in hiai a gen: Ka kianga nong pai ding bangmah kidalsak ken. 17 A kilawm thaman pahtakman hon pe ding ing a, na chih chih hih nading ka hi. Hong pai inla, kei adingin hiai mite tung ah hamsia lou in, chi ahi, a chi uhi. 18 Ahihhangin, Balaam in amaute a dawng a: Balak in a inpi, ngun leh khama dimin hon pe mahleh, Tangtawn Toupa ka Pathian' thupiak baan bangmah a neu a lian ka hih thei kei. 19 Midangte bangin tuzan hiai ah taam unla, Tangtawn Toupa'n hon hilh nop dang om hiam ka zongkhe ding, a chi hi. 20 Tua zanin, Balaam kiang ah Pathian hong hawh a: Hiai mite nang sam dinga hong hawh a hih manun, amaute zui in. Ahihhangin, nang kon hilh kia hih in, a chi hi.
Balaam' Sakolneu Pau
21 Balaam, zingsangin a thou a, a sakolneu tung ah tuanphah a phah a, Moab makaite a zui hi. 22 Ahihhangin, amah a kuankhiak takin, Pathian a heh a, amah dai dingin, Tangtawn Toupa' vansawltak lampi ah a ding hi. Balaam bel a sakolneu tunga tuang ahi a, a silate nih in amah a zui uhi, 23 Tua sakolneu in Tangtawn Toupa' vansawltak, a khuta namsau phawisa tawi kawmpi-a ding a muh takin, lampi apan a pialkhia a, gamlak ah a paita hi. Balaam in a sakolneu lampi-a paikik dingin a sat hi. 24 Tua khit in, tua Tangtawn Toupa' vansawltak bel, grephuan nih baanga kium kikal lam kawchik ah a ding hi. 25 Tua sakolneu in Tangtawn Toupa' vansawltak a muh takin, baang nehin a pai a, Balaam' khe baang tawh a nehden hi. Tuachi-in, Balaam in a sakolneu a sat kik hi. 26 Tua khitin, Tangtawn Toupa' vansawltak mailam ah a pai a, veilam hiam, taklam hiama kihei nading omlouhna mun kawchik ah a ding hi. 27 Tua sakolneu in Tangtawn Toupa' vansawltak a muh takin, Balaam nuai ah a lumsuk a, Balaam a heh a, a chiangin a sakolneu a sat hi. 28 Tua khitin, Tangtawn Toupa'n sakolneu kam a honsak a, sakolneu in Balaam kiang ah: Kei thumvei tak non sat nadingin na tung ah bang ka hih-a ahia? a chi hi. 29 Balaam in sakolneu a dawng a: Mihai non suaksak mawk ve le! Ka khuta namsau tawi hileng, tumah mah-in kon that ding, a chi hi. 30 Tua sakolneu in Balaam kiang ah: Na sakolneu ka hi keia hia, tuni donga na tuanna gige ka hi keia hia? Hibanga na tunga hih ding ka hih dan ngeina ahi-a hia? a chi hi. Ama'n: Hilou, a chi hi. 31 Tua khitin, Tangtawn Toupa'n Balaam mit a vaksak a, Tangtawn Toupa' vansawltak, a khuta namsau phawisa tawia lampi-a ding a mu hi. Tuachi-in, nakpitakin a kunsuk a, maitangin lei a si hi. 32 Tangtawn Toupa' vansawltak in amah a dong a: Banghanga na sakolneu thumvei sat na hia? Na gamtat dan kei adinga ngongtatna ahih mana nang hon dai dinga hiaia hong pai ka hi. 33 Sakolneu in kei hon mu a, thumvei kei apan kiheikhia ahi ve. Tua banga kiheikhe lou hi leh, tu'n nang hon that khinta ding ing a, amah bel hawi ding ka hi, a chi hi. 34 Balaam in Tangtawn Toupa' vansawltak kiang ah: Ka na khialta. Kei hon dai dinga lampi-a nang ding na hih lam ka phawk keia ahi. Tu'n nang lungkimlou na hih leh ka kik ding, a chi hi. 35 Tangtawn Toupa' vansawltak in Balaam kiang ah: Hiai mite tawh ton in. Ahihhangin, kon hilh kia gen in, a chi hi. Tuachi-in, Balaam bel, Balak' makaite tawh a ton hi. 36 Balaam a hong pai, chih Balak in a zak takin, ama' gamgi mong Amon gamgi-a om Moab khawpi ah amah tuak dingin a kuan hi. 37 Balak in Balaam kiang ah: Kintaka hon sam hilou ka hi maw? Banghanga ka kianga hong pai lou? Kei, nang pahtakman hon pe taktak theilou mi ka hi ahia? a chi hi. 38 Balaam in a dawng a: Tu-a hong pai ka hi ve. Ahihhangin, thil khat peuhpeuh gen thei ka hi-a hia? Pathian in ka kama a koih kia gen ding ka hi, a chi hi. 39 Tua khitin, Balaam in Kiriath Huzoth ah Balak a zui hi. 40 Balak in bawngte leh belamte a laan a, Balaam leh a kianga om makaite zong bangzah hiam a pia hi. 41 A zingchiangin, Balak in Bamoth Baal ah Balaam a tonpih a, tua apanin tua a mi gente' tamdan bangzah hiam a mu hi.
Balaam' Thugen Khatna
1 Balaam in: Hiai ah maitam sagih hon dawhsak inla, kei adingin bawngtal sagih leh belamtal sagih hon suktuahsak in, a chi hi. 2 Balak in Balaam gen bangin a hih a, amaute gel in maitamte tung ah bawngtal khat leh belamtal khat tek a laan uhi. 3 Tua khitin, Balaam in Balak kiang ah: Hiah na thillat kiang ah na om inla, kei ka vapaikhe tuam ding, Tangtawn Toupa kei tuak dingin hong pai mai thei ahi. Kei kianga hon latsak peuhmah nang kon hilh ding, a chi a, tua khitin, amah mual giau khat ah a hawh tuamta hi. 4 Pathian in amah a tuak a, Balaam in amah kiang ah: Maitam sagih ka dawh a, tuate tung ah bawngtal khat leh belamtal khat tek ka laanta, a chi hi. 5 Tangtawn Toupa'n Balaam' kam ah thupuak khat a koih a: Balak kiang ah paikik inla, hiai thupuak amah pia in, a chi hi. 6 Tuachi-in, amah Balak kiang ah a paikik a, amah a thillat kianga, Moab makaite tawh ding a mu hi. 7 Tua khitin, Balaam in a thupuak a genkhia a: Moab kumpipa Balak in, Aram apan kei hon tonpih a, suahlam mualte apan ahi, Hong pai inla, kei adingin Jakob hamsiat in, Israel gensia in! a chi. 8 Pathian in a hamsiat louh ke'n bangchi-a hamsiat thei ding ka hia? Tangtawn Toupa'n a gensiat louh ke'n bangchi-a gense thei ding ka hia? 9 Mualdawn suangpite apan amaute mu ing a, mualsangte apan amah en ing a, tua ah nam khat tuamteen a, namte laka kisimkhawm lou hi. 10 Jakob leivuite kua'n simseng ding, ahihkei leh, Israel sehli suah seh khat kua'n sim thei ding? Midiktat sihna bangin hon sisak inla, ka tawpna midiktat tawpna bangsak in! a chi hi. 11 Tua khitin, Balak in: Kei adinga bang hon hihsak na hita maia? Ka melmate hamsiat dingin kon tonpih a, ahihhangin vualzawlna loungal bangmah na hih kei a! a chi hi. 12 Balaam in a dawng a: Tangtawn Toupa'n ka kama a koih gen teitei lou ding ka hi maw? a chi hi.
Balaam' Thugen Nihna
13 Tua khitin, Balak in amah kiang ah: Amaute na muh theih nading mun dang ah hon zui in. Amaute pawlkhat na mu ding a, a vekun bel na mu kei ding. Tua apanin, kei adingin, amaute hamsiat in, a chi hi. 14 Tuachi-in ama'n Pisga mual tunga Zofim' lou ah amah a tonpih hi. Tua ah, maitam sagih a dawh a, maitamte tung ah bawngtal khat leh belamtal khat tek a laan hi. 15 Balaam in Balak kiang ah: Hiah na thillat kiang ah na om in, ke'n hua lai ah Tangtawn Toupa ka vatuak ding, a chi hi. 16 Tangtawn Toupa'n Balaam a na tuak a, a kam ah thupuak khat a koih a: Balak kiang ah kik inla, hiai thupuak pia in, a chi hi. 17 Tuachi-in, Balaam, Balak kiang ah a pai a, a thillat kianga Moab makaite tawh dingin a om hi. Balak in amah kiang ah: Tangtawn Toupa'n bang a gen a? chi-in a dong hi. 18 Ama'n a thupuak a genkhia a: Balak, thou inla, ngaikhia in, Zipor' tapa aw, ka thugen za in. 19 Pathian zaw zuau gen ding mi hilou hi. A lungsim khel ding mi zong hilou hi. Thu gen napi-a semkhe lou ding hia? Thu chiam napi-a tangtun lou ding hia? 20 Vualzawl dinga thupiak ngah hi ve'ng. Ama'n vualzawlta a, ke'n kheng thei lou. 21 Jakob ah mawhna kimu lou, Israel ah muanhuailouhna kimu lou, Tangtawn Toupa, a Pathian un amaute ompih a, Kumpipa' kikouna amaute' laka om hi. 22 Pathian in amaute Aigupta gam apan lakhia a, amaute'n gam bawngtal tha pu uhi. 23 Jakob doua bumna om lou, Israel doua aisan om lou. Tu'n Jakob leh Israel tawh kisaia: Pathian in a hih en dih ua! kichi ding hi. 24 Tua mipite humpinelkai nou banga thou uh a, humpinelkai a samat a gaih mateng leh a matsate' sisan a dawn khit mateng khawl lou banga amau kitokthou uhi, a chi hi. 25 Tua khitin, Balak in Balaam kiang ah: Amaute hamsiat lah hamsiat kenla, vualzawl lah vualzawl dah mai awh! a chi hi. 26 Balaam in a dawng a: Tangtawn Toupa' gen peuhmah ka hih ding, chi-in kon hilh keia hia? a chi hi.
Balaam' Thugen Thumna
27 Tua khitin, Balak in Balaam kiang ah: Hong pai in, mun dang ah hon paipih ning. Tua apan kei adinga amaute na hamsiat ding Pathian lungkimna ahi mawh ding hia, a chi hi. 28 Tuachi-in, Balak in Peor mual tung ah gamsia etsukna mun ah Balaam a tonpih hi. 29 Balaam in: Hiai ah maitam sagih hon dawhsak inla, kei adingin bawngtal sagih leh belamtal sagih hon suktuahsak in, a chi hi. 30 Balak in Balaam gen bangin a hih a, maitamte tung ah bawngtal khat leh belamtal khat tek a laan hi.
1 Israel vualzawl ding Tangtawn Toupa' lungkimna ahi, chih Balaam in a muh takin, hun dang bangin, bumna zat a sawm kei a, gamdai-gamkeu lam a nga zawta hi. 2 Balaam a dakkhia a, Israelte a nam a nama giahphual sat a muh takin, ama' tung ah Pathian Kha hong tung a, 3 a thupuak a genkhia a: Beor' tapa Balaam' thugen, a mita teltaka mupa' thugen, 4 Pathian' thute zapa, Vanglianpen mupa, khupbawhpa leh a mitvakpa' thugen: 5 Jakob aw, na puanbukte, Israel aw, na tenna munte, kilawm na mah e! 6 Phaizang bangin kiphalh uh a, lui geia huante bang hi uhi. Tangtawn Toupa' suansa tawsaw singte bang, tuite geia sidar singte bang hi uhi. 7 Amaute' baltin apan tuite luangkhe ding a, a khaichite un tui tampi mu ding uhi. A kumpipa uh Agag sanga lianzaw ding a, a kumpipa uh tawisanga om ding hi. 8 Pathian in Aigupta gam apan amaute piikhia a, amaute'n gam bawngtalte hatna nei uhi. Helhat namte nawmvalh uh a, a guhte uh hihzan uhi. A thalte-un amaute kap pailet uhi. 9 Humpinelkai banga bok uh a, lumsuk uhi. Humpinelkainu bang amaute kuan tokthou ngam ding eita? Nou hon vualzawlte vualzawlin om uh henla, nou hon hamsiatte hamsiatin om uhen! a chi hi. 10 Tua khitin, Balaam tunga Balak hehna a kuang a, a khutte a nuai tuah a, amah kiang ah: Ka melmate hamsiat dingin kon sam a, thumvei tak amaute na vualzawl zawsopta. 11 Tu'n kintakin paikhia inla, inn ah pai in! Thupitakin pahtakman kon pe ding, ka chi a, ahihhangin, Tangtawn Toupa'n pahtakman piaka na om ding hon dai ahi, a chi hi. 12 Balaam in Balak a dawng a: Thupua non sawlte ka hilh keia hia: 13 Balak in a inpi ngun leh khama dimin hon pe mah leh, Tangtawn Toupa' thupiak ban paiin, bangmah a sia zong, a pha zong ka hih thei kei. Tangtawn Toupa' gen kia ka gen teitei ding, ka chi keia hia? 14 Tu'n ka mite lak ah ka kilehta ding. Ahihhangin, hong pai dih, hun hong tung dingtea hiai nam in na mite tunga a hih ding uh hon hilhkhol ning, a chi hi.
Balaam' Thugen Una
15 Ama'n a thugen a genkhia a: Beor' tapa Balaam' thugen, a mittea teltaka mupa' thugen, 16 Pathian' thute zapa' thugen, Tungnungpen apan theihna neipa, Vanglianpen apan mengmuh mupa, khupbawhpa, a mit vaksaka ompa' thugen: 17 Ke'n amah mu hi'ng, tuin bel hi kei. Ke'n amah mu hi'ng, a naiin bel hi kei. Jakob apan aksi khat hong suak ding a, Israel apan kumpi chiang khat hong dingkhe ding hi. Ama'n Moab taltangte leh Seth' tapate' luguhte gawpsak ding hi. 18 Edom zawhin om ding a, a meima Seir zawhin om ding hi. 19 Jakob apan ukpa khat hong pawt ding a, ama'n khawpi-a suaktasunte hihmangthang ding hi, a chi hi.
Balaam' Thugen Nunung
20 Tua khitin, Balaam in Amalek a mu a, a thugen a genkhia a: Amalek zaw namte laka masapen hi ahi. Ahihhanga hong se khongkhong ding hi, a chi hi. 21 Tua khitin, Kente a mu a, a thugen a genkhia a: Na tenna mun bit a, na bu suangpi henga seh hi a, 22 ahihhanga, Ashur in sala hon mat chianga, Kente hihmanthata om ding hi uteh, a chi hi. 23 Tua khitin, ama'n a puakgik thu a genkhia a: Maizen aw! Pathian in hiai a hih chianga, kua nungta zou ding? 24 Kitim tuipi gei apan longte hong pai ding a, Ashur leh Eber zou ding hi. Ahihhanga amaute zong hong segawp ding uhi, chi hi. 25 Tua khitin, Balaam a dingkhia a, inn ah a kik a, Balak zong a paita hi.
Moab in Israel Puksak
1 Israel, Shitim-a a taam sungin, pasalte'n Moab numeite tawh lupkhawm a thangsak uhi. 2 Moab numeite'n a pathiante uh maia kithoihna ah amaute a chial pahpah uhi. Tua mite'n bel tua pathiante mai ah an a ne uh a, a mai uah a kun uhi. 3 Tuachi-in, Israelte Peor' Baal biakna ah a kihelta uhi. Tua hangin amaute tung ah Tangtawn Toupa' hehna a kuangta hi. 4 Tangtawn Toupa'n Mosi kiang ah: Tangtawn Toupa' hehna Israelte apan heimanga a om theih nadingin, hiai mite' makaite kaikhawm inla, Tangtawn Toupa' mai ah sun tanglai khawvak ah amaute that inla, Tangtawn Toupa' mai ah phoulak in, a chi hi. 5 Tuachi-in, Mosi in Israel vaihawmte kiang ah: Noute'n Peor' Baal biakna-a kihel na mite uh na thah chiat ding uh ahi, a chi hi.
Fineha in Hipi Lentang
6 Tua khitin, Israelte Kihoupihna Puanbuk lutna-a kapa a om laitakun, Israel pasal khat in, Mosi leh Israel kikhawmte mitmuhin Midian numei khat a inn ah hon piilut hi. 7 Siampi Aron' tapa Eleazar hi a, Eleazar' tapa Fineha hiven, hiai Fineha in hiai thil a muh takin, kikhawmte a nusia a, a khutin teipi khat a tawi a, 8 tua Israel mipa a puanbuk sung ah a zuilut hi. Ama'n amaute gel, Israel pasal leh tua numei pumpi a dawt pailet tuak hi. Tua khitin, Israelte tunga' hipi a tawp hi. 9 Ahihhangin, hipi-a si mi 24,000 a pha hi. 10 Tangtawn Toupa'n Mosi kiang ah: 11 Eleazar' tapa Fineha in Israelte apan ka hehna a heimangta. Eleazar zong siampi Aron' tapa ahi. Fineha zong ka zahtakhuaina guma ka thikthusiatna bangin a thikthusia a, tuachi-in, ka thikthusiatna in amaute a kangmangta kei hi. 12 Tua ahih manin, amah tawh kal ah ka lemna thukhun ka bawl chih amah hilh in. 13 Amah a Pathian zahtakhuaina guma thikthusia hi a, Israelte adinga khelhna khuhna a bawlsak manin, amah leh a suante'n siampi hihdenna thukhun a nei ding uhi, a chi hi. 14 Tua Midian numei tawh thahkhawm, Israel mipa' min Zimri ahi a, Salu' tapa ahi. Salu bel Simeon' inkawte' makai ahi. 15 Tua thah-a om Midian numei' min Kozbi ahi a, Zur' tanu ahi. Zur bel, Midian innkuan khata nam makai ahi. 16 Tangtawn Toupa'n Mosi kiang ah: 17 Midiante zaw meima bangin sai inla, amaute that in. 18 Amaute'n Peor thu leh a sanggamnu uh, Midian makai' tanu Kozbi tawh kisaia noute hon khem laiun meima banga hon sai ahi uhi. Peor ziaka tua hipi hong tun takin Kozbi thahin a om ahi, a chi hi.
Kisimna Nihveina
1 Tua hipi nungin, Tangtawn Toupa'n Mosi leh siampi Aron' tapa Eleazar kiang ah: 2 Israel nam khempeuh a innkuan kuanin, kum 20 apan a tunglama upa, Israel sepaiha pang thei khempeuh sim un, a chi hi. 3 Tuachi-in, Jerikho gal Jordan lui kiang, Moab phaizang ah, Mosi leh siampi Eleazar in amaute a houpih uh a: 4 Tangtawn Toupa'n Mosi thu a piak bangin, pasal kum 20 leh a tunglama upate sim un, a chi uhi. Hiaite Aigupta gam apan hong paikhia Israelte ahi uhi: 5 Israel' tapa masapen Reuben' suante hiaite ahi: Hanokh tungtawnin Hanokh beh; Palu tungtawnin Palu beh; 6 Hezron tungtawnin Hezron beh; Karmi tungtawnin Karmi beh; 7 Hiaite Reuben' suan behte ahi uh a, 43,730 a pha uhi. 8 Palu tapa Eliab ahi a, 9 Eliab' tapate Nemuel, Dathan leh Abiram ahi. Hiai Dathan leh Abiram mah ahi a mite uh laka miliante tua Kora nungzuite Tangtawn Toupa tunga a hel lai ua Mosi leh Aron tunga helna laka pang. 10 Lei a kamka a, amaute, Kora tawh a valhkhawm hi. Kora nungzuite bel mei in mi 250 a kattum laiin a si uhi. Amaute bel vauhilh nadinga chiamtehnain a pang uhi. 11 Kora khang gui bel a subei kei hi. 12 Simeon' suante, a beh behin hiaite ahi: Nemuel tungtawnin Nemuel beh; Jamin tungtawnin Jamin beh; Jakin tungtawnin Jakin beh; 13 Zera tungtawnin Zera beh; Shaul tungtawnin Shaul beh. 14 Hiaite Simeon behte ahi uh a, 22,200 a pha uhi. 15 Gad' suante, a beh behin hiaite ahi: Zefon tungtawnin Zefon beh; Hagi tungtawnin Hagi beh; Shuni tungtawnin Shuni beh; 16 Ozni tungtawnin Ozni beh; Eri tungtawnin Eri beh; 17 Arodi tungtawnin Arodi beh; Areli tungtawnin Areli beh. 18 Hiaite Gad behte ahi uh a, 40,500 a pha uhi. 19 Er leh Onan bel Judah' tapate ahi uh a, ahihhangin, Kanan gam ah a si uhi. 20 Judah suante a beh behin hiaite ahi: Shela tungtawnin Shela beh; Perez tungtawnin Perez beh; Zera tungtawnin Zera beh. 21 Perez suante hiaite ahi: Hezron tungtawnin Hezron beh; Hamul tungtawnin Hamul beh. 22 Hiaite Judah behte ahi uh a, 76,500 a pha uhi. 23 Isakhar' suante, a beh behin hiaite ahi: Tola tungtawnin Tola beh; Pua tungtawnin Pua beh; 24 Jashub tungtawnin Jashub beh; Shimron tungtawnin Shimron beh. 25 Hiaite Isakhar behte ahi uh a, 64,300 a pha uhi. 26 Zebulun suante, a beh beh-in hiaite ahi: Sered tungtawnin Sered beh; Elon tungtawnin Elon beh; Jaleel tungtawnin Jaleel beh. 27 Hiaite Zebulun behte ahi uh a, 60,500 a pha uhi. 28 Josef suante, Manase leh Efraim tungtawnin a beh beh-in hiaite ahi: 29 Manase' suante a beh behin hiaite ahi: Makir tungtawnin Makir beh. Makir bel Gilead' pa ahi. Gilead tungtawnin Gilead beh. 30 Gilead' suante a beh behin hiaite ahi: Iezer tungtawnin Iezer beh; Helek tungtawnin Helek beh; 31 Asriel tungtawnin Asriel beh; Shekhem tungtawnin Shekhem beh; 32 Shemida tungtawnin Shemida beh; Hefer tungtawnin Hefer beh; 33 Hefer' tapa Zelofehad in tapa a nei kei a, tanute kia a nei hi. A minte uh Mala, Noa, Hagla, Milka leh Tirza ahi. 34 Hiaite Manase behte ahi uh a, 52,700 a pha uhi. 35 Efraim' suante, a beh behin hiaite ahi: Shuthela tungtawnin Shuthela beh; Beker tungtawnin Beker beh; Tahan tungtawnin Tahan beh. 36 Hiaite Shuthela suante-a beh ahi: Eran tungtawnin Eran beh. 37 Hiaite Efraim behte ahi uh a, 32,500 a pha uhi. Hiaite Josef suana beh ahi uhi: 38 Benjamin suante, a beh beh-in hiaite ahi: Bela tungtawnin Bela beh; Ashbel tungtawnin Ashbel beh; Ahiram tungtawnin Ahiram beh; 39 Shufam tungtawnin Shufam beh; Hufam tungtawnin Hufam beh. 40 Ard leh Naaman tungtawna Bela suante hiaite ahi: Ard tungtawnin Ard beh; Naaman tungtawnin Naaman beh. 41 Benjamin behte hiaite ahi uh a, 45,600 a pha uhi. 42 Dan suante, a beh beh-in hiaite ahi: Shuham tungtawnin Shuham beh. Dan behte hiaite ahi. 43 Avekpi un Shuham behte ahi vek uh a, 64,400 a pha uhi. 44 Asher suante, a beh behin hiaite ahi: Imra tungtawnin Imra beh; Ishvi tungtawnin Ishvi beh; Beria tungtawnin Beria beh; 45 Beria suante tungtawna behte hiaite ahi uh: Heber tungtawnin Heber beh; Malkiel tungtawnin Malkiel beh. 46 Asher in tanu khat a nei a, a min Sera ahi. 47 Asher behte hiaite ahi uh a, 53,400 a pha uhi. 48 Naftali suante, a beh behin hiaite ahi: Jazeel tungtawnin Jazeel beh; Guni tungtawnin Guni beh; 49 Jezer tungtawnin Jezer beh; Shilem tungtawnin Shilem beh. 50 Hiaite Naftali behte ahi uh a, 45,400 a pha uhi. 51 Israelte pasal a vekpi-un 601,730 a pha uhi. 52 Tangtawn Toupa'n Mosi kiang ah: 53 Amaute kiang ah goutan dingin gam hawm ding ahi a, a min zahzah uh bang zela hawm ding ahi. 54 Pawl tamzawte kiang ah goutan gam za zaw, pawl tawmzawte kiang ah goutan gam neu zaw piak ding ahi. Min kikhum zah bang zelin, gou tan a tan ding uh ahi. 55 Gam bel aisana hawm ding kiteltakin hih in. Pawl chih in a pu a pa khanga nam min bang zela goutan luah ahi ding ahi. 56 Goutan peuhmah pawl tamzaw leh pawl tawmzawte lak ah aisana hawm ding ahi, a chi hi. 57 Levite, a beh beha kisim hiaite ahi: Gershon tungtawnin Gershon beh; Kohath tungtawnin Kohath beh; Merari tungtawnin Merari beh. 58 Hiaite zong Levi behte ahi: Libna beh; Hebron beh; Mali beh; Musha beh; Kora beh. Kohath bel Amram' pu ahi. 59 Amram' zi' minjokhebed ahi a, Levi suan leh khak khat ahi a, Aigupta gama Levite apana piang ahi. Amram adingin Aron, Mosi leh a sanggamnu uh Miriam a neihsak hi. 60 Aron bel Nadab leh Abihu, Eleazar leh Ithamar pa ahi. 61 Ahihhangin, Nadab leh Abihu in Tangtawn Toupa' maia phallouh mei tawh a, thil a lat laiun a si uhi. 62 Levite pasal kha khat hiam, a tamzaw hiama upa khempeuh 23,000 a pha hi. Israelte laka goutan gam tang lou uh ahih manun, Israel dangte tawh simkhawm ahi kei uhi. 63 Jerikho gal, Jordan lui kiang, Moab phaizanga Mosi leh siampi Eleazar in Israelte a sim lai ua kisimte hiaite ahi uhi. 64 Mosi leh siampi Aron in Sinai Gamdai-gamkeua Israelte a sim laiun, a kisimte lak ah amaute khat beek a om kei uhi. 65 Banghang hiam chih leh, Tangtawn Toupa'n tua Israelte kiang ah, gamdai-gamkeu ah a si ngeingei ding uh, chi-in a na hilhkhin a, Jefune' tapa Kaleb leh Nun' tapa Joshua loungal amaute a khawsuak khat beek a om kei uhi.
Zelofehad' Tanute
1 Zelofehad' tanute bel Josef tapa Manase behte ahi uhi. Zelofehad bel Hefer' tapa ahi. Hefer bel Gilead' tapa ahi a, Gilead bel Manase' tapa ahi. Tua tanute' minte Mala, Noa, Hogla, Milka leh Tirza ahi. Amaute'n 2 Kihoupihna Puanbuk lutna a naih uh a, Mosi, Siampi Eleazar, makaite leh kikhawmte mai ah a ding uh a: 3 Ka pa uh gamdai-gamkeu ah a si hi. Amah zaw Tangtawn Toupa tunga hel dinga mite kaikhawmpa Kora nungzuite lak ah a pang kei a, ahihhangin, ama' khelhna hangin a si a, tapate a nuse kei hi. 4 Ama'n tapa a neih louh mana, banghanga a beh lak apan a min mang ding ahia oi? Ka pa uh' tanaute lak ah goutan koute hon pia un, a chi uhi. 5 Tuachi-in, Mosi in a thu uh Tangtawn Toupa' mai a tun a, 6 Tangtawn Toupa'n amah kiang ah: 7 Zelofehad' tanute' thugen a dik ahi. A pa uh' sanggamte laka goutan na piak teitei ding ahi a, a pa uh' gou mahmah amaute na piakkhiak ding ahi. 8 Israelte kiang ah: Pasal khat peuh tapa neiloua a sih leh, a goutan a tanute kiang ah pekhia un. 9 Ama'n tanu zong a neih kei leh a goutan a sanggam pasalte kiang ah pia un. 10 Ama'n sanggam pasalte a neih kei leh, a pa' sanggam pasalte kiang ah pia un. 11 A pa'n sanggam pasalte a neih kei leh, a beh laka tanau naipen kiang ah a goutan pia un, ama'n a tang thei ding hi. Tangtawn Toupa'n Mosi thu a piak bangin, Israelte adingin hiai danthuseh ahi ding ahi, chi in, a chi hi.
Mosi Thakheng ding Joshua
12 Tua khitin, Tangtawn Toupa'n Mosi kiang ah: Abarim taanga hiai mual ah paitou inla, Israelte kianga gam ka piak en in. 13 Na muh khit chiangin na sanggampa Aron bangin nang zong na mite kianga pikhawm na hita ding hi. 14 Ahang bel, Zin Gamdai-gamkeua tuite omna-a mipite a hel laiun, amaute' mitmuhin ka min siangthoua pahtawi ding ka thupiak na nihun na mang kei ua ahi, a chi hi. Hiaite bel, Zin Gamdai-gamkeua Meriba Kadesh tuite ahi. 15 Mosi in Tangtawn Toupa kiang ah: 16 Tangtawn Toupa, mihing khempeuhte' khate' Pathian in hiai mihonte tung ah mi khat sep hen, 17 Amah amaute maia pawtkhia a, lut dingpa hi hen. Tangtawn Toupa' mite, a ching ding neilou belamte bang a hih louh nading-ua, amaute piikhia a, piilut dingpa hi hen, a chi hi. 18 Tuachi-in, Tangtawn Toupa'n Mosi kiang ah: Nun' tapa Joshua, Kha omnapa tonpih inla, a tung ah na khut nga in, 19 Siampi Eleazar leh kikhawmte khempeuh mai ah amah dingsak inla, amaute' mitmuhin, amah nna guan in. 20 Israel minam in a thu a man theih nadingin, na thuneihna amah hawm in. 21 Amah siampi Eleazar maia a din ding ahi. Eleazar in Tangtawn Toupa' maia Urim dongin Joshua adingin thupuknate a la ding ahi. Joshua' thupiakin Israelte khempeuh a pawtkhe ding uh a, ama' thupiakin hong lut ding uh ahi, a chi hi. 22 Tangtawn Toupa'n thu a piak bangin Mosi in a hih hi. Joshua a tonpih a, siampi Eleazar leh kikhawmte khempeuh mai ah a dingsak a, 23 tua khitin, ama'n a tung ah a khut a nga a, Tangtawn Toupa'n Mosi tungtawna thuhilhna a piak bangin, nna a guan hi.
Nisim Thillatte
1 Tangtawn Toupa'n, Mosi kiang ah: 2 Hiai thupiak Israelte pia inla, amaute kiang ah: Ka lungkimna gim namtui hi dingin meia lat thillatte hi ding an, a hun seh ah, hon pia un, chi in. 3 Tua baan ah, amaute kiang ah: Tangtawn Toupa' maia na piak ding uh meia thillat hiai ahi: Belamnou kum khata upa genbaanglou nih, nisima haltum thillat gige hi dinga na piak ding uh ahi. 4 Belamnou khat zingsanga lat ding, nitak khawmuia a dang khat lat ding ahi. 5 Tuate tawh kitonin, an thillat anvui nei dimdem ephah khat sehsawm suah seh khat, oliv thau hin khat sehli suah seh khat tawh kihel latkhawm ding ahi 6 Hiai bel haltum thillat gige ding Tangtawn Toupa' maia meia thillat a lungkimna gim namtui hi ding chi-a Sinai Muala kisepsa ahi 7 Belamnou khat tek tawh kilaan khawm ding dawn thillat bel silngou sawh dawn thil hin khat ahi. Mun siangthou ah, Tangtawn Toupa' mai ah tua dawn thillat sungbua in. 8 Nitak khawmuiin, belamnou nihna pen zingsanga na bawl an thillat leh dawn thillat bangbang tawh, lan in. Hiai meia thillat, Tangtawn Toupa' lungkimna gim namtui ahi.
Sabbath Thillatte
9 Sabbath ni-in, belamnou, kum khata upa, gen baanglou nih, a dawn thillat tawh, an thillat anvui nei ephah khat sehsawm suah seh nih, sathau tawh kihel tawh, laan in. 10 Hiai Sabbath nisim ading, haltum thillat ahi. Hiai bel, haltum thillat ngeina-a dawn thillat tawh kiton gige behlapna ahi.
Khasim Thillatte
11 Kha sima a ni khat ni-in, Tangtawn Toupa' mai ah haltum thillat, bawngtaltuai nih, belamtal khat leh belamnoupa, kum khata upa sagih, genbaanglou chiat, laan un. 12 Bawngtal khat zel tawh latkhawm ding an thillatte, anvui nei ephah khat sehsawm suah seh thum, sathau tawh kihel ahi. Belamtal tawh latkhawm ding an thillat, anvui nei ephah khat sehsawm suah seh nih, sathau tawh kihel ahi ding ahi. 13 Belamnou khat zel tawh latkhawm ding an thillat, anvui nei ephah khat sehsawm suah seh khat, sathau tawh kihel ahi ding ahi. Hiai bel, Tangtawn Toupa' maia meia thillat gim namtui hi dinga, haltum thillat ahi. 14 Bawngtal khat zel tawh latkhawm ding dawn thillat, grepzu hin kimkhat ahi ding ahi. Belamtal tawh latkhawm ding dawn thillat grepzu hin khat sehthum suah seh khat ahi ding ahi. Belamnou khat zel tawh latkhawm ding dawn thillat grepzu hin khat sehli suah seh khat ahi ding ahi. Hiai khasim thillat ahi a, kum khat sunga kha thak ni zela haltum thillat ding ahi. 15 Haltum thillat gige, a dawn thillat tawh latkhawm baan ah, keltal khat, Tangtawn Toupa' maia khelhna thillata lat ding ahi.
Paikan Ankuang
16 A kha khatna, a ni sawmleli ni-in Tangtawn Toupa' Paikan zat ding ahi. 17 Hiai kha, a ni sawmlenga ni-in, ankuang luina a om ding ahi. Ni sagih sung silngou sawhlouh tanghou ne un. 18 A ni khat ni-in khawmpi siangthou nei unla, nna ngeina sem kei un. 19 Tangtawn Toupa' mai ah meia thillat haltum thillat bawngtaltuai nih, belamtal khat leh belamnoupa, kum khata upa, genbaanglou sagih lan un. 20 Bawngtal khat zel tawh an thillat, anvui nei ephah khat sehsawm suah seh thum, sathau tawh kihel a om ding ahi. Belamtal tawh anvui nei ephah khat sehsawm suah seh nih ahi ding ahi. 21 Belamnou sagih, khat zel tawh anvui nei ephah sehsawm suah seh khat ahi ding ahi. 22 Noute adinga khuhna bawl nadingin keltal khat khelhna thillat laan un. 23 Hiaite zingsang haltum thillat ngeinate baana behlapnain hih un. 24 Ni sagih sung hibangin nisim meia thillat Tangtawn Toupa' lungkimna gim namtui haltum thillat dingin an bawl un. Hiai bel, haltum thillat ngeina leh a dawn thillat behlapnain hih un. 25 A ni sagih ni-in, khawmpi siangthou nei unla, nna ngeina sem kei un.
Nipikalte Ankuang
26 Gahmasate ni-in, Nipikalte Ankuang lui sunga Tangtawn Toupa' maia an thak na lat chiangun, khawmpi siangthou nei unla, nna ngeina sem kei un. 27 Haltum thillat, bawngtaltuai nih, belamtal khat, belamnoupa, kum khata upa sagih Tangtawn Toupa' lungkimna gim namtui hi dingin laan un. 28 Bawngtal khat zel tawh an thillat, anvui nei ephah khat sehsawm suah seh thum, sathau tawh kihel ahi ding ahi. 29 Belamnou sagihte khat zel tawh anvui nei ephah khat sehsawm suah seh khat ahi ding ahi. 30 Noute adinga khuhna bawl nadingin keltal khat telsak un. Haltum thillat ngeina leh a an thillat baan ah, hiaite a dawn thillatte tawh bawl un. Gantate genbaanglou hisak ngeingei un.
Pengkulte Ankuang
1 A Kha sagihna, a ni khat ni-in, khawmpi siangthou nei unla, nna ngeina sem kei un. Noute adinga pengkulte mut ni ahi. 2 Tangtawn Toupa' lungkimna gim namtui hi dingin, haltum thillat, bawngtaltuai khat, belamtal khat leh belamnoupa, kum khata upa, genbaanglou sagih laan un. 3 Tua bawngtal tawh, an thillat, anvui nei ephah khat sehsawm suah seh thum, sathau tawh kihel bawl un. Belam tawh, anvui nei ephah khat sehsawm suah seh nih ahi ding ahi. 4 Belamnou sagihte khat zel tawh, anvui nei ephah khat sehsawm suah seh khat ahi ding ahi. 5 Noute adinga khuhna bawl nading khelhna thillat dingin keltal khat telsak un. 6 Hiaite bel, a kisehsa banga khasim leh nisim haltum thillatte leh a an thillatte leh dawn thillatte baana behlapna ahi. Tangtawn Toupa' maia thillatte a lungkimna gim namtui ahi uhi.
Khelhna Khuhna Ni
7 Hiai Kha sagihna, a ni sawm ni-in khawmpi siangthou nei un. Noute kizangsakin, nna bangmah sem kei un. 8 Tangtawn Toupa' lungkimna gim namtui hi dingin, haltum thillat bawngtaltuai khat, belamtal khat leh belamnou kum khata upa genbaanglou sagih laan un. 9 Tua bawngtal tawh an thillat, anvui nei ephah khat sehsawm suah seh thum, sathau tawh kihel ahi ding ahi. Belamtal tawh, anvui nei ephah khat sehsawm suah seh nih ahi ding ahi. 10 Belamnou sagihte khat zel tawh anvui nei ephah khat sehsawm suah seh khat ahi ding ahi. 11 Khelhna khuhna bawl nading khelhna thillat leh haltum thillat ngeina leh a an thillat leh a dawn thillatte behlapna in khelhna thillat ding keltal khat telsak un.
Bawktate Ankuang
12 A kha sagihna, a ni sawmlenga ni-in, khawmpi siangthou nei unla, nna ngeina sem kei un. Ni sagih sung Tangtawn Toupa' mai ah ankuanglui bawl un. 13 Tangtawn Toupa' lungkimna gim namtui hi ding, meia thillat, tua haltum thillat, bawngtaltuai sawmlethum, belamtal nih leh belamnoupa kum khata upa, genbaanglou sawmleli laan un. 14 Bawngtal sawmlethumte laka khat zel tawh an thillatte, anvui nei ephah khat sehsawm suah seh thum, sathau tawh kihel ahi ding ahi. Belamtal nihte laka khat zel tawh anvui nei ephah khat sehsawm suah seh nih ahi ding ahi. 15 Belamnou sawmlelite laka belamnou khat zel tawh, anvui nei ephah khat sehsawm suah seh khat a hi ding ahi. 16 Haltum thillat ngeina leh a an thillat leh dawn thillat baan ah, khelhna thillat ding keltal khat telsak un. 17 A ni nih ni-in, bawngtaltuai sawmlenih, belamtal nih leh belamnoupa, kum khata upa genbaanglou sawmleli laan un. 18 Tua bawngtalte, belamtalte leh belamnoute tawh, an thillat leh dawn thillat, a pha ding zah sehsa bangin laan un. 19 Haltum thillat ngeina leh a an thillat leh dawn thillatte baan ah, khelhna thillat ding keltal khat telsak un. 20 A ni thum ni-in, bawngtal sawmlekhat, belamtal nih leh belamnoupa, kum khata upa genbaanglou sawmleli laan un. 21 Tua bawngtalte, belamtalte leh belamnoute tawh a an thillatte leh dawn thillatte, a pha ding zah sehsa bangin laan un. 22 Haltum thillat ngeina leh a an thillat leh dawn thillat baan ah, khelhna thillat ding keltal khat telsak un. 23 A ni li ni-in, bawngtal sawm, belamtal nih leh belamnoupa, kum khata upa genbaanglou sawmleli laan un. 24 Tua bawngtalte, belamtalte leh belamnoupa tawh a an thillatte leh dawn thillatte, a pha ding zah sehsa bang in laan un. 25 Haltum thillat ngeina leh a an thillat leh dawn thillat baan ah, khelhna thillat ding keltal khat telsak un. 26 A ni nga ni-in, bawngtal kua, belamtal nih leh belamnoupa, kum khata upa, genbaanglou sawmleli laan un. 27 Tua bawngtalte, belamtalte leh belamnoute tawh, a an thillatte leh dawn thillatte, a pha ding zah sehsa bangin laan un. 28 Haltum thillat ngeina leh a an thillatte leh dawn thillat baan ah, khelhna thillat ding keltal khat telsak un. 29 Ani guk ni-in, bawngtal giat, belamtal nih leh belamnoupa, kum khata upa, genbaanglou sawmleli laan un. 30 Tua bawngtalte, belamtalte leh belamnoute, a an thillatte leh dawn thillatte, a pha ding zah sehsa bang in laan un. 31 Haltum thillat ngeina leh a an thillat leh dawn thillatte baan ah, khelhna thillat ding keltal khat telsak un. 32 A ni sagih ni-in, bawngtal sagih, belamtal nih leh belamnoupa, kum khata upa, genbaanglou sawmleli laan un. 33 Tua bawngtalte, belamtalte leh belamnoute tawh, a an thillatte leh dawn thillatte, a pha ding zah sehsa bangin laan un. 34 Haltum thillat ngeina leh a an thillat leh dawn thillatte baan ah, khelhna thillat ding keltal khat telsak un. 35 A ni giat ni-in khawmpi siangthou nei unla, nna ngeina sem kei un. 36 Tangtawn Toupa' lungkimna gim namtui hi dingin meia thillat, tua haltum thillatte bawngtal khat, belamtal khat leh belamnoupa kum khata upa, genbaanglou sagih laan un. 37 Tua bawngtal, belamtal leh belamnoute tawh a an thillatte leh a dawn thillatte, a pha ding zah sehsa bangin laan un. 38 Haltum thillat ngeina leh a an thillat leh dawn thillat baan ah, khelhna thillat ding keltal khat telsak un. 39 Na chiamsa uh leh na ut thillatte uh baan ah, sehsa na ankuangluite uah Tangtawn Toupa adingin hiaite, na haltum thillatte uh, an thillatte, dawn thillatte leh lemna thillatte laan un, chi in, a chi hi. 40 Tangtawn Toupa' thupiak khempeuh Mosi in Israelte a hilh hi.
Thuchiamte tawh kisai Dante
1 Mosi in Israel namte' lutangte kiang ah: Hiai Tangtawn Toupa' thupiak ahi: 2 Pasal khat peuh in Tangtawn Toupa kianga thuchiam a bawl chiangin, ahih kei leh, thuchiam zanga a kihen chiangin, ama' thu mah a palsat ding ahi kei a, a gensa peuhmah a tangtun teitei ding ahi. 3 Nungak khat peuh in a pa' insunga a om laia Tangtawn Toupa' maia thuchiam a bawl chiangin, ahih kei leh, thuchiam hiam, kichiamna a bawla, 4 a kichiamna hiam, thuchiam hiam a pa'n a zak a, a kianga bangmah a gen kei leh, a kichiamna khempeuh leh a thuchiam peuhmah a paisuak ding ahi. 5 Ahihhangin, a pa'n tua a zak chianga a kham leh bel, tua nu' kichiamna, ahih kei leh, thuchiama a kihenna khat beek a paisuak kei ding hi. A pa'n kham ahih manin, Tangtawn Toupa'n amah a khahkhe ding hi. 6 Ama'n kichiamna a bawl hiam, thunung khuallou hiaia amuk in thuchiam a bawl hiama amah a kihen nunga pasal a neih a, 7 a pasal in tua thu thei napi-a bangmah a gen kei leh, a kihenna tua kichiamna hiam, thuchiam hiam a kip dinga a paisuak ding hi. 8 Ahihhangin, a pasal in tua thu a zak laia, a kham lehbel tua a kihenna kichiamna hiam, thunung khuallou hiaia thuchiam a bawl hiam bangmahlou suaksak ahi a, Tangtawn Toupa'n amah a khahkhe ding hi. 9 Meigong hiam, maksa numei hiam in kichiamna hiam, batneia a kibawlna peuhmah, ama tung ah a kipden ding hi. 10 A pasal tawh omkhawm numei khatpeuh in kichiamna hiam, kichiam zena thuchiam hiam zanga kihenna a neih a, 11 a pasal in tua thu za napi-a ama' kianga bangmah a gen kei a, a kham kei leh a thuchiam khempeuh, ahih kei leh a kihenna a kipden ding hi. 12 Ahihhangin, a pasal in tuate a zak taka bangmah loua a beisak leh bel, a thuchiamte, ahih kei leh, a kama a genkhiak thuchiamte khat beek a paisuak kei ding hi. A pasal in tuate bangmahloua bawlsak ahih manin, Tangtawn Toupa'n amah tuate apan a khahkhe ding hi. 13 Thuchiam a bawl khempeuh, ahih kei leh, amah kizangsak dinga kichiam zena a thugen khempeuh a pasal in a kipsak thei a, bangmahlou a suaksak thei hi. 14 Ahihhangin, a pasal in tua tawh kisai bangmah gen a neih kei leh, a kichiamna, ama' kihenna a kipsak ahi. Tuate a zak laia bangmah gen loua tuate kipsak ahi. 15 Hinapi-in, tuate a zak nung bangtan hiama tuate bangmahloua bawl ahih leh bel, tua nu' mawhna a pasal in a khu hi, a chi hi. 16 Hiaite pasal leh a zi kitanauna leh pa leh a inn-a om lai a tanu nungak kitanauna tawh kisai, Tangtawn Toupa'n Mosi kianga dan a piak ahi.
Midiante' tunga Phulakna
1 Tangtawn Toupa'n Mosi kiang ah: 2 Israelte adingin Midiante tung ah phuba la in. Tua nung chiangin, na mite laka lakkhawm na hita ding hi, a chi hi. 3 Tuachi-in, Mosi in mipite kiang ah: Midiante dou ding leh amaute tunga Tangtawn Toupa' phuba la dingin na pasalte uh bangzah hiam galvan un. 4 Israel namte apan mi 1,000 khat chiat galdou dingin sawl un, a chi hi. 5 Tuachi-in, pasal 12,000 galdou dingin a kigalvan uhi. Nam khat apan 1,000 zel Israel behte apan piakkhiak ahi uhi. 6 Mosi in nam khat laka 1,000 zel kidouna phual ah a sawl a, siampi Eleazar' tapa Fineha in mun siangthou apan vante leh thu theihsak nading pengkulte a la a, amaute tawh a ton hi. 7 Tangtawn Toupa'n Mosi thu a piak bangin, amaute'n Midiante a dou uh a, pasal peuhmah a that uhi. 8 A thahte uh lak ah Evi, Rekem, Zur, Hur leh Reba, tua Midian kumpipa ngate a tel uhi. Beor' tapa Balaam zong namsauin a that uhi. 9 Israelte'n Midian numeite leh naupangte salin a man uh a, Midiante' bawnghonte, belam leh kelhonte khempeuh leh vante gallak sumin a la uhi. 10 Midiante' tenna khawpi khempeuh leh a giahphualte uh a haltum vek uhi. 11 Gallak sum khempeuh leh vansuhte khempeuh mihingte leh gantate tawh a la uhi. 12 Tua salmatte, gallakte leh vante hon pua uh a, Jerikho gal, Jordan lui dung, tua Moab phaizang ah, Mosi leh siampi Eleazar leh Israel kikhawmte kiang ah giahphual ah hon tun uhi. 13 Mosi, siampi Eleazar leh nam makaite, giahphual pua-a amaute vatuak dingin a kuankhia uhi. 14 Mosi bel galmun apan hong kik tua sepaihhon makaite, tua 1,000 pawlpawlte' makaite leh 100 pawlpawlte' makaite tung ah a heh hi. 15 Ama'n amaute kiang ah: Numeite khempeuh nungta dinga phal na hi umaw? 16 Balaam' thuhilhna zuite amaute ahi uh a, Peora thiltung ah Tangtawn Toupa apan Israelte piimang dinga vanzatte ahi uh a, hipi in Tangtawn Toupa' mite a nuai hi. 17 Pasal naupangte khempeuh that unla, pasal tawh lumkhawmsa numei peuhmah that un, 18 pasal tawh lumkhawm ngei nailou nungak peuhmah bel noute adingin hinghawi un.
Israelte Siansuahna
19 Mi khat peuh that, ahih kei leh, thahsa khat peuh lawngkha khempeuh, ni sagih sung giahphual pua ah giak un. A ni thum ni leh ni sagih ni-in noute leh na salmatte uh na kisiansuah ding uh ahi. 20 Puansilh peuhmah leh savun, kelmul, ahih kei leh singa kibawl van peuhmah siansuah un, a chi hi. 21 Tua khitin, siampi Eleazar in galdoua kuan sepaihte kiang ah: Tangtawn Toupa'n Mosi a piak Dan in a ngiat hiai ahi: 22 Kham sik, ngun sik, sumsan sik, tiin sik, haak sik leh 23 thil dang mei kattum theihlouh van khempeuh meia paisuaksak ding ahi. Tua khit chiangin, a siang ahi ding. Ahihhangin, siansuahna tuia zong paisuaksak ding ahi. Mei kattum theih van peuhmah tua tuia paisuaksak ding ahi. 24 A ni sagih ni-in na puansilhte uh sawp un, a siang na hita ding uh. Tua khit chiangin giahphual sung ah nong lut thei ding uh, a chi hi.
Gatiakte Hawmna
25 Tangtawn Toupa'n Mosi kiang ah: 26 Nang leh siampi Eleazar leh nam-a innkuan lutangte'n matsa mihingte khempeuh leh gantate sim un. 27 Kidouna-a pang sepaihte leh nam sunga midangte lak ah gallakte hawm un. 28 Kidouna-a pang sepaihte lak apan, mihingte, bawngte, sabiltungte, belamte hi-in, kelte hita leh 500 zela khat, Tangtawn Toupa kianga siah piak dingin sepkhia un. 29 Amaute'n kimkhat a tan uh lak apan hiai siah la unla, Tangtawn Toupa' tan hi dingin siampi Eleazar kiang ah pia un. 30 Israelte'n kim khat a tan uh lak apan mihing, bawng, sabiltung, belam hi-in, kei hita leh, 50 laka khat telkhia unla, Tangtawn Toupa' biakbuk kema mawhpua Levite kiang ah pia un, a chi hi. 31 Tuachi-in, Tangtawn Toupa'n Mosi thu a piak bangin, Mosi leh siampi Eleazar in a hih uhi. 32 Sepaihte'n gallak a lakte uh belam 675,000 leh, 33 bawng 72,000 leh, 34 sabiltung 61,000 leh, 35 pasal tawh lumkhawm ngei nailou numei 32,000 ahi. 36 Galphuala galdou sepaihte'n a kimkhat a tan uh: Belam 337,500 ahi a, 37 tua lak apan Tangtawn Toupa ading siah 675 ahi. 38 Bawng 36,000 ahi a, tuate lak apan Tangtawn Toupa ading siah 72 ahi. 39 Sabiltung 30,500 ahi a, tuate lak apan Tangtawn Toupa ading siah 61 ahi. 40 Mihing 16,000 ahi a, tuate lak apan Tangtawn Toupa ading siah 32 ahi. 41 Mosi in tua siah Tangtawn Toupa' tan siampi Eleazar kiang ah a pia hi. Tua bel, Tangtawn Toupa'n Mosi thu a piak bangbang ahi. 42 Israelte'n a kim khat a tan uh, Mosi in galdoute apan 43 a sehkhiak, mipite'n a kimkhat a tan uh, belam 337,500 leh, 44 bawng 36,000 leh, 45 sabiltung 30,500 leh, 46 mihing 16,000 ahi. 47 Tangtawn Toupa'n Mosi thu a piak bangin Israelte'n a kimkhat a tan uh lak apanin Mosi in mihing leh ganta 50 lak ah khat chiat a telkhia a, Tangtawn Toupa' biakbuk kema mawhpua Levite kiang ah a pia hi. 48 Tua khitin, sepaihhon a pawlpawlte tunga makaite, 1,000 pawlpawl tunga makaite, leh 100 pawlpawl tunga makaite Mosi kiang ah a vapai uh a, 49 a kiang ah: Na silate'n na thu nuaia om sepaihte ka sim uh a, khat lei zong kimlou a om kei. 50 Tuachi-in, koute chiat in ka muhkhiak uh khama kibawl banbuhte, taute, suainamna zungbuhte, bilbahte leh khite Tangtawn Toupa' maia thillat dingin kon tawi uhi, a chi uhi. 51 Mosi leh siampi Eleazar in amaute apan tua kham, tua khutsiam silbawlte khempeuh a saang uhi. 52 1,000 pawlpawl tunga makaite leh 100 pawlpawl tunga makaite apan khamte khempeuh Mosi leh Eleazar in Tangtawn Toupa' maia thawnpiaka a piakte uh shekel 16,750-a gik ahi. 53 Sepaihte'n gallak amau ading a la tek uhi. 54 Mosi leh siampi Eleazar in tua khamte, 1,000 pawlpawl tunga makaite leh 100 khat pawlpawl tunga makaite apan a sang uh a, Tangtawn Toupa' maia Israelte adinga theihgigena hi dingin, Kihoupihna Puanbuk sung ah hon tawilut uhi.
Jordan Suahlam Gamhawmna
1 Reubente leh Gadte, bawnghonte, belam leh kelhonte hau ahi uh a, Jazer leh Gilead gamte ganhonte adingin a hoih, chih a mu uhi. 2 Tuachi-in, Mosi leh siampi Eleazar leh nam makaite kiang ah hong pai uh a: 3 Ataroth, Dibon, Jazer, Nimra, Heshbon, Eleale, Sebam, Nebo leh Beon, 4 Tangtawn Toupa'n Israelte maia a zawhna gam, gantate adingin a hoih a, na sila koute'n lah ganhonte ka nei uhi. 5 Na mitmuha deihsakna ka tan uleh, ka tan dingun na sila koute kiang ah hiai gam hon pia un. Jordan lui gal hon kansak kei un, a chi uhi. 6 Mosi in Gadte leh Reubente kiang ah: Noute hiaia na tut maimai sung ua, na gammi hihpihte uh galdoua kuan ding uhia? 7 Tangtawn Toupa'n amaute a piaksa gam sunga va galkaia lut dinga banghanga Israelte lungkesak na hi ua? 8 Gam vel dinga Kadesh Barnea apan na pu na pate uh ka sawl laia a thilhih uh hiai ahi. 9 Eshkol Phaizanga paitoua gam a vel khitun, Tangtawn Toupa'n amaute gou a piaksa-a lut lou dingin amaute a lungkesak uhi. 10 Tua ni-in, Tangtawn Toupa' hehna tawhthawhin a om a, hibangin a kichiam hi: 11 Lungtang teng khempeuh tawh kei hon zuih louh manun pasal kum 20 leh a tunglama upa khat lei zong Abraham, Isak leh Jakob kianga kichiam zena ka chiam gam a lut kei ding. 12 Keniz mi Jefune' tapa Kaleb leh Nun' tapa Joshua, lungtang teng tawh Tangtawn Toupa zuite loungal khat mahmah zong a lut kei ding, a chi hi. 13 Israelte tung ah Tangtawn Toupa' hehna a kuang a, a mitmuha thil gilou hih tua khang buppi a bei mateng amaute tua gamdai-gamkeu ah kum 40 sung a vakthapsak hi. 14 Hiai ah nou, mikhialte' suante, na pu na pate uh dinmun ah na ding uh a, Israelte tung ah Tangtawn Toupa na hehsak sem uhi. 15 Amah zuihna apan na pialmang uleh, hiai mite khempeuh gamdai-gamkeu ah a nuse ding a, amaute' manthatna omsak noute na hi ding uh, a chi hi. 16 Tua khitin, amaute a kiang ah hong paitou uh a: Ka ganhonte uh ading gankulte hiai ah ka bawl nuam uh a, ka numeite uleh tate adingin khawpite, innte ka lam nuam uh. 17 Ahihhangin, Israelte amau' mun ka lutpih mateng uh koute kigalvan a, amaute ma-a pai masa dingin koute kimansa ka hi uh. Tua sung tengin, ka numeite uleh tate uh hiai gama teengte apan kihumbit nadingin kulhnei khawpite ah a teeng ding uh. 18 Israel michih in gouluah gam a ngah mateng koute ka inn uah ka kik kei ding uh. 19 Koute' gouluah ding Jordan suahlama hong om ahih manin, Jordan gal lam ah amaute tawh gouluah gam ka saang kei ding uh, a chi uhi. 20 Tua khitin, Mosi in amaute kiang ah: Hiai banga hih ding na hih ua, galdou dinga Tangtawn Toupa' maia na kigalvan ding ua, 21 Tangtawn Toupa'n a melmate a hawlkhiak mateng, na vek ua kigalvansa-a Jordan gal vakai ding na hih uleh, 22 Tangtawn Toupa' maia tua gam a kizawh chiangin na kik thei ding uh a, Tangtawn Toupa tung leh Israelte tunga na mawhpuakna uapan na siangta ding uh. Tangtawn Toupa' mai ah hiai gam noutea ahi ding. 23 Ahihhangin, hiai na hih kei uleh, Tangtawn Toupa tunga khial na hi ding uh a, na khelhna un hon mukhe ding, chih thei mahmah un. 24 Na numeite uleh tate uh adingin khawpite lam unla, na belam uleh kelhonte uh adingin huang bawl unla, ahihhangin, hih dinga na chiamsa uh hih teitei un, a chi hi. 25 Gadte leh Reubente'n Mosi kiang ah: Ka toupa un thu non piak bangbangin, na sila koute'n ka hih ding uh, 26 Ka tate uleh zite uh leh, ka belam leh kelhonte leh bawnghonte uh hiai ah Gilead khawpite ah a om ding uh. 27 Na sila koute bel galdou dinga kigalvan chiatin, ka toupa un na gen bangin, Tangtawn Toupa' maia galdou dingin ka galkah ding uh, a chi uhi. 28 Tua khitin, Mosi in siampi Eleazar leh Nun' tapa Joshua leh Israel namte' beh tuulpite kiang ah amaute tawh kisaiin thupiakte a pia hi. 29 Amaute kiang ah: Gad leh Reubente pasal khempeuh galdou dinga a kigalvan ua, Tangtawn Toupa' maia noute tawh Jordan gal a kah uleh, noute' maia tua gam a kizawh chiangin, Gilead gam a tan dingun pia un. 30 Ahihhangin, kigalvana noute tawh a galkah kei uleh, noute tawh Kanan gam ah goutan a pom teitei ding uh ahi, a chi hi. 31 Gadte leh Reubente'n a dawng uh a: Tangtawn Toupa' gensa na sila koute'n ka hih ding uh. 32 Tangtawn Toupa' mai ah, kigalvansain Kanan gam ah ka galkah ding uh, ahihhangin, ka goutan uh bel Jordan gal hiai lam pang ah ahi ding hi, a chi uhi. 33 Tua khitin, Mosi in Gadte, Reubente leh Josef tapa Manase nam kimkhat kiang ah, Amorte kumpipa Sihon' gam leh Bashan kumpipa Og' gam tua kumpigamte a buppi-in, a khawpite leh a khawtate' gamte a pia hi. 34 Gadte'n Dibon, Ataroth, Aroer, 35 Ataroth Shofan, Jazer, Jogbeha, 36 Beth Nimra leh Beth Haran kulhbaang nei khawpitein a lam uh a, a belam uleh kelhonte uh ading huangte a bawl uhi. 37 Reubente'n Heshbon, Eleale leh Kiriathaim a lamthak uhi. 38 Tua baan ah, Nebo leh Baal Meon leh Sibma zong a lamthak uhi. Nebo leh Baal Meon minte a kikhek a, amaute'n a khawpi lamthakte uh minte a phuak uhi. 39 Manase' tapa Makir' suante, Gilead gam ah a kuan uh a, a la uh a, tua muna om Amorte a hawlkhia uhi. 40 Tuachi-in, Mosi in Manase suan Makirte kiang ah Gilead a pia a, tua ah a teeng uhi. 41 Manase suan khat Jair in a tennate uh a zou a, tuate' min dingin Havoth Jair a sa hi. 42 Noba in Kenath leh a kimkota khuate a la a, a min dingin, amah kitamsakin Noba a sa hi.
Israelte Khualzinna: Aigupta apan Sinai
1 Israelte, Mosi leh Aron' makaihna nuaia, Aigupta gam apan a pawlpawla hong paikhiak lai ua, hong khualzinna uh abanbanin hiaite ahi. 2 Tangtawn Toupa' thupiakin Mosi in a khualzinna uh a gelhlut ahi. A banbana a khualzinna uh hiai ahi: 3 A kha khatna, a ni sawmlenga ni, Paikan zing chiangin, Israelte Rameses apan a kipankhia uhi. Aiguptate' muh geguin hangsantakin a paikhia uhi. 4 Aiguptate bel Tangtawn Toupa'n a lak ua piang masa khempeuh a thahte a om uhi. Ahang bel, Tangtawn Toupa'n a pathiante uh tung ah gawtna thukhenna a tun-a ahi. 5 Israelte'n Ramase a nusia uh a, Sukoth ah giahphual a sat uhi. 6 Sukoth a nusia uh a, gamdai-gamkeu mong Etham ah giahphual a sat uhi. 7 Etham a nusia uh a, Pihahiroth ah a kik uh a, Migdol kiang ah giahphual a sat uhi. Pihahiroth bel Baal Zefon suahlama om ahi. 8 Pihahiroth a nusia uh a, tuipi kana gamdai-gamkeua ni thum sung a zin nungun, Mara ah giahphual a sat uhi. 9 Mara a nusia uh a, tuinak sawmlenih leh tum sing 70 omna Elim a tung uh a, tua ah giahphual a sat uhi. 10 Elim a nusia uh a, Tuipi San kiang ah giahphual a sat uhi. 11 Tuipi San a nusia uh a, Sin Gamdai-gamkeu ah giahphual a sat uhi. 12 Sin Gamdai-gamkeu a nusia uh a, Dofka ah giahphual a sat uhi. 13 Dofka a nusia uh a, Alush ah giahphual a sat uhi. 14 Alush a nusia uh a, mipite adinga dawn ding tui om louhna Refidim ah giahphual a sat uhi. 15 Refidim a nusia uh a, Sinai Gamdai-gamkeu ah giahphual a sat uhi.
Sinai apan Kadesh
16 Sinai Gamdai-gamkeu a nusia uh a, Kibroth Hataava ah giahphual a sat uhi. 17 Kibroth Hataava a nusia uh a, Hazeroth ah giahphual a sat uhi.
Gamdai-gamkeua Vakthapna
18 Hazeroth a nusia uh a, Rithma ah giahphual a sat uhi. 19 Rithma a nusia uh a, Rimon Perez ah giahphual a sat uhi. 20 Rimon Perez a nusia uh a, Libna ah giahphual a sat uhi. 21 Libna a nusia uh a, Risa ah giahphual a sat uhi. 22 Risa a nusia uh a, Kehelatha ah giahphual a sat uhi. 23 Kehelatha a nusia uh a, Shefer Mual ah giahphual a sat uhi. 24 Shefer Mual a nusia uh a, Harada ah giahphual a sat uhi. 25 Harada a nusia uh a, Makheloth ah giahphual a sat uhi. 26 Makheloth a nusia uh a, Tahath ah giahphual a sat uhi. 27 Tahath a nusia uh a, Tera ah giahphual a sat uhi. 28 Tera a nusia uh a, Mithka ah giahphual a sat uhi. 29 Mithka a nusia uh a, Hashmona ah giahphual a sat uhi. 30 Hashmona a nusia uh a, Moseroth ah giahphual a sat uhi. 31 Moseroth a nusia uh a, Bene Jaakan ah giahphual a sat uhi. 32 Bene Jaakan a nusia uh a, Hor Hagidgad ah giahphual a sat uhi. 33 Hor Hagidgad a nusia uh a, Jotbatha ah giahphual a sat uhi. 34 Jotbatha a nusia uh a, Abrona ah giahphual a sat uhi. 35 Abrona a nusia uh a, Ezion Geber ah giahphual a sat uhi. 36 Ezion Geber a nusia uh a, Zin Gamdai-gamkeua Kadesh ah giahphual a sat uhi.
Kadesh apan Moab
37 Kadesh a nusia uh a, Edom gamgi-a om Hor Mual ah giahphual a sat uhi. 38 Tangtawn Toupa' thupiakin, Hor Mual ah siampi Aron a paitou a, tua ah a si hi. Tua bel, Aigupta gam apan Israelte hong paikhiak nung uh, a kum 40-na, a kha ngana, a ni khat ni ahi. 39 Aron, Hor Muala a sihin, kum 123-a upa ahi. 40 Kanan gam Negev-a teeng, Kanan mi, Arad kumpipa'n Israelte hong pai uh chih a za hi. 41 Hor Mual a nusia uh a, Zalmona ah giahphual a sat uhi. 42 Zalmona a nusia uh a, Punon ah giahphual a sat uhi. 43 Punon a nusia uh a, Oboth ah giahphual a sat uhi. 44 Oboth a nusia uh a, Ije Abarim ah giahphual a sat uhi. Ije Abarim bel Moab gamgi-a om ahi. 45 Ije Abarim a nusia uh a, Dibon Gad ah giahphual a sat uhi. 46 Dibon Gad a nusia uh a, Almon Diblathaim ah giahphual a sat uhi. 47 Almon Diblathaim a nusia uh a, Nebo kianga Abarim mualte ah giahphual a sat uhi. 48 Abarim mualte a nusia uh a, Jerikho gal, Jordan lui kiang, Moab phaizang ah giahphual a sat uhi. 49 Tua Moab phaizang ah Beth Jeshimoth apan Abel Shitim dong, Jordan lui zuiin giahphual a sat uhi.
Kanan Gam Zawh ding Hilhna
50 Tua Jerikho gal, Jordan lui kiang, Moab phaizangte ah Tangtawn Toupa'n Mosi a houpih a: 51 Israelte kiang ah thu gen inla. Jordan lui kana Kanan gam na lut chiangun, 52 tua gama tengte khempeuh na mai uah hawlkhia un. Suihthawha kibawl a milimte uleh sunthawh milimte khempeuh hihgawp unla, a munsangte khempeuh uh hihchim gawp vek un. 53 Tua gam tang unla, a sung ah teeng un. Tua gam na luah ding ua hon pekhin ka hi. 54 Na beh dandanun aisanin tua gam hawm un. Pawl tam zawte'n goutan zazaw a tang ding ua, pawl tawm zawte'n goutan neu zaw a tan ding uh ahi. Aisana amau tan dinga kiakia amaua ahi ding ahi. Na pu na pate uapana na namte uh dandana na hawm ding uh ahi. 55 Ahihhangin, tua gama teengte na hawlkhiak kei uleh bel, na tensak laite uh, na mitte uleh na pangte uh adingin lingte a suak ding uh a, na tenna gam uah buaina hon pe ding uhi. 56 Tua hun chiangin, amaute tunga hih ka sawm noute tung ah ka hih ding, chi in, a chi hi.
Kanan Gamgi
1 Tangtawn Toupa'n Mosi kiang ah: 2 Israelte thu pia inla, amaute kiang ah: Kanan gam na lut chiangun, goutan dinga hong kipe ding gam in hiai gamgite a nei ding hi.
Simlam
3 Na simlam pang uh Edom gamgi zui Zin Gamdai-gamkeu apan ahi ding a, suahlam panga paitouin Chi Tuipi dong ahi ding. 4 Na gamgi uh Akrabim kaltouhna simlam apan kiheiin Zin a sun ding a, Kadesh Barnea simlam ah a pai ding. Tua apan Hazar Adar dong a pai ding a, Azmon a sun ding. 5 Azmon apan gamgi a kihei ding a, Aigupta Luipi dong a pai ding a, Tuipi ah a tawp ding hi.
Tumlam
6 Na tumlam gamgi uh Tuipi Lian gei ahi ding. Hiai na tumlam gamgi uh ahi ding hi.
Mallam
7 Na mallam gamgi uh hiai ahi ding: Tuipi Lian apan Hor Mual dong na gamgi uh a pai ding a, 8 Hor Mual apan Lebo Hamath ah a pai ding a, Zedab ah a pai ding a, Zifron ah a pai lai ding a, Hazar Enan ah a mong ding hi. Hiai na mallam gamgi uh ahi ding hi.
Suahlam
10 Na suahlam gamgi uh Hazar Enan apan Shefam dong a pai ding. 11 Tua Shefam apan Ain suahlam Ribla ah a paisuk ding a, Kinereth Tuipi suahlama gamken zuiin a pai ding hi. 12 Tua apan Jordan lui a zuisuk ding a, Chi Tuipi ah a mong ding hi. Hiai gam a kimkota gamgite tawh, na gam uh ahi ding, chi in, a chi hi. 13 Mosi in Israelte thu a pia a: Hiai gam gouluah dingin aisanin pia in. Tangtawn Toupa'n nam kua leh nam kimkhat kianga piak dingin thu a peta hi. 14 Ahang bel, Reuben nam, Gad nam leh Manase nam kimkhata innkuante'n goutan nei khin ahih man uh ahi. 15 Hiai nam nih leh nam kimkhatte'n nisuahna lam, Jerikho gala Jordan lui suahlam pang ah goutan a sangta uhi, a chi hi.
Kanan Gam Hawm Uliante
16 Tangtawn Toupa'n Mosi kiang ah: 17 Nang taanga goutan gam hawm dingte' min hiaite ahi: Siampi Eleazar leh Nun' tapa Joshua ahi. 18 Gam hawmna huh dingin nam khat laka makai khat zel sep in. 19 Hiaite a minte uh ahi: Judah nam apan Jefune' tapa Kaleb; 20 Simeon nam apan Amihud' tapa Shemuel; 21 Benjamin nam apan Kislon' tapa Elidad; 22 Dan nam apan makai Jogli' tapa Buki; 23 Josef' tapa Manase nam apan makai Efod' tapa Haniel; 24 Josef' tapa Efraim nam apan makai Shiftan' tapa Kemuel; 25 Zebulun nam apan makai Parnakh' tapa Elizafan; 26 Isakhar nam apan makai Azan' tapa Paltiel; 27 Asher nam apan makai Shelomi' tapa Ahihud; 28 Naftali nam apan makai Amihud' tapa Pedahel, a chi hi. 29 Kanan gama, Israelte kianga gam pe dinga Tangtawn Toupa'n thu a piakte hiaite ahi uhi.
Levite ading Khawpite
1 Jerikho gal, Jordan lui kiang, Moab phaizangte ah, Tangtawn Toupa'n Mosi a houpih a: 2 Israelte' tan ding goutan apanin, Levite' teen nading khawpite pe dingin Israelte thu pia in. Tua khawpite' kimkot ah gantatna gam zong pia un. 3 Tuachi-in teen nading khawpite leh gantatna gamte, a bawnghonte uh, belam leh kelhonte leh a ganta khempeuh uh tat nading a nei ding uhi. 4 Levite kianga na piak uh khawpite' kimkota gantatna gamte bel, khawpi kulhbaang apan tong 1,500 tan kizalh ahi ding ahi. 5 Khawpi pua ah, suahlam pang ah tong 3,000, simlam pang ah tong 3,000, tumlam pang ah tong 3,000, mallam pang ah tong 3,000 teh unla, a laizang taka khawpi om ding ahi. Amaute'n khawpite apan hiai chia gam gantat nading a nei ding uh ahi.
Bukna Khawpite
6 Levite kianga na piak khawpite laka guk bukna khawpite ahi ding ahi. Mi khatpeuh that kha mi tuate ah a tai thei ding hi. Tuate baan ah khawpi 42 amaute pia un. 7 Avekpi-in, Levite na piak uh khawpi 48 leh gantatna gamte ahi ding ahi. 8 Israelte tan gam apan Levite kianga khawpi na piakte uh bel, nam chih' goutan chiat tawh kikhom ahi ding ahi: Khawpi tam nei nam apan khawpi tam la unla, khawpi tawm nei nam apan tawm la un, a chi hi. 9 Tua khitin, Tangtawn Toupa'n Mosi a houpih a: 10 Israelte kiang ah thu gen inla: Jordan lui kana Kanan gam na lut chiangun, 11 na bukna khawpite uh hi dingin khawpi pawl khat telkhia un. Tua ah khut khiala mi that kha mi a tai thei ding hi. 12 Tuate phula mi apan bukna munte ahi ding. Tua bel, tualthata ngawha om mi, kikhawmte maia thu ettelna a om ma-a a sih louh nading ahi. 13 Na piak uh khawpi gukte na bukna khawpite uh ahi ding. 14 Bukna khawpite hi dingin, Jordan gal hiai lam pang ah khawpi thum pia unla, Kanan gam ah thum pia un. 15 Israelte, gamdang mite leh a lak ua teeng midangte adingin, hiai khawpi gukte, bukna munte ahi ding. Tuachi-in, khut khiala mi that kha peuh mah tuate ah a tai thei ding hi. 16 Mi khat peuh in, kua hiam khat siikin sat henla, tua mi si taleh, a satpa tualthat ahi. Tualthat mi thah ding ahi. 17 Ahih kei leh, mi khat peuh in, mi that thei suang tawi henla, kua hiam khat dengin tua mi si taleh, a dengpa tualthat ahi. Tualthat mi thah ding ahi. 18 Ahih kei leh, mi khat peuh in, mi that thei sing tawi henla, kua hiam khat satin, tua mi si taleh, a satpa tualthat ahi. Tualthat mi thah ding ahi. 19 Sisan phula mi in amah a thah ding ahi. Amah a tuah khak chiangin a that ding ahi. 20 Mi khat peuh in, muhdahna tawh tupkholhna neiin, midang khat sawn henla, ahih kei leh tup mawngin bang hiam khatin deng henla, tua mi si taleh, 21 ahih kei leh, kimelmakna neiin a khuttumin tum henla, tua mi si taleh, a hihlumpa thah ding ahi. Amah tualthat ahi. Sisan phula mi in amah a tuah khak chiangin a thah ding ahi. 22 Ahihhangin, kimelmakna nei hiloua kua hiam khat in midang a sawn khak a, ahih kei leh, tupmawng hiloua amah a den khak a, 23 ahih kei leh, amah muloua amah that thei suang a tunga a khiak a, amah a sih leh, a meima lah hilou, hihnat tum lah hilou ahih manin, 24 kikhawmte'n amah leh sisan phula mi kal ah hiai dante dungzuiin thu a khen ding uh ahi. 25 Tua kikhawmte'n sisan phula mi apan, tualthata ngawha ompa a humbit teitei ding uh ahi a, a taina tua bukna khawpi ah a khakik ding uh ahi. Sathau siangthou nilha om siampilian a sih mateng tua ah a om dine ahi. 26 Ahihhangin, ngawha ompa, a taina, bukna khawpi gamgi pawlama a piikhiak a, 27 sisan phula mi in tua khawpi pua-a amah a muh leh, sisan phula mi in, ngawha om mi a that thei ding a, tualthata mawh ahi kei ding hi. 28 Siampilian sih mateng, tua bukna khawpi ah, tua ngawha ompa a om teitei ding ahi. Siampilian sih nung kiain ama' gam ah a kik thei ding hi. 29 Na tenna peuh uah, hong om ding khangsawn sawn donga noute adinga danin a ngiat hiaite ahi. 30 Mi that mi khat peuh, theihpih mite' theihpihna pansan kia-a tualthata thah ding ahi. Mi khat kia theihpihna pansana bel kuamah thah ding ahi kei hi. 31 A si taak tualthat mi' hinna ading tatna saang kei un. Amah thah teitei ding ahi. 32 Bukna khawpi-a tailut mi kuapeuh, siampilian sih ma-a ama' gam sunga a teen theih nadinga sawlkik dingin tatna sum saang kei un. 33 Noute' omna gam buahsak kei un. Sisan suahna in gam a buahsak a, sisan suah mi' sisan mah suah louhin, sisan suahna gam adingin khuhna a kibawl thei kei hi. 34 Noute teenna gam, tu-a ka tenna ninsak kei un. Ahang bel, Kei, Tangtawn Toupa Israel laka teeng ka hi, chi in, a chi hi.
Zelofehad Tanute' Goutan
1 Makir' tapa Gilead beha innkuan lutangte tua, Josef suante' behte hong pai uh a, Mosi leh makaite leh Israel innkuan lutangte mai ah thu a gen uhi. Makir bel Manase' tapa ahi. 2 Amaute'n: Israelte kianga goutan dinga, aisana gam pe dinga Tangtawn Toupa'n nang ka toupa uh thu hon piak laiin, ka sanggampa uh Zelofehad' gam a tanute pe dingin nang thu hon pia hi. 3 Tua numeite'n Israel laka namdang pasalte kitenpihta le uh, ka pu ka pa uapan a goutante uh lakkika om dinga, a kitenpih uh namte' goutana behlap ding a suak hi. Tua hi leh, koute kianga piak goutan laka bangzah hiam lakmanga om ding ahi. 4 Israelte adinga Jubili kum hong tun chiangin,a goutan uh a kitenpih uh namte goutana kibehlap ding ahi a, ka pu ka pate uh nam gouluah apan amaute' gouluah kilakhe ding ahi, a chi uhi. 5 Tua khitin, Tangtawn Toupa' thupiakin, Mosi in Israelte kiang ah hiai thupiak a pia hi: Josef suante beh in a thugen uh a dik ahi. 6 Zelofehad' tanute adinga Tangtawn Toupa' thupiak hiai ahi. A pa uh' nam beh sunga a ut peuh uh a kitenpih thei ding uh. 7 Israel michih in a pu a pate apan nam gouluah gam nei ding ahih manun, Israel gam gouluah gam peuhmah nam khat apan nam dang ah a paisawn ding ahi kei hi. 8 Israel nam khat peuh sunga gouluah gam luah tanu peuhmah in a pa' nam sunga beh kua hiam khat a kitenpih teitei ding ahi. Tuachi-in, Israel mi peuhmah in a pu a pa apan gouluah gam tang thei ding hi. 9 Israel nam peuhmah in a gouluah gam a tandet ding ahih manin, gouluah gam pen nam khat apan nam dang ah a paisawn kei ding hi, a chi hi. 10 Tuachi-in, Tangtawn Toupa'n Mosi thu a piak bangin, Zelofehad' tanute'n a hih uhi. 11 Zelofehad' tanute, Mala, Tirza, Hogla, Milka leh Noa in a pa uh lampanga a sanggam uh hikhate a kitenpih uhi. 12 Josef tapa Manase suante laka behte sunga mite a kitenpih uh a, a gouluahte uh a pa' beh leh nam ah a omden hi. 13 Hiaite Jerikho gal, Jordan lui kiang Moab phaizangtea, Tangtawn Toupa'n Mosi tungtawna thu a piakte leh dante ahi.
Horeb Nutsiat ding Thupiak
1 Jordan lui suahlam gamdai-gamkeu Araba-a, Israelte khempeuh kianga Mosi' thugente hiaite ahi. Hiai gamdai-gamkeu bel, Tuipi San gala phaizang, Paran leh Tofel, Laban, Hazeroth leh Dizahab kikala om ahi. 2 Seir Mual lampi tawna paiin, Horeb apan Kadesh Bernea dong, ni sawm leh ni khat lam ahi. 3 Tangtawn Toupa'n Israelte tawh kisaia, Mosi thu a piak khempeuh, Mosi in amaute kiang ah a kum 40-na, a kha sawm leh khatna, a ni khat ni-in, a phuang hi. 4 Hiai bel, ama'n Heshbona vaihawmpa, Amor kumpipa Sihon leh Ashtaroth leh Edreia vaihawmpa Bashan kumpipa Og, a zawh nung ahi. 5 Mosi in Jordan lui suahlama Moab gam ah hiai dan a genchian panta a: 6 Horeb ah, Tangtawn Toupa i Pathian in eite kiang ah thu a gen a: Hiai mual ah na om sawt huntawk uh. 7 Kisa unla, giahphual suanin, Amorte' tanggam, Araba kim-le-kiang teng, tua mualtung gamte, Negev leh tuipi geite, Kanante' gam leh Lebanon leh lufratis luipi donga teeng namte kianga lut-in pai un. 8 Ngai un! kon piak gam na mai uah a om. Tangtawn Toupa'n na pu na pate uh, Abraham, Isak leh Jakob leh amaute nunga a chi suante uh kianga pe ding chi-a a kichiamna tua gam ah valut unla, va luah un, a chi hi.
Makaite Sehna
9 Tua hun laiin, ke'n noute kiang ah: Noute kei kia puak dingin van gik lua na hi uh. 10 Tangtawn Toupa' na Pathian un noute hon pungsak a, ngai un, tuni-in vana aksi zahin na tamta uh. 11 Tangtawn Toupa, na pu na pate uh' Pathian in noute a leh 1,000 khat sanga tam zawin hon pungsak henla, a hon chiamsa bangin, hon vualzawl hen aw, 12 Ahihhangin, na buainate uh, na puakgikte uh leh na thubuaite uh kei kia'n bangchi-in ka paw zou dia? 13 Na namte uh laka a pii, a theisiam leh mite' zahtak bang zah hiam teelkhia unla, amaute, noute tunga makaiin ka koih ding, ka chi hi. 14 Noute'n non dawng uh a: Na thu sawm a hoih ahi, na chi uhi. 15 Tuachi-in, na namte uh laka makai a pii a theisiam leh mi suanhuaite ka la a, noute tunga thunei ding, 1000 pawlpawl tunga makai, 100 pawlpawl tunga makai, sawmnga nga tunga makai leh sawmkhat khat tunga makai hi dingin leh nam uliante hi dingin ka sep hi. 16 Tua hun laiin, noute' thukhente thu ka pia a: Na sanggamte uh kala thubuaite ngaikhia unla, Israel sanggamte kal hi-in, amaute laka khat leh gamdang mi khat kal hita leh, a diktakin thu khen un. 17 Thukhenna ah deihsaktuam nei kei un. A neu a lian zong ngaikhe tuak un. Thukhenna Pathian-a a hih manin, mihing kuapeuh zong lau kei un. Noute adinga thu haksa lua peuhmah ka kiang hon tun un. Ke'n ka na ngaikhe ding, ka chi hi. 18 Tua hun laiin, na hih ding peuhmah uh kon hilh hi.
Enkhete Sawlna
19 Tua khitin, Tangtawn Toupa, i Pathian in eite thu hon piak bangin, Horeb apan i kipankhia uh a, na muhsa uh tua gamdai-gamkeu lianpi leh lauhuai khempeuh tawnsuakin, Amorte' tanggam manawh-in i pai uh a, Kadesh Barnea i tung uhi. 20 Tua khitin, noute kiang ah: Tangtawn Toupa i Pathian in eite hon piak ding Amorte tanggam na tungta uhi. 21 Tangtawn Toupa na Pathian un na mai uah tua gam a koih en un. Tangtawn Toupa, na pu na pate uh' Pathian in noute hon hilh bangin, valut unla, gam va luah un. Lau kei un. Lungke sam kei un, kon chi hi. 22 Tua khitin, noute navekun ka kiang ah nong pai uh a: Eite adinga gam va vel ding leh, zuih ding lampi leh i tun nading khawpite tawh kisai thu hon tun kik dingin i mai ah mite sawl ni, na chi uhi. 23 Tua ngaihdan hoih dingin ka um a, tuachi-in, na lak ua mi sawmlehnih, nam khat laka khat zel, ka telkhia hi. 24 Amaute a kuankhia uh a, tua tanggam ah a paitou uh a, Eshkol Phaizang hong tung uh a, a gam a vel uhi. 25 Tua gamgah bang zah hiam hon pua uh a, eite kiang hon tun uh a, thu hon tunin: Tangtawn Toupa i Pathian in eite gam hon piak gam hoih ahi, a chi uhi.
Tangtawn Toupa tunga Helna
26 Ahihhangin, noute na kuantou nuam kei uh a, Tangtawn Toupa na Pathian uh thupiak na helsan uhi. 27 Na puanbukte uah na phun uh a: Tangtawn Toupa'n eite hon mudah a, Amorte' hihmanthat dinga amaute khut sunga hon pe dinga, Aigupta gam apan hon piikhia ahi maimah! 28 I sanggamte'n: Tua mite eite sanga hatzaw leh sang zaw ahi uh. Tua khawpite zong lian a, vaan sun kulhbaangte nei ahi uh. Anakte nangawn tua ah ka mu uh, chi uh a, hon lungkesak uh hiven, koia paitou thei ding i hia? na chi uhi. 29 Ahihhangin, ke'n noute kiang ah: Amaute lauin liing kei un. 30 Tangtawn Toupa, na Pathian uh noute' maia pai dingpa'n noute adingin Aigupta gam leh Gamdai-gamkeua na mitmuh ua a hih banga, noute adinga hon dousak ding ahi. 31 Pa in a tapa a puak banga, hiai mun na tun dong uh, lamtawna Tangtawn Toupa'n noute hon puakna na muta uhi, kon chi hi. 32 Hibang hinapi, Tangtawn Toupa na Pathian uh na muang kei uh. 33 Na zinna ua zana meikuang, suna meipi-a na mai ua pai a, noute' giahphual sat nading munte zong ding leh, na pai nading uh lampi hon lak dinga paipa amah na muang kei uh. 34 Tangtawn Toupa'n na thugen uh a zak takin, a heh a, a kichiam a: 35 Hiai khang giloute lak apan kuamah in, na pu na pate uh kianga piak ding chi-a ka chiam, tua gam hoih a mu kei ding. 36 Jefune' tapa Kaleb loungal kuamah in a mu kei ding. Ama'n bel, a mu ding. Ama'n Tangtawn Toupa a lungtang khempeuh-a a zuih manin, a khe-a a sikna chiang chiang gam, amah leh a suante kiang ah ka pe ding, a chi hi. 37 Noute hangin Tangtawn Toupa kei tung ah zong a heh a: Nang zong tua gam sung na lut kei ding. 38 Ahihhangin, nang hon huhpa, Nun' tapa Joshua a lut ding. Ama'n tua gam luah dinga Israel makaih ding ahih manin, amah hanthawn in. 39 Sal-a kaih hi ding na chih uh na taneute uh, tuni-a a sia a pha khen thei nailou na tapate uh tua gam a lut ding uh. Amaute kiang ah tua gam ka pe ding a, amaute'n a luah ding uh. 40 Ahihhangin, noute zaw kihei unla, Tuipi San lam manawh lampi zuiin gamdai-gamkeu lam zuanin kipankhia un, a chi hi. 41 Tua khitin, non dawng uh a: Tangtawn Toupa tung ah ka khialta uh. Tangtawn Toupa'n koute thu hon piakte khempeuh bangin, ka kuantou ding uh a, ka dou ding uh, na chi uhi. Tuachi-in, tanggama kuantouh ding pen baihlam ding sain noute na kigalvan chiat uhi. 42 Ahihhangin, Tangtawn Toupa'n ka kiang ah: Amaute kiang ah: Noute hon ompih lou ding ka hih manin, kuantou kei unla, va-dou kei un. Na melmate uh zawha om ding na hi uh, chi-in amaute hilh in, hon chi hi. 43 Tua bangin, noute kon hilh a, ahihhangin, na ngaikhe nuam kei uh. Tangtawn Toupa' thupiak na helsan uh a, kisatheiin tanggam ah na kuantou uhi. 44 Tua tanggama teeng Amorte noute dou-in hong kuankhia uhi. Khuailal bangin noute hon delh uh a, Seir apan Horma dongin hon phukpai uhi. 45 Noute nong kik uh a, Tangtawn Toupa' mai ah na kap uhi. Ahihhangin, ama'n na kahnate uh a ngaihsak kei a, noute hon bilhumsan hi. 46 Tuachi-in, Kadesh ah ni tampi na taam uh a, tua laia na hun zatbei sung teng uh a sawt hi.
Gamdai-gamkeua Vaakthapna
1 Tua khitin, i kinunghei uh a, Tuipi San lam lampi zuiin, gamdai-gamkeu lam ah i kipankhia uhi. Tangtawn Toupa' hon thuhilh bangbang ahi. Ni tampi sung Seir tanggam kimvelin i pai uhi. 2 Tua khitin, Tangtawn Toupa'n ka kiang ah: 3 Hiai tanggam kimvela na pai sung uh a sawtta. Tu'n mallam ah kihei un. 4 Mipite kiang ah hiai thupiakte pia in: Na sanggamte uh, Esau suan Seir tanggama teengte' gama paisuak dek na hi uh. Amaute'n noute hon lau ding uh, ahihhangin, pilvang mahmah un. 5 Amaute gal bawl dingin hehsak kei un. Ahang bel, amaute' gam noute hon pe lou ding, na khepek ngakna khop uh zong hon pe lou ding ka hi. Esau kianga, a tan dinga tua Seir tanggam ka piaksa ahi. 6 Amaute apan na annekte uh ngun dangka in lei unla, na tuidawnte uh zong ngun dangkain lei un, a chi hi. 7 Tangtawn Toupa, na Pathian un na khut nasepte khempeuh uh hon vualzawl hi. Hiai gamdai-gamkeu zapi-a na zin sung uh noute hon veng a, hiai kum 40 sung, Tangtawn Toupa na Pathian un noute hon ompih a, bangmah na tasam kei uhi. 8 Tuachi-in, i sanggamte, Esau' suante, tua Seir tanggama teengte i paikheng uhi. Elath leh Ezion Geber apan hong paiin, Araba lampi apan i kihei uh a, Moab gamdai-gamkeu zuiin i khualzin uhi. 9 Tangtawn Toupa'n ka kiang ah: Moabte hihbuai kei unla, gal bawl dingin hehsak kei un. A gam uh neukha zong hon pe lou ding ka hi. Lot' suante kianga, a tan ding ua, Ar gam ka piaksa ahi, a chi hi. 10 Tua-a na teengte Emimte ahi uh a, mi hat leh tamte, Anakte banga din sangte ahi uhi. 11 Anakte bangin, miliante ahi uh a, Moabte'n amaute Emimte, a chi uhi. 12 Seir ah Horte a na teeng uh a, ahihhangin, Esau' suante'n amaute a hawlkhia uhi. A mai uah Horte a hihmangthang uh a, amaute mun ah a teeng uhi. Tangtawn Toupa'n Israelte luah dinga a piak gama Israelte' hih bangbanga hih uh a hi ve. 13 Tua khitin, Tangtawn Toupa'n: Tuin kisa unla, Zered Phaizang kaan un, hon chi a, tuachi-in, tua phaizang i kaan uhi. 14 Kadesh Barnea i nutsiat a, Zered Phaizang i kaan nung, kum 38 a beita hi. Tua hun sungin, Tangtawn Toupa amaute kianga a kichiam bangin, tua khanga galdou thei pasal khempeuh giahphual apan a mangthang vekta uhi. 15 Tangtawn Toupa'n giahphual apan amaute a beisiangsak sipsip mateng, ama' khut in amaute dou ahi mahmah hi.
Amonte
16 Hiai mipite laka galdou thei pasalte a sihbei takun, 17 Tangtawn Toupa'n ka kiang ah thu a gen a: 18 Tuni-in, Moab gamgi na kaan ding uh a, Ar Khawpi ah na pai ding uh ahi. 19 Amonte kiang na tun chiangun, amaute buaisak kei unla, galbawl dingin zong hehsak kei un. Ahang bel, Amonte gam peuhmah na tan ding ua hon pe lou ding ka hi. Lot' suante' luah dinga ka piaksa ahita, a chi hi.
Miliante
20 Tua gam zong, tua gama na teeng masa miliante gama ngaih ahi. Amonte'n bel amaute Zamzumte, chi-in a minvawh uhi. 21 Amaute bel mihatte ahi uh a, tam zong a tam uhi. Anakte banga din sang ahi uhi. Tangtawn Toupa'n amaute, Amonte' mai apan a hihmangthang a, Amonte'n amaute a hawlkhia uh a, amau' mun ah a teeng uhi. 22 Tangtawn Toupa'n Esau' suante' maia Horte a hawlkhiak a, tua Seir-a teeng Esau' suante adinga a hihsak bangbang hihsak ahi. Esau' suante'n Horte hawlkhiain amaute' mun ah tu dong a teeng uhi. 23 Gaza donga khawtate-a teeng Avimte ahih leh, Kaftor apan hong paikhia Kaftorte'n a hihmangthang uh a, amaute' mun ah a teeng uhi.
Heshbon Kumpipa Sihon Zawhna
24 Tangtawn Toupa'n: Tuin kisa unla, kuankhia unla, Amon Lui kaan un. Ngai in, na khut sung uah Heshbon kumpipa, tua Amor mi Sihon leh a gam kon peta hi. Tua gam luah panta unla, amah dou un. 25 Tuni mahmahin vannuaia namte khempeuh tung ah noute launa leh mulkimna ka koih panta ding. Noute tawh kisai thu a za ding uh a, a liing ding uh a, noute hangin a mangbang ding uhi, a chi hi. 26 Ke'n Kedemoth gamdai-gamkeu apanin, Heshbon kumpipa Sihon kiang ah thupawte sawlin kilemna ka tah a: 27 Na gam sung kantanin koute hon paisuaksak in. Lamlian taangpi ka zui ding uh a, veilam hiam taklam hiam ah zong ka pial kei ding uh. 28 Nek ding an leh dawn ding tui hon leisak unla, a man ngun dangka-in kon pe ding uh. Khein hon paisuaksak lei un. 29 Seir-a teeng Esau' suante leh Ar-a teeng Moabte'n koute hon paisak bangun, Tangtawn Toupa'n koute hon piak gam ka tun ua, Jordan lui ka kaan mateng uh hon paisak un, ka chisak hi. 30 Ahihhangin, Heshbon kumpipa Sihon in hon paisuaksak nuam kei hi. Ahang bel, Tangtawn Toupa na Pathian un noute khutsunga amah hon piak nop man ahi a, Ama'n tuni-a na muh bangun, ama' lungsim a khauhsak a, a lungtang a genhaksak-a ahi. 31 Tangtawn Toupa'n ka kiang ah: Ngai in, na khut sung uah Sihon leh a gam kon pe-panta. Tuin, a gam la panta unla, luah panta un, a chi hi. 32 Sihon leh a mite khempeuh Jahaz muna eite hon tuak a, hon dou dinga hong kuankhiak laiun, 33 Tangtawn Toupa i Pathian in eite khut sung ah amah hon pia a, amah leh a tapate leh a mite khempeuh tawh i thatvek uhi. 34 Tua hunin a khawpite khempeuh i la uh a, i hihse vek sipsip a, numei, pasal leh naupang tawh i hihmangthang khawm vek hi. A suakta himhim i hawi kei hi. 35 Ahihhangin, i laksa khawpite apan ganhonte leh gallak vante bel eima' tan dingin i paw mang uhi. 36 Amon Kuam geia om Aroer khawpi apan tua lui phaia om Gilead gam donga khawpite khat beek zong eite adinga hat lua a om kei hi. Tangtawn Toupa i Pathian in tuate khempeuh hon pevek hi. 37 Ahihhangin, Tangtawn Toupa i Pathian in thu hon piak bangin, Amonte gam koimah, Jabok lui dong hi-in, mualtunga khawpite' kim leh pam gam hita leh na naih kei uhi.
Bashan Kumpipa Og Zawhna
1 Tua khitin, i kihei uh a, Bashan zotna lampi zuiin i paitou uh a, Bashan kumpipa Og, a mite khempeuh tawh Edrei-a eite hon dou dingin hong kuan uhi. 2 Tangtawn Toupa'n ka kiang ah: Amah lau kei un. Amah leh a mite khempeuh leh a gam na khut sung ua hon peta ka hi. Heshbon-a vaihawmpa Amorte kumpipa Sihon na bawl bangun amah bawl un, hon chi hi. 3 Tuachi-in, Tangtawn Toupa i Pathian un Bashan kumpipa leh a mite khempeuh i khut sung ah hon pia hi. Amaute i that vek a, a suakta hawi i nei kei uhi. 4 Tua hun laiin, a khawpite khempeuh i la uh a, khawpi 60-te lak ah, amaute apan lak louh a om kei. Argob gam bup, Bashan gam Og' kumpigam i la vek uhi. 5 Hiai khawpite khempeuh kulhbaang sangpipi leh kongpite leh a kaihna zawlte nei ahi uh a, kulhbaang neilou khawta tampi mahmah zong a om hi. 6 Heshbon kumpipa Sihon i bawl bangbangin amaute i hihmangthang vek a, khawpite i hihgawp a, numei pasal leh naupang i hihmangthang hi. 7 Ahihhangin, gantate khempeuh leh khawpite apan gallak vante bel eite adingin i pawmang vek hi. 8 Tua bangin, tua hun in, hiai Amor kumpipa nihte apanin Jordan lui suahlam gam, Amon Kuam apan Hermon Mual dong i la uhi. 9 Hermon bel Sidonte'n Sirion a chih uh ahi a, Amorte'n Senir a chih uh ahi. 10 Phaizanga khawpite khempeuh, Gilead gam khempeuh leh Bashan gam khempeuh, Saleka khawpi leh Edrei khawpi dong i la uhi. Hiai khawpite bel Bashana teeng Og in a uk ahi. 11 Milian a sibangte laka khawsuak sun bel Bashan kumpipa Og kia ahi. A lupna sika kibawl ahi a, tong kua-a sau, tong li-a za ahi. Tua lupna, Amonte' khua Raba ah om lai hi lou hia?
Nam Nih leh Akimtekianga Gam Piak
12 Tua huna i gam lak thak apan, Amon Kuam kianga om Aroer mallam gam teng Reubente leh Gadte kiang ah ka pia hi. Tua ah Gilead tanggam kimkhat leh a khawpite tawh a tel hi. 13 Gilead gam omlai teng leh Og' kumpigam, tua Bashan gam khempeuh bel, Manase nam kimkhat kiang ah ka pia hi. Bashan gama Argob gam khempeuh bel, miliante' gam a kichi sek hi. 14 Manase' suan Jair in Argob gam khempeuh, Geshurte leh Maakathte' gamgi dong a la hi. Amah tamin a gam min a kiphuak a, tuni dongin Bashan earn teng Havoth Jair a kichi hi. 15 Tua baan ah, Gilead gam Makir ka pia hi. 16 Ahihhangin, Reubente leh Gadte kiang ah Gilead apan Amon Kuam leh Jabok lui dong gam ka pia hi. Tua Amon Kuam laizang tak gamgi ahi. Jabok lui lah Amonte gamgi ahi. 17 A tumlam gamgi bel Araba-a Jordan lui, Kinereth apan Araba Tuipi dong, Pisga mualpang ken nuaia pai ahi. Araba Tuipi bel Chi Tuipi ahi. 18 Tua hun laiin, noute thu kon pia a: Tangtawn Toupa na Pathian un hiai gam na luah dingun hon peta. Ahihhangin, a thaching, kidou dinga kigalvante khempeuh, na Israel sanggamte uh mai ah na galkah masa ding uh ahi. 19 Na zite uleh na tate uleh na gantate uh bel, kon piaksa khawpite ah a om thei ding uh. Ganta lah na hau uh chih ka thei hi. 20 Tangtawn Toupa'n noute banga na sanggamte uh tawlngakna a piak a, amaute'n zong Tangtawn Toupa na Pathian un Jordan gal gam a piak ding a laak sam mateng uh, tua khawpite ah a om thei ding uh. Tua nung chiangin, noute gamluah ding hon piak ah na paikik chiat ding uh ahi, kon chi hi.
Makai Kikhekna
21 Tua hunin, Joshua thu ka pia a: Tangtawn Toupa na Pathian un hiai kumpipa nihte tunga a hihtak khempeuh na mitin na muta. Tangtawn Toupa'n na pai nading kumpigamte khempeuh tung ah zong tua bang mahin a hih ding. 22 Amaute lau ken. Tangtawn Toupa na Pathian mahmah un noute adinga hon dousak ding ahi, ka chi hi. 23 Tua hunin, Tangtawn Toupa kiang ah ka ngen ngutngut a: 24 Toupa, Tangtawn Pathian aw, na sila kiang ah na thupina leh na bantha hat non musak panta. Na thilhihte leh nasep hattak na septe bang hih thei, vantung leh leitung ah bang pathian a om a? 25 Kon ngen ahi, hon galkahsak inla, Jordan gala gam hoih tanggam hoih leh Lebanon hon musak in, ka chi hi. 26 Ahihhangin, noute hangin Tangtawn Toupa ka tung ah a heh a, kei hon ngaikhe kei hi. Tangtawn Toupa'n ka kiang ah: Tua teng kichingta. Hiai thu ka kiang ah gen ngei nawn ken. 27 Pisga Mual dawn ah kahtou inla, tumlam, mallam, simlam leh suahlam en in. Hiai Jordan lui kan lou ding na hih manin, na mitin tua gam en in. 28 Ahihhangin, Joshua nna guan inla, hanthawn inla, hatsak in. Ama'n hiai mite makaih ding a, na muh ding tua gam luahsak ding ahi, a chi hi. 29 Tuachi-in, Beth Peor kianga luiphai ah i taam hi.
Thukhun leh Thumanna
1 Israel aw, tuin noute zuih dinga kon sinsak ding danthusehte leh dante za un. Na hin theih nading uleh, Tangtawn Toupa na pu na pate uh Pathian in hon piak ding tua gam lut a, na luah theih nadingun tuate zui un. 2 Noute kon thupiak behlap kei unla, khiam sam kei un. Tangtawn Toupa na Pathian uh' thupiak kon piakte zui un. 3 Tangtawn Toupa'n Baal Peor-a a hih na mit-un na muta uhi. Tangtawn Toupa na Pathian un, Baal Peor zuite peuhmah na lak ua pan a hihmangthang a, 4 ahihhangin, Tangtawn Toupa lenkip noute khempeuh bel tuni dongin na nungta lai uhi. 5 Ngai un, Tangtawn Toupa ka Pathian in kei hon thupiak bangin, danthusehte leh dante kon sinsakta, tuate mah, valut a, na luah dek uh tua gam sunga na zuih ding uh ahi. 6 Hiai danthusehte tawh kisai khempeuh za a: Hiai nam thupi, a pii leh a theisiam mite ahi taktak uh, chi ding namte kiang ah hiai in na pilna uleh na theihsiamna uh lak ding ahih manin, pilvangtakin tuate zui un. 7 Tangtawn Toupa i sap tenga i kiang naia om tua Tangtawn Toupa i Pathian banga, amaute kiang naia om pathian nei nam thupi dang kua oma eita? 8 Tuni-a na mai ua ka koih hiai danthusehte leh dan diktat khempeuh bang nei nam thupi kua oma eita? 9 Pilvang photphot unla, na mit ua na muhtakte uh na mangngilh louh nadingun, ahih kei leh, na nuntak sung teng ua na lungtang uapan na tolhmangsak louh nadingun, nou leh nou hoihtakin kikem un. Na tate uleh amaute nunga a tate uh kiang ah tuate theisak un. 10 Horeba Tangtawn Toupa na Pathian uh maia na din ni uh thei gige un. Tua ni-in Ama'n ka kiang ah: Mipite'n gam sunga a teen sung teng uh kei hon zahtak dan a sin theih nading uleh, a tate uh kianga a sinsak theih nadingun, ka thute za dingin mipite kaikhawm in, hon chi hi. 11 Non naih uh a, tua mual bul ah na ding uhi. Tua laiin, mei in van sun zen-in tua mual a kaang a, meipi vom leh mial in a khuh lai hi. 12 Tua hun laiin, Tangtawn Toupa'n meikuang lak apan noute kiang ah thu a gen a, a thugen gingte na za uh a, lim leh mei bel na mu kei uh. Aw ging kia a om a, 13 Ama'n a thukhun na zuih dingun na kiang uah a phuang a, tua Thupiak Sawmte ahi suangpek nih tunga a gelh. 14 Galkaha na luah dek uh gama na zuih ding uh, tua danthusehte leh dante sinsak dingin, Tangtawn Toupa'n tua hun mahin kei hon hilh ahi,
Milim Biak Khamna
15 Horeba meikuang lak apan Tangtawn Toupa'n noute kianga thu a gen ni-in, lim leh mei bangmah na mu kei uh. Tua ahih manin, na hinna uh pilvangtakin kem un. 16 Hong segawp a, khuakthawh milim himhim bawl lou dingin pilvang un. Numei batpih hiam, pasal batpih hiam bawl kei un. 17 Leitunga ganhing khatpeuh batpih bawl kei un. Huihkhua-a leng vasa khatpeuh batpih bawl kei un. 18 Leilaka bokvak ganhing khatpeuh batpih bawl kei un. Nuailam tui sunga ngasa khatpeuh batpih bawl kei un. 19 Vanlam ena na daktouh chiangun, ni leh kha leh aksite na mu ding uhi. Hiaite vanlam thilhonpi ahi uhi. Hiai vanlam thilhonpi Tangtawn Toupa na Pathian un vannuaia namte khempeuh kianga a piak ahi. Hiaite' maia kun ding leh a nna uh sem dinga zolzawh-a na om louh nadingun, pilvangtakin kikem un. 20 Noute na hih uleh, Tangtawn Toupa'n sik haltuina meiphual Aigupta apan hon lakhia a, tu-a na hihna bang ua, a goutan nam hi dinga hon piikhiak na hi uhi. 21 Na thugente uh hangin kei tung ah zong Tangtawn Toupa a heh a, Jordan lui ka kan kei ding chih leh, Tangtawn Toupa'n na gouluah ding ua hon piak dek tua gam hoih ka lut kei ding chih kiptaka kichiamin a genta hi. 22 Hiai gam ah ka si ding a, Jordan lui ka kaan kei ding a, ahihhangin, noute'n bel kaan dek a, tua gam hoih luah dek na hi uhi. 23 Tangtawn Toupa'n noute tawh kala a bawl thukhun mangngilh lou dingin pilvang un. Tangtawn Toupa'n a kham thil khat peuh lim leh mei neiin milim kibawl kei un. 24 Ahang bel, Tangtawn Toupa na Pathian uh zaw kangmang thei mei, thikthusia Pathian ahi. 25 Tate leh tute na neih khit chiang uleh, tua gama sawt na teen chiang ua, nong tat siatgawp uh a, milim khat peuh na bawl uleh, Tangtawn Toupa na Pathian uh' mitmuha thil gilou hih a, amah na hehsak uleh, 26 gam luah dinga Jordan lui na kaan dek uh tua gam apan hihmanthatin na om pah ding uh, chih theihpihte hi dingin lei leh vaan tuni-in ka sam hi. Tua gam ah sawt na teeng het kei ding uh a, hihmanthat sipsipin na om ding uhi. 27 Tangtawn Toupa'n namdangte lak ah hon thehthang ding a, Tangtawn Toupa'n hon hawlmangna tua namte lak ah tawmchik kia na suakta ding uhi. 28 Tua ah mihing' bawltawm sing leh suang pathiante, muh lah mu thei lou, zak lah za thei lou, nek lah ne thei lou, nap lah nam theiloute' nna na sem ding uhi. 29 Ahihhangin, tua apan Tangtawn Toupa na Pathian uh na zon uleh bel, na lungtang khempeuh uleh na hinna khempeuh utawh Amah na zon naak uleh, amah na mu ding uhi. 30 Ni nunungte-a hibang teng hong tunga na mangbat chiangun, Tangtawn Toupa na Pathian uh kiang ah na kik ding uh a, a thu na mang ding uhi. 31 Ahang bel, Tangtawn Toupa na Pathian uh zahngaithei Pathian ahi-a ahi. Noute hon taisan hiam, hihmangthang hiam, na pu na pate uh tawh kala thukhun, amaute kianga kichiam zena a hihkip mangngilh hiamin a om kei hiai ding hi.
Tangtawn Toupa Pathian
32 Ni masa lam, noute' hun ma thu, Pathian in leitunga mihing a siam ni apan thu tu'n dong un. Hibanga thil thupi himhim a tung ngei hia, ahih kei leh, tua bang a kiza ngei hia? Vaante mong khat apan mong lang khat dongin dong un. 33 Noute'n na zak ua na hin bangun, meikuang lak apan Pathian' aw nam dang in zatain a hing ua hia? 34 Pathian dang himhim in ze-etnate, chiamtehna lamdangte leh thillamdangte, kidounate leh khut hat leh banzakin namte lak apan nam khat amah adingin a la ngei ahia? Tangtawn Toupa na Pathian un thilhih thupi leh lauhuai zanga, noute adinga, na mitmuh ua Aigupta-a a hih bang a hih ngei ahia? 35 Noute'n, Tangtawn Toupa, Pathian ahi, chih na theih nading ua hiai thilte noute kianga laha om ahi. Amah lou a dang om lou ahi. 36 Noute hon thunun dingin vaan apan a aw hon zasak a, leitung ah ama' meikuang thupi hon lak a, tua meikuang lak apan a thugente na za uhi. 37 Na pu na pate uh a it manin amaute nunga a suante uh hon teel a, amah mah in hon ompihna leh hatna thupi-in Aigupta gam apan hon piikhia ahi. 38 Tua bel, noute' mai apan, noute sanga lianzaw leh hatzaw namte hawlkhia a, amaute gam sung hon tun a, tuni-a banga na gouluah ding ua hon piak a tup man ahi. 39 Tangtawn Toupa zaw tung vaan ah leh nuai lei ah Pathian ahi, chih tuni-in sang unla, lungtang ah vom un. A dang kuamah om lou ahi: 40 Noute ading leh noute nunga na tate uh adinga a hoih nadingin leh, noute-a hiden dinga Tangtawn Toupa, na Pathian un gam hon piak sunga na dam sawt theih nadingun, tuni-a noute kon piak a danthusehte leh thupiakte zui un, a chi hi.
Bukna Khawpite
41 Tua khitin, Mosi in Jordan suahlam ah khawpi thum a septuam hi. 42 Tuate bel, mi khat peuh in, muhdahna nei masa leh tup mawng hi lou a, a innveng a thah khak leh, a tai theih nading ahi. Hiai khawpite khat peuh ah a tailut thei ding a, a hing thei ding hi. 43 Tua khawpite hiaite ahi: Reubente' gam gamdai-gamkeua Bezer khawpi, Gadte gam Gileada Ramoth khawpi leh, Manasete' gam Bashana Golan khawpi ahi.
Dan
44 Mosi in Israelte' maia a lui Dan hiai ahi. 45 Hiaite Mosi' piak theihsaknate, danthusehte leh dante ahi. Tua bel, Aigupta gam apan hong paikhiak lai uleh, 46 Sihon' gam, Jordan lui suahlama Beth Peor kiang luiphaia a om lai ua a piak ahi. Sihon bel, Amorte kumpipa, Heshbona vaihawmpa, Mosi leh Israelte'n Aigupta gam apan hong paikhiak lai ua a zawhpa uh ahi. 47 Amaute'n Sihon gam leh Bashan kumpipa Og' gam a luah uhi. Amaute gel bel, Jordan lui suahlama Amor kumpipa nihte ahi uhi. 48 Hiai sam bel Amon Kuam geia Aroer apan Sion Mual donga kizalh ahi. Sion Mual in min dang a nei a, Hermon ahi. 49 Tua gam in Jordan lui suahlama Araba luiphai khempeuh, Pisga mual pang nuaia Araba Tuipi dong a uap hi.
Dan Sawmte Piakna
5 Mosi in Israelte khempeuh a sam a, a kiang uah: Israel aw, tuni-a na zak ua ka phuan danthusehte leh dante ngai un. Sin unla, zui ngeingei dingin pilvang un. 2 Tangtawn Toupa eite Pathian in Horeb ah eite tawh kal ah thukhun khat a bawl hi. 3 Tangtawn Toupa'n hiai thukhun, i pu i pate tawh kala a bawl ahi kei a, tuni-a hiaia oma nungta lai eite khempeuh tawh kala a bawl ahi zaw. 4 Tangtawn Toupa'n tua mual tung ah, meikuang laka pan noute kiang ah kimaituahin thu a gen hi. 5 Tua laiin, meikuang lau a, muala na paitouh louh manun, Tangtawn Toupa' thugen noute kianga phuang dingin, Tangtawn Toupa leh noute kal ah kei ka ding hi. Ama'n: 6 Kei Tangtawn Toupa, na Pathian Aigupta gam, saltanna gam apan hon piikhepa ka hi. 7 Ka maia keimah lou pathian dangte na neih het louh ding ahi. 8 Tung vaan ah hiam, nuai lei ah hiam, nuai tuite ah hiam, thil khatpeuh lim leh mei nei batpih milim na kibawl het louh ding ahi. 9 Amaute' maia na kuun het louh ding, a nna uh zong na sep het louh ding ahi. Ahang bel, kei Tangtawn Toupa, na Pathian thikthusia Pathian, kei hon mudah pate' khelhna a tate uh a khang thumna leh khang lina chiang dong gawtpa, 10 ahihhanga kei hon it a, ka thupiakte zuite bel a a sang a sang tunga itna muanhuai langsakpa ka hi, 11 Tangtawn Toupa na Pathian' min na mawk zat hetlouh ding ahi. Ahang bel, Tangtawn Toupa'n ama' min mawk zat khat peuh mawhneilouin koih lou ding ahi. 12 Tangtawn Toupa na Pathian uh' hon thupiak bangin, Sabbath ni siangthoua zangin na tang ding ahi. 13 Ni guk sung sem gimin, na nna na sem ding ahi. 14 Ahihhangin, a ni sagih ni bel Tangtawn Toupa na Pathian adinga Sabbath ni ahi. Tua ni-in nna himhim na sem ding ahi kei. Na tapa hiam, na tanu hiam, na sila pasal hiam, na sila numei hiam, na bawngtal hiam, sabiltung hiam, gantate khat peuh hiam, na kongpite sunga gamdang mi hiam in zong nna a sem ding uh ahi het kei. 15 Aigupta gama sala om na hih lam uleh, Tangtawn Toupa na Pathian un khut hattak leh baan zaka tua apan hon piikhia ahih lam thei gige in. Tua bang ahih manin, Tangtawn Toupa na Pathian in Sabbath ni tang dinga thu hon pia ahi. 16 Tangtawn Toupa'n thu hon piak bangin, na nu leh na pa zahtak in, tuachi-in na khankhua sawt ding a, Tangtawn Toupa na Pathian in hon piak ding gam ah nang adingin a hoih thei ding hi. 17 Tual na that ding ahi het kei. 18 Ang na kawm ding ahi het kei. 19 Guk na gu ding ahi het kei. 20 Na innveng tung ah theihpih taklouin na pang ding ahi het kei, 21 Na innvengpa' zi na deihgawh ding ahi het kei. Na innveng' inn hiam, gam hiam, a sila pasal hiam, a sila numei hiam, a bawngtal hiam, a sabiltung hiam, ama' van neih hiam deihgawhin na haza ding ahi het kei, a chi hi.
Israelte' Dawnna
22 Mual tunga kikhawm noute khempeuh kianga, meikuang, meipi leh mial bibek apan aw ngaihtaka Tangtawn Toupa'n a phuankhiak thupiakte hiaite ahi. Ama'n hiaite baan ah, bang mah a behlap kei hi. Tua khitin, suangpek nih tung ah tuate a gelh a, kei hon pia hi. 23 Tua mual meia a kuan laia, tua mial lak apan aw hong pawt noute'n na zak laiun, na nam makaite uleh na upate khempeuh uh ka kiang ah hong hawh uhi. 24 Noute'n ka kiang ah: Ngai in, Tangtawn Toupa koute Pathian in a thupina leh letna hon ensak a, meikuang lak apan a aw ka zata uhi. Pathian in mi a houpih leh zong tua mi a nungta thei lai, chih tuni-in, ka muta uhi. 25 Ahihhangin, tu-a banghanga si ding ka hi ua? Hiai meikuang thupi in koute hon kangtum ding a, Tangtawn Toupa koute' Pathian' aw za kik lai le ung, ka si ding uhi. 26 Ahang bel, Pathian hing' aw, meikuang lak apan thugen, koute zak banga za a nungta lai, mihing lak ah kua om ngei ahia? 27 Naih inla, Tangtawn Toupa eite' Pathian' gen khempeuh ngaikhia in. Tua khit chiangin, Tangtawn Toupa eite Pathian in nang hon hilh peuhmah koute hon hilh in. Ka ngaikhe ding uh a, ka zui ding uh, na chi uhi.
Pathian' Dawnna
28 Kei non houpih laiun, Tangtawn Toupa'n a za a, Ama'n ka kiang ah: Hiai mite'n na kianga a gen uh ka za hi. A gen peuhmah uh a hoih hi. 29 A tawntunga amaute leh a tate uh adinga a hoih nadingin leh kei hon laudan a siam nadingun, a lungtangte uh keilam hong nga le uh aw! 30 Pai inla, a puanbuk ua kik dingin amaute hilh in. 31 Ahihhangin, amaute luah dinga ka piak ding gama a zuih ding ua na sinsak ding thupiakte, danthusehte leh dante khempeuh kon piak theih nadingin nang zaw hiah om tadih in, a chi hi. 32 Tua bang ahih manin, Tangtawn Toupa noute' Pathian in, noute hon thupiak zui dingin pilvang un. Taklam ah hiam, veilam ah hiam pialsan kei un. 33 Na nuntak ua, na mavan ua, na luah ding uh gama na khantou nadingun, Tangtawn Toupa na Pathian un noute hon thupiak lampi khempeuh zui suak un.
Dan Sinsak dinga Thupiak
1 Galkai a, na luah ding uh tua gama zui dinga noute hon sinsak dinga, Tangtawn Toupa na Pathian un kei hon thupiak tua thupiakte, danthusehte leh dante hiaite ahi. 2 Tua bel, noute leh na tate uleh, amaute nunga a tate un, na nuntak sung teng ua na zuih ding ua, kon piak dante leh thupiakte ahi. Na nuntak sung teng ua tuate na zuih uleh Tangtawn Toupa na Pathian uh laudan na siam ding uh a, na khantou ding uhi. 3 Israel aw, za inla, zui dingin pilvang in, Tua bel, noute na mavan nading uleh, Tangtawn Toupa, na pu na pate' uh Pathian in noute kianga a gen banga nawitui leh khuaizu-a luang gama nakpitaka nong pun theih nading uh ahi. 4 Israel aw, za in: Tangtawn Toupa i Pathian uh Tangtawn Toupa khat omsun ahi. 5 Na lungtang khempeuh uleh na hinna khempeuh uleh, na hatna khempeuh un Tangtawn Toupa na Pathian uh it un. 6 Tuni-a noute kon piak hiai thupiakte na lungtang ua a om ding ahi. 7 Na tate uh sinsak un. Inn-a na tut chiang uleh, lampi-a na pai lai uleh, na lup chiang uleh na thawh chiangun, tuate gen un. 8 Chiamtehna hi dingin na khut uah bun unla, na taltang uah khim un. 9 Na inn kongbiangte uleh na kongpite uah tuate gelh un. 10 Tangtawn Toupa na Pathian un noute hon piak ding chi-a na pu na pate uh, Abraham, Isak leh Jakob kianga a chiam gam ah hon pilut ding a, noute' lamsa hi lou khawpi lianpipi, 11 noute sepkhiak hi lou thil hoihpipi-a dim innte, noute tawhsa hi lou tuilehte, noute' suansa hi lou grephuante leh oliv singte na luah ding uhi. Ama'n tua gam ah hon piilut a, nea na tai chiangun, 12 Aigupta gam, saltanna mun apan hon piikhepa Tangtawn Toupa mangngilh lou dingin pilvang un. 13 Tangtawn Toupa, na Pathian uh lau dan siam unla, ama' nna sem unla, ama' min louin kichiam un. 14 Pathian dangte, na kiim na pam ua namte' pathiante zui kei un. 15 Ahang bel, Tangtawn Toupa na Pathian uh, noute laka ompa zaw thikthusia Pathian ahi a, na tung uah a hehna a kuang ding a, leitung apan hon hihmangthang kha ding hi. 16 Masa-a na hih bangun, Tangtawn Toupa na Pathian uh ze-et kei un. 17 Tangtawn Toupa, na Pathian uh' thupiakte leh noute hon piak a thu theihsakte leh a danthusehte zui teitei dingin pilvang un. 18 Noute adinga a hoih nading leh, Tangtawn Toupa'n na pu na pate uh kianga kichiam zena a chiam, tua gam hoih na luah zawh nadingun, Tangtawn Toupa' mitmuha a dik leh a hoih hih un. 19 Tua bel, Tangtawn Toupa gen banga, na mai ua na melmate khempeuh uh hawlkhia a, tua gam na luah theih nading uh ahi. 20 Tunung chianga na tapate un: Tangtawn Toupa i Pathian in thupiak noute hon piak a thu theihsakte, a danthusehte leh dante bang genna ahia? chi-a hon dot chiangun, 21 amaute kiang ah: Aigupta gam ah Faro' sila ka na hi uh a, ahihhangin, Tangtawn Toupa'n a baan thahat-in Aigupta gam apana hon piikhia ahi. 22 Koute' mitmuhin, Tangtawn Toupa'n chiamtehna lamdangte leh a thupi leh mulkimhuai thillamdangte, Aigupta gam leh Faro leh a innkawte khempeuh tung ah a sawl hi. 23 Ahihhangin, ka pu ka pate uh kianga piak ding chi-a kichiam zena a chiam gama hon piilut ding leh hon pe dingin, Aigupta gam apan hon piikhia hi. 24 Tuni-a banga eite adinga a hoih nading leh, hawia nungta-a i om nadingin, Tangtawn Toupa'n hiai danthusehte khempeuh zui ding leh, Tangtawn Toupa i Pathian uh lau dan siam dingin thu hon pia. 25 Ama'n thu hon piak banga, Tangtawn Toupa i Pathian' maia hiai dante khempeuh zui dinga i pilvan leh, tua mah eite' diktatna hi ding ahi, chi-in hilh un.
Gam La dinga Thupiakna
1 Tangtawn Toupa na Pathian un noute' lut dekna gam luah dinga hon piilut a, nam tampi noute sanga hatzaw Hitte, Girgaste, Amorte, Kanante, Perizte, Hivte, leh Jebuste, hiai nam sagih noute' maia a hawlkhiak chiangin leh, 2 Tangtawn Toupa na Pathian un noute' khut sunga tuate hon piak chiangin, amaute na that ding uh a, na hihmangthang sipsip ding uh ahi. Amaute tawh kal ah thukhun bawl kei unla, zahngaihna zong lak kei un. 3 Amaute tawh kiteengtuah kei un. Na tanute uh amaute' tapate adingin pe kei unla, amaute' tanute zong na tapate uh adingin pii kei un. 4 Ahang bel, pathian dangte' nasem dingin na tapate uh, kei apan a piimang ding uh a, Tangtawn Toupa' hehna na tung uah a kuang ding a, noute hon hihmangthang pah ding ahi. 5 Amaute tunga na hih ding uh hiai ahi: Amaute' Ashera songte phukpai unla, amaute' milimte meiin haltum un. 6 Ahang bel, noute, Tangtawn Toupa na Pathian uh adinga nam siangthou na hi uhi. Tangtawn Toupa na Pathian un ama' mite, ama' gou manphate hi dinga, leitung maikaiha namte khempeuh lak apan hon teelkhiak na hi uhi. 7 Tangtawn Toupa'n nam dangte sanga na tamzawk man ua hon deihthawh a, hon teel ahi kei hi. Noute zaw namte khempeuh laka a tawmpen na hi uhi. 8 Ahihhanga Tangtawn Toupa'n noute hon it a, na pu na pate uh kianga a thuchiam a letkip mana, saltanna mun, Aigupta kumpipa Faro' vangletna apan a baan thahata hon tankhia a, hon tankhia ahi zaw hi. 9 Tua bang ahih manin, Tangtawn Toupa na Pathian uh, Pathian khat om sun ahi chih thei un. Amah zaw Pathian muanhuai ahi a, amah itte leh a thupiak zuite tunga a thukhun leh a zahngaihna khang 1,000 donga lenkippa ahi. 10 Ahihhangin, Amah mudahte bel, a langtangin manthatnain a thuk ding. Amah mudahte a langtanga thuk dingin a zekai kei ding hi. 11 Tua bang ahih manin, zuih dinga tuni-a kon piak thupiakte, danthusehte leh dante zui un. 12 Hiai dante na ngaihkhiak ua, na letkip ua, na zuih uleh, Tangtawn Toupa na Pathian un, na pu na pate uh kianga a thuchiam bangin noute tawh kala a thukhun zahngaihna a lenkip ding hi. 13 Ama'n noute hon it ding a, hon vualzawl ding a, hon pungsak ding hi. Ama'n na pu na pate uh piak ding chi-a kichiam zena a chiam gam sung ah na gil ua gah a vualzawl ding a, na gam gahte uh, buh leh zu thak leh sathau, na bawngnoute uh, na belam uleh kelnoute uh a pungsak ding hi. 14 Nam dang khempeuh sangin noute vualzawl zawkin na om ding uh a, na pasalte uleh na numeite uh kuamah tabeiin a om kei ding uh a, na gantate uh zong nou neilou-in a om kei ding. 15 Tangtawn Toupa'n chinatna khempeuh noute apan a hemkhe ding. Aigupta gama na theih uh natna mulkimhuaite hon thuaksak kei ding a, nou hon mudahte a thuaksak zaw ding hi. 16 Tangtawn Toupa na Pathian un, noute hon piak namte khempeuh na hihmangthang vek ding uh ahi. Lainatna mitin amaute en kei unla, amaute' pathiante' nna zong sem kei un. Ahang bel, tuate noute adinga thaang hi ding uh hiven. 17 Na lungsung uah: Hiai namte eite sanga tam zaw uh hi a, bangchi-a hawlkhe thei ding i hia? na chi mai thei uhi. 18 Ahihhangin, amaute lau kei un. Tangtawn Toupa na Pathian un Faro leh Aigupta gam khempeuh tunga a hih thei gige zaw un. 19 Tangtawn Toupa na Pathian un ze-etna thupite, chiamtehna lamdangte leh thillamdangte zanga, khut thahat leh banzaka noute hon piikhiak dan na mitun na mu uhi. Tangtawn Toupa na Pathian un, tu-a maituah ding na lau uh' namte khempeuh tung ah tua bang mah a hih ding hi. 20 Tua baan ah, noute apan kiselte leh a khawsuak sunte nangawn a manthat vek masiah uh Tangtawn Toupa na Pathian un a lak uah khuaizantate a sawl ding hi. 21 Amaute lauin liing kei un. Noute laka om, Tangtawn Toupa na Pathian uh, thupi leh a lauhuai Pathian ahi. 22 Tangtawn Toupa na Pathian un tua namte, noute' mai ah khat khatin a hawlkhe ding hi. Thakhata a vekpi ua hihmangthang dingin phal na hi kei ding uh, tuachi louin zaw, na kim na kiang uah gamsate a pung kha ding hi. 23 Ahihhangin, Tangtawn Toupa na Pathian un, noute' khut sung ah amaute hon pe ding a, hihmanthat vek ahih mateng uh, nakpitaka manthatnain a mangthangsak ding hi. 24 A kumpipate uh, noute' khut sung ah hon pelut ding a, khua vannuai apan amaute' min na thaimang ding uhi, Amaute na hihmanthat vek mateng uh kuama'n noute hon nang zou kei ding. 25 A khuakthawh milim pathiante uh meia na haltum ding uh ahi. Tuate tunga ngun leh khamte deihgawh kei unla, kilaak kei un. Tua bang na hih uleh, noute hon thangawksak kha ding uhi. Ahang bel, tua mah Tangtawn Toupa na Pathian uh adinga kihhuai ahi. 26 Thil kihhuai na inn sung uah lalut kei un, tua banga na hih uleh, tuate banga hamsiatin na om ding uhi. A kiha kihin a huatin hua un. Ahang bel, tuate hamsiat thil ahi uhi.
Tangtawn Toupa Theih Gige ding
1 A nuntak theih nading uh, na pun theih nading uh leh, Tangtawn Toupa'n na pu na pate uh kianga kichiam zena a chiamsa gam na lut ua na luah theih nadingun, tuni-a kon thupiak peuhmah zui dingin pilvang un. 2 A thupiakte na zui ding uhia, zui lou ding, chih na lungtangte uh thei nuama Tangtawn Toupa na Pathian un hon kingainiam a, hon ze-et a, hiai kum 40 sung, gamdai-gamkeu tawnsuaka hon pii dan thei gige un. 3 Noute hon kingainiamsak a, hon gilkialsak a, tua khitin noute leh na pu na pate un na theih ngeilouh uh manain hon vaak hi. Tua bel, mihing tanghou kiain a nungta kei ding a, Tangtawn Toupa' kam apan hong pawt thu peuhmah in a nungta zaw ding, chih hon sinsak nop man ahi. 4 Hiai kum 40 sungin, na puansilhte uh luiin a se kei a, na khete uh zong a bawk kei hi. 5 Mi'n a tapa a thunun bangin, Tangtawn Toupa na Pathian un noute hon thunun ahi, chih lungtangin thei un. 6 Tangtawn Toupa na Pathian uh' lampi tawnin leh amah laudan siamin a thupiakte zui un. 7 Ahang bel, Tangtawn Toupa na Pathian un gam hoiha hon piilut ding ahi. Tua gam bel, luite leh tuikhukte, luiphaite leh mualte, tuinakte omna ahi. 8 Huitbuh leh barlibuhte, grepguite leh theipikungte, mimtheite, oliv thau leh khuaizu pianna gam ahi. 9 Tanghou taksap louhna gam ahi a, tua ah bangmah na tasam kei ding uhi. A suangte sik ahi a, a mualte apan dalsik na laikhe ding uhi. 10 Na nek ua na tai chiangun, Tangtawn Toupa na Pathian un gam hoih hon piakna gam ah, amah phat un. 11 Tuni-a noute hon piak a thupiakte, a dante leh a danthusehte zui lou a, Tangtawn Toupa na Pathian uh na mangngilh louh nadingun pilvang un. 12 Tuachi louin zaw, na nek ua na tai chiangun, inn hoihte na lam ua, na teen chiangun leh, 13 na bawnghonte uleh na belamhonte uleh kelhonte uh hong pun a, na kham leh ngunte uleh na neih na lam uh hong pun chiangin, 14 na lungtang uh hong kisathei ding a, Aigupta gam, saltanna mun apan hon piikhepa Tangtawn Toupa na Pathian uh na mangngilh kha ding uhi. 15 Ama'n tua gamdai-gamkeu, gam dangtak leh tui om louhna gam zapi leh lauhuai, gul guneite leh aikamte omna gam tawnin hon pii a, meisah suangpi apan tui hon pia hi. 16 Gamdai-gamkeu ah nek dingin mana hon pia a, na pu na pate uh theih ngeilouh an ahi. A tawpin noute adinga a hoih nadingin hon kiniamkhiaksak a, hon ze-et ahi. 17 Noute'n: Ka vangletna leh ka bantha hatin hiai hauhna ka lamkhiak ahi, na chi mai thei uh. 18 Ahihhangin, Tangtawn Toupa na Pathian uh thei gige un. Amah ahi hauhna lamkhiak theihna hon pia a, na pu na pate uh kianga kichiama a thukhun tuni-a banga hihkippa. 19 Tangtawn Toupa na Pathian uh na mangngilh ua, pathian dangte zui a, a nna uh sem a, a mai ua na kun peuhmah uleh, hihmanthatin na om ngeingei ding uh chih, tuni'n noute kiang ah theihpihna ka gen ahi. 20 Tangtawn Toupa'n na mai ua a hihmanthat namte bangin, noute zong Tangtawn Toupa na Pathian uh thu na man louh manun, hihmanthatin na om ding uhi.
Israel Helna Genkikna
1 Israel aw, ngai in. Tuin Jordan lui gal kai a, valut a, kulhbaang vansunte nei tua khawpi thupite nei noute sanga thupizaw leh hatzaw namte va suankhe dek na hi uhi. 2 A mite a hat uh a, a saang uh. Anakte ahi uhi! Amaute' tungthu na thei uh. Kua'n amaute nang zou ding ahia? a kichih na zata uh. 3 Ahihhangin, tuni-in thei un. Tangtawn Toupa, na Pathian uh, a kangtum thei meikuang banga noute' maia na pai masa ahi. Ama'n noute' mai ah amaute a hihmangthang ding a, a zou gawp ding. Tangtawn Toupa'n noute hon chiamsa bangin, noute'n amaute na suankhe ding uh a, na hihchimit pah ding uhi. 4 Tangtawn Toupa na Pathian un, noute' maia amaute a paihkhiakkhit chiangin: Ka diktatna hanga Tangtawn Toupa'n hiai gam luah dinga hon piilut ahi, kichi het kei un. Hiai namte' gitlouhna hanga Tang-tawn Toupa'n noute' maia amaute hawlkhe ding ahi zaw. 5 Noute na diktatna uh, ahih kei leh, na lungtang uh takna sakhatna hanga, amaute' gam luah dek na hi kei uh. Hiai namte' gitlouhna hang ahi zaw, Tangtawn Toupa na Pathian un na mai ua amaute a suankhiak dek. Tua bel, na pu na pate uh Abraham, Isak leh Jakob kianga thu a chiam tangtunsak nadingin ahi. 6 Noute' diktatna hanga, Tangtawn Toupa na Pathian un hiai gam hoih na luah ding ua hon pe dek ahi kei, chih thei un. Noute zaw nam genhak na hi uhi.
Bawngnou Lim
7 Hiai thei gige unla, gamdai-gamkeua Tangtawn Toupa na Pathian uh na totheh dan uh mangngilh kei un. Aigupta gam na nutsiat ni uapan, hiai mun nong tun dongun, Tangtawn Toupa tunga hel na hiden uhi. 8 Horeb ah, Tangtawn Toupa na hehsak uh a, noute hon hihmangthang ding khopin a heh hi. 9 Suangpekte, Tangtawn Toupa'n noute tawh kala a bawl thukhun suangpekte mah sang dinga tua mual tunga ka kaltouh laiin, tua mual tung ah ni 40 leh zan 40 sung ka taam hi. Tua sungin an ka ne kei a, tui zong ka dawn kei hi. 10 Tangtawn Toupa'n, Pathian khut zung in a gelh suangpek nih hon pia hi. Tuate tung ah, Tangtawn Toupa'n kikhopkhawm ni-a tua mual tunga, meikuang laka pan noute kianga a phuankhiak thupiakte khempeuh a om hi. 11 Tua ni 40 leh zan 40 a bei takin, Tangtawn Toupa'n tua suangpek nihte, thukhun sawm pekte kei hon pia hi. 12 Tua khitin, Tangtawn Toupa'n ka kiang ah: Aigupta gam apan na piikhiak na mite segawpkhin ahih manun, kisa inla, hiai apanin paisuk pah in. Amaute ka thupiak apan a kiheimang pah uh a, a sunthawh milim khat kibawl uh ahi, a chi hi. 13 Tua baan ah, Tangtawn Toupa'n ka kiang ah: Hiai mite ka muta. Mi genhakte ahi taktak uhi! 14 Amaute ka hihmanthat a, khuavan nuai apan a minte uh ka nulmang theih nadingin, hon kham ken. Amaute sanga nam hatzaw leh tamzawin nang kon bawl ding, a chi lai hi. 15 Tuachi-in, ka kihei a, tua mual tung apanin tua mual meia a kuan lai mahin, ka kumsuk hi. Ka khutte ah tua thukhun suangpek nihte a om hi. 16 Kon et takin, ngai un, Tangtawn Toupa na Pathian uh tung ah na khialta uh, chih ka mu hi. Bawngnou leh mei neia kisung milim na nakibawlta uhi. Tangtawn Toupa'n hon thupiak lampi apan na kiheimang pah uhi. 17 Tuachi-in, tua suangpek nihte ka la a, ka khut apan ka paikhia a, na mitmuhun ka hihtam vek hi. 18 Tua khitin, Tangtawn Toupa' mai ah khatvei, ni 40 leh zan 40 sung ka khupbawh kik hi. Noute'n Tangtawn Toupa' mitmuha thil gilou hih-a amah na hehsak ua, khelhna na hih khempeuh uh hangin, an ka ne kei a, tui zong ka dawn kei hi. 19 Noute hon hihmangthang ding zaha na tung ua a heh manin, Tangtawn Toupa' hehna leh thangpaihna ka lau hi. Ahihhangin, tua hunin Tangtawn Toupa'n kei hon ngaikhe kik hi. 20 Tua baan ah, Aron tung ah amah hihmangthang ding zahin, Tangtawn Toupa'n hehna a langsak hi. Ahihhangin, tua laitakin, Aron adingin zong ka thuumsak hi. 21 Na khelhna thil uh, bawngnou na kibawl uh zong ka la a, meiphual ah ka khul hi. Tua khitin ka hihtam a, leivui banga neiin ka hihvui a, tua a vuite, tua mual apan luangsuk luitui ah ka pailut hi. 22 Noute'n Tabera ah leh Masa ah leh Kibroth Hatava ah zong, Tangtawn Toupa na hehsak uhi. 23 Tangtawn Toupa'n Kadesh Barnea apan noute hon sawlkhiak laiin, noute kiang ah: Paitou unla, kon piaksa gam va luah un, hon chi hi. Ahihhangin, Tangtawn Toupa, na Pathian un hon thupiak na helsan uhi. Amah na muang kei uh a, amah na thuman kei uhi. 24 Noute kon theih nungsang, Tangtawn Toupa tunga hel na hiden uhi. 25 Tangtawn Toupa'n noute hon hihmangthang ding a chih manin, kei bel leilak ka kidenna a, tua ni 40 leh zan 40 sung, Tangtawn Toupa' mai ah ka khupbawh hi. 26 Tangtawn Toupa' mai ah ka thuum a: Toupa Tangtawn Toupa aw, na mite na vangletna thupi-a na tatkhiaksa, khut thahata Aigupta gam apan na tatkhiak na goute hihmangthang ken. 27 Na silate Abraham, Isak leh Jakob thei gige in. Hiai mite' genhakna, a gitlouhna uleh a khelhna uh kimuhmawhbawl in. 28 Tuachi louin zaw, non piikhiakna gam mite'n: Tangtawn Toupa'n amaute a chiamsa gama a piilut theih louh manin leh, amaute a muhdah manin, gamdai-gamkeua amaute thah dinga piikhia ahi, hon chi ding uhi. 29 Amaute lah na mite, na gouluahte, na vangletna thupitak leh na baan zaka na piikhiakte ahi mahmah uhi, ka chi hi.
Pathian Zahngaihna Suutkikna: Suangpek Thakte Piakna
1 Tua 'aiin' Tangtawn Toupa'n ka kiang ah: Suangpek thak nih amasate bangbang kisek inla, tua mual tung ah, ka kiang ah hong paitou in. Singa bawl singkuang khat zong ki bawl in. 2 Tua suangpekte tung ah, na hihtap suangpek masate tunga kigelh thute ka gelh ding. Tua khit chiangin, tuate, tua singkuang sung ah koih in, hon chi hi. 3 Tuachi-in, akasia singin singkuang ka bawl a, amasate bangbang suangpek nih ka sek a, tua suangpek nihte khuta tawiin, tua mual tung ah ka paitou hi. 4 Tangtawn Toupa'n hiai suangpekte tung ah, a masa-a a gelh tua Thupiak Sawmte, kikhopkhawm ni-a tua mual tunga meikuang lak apan noute kianga a phuankhiakte a gelh hi. Tangtawn Toupa'n tua suangpekte kei hon pia a, 5 tua khitin, tua mual tung apanin kong kumsuk a, singkuang ka bawl sung ah tua suangpekte ka koih hi. Tangtawn Toupa'n kei hon thupiak banga ka hih ahi a, tuin tua ah a om uhi. 6 Israelte, Jaakante' tuilehte apan a kipankhia uh a, Mosera ah a pai uhi. Tua ah Aron a si a, tua ah a kivui a, a tapa Eleazar in siampi hihna mun a luah hi. 7 Tua apanin Gudgoda ah a pai uh a, tua apanin Jotbatha gam ah a pai lai uhi. Jotbatha gam bel, luituite luanna gam ahi. 8 Tua laiin, Tangtawn Toupa'n, Tangtawn Toupa' thukhun bawm singkuang paw ding, nasema Tangtawn Toupa' maia ding ding leh, Ama' mina vualzawlnate gen dingin Levi nam a sepkhe tuam hi. Tuni dongin tua nna a sem lai uhi. 9 Tua hang ahi, Levite'n a sanggamte uh laka tan, ahih kei leh, goutan a neih louh uh. Tangtawn Toupa, na Pathian un amaute a hilh bangin, amaute' goutan zaw Tangtawn Toupa ahi. 10 Hun masa-a bangin, tua mual tung ah ni 40 leh zan 40 sung ka taam a, Tangtawn Toupa'n hiai hunin zong kei hon ngaikhia hi. Noute hon hihmanthat ding a deihlam ahi keia ahi. 11 Tangtawn Toupa'n ka kiang ah: Paita inla, na pu na pate uh kianga piak ding ka chiam gam lut a, luah dingin hiai mite a lampi uah pii in, hon chi hi.
Tangtawn Toupa Jt-a Lau ding
12 Israel aw, tu in Tangtawn Toupa na Pathian un bang hon ngiata eita, Tangtawn Toupa na Pathian uh lauh ding, a lampi khempeuh zuih ding, amah it ding, na lungtang khempeuh uleh na hinna khempeuh utawh Tangtawn Toupa na Pathian uh' nna sep ding leh, 13 noute hoih nadinga tuni-a kon piak, Tangtawn Toupa' thupiakte leh thusehte zuih ding loungal? 14 Ngai un, vaante, vaan sangpente nangawn, leitung leh a sunga omte khempeuh Tangtawn Toupa na Pathian uh-a ahi. 15 Hinapi-in, Tangtawn Toupa'n na pu na pate uh tung ah deihthawhna a nei a, amaute a it a, tuni-a bangin, namte khempeuh tung ah amaute' chi suan noute hon teel hi. 16 Tua bang ahih manin, na lungtangte uh suum unla, genhakin om nawn kei un. 17 Ahang bel, Tangtawn Toupa na Pathian uh, pathiante' Pathian, toute' Toupa, Pathian thupi, thahat leh mulkimhuai, deihsaktuam nei lou, golhguknate ne lou ahi. 18 Ama'n pabeite leh meigongte adingin dikin vai a hawmsak a, gamdang mite a it a, nek leh tak leh silh leh teen a pia hi. 19 Noute'n zong gamdang mite na it ding uh ahi. Ahang bel, noute zong Aigupta gam ah gamdang mite va hi hi ve uchin. 20 Tangtawn Toupa na Pathian uh lau unla, a nna sem un. Amah lenkip unla, ama' minin thu chiamte bawl un. 21 Amah noute' phatlawhna ahi. Amah noute' Pathian, noute adinga tua thil thupi leh mulkimhuaite na mitmuh ua hihpa ahi. 22 Aigupta gama paisuk na pu na pate uh, avekpiun 70 ahi uh a, tuin Tangtawn Toupa na Pathian un vaana aksite bangin noute hon tamsakta hi.
Thupiakte Sin ding, Zuih ding
1 Tangtawn Toupa na Pathian uh it unla, a thupiakte'ngiatte, a dante, leh thupiakte zui gige un. 2 Tangtawn Toupa na Pathian uh' taihilhna mu lou leh thei lou na tate uh houpih ka hi kei, chih tuni-in thei un. Amaute'n ama' thupina, a khut hat leh a banzak a mu kei uh. 3 Aigupta gam sunga Aigupta kumpipa Faro tung leh a gam sung mite khempeuh laka chiamtehna a lakte leh a thilhihte a mu kei uh. 4 Aigupta sepaihte'n noute hon delh lai ua, a sakolte uleh kangtalaite uh tunga a thilhih, Tangtawn Toupa'n Tuipi San tuite-a amaute a tupmang dan leh amaute tunga siatdenna tuni donga a tut dan a thei kei uh. 5 Hiai mun nong tun mateng ua, gamdai-gamkeua noute adinga a thilhih mute na tate uh ahi kei uh. 6 Israelte khempeuh laka lei kamka a, Reuben mi Eliab' tapate Dathan leh Abiram, a innkawte utawh, a puanbukte uleh a neih a lamte utawh a valh laia, amaute tunga a thilhih mute na tate uh ahi kei uh. 7 Tangtawn Toupa' thilhih thupite khempeuh mute zaw noute' mitte ahi zaw hi. 8 Tua bang ahih manin, tuni-a noute kon piak thupiakte khempeuh zui un, tua bel, Jordan lui galkah a, tua gam lut a, luah dinga thahatna na neih nading uh ahi. 9 Tua baan ah, Tangtawn Toupa'n na pu na pate uh kiang leh a chisuante uh kianga piak ding chi-a a chiam, nawitui leh khuaizu-a luang gama na damsawt nading uh ahi. 10 Gam la dinga na lut dekna uh zaw, na pawtkhiaksan uh Aigupta gam, tua anteh louhing chiinna huan banga, na khaichite uh chiing a, khe-a pai a, na tuibuahna uh bang ahi kei. 11 Galkaha, na va luah ding gam uh zaw, mualte leh luiphaite omna gam, vaan vuahtui dawn gam ahi. 12 Tangtawn Toupa na Pathian un a kep gam ahi a, kum kipat chil apan kumtawp dong, Tangtawn Toupa, na Pathian uh' mit a tuk gigena ahi. 13 Tuachi-in, tuni-a thupiak kon piakte Tangtawn Toupa na Pathian uh it ding, lungtang khempeuh leh hinna khempeuha a nna sep ding chih, muanhuaitaka na zuih uleh, 14 tua chiangin, Tangtawn Toupa'n noute' gam tung ah, a hunhun-in vuahtui, vuah masa leh vuah nunung, hon sawl ding a, tuachi-in na buhte uh, na zuthakte uh, na sathaute uh na nawnlut ding uhi. 15 Na bawnghonte uh adingin gamlak loupate hon pe ding a, tuachi-in, ne leh ta-in na tai ding uhi. 16 Pilvang un, tuachi louin zaw khemkhiakin na om ding uh a, lampiala, pathian dangte' nna semin, a mai uah na kuun ding uhi. 17 Tua hun chiangin, noute tung ah Tangtawn Toupa' hehna a kuang ding a, vuah zuk louh nadingin vaante a khakbing ding a, lei in gah a suah kei ding a, Tangtawn Toupa'n hon piak ding gam hoih ah na mangthang pah ding uhi. 18 Tua bang ahih manin, na lungtangte uleh na lungsimte uah hiai ka thute keem tinten un. Na khutte uah chiamtehna hi dingin bun unla, na taltangte uah khim un. 19 Na tate uh kiang ah sinsak unla, inna na tut lai uleh, lampi-a na pai laiun, na lup chiangun leh na thawh chiangun tuate genin sinsak un. 20 Na inn kongkhak biang uahte leh na kongpite uah tuate gelh un. 21 Tuachi-in, Tangtawn Toupa'n na pu na pate uh kianga piak ding a chiam gam sung ah, lei tunga vaante om sung nite tama a sawt bangin noute damsung nite leh na tate uh damsung nite a sawt ding hi. 22 Noute zuih dinga kon piak hiai thupiakte khempeuh zui dinga na pilvan uh a, Tangtawn Toupa na Pathian uh it ding, a lampite khempeuh tot ding leh, amah letkip ding, chih na zuih uleh, 23 tua chiangin, Tangtawn Toupa'n noute' mai ah hiai namte khempeuh a hawlkhe ding a, noute sanga lianzaw leh hatzawte na vuak-suaksak ding uhi. 24 Khenuaia na sikna khempeuh uh noutea ahi ding. Na gam uh, gamdai-gamkeu apan Lebanon dong leh, Iufratis luipi apan tumlam tuipi dongin a kizalh ding hi. 25 Kuama'n noute hon nang zou kei ding. Tangtawn Toupa na Pathian un noute hon chiamsa bangin, leitung na paina peuhmah uah noute launa leh mulkimna a koih ding hi. 26 Ngai un, tuni-in noute' mai ah vualzawlna leh hamsia ka koih hi. 27 Tuni-a noute kon piak Tangtawn Toupa na Pathian uh' thupiakte na zuih uleh, vualzawlna na tang ding uh a, 28 Tangtawn Toupa na Pathian uh' thupiakte na zuih kei ua, na theihsa uh hilou pathian dangte zui a, tuni-a kon thupiak lampi na kiheisan uleh bel hamsia na tang ding uhi. 29 Luah dinga na lut dekna gam ua Tangtawn Toupa na Pathian un hon piilut chiangin, Gerizim Mual tung ah vualzawlnate na phuang ding uh a, Ebal Mual tung ah hamsiate na phuang ding uh ahi. 30 Na theih bangun, hiai mualte bel, Jordan lui gala, ni tumna lama paisuk lampi tumlam, Gilgal kiang leh More-a tawsaw singte kianga, Araba-a teeng Kanante gama om ahi. 31 Tangtawn Toupa na Pathian un noute hon piak ding gam luah dinga lut dek a, Jordan lui galkah dek na hi uhi. Tua gama lut a, na teen chiangun, 32 tuni-a noute' maia ka koih danthusehte leh dante khempeuh zui ngeingei dingin pilvang un.
Teeltuam Biaknamun
1 Tangtawn Toupa, na pu na pate uh Pathian in noute luah dinga hon piak gama na teen sung teng ua, pilvangtaka na zuih ngeingei ding uh danthusehte leh dante hiaite ahi. 2 Tua na hawlkhiak ding uh namte'n mualsang tungte, mual niam tungte leh singhing nuai tenga, a pathiante uh a biakna munte uh na hihsiat sipsip ding uh ahi. 3 Amaute' maitamte hihchim unla, amaute' suang zek siangthoute khentam unla, amaute' Ashera songte meiin haltum un. Amaute' suihthawh milimte phuk unla, tua munte apan a minte uh phiatmang vek un. 4 Amaute' pathian biak dana Tangtawn Toupa, na Pathian uh na biak het louh ding uh ahi. 5 Tangtawn Toupa na Pathian un a teen nadinga, ama' Min a koih nading na beh na phungte khempeuh uh lak apan a teelkhiak ding mun na zongkhe ding uh ahi. Tua ah na hawh ding uh a, 6 tua ah na haltum thillatte uleh, kithoihnate, na sawma khatte uh leh na veithillatte uh, piak dinga na chiamsate uleh, ut thillatte leh ganhonte leh belam leh kelhonte apan piang masate non tawi ding uh ahi. 7 Tangtawn Toupa' na Pathian un noute hon vualzawlta ahih manin, Tangtawn Toupa mai ah, noute leh na inkawte un na khut sepgim gahte uh na ne ding uh a, na lungnuam ding uhi. 8 Tuni-a mi chih in hoih na sak bangbang ua, hiaia na hih dan bangun zaw na hih ding uh ahi het kei hi. 9 Tu'n bel, khawl tawldamna mun leh, Tangtawn Toupa na Pathian un hon piak ding gamgou luah ding mun na tun nai louh manun, hibanga hih tadih na hi uhi. 10 Ahihhangin, Jordan lui na kaan ding uh a, Tangtawn Toupa na Pathian un gouluah dinga hon piak ding gam ah na teeng ding uh a, na kim na pam ua na melmate khempeuh uapan tawlngakna hon pe ding a, bittakin na nungta ding uhi. 11 Tua hun chiangin, Tangtawn Toupa na Pathian un ama' Min tenna dinga a teel ding mun ah, noute' tawi ding chi-a hon thupiak peuhmah non tawi ding uh ahi. Tuate bel, na haltum thillatte uleh, na kithoihnate uh, na sawma khatte uleh, na vei thillatte uleh, Tangtawn Toupa kianga na chiamsa uh na neih na lam uh a hoihpente khempeuh non tawi ding uh ahi. 12 Tua ah, noute leh na tapate uleh, na tanute uh, na sila pasalte uh, na sila numeite uh leh, na khawpite ua teeng noute laka tantuan leh goutan neilou Levite tawh, Tangtawn Toupa na Pathian uh mai ah lungnuam un. 13 Noumau' utna mun muna na haltum thillatte uh laan mawkmawk lou dingin pilvang un. 14 Tangtawn Toupa'n na beh na phungte uh khat gama a teel ding mun kia ah, tuate laan zaw unla, noute zuih dinga kon thupiak peuhmah zui zaw un. 15 Na gante uh gawh thu ah bel, Tangtawn Toupa na Pathian un vualzawlna hon piak bangbangin, na khawpite uh khat peuh ah na gou thei ding uhi. Sazate hiam, sazukte hiam na mat ua na nek bangbangun na ne ding uhi. Daan banga a sianga ngaihte leh a siang loua ngaihte'n zong a ne thei ding uhi. 16 Ahihhan gin, gan sisan na ne ding uh ahi kei hi. Gan sisan zaw lei laka tui sunbuak bangin na sungbaw ding uh ahi. 17 Na buh uh, na zu thak uh, na sathau uh sawma khat noumau khawpite ah na ne ding uh ahi kei. Ahih kei leh, na ganta uh leh na belam leh na kelhonte uapan piang masate, ahih kei leh, piak ding na chiamsa uh, ahih kei leh, na ut thillatte uh, ahih kei leh, na vei thillatte uh, noumau' khawpite ah na ne ding uh ahi kei. 18 Tuate bel, Tangtawn Toupa na Pathian un a teel ding mun ah, noute, na tapate uh, na tanute uh, na sila pasalte uh, na sila numeite uleh na khawpite ua teeng Levite tawh na ne ding uh ahi. Na sepgim gahte peuhmah uh Tangtawn Toupa na Pathian uh mai ah nuamin na ne ding uh ahi. 19 Noumau' gama na teen sung peuhmah uh, Levite ngaihsak louha koih lou dingin pilvang un. 20 Tangtawn Toupa na Pathian un hon chiamsa banga, na gam uh a keeklet chianga sa lunggulh a: Sa duh nang e, na chih chiangun, na duh bangbang uh na ne thei ding uhi. 21 Tangtawn Toupa na Pathian un a Min koih nadinga a teelna mun, noute adinga a gamlat luat leh, kon thupiak bangin, Tangtawn Toupa' hon piaksa ganhonte leh belam leh kelhonte lak apan gante na gou thei ding uh a, noumau' khawpite ah na duh zahzah uh na ne thei ding uhi. 22 Sasante leh sazukte na nek bangun ne un. Dan banga a sianga ngaihte leh a siangloua ngaihte'n zong a ne thei ding uhi. 23 Ahihhangin, a sisan bel ne kei peuh le uchin. Ahang bel, sisan pen hinna hi a, a sa tawh a sisan nekkhawm louh ding ahi. 24 Sisan zaw na nek ding uh hilou ahi. Tui bangin leilak ah sung bua un. 25 Sisan ne kei un. Hi leh, noute leh na nung ua na tate uh adingin a hoih ding hi. Ahang bel, Tangtawn Toupa' mitmuha a dik hih hi ding hi ve uchin. 26 Ahihhangin, na sehtuam siangthousate uleh lat dinga na chiamsate peuhmah uh tawi unla, Tangtawn Toupa'n a teel ding mun ah paipih un. 27 Na haltum thillatte uh na lan ding uh ahi. Tangtawn Toupa na Pathian uh' maitam tung ah, a sa leh a sisan non tawi ding uh a, siampite'n a sisan pen Tangtawn Toupa' maitam pang ah a sungbaw ding uh a, a sa bel, na ne thei ding uhi. 28 Hiai thupiak kon piakte khempeuh zui dingin pilvang un. Hi leh, noute leh na nung ua na tate uh adingin a hoih gige ding hi. Ahang bel, Tangtawn Toupa na Pathian uh' mitmuh-a a dik leh a hoih hih hi ding hi ve uchin.
Milim Biak Khamna
29 Tangtawn Toupa na Pathian un, luah dinga na lut dekna gam ua namte noute' maia a satkhiak chiangin a gam uh na luah ding uhi. 30 Amaute na hihmanthat nung chiangun, amaute' pathiante' thu kana thangawk lou dingin pilvang un: Hiai namte'n a pathiante uh bangchi biak ahi ua? Eite'n zong amaute hih bangbangin hih ni, chi lou dingin pilvang un. 31 Amaute biak danin Tangtawn Toupa na Pathian uh be kei un. Ahang bel, amaute'n a pathiante uh bia a, Tangtawn Toupa' kih thil tampi hih uh ahi. A tapate uleh a tanute uh, a pathiante uh maia meia hal nangawn hal uh a, laan uhi. 32 Kon thupiak khempeuh zui teitei dingin pilvang unla, behlap lah behlap kei unla, khep lah khiam kei un.
Pathian Dang Biak Kikhamna Dan
1 Noute laka kamsang hiam, mang nei mi hiam hong om a, chiamtehna lamdang hiam, thillamdang hiam a genkholh a, 2 tua a gente hong tun taktak a: I theih ngeilouh pathiante zui ni, amaute bia ni, a chih leh, 3 tua kamsangpa hiam, mang neipa hiam' thugen na ngaihkhiak hetlouh ding uh ahi. Tangtawn Toupa na Pathian un lungtang khempeuh leh hinna khempeuh-in amah na it uhiam, chih hon ze-etna ahi. 4 Tangtawn Toupa na Pathian uh ahi na zuih ngeingei ding uh. Amah mah zahtaaka na lau ngeingei ding uh ahi. Ama' thupiak zui unla, ama' thu mang un. Ama' nna sem unla, amah lenkip un. 5 Tua kamsang hiam, tua mang neipa hiam thah ngeingei ding ahi. Ahang bel, ama'n Aigupta apan hon piikhia a, saltanna apan hon tankhepa tunga hel ding thu gen hiven. Ama'n, Tangtawn Toupa na Pathian un zuih dinga hon thupiak lampi apan noute hon pialmangsak sawm ahi. Noute lak apan thil gilou na phiatsiang ngeingei ding uh ahi. 6 Na nu' tapa na sanggampa mahmah, na tapa mahmah, na tanu mahmah hi-in, na it na zi, ahih kei leh, na lawm naipen nangawn hita leh, tua bang mi in a sima hon zol a: Kisa ni-in, pathian dangte' nna vasem ni, a chih leh mang kei un. Noute hiam, na pu na pate uh hiam in na theih ngei louh uh pathiante, 7 na kim na pam ua, lei mong khat apan lei mong dang donga om namte' pathiante mah gen ahi. 8 Tua banga hon zol mi zui kei unla, ngaih zong ngaikhe kei un. Tua bang mi zaw lainat zong lainat kei un. Hinghawi kei unla, gup zong gum kei un. 9 Tua naksanga tua bang mi na thah ngeingei ding uh ahi. Amah that dinga khut lik masa-a na pan ding uh, tua khit chianga mi dang khempeuh in khut a lik ding uh ahi. 10 Tua bang mi in saltanna mun Aigupta gam apan noute hon piikhepa, Tangtawn Toupa na Pathian uapan hon piimang sawm ahih manin, suangin denglum un. 11 Tua khit chiangin, Israelte khempeuh in a za ding uh a, a lau ding uh a, noute laka kuamah in tua bang thil gilou a hih nawn kei ding hi. 12 Tangtawn Toupa na Pathian un na teen nading uh khawpite hon pe ding hi. 13 Noute laka migiloute hong om a, na theih louh uh pathian dangte gen a: Kisa ni-in, pathian dangte' nna sem ni, chi-a khawpi mipite piimang om ahi, chi-a kigen na zak uleh, 14 tua thu na kantel ngeingei ding uh ahi. A dik mah a na hih a, noute laka hibang thil kihhuai kihih ahi, chih kitelna kimu a hih peuhmah leh, 15 tua khawpi-a teengte khempeuh namsaua na thah ngeingei ding uh ahi. Tua khawpi leh a sunga omte khempeuh, a mihingte leh gantate tawh hihmangthang vek sipsip un. 16 Tua khawpi-a neih leh lam omte khempeuh, khawpi laizang ah koihkhawm unla, tua khawpi haltum un. Tua khawpi sunga neih leh lam kaihkhawmte bel, Tangtawn Toupa na Pathian uh mai ah haltum sipsip un. Tua khawpi zaw, khawpi sia-a omden dinga hamsiat ahi. 17 Tua hamsiat thil bangmah na khut uah a kimu ding ahi kei. Tua bel, Tangtawn Toupa'n a thangpaihna kuang lauhuai a kiheisan theih nading ahi. Tuachi-in, na pu na pate uh kianga a chiamsa bangin, ama'n zahngaihna hon musak ding a, na tung uah lainatna a nei ding a, noute hon pungsak ding hi. 18 Ahang bel, tuni-a noute kon piak Tangtawn Toupa na Pathian uh' thupiakte khempeuh zuia a thu na man uleh, Tangtawn Toupa na Pathian uh' mitmuha a dik hih na hi ding uhi.
An tawh kisai Dan
1 Noute zaw, Tangtawn Toupa na Pathian uh' tate na hi uh ahi. Misite hangin na sa uh ki-at kei unla, na maibawk sam uh zong tan kei un. 2 Ahang bel, Tangtawn Toupa na Pathian uh adinga nam siangthou hi uchin a, leitung maikaih-a namte khempeuh lak apan Tangtawn Toupa'n ama' gou manpha hi dinga hon teelkhiak hi ve uchin. 3 Thil kihhuai himhim ne kei un. 4 Na nek theih ding uh ganhingte hiaite ahi: Bawngtal, belam leh kei, 5 sazuk, saza, sakhi, gam kei, sathak, gam bawngtal leh gam belam. 6 Khechin niha ka, eknel hai ganhingte sa na ne thei ding uhi. 7 Ahihhangin, eknel hai hi lei hiam, khechin ka hi lei hiam na nek louh ding uh ahi. Tuate lak ah, sangawngsau, bilpi leh sakik a tel uhi. Tuate bel eknel hai hi napi-in, khechin niha ka ahi kei uh a, noute adinga a sianglou ahi. 8 Vok zong noute adinga sianglou ahi. Khechin niha ka a hih hangin, eknel hai lou ahi. A sa na nek louh ding uh, a siluang zong na lawnkhak louh ding uh ahi. 9 Tui laka teeng ganhing na nek theih ding uh hiaite ahi: Pheh leh lip neite na ne thei ding uhi. 10 Ahihhangin, pheh leh lip nei lou peuhmah na ne thei kei ding uhi. Noute adingin a sianglou ahi uhi. 11 Vasa sa siang peuhmah na ne thei ding uhi. 12 Ahihhangin, hiaite na ne thei kei ding uhi: Muvanlai, musane, musane vom, 13 musi san, musi vom, mupi vom nam khempeuh, 14 va-ak nam khempeuh, 15 gamdai vapi, mu meika, tuiva, mu meika peuhmah, 16 simbutanglit, simbupi, simbu kaang, 17 gamdai simbu, sasial ne vasa, tui mu, 18 lui vakengsang, tuivapi nam peuhmah, va-singdangtu leh baak. 19 Ahona ta, a lengthei ganhing neute peuhmah noute adinga a sianglou ahi. Tuate ne kei un. 20 Ahihhangin, ganhing siangte bel na ne thei ding uhi. 21 Ganhing amaha sisa-a kimu peuhmah ne kei un. Na khawpite uh khat peuha teeng gamdang mi na pe thei ding uh a, ama'n a ne thei ding hi. Ahih kei leh, mikhual kiang ah na zuak thei ding uhi. Ahihhangin, noute zaw Tangtawn Toupa na Pathian uh adinga nam siangthou tuam na hi uhi. Kelnou, a pi nawituiin huan kei un.
Sawma Khat tawh kisai Dan
22 Kumsimin na lou ua na haichin ua pana piang khempeuh laka sawma khat koihkhia teitei un. 23 Na damsung teng ua, Tangtawn Toupa na Pathian uh zahtaka lau dan na siam theih nadingun, ama'n a Min om nadinga a teel mun ah, na buhte uh, zuthakte, sathaute, na gantate uh leh belam leh kelte laka piang masate laka sawma khatte Tangtawn Toupa na Pathian uh mai ah ne un. 24 Ahihhangin, tua mun pen noute adinga gamla lua ahih a, Tangtawn Toupa na Pathian un lah hon vualzawl mahmah a hih a, Tangtawn Toupa'n a Min om nadinga a teel mun noute adinga gamla lua ahih mana na sawma khatte uh va paw zoulou na hih uleh bel, 25 na sawma khatte uh sum suah unla, tua sum tawiin, Tangtawn Toupa na Pathian un a teel mun ah hawh un. 26 Na lunggulh peuh uh lei nadingin tua sum zang un. Bawng, belam, zu, ahih kei leh silngou sawh dawn theih, ahih kei leh, na lunggulh peuh peuh uh lei un. Tua khit chiangin, noute leh na innkawte un, tua mun ah, Tangtawn Toupa na Pathian uh mai ah tuate na ne ding uh a, na lungnuam ding uh ahi. 27 Na khawpite ua teeng Levite na mangngilh louh ding uh ahi. Ahang bel, amaute'n gam piak tan, ahih kei leh, noute banga goutan tuam nei lou uh hiven. 28 Kum thum chin kum a bei tengin, tua kuma piang laka sawma khatte khempeuh hon pua unla, na khawpite uah koihkhawm un. 29 Tua bel, na lak ua gam piak tanglou, ahih kei leh, amau' gou tan tuam neilou Levite leh gamdang mite, pabeite leh meigongte, tua na khawpite ua teengte hong pai a, a nek ua a tai nading uleh, Tangtawn Toupa na Pathian un noute na khut nasepte khempeuh ua hon vualzawl theih nading ahi.
Leibat tawh kisai Dan
1 Kum sagih a chin kum tengin, leibatte na maisak ding uh ahi. 2 A hih ding dan hibang ahi: A leitawisak mi peuhmah in, a Israel mi hihpih a leitawisak a, a batsak peuhmah a maisak ding ahi. Leibatte maisak nading Tangtawn Toupa'n phuangkheta a hih manin, ama'n a Israel mi hihpih hiam, a sanggam hiam in a dit ding a ngiat ding ahi kei hi. 3 Mikhual apan bel leibat dit ding na ngiat thei hi. Ahihhangin, na sanggam in hon bat peuhmah bel na maisak ding ahi. 4 Ahihhangin, Tangtawn Toupa na Pathian un, goutana na luah ding ua hon piak ding gama, nakpitaka noute hon vualzawl ding a hihmanin, na lak uah a tasam a om kei ding hi. 5 Tua bel, Tangtawn Toupa na Pathian uh' thu na man taktak uh a, tuni-a kon piak hiai thupiakte khempeuh pilvangtaka na zuih peuhmah uleh chihna ahi. 6 Ahang bel, Tangtawn Toupa na Pathian un hon chiamsa banga, noute hon vualzawl ding a, namdang tampite leitawisak ding uchin a, kuamah apan leitawi lou ding na hi uhi. Nam tampi uk ding uchin a, kuama'n noute hon uk lou ding ahi. 7 Tangtawn Toupa na Pathian un, noute hon piak ding gam sunga khawpi khatpeuha, na sanggamte uh laka tasam a om leh, tua a tasam na sanggam tung ah, lungtang taak leh sumchiilin om ken. 8 A tung ah thilphal inla, a taksap awng hu ding leitawisak in. 9 Leibat maisak nading kum sagih naita, chi-a lungsim gilou pu om lou dingin pilvang un. A tasam sanggam tunga tua bang deihsak louhna lungsim pu a, bangmah pe loua na om louh ding uh ahi. Tua chi louin zaw, ama'n na lang pang lamin Tangtawn Toupa kiang ah a thuum kha ding a, mi khial na hi ding uhi. 10 Itpipi hilouin, phaltakin pia in. Tua hi leh, hiai hanga Tangtawn Toupa na Pathian un, na nasep khempeuh uleh na khut ngakna khempeuh uh hon vualzawl ding ahi. 11 Na gam sung ua lah a zawngte om gige ding ahih mana, na gam sung ua na sanggamte uh, a zawngte, a tasamte lama thilphal dinga thu hon pia ka hi.
Silate tawh kisai Dan
12 Na Hebru mi hihpih uh, pasal hi-in, numei hita leh, na sal hi dinga hong kikhotkhiak a, tua banga na nna kum guk sung a sep leh, a kum sagihna-a na noplensak a, na suahtaksak ngeingei ding ahi. 13 Tua banga na khahkhiak chianga, khutvuaka na paisak louh ding ahi. 14 Thilphaltakin na belamhonte lak apan, na buhphual apan leh na grep sukna khuk apan thil na piak ding ahi. Tangtawn Toupa na Pathian un hon vualzawl bangbanga, amah na piak ding ahi. 15 Noute zong Aigupta gama sala omte na hih dan uleh, Tangtawn Toupa na Pathian un hon tat dan thei gige un. Tua hang mah ahi, tuni-a hiai thupiak noute kon piak. 16 Ahihhangin, na sila in nang leh na innkawte hon it a, noute tawh om nuam a sak a: Noute kon nuse nuam kei, a chih leh, 17 tukkilh khat lain, a bil teep, kongkhaka phahin na vut pailet ding a, tuachi-in, a damsung teng na sila a hiden ding hi. Sila numei ahih leh zong tua bang mahin hih in. 18 Na sila in kum guk sung na nna a sep pen, sum thalawha goih mi' nasepkhiak zah lehnihin kithaman mahleh, amah khaha noplensak ding thil haksain ngaihsun ken. Tangtawn Toupa na Pathian un na sep peuhmah-a hon vualzawl na ding ahi.
Ganta Piangmasa tawh Kisai
19 Na bawnghon leh, na belam leh kelhon laka piang masa peuhmah, Tangtawn Toupa na Pathian uh adingin koihkhia in. Na bawngtal piang masa zaw nna semsak ken. Na belam piang masa zong a mul met ken. 20 A kumsimin tuate Tangtawn Toupa na Pathian uh mai ah, ama' teel ding mun ah, nang leh na innkawte'n na nek ding uh ahi. 21 Na ganta melhemna nei a, a khebai hiam, a mittaw hiam ahih a, chinlahna nasetak nei ahih peuhmah leh, Tangtawn Toupa na Pathian uh maia thillata na lat louh ding uh ahi. 22 Noumau' khawpite ah na ne ding uh ahi. Dan banga a siangloua ngaih leh a sianga ngaihte'n, saza leh sazuk bangin, tuate a ne thei tuak ding uhi. 23 Ahihhangin, a sisan bel na nek louh ding uh ahi. Leilak ah tui sunbuak bangin sung bua un.
Ankuangluite tawh kisai Dante: Paikan Ankuang
1 Abib kha tang unla, Tangtawn Toupa na Pathian uh' Paikan ankuang lui un. Ahang bel, tua Abib kha, zan laitaka Tangtawn Toupa na Pathian un, Aigupta gam apan noute hon piikhia hiven. 2 Tangtawn Toupa na Pathian uh mai ah Paikan kithoihna thillat dingin, na belamhon lak uapan hiam, na bawnghon lak uapan hiam, gan khat laan un. Tua bel, Tangtawn Toupa'n Ama' min om nadinga a teel ding mun ah na laan ding uh ahi. 3 Tua Paikan Ankuang bel, silngou sawh tanghou tawh ne kei un. Ni sagih sung, silngou sawhlouh tanghou, thuakna haksatna tanghou, ne un. Ahang bel, kin leh buanga Aigupta gam nusia na hi uhi. Aigupta gam apan na pemkhiak hun uh, na damsung teng ua na theih gige nading uh ahi. 4 Ni sagih sung peuhmah, na gamsung khempeuh uah silngou himhim na lak uah kimu het kei hen. Ni khat ni nitaklama na kithoihna sa himhim uh, a zing chiang zingsang donga siit omsak het kei un. 5 Tangtawn Toupa na Pathian un noute hon piak ding khawpi khatpeuh peuha, Paikan kithoihna na lat mawkmawk het louh ding uh ahi. 6 Ama'n ama' Min om nadinga a teel ding mun loungal ah lan kei un. Tua ama' teel ding mun ah, nitaklam nitum chiangin, Aigupta apan nong pemkhiak uh hunchin ni-in, tua Paikan kithoihna thillat laan un. 7 Tangtawn Toupa na Pathian un a teel ding mun ah, tua kithoihna sa em unla, ne un. Tua khit a zingsang chiangin na puanbukte uah chiahkik un. 8 Ni guk sung, silngou sawhlouh tanghou ne unla, a ni sagih ni-in, Tangtawn Toupa na Pathian uh mai ah khawmpi siangthou nei unla, nna sem kei un.
Nipikalte Ankuang
9 Buh at dinga kawite na golh ni uapan, tua nipikal sagih na simtou ding uh ahi. 10 Tua khit chiangin, Tangtawn Toupa'n noute hon vualzawl dandan apan ut thillat lanin, Tangtawn Toupa na Pathian uh mai ah, Nipikalte Ankuang na lui ding uh ahi. 11 Tangtawn Toupa na Pathian un, ama' Min om nadinga a teelna mun ah, ama' mai ah nuamin om un. Tua ah, tua hunin noute leh na tapate uleh na tanute uh, na sila pasalte uleh na sila numeite uh, na khawpite ua teeng Levite, na lak ua om gamdang mite, pabeite leh meigongte tawh nuamin kipak un. 12 Aigupta gama sala na om na hi uh, chih thei gige unla, hiai danthusehte pilvangtakin zui un.
Bawktate Ankuang
13 Na buhphual ua ante leh na grepsukna khuk ua thilpiangte na khopkhawm khit chiangun, ni sagih sung Bawktate ankuang lui un. 14 Tua Ankuang ah, noute leh na tapate uleh na tanute uleh na sila pasalte uleh na sila numeite uh, na khawpite ua teeng Levite, gamdang mite, pabeite leh meigongte tawh nuam un. 15 Tangtawn Toupa'n a teel ding mun ah, Tangtawn Toupa na Pathian uh mai ah, ni sagih sung tua ankuang lui un. Ahang bel, Tangtawn Toupa na Pathian un na an lak khempeuh uleh na khut nasep khempeuh uah noute hon vualzawl ding a, na lungnopna uh kim ding ahi. 16 Tangtawn Toupa na Pathian un a teel ding mun ah, kum khatsungin thumvei, Ama' mai ah pasal khempeuh nong kilang ding uh ahi. Tuate bel, Silngou sawhlouh Tanghou Ankuang, Nipikalte Ankuang, Bawktate Ankuang lui hunte ahi. Tangtawn Toupa' mai ah, kuamah khutvuakin nong kilang ding uh ahi kei. 17 Tangtawn Toupa na Pathian un vualzawlna hon piak dan tawh kikhomin, thawnpiak non tawi tek ding uh ahi. Thukhen Vaihawmte tawh kisai Dan 18 Tangtawn Toupa na Pathian un hon piak ding khawpite khempeuh ah, na namte tek uh ading thukhen mite leh uliante sep un. Amaute'n na mite uh tunga, a dik a tanga vaihawmin thu a khen ding uh ahi. 19 Dika thukhenna kaikawi kei un. Deihsaktuam zong nei kei un. Golhgukna sum ne het kei un. Golhgukna in mipilte' mit tawsak a, mi diktatte' thu kaikawi ahi. 20 Tangtawn Toupa na Pathian un noute hon piak ding gama teeng a, na luah theih nadingun, thudika vaihawm, ahi, thudika vaihawm kia zui un.
Pathian Dang Biak Khamna
21 Tangtawn Toupa na Pathian uh maia nou adinga na dawh uh maitam kiang ah, nou ading Ashera song himhim kiphuh kei unla, 22 biak ding suang himhim zong kiphuh kei un. Tangtawn Toupa na Pathian un hiaite kih ahi.
1 Tangtawn Toupa na Pathian uh mai ah, melhemna hiam, genbaanna hiam nei bawngtal hiam, belam hiam laan kei un. Tua bangte Tangtawn Toupa' adinga kihhuai hi ding ahi. 2 Tangtawn Toupa'n hon piak ding khawpite khat peuha teeng pasal hiam, numei hiam khatpeuh in, Tangtawn Toupa na Pathian uh mitmuha thilgilou hih a, a thukhun manglou a kimuh leh, 3 kon thupiak tawh kikalh-a pathian dangte' nna sem a, a biak leh, ahih kei leh, ni hiam khapi hiam, vana aksite hiam bia a kimuh a, 4 na kiang ua hong kigen leh, limtakin na kankhe ding uh ahi. Na kankhiak ua, a tak a na hih a, Israela hibang thil kihhuai kihih taktak ahih leh, 5 hiai bang thil gilou hih pasal hiam, numei hiam, na khawpi kongpi uah piikhia unla, suangin denglum un. 6 Ahihhangin, mi thah ding bel, theihpih mi nih hiam thum hiam theihpihna thu pansana thah ding ahi. Theihpih mi khat kia theihpihna thu pansana kuamah thah ding ahi kei hi. 7 Tua banga mi thah ahih chiangin, theihpih mi-a pangte mah khut kha masain a pang ding uh a, tua khit chiangin midangte khempeuh in khut a kha ding uh ahi. Noute lak apan thil gilou na koihkhiak ding uh ahi.
Thukhenna Mun
8 Na khawpite ua, noute adinga thukhen ding haksa lua thubuai na mai ua hong tun leh sisan suahna thu, kihek kipeina thu hi-in, kivuak thu hita leh, Tangtawn Toupa na Pathian un a teelna mun na tun ding uh ahi. 9 Siampi-a pang Levite kiang hiam, tua hun laia thukhena tumi hiam kiang ah thukhen dingin tun un. Amaute dong le uchin, amaute'n thukhenna ding hon hilh ding uhi. 10 Tua banga Tangtawn Toupa'n a teelna muna thukhenna bangbang na zuih ding uh ahi. Thil hih dinga hon piakte peuhmah uh hih teitei dingin pilvang un. 11 Hon sinsak uh dan bangbang leh, thukhenna hon piak bangbang-un gamta un. Noute hon piak uapan taklam ah hiam, veilam ah hiam pial kei un. 12 Tangtawn Toupa na Pathian uh maia a nna sema ding thukhen mi hiam, siampi hiam thuman lou a, kisathei taka gamta mi peuhmah thah ding ahi. Israel gamsung apan hibang thil gilou na koihmang ding uh ahi. 13 Mi khempeuh in tua a za ding uh a, a lau ding uh a, kisathei takin a gamta nawn kei ding uhi.
Kumpipa Vaihawmna Dan
14 Tangtawn Toupa na Pathian un hon piak ding tua gam sung lut a, luah a, na teen chiang ua: I kim i kianga namte khempeuh bangin eite tung ah kumpipa khat tungkhia ni, na chih chiangun, 15 Tangtawn Toupa na Pathian uh' teel mi mahmah noute tunga kumpipa hi dingin tungkhe teitei un. Tua bang mi bel, noute' sanggam khat a hih peuhmah ding ahi. Na Israel mi hihpih uh hilou, mikhual peuh noute tunga om dinga na tunkhiak het louh ding uh ahi. 16 Tua ban ah, kumpipa'n ama' adingin sakol tampi a kaikhawm ding ahi kei. Ahih kei leh, sakol zong dinga Aigupta gama kik dingin mite a sawl ding ahi kei. Ahang bel, Tangtawn Toupa'n: Tua lama na kik nawn louh ding uh ahi, chi-a noute hon hilhkhin hiven. 17 Ama'n zi zong tampi a neih ding ahi kei. Tuachi louin zaw, a lungtang piimangin a om ding hi. Ngun leh kham zong tampi a khawm ding ahi kei hi. 18 A kumpigama kumpitutphah tunga a tut chiangin, siampi-a pang Levite apan kila hiai dan teisawna, amah adinga laibuziala a gelh ding ahi. 19 Tua dan ama' kianga a om gige ding, a damsung teng a sim gige ding ahi. Tuachi-in, Tangtawn Toupa a Pathian lau dan a sin thei ding a, hiai dan thute khempeuh leh danthusehte pilvangtakin a zui thei ding a, 20 a sanggamte sanga hoihzawin a kingai kei ding a, dan apan taklam hiam, veilam hiam ah a pial kei ding hi. Tua nungin, a kumpigam Israel tung ah amah leh a suante'n sawtpi vai a hawm ding uhi.
Siampite leh Kamsangte
1 Levi mi, siampi-a pang Levi nam khempeuh in Israel ah gam piak, ahih kei leh, goutan a nei kei ding uhi. Ahang bel, Tangtawn Toupa' maia meia thillatte-a kivak ding uh a, tuate mah amaute' goutan hi ding hiven. 2 A sanggamte uh lak ah goutan a nei kei ding uhi. Amaute kianga gensa bangin, Tangtawn Toupa mah amaute' goutan ahi ding ahi. 3 Bawngtal hiam, belam hiam laante apana siampite' tan ding na piak dingte uh hiai ahi: a Hang, a biangte gel leh a sungkuate. 4 Na buh na bal uh gahmasate, na zu thak uleh na sathau thak uleh, na belam mulmet khiak masak uh, amaute na piak ding uh ahi. 5 Ahang bel, Tangtawn Toupa na Pathian un, amaute leh a tapate uh, Tangtawn Toupa maia dinga a mina nasem gige dinga, na namte uh khempeuh lak apan teel hiven. 6 Levi mi khat, Israel gamsunga khawpite koipeuha a teenna apan a peemkhiak a, Tangtawn Toupa' teelna muna lunglawptaka hong pai leh, 7 tua muna Tangtawn Toupa' maia dinga a nasemsa, a Levi hihpihte khempeuh bangin, Tangtawn Toupa a Pathian' minin a sem thei ding hi. 8 A innsung thil neihte zuakna sum na muta mah leh, a hong tunna-a Levite' hamphatnate ah tan a nei sam ding ahi.
A Kihhuai Gamtatnate
9 Tangtawn Toupa na Pathian un hon piak ding gam sung na lut chiangun, tua gama namte' thilhih kihhuaite zui kei un. 10 Noute lak ah a tapa hiam, a tanu hiam meia paisaka laan hiam, mang aisan chiing hiam, mitkhialdawi tawi hiam, bum hiam, vaang et chiing hiam, 11 dawiai tawi hiam, misisa houpih hiam, khate zawl hiam, misisate thu dong thei hiam, muhin a om ding ahi kei hi. 12 Hiai thilte hih mi peuhmah Tangtawn Toupa adinga kihhuai ahi. Hiai kihhuaite a hih man ua, Tangtawn Toupa na Pathian un amaute na mai ua hawlkhe ding ahi. 13 Noute zaw, Tangtawn Toupa na Pathian uh maia gensiatbei leh genbaangloua na om ding uh ahi.
Kamsang
14 Na hawlkhiak ding uh namte bel, bum chiingte, ahih keileh, mang aisan chiingte ngaihsakte ahi uhi. Noute zaw, Tangtawn Toupa na Pathian un hibangte hih dinga hon phallou ahi. 15 Tangtawn Toupa na Pathian un, na sanggam mahmahte uh lak apan kei bangbang kamsang khat noute adinga tungkhe ding ahi. Amah na ngaihkhiak ngeingei ding uh ahi. 16 Ahang bel, Horeba khawmpi a om laia, Tangtawn Toupa na Pathian uh kianga na nget uh hiai mah hiven. Tua lai ah noute'n: Tangtawn Toupa ka Pathian uh' aw hon zasak nawn ken, hiai meikuang thupi hon musak nawn ken, ka si kha ding uh, na chi uhi. 17 Tangtawn Toupa'n ka kiang ah: A thugen uh a hoih hi. 18 A sanggamte uh lak apan nang bangbang kamsang khat ka tungkhe ding a, a kam ah ka thute ka koih ding a, amah ka thupiak peuhmah ama'n amaute a hilh ding hi. 19 Tua kamsang in keima' mina a genkhiak thute ngaikhe lou mi peuhmah, keima'n ka ngaihtuah ding hi. 20 Keima' mina thugen kichi kamsang a om a, gen ding ka piak hilou a gen a, ahih kei leh, pathian dangte' mina thugen kamsang kichi a om leh, tua bang kamsang thah teitei ding ahi, chi ahi. 21 Thu kigen pen Tangtawn Toupa apan hilou ahi, chih bangchi-a theithei ding i hia na chi mai thei uhi. 22 Tangtawn Toupa' min siala kamsang in thu a phuan tung taktak lou hiam, hong diklou hiam ahih leh, tua thu Tangtawn Toupa' gen hilou ahi ding. Tua kamsang in kisathei taka a upmawh thu gen ahi lei a, amah lau het kei un.
Bukna Khawpite
1 Tangtawn Toupa na Pathian un a hon piak ding gama namte a hih manthat khit chiangin leh, amaute hawlkhia a, a khawpite uleh a innte uh na luah chiangun, 2 tua hun chiangin, Tangtawn Toupa na Pathian un na luah ding ua hon piak ding gamsung laizang deuha om, khawpi thum septuam un. 3 Tuate zot nading lampite sial unla, Tangtawn Toupa na Pathian un gouluah dinga hon piak ding gam sehthum suah un. Tuachi-in, mi that kha kuapeuh tua mun ah a taailut thei ding hi. 4 Midang that a hinna hu dinga tua muna taailut mi tawh kisai dan hiai ahi. Tua bel, tupkholhna gilou hilou a, tupkholh louha a inveng that kha mi chihna ahi. 5 Etsak nadingin, mi khatpeuh, a inn vengpa tawh sing sat dingin gamlak ah a hawh thei hi. Sing phuk dinga a heipi a liik takin, a heitang kitolin a innvengpa dengkhain a that kha thei hi. Tua bang mi pen, hiai khawpite khat peuha taailutin a hinna a hu thei hi. 6 Tua bang hi kei leh, sisan phulami in, heh lua-in tua mipa delh leh, gamla lua ahih manin, sitak hilou napi-in, muhdahna gilou nei masa-a a innvengpa that hi lou napi-in, tua sisan phulapa'n amah that kha ding hi. 7 Hiai hang ahi, noute adinga khawpi thum kisehkhiak tuam dinga thu kon piak. 8 Tangtawn Toupa na Pathian un, na pu na pate uh kianga kichiam zena a na chiamsa banga na gam uh a keklet a, amaute a na chiamsa tua gambup hon piak leh, 9 chih bel, Tangtawn Toupa na Pathian uh it ding leh, ama' lampite zuih gige ding thu, tuni-a hon piak dante khempeuh pilvangtaka na zuih uleh, chihna ahrhiai khawpi thumte baan ah noute adingin khawpi thum dang behlap un. 10 Tuachi-in, Tangtawn Toupa na Pathian un gouluah dinga hon piak gam sung ah, na lak uah mawh neilou' sisan a kisuah kei ding a, sisan mawh noute tung ah a om kei ding hi. 11 Ahihhangin, a innveng mudah mi khatpeuh omin, ama'n tua a innveng buka sualin that henla, tua khitin hiai khawpite khat ah taai taleh, 12 tua khawpi upate'n mi sawlin amah a kaikhesak ding uh a, amaute'n tua mipa a sih theih nadingin, sisan phula mi khut sung ah a pekhe ding uh ahi. 13 Amah na lainat ding uh ahi kei a, noute adinga a hoih nadingin, Israel gam apan mawhneilou' sisan suahna na hihsiang ding uh ahi. 14 Tangtawn Toupa na Pathian un, na luah ding ua hon piak na goutan uh sunga na pu na pate' goutana koihsa, na innveng tawh kala gamgi suang na suan ding ahi kei hi.
Theihpihmi tawh Kisai
15 Mi khat thulimlouhna thu, ahih kei leh, khelhna khat peuh a na hih thu ah, mi khat kia theihpihna pansana mawhtansak ding ahi kei. Theihpih mi nih hiam, thum hiam pansan kiain thu a kikipsak ding ahi. 16 Mi khatpeuh thil hihkhiala ngawh dinga, tup gilou nei theihpih mi a din leh, 17 tua bang kingawhna neite gel, Tangtawn Toupa' maia tua huna semlel siampite leh thukhenmite' mai ah a ding tuak ding uh ahi. 18 Thukhenmite'n tua kingawhna thu limktakin a kantel ding uh ahi. Ngai in, theihpihmia ding pen theihpih taklou a hih a, a sanggam dikloupi-a ngawh a hih leh, 19 ama'n a sanggam tunga hih a tup bangbang, ama' tunga na hih ding uh ahi. Tua bangin, na lak uapan thil gilou na hihsiang ding uh ahi. 20 Midangte'n tua zain a lau ding uh a, na lak uah tuabang thil gilou a hih kei ding uhi. 21 Tua bang thu ah lainatna na lah ding uh ahi kei: Hinna taanga hinna, mit taanga mit, ha taanga ha, khut taanga khut, khe taanga khe ahi ding ahi.
Kidouna tawh Kisai
1 Na melmate uh dou dinga na kuan chiang ua, sakolte, kangtalaite leh noute sanga tamzaw mite na muh chiangun, amaute lau kei un. Ahang bel, Aigupta gam apan noute hon piikhepa Tangtawn Toupa na Pathian un noute hon ompih hiven. 2 Hichi hong hi ding a, na kidou dek laitakun, siampi in mipite va naihin a kiang uah thu a gen ding ahi. 3 Ama'n amaute kiang ah: Israel aw, ngai in, tuni-in na melmate uh dou dek na hi uhi. Na lungtang uh patau kei hen. Lau kei unla, liing kei un. Ahih kei leh, amaute hanga lau lua-a lungdong om kei un. 4 Ahang bel, noute hon tonpih a, na melmate uh nou adinga hon dousak a, noute hon hukhe dingpa Tangtawn Toupa na Pathian uh ahi, a chi ding hi. 5 Ulian makaite'n sepaihhonte kiang ah: Mi kuapeuh, inn lamthak a, laan nai lou a om hiam? A om leh, inn ah va pai hen. Tuachi louin zaw kidouna ah a si kha ding a, midang in a laan kha ding hi. 6 Mi kuapeuh, grephuan bawl a, a gah ne nai lou a om hiam? A om leh, inn ah va pai hen. Tuachi louin zaw kidouna ah a si kha ding a, midang in a grep gah a ne kha ding hi. 7 Mi kuapeuh, numei tawh kikham a, a kiteng nailou a om hiam? A om leh inn ah va pai hen. Tuachi louin zaw, kidouna ah a si kha ding a, mi dangin a numei khamsa a kitenpih kha ding hi, a chi ding uh ahi. 8 Tua khit chiangin, tua makaite'n: Mi kuapeuh patau lungdong a om hiam? A om leh, a sanggamte patau-a a lungdonsak louh nadingin inn ah pai hen, a chi lai ding uh ahi. 9 Makaite'n tua banga sepaihhonte kianga thu a genkhit chiangun, sepaihhonte tunga makai dingte a sep ding uh ahi. 10 Khawpi khatpeuh sim dinga na naih chiangun, tua khawpi mite kiang ah lemna thu tah masa un. 11 Tua lemna thu a saan uh a, kongpite a hon hon uleh, tua khawpi sunga mite khempeuh nna na sepsak teitei theih nadingun, noute nasemin a om ding uhi. 12 Tua lemna bawl ding a nial uh a, noute hon dou uleh bel, tua khawpi sim un. 13 Tangtawn Toupa na Pathian un noute' khut sunga tua khawpi hon piak chiangin, a sunga pasal khempeuh namsauin that un. 14 Numeite, naupangte leh gantate leh khawpi sunga thil dang omte khempeuh bel, noute' tan dingin gallakin na nei ding uhi. Tangtawn Toupa na Pathian un na melmate uapan gallak sum hon piakte noute adingin na zang thei ding uhi. 15 Na kiang nai ua namte hilou, gamlapi-a om khawpite khempeuh na sai ding dan uh hibang ahi. 16 Ahihhangin, noute' gouluah dinga Tangtawn Toupa na Pathian un hon piak ding na kiang nai ua namte' khawpite sung ah, a nak thei hinna nei peuhmah hinghawi kei un. 17 Tangtawn Toupa na Pathian un hon thupiak bangin, amaute hihchimit vek sipsip un. Amaute bel, Hitte, Amorte, Kanante, Perizte, Hivte leh Jebuste ahi uhi. 18 Tua banga na hihchimih kei uleh, amaute' pathiante bia a, thil kihhuai a hihte uh zui dingin hon sinsak ding uh a, Tangtawn Toupa na Pathian uh tung ah na khial ding uhi. 19 Hun sawttak sung khawpi khat na sim uh a, laak zawh sawma na dou chiangun, singkung omte, a gah na nek theihte uh phuk kei un. Tua khawpi douna-a zat dingin zong phuk kei un. Ahang bel, gamlak sing gahte mihing nek dinga om hiven. 20 Ahihhangin, a gah neilou singte bel phukin na suse thei ding uh a, tua khawpi na dou uh na lak zawh mateng uh, a douna vanzat dingin tua singte na zang thei ding uhi.
Tualthah Suikhiak Zawhlouh Khelhna
1 Tangtawn Toupa na Pathian un na luah ding ua hon piak ding gam sunga mi khatpeuh thahsa-a gampalaka lum a kimuh a, kua thah hiam, chih a kitheih kei leh, 2 na upate uleh thukhenmite a kuan ding uh a, tua siluang omna apan a kiang naipena khawpite tawh kal a teh ding uh ahi. 3 Tua khit chiangin, tua siluang tawh kinaipen khawpi upate'n, nasem ngeinailou leh hakkol paw ngei nailou bawngla khat hon kai ding uh a, 4 lei leh ngeilouh, ahih kei leh, haichiin ngeilouhna, luiluang omna phaizang khat ah, tua bawngla ngawng a hek tan ding uh ahi. 5 Levi' tapa siampite, Tangtawn Toupa na Pathian un, Tangtawn Toupa' mina nasem ding leh, vualzawlna thu sam ding leh, thubuai khempeuh leh kivuak kisat thu-a thukhen dinga a teelkhiakte'n hon naih ding uh hi. 6 Tua khit chiangin, tua siluang kiang naipen khawpi-a upate khempeuh in, tua phaizanga a ngawng hektansa bawngla tung ah a khut uh a sil ding uh a: 7 Koute' khutte'n hiai sisan suah lou ahi, sisan a kisuah lai zong ka mitte un mu lou ahi. 8 Tangtawn Toupa aw, na tatsa na mi Israelte adingin hiai khelhna khuhna hon saansak inla, na mi Israelte mawhneilou sisan mawh hon khusak ken, a chi ding uhi. 9 Tua bangin, Tangtawn Toupa' mitmuh-a a dik a tang na hih chiangun, noute laka mawhneilou sisan suahna mawhna na koihmang ding uh ahi.
Salmat Kitenpihna
10 Na melmate uh dou dinga na kuankhiak chiang ua, Tangtawn Toupa na Pathian un amaute na khut sung ua hon piak a, amaute sala na kaih chiangun leh, 11 tua salmatte laka nungak melhoih na muh a, enlah a, zi-a na neih nop chiangin na nei thei hi. 12 Tua bang numei na inn ah pii inla, a sam metsak inla, a chinte tan inla, 13 amah na mat lai ua, a puansilhte khekkhiaksak in. Na inn sunga kha khat sung a nu leh pa a suun khit chiangin, amah na luppih thei ding a, a pasal na hi ding a, amah na zi ahi ding hi. 14 Amah-a na lungtun kei leh a utna na-a a pai na phal ding ahi. Amah mindaisakta na hih manin, na zuak ding ahi kei hi.
Tapa Masa' Hamphatna
15 Pasal khat in zi nih a neih a, khat it a, a khat a muhdah a, tapa lah a neihsak tuak ua, a muhdah pen' ta tamasa ahih zawk mah leh, 16 ama'n a tapate tan ding gou a hawm chiangin, a muhdah zi pen' tapa, tamasa hihna hamphatna laksakin, a zi it pen' tapa a pe ding ahi het kei hi. 17 A zi muhdah zawk pen' tapa, tamasa ahihna gumin, a gou neih khempeuh tan nih a piak ding ahi. Tua tapa bel a pa' thahatna chiamtehna masa hi a, tamasa' hamphatna amah-a hiven.
Tapa Hel
18 Pasal khatpeuh in tapa genhak leh helhat, a nu leh pa thu mang lou a neih a, tua tapa in amaute' thununna a zuih nop kei leh, 19 a nu leh a pa'n amah a man ding uh a, a khawpi uh kongpi ah upate mai ah hon tonpih ding uh ahi. 20 Amaute'n tua upate kiang ah: Hiai ka tapa uh genhak a, helhat ahi. Ama'n koute hon thuman lou ahi. A uangtat leh zukhamhat ahi, a chi ding uhi. 21 Tua khit chiangin tua khawmi pasalte khempeuh in suangin a mah a denglum ding uh ahi. Tua bangin na lak uapan thil gilou na hihsiang ding uh ahi. Israel mi khempeuh in tua thu za-in a lau ding uhi.
Dan Tuamtuam
22 Sihna khawp khelhna liana mawh mi pen thah ding ahi a, a pumpi singtunga khai ding ahi. 23 Sing tunga khai peuhmah Pathian' hamsia thuak ahih manin, tua banga thahpa, tua ni maha vui ding ahi. A luang zan khua-a singtunga a om louh ding ahi. Tangtawn Toupa na Pathian un na gouluah ding ua hon piak ding gam tua banga na suknit het louh ding uh ahi.
Sanggamte' Neih-le-lam
1 Na sanggampa' bawngtal hiam, belam hiam vakmang na muh leh, ngaihsak louin om kenla, ama' kiang tunkik teitei in. 2 Tua sanggampa na kiang naia om lou hiam, ahih kei leh, tua gan nei kua hi hiam, chih na theih kei leh, nang inn ah kai inla, a neipa'n hong zon mateng na kern in. Tua chiangin, na pekik in. 3 Na sanggampa' sabiltung hiam, puanakpi hiam, ahih kei leh, a mansak van khatpeuh na muh leh, tua bang mahin hih in. Ngaihsak louin om ken. 4 Na sanggampa' sabbiltung hiam, bawngtal hiam lampi-a puk na muh leh, ngaihsak louin om ken. Kaidingin phong teitei in.
Kideidanna
5 Numei in pasal silh leh teen a silhin a teeng ding ahi kei. Pasal in zong numei' silh leh teen a silhin a teeng ding ahi kei. Ahang bel, Tangtawn Toupa na Pathian un tua banga hih mi kih hiven. 6 Lam kiang khawng ah singkung hi-in leilak hita leh, vasabu na muh a, a pi in a noute hi-in, a tuite hita leh a opkhum lai a hih leh, a pi leh a nou lakhawm ken. 7 A nou na la thei hi, ahihhangin, a pi bel khah teitei in. Tua hi leh, nang adingin a hoih ding a, na khantou ding hi. 8 Inn thak na lam chiangin, na inn tung apan mi khattei kia-in sisan suahna mawh na khu kha ding a, inn tung ah a umna zawl khung teitei in. 9 Na grephuan sung ah khaichi nam tuam nih pawikhawm ken. Tua banga na pawikhawm leh, a khaichite gentaak louh, a gahte zong a sianglou a suak ding hi. 10 Sabiltung leh bawngtal hakkol pawkhawmsakin lei let ken. 11 Samulkhau leh ziza khau zangngat gatkhawm puante silh ken. 12 Na silh na puanakpi mong lite ah a neelkai bawl in.
Kitenna Dan Palsatna
13 Pasal khatpeuh in zi a neih a, a luppihkhit nunga, amah deihlou a, 14 gensia a, a mindaisak a: Hiai numei ka kitenpih a, ahihhangin, ka luppih takin nungak siangthou a hihna ka mu kei, a chih leh, 15 tua nungak nu leh pa'n kongpi ah, khawsung upate' mai ah, amah nungak siangthou ahi, chih kitelna hon tawi ding uh ahi. 16 Tua nungak pa'n tua upate' mai ah: Hiai mipa' kitenpih dingin ka tanu ka pia a, ahihhangin, ama'n a deih kei hi. 17 Tuin amah a gensia a: Na tanu nungak siangthou a hihna ka mu kei, a chi hi. Ahihhangin, ka tanu hiai nungak siangthou hihna kitelna a om, a chi ding hi. Tua khitin, tua nungak' nu leh pa'n tua khawsung upate kiang ah tua puan a ensak ding uh ahi. 18 Tuachi-in, tua upate'n tua mipa a paipih ding uh a, a gawt ding uh ahi. 19 Ama'n Israel nungak siangthou mindaisak ahih manin, amaute'n amah ngun dangka shekel 100 a liausak ding uh a, tua nungak' pa a pe ding uh ahi. Tua numei bel, tua mipa' zi ahi lailai ding a, a damsung teng a ma thei kei ding hi. 20 Ahihhangin, tua ngawhna a dik a hih a, tua nungak a siangthou ahihna kitelna a kimuh theih kei leh bel, 21 tua numei a pa' kongkhaka tonpih ahi ding a, a khawpi-a pasalte'n suangin amah a denglum ding uh ahi. Ahang bel, ama'n a pa inn sunga a om laia, midang tawh a na-mawh a, Israel sunga zahlakna thil tun hiven. Na lak uapan thil gilou na hihsiang ding uh ahi. 22 Pasal khatpeuh in midang' zi a luppih a kimuh leh, tua banga amah luppihpa leh tua numei, a nihun a si teitei ding uh ahi. Israel apan tua bang gitlouhna na hihsiang ngeingei ding uh ahi. 23 Khawpi sunga pasal khatpeuh in pasal nei dinga khamsa nungak siangthou a tuahkhak a, a luppih leh, 24 tua khawpi kongpi ah a nihun na tonpih ding uh a, na denglum ding uh ahi. Tua nungak pen khawpi sunga om hi napi-a panpihna zonga a kikou louh man leh tua pasal pen in mi zi a zahlak sak man ahi. Na lak uapan tua bang gitlouhna na hihsiang ngeingei ding uh ahi. 25 Ahihhangin, gamlaka pasal in nungak pasal nei dinga khamsa a tuah a, a pawngsual leh, hibang hih tua pasal pen kia a si ding ahi. 26 Tua nungak bel bangmah lawh louh ding ahi. Ama'n sihna khop khelhna bangmah hih lou ahi. Hibang thu ahih leh, mi'n a innveng suala a thah tawh kibang ahi. 27 Ahang bel, tua pasal in tua nungak gamlaka tuak hi a, tua khamsa nungak kikou mah leh, amah hukhe ding kuamah om lou hiven. 28 Pasal khatpeuh in khamsa hilou nungak a tuah a, a pawng suai a, theihkhiak ahih uleh, 29 tua pasal in tua nungak' pa ngun dangka shekel 50 a piak ding ahi. Tua baan ah, tua nungak mindaisak a hih manin, a kitenpih ding ahi. A damsung teng amah a ma thei kei ding hi. 30 Pasal in a pa' zi a kitenpih ding ahi kei. A pa' lupna a buahsak ding hilou ahi.
Kikhawmte laka Kihelthei leh Kiheltheiloute
1 Chiltang kitam, ahih kei leh, chiltang atkhiak mi kuamah, Tangtawn Toupa' mi kikhawmte lak ah a kihel thei kei ding hi. 2 Zawlta, sawn peuhmah, a khang sawn dongin, Tangtawn Toupa' mi kikhawmte lak ah a lut thei kei ding hi. 3 Amon mi, ahih kei leh, Moab mi, ahih kei leh, a suante uh kuamah, a khangsawn sawn dongin, Tangtawn Toupa' mi kikhawmte lak ah a lut thei kei ding hi. 4 Ahang bel, noute Aigupta apan nong pai lai-un, lampi ah an leh tui tawh hon tuak dingin amaute hong kuan kei uh a, noute hon hamsiat dingin Mesopotamia-a Pethor apan Beor' tapa Balaam a guai zaw uhi. 5 Ahihhangin, Tangtawn Toupa na Pathian un Balaam' thu a ngaikhe kei a, a hamsia noute adingin vualzawlna a suaksak zaw hi. Tangtawn Toupa na Pathian un noute hon it man ahi. 6 Na dam sung teng uh, amaute tawh kilemna, a hoihna ding ua kilawmbawlna bangmah na bawl het louh ding uh ahi. 7 Edom mi bel kih kei un, na sanggampa uh ahi. Aigupta mi zong kih kei un, a gama mikhuala om na hi uhi. 8 Amaute' tate, a khang thumna ah Tangtawn Toupa' mi kikhawmte lak ah a lut thei ding uhi.
Giahphual Sianlouhna
9 Na melmate uh dou dinga giahphual na sat chiangun, a sianglou thil peuhmah apan kihemkhia un. 10 Noute laka khatpeuh, zankala bawtui pawt a om leh, giahphual pawlama paikhiain a vaom tuam ding ahi. 11 Nitak lamin a kisil ding a, nitum chiangin giahphual sung a lut thei ding hi, 12 Giahphual pua ah zun leh ek nawn nading mun na septuam ding uh ahi. 13 Na galvante uh baan ah, kawkhuk tawh nading vanzat na nei ding uh ahi. Kawkhuk touin zun leh ek na nawn ding uh a, tua khit chiangin na vuk kik ding uh ahi. 14 Ahang bel, Tangtawn Toupa na Pathian uh noute hinna hon humbit ding leh, na melmate uh na khut sung ua hon pe dinga noute' giahphual sunga vialpai pai hiven. Na giahphual uh a siangthou ding ahi. Na lak ua thil zahlakhuai khatpeuh mu a, noute hon kiheisan louh nading ahi.
Dan Tuamtuamte
15 Sila khatpeuh noute laka hong buk leh, a pu khut ah pekhe kei un. 16 Na lak uah, a utna peuh ah leh a teel khawpi khatpeuh ah teengsak un. Amah nuaisiah kei un. 17 Israel mi kuamah, numei hi-in pasal hita leh, biakna muna kizuak na om louh ding uh ahi. 18 Numei kizuak hiam, hibanga gamta-a pasal kizuak hiam in a lawhkhiak peuhmah, thuchiam khatpeuh tangtun nadinga, Tangtawn Toupa na Pathian uh' inna non tawilut het louh ding uh ahi. Ahang bel, Tangtawn Toupa na Pathian un tuate a nihnih-a kih ahi. 19 Sum hi-in, an hi-in, a pung lak theih thil dang himhim zong, na sanggam tung ah a pung la ken. 20 Gamdang mi tung ah bel sumpung na la thei ding hi. Ahihhangin, na sanggam Israel mi tung ah zaw sumpung la ken. Tua hi leh, Tangtawn Toupa na Pathian un, luah dinga na lutna gam ua na khut nasep peuhmah hon vualzawl ding hi. 21 Tangtawn Toupa na Pathian uh kianga na chiam peuhmah tangtun dingin zekai ken. Tangtawn Toupa na Pathian un hon ngiat ngeingei ding a, khiala mawh tang kha ding hiteh. 22 Bangpeuh chiam lou dinga na kiven leh, na khial kei ding hi. 23 Na muk in a genkhiak peuhmah hih teitei in. Ahang bel, nangma' utthu-a, nangma' kama Tangtawn Toupa na Pathian tunga na chiam hiven. 24 Na innveng' grephuana na lut leh, na deih zahzah grep gah na ne thei ding hi. Ahihhangin, na seng sunga koih bel nei het ken. 25 Na innveng buhleia na lut leh, buhvui na zut thei ding hi. Ahihhangin, kawitein buh dinglai at het ken.
1 Pasal khatpeuh in numei khat kitenpih henla, tua numeia thil zahlakhuai khat muin lungtung kei henla, maakna lai gelhin pia henla, a inn apan nawkiksak leh, 2 tua baan ah, tua numei in a inn a nutsiat nungin, pasal dang khat nei henla, 3 a pasal nihna zong amaha lungtung louin, maakna lai gelhin pia henla, a inn apan nawkiksak leh, ahih kei leh, tua pasal in sihsan leh, 4 tua amah ma-a a pasal masapen in amah a kitenpih kik thei kei ding hi. Amah pen hihnitsa hita hiven. Tua bang thil bel Tangtawn Toupa' mitmuha kihhuai hi ding ahi. Tangtawn Toupa na Pathian un gouluah dinga hon piak ding gam tung ah khelhna tun kei un. 5 Pasal khatpeuh in a zi neihna a nai lai leh, kidouna muna sawl louh ding ahi. Ahih kei leh, sep ding got louh ding ahi. Kum khat sung inn-a noplena om a, a kitenpihtaak a zi a lungnopsak ding ahi. 6 Leibat taangin buhgawina sumhek suang a bupin hiam, a tunglam kia hiam zong la ken. Tua banga na hih leh, a kivakna laksak suak ding na hi. 7 Mi khatpeuh in a sanggam hihpih Israel khat pawmang a, suak leh sal zata a zat hiam, a zuak hiam a hih a, a kimuhkhiak leh, tua banga hihpa a sih ngeingei ding ahi. Na lak uapan thil gilou na hihsiang ding uh ahi. 8 Phaak natna thu ahih leh, siampi Levite hon hilh bangbanga pilvangtaka sai ding ahi. Amaute thu ka piak pilvangtaka na zuih ding uh ahi. 9 Noute Aigupta apan nong paikhiak lai ua, lampi-a Tangtawn Toupa na Pathian un Miriam tunga a hih thei gige un. 10 Na innveng kianga bang peuh na leitawisak chiangin, a kichiamna dinga a tah thil la dingin a innsung ah lut ken. 11 Inn pua ah ding inla, na leitawisakpa'n a kichiamna thil hon tawikhia henla, hon pia hen. 12 Amah mi zawng a hih leh, a kichiamna thil keemin zan giahpih ken. 13 A kichiamna puanaktual silh-a a ihmut theih nadingin, ni tum chiangin tua a kichiamna puanakpi pekik in. Tua hileh, amah na tung ah a kipak ding a, Tangtawn Toupa na Pathian' ngaih-in tua na thil hih, diktatna thil hih ahi ding hi. 14 Mizawng leh tasam na goihte, na Israel mi hihpih uh sanggam hi-in, na gam sung ua khawpite khatpeuha teeng gamdang mi hita leh, nang adinga nuamtak sain mawkbawl ken. 15 Amah a zawng a tasam a hih manin, a sum thalawh bangbang, a nisimin nitum main pia in. Tua banga na hih kei leh, nang hon hekin Tangtawn Toupa a sam kha ding a, khelhna mawh na tang kha ding hi. 16 Tate hangin pate na hihlum ding uh ahi kei a, pate hangin zong tate na hihlum ding uh ahi kei hi. Michih ama' khelhna hangin a si ding hi. 17 Gamdang mi hi-in, pabeite hita leh, thudika thukhenna taansakin na zaangsak ding ahi kei. Ahihkei leh, thuchiam nadingin meigongte' puanakpi na laksak ding ahi kei hi. 18 Noute zong Aigupta gama sala om a, Tangtawn Toupa na Pathian un tua apan hon tankhia ahi, chih thei gige in. Hiai hang ahi hibanga hih dinga noute thu kon piak. 19 Na loua buh na lak chianga, buhphal khat na lak khak louh a om leh, a sang zong dingin va kik ken. Gamdang mite leh pabeite leh meigongte adingin nusia in. Tua hi leh, Tangtawn Toupa na Pathian un na khut nasepte khempeuh uh hon vualzawlsak ding ahi. 20 Na oliv gahte na lawh chiangin, a nihvei nadingin a hiangte ah a sang zong ken. A sang omlaite, gamdang mite leh pabeite leh meigongte adingin nusia in. 21 Na grephuan-a grep gah na lawh chiangin, grep guite a nihvei nadingin a sang zong ken. A sang omlaite, gamdang mite leh pabeite leh meigongte adingin nusia in. 22 Noute zong Aigupta gama sila-a om na hi uh, chih thei gige in. Hiai hang ahi hibanga hih dinga noute thu kon piak.
1 Mite'n thubuai a neih uleh, thukhenna inn a tut ding uh, thukhente'n thu khen a, a mawhlou a dik pen a dika a phuan ding uh, a mawh pen a mawhpaih ding uh ahi. 2 Tua a mawh pen vuak thuak taak ahih leh, thukhenpa'n amah a boksak ding a, a mawhna in a gitlouhna thaman a lawkhiak kibikhiah zahvei, ama' mitmuh mahmahin a satsak ding ahi. 3 Ahihhangin, 40-vei sanga tamzaw a satsak ding ahi kei. Tua sanga tamvei zaw ahih leh, na mitmuh uah na sanggam uh a zahlaak lua ding hi. 4 Bawngtal in buh a chil laiin a muk na hensak ding ahi kei. 5 Unau sanggam teengkhawmte laka khat tapabeia a sih leh, a zi meigong in tua innkuan pawlam ah pasal a nei ding ahi kei hi. A pasal sanggam in amah kitenpih-in, ama' tunga sanggam pasal' mawhpuakna a tangtun ding ahi. 6 Tua sanggam si pen' min Israelte lak apan thaimanga a om louh nadingin, tua nu' tapa piang masapen in tua a sipa min a puak ding ahi. 7 Ahihhangin, mi'n a sanggampa' zi a kitenpih nop kei leh, tua nu, khawpi kongpi ah upate kiang ah a pai ding a: Ka pasal' sanggampa'n Israel ah a sanggampa' min puak ding nial ahi. Ka tunga pasal sanggampa hihna mawhpuakna tangtun nuam lou ahi, a chih ding ahi. 8 Tua khit chiangin, tua khawpi upate'n tua sanggampa samin a houpih ding uh ahi. Ama'n: Amah kitenpih nuam lou ka hi, a chih teitei leh, 9 a sanggampa' meigongnu, tua upate mai ah, tua sanggampa kiang ah a va pai ding a, tua mipa' khe apan khedap khat a suahkhe ding a, a maitang a chilphih ding a: A sanggampa' innkuan khanggui lamtou nuamlou mi tung ah hibang kihih ahi, a chi ding ahi. 10 Tua mi' innkuan khanggui bel, Israel gam sung ah Khedap Suahsaksa Innkuan, chi-a theih ahi ding hi. 11 Mi nih a kisual a, khat pen' zi hong pai a, a pasal sualpa apan a pasal humbit sawm a, tua mipa sawk a, a zahmawh a mat leh, 12 tua nu' khut na tankhiak ding uh ahi. Amah na lainat louh ding uh ahi. 13 Na ip sung ah bukna suang kibang lou nih, khat a gik, khat lah a zang na koihkhawm louh ding ahi. 14 Na innsung ah, tehna ephah kibanglou nih, khat a lian, khat a neu na koihkhawm louh ding ahi. 15 Tangtawn Toupa na Pathian un hon piak ding gam sunga na khantou theih nading-in, buknate leh ephahte a dik leh a kituak na neih ding ahi. 16 Ahang bel, Tangtawn Toupa na Pathian un hibang hih mi, diktat-loutaka thil hih kuapeuh kih hiven. 17 Aigupta gam apan nong paikhiak lai ua, lampi-a Amalekte hon na bawl dan thei gige un. 18 Tawla na bah laitakun, na zinna uah hon na lamtuah uh a, nunglama mi pha zouloute khempeuh hon na satkhia uhi. Pathian launa neilou ahi uhi. 19 Tangtawn Toupa na Pathian un gouluah dinga hon piak ding gam sunga, na kim na pam ua melmate khem-peuh apan tawlngakna hon piak chiangin, Amalekte theihgigena, vanni nuai apan na nulmang ding ahi. Mangngilh het ken!
Gahmasate leh Sawma khatte
1 Tangtawn Toupa na Pathian un, gouluah ding, luah ding leh a sunga tenna dinga hon piak ding gam sung na lut chiangin hichi hong hi ding hi. 2 Tangtawn Toupa na Pathian un hon piak ding gam apan lei gahsuah masa khempeuh laka khenkhat na la ding a, gam apan hon tawiin, seeng ah na koih ding a, Tangtawn Toupa na Pathian un a min om nadinga a teel ding mun ah na koih ding ahi. 3 Tua hun laitaka siampi nasema pangpa kiang ah na vapai ding a, a kiang ah: Tangtawn Toupa'n eite kianga piak dinga i pu i pate kianga a chiam gam kong tungta, chih Tangtawn Toupa ka Pathian kiang ah tuni'n ka phuang hi, na chi ding ahi. 4 Tua siampi in na khut apanin, tua seeng a la ding a, Tangtawn Toupa na Pathian uh' maitam mai ah a nga ding hi. 5 Tua khitin nang, Tangtawn Toupa na Pathian uh mai ah: Ka pa, Aram mi, vialpem pem mi ahi a, mangthang dinga kisa ahi. Aigupta gam ah a paisuk a, tua ah a khualtam hi. Ahihhangin, tua ah a thupi, a hat leh a tam mahmah nam hong hi hi. 6 Ahihhangin, Aiguptate'n koute hon mawkbawl uh a, hon thuakgimsak uh a, ka tung uah saltanna haksatak hon nga uhi. 7 Tua bang a hihtakin, Tangtawn Toupa ka Pathian uh kiang ah ka kikoukhia uh a, Toupa'n ka aw uh zain ka thuakgimna uleh, ka sepgimna uleh, nuaisiaha ka omna uh a en hi. 8 Tuachi-in, Tangtawn Toupa'n khut hat leh baan zakin, mulkimna lianpi leh chiamtehnate leh thillamdangte tawh, Aigupta gam apanin koute hon piikhia hi. 9 Ama'n hiai mun hon tun a, hiai gam, nawitui leh khuaizu-a luang gam hon pia hi. 10 Tu-in, ngai in, Tangtawn Toupa aw, nangma'n non piak gam gah masate kon tawi hi, na chi ding hi. Tua khit chiangin, Tangtawn Toupa na Pathian uh mai ah kuunin na be ding ahi. 11 Tuachi-in, nang leh na innkawte leh Levite leh na lak ua gamdang mi omte, Tangtawn Toupa na Pathian un hon piak thil hoihte peuhmah ah na nuam ding uh ahi. 12 A kum thumna bel sawma khat piak kum ahi. Tua kuma na sepkhiak apan sawma khat khempeuh na koihkhiak khit chiangin leh, Levite, gamdang mite, pabeite leh meigongte'n na khawpite ua ne a, a vah theih na ding ua, amaute kianga na piak ding ahi. 13 Tua khit chiangin, Tangtawn Toupa na Pathian uh kiang ah: Na thupiak bangin, ka innsung apanin tantuan siangthou ka sepkheta a, Levite, gamdang mite, pabeite leh meigongte ka peta. Na thupiakte ka manglou kei a, tuate laka khat zong ka mangngilh kei. 14 Sisuuna ka om sungin tua tantuan siangthou khat beek zong ka ne kei a, ka sianlouh sungin zong tuate khat beek zong ka lakhe kei a, tuate khat beek zong misite kiang ah ka laan kei a, Tangtawn Toupa ka Pathian uh thu ka mang hi. Thu non piak peuhmah ka zuikhinta. 15 Na teenna siangthou apan hon ensuk inla, na mi Israelte leh, ka pu ka pate uh piak ding chi a, kichiam zena na chiam banga koute non piak gam, nawitui leh khuaizu-a luang gam vualzawl in, na chi ding ahi.
Thupiakte Zuih ding
16 Tangtawn Toupa na Pathian un hiai danthusehte leh dante na zuih dingun tuni-in hon pia hi. Na lungtang khempeuh uleh, na hinna khempeuhin, pilvangtakin zui in. 17 Tangtawn Toupa na Pathian uh ahi, chih leh, a lampite na tawn ding uh, chih leh, a danthusehte, a thupiakte leh a dante na zui ding a, ama' thu na mang ding, chih na phuangkheta hi. Tangtawn Toupa'n zong a thuchiam bangin, ama' mi, ama' gou manphate na hi uh, chih leh, a thupiakte na zuih ding uh ahi, chih tuni-in a phuang hi. 19 Ama' siamsa namte khempeuh tunga phatlawh ding, minthang ding leh thupi dinga hon tungkhe ding ahi, chih leh, a thuchiam banga Tangtawn Toupa na Pathian uh adinga nam siangthou sehtuam hi ding na hi uh, chih a phuang hi, a chi hi.
Ebal Mual tunga Maitam
1 Mosi leh Israel upate'n mipite kiang ah thu a pia uh a: Tuni-a kon piak hiai thupiakte khempeuh zui un. 2 Jordan lui kana Tangtawn Toupa na Pathian un hon piak ding gam na lut chiangun, suang lianpipi chiang unla, belhkipnain zut un. 3 Tangtawn Toupa, na pu na pate uh' Pathian in, noute hon chiam bangbanga Tangtawn Toupa na Pathian un hon piak ding gam, tua nawitui leh khuaizu-a luang gam lut dinga na galkah khit chiangun, tua suangte tung ah hiai dante khempeuh gelh un. 4 Tua baan ah, Jordan lui na kaan khit chiangun, tuni-a kon thupiak bangin, Ebal Mual tung ah hiai suangte chiang unla, a belhkipnain zut unla, 5 tua ah Tangtawn Toupa na Pathian uh' mai ah suang maitam dawh un. Tua suangte tung ah sik vanzat zang kei un. 6 Gamlak suangte zangin, Tangtawn Toupa na Pathian uh' maitam dawh unla, tua tung ah Tangtawn Toupa na Pathian uh mai ah haltum thillat laan un. 7 Tua ah lemna thillat lan unla, Tangtawn Toupa na Pathian uh maia nein nuam un. 8 Tua baan ah, tua na suang chiante uh tung ah, hiai dante khempeuh kiteltakin na gelh ding uh ahi, a chi hi.
Ebal Muala Hamsiatna
9 Tua khitin, Mosi in, tua Levi mi siampi hite tawh, Israelte khempeuh kiang ah: Israel aw, daai dide unla, ngai un! 10 Tuni-in noute, Tangtawn Toupa na Pathian uh' mite na hi uhi. Tangtawn Toupa na Pathian uh' thu mang unla, tuni-a kon piak a thupiakte leh thusehte zui un, a chi hi. 11 Tua ni mahin Mosi in mipite thu a pia a: 12 Jordan lui na kaan khit chiangun, mipite vualzawl dingin hiai namte Gerizim Mual ah a ding ding uh ahi: Simeon, Levi, Judah, Isakhar, Josef leh Benjamin. 13 Hamsiatnate gen dingin Ebal Mual ah hiai namte a ding ding uh ahi: Gad, Asher, Zebulun, Dan leh Naftali. 14 Levite'n aw ngaihtakin Israelte khempeuh mai ah hiai a gen ding uh ahi: 15 Khuak thawh milim hiam, milim sun thawh hiam tua khutsiamte' bawl Tangtawn Toupa' kih thil a sima kem mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 16 A nu hiam, a pa hiam simmawh mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 17 A innveng' gamgi suang khiin mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 18 Lampi-a mittawte kaia lampialsak mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 19 Gamdang mite, pabeite leh meigongte apan thudika thukhenna lamang mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 20 A pa' zi luppih a, a pa' lupna zahtaklou mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 21 Ganta peuh luppih mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 22 A sanggamnu, a pa' tanu hiam, a nu' tanu hiam luppih mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 23 A zi' nu luppih mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 24 A sima a innveng that mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 25 Mawhneilou mi that dinga golhgukna sum ne mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi. 26 Hiai dan thute zuia lenkip lou mi peuhmah hamsiat ahi, a chi ding uh a, Mipite khempeuh in: Amen! a chi ding uh ahi.
Thumanna Vualzawlnate
1 Tangtawn Toupa na Pathian uh thu na man sipsip ua, tuni-a kon piak a thupiakte khempeuh pilvangtaka na zuih leh, Tangtawn Toupa na Pathian un leitung namte khempeuh tung ah hon liiksang ding hi. 2 Tangtawn Toupa na Pathian uh' thu na man uleh, hiai vualzawlnate khempeuh in hon zui ding a, na tung uah hong tung ding hi: 3 Khawpi sunga a nunnuam na hi ding a, gamsung ah a nunnuam na hi ding hi. 4 Na sul apana piang a nunnuam ahi ding a, na gam ua haichiinte leh na ganta noute uh na bawng noute leh na belam noute vualzawl ahi ding hi. 5 Na seeng, na lawh leh na annel vui mekna kuang vualzawl ahi ding hi. 6 Nong lut chiangin, a nunnuam na hi ding a, na pawtkhiak chiangin a nunnuam na hi ding uhi. 7 Tangtawn Toupa'n nou hon dou melmate na mai uah hon zousak ding hi. Lam khat apan hong kuanin hon dou ding uh a, lam dang sagih ah a taikeek ding uhi. 8 Tangtawn Toupa'n na buhpang a vualzawl ding a, na khut ngakna thil peuhmah a vualzawl ding hi. Tangtawn Toupa na Pathian un hon piak ding gam sung ah nang hon vualzawl ding hi. 9 Tangtawn Toupa na Pathian uh thupiakte na zuih uh a, a lampite na tot uleh, kichiam zena hon chiam bangbangin, ama' nam siangthou hi-in Tangtawn Toupa'n hon hihkip ding hi. 10 Tua hun chiangin, Tangtawn Toupa' mina sap na hi uh, chih leitung namte khempeuh in hon thei ding uh a, hon lau ding uhi. 11 Tangtawn Toupa'n noute kianga piak dinga, na pu na pate uh kianga a chiam gam sung ah lawhchinna tampi hon pe ding na sul uapan piang, na ganta noute leh lei gahsuah ah hon lawhchingsak ding hi. 12 Tangtawn Toupa'n a hunhuna vuah hon pe ding leh, na khut nasepte khempeuh hon vualzawl dinga a goubawm hoih, tua vaante nang adingin hon hong ding ahi. Nam tampite kiang ah na leitawisak ding uh a, noute'n bel na leitawi kei ding uhi. 13 Tangtawn Toupa'n a mei hilouin, a lutang hon hisak ding hi. Tuni-a noute hon piak Tangtawn Toupa na Pathian uh' thupiakte na limsak ua, zui dinga na pilvang uleh, a nuainung hilouin a tungnunga koih hi ding na hi uh. 14 Tuachi-in, tuni-a noute kon piak thute khatpeuh kiheisan loua taklam hiam, veilam hiama pialsan a, pathian dangte nna sem dinga na naih louh ding uh ahi.
Thumanlouhna Hamsiatna
15 Ahihhangin, Tangtawn Toupa na Pathian uh thu na man kei ua, a thupiakte khempeuh tuni-a kon piak danthusehte na zuih kei uleh bel, hiai hamsiate khempeuh na tung hong tung ding a, hon nuselou ding ahi: 16 Khawpi sung ah hamsiatin na om ding uh a, gamsung ah hamsiatin na om ding uhi. 17 Na seeng uleh na anvui nei mekna kuang uh hamsiatin a om ding hi. 18 Na suul uapan piang hamsiatin a om ding a, gama na haichinte, na bawng noute leh na belam leh kei noute hamsiatin a om ding uhi. 19 Nong lut chiang uh leh nong pawtkhiak chiangun hamsiatin na om ding uhi. 20 Tangtawn Toupa'n na khut ngakna khempeuh uh tung ah hamsiate, buainate leh salhnate hon sawl ding a, tua lah hihmanthatna leh thakhata na siatna na tun mateng uh na thuak ding uhi. Amah nusia a, thil gilou na hih man uh ahi ding hi. 21 Gam luah dinga na lut dekna uah Tangtawn Toupa'n natna hite hon thuaksak ding hi. 22 Nattun leh meima tawh kithuah kumzawn natna in hon sawi ding a, nisapi leh keuna, nget leh ap hon sawl ding a, na manthat mateng uh na thuak ding uhi. 23 Na lutung ua vaante, sumsan a suak ding a, na khenuai ua lei lah sik a suak ding. 24 Tangtawn Toupa'n na gam vuah uh leivui leh vut a suaksak ding a, hihsiat na hih mateng uh, vaan apan na tung uah hong zusuk ding hi. 25 Tangtawn Toupa'n na melmate uh mai ah hon vuallelsak ding a, lam khat apan amaute na dou ding uh a, lam dang sagih ah na taikeek ding uh a, leitung kumpigamte' mulkimna na hi ding uhi. 26 Na saluangte uh huihkhua vasate khempeuh leh leitung gamsate' an ahi ding a, amaute hawlmang ding kuamah a om kei ding hi. 27 Tangtawn Toupa'n Aigupta meimatumte leh meimasiate, meima tuikai huphupte leh chithak hon thuaksak ding a, tuate apan hihdam theih na hi kei ding uhi. 28 Tangtawn Toupa'n haina, mittawtna leh lungsim buaina hon thuaksak ding. 29 Suntang laiin miallaka mittaw pai bangin na kimai poppop ding uhi. Na sep peuhmah uah na lawhsam ding uh a, nisimin nuaisiah leh buluhin na om ding uh a, hon hukhe ding lah kuamah a om kei ding hi, 30 Numei khat tawh kiteng dingin na kikhaam ding a, ahihhangin, midang in a luppih ding. Inn na lam ding a, ahihhangin a sung ah na teeng kei ding. Grephuan na bawl ding a, ahihhangin, a gah chep zong na chiam kha kei ding. 31 Na mitmuhin na bawngtal a kigou ding a, ahihhangin, a sa na ne kha kei ding. Na sabiltung laksuhin na om ding a, na kianga piakkik ahi kei ding. Na belamte na melmate kianga piak ahi ding a, kuama'n amaute a hukhe kei ding. 32 Na tapate leh tanute namte khuta piak ahi ding uh a, amaute hukhe dingin khutlik theihna vangletna na nei kei ding a, nisima amaute enin na mitte a segawp ding. 33 Na theih louh uh mite'n na gam uapan na sepgim gah a ne ding uh a, na damsung teng nuaisiahna leh siatna loungal bangmah na nei kei ding a, 34 na thil muhte'n hon haisakgawp ding. 35 35 Tangtawn Toupa'n na khukte leh na khete, hihdam theihlouh meimatum nasetakte a thuaksak ding a, tua meimatumte na khenuai apan na luzang dong a dim ding. 36 Tangtawn Toupa'n nang leh na tung ua na koih uh kumpipa, noute leh na pu na pate un a theih louh uh nam kiang ah hon hawlkhe ding. Tua mun ah pathian dangte na be ding uh a, tuate lah sing pathian peuh, suang pathian peuh ahi ding. 37 Tangtawn Toupa'n hon hawlkhiak nading namte' mitmuhin, mulkimhuai, simmawhhuai paunak leh nuihzabuuk na suak ding uhi. 38 Lou ah buhchi tampi na pawi ding a, ahihhangin, khaupete' n negai ding ahih manin tawmchik kia na la ding. 39 Grephuante na bawl ding a, hoihtakin na keem ding a, ahihhangin, lungte'n negai ding ahih manin, a zu na dawn kei ding a, grepgah zong na lou kei ding. 40 Na gamsung teng ah oliv singkungte na nei ding a, ahihhangin, oliv gahte pulh bei ding ahih manin, a thau na zang kei ding. 41 Tapate leh tanute na nei ding a, ahihhangin, amaute sala piimanga om ding ahih manun, na ompih kha kei ding. 42 Na gama singkungte khempeuh leh haichiinte khempeuh khaupete'n a negai ding hi. 43 Na lak ua teeng gamdang mi na tunga sangsem semin a khangtou ding a, ahihhangin, nang bel na niamkiak semsem ding hi. 44 Ama'n nang hon leitawisak ding a, nang bel, a leitawisakin na pang kei ding. Amah a lutangin a pang ding a, nang bel a mei na hi ding. 45 Hiai hamsiate khempeuh na tunga hong tung ding ahi. Hihmanthata na om mateng nang hon nungdelh ding a, hon nuse kei ding hi. Ahang bel, nang Tangtawn Toupa na Pathian thu mang lou a, a hon piak thupiakte leh thusehte na zuih louh man hi ding ahi. 46 Tuate bel, nang leh na suante adinga chiamtehna leh thillamdang hi tawntung ding ahi. 47 Na lawhchin laitaka lungnuamtak leh kipaktaka Tangtawn Toupa na Pathian nna na sep louh man ahi ding. 48 Tangtawn Toupa'n nang hon dou ding a, hon sawl melmate' nna sem ding chin a, gilkialpi leh dangtakpi, savuak leh tasampi-a om ding na hi ve. Ama'n hon hihmanthatkhit masiah, na ngawnga sik hakkol hon batsak ding eive. 49 Tangtawn Toupa'n hon dou dingin nam khat gamlapi leimong apanin muvanlai thil bawhsuk guih bangin hon pii ding hi. Tua nam' pau na theih louh ahi ding a, 50 kihtakhuai melpu, a upa lah zahtak tuanlou, a naupang lah lainat tuanlou ahi ding. 51 Hihsiat dimdem na hih mateng, na gan tuailaite uleh na lou haichiinte uh, amaute'n negai ding uh ahi. Buh hi-in, zuthak hi-in, sathau hita leh, bangmah hon nutsiat nei lou ding uhi. Bawnghon laka a noute hi-in, belam leh kelhon laka a noute hita leh, hon nutsiat nei lou ding uhi. 52 Na muan mahmah uh kulhbaang sangte a puk masiah, na gamsung ua khawpite khempeuh uum a, hon dou nilouh ding uhi. Tangtawn Toupa'n hon piak ding gam sung khempeuha khawpite khempeuh, tua banga hon dou ding uhi. 53 Tua banga hon dou sung ua, na melmate un na tung ua thuakna hon tun ding uh ahih mana, na sul uapana piangte, Tangtawn Toupa'n hon piak tapate leh tanute' sa ne ding na hi uh. 54 Noute laka pasal chingkampen leh lungnempen nangawn in ama' sanggampa ahih kei leh, a zi it, ahih kei leh a ta khawsuaksunte nangawn lainat zou lou ding a, 55 a tanaute' sa a nek lai nangawn, amaute khat beek hawm lou ding ahi. Na melmate un na khawpite khempeuh uh hon umchip lai ua, noute tunga thuakna hon tut man ua, a neihsun tua hi ding hiven. 56 Noute laka numei chingkampen leh lungnempen a khenuaia leilak sik ngam lou zah-a lungnemin zong a pasal it leh ama' tapa leh tanu ngeelngeel, 57 ama' sula piang masa leh a neih a tate nangawn lainatlou ding hi. Ahang bel, a melmate un na khawpite uh hon uum sunga, na tung ua lungzinna hon tut ding mana, ama'n a sima tuate nek sawm ding hiven. 58 Hiai laibu-a kigelh hiai dante khempeuh pilvangtaka na zuih kei ua, hiai min thupi leh lauhuai Tangtawn Toupa na Pathian uh na zahtak kei ua leh, 59 Tangtawn Toupa'n noute tung leh na suan na khakte uh tunga hiai gawtna lauhuai, tuahsiatna khauh leh sawt daih leh, chinatna dailou leh sawt daih hon tun ding ahi. 60 Ama'n na lauh mahmah uh Aigupta natnate khempeuh na tung ua hon tun ding a, na tung ua belhden ding ahi. 61 Hihmanthat-a na om mateng uh, Tangtawn Toupa'n hiai Dan Laibu sunga kigelh lou chinatna leh tuahsiatna a namkim zong na tung ua hon tun ding ahi. 62 Tangtawn Toupa na Pathian uh thu na man louh man ua, vaana aksi zah-a tam noute laka tawm chik kia nutsiata om ding na hi uh. 63 Hon lawhchinsak leh noute tamlama hon punsak Tangtawn Toupa' kipahlam ahih banga, noute hon hihsiat leh hon hihmanthat a kipahlam hita ding ahi. Luah dinga na lut dekna gam uapan bulkalha om ding na hi uhi. 64 Tua hun chianga, Tangtawn Toupa'n leitung mong khat apan mong langkhat donga, namte khempeuh laka hon thehzak ding ahi. Tua munte-a pathian dangte be ding uchin a, sing pathiante leh suang pathiante, noute hi-in na pu na pate uh hita leh, na theih ngei louh uh pathiante ahi uhi. 65 Tua namte laka tawlngak himhim mu lou ding, na khe ngak nading uleh tawlngakna mun zong mu lou ding na hi uh. Tua munte-a Tangtawn Toupa'n lungzinna, lunggulhna hanga mit tawlna leh lungtang mangbatna hon pe ding ahi. 66 Diphawmna omden ding, a sun a zana launa tawh kidim den ding, na hinna uh lungmuang lou ding a hi. 67 Zingsang chianga: Nitak hita mai leh aw! chi ding uchin a, nitak chianga: Zingsang hita mai leh aw! chi ding na hi uh. Hiai bel, na lungtang ua mulkimna-a kidimna leh mita na muhte uh hang hi ding ahi. 68 Ke'n zin nawn kei un ka chihna lam, Aigupta lama longtea, Tangtawn Toupa'n hon sawlkik ding ahi. Tua muna numei sila leh pasal silate hi dinga na melmate uh laka va kizuak ding uchin a, lah kuama'n hon na lei lou ding hi.
Pathian' Vangletna tunga Kinga Thukhun
1 Tangtawn Toupa'n Horeba Israelte tawh kala thukhun a bawl baana, Moab gama Israel suante tawh kala thukhun bawl dinga Mosi a thupiak, tua thukhun thute hiaite ahi. 2 Mosi in Israelte khempeuh a samkhawm a, amaute kiang ah: Tangtawn Toupa'n Aigupta gama Faro leh a silate khempeuh leh a gam khempeuh tunga, na mitmuh ua, a hih khempeuh na muta uhi. 3 Tuate bel, na mit ua na muh uh ze-etna lianpite, chiamtehnate leh thillamdang thupite ahi. 4 Hinapi-in, Tangtawn Toupa'n tuni dongin, theihsiam nading lungtangte, muh nading mitte leh zakna ding bilte noute hon pe nai kei hi. 5 Ke'n gamdai-gamkeua kum 40 sung noute kon pii sungin na pumpi ua pan na puansilhte uh a se kei a, na khete uapan na khedapte uh a se kei hi. 6 Tanghou na ne kei uh a, zu hiam, a batpih hiam na dawn kei uh. Tua bel, kei Tangtawn Toupa na Pathian uh ka hi, a chipa na theih nading uh ahi. 7 Hiai mun nong tun takun, Heshbon kumpipa Sihon leh Bashan kumpipa Og in eite hon na kidoupih uh a, amaute i zou uhi. 8 A gam uh i laksak a, Reubente, Gadte leh Manase nam kimkhat kiang ah goutanin i pia uhi. 9 Tua bang ahih manin, na hih khempeuh ua na mavan nading-un hiai thukhun thute kem unla zui un.
Thukhuna Kihelte
10 Tuni-in na vekun na makaite uh, na miliante uh leh na upate uleh na uliante uh tawh, Israel pasalte khempeuh Tangtawn Toupa na Pathian uh mai ah na ding uhi, 11 na taneute uleh na zite uh na giahphual ua om gamdang mite, singpua-a na zatte uleh tuitawia na zatte utawh. 12 Tua bel, Tangtawn Toupa na Pathian uh tawh kala thukhun bawl khawm ding leh, tuni-a Tangtawn Toupa'n noute tawh kala a kichiamna-a pang dingin ahi a, 13 tuni-a ama'n noute ama' nam tuam hi dinga hon bawl ding leh, noute kianga a gensa bang leh na pu na pate uh kiang leh Abraham, Isak leh Jakob kianga a chiamsa bangbanga amah noute' Pathian ahih nading ahi. 14 Hiai thukhun, kichiamna tawh noute tawh kal kia ading a hi kei a, 15 tuni-a Tangtawn Toupa' maia hiaia ding leh tuni-a eite kianga omloute ading zong ahi.
Israelte Kithehthangna
16 Eite, Aigupta gama teeng hang a, namte laka hong paisuak hang a, paikheng i hi, chih noute mahmah in na thei uhi. 17 Amaute' laka thil kihhuaite, sing leh suang leh ngun leh kham milimte na mu uhi. 18 Tuni-a noute laka pasal leh numei hi-in, innkuan leh beh hi-in, nam hita leh, kuama'n tua namte' pathiante be dinga Tangtawn Toupa i Pathian na kiheisan het louh ding uh ahi chih thei gige un. Tua bang sihna gu kha mahmah omsak thei thil peuhmah na lak ua zung na kaihsak louh ding uh ahi. 19 Tua bang mi in hiai kichiamna a zak takin, a lungsunga kivualzawl tawm in: Ka lungtang deihlam zuiin pai teitei leng zong bit na-veng, chi-in kingaihtuah mai thei hi. Hiai in gam sung ah, tui omna hi-in, a keuna hita leh, siatna tun ding hi. 20 Tangtawn Toupa'n tua bang mi ngaidam nuam ngeilou ding hi. Tua bang mi tunga a hehna leh thikthusiatna kuang ding a, hiai laibu sunga kigelh hamsiate khempeuh ama' tunga tung ding a, Tangtawn Toupa'n vaan ni nuai apan a min nulmang ding hi. 21 Tangtawn Toupa'n hiai Dan Laibu-a kigelh thukhun hamsiate khempeuh banga, tuahsiatna thuak dinga Israel namte khempeuh lak apan amah malmat ding hi. 22 Tua bel, noute hon zui ding khangsawn sawn, na tate uleh, gam gamlapi apan hong pai nam dangte'n Tangtawn Toupa' tunsak gam tunga a siatna leh natnate mu ding uhi. 23 A gambuppi mei katsiat leh chi leh kaata dim, khaichi lah kipawi lou, bangmah pou lou, sing leh lou bangmah omlou hi ding. Tangtawn Toupa'n heh leh thangpaia Sodom leh Gomora, Adma leh Zeboim a lumlet laia siatna bang hi ding. 24 Namte khempeuh in: Banghang hi tel ahia, Tangtawn Toupa'n hiai gam tunga hibang a hih? Hiai hehna nasia banghanga kuang hi tel ahia? chi ding uhi. 25 A dawnna bel, Tangtawn Toupa Pathian in, a pu a pate uh Aigupta gam apan a piikhiak laia amaute tawh kala a thukhun a kiheisan man uh ahi ve. 26 Amaute lampial uh a, a theih ngeilouh uh, Tangtawn Toupa'n amaute a piak louhpi pathian dangte bia-a kun uh hiven. 27 Tua bang ahih mana hiai gam tunga Tangtawn Toupa' hehna kuang a, hiai laibu sunga kigelh hamsiate khempeuh tungsak ahi. 28 Tangtawn Toupa heh a, thangpai mahmah a, hiai gam apan amaute bulkalh a, tuni-a banga gamdang pek tun ahi, chih hi ding hi. 29 Thil kiseelte, Tangtawn Toupa i Pathiana hi a, a kilaakkhete bel eite leh i tate-a hiden hi. Tuachi-a, hiai dan thute khempeuh i zuih theih nading ahi.
Israel Tundingkikna
1 Tangtawn Toupa na Pathian un namte khempeuh laka hon thehzakna munte peuhmaha, noute' maia ka koih hiai vualzawlnate khempeuh leh, hamsiate khempeuh na tung ua hong tung a, lungtanga na vei chiangun leh, 2 noute leh na tate uh, Tangtawn Toupa na Pathian uh kianga nong kik ua, tuni-a thu kon piakte bangbanga na lungtang khempeuh uleh na hinna khempeuh utawh, a thu na man chiangun, 3 tua chiangin, Tangtawn Toupa na Pathian un, na saltanna uapan hon piikik ding a, hon lainat ding a, na kithehzakna uh namte khempeuh lak apan hon kaikhawm ding hi. 4 Vaanni nuaia gam gamlapena sawlmang na hita le uchin zong, Tangtawn Toupa na Pathian un tua gam apan hon kaikhawm ding a, hon piikik ding hi. 5 Ama'n na pu na pate uh' gam hiai ah hon piikik ding a, na luah ding uh a, na pu na pate uh sanga mavang zaw leh tamzawin hon bawl ding hi. 6 Tangtawn Toupa na Pathian un, na lungtangte uh leh na tapate uh' lungtangte hon sumsak ding a, tuachi-in, na lungtang khempeuh utawh, na hinna khempeuh utawh amah na it ding uh a, na nungta ding uhi. 7 Tangtawn Toupa na Pathian un, na melmate uleh, noute hon mudaha hon gelgawtte tung ah zong hiai hamsiate khempeuh a koih ding hi. 8 Tua khit chiangin, Tangtawn Toupa' aw na mang thak ding uh a, tuni-a kon piak, a thupiakte khempeuh na zui ding uhi. 9 Tua hun chiangin, Tangtawn Toupa na Pathian un na khut nasepte khempeuh uah hon mavangsak ding a, na suan na khakte uleh, na gantate uh a pungsak ding a, na gam gah uh zong a pungsak denta ding hi. Ahang bel, Tangtawn Toupa na Pathian uh, na pu na pate uh tunga a lungnop banga noute tunga lungnuam kik denta ding hiven. 10 Hiai Dan Laibu-a kigelh, a thupiakte zui dinga Tangtawn Toupa na Pathian uh' aw na man ua, Tangtawn Toupa na Pathian uh kianga na lungtang khempeuh uleh, na hinna khempeuh utawh na kik nawn uleh, tua banga noute tunga lungnuam kik ding a, hon mavangsak ding hi.
Hinna leh Sihna Tahna
11 Ahang bel, tuni-a noute kon piak hiai thupiak, noute adinga theihhak dinga kisel ahi kei a, gamlapi-a om zong ahi kei hi. 12 Vaantunga om ahi kei a: I zaka i zuih theih nadinga, eite adinga vantunga kua kaltou a, hon valaksak ding hiam? na chih uh kul lou ahi. 13 Ahih kei leh, tuipi gal peka om zong ahi kei a: I zaka i zuih theih nadinga, eite adinga tuipi gala kua va pai a, hon valaksak ding hiam? na chih uh zong kul lou ahi. 14 Tua thu na zuih theih nading ua, naichika om a, na kamsung uleh na lungsung ua om ahi. 15 En un, tuni-in na mai uah hinna leh thil hoih, tua baan ah, sihna leh thil hoihlou ka koih a, 16 tua bel, na hin ua na pun theih nading ua, Tangtawn Toupa na Pathian uh na it ding uh, a lampite na zuih ding uh, tua ban a, a thupiakte, a danthusehte leh a dante na zuih ding ua, tuni-a thu hon pia ka hi. Tua hi leh, Tangtawn Toupa na Pathian un, luah dinga na lutna gam ua, noute hon vualzawl ding ahi. 17 Ahihhangin, na lungtang uh lampial a, na ngaihkhiak kei ua, piimanga na om ua, pathian dangte bia a, a nna uh na sep uleh bel, 18 mangthang ngeingei ding na hi uh, chih tuni-in noute kiang ah ka phuang hi. Jordan lui kaan a, lut a, na va luahna gam uah na khantou kei ding uhi. 19 Noute' mai ah hinna leh sihna, vualzawlna leh hamsia ka koih chih, noute tunga hon theihpihte hi dingin, lei leh vaan ka sam hi. Tua bang ahih manin, noute leh na suan na khakte uh na hin theih nadingun, hinna teel un. 20 Tua hi leh, Amah na hinna uleh na khantouna uh hipa Tangtawn Toupa na Pathian uh na it thei ding uh a, ama' aw na ngaikhe ding uh a, amah na lenkip thei ding uhi. Tua baan ah, Tangtawn Toupa'n na pu na pate uh, Abraham, Isak leh Jakob kianga kichiam zena, piak ding a na chih gam sung ah na teeng ding uhi, a chi hi.
Joshua leh Israelte Mawhpuakna Gawtna
1 Tua khitin, Mosi a pai a, Israelte khempeuh kiang ah hiai thute a gen hi. 2 Amaute kiang ah: Tuni-in kei kum 120-a upa ka hita a, hong pai a, hong lutpih thei ka hi nawn kei hi. Tangtawn Toupa'n zong ka kianga: Hiai Jordan lui gal na kah kei ding, hon chikhin ahi. 3 Tangtawn Toupa na Pathian mahmah uh na mai ua na pai masa ding ahi. Ama'n hiai namte na mai ua hihmangthang a, noute'n amaute' gam luah ding na hi uh. Tangtawn Toupa' gensa banga Joshua mahmah noute' maia galkah masa ding ahi. 4 Tangtawn Toupa'n, Amor kumpipate Sihon leh Og leh a gamte uh a hihmanthat a, a hih bangbanga hiai namte tunga hih ding ahi. 5 Noute thu kon piaktak banga, amaute tunga na hih theih nading ua, Tangtawn Toupa'n noute' khut sunga amaute hon pe ding ahi. 6 Hattak leh hangsantakin om unla, amaute kihtain lau kei un. Ahang bel, Tangtawn Toupa na Pathian uh, amah ahi noute hon tonpihpa. Ama'n noute hon nusia a, hon taisan lou ding ahi, a chi hi. 7 Tua khitin, Mosi in Joshua a sam a, Israelte khempeuh mitmuhin a kiang ah: Hattak leh hangsantakin om in. Ahang bel, Tangtawn Toupa'n a pu a pate uh piak ding a chiam gama, hiai mite tawh na pai ngeingei ding ahi a, amaute na luahsak ding ahi. 8 Tangtawn Toupa ahi na maia paipa. Ama'n nang hon ompih ding a, hon nusia-a hon taisan lou ding ahi. Lau kenla, lunglel het ken, a chi hi.
Dan Piakkhiakna
9 Tuachi-in, Mosi in hiai Dan a gelh a, siampite, tua Tangtawn Toupa' singkuang zawng Levi tapate leh, Israel upate khempeuh khut ah a pia hi. 10 Tua baan ah, Mosi in amaute thu a pia a: Kum sagih bei tengin, tua bat thaimang kum hun seh ah, tua Bawktate ankuang lui hunin, 11 Tangtawn Toupa na Pathian un a teel muna, ama' maia Israelte khempeuh hong kilaak chiangun, Israelte khempeuh zakin hiai dan na sim ding ahi. 12 Mite, numei pasal leh naupang neute leh na kongpi sung ua mikhual omte kaikhawm vek in, amaute'n a zak ua, Tangtawn Toupa na Pathian uh laudan a sin ua, hiai dante khempeuh pilvangtaka a zuih theih nading uleh, 13 hiai thei nailou a tate un a zak ua, Jordan lui galkah a, na va luah ding gam ua na teen sung teng uh, Tangtawn Toupa na Pathian uh laudan a sin theih nading uh ahi, a chi hi.
Pathian in Israelte a Ngawhna
14 Tua khitin, Tangtawn Toupa'n Mosi kiang ah: Ngai in, na sih hun hong naita hi. Joshua sam inla, Kihoupihna Puanbuk ah hong om un, amah nna guan ding ka hi, a chi hi. Tuachi-in, Mosi leh Joshua a va pai uh a, Kihoupihna Puanbuk ah a va om uhi. 15 Tangtawn Toupa tua Puanbuk ah meipi khuamin hong kilak a, tua Puanbuk lutna ah a ding hi. 16 Tangtawn Toupa'n Mosi kiang ah: Ngai in, na pu na pate kiang ah na khawlta ding hi. Hiai mite bel, a kisa ding uh a, a va om nading gam ua mite laka teengin, tua gamdang mite' pathiante tawh ang kikawma kizuak a suak ding uh a, kei hon nusiain amaute tawh kala ka thukhun a palsat ding uhi. 17 Tua ni chiangin, amaute tunga ka hehna a sou ding a, amaute ka taisan ding a, amaute apan ka mai ka seel ding a, nawmvalhin a om ding uhi. Amaute tung ah thil hoihlou leh buaina tampi a tung ding a, tua ni chiangin: Eite laka i Pathian a om nawn louh mana hiai thil hoihloute i tunga hong tung hi lou hia? a kichi ding uhi. 18 Amaute' thil gilou hihte khempeuh leh, pathian dangte lama a kihei manun, ke'n lah tua ni chiangin, amaute apanin ka mai ka seel taktak ding hi. 19 Tua bang ahih manin, tu'n noute adingin hiai la gelh inla, Israelte dema kei adinga theihpihna-a a pan theih nadingin, hiai la amaute kam ah guang in. 20 A pu a pate uh kianga ka chiamsa, nawitui leh khuaizu-a luang gama amaute ka piilut a, amaute'n ne-a dawna, a tai ua, hong mavan chiangun, pathian dangte lam a nga ding uh a, amaute' nna a sem ding uhi. Kei hon pampaihin ka thukhun a palsat ding uhi. 21 Tua hun chianga, amaute tunga tuahsiatna leh haksatna leh buaina a tun chiangin, a suante un mangngilh lou ding a hih manun hiai la amaute dema theihpihnain a pang ding hi. Ahang bel, tuni-a amaute' lungput dan thei ing a, amaute piak ding ka chiam gama, amaute ka piilut ma nangawna theikhin ka hi, a chi hi.
Dan Laibu Kikoihching
22 Tua bang ahih manin, Mosi in tua ni mah-in hiai la a na phuak a, Israel tate a sinsak hi. 23 Tua khitin, Nun' tapa Joshua kiang ah Tangtawn Toupa'n hiai thupiak a pia hi: Hattak leh hangsantakin om in. Israelte ka chiam gam ah amaute na piilut ding a, ke'n kon ompih ding hi, a chi hi. 24 Mosi in hiai dante a bul apan a tawp dong, laibu sunga a gelhkhit takin, 25 Mosi in Tangtawn Toupa' thukhun singkuang pua, tua Levite thu a pia a: 26 Hiai Dan Laibu la unla, noute dema theihpihna-a a pan den theih nadingin, Tangtawn Toupa na Pathian uh' thukhun singkuang kiang ah koih un. 27 Ahang bel, na helna uleh na genhakna uh thei hi vengin. Tuni-a noute kianga hing leh dama ka om laia bawn, Tangtawn Toupa tunga hel na hih chiangun, ka sih nung chianga bangzahta-a hel zawsem ding na hi ua? 28 Na nam upate khempeuh uleh, na makaite uh sam khawma hiai thute ka gen a, amaute dema hon theihpih dinga lei leh vaan ka sap theih nadingin, amaute khempeuh ka kiang ah hon kaikhawm un. 29 Ahang bel, hiai kiteltaka thei ka hi: Ka sih nung chianga amau leh amau kisusegawp ding uh a, noute kon thupiak lampi pialmangsan ding uhi. Na khut nasepte uh tungtawna amah hehsak dinga, Tangtawn Toupa' mitmuha thil gilou hih ding na hih man ua, ni nunungte-a na tung ua siatna hong tung ding ahi, a chi hi. 30 Tua khitin, Mosi in Israel kikhawmte zakin hiai la thu, a bul apan a tawp dong a gen hi:
Mosi' La
1 Vaante aw, bil dawh un, thu gen ding hi'ng. Lei aw, ka kama thu za in. 2 Ka sinsakna vuah bangin taaksuk henla, ka thugen daitui siang bang hen. Lounou tunga vuahmal taaksuk bang henla, loupa tunga vuahphin bang hen. 3 Tangtawn Toupa' min phuang ding ka hi. I Pathian thupina phat un aw! 4 Amah tua Suangpi hi a, a nasep hoihkim hi. A lampite dika thukhenna hi a, amah thutak Pathian hi a, amah zaw diktat leh tang hi ahi. 5 Amaute ama' mai ah kihihsegawp uh a, a maizum nading ua, ama' tate hi nawnlou uhi. Amaute zaw khang tatsia leh gilou hi uhi. 6 Nou mihai leh mipilloute'n Tangtawn Toupa na ditna uh hibang hi maw? Amah noute' Pa, noute hon leipa hilou maw? Ama'n noute hon bawl a, hon tungding hilou maw? 7 Tanglai nite thei gige unla, khang tampite khanlai nite suut un. Na pa uh dong un, ama'n hon hilh ding hi. Na upate uh dong un,amaute'n hon hilhchian ding uhi. 8 Tungnungpen in namte laka a goutante uh a hawmsak laia, mite a khenzak laia, Israel tate tamdan zuia, namte gamgite khung hi. 9 Ahang bel,Tangtawn Toupa' tantuan a mite hi a, Jakob lah a goutan hi ahi. 10 Ama'n gamdai-gamkeu ah amah mukhhia a, gamsia leh gam vuak, a daihsip sipna ah amah mukhia hi. Ama'n amah hum a, amah don a, a mitnauta banga kem hi. 11 Muvanlai in a bu thaidalh a, a noute tunga phe velvela leng a, amaute dom dinga kha zak a, a kha tunga amaute a puak bang hi ahi. 12 Tua banga Tangtawn Toupa kia in amah pii a, ama' kianga gamdang pathian khat beek om lou hi. 13 Ama'n leitung a sanna munte-a amah tuangsak a, gam gahtein vak a, suangpi apan khuaizu in taisak a, meisah suang heng apan sathauin thausak hi. 14 Bawnghonte apan bawngnawi dat, belam leh kelhonte apan nawitui, belamnou thaute tawh pia hi. Bashan belamtalte leh kelte, huit buh hoihpente tawh pia hi. Zu, tua grepte sisan banga san nang dawn na hi. 15 Ahihhanga, Jeshurun hong thau a, hong kipek hi. Hong vah a, hong gik a, hong mam hi. Tua chianga ama'n amah siampa Pathian taisan a, a hotdamna Suangpi nolh hi. 16 Amaute'n gamdang pathiante pansana ama' thikthu sesak uh a, thil kihhuai zanga hehsak uhi. 17 Pathian hilou dawite' mai ah kithoihna laan uh a, a theih louh uh pathiante, hong kilang tawm thak pathiante, na pu na pate un a lau louh uh pathiante' mai ah kithoihna laan uhi. 18 Noute ta-a hon nei tua Suangpi taisan hi uteh, noute hon bawlpa Pathian mangngilh hi uteh. 19 Tangtawn Toupa'n tua mu a, amaute nolh hi. A tapate leh tanute'n amah a hehsak man uh ahi. 20 Ama'n: Amaute apan ka mai seel ding hi'ng, khang tatsiate, upnabei tate a hih man ua, a beina uh tungsak ding hi'ng. 21 Pathian hiloute zanga ka thikthu sesak uh a, a mannabei a milimte uh zanga hon hehsak uhi. Ke'n nam hiloute zanga hazatna amaute neisak ding ing a, theihsiamna bei nam khat zanga amaute hehsak ding hi'ng, 22 Ahang bel, ka hehna mei kuang a, gawtmun nuainungpen donga kaang ding hi. A kuang semsem in leitung leh a gahte kangtum ding a, mualte kingakna suangphumte kaang ding hi. 23 Amaute tunga tuahsiatna vumsak ding ing a, amaute tunga ka thaltangte zang ding hi'ng. 24 Amaute gilkiala gawnggawp ding uh a, hipi leh siatna khatak in amaute negai ding hi. Amaute suai dinga gamsate' hate sawl ding ing a, leilaka bokvak thangtom gute sawl ding hi'ng. 25 Kongzing khawnga namsau in amaute tabeia koih ding a, a inn sung uah mulkimna leng ding hi. Tangvalnou leh nungaknoute, nawi nelai naungekte leh a teek samkangte mangthang ding uhi. 26 Amaute thehzak ding ing a, amaute theih gigena mihingte lak apan beisak ding hi'ng, chikhin hi'ng. 27 Ahihhanga, melmapa' totna lau ing a, tua hi kei leh, langpangpa'n theikhial a: I khut vualzouta e, hiaite khempeuh hihpa Tangtawn Toupa hi kei, chi kha ding hi, chi hi. 28 Ahang bel, amaute pilna neilou nam hi uh a, amaute sunga theihsiamna om lou hiven. 29 Amaute pilin hiai theisiam nuam hi liai uh henla, a tawpna ding uh thei le uh zaw! 30 Bangchi-a mi khat in mi sang khat delhzaak thei ding, bangchi-a mi nih in mi sangsawm taaikeeksak thei ding, a Suangpi un amaute khawngkhia a, Tangtawn Toupa'n amaute pekhia ahih kei ngalleh? 31 Ahang bel, amaute' suangpi lah eite Suangpi bang hilou a, i langpangte mahmah nangawn in, ahi, theihpih uh hiven. 32 Ahang bel, a grepgui uh Sodom grepgui hi a, a loute uh Gomora loute hiven. A grepgahte uh gu tawh kidim a, a gahbawkte kha vek hiven. 33 A zute uh gulgu hi a, sokval gu hat hi ahi. 34 Ama'n: Hiai kei kianga kholkhawm, ka goubawma khumchip ahi kei ahia? 35 Phulakna keia hi a, ditna keia hi ahi. A hun taka amaute' khe taal ding hi. 36 Ahang bel, a tuahsiat ni uh naita a, tua thilte amaute tunga tungpahta ding hi, chi hi. Ahang bel, Tangtawn Toupa'n a mite tunga thu khen ding a, a silate lainat ding hi. Amaute' vangletna beita, chih a muh chianga, 37 ama'n: Amaute' pathiante koia omta a, buk nadinga a zon uh suangpi koia omta hiam? 38 Tua a kithoihna sathaute uh ne a, a dawn thillatte uh dawnte koia omta hiam? Thou-in noute hon huh le uh a kei dia, na bukna uh hi le uh a kei dia! 39 Tu'n thei in, kei, keimah amah hi'ng, Kei lou pathian dang om lou hi. Ke'n that ing a, hingsak ing a, ke'n liamsak ing a, damsak ing a, ka khut apan amaute kuama'n humbit thei lou ding hi. 40 Ahang bel, ke'n ka khut vanlama liiktou ing a: Kei a hingden ka hih takpi mana, 41 ka namsau tathiam ing a, ka khutin dika thukhenna a tawi chianga ka langpangte thuk ding ing a, kei hon mudahte dinkik ding hi vengin. 42 Ka thaltangte sisan dawnkhamsak ding ing a, ka namsau in sa ne ding a, thahte leh matte' sisante leh melmapa' makaite' lutang sate hi ding hi, chi ding hi. 43 Namte aw, ama' mite tawh lungnuamkhawm un. Ahang bel, ama'n a silate' sisan phuba la ding a, a melmate tunga phulakna tun ding a, ama' gam leh ama' mite, adinga khuhna bawlsak ding hiven, chi-in. 44 Tuachi-in, Nun' tapa Joshua tawh Mosi hong pai a, mipite zakin hiai lathute khempeuh a gen hi. 45 Mosi in hiai thute khempeuh Israelte kianga a genkhit-in, 46 amaute kiang ah: Tuni-a noute laka theihpihna thu ka gente khempeuh lungtanga na kep ding uh, hiai dante pilvangtaka zui dinga na tate uh thu na piak ding uh ahi. 47 Ahang bel, hiai noute adinga bangmah lou maimai hi zenzen lou a, na hinna uh hi ahi. Jordan luigal kaha na va luah ding uh gamsunga hiai thute pansana na damsung nite uh sausak ding na hi uhi, a chi hi.
Nebo Muala Mosi
48 Tua khitin, Tangtawn Toupa'n tua ni mahmah-in Mosi a houpih a: 49 Jerikho gala Moab gama Abarim mual, tua Nebo Mual kichi ah kahtou in. Tua apanin Kanan gam, Israel tate a goutan ding ua ka piak gal-et inla, 50 Hor Muala na sanggampa Aron a sih a, a mite kianga khopkhawm ahih bangin, nang zong na kaltouhna tua mual ah sita inla, na mite kianga khop-khawmin omta in. 51 Ahang bel, Zin Gamdai-gamkeua, Meriba Kadesh tuite muna Israel tate laka kei hon pahtawi lou a, amaute laka ka tunga na tatlek hang ahi. 52 Hinapi-in, na maia gam na mu ding a, Israel tate ka piak ding tua gamsung ah bel na lut kei ding hi, a chi hi.
Israel Namte Vualzawlna
1 Pathian in Mosi a sih ma-a Isreel tate vualzawlna hiaite ahi. Ama'n: 2 Tangtawn Toupa, Sinai Mual ah hong pai a, Seir apanin amaute tung ah phalvakin hong vaak hi. Paran Mual apan hong taangkhia a, a misiangthou sangsawmte tawh hong ton hi. A khut taklam apanin amaute adingin, meikuang bang dan hong tung hi. 3 Ahi, tua nam itpa nang hi chin a, a siangthoute khempeuh Nang khut sunga om hi ahi: Amaute khempeuh na khebula tu uh a, michih in na thute saang uhi. 4 Mosi in koute adinga dan hon pia a, tua mah Jakob kikhawmte' goutan hi ahi. 5 Nam makaite khempeuh hong kikhopkhawm chiang ua, amah Jeshurun tunga kumpipa hi ahi. 6 Ama'n: Reuben hing henla, si kei hen, a mite zong tawm kei hen, chi hi. 7 Ama'n Judah' tungthu ah hiai gen a: Tangtawn Toupa aw, Judah' aw za inla, amah a mite kiang ah hon pii in. A khutte ama' kiven nadingin kiching henla, nang a melmate doua huhpa hi in aw, chi hi. 8 Ama'n Levi tungthu ah: Na Thumim leh na Urim, na deihsakpa-a hi a, amah, Masa-a na ze-et hi a, Meriba tuite muna na Kilangpih hi ahi. 9 Ama'n a nu leh pa tungthu gen a: Amaute zahtaak tuan keng, chi hi. Ama'n a sanggamte zong mei theihlou a, ama'tate mahmah nangawn deihsak tuam lou hi. Ahang bel, ama'n na thu veeng a, na thukhun kem hiven. 10 Ama'n na thukhennate Jakob sinsak a, na dan Israel sinsak hi. Na maia gimnamtui hal a, na maitam tunga haltum thillat laan hi. 11 Tangtawn Toupa aw, a khut nasep siamnate vualzawl inla, ama' khut nasep sang in. Amah doute leh amah mudahte a thawhzawh nawn louh nadingun, a taai uah sat in, chi hi. 12 Ama'n Benjamin tungthu ah: Tangtawn Toupa' itpa zaw ama'kiang ah bitin teeng hen. Ama'n sun nitum tuma amah hum a, seel a, Tangtawn Toupa' itpa a liangkou kikala khawltawldam hi, chi hi. 13 Ama'n Josef tungthu ah: Tangtawn Toupa'n ama' gam vaan daitui leh nuailam thuka tuitein vualzawl hen. 14 Ni apan gah manphapente leh, khapi apan gahsuah manphapentein vualzawl henla, 15 tanglai mualte apan thilhoihpentein vualzawl henla, Tangtawn mualte apan thil manphatein vualzawl hen. 16 Leitung apan thawnpiak hoihpente leh gah hoihpente leh loupa buk kuanga teengpa' deihsaknain vualzawl hen. Hiaite khempeuh Josef lutung leh a sanggamte laka makaite' tai ah khuksakin om hen aw. 17 Ama' thupina zaw bawngtal nou piang masa bang hi a, ama' kite zaw gam bawngtal kite bang hi ahi. Ama'n tuate-a namte si ding a, leimong donga omte nangawn si ding hi. Tuate bel, Efraim suan sangsawm sawma simte hi uh a, Manase suan a sang sanga simte hi uhi, chi hi. 18 Ama'n Zebulun tungthu ah: Zebulun aw, na paikhiak laiin lungnuam in. Nang Isakhar, na puanbukte ah lungnuam in! 19 Minamte mualtung lama samkhetou ding uh a, amaute'n diktatna thillatte laan ding uhi. Ahang bel, tuipite-a hauhnate tang ding uh a, sehnel laka kisel goute tang ding uhi, chi hi. 20 Ama'n Gad tungthu ah: Gad vaihawmna gam liansakpa mi nunnuam ahi. Tua ah humpinelkai bangin Gad teeng a, ama'n khut leh lutang balzak ding hi. 21 Ama'n ama' adinga gamhoihpen kilaak a, makai' tan dingte ama' adinga kisiit hi. Nam makaite' hong kikhop chianga Israel tawh kisaia, thukhennate, Tangtawn Toupa' deihna semkhia hi, chi hi. 22 Ama'n Dan tungthu ah: Dan zaw humpinelkai nou hi a, Bashan apan hong tawmkhia hi ahi, chi hi. 23 Ama'n Naftali tungthu ah: Naftali, Tangtawn Toupa' deihsakna tawh kidimpa, a vualzawlna tawh kidimpa hi a, ama'n simlam ah Tuipi dong gam luah ding hi, chi hi. 24 Ama'n Asher tungthu ah: Tapate laka a nunungpen Asher hi ahi. Ama'n a sanggamte' deihsakna tang henla, a khepek zong sathau ah kidiah hen. 25 Na kongpi kalhnate sik leh sumsan hi henla, na damsung teng na tha hat hen. 26 Jeshurun' Pathian bang kuamah omlou hi. Amah zaw nang hon huh dinga vaante tunga tuang hi. A thupina tawh meipi tunga tuang hi. 27 Tangtawn Pathian bukna hi a, a taangtawn baante'n na nuailama hon dom hi. Ama'n na mai apan meima hawlkhe ding a, Hihmangthang in! chi ding hi. 28 Tua banga Israel kia bita teeng ding a, buh leh zu tamna gama Jakob tuikhuk om ding a, a vaante'n daitui kesuksak ding hi. 29 Israel aw, a nunnuam na hi! Nang bang kua om ahia, nang Tangtawn Toupa' hotdam nam? Nang kihutna leh panpihna, na thupina namsau Tangtawn Toupa hi ahi! Na melmate na nuaia lut ding a, nang amaute' munsangte tuanchil ding na hi, chi hi.
Mosi in Gamchiam Gal-et
1 Tua khitin, Moab phaizang apanin, Jerikho gala Nebo Mual a sanna Pisga mualvum ah Mosi a kaltou hi. Tua apanin Tangtawn Toupa'n Gilead gam khempeuh, Dan gam dong, 2 Naftali gam khempeuh, Judah gam khempeuh Tumlam Tuipi dong, 3 tua baan ah Simlam Negev, Jerikho Phaizang Zoar dong, amah a ensak hi. Jerikho bel, Tumsing Khawpi kichi ahi. 4 Tua khitin, Tangtawn Toupa'n amah kiang ah: Abraham leh Isak leh Jakob kianga: Na suante uh kiang ah ka pe ding, chi-a ka chiamna hiai gam ahi. Tu'n na mit mahmaha hon musak ka hi. Ahihhangin, tua mun tung dinga galkah lou ding na hi, a chi hi.
Mosi Sihna
5 Tuachi-in, Tangtawn Toupa' sila Mosi, Moab gam ah, Tangtawn Toupa' gen bangin a sita hi. 6 Ama'n Moab gama phaizang ah amah a vui hi. Tua bel, Beth Peor gal ahi. Ahihhangin, tuni dong kuama'n a haan a thei kei hi. 7 Mosi a sih-in, kum 120-a upa ahi. Hinapi-in, a mit a mial nai kei a, a hatna tha zong a kiam kei hi. 8 Israel tate'n tua Moab phaizang ah, ni 30 sung Mosi a kah uhi. Tua bangin, Mosi suunna leh kahna nite hong beita hi.
Joshua in Mosi' Tha Kheng
9 Tuin Nun' tapa Joshua bel, Mosi in a tunga khut nga a hih manin, pilna kha in a luahdim ahi. Tua bang ahih manin, Israel tate khempeuh in a thu a limsak uh a, Tangtawn Toupa'n Mosi a thupiak bangin a hihta uhi.
Israel Gama Mosi Pahtawina
10 Tua nungsang, Israel gam ah, Tangtawn Toupa'n kimaituaha a theih Mosi bang kamsang dang a omta kei hi. 11 Tangtawn Toupa'n Aigupta gama Faro leh a silate mai leh, a gamsung khempeuha hih dinga a piak chiamtehnate leh thillamdangte khempeuh a piak kamsang dang a om kei hi. 12 Mosi in Israelte khempeuh mitmuha vangletna thupi khempeuh leh, lau-a mulkimna thupi Mosi in a hihte khempeuh bang a hih thei kuamah dang a om kei hi.
1 Tangtawn Toupa' sila Mosi sih nungin, Tangtawn Toupa'n Nun' tapa Joshua, Mosi panpihpa kiang ah thu a gen a: 2 Ka sila Mosi a sita. Thou inla, hiai mite khempeuh tawh Jordan lui galkah a, Israelte ka piak ding gama lut dingin kisa in. 3 Mosi kianga ka chiamsa bangin, na khepek ua na sikna gam chiangchiang uh kon pe dek hi. 4 Na gam uh, gamdai-gamkeu apan hiai Lebanon mual dung dong ahi ding a, tua chiangin, tua lui lian Iufratis luipi apan tumlam Tuipi Lian dong, Hitte gam khempeuh ahi ding hi. 5 Na damsung teng nang kuama'n hon nang zou kei ding. Mosi ka ompihtak bangin nang kon ompih ding. Kon zuausan ngei kei ding a, kon taisan ngei kei ding. 6 A pu a pate uh kianga piak ding, chi-a kichiam hiaia ka chiamsa gam luah dinga hiai mite pii ding na hih manin, thahat leh hangsan suah in. 7 Tha hat leh hangsan suah in. Ka sila Mosi in hon piak dan khempeuh zui dingin pilvang in. Na paina peuha na lawhchin theih nadingin, tua dan, taklam hiam, veilam hiam ah, pialsan ken. 8 Hiai Dan Laibu na kam nusesak ken. A sunga thu kigelhte peuhmah pilvangtaka na zuih theih nadingin, a sun a zanin na sut ding ahi. Tua hileh, na paina ah na lamzang ding a, na lawhching ding hi. 9 Ke'n thu kon peta hilou hiam? Thahat leh hangsan suah in. Lau kenla, lunglel ken. Na paina peuh ah, Tangtawn Toupa'n hon ompih ding ahi, a chi hi. 10 Tua bangin, Joshua in mite' makai liante thu a pia a: 11 Giahphual vasiksuak unla, mipite kiang ah: Nek leh tak kaikhawm un. Tu apan ni thumin, Tangtawn Toupa, na Pathian un noute adinga hon piak ding gam lut a, la a, luah dingin hiai Jordan lui na galkah ding uhi, chi un, a chi hi. 12 Joshua in, Reubente, Gadte leh Manase nam kimkhatte kiang ah bel, 13 Mosi, Tangtawn Toupa' nasempa'n noute hon thupiak thei gige un: Tangtawn Toupa, na Pathian un noute khawlna hon pe ding. Ama'n noute hiai gam hon pia ahi! 14 Mosi in Jordan lui suahlam gam hon piakna ah na zite uh, na tate uh leh na gantate uh a na teng ding uh a, ahihhangin, nou galdou mite bel kigalvanin na sanggamte uh ma ah na galkah ding uh ahi. 15 Tangtawn Toupa'n noute hon piak banga, na sanggamte uh zong tawlngakna a piak a, Tangtawn Toupa, na Pathian un a piak ding gam la a, a luah mateng uh, amaute na huh ding uh ahi. Tua nung chiangin, Mosi, Tangtawn Toupa' nasempa'n nisuahna lam a, Jordan lui suahlam gam hon piak ah, na kik ding uh a, noumau' gam na luah ding uhi, a chi hi. 16 Amaute'n Joshua a dawng uh a: Hih dinga koute non thupiak peuhmah ka hih ding uh. Non sawlna peuhmah ah ka pai ding uh. 17 Mosi' thu ka man bangun, nang thu zong ka mang ding uh. Tangtawn Toupa, na Pathian in, Mosi a ompih bangin, nang hon ompih peuhmah phot hen. 18 Na thu sel a, na thupiak mang lou mi peuhmah thah ahi ding. Thahat leh hangsan suah peuhmah phot in, a chi uhi.
Rahab leh Enkhemite
Tua nungin, Nun' tapa Joshua in, Shitim luiphai apan enkhemi nih a simin a sawl hi: Vakuan unla, gam vaveel unla, a diakin Jerikho khawpi vavel un, a chi hi.
Tuachi-in, amaute a vakuan uh a, kizuaknu Rahab inn ah a valut uh a, tua ah a vazintung uhi. 2 Kua hiam khat in: Ngai in! Israelte pawlkhat gam enkhe dingin, tuzanin hiai ah hong pai uhi, chi-in Jerikho kumpipa a vahilh hi. 3 Tua khitin, Jerikho kumpipa'n Rahab kiang ah mi a sawl a: Na kianga hong pai a, na inn-a hong lut mite hon pekhia in. Gam sung khempeuh enkhe dinga hong pai ahi uh, a chisak hi. 4 Ahihhangin, tua numei in tua mi nihte a paipih a, a na sel hi. Ama'n: Ahi, mi nih ka kiang ah hong pai ngut uhi. Ahihhangin, koi apan hong pai uhiam, chih ka thei kei. 5 Khawpi kongpi khak hun, khawmuiin a paikheta uhi. A paina lam uh zong ka theih louhpi. Kintakin delh un, na pha lai ding uhi, a na chi hi. 6 Ahihhangin, amaute bel, numei in inntung lama paipih a, inntunga a siatkhawm ziza kungte nuaia a na sel ahi. 7 Tua bangin, tua mite'n Jordan kaimun zotna lampi lam ah, enkhemite delh dingin a kipankheta uhi. Mi delhte a pawtkhiak khitun, kongpi a khak uhi. 8 Enkhemite zana a lup maun, Rahab, inntung ah a paitou a, amaute kiang ah: 9 Tangtawn Toupa'n hiai gam noute' khut sung ah hon pekhin, chih ka thei. Noute launa in koute hon khuhta. Hiai gama tengte khempeuh, noute launain a zulkhinta uhi. 10 Noute Aigupta apan nong paikhiak laiun, Tangtawn Toupa'n na mai uah, Tuipi San tuite a kangtatsak, chih ka na za uhi. Jordan suahlama Amor kumpipate, Sihon leh Og tunga na thilhih uh, amaute na suksiat dimdem dan uh, ka na za uhi. 11 Tua thu ka zak takun, ka lungtangte uh a zulkhinta a, noute lauin, michih hansanna a beikhinta. Tangtawn Toupa, na Pathian uh, tunga van Pathian leh nuaia lei Pathian a hih man a na hi. 12 Tua bang a hi a, tu'n noute tunga siamna ka suah manin, kei leh ka innkawte tunga siamna suah dingin, hehpihtakin, Tangtawn Toupa' min sialin ka kiang ah kichiam ve ua aw. 13 Ka pa leh ka nu leh ka sanggampate, leh ka sanggamnute leh a neih khempeuh uh' hinna non hutkhiaksak ding ua, sihna apan koute non hinghawi ding uh, chih chiamtehna kip hon pe ve ua aw, a chi hi. 14 Tua mite'n: Koute' hinna in noute' hinna sawng hen! Ka thilhih uh na genkhiak kei peuhmah naak leh, Tangtawn Toupa'n koute gam hon piak chiangin, noute tung ah siamna leh muanhuaina ka suah ding uh, a chi uhi. 15 Rahab' tenna inn bel, khawpi kulhbang tunga kilam ahi a, ama'n tawhlet apan khauhualin amaute a khaikhesuk hi. 16 Ama'n: Hon delhte'n hon muh louh nadingun mual tung lam ah tai un. Amaute hong kik nawn mateng, ni thum sung tua ah vabu unla, tua khit chiangin, na pai nading uah na pai ding uhi, a chi hi. 17 Tua mite'n amah kiang ah: Hiai kichiamna non kichiamsak tawh kisaiin, koute'n amawknain mawh paw lou hiai ding ka hi uh aw. 18 Ngai in, hiai gam kong lut tak chiangun hiai non khaikhiakna tawhlet ah hiai khauhual san na khih inla, na innsung ah na pa leh na nu leh na sanggampate, na sanggamnute leh na innkawte khempeuh na na kaikhawm in. 19 Noute kuapeuh, innsung apan konglaka a na paikhiak leh ama' sisan mawh ama' lutung ah a om ding. Koute'n mawh ka paw kei ding uh. Inn sunga nang tawh omkhawm mi peuhmah ahih leh, ama' tunga khut a kikhak peuhmah leh, ama' sisan mawh koute' lutung ah a om ding. 20 Ahihhangin, koute thilhih na genkhiak lebel, non kichiamsakna mawh apan ka siang ding uhi, a chi uhi. 21 Ama'n a dawng a: Na gen bang teekteek uh hita hen, a chi a, amaute a khakheta a, a paita uhi. Ama'n tua tawhlet ah tua khauhual san khihsain a koih hi. 22 Amau a paikhia uh a, amau delhte'n lamtawna vazong a, lah mu loua hong kik mateng uh, ni thum sung, mual tung lam ah a vatam uhi. 23 Mual tung apan amaute gel hong paisuk kik uh a, Lui a galkah uh a, Nun' tapa Joshua kiang hong tung uh a, a thiltuahte khempeuh uh amah a hilh uhi. 24 Joshua kiang ah: Tangtawn Toupa'n eite' khut ah tua gam khempeuh hon pekhin taktak ahi. Eite lauin mi khempeuh a zulkhinta hi, a chi uhi.
Jordan Lui Galkahna
1 Zingkhangpi-in Joshua a thou a, Israelte khempeuh tawh Shitim luiphai apan a kipankhia uh a, Jordan lui a tung uhi. Tua mun ah, lui galkah ma-in, giahphual a sat uhi. 2 Ni thum nungin, makaite'n giahphual a veh suak uh a, mipite kiang ah thupiakte a pia uhi: 3 Tangtawn Toupa, na Pathian uh' thukhun singkuang leh tua singkuang zawng siampite, Levite na muh chiangun, na omna uapan kipankhiain, tua singkuang na zui ding uh ahi. 4 Singkuang leh noute kal tong 2,000-a a kihal ding ahi. Singkuang na naih luat louh ding uh ahi. Tua bangin, koilama pai ding ahia, chih na thei ding uhi. Hiai lama pai ngei nai lou na hih manun hibanga na hih ding uh ahi, a chi uhi. 5 Joshua in mipite kiang ah: Noute kisiansuah un. Tangtawn Toupa'n zing chianga noute laka thillamdangpipi hih ding ahi, a chi hi. 6 Joshua in siampite kiang ah: Thukhun singkuang kisuan unla, mipite mai lam ah pai un, a chi hi. Tua bangin, amaute thukhun singkuang a kisuan uh a, mipite mai lam ah a pai uhi. 7 Tangtawn Toupa'n Joshua kiang ah: Mosi ka ompih banga nang hon ompih gige ka hi, chih mipite'n a theih nadingun, tuni-in Israelte khempeuh mai ah nang hon pahtawi panta ding ka hi. 8 Thukhun singkuang zawng siampite kiang ah: Jordan lui gei na tun chiangun, tui sikkhain ding un, chi-in thupia in, a chi hi. 9 Joshua in Israelte kiang ah: Hon naih unla, Tangtawn Toupa, na Pathian uh thute ngaikhia un. 10 Pathian Hing noute laka om ahi, chih hiai pansanin na thei ding uh. Ama'n noute mai apan Kanante, Hitte, Hivte, Perizte, Girgaste, Amorte leh Jebuste a hawlkhe ngeingei ding hi. 11 En un, leitung khuavannuai Toupa' thukhun singkuang na mai uah Jordan lui sung a lut ding hi. 12 Tu'n Israel namte lak apan mi sawmlenih, nam khat apan mi khat zel telkhia un. 13 Tangtawn Toupa, leitung khempeuh Toupa' thukhun singkuang zawng siampite'n Jordan tui khepeka a sik tak chiangun, luinak lam apan tui hong luangsuk pen, a kikhentat ding a, a kichingkhawm ding hi, a chi hi. 14 Hichi hong hi a, mipite'n, Jordan lui galkah dingin a giahphual uh a nusia uh a, thukhun singkuang zawng siampite amaute mai lam ah a pai uhi. 15 Jordan lui bel anlak hun sung teng a khansan laitak ahi. Hinapi-in, singkuang zawng siampite Jordan lui a tung uh a, a khepekun tuigei a sik uhi. 16 Tua laitakin, tua tui pen luinak lam apan luang louin a khawlta hi. Gamlapi ah, Zarethan kiang naia khua khat, Adam kichi mun ah tui vum venvonin a khawl a, luitaw lama Araba Tuipi, tua Chi Tuipi, lama luangsuk chiang chiang a kikhentat hi. Tua bangin, mipite Jerikho zawn ah a galkah uhi. 17 Israelte khempeuh, a nam buppi-a leihula a galkah sung teng uh, Tangtawn Toupa' thukhun singkuang zawng siampite bel, Jordan lui laizang ah, leihul ah kiptakin a ding uhi,
1 Tua nam buppi in Jordan lui a galkah khit takun, Tangtawn Toupa'n Joshua kiang ah thu a gen a: 2 Mipite lak apan mi sawmlenih, nam khat apan khat zel, telkhia inla, amaute thu pia inla: 3 Siampite' khe in a sikna mun, Jordan lui laizang apan suang sawmlenih lain pua unla, tuzan na giah nading uh giahphual ah nga un, chi-in hilh in, a chi hi. 4 Tua bangin, Joshua in Israelte lak apan a sehsa mi sawmlenihte, nam khat apan khat zel, a samkhawm a, 5 amaute kiang ah: Tangtawn Toupa, na Pathian uh' singkuang mai ah, Jordan lui laizang ah vapai unla, mi chih in suang khat tek, Israel nam zahzah, na liangun vapua un. 6 Tua bel, noute laka chiamtehna ahih den theih nading ahi. Tunung chiangin, na tate un: Hiai suangte bang na chihna uh hiam? chi-in hon dong ding uhi. 7 Tua hun chiangin, noute'n: Pathian in Tangtawn Toupa' thukhun singkuang mai ah Jordan luite a sattan hi. Jordan lui a galkah laia Pathian in Jordan tuite a kantatsak manin, Israel suante adinga theihgigena hiden dinga hiai suangte ka koih uh ahi, chi-in amaute na hilh ding uhi, a chi hi. 8 Tua bangin, Israel suante'n Joshua, thupiak bangbangin a hihta uhi. Tangtawn Toupa'n Joshua a hilh bangbangin, Jordan lui laizang apan suang sawmlenih, Israel nam zahzah, a pua uh a, a giahphual uah a nga uhi. 9 Joshua in thukhun singkuang zawng siampite dinna Jordan lui laizang ah suang sawmlenih dang a chiangkhawm hi. Tua suangte tua lai ah tuni dongin a om uhi. 10 Mipite' hih dinga Tangtawn Toupa'n Joshua a thupiak peuhmah a kim sipsipa mipite'n a hih khit mateng uh, singkuang zawng siampite bel Jordan lui laizang ah a ding uhi. Mosi in Joshua a thuhilh bangbanga kihih ahi. Tua bangin, mipite a kinawh uh a, Jordan lui a galkahta uhi. 11 Amaute khempeuh a galkah khitun, Tangtawn Toupa' singkuang leh siampite, mipite' mitmuhin a galkahta uhi. 12 Reuben' suante apan, Gad' suante apan, leh Manase suan nam kimkhat apan mite bel Mosi in amaute a thuhilh bangin, Israel suante mai ah a galkah uh a, galdou dingin a kigalvan uhi. 13 Kigalvansa mi 40,000, Tangtawn Toupa' mai ah gal dou dingin, Jerikho phaizang ah a galkah uhi. 14 Tua ni-in, Tangtawn Toupa'n Israelte khempeuh' mitmuhin Joshua a pahtawi hi. Amaute'n Mosi a zahtak bangun Joshua zong a damsung teng a zahtak uhi. 15 Tangtawn Toupa'n Joshua kiang ah: 16 Theihpihna singkuang zawng siampite, Jordan lui apan hong paitou dingin thu pia in, a na chita hi. 17 Tua bangin, Joshua in siampite kiang ah: Jordan lui apan hong paitou un, chi-in thu a napia hi. 18 Tua khitin, Tangtawn Toupa' thukhun singkuang zawng siampite, Jordan lui apan hong paitou uhi. Siampite' khete'n leihul a sik takin, Jordan lui tui hong kichih kik a, a ma-a bangin luipiau dimletin tui a luang hi. 19 Kha khatna, a ni sawm ni-in, mipite Jordan lui apan a paitou uh a, Jerikho suahlam panga om, Gilgal mun ah giahphual a sat uhi. 20 Gilgal ah Joshua in, Jordan lui apan a puakkhiak uh, tua suang sawmlenihte a chiangta hi. 21 Israelte kiang ah: Tunung chianga na suante un a pate uh kianga: Hiai suangte bang na chihna uhiam? chi-a a dot chiangun, 22 Israelte leihula hiai Jordan lui galkah uh eive, chi-in amaute na hilh un. 23 Tangtawn Toupa, na Pathian un noute na galkah mateng uh, na mai uah Jordan tui a kangtatsaka ahi. Tangtawn Toupa, na Pathian un i galkah mateng uh, i maia Tuipi San a na kantatsak bangbangin, Jordan lui a kangtatsak hi. 24 Leitung mi khempeuh in, Tangtawn Toupa' khut thahat dan a theih nading uleh, noute'n Tangtawn Toupa, na Pathian uh na lau den theih nadingun, Ama'n hiai a hih ahi, a chi hi.
Gilgala Zeksumna 1 Tua khitin, hichi hong hi a, Tangtawn Toupa'n eite khempeuh i galkah mateng, Israelte mai ah Jordan lui a kangtatsak, chih, Jordan tumlama om Amorte' kumpipate khempeuh leh tuipi geia Kanante' kumpipate khempeuh in a zaktakun a lungtangte uh a zulkhinta a, Israelte maituah dingin, hangsanna himhim a neita kei uhi. 2 Tua hun laiin, Tangtawn Toupa'n Joshua kiang ah: Meisahsuang temtate bawl inla, Israelte a nihveina zeksum kik in, a chi hi. 3 Tua bangin, Joshua in meisahsuang temtate a bawl a, Gibeath Haaraloth ah, Israelte zek a sum hi. 4 Hibanga a hihna hang hiai ahi: Aigupta apan hong paikhia, galdou thei pasal khempeuh, gamdai-gamkeu lampi ah a sivekta uh a, 5 tua Aigupta apan hong paikhete lah, Mosi in a zeksumsa ahi uhi. zekmukvun mual, Ahihhangin, Aigupta apan a khualzinna ua piangte bel, zeksum louh ahi uhi. 6 Aigupta apan hong paikhiak lai ua galdou thei pasal teng a sih vek dong uh, Israelte, gamdai-gamkeu ah kum 40 sung a vialzin uhi. Tua lah, Tangtawn Toupa' thu a man louh man uh ahi. Tangtawn Toupa'n eite kianga piak dinga i pu i pate kianga a chiamsa, tua nawitui leh khuaizu-a luang gam mu kei unteh, chi-in a na kichiamkhinta hi. 7 Ama'n tuate tangin a tate uh a khangliansak a, tuate ahi Joshua in zek a sumsak. Lamkala kuamah zek kisum lou ahih manin, zeksum louhin a na om nilouh uhi. 8 A nam buppi-a zeksum ahih nungun, a damsiang mateng uh, giahphual ah a nituang uhi. 9 Tua nungin, Tangtawn Toupa'n Joshua kiang ah: Tuni-in, Aigupta zahlakna noute apan ka khukmangta, a chi hi. Tua ahih manin, tuni dongin tua mun, Gilgal a kichi hi. 10 Jerikho phaizang, Gilgala a giah sungun, tua kha, a ni sawmleli ni, nitakin paikan ankuang a lui uhi. 11 Paikan khit, a zing chiang mahmahin tua gam gah, tanghou silngou sawhlouh leh an kan a ne uhi. 12 Tua gam gah a nek ni zing uapanin mana a ke nawn kei hi. Israelte adingin mana a om nawn kei a, tuachi-in, tua kumin Kanan gam gah a neta uhi.
Jerikho Pukna
13 Jerikho khawpi kianga Joshua a om laitakin, hichi hong om hi: Amah a daktouh leh, a mai ah pasal khat, a khuta namsau phawisa tawia ding a mu hi. Joshua in tua pa a vanaih a: Nang koute lama pang na hi hia, ka melmate uh lama pang? chi-in a dong hi. 14 Ama'n a dawng a: A koilam mah hi lou. Tangtawn Toupa' sepaihhon Makaipa hihna tawh hong pai ka hi, a chi hi. Tua a zak phetin, Joshua in lei si-in, amah a bia a: Ka Toupa'n a nasempa kianga bang gen ding nei hiam? chi-in a dong hi. 15 Tangtawn Toupa' sepaihhon Makaipa'n Joshua kiang ah: Na khedap suah in. Na dinna mun siangthou ahi, a chi hi. Tua bangin, Joshua in a khedap a suah hi.
1 Israelte kihtak manin Jerikho khawpi kongpi a kikhakchip bikbek hi. Kuamah a pawtkhe kei a, kuamah a lut kei hi. 2 Tua chiangin, Tangtawn Toupa'n Joshua kiang ah: En in, Jerikho khawpi na khut sung ah kon pekhinta hi. A kumpipa leh a sepaih galhatte kon pekhinta hi. 3 Galvan tawite khempeuh tawh khawpi kimvelin khatvei pai in. Hibangin ni guk sung hih in. 4 Singkuang mai ah siampi sagih, belamtal ki pengkul sagih tawiin paisak in. A ni sagih ni in, siampite pengkul mut kawmin, sagihvei khawpi kimvelin pai un. 5 Amaute'n belamtal ki, ngaihtak leh saugintaka a mut uh na zak chiangun, mipite ngaihtakin a awng zua zua ding uh ahi. Tua laitakin, khawpi kulhbang, amahin a chim ding hi. Tua bangin, mi chih ama' mazawn ah a lut ding ahi, a chi hi. 6 Nun' tapa Joshua in siampite a samkhawm a, amaute kiang ah: Tangtawn Toupa' Thukhun singkuang kisuan un. Tua singkuang mai ah siampi sagih, belamtal ki, pengkul sagih tawiin paisak un! a chi hi. 7 Tua khitin, siampite kiang ah: Kipankhia un! Khawpi kimvelin pai unla, galvan tawite, Tangtawn Toupa' thukhun singkuang mai ah masa uhen, a chi hi. 8 Joshua in mite kianga thu a genkhitin, Tangtawn Toupa' maia belamtal ki, pengkul sagih tawi siampi sagihte, pengkul mut kawmin a pai uhi. Amaute nung ah Tangtawn Toupa' thukhun singkuang in a zui hi. 9 Pengkul mut siampite mai ah galvan tawi galdou mite a pai uh a, nungdal siampite'n pengkul mut kawmin singkuang a zui uhi. 10 Joshua in mipite thu a pia a: Noute awng dinga thu kon piak mateng awng kei un. Na aw uh sangsak kei unla, pau zong pau kei un. Awng un! Ka chih chiangin bel, awng un, a chi hi. 11 Tuachi-in, ama'n Tangtawn Toupa' singkuang, khawpi khatvei kimvelin a zawngsak hi. Tua khitin, mipite giahphuala kik-in a zangiak uhi. 12 Joshua bel, a zing chiang zingkhangin a thou a, siampite, Tangtawn Toupa' singkuang a kisuan kik uhi. 13 Pengkul sagih tawi siampi sagihte, pengkul mut kawmin, Tangtawn Toupa' singkuang mai ah a pai uhi. Galvan tawite, amaute mai ah a pai uh a, nungdal pawl in Tangtawn Toupa' bawm a zui uh a, pengkul a mutging tawntung uhi. 14 A ni nih ni-in, khawpi kimvelin khatvei a pai uh a, giahphual ah a kik uhi. Tua bangin ni guk sung a hih uhi. 15 A ni sagih ni-in, hichi hong hi a, phalvak-in amaute a thou uh a, a hih ngei bangun khawpi kimvelin a pai uhi. Tua a ni sagih ni kiain sagihvei, khawpi kimvelin a pai uhi. 16 Sagih vei a kimvelna ua, siampite'n pengkul a mut takun, Joshua in mipite thu a pia a: Awng un! Tangtawn Toupa'n noute khut sung ah khawpi hon peta hi. 17 Khawpi sunga omte khempeuh Tangtawn Toupa' hamsiat ahi. Kizuaknu Rahab leh a innkawte kia na hawi ding uh ahi. Tua bel, ama'n enkhemi i sawlte a na sel man ahi. 18 Ahihhangin, hamsiat thu khat peuh la lou dingin, tua hamsiat thilte apan kiveng tek un. Tua chi louin zaw, Tangtawn Toupa'n hon hamsiat ding a, Israel giahphual hamsiat suaksakin, buaisiatna na tun kha ding uhi. 19 Ngun leh khamte khempeuh, sumsan leh sika kibawl van khempeuh, Tangtawn Toupa adinga sehtuam siangthou ahi. Tangtawn Toupa' gou kholhna-a na koih vek ding uh ahi, a chi hi. 20 Tua khitin, siampite'n pengkul sauginin a mut uh a, mipite'n a zak takun a awng uhi. Pengkul gin leh mipite ot tawh kitonin khawpi kulhbang a chimta hi. Tuachi-in, michih amau' mazawn tek ah a lut uh a, khawpi a lata uhi. 21 Khawpi leh a sunga omte khempeuh a hihse vek uh a, pasal, numei, a teek a khang, ganhon, belamhon leh sabiltungte a vekin namsauin a satlum uhi. 22 Joshua in gam enkhemi nihte kiang ah: Kizuaknu' inn ah lut unla, ama' kianga na kichiam bangun, amah, ama' mite leh a neih khempeuh tawh hon lakhia un, a na chita hi. 23 Tua bangin, enkhia-a kuan tangvalte a valut uh a, Rahab leh a pa leh nu leh sanggampate leh ama' mite khempeuh hon lakhia uhi. A innkawte khempeuh hon lakhia uh a, Israelte giahphual pua ah amaute a koih uhi. 24 Tua khitin, khawpi buppi leh a sunga omte khempeuh meiin a haltum uhi. Ngun leh khamte leh sumsan leh sika kibawl belte kia a hawi uh a, tuate Tangtawn Toupa' inn-a goukholna ah a koih uhi. 25 Kizuaknu Rahab leh a pa' innkawte leh ama' mite khempeuh bel, Joshua in a hinghawi hi. Tua bel, Joshua in enkhe dinga Jerikho-a a sawl mite, ama'n a na sel man ahi. Tuachi-in, amah tuni dongin Israelte lak ah a tengta hi. 26 Tua hun laitakin, Joshua in hamselawhna thu a khung hi: Hiai khawpi Jerikho lamthak peuhmah, Tangtawn Toupa'n hamsiat hen: Tua bang mi in, a suangphum a phum chiangin, a tapa upapen in sawng hen. A kongpite a bawl chiangin, a tapa tumpen in sawng hen, a chi hi. 27 Tua bangin Tangtawn Toupa'n Joshua a ompih a, a minthanna in gamteng a thawn hi.
Akhan' Khelhna
1 Ahihhangin, hamsiat thilte tawh kisaiin, Israelte muan-huailoutakin a gamta uhi. Judah nam-a mi khat Zera' tapa Zabdi' tapa Karmi ahi a, Karmi' tapa Akhan ahi. Akhan in hamsiat thilte a na la hi. Tuachi-in, Israelte tung ah Tangtawn Toupa' hehna a kuangta hi. 2 Joshua in Jerikho apan Ai khua ah mite a sawl hi. Ai khua bel, Bethel khawpi suahlam Beth Aven khawpi kianga om ahi. Joshua in a misawlte kiang ah: Paitou unla, gam vaenkhia un, a chi hi. Tuachi-in, amaute a paitou uh a, Ai khua a vaenkhia uhi. 3 Amaute Joshua kiang ah hong kik nawn uh a: Mi tengteng na kuansak vek a kul kei. Ai khua la dingin mi 2,000 hiam, 3,000 hiam sawl in. Mi tengteng tawlsak dah in. Ai khua ah mi tawmchik kia om hi, a chi uhi. 4 Mi 3,000 khawng a kuantou uh a, ahihhangin, Ai khawmite mai ah amaute a taikek uhi. 5 Ai khawmite'n mi 36 a na that uh a, khawpi kongpi apan Shebarim dong a delhsuk uh a, mun ken lak ah amaute a that uhi. Tua in mite a lungkesak a, tui bang lei a zui a hong hita uhi. 6 Tua bang ahih manin, Joshua in a puansilh a botkek a, Tangtawn Toupa' singkuang mai ah lei si-in, nitaklam tanpha a bok hi. Amah leh Israel upate leilaka bok-in, a luzang uah leivui a kibuak uhi. 7 Joshua in: Maizen, Toupa Tangtawn Pathian aw, banghanga hiai mite, Amorte khut-a mangthang dinga Jordan lui gal kahsak himhim na hia? Jordan lui gal langkhat lam ah lungkimtakin om hiathiat houh le ung maw! 8 Toupa aw, Israelte a melmate uh maia a taikek nung uh, ke'n bang genta ding ka hia? 9 Kanante leh hiai gama tengte'n hiai thu a na za ding uh a, koute hon umchipin, leitung apan ka min uh a thaimangta ding uhi. Tua khit chiangin, nang na min thupi hu dingin bang na hihta dia le? a chi hi. 10 Tangtawn Toupa'n Joshua kiang ah: Thou in! Banghanga bok nilouh na hia? 11 Israel in a khialta-a ahi! Ka thukham, amaute ka thupiak a mangkei uhi. Hamsiat thilte apan lak a nei uh a, a gu uh a, a im uh a, amau' van lak ah a sel uhi. 12 Hiai hangin ahi, Israelte, a melmate uh maia a din zawh louh uh. Amaute hamsiat thil hong suakta uh ahih manin, a melmate uh mai ah a taikek uhi. Noute laka hamsiat thil peuhmah na hihsiat kei uleh, noute kon ompih nawn kei ding hi. 13 Thou inla, mipite hihsiangthou in. Amaute kiang ah: Zing chiang adingin kihihsiangthou un. Tangtawn Toupa, Israel' Pathian in, Israel aw, noute lak ah hamsiat thil om ahi. Tua na koihmang mateng uh, na melmate uh mai ah na ding thei kei ding uh, chi ahi. 14 Zingsangin a nam a nama hong kilat ding uh ahi. Tangtawn Toupa'n a mat nam pen, a beh a beh-a hong kilat ding uh ahi. Tangtawn Toupa'n a mat beh pen, a innkuan kuana hong kilat ding uh ahi. Tangtawn Toupa'n a mat inkuan pen, a mi mai mala hong kilat ding uh ahi. 15 Tangtawn Toupa'n hamsiat thil tawh a matkhawm mi pen, a neih teng tawh Israelte'n a haltum ding uh ahi. Tangtawn Toupa' thukhun a manlouh manin leh Israelte laka khelhna zumhuaitak a hih manin, hibanga a tunga a hih ding uh ahi! a chi hi. 16 A zing chiang zingkhangin Joshua a thou a, Israelte a nam anamin hon painaisak a, Judah nam matin a om hi. 17 Judah nam, a beh a behin hon painaisak a, Zera beh matin a om hi. Zera beh, a innkuan kuanin hon painaisak a, Zabdi inkuan matin a om hi. 18 Joshua in Zabdi innkuan, a mi mai malin hon painaisak a, Akhan matin a om hi. Akhan bel, Karmi' tapa ahi. Karmi bel, Zabdi' tapa ahi. Zabdi bel, Zera' tapa ahi. Zera lah Judah nama mi ahi. 19 Tua khitin, Joshua in Akhan kiang ah: Ka tapa aw, Tangtawn Toupa, Israel Pathian, thupina pia inla, ama' kiang ah kiphuang in. Na thilhih hon hilh in, hon im ken, a chi hi. 20 Akhan in a dawng a: A dik ahi! Tangtawn Toupa, Israel Pathian tung ah ka na khialta hi. Hichi khachi-a ka hih ahi: 21 Gallak thilte lak ah Shinar puanaktual khat ka mu hi. Tua baan ah ngun tang, Shekel 200 leh kham khetphim tang shekel 50 zong ka mu a, ka enlah a, ka lata hi. Ka puanbuk sung, suai leinuai ah tuate ka sel a, tua nuai ah ngun tang a om hi, a chi hi. 22 Tua khitin, Joshua in mite a sawl a, amaute tua puanbuk ah a vatai uhi. Ngai in, tua puanbuk suai nuai ah puanaktual, a nuaia ngun tang tawh a na kisel petmah hi. 23 Amaute'n tua puanbuk apan tua thilte hon la uh a, Joshua leh Israelte khempeuh kiang ah hon pua uh a, Tangtawn Toupa mai ah a zalh uhi. 24 Tua khitin, Joshua leh Israelte khempeuh in Zera' tapa Akhan a kaikhia uhi. Tua ngun tawh, tua puanaktual tawh, tua kham khetphim tang tawh, a tapate, a tanute, a ganhonte, a sabiltungte, leh a belamte, tua chiangin, a puanbuk leh a neih teng tawh, amah Akhor Phaizang ah a paipih uhi. 25 Joshua in: Banghanga nang hibang lungzinna eite khempeuh tunga hon tun na hia? Tangtawn Toupa'n tuni in nang tung ah lungzinna hon tun ding ahi, a chi hi. Tua bangin, Israelte khempeuh in amah suang-in a deng uh a, amaute'n suanga a den khitun, meiin a haltum uhi. Hibang ahi amaute'n a denlup dan uh. 26 Akhan tung ah suang lianpi-in a chiang uh a, tuni dongin tua a om lai hi. Tua bangin, Tangtawn Toupa, a hehna mulkimhuai apan a lungheita hi. Tua ahih manin, tuni dongin tua mun, Akhor Phaizang a kichi hi.
Ai Khua Hihsiatna
1 Tua nungin, Tangtawn Toupa'n Joshua kiang ah: Lau kenla, lungke ken. Galdou pawlpi khempeuh tonpih inla, vakuantou inla, Ai khua vasim in. En in, Ai kumpipa leh a mite, a khawpi leh a gam na khut sung ah kon peta hi. 2 Jerikho leh a kumpipa tunga na hih bangbangin, Ai leh a kumpipa tung ah hih in. Gallak thil leh a ganhonte uh bel, noumau adingin na la thei ding uhi. Khawpi nunglam ah galbuk pawl koih in, a chi hi. 3 Tua bangin, Joshua leh galdou khempeuh Ai khua sim dingin a kuankhia uhi. A galhat penpente 30,000 a telkhia a, zankhangin a sawlkhia hi. 4 Amaute thu a pia a: En un, noute, khawpi nunglam ah galbukin na om ding uh ahi. Khawpi apan gamlapi ah pai kei unla, mansain om un. 5 Kei leh ka ompihte'n khawpi ka vanaih ding uhi. Hichi hong hi ding a, tuma-a mah bangin, koute dou dingin amaute hong kuankhe ding uhi. Hong kuankhiak tak chiangun, amaute mai ah ka tai ding uhi. 6 Khawpi apan amaute ka zolkhiak mateng uh koute hon delh ding uh a, amaute'n: Tuma-a mah bangin, amaute eite mai ah taikek uh e, a kichi ding uhi. Tua banga, amaute maia ka tai chiangun, 7 noute na galbukna mun uapan ding khiain khawpi na la ding uhi. Tangtawn Toupa, na Pathian un noute khut sung ah tua khawpi hon pe ding hi. 8 Khawpi na lak khit chiangun, meiin na haltum ding uh ahi. Tangtawn Toupa' thupiak bangbangin na hih ding uh ahi. Ngai un, ke'n thu kon peta hi, a chi hi. 9 Joshua in a amaute a sawlkhia a, amaute galbuk nading mun ah a kuanta uhi. Ai khua tumlam pang, Ai leh Bethel kikal ah gal a buk uhi. Ahihhangin, Joshua bel mipite lak ah tua zan a giak hi. 10 A zing chiang, zingkhangpiin Joshua a thou a, a mite a kaikhawm a, Israel upate tawh Ai khua lam manawhin mipite ma a kai hi. 11 Galdoumi khempeuh amah tawh a kuantou uh a, khawpi a naih uh a, khawpi mazawn naichik a vatung uhi. Ai mallam pang ah giahphual a sat uhi. Ai leh amaute kikal ah phaizang a om hi. 12 Amain, Joshua in mi 5,000 khawng sawlin, Ai tumlam pang ah Ai leh Bethel kikal ah galbukin a koihkhinta hi. 13 Khawpi mallama giahphuala om, galdoumi khempeuh in mallam ah panmun a khawh uh a, tumlam ah galbuk pawl a pang uhi. Tua zanin, phaizang ah Joshua a paisuk hi. 14 Ai kumpipa'n tua a muh takin, khawpi mite tawh zingkhangpi-in a thou uh a, kintakin Araba zawn mun khat ah Israelte dou dingin a kuankhia hi. Ahihhangin, khawpi nunglam ah galbuk pawl a om, chih a thei kei hi. 15 Joshua leh Israelte bel kumpipa' galdoumite maia vuallel bangin, gamdai-gamkeu lampi ah a tai uhi. 16 Kumpipa'n amaute delh dingin, khawpi-a om teng khempeuh a samkhawm a, Joshua a delh uhi. Joshua in khawpi apan amaute a zolkhiak ahi uhi. 17 Ai ah hita leh Bethel ah hita leh, mi khat lei zong a omta kei uhi. Khawpi pen venlouha nusiain, Israelte a delhta uhi. 18 Tua khitin, Tangtawn Toupa'n Joshua kiang ah: Na khuta teipi Ai khualam ngatin lik in. Khawpi nang khut sunga hon pe ding ka hi, a chi hi. Tua bangin, Joshua in a teipi Ai khua lam ngatin a lik hi. 19 Hibanga a hih takin, galbukte, a panmun uapan hong dingkhe pah uh a, khawpi sunga lutin khawpi a lata uh a, a hal pah uhi. 20 Ai khua mite'n nunglam a nga uh a, khawpi kang khu vanlama kitungtou a mu uhi. Ahihhangin, amaute adingin koilam maha suahtak nading lampi a omta kei hi. Ahang bel, gamdai-gamkeu lama tai Israelte'n lah amaute delhte a na-lehdouta uhi. 21 Galbukte'n khawpi a lata uh, chih leh khawpi kangkhu kitungtou a muhtakun, Joshua leh Israelte khempeuh in kilehheiin Ai khua mite a na-sual uhi. 22 Galbukte zong khawpi apan hong taikhiain amaute a suai uh a, tua chi-in, Israelte'n amaute a langtuak ah a kalteh uhi. Israelte'n amaute hinghawi neilouin a that vek uh a, suakta khat leltak zong a om kei hi. 23 Ahihhangin, Ai kumpipa bel a hingmat uh a, Joshua kiang ah hon paipih uhi. 24 Israelte'n Ai khaw mite khempeuh, giahphual ah leh gamdai-gamkeua amaute a delhna mun uah, namsauin a na that chimit uhi. Tua nungin, Israelte Ai khua ah a kik uh a, a sunga omte namsau-in a that uhi. 25 Tua ni-in, Ai khua-a teng khemppeuh pasal leh numei 12,000 a si uhi. 26 Joshua in lah Ai khua-a tengte khempeuh a thah vek mateng, a teipi tawina khut a dokkik kei hi. 27 Ahihhangin, Tangtawn Toupa'n Joshua thu a piak bangin, Israelte'n tua khawpi-a gantate leh gallakte amau adingin a kilak uhi. 28 Tua bangin, Joshua in Ai khua a halta a, a sesa kivum lei a suaksak a, tuni dong kuama'n a luah kei hi. 29 Ai kumpipa bel singkung ah a khailum a, nitaklam dongin a khai hi. Ni a tum takin, Joshua in singkung apan a luang lakkhiak dingin thu a pia a, a lakhia uh a, khawpi kongpi lutna ah a paai uhi. A tung ah suang lianpi-in a chiang uh a, tuni dongin tua suangte a om lai hi.
Ebal Muala Thukhun Thaksakna
30 Tua nungin, Joshua in Ebal Mual ah, Tangtawn Toupa, Israel' Pathian adingin maitam a dawh hi. 31 Tua bel, Tangtawn Toupa' sila Mosi in Israelte kianga a thupiak tangtunna ahi. Tua bangin, Mosi' Dan Laibu sunga kigelh bangbangin, sik vanzat kizat louhna, sek louh suangtein ama'n tua maitam a dawh hi. Tua tung ah amaute'n Tangtawn Toupa adingin haltum thillatte leh lemna thillatte a lan uhi. 32 Tua ah, Joshua in Israelte mitmuhin, Mosi' dan gelhsa tua suangte tung ah a teisawn hi. 33 Israelte khempeuh, gamdang mi hi-in, tualsung mi hita leh, a vekpiun, a upate uh, a makaite uh leh thukhenmite tawh, Tangtawn Toupa' thukhun singkuang pang tuak ah a ding uhi. Amaute, tua singkuang zawng Levi siampite mai ah tua bangin a ding uhi. Amaute kikimkhenin, a kimkhat Gerizim Mual mazawn ah a ding uh a, a kimkhat dang Ebal Mual mazawn ah a ding uhi. Tangtawn Toupa' sila Mosi in, Israelte vualzawl dinga amaute thu a hilh laiin, hibanga hih dingin thu a na pekhin hi. 34 Tua nungin, Joshua in dan thute khempeuh vualzawlnate leh hamsiate, Dan Laibu sunga kigelh bangbangin, a simkhia hi. 35 Joshua in, Mosi' thupiak peuhmah, Israel kikhawmte, numei leh naupang leh amaute laka teeng gamdang mite nangawn zak-a simkhiak louh bangmah a om kei hi.
1 Jordan tumlam panga kumpipate khempeuh, tanggama omte, phaizang a omte, leh Tuipi Lian gei gam tengteng, Lebanon chiang donga omte'n Jerikho leh Ai zawhna thu a na za uhi. Amaute bel, Hitte, Amorte, Kanante, Perizte, Hivte leh Jebuste' kumpipate ahi uhi. 2 Amaute, Joshua leh Israelte dou dingin kithutuaktakin hong kikaikhawm uhi. 3 Ahihhangin, Joshua in Jerikho leh Ai a bawl dan Gibeonte'n, a na zak takun, 4 lepchiahpiltakin a gamta uhi. Palaia kibawlin, ip luipipi, zuthol luipipi a sesa kithuap nemnum khawng, sabiltungtea puain a kisawl uhi. 5 Khedap sesa, kithuap nemnum khawng a bun uh a, puan luipipi a silh uhi. A tanghou beute uh zong a keugawp leh a apgawpsa ngen ahi. 6 Amaute, Gilgal giahphual ah Joshua kiang ah a vapai uh a, amah leh Israelte kiang ah: Gamlapi apan hong pai ka hi uh. Koute tawh lemna thu khung un aw, a vachi uhi. 7 Israelte'n tua Hivte kiang ah: Ka kiang ua teng hi kha ni uteh. Tua hi leh, noute tawh lemna thu ka khung thei ding uhia! a chi uhi. 8 Amaute'n Joshua kiang ah: Koute, na silate ka kei ua hia, a chi hi. Ahihhangin, Joshua in amaute kiang ah: Kuate na hi ua? Koi apan hong pai na hi ua? a chi hi. 9 Amaute'n a dawng uh a: Tangtawn Toupa, na Pathian uh min ka zak manun, gam gamlapi apan hong pai ka hi uh. A minthanna kigensawn ka na za uh a, Aigupta-a a thilhih khempeuh ka na za uhi. 10 Jordan suah lama Amor kumpipa nihte Heshbon kumpipa Sihon leh Bashan kumpipa, Ashtaroth khua-a vaihawmpa Og a bawl dante ka na za uhi. 11 Tua bang ahih manin, ka upate uh leh ka gam ua tengte khempeuh in koute hon sawl uhi: Lampi-a nek ding an pua unla, amaute vahoupih un. Koute na silate hi ung, koute tawh lemna thu khung un, vachi un, hon chi uhi. 12 Noute kianga hong pai dingin, inn apan kong kipatkhiak laiun, hiai ka tanghoute uh a lum laia kon tun uh ahi a, en un, tuin a apgawpta. 13 Hiai zuthawlte zu ka thun laiun, a thak ahi a, en un, tuin a khaanggawpta. Kong paina uh a gamlat luat manin ka puansilhte uh leh ka khedapte uh a luigawpta, a chi uhi. 14 Israelte'n tua mite' an a chiam uh a, Tangtawn Toupa dongin thu a kan masa kei uhi. 15 Tuachi-in, Joshua in amaute hinghawi dingin, amaute tawh lemna thu khung a, kikhawm mipite' makaite kichiamin thukhun a hihkipsak hi. 16 Gibeonte tawh lemna a bawl nung uh ni thum khitin a kilempihte uh, amau kiang naia teng, a khawhiangte ahi uh, chih Israelte'n a za uhi. 17 Tua bangin, Israelte a kipankhia uh a, a ni thum ni-in, amaute khawpite hong tung uhi. Tuate Gibeon, Kefira, Beeroth leh Kiriath Jearim ahi. 18 Ahihhangin, Israel kikhawmte' makaite'n, amaute kianga Tangtawn Toupa, Israel Pathian' min siala a na kichiamtak manun, amaute a dou kei uhi. Ahihhangin, kikhawmte, avekpiun a makaite uh tung ah a phun uhi. 19 Ahihhangin, makaite'n a dawng uh a: Tangtawn Toupa, Israel Pathian' min sialin i thuchiam amaute kiang ah i peta. Tu-in amaute i khoih a siang kei hi. 20 Amaute tunga i hih ding hiai ahi: Amaute kianga i kichiamna palsata eite tunga thangpaihna hong tun louh nadingin, amaute i hinghawi ding hi, a chi uhi. 21 Amaute'n: Amaute hing uhen. Ahihhangin, nam buppi khempeuh adingin singpua tuitawiin pang uhen, a chi uhi. Tua bangin makaite'n amaute kianga thuchiam a bawl uh a zui uhi. 22 Tua bangin, Joshua in Gibeonte a sam a: Banghanga koute kiang naia teeng hinapi, Gamlapi-a teeng ka hi uh, chi-a hon khem na hi ua? 23 Tu-in noute hamsethuak na hi uhi. Ka Pathian uh inn ading singpua tuitawia nasep na tawp ngei kei ding uh, a chi hi. 24 Amaute'n Joshua a dawng uh a: Tangtawn Toupa, na Pathian un a sila Mosi thu a piak dan, gam buppi noute hon piak dan leh, a gama teengte na mai ua hihchimih ding thu a piak dan kiteltaka hilhin ka om uhi. Tua banga, noute hanga ka hinna uh mansuah ding ka lau mahmah manun, hibanga hih ka hi uhi. 25 Tu-in, noute khut sunga om ka hi mai uh a, kilawm leh dik na sak bangbangun ka tung uah hih mai un, a chi uhi. 26 Joshua in Israelte khut apan amaute a humbit a, amaute a that kei uhi. 27 Tu ni-in, amaute ading leh Tangtawn Toupa'n a sehna muna Tangtawn Toupa' maitam ading, singpua tuitawi dingin Joshua in Gibeonte a bawlta hi. Tuni dongin, tua bangin a pang uhi.
Nileh Kha a Khawlna
1 Joshua in Ai khua a la a, a hihgawp vek a, Jerikho khua leh a kumpipa tunga a hih bangin, Ai khua leh a kumpipa tung ah a hih chih thu Jerusalem kumpipa Adoni Zedek in a na za hi. Tua baan ah, Gibeonte'n Israelte tawh lemna thu khung uh a, amaute lak ah a teeng uh, chih zong a na za hi. 2 Amah leh a mite'n hiai thu a zak takun a patau mahmah uhi. Ahang bel, Gibeon kichi, kumpipa' khawpite laka khat banga lian, Ai khua sanga lianzaw ahi a, a mite zong galhat ahi uh chih a theih man uh ahi. 3 Tua bang ahih manin, Jerusalem kumpipa Adoni Zedek in, Hebron kumpipa Hoham, Jarmuth kumpipa Piram, Lakhish kumpipa Jafia leh Eglon kumpipa Debir kiang ah ngetna a bawl a: 4 Hong kuantou unla, Gibeon dou dingin hong huh un. Gibeon in Joshua leh Israelte tawh kilemna a bawl ahi, a chi hi. 5 Tua bangin, tua Amor kumpipa ngate a pangkhawm uhi. Amaute, Jerusalem, Hebron, Jarmuth, Lakhish leh Eglon kumpipate ahi uhi. A sepaihte khempeuh utawh a kuantou uh a, Gibeon dou dingin panmun a khawh uh a, a douta uhi. 6 Tua chiangin, Gibeonte'n Gilgal giahphual ah Joshua kiang ah thu a khak uh a: Na silate hon taisan ken. Hong kuantou meng inla, hong hunkhia in! Tanggama Amor kumpipate khempeuh koute dou dingin a pangkhawm uh, koute hong huh meng in, a chi uhi. 7 Tuachi-in, a sepaih honpi tawh, a galhat muanhuaite tawh, Gilgal apanin Joshua a kuantouta hi. 8 Tangtawn Toupa'n Joshua kiang ah: Amorte kihta ken. Amaute na khut sung ah kon pekhinta. Amaute kuamah in nang hon nang zou kei ding, a chi hi. 9 Gilgal apan zan khawvaka a pai touh nungun, Joshua in amaute, a theihkholh louhun, a dou guih hi. 10 Tangtawn Toupa'n amaute Israelte mai ah a buaigawpsak a, Gibeon ah tampitak a that hi. Israelte'n Beth Horon paitouhna lampi ah amaute a delh uh a, Azeka leh Makeda dongin lamtawnin a that uhi. 11 Amorte, Beth Horon apan Azeka dong, Israelte mai-a a taisukna uah, Tangtawn Toupa'n van apan gialpi-in a dengsuk a, Israelte' namsaua si sangin gialpi denlup a tamzaw uhi. 12 Tangtawn Toupa'n Israelte khut sunga Amorte a piak ni-in, Joshua in Tangtawn Toupa kiang ah thu a gen a, Israelte mai ah: Ni aw, Gibeon tung ah dingchip in, Kha aw, Aijalon Kuam tung ah dingchip in, a chi hi. 13 Tua bangin, Israelte'n a melmate uh tunga phuba a lak zawh mateng uh ni a khawl a, kha a khawl hi. Hiai thu Jashar' Laibu sung ah kigelh mah hilou hia? Van laizang ah ni a khawl a, ni khat sung vingveng tum ding a thudon kei hi. 14 Tua ma hileh, tua nung hi leh, chikmahin tua ni banga Tangtawn Toupa'n mi khat thumna a ngaihkhiak ni a om ngei kei hi. Tangtawn Toupa'n Israelte adingin gal a dou taktak hi! 15 Tua khitin, Joshua leh Israelte khempeuh Gilgal giahphual ah a chiahkik uhi.
Amor Kumpipa Ngate Thahna
16 Tua kumpipa ngate bel a na tai uh a, Makeda ah, kawkhuk ah a na- Phat Phat bu uhi. 17 Mi pawlkhat in: Kumpipa ngate ka muta uh. Makeda ah, kawkhuk ah a bu uh, chi-in Joshua a hilh uhi. 18 Ama'n amaute kiang ah: Suang lianpi khuk unla, tua kawkhuk hu unla, mi pawlkhat vengsak un. 19 Ahihhangin, noute tua muna khawl louin na galte uh delh unla, a nunglam ua pan suai unla, a khawpite uh tungsak kei un. Tangtawn Toupa, na Pathian un noute' khut sung ah amaute hon pekhinta ahi, a chi hi. 20 Tua bangin, Joshua leh Israelte'n amaute a zougawp ngiingei uh a, thah bang tawmchik kia kulhnei khawpite a tung uhi. 21 Tua nungin, sepaihhonte Makeda ah, giahphual ah, Joshua kiang ah galmuangin a kik uhi. Kuamah in Israel demna thu a gen kei hi. 22 Joshua in: Kawkhuk hong unla, tua kumpipa ngate ka kiang ah hon kai un, a chi hi. 23 Tua bangin, kawkhuk apan tua kumpipa ngate hon kai uhi. Amaute, Jerusalem, Hebron, Jarmuth, Lakhish leh Eglon kumpipate ahi uhi. 24 Amaute, Joshua kiang hon tut takun, ama'n Israelte khempeuh a samkhawm a, amaute hon kai sepaih makaite kiang ah: Hiai ah hong pai unla, hiai kumpipate' ngawng ah na khe-un sik un, a chi hi. Tua bangin, amaute hong pai nai uh a, amaute' ngawng ah a sik uhi. 25 Joshua in amaute kiang ah: Lau kei un. Lungke kei un. Thahat leh hangsan suah un. Gal na dou dingte uh tung ah Tangtawn Toupa'n hibanga hih ding ahi, a chi hi. 26 Tua khitin, Joshua in namsauin kumpipate a dawt a, a that a, singkung nga dawn ah a khai a, nitaklam dongin a kikhaisak hi. 27 Ni hong tum takin, Joshua in amaute, singkungte apan lakkhiak a, a bukna uh kawkhuk sunga paihlut ding thu a pia hi. Suang lianpipiin tua kawkhuk a hu uh a, tuni dongin tua suangte a om lai hi. 28 Tua ni-in, Joshua in Makeda a la hi. Tua khawpi-a teengte leh a kumpipa namsauin a that vek sipsip a, khat lei zong hinghawi a nei kei hi. Jerikho kumpipa tunga a hih bangin, Makeda kumpipa tung ah zong a hih hi.
Simlam Khawpite Zawhna
29 Tua nungin, Joshua Israelte khempeuh tawh Makeda apan Libna ah a pai uh a, tua khua a sim uhi. 30 Tangtawn Toupa'n tua khua leh a kumpipa Israelte khut sung ah a pia hi. Joshua in tua khua-a teengte khempeuh namsauin a that a, hinghawi a nei kei hi. Ama'n Jerikho kumpipa tunga a hih bangin, Libna kumpipa tung ah zong a hih hi. 31 Tua nungin, Joshua, Israelte khempeuh tawh, Libna apan Lakhish ah a pai uhi. Lakhish sim dingin panmun a khawh uh a, a sim uhi. 32 Tangtawn Toupa'n Israelte khut sung ah Lakhish a pia a, Joshua in a ni nih ni-in, tua khua a la hi. Libna tunga ahih bangin, Lakhish-a teengte khempeuh namsauin a that hi. 33 Lakhish huh dingin Gezer kumpipa Horam hong kuantou a, ahihhangin, Joshua in Horam leh a sepaihhon a zou a, hinghawi a nei kei hi. 34 Tua nungin, Joshua, Israelte khempeuh tawh, Lakhish apan Eglon ah a pai uhi. Eglon sim dingin giahphual a sat uh a, a sim uhi. 35 Tua ni mah-in tua khua a la uh a, Lakhish tunga a hih bangbangun Eglon-a teengte khempeuh namsauin a that uhi. 36 Tua nungin, Joshua, Israelte khempeuh tawh, Eglon apan Hebron ah a pai uh a, tua khua a sim uhi. 37 Hebron a la uh a, a kumpipa tawh a mite khempeuh tawh, a khawtatea teengte khempeuh tawh namsauin a that uh a, hinghawi a nei kei uhi. Eglon tunga ahih bangbangun, Hebron leh a sunga teengte a hihchimit uhi. 38 Tua nungin, Joshua, Israelte khempeuh tawh a kihei uh a, Debir a sim uhi. 39 Tua khawpi a la uh a, kumpipa a that uhi. A khawtate a la uh a, a mite khempeuh namsauin a that uh a, hinghawi a nei kei uhi. Libna leh a kumpipa tunga a hih uleh, Hebron tunga a hih bangbangun, Debir leh a kumpipa tung ah zong a hih uhi. 40 Tuachi-in, Joshua in hiai gam buppi, tanggam, simlam gam Negev kichi, phaizang leh muangpang keen teng, a kumpipate khempeuh utawh a zou a, hinghawi a nei kei hi. Tangtawn Toupa, Israel Pathian' thupiaksa bangbangin, a nak thei khempeuh a hih chimit hi. 41 Joshua in Kadesh Barnea apan Gaza dong leh Goshen gam khempeuh apan Gibeon dong a zou vek hi. 42 Joshua in hiai kumpipate leh a gam uh khatvei kuanin a zou vek hi. Tua bel, Tangtawn Toupa, Israel Pathian in Israel adinga gal a dou man ahi. 43 Tua nungin, Joshua leh Israelte khempeuh Gilgal giahphual ah a chiahkik uhi.
Mallam Kumpipate Zawhna
1 Hazor kumpipa Jabin in hiai thu a na za a, Madon kumpipa Jobab leh Shimron leh i Akshaf kumpipate kiang ah thu a I khak hi. 2 Mallam tanggamte, Galili tuipi simlama om Araba-a teengte, tumlam phaizang apan Dor tanggam donga teengte' kumpipate kiang ah zong thu a khak hi. 3 Tua baan ah, suahlam leh Kanante' kumpipate leh tanggama teeng Amorte, Hitte, Perizte, Jebuste' kumpipate leh Hermon Mual nuai Mizpa gama Hivte' kumpipate kiang ah zong thu a khak hi. 4 Amaute, a sepaihhon khempeuh utawh, sakol leh kangtalai tampi tawh, sepaihhon tampi mahmah hong kuankhia uhi. A tamdan uh tuipi piaua sehnel zah ahi. 5 Hiai kumpipate kigawmin Merom Tuite kichihna mun ah giahphual a sat uh a, Israelte sim dingin a kisa uhi. 6 Tangtawn Toupa'n Joshua kiang ah: Amaute lau ken. Zing chiang tubang hunin, amaute khempeuh Israelte khutsung ah thahsa-a hon pe ding ka hi. A sakolte uh zapiguite na sattatsak ding a, a kangtalaite uh na haltumsak ding ahi, a chi hi. 7 Tua bangin, Joshua leh a sepaihhon Merom Tuite kichihna mun ah hong kuan guih uh a, amaute a sim uhi. 8 Tangtawn Toupa'n Israelte khut sung ah amaute a peta a, amaute a zou uhi. Sidon Lianzaw dong, Misrefoth Maim dong, tua chiangin, suahlama Mizpa Kuam dong amaute a delh uh a, hinghawi nei louin, a that vek uhi. 9 Tangtawn Toupa' thupiak bangin Joshua in amaute' sakolte' zapiguite a sattatsak uh a, a kangtalaite uh a haltumsak uhi. 10 Tua hun laiin, Joshua a nungkik a, Hazor khua a la a, namsauin a kumpipa a that hi. Hazor bel, hiai kumpigamte lutang a na hi ngeita ahi. 11 Tua khua-a tengte khempeuh namsauin a that chimit uhi. A nakthei khempeuh zong hinghawi a nei kei uh a, Hazor khua mahmah zong a haltum uhi. 12 Joshua in hiai kumpipate' khawpite khempeuh a la a, a kumpipate uh namsauin a that hi. Tangtawn Toupa'n a sila Mosi thu a piak bangin, amaute a hihchimit vek hi. 13 Ahihhangin, Israelte'n khawpi sesa tunga kilam khawpite zaw, Hazor chih louh siah, a hal kei uhi. Hazor bel, Joshua in a haltum hi, 14 Israelte'n gallakte khempeuh, hiai khawpitea gantate tawh, amau adingin a kipuak uhi. Ahihhangin, a mihingte bel namsauin a that vek uh a, a nak thei khempeuh hinghawi a nei kei uhi. 15 Tangtawn Toupa'n a sila Mosi thu a piak bangin, Mosi in Joshua thu a pia a, Joshua in a semkhia hi. Tangtawn Toupa'n Mosi a thupiakte khempeuh Joshua in sepkhiak zawh louhin bangmah a nuse kei hi. 16 Tua bangin, Joshua in hiai gam a vekpi-in a la hi: Tuate tanggam khempeuh Negev khempeuh, Goshen gam khempeuh ahi. Tumlam gam niam gamte leh Araba phaizang niam lam leh Israel tanggam leh a phaizang gamte tawh a la hi. 17 Seir Mual vasun tou Halak Mual giau apan Hermon Mual nuai lama Lebanon Phaizanga om, Baal Gad dong a zou vek hi. A kumpipate uh a man a, a sat a, a that hi. 18 Joshua in ni tampi sung hiai kumpipate a dou hi. 19 Gibeona teeng Hivte chih louh siah, khawpi khat lei in zong Israelte tawh lemna a bawl kei hi. Israelte'n amaute khempeuh douin a la vek uhi. 20 Tangtawn Toupa mahmah in Israelte dou dingin amaute lungtang a khauhsak hi. Tua bel, Tangtawn Toupa'n Mosi a thupiak banga Israelte'n amaute zou dimdem a, zahngaihna beia, a hihmanthat theih nading uh a na hi. 21 Tua hun lai mahin, Joshua a kuan a, tanggam apan Anakte a hihchimit hi. Tua bel, Hebron, Debir leh Anab tanggam khempeuh apan, Judah tanggam khempeuh apan, leh Israel tanggam khempeuh apan amaute a hihchimit chihna ahi. Joshua in amaute leh a khawpite uh a hihchimit vek a, 22 Israel gam ah Anakte nutsiat a om nawn kei hi. Gaza, Gath leh Ashdod kia ah a suakta tawmchik a om uhi. 23 Tua bangin, Tangtawn Toupa'n Mosi a thupiak bangin, Joshua in tua gam khempeuh a la a, Israel nam chih kiang ah, goutan gam a hawmsak hi. Tua nungin, gam in galkidouna apan tawlngakna a ngahta hi.
Zawhsa Kumpipate
1 Israelte'n, Jordan lui suahlam Amon phaizang apan Hermon Mual dong, Araba suahlam pang teng tawh, gam a lakte uh leh tua gam kumpipa a zawhte uh hiaite ahi: 2 Sihon bel Amorte kumpipa ahi a, Hesbona vaihawm ahi: Ama' uk sung bel, Amon phaizang laizanga om Aroer apan Jabok Lui dong ahi. Tua Jabok Lui bel, Amonte gamgi ahi. Hiai gam in Gilead kimkhat a uap hi. 3 Tua baan ah, Araba suahlam pang teng, Kinereth Tuipi leh tua Chi Tuipi kichi Araba Tuipi dong leh Beth Jeshmoth dong, leh simlam panga Pisga pang kham suk teng tawh zong ama' uk ahi. 4 Sihon in Bashan kumpipa Og' gamgi dong a uk hi. Og bel, Refaim nam omsunte laka khat ahi. Ashtaroth leh Edrei ah vai a hawm hi. 5 Hermon Mual, Saleka leh Bashan a uk a, Geshur leh Maaka gamgi dong a gam ahi. Tua in Gilead gam kimkhat, Heshbon kumpipa Sihon' gamgi dong a uap hi. 6 Tangtawn Toupa' sila Mosi leh Israelte'n amaute a zou uhi. Tuachi-in, Tangtawn Toupa' sila Mosi in amaute' gam Reubente, Gadte leh Manase nam kimkhatte tan dingin a pia hi. 7 Joshua leh Israelte'n Jordan lui tumlam gam kumpipa a zawhte uh hiaite ahi: Jordan lui tumlam gamte bel, Lebanon phaizang Baal Gad apan Seir Mual suntou Halak Mual dong ahi. Joshua in hiai gamte, Israelte kiang ah a nam a nama kihawm dingin a pia hi. 8 Hiai kumpipate'n tanggam teng, tumlam phaizang gam teng, Araba, mual pang kham teng, gamdai-gamkeu leh Negev teng a luah uhi. Amaute, Hitte, Amorte, Kanante, Perizte, Hivte leh Jebuste ahi uhi. 9 Jerikho kumpipa khat ahi a, Bethel kianga Ai kumpipa khat ahi. 10 Jerusalem kumpipa khat ahi a, Hebron kumpipa khat ahi. 11 Jarmuth kumpipa khat ahi a, Lakhish kumpipa khat ahi. 12 Eglon kumpipa khat ahi a, Gezer kumpipa khat ahi. 13 Debir kumpipa khat ahi a, Gedar kumpipa khat ahi. 14 Horma kumpipa khat ahi a, Arad kumpipa khat ahi. 15 Libna kumpipa khat ahi a, Adulam kumpipa khat ahi. 16 Makeda kumpipa khat ahi a, Bethel kumpipa khat ahi. 17 Tapua kumpipa khat ahi a, Hefer kumpipa khat ahi. 18 Afek kumpipa khat ahi a, Lasharon kumpipa khat ahi. 19 Madon kumpipa khat ahi a, Hazor kumpipa khat ahi. 20 Simron Meron kumpipa khat ahi a, Akshaf kumpipa khat ahi. 21 Tahanak kumpipa khat ahi a, Megido kumpipa khat ahi. 22 Kadesh kumpipa khat ahi a, Karmela Jokneam kumpipa khat ahi. 23 Dor gam sanga Dor kumpipa khat ahi a, Gilgal a Goim kumpipa khat ahi. 24 Tirza kumpipa khat ahi a, A vekin kumpipa sawmthumlekhat ahi.
Gam Lak ding Omlaite
1 Joshua, a kum hong tam a, hong teekta hi. Tangtawn Toupa'n amah kiang ah: Nang lah na tek mahmahta a, gam lianpipi lak ding lah a om lai hi. 2 Israelte'n gam a lak nai louh uh, Filistiate leh Geshurte gamte ahi. 3 Tuate'n Aigupta suahlama Sihor Lui apan mallama Ekron gam dong a uap hi. Mi'n amaute khempeuh, Kanante lak ah a simtel uhi. Filistia vaihawmpa ngate bel, Gaza, Ashdod, Ashkelon, Gath, Ekron leh Avima vaihawmpate ahi uhi. 4 Simlam apan Kanante gam khempeuh Sidonte' Ara apan Afek dong, Amorte gam teng, 5 tua chiangin, Gebalte gam teng leh suahlama Lebanon gam khempeuh, Hermon Mual nuaia Baal Gad apan Hamath lutna dong zong a uap hi. 6 Lebanon apan Misrefoth Maim donga tanggama teengte khempeuh ahih leh, keima'n Israelte mai ah ka delhkhe ding hi. Tua bel, Sidon mi ngen ahi uhi. Kon thupiaksa bangin, Israelte' goutan dingin hiai gam pe ngeingei in. 7 Nam kuate leh Manase nam kimkhatte kiang ah a goutan dingun hawm in, a chi hi.
Jordan Suahlam Gam Hawmna
8 Tangtawn Toupa' sila Mosi in amaute adinga a sehsak bangin, Reuben suante leh Gad suante'n bel, Manase nam kimkhat dangte tawh, Mosi' piaksa Jordan suahlam gam ah goutan a neita uhi. 9 Tua gam bel, Amon Kuam geia om Areor apan leh tua Kuam laizanga khawpi apan, Medeba mual tung gam teng uapin, Dibon dong ahi. 10 Heshbona vaihawmpa, Amorte kumpipa Sihon khawpite khempeuh uapin, Amon gamgi dong ahi. 11 Gilead, Geshur leh Maaka mite gam, Hermon Mual khempeuh leh Bashan gam khempeuh, Saleka dong zong a uap hi. 12 Tua bel, Bashana Og' kumpigam khempeuh ahi. Og in Ashtaroth leh Edrei ah vai a na hawm hi. Amah bel, Refaimte laka khawsuaksunte laka nunungpen ahi. Mosi in amaute a zou a, a gam uh a laksak hi. 13 Ahihhangin, Israelte'n Geshurte leh Maakate a hawlkhe kei uh a, tuni dongin amaute Israelte lak ah a teeng uhi. 14 Mosi in Levi suante kiang ah bel goutan a pe kei hi. Ahang bel, amaute a chiamsa bangin, amaute' goutan zaw Tangtawn Toupa, Israel Pathian kianga meia hal thillatte ahi. 15 Mosi in Reuben suante, a beh a beha gam a piakte hiaite ahi: 16 Amon Kuam geia om Aroer Guam geia apan leh tua Kuam laizanga khawpi apan leh Medeba mualtung khempeuh apan, 17 Heshbon leh tua mualtunga a khawpite khempeuh chiang dong ahi. Tua in Dibon, Bamoth Baal, Beth Baal Meon, 18 Jahaz, Kedemoth leh Mefaath, 19 Kiriathaim, Sibma, phaizang kianga mualtunga om Zeret Shahar zong a uap hi. 20 Beth Peor, Pisga mual pang kham teng, leh Beth Jeshmoth uap ahi. 21 Hiai gamte bel, phaizanga khawpi khempeuh leh Heshbona vaihawmpa, Amorte' kumpipa Sihon' gam teng zong uap ahi. Mosi in Amor kumpipa Sihon nuaia vaihawm Evi, Rekem, Zur, Hur leh Reba, tua chiangin, Midian hausate tawh a na zoukhin hi. 22 Kidouna muna a thahte uh baan ah, Israelte'n Beor' tapa Balaam, tua aisanpa zong namsauin a that uhi. 23 Reubente' gamgi, Jordan lui ahi. A khawpite leh khawtate, Reuben suante'n goutan dinga a beh a beha a hawm uh ahi. 24 Mosi in Gad suante kianga, a beh a beha gam a piak hiaite ahi: 25 Jezer gam, Gilead khawpite khempeuh leh Amorte gam kimkhat, Raba kiang naia Aroer chiang dong ahi. 26 Tua chiangin, Heshbon apan Ramath Mizpa leh Betonim chiang dong leh Mahanaim apan Debir gamgi chiang dong ahi. 27 Phaizang ah, Beth Haram, Beth Nimra, Sukoth leh Zafon dong ahi. Tua bel, Heshbon kumpipa Sihon' gam om laite ahi. A gamgi, Jordan lui apan suahlama Khinereth Tuipi chiang dong ahi. 28 A khawpite leh khawtate, Gadte'n, goutan a beh a behin a hawm uhi. 29 Mosi in Manase nam kimkhat, tua bel, Manase suante, a beh a beha gam a piak hiaite ahi: 30 Manase gamgi, Manahaim apan ahi. Bashan gama om Jair khawpite khempeuh a uap a, khawpi teng a vekin 60 ahi. 31 Gilead kimkhat, leh Bashan gam Og kumpipa' khawpite Ashtaroth leh Edrei bel, Manase' tapa Makir suante kimkhat in a beh a beha a tan uh ahi. 32 Mosi in suahlama Jordan gala Moab phaizanga a om lai a, goutan a hawm hiaite ahi. 33 Ahihhangin, Mosi in Levite kiang ah goutan a pe kei. Amaute' goutan bel, a gensa bangin, Tangtawn Toupa, Israel Pathian ahi.
Gam Lak ding Omlaite
1 Kanan gama Israelte'n goutan a ngah gam uh hiaite ahi. Tua bel, siampi Eleazar leh Nun' tapa Joshua leh Israel nam behtuulpite'n amaute laka a hawmsak uh ahi. 2 Tangtawn Toupa'n, Mosi tungtawna thu a piak bangin, nam kua leh a kimkhatte kiang ah aisanin goutante a hawm uhi. 3 Mosi in Jordan suahlam ah nam nih leh a kimkhatte goutan a pekhinta a, ahihhangin, Levite lah goutan a hawm kei hi. 4 Ahang bel, Josef tapate nam nih hong suak uh a, Manase nam leh Efraim nam ahi uhi. Levite'n gam tan a nei kei uh a, ahihhangin, tenna ding khawpite leh a kima gam belamte leh bawngte tat nading tawh kia a tang uhi. 5 Tua bangin, Tangtawn Toupa'n Mosi kianga a thupiak bangin Israelte'n gam a hawm uhi.
Kaleb ading Hebron
6 Tua chiangin, Judah suante'n Gilgal ah Joshua a vanaih uh a, Keniz mi Jefune' tapa Kaleb in a kiang ah: Tangtawn Toupa'n Pathian' mi Mosi kianga Kadesh Barnea-a nang leh kei tungthu a gen na thei hi. 7 Mosi in Kadesh Barnea apan gam enkhe dinga hon sawl laiin, kum 40 ka hita. A dika ka theih bangbangin amah kiang ah thu ka tun kik hi. 8 Ahihhangin, ka kuanpih ka sanggamte'n mipite' lungtang a lausak uhi. Ke'n bel, Tangtawn Toupa, ka Pathian, ka lungtang teng khempeuhin ka zui hi. 9 Tuachi-in, tua ni mahin, ka kiang ah Mosi a kichiam a: Nang, na lungtang teng khempeuh tawh Tangtawn Toupa, ka Pathian na zuih manin, na khea na vasikna gam nang leh na tate' goutan ahi tawntung ding, a chi hi. 10 Tangtawn Toupa'n hon chiamsa bangbang ahi. Ama'n, Mosi kianga hiai thu a gen bangin, Israelte gamdai-gamkeua a vialvak nung-un, ka hinna kum 45 hon hawisak hi. En in, tuin, kum 85 ka hita! 11 Hinapi-in, Mosi in hon sawlkhiak ni-a ka tha bang tu'n ka pu lai. Tua laia kidou dinga ka hat bangin, tu'n sep ding teng sem dingin ka hat lai hi. 12 Tu-in, Tangtawn Toupa'n tua ni-a hon chiamsa hiai tanggam kei hon pia in. Tua laiin, tua gam ah Anakte a teeng uh a, a khawpite uh a lian a, kulhbaang nei ngen ahi, chih nang mahmah in na za hi. Ahihhangin, Tangtawn Toupa'n hon ompih ding a, Ama' gensa bangin amaute ka hawlkhe ding hi, a chi hi. 13 Tua bangin, Joshua in Jefune' tapa Kaleb a vualzawl a, a goutan dingin Hebron a pia hi. 14 Tua nungsang peuhmah, tuni dongin, Hebron pen Keniz mi Jefune' tapa Kaleba a hidenta hi. Ahang bel, ama'n a lungtang teng khempeuha Tangtawn Toupa, Israel Pathian a zuih man ahi. 15 Hebron bel, nidang laiin Kiriath Arba kichi ahi. Anakte laka thupipen Arba' min tama kiphuak ahi. Tua nung, tua gam in galmuanna a ngahta hi.
Judah adinga Gam Sehkhiak
1 Judah suante, a beh a beh adinga sehkhiak gam bel, Edom gamgi dong, simtawpa Zin Gamdai-gamkeu dongin a kizalh suk hi. 2 Simlam gamgi bel, Chi Tuipi simtawpa gamgeng apan ahi. 3 Tangkanna simlam ah a pai a, Zin dong a pai hi. Kadesh Barnea simlam apan a paitou a, Hezron kiang ah a pai a, Adar ah a paitou a, Karka dong a kikual hi. 4 Tua baan ah, Azmon dong a pai a, Aigupta-a Luiguamkeu a kaan a, Tuipi Lian ah a mong hi. Hiai simlam gamgi ahi. 5 Suahlam gamgi bel, Chi Tuipi ahi a, Jordan Lui dong ahi. Mallam bel, Jordan suaha tuipi apan ahi. 6 Beth Hogla dong a paitou a, Beth Araba mallam ah, Reuben' tapa Bohan' Suang kichi dong a pai hi. 7 Akhor Phaizang apan Debir ah a paitou a, mallam manawhin, Gilgal lam ah a kihei hi. Gilgal bel, Adumim Tangkanna gala om ahi. Adumim bel, tua luita simlama om ahi. Tua ban ah, En Shemesh tuite zuiin a pai a, En Rogel ah a suakkhia hi. 8 Tua baan ah, Ben Hinom phaizang mallam mong tak ah a kahtou a, Jebuste' Khawpi pang kham a zuitou hi. Tua Khawpi bel Jerusalem hong kichi ahi. Tua apanin Hinom Phaizang tumlama mual vum ah, Refaim Phaizang maltawp tak ah a paitou hi. 9 Tua mual apanin Neftoa luinakte manawhin a pai a, tua apan Efron muala khawpite ah a suakkhia a, Baala lam ah a paisuk hi. Baala bel, Kiriath Jearim kichi ahi. 10 Tua baan ah, Baala apan tumlam manawhin Seir Mual dong a kuisuk a, Jearim mual mallam kham zuiin a pai a, Beth Shemesh dong a paisuk a, Timna ah a galkah hi. Jearim mual bel, Kesalon zong kichi ahi. 11 Ekron mallam kham zuiin a pai a, Shikeron lam ah a kihei a, Baala Mual zuiin a pai a, Jabneel ah a suak a, tuipi a sun hi. 12 Tumlam gamgi ahih leh, Tuipi Lian geigei zuia pai ahi. Hiaite bel, Judah suante' gamgi, a beh a beha uap ahi. 13 Tangtawn Toupa'n a kianga thu a piak bangin, Joshua in, Jefune' tapa Kaleb ading, Judah gam sung ah, tan khat a pia hi. Tua bel, Kiriath Arba ahi. Kiriath Arba bel Hebron zong kichi ahi. Arba bel, Anak suangpa ahi. 14 Kaleb in, Hebron apanin Anakte thum a hawlkhia hi. Amaute, Sheshai, Ahiman leh Talmai ahi. Amaute Anak suante ahi uhi. 15 Tua apanin Debira teengte a vasim hi. Debir bel, nidang laiin Kiriath Sefer kichi ahi. 16 Kaleb in: Kiriath Sefer sim a, la zoupa kiang ah, a zi dingin ka tanu Aksa pia ning, a na chi hi. 17 Kenaz' tapa Othniel in a la zou hi. Kenaz bel, Kaleb' sanggampa ahi. Tua bangin, Kaleb in a tanu Aksa, Othniel zi dingin a pia hi. 18 Hichi hong hi a, Aksa, Othniel kiang ah hong pai a, a pa kianga lou khat ngen dingin amah ana kun hi. Aksa, a sabiltung apan a kumkhiak takin, Kaleb in amah kiang ah: Nang bang na deih a? a chi hi. 19 Aksa in a dawng a: Deihsakna tuam khat hon pia inla, Negeva gam non piaktak ngai leh, tua tuinakte zong hon pia in, a chi hi. Tua bangin, Kaleb in tuinak saknungte leh tuinak khangnungte amah a pia hi. 20 Judah suante'n a beh a beha a goutan uh hiai ahi: 21 Simlam tawpa Edom gamgi zula Judah suante'n a neih khawpite hiaite ahi: Kabzeel, Eder, Jagur, 22 Kina, Dimona, Adada, 23 Kadesh, Hazor, Ithnan, 24 Zif, Telem, Bealoth, 25 Hazor Hadata, Kerioth leh Hezron. Hezron bel Hazor ahi. 26 Tua baan ah, Amam, Shema, Molada, 27 Hazar Gada, Heshmon, Beth Pelet, 28 Hazar Shual, Beersheba, Biziothia ahi. 29 Tua ban ah, Baala, Iim, Ezem, 30 Eltolad, Kesil, Horma, 31 Ziklag, Madmana, Sansana, 32 Lebaoth, Shihim, Ain leh Rimon ahi. Avekin, khawtate baan ah khawpi 29 ahi. 33 Tumlam gam niam ah: Eshtaol, Zora, Ashna, 34 Zanoa, En Ganim, Tapua leh Enam, 35 Jarmuth, Adulam, Soko leh Azeka, 36 Shaaraim, Adithaim, Gedera. Gendera bel Gederothaim zong a kichi hi. Avekin, khawtate baan ah khawpi sawmleli ahi. 37 Zenan, Hadasha, Migdal Gad, 38 Dilean, Mizpa, Joktheel, 39 Lakhish, Bozkath, Eglon, 40 Kabon, Lamas, Khitlish, 41 Gederoth, Beth Dagon, Naama leh Makeda. A vekin, khawtate baan ah khawpi sawmleguk ahi. 42 Tua chiangin, Libna, Ether, Ashan, 43 Ifta, Ashna, Nezib, 44 Keila, Akzib, leh Maresha zong a uap hi. Avekin, khawtate baan ah khawpi kua ahi. 45 Ekron, a kimkota tennate gam leh a khawtate tawh, 46 Ekron tumlam panga Ashdod kiang naia khawpite leh khawtate zong a uap hi. 47 Ashdod, a kimkota tennate leh khawtate tawh, Gaza, a kimkota tennate leh khawtate tawh, Aigupta lui leh Tuipi Lian dong a gamgi in a uap ahi. 48 Tanggam ah: Shamir, Jatir, Soko, 49 Dana, Debir kichi Kiriath Sana, 50 Anab, Eshtemo, Anim, 51 Goshen, Holon leh Gilo a uap hi. Avekin, khawtate baan ah sawmlekhat ahi. 52 Arab, Duma, Eshan, 53 Janim, Beth Tapua, Afheka, 54 Humta, Hebron kichi Kiriath Arba leh Zior zong a uap hi. Avekin, khawtate baan ah khawpi kua ahi. 55 Maon, Karmel, Zif, Juta, 56 Jezreel, Jokdeam, Zanoa, 57 Kain, Gibea, leh Timna zong a uap hi. Avekin, khawtate baan ah khawpi sawmkhat ahi. 58 Halul, Beth Zur, Gedor, 59 Maarath, Beth Anoth leh Eltekon zong a uap hi. Avekin, khawtate baan ah khawpi guk ahi. 60 Kiriath Jearim kichi Kiriath Baal leh Raba zong a uap hi. Avekin, khawtate baan ah khawpi nih ahi. 61 Gamdai-gamkeu ah: Beth Araba, Midin, Sekaka, 62 Chi khawpi Nibshan leh En Gedi zong a uap hi. Avekin, khawtate baan ah khawpi guk ahi. 63 Judah suante'n Jerusalema teeng, Jebuste a hawlkhe zou kei uhi. Tuni dongin Jebuste, Jerusalem ah, Judah suante lak ah a teeng uhi.
Efraim leh Manase ading Gam Sehkhiak
1 Josef' suante adinga gam sehkhiak gamgi Jerikho zawn, Jordan apan Jerikho tuinakte suah lama paitou, gamdai-gamkeu tawnin Bethel tanggam ah a pai hi. 2 Luz kichi Bethel apan, Arki gamgi a tawn a, Ataroth ah a pai hi. 3 Tumlam ah a paisuk a, Jafelet' suante gamgi ah, Beth Horon khangnung gamgi ah a pai a, Gezer ah a pai a, tuipi a sun hi. 4 Josef' suante Manase leh Efraim in a goutan uh hibang in a ngah uhi. 5 Efraim' suante gam, a beh a beh-a a hawm uh hiai ahi: Simlam ah a gamgi uh Ataroth Adar apan Beth Horon saknung ah a pai a, 6 tumlama kiheisukin tuipi a sun hi. Mikmethath simlama paiin suahlam manawhin a kawi a, Taanath Shilo ah a pai a, Janoa suahlam ah a pai hi. 7 Janoa apan Ataroth ah leh Naara ah a paisuk a, Jerikho hetkhain Jordan lui a sun hi. 8 Tapua apan tumlam ah Kana Kuam ah a pai a, tuipi a sun hi. Efraim suante'n a beh a beha a goutan uh hibang ahi. 9 Manase suante' goutan sunga Efraim suante adinga sehkhiak khawpite leh a khawtate zong a uap hi. 10 Ahihhangin, amaute'n Gerara teeng Kanante a hawlkhia kei uhi. Tuni dongin Kanante, Efraim suante lak ah a teeng uh a, Efraim suante' sal-in a om uhi.
1 Josef' tapa masa Manase ahi a, Manase nam adinga gam sehkhiak hibang ahi. Manase' tamasa Makir ahi. Makir lah Gileadte' pubul ahi. Makir suante sepaih galhatte ahih manun, Gilead leh Bashan a tang uhi. 2 Tuachi-in, hiai goutan bel Manase suan dangte kianga piak ahi. Amaute bel, a beh behin, Abiezer, Helek, Asriel, Shekhem, Hefer leh Shemida beh ahi uhi. Hiaite Josef tapa Manase suan pasalte, a beh beha gen ahi uhi. 3 Manase' tapa Makir, Makir' tapa Gilead, Gilead' tapa Hefer, Hefer' tapa Zelofehad ahi. Zelofehad in tapa a nei kei a, tanu vive a nei hi. Amaute Mala, Noa, Hogla, Milka leh Tirza ahi uh. 4 Amaute, siampi Eleazar, leh Nun' tapa Joshua leh behtulpite kiang ah hong pai uh a: Ka saggam pasalte uh laka koute zong goutan hon pe dingin Tangtawn Toupa'n Mosi thu a pia hi, a chi uhi. Tua bangin, Tangtawn Toupa' thupiak bangin, Joshua in amaute a pa uh' sanggam pasalte tawh goutan a pekhawm hi. 5 Manase suante' goutan bel, Jordan suahlam Gilead leh Bashan simlouhin, gam sehkhiak sawmkhat ahi. 6 Ahang bel, Manase suante' tanute'n a tapate uh lak ah goutan a ngah tei ua ahi. Gilead gam bel, Manase tapa dangtea ahi. 7 Manase gamgi ahih leh Asher apan Mikmethath chiang dong ahi. Mikmethath bel, Shekhem gala om ahi. Mikmethath apan simlam ah gamgi a pai a, En Tapua-a teengte a uap hi. 8 Manase suante'n Tapua gam a tang uh a, ahihhangin, Tapua khawpi bel Manase gamgi tak ah a om a, Efraim suante'n a tang uhi. 9 Tua baan ah, Manase gamgi simlam manawhin Kana Kuam ah a pai a, Efraim suante' khawpite dong a pai hi. Efraim khawpite pawlkhat, Manase suante' khawpite lak ah a om hi. Ahihhangin, Manase gamgi bel, tua Kana Kuam mallam pang ah a pai a, tuipi a sun hi. 10 Simlama gam Efraima ahi a, mallama gam Manasea ahi. Manase gamgi in tuipi a sun a, mallam ah Asher tawh a kigamgi a, suahlam ah Isakhar tawh a kigamgi hi. 11 Isakhar leh Asher gam sung ah, Manase suante'n Beth Sheen leh a kim gam a vanei uh a, Ibleam leh a kim gam leh Dor leh a kim gam zong a vanei uhi. Endor leh a kim gama teengte leh Taanak leh a kim gama teengte zong a vanei uh a, Megidoa teengte leh a kima teengte zong a va-nei uhi. Gam sehkhiak thum a tang uhi. 12 Kanante'n hiai gama teen teitei a sawm manun, Manase suante'n hiai khawpite a luah zou kei uhi. 13 Ahihhangin, Israelte hong hat zawk takun, Kanante silain a zang uh a, a hawlkhe vek kei uhi. 14 Josef suante'n Joshua kiang ah: Banghanga koute goutan khat kia, gam khat kia hon khenkhiak na hia? Koute, Tangtawn Toupa'n hon vualzawl a, a tama tam kei ve ua, a chi uhi. 15 Joshua in amaute a dawng a: Noute a tama tam na hih man-un leh, Efraim tanggam noua dinga neu lua ahih manin, gammang ah kuantou unla, Perizte leh Refaite gam nou adingin vavat ve ua, a chi hi. 16 Josef suante'n a dawng uh a: Tua tanggam koute adingin kiching lou lai hi. Phaizanga teeng Kanante lah sik kangtalaite nei hi uh a, Beth Shaan leh a kim gama teengte leh Jezreel phaizanga teengte'n zong sik kangtalaite a nei uhi, a chi uhi. 17 Ahihhangin, Joshua in Josef suante Efraim nam leh Manase nam kiang ah: Ahi, noute na tam uh a, hat lah na hat uh a, gam sehkhiak khat kia na tang kei ding uh. 18 Tanggam gammang zong na tang ding uh. Vavat un, a gam mong dong na tang ding uhi. Kanante'n sik kangtalaite neiin, hat mah le uh, amaute na hawlkhe zou ding uhi, a chi hi.
Gam Omlaite Hawmna
1 Tua nungin, Israel kikhawmte khempeuh Shilo ah a paikhawm uh a, tua ah Kihoupihna Puanbuk a lam uhi. Gam khempeuh a zoukhinta uh a, 2 ahihhangin, goutan ngah nailou Israel nam sagih a om lai hi. 3 Joshua in Israelte kiang ah: Tangtawn Toupa, na pu na pate uh Pathian in noute gam hon peta. Luah loua bangtan ngak ding na hi ua? 4 Nam teng apan mi thum tek sep unla, gam vavel unla, a gam goutante uh omdan gelha tawiin, ka kiang ah hong kik nawn uhen. 5 Gam seh sagih na suah ding uh ahi. Judah innkawte bel, simlam ah a gam uah a omden ding uh a, Josef inkawte zong mallam ah a gam uah a omden dng uhi. 6 Gam seh sagihte omdan na gelh khit chiangun, kei kiang ah hon tawi le uchin, ke'n Tangtawn Toupa, i Pathian' mai ah, noute adingin ai kon sansak ding hi. 7 Levi suante'n bel, noute lak ah goutan a nei kei uhi. Tangtawn Toupa' maia siampi na a sep uh' amaute' goutan ahi. Gad, Reuben leh Manase nam kimkhatte'n Jordan suahlam ah goutan a ngah khin uhi. Tangtawn Toupa' sila Mosi in amaute a piak ahi, a chi hi. 8 Tua mite gam vel dinga a kuankiak takun, Joshua in amaute a thuhilh a: Pai unla, gam vavel unla, a omdan hon gelh un. Tua khit chiangin, hong kik unla, Shilo ah Tangtawn Toupa' mai ah noute adingin, ai kon sansak ding hi, a chi hi. 9 Tua bangin, tua mite a kuankhia uh a, gamsung teng a paisuak uhi. A gam seh sagih a suah uh a, a khua a khua-in a omdan a gelh uh a, Shilo giahphual ah Joshua kiang ah hong chiahkik uhi. 10 Joshua in, Shilo ah, Tangtawn Toupa' mai ah, amaute adingin ai a san a, Israelte kiang ah gam sehkhiak bangbangin gam a hawmsak hi.
Benjamin ading Gam Sehkhiak
11 Aisan masa pen Benjamin suante, a beh a beh tung ah a tu hi. Amaute adinga gam sehkhiak bel, Judah nam leh Josef namte kikal ah a kia hi. 12 Mallam ah a gamgi uh, Jordan apan Jerikho mallam kham ah a pai a, tumlam tanggam ah a pai a, Beth Aven gamdai-gamkeu ah a suakkhia hi. 13 Tua apan Luz simlam kham ah a galkah hi. Luz bel, Bethel kichi ahi. Tua apanin, Beth Horon khangnung simlam mual ah a pai a, taroth Adar chiang dong a paisuk hi. 14 Simlama Beth Horon gal mual apan tua gamgi simlam manawhin tumlam pang ah a pai a, Kiriath Baal ah a suakkhia hi. Kiriath Baal bel, Kiriath Jearim kichi ahi. Tua bel, Judah suante' khawpi ahi. Hiai a tumlam gamgi ahi. 15 Simlam gamgi bel, tumlama Kiriath Jearim khua gei apan a kipan a, Neftoa tuinakte ah a suakkhia hi. 16 Tua baan ah, Refaim Phaizang mallama Ben Hinom Phaizang gala mualbul zuisukin, Jebuste khawpi simlam kham ah, En Rogel chiang dong a pai hi. 17 Tua baan ah, mallam ah a kui a, En Shemesh ah a pai a, Adumim Tangkanna gala Geliloth ah a pai a, Reuben' tapa Bohan' Suang ah a pai a, 18 Beth Araba ah a pai lai a, Araba ah a paisuk hi. 19 Tua ban ah, Beth Hogla mallam kham ah a pai a, Chi Tuipi mallam pang geng ah a suakkhia a, simlama Jordan suah a sun hi. Hiai simlam gamgi ahi.20 Suahlam gamgi bel Jordan lui ahi. 20 Hiaite Benjamin suante, a beh a beha, a goutan uh kualkhum gamgi ahi. 21 Benjamin suante'n, a beh a beha a tan uh khawpite hiaite ahi: Jerikho, Beth Hogla, Emek Keniz, 22 Beth Arba, Zemarin, Bethel, 23 Avim, Para, Ofra, 24 Khefar Amoni, Ofni leh Geba ahi. A vekin, khawtate ban ah, khawpi sawmlenih ahi. 25 Gibeon, Uma, Beeroth, 26 Mizpa, Khefira, Moza, 27 Rekem, Irpeel, Tarala, 28 Zela, Jebus khawpi Helef, dong ahi. Jebus bel Jerusalem kichi ahi. Tua baan ah, Gibea leh Kiriath zong ahi. Avekin, khawtate ban ah khawpi sawmleli ahi. Benjamin suante'n, a beh a beha a goutan uh hibang ahi.
Simeon ading Gam Sehkhiak
1 Aisan nihveina pen Simeon suante, a beh a beh tung ah a tu hi. Amaute' goutan bel, Judah gam sung ah a om hi. 2 Tua khawpite bel, Beersheba, Sheba kichi leh Molada, 3 Hazar Shual, Bala, Ezem, 4 Eltolad, Bethul, Horma, 5 Ziklag, Beth Markaboth, Hazar Susa, 6 Beth Labaoth leh Sharuhen ahi. Khawtate baan ah khawpi sawmlethum ahi. 7 Tua baan ah, Ain, Rimon, Ether leh Ashan zong a tang uhi. Khawtate ban ah, khawpi li ahi. 8 Tua baan ah, hiai khawpite kima khawtate khempeuh, Baalath Beer chiang dong ahi. Baalath Beer bel simlam Negeva Rama ahi. Simeon suante'n, a beh a beha a goutan uh hibang ahi. 9 Judah suante' goutan, amaute kisap zah sanga a let zawk manin, amaute' goutan apan Simeon suante' goutan ding kisepkhia ahi. Tua bangin, Simeon suante'n Judah gam sung apan goutan a ngah uhi.
Zebulun ading Gam Sehkhiak
10 Aisan thumveina pen Zebulun suante, a beh a beh tung ah a tu hi: Amaute' goutan gamgi Sarid chiang dong ahi. 11 Tumlam ah Marala ah a pai a, Dabesheth a sun a, tua baan ah, Jakneam kianga luita dong a sun hi. 12 Sarid apan suahlam, ni suahna lam ah, Kisloth Tabor gam ah a pai a, Daberath ah a suak a, tua chiangin, Jafia ah a paitou hi. 13 Tua baan ah, suahlam manawhin, Gath Hefer ah leh Eth Kazin ah a pai a, Rimon ah a suakkhia a, Nea lam ah a kihei hi. 14 Tua apanin mallam pang ah a pai kual a, Hanathon ah a pai a, Ifta El Phaizang a sun hi. 15 Tua gamgi in Katath, Nahalal, Shimron, Idala leh Bethlehem zong a uap hi. Avekin, khawtate baan ah khawpi sawmlenih ahi. 16 Hiai khawpite leh khawtate, Zebulun suante'n, a beh a beha goutan a hawm uh ahi.
Isakhar ading Gam Sehkhiak
17 Aisan liveina pen Isakhar suante, a beh a beh tung ah a tu hi. 18 A gamgi un hiaite a uap hi: Jezreel, Khesaloth, Shunem, 19 Hafaraim, Shion, Anaharath, 20 Rabith, Kishion, Ebez, 21 Remeth, En Ganim, En Hada leh Beth Pazez. 22 A gamgi un Tabor, Shahazuma leh Beth Shemesh a tawn a, Jordan a sun hi. A vekin, khawtate baan ah khawpi sawmleguk ahi. 23 Hiai khawpite leh khawtate, Isakhar suante'n, a beh a beha goutan a hawm uh ahi.
Asher ading Gam Sehkhiak
24 Aisan ngana pen Asher suante, a beh a beh tung ah a tu hi. 25 A gamgi uh hibang ahi: Helkath, Hali, Beten, Aksaf, 26 Alamelek, Amad leh Mishal ah a pai hi. Tumlam pang ah a gamgi un Karmel a tawn a, Sihor Libnath lui a sun hi. 27 Tua baan ah, suahlam ah Beth Dagon lam manawhin a kihei a, Zebulun a sun hi. Tua ban ah, Ifta El Phaizang ah a pai a, mallam ah Beth Emek leh Neiel sunin a pai a, veilam ah Kabul ah a suak hi. 28 Tua baan ah, Abdon, Rehob, Hamon leh Kana ah a pai a, Sidon Lianzaw chiang dong a pai hi. 29 Tua baan ah, Rama lam ah a kihei kik a, kulhbang nei Tura ah a pai a, Hosa lam ah a kihei a, Akzib gam ah tuipi ah a suak hi. 30 Tua baan ah, Uma, Afek leh Rehob ah a pai hi. Avekin, khawtate baan ah khawpi sawmnihlenih ahi. 31 Hiai khawpite leh a khawtate Asher suante'n, a beh a beha goutan a hawm uh ahi.
Naftali ading Gam Sehkhiak
32 Aisan gukna pen Naftali suante, a beh a beh tung ah a tu hi: 33 A gamgi uh, Helef leh Zaananim a singkung lianpi apan leh Adami Nekeb leh Jabneel khengin Lakum dong a pai a, Jordan lui ah a suak hi. 34 Tua baan ah, tumlam ah Aznoth Tabor ah a pai a, Hukok ah a suak hi. Simlam ah Zebulun, tumlam ah Asher, suahlam ah Jordan lui ah Judah gam a sun hi. 35 Naftali suante' khawpi kulhbang neite, Zidim, Zer, Hamath, Rakath, Kinereth, 36 Adama, Rama, Hazor, 37 Kedesh, Edrei, En Hazor, 38 Iron, Migdal El, Horem, Beth Anath leh Beth Shemesh ahi. Avekin, khawtate baan ah khawpi sawmlekua ahi. 39 Hiai khawpite, a khawtate tawh, Naftali suante'n, a beh a beha a hawm uh ahi.
Dan ading Gam Sehkhiak
40 Aisan sagihna pen Dan suante, a beh a beh tung ah a tu hi. 41 A goutan uh gamgi in hiai khawpite a uap hi: Zorak, Eshtaol, Ir Shemes, 42 Shaal Abin, Aijalon, Ithla, 43 Elon, Timna, Ekron, 44 Elteke, Gibethon, Baalath, 45 Jehud, Bene Barak, Gath Rimon, 46 Me Jarkon leh Rakon uap hi a, Jopa gal gam dong ahi. 47 Ahihhangin, Dan suante'n a gam goutan neu a sa uhi. Tua bangin, a kuantou uh a, Leshem a vasim uh a, namsauin a vala uh a, a luahta uhi. Leshem ah a teeng uh a, a min dingin a pu uh min tamin Dan a sa uhi. 48 Hiai khawpite, a khawtate baan ah, Dan suante'n a beh a beha goutan a hawm uh ahi.
Joshua ading Gam Sehkhiak 49 Israelte'n gam sehkhiak banga a hawm khit-un, amau lak ah Nun' tapa Joshua zong goutan a pia uhi. 50 Tua bel, Tangtawn Toupa'
thupiak banga a hih uh ahi. Ama' nget khawpi a pia uhi. Tua khawpi bel, Efraim tanggama Timnath Sera ahi. Ama'n tua khawpi a puah a, tua ah a teeng hi. 51 Hiaite, Shilo-a Kihoupihna Puanbuk kongpi-a Tangtawn Toupa maia siampi Eleazar, Nun' tapa Joshua leh Israel behtulpite'n aisana goutan gam a hawm uh ahi. Tua bangin, gam hawm a zouta uhi.
Bukna Khawpite
1 Tua nungin, Tangtawn Toupa'n Joshua kiang ah thu a gen a: 2 Mosi tungtawna kon thuhilh bangin, nou adinga bukna khawpite bawl a, septuam dingin, Israelte hilh in. 3 Mi kuapeuh in tup khoih hiloua, khutkhiala mi khat peuh a thah khak leh, tua bang khawpi ah a tailut ding hi. Tua bang khawpite bel, tanau nai sisan phulami apan na bukna uh ahi ding hi. 4 Hiai khawpite laka khat peuha tua bang mi a tailut chiangin, khawpi kongpi lutna ah a ding ding a, khawpi upate' mai ah a thu a tun ding ahi. Tua khit chiangin, amaute'n a khawpi uah amah a lutsak ding uh a, amaute laka a ten nading mun a pe ding uh ahi. 5 Tanau nai sisan phulami in mithat a delh leh, phulami khut sunga tua mi that khapa a piak khiak louh ding uh ahi. Ahang bel, tupkholh louh leh mudah lungsim nei masa hiloua a innveng that kha a hih man ahi. 6 Kikhawmte' maia, thu khentel dinga a din masiah leh, tua hun laia siampiliana pang pen a sih masiah, tua khawpi ah a teng ding ahi. Tua khit chiangin, a taisan khawpi ah ama' inn ah a chiahkik thei ding hi, a chi hi. 7 Tua bangin, amaute'n Naftali tanggam, Galili gam sung ah Kadesh a septuam uhi. Tua baan ah, Efraim tanggam ah Shekhem a septuam uh a, Judah tanggam ah Hebron kichi Kiriath Arba a septuam uhi. 8 Jerikho gala Jordan suahlam ah bel, Reuben suante lak ah mualtung gamdai ah Bezer, Gad suante lak ah, Gilead gam sung ah Ramoth, tua baan ah, Manase suante lak ah Bashan gam sunga Golan a septuam uhi. 9 Hiai khawpite bel, Israelte leh amaute laka teeng gamdang mite ading ahi. Mi khat peuh in, khutkhiala kuapeuh a thah khak leh, hiai sehtuam khawpite ah a tailut thei ding hi. Hiai bel, amah kikhawmte thukhentatna maia a din ma-a, tanau nai sisan phulami in a thah louh nading ahi.
Levite ading Khawpite
1 Siampilian Eleazar leh Nun' tapa Joshua leh Israel suan dangte' behtulpite kiang ah, Levi suante' behtulpite hong pai uhi. 2 Kanan gam Shilo ah amaute kiang ah: Koute teen nading khawpite leh ka gan tat nading uh loupa gam non piak dingun, Tangtawn Toupa'n Mosi tungtawnin noute kiang ah thu hon pia hi, chi-in a gen uhi. 3 Tua bangin, Tangtawn Toupa' thupiak bangin, Israelte'n amau' goutan apan gantatna gamte Levi suante a pia uhi. 4 Aisan masapen bel Kohath behte, a beh a beh tung ah a tu hi. Judah leh Simeon leh Benjamin suante gam apan, siampi Aron suan Levite adingin aisana sehkhiak khawpi sawmlethum ahi. 5 Efraim leh Dan leh Manase nam kimkhatte' behte' gam apan, Kohath beh dangte adinga aisana sehkhiak khawpi sawmkhat ahi. 6 Isakhar leh Asher leh Naftali leh Manase nam kimkhatte laka behte gam apan, Gershon behte adinga aisanna sehkhiak khawpi sawmlethum ahi. 7 Reuben leh Gad leh Zebulun suante' gam apan, Merari behte, a beh a beh adinga aisana sehkhiak khawpi sawmlenih ahi. 8 Tangtawn Toupa'n Mosi tungtawna thu a piak bangin, Israelte'n Levi suante adingin, aisanin hiai khawpite leh gantatna gamte hibangin a sepkhia uhi. 9 Judah leh Simeon suante gam apan sehkhiak hiai khawpite ahi: 10 Hiai khawpite bel, Aron suante, Kohath beh Levite adinga aisana sehkhiak ahi, Ahang bel, aisan masapen amaute tunga tu ahi. 11 Amaute adingin, Judah tanggam ah Kiriath Arba leh a kima gantatna gam tawh a pia uhi. Kiriath Arba bel, Hebron kichi ahi. Arba bel Anak suangtubul ahi. 12 Ahihhangin, tua khawpi kima gamte leh khawtate bel, Jefune' tapa Kaleb' goutan dingin a pia uhi. 13 Tua bangin, siampi Aron suante adingin, Hebron leh a kima gantatna gam a pia uhi. Hebron bel, mithat mi adinga bukna khawpi khat ahi. Tua baan ah, Libna leh a kima gantatna gam, 14 Jatir leh a kima gantatna gam, Eshtemoa leh a kima gantatna gam, 15 Holon leh a kima gantatna gam, Debir leh a kima gantatna gam. 16 Ain leh a kima gantatna gam, Juta leh a kima gantatna gam, leh Beth Shemesh leh a kima gantatna gam a pia uhi. Avekin, hiai nam nihte' gam apan a piak uh khawpi kua ahi. 17 Benjamin suante gam apan Gibeon leh a kima gantatna gam, Geba leh a kima gantatna gam, 18 Anathoth leh a kima gantatna gam, Almon leh a kima gantatna gam a pia uhi. Avekin khawpi li ahi. 19 Aron suan siampite adinga piak khawpite a vekin sawmlethum leh a kima gantatna gamte ahi. 20 Levi suan Kohath beh omlaite adingin Efraim suante gam apan khawpite a sepkhia uhi: 21 Efraim tanggam ah, Shekhem leh a kima gantatna gam a pia uhi. Shekhem bel, mithat mi bukna khawpi khat ahi. Gezer leh a kima gantatna gam zong a pia uhi. 22 Kibzaim leh a kima gantatna gam, Beth Horon leh a kima gantatna gam tawh, amaute adingin a pia uhi. Avekin khawpi li ahi. 23 Tua louin, Dan suante apan Elteke leh a kima gantatna gam, Gibethon leh a kima gantatna gam, 24 tua chiangin, Aijalon leh Gath Rimon a kima gantatna gamteng tawh a pia uhi. Avekin khawpi li ahi. 25 Manase nam kimkhatte' gam apan Taanak leh Gath Rimon, a kima gantatna gam teng tawh a pia uhi. Avekin khawpi nih ahi. 26 Hiai khawpi sawmte leh gantatna gamte, Kohath beh dangte adinga a piak uh ahi. 27 Levi suan Gershon behte adingin: Manase nam kimkhatte gam apan Bashan gama Golan, a kima gantatna gamte tawh a pia uhi. Golan bel, mithat mi bukna khawpi khat ahi. Tua baan ah, Beth Eshtera leh a kima gantatna gam teng tawh a pia uhi. Avekin khawpi nih ahi. 28 Isakhar suante gam apan Kishion, a kima gantatna gam tawh, Daberath a kima gantatna gama tawh, 29 Jarmuth leh En Ganim, a kima gantatna gam teng tawh a pia uhi. Avekin khawpi li ahi. 30 Asher suante gam apan Mishal, akima gantatna gam tawh, Abdon, akima gantatna gam tawh, 31 Helkath leh Rehob, a kima gantatna gam teng tawh a pia uhi. Avekin khawpi li ahi. 32 Naftali suante gam apan, Galili gama Kadesh a kima gantatna gam tawh a pia uhi. Kadesh bel, mithat mi bukna khawpi khat ahi. Tua baan ah, Hamoth Dor leh Kartan, a kima gantatna gam teng tawh a pia uhi. Avekin khawpi thum ahi. 33 Gershon behte khawpite a vekin, a gantatna gamte tawh, sawmlethum ahi. 34 Levi suan dang, Marari behte adingin hiai khawpite a pia uhi: Zebulun suante gam apan Jokneam leh a kima gantatna gam, Karta leh a kima gantatna gam, 35 Dimna leh akima gantatna gam leh Nahalal leh a kima gantatna gam a pia uhi. Avekin khawpi li ahi. 36 Reuben suante gam apan Bezer leh a kima gantatna gam, Jahaz leh a kima gantatna gam, 37 Kedemoth leh a kima gantatna gam, leh Mefaath leh a kima gantatna gam a pia uhi. Avekin khawpi li ahi. 38 Gad suante gam apan Gilead gama Ramoth, a kima gantatna gam tawh a pia uhi. Ramoth bel mithat mi bukna khawpi khat ahi. Tua baan ah, Manahaim leh a kima gantatna gam, 39 Heshbon leh Jazer, a kima gantatna gam teng tawh a pia uhi. Avekin khawpi li ahi. 40 Levi suan dang Merari behte adinga sehkhiak khawpite, avekin sawmlenih ahi. 41 Israelte gama Levi suante khawpi, a gantatna gam teng utawh, a vekin 48 ahi. 42 Hiai khawpite'n a kim ah gantatna gam a nei tek uhi. Tua bangin khawpite khempeuh in gantatna gam a nei tek uhi. 43 Tangtawn Toupa'n Israelte, a pu a pate uh kianga a na chiamsa gam khempeuh a peta a, amaute'n tuate a luah uh a, a teeng uhi. 44 Tangtawn Toupa'n a pu apate uh kianga a na chiamsa bangin, amaute mun chih ah tawlngakna a peta hi. A galte uh kuamah in amaute a nang zou kei uhi. Tangtawn Toupa'n amaute' khut sung ah a galte khempeuh uh a peta hi. 45 Tangtawn Toupa'n Israel suante kianga thil hoih a chiamte, a tangtung lou khat beek a om kei a, a tung kim sipsip hi.
Suahlam Namte' Chiahkikna
1 Tua nungin, Joshua in Reubente, Gadte leh Manase nam kimkhatte a samkhawm a, amaute kiang ah: 2 Tangtawn Toupa' sila Mosi' thupiak khempeuh na zuita uh a, kei hon thupiak khempeuh ah ka thu na mangta uhi. 3 Hun sawtpi apan tu hun dong, na sanggamte uh na taisan kei uh a, Tangtawn Toupa, na Pathian un sep ding hon got peuhmah na semkhinta uhi. 4 Tu-in, Tangtawn Toupa, na Pathian un a thuchiam bangin, na sanggamte uh tawlngakna a peta. Noute na puanbuk uah chiahkikta unla, Tangtawn Toupa' sila Mosi in Jordan suahlama gam hon piakna ah paita un. 5 Tangtawn Toupa' sila Mosi' hon piak thupiak leh dan zui dingin pilvang un. Na lungtang khempeuh uleh, na mihinna khempeuh utawh, Tangtawn Toupa, na Pathian uh it ding, a lampite tawn ding, a thupiakte zui ding, amah lenkip ding leh, a na sem dingin pilvang mahmah un, a chi hi. 6 Tua bangin, Joshua in amaute a vualzawl a, a khakheta a, amaute a puanbuuk uah a chiahta uhi. 7 Mosi in Manase nam kimkhatte kiang ah Bashan gam ah goutan a pia hi. Manase nam kimkhat dang kiang ah bel, Joshua in amaute a puanbuuk lam ua a sawlkhiak laiin, amaute a vualzawl hi: 8 Na hauhna uh thupitak, ganhon tampi, kham leh ngun, sumsan leh sikte leh puansilh niktente utawh na puan buukte uah chiahta un. Galte apan na gallakte uh, na sanggamte uh hawm un, a chi hi. 9 Tua bangin, Tangtawn Toupa'n Mosi tungtawna a thupiak banga a ngah uh, amau' gam Gileada chiah dingin, Reubente, Gadte leh Manase nam kimkhatte'n Kanan gama Shilo ah, Israelte a nuseta uhi. 10 Amaute, Kanan gama Jordan geia Geliloth mun hong tung uhi. Tua ah, Reubente, Gadte leh Manase nam kimkhatte'n Jordan lui gei ah, mideep tham maitam lianpi a dawh uhi. 11 Tua bangin, Israel lam pang, Kanan gamgi, Jordan lui geia om Geliloth mun ah, maitam a dawh uh, chih Israelte'n a theih takun, 12 amaute dou dingin Israel mipite khempeuh Shilo ah a kikaikhawm uhi. 13 Tua apanin, Israelte'n, Gilead gam ah, Reubente, Gadte, leh Manase nam kimkhatte kiang ah, siampi Eleazar' tapa Fineha a sawl uhi. 14 Amah tawh tonin, Israel nam sawmte laka nam makai sawm khat, nam khat apan mi khat tek, a sawl uhi. Amaute bel, Israel sangsawm tampite laka makai ngen ahi uhi. 15 Amaute, Gilead gama Reubente, Gadte, leh Manase nam kimkhatte kiang hong tung uhi. Amaute kiang ah: 16 Israel kikhawmte'n na kiang uah: Bang chi dana Israel Pathian adinga hibanga muanhuai loua om thei na hi ua oi? Bang chi dana tu-a Tangtawn Toupa kiheisan a, Ama' tunga hel a, noute ading maitam kidawhtuam thei na hi ua oi? 17 Tua ni-in Tangtawn Toupa' mite tung ah hipi tung mahleh, tuni dong, Peor-a ginatlouhna apan i sian nai louhpi. Tua khelhna kiching lou lai hia? 18 Tu-a noute'n Tangtawn Toupa kiheisan ding maw? Tuni-a Tangtawn Toupa tunga na hel uleh, zingchiangin, amah Israel nam buppi tung ah a heh ding hi. 19 Na goutan gam uh buah ahih leh, Tangtawn Toupa' gam neih lam ah hong pai lei ve ua. Tua gama Tangtawn Toupa' biakbuk om a, koute tawh gam i kikop lei kei dia. Tangtawn Toupa, i Pathian' maitam lou, noute ading maitam tuam dang khat bawlin, Tangtawn Toupa tung ah hel peuhmah kei un. 20 Zera' tapa Akhan in, hamsiat thil tawh kisaia muanhuai loutaka a gamtat laiin, Israel nam buppi tunga thangpaihna hong tung hilou maw? Ama' khelhna hi mah leh, amah kia'n a sihlawh kei hi, hon chi uhi, a vachi uhi. 21 Tua bangin, Reubente, Gadte leh Manase nam kimkhatte'n tua Israel nam makaite a dawng uh a: 22 Pathian, Vanglianpen Tangtawn Toupa ahi! Pathian, Vanglianpen Tangtawn Toupa ahi! Ama'n a thei! Israel in thei hen! Hiai ka thilhih uh, Tangtawn Toupa tunga helna ahih a, ahih kei leh, thumanlouhna a hih peuhmah leh, ama'n a thei ding hi. Ahi, Israel in zong thei hen. Tuni-in, koute hon hondam kei hen. 23 Tangtawn Toupa kiheisan nadinga koumau maitam tuam kidawh a, a tunga haltum kithoihnate leh an thilpiakte, a hih kei leh, lemna kithoihna thillatte lat sawm ka hih uleh, Tangtawn Toupa mahmah in ka tung uah thu khen hen. 24 Hi lou hiai hi! Denchiangin, na suante un, ka suante uh kiang ah: Noute'n Tangtawn Toupa, Israel Pathian tawh bang kisaina nei na hi uhiam? 25 Tangtawn Toupa'n noute leh koute kikal ah gamgi dinga Jordan koih hilou hiam, nou Reubente leh Gadte! Tangtawn Toupa ah tan na nei kei uh, a chi kha ding uh a, na suante un ka suante uapan Tangtawn Toupa launa a beisak khading uh, chih ka lau manua, hibang hih ka hi zaw uhi. 26 Hiai hang ahi: Kisa ni, maitam khat kidawh ni haltum thillat hiam, kithoihna thillat hiam lat nading bel hilouin, ka chih uh. 27 Tua naksangin, koute'n haltum thillatte, kithoihnate leh kithoihna thillatte tawh, Tangtawn Toupa, a mun siangthou ah ka bia uh, chih noute leh koute kikal ah khangsawnte adinga theihpihna hi dinga ka deih uh ahi zaw. Tua hi leh, tununga na suante un, ka suante uh kiang ah, Tangtawn Toupa ah tan na nei kei uh, a chi thei kei ding uhi. 28 Hibanga koute kiang hiam, na suante uh kiang hiama, hon chih himhim uleh, koute'n: Tangtawn Toupa' maitam batpih, ka pu ka pate un a na dawh uh en ve ua. Haltum thillat leh kithoihna thil lat nading bel hilouin, noute leh koute kala theihpihna hi zaw dingin, ka chi ding uhi. 29 A biakbuk maia ding, Tangtawn Toupa, i Pathian' maitam pen loungal, haltum thillat, an thillat leh kithoihna thillat lat nading, maitam dang khat dawhin, Tangtawn Toupa' tunga helin, amah kiheisan peuhmah lou ding hi ung, a chi uhi. 30 Siampi Fineha leh Israel nam makaite, tua Israel behtulpite'n Reubente, Gadte leh Manase nam kimkhatte' thugen a zak takun, a lungkimta uhi. 31 Tua bangin, siampi Eleazar' tapa Fineha in, Reubente, Gadte leh Manase nam kimkhatte kiang ah: Hiai thu-a noute'n Tangtawn Toupa' tunga muanhuailou taka hibang hih na hihlouh manun, Tangtawn Toupa eite laka om ahi, chih tuni'n ka thei uhi. Tuin, Tangtawn Toupa khut' apan Israelte na humbitta uhi, a chi hi. 32 Tua nungin, siampi Eleazar' tapa Fineha leh nam makaite bel, Gilead gama Reubente leh Gadte tawh kimuhna apanin Kanan gam ah a chiahkik uh a, Israelte kiang ah thu a tun uhi. 33 Israelte'n tua thutut a kipahpih uh a, Pathian a phat uhi. Reubente leh Gadte dou a, a tenna gam uh gamsak ding thu a gen nawn kei uhi. 34 Tua bangin, Reubente leh Gadte'n tua maitam, EITE KALA THEIHPIHNA TANGTAWN TOUPA PATHIAN AHI, chih min a phuah uhi.
Joshua' Mangphakhakna
1 Tangtawn Toupa'n Israelte, a kim a kiang ua a galte khempeuh uapan tawlngakna a piak nung kum tampi a paita hi. Joshua zong a kum hong tamta a, hong teekta hi. 2 Ama'n Israelte, upate, nam makaite, thukhente leh uliante a sam khawm a, amaute kiang ah: Kei lah ka kum hong tamta a, kong teekta hi. 3 Noute guma, Tangtawn Toupa, na Pathian uh hiai Zentel namte khempeuh tunga, noute hanga a hih khempeuh, noute mahmah in na muta uhi. Noute adinga gal hon dousakpa Tangtawn Toupa, na Pathian uh ahi. 4 Jordan lui leh tumlam Tuipi Lian kikala nam omlaite ka zawh a, noute' goutan dinga, a nam a nama kon hawmsak dan thei gige un. 5 Tangtawn Toupa, na Pathian mahmah un tua nam omlaite, na mai uah hon hawlkhiaksak ding hi. Tangtawn Toupa, na Pathian un hon chiamsa bangin, noute'n a gam uh na luahta uhi. 6 Thahat mahmah suah un. Mosi' Dan Laibu-a kigelhte, veilam hiam, taklam hiama pialsan lou ding, ahihhanga tuate zui zaw dingin pilvang mahmah un. 7 Noute laka omlai hiai Zentel namte tawh kizopna nei peuhmah kei un. A pathiante uh min sam kei unla, amaute minin kichiam sam kei un. Amaute nna sem kei un. Amaute biain a mai uah kun kei un. 8 Tu donga na hih bangun, Tangtawn Toupa, na Pathian uh lenkip zaw un. 9 Tangtawn Toupa'n noute' mai ah nam lian leh hatte a hawlkheta. Tuni dongin, na mai uah kuamah a ding zou kei hi. 10 Noute laka mi khat lei in zong, 1,000 a delhzak hi. Ahang bel, Tangtawn Toupa, na Pathian un a hon chiamsa bangin, noute adinga hon dousak man ahi. 11 Tua bang ahih manin, Tangtawn Toupa, na Pathian uh it dingin pilvang mahmah un. 12 Hiai Zentel namte tawh kizopna nei kei un. Na kizop uleh, na lak ua teeng laite' gamtat na zui ding uh a, zi-le-tain na kilatuah ding uh a, kingaihna niin ah na lut ding uhi. 13 Tua banga na hih uleh, Tangtawn Toupa, na Pathian un, hiai namte na mai uah a hawlkhe nawn kei ding, chih thei kilkel un. Tua naksangin, Tangtawn Toupa, na Pathian un hon piaksa, hiai gam hoihtak apan na manthat vek masiah uh, amaute noute adingin thang leh pial, na nungzang ua dinga zepna khauhual leh na mit ua dinga lingte a suak zaw ding hi. 14 En un, tu-in, kei leitung dan banga pai ding ka hita. Tangtawn Toupa, na Pathian un, thil hoih hon chiamsate khempeuh, khat leltak zong a vuaksuak kei, chih na lungtang uleh, na mihinna-un na thei uhi. Thuchiam peuhmah a tungkim a, khat leltak zong a vuaksuak kei hi. 15 Ahihhangin, Tangtawn Toupa, na Pathian un thil hoih hon chiamsate a tunkim vek bangin, hiai gam hoih hon piaksa apan hon hihmanthat vek masiah, a hon vauna thil hoihloute zong, Tangtawn Toupa'n na tung uah a tungkimsak ding hi. 16 Tangtawn Toupa, na Pathian un hon piak, a thukhun na manlouh ua, pathian dang zuana a nna uh sem a, na biak himhim uleh, Tangtawn Toupa' thangpaihna na tung uah a kuang ding. Hon piaksa gam hoih apan na mangthang pah ding uhi, a chi hi.
Shekhem ah Thukhun Kithaksak
1 Tua khitin, Joshua in Israel namte khempeuh, Shekhem ah a samkhawm hi. Upate, nam makaite, thukhente leh Israel uliante a sam a, Pathian mai ah amaute hong kilak uhi. 2 Joshua in amaute khempeuh kiang ah: Tangtawn Toupa, Israel Pathian in hibang a gen a: Tanglaiin, na pu na pate uh Abraham' pa Tera leh Nahor zong telin, Iufratis Lui khen lam ah a teng uh a, pathian dangte a bia uhi. 3 Ahihhangin, na pa uh Abraham, tua Eufratis Lui khenlam gam apan ka lakhia a, Kanan gam dung leh vai ah ka pi hi. Suan leh khak tampi amah ka pia a, amah adingin Isak ka pia a, 4 Isak adingin Jakob leh Esau ka pia hi. Esau adingin Seir tanggam ka sehsak a, ahihhangin, Jakob leh a tate bel Aigupta gam ah a paisuk uhi. 5 Tua khitin, Mosi leh Aron ka sawl a, Aigupta gam sunga ka thilhihte Aigupta ka thuaksak hi. Noute bel, tua gam apan kon pikhia hi. 6 Aigupta apan na pate uh ka pikhiak laiin, tuipi nong tung uh a, Aiguptate'n amaute, Tuipi San dong, kangtalaite leh sakoltungtuangte tawh a delh uhi. 7 Na pate uh, Tangtawn Toupa kiang ah panpihna ngenin a kikou uhi. Ama'n noute leh Aiguptate kal ah mial a koih hi. Amaute tung ah tuipi a luangsak a, amaute a tumsak hi. Aiguptate tunga ka thilhih noute'n na mitun na mu uhi. Tua nungin, gamdai-gamkeu ah sawtpi na tam uhi. 8 Noute, Jordan suahlama teeng Amorte gam kon tun hi. Amaute'n hon na dou uh a, ahihhangin, amaute, noute' khut sung ah kon pia a, amaute na mai uah ka hihmangthang a, a gam uh na tang uhi. 9 Zipor' tapa Balak, Moab kumpipa, Israelte dou dingin a kisa hi. Noute hon hamsiat dingin Beor' tapa Balaam a samsak a, 10 ahihhangin, Balaam thu ka ngaikhe kei hi. Tua nungin, ama'n noute hon vualzawl zihzeh zaw hi. Ama' khut apan noute kon hinghawi hi. 11 Tua khitin, Jordan na galkah uh a, Jerikho nong tung uhi. Jerikho-a teengte leh Amorte, Perizte, Kanante, Hitte, Girgaste, Hivte leh Jebuste'n noute hon dou uhi. Ahihhangin, amaute, noute' khut sung ah kon pia hi. 12 Noute' mai ah tunpite ka sawl a, noute' mai ah Amorte kumpipa nihte a hawlkhia uhi. Noute'n na namsau uleh na thai ua na hawlkhiak uh ahi kei hi. 13 Tua bangin, na sepgim louhna uh gam leh na lam louh uh khawpite kon pia hi. Tua ah na teeng uh a, na suan louh uh grep huante leh oliv huante apan na ne uhi, a chi hi. 14 Tu-in, lungtang chihtakna leh thutakna tawh Tangtawn Toupa lau un. Iufratis Lui gal leh Aigupta-a na pu na pate un a biak uh pathiante paimang unla, Tangtawn Toupa' nna sem un. 15 Ahihhangin, Tangtawn Toupa' nna sep ding, noute adinga hoihloua a kilat leh, kua nna ahia na sep ding uh, tuni-in teel un. Na pu na pate un Iufratis Lui gala a nna a sep uh pathiante' nna hia, ahihkei leh, na tenna gam ua Amorte' pathiante' nna hia na sep ding uh! Ahihhangin, kei leh ka innkawte'n zaw, Tangtawn Toupa nna ahi ka sep ding uh, a chi hi. 16 Tua a zak takun, mipite'n a dawng uh a: Koute'n pathian dangte' nna sem dingin, Tangtawn Toupa taisan ngei peuhmah lou ding hi ung! 17 Tangtawn Toupa, i Pathian mahmah ahi Aigupta apan i pate leh eite hon pikhia. Amah ahi tua i saltanna gam apan hon pikhia a, i mitmuh-a chiamtehna lamdangte hihpa. I khualzinna lam tawntung leh i khualzinna gama namte khempeuh lak ah ama'n eite hon humbit hi. 18 Tangtawn Toupa'n eite' mai ah namte khempeuh a hawlkhia a, tuate lak ah tua gama teeng Amorte zong a pang uhi. Koute'n zong Tangtawn Toupa' nna mah sem ding hi ung. Ahang bel, Amah kia i Pathian ahi, a chi uhi. 19 Joshua in mipite kiang ah: Tangtawn Toupa' nna sem thei kei ni uteh! Amah zaw Pathian siangthou ahi a, thikthusia Pathian hi a, na helna uleh na khelhnate uh hon ngaidam lou ding ahi. 20 Tangtawn Toupa taisanin gamdang' pathiante' nna na sem ding uh a, tua hun chiangin, noute' tunga hoihkhinta napi-in, kiheiin hon thuaksak ding a, hon kangtum ding ahi aw! a chi hi. 21 Ahihhangin, mipite'n Joshua kiang ah: Hibang hi peuhmah lou ding! Koute'n Tangtawn Toupa' nna mah sem ding hi ung, a chi uhi. 22 Joshua in: Tangtawn Toupa' nna sem ding chi-a na teel uleh, noumau mah, noute tunga theihpihte na hita uhi, a chi hi. Amaute'n a dawng uh a: Hi mah ung, theihpihte hi ung, a chi uhi. 23 Joshua in: Tua bang ahih nungsang, tu-in, noute' laka om gamdang' pathiante paimang unla, Tangtawn Toupa, Israel Pathian kiang ah na lungtangte uh pekhia un, a chi hi. 24 Mipite'n Joshua kiang ah: Koute'n Tangtawn Toupa' nna ka sem ding uh a, a thu ka mang ding uhi, a chi uhi. 25 Tua ni mahin, Joshua in mipite adingin thukhun a bawl a, tua Shekhem ah thusehte leh dante a pia hi. 26 Joshua in Pathian' Dan Laibu sung ah tua thute a gelh hi. Tua khitin, ama'n suang lianpi a la a, Tangtawn Toupa' mun siangthou kianga tawsaw sing nuai ah a phut hi. 27 Mipite khempeuh kiang ah ama'n: En un! Hiai suang eite tunga theihpihna ahi ding hi. Tangtawn Toupa'n eite kianga a gente khempeuh hiai suang in a zata hi. Noute'n na Pathian uh na zuausan uleh, noute tunga theihpihna hiai ahi ding hi, a chi hi. 28 Tua khitin, Joshua in mipite a sawlkhia a, amau' goutan gam tek ah a paisak hi.
Gamchiam ah Joshua Kivui
29 Hiai thilte nungin, Nun' tapa Joshua, Tangtawn Toupa' sila a sita hi. A sih-in amah kum 110-a upa ahi. 30 Gaash Mual mallama Efraim tanggam, ama' goutan sung ah, Timath Sera kichi mun ah, amah a vui uhi. 31 Joshua damsung teng, Israelte'n Tangtawn Toupa' nna a sem uhi. Tangtawn Toupa'n Israelte adinga a hihsak khempeuh mu, Joshua sanga damsawt zaw upate' damsung teng zong, Israelte'n Tangtawn Toupa' nna a sem uhi. 32 Israelte'n Aigupta apan hon puak uh, Josef guhte zong Shekhem mun ah a vui uhi. Shekhem bel, Jakob in Shekhem' pa Hamor' tate apan Shekel 100-a gam a leina sunga om ahi. Hiai gam, Josef suante' goutan a hong hita hi. 33 Tua khitin, Aron' tapa Eleazar a si a, Gibea ah a vui uhi. Tua bel, a tapa Fineha' goutan dinga a sehkhiak uh ahi a, Efraim tanggama om ahi.
Kanan Gam Lak Masawnna
1 Joshua sih nungin Israel tate'n Tangtawn Toupa kiang ah: Koute adinga Kanante dou ding kua kuan masa ding ahia? a chi uhi. 2 Tangtawn Toupa'n a dawng a: Judah nam a kuan masa ding ahi. Ngai un, amaute khutsung ah gam ka pia hi, a chi hi. 3 Tua khitin, Judah nam in a sanggam uh Simeon nam kiang ah: Kanante hong doupih dingin, kou adia seh gam ah hong kuantou sam un. Koute zong nou adia seh gam ah kong kuan sam ding uh, a chi uhi. Tua bangin, Judah nam zuiin Simeon nam a kuantou uhi. 4 Judah nam a kuan uh a, Tangtawn Toupa'n amaute' khut sung ah Kanante leh Perizte a pia a, Bezek khua ah mi 10,000 a zou uhi. 5 Tua Bezek khua ah Adoni Bezek a mu uh a, amah a dou uh a, Kanante leh Perizte a zougawp uhi. 6 Adoni Bezek a tai a, amaute'n delhin a man uh a, a khutpite gel leh a khepite gel a tankhiaksak uhi. 7 Adoni Bezek in: Ke'n ka khatehnen tawm kumpipa 70-te' khutpite leh khepite ka tankhiaksak a, amaute tunga ka gamtat bangbanga Pathian in hon thuk a hita ve, a chi hi. Judah suante'n amah Jerusalem ah a paipih uh a, tua ah a si hi. 8 Judah suante'n Jerusalem khawpi a sim uh a, namsauin a mite a that uh a, tua a la uh a, meiin a hal uhi. 9 Tua nungin, tanggam leh Negev gamdai-gamkeu leh mual niam gama teng Kanante dou dingin Judah suante a kuan uh a, 10 Hebron khawpi-a teengte a dou uh a, Sesai tawh Ahiman tawh, Talmai tawh a zou uhi. Hebron min masa bel, Kiriath Arba ahi. 11 Tua apanin a kuan uh a, Debir khawpi-a teengte a dou uhi. Debir min masa bel Kiriath Sefer ahi. 12 Kaleb in: Kiriath Sefer dou a, la zou om leh, a zi dingin ka tanu Aksa ka pe ding, chi-in thu a chiam hi. 13 Kenaz' tapa Othniel in tua khawpi a la zou a, Kaleb in a tanu Aksa a zi dingin a pia hi. Kenaz bel Kaleb' naupa ahi. 14 Aksa, Othniel kiang hong tun takin, ni khat bel, a pa kianga lou khat ngen dingin amah a sawl teitei hi. Aksa a sabiltung apan a kumkhiak takin, Kaleb in: Bang deih na hia? a chi hi. 15 Aksa in: Deihsakna tuam khat hon pia inla, Negev gamdai-gamkeua gam non piaktak ngai leh, tua tuinakte zong hon pia in, a chi a, Kaleb in tuinak saknung leh tuinak khangnung a pia hi. 16 Tua laiin, Mosi' sungpa' suante, Tumsing Khawpi kichi apan, Arad simlama Judah gamdai-gamkeu ah, Judah suante kiang ah a pemtou uh a, amaute lak ah a teeng uhi. Mosi' sungpa bel Ken mi ahi. 17 Tua nungin, Judah nam leh a sanggamte uh Simeon nam in, Zefath khawpi-a teeng Kanante a sim uh a, a khawpi a hihgawp dimdem uh a, Horma chi-in tua khawpi a minvawh uhi. 18 Tua baan ah, Judah nam in Gaza khawpi leh a khawtate leh, Ashkelon khawpi leh a khawtate leh, Ekron leh a khawtate zong a la uhi. 19 Tangtawn Toupa'n Judah nam a ompih a, tanggama teengte a hawlkhia uhi. Ahihhangin, phaizanga teengte'n sik kangtalaite a neih manun a hawlkhe zoukei uhi. 20 Mosi' chiamsa bangin, Kaleb adingin Hebron a pia uh a, Kaleb in Anak' tapa thumte tua apan a hawlkhia hi. 21 Benjamin suante'n bel Jerusalema teeng Jebuste a hawlkhe kei uh a, tuni dongin Benjamin' suante lak ah amaute a teeng lai uhi. 22 Tua bang mah in, Josef innkawte Bethel sim dingin a kuan uh a, Tangtawn Toupa'n amaute a ompih hi. 23 Bethel min masa bel Luz ahi. Bethel enkhe dinga enkhemi a kisawl laiun, 24 enkhemite'n khawpi apan hong paikhia mi khat a mu uh a, amah kiang ah: Khawpi sung lutna non hilh leh, na tung ah zahngaih ka suah ding uh, a chi uh a, 25 ama'n amaute kiang ah khawpi sung lutna a hilh a, amaute'n namsauin tua khawpi mite a that uh a, tua mipa leh a innkawte khempeuh bel a hawi uhi. 26 Amah Hitte gam ah a pem a, tua ah khawpi khat a lam a, a min dingin Luz a sa a, tuni dongin tua min a puden hi.
Gam Lakbeilouhte
27 Manase nam in Beth Shan leh a khawtatea teengte leh, Taanak leh a khawtatea teengte leh, Dor leh a khawtatea teengte leh, Ibleam leh a khawtatea teengte leh, Megido leh a khawtatea teengte a hawlkhe kei uhi. Ahang bel Kanante'n tua gama teen a tum tinten ua ahi. 28 Israelte hong hat takun, Kanante siah a liausak teitei uhi. Siah liausak mah le uh, Kanante a hawlkhe vek kei uhi. 29 Efraim nam in zong Gezer khua-a teeng Kanante a hawlkhe kei uh a, Gezer ah amaute lak ah Kanante a teeng uhi. 30 Zebulun nam in zong Kitron-a teengte hita leh, Nahalola teengte hita leh a hawlkhe kei uh a, Kanante amaute lak ah a teeng uh a, ahihhangin, siah a liausak uhi. 31 Asher nam in Ako khua-a teengte leh Sidon khua-a teengte leh, Alab khua-a teengte leh, Akzib khua a teengte leh, Helba khua-a teengte leh, Afek khua-a teengte leh, Rehob khua-a teengte a hawlkhe kei uhi. 32 Tua banga hawlkhiak louha a hawi manun, tua gama teeng Kanante lak ah Asherte a teeng uhi. 33 Naftali nam in zong Beth Shemesh khua-a teengte leh, Beth Anath khua-a teengte siah a liausak uhi. 34 Amorte'n Dan suante tanggam ah a nawhkhetou uh a, phaizanga a hong paisuk ding uh a phal kei uhi. 35 Amorte'n Heres Mual leh Aijalon leh Shaalbim a nuse nuam kei uh a, ahihhangin, Josef innkawte hong hat semsem takun, Amorte siah a liausak uhi. 36 Amorte' gamgi bel Akrabim Taangkanna apan, Sela apan a tunglama paitou ahi.
Israel Thumanlouhna
1 Tua hun laiin, Gilgal apan Bokim ah Tangtawn Toupa' vansawltak a paitou a, Israelte kiang ah: Noute Aigupta gam apan kon pikhetou a, na pu na pate uh kianga gam piak ding chi-a ka nakichiamna hiai gam ah kon piilutta hi. Na kiang uah: Noute tawh kala ka thukhun ka palsat ngei kei ding. 2 Noute'n zong hiai gama teengte tawh kala thukhun na bawl het louh ding uh, a maitamte uh na hihchip vek ding uh, chi-in kon nahilh tawk a, ahihhangin, ka thu na mang kei uh. Banghanga hibanga om na hi ua? 3 Tua thamlouin: Na mai uah amaute ka hawlkhe kei ding a, na pang uah ling ahi ding uh a, a pathiante uh noute adingin thang antah ahi ding uh, chi-in zong kon hilh tawk ve, a chi hi. 4 Tua Tangtawn Toupa' vansawltak in Israelte khempeuh kianga hibanga thu a gen takin, amaute nakpitakin a kap uhi. 5 Tua bang ahih manin, tua mun min dingin Bokim a phuak uh a, tua ah Tangtawn Toupa' mai ah kithoihnate a lan uhi.
Joshua Sihna
6 Joshua in Israelte a kikhensak khitin, amaute a goutan gam tek uh luah dingin a kuan uhi. 7 Joshua damsung teng leh, Joshua sanga damsawt zaw, nidang laia Israelte adinga Tangtawn Toupa' nasep thupi mu pha upate' damsung teng bel, Israelte'n Tangtawn Toupa' thu a mang uhi. 8 Ahihhangin, Nun' tapa Joshua, Tangtawn Toupa' sila, kum 110-a upa ahihin a si a, 9 Goash Mual mallama ama' goutan Efraim tanggam sunga Timnath Heres mun ah a vui uhi. 10 Tua khanga mi khempeuh, a pu a pate uh kianga a kivui khit vek nungun, khangthak hong omte'n Tangtawn Toupa a meltheih taktak kei uh a, Israelte adinga ama'n bang hihsak hiam, chih zong a thei kei uhi.
Israel Muanhuailouhna
11 Tua nungin, Tangtawn Toupa' mitmuhin thil gilou ahih uh a, Baal pathiante a bia uhi. 12 Tangtawn Toupa, a pu a pate uh' Pathian, Aigupta gam apan amaute pikhepa a taisan uh a, a kim a kiang ua nam dangte' pathiante lunggulhin a delh uh a, kunin a bia uh a, Tangtawn Toupa a thangpaisak uhi. 13 Tua bangin, Tangtawn Toupa a taisan uh a, Baal pathiante leh Ashtoreth pathiante a bia uhi. 14 Israelte tung ah Tangtawn Toupa' hehna a kuang a, amaute lok gigete khut ah a pia a, tuate'n amaute a lok uhi. Tua baan ah, Ama'n a kim a kiang ua a melmate uh khut sung ah amaute a khawngkhia hi. Tua bang ahih manin, Israelte, a melmate uh nuai ah a ding zou nawn kei uhi. 15 A gal kuankhiak chiangun, Tangtawn Toupa'n thu a chiam a, kichiam zena amaute kianga a gensa bangbangin, Tangtawn Toupa' khut in amaute tuahse dingin a dou a, lungzingin a mangbang thei mahmah uhi. 16 Tua nungin, Tangtawn Toupa'n Israelte lak ah makaite a tungkhesak a, tuate'n amau lok zelte khut apan amaute a hukhe zel uhi. 17 Hinapi-in, Israelte'n a makaite uh thu a ngaikhe kei uh a, pathian dangte kianga kizuakin a mai uah a kun uhi. A pu a pate uh' lampi a pialsan pah uh a, a pu a pate un Tangtawn Toupa' thupiakte a zuih bangun amaute'n a zui kei uhi. 18 Tangtawn Toupa'n amaute adinga makaite a bawlsak chiangin, Tangtawn Toupa'n tua bang makaite a ompih a, a damsung teng uh, a melmate uapan amaute a hukhe zel hi. Ahang bel, amaute sikdena gimsakte khut nuaia thum leh maua a om chiangun, Tangtawn Toupa'n amaute a lainat mahmah zela ahi. 19 Tua bang makai a sih peuhpeuh chiangin, amaute a kilehhei uh a, a pu a pate uh sangin a tatse zaw zel uhi. Pathian dangte a zui uh a, a nna uh semin a mai uah a kun uh a, a tatsiatna uleh genhakna uh a tawp kei uhi. 20 Tua bang hun chiangin, Israelte tung ah Tangtawn Toupa' hehna a kuang a: Hiai nam mahmah, a pu a pate uh kianga ka piak ka thukhun a zui kei uh a, ka aw a ngaikhe kei uh. 21 Joshua a sih laia, a nutsiat nam omlaite ke'n zong amaute' mai apan ka hawlkhe nawn kei ding. 22 Amaute ka hawi khe kei ding a, Israelte ze-etna'n ka zang ding a, a pu a pate uh zuih bangin Tangtawn Toupa' lampi zuiin a tawn zelna uhiam tawn lou ka en ding, a chi hi. 23 Tua bangin, Tangtawn Toupa'n tua nam dangte sikkhat thu-a hawlkhe lou dingin a phutkip a, Joshua khut sung ah zong a na-pevek kei hi.
Nam Omlaite
1 Kanan gama kidounate thei khalou Israelte ze-et nadingin, Tangtawn Toupa'n hiai namte a phutkip hi. 2 A tup a ngim bel, kidou dan thei nailou Israel suante kidou dan a sinsak nop man ahi lei hi. 3 Tua namte bel, Filistia' vaihawmpa ngate leh Kanante khempeuh leh, Sidonte leh Lebanon tanggama Baal Hermon apan Lebo Hamath donga teeng Hivte khawng ahi uhi. 4 Tangtawn Toupa'n Mosi' tungtawna a pu a pate uh kianga a thupiakte a zui na uhiam zui lou chih thei nuama Israelte ze-et nadinga tua namte na phutkip ahi. 5 Tua bangin, Israelte tua Kanante kichi Hitte, Amorte, Perizte, Hivte leh Jebuste lak ah a teeng uh a, 6 a tanute uh a kitenpih uh a, amaute' tanute hiai namte' tapate' zi dingin a pia uh a, a pathian uh a bia uhi.
Othniel
7 Israelte'n Tangtawn Toupa, a Pathian uh mangngilhin Baalte leh Asherate biain, Tangtawn Toupa' mitmuhin thil gilou ahih uhi. 8 Tua bang ahih manin, Israelte tung ah Tangtawn Toupa' hehna a kuang a, Mesopotamia gama Aram kumpipa Kushan Rishathaim khut sung ah amaute a khawngkhia a, tua kumpipa' thunuai ah kum giat sung a om uhi. 9 Ahihhangin, Tangtawn Toupa kianga Israelte a toukou takun, Tangtawn Toupa'n amaute hukhepa Othniel a tungkhia a, ama'n amaute a hukhia hi. 10 Tangtawn Toupa' Kha Othniel tung ah a tung a, Israelte' ma a kai hi. Othniel in gal a dou a, Tangtawn Toupa'n Aram kumpipa Kushan Rishathaim a khut sung ah a pia a, a zou hi. 11 Tua bangin Israel gam in kum 40 sung galmuanna a nei a, tua khit-in Kenaz' tapa Othniel a si hi.
Ehud
12 Tua nungin, Israelte'n Tangtawn Toupa' mitmuhin thil gilou a hih kik uh a, tua hangin Israelte nuaisiah ding, Tangtawn Toupa'n Moab kumpipa Eglon khut a hatsak hi. 13 Eglon in Amonte leh Amalekte a kaikhawm a, Israel a sim uh a, Tumsing Khawpi kichi a la uh a, 14 Moab kumpipa Eglon nuai ah Israelte silain a om uhi. 15 Tua khitin, Israelte, Tangtawn Toupa kiang ah a toukou uh a, Ama'n amaute hukhepa dingin Ehud a tungkhia hi. Amah bel, Benjamin nama Gera' tapa ahi a, veilong ahi. Ama' khut tungtawnin, Israelte'n Moab kumpipa Eglon kiang ah thawnpiak a pia uhi. 16 Ehud in namsau hiamtuah, tong khata sau khat a sek a, a puan nuai ah, a taklam pheipi ah a henbelh hi. 17 Eglon bel mi thau mahmah khat ahi. Ehud in Moab kumpipa Eglon khut ah tua thawnpiak a pia a, 18 a piak khitin tua thawnpiak pawte a paikiksak hi. 19 Amah bel Gilgal kianga suang milim omna a tunin, a kihei a, kumpipa kiang ah a kik a: Kumpipa aw, na kianga gen ding thuguk khat ka nei, a chi hi. Kumpipa'n: Dai sipsip un! a chi a, a silate khempeuh a pusuaksak hi. 20 Kumpipa bel a inndan tungnung, a votna ah amah kiain a tu a, Ehud in amah a vanaih a: Nang ading Pathian thupuak khat ka nei, a chi hi. Kumpipa a kumpitutphah apan a dintouh laitakin, 21 Ehud in a khut veilamin a sawk a, a taklam pheipi-a namsau a dok a, kumpipa' gil ah a dawt hi. 22 A namsau bul dongin a tum a, a kalkaal lam ah a pailet hi. Ama'n a namsau a dokkik kei a, a thau in a tuamkhum a, a kalkaal ah a ek a tolhkhia hi. 23 Tua khitin, Ehud innlim ah a pawtkhia a, tua inndan tungnung kongkhakte a khak a, a kaih hi. 24 Ehud a paikhiak nungin, kumpipa' silate'n a va en uh a, inndan tungnung kongkhakte kikalhsain a mu uhi. Innsung lama daileng hinte, a kichi uhi. 25 Ningkitel hiaia a ngak nung ua, kong a kihon louh takin, chabi a la uh a, kong a hong uhi, Tua ah, a toupa uh, pialkhang ah a sisain a nalum hi. 26 Tua banga a zia uh a sawt sungin, Ehud a suakta khin a, suang milim omna a kheng a, Seir a tung hi. 27 Tua lai a tun takin, Efraim tanggam teng ah belamtal ki pengkul a mut a, tanggam apan Israelte a kuansuk uh a, ama'n, amaute' maia paiin ma a kai hi. 28 Ehud in amaute kiang ah: Tangtawn Toupa'n na meima uh Moabte na khut sung ua hon peta ahi, hon zui un, a chi hi. Tua bangin, amaute'n amah a zuisuk uh a, Moab gam zotna Jordan lui kanna a la zou uh a, ahihhangin, kuamah luigal kai ding a phal kei uhi. 29 Tua ni-in, Moabte mi hat hangsan ngenta 10,000 khawng a that uh a, khat lei zong a suakta kei hi. 30 Tua ni mah-in, Israelte'n Moabte a nuaisiah uh a, tua hun apan Israel gam in kum 80 sung galmuanna a nei hi.
Shamgar
31 Ehud nungin, Anath' tapa Shamgar in ma a kai a, Israel hukhe dingin, bawngtal sutna chiangzumin Filistiate 600 a that hi.
Debora
1 Ehud a sita a, Israelte'n Tangtawn Toupa' mitmuhin thil gilou a hih kik uhi. 2 Tangtawn Toupa'n Hazor-a vaihawmpa tua Kanan kumpipa Jabin khut ah Israelte a khawngkhia hi. Jabin sepaih makai Sisera bel, Harosheth Hagoim ah a teeng hi. 3 Jabin in sik kangtalai 900 a nei a, kum 20 sung Israelte nakpitaka sikdenin a gimsak hi.Tua hun laiin Israelte Tangtawn Toupa kiang ah huhna ngenin a toukou uhi. 4 Tua hun mahin, kamsangnu khat Debora a om a, Israelte tunga makaiin a pang hi. Amah bel Lapidoth' zi ahi. 5 Ama'n a hih ngeina bangin Rama leh Bethel kikal Efraim tanggam ah, Debora' Nisuh kung nuai ah a tu sek a, Israelte ama' thukhensak dingin a mai ah hong pai zel uhi. 6 Ama'n Naftali gama Kedesh apanin Ahinoam' tapa Barak a samsak a, a kiang ah: Tangtawn Toupa, Israelte' Pathian in na kianga thu hon pia hilou hia? Ama'n: Pai inla, na mite kaikhawm inla, Naftalite leh Zebulunte 10,000 Tabor Mual ah kuanpih in. 7 Ke'n Jabin' sepaih makai Sisera, a kangtalaite leh a sepaihte tawh Kishon Luia hong kuan dingin ka na zolkhe ding a, na khut sung ah kon pe ding, chi ahi, a chi hi. 8 Barak in Debora kiang ah: Nang nong kuanpih ding leh, ka kuan ding a, nong kuanpih kei ding leh zaw ka kuan kei ding, a chi hi. 9 Debora in: Hong kuanpih mahmah ning. Ahihhangin, na kuanna lam ah minphatna na tang kei ding. Ahang bel, Tangtawn Toupa'n numei' khut sunga Sisera khawng ding hiven, a chi hi. Tua bangin, Debora a kisa a, Kedesh ah Barak tawh a kuankhawm hi. 10 Barak in Kedesh ah Zebulunte leh Naftalite a samkhawm a, ama' makaihna nuai ah mi 10,000 a kuan uh a, Debora in amah a kuanpih hi. 11 Tua hun laiin, Mosi' sungpa Hobab suante laka khat Ken dangte lak apan a kituamkoih a, Kedesh kianga Zaananim muna tawsaw sing kiang ah a puanbuk a kai hi. 12 Kente'n Sisera kiang ah: Ahinoam' tapa Barak, Tabor Mual ah a kuantou, chi-in a hilh uhi. 13 Tua a zak takin, Sisera in a sik kangtalai 900-te leh, Harosheth Hagoim apan Kishon luikuam donga om mi khempeuh a kaikhawm hi. 14 Debora in Barak kiang ah: Kisa in! Tuni, Tangtawn Toupa'n Sisera na khut sunga hon piak ni ahi. Tangtawn Toupa na mai ah paita hilou hia, a chi hi. Barak in a mi 10,000-te Tabor Mual apan a makaihsuk hi. 15 Tangtawn Toupa'n Barak' mai ah Sisera leh a kangtalai taisanin khein a tai hi. 16 Barak in Sisera' kangtalaite leh sepaihte Haroseth Hagoim dong a delh zui a, Sisera' sepaihhon khempeuh namsauin a si uh a, khat lei zong a suakta kei hi. 17 Sisera bel, khein a tai a, Ken mi Heber' zi Jael' puanbuk ah a tailut hi. Hazor kumpipa Jabin leh Ken mi Heber' innkawte kala galmuanna a om manin, Sisera bel tua muna tailut ahi. 18 Jael bel Sisera tuak dingin hong pusuak a: Ka toupa aw, hiah hong pai inla, hong lut in, lau ken, a chi hi. Tua bangin, Jael' puanbuk ah Sisera a lut a, ama'n puanin amah a na khuh hi. 19 Sisera in Jael kiang ah: Ka dangtak mahmah a, tui dawn ding hon pe ve, a chi a, Jael in bawngnawi savun thawl a hong a, dawn ding a pia a, puanin amah a khuh kik hi. 20 Sisera in Jael kiang ah: Puanbuk kongkhak ah na ding inla, mi khat peuh in hong kan a: Mi hong lut om hia? hong chih uleh, Om lou, na chi in aw, a chi hi. 21 Ahihhangin, Heber' zi Jael in puanbuk khetphim khat leh sek a la a, Sisera baha ihmu hithiat lai a vanaih denden a, a haizek ah tua puanbuk khetphim a khenlut a, lei tawh a kilhdensuk a, a si hi. 22 Barak in Sisera a delh a, tua lai a hong tung hi. Jael hong pusuakin amah a natuak a: Hong pai dih, na mi zon kon lak ding, a chi hi. Barak a valut takin, ngai dih, Sisera si a, a haizeka puanbuk khetphim tai vengvong a mu hi. 23 Tua ni-in, Pathian in Israel suante' mai ah Kanan kumpipa Jabin a nuaisiah a, 24 a tawptawpa Ken kumpipa a nuaisiah dimdem mateng uh, Israel suante a hat semsem uhi.
Debora' La
1 Tua ni-in, Debora leh Ahinoam' tapa Barak in hiai la a sa uhi: 2 Milian miphate'n Israelte laka ma a kaih laiun, mipite'n amau utthu-a a zuih laiun- Tangtawn Toupa tung ah kipahthu gen un! 3 Kumpipate aw, na za un! Vaihawm thuneite aw, na ngai un! Tangtawn Toupa' mai ah, keimah in la sa ding hi'ng. Tangtawn Toupa, Israel Pathian phatna kaihgingin sa ding hi'ng. 4 Tangtawn Toupa aw, Seir Mual apan na kuankhiak laiin, Edom gamsang apan kal na suan laiin, lei ling a, vante'n tui sungbua, ahi, mei vomte'n vuah zusak hi. 5 Tangtawn Toupa' mai ah mualte'n hawktui luangsak buabua a, Tangtawn Toupa, Israel Pathian' mai ah, Sinai Mual ah hawktui luangsak. 6 Anath' tapa Shamgar khan laiin, ahi, Jael a khan laiin, lamliante nutsiatin om a, khualzinte'n lampelh suk leh toute tawn uhi. 7 Kei Debora ka kisak mateng, kei Israela nu khat ka kipat mateng, khawta-a khawsak beita, Israel gama khawta-a khawsak tawpta. 8 Israel in pathian thakthakte a teel sungin, a kongpite ah kidouna om a, ahihhangin, Israel gama sepaih 40,000-te lak ah, lum leh tei a kimu-a hia! 9 Israel ukpite lam ah, amau utthu-a kuan mipite lam ah ka lungtang om hi. Tangtawn Toupa' tung ah lungdamthu gen un! 10 Nou sabiltung kaang tunga tuangte, nou suala puanphah tunga tute, nou lampi-a paite, ngaihtuah un. 11 Gan tuipiakna muna thalkapte' awte ngaihtuah un, Tangtawn Toupa' thilhih diktatte gen uh a, Israel khawtate adinga thilhih diktatte gen uhi. Tua khitin, khawpi kongpite lam ah, Tangtawn Toupa' mipite paisuk uhi. 12 Debora aw, khanglou in, khanglou in! Khanglou in, khanglou inla, la sa in! Barak aw, thou in, Ahinoam' tapa Barak aw, kisa inla, na salmatte pimang in! 13 Tua khitin, a sibangte milian miphate kiang ah hong pai uh a, galhat khawkhengte tawh, kei lama pang dingin Tangtawn Toupa hong kuan hi. 14 Amalek gama zungkai Efraim nam apan, nang Benjamin nong kuan a, nang khitin, Efraim hong kuan a, nang Benjamin, na mite tawh nong kuan hi. Makir apan sepaih makaite hong kuan a, Zebulun apan sepaih makaailian' chiangtawite hong kuan. 15 Isakhar sepaih makaite Debora tawh ton uh a, Barak zong Isakhar bangin, Debora tawh ton hi. Ama' makaihna nuai ah, phaizang ah ama' nung ah kuan uh a, Reuben sepaih pawlte bel nakpitakin kingaihtuah lai uh. 16 Banghanga noute belam huang kikal khawnga tu mawk? Belamte adia tamngai kitum ngai maw? Reuben sepaih pawlte nakpitakin kingaihtuah lai uh. 17 Gileadte Jordan suah lama om lai uh a, banghanga Dante long kiang khawnga omom ahi ua? Tuipi geia Asherte om uh a, tuipi kahiang gei khawng ah om uh. 18 Zebulunte sih lauhuaina muna om uh a, Naftalite zong kidouna phual mual tung khawng ah om uh. 19 Kumpipate hong kuan uh a, gal dou uh. Kanan kumpipate'n Taanak ah, Megido tuite kiang ah, gal dou uh a, gallak sumte paw lou uh. 20 Van apan van asksite'n a paina uah Sisera dou uh. 21 Kishon, tua tanglai lui Kishon tuikhang in amaute taimangta. Ka hinna aw, hattakin kalsuan in. 22 Sakol khete'n lei tuan ging a, sakol hatte tawmtawmin tai. 23 Tangtawn Toupa' vansawltak in: Tangtawn Toupa huh dinga hong kuan louh manin, Meroz khua hamsiat in. Galhatte dou dinga Tangtawn Toupa a huh louh manun, nakpitakin amaute hamsiat in, chi. 24 Numei lak ah Jael mi nunnuampen hi, amah Ken mi Heber' zi hi. Puanbuka teeng numeite lak ah, amah mi nunnuam hi. 25 Sisera in tui ngen a, Jael in bawngnawi pia a, belkuang manphatakin bawngnawi dat pia. 26 Jael khut in puanbuk khetphim sawk a, a taklam in nasemmi' sek a la. Sekin Sisera sek a, a lutang a satzan. A haizek khenzan a, sun pailet. 27 Jael' khebul ah Sisera op a, puka lumden. A khebul ah opsuk a, puk a, a opsukna ah si. 28 Sisera' nu tawhlet ah dakkhia a, vathangkalha enin kap a: Banghanga kangtalai hong tung hak ahia? Banghanga kangtalai ging Zekai-a hia? chi. 29 Ama' nungak pilte'n dawng uh a, ama'n lah a gen ngeingei gen tah. 30 Gallakte mu a, hawm uh hilou ding hia! Michih in nungak khatkhat hiam, nihnih hiam nangawna hawm uh hilou ding hia! Sisera in puansilh zem phapha tang hi lou ding hia! Puanzep kilawm, gallak puan kilawm, a thuah thuaha zep puansilhte ka ngawnga velh ding hon puak nalou ding hia? chi. 31 Tangtawn Toupa aw, na galte khempeuh tua bangin mangthang uhen. Nang hon itte bel, zing nisuak taangpha bangin taang uhen, a chi uhi. Tua nung kum 40 sung Israel gam in galmuanna a nei hi.
Midiante' Nuaisiahna
1 Israelte'n Tangtawn Toupa' mitmuhin thil gilou a hih uh a, Tangtawn Toupa'n kum sagih sung Midiante' khut sung ah amaute a pekhia hi. 2 Midiante' nuaisiahna amaute tung ah a gik mahmah a, Israelte'n tenna bukna dingin mual tung kawlhawm khawng, kawkhuk khawng, kulh khawng kibawl uhi. 3 Israelte'n khaichi a chiin chiangun, Midiante leh Amalekte leh Suahlam mi midangte hong kuan pahpah uhi. 4 Israelte doua giahphualte a sat chiangun, Gaza dongin, loua buh leh balte a susia uh a, Israelte adingin nek leh tak ding leh, ganta belam leh kei, bawngtal leh sabiltungte nangawn a hawi kei uhi. 5 Amaute lah a gante uleh a puanbuk khawng utawh khaukhuphon mah bangin hong paitou pahpah uhi. Mihingte leh a sangawngsaute uh simseng louh tawh hong paiin, gam a sugawp uhi. 6 Midiante'n gam a nezawng gawp uh a, Israelte, Tangtawn Toupa kiang ah huhna ngenin a toukou uhi. 7 Midiante hanga Israelte, Tangtawn Toupa kianga a toukou takun, hichi hong hi a, 8 Tangtawn Toupa'n kamsang kua hiam khat a sawl a, tua kamsangpa'n: Tangtawn Toupa Israelte Pathian in: Keimah mah in Aigupta gam apan kon piikhetou a, saltanna mun apan kon piikhia hi. 9 Aiguptate leh noute hon sikdente khempeuh khut sung apan kon humbit a, na mai uah amaute ka hawlkhia a, a gam uh noute kon pia hi. 10 Noute kiang ah: Kei Tangtawn Toupa, na Pathian uh ka hi. Na tenna gam ua Amorte' pathiante na lau ding uh ahi kei, kon chi a, ahihhangin, ka aw na ngaikhe kei uh, a chi, a chi hi.
Gideon
11 Tua khitin, Tangtawn Toupa' vansawltak hong pai a, Ofra muna tawsaw sing nuai ah a tu hi. Tua muna lou om bel, Abiezer mi Joash' lou ahi. Tua lou ah a tapa Gideon buhchilin a om a, Midiante muh louh dingin, grep sukna khuk sung ah buh a chil hi. 12 Tua Tangtawn Toupa' vansawltak Gideon kiang ah a kilaak a: Galhat hangsan aw, Tangtawn Toupa'n nang hon ompih hi, a chi hi. 13 Gideon in a dawng a: Ka Toupa aw, Tangtawn Toupa'n koute hon ompih ahih leh, ka tung ua hibang teng banghanga tung ahia oi? Ka pu ka pate un hon na hilh thillamdangte khempeuh koia omta uh ahia? Amaute'n: Tangtawn Toupa'n Aigupta gam apan eite hon na piikhia ahi, chi-a hon na hilh uh hilou maw? Tun lah Tangtawn Toupa'n koute hon taisan a, Midiante' khut sung ah hon pekhia hi! a chi hi. 14 Tua khitin, Tangtawn Toupa amah lam ah a kihei a: Hatna na neih tawh kuan inla, Midiante' khut sung apanin Israelte hukhia in, nang hon sawlpa keimah hi lou ka hi hia? a chi hi. 15 Gideon in: Ka Toupa aw, ke'n Israelte bangchi-a hukhe thei ding ka hia? Ngai dih, kei Manase suana beh hatloupen, ka pa' innkaw sunga neupen ka hi lai, a chi hi. 16 Tangtawn Toupa'n a dawng a: Ke'n kon ompih ding a, Midiante mi khat bang leia zougawp ding na hi, a chi hi. 17 Tua khitin, Gideon in amah kiang ah: Na mitmuha deihsakna tangta ka hih leh, nang mahmah in non houpih, chih a kitheih nading chiamtehna hon pia in. 18 Tu'n thawnpiak ding tawia kong kileh kik mateng, hehpihtakin na paimang ken aw, a chi hi. Tangtawn Toupa'n: Nong kileh kik mateng kon na ngak ding, a chi hi. 19 Gideon inn sung ah a valut a, kelnou khat leh anvui nei ephah khat a la a, silngou sawhlouh tanghou a bawl a, tua sa pen lawh ah a koih a, a satui belkuang ah a sung a, tuate hon tawikhia a, tua gel sing nuaia tua vansawltak' mai ah a lui hi. 20 Tua Pathian' vansawltak in amah kiang ah: Sa leh silngou sawhlouh tanghou hiai suangpi tung ah koih inla, satui sunkhum in, a chi a, Gideon in tua bangin a hih hi. 21 Tangtawn Toupa' vansawltak in a khuta chiangkhun dawnin tua sa leh silngou sawhlouh tanghou a khoih a, tua suangpi apan mei hong kuang a, tua sa leh silngou sawhlouh tanghou a kangtum hi. Tua khitin, tua Tangtawn Toupa' vansawltak in Gideon a paimangsan hi. 22 Gideon in amah Toupa' Tangtawn Pathian ahi, chih a phawkkhiak takin a lau a: Maizen, Tangtawn Toupa Pathian aw! Kimaituahin Tangtawn Toupa' vansawltak ka muta mawk a! a chi hi. 23 Ahihhangin, Tangtawn Toupa'n amah kiang ah: Khamuangtakin om inla, lau ken! Na si kei ding, a chi hi. 24 Gideon in tua ah, Tangtawn Toupa ading maitam a dawh a, tua maitam min dingin Jehova Shalom a sa hi. Tuni dongin, Abiezerte gama Ofra ah tua mun a om lai hi. 25 Tua zan mahin, Tangtawn Toupa'n Gideon kiang ah: Na pa' bawngtalte laka nihna, kum sagiha upa la inla, na pa' dawh Baal maitam phelgawp inla, a kianga Ashera song zong phukpai in. 26 Hiai kulh tung ah, Tangtawn Toupa na Pathian ading maitam diktak dawh in. Tua Ashera song na phuk pen singkhul dingin zang inla, tua bawngtal nihna haltum thillatin lan in, a chi hi. 27 Tua bangin, Gideon in a nasemte laka sawm khat a tonpih a, Tangtawn Toupa' hilh bangin a hih a, ahihhangin, ama' innkawte leh khawpi mite a lau manin, sunlaia hih louin, zankhangin a hih hi. 28 Zingsanga khawpi mite a thawhkhiak takun, ngai dih, Baal maitam chimsa tawh a kianga Ashera song kiphuk tawh, maitam kidawh thak tunga bawngtal nihna haltum thillata kilan tawh a na om hi. 29 Amaute lak ah a kikan uh a: Hiai kua hih ahia? a kichi uhi. Limtaka kana a kidot nungun: Joash' tapa Gideon hih ahi, chi-in mi'n a hilh uhi. 30 Tua khawpi mite'n Joash kiang ah: Na tapa thah dingin hon pekhia in. Baal maitam a phelgawp a, a kianga Ashera song a phuk manin, a sih teitei ding ahi, a chi uhi. 31 Ahihhangin, Joash in a kim a kianga heha dingte khempeuh kiang ah: Noute'n maw Baal na gup ding uh? Baal hut sawm na hi umaw? Baal gum mi peuhmah zingsang main thah hi hen! Baal, pathian taktak ahih leh, a maitam kiphelgawp hiven, amah kigum leh ake! a chi hi. 32 Tua ni-in, Gideon in Baal maitam phelgawp a: Baal amah leh amah kigum hen, a chih manin, Gideon' min dingin Jerub Baal a sa uhi. 33 Tua khitin, Midiante khempeuh leh Amalekte leh suah lam mite a pangkhawm vek uh a, Jordan lui a kaan uh a, Jezreel Phaizang ah giahphual a sat uhi. 34 Tua hunin, Tangtawn Toupa' Kha in puan bangin Gideon a thuam a, Gideon in belamtalki pengkul a mut a, Abiezerte amah zui dingin a kisamkhawm uhi. 35 Tua baan ah, Gideon in Manase gam leh Asher gam leh Zebulun gam leh Naftali gam khempeuh ah zong thangkoute a sawl a, kigalvan dingin a hilhsak hi. Amaute zong amah tuak dingin hong kuankhia uhi. 36 Gideon in Pathian kiang ah: Non chiamsa bangin ka khut tungtawnin Israelte na hukhe taktak ding maw? 37 En in, buhphual ah belam mul ka koih ding a, samul tung kia-a daitui a na kiak a, leilak mun dang teng a hul leh, na gen bangin ka khut tungtawnin Israelte na hukhe ding, chih ka thei ding, a chi hi. 38 A chih bangbangin hong om a, zingsang beltakin Gideon a thou a, belam mul a suk leh belkuang dim tui a taakkhia hi. 39 Tua khitin, Gideon in Pathian kiang ah: Ka tung ah heh kenla, khatvei thu hon gensak lai in. Samul zangin etna khat hon phalsak lai in, kon ngen ahi. Tutungin, samul hulsak inla, leilak ah daitui kesak in a chi hi. 40 Tua zanin, Pathian in tua bangin a hih a, samul kia a hul a, leilak mun dang teng ah daitui a kia hi.
Gideon in Midiante Zou
1 Zingkhangpi-in, Jerub Baal, tua bel Gideon hiven, leh a mite khempeuh a kisa uh a, Harod tuinak ah giahphual a sat uhi. Amaute' giahphual mallam More mual kianga phaizang ah, Midiante'n giahphual a sat uhi. 2 Tangtawn Toupa'n Gideon kiang ah: Midiante na khut sunga kon piak nadingin na tam lua uh. Israelte'n: Ka khut ua kihukhia ka hi uh, chi-in ka tung ah a kisathei kha ding uh. 3 Tu'n mipite zakin thu phuang inla: Laua ling peuhmah kik henla, Gilead Mual apan inn ah chiah pah hen, chi in, a chi hi. Tua bangin, mi 22,000 a kik uh a, mi 10,000 a om lai uhi. 4 Ahihhangin, Tangtawn Toupa'n Gideon kiang ah: Mi na tam law lai uh. Amaute lui ah piisuk inla, tua ah ke'n amaute ka entel ding. Hichi ahi ding a, Hiai mi in nang hong zui hen, ka chih pen a kuan ding a, Hiai in zaw nang hon zui kei hen, ka chih pen a kuan kei ding, a chi hi. 5 Gideon in tua mite lui ah a piisuk a, Tangtawn Toupa'n Gideon kiang ah: Ui tuiliah banga leia liah thawha tui dawnte a tuamin khenkhia inla, khukdina hupte a tuamin koih in, a chi hi. 6 Khuta tui luaka leia liah thawha tui dawn mi 300 a pha uh a, a dang teng in khukdin in tui a hup uhi. 7 Tangtawn Toupa'n Gideon kiang ah: Liah thawha tui dawn mi 300 zangin na mite ka hukhe ding a, Midiante na khut sung ah kon pe ding. Mi dang teng a inn tek uah kik uhen, a chi hi. 8 Tua bangin, Gideon in mi 300-te a siit a, tuate'n a kikte apanin nek dingte leh belamtal ki pengkulte a la uhi. Israel mi dang teng a puanbuk tek uah a sawlkik hi. Midiante bel Gideon omna khang phaizang ah, giahphual ah a om uhi. 9 Tua zanin, Tangtawn Toupa'n Gideon kiang ah: Kisa inla, Midiante' giahphual sim dingin kuansuk in, na khut sunga hon pe ding ka hi. 10 Tua giahphual vasim ding na lau leh, na silapa Pura tonpih inla, 11 ngiahphual ah a thugen uh vasimngaih in. Tua in giahphual sim ngam dingin nang hon hangsansak ding, a chi hi. Tua bangin, Gideon leh a silapa Pura, Midiante' giahphual pua-a galvilte kiang ah a kuansuk uhi. 12 Tua phaizang ah Midiante, Amalekte leh suah lam mite, khaukhup hon banga sahin a om uh a, a sangawngsaute uh tuipi piaua sehnel sanga tamzaw, simsenglouh ahi. 13 Gideon hong kuansuk a, mi khat in a mang a gen laitakin a tungsuk a, tua mipa'n a lawmpa kiang ah: Ngai dih, mang ka man a, ka mangin barli tanghou beu khat Midiante giahphual ah hong tuklut a, puanbuk khat a deng a, tua puanbuk a puk a, a kilumlet a, a chim ka chi, a chi hi. 14 A lawmpa'n: Hiai peuhmah, tua Israel mi, Joash' tapa Gideon' namsau hilou mawh kenteh! Pathian in Midiante leh giahphual bup a khut sunga peta ahi ve, a chi hi. 15 Gideon in hiai mang leh a khiakna a zak takin Pathian a bia hi. Israel giahphual ah hong kilehkik a: Kisa un! Tangtawn Toupa'n Midiante' giahphual na khut sung ua hon peta ahi, a chi hi. 16 Ama'n mi 300 pawl thumin a khen a, michih khut ah belamtal ki pengkul leh belhawm leh a sunga meisel tawh a pe tek hi. 17 Tua khitin, amaute kiang ah: Kei hon en unla, ka hih bangbangin hih un. Giahphual gei ka tun chiangin, ka hih bangbangin hih un. 18 Kei leh ka tonpihte'n ka pengulte uh ka mut chiangun, giahphual kimkot ah noute'n zong na pengkulte uh mut unla: Tangtawn Toupa leh Gideon adingin, chi-in awng un, a chi hi. 19 Gideon in mi 100 tawh Midiante giahphual a naih uh a, zan ven laita kipat, galvilte kikhen laitakin a tung uh a, pengkul a mut uh a, a khut ua belte a khentam uhi. 20 Tua pawl thumte'n zong pengkul mutin, a khut ua belte a khentam uhi. Veilam khuta meisel tawiin, taklam khuta pengkul a mut uh a: Tangtawn Toupa leh Gideon' ading namsau! chi-in a awng uhi. 21 Michih giahphual kimkot ah a pang uh a, Midiante a taikek uh a, laua kikou vengvungin a tai uhi. 22 Mi 300-te'n pengkul kitonin a mut uh a, Tangtawn Toupa'n giahphual sunga Midiante amau namsauin a kithattuahsak a, Zerera lam ah Beth Shita ah, Tabath kianga Abel Mehola dong a tai uhi. 23 Gideon in Naftalite, Asherte leh Manasete a samkhawm a, Midiante a delh uhi. 24 Gideon in Efraim tanggam teng ah thangkoute a sawl a: Midiante dou dingin hong kuansuk unla, amaute main Jordan lui kannate, Beth Bara dong na la un a chisak hi. Tua bangin Efraimte khempeuh a kisamkhawm uh a, Beth Bara dong, Jordan lui kannate a lazou uhi. 25 Midian sepaih makai nihte Oreb leh Zeeb zong a man uh a, Oreb pen Oreb suangpi ah a that uh a, Zeeb bel Zeeb grepsukna ah a that uhi. Midiante a delh zui uh a, Oreb leh Zeeb' lutangte Jordan lui gal ah Gideon kiang ah hon pua uhi.
Zeba leh Zalmuna
1 Tua hun laiin, Efraimte'n Gideon kiang ah: Banghanga koute hibanga hon bawl na hia? Banghanga Midiante dou dinga na kuan laia, koute hon sam tei lou na hia? chi-in amah nakpitakin a dem uhi. 2 Ahihhangin, ama'n amaute a dawng a: Noute tawh tehkak dingin ke'n bang ka hih zoua eita? Abiezerte' grep gah hoihte sangin Efraimte' grep sang mah hoih zaw hi lou maw? 3 Pathian in Midian makaite Oreb leh Zeeb na khut ua hon pia a, noute tawh tehin ken bang ka hih zoua eita? a chi hi. Hiai a zak takun, Gideon tunga a hehna a nemta hi. 4 Gideon leh a mi 300-te tawi mah le uh, Midiante a delh lailai uh a, Jordan lui a tung uh a, a galkah uhi. 5 Gideon in Sukoth khaw mite kiang ah: Kei hon zuite a bahta uh a, hehpihtakin, amaute ading tanghou beute hon pia un aw, Midian kumpipate Zeba leh Zalmuna delh lai ding ka hi, a chi hi. 6 Ahihhangin, Sukoth kha'W makaite'n: Zeba leh Zalmuna na khut sunga omkhin ahi ua hia, tua banga na sepaihte tanghou beute ka piak pah zawzen ding uh? a chi uhi. 7 Gideon in a dawng a: Tua banga thu na gen manun, Tangtawn Toupa'n Zeba leh Zalmuna ka khut sunga hon piak chiangin, gamdai-gamkeu ling leh loulingneitein na sa uh ka kuikek mahmah ding, a chi hi. 8 Tua mun apanin amah Penuel ah a paitou a, tua khaw mite kiang ah, tua mah bangin tanghou a ngen a, amaute'n Sukothte dawn bangin a dawng uhi. 9 Ama'n Penuel khaw mite kiang ah zong: Galmuanga kong kilehkik chiangin, hiai inn sang ka laichim ding, a chi hi. 10 Tua hun laiin, Zeba leh Zalmuna, sepaih 15,000 tawh Karkor muna giahphual ah a om uhi. Tuate bel, suah lam sepaihte laka dama khawsuak omsun ahi uhi. Namsau tawi sepaih 120,000 bel a si uhi. 11 Gideon bel, Noba leh Jogbeha suah lama paitou vialpem namte lampi ah a paitou a, galmuangtaka om tua sepaihhonte a dou guih hi. 12 Midian kumpipa Zeba leh Zalmuna a tai uh a, ahihhangin, Gideon in amaute a delh a, a man a, tua sepaihhonte zong a delhzak hi. 13 Tua khitin, Joash' tapa Gideon, galphual apan, Heres mual kanna lamlian toupai zuiin a lehkik hi. 14 Sukoth mi tangval khat a man a, thu a dong a, tua tangval in Gideon adingin Sukoth upate leh sepaih makai 77-te min a gelhkhiaksak hi. 15 Tua khitin, Gideon tua Sukoth khaw mite kiang ah hong pai a: En ua le, hiai ah Zeba leh Zalmuna a om uh. Amaute tawh kisaia non tot ua: Zeba leh Zalmuna na khut sunga omkhin ahi ua hia, banghangin maw sepaih bahte tanghou ka piak pah zawzen ding uh? non chi uh, a chi hi. 16 Tua khitin, tua khaw upate a man a, khaw pam lam ah a kai a, gamdai-gamkeu ling leh loulingneite a la a, tuate in Sukothte sinsakna a pia hi. 17 Penuel inn sang zong a laichim a, tua khaw mite a that hi. 18 Tua khitin, Zeba leh Zalmuna kiang ah: Tabor muala na thahte uh bangchi bang mi ahi ua? a chi hi. Amaute'n: Nang bangbanga kumpi tapa bang ahi uh, a chi uhi. 19 Gideon in: Ka nu' tapa ka sanggamte ahi ve ua le. Tangtawn Toupa' hinna louin ka kichiam ahi: Amaute na hinghawi le uchin zaw, noute hon that lou mah ding hi vengin, a chi a, 20 kiheiin a tapa upapen Jether kiang ah: Amaute that in, a chi hi. Ahihhangin, Jether bel tangval nou lei ahi a, a lau a, a namsau a dok kei hi. 21 Zeba leh Zalmuna in: Kisa inla, nang mahmah in hon that suk in. Mi a pasalphatna, a hangsanna-a kilang hilou maw, a chi uhi. Gideon in a naih a, amaute a that a, a sangawngsaute uh ngawng apan kizepna khite a la hi.
Gideon' Siampi-puanak zem
22 Tua khitin, Israelte'n Gideon kiang ah: Nang Midiante' khut apan koute non hutkhiak manin, koute tung ah vaihawm inla, na tapa leh na tupa zong koute tung ah vaihawmin pang uhen, a chi uhi. 23 Ahihhangin, Gideon in amaute kiang ah: Noute tung ah vaihawmin ka pang kei ding a, ka tapa zong a pang kei ding. Tangtawn Toupa'n noute tung ah vai a hawm zaw ding, a chi hi. 44 Tua khitin, Noute apan nget khat bel kon nei hi. Noute tek in gallak na tante uapan bilbah khat tek hon pe le uchin, a chi hi. A galzawhte ubel, Ishmaelte ahi uh a, bilbah batte ahi uhi. 25 Amaute'n: Bilbahte hon pe mah n'ung, a chi uh a, puanza khat a phah uh a, a gallak uh bilbahte hon kaikhawm uhi. 26 Sangawngsau ngawnga khite, khi-awh vawhsawnte, khainiangte leh Midian kumpipate' kumpipuan sandupte sim louh, Gideon in bilbah a ngetkhiakte khamsik shekel 1,700 a pha hi. 27 Gideon in tuatein siampi puanak zem a bawl a, a khawpi Ofra ah a koih a, Israelte khempeuh in tua biain a kizuak uhi. Gideon leh a innkawte adingin, tua siampi puanak zem thang antah a suak mawkta hi.
Gideon' Sihna
28 Tua nungin, Midiante Israelte' nuaisiahin a omta uh a, lu a phongkhe zou nawn kei uh a, Gideon dam sungin, Israel gam in kum 40 sung galmuanna a nei hi. 29 Joash' tapa Jerub Baal a inn ah a kilehkikta hi. 30 Ama'n zi a hau a, ama' ta mahmah tapa 70 a nei hi. 31 Shekhema om a meinu'n zong tapa a nei a, Gideon in a min dingin Abimelek a sa hi. 32 Joash' tapa Gideon teekkunin a dam a, tua nungin, a si a, Abiezerte gama Ofra ah, a pa Joash' hankhuk ah a kivui hi. 33 Gideon a sih takin, Israelte a nungtolh kik uh a, Baal pathiante delhin a kizuak uh a, a pathian dingun Baal Berith a tungkhia uhi. 34 Tua bangin, a kim a kiang ua a melmate uh' khut apan Israelte humbitpa Tangtawn Toupa, a Pathian uh a thei gige nawn kei uh a, 35 Jerub Baal in amaute adinga thil hoih a hihte mangngilhin, a innkawte tung ah zong muanhuaiin siam a suah kei uhi.
Abimelekh
1 Tua nung lamin, Jerub Baal' tapa Abimelekh, Shekhema a nu' sanggamte kiang ah a hawh a, amaute kiang ah leh, a nu' pa' behte khempeuh kiang ah thu a gen a: 2 Shekhem makaite khempeuh kiang ah thu gen unla: Jerub Baal' tapa 70-te'n na tung ua vai a hawm uh hia hoih na sak uh, ahih kei leh, mi khat in na tung ua vai a hawm? Kei na guh uapan guh, na sa uapan sa ka hih lam theigige un, chi un, a chi hi. 3 A nu' sanggamte'n Shekhem makaite khempeuh kiang ah tua thute khempeuh a gen uh a, Abimelekh zui dingin a lunghei uh a: Amah i sanggampa ahi mah vele, a chi uhi. 4 Amaute'n Baal Berith biakinn apan ngun sik shekel 70 Abimelekh a pia uhi. Abimelekh in tua sumtein mi ngongtat leh namanlou teng a guai a, amaute'n amah a zui uhi. 5 Tua khitin, amah Ofra khua-a a pa' inn ah a hawh a, a pa Jerub Baal' tapa ama' sanggam pasal 70-te suangpi tung khat ah a that vek hi. Ahihhangin, Jerub Baal' tapa naupangpen Jotham bel a bu a, a suakta kha hi. 6 Tua khitin, Shekhem leh Beth Milo khawmite, Shekhem song kianga tawsaw sing omna ah a kikaikhawm uh a, Abimelekh kumpi lukhu a khusak uhi.
Singkung Gentehna
7 Mi'n hiai thu Jotham kianga a hilh takun, amah Gerizim Mual tung ah a kaltou a, ngaihtakin a kikou a, amaute kiang ah: Shekhem makaite aw, Pathian in na thu uh a ngaihkhiak theih nadingin, ka thugen na ngai un: 8 Khatvei, singkungte'n amaute uk ding kumpipa thaunilh dingin a kisa uh a, oliv singkung kiang ah: Nang ka kumpipa-un hong pang in, a chi uhi. 9 Ahihhangin, oliv singkung in a dawng a: Pathian leh mihing pahtawi nadinga kizang ka sathau namtui suah ding tawpsanin, singkung dangte tung ah ka kivialzak dia hia? a chi hi. 10 Tua khitin, singkungte'n theipi kung kiang ah: Nang kisa inla, ka kumpipa-un hong pang in, a chi uhi. 11 Ahihhangin, theipi kung in a dawng a: Ahoih mahmah ka gah suah ding leh ka khumna tawpsanin, singkung dangte tung ah ka kivial- zak dia hia? a chi hi. 12 Tua khitin, singkungte'n grepgui kiang ah: Nang kisa inla, ka kumpipa-un hong pang in, a chi leuleu uhi. 13 Ahihhangin, grepgui in a dawng a: Pathiante leh mihing kipaksak ka grepzu thakte tawpsanin singkung dangte tung ah ka kivialzak dia hia? a chi hi. 14 A tawpin, singkung teng khempeuh in lingkung kiang ah: Nang kisa inla, ka kumpipa un hong pang in, a chi uhi. 15 Ling kung in singkungte kiang ah: Noute tunga kumpipa dinga non thaunilh nop taktak uleh, ka liim ah hong bu ve ua. Tua bang na ut kei uleh lah, lingkung apan mei hongpawt henla, Lebanon sidar singkungte kangtum hen, a chi hi. 16 Na kumpipa ding ua Abimelekh na bawl ua, lungsim dik leh phathuaia gamta na hih ua, Jerub Baal leh a innkawte tunga gamtat kilawma gamta na hih ua, tan dia kilawm pia na hih nak uleh, Abimelekh tawh nuamsa le uteh ake. 17 Ka pa'n noute adingin gal a dou a, ama' hinna phalin Midiante' khut apan hon humbit ahi. 18 Ahihhangin, ka pa' innkawte' tung ah na hel uh a, suangpi tung ah a tapa 70-te, a banbanin na that uh a, a silanu tawh a ta Abimelekh, na sanggampa uh ahih manin, Shekhemte tunga kumpipain na bawl uh. 19 Tuni-a kilawmtak leh phathuaitaka Jerub Baal tunga gamta na hih nak uleh, Abimelekh tung ah kipakin lungnuam unla, amah zong noute tunga kipakin lungnuam hen. 20 Ahihhangin, tua banga gamta na hih kei uh lebel, Abimelekh apan mei hong pawt henla, Shekhem khaw mite leh Beth Milo khaw mite kangtum henla, Shekhem mite leh Beth Milo mite apan mei hong pawt henla, Abimelekh kangtum hen! a chi hi. 21 Tua khitin, Jotham a taimang a, Beer a tung a, a sanggampa Abimelekh a lau manin tua ah a teeng hi.
Abimelekh Pukna
22 Abimelekh in kum thum sung Israelte a makaih nungin, 23 Pathian in Abimelekh leh Shekhemte kal ah kha gilou a koih a, Shekhemte, Abimelekh tung ah lepchiahtakin a gamta uhi. 24 Ahang bel, Jerub Baal' tapa 70-te tunga sisan suahna mawhna, Pathian in Abimelekh tung ah leh a sanggamte that dinga amah panpih Shekhem makaite' tunga a but nop man ahi. 25 25 Shekhem makaite'n mual tung ah Abimelekh buk dingin mi a koih uh a, lampi-a paite peuhmah a lok zel uhi. Hiai thu Abimelekh kiang ah mi'n a hilh uhi. 26 Ebed' tapa Gaal in a sanggamte a tonpih a, Shekhem makaite lama pang dingin hong kuan a, Shekhem makaite'n amah a na muang uhi. 27 Amaute grephuan ah a hawh uh a, grep gahte khawmin, a tui a suk uh a, a pathian uh biakinn ah nopbawlin a om uhi. Tua banga nea a dawn laiun Abimelekh a hamsiat uhi. 28 Ehed' tapa Gaal in: Abimelekh kua hi a, Shekhem kua hi ahia ama' nuaia i om ding? Amah Jerub Baal' tapa hi lou maw? Ama' nuaia sepaih makai Zebul hi lou maw? Shekhem' pa Hamor' mite nna sem ve ua. Banghanga Abimelekh nna sem ding i hia? 29 Hiai mite ka thu nuaia om hi le uh ut nang e. Hi leh, Abimelekh ka hawlmang ding, a chi hi. Tua bangin, Gaal in Abimelekh kiang ah: Na sepaih honte behlap inla, hong kuan in! a chi hi. 30 Tua khawpi ukpipa Zebul in Ebed' tapa Gaal' thugente a zak takin, a hehna a kuang a, 31 Abimelekh kiang ah a simin mi a sawl a: Ngai dih, Ebed' tapa Gaal leh a sanggamte Shekhem ah hong pai uh a, nang hon pawsiahta uh. 32 Nang leh na sepaihte tu zanin kuankhia unla, gamlak ah amaute bukin ngak un. 33 Zingsang beltakin, ni suah phetin thou unla, khawpi la un. Ngai dih, Gaal leh a sepaihte nang dou dingin hong kuankhe ding uh ahi, a tung uah na hih theih bangbang hih in, a chisak hi. 34 Abimelekh leh a sepaihte khempeuh zan laiin a thou uh a, Shekhemte buk dingin pawl li a kisuah uhi. 35 Ebed' tapa Gaal paikhia a, khawpi lutna kongpi-a a din laitakin Abimelekh leh a sepaihte a mibukna uapan hong kuan uhi. 36 Gaal in tua mite a muh takin, Zebul kiang ah: En dih, mual tungte apanin mi hong kuan uh! a chi hi. Ahihhangin, Zebul in: Mual sang liimte mihing banga mu na hi ve, a chi hi. 37 Gaal in: En dih, gam laizang apanin mite hong kuan. Pawl khat lah aisansiampa' tawsaw sing lam apan hong kuan uh, a chi hi. 38 Zebul in: Abimelekh kua ahia a nna i sep ding, na chihna kam kaw' omta ahia le? Tua hong kuante na simmawhte hilou u maw? Kuan inla amaute dou ve leh! a chi hi. 39 Gaal in Shekhem makaite' ma a kai a, Abimelekh a dou hi. 40 Abimelekh in amaute a delh a, Gaal a taisia a, kidouna phual apan khawpi kongpi dongin tampi liamin a puk uhi. 41 Abimelekh bel Aruma ah a taam a, Zebul in Gaal leh a sanggamte Shekhema teng lou dingin a hawlkhia hi. 42 A zing chiangin, Shekhem makaite gamlak ah a paikhia uh a, a paikhiak thu uh, mite'n Abimelekh kiang a tun uhi. 43 Abimelekh in a sepaihte a tonpih a, pawl thumin a khen a, gamlak ah Shekhemte a buk uhi. Khawpi apan mite hong paikhia a muh takin amaute dou dingin a dingkhia a, a dou hi. 44 Abimelekh leh a na ompih sepaihte'n Shekhem lutna kongpi a delh uh a, tua ah a pang uhi. Sepaih pawl dang nihte'n gamlaka omte a delh uh a, a that uhi. 45 Tua ni, sun nitumin Abimelekh in khawpi a dou a, a la zou a, a sunga mite a that a, khawpi a hihsia a, a sung ah chi a theh hi, 46 Hiai thu a zak takin, Shekhem kulhpi-a teeng makaite El Berith biakin sung bitna mun ah a tai uhi. 47 Shekhem kulhpi-a teengte tua lai ah a kikhum uh, chih Abimelekh in a za a, 48 a sepaihte tawh Zalmon Mual ah a paitou hi. Abimelekh in heipi-in singhiang khat a sat a, a liangzang ah a pua a, a mite kiang ah: Ka hih dan na muh bangbangun kintakin hih tek un, a chi hi. 49 Tua bangin, amaute khempeuh in singhiang a sat tek uh a, Abimelekh hih bangin a pua uhi. Kulhpi kimkot ah singhiangte a sekhawm uh a, meiin a hal uh a, kulhpi sunga omte a halkhum uhi. Tua Shekhem kulhpi sung ah numei leh pasal 1,000 khawng a si uhi. 50 Tua khitin, Abimelekh bel, Thebez khawpi lam ah a pai a, a dou a, a lata hi. 51 Tua khawpi sung laizang ah kulhpi innsang khat a om a, numei pasal, tua khawpi-a teengte tua lai ah a taikhawm uh a, kong a kikhakkhum uh a, innsang intung lam ah a kaltou uhi. 52 Abimelekh in tua kulhpi innsang a dou a, a kongpi meia hal dingin a naih hi. 53 Tua laitakin, numei khatin Abimelekh lutung ah buhhek suang tungnung a khiakkhum a, a luguh a kitam hi. 54 Abimelekh in a galvan pua tangval kintakin a sam a: Mi'n numei' thahsa hon chi kha ding, nangma' namsau dok inla, hon that in, a chi a, tua tangval in namsauin amah a sun a, a sita hi. 55 Israelte'n Abimelekh a sita, chih a theih takun, michih in ah a paita uhi 56 Abimelekh in a sanggam 70-te that a, a pa tunga a tatsiat, Pathian in a thuk a, 5 Shekhem gitlouhna khempeuh zong a thuk hi. Tua bangin, Jerub Baal' tapa Jotham' hamsia amaute tung ah a tungkimta hi.
Tola
1 Abimelekh sih nungin, Israel hukhe dingin Isakhar nama Tola hong dingkhia hi. Amah Pua' tapa ahi a, Pua bel Dodo' tapa ahi. Amah Efraim tanggama Shamir khua-a teeng ahi. 2 Ama'n kum 23 sung Israelte' ma a kai a, a sih takin, Shamir khua ah a kivui hi.
Jair
3 Tola nungin, Gilead mi Jair hong dingkhia a, kum 22 sung Israelte' ma a kai hi. 4 Ama'n tapa 30 a nei a, amaute sabiltung 30 tung ah a tuang uh a, Gilead gama khawpi 30 a lam uhi. Tua khawpite tuni dongin Havoth Jair a kichi hi. 5 Jair a sih takin, Kamon khua ah a kivui hi.
Israelte Khelhna
6 Israelte'n Tangtawn Toupa' mitmuhin thil gilou a hih kik zel uh a, Baal leh Ashtoreth tua Aramte' pathiante, Sidonte' pathiante, Moabte' pathiante, Amonte' pathiante, Filistiate pathiante a bia uhi. Tangtawn Toupa taisan a, amah a biak nawn louh manun, 7 Tangtawn Toupa' hehna Israelte tung ah a kuang a, Filistiate' khut ah leh Amonte khut ah amaute a khawngkhia hi. 8 Tua kum apan kum sawm leh giat sung, tua mite'n Jordan gala Gilead kichi, Amonte' gama teeng Israelte a nuaisiah uh a, a hihgenthei mahmah uhi. 9 Tua baan ah, Judahte, Benjaminte leh Efraim inkawte hong dou dingin, Amonte Jordan lui gal hong kah uh a, Israelte a lungzingsak mahmah uhi. 10 Tua bang hong hih takin, Israelte Tangtawn Toupa kiang ah huhna ngenin a toukou uh a: Na tung ah ka na-khialta uh. Nang ka Pathian uh hon taisanin Baal pathiante ka na-beta uh, a chi uhi. 11 Tua khitin, Tangtawn Toupa'n Israelte kiang ah: Aigupta gam apan, Amorte apan, Amonte apan leh Filistiate apan kon hukhia a, 12 Sidonte, Amalekte leh Moabte'n hon nuaisiah laiun, huhna ngenin nong toukou uh a, amaute khut sung apan kon hukhia hi. 13 Ahihhangin, noute mahmah in kei non taisan uh a, pathian dangte na bia uh. Tu'n zaw kon hukhe nawn kei ding. 14 Pai unla, na teel uh pathiante kiang ah huhna ngenin toukouta un. Na lungzin laiun hon hukhe le uh ake! a chi hi. 15 Ahihhangin, Israelte'n Tangtawn Toupa kiang ah: Ka na khialta uh ahi. Na mitmuha hoihpen bang zel ka tung uah hih inla, ahihhangin, tuni'n zaw ka hinna uh humbit pah peuhmah in, a chi uhi. 16 Tua khitin, amaute laka gamdang' pathiante a koihkhia uh a, Tangtawn Toupa a bia uhi. Ama'n Israelte' lungzinna a thuak zou nawn kei hi. 17 Amonte galdou dingin a kikaikhawm uh a, Gilead gam ah giahphual a sat uhi. Israelte zong a kikhawm uh a, Mizpa ah giahphual a sat uhi. 18 Tua banga thil a om takin, Gilead gama teengte leh a makaite uh a kikum uh a: Amonte dou dinga kua kipan masa ding ahia? A kipan masapen pen Gileada teengte khempeuh tunga lutangin pang hen, a kichi uhi.
Jeftha
1 Gilead mi Jeftha bel, galhat hangsan ahi a, a nu bel kizuak numei khat ahi. 2 Gilead zi in Gilead adingin tapate a nei a, amaute a pichin takun, Jeftha a hawlkhia uh a: Nang numei tuam khat tapa na hih manin, koute lak ah ka pa uh' gou na luah kei ding, a chi uhi. 3 Jeftha bel, a sanggamte apanin a tai a, Tob gam ah a teeng hi. Mi huhamte'n amah a zui uh a, mi lokin a kuan pahpah uhi. 4 Tua nung lamin, Amonte'n Israelte a dou uhi. 5 Tua banga Amonte'n Israelte a dou takun, Gilead upate Tob gam apana Jeftha pii dingin a kuan uh a: 6 Hong pai inla, Amonte dou dingin, ka makaiun hong pang in, a chi uhi. 7 Jeftha in Gilead upate kiang ah: Kei na muhdahpa uh ka hi keia hia? Ka pa' inn apan non hawlkhia uh a, banghanga na buai tak ua ka kianga hong hawh na hi ua? a chi hi. 8 Gilead upate'n amah kiang ah: A na hita zongin, tu-a nang kianga hong pai kik hi ung. Hong pai inla, Amonte hong doupih in. Gileadte' lutang hi dinga hon deih hi ung, a chi uhi. 9 Jeftha in Gilead upate kiang ah: Amonte dou dingin hon piikik le uchin la, Tangtawn Toupa'n ka khut sung ah amaute hon peta leh, noute' lutangin ka pang taktak dia hia? a chi hi. 10 Gilead upate'n Jeftha kiang ah: Na thu banga ka gamtat kei ua leh, Tangtawn Toupa eite kala theihpihpa hi hen, a chi uhi. 11 Tua banga a chih takun, Jeftha in Gilead upate a zui a, amaute'n amaute' lutang hi ding leh, amaute' tunga sepaih makai lianpen hi dingin a bawl uhi. Ama'n Mizpa ah Tangtawn Toupa' mai ah tua a thugente mah a gen hi. 12 Tua khitin, Jeftha in Amon kumpipa kiang ah mi a sawl a: Ka tunga bang lungkimlouhna nei a, ka gam sunga kei dou dinga hong kuan na hia? a chisak hi. 13 Amon kumpipa'n Jeftha' misawlte a dawng a: Aigupta gam apan Israel hong paitouh lai a, ka gam Amon apan Jabok leh Jordan lui dong hon suh, tu'n gal bawl se louin hon pekik hen, a na chi hi. 14 Jeftha in Amon kumpipa kiang ah mi a sawl kik a, 15 Jeftha in hiai a gen a: Israel in Moab gam a sut kei. Amonte' gam zong a sut kei. 16 Ahihhangin, Aigupta gam apan hong paitouh laiin, gamdai-gamkeu tawnin Tuipi San ah a pai a, Kadesh gam a tung hi. 17 Tua khitin, Israel in Edom kumpipa kiang ah mi a sawl a: Na gam sung tawnin hon paisak in, a chisak hi. Ahihhangin, Edom kumpipa'n a za nuam kei hi. Tua khitin, Moab kumpipa kiang ah a sawl a, ahihhangin, ama'n zong a gama pai ding a phal kei a, Israel Kadesh ah a taam hi. 18 Tua khitin, Israel Edom gam leh Moab gam pelin, gamdai-gamkeu tawnin a pai uh a, Amon gal khat lam ah giahphual a sat uhi. Ahihhangin, Moab gam sung a lut kei uh. Amon kuam zaw Moab gamgi ahi lei hi. 19 Tua khitin, Israel in Heshbon khawpi-a vaihawmpa Sihon kiang ah mi a sawl a: Na gam ua pai dingin na gam sung ka tot uh hon phalsak ve, a chisak hi. 20 Ahihhangin, Sihon in Israel a muang kei a, a sepaihte khawmin Jahaz ah giahphual a sat a, Israel a douta hi. 21 Tangtawn Toupa, Israel Pathian in Sihon leh a sepaihhonte Israel' khut sung ah a pia a, amaute a zou uhi. Israel in Amorte' tenna gam khempeuh a luah hi. 22 Amaute'n Amorte' tenna gam teng a luah uh a, tua bel Amon kuam apan Jabok lui kuam dong leh, gamdai-gamkeu apan Jordan lui dong ahi. 23 Tangtawn Toupa, Israel Pathian in, a mi Israelte' mai ah Amorte a hawlkhia hi. Banghanga nang tua-a gam luah thei ding na hia? 24 Na pathian Khemosh in hon piak teng na luah lei kei ding hia? Tua mah bangin, koute'n zong Tangtawn Toupa, ka Pathian un koute' maia gam a lak teng ka luah kei ding ua hia? 25 Moab kumpipa Zipor' tapa Balak sangin na hoih zaw tuama hia? Ama'n Israel kinakpihin a dou ngei ahia? 26 Heshbon khawpi leh a khawtate, Aroer khawpi leh a khawtate leh Amon kuam kima khuate, kum 300 sung Israel in a tan sunga banghanga tua hun sung teng tuate lakik lou na hia leh? 27 Na tung ah ka khial kei. Nang bel koute hon douin ka tung uah na khial hi. Tangtawn Toupa, Thukhenpa'n tuni-in Israel suante leh Amonte kal ah thu khen hen, a chi, a chisak hi. 28 Ahihhangin, Amonte kumpipa'n Jeftha' thukhah thu a ngaihsak kei hi.
Jeftha' Kichiamna leh Vualzawhna
29 Tua khitin, Tangtawn Toupa' Kha Jeftha tung ah hong tung a, ama'n Gilead gam leh Manase gam a kaan a, Gilead gam Mizpa a kheng a, tua apanin Amonte dou dingin a kuan hi. 30 Jeftha in Tangtawn Toupa' mai ah kichiamna khat a bawl a: Ka khut sunga Amon non piak leh, 31 hibang ahi ding a, Amonte apan galmuanga kong kilehkik chiangin, ka inn apan kei hon na muak masapen pen Tangtawn Toupa-a ahi ding a, haltum thillatin ka lan ding, a chi hi. 32 Tua khitin, Jeftha, Amonte dou dingin a kuan a, Tangtawn Toupa'n a khut sung ah amaute a pe taktak hi. 33 Aroer apan Minith lutna dong leh, Abel Keramim kala khawpi 20 a zou vek a, mi tampi a that hi. Tua bangin, Israel suante'n Amonte a nuaisiah uhi.
Jeftha' Tanu
34 Mizpa-a a inna Jeftha hong kilehkik takin, ngai dih, a inn apan amah na muak masapen a tanu ahi a, khuangta tawh lamin hong paikhia hi! A ta neihsun a hi behlap a, tanu dang leh tapa zong a nei kei hi. 35 Ama'n a tanu a muh takin, a puansilh a botkek a: Maizen aw, ka tanu! Hon lainiam namai chia! Hon lunggimsakte laka khat lah nong hi mawk a! Ka phei theih louh, Tangtawn' Toupa' maia thu na genkhin ka hi vele! a chi hi. 36 A tanu in a dawng a: Pa aw, Tangtawn Toupa' maia thu genkhinta na hih chiangin, Tangtawn Toupa'n lah na meima Amonte tunga phuba hon laksakta a, Tangtawn Toupa' maia na kama na gensa, na thuchiam bangbangin, ka tung ah hih in, a chi hi. 37 Tua khitin, ama'n a pa kiang ah: Hiai ka nget khat bel hon hihsak in: Ka lawmte tawh, mual tung khawnga a suk a toua pai a, ka nungak siangthouna ka kah nading kha nih sung hun hon pia in, pasal nei ngeilou ding lah ka hi ngai a, a chi hi. 38 Ama'n: Tua bangin na pai thei ding, a chi a, kha nih sung a sawlkhia hi. A tanu bel, a lawmte tawh mual tung khawng ah a suk a touin a vak a, a nungak siangthouna a kah hi. 39 Kha nih a bei takin, a pa kiang ah hong kik a, a pa'n a thuchiam bangin a tung ah a hih hi. A tanu bel nungak siangthou a hiden a, pasal tawh a lumkhawm ngei kei hi. 40 Israel tanute'n Gilead mi Jeftha' tanu suunna kumsimin ni li sung a nei zel uh a, Israelte lak ah ngeinain a omta hi.
Jeftha leh Efraim Nam
1 Tua nungin, Efraimte a kikaikhawm uh a, Zefon ah a galkah uh a, Jeftha kiang ah: Banghanga Amonte dou dinga galkah a, koute hon sam lou na hia? Na lutunga na inn haltum ding ka hi uh aw, a chi uhi. 2 Jeftha in amaute a dawng a: Kei leh ka mite, Amonte tawh kikhinga nakpitaka ka pan laiun, noute kon sam tawk a, Amonte' khut apan nong hukhe nuam kei ua ahi zaw. 3 Nong hukhe nuam kei uh, chih ka theih takin, sih leh sih, chi-in Amonte dou dingin ka galkah a, Tangtawn Toupa'n amaute ka khut sung ah hon pia hi. Tuni-a kei dou dinga nong kuan zawsop uh banghang ahia? a chi hi. 4 Jeftha in Gilead gama mite khempeuh a kaikhawm a, Efraimte a dou uhi. Efraimte'n: Nou Gileadte, Efraim leh Manase laka galtai vakvaite leltak, a chih manun, Gileadte'n Efraimte a zougawp uhi. 5 Gileadte'n Efraim gam zotna Jordan lui kanna a la uh a, tua ah a pang uhi. Efraim galtai vakvai khatpeuh in: Lui hon kansak ve ua, a chih chiangin, Gileadte'n: 6 Efraim mi na hi hia? a chi uh a, ama'n: Hilou, a chi hi. Tua bang hun chiangin, Gileadte'n: Shiboleth, hon chi mah dih, a chi uhi. Ama'n diktakin a chi thei kei a: Siboleth, a chi zel hi. Gileadte'n tua bang mi a man uh a, lui kanna mun ah a that zel uhi. Tua hunin, Efraimte 42,000 a si uhi. 7 Jeftha in kum guk sung Israelte a makaih a, tua khitin a si a, Gilead khawpite khat ah a kivui hi.
Ibzan, Elon leh Abdon
8 Jeftha nungin, Bethlehem mi Ibzan in Isrelte a makaih hi. 9 Ama'n tapa 30 a nei a, tanu 30 tak beh dang lak ah a kha a, a tapate ading mou 30 mah beh dang lak apan a pii hi. Ama'n kum sagih sung Israelte a makaih a, 10 tua nungin a si a, Bethlehem ah a kivui hi. 11 Ibzan nungin, Zebulun mi Elon in kum sawm sung Israelte a makaih a, 12 a sih takin, Zebulun gama Aijalon ah a kivui hi. 13 Elon nungin, Pirathon khaw mi, Hilel' tapa Abdon in Israelte a makaih hi. 14 Ama'n tapa 40 leh tupa 30 a nei a, amaute sabiltung 70 tung ah a tuang uhi. Abdon in kum giat sung Israelte a makaih hi. 15 Tua nungin, tua Pirathon mi Hilel' tapa Abdon a si a, Amalek tanggam ah, Efraimte gama Pirathon khua ah a kivui hi.
Samson Pianna
1 Israelte'n Tangtawn Toupa' mitmuhin thil gilou a hih kik zel uh a, Tangtawn Toupa'n amaute Filistiate khut sung ah kum 40 sung a pia hi. 2 Zora khua-a teng Dan nama mi khat a om a, a min Manoa ahi. A zi bel a chiing ahi a, ta a nei kei hi. 3 Manoa' zi kiang ah Tangtawn Toupa' vansawltak a kilaak a: Ngai in, nang a chiing ta nei ngeilou na hi, ahihhangin, tu'n na gai ding a, tapa na nei ding. 4 Grepzu himhim, ahih keileh, silngou sawha kibawl dawn thil himhim dawn lou ding leh, a sianglou himhim ne lou dingin kiveng in. 5 Ahang bel, ngai in, gai dek na hi a, tapa nei dek na hi. Na tapa sam met louh ding, sula a omlai apan Pathian adia sehtuam Nazir mi hi ding ahi. Ama'n Filistiate khut sung apan Israelte hutkhiak a pan ding, a chi hi. 6 Tua numei hong pai a, a pasal a hilh a: Pathian' mi khat ka kiang ah hong hawh a, amah Pathian' vansawltak melpu khat ahi a, a zahtakhuai mahmah hi. Koi apana hong pai hiam, chih ka dong kei a, a min zong hon hilh kei hi. 7 Ama'n ka kiang ah: Ngai in, gai dek na hi a, tapa nei dek na hi. Amah sula a omlai apan, a sih dong Pathian adia sehtuam Nazir mi hi ding ahih manin, grepzu himhim, silngou sawh dawn thil himhim na dawn louh ding, a sianglou himhim na nek louh ding, hon chi ahi, a chi hi. 8 Tua khitin, Manoa Tangtawn Toupa kiang ah a thum a: Ka Toupa aw, ka hon ngen ngutngut ahi. Non sawl Pathian' mi hehpihtakin hon sawl kik thak in, ama'n hong piang ding naungek ka khoilet ding dan uh hon sinsak hen, a chi hi. 9 Pathian in Manoa' thumna a ngaikhia a, tua numei loua a tut laiin, Pathian' vansawltak a kiang ah hong hawh kik hi. Ahihhangin, a pasal Manoa bel amah kiang ah a om kei a, 10 kintakin, a pasal hilh dingin a vatai pah a, a kiang ah: Ngai dih, zan hala ka kianga hong kilaakpa ka kiang ah hong kilaak nawn! a vachi hi. 11 Manoa a dingkhia a, a zi a zui a, tua hong kilaakpa kiang ah: Numei kianga thugenpa na hi hia? a chi a, ama'n: Ka hi, a chi hi. 12 Manoa in: Ahih leh, na thugente hong tangtun chiangin, naupang pen bang dan in a nuntakna uk ding ahia? a chi hi. 13 Tangtawn Toupa' vansawltak in Manoa kiang ah: Na zi, amah ka hilhsa teng zui dinga a kiven ding ahi. 14 Grepzu apan bangmah a nek louh ding, grepzu leh silngou sawh dawn thil himhim a dawn louh ding, a sianglou bangmah a nek louh ding, ka thupiak bangbang a zuih ding ahi, a chi hi. 15 Manoa in Tangtawn Toupa' vansawltak kiang ah: Kelnou khat kon gawh nuam a, hehpihtakin hon phal inla, kon khoutang uh aw, a chi hi. 16 Tangtawn Toupa' vansawltak in a dawng a: Hon khou mah le uchin na an ka ne kei ding. Ahihhangin, haltum thllat dinga na bawl nop lebel, Tangtawn Toupa' mai ah bawl lechin, a chi hi. Manoa in bel, amah Tangtawn Toupa' vansawltak ahih lam a thei kei hi. 17 Tua khitin, Manoa in tua Tangtawn Toupa' vansawltak kiang ah: Na thugente hong tangtun chianga kon pahtawi theih nadingin, na min banga le? a chi hi. 18 Tangtawn Toupa' vansawltak in: Banghanga ka min hon dong na hia? Theih theih louh lamdang ahi, a chi hi. 19 Tua khitin, Manoa in kelnou khat a la a, tua tawh an thillat a bawl a, suangpi tung ah Tangtawn Toupa' mai ah a laan hi. Manoa leh a zi in a et laiun, Tangtawn Toupa'n thillamdang khat a hih a, 20 maitama meikuang vanlam ah a lengtou a, tua meikuang lak ah Tangtawn Toupa' vansawltak, vanlam ah a kaltou hi. Hiai a muh takun, Manoa leh a zi lei si-in a kuun uhi. 21 Tua Tangtawn Toupa' vansawltak, Manoa kiang ah hita leh, a zi kiang ah hita leh, a kilaak nawn kei a, Manoa in tua laitak mahin, amah Tangtawn Toupa' vansawltak ahi, chih a thei hi. 22 Tua khitin, Manoa in a zi kiang ah: Pathian mu i hi mawk a, i si mahmah ding! a chi hi. 23 Ahihhangin, a zi in a dawng a: Tangtawn Toupa'n hon thah tum hi leh, i haltum thillat leh an thillatte i khut apan a sang kei ding, ahih kei leh, hiai thilte hon lak kei ding, ahih kei leh, hibang hunin, hibang thilte hon hilh kei ding, a chi hi. 24 Tua numei in ta pasal a nei a, a min dingin Samson a sa hi. Tua pasal naupang hong khanglian a, Tangtawn Toupa'n a vualzawl hi. 25 Tangtawn Toupa' Kha in Zora leh Eshtaol kala, Mahane Dana a om laiin, amah a tokthou panta hi.
Samson' Zineihna
1 Samson bel Timna khua ah a hawhsuk a, tua ah Filistia nungak khat a mu hi. 2 Inn lama hong kilehkik takin, a nu leh a pa kiang ah: Timna khua ah Filistia nungak ka mu a, ka zi dingin hon piisak un, chi-in a ngen hi. 3 A nu leh a pa'n: Na tanaute' tanu hiam, ahih kei leh, ka mi ka sate' tanute laka neih theih om lou ahi maw, Filistia zeksumlouhte laka zi zonga na kuan? a chi uhi. Ahihhangin, Samson in a pa kiang ah: Tua nu mah hon piisak mai un, amah ka deih dan tak ahi, a chi teitei hi. 4 Tangtawn Toupa'n Filistiate tunga phulak nading lem zonga hibang thil om ahih lam a nu leh a pa'n bel a thei kei uhi. A hang bel, tua laia Filistiate nuaia Israelte om uh hiven. 5 Samson leh a nu-le-pa Timna khua ah a hawhsuk uh a, grephuan lak a tun takun, humpinelkai lunlai khat in humhamin amah a naih hi. 6 Samson' tungah Tangtawn Toupa' Kha vangliantakin a hong tung a, ama'n a khutvuakin tua humpinelkai, kelnou balzantakin a balzan hi. Ahihhangin, Samson in a thilhih pen a nu leh a pa a hilh kei hi. 7 Tua khitin, a paisuk a, tua numei a houhpih a, a mit a tung mahmah hi. 8 Hun bangtan hiam nungin, tua nu innlama pii dingin Samson hong kuan kik a, lampi ah tua humpinelkai saluang en dingin a vapial a, tua saluang sung ah khuai a nakai a, a zu zong a om hi. 9 Ama'n tua khuaizu bangzah hiam khutin a khuatkhia a, a pai kawmin a ne hi. A nu leh a pa kiang a tun takin, khuaizu a pia a, amaute'n zong a ne uhi. Ahihhangin, ama'n humpinelkai saluang apan a lak a hih lam amaute a hilh kei hi. 10 Samson' pa tua nungak en dingin a vahawh a, tua hun laia mou pii dingte ngeina bangin, Samson in tua ah ankuang a lui hi. 11 Samson a muh takun, amaute'n a lawm ding 30 a teel uhi. 12 Ama'n a lawmte kiang ah: Tu'n noute thuhaksa khat kon dong aw. Ankuanglui ni sagih sunga na suut theih uleh, puanmalngat silh 30 leh puanak kop 30 kon pe ding. 13 Ahihhangin, tua thuhaksa na sut theih kei uleh bel, puanmalngat silh 30 leh puanak kop 30 kei non pe ding uh, a chi hi. Amaute'n: Na thuhaksa hon gen daw le, ka za nuam uh, a chi uhi. 14 Ama'n: A ne thei apan nek ding om a, a thahat apan a khum om, a chi hi. Ahihhangin, amaute'n ni thum sungin tua thuhaksa a suut thei kei uhi. 15 A ni lini-in, amaute'n Samson' zi kiang ah: Na pasal in a thuhaksa suutna hon hilh nadingin, amah na zawl in. Tua banga na hih kei leh, nang leh na pa' inn meia hal ding ka hi uh. Koute non lok nop man ua hon chial na hi ua hia? a chi uhi. 16 Samson' zi a liangkou-a luaiin a kap a: Kei hon mudah na hi! Hon it taktak lou na hi. Na thuhaksa ka mite kiang ah na gen a, a suutna kei non hilh nuam kei, a chi hi. Ama'n a dawng a: Ka nu ka pa zong ka hilh louhpi, banghanga nang hon hilh ding ka hia? a chi hi. 17 A zi in bel ankuanglui ni sagih sung teng kapin a dong a, a phuutphuut manin, a ni sagih ni-in a hilh khong hi. A zi in a mite kiang ah a hilhsawn hi. 18 Ni sagih ni, ni tum main, tua khawmite hong pai uh a: Khuaizu sanga khumzaw bang ahia? Humpinelkai sanga thahat zaw bang ahia? a chi uhi. Samson in amaute kiang ah: Ka bawngla-a leilet hi kei le uchin, ka thuhaksa na suut theih louh hiai ding uh, a chi hi. 19 Tua khitin, Samson' tung ah vangliantakin Tangtawn Toupa' Kha a hong tung a, amah Ashkelon ah a hawhsuk a, tua khaw mi 30 a that a, a puansilhte uh kop 30 a la a, a thuhaksa suutte kiang ah a pia hi. Tua khitin, heh mahmah-in a pa' inn ah a paita hi. 20 Samson' zi bel a pa'n, a kitenna ua theihpih-a pang Samson' lawmpa kiang ah zi dingin a pia hi.
Filistiate tunga Samson' Phulakna
1 Tua nung lamin, huit buh lak laiin, Samson a zi veh dingin a kuan a, kelnou khat a pua hi. Ka zi' indan sung ah ka lut nuam, a chih leh, a zi pa'n a lutsak nuam kei hi. 2 A zi pa'n: Amah mudah mahmah kon sa a, na lawmpa' zi dinga na pia ka hi ve. A naunu ama' sanga melhoih zaw hilou maw. Amah nei zaw mai in, a chi hi. 3 Samson in amaute kiang ah: Tutung in zaw, Filistiate thuk leng zong kei' mawhna hita ken teh, a chi hi. 4 Tua bangin, a kuan a, sihal 300 a man a, a mei uh nihnihin a pehkhawm a, meisel khat tek a henkhawm hi. 5 Tua meiselte a halkuang a, Filistiate' buh lak ah tua sehalte a khah a, buhpawlte leh buh dinglaite grephuan leh oliv kungte dongin a kang vek hi. 6 Filistiate'n: Hiai kua hih ahia? chi-in a kidong uh a, Timna mipa' makpapa Samson hih a ka, tua Timna mipa'n Samson zi a lawmpa zi dinga a piak man a ka, a kichi uhi. Tua bang ahih manin, Filistiate a kuantou uh a, Samson' zi leh a zi' pa a haltum uhi. 7 Samson in amaute kiang ah: Ka tunga tua bang hih nuam na hih chiangun, ke'n zong na tung ua phuba ka lak mateng ka tawp kei ding, a chi hi. 8 Tua bangin, amaute dawm het louin a suai a, tampi a that a, tua khitin, a paisuk a, Etam suangpi heng ah a om hi. 9 Filistiate a kuantou uh a, Judah gam ah giahpual a sat uh a, Lehi dou dingin gam teng ah a kiphalh uhi. 10 Judah gam mite'n: Banghanga koute dou dinga hong kuan na hi ua? a chi uhi. Amaute'n a dawng uh a: Samson man dinga hong kuan ka hi uh. Ka tung ua a hih bangbang ama' tunga hih ding ka hi uh, a chi uhi. 11 Tua khitin, Judah gam apan mi 3,000, Etama suangpi heng ah a kuansuk uh a, Samson kiang ah: Filistiate'n i tunga hon uk uh a hih lam na thei kei ahia, koute bang hon lawh na hia? a chi uhi. Ama'n a dawng a: Ka tunga a hih bangbang ua, amaute tunga hih ka hi lei ve, a chi hi. 12 Amaute'n: Nang hon hentom a, Filistiate khuta hon pekhe dinga hong kuan ka hi uh, a chi uhi. Samson in: Noumau' khuta hon that zen lou ding na hina uh, chih kichiam phot un, a chi hi. 13 Amaute'n: That lou e. Kon hentom lei ding uh a, amaute khut ah kon pekhe lei ding uh, koute'n zaw kon that het kei ding uh, a chi uhi. Tua bangin khauzen thak nihin amah a hentom uh a, tua suangpi heng apan a kaikhia uhi. 14 Amah Lehi gam hong tun takin, Filistiate'n nakpitaka awngin a na tuak uhi. Tua laitakin, Samson' tung ah vangliantakin Tangtawn Toupa' Kha a hong tung a, a khuta henna khauzente a phutat a, ziza khau kangtat bangin a khutte apan a tolkhia hi. 15 Sabiltung khaguh thak khat a mu a, a la zok a, mi 1,000 a satlum hi. 16 Tua khitin, Samson in: Sabiltung khaguhin a vum tunga vumin chiang venvon ing, Sabiltung khaguhin mi 1,000 satlum ing! a chi hi. 17 Tua banga a genkhitin, sabiltung khaguh a pai a, tua mun min dingin Ramath Lehi a phuak hi. 18 Samson a dangtak mahmah a, Tangtawn Toupa a sam a: Nangmah mah in ka khut tungtawnin hutkhiakna thupi non peta. Ahihhangin, dangtaka si ding ka hita a, zeksum louhte' khut sung tung ding ka hi maw? a chi hi. 19 Pathian in tua Lehi gam ah leikuak a khisak a, tui a hong pawt hi. Ama'n tua tui a dawn a, hong halh a, a tha a tungkikta hi. Ama'n tua mun min dingin En Hakore a phuak a, tuni dongin Lehi gam ah tua mun a om lai hi. 20 Samson in Filistiate' khan laiin, kum 20 sung Israelte a makaih hi.
Samson leh Delalla
1 Ni khat, Samson Gaza khawpi-a a vahawhsuk leh, numei kizuak khat a vamu a, a valuppih hi. 2 Kua hiam khat in, Samson hiai ah a om! chi-in Gazate a hilh hi. Gazate'n tua mun a um uh a, zan khawvakin khawpi kongpi a ching uhi. Zingsang dong i ngak ding a, phalvakin amah i that ding, a kichi uhi. 3 Samson bel zankim dong tua ah a lum a, zankim laiin a thou a, khawpi kongpi kongkhak, a khuam tawh, a kaihna zawl tawh a phawikhia a, a liangkoua puain Hebron khawpi gala mual tung a tuntou hi. 4 Tua nung lamin, Samson in Delaila kichi Sorek Phaizanga numei khat a it hi. 5 Filistia vaihawmte tua nu kiang ah a vahawh uh a: Samson na zawl inla, a thahatna vangletna thuguk na zongkhia inla, amah man zou a, hentoma ka zahlaksak theih nading uh na zong in, ngun dangka shekel 1,100 hon pena n'ung, a chi uhi. 6 Tua khitin, Delaila in Samson kiang ah: Na thahatna vangletna thusim hon hilh in. Mi'n bang chi'n hon hentomin hon zahlaksak thei dia? a chi hi. 7 Samson in: Savun khau thak nom lai sagihin hon hen le uh, mi dang bangin hatnabei ka hi ding, a chi hi. 8 Tua bangin, Filistia makaite'n Delaila kiang ah savun khau thak nomlai sagih a pia uh a, tuatein Samson a hen hi. 9 Amah kiang ah inndan sung ah, pasalte a buksak uhi. Delaila in Samson kiang ah: Samson, Filistiate'n hon man dek uh eih! a chih leh, Samson in khauzang kangtat bang maiin tua savun khau thakte a phutat a, a thahatna vangletna thuguk a theikhe kei uhi. 10 Delaila in Samson kiang ah: Ngai dih, non mawkbawl a, non zekhem a, ka kiang ah zuau na gen. Bangchi-a hentoma om thei ding na hia, hon hilh in, a chi hi. 11 Ama'n: Khauzen thak zat nailouh ngenin hon hen le uh, mi dang bangin thahatnabei ka hi mai ding, a chi hi. 12 Tua bangin, Delaila in khauzen thak ngenin Samson a hen a, inndan sung ah pasalte a buksak a: Samson, Filistiate'n hon man dek uh eih! a chi hi. Ahihhangin, ama'n khauzang bang maiin a baan apan henna khauzente a phutat hi. 13 Delaila in Samson kiang ah: Tu dongin non mawkbawl a, non zekhem a, ka kiang ah zuau na gen. Bangchi-a hentoma om thei ding na hia, hon hilh in, a chi hi. Ama'n a dawng a: Ka samphek sagihte siambu-a khihna khau tawh hekkhawm uhenla, siambu khetphim in kilhchip le uh, a chi hi. 14 Delaila in tua bangin, siambu-a khau tawh Samson' sam hekkhawmin, siambu khetphim in a kilhchip hi. Tua khitin: Samson, Flistiate'n hon man dek uh eih! a chi hi. Samson ihmu hong khanglou a, siambu khetphim tawh, siambu khau tawh a phawikhekhawm vek hi. 15 Tua khitin, Delaila in Samson kiang ah: Na lungtang in lah hon muang loupi bangchi dana: Kon it, chichi thei na hia? Thumvei mahmah non mawkbawl a, na thahatna vangletna thuguk non hilh kei, a chi hi. 16 Si ding hiaia a chimtakluat masiah, nisimin tua bangin a phuphu mai hi. 17 Tua khitin, Samson in a lungsima om teng a hilh vek a: Ka pian chil apan Pathian adinga sehtuam Nazir mi ka hi a, ka sam met ngeilouh ahi. Ka sam kimet leh, ka thahatna bei ding a, midang banga hatnabei hi mai ding ka hi, a chi hi. 18 Samson in bangkim a hilhta, chih Delaila in a theih takin, Filistia vaihawmte a samsak a, amaute kiang ah: Samson in a lungsima om teng hon hilh vekta. Khatvei hong pai lai un, a chi a, Filistia vaihawmte sum tawiin hong kuan uhi. 19 Delaila in a khuk tung ah Samson a ihmusak a, mi khat samin, Samson luzanga samphek sagihte a metkhiaksak hi. Tua bangin, Delaila in Samson a nuaisiahin a gimsak panta a, Samson lah a thahatna in a nuseta hi. 20 Tua khitin, Delaila in: Samson, Filistiate'n hon man dek uh eih! a chi hi. Samson ihmu hong khanglou a: Nidanga bangin ka taikhe dia, ka kitungkhe nawn mai ding, chi-in a kingaihtuah hi. Tangtawn Toupa'n amah a nusekhinta, chih himhim a phawk kei hi. 21 Tua bangin, Filistiate'n Samson a man uh a, a mittangte a khelkhia uh a, Gaza khawpi ah a kai uh a, sumsan sikkol a bunsak uh a, suangkul sunga buh hekin a pangta mai hi. 22 Ahihhan gin, a sam a metsak uh hong saukikta hi.
Samson Sihna
23 Filistia vaihawmte, a pathian uh Dagon' maia kithoihna thupitak laan ding leh nopbawl dingin a kikaikhawm uh a: I Pathian in eite khut sung ah i melmapa Samson hon peta hiven, a kichi uhi. 24 Mipite'n Samson a muh takun, a pathian uh a phat uh a: I Pathian in i melmapa i khut sung ah hon peta, i gam hihsepa i galhat site pungsakpa, a chi uhi. 25 Tua banga amaute lunglawpa a om laiun: Mipite' etnop dingin, Samson hon kaikhia un, a chi uhi. Tua bangin, suangkul apan Samson a kaikhia uh a, amaute' mai ah etnop bawlna'n a pang hi. Amaute'n khuampite kal ah amah a dingsak uhi. 26 Samson in ama' khut len tangvalpa kiang ah: Hiai biakinn dou khuampite-a kingai dingin, khuampite ka khoih phak nading mun ah hon pii in, a chi hi. 27 Tua inn ah numei leh pasal leh Filistia vaihawmte a dim uh a, inn tung ah numei leh pasal 3,000 a om uh a, Samson etnop bawla om a en uhi. 28 Tua laitakin, Tangtawn Toupa kiang ah Samson a thuum a: Toupa Tangtawn Pathian aw, kei hon theigige in. Tutung kia ka thahatna hon pekik inla, ka mitte' phuba lak ding khatvei hon phal teitei in, a chi hi. 29 Tua khitin, Samson tua inn dou khuampi laitate kal ah a ding a, a taklam leh veilama tua khuampite a kawi a: 30 Filistiate hon sihchilhsak in, a chi a, a thahatna khempeuhin tua khuampite a sawn a, vaihawmte leh tua mipi omte khempeuh tung ah inn a chimsuk hi. A dam sunga a thah sangin, a sihna-a a thah a tamzaw hi. 31 Tua khitin, a sanggamte leh a pa' innkawte khempeuh hong kuansuk uh a, a luang hong la uhi. Amah a pua uh a, Zora leh Eshtaol kala a pa Manoa' hankhuk ah a vui uhi. Ama'n kum 20 sung Israelte a makaih hi.
Mika' Milimpathiante
1 Tua hun laiin, Efraim tanggam ah Mika kichi mi khat a om hi. 2 Ama'n a nu kiang ah: Na ngunsik tang shekel 1,100 kilamang a, tua sum tunga hamsia na koih thu ka bilin a za a, ngai dih, tua ngunsik tangte ka khuta om ahi, kei laak ahi, a chi hi. A nu'n: Ka tapa, Tangtawn Toupa'n hon vualzawl hen, a chi hi. 3 Ama'n tua ngunsik tang shekel 1,100 a nu khut ah a pekik a, a nu'n: Ka tapa in milim khuak thawh leh sun thawh a bawl nadinga, Tangtawn Toupa kianga ka ngunsik ka latsa ahi. Tua ngunsik tangte kon pekik ding, a chi hi. 4 Mika in tua ngunsik tangte a nu kiang ah a pekik a, a nu'n ngunsik tang shekel 200 a la a, ngun siksek khat kiang ah a pia a, tua siksekpa'n milim khuak thawh leh sun thawhte a bawl a, tuate Mika' inn sung ah a om hi. 5 Hiai Mika in milim pathian biakinnneu khat a nei a, siampi puanakzem leh innsung milim pathiante a bawl a, a tapate khat a siampi dingin a bawl hi. 6 Tua hun laiin, Israel in kumpi a nei kei a, michih ama' hoihsak bangin a gamta tek uhi. 7 Judah gama Bethlehem khawpi apan Levi tangval khat a om a, amah Judah innkawte laka teeng ahi. 8 Amah teen nading mun dang zong dingin, Judah gama Bethlehem nusiain a pemkhia a, a pemna lam ah Efraim tanggama Mika' inn hong tung hi. 9 Mika in amah kiang ah: Koia hong kipan na hia? a chi hi. Ama'n: Judah gama Bethlehema teeng Levi mi khat ka hi a, teen nading mun zong ka hi, a chi hi. 10 Mika in amah kiang ah: Ka kiang ah teeng inla, ka pa ding leh ka siampi dingin pang in, kum khat in ngun tang shekel sawmkhat tawh, puansilhte leh na taksap teng hon pia ning, a chi hi. 11 Tua Levi mi in ama' kianga teen ding a lungkim a, Mika tate khat bangin a om hi. 12 Mika in tua Levi tangval siampi-in a bawl a, a inn ah a teeng hi. 13 Mika in: Hiai Levi mi ka siampi-a pang a hih chiangin, Tangtawn Toupa'n ka tung ah thilhoih a hih ngei ding, chih tu'n ka thei, a chi hi.
Laish-a Dante Teeng
1 Tua hun laiin, Israelte'n kumpi a nei kei uhi. Dante'n zong tua hun dong, Israel namte lak ah goutan a nei nai kei uh a, amaute'n teen nading mun a zong uhi. 2 Tua bangin, Dante'n Zora leh Eshtaol apan galhat mi nga, gam enkhe dingin a sawl uhi. Hiaite Dan nama behte khempeuh taanga kuan ahi uh a, Dante'n amaute kiang ah: Kuan unla, gam vavel un, a chi uhi. Tua enkhete Efraim tanggam a lut uh a, Mika' inn ah hong kinga uh a, zan khat a giak uhi. 3 Mika' inn hong tun dek kuanun, tua Levi mi' aw a za uh a, a meltheih uhi. Tua inna valutin: Nang kua'n hiaia hon tun ahia? Hiaia bang hih na hia? Banghanga hiaia om na hia? a chi uhi. 4 Ama'n ama' tunga Mika' thilhih teng amaute a hilh a: Ama'n hon guai a, a siampi-a pang ka hi, aka a chi hi. 5 Tua khitin, amaute'n: Ka zinna uh ka lawhching nading uhia, ka thei nuam uh a, hehpihtakin, Pathian hon dotsak ve, a chi uhi. 6 Tua Levi siampi in a dawng a: Khamuangtakin pai un. Tangtawn Toupa'n na zin dekna uh pha hon sakpih hina, a chi hi. 7 Tua mi ngate Laish khawpi a tun mateng uh a pai uh a, tua khaw mite galmuangtakin a om uh, Sidonte bangin galmuang leh bitin a om hithiat uh, chih a mu uhi. Amaute nuaisiah a, amaute tunga vaihawm ding a om kei a, Sidonte tawh lah a kigamla uh a, kuamah dang tawh zong a kikawm kei uhi. 8 Amaute Zora leh Eshtaol-a a sanggamte uh kiang a tunkik takun, a sanggamte un: Bang na vamu ua? a chi uhi. 9 Amaute'n: Kisa ni-in amaute dou ni. A gam uh ka mu uh a, a hoih mahmah hi. Banghanga om maimai ding? Tua gama valuta valuah ding saik kei un. 10 Tua gam na tun chiangun, gallau lou hiaia muangtaka omte na vamu ding uh a, taksap omlouhna gam lianpi Pathian in na khut sung ua hon piak ahi, a chi uhi. 11 Zora leh Eshtaol apanin, Dan behte 600, kidou dinga kigalvansa, a kuankhia uhi. 12 Lampi ah Judah gama Kiriath Jearim ah giahphual a sat uhi. Hiai hang ahi tuni donga Kiriath Jearim tumlama mun khat Mahane Dan' a kichih. 13 Tua apanin Efraim tanggam ah a pai uh a, Mika' inn hong tung uhi. 14 Tua khitin, Laish gam vaenkhete'n a sanggamte uh kiang ah: Hiai mite khuta siampi puanakzem leh innsung milim pathiante, khuakthawh milimte leh sunthawh milim a om lam na thei uhia? Tu'n bang lawh ding hiam na thei uhi, a chi uhi. 15 Tua ah a kihei uh a, Levi mi omna Mika' inn ah a vapai uh a, amah chibai a buk uhi. 16 Kidou dinga kigalvansa Dan mi 600-te kongpi lutna ah a pang uhi. 17 Amaute tua siampi tawh kongpi-a kihoua a om kalun, tua gam enkhemi ngate inn sung ah a lut uh a, khuakthawh milim leh siampi puanakzem leh innsung milim pathiante leh sunthawh milim a la uhi. 18 Amaute'n Mika' inn sunga lut a, suihthawh milim pathian leh siampi puanakzem leh inn sung milim pathiante leh sunthawh milim pathian a lak takun, tua siampi in: Bang hih na mai ua! a chi hi. 19 Amaute'n amah kiang ah: Dai mai inla, kamsin in! Pau louin hon zui inla, koute' pa leh siampi-in hong pang in. Israelte laka nam khat leh beh khat adinga siampi-a pan, innkuan khat kia' siampi-a pan sanga hoihzaw hilou maw? a chi uhi. 20 Tua siampi a kipak a, siampi puanakzem leh innsung milim pathiante leh khuakthawh milim a la a, amaute a zui a, amaute laizang ah a pai hi. 21 Amaute a paikhia uh a, a taneute uh, a ganhonte uleh a neih a lamte uh a masasak uhi. 22 Amaute Mika' inn apan gamla kuam a tun takun, Mika' inn kianga teengte a kisamkhawm uh a, kigalvanin a delh uh a, Dante a delhpha uhi. 23 Dante a galsap uh a, Dante hong kiheiin a na maituah uh a, Mika kiang ah: Koute dou dinga na kigalvan bangchi na hia? a chi uhi. 24 Mika in: Ka pathian bawlsate leh ka siampi na la uh a, na paimangpih ve ua le. Ke'n bang dang ka neia ahia? Bangchi na hia? non chih himhim uh, a chi hi. 25 Dante'n a dawng uh a: Hon kiselpih se dah un, mi lungtom deuhte'n hon sualin nang leh na innkawte hon that kha unte, a chi uhi. 26 Dante a pai zel uh a, Mika in lah amaute ama' dou vual ahi kei uh, chih a thei a, a inn ah a kilehkikta hi. 27 Tua bangin, Dante'n Mika' bawlsa milimte leh a siampi a laksak uh a, Laish-a kigalging loua muangtaka omte namsauin a dou uh a, a khawpi uh a haltum uhi. 28 Laish bel Beth Rehob kiang phaizanga om, Sidonte apan gamlapi-a om ahih manin leh amaute humbit ding om lou, midang kuamah tawh zong kizopna nei lou ahih manun, Dante'n tua khawpi a lamthak uh a, a luahta uh a, 29 tua khawpi min dingin a pu uh tamin Dan a sa uhi. Tua khawpi min masa bel Laish ahi. 30 Tua ah Dante'n khuakthawh milim pathiante a kitunkhiak uh a, sala kaihmang ahih dong uh, Mosi' tapa Gershon' tapa Jonathan leh a tate, Dante adingin siampitein a pang uhi. 31 Shilo-a Pathian' inn a om sung teng Mika' bawlsa milim pathian a zang lailai uhi.
Levi Mi Khat leh a Mei
1 Tua hun laiin, Israeite'n kumpi a nei kei uhi. Efraim tanggam singtang kawm ah Levi mi khat a om a, Judah gama Bethlehem mi khat meiin a nei hi. 2 Tua a mei bel numei paktatpi khat ahi a, a pasal adingin a muanhuai kei a, a pasal nusiain kha li sung bang a nawlam ah, Bethlehem ah a om zel hi. 3 A pasal a kisa a, a nungdelh a, kamsiamtaka vapiikik dingin a kuan a, a silapa tawh sabiltung nih tawh a tonpih hi. A mei in a pa inn ah a na piilut a, tua numei pa'n tua a pasal a namuh takin, kipaktakin a nadawn hi. 4 Tua Levi' sungpa, tua numeinu' pa'n amah a na khou a, ni thum a taam a, nea dawnin tua ah a giak hi. 5 A ni li ni-in hichi ahi a, zingsang beltakin, amaute a thou uh a, malam sawn dingin a kisa hi. Tua numei' pa'n a makpapa kiang ah: Tanghou nein kihihhalh phot unla, tua khit chiangin pai un, a chi hi. 6 Amau gel zong nea dawnin a tu uhi. Tua khitin, tua numei pa'n: Tuzan taam lai mahmah unla, nuamtakin tawldam phot un, a chi hi. 7 Pai dinga a kisak leh a sungpa'n a khou a, tua zan a tam zel hi. 8 A ni ngani zingsang beltaka pai dingin a kisa a, tua numei pa'n: An ne zek beek unla, sunnung ngak un, a chi a, anihun an a ne uhi. 9 Tua khitin, a mei tawh a silapa tawh a kipankhe dek uh a, a sungpa'n: En dih ua, nitaklam a hita. Tuzan giak phot un. Khua mial hita, tuzan giak unla, tawldam phot un, zingsang beltakin pai na nute, a chi hi. 10 Ahihhangin, amah a taam nuam nawn kei a, kisain a kipankheta hi. Jebus gala phaizang a tung hi. Jebus bel Jerusalem ahi. A sabiltung nihte, tuanphah phahsain a om uh a, a meinu zong a kiang ah a om hi. 11 Jebus khua a tun dekun, ni a tum dektak hi. Silapa'n a pu kiang ah: Jebuste kiang ah khawlin tuzan giak mai ni, a chi hi. 12 Ahihhangin, a pu'n a dawng a: Israelte omlouhna, melmak khua-a giak dingin khawl kei ni. Gibea khua dong pai teitei ni, a chi hi. 13 Tua khitin, a silapa kiang ah: Gibea khua hiam Rama khua hiam delh ni, a koi zawsam hiam ah giak ni, a chi hi. 14 A pai nawn uh a, Benjamin gama Gibea khua a tung uh a, tua hunin ni a tumta hi. 15 Tua-a giak dingin Gibea khaw sung a lut uhi. A lut takun, khawlai sumsinna mun ah a tu uh a, kuama'n a inn-a giak dingin a samlut kei uhi. 16 Tua laitakin, putek khat loukuan, nitak lamin lou apan hong pai a, amah bel Efraim tanggam mi, Gibea khua-a teeng ahi. Tua khaw mite bel Benjamin nam ahi uhi. 17 Amah a khawdah leh, khawlai sumsinna muna tu khualzinpa a mu a: Koia pai dek na hi ua? Koia hong kipan na hi ua? a chi hi. 18 Tua Levi mi in: Judah gama Bethlehem khua apan Efraim tanggam gamlapi-a pai dekin hon tawn ka hi uh. Kei zaw Efraim tanggam mi ka hi. Judah gama Bethlehem khua-a hawh, tu-a Tangtawn Toupa' inn zuana pai ka hi. Ahihhangin, kuama'n hon zintun kei. 19 Buhpawl leh sabiltung ading gan-an ka nei a, tanghou leh grepzu zong kei ading, na silanu ading, na silapa tangval ading kiching ka nei. Bangmah taksap ka nei kei uh, a chi hi. 20 Tua putek in: Khamuangtakin om inla, ka inn ah hong kinga in. Na taksap teng kei tung ah nga inla, konglak ah zaw giak mahmah ken, a chi hi. 21 Tua bangin a inn ah a piiluut a, a sabiltung an a pia hi. Khe khawng a sil khitun, nein a dawn uhi. 22 Tua banga nuamsa-a a om laiun, khawpi mi namanlou pawlkhat in tua inn a vaum uh a, kongkhak vatumin, inn neipa putek kiang ah: Na inna hong lutpa ka ih dingun hon pekhia in, a chi uhi. 23 Inn neipa a vapusuak a, amaute kiang ah: Hilou e, sanggamte, hibanga gilouin gamta kei un. Hiai mipa ka zinpa, ka inna hong tung ahi a, tua bang thil zahlakhuai a tung ah hih kei un. 24 En un, ka tanu nungak siangthou a om a, ka zinpa' meinu zong a om. Amaute kon piak ding hon phal unla, amaute zahlaksakin na utut uh lawh un. Hiai mipa zaw zahlakhuai takin bawl kei uh, a chi hi. 25 Ahihhangin, tua mite'n a thugen a ngaihkhiak nop louh takun, mikhualpa'n a meinu a kaikhia a, tua mite kiang ah a pia hi. Amah zankhawvaka luppihin a pawngsual uh a, zing khawvakin a khah uhi. 26 Zing khua hong vak takin, tua nu, a pasal omna inn hong tung a, kongkhak ah a puk a, ni suah dong a lum hi. 27 Tua nu' pasal zingsangin a thou a, kong a hong a, pai dingin a pusuak dek hi. Tua ah a meinu, a khutte innsung lam nga-a kongkhak bula lum a mu hi. 28 Ama'n a meinu kiang ah: Thou in, paita ni! a chi hi. Ahihhangin, a meinu'n a dawng kei hi. Ama'n a sabiltung tung ah a meinu a koihtou a, inn lam zuanin a paipihta hi. 29 Inn a tun takin, temta a la a, a meinu a la a, seh sawmlenih suahin a phei a liangin a sem a, Israel gam teng ah a khak vek hi. 30 A mu peuhmah in: Aigupta gam apan Israel suante hong pemkhiak uapan tuni dong, hibang mahmah kimu ngei kei, hih zong kihih ngei kei! Ngaihtuah unla, kikum unla, gen un, bang lawh ding! a chi uhi.
Israelte'n Benjaminte Dou
1 Tua khitin, Israelte khempeuh Dan apan Beersheba dong leh Gilead apan Mizpa ah Tangtawn Toupa' mai ah mi khat bang maiin, tua sapkhawmte hong paikhawm uhi. 2 Makaite leh Israel namte khempeuh Pathian' mi kikhawmte lak ah hong pai uh a, hong kilaak uh a, khe sepaih namsau tawi 400,000 a pha hi. 3 Benjamin suante'n, Israel tate Mizpa ah a kikhawm uh, chih a naza uhi. Israelte'n: Gamtat gilou mulkimhuai bangchi banga hong om ahia, hon hilh un, a chi uhi. 4 Numei a thah uh' pasal, tua Levi mi in a dawng a: Ka meinu leh kei, Benjamin gam, Gibea khua ah zan giak dingin ka lut uhi. 5 Zanin Gibea mite kei dou dingin hong kuan uh a, kei hon thah sawmin inn hong um uh a, ka meinu pawngsualin a luppih uh a, a si hi. 6 Ke'n ka meinu ka la a, ka semzak a, tuate Israel luah gam khempeuh ah ka khak hi. Ahang bel, Israel gam sunga hibang thil kilawm lou leh zahlakhuai a hih man uh ahi. 7 Nou Israelte'n tu'n na thukhenna uh gen un, a chi hi. 8 Israel suan mipite mi khat bang maiin, a kisa uh a: Eite kuamah inna kik lou ding, khat lei zong a inna chiah kik lou ding. 9 Gibea tunga i hih ding hiai ahi: Ai i san ding a, aisan bangbangin tua khua i sim ding. 10 Israel nam chih lak apan 100 laka sawmkhat, 1,000 laka 100 zel, 10,000 laka 1,000 zel, sepaihhonte nek ding i kaikhawmsak ding. Sepaihhonte Benjamin gama Ginbea hong tun chiangun, Israel gam sunga gitlouhna a hih bangbang uh amaute tung ah i hih ding uh, a chi uhi. 11 Tua bangin, Israelte khempeuh, mi khat banga pheikhai kilualtakin Gibea sim dingin hong kuan uhi. 12 Tua khitin, Israel namte'n Benjamin namte teenna gam teng ah mi a sawl uh a, amaute'n: Na lak ua thil gilou kihih bangchi dan ahia? 13 Gibea-a tua bang mi namanloute tu'n hon pekhe zok un. Amaute ka that ding uh a, Israel gama gitlouhna ka halsiang ding uh, a chi uhi. Ahihhangin, Benjaminte'n a sanggam uh Israel suante' thugen a ngaikhe nuam kei uhi. 14 Tua baan ah, Israelte dou dingin, a khawpite uapan Gibea ah hong kuan uh a, 15 Benjaminte a khawpite uapan namsau tawi 26,000 a kingah uhi. Tuate baan ah, Gibea khua in sepaih teltuam 700 a kaikhawm hi. 16 Hiai sepaihhonte lak ah sepaih teltuam veilong ngen 700 a om uh a, amaute'n suanglot in samzang nangawn a khial kei uhi. 17 Israelte'n Benjaminte tellouin, namsau tawi galhat ngen 400,000 a kaikhawm uhi. 18 Israel suan mipite Bethel ah a hawh uh a, Pathian kiang ah: Benjaminte dou dinga kuan masa ding kua ka hi ding ua? chi-in a dong uhi. Tangtawn Toupa'n: Judah nam kuan masa uhen, a chi hi. 19 A zing chiangin, Israelte a kisa uh a, Gibea gal ah giahphual a sat uhi. 20 Tua bangin, Israelte Benjamin nam dou dingin a kuantou uh a, Gibea ah amaute dou dingin panmun a khawh uhi. 21 Benjaminte, Gibea apan hong kuankhia uh a, tua ni-in kidouna phual ah Israelte 22,000 a vatpai uhi. 22 Ahihhangin, Israelte a kihanthawn uh a, tua mun mah ah a zanni-a bangin panmun a khawh uhi. 23 Tua bangin Israelte a kuantou uh a, Tangtawn Toupa' mai ah nitaklam dong a kap uh a: Ka sanggam uh Benjamin nam dou dingin ka kuan kik ding uhiam? a chi uhi. Tangtawn Toupa'n a dawng a: Amaute dou dingin kuan un, a chi hi. 24 A ni nih ni-in Israelte'n Benjaminte dou dingin, a naih kik uhi. 25 Tutungin zong Israelte dou dinga Benjaminte Gibea apanin hong kuankhia uh a, Israelte namsau tawi ngen 18,000 a vatpai nawn uhi. 26 Israelte a vekpi mahmah-un Bethel ah a hawhtou kik uh a, Tangtawn Toupa' maia tuin a kap uh a, nitak lam dongin an a ngawl uhi. Tua ah Tangtawn Toupa' mai ah haltum kithoihnate leh lemna thillatte a lan uhi. 27 Israelte'n Tangtawn Toupa' dawnna a ngak uhi. Tua hun laia, Pathian' thukhun singkuang bel Bethel khua-a om a, 28 Aron' tapa Eleazer tapa Fineha in thukhun singkuang maia siampi nna sem hiven, Israelte'n: Ka sanggam uh Benjamin nam dou nawn dinga kuan kik ding ka hi uhiam, ahih kei leh tawp ding? a chi uhi. Tangtawn Toupa'n a dawng a: Zing chiangin Benjaminte na khut sung ua hon pe ding ka hih manin, amaute dou dingin kuan kik un, a chi hi. 29 Tua khitin, Israelte'n Gibea kimkot ah galbuk pawl a kibawl uhi. 30 A ni thum ni-in, Benjaminte dou dingin a kuantou uh a, a hih ngeina uh bangin, panmun a khawh uhi. 31 Benjaminte amaute dou dinga hong kuankhiak takun, Israelte'n khua apan amaute a zawlkhia uhi. Benjaminte'n ni danga bangin, Israelte a dou uh a, a that pan nawnta uh a, kidouna phual ah leh lampi dung khawng ah mi 30 khawng a that uhi. Tua lampi khat bel Bethel khua zotna ahi a, a dang khat bel Gibea khua zotna ahi. 32 Benjaminte'n: Kidou masak banga amaute zougawp hita hang eih! a kichi uhi. Ahihhangin, Israelte'n: Khawpi apan lampi dung tenga amaute i zawlkhiak theih nadingin, tai phot ni, a kichi uhi. 33 Israelte a panmunte uapan hong dingkhia uh a, Baal Tamar khua ah panmun a khawh uh a, galbuk pawlte, Gibea phaizanga a panmun uapan hong dingkhiain hong kuan uhi. 34 Israelte laka sepaih teltuam 10,000 in Gibea mazawn ah tangtakin a dou uh a, kidouna a huaise mahmah mai hi. Benjaminte'n a vuallelhgawpna ding uh a nai dan a phawk kei uhi. 35 Tangtawn Toupa'n Israelte' mai ah Benjaminte a zou a, tua ni-in Israelte'n Benjaminte, namsau tawi ngen 25,100 a that uhi. 36 Tua khitin, Benjaminte'n vuallel uh ahi, chih a kiphawk uhi. Israelte bel Gibea kianga galbuka a koihte uh muangin, Benjaminte' maia tai ahi uh a, 37 galbuk pawl in thakhatin Gibea lam delhin a lut uh a, khawpi sung khempeuh namsauin a vatmai uhi. 38 Israelte'n galbuka tangpang pawlte tawh kigal-houpih nading, khawpi apan meikhu kitungsak ding, chi-in a kithukimsa uh ahi a, 39 tua a muh chiang ua, Israel tai dalhte kilehheia galdou ding, a chih uh ahi. Benjaminte'n Israelte a dou pan nawn uh a, 30 khawng a thatta uh a: Kidou masak banga amaute zawh hi nawn taktakta uh eih! a kichi uhi. 40 Tua banga khawpi apan meikhu a kituntouh takin, Benjaminte a kihei uh a, khawpi apan meikhu vanlama kitungtou a mu uhi. 41 Tua laitakin, Israelte'n amaute a dou uhi, Benjaminte n a vuallelh uh hong tungta, chih a phawk takun lauin a linggawp uh a, 42 Israelte' mai ah gamdai-gamkeu lam ah a taikek uh a, ahihhangin, kidouna in amaute a lap hi. 43 Amaute'n Benjaminte a umchip uh a, a delh uh a, Gibea suahlam pang ah a delhpha uh a, 44 Benjaminte galhat ngenta 18,000 a vatmai uhi. 45 Kiheia gamdai-gamkeu lama Rimon suangpi dong a taina uah, lampi dung teng ah Israelte'n mi 5,000 a that uhi. Benjaminte Gidom dong a delh uh a, 2,000 dang a that lai uhi. 46 Tua ni-in, Benjaminte namsau tawi, galhat ngenta 25,000 a si uhi. 47 Ahihhangin, mi 800, gamdai-gamkeu lam ah Rimon suangpi dong a tai uh a, tua ah kha li sung a om uhi. 48 Israelte a kilehkik uh a, Benjamin naupangte namsau in a that uh a, khawpi teng ah mihing leh gantate leh a muh peuhpeuh uh namsauin a that vek uhi. Khawpi a totkhak peuhmah uh a haltum lai uhi.
Benjaminte Zigotna
1 Israelte'n Mizpa ah kichiamna a bawl uh a: Eite kuamah in Benjaminte' zi dinga a tanu a piak louh ding, a kichi uhi. 2 Amaute Bethel ah a hawh uh a, nitaklam dongin Pathian' mai ah a tu uh a, nakpitaka khasiain a kap uh a: 3 Tangtawn Toupa, Israel Pathian aw, banghanga Israelte tunga hibang teng hong tung a, tuni-a Israelte laka nam khat kimlou hita mai ahia? a chi uhi. 4 A zing chiangin, amaute beltakin a thou uh a, maitam dawhin, haltum thillat leh lemna thillatte a lan uhi. 5 Tua khitin, Israel suan mipite'n: Tangtawn Toupa' maia kikhawmte laka Israelte kua ahia hong kihel lou? a chi uhi. Ahang bel, Mizpa-a hong hawh loulou, chi-in kichiamna thupitak a bawl uh a: Tua bang mi thah ngeingei ding, a nachita ua ahi. 6 Israelte laka a sanggam uh Benjaminte adingin Israelte dahin a kisik uh a: Tuni-in Israelte lak apan nam khat satkhiak ahita. 7 A dama khawsuak sunte bangchi-a zi guan ding i hia, kuama'n a tanu amaute' zi dinga piak louh ding, chi-a kichiamkhinta hanga! a kichi uhi. 8 Tua khitin, Mizpa ah, Tangtawn Toupa' maia Israel suante koi pen hong hawh lou ahia? a kichi uhi. Kikhopna-a pang dingin Jabesh Gilead apanin kuamah, giahphual ah hong hawh kei, chih a theikhia uhi. 9 Ahang bel, a kisim takun, Jabesh Gilead apan kuamah hong hawh kei, chih a mu ua ahi. 10 Tua khitin, kisamkhawmte'n galhat ngenta 20,000 Jabesh Gilead khua ah a sawl uh a: Kuan unla, Jabesh Gileada teengte namsauin vathat un, numei leh naupang nangawn. 11 Na hih ding uh hiai ahi: Pasal khempeuh leh nungak siangthou hi nawnlou peuhmah that vek un, chi-in thu a pia uhi. 12 Jabesh Gileada teengte lak ah nungak nou 400, pasal tawh lumkhawm ngei nailou, a mu uh a, tuate Kanan gama Shilo khawpi-a giahphual ah a tonpih uhi. 13 Tua kisamkhawmte'n Rimon suangpi-a Benjamin pasal omte kiang ah thu a khak uh a, kilemna bawl dingin a chial uhi. 14 Tua hunin Benjaminte hong kikta uh a, amaute zi dingin Jabesh Gileada a hinghawi uh nungakte a pia uhi. Ahihhangin, tua nungakte amaute adingin a kiching kei hi. 15 Tangtawn Toupa'n Israel namte kala kimlouhna awng a omsak manin, Israel suan mipite'n Benjaminte adinga dahin a kisik mahmah uhi. 16 Tua kisamkhawmte laka upate'n: Benjamin' numeite khempeuh thatkhin hang a, pasal damsunte bangchi-a zi guan ding i hia? 17 Israel laka nam khat suanmanga a om louh nadingin, Benjaminte'n gouluah ding suante a neih uh kul ahi. 18 Ahihhangin, Israelte'n kichiamna bawl a, Bejaminte zi guan peuhmah hamsiatin om hen, chikhin a, i tanute lah a zi ding ua pe thei lou hita hanga! 19 Ahihhangin, ngai dih ua, tu-a kipan hun sawt loua, Shilo khua-a Tangtawn Toupa' maia ankuang luina om ding hi a, a kichi uhi. Shilo bel, Bethel mallam, Lebona khawpi simlam, Bethel leh Shekhem kala lampi suahlam panga om ahi. 20 Tua bang ahih manin, Israelte'n Benjaminte kiang ah: Kuan unla, grephuan ah na kibu un. 21 Na en gige unla, Shilo nungakte laam dinga hong kuan ding uh ahi. Tua banga hong pai chiangun michih in na zi ding uh na kimat chiat unla, Benjamin gam ah paipih un. 22 A pate uhiam, a sanggamte uhiam in koute kianga lungkim-louhna thu hong tut uleh koute'n: Koute hangin amaute tung ah zahngai un. Kidou sungin lah amaute zi ka guan thei kei ua, noute'n lah na tanute uh na piak thawh uh hilou a, kichiamna-a mawhtang lou ding hi uteh, ka chi ding uh, a chi uhi. 23 Tua bangin, Benjaminte'n a hih uh a, amaute adinga kiching nungakte tua a laamte lak apan khat chiat manin, a zi dingun a taipih uhi. Tua khitin, a gouluah gam uah a kilehkik uh a, khawpite lam thakin, a luah uhi. 24 Tua hunin, Israelte tua mun nusiain, amau' behte leh innkawte tek kiang ah, amau gouluah gama a inn uah a paita uhi. 25 Tua hun laiin, Israel gam ah kumpi a om kei a, michih ama' hoihsak bangin a gamta hi.
Elimelekh-te Innkuan
1 Vaihawmte'n vai a hawm laiun, tua gam ah kial a kia a, Judah gama Bethlehem apan pasal khat, a zi tawh, a tapa nihte tawh Moab gama vateeng tadih dingin a kuan uhi. 2 Tua mipa' min Elimelekh ahi a, a zi' min Naomi ahi a, a tapa nihte' min Malon leh Khilion ahi. Judah gama Bethlehem khua-a teng Efratha beh ahi uhi. Amaute Moab gam ah a lut uh a, a teeng uhi. 3 Naomi' pasal Elimelekh hong sita a, Naomi bel a tapa nihte tawh nutsiatin a om hi. 4 Tua tapa nihte'n Moab numeite zi-in a nei uh a, khat min Orpa ahi a, a khat pen min bel Ruth ahi. Tua gama kum sawm a ten nungun, 5 Malon leh Khilion zong hong si tuak uh a, Naomi bel a tapa nihte leh a pasal' sihsan ahita hi. 6 Naomi in Moab gama a om laiin, Tangtawn Toupa'n a mite a veh a, amaute an a pia, chih thu a za a, a mou nihte tawh tua gam apan inn lam zuan kik dingin a kisa uhi. 7 A mou nihte tawh a teenna uapan a kipankhia uh a, Judah gam zuanin a pai uhi. 8 Naomi in a mou nihte kiang ah: Paita unla, na nute uh inn ah kik tuak mai un. Na misite uleh keima tunga siamna na suah bangun, Tangtawn Toupa'n na tung uah siam hon suah hen. 9 Tangtawn Toupa'n na nih-un, pasal dangte inn ah tawldamna hon musakta hen, a chi hi. Tuachi-in, ama'n amaute a tawp a, amaute nakpitakin a kapkhia uhi. 10 Amaute'n amah kiang ah: Hilou e, na mite kiang ah kon zui kik ding uh, a chi uhi. 11 Ahihhangin, Naomi in: Ka tanute aw, na inn uah kik un. Banghanga kei hon zui ding na hi ua? Na pasal dingun ke'n tapate ka paai lai dia hia? 12 Ka tanute aw, na inn uah kik un, pasal dang nei dingin ka tekta hi. Kei adingin lamet om lai, chi dek lengla, tuzan mahmahin pasal nei lengla, tapate nei tazen leng zong, 13 a pichin uh na ngak nuam ding ua hia? Amaute ngakin pasal beiin na om nuam ding ua hia? Hilou e, ka tanute aw. Noute sangin ke'n ka thuak zaw. Tangtawn Toupa'n ka tunga a khut kha ahi, a chi hi. 14 Hiai thu a zak takun, amaute a kap nawn uhi. Tua khitin, Orpa in a nu mangpha khakin a tawp a, Ruth in bel a nu a len tinten hi. 15 Naomi in: En in, na sanggamnu a mite kiang ah leh a pathiante kiang ah a chiahkikta. Nang zong amah zuiin kik in, a chi hi. 16 Ahihhangin, Ruth in a dawng a: Nang nuse ding hiam, nang apan chiahkik ding hiamin hon kunkun ken. Na paina-na ah ka pai ding a, na giahna na ah ka giak ding. Na mite ka mite ahi ding a, na Pathian ka Pathian ahi ding. 17 Na sihna na ah ka si ding a, tua ah ka kivui ding. Sihna loungal thil dang in nang leh kei hon khen leh, Tangtawn Toupa'n a lawh lawh hon lawh hen, a nase pen zong hon lawh hen, a chi hi. 18 Ruth in amah zuih a sawm tinten chih Naomi in a theih takin, chiahkik dingin amah a kun nawn kei hi. 19 Tuachi-in, tua numeite gel Bethlehem hong tun dongun, hong ton uhi. Bethlehem hong tun takun, amaute hangin, tua khawpi-a mite a kising souhsouh uhi. Tua khua numeite'n: Hiai Naomi ahi zenhouh maw? a chi uhi. 20 Naomi in amaute kiang ah: Naomi hon chi nawn kei un, Mara hon chi zaw un. Ahang bel, Vanglianpen in ka nuntakna khasak hita ven. 21 Buchingtaka kuankhia ing a, ahihhanga Tangtawn Toupa'n a hawma hon paikiksak hiven, banghanga Naomi hon chi lai ding na hia? Tangtawn Toupa'n hon thuaksak a, Vanglianpen in ka tunga vangsiatna hon tun hiven, a chi hi. 22 Tua bangin, Naomi hong kilehkik a, a mounu tua Moab numei Ruth in Moab gam apan hon zui a, barli buh lak kipat laiin Bethlehem khua hong tung uhi.
Ruth leh Boaz
1 Naomi in a pasal lam ah, Elimelekh behte laka mi suanhuai mahmah khat, tanau a nei a, tua pasal' min Boaz ahi. 2 Tua Moab numei Ruth in Naomi kiang ah: Lou ah vakuanin, hon deihsak ka muh peuhpeuh nung ah buhsang ka vazong ding aw! a chi hi. Naomi in amah kiang ah: Ka tanu aw, vakuan ve, a chi hi. 3 Tua bangin a vakuan a, buhlate nung ah buhsang a khawm hi. Tua bangin Ruth in Elimelekh behte khat Boaz' lou ah buhsang a vakhawmkha zenzen hi. 4 Tua laitak mahin, Bethlehem apanin Boaz a hong tung a, buhlate chibai a buk a: Tangtawn Toupa'n noute hon ompih hen aw! a chi hi. Amaute'n zong a dawng uh a: Tangtawn Toupa'n nang hon vualzawl hen aw, a chi nawn uhi. 5 Boaz in buhla makaipa kiang ah: Hua laia kua' tanu ahia? Chi-in a dong hi. 6 Tua buhla makaipa'n a dawng a: Moab gam apan Naomi tawh hong ton Moab numeinu ahi. 7 Ama'n: Hehpihtakin buhsang hon zongsak inla, buhlate nunga buhphal lak khawng ah buhsang hon khawmsak ve maw, a chi a, loubuka tomchik a khawl sung chih louh, zingsang apat tu dong lou laia nna semsem mai ahi, a chi hi. 8 Tuachi-in, Boaz in Ruth kiang ah: Ka tanu aw, ka thu ngaikhia in. Midang' lou ah kuanin buhsang vazong kenla, hiai apan paikhe nawn ken. Hiai ah ka sila numeite kiang ah om gige in, 9 Buhla pasalte' buhlakna en gige inla, amaute nungnung zui in. Nang hon khoih lou dingin pasalte ka hilhsa ahi. Na dangtak chiangin pai inla, pasalte' dipsa thawla tui vadawn in, a chi hi. 10 Hibang thu a zak takin, Ruth lei si-in a kun a: Kei gamdang mi hinapi, hibanga non deihsaka non phawk banghang ahia? a chi hi. 11 Boaz in a dawng a: Na pasal sih nungsiaha na nu adinga na thilhih teng khempeuh leh na pianna nulehpa leh na gam nusia a, midang na theih ngeilouh mite tawh teengkhawm dinga nong paikhiak dan khawng hon hilh uhi. 12 Tangtawn Toupa'n na thilhih hon din henla, a khalim bel dinga nong kisaknapa Tangtawn Toupa, Israel Pathian in nakpitakin hon vualzawl hen, a chi hi. 13 Ama'n: Ka toupa' mitmuhin deihsakna tang lailai nuam ing. Nang non khamuanta a, na sila numeite khat tawh zong teh tham hi kei mah leng, kei na sila kamphain non houpihta, a chi hi. 14 Annek hun takin, Boaz in Ruth kiang ah: Hiah hong pai inla, tanghou bangzah hiam beek grep tuithuka diahin hong ne in, a chi hi. Amah tua banga buhlate tawh a tutkhawm takin, Boaz in ankan bangzah hiam a pia hi. Ama'n a deih zah a nek khitin a vai lai hi. 15 Amah buhsang khawm dinga a dinkhiak nawn takin, Boaz in a sila numeite thu a pia a: Buhphalte lak ah buhsang a zon leh zong kisuanglahsak kei un. 16 Tua sangsikin, buhphal gaksa lak apan nangawn buhkung dokin ama' khop dingin nutsiat unla, tai kei un, a chi hi. 17 Tua bangin, Ruth in nitaklam dongin lou ah buhsang a khawm hi. Tua khitin, barli buh a khopte a chil a, ephah khat phial a ngah hi. 18 Ama'n tua a pua a, khua ah a pai a, a nu'n a buhsang khopzah a mu hi. Ruth in a nek khamval zong a suahkhia a, a nu a pia hi. 19 A nu'n amah kiang ah: Tuni-in koi ah buhsang na vazong a? Koi ah na vasema eita? Nang hon na phawkphapa nunnuamta hen aw! a chi hi. Ruth in a vasepna lou neipa' thu a nu a hilh a: Tuni-a ka va sepnapa' min Boaz ahi, a chi hi. 20 Naomi in a mounu kiang ah: Tangtawn Toupa'n amah vualzawl hen! Ama'n a damlaite leh a sisate tunga siamna suah tawp lou lai hiven, a chi hi. Tua baan ah, ama'n: Tua pa i tanau nai ahi a, tanpa tanaunai i neihte laka khat ahi, a chi lai hi. 21 Tua khitin, tua Moab numei Ruth in: Ka buh a lakkhit masiah uh ka nasemte lak ah om gige in, nangawn hon chi lai eive, a chi hi. 22 Naomi in a mounu Ruth kiang ah: Ka tanu aw, ama' nungakte tawh na tonkhawm leh nang adinga hoih ding ahi, midang lou ah siatna na tuak kha ding, a chi hi. 23 Ruth bel barli buh leh huit buh lakkhit mateng, buhsang zong dingin Boaz' sila numeite naihin a om gige hi. Tuachi-in, Ruth, a nu tawh a teengkhawm hi.
Buhphuala Ruth leh Boaz
1 Ni khat bel, a nu Naomi in amah kiang ah: Ka tanu aw, nang adinga hoih tawlngakna, taksap bangkim awng hukna na neih theih nading innkuan kon zonsak kei dia hia? 2 Boaz, a sila numeite tawh na omkhawmnapa uh, i tanau nai ahi kei maw? Ngai dih, tu zanin ama'n buhphuala barli buh zapsiang ding ahi. 3 Kisil siang inla, gim namtui kinuh inla, na puansilh hoihpen silh in. Tua khit chiangin, buhphual ah hawhsuk in. Ahihhangin, ama'n a neka a dawn khit mateng, tua muna na om lam kiphawksak ken. 4 Amah a lup chiangin, a lupna mun chiamteh in. Tua khit chiangin, vanaih inla, a khe vahawk inla, valum in. Ama'n na hih ding hon nahilh ding ahi, a chi hi. 5 Ruth in a dawng a: Na gen peuhmah ka hih ding, a chi hi. 6 Tuachi-in, amah buhphual ah a hawhsuk a, a nu'n a hih dinga a hilh peuhmah a hih hi. 7 Boaz in a nek-a a dawn khitin, lungnuamtakin a om a, buhvum pang gamla lamsang ah a lum hi. Ruth in a vanaih deendeen a, Boaz' khe hawkin a valum hi. 8 Zankhang laiin hichi hong hi a, banghiam khat in tua mipa a phawng guih a, a kihei leh, a khekhuana numei khat lum a phawk hi. 9 Ama'n: Kua na hia? a chi hi. Ruth in a dawng a: Na sila Ruth ka hi. Tanpa tanau nai hi vechin, na puanmong hon zawn ve, a chi hi. 10 Ama'n a dawng a: Ka tanu aw, Tangtawn Toupa'n hon vualzawl hen. Siamna na hon latsaksa sangin hiai na siamna a lianzaw lai. Pasal naupang zawte, a zawng hi-in a hau hita leh na delh kei a! 11 Ka tanu aw, lau ken. Na nget khempeuh kon hihsak ding. Ka khawpihte khempeuh in nunhoih numei na hih dan a thei vek uhi. 12 Tanpa tanaunai hi mah leng, kei sanga tanpa tanau nai zaw a om hi. 13 Tuzan hiai ah giak inla, zingsang chiangin ama'n tatna hon bawl nop leh pha, tatna bawl hen. Ama'n tatna a bawl nop kei leh, Tangtawn Toupa a hing ahihna sialin ke'n tatna ka bawl ding. Zingsang dong hiai ah lum in, a chi hi. 14 Tua bangin, amah Boaz' khekhuan ah zingsang dong a lum a, sanggam melmak theih mial laiin a thou hi. Boaz in amah kiang ah: Buhphual ah numei khat hong hawh chih kitheisak ken, a chi hi. 15 Ama'n: Na lukhum hon la inla, hon dawh in, a chi lai hi. Ruth in a lukhum a dawh a, Boaz in barli buh, tehna guk dim a sun a, amah a suan hi. Tua khitin, Boaz khawpi lam ah a kilehkik hi. 16 Ruth, a nu kiang hong tun takin, Naomi in: Ka tanu aw, bang achi ale? chi-in a dong hi. Ruth in amah adinga Boaz hihsak khempeuh a hilh a: 17 Hiai barli buh tehna guk tak hon pia a: Na nu kiang ah khutvuakin kik ken, hon chi eive, nu, a chi lai hi. 18 Tua khitin, Naomi in: Ka tanu aw, bang thil hong tung hiam chih na theih mateng na ngak in. Boaz in tuni-a hiai thil a hih vaiveng mateng amah om maimai lou hiai ding ahi, a chi hi.
Boaz leh Ruth Kitenna
1 Tua sungin, Boaz khawpi kongpi ah a hawhtou a, tua ah a tu hi. Tua tanpa tanaunai, a thu a nagensa pen tua laia hong pai takin, Boaz in: En dih vaw, hiah hong pai inla, hong tu dih aw lawm, a chi hi. Tuachi-in, amah hong pai a, hong tu hi. 2 Boaz in khawpi upa sawm khat a samkhawm a: Hiah hong tu dih ua, a chi a, amaute zong a tu uhi. 3 Tua khitin, ama'n tanpa tanaunai kiang ah: Moab gam apan hong kilehkik Naomi in, i sanggampa Elimelekh gam a zuak a, 4 hiai thu nang kon hilh a, hiaia tute mai leh ka mite' upate mai ah tan in, kon chih ding thil kilawm hi-in ka thei hi. Na tat nop leh tan inla, na tat nop kei leh lah hon hilh lechin. Nang lou a tan ding dang om kei a, nang nungin kei ka hi lei hi, a chi hi. Tua tanpa tanau bul in: Tan mah ning e, a chi hi. 5 Tua khitin, Boaz in: Naomi apan tua gam na tat ni ni-in, misipa' meithai tua Moab numei Ruth apan lei na suak hi. Misipa' gam tunga a min pu ding suan a om nadingin, tua misipa' meithai, Moab numei zong na tangkhawm teitei chihna ahi, a chi hi. 6 Hiai a zak takin, tua tanpa tanaunai in: Tua bang ding ahih leh, tan thei kei ning, keima' goutan mansuah kha ning. Nang adingin tan zaw mai in, ke'n tan thei lou hi'ng, a chi hi. 7 Tua hun laiin, Israel gam ah, gam tat leh kipiaksawnna om chiangin, khat in a khedap suahkhiain a khatpa a pia hi. Hiai bel Israel gama gou kitatna a kikipsakna daan ahi. 8 Tua bangin, hiai tanpa tanaunai in: Nang adingin tan in, chi-in a khedap a suahkhia hi. 9 Tua khitin, Boaz in tua upate leh mite khempeuh kiang ah: Naomi apanin Elimelekh, Khilion leh Malon' gam khempeuh ka leita, chih tuni-in noute a theihpihte na hi uhi. 10 Malon' meithai, Moab numei Ruth zong ka zi dingin ka tangta hi. Misisa' gam tunga a min pu ding suan a om nading leh a sanggamte apan a min man louh nading leh khawpi laibute apan a min a man louh nading ahi. Tuni-in noute a theihpihte na hi uhi! a chi hi. 11 Tua khitin, upate leh kongpi-a omte khempeuh in: Theihpihte hi mah ung. Tangtawn Toupa'n na inn sunga hong lut dingnu Rakhel leh Lea bangin bawlta hen. Amaute'n a kigawmun Israel innkawte tungding uh hiven. Efratha ah mi suanhuai hong suak inla, Bethlehem ah hong minthangta in. 12 Tua ban ah, Tangtawn Toupa'n hiai numei tawh kala chisuan nang hon piak ding tungtawnin na innkuan zong, Judah leh Tamar tawh kala chisuan Perez' innkuan mah bang hen aw, a chi uhi.
Khangthu
13 Tuachi-in, Boaz in Ruth a pi a, a zi honghita hi. Boaz in amah a luppih a, Tangtawn Toupa'n nau pai theiin amah a bawl a, tapa a nei hi. 14 Numeite'n Naomi kiang ah: Tangtawn Toupa phatin om hen. Ama'n tuni-in tanpa tanau bul beiin nang hon koih kei hi. Amah Israel gam sung khempeuh ah minthangta hen! 15 Amah na hinna halhthaksak dinga na tek na vuai chianga hon vakpa hi hen. Ahang bel, na mou nang hon itnu leh nang adinga tapa sagih sanga hoihzawnu in amah neikheta hiven, a chi uhi. 16 Naomi in naungek a la a, a pheitung ah a tusak a, a donnu hong hita hi. 17 Innveng numeite'n naungek min' a phuak uh a: Naomi in tapa neita e! chi-in a min dingin Obed a sa uhi. Amah Jese' pa hong hi a, Jese lah David' pa ahi. 18 Hiaite Perez' suante ahi: Perez in Hezron a suang a, 19 Hezron in Ram a suang a, Ram in Aminadab a suang hi. 20 Aminadab in Nashon a suang a, Nashon in Salmon a suang hi. 21 Salmon in Boaz a suang a, Boaz in Obed a suang a, 22 Obed in Jese a suang a, Jese in David a suang hi.
Samuel Pianna
1 Efraim tanggam ah khua khat Ramathaim a om hi. Tua khua ah pasal khat, Zuf behte khat a om a, a min Elkana ahi. Amah bel, Jeroham' tapa ahi. Jeroham bel Elihu' tapa ahi a, Elihu lah Tohu' tapa ahi a, Tohu lah Zuf tapa ahi. Zuf bel Efraim nama mi ahi. 2 Elkana in zi nih a nei a, khat pen Hana ahi a, adang khat pen Penina ahi. Penina in tate a nei a, Hana in bel a nei kei hi. 3 Kum simin hiai mipa, ama' teenna khua apan Shilo ah Tangtawn Toupa Vanglianpen be ding leh a maia kithoihna laan dingin hong kuan hi. Shilo bel Tangtawn Toupa' siampi Hofni leh Fineha omna ahi. Amaute lah Eli' tapa nihte ahi uhi. 4 Elkana in kithoihna a lat ni ding hong tun chiangin a zi Penina leh a tapate leh a tanute khempeuh kiang ah satan khat chiat a pe zel a, 5 ahihhangin, Hana bel a it manin leh Tangtawn Toupa'n a suul a khaakbing manin, tan nih a pe zel hi. 6 Tangtawn Toupa'n Hana suul a khaakbing manin, a langnu Penina in lung nopmawha a liin hiai nadingin a totbawl sek hi. 7 Hibangin kum tampi a pai hi. Hana, Tangtawn Toupa' inn-a a hawhtouh chiangin a langnu'n a kah mateng a tawng sek a, ama'n an a ngawl sek hi. 8 A pasal Elkana in a kiang ah: Hana, banghanga kap na hia? Banghanga an ne lou na hia? Banghanga dahmel na hia? Nang adinga tapa sawmkhat sanga kei manpha zaw ka hi kei-a hia? a chi hi. 9 Khatvei bel, Shilo-a ne-a a dawn khitun, Hana a dingkhia hi. Siampi Eli bel, Tangtawn Toupa' tempul kong bul ah, tutna tung ah a tu hi. 10 Hana lah lungkham mahmah kawma naktak a kap in, Tangtawn Toupa' mai ah a thuum hi. nKichiamna khat a bawl a: Tangtawn Toupa Vanglianpen aw, na silanu' thuakgimna en a, non phawk gige a, na silanu hon mangngilh lou a, tapa khat non piak peuhmah leh, a dam sung teng Tangtawn Toupa Vanglianpen adingin amah ka pe ding a, a lutung ah sammet tern a kizang ngei kei ding hi, a chi hi. 12 Tua banga Tangtawn Toupa' maia Hana a thuum laiin, Eli' in a mukphun a mu hi. 13 Hana bel a lung sung ah a thuum a, a muuk kia a phun a, aw gingkhia bel a kiza kei hi. Eli in amah zukham a sa a, 14 a kiang ah: Bangtan zukhama om ding na hia? Na zudawn tawpsan taven, a chi hi. 1 Hana in: Hilou ahi, toupa aw, a lungkham mahmahnu khat ka hi. Zu hita leh, kham theih peuhmah hita leh dawn lou ka hi. Tangtawn Toupa' maia ka hinna sungbua ka hi zaw. 16 Na silanu, numei mannabei hon sa ken. Lunggimna leh dahna lianpi neia hiaia thuum ka hi, a chi hi. 1 Eli in a dawng a: Khamuang-takin paita inla, Israel Pathian in na nget hon lawhchingsak hen aw, a chi hi. 18 Hana in: Na mitmuhin na silanu deihsakna hon tangsak in, a chi hi. Tua khitin, a pai a, an a ne zek a, a dahmel nawn kei hi. 19 A zingchiangin, beltakin a thou uh a, Tangtawn Toupa a bia uh a, Rama khua-a a inn uah a chiahkikta uhi. Elkana in a zi Hana a luppih a, Tangtawn Toupa'n Hana a thei gige hi. 20 Hun hong pai zel a, Hana a gai a, tapa khat a nei hi. Ama'n: Amah zaw Tangtawn Toupa apan ka nget ahi, chi-in, a min dingin Samuel a sa hi. Hana in Tangtawn Toupa kianga Samuel Pia 21 Tua mipa Elkana leh a sungte khempeuh tawh Tangtawn Toupa' maia kumsim kithoihna laan ding leh a kichiamna tangtun dinga a kuantouh takin, 22 Hana bel a vakihel kei hi. Ama'n a pasal kiang ah: Naungek in nawinek a tawp masiah kong hawh kei ding. Nawinek a tawp chiangin, amah tonpihin, Tangtawn Toupa' mai ah ka pe ding a, tua ah a omdenta ding, a chi hi. 23 A pasal Elkana in: Hoih na sak bangbangin hih in. Amah nawinek na tawpsak mateng hiai ah om in. Tangtawn Toupa'n a thu kipsak hen aw, a chi hi. Tua bangin, tua numeinu inn ah a om a, a tapa nawinek a tawp mateng a don hi. 24 Ama'n naupangpa nawinek a tawpsak takin bawngtal kum thuma upa khat tawh, anvui nei ephah khat tawh, zu thawl khat tawh a keng a, naupangpa neulai mahleh a tonpih a, Shilo-a Toupa' inn ah a paipih hi. 25 Tua bawngtal a gawhkhit takun, tua naupangpa Eli kiang ah a paipih uh a, 26 tua numeinu'n a kiang ah: Ka toupa aw, na hinna sialin ka gen ahi. Na kianga dinga Tangtawn Toupa' maia thuumnu ka hi. 7 Hiai naupang ngenin ka thuum a, Tangtawn Toupa'n ka nget hon peta. 2 Tuin, ke'n amah Tangtawn Toupa ka pia hi. A damsung teng Tangtawn Toupa kianga piak ahi den ding hi, a chi hi. Ama'n tua ah Tangtawn Toupa a bia hi.
Hana' Thuumna
1 Tua khitin, Hana a thuum a: Tangtawn Toupa ah ka lungtang nuamin kipak hi, Tangtawn Toupa ah ka kiite tawisangin om hi. Ka melmate tung ah ka kam kisial hi, na hutkhiakna-a kipak ka hih man ahi. 2 Tangtawn Toupa banga siangthou kuamah om lou hi. Nang lou kua dang om lou hi. Koute' Pathian loungal Suangpi dang om lou hi. 3 Kisathei takin paupau ke'n, na muk in kiotsakna thu zong gen kei hen, Tangtawn Toupa lah a theipa Pathian hi a, ama'n thilhih khempeuh buuk hiven. 4 Galhatte' thalphelte hihtana om a, a kisuite lah thahatna-a kigalvan uhi. 5 A niang leh taite zong an thalawh dinga kipia uh a, a kialte lah kial nawn lou uhi. A chiingnu'n ta sagih nei a, tapa tampi neinu lah bahta hi. Tangtawn Toupa'n that a, hihhing zel hi. Sheol ah paisuksak a, tua apan kaithou zel hi. 7 Tangtawn Toupa'n zawnna leh hauhna tun a, ama'n niamsak a, tawisang zel hi. 8 Ama'n a zawngte leivui apan dingkhesak a, a tasamte meivu lak apan domkangtou a, kumpi tapate tawh tukhawmsak a, pahtawina kumpitutphah luahsak hi. Ahang bel, leitung suangphumte Tangtawn Toupa-a hi a, tuate tunga leitung nga hiven. 9 Ama'n a misiangthoute' khe ching ding a, ahihhanga, migiloute bel miallaka daihsak didea om ding uhi. Thahatnain kuamah vualzou lou ding hi. Tangtawn Toupa' melmate hihzaan dimdem hi ding a, vantung apan ama'n vanpiging bangin amaute dou ding a, Tangtawn Toupa'n lei mong dong thu khen ding hi. Ama'n a kumpipa thahatna pe ding a, a thaunilhpa' kii tawisang ding hi, a chi hi. 11 Tua khitin Elkana bel Rama-a a inn ah a chiahkikta hi. Ahihhangin, tua naupangpa bel siampi Eli' mai ah Tangtawn Toupa' nasemin a om hi.
Eli Tapa Giloute
12 Eli' tapate bel, mannabei ahi uh a, Tangtawn Toupa theihna a nei kei uhi. 13 Siampite' hih dan ngeina khat a om a, mi khatpeuh in kithoihna a lat chiangin, tua kithoihna sa a kihuan laitakin, siampi' sila khat, sikkhut ka thum nei tawiin hong pai a, 14 tua sikkhut in tua sa huanna beel dai hi-in, beel pum hi-in, beelpi hi-in, beel neu hita leh, a sunsuk a, a sutkhiak khak teng siampi in a tang hi. Tua bangin, Shilo-a hong pai Israelte khempeuh tung ah siampite'n a hih uhi. 15 Kithoihna sa athaute a kihaal ma nangawnin siampi' sila hong pai a, kithoihna laanpa kiang ah: Siampi in sa minsa hon saang lou ding ahi, a sial, emmin ding sa hon pia in, a chi pahpah hi. 1 Kithoihna laanpa'n: A thaute beek kihaal masa phot hen aw, tua khit chiangin na deih deih la in, chita le zong, tua siampi' sila in: Hi thei lou ding. Tu'n hon pekhia in, non piak kei leh thaguma la veve ding hi'ng, a chi hi. Tua bang ahih manin, tua tangvalte' khelhna, Tangtawn Toupa' mitmuhin a nase mahmah hi. Ahang bel, Tangtawn Toupa' maia thillat pen kihhuai suaksak uh hiven. 18 Ahihhangin, Samuel in bel, naupang chik himahleh, siampi' puanak, puanmalngat silhin Tangtawn Toupa' mai ah nna a sem hi. 1 Kum simin a nu'n a puanaktual neu a bawlsak a, kumsim kithoihna laan dinga a pasal tawh a kuan chiangin, tua bang puanaktual a puak zel uhi. 20 Eli in Elkana leh a zi a na vualzawl zel a: Hiai numei in a nget a, Tangtawn Toupa piak ding a chih mun luah dingin, Tangtawn Toupa'n hiai numei apanin chisuan hon pia hen aw, a chi hi. Tua khit chiangin inn lam ah a kilehkik zel uhi.2 Tangtawn Toupa, Hana tunga hehpihsiam ahih manin, Hana in nau a paai kiik a, tapa thum leh tanu nih a nei hi. Tua bang sungin, Tangtawn Toupa' ompihin Samuel hong khanglian hi. 2 Eli bel hong teekta mahmah hi. A tapate'n Israelte khempeuh tunga a thilhihte uh leh, Kihoupihna Puanbuk kongkhak bula hong paikhawm numeite a na luppih dan uh zong a za hi. 23 Amaute kiang ah: Banghanga tua bang thilte hih na hi ua oi? Hiai na thilhih giloute uh mite khempeuh apan za ka hi. 24 Ka tapate aw, hi bang ding hilou ahi! Tangtawn Toupa' mite na thumangsak kei uh chih thuthang ka zakte thu hoih hilou ahi. 25 Mi khatpeuh midang tunga a khelh leh, ama' adinga Pathian vakikum thei ahi. Ahihhangin, mi khatpeuh Tangtawn Toupa tunga a khelh leh, ama' adinga kua kikumta ding ahia? a chi hi. Ahihhangin, a tapate'n a pa uh' taihilhna a ngeingaih kei uhi. Ahang bel, amaute hihlup ding Tangtawn Toupa' deihlam a nahi-a ahi. 26 Naupang Samuel bel hong khanglian a, Pathian leh mihingte' deihsakna ah zong a khangtou hi.
Eli Innkawte Mawhpaihna
27 Tuabang hun laiin, Pathian' mi khat Eli kiang ah hong hawh a: Hiai Tangtawn Toupa' thugen ahi: Na pa' innkawte Aigupta gama Faro' nuaia a om lai ua, amaute kianga a kiteltaka Keimah vakilaak hilou ka hi maw? 28 Amah ka siampi-a pang a, ka maitama vapaitou a, ka maia gim namtui vahal ding leh siampi puanak silh dinga, Israel namte khempeuh lak apan na pa na teelkhia ka hi. Tua baana, Israete'n meia a thillatte khempeuh uh na pa' innkawte' tan dinga pia ka hi. 2 frKa tenna muna kithoih nading leh thillat dinga ka sehte banghanga simmawh na hia? Banghanga, Israel mipite' thillat khempeuh apan a sa hoih lailai la a, noute kihihthaua kei sanga na tapate pahtawi zaw na hia? chi ahi. 30 Tua bang ahih mana, Tangtawn Toupa, Israel Pathian in: Na innkawte leh na pa' innkawte'n ka maia nna sem gige ding uh ahi, chi-a, thu na chiamkhinta ka hi, chi ahi. Hinapi-in, tu'n Tangtawn Toupa'n: Tua bang hi peuhmah kenteh! Kei hon pahtawi peuhmah ka pahtawi ding a, kei hon simmawh neuhmah lah ngaihneuin a om ding. Ngai in, na banthahat leh na pa' innkawte banthahatte ka satkhiak hun hong tung ding hi. Tua hun chiangin, nang' khanggui ah teekkuna dam om lou ding a, 32 ka tenna mun ah lungdonna mu ding na hi. Israel tung ah thil hoih kihih mah leh, nang' khanggui ah teekkuna dam om lou ding hi. 33 Ka maitam apan ka satkhiak louh, na lak ua omsun peuhmah lah, na khitui luangsaka hon mitmialsak leh na lungtang dahsak dinga hawi hi lei ding uh a, na suan leh khakte khempeuh khansih ding uhi. 34 Na tapa nihte, Hofni leh Fineha, nang adingin chiamtehna suak ding uh a, a nih ua nikhat thu-a si ding uh ahi. 35 Kei adingin siampi muanhuai khat ka tungkhe ding a, ama'n ka lungtang leh ka lungsim deih bangbangin a sem ding hi. Ama' innkawte ka tungding ding a, ama'n ka thaunilhpa' mai ah nna a seem gige ding hi. 36 Tua hun chiangin, nang' khangguia nutsiata omsun peuhmah, tua pa' mai ah ngunsik them leh an kamkhat ngen dingin hong paiin hong kuun ding a, hong thuum ding a: Nek ding an ka neih theih nadingin siampi' nna sem dingin hon sep mahmah in, chi-in hong ngen ngutngut ding hi, chi ahi, a chi hi.
Tangtawn Toupa'n Samuel Sam
1 Naupang Samuel bel, Eli nuai ah, Tangtawn Toupa' maia nasemin a om hi, Tua hun laiin, Tangtawn Toupa' thu a vaang a, mengmuhna a tam kei hi. 2 Eli' mit a bahta a, khua a mu thei khopteek hi. Zan khat, Eli ama' muna a lup laiin, Samuel zong Pathian' thukhun singkuang omna, Tangtawn Toupa' tempul sung ah a lum hi. 3 Pathian' meivak kide zong a mit nai kei hi. 4 Tua laiin, Tangtawn Toupa'n Samuel a sam hi. Samuel in a dawng a: Hiah ka om, a chi a, 5 Eli kianga va-taaiin: Non sam a, hiah ka om, a chi hi. Ahihhangin, Eli in: Hon sam lou ka hi. Vapai inla, valum in, a chi hi. Samuel a vapai a, a valum hi. Tangtawn Toupa'n: Samuel! chi-in a sam kiik hi. Samuel a thou a, Eli kiang ah a vapai a: Non sam a, hiah ka om, a chi hi. Eli in: Ka tapa aw, hon sam lou ka hi. Vapai inla, valum in, a chi hi. 7 Samuel in bel Tangtawn Toupa a meltheih nai kei hi. Tangtawn Toupa' thu lah ama' kianga laakkhiaksak ahi nai kei hi. 8 Tangtawn Toupa'n a thumvei nadingin Samuel a sam a, Samuel a thou a, Eli kiang ah a vahawh a: Hiah ka om, na hon sam a, a chi hi. Tua bang a hihtakin, Eli in, Tangtawn Toupa'n naupang sam ahi, chih a phawkkhia hi. tuachi-in, Eli in Samuel kiang ah: Vapai inla, valum inla, ama'n hon sap leh, Tangtawn Toupa, thu gen in, na sila in ngaikhia ka hi, na chi in, a chi hi. Tua bangin Samuel a vapai a, ama' mun ah a lum hi. 10 Tangtawn Toupa hong pai a, tua ah hong ding a, hun danga bangin: Samuel! Samuel! chi-in hong sam hi. Samuel in: Thu gen in, na sila in ngaikhia ka hi, a chi hi. nTangtawn Toupa'n Samuel kiang ah: Ngai in, Israel ah thil khat hih ding ka hi. A za peuhmahte' bil khawng ding ahi. 12 Tua hun chiangin, Eli' innkawte dema ka thugen peuhmah, a bul apan a tawp dongin, Eli' tunga tungsak ding ka hi. Ahang bel, a phawk mahmah khelhna hanga Eli innkawte gawt denden ding ka hi, chih ka hilhta hi. Tua bel, a tapate kihhuai kisuaksak uh a, ama'n lah amaute khou a, kham lou ahihna ahi. 14 Tua bang ahih mana, Eli' innkawte' tunga kichiamta ing a: Kithoihna hi-in, thillat in hita leh, Eli' innkawte' khelhna khuh ngei lou ding hi, chita hi'ng, a chi hi. 1 Samuel bel zingsang dong a lum a, tua khitin, Tangtawn Toupa' inn kongkhakte a hong hi. Ama'n a mengmuh pen Eli a hilh ngam kei hi. 1 Ahihhangin, Eli in amah a sam a: Samuel, ka tapa aw, a chi hi. Samuel in a dawng a: Hiah ka om, a chi hi. 17 Eli in: Tangtawn Toupa'n na kianga bang gen ahia? Kei apan iim ken. Nang hon hilhte thumal khat dong hon iim na neih peuhmah leh, Pathian in nang hon lawh dandan hon lawh hen, a nase zaw zong hon lawh hen, a chi hi. 18 Tuachi-in, Samuel in iim nei louin, a hilh vek sipsip hi. Tua khitin, Eli in: Amah Tangtawn Toupa hiven, a mitmuha hoih a sak bangbang hih hen, a chi hi. 19 Samuel hong khanlet bangbangin Tangtawn Toupa'n a ompih a, ama'n a thugen lei a dengsak kei hi. 20 Tuachi-in, Dan apan Beersheba dongin, Israelte khempeuh in, Samuel zaw Tangtawn Toupa' kamsang khata hihkip ahita, chih a meltheih uhi. 21 Shilo ah Tangtawn Toupa a kilaak zom zel a, a thu tungtawnin Samuel kiang ah amah kipulaakin a kitheisak hi.
1 Tuachi-in, Samuel' thugen Israelte khempeuh kiang hong tung hi.
Filistiate'n Pathian' Thukhun Singkuang Laksak
Hichi hong hi a, Israelte, Filistiate dou dingin a kuankhia uhi. Israelte'n Ebenezer ah giahphual a sat uh a, Filistiate'n Afek ah giahphual a sat uhi. 2 Israelte maituah dingin, Filistiate'n panmun khawhin a na kibukhin uhi. Tua banga kidouna hong natsiat takin, Israelte bel Filistiate' zawhin a om uh a, Filistiate'n tua kidouna phual ah Israelte 4,000 khawng a that uhi. 3 Israel sepaihte giahphuala a kiik takun, Israel upate'n: Banghanga Tangtawn Toupa'n tuni-a Filistiate' maia hon vuallelsak ahia? Tangtawn Toupa' thukhun singkuang in eite hon zuih theih nading leh i melmate khut apan hon hutkhiak theih nadingin, Shilo apan paw ni, a chi uhi. 4 Tuachi-in, mipite'n Shilo ah mi a sawl uh a, tua mite'n cherubte' kala tupa Tangtawn Toupa Vanglianpen' thukhun singkuang hon pua uhi. Eli' tapa nihte Hofni leh Fineha in tua ah Pathian' thukhun singkuang a ompih uhi. 5 Tangtawn Toupa' thukhun singkuang tua giahphual hong tun takin, Israelte khempeuh a awng uh a, lei a liing zou hiai hi. 6 Filistiate'n tua awng husa a zak takun, Hebru giahphuala hiai awng husa bang a maia? a chi uhi. Tangtawn Toupa' singkuang giahphual hong tung ahi, chih a theih takun, 7 Filistiate a lau uhi. Giahphuala pathian khat hong tung ahi. I tung gik e! Hibang mahmah om ngei nai kei. 8 I tung gik e! Hiai pathian hatte' khut apan kua'n i hinna hon humbit ding ahia? Gamdai-gamkeua hipi namkima Aiguptate thuaksak hiai pathiante ahi. Thahat suah un, Filistiate aw! Pasal suah un, noute nuaia amaute a om bang ua, amaute nuaia noute om ding na hi uh. Pasal suah unla, gal dou un! a kichi uhi. 10 Tua bangin Filistiate a pang uh a, Israelte a vuallel uh a, a puanbuk uah a tailut tek uhi. Gala si a tam mahmah a, Israelte'n zong khe sepaih 30,000 a mansuah uhi. nFilistiate'n Pathian' singkuang a laksak uh a, Eli' tapa nihte Hofni leh Fineha zong a si uhi.
Eli' Sihna
12 Tua ni mahin, Benjamin mi khat, kidouna apan hong tai a, Shilo ah a vahawh hi. A puansilhte khempeuh a keekgawp a, a luzang ah leivui a khu hi. 13 Amah hong tun laitakin, Eli zong lam gei ah tutphah tunga tuin a na om hi. Pathian singkuang tawh kisaia lunglau ahih mana, thu ngaka na om ahi. Tua khualtaipa khawpi sung hong lut a, bang thiltungta hiam chih a gen takin, khawpi bupin a kikou vengvung uhi. 14 Eli in tua kikou husa a zak takin: Hiai kikou husa bang hang hiam, chi-in a kan hi. Tua khualtaipa Eli kiang ah kinawhtakin hong taai hi. 15 Eli bel kum 98-a upa ahita a, a mit a mialta a, khua a mu thei nawn kei hi. 16 Tua khualtaipa'n Eli kiang ah: Kidouna phual apan hong tung phet mah ka hi. Tuni mahmaha kidouna phual apan hong taai ka hi, chi-in a hilh hi. Eli in: Ka tapa, bang thil a tunga? chi-in a dong hi. Thu hon pua khualtaaipa'n: Filistiate' maia Israelte taaikekta a, mi tampitak si ahi. Na tapa nihte Hofni leh Fineha zong si uh a, Pathian' singkuang zong hon laaksak uh ahi, a chi hi 18 Pathian' singkuang hong kigen khak takin, Eli, kongpi geia a tutna apan a thalkiak hi. Amah teekta a, gik mahmah ahih manin, a ngawng a kitan a, a si hi. Amah Israelte vaihawma a pan sung kum 40 ahi. 19 A mounu, Fineha' zi a gailai ahi a, a nausuah hun dekta ahi. Pathian' singkuang kilaaksak thu, a pasal' pa leh ama' pasal sih thu a zaaktakin nauvei natna in a pha a, a nau a suak hi. Ahihhangin, nauvei natna a thuak zou kei hi. Si dingin a kisa a, amah khoi numei in lah: Lungke ken, tapa nei na hi, a chi hi. Ahihhangin, dawn lah a dawng kei a, ngaihsak zong a ngaihsak kei hi. 21 Ama'n: Thupina in Israel nuseta hi, chi-in, tua pasal naungek' min dingin, Ikhabod a phuak hi. Tua bel, Pathian' singkuang kilaaksakna, a pasal' pa leh ama' pasal sihna hang ahi.2 Ama'n: Pathian' singkuang laaksak-a omta a, thupina in Israel nuseta hiven, a chi hi.
Ashdod leh Ekron-a Pathian' Singkuang tunga Filistiate' Mawhna 1 Filistiate'n Pathian' singkuang a laaksak nungun, Ebenezar apan Ashdod ah a pua uhi. 2 Tua nungin Dagon' tempul sung ah a pawlut uh a, Dagon kiang mahmah ah a koih uhi. 3 Ashdod mipite a zingchiang zingsang beltaka a thawhkhiak takun, ngai in, Tangtawn Toupa' singkuang maia Dagon khuppuk a na om hi! Amaute'n Dagon a phong uh a, a mun ngei ah a koih kik uhi. 4 Ahihhangin, a zing nawna a thawhkhiak takun, ngai in, Tangtawn Toupa' singkuang maia Dagon khuppukin a na om zel hi! Dagon' lutang leh a khutte kitankhiain innliim ah a na om hi. A pumpi kia a mun ah a kinusia hi. 5 Tuni donga Dagon siampite hi-in mi dang kuapeuh hita leh, Ashdod-a Dagon' tempula lut peuhmah in a innliim a siik ngam louh uh hiai hang ahi hi. 6 Ashdod leh a kiim a kianga mite tung ah Tangtawn Toupa' khut a gik mahmah a, amaute tung ah siatna a tun a, meimasiate a veisak hi. 7 Ashdod mite'n thil hong tung a muh takun: Israel Pathian' singkuang eite kianga a om ding hilou ahi, ama' khut eite tung leh i pathian uh Dagon tunga gik ahi, a chi uhi. 8 Tuachi-in, Filistia vaihawmte khempeuh a samkhawm uh a: Israel Pathian' singkuang bang lawh ding ka hita uale? chi-in a dong uhi. Amaute'n a dawng uh a: Israel Pathian' singkuang Gath tunsuk un, a chi uhi. Tuachi-in, amaute'n Israel Pathian' singkuang a pawkhia uhi. 9 Ahihhangin, a puakkhiak khitun, Tangtawn Toupa'n tua khawpi tung ah siatna thupitak tawh khut a kha a, a patausak mahmah hi. Tua khawpi mite meimasiate veisakin a neu a lian a thuaksak hi. ^Tuachi-in, tua Pathian' singkuang Ekron ah a khasawn uhi. Tua Pathian' singkuang Ekron khawpi a lut dektakin Ekron khawmite a kikoukhia uh a: Eite leh i mite that dinga Israel Pathian' singkuang eite kiang hon tun uh ahi, a chi uhi. nTuachi-in, Filistia vaihawmte a samkhawm uh a: Israel Pathian' singkuang khamang un. Ama' mun ah paikik hen. Tuachi louin zaw koute leh ka mite uh hon that vek ding ahi, a chi uhi. Ahang bel, Pathian' khut lah tua khawpi tunga gik mahmah a, sihna in a khawpi bupa patausak hiven. 12 A siloute'n meimasia vei uh a, tua khawpi' lungkham aw in van thawntou hi.
Israel Pathian' Singkuang Piakkikna
1 Filistiate' gam sunga Tangtawn Toupa' singkuang kha sagih a om takin, 2 Filistiate'n a siampite uleh a aisansiamte uh a samsak uh a: Tangtawn Toupa' singkuang bang lawh ding ka hi ua? Ama' muna ka khakkik ding dan uh hon hilh un, a chi uhi. 3 Amaute'n a dawng uh a: Israel Pathian' singkuang na khakkik uleh, khutvuakin paisak kei unla, a mai ah mawhna thillat khak teitei un. Tua hileh, hihdamin na om ding uh a, banghanga noute apan a khut lakhe lou nilouh hiam chih na thei din^ uhi, a chi uhi. Filistiate'n: Amah kianga mawhna thillat bang khaak ding ka hi ua? chi-in a dong nawn uhi. Amaute'n a dawng uh a: Khamsika kibawl meimasia lim nga leh khamsika kibawl zusa nga zel, Filistia vaihawm tamdan zahzah na khak ding uh ahi, ahang bel, hiai hipi in noute leh na vaihawmte uh hon thuaksak uh ahih man ahi. 5 Gamsung hihsia meimasia limte leh zusa limte bawl unla, Israel Pathian pahtawina pia un. Tua hi leh, ama'n noute leh na pathiante uh leh na gam uapan a khut dokkik maithei ding hi. 6 Banghanga Aiguptate leh Faro' hih banga na lungtangte uh khauhsak ding na hi ua? Ama'n amaute nakpitaka thuaksak a, tuachi-a amaute'n Israelte paikhesak phet uh a, tua banga pemkhia uh hilou maw? 7 Tuabang ahih manin, tu'n kangtalai thak khat, hakkol baat ngeilouh bawngpi nih a nou nei lai tawh hon la un. Tua bawngpite kangtalai tawh vawh unla, a noute bel kaikhia unla, khum un. 8 Tua Tangtawn Toupa' singkuang pen hon la unla, tua kangtalai tung ah koih un. Amah na khak ding uh mawhna thillat dinga, khamsika kibawlte singlem sunga koihin, tua singkuang kiang ah koih un. Tua bangin, paisak unla, 9 ahihhangin en gige un. Tua singkuang ama' gam lam, Beth Shemesh lama a pai leh, Tangtawn Toupa'n hiai siatna thupi eite tunga hon tun hi tah, chihna ahi ding. Tua banga a pai kei leh bel, eite hon thuaksak ama' khut hiloua, hong tungkha him him hitah chihna ahi ding hi, a chi uhi. 10 Tua bangin a hihta uhi. Bawngpi nih hon kai uh a, tua kangtalai ah a vawh uh a, a noute bel a khum uhi. uKangtalai tung ah Tangtawn Toupa' singkuang leh tua zusa leh meimasia lim khamsika kibawlte koihna singlem a koihkhawm uhi. 12 Tua khitin, tua bawngpite Beth Shemesh lam zuana pai vingvengin, lampi a zui uh a, lamtawnin a haam uhi. Veilam hiam, taklam hiam ah a pial kei uhi. Filistia vaihawmte'n Beth Shemesh gamgi dong a zui uhi. 13 Beth Shemesh mite tua phaizanga a huit buh uh lain a na om uh a, a daktouh uleh, singkuang a mu uh a, a lungnuam mahmah uhi. 14 Tua kangtalai, Beth Shemesh khawmi Joshua' lou hong tung a, tua ah suangpi lianpi kiang ah a khawl hi. Tua mite'n tua kangtalai singte ekin, Tangtawn Toupa' mai ah tua bawngpite haltum thillatin a laan uhi. Levite'n Tangtawn Toupa' singkuang, khamsika kibawl thilte koihna singlem tawh a la uh a, tua suangpi lianpi tung ah a koih uhi. Tua ni-in, Beth Shamesh khawmite'n haltum thillatte leh kithoihna thillatte, Tangtawn Toupa' mai ah a laan uhi. 16 Filistia vaihawm ngate'n hiai thilte khempeuh a mu uh a, tua khitin, tua ni mahin Ekron ah a kilehkikta uhi. 17 Filistiate'n Tangtawn Toupa' maia mawhna thillat ding a khak uh khamsika kibawl meimasia limte hiaite ahi. Ashdod, Gaza, Ashkelon, Gath leh Ekron ading khat tek ahi. 18 Khamsika kibawl zusa lemte zong, vaihawmmi ngate' khawpite zahzah ahi. Tua khawpite bel kulhnei khawpite leh a khawtate tawh ahi. Tua Tangtawn Toupa' singkuang a koihna uh suangpi lianpi bel, Beth Shemesh khawmi Joshua' lou ah tuni dongin theihpihnain a omden hi. 19 Ahihhangin, Pathian in Beth Shemesh khawmi pawlkhat makai 70 leh mimal mi dang 50,000 tung ah khut a kha a, a that hi. Ahang bel, Tangtawn Toupa' singkuang sung a et man uh ahi. Tangtawn Toupa khut gik a thuak manun, mipite a kap uh a, 20 Beth Shemesh khawmite'n: Tangtawn Toupa hiai Pathian siangthou' maia kua ding thei ding ahia? Hiai apan kua kianga hiai singkuang paita ding ahia? a chi uhi. 21 Tua khitin, Kiriath Jearim khawmite kiang ah mi a sawl uh a: Filistiate'n Tangtawn Toupa' singkuang hon khakkiikta uh. Hong paisuk unla, nou omna ah latou un, a chisak uhi.
1 Tuachi-in, Kiriath Jearim khawmite hong pai uh a, Tangtawn Toupa' singkuang keem dingin Abinadab' tapa Eleazar a siansuah uhi.
Samuel in Mizpa ah Filistiate Zou
2 Hun sawtpi, kum 20 sung mahmah, tua singkuang Kiriath Jearim ah a om a, Israelte khempeuh in a suun uh a, Tangtawn Toupa a zong uhi. 3 Samuel in Israel innkawte khempeuh kiang ah: Na lungtang khempeuh utawh Tangtawn Toupa lama kiik na hih uleh, gamdang pathiante leh na lak ua Ashtorethte paikhia unla, Tangtawn Toupa' nuai ah kipia unla, amah kia' nna seem un. Hi leh, ama'n Filistiate khut apan na hinna uh hon humbit ding, a chi hi. 4 Tuachi-in, Israelte'n a Baalte uleh Ashtorethte uh a paikhia uh a, Tangtawn Toupa kia' nna a sem uhi. 5 Tua khitin, Samuel in: Israelte khempeuh Mizpa ah kikaikhawm unla, ke'n noute adingin Tangtawn Toupa kiang ah kon ngetsak ding, a chi hi. 6 Tua banga Mizpa-a a kikaihkhawm takun, tui a tawi uh a, Tangtawn Toupa' mai ah a sungbua uhi. Tua ni-in an a ngawl uh a, tua ah kiphuanna a nei uh a: Tangtawn Toupa' tung ah ka na khialta uh, a chi uhi. Samuel bel Mizpa ah Israelte' makai vaihawmpain a pang hi. 7 Israelte Mizpa ah a kikaikhawm uh, chih Filistiate'n a zak takun, a vaihawmte uh Israelte dou dingin hong kuantou uhi. Israelte'n tua thu a zaktakun, Filistiate hangin a lau mahmah uhi. 8 Samuel kiang ah: Tangtawn Toupa i Pathian in Filistiate khut apan hon hutkhiak nadingin koute adinga a kianga non ngetsak tawp ken, a chi uhi. 9 Samuel in belamnou nawine lai a la a, haltum kithoihnain Tangtawn Toupa' mai ah a laan hi. Israelte adingin Tangtawn Toupa kiang ah a ngen a, Tangtawn Toupa'n a dawng hi. Samuel in tua haltum thillat a lat sungin, Filistiate'n Israelte kidoupih dingin hon naih uhi. Ahihhangin, tua ni-in, Filistiate douin Tangtawn Toupa vanging ngaihtakin hong ging a, amaute lauin a lungbuaisak a, Israelte' mai ah zawhgawpin a om uhi. nTua khitin, Israelte'n Mizpa apanin Filistiate a delh uh a, Beth Kar khang dong, lampi ah amaute a that suksuk uhi. 12 Tua khitin, Samuel in suang khat a la a, Mizpa leh Shen kikal ah a phut a: Hiai tan dong Tangtawn Toupa'n hon panpihta, chi-in, tua suangphuh min dingin Ebenezer a sa hi. 3 Tuachi-in, Filistiate zawh-in a om uh a, Israel gam a dou nawn kei uhi. Samuel damsung teng Tangtawn Toupa' khut in Filistiate a dou hi. 14 Ekron apan Gath donga Filistiate'n Israelte khut apan a laak uh khawpite khempeuh Israelte' khuta piakkiikin a om a, a kiim a kianga Israelte' gamte nangawn Israelte'n Filistiate' ukna nuai apan a humbit uhi. Tuachi-in, Israelte leh Amorte kal ah lemna omta hi. 15 Samuel bel a damsung teng Israelte khempeuh tunga vaihawmpa-in a pangden hi. 1 A kum a kumin, Bethel apan Gilgal ah, Mizpa ah a pai kual a, tua munte ah Israelte tung ah vai a hawm hi. 17 Ama' inn omna Rama ah a kilehkik zel a, tua ah zong Israelte tung ah vai a hawm hi. Tua ah Tangtawn Toupa' mai ah maitam khat a dawh hi.
Israelte'n Kumpipa ding Ngen
1 Samuel hong teek takin, Israelte tunga vaihawmte hi dingin a tapate a sep hi. 2 A tapa upen, a piang masapen' min Joel ahi a, a nihna pen' min Abija ahi a, amaute'n Beersheba ah vaihawma pangin a sem uhi. 3 Ahihhangin, a tapate'n ama' lampite a tawn kei uhi. Punna thanghuai delhin a lampial uh a, golhnate a ne uh a, thudika thukhenna a kaikawi uhi. 4 Tuachi-in, Israel upate khempeuh a kikaikhawm uh a, Rama ah Samuel kiang ah hong hawh uhi. 5 Amah kiang ah: Nang na teekta a, na tapate'n lah na lampite a tawn kei uhi. Tu'n nam dangte' neih bang koute hon vaihawmsak ding kumpipa khat hon sehsak in, a chi uhi. 6 Ahihhangin, amaute'n: Koute hon vaihawmsak ding kumpipa khat hon pia in, a chih takun, tua in Samuel a lungtaisak kei hi. Tuachi-in, Tangtawn Toupa' mai ah a thuum a, 7 Tangtawn Toupa'n: Mipite'n na kianga a gen khempeuh uh ngaikhia in. Nang hon nial ahi kei uh a, a kumpipa ding ua kei hon nial ahi uh. 8 Amaute Aigupta apan ka piikhiak ni apan tuni donga kei hon taisana pathian dangte' nna a sep bang ua, nang tunga hih ahi uh. 9 Amaute' thugen ngaikhia in. Ahihhangin, amaute khauhtakin vauhilh inla, amaute' tunga vaihawm ding kumpipa' thukhen ding dan hilh in, a chi hi. 10 Samuel in kumpipa ngen amaute kiang ah Tangtawn Toupa' thugen khempeuh a hilh a: nNoute tunga vaihawm ding kumpipa' thukhen ding dan hiai ahi: Ama'n na tapate uh a la ding a, a kangtalaite leh sakolte tawh a semkhawmsak ding a, a kangtalaite mai ah a taai ding uhi. 12 Pawlkhatte 1,000 pawlpawl makai dingin, pawlkhatte 50 pawlpawl makai dingin, pawlkhatte a lou kai dingin, pawlkhatte a buh la dingin, pawlkhatte galvan leh a kangtalaite' vanzatte bawl dingin a sep ding. 13 Na tanute uh gimnamtui bawl ding, anhuan ding leh tanghou em dingin a sep ding. 14 Na lou gam hoihpente uh leh grephuante leh oliv huante hon laksak ding a, a silate a pe ding. 15 Na buh leh bal uleh na grepzute uh sawma khat a la ding a, ama' uliante leh silate a pe ding. 16 Na sila pasalte uleh na sila numeite uh, na ganhon uleh na sabiltungte uh a hoih hoih ama' zat dingin a la ding. 17 Na belam leh kelte uh sawma khat a la ding a, noumau mahmah zong a silate na suak ding uh. 18 Tua ni hong tun chiangin, na teelsa uh kumpipa apan tungzanna ngenin na kikoukhe ding uh a, tua ni chiangin Tangtawn Toupa'n lah hon dawng kei ding, a chi hi. 19 Ahihhangin, mipite'n Samuel' thugen a ngaikhe nuam kei uhi. Amaute'n: Hilou e! Koute tung ading kumpipa deih hi ung. 20 Tua hi leh, nam dangte khempeuh banga koute hon makaih ding leh ka mai ua pai a, koute adinga gal hon dousak ding kumpipa khat nei ding hi ung, a chi uhi. 21 Samuel in mipite' thugente khempeuh a zaktakin, Tangtawn Toupa' mai ah a gensawn hi. 22 Tangtawn Toupa'n a dawng a: Amaute' thu ngaikhia inla, kumpipa khat pia in, a chi hi. Tua khitin, Samuel in Israelte kiang ah: Michih ama' khua ah kilehkik hen, a chi hi.
Samuel in Saul Thaunilh
1 Benjamin mi, suanhuai, mi haat khat a om a, amah Abiel' tapa Kish ahi. Abiel bel Zeror' tapa ahi a, Zeror lah Bekorath' tapa ahi. Bekorath lah Benjamin mi Afia' tapa ahi. 2 Kish in tapa khat a nei a, a min Saul ahi. Saul bel mitla tak, Isaelte laka a kimpih omlou, midang teng sanga liangkou tunglam chianga sangzaw ahi. Khatvei, Saul' pa Kish' sabiltungte a mang a, Kish in a tapa Saul kiang ah: Silate khat tonpihin kuankhia inla sabiltungte vazong in, a chi hi. 4 Saul a kuan a, Efraim tanggam teng ah a pai a, Shalisha kim gam teng a tawn a, ahihhangin, sabiltungte a mu kei uhi. Shaalim gam sung teng a zong uh a, sabiltungte a om kei hi. Tua khitin, Benjamin gam sung a tawnsuak nawn uh a, a mu tuan kei uhi. 5 Zuf gam sehkhen a tun takun, Saul in a tonpih a silapa kiang ah: Hong pai in, chiahkikta ni. Ka pa'n sabiltungte sangin eite hon ngaihtuahin lungkham ta'nteh, a chi hi. 6 Ahihhangin, silapa'n: Ngai dih, hiai khua-a Pathian' mi khat om eive. Amah mite' zahtak mahmah, a thugen peuh dika tung zel ahi. Amah kiang ah vahawh ni. Ama'n ngat nading lam hon hilh thei maithei ahi, a chi hi. 7 Saul in a silapa kiang ah: Vahawhta le'ng amah bang i pe dia? I ipte-a i an lah beita a, tua Pathian' mipa i piak ding thawnpiak nei lou i hi. Bang i neia eita? a chi hi, 8 Silapa'n a dawngkik a: En dih, ngun dangka shekel khat sehli suah seh khat ka nei. Koi lam tawn ding i hi hiam hon hilh theih nadingin tua Pathian' mipa hiai sum ka pe ding, a chi hi. 9 Tuma siaha bel, Israel gama mi'n Pathian apan thu a kan nop chiang ua: Pai dih, mutheipa kiang ah hawh dih ni, kichi sek uh ahi. Ahang bel, tuni-a kamsang kichi tua hun laia mutheipa kichi hiven. 10 Saul in silapa kiang ah: Na thugen a hoih hi. Hong pai aw, hawh ni, a chi a, tua Pathian' mi omna khua zuanin a kuankheta uhi. 11 Tua khua zuana muala a kaltouh laiun, tui tawi dinga hong kuan nungak pawlkhat a tuak uh a, amaute kiang ah: Hiai ah mutheipa a om hia? chi-in a dong uhi. 12 Amaute'n a dawng uh a: Om mah e. Ngai un, tu'n na mai uah om, Kinawh le uchin. Mite'n munsanga kithoihna a lat man ua, tuni-a ka khua ua hong hawh a hi lei. 13 Khawpi na lut phet chiangun, munsanga an ne dinga a kuan main na mu man ding uh. Ama'n tua kithoihna a vualzawl teitei kuul ahih manin, ama' tun mateng mipite'n an ne lou ding uh ahi. Tu'n hawhtou un, tu hun maha amah mu thei ding na hi uh, a chi uhi. 14 Amaute tua khawpi ah a hawhtou uh a, khawsung a lut takun, munsanga hawhtou dek amaute lama hong pai Samuel a na om hi. 15 Saul hong pai ma ni-in, Tangtawn Toupa'n Samuel kiang ah hiai a na hilhkhin hi: 16 Zingchiang tubang hunin Benjamin gam apan mi khat hon sawl ding ka hi. Ka mi Israelte tunga vaihawm dingin amah thau nilh in. Ama'n Filistiate' khut apan ka mite hukhe ding ahi. Ka mite' kikou husa ka kiang hong tungta a, amaute limsak ka hi, a chi hi. 17 Samuel in Saul a muhtakin, Tangtawn Toupa'n a kiang ah: Na kianga ka genpa hiai ahi. Ama'n ka mite tunga vaihawm ding ahi, a chi hi. 18 Saul in kongpi ah Samuel a naih a: Hehpihtakin, mutheipa' inn omna non hilh thei diam? chi-in a dong hi. 1 Samuel in a dawng a: Kei ka hi mutheipa. Munsang zuanin ka mai ah paitou in, tuni-a kei tawh an nekhawm ding na hi. Zingchiangin kon paisak ding a, na lungtanga omte khempeuh kon hilh ding, a chi hi. 20 Ni thum paita a, na mansuah sabiltungte ahih leh lungkhampih ken, kimuta ahi, Nang tung lou leh na pa' innkawte tung lou, kua tunga Israelte khempeuh lunggulhna tu ahia? a chi hi. 21 Saul in a dawng a: Israel laka nam neupen Benjamin mi, Benjamin nam laka zong beh neupen hilou ka hi maw? Banghanga ka kianga tua bang thu gen na hia? a chi hi. 2 Tua khitin, Samuel in Saul leh a silapa innsung ah a piilut a, michial 30-te' mai a tallatna pen mun ah a tusak hi. 23 Samuel in anhuanpa kiang ah: Seh tuam dinga kon piak sabeu hon tawi in, a chi hi. 24 Tuachi-in, anhuanpa'n saphei a vekin hon tawi a, Saul' mai ah hong koih hi. Samuel in: Nang adinga kisiit tuam hiai ahi. Michialte nei ka hi, ka chih lai apan hiai hun adinga nang adinga siit tuam ahih manin ne in, a chi hi. Saul in tua ni-in Samuel tawh an a umkhawm hi. 25 Tua munsang apan khawpi-a hong paisuk nungun, Samuel in a inn tung ah Saul a houpih hi. 26 Zing khawvakin a thou uh a, tua inntung ah Samuel in Saul a sam a: Kisa in, hon paisakta ding ka hi, a chi hi. Saul a kisak khitin, Samuel tawh a pusuakkhawm uhi. 27 Khaw nawl a tunsuk takun, Samuel in Saul kiang ah: Eite' maia pai masa dingin silapa hilh in. Nang bel hiah khawl tadih in, Pathian apan thupuak khat hon pe ding ka hi, a chi a, silapa bel a na pai masa hi.
1 Tua khitin, Samuel in sathau thawl khat a la a, Saul' lu tung ah a sung a, a tawp a: Tangtawn Toupa'n a goutan tunga makai dinga sathau hon nilh hilou hia? a chi hi. 2 Tuni-a kei non nutsiat chiangin, Rakhel' han kianga Benjamin gamgi-a Zelza a na pai mun ah mi nih in hon na tuak ding a: Na zonzon sabiltungte kimuta, chi-in hon hilh ding uhi. Na pa'n sabiltungte lungkhampih nawnlou a, nang hon lungkhampih ahita. Ka tapa tawh kisai bang hih ding ka hia? chi chi ahi, hon chi ding uh ahi. 3 Tua apanin Tabor singkung lianpi na tun mateng na pai ding hi. Tua ah, Bethela Pathian kianga hawhtou mi thum in hon tuak ding uh a, khat in keel tuailai thum a paw ding a, a khatpen in tanghou beu thum a paw ding a, a dang khat leuleu in savun zuthawl khat a paw ding hi. 4 Amaute'n nang hon na muakin tanghoubeu nih hon pe ding uh a, na sang ding ahi. 5 Tua nungin, Pathian' Gibea ah na pai ding a, tua ah Filistia sepaihte galvilna mun a om ding hi. Tua khawpi na naih chiangin, munsang apana a hon-a hong kizuisuk kamsangte na tuak ding hi. Tuate' mai ah kaihgingte, khuangtate, tamngaite leh pekgingte tum pawl a pai ding uh a, kamsang thugen a gen ding uhi. 6 Tangtawn Toupa' Kha vangliantakin na tung ah hong tung ding a, amaute tawh kamsang thugen na genkhawm ding a, mituam suakin na kipumkhek ding hi. 7 Hiai chiamtehnate a tunkim chiangin, na khut in sep ding a muh peuhpeuh sem in, Pathian in hon ompih ahi. 8 Ka mai ah Gilgal ah na paisuk in. Haltum kithoihnate leh lemna thillatte lan dingin na kiang ah kong paisuk ngeingei ding. Ahihhangin, kong paisuk a, na hih ding kon hilh mateng ni sagih sung na-ngak in, a chi hi.
Saul Kumpia-a Bawlna
9 Samuel nuse dinga Saul a kihei takin, Pathian in Saul' lungtang a kheksak a, tua ni-in, hiai chiamtehnate khempeuh hih tangtunin a om hi. 10 Amaute Gibea hong tun takun, kamsangte a hona paiin a na tuak uhi. Pathian' Kha vangliantakin Saul' tung ah hong tung a, tua kamsangte' thugenna ah a kihel hi. 11 Amah theisate'n kamsangte tawh kamsang thugente genkhawma amah a muh takun, Kish' tapa tunga tung hiai bang ahita maia? Saul zong kamsangte laka kihel ahita maw? chi-in a kianga omte a kidong tuah uhi. 12 Tua laia teeng mi khat in a dawng a: Amaute' pa kua ahia? a chi a, tua thu paunak khat hong suak a: Saul zong kamsangte laka kihel ahita maw? chih ahi den hi. 13 Saul in kamsang thugen a tawp takin, munsang ah a vahawh hi. 14 Saul' pangak in amah leh a silapa kiang ah: Koia va-om na hi ua? chi-in a dong hi. Ama'n: Sabiltungte va zong. Ahihhanga muh zawh hilou ding ahi, chih ka theih tak ua, Samuel kianga va-hawh ka hi uh, a chi hi. 1 cBaul' pangak in: Samuel in na kianga a gen hon hilh in, a chi hi. 16 Saul in a pangak a dawng a: Ama'n sabiltungte a kimukikta chih hon hilh mah ve, a chi hi. Ahihhangin, Samuel in kumpipa hihna thu a gen pen bel a pangak a hilh kei hi. 17 Samuel in Israel mipite Mizpa ah Tangtawn Toupa' mai ah a samkhawm a, 18 amaute kiang ah: Hiai Tangtawn Toupa, Israel Pathian' thugen ahi: Aigupta apanin Israel ka pikhetou a, Aigupta vangletna leh noute hon nuaisiah kumpigamte khempeuh apan kon humbit hi. 19 Ahihhangin, na siatnate khempeuh uleh na mangbatnate uapan hon damsakpa na Pathian uh na nialta uhi. Amah kiang ah: Ahi kei, ka tung uah kumpipa khat hon koih in, na chi uhi. Tua bang ahih manin, tu'n a nam anam leh a beh abehin Tangtawn Toupa' mai ah hong kilang un, a chi hi. 20 Samuel in Israel namte khempeuh hon piinai a, Benjamin nam telkhiakin a om hi. ^Tua khitin, Benjamin nam a beh a behin hon piinai a, Matri beh telkhiakin a om hi. A tawpin Kish' tapa Saul teelkhiakin a om hi. Ahihhangin, amah a zon uleh muhphakin a om kei hi. 22 Tuachi-in, Tangtawn Toupa a dong uh a: Tua mipa hiaia hong pai nailou hia? a chi uhi. Tangtawn Toupa'n: Hong pai mah e. Van lak ah a bu-a ahi, a chi hi. 23 Amaute a vatai uh a, amah hon piikhia uh a, mipite laka a din takin midang teng sangin a sangzaw a, a liangkou chiang pha zou a om kei hi. 4 Samuel in mipite khempeuh kiang ah: Tangtawn Toupa' teel mipa na mu uhia? Mipite lak ah amah bang kuamah om lou hi, a chi hi. Tua khitin, mipite khempeuh a kikou uh a: Kumpipa dam sawt hen! a chi uhi. 25 Samuel in mipite kiang ah kumpigam ki-uk dingdan a hilhchian hi. Tuate laibu zial ah a gelhkhia a, Tangtawn Toupa' mai ah a koihchipta hi. Tua khitin, Samuel in mipite amau' inn tek ah a sawlkikta hi. 26 Saul zong Gibea ah ama' inn ah a paita a, Pathian in a lungtang uh a khoih mihangsante'n a zui uhi. Ahihhangin, mannabei mi pawlkhat in: Hiai mi in eite bangchi-a hon huhing thei ding ahia? a chi uhi. Amah a simmawh uh a, thawnpiak bangmah a puak kei uhi. Ahihhangin, Saul bel a dai sipsip hi.
Saul in Jabesh Khawpi Hukhia
1 Amon mi Nahash a kuantou a, Jabesh Gilead a sim hi. Jabesh mite khempeuh in amah kiang ah: Koute tawh kal ah kilemna thukhun bawl in, hi leh koute na nuai ah ka om ding uhi, a chi uhi. 2 Ahihangin, Nahash in a dawng a: Noute na vekpiun na taklam mittangte uh ka khelkhe ding a, Israelte khempeuh ka zahlaksak ding a, tua mah lemna thukhun ahi din^, a chi hi. Jabesh upate'n amah kiang ah: Israel gam khempeuha thangkou ka sawl theih nadingun ni sagih hun hon pia in. Koute hukhe ding kuamah hong kuan kei leh na khutsung ah kong kipelut ding uh, a chi uhi. 4 Thangkoute Saul omna Gibea hong tung uh a, mipite kianga hiai dinmun thu a gen takun a vekpiun nakpitakin a kapkhia uhi. Tua laitakin lou apanin Saul hong tung a, a bawngtalte nung ah hong pai hi. Ama'n: Mipite bang lungkhama kap ahi ua? a chi hi. Amaute'n: Jabesh mite' thugen a gensawn uhi. 6 Saul in a thugente uh a zak takin, Pathian' Kha a tung ah vangliantakin hong tung a, ama' thangpaihna a kuang hi. Bawngtal tuak khat a la a, a semnen a, Israel gam sung teng ah a baak a baakin thangkoute a pawsak a, a khak a: Saul leh Samuel nungzui lou mi peuhmah a bawngtalte tung ah hibang tung ding ahi, a chisak hi. Tua khitin mipite tung ah Tangtawn Toupa launa a tung a, mi khat bang maiin a kuankhia uhi. 8 Saul in amaute Bezek-a a kaihkhawm takin, Israelte 300,000 a pha uh a, Judahte 30,000 a pha uhi. 9 Amaute'n thangkou hong kuante kiang ah: Jabesh Gileadte kiang ah: Zing chianga nisat laitakin hutkhiak na hi ding uh, chi un, a chi uhi. Thangkoute chiahkika, hiai thu Jabeshte kianga a gen takun thathouin a kipak mahmah uhi. 10 Amaute'n: Amonte kiang ah: Zing chiangin na khutsung uah kipekhia n'ung, na lawh lawh uh hon lawhta un, a chi uhi. 11 A zingchiangin, Saul in a mite pawl thumin a khen a, zanven nunung laitakin Amonte' giahphual a luh uh a, nisat laitak dong amaute a that uhi. A dama khawsuak sunte a taaizaak uh a, mi niha kipawl muh ding zong a om kei hi.
Saul Kumpipain Kikipsak
12 Mipite'n Samuel kiang ah: Saul in eite tunga vaihawm ding maw? chi-a dong kuate ahia? Tuate koute kiang hon tun un, amaute ka that ding uh, a chi uhi. Ahihhangin Saul in: Tuni-a Tangtawn Toupa'n Israel hukhia ahih manin tuni'n kuamah thah ahi kei ding, a chi hi. 14 Tua khitin Samuel in mipite kiang ah: Hong pai un, Gilgal ah hawh ni-in, kumpi hihna tua mun ah pomkip thak ni, a chi hi. 15 Tuachi-in mipite khempeuh Gilgal ah a hawh uh a, Tangtawn Toupa' mai ah kumpipain Saul a pomkip uhi. Tua ah Tangtawn Toupa' mai ah kithoihnate leh lemna thillat a laan uh a, Saul leh Israelte khempeuh in lungnopna lianpi a bawl uhi.
Samuel' Mangphakhakna
1 Samuel in Israelte khempeuh kiang ah: Ka kianga na gen khempeuh uh ka ngaikheta a, na tung uah kumpipa khat ka koihta. 2 Tu'n noute' makaipa dingin kumpipa khat na neita uh. Kei ka hih leh, ka upata a, ka sam a kaangta. Ka tapate hiai ah na lak uah a om uh. Kei ka tuailai apan tuni dong noute' makaiin ka pangta. 3 Tu'n hiai ah ka ding hi. Non dem nop uleh Tangtawn Toupa leh a thaunilhpa' mai ah hon dem un. Kua bawngtal ka laksak ngeia? Kua sabiltung ka laksak ngeia? Kua tung ah diklou taka hihin kua ka nelhsiah ngeia? Kei hon mitsisak dingin kua khut apan golhguk sum ka saang ngei-a eita? Hibang hih ka na neih peuhmah leh ka din ding, a chi hi. 4 Amaute'n a dawng uh a: Kuamah tung ah diklou takin na hih ngei kei a, kuamah na nelhsiah ngei kei. Kuamah khut apan bangmah na ne ngei kei, a chi uhi. 5 Samuel in amaute kiang ah: Noute dema theihpihpa Tangtawn Toupa ahi. Ka khut ah bangmah na mu kei uh, chih, tuni-a theihpihpa a thaunilhpa zong ahi, a chi hi. Amaute'n: Theihpihpa amah hi mah e, a chi uhi. 6 Tua khitin, Samuel in mipite kiang ah: Mosi leh Aron sep a, Aigupta apan na pu na pate uh piikhepa Tangtawn Toupa ahi. Tua bang ahih nungsang hiai ah ding un. Tangtawn Toupa'n noute leh na pu na pate uh adinga thil diktattaka hihte khempeuh tawh kisaia, Tangtawn Toupa' maia kiteltaka suut ding ka hi. Jakob Aiguta gam a lut nunga na pu na pate' un huhna ngena Tangtawn Toupa sam uh a, Tangtawn Toupa'n Mosi leh Aron sawl a, amaute'n Aiguptate' gam apan na pu na pate uh piikhia uh a, hiai muna amaute teengsak uhi. 9 Ahihhanga amaute'n Tangtawn Toupa, a Pathian uh mangngilh uh a, ama'n amaute Hazor' sepaihhon makai Sisera khutsung leh Filistiate khutsung leh amaute dou Moab kumpipa' khutsunga khawngkhia hi. Amaute'n Tangtawn Toupa sam uh a: Ka na khialta uh. Tangtawn Toupa taisanin Baalte, Ashtorethte' nna ka na sem uh. Ahihhangin, tu'n ka melmate uh khut apan hon humbit inla, na nna ka sem ding uh, a chi uhi. uTuachi-in Tangtawn Toupa'n Jerub Baal, Barak, Jeftha leh Samuel sawlin na kimkot ua na melmate uh khut apan noute hon hukhia a, bitin na teeng uhi. 12 Ahihhangin, Amonte' kumpipa Nahash noute hon dou dinga hong kuan na muh takun, Tangtawn Toupa na Pathian uh na kumpipa uh hinapi, noute'n ka kiang ah: Hilou e, koute tunga vaihawm ding kumpipa khat ka deih uh, na chi 3 Tu'n na teel uh kumpipa hiai uhi. 13 Tu'n, na teel uh kumpipa hiai ah a om, amah na ngetpa uh ahi ve. 14 En un, Tangtawn Toupa na lau uh a, a nna na sep uh a, a thu na man uh a, a thupiakte na helsan kei uleh, noute leh na tung ua vaihawm kumpipa'n Tangtawn Toupa na Pathian uh nung na zuih uleh, a hoih e! 15 Ahihhangin, Tangtawn Toupa' thu na man kei uleh, a thupiakte na helsan uleh, a khut in na pu na pate uh a dou bangin noute hon dou ding ahi. 16 Tuin, ding diindeen unla, Tangtawn Toupa'n na mitmuh ua thil thupi a hih ding en un! 17 Tu hun huitbuh lak hun hilou hia? Vanpiging leh vuahpi hon sawl dingin Tangtawn Toupa ka sam ding. Kumpipa khat na nget uh, Tangtawn Toupa' mitmuha thil hoihlou hih na hi uh, chih na phawk ding uh, a chi hi. 18 Tua khitin, Samuel in Tangtawn Toupa a sam a, Tangtawn Toupa'n tua ni mahin vanpiging leh vuahpi hon sawl hi. Tuachi-in, mite khempeuh Tangtawn Toupa leh Samuel lau leh zahtak mahmahin a ding uhi. Mipite'n a vekpiun Samuel kiang ah: Na sila koute ka sih louh nading un, koute adingin Tangtawn Toupa na Pathian kiang ah hon thuumsak in. Kumpipa ka nget uh, ka khelhna dangte teng ua thil hoihlou behlap ka na hi uh, a chi uhi. 20 Samuel in a dawng a: Lau kei un. Hiai thil hoihlou khempeuh na hihta uh. Hinapi-in, Tangtawn Toupa kiheimangsan kei unla, na lungtang khempeuh utawh Tangtawn Toupa' nna sem un. 21 Mannabei milimte delhin kiheimang kei un. Noute adinga thil hoih hih thei loupi uh, noute hinna humbit theiloupi uh. Amaute a mannabei hi ve-un. 22 A min thupi a hih mana Tangtawn Toupa'n a mite hon nial lou ding hi. Tangtawn Toupa'n noute ama-a hon hihsak ding a kipahlam hiven. 23 Kei ka hih leh, noute hon thumsak louin Tangtawn Toupa tung ah khialta lou zen ning. Lampi dika tang kon sinsak ding, 24 Ahihhangin, noute adinga a thilhih thupite ngaihtuah unla, Tangtawn Toupa lauin, lungtang khempeuh tawh thutakin a nna sem peuhmah phot un. 25 Thil hoihlou na hih teitei uleh bel, noute leh na kumpipa uh phiatmangin na om ding uh, a chi hi.
Samuel in Saul Taai
1 Saul bel kum 30 ahih X O kumin kumpipa a hong hi a, Israel tung ah kum 42 sung vai a hawm hi. 2 Saul in Israel apan mi 3,000 a teelkhia a, tuate laka 2,000 amah tawh Mikmash ah leh Bethel tanggam ah a om uhi. A dang 1,000-te bel Jonathan tawh Benjamin gama Gibea ah a om uhi. Midangte ahihleh bel inn lam ah a sawlkiik hi. Jonathan in Geba-a Filistia galvilna a vasim a, Filistiate'n tua thu a za uhi. Saul in gam sung teng ah pengkul a mutsak a: Hebrute'n za uhen! a chi hi. 4 Israelte khempeuh in tua thu a za uh a: Saul in Filistiate' giahphual sim ahi, tu'n Filistiate adingin Israelte namsia a suakta uh, a chi uhi. Tuachi-in, Gilgala Saul kianga vahawh dingin mite sapkhawmin a om uhi. 5 Filistiate zong Israel dou dingin a kikaikhawm uh a, kangtalai 3,000, kangtalai hawi 6,000 leh sepaih tuipi piaua sehnel zah tawh a kuan uhi. A kuantou uh a, Beth Aven suahlama Mikmash ah giahphual a sat uhi. 6 Israelte'n a dinmun uh a lauhuai dan leh a sepaihhonte uh nakpitaka neh-a a om dan uh a muh takun, kawl heng khawng, loupa lak khawng, suangtum lak khawng, kawkhuk khawng leh tuibem sung khawng ah a bu uhi. 7 Hebrute pawlkhat ngial in houh Jordan lui kanin Gad gam leh Gilead gam ah a taai uhi. Saul bel Gilgal ah a om lai a, a ompih mite lauin a ling uhi. 8 Tua ah Samuel hun seh ni sagih sung a ngak a, ahihhangin, Samuel lah Gilgal ah hong hawh kei a, Saul' mite a kithehzak panta uhi. 9 Ama'n: Haltum thillat dingte leh lemna thillat dingte hon la un, a chi a, haltum thillat a lanta hi. 10 Tua banga thillat a latkhit phetin, ngai in, Samuel hong tung a, amah muak dingin Saul a vakuan hi. 11 Samuel in: Bang na hih na maia? chi-in a dong hi. Saul in a dawng a: Mite kithehzak a, nang lah a hun seha hong tung lou, Filistiate lah Mikmash-a kikaikhawm uh ka muh takin, 12 Flilistiate Gilgala hong kuansukin hong dou ding uh hitain ka ngaihtuah a, Tangtawn Toupa' deihsakna ka na zongta kei a, tua hanga haltum thillat a na lan mai ka hi, a chi hi. 13 Samuel in: Haihuaitaka gamta na hi ve. Na kianga Tangtawn Toupa na Pathian' hon thupiak zui lou na hi. Zuia thu mang hi lechin, Israel tunga na kumpigam hihkip denta ding hiven. 14 Tu'n zaw, na kumpigam in daih sawt lou ding ahi. Tangtawn Toupa'n ama' lungtang bang pu mi khat zong kheta a, a mite tunga makai dinga septa ahi. Ahang bel, nang Tangtawn Toupa' thupiak zuilou hita ve chin, a chi hi. 1 Tua khitin, Samuel in Gilgal a nusia a, Benjamin gama Gibea ah a paitou hi. Saul in a ompihte a sim a, 600 a pha uhi.
Israelte Galvan beia Om
16 Saul leh a tapa Jonathan leh amaute kianga om mite, Benjamin gama Gibea ah a taam uh a, Filistiate bel Mikmash ah giahphual ah a om uhi. 17 Filistiate' giahphual apan galsim ding pawl thum kisuahin a kuankhia uhi. Pawl khat suai kiang naia Ofra lam ah a kihei uh a, 18 pawlkhat Beth Horon lam ah, a thumna pawl gamdai-gamkeu lama Zeboim Kuam kimuhsukna gamgi lam ah a kuan uhi. 19 Filistiate'n: Hebrute'n namsaute, ahih kei leh, teipite seek kha unteh! a na chihkhit manun, Israel gam sung teng ah siksekmi a kimu zou kei hi. 20 Tuachi-in, Israelte khempeuh loukaihna tute, suanggalte, heipite leh kawitete tat hiam dingin Filistiate kiang ah a hawhsuk sek uhi. 21 Loukaihna tute leh suanggalte, ninkaihna sikkate leh heipite leh gan hawlna sikzumte tat hiam man shekel sehthum suah seh nih ahi. 22 Tua bang ahih manin, kidou ni-in, Saul leh Jonathan tawh omkhawm sepaihte, namsau hi-in teipi hita leh, khuta tawi khat lei zong a om kei hi. Saul leh a tapa Jonathan kia in a tawi uhi.
Jonathan In Filistiate Dou
23 Filistiate pawlkhat Mikmash-a mual kanna ah a kumkhekhin uhi.
1 Ni khat bel, Saul' tapa Jonathan in a galvan pawpa tangval kiang ah: Kisa dih, lehlam panga Filistia galvilte omna ah i vahawh ding, a chi hi. A pa bel a hilh kei hi. 2 Saul bel Gibea khawpua ah, Migron-a mimthei kung nuai ah a om a, mi 600 khawng amah kiang ah a om uhi. 3 Tua 600-te lak ah siampi puanak silh mi khat, Ahija kichi a om hi. Amah bel, Ikhabod' sanggampa Ahitub' tapa ahi. Ahitub bel Fineha' tapa ahi a, Fineha bel Eli' tapa ahi. Eli lah Shilo-a Tangtawn Toupa' siampi ahi. Kuama'n Jonathan kuankhiak lam a thei kei hi. Jonathan in Filistia galvilte omna tun nadingin mual kanna-a paisuak a sawm ahi. Tua mual kanna pang tuak ah kawl a om hi. Kawl khat pen Bozez a kichi a, a dang khat pen Sene a kichi hi. 5 Tua kawl khat Mikmash lampang mallam ah a om a, a dang khat pen Geba lampang simlam ah a om hi. Jonathan in a galvan pawpa tangval kiang ah: Kisa dih, hiai zeksum louhte' galvilna mun ah vakuan ni. Tangtawn Toupa ei lam ah a pang mawh ding hia. Tangtawn Toupa'n tampi zangin hi-in, tawmchik zangin hita leh, a hutkhiakna bangmah in dai theilou hi, a chi hi. 7 A galvan pawpa'n: Na lungsima om bangbangin hih in. Hih in, ka hon thukimpih hi, a chi hi. Jonathan in: Kisa in leh. Tua mite lam ah i galkai ding a, i kimusak ding. 9 Amaute'n: Noute kianga kong pai mateng uh hon na ngak un, hon chih uleh, i omna ah i na om ding a, amaute i va naihtou kei ding. 10 Ahihhangin: Ka kiang uah hong paitou un, hon chih uleh, Tangtawn Toupa'n amaute i khutsunga hon peding ahi, chih chiamtehna ahi ding a, i kuantou ding, a chi hi. 11 Tuachi-in, a nihun Filistiate' galvilna ah a va kimusak uh a, Filistiate'n: En dih uh! Hebrute a bukna kua uapan hong vakkhia uh ei, a chi uhi. 12 Tua galvilna-a omte'n Jonathan leh a galvan pawpa kiang ah: Ka kiang uah hong paitou unla, sin ding khat hon na sinsak n'ung, a chi uhi. Tuachi-in, Jonathan in a galvan pawpa kiang ah: Ka nung hon zuitou in. Tangtawn Toupa'n Israelte' khutsunga amaute hon pekhia hita, a chi hi. 13 Jonathan a khut leh khe tawh pangin a kaltou a, a galvan pawpa'n a zuitou hi. Filistiate Jonathan' mai ah a puk ziahziah uh a, a galvan pawpa'n zong amah zuiin a nung ah galte a that toutou hi. 14 Tua a va sim masakna uah Jonathan leh a galvan pawpa'n mun neuchik, lou chiing khat sung ah mi 20 khawng a that uhi.
Israelte n Filistiate Zougawp
15 Sepaihhonte giahphuala omte, gamlaka omte, galvilna muna omte leh galsim pawlte lak ah nakpitaka laua linna a om hi. Lei nangawn a ling a, Pathian in launa a sawla ahi. Benjamin gama Gibea-a om Saul' galvilte'n sepaihhonte kilchiha zulmanga kithehzak a mu uhi. 17 Saul in amah kianga omte kiang ah: Sepaihte kisim unla, kua ahia kimlou en dih ua, a chi hi. Tua banga a kisim uleh, a kimlou Jonathan leh a galvan pawpa a na hi hi. 18 Saul in Ahija kiang ah: Pathian' singkuang hon la in, a chi hi. Tua huna bel Pathian' singkuang Israelte laka om ahi. 19 Saul in tua siampi a houpih laiin, Filistiate giahphuala buaina husa a uang semsem hi. Tuachi-in, Saul in siampi kiang ah: Na khut dokkiik in, a chi hi. 20 Tua khitin, Saul leh a mite khempeuh a kikaikhawm uh a, kidouna phual ah a lut uhi. Ngai dih ua, Filistiate buai chihtaka buaizaka amau leh amau a namsau ua kisattuah in a mu uhi. 21 Tua malama Filistiate lama va pang a, a giahphual ua amaute zuitou Hebrute pawlkhat, Saul leh Jonathan kima om Israel lam ah hong pangta uhi. 22 Efraim gama bu, Israelte khempeuh in Filistiate' taizak thu a zak takun, kidouna ah a va pang uh a, galte a delh uhi. 23 Tuachi-in, tua ni-in Tangtawn Toupa'n Israel a hukhia a, Beth Aven khen lam dongin kidouna in mai a nawt hi.
Jonathan in Khuaizu Ne
24 Tua ni-in Israelte a mangbang uhi, ahang bel Saul in mite kichiamsak a: Nitak lama hong hih a, ka galte tunga phu ka lak zawh ma teng an ne peuhmah hamsiatin om hen! a chi-a ahi. Tuachi-in, mipite kuamah in an a chiam kei uhi. 25 Sepaihhonte khempeuh gam-mang sung ah a lut uh a, lei lak ah khuaizu a na om hi. 26 Gammang sung a lut takun khuaizu luangkhia a mu uhi. Kichiamna lau uh ahih manin, kuama'n khuaizu khuta sawkin kam a tun ngam kei hi. 27 Ahihhangin, Jonathan in bel a pa'n kichiamna-a mite a henchip lam a zakha kei a, a khuta chiangkhun mukin khuaikhak a sun a, a khuttala khuaizu sawkin a kam a tun a, a mit hong vak kuau hi. 28 A lak ua sepaih khat in a kiang ah: Na pa'n kichiamna-a sepaihhonte hen a: Tuni-a an ne peuhmah hamse thuak hihen! chi eive. Hiai hanga mite baha tamsawl uh ahi, a chi hi. 29 Jonathan in: Ka pa'n gam adinga buaina tun ahi. En ve! Ke'n khuaizu neukha ka liah leh ka mit vak pah kiau ei voi. 30 Mite'n a gallakte uapan tuni'n noplen takin ne le uh, bangzahta-a hoihzaw ding ahia? Filistiate tam kithat sem lou ding hia? a chi hi. Tua ni-in, Israelte'n Mikmash apan Aijalon dong Filistiate a zawh nungun a bahta uhi. 32 Tuachi-in, a gallak thilte uh a bawhin a bawh uh a, belamte, bawngte leh bawngnoute tanin a gou uh a, a sisan tawh a ne uhi. 33 Mi khat in Saul kiang ah: En dih, mite'n sa, a sisan tawh nein Tangtawn Toupa tung ah a khialta uh, a chi hi Ama'n: Muanhuailou takin na gamtata uh. Suangtum lianpi khat hiai ah hon khuk zok un, a chi hi. 34 Tua khitin, ama'n: Mipite lak ah va pai unla: Michih in na bawngtalte uh leh belamte hiai ah hon kai unla, hiaia gouin ne un. Sa peuhmah a sisan omlai pi-a nein Tangtawn Toupa' tung ah khial kei un, chi un, a chi hi. Tuachi-in, mi chih in tua zanin a bawngtal hon kai a, tua ah a gou hi. 35 Tua khitin, Saul in Tangtawn Toupa ading maitam khat a dawh a, hibang thil a hih masakna ahi. Saul in: Zanlai-in Filistiate delhsuk ni-in, phalvak masiah amaute lok ni. Khat lei zong hinghawi kei ni, a chi hi. Mite'n: Hoih na sak bangbangin hih in, chi-in a dawng uhi. Ahihhangin, siampi in: Hiai Pathian dong phot ni, a chi hi. 37 Tuachi-in, Saul in Pathian a dong a: Filistiate ka delhsuk diam? Amaute Israelte' khutsung ah na pe diam? a chi hi. Ahihhangin, tua ni-in Pathian in a dawng kei hi. 38 Tua bang ahih manin, Saul in: Mipi makaite khempeuh hiah hong paikhawm unla, tuni-a bang khelhna kihihkha hiam zongkhia ni. 39 Israel hukhepa Tangtawn Toupa a nungta a hih bangbangin, ka tapa Jonathana khelhna na om a hih leh zong a sih teitei ding ahi, a chi hi. Ahihhangin, a lak ua kuamah in bangmah a gen kei hi. 40 Tua khitin, Saul in Israel khempeuh kiang ah: Noute tua lai ah ding un. Kei leh ka tapa Jonathan hiai ah na mai uah ka ding ding uh, a chi hi. Amaute'n: Hoih na sak bangbangin hih in, chi-in a dawng uhi. 41 Tua khitin, Tangtawn Toupa, Israel' Pathian kiang ah Saul a thum a: Dawnna dik hon pia in, a chi hi. Tuachi-in, ai a saan uh a, Jonathan leh Saul tung a tu hi. Midang teng a siang uh a, a paikhia uhi. 4 Saul in: Kei leh ka tapa Jonathan kal ah aisan un, a chi a, Jonathan tung a tu hi. 43 Tua khitin, Saul in Jonathan kiang ah: Bang hih na hita maia, hon hilh in, a chi hi. Tuachi-in, Jonathan in amah a hilh a: Ka chiang dawn ah khuaizu neukha ka chiama ahi. Tu-a ka sih teitei kul ding maw! a chi hi. 44 Saul in: Jonathan aw, na sih kei leh Pathian in kei hon lawh lawh hon lawh henla, a nase zaw zong hon lawh hen, a chi hi. 4 Ahihhangin, a mite'n Saul kiang ah: Israela hiai hutkhiakna thupi hon tunpa Jonathan a si dia hia? Silou e! Tangtawn Toupa a nungta ahih bangbangin, a lu zanga samzang khat zong leilak ah a ke kei ding. Ahang bel, ama'n Pathian' panpihna-a tuni-a hiai hih ahi, a chi uhi. Tua bangin, mite'n Jonathan a hukhia uh a, thahin a omta kei hi. 46 Tua khitin, Saul in Filistiate a delh nawn kei a, Filistiate a gam uah a kilehkiikta uhi. 47 Saul in Israel tunga vaihawmna a lak nung siah, kil chih ah a melmate uh Moabte, Amonte, Edomte, Zoba kumpipate leh Filistia kumpipate a dou hi. A kiheina lamlam ah a melmate tung ah gawtna a tun hi. 48 Hangsantakin gal a dou a, Amalekte a zou a, Israelte a na lokte' khut apan amaute' hinna a humbit hi.
Saul' Innkawte
49 Saul' tapate Jonathan, Ishvi leh Malkishua ahi. A tanu uzaw' min Merab ahi a, a nauzaw min Mikhal ahi. 50 A zi' min Ahinoam ahi a, Ahimaz' tanu ahi. Saul sepaihhon makaipi Abner ahi a, Ner' tapa ahi. Ner bel Saul' pangak ahi. 51 Saul' pa Kish leh Abner' pa Ner bel Abiel' tapa nihte ahi. 52 Saul damsung teng Filistiate tawh kal ah kidouna nasia a om gige a, Saul in mihat leh hangsan a muh peuhpeuh ama' nuaia sem dingin a la zel hi.
Tangtawn Toupa'n Saul' Kumpi Hihna Paai
1 Samuel in Saul kiang JL%3 ah: Tangtawn Toupa'n a mi Israelte tunga kumpipa hi dinga thaunilh dinga a sawlpa kei ka hi. Tua bang ahih manin, Tangtawn Toupa apan thupuak tu'n ngai in. 2 Tangtawn Toupa Vanglianpen' thugen hiai ahi: Israelte Aigupta gam apan hong paitouh lai ua lampi-a na buk a, a thilhihte uh hanga Amalekte gawt ding ka hi. 3 Tu'n kuan inla, Amalekte dou inla, a neihte khempeuh uh hihmangthang sipsip in. Bangmah hawi ken. Numeite, pasalte, naupangte, naungekte, bawngte leh belamte, sangawngsaute leh sabiltungte it louin that vek in, a chi, a chi hi. 4 Tuachi-in, Saul in Telaim ah mite samkhawmin a sim a, khe sepaih 200,000 leh Judah gama mi 10,000 ahi uhi. 5 Saul bel Amalekte' khawpi a tungsuk a, guam kuam khat ah galbuk a koih hi. 6 Tua khitin, Kente kiang ah: Kihemkhia unla, Amalekte tawh kon hihmanthatkhawm louh nadingin amaute nusia un. Noute zaw Israelte khempeuh Aigupta apan hong paitouh lai ua, a tung ua chitna siamna suah na hi ua ahi, a chi hi. Tua bangin, Kente Amalekte apan a kihem khia uhi. 7 Tua khitin, Saul in Aigupta suahlama Havila apan Shur dong lamtawnin Amalekte a dou hi. 8 Amalek kumpipa Agag a hingmat a, a mite khempeuh bel namsauin a that vek hi. 9 Ahihhangin, Saul leh a mite'n Agag leh belam leh bawng hoihpente, bawngnou leh belamnou thaute leh thil hoih peuhmah a hinghawi uhi. Hiaite a that chimit nuam kei uh a, a simmawhhuai leh a zawngkhalte bel a that chimit uhi. 10 Tua khitin, Tangtawn Toupa' thu Samuel kiang ah hong tung a: nSaul, kumpipa dinga ka na bawl ka dah a suak hi, ama'n kei hon kiheisan a, ka thuhilhnate zui lou hiven, a chi hi. Samuel a lungkham a, tua zan khawvakin Tangtawn Toupa' mai ah thumin a kikou khia hi. 12 Zingkhangin Samuel a thou a, Saul vamu dingin a kuan hi. Ahihhangin, mi'n amah kiang ah: Saul zaw Karmel ah a hawhtou a, amah kipahtawi nadingin theihgigena suang a phut a, tua apan kiheiin Gilgal ah a paisuak, chi-in ana hilh uhi. 13 Samuel in amah a delhphak takin Saul in: Tangtawn Toupa'n nang hon vualzawl hen aw! Tangtawn Toupa' thuhilhnate ka zuikhinta, a chi hi. 14 Ahihhangin, Samuel in: Ahih leh belam ham ka zakte bang ahia le? Bawng ham ka zakte bang ahia le? a chi hi. 15 Saul in a dawng a: Mite'n Amalekte' gante hon kaih uh ahi ve. Belam leh bawng hoihpente zaw Tangtawn Toupa na Pathian' maia kithoihna thillat dinga itin a hinghawi uh a, adangte khempeuh ahih leh that chimit-na ka hi uh, a chi hi. 16 Samuel in Saul kiang ah: Kamsim di-aw! Zanni zana Tangtawn Toupa'n ka kianga a gen kon hilh ding, a chi hi. Saul in a dawng a: Hon hilh ve, a chi hi. 17 Samuel in: Nangma' mitmuha neu na kisak lai om mahleh, Israel namte' lutang hong hi hilou na hi maw? Tangtawn Toupa'n Israel tunga kumpipa hi dinga thau hon nilh na hi! 1 Ama'n sep ding neia hon sawl a: Kuan inla, tua mikhial Amalekte hihmangthang sipsip in. Amaute na phiatmang vek masiah dou in, hon chi ei voi. 19 Banghanga nang Tangtawn Toupa' thu manglou? Banghanga gallakte tuh a, Tangtawn Toupa' mitmuha thil hoihlou hih na hia? a chi hi. 20 Saul in: Tangtawn Toupa' thu ka mang mah ve. Tua sep ding hon piak sem dingin ka kuan a, Amalekte ka hihmangthang a, a kumpipa uh Agag kon tonpih hi. 21 Mipite'n tua gallakte apanin belamte leh bawngte a la uh. Pathian adinga sehsiangthoute mah ahi. Gilgala Tangtawn Toupa na Pathian' maia kithoihna thillat dinga a lak uh ahi, a chi hi. 22 Ahihhangin, Samuel in a dawng a: Tangtawn Toupa'n, Tangtawn Toupa' thuman a kipahpih zaha, haltum thillatte leh kithoihna thillatte kipahpih hia? Ngai in, kithoihna sanga thuman hoihzaw a, belamtal thaute sanga a thu ngaihsak hoihzaw ahi. 23 Ahang bel, thumangloua helna zaw dawi aisan khelhna bang hi a, kiletsakna zong milimbiakna leh gitlouhna bang ahi. Tangtawn Toupa' thu na pampaih mana ama'n kumpipa na hihna hon pampaihta hi, a chi hi. 24 Tua khitphetin, Saul in Samuel kiang ah: Ka na khialta, Tangtawn Toupa' thupiak leh na thuhilhnate ka palsatta. Mipite ka lau a, amaute' deihna ka na zuita hi. 25 Tu'n kon ngen ahi, ka khelhna hon ngaidam inla, Tangtawn Toupa ka biak theih nadingin hon tonpih kik in, a chi hi. 26 Ahihhangin, Samuel in amah kiang ah: Nang kon zuikik kei ding. Tangtawn Toupa' thu na pampaih a, Tangtawn Toupa'n Israel tunga kumpipa na hihna apan hon pampaihta ahi! a chi hi. 27 Samuel pai dinga a kihei takin, Saul in a puanaktual mong ah a man a, a kikek hi. 28 Samuel in amah kiang ah: Tangtawn Toupa'n tuni'n nang apan Israel kumpigam keksakin hon sutkheta a, na innvengte khat, nang sanga hoih zaw khut ah a peta. 29 Israel Thupina ahipa'n zuau lah gen lou, a lungsim lah khelkik lou ahi. Amah lungsim khelkik ding mi hilou ahi, a chi hi. 30 Saul in a dawng a: Ka na khialta. Ahihhangin, Tangtawn Toupa na Pathian ka biak theih nadingin hehpihtakin ka mite' upate leh Israel' mai ah zahtakna hon pia in, a chi hi. 31 Tuachi-in, Samuel in Saul a zui kik a, Saul in Tangtawn Toupa a bia hi. 32 Tua khitin Samuel in: Amalek kumpipa Agag ka kiang ah hon pii un, a chi hi. Agag bel lauthawng takin a kiang ah hong pai a: Sihna' mulkimhuaina in hon kheng hitante, a chi hi. 33 Ahihhangin, Samuel in: Na namsau in numeite tabeia a bawl banga nang' nu zong numeite laka tabei hi ding hi, a chi hi. Tuachi-in, Samuel in Gilgala Tangtawn Toupa' mai ah, Agag atum tuma tanin a that hi. 34 Tua khitin, Samuel bel Rama zuanin a kipankheta a, ahihhangin, Saul bel Saul' khua Gibea-a a inn ah a paitouta hi. 35 Samuel in Saul suun mahmah mah leh, a sih mateng amah mu dingin a hawh ngei nawn kei hi. Tangtawn Toupa zong, Israel kumpipa hi dinga Saul a bawl a dah mahmah hi.
Samuel in David Thaunilh
1 Tangtawn Toupa'n Samuel kiang ah: Israel kumpipa hihna apan Saul pampaihta ka hih nung nang bangtan amah suun ding na hia? Na saki ah sathau thundim inla, kuankhia in. Bethlehema Jese kianga hon sawl ka hi. A tapate laka khat kumpipa hi dinga teelta ka hi, a chi hi. Ahihhangin, Samuel in: Bang chi-a kuan thei ding ka hia? Saul in na za ding a, kei hon that ding ahi, a chi hi. Tangtawn Toupa'n: Bawngla khat keng inla: Tangtawn Toupa' maia kithoihna lan dinga hong kuan ka hi, na chi ding hi. 3 Tua kithoihna thillatna ah Jese chial in. Na hih ding kon hilh ding. Kon kawkmuh penpa kei adingin thau non nilhsak ding hi, a chi hi. Samuel in Tangtawn Toupa' gen bangbangin a hih hi. Bethlehem hong tun a, tua khawpi upate'n amah a tuah takun a liing uh a: A hoih lama hong hawh na hina maw? a chi uhi. 5 Samuel in a dawnga: He, a hoihlam hi mah e. Tangtawn Toupa' maia kithoihna lan dinga hong hawh ka hi. Noute kisiansuah unla, kithoihna thillatna ah hong hawhpih un, a chi hi. Tua khitin, Jese leh a tapate a siansuah a, kithoihna-a hawh dingin a chial hi. 6 Amaute hong tun takun, Samuel in Eliab a mu a: Tangtawn Toupa' thaunilhpa tu-a Tangtawn Toupa' maia dingpa hi mahmah inte, chi-in a ngaihtuah hi. 7 Ahihhangin, Tangtawn Toupa'n Samuel kiang ah: A melput dan hiam, a din san dan hiamin en ken, amah zaw ka nialsa ahi. Tangtawn Toupa, mihingte thil et dana thil en hi lou ahi. Mihingte'n zaw pawlam lat dana en uh a, Tangtawn Toupa'n zaw lungtang en ahi, a chi hi. 8 Tua khitin, Jese in Abinadab a sam a, Samuel' mai ah a paisak hi. Ahihhangin, Samuel in: Tangtawn Toupa'n hiai zong a teel kei, a chi hi. Tua khitin, Jese in Samuel' mai ah Shama a paisak hi. Ahihhangin, Samuel in: Toupa'n hiai zong a teel kei, a chi hi. 1 Jese in a tapate sagih Samuel' mai ah a paisak a, ahihhang in, Samuel in amah kiang ah: Tangtawn Toupa'n hiaite a teel kei, a chi hi. nTuachi-in, Jese kiang ah: Tapa na neih hiaiteng maw? a chi hi. Jese in a dawng a: A nautum pen a om lai, ahihhangin, amah zaw belam chinga om ahi, a chi hi. Samuel in: Amah samsak in. Amah hong tun masiah tu lou ding i hi, a chi hi. 12 Tuachi-in, Jese in mi a sawl a, a tapa nautum pen hon piilutsak hi. Amah bel san hithet, pian phung hoih leh mei hoih ahi. Tangtawn Toupa'n Samuel kiang ah: Kisa inla, amah thau nilh in. Hiai amah ahi, a chi hi. 13 Samuel in sathau thunna saki a la a, tua mipa a sanggamte mitmuhin sathau a nilh hi. Tua ni nungsiah Tangtawn Toupa' Kha vanglianntakin David tung ah hong tung hi. Tua khitin, Samuel bel Rama ah a kilehkiikta hi.
David in Saul nuaia Sem
14 Saul apanin Tangtawn Toupa' Kha a paikheta a, Tangtawn Toupa apan kha gilou in amah a gimsakta hi. 15 Saul' nasemte'n amah kiang ah: Ngai dih, Pathian apan kha gilou in hon gimsak ahi. 16 Ka toupa un na silate thu pia inla, kaihging tum siam khat zongkhia uhen. Pathian apan kha gilou hong tun chiangin ama'n kaihging a tum ding a, na gimna nuamtuam ding ahi, a chi uhi. 17 Tuachi-in, Saul in a nasemte kiang ah: Kaihging tum siam hon zonsak unla, ka kiang ah hon tonpih un, a chi hi. 18 A silate khat in a dawng a: Ngai in, Bethlehem mi, Jese tapa khat, kaihging tum siam khat ka mu ngeita. Amah mi hangsan leh galhat, thugen siam ahi. Tangtawn Toupa'n amah ompih ahi, a chi hi. 19 Tua khitin, Saul in Jese kiang ah thupua a sawl a: Na tapa David, belam chinga om ka kiang ah hon sawl in, a chisak hi. 20 Tuachi-in, Jese in sabiltung khat a la a, tanghoubeu leh savun thawl khat zu leh keeltuai khat a pawsak a, a tapa David tawh Saul kiang ah a sawl hi. 21 David, Saul kiang hong tung a, a nasemin a pangta hi. David in amah a it mahmah a, tuachi-in David bel Saul galvan tawite laka khat hong suak hi. 22 Saul in Jese kiang ah thu a khak a: David zaw ka kiang ah omdensak in, amaha lungtung ka hi, a chi hi. Pathian apan kha gilou Saul tung hong tun chiangin, David in a kaihging a la a, a tum zel hi. Tua hun chiangin Saul adingin tungzanna hong tung zel a, Saul gimna a nuamtuam zel hi. Tua bangin kha gilou in amah a nuse zel hi.
David leh Goliath
1 Filistiate'n kidou dingin a sepaihte uh a kaikhawm uh a, Judah gam Soko ah a paikhawm uhi. Soko leh Azeka kala Efes Damim ah giahphual a sat uhi. 2 Saul leh Israelte a kikaikhawm uh a, Ela Phaizang ah giahphual a sat uhi. Tua ah Filistiate tuak dingin a kikhung uhi. 3 Filistiate'n mual khat a luah uh a, Israelte'n mual dang khat a luah uh a, a kal uah phaizang in a hal hi. 4 Gath khawmi, mi hat khat Goliath kichi a om a, Filistiate giahphual apan hong kuan a, a kal uah a ding hi. Amah bel tong guk leh khap khata sang ahi. 5 Ama'n sumsan siklukhu a khu a, sumsana kibawl lip-nei awmphaw a silh hi. Tua awmphaw bel shekel 5,000-a gik ahi. 6 A khete ah sumsan khephaw a bun a, a nungzang ah sumsan teisau a kuah hi. A teipi' kung bel siamgan mi' kolpi bang ahi. A teipi' luzum sik zong shekel 600-a gik ahi. A lum pawpa a mai ah a pai hi. 8 Goliath mun khat ah a ding a, Israel sepaihte a kikoukhum a: Bang dinga hong kuankhia a, kidou dinga hong kikhung mahmah na hi ua? Kei Filistia mi hilou ka hi hia? Noute Saul silate hilou na hi umaw? Mi khat hong kiteelkhia unla, ka kiang ah hon paisuksak un. Kei hon suai a, hon thah zawh leh, koute na silaun ka om ding uh. Ahihhangin, ken ka zawha ka thah leh, noute ka sila ua omin, ka nna uh na sem ding uh, a chi hi. 10 Tua khitin, tua Filistia mipa'n: Tuni'n Israel sepaihte kon ngam ahi! Mi khat hon pia unla, kisual n'ung, a chi hi. nHiai Filistia mipa' thugente a zak takun Saul leh Israelte khempeuh patauin a lau uhi. 12 David bel Efrath mi Jese' tapa ahi. Jese bel Judah gama Bethlehema teeng ahi. Jese in tapa giat a nei a, Saul dam laiin amah a upata a, a teek mahmahta hi. 13 Jese' tapa uzaw thumte'n kidouna ah Saul a zui uhi. Tapa upen Eliab ahi a, a nihna Abinadab ahi a, a thumna Shama ahi. 14 David ahih leh a nautumpen ahi. A uzaw thumte'n Saul a zui uh a, 15 ahihhangin, David bel Bethlehema a pa' belamte chingkawmin Saul tawh kal ah a kivialleh leh hi. 16 Ni 40 sung tua Filistia mipa zingsang teng leh nitaklam tengin hong kuan a, a dinna ngei ah hong ding pahpah hi. Tua laiin, Jese in a tapa David kiang ah: Hiai buhtang kan ephah khat leh hiai tanghou beu sawmte na sanggamte ading pua inla, a giahphual uah va hawh meeng in. Na sanggamte bangchi-in a om uhiam va kan inla, pha-na uhiam thu hon puak in. 19 Amaute Saul leh Israelte khempeuh tawh Ela Phaizanga Filistiate doua om ahi uh, a chi hi. 20 Zingkhangpi-in David in belamhonte a chingpa khat khuta nusiain, Jese' sawl bangin van puain a kuankheta hi. Sepaihhonte' giahphual a panmun ua kuankhia a, a kikou zuazua laiun, giahphual a va tung hi. Z1 lsrael leh Filistiate kimaituahin panmun khawhin a ding uhi. 22 David in a vante nektak keempa khut ah a nusia a, kidouna phual ah a va taai a, a sanggamte chibai a vabuk hi. 23 Amaute tawh a kihou laitakun, ngai in, Gath khua apan Filistia mihatpa Goliath, Filistiate' pan mun apan hong paikhia a, a kal ua dingin, a hih ngeina bangin mi tawngin hong kikou a, David in a za hi. 24 Israelte'n tua mipa a muh takun lau luain amah apan a taai uhi. 25 Israelte'n: Hiai mipa hibanga hong kuan pahpah na mu hia, Israelte tawng dinga hong kuan pahpahpa? Hiai mi that zou om leh, kumpipa'n hauhna thupitak pe ding a, a tanu zong a zi dinga pe ding a, a pa' innkawte zong kumpipa' tunga mawhpuakna apan awlsak ding ahi, a na chi uhi. David in a kianga dingte kiang ah: Hiai Filistia mipa that a, Israel apan zahlakna koihmang thei mi bang a kilawh dia? Hiai zeksum louh Filistia mi, Pathian hing' sepaihhonte selphou kua ahia? a chi hi. 27 Amaute'n a na gengensa uh David' kiang ah a gen kik uh a: Hiai mipa thatpa tunga hibang hibang kihih ding ahi, chi-in a hilh uhi. 28 David in sepaihte a houpih lai David' sanggam upen Eliab in a za a, a hehsan guih a: Banghanga hiaia hong hawhsuk na hia? Gamdai-gamkeua belam tawmkhahte kua khuta nusia na hia? Na kisaktheih dan leh na lungsim siatdan ka thei, kidouna en ding leia hong paisuk na hi, a chi hi. 29 David in: Bang ka hiha ahia? Pau nangawn pau theilou ding ka hi maw? a chi hi. 30 Midang khat kiang lam ah a paikhia a, a gen ngei mah a gen a, tua mite'n a ngei mah hilhin a dawng uhi. 31 David' thugen zate'n Saul kiang a tun uh a, Saul in amah a samsak hi. 32 David in Saul kiang ah: Hiai Filistia mipa hangin kuamah lunglau kei un. Na silapa ka kuan ding a, amah ka suai ding, a chi hi. Saul in a dawng a: Hiai Filistia mipa suai dingin na kuan thei kei ding. Naupang lei na hi. Amah zaw a tuailai apan galdou mi hita ahi, a chi hi. 34 Ahihhangin, David in Saul kiang ah: Na silapa'n ka pa' belamte ka ching hi. Humpinelkai hiam, vompi hiam hong pai a, belamhonte lak apan belam hong tuahmang chiangin, 35 ka delh a, ka sat a, a kam apan belam ka humbit hi. Ama'n kei hon bawh chiangin a mulin ka man a, ka sat a, ka that hi. 36 Na silapa'n humpinelkai leh vompi that tuak ka hi. Hiai zeksumlouh Filistia mi in Pathian hing' sepaihhonte hihniin a hih chianga tu hun a humpinelkai hiam, vompi bang sak ding ka hi. 37 Humpinelkai chinte apan leh vompi chinte apan ka hinna humbit pa Tangtawn Toupa'n hiai Filistia mi' khut apan ka hinna a humbit ding ahi, a chi hi. Saul in David kiang ah: Kuan inla, Tangtawn Toupa'n hon ompih hen, a chi hi. 38 Tua khitin, Saul in ama' puanak tungsilh David a silhsak a, a galthuam puanak zong a silhsak a, a sumsan siklukhute zong a khusak hi. 39 David in tua puanak tungsilh tung ah a namsau a kuah a, tuate a zat zongsatsa ahih louh manin pai a kisin hi. Ama'n Saul kiang ah: Hiai ka zat zongsatsa ahih louh manin hiaite silhsa-in zaw ka pai thei kei, a chi a, tua kivatnate a suahkhia hi. 40 Tua khitin, a khutin a chiangkhun a la a, luita apan suangtang zol sipsip nga a tawm a, a belam chinna kawlzal sunga ip ah a guang hi. A khuta suanglotkhau tawiin tua Filistia mipa a naih hi. 41 Tua sung teng, tua Filistia mipa'n David a naih a, a mai ah a lum tawipa a pai hi. 42 Ama'n David enin a vel a, naupang lei, san hit-het leh melhoih ahi, chih a mu a, a simmawh ta hi. 43 David kiang ah: Ui ka hi-a hia, kei suai dinga chiang tawh nong kuan? a chi a, a pathiante' min sialin a hamsiat ek ek hi. 44 Tua baan ah: Hia'h hong pai in, na sa tungleng vasate leh gamlak gamsate ka pe ding, a chi hi. 45 David in tua Filistia mipa kiang ah: Kei suai dingin namsau tawh, teipi tawh, teita tawh nong kuan a, kei zaw na langpa Tangtawn Toupa Vanglianpen, Israel sepaihhonte' Pathian na simmawhpa' mina hong kuan ka hi. 46 Tuni-a Tangtawn Toupa'n ka khut sunga nang hon pekhiain hon kamsimsak ding a, hon phukpai ding ing a, na lutang tankhe ding ka hi. Tuni-a Filistia sepaihhonte' luangte tungleng vasate leh leitung gamsate pe ding ing a, leitung bup in, Israel ah Pathian a om chih thei ding uhi. 47 Tangtawn Toupa'n namsau zangin hiam, teipi zangin hiam a hon dou kei chih hiaia omkhawmte khempeuh in a thei ding uh. Ahang bel, kidouna Tangtawn Toupa-a hi a, noute khempeuh koute khutsunga hon pekhe ding hiven, a chi hi. 48 Tua Filistia mipa'n David suai dinga hon naih semsem takin, David in kintakin kidouna phual zuanin Filistia mipa dou dingin a tai hi. 49 A kawlzal sung a sawk a, suangtang khat a lakhia a, a suanglotkhaua thuahin, tua Filistia mipa' lutang ah a deng hi. Tua suangtang a taltang ah a lut a, leilak ah a khuplamin a puuk hi. 50 Tua bangin David in suanglotkhau khat leh suangtang khatin Filistia mipa a zou hi. A khuta namsau tawi louin, Filistia mipa a phukpai a, a thatta hi. David a va taai a, a dinkhum a, Filistia mipa' namsau lenin a paai apan a phawikhia a, amah thatin a lutang a tankhia hi. Filistiate'n a mi hangsanpa uh a sita chih a mu uh a, kilehheiin a taita uhi. 52 Israel mite leh Judah mite'n awng zuazua kawmin mailam a delh uh a, Gath lutna leh Ekron kongpite dongin Filistiate a delh uhi. Gath leh Ekron zotna, Shaaraim lampi dung ah Filistiate a si leh liamte a kithehzak uhi. 53 Israelte'n Filistiate delh a kilehkiik takun, Filistiate' giahphual a lok uhi. 54 David in tua Filistia mipa' lutang a la a, Jerusalem ah hon pua a, Filistia mipa' galvante ama' puanbuk ah a koih hi. 55 Saul in tua banga Filistia mipa suai dinga David kuan a et lai mah in, sepaihhon makaipa Abner kiang ah: Abner, tua tangvalpa kua tapa ahia? a chi hi. Abner in a dawng a: Kumpipa aw, na hinna sialin ka gen ahi, ka thei kei, a chi hi. 56 Kumpipa'n: Hiai tangvalpa kua' tapa hi hiam, kankhia in, a chi hi. 57 David, Filistia mipa a thahna apan hong kilehkik phetin, Abner in a tonpih a, David in Filistia mipa' lutang tawi kawmin Saul' mai ah a paipih hi. 58 Saul in: Tangvalpa, kua' tapa na hia? chi-in amah a dong hi. David in: Bethlehem khua-a na silapa Jese' tapa ka hi, a chi hi.
Saul in David Haza
1 David in Saul kianga thu a gen khitin, Jonathan bel David tawh lungsim munkhatin hong om a, amah a ki-it bangin David a it hi. 2 Tua ni apanin Saul in amah kiang ah David a omsak a, a pa' inn ah a kiiksak nawn kei hi. Jonathan in amah a ki-it banga David a it manin, David tawh kal ah thukhun khat a bawl hi. Jonathan in a silh lai kumpipuan a suahkhia a, a puanaktual tawh David a pia a, a namsau, a thalphel leh a kawnggak zong pia hi. 5 Saul in sep ding a got peuhmah David in piltakin a hih zel a, Saul in sepaihhon lak ah dinmun sang a pia hi. Hiai in mipite khempeuh a kipaksak a, Saul' silate zong a kipaksak hi. 6 David in tua Filistia mipa a thah khita, mite galphual apan inn lama hong kilehkiik takun, Israel gam khawpite khempeuh apan numeite Saul muak dingin hong kuan uh a, amah muakin lungnop late, khuangte leh tamngaite thuaha la sain a lam uhi. 7 Lam kawmin la a sa uh a: Saul in a sang a sanga that a, David in sangsawm sawm-a that hi, a chi uhi. 8 Saul in bel hiai a lasak uh a zadah a, a heh mahmah hi. Ama'n: David bel sangsawm sawma that chi-a pahtawina pia uh a, kei lah asang asanga that hon chih lei uh, kumpigam lou a dang tan bang a nei tuan nawn dia? chi-in a ngaihtuah hi. 9 Tua hun apanin Saul in hazatna mitin David a enta hi. 10 A zingchiangin Pathian apan kha gilou thakhatin Saul tung ah hong tung hi. David in a hih ngeina bangin kaihging a tum a, tua sungin, Saul in a inn sung ah kamsang thugen a gen hi. Saul in a khuta teipi tawi hiven, na lungsim a: David baang tawh kilhden ning, chi-in David a khawhta mai hi. Ahihhangin, David in nihvei amah a kihepsan hi. 1 Tangtawn Toupa'n David ompih a, Saul a nutsiattak manin, Saul in David a lau hi. 13 Tuachi-in, amah kiang apan David a sawlmang a, sepaih 1000 tunga makaiin a koih a, David in tua sepaihte galdouna ah a makaih hi. 14 Tangtawn Toupa'n amah a ompih manin, a hih khempeuh ah piltakin a hih hi. 15 David piltakin a gamta chih Saul in a muh takin amah a lauta hi. 16 Ahihhangin, Israelte leh Judahte khempeuh galdounate-a makaih ahih manin, amaute'n David a it uhi. 17 Saul in David kiang ah: Hiai ah ka tanu uzaw Merab om hi. Amah na zi dinga hon pe ding hi'ng, hangsantakin ka na sem inla, Tangtawn Toupa' kidounate hattakin dou in, a chi hi. Ahang bel, Saul in a lungsima: Ama' tung ah khut kha kei ning. Filistiate'n kha hen aw! a chih man ahi. 18 Ahihhangin, David in Saul kiang ah: Kei kua ka hia? Israelte lak ah ka innkawte leh ka pa' behte kua ahi ua, kei kumpipa' makpa k'ong hih tel ding? a chi hi. 19 Tuachi-in, David adinga Saul' tanu Merab piak hun hong tun takin, Mehola' mi Adriel a zi dinga piakin a om zawta hi. 20 Saul' tanu Mikhal in bel David a it a, tua thu Saul a hilh takun Saul a kipak hi. 21 Saul in a lungsimin: David adinga ka tanu thaang antah ahih a, Filistiate' khut a thuak theih nadingin, amah David pia ning e, chi-in a ngaihtuah hi. Tuachi-in, Saul in David kiang ah: Ka makpa na hih theih nading hunlem a nihveina tuin nei chia, a chi hi. 22 Tua khitin, Saul in a nasemte thu a pia a: A simin David houpih unla: Ngai dih, kumpipa'n nang hon paakta a, a nasemte khempeuh in lah nang hon paakta uh a, tu'n a makpa-in om ve, chi un, a chi hi. 2 Hiai thute David kiang ah a gentuan zihzeh uh a, ahihhangin, David in: Kumpipa' makpa-a om ding thil namaiin na ngaihtuah ua hia? Kei mizawng leh theih tham louh ka hi, a chi hi. 24 Saul silate'n David' thugen Saul a hilh takun, 25 Saul in a dawng a, David kiang ah: Kumpipa'n a melmate phuba lak nadinga Filistiate zekmukvun 100 loungal, mou man ding thil dang a deih kei, chi-in hilh un, a chi hi. Saul thilgel bel, Filistiate khuta David puksak ding ahi mawk hi. Saul' nasemte'n hiai thilte David a hilh takun, kumpipa' makpa a hih ding a kipahlam ahita hi. Tuachi-in, hun seh a bei main, 27 David leh a mite a kuankhia uh a Filistiate 200 a va that uhi. Ama'n a zekmukvunte uh hon pua a, kumpipa' makpa a hih theih nadingin a kiang ah a kim sipsipin a peta hi. Tuachi-in, kumpipa'n a tanu Mikhal a zi dingin a peta hi. 28 Saul in, Tangtawn Toupa'n David a ompih a, a tanu Mikhal in lah amah a it, chih a phawktakin, 29 David a lau semsem a, a damsung teng a meima a hiden den hi. Filistia sepaih makaite'n gal a dou lailai uh a, tua banga a pan tengun, Saul' sila dangte sangin David a pilvang zaw a, a lawhching zaw semsem a, a min a thangta hi.
Saul in David Thah Sawm
1 Saul in bel a tapa Jonathan leh ama' nasemte khempeuh David that dingin a hilh maimah hi. Ahihhangin, Saul' tapa Jonathan in David a deihthawh mahmah a, 2 David a hilhkhol a: Ka pa Saul in nang hon thah theih nading hunlem zong ahi. Zingchiang, zing sangin kiveng inla, va bumang inla, tua ah om in. 3 Kei ka va paikhe ding a, na omna gam ah ka pa kiang ah ka ding ding a, nang thu ka kikuppih ding a, ka muhkhiak dan kon hilh ding, a chi hi. Jonathan in a pa Saul kiang ah David a phat a, a kiang ah: Kumpipa'n a sila David tung ah khelhna hih ken aw, ama'n na tunga khelhna hih lou ahi. A thilhih nang adia hoih mahmah leh phatuam ahi zaw. 5 Tua Filistia mipa a thah laia ama' hinna lauhuai taka koih ahi. Tangtawn Toupa'n Israelte khempeuh adinga thupitaka vualzousak ahi. Tua mu chin a, kipak mahmah na hi. Tua bang ahih nung, banghanga a san beipi-a mawhna neilou David that a, a tunga khial mahmah ding na hia? a chi hi. 6 Saul in Jonathan' thugen a ngaikhia a, kichiamna a bawl a: Tangtawn Toupa' hinna sialin ka kichiam hi. David thahin a om kei ding, a chi hi. Tuachi-in, Jonathan in David a sam a, tua houlimna thute a hilh vek hi. Ama'n Saul kiang ah David a tonpih a, David zong a malama bangin Saul kiang ah a om hi. 8 Khatvei kidouna hong omkik a, David a kuan a, Filistiate a dou hi. Nakpitakin a maute a suai a, a mai ah a taikeekta uhi. 9 Ahihhangin, Saul a inna teipi tawia a tut laiin, Tangtawn Toupa apan kha gilou khat ama' tung ah hong tung hi. David in kaihging a tum laiin, 10 Saul in a teipi-a David baang tawh kilhden a tum a, ahihhangin Saul in baang a khawh laiin David in a kihepkhiak san hi. Tua zanin David a suakta hi. 11 Saul in David' inn taanga a zingsang chianga amah that dingin mi a sawl hi. Ahihhangin, David' zi Mikhal in amah ana hilhkhol a: Na hinna hu dinga tuzan na taai kei leh, zing chianga thaha om ding na hi, a chi hi. 12 Tuachi-in, Mikhal in tawhlet ah David a khaikhia a, David a taai a, a suakta hi. 13 Tua khitin, Mikhal in milim pathian khat a la a, lupna ah a sial a, puan a khuh a, a lutang zawn ah kelmul a koih hi. 14 Saul in David man dinga mi a sawl takin, Mikhal in: Amah china ahi, a na chi hi. 15 Tua khitin, Saul in David mu dingin tua mite a sawlkik a, amaute kiang ah: Amah ka thah theih nadingin a lupna tawh ka kiang ah hon la un, chi-in a hilh hi. 16 Ahihhangin, tua misawlte innsung a valut takun, ngai in, lupna ah tua milim pathian a na om a, a lutang zawn ah kelmul a na om hi. 17 Saul in Mikhal kiang ah: Banghanga hibanga hon khem a, ka melmapa a suahtak theih nadinga khamang na hia? a chi hi. Mikhal in: Ama'n: Hon taikhesak in, banghanga nang hon that ding ka hia? hon chi hiven, chi-in amah a hilh hi. 18 Tua banga David taimang a, a suahtaak khitin, Rama ah Samuel kiang ah a va hawh a, Saul in ama' tunga a thilhih khempeuh a hilh hi. Tua khitin, amah leh Samuel Naioth ah a hawh uh a, tua ah a taam uhi. 19 Ngai in, David, Rama-a Naioth ah a om, chih thu Saul kiang hong tung a, 20 Saul in David man dingin mi a sawl hi. Ahihhangin, tua a misawlte'n kamsang pawlkhat kamsang thugena om leh amaute laka Samuel a makai ua ding a muh takun, tua Saul' misawlte tung ah Pathian' Kha hong tung a, amaute'n zong kamsang thugenin thu a gen uhi. 21 Saul kiang ah tua thu hilhin a om a, ama'n mi tamsem a sawl a, tuate'n zong kamsang thugenin thu a gen uhi. Saul in a thumvei nadingin mi a sawl a, amaute'n zong kamsang thugenin thu a gen uhi. 22 A tawpin, amah mah Rama zuanin a kipankhia a, Seku tuikholna lianpi hong tung hi. Ama'n tua ah: Samuel leh David koia om ahi ua, chi-in a dong hi. Amaute'n: Ngai in, Rama-a Naioth ah om uh, a chi uhi. 23 Tuachi-in, Saul, Rama-a Naioth ah a hawh a, ahihhangin, ama' tung nangawn ah Pathian' Kha hong tung a, Rama-a Naioth a tun mateng kamsang thugenin thu gen kawmkawmin a pai hi. 24 A kumpipuan a suahkhia a, Samuel' mai ah kamsang thugenin thu a gen hi. Tua bangin sun nitum leh zan khawvakin a om hi. Hiai hang ahi mite'n: Saul zong kamsangte laka kihel ahita maw? a chih uh.
David leh Jonathan
1 Tua khitin, David bel Rama-a Naioth apan a taai a, Jonathan kiang ah a hawh a: Ke'n bang ka hih-a ahia? Ke'n bang hihkhelh ka neia ahia? Na pa' tung ah bang khelhna ka hiha ahia, ka hinna laak a sawm mawk? a chi hi. Jonathan in a dawng a: Na hinna la ngei peuhmah lou e! Si lou ding na hi! Ngai dih, ka pa'n kei hon theisak lou a, a neu hi-in a lian hita leh bangmah hih lou ahi. Na hinna lak sawm hileh kei hon iim dia hia? Hon iim lou ding hi, a chi hi. 3 Ahihhangin, David a kichiam a: Na mitmuhin deihsakna ka tang chih na pa'n thei mahmah a, a lungsim a: Jonathan in hiai a theih ding hi peuhmah lou ahi, tua chilou-a zaw dah kha ding ahi, chi-a ngaihtuah ahi. Hinapi-in Tangtawn Toupa' hinna leh nangma' hinna sialin ka gen ahi: Kei leh sihna kala kal khat lelin hon hal ahi, a chi hi. Jonathan in David kiang ah: Kei hih dinga na deih peuhmah nang adinga hih ding ka hi, a chi hi. 5 Tuachi-in, David in Jonathan kiang ah: Ngai dih, zing chiang Khathak Ankuanglui ni ahi a, kumpipa tawh ankuang ka umkhawm ding theihsa a seh ahi. Ahihhangin, ka pai ding a, thai chiang nitaklam dong gamlak ah ka va bu ding. 6 Na pa'n ka omlouh phamawhsa a hon kan himhim leh, na pa kiang ah: David zaw ama' pianna khua Bethlehem a amau' behte khempeuh adinga kumsim kithoihna-a pang dinga a delh theih nading ka kianga phalna hon ngen ahi, na chi ding ahi. 7 Ama'n: Hoih e, a chih leh na silapa khamuang ka hi ding. Aheh leh bel, ama'n ka siatna zong tinten ahi, chih na theihtelna ahi ding. 8 Nang zaw, na silapa tung ah chitna siamna suah in. Ahang bel, nang Tangtawn Toupa' maia amah tawh kala thukhun bawlsakta hive chin. Ka mawh leh bel, nangmah mah in hon that in! Banghanga na pa' khutsunga hon pelut ding na hia oi? a chi hi. Jonathan in: Pelut ngei peuhmah lou e! Ka pa'n nang hon hihsiat sawm ahi, chih muanmawhna nei liai leng, hong paia hon hilh tawklou ding ka hi a-maw? a chi hi. 10 David in: Na pa'n khauhtakin nang hon dawng leh, kei kua'n hon hilhta dia le? a chi hi. nJonathan in: Hong pai in, gamlak ah hawh ni, a chi a, gamlak ah a paikhe khawm uhi. 12 Tua ah Jonathan in David kiang ah: Tangtawn Toupa, Israel Pathian hon theihpihpa hi hen aw! Nithum ni tubang hunin ka pa apan ka kankhe ding! Nang lama a tup ngaikhiaiin, a hoih leh, thu hon khak a, hon theisak lou ding ka hi a-maw? 13 Ahihhangin, ka pa'n nang hon hihsiat sawm ahih a, ken bittaka nang kon khakmang kei leh, Tangtawn Toupa'n kei a lawh lawh hon lawh henla, a sezaw zong hon lawh hen aw. Tangtawn Toupa'n ka pa a ompih bangin nang hon ompih hen aw. 14 Ahihhangin, kei thah-a ka om louh nadingin ka dam sung teng, Tangtawn Toupa' chitna siamna bangbang hon musak inla, 15 David' melmate peuhmah leitung maikaih apan satkhiaka a om chiang nangawnin, ka innkawte apan na chitna siamna beisak ken aw, a chi hi. 16 Tuachi-in, Jonathan in David' innkawte tawh kal ah thukhun a bawl a: Tangtawn Toupa'n David' melmate thuk hen, a chi hi. 17 Tua ban ah Jonathan in David a it manin, David' kichiamna mah David a kipsakthak hi. Ahang bel, ama'n amah a ki-it banga David it hiven. 18 Tua khitin, Jonathan in David kiang ah: Zing chiang Khathak Ankuanglui ni ahi. Na tutna vuak ding hi a, na omlouh kilang ngeingei ding ahi. 19 Zinghal chiangin, nitaklamin hiai buaina a kipat laia na bukna mun ah pai inla, Ezel suang kiang ah na ngak in. 20 Muitum bangin tua suang kiang ah thaltang thum kon kapkhe ding. 21 Tua khit chiangin, naupang khat kon sawl ding a: Va kuan inla, thaltangte va tawm in, ka chi ding. En in, nang apan hiai lam pang ah thaltangte om ahi, hiai ah hon tawi in, nakpitaka ka chih leh, hong paikhia in. Ahang bel, Tangtawn Toupa' hinna sialin ka gen ahi: Na bit a, lauhuai bangmah a om kei, chihna hi ding ahi. 22 Ahihhangin, naupangpa kianga: En in, thaltangte na khenlama om ahi, ka chih leh bel, Tangtawn Toupa'n hon sawlkhia ahi, chihna hi ding ahi a, na paimang ding ahi. 23 Nang leh ken i kikup thu ahih leh, Tangtawn Toupa mah nang leh kei kala theihpihpa ahi. Thei gige in aw, a chi hi. 24 Tuachi-in, David bel gampalak ah a bu a, Khathak Ankuanglui hun hong tun takin, kumpipa an umin a tu hi. 25 Baang kianga a tutna gige ah, Jonathan a ding a, Abner bel Saul tawh kizomin a tu a, David tutna bel a awng hi. 26 Saul in tua ni-in bangmah a gen kei hi. David a siangloua ngaih theihna dinga a tunga banghiam tung a, sianglou hi ngeingei ding hi, chi-in a ngaihtuah hi. 27 Ahihhangin, a zing chiang, tua kha a ninih ni-in, David' tutna mun a awng zel hi. Saul in a tapa Jonathan kiang ah: Banghanga Jese' tapa ankuang um dinga zanni zong, tuni zong hong pai lou ahia? a chi hi. 28 Jonathan in a dawng a: David in Bethlehem a hawh dinga phalna nakpitaka ka kianga hon ngen ahi. 2 Ama'n: Ka innkawte'n tua khua-a kithoihna nei a, ka sanggampa'n tua muna hawh dia thu hon pia ahih chiangin, hon hawhsak in. Na mitmuha deihsakna ka tan leh ka sanggamte va mu dingin hon paisak in, chi ahi. Hiai hang ahi, kumpipa ankuang um dinga hong pai louh, a chi hi. Jonathan tunga Saul' hehna a kuang a, a kiang ah: Nang numei tatsia leh helhat numei' tapa! Nang zahlak nading leh nang hon nei nu' zahlak nadinga Jese' tapa lama pang na hi, chih ka theih louh sa na hi hia? 31 Hiai leitunga Jese' tapa a nuntak sung teng nang leh na kumpigam ding lou ding na hi uh. Amah samsak inla, ka kiang ah hon paipih in, a sih teitei ding ahi! a chi hi. Jonathan in a pa kiang ah: Banghanga amah thaha om ding ahia? Bang a hih-a ahia? chi-in a dong hi. 33 Ahihhangin, Saul in amah thah sawmin a teipi-in a khawh hi. Tua phetin, Saul in David thah sawm taktak ahi, chih a theita hi. 34 Jonathan zong heh mahmahin ankuang apan a dingkhia hi. A pa'n David a bawl dan zumhuaipi hanga a dah mahmah manin, tua kha a ni nih ni-in an a ne kei hi. 35 A zingchiang zingsangin, David tawh kimu dingin gampalak ah Jonathan a paikhia hi. Pasal naupang nou khat a tonpih a, 36 tua naupangpa kiang ah: Va taai inla, ka thai kapkhiakte va tawm in, a chi hi. Naupangpa a va taai laiin amah khenlam ah thaltang khat a kapkhia hi. 37 Jonathan' thaltang kiakna muna naupangpa a tun takin, Jonathan in a galsap a: Thaltang na khenlama om lou hia? a chi hi. 38 Tua khitin a kikou a: Kinawh in! Kintakin pai in! Khawl ken! a chi hi. Naupangpa'n a thaltang a tawm a, a toupa kiang ah a kilehkik hi. 39 Naupangpa'n bel hiai thilte theih a nei kei a, Jonathan leh David kia in a thei uhi. 40 Tua khitin, Jonathan in a thai leh atang naupangpa a pia a: Pai inla, khawpi ah pawlut in, a chi hi. 41 Naupangpa a pai khit takin tua suang simlam apan David a dingkhia a, Jonathan' mai ah, lei si-in thumvei a kuun hi. Tua khitin a kitawp uh a, a kapkhawm uh a, David a nakkah zaw hi. 42 Jonathan in David kiang ah: Lungmuangtakin pai in. Tangtawn Toupa' mina kichiama lawma kibawl hang a: Nang leh kei kal ah, na chisuante leh ka chisuante kal ah Tangtawn Toupa theihpihpa hiden hi, chita i hi, a chi hi. Tua khitin David a paikhia a, Jonathan zong khawpi ah a chiahkikta hi.
Nob-a David
1 David bel Nob ah, siampi Ahimelekh kiang ah a hawh hi. Ahimelekh in amah a na tuah laiin a liing a: Banghanga nang kia-a tang om na hia? Banghanga na kianga kuamah om lou ahiam? a chi hi. 2 David in siampi Ahimelekh a dawng a: Kumpipa'n hon sawlna khat a nei a, ka kiang ah: Hiai na hih ding leh hilh-a na omna kuama'n a theih louh ding ahi aw, hon chi ahi. Ka mite a hih leh, mun khata kei hon tuak dingin ka hilh ahi. 3 Tuabang ahih manin, tu'n na khut ah bang na nei a? Tanghou beu nga hon pia in. Ahih kei leh, na muh theih theih hon zonsak in, a chi hi. 4 Ahihhangin, tua siampi in David a dawng a: Tanghou a nautangte khut-a neihsa ka nei kei a, sehtuam siangthou tanghou pawlkhat bel a om, pasalte numei apan kikem siangthou a hih naak uleh, a chi hi. 5 David in a dawng a: Ka kuankhiak peuhpeuh chianga zaw, koute apan numeite nithum tan koihtuam hi uhi. Sep ding bawl dingte a siangthou lou ahih chiang nangawna, pasalte thil neihte siangthou ahi. Tuni-in houh siangthou sem na mai unchia! a chi hi. 6 Tuachi-in, Tangtawn Toupa' mai apan kilakhia Pathian' Ompihna tanghou chih louh tanghou dang om lou ahih manin, tua siampi in sehtuam siangthou tanghou a pia a, tua tanghou a kilakkhiak ni-a a khek nading tanghou lumlaitein a khek hi. 7 Tua ni-in, Saul' nasemte khat tua mun ah a om a, Tangtawn Toupa' maia omsak takdih mah ahi. Amah Edom mi Doeg ahi a, Saul' belamching makai ahi. 8 David in Ahimelekh kiang ah: Teipi hiam, namsau hiam nei lou maw? Kumpipa' nna kinawh lua ahih mana ke'n ka namsau hiam, galvan dang himhim zong hon keng lou ka hi, a chi hi. 9 Tua siampi in a dawng a: Ela Phaizanga na thahpa, tua Filistia mipa Goliath' namsau hiai ah a om. Siampi puanak kal ah, puana kitunin a om, na deih leh la in. Tua loungal namsau dang om lou ahi, a chi hi. David in: Tua bang kaan om ding hiam, hon pia in, a chi hi.
Gath-a David
10 Tua ni-in, David bel Saul apan a taai a, Gath kumpipa Akhish kiang ah a hawh hi. 1 Ahihhangin, Akhish' silate'n amah kiang ah: Hiai mi a gam kumpipa David hi lou ahi maw? Laama a tungthu la-a a sak ua: Saul in a sang sanga that, David in sangsawm sawma that hi, a chihpa uh amah hilou maw? a chi uhi. 12 David in hiai thute a lungsung ah a koih a, Gath kumpipa Akhish a lau mahmahta hi. 13 Tuachi-in, amaute' mai ah a kihaisak a, amaute khutsunga a om sung teng mihai a kineih a, kongpi kongkhak khawng a gelh gial a, a khamulte khawng ah a chiltui a kaaisak hi. 14 Akhish in a silate kiang ah: Hua mipa en dih uh! A hai ahi! Banghanga ka kianga hon pii na hi ua? 5 Mihai ka tasam-a hia, ka maia hibanga om dinga non pii uh? Hibang mi ka innsung ah hong lut tel dia hia? a chi hi.
Adulam leh Mizpa-a David
1 David in Gath a nusia a, Adulam-a kawkhuk tungin a suakta hi. A sanggamte leh a pa' innkawte'n a thu a zak takun, tua ah a kiang ah a va-hawhsuk uhi. 2 Mangbang mite khempeuh leh leiba neite leh lungkimloute amah kiang ah hong paikhawm uh a, amaute' makaiin a pangta hi. Tua banga paikhawm mi 400 khawng in amah a zui uhi. 3 Tua apanin Moab gama Mizpa ah David a pai a, Moab kumpipa kiang ah: Pathian in kei adinga bang hon hihsak ding hiam, chih ka theih mateng, ka nu leh ka pa na kiang ah hong hawh phal inla, taamsak tadih ve aw, a chi hi. 4 Tuachi-in, Moab kumpipa kiang ah amaute a nusia a, amah bukna muanhuai sunga a om sung teng kumpipa kiang ah a om uhi. 5 Ahihhangin, kamsang Gad in David kiang ah: Bukna muanhuai sung ah om kenla, Judah gam ah pai in, a chi hi. Tuachi-in, David a paikhia a, Hereth gammaang ah a lut hi.
Saul in Nob Siampite That
6 Saul in David leh a mite kimukheta chih a za hi. Amah Gibea ah mualtung khata tengtere kung nuai ah, a khuta teipi tawiin a tu a, a silate khempeuh a kimkot ah a ding uhi. 7 Saul in amaute kiang ah: Benjamin' mite aw, ngai un. Jese' tapa in noute khempeuh ante leh grephuante hon pe ding hia? Noute khempeuh 1,000 pawlpawlte' makaite leh 100 pawlpawlte' makaite-a hon bawlvek ding hia? 8 Tua banga noute khempeuh in kei a sima hon sawm na hi umaw? Ka tapa in Jese' tapa tawh kala thukhun a bawl kuama'n non hilh kei uh a, kuama'n kei non khawtuah kei uh. Ka tapa in tuni-a ka silapa kei hon taang dinga a hasot lam kuama'n non hilh kei uh, a chi hi. 9 Ahihhangin, tua Edom mi Doeg, Saul' silate tawh dingkhawmpa'n: Nob khua-a Ahitub' tapa Ahimelekh kianga Jese' tapa a hawh lai ke'n ka mu. 10 Ahimelekh in amah adingin Pathian thu a dotsak a, nek leh tak zong a pia a, Filistia mipa Goliath' namsau zong a pia hi, a chi hi. 11 Tua khitin, kumpipa'n Ahitub' tapa siampi Ahimelekh leh Nob khua-a siampi-a pang a pa' inkawte khempeuh a samsak a, a vekun kumpipa kiang ah hong hawh uhi. 12 Saul in: Ahitub' tapa aw, tu'n ngaikhia in, a chi hi. Ama'n a dawng a: Toupa aw, hiai ah ka om, a chi hi. 13 Saul in amah kiang ah: Banghanga kei hon sim sawm vial na hia? Nang leh Jese' tapa in non sawm uh. Amah tanghou leh namsau na pia a, amah adingin Pathian thu na dotsak a, ka tung ah a hel a, tuni-a bangin kei hon taangta ve, a chi hi. 14 Ahimelekh in kumpipa a dawng a: Na silate khempeuh lak ah David banga nang adinga muanhuai kua ahia om? Amah na makpapa hi a, nang hon veng makai hi a, na innkawte laka nakpitaka zahtakna ngah hilou maw? I5 Tua ni-a amah adinga Pathian thu ka dotsak, ka dotsak masakna ahi-a hia? Hi peuhmah lou! Kumipa'n na silapa hita leh a pa' innkawte khatpeuh hita leh ngawhna nei het ken. Ahang bel, na silapa'n hiai thu bangmah theih neilou ahi, a chi hi. 16 Ahihhangin, kumpipa'n: Ahimelekh, na si ngeingei ding hi, nang leh na pa' innkawte khempeuh na si ding uh, a chi hi. Tua khitin, kumpipa'n a kianga amah vengte thu a pia a: Tangtawn Toupa' siampite zong David lama pang ahih manun kihei unla, tua Tangtawn Toupa' siampite that un. David taikhia ahi, chih amaute'n thei napi-a kei hon hilh lou uh ahi, a chi hi. Ahihhangin, Tangtawn Toupa' siampite tunga khut khak ding kumpipa' silate a ut kei uhi. 18 Tua bang ahih takin, kumpipa'n Doeg thu a pia a: Kihei inla, siampite satpai in, a chi hi. Tua ni-in, puanmalngata kibawl siampi puanak silh mi 85 a that hi. 19 Tua siampite' khawpi Nob zong, a sunga pasalte, numeite, naupangte leh naungekte, bawnghonte, sabiltungte leh belamte nangawn tawh namsauin a satlum hi. 20 Ahihhangin, Ahimelekh' tapa Abiathar a suakta a, David pawla pang dingin a taai hi. Ahimelekh bel Ahitub' tapa ahi. 21 Saul in Tangtawn Toupa' siampite a that chih Abiathar in David a hilh hi. 22 David in Abiathar kiang ah: Tua ni-a tua Edom mi' Doeg, tua laia om ka muh taka, Saul hilh ngeingei inteh, chih ka theihsa ahi a, na pa' innkawte khempeuh kei hanga si uh ahita. 23 Kei kiang ah om in, lau ken. Na hinna lak sawmpa'n kei hinna zong lak sawm ahi. Kei kianga bit ding na hi, a chi hi.
David in Keiia Humbit
1 Ngai dih, Filistiate'n Keila khua sim uh a, buhphuala buhte la uh ahi, chi-a David a hilh takun, 2 ama'n Tangtawn Toupa a dong a: Kuanin Filistiate ka dou diam? a chi hi. Tangtawn Toupa'n a dawng a: Kuan inla, Filistiate dou in. Keila khua hukhia in, a chi hi. 3 Ahihhangin, David' mite'n a kiang ah: Hiai Judah gam nangawna lau hang a, Filistia sepaihte dou dingin Keila ah kuansuk lehang lau sem lou ding i hi maw! a chi uhi. 4 David in Tangtawn Toupa a dong kik a, Tangtawn Toupa'n a dawng a: Keila ah kuansuk in, Filistiate na khut sunga hon pe ding ka hi, a chi hi. 5 Tuachi-in, David leh a mite Keila ah a kuansuk uh a, Filistiate a dou uh a, a gantate uh a pawmang uhi. Filistiate nakpitaka manna a thuaksak uh a, Keila khawmite a hukhia uhi.6 Ahimelekh' tapa Abiathar in Keila-a David kianga hong taai laiin, siampi puanak hon pawsuk hi.
Saul in David Delh
7 Keila-a David hawhsuk ahi, chih Saul' a hilh takun, ama'n: Pathian in amah ka khut sunga hon pekhia ahita ve, tua khawpi kongpite leh a kaihna zawlte neia va lut a, va kikoltangsak hita ven, a chi hi. 8 Tuachi-in, a mite khempeuh galdou dingin a samkhawm a, Keila-a kuansuk a, David leh a mite va umchip dingin a sawl hi. 9 David in amah siat nading Saul in a sawmna thu a theih takin, siampi Abiathar kiang ah: Tua siampi puanak hon la in, a chi hi. 10 David in: Tangtawn Toupa, Israel Pathian aw, Saul in keima hanga Keila-a kuansuka, tua khua hihsiat sawm ahi, chih na silapa'n ka theichian hi. uKeila mite'n ama' khut sunga kei hon pekhe ding uhia? Na silapa'n ka zak banga Saul hong kuansuk ding hia? Tangtawn Toupa, Israel Pathian aw, na silapa hon hilh in, a chi hi. Tangtawn Toupa'n: Hong kuansuk mah inteh, a chi hi. 12 David in a dong kik a: Keila khawmite'n Saul khut ah kei leh ka mite hon pekhe ding uam? a chi hi. Tangtawn Toupa'n: Hon pekhe mah unteh, a chi hi. 13 Tuachi-in David leh a mi 600 khawng phate'n Keila a nusia uh a, mun tuamtuam ah a pai kawikawi uhi. Keila apan David a suaktata chih Saul a hilh takun, Saul bel Keila ah a hawhsuk nawn kei hi. 14 David bel gamdai-gamkeua mun muanhuai ah leh Zif gamdai-gamkeua mualtung khawng ah a taam hi. Nisimin Saul in amah a zong a, ahihhangin Pathian in Saul khut ah amah a pekhe kei hi. 15 Zif Gamdai-gamkeua Horesh muna David a om laiin, a hinna la dingin Saul hong kuan, chih a na mu hi. Tua Horesh mun ah Saul' tapa Jonathan, David kiang ah hong hawh a, Pathian-a thahatna mu dingin amah a huh hi. 17 Ama'n: Lau ken. Ka pa Saul in nang hon mu lou ding ahi. Israel tunga kumpipa-a pang ding na hi. Kei zong nang zoma na nuaia om ding ka hi. Ka pa Saul nangawn in hiai thei ahi, a chi hi. 18 Amau gel in Tangtawn Toupa mai ah thukhun khat a bawl uh a, tua khitin, Jonathan, inn ah a chiahkik a, ahihhangin, David bel Horesh ah a taam hi. 19 Zifte Gibea ah Saul kiang ah a va hawh uh a: Jeshimon simlama Hakila muala Horesh mun muanhuai khawnga koute laka David bu hi lou maw? 20 Kumpipa aw, nong paisuk nop peuhpeuh chiangin hong paisuk inla, kumpipa khuta David piakkhiak ding koute mawhpuak hi hen, a chi uhi. 21 Saul in a dawng a: Kei non khawtuahna uh hangin Tangtawn Toupa'n noute hon vualzawl hen aw. 22 Pai unla, na kisakhol un. David koia hawh sek a, tua-a amah kua'n mu hiam, chihte kankhia un. Amah zaw pilkhel mahmah ahi, chih mi'n hon hilh ahi. 23 A bukna sekte khempeuh zongkhia unla, thu kitel hilh dingin hong pai kik un. Tua khit chiangin noute kon zui ding. Tua gam sunga om ahih nak leh ke'n Judah behte khempeuh lak ah amah ka zong khe na ding, a chi hi. 24 Tuachi-in, amaute a kipankhia uh a, Saul main Zif ah a hawh uhi. David leh a mite bel Araba-a Maon Gamdai-gamkeu ah a om uhi. Tua mun bel Jashimon simlama om ahi. 25 Saul leh a mite'n amah a zong panta uh a, tua thu David kianga a kihilh takin, tua suangpi ah a paisuk a, Maon Gamdai-gamkeu ah a om hi. Saul in hiai thu a zak takin, David delhin Maon Gamdai-gamkeu ah a paisuk hi. 26 Saul bel mual khat zuiin a pai a, David leh a mite bel lehlam pang ah, Saul apan taaimang dingin kinawhtakin a om uhi. Saul leh a sepaihte'n David leh a mite man dinga a delhphak dek takun, 27 Saul kiang ah thangkou khat hong taai a: Kintakin hong pai in! Filistiate'n gam hong dou uh ahi, hong chi hi. Tuachi-in, Saul in David delh a khawlsan a, Filistiate tuak dingin a kuan hi. Hiai hang ahi, hiai mun min dinga Sela Hamalekoth a phuah uh. 29 David zong tua apan a paikhetou a, En Gedi kawkhuk khawng ah a om hi.
David in Saul' Hinna Hawisak
1 Saul, Filistiate delh hong kik takin: David zaw En Gedi Gamdai-gamkeua om ahi, chi-a hilhin a om hi. 2 Tuachi-in, Saul in Israelte mi teeltuam 3,000 pi-in Sakelte' Kawlhengte kichi kianga David leh a mite zong dingin hong kuan hi. 3 Lampi-a belamchingte lak hong tung a, tua ah kawlbuk khat a om a, tua sunga khawl tawlnga dingin Saul a va lut hi. Tua sung tawng ah David leh a mite a na om uhi. 4 A mite'n amah kiang ah: Tangtawn Toupa'n na kianga: Ngai in, na meima na ut uta na bawl dingin na khut ah kon pe ding, a chih, tuni ding gen ahi ve, a chi uhi. David bel a va bokvaktou khial khial a, Saul kumpipuan mong a va atkhia hi. 5 Tua nungin, Saul' kumpipuan mong a atkhiak manin David' sia-le-pha theihna a na hi. 6 A mite kiang ah: Ka heutupa, Tangtawn Toupa' thaunilhpa tunga hi banga ka hih louh ding hi a, ahih kei leh a tunga khut ka khak louh ding ahi. Ahang bel, amah Tangtawn Toupa' thaunilh hiven, a chi hi. 7 David in hiai thutein a mite a taihilh a, Saul a sual ding uh a khaam hi. Tua bangin, Saul in tua kawlbuk nusiain maban a sawnta hi. 8 Tua khitin, David zong tua kawlbuk apan a paikhia a, Saul a galsap a: Kumpipa ka toupa aw! a chi hi. Saul in kinungheia a et leh David a maia lei si-in a boksuk hi. 9 Saul kiang ah: David in hon suksiat sawm ahi, chi-a mi'n na kianga a gen uh, banghanga taksanga ngaikhia na hia? Tuni-a Tangtawn Toupa'n kawlbuk sunga nang ka khuta hon piakkhiak dan na mitin na muta. Pawlkhatte'n zaw nang that mai dinga hon hasuan uh hi a, hinapi-a hon hinghawi ka hi aw. Ke'n: Ka toupa zaw Tangtawn Toupa' thaunilh hi a, a tunga ka khut kha lou ding ka hi, chi ka hi. uPa aw, en dih ve, ka khuta ka tawi na kumpipuan them hiai! Na kumpipuan mong atkhia ing a, nang hon that lou ka hi. Thil gilou hih hiam, hel hiama khial lou ka hi, chih tuin thei inla, pom in aw. Na tunga khial lou ka hi, hinapi-a nang ka hinna lak sawma hon delh delh na hi. 12 Tangtawn Toupa'n nang leh kei kal thu khen hen. Tangtawn Toupa'n ka tunga na khelhna phuba la hen. Ken zaw hon khoih lou ding hi'ng. 13 Paunak upa khat in: Migiloute apan thilhih gilou a pawt, a chih bangin, ke'n zaw na tunga khut kha lou ding hi'ng. Kua dou dinga Israel kumpipa hong kuankhia eita? Kua delh na hia leh? Uipul maw, uihik maw na delh? 15 I kal ah Tangtawn Toupa'n thu khen henla, i kal ah thutanna bawl hen. Ama'n ka hihna theiin hon ompih hen. Ama'n na khut apan hon hukhiain ka dikna langsak hen, a chi hi. 16 David in Saul kianga thute a gen khitin, Saul in: David, ka tapa aw, tua nang aw ahi maw? a chi a, aw suahin a kapkhia hi. 17 Ama'n: Kei sangin diktat zaw chia. Ka tung ah siam mahmah chia. Kei zaw na tung ah siam kei lua ing. 18 Ka tunga thil hoih na hih tumah mahin non hilh a, Tangtawn Toupa'n na khut ah kei hon pekhia a, hinapi-in non that kei. 19 Mi'n a meima a tuah chianga bangmah lawh lou-a suaktasak ngei hia? Tuni-a ka tunga na siamna bangbangin Tangtawn Toupa'n nang hon pethuk hen aw. 20 Kumpipa nong hi ngeingei ding a, Israel kumpigam na khut ah a kip ding chih ka thei hi. 21 Tua hun chiangin, ka suan ka khakte na satkhe kei ding a, ka innkawte apan ka min na thaimang kei ding chih, Tangtawn Toupa' min sialin tuni-in ka kiang ah kichiam in, a chi hi. 22 Tuachi-in, David in Saul kiang ah, kichiamna a bawl hi. Tua khitin, Saul inn ah a chiahta a, David leh a mite bel mun muanhuai ah a paitou uhi.
David, Nabal leh Abigail
1 Samuel a sita a, Israelte khempeuh hong kikaikhawm uh a, amah a suun uhi. Tua khitin, Rama-a ama' inn ah a vuita uhi. Tua khitin, David bel Paran Gamdai-gamkeu ah a paisuk hi. 2 Tua ah, mi khat Karmela nasem a om a, amah ahau mahmah mi khat ahi. Kei 1,000 leh belam 3,000 a nei a, Karmel ah tuate mul a met hi. 3 Tua mipa' min Nabal ahi a, a zi' min Abigail ahi. Abigail bel piltak, melhoihtak ahi. Ahihhangin, a pasal bel, Kaleb' suan, maigumtak leh a thilhiha gilou, lungsim neu leh genhaktak ahi. 4 Tua gamdai-gamkeua David a om laiin, Nabal in belam mul a met chih thu a za hi. 5 Tuachi-in, tangval sawmkhat a sawl a, amaute kiang ah: Karmela Nabal kiang ah va hawhtou unla, ka minin chibai va buk unla, 6 amah kiang ah: Damsawt in! Nang leh na inkuante leh na neihte khempeuh tung ah chidamna om hen! 7 Na belam mulmet lai ahi, chih ka na za hi. Na belamchingte koute kianga a om laiun, amaute ka mawkbawl het kei uh. Amaute Karmela a om sung teng uh, amaute-a bangmah a mang kei. 8 Na silate dong mah lechin hon hilh ding uh. Tua bang ahih manin, ankuanglui huna hawng hawh ka hih manun, ka tangvalte na deihsak inla, hehpihtakin na sila koute leh na tapa David ading na muh theih theih hon pia in, chi un, a chi hi. 9 David' mite hong tun takun, David minin hiai thukhah Nabal kiang ah a pia uh a, a ngak uhi. 10 Nabal in David' silate a dawng a: Kua ahia hiai David? Kua ahia hiai Jese' tapa? Tulaia sila tampite a toute uapan taimang uhi. 1 Ka tanghoute leh ka tuite, ka belam mulmette adinga ka gawh sate, banghanga, koia hong kuan ahi ua chih nangawn theihlouhte kianga pe mahmah ding ka hia? a chi hi. 12 David' mite a kihei uh a, a chiahkikta uhi. Hong tun takun, tua thute a gensawn sipsip uhi. 13 David in a mite kiang ah: Na namsaute uh kuah un! a chi hi. Tuachi-in, a namsaute uh a kuah uh a, David in zong a namsau a kuah hi. Mi 400 in David a zuitou uh a, 200 in vante a veng uhi. 14 Nabal' silate khat in Nabal' zi Abigail kiang ah: Ngai in, David in ka toupa uh a chibaibukna pe dinga gamkeu-gamdai apan thupawte a hon sawl a, ahihhangin, ka toupa un amaute zaklaksakin a na enghou hi. 15 Hiai mite lah ka tung ua hoiha siam mahmah uh a, hon mawkbawl het lou uh a, amaute kianga gamlaka ka om sung teng uh bangmah mang lou ahi. 16 Amaute kiang naia belamte ka chin sung teng uh, sun leh zana ka kimkot ua baang hi mai uhi. 17 Tu'n hiai thu suut suut inla, ka toupa uh leh a innkawte khempeuh tunga tuahsiatna kikhai ahih chiangin, na hih theih bang om hiam zong in. Ka toupa uh zaw mannabei hi a, kuamah' houpih theih hilou ahi, a chi hi. 18 Abigail a kizekaisak het kei a, tanghou beu 200, zu savunthawl nih, belam semsa nga, buhtang kansa lawh nga tawh, grepgah keu tanghou beu 100 leh theipi keu tanghou beu 200 tawh, sabiltungte a suan a, 19 a silate kiang ah: Na pai masa unla, kon zui ding, a chi hi. Ahihhangin, a pasal Nabal bel a hilh kei hi. 20 Sabiltung tunga tuanga mual liaha hong pai laiin, David leh a mite hong paisuk uh a, Abigail in amaute a na tuak hi. 21 David in bel: Hiai mipa' neih leh lam gamdai-gamkeua ka vensak a, a neihsa bangmah a man louh bangmah phatuam kei. Ama'n thil hoih thil hoih loua hon din ahi maw. 22 Zingsang chiangin hiai mipa' neihsa khempeuh laka pasal khat lei zong a hinga ka nutsiat leh Pathian in David a ut ut hon lawh henla, a se zawsem zong hon lawh hen, a na chikhin hi. 23 Abigail in David a mu a, a sabiltung apan a kumkhe pah a, David' mai ah lei si-in a bok hi. 24 A khebula bokin: Ka toupa aw, mawhsakna kei tung tu hen. Hehpihtakin na silanu' thugen ding hon ngaihkhiaksak in. 2 Ka toupa'n mannabei Nabal ngaihsak ken. A min bangbang ahi. A min khiakna Mihai chih ahi a, haina in nungzuih ahi. Kei ka hih leh, ka toupa' misawlte ka mu kha keia ahi. 26 Tangtawn Toupa'n nang ka toupa, sisan suahna leh na khuta phulakna ding apan hon keem a, tu'n Tangtawn toupa' nuntakna leh nang' nuntakna sialin ka gen ahi. Na melmate leh ka pu hihsiat sawmte khempeuh Nabal bang uhen. 27 Tua baan ah, na silanu'n ka toupa adinga kon puak hiai thawnpiak, nang hon zui tangvalte kianga piak hi hen. 28 Hehpihtakin na sila' tatlekna hon ngaidam in. Tangtawn Toupa'n ka toupa adinga kumpigam omden ding bawlsak ngeingei ding hi, ahang bel, ama' dou lah Tangtawn Toupa' galdoute mah hiven. Na dam sung teng nang ah thil gilou kimu kei hen. 29 Mi khat in na hinna lak sawmin hon delh mah leh, Tangtawn Toupa na Pathian in ka toupa' hinna zaw a hinga damlaite laka bitsak ding hi. Ahihhangin, na melmate' hinna zaw suanglot khau sung apan lotmang banga lawnmang ding hi. 30 Tangtawn Toupa'n ka toupa adinga thil hoih a chiamsa peuhmah hon hihsak a, Israel tunga makaia a seh khit chiangin, a kullou sisan suahna leh phuba lakna puakgik, ka toupa in a sia leh pha theihna-a nei nilouh lou ding ahi. Tua baan ah, Tangtawn Toupa'n ka toupa a lawhchinsak khit chiangin, na silanu hon thei gige in, a chi hi. 32 David in Abigail kiang ah; Tuni-a kei hon tuak dinga nang hon sawlpa Tangtawn Toupa, Israel Pathian phatin om hen. 33 Thil bukkaak siamna na neih manin leh tuni-a sisan suah lou ding leh keima' khuta phu la lou dinga non kepbit manin vualzawlin om in. 34 Na tunga khut kha lou dinga hon keem Tangtawn Toupa, Israel Pathian' min sialin ka gen ahi: Hibang hi kei henla, kei hon tuak dinga hong pai pah hi kei lechin, Nabal' neihsa pasal khat lei zong, zingsang donga hinghawi om lou ding hive'n, a chi hi. Tua khitin, David in Abigail' khut apanin, ama' hon puak thilte a sang a: Khamuangtakin inn ah paita in. Na thugente ka zata a, na thilnget kon peta hi, a chi hi. 36 Abigail, Nabal kiang hong tun takin, ngai in, Nabal bel a inn uah kumpite' ankuanglui banga ankuang luiin a na om a, zukham mahmah-a maitai ngial in a om hi. Abigail in bel a zingchiang zingsang mateng bangmah a hilh kei hi. A zingchiang zingsanga Nabal a halh kiukiau takin, a zi in hiai thute khempeuh amah a hilh hi. Nabal' lungtang in a pawzou kei a, amah suangtum bang maiin a om hi. 38 Ni sawm khawng nungin, Tangtawn Toupa'n Nabal tung ah khut a kha a, a sita hi. 39 David in Nabal' sih thu a zak takin: Nabal in simmawhtaka hon bawlna hanga Tangtawn Toupa'n kei hon gup manin Tangtawn Toupa phatin om hen. Ama'n thil diklou hih lou dingin kei hon veeng a, Nabal' thil diklou hih ama' lutung a tusakta hi, a chi hi. Tua khitin, David in Abigail kiang ah thu a khak a, a zi hi dingin a ngen hi. 40 A silate Karmel ah a va hawh uh a, Abigail kiang ah: David in a zi dinga nang hon pii dinga koute hon sawl ahi, a chi uhi. 41 Abigail bel a maia lei si-in a kun a: Hiai ah na silanu uh om ing, ka toupa' silate' khe sil dinga mansa hi ing, a chi hi. 42 Abigail kintakin sabiltung tung ah a tuang a, a silanu ngate tawh David sawltakte a zui a, David' zi hong hita hi. 43 David in Jezreel mi Ahinoam zong zi-in a nei a, Abigail tawh a nihun David zi ahi uhi. 44 Ahihhangin, Saul in a tanu, David' zi Mikhal bel Galim mi, Laish' tapa Paltiel a na pekhinta hi.
David in Saul' Hinna Hawisak Lai
1 Zifte Gibea ah Saul kiang ah a va hawh uh a, amah kiang ah: Jeshimon gala Hakila muala David kisel hilou maw? a chi uhi. 2 Tuachi-in, Saul, Zif Gamdai-gamkeu ah a teelkhiak tuam Israel mi 3,000 tawh David zong dingin a kuansuk hi. 3 Saul in tua Jeshimon gala Hakila muala lampi kiang ah giahphual a sat a, ahihhangin, David bel gamdai-gamkeu ah a om hi. Saul in amah gamdai-gamkeu ah a zui chih a muhtakin, 4 enkhete a sawl a, tua ah Saul hong tung taktak chih a theita hi. 5 Tua khitin, David a kipankhia a, Saul in giahphual a satna mun ah a hawh a, Saul leh a sepaihhon makailian Abner' lupna mun a mu hi. Saul bel giahphual laizang ah a lum a, a sepaihhonte a kimkot ah a giak uhi. 6 David in Hit mi Ahimelekh leh Joab' sanggampa Zeruia' tapa Abishai kiang ah: Giahphual sunga Saul kianga kua'n hon zuisuk ding ahia? a chi hi. Abishai in: Ke'n kon zuisuk ding, a chi hi. Tuachi-in, David leh Abishai, tua mihonte kiang ah zanin a hawhsuk uh a, ngai in, Saul bel giahphual laizanga, a lukhunga a teipi leilaka siattalsa-a ihmuin a om hi. Abner leh sepaihte a kimkot ah ihmuin a om uhi. 8 Abishai in David kiang ah: Tuni'n Pathian in na melmapa na khut sunga hon pia ahi. Ka teipi-in amah lei tawh ka kilhdensuk aw. Nihvei ka sut kul lou ding ahi, a chi hi. 9 Ahihhangin, David in Abishai kiang ah: Amah hihmangthang ken! Kua ahia Tangtawn Toupa' thaunilh mi tunga khut kha a, mawhneilou hi thei ding? 10 Tangtawn Toupa' hinna louin ka gen hi: Tangtawn Toupa'n tua bang mi tunga khut kha teitei ding ahi. Saul ama' hun hong tung a, si hiam, ahih kei leh kidouna-a kuana mangthang hiam hi ding ahi. nKe'n Tangtawn Toupa' thaunilh mi tung ah khut ka kha kei hiai ding. A lukhunga teipi leh tuithawl la inla, pai ni, a chi hi. 12 Tuachi-in, David in Saul' lukhunga teipi leh tuithawl a la a, a paita uhi. Kuama'n tua a mu kei a, theih zong a thei kei a, kuamah lah a khanglou a om het kei hi. Tangtawn Toupa'n amaute ihmut limtaka ihmusak ahih manin, avekun a ihmu huthut uhi. 13 Tua khitin, David lehlampang ah a galkah a, gamla kuam ah mualtung khat ah a ding a, a kal uh a kigamla hi. 14 David in sepaihhon leh Ner' tapa Abner a galsap a: Abner, nang hon dawng lou ding maw? a chi hi. Abner in a dawng a: Kumpipa sam nang kua na hia? a chi hi. 15 David in: Nang pasal na hi keia hia? Hilou maw? Israel ah nang bang kua a oma eita? Banghanga kumpipa, na toupa veeng lou na hia? Kumpipa, na toupa hihmangthang dinga kua hiam khat hong pai hilou maw! 16 Na thilhih hoihlou ahi ve. Tangtawn Toupa' min sialin ka gen ahi. Na toupa uh, Tangtawn Toupa' thaunilh veeng lou na hih manun nang leh na mite si taak na hi ve ua. Na kiim na kiang en mah in. Kumpipa' lukhunga a teipi leh tuithawl koia om ahia? a chi hi. 17 Saul in David' aw a meltheih a: Ka tapa David aw, tua aw nanga ahi maw? a chi hi. David in a dawng a: Kumpipa ka toupa aw, hi mah e, a chi hi. 18 Tua baan ah, ama'n: Banghanga ka toupa'n a silapa delh delh ahia? Bang ka hih-a ahia, bang mawhtanna thil ka hih-a ahia? 19 Tu'n kumpipa ka toupa'n a silapa' thugen na ngaikhia in. Tangtawn Toupa'n kei dou dinga na lungsim tokthou a hih leh, thillat khat sang hen aw? Ahihhangin, mihingte' hon tawhthawh a hih leh bel, Tangtawn Toupa' mai ah amaute hamsethuakin om uhen! Amaute'n Tangtawn Toupa' goutan ka tan sam apan hon hawlmang uh a: Pai inla, pathian dangte' nna sem in, hon chi uh hiven. 20 Tu'n Tangtawn Toupa' mai apan gamlapi ah ka sisan mai lei ah kesak hen. Mi'n mualtung khawnga vengkeng a zon bangin, Israel kumpipa hiai uihik lei zong dingin hong kuanta! a chi hi. Saul in: Ka na khialta. Ka tapa David aw, hong kiik in. Tuni-a ka hinna manpha-a na seh manin, nang hihsiat ka tum nawn kei ding. Mihai banga gamta ka hi taktak a, nakpitaka hihkhial ka hi, a chi hi. 22 David in a dawng a: Hiai kumpipa' teipi ahi. Na mite khat hong pai henla, hong la hen. 23 Tangtawn Toupa'n michih a thilhih diktat leh muanhuaina banga pahtakman pe na ahi. Tangtawn Toupa'n tuni-a ka khuta nang hon pekhia a, hinapi a ke'n Tangtawn Toupa' thaunilh mi tunga khut kha nuamlou ka hi. 24 Tuni-a ka hinna manpha-a hon sehsak a, buaina khempeuh apan ka hinna humbit ahi, a chi hi. 25 Tua khitin, Saul in David kiang ah: Ka tapa David aw, vualzawlin om in. Thil thupite na hih ding a, na vualzou ngeingei ding hi, a chi hi. Tuachi-in, David ama' pai nading ding ah a pai a, Saul bel inn lam ah a kilehkikta hi.
Filistiate laka David
1 Ahihhangin, David a kingaihtuah a: Nikhat tei Saul khuta hihmanthata om ding hi ing a, Filistiate' khuta tailut sanga hoihzaw ka hih theih omlou hi. Tua bangin hih leng, Saul in Israel gam koipeuha kei hon zon tawpsan ding a, a khut apan suakta ding hi'ng, a chi hi. 2 Tuachi-in, David leh a ompih a mi 600-te tawh a kipankhia a, Gath kumpipa Maokh' tapa Akhish a beel hi. 3 David leh a mite Gath ah Akhish tawh a teengkhawm uhi. Amaute'n a innkuante uh a tonpih chiat uh a, David in zong a zi nihte, Jezreel mi Ahinoam leh Karmel mi, tua Nabal' meithai Abigail a tonpih hi. 4 Gath ah David a taita chih Saul a kihilh takin, amah a zong nawnta kei hi. 5 David in Akhish kiang ah: Na mitmuha deihsakna ka tan leh, ka teen theih nading tanggam khua khat hon sehsak in. Banghanga na silapa nang tawh kumpi' khawpi-a teengkhawm ding ka hia? a chi hi. 6 Tuachi-in, tua ni mah in Akhish in Ziglak a pia a, tua nungsiah Judah kumpipate-a a hidenta hi. 7 David bel Filistia gam ah kum khat leh kha li sung a teeng hi. 8 David leh a mite a kuankhia uh a, Geshurte, Girzite leh Amalekte a va sim uhi. Hiai namte bel, tanglai pek apan tua gama Shur leh Aigupta gam donga teeng uh ahi. 9 David in gam khatpeuh a sim chiangin, pasal hi-in, numei hita leh hinghawi a nei kei a, belamte leh bawngte, sabiltungte leh sangawgsaute leh puante bel a la zel hi. Tua nungin, Akhish kiang ah a kilehkik zel hi. 10 Akhish in: Tuni-a koilam sima kuan na hia? chi-a a dot chiangin, David in: Judah gam Simlam Negev, a chih kei leh, Jerameel Simlam a chih kei leh, Kente Simlam a chi zel hi. nAma'n pasal hi-in numei hita leh hinghawiin Gath ah hon tonpih ngei kei hi. Ahang bel, ama'n: Amaute'n hon gensimin: David in hibang hih ahi, hon chi kha ding uh, chi-a a ngaihtuah man ahi. Filistia gam sunga a teen sung teng tua banga gamtat a ngeina ahi. 2 Akhish in David a muang a, a lungsimin: Ama'n a mi Israelte adinga nakpitaka simmawhhuai kisuaksak ahih chiangin, ka nasema omden ding ahi, a chi hi,
Saul leh Endordawi aisannu
1 Tua hun laiin, Filistia sepaihte Israel dou dingin a kikaikhawm uhi. Akhish in David kiang ah: Nang leh na mite'n sepaihhon laka kei non zuih ding uh ahi, chih na theih ding ahi, a chi hi. 2 David in: Tua bang ahih leh, na silapa'n bang hih thei ahia, a chih nangmah ngeiin na mu ding, a chi hi. Akhish in a dawng a: Hoih mahmah e. Kei hon veengpa hiden dingin kon bawl ding, a chi hi. Samuel sikhinta a, Israelte khempeuh in amah suun a, ama' khawpi Rama a vui uh ahi. Saul in zong dawizawlte leh aisansiamte a gam apan a hawlkhe khinta hi. 4 Filistiate a kikaikhawm uh a, hong kuanin Shunem ah giahphual a sat uhi. Tua hun mah-in Saul in Israelte khempeuh a kaikhawm a, Gilboa ah giahphual a sat uhi. 5 Saul in Filistia sepaihhon a muh takin, lauin a ling a, mulkimnain a dim hi. 6 Tangtawn Toupa kiang ah thu a dong a, ahihhangin, Tangtawn Toupa'n mangte hi-in, Urim hi-in, kamsangte tungtawnin hita leh, a dawng kei hi. 7 Tua bang ahih takin, Saul in a nasemte kiang ah: Numei dawizawl khat hon zonsak un, amah naih a, thu ka dot theih nadingin, a chi hi. Amaute'n a dawng uh a: Ngai in, Endor ah tua bang numei dawizawl khat om ahi, a chi uhi. 8 Tuachi-in, Saul a kibawl lamdang a, puansilh dangte a silh a, zanin amah leh mi nih tua numei kiang ah a va hawh uhi. Saul in: Kei adingin kha khat hon dotsak inla, ka minlawh penpen hon sapkhiaksak in, a chi hi. 9 Ahihhangin, tua numeinu'n amah kiang ah: Saul thilhih thei mahmah ding hi vechin, ama'n dawizawlte leh aisansiamte gamsung apan satkheta hi. Banghanga ka sih nadinga hon thangsiah na hia? a chi hi. 10 Saul bel Tangtawn Toupa' min sialin a kichiam a: Tangtawn Toupa' hinna sialin ka gen ahi: Hiai hanga gawtna thuak lou ding na hi, a chi hi. 11 Tua khitin, tua numeinu'n: Nang adinga kua hon sapkhiaksak ding ka hia? chi-in a dong hi. Ama'n: Samuel hon sapkhiaksak in, a chi hi. 12 Tua numeinu'n Samuel a muh takin, nakpitakin a kikoukhia a, Saul kiang ah: Banghanga hon khem na hia? Saul na hi vele! a chi hi. 13 Kumpipa'n amah kiang ah: Lau ken. Bang na mu a? a chi hi. Tua numeinu'n: Leilak apan hong paikhetou kha khat ka mu, a chi hi. 14 Ama'n: Bang mei a pu a? chi-in a dong hi. Numeinu'n: Putek puanakpi silh khat hong paitou ahi, a chi hi. Saul in bel Samuel ahi chih a thei pah a, a kuun a, a maitanga lei si-in a bok hi. 15 Samuel in Saul kiang ah: Banghanga kei hon samkhetou a, hon subuai na hia? a chi hi. Saul in: Lungdonga mangbang lua hi'ng. Filistiate'n kei hon dou uh a, Pathian in lah hon nuseta hi. Ama'n kamsangte' tungtawn hi-in, mangte' tungtawn hita leh hon dawng nawn lou hi. Tua bang ahih mana, bang hih ding ka hi hiam, chih non hilh ding deiha hon sam ka hi, a chi hi. 16 Samuel in: Tangtawn Toupa'n nang hon nutsiat a, na meima a hong suah nung banghanga kei hon dong na hia? Tangtawn Toupa'n kei tungtawna a genkholhsa hih ahita ve. Tangtawn Toupa'n na khut apan kumpigam hon sutkhia a, na innvengte khat peta ahi. Amah David ahi. 18 Tangtawn Toupa' thu na man louh man leh Amalekte tunga a thangpaihna na tangtun louh mana, Tangtawn Toupa'n tuni-a na tunga hibang hih ahi. 19 Tangtawn Toupa'n Israel gam leh nang Filistiate' khuta hon pekhekhawm ding a, zing chianga nang leh na tapate ka kianga om ding na hi uh. Tangtawn Toupa'n Israel sepaihhonte zong Filistiate khuta pekhe ding ahi, a chi hi. 20 Saul bel Samuel' thugen hanga lauin leilak ah a kikham pah zenzon hi. Tua ni leh tua zan tawntung an ne lou ahih manin, a thahatna a bei sipsip hi. 21 Tua numeinu Saul kiang hong tun takin, a lau mahmah chih a mu a, a kiang ah: Ngai in, na nasemnu'n na thu ka mangta. Ka hinna ka khutsunga kitawiin, hih dinga non sawl ka hihta. 22 Tu'n na nasemnu' thugen ngaikhia inla, na pai zawh nadinga tha na neih nadingin na nek ding an hon pia ning, a chi hi. Amah a ut kei a: Ka ne kei ding, a chi hi. Ahihhangin, ama' mite leh tua numeinu'n amah a ngen ngutngut uh a, amaute a ngaikhia hi. Leilak apan a thoutou a, tutna sau ah a tu hi. 24 Tua numeinu'n tua inn ah bawngnou vakthau khat a nei a, a gou pah hi. Anvui nei bangzah hiam lain a mekman a, silngou sawhlouh tanghou beuin a em hi. 25 Tua khitin, Saul leh a mite' mai ah a lui a, a ne uhi. Tua zan maha kisain amaute a paita uhi.
Akhish in Ziglak ah David Sawlkik
1 Filistiate'n a sepaihte khempeuh uh Afek ah a kaikhawm uh a, Israelte bel Jezreel-a luinak kiang ah giahphual ah a om uhi. 2 Filistia sepaih makaite 100 bang, 1,000 banga makaihin mainawtin a pai uh a, David leh a mite'n bel Akhish tawh a nunglam ah a zui uhi, 3 Filistia makaite'n: Hiai Hebrute bang hih ding ahi ua? a chi uhi. Akhish in a dawng a: Hiai Israel kumpipa Saul' sila David hilou maw? Amah kum khat vai ka kianga omta a, Saul a nutsiat apan tu dong, amah a diklouhna mu lou ka hi, a chi hi. 4 Ahihhangin, Filistia makaite a tung ah a heh uh a: Hiai mipa mun na piakna-a kik dingin sawlkik in. Kidouna ah eite hong zui thei kei ding. Tua chi louin zaw, kidou laitakin eite lang ah a pang kha ding. I mite lutangte a lak kana a pu' deihsakna a ngah theihna bang dang a om dia? 5 Laam kawma: Saul in a sang a sanga that, David in sangsawm sawma that, chi-a la-a a sak uh hiai David hilou maw, a chi uhi. 6 Tuachi-in, Akhish in David a sam a, a kiang ah: Tangtawn Toupa' hinna sialin ka gen ahi: Na muanhuai a, sepaihhonte laka kei tawh na sepkhawm ding zaw kipak mahmah ding ka hi. Ka kianga nong pai apan tu donga nanga a diklou bangmah mu lou ka hi. Ahihhangin, makaite'n nang hon sanglou uh ahi. 7 Chiahkik inla, khamuangtakin paita in. Filistiate' makaite' zakdah ding bangmah hih ken, a chi hi. 8 David in: Bang ka hih-a ahia? Na kianga kong pai apan tuni dong na nasempa dem nading bang na mu-a ahia? Banghanga kuana, kumpipa ka toupa' meima dou theilou ding ka hia? chi-in a dong hi. Akhish in a dawng a: Kei' mitmuh-a zaw Pathian' vansawltak banga ka lungtunna na hi. Ahihhanga Filistiate makaite 'n: Ama'n kidouna ah eite hon zui thei kei ding, chi uhi. 10 Tuin baihtakin kisa inla, nang hon zui na pu' nasemte tawh, zingsang phal vak tungin paikheta un, a chi hi. Tuachi-in, David leh a mite Filistiate gama kik dingin zingsang beltakin a thou uh a, Filistiate bel Jezreel ah a kuantou uhi.
David in Amalekte Zougawp
1 David leh a mite, a ni thum ni-in Ziklag a tung uhi. Amalekte'n simlam Negev leh Ziklag a na sim uh a, Ziklag meiin a hal uh a, 2 numeite leh a sunga omte khempeuh, a teek akhangin salin a kai uhi. Amaute kuamah a that kei uh a, amaute paipihin a pawmang uhi. 3 David leh a mite Ziklag hong tun tak-un, ngai in, meia kangtum leh a zite uh, a tapate uleh tanute uh sala kaihmangin a mu uhi. tuachi-in, David leh a mite nakpitakin a kapkhia uh a, kap zou nawn lou ahih dongun a kap uhi. 5 David' zi nihte, tua Jezreel mi Ahinoam leh Karmel mi Nabal' meithai Abigail zong matin a na om uhi. 6 Mite'n David suanga denlup ding a kikup manun, amah lungdongin a mangbang mahmah hi. A tapate uleh a tanute uh hangin michih lungsim a na mahmah hi. Ahihhangin, David in bel Tangtawn Toupa a Pathian ah thuakzawhna thahatna a mu hi. 7 Tua khitin, David in Ahimelakh' tapa siampi Abiathar kiang ah: Siampi puanak hon la in, a chi a, Abiathar in a hon la a, 8 David in Tangtawn Toupa a dong a: Hong simte ka delh diam? Amaute ka delhpha lai diam? a chi hi. Tangtawn Toupa'n a dawng a: Amaute delh in, na delhpha ngeingei ding a, bangkim na lakik ngeingei ding, a chi hi. 9 David leh a mi 600-te a kuan uh a, Besor Guam hong tung uh a, tua ah pawlkhat a kinusia uhi. 10 Ahang bel, mi 200-te tua guam kan dingin a bah lua ua ahi. 11 Tua ah, Aigupta mi khat gamlaka om a mu uh a, David kiang ah a tonpih uh a, dawn ding tui leh nek ding an a pia uhi. 12 Tua nek ding a piak uh bel theipi keua kibawl tanghou beu phei khat leh grep keua kibawl tanghou beu nih ahi. Ama'n tua a ne a, a halhta hi. Ama'n ni thum leh zan thum sung an lah ne lou, tui lah dawn lou a na hi-a ahi. 13 David in amah kiang ah: Kua mi na hia, koia hong kipan na hia? chi-in a dong hi. Ama'n: Aigupta mi ka hi a, Amalek mi khat' sila ka hi. Ni thum paita-a ka chinat manin ka pu'n hon nusia ahi. 14 Kerethte Simlam leh Judahte gam leh Kaleb Simlam ka sim uh a, Ziklag zong ka hal uhi, a chi hi. 15 David in: Tua misimpawlte kiang ah non piisuk thei diam? chi-in a dong hi. Ama'n a dawng a: Non that kei ding a, ka pu' khut ah zong non pelut kei-na ding chih Pathian' min sialin ka kiang ah kichiam phot lechin, amaute kiang kon tun ding, a chi hi. 16 Ama'n David a piisuk a, ngai in, amaute bel Filistia gam leh Judah gam apan gallak vante tam lua ahih man a, nea dawna nuamsain gamtenga kithehdalhin a na om uhi. 17 David in khawmui apan a zing chiang nitaklam dong amaute a dou a, sangawngsau tunga tuanga tai tangval 400-te chih louh khat lei zong a suakta kei uhi. 18 David in Amalekte' thil lak peuhmah, ama' zi nihte telin, a lakik vek hi. 19 Bangmah a kimlou a om kei a, a teek a khang, pasal naupang, numei naupang, gallakte ahih kei leh a lak dangte khempeuh uh, a kim vek hi. David in bangkim a lakik vek hi. 20 Belamhonte leh bawnghonte a lakik vek a, a mite'n ganta dangte mailam ah tuate a hawi uh a: Hiai David' gallak ahi, a chi uhi. 21 Tua khitin, bah lua-a David zui zou lou mi 200-te, tua Besor Guama nutsiata omte kiang ah David hong tung hi. Amaute, David leh a tonpihte dawn dingin hong kuan uhi. David leh a mite hong nai takun, David in tuate a muak hi. 22 Ahihhangin, David zuite laka mannabei leh buaina bawlte'n: Amaute'n eite hon zui lou uh ahih manin, gallak thil i lakkikte amaute hawm kei ni. Ahihhangin, mi chih ama' zi leh tate lain pai hen, a chi uhi. 23 David in a dawng a: Ka sanggamte aw, hi lou e. Tangtawn Toupa'n eite hon piakte tua bangin bawl kei ni. Ama'n eite hon humbit a, ei hon doute i khutsunga hon pia hi a, 24 na gen uh kua'n ngaikhe ding ahia? Van veeng dinga ompa tan, kidouna-a kuansukpa tan zah mah hi ding ahi. Mi khempeuh in tan kibang a tan ding uh ahi, a chi hi. 25 Tua bangin a kizang a, tua ni apan tu dongin hiai Israelte adingin dankhun leh thuseh hiden dingin David in a hihkipta hi. 26 David, Ziklag hong tun takin, gallak pawlkhat a lawmte, tua Judah upate kiang ah a khak a: Ngai un, Tangtawn Toupa' melmate apan gallakte apana noute' adinga thawnpiak hiai ahi, a chi hi. 27 Bethel-a omte, Ramoth Negev-a omte leh Jatir-a omte kiang ah leh Aroer-a omte, Sifamoth a omte, Eshtemo-a omte leh 29 Rakal-a omte, Jerameelte' khawpite-a omte leh Kente kiang ah leh 30 Horma-a omte, Bor Ashan-a omte, Athak-a omte leh 31 Hebrona omte leh David leh a mite vavakna gama omte khempeuh kiang ah tua a khak hi.
Saul in Ama' Hinna La
1 Filistiate'n Israel gam a dou uh a, Israelte amaute' mai ah a taaikek uh a, Gilboa Mual tung ah tampi thahin a om uhi. 2 Filistiate'n nakpitakin Saul leh a tapate a delhzui uh a, a tapate Jonathan, Abinadab leh Malki Shua a that uhi. 3 Saul kiima kidouna a nase semsem a, thai tawite'n amah a phaak takun nasetakin a kapliam uhi. 4 Saul in a galvan tawipa kiang ah: Na namsau phawi inla, hon dawt pailet in, hiai zeksumlouhte hong paiin, hon dawt pailetin hon engbawl kha ding uhi, a chi hi. Ahihhangin, a galvan tawipa a mulkim a, a dawt pailet nuam kei hi. Tuachi-in, Saul in ama' namsau phawiin a namsau a bawhta hi. 5 Tua galvan tawipa'n Saul a sita chih a muhtakin, ama'n zong a namsau a bawh a, amah tawh a sikhawmta hi. 6 Tuachi-in, Saul leh a tapa thumte leh a galvan tawipa leh a mite khempeuh tua mun ah a sikhawm uhi. 7 Tua phaizang dung leh Jordan lui gala om Israelte'n, Israel sepaihhonte a taikeek uh a, Saul leh a tapate a sita uh, chih a muh takun a khawpite uh nusiain a taaikeek uhi. Tuachi-in, Filistiate hong paiin tua khawpite a luah uhi. 8 A zing chianga, misite' kivatnate suaha la dinga Filistiate hong kuan takun, Gilboa Mual tung ah Saul leh a tapa thumte sisain a mu uhi. 9 A lutang a tankhia uh a, a galvan a suahkhiaksak uh a, a milim tempulte uleh mipite laka tua thu phuangzak dingin, Filistia gam sung teng ah khualtaite a sawl uhi. 10 Saul' galvan pen Ashtoreth tempul ah a koih uh a, a luang bel Beth Shan kulhbaang ah a henbelh uhi. 11 Filistiate'n Saul tunga a thilhih uh Jabesh Gilead mite'n a zak takun, 12 a mi hangsante khempeuh uh zan khangin Beth Shan ah a vahawh uh a, Beth Shan kulhbaang apan Saul leh a tapate' luangte a lakhia uh a, Jabesh ah a pua uh a, tua ah a hal uhi. 13 A guhte uh bel a la uh a, Jabesh-a tawsaw sing khat nuai ah a vui uh a, ni sagih sung an a ngawl uhi.
David in Tangtawn Toupa Thaunilh a Zahtak-dan
1 Saul sih nungin David, Amalekte zoukhin hong kilehkik a, Ziklag ah ni nih a taam hi. 2 A ni thum ni-in, Saul' giahphual apanin mi khat, a puansilhte kikekgawp leh a luzanga leivui niaunuauin hong tung hi. David kianga hong paiin, leilaka bokin amah zahna a pia hi. 3 David in: Koi apana hong pai na hia? chi-in a dong hi. Ama'n a dawng a: Israelte' giahphual apan hong suakta ka hi, a chi hi. 4 David in: Bang thil a tung a, hon hilh in, a chi hi. Ama'n: Galphual apanin mite a taaikek uh a, a lak ua tampi pukin a si uh. Saul leh a tapa Jonathan zong a si uh, a chi hi. 5 Tua khitin David in tua thu hon tun tangvalpa kiang ah: Saul leh a tapa Jonathan a si uh, chih bangchi-a thei na hia? a chi hi. 6 Tua tangvalpa'n: Gilboa muala om kha ing a, tua laia Saul a teipi-a kingaia om a, kangtalaite leh a tungtuangte'n lah pha dekta uhi a, 7 amah hong kihei a, hon muh takin hon sam a, ke'n: Hiah ka om, ka chi hi. 8 Ama'n: Kua na hia? hon chi a, ke'n: Amalek mi ka hi, chi-in ka dawng hi. 9 Tua khitin ama'n: Hon dinkhum inla, hon that in. Si dektak ing a, lah hinglai ka hi, a chi mawk hi. 10 Amah a puk nunga dam zou tuan lou ding ahi, chih ka theih mana dinkhuma that ka hi. A lutunga a kumpilukhu leh a baana a gaakna la ing a, ka toupa kianga hon tawi ka hi, a chi hi. 11 Tua a zaktakin David leh a ompihte khempeuh in a puansilhte uh a botkek uhi. 12 Saul leh a tapa Jonathan leh Tangtawn Toupa' mipite leh Israel innkawte namsaua a puktak manun, nitaklam dong amaute'n a suun uh a, a kap uh a, an a ngawl uhi. David in tua thu hon tun tangvalpa kiang ah: Koia hong kipan na hia? a chi hi. Ama'n a dawng a: Gamdang mi, Amalek khat tapa ka hi, a chi hi. 14 David in: Tangtawn Toupa' thaunilhpa hihmangthang dinga a tunga khut khak ding banghanga lau lou na hia? a chi hi. 15 Tua khitin, David in a mite khat a sam a, a kiang ah: Amah va naih inla, va that in! a chi hi. Tua bangin a kuan a, amah a va sat a, a si hi. 16 Ahang bel, David in amah kianga: Na sisan nangma' lutung tu hen. Tangtawn Toupa' thaunilhpa ka that, na chih laia nangma' kama mawh kitan na hita, na chi khinta hiven.
Saul leh Jonathan Suunna
17 David in Saul leh a tapa Jonathan a suun laiin, hiai kahla in a suun a, 18 Judah mite kianga hiai thalphel kahla sinsak ding thu a pia a, Jashar' Laibu ah a kigelh hi: 19 Israel aw, na kilawmna, na mualsangte ah thah-in omta! Mihatte pukta mai! 20 Gath ah gen kei un, Ashkelon kongzing khawng ah genthang kei un, Filistia tanute kipak kha ding uh a, zeksumlouhte' tanute lungnuam kha ding uhi. 21 Gilboa mualte aw, na tung uah daitui ke nawn kei henla, vuah lah zu nawn kei hen. Thillat dinga gahsuah ding loute zong om nawn kei hen. Tua-a mihatte' lum, Saul' lum kihihninta sathaua kizut nawn lou. 22 Thaha omte' sisan apan, mihatte' sa apan Jonathan' thalphel vuakkik lou a, Saul' namsau vuakkik lou hi. 23 Saul leh Jonathan a dam lai-un ki-it uh a, kihehpih uh a, sihna-a zong kikhen lou uhi. Muvanlai sanga thakin zaw uh a, humpinelkai sanga hat zaw uhi. 24 Israel' tanute aw, Saul adin kap un. 25 Mihatte galphuala pukta mai! Na mualsangte ua Jonathan thaha omta mai! 26 Ka sanggampa Jonathan, nang suunin ka dah hi, ka itluat na hi. Kei non itna lamdang a, numeite' itna sanga houh lamdang zaw hi. 27 Mihatte pukta mai! Kidouna galvante mangta mai!
David, Judah Kumpipa dinga Thau Kinilh
1 Hun hong pai pai a, David in Tangtawn Toupa a dong a: Judah khawpite khat ah ka paitou diam? a chi hi. Tangtawn Toupa'n: Paitou in, a chi hi. David in: Koi ah ka pai dia? a chi hi. Tangtawn Toupa'n a dawng a: Hebron ah, a chi hi. 2 Tuachi-in, tua ah a zi nihte, Jezreel mi Ahinoam leh Nabal' meithai Abigail tawh David a paitou hi. 3 David in a ompihte, a sungkuante utawh a tonpih a, Hebron leh a khawtate ah a teeng uhi. 4 Tua khitin, Judah mite Hebron ah hong hawh uh a, tua ah Judah innkawte tunga kumpipa dingin David thau a nilh' uhi. Saul vuite Jabesh Gileadte ahi uh, chih David a hilh takun, 5 ama'n Jabesh Gileadte kiang ah mi a sawl a: Na pu uh Saul vui a, a tunga siamna na suah manun, Tangtawn Toupa'n hon vualzawl hen. 6 Tua Tangtawn Toupa'n na tung uah chitna leh muanhuaina suah henla, ke'n zong, hiai na thilhih manun na tung uah deihsakna suah sam ning. 7 Na pu uh Saul sita a, Judah inkawte'n a tung ua kumpipa hi dingin kei thau hon nilhta uh ahih chiangin, tu'n thahat leh hangsan suahta un, a chisak hi.
David' Innkawte leh Saul' Innkawte kala Kidouna
makaipa'n Saul' tapa Ish-seth a pii a, Mahanaim ah a tonpih hi. 9 Gilead, Ashuri leh Jezreel tung ah leh Efraim, Benjamin leh Israel khempeuh tunga kumpipain amah a bawl hi. 10 Israel tunga kumpipa hong hih laiin, Ish-seth bel kum 40-a upa ahita a, kum nih sung vai a hawm hi. Ahihhangin, Judah innkawte'n bel David a zui uhi. 11 Hebrona Judah innkawte tunga David kumpipa a hih sung kum sagih leh kha guk ahi. 12 Ner' tapa Abner in Saul' tapa Ish Bosheth' mite tawh Mahanaim a nusia uh a, Gibeon a zuan uhi. 13 Zeruia' tapa Joab leh David' silate a kuan uh a, Gibeon dil ah amaute a tuak uhi. Dil gal langkhat ah pawlkhat a tu uh a, a lehlam pang ah pawlkhat a tu uhi. 14 Tua lai ah Abner in Joab kiang ah: Tangvalte pawlkhat kisasak ni-in, i mai ah kisualsak ni, a chi hi. Joab in: Himah heh, kisual uhen, a chi hi. 15 Tuachi-in, a dingkhia uh a, a mizah kikim, Saul' tapa leh Boseth-a Benjaminte sawmlenih leh David-a sawmlenih a kisim uhi. 16 Mi chih in a langpa' lutang ah a man a, temluzumin a langpa pang a dawt a, a pukkhawm uhi. Tua bang ahih manin, Gibeona tua mun min dingin Helkath Hazurim a sa uhi. Tua ni-a kidouna a nase mahmah a, Abner leh Israelte bel David' silate' zawhin a om uhi. 18 Tua ah Zeruia' tapa thumte Joab, Abishai leh Asahel a om uhi. Asahel bel gamlak sasan banga taaihat ahi. 19 Ama'n Abner a nungdelha, taklam ah zong, veilam ah zong pial louin a delh vingveng hi. 20 Abner in nunglam a en a: Asahel na hi maw? a chi hi. Ama'n: Hi mah ing, chi-in a dawng hi. 21 Abner in a kiang ah: Taklam hiam, veilam hiam ah kihei inla, tangvalte khat suai inla, a galvante sut in, a chi hi. Ahihhangin, Asahel in amah delh a tawpsan nuam kei hi. 22 Abner in Asahel a vau kik a: Hon delh nawn ken! Banghanga hon satpai ding ka hia? Bangchi-a na sanggampa' mei mu ngam ding ka hia? a chi hi. 23 Ahihhangin, Asahel in amah delh a tawp nuam kei hi. Tuachi-in, Abner in a teipi tongin Asahel' gilpi ah a sun a, a nunglam ah a pailet hi. Asahel a puk a, tua mun ah a si pah hi. Asahel puka a sihna mun hong tung peuhmah tua ah a khawl zel uhi. 24 Ahihhangin, Joab leh Abishai in bel Abner a delhzui zel uh a, ni a tum dektakin, Gibeon gamsia zotna lampi-a om Gia kichi kianga Ama mual hong tung uhi. 25 Tua ah Benjaminte Abner lama pangin hong kikaikhawm uhi. Pawlkhata kibawlin mual tung ah a pang uhi. 26 Abner in Joab kiang ah: Namsau in hon negai den ding hia? Hiai thil tawpna kha mahmah ding ahi, chih na thei hia? Na mite'n a sanggamte uh delh nawn lou dinga chik chianga khaam ding na hia? a chi hi. 27 Joab in a dawng a: Pathian' hinna louin ka gen ahi: Tua banga thu gen lou hi lechin, mite'n a sanggamte uh zingsang dong delh ding uh hiven, a chi hi. 28 Tuachi-in, Joab in pengkul a mut a, tua mite khempeuh a khawl uh a, Israelte a delh nawn kei uh a, dou zong a dou nawn kei uhi. 29 Tua zankhawvakin, Abner leh a mite Araba kantanin a paisuak uh a, Jordan lui kanin, Bithron gam khempeuh tawnin Mahanaim a tung uhi. 30 Joab zong Abner delhna apan a kilehkik a, a mite khempeuh a kaikhawm hi. Asahel lou zong David' mite sawmlekua a kimta kei uhi. 31 Ahihhangin, David' mite'n Abner tawh omkhawm Benjaminte 360 a that uhi. 32 Asahel' luang a pua uh a, Bethlehama a pa' hankhuk ah a vui uhi. Tua khitin, Joab leh a mite zankhawvakin a pai uh a, zing khawvakin Hebron a tung uhi.
1 Saul inkawte leh David' innkawte kala kidouna in sawtpi a daih hi. David hong hat semsem a, Saul' innkawte bel a hat kei semsem uhi. 2 Hebrona piang David' ta masa Amnon, Jezreel mi Ahinoam' tapa ahi. 3 A nihna Kileab, Karmel mi Nabal' meithainu Abigail' tapa ahi. A thumna Absalom, Geshur kumpipa Telmai' tanu Maaka tapa ahi. 4 A lina Adonija, Hagith' tapa ahi. A ngana Shefatia, Abitai' tapa ahi. 5 A gukna Ithream, David' zi Egla' tapa ahi. Hiaite Hebrona David apan piang ahi uh.
Abner David lama Kituan
6 Saul innkawte leh David inkawte kidou sungin, Abner in Saul innkawte sung ah a dinmun a kipsak toutou hi. 7 Saul in mei khat, Aia' tanu Rizpa kichi nei hiven, Ish-seth in Abner kiang ah: Banghanga ka pa' meinu luppih na hia? a chi hi. 8 Ish Bosheth' thugen in Abner a hehsak mahmah a: Kei, Judah adinga ui lutang lei ka hi-a hia? Tuni mahmah donga na pa' Saul innkawte leh a lawmte adinga muanhuai ka hi a, David khutsunga nang hon pekhelou ka hi. Hinapi-a tuni-a hiai numei tawh kisaia khiala non ngawh! 9 Tangtawn Toupa'n David kianga kichiam zena a chiam ka hihsak kei a, 10 Saul' innkawte khut apan kumpigam lakhia a, Israel leh Judah tunga David' kumpitutphah Dan apan Beersheba dong ka kipsak kei leh, Pathian in Abner a lawhlawh hon lawh henla, a sezaw zong hon lawh hen, a chi hi. 11 Ish-seth in Abner a lau manin a kiang ah bangmah a gen ngam nawn kei hi. 12 Tua khitin, Abner in David kiang ah ama' taanga thugen ding khualtaite a sawl a: Kua gam ahi-a ahia? Kei tawh kal ah kilemna bawl in, ke'n Israel gam khempeuh nang lama tun dinga hon huh ding hi'ng, a chisak hi. 13 David in: Hoih e. Nang tawh kal ah kilemna ka bawl ding. Ahihhangin, nang apan thil khat ka ngiat hi. Kei hon mu dinga nong pai chianga Saul' tanu Mikhal non tonpih kei leh non mu thei kei ding, a chi hi. 14 Tua khitin, David in Ish-seth kiang ah khualtaite a sawl a: Ama'n Filistiate' zekvun zakhat pia a, ka khaamsa ka zi Mikhal hon pia in, chi-in a ngiat hi. 15 Tuachi-in, Ish-seth in thu a pia a, a pasal Paltiel apan Mikhal a lakkiksak hi. Paltiel bel Laish' tapa ahi. 16 Ahihhangin, a pasal in kap kawmkawmin amah a zui a, Bahurim dong a nungzuih suak hi. Abner in amah kiang ah: Inn ah chiahkik in! a chi a, a chiahkikta hi. 17 Abner bel Israel upate tawh thu a kikum uh a: David na kumpipa ua neih ding hun bangtan hiam na utta uhi. 18 Tu-in tua hihta un! Ahang bel, Tangtawn Toupa'n David kianga thu chiam a: Ka sila David tungtawna Filistiate khut sung apan leh a melmate khempeuh uh khutsung apan ka mi Israelte ka hukhe ding, na chikhin hiven, a chi hi. 19 Abner in Benjaminte zong maituahin a houpih hi. Tua khitin, Hebron ah a hawh a, Israelte leh Benjamin innkawte' thil hih nopte khempeuh David a hilh hi. 20 Abner in Hebrona David kianga hong hawh laiin mi 20 hon tonpih a, David in amah leh a mite adingin ankuang a lui hi. 21 Tua ah Abner in David kiang ah: Israelte'n nang tawh kilemna bawl a, nang na lunggulhte khempeuh na uk theih nadingin, paikik pahin ka toupa kumpipa adingin Israel khempeuh va kaikhawm ning, a chi hi. Tuachi-in, David in Abner a khakhia a, lungmuangtakin a paita hi.
Joab in Abner That
22 Tua khit phetin, David' mite leh Joab galsim hong tung uh a, gallak tampi hon tun uhi. Ahihhangin, David in Abner na khakhe khin a, amah zong lungmuangtaka paita ahih manin, Hebrona David kiang ah Abner a na om nawn kei hi. 23 Joab leh a tonpih sepaihte khempeuh hong tun takun, Ner tapa Abner, kumpipa kiang ah hong hawh a, kumpipa'n a na khakhia a, lungmuangtakin a paita chih amah a na hilh uhi. 24 Tuachi-in, Joab, kumpipa kiang ah a va hawh a: Bang na hih na maizen a? Ngai dih, Abner na kianga hong hawh a, banghanga paisak na hia oi? Tu'n lah paikhinta! 25 Ner' tapa Abner na theihsa hi a, nang hong khem dinga hong pai a, na khawhei dan en a, na thil hih peuhmah theikhe dinga hong hawh aka hia, a chi hi. 2 Tua khitin, Joab in David a nusia a, khualtaite sawlin Abner a delhsak a, Sira tuileh apan amah hon piikik uhi. David in bel hibang thu a thei kei hi. 27 Hebrona Abner hong kik takin, Joab in a tuama houpih ding bangin, kongpi bul ah Abner a pii tuam hi. Tua ah a sanggampa Asahel' sisan phuba lain, Joab in Abner gilpi ah a dawt a, Abner a sita hi. 28 Tua nungin, David in hiai thu a za a: Ner' tapa Abner' sisan tawh kisaiin, Tangtawn Toupa' mai ah kei leh ka kumpigam mawhneilou ka hi gige uhi. 29 Abner' sisan mawh, Joab leh a pa' innkawte tung ah tu hen! Joab inkuan sung ah meimasia vei, ahih kei leh, phak natna vei, ahih kei leh, chiangkhuna kingaia pai, ahih kei leh, namsaua si, ahih kei leh, annek tuidawn tasam kitatlak kei hen aw, a chi hi. 30 Abner in Gibea kidouna-a, a sanggampa uh Asahel a thah mana, Joab leh a sanggampa Abishai in Abner that uh ahi. 31 Tua khitin, David in Joab leh a ompih mite khempeuh kiang ah: Na puansilhte uh botkek unla, saiippuan silh unla, Abner' mai ah sisuunin pai un, a chi hi. Kumpipa David mahmah zong siluang zuiin a pai hi. 32 Hebron ah Abner a vui uh a, Abner han ah kumpipa a kap a, mite khempeuh zong a kap uhi. Kumpipa'n Abner suunin: Abner mihai siha sih kul hia? Na khutte lah hen hilou a, na khete lah kolbutsak hilou a, migiloute' khuta puk banga na puktak mai! chi-in kahtam a lou hi. Mite khempeuh zong amah suunin a kap kik uhi. Tua khitin, amaute khempeuh hong pai uh a, sun a hih laia banghiam beek ne dingin David a kun uhi. Ahihhangin, David a kichiam a: Ni tum ma-a an hiam, thil dang himhim hiam ka nek leh, Pathian in a lawhlawh hon lawh henla, a nase zaw sem zong hon lawh hen, a chi hi. 36 Mite khempeuh in hiai a chiamteh uh a, a lungkimta uhi. Kumpipa' thilhih peuhmah in amaute a lungkimsak hi. 37 Tua ni-in, Ner' tapa Abner thahna ah kumpipa'n mawhna a nei kei, chih tua ni-in mite khempeuh leh Israel khempeuh in a theitel uhi. 38 Tua khitin, kumpipa'n a silate kiang ah: Israela milian leh mi thupi khat si ahi, chih thei lou maw? 39 Tuni'n kei, thaunilh kumpipa' hi mah leng, ka hat kei a, hiai Zeruia' tapate kei adinga hat lua uh ahi. Tangtawn Toupa'n thilgilou hih mi, a thilgilou hihte bangbangin thuk hen aw! a chi hi.
Ish-seth Thahna
1 Saul' tapa Ish-seth in Hebron ah Abner a sita, chih a zak takin, hansanna a mansuah vek a, Israelte khempeuh a patau uhi. 2 Tua Saul' tapa in galsim pawlte' makai nih a nei a, khat min Baana ahi a, a dang khat min Rekab ahi. Amaute, Benjamin nama Beeroth mi Rimon' tapate ahi uhi. Beeroth bel Benjamin nama tel banga ngaih ahi. 3 Ahang bel, Beeroth mite Gittaima taia tuni dong gamdang mi banga tua muna teeng uh ahi. 4 Saul' tapa Jonathan in tapa khat a nei a, a khe langniha baai ahi. Ama'n Jezreel apana Saul leh Jonathan tungtang thu a zak laiin, kum nga-a upa ahi. Amah donnu'n amah poma a tai leh, a kinawh luat mana, amah kesak a, hong poihlong gawp ahi. Ama' min Mefibosheth ahi. 5 Beeroth mi Rimon' tapate Rekab leh Baana, Ish Bosheth' inn lam zuanin a kipankhia uh a, sun nisat laitakin hong tung uhi. Ish-seth zong sun khawla a lup laitak ahi. 6 Huit buh va la ding hileh kilawmin amau gel innsung tawng ah a va lut uh a, Ish-seth gilpi ah a dawt uhi. Tua khitin, Rekab leh a sanggampa Baana a kigelmang uhi. Amau gel bel, Ish-seth a lupna dan sunga a lupna tunga a luplaia tua innsunga va lut uh ahi. Amah dawt a, a thahkhitun a lutang a tankhia uh a, tua puain Araba phaizang tawnin zan khawvakin a pai uhi. Ish Bosheth' lutang David kiang ah hon pua uh a, kumpipa kiang ah: Hiai ah na melmapa, na hinna lak sawmpa Saul' tapa Ish Bosheth' lutang om e. Tuni'n Tangtawn Toupa'n Saul leh a chisuan tunga ka toupa kumpipa phuba hon laksak ahi, a chi uhi. 9 David in Beeroth mi Rimon' tapate Rekab leh a sanggampa Baana a dawng a: Buaina, lungkhamna khempeuh apan hon hukhepa Tangtawn Toupa' min sialin ka gen ahi. 10 Ngai un, Saul a sita, chih mi khat in hon hilh laiin, thu kipahhuai hong tun a kisa hi. Ke'n amah ka man a, Ziklag ah ka that hi. Hon thupuak hanga amah pahtakman ka piak tua ahi ve! Mawhneilou mi khat ama' innsunga ama' lupna tunga lum lai that migilou noute' khut apan a sisan mawh ngiat sem a, leitung apan hon thaimang lou ding ka hi hia? a chi hi. 12 Tuachi-in, David in a tangvalte thu a pia a, amaute a that uhi. A khut uleh a khete uh a tankhia uh a, a luangte uh Hebron dil kiang ah a khai uhi. Ahihhangin, Ish Bosheth' lutang a la uh a, Hebrona Abner' hankhuk ah a vui uhi.
David, Israel tunga Kumpipa-in Pang
1 Israel namte khempeuh David kiang ah Hebron ah hong pai uh a: Koute na sa leh sisan ka hi uh. 2 Hun paisa-a, Saul ka tung ua kumpipa a hih laiin, galdounatea Israelte makaipa nang na hi. Tangtawn Toupa'n na kianga: Ka mi Israelte na ching ding a, amaute ukpa nong hi ding, chi ahi, a chi uhi. 3 Israel upate khempeuh Hebrona kumpipa David kianga hong pai takun, kumpipa'n Hebron ah Tangtawn Toupa' mai ah, amaute tawh kilemna a bawl a, amaute'n Israel tunga kumpipain David thau a nilh uhi. 4 David kumpipa hong hihin kum 30-a upa ahi a, kum 40 sung vai a hawm hi. 5 Hebron ah kum sagih leh kha guk sung Judah tung ah vai a hawm a, Jerusalem ah Israelte khempeuh leh Judah tung ah kum 33 sung vai a hawm hi.
David in Jerusalem Lazou
6 Kumpipa leh a mite, Jerusalema teeng Jebuste kiang ah a hawh uhi. Jebuste'n David kiang ah: Hiai ah nong lut thei kei ding uh. Mittawte leh khebaite nangawnin hon hawlkhe zou lua un teh, a chi uhi. Amaute'n bel: Hiai ah David hong lut thei ken teh, chi-a ngaihsun taktak dan uh ahi. 7 Ahihhangin, David in tua Zion kulhpi, David' khawpi a la hi. 8 Tua ni-in, David in: Jebuste, tua David' meima khebaite leh mittawte va dou a, va zou ding kuapeuh, tuilakna hawma a kaltouh kul ding hi, a chi hi. Hiai hang ahi: Mittawte leh khebaite kumpi innpi sung ah lut ken teh, a na chih uh. 9 David tua kulhpi ah a teeng a, David' Khawpi chih min a sa hi. A kimkot ah kulh kipsak tuam ding a chialte, a sunglam manawh in a lamtou hi. 10 Toupa, Tangtawn Toupa Pathian Vanglianpen in amah a ompih manin, a hong hat semsem hi. 11 Tura kumpipa Hiram in David kiang ah thupawte, sidar singtumte, sing nasep siamte leh suangsek siamte tawh, a sawl a, amaute'n David ading innpi a lam uhi. 12 Tangtawn Toupa'n a mi Israelte khualna-a Israelte tunga David kumpipa-a tungkip a, a kumpigam tawisang ahi, chih David in a thei hi. 13 Hebron a nutsiat nungin, David in Jerusalem ah mei tamsem, zi tamsem, tapa tamsem, tanu tamsem a nei hi. 14 Tua muna a ta neihte' min hiaite ahi: Shamua, Shobab, Nathan, Solomon, 15 Ibhar, Elishua, Nefeg, Jafia, 16 Elishama, Eliada leh Elifelet.
David in Filistiate Zou
17 Israelte tunga kumpipa hi dinga David thau kinilh ahi, chih Fiistiate'n a zak takun, kigalvan kimin amah zong dingin hong kuantou uhi. Ahihhangin, David in tua thu a za a, kulhpi sung ah a paisuk hi. 18 Filistiate hong tung uh a, Refaim Phaizang ah a kiphalh uhi. 19 Tuachi-in, David in Tangtawn Toupa a dong a: Kuanin Filistiate ka dou diam? Amaute ka khutsung ah non pe diam? a chi hi. Tangtawn Toupa'n a dawng a: Kuan in. Filistiate na khutsung ah kon pe ngeingei ding, a chi hi. 20 Tuachi-in, Baal Perazim ah David a kuan a, Filistiate a zou hi. Ama'n: Tui in thil a phutzak bangin, Tangtawn Toupa'n ka mai ah ka melmate a phuzakta, a chi hi. Tua hanga tua mun min dinga Baal Perazim chih min kisa ahi. 21 Filistiate'n tua mun ah a milim pathiante uh a taisan uh a, David leh a mite'n a pawmang uhi. 22 Filistiate khatvei hong kuan kik uh a, Refaim Phaizang ah hong kiphalh kik uhi. 23 David in Tangtawn Toupa a dong a, ama'n: Tangtakin kuantou pah ken, a nunglam uah a kuala paiin, balsam singkungte mai ah amaute dou in, chi-in a dawng hi. 24 Tua balsam singkungte dawna paiging na zak chiangin kintakin dou in. Filistia sepaihhonte dou dinga Tangtawn Toupa na maia kuankheta ahi, chihna hi ding ahi, a chi hi. 25 Tangtawn Toupa' thupiak bangin David in a hih a, Gibeon apan Gezer dong Filistiate a phukpai hi.
Jerusalem ah Pathian' Singkuang Kitun
1 David in Israelte lak apan mi teeltuam 30,000 a kaikhawm a, 2 amah leh a mite Judah gama Baala apan a kuan uh a, tua apan Pathian' singkuang latou dingin a kisa uhi. Tua Pathian' singkuang bel Tangtawn Toupa Vanglianpen' mina tua Min kilou ahi. Tua Tangtawn Toupa tua singkuang tunga cherubte kala kumpitutphaha tupa ahi. 3 Amaute'n tua Pathian' singkuang, kangtalai thak khat tung ah a koih uh a, Gibea-a om Abinadab' inn apan hon pua uhi. Abinadab' tapate Uza leh Ahio in tua kangtalai thak, 4 a tunga Pathian' singkuang kikoih a pii uh a, Ahio bel tua kangtalai mai ah a pai hi. 5 David leh Israel innkawte khempeuh, Tangtawn Toupa' mai ah, late, tamngaite, kaihgingte, khuangtate, pengkul bineite leh dakkhutbette tawh theihtawpin tua kipahpihin a om uhi. 6 Nakon' buhphual hong tun takun, tua kangtalai kai bawngtalte a kipalpaih dek manin, Uza in khuta sawkin, Pathian' singkuang a len hi. 7 Uza thilhih diklou ahih manin, a tung ah Tangtawn Toupa' hehna a kuang a, Pathian in ama' tung ah khut a kha a, tua ah, Pathian' singkuang kiang ah a sita hi. Uza tunga Tangtawn Toupa' thangpaihna a tun manin, David a lung nuam kei a, tuni dongin tua mun Perez Uza a kichi hi. 9 Tua ni-in David in Tangtawn Toupa a lau a: Bangchi-a Tangtawn Toupa' singkuang ka kiang hong tung thei peuhmah ding ahia? a chi hi. David khawpi-a ama' kianga om dingin Tangtawn Toupa' singkuang a paw nuam kei a, Git mi Obed Edom' inn ah a paw zawta hi. nTangtawn Toupa' singkuang, tua Git mi Obed Edom' inn ah kha thum sung a om a, Tangtawn Toupa'n amah leh a mite khempeuh a vualzawl hi. 12 Tangtawn Toupa'n Pathian' singkuang hangin Obed Edom' innkawte leh a neih peuhmah a vualzawl, chih David a hilh uhi. Tuachi-in, David a kuansuk a, Obed Edom' inn apanin David khawpi ah, kipahna thupitak tawh a latou hi. 3 Tangtawn Toupa' singkuang pawte'n kal guk a suan khit un, bawngtal khat leh bawngnou vakthau khat a lan hi. 14 David bel siampi puanak puan malngat silhin, Tangtawn Toupa' mai ah nakpitakin a laam hi. 15 Amah leh Israel innkawte khempeuh in kikou leh pengkul gingte tawh Tangtawn Toupa' singkuang a laktouh sung ua laam ahi. 16 Tangtawn Toupa' singkuang, David khawpi sung a lut takin, Saul' tanu Mikhal in tawhlet apan a na-en a, Tangtawn Toupa' maia David tawma laam a muh takin, a lungsung ah amah a simmawh hi. Tangtawn Toupa' singkuang hon tun uh a, David in a koih nadinga puanbuk a kaih sung ah a koih uhi. David in Tangtawn Toupa' mai ah haltum thillatte leh lemna thillatte a lan hi. 18 Haltum thillatte leh lemna thillatte a lat khitin, Tangtawn Toupa Vanglianpen' minin mipite a vualzawl hi. Tua khitin, tanghou beu khat, nisuh keu beu khat leh grep keu beu khat tek Israel mipite, numei pasal a pe vek hi. Tuachi-in, mipite khempeuh inn lam ah a chiahta uhi. 20 David, a innkawte vualzawl dinga inna hong chiah takin, Saul' tanu Mikhal amah tuak dingin hong pusuak a: Tuni'n Israel kumpipa, zumtheilou mi' hih dia kilawm bangin, a silate laka sila numeite' mitmuha puanakpi suahin kilang-tuamsak na mai e! a chi hi. 21 David in Mikhal kiang ah: Tangtawn Toupa' mi Israelte tunga vaihawm dinga, na pa hita leh, a innkawte kuapeuh sanga kei hon teelzaw Tangtawn Toupa' mai ah ahi kipaka ka nuam mahmah ding. 22 Hiai sang nangawna lethuailou zaw, keima' mitmuh nangawna simmawhhuaia om ding ka hi. Ahihhanga, na gen hiai sila numeite' pahtawi bel hina ding ka hi, a chi hi. 23 Tuachi-in, Saul' tanu Mikhal in bel a sih dongin ta a nei het kei hi.
David kianga Pathian' Thuchiam
1 Kumpipa, a innpi-a a teenkip nung leh Tangtawn Toupa'n a kim a kianga a melmate khempeuh apan tawlngakna a piak nungin, 2 ama'n kamsangpa Nathan kiang ah: Pathian' singkuang puanbuk sung peuha a om laia kei sidar singa kilam innpi a, ka teen mawk! a chi hi. Nathan in kumpipa a dawng a: Lungsima na vei peuhmah hih mai in, Tangtawn Toupa'n hon ompih ahi, a chi hi. 4 Tua zanin, Tangtawn Toupa' thu Nathan kiang ah hong tung a: 5 Pai inla, ka sila David va hilh in. Tangtawn Toupa' thugen hiai ahi: Ka tenna ding inn hon lamsak ding nang na hi-a hia? 6 Israelte Aigupta apan ka pikhiak touh apan tuni dong inna teeng nailou ka hi. Puanbuka teenga mun tuamtuama kituah kawikawi lai ka hi. 7 Israelte khempeuh tawh ka pai kawikawina mun peuh ah, ka mi Israelte ching dinga thu ka piak, a vaihawmte uh khat peuh kiang ah zong: Banghanga sidar inn hon lamsak lou na hi ua? Ka chi ngeia hia? chi in. 8 Tu'n ka sila David hilh in: Tangtawn Toupa Vanglianpen' thugen hiai ahi: Ka mi Israelte tunga vaihawm dinga gantatna mun leh belamhon zuihna apan hon la ka hi. 9 Na paina peuha hon ompih ing a, na melmate khempeuh na maia pan satkhia inga, tu'n leitunga milianpente' minte banga na min thupisak ding ka hi. 10 Ka mi Israelte, amau inn a neih na ding uleh, hihbuai ahih nawn louh nading ua, amaute ading mun khat pe ding ka hi. Migiloute'n a chil laia amaute a nuaisiah bang ua nuaisiah nawn lou ding uh a, nka mi Israelte tunga vaihawmte ka seh apan ahih bang ua zong hih nawn lou ding uh ahi. Na melmate khempeuh uapan zong khawl tawldamna hon pe ding ka hi. Tangtawn Toupa mahmah in nang ading inn khat hon hihkipsak ding ahi, chih Tangtawn Toupa'n na kianga phuang ahi. 12 Na nite hong bei a, na pu na pate kianga na khawl chianga, na mun luah ding na suan, nangma' pumpi mahmah apan hong piang ding, tungkhe ding ing a, a kumpigam kipsak ding ka hi. 13 Amah ahi ka Min ading inn khat lam ding. 14 Ama' pa hi ding ing a, amah ka tapa hi ding hi. Amah a tatkhelh chianga mihingte' chiang zanga amah taihilh ding ing a, mihingte' satna-a taihilh ding ka hi. 15 Ahihhanga amah apan ka itna lakmang hi ngeilou ding a, Saul apan ka lakmang a, na mai apan amah ka lakkhiak bang hi lou ding ahi. 16 Na inn leh na kumpigam ka maia omden ding a, na kumpitutphah zong kipden ding ahi, chi ahi, chi in, a chi hi. 17 Nathan in hiai lahkhiak thute khempeuh David kiang ah a gensawn hi.
David' Thuumna
18 Tua khitin, Kumpipa David a lut a, Tangtawn Toupa' maia tuin: Toupa Tangtawn Pathian aw, kei kua ka hia, ka inkawte zong bang hi uh ahia, hitan tan non pii? 9 Hiai na mitmuha kiching lou lai bangtaka, Toupa Tangtawn Pathian aw, na sila' innkawte' tunung thu ding zong na gen lai? Tangtawn Toupa aw, mihing na sai dan hibang hi mah hia? 20 Na kianga David in bang ahia a gen lai ding? Toupa Tangtawn Pathian aw, nang na silapa hon thei hive chin. 21 Na thu bang leh na deihna banga hiai thil thupi hihta chin a, na silapa kianga hon theisakta hi vechin. 22 Toupa Tangtawn Pathian aw, thupi na mahmah chia! Koute'n ka bil ua ka zaktak bang ua, nang bang kuamah om lou a, nang loungal Pathian om lou hi. 23 Na mi Israelte bang kua ahia om leitunga nam khat nanga tuam hi dinga tankhe ding leh nang adinga min kibawl dinga Pathian na kuankhiak a, Aigupta gam apan na tatkhiakte' maia namdangte leh a pathiante uh hawlkhia a, thillamdang leh mul-kimhuai pipi na hih, tua nam bang kua ahia om! 24 Nang na mi Israelte, nanga mahmah hiden dinga hihkip chin a, Tangtawn Toupa aw, a Pathian uh hong hita na hi. 25 Tu'n Tangtawn Toupa Pathian, na silapa leh a innkawte tawh kisaia na thuchiam kembitden in. Na chiamsa bangin hih in. 26 Hi leh, na min liana thupiden ding hi. Tua hun chianga, mite'n: Tangtawn Toupa Vanglianpen, Israel tunga Pathian ahi! chi ding uh a, na maia na sila David innkawte tunding hi ding hi. Tangtawn Toupa Vanglianpen, Israel Pathian aw, na silapa kianga: Nang ading inn ka lam ding, chi-a hiai lakkheta na hi. Tua bang ahih mana, na silapa'n hiai thumna na kianga hon lan dinga hiai hangsanna neita ahi. 28 Toupa Tangtawn Pathian aw, nang Pathian na hi! Na thute muanhuai ahi, na silapa kianga hiai thil hoihte chiamta na hi. 29 Na mitmuha omden dingin na silapa' innkawte tu'n vualzawl in! Ahang bel, Toupa Tangtawn Pathian aw, nang thu genta chin a, na vualzawlna tawh na silapa innkawte vualzawla omdenta ding hi, a chi hi.
David' Vualzawhna dangte
1 Hun hong pai pai a, David in Filistiate a zou a, a nuaisiah a, Filistiate' ukna apan Metheg Ama a la hi. 2 David in Moabte zong a zou hi. Amaute leilak ah a bok sak a, amaute khau tawn khatin a teh a, khau tawn nih a phakna chiang a that a, a tawn thumna teng a hinghawi hi. Tua bangin, Moabte, David nuaia om a suak uh a, siah a pia uhi. 3 Tua baan ah, David, Iufratis Luipi chiang donga a ukna omsak thak dinga a kuan laiin, Zoba kumpipa Rehob' tapa Hadadezer a dou hi. 4 David in a kangtalai 1,000, kangtalai hawlte 7,000 leh khe sepaih 20,000 a matsak hi. Kangtalai kai sakol 100 loungal adang teng' thaguipi a sattansak hi. 5 Damaska-a teeng Aramte, Zoba kumpipa Hadadezer huh dinga hong kuan takun, David in amaute 22,000 a that hi. 6 Aramte' kumpigama Damaska ah sepaihhon pawlte a koih a, Aramte David nuai ah a toukai uh a, siah a pia uhi. Tangtawn Toupa'n David kuanna khempeuh ah vualzawhna a pia hi. 7 David in khama kibawl, Hadadezer' uliante' lumte a la a, Jerusalem a tun hi. 8 Kumpipa David in Hadadezer khawpite Teba leh Berothai apan sumsan sik tampi a la hi. 9 Hadadezer' sepaihhonte khempeuh David in a zou, chih Hamath kumpipa Tou in a zak takin, 10 Kumpipa David muaka chibai buk ding leh Hadadezer tunga a vualtungtuanna kipahpih dingin a tapa Joram a sawl hi. Hadadezer leh Tou bel ana kidou gige ahi uhi. Joram in ngun leh kham leh sumsana kibawl vante hon puak hi. 11 Nam dang a zawhte khempeuh apan a lak ngun leh khama kibawlte a lat bangin, David in hiai vante zong Tangtawn Toupa kiang ah a lan hi. 12 Tua a nam zawhte bel Edom leh Moab, Amonte leh Filistiate leh Amalekte ahi. Zoba kumpipa, Rehob' tapa Hadadezer apan gallak sum a lakte zong a lan hi. 13 Chi Phaizanga Edomte 18,000 that khina hong kik nungin, David a minthang mahmah hi. 14 Edom gam sung teng ah sepaihhonte a koih a, Edomte khempeuh David nuai ah a toukai uh a, Tangtawn Toupa'n a kuanna khempeuh ah vualzawhna a pia hi.
David' Uliante
15 David in Israelte khempeuh tung ah vai a hawm a, a mite khempeuh adinga dik leh kizen a hih hi. 16 Zeruia' tapa Joab, sepaihhon makailian ahi a, Ahilud' tapa Jehoshafat bel laibu a thil gelhlutpa ahi. 17 Ahitub' tapa Zadok leh Abiathar' tapa Ahimelekh siampi ahi uhi. Seraia, laigelhpa ahi a, 18 Jehoiada' tapa Benaia bel Karethte leh Pelethte tunga ukpa ahi. David' tapate ahih uleh kumpipa' thudotte ahi uhi.
David leh Mefibosheth
1 David in: Jonathan hanga deihsakna ka piak theih ding Saul' innkawte a omlai om uhiam? chi-in a kan hi. 2 Saul' innkawte' sila khat Ziba a om a, David' maia hong pai dingin a sam uhi. Kumpipa'n amah kiang ah: Ziba na hi maw? a chi hi. Ama'n a dawng a: Na silapa amah hi mah ing, a chi hi. 3 Kumpipa'n: Pathian deihsakna ka latsak nading Saul innkawte khat beek om nawn lou hia? chi-in a dong hi. Ziba in kumpipa a dawng a: Jonathan' tapa khat om mah e. Amah zaw a khe langniha poihlong ahi, a chi hi. 4 Kumpipa'n: Amah koia om ahia? chi-in a dong hi. Ziba in a dawng a: Lo Debar khua ah, Amiel' tapa Makir' inn ah a om, a chi hi. 5 Tuachi-in, Kumpipa David in Lo Debar-a Amiel' tapa Makir' inn apan amah a vapiisak hi. 6 Saul' tapa Jonathan' tapa Mefibosheth, David kiang hong tun takin, David zahna piain a mai ah a kun hi. David in: Mefibosheth! a chi hi. Ama'n a dawng a: Na silapa amah ka hi, a chi hi. 7 David in amah kiang ah: Lau ken aw, na pa Jonathan vanga deihsakna hon lak nuam ka hi. Na pu Saul' neihsa gam khempeuh nang hon pe ding ing a, nang ka dawhkana nea dawn gige ding na hi, a chi hi. 8 Mefibosheth a kun a: Ui puul bang lei kei tua zaha na phawk ding, na silapa bang ka hia oi? a chi hi. 9 Tua khitin, kumpipa'n Saul' silapa Ziba a samsak a, amah kiang ah: Saul leh a innkawte' neihsa khempeuh na pu' tupapa kianga peta ka hi. 10 Nang leh na tapate leh na silate'n ama' adingin tua gam na khou ding uh a, na pu' tupapa'n nek ding a neih theih nadingin tua gam gahte non puaklut ding uh ahi. Na pu' tupapa Mefibosheth in ka dawhkana nein a dawn gige ding, a chi hi. Ziba in bel tapa sawmlenga leh sila 20 a nei hi. 11 Tua khitin, Ziba in kumpipa kiang ah: Ka toupa kumpipa'n a sila hih dinga na thupiak khempeuh na silapa'n ka hih ding, a chi hi. Tuachi-in, Mefibosheth in kumpipa' tapate khat bangin kumpipa' dawhkana nein a dawn hi. 12 Mefibosheth in tapa naupang chik Mika kichi a nei a, Ziba' innkawte khempeuh Mefibosheth' silate ahi uhi. 13 Mefibosheth bel kumpipa' dawhkana nea dawn ahih tawh, a khe langniha poihlong ahih tawh Jerusalem ah a teengta hi.
David in Amonte Zou
1 Hun hong pai pai a, Amonte' kumpipa hong si a, a tapa Hanun in kumpipa hihna a luah hi. 2 David in: Nahash' tapa Hanun tung ah siam ka suah ding, a pa'n ka tunga siam a suah bangin, chi-in a ngaihtuah hi. Tuachi-in David in Hanun kianga a pa sihna thu-a a suunpih dan gen dingin Hanun kiang ah palai a sawl hi. David silate Amonte gam hong tun takun, 3 Amon makaite'n a pu uh Hanun kiang ah: David in na pa suunpihna gen dinga mi hon sawl, David in na pa pahtawiin na um hia? David in khawpi vela, enkhe dinga, tua chianga lumlet ding mi hon sawl hi zaw lou hia? a chi uhi. 4 Tuachi-in, Hanun in David silate a man a, a khamul uh a kimkhat chiat a metsak a, a puansilhte uh a tawbou tak uah tum nih a suahsak a, a sawlkik hi. 5 Hiai thu David kianga a kihilh takin, hiai mite nakpitaka zahlaksaka om a hih manun, amaute kiang ah khualtaite a sawl hi. Kumpipa'n amaute kiang ah: Na khamul uh hong khan nawn mateng Jerikho ah hong tam tadih unla, tua khit chiangin hong pai un, a chisak hi. 6 Amonte'n David nakvanga namsia ahita uh, chih a phawk takun, Beth Rehob leh Zoba apan Aram khe sepaih 20,000, tua baan ah Maaka kumpipa mi 1,000 tawh, Tob apan mi 12,000 tawh a guai uhi. 7 Hiai thu a zak takin, David in galdou thei sepaihhon khempeuh tawh Joab a sawl hi. 8 Amonte hong kuankhia uh a, a khawpi kongpi uah galdou dingin a kisa uh a, Zoba leh Rehob apan Aramte leh Tob leh Maaka' mite bel gam sung ah a om uhi. 9 Joab in a mazawn leh a nunglam ah kidou dinga kivualte a mu a, Israel sepaih hoihpente a teelkhia a, Aramte dou dingin a koih hi. 10 Midangte khempeuh bel a sanggampa Abishai makaihna nuai ah a koih a, Amonte dou dingin a koih hi. nJoab in: Kei adinga Aramte a hat luat uleh, kei hong hukhe dinga nong kuan ding ahi. Noute adinga Amonte a hat luat uleh, noute hukhe dingin kong kuan ding hi. 12 Thahat suah unla, i mite leh Pathian' khawpite adingin hangsantakin galdou un. Tangtawn Toupa'n a mitmuha a hoih hih na ding ahi, a chi hi. Tua khitin, Joab leh a tonpih sepaihte'n Aramte dou dingin mailam a nawt uh a, amaute a mai ah a taikek uhi. 14 Aramte a taikek uh, chih Amonte'n a muhtakun, Abishai' mai ah a taikek samta uh a, khawpi sung ah a lut uhi. Tuachi-in, Joab, Amonte douna apan hong kilehkik a, Jerusalem hong tung hi. 15 Israelte'n amaute a zougawp uh chih a muh nungun, Aramte a kikaikhawm kik uhi. 16 Hadadezer in Luipi gal apanin Aramte a piisak a, Hadadezer sepaihhon makaipa Shobakh makaihin Helam ah a kuan uhi. 17 David kianga hiai thu a kihilh takin, ama'n Israelte khempeuh a kaikhawm a, Jordan lui kanin, Helam ah a kuan hi. David tuaka dou dingin Aramte a kisa uhi. 18 Ahihhangin, Aramte Israelte' mai ah a taikek uh a, David in a kangtalai hawlte uh 700 leh a khe sepaihte uh 40,000 a that hi. A sepaihhon' makai uh Shobakh zong a satpai a, tua mun ah a si hi. 19 Hadadezer nuaia kumpipa khempeuh in Israelte'n a zou uh, chih a kimuh takun, Israelte tawh kilemna a bawl uh a, amaute nuai ah a toukai uhi, Tuachi-in, Aramte'n Amonte huh nawn ding a lauta uhi.
David leh Bathsheba
1 Nipi kipan a, kumpipate galdoua a kuan laiun, David in Joab leh a silate leh Israelte a vekun a sawlkhia hi. Amonte zougawpin, Raba a sim uhi. Ahihhangin, David bel Jerusalem ah a om hi. 2 Nitaklam khatin David a lupna apan a thoukhia a, kumpi innpi tunglam ah a vialvak hi. Tua inntung apanin numei kisil khat a mu hi. Tua numei a melhoih mahmah a, 3 David in tua numeinu kankhe dingin mi a sawl hi. A misawl in: Hiai nu, Eliam' tanu Bathsheba, Hit mi Uria' zi hilou maw? a chi hi. 4 Tua khitin, David in amah pii dingin mi a sawl hi. Tua minu David kiang hong tung a, ama'n a na luppih hi. Amah bel a sianlouhna apan kihihsiangkhin ahi. Tua bangin, inn ah a chiahkikta hi. 5 Tua numei a gai a, David kiang ah thu a khak a: Nau ka paai, a chi hi. 6 Tuachi-in, David in Joab kiang ah thu a khak a: Hit mi' Uria ka kiang ah hon sawl in, a chi hi. Tua bangin, Joab in David kiang ah amah a sawl hi. 7 Uria amah kiang hong tun takin, David in Joab bang a chi a, sepaihte bang a chi ua, kidouna bang a chi zel a, chih khawng a kan hi. 8 Tua khitin, David in Uria kiang ah: Na inn ah va pai inla, na khe sil in, a chi hi. Tuachi-in, Uria in kumpi' innpi a nusia a, kumpipa apan thawnpiak a nungdelhsak uhi. 9 Ahihhangin, Uria bel a pu' silate kiang ah, innpi kongpi ah a lum a, a inn ah a pai kei hi. 10 Uria inn ah a pai kei, chih David a kihilh takin, ama'n Uria kiang ah: Gamlapi apan hong tung phet hilou na hi maw? Banghanga inna va pai lou, a chi hi. nUria in David kiang ah: Pathian' singkuang leh Israel leh Judahte puanbuk khawnga om uh a, ka pu Joab leh ka toupa' mite gamlak khawnga giahphual sata om uh a, bangchi-a kei ne ding leh dawn ding leh ka zi kianga lum dinga inna pai thei ding ka hia? Na hinna sialin ka gen ahi, tua teng hih peuhmah kei ning! a chi hi. 12 David in Uria kiang ah: Hiai ah ni khat taam lai inla, zingchiangin kon sawlkik ding, a chi hi. Tuachi-in, Uria, Jerusalem ah tua ni leh a zing chiang a taam hi. 13 David in amah a chial a, amah tawh nea dawnin a om a, David in zu a khamsak hi. Ahihhangin, nitakin Uria a paikhia a, a pu' silate lak ah, ama' phek tung ah a giak a, inn ah a pai kei hi. 14 Zingsangin, David in Joab ading laikhak a gelh a, Uria a pawsak hi. 15 Tua laikhak ah: Uria gal matawng ah, kidouna a natsiatna mun ah pangsak inla, amah satpaiha om a, a sih nadingin nungkiksan in, chi-in a gelh hi. Tuachi-in, Joab in tua khawpi a sim laiin khawpi vengte a hatna laitak hi-a a theihna mun ah Uria a koih hi. 17 Tua khawpi mite hong kuankhia a, Joab a suai laiun, David' sepaihte pawlkhat a puk uhi. Tua baan ah, tua Hit mi Uria a si hi. 18 Joab in tua kidouna thu a kim sipsipin David a khak hi. 19 Khualtaipa kiang ah thu a hilh a: Hiai kidouna thu kumpipa na piak khit chiangin, 20 kumpipa' hehna a puakzak mai thei a, ama'n: Tua khawpi dou dinga banghanga va naih law lawmlawm na hi ua? Kulhbaang tung apan thala hon na kap ding uh ahi, chih thei lou maw? 21 Jerub Besheth' tapa Abimelekh kua'n that hiam, chih thei lou maw? Numei khat in kulhbaang tung apan buhheksuang tungnung ama' tunga khesuk a, Thebez-a si hilou maw? Banghanga kulhbaang va naih law lawmlawm na hi ua? chi-a hon dong maithei ahi. Hiai banga hon dot leh, a kiang ah: Na sila Hit mi Uria zong si ahi, chi in, a chi hi. 22 Tua khualtaipa a kipankhia a, hong tun takin, Joab in gen ding, chi-a amah a hilh khempeuh David a hilh hi. 23 Tua khualtaipa'n David kiang ah: Tua mite'n koute hon na zou uh a, hong pawtkhia uh a, mun awnga hon delh uh a, ahihhanga, koute'n kongpi donga nawhkik hi ung. 24 Tua laia, kulhbaang tung apan thaltawite'n kongpi-a na silate thala hon kap uh a, kumpipa' silate bangzah hiam si uhi. Tua baan ah, na sila Hit mi Uria zong si ahi, a chi hi. 25 David in tua khualtaipa kiang ah: Joab kiang ah hiai gen in: Hiai in na lung dahsak kei hen! Namsau in khat a thah banga a dang zong that ahi. Tua khawpi dou inla, hihgawp in, chi-in, Joab hanthawn dingin hiai gen in, a chi hi. Uria' zi in a pasal a si, chih a zak takin, amah a suun hi. 27 A sisuun hun a bei takin, David in a inn ah a piisak a, a zi hong hi a, tapa khat a neihsak hi. Ahihhangin, David' thilhih in Tangtawn Toupa lungkimlou takin a koih hi.
Nathan in David Taihilh
1 Tangtawn Toupa'n David kiang ah Nathan a sawl a, ama' kiang hong tun takin: Khawpi khat ah mi nih a om uh a, khat a hau a, a khat pen a zawng hi. 2 Ahaupapen in belam leh bawng a hau mahmah a, 3 ahihhangin, a zawngpa pen in belamnou nu neuchik khat loungal bangmah a nei kei hi. Ama'n tua a khoi a, amah leh a tate tawh, tua belam nou a khangtou hi. Tua belamnou in ama' an a nekpih a, a nou a dawnpih a, a angsung nangawn ah a ihmu hi. Ama' adingin a tanu bang ahi. 4 Tua ahaupa' inn ah mikhual khat hong zintung hi. Ahihhangin, ahaupa'n mikhual nek ding bawl nadingin ama' belamte leh bawngte laka khat beek a gou kei hi. Gawh naksangin, mizawngpa' belamnou nu a laksak a, a inna hong tungpa nek dingin a bawl hi, a chi hi. 5 David tua ahaupa tung ah a heh mahmah a, Nathan kiang ah: Tangtawn Toupa' hinna sialin ka gen ahi, hibanga gamtapa si taak ahi! 6 Tua mipa hibanga gamta a, lainatna neilou ahih manin, tua belamnou man a lehli a piak ding ahi, a chi hi. 7 Tua khitin, Nathan in David' kiang ah: Tua mipa nang na hi! Tangtawn Toupa, Israel Pathian in hiai a gen a: Ke'n Israel tunga kumpipa hi dingin thau kon nilh a, Saul khut apan na hinna kon humbit hi. 8 Na pu' innkawte nang kon pia a, na pu' zite na angsung ah kon pia a, Israel leh Judah innkawte kon pia hi. Hiaite tawm lua ahih leh, a tam zaw zong kon pe nuam. 9 Banghanga a mitmuha thil gilou hih a, Tangtawn Toupa' thu simmawh na hia? Namsauin tua Hit mi Uria na satlum a, a zi nang adingin na pii hi. Amonte' namsaua amah that na hi. 10 Hibanga kei non simmawh a, tua Hit mi Uria' zi nang adinga na pii manin, namsau in na innsung lawi lou ding ahi, chi ahi. 111 Tangtawn Toupa'n hiai a gen a: Nangma' innsung apan maha na tunga siatna tun ding ka hi. Nangma' mitmuh mahmaha na zite la ding ing a, na innveng nai khat kianga pe ding ing a, ama'n suntang laia amaute luppih ding ahi. 12 Nang a sima na hih, ke'n Israelte khempeuh maia suntang laia hiai tungsak ding ka hi, chi ahi, a chi hi. 13 Tua khitin, David in Nathan kiang ah: Tangtawn Toupa tung ah ka na khialta, a chi hi. Nathan in a dawng a: Tangtawn Toupa'n na khelhna a lamangta. Na si kei ding. 14 Ahihhangin, hiai na thilhiha Tangtawn Toupa' melmate na kisimmawhsak luat manin, tapa nang apan piang ding pen a si ding hi, a chi hi. 15 Nathan inn-a a pai nungin, tua Uria' zi in David adinga a neihsak tapa tung ah Tangtawn Toupa'n khut a kha a, hong china hi. 16 David in tua naupang adingin Pathian kiang ah a ngetsak ngutngut a, an a ngawl a, zankhawvakin suai tung ah a lum hi. 17 A innsung upate amah suai apan thoukhesak dingin a kiang ah hong ding uh a, ahihhangin, a thou nuam kei a, amaute tawh zong an himhim a ne nuam kei hi. 18 A ni sagih ni-in tua naupang a si hi. Tua naupang a hin laia bawn David i houpih chianga hon ngaikhe lou ahih chiangin, naupang a si, chih bangchi-a hilh thei ding i hia? Thil hoihloupi zong kilawh kha in teh, chi-in, David silate'n naupang a si, chih amah a hilh ngam kei uhi. 19 David in a silate kihuau suausuau a mu a, naupang a sita, chih a phawk hi. Ama'n: Naupang si hia? chi-in a kan hi. Amaute'n: He, amah si ahi, chi-in a dawng uhi. 20 David suai apan hong thoukhia a, a kisil khitin sathau kizutin, a puansilhte a kheng a, Tangtawn Toupa' inn sung ah a lut a, amah a bia hi. Tua khitin, ama' inn ah a pai a, ama'n annek ding a ngen a, a pia uh a, a neta hi. 21 A silate'n amah kiang ah: Banghanga hibanga om na hia le? Naupang a hin laia an ngawl china, kap china, tu-a a sih taka thoua an na nek? a chi uhi. 22 Ama'n a dawng a: Naupang a hin laia an ngawl ing a, kap ka hi. Tangtawn Toupa'n deihsakna hon piain naupang a dam khamawh ding hiam, chih kua'n thei eita? 23 Tu-a bel amah sita a, banghanga an ngawl ding ka hia? Amah hingsak kik thei ding ka hi maw? Kei amah kianga pai ding ing a, amah kei kianga hong kik lou ding hi, a chi hi. 24 Tua khitin, David in a zi Bathsheba a khamuan a, amah kianga hawhin a luppih hi. Ama'n tapa khat a nei a, a min dingin Solomon a sa uhi. Tangtawn Toupa'n amah a it hi. 25 Tangtawn Toupa'n amah a it manin, kam-sangpa Nathan sawlin, a min dinga Jedidia sak dingin thu a khak hi. 26 Tua lai mahin Joab in Amonte khawpi Raba a sim a, kumpi khawpi kulhpi a la zou hi. 27 Joab in David kiang ah khualtaite a sawl a: Raba ka sim a, a tui lakna ka lazouta. 28 Tu'n sepaih dangte kaikhawm inla, khawpi sim inla, la in. Tuachi ahih kei leh, ke'n tua khawpi la ding ing a, kei tama a min kisa ding ahi, a chisak hi. 29 Tuachi-in, David in sepaihhon khempeuh a kaikhawm a, Raba ah a kuan a, a sim a, a la zouta hi. 30 A kumpipa uh lutang apan kumpilukhu a la hi. A gikdan khamsik talent khata gik, suangmanpha-a kizem ahi. Tua David lutunga khuksakin a om hi. Tua khawpi apan gallak tampi a la a, 31 a sunga om mite a kaikhia a, sing atnate, suanggalte leh heipite zangin nna a semsak a, teklei khawng a velsak hi. Amon khawpite khempeuh zong hibangin nna a semsak hi. Tua khitin, David leh a sepaihhonte khempeuh Jerusalem ah a kilehkikta uhi.
Amnon leh Tamar
1 Hun hong pai pai a, David' tapa Amnon in David tapa Absalom' sanggamnu Tamar a deihta hi. 2 Tamar bel nungak siangthou a hi a, Amnon in bangmah lawh theilou ahih manin, tua a sanggamnu hanga china hialin lungkiain a om hi. 3 Amnon in lawm khat a nei a, a min Jonadab ahi. Amah bel, David' sanggampa Shimea' tapa ahi. Jonadab bel pilkheltak ahi a, 4 ama'n Amnon kiang ah: Banghanga nang, kumpipa' tapa, a nisima gawng semsem na hia le? Hon hilh lou ding maw? a chi hi. Amnon in amah kiang ah: Ka sanggampa Absalom' sanggamnu Tamar deihta ka hi, a chi hi. 5 Jonadab in: Lupna ah lum inla, kichinat khembawl in. Na pa'n hong veh chiangin, amah kiang ah: Ka sanggamnu Tamar hong pai henla, nek ding bangpeuh hon tawi leh chi nang e. Ka mitmuh in, ka et lai mahin an hon bawlsak henla, ama' khut tung apan mahmah in ne leng, na chi lechin, a chi hi. Tua bangin Amnon a lum a, a kichinat khembawlta hi. Kumpipa'n amah hong veh takin, Amnon in a kiang ah: Ka sanggamnu Tamar hong pai henla, a khut tung apan ka nek dingin, ka mitmuhin tanghou bang zah hiam, limchitak hon bawlsak leh chi nang e, a chi hi. 7 David in innpi-a Tamar kiang ah thu a khak a: Na sanggampa Amnon inn ah va hawh inla, ama' nek ding an va bawlsak in, a chi hi. 8 Tuachi-in, Tamar, a sanggampa Amnon inn ah a va hawh a, amah bel a na lum hi. Tamar in anvui nei a la a, a mek a, Amnon' muhin tanghou a bawl a, a em hi. 9 Tua khitin, tua kuang domin Amnon kiang ah tanghou a pia hi. Ahihhangin, Amnon in a ne nuam kei hi. Amnon in: Midangte hiai apan sawlkhe vek in, a chi hi. Tuachi-in, mi chih in amah a nusia uhi. 10 Tua laitakin Amnon in Tamar kiang ah: Na khut tung apan ka nek theih nadingin, ka lupna dan sung ah an hon tawi in, a chi hi. Tamar in tanghou a bawlsa a tawi a, a sanggampa Amnon kiang ah, a lupna dan sung ah hon tawi hi. 1 Ahihhangin tua an a nek ding hon tawi takin, amah a na man a: Ka sanggamnu aw, ka kiang ah hong lum in, a chi hi. 12 Tamar in: Ka sanggampa aw, hibang hih ken! Hon suai ken. Israel ah hibang hih ding hilou ahi! Hibang gitlouhna hih ken. 13 Kei bang suak ding? Ka zahlakna koia paikhe thei ding ka hia? Nang zong bang suak ding? Israela migilou mihaite khat bang ding na hi. Hehpihtakin, kumpipa houpih inla, nang tawh kiten ding hon kham lou hiai ding ahi, a chi hi. 14 Ahihhangin, Amnon in Tamar thugen a ngaikhe nuam kei a, ama' sanga hatzaw ahih chiangin, a zahlaksakta hi. 15 Tua khitin, Amnon in amah muhdah chihtakin a mudah a, amah a itna sangin a muhdahna a lian zaw hi. Amnon in amah kiang ah: Thou inla, paikhia in, a chi hi. 16 Tamar in amah kiang ah: Hilou ding! Non hawlkhiak leh, ka tunga na thil hihsa sanga sezaw hi ding ahi, a chi hi. Ahihhangin, Amnon in a ngaikhe nuam kei hi. 17 Ama' sila tuam khat a sam a: Hiai numei hiai apan kaikhia inla, a nung ah kong kaih in, a chi hi. 18 Tua bangin, a silapa'n Tamar a kaikhia a, a nung ah kong a kaih hi. Tamar in bel kumpi' tanu nungak siangthoute' silh, nakpitaka kizepna silh ahi. 19 Tamar in a luzanga vut kibuakin, a puanaktual nakpi taka zep hoih botkekin, a lu humin a pai a, a pai kawmin a kapkhe ekek hi. 20 A sanggampa Absalom in amah kiang ah: Tua Amnon, na sanggampa, na kianga om ahi maw? Ka sanggamnu aw, tu'n dai didein om in. Amah na sanggampa ahi. Hiai thil ngaihhtuah nawn ken, a chi hi. 21 Kumpipa David in hiaite khempeuh a zak takin, a heh mahmah hi. Absalom in bel Amnon kiang ah, a sia a pha hita leh, thu kam khat zong a gen ngei kei a, a sanggamnu Tamar a zahlaksak manin, a mudah hi.
Absalom in Amnon That
23 Kum nih nungin, Absalom' belammul mette, Benjamin gamgi kianga Baal Hazora a om laiun, Absalom in kumpipa' tapate khempeuh tua-a hong pai dingin a chial vek hi. 24 Absalom, kumpipa kiang ah a va hawh a: Na silapa'n belammul mette ka samkhawmta a, hehpihtakin kumpipa leh na silate non^ hawh kei ding ua hia? a chi hi. 25 Kumpipa'n a dawng a: Hilou e, ka tapa aw, ka vekun kong hawh ding uh ahi kei. Nang adingin puakgik ka hi lei ding uh, a chi hi. Absalom in chial ngutngut mah leh, ama'n a nial a, a vualzawlna bel a pia hi. 26 Tua khitin, Absalom in: Nong hawh kei ding leh, hehpihtakin, Amnon koute hon zuisak in, a chi hi. Kumpipa'n: Banghanga ama'n noute hon zui ding ahia? a chi hi. 27 Ahihhangin, Absalom in a ngen teitei a, Amnon leh kumpipa' tapa dangte a zuisak hi. 28 Absalom in a mite thu a pia a: Ngai un! Amnon zukhama nop hon sak chiangin, Amnon tunga khut khain that un, ka chih chiangin, lau het kei un. Hiai thupiak hon pia kei hilou ka hi hia? Thahat leh hangsan suah un, a chi hi. 29 Tuachi-in, Absalom' thupiak bangin Absalom' mite'n Amnon tung ah a hihta uhi. Kumpipa' tapate khempeuh a dingkhia uh a, a sabiltungte uh tunga tuangin a tai uhi. Lampi-a a pai laiun, thutut David kiang ah hong tung a: Absalom in kumpipa' tapate khempeuh tunga khut kha a, khat beek suakta lou hi, chi-in thu hong tung hi. 31 Kumpipa a dingkhia a, a puansilhhte a botkek a, leilak ah a lum hi. A silate khempeuh zong a puansilhte uh botkekin a kiang ah a ding uhi. Ahihhangin, David sanggampa Shimea' tapa Jonadab in: Kumpi tapate a vek ua that uh, chi-in ka toupa'n ngaihtuah ken. Amnon kia ahi si, Amnon in a sanggamnu Tamar a pawngsual ni apan Absalom' thiltup hiai hi mawng ahi. 33 Kumpipa' tapate si vek, chi-a thutut ah ka toupa kumpipa lungkham ken. Amnon kia ahi a si, a chi hi. 34 Tua sungin, Absalom a taimangta hi. Galvila dingpa a khawdak a, a tumlam panga lampi ah mi tampi a mu a, amaute mual pang ah hong paisuk uhi. Galvilpa a va pai a, kumpipa a va hilh a: Horonaim lama mualpang ah mite ka mu, a chi hi. 35 Jonadab in kumpipa kiang ah: En mah ve, kumpipa' tapate hiah om uh. Na silapa' gen bang bang ahi, a chi hi. 36 Tua banga a genkhitin, kumpipa' tapate hong lut uh a, nakpitakin a kap uhi. Kumpipa leh a silate khempeuh zong khasetakin a kap uhi. 37 Absalom bel a taimang a, Geshur kumpipa Amihud' tapa Talmai kiang ah a tai hi. Ahihhangin, Kumpipa David in nisimin a tapa a suun hi. 38 Absalom tai a, Geshur a tun nungin, tua ah kum thum a taam hi. 39 Amnon sihna tungthu-a kihehnemtain, kumpipa' lungtang bel Absalom kiang a ut mahmah hi.
Jerusalema Absalom' Kikna
1 Kumpipa' lungtang in Absalom a lunggulh chih Zeruia' tapa Joab in a thei hi. 2 Tuachi-in, Tekoa ah mi a sawl a, tua apan numei pii khat a piisak hi. Ama'n tua nu kiang ah: Sisuuna dahin kibawl inla, sisuun puan silh inla, bangmah kicheina thil kinuh ken. Mi tampi a sisate suuna dah bangin gamta in. 3 Tua khit chiangin, kumpipa kiang ah va hawh inla, hibangin thu va gen in, chi-in a thugen dingte a muam hi. 4 Tekoa numei, kumpipa kianga a va hawh takin, zahna plain lei si-in a kun a: Kumpipa aw, hon huh in! a chi hi. 5 Kumpipa'n: Bang in hon dahsak ahia? a chi hi. Ama'n: Kei ka pasal sita a, meigong ka hi. 6 Kei na silanu'n tapa nih nei ing a, amaute gamlaka kisual uh a, amaute kaikhen ding kuamah om lou hi. Khat in khat tunga khut kha a, that hi. 7 Hiai mite a beh tang ua na silanu tunga heh uh a: A sanggampa tunga khut khapa hon pekhia in. A sanggampa tunga khut kha-a a thah manin amah ka thah teitei ding uh ahi, a gouluah ding zong ka hihmanthat ding uh ahi, chi uhi. Leitunga ka pasal adinga min leh suan zong nutsiat lou a, meiam ka neihsun mitsak ding uh hita hi, a chi hi. Kumpipa'n tua numei kiang ah: Inn ah paita in, nang ading thupiak khat ka bawl na ding, a chi hi. 9 Ahihhangin, tua Tekoa numei in amah kiang ah: Ka toupa kumpipa aw, mawhtanna kei tung leh ka pa' innkawte tung ah om henla, kumpipa leh a kumpitutphah bel mawhneilouin om hen, a chi hi. 10 Kumpipa'n a dawng a: Mi khat peuh in na kianga gen a neih leh, ka kiang ah hon tonpih in, nang hon buaisak nawn kei ding, a chi hi. 11 Numei nu'n: Tua bang ahih leh, sisan phulapa'n siatna behlap a, ka tapa hihmanthata a om louh nadingin, kumpipa'n Tangtawn Toupa a Pathian sam hen aw, a chi hi. Kumpipa'n: Tangtawn Toupa' hinna sialin ka gen ahi: Na gen tapa' lutanga samzang khat zong leilak ah a ke kei ding, a chi hi. 12 Tua numeinu'n: Ka toupa kumpipa' kiang ah, na silanu thu kamkhat hon gensak lai in, a chi hi. Kumpipa'n: Gen in, a chi hi. 13 Tua numeinu'n: Ahih leh, banghanga Pathian' mite tunga thil hibang sawm na hia oi? Kumpipa'n hiai a gen taka, amah mawh kitan hilou maw? Ahang bel, kumpipa'n a tapa sawlmanga om piikik nawn lou hiven. 14 Leilaka tui bawsa luahkik theih louh banga koute si ngeingei ding ka hi ve ua. Ahihhanga Pathian in zaw hinna lamang lou ahi. Lakmang nak-sanga, sawlmanga om mi zong amah apan khenkhiak dena a om louh nadinga lampi zong zaw ahi. 15 Mite'n hon lausak ahih mana ka toupa kumpipa kianga hiai gen dinga tu-a hong pai ka hi. Na silanu'n: Kumpipa ka va houpih ding. A silanu' nget a hihsak khamawh ding hia, 1 kumpipa'n kei leh ka tapa, Pathian' piaksa goutan tang lou dinga satkhiak hon sawmpa khut apan a silanu hinna a humbit nuam khamawh ding hiam, chi-a na silanu'n ngaihsun ka hi. 17 Tu'n na silanu'n: Ka toupa kumpipa' thugen in kei hon tawldamsak hen. Ahang bel, ka toupa kumpipa, thil hoih leh thil hoihlou khen thei dinga Pathian' vansawltak bang hiven. Tangtawn Toupa na Pathian in nang hon ompih hen aw, chi ka hi, a chi hi. 8 Tua khitin, kumpipa'n tua numei kiang ah: Kon dot ding dawnna hon iim het ken, a chi hi. Numeinu'n: Ka toupa kumpipa'n gen in, a chi hi. 19 Kumpipa'n: Hiai thil khempeuh ah Joab khut a kigolh kei maw? chi-in a dong hi. Numeinu'n a dawng a: Ka toupa kumpipa' hinna sialin ka gen ahi. Ka toupa kumpipa' thugen apan kuamah veilam hiam, taklam hiam ah a pial thei kei. Ahi, na silapa Joab ahi hiai hih ding hon thuhilh a, hiai thu khempeuh na silanu kama hon muam. 20 Na silapa Joab in tulai thil omdan khek nuama hiai hih ahi. Ka toupa'n Pathian vansawltak' pilna bang pilna na nei, gam sunga thil tung khempeuh na thei, a chi hi. 21 Kumpipa'n Joab kiang ah: Hoih e. Ka hih ding. Kuan inla, tangval Absalom hon piikik in, a chi hi. 22 Kumpipa zahna plain Joab lei si-in a kun a, a vualzawl a: Na silapa'n ka toupa kumpipa' mitmuhin deihsakna ka tang chih tuni'n na silapa'n ka theita. Ahang bel, kumpipa'n na silapa ngetna phalsak hive chin, a chi hi. 23 Tua khitin, Joab, Geshur ah a hawh a, Jerusalem ah Absalom hon piikik hi. 24 Ahihhangin, kumpipa'n: Ama' inn ah pai henla, ka maitang mu kei hen, a chi hi. Tuachi-in, Absalom a inn ah a pai a, kumpipa' maitang a mu kei hi. 25 Israel gam sung khempeuh ah, mi kuamah, Absalom banga melhoiha phat a om kei hi. 26 A sam a met tengin a metkhiak gikdan a buk a, kumpi tehna danin shekel 200 in a gik hi. Ama'n a sam a gik luat chianga met zelzel ahi. 27 Absalom in tapa thum leh tanu khat a nei hi. A tanu min Tamar ahi, nungak melhoihtakin hong khangkhia hi. 28 Absalom, kumpipa maitang' mu louin Jerusalem ah kum nih a om hi. 29 Tua khitin, kumpipa kianga sawl dingin Joab a thukhak hi. Ahihhangin, Joab hong pai nuam kei hi. A nihveina a thukhak a, hong pai nuam tuan kei hi. 30 Tua khitin, a silate kiang ah: Ngai un, Joab' lou, kei' lou tawh kizom ahi, tua ah barlibuh ching ahi. Va kuan unla, meiin va hal un, a chi hi. Tuachi-in, Absalom' silate'n tua lou meiin a vahal uhi. 31 Tua khitin, Absalom inn ah Joab hong hawh a, a kiang ah: Banghanga na silate'n ka lou meia hal uh ahia? a chi hi. 32 Absalom in Joab kiang ah: Ngai dih! Kon thukhak a: Hiah hong inla, kumpipa kiang ah: Geshur apan banghanga hong pai ka hia? Hua'h om lai leng kei adia hoih zaw ding hi! chih va gen dinga hon sawl nuam ka hi. Thil bangpeuha mawhna nei ka hih leh, hon that leh a kei dia, a chi hi. 33 Tuachi-in, Joab, kumpipa kiang ah a va hawh a, hiai a va hilh hi. Kumpipa'n Absalom a sam a, amah hong luta, kumpipa' mai ah leisi-in a kun hi. Kumpipa'n Absalom a na tawp hi.
Absalom Thil Simsawm
1 Hun hong pai pai a, Absalom in kangtalaite, sakolte leh mi 50, ama' maia tai ding a kikoih hi. 2 Beltakin a thou a, khawpi kongpi zotna lampi gei ah a ding a, a thubuai uh kumpipa' maia gen a, thu khensak dinga mi hong pai peuhmah chiangin, Absalom in a na sam a: Koi khua-a hong kipan na hia? chi-in a na dong zel hi. Tua bang mi in: Na silapa Israel namte khat tua bang tua bang akipan ka hi, a chi hi. 3 Absalom in amah kiang ah: Ngai dih, na thubuai ah nang na dik hi. Ahihhangin, na thu hon ngaihkhiaksak ding kumpipa nuaia mi om lou ahi, a chi hi. 4 Tua baan ah: Kei gam sunga thukhen dinga seh hi peuhmah leng zaw, lungkimlouhna hiam, thubuai hiam nei peuhmah ka kianga hong pai ding a, ke'n thudika thukhenna bawlsak ding hi'ng a, a chi lai hi. 5 Tua baan ah, a maia kun dinga mi'n amah hon naih peuhmah chiangin, Absalom in a na sawk a, a na len a, a na tawp hi. 6 Thudika thukhenna deiha kumpipa hon naih Israelte khempeuh tua bangin a na bawl zel a, Israelte' lungtang a na gukmangsak hi. 7 Kum 40 hong bei takin, Absalom in kumpipa kiang ah: Tangtawn Toupa' maia ka thuchiam tangtun dingin Hebron ah hon hawhsak ve. Aram gama Geshur-a na silapa ka om laia hiai thuchiam ka bawl a: Tangtawn Toupa'n Jerusalem hon tutkik leh, Tangtawn Toupa Hebrona be ding ka hi, chi ka hi, a chi hi. 9 Kumpipa'n amah kiang ah: Lungmuangtakin va hawh in, a chi a, tuachi-in, Hebron ah a va hawhta hi. 10 Tua khitin, Absalom in Israel namte khempeuh kiang ah a simin khualtaite a sawl a: Pengkul gingte na zak phet chiangun, Hebron ah Absalom kumpipa hita e, chi un, a chisak hi. Jerusalem apan mi 200 in Absalom a zui uhi. Amaute bel a mikhual dinga a chial a hi uh a, thil omdan bangmah phawk louin lungsim siangtaka hawh ahi uhi. 12 Absalom in kithoihnate a lat sung mahin Gilon mi Ahithofel, David adinga thuhilha pangpa, a tenna khua Gilon apan hong hawh dingin a samsak hi. Tua bangin thu simsawm hong hat hiaihiai a, Absalom zuite zong a pung zel hi.
David Taai
13 Khualtai khat hong pai a, David kiang ah: Israel mite' lungtangte Absalom lama belh ahita, chi-in a hilh hi. 14 David in Jerusalema amah kianga om a uliante khempeuh kiang ah: Hong pai un. I taikhiak uh kul hi. Tuachi louin zaw, Absalom apan suakta om lou ding hi hang. Taikhe pah ni, tuachi louin zaw, hon delhpha dingin hong kinawh ding a, eite tung ah siatna hon tun ding a, khawpi zong namsauin a dou ding hi, a chi hi. 15 Kumpipa' uliante'n a dawng uh a: Ka toupa uh kumpipa' deihtel bangbang na silate'n ka zui ding uh, a chi uhi. 16 Kumpipa a kipankhia a, a inkawte khempeuh in a zui uhi. Ahihhangin, kumpi' innpi kem dingin a meite sawm khat a nusia hi. 17 Tua bangin kumpipa, amah zuite khempeuh tawh a kipankhia a, gamla kuam mun khat ah a khawl hi. 18 A mite khempeuh in Kerethte leh Pelethte khempeuh tawh tonin amah a paikheng uhi. Gath apan amah zui Git mi 600-te kumpipa' mai ah a pai uhi. 19 Kumpipa'n Git mi Itai kiang ah: Banghanga koute hon zui ding na hi ua? Kik unla, Kumpipa Absalom kiang ah om un. Nou, na gam uapan sawlmang gamdang mite hi uchin a, 20 zanni-a hong tung lei na hi uh. Tuni-a koute tawh hon vakthapkhawmsak ding ka hi maw? Ke'n zong koia pai ding ka hia, chih ka theihlouhpi. Kik unla, na gam mite tonpih un. Zahngaihna leh muanhuaina in nang hon ompihta hen, a chi hi. 21 Ahihhangin, Itai in kumpipa a dawng a: Tangtawn Toupa' hinna sialin leh ka toupa kumpipa' hinna sialin ka gen ahi: Ka toupa kumpipa omna peuh ah, hinna ding hi-in, sih nading hita leh, na silapa ka om ding, a chi hi. David in Itai kiang ah: Pai masa inla, pai zel in, a chi hi. Tua bangin Git mi Itai, a mite khempeuh tawh, a ompih inkuante tawh, mainawtin a paita hi. 23 Tua mite khempeuh a pai zel laiun, tua gam mite a vekun a kapkhe vengvung uhi. Kumpipa'n zong Kidron Phaizang a kaan a, mite khempeuh in gamdai-gamkeu lam a manawh uhi. 24 Zadok zong tua ah a om a, a ompih Levite khempeuh tawh Pathian' thukhun singkuang a pua uhi. Pathian' singkuang a ngakhia uh a, mipite khempeuh in khawpi a nutsiat vek mateng uh Abiathar in kithoihna laanin ana ngak hi. 25 Tua khitin, kumpipa'n Zadok kiang ah: Khawpi ah Pathian' singkuang pawkik in. Tangtawn Toupa' mitmuha deihsakna ka ngah leh, ama'n hon piikik ding a, Pathian' singkuang leh a tenna ka mu nawn na ding. 26 Ahihhanga ama'n: Na tung ah ka lungkim kei, a chih hiai leh, kei zaw mansa ka hi, hoih a sak dandan ka tung ah hihta hen, a chi hi. 27 Kumpipa'n siampi Zadok kiang ah: Nang a mukholthei hilou na hi maw? Lungmuangtakin na tapa Ahimaaz tawh, Abiathar' tapa Jonathan tawh khawpi ah kik in. Nang leh Abiathar in na tapa tegel uh tonpih un. 28 Khawpi na tung na uh, chih noute apan thu ka ngah masiah, gamdai-gamkeua luikannate ah ka na ngak ding, a chi lai hi. 29 Tuachi-in, Zadok leh Abiathar in Jerusalem ah Pathian' singkuang a pawkik uh a, tua ah a om uhi. 30 Ahihhangin, David bel Oliv Mual ah kap kawmkawmin a paitou a, a lu a khuh a, khevuakin a pai hi. A tonpihte khempeuh in zong lu a khuh uh a, kap kawmkawmin a pai uhi. 31 Absalom tawh thil simsawmte lak ah Ahithofel a pang, chih David a kihilh a, David a thuum a: Tangtawn Toupa aw, Ahithofel' thuhilhna haina suaksak in, a chi hi. 32 David a khupbawh a, Pathian a bia hi. Tua mualvum a tun takin, amah tuak dingin Arka mi Hushai a puanakpi kikeksa, a lutunga leivui kibuakin a na om hi. 33 David in amah kiang ah: Kei non zuih leh zaw, kei adingin puakgik na hi ding. 34 Khawpi-a na kik a, Absalom kianga: Kumpipa aw, na sila ka hi ding. Nidang laia na pa' sila na hita ka hi a, tuin, nang' sila ka hi ding, na chih leh bel, Ahithofel' thuhilhna kisesaka kei hon huh na hi zaw ding. 35 Tua-a siampite Zadok leh Abiathar in hon ompih ding hilou maw? Kumpipa' innpi sunga na thuzak peuhmah Zadok leh Abiathar hilh zel in. 36 A tapa tegel uh, Zadok' tapa Ahimaaz leh Abiathar tapa Jonathan, amaute tawh omkhawm uh hiven, na zak peuhmah kei hon hilh dingin amaute ka kiang ah hon sawl in, a chi hi. 37 Tuachi-in, David' lawm Hushai bel, tua khawpi-a Absalom a lut laitak mah in, Jerusalem a tung hi.
David leh Ziba
1 David mualtung apan gamla lou a tun takin, amah tuak dinga na ngak, Mefibosheth' silapa Ziba a na om hi. Amah sabiltung bangzah hiam tuanphah phahsa leh tanghou beu 200, grepgah keu beu 100, theipi keu beu 100 leh zu thawl khat pua-a kizui tawh a om hi. 2 Kumpipa'n Ziba kiang ah: Banghanga hiaite hon puak na hia? chi-in a dong hi. Ziba in a dawng a: Sabiltungte kumpipa' innkawte tuan nading ahi a, tanghou leh theite nek ding, zu bel gamdai-gamkeua bahte dawn ding ahi, a chi hi. 3 Tua khitin, kumpipa'n: Na pu Saul' tupapa koia om ahia? chi-in a dong hi. Ziba in: Ama'n, tuni-a Israel' innkawte'n ka pa' kumpigam kei hon pe kik ding ahi, chi-a ngaihtuah a, Jerusalem-a om ahi, a chi hi. 4 Tua khitin, kumpipa'n Ziba kiang ah: Mefibosheth' neihsa khempeuh tu'n nanga ahita, a chi hi. Ziba in: Tu'n kingainiamtakin ka kuun hi. Ka toupa kumpipa' mitmuhin deihsakna tang leng maw, a chi hi.
Shimei in David Hamsiat
5 Kumpipa David, Bahurim a tun dek kuanin, Saul innkawte' behte mi khat, tua apan hong paikhia hi. Amah Gera' tapa, a min Shimei ahi. Hong pai kawmkawmin hamsia a lou hi. 6 Sepaihte leh vengmite khempeuh David' vei leh taka om hinapi, Shimei in David leh kumpipa' silate suangtangin a deng hi. Shimei in hamsia lou kawmkawmin: Nang sisansuah hat, giloupa paimang in, paimang in! Saul' innkawte tunga sisan na suah a, ama' muna vai na hawm, Tangtawn Toupa'n nang tunga bung ahi. Tangtawn Toupa'n na tapa Absalom kianga kumpigam pia a, nang sisansuah mi na hih mana, segawp na hita ve! a chi hi. 9 Zeruia' tapa Abishai in kumpipa kiang a: Banghanga hiai uipul in ka toupa kumpipa hamsiat ding ahia? Kuanin a lu va tan ve ning, a chi hi. Ahihhangin, kumpipa'n: Nou, Zeruia' tapate leh ke'n bang kikop nei i hia? Tangtawn Toupa'n: David hamsiat in, chi hita leh, kua'n: Banghanga nang hiai hih, chi thei ding ahia? a chi hi. 11 David in Abishai leh a uliante khempeuh kiang ah: Ka tapa, ka sa leh ka sisan mahmah in ka hinna lak sawm ahih chiangin, hiai Benjamin mi in lak sawm sem lou ding hia! Omsak maimai un. Tangtawn Toupa'n tua banga hih dinga sawl ahih chiangin, hon hamsiat mah hen. 12 Tangtawn Toupa'n ka mangbatna muin, tuni-a hamsia ka thuak, thil hoihin hon din na lou ding hia, a chi hi. 13 Tuachi-in, David leh a mite lampi zuiin a pai zel uh a, Shimei in lah, a pam ah, mualpanga paiin hamsia lou kawmkawmin suangin a deng a, ninneng khawngin a theh hi. 14 Kumpipa leh a tonpihte khempeuh, a tupna mun uh bahtakin a tung uh a, tua ah amah a kihihhalh hi.
Hushai leh Ahithofel Thuhilhna
15 Tua sung teng, Absalom leh Israelte khempeuh Jerusalem hong tung uh a, Ahithofel in Absalom hon zui hi. 16 David' lawmpa tua Arka mi Hushai, Absalom kiang ah a va hawh a, a kiang ah: Kumpipa damsawt hen! Kumpipa damsawt hen! a chi hi. 17 Absalom in Hushai kiang ah: Na lawmpa kianga itna na latsak hiai hia? Banghanga na lawmpa zui lou na hia? a chi hi. 18 Hushai in Absalom kiang ah: Hilou e, hiai mite leh Israelte khempeuh leh Tangtawn Toupa' teelpa hiai mipa-a ka hi ding a, amah kiang ah ka omden ding. 19 Tua baan ah, ke'n kua' nna sem ding ka hia? Ka tapa' nna sem lou ding ka hi maw? Na pa' nna ka sep bangin, nang nna ka sem ding, a chi hi. 20 Absalom in Ahithofel kiang ah: Thuhilhna hon pia in. Bang hih ding i hia? a chi hi. 21 Ahithofel in a dawng a: Na pa'n innpi kem dinga a nutsiat, na pa' meite luppih in. Tua hileh, na pa' nakvang ah namsetakin na kibawlta chih Israelte khempeuh in a za ding uh a, na ompih kuapeuh' hatsaka om ding ahi, a chi hi. 22 Tuachi-in, inntungkhum zaang ah Absalom adingin puanbuk khat a kai uh a, Israelte khempeuh' mitmuhin a pa' meite a luppih hi. 23 Tua hun laia Ahithofel' thuhilhna bel Pathian dongpa' thuhilhna mah a bang hi. David leh Absalom in Ahithofel' thuhilhna a na saan dan uh tuabang ahi.
1 Ahithofel in Absalom kiang ah: Mi 12,000 ka teelkhe ding a, David delh dingin tuzan chiangin ka kuankhe ding. 2 Tawla a bah laitakin amah ka suai ding. Amah laua mulkimin ka koih ding a, a ompihte khempeuh a taikek ding uhi. Kumpipa tung kia ah khut ka kha ding a, 3 tua mite khempeuh na kiang kon tunkik vek ding. Na zonzonpa a hong kik kei ding, mi khempeuh hong kik ding a, midang khempeuh a khamuang ding uh, a chi hi. 4 Absalom leh Israel upate khempeuh in hiai thil sawm hoih a sa uhi. 5 Ahihhangin, Absalom in: Tua Arka mi Hushai in bang gen ding a nei hiam amah zong samsak in, a chi hi. 6 Amah kianga Hushai hong pai takin, Absalom in: Ahithofel in hiai thuhilhna hon pia a, a gen banga hih ding i hi hia? i hih kei ding leh, na ngaihdan hon pia in, a chi hi. 7 Hushai in Absalom a dawng a: Ahithofel' thuhilhna tu hun adingin a hoih kei. 8 Na pa leh a mite na thei hi. Kidou mi ahi uh a, gamlaka vompi a noute kilaksak banga huaisia ahi uh. Thamlouin, na pa galdou siamsa hi a, sepaihte tawh zan laia mawk om het lou ding ahi. 9 Tu mahmaha zong kawlbuk khattou, ahih kei leh mun dang khata bu ding ahi. Ama'n na sepaihte hon dou masak leh, a zakha peuhmah in: Absalom zui sepaihte nak sih mahmah uh e, chi ngeingei ding uh ahi. 10 Tua hun chianga, humpinelkai lungtang pu, sepaih hangsanpen' lungtang nangawn laua zulmang ding ahi. Ahang bel, Israelte khempeuh in na pa kidou mi ahihna leh a ompihte' hangsanna thei uh hiven. 11 Tua bang ahih manin, nang ka hon thuhilh ahi: Dan apan Beersheba dong, tuipi-a sehnel zaha tam Israelte khempeuh pilvangtakin na kiang ah kaikhawm inla, nangmah mahin galphual ah makaih in. Tua chiangin, koute'n amah a kimuhna peuhpeuh ah ka dou ding uh a, amah hi-in, a mite hita leh kuamah a hinga nutsiat a om kei ding uhi. 1 Khawpi sunga a kikhinlut leh, Israel khempeuh in tua khawpi ah khauzente a hon tawilut ding uh a, luiguam dong tua khawpi a kaichim ding uh a, athem neng natan muh ding a om kei ding hi, a chi hi. 14 Absalom leh Israel mi khempeuh in: Ahithofel thuhilhna sangin Arka mi Hushai' thuhilhna a hoih zaw, a chi uhi. Ahang bel, Absalom tunga Tangtawn Toupa' apan siatna a tun theih nadinga Tangtawn Toupa Pathian in Ahithofel thuhilhna hoih vuaksuaksak ding tumkhin hiven. 15 Hushai in siampite Zadok leh Abiathar a hilh a: Ahithofel in Absalom leh Israel upate hibang, hibanga thuhilh a, ahihhanga, ke'n tuabang tuabanga hih dinga thuhilh ka hi. 16 Tu'n thu khak pah unla, David kiang ah: Gamdai-gamkeua lui kannate ah zan taam kei unla, luigal kai teitei un. Tua banga na hih kei uleh, valhzawha om ding na hi uh, chi-in hilhsak un, a chi hi. 17 Jonathan leh Ahimaaz bel En Rogel ah a om uhi. Amaute khawpi sung a lut lai uh mi muh ding deihlouin, sila nungak khat va paisak a, amaute a va hilh a, amaute'n Kumpipa David a va-hilh sawn ding uh chih ahi. 18 Ahihhangin, tangval khat in amaute a mu a, Absalom a hilh hi. Tua bang ahih manin, amau gel kintakin a paikhia uh a, Bahurim kichi-a mi khat inn ah a hawh uhi. Tua mipa'n a kongtual ah tui tawhkhiak khat a nei a, tua sung ah a kumsuk uhi. 19 A zi in khuhna khat a la a, tua tui tawhkhiak tung ah a phah a, a tung ah buh a zalh hi. Kuama'n hiai thu a thei kei hi. 20 Absalom' mite tua inn-a hiai numeinu kiang ah hong hawh uh a: Ahimaaz leh Jonathan koia om ahi ua? chi-in a dong uhi. Numeinu'n a dawng a: Amaute'n luita kanta uh, a chi hi. Tua mite'n a zong uh a, kuamah mu louin Jerusalem ah a kikta uhi. 21 Tua mite a paikhiak nungun, amau gel, tui tawhkhiak apan a kaikhetou uh a, Kumpipa David kianga thu tun dingin a kuan uhi. Amaute'n amah kiang ah: Kipankhia unla, lui kan pah un. Ahithofel in nang dou dinga hibang hibang thuhilhna pia ahi, a chi uhi. 22 Tuachi-in, David leh a ompihte khempeuh a kipankhia uh a, Jordan lui a kan uhi. Zing khawvakin Jordan gal kai lou kuamah a om nawn kei hi. 23 Ahithofel in, a thuhilhna a kizui kei, chih a theih takin, a sabiltung tunga tuangin a tenna khawpi-a a inn ah a paita hi. A innsung a kemhoih a, amah leh amah a kikhailum hi. Amah a sita a, a pa' hankhuk ah a kivui hi. 24 David in Mahanaim a zuan a, Absalom leh Israelte khempeuh in Jordan lui a kan uhi. 25 Absalom in Joab mun ah, sepaihhon' makai lianin Amasa a guang hi. Amasa bel mi khat Jether kichi' tapa ahi. Jether bel Israel mi ahi a, Nahash' tanu Abigail zi-a nei ahi. Abigail lah Joab' nu, Zeruia' sanggamnu ahi. 26 Israelte leh Absalom in Gilead gam ah giahphual a sat uhi. 27 David, Mahanaim a tun takin, Amonte gama Raba khua mi Nahash' tapa Shobi leh Lo Debar khua mi Amiel' tapa Makir leh Rogelim apan Gilead mi Barzilai in 28 awngphahte, belkuangte leh leibelte hong puak uhi. Huitbuhte, barlibuhte, anvuite leh buhkante, betangte leh besantangte, 29 khuaizute, bawngnawidat thukte, belamte leh bawngnawi thaudatte David leh a mite' nek ding zong hong puak uhi. Ahang bel, amaute'n: Gamdai-gamkeua hong gilkial a, hong tawi a, hong dangtak mahmah uh hi a, chi uh hiven.
Absalom Sihna
1 David in a tonpihte a sim a, 1,000 tunga makai dingte, 100 tung a makai dingte a sep hi, 2 David in tua sepaihhonte a sawlkhia a, munthuma khen munkhat tung ah Joab a makaisak a, munthuma khen munkhat tung ah Zeruia' tapa Abishai a makaisak a, munthuma khen munkhat tung ah Git mi Itai a makaisak hi. Kumpipa'n tua sepaihhonte kiang ah: Keimah mah zong noute laka kuan ding ka hi, a chi hi. 3 Ahihhangin, mite'n a dawng uh a: Nang zaw na kuankhiak het louh ding ahi. Taikek tamah le-ung koute hon ngaihsak lou ding uhi. Koute a kimkhat si mah le ung, phamawh sa lou ding uhi. Nang bel koute 10,000 sanga manpha zaw na hi. Khawpi apan hon na gal huh lechin nang adingin hoih zaw ding ahi, a chi uhi. 4 Kumpipa'n a dawng a: Hoih na sak bangbang un ka hih ding, a chi hi. Tuachi-in, sepaihhonte 100 pawlpawl, 1,000 pawlpawla a kuankhiak laiun, kumpipa bel kongpi bul ah a ding hi. 5 Kumpipa'n Joab, Abishai leh Itai thu a pia a: Kei ziakin tangval Absalom tung ah nemtakin gamta un aw, a chi hi. Tua sepaihhonte khempeuh in Absalom tawh kisaia kumpipa'n sepaih makaite thu a piak a za uhi. 6 Sepaihhonte Israel dou dingin gamlak ah a kuankhia uh a, Efraim gammang ah kidouna a omta hi. Tua ah David' mite'n Israel sepaihhon a zou uh a, tua ni-a misi tam mahmah a, mi 20,000 a si hi. 8 Tua kidouna tua gamsung teng ah a kizalh a, namsaua si sangin gamsunga manga si a tamzaw hi. 9 Tua ah Absalom in David' mite a tuakkha hi. Amah bel, a sakol tung ah a tuang a, tawsaw sing lianpi, hiang phatak nuaia a sakol a pai laiin, Absalom' lutang tua singhiangte laka awkin a kikhaigeigoi hi. A sakol paisuakin, amah singkung ah a kikhai hi. 10 Mi khat in hiai a mu a, Joab a hilh a: Tawsaw singa Absalom kikhai ka mu, a chi hi. 11 Joab in tua thu genpa kiang ah: Bang e! Amah mu maw? Banghanga tua mun maha amah leilaka satpai pah lou e? Satpai lechin ngunsik shekel sawmkhat leh galhang kawnggak hon pe ding hi'ng a, a chi hi. 12 Ahihhangin, tua mipa'n a dawng a: Ka khut sung ah, kei adingin shekel 1,000 kibuk leh zong, kumpipa' tapa tunga khut kha lou ding ka hi. Koute zak mahmaha, kumpipa'n nang leh Abishai leh Itai thu hon pia a: Kei ziakin Absalom hinghawi un! chi ahi. 13 Ke'n ka hinna lauhuaitakin koihta leng, kumpipa' theihlouha kisel lah om lou a, hon gamlat phing ding na hi, a chi hi. 14 Joab in: Hibangin nang hon ngak ngak kei ning, a chi a, teizum thum a la a, Absalom tawsaw singa kikhaia hinglai, a awm ah tua teizumte a siat hi. 15 Tua ah Joab galvan tawi mi sawm in Absalom uum-in, a sat uh a, a that uhi. 16 Tua khitin, Joab in pengkul a mut a, sepaihte'n Israel a delh nawn kei uhi. Joab in amaute khawlsak hiven. 17 Absalom luang a la uh a, tua gammanga kawkhuk ah a lawnlut uh a, ama' tung ah suang a sevum venvon uhi. Tua hun sung tengin, Israelte khempeuh amau' inn tek ah a taai uhi. 18 Absalom in a dam laiin Kumpipa' Luikuam ah, amah theihgigena hi dingin suang a na phut khinta hi. Ama'n: Ka min theihgigena pawding tapa lah nei lou ing a, chi-in a ngaihtuaha ahi. Tua suangphuh amah a kitamsak a, tuni dongin, Absalom Suangphuh a kichi hi.
David in Absalom Suun
19 Zadok' tapa Ahimaaz in: Hon taisak inla, Tangtawn Toupa'n kumpipa a melmate khut apan a hutkhiak thu kumpipa kiang hon tunsak in, a chi hi. Z0 Joab in: Tuni-a tua thu tun ding nang na hi kei. Hun dang ah na tun nading, tuni-in zaw na tun het kei ding. Ahang bel, kumpipa' tapa si hiven, a chi hi. 21 Tua khitin, Joab in Kush mi khat kiang ah: Pai inla, na thil muh kumpipa va hilh in, a chi hi. Tua Kush mi, Joab' mai ah a kun a, a taikhe pah hi. 22 Zadok' tapa Ahimaaz in Joab kiang ah a gen kik a: Abang abang hi leh, hehpihtakin tua Kush mi hon nungdelhsak in, a chi hi. Ahihhangin, Joab in a dawng a: Ka tapa aw, banghanga va kuan nuam na hia? Pahtakman ngah nading thu tut ding na neih louhpi, a chi hi. 23 Ama'n: Abang abang hileh, ka taai nuam, a chi hi. Joab in: Tai aw le! a chi hi. Ahimaaz phaizang lam ah a tai a, tua Kush mi a makhelh hi. 24 David, kongpi sungnung leh pawnung kala a tut laiin, galvilpa, kulhbaang kianga kongpi tung inntung ah a kaltou hi. Ngai dih, a khawdak leh, khattanga tai mi khat a mu hi. 25 Galvilpa'n kumpipa a galsap a, thu a tun hi. Kumpipa'n: Amah tanga hong tai a hih leh, thupha pua hi inteh, a chi hi. Tua thangkou hong nai semsem hi. 26 Tua khitin, galvilpa'n mi dang khat hong taai a mu a, kongpi ngakpa a galsap suk a: En dih, mi dang khat, a tangin hong taai! a chi hi. Kumpipa'n: Ama'n zong thupha hon^puak hi mahmah inteh, a chi hi. 2 Galvilpa'n: A masapen' tai dan zaw Zadok' tapa Ahimaaz' tai dan bang veh aw, a chi hi. Kumpipa'n: Amah mi hoih hiven, thuhoih hon pua hi peuhmah in teh, a chi hi. 28 Tua khitin, Ahimaaz in kumpipa a galsap a: Bangkim hoih hi! a chi hi. Kumpipa' maia lei si-a kunin: Tangtawn Toupa, na Pathian phatin om hen! Ama'n: Ka toupa kumpipa tunga khut likte hon pekheta, a chi hi. 29 Kumpipa'n: Tangval Absalom a bit na maw? a chi hi. Ahimaaz in a dawng a: Kei kianga Joab in kumpipa' mite a hon sawl dek laitakin, buaina thupitak ka mu a, kei, na sila in bang hi hiam chih ka thei kei, a chi hi. 30 Kumpipa'n: Na kikhin inla, hia'h na ngak in, a chi a, amah a kikhinkhia a, tua ah a ding hi. 31 Tua khitin, tua Kush mi hong tung a: Ka toupa kumpipa aw, thupha za in! Tangtawn Toupa'n hon doute khempeuh apanin tuni'n nang hon hukheta, a chi hi. 32 Kumpipa'n tua Kush mi kiang ah: Tangval Absalom a bit na maw? chi-in a dong hi. Tua Kush mi in a dawng a: Ka toupa kumpipa' melmate leh nang hon hihsiat sawma hon doute khempeuh, tua tangvalpa bang vek le uh ka chi, a chi hi. 33 Kumpipa a liing a, kongpi tunga inndan ah a kaltou a, a kap hi. A pai kawmkawmin: Ka tapa Absalom aw! Ka tapa, ka tapa Absalom! Nang sikin kei si zaw leng maw. Absalom aw, ka tapa, ka tapa! a chi hi.
1 Kumpipa'n Absalom a kah a, a suun, chih Joab a kihilh hi. 2 Sepaihhonte khempeuh adingin, tua ni-a vualzawhna, sisuunna hong suak hi. Ahang bel, kumpipa a tapa sihna tunga daha khasia ahi, chih sepaihhonte'n tua ni-a za uh hiven. 3 Tua ni-in, sepaihhonte, galmun apan taikek a, maizuma simlut bangin, sepaihhonte tua khawpi ah a simin a lut uhi. 4 Ahihhangin, kumpipa'n a mai a khuh a, aw ngaihtakin a kikoukhia a: Ka tapa Absalom, Absalom ka tapa, ka tapa! a chi hi. 5 Tua khitin, innsunga kumpipa kiang ah, Joab a va lut a: Tuni'n na hinna leh na tapate leh na tanute, na zite leh na meite' hinna hukhia na mite khempeuh na zahlaksakta. 6 Nang hon mudahte na it a, nang hon itte na mudah, sepaih makaite leh a mite uh bangmah na sa kei, chih na kilangsakta. Tuni'n Absalom dam hi-in, koute khempeuh si hi le-ung na kipak ding, chih ka mu. 7 Tu'n va pusuak inla, na mite va hanthawn zokin. Tangtawn Toupa' min sialin ka gen ahi, na va pusuah kei leh, tu zanin na kianga om ding kuamah a omta kei ding a, na tuailai hun apan tuni donga na tunga thil hoihlou tungte khempeuh sangin, nang adingin hiai a hoih kei zaw ding, a chi hi. 8 Tuachi-in, kumpipa a dingkhia a, kongpi ah a vatu hi. Kumpipa kongpi-a tu ahi, chih tua mite kianga a kihilh takin, amaute a mai ah hong pai vek uhi.
David, Jerusalem ah Kik
Tua sungin, Israelte a inn uah a tailut vek uhi. 9 Israel namte lak ah a kiseel vengvung uh a: Kumpipa'n i melmate khut apan eite hon humbit a, Filistiate khut apan hon suaktasak amah ahi. Ahihhangin, tuin Absalom hangin gam apan a taai hi. 10 Eite tunga vaihawm dinga i thaunilh Absalom lah kidouna phuala sita. Banghanga kumpipa piikik ding thu bangmah gen lou na hi ua? a kichi uhi. nKumpipa David in siampite Zadok leh Abiathar kiang ah thu a khak a: Judah upate kiang ah thu dong un: Banghanga kumpipa a innpi-a tunkik dinga a nanungpena pang ding na hi ua, Israel gam sung tenga thu kigen, kumpipa kianga ama' omna muna tungta hilou maw? 12 Noute ka sa leh ka sisan, ka sanggamte na hi uh. Banghanga kumpipa piikik dinga a nanungpena pang ding na hi ua? chi un. 13 Tua baan ah, Amasa kiang ah: Nang ka sa leh ka sisan hilou maw? Tu apana Joab muna ka sepaihhon makaipipena na pan gige kei leh, Pathian in kei a lawhlawh hon lawh henla, a se zawsem zong hon lawh hen, chi un, a chi hi. 14 Ama'n Judah mite khempeuh mi khat bang maia kithutuakin, a lungtang uh a zouta hi. Kumpipa kiang ah thu a khak uh a: Nang leh na mite khempeuh hong kikta un, a chi uhi. 15 Tua khitin, kumpipa hong kik a, Jordan lui dong hong pai hi. Kuankhia-a kumpipa va muak a, Jordan lui gal kaipih dingin Judah mite Gilgal hong tungkhin uhi. 16 Efraim apan Benjamin mi, Gera' tapa Shimei, kumpipa David tuak dingin Judah mite tawh kintakin hong paisuk uhi. 17 Amah tawh hong ton, Benjamin mi 1,000, Saul innsung kempa Ziba tawh, a tapa sawmlengate leh sila 20 tawh ahi uhi. Kumpipa omna Jordan lui lama 18 kumpipa innkawte pii galkai a, a deihdeih hih dingin, amaute'n a taai ah lui a kaan uhi. Gera' tapa Shimei, Jordan luigal a va kai a, kumpipa' mai ah a bok a, 19 a kiang ah: Ka toupa'n mawh hon tangsak ken. Ka toupa kumpipa'n Jerusalem a nutsiat ni-a na silapa'n na tunga thil diklou ka hih thei gige ken. Kumpipa'n hiai a lungtang apan koih mang hen. 20 Ahang bel, kei na silapa'n ka na khialta chih thei ing a, hong paisuk a, ka toupa kumpipa tuak dinga hong kuan Josef innkawte khempeuh laka a masapena tuni-a hiaia hong pai ka hi, a chi hi. 21 Tua khitin, Zeruia' tapa Abishai in: Hiai hanga Shimei thah ding hilou maw? Ama'n Tangtawn Toupa' thaunilhpa hamsiat hiven, a chi hi. 22 David in a dawng a: Nou leh ke'n bang kikop nei i hia, nou Zeruia' tapate aw? Tuni'n ka langte nong suak mawk ua! Tuni taka Israel gam sunga mi khatpeuh kithat ding maw? Tuni'n Israel tunga kumpipa ka hi, chih ka thei keia hia? a chi hi. 23 Tuachi-in, kumpipa'n Shimei kiang ah: Na si kei ding, a chi hi. Kumpipa'n kichiam zena hiai thuchiam a piak ahi. 24 Saul' tapa Mefibosheth zong kumpipa tuak dingin a hawhsuk hi. Ama'n kumpipa' paikhiak ni apan bittaka hong kik ni dong, a khete lah a keem kei a, a khamul lah a met kei a, a puante lah a sawp kei hi. 25 Kumpipa tuak dinga Jerusalem apan hong tun takin, kumpipa'n: Mefibosheth, bang hanga nang kei hon zui lou na hia? a chi hi. 26 Ama'n: Ka toupa kumpipa aw, na silapa kei, khebai ka hih chiangin, kumpipa ka zuih theih nadingin ka sabiltung tuanphah ka phah ding a, ka tuang ding, ka chih hi a, ahihhanga, ka silapa Zeba in hon kilepsan ahi. 27 Ama'n ka toupa kumpipa kianga kei hon gensia eive. Ka toupa kumpipa lah Pathian' vansawltak bang hi chin a, na ut peuh hih in. 28 Ka pu' suante khempeuh, ka toupa kumpipa apan sihna loungal bangmah lawhtak taak hilou uhi, hinapi-a nang na ankuang umte laka na silapa mun non piak nung ke'n kumpipa apan bang nget ding nei lai ding ka hia? a chi hi. 29 Tuachi-in, kumpipa'n a kiang ah: Banghanga nang tungthu gen lai na hia oi? Loute kihawm dingin nang leh Ziba thu kon peta ve, a chi hi. 30 Mefibosheth in kumpipa kiang ah: Nang ka toupa kumpipa damtaka hong tungta hive chin, Ziba in bang teng tang vek hen aw, a chi hi. 31 Gilead mi Barzilai zong kumpipa tawh Jordan lui kankhawm dingin leh tua apan amah khasawn dingin Rogelim apan hong hawhsuk hi. 2 Barzilai bel upa tak, kum 80-a upa ahi. Amah ahau ahi a, kumpipa Mahanaima a taam laiin nek ding taak ding a na pia hi. 33 Kumpipa'n Barzilai kiang ah: Lui gal kaikhawm ni-in, Jerusalem ah ka kiang ah om inla, nek leh taak hon pia ning, a chi hi. 34 Ahihhangin, Barzilai in kumpipa a dawng a: Kum bangzah dam lai ding ka hia, Jerusalem-a kumpipa ka zuih touh ding? 35 Tu-a kum 80-a upa ka hih taak chiangin, a sia a pha zong ka khenkak thei dia hia? Numei leh pasal lasate zong ka za thei lai dia hia? Banghanga ka toupa kumpipa adinga puakgik behlapna lei hi ding ka hia oi? 36 Na silapa'n kumpipa, luigal hon kaipihin gamla lou hon zui ning, ahihhangin, banghanga kumpipa'n hibanga hon pakta ding na hia? 37 Ka nu leh ka pa' han kiang naia ka khua-a ka sih theih nadingin, na silapa hon kiksak mai in. Na silapa Kimham hia'h om. Ama'n ka toupa kumpipa luigal hon kaipih hen aw. Na deih bangbang ama' adingin hihta in, a chi hi. 38 Kumpipa'n: Kimham in luigal kei hon kaipih ding a, na deih bangbang ama' adingin ka hih ding. Kei apan na lunggulh peuhpeuh zong nang adingin ka hih ding, a chi hi. Tuachi-in, mi khempeuh in Jordan lui a kan uh a, tua khitin, kumpipa'n a kaan hi. Kumpipa'n Barzilai a tawp a, a vualzawlna a pia a, Barzilai ama' inn ah a chiahkikta hi. 40 Kumpipa'n lui kaan a, Gilgal a tun laiin, Kimham in luigal a kaipih hi. Judah sepaihhon leh Israel sepaihhon kimkhat in kumpipa lui a pii-galkai uhi. Israel mite khempeuh kumpipa kiang ah hong pai pah uh a, a kiang ah: Banghanga ka sanggamte uh, Judah mite'n kumpipa gumang a, amah leh a innkawte, a mite khempeuh tawh, Jordan lui hon galkaipih ahi ua? a chi uhi. 42 Judah mite khempeuh in Israel mite a dawng uh a: Kumpipa koute tanau nai ahih mana hibanga hih ka hi ve ua. Banghanga hiai thu-a heh na hi ua oi? Kumpipa' an peuhmah ka ne ua hia? Koute adingin bangpeuh ka kilak ua hia? a chi uhi. 43 Tua khitin, Israel mite'n Judah mite a dawng uh a: Koute'n kumpipa ah tan sawm ka nei uh. Tua baan ah, David tung ah noute sangin ngiat theih ka hau zaw uh. Banghanga hon simmawhbawl na hi ua? Kumpipa piikik ding gen masa koute ka hi kei ua hia? a chi uhi. Ahihhangin, Judah mite'n Israel mite sanga kam khauh zawin a dawng uhi.
David tunga Sheba' Helna
1 Mannabei mi khat, Benjamin mi, Bikri' tapa Sheba kichi tua ah a om hi. Ama'n pengkul a mut a, a kikou a: Eite'n David ah tan nei kei hang, Jese' tapa ah goutan ding nei kei hang! Israel aw, na puanbuk tek uah pai un! a chi hi. 2 Tuachi-in, Israel mite khempeuh in Bikri' tapa Sheba zui dingin David a nusia uhi. Ahihhangin, Judah mite, Jordan lui apan Jerusalem dong a kumpipa uh kiang ah a om uhi. 3 David, Jerusalema a innpi-a hong kik laiin, innpi kem dinga a nutsiat a mei sawmkhatte a lakhia a, inn khat ah a koih a, mi a vengsak hi. Amaute nek leh taak a pia a, ahihhangin, amaute a luppih kei hi. A sih dongun khumtuamin a om uh a, meigong bangin a khawsa uhi. 4 Kumpipa'n Amasa kiang ah: Ni thum sunga ka kianga hong paikhawm dingin Judah mite sam inla, nang zong hia'h om in, a chi hi. 5 Ahihhangin, Judah sam dinga a kuan takin, kumpipa' hun seh sanga sawt zaw a beisak hi. 6 David in Abishai kiang ah: Bikri' tapa Sheba in Absalom hih sanga sezaw-a i tunga hih ding ahi. Na pu' mite tonpih inla, amah delh in, tuachi louin zaw, kulh nei khawpite a mu ding a, eite apan a suakta kha ding, a chi hi. tuachi-in, Joab' mite leh Kerethte leh Pelethte leh galhat thupite khempeuh, Jerusalem apanin Bikri' tapa Sheba delh dingin a kuan uhi. 8 Amaute, Gibeona suangpi liana a om laiun, amaute tuak dingin Amasa hong pai hi. Joab in a sepaih puanak silh tung ah a kawng a gak a, tua a kawnggak ah temluzum khat a paai ah a kuah hi. Mailama kalsuan kawmin, tua temsau a pai apan a phawi hi. 9 Joab in Amasa kiang ah: Ka sanggampa, bang nong chi a? a chi hi. Tua khitin, Joab in Amasa tawp dingin a khut taklamin a khamul ah a man hi. 10 Amasa bel Joab' khuta temluzum apan a kiveng kei a, Joab in a gilpi ah a dawt a, a gilzangte leilak ah a lawtkhia hi. Dawt kikkik kul louin Amasa a si hi. Tua khitin, Joab leh a sanggampa Abishai in Bikri' tapa Sheba a delh uhi. 11 Joab' mite laka khat Amasa kiang ah a ding a: Joab deihsak mi kuapeuh leh David lama pang kuapeuh in Joab zui hen! a chi hi. 12 Amasa lah lampi laia a sisana kidiahin a lum a, tua mipa'n sepaihte khempeuh a dinkhawl uh chih a mu hi. Amasa kiang hong tung peuhmah a khawl uh, chih a muh takin, lampi apan a luang a kaikhia a, gamlak ah puan khatin a khuh hi. 13 Lampi apan Amasa a kikaihkhiak khitin, mite khempeuh in Bikri' tapa Sheba delh dingin, Joab tawh tonin ma a sawnta uhi. 14 Sheba in amah zui dinga kikaikhawma zui, Israel behte khempeuh, Abel Beth Maaka kichi dong leh Berte' gamsung khempeuh a tawnsuak hi. 5 Joab leh sepaihte khempeuh hong pai uh a, Abel Beth Maaka kichi ah Sheba a dou uhi. Khawpi dong a kimkot ah douna leidaiin a uum uh a, kulhbaang pawnung zaw a suntou hi. Kulhbaang laichim dinga a pan laiun, 16 numei pii lemthei khat in tua khawpi apan a galsap a: Na ngai un! Na ngai un! Joab ka houpih theih nadingin hiah hong pai dingin amah hilh un, a chi hi. joab in amah a va naih a, ama'n: Joab na hi hia? chi-in a na dong hi. Joab in: Himah ing, a chi hi. Numeinu'n: Na silanu'n ka gen ding na ngai in, a chi hi. Joab in: Na ngai mah ing e, a chi hi. 18 Numeinu'n: Tanglaiin, Abel ah dawnna la un, a chi sek ua, thutanna a bawl zel uhi. 19 Koute Israel gam sunga kilemna deih leh muanhuaite ka hi uh. Noute'n Israel gam sunga nu khata piang khawpi na hihse dek uh. Banghanga Tangtawn Toupa' goutan khat nawmvalh sawm na hi ua oi? a chi hi. 20 Joab in: Tua bang hi zenzen kei. Nawmvalh zenzen kei ning, hihsiat zong hihse zenzen kei ning. 21 Tua bang ka tup hi kei. Bikri' tapa Sheba kichi, Efraim tanggama hong kipan mi khat in kumpipa David doua khut liik ahi. Hiai mi khat hon pekhe le uchin khawpi apan ka kilehkik ding, a chi hi. Tua numei in Joab kiang ah: Nang adingin kulhbaang apan a lutang hong kilawnkhia inteh, a chi hi. 22 Tua numei in khawpi-a omte khempeuh kiang ah thuhilhna piltak a pia a, amaute'n Bikri' tapa Sheba' lutang a tankhia uh a, Joab' mai ah a lawnkhia uhi. Tuachi-in, Joab in pengkul a mut a, a mite tua khawpi apan a kikhenzak uh a, amau inn tek ah a kilehkikta uhi. Joab zong Jerusalem ah kumpipa kiang ah a kilehkikta hi. 23 Joab bel Israel sepaihhon khempeuh tunga makai ahi a, Jehoiada' tapa Benaia bel Kerethte leh Pelethte tunga makai ahi. 24 Adoniram bel nasepsak teiteite tunga ulian ahi a, Ahitub' tapa Jehoshafat lah laibu-a thil gelhlutpa ahi. 25 Zadok leh Abiathar siampi ahi uh a, 26 Jair mi Ira lah David' uliante' makai ahi.
Gibeonte ading Phulaksakna
1 David' vaihawm sungin, kum thum kizomin kial a kia a, David in Tangtawn Toupa' mai a zong hi. Tangtawn Toupa'n: Saul leh sisan baang a inkawte' hang ahi keia, Gibeonte a thah hang ahi, a chi hi. 2 Kumpipa'n Gibeonte a sam a, amaute a houpih hi. Gibeonte bel Israel mi ahi kei uh a, Amor sibang khawsuaksunte ahi uhi. Israelte'n amaute hinghawi dingin a kichiamkhin uh a, hinapi-in, Saul in Israel leh Judah adinga a phatuamngaih nalamin Gibeonte thah chimih a na sawm hi. 3 David in Gibeonte kiang ah: Noute adingin bang kon hihsak dia? Tangtawn Toupa' goutan na vualzawl theih nadingun bangchi bangin hihdik thak nawnna ka bawl dia? a chi hi. 4 Gibeonte'n a dawng uh a: Saul apan a innkawte hiam, ngun hiam kham hiam ngiat theihna hamphatna ka nei kei uh, Israel mi khatpeuh thah theihna hamphatna zong ka nei kei uh, a chi uhi. David in: Noute adingin bang hon hihsak leng na ut ua? a chi hi. 5 Amaute'n kumpipa a dawng uh a: Koute hong hihmangthanga, hih chimiha ka om theih nading uleh, Israel gam sunga mun himhim ka neih louh theih nading ua, ka tunga thu sawmpa tawh kisai ahih leh, a suante laka pasal sagih thah ahih theih nading uleh Saul omna Gibea-a Tangtawn Toupa' maia phoulak ahih theih nadingun ka khut ua piakkhiak hi uhen, Saul lah Toupa' teelpa hiven, a chi uhi. Tuachi-in, kumpipa'n: Amaute na khut uah kon pekhe ding, a chi hi. 7 Kumpipa'n Tangtawn Toupa' maia, David leh Saul' tapa Jonathan tawh kala kichiamna bangin, Jonathan' tapa Mefibosheth a hinghawi hi. Jonathan bel Saul' tapa ahi. 8 Ahihhangin, kumpipa'n, Aia' tanu Rizpa in Saul tawh kala a neih tapa nihte, Armoni leh Mefibosheth tawh, Saul' tanu Merab in Barzilai' tapa Adriel tawh kala a neih tapa ngate a teelkhia hi. Barzilai bel Meholath mi ahi. 9 Tuate Gibeonte khut ah a pekhia a, mual tunga Tangtawn Toupa' maia thah leh phoulakin a om uhi. Hiai mi sagihte a pukkhawm uhi. Buhlak hun ni masate sungin, barli buh lak a kipat laitakin thahin a om uhi. 10 Aia' tanu Rizpa in saiippuan a la a, suangpi tung ah amah adingin a phah hi. Buhlak kipat chil apan tua siluangte tunga van apan vuahtui a kiak dongin, sun laiin tua siluangte tungleng vaste a khoihsak kei a, zan laiin zong gamsate a khoihsak kei hi. nSaul' meinu, Aia' tanu Rizpa' thilhih dan David kianga a hilh takun, 12 a vapai a, Jabesh Gilead khawmite apanin Saul leh a tapa Jonathan' guhte a simin a vala hi. Tuate bel Filistiate'n Gilboa-a Saul a thah nung ua, a luangte uh a khaina mun uh, Beth Shan-a taangpi omna mun apan a na lak uh ahi. David in tua apanin Saul leh a tapa Jonathan guhte hon pua a, tua baan ah, thaha phoulaka omte' guhte zong kaihkhawmin a om hi. 14 Saul leh a tapa Joathan' guhte, Benjamin gama Zela mun ah Saul' pa Kish' hankhuk ah a vui uh a, kumpipa' thupiak bangin bangkim a hih uhi. Tua nungin, Pathian in tua gam adinga thumna a dawng hi.
Filistiate Dounate
15 Filistiate leh Israel kal ah kidouna khatvei a om kik hi. David, a mite tawh Filistiate dou dingin a kuansuk a, hong bah mahmah hi. 16 Rafa' suante laka khat Ishbi Benob kichi, a sumsan teipi luzum zong shekel 300-a gik, namsau thaka kigalvanpa'n: David ka that ding, a na chikhin hi. 17 Ahihhangin, Zeruia' tapa Abishai in David hong hukhia hi. Tua Filistiapa tung ah khut a kha a, a that hi. Tua khitin, David' mite'n a kiang ah: Israel gam meivak a mih louh nadingin, kidouna phual ah koute hon zui nawn peuhmah kei ni teh, chi-in a kichiam hiai uhi. 18 Hun hong pai pai a, Gob mun ah Filistiate tawh kidouna dang a om kik hi. Tua hunin, Hushath mi Sibekai in Rafa' suante khat Saf kichi a that hi. 19 Gob muna Filistiate tawh kidouna dang khat ah, Bethlehem mi Jaare Oregim' tapa Elhanan in siamkolpi chia mahmah teipi nei, Git mi Goliath' sanggampa Lahmi a that hi. 20 Kidouna dang khat Gath mun ah hong om leuleu a, tua ah milian mahmah, khutzung guk tuak leh khezung guk tuak nei, aveka khutzung khezung 24 pha khat a om hi. Amah zong Rafa' suante khat ahi. 21 Ama'n Israelte a tot takin, Shimea' tapa Jonathan in amah a that hi. Shimea bel David' sanggampa ahi. Hiai mi lite bel, Gath muna Rafa' suante ahi uh a, David leh a mite' khut ah a puk vek uhi.
David Phatnala
1 Tangtawn Toupa'n David, a galte khempeuh khut apan leh Saul khut apan a humbit laiin, David in Tangtawn Toupa' mai ah hiai la a sa hi. 2 Ama'n: Tangtawn Toupa ka suangpi, ka kulhpi leh kei hon hukhepa hi. 3 Ka Pathian ka suangpi, ka bukna hi. Ka lum leh ka hotdamna kii hi. Amah ka kulh, ka bukna leh ka hondampa nang ngongtatte apan' non hondamta. 4 Tangtawn Toupa sam hi'ng, amah zaw phat taak hi ahi. Ka galte apan hotdam hi'ng. 5 Sihna tuihualte ka kimkot ah kipei a, siatna hawktui luangte'n hon tum hi. 6 Misikhua khauhualte'n hon vial a, sihna thang ka mai ah om hi. 7 Mangbanga Tangtawn Toupa sam ing a, ka Pathian sam hi'ng. Ama'n a tempul apan ka aw za a, ka kikou aw a bil tungtou hi. 8 Lei kiliing a, kivuang a, vante' suangphumte kiliing hi. Amah heh a hih mana, amaute kiliing uhi. 9 A nakvangte apan meikhu kitung a, a kam apan kangtumthei meikuang pawt a, tua apan meiamte pawtkhia hi. 10 Ama'n vante phenvang a, hong kumsuk a, meipi vomte siksuk hi. 11 Amah Cherubte tunga tuangin leeng a, huih khate tunga tuangin sangpi-a leengtou hi. 12 A kimkota kikhuh nadingin khawmial bawl a, vuah pua van meivomte bawl hi. 13 Ama' omna vak tangpha apan kekte kia a, vak puappuap a, 14 Vaan apan Tangtawn Toupa vanpi-in ging a, Tungnungpen' aw in thawn hi. 15 Ama'n thaltangte kapkhia a, galte thehzak a, kekte sawl a, amaute phiatmang hi. 16 Tangtawn Toupa aw, nang heha sal chin a, nakvang hu a phit chianga, tuipi sung kuamthukte hong dawk a, leitung kingakna suangphumte kihawkkhia-a, hong dawk hi. 17 Ama'n tung sang apan hon sawksuk a, hon len a, tuithukte apan hon domkhia hi. 18 Ama'n a hat mahmah ka galte apan hon humbit a, kei adinga hat lua ka melmate apan hon hukhia hi. 19 Amaute'n ka tuahsiat ni-a hon maituah uh a, ahihhanga Tangtawn Toupa kei hon huhpa hi ahi. 20 Ama'n mun awngthawl hon tun a, ka tunga lungdam ahih mana hon hukhia hi. 21 Tangtawn Toupa'n ka diktatna banga ka tunga hihta a, ka khut sianna banga hon dinkik hi. 22 Ahang bel, ke'n Tangtawn Toupa' lampite tawn ing a, ka Pathian apan lampiala thil gilou hih lou hi'ng. 23 A dante khempeuh ka maia om a, a thusehte pialsan lou hi'ng. 24 Ama' maia genbaangloua om ing a, khelhna apan kikem hi'ng. 25 Tangtawn Toupa'n ka diktatna bangbang leh, a mitmuha ka sianna bangbanga hon dinkik hi. 26 A muanhuaite tunga a muanhuaia kilak chin a, genbaangloute tunga genbaangloua kilak na hi. 27 A siangte tunga a sianga kilak chin a, lungsim kawite tunga lemtheitaka kilak na hi. 28 Nang a kingainiamte hondam chin a a kisatheite bel en chin a, niamsak na hi. 29 Tangtawn Toupa aw, nang ka meivak hi chin a, Tangtawn Toupa'n ka khawmial vak suaksak na hi. 30 Nang' huhna tawh sepaihhonte naih ngam ing a, ka Pathian tawh kulhbaang kal thei hi'ng. 31 Pathian zaw, a lampi hoihkim a, Tangtawn Toupa' thu dikkim hi. Amah zaw, amah beelte khempeuh adinga lum hi ahi, 32 Tangtawn Toupa loungal Pathian dang kua om ahia? Eite' Pathian loungal Suangpi kua dang ahia? 33 Pathian ahi, thahatna tawh hon thuama, ka lampi hoihkimsak. 34 Ama'n ka khete zukpi khete banga bawl a, munsang ahte hon dingsak hi. 35 Amah ahi ka khutte kidou dan sinsak a, ka banthate'n sumsan thalphel lai zou hi. 36 Nang na vualzawhna lum hon pia chin a, kei hon liansak dinga nang hong kumsuk na hi. 37 Nang ka nuaia lampi liansak chin a, ka siakguhte kihek lou hi. 38 Ka galte delh ing a, amaute nuaisiah hi'ng. Amaute hihmanthat ahih mateng uh kilehkik lou hi'ng. 39 Amaute sikzan sipsip ing a, thou zou nawn lou uh a, ka khenuaia puk uhi. 40 Nang kidou dinga thahatna-a hon thuam chin a, ka langte ka nuaia kunsak na hi. 41 Nang ka galte taikeksak chin a, ka melmate hihmangthang hi'ng. 42 Amaute huhna ngena kikou uh a, hukhe ding kuamah om lou hi Tangtawn Toupa nangawn sam uh a, ama'n dawng tuan lou hi. 43 Ke'n amaute leilak leivui banga vuisak ing a, konglak buannawi banga tuana chilgawp hi'ng. 44 Nang ka mite' hon douna apan hon hukhia chin a, namte lutang hi ding a, hon hinghawi na hi. Ka theih ngeilouh mite ka nuaia lut uhi. 45 Gamdang mite hong paia, ka nuaia ton uh a, ka aw a zak phet chiang ua ka thu mang pah uhi. 46 Amaute khempeuh lungkia uh a, a kulhpite uapan liing kawmkawma hong paikhia uhi. 47 Tangtawn Toupa hing hi! Ka Suangpi phatin om hen! Pathian, Suangpi, ka Hondampa pahtawiin om hen! 48 Amah zaw ka phuba hon laksakpa Pathian hi a, namte ka nuaia koihpa hi a, 49 ka galte apan hon suaktasakpa hi ahi. Nang ka galte' tung lampeka hon pahtawi chin a, hiamgamte apan hon humbit na hi. 50 Tua bang ahih mana Tangtawn Toupa aw, namte laka nang hon phat ding ing a, na min phatla sa ding hi'ng. 51 Ama'n a kumpipa vualzawhna thupite pia a, a thaunilhpa David leh a suan a khakte tunga chitna muanhuai pe denden hi, chi hi.
David' Thu Nunungte
1 Hiaite David' thugen nanungte ahi: Jese' tapa David' thugen, Tungnungpen in a pahtawipa, Jakob' Pathian' thaunilhpa, Israelte lasa siampa' thugen: 2 Tangtawn Toupa' Kha in kei tungtawnin thu gen a, a thute ka leia om hi. 3 Israel' Pathian in thu gen a, Israel' suangpi in ka kianga: Mi'n mite tunga diktata vai a hawm chianga, Pathian lau kawma vai a hawm chianga, 4 amah mei kai louh ni, nisuah chila zingsang khawvak bang hi a, lei apan loupa khangsak, vuahtheu nung khawvak tangpha bang hi ahi. 5 Ka innkuan sung Pathian tawh kilem ahi kei-a hia? Ama'n kei tawh kala Tangtawn thukhun bawl a, a hoih kima bawlsipsip ahi kei-a hia? Ama'n ka hotdamna bukimsakin, ka lunggulh peuhmah hon pe kei dia hia? 6 Ahihhangin, mannabei mite zaw lingte banga paihkhiak vek, khuta tomkhawm louh bang hi ding uhi. 7 Lingte tomkhawm peuhmah in sik vanzat hiam, teipi kung hiam zang uh a, lingte a omna ua haltuma om uhi.
David' Mihatte
8 Hiaite David' mihatte minte ahi: Takemon mi Josheb Bashebeth, Thumte laka makai ahi. Ama'n mi 800-te tunga a teipi lek a, kidouna khata that vek hi. 9 Amah zomin, Ahoha mi Dodai' tapa Eleazar ahi. Galhat thumte laka khat hi-in, amaute kikaikhawm in Filistiate kidoupih dinga a tot laiun, David tawh a omkhawm hi. Tua hunin Israelte a nungtawn uh a, 10 ahihhangin, amah bel a panna mun ah tolhlouin a ding a, a namsau letna a khut kongkaw zenin Filistiate a satpai pai mai hi. Tangtawn Toupa'n tua ni-in vualzawhna thupitak a tun hi. Sepaihhonte Eleazar kiang ah a va pai kik uh a, ahihhangin, misite valok ding leia kik a suak uhi. 11 Amah zomin, Harar mi Agee' tapa Shama ahi. Behianga dim lou khata Filistiate a kikaihkhawm laiun, Israel sepaihte a tai uhi. 12 Ahihhangin, Shama bel tua lama a panmun ah a dingkip a, tua gam huin Filistiate a satpai a, Tangtawn Toupa'n vualzawhna thupitak a tun hi. 13 Buhlak laiin, makai 30-te laka thumte, Adulam kawlbuka David kiang ah a hawhsuk uhi. Tua laiin, Filistiate pawlkhat in bel Refaim Phaizang ah giahphual a sat uhi. 14 Tua lai mahin, David, bukna muanhuai ah a om a, Filistia sepaihhon Bethlehem ah a om uhi. 15 David in tui a lunggulh a: Khattei in Bethlehem kongpi bula tuileha tui dawn ding hon laksak leh aw, a chi hi. 16 Tuachi-in, tua galhat thumte'n Filistiate panmun a phu paisuak uh a, Bethlehem kongpi bula tuileh apan tui a vatawi uh a, David kiang ah hon pua uhi. Ahihhangin, David in a dawn nuam kei a, Tangtawn Toupa' mai ah a sungbua hi. 17 Ama'n: Tangtawn Toupa aw, hibang hih peuhmah kei ning. A hinna uh mansuah theihna donga vakuante' sisan hilou maw hiai tui? a chi a, a dawn nuam kei hi. Galhat thumte' hansanna thilhih hibang ahi. 18 Zeruia' tapa Joab' sanggampa Abishai, tua galhat Thumte' makai ahi. Ama'n mi 300 tung ah a teipi a lek a, a that vek a, tua Thumte bangin a minthang hi. 19 Tua Thumte sanga pahtawina sang zaw ngah hi lou hia? Amah, amaute laka simtel hi keimah leh, amaute' makai hong hi ahi. 20 Kabzeel mi Jehoiada' tapa Benaia hansanna thilhih thupite hihpa, galhang khat ahi. Moabte' misuanpen nih a satlum hi. Vuk kiak ni khat in kawkhuk khat ah humpinelkai khat zong a that hi. 21 Aigupta mi, mi lianpi khat zong a that hi. Tua Aigupta mi in teipi tawi hinapi, Benaia in khetbuk tawh a vanaih a, Aigupta mi' khut apan teipi a sut a, tua teipi mahin amah a that hi. 22 Hibang ahi Jehoiada' tapa Benaia hansanna thilhihte. Amah zong tua galhat thumte bangin a minthang hi. Tua mi 30-te sangin pahtawina sangzaw a ngah a, ahihhangin, Thumte laka simtel ahi kei hi. David in amah vengte laka makaiin a koih hi. 2 Tua 30-te laka pang hiaite ahi: Joab sanggampa Asahel, Bethlehem mi Dodo' tapa Elhanan, 25 Harod mi Shama, Harod mi Elika, 26 Palti mi Helez, Tekoa mi Ikesh' tapa Ira, 27 Anathoth mi Abiezer, Hushath mi Mebunai, 28 Ahoha mi Zalmon, Netofath mi Maharai, 29 Netofath mi Baana' tapa Heled, Benjamin gama Gibea mi Ribai' tapa Ithai, Pirathon mi Benaia, Gaash mual kikal apan Hidai, 31 Arbath mi Abi Albon, Barhum mi Azmaveth, 32 Jashen' tapate - Shalbon mi Eliaba, 33 Harar mi, Shama' tapa Jonathan, Harar mi Sharar' tapa Ahiam, 34 Maakath mi Ahasbai' tapa Elifelet, Gilon mi Ahithofel' tapa Eliam, 35 Karmel mi Hezro, Arbi mi Paarai, 36 Zoba mi Nathan' tapa Igal, Nathan bel Hagri' tapa ahi. 37 Amon mi Zelek, Beeroth mi Naharai, amah Zeruia' tapa Joab galvan tawipa ahi. 38 Ithri mi Ira, Ithri mi Gareb 39 leh Hit mi Uria, Avek-un 37 a pha uhi.
David in Sepaihte Sim
1 Israel tunga Tangtawn Toupa' thangpaihna a kuang kik a, amaute tung ah David a tawnghang a: Pai inla, Israelte leh Judahte sim in, a chi hi. 2 Tuachi-in, kumpipa'n a sepaihhon makailian Joab kiang ah: Dan apan Beersheba dong, Israel namte tawnsuak unla, mite bangzah pha hiam, chih ka theih nadingin va sim un, a chi hi. 3 Ahihhangin, Joab in kumpipa a dawng a: Tangtawn Toupa na Pathian in mite a leh zain pungsak henla, ka toupa kumpipa mit in en hen. Ahihhangin, banghanga ka toupa kumpipa'n kisimna bawl nuam se ahia? a chi hi. 4 Ahihhangin, kumpipa' thu in Joab leh sepaih makaite a thuneihkhum a, tuachi-in kumpipa' omna nusia-in Israel mite minkhum dingin a kuan uhi. Jordan luigal a kai nungun, Aroer kiang ah, mualkala tua khawpi simlam ah, giahphual a sat uhi. Tua khitin, Gad tawnin Jazer ah a pai zel uhi. 6 Gilead ah, Tatim Hodshi ah, Dan Jaan ah, Sidon lam manawhin a paikual uhi. 7 Tua baan ah, Tura kulh lam ah leh, Hivte leh Kanante' khawpite lam ah a pai uhi. Atawpin, Judah gam Negev-a Beersheba dong a pai uhi. 8 Gamsung khempeuh a totsuak nungun, kha kua leh ni 20 beiin, Jerusalem ah hong tungkik uhi. 9 Joab in mite a pha zah kumpipa kiang ah a tun a: Israel gam ah namsau tawi thei 8,00,000 a om a, Judah gam ah 5,00,000 a om, a chi hi. 10 Mite a simsak khit in, David a sia leh pha theihna a nata a, Tangtawn Toupa kiang ah: Ka thilhih ah nakpitaka khial ka hi. Tangtawn Toupa aw, na silapa' thulimlouhna tuin lamang in, thil haihuaipi hih ka hi, a chi hi. 11 A zingchiang zingsanga David' thawh main, kamsangpa Gad, thil mutheipa tua David-a tuam kiang ah Tangtawn Toupa' thu hong tung a, 12 ama'n: Pai inla, David kiang ah: Tangtawn Toupa' thugen hiai ahi: Teel ding thum kon pe ding. Na tunga ka tunsak dingin khat teel in, a chi, chi in, a chi hi. 13 Tuachi-in, David kiang ah Gad a va hawh a, a kiang ah: Na gam sungah, na tung ua kum sagih sung kial hong kiak ding hia, ahih kei leh, na melmate' delha kha thum sung na tai ding hia, ahih kei leh, na gam sunga ni thum sung hipi a len ding hia? Hiaite ngaihtuah inla, kei hon sawlpa bangchi dawn ding ka hi hiam, thu khentatna bawl in, a chi hi. 14 David in Gad kiang ah: Ka lungzing mahmah hi. Tangtawn Toupa zahngaihna lian a hih chiangin, ama' khut sung ah puklut ni. Ahihhangin, mihingte' khut sung ah zaw hon puksak ken, a chi hi. 15 Tuachi-in, Tangtawn Toupa'n tua zingsang apan hun seh chin mateng, Israel gam ah hipi a tungsak a, Dan apan Beersheba dongin mi 70,000 a si hi. 16 Vansawltak in Jerusalem hihse dinga khut a zankhiak takin, tua siatna hangin Tangtawn Toupa a dah a, mipite thuaksak tua vansawltak kiang ah: Kiching ta! Na khut dokkikta in, a chi hi. Tua Tangtawn Toupa' vansawltak bel tua hun laitakin, Jebus mi Arauna buhphual ah a om hi. 17 David in tua mite thuaksak vansawltak a muh takin, Tangtawn Toupa kiang ah: A khiala thil diklou hih kei ka hi. Hiai mite belam lei hi uh a, bang ahia a hih uh? Kei leh ka innkuante tung ah na khut tu zaw hen, a chi hi.
David in Maitam Bawl
18 Tua ni-in, David kiang ah Gad a va hawh a, a kiang ah: Paitou inla, tua Jebus mi Arauna' buhphual ah Tangtawn Toupa' mai ah maitam dawh in, a chi hi. 19 Tuachi-in, Tangtawn Toupa'n Gad tungtawna thu a piak bangin, David a kuantou hi.20 Arauna a dakkhiak leh, kumpipa leh a mite, amah hon zuana hong pai a mu a, hong paikhia a, a maia lei si-in kumpipa' mai ah a kun hi. 21 Arauna in: Bang dinga ka toupa kumpipa na silapa kianga hong hawh na hia? a chi hi. David in a dawng a: Mipite tunga hipi tung a dam nadinga Tangtawn Toupa' maia maitam ka dawh theih nadinga na buhphual lei dinga hong hawh ka hi, a chi hi. Arauna in David kiang ah: Ka toupa kumpipa'n na deih deih la inla, lan in. Hiai ah haltuma zat ding bawngtalte om a, hiai ah buhkhetna singkate leh bawng hakkolte a singkhul dingin om hi. 23 Kumpipa aw, hiaite khempeuh kon pia hi, a chi hi. Tua baan ah, Tangtawn Toupa na Pathian in nang hon saang hen aw, a chi lai hi. 24 Ahihhangin, kumpipa'n Arauna a dawng a: Hilou e. Aman kon piak teitei ding ahi. Tangtawn Toupa ka Pathian' mai ah, kei adia a man om loupi haltum thillat ka laan kei ding, a chi hi. Tuachi-in, David in tua buhphual leh bawngtalte a lei a, aman ngun shekel 50 a pia hi. 25 David in Tangtawn Toupa' mai ah maitam a dawh a, haltum thillatte leh lemna thillatte a laan hi. Tua khitin, Tangtawn Toupa'n tua gam taanga thuumna dawng a, Israel tunga hipi a damta hi.
Adonija Kumpi-in Kikoih
1 Kumpipa David hong upa a, hong teekta a, puan silhthuahsak sakta le uh zong lum a sa thei kei hi. 2 A silate'n a kiang ah: Kumpipa don ding leh keem dingin nungak siangthou khat zong n'ung, ka toupa uh kumpipa chilumsak dingin na kianga hong lum thei ding hi, a chi uhi, 3 Tuachi-in, Israel gam sung teng ah nungak melhoih a zong uh a, Shunam mi Abishag a mu uh a, kumpipa kiang ah hon pii uhi. 4 Tua nungak a melhoih mahmah khat ahi. Ama'n kumpipa a keem a, a don hi. Ahihhangin kumpipa'n zi bangin a luppih kei hi. 5 Tua hun laiin, Adonija, a nu Hagith hiven, hong kiliansak a, Kumpipain ka pang ding, chi-in kangtalaite leh sakoltungtuangte, tua chiangin ama' maia matai ding mi 50 a khawm hi. 6 A pa'n lah: Banghanga hibanga gamta na hia? chi-in a va kikum ngei kei hi. Adonija bel a mei zong a hoih mahmah a, Absalom nunga piang ahi. 7 Adonija in Zeruia' tapa Joab leh siampi Abiathar thu a kuppih a, amaute'n amah a gum uhi. 8 Ahihhangin, siampi Zadok leh Jehoiada' tapa Benaia leh kamsang Nathan leh Shimei leh Rei leh David veengpa bel Adonija lam ah a pang kei uhi. Tua nungin, Adonija in En Rogel kiang Zoheleth Suangpi ah belamte, bawngte leh bawngnou vakthaute a laan a, a sanggampate leh kumpipa' tapate khempeuh leh kumpi ulian Judahte khempeuh a chial hi. 10 Ahihhangin, kamsang Nathan hita leh, Benaia hita leh, kumpipa veengpa hita leh, a sanggampa Solomon hita leh, amaute chial a nei kei hi. 11 Tua khitin, Nathan in Solomon' nu Bathsheba kiang ah: Ka toupa uh David theihlouhin, Hagith' tapa Adonija, kumpipain a pangta, chih za lou na hi maw? 12 Hehpihtakin hon ngaikhia in, tu'n nangma' hinna mahmah leh na tapa Solomon' hinna na humbit theih ding dan hon thuhilh ning. 13 Kumpipa David kiang ah va lut inla, a kiang ah: Ka toupa, kumpipa aw, kei na silanu kianga kichiama: Kei nungin na tapa Solomon kumpipain a pang ngeingei ding a, ka kumpitutphah tung ah a tu ding, chi hilou na hi maw? Ahihleh, banghanga Adonija kumpipa-a pang ahia oi? va chi zok in. 14 Tua banga kumpipa na houpih lai mahmahin kei k'ong lut ding a, na gente dik ahihna kong kipsak ding hi, a chi hi. 15 Tuachi-in, a teeksia kumpipa a inndan sunga mu dingin Bathsheba a kuan hi. Tua muna Shunam mi Abishag in kumpipa a na keem ahi. 16 Bathsheba, kumpipa' mai ah kunin a va khukdin hi. Kumpipa'n: Bang deih na hia? chi-in a na dong hi. 17 Ama'n: Ka toupa aw, nang mahmah na silanu kiang ah, Tangtawn Toupa, na Pathian minin na kichiam a: Kei nungin na tapa Solomon kumpipain a pang ngeingei ding a, ka kumpitutphah tung ah a tu ding, non chi a, 18 hinapi-in, tu'n lah Adonija kumpipain a pang a, nang ka toupa kumpipa'n lah tua thu na thei kei a, 19 ama'n bawng tampi, bawngnou vakthaute leh belamte laan a, kumpipa' tapate khempeuh leh siampi Abiathar leh sepaihhon makailian Joab chial a, na sila Solomon chial het lou ei ve. 20 Ka toupa kumpipa aw, ka toupa kumpipa' nunga na kumpitutphah tunga kua tu ding hiam, chih nang apan thei nuama Israelte khempeuh' mit nang tunga tu ahi. 21 Tua banga a theih kei uleh, ka toupa kumpipa, na pu na pate kianga khawl dinga siala na om phet chianga, kei leh na tapa Solomon bel mikhialte banga bawla om pah ding hi ung, a chi hi. 22 Tua banga kumpipa a houpih laitakin, kamsang Nathan hong tung hi. 23 Kumpipa kiang ah: Kamsang Nathan hiah a om, chi-in a hilh uhi. Tuachi-in, amah kumpipa' mai ah a va pai a, a maitanga lei si-in a vakuun hi. 24 Nathan in: Ka toupa kumpipa aw, nang nunga kumpipa-a pang dingin Adonija ahi ding a, na kumpitutphaha tu ding amah mah ahi, chi-in na phuang hia? 25 Tuni-in lah amah a kuansuk a, bawng tampi mahmah, bawngnou vakthaute leh belamte a laan a, kumpipa' tapate khempeuh, sepaihhon makaite leh siampi Abiathar chial a, amaute'n tu mahmaha amah tawh nea dawnkhawm uh a: Kumpipa Adonija damsawt hen! chi uh ei ve. 26 Hinapi-a, kei na silapa leh siampi Zadok leh Jehoiada' tapa Benaia leh na silapa Solomon bel hon chial lou ahi. 27 Ka toupa kumpipa'n na nunga kumpitutphah tunga kua tu ding hiam chih na silate hon theisak loua, ka toupa kumpipa'n hibanga na hih mah hia? a chi hi.
David in Solomon Kumpipain Pangsak
28 Tua khitin, kumpipa David in: Bathsheba hon samlut un, a chi a, tuachi-in Bathsheba kumpipa omna ah hong lut a, a mai ah hong ding hi. 29 Kumpipa a kichiam a: Buaina chiteng apana hon tankhepa Tangtawn Toupa Pathian hinna sialin ka gen ahi. 30 Tangtawn Toupa, Israel Pathian' min siala na kianga ka kichiamna: Na tapa Solomon mah kei nungin kumpipain a pang ding a, keima' mun ah ka kumpitutphah tung ah a tu ding, ka chih tuni'n ka tangtun ngeingei ding hi, a chi hi. Tua khitin, Bathsheba lei si-in a kuun a, kumpipa' mai ah a khukdin a: Ka toupa Kumpipa David damsawt hen, a chi hi. 32 Kumpipa David in: Siampi Zadok, kamsang Nathan leh Jehoiada' tapa Benaia hon samlut un, a chi hi. Amaute kumpipa' maia hong pai takun, 33 ama'n amaute kiang ah: Na toupa uh silate tonpih unla, ka sabiltung tung ah ka tapa Solomon tuangsak unla, Gihon ah piisuk un. 34 Tua ah amah Israel kumpipa dingin siampi Zadok leh kamsang Nathan thaunilhsak un. Pengkul mut unla: Kumpipa Solomon damsawt hen! chi-in kikou un. 35 Tua khit chiangin, amah na zuihtouh ding uh ahi. Amah hong paitou a, ka kumpitutphah tunga tu a, kei muna vai a hawm ding ahi. Israel leh Judah tunga ukpa hi dinga amah septa ka hi, a chi hi. Jehoiada' tapa Benaia in kumpipa a dawng a: Amen! Tangtawn Toupa, ka toupa kumpipa' Pathian in tuabang takin phuang hen aw. 37 Ka toupa kumpipa David' kumpitutphah sanga ama' kumpitutphah lianzaw-a bawl dingin Solomon ompih hen! a chi hi. 38 Tuachi-in, siampi Zadok in kamsang Nathan leh, Jehoiada' tapa Benaia leh Kerethte leh Pelethte a kuansuk uh a, kumpipa David' sabiltung tung ah Solomon a tuangsak uh a, Gihon ah a zuisuk uhi. 3 Siampi Zadok in puanbuk siangthou apan sathau thawl saki a la a, Solomon a nilh hi. Tua khitin, pengkul a mut uh a, mipite khempeuh a kikou uh a: Kumpipa Solomon damsawt hen! a chi uhi. 40 Mipite khempeuh in, tamngaite tuma nakpitaka kipakin amah a zuitou uh a, a husa un lei a lingsak hi. 41 Adonija leh a ompih, a kianga hong hawhte khempeuh in ankuangum a zawh laitakun tua husa a za uhi. Pengkul gin a zak takun, Joab in: Khawpi a tua husa khempeuh bang chihna ahia? a chi hi. 42 Tua banga a pau laitakin, siampi Abiathar' tapa Jonathan hong tung hi. Adonija in: Hong lut in. Nang banga mi thupi in thupha hon pua hi lou thei kei ni teh, a na chi hi. 43 Jonathan in a dawng a: Hi peuhmah lou! I toupa kumpipa David in Solomon kumpipa dinga bawlta ahi. 44 Kumpipa'n kamsang Nathan, Jehoiada' tapa Benaia leh Kerethte leh Pelethte, siampi Zadok tawh sawl a, amaute'n kumpipa' sabiltung tunga amah tuangsak uh a, 45 siampi Zadok leh kamsang Nathan in Gihona amah thaunilh uh ahi. Tua apan amah kipahpiha awng kawmkawma paitou uh a, a husa un khawpi thawnsuak a, na zak uh husa tua ahi ve. 46 Tua baana, kumpitutphah tunga Solomon tu ahi. 7 I toupa kumpipa David paakta dinga kumpi' uliante zong hong pai uh a: Na Pathian in nang' minthanna sanga minthangzawin Solomon bawl henla, nang' kumpitutphah sangin ama' kumpitutphah thupizawsak lai hen aw! chi uh ahi. Tuachi-in, kumpipa a lupna tung ah Pathian biain kuun a: 4 Ka kumpitutphah tunga tu ding ka thakheng ding tuni-a hon musakpa Tangtawn Toupa, Israel Pathian phatin om hen, chi ahi, a chi hi. 49 Hiai a zak takun, Adonija kianga hong hawhte khempeuh patauin a dingkhia uh a, a kikhenzakta uhi. 50 Ahihhangin, Adonija bel Solomon lauin a vapai a, maitam kiite a valen hi. 51 Tua khitin Solomon kiang ah: Adonija in Solomon a lau a, maitam kii ah a luai a: Kumpipa Solomon in a silapa namsauin hon that kei ding, chi-in, kichiam hen, a chi, chi-in a hilh uhi. 52 Solomon in a dawng a: Amah mi muanhuai a hihna a latsak leh a luzanga samzang khat zong leilak ah a ke kei ding. Ahihhangin, amah-a thil gilou a om leh bel, a si ding, a chi hi. 53 Tua khitin, Solomon in mi a sawl a, amaute'n maitam apan Adonija a lakhia uhi. Adonija hong pai a, Kumpipa Solomon' mai ah a kuun a, Solomon in: Na inn ah paita in, a chi hi.
Solomon kianga Mawhpuakna David' Got
1 David sih hun hong nai takin, ama'n a tapa Solomon kiang ah mawhpuakna leh thuneihna a guan hi. 2 Leitung mite khempeuh pai dan banga pai ding ka hita. Thahat suah inla, pasal suah inla, 3 Tangtawn Toupa, na Pathian deihlam zui in. A lampi tawn inla, a dankhunte, a thupiakte, a thukhennate leh a theihpihmite, Mosi Dan Laibu-a kigelh bangin zui in. Tua mah na thilhih peuhmah leh na paina peuhmaha na mavan nading ahi. Tua baan ah, Tangtawn Toupa'n ka kianga hon chiamsa: Na suante'n a nuntak dan uh a chin hoih ua, a lungtang khempeuh uleh a hinna khempeuh utawh ka maia muanhuaitaka a gamtat uleh, Israel kumpitutphah tunga tu ding mi na tasam ngei kei ding, a chih a tangtun theih nading ahi. Tu'n Zeruia' tapa Joab in ka tunga a thilhih Israel sepaihhon makaite Ner' tapa Abner leh Jether' tapa Amasa tunga a hih nang mahmah in na thei hi. Amaute a that a, lemna muanna om laitakin kidou lai mahbangin a sisan uh a suah a, a kawnga kawnggak leh a khea khedapte ah tua sisan a baang hi. 6 Na pilna bangbangin a tung ah gamtang inla, ahihhangin, a samkangpi tawh lungmuangtakin hankhuk lutsuksak ken. 7 Ahihhangin, Gilead mi Barzilai' tapate tung ah chitna siamna suah inla, na dawhkana ankuang unite lak ah pangsak in. Na sanggampa Absalom apan ka taai laia, amaute'n hon huh uh ahi. Tua baan ah, Bahurim apan Benjamin mi Gera' tapa Shimei ompih na hi chih thei gige in. Mahanaima ka tai ni-a ama'n ka tunga hamsia khatak mai hon lawh ahi. Jordan luia kei tuak dinga hong paisuk laia Tangtawn Toupa' min siala kichiam khin ing a: Namsauin kon that kei ding, na chi khin ka hi. 9 Ahihhangin, amah mawhnei lou ahi, chi-in tu'n ngaihsun ken. Nang, pilna nei mi na hi a, amah bang lawh ding hiam, chih na thei hi. A samkangpi tawh sisan kai kawmin hankhuk lutsuksak in, a chi hi. 10 Tua khitin, David a pu a pate kiang ah a khawlta a, David' Khawpi ah vuiin a omta hi. uIsrael tung ah kum 40 sung vai a hawm a, Hebron ah kum sagih, Jerusalem ah kum 33 ahi. 12 Tuachi-in, Solomon, a pa David kumpitutphah tung ah a tu a, a vaihawmna kiptakin a kiphutkipta hi.
Solomon' Kumpitutphah Kipta
13 Hagith' tapa Adonija bel Solomon' nu Bathsheba kiang ah a va hawh hi. Bathsheba in: A hoihlama hong hawh na hi hia? chi-in a na dong hi. Ama'n a dawng a: He, a hoihlam hi e. 14 Na kianga gennop khat nei ka hi, a chi hi. Bathsheba in: Na gen thei ding, a chi hi. 15 Ama'n: Na theihsa bangin, kumpigam keia ahi. Israelte khempeuh in a kumpipa ding ua kei hon muang uh ahi. Ahihhangin, thil hong kikheng a, kumpigam ka sanggampa'n a tang hi. Ahang bel, Tangtawn Toupa'n amah pia hiven. 16 Tu-in nang apan ka nget nop khat a om, hon nial ken, a chi hi. Bathsheba in: Gen ve, a chi hi. 17 Tuachi-in, Adonija in a gen zom zel a: Kumpipa Solomon kiang ah hon ngetsak in, ama'n hon nial lou ding ahi. Tua Shunam mi Abishag ka zi dingin hon pia hen, a chi hi. 18 Bathsheba in: Hoih mahmah e. Nang adingin kumpipa houpih ning e! a chi hi. 19 Bathsheba, Adonija adinga gensak dinga kumpipa Solomon kianga a va hawh takin, kumpipa a na ding a, a mai ah a kun a, tua khitin a kumpitutphah tung ah a tu hi. Kumpipa' nu ading zong kumpitutphah khat a lasak a, amah kumpipa' taklam ah a tu hi. 20 Bathsheba in: Thil neuchik khat kon ngen nuam a, hon nial ken aw, a chi hi. Kumpipa'n a dawng a: Nu aw, gen in, kon nial kei ding, a chi hi. 21 Tuachi-in, Bathsheba in: Na sanggampa Adonija zi dingin tua Shunam mi, Abishag piak hi hen, a chi hi. 22 Kumpipa Solomon in a nu a dawng a: Banghanga Adonija adinga Shunam mi Abishag ngetsak na hia? Kumpigam nangawn ngetsak vanglak ve, amah ka sanggampa ahi mah ve. Ahi, amah ading, siampi Abiathar ading leh Zeruia' tapa Joab adingin ngetsak lai ve! a chi hi. 23 Tua khitin, Tangtawn Toupa' hinna sialin Solomon a kichiam a: Adonija in a thil nget hanga a hinna a taan lawh kei taak leh, Tangtawn Toupa'n kei a lawh lawh hon lawh henla, a nasezaw zong hon lawh hen! a chi hi. 24 Tu'n, ka pa David kumpitutphah tunga kiptaka hon tusak a, a chiamsa bangbanga kei adinga kumpigam hon bawlsak Tangtawn Toupa' hinna sialin ka gen ahi. Tuni'n Adonija thahin a om ngeingei ding! a chi hi. 25 Tuachi-in, Kumpipa Solomon in Jehoiada' tapa Benaia thu a pia a, ama'n Adonija tung ah khut a kha a, Adonija a si hi. 26 Kumpipa'n siampi Abiathar kiang ah: Anathoth-a na loute ah kilehkik in. Si taak na hi a, ahihhangin, ka pa David' maia Toupa Tawngtawn Pathian singkuang pua a, ka pa' haksatna khempeuh thuakpih na hih manin, tu'n zaw kon that kei ding, a chi hi. 27 Tuachi-in, Solomon in Tangtawn Toupa' siampi hihna apan Abiathar' a tawpsak a, Tangtawn Toupa'n Shilo-a Eli innkaw thu a tangtungsak hi. 28 Joab bel Absalom tawh pangkhawm hi keimah leh Adonija tawh thil simsawmpa ahih manin, hiai thu a zak takin, Tangtawn Toupa' puanbuk ah a tailut a, maitam kiite ah a luai hi. 29 Joab, Tangtawn Toupa' puanbuk ah a tailut a, maitam kiang ah a om chih thu Kumpipa Solomon a hilh uhi, Tua khit phetin, Solomon in Jehoiada' tapa Benaia thu a pia a: Pai inla, ama' tung ah khut kha in! a chi hi. 30 Tuachi-in, Tangtawn Toupa' puanbuk ah Benaia a lut a, Joab kiang ah: Kumpipa'n: Hong pawtkhia in! chi ahi, a chi hi. Ahihhangin, ama'n a dawng a: li, hiah ka si zaw ding, a chi hi. Benaia in kumpipa kiang ah hiai thu a tun a: Joab' hon dawnna hibang ahi, a chi hi. 31 Kumpipa'n Benaia thu a pia a: A chih bangin hih in. Amah satlumin vui inla, Joab in mawhneilou sisan suaha a mawhna apan kei leh ka innkuan sung siangsak in. 32 Ama'n ka pa David theihlouha mi nih namsaua a thah a, sisan a suahna Tangtawn Toupa'n thuk ding hi. Tua mi tegel, Ner' tapa Abner, Israel sepaihpawlpi makai leh Jether' tapa Amasa, Judah sepaihpawlpi makai, amah sanga mi hoih zaw leh mi tang zaw hi uhi. 33 Amaute' sisan kisuahna mawhna Joab leh a suante tung ah tu den hen. Ahihhangin, David leh a suante tung ah, a innkawte leh a kumpitutphah tung ah bel, Tangtawn Toupa' lemna muanna omdenta hen, a chi hi. 34 Tuachi-in, Jehoiada' tapa Benaia a kuantou a, Joab tung ah khut a kha a, a that a, gamdai-gamkeua ama' gam sunga vuiin a omta hi. 35 Kumpipa'n Joab mun ah Benaia, sepaihpawlpi makaiin a koih a, Abiathar zong siampi Zadok in a khengkhia hi. 36 Tua khitin kumpipa'n Shimei a samsak a, a kiang ah: Jerusalem ah inn khat kilam inla, tua ah teeng in, ahihhangin, mun dang koimah ah paikhe het ken. 37 Na paikhiak a, Kidron Phaizang na kaan ni ni-in na si ngeingei ding a, na sisan mawh nangma' lutung a tu ding, chih thei in, a chi hi. 38 Shimei in kumpipa a dawng a: Na gen a hoih hi. Ka toupa, kumpipa' gen bangin kei na silapa'n ka hih ding, a chi hi. Tua bangin Shimei, Jerusalem ah hun sawtpi a teeng hi. 39 Ahihhangin, kum thum nungin Shimei' sila nihte, Gath kumpipa, Naaka' tapa Akhish kiang ah a taai uhi. Tua thu Shimei a hilh uh a: Na silate Gath ah a om uh, a chi uhi. 40 Hiai a zak takin Shimei in a sabiltung tung ah a tuanphah a phah a, a silate zong dingin Gad-a Akhish kiang ah a va hawh hi. Tua bangin, Shimei a kuankhia a, Gath apanin a silate a piikik hi. 41 Shimei, Jerusalem apan Gath ah a hawh a, a hong tungkik nawnta, chih Solomon a hilh takun, 42 kumpipa'n Shimei a sam a, a kiang ah: Mun dang koipeuha na paikhiak ni ni-in na si ding chih thei in, chi-in Tangtawn Toupa' hinna sialin kon kichiamsakin kon vaukhol kei-a hia? Tua hun mahin, ka kiang ah: Na gen a hoih, ka mang ding, na chi kei-a hia? 43 Tua bang ahih nung banghanga Tangtawn Toupa' kianga na kichiamna zui lou a, kon thupiak zui lou na hia? a chi hi. 44 Kumpipa'n Shimei kiang ah: Ka pa David tunga thil gilou na hih khempeuh na lungtangin na thei hi. Tuin, Tangtawn Toupa'n na thil gilou hih hon thuk ding ahi. Ahihhangin, kumpipa Solomon bel vualzawlin a om ding a, Tangtawn Toupa' mai ah David kumpitutphah a kip den ding, a chi lai hi. 4 Tua khitin, kumpipa'n Jehoiada' tapa Benaia thu a pia a, Benaia a kuankhia a, Shimei tung ah khut a kha a, a that hi. Solomon' khut ah kumpigam kiptaka tunding ahita hi.
Solomon in Pilna Ngen
1 Solomon in Aigupta kumpipa Faro tawh pankhawmna kizopna a bawl a, a tanu a kitenpih hi. David Khawpi ah a pii a, a innpi leh Tangtawn Toupa' tempul leh Jerusalem kulhbaang a kimvela a lamkhit mateng tua ah a ompih hi. 2 Ahihhangin, Tangtawn Toupa' Min ading tempul a kilam nailouh manin, mite'n munsang khawngte ah tua hun laiin, kithoihnate a laan uhi. 3 Solomon in zong munsangtea kithoihnate laan a, gimnamtuite a hal chih louh, a pa David' dankhunte zuiin, Tangtawn Toupa' itna a langsak hi. 4 Gibeon bel munsang poimawhpen ahih manin, kithoihnate laan dingin kumpipa tua ah a hawh a, tua maitam ah haltum thillat 1,000 a laan hi. 5 Tua Gibeon ah Tangtawn Toupa Solomon kiang ah zaana ihmut mang ah a kihil a, Pathian in: Na ut peuhmah hon pe dingin hon ngen in, a chi hi. Solomon in a dawng a: Na sila, ka pa David na tunga a muanhuai a, a diktat a, lungtang tang ahih manin, nang a tung ah chitna siamna thupitak na lakta. Hiai chitna siamna na pe lailai a, tuni donga a kumpitutphah tunga tu ding tapa na pia hi. Tuin, Tangtawn Toupa, ka Pathian aw, ka pa David muna kumpipain kei na silapa non koihta. Ahihhangin, kei zaw naupang nou ka hi lei a, ka sep dingte sepkhiak ding dan ka thei kei hi. 8 Nam thupi na mitelte lak ah na silapa ka om a, amaute lah a tam mahmah uh a, simseng ding ahi kei uhi. 9 Tua bang ahih manin, na mite uk dingin na silapa, lungpilna, adik leh diklou khenkaak theihna hon pia in. Ahang bel, na mite hiai zahta kua'n uk thei ding ahia? a chi hi. 10 Solomon in hiai a nget manin, Toupa a tung ah a kipak hi. 11 Tuachi-in, Pathian in amah kiang ah: Nangma' nuntak nading hita leh, nang adinga hauhna hita leh, na melmate sih nading hita leh ngen lou a, dika thukhenna pilna na ngetzawk manin, 12 non nget kon pe ding. Lungpilna leh theihkakna pilna kon pe ding a, nang bang mi kuamah om ngeilou a, om zong om ngei nawnlou ding ahi. 13 Tua baan ah, non nget louh zong kon pe ding. Hauhnate leh pahtawina kon pe ding a, na damsung teng kumpipate lak ah na kimpih kuamah a om kei ding. 1 Ka lampite na zuih a, na pa David banga ka dankhunte leh thupiakte na zuih peuhmah leh, damsawtna kon pe ding, a chi hi. 15 Tua khitin, Solomon a khanglou a, a ihmut mang ahi chih a phawkkhia hi. Amah Jerusalem ah a kilehkik a, Toupa' thukhun singkuang mai ah a ding a, haltum thillatte leh lemna thillatte a laan a, kumpi' inna nasem mite khempeuh adingin ankuang a lui hi.
Thukhenna Pil
16 Hibang thil hong om a, kizuak numei nih, kumpipa kiang ah hong hawh uh a, a mai ah hong ding uhi. 17 A lak ua khat in: Ka toupa aw, hiai numei leh kei, inn khat ah ka tengkhawm uhi. Amah ka kianga a om sungin ken naungek khat ka nei hi. 18 Ka ta a pian nung ni thumin hiai minu'n zong naungek a nei hi. Koute kia ka om uh a, tua inn ah koute gel lou midang kuamah a om kei hi. 19 Zankalin, hiai numei in a ta a delhkhak manin, a ta hong si hi. 20 Amah zankim laiin a thoukhia a, kei na silanu ka ihmut kalin ka kianga om ka tapa a la hi. Tua ka tapa a ang ah a sial a, ama' tapa sisa ka ang ah hong sial hi. 21 A zingchiang zingsanga nau nawi pe dinga ka thawhkhiak leh amah a sisa a na hi! Ahihhangin, zing khawvaka limtaka ka et leh, ka neih ka tapa ahi kei hi, a chi hi. 22 Tua numei khat pen in: Hilou! A hing pen kei' tapa ahi a, a si pen nanga ahi, a chi hi. Ahihhangin, a masapen in a chih ngei mah a chi giugeu a: Hilou! A sipen nanga ahi a, a hing pen keia ahi, a chi hi. Tua bangin, kumpipa' mai ah a kinial uhi. 23 Kumpipa'n: Hiai pen in: Ka tapa a hing ahi, nang' tapa a si ahi, a chi a, a khat pen in lah: Hilou! Nang' tapa a si ahi a, keia a hing ahi, a chi hi, a chi hi. 24 Tua khitin, kumpipa'n: Namsau hon la un, a chi a, kumpipa adingin namsau khat hon la uhi. 25 Tua khitin, ama'n thu a pia a: Naungek hing lai pen tum nih suah unla, a kimkhat numei khat pia unla, a kimkhat dang numei khat pen pe nawn un, a chi hi. 26 A hinglai tapa nei numei pen, a tapa lainatna tawh a kidim a, kumpipa kiang ah: Ka toupa aw, hehpihtakin naungek hinglai amah pia un! That mahmah ken! a chi hi. Ahihhangin, numei khat penin bel: Ke'n lah tua naungek tang kei ning, aman lah tang ken teh. tum nih suah in! a chi hi. 27 Tua khitin, kumpipa'n thu a khen a: Tua naungek hinglai pen numei masapen pia un. Amah that kei un, amah pen mah naungek nu a hina, a chi hi. 28 Israelte khempeuh in kumpipa' thukhenna a zak takun, thukhenna dik pe dingin kumpipa'n Pathian apan pilna nei ahi, chih a muh manun, kumpipa zahtaka launa a nei uhi.
Solomon' Uliante leh Ukpipate
1 Tuachi-in, Kumpipa Solomon in Israel gamsung khempeuh tung ah vai a hawm hi. 2 Ama' uliante hiaite ahi: Zadok' tapa siampi Azaria, 3 Shisha' tapate Elihoref leh Ahija, laigelh thusate ahi uhi. Ahilud' tapa Jehoshafat, laibu-a thil gelhluta chiamtehpa ahi. 4 Jehoiada' tapa Benaia, sepaihpawlpi makai lianpen ahi. Zadok leh Abiathar, siampite ahi uhi. 5 Nathan' tapa Azaria, gam sehkhena uliante ukpa ahi. Nathan' tapa Zabud, kumpipa-a tuam siampi leh thuhilhpa ahi. 6 Ahishar, kumpi innpi ukpa ahi. Abda' tapa Adoniram, phutluih nasemte ukpa ahi. 7 Solomon in Israel gam sehkhen tunga ukpipa sawmlenih zong a nei a, tuate'n kumpipa leh a sungte' nek leh tak a pia uhi. Amaute khat tek in kum khata kha khat nek-leh-tak a pe chiat uhi. 8 Hiaite ukpipate ahi: Efraim tanggam ah Ben Hur ukpipa ahi. 9 Makaz, Shaalbim, Beth Shemesh leh Elon Bethhanan gam ah Ben Dekar ukpipa ahi. 10 Aruboth gam ah Ben Hesed ukpipa ahi. Soko leh Hefer gam khempeuh amah-a ahi. 11 Nafoth Dor gam ah ukpipa Ben Abinadab ahi. Ama'n Solomon' tanu Tafath zi-in a nei hi. 12 Taanakh leh Megido leh Beth Shan gam khempeuh ah Ahilud' tapa Baana ukpipa ahi. Beth Shan bel Zezreel khanga Zerethan zoma om, Beth Shan apan Abel Mehola dong, Jokmeam khen chiang dong ahi. 13 Ramoth Gilead gam ah Ben Geber ukpipa ahi, Gilead-a Manase' tapa Jair teenna zong amah-a ahi. Tua baan ah Bashan gama Argob gam sehkhen leh kulhbaang nei a khawpi lianpipi gukte zong amah-a ahi. Tua khawpite'n kongpi kaihna sumsan sikzawlte a nei uhi. 14 Mahanaim gam ah Ido' tapa Ahinadab ukpipa ahi. 15 Naftali gam ah Ahimaaz ukpipa ahi. Ama'n Solomon' tanu Basemath a kitenpih hi. 16 Asher leh Aloth gam ah Hushai' tapa Baana ukpipa ahi. 17 Isakhar gam ah Parua' tapa Jehoshafat ukpipa ahi. 18 Benjamin gam ah Elia' tapa Shimei ukpipa ahi. 19 Gilead gam ah Uri' tapa Geber ukpipa ahi. Tua gam lah Amor kumpipa Sihon gam leh Bashan kumpipa Og gam ahi ngeita uhi. Geber kia mah tua gam sehkhena ukpipa ahi.
Solomon' Nisim Nek-leh-taak
20 Judah leh Israel mite bel tuipi geia sehnel zaha tam ahi uhi. Amaute'n nea dawnin nuam a sa uhi. 21 Solomon in tua Luipi apan Filistiate gam, Aigupta gamgi donga kumpigamte tung ah vai a hawm hi. Hiai gamte'n Solomon kiang ah siah a pia uh a, a damsung teng ama' khua leh tui ahi uhi. Solomon' nisim nek leh tak dinga piak anvui nei tehna lawh 30 leh an tehna lawh 60, 23 inn-a vakthau bawng sawm khat, gama vakthau bawng 20, belam leh kei 100, leh sakhite, sazate, sapengte leh ak hoihpente ahi. 24 Ama'n tua Luipi tumlam, Tifsha apan Gaza donga kumpigam khempeuh uk ahih manin, koi mun Deuh ah lemna-muanna a nei hi. 25 Solomon dam sungin, Judah leh Israel gamsung Dan apan Beersheba dong michih ama' grepgui leh theipi kung nuai ah bittakin a teeng uhi. 26 Solomon in kangtalai kai sakolte adingin ganinn 4,000 leh sakol 12,000 a nei hi. 27 Gam sehkhen uliante'n amau tan hun kha khat sung, Kumpipa Solomon leh a ankuang um dinga hong paite khempeuh ading nek leh tak a pe tek uhi. Bangmah taksap om lou dingin mawhpuak a buchingsak uhi. 28 Kangtalai kai sakolte leh sakol dangte adingin barli buh leh buhpawlte hon pua uh a, dik a sakna mun mun uah hong koih zel uhi.
Solomon' Pilna
29 Pathian in pilna leh theihsiamna leh lainatna a tama tam tuipi geia sehnel zah, Solomon a pia hi. 30 Solomon' pilna bel Suahlam mite khempeuh leh Aiguptate' pilna khempeuh sangin a thupi zaw a, a sang zaw hi. 3 Amah miteng sangin a pii zaw a, Ezra mi Ethan sangin a pii zaw a, Mahol' tapate Heman, Kalkol leh Darda sangin a pii zaw hi. A minthanna a kim a kianga namte khempeuh lak ah a thangsuak hi. 32 Ama'n paunak 3,000 a genkhia a, a la neih 1,005 a pha hi.33 Ama'n sing leh lou hindan, Lebanon tanga sidar singkung apan baanga zam husop tungthu a gen thei hi. Ganhingte leh vasate, awma kitholhte leh ngasa tungthu a sinsak thei hi. 34 Nam chih apan mite, Solomon' pilna ngaikhe dingin hong kuan uhi. A pilna thu a na zata leitung kumpipate'n tua bang mite hon sawl uhi.
Tempul Lam dinga Kisakna
1 Tura kumpipa Hiram in Solomon, a pa David tha kheng dingin kumpipa hihna thaunilhna a tangta chih thu a zak takin, Solomon kiang ah palaite a sawl hi. Ahang bel, amah, David tawh lawm hoiha kinei ahi ua ahi. 2 Solomon in Hiram kiang ah hiai thu a khakkik hi: 3 Mun chih kilchih apan ka pa David tunga gal bawlmi hangin, Tangtawn Toupa'n a galte khempeuh a khepek nuaia a koih mateng, ama'n Tangtawn Toupa, a Pathian' Min ading tempul a lam theih louh dan na thei hi. 4 Ahihhangin, tuin Tangtawn Toupa ka Pathian in kilchiha khawlna kei hon peta a, meima zong a om kei a, siatna zong a om kei hi. 5 Tua bang ahih manin, Tangtawn Toupa'n ka pa David a na hilh bangin, Tangtawn Toupa, ka Pathian' Min ading tempul lam ka tum hi. Ama'n ka pa David kianga: Nangma' muna, kumpitutphah tunga ka tutsak ding na tapa in ka Min ading tempul a lam ding, a na chi hi. 6 Tua bang hiven, Lebanona sidar singte kei adinga phuuk ding thu na pia in. Ka mite'n na mite tawh a semkhawm ding uh a, nang chih dandanin na mite goihna sum ka pe ding. Sidon mite banga innsing ding phuk siam koute'n nei lou ka hi uh, chih na thei hi, a chi hi. 7 Hiram in Solomon' thukhah thu a zaktakin, a kipak mahmah a: Tuni'n Tangtawn Toupa phatin om hen, hiai nam thupitak tunga vaihawm ding, David kianga tapa pii peta ahi, a chi hi. 8 Tuachi-in, Hiram in Solomon kiang ah thu a khak a: Thu non khak ka na muta a, sidar leh taksing tumte na deih zahzah kon pe ding. Ka mite'n tuate Lebanon apan tuipi chiang dong hon tolhsuk ding uh a, na chihna mun dong, tuipi tung ah puumin kon tolhsuksak ding hi. Tua mun ah hon suahkhe ding uh a, na paw ding hi. Nang zong ka lunggulh bangin kei innsung ading nek leh tak non pe ding hi, a chi hi. 10 Hibangin, Hiram in Solomon' deih zahzah sidar leh taksing a pia a, 1 Solomon in sathau suuk thawh bath 20,000 baan ah, huit buh tehna 20,000, Hiram innsung adingin a pia hi. Solomon in a kumsimin Hiram ading hibangin a pia hi. 12 Tangtawn Toupa'n a chiamsa bangin Solomon, pilna a pia hi. Hiram leh Solomon kal ah kihoutheihna a om a, a nihun kilemna thukhun a bawl uhi. 13 Kumpipa Solomon in Israel gamsung teng apan phutluih nasem mi 30,000 a kaikhawm a, 14 kha khat-a 10,000 zelin, Lebanon ah amaute a sawl hi. Tuachi-in, amaute kha khat sung Lebanon ah a taam uh a, kha nih sung inn ah a tawlnga zel uhi. Tua phutluih nasemte Adoniram in a uk hi. 15 Solomon in mual tung gam apan van paw mi 70,000 leh suangsek mi 80,000 a nei a, 16 nasepna enkai ding leh nasemte makaih ding enkaimi 3,300 a nei hi. 17 Kumpipa' thupiakin tempul suangphum dingin suanglakna khuk apan suang hoih chi, lianpipi a lakhesak a, tuate a seksak hi. 18 Solomon leh Hiram' khutsiamte leh Gebal mite'n tempul lam nadingin singtumte suiin suangte a sek uhi.
Solomon In Tempul Lam
1 Israelte Aigupta apan hong paikhiak nung a kum 480-na, Solomon in Israel tunga a vai hawm kum a kum lina, a kha nihna Ziv khain Tangtawn Toupa' tempul lam a pan hi. 2 Kumpipa Solomon in Tangtawn Toupa ading tempul a lam bel tong 60-a sau, tong 20-a za leh tong 30-a sang ahi. 3 Tempul sungpi maia innlim zong tempul vailam chia-in tong 20-in a paisuak a, tong sawmin a lawkkhia hi. 4 Tua tempul ah khawvak lut nading tawhlet kawchikte vathangkalh nei a bawl hi. 5 Tua a innsungpi pang baangte leh a mun siangthou sungnung pang baangte si-in a pawlam ah a kimvelin, inndan chialneite a bawl hi. 6 A chial nuainungte tong nga-a za, a chial nihnate tong guka za, a chial thumnate tong sagiha za ahi. Pawlam inndante' innkamte, tempul baanga phuhlut kul lou dingin, innkamte ngak nading a lawkkhete a bawl hi. 7 Tua tempul lam laiin, suangkhuuka suang seksate kia a kizang a, sek leh sikkhu, ahih kei leh siika kibawl van zat ging himhim, tua ah a kiza kei hi. 8 Inndan chial nuainunga lutna kong tempul simlam ah a om a, kaltouhna dawhchial in inndan chial laita a suntou a, tua apan inndan chial tungnung a suntou hi. 9 Tua bangin tempul tunga innkamte khunga sidar singpektea khuhin a lamkhin a, 10 tempul panga inndan paisuakte zong a lamkhin hi. Tua inndante sandan tong nga chiat ahi a, tuate tempul pang ah innkamtein a kihihkip hi 11 Tangtawn Toupa' thu Solomon kiang ah hong tung a: 12 Na tempul lam tawh kisaiin, ka dankhunte na zuih a, ka thukhennate na sepkhiak a, ka thupiakte zuia thu na man leh, na pa David kianga ka thuchiam nang tungtawnin ka tangtungsak ding hi. 13 Israelte lak ah ka teeng ding a, ka mi Israelte ka taisan kei ding hi, a chi hi. 14 Tua bangin Solomon in tempul a lam a, a zouta hi. 15 A baangte' sunglam teng sidar singpekin, suai apan inntung dai chiang dong, baangthuah a phalhsuak a, a suai tung ah taksing pek a phahsuak hi. 16 Tempul sung nunglam sidar singpekin tong 20 chiang, suai apan inntung dai suntouin a daltan a, mun siangthou sungnung a bawl a, Mun Siangthoupen ahi. 17 Hiai mazawn inndan tong 40-a sau ahi. 18 Tempul sung tenga sidar singpekte ah umgahte leh pakpalhte lim a kikhuak hi. Tua tempul sung teng sidar sing kikhuhsuak ahih manin, suang himhim a kimu kei hi. 19 Tua munsiangthou sungnung bel, Tangtawn Toupa' thukhun singkuang koih nadingin a bawl hi. 20 Tua mun siangthou sungnung ahih leh, tong 20-a sau, tong 20-a za, tong 20-a sang ahi. Tua sungteng khamsiik siangin a tuam vek a, tua sidar maitam zong khamsiik siangin a tuam hi. 21 Solomon in tempul sung teng khamsiik siangin a tuam a, tua khamsiika tuam munsiangthou sungnung mai ah khamsiik khain-iangte a zan hi. 22 Tuachi-in, tempul sung teng khamsiika tuamsuak ahi. Tua munsiangthou sungnunga maitam zong khamsiika tuam ahi. 23 Tua munsiangthou sungnung sung ah oliv singin cherub nih, tong sawma sang a bawl hi. 24 Cherub khatna kha tong nga-a sau ahi a, a kha langkhat zong tong nga-a sau mah ahi a, kha mong leh kha mong kal tong sawma kigamla ahi. 25 Cherub nihna zong tong sawm maha sang ahi. Cherub nihte letdan leh melputdan kibang geih ahi a, 2 ^Cherubte san dan tong sawm ahi tuak hi. 27 Solomon in tua cherubte inndan sungnung-pen ah kha zaksa in a koih hi. Cherub khat kha in baang khat a sunkha a, cherub dang khat pen' kha in baang langkhat a sunkha a, a khate uh tua inndan laizang ah a kisutuah uhi. 28 Tua cherubte zong khamsiikin a tuam hi. 29 Tempul kimvela baangte ah, inndan sungnung hi-in pawnung hita leh, a khuak thawh cherubte, nisuhkungte leh pakpalhte a koih hi. 30 Tempul sung suai teng zong, inndan sungnung hi-in, pawnung hita leh, khamsiikin a tuam vek hi. 31 Munsiangthou sungnung lut nadingin oliv singin kongkhakte a bawl a, a kong tung leh kongbiangte pang nga neiin a bawl hi. 32 Tua oliv singa kibawl kongkhak pek nihte ah a khuakthawhin cherubte, nisuhkungte leh pakpalhte a bawl a, tua cherub leh nisuh kungte sekthawh khamsiikin a tuam hi. 33 Tua bang mahin, inndanpi lutna zong oliv singin kong biangte pang li neiin a bawl hi. 3 Tua kongkhak pek nihte taksingin a bawl a, tuate zong a kikhep theiin a bawl hi. 5 Tua kongkhak pekte ah a khuakthawhin cherubte, nisuh kungte leh pakpalhte a bawl a, tuate sekthawh khamsiikin a tuam hi. 36 Tempul huangsung inntual sungnungzaw pen suangsek chial thum leh sidar sing kisui chial khatin a bawl hi. 37 A kum Una, Ziv khain Tangtawn Toupa' tempul suangphum a kiphum hi.3 A kum sawmlekhatna, a kha giatna Bul khain tempul lam ding dan sehsa bangbangin nouneltakin a kizouta hi. Solomon in tua tempul lam nadingin kum sagih a beisak hi.
Solomon in Ama' Innpi Lam
1 Solomon in ama' innpi lam nadingin kum sawmlethum a beisak hi. 2 Tua innpi, Lebanon Gammang singin a lam a, a dung tong 100-a sau, a vailam tong 50-a za, a sanlam tong 30-a sang ahi a, sidar sing khuampi vual li-in sidar sing kisui innkamte a dou hi. 3 Tua sing khuampite tunga innkamte tung sidar singpeka kikhuh ahi. Khuam 45, vual khata innkam sawmlenga zel om ahi.4 A tawhlette a kizomin kop thum thumin, sangpi ah a kikoih hi. 5 A kongvangte khempeuh kongbiangte tawh pang li nei, a vual thumna kimaituaha bawl ahi. 6 Innlim, tong 50-a sau, tong 30-a za-a bawl hi. Tua innlim mai ah dawksawn innlim neu a om a, tua mai ah khuampite leh bikha kaikhia a omsak hi. 7 Kumpitutphah koihna inndanpi lian a bawl a, tua bel Thukhenna Inndanpi ahi. Tua inndan sung baang teng sidar singpekin, suai apan inntungdal chiang dong a khuh hi. 8 Ama' tenna ding innpi pen a nung lam ah, inndan lian tawh mei puakdan kibanga bawlin a om hi. Solomon in inndan lian tawh kibang mah, a kitenpihnu Faro' tanu ading inn a bawlsak hi. 9 Hiai innlamte khempeuh, a pawlam apan huangsung inntual chiang dong leh, a suangphum apan a bikhalap chiang dong, suanghoih chi, teh detdeta sek, a sung a pua singatna-a at-a nawtmam ngena bawl ahi. 10 A suangphumte suang hoih lianpipi, pawlkhat tong sawm, pawl khat tong giata sau ahi. nA tung lam ah suang hoih manpha chi teh detdeta sek leh sidar innkamte a kizang hi. 12 Huangsung inntual kimkot sung suangsek lep baang thuah thumin leh sidar singin a kium hi.
Tempul Vanzatte
13 Kumpipa Solomon in Tura khua ah mi a sawl a, Huram* a piisak hi. 14 Huram' nu bel Naftali nam apan meigong a hi a, a pa lah Tura khawmi ahi a, sumsan sek mi ahi. Huram zong sumsana thil bawl thei theihsiamna leh pilna-a hau mahmah ahi. Amah Kumpipa Solomon kiang ah hong tung a, nasep ding a khuta kipia khempeuh a sem hi. 15 Sumsanin khuampi nih a sung a, tuate tong sawmlegiata sang, akimvela teha zong tong sawmleniha lian ahi. 16 Tua khuampi nihte dawn ah khuamlukhu nih tek, sumsan sunthawh, tong nga-a sang a bawl hi. 17 Tua khuampite dawn ah khuamlukhu kisuangsawnte khainiang kiphanin a tuam hi. Khuamlukhu khat ah khainiang phan sagih tekin a zem hi. 18 Tua khuampite dawna khuamlukhu-a khainiang kiphante ah a zepna mimthei gah vual nihin a koih tek hi. 19 Innlima pang khuampite dawna khuamlukhute ahih leh lili pak melpuin tong li-a sang ahi. 2 Tua khuampite gel tunga khuamlukhute tunga sik khainiang tawh kizom belkuang lim tung zawn ah a kimvelin mimthei 200 a kivual hi. 21 Tua khuampite bel tempul innlim ah a dingsak a, a simlam panga khuampi min dingin Jakin a phuak a, a mallam pang pen min dingin Boaz a phuak hi. 2 Tua khuampite' dawna khuamlukhute lilipak melpu ahi. Tua bangin khuampite a kibawlkhinta hi. 23 Ama'n siik sunthawhin Tuikuangpi a bemin a bawl a, a gei leh gei kikal tong sawm ahi a, a sanlam tong nga ahi. A kimvela tehin tong 30 ahi. 24 A gei nuai ah a kimvelin umgah lim, tong khata sawm zel a kikoihsuak hi. Tua umgahte vualnihin a Tuikuangpi tawh sunkhawm ahi. 25 Tua Tuikuangpi bel bawngtal sawmlenih tunga kitung ahi a, bawngtal thumin mallam a nga a, thum in tumlam, thum in simlam, thum in suahlam a nga hi. Tuate tung ah Tuikuangpi a kitung a, bawngtalte nunglam teng a sunglam ah a om hi. 26 Tuikuangpi sahdan khutpek chia ahi a, a gei lah nou gei bang ahi a, lilipak paih bang ahi. Tui bath 2,000 a ta hi. 27 Ama'n kangtalai sawmkhat zong sumsanin a bawl hi. Tuate tong li-a sau, tong li-a za leh tong thuma sang ahi. Tua kangtalaite a bawl dan hibang ahi: Siikpek kitungte a om a, tuate a kawmte kal ah a om uhi. 29 Tua siikpek kitungte ah humpinelkai limte, bawngtal limte leh cherubte a tuang hi. Tua siikpek kawmte dawn ah siiktheih kahlei a om hi. Tua humpinelkai leh bawngtal limte nuai ah pakkhi phekthawha kibawl a om hi. 30 Tua kangtalaite'n sumsana kibawl khepei li leh a zawlte a nei chiat uhi. Tua khepei lite nanna sumsan sunthawha kibawl ahi a, a panga pakkhi tawh sunkhawma kibawl ahi. 31 Tua a peite nanna, nou banga bem a sunghawm tong khata thuk ahi. Tua nou banga bem tawlet taw a let dan tong khat leh a lang ahi. Tua nou banga bem gong a kimvelin, khuakthawh limte a zep ahi. Kangtalai pang siikpekte bel a dung a vai kikim ahi. 32 Tua kangtalai pei lite, tua siikpekte nuai tak ah a om a, a siikzawlte leh a pei nannate sa khata kizom ahi. Tua kangtalai peite sandan tong khat leh a lang ahi. 33 Tua kangtalai peite bel kidouna kangtalai peite banga kibawl, a zawlpite, a pei kualte, a pei sung kalhnate leh a kaihna bulte sunthawh siik ngen ahi. Tua kangtalai in a letna bil li tek a nei a, a kiu tenga lawkkhia-a kibawl ahi. 35 Tua kangtalai tungkhum ah a beema paisuak, tong kimkhata thuk a om hi. A nanna leh siikpekte bel kangtalai tungkhum tawh a kimat hi. 36 Ama'n a nannate leh sikpekte pang a awnna teng ah a khuakthawhin cherubte, humpinelkaite leh nisuh kungte leh a kimvela pakkhite a bawl hi. 37 Kangtalai sawmte a bawl dan hibangin lim leh mei leh letdan kibang vek ahi. 38 Tua khitin, sumsan tuikuang sawm khat a bawl a, a gei kikal kaantana tangtaka teh-in tong li ahi a, tui bath 40 ta chiat ahi. Tua tuikuangte a tunna khe sawm tunga kikoih chiat ahi. 39 Tempul simlam ah kangtalai nga a koih a, mallam ah nga a koih hi. Tuikuangpi pen tempul simlam, simsuahlam kiu ah a koih hi. 40 Tuikuangte leh suahdulte leh tuithehna belkuangte zong a bawl hi. Tuachi-in, Huram in kumpipa Solomon adinga Tangtawn Toupa' tempula vante a bawl khempeuh a zouta hi. 41 Khuampi nihte; khuampite tunga khuamlukhute, khuampite douna belkuang bang nih, a zepna khainiang phanthawh kop nih; 42 khuampite tunga belkuang bang khuamlukhute zepna khainiang kop nihte a vual niha kibulh mimthei 400-te; 43 a tunna khe sawmte leh a tuikuang sawmte; 44 tuikuangpi leh a nuaia bawngtal sawmlenihte; 45 belte, suahdulte leh tuithehna belkuangte ahi. Huram in Kumpipa Solomon' adingin Tangtawn Toupa' tempula a bawlte khempeuh sumsan nawttet ahi vek hi. 46 Kumpipa'n Jordan luiphai, Sukoth leh Zerethan kala siiksunna bellei kivelte sunga tua sumsante a sunsak ahi. 47 Hiai sumsan vanzatte a tamluat manin, Solomon in tehse louh bukse louhin a vekpi-in a koih hi. Sumsan gikdan kiteh se lou ahi. 48 Solomon in Tangtawn Toupa' tempul sunga vanzatte khempeuh zong a bawl hi: Khamsiika kibawl maitam; Ompihna tanghou koihna, khamsiika kibawl dawhkan; 49 munsiangthou sungnung maia taklama nga, veilama nga kikoih, khamsiik sianga kibawl meivak mungte, khamsiika kibawl paklim leh meivakte leh taitehte; 50 khamsiik sianga kibawl tuikuangte, meiek siaknate, tuithehna belkuangte, kuangdaite leh gimnamtui halnate leh inndan sungnung, tua Mun Siangthoupena kongkhakte kaihna khamsiik kuakte leh tempul inndanpi-a kongkhakte kalhnate zong ahi. 51 Kumpipa Solomon in Tangtawn Toupa' tempul adinga a nasep khempeuh a kizawhsiang takin, a pa David in a na latsa thilte a lalut hi. Tua thilte bel ngunsiik leh khamsiikte leh vanzatte ahi. Ama'n tuate Tangtawn Toupa' tempul gou koihkhawmna ah a koih hi.
Tempul ah Thukhun Singkuang Kipawlut
1 Tua khitin, Kumpipa Solomon in Israel upate, Israel innkawte laka behtuulpite leh makaite khempeuh kiang ah David Khawpi Zion apan Tangtawn Toupa' thukhun singkuang Jeru-salema ama' kianga hon pawtou dingin thu a pia hi. 2 Israel mite khempeuh, kha sagihna Ethanim kha-a ankuang lui hunin, Kumpipa Solomon' mai ah hong paikhawm uhi. 3 Israel upate khempeuh hong tun takun, siampite'n tua thukhun singkuang a pua uh a, 4 Tangtawn Toupa' thukhun singkuang leh Kihoupihna Puanbuk leh vanzat siangthoute khempeuh siampite leh Levite'n hon tuntou uhi. 5 Kumpipa Solomon leh a kianga hong paikhawm Israel kikhawmte, a vekpi-un Thukhun Singkuang mai ah a om uh a, belamte leh bawngte a laan tam lua uh a, simseng leh chiamteh seng ahi kei hi. 6 Tua khitin, siampite'n Tangtawn Toupa' thukhun singkuang, tempul mun siangthou sungnung Mun Siangthoupen ah hon pawlut uh a, cherubte kha nuai ah a koih uhi. 7 Tua cherubte'n thukhun singkuang omna mun tung ah kha a zak uh a, thukhun singkuang leh a zawnna zawlte a zakkhum uhi. 8 Tua a zawnna zawlte a sau a, a mongte, tua mun siangthou sungnung maia Mun Siangthou apan a kimu thei a, ahihhangin, Mun Siangthou pua apan bel a kimu thei kei hi. Tuni dongin tua ah a om uhi. 9 Tua thukhun singkuang sung ah, Mosi in Horeb muala tua suang a koih, tua suangpek nihte loungal bangmah a om kei hi. Tua Israelte Aigupta apan hong paikhiak nungun, Tangtawn Toupa'n Horeb ah, amaute tawh kal ah thukhun a na bawl hi. 10 Mun Siangthou apan siampite a kihepkhiak khit-un, meipi in Tangtawn Toupa' tempul a dimsak hi. Tangtawn Toupa' thupina in a dimsak manin, tua meipi hangin, siampite'n a nna uh a sem thei kei uhi. 12 Tua khitin, Solomon in: Tangtawn Toupa'n meipi vom ah ka teeng ding, chi a, 13 ke'n na teen nading, na teen denden nading tempul thupitak kon bawlsakta, a chi hi. 14 Tua muna Israel kikhawmte a vekpi ua a din sungun, kumpipa a kivialhei a, amaute a vualzawl hi. 15 Tua khitin ama'n: Ka pa David kianga a kam mahmaha a chiamsa, a khut mahmaha tangtungsakpa, Tangtawn Toupa, Israel Pathian phatin om hen. Ama'n: 16 Ka mi Israelte, Aigupta apan ka piikhiak ni apan a nungsiah, ka Min om nadingin Israel nam laka khawpi khat mah ka teel nai kei, ahihhangin, ka mi Israelte uk dingin David ka teelta, a chi hi. 17 Ka pa David in Tangtawn Toupa, Israel Pathian' Min adinga tempul lam ding lungtangin a vei hi. 18 Ahihhangin, Tangtawn Toupa'n ka pa David kiang ah: Ka Min adinga tempul lam ding lungtanga na vei manin na hihhoih hi. 19 Hinapi-in, tua tempul lam ding nang na hi kei a, na sa leh na sisan mahmah na tapa in a lam zaw ding. Ama'n ka Min adingin tempul a lam ding hi, a chi hi. Tangtawn Toupa'n a thuchiam a tangtun a: Ke'n ka pa David dinmun ka luah a, Tangtawn Toupa' thuchiam bangbangin Israel kumpitutphah tung ah tuin ka tuta a, Tangtawn Toupa Israel Pathian' Min ading tempul ka lamta hi. 21 Tangtawn Toupa'n i pu i pate Aigupta apan a piikhiak laia, amaute tawh kala thukhun a bawl kikoihna thukhun singkuang koih nading mun zong ka bawlsakta hi, a chi hi.
Solomon' Tempul Latna Thumna
22 Tua khitin, Israel kikhawmte' mai ah leh Tangtawn Toupa' maitam mai ah Solomon a ding a, vaanlama a khut zak in: 23 Tangtawn Toupa, Israel Pathian aw, tung vaan ah leh, nuai leitung ah nang bang Pathian a om kei hi. Lungtang khempeuh tawh na lampi zuite tawh kala thukhun leh zahngaihna kempa na hi. 24 Na sila, ka pa David kianga na thuchiam na kipsak hi. Na kamin thu na chiam a, na khutin, tuni-a bangin, na tangtun hi. 25 Tuin Tangtawn Toupa, Israel Pathian aw, na sila, ka pa David kiang a: Na tapate, nangma hih banga a thilhih peuhmah ua, ka maia a pai peuhmah uleh, ka maia Israel kumpitutphah tunga tu ding mi na tasam ngei kei ding uh, na chih laia, a kianga na thuchiam ama' adingin kipsak in. 26 Tuin, Israel Pathian aw, na sila, ka pa David kianga na thuchiam hong tangtungta hi. Ahihhangin, leitung ah Pathian a teeng taktak dia hia? Vaante, vaansangpente nangawn in nang hon dawl zou lou hi. Hiai ka tempul lam in hon dawl zou kei sem na'n chia! 28 Ahita zongin, na sila thumna leh ngetna lam en in. Tangtawn Toupa, ka Pathian aw, tuni-a na sila in na maia a kikouna leh thuumna ngaikhia in. 29 Hiai munlam nga-a na sila thuumna na zak theih nadingin, nang: Tua muna ka Min om ding hi, na chihna hiai mun, hiai tempul lam ah a sun a zanin na mit hak hen aw. 30 Hiai mun lam nga-a na mi Israelte a thuum chiangun, amaute ngetna leh na sila ngetna na za in. Na teenna mun vaan apanin na za inla, na zak chiangin na ngaidam in. 31 Mi khat peuh a innveng tunga a khelh chianga, kichiamna nei dinga phut ahih a, amah hong pai a, hiai tempul sunga na maitam maia a kichiam chiangin, 32 vaan apanin na za inla gamtang in. Na silate kal ah nang thu khen inla, a mawhmi mawhpaih inla, a thilhih ama' lutung tusak in. Mawhneilou mi bel mawhlou chi-in phuang inla, a mawhlouhna kipsak in. 33 Na mi Israelte na tunga a khelh man ua gal in amaute a zawh chiangin leh, nang lama hong kihei kiik a, na min siala a thuum ua, hiai tempula ngetna a neih chiangun, 4 nang vaan apanin na za inla, na sila, na mi Israelte' khelhna ngaidam inla, a pu a pate uh kianga na piak gam ah piikik nawn in. Na mite na tunga a khelh man ua, vaante na khakbing a, vuah a zuk louh chianga, amaute na thuaksak mana hiai mun lam nga-a thuuma na min a sial ua, a khelhna uh a lehngatsan chiangun, 36 nang vaan apanin na za inla, na sila na mi Israelte' khelhna ngaidam in. Hih dingdan lampi dik amaute sinsak inla, na mite' goutan dinga na piak gam ah vuah zusak in. 37 Kial a kiak hiam, gam sunga hipi a len hiam, vuaigawpna hi-in apna hita leh, khaupete hi-in khaukhupte hiam a leen a, ahih kei leh a khawpite uh khatpeuh gal in a sim leh, ahih kei leh, siatna hiam natna hiam khatpeuh a tun a, 38 na mi Israelte khatpeuh a thuum a, a tau chiangin, ahih kei leh mi chih in a lunggimna hanga hiai tempul lama khut a zak chiangin, nang na teenna mun vaan apanin na za in. Ngaidam inla, gamtang in. Mi chih a thilhihte khempeuh bangin sai in. Nang a lungtang thei hi vechin. Mi khempeuh lungtangte nang kia in thei hi vechin. 40 Tua bangin sai lechin, ka pu ka pate uh na piak gam sunga a nuntak sung teng uh nang hon lau ding uhi. 41 Na mi Israelte hilou, gamdang mi, gam gamlapi apan, na min hanga hong pai mi' thuumna zong za in. 2 Ahang bel, na minthanna leh na khut vangletna leh ban zakna, mite'n za ding hi ve un. Tua bang mi hong pai a, hiai tempul lam nga-a hong thuum chiangin, 43 nang na teenna mun vaan apanin na za inla, tua gamdang mi' hon nget peuhpeuh hihsak in. Tua hi leh, leitung mi khempeuh in nangma' mi Israelte banga na Min thei ding uh a, hon lau ding uh a, hiai ka innlam in na Min pu ahi, chih thei ding uhi. 44 Na mite'n na sawlna mun peuh a, a galte uh a dou chiangun leh, na teelsa hiai khawpi leh na Min adinga ka lam hiai tempul lam nga-a Tangtawn Toupa' kianga a thuum chiangun, nang vaan apanin, a thuumna uleh a tauna uh na za inla, amaute gum in. 46 A khiallou lah kuamah om lou a, amaute'n na tunga a khelh chiang ua, a tung ua na heh a, meima khutsunga amaute na piakkhiak a, ama' gama, gamlain nai taleh, amaute sala a kaih chiangin, 47 a saltanna gam ua lung hei a, amaute nuaisiahte' gam apan thuum a, hong tau uh a: Ka na khialta uh. Thil diklou ka na hihta uh. Giloutakin ka na gamtata uh, a chih uleh, tua chiangin, amaute, sala kaite gama lungtang leh hinna khempeuh tawh nang lama hong kihei ua, a pu a pate uh na piak gam lam, na teelsa khawpi lam leh na Min adinga ka lam tempul lam nga-a na kianga a thuum uleh, nang, na teenna mun vaan apanin a thuum a tauna uh na za inla, amaute gum in. Na tunga khial na mite ngaidam inla, na tunga a helnate khempeuh uh maisak inla, amau nuaisiahte amaute tung ah zahngaisak in. 51 Ahang bel, amaute na mite hi uh a, na goutan, Aigupta apan, siik haltuina meiphualpi apan na piikhiakte hi ve-un. 52 Na sila thuumna leh na mi Israelte' thuumna tung ah na mit hak henla, na kianga hong toukou chiangun na ngaikhia in, 53 Ahang bel, Toupa Tangtawn Pathian aw, Aigupta apan ka pu ka pate uh na piikhiak laia, na sila Mosi' tungtawna na phuankhiak bangbanga, leitung namte khempeuh lak apan amaute na goutan dinga na telkhiak hi ve-un, a chi hi. 54 Solomon in Tangtawn Toupa' maia hiai thuumnate leh ngetnate khempeuh a neih khitin, vaanlama a khut zaka Tangtawn Toupa' maitam maia a khukdinna apan a dingkhia hi. 55 A ding a, Israel kikhawmte khempeuh a vualzawl a, ngaihtakin: 56 A mi Israelte a chiamsa bangbanga khawltawldamna pepa, Tangtawn Toupa phatin om hen. A sila Mosi tungtawna thuchiam hoihtak a chiamte khempeuh thumal khat nangawn a vuaksuak kei hi. 57 Tangtawn Toupa i Pathian in i pu i pate a ompih bangin eite hon ompih hen aw. Eite hon taisanin hon nuse ngei kei hen. 58 Ama' lampite tawna pai ding leh i pu i pate kianga a piak thupiakte, thukhennate leh dankhunte zui dingin, ama'n i lungtangte ama' lam ah hon heisak hen. 59 Nisim taksap banga a sila leh a mi Israelte a gup nadingin, hiai ka thuumna thute'n sun leh zanin Tangtawn Toupa naih gige hen. 60 Tua hi leh, leitung mite khempeuh in Tangtawn Toupa mah Pathian ahi a, a dang a om het kei, chih a thei ding uhi. 61 Ahihhangin, tu hun banga, a dankhunte zuia nungta ding leh a thupiakte mang dingin, na lungtangte uh Tangtawn Toupa i Pathian kiang ah a kipumpiak ngeingei ding ahi, a chi hi.
Tempul Latna
62 Tua khitin, kumpipa leh Israelte khempeuh in Tangtawn Toupa' mai ah kithoihnate a laan uhi. 63 Solomon in Tangtawn Toupa' mai ah lemna thillatte a laan a, bawng 22,000 leh belam leh kei 120,000 a laan hi. Tua bangin, kumpipa leh Israelte khempeuh in Tangtawn Toupa' tempul a laan uhi. 64 Tua ni mahin, kumpipa'n Tangtawn Toupa' tempul mailama huangsung intual laizang a siansuah a, tua ah haltum thillatte, an gah thillatte leh lemna thillat thaute a laan hi. Ahang bel, tua haltum thillatte, an gah thillatte leh lemna thillat thaute tua Tangtawn Toupa' maia sumsan maitama ta zoulou uh hiven. 65 Tua bangin, Solomon in tua hunin, ankuangluina a bawl a, Israel khempeuh, kikhawmpi tampi mahmah, Lebo Hamath apan Aigupta gam Wadi dong apan mite, kumpipa kiang ah a om uhi. Amaute'n ni sagih nunga ni sagih dang, a veka ni sawmleli sung Tangtawn Toupa i Pathian' mai ah nopbawlna a nei uhi. 66 A ni sawmlenga ni zing chiang in, kumpipa'n mite a paisakta hi. Amaute'n kumpipa a vualzawl uh a, Tangtawn Toupa'n a sila David leh a mi Israelte adinga thilhoih a hihte khempeuh hanga lungnuam leh kipak mahmah in innlam a zuanta uhi.
Solomon kianga Tangtawn Toupa Kilaak
1 Solomon in Tangtawn Toupa' tempul leh kumpi innpi lam khinta a, hih a tup teng a hihkhit vek takin, 2 a nihvei nadingin, a kiang ah Tangtawn Toupa a kilaak a, Gibeona a kianga a kilaak bangbangin a kilaak hi. 3 Tangtawn Toupa'n a kiang ah: Ka maia thumna leh ngetna na bawlte ka zata. Hiai tempul na lamkhiak ah ka Min koihdenin, ka siansuahta. Ka mitte leh ka lungtang tua ah a om gige ding. 4 Nang na hih leh, na pa David banga lungtang muanhuai leh tang tawh ka maia na pai a, kon thupiak khempeuh hih a, ka dankhunte leh thukhennate na zuih peuhmah leh, 5 na pa David kianga: Israel kumpitutphaha tu ding mi na tasam ngei kei ding ka chih laia thu ka chiam bangin, Israel tunga na kumpitutphah ka kipsak den ding hi. Ahihhangin, nang na hita zong, na tapate ahita zong, non kiheisan ua, thu kon piakte leh dankhun kon piakte zui lou a, pathian dangte nasem ding leh amaute be dinga na lampial uleh, 7 Israelte, gam ka piaksa apan ka satkhe ding a, ka Min adinga ka siansuahsa hiai tempul ka nolh ding hi. Tua hun chiangin, namte khempeuh lak ah Israel paunak leh simmawh a suak ding hi. 8 Tuin hiai tempul thupi-in, mi deep mah leh, a kianga paite khempeuh in lamdang sa ding uh a, simmawhin: Banghanga Tangtawn Toupa'n hiai gam leh hiai tempul hibang lawh tazen ahia? chi ding uhi. Mite'n dawng ding uh a: Amaute'n, Aigupta apan amaute' pu leh pate piikhepa Tangtawn Toupa a Pathian uh kiheisan a, pathian dangte angpom a, bia a, a nna uh sem uh hiven. Hiai hang ahi Tangtawn Toupa'n amaute tunga hiai siatna a tut, chi ding uhi, a chi hi.
Solomon Gamtatna Dangte
10 Solomon in inn nih, tempul leh kumpi innpi a lam sung, kum 20 hong bei takin, 11 Kumpipa Solomon in a taksap sidar sing, taksing leh kham pepa, tua Tura kumpipa Hiram kiang ah, Galili gam sunga om khawpi 20 a pia hi. 12 Ahihhangin, tua Solomon' piak khawpite en dinga Hiram a va hawh takin, a lungtung kei hi. 13 Ama'n: Ka sanggampa aw, non piak hiai khawpite bangchi bang khawpi ahita mai ua le! chi-in a dong hi. Tuachi-in, hiai khawpite' min dingin Kabul Gam* chih a phuak a, tuni dongin hiai min a khu uhi. 14 Hiram in kumpipa kiang ah khamsiik talen 120 a na khakkhin hi. 15 Kumpipa Solomon in Tangtawn Toupa' tempul leh ama' innpi leh inntung zaangte, Jerusalem kulhbaangte leh Hazor, Megido leh Gezer khuate lam dinga phutluiha nasem mi a laakte tawh kisai thu hiai ahi. 16 Aigupta kumpipa Faro in Gezer a na sim a, a na la a, meiin a na haltumkhinta hi. A sunga teeng Kanante a that a, a tanu, tua Solomon' zi vankenin tua khua a na kengsak hi. 17 Solomon in Gezer a lam thak a, Beth Horon khangnung, 18 Baalath leh a gamsung gamdai-gamkeua Tadmor zong a lam hi. 19 Tuate baan ah, a ante, kangtalaite leh sakolte koihna khawpite Jerusalem, Lebanon leh a uk gamsung khempeuha a lam nop teng a lam hi. 20 Hiaite lam dingin, Amor mi, Hit mi, Periz mi, Hiv mi leh Jebus mi omlaite phutluihin nna a semsak hi. Amaute bel, Israel mi ahi kei uhi. 21 Hiaite' suante, Israelte'n a hihchimih zawhlouhte ahi uhi. Solomon in tuni dongin amaute saltang nasemtein a zang hi. 22 Ahihhangin, Israelte bel salin a nei kei a, galdou pawl, kumpi nasemte, uliante, sepaih makaite, kidouna kangtalaite leh kangtalai hawlpawlte makaitein a zang hi. 23 Solomon' nna gumtea mawhpua miliante ahi uh a, nasem taktakte enkaia pang milian 550-te ahi uh. 24 Faro' tanu, David Khawpi apan tua Solomon' lamsak innpi hong tuntouh khit nungin, Solomon in kulhbaang thuahte a lamsak hi. 25 Solomon in Tangtawn Toupa adinga a dawh maitam tung ah haltum kithoihnate leh lemna thillatte kum khatin thumvei a laan a, tuate tawh kitonin Tangtawn Toupa' mai ah gim namtuite a hal hi. Tua bangin tempul-a hih dinga a bawlte a tangtun hi. 26 Solomon in Ezion Geber ah longte zong a bawl hi. Ezion Geber bel Tuipi San geia Edom gama Elath kiang naia om ahi. 27 Hiram in, Solomon' mite tawh semkhawm dingin a mi, longpusiam, tuipi lam theite a sawl hi. 28 Amaute longa paiin Ofir ah a hawh uh a, khamsiik talen 420 hon pua uh a, kumpipa Solomon kiang ah a pia uhi.
Sheba Kumpinu'n Solomon Veh
1 Sheba Kumpinu in Solomon' minthanna leh Tangtawn Toupa tawh a kizopna thu a zak takin dotna haksapipitea amah ze-et dingin hong hawh hi. 2 Sangawngsau tampi, nektheih gimnamtuite, khamsiik tampi leh suangmanpha tampi pua-a kizuiin, Jerusalem hong tung a, Solomon kianga hong hawhin a houlimpih a, a lungsima om bangbang a genpih hi. 3 A dotna khempeuh Solomon in a dawng a, kumpipa' dawn theihlouh ding dotna, ama adinga haksa lua himhim a om kei hi, 4 Sheba kumpinu in Solomon pilna khempeuh leh a kumpi innpi lam, 5 a dawhkana an, uliante tutdan, a nasemte nangawnin kumpipuan a silh dan uh, a zu pete leh Tangtawn Toupa' tempula haltum thillatte a lat dan a muhtakin lamdang saknain a dim hi. 6 Amah kumpipa kiang ah hong pai a: Na sepkhiakte leh na pilna thu kigente ka gama ka na zakte a dik ahi. 7 Ahihhangin, hong pai a, ka mit mahmaha kong muh mateng ka na um kei hi. Ahi taktaka a kim a lang zong hon na hilh zoulou uh ahi ve! Pilna leh hauhna na neihte'n aki-gensawn ka zakte nakpitakin a kheng hi. 8 Na mite kipak namah un chia! Na uliante na maia ding gige-a na pilna zate nuamsa hi na uh e! Na tunga lungtunga, Israel kumpitutphah tunga hon tusakpa Tangtawn Toupa, na Pathian phatin om hen aw. Tangtawn Toupa'n Israel a Tangtawn itna hanga, dika vaihawmna leh a dik a tanga thukhenna lenkip dinga nang kumpipa-a hon na bawl ahi ve maw! a chi hi. 10 Tuachi-in, ama'n khamsiik talen 120, nektheih gimnamtuite tampi leh suangmanphate kumpipa a pia hi. Sheba kumpinu in kumpipa Solomon a piak zah ginnamtuite hong kipawlut ngei nai kei hi. 11 Hiram' longte'n Ofir apanin khamsiik hon pua uhi. Tua apan mah-in algum sing tampi leh suangmanphate hon pua uhi. 12 Kumpipa'n tua algum singtein Tangtawn Toupa' tempul leh kumpi innpi innkhuamte, lasa-pawlte ading kaihging leh pekgingte a bawl hi. Tua ni banga algum sing kipawlut tam a om ngei nai kei hi. 13 Kumpipa Solomon in a hauhna apan a piaksate ban ah, Sheba kumpinu' lunggulhte leh ngette khempeuh a piakbehlap hi. Tua khitin Sheba kumpinu leh a nungzuite teng in innlam a zuanta uhi.
Solomon' Thupina
14 Solomon in kumsima a muhkhiak khamsik talen 666 ahi. 15 Tuate lakah sumsinte leh sumbukneite leh Arab kumpipate leh gamsung ukpipate apan siahpiakte kisim lou lai hi. 16 Kumpipa Solomon in sekthawh khamsiikin lum lian 200 a bawl a, lum khat bawlnain khamsiik beka 600 zel a lut hi. 17 Sek thawh khamsiikin lum neu 300 a bawl a, lum neu khat bawlnain khamsiik mina thum zel a lut hi. Kumpipa'n tuate Lebanon Gammang Innpi kichi ah a koih hi. 18 Tua khitin, kumpipa'n saihain kumpitutphah thupi mahmah khat a bawl a, khamsiik siangin a tuam lai hi. 19 Tua kumpitutphah in siksan chial guk a nei a, anunglam dawn a beem hi. A pang tuak ah khutngakna tutna baante a om a, tuate pang ah humpinelkai dinglai lim a om hi. 20 Siksan chial gukte mong tuak ah humpinelkai sawmlenih, chial khat mong tuak ah khat zel, a kivual hi. Kumpigam dang ah a kibatpih a kibawl ngei nai kei hi. 21 Kumpipa Solomon' zunoutungte khempeuh khamsiika kibawl ahi a, tua Lebanon Gammang Innpi sunga tuium belsuante zong khamsiik sianga kibawl ahi. Solomon hun laia, ngunsiik manphaloua kingai ahih manin, ngunsiik in bangmah a kibawl kei hi. 22 Kumpipa'n tuipi-a sumsinna long pawlkhat, Hiram' longte tawh kipawl a nei hi. Kum thum sungin, khatvei hong tung uh a, khamsiik, ngunsiik leh saiha leh zawngliante leh zawngneute hon paw zel hi. 23 Kumpipa Solomon bel leitung kumpipa dangte khempeuh sangin, hauhna leh pilna in a thupi zaw hi. 24 Pathian in a lungsunga a koih tua pilna ngai dingin, leitung bup in Solomon houpih theihna a zong uhi. 25 A kumsimin, amah kianga hong hawh peuhmah in thawnpiak a pia a, tuate nguna kibawl, khama kibawl vante, kumpipuante, galvante leh nektheih gimnamtuite, sakolte leh sabiltungte ahi. 26 Solomon in kangtalaite leh sakolte a kholkhawm a, kangtalai 1,400 leh sakol 12,000 a nei a, tua kangtalai koihna khawpite ah leh Jerusalem ah amah kiang ah a koih hi. 27 Kumpipa'n Jerusalem ah ngunsiikte sing bang maia neih taangpi-in a nei a, sidar singte zong mual bultea theipi kungte bang maiin neih taangpi-in a bawl hi. 28 Solomon sakolte bel Aigupta gam leh Kue apan laklut ahi. Kumpipa Solomon' pawlte'n Kue apan hon lei uh ahi. 9 Amaute mahin Aigupta apan kangtalai khat ngunsiik shekel 600-a leiin, sakol khat shekel 150-a leiin hon pawlut uhi. Amaute'n Hit kumpipate leh Aram kumpipate khempeuh adingin zong a pawkhia uhi.
Solomon' Zite
1 Kumpipa Solomon in Faro' tanu baan ah gamdang numei tampi a it hi. Tuate Moabte, Amonte, Edomte, Sidonte leh Hitte khawng ahi uhi. 2 Tuate mah Tangtawn Toupa'n: Gamdang mite tawh na kitentuah het louh ding uh ahi, na kitentuah uleh, a pathiante uh lama na lungtangte uh hon ngasak ngeingei ding uh ahi, chi-a Israelte a hilh hiai namte ahi uhi. Hinapi-in Solomon in amaute itin a lenkip teitei hi. 3 Kumpi khangguia piang zipi 700 a nei a, mei 300 a nei a, tua a zite'n amah a lampialsak uhi. Solomon hong upat takin, a zite'n pathian dangte lam ah a lungtang a hei uh a, a pa David lungtang bangin, ama' lungtang, Tangtawn Toupa a Pathian ah a kipumpiak kei hi. 5 Sidonte' pathian Ashtoreth leh Amonte pathian kihhuai Molekh a zuita hi. 6 Tuachi-in, Solomon in Tangtawn Toupa' mitmuhin thilgilou a hih a, a pa David hih bangin Tangtawn Toupa a zui tinten kei hi. Jerusalem suahlama mual tung khat ah, Moabte' pathian kihhuai, Khemosh adingin leh Amonte' pathian kihhuai Molekh adingin munsang khat a lam hi. A gamdang zite khempeuh adingin tua bang mahin a hihsak a, amaute'n a pathiante uh mai ah gimnamtuite halin kithoihnate a laan uhi. 9 Solomon' lungtang in Tangtawn Toupa, Israel Pathian, amah kianga nihvei kilaakpa a lehngatsan manin, Tangtawn Toupa a tung ah hong heh hi. 10 Ama'n pathian dangte zui lou dingin Solomon khaamta mahleh, Solomon in Tangtawn Toupa' thupiak a zui kei hi. HTuachi-in, Tangtawn Toupa'n Solomon kiang ah: Na lungput hibang hita a, kon thupiak ka thukhun leh dankhunte zui lou na hih manin nang apanin kumpigam ka lakhe ngeingei ding a, na nuaia mite khat ka pe ding. Ahihhangin, na pa David vangin, nang damsungin bel ka hih kei ding. Na tapa' khut apan ka sutkhe ding. 13 Kumpigam bupin bel ka sutkhe kei ding a, ka sila David leh ka teelsa Jerusalem vangin, nam khat na tapa ka pe ding, a chi hi.
Solomon' Longte
14 Tua khitin, Tangtawn Toupa'n Solomon khing dingin Edom kumpi khangguia Edom mi Hadad a tungkhia hi. 15 Tua malama David in Edomte a dou laiin sepaihpawlpi makai Joab, misite vui dinga hawh in Edoma pasalte khempeuh a that hi. 16 Joab leh Israelte khempeuh, tua Edoma pasal khempeuh a thah khit mateng uh, tua ah kha guk sung a taam uhi. 17 Ahihhangin, Hadad, naupang chik hilai bel a pa' nuaia sem Edom uliante tawh Aigupta gam ah a taai hi. 18 Midian gam apan kipankhiain Paran gam ah a pai uh a, Paran apan mite tonpihin Aigupta kumpipa kiang ah Aigupta gam ah Aigupta kumpipa Faro kiang a tung uhi. Aigupta kumpipa'n inn khat leh gam leh nek ding an Hadad a na pia hi. 19 Faro in Hadad a paakta mahmah a, a zi Kumpinu Tapenes' sanggam tawh a kitengsak hi. 20 Tapenes' sanggamnu'n Hadad ading tapa khat a neihsak a, a min Genubath ahi. Tapenes in kumpi innpi ah amah a khoi piching a, tua bangin Genubath bel Faro' tate tawh a tengkhawm hi. 21 Aigupta gama Hadad a om sungin, David a pu a pate kiang ah a khawlta a, sepaihpawlpi makai Joab zong a sita chih thu a za hi. Tua khitin, Hadad in Faro kiang ah: Ka gama kiknawn dingin hon paisakta in, a chi hi. 22 Faro in: Hiai ah bang na tasama ahia, na gama na kiknawn nop? chi-in a dong hi. Hadad in a dawng a: Bangmah tasam lou ka hi, ahihhangin, hon paisak teitei in! a chi hi. 23 Pathian in Solomon khing dingin midang khat Eliada' tapa Rezon zong a tungkhia hi. Rezon bel, a pu Zoba kumpipa Hadadezer apan taimang ahi. 24 David in Zoba sepaihte a zawhgawp laiin Rezon in mi a khawm a, helpawl makaiin a pang hi. Tua helpawlte Damaska ah a pai uh a, tua ah a teeng uh a, a uk uhi. 5 Hadad in buaina a tut behlapin, Solomon damsung teng Rezon zong Israelte langa pangin a khing den hi. Tuachi-in Rezon in Aram ah vai a hawm a, Israel a galbawl nilouh hi.
Jeroboam, Solomon tunga Hel
26 Nebat' tapa Jeroboam zong kumpipa tung ah a hel hi. Amah bel Solomon' uliante laka khat ahi a, Zereda-a hong kipan Efraim mi ahi. A nu a hih leh Zerua kichi meigong khat ahi. 27 Solomon tunga Jeroboam' heldan hibang ahi: Solomon in kulhbaang tung thuahte a lamkhinta a, a pa David' Khawpi kulhbaang awngvang a hukhinta hi. 28 Jeroboam bel galhatpi khat ahi a, Solomon in ama' nna a sep hoih dan a muh-in, Josef innkawte laka nasempawl khempeuhte' makaiin a koih hi. 29 Tua hun laiin, Jeroboam in Jerusalem a pawtkhiaksan leh, Shilo-a kamsang Ahija, puanaktual thak silh in lampi ah a na tuak hi. Tua gamlakah amaugel kia a om laiun, Ahija in tua puanaktual a silh lai a botkek a, seh sawmlenih a suah hi. 31 Tua khitin, Jeroboam kiang ah: Nang adingin sehsawm la in. Tangtawn Toupa, Israel Pathian in: En in, Solomon khut apan kumpigam sutkhe ding ing a, nam sawm hon pe ding ka hi, 2 ahihhangin, ka sila David hang leh Israel namte khempeuh apan ka teelkhiaksa Jerusalem khawpi hanga, ama'n nam khat tang ding ahi. 33 Amaute'n kei hon taisan a, Sidonte' pathian Ashtoreth," Moabte pathian Khemosh leh Amonte pathian Molekh bia uh a, Solomon' pa David banga ka lampite tawn lou uh a, ka mitmuha thil dik zong hih lou uh a, ka dankhunte leh thukhennate zui lou uhi. 34 Ahihhangin, Solomon khut apan kumpigam a vekpi-in ka sutkhe kei ding. Ka teelpa leh ka thupiakte leh dankhunte zuipa ka sila David vangin, a damsung teng vaihawm dingin ka bawl hi. 35 A tapa khut apanin kumpigam ka sutkhe ding a, nam sawm nang kon pe ding. 3 Ka Min om nadinga ka teel tua khawpi Jerusalema ka maia ka sila David in meivak a neih gige theih nadingin, a tapa kiang ah nam khat ka pe ding. 37 Ahihhangin, nang na hih leh, kon sep ding a, na lungtang' lunggulh teng tung ah vai na hawm ding. Israel tung ah kumpipa na hi ding hi. 38 Ka sila David hih banga kon thupiak peuhmah na zuih a, ka lampite na tot a, ka dankhunte leh thupiakte na zuih leh, kon ompih ding hi. David adinga ka phuhkhiaksak kumpigam bang kumpigam kon lamkhiaksak ngeingei ding a, Israel kon pe ding. 3 Hiai hangin David' suante ka niamsak ding a, tua bang bel ahi denden kei ding, chi ahi, a chi hi. 40 Solomon in Jeroboam thah a sawm a, ahihhangin, Jeroboam Aigupta ah, kumpipa Shishak kiang ah a taai a, Solomon' sih mateng tua ah a taam hi.
Solomon' Sihna
41 Solomon' vaihawm sunga thil tung dangte, a thilhih khempeuh leh a pilna khempeuh, Solomon tungthu gelhna laibu sunga kigelh hilou hia? 42 Solomon in Jerusalem ah Israel' gam khempeuh tung ah kum 40 sung vai a hawm hi. 4 Tua khitin, a pu a pate kiang ah a khawlta a, a pa David Khawpi ah a kivui hi. A tapa Rehoboam in a kumpi hihna a luah hi.
Rehoboam tunga Helna
1 Israelte khempeuh Shekhem ah Rehoboam kumpipa-a bawl dinga a hawh manun Rehoboam zong Shekhem ah a hawh hi. 2 Nebat' tapa Jeroboam in hiai thu a zak laiin, Solomon apan a taaina Aigupta gama om lai ahi. Hiai thu a zak takin, Aigupta apan hong kik hi. 3 Tuachi-in, Jeroboam a sam uh a, amah leh Israel kikhawmte khempeuh Rehoboam kiang ah a hawh uh a, ama kiang ah: 4 Na pa'n koute tunga hakkol gikpi hon suan a, nang tu'n phutluiha nasepna leh koute hon sot hakkol gikpi zaangsak in, tuachi-in na nna ka sem ding uh a chi uhi. 5 Rehoboam in a dawng a: Ni thum sung paikhe phot unla, tua khit chiangin hong hawh nawn un, a chi hi. Tuachi-in, mipite a paikhia uhi. 6 Tua khitin, Kumpipa Rehoboam in a pa Solomon' damsunga a nuaia sem upate thu a kum hi. Ama'n: Hiai mite dawn dingdan bang thuhilhna non pe thei ua? a chi hi. 7 Amaute'n: Tuni-a hiaite' nasem na hih nop leh, dawnna hoih pe lechin, na silate ahi den ding uh, a chi uhi. 8 Ahihhangin, Rehoboam in upate thuhilhna a nawlh a, a khanvual, a nasem tuailaite thu a dong hi. 9 Amaute kiang ah: Non thuhilhna uh bang ahia? Ka pa'n ka tung ua hakkol gik hon sot hon hihzaangsak in, hon chi hiai mite bangchi dawn ding ka hia? chi-in a dong hi. A khanvual tuailaite'n a dawng uh a: Na pa'n ka tung ua hakkol gik hon suan ahi, hon hihzaangsak in, chi hiai mite kiang ah: Ka pa' kawng sanga kei' khutme lianzaw ahi. 1 Ka pa'n na tung uah hakkol gik hon suan a, ken ka giksak zaw sem ding. Ka pa'n noute zepna khauhual in hon zeep, ke'n aikamtein kon zeep ding, chi-in dawng in, a chi uhi. 12 Ni thum nungin, Jeroboam leh tua mite khempeuh, kumpipa'n: Nithum nungin hong hawh nawn un, chi-a a hilh bangin, hong hawh nawn uhi. 13 Kumpipa'n khauhtakin amaute a dawng a, upate thuhilhna nawlhin, 14 tangvalte' thuhilhna a zui zaw a: Ka pa'n na hakkol uh a giksak a, ken ka giksak zaw sem ding. Ka pa'n noute zeepna khauhualin hon zeep a, ke'n aikamtein kon zeep ding, a chi hi. 15 Tuachi-in, hi banga thil kihei lamdang Tangtawn Toupa akipan ahih manin, kumpipa'n mipite' thu a ngaikhe kei hi. Hiai bel, Shilo mi Ahija tungtawna Tangtawn Toupa'n Nebat' tapa Jeroboam kianga a thugen a tangtun nading ahi. Israelte khempeuh in, kumpipa'n amaute a ngaikhe kei, chih a muh takun, kumpipa a dawng uh a: Koute'n David-a tan bang nei ka hi ua? Jese' tapa-a tan bang nei ka hi ua? Israel aw, na puanbuk tek uah kik un! David aw, na innkuansung kikep in! a chi uhi. Tuachi-in, Israelte inn lam zuanin a paita uhi. 17 Ahihhangin, Judah gam sunga Israel teengte bel, a tung uah Rehoboam in vai a hawm lai hi. 18 Kumpipa Rehoboam in, phutluih nasemte' makai Adoniram a sawlkhia a, ahihhangin, Israelte khempeuh in amah suangin a denglum uhi. Ahihhangin kumpipa Rehoboam bel a kangtalai ah a tuang man hamham a, Jerusalem tungin a suakta hi. 19 Tuni dongin, Israel bel David' innkawte tung ah a hel lai uhi. 20 Israelte khempeuh in Jeroboam hong kiknawnta chih a zak takun, mi sawlin, kikhopna ah a samsak uh a, Israel gam khempeuh tung ah kumpipain a bawlta uhi. Judah nam kia, David innkawte adingin a muanhuai uhi. 21 Jerusalem hong tun takin, Rehoboam in Judah uliante leh Benjamin nam a samkhawm a, a vekpi-un galdou thei mi 180,000 a pha uhi. Hiaite bel Israel innkawte dou a, Solomon' tapa Rehoboam adinga kumpigam la nawn dinga a sapkhawm ahi. 22 Ahihhangin Pathian' mi Shemaia kiang ah Pathian' thu hong tung a: 23 Judah kumpipa Solomon' tapa Rehoboam kiang ah leh Judah innkawte khempeuh leh Benjamin innkawte khempeuh leh midangte khempeuh kiang ah: 24 Hiai Tangtawn Toupa' thugen ahi: Na sanggamte uh Israelte dou dingin kuantou kei un. Noute na inn chiat uah pai un. Hiai thil keima' hih ahih man ahi, chi ahi, chi in, a chi hi. Tuachi-in, Tangtawn Toupa' thu a mang uh a, Tangtawn Toupa'n thu a piak bangin inn lam ah a kik chiat uhi.
Bethel leh Dana Bawngnoulimte
25 Tua khitin, Jeroboam in Efraim tanggam ah Shekhem kulh muanhuaiin a bawl a, tua ah a teeng hi. Tua apanin a kuankhia a, Peniel a lamkhia hi. 26 Jeroboam a kingaihtuah a: Tu'n kumpipa David innkawte' khuta tua kumpigam kiknawn thei hi a, 27 hiai mite, kithoihnate laan dinga Jerusalema Tangtawn Toupa' tempula a paitouh uleh, a toupa uh Judah kumpipa Rehoboam lama hong lunghei nawn ding uhi. Kei hon that ding uh a, Judah kumpipa Rehoboam lama kik ding uhi, a chi hi. 28 Thuhilhna a zon nungin, kumpipa'n khamsiikin bawngnou lim nih a bawl hi. Mipite kiangah: Jerusalema na paitouh uh noute adinga haksa lua hi. Israel aw, Aigupta apana noute hon pikhetou na pathiante uh hiai ah om, a chi hi. 29 Tua bawngnou lim khat Bethel ah a koih a, adang khat pen Dan ah a koih hi. 30 Hiai thil bel khelhna hong hi ahi. Mipite lah hiai bawngnou lim khat be dingin Dan tantan a va pai uhi. 31 Jeroboam in munsangte ah biakna bukte a lam a, Levite hiloupi mi chiteng lak apanin siampite a bawl hi. 32 Judah gama kizang ankuanglui bangbang, a kha giatna, ani sawmlenga ni-a ankuangluina neih ding a bawlkhia a, tua ni-in maitam teng ah kithoihnate a laan hi. Hibangin, Bethela a tunkhiak bawngnou lim mai ah kithoihna a laan hi. Tua baan ah, Bethela munsang a bawlkhiakte ah siampite zong a sep a, a koih hi. 33 A kha giatna, a ni sawmlenga ni, ama' sehtawm tua khain Bethela maitam a dawh tung ah kithoihnate a laan hi. Tuachi-in, Israelte adingin ankuangluina a sep a, thillatte laan dingin maitam a naihtou hi.
Judah Gama Pathian' Mi Khat
1 Tangtawn Toupa' thuin, Judah gam apanin Pathian' mi khat Bethel ah hong hawh hi. Tua laitak mahin thillat khat laan dingin, maitam kiang ah Jeroboam a ding hi. 2 Tangtawn Toupa' thuin, maitam demin a kikoukhia a: Maitam aw, maitam! Tangtawn Toupa' thugen hiai ahi: David innkuan sung ah Josia kichi tapa khat a piang ding a, ama'n tu-a kithoihnate laan, tua munsangtea siampite mah na tung ah a laan ding a, na tung ah mihing' guhte a kihaltum ding, chi ahi, a chi hi. 3 Tua ni mahin tua Pathian' mi in chiamtehna a pia a, hiai ahi Tangtawn Toupa' phuankhiak chiamtehna: Hiai maitam a kitamkham ding a, a tunga meivute a kibungkhe ding, a chi hi. 4 Kumpipa Jeroboam in, tua Pathian' mi in Bethela maitam dema a kikoupih thu a zak takin, tua maitam apan a khut a zankhia a: Amah man un! a chi hi. Ahihhangin, tua Pathian mi' lama a khut zankhiak a teemgawp a, a dokkik theita kei hi. 5 Tua baan ah, tua Pathian' mi in Tangtawn Toupa' thu-a chiamtehna a piak bangin, tua maitam hong kitamkham a, a meivute a kibungkhia hi. 6 Tua khitin, kumpipa'n Pathian' mi kiang ah: Tangtawn Toupa na Pathian kiang ah hon thuumsak inla, ka khut dam nadingin hon ngetsak in, a chi hi. Tuachi-in, Pathian' mi in Tangtawn Toupa kiang ah a thuumsak a, kumpipa khut a dam a, a teem gawp ma-a bangbang hong hita hi. 7 Kumpipa'n tua Pathian' mi kiang ah: Inn ah kei hon zui inla, banghiam beek hong ne in, thawnpiak khat kon pe ding, a chi hi. 8 Ahihhangin, Pathian' mi in kumpipa a dawng a: Na neihsa khempeuh kimkhat hon pe ding hi lechin zong kon zui kei ding a, tua ah tanghou hi-in, tui hita leh, nein ka dawn kei ding. 9 Ahang bel, Tangtawn Toupa' thu-a thupiak ka hi. Ama'n: Tanghou na nek het louh ding, tui na dawn het louh ding, na kuanna lampi-a zong nong kik het louh ding, hon chi ahi, a chi hi. 10 Tuachi-in, ama'n lampi tuam dang a tawn a, Bethela hong hawhna lampi ah a kilehkik kei hi. 11 Bethel ah kamsang puteek kuahiam khat a om a, a tapa nihte hong pai uh a, tua ni-a Pathian' mi in tua laia a hih khempeuh a hilh uhi. Kumpipa kianga a gen teng zong a pa uh a hilh uhi. 12 A pa un: Amah koilam ah a paia? chi-in amaute a dong hi. A tapate'n Judah gam apan tua Pathian' mi in koi lampi zui hiam, chih a lak uhi. 13 Tuachi-in, tua kamsangpa'n a tapate kiang ah: Kei adingin sabiltung tung ah tuanphah hon phahsak un, a chi hi. Sabiltung tunga tuanphah a phahkhit takun, amah a tuang a, 4 Pathian' mi a nungdelh hi. Amah tawsaw sing nuaia tuin a va mu a, a kiang ah: Judah gam apan hong paipa Pathian' mi na hi hia? a chi hi. Ama'n: Ka hi, chi-in a dawng hi. 15 Tuachi-in, tua kamsangpa'n a kiang ah: Ka inn ah hon zui inla, an hong ne in, a chi hi. 1 Tua Pathian' mi in: Kiheiin nang kon zui thei kei. Hiai mun ah nang tanghou lah ka ne thei kei a, tui lah ka dawn thei kei. 17 Tangtawn Toupa' thu-a hilhin ka om a: Tanghou lah na nek het louh ding, tui lah na dawn het louh ding, chi-a hilha om ka hi, na kuanna lampi-a zong nong kik het louh ding, hon chi ahi, a chi hi. 18 Tua kamsang puteek in a dawng a: Kei zong nang banga kamsang khat ka hi. Tangtawn Toupa' thuin vansawltak khatin ka kiang ah: Ama'n tanghou a nek a, tui a dawn theih nadingin, amah na inn ah hon piikik in, hon chi ahi, a chi hi. Ahihhangin, amah kianga a zuaupi gen ahi. 1 Tuachi-in, Pathian' mi amah zuiin a kik a, a inn ah nein a dawnta hi. 20 Dawhkana an a nek lai un, amah hon piikikpa tua kamsang puteek kiang ah Tangtawn Toupa' thu hong tung hi. 21 Judah gam apan hong pai tua Pathian' mi lam ah a kikoukhia a: Tangtawn Toupa' thugen hiai ahi: Tangtawn Toupa' thu na khing a, Tangtawn Toupa, na Pathian thupiak na mang kei. 22 Hong kilehkikin, nek louh ding, dawnlouh ding a chihna mun ah tanghou na ne a, tui na dawn hi. Tua bang ahih manin, na luang, na pu na pate hana kivui lou ding ahi, chi ahi, a chi hi. 23 Tua Pathian' mi in ne-a a dawn khitin, amah hon piikik kamsangpa'n a sabiltung ah amah adingin tuanphah a phahsak hi. 24 Amah lampi-a a pai laiin, humpinelkai khat in lampi ah amah a na tuak a, a that a, lampi lai ah a luang a kipai a, tua sabiltung leh tua humpinelkai a kiang ah a ding uhi. 25 A kianga pai mite'n tua laia siluang kipai leh a kianga humpinelkai ding a mu uh a, tua kamsang puteek' teenna khawpi ah thu a va tun uhi. 26 A khualzinna apan amah piikiikpa tua kamsangpa'n tua thu a zak takin: Tangtawn Toupa' thu nialpa Pathian' mipa ahi ve. Tangtawn Toupa'n humpinelkai kianga amah pekhia a, Tangtawn Toupa' thu in a vauhilh bangbanga, humpinelkai in amah na ham a, keilum ahita ve, a chi hi. 27 Tua kamsangpa'n a tapate kiang ah: Kei adingin sabiltung tung ah tuanphah hon phahsak un, a chi a, a phahsak uhi. 28 Tua khitin, amah a kuankhia a, lamlaia siluang kipaikhia leh humpinelkai a kianga ding tawh a mu hi. Tua humpinelkai in siluang lah a ne kei a, sabiltung zong a ham kei hi. 29 Tuachi-in, tua kamsangpa'n Pathian' mi luang a phong a, sabiltung tung ah a nga a, a suun ding leh a vui dingin ama' khawpi ah a pua hi. 30 Tua khitin, ama' hankhuk ah tua luang a sial a, amah a suun uh a: Aw, ka sanggampa, a chi uhi. 31 Amah a vui khitin, a tapate kiang ah: Kei ka sih chiangin, Pathian' mipa kivuina hankhuk ah hon vui unla, ka guhte ama' guhte kiang ah hon koih un. 32 Ahang bel, tua Bethela maitam leh Samaria khawpitea munsang biakna bukte dema Tangtawn Toupa' thu a phuante tung taktak ding hiven, a chi hi. 33 Hiai nung nangawnin, Jeroboam in a tatdan giloute a khiam tuan kei a, mi tuamtuam apanin, munsangte ading siampite khatvei a sep lai hi. Siampi hih ut peuhmah, munsangte adingin a siansuah zel hi. 34 Jeroboam innkawte' pukgawpna leh leitung maikaih apan a manthatna, tua Jeroboam innkawte khelhna hiai ahi.
Jeroboam Doua Ahija' Genkholhna
1 Tua hun laiin, Jeroboam' tapa Abija hong china a, 2 Jeroboam in a zi kiang ah: Jeroboam zi na hih lam kithei lou dingin kibawl lamdangin va kuan inla, Shilo ah va hawh in. Tua ah kamsang Ahija na om ding ahi. Amah ahi, kei a mite tunga kumpipa hi ding, chi-a honhilhpa. 3 Tanghou beu sawm leh khuaizu thawl khat keng inla, amah kiang ah va hawh in. Ama'n naupangpa tunga bang tung ding hiam chih hon na hilh ding ahi, a chi hi. 4 Tua bangin Jeroboam' gen bangin a zi a va kuan a, Shilo-a Ahija inn ah a va hawh hi. Ahija bel khawmu thei lou, a upattak mana mitmial ahi. 5 Ahihhangin, Tangtawn Toupa'n Ahija a na hilhkhin a: Jeroboam' zi, a tapa china ahih mana a tungthu dong dinga hong hawh ding ahi. Hibanga na na dawn ding ahi: Amah hong tun chiangin, midanga kibawla hong hawh ding ahi, a chi hi. 6 Tuachi-in, a kongkhak bula Ahija in Jeroboam' zi' khesik ging a zaktakin: Jeroboam' zi aw, hong lut in. Banghanga hibanga kibawl lamdang se? Na kianga thu hoihlou tun dinga sawl ka hi. 7 Pai inla, Jeroboam kiang ah hiai Tangtawn Toupa, Israel' Pathian' thugen hilh in. Ama'n: Ka mi Israelte' makaia hon bawl dingin, mipite lak apanin nang kon tungkhia hi. 8 David innkawte apan kumpigam ka khenkhia a, nang kon pia hi. Ahihhangin, ka thupiakte zui a, na lungtang khempeuh tawh kei hon zui a, ka mitmuha dikte kia hihpa ka sila David hih bangin na hih kei. 9 Nang' ma-a hing leh dama omte khempeuh sangin na tatse zaw a, pathian dangte, siika kibawl milimte na kibawltawm a, non hehsak a, non nungngatsan hi. 10 Hiai hanga Jeroboam innkawte tunga siatna tun ding ka hi. Israel gama Jeroboam suan pasal piang nunung khempeuh, sal hi-in noplen hita leh satkhe ding ka hi. Mi'n ekkeu a haltum banga Jeroboam innkawte a bei siang masiah meia hal ding ka hi. nKhawpi sunga Jeroboam neihsa si peuhmah uite'n ne ding a, gama si peuhmah lah tungleng vasate'n ne ding hi! Toupa'n a na chita hi. 12 Nang na hih leh, kilehkiik in. Khawpi sung na sik tawh kitonin tua naupang a si ding. 13 Israelte khempeuh in amah a suun ding uh a, a vui ding uh. Jeroboam suan laka a kivui sunsun amah ahi ding. Ahang bel, Tangtawn Toupa, Israel Pathian in Jeroboam innkawte laka thil hoih a muhna om sunsun amah hiven. 14 Tangtawn Toupa'n ama' ading, Israel tunga kumpipa hi ding, Jeroboam' innkuan satkhe dinga mi khat tungkhe ding ahi. Tua ni ding tuni ahi ve! Hitak tak ding maw? Hi e, tumah mah ahi. 15 Tangtawn Toupa'n Israel a saat ding a, tuilaka pumpeng kilaama kivei bang ahi ding. A pu a pate uh kianga a piaksa hiai gam hoih apan Israel a bulkalh ding a, tua Luipi gal pek ah a thehthang ding. Ashera song phuta Tangtawn Toupa a sukthangpaih man uh ahi. 16 Jeroboam in khelhnate hih a, Israel a khelhsak mana Ama'n Israel lehngatsan ding ahi, a chi hi, 17 Tua khitin, Jeroboam' zi a dingkhia a, a paikhia a, Tirza a tung hi. Tua-a innliim a sik phetin, tua naupangpa a si hi. 18 Tangtawn Toupa'n a sila tua a kamsangpa Ahija' tungtawna a gensa bangin, tua naupangpa a vui uh a, Israelte khempeuh in a suun uhi. 19 Jeroboam' vaihawm sunga thiltung dangte, a galdounate leh a vaihawm dante, Israel kumpite' tangthubu ah a kigelh hi. 20 Jeroboam in kum 22 sung vai a hawm a, tua khitin, a pu a pate kiang ah a khawlta hi. A tapa Nadab in a kumpi hihna a luah hi.
Judah Kumpipa Rehoboam
21 Solomon' tapa Rehoboam, Judah kumpipa ahi. Kumpipa a hong hihin amah kum 41 ahi a, Tangtawn Toupa'n a Min om nadinga Israel namte lak apan a teel, tua Tangtawn Toupa' Khawpi Jerusalem ah kum sawmlesagih sung vai a hawm hi. A nu' min Naama ahi a, Amon mi ahi. 22 Judah gam mite'n Tangtawn Toupa' mitmuhin thil gilou a hih uhi. A pu a pate uh hih sangin, tua khelhnate tungtawnin ama' thikthusiatna hehna lianzaw a tokthou uhi. 23 Amaute adingin munsangte a kibawl uh a, mual chih leh singnuai teng ah, suang siangthoute, Ashera songte a phut uhi. 24 Gamsunga biakna bukte ah pasal kizuakte a om uh a, Tangtawn Toupa'n Israelte' maia a hawlkhiak namte' thilchiin kihhuaite khempeuh a hih uhi. 25 Kumpipa Rehoboam' vaihawm kum, a kum ngana ah, Aigupta kumpipa Shikshak in Jerusalem hong sim a, 26 Tangtawn Toupa' tempula goute leh kumpi innpi-a goute a pawmang hi. Bang teng, Solomon' bawl khama kibawl lumte khempeuh zong a pawmang hi. 27 Tuachi-in, Kumpipa Rehoboam in tua kham lumte kheek nadingin sumsan lumte a bawl a, kumpi innpi kong veng sepaih makaite a zangsak hi. 8 Kumpipa, Tangtawn Toupa' tempula a hawh tengin, tua veng sepaihte'n tua lumte a zang uh a, tua khit chiangin veng sepaihte omna inndan ah a koihkiik zel uhi. 29 Rehoboam' vaihawm sunga thiltung dangte ahih leh, Judah kumpite tangthu kigelhna laibu sunga kigelh hilou hiam? 30 Rehoboam leh Jeroboam kal ah kidouna a om zihzeh hi. 31 Rehoboam zong a pu a pate kiang ah a khawlta a, David' Khawpi ah a pu a pate kiang ah a kivui hi. A nu min Naama ahi a, Amon mi ahi. A tapa Abija in a mun a luah a, kumpipain hong pang hi.
Judah Kumpipa Abija
1 Nebat' tapa Jeroboam' vaihawm kum, a kum sawmlegiatna ah, Judah kumpipain Abija hong pang a, Jerusalem ah kum thum sung vai a hawm hi. A nu' min Maaka ahi a, Maaka bel Abishalom' tanu ahi. 3 Abija in, ama' ma-a a pa' hih khelhna teng mah a hih a, a pu David lungtang bangin, ama' lungtang bel Tangtawn Toupa, a Pathian ah a kipumpiak kei hi. 4 Ahihhangin, David' vangin, Tangtawn Toupa, a Pathian in ama' mun luah ding tapa khat tungkhiain leh Jerusalem hatsakin, amah kiang ah Jerusalem ading meivak a pia hi. 5 Ahang bel, David in tua Hit mi Uria tawh kisai chih louh, a damsung teng Tangtawn Toupa' mitmuha thildik hih a, Tangtawn Toupa' thupiakte zui lou ngeilou ahi. 6 Abija' damsung teng Rehoboam leh Jeroboam kal ah kidouna a om hi. 7 Abija' vaihawm sunga thiltung dangte leh a thilhihte khempeuh Judah kumpite' tungthu kigelhna laibu sunga kigelh hilou hiam? Abija leh Jeroboam kal ah zong kidouna a om hi. 8 Abija bel a pu a pate kiang ah a khawlta a, David' Khawpi ah a kivui hi. Tuachi-in, a tapa Asa, ama' mun luahin kumpipain hong pang hi.
Judah Kumpipa Asa
9 Israel kumpipa Jeroboam' vaihawm kum a kum 20-na ah, Asa, Judah kumpipain hong pang a, 10 Jerusalem ah kum 41 sung vai a hawm hi. A pi' min Maaka ahi a, Maaka bel Abishalom' tanu ahi. 11 Asa in a pu David bangin, Tangtawn Toupa' mitmuhin thildik a hih hi. 12 Gam sung apanin biakna buka pasal kizuakte a hawlmang a, a pa' bawlsa milimte khempeuh a paimang hi. 13 A pi Maaka nangawn kumpinu' nu chih dinmun apan a kaikhia hi, ahang bel, ama'n Ashera song kihhuai na phut hive'n. Asa in tua song a phuuk a, Kidron Phaizang ah meiin a haltum hi. 14 Munsangte beisak kei mahleh, Asa' lungtang bel, a damsung teng, Tangtawn Toupa' ah a kipumpiak hi. 15 Ama'n Tangtawn Toupa' tempul ah, amah leh a pa' latsa ngun leh kham leh thildangte a pawlut hi. 16 Asa leh Israel kumpipa Baasha kal ah a vaihawm sung teng uh kidouna a om hi. 17 Israel kumpipa Baasha bel Judah sim ding leh Judah kumpipa Asa' gam sung apan pawtkhe ding leh lut ding kuapeuh dai na ding Rama kulh bawl dingin a kuantou hi. 18 Tua khitin, Asa in Tangtawn Toupa' tempul gou koihna leh ama' innpi sunga a koih ngun leh kham khempeuh a la a, a uliante khuta nga-in, Damaska-a vaihawmpa Aram kumpipa Ben Hadad kiang ah a khak hi. Ben Hadad bel Tabrimon' tapa ahi a, Tabrimon bel Hezion' tapa ahi. 19 Asa in Ben Hadad kiang ah: Na pa leh ka pa kala kilemna thukhun a om bangin, nang leh kei kal ah lemna thukhun om hen. En in, thawnpiak ngun leh kham kon khak hi. Israel kumpipa Baasha, kei apan a kihepkhiak nadingin, amah tawh kala na lemna thukhun tatsak in, a chi hi. 20 Ben Hadad in Kumpipa Asa a kilempih a, Israel khawpite sim dingin a sepaihhon makaite a sawl hi. Ama'n Naftali baan ah, Ijon, Dan, Abel Beth Maaka leh Kinereth khempeuh a zou hi. 21 Baasha in hiai thu a zak takin, Rama a lam lai a tawpsan a, Tirza ah a kiik hi. 22 Tua khitin, Kumpipa Asa in Judah mi khempeuh kiang ah thupiak a bawl a, kuamah a awlsak kei a, amaute'n Rama apanin, Baasha in tua-a a zat suangte leh suangtumte a pawsiang vek uhi. Kumpipa Asa in tuatein Benjamin gama Geba, tua ban ah Mizpa zong a lam hi. 23 Asa' vaihawm sunga thiltung dangte, a sepkhiak khempeuh, a thilhih khempeuh leh a khawpi lamte ahih leh, Judah kumpite' tangthu kigelhna laibu sunga kigelh hilou hia? Ahihhangin, amah hong teekta a, a khete hong dam kei hi. 24 Tua khitin, Asa bel a pu a pate kiang ah a khawlta a, a pu David Khawpi ah amaute kiang ah a kivui hi. A tapa Jehoshafat in a mun luahin kumpipain hong pang hi.
Israel Kumpipa Nadab
25 Judah kumpipa Asa' vaihawm kum, a kum nihna ah, Jeroboam' tapa Nadab, Israel kumpipain hong pang a, Israel tung ah kum nih vai a hawm hi. 26 Ama'n a pa' lampite tawnin leh a khelhna zuiin, Israelte zong tua bang khialsakin, Tangtawn Toupa' mitmuhin thil gilou a hih hi. 27 Isakhar' innkuan sung mi Abija' tapa Baasha in amah douin thil a simsawm a, Nadab leh Israelte khempeuh in Filistia khawpi khat Gibethon a dou laiun, tua mun ah Nadab a that hi. 28 Tua bel Judah kumpipa Asa' vaihawm kum, a kum thumna ah ahi. Baasha in Nadab a thah khitin, a mun luahin kumpipain hong pang hi. 29 Baasha in vaihawm a pat phetin, Jeroboam innkawte a that vek hi. Tangtawn Toupa'n a sila Ahija tungtawna a gen bangbangin, Baasha in a nakthei peuhmah kuamah Jeroboam adinga nutsiat neilouin a hihmangthang vek hi. 30 Hiai bel, Jeroboam in khelhnate hih a, Israel zong khialsak a, Tangtawn Toupa, Israel Pathian a hehsak man ahi. 31 Nadab' vaihawm sunga thiltung dangte leh a thilhih khempeuh ahih leh Israel kumpite' tungthu kigelhna laibu sunga kigelh hi lou hia? 32 Asa leh Israel kumpipa Baasha' vaihawm sung teng a kal uah kidouna a om hi.
Israel Kumpipa Baasha
33 Judah kumpipa Asa' vaihawm kum, a kum thumna ah, Ahija' tapa Baasha, Tirza ah Israel khempeuh tung ah kumpipain hong pang a, kum 24 sung vai a hawm hi. 34 Ama'n Jeroboam lampite tawnin leh a khelhnate hih a, Israel khialsakin, Tangtawn Toupa' mitmuhin thil gilou a hih hi.
1 Tua khitin, Hanani' tapa Jehu kiang ah Baasha douna Tangtawn Toupa' thu hong tung a: 2 Leivui apan nang kon domkang a, ka mi Israelte' makaiin kon bawl a, ahihhangin, Jeroboam' lampite na tawn a, ka mi Israelte na khialsak a, a khelhnateun kei non hehsak hi. 3 Tua bang ahih manin, Baasha leh a innkawte kangtum dek a, na innkuan sung zong Nebat' tapa Jeroboam' innkuan sung bangsak dek ka hi. 4 Baasha' neih, khawpi sunga site, uite'n ne ding a, gamsunga site lah tungleng vasate'n ne ding hi, a chi hi. 5 Baasha' vaihawm sunga thiltung dangte, a thilhih leh a sepkhiakte ahih leh, Israel kumpite' tungthu gelhna laibu sunga kigelh hi lou hia? 6 Baasha bel a pu a pate kiang ah a khawlta a, Tirza ah a kivui hi. Tuachi-in, a tapa Ela in a mun a luah a, kumpipa-in hong pang hi. 7 Tua baan ah, Baasha in Tangtawn Toupa' mitmuha thil gilou a hihte khempeuh hang bang, a thilhihte tungtawna amah a hehsak hang bang, Jeroboam innkawte hong batna hang bang, leh tua innkawte a hihmanthatna hang bangin, amah leh a innkawte kiang ah, Henani' tungtawnin Tangtawn Toupa' thu hong tung hi.
Israel Kumpipa Ela
8 Judah kumpipa Asa vaihawm kum, a kum 26-na ah, Baasha' tapa Ela, Israel kumpipain hong pang a, Tirza ah kum nih sung vai a hawm hi. 9 A galdouna kangtalai kimkhat tunga makai, a uliante khat Zimri in amah thah ding a simsawm hi. Tua laiin, Ela bel Tirza ah a om a, Tirza-a kumpi innpi ukpa Arza' inn ah zukhamin a om hi. 10 Zimri hong lut a, a tunga khut khain a that hi. Tua bel Judah kumpipa Asa' vaihawm kum, a kum 27-na ahi. Tuachi-in, Zimri in Ela' mun luahin kumpipain hong pang hi. 11 Vaihawm a pat a, kumpitutphah tunga a tut phetin, Baasha tanau nai hi-in a lawm hita leh pasal himhim a hinghawi kei hi. Tua chi-a Zimri in Baasha innkuante a thah chimihna bel Tangtawn Toupa'n Baasha dema kamsang Jehu tungtawna a thugen bangbang ahi. 13 Ahang bel, Baasha leh a tapa Ela' khelhnate khempeuh leh, Israel a khelhsakna uh hang leh, mannabei a milimte uh hanga Tangtawn Toupa, Israel Pathian a hehsakna uh hang ahi. 14 Ela' vaihawm sunga thiltung dangte leh a thilhih khempeuh ahih leh, Israel kumpite' tungthu kigelhna laibu sunga kigelh hi lou hia?
Israel Kumpipa Zimri
15 Judah kumpipa Asa' vaihawm kum, a kum 27-na ah, Zimri in Tirza ah ni sagih sung vai a hawm hi. Tua laiin, Filistia khawpi khat Gibethon ah sepaih pawlpi in giahphual a sat uhi. 6 Zimri in kumpipa thah simsawm a, a thah thu, tua giahphuala om Israelte'n a zak takun, tua ni mahmahin tua giahphual ah, sepaihhon makai ding Omri, Israel kumpipa dingin a phuang uhi. 17 Tua khitin, Omri leh a kianga om Israelte khempeuh Gibethon apan a nungkiik uh a, Tirza a sim uhi. 18 Zimri in tua khawpi a pukta, chih a muh takin, kumpi innpi-a kulh ah a tailut a, a kiim a kiang apan tua kumpi innpi meiin a hal a, tuachi-in a sita hi. 19 Ahang bel, Tangtawn Toupa' mitmuha thil gilou hih a, Jeroboam lampite zui a, khelhna hih a, Israelte zong khialsaka, khelhna a hihte khempeuh hang ahi. 20 Zimri' vaihawm sunga thiltung dangte leh a helna thute ahih leh, Israel kumpite' tungthu gelhna laibu sunga kigelh hi lou hia?
Israel Kumpipa Omri
21 Tua khitin, Israel mite pawl nih a kisuah uh a, a kimkhatte'n kumpipa dingin Ginath' tapa Tibni a deih uh a, a kimkhat dangte'n Omri a deih uhi. Ahihhangin, Ginath' tapa Tibni deihte sangin Omri deihte a hat zaw uhi. Tuachi-in, Tibni a si a, Omri, kumpipain hong pang hi. 2 Judah kumpipa Asa' vaihawm kum, a kum 31-na ah Omri, Israel kumpipain hong pang a, kum sawmlenih sung vai a hawm a, tua laka kum guk sung Tirza ah vai a hawm hi. 24 Ama'n Shemer apan Samaria mual ngunsiik talen nihin a lei a, tua mual ah khawpi khat a lam a, a min dingin tua mual nei masa Shemer' min tamin Samaria a sa hi. 25 Ahihhangin, Omri in Tangtawn Toupa' mitmuhin thil gilou a hih a, ama' ma-ate khempeuh sangin a khial zaw hi. 2 Nebat' tapa Jeroboam lampite leh a khelhna a zui a, tua mahin Israelte a khialsak a, tuachi-in, mannabei milimtein Tangtawn Toupa Israel Pathian a hehsak hi. 270 mri' vaihawm sunga thiltung dangte, a thilhih leh a nasep mualsuahte, Israel kumpite' tungthu gelhna laibu sunga kigelh hi lou hia? Omri zong a pu a pate kiang ah a khawl a, Samaria ah a kivui hi. Tua khitin, a tapa Ahab in a mun luahin kumpipain hong pang hi.
Israel Kumpipa Ahab
29 Judah kumpipa Asa' vaihawm kum, a kum 38-na ah, Omri' tapa Ahab, Israel kumpipain hong pang a, Samaria ah, Israel tung ah kum 22 sung vai a hawm hi. 30 Omri' tapa Ahab in Tangtawn Toupa' mitmuhin ama ma-a mite khempeuh sangin a khial zaw hi. 31 Nebat' tapa Jeroboam khelhnate hih nangawn thil neuchikin a ngai a, Sidonte' kumpipa Ethbaal' tanu Jezebel zong a kitenpih a, Baal' nasep panin a bia hi. 2 Samaria ah Baal tempul a lam a, tua ah Baal adingin maitam khat a dawh hi. 33 Ahab in Ashera song 500 phut a, ama' ma-a Israel kumpite khempeuh sanga Tangtawn Toupa, Israel Pathian hehsak dingin thil gilou a hih tam zaw hi. 34 Ahab' damsungin, Bethel mi Hiel in Jerikho a lam thak hi. A tapa upapen Abiram taanlawh hialin a suangphumte a phum a, ama' tapa tumpen Segub taanlawh hialin a kongpite a tungkhia hi. Tua bel, Nun' tapa Joshua in Tangtawn Toupa' thu a gen bangbanga tung ahi.
Va-akte'n Elija Vaak
1 Hibang hong hi a, Gilead gama Tishbe apan Tishbe mi Elija in Ahab kiang ah thu a gen a: A nna ka seppa Tangtawn Toupa, Israel Pathian hinna sialin ka gen ahi: Keima' thu ahih kei ngai leh, tuban kum tamlou sung daitui lah a ke kei ding a, vuahtui lah a ke kei ding, a chi hi. 2 Tua khitin, Tangtawn Toupa' thu Elija kiang ah hong tung a: 3 Hiai mun nusia inla, suahlam ah pai inla, Jordan lui suahlama Kereth Guam ah kibu in. 4 Tua luitate apan tui na dawn ding a, an-a hon vaak dingin va-akte thu ka pe ding, a chi hi. 5 Ama'n Tangtawn Toupa' hilh bangin a hih hi. Jordan lui suahlama tua Kereth Guam ah a hawh a, tua ah a taam hi. Va-akte'n zingsangin tanghou leh sa hon puak uh a, nitak lamin zong tanghou leh sa hon puak uh a, tua luitate apanin tui a dawn hi.
Zarefath-a Meigongnu
7 Tua gama vuah zu lou ahih manin, tua nung sawt louin tua luita hong kangta hi. 8 Tua bang ahih takin, Tangtawn Toupa' thu Elija kiang ah hong tung a: 9 Sidon gama Zarefath ah hawh pah inla, tua ah taam in, an-a nang hon vaak dingin, tua muna meigong khat thu pekhin ka hi, a chi hi. 10 Tuachi-in, Zarefath ah a hawhta hi. Tua khawpi kongpi hong tun takin, singtoma om meigong khat a na om hi. Amah a gaalsap a: Ka dawn ding tui tawmkha, tuithawlin non tawi thei diam? a chi hi. nTui la dinga a kuan takin: Hehpihtakin tanghou them khat zong hon tawi in aw, a gaalchih hi. 12 Tua meigongnu'n: Tangtawn Toupa, na Pathian' hinna sialin ka gen ahi. Tanghou himhim neilou ka hi. Bel sung ah anvui nei khutdim khat leh thawl sunga sathau tawmkha ka nei. Kei leh ka tapa adinga tua anvui nei bawl nading sing toma om ka hi a, tua ka ne ding ua, ka sita mai ding uh, a chi hi. 13 Elija in a kiang ah: Lau ken. Inn ah va pai inla, na chih bangin va hih in. Ahihhangin, kei adingin tanghou beu neuchik bawl masa inla, hon tawi in. Tua khit chiangin nang leh na tapa ading bawl in. 14 Ahang bel, Tangtawn Toupa, Israel Pathian' gen hiai ahi: Tangtawn Toupa'n vuahtui leitunga hon piak ni a tun mateng tua bela anvui nei a bei kei ding a, tua thawla sathau zong a kang kei ding, a chi hi. 15 Tua meithainu a pai a, Elija chih bangin a va hihta hi. Tua chi-in, Elija leh meigongnu leh a innkawte adingin nisim an a om hi. 16 Ahang bel, Tangtawn Toupa' thu Elija' gen bangbanga, bela anvui nei bei lou a, thawla sathau zong kang lou hiven. 17 Hun bangtan hiam nungin, tua inn neinu' tapa hong china hi. Hong gim semsem a, a tawpin hong naakbei mawk hi. 18 Tua numei in Elija kiang ah: Pathian' mi aw, ka tunga lungkimlouhna bang nei na hia? a chi hi. 19 Elija in a dawng a: Na tapa hon pia in, a chi hi. Numeinu' ang apan amah a la a, ama' kingakna inndan tungnung ah a domtou a, a lupna tung ah a sial hi. 20 Tua khitin, Tangtawn Toupa kiang ah a toukou a: Tangtawn Toupa, ka Pathian aw, ka kingakna nu, hiai meithainu' tapa sisak a, ama' tung nangawna lungkham mangbatna hon tun na hi maw? a chi hi. 21 Tua khitin, tua luang tung ah thumvei kiphalhin, Tangtawn Toupa a sam a: Tangtawn Toupa, ka Pathian aw, hiai naupangpa hinna pekik in! a chi hi. 22 Tangtawn Toupa'n Elija toukouna a za a, naupangpa hinna hong kiik a, a hingta hi. Elija in tua naupang a dom a, tua inndan apan, inn sung ah a paipih suk a, a nu kianga piain: En in, na tapa hing hi! a chi hi. 24 Tua khitin, tua numeinu'n Elija kiang ah: Pathian' mi na hi, chih tu'n ka theita a, na kama Tangtawn Toupa' thu zong thutak ahi, chih ka theita, a chi hi.
Elija leh Obadia
1 Hun sawtpi nungin, Tangtawn Toupa' thu Elija kiang ah hong tung a: Pai inla, Ahab kiang ah va kilak in, ke'n gamsunga vuah hon sawl ding ka hi, a chi hi. 2 Tuachi-in, Elija, Ahab kianga kilak dingin a kuan hi. Tua hunin, Samaria gama kial nase mahmah ahih manin,3 Ahab in a innpi ukpa Obadia a samsak hi. Obadia bel Tangtawn Toupa uma kipezoutak khat ahi. 4 Jezebel in Tangtawn Toupa' kamsangte a baan thah laiin, Obadia in kamsang 100 a tonpih a, kawlbuk nih ah a sel hi. Khat ah 50, a dang khat ah 50 a sel a, an leh tuiin a vaak hi. 5 Ahab in Obadia kiang ah: Gam sung teng tawnsuak inla, tuinakte leh luiphaite va pha vek in. I gantate thah kul lou a, sakolte leh sabiltungte i hawi theih nadingin loupa i mukha mawh ding hia, a na chita hi. 6 Tuachi-in, a phak nading chiang uh a hawm uh a, langkhat lam ah Ahab a pai a, a lehlam ah Obadia a pai hi. 7 Obadia a paipai laiin, Elija in a na tuak hi. Obadia in amah a meltheih a, lei si-in a kuun a: Nang ka toupa Elija na hi taktak maw? a chi hi. 8 Elija in a dawng a: Hi mah ing e! Pai inla, na pu kiang ah: Elija hiai ah a om, va chi in, a chi hi. 9 Obadia in: Bang khelhna nei ka hia, na sila thah dinga Ahab kianga non piakkhiak dek? 10 Tangtawn Toupa, na Pathian' hinna sialin ka gen ahi. Ka pu'n nang zong dinga mi a sawl louhna nam hi-in kumpigam hita leh khat beek om lou ahi. Nam khatpeuh hi-in, kumpigam khatpeuh hita leh, tua ah nang na om kei, a chih chiang ua, hon muh louh thu uah kichiamsak zel ahi. 11 Tuin lah nang ka pu kianga hawh a: Elija hiai ah a om, va chi dingin non sawl a. 12 Nang kon nutsiat kala Tangtawn Toupa' Kha in nang koisan hon tun ding hiam, chih lah thei lou ing a, va paiin, Ahab va hilh leng la, nang hon mu kei leh, kei hon that ding ahi. Hinapi-a kei na sila bel, ka tuailai apan Tangtawn Toupa bemi ka hi. 13 Jezebel in Tangtawn Toupa' kamsangte a ban thah laia ka thilhih zata lou maw? Tangtawn Toupa' kamsang 100 kawlbuk niha sel ing a, khata 50, a dang khata 50 mah sel ing a, an leh tuia vaak ka hi. 14 Tuin nang ka pu kianga hawh a: Elija hiai ah a om, chi-a va hilh dingin non sawl a, kei hon that mahmah ding ahi! a chi hi. Elija in: A nna ka sep Tangtawn Toupa Vanglianpen' hinna sialin ka gen ahi. Tuni-a Ahab kianga kilak ngeingei ding ka hi, a chi hi.
Karmel Muala Elija
16 Tuachi-in, Ahab tuak dingin Obadia a va pai a, a va hilh a, Elija tuak dingin Ahab a hong pai hi. 17 Ahab in Elija a muh takin a kiang ah: Nang na hi maw, nang Israel buaisakpa? Ahab in a chi hi. 18 Elija in a dawng a: Ke'n Israel adingin buaina ka bawl kei. Nang leh na pa' innkawte na hi zaw uh Israel buaisak. Tangtawn Toupa' thupiakte na tawpsan uh a, Baalte na zuih man uh ahi. 19 Karmel Muala kei hon tuak dingin, Israel gamsung tenga mite hilhsuak vek in. Jezebel' dawhkana an ne, tua Baal' kamgsang 450-te leh Ashera' kamsang 400-te zong hon tonpih in, a chi hi. 20 Tuachi-in, Ahab in Israel gam sung teng ah thu a khak a, Karmel Mual ah tua kamsangte a kaikhawm hi. 21 Elija bel mipite' mai ah a pai a: Bangtan ahia ngaihdan nih kalteha na om nilouh ding uh? Tangtawn Toupa mah Pathian ahih leh amah zui unla, Baal mah Pathian ahih leh lah amah zui un, a chi hi. Ahihhangin, mipite'n bangmah a gen kei uhi. 22 Tua khitin, Elija in amaute kiang ah: Tangtawn Toupa' kamsangte laka a omsun kei kia ka hi. Ahihhangin, Baal in kamsang 450 a nei. 23 Koute adingin bawngtal nih hon la un. Amaute'n amau ading bawngtal khat teel uhenla, sem nenin singte tung ah koih uh henla, ahihhangin, meiin hal kei uhen. 24 Tua khit chiangin na Pathian uh min sam un, ke'n Tangtawn Toupa' min ka sam ding. Meia hon dawng pathian penpen Pathian ahi, a chi hi. Tua khitin, mipite khempeuh in: Na thugen hoih e, a chi uhi. 25 Elija in Baal kamsangte kiang ah: Bawngtalte laka khat teel unla, noute tam mahmah na hih chiangun, kisa masa un. Na pathian uh min sam unla, mei bel tawh kei un, a chi hi. 26 Tuachi-in, amaute'n amaute kianga kipia bawngtal a la uh a, lat dingin a bawl uhi. Tua khitin, zingsang akipan ni sut dong Baal' min a sam uh a: Baal aw, hon dawng in! chi-in a kikou uhi. Ahihhangin, dawnna a om kei a, kuama'n a dawng kei hi. Tua maitam a dawh uh kimkot ah a laamthawh hiai uhi. 27 Ni hong sut takin, Elija in amaute a tawng a: Kinakkou un! Amah pathian ahi vele! Kingaihtuah tuah khat hi-in teh, ahih kei leh, buai lua khat, khualzin khat hi-in teh. Ihmu khattou hi-in teh, phawn kul houh hi-in teh, a chi hi. 28 Amaute lah a kinakkou semsem uh a, tema a ki-at utawh, teia a kisut keh utawh, amau ngeina danin, sisan a pawt mateng a pang uhi. 29 Ni hong kaita a, nitaklam kithoihna thillat hun dongin thu genin a buai mahmah uhi. Ahihhangin, dawnna bangmah a om kei a, kuama'n lah a ngaihsak kei hi. 30 Tua khitin, Elija in, mite khempeuh kiang ah: Hiah ka kiang ah hong pai un, a chi a, amaute hong pai uhi. Ama'n Tangtawn Toupa' maitam kisesa a puahpha hi. 31 Elija in suang sawmlenih, Jakob suan nam khat ading suang khat zel a la hi. Tua Jakob bel Tangtawn Toupa' thu: Na min Israel ahi ding, chih a tunnapa ahi. 32 Tua suangtein Tangtawn Toupa' minin maitam khat a dawh a, a kimkot ah buhchi sea nih taak nading khuk a toukual hi. 33 Tua maitam tung ah sing a sia a, bawngtal sa a semnen a, tua sing tung ah a koih hi. Tua khitin, amaute kiang ah: Tuibel li dimin tui sung unla, tua thillat tung ah leh sing tung ah sungbua un, a chi hi. 34 Ama'n: Tua bangin hih nawn un, a chi a, a hih nawn uhi. Ama'n: A thumveina dingin, hih nawn un, a chi a, a thumveina dingin a hih nawn uhi. 35 Tua maitam pang ah tui a luangsuk a, tua a kimkota kuak ah tui a dim hi. 36 Kithoihna lat hun takin, kamsang Elija in mailam hon naih a, a thum a: Tangtawn Toupa, Abraham, Isak leh Jakob' Pathian na hi a, kei na sila ka hi a, hiai thilte khempeuh nang thupiaka kihih ahi, chih tuni'n kilangsak in. 37 Hon dawng in, Tangtawn Toupa aw, hiai mite'n Tangtawn Toupa nang, Pathian na hi, chih leh amaute lungtang kiheisak na hi, chih a theih nadingun hon dawng in, a chi hi. 38 Tua khitin, Tangtawn Toupa' mei hong kia a, tua kithoihna thillat, a sing, a suangte leh a leivui a kangtum a, tua maitam kimkot tawhkuaka tuivungte a hipkang vek hi. 39 Mipite khempeuh in tua a muhtakun, a bok uh a: Tangtawn Toupa mah Pathian ahi! Tangtawn Toupa mah Pathian ahi! a chi uhi. 40 Tua khitin, Elija in amaute thu a pia a: Baal kamsangte man un. Kuamah suaktasak kei un! a chi hi. A thupiak bangin a man uh a, Elija in Kishon Phaizang ah a kaisuksak a, a thatsak vek hi. 41 Tua khitin, Elija in, Ahab kiang ah: Pai inla, nein dawnta in. Vuahpi zu ding husa om hi, a chi hi. 42 Tuachi-in, ne ding leh dawn dingin Ahab a paikhia hi. Elija bel Karmel Mualvum ah a kaltou a, tua ah a khuukte kala a mai phuala kuunin a tu hi. 43 A silapa kiang ah: Va pai inla, tuipi lam va en in, a chi hi. A silapa a paitou a, a va khawdak hi. Ama'n: Bangmah om kei, a chi hi. Elija in sagih vei: Va painawn in, a chi hi. 44 A sagih veina ah, tua silapa'n: Tuipi apan mihing khuttum chia meilom khat kaltou hi, a chi hi. Tuachi-in, Elija in: Pai inla, Ahab kiang ah: Na kangtalai mansak inla, vuahpiin hon khum main taisuk in, va chi in, a chi hi. 45 Tua sungin, meipi-in tung vaan hong mial a, huih hong nung a, vuahpi hong zu a, Ahab zong Jezereel lam manawhin a taita hi. 46 Elija tung ah Tangtawn Toupa' vangletna hong tung a, amah a puanakpi a kawnggaka zepsuk zokin Jezereel dong Ahab makhelhin a taai hi. Horeb ah Elija Taai
1 Ahab in, Jezebel kiang ah Elija thilhih bangkim, kamsangte khempeuh namsaua a thah dan khawng a hilh vek hi. 2 Tuachi-in, Jezebel in Elija kiang ah mi a sawl a: Zingchiang tubang huna na hinna, tua kamsangte khat hinna banga ka bawl keitaak leh, pathiante'n a lawh lawh hon lawh uh henla, a nase zawin zong hon lawh uhen, a chisak hi. 3 Elija a lau a, a hinna hu dingin a taai hi. Judah gama Beersheba hong tun takin, a silapa tua ah a nusia a, 4 amah bel gamdai-gamkeu ah ni khat lam a va taai hi. Tua ah munphiah sing nuai ah a tu a, a sih nadingin a thum a: Tangtawn Toupa aw, kei adingin kichingta. Ka pu ka pate sangin lah hoih zaw tuan kei ing. Ka hinna la mai in, a chi hi. 5 Tua khitin, tua sing nuai ah a lum a, a ihmu hi. Thakhatin, vansawltak khat in a va khoih a: Thou inla, an ne in, a chi hi. 6 Ama'n a kim a kiang a en a, a lukhunga meiama kiem tanghou beu khat leh tui thawl khat om a mu hi. Tua a ne a, a dawn a, a lumsuk nawn hi. 7 Tua Tangtawn Toupa' vansawltak a nihvei nadingin hong pai kik a, amah a khoih a: Thou inla an ne in, na pai nading nang adinga tawl-huai lua ahi, a chi hi. 8 Tuachi-in, a thou a, an a ne a, tui a dawn hi. Annek in a tha khauhsak ahih manin, Pathian Mual, tua Horeb a tun mateng a pai a, ni 40 leh zan 40 a pai hi. 9 Tua ah kawlbuk khat ah a lut a, tua ah a zangiak hi.
Elija kianga Tangtawn Toupa Kilaak
Amah kiang ah Tangtawn Toupa' thu hong tung a: Elija, hiaia bang hih na hia? a chi hi. 1 Elija in a dawng a: Tangtawn Toupa, Pathian Vanglianpen adinga phatuamngai mahmah ka hi. Israelte'n na thukhun a nolh uh a, na maitamte a laichim uh a, namsauin na kamsangte a that uh. A khawsuak sun kei kia ka hi a, kei nangawn thah hon sawm uh ahi, a chi hi. 11 Tangtawn Toupa'n: Pawtkhia inla, tua mual tung ah Tangtawn Toupa' mai ah va ding in, Tangtawn Toupa'n hon tawn ding ahi, a chi hi. Tua khitin, huihpi thupi leh hat lua hong nung a, Tangtawn Toupa' mai ah tua mual a zialgawp a, suangte nangawn a muttam a, ahihhangin, tua huihpi ah Tangtawn Toupa a om kei hi. Tua huihpi nun khitin, zinpi hong ling a, ahihhangin, tua zinling ah Tangtawn Toupa a om kei hi. 12 Tua zinpi lin khitin, meikuang hong om a, ahihhangin, tua meikuang ah Tangtawn Toupa a om kei hi. Tua meikuang khitin, nemtaka huau siausiau hong om hi. 13 Elija in tua huau siausiau a zak takin, a puanakpi in a maitang a khuha, a va pawtkhia a, tua kawlbuk kong gei ah a va ding hi. Tua khitin, aw khat in a kiang ah: Elija, hiaia bang hih na hia? a chi hi, 14 Elija in a dawng a: Tangtawn Toupa, Pathian Vanglianpen adinga phatuamngai mahmah ka hi. Israelte'n na thukhun a nolh uh a, na maitamte a laichim uh a, namsauin na kamsangte a that uh a, a khawsuak sun kei kia ka hi a, tu'n kei nangawn thah hon sawm uh ahi, a chi hi. 15 Tangtawn Toupa'n amah kiang ah: Nong kipatna lam ah kilehkiik inla, Damaska Gamdai-gamkeu ah hawh in. Tua lai na tun chiangin, Aram tunga kumpipa hi dingin Hazael thaunilh in. 16 Israel tunga kumpipa hi dingin, Nimshi' tapa Jehu zong thaunilh inla, kamsanga panga nang mun luah dingin Abel Mehola mi, Shafat' tapa Elisha zong thaunilh in, 17 Hazael' namsau apan suakta peuhmah Jehu in that ding a, Jehu' namsau apan suakta peuhmah, Elisha in that ding hi. 8 Ahihhangin, Baal' maia khukdin ngeilou leh muka amah tawp ngeilou, Israel gama mi 7,000 kei adinga ka siit nei ka hi, a chi hi.
Elisha Sapna
19 Tuachi-in, tua mun apan Elija a paikheta a, Shafat' tapa Elisha a va mukhia hi. Elisha bel, lou kaihna langkawn baat bawngtal tuak sawmleniha loukaiin a na om hi. Ama'n tuak sawmlenih a zang hi. Elija in amah a va naih a, a puanakpi a va silhsak hi. 20 Elisha in a bawngtalte nusiain Elija a nungdelh a: Ka nu leh ka pa mangpha va khak phot ning. Tua khit chiangin hon zui ning, a chi hi. Elija in: Kilehkik in. Ke'n nang bang hon lawh ka hia? a chi hi. 21 Tuachi-in, Elisha in Elija a nusia-a a kilehkik hi. A loukaihna bawngtalte a kai a, a gou hi. A sa huan nadingin a loukaihna van langkawnte a zang a, a sahuante mite kiang ah a pia a, amaute'n a ne uhi. Tua khitin, Elija zui dingin a kuankhia a, a nasempa hong hita hi.
Ben Hadad in Samaria Dou
1 Hichi hong hi a, Aram kumpipa Ben Hadad in a sepaihhonte khempeuh a kaikhawm a, kumpipa 32 in, a sakolte uleh kangtalaite utawh amah a zui uh a, tua bangin Samaria sim dingin a kuantou a, a va dou hi. 2 Tua khawpi-a Israel kumpipa Ahab kiang ah thupua a sawl a: Hiai Ben Hadad thugen ahi: Ama'n na ngun leh na khamte keia ahi. 3 Na zi hoihpente leh na ta hoihpente keia ahi, chi ahi, a chisak hi. 4 Israel kumpipa'n a dawng a: Ka toupa, kumpipa aw, na chih bang ahi. Kei leh ka neih teng khempeuh nanga ka hi uhi, a chi hi. 5 Tua thupawte hong pai kik uh a: Hiai Ben Hadad' thugen ahi: Ama'n: Na ngun leh kham, na zi leh na tate hon ngiat dingin mi hon sawl ka hi. 6 Ahihhangin, zingchiang tubang hunin, nangma' innpi leh na uliante' innte phekleka zong dinga ka uliante hon sawl ding ka hi. Amaute'n manpha na sak thil peuhmah a la ding uh a, hon pawmang ding uh, chi ahi, a chi uhi. 7 Israel kumpipa'n gamsunga a upate khempeuh a kaikhawm a, amaute kiang ah: Hiai mipa'n buaina zong ahi, chih na mu uh! Ama'n ka zite leh ka tate leh ka ngun leh kham la dinga mi hon sawl laiin, ka nial kei hi, a chi hi. 8 Tua upate leh mite khempeuh in a dawng uh a: Amah ngaikhe ken. A ngiatte zong pe ken, a chi uhi. 9 Tuachi-in, ama'n Ben Hadad misawlte a dawng a: Ka toupa, kumpipa na hilh unla, na silapa'n na ngiat masakte khempeuh ka hih ding, ahihhangin, hiai na ngiat pen ka hih thei kei, a chi, chi un, a chi hi. Tua khitin, amaute a paikhia uh a, Ben Hadad kiang ah dawnna a tun uhi. 10 Tua khitin Ben Hadad in Ahab kiang ah thu dang a khak a: Ka mite'n khutdim khat teka a tan ding uh leivui Samaria-a a kinutsiat leh, pathiante'n a ut ut uh hon lawh uhenla, a nase zaw zong hon lawh uhen aw, a chi hi. nIsrael kumpipa'n a dawng a: A galvana kithuampa zaw, a suahkhepa banga a kisial ding ahi kei, chi-in amah hilh un, a na chi hi. 12 Ben Hadad leh kumpipate'n a puanbukte ua zu a dawnkhawm laitakun, Ben Hadad in hiai thupuak a za a, a mite thu a pia a: Gal dou dingin kisa un, a chi hi. Tuachi-in, tua khawpi sim dingin a kisa uhi.
Ahab in Ben Hadad Zou
13 Tua hun sung mahin kamsang khat, Israel kumpipa Ahab kiang ah hong pai a: Hiai Tangtawn Toupa' thugen ahi. Ama'n: Hiai sepaihhon tampi na mu hia? Tuni'n na khut sunga hon pe ding ka hi. Tua khit chiangin keimah Tangtawn Toupa ka hi, chih na thei ding, chi ahi, chi-in a genkhia hi. 14 Ahab in: Ahih leh hiai kua'n hih ding ahia? chi-in a dong hi. Tua kamsangpa'n a dawng a: Hiai Tangtawn Toupa' thugen ahi. Ama'n: Gamsehkhena makaite laka ulian tangvallaite'n a hih ding uh ahi, chi ahi, a chi hi. Ama'n: Ahih leh kua'n kidouna pan ding hiam? chi-in a dong hi. Tua kamsangpa' a dawng a: Nang na pan ding ahi, a chi hi. 15 Tuachi-in, Ahab in a gamsehkhen makaite laka ulian tangvallaite 232 a samsak hi. Tua khitin, Israel dangte, a vek ua 7,000 a kaikhawm hi. 16 Amaute, suun laitak, Ben Hadad leh a kizoppih tua kumpipa 32-te zukhama a puanbukte ua a om laitakun, hong kipankhia uhi. 17 Gam sehkhena makaite laka ulian naupang zawte a masa uhi. Ben Hadad in enkhemite a sawl a, amaute'n: Samaria apan mite'n hon naih uh, chi-in thu a tun uhi. 18 Ben Hadad in: Amaute lemna thu tawh hong kuan uh ahih leh hingmat unla, kidou dinga hong kuan ahih uh lelah, hingmat un, a chi hi. 19 Tua gam sehkhena ulian tangvallaite tua khawpi apan a kuankhia uh a, a nung uah sepaih honpi'n a zui uh a, 20 amaute tek in a langte uh a satpai uhi. Hibang laitakin, Aramte a taikek uh a, Israelte'n a delhzui uhi. Ahihhangin, Aram kumpipa Ben Hadad bel, sakol tunga tuangin, a sakoltungtuang pawlkhat tawh a suakta uhi. Israel kumpipa'n mai a nawt zel a, sakolte, kangtalaite a zou a, Aramte tampitak a that hi. 22 Tua nunglamin, tua kamsangpa Israel kumpipa kiang ah hong hawh a: Aram kumpipa'n khawkhal nawn chianga nang hong dou kik nawn ding ahih manin, na dinmun hatsak inla, bang hih kul hiam, chih gel in, a chi hi. 23 Tua hun lai mahin, Aram kumpipa' uliante'n amah a thuhilh uh a: Amaute' pathiante mualtung pathiante ahi. Tua hanga eite adinga hat lua ahi uhi. Ahihhangin, phaizang ah amaute dou lehang, amaute sangin i hat zaw ngeingei ding. 24 Hiai hih in: Kumpipate a makaihna uh laaksak inla, ulian dangtein khek in. 25 Na mansuahsa sepaih honpi bang dinkhe kik nawn in, mansuahsa sakolte mun ah sakolte, mansuahsa kangtalaite mun ah kangtalaite, dinkhe kik in, tuachi-in, phaizang ah Israel i dou thei ding hi. Tua hun chiangin amaute sangin i hat zaw ngeingei ding, a chi uhi. Ama'n amaute a lemsakpih a, amaute chih bangbangin a gamtata hi. 26 Khua hong khai kik nawn takin, Ben Hadad in Aramte a kaikhawm a, Israel dou dingin Afek ah a kuantou hi. 27 Israelte zong a kikaikhawm uh a, nek ding tak ding piak ahih nungun, amaute tuak dingin a kuankhia uhi. Aramte gamsung dima a kiphalh laiun, Israelte bel kelhon tawmkha kha pawl nih om liklik bangin, Aramte gal ah, giahphual nih satin a om uhi. 28 Tua Pathian' mi hong paitou a, Israel kumpipa kiang ah: Tangtawn Toupa' thugen hiai ahi: Aramte'n Tangtawn Toupa zaw mualtung pathian hi a, phaizang pathian hilou ahi, a chih manun, hiai sepaihhon tampite na khut sunga hon pe ding ing a, keimah Tangtawn Toupa ka hi, chih thei ding na hi uh, chi ahi, a chi hi. 29 Ni sagih sung, amaute kimaituahin giahphual a sat uh a, a ni sagih ni-in, kidouna ah a pangkhawm uhi. Israelte'n ni khat sungin Aram khe sepaih 100,000 a that uhi. 30 Adangte Afek khawpi ah a tai uh a, tua ah kulhbaang chim in 27,000 a delhlum lai hi. Ben Hadad zong tua khawpi ah a tailut a, inndan sungnung ah a bu hi. 31 A uliante'n amah kiang ah: Ngai in, Israel innkawte' kumpipate zaw zahngaithei ahi uh, chih i zata. Saiippuan teengin leh khauhualtea i lutang uh gakin Israel kumpipa kiang ah tailut ni. Ama'n i hinna hon hawisak khamawh ding hia, a chi uhi. 32 Tuachi-in, saiippuan teengin leh khauhualtea a lutang uh gakin, Israel kumpipa kianga va tailut a om uh a: Na sila Ben Hadad in: Hehpihtakin ka hinna hon hawisak in, chi ahi, a chi uhi. Kumpipa'n a dawng a: Amah hing lai ahi maw? Amah ka sanggampa eive, a chi hi. Tua mite'n hiai dawnna, chiamtehna hoih hina, chi-in a kampau a zang pah uh a: He, na sanggampa Ben Hadad! a chi uhi. Kumpipa'n: Kuan unla, amah va man un, a chi hi. Ben Hadad hong pawtkhiak takin, Ahab in a kangtalai ah a tuangsak hi. 3 Ben Hadad in: Ka pa'n na pa khut apan' a laak khawpite ko'n pe kiik ding. Ka pa'n Samaria-a a hih bangin, nang zong Damaska ah sumsinna munte na bawl thei ding, a chi hi. Ahab in: Kilemna thukhun khat bawl leng nang kon khah ding, a chi a, tua bangin kilemna thukhun a bawlpih a, a khahta hi.
Kamsang khat in Ahab Mawhpaih
35 Tangtawn Toupa' thuin, kamsangte' tapate khat in a lawmpa khat kiang ah: Na galvan in hon sat in, a chi a, ahihhangin, a lawmpa'n a nial hi. 36 Tuachi-in, tua kamsangpa'n: Tangtawn Toupa thu na nial manin, kei non nutsiat phet chiangin, humpinelkai khat in nang hon that ding ahi, a chi hi. Tua mipa a paikhiak nungin, humpinelkai khat in a tuak a, a that hi. 37 Tua kamsangpa'n, midang khat a tuak a, a kiang ah: Hehpihtakin hon sat in, a chi a, tua mipa'n a sat a, a liamsak hi. 38 Tua khitin, tua kamsangpa a pai a, kumpipa ngakin lampi gei ah a ding hi. Amah bel a tai gakna-a a mit khuhsukin a kibawllamdang hi. 39 Kumpipa tua lampi-a hong pai takin, tua kamsangpa'n a na galsap a: Kidou saan laitakin na silapa kidouna phual ah a lut a, mi khat a galmat tawh hong pai a: Hiai mi na veeng in. Na khahsuah leh ama' hinna nang hinna in sawng ding ahi. Ahih kei leh, ngun talen khat na liau ding, hon chi hi. 40 Na sila, a lang a langa ka buai sungin, galmatpa a nasuakta hi, a chi hi. Kumpipa'n: Nang leh nang kithukhen na hita ve. Nang mahmah in na genta ve, a chi hi. 41 Tua khit phetin, tua kamsangpa'n a mita talgakna a hawkkhia a, kamsangte laka khat a hih lam kumpipa'n a meltheih hi. 42 Ama'n kumpipa kiang ah: Hiai Tangtawn Toupa' thugen ahi. Ama'n: Si dinga ka chiamtehsa mi nang na khahta. Tua hangin, ama hinna, nang hinna in a sawng ding ahi. Ama' mite' hinna, nang mite' hinna in sawng ding ahi, chi ahi, a chi hi. 43 Lungkim het lou leh heh mahmah in, kumpipa, Samaria-a a innpi ah a paita hi,
Naboth' Grephuan
1 Hun bang hiam nungin, Jezreel mi Naboth' grephuan tawh kisai thu khat hong om hi. Tua grephuan bel Jezreela om ahi a, tua lah Samaria kumpipa' innpi kiang naia om ahi. 2 Ahab in Naboth kiang ah: Na grephuan, kei' innpi kiang naia om ahih manin, anteh louhing chiinna huan dingin ke'n tang ve ning e. Tua taangin grephuan hoih zaw k'on pe dia, na deih zawk leh lah, aman zahzah k'on pe ding, a chi hi. 3 Ahihhangin, Naboth in a dawng a: Ka pu ka pate gou hon pe thei het kei ning, a chi hi. 4 Tuachi-in, Jezreel mi Naboth in: Ka pu ka pate gou hon pe thei ke'ng, a chih manin, Ahab bel lungkim lou leh hehin inn ah a paita hi. Mai mialtakin lupna ah a lum a, an a ne nuam kei hi. 5 A zi Jezebel hong lut a, a kiang ah: Banghanga hichi lungkimlouh mei na hia? Banghanga an ne nuam lou na hia? a chi hi. 6 Ama'n: Tua Jezreel mi Naboth kiang a: Na grephuan hon leisak in, ahih kei leh, na deihzawk leh lah, grephuan dang hon pia ning, ka chih leh ama'n: Ka grephuan hon pe kei ning, a chi-a ahi, a chi hi. 7 A zi Jezebel in: Israel tunga kumpipa-a na gamtat dan hibang lei hi maw? Thou inla, an ne in! Kilungnuamsak in. Ken tua Jezreel mi Naboth' grephuan hon laksak ning, a chi hi. Tuachi-in, ama'n Ahab' minin lai a gelh a, Ahab' chiamtehnain a chiamteh a: Naboth tenna khawpi-a teeng upate leh makaite kiang ah tuate a khak hi. 9 Tua laite ah hibangin a gelh hi: An ngawlni khat phuang unla, tua ni-in mipite laka mun kilangtak ah Naboth tusak un. 10 Amah zawn ah mi gilou nih tusak unla, Naboth in Pathian leh kumpipa hamsiat ahi, chisak un. Tua khit chiangin Naboth kaikhia ula, suangin denglum un, chi-in. nTuachi-in, Naboth tenna khawpi-a teeng upate leh makaite'n Jezebel in lai a gelh thuhilhna bangin a hih uhi. 12 Anngawlni khat a sep uh a, mipite laka mun kilangtak ah Naboth a tusak uhi. 13 Tua khitin, migilou nih hong pai uh a, Naboth mai ah hong tu uh a: Naboth in Pathian leh kumpipa hamsiat ahi, a chi uhi. Tuachi-in, khawpi pawlam ah Naboth a kaikhia uh a, suangin a denglumta uhi. 14 Tua khitin Jezebel kiang ah thu a khak uh a: Naboth suangin a kideng a, a sita, a chi uhi. 15 Naboth suangin a kidenglumta, chih Jezebel in a zak phetin, Ahab kiang ah: Thou inla, an ne inla, Naboth in hon leisak nop louh grephuan va luahta in. Amah dam nawn lou a, sita ahi, a chi hi. 16 Ahab in Naboth sih thu a zak takin, a thou a, Naboth' grephuan luah dingin a kuansuk hi. 17 Tua khitin, Tangtawn Toupa' thu tua Tishbe mi Elija kiang ah hong tung a: 18 Samaria-a vaihawmpa Israel kumpipa Ahab tuak dingin paisuk in. Tu laitaka Naboth' grephuana om ahi, va luah dinga kuansuk ahi. 19 Amah kiang ah: Hiai Tangtawn Toupa' thugen ahi. Ama'n: Mi khat tualthaha that a, a thilneih sut hi lou na hi hia? chi ahi. Tua baan ah: Hiai Tangtawn Toupa' thugen ahi. Ama'n: Naboth' sisan uite'n a liahna mun ah, na sisan, ahi, nangmah mah sisan uite'n a liak ding ahi! chi ahi, va chi in, a chi hi. 20 Ahab in Elija kiang ah: Nang ka melmapa'n hon mukhia na hi maw! a chi hi. Elija in a dawng a: Tangtawn Toupa' mitmuha thil gilou hih dinga nang leh nang kikhawngkhia na hih manin, hon mukhia ka hi mah ve. 21 Tangtawn Toupa'n: Na tunga siatna hon tun ding ka hi. Na suante ka hihmangthang dinga Ahab apan Israel gam a ta pasal sila hi-in, noplen hita leh satkhe ding ka hi. 22 Kei hon hehsak a, Israel khialsak na hih mana, Nebat' tapa Jeroboam innkuan leh Ahija' tapa Baasha innkuan banga na innkuan bawl ding ka hi, chi ahi. 23 Tua baan ah, Jezebel tawh kisai in, Tangtawn Toupa'n: Jezreel kulhbaang bul ah uite'n Jezebel negai ding hi, chi ahi. Ahab' neihsa, tua khawpi sunga site, uite'n ne ding a, khawpi pua gama site lah tungleng vasate'n ne ding hi, a chi ahi, a chi hi. 25 A zi Jezebel thuhilhsa-a, thil gilou hih dinga amah leh amah kikhawngkhia Ahab bang mi om ngei lou hi. 26 Tangtawn Toupa'n Israelte' maia a hawlkhiak Amorte banga milimte delh a, gilou tawpkhawka amah gamta hiven. 2 Ahab in hiai thute a zak takin, a puansilhte a botkek a, saiippuan a silh a, an a ngawl hi. Saiippuan silhin a lum a, nunnemtakin a vaak khialkhial hi. 28 Tua khitin, Tishbe mi Elija kiang ah Tangtawn Toupa' thu hong tung hi. 9 Ama'n: Ka maia Ahab kiniamkhiak dan na mu hia? Hibanga a kiniamkhiak manin, ama' damsungin hiai siatna ka tungsak kei ding a, a tapa' damsungin, a innkuan sung ah ka tungsak ding, a chi hi.
Mikaia' Genkholhna
1 Tua baan kum thum sung Aram leh Israel kal ah kidouna a om kei hi. 2Ahihhangin, a kum thumna ah Judah kumpipa Jehoshafat, Israel kumpipa mu dingin a hawhsuk hi. 3Israel kumpipa'n a uliante kiang ah: Ramoth Gilead eitea hi a, hinapi-a Aram kumpipa apan laakkik nadinga bangmah hihloua om i hi, chih na thei kei umaw? a na chikhinta hi. 4 Tuachi-in, ama'n Jehoshafat kiang ah: Ramoth Gilead dou dingin non zui kei dia hia? a chi hi. Jehoshafat in Israel kumpipa a dawng a: Nang bang ka hi, ka mite zong na mite bang ahi, ka sakolte na sakol ahi uh, a chi hi. 5 Ahihhangin, Jehoshafat in Israel kumpipa kiang ah: Tangtawn Toupa dong masa phot in, chi-in zong a hilh hi. 6 Tuachi-in, Israel kumpipa'n kamsang 400 khawng a samkhawm a, amaute kiang ah: Ramoth Gilead ka dou diam, ka kikhaam zaw diam? chi-in a dong hi. Amaute'n a dawng uh a: Kuan in. Tangtawn Toupa'n na khut sunga tua hon pe ding ahi, a chi uhi. Ahihhangin, Jehoshafat in: I dot theih ding Tangtawn Toupa' kamsang khat beek om lou hia? a chi hi. 8 Israel kumpipa'n Jehoshafat a dawng a: Tangtawn Toupa' thu i dot theih nading mi khat om mah e, ahihhangin, ama'n zaw ka tungthu a hoihlam gen ngeilou a, a sia gen gige a, amah mudah ka hi. Amah, Imla' tapa Mikaia ahi, a chi hi. Jehoshafat in a dawng a: Kumpipa'n tua bang na chih ding hilou ahi, a chi hi. 9 Tuachi-in, Israel kumpipa'n a uliante khat a sam a: Kintakin Imla' tapa Mikaia hon paipih in, a chi hi. 10 Israel kumpipa leh Judah kumpipa Jehoshafat bel kumpipuan silhin Samaria khawpi kongpi lutna kianga buhphual ah, amau' kumpitutphah ah a tu tuak uh a, amaute' maia genkholhna thugen tua kamsangte tawh a om uhi. nKenaana' tapa Zedekia in sikin kite a na bawl a: Hiai Tangtawn Toupa' thugen ahi. Ama'n: Aramte hihmanthat ahih mateng hiai in amaute na sun ding uh, chi ahi, a chi hi. 12 Kamsang dangte khempeuh in zong tua mah a gen uhi. Amaute'n Ramoth Gilead dou inla, zou in. Tangtawn Toupa'n kumpipa khut sunga hon pe ding hiven, a chi uhi. Mikaia sam dinga kuan misawlpa'n Mikaia kiang ah: Ngai dih, kamsang dangte'n mi khat bang maia kumpipa adinga lawhchinna genkhol uhi. Amaute' thugen tawh na thugen kibangsak inla, a hoihlam gen in, a chi hi. 14 Ahihhangin, Mikaia in: Tangtawn Toupa' hinna sialin ka gen ahi. Tangtawn Toupa' hon hilh kia amah ka hilh ding, a chi hi. 15 Amah hong tun takin, kumpipa'n: Mikaia, Ramoth Gilead dou dingin ka kuan ding uam, ka kikham zaw diam? a chi hi. Ama'n a dawng a: Dou inla, vualzou awu. Tangtawn Toupa'n Kumpipa khut sunga hon pe ding hiven, a chi hi. 16 Kumpipa'n amah kiang ah: Tangtawn Toupa' mina thutak loungal bangmah hon hilh lou dinga bangzah vei hon kichiamsak ding ka hia? a chi hi. 17 Tua khitin Mikaia in a dawng a: A ching ding omlou belamte banga Israelte khempeuh mualtung khawnga kithehzak ka mu a, Tangtawn Toupa'n: Hiai mite'n makai nei lou uh ahi. Michih a inn chiat uah lungmuangtakin pai chiat uhen, chi ahi, a chi hi. 18 Israel kumpipa'n Jehosafat kiang ah: Hiai mipa'n ka tungthu a sia loungal, a hoih himhim genkhol ngeilou ahi, chih kon hilh keia hia? a chi hi. 19 Mikaia in a gen lai a: Tua bang ahih manin, Tangtawn Toupa' thu na ngai in: Tangtawn Toupa a kumpitutphah tunga tu a, a vei leh a taka vaan mipi honpi ding ka mu. 20 Tuachi-in, Tangtawn Toupa'n: Ramoth Gilead dou ding leh tua-a vasi dingin Ahab kua'n zol ding ahia? a chi hi. Khat in hiai hoihinteh a chia, a dang khat in tua hoihinteh, a chi hi. 21 Atawpin, kha khat hong pai a: Ke'n ka zol ding, a chi hi. 22 Tangtawn Toupa'n: Bang zangin na zol dia? chi-in a dong hi. Tua kha in: Ka kuan ding a, a kamsangte khempeuh kam ah kha zuau thei ka va hi ding, a chi hi. Tangtawn Toupa'n: Amah na zol zou ding. Pai inla, tua bangin va hih in, a chi hi. 23 Tua bangin, Tangtawn Toupa'n hiai na kamsangte khempeuh kam ah kha zuauthei a koihta. Tangtawn Toupa'n nang adingin siatna a sehsa ahita, a chi hi. 24 Tua khitin, Kenaana' tapa Zedekia in a naih a, Mikaia' maitang a beeng a: Tangtawn Toupa apan tua kha, nang hon houpih dinga kei apan a paikhiak laiin, koi lam ah a pai a? a chi hi. 25 Mikaia in a dawng a: Inndan sungnunga bu dinga na tailut ni-in thei na ve teh, a chi hi. 26 Israel kumpipa'n thu a pia a, Mikaia tonpih unla, khawpi ukpa Amon kiang ah leh, kumpipa' tapa Joash kiang ah khakiik unla: 27 Hiai kumpipa' thugen ahi. Ama'n: Hiai mipa suangkul ah khum unla, bittaka kong kiik nawn masiah tanghou leh tui loungal bangmah pe kei un, chi ahi, chi un, a chi hi. 28 Mikaia in: Bittaka nong kiik nawn peuhmah leh, Tangtawn Toupa'n kei tungtawnin thu a gen keia hi'n teh, chi-in a phuang hi. Tua baan ah: Nou mipite khempeuh aw, ka thugente chiamteh un! a chi lai hi.
Ramoth Gilead ah Ahab Thahin Om
29 Tuachi-in, Israel kumpipa leh Judah kumpipa Jehoshafat, Ramoth Gilead ah a kuantou uhi. 30 Israel kumpipa'n Jehoshafat kiang ah: Kei kibawllamdangin kidouna phual sung ah ka lut ding a, nang zaw na kumpipuan mah silhin om in, a chi hi. Tua chi-in, Israel kumpipa a kibawllamdang a, kidouna phual sung ah a lut hi. 3 Aram kumpipa'n bel a kangtalai 32-te tunga makaite thu a pia a: A neu hi-in a lian hita leh, Israel kumpipa loungal kuamah suai kei un, a chi hi. 2 Tua kangtalai hawi makaite'n Jehoshafat a muh takun: Hiai Israel kumpipa hi mahmah e, chi-in a ngaihtuah uhi. Tuachi-in amah suai dingin a kisa uh a, ahihhangin, Jehoshafat a kikoukhia a, 33 tua kangtalai hawi makaite'n Israel kumpipa a hih louh lam a theih takun a delh nawn kei uhi. 34 Ahihhangin, mi kuahiam khat in ngimtuam neilouin a thai a khah leh, Israel kumpipa kithopna galvan kaal tak ah a kapkha hi. Kumpipa'n a kangtalai hawlpa kiang ah: Kilehhei inla, kidouna phual apan hon taikhiakpih in, liam ka hita, a chi hi. 35 Tua sun nitumin kidouna a nase mahmah a, kumpipa bel a kangtalai tunga kingaiin Aramte lam ngain a op hi. Tua kangtalai sung ah a sisan a luang a, tua nitaklamin a sita hi. Ni hong tumdek takin sepaihhonte lak ah kikou husa hong om a, michih ama' khawpi ah, michih ama' gam ah tai un! chih hong kiza hi. 37 Tua bangin kumpipa a sita a, Samaria ah hon pua uh a, tua ah a vui uhi. 38 Samaria-a dil khat ah tua kangtalai a sil uh a, Tangtawn Toupa' gensa bangin uite'n a sisan a liaksiang uhi. Tua dil bel kizuakte kisilna dil ahi. 39 Ahab' vaihawm sunga thiltung dangte leh a thilhihte, a innpi lam-a saiha a phah thu leh kulhnei khawpi a lamte thu, Israel kumpite' tungthu gelhna laibu sunga kigelh hi lou hia? 40 Ahab, a pu a pate kiang ah a khawlta a, a tapa Ahazia in a mun a luah a, kumpipain hong pang hi.
Judah Kumpipa Jehosafat
41 Asa' tapa Jehoshafat bel, Israel kumpipa-a Ahab hong pan kum, a kum lina-a Judah kumpipa-a hong pang ahi. 42 Amah kumpipa hong hihin kum 35-a upa ahita. Jerusalem ah kum 25 sung vai a hawm hi. A nu' min Azuba ahi a, Shilhi' tanu ahi. 43 Ama'n bangkim ah a pa Asa' lampite a tawn a, tuate a pialsan kei a, Tangtawn Toupa' mitmuha dik a hih hi. Hinapi-in, munsangte a kiphiat kei a, tua ah mite'n kithoihnate a laan uh a, gimnamtuite a hal lai uhi. 44 Jehoshafat in Israel kumpipa zong a kilempih mahmah hi. 45 Jehoshafat vaihawm sunga thiltung dangte, a nasepkhiakte leh galzawhnate thu ahih leh, Judah kumpite' tungthu gelhna laibu sunga kigelh hi lou hia? 46 A pa Asa' vaihawm nung nangawna biakna buka pasal kizuak omlaite zong gamsung apanin a beisak hi. 47 Tua hun laiin, Edom ah kumpipa a om kei a, thuneihna piaksawn khat in vai a hawm hi. 48 Jehoshafat in Ofir-a khamsiik pua-a kuan ding sumsinna longte tampi a bawl a, ahihhangin, tuipi tung ah tuate a pai ngei kei uhi. Ahang bel, Ezion Geber-a kisia hi ve-un. 49 Tua hun laiin, Ahab' tapa Ahazia in Jehoshafat kiang ah: Ka mite leh na mite long ah tuang-khawm uhen, a chi a, ahihhangin, Jehoshafat in a nial hi. 50 Tua khitin, Jehoshafat, a pu a pate kiang ah a khawlta a, a pa David' khawpi ah amaute kiang ah a kivui hi. A tapa Jehoram in ama' mun a luah hi.
Israel Kumpipa Ahazia
51 Judah kumpipa-a Jehoshafat hong pan kum, a kum sawmlesagihna ah, Ahab' tapa Ahazia, Israel kumpipain hong pang a, Israel tuns ah kum nih sung vai a hawm hi. 52 Amah a nu a pa' lampite leh Israel khialsakpa, Nebat' tapa Jeroboam lampite tawna gamta ahih manin, Tangtawn Toupa' mitmuhin thil gilou a hih hi. 53 Ama'n Baal nna semin a bia a, a pa' hihsa bangin, Tangtawn Toupa, Israel Pathian a hehsak hi.
Ahazia tunga Gawtna
1 Ahab' sih nungin, Israel tung ah Moab a hel hi. 2 Tua hun laiin, Ahazia bel Samaria-a a inndan tungnung vathangkalh awnga kia, liamin a na omkhin hi. Tua bang ahih manin, mi a sawl a, a misawlte kiang ah: Pai unla, hiai liamma apan ka damzou nading hiam, chih Ekronte' pathian Baal Zebub va dong un, a chi hi. 3 Ahihhangin, Tangtawn Toupa' vansawltak in Tishbe mi Elija kiang ah: Paitou inla, Samaria kumpipa' misawlte vatuak inla, amaute kiang ah: Israela Pathian a om louh mana Ekronte' pathian Baal Zebub thu dong dinga kuan na hi uhia? 4 Tua bang a hih manin, Ahazia kianga Tangtawn Toupa' thu gen hiai ahi. Ama'n: Tu-a na lupna nuse nawn lou ding na hi. Si ngeingei ding na hi! chi ahi, chi in, a chi hi. Tua chi-in, Elija a kuantou hi. 5 Misawlte, kumpipa kiang hong tunkik takun, ama'n amaute kiang ah: Banghanga hong kileh pah na hi ua? a chi hi. 6 Amaute'n a dawng uh a: Mi khat, koute tuak dingin hong pai a, ama'n: Noute hon sawlpa kumpipa kiang ah paikik unla, amah kiang ah: Hiai Tangtawn Toupa' thugen ahi. Ama'n: Israela Pathian a om louh mana Ekronte' pathian Baal Zebub thu dong dinga kuan na hi uhia? Tua bang a hih manin, tu-a na lupna nuse nawn lou ding na hi. Si ngeingei ding na hi! chi ahi, a chi, a chi uhi. 7 Kumpipa'n: Noute hon tuak dinga hong pai a, hiai thu hon hilh, mi bangchi ahia? chi-in a dong hi. 8 Amaute'n a dawng uh a: Amah samulpuan silh, savuna a kawng gak mi khat ahi, a chi uhi. Kumpipa'n: Tua pa, Tishbe mi Elija ahi ve, a chi hi. Tua khitin, ama'n sepaih kepten khat, a mite 50 tawh Elija kiang ah a sawl hi. Tua kepten in mual tunga tu Elija a va naih a: Nang, Pathian' mi aw, kumpipa'n: Hong hawhsuk in, chi ahi, a chi hi. 10 Elija in keptenpa a dawng a: Kei Pathian' mi ka hih taktak leh, vaan apanin mei hong kesuk henla, nang leh na mi 50-te hon kangtum hen! a chi hi. Tuachi-in, vaan apan mei hong kesuk a, tua kepten leh a mite a kangtum hi. 11 Hiai a theih takin, kumpipa'n Elija kiang ah, kepten dang khat, a mite 50-te tawh a sawl thak hi. Tua kepten in Elija kiang ah: Nang, Pathian' mi aw, kumpipa'n: Hong hawhsuk in, chi ahi, a chi hi. 12 Elija in a dawng a: Kei Pathian' mi ka hih taktak leh, vaan apanin mei hong kesuk henla, nang leh na mi 50-te hon kangtum hen! a chi hi. Tuachi-in, vaan apanin mei hong kesuk a, amah leh a mi 50-te a kangtum hi. 13 Tua baan ah, kumpipa'n kepten thumna leh a mite 50-te a sawl thak leuleu hi. Hiai kepten thumna a kuantou a, Elija mai ah a bok a: Nang, Pathian' mi aw, ka hinna leh na sila hiai mi 50-te' hinna hehpihtakin na mitmuhin manpha sakin aw! 14 Ngai in, van apana mei hong kesuk in kepten masa nihte leh amaute' mite khempeuh a kangtum hi. Ahihhangin, kei hinna na mitmuhin manpha sa in aw! chi-in a ngen ngutngut hi. 15 Tua Tangtawn Toupa' vansawltak in Elija kiang ah: Amah zuisuk in. Amah lau ken, a chi hi. Tuachi-in, Elija a dingkhia a, kumpipa kiang ah tua kepten a zuisuk hi. 16 Elija in kumpipa kiang ah: Hiai Tangtawn Toupa' thugen ahi. Ama'n: Israel-a Pathian om lou chi-a Ekronte' pathian Baal Zebub thu dong dinga mi sawl na hi hia? Hiai na hih manin, tu-a na lupna nuse ngei nawn lou ding na hi. Si ngeingei ding na hi, chi ahi, a chi hi. 17 Tangtawn Toupa'n Elija kama a gen bangin, Ahazia a sita hi. Ahazia in tapa a neih louh manin, Jehoshafat' tapa Jehoram, Judah kumpipa-a a pan kum, a kum nihna ah, Joram in Ahazia' mun luahin kumpipain a pang hi. 18 Ahazia' vaihawm sunga thiltung dangte, a thilhihte ahih leh, Israel kumpite' tungthu kigelhna laibu sunga kigelh hilou hia?
Elija Vaana Laktouhna
1 Tangtawn Toupa'n pingpei-a vaana Elija a laktouh dek laiin, Elija leh Elisha bel Gilgal apanin hong pai uhi. 2 Elija in Elisha kiang ah: Hiah na om in. Tangtawn Toupa'n Bethela pai dingin kei hon sawl ahi, a chi hi. Ahihhangin, Elisha in: Tangtawn Toupa' hinna leh nang' hinna sialin ka gen ahi. Kon nuse kei ding, a chi hi. Tuachi-in, Bethel ah a tonsuk uhi. 3 Bethela kamsang omkhawmte, Elisha kiang ah hong hawh uh a: Tangtawn Toupa'n tuni-a na pu hon laksak ding ahih lam na thei hia? a chi uhi. Elisha in a dawng a: Thei mah ing. Ahihhangin hiai thu gen kei un, a chi hi. 4 Tua khitin, Elija in Elisha kiang ah: Hiah na om in. Tangtawn Toupa'n Jerikho-a pai dinga kei hon sawl ahi, a chi hi. Elisha in a dawng a: Tangtawn Toupa' hinna leh nang' hinna sialin ka gen ahi. Kon nuse kei ding, a chi hi. Tuachi-in, Jerikho ah a tonsuk uhi. 5 Jerikho-a kamsang omkhawmte, Elisha kiang ah a hawhtou uh a: Tangtawn Toupa'n tuni-a na pu hon laksak ding ahih lam na thei hia? a chi uhi. Elisha in a dawng a: Thei mah ing. Ahihhangin, hiai thu gen kei un, a chi hi. 6 Tua khitin, Elija in Elisha kiang ah: Hiah na om in. Tangtawn Toupa'n Jordan luia pai dinga kei hon sawl ahi, a chi hi. Elisha in a dawng a: Tangtawn Toupa' hinna leh nang' hinna sialin ka gen ahi. Kon nuse kei ding, a chi hi. Tuachi-in, a nihun a ton uhi. 7 Kamsang omkhawmte lak apan 50 a vapai uh a, Jordan luia Elija leh Elisha a khawlna uh gal ah a ding uhi. 8 Elija in a puanakpi a suah a, a lomzial a, tua-in tui a sat hi. Tua tui, vei leh tak ah a kikhen a, a nihun leihula paiin a galkah uhi. 9 Luigal a kahtakun, Elija in Elisha kiang ah: Nang apan lakkhiaka ka om main bang kon hihsak dia? Hon hilh in, a chi hi. Elisha in a dawng a: Na kha lehnih hon luahsak in, a chi hi. 10 Elija in: Thil haksatak ngen na hive. Ahihhangin, nang apan lakkhiaka ka om laitak non muh leh, nanga ahi ding. Non muh kei leh bel, nanga ahi kei ding, a chi hi. nTua banga tontona a paupau laiun, thakhatin meikuang kangtalai khat leh a kai meikuang sakolte hong kilang a, amaute gel a kikhensak a, Elija bel pingpei lak ah vaan ah a paitouta hi. 12 Elisha in hiai a mu a: Pa aw! Pa aw! Israel kangtalaite leh sakoltungtuangte aw! chi-in a kikou khia hi. Elisha in Elija a mu nawn kei a, tua khitin ama' puansilhte a botkek hi. 13 Elisha in Elija apan hong kesuk puanakpi a tawm a, paikikin Jordan luigei ah a ding hi. 14 Tua Elija apana hong kia puanakpi a la a, tuain tui a sat a: Tangtawn Toupa, Elija' Pathian tu'n koi ah a om a? a chi hi. Tua banga tui a sat takin, vei leh tak ah tui hong kikhen a, a galkahta hi. 15 Jerikho apan hong pai a, hong galet tua kamsang omkhawmte'n: Elija kha Elisha tunga om eive, a chi uhi. Amaute amah tuak dingin a vapai uh a, a mai ah a va-kuun uhi. 16 Amaute'n: Ngai in, na silate'n mi kizen 50 ka nei uh, kuan uh henla, na pu vazong uhen. Tangtawn Toupa' Kha in amah pua a, mualtung khattou, luikuam khattoua nga hi kha inteh, a chi uhi. Eisha in a dawng a: Hilou e. Amaute sawl kei un, a chi hi. 17 Ahihhangin, nial ding a zumhuai dongin a chi teitei uh a, tua chi-in: Sawl ve ua le, a chi hi. Amaute'n mi 50 a sawl uh a, ni thum sung a zon hangun a mu kei uhi. 18 Elisha' omna Jerikho khua-a amah kiang hong tun takun, Elisha in amaute kiang ah: Va-kuan kei un, kon chi kei-a hia? a chi hi.
Tui Damsakna
19 Tua khawpi mite'n Elisha kiang ah: Ngai dih, pu aw, na muh bangin, hiai khawpi kingakna mun hoih ahi. Ahihhangin, a tuinek hoihlou a, a gam in gahsuah theilou hi, a chi uhi. 20 Ama'n: Belkuang thak khat hon la unla, a sung ah chi koih un, a chi a, tuachi-in belkuang khat hon la uhi. 21 Tua khitin, amah luikhuk ah a vahawh a, tua ah chi a vakhia a: Hiai Tangtawn Toupa' thugen ahi. Ama'n: Hiai tui ka damsakta. Sihna lah a tun nawn kei ding a, gam lah gahsuah louin a omsak nawn kei ding, chi ahi, a chi hi. 22 Tuni dongin, tua tui, Elisha' gen bangin tui chidam ahita hi.
Elisha in Simmawhna Tuak
23 Tua apan Bethel ah Elisha a paitou hi. Lampi-a a pai laiin, khawpi apan tuailaite hong pai uh a, simmawh bawlin: Paitou aw, nang talkolhpa! Paitou aw, nang talkolhpa! a na chi uhi. 24 Amah a kihei a, amaute a en a, Tangtawn Toupa' minin, amaute tung ah hamsia a samkhesuk hi. Tua khitin, gamlak apan vompi nih hong paikhia a, tua tuailaite laka 42 a balgawp hi. 25 Karmel Mual zuanin Elisha a pai zel a, tua apanin Samaria ah a kik hi.
Moab Heina
1 Judah kumpipa Jehoshafat vaihawm kum, a kum sawmlegiatna ah, Ahab' tapa Joram, Samaria ah Israel kumpipa-in hong pang hi. Ama'n Tangtawn Toupa' mitmuhin thil gilou a hih a, ahihhangin a nu leh pa' hih bang zen bel ahi kei hi. A pa' bawlsa Baal suang zek a paikhia a, 3 ahihhangin, Nebat' tapa Jeroboam khelhnate leh Israel a khelhsaknate a len a, tuate a kiheisan kei hi. 4 Moab kumpipa Mesha in belamte a vui a, belamnou 100,000 leh belamtal 100,000 mul Israel kumpipa a piak a kul hi. 5 Ahihhangin, Ahab sih nungin, Moab kumpipa, Israel kumpipa tung ah a hel hi. 6 Tuachi-in, tua hun laiin, kumpipa Joram, Samaria apan a kuan a, Israelte khempeuh a kaikhawm hi. 7 Judah kumpipa Jehoshafat kiang ah zong thu a khak a: Moab kumpipa ka tung ah a hel a, Moab dou dingin nong zui ding hiam? a chi hi. Jehoshafat in a dawng a: Hong zui mah ning. Kei lah nang bang ka hi a, ka mite lah na mite bang ahi a, ka sakolte zong na sakolte bang ahi, a chi hi. 8 Jehoshafat in: Koi lam tawna dou ding i hia? a chi a, Joram in: Edom gamdai-gamkeu tawnin i dou ding, a chi hi. Tuachi-in, Israel kumpipa, Judah kumpipa leh Ekron kumpipa tawh tonin a kuankhia hi. Ni sagih sung a kualpai nungun, sepaihhonte'n amau ading leh a gam kuante uh ading tui a tasam uhi. 10 Israel kumpipa'n: Bang ahita maia! Tangtawn Toupa'n Moab khut sunga piak dinga kumpipa thum hon samkhawm ahi maw? a chi hi. 11 Ahihhangin, Jehoshafat in: Tangtawn Toupa thu i dot theih nading hiaia Tangtawn Toupa' kamsang kuamah om lou hia? chi-in a dong hi. Israel kumpipa' ulian khat in a dawng a: Hiai ah Shafat' tapa Elisha a om. Amah tuia Elija khut buakpa ahi, a chi hi. 12 Jehoshafat in: Ama' kianga Tangtawn Toupa' thu om ahi, a chi hi. Tuachi-in, Israel kumpipa leh Jehoshafat leh Edom kumpipa Elisha kiang ah hong hawhsuk uhi. 13 Elisha in Israel kumpipa kiang ah: Eite'n bang kisaina nei i hia? Na pa' kamsangte leh na nu' kamsangte kiang ah hawh tanla, a chi hi. Israel kumpipa'n a dawng a: Hawh lou ding. Moab khuta hon pilut dinga kou kumpipa thumte hon samkhawmpa Tangtawn Toupa hiven, a chi hi. 14 Elisha in: A nna ka seppa, Tangtawn Toupa Vanglianpen' hinna sialin ka gen ahi. Judah kumpipa Jehoshafat a om zahtak lou hi leng, et zong kon en kei ding a, muh zong kon mu kei ding. 15 Ahihhangin, tumging tum siam khat hon pii in, a chi hi. Tua tumging siam in tumging a tum leh, Elisha tung ah Tangtawn Toupa' khut hong om hi. 16 Elisha in: Hiai Tangtawn Toupa' thugen ahi. Ama'n: Hiai phaizang kawkhukin dimsak in. 17 Ahang bel, hiai Tangtawn Toupa' thugen hi a, ama'n: Huih zong mu lou ding chin a, vuah zong mu lou ding na hi. Hinapi-a, phaizang teng tuiin dim ding a, na bawnghonte leh na ganta dangte'n dawn ding hi. 18 Hiai ahih leh Tangtawn Toupa' mitmuha thil baihlam hi a, ama'n Moab zong na khut sunga hon pe ding ahi. 19 Khawpi kulh nei peuhmah leh khawpi lian peuhmah lumlet ding chin a, singkung hoih peuhmah lah phuk ding chin a, luinak khempeuh kangtatsak ding chin a, lou hoih peuhmah lah suangtumte-a sesak ding na hi, chi hiven, a chi hi. A zingchiang kithoihna lat hunin, Edom lam apanin tui luang hong omta mai hi! Tuachi-in, tua gam ah tui hong dimta hi. 21 Moabte khempeuh in amaute dou dingin kumpipa thum hong kuan uh, chih a na za uh a, tuachi-in, michih, a teek a khang, galvan tawithei khempeuh kisamkhawmin gamgi ah a kikoih uhi. 22 Zingsang beltaka a thawhtakun, tui tung ni in a sal a, Moabte' mit ah sisan bangin a san hi. 23 Amaute'n: Hua lah sisan ahi mawk a! Tua kumpipate kisual uh a, kithat tuah ahita ve ua! Moab aw, gallak sumte delhin! a kichi uhi. 24 Ahihhangin, tua Moabte, Israelte' giahphual hong tun takun, Israelte hong dingkhia uh a, Moabte a taizak masiah uh a dou uhi. Tua bangin, Israelte'n tua gam a sim uh a, Moabte a that ekek uhi. 25 Khawpite a hihsia uh a, michih in lou hoih peuhmah ah suang a lawnlut uh a, suangin a dim vek hi. Tuinak khempeuh lah a kangtatsak uh a, singkung hoih peuhmah lah a phuk uhi. Kir Hareseth kia ah a ngeina-a suang omna muna nutsiat ahi a, suanglot khaua kigalvante kia in a uum uh a, a dou uhi. 26 Moab kumpipa'n kidouna-a vuallel ahih lam a muh takin, Edom kumpipa kiang dong phu paisuak dingin namsau tawi mi 700 a tonpih a, ahihhangin, a lawhsam uhi. 27 Tua khitin, amah muna kumpipa-a pang ding a tapa upapen a tonpih a, khawpi kulhbang tung ah kithoihnain a mah a laan hi. Israel tunga hehna nase mahmah tawh a nungkik uh a, a gam uah a kikta uhi.
Meithainu' Sathau
1 Kamsangte laka mi khat' zi Elisha kiang ah a toukou a: Na sila, ka pasal a sita. Ama'n Tangtawn Toupa zahtak ahi, chih na thei. Ahihhangin, a leibatnapa hong kuan ding a, ka tapa nihte a sila dinga kai ding ahi, a chi hi. Elisha in a dawng a: Bangchi-a hon panpih thei ding ka hia? Hon hilh dih, na inn ah bang na nei a? a chi hi. Ama'n: Na sila in inn ah sathau tawmkha loungal bangmah ka nei het kei, a chi hi. 3 Elisha in: Kuan inla, na innvengte khempeuh kiang ah bel vuak va ngenkhawm inla, tawmchik kia ngen ken. 4 Tua khit chiangin, lut inla, na tapate tawh inn kikhakkhum un. Tua bel teng ah sathau sung un. Khat a dim chiangin, kemkhe zel un, a chi hi. 5 Meithainu'n, Elisha a paisak a, a nunglamin, a tapate tawh inn a kikhakkhum uhi. A tapate'n bel hon la uh a, ama'n a na sungdim zel hi. 6 Bel teng a dim takin, a tapa kiang ah: Bel dang hon la lai in, a chi hi. Ahihhangin, ama'n: Bel om nawn kei, a chi hi. Tua khitin sathau a kangta hi. 7 Amah a vapai a, Pathian' mipa a va-hilh hi. Elisha in: Pai inla tua sathaute zuak inla, na leibatte din in. A omlaitein nang leh na tapate kivak un, a chi hi.
Shunam Numei' Tapa Hinsakna
8 Ni khat bel, Elisha, Shunam ah a hawh hi. Tua ah numei khawsathei tak khat a om hi. Ama'n an ne dingin Elisha a khou hi. Tuachi-in, amah hong pai khak tengin, an ne dingin tua ah a kinga zel hi. 9 Tua numei in a pasal kiang ah: Hiai lama hong pai pahpahpa Pathian' mi siangthou ahi, chih ka thei. 10 Inntung lam ah amah ading inndan neu khat bawlsak ni-in, tua ah lupna khat, dawhkan khat, tutna khat leh meivak khat amah adingin koihsak ni. Eite kianga hong hawh peuhpeuh chiangin tua ah giaksak ni, a chi hi. 11 Ni khat bel, Eliisha hong hawh laiin, tua a inndan ah a paitou a, tua ah a lum hi. 12 Ama'n a silapa Gehazi kiang ah: Tua Shunamnu vasam in, a chi hi. Tua bangin a vasam a, amah Elisha' mai ah a ding hi. 13 Elisha in a silapa kiang ah: Numeinu kiang ah: Koute hizahtain non buaipih a, nang adingin bang kon hihsak dia? Kumpipa kiang hiam, sepaih makaipa kiang hiam ah nang ading kon gensak ding uam? chi-in amah dong in, a chi hi. Numeinu'n: Kei, ka mite laka inn nei ka hi, a chi hi. 14 Elisha in: Amah adinga bang hihsak thei ding i hia le? a chi hi. Gehazi in: Ahihleh, ama'n tapa nei lou a, a pasal lah teekta hi, a chi hi. 15 Tua khitin, Elisha in: Amah vasam in, a chi a, a vasam a, kongkhak ah hong ding hi. 16 Elisha in: Kum nawn tubang hunin tapa khat na angpom ding, a chi hi. Ama'n: Maizen, ka toupa, nang Pathian' mi aw, na sila hon kinemkhialsak dah in! a chi hi. 17 Ahihhangin, tua numei hong gai a, Elisha hilh bangbangin, a kum nawn tubang hunin tapa a nei hi. 18 Tua naupang hong khanglian a, ni khat a buh atte laka a pa om kiang ah a vahawh hi. 19 A pa kiang ah: Ka lutang! Ka lutang! a chi hi. A pa'n sila khat kiang ah: A nu kiang ah vakha in, a chi hi. 20 Tua silapa'n amah doma, a nu kianga a vakhak nungin, nisut dong a nu tung ah a tu a, tua khitin a si hi. 21 A nu'n amah a domtou a, tua Pathian' mipa' lupna tung ah a sial hi. Tua khitin, inn a khak a, a pawtkhia hi. 22 Ama'n a pasal a sam a, a kiang ah: Hehpihtakin silate khat leh sabiltung khat hon sawl in, Pathian' mipa kianga vataai zokin kong kileh pah ding, a chi hi. 23 A pasal in: Bang hanga tuni-a amah kianga vahawh ding na hia? Kha thakni lah hilou a, Sabbath ni lah hilou a, a chi hi. Ama'n: A hoih na! a chi hi. 24 Sabiltung tuanphah a phah a, a silapa kiang ah: Na pai masa inla, kon hilh kei ngai leh awltat ken, a chi hi. 25 Tuachi-in, amah zong a kipankhia a, Karmel Mual ah Pathian' mipa kiang ah hong hawh hi. Elisha in gamlapi apan amah a na galmuh takin, a silapa Gehazi kiang ah: En dih! Huah Shunamnu a om ka chi! 26 Vataai in vatuak inla, a kiang ah: Na dam na maw? Na pasal a dam na-maw? Na tapa a dam na-maw? chi-in vadong in, a chi hi. Numeinu'n: Bangkim hoih hi, a chi hi. 27 Tua muala Pathian' mipa kiang a tun takin, a khe a valen hi. Gehazi hong pai a, amah a sawnkhia hi. Ahihhangin, tua Pathian' mipa'n: Hong kikum dah in! Mangbatna khat nei ahi, ahihhangin, Tangtawn Toupa'n hon im a, banghang hiam chih hon hilh nai kei, a chi hi. 28 Numeinu'n: Ka toupa aw, tapa kon ngen a hia? Hon lamenkhialsak ken, kon chi keia hia? a chi hi. 29 Elisha in Gehazi kiang ah: Na puanakpi kawng gak inla, ka chiangkhun la inla, vataai in. Mi na tuah leh, muakin chibai kenla, mi'n hon muah leh zong dawng ken. Tua naupangpa' mai ah ka chiang vanga in, a chi hi. 30 Ahihhangin, naupangpa' nu in: Tangtawn Toupa' hinna leh nangma' hinna sialin ka gen ahi. Hon nuse lou ding ka hi, a chi hi. Tua chi-in, Elisha a dingkhia a, amah a zuita hi. 31 Gehazi a na pai masa a, naupangpa' mai ah tua chiangkhun a nanga hi. Ahihhangin, aw hi-in, zakna hita leh bangmah a om kei hi. Tua chi-in, Elisha tuak dingin Gehazi hong taai kik a, a kiang ah: Naupangpa a khawphawk kei, a chi hi. 32 Elisha tua inn hong tun takin, a lupna tung ah naupangpa sisain a na lum hi. 33 Insung ah a lut a, kong a kikhakkhum a, Tangtawn Toupa kiang ah a thuum hi. 4 Tua khitin, lupna tung ah a kaltou a, naupangpa tung ah, kam leh kam, mit leh mit, khut leh khut sutuahin a bok hi. Tua banga a tunga a kizan leh naupangpa' chi hong lum hi. 35 Elisha a kiheikhia a, inndan sung ah a kivialleh leh a, lupna tung ah a kaltou kik a, a ma-a bangin a tung ah a vabok kik hi. Naupangpa sagihvei hong hehthiai a, a mit hong hak hi. Elisha in Gehazi a sam a, a kiang ah: Tua Shunamnu sam in, a chi a, a sam hi. Amah hong pai takin, Elisha in: Na tapa pii in, a chi hi. 37 Amah hong lut a, a khebul ah a bok a, lei si-in a kun hi. Tua khitin, a tapa a pii a, a paikheta hi.
Belsunga Sihna Gu
38 Elisha, Gilgal ah hong lehkik hi. Tua gama kial a kiak lai ahi. Tua-a kamsang omkhawmte amah tawh a kimuhkhawm sungun, ama'n a silapa kiang ah: Bel lianpi suang inla, hiai mite ading an huansak in, a chi hi. 39 A lak ua khat gamlaka loupa teh khawng khawm dingin a kuan a, gamlak khaugui khat a mu hi. A gah khenkhat a lou a, a puanakpi-a a tuun theih zah a tuun hi. Hong tun takin, a atnen a, tua bel sung ah a kha hi. Kuama'n lah bang hi hiam, chih a thei kei uhi. 40 Tua mite' adingin tua anhuan a thuk khia uh a, ahihhangin, a nek pat takun: Pathian' mi aw, belsung ah sihna om veh aw! chi-in a kikoukhia uh a, tua an a ne thei himhim kei uhi. 41 Elisha in: Anvui nei khenkhat hon la un, a chi hi. Ama'n tua anvui nei, bel sung ah a koih a: Mite nek dingin thuk uale, a chi hi. Tua bel ah guih theih bangmah a om nawn kei hi.
Mi 100 Vaakna
42 Baal Shalisha apan mi khat hong pai a, Pathian' mipa ading barlibuh min masa apan kibawl tanghou beu 20 leh tua an thak vui bangzah hiam hon puak hi. Elisha in: Mite nek dingin pia in, a chi hi. 43 A silapa'n: Mi 100 mai ah hiai bangchi'n ka lui thei dia? a chi hi. Ahihhangin, Elisha in a dawng a: Mite nek dingin pia in. Ahang bel, hiai Tangtawn Toupa' gen hiven. Ama'n: Amaute'n ne vah ding uh a, a vai zong om lai ding ahi, chi ahi, a chi hi. 4 Tua khitin, amaute' mai ah a lui a, a ne uh a, Tangtawn Toupa' gen bangin khamval a nei uhi.
Naaman' Phakna Damsakna
1 Naaman bel, Aram kumpipa' sepaihhon makailian ahi. A pu mitmuhin mi thupi leh mi zahtakhuai ahi. Ahang bel, ama' tungtawna Tangtawn Toupa'n Aramte vualzawhna na peta ahi. Amah sepaih hangsan ahi, ahihhangin phaak ahi mawk hi. 2 Tua laiin, Aram apan mi a pawlpawla kuante'n Israel apan nungaknou khat salin a kai uh a, ama'n Naaman' zi' nna a sem hi. 3 Ama'n a pi kiang ah: Ka pu, Samaria-a kamsang kiang ah va hawh peuhmah leh aw! Ama'n a phaakna na damsak ding hi a, a chi hi. 4 Naaman a pu kiang ah a va hawh a, Israel nungaknou' thugen a hilh hi. 5 Aram kumpipa'n a dawng a: Hawh tham e! Ke'n Israel kumpipa kiang ah laikhak ka gelh ding, a chi hi. Tuachi-in, Naaman a kipankhia a, ngun talen sawmkhat, kham shekel 6,000 leh puansilh kop sawmkhat a keng hi. 6 Israel kumpipa ading laikhak a puak ah hibangin a kigelh hi: Ka silapa Naaman phaakna na hihdam dingin, hiai laikhak tawh na kiang ah kon sawl hi, chi-in. 7 Israel kumpipa'n tua laikhak a sim phetin, a kumpipuan a botkek a: Kei Pathian ka hi-a hia? Ke'n mi thatin ka hingkiksak thei-a hia? Banghanga hiai mipa'n mi khat peuh a phakna ka damsak dinga hon sawl thei ahia? En dih ua, ama'n kei kinakpih hon sawm dan! a chi hi. Pathian' mi Elisha in, Israel kumpipa'n a kumpipuan a bawhkek thu a zak takin, hiai thu a khak hi: Banghanga na kumpipuan botkek na hia? Tua mipa ka kiang ah hon sawl in, hi leh ama'n Israel ah kamsang khat a om, chih a thei mai ding, a chi hi. 9 Tuachi-in, Naaman, a sakolte leh kangtalaite tawh a vapai a, Elisha' inn kongkhak bul ah a vading hi. 10 Elisha in amah kiang ah thu pua khat a sawl a: Jordan lui ah sagihvei vakisil in, hileh, na sa a damkik ding a, hihsiangin na om ding hi, a chisak hi. 11 Ahihhangin, Naaman hehsain a paikhia a: Amah ka kianga hong pawtkhia a, ka kianga hong ding a, Tangtawn Toupa, a Pathian' min sam a, ka phaakna mun tunga a khut zaka, hon damsak ngeingei dinga ngaihtuah ka hi ve. 12 Damaska luite, Abana leh Farparte, Israel luite khatpeuh sanga hoih zaw hi lou hia? Tua luitea kisilin ka siang tawk kei dia hia? a chi hi. Tuachi-in heh luain a kihei a, a paikheta hi. 13 Naaman' silate a kiang ah a vapai uh a: Pa aw, kamsangpa'n thil lianpi hih dingin hon hilh leh na hih kei dia hia? Vakisil inla, siangta in! hon chih lei leh, hih sem lou ding na hi maw? a chi uhi. 14 Tuachi-in, a kuansuk a, Pathian' mipa' hilh bangin Jordan lui ah sagihvei a vakidiah a, a sa a dam a, tuailai' sa bangin a siangta hi. 15 Tua khitin, Naaman leh a nungzuite tua Pathian' mipa kiang ah a vakileh kik uhi. Amah a mai ah a vading a: Israel ah loungal leitung khempeuh ah Pathian a om kei, chih tuin ka theita. Hehpihtakin, tu'n na silapa apan thawnpiak sang in, a chi hi. 16 Kamsangpa'n a dawng a: A nna ka seppa, Tangtawn Toupa' hinna sialin ka gen ahi. Thil khat beek ka sang kei ding, a chi hi. Naaman in kunkunta leh zong, a nial bikbek hi. 17 Naaman in: Na saan nop kei aleh, hehpihtakin, na silapa keimah puak dingin sabiltung nih puakkhop leitang hon pe ve, ahang bel, Tangtawn Toupa' mai ah loungal pathian dang' maia haltum thillatte leh kithoihnate laan nawn lou ding ka hi. 18 Ahihhangin, hiai thil khat ah, Tangtawn Toupa'n na silapa hon ngaidam hen aw: Rimon tempul sunga ka toupa kuun dinga ka baana kingaia a lut chianga kei zong ka kuun sam a kuul chiangin, ahi, tua banga Rimon tempul sunga ka kuun chiangin, Tangtawn Toupa'n hiai thu ah na silapa hon ngaidam hen, a chi hi. 19 Elisha in: Khamuangtakin paita in, a chi hi. Naaman gamla lou a tun nungin, 20 Pathian' mi Elisha' silapa Gehazi a kingaihtuah a: Ka pu zaw hiai Aram mi Naaman tunga nem lua hi veh aw, thawnpiak hon puakte a saan louh mawk. Tangtawn Toupa' hinna sialin ka gen ahi. Naaman ka vanungdelh ding a, bang hiam beek ka vala ding, a chi hi. 21 Tuachi-in, Gehazi in Naaman kintakin a vanungdelh hi. Naaman in amah delh a na muh takin, amah tuak dingin kangtalai apan a kumsuk a: A hoihlam thu-a hong tai na hina maw? a chi hi. 22 Gehazi in: A hoihlam thu hi mah e. Ka pu'n hiai gen dingin hon sawla ahi. Kamsangte laka nih, Efraim tanggam apan ka kiang ah hong hawh uh a, hehpitakin amaute ading ngun talen khat leh puansilh kop nih pia in, chi ahi, a chi hi. 23 Naaman in: Hi tham e. Talen nih la in, a chi hi. Tua banga la dingin Gehazi a kun teitei a, tua khitin, ip nihin ngun talen nih leh puansilh kop nih a tuun a, a sila nih a suan a, amaute'n Gehazi maia paiin a pua uhi. 24 Khua hong tun takun, Gehazi in, tua vante Naaman' silate apan a la a, innsung ah a kemta hi. Amaute a sawlkik a, a paita uhi. 25 Tua khitin, a pu Elisha kiang ah a valut a, a mai ah a vading hi. Elisha in: Gehazi, koia vaom na hia? a chi hi. Gehazi in a dawng a: Na silapa koimah ah hawh kei veng aw, a chi hi. 26 Ahihhangin, Elisha in a kiang ah: Tua mipa nang tuak dinga a kangtalai apan hong kumsuk laiin ka kha in nang hon ompih keia hia? Sum hi-in, puansilhte hi-in, oliv huante hi-in, grephuante hi-in, belamhonte, bawnghonte hi-in, sila pasalte, sila numeite hita leh saan hun, tubang hun ahi-a hia? 27 Naaman' phaakna nang tung leh na suante tung tuden ding ahi, a chi hi. Tua khitin, Gehazi, Elisha kiang apan a paikhia a, a phaak a, vuk bangin a ngou bebua hi.
Tuia Heitang Kilaam
1 Kamsang omkhawmpawlte'n Elisha kiang ah: En dih, nang tawh i omkhawmna mun eite adinga neu lua hi. 2 Jordan lui ah, khuam khat tek vala dingin kuansuk n'ung. Tuachi-in, i tenna ding lam n'ung, a chi uhi. Ama'n: Kuan un, a chi hi. 3 A lak ua khat in: Nang na silate hong kuanpih lou ding maw? a chi hi. Elisha in a dawng a: Kong kuan ding, a chi a, 4 amaute a vakuanpih hi. Amaute Jordan lui ah a kuansuk uh a, sing a phuk panta uhi. 5 A lak ua khat in sing a phuk laiin, a heitang tui lak ah a kia hi. Amah a kikoukhia a: Maizen aw, toupa! I khelh eive! a chi hi. 6 Pathian' mi in: Koisana kia ahia? a chi hi. A mun a etsak takin, Elisha in singhiang khat a sat a, tua ah a khesuk a, heitang a kilamsak hi. 7 Tawm in, a chi a, a kesakpa'n a sawk a, a tawm hi.
Aramte' Mittaw
8 Tua laiin, Aram kumpipa'n Isarel hong dou hi. Ama'n a uliante thu a kuppih a: Hiai mun, tua mun ah giahphual ka sat ding, a chi hi. Pathian mipa'n Israel kumpipa kiang ah thu a khak a: Aramte tua muna paisuk ding uh ahi a, tua mun tot ding pilvang in, a chi hi. 10 Tuachi-in, Pathian' mi in a genna mun Israel kumpipa'n a enchian hi. Elisha in a na hilhkholh sek manin, tua bang munte ah a kiveng thei hi. uHiai in Aram kumpipa a hehsak a, a uliante a samkhawm a: Eite laka Israel lam pang kua ahia, hon hilh lou ding maw? chi-in amaute a nawh hi. 12 A uliante khat in: Ka toupa kumpipa aw, eite laka tua bang mi om lou hi. Israela om Elisha in na lupna inndan sunga na gente nangawn Israel kumpipa hilh zel ahi aw, a chi hi. 13 Kumpipa'n thu a pia a: Kuan unla, a omna mun va theikhia un. Mi sawlin ka mansak ding, a chi hi. Amah Dothan ah a om, chi-in thu hong tung hi. 14 Ama'n sakolte, kangtalaite leh sepaihte a sawl a, amaute zankhangin a kuan uh a, tua khawpi a vaum uhi. 15 Pathian' mipa' silapa zingkhanga thou a pusuah leh, sepaihhon, sakolte leh kangtalaite tawh khawpi um khinin a mu hi. Ama'n: Ka toupa aw, bang lawh ding i hita maia le? a chi hi. 16 Kamsangpa'n a dawng a: Lau ken. Amaute tawh pangkhawm sanga eite tawh pangkhawmte tam zaw ahi, a chi hi. 17 Tuachi-in, Elisha a thuum a: Tangtawn Toupa aw, ama'n a muh theih nadingin a mit vaksak in, a chi hi. Tangtawn Toupa'n silapa' mit a vaksak a, a en a, Elisha' kimkot ah, mualte meikuang sakolte leh kangtalaitea dimin a mu hi. 18 Melma in amah hon naihsuk takin, Tangtawn Toupa kiang ah Elisha a thuum a: Hiai mite mittawtnain suai in, a chi hi. Tuachi-in, Elisha' nget bangin Tangtawn Toupa'n amaute' mit a tawsak hi. 19 Elisha in amaute kiang ah: Hiai lampi ahi kei a, hiai khawpi zong ahi kei. Kei hon zui un, keima'n na mi zonpa uh kiang ah kon pii ding, a chi hi. Tua bangin, amaute Samaria ah a pii hi. 20 Tua khawpi a tun nungun, Elisha in: Tangtawn Toupa aw, amaute' mit vaksak in, a chi hi. Tangtawn Toupa'n amaute' mit a vaksak a, a khawdah uleh, Samaria khawpi sunga om ana hi uhi. 21 Israel kumpipa'n amaute a muh takin, Elisha kiang ah: Pa, amaute ka that diam? Amaute ka that diam? a chi hi. 22 Ama'n a dawng a: Amaute that ken. Na mi matsate namsau hiam, thai hiam in na that dia hia? A nek ua, a dawn ua, a pu uh kianga a kilehkik theih nadingun, nek ding leh dawn ding pia in, a chi hi. 23 Tuachi-in, ama'n amaute adingin ankuang thupitak a lui a, a nek ua a dawn khitun, amaute a sawlkhia a, amaute a pu uh kiang ah a kilehkikta uhi. Tuachi-in, Aram apan a pawl pawla kuan sekte'n Israel gam a sim nawn kei uhi.
Samaria a Kialpi
24 Hun bangtan hiam nungin, Aram kumpipa Ben Hadad in a sepaihhonte khempeuh a kaikhawm a, a kuan a, Samaria a sim hi. 25 Tua khawpi ah kialpi a tung a, gal in a sim sung lah a sawt a, sabiltung lutang khat in ngun shekel 80 a man a, begap kab khat sehli suah sehkhat in shekel nga a man hi. 26 Israel kumpipa kulhbaang zuia a pai laiin, numei khat in kap kawmin: Ka toupa kumpipa aw, hon panpih in! a chi hi. 27 Kumpipa'n a dawng a: Tangtawn Toupa'n hon panpih kei leh, ke'n koi apan nang panpih nading la ding ka hia? Buhphual apan maw? Grep sukna apan maw? a chi hi. 28 Tua khitin, ama'n: Bang thu ahia leh? a chi hi. Numeinu'n a dawng a: Hiai numei in: Tuni-a i nek dingin na tapa hon pekhia inla, zingchiangin kei' tapa i ne ding, hon chi hi. 29 Tua-chi-in, kei' tapa ka huan uh a, ka negai uh. A zingchianga ke'n: I nek dingin nang tapa hon pekheta aw le, ka chih leh, selmang ahi, a chi hi. 30 Kumpipa'n tua numei' thugen a zak takin, a kumpipuan a botkek hi. Amah kulhbaang zuia a pai laiin, mite'n a en uh a, a puan nuaia saiippuan silh a na hi hi. 31 Ama'n: Shafat' tapa Elisha lutang tuni-a a bit lai ngeingei leh, Pathian in a lawh lawh hon lawh hen aw! a chi hi. 32 Elisha bel a innsung ah a tu a, upate a kiang ah a tu uhi. Kumpipa'n thupua mi mataisak himah leh a hong tun main, Elisha in upate kiang ah: Hiai tualthatpa'n ka lutang lak a sawm dan mu lou maw? Ngai un, thupawpa hong tun chiangin kongkhak unla, amah lutsak louin khakkip bikbek un. A pu' kalsuan a nunga hong ging hilou maw? a chi hi. 33 Amaute a houpih sung mahin thupawpa amah kiang hong tungsuk a, kumpipa'n: Hiai tuahsiatna Tangtawn Toupa apan ahi. Banghanga Tangtawn Toupa ngak lailai ding ka hia? chi ahi, a chi hi.
1 Elisha in: Tangtawn Toupa' thu ngai in. Hiai Tangtawn Toupa' thugen ahi. Ama'n: Zingchiang tubang hunin Samaria kongpi ah anvui nei se-a khat in shekel khat man ding a, barli buh sea nih in shekel khat man ding hi, a chi hi. 2 A khuta kumpipa kingaihnapa tua ulian in Pathian' mipa kiang ah: Ngai in, Tangtawn Toupa'n vaan kongpite hong ding hileh zong, hibang a tung thei peuhmah dia hia? a chi hi. Elisha in a dawng a: Na mitin zaw na mu ding a, nek zaw na ne kha kei ding! a chi hi.
Opchipna Kibeisak
3 Tua khawpi kongpi ah phaakna vei pasal li a om hi. Amaute a kihou uh a: Banghanga i sih mateng hiaia om nilouh ding i hia? 4 Khawpi sung lut ding chi lehang lah kialpi om a, si ding hang a. Hiai ah hichi om lehang lah si ding hang a, Aramte giahphual ah va pai ni-in, va kipe lut mai ni. Hon hinghawi uleh i hing ding a, hon thah uleh i si mai ding, a kichi uhi. 5 Khawmui takin a kisa uh a, Aramte giahphual ah a vahawh uhi. Tua giahphual gei a tun takun, mi kuamah a na om kei hi. 6 Tangtawn Toupa'n kangtalaite leh sakolte leh sepaihhonte' husa, Aramte a zasak a, amaute'n: Ngai un, Israel kumpipa'n eite dou dinga Hitte leh Aiguptate' kumpipate guai ahi ve! kichi uh hiven. 7 Tuachi-in, a dingkhia uh a, miallakpi ah a taaikheta uh a, a puanbukte uh, a sakolte uleh a sabiltungte uh a nusia uhi. Giahphual a om ngei bangbangin a taisan uh a, a hinna uh humbit dingin a taaita uhi. 8 Phaakna veite tua giahphual hong tung uh a, puanbukte khat ah a lut uhi. Tua ah nein a dawn uh a, ngun leh kham leh puansilhte a pawkhia uh a, a seel uhi. Hong pai kik uh a, puanbuk dang khat ah a lut uh a, van dang khenkhat a la uh a, tuate zong a seel uhi. 9 Tua khitin, a kihou uh a: I hih dik het kei. Tuni, tangthupha ngah ni hi a, eite kia'n kem a, zing khawvak dong i ngak leh zaw gawtna in hon lap ding. Kintakin pai ni-in, kumpi innpi ah thu vatun ni, a kichi uhi. 10 Tuachi-in, a vapai uh a, khawpi kongpi ngakte a galsap uh a: Aramte' giahphual ah ka vahawh uh a, kuamah a om het kei uh. Sakol leh sabiltung kikhihte kia a om a, puanbukte lah a om dan ngei bangin a kinusia hi, a chi uhi. 1 Tua kongpi ngakte'n tua thu a kikoupih uh a, tua thu mah kumpi innpi sung ah a kitun hi. 12 Kumpipa zan khangin a thoukhia a, a uliante kiang ah: Aramte'n eite tunga a thilhih uh kon hilh ding. Eite puksi dektak i hi, chih a theih manun, giahphual nusiain gam ah vakisel uh a: Amaute hong paikhe ngeingei ding uh a, tua chiangin i hingmat ding a, khawpi sung i lut kei dia, chi-a kingaihtuah uh ahi, a chi hi. A uliante khat in a dawng a: Khawpi sunga sakol omsunte nga, mi pawlkhat va-kaisak un. Amaute' dinmun leh hiaia khawsuak sun Israel dangte khempeuh dinmun tawh kibang ding a, ahi, si dinga seh hiai Israel dangte khempeuh bang lei ding uhi. Bang thu bang la om hiam vaenchian dingin amaute sawl ve ni, a chi hi. 14 Tuachi-in, kangtalai nih, a kai sakolte tawh a teelkhia uh a, kumpipa'n Aram sepaihte nung ah amaute a sawl hi. Ama'n tua kangtalai hawlte kiang ah thu a pia a: Pai unla, bang thu bang la om hiam vaenchian un, a chi hi. 15 Amaute'n Jordan lui chiang dong amaute a vanungzuih uh a, Aramte'n a nungtai nalam ua lamdung tawna puansilhte leh vandangte a thehzakgawpte uh a mu uhi. 16 Tua khitin, mipite a kuankhia uh a, Aramte' giahphual a luh uhi. Tuachi-in, Tangtawn Toupa' gensa bangin, anvui nei sea khat, shekel khatin a kizuak a, barli buh sea nih, shekel khatin a kizuak taktak hi. 17 Kumpipa'n a baan a ngaihpa tua ulian pen kongpi ngaka a koih hiven, mipite'n tua kongpi ah a tuanchil kha uh a, Pathian mipa' inn-a kumpipa hong hawh laia ama'n a na genkholh bangbangin, tua ulian a sita hi. 18 Pathian' mipa'n kumpipa kianga: Zingchiang tubang hunin, Samaria kongpi ah anvui nei sea khat shekel khatin a kizuak ding a, barlibuh sea nih shekel khat in a kizuak ding, chi-a a gen bangbanga hiai hong tung ahi. 19 Tua ulian in Pathian' mipa kiang a: Ngai in, Tangtawn Toupa'n vaan kongpi hong ding hi leh zong hibang thil a tung thei peuhmah dia hia? na chikhin a, Pathian' mipa'n: Na mitin zaw na mu ding a, nek zaw na ne kha kei ding! chi-a na dawng khin ahi mah ve. 20 Tua bang teekteeka a tunga tung ahi. Mipite'n tua kongpi-a amah tuanchil kha uh a, amah si hiven.
Shunamnu' Gam Kipekik
1 Elisha in tua numei, a tapa a hinsakkik kianga: Na sungte tawh pai inla, na teen theihnana uah vateeng phot un, Tangtawn Toupa'n kum sagih sung gamsunga kial kiak ding sepkhin ahi, a na chihsa ahi. 2 Pathian' mipa' hilh bangin tua numeinu'n a hih a, amah leh a sungte paiin, Filistiate' gam ah kum sagih sung a vateeng uhi. 3 Kum sagih a bei nungin, Filistiate' gam apan hong kilehkik a, a inn leh a gam ngen dingin kumpipa kiang ah a vahawh hi. 4 Kumpipa'n Pathian' mipa' sila Gehazi a na houpih a: Elisha' thilhih thupite khempeuh hon hilh in, a na chi hi. 5 Elisha in misi a hinsakkik dan, kumpipa kiangah Gehazi in a gen laitakin, a tapa a hinsakkik tua numei, kumpipa kianga a inn leh a gam ngen dingin hong hawh hi. Gehazi in: Ka toupa kumpipa aw, tua numei ka gen hiai ahi a, Elisha in a hinsakkik a tapa hiai ahi, a chi hi. 6 Kumpipa'n tua numei kiang ah tua thu a dong a, ama'n a hilh vek hi. Tua khitin tua thu ulian khat a mawhpawsak a, a kiang ah: Ama' neihsa khempeuh, hiai gam a nutsiat apan tuni donga a gama piang khempeuh tawh pekik vek in, a chi hi.
Ben Hadad Thahna
7 Elisha bel Damaska ah a vahawh a, Aram kumpipa Ben Hadad a na dam kei hi. Kumpipa kianga: Pathian' Mipa hiai tan dong hong hawh ding ahi, chi-a a hilh takun, 8 kumpipa'n Hazael kiang ah: Thawnpiak khat keng inla, Pathian' mipa tuak dingin vakuan in. Ama' tungtawnin Tangtawn Toupa thu vadong inla: Hiai chinatna apan ka damkik ding hiam? chih vadong in, a chi hi. 9 Hazael zong Damaska vanhoih-pente sangawngsau 40 puakkhop, thawnpiak dinga kengin, Elisha tuak dingin a kuan hi. A valut a, a maia vadingin: Aram kumpipa na tapa Ben Hadad in hon sawl a: Hiai chinatna apan ka damkik ding hiam? chi-a hon dong ahi, a chi hi. 10 Elisha in a dawng a: Pai inla, amah kiang ah: Na damkik tham ding, chi in. Ahihhangin, Tangtawn Toupa'n hon theisak a, a taktakin amah si ding ahi, a chi hi. nTua genin, Elisha in Hazael a en gegu a, a na maizum hiai masiah a en hi. Tua khitin, Pathian' mipa a kap hi. 12 Hazael in: Banghanga ka toupa kap na hia? a chi hi. Ama'n a dawng a: Israelte tunga siatna na tut ding ka theia ahi. A kulhbaangte uh meiin na hal ding a, namsauin a tangvalte uh na that ding a, a tangekte uh leilak denna'n na nei ding a, a numei gailaite uh na kuikek ding, a chi hi. 13 Hazael in: Bangchi'n na silapa, ui lei takin tua bang ka hih zou dia ahia? a chi hi. Elisha in: Nang, Aram kumpipa hong hi ding na hi, chih Tangtawn Toupa'n hon lakkhin ahi, chi-in a dawng hi. 14 Tua khitin, Hazael in Elisha a nusia a, a pu kiang ah a kilehkikta hi. Ben Hadad in: Elisha in na kiang ah bang a gen a? chi-a a dot takin, Hazael in: Na damkik ngeingei ding, chi-in hon hilh hi, chi-in a dawng hi. 15 Ahihhangin, a zing chiangin Hazael in puan sahpi khat tui ah a diah a, kumpipa maitang a khuh a, kumpipa a si hi. Tua khitin, Hazael in a mun luahin kumpipain a pang hi.
Judah Kumpipa Jehoram
16 Israel kumpipa Ahab' tapa Joram' vaihawm kum, a kum ngana ah Jehoshafat, Judah kumpipa a hih laiin, Jehoshafat' tapa Jehoram in Judah kumpipa hi-in vaihawm a pan hi. 17 Kumpipa hong hih laiin kum 32-a upa ahi a, Jerusalem ah kum giat sung vai a hawm hi. 18 Ahab' innkawte' lampite zuiin, Israel kumpipate' gamtat a zui hi. Ahang bel, ama'n Ahab' tanu khat a kitenpih man ahi. Tangtawn Toupa' mitmuhin thil gilou a hih a, 19 hinapi-in, a sila David vangin Tangtawn Toupa'n Judah a hihse nuam kei hi. Ama'n David leh a suante adinga meivak tunden ding thu na chiamkhinta hiven. 20 Jehoram' dam laiin, Judah tung ah Edom a hel a, amah adingin kumpipa tuam a kitunkhiak hi. 21 Tuachi-in, jehoram, a kangtalaite khempeuh tawh, Zair ah a taai hi. Edomte'n amah leh a kangtalai hawi makaite a na umchip uh a, amah a kisa a, zingkhangin a suakta hi. A sepaihhonte bel innlam ah a taikik uhi. 22 Tuni dongin, Judah tung ah Edom a hel den a, Libna zong a hun kibangin a hel hi. 23 Jehoram' vaihawm sunga thiltung dangte leh a thilhihte khempeuh, Judah kumpite' tungthu kigelhna laibu sunga kigelh hilou hia? 24 Jehoram, a pu a pate kiang ah a khawlta a, David' Khawpi ah amaute kiang ah a kivui hi. A tapa Ahazia in a mun a luaha, kumpipain hong pang hi.
Judah Kumpipa Ahazia
25 Israel kumpipa, Ahab' tapa Joram' vaihawm kum, a kum sawmlenihna ah Judah kumpipa Jehoram' tapa Ahazia in vai a hawm pan hi. 26 Kumpipa hong hih chilin, kum 22-a upa ahi a, Jerusalem ah kum khat sung vai a hawm hi. A nu' min Athalia ahi a, Israel kumpipa Omri' tunu ahi. 27 Ahab innkawte' lampite a zui a, Ahab' inkawte' hih bangin Tangtawn Toupa' mitmuhin thil gilou a hih hi. Ahang bel, zi leh ta-a kineihna tungtawna Ahab' innkuan tawh kitanau uh ahia ahi. 28 Ahazia bel, Ahab' tapa Joram tawh kithuahin Aram kumpipa dou dingin Ramoth Gilead ah a kuan hi. Aramte'n Joram a na liamsak uh a, 29 tuachi-in a liamma apan kidamsak dingin, Kumpipa Joram, Jezreel ah a kilehkik hi. Tua liamma bel, Ramoth-a Aram kumpipa Hazael a dou laia, Aramte' liamsak ahi. Tua nungin, Judah kumpipa, Jehoram' tapa Ahazia zong Ahab' tapa Joram mu dingin Jezreel ah a hawhsuk hi. Ahang bel, Joram liama om ahih man ahi.
Israel Kumpipa dinga Jehu Thaunilhna
1 Elisha in kamsangpawlte laka mi khat a sam a, a kiang ah: Na puanakpi kawng gak inla, hiai sathau thawl tawiin Ramoth Gilead ah vahawh in. 2 Tua lai na tun chiangin, Jehoshafat' tapa Jehu zongkhia in. Jehoshafat bel Nimshi' tapa ahi. Jehu kiang ah va hawh inla, a lawmte lak apan sam tuam inla, inndan sungnung khat ah lutpih in. 3 Tua khit chiangin, sathau thawl la inla, ama' lutung ah tua sathau buak inla: Hiai Tangtawn Toupa' thugen ahi. Ama'n: Israel tunga kumpipain thau kon nilh hi, chi ahi, chi-in phuang in. Tua khit chiangin, kong hong inla, taai in. Kizekaisak het ken! a chi hi. 4 Tuachi-in, tua kamsang tangval, Ramoth Gilead ah a va hawh hi. 5 A tun takin, sepaih ulian tukhawmte a mu hi. Ama'n: Nang, makaipa' adingin thupuak khat ka nei, a chi hi. Jehu in: A kuapen ading e? a chi hi. Ama'n: Nang, makaipa ading, a chi hi. 6 Jehu a dingtou a, innsung ah a lut hi. Tua kamsangpa'n Jehu' lutung ah sathau a buak a: Hiai Tangtawn Toupa, Israel' Pathian' thugen ahi. Ama'n: Tangtawn Toupa' mi Israelte tunga kumpipain thau kon nilh hi. 7 Na pu Ahab' innkawte na hihmanthat ding ahi. Jezebel in ka sila kamsangte' sisan leh Tangtawn Toupa' silate' sisan a suah phuba la ding ka hi. 8 Ahab' innkawte a vekpi-a mangthang ding ahi. Israela om Ahab' suante laka pasal a tawpna dong, sal hi-in noplen hita leh, satkhe ding ka hi. 9 Ahab innkawte khempeuh Nebat' tapa Jeroboam innkawte leh Ahija' tapa Baasha' innkawte banga bawl ding ka hi. 10 Jezebel ahih leh, Jezereela leilak mun khata uite'n negai ding uh a, kuama'n amah vui lou ding ahi, chi ahi, chi-in a phuang hi. Tua khitin, kong a hong a, a taaita hi. 11 Jehu zong a ulian hihpihte kiang ah a pusuak a, a lak ua khat in: Bangkim a hoih lam ahina maw? Banghanga hiai mihai na kianga hong hawh ahia? a na chi hi. Jehu in a dawng a: Hiai mi na thei uh a, bang thilte gen hiam, chih zong na thei uhi, a chi hi. 1 Amaute'n: Thei kei ung. Hon hilh in, a chi uhi. Jehu in: Ama' hon hilh hiai ahi: Hiai Tangtawn Toupa thugen ahi. Ama'n: Israel tunga kumpipa-a thau hon nilh ka hi, chi ahi, chi hi, a chi hi. 13 Amaute'n kintakin a puanakpite uh a suah pah uh a, ama' nuai ah tua kailawn tung ah a phah uhi. Tua khitin, pengkul a mut uh a: Jehu kumpipa ahi! chi-in a kikou uhi.
Joram leh Ahazia Thahna
14 Tuachi-in, Jehoshafat' tapa Jehu in Joram thah nading a simsawm hi. Jehoshafat bel Nimshi' tapa ahi. Tua laiin, Joram leh Israelte khempeuh in Aram kumpipa Hazael apanin Ramoth Gilead a hu uhi. 15 Ahihhangin, kumpipa Joram bel Aramte' liamsakna kihihdam dinga Jezereela kilehkik ahi. Tua liamma bel Aram kumpipa Hazael tawh kidounaa liamma ahi. Jehu in: Na ngaihdan hibang ahih leh, mi kuapeuh pawtkhiaa vapai a, Jezereela thu a vatut louh nadingin khawpi apan kuamah pawtkhesak kei le chin, a chi hi. 16 Tua khitin, a kangtalai ah a lut a, Jezereel ah a taisuk hi. Ahang bel, Joram lah tua-a om a, Judah kumpipa lah Joram mu dinga tua-a hawhsuk hiven. 17 Jezereela innsang tunga ding galvil mi in Jehu' sepaih tua lam zuana hong paite a muh takin: Sepaihhon hiai lam hon zuan ka mu, chi-in a kikoukhia hi. Joram in: Sakoltungtuang mi khat hon sam inla, amaute va tuak a: Lemna thu tawh hong pai na hina uhiam? chi-a vadong dingin, amah sawl in, chi-in thu a pia hi. 18 Jehu tuak dingin, tua sakoltungtuangpa a taikhia a, amah kiang ah: Hiai kumpipa' thugen ahi. Ama'n: Lemna thu tawh hong pai na hina uhiam? chi ahi, a chi hi. Jehu in a dawng a: Nang lemna thu tawh bang kisaina nei na hia? Ka nung ah pai in, a chi hi. Galvilpa'n thu a tun nawn a: Thu pawpa amaute kiang a vatung a, ahihhangin hong kilehkik kei, a chi hi. 19 Tuachi-in, kumpipa'n sakoltungtuang nihna a sawlkhia a, amah amaute kiang a vatun takin: Hiai kumpipa' thugen ahi. Ama'n: Lemna thu tawh hong pai na hina uhiam? chi ahi, a chi hi. Jehu in a dawng a: Nang lemna thu tawh bang kisaina nei na hia? Ka nung ah pai in, a chi hi. 20 Galvilpa'n thu a tun nawn a: Amah amaute kiang a tung a, ahihhangin, amah zong hong kilehkik tuan kei. Tua kangtalai hong kihawl dan Jehu' hawi dan a bang. Mihai bang maiin a hawi, a chi hi. 21 Joram in: Ka kangtalai hon bulhsak un, chi-in thu a pia a, a bulhkhit takun, Israel kumpipa Joram leh Judah kumpipa Ahazia a kumkhia uh a, Jehu tuak dingin amau' kangtalai tuak ah a tuang uhi. Jezereel mi Naboth' lou mun ah Jehu a tuak uhi. 22 Joram in Jehu a muh takin: Jehu, lemna thu tawh hong pai na hina maw? chi-in a dong hi. Jehu in a dawng a: Na nu Jezebel' milim biakna leh aisanna a dim sung teng bangchi'n lemna a om thei dia, a chi hi. 23 Joram a kihei a, a taai a, Ahazia a galsap a: Ahazia, kikhema kilehbawlna om ei! a chi hi. 24 Jehu in a thalphel a lai a, Joram a liangpak tak ah a kap a, thai in a lungtang a kapkha a, a kangtalai sung ah a puksuk hi. 25 Jehu in a kangtalai hawi ulian Bidkar kiang ah: Amah dom inla, Jezereel mi Naboth' lou mun ah paai in. Tangtawn Toupa'n hiai mipa' tungthu a genkholh laia a pa Ahab nunga kangtalaia nang leh kei i tuankhawm lai thei gige in. Tangtawn Toupa'n: Zanni in Naboth' sisan leh a tapate' sisan ka mu, chi-in a genkhia a, hiai lou mun ah tua sisan suahna kon dinsak ngeingei ding, chi-a Tangtawn Toupa'n a phuankhiak thei in. Tu'n amah dom inla, Tangtawn Toupa' gen bangbangin, tua lou mun ah paai in, a chi hi. 27 Judah kumpipa Ahazia in tua thiltung a muh takin, Beth Hagan lampi ah a taitou hi. Jehu in kikou kawmin a delh a: Amah zong that un! a chi hi. Ibleam kianga Gur zotna lampi ah, a kangtalai sung ah amah a liamsak uh a, ahihhangin, amah Megido ah a suakta a, tua ah a si hi. 28 A silate'n kangtalaiin amah a pua uh a, Jerusalem a tun uhi. Tua David Khawpi ah ama' hankhuk ah, a pu a pate kiang ah a vui uhi. 29 Ahab' tapa Joram' vaihawm kum, a kum sawmlekhatna ah, Ahazia, Judah kumpipa hong hita ahi.
Jezebel Thahna
30 Tua khitin, Jehu, Jezereel ah a hawh hi. Jezebel in Jehu hong hawh thu a zak takin, a mit khawng a kinuh a, a sam khawng a na-bawl lamdang a, tawhlet ah a dakkhia hi. 31 Jehu, kongpi-a a lut takin, Jezebel in: Na pu thatpa nang Zimri in lemna muanna tawh hong pai na hi hia? a na chi hi. 32 Ama'n tawhlet a entou a: Kei lama kua ahia? Kua e? a chitou hi. Michilgeh nih hiam, thum hiam in a ensuk uhi. Jehu in: Amah hon lawnkhesuk un, a chi hi. Tuachi-in, amaute'n Jezebel a lawnkhesuk uh a, a sisan in baang leh amah tuanchil sakolte a thehkha hi. 34 Jehu a lut a, nein a dawn hi. Ama'n: Tua hamsethuaknu la unla, vui un, amah kumpi' tanu hi buang ven, a chi hi. 35 Ahihhangin, amah vui dinga a pawtkhiak takun, a luguh leh a khete leh a khutte loungal bangmah a mu kei uhi. 36 Amaute a lut kik uh a, Jehu a hilh uhi. Jehu in: Hiai Tangtawn Toupa'n a silapa, Tishbe mi Elisha tungtawna a gen ahi. Ama'n: Jezereela gam mun khat ah uite'n Jezebel' sa a negai ding uhi. 37 Jezebel' pumpi, Jezereela leilak ah ekchiim bang ahi ding a, kuama'n: Hiai Jezebel ahi, a chi thei kei ding, chi ahi, a chi hi.
Ahab' Innkawte Thahna
1 Samaria ah, Ahab innkawte' suante' tapa 70 a om uhi. Tuachi-in, Jehu in laikhakte a gelh a, Samaria-a Jezereel uliante leh upate, tua baan ah Ahab' tate donte kiang ah a khak hi. Ama'n tua laikhak ah: 2 Hiai laikhak na muh phet chiangun, na pu uh' tate noute kianga om a hih manun leh kangtalaite leh sakolte, kulhnei khawpi leh galvante nei na hih manun, 3 na pu uh' tapate laka a hoih pen leh muanhuai pen teelkhia unla, a pa' kumpitutphah ah tusak un. Tua khit chiangin, na pu uh innkawte huin pang un, a chi hi. 4 Ahihhangin, amaute a mulkim uh a, kumpipa nih in a nan zawh louh uh amah eite'n bangchi nan zawh ding? a chi uhi. 5 Tuachi-in, kumpi innpi ukpa, khawpi ukpa, upate leh Ahab' tate donte'n Jehu kiang ah thu a khak uh a: Koute na silate ka hi uh a, na gen peuhmah ka hih ding uh. Kuamah kumpipain ka bawl kei ding uh. Hoih na saksak hih in, a chi uhi. 6 Tua khitin, Jehu in laikhak nihna a khak a: Kei lama pang na hih ua, hon thuman ding na hih uleh, na pu uh' tate' lu na la unla, zingchiang tubang hunin Jezereel ah ka kiang ah hong pai un, a chi hi. Kumpi tapate, a vek-ua 70, tua khawpi sunga makaite, amaute khoite kiang ah a om uhi. 7 Tua laikhak hong tun takin, hiai mite'n kumpi tapa 70-te a man uh a, a that uhi. A lutangte uh lawh sunga koih-in, Jezereel ah Jehu kiang ah a khak uhi. 8 Thupawpa hong tun takin, Jehu kiang ah: Kumpi tapate' lutangte hon pawta uh, a chi hi. Tua khitin, Jehu in: Khawpi kongpi ah tua lutangte pawlniha vumin zingsang dong koih un, chi-in thu a pia hi. 9 A zingchiang zingsangin Jehu a pawtkhia a, mi khempeuh' mai ah a ding a: Noute mawhneiloute na hi uh. Kei ka hi ka pu thah sawma thatpa. Ahihhangin, hiaite khempeuh thatpa kua ahia? 10 Tangtawn Toupa'n Ahab innkawte mawhsakna a gente malkhat zong lawhsam lou ding ahi, chih thei un. Tangtawn Toupa'n a sila Elija tungtawna a chiamsa tangtun ahita, a chi hi. 11 Tuachi-in, Jehu in Jezereela om Ahab innkawte, kuapeuh a that a, a makaite khempeuh, a lawm naite leh a siampite zong a that a, khat beek zong hinghawiin a nuse kei hi. 12 Tua khitin, Jehu a kipankhia a, Samaria zuanin a pai hi. Belamchingte' belam mulmetna inn ah, 13 Judah kumpipa Ahazia tanaute pawlkhat a mu a, amaute kiang ah: Kuate na hi ua? chi-in a dong hi. Amaute'n a dawng uh a: Ahazia' tanaute ka hi uh a, kumpipa' innkawte leh kumpinu' nu innkawte chibai buk dinga hong hawhsuk ka hi uh, a chi uhi. 14 Ama'n thu a pia a: Amaute hingmat un! a chi hi. Tuachi-in, amaute a hingmat uh a, Beth Eked tuikhuk kiang ah a that uhi amaute pasal 42 ahi uhi. Ama'n hinghawia nutsiat a nei kei hi. Ama'n tua mun a nutsiat nungin, amah tuak dinga hong pai, Rekab' tapa Jehonadab a tuak hi. Jehu in amah chibai a buk a, a kiang ah: Ke'n nang kon thukimpih bangin, nang kei non thukimpih hia? a chi hi. Jehonadab in a dawng a: Hon thukimpih mah ing, a chi hi. Jehu in: Tua bang a hih leh, na khut hon khak in, a chi hi. Ama'n a khut a khak a, Jehu in a kangtalai ah a kailut tou hi. 16 Jehu in: Hon zui inla, Tangtawn Toupa adinga ka phatuamngaih dan mu in, a chi hi. Tuachi-in, a kangtalaia tuangsakin a tonpih hi. 17 Samaria hong tun takin, Jehu in tua muna om lai Ahab' innkawte a that vek hi. Tangtawn Toupa'n Elija kianga a thugen bangbangin amaute a hihmangthang hi.
Baal Nasemte Thahna
18 Tua khitin, Jehu in mite khempeuh a kaikhawm a, amaute kiang ah: Ahab in Baal' nna neuchik a sem a, Jehu in nakpi-in a sem ding. 19 Tu'n Baal' kamsangte khempeuh, a nasemte khempeuh leh a siampite khempeuh samkhawm un. Baal maia kithoihna thupitak laan ding ka hih manin, amaute a kimlou omsak kei un. Hiaia hong hawhlou peuhmah hinghawia om lou ding uhi, a chi hi. Ahihhangin, Jehu bel, Baal nasemte khempeuh that nuama zekhemna zanga gamta ahi. 20 Jehu in: Baal pahtawi dingin khawmpi lian sam un, a chi a, tuachi-in, khawmpi lian a phuang uhi. 21 Tua khitin, Israel gam sung teng ah thu a khak a, Baal nasemte khempeuh hong pai uh a, hong pai lou kuamah a om kei hi. Baal tempul mong langkhat apan mong langkhat dong a dim masiah a kihen uhi. 22 Tua khitin, Jehu in puankoihna kempa kiang ah: Baal nasemte khempeuh ading kumpipuan hon la in, a chi a, ama'n amaute ading kumpipuante hon la hi. 23 Tua khitin, Jehu leh Rekab' tapa Jehonadab, Baal tempul sung ah a lut uh a, Jehu in Baal nasemte kiang ah: Dakkhia unla, Tangtawn Toupa silate noute lak ah omsak kei un, Baal nasemte kia omsak un, a chi hi. 24 Tuachi-in, kithoihnate leh haltum thillatte laan dingin amaute a lut uhi. Tua laitakin, Jehu in kongpua ah vengmi 80 a koih a, amaute kiang ah: Na lak ua khatpeuh in, na khut ua kep dinga kon piak dingte khatpeuh na suahtaksak ngeingei uleh, tua banga a suakta mi' hinna taanga a suaktasakpa hinna la ding ka hi, chi-in amaute a vau hi. 25 Jehu in haltum thillat a lat khit phetin, vengmite leh uliante thu a pia a: Lut unla, tempul sunga omte that unla, kuamah suaktasak kei un, a chi hi. Tuachi-in, amaute namsauin a that uh a, vengmite leh uliante'n tua siluangte a lawnkhia uh a, tua khitin Baal' tempul sungnunga biakna mun ah a lut uhi. 26 Baal tempul sung apanin tua suang zek siangthou a lakhia uh a, meiin a hal uhi. 27 Tua Baal suang zek siangthou a hihsia uh a, Baal tempul zong a laichimgawp uh a, tuni dongin, mite'n dailenna munin a zang uhi. 28 Tua bangin, Jehu in Israel apan Baal biakna a hihgawp hi. Ahihhangin, Nebat' tapa Jeroboam khelhnate, tua-a Israel a khelhsak-nate, Bethel leh Dana kham bawngnoute biakna a tawpsan kei hi. 30 Tangtawn Toupa'n Jehu kiang ah: Ka mitmuha thil dik na hih hoih manin leh Ahab innkawte tunga hih dinga lungsima ka neih khempeuh na hihtak manin, na suante khang li dong, Israel kumpitutphah tung ah a tu ding uhi, a chi hi. 31 Hinapi-in, Tangtawn Toupa, Israel Pathian' dan, a lungtang khempeuh tawh zui dingin a pilvang kei a, Jeroboam in Israel a khelhsakna tua khelhnate a kiheisan kei hi, 32 Tua hun laiin, Tangtawn Toupa'n Israel gam letdan a neusak panta hi. Hazael in Israelte a gam sung teng uah a nuaisiah hi. 33 Tua bel, Jordan lui suahlam, Gilead gam teng ahi, Tua Gilead gam lah Gad leh Reuben leh Manase gam ahi a, Aroer apan Amon Guam zuiin, Gilead tawnin Bashan dong ahi. 34 Jehu' vaihawm sunga thltung dangte, a thilhih khempeuh leh a sepkhiakte khempeuh, Israel kumpite tungthu kigelhna laibu sunga kigelh hi lou hia? 35 Jehu, a pu a pate kiang ah a khawlta a, Samaria ah a kivui hi. A tapa Jehoahaz in a mun a luah a, kumpipain hong pang hi. 36 Jehu in Samaria-a Israel tunga a vaihawm sung kum 28 ahi.
Athalia leh Joash
1 Ahazia nu Athalia in a tapa a sita, chih a muh takin, kumpi innkawte hihmangthang dingin a kipan hi. 2 Ahihhangin, Kumpipa Jehoram' tanu tua Ahazia' sanggam nu Jehosheba in Ahazia' tapa Joash a la a, kumpi tapate lak apan a gumang hi. Tua kumpi tapate bel thah dinga om dek ahi uhi. Jehosheba in Joash leh a donnu Athalia' khut apan humbit dingin lupna dantan sung ah a seel hi. Tuachi-in, amah thahin a om kha kei hi. 3 Athalia in kum guk sung tak tua gam a uk sungin, Joash bel, a donnu tawh Tangtawn Toupa' tempul sunga seelin a om hi. 4 A kum sagihna ah, Jehoiada in sepaih 100 pawlpawl tunga makaite, tua Karte leh tua vengmite a samsak a, Tangtawn Toupa' tempul ah amah kiang ah a piisak hi. Amaute tawh kal ah thukhun a bawl a, Tangtawn Toupa' tempul ah a kichiamsak hi. Tua khitin, amaute kiang ah kumpipa' tapa a ensak hi. 5 Ama'n amaute thu a pia a: Na hih ding uh hiai ahi: Sabbath ni-a sep nei pawl thumte laka pang, sehthum suah sehkhat, kumpi innpi veng ding leh 6 a seh khat dang Sur Kongpi-a om ding, tempul veng dinga kikhelte omna nunga, kongpi-a om dingte na hi uhi. 7 Pawl nih dangte laka kihel noute, Sabbath ni-a sep nei loute, kumpipa adinga tempul veng ding na hi vek uhi. 8 Kumpipa kimkot ah om unla, michih in na galvan uh tawi un. Noute hong naih peuhmah na thah ding uh ahi. Kumpipa a paina peuh ah a kiang nai ah om un, a chi hi. 9 Sepaih 100 pawlpawl tunga makaite'n siampi Jehoiada' thupiak bangin a hih uhi. Amaute'n a mite chiat uh a pii uh a, Sabbath ni-a sep neite hi-in, sep neilou-a awlte hitaleh, siampi Jehoiada kiang ah hong hawh uhi. 10 Ama'n tua makaite' khut ah Kumpipa David' teipite leh lumte, tua tempul sunga kikoihte, a pia hi. nVengmite lah a galvan uh tawi chiatin, kumpipa kimkot ah maitam kiang leh, tempul kiang ah, tempul simlam apan mallam dongin a om uhi. 12 Jehoiada in kumpipa tapa hon piikhia a, kumpilukhu a khusak hi. Thukhun kawpi khat a pia a, amah kumpipa-in a phuangkhia hi. Amaute'n amah thau a nilh uh a, mipite'n khut a beng uh a: Kumpipa' damsawt hen! chi-in a kikou zuazua uhi. 13 Athalia in vengmite leh mipite' husa a zak takin, Tangtawn Toupa' tempula om mipite kiang ah a va hawh a, 14 a et leh, ngeina dana khuampi kianga kumpipa ding a mu hi. Uliante leh pengkul mutte, kumpipa kiang ah a ding uh a, gamsunga mite khempeuh nuamin a kikou uh a, pengkul a mut uhi. Tua laiin, Athalia in bel a kumpipuan a botkek a: Lehbawla kikhot khiakna! Lehbawla kikhot khiakna! chi-in a kikou hi. 15 Siampi Jehoiada in sepaih 100 pawlpawl tunga makaite, sepaihhonte tunga thuneite thu a pia a: Tua nu, sepaihte kal ah hon piikhia unla, amah zui peuhmah namsauin that un, a chi hi. Ahang bel, siampi in: Tangtawn Toupa' tempul sunga amah thah louh ding ahi, a na chikhinta-a ahi. 16 Tuachi-in, amah kumpi innpi tuala sakolte lutna mun a tun takin a man uh a, tua mun ah a that uhi. 17 Tua lai ah Jehoiada in amaute, Tangtawn Toupa' mite ahih na dingun, Tangtawn Toupa leh kumpipa leh mipite kal ah thukhun a bawl hi. Kumpipa leh mipite kal ah zong thukhun a bawl hi. 18 Gamsunga mipite khempeuh Baal' tempul ah a hawh uh a, a laichimgawp uh a, maitamte leh milimte a satgawp uh a, tua maitamte' mai ah Baal siampi Matan a that uhi. Tua khitin, siampi Jehoiada in Tangtawn Toupa' tempul ah vengmite a koih hi. 19 Sepaih 100 pawlpawlte' tunga makaite, Karte, vengmite leh gamsung mipite a tonpih a, Tangtawn Toupa' tempul apanin kumpipa a pii uh a, vengmite kongpi kichi-a lutin, kumpi innpi sung a lutpih uhi. Kumpipa'n kumpitutphah a luah a, 20 mipite a lungnuam mahmah uhi. Athalia, kumpi innpi-a namsaua thah ahih manin, khawpi sung a dai sipsip hi. 21 Joash in vai hawm pat laiin kum sagih-a upa ahi.
Tempul Puahphatna
1 Jehu' vaihawm kum, a kum sagihna ah Joash, kumpipa hong hi a, Jerusalem ah kum 40 sung vai a hawm hi. A nu' min Zibia ahi a, Beersheba mi ahi. 2Siampi Jehoiada in amah a thuhilh sung teng, Joash in Tangtawn Toupa' mitmuhin thil dik a hih hi. 3Ahihhangin, munsangte hihsiat ahi kei a, mite'n tua ah kithoihnate laanin, gimnamtuite a hal uhi. 4 Joash in siampite kiang ah: Tangtawn Toupa' tempula thillat siangthoua hong kitawi sumte lakhawm un. Tua sumte bel kisimpina-a kidongte, mimal kichiamna apan kimute leh utthu-a tempula kitawi sumte ahi. 5 Siampi chih in tua sumte lakhawm henla, tempul siatna peuhmah puahnain kizang hen, a chi hi. 6 Ahihhangin, Kumpipa Joash' vaihawm kum, a kum 23-na ah, siampite'n tempul a puahpha nai kei lai uhi. 7 Tua bang ahih manin, Kumpipa Joash in siampi Jehoiada leh siampi dangte a sam a: Tempul hihsiatnate banghanga puahpha lou na hi ua? Na sumkemte uapan sum la nawn kei unla, na laksate uh tempul puahphat nadingin pekhia un, a chi hi. Tua siampite'n mipite apan sum don nawn louh ding leh amau mah in tempul puahphat louh dingin a thukim uhi. Siampi Jehoiada in singkuang khat a la a, a sin a vutvang hi. Tua singkuang pen, Tangtawn Toupa' tempul lut chianga taklam panga maitam kiang ah a koih hi. Tua tempul lutna kong ngak siampite'n, Tangtawn Toupa' tempula hong kitawi sumte tua singkuang sung ah a koih uhi. 10 Tua singkuang sung ah sum tam a omta chih a theih chiangun, kumpipa laigelhpa leh siampilian hong pai uh a, Tangtawn Toupa' tempula sum hong kitawite a sim uh a, ipte ah a thunkhe zel uhi. nSum phazah a kichiamteh khit chiangin, tempul puahphatna nasep enkai dinga seh mite khut ah a pe zel uhi. Tua sumte apanin Tangtawn Toupa' tempul puaha nasemte thaman a pia uhi. Amaute bel singsiamte leh innlam siamte, 12 suanglep siamte leh suangsek siamte ahi uhi. Amaute'n Tangtawn Toupa' tempul puah nading sing leh suangseksate a lei uh a, tempul puahphatna-a seente khempeuh a pia uhi. 13 Tempula sum hong kitawite bel Tangtawn Toupa' tempula zat ding ngun kuangdaite, meiek siaknate, tuithehna belkuangte, pengkulte, ahih kei leh kham leh nguna kibawl thilte bawlnain a kizang kei hi. 14 Nasemte a kipia a, amaute'n tempul puahphatnain a zang uhi. 15 Nasemte' thaman pe dinga sum piaknate apanin a gelhthawh sum chiamtehna a kingiat kei hi. Ahang bel, amaute genbaang mahmah loua diktat sipsip ahi ua ahi. 16 Mawhna thillatte leh khelhna thillatte apan sumte bel Tangtawn Toupa' tempul ah a kilalut kei hi. Siampite tan ahi. 17 Tua hun lai khawngin, Aram kumpipa Hazael a kuantou a, Gath a sim a, a la hi. Tua khitin, Jerusalem sim dingin a kihei a, 18 ahihhangin, Judah kumpipa Joash in a pu a pa Judah kumpipate, Jehoshafat, Jehoram leh Ahazia' latsa thil zek siangthoute khempeuh leh ama' latsa thawnpiak zek siangthoute leh Tangtawn Toupa' tempul sum koihna-a khamte khempeuh a la a, Aram kumpipa Hazael kiang ah a khak a, Hazael bel Jerusalem apan a nungkikta hi. 19 Joash' vaihawm sunga thiltung dangte, a thilhihte khempeuh ahih leh, Judah kumpite' tungthu gelhna laibu sunga kigelh hi lou hia? 20 A uliante'n amah thah a simsawm uh a, Sila zotna lampi ah, Beth Milo mun ah a that petmah uhi. 21 Amah that uliante bel Shimeath' tapa Jozabad leh Shomer' tapa Jehozabad ahi uhi. Joash a sita a, David Khawpi ah, a pu a pate kiangah a kivui hi. A tapa Amazia in a mun a luah a, kumpipain hong pang hi.
Israel Kumpipa Jehoahaz
1 Judah kumpipa Ahazia' tapa Joash' vaihawm kum, a kum 23-na ah, Jehu' tapa Jehoahaz, Samaria ah Israel kumpipain hong pang a, kum sawmlesagih sung vai a hawm hi. 2 Nebat' tapa Jeroboam' khelhnate, tua khelhnatea Israel a khelhsaknate zuiin, Tangtawn Toupa' mitmuhin thil gilou a hih a, tua khelhnate a tawpsan kei hi. 3 Tuachi-in, Israel tunga Tangtawn Toupa' hehna a kuang a, Ama'n hun sawtpi sung Aram kumpipa Hazael leh a tapa Ben Hadad khut nuai ah amah a koih hi. 4 Tua khitin, Jehoahaz in Tangtawn Toupa' deihsakna a zong a, Aram kumpipa'n Israel a nuaisiahna nasia a muh manin, 1 Kum Tangtawn Toupa'n a ngetna a ngaikhia a, 5 Israel adingin hukhepa khat a pia a, Aram' vangletna apan a suakta uhi. Tuachi-in, Israelte, hun paisa-a bangin amau inn tek ah a teeng uhi. 6 Ahihhangin, Jeroboam' innkawte khelhnate, tuatea Israel a khelhsaknate a kiheisan kei uhi. Tua tham louin, Samaria ah Ashera song a ding lai hi. 7 Jehoahaz' sepaihhon lak ah, sakoltungtuang 50 leh kangtalai sawm khat leh khe sepaih 10,000 loungal, a dang bangmah a om nawn kei hi. Ahang bel, Aram kumpipa'n a dang teng hihsiatsak a, buhchil laia buhvaite banga bawl hiven. 8 Jehoahaz' vaihawm sunga thiltung dangte, a thilhihte leh a sepkhiakte ahih leh, Israel kumpite' tungthu kigelhna laibu sunga kigelh hilou hia? 9 Jehoahaz, a pu a pate kiang ah a khawlta a, Samaria ah a kivui hi. A tapa Jehoash in a mun a luah a, kumpipain hong pang hi.
Israel Kumpipa Jehoash
10 Judah kumpipa Joash' vaihawm kum, a kum 37-na ah, Jehoahaz' tapa Jehoash, Samaria ah Israel kumpipain hong pang a, kum sawmleguk sung vai a hawm hi. nAma'n Tangtawn Toupa' mitmuhin thil gilou a hih a, Nebat' tapa Jeroboam khelhnate, tuatea Israel a khelhsaknate a kiheisan kei a, tuate a hih lailai hi. 12 Jehoash' vaihawm sunga thiltung dangte, a thilhihte khempeuh leh a sepkhiakte a hih leh, Judah kumpipa Amazia tunga a galbawl thu khawng tawh, Israel kumpite' tungthu kigelhna laibu sunga kigelh hi lou hia? 13 Tuachi-in Jehoash, a pu a pate kiang ah a khawlta a, Jeroboam in a kumpitutphah a luah hi. Jehoash, Samaria ah, a pu a pate kiang ah a kivui hi. 14 Elisha a chi a na a, tua chinatna a sihpih hi. Israel kumpipa Jehoash amah veh dingin a kuansuk a, a va kah a: Ka pa aw! Ka pa aw! Israel kangtalaite leh sakoltung-tuangte aw! chi-in a kap hi. Elisha in: Thalphel khat leh thaltang bangzah hiam hon la in, a chi a, ama'n hon la hi. 16 Elisha in Israel kumpipa kiang ah: Thalphel na khut in leen in, a chi a, tuachi-in, kumpipa'n a len a, Elisha in kumpipa khutte tung ah a khut a koih hi. 17 Tua khitin, Elisha in: Suahlam tawhlet hong in, a chi a, kumpipa'n a hong hi. Tua takin, Elisha in: Thaltang kap in! a chi a, ama'n a kapkhia hi. Elisha in: Tangtawn Toupa' vualzawhna thaltang, Aram tunga vualzawhna! chi-in a phuang hi. Ama'n: Afek ah Aramte na hihmangthang sipsip ding, a chi lai hi. 18 Tua khitin, ama'n: Thaltang tawm in, a chi a, kumpipa'n a tawm hi. Elisha in, a kiang ah: Leilak sat in, a chi hi. Ama'n thumvei a sat a, a tawp hi. 19 Pathian' mipa a tung ah a heh a: Leilak ngavei hiam, gukvei hiam na sat ding hi a, tua hi leh, Aram kumpipa zou ding chin a, hihmangthang sipsip ding hi chin a. Tun lah, thumvei kia zou ding na hita ve, a chi hi. 20 Elisha a sita a, a kivui hi. Hichi ahi a, Moab galsim pawlte, khawkhal hun tengin tua gam sung ah a lut naak uhi. Khatvei Israelte'n misi khat a vui laiun, thakhatin, galsim pawl khat a mu uhi. Tuachi-in, misipa luang, Elisha' hankhuk ah a pailut uhi. Tua siluang in Elisha' guhte a sukkhak takin, tua mi hong hingkik a, a khein hong dingtou hi. 22 Aram kumpipa Hazael in Jehoahaz' vaihawm sung teng Israel a nuaisiah hi. 23 Ahihhangin, Tangtawn Toupa bel, Abraham, Isak leh Jakob tawh kala a thukhun hangin, Israelte tung ah hehpih a siam a, amaute a lainat a, amaute awlmawhna a lak hi. Tuni dongin amaute hihsiat ding, ahih kei leh, a ompihna apan sawlmang ding a ut kei hi. 24 Aram kumpipa Hazael hong si a, a tapa Ben Hadad in a mun a luah a, kumpipain hong pang hi. 25 Tua khitin, Jehoahaz' tapa Jehoash in Hazael' tapa Ben Hadad khut apanin, kidouna-a a pa Jehoahaz khut apan Ben Hadad in a laksak khawpite a sutkik hi. Jehoash in Ben Hadad thumvei a zou a, Israel khawpite a sutkik hi.
Judah Kumpipa Amazia
1 Israel kumpipa, Jehoahaz' tapa Jehoash' vaihawm kum, a kum nihna ah, Judah kumpipa Joash' tapa Amazia in vai a hawm pan hi. 2 Kumpipa a hong hihin kum 25-a upa ahi a, Jerusalem ah kum 29 sung vai a hawm hi. Anu' min Jehoadin ahi a, Jerusalem apan ahi. 3 Amazia in Tangtawn Toupa' mitmuhin thil dik a hih a, ahihhangin, a pa David hih bangin a hih kei hi. Bangkim ah a pa Joash a zui hi. 4 Ahihhangin, munsangte a kipaikhe kei a, mipite'n tua ah kithoihnate leh gimnamtui halte a hih lailai uhi. 5 Ama'n kumpigam kiptaka a let nungin, a pa kumpipa that tua uliante a that hi. Hinapi-in, tua tualthatte' tapate bel, Mosi' Dan Laibu sunga kigelh bangin a that kei hi. Tua Mosi' Dan Laibu sunga bel Tangtawn Toupa' thupiak hibanga kigelh ahi: Pate, a tate uh hanga thah ding ahi kei a, tate zong, a pate uh hanga thah ding ahi kei, mi ama' khelhna hanga si ding ahi, chi-in. 7 Amah ahi, Chi Phaizanga Edomte 10,000 zou a, kidouna-a Sela la a, Joktheel chi-a minlawhpa. Tuni dongin tua minin a kisam hi. 8 Tua khitin, Amazia in Israel kumpipa Jehoahaz' tapa Jehoash kiang ah thu a khak hi. Jehoahaz bel Jehu' tapa ahi. Tua thu a khakna ah: Hong pai inla kimaituah ni, chi-in a tawng hi. 9 Ahihhangin Israel kumpipa Jehoash in Judah kumpipa Amazia a dawng a: Lebanona loulingnei in Lebanona sidar singkung kiang ah thu a khak a: Ka tapa' zi dingin na tanu hon pia in, a chi hi. Tua khitin, Lebanona gamsa khat hong pai a, a khe in tua loulingnei a chilgawpta hi! 10 Nang Edom na zou ngeitak a, tu'n nong kiuangsak ahi. Na vualzawhna sial inla, ahihhangin inn ah ki om suk in! Banghanga buaina zong a, nangma' pukna ding leh Judah pukna ding zong zenzen ding na hia? a chi hi. Ahihhangin, Amazia in a ngaikhe nuam kei a, Israel kumpipa Jehoash in amah a douta hi. Amah leh Judah kumpipa Amazia, Judah gama Beth Shemesh ah a kimaituah uhi. 12 Judah bel Israel' zawhthal gawpin a om a, michih a inn zuanin a taaita hi. 13 Israel kumpipa Jehoash in Judah kumpipa Amazia Beth Shemesh ah a man hi. Amazia bel Joash' tapa ahi a, Joash lah Ahazia' tapa ahi. Tua khitin, Jehoash, Jerusalem ah a paitou a, Jerusalem kulhbang, Efraim Kongpi apan Akiu Kongpi dong, tong 400 khawnga sau, a laichim hi. 14 Tangtawn Toupa' tempul leh kumpi innpi-a gou koihkhawmna-a om ngun leh kham leh, thildangte khempeuh a la vek hi. Galmatte zong a la a, Samaria ah a chiahkikta hi. 15 Jehoash' vaihawm sunga thiltung dangte, a thilhihte leh a sepkhiakte, Judah kumpipa Amazia tunga a galbawl thu tawh, Israel kumpite' tungthu kigelhna laibu sunga kigelh hilou hia? 16 Tuachi-in, Jehoash, a pu a pate kiang ah a khawlta a, Samaria ah, Israel kumpite' kiang ah a kivui hi. A tapa Jerobaom in a mun a luah a, kumpipain hong pang hi. 17 Judah kumpipa, Joash' tapa Amazia bel Israel kumpipa Jehoaz' tapa Jehoash sih nung kum sawmlenga a dam lai hi. 18 Amazia' vaihawm sunga thiltung dangte ahih leh, Judah kumpite' tungthu kigelhna laibu sunga kigelh hi lou hia? 19 Mi'n Jerusalem ah amah a sawm uh a, Lakhish ah a taai hi. Ahihhangin, Lakhish ah mi a delhsak uh a, tua ah a that uhi. 20 Sakolin amah hon pawkik uh a, David Khawpi Jerualem ah, a pu a pate kiang ah a kivui hi. 21 Tua khitin, Judah gam mite khempeuh in Azaria a pii uh a, a pa Amazia mun ah kumpipain a bawl uhi. Amah kum sawmleguka upa ahi. 22 Amah ahi, Amazia a pu a pate kianga a khawl nunga, Elath lamthak a, Judah gam adinga pekikpa.
Israel Kumpipa Jeroboam Nihna
23 Judah kumpipa Joash' tapa Amazia' vaihawm kum, a kum sawmlengana ah, Israel kumpipa Jehoash' tapa Jeroboam, Samaria ah kumpipain hong pang a, kum 40 sung vai a hawm hi. 4 Tangtawn Toupa' mitmuhin thil gilou a hih a, Nebat' tapa Jeroboam' khelhnate, tuatea Israel a khelhsaknate khat beek a kiheisan kei hi.25 Amah ahi, Tangtawn Toupa, Israel Pathian in Amitai' tapa, a sila Jona tungtawna a thugen bangbanga, Israel gamgi, Lebo Hamath apan Araba Tuipi dong puahphapa. Jona bel, Gath Hefer mi, kamsang ahi. 26 Tangtawn Toupa'n Israela michih, suaklesal hi-in noplen hita leh, a thuak dan uh a mu hi. Amaute panpih ding lah kuamah a om kei hi. 27 Tua baan ah, Tangtawn Toupa'n vaanni nuai apan Israel min nulmang ding na chi lou ahih manin, Jehoash' tapa Jeroboam khut tungtawnin amaute a hukhia hi. 28 Jeroboam' vaihawm sunga thiltung dangte, a thilhih khempeuh leh galthu-a a sepkhiakte, Israel adinga Damaska leh Hamath a lakkik thu tawh, Israel kumpite' tungthu kigelhna laibu sunga kigelh hilou hia? Hamath bel Uaudi-a na hita ahi. 29 Jeroboam bel Israel kumpite a pu a pate kiang ah a khawlta a, a tapa Zekharia in a mun a luah a, kumpipain hong pang hi.
Judah Kumpipa Azaria
1 Israel kumpipa Jeroboam' vaihawm kum, a kum 27-na ah, Judah kumpipa Amazia' tapa Azaria* in vai a hawm pan hi. 2 Amah kumpipa-a hong pang a, Jerusalema vai hon hawm pat laiin, kum sawmlehguka upa ahi. 3 A pa Amazia hih bangin, Tangtawn Toupa' mitmuhin thildik a hih a, 4 ahihhangin, mun sangte a beisak kei a, mipite'n tua ah kithoihnate laanin gimnamtuite a hal uhi. 5 Tangtawn Toupa'n kumpipa a sih ni dong phaaknain a gimsak a, inn tuam khat ah a teeng hi. Kumpipa' tapa Jotham in kumpi innpi tung ah thu a nei a, a gam mite a uk hi. 6 Azaria' vaihawm sunga thiltungte, a thilhihte khempeuh, Judah kumpite tungthu kigelhna laibu sunga kigelh hi lou hia? 7 Azaria bel a pu a pate kiang ah a khawlta a, David Khawpi ah, amaute kiang ah a kivui hi. A tapa Jotham in a mun a luah a, kumpipain hong pang hi.
Israel Kumpipa Zekharia
8 Judah kumpipa Azaria' vaihawm kum, a kum 38-na ah, Jeroboam' tapa Zekharia, Samaria ah, Israel kumpipain hong pang a, kha guk sung vai a hawm hi. Ama'n a pu a pate bangin, Tangtawn Toupa' mitmuhin thil gilou a hih a, Nebat' tapa Jeroboam khelhnate, tuatea Israel a khelhsaknate a kiheisan kei hi. 10 Jabesh' tapa Shalum in Zekharia thah a sawm a, mite' mai ah a suai a, a that a, a mun a luah a, kumpipain hong pang hi. nZekharia' vaihawm sunga thiltung dangte, Israel kumpite' tungthu kigelhna laibu sunga kigelh hi lou hia? 12 Tuachi-in, Tangtawn Toupa'n Jehu' khanga a thugen a tangtung hi. Ama'n: Na suante khang li dong Israel kumpitutphah tung ah a tu ding uh, a na chi hi.
Israel Kumpipa Shalum
13 Judah kumpipa Uzia vaihawm kum, a kum 39-na ah, Jabesh' tapa Shalum kumpipain hong pang a, Samaria ah kha khat sung vai a hawm hi. 14 Tua khitin, Gadi' tapa Menahem, Tirza apan Samaria ah a kuantou a, Samaria ah, Jabesh' tapa Shalum a suai a, a that a, a mun a luah a, kumpipain hong pang hi. 15 Shalum' vaihawm sunga thiltung dangte, thil simsawma a makaihna thu tawh, Israel kumpite' tungthu kigelhna laibu sung ah a kigelh hi. 16 Tua hun laiin, Menahem in, Tirza akipanin, Tifsa leh khawpi sunga om kuapeuh leh a kiang naia omte a dou hi. Tua bel, amaute'n a kongpite uh a na hon nop louh man uh ahi. Tifsa a buluh a, numei gailaite khempeuh a pikkham vek hi.
Israel Kumpipa Menahem
17 Judah kumpipa Azaria' vaihawm kum, a kum 39-na ah, Gadi' tapa Menahem, Israel kumpipain hong pang a, Samaria ah kum sawm sung vai a hawm hi. 18 Ama'n Tangtawn Toupa' mitmuhin thil gilou a hih a, a vaihawm sungteng khempeuh, Nebat' tapa Jeroboam khelhnate, tuatea Israel a khelhsaknate a kiheisan kei hi. 19 Tua khitin, Asuria kumpipa Pul in tua gam a dou a, Menahem in ama' huhna a ngah a, kumpigam a ukna hatsak dingin, ngun talen 1,000 a na pia hi. 20 Menahem in hiai sum Israel apan a lak teitei ahi. Asuria kumpipa kianga piak dingin gam sunga a haute'n ngun shekel 50 tek a piak uh a kul hi. Tuachi-in, Asuria kumpipa a nungkik a, tua gam sung ah a taam nawn kei hi. 21 Menahem' vaihawm sunga thiltung dangte leh a thilhih khempeuh ahih leh, Israel kumpite' tungthu kigelhna laibu sunga kigelh hi lou hia? 22 Tuachi-in, Menahem, a pu a pate kiang ah a khawlta a, a tapa Pekahia in a mun a luah a, kumpipain hong pang hi.
Israel Kumpipa Pekahia
23 Judah kumpipa Azaria' vaihawm kum, a kum 50-na ah, Menahem' tapa Pekahia, Samaria ah, Israel kumpipain hong pang a, kum nih sung vai a hawm hi. 24 Pekahia in Tangtawn Toupa' mitmuhin thilgilou a hih hi. Nebat' tapa Jeroboam' khelhnate, tuatea Israel a khelhsaknate a kiheisan kei hi. 25 A nuaia ulianpente khat, Remalia' tapa Peka in amah thah a sawm hi. Gilead mi 50 a tonpih a, Samaria-a kumpi innpi kulh sung ah, Argob leh Arie tawh, Pekahia a thatkhawm uhi. Tuachi-in, Peka in Pekahia a that a, ama' mun a luah a, kumpipain hong pang hi. 26 Pekahia' vaihawm sunga thiltung dangte leh a thilhihte khempeuh ahih leh, Israel kumpite' tungthu kigelhna laibu sung ah a kigelh hi.
Israel Kumpipa Peka
27 Judah kumpipa Azaria' vaihawm kum, a kum 52-na ah, Remalia' tapa Peka, Samaria ah, Israel kumpipain hong pang a, kum 20 sung vai a hawm hi. 8 Ama'n Tangtawn Toupa' mitmuhin thilgilou a hih a, Nebat' tapa Jeroboam' khelhnate, tuatea Israel a khelhsaknate a kiheisan kei hi. 29 Israel kumpipa Peka' vaihawm laiin, Asuria kumpipa Tiglath Pilesar hong kuan a, Ijon, Abel Beth Maaka, Janoa, Kadesh leh Hazor a la hi. Gilead leh Galili, Naftali gam teng uapin zong a la a, a mite Asuria ah a pawmang hi. 30 Tua khitin, Ela' tapa Hoshea in Remalia' tapa Peka thah a sawm hi. Amah a suai a, a that a, tua khitin, ama' mun a luah a, Uzia' tapa Jotham' vaihawm kum, a kum 20-na ah, kumpipain hong pang hi. 31 Peka' vaihawm sunga thiltung dangte leh a thilhihte khempeuh ahih leh, Israel kumpite' tungthu kigelhna laibu sunga kigelh hi lou hia?
Judah Kumpipa Jotham
32 Israel kumpipa Remalia' tapa Peka' vaihawm kum, a kum nihna ah, Judah kumpipa Uzia' tapa Jotham in vai a hawm pan hi. 33 Kumpipa a hong hihin kum 25-a upa ahi a, Jerusalem ah kum sawmlehguk sung vai a hawm hi. Ami' min Jerusha ahi a, Zadok' tanu ahi. 34 Jotham in a pa Uzia hih bangbangin, Tangtawn Toupa' mitmuhin thildik a hih hi. 35 Ahihhangin, munsangte hihbei ahi kei a, mipite'n tua ah kithoihnate laanin, gimnamtuite a hal lailai uhi. Jotham in Tangtawn Toupa' tempula Kongpi Saknung a bawlthak hi. 36 Jotham' vaihawm sunga thiltung dangte leh a thilhihte khempeuh ahih leh, Judah kumpite' tungthu kigelhna laibu sunga kigelh hi lou hia? Tua hun laiin, Tangtawn Toupa'n Aram kumpipa Rezin leh Remalia' tapa Peka, Judah dou dingin a sawl panta hi. 38 Jotham, a pu a pate kiang ah a khawlta a, David Khawpi, a pa' khawpi ah a kivui hi. A tapa Ahaz in a mun a luah a, kumpipain hong pang hi.
Judah Kumpipa Ahaz
1 Remalia' vaihawm kum, a kum sawmlesagihna ah, Judah kumpipa Jotham' tapa Ahaz in vai a hawm pan hi. 2 Ahaz, kumpipa hong hihin kum 20-a upa ahi a, Jerusalem ah kum sawmleguk sung vai a hawm hi. A pa David banglou takin, Tangtawn Toupa, a Pathian' mitmuhin thil dik a hih kei hi. 3 Israel kumpipate lampite a tawn a, Israelte' maia Tangtawn Toupa'n a hawlkhiak namte' lampi kihhuaite tawnin a tapa nangawn mei ah a laan hi. 4 Mualtung leh singkung zaipha nuaia munsangte ah kithoihnate a laan a, gimnamtuite a hal hi. 5 Tua khitin, Aram kumpipa Rezin leh Israel kumpipa, Remalia' tapa Peka Jerusalem sim dingin a kuantou uh a, Ahaz a dou uh a, ahihhangin, a zou kei uhi. 6 Tua hun laiin, Aram kumpipa Rezin in Judah gam mite hawlkhiain, Aram adingin Elath a lakik hi. Tua khitin, Elath ah Edomte a lut uh a, tuni dongin a teeng lai uhi. 7 Ahaz in Asuria kumpipa Tiglath Pilesar kiang ah thupawte a sawl a: Kei na sila, na nuaia toukai ka hi. Hong kuantou inla, Aram kumpipa leh Israel kumpipa khut apan hong hukhia in, amaute'n kei hon dou uh ahi, a chisak hi. 8 Ahaz in Tangtawn Toupa' tempul leh kumpi' innpi sunga gou koihkhawmna-a om ngun leh kham a la a, Asuria kumpipa kiang ah thawnpiakin a khak hi. 9 Asuria kumpipa'n thumanin, Damaska a dou a, a la hi. A sunga tengte, Kir ah a pawmang a, Rezin zong a that hi. Tua khitin, Kumpipa Ahaz, Asuria kumpipa Tiglath Pilesar tuak dingin Damaska ah a hawhtou hi. Ama'n Damaska ah maitam khat a mu a, siampi Uria kiang ah maitam limgelh, a dawh dingdan a kip a kawia lak khat a khak hi. nTuachi-in, siampi Uria in maitam khat, Kumpipa Ahaz in Damaska apan a limgelhsa a khak maitam geldan khempeuh bangbangin a dawh a, Kumpipa Ahaz hong kik main a zousiang hi. 12 Damaska apan kumpipa hong kik takin, tua maitam a mu a, a va naih a, a tung ah thillatte a laan hi. 13 A haltum thillat leh angah thillat a laan a, a dawn thillat a sungbua a, tua maitam tung ah lemna thillat sisan a theh hi. 14 Tempul mai lama maitam thak leh Tangtawn Toupa' tempul kal apanin, Tangtawn Toupa' maia ding tua sumsan maitam hon la a, tua maitam thak' mallam pang ah a koih hi. 15 Tua khitin, Kumpipa Ahaz in siampi Uria kiang ah hiai thupiakte a pia hi: Tua maitam thak kongpi tung ah zingsang haltum thillat leh nitak an thillatte leh gamsung mi khempeuhte' haltum thillatte leh a an thillatte uh leh a dawn thillatte uh laan in. Tua maitam tung ah haltum thillatte leh kithoihnate' sisan theh in. Ahihhangin, ke'n zaw makaihna zon nadingin tua sumsan maitam ka zang ding, a chi hi. 16 Siampi Uria in zong Kumpipa Ahaz' thupiak bangbangin a hih hi. 17 Kumpipa Ahaz in a pang baangthuahte a lakhia a, tuikuang daite zong a tunna apan a lakhia hi. A Tuipi limlang zong, a douna sumsan bawngtalte apan a lakhia a, suang tung ah a tung hi 18 Sabbath ni adinga tempula a tungnei inn kilam zong a lakhia a, Tangtawn Toupa' tempula kumpite lut nadinga kongpi kibawl zong Asuria kumpipa zahtaknain a lakhia hi. 19 Ahaz' vaihawm sunga thiltung dangte leh a thilhihte ahih leh, Judah kumpite' tungthu kigelhna laibu sunga kigelh hi lou hia? 20 Ahaz zong a pu a pate kiang ah a khawlta a, David Khawpi ah, amaute kiang ah a kivui hi. A tapa Hezekia in a mun a luah a, kumpipain hong pang hi.
Israel Kumpipa Nunung Hoshea
1 Judah kumpipa Ahaz' vaihawm kum, a kum sawmlenihna ah, Ela' tapa Hoshea, Israel kumpipain hong pang a, kum kua sung vai a hawm hi. 2 Ama'n Tangtawn Toupa' mitmuhin thilgilou a hih a, ama' ma-a Israel kumpipate hih bangin bel a hih kei hi. 3 Asuria kumpipa Shalmaneser, Hoshea dou dingin hong kuantou hi. Hoshea bel Shalmaneser nuaia toukaia siah pia ahi. 4 Ahihhangin, Hoshea in Aigupta kumpipa So kiang ah palai a sawl a, kumsima Shalmaneser kianga a piak siah a pe nawn kei a, Shalmaneser lehbawla amah adinga muanhuailou a suak hi. Shalmaneser in hiai thu a theihkhiak taka Hoshea dou ahi. Tuachi-in, Shalmaneser in Hoshea a man a, suangkul ah a khum hi. 5 Asuria kumpipa'n gamsung khempeuh a sim a, Samaria douin kum thum sung a umchip hi. 6 Hoshea' vaihawm sung, a kum kuana ah Asuria kumpipa'n Samaria a la a, Israelte, Asuria ah a pawmang hi. Hala ah bang, Habor Lui geia Gozan ah bang leh Medes gama khawpite ah bang a teengsak hi.
Khelhna Hanga Israel Pukmangna
7 Hibang teng hong tunna hang bel, Israelte, tua Tangtawn Toupa a Pathian uh, Aigupta kumpipa Faro' vangletna, Aigupta apan amaute piikhepa tunga a khelh man uh ahi! Tu'n pathian dangte a biaksan uh a, 8 Tangtawn Toupa'n a mai uapan a hawlkhiak namte' gamtatte leh Israel kumpipate'n a laklut uh gamtatte a zui uhi. 9 Israelte'n Tangtawn Toupa, a Pathian uh tung ah a simin thil diklou a hih uhi. Galvil buksang apan khawpi kulhnei dong, a khawpite khempeuh uah munsangte a kilam uhi. 1 Mualsang tung teng leh sing nuai teng ah suang zek siangthoute leh Ashera songte a phut uhi. nTangtawn Toupa'n a mai uapan a hawlkhiak namte' hih bangin, munsang teng ah gimnamtuite a hal uhi. Tangtawn Toupa hehsak thil giloute a hih uh a, 12 Tangtawn Toupa'n: Hiai na hih ding uh ahi kei, na chi mahleh, milimte a bia uhi. 13 Tangtawn Toupa'n kamsangte leh muhkholhna neite khempeuh tungtawnin Israel leh Judah a na vauhilh a: Na gamtat giloute uh kiheisan unla, na pu na pate uh kianga zuih dinga ka piak leh ka sila, tua kamsangte tungtawna noute kon piak Dan bangbangin, ka thupiakte leh dankhun zui un, a chi hi. 14 Ahihhangin, a ngai nuam kei uh a, Tangtawn Toupa, a Pathian uh muanglou a pu a pate uh bangin, genhakin a om uhi. 15 A dankhunte leh a pu a pate uh tawh kala thukhun a bawl leh amaute a theihpihnate a nolh uhi. Mannabei pathiante zuiin, amau leh amau mannabei a kisuah uhi. Tangtawn Toupa'n a kim a kiang ua namte tawh kisaiin: Amaute' hih bangin hih kei un, chi-in thu na pe mah leh, amaute hih dandan a zui uh a, Tangtawn Toupa'n amaute' hih louh dinga a khamte a hih teitei uhi. 16 Tangtawn Toupa, a Pathian uh' thupiakte khempeuh a kiheisan uh a, amau adinga sunthawh bawngnou lim bia-in a kun uh a, Baal a bia uhi. 17 A tapate uleh a tanute uh mei ah a laan uh a, aisan leh bum a chiing uh a, Tangtawn Toupa' mitmuha thilgilou hih dinga kikhawngkhiain amah a hehsak uhi. 18 Tuachi-in, Israel tung ah Tangtawn Toupa a heh mahmah a, a ompihna apanin amaute a koihmang hi. Judah nam kia nutsiatin a om a, 19 Judah nangawn in Tangtawn Toupa, a Pathian uh' thupiakte a zui kei uh a, Israel in a na patsa tatdante a zui uhi. 20 Tua bang ahih manin, Tangtawn Toupa'n Israelte khempeuh a nolh a, amaute thuakgimsakin, ama' ompihna apan a koihmang mateng, milokte' khutsung ah amaute a pekhia hi. 21 Ama'n David innkawsung apanin Israel a laikhia a, Nebat' tapa Jeroboam, a kumpipa dingun a kibawl uhi. Jeroboam in Tangtawn Toupa zuihna apan Israel a zolkhia a, khelhna thupitak a hihsak hi. 22 Israelte'n Jeroboam khelhnate khempeuh kiptakin a zui uh a, tuate a kiheisan kei uhi. 23 Tangtawn Toupa'n a ompihna apan amaute a koihkhiak mateng, tua bangin a nungta uhi. Ama'n a sila kamsangte tungtawna, a vauhilhsa bangbang a hita hi. Tuachi-in, Israel mipite a gam uapan lakmangin a om uh a, Asuria-a puakmangin a om uhi. Tu dongin tua ah a om lai uhi.
Samaria Kiluahkik
24 Asuria kumpipa'n Babulon khawng, Kutha khawng, Ava khawng, Hamath khawng leh Sefarvaim khawng apan mi hon pii a, Israelte khengkhe dingin Samaria gam khawpite ah a teengsak hi. Amaute'n Samaria a kilak uh a, a khawpite ah a teeng uhi. 25 Amaute tua-a a teen masak laiun, Tangtawn Toupa a be kei uhi. Tuachi-in, Tangtawn Toupa'n amaute lak ah humpinelkaite a sawllut a, tuate'n mi pawlkhat a that uhi. Asuria kumpipa kiang ah hibangin thu a kitun hi: Mi na piikhiak a, Samaria khawpitea na teensakte'n tua gam pathian in bang ngiat hiam, chih a thei kei uh a, tua hangin, tua gam pathian in amaute lak ah humpinelkaite a sawllut a, amaute a that uhi, chi-in. 27 Tua khitin, Asuria kumpipa'n hiai thupiak a pia a: Samaria-a salmata na mat uh siampi khat, tua-a teeng ding leh tua gam pathian in a ngiat sinsak dingin piikik un, a chi hi. 28 Tuachi-in, Samaria apan sala piikhiak siampite khat Bethela teeng dingin hong pai a, Tangtawn Toupa bangchi biak ding hiam, chih a sinsak hi. 29 Ahihhangin, piandana nam tuamtuam in a tenna na uah, amau' pathian a kibawl chiat uh a, Samaria mite'n munsang a bawlte ua, biakna bukte ah a tung uhi. 30 Babulon apan hong paite'n Sukoth Benoth a bawl uh a, Kutha apan hong paite'n Nergal a bawl uh a, Hamath apan hong paite'n Ashima a bawl uh a, Avate'n Nibhaz leh Tartak a bawl uh a, Sefarvaimte'n Sefarvaim pathiante Adramelekh leh Anamelekh maia kithoihnain a tate uh meiin a hal uhi. 32 Amaute'n Tangtawn Toupa a bia uh a, ahihhangin, munsangtea buktatea biakna makaih dingin amau' mi namkim siampi dingin a kibawl uhi. 33 Amaute'n Tangtawn Toupa a bia uh a, ahihhangin, piikhiaka a omna uh namte' tatdan zuiin, amau' pathiante nna zong a sem kawmkawm uhi. 34 Tuni dongin, a tatdan lui uh a zui teitei uhi. Tangtawn Toupa lah a be taktak kei uh a, Tangtawn Toupa'n Jakob' suante kianga a piak dankhunte, thusehte, leh thupiakte lah a zui kinken kei uhi. Tua Jakob bel Tangtawn Toupa'n Israel chi-a a minvawhpa ahi. 35 Tangtawn Toupa'n Israelte tawh kala thukhun a bawl laiin: Pathian dang be kei unla, amaute' mai ah kun kei unla, a nna uh semin, a mai uah kithoihnate laan kei un. 36 Noute, vangletna thupi leh banzaka, Aigupta apan hon piikhetoupa Tangtawn Toupa ahi na biak ngeingei ding uh. Ama' mai ah na kun ding uh a, kithoihnate na laan ding uh ahi. 37 Noute adinga a gelh tua dante, thusehte, dankhunte leh thupiakte zui dingin na pilvang ding uh ahi. Pathian dangte be kei un. 38 Noute tawh kala thukhun ka bawl mangngilh kei unla, pathian dangte be kei un. 39 Tangtawn Toupa, na Pathian uh be zaw un. Amah ahi na melmate khempeuh uh' khut apan hon humbit dingpa, chi-in thu a pia hi. 40 Ahihhangin, amaute'n a ngaikhe nuam kei uh a, a tatdan luite uh a lenkip teitei uhi. 41 Hiai mite'n Tangtawn Toupa a biak lai nangawnun, a milimte uh' nna a sem kawmkawm uhi. Tuni dongin, a tate uleh a tute un a pu a pate uh hih mah a hih lailai uhi.
Judah Kumpipa Hezekia
1 Israel kumpipa, Ela' tapa Hoshea' vaihawm kum, a kum thumna ah, Judah kumpipa, Ahaz' tapa Hezekia in vai a hawm pan hi. 2 Amah kumpipa hong hih chilin, kum 25-a upa ahi a, Jerusalem ah kum 29 sung vai a hawm hi. A nu' min Abija ahi a, Zekharia' tanu ahi. 3 Hezekia in a pu David hih bangin, Tangtawn Toupa' mitmuhin thil dik ahih hi. 4 Munsangte a beisak a, suang zek siangthoute a sattam a, Ashera songte a phukpai hi. Mosi' bawl sumsan gul zong a gawizan hi, ahang bel, tua hun donga Israelte'n a maia gimnamtui hal lai uh hiven. Tua sumsan gul bel Nehushtan chi-in a minvawh uhi. 5 Hezekia in Tangtawn Toupa, Israel Pathian a muang hi. Judah kumpite lak ah, ama' ma hi-in, ama' nung hita leh, amah bang a om kei hi. 6 Ama'n Tangtawn Toupa a lenkip tinten a, amah zuih a tawp kei hi. Tangtawn Toupa'n Mosi a piak thupiakte a zui hi. Tua bang ahih manin, Tangtawn Toupa'n amah a ompih a, amah zong a sep peuhmah ah a mavang hi. Amah Asuria kumpipa tung ah a hel a, tua kumpipa' nna a sem kei hi. 8 Galvilbuk sang apan kulhnei khawpi dong, Filistiate a zou a, Gaza leh a gam chiang dong a zou hi. 9 Kumpipa Hezekia' vaihawm kum, a kum lina ah, Asuria kumpipa Shalmaneser in Samaria douin a kuan a, a umchip hi. Tua bel Israel kumpipa, Ela' tapa Hoshea' vaihawm kum, a kum sagihna ahi. 10 Kum thum bei takin, Asuria in Samaria a la hi. Tuachi-in, Hezekia' vaihawm kum, a kum gukna, Israel kumpipa Hoshea' vaihawm kum, a kum kuana ah Samaria zawhin a om a, nAsuria kumpipa'n Israelte Asuria ah a pawmang a, Hala ah bang, Habor Lui geia Gozan ah bang leh Medes gam khawpite ah bang a teengsak hi. 12 Hibang teng hong tunna hang bel, amaute'n Tangtawn Toupa, a Pathian uh thu a ngaihkhiak louh ua, a thukhun a manlouh man uh ahi. Tua bel, Tangtawn Toupa' sila Mosi' thupiakte mah ahi. Tua thupiakte a ngaikhe kei uh a, zuih zong a zui kei uhi. Kumpipa Hezekia' vaihawm kum, a kum sawmlelina ah, Asuria kumpipa Senakherib in Judah khawpi kulhneite khempeuh a dou a, a la hi. 14 Tuachi-in, Judah kumpipa Hezekia in Lakhish ah Asuria kumpipa kiang ah thu a khak a: Ka na khialta. Kei apan nungkikta inla, non ngiat bangbang kon pe ding, a chi hi. Asuria kumpipa'n Judah kumpipa piak ding ngun talen 300 leh kham talen 30 a bikhiah hi. 15 Tuachi-in, Hezekia in Tangtawn Toupa' tempul sunga om leh kumpi innpi-a gou koihkhawmna-a om ngun leh kham khempeuh Asuria kumpipa a pevekta hi. 16 Hiai hunin, Judah kumpipa Hezekia in Tangtawn Toupa' tempul kongkhakte leh kongkhak biangte tuamna khamte a khokkhia a, Asuria kumpipa a pevek hi.
Senakherib in Jerusalem Vau
17 Asuria kumpipa a sepaih makai lianpen leh a uliante leh gamkuan sepaih makai, sepaihhon tampi tawh Lakhish apan Jerusalema kumpipa Hezekia kiang ah a sawl hi. Jerusalem ah hong hawhtou uh a, Dil Saknung tuilakna ah, Puansawpte Gam zotna lampi ah a khawl uhi. 18 Kumpipa a samsak uh a, kumpi innpi ukpa Hilkia' tapa Eliakim tawh, laigelhpa Shebna tawh, laibu-a thil chiamtehpa, Asaf tapa Joa tawh, amaute tuak dingin hong kuankhia uhi. Gamkuan sepaih makaipa'n amaute kiang ah: Hibangin Hezekia hilh un: Hiai kumpipa thupi Asuria kumpipa' thugen ahi. Ama'n: Na kimuanna koia na ngak ahia? 20 Thuhilhna leh kidou dan gelsiamna nei na kichi a, ahihhangin a hawmpi gen na hi. Ka tunga na hel, kua muang na hia? 2 Tu'n ngai in, Aigupta muang na hi a, amah pumpeng chiangkhun kitamsa, mi tua ah kingai leh a khut sun ding a, liamsak ding ahi! Amah muangte khempeuh adinga Aigupta kumpipa Faro tua bang hi ahi. 22 Ka kianga: Tangtawn Toupa ka Pathian uh muang ka hi uh, chi na hih leh, Hezekia in Judah leh Jerusalem kianga: Hiai maitam maia na biak ngeingei ding uh ahi, chi-a, a munsangte leh a maitamte a hihbeisakpa amah hilou maw? 23 Tu'n hong pai inla, ka pu, Asuria kumpipa kiang ah thuum in. A tungtuang ding na neih leh, sakol 2,000 hon pia ning. 24 Kangtalaite leh sakoltungtuangte hon pe dinga Aigupta muang na hih leh, ka pu' uliante laka neupen khat zong bangchi nawhkik zou ding na hia? 25 Tua baan ah, Tangtawn Toupa' thu zaloupi-a hiai mun dou a, hihgawp dinga hong kuan non sa a hia? Tangtawn Toupa mahmah in hiai gam dou a, hihgawp dinga kei hon hilh ahi, chi ahi, a chi hi. 26 Tua khitin, Hilkia' tapa Eliakim leh Shebna leh Joa in tua gamkuan sepaih makaipa kiang ah: Hehpihtakin na silate Aram pauin hon houpih in, theina hi-ung. Kulhbaang tunga omte zakin Hebru pauin hon houpih dah in, a chi uhi. 27 Ahihhangin, tua sepaih makaipa'n a dawng a: Ka pu'n na pu uleh noute' kiang kia-a hiai thilte gen dinga hon sawl a, hiai kulhbaang tunga tu noute banga a ek uh ne a, a zun uh dawn dingte kianga hon sawl lou hia? a chi hi. 28 Tua khitin, tua sepaih hon makaipa a ding a, Hebru pauin ngaihtakin thu a gena: Kumpipa thupi, Asuria kumpipa thu na ngai un! 29 Kumpipa' thugen hiai ahi. Ama'n: Hezekia kikhemzousak kei un. Ama'n ka khut apan noute hon humbit zoulou ding ahi. 30 Hezekia in: Tangtawn Toupa'n eite hon humbit ngeingei ding ahi. Hiai khawpi, Asuria kumpipa' khuta piakkhiak hi lou ding ahi, a chih chiangin, Tangtawn Toupa muang dingin kithuzawhsak kei un. Hezekia thugen ngaikhe kei un. Asuria kumpipa' thugen hiai ahi. Ama'n: Kei hon kilempih unla, ka kiang ah hong paikhia un. Tua hi leh, noute tekin noumau' grepgui leh theipi kung apan na ne chiat ding uh a, noumau' tuikhuk apan tui na dawn chiat ding uh. 32 Kei hong paia, noumau' gam bangbang gam khat, buh tamna leh grepzu tamna, an leh grephuan tamna, oliv kung leh khuaizu tamna kon tut mateng tua bangin na om ding uh. Hinna teel unla, sihna teel kei un. Hezekia in: Tangtawn Toupa'n eite hon humbit ding ahi, a chih chiangin kipikhialsak kei un. 33 Nam khat kuapeuh' pathian in Asuria kumpipa' khut sung apan ama gam a humbit ngeita ahia? 34 Hamath leh Arpadte' pathiante koia om ahi ua? Sefarvaim, Hena leh Ivate' pathiante koia om ahi ua? Ka khut sung apan Samaria a humbit ngeita ua hia? 35 Hiai gamte' pathiante a kua pen in ahia, ka khutsung apan a gam a hutkhiak ngeitak? Tangtawn Toupa'n ka khut sung apan Jerusalem bangchi humbit mahmah ding hiam? 36 Ahihhangin, kumpipa Hezekia in: Amah dawng kei un, chikhin ahih manin, mipite a dai sipsip uh a, dawnna bangmah a gen kei uhi. 37 Tua khitin, Hilkia' tapa Eliakim, tua kumpi' innpi ukpa leh laigelhpa Shebna leh Asaf tapa Joa, laibu-a thil chiamtehpa, a puansilhte uh botkeksain Hezekia kiang ah a va hawh uh a, tua gamkuan sepaih makaipa' thugen a va hilh uhi.
Jerusalem Hutkhiakna Genkholhna
1 Kumpipa Hezekia in hiai thu a zak takin, a puansilhte a botkek a, saiippuan a silh a, Tangtawn Toupa' tempul ah a lut hi. 2 Kumpi innpi ukpa Eliakim leh laigelhpa Shebna leh siampi makaite, saiippuan silhin, Amoz' tapa kamsang Isai kiang ah a sawl hi. 3 Amaute'n: Hiai Hezekia' thugen ahi. Ama'n: Hiai naungekte a pian dektaka nau dom ding omlou, nau neikhe dinga thahaatna lah omlouh ni bangin, mangbat ni, taihilh ni leh zahlak ni ahi. 4 Asuria kumpipa'n Pathian hing gense dinga a gamkuan sepaih makaipa' thugente, Tangtawn Toupa na Pathian in na zain, Tangtawn Toupa na Pathian in tua a zakte hangin amah a taihilh ding ahi mawh ding hia? Tua bang ahih manin, a siloua khawsuaksunte adingin thuumsak in, chi ahi, a chi uhi. 5 Kumpipa Hezekia' uliante Isai kiang hong tun takun, 6 Isai in amaute kiang ah: Na pu uh hilh un. Hiai Tangtawn Toupa' thugen ahi. Ama'n: Na zak thute, tua Asuria kumpipa' nuaia lutte'n kei hon gensiatna thu a gente uh lau ken. Ngai in! Ama' sungah kha chi khat ka koih ding a, thuthang khat a zak chiangin, ama' gama kik ding a, tua muna namsaua amah vatpai ding ka hi, chi ahi, a chi hi. 8 Asuria kumpipa'n Lakhish a nuseta, chih tua gamkuan sepaih makaipa'n a zak takin, a nungkik a, kumpipa, Libna douin a mu hi. 9 Aigupta kumpipa Kush mi Tirhaka, amah dou dingin hong kuan, chih thu Senakherib in a za hi. Tuachi-in, Hezekia kiang ah thupawte hiai thu tawh a sawl nawn a: 10 Judah kumpipa Hezekia kiang ah hiai thu gen un: Na kingakna pathian in: Asuria kumpipa khuta Jerusalem piak-khiak hi lou ding ahi, a chih chiangin, amah kikhemzousak ken. nNamte khempeuh tunga Asuria kumpipate'n a hih dan uleh a hihsiat dimdem dan uh na za thamta vele. Nang zong humbitin na om tuan dia hia? 1 Ka pu ka pate'n a hihmanthatsa namte' tua Gozante, Harante, Rezefte leh Tel Asar-a om Eden mite' pathiante'n amaute a humbit ua hia le? 13 Hamath kumpipa, Arpad kumpipa, Sefarvaim khawpi kumpipa, Hena kumpipa leh Iva kumpipa koi ah a omta ua eita? chi-un, a chisak hi.
Hezekia' Thuumna
14 Hezekia in thupawte apan laikhak a sang a, a sim hi. Tua khitin, Tangtawn Toupa' tempul ah a paitou a, Tangtawn Toupa' mai ah a va phalh hi. 15 Tangtawn Toupa kiang ah Hezekia a thuum a: Tangtawn Toupa, Israel Pathian, cherubte kala kumpitutphaha tupa aw, nang kia, leitung kumpigam khempeuh tunga Pathian na hi. Lei leh vaan bawlpa na hi. 16 Tangtawn Toupa aw, na bil hon dawh inla za in. Na mit hak inla en in. Pathian hing simmawha selphou dinga Senakherib in thu hon khakte ngai in. 17 Tangtawn Toupa aw, Asuria kumpipate'n hiai namte leh a gamte uh a hihse vek uh, chih a dik mah ahi. 18 A pathiante uh Pathian hilou a, mihingte' khuta bawltawm sing peuh, suang peuh ahih manun, meikhuk ah a khul uhi. 19 Tangtawn Toupa, koute' Pathian aw, leitung kumpigam khempeuh in, Tangtawn Toupa aw, nang kia Pathian na hi chih hon theih nadingun, tu'n a khut apan koute hon hukhia in, a chi hi.
Senakherib' Pukna Genkholhna
20 Tua khitin, Amoz' tapa Isai in Hezekia kiang ah thu a khak a. Tangtawn Toupa, Israel Pathian' thugen hiai ahi. Ama'n: Asuria kumpipa Senakherib tawh kisaia na thuumna ka zata. 21 Tangtawn Toupa'n amah doua a thugen hiai ahi: Zion' Tanu Nungak Siangthou in nang hon simmawhin hon nuihsan hi. Jerusalem' Tanu in na taisiat muin, lu hon sinkhum hi. 22 Kua simmawha gensia kisa na hia? Kua dema na aw sangsak na hia? Kua tunga kisatheia mit tunghah na hia? Israel Misiangthoupa dem hilou maw! 23 Na thupawte zangin Toupa tung ah simmawhna thu na sungvumta: Ka kangtalai tampi tawh mualsangte tung ah, ahi, Lebanon mualsangpente tung ah ka kaltou. A sidar sing sangpente, a meilah sing hoihpente ka phuk. A mualtung gamlapente leh, a gammang hoihpente ka tawnsuak vek. 24 Gamdang ahte tuilehte ka tou, tua ah tuite ka dawn. Ka khenuai ah Aigupta tuite ka sikkangvek, na chi maw! 25 Nang za nai lou maw? Tanglai peka ka sehsa, tanglai peka ka gensa, tu-a ka tangtunsak: Nang kulh muanhuaite suangtum lak suahsak na hi ve. 26 A mite' un vangletna nei nawnlou uh a, mangbanga zahlakta uh a, gamlak loupate bangta uh a, loupanou pou bang lei hita uh a, inntung vuma loupapou tuung nisa haikeu pah bangta uhi. 27 Ahihhanga ke'n lah na omna mun thei, nong kuan lam leh na chiah lam thei, ka tunga na hehdan zong thei hi'ng. 28 Ka tunga na heh mahmah man leh na zummawhna ka bil tungta ahih mana ke'n na naka ka ngakuai baat ding ing a, na kama ka kamkaihna bulh ding ing a, nong kuanna lama hon kiksak ding hi'ng, chi ahi, a chi hi. 29 Hezekia aw, nang adinga chiamtehna hiai hi ding hi: Tukum amaha pou ne ding chin a, a kum nihna ah, tua apan pousawn ne lai ding na hi. A kum thumna ah bel tuh ding chin a, at ding chin a, grephuan bawl ding chin a, a gah ne ding na hi. 30 Judah innkawte laka khawsuaksunte'n nuailama zungkha lai ding, tunglama gahsuah lai ding hi. 31 Ahang bel, Jerusalem apan khawsuak omsun khat hong pawt ding a, Zion Mual apan khawsuaksun pawlkhat hong pawt ding hi. Tangtawn Toupa Vanglianpen' phatuamngaihna in hiai tangtungsak ding hiven. 32 Tua bang ahih manin, Tangtawn Toupa'n Asuria kumpipa tawh kisaia a thugen hiai ahi: Amah hiai khawpi ah lut lou ding a, hiai ah thai zong khah lou ding hi. A mai ah lum tawh hong kilang lou ding a, a kimkot ah panmun lei sepsang sam lou ding hi. 33 Amah hong kuanna lam maha kik ding a, hiai khawpi sung lut lou himhim ding hi, chi-in, Tangtawn Toupa'n phuang hi. 34 Keima' vang leh ka sila David vanga, hiai khawpi hu ding ing a, humbit ding hi'ng! chi ahi, a chi hi. 35 Tua zanin, Tangtawn Toupa' vansawltak a kuankhia a, Asuria giahphual ah mi 185,000 a that hi. A zingsanga mite a thawhkhiak takun, siluang ngenta a na om hi! 36 Tuachi-in, Asuria kumpipa Senakherib in giahphual a nusia a, a nungkikta hi. Ninevi khawpi ah a kik a, tua ah a om kinkenta hi. 37 Ni khat bel, Nisrokh' tempula a pathian a biak laiin, a tapate Adramelekh leh Sharezer in namsau in amah a satlum uh a, Ararat gama taiin a suakta uhi. Senakherib' tapa Esarhadon in a mun a luah a, kumpipain hong pang hi.
Hezekia Chinatua
1 Tua hun laiin, Hezekia hong china a, a si dektak hi. Amoz' tapa kamsang Isai a kiang ah a va hawh a: Tangtawn Toupa' thu gen hiai ahi. Ama'n: Na innsung om dingdan geel fel in, damkhe zou loua, si ding na hi, chi ahi, a chi hi. 2 Hezekia baanglam ngain a kihei a, Tangtawn Toupa kiang ah a thuum a: 3 Tangtawn Toupa aw, na maia thutak leh lungtang teng khempeuh tawh muanhuaiin ka nuntak dan leh na mitmuha thilhoih ka hih dan thei gige in, a chi a, khasetakin a kap hi. 4 Isai in tua huangsung inntual zong a kaan main, Tangtawn Toupa' thu a kiang ah hong tung a, 5 Ama'n: Kilehkik inla, ka mite' makaipa Hezekia kiang ah: Hiai Tangtawn Toupa, na pa David' Pathian' thugen ahi. Ama'n: Na thuumna ka zata a, na khituite ka muta. Kon damsak ding. Tu apan ni thum ni-in Tangtawn Toupa' tempul ah na hawhtou zouta ding. 6 Na damsung kum, kum sawmlengain kon behlapsak ding hi. Asuria kumpipa khut apan nang leh hiai khawpi kon humbit ding. Keima' hang leh ka sila David vangin, hiai khawpi vengbita hu ding, ka hi, chi ahi, chi in, a chi hi. Tua khitin, Isai in: Theipi gah beu khat bawl in, a chi hi. Tua bangin a bawl uh a, tua meimatum ah a belh uh a, a damta hi. 8 Hezekia in Isai kiang ah: Tangtawn Toupa'n hon damsak ding, chih chiamtehna bang hi ding a, tu apan ni thum ni-a Tangtawn Toupa' tempula hawhtou zou ding ka hi, chih chiamtehna bang hi ding hiam? chi-in a dong hi. 9 Isai in a dawng a: Tangtawn Toupa'n a chiamsa a hih ding, chih nang adinga Tangtawn Toupa' chiamtehna hiai hi hen: Liimliap kalbi sawmkhat mailam ah a pai ahi diam, ahih kei leh kalbi sawmkhat a nungkik ahi zaw diam? a chi hi. 10 Hezekia in: Liimliap kalbi sawmkhat mai lama a pai thil baihlam ahi a, kalbi sawmkhat nungkiksak zaw in, a chi hi. 1 Tua khitin, kamsang Isai in Tangtawn Toupa a sam a, Tangtawn Toupa'n Ahaz' kalbi ah liimliap kalbi sawmkhat paisuksa a nungkiksak hi.
Babulon apan Palaite
12 Tua hun laiin Babulon kumpipa Baladan' tapa Merodakh Baladan in Hezekia chinat thu a zak manin, Hezekia kiang ah laikhakte leh thawnpiak khat a khak hi. 13 Hezekia in thupawte kipaktakin a na muak a, a van koihkhawmna-a van omte khempeuh a na ensak hi. Tua vante ngun leh kham leh nektheih namtuite, sathau manphate, a galvante leh a gou khempeuh ahi. Ama' kumpi innpi leh a kumpigam sunga om peuhmah amaute a lah louh himhim khatbek a nei kei hi. 14 Tua khitin, kamsang Isai kumpipa Hezekia kiang ah a va hawh a: Tua mite'n bang hong gen a, koi apana hong hawh uh ahia? chi-in a dong hi. Hezekia in a dawng a: Amaute gam gamlapi, Babulon apan hong pai ahi uh, a chi hi. 15 Kamsangpa'n: Amaute'n na innpi sung ah bang a mu ua? chi-in a dong hi. Hezekia in: Ka innpi sunga bangkim a mu uh. Ka goute lak apan om amaute ka lah louh bangmah himhim a om kei, a chi hi. 16 Tua khitin, Isai in Hezekia kiang ah: Tangtawn Toupa' thu na ngai in: 17 Na innpi sunga bangkim leh tuni donga na pu na pate'n a na kholkhawm teng khempeuh uh, Babulona a kipuakmang vek hun hong tung ngeingei ding ahi. Bangmah kisiit lou ding ahi, Tangtawn Toupa'n chi ahi. 18 Tua baan ah, na suante pawlkhat, na sa leh si mahmah, nang apana piang dingte nangawn kikaimang ding a, Babulon kumpipa' innpi sunga michilgehte suak ding uh ahi, a chi hi. 19 Hezekia in: Tangtawn Toupa' thu na gen a hoih hi, chi-in a dawng hi. Ahang bel, ama'n: Kei damsungin lemna leh bitna om na lou ding hia? chi-a a ngaihtuah man ahi. 20 Hezekia' vaihawm sunga thiltung dangte, a sepkhiak khempeuh, tuikul a bawldan tawh, khawpi-a tui a laklutna lei vuta tuilam a bawldan khawng ahih leh, Judah kumpite' tungthu kigelhna laibu sunga kigelh hi lou hia? ^Tuachi-in, Hezekia, a pu a pate kiang ah a khawlta a, a tapa Manase in a mun a luah a, kumpipain hong pang hi.
Judah Kumpipa Manase
1 Manase, kumpipa-a hong pan chilin, kum sawmleniha upa ahi a, Jerusalem ah kum 55 sung vai a hawm hi. A nu' min Hefziba ahi. 2 Israelte' maia Tangtawn Toupa'n a hawlkhiak namte' thilhih kihhuaite. Manase in a zui a, Tangtawn Toupa mitmuhin thilgilou a hih hi. 3 A pa Hezekia' hihgawpsa munsangte a lamthak a, Israel' kumpipa Ahab hih bangin, Baal maitamte a dawh a, Ashera song zong a phut hi. Vaan aksihonte khempeuh mai ah a kuun a, amaute a bia hi. 4 Tangtawn Toupa'n: Jerusalem ah ka min ka koih ding, a chih, tua Tangtawn Toupa' tempul ah ahi Manase in maitamte a dawh. 5 Tangtawn Toupa' tempul huangsung inntual nih ah, aksihonte khempeuh ading maitamte a dawh hi. 6 Ama' tapa mahmah mei ah a laan a, bum leh aisan a hih a, dawizawlte leh kha na peuh zawlte thu a dong zel hi. Tangtawn Toupa' mitmuhin thilgilou lua a hih a, Tangtawn Toupa a hehsak hi. 7 Ashera song kikhuak giala a bawl a la a, tempul sung ah a koih hi. Tua tempul lah, Tangtawn Toupa'n David leh a tapa Solomon kianga: Hiai tempul ah leh, Israel namte khempeuh apan ka telkhiak Jerusalem ah ka Min ka koihden ding, a chih ahi. 8 Tua baan ah, Israelte kianga ka thupiak peuhmah zui dinga a pilvan ua, Mosi in a maute a piak Dan a vekpi-a a zuih peuhmah uleh, a pu a pate uh kianga ka piak gam apan amaute ka vakmangsak nawn kei ding, a chihsa hinapi-in, 9 amaute'n a ngaikhe kei uhi. Manase in amaute a lampialsak a, Israelte' maia Tangtawn Toupa'n a hawlkhiak namte sangin a tatsia zaw tham uhi. 10 Tangtawn Toupa'n a sila tua kamsangte tungtawnin: nJudah kumpipa Manase in hiai khelhna kihhuaite a hihta. Ama'n ama' maia om Amorte sangin thilgilouzaw a hih a, a milimtein Judahte khelhna ah a piilut hi. 12 Tua bang ahih manin, hiai Tangtawn Toupa, Israel Pathian' thugen ahi. Aman: Jerusalem tung ah leh Judah tung ah siatna nasia ka tun ding a, a za peuhmahte' bil a khawng ding. 3 Samaria tunga kizang tehna khau leh Ahab innkawte tunga kizang ulum, Jerusalem tung ah ka zang ding. Mi'n kuang a nui bangin, Jerusalem ka nulmang ding a, ka lumlet ding. 14 Ka goutan laka khawsuaksun ka taisan ding a, a melmate uh khut ah ka pelut ding. A galte uh' sim leh lawhin a om ding uh. 15 Ka mitmuha thilgilou hih a, a pu a pate uh Aigupta apan hong paikhiak ni ua pan, tuni dong hon totheh man uh ahi ding, chi ahi, a chi hi. 16 Tua baan ah, Manase in mawhneilou sisan tam a suah lua a, Judah a khelhsakna khelhna baan ah, tuatein Jerusalem mong khat apan mong langkhat a dimsak a, amaute'n Tangtawn Toupa' mitmuhin thilgilou a hihta uhi. 17 Manase vaihawm sunga thiltung dangte leh a thilhih khempeuh leh khelhna ahih khawng tawh, Judah kumpite' tungthu kigelhna laibu sunga kigelh hilou hia? 8 Tuachi-in Manase, a pu a pate kiang ah a khawlta a, a innpi huan sung, tua Uzia' huan sung ah a kivui hi. A tapa Amon in a mun a luah a, kumpipain hong pang hi.
Judah Kumpipa Amon
19 Amon, kumpipa-a hong pan chilin kum 22-a upa ahi a, Jerusalem ah kum nih sung vai a hawm hi. A nu' min Meshulemeth ahi a, Haruz' tanu ahi. Amah Jotba apan ahi, 20 Amon in, a pa Manase hih bangin, Tangtawn Toupa' mitmuhin thil gilou a hih hi. 21 A pa lampi teng khempeuh a tawn a, a pa' biak milimte a bia a, amaute' mai ah a kuun hi. 22 Tangtawn Toupa a pu a pate' Pathian a taisan a, Tangtawn Toupa' lampi a tawn kei hi. 23 Amon' uliante'n amah a sawm uh a, kumpipa, a innpi sung ah a that uhi. 24 Tua khitin, tua gam mite'n kumpipa Amon thah sawm pawlte khempeuh a that uh a, a tapa Josia, a mun ah kumpipain a bawl uhi. 25 Amon' vaihawm sunga thil-tungte leh a thilhihte ahih leh, Judah kumpite' tungthu kigelhna laibu sunga kigelh hilou hia? 26 Amah, Uzia huan sunga ama' hankhuk ah a kivui hi. A tapa Josia in a mun a luah a, kumpipa-in hong pang hi.
Dan Laibu Kimukhia
1 Josia, kumpipa-a hong pan chilin, kum giata upa ahi a, Jerusalem ah kum 31 sung vai a hawm hi. A nu' min Jedida ahi a, Bozkath khawmi, Adaia' tanu ahi. 2 Josia in Tangtawn Toupa' mitmuhin thil dik a hih a, a pa David' lampi khempeuh a tawn a, veilam hiam taklam hiam ah a pialsan kei hi. 3 A vaihawm kum, a kum sawmlegiatna ah, kumpipa Josia in a laigelhpa, Azalia' tapa Shafan, Tangtawn Toupa' tempul ah a sawl hi. Azalia bel Meshulam' tapa ahi. 4 Kumpipa'n Safan kiang ah: Siampilian Hilkia kiang ah vahawh inla, tempul kongkhak ngakte'n mipite apan a don uh sum, tua Tangtawn Toupa' tempul sunga hong kilalutte mansain koihsak inla, 5 tua sumte, tempul puahphat enkai dinga sehte kiang ah kemsak inla, Tangtawn Toupa' tempul puahpha-a nasemte' thaman pesak in. Tua sing siamte, innlam siamte, suangsek siamte' thaman pesak in. Tua baan ah, tempul puahphat nading singtum leh suangseksa amaute leisak in. 7 Ahihhangin, amaute kep dinga sum piakte zatna a gelhthawh uh a kul kei ding hi. Ahang bel, amaute genbaang mahmah loua muanhuai hi uhi, a chi hi. 8 Siampi Hilkia in laigelhpa Shafan kiang ah: Tangtawn Toupa' tempul sung ah Dan Laibu ka mukheta, a chi hi. Ama'n Shafan khut ah a pia a, Shafan in a sim hi. 9 Tua khitin, laigelhpa Shafan, kumpipa kiang ah a va hawh a, thu a vatun a: Na uliante'n Tangtawn Toupa' tempula sum omte a pekhia uh a, tempula nasemte leh amaute enkaite a kemsakta uh, a chi hi. 10 Tua khitin, laigelhpa'n kumpipa kiang ah: Siampi Hilkia in laibu khat hon pia, a chi a, kumpipa' mai ah tua laibu a sim hi. 11 Kumpipa'n tua Dan Laibu-a thute a zak takin, a kumpipuante a botkek hi. 12 Siampi Hilkia leh Shafan' tapa Ahikam leh Mikaia' tapa Akbor leh kumpipa' sawltawl Asaia kiang ah hiai thupiakte a pia hi: 13 Kuan unla, kei adingin leh mipite ading leh Judahte khempeuh adingin, hiai laibu kimukhia-a kigelh thu Tangtawn Toupa hon dotsak un. Hiai laibu-a thute i pu i pate'n a zuih louh manun, i tunga Tangtawn Toupa' hehna kuangkhia a thupi lua hi. Eite tawh kisaia tua-a kigelh khempeuh bangin, amaute a gamta kei uhi, a chi hi. 14 Siampi Hilkia, Ahikam, Akbor, Shafan leh Asaia bel kamsangnu Hulda houpih dingin a kuan uhi. Hulda bel Shalum' zi ahi a, Shalum bel Tikva' tapa ahi a, Tikva bel Harhas' tapa ahi. Harhas lah puankoihna kempa ahi. Hulda bel Jerusalema bial sehkhen nihna-a teeng ahi. 15 Ama'n amaute kiang ah: Hiai Tangtawn Toupa, Israel Pathian' thugen ahi. Noute ka kianga hon sawlpa kiang ah hilh un, 16 hiai Tangtawn Toupa' thugen ahi. Ama'n: Judah kumpipa'n a sim laibu sunga kigelh peuhmah bangin, hiai mun leh a mite tunga siatna tun ding ka hi. 17 Amaute'n kei hon taisan a, pathian dangte' maia gimnamtui hal a, a khutsuak uh milimte zanga kei a hon hehsak manun, hiai mun tunga ka hehna a kuang ding a, a kiphelhmit zou kei ding, chi ahi. 18 Tangtawn Toupa thu dong dinga noute hon sawlpa, Judah kumpipa hilh un. Hiai Tangtawn Toupa, Israel Pathian' thugen ahi: 19 Hiai mun leh a mite doua ka thugen, amaute hamsethuak leh hihhsiat ahi ding ka chih na zak laia na ngaihkhiak a, Tangtawn Toupa' maia na kingaihniam man leh, na puanakpi botkek a, ka maia na kah manin, ka ngaikheta, Tangtawn Toupa'n a chi. 20 Tua bang ahih manin, na pu na pate kiang ah kon la ding a, khamuangtaka vuiin na om ding. Hiai mun tunga siatna ka tut ding na mitin a mu kei ding, chi ahi, a chi hi. Tuachi-in, kamsangnu' dawnna, kumpipa kiang a tunkik uhi.
Josia in Thukhun Thaksak
1 Tua khitin, kumpipa'n Judah leh Jerusalem upate khempeuh a samkhawm hi. 2 Amah Judah mite, Jerusalem mite, siampite leh kamsangte mi khempeuh a neupen apan a lianpen dong tawh Tangtawn Toupa' tempul ah a hawhtou hi. Tangtawn Toupa' tempula kimukhia tua Thukhun Laibu amaute zakin a sim hi. 3 Kumpipa bel khuampi kiang ah a ding a, Tangtawn Toupa zui ding, a theihpihnate, a dankhunte leh thusehte a lungtang teng khempeuh leh a hinna tawh zui ding, chi-a, hiai laibu sunga kigelh thute tua banga kipsakin, Tangtawn Toupa' mai ah tua thukhun a thaksak hi. Tua khitin, mipite, tua thukhun ah a kichiam uhi. 4 Kumpipa'n siampilian Hilkia, a nuaia lianzom siampite leh kongkhak ngakte kiang ah, Baal leh Ashera leh aksihonpi khempeuh adinga kibawl vante khempeuh Tangtawn Toupa' tempul sung apan paikhe dingin thu a pia hi. Jerusalem pua-a Kidron Phaizang ah tuate a hal a, a vute Bethel a tun hi. 5 Judah khawpite leh Jerusalem kim leh kianga munsangte-a gimnamtui hal dinga Judah kumpipate'n milim bia siampi a sehte uh, tua Baal biakna, tua ni leh kha biakna leh aksi lomomte leh aksi honpite khempeuh biakna-a gimnamtui halte ngei, a beisak vek hi. 6 Tangtawn Toupa' tempul apanin Ashera song a la a, Jerusalem pua-a Kidron Phaizang a tun a, tua ah a hal hi. A gawivui lai a, a vuite, mi nautangte' hante tung ah a theh hi. 7 Tangtawn Toupa' tempula pasal kizuakte' innte leh numeite'n Ashera ading puan a gatna munte uh zong a phelgawp hi. 8 Josia in Judah khawpite apan siampite a hon pii a, siampite'n gimnamtui a halna uh munsangte, Geba apan Beersheba dong a hihnin vek hi. Khawpi kongpi veilam panga om, tua khawpi ukpipa Joshua Kongpi-a om, kongpitea biakna bukte zong a phelgawp hi. 9 Tua munsangtea siampite'n Jerusalema Tangtawn Toupa' maitam ah nna sem kei mah le uh, a siampi hihpihte utawh silngou sawhlouh tanghou a nekhawm uhi. Ama'n Ben Hinom Phaizanga om Tofeth a hihnitsak a, tuachi-in kuama'n Molekh' maia kunin a tapa hiam, a tanu hiam meia lat nadingin a zang thei kei hi. nAma'n Judah kumpipate'n ni pathian kianga a lat uh sakolte, Tangtawn Toupa' tempul lutna apan a lakhia hi. Tuate bel ulian khat Nathan Melekh kichi' inndan kianga kongtuala om ahi uhi. Tua khitin Josia in ni pathian kianga latsa kangtalaite a haltum hi. 12 Judah kumpipate'n Ahaz' inndan tungnung kianga inntunga a dawh uh, maitamte leh Manase in Tangtawn Toupa' tempul huangsung nihte-a a dawh maitamte zong ama'n a phelkhia hi. Tua apan tuate a lakhia a, a hihtamgawp a, Kidron Phaizang ah a suangte a pailut hi. 13 Kumpipa'n Tatsiatna Mual simlam, Jerusalem suahlama om munsangte zong a hihnitsak hi. Tuate bel, Israel kumpipa Solomon in Sidonte' pathian kihhuai Ashtoreth ading bang, Moabte' pathian kihhuai Khemosh ading bang leh Amonte' pathian kihhuai Molekh ading banga a na lamsak ahi. 14 Josia in suang zek siangthoute a hihtam a, Ashera songte a phuk a, tua munte mihing guhtein a khuh hi. 15 Israelte khialsakpa, Nebat' tapa Jeroboam in munsang a bawl, Bethela maitam nangawn, tua maitam leh munsang nangawn a phelgawp hi. Tua munsang meiin a hal a, a gawivui a, Ashera song zong a haltum hi. 16 Tua khitin, Josia a dak kimvel a, tua mual panga hanmunte a muh takin, a sunga guhte a lakhesak a, hiai thilte genkholpa tua Pathian' mipa'n a phuansa Tangtawn Toupa' thu bangin, tua maitam hihnit nadingin a tung ah tua guhte a hal hi. 17 Kumpipa'n: Tua hansuang ka muh bang ahi? a chi hi. Tua khawpi mite'n: Judah apan hong pai a, tua na thilhihte na hihna Bethel maitam demna thu genpa, tua Pathian' mipa' han mun chiamtehna ahi ve, a chi uhi. 18 Ama'n: Omsak maimai unla, a guhte kuamah khoihtaangsak kei un, a chi hi. Tuachi-in, a guhte leh Samaria apan hong pai kamsangpa' guhte khoihtat louhin a koih uhi. 19 Josia in Bethela a hih bangbangin, Israel kumpipate'n Samaria khawpitea munsangtea biakna bukte bawl a, Tangtawn Toupa a hehsakna uh, tua biakna bukte a phiatmang a, a hihnitsak vek hi. Josia in tua munsang maitamte tung ah tua siampite khempeuh a that a, tua maitamte tung ah mihing guhte a hal hi. Tua khitin, Jerusalem ah a kik hi. 21 Kumpipa'n mipite khempeuh kiang ah hiai thupiak a pia a: Thukhun Laibu-a kigelh bangbangin Paikan zang un, a chi hi. 22 Israelte' makai vaihawmte hun leh Israel kumpipate leh Judah kumpipate' hun sung teng tua Paikan kitang-in kizang ngei nawnlou hi. ^Ahihhangin, Kumpipa Josia' vaihawm kum, a kumsawmlegiatna ah, Jerusalem ah Tangtawn Toupa' mai ah Paikan a kizang hi. 24 Tua thamlouin, Josia in aisansiamte, dawizawlte, innsungtuam pathiante, milimte leh Judah gam sung leh Jerusalema thil kihhuai kimute a paimang vek hi. Hiai a hih bel, siampi Hilkia in Tangtawn Toupa' tempula a muhkhiak Dan laibu in a ngiatte a hihkim nadinga a hih ahi. Josia' malam hi-in, a nunglam hita leh, amah banga Tangtawn Toupa lama kihei kumpipa dang a om kei hi. Amah bel, Mosi' Dan khempeuh banga lungtang khempeuh, a hinna khempeuh, a thahatna khempeuh tawh Tangtawn Toupa lam nga mi ahi. 2 Ahihhangin, Tangtawn Toupa, a hehna sousang apan a kihei kei hi. Manase in amah hehsak thei a thilhih khempeuh hanga Judah tunga a hehna sousang hiven. 27 Tua bang ahih mana, Tangtawn Toupa'n: Israel ka kiheisan banga Judah kiheisan ding ing a, ka teelsa khawpi Jerusalem leh hiai ka Min om nading ka chih tempul nolh ding hi'ng, chi ahi. Josia' vaihawm sunga thil tung dangte leh a thilhihte khempeuh ahih leh, Judah kumpite' tungthu kigelhna laibu sunga kigelh hilou hia? 29 Josia, kumpipa a hih sungin, Aigupta kumpipa Faro Neko, Asuria kumpipa huh dingin Iufratis Luipi ah a kuantou hi. Kumpipa Josia zong amah tuak a, kidou dingin a kuankhia a, ahihhangin, Neko in amah na tuakin, Megido ah a that hi. 30 Josia' silate'n Megido apan Jerusalem ah kangtalaiin a luang a pua uh a, ama' hankhuk ah a vui uhi. A gam mite'n Josia' tapa Jehoahaz a tonpih uh a, thau a nilh uh a, a pa' mun ah kumpipain a bawl uhi.
Judah Kumpipa Jehoahaz
31 Jehoahaz, kumpipa-a hong panin, kum 23-a upa ahi a, Jerusalem ah kha thum vai a hawm hi. A nu' min Hamutal ahi a, Jeremia' tanu ahi. Hamutal bel Libna khawmi ahi. 32 Jehoahaz in a pu a pate' hih bangin, Tangtawn Toupa' mitmuhin thilgilou a hih hi. 33 Jerusalema vai a hawm louh nadingin Faro Neko in Hamath gama Ribla ah khainiang a bunsak a, Judah tung ah, ngun talen 100 leh kham talen khat siah a kai hi. 34 Faro Neko in Josia' tapa Eliakim, Josia' mun ah kumpipain a tusak a, Eliakim' min zong Jehoiakim in a laihsak hi. Ahihhangin, Jehoahaz bel Aigupta ah a pawmang a, tua ah a si hi. 35 Jehoiakim in Faro Neko kiang ah, a ngiat ngun leh kham siahin a pia hi. Tua banga a piak theih nadingin, gambuppi siah a liausak a, amaute sehdan bangin, ngun leh kham a laksak hi.
Judah Kumpipa Jehoiakim
36 Jehoiakim kumpipa hong hihin, kum 25-a upa ahi a, Jerusalem ah kum sawmlekhat sung vai a hawm hi. A nu' min Zebida ahi a, Pedaia' tanu ahi. Zebida bel Ruma khawmi ahi. 37 Ama'n a pu a pate hih bangin, Tangtawn Toupa' mitmuhin thilgilou a hih hi.
1 Jehoiakim' vaihawm sungin Babulon kumpipa Nebukhadnezar in tua gam a sim a, Jehoiakim zong ama' nuai ah kum thum sung toukaiin a om hi. Ahihhangin, a lungsim a kheng a, Nebukhadnezar tung ah a hel hi. 2 Tangtawn Toupa'n galsim pawlpawl Babulonte, Aramte, Moabte leh Amonte amah dou dingin a sawl hi, Tangtawn Toupa'n a sila kamsangte tungtawna a phuansa bangbang Judah gam hihse dinga a sawl ahi. Manase' khelhnate leh a thilhih khempeuh hanga Tangtawn Toupa'n a ompihna apan a paihkhiak nadinga, Tangtawn Toupa' thupiak banga hiai thilte Judah tunga tung ahi mahmah hi. 4 Manase' thilhihte bel mawhneilou sisan a suahte khawng zong ahi. Ahang bel, ama'n mawhneilou sisana Jerusalem dimsak a, Tangtawn Toupa'n ngaidam nuam lou hi. 5 Jehoiakim' vaihawm sunga thiltungdangte leh a thilhih khempeuh, Judah kumpite' tungthu kigelhna laibu sunga kigelh hilou hia? 6 Tuachi-in Jehoiakim, a pu a pate' kiang ah a khawlta a, a tapa Jehoiakhin in a mun a luah a, kumpipain hong pang hi. 7 Babulon kumpipa'n Aigupta gam khempeuh, Aigupta Luita apan Iufratis Luipi dong a laksak manin, Aigupta kumpipa a gam apan hong kuankhe nawn kei hi.
Judah Kumpipa Jehoiakhin
8 Jehoiakhin, kumpipa-a hong pan chilin, kum sawmlegiata upa ahi a, Jerusalem ah kha thum sung vai a hawm hi. A nu' min Nehushta ahi a, Elnathan' tanu ahi. Nehushta bel Jerusalem khawmi ahi. 9 Jehoiakhin in a pa' hih bangin, Tangtawn Toupa' mitmuhin thilgilou a hih hi. 10 Tua hun laiin, Babulon kumpipa Nebukhadnezar, Jerusalem ah hong kuan a, hong umchip hi. 11 Amah mah zong Jerusalem hong tung a, a uliante'n a dou uhi. 12 Judah kumpipa Jehoiakhin, a nu, a sawltawlte, a miliante leh a uliante Nebukhadnezar khut ah a kipe vek uhi. Babulon kumpipa in a vaihawm kum, a kum giatna ah Jehoiakhin suangkul ah a khum hi. 13 Tangtawn Toupa'n a phuansa bangin, Israel kumpipa Solomon in Tangtawn Toupa' tempul adinga a bawl, khama kibawl goute khempeuh Nebu-kadnezar in Tangtawn Toupa' tempul leh kumpi innpi apan a la vek hi. 4 Jerualema teengte khempeuh, uliante leh galdoutheite khempeuh, khutsiamte leh siamna neite khempeuh, a vekun 10,000 salin a kai vek hi. Gamsunga a zawngpente kia nutsiatin a om uhi. 15 Nebukhadnezar in Jehoiakhin, Babulon ah salin a kai a, kumpipa' nu, a zite, a uliante leh gamsunga makaite zong Jerusalem apan Babulon ah a kai hi. 16 Babulon kumpipa'n galdoutheia hat, mi 7,000 leh khutsiammi leh siamnanei mi 1,000 zong Babulon ah a tuah vek hi. 17 Ama'n Jehoiakhin' pangak Matania, ama' mun ah kumpipain a koih a, a min zong Zedekia chi-in a laihsak hi.
Judah Kumpipa Zedekia
18 Zedekia, kumpipa-a hong pan laiin, kum 21-a upa ahi a, Jerusalem ah kum sawmlekhat sung vai a hawm hi. A nu' min Hamutal ahi a, Jeremia' tanu ahi. Hamutal bel Libna khawmi ahi. 19 Zedekia in, Jehoiakim hih bangin, Tangtawn Toupa' mitmuhin thilgilou a hih hi. 20 Tangtawn Toupa' thangpaihna hang ahi Jerusalem leh Judah tunga hibang teng a tun. A tawpin ama'n a ompihna apanin amaute a lawnkhia hi.
Jerusalem Pukna
1 Zedekia, Babulon kumpipa tung ah hong hel hi. Tuachi-in, Zedekia' vaihawm kum, a kum kuana, a kha sawmna, a ni sawm ni-in, Babulon kumpipa Nebukhadnezar, a sepaih honpi tawh, Jerusalem douin hong kuan hi. Khawpi pua ah giahphual a sat a, a kimkot ah panmun a khawh hi. 2 Kumpipa Zedekia vaihawm kum, a kum sawm leh khatna dong Jerusalem khawpi, kidouna nuai ah a om hi. 3 A kha lina, a ni kua-ni in, tua khawpi sungah kial a nase mahmah a, mite' nek ding bangmah a om kei hi. 4 Tua lai mahin, khawpi kulhbaang a kiphuvang a, Babulonte'n khawpi umchip himah leh, zankalin, kumpipa' huan kianga kulhbaang nihte kikal kongpi ah sepaihhonte, a vekpiun a taaikhia uhi. Araba lam ah a tai uh a, 5 ahihhangin, Babulonte'n kumpipa a delh uh a, Jerikho phaizang ah a delhpha uhi. A sepaihte khempeuh amah apan a tuam omkha uh a, a kithehzak uh a, 6 kumpipa matin a om hi. Ribla ah Babulon kumpipa kiang ah a pii uh a, tua ah ama' tunga gawtna ding thukhenna a bawl uhi. 7 Zedekia' muhtangpi-in a tapate a that uh a, ama' mit zong a khekkhiaksak uhi. Sumsan koi a bunsak uh a, Babulon a tun uhi. 8 Babulon kumpipa' Nebukanezer vaihawm kum, a kum sawm-lekuana, a kha ngana, a ni sagih ni-in, kumpipa vengpawl makai Nebuzaradan, Babulon ulian Jerusalem ah hong kuan a, 9 Tangtawn Toupa' tempul, kumpi' innpi leh Jerusalema innte khempeuh meiin a hal hi. 10 Babulon sepaihhonte'n tua kumpipa vengpawl makaipa makaihin Jerusalem kimkota kulhbaang a hihchim uhi. nTua vengpawl makai Nebuzaradan in tua khawpi-a omlaite, khawsung mipi dangte leh Babulon kumpipa lama toukaite tawh, salin a kaimang hi. 12 Ahihhangin, gamsunga a zawngpente, grephuante leh loute keem dingin a nusia hi. 13 Babulonte'n Tangtawn Toupa' tempula sumsan khuampite, tuahtheih a tunnate leh sumsan limlang Tuipi a hihtam uh a, a sumsante Babulon a tun uhi. 14 Belte, suahdulte, meiek siaknate, kuangte leh tempula kizang sumsan vante zong a pawmang uhi. 15 Tua kumpipa vengpawl makai in ngun leh khama kibawl gimnamtui halna belkuangte leh tuithehna belkuang khempeuh a pawmang hi. 16 Solomon in Tangtawn Toupa' tempul adinga a bawl tua khuampi nihte, tua Tuipi leh tuahtheih a van khainate akizang sumsante bel buuk seeng ahi kei hi. Tua khuampite tong sawmlegiata sang tuak ahi. Khuampi khat tunga khuamlukhu tong khat leh a langa sang ahi a, a kimvela sumsana bawl mimthei gah kiphan thawha kituam ahi. Khuampi dang khat pen zong tua bangmaha kiphan thawha tuam ahi. 18 Vengpawl makai in siam-pimakai Seraia leh a ama' zoma siampi Zefania leh kongkhak veng thumte salin a kai hi. 19 Khawpi sunga omlaite lak ah, galdou pawl sepaihte uk ulian leh kumpipa panpih mi nga zong a piimang hi. Gamsunga sepaih lakna lama mawhpua ulian, laigelhpa leh a mite 60, tua khawpi sunga kimute zong a piimang hi. Makaipa Nebuzaradan in amaute khempeuh a kai a, Ribla ah Babulon kumpipa kiang a tun hi. 21 Hamath gama tua Ribla ah kumpipa'n amaute a thatsak vek hi. Tuachi-in, Judah bel a gam apan sala piimang ahita hi. 22 Babulon kumpipa Nebukhadnezar in Ahikam' tapa Gedalia, Judah gama a nutsiatte tunga ukpipain a koih hi. Ahikam bel Shafan' tapa ahi. 23 Babulon kumpipa'n Gedalia, ukpipain a koih chih thu sepaih makaite leh a sepaihte un a zak takun, Mizpa ah Gedalia kiang ah hong hawh uhi. Amaute bel, Nethania' tapa Ishmael, Karea' tapa Johanan, Netofath mi Tanhumeth' tapa Seraia, Maakath mi' tapa Jaazania leh a mite ahi uhi. 24 Gedalia in amaute khamuan dingin kichiamna a bawl a: Babulon uliante lau kei un. Gamsung ah teeng unla, Babulon kumpipa' nna sem un, noute adinga hoih ding ahi, a chi hi. 25 Ahihhangin, a kha sagihna ah, kumpi khangguia mi khat, Nethania' tapa Ishmael, mi sawm khat tawh hong kuan a, Gedalia leh ama' kianga Mizpa-a om Judah mite leh Babulonte hong that hi. Nethania bel Elishama' tapa ahi. 26 Hibang hong hih takin, mite khempeuh a neupen apan a lianpen dong, sepaih makaite tawh, Babulonte lauh manin, Aigupta gam ah a taai uhi.
Jehoihakhin Khahkhiakna
27 Judah kumpipa Jehoiakhin piimangna, a kum 37-na ah, Evil Merodakh , Babulon kumpipa-a hong pan kumin, ama'n a kha sawm leh nihna, a ni 27 ni-in, suangkul apanin Jehoiakhin a khahkhia hi. 28 Ama'n kam nemtakin Jehoiakhin a houpih a, Babulona om kumpipa dangte sangin amah pahtawina kumpi tutphah sangzaw a pia hi. 29 Tuachi-in, Jehoiakhin in a suangkul tanna puansilhte a suahkhia a, a damsung hun om lai teng, kumpipa' dawhkan ah an a ne gige hi. 30 Kumpipa'n Jehoiakhin' damsung teng a nisim zat ding tantuan a pe gige hi.
Adam apan Noa' Tate
1 Adam, Seth, Enosh, 2 Kenan, Mahalalel, Jared, 3 Enokh, Methusela, Lamekh, Noa. 4 Noa' tapate: Shem, Ham, Jafeth.
Jafeth' Suante
Gomer, Magog, Madai, Javan, Tubal, Meshekh leh Tiras. 6 Gomer' tapate: Ashkenaz, Rifath leh Togarma. 7 Javan' tapate: Elisha, Tarshish, Kitim leh Rodanim.
Ham' Suante
8 Ham' tapate: Kush, Mizraim, Put leh Kanan. 9 Kush' tapate: Seba, Havila, Sabta, Raama leh Sabteka. Raama' tapate: Sheba leh Dedan. 10 Kush in tapa Nimrod' a nei hi. Nimrod bel leitunga galhat khawkheng hong hi ahi. 11 Mizraim bel Ludte, Anamte, Lehabte, Naftute, 12 Pathruste, Kaslute leh Kaftorte' pubul ahi. Kaslute apan Filistiate hong piang ahi. 13 Kanan' tapa upapen Sidon ahi. Tua baan ah, Kanan bel, Hitte, 14 Jebuste, Amorte, Girgashte, 15 Hivte, Arkate, Sinte, 16 Arvadte, Zemarte leh Hamathte' pa ahi.
Shem' Suante
Elam, Ashur, Arfaksad, Lud leh Aram. Aram' tapate: Uz, Hul, Gether leh Meshekh. 18 Arfaksad bel Shela' pa hi a, Shela lah Eber' pa ahi. Eber in tapa nih a nei a, khat min Peleg ahi a, ama' huna leitung gam kikhen ahih mana, tua min kisa ahi. Peleg' sanggampa' min Joktan ahi. 'Joktan bel Almodad, Shelef, Hazarmaveth, Jera, 21 Hadoram, Uzal, Dikla, 220 bal, Abimael, Sheba, 230 fir, Havila leh Jobab' pa ahi. Hiaite khempeuh Joktan' tapate ahi. 24 Shem, Arfaksad, Shea, 25 Eber, Peleg, Reu, 26 Serug, Nahor, Tera, 27 Abram, tua bel, Abraham ahi.
Abraham Innkuan
28 Abraham' tapate: Isak leh Ishmael.
Hagar' Suante
29 Hiaite a suante uh ahi: Ishmael ta masa Nebaioth tua baan ah Kedar, Adbeel, Mibsam, 30 Mishma, Duma, Masa, Hadad, Tema, 31 Jetur, Nafish leh Kedema. Hiaite Ishmael' suante ahi.
Ketura' Suante
32 Abraham' mei Ketura' sunga piangte: Zimran, Jokshan, Medan, Midian, Ishbak leh Shua. Jokshan' tapate: Sheba leh Dedan. 33 Midian' tapate: Efa, Efer, Hanokh, Abida leh Eldaa. Hiaite Ketura' suante ahi.
Sara' Suante
34 Abraham bel Isak' pa ahi. Isak' tapate: Esau leh Israel.
Esau' Suante
35 Esau' tapate: Elifaz, Reuel, Jeush, Jalam leh Kora. 36 Elifaz' tapate: Teman, Omar, Zefo, Gatam leh Kenaz; Timna apan piang Amalek. 37 Reuel' tapate: Nahath, Zera, Shama leh Miza.
Edom Gama Seir' Mite
38 Seir' tapate: Lotan, Shobal, Zibeon, Ana, Dishon, Ezer leh Dishan. 39 Lotan' tapate: Hori leh Homam. Lotan' sanggamnu Timna ahi. 40 Shobal' tapate: Alvan, Manahath, Ebal, Shefi leh Onam. Zibeon' tapate: Aia leh Ana. 41 Ana' tapa: Dishon. Dishon' tapate: Hamran, Eshban, Ithran leh Keran. 42 Ezer' tapate: Bilhan, Zaavan leh Akan. Dishan' tapate: Uz leh Aran.
Edom Vaihawmte
43Israel kumpipa kuamah in vai a hawm ma-a Edom gama vaihawm kumpipate hiaite ahi: Beor' tapa Bela, khawpi Dinhaba a kichi hi. 44 Bela a sih takin, Bozra khawmi, Zera' tapa Jobab in a mun a luah a, kumpipain a pang hi. 45 Jobab a sih takin, Teman gam mi Husham in a kumpi hihna a luah hi. 46 Husham a sih takin, Bedad' tapa Hadad in a mun a luah a, kumpipain a pang hi. Ama'n Moab gama Midian a zou hi. Ama' khawpi Avith a kichi hi. 47 Hadad a sih takin, Masreka mi, Samla in a mun a luah a, kumpipain a pang hi. 48 Samla a sih takin, luipi gei Rehoboth khawmi Shaul in a mun a luah a, kumpipain a pang hi. 49 Shaul sih takin, Akbor' tapa Baal Hanan in a mun a luaha kumpipain a pang hi. 50 Baal Hanan a sih takin, Hadad in a mun a luah a, kumpipain a pang hi, A khawpi Pau a kichi a, a zi' min bel Mehetabel ahi. Mehetabel bel Matred tanu ahi a, Matred lah Mezahab'tanu ahi. 51 Hadad zong hong si hi. Edom makaite hiaite ahi: Timna, Alia, Jetheth, 52 Oholibama, Ela, Pinon, 53 Kenaz, Teman, Mibzar, 54 Magdiel leh Irani. Hiaite Edom makaite ahi.
Israel' Tapate
1 Hiaite Israel' tapate ahi: Reuben, Simeon, Levi, Judah, Isakhar, Zebulun, 2 Dan, Josef, Benjamin, Naftali, Gad leh Asher.
Judah' Suante, Hezron' tapa chiang
3 Judah' tapate: Er, Onan leh Shela. Hiai thumte Shua' tanu, Kanan numei tawh kala a neih ahi. Judah' tamasa Er bel Tangtawn Toupa' mitmuhin a tatsia a, Tangtawn Toupa'n a that hi. 4 Judah' mou Tamar in Judah adingin Perez leh Zera a neihsak hi. Judah in a vekin tapa nga a nei hi. 5 Perez' tapate: Hezron leh Hamul. 6 Zera' tapate: Zimri, Ethan, Heman, Kalkol leh Darda, a vekun nga. 7 Karmi' tapa: Akhar, ama'n thilkhamte tunga muanhuai loua omin, tuate lain Israel tunga buaina a tun hi. 8 Ethan' tapa: Azaria. 9 Hezron' suan tapate: Jerameel, Ram leh Kaleb.
Ram apan Kakhete
10 Ram bel, Aminadab' pa ahi. Aminadab bel Nashon' pa ahi. Nashon, Judah-te makai ahi. 11 Nashon bel Salmon' pa ahi a, Salmon lah Boaz' pa ahi. 12 Boaz lah Obed' pa ahi a, Obed lah Jese' pa ahi. 13 Jese bel Eliab' pa ahi a, Eliab lah a tamasa ahi. A nihna Abinadab, a thumna Shimea, 14 a Una Nethanel, a ngana Radai, 15 a gukna Ozem leh a sagihna David. 16 A sanggamnute uh Zeruia leh Abigail ahi. Zeruia' tapa thumte Abishai, Joab leh Asahel ahi. 17 Abigail bel Amasa' nu ahi a, Amasa' pa bel Ishmael mi Jether ahi.
Kaleb apan Kakhete
18 Hezron' tapa Kaleb in a zi Azuba leh Jerioth tawh kal ah tate a nei a, tua tapate hiaite ahi: Jesher, Shobab leh Ardon. 19 Azuba a sih takin, Kaleb in Efrath a nei a, tua in amah adingin Hur a neihsak hi. 20 Hur bel Uri' pa hong hi a, Uri lah Bazalel' pa hong hi hi. 21 Tua nunglamin, Hezron in Makir' tanu a luppih hi. Hezron kum 60-a upa ahih laia zi-a a na neih ahita. Makir bel Gilead' pa ahi. Hezron adingin Segub a neihsak hi.2 Segub bel Jair' pa hong hi a, Jair in Gilead gam khawpi 23 a uk hi. Ahihhangin, Geshur leh Aram in Havoth Jair leh Kenath a laksak uh a, a kim leh kianga khuate 60 tawh a la uhi. Hiaite khempeuh Gilead' pa Makir' suante ahi. 24 Kaleb Efratha-a Hezron a sih nungin, Hezron' zi Abija in Ashur a neihsak hi. Ashur bel Tekoa' pa ahi.
Jerameel apan Kakhete
25 Hezron tamasa Jerameel' tapate: A tamasa Ram ahi. Abaan ah Buna, Orem, Ozem leh Ahija ahi. 26 Jerameel in zi dang a nei a, a min Atara ahi. Amah Onam' nu hong hi ahi. 27 Jerameel' tamasa Ram tapate: Maaz, Jamin leh Eker. 28 Onam' tapate: Shamai leh Jada. Shamai' tapate: Nadab leh Abishur. 29 Abishur' zi min Abihail ahi a, ama'n Abishur adingin Aban leh Molid a neihsak hi. 30 Nadab' tapate: Seled leh Apaim ahi. Seled bel tabeiin a si hi. 31 Apaim' tapa: Ishi ahi a, amah Sheshan' pa hong hi a, Sheshan lah Alai' pa hong hi ahi. 32 Shemai' sanggampa Jada' tapate: Jether leh Jonathan ahi. Jether bel tabeiin a si hi. 33 Jonathan' tapate: Peleth leh Zaza. Hiaite Jerameel suante ahi. 34 Sheshan in tapa a nei kei a, tanute kia a nei hi. Ama'n Aigupta mi sila khat, Jarha kichi a nei hi. 35 Sheshan in a silapa Jarha' zi dingin a tanu a pia a, tua sila in amah adingin Atai a neihsak hi. Atai bel Nathan' pa hong hi a, Nathan lah Zabad' pa hong hi ahi. 37 Zabad bel Eflal'pa hong hi a, Eflal lah Obed' pa hong hi ahi. 380 bed bel Jehu' pa hong hi a, Jehu lah Azaria' pa hong hi ahi. 39 Azaria bel Helez' pa hong hi a, Helez lah Eleasa' pa hong hi ahi.40 Eleasa bel Sismai' pa hong hi a, Sismai lah Shalum' pa hong hi ahi. 41 Shalum bel Jekamia' pa hong hi a, Jekamia lah Elishama' pa hong hi ahi.
Kaleb' Behte
42 Jerameel' sanggampa Kaleb' tapate: A tamasa Misha ahi a, amah Zif' pa hong hi hi. A nihna Maresha ahi a, amah Hebron' pa hong hi ahi. 43 Hebron' tapate: Kora, Tapua, Rekem leh Shema. 44 Shema bel Raham' pa hong hi a, Raham lah Jorkeam' pa hong hi hi. Rekem bel Shamai' pa hong hi ahi. 45 Shamai' tapa Maon ahi a, Maon lah Beth Zur' pa hong hi ahi. 46 Kaleb' mei Efa bel Haran, Moza leh Gazez nu hong hi a, Haran lah Gazez' pa hong hi ahi. 47 Jadai' tapate: Regem, Jotham, Geshan, Pelet, Efaleh Shaaf. 48 Kaleb' mei Maaka bel Sheber leh Tirhana nu hong hi ahi. 49 Maaka in Madmana' pa Saf leh Sheva zong a nei hi. Sheva bel Makbena' leh Gibea' pa hong hi ahi. Kaleb' tanu Aksa ahi. 50 Hiaite Kaleb' suante ahi uhi. Efratha' tamasa Hur' tapate: Kiriath Jearim' pa Shobal leh 51 Bethlehem pa' Salma leh Beth Gader' pa Haref. 52 Kiriath Jearim' pa Shobal' suante: Haroe leh Manahathte kimkhat leh 53 Kiriath Jearim behte Ithrate, Puthte, Shumathte leh Mishrate. Hiaite apanin Zorathte leh Eshtaolte hong piangkhia uhi. 54 Salma' suante: Bethlehem, Netofathte, Atroth Beth Joab, Manahathte kimkhat, Zorate leh 55 Jabez-a teng laigelhte behte Tirathte, Shimeathte leh Sukathte ahi. Hiaite Rekab innkawte pa Hamath pana hong pai Kente ahi uhi.
David' Tapate
1 Hiaite Hebrona piang David' tapate ahi: A tamasa Amnon ahi a, Jezreel mi Ahinoam a nu ahi. A nihna Daniel ahi a, a nu Karmel mi Abigail ahi. 2 A thumna Absolom ahi a, a nu Geshur kumpipa Talmai' tanu Maaka ahi. A Una Adonija ahi a, a nu Hagith ahi. 3 A ngana Sefatia ahi a, a nu Abital ahi. A gukna Ithream ahi a, a nu, David' zi Egla ahi. 4 Hiai gukte David in Hebrona kum sagih leh kha guk vai a hawm sunga piang ahi uhi. David in Jerusalem ah kum 33 sung vai a hawm a, 5 tua muna a tate hiaite ahi: Shamua, Shobab, Nathan leh Solomon. Hiai lite bel Amiel' tanu Bathsheba tawh kala a neih ahi. 6 Tuate baan ah, Ibhar, Elishua, Alifelet, 7 Noga, Nefeg, Jafia, 8 Elishama, Eliada, Elifelet a vekun kua. 9 Hiaite khempeuh, a meite tawh kala a neihte baana a tapate ahi, Amaute' sanggamnu Tamar ahi.
Judah Kumpipate
10 Solomon' tapa Rehoboam, Rehoboam' tapa Abija, Abija' tapa Asa, Asa' tapa Jehoshafat, 11 Jehoshafat' tapa Jehoram, Jehoram' tapa Ahazia, 12 Ahazia' tapa Amazia, Amazia' tapa Azaria, Azaria' tapa Jotham, 13 Jotham' tapa Ahaz, Ahaz' tapa Hezekia, Hezekia' tapa Manase, 14 Manase' tapa Amon, Amon' tapa Josia. 15 Josia' tapate: A tamasa Johanan, a nihna Jehoiakim, a thumna Zedekia, a Una Shalum. 16 Jehoiakim' mun luahte: Ama' tapa Jehoiakhin leh Jehoiakhin' tapa Zedekia.
Saltan nunga Kumpi Khanggui
17 Saltaang Jehoiakhin suante: A tapa Shealtiel, 18 Malkiram, Pedaia, Shenazar, Jekamia, Hoshama leh Nedabia. 19 Pedaia' tapate: Zerubabel leh Shimei. Zerubabel' tapate: Meshulam leh Hanania. A sanggamnu uh Shelomith ahi. 20 Adang nga zong a om a, amaute: Hashuba, Ohel, Berekia, Hasadia leh Jushab Hesed. 21 Hanania' suante: Pelatia leh Jeshaia. Tuate baan ah, Refaia, Arnan, Obadia leh Shekania' tapate. 22 Shekania' suante: Shemaia leh a tapate: Hatush, Igal, Baria, Nearia leh Shafat, a vekun guk. 23 Nearia' tapate: Elioenai, Hizkia leh Azrikan, a vekun thum. 24 Elioenai' tapate: Hodavia, Eliashib, Pelaia, Akub, Johanan, Delaia leh Anani, a vekun sagih.
Judah Beh Dangte
1 Judah' suante: Perez, Hezron, Karmi, Hur leh Shobal. 2 Shobal' tapa Reaia, Jahath' pa hong hi a, Jahath lah Ahumai leh Lahad' pa hong hi ahi. Hiaite Zorath behte hong hi ahi. 3 Hiaite Etam' tapate ahi: Jezreel, Ishma leh Idbash. Amaute' sanggamnu Hazelelponi ahi. 4 Penuel bel Gedor' pa hong hi a, Ezer lah Husha' pa hong hi ahi. Hiaite Efratha' tamasa Hur suante ahi: Hur bel Bethlehem' pa hong hi ahi. 5 Tekoa' pa Ashur in zi nih a nei a, amaute Hela leh Naara ahi. 6 Naara in Ashur adingin Ahuzam, Hefer, Temeni leh Haahashtari a neihsak hi. Hiaite Naara' suante ahi. 7 Hela' tapate: Zireth, Zohar, Ethnan leh 8 Koz. Koz bel Anub leh Hazobeba leh Harum' tapa Aharhel behte' pa hong hi ahi. 9 Jebez bel a sanggamte sangin a lunglian zaw hi. A nu'n: Nathuakin amah ka neikheta, chi-a a min dinga Jabez a phuah ahi. 10 Jabez in Israel Pathian a sam a: Hon vualzawl lechinla, ka gam liansak lechin aw! Na khut in hon ompih henla, natna ka thuak louh nadingin siatna apan hon veng lechin, a chi hi. Tua bangin, Pathian in a ngetna a lawhchingsak hi. 11 Shuha' sanggampa Kelub bel Mehir' pa hong hi a, Mehir lah Eshton' pa hong hi ahi. 12 Eshton bel Beth Rafa, Pasea leh Tehina' pa hong hi a, Tehina lah Ir Nahash' pa hong hi ahi. Hiaite Reka mite ahi. 13 Kenaz' tapate: Othniel leh Seraia. Othniel' tapate: Hathath leh Meonothai. 14 Meonothai bel Ofra' pa hong hi ahi. Seraia bel Joab' pa hong hi a, Joab lah Ge Harashim' pa hong hi ahi. Ge Harashim' mite khutsiam mi a hih man ua hibang min phuah ahi. 15 Jefune' tapa Kaleb' tapate: Iru, Ela leh Naam. Ela' tapa: Kenaz. 16 Jahalelel' tapate: Zif, Zifa, Tiria leh Asarel. 17 Ezra' tapate: Jether, Mered, Efer leh Jalon. Mered' zite khat in tate Miriam tawh Shamai tawh Ishba tawh a nei hi. Ishba bel Eshtemoa' pa hong hi ahi. 18 Mered' zi Judah mi in tapate Gedor' pa Jered tawh, Soko' pa Heber tawh, Zenoa' pa Jekuthiel tawh a nei hi. Hiai amasate, Mered in zi-a a neih Faro' tanu' Bithia' tate ahi. 19 Hodia' zi, Naham' sanggamnu' tate: Garmi mi Keila' pa leh Maakath mi Eshtemoa. 20 Shimon' tapate: Amnon,Rina, Ben Hanan leh Tilon. Ishi' suante: Zoheth leh Ben Zoheth. 21 Judah' tapa Shela' tapate: Leka' pa Er, Meresha' pa Laada leh Beth Ashbea-a khau zangngat gante beh, 22 Kozeba mi Jokim leh Joash leh Saraf. Saraf bel Moab leh Jashubi Lehem ukpa ahi. Hiai khangthu bu taanglai apan kigelh ahi. 23 Amaute belvelmi ahi uh a, Netaim leh Gedera-a teeng ahi uhi. Tua muntea teengin kumpipa adingin a seem uhi.
Simeon
24 Simeon' suante: Nemuel, Jamin, Jerib, Zera leh Shaul. 25 Shaul' tapa Shalum ahi a, Shalum' tapa Mibsam ahi a, Mibsam' tapa Mishma ahi. 26 Mishma' suante: A tapa Hamuel, Hamuel' tapa Zakur, Zakur' tapa Shimei. 27 Shimei in tapa sawmleguk leh tanu guk a nei a, ahihhangin, a sanggampate'n ta tampi a nei kei uh. Tua bang ahih manin, a behte uh Judah mite zahin a tam kei uhi. 28 Amaute, Beersheba, Molada, Hazar Shual, 29 Bilha, Ezem, Tolad, 30 Bethuel, Horma, Ziklag, 31 Beth Markaboth, Hazar Susim, Beth Biri leh Shaaraim khawng ah a teng uhi. Hiaite, David' vaihawm ma-a a tenna munte uh ahi. 32 A kim a kiang ua khuate Etam, Ain, Rimon, Token leh Ashan, khaw nga leh 33 hiai khuate kim leh kianga Baalath donga khawtate khempeuh ah zong a teeng uhi. Amaute'n a khangthu uh gelhin a kem uhi. 34 Meshobab, Jamlekh, Amazia' tapa Josha, 35 Joel, Joshibia' tapa Jehu. Joshibia bel Seraia' tapa ahi a, Serai lah Asiel' tapa ahi. 36 Tuate baan ah, Elioenai, Jaakoba, Jeshohaia, Asaia, Adiel, Jesimiel, Benaia leh 37 Shifi' tapa Ziza. Shifi bel Alon' tapa ahi a, Alon bel Jedaia' tapa ahi a, Jedaia bel Shimri' tapa ahi a, Shimri lah Shemaia' tapa ahi. 38 Hiai a tunga min kigelhte amau' beh tuamtuamte' makaite ahi uhi. Amau' innkuante hong pung mahmah uh a, 39 gantat nading zongin, phaizang suahlam ah Gedor khua kim leh kiang ah a kuan uhi. 40 Gan tat nading loupa mun hoih leh taanzau, galmuang leh dai zikzik mun a mu uhi. Tua ah Hamte pawlkhat a na teeng ngeita uhi. 41 Hiaia min kigelhte bel Judah kumpipa Hezekia dam laia hong tung ahi uhi. Hamte tenna hong sim uh a, tua-a na om Meunate zong a sim uh a, amaute a zougawp uh, chih tuni-in a kitelna muh theih ahi. Tuate' mun ganvulhna hoih ahih manin, hong teengkip uhi. 42 Hiai Simeon mite laka 500, Ishi' tapate Pelatia, Nearia, Refaia leh Uziel in a makaih uh a, Seir tanggam a sim uhi. 43 A na suakta sun, Amalek omlaite a that uh a, tuni dongin tua ah a teengta uhi.
Reuben
1 Israel' tamasa Reuben' tapate hiaite ahi. Reuben bel tamasa himahleh, a pa' lupnapi a hihbuah manin, ta upa hihna hamphatna, Israel' tapa Josef tapate kianga piak ahi. Tua bang ahih manin, ta upa a hihna bangin khanggui gelhna ah ta upain Reuben a kikhum thei kei hi. 2 Judah zong a sanggamte laka hatpen leh ama' suan apan uk mi hong pawt hita mahleh, ta upa hihna hamphatna Josef in a tang hi. 3 Israel' tamasa Reuben' tapate: Hanokh, Palu, Hezron leh Karmi. 4 Joel' suante: A tapa Shemaia, Shemaia' tapa Gog, Gog' tapa Shimei, 5 Shimei' tapa Mika, Mika' tapa Resia, Resia' tapa Baal, 6 Baal' tapa Beera. Hiai Beera ahi Asuria kumpipa Tiglath Pileser in sala a piimang. Beera mah ahi Reubente makai. 7 Khanggui gelhna-a kikhum, a tanaute uh, a beh a behin hiaite ahi:Makaipen Jeiel ahi. Midang Zekharia, 8 Azaz' tapa Bela. Azaz bel Shema' tapa, Shema bel Joel' tapa ahi. Amaute Aroer apan Nebo leh Baal Meon dong gam ah a teeng uhi. 9 Amaute' ganhonte a pun mahmah manin, suahlam pang ah, Iufratis Luipi suntou gamdai-gamkeu mong dong in gam a luah uhi. 10 Saul vaihawm sungin, amaute'n Hagrate a dou uh a, a zou uhi. Gilead suahlam panga Hagrate teenna khempeuh a luah uhi.
Gad
11 Reubente zomin, Bashan gam ah, Saleka dong Gadte a teeng uhi: 12 Makaipen Joel ahi. Anihna Shafam, tua khitin, Bashan ah Janai leh Shafat ahi. 13 Amaute' tanaute, a innkuan kuanin: Mikhael, Meshulam, Sheba, Jorai, Jakan, Zia leh Eber, a vekun sagih. 14 Hiaite Abihail' tapate ahi. Abihail bel Huri' tapa ahi a, Huri bel Jaroa' tapa ahi a, Jaroa bel Gilead' tapa ahi a, Gilead bel Mikhael' tapa ahi a, Mikhael bel Jeshishai' tapa ahi a, Jeshishai bel Jado' tapa ahi a, Jado lah Buz' tapa ahi. 15 Ahi bel Abdiel' tapa ahi a, Abdiel lah Guni' tapa ahi a, a innkuan lutang uh ahi. 16 Gadte bel Bashan gama Gilead ah leh a kim a kianga khawtate ah leh gantatna Sharon gam khempeuh ah a teeng uh a, a kiphalh theih tantan uah a kiphalh uhi. 17 Hiaite khempeuh Judah kumpipa Jotham leh Israel kumpipa Jeroboam vaihawm sunga khanggui gelhna sunga kikhum ahi uhi. 18 Reubente, Gadte leh Manase nam kimkhatte'n galdouthei mansa pasal 44,760 a nei uhi. Amaute pianpha, lum leh namsau tawi thei, leh thai tawi thei, kidou dinga chilsiamsa ahi uhi. 19 Amaute'n Hagrate, Jestur, Nafish leh Nadab tung ah gal a bawl uhi. 20 Amaute'n kidou sunga Pathian a kouh manun, kidou laiin huhna a ngah uh a, Pathian in amaute khut ah Hagrate leh amaute tawh pangkhawmte a pia hi. Amaute'n Pathian muang uh ahih manin, Pathian in a thuumna uh a dawng hi. 21 Amaute'n Hagrate' ganta a laksak uh sangawngsau 50,000, belam 250,000 leh sabiltung 2,000 a pha hi. A salmat uh mi 100,000 ahi a, 22 kidouna, Pathian-a ahih manin, midang tampi thahin a om uhi. Tuachi-in, sala kaihmanga a om mateng uh tua gam a luah uhi.
Manase Nam Kimkhat
23 Manase nam kimkhatte a tam mahmah uhi. Amaute Bashan leh Baal Hermon kal gam ah a teeng uhi. Tua bel, Senir dong ahi. Senir bel Hermon Mual ahi. 24 Hiaite amaute innkuan lutangte ahi uhi: Efer, Ishi, Eliel, Azriel, Jeremia, Hedavia leh Jadiel. Amaute galhang, mi minthang, amau' innkuante adinga lutang ahi uhi. 25 Ahihhangin, amaute' pu leh pate Pathian tung ah a muanhuai kei uh a, Pathian in amaute' maia tua gama a hawlkhiak namte' pathiante kiang ah a kizuak uhi. 26 Tuachi-in, Israel Pathian in Asuria kumpipa Pul' lungtang a tokthou a, ama'n Reubente, Gadte leh Manase nam kimkhatte salin a kaimang hi. Pul bel Asuria kumpipa Tiglath Pilesar kichipa mah ahi. Ama'n amaute Hala, Habor, Hara leh Gozan luipi khawng a tun a, tua munte ah tuni dongin a om uhi.
Levi
1 Levi' tapate: Gershon, Kohath leh Merari. 2 Kohath' tapate: Amram, Izhar, Hebron leh Uziel. 3 Amram' tate: Aron, Mosi leh Miriam. Aron' tapate: Nadab, Abihu, Eleazar leh Ithamar. 4 Eleazar bel Fineha' pa ahi a, Fineha bel Abishua' pa ahi a, 5 Abishua bel Buki' pa ahi a, Buki bel Uzi' pa ahi a, 6 Uzi bel Zerahia' pa ahi a, Zerahia bel Meraioth' pa ahi a, 7 Meraioth bel Amaria' pa ahi a, Amaria bel Ahitub' pa ahi a, 8 Ahitub bel Zadok' pa ahi a, Zadok bel Ahimaaz' pa ahi a, 9 Ahimaaz bel Azaria' pa ahi a, Azaria bel Johanan' pa ahi a, 10 Johanan bel Azaria' pa ahi. Azaria ahi Jerusalema Solomon' tempul lam sunga siampi nasem. 11 Azaria bel Amaria' pa ahi a, Amaria bel Ahitub' pa ahi a, 12 Ahitub bel Zadok' pa ahi a, Zadok bel Shalum' pa ahi a, 13 Shalum bel Hilkia' pa ahi a, Hilkia bel Azaria' pa ahi a, 14 Azaria bel Seraia' pa ahi a, Seraia lah Jehozadak' pa ahi. 15 Tangtawn Toupa'n Judah leh Jerusalem, Nebukhadnezar khut zanga sala a khakmang laiin Jehozadak zong kaih-mangin a om hi. 16 Levi' tapate: Gershon, Kohath leh Merari. 17 Hiaite Geshon' tapate' min ahi: Libni leh Shimei. 18 Kohath' tapate: Amram, Izhar, Hebron leh Uziel. 19 Merari' tapate: Mali leh Mushi. Hiai Levite behte, a pu a pate uh gelh banga kimu ahi. 20 Gershon' tapate: A tapa Libni, Libni' tapa Jehath, Jehath' tapa Zima, 21 Zima' tapa Joa, Joa' tapa Ido, Ido' tapa Zera, Zera' tapa Jeatherai. 22 Kohath' suante: A tapa Aminadab, Aminadab' tapa Kora, Kora' tapa Asir, 23 Asir' tapa Elkana, Elkana' tapa Ebiasaf, Ebiasaf tapa Asir, 24 Asir' tapa Tahath, Tahath' tapa Uriel, Uriel' tapa Uzia, Uzia' tapa Shaul. 25 Elkana' suante: Amasai leh Ahimoth. 26 Ahimoth' tapa Elkana, Elkana' tapa Zofai, Zofai' tapa Nahath, 27 Nahath' tap Eliab, Eliab' tapa Jehoram, Jehoram' tapa Elkana leh Elkana' tapa Samuel. 28 Samuel' tapate: A tamasa Joel, a nihna Abija. 29 Merari' suante: Mali, Mali' tapa Libni, Libni' tapa Shimei, Shimei' tapa Uza, 30 Uza' tapa Shimea, Shimea' tapa Hagia leh Hagia' tapa Asaia.
Tempula Tumging Tumte
31 Tangtawn Toupa' inna Pathian singkuang hong khawl nunga, tua-a tumging lam mawhpua David' in a koih mite hiaite ahi: 32 Solomon in Jerusalema Tangtawn Toupa' tempul a lam mateng, amaute tua biakbuka tumging tumin a pang uhi. Amau adinga dan kikhung bangbangin a nasepte uh a sem uhi. 33 Tua banga nasemte, a tapate utawh hiaite ahi: Kohath' suante apan: Tumging siam Heman. Amah Joel' tapa ahi a, Joel bel Samuel' tapa ahi. 34 Samuel bel Elkana' tapa ahi a, Elkana bel Jehoram' tapa ahi a, Jehoram bel Eliel' tapa ahi a, Eliel lah Toa' tapa ahi. 35 Toa bel Zuf tapa ahi a, Zuf bel Elkana' tapa ahi a, Elkana bel Mahath' tapa ahi a, Mahath lah Amasai' tapa ahi. 36 Amasai bel Elkana' tapa ahi a, Elkana bel Joel' tapa ahi a, Joel bel Azaria' tapa ahi a, Azaria lah Zefania' tapa ahi. 37 Zefania bel Tahath' tapa ahi a, Tahath bel Azir' tapa ahi a, Azir bel Eliasaf tapa ahi a, Eliasaf lah Kora' tapa ahi. 38 Kora bel Izhar' tapa ahi a, Izhar bel Kohath' tapa ahi a, Kohath bel Levi' tapa ahi a, Levi lah Israel' tapa ahi. 39 Tua baan ah, Heman' seppih Asaf ahi a, a taklama pang gige ahi: Berekia' tapa Asaf ahi. Berekia lah Shimea' tapa ahi. 40 Shimea bel Mikhael' tapa ahi a, Mikhael bel Baaseia' tapa ahi a, Baaseia bel Malkija' tapa ahi a, 41 Malkija bel Ethni' tapa ahi a, Ethni bel Zera' tapa ahi a, Zera lah Adaia' tapa ahi. 42 Adaia bel Ethan' tapa ahi a, Ethan bel Zima' tapa ahi a, Zima bel Shimei' tapa ahi a, 43 Shimei bel Jahath' tapa ahi a, Jahath bel Gershon' tapa ahi a, Gershon lah Levi' tapa ahi. 44 Amaute' seppihte Merarite, a veilama pang gige ahi uhi. Kishi' tapa Ethan ahi. Kishi bel Abdi' tapa ahi a, Abdi bel Malukh' tapa ahi a, 45 Malukh bel Hashabia' tapa ahi a, Hashabia bel Amazia' tapa ahi a, Amazia lah Hilkia' tapa ahi. 46 Hilkia bel Amzi' tapa ahi a, Amzi bel Bani' tapa ahi a, Bani bel Shemer' tapa ahi a, 47 Shemer bel Mali' tapa ahi a, Mali bel Mushi' tapa ahi a, Mushi bel Merari' tapa ahi a, Merari lah Levi' tapa ahi. 48 A Levi hihpihte uh biakbuk, tua Pathian inn-a sep ding dang got ahi uhi. 49 Ahihhangin, Aron leh a suante ahi haltum thillatna maitam leh gimnamtui halna maitama thil laante. Tua bel Pathian' sila Mosi' thupiak bangbanga Israel adinga khelhna khuhna bawl a, Mun Siangthoupena thilhih khempeuh tawh kisai ahi. 50 Hiaite Aron suante ahi: A tapa Eleazar, Eleazar' tapa Fineha, Fineha' tapa Abishua, 51 Abishua' tapa Buki, Buki' tapa Uzi, Uzi' tapa Zerahia ahi. 52 Zerahia' tapa Meraioth, Meraioth' tapa Amaria, Amaria' tapa Ahitub, 53 Ahitub' tapa Zadok, Zadok' tapa Ahimaaz ahi. 54 Amaute' gam dinga seh, a tenna munte uh hiaite ahi: Aisaana piak masak amaute ahih manun, Aron' suan, Kohath behte teng kianga hiaite piak ahi. 55 Judah gama Hebron leh a kim a kianga gantatna gam teng piak ahi uhi. 56 Ahihhangin, khawpi kiima loute leh khawtate bel Jefune' tapa Kaleb kiang ah a kipia hi. 57 Tua bangin, Aron suante kiang ah tua bukna khawpi Hebron, Libna, Jatir, Eshtemoa, 58 Hilen, Debir, 59 Ashan, Juta leh Beth Shemesh, a gantatna gam teng utawh a kipia hi. 60 Benjamin nam lak ah Gibeon, Geba, Alemeth leh Ana-thoth, a gantatna gam teng utawh amaute piak ahi. Kohath' behte kianga khawpi kihawm teng avekin sawmlethum ahi. 61 Kohath suan dangteng kiangah, Manase beh kimkhatte lak apan khawpi sawmkhat a kipia hi. 62 Gershon' suante, a beh a beh adinga, Isakharte, Asherte, leh Naftalite laka kipia khawpi sawmlethum ahi. Tuate lak ah Manase gam a tel a, tua bel Bashan ahi. 63 Merari' suante, a beh a beh adinga Reubente, Gadte leh Zebulunte laka kipia khawpi sawmlenih ahi. 64 Tuachi-in, Israelte'n Levite adingin hiai khawpite leh a gantatna gamte uh a pia uhi. 65 Judah, Simeon leh Benjamin namte leh behte apan in ama-a kigensa khawpite aisaanin a kipia hi. 66 feKohath behte laka pawlkhatte' gamsung khawpi dingin Efraim nam apan piak ahi. 67 Efraim tanggam ah bukna khawpi Shekhem piak ahi uh a, tua baan ah Gezer, 68 Jokmeam, Beth Horon, 69 Aijalon leh Gath Rimon, a gantatna gam teng utawh, piak ahi uhi. 70 Manase nam kimkhat apanin Israelte'n Aner leh Bileam, a gantatna gam teng utawh, Kohath beh omlaite kiang ah a pia uhi. 71 Gershonte'n hiai anuaiate a tang uhi: Manase' nam kimkhat apanin Bashan gama Golan, tua baan ah, Ashtaroth, a gantatna gam teng utawh a tang uhi. 72 Isakhar nam apanin, Kadesh, Daberath, 73 Ramoth leh Anem, a gantatna gam teng utawh a tang uhi. 74 Asher' nam apanin, Mashal, Abdon, 75 Hukok leh Rehob, a gantatna gam teng utawh a tang uhi. 76 Tua baan ah, Naftali' nam apanin Galili gama Kadesh, Hamon leh Kiriathaim, a gantatna gam teng utawh a tang uhi. 77 Merarite, tua Levi omlaite'n anuaiate a tang uhi: Zebulunte apanin Jokneam, Karta, Rimono leh Tabor, a gantatna gam teng utawh a tang uhi. 78 Reuben nam apanin Jordan gal, Jerikho suahlam, gamdai-gamkeua Bezer, Jaza, ^Kedemoth leh Mafaath, a gantatna gam teng utawh a tang uhi. 80 Tua baan ah, Gad nam apanin Gilead gama Ramoth, Mahanaim, 81 Heshbon leh Jazer, a gantatna gam teng utawh a tang uhi.
Isakhar
1 Isakhar' tapate: Tola, Pua, Jashub leh Shimron a vekun li. 2 Tola tapate: Uzi, Refaia, Jeriel, Jamai, Ibsam leh Samuel a innkuan lutangte uh ahi. David' vaihawm sungin, Tola suante, amau' khangguia galdou theia minkhum teng 22,600 ahi uhi. 3 Uzi' tapa: Izrahia. Izrahia' tapate: Mikhael, Obadia, Joel leh Ishia. 4 Amau' innkuan khangguia galdou thei minkhum teng 36,000 ahi uhi. Amaute'n zi-le-ta tampi a nei ua ahi. 5 Isakhar behte' tanaute khangguia galdou theia minkhum 87,000 ahi uhi.
Benjamin
6 Benjamin' tapa thumte: Bela, Beker leh Jediel. 7 Bela' tapate: Ezbon, Uzi, Uziel, Jerimoth, leh Iri, innkuan lutang ngen nga ahi uhi. Amaute khangguia galdou theia minkhum 22,034 ahi uhi. 8 Beker' tapate: Zemira, Joash, Eliezer, Elioenai, Omri, Jeremoth, Abija, Anathoth leh Alemeth, avekun Beker' tapate ahi uh. 9 Amaute' suante' khangguia galdou theia minkhum 20,200 ahi uhi. 10 Jediael' tapa: Bilhan. Bilhan' tapate: Jeush, Benjamin, Ehud, Kenaana, Zethan, Tarshish leh Ahishahar. nHiai Jediael tapate, innkuan lutang ngen ahi uhi. Galdou dinga mansa 17,200 ahi uhi. 12 Shufte leh Hufte, Ir' suante ahi uh a, Hushte bel Aher' suante ahi uhi.
Naftali
13 Naftali' tapate: Jaziel, Guni, Jezer leh Shalum. Amaute Bilha' suante ahi.
Manase
14 Manase' suante: Asriel bel a mei Aram mi apan a suan ahi. Tua a meinu'n Gilead' pa Makir a neih ahi. 15 Makir in Hupte leh Shupte laka mi' khat zi-in a nei hi. Makir sanggamnu' min Maaka ahi. A suan dang khat Zelofehad ahi a, ama'n tanu ngen a nei hi. Makir' zi Maaka in tapa khat a nei a, a min Peresh ahi. A sanggampa' min Sheresh ahi a, a tapate Ulam leh Rakem ahi. 17 Ulam' tapa: Bedan. Hiaite Gilead' tapate ahi. Gilead bel Makir' tapa ahi. Makir lah Manase' tapa ahi. 18 Makir' sanggamnu' Hamoleketh in tapa Ishbod, Abiezer leh Mala a nei hi. I9 Shemida' tapate: Ahian, Shekhem, Likhi leh Aniam.
Efraim
20 Efraim' suante: Shuthela, Shuthela' tapa Bered, Bered' tapa Tahath, Tahath' tapa Eleada, Eleada' tapa Tahath, 21 Tahath' tapa Zabad leh Zabad' tapa Shuthela. Ezer leh Elead bel Gath-a teeng masate' gantate laksak dinga a kuan laiun, a na that uhi. 22 A pa uh Efraim in ni tampi sung amaute a suun a, a sanggamte amaute nem dingin hong hawh uhi.23 Tua nungin ama'n a zi a luppih kik a, hong gai a, tapa khat a nei hi. Efraim innsunga vangsiatna a om manin, tua a tapa min dingin Beria a sa hi.2 A tanu' min Sheera ahi a, Sheera in Beth Horon Khangnung leh Saknung, tua baan ah, Uzen Sheera a lam hi. 25 Beria' tapa Refa, Refa' tapa Reshef, Reshef tapa Tela, Tela' tapa Tahan, 26 Tahan' tapa Ladan, Ladan' tapa Amihud, Amihud' tapa Elishama, 27 Elishama' tapa Nun, Nun' tapa Joshua ahi. 28 A gamte uleh a tenna munte uh Bethel leh a kiim a kianga khawtate, tua baan ah, suahlam ah Naaran, tumlam ah Gezer leh a kiim a kianga khawtate, tua ban ah, Shekhem leh Ava donga a khawtate leh a khawta dangte ahi. 29 Manase gamgi zulzul ah Beth Shan, Taanakh, Megido leh Dor, a khawtate tawh ahi. Israel' tapa Josef suante hiai khawpite ah a teeng uhi.
Asher
30 Asher' tapate: Imna, Ishva, Ishvi leh Beria. Amaute' sanggamnu Sera ahi. 31 Beria' tapate: Heber leh Malkiel. Malkiel bel Birzaith' pa hong hi ahi. 32 Heber bel Jaflet, Shomer leh Hotham leh a sanggamnu Shua' pa hong hi ahi. 33 Jaflet' tapate: Pasakh, Bimhal leh Ashvath. Hiaite Jaflet' tapate ahi. 34 Shomer' tapate: Ahi, Roga, Huba leh Aram. 35 A sanggampa Helem' tapate: Zofa, Imna, Shelesh leh Amal. 36 Zofa' tapate: Sua, Harnefer, Shual, Beri, Imra, 37 Bezer, Hod, Shama, Shilsha, Ithran leh Beera. 38 Jether' tapate: Jefune, Pispa leh Ara. 39 Ula' tapate': Ara, Haniel leh Rizia. 40 Hiaite khempeuh Asher suante ahi uh a, innkuan lutang ngen, mi suanhuai ngen, mi hangsan leh makai tallang ngen ahi uhi. Khangguia gelhna-a minkhum, galdou thei 26,000 ahi uhi.
Benjamin Khanggui
1 Benjamin bel Bela' pa hong hi a, Bela a ta masa ahi. A nihna Ashbel, a thumna Ahara, 2 a Una Noha, a ngana Rafa ahi. 3 Bela' tapate: Adar, Gera, Abihud, 4 Abishua, Naaman, Ahoa, 5 Gera, Shefufan leh Huram. 6 Hiaite Ehud' tapate, Geba-a teeng innkuan lutangte ahi uh a, Manahath-a khakmanga omte ahi uhi: 7 Naaman, Ahija leh Gera. Gera in amaute a khamang a, tua nungin Gera bel Uza leh Ahihud'pa hong hi ahi. 8 Shaharaim in a zite Hushim leh Baara a maak nungin Moab gam ah tapate a nei hi. 9 A zi Hodesh tawh kal ah tapate Jobab, Zibia, Mesha, Malkam, 10 Jeuz, Sakia leh Mirma a nei hi. Hiai a tapate innkuan lutang ngen ahi uh. 11 A zi Hushim tawh kal ah Ahitub leh Elpaal a nei hi. 12 Elpaal' tapate: Eber, Misham leh Shemed. Shemed in Ono leh Lod leh a kiim a kianga khawtate a lam hi. 13 Tuate baan ah Beria leh Shema. Amaute bel, Aijalon-a teengte' innkuan lutangte ahi uh a, Gath-a teengte hawlkhete zong ahi uhi. 14 Ahio, Shashak, Jeremoth, 15 Zebadia, Arad, Eder, 16 Mikhael, Ishpa leh Joha bel Beria' tapate ahi. 17 Zebadia, Meshulam, Hizki, Heber, 18 Ishmerai, Izlia leh Jobab bel Elpaal' tapate ahi. 19 Jakim, Zikri, Zabdi, 20 Elienai, Zilethai, Eliel, 21 Adaia, Beraia leh Shimrath bel Shimei' tapate ahi. 22 Ishpan, Eber, Eliel, 23 Abdon, Zikri, Hanan, 24 Hanania, Elam, Anthothija, 25 Ifdeia leh Penuel, Shashak' tapate ahi. 26 Shamsherai, Sheharia, Athalia, 27 Jaareshia, Elija leh Zikri bel Jeroham' tapate ahi. 28 Hiaite khempeuh innkuan lutangte, khanggui gelhna-a makaia minkhumte ahi uh a, Jerusalema teengte ahi uhi. 29 Gibeon' pa Jeiel Gibeona teeng ahi. A zi' min Maaka ahi a, 30 a tamasa pasal Abdon ahi a, a zom Zur, Kish, Baal, Nadab, 31 Gedor, Ahio, Zeker leh 32 Mikloth ahi a, Mikloth bel Shimea' pa hong hi ahi. Amaute, Jerusalem ah a tanaute uh kiang ah a teeng uhi. 33 Ner bel Kish' pa hong hi a, Kish bel Saul' pa hong hi a, Saul bel Jonathan, Malki Shua, Abinadab leh Esh Baal' pa hong hi ahi. 34 Jonathan' tapa: Merib Baal. Merib Baal bel Mika pa hong hi ahi. 35 Mika' tapate: Pithon, Melekh, Tarea leh Ahaz. 36 Ahaz bel Jehoada' pa hong hi a, Jehoada bel Alemeth, Azmaveth, leh Zimri' pa hong hi a, Zimri bel Moza' pa hong hi a, 37 Moza bel Binea' pa hong hi ahi. Binea' tapa Rafa. Rafa' tapa Eleasa, Eleasa' tapa Azel ahi. 38 Azel in tapa guk a neia, a min uh: Azrikam, Bokeru, Ishmael, Shearia, Obadia leh Hanan ahi. Hiaite Azel' tapate ahi uhi. 39 A sanggampa Eshek' tapate: A tamasa Ulam, a nihna Jeush, a thumna Elifelet. ^Ulam' tapate galhat hangsan, thalphel zang siam ahi uhi. Amaute'n tapate leh tupate tampi a nei uh a, avekun 150 a pha uhi. Hiaite khempeuh Benjamin' suante ahi uhi.
1 Israel khempeuh, khanggui suina, Israel kumpipate' laibu sunga minkhum ahi uhi.
Jerusalema Teengte
a om uhi. 2 Amau' gam leh amau' khawpi luahkik masate lah Israel mite, siampite leh Levite leh tempul nasemte bangzah hiam ahi lei uhi. 3 Judah apan, Benjamin apan, Efraim leh Manase apana Jerusalema teengte hiaite ahi: 4 Amihud' tapa Uthai, Omri tapa Amihud, Imri' tapa Omri, Omri' tapa Bani. Bani bel Perez' suan ahi a, Perez lah Judah' tapa ahi. 5 Shilonte laka mite: A tamasa Asaia leh Asaia tapate. 6 Zerate laka mi: Jeuel. Judah mite laka mi 690. 7 Benjaminte laka mite: Meshulum' tapa Salu, Hodavia' tapa Meshulam, Hasenua' tapa Hodavia. 8 Jeroham' tapa Ibneia, Uzi' tapa Ela, Mikri' tapa Uzi leh Shefatia' tapa Mesulam, Reuel' tapa Shefatia, Ibnija' tapa Reuel. 9 Benjaminte laka mi, khanggui gelhna-a minkhumte 956 ahi. Hiai mite khempeuh innkuan lutang ngen ahi uhi. 10 Siampite laka mite: Jedaia, Jehoiarib, Jakin. 11 Hilkia' tapa Azaria, Meshulam' tapa Hilkia, Zadok' tapa Meshulam, Meraioth' tapa Zadok, Ahitub' tapa Meraioth. Ahitub bel Pathian' inn-a mawhpua ulian ahi. 12 Jeroham' tapa Adaia, Pashur' tapa Jeroham, Malkija' tapa Pashur. Adiel' tapa Maasai, Jazera' tapa Adiel, Meshulam' tapa Jazera, Meshilemith' tapa Meshulam, Imer' tapa Meshilemith. 13 Innkuan lutang siampite 1,760 ahi. Amaute mi kizen, Pathian inn-a nasep mawhpua ahi uhi. 14 Levite laka mite: Hashub' tapa Shemaia, Azrikam' tapa Hashub, Merari mi Hashabia' tapa Azrikam. 15 Bakbakar, Heresh, Galal leh Mika' tapa Matania, Zikri' tapa Mika, Asaf tapa Zikri, 16 Shemaia' tapa Obadia, Galal' tapa Shemaia, Jeduthun' tapa Galal. Asa' tapa Berekia, Elkana' tapa Asa. Elkana bel Netofathte' khuate khata teeng ahi. 17 Kongpi veengte: Shelum, Akub, Talmon, Ahiman leh a sanggamte uh. Shalum bel amaute' makai ahi a, 18 suahlam panga Kumpipa' Kongpi-a tuni donga kikoih ahi. Hiaite Levi pawl apan kongpi veengte ahi uhi. 19 Kore' tapa Shalum, Ebiashaf tapa Kore, Kora' tapa Ebiashaf leh Kora innkuan apan kongpi veenpihte bel, a pu a pate uh, Tangtawn Toupa' tenna lutna veenga mawhpua ahih bangun, Puanbuk innlim veenga mawhpua ahi uhi. 20 Hun paisa ah, Eleazar' tapa Fineha bel kongpi veengte makai ahi a, Tangtawn Toupa'n amah a ompih hi. 21 Meshelemia' tapa Zekharia, Kihoupihna Puanbuk lutna kongpi veengpa ahi. 22 Innlima kongpi veeng dinga teelkhiakte avekpi-un 212 ahi. Amaute khuate-a khanggui gelhna-a minkhum ahi uhi. Tua kongpi veengte bel David leh mailam muthei Samuel in muanga amau' mun ding chiat a sehsak ahi. 23 Amaute leh a suante uh Tangtawn Toupa' inn, tua Puanbuk kichi ah kongpi veengin a pang uhi. 24 Tua kongpi veengte pang li ah, Suahlam, Tumlam, Mallam leh Simlam pang ah a om uhi. 25 Khatvei vei amaute' khuate-a om a sanggamte uh zong, ni sagih sung khawng kongpite veenpih dingin hong kuan uhi. 26 Ahihhangin, kongpi veeng makai, Levite bel Pathian' inn-a inndante leh gou koihkhawmnate zong mawhpuaksak ahi uhi. 27 A veen ngeingei ding uh ahih manin, Pathian' inn kim ah zankhuain a om uh a, zing tenga kong hon ding a mawhpuak uh ahi. 28 A lak ua pawlkhatte, tempula biakna vanzatte keemin a pang uh a, tua vanzatte laklut ahih teng leh, lakkhiak ahih tengin a sim zel uhi. 29 Munsiangthoua vanzat dangte leh biakna vanzatte khempeuh kepna siampi dangte kianga piak ahi. Tuate bel anvui nei, grepzu, sathau, halthawh gimnamtuite leh mehlaka khak gimnamtuite zong ahi khawm vek hi. 30 Ahihhangin, siampite pawlkhat gimnamtuite helkhawm lam ah mawhpuain a pang uhi. 31 Levi mi khat, Kora beh laka mi Shalum tamasa, Matithia kichi bel tanghou em lama mawhpuakna got ahi. 32 A Kohath sanggamte pawlkhat bel Sabbath tenga dawhkan tunga a vuala koih ding tanghoute bawl ding mawhpuakna got ahi uhi. 33 Levi innkuan lutang hi a, tumging tumte bel tempula inndante ah a giak uh a, sun leh zana mawhpuakna neite ahih manun, mawhpuakna dang apan awlsak ahi uhi. 34 Hiaite khempeuh Levi innkuante-a lutangte, khanggui gelhna-a makai hihna neia minkhumte ahi uh a, Jerusalem ah a teeng uhi.
Saul' Khanggui
35 Gibeon' pa Jeiel bel Gibeon-ah a teeng hi. A zi' min Maaka ahi a, 36 a tamasa pasal Abdon ahi. Azomin Zur, Kish, Baa, Ner, Nadab, 37 Gedor, Ahio, Zekharia lehMikloth ahi. 38 Mikloth bel Shimeam' pa ahi. Amaute zong Jerusalem ah a tanaute uh kiang ah a teeng uhi. 39 Ner bel Kish' pa ahi a, Kish bel Saul' pa ahi a, Saul lah Jonathan, Malki Shua, Abinadab leh Esh Baal' pa ahi. 40 Jonathan' tapa: Merib Baal. Amah Mika' pa ahi. 41 Mika' tapate: Pithon, Melakh, Tarea leh Ahaz. 42 Ahaz bel Jada' pa ahi. Jada bel Alemeth leh Azmaveth leh Zimri' pa ahi a, Zimri lah Moza' pa ahi. 43 Moza lah Binea' pa ahi. Binea' tapa Refaia, Refaia' tapa Eleasa, Eleasa' tapa Azel ahi. 44 Azel in tapa guk a nei a, a min uh: Azrikam, Bokeru, Ishmael, Shearia, Obadia leh Hanan ahi. Hiaite Azel' tapate ahi.
Saul Amah Kithat
1 Filistiate'n Israel a dou laiun, Filistiate' mai ah Israelte a taikek uh a, Gilboa Mual tung ah tampi a si uhi. 2Filistiate'n Saul leh a tapate a phanawh mahmah uh a, a tapate Jonathan, Abinadab leh Malki Shua a that uhi. 3Saul kiim leh kiang ah kidouna a uang mahmah a, thaltawite'n amah a phak takun, a liamsak uhi. 4 Saul in a galvan tawipa kiang ah: Na namsau phawi inla, hon dawt pailet in, hiai zeksumlouhte hong ding ua hon engbawl kha ding uh, a chi hi. Ahihhangin, a galvan tawipa a mulkim a, a hih nuam kei hi. Tuachi-in, Saul in ama' namsau a phawi a, tua a bawh hi. 5 Saul a si chih a galvan tawipa'n a muh takin, ama'n zong a namsau a bawh a, a si teita hi. 6 Tua bangin, Saul leh a tapa thumte a si uh a, a innkuan ua sikhawm ahi mai uhi. 7 Tua phaizanga om Israelte khempeuh in, sepaihhonte a taikek uh chih leh, Saul leh a tapate a si uh chih a theih takun, a khawpite uh nusiain a taaikek uhi. Tuachi-in, Filistiate hong pai uh a, hong luah uhi. 8 A zing chiangin, misite' vante la dingin Filistiate hong kuan uh a, Gilboa Muala Saul leh a tapate si-in a mu uhi. 9 Saul' vante a la uh a, a lutang tanin a la uh a, a galvan zong a la uh a, tua thu Filistia gam sung tenga mipite laka than dingin khualtaite a sawl uhi. 10 Saul' galvan a lak uh, a milim pathiante uh' tempul ah a koih uh a, Saul lutang zong Dagon' tempul sung ah a suang uhi. nJabesh Gileada teengte khempeuh in Saul tunga Filistiate thilhih khempeuh thu a zak takun, 12 a mi hangsante khempeuh uh a kuan uh a, Saul leh a tapate luang a va la uh a, Jabesh ah hon pua uhi. Tua khitin, Jabesh-a tawsaw sing lianpi nuai ah a guhte uh a vui uh a, ni sagih sung an a ngawl uhi. 13 Saul bel Tangtawn Toupa tunga a muanhuai louh mana si ahi. Tangtawn Toupa' thu a mang kei a, dawi aisaansiam nangawn a makaihna deihin thu a dong a, 14 Tangtawn Toupa a dong zaw kei hi. Tua hangin, Tangtawn Toupa'n amah a sisak a, Jese' tapa David kiang ah kumpigam a pekhia hi.
Israel Kumpipa David
1 Israel gamsung mi khempeuh Hebron ah David kiang ah hong hawh uh a: Koute na si leh sa hi ung. 2 Tuma siah in, Saul kumpipa a hih lai nangawnin, Israel galdounate khempeuha amaute makaihpa nang na hi. Ahi a, Tangtawn Toupa, na Pathian in na kianga: Ka mi Israelte ching in, ka mite ukpa hong hi ding na hi, hon chi hiven, a chi uhi. 3 Israel upate khempeuh Hebrona Kumpipa David kianga hong hawh khitun, ama'n Hebron ah amaute tawh Tangtawn Toupa' maia kithukimna khat a bawlpih a, Tangtawn Toupa'n Samuel tungtawna a chiamsa bangin, amaute'n Israel tunga kumpipa hi dingin David thau a nilh uhi.
David in Jerusalem Lazou
4 David leh Israelte khempeuh Jerusalem ah a kuan uhi. Tua Jerusalem bel Jebus na kichi ahi. Tua muna teeng Jebuste'n 5 David kiang ah: Hiah nong lut kei ding, a na chi uhi. Ahihhangin, David in Zion kulhpi, tua David khawpi, a la hi. 6 David in: Jebuste that masa penpen, sepaih makailian-a bawl ahi ding, a na chikhin hi. Zeruia' tapa Joab a kuan masapen a, tuachi-in sepaih makailianin a pang hi. 7 David, tua kulhpi ah a teeng a, tua hangin, David Khawpi a kichi hi. 8 A kimkot ah a thuaha chial sehsawnte leh kulhbaang kal ah khawpi a lamtou hi. Joab in khawpi mun tuamtuam a puahpha hi. 9 Tangtawn Toupa Vanglianpen in amah a ompih manin, David bel hong lianin hong vanglian semsem hi.
David' Mihatte
10 Tangtawn Toupa' chiamsa banga David kumpi hihna in Israel gamsung teng a uap nadingin a mihat makaite leh Israelte khempeuh in a kumpi hihna nakpitakin a gum uhi. 11 Tua David' mihatte minte hiaite ahi: Hakmon mi Jashobeam bel sepaih laka makaipen ahi. Ama'n kidouna khat ah a teipi in mi 300 a that hi. 12 Amah zomin, Ahoha mi Dodai' tapa Eleazar ahi a, amah mihat thumte laka pang ahi. 13 Filistiate galdou dinga Pas Damim-a a kikhop laiun, David kiang ah Eleazar a om hi. Barli buh tawh kidim lou khat ah, Filistiate apanin sepaihhon a taikek uhi. 1 Ahihhangin, tua lou laizang ah a pang thak uh a, tua lou a hu uh a, Filistiate a satpai uh a, Tangtawn Toupa'n hotdamna thupitak a pia hi. Mihat makai 30-te laka thum Adulam kawlbuka suangpi ah David kiang ah hong hawh uhi. Tua bel, Filistiate, Refaim Phaizanga giahphuala a om laitak uh ahi. 16 Tua hun lai mahin David a muanhuai mun ah a om a, Filistia sepaihhon khat Bethlehem ah a om uhi. 17 David in tui a lunggulh a: Bethlehem kongpi bula tuileh-a tui hon va laksak ding mi om leh aw! a chi hi. 18 Tuachi-in, tua mi Thumte'n Filistiate' panmun a phupaisuak uh a, Bethlehem kongpi kianga tuileh apan tui a va tawi uh a, David kiang ah hon pua uhi. Ahihhangin, David in a dawn nuam kei a, Tangtawn Toupa' mai ah a sungbaw zaw hi. 19 Ama'n: Hibang hih peuhmah kei ning! A hinna uh mansuah ding lauhuaipi-a vakuante' sisan ka dawn dia hia? a chi hi. Amaute'n a hinna uh mansuah ding lauhuaipi-a tui hon tawi ahih manun, David in a dawn nuam kei hi. Tua mihat Thumte' hansanna hibang ahi. 20 Tua mi Thumte' makai, Joab sanggampa Abishai ahi. Ama'n mi 300 dou-in a teipi a liika a that a, tua mi Thumte sangin a min a thangzaw hi. 21 Tua mi Thumte laka nihte sangin pahtawina sangzaw a ngah a, amaute laka pang hi kei mahleh, amaute' makaiin a pang hi. 22 Jehoiada' tapa Benaia, Kabzeel mi galhang ahi. Ama'n hansanna thupitaktak a hih hi. Ama'n Moab mi suanpen nih a satlum hi. Vukkiakni khatin kawkhuk khat ah a kuansuk a, humpinelkai khat a that hi. 23 Tua lou zong, Aigupta mi tong nga-a sang a satlum hi. Tua Aiguptapa'n siamgante kolpi chia teipi tawi mahleh Benaia in khetbuk tawh a suai a a teipi tawi a sut a, tua a teipi mahin amah a that hi. 24 Jehoiada' tapa Benaia hansanna nasep tua bang ahi a, amah zong mihat Thumte bangin a minthang hi. 25 Mihat Thumte laka simtel hi kei mahleh, tua mi 30-te a kuapeuh sanga pahtawina sangzaw tang ahi. David in amah veengte laka makaiin amah a koih hi. 26 Tua mihatte: Joab' sanggampa Asahel, Bethlehem mi Dodo' tapa Elhanan, Harora mi Shamoth, Pelon mi Helez, 28 Tekoa mi Ikesh' tapa Ira, Anathoth mi Abiezer, 29 Hushath mi Sibekai, Aho mi Itlai, 30 Netofat mi Maharai, Netofath mi Baana' tapa Heled, 31 Benjamin gama Gibea mi Ribai' tapa Ithai, Pirathon mi Benaia, Gaash kuama mi Hurai, Arbath mi Abiel, Aharum mi Armaveth, Shaalbon mi Eliaba, 34 Gizon mi Hashem' tapate, Harara mi Shagee' tapa Jonathan, 35 Harara mi Sakar' tapa Ahiam, Ur' tapa Elifal, 36 36 Makerath mi Hefer, Pelon mi Ahija, 37 Karmel mi Hezro, Ezai' tapa Naarai, 38 Nathan' sanggampa Joel, Hagri' tapa Mibhar, 39 Amon mi Zelek, Joab' galvan tawipa, Baroth mi Naharai. Joab bel Zeruia' tapa ahi. 40 Ithra mi Ira, Ithra mi Gareb, 41 Hit mi Uria, Alai' tapa Zabad, 42 Reuben mi Shiza' tapa Adina. Amah Reubente makai ahi a, Sawmthumte laka pang ahi. 43 Maaka' tapa Hanan, Mithna mi Joshafat, 44 Aterath mi Uzia, Aroer mi Hotham' tapate Shama leh Jeiel. 45 Shimri' tapa Jediael, a sanggampa Tizi mi Joha. 46 Mahava mi Eliel, Elnaam' tapate Jeribai leh Joshavia, Moab mi Ithma, 47 Eliel, Obed leh Mezoba mi Jaasiel.
Galhatte'n David Zuan
1 Kish' tapa Saul apan David hawlmanga a om laiin, Ziklag ah hiai mite a kiang ah hong pai uhi. Amaute bel galdouna-a David lama pangte ahi uh a, 2 thala kigalvan, thalkap siam, khut veilam taklam zanga suanglot khau zangsiam ahi uhi. Benjamin nam, Saul behte ahi uhi. Amaute: 3 Amaute' makai Ahiezer leh Joash. Amaute bel Gibea mi Shemaa' tapate ahi uhi. Tua ban ah, Azmaveth' tapate Jeziel leh Pelet. Baraka, Anathoth mi Jeshu, 4 Gibeon mi, tua 30-te laka mihat leh makai Ishmaia. Jeremia, Jahaziel, Johanan, Gederath mi Jozbad, 5 Eluzai, Jerimoth, Bealia, Shemaria leh Haruf mi Shefatia. 6 Kora beh Elkana, Ishia, Azarel, Joezer leh Kora beh Jeshobeam. 7 Tua baan ah, Gedor mi Jehoram' tapate Joela leh Zabadia. 8 Gamdai-gamkeua bukna muanhuaia David a om laiin, Gadte pawlkhat a kiang ah a va tai uhi. Amaute galhat, galdou dinga mansa gige, lum leh tei zangsiam ahi uhi. Amaute' maitang humpinelkai maitang a bang a, mualtunga sazate bangin tai a hat uhi. 9 Amaute' makai Ezer ahi. a nihna Obadia hi a, a thumna Eliab ahi. 10 A Una Mishmana, a ngana Jeremia, na gukna Atai, a sagihna Eliel, 12 a giatna Johanan, a kuana Elizabad, 13 a sawmna Jeremia, a sawm leh khatna Makbanai. 14 Hiai Gadte sepaih makaite ahi uh a, a neupen zong mi 100 tawh kikim ahi a, a lianpen lah mi 1,000 tawh kikim ahi. 15 Amaute ahi, kha khatna a, Jordan lui khanga luipanga a let zuazua laitaka kaante. Tua lui suahlam leh tumlama teengte khempeuh laua taisakte ahi uhi. 16 Benjamin dangte leh Judah apan pawlkhat zong tua mun muanhuai ah David kiang ah hong tai uhi. 17 Amaute tuak dingin David hong kuankhia a, amaute kiang ah: Lemna thu tawh hong pai a, hong huh dinga hong pai na hih uleh, kei tawh pang dinga hon sang dinga mansa ka hi. Ahihhangin, khutlum zatna om louh laitaka, ka melmate khut sunga hon khotkhiak sawm na hih uleh bel, i pu i pate Pathian in mu henla, na tung uah thu khen hen, a chi hi. 18 Tua khitin, 30-te makai Amasai tung ah Kha hong tung a, ama'n: David aw, nanga hi ung! Jese' tapa aw, nang tawh pangkhawm hi ung! Lawhching in, lawhching inla, nang hon huhte lawhching uhen, na Pathian in hon huh ding hiven, a chi hi. Tuachi-in, David in amaute a saang a, amaute, a galsim pawlpawlte makaite-in a bawl hi. 19 Saul dou dinga Filistiate tawh David a kuan laiin, Manasete pawlkhat David kiang ah a va lehtaai uhi. Amaute' makaite tawh thu a kikup nungun, tua makaite'n amah a sawlkik manun, amah leh a mite'n Filistiate a huhta kei uhi. Amaute'n: A pu Saul kiang ah hon kilepsan khaleh, lutawng bansuma om lei ding hi hang, a chi uhi. 20 David, Ziklag-a a om laia, amah kianga hong lehtaai Manasete hiaite ahi: Adna, Jozabad, Jediael, Mikhael, Jozabad, Elihu leh Zilethai. Amaute Manasete 1,000 pawl makaite ahi uhi. 21 Amaute galhat ngen a hih manun, galsim pawlte douin David a huh uh a, David' sepaihhon makaite ahi uhi. 22 David in sepaihhon thupitak, Pathian' sepaihhon bang, a neih matan a nisimin amah huh mi hong kibehlaplap mai uhi.
Hebrona David lama Pangte
23 Tangtawn Toupa' gensa banga, Saul' kumpigam David kianga pe ding, David huh ding, kigalvansa-a Hebrona amah kianga hong pai mite hiaite ahi: 24 Judah mi, lum leh tei tawi, galdou dinga kigalvan, 6,800. 25 Simeon mi, kidou dinga mansa galhat 7,100, 26 Levi mi, 4,600. 27 Tuate lak ah Aron innkuan makai Jehoiada leh mi 3,700 leh, 28 tangval galhat hangsan Zadok ama' innkuan mi ulian 22 tawh a pang uhi. 29 Benjamin mi, Saul behte 3,000, a lak ua tamzaw tua ni donga Saul lama muanhuai lai hi. 30 Efraim mi, galhat hangsan, a beh lak ua minthang 20,800. 31 Manase nam kimkhatte, David kumpipa-a thaunilh dinga minlawha hong pai 18,000. 32 Isakhar mi, hunte leh Israel thilhih tuak theisiam makai 200, amaute nuaia om a tanaute uh. 33 Zebulun mi, kidou siamsa, kidou dinga mansa, galvan chikim tawi, David huh dinga muanhuai taka lungtang teng pia 50,000. 34 Naftali mi, ulian 1,000 leh lum leh tei tawi 37,000. 35 Dan mi, kidou dinga mansa 28,600. Asher mi, kidou dinga mansa leh siamsa 40,000. 37 Jordan suahlam Reuben leh Gad leh Manase nam kimkhat apan mi galvan chikima kivan 120,000. 38 Hiaite khempeuh, galdou mi, galdouna-a pang dinga amau hong kipia ahi uhi. Amaute bel, Israel gam khempeuh tunga kumpipa dinga David bawl tum tintena Hebrona hong pai ahi uhi. Israel midangte zong David, kumpipa-a bawl dingin lungtang pumkhatin a om uhi. 39 Amaute ni thum sung David kianga nea dawnin a om uhi. Amau' innkuante'n amaute adingin nek ding taak ding a pia uhi. 40 Isakhar, Zebulun leh Naftali dongin, a innvengte un zong, sabiltungte, sangawngsaute, sakolneute leh bawngtalte-a an hon pua in hong pai uhi. Nek ding taak ding, annel vuite, theipi keu beute, grepkeu beute, grepzute, sathaute, bawngte leh belamte kiching mahmah hi. Ahang bel, Israela lungnopna thupi hiven.
Pathian' Singkuang Lakkikna
1 David in a uliante, a sepaih sangkhat khat makaite, sepaih 100 pawlpawl makaite tek thu a kum hi. 2 Tua khitin, Israel kikhawmte khempeuh kiang ah: Hoih na sak lam uh ahih a, Tangtawn Toupa i Pathian' deihlam ahih leh, Israel gam sung tenga i sanggamte kiang ah leh amaute kianga a khawpite uh leh gantatna gama om siampite leh Levite kiang ah, hong kuan a, hong huh nadingun thu khak ni. 3 Saul vaihawm sunga, i Pathian' singkuang zanga thu dong lou i hih chiangin, tua singkuang lata ni, a chi hi. 4 Mite khempeuh ngaiha hoih ahih manin, kikhawmte khempeuh in tua thu lem a sakpih uhi. 5 Tuachi-in, David in Israel khempeuh, Aigupta gama Shihor lui apan Lebo Hamath dongin a kaikhawm a, Kiriath Jearim apan Pathian' singkuang paw dingin a chi hi. 6 David leh a ompih Israelte khempeuh, Judah gama Baala, tua bel Kiriath jearim hiven, tua ah Tangtawn Toupa Pathian' singkuang paw dingin a kuan uhi. Tua Tangtawn Toupa Pathian bel cherubte kala kumpitutphaha tupa ahi a, tua Mina tua singkuang kiminlawh ahi. 7 Abinadab' inn apanin, kangtalai thak khatin tua Pathian' singkuang a pua uh a, Uza leh Ahio in tua kangtalai a kai uhi. 8 David leh Israelte khempeuh in, Pathian' mai ah tua singkuang, theihtawpin a kipahpih uh a, late sain, tumgingte, kaihgingte, khuangtate, dakkhutbette leh pengkulte tawh thuah in a kipahpih uhi. 9 Kidron' buhphual hong tun takun, kangtalai kai bawngtalte a kisuih manun, Uza in tua singkuang lenkip dingin khutin a sawk hi. 10 Uza tung ah Tangtawn Toupa' hehna a kuang a, khuta tua singkuang a khoih manin, a tung ah khut a kha hi. Tuachi-in, tua ah Pathian' mai ah a sita mai hi. 11 Tangtawn Toupa' thangpaihna Uza tunga a puahzak manin, David a heh a, tuni dongin tua mun Perez Uza a kichi den hi. 12 Tua ni-in David in Pathian a lau a: Bangchi-a Pathian singkuang ka kiang tun thei ngei ding ka hia? a chi hi. 13 Ama'n ama' kianga om dingin, tua singkuang, David khawpi a tun ngam kei a, Git mi Obed Edom' inn a tun zawta hi. 14 Tua Pathian' singkuang Obed Edom inn ah, a innkuante kiang ah kha thum sung a om a, Tangtawn Toupa'n a innkuan leh a neih khempeuh a vualzawl hi.
David' Inn leh a Innkuan Sung
1 Tura kumpipa Hiram in David kiang ah, ama' adia kumpi innpi khat lamsak dingin, sidar singtumte, suangsekmite leh singnasemte tawh, thupawte a sawl hi. 2 David in, Tangtawn Toupa'n Israel tunga kumpipain amah a koihkip a, a mi Israelte khualna-a a kumpigam nakpitaka tawisang ahita chih a thei hi, 3 David in Jerusalem ah zi tamsem a nei a, tapa tamsem leh tanu tamsemte' pa hong hi hi. 4 Jerusalema piang a tate hiaite ahi: Shamua, Shabab, Nathan, Solomon, 5 Ibhar, Elishua, Elpelet, 6 Noga, Nefeg, Jafia, 7 Elishma, Beeliada leh Elifelet.
David in Filistiate Zou
8 Israel gam khempeuh tunga kumpipa hi dingin David thau a kinilh chih Filistiate'n a zak takun, sepaih bukim tawh amah zong dingin a kuantou uhi. Ahihhangin, David in a na za a, amaute tuak dingin a kuan hi. 9 Filisiate bel hong kuankhin uh a, Refaim Phaizang a luahkhin uhi. Tuachi-in, David in Pathian a dong a: Kuanin Filistiate ka dou diam? Amaute ka khut ah non pe diam? a chi hi. Tangtawn Toupa'n a dawng a: Kuan in, amaute na khut sung ah kon pe ding, a chi hi. nTuachi-in, David leh a mite, Baal Perazim ah a kuantou uh a, tua ah amaute a zou hi. David in: Tuite a luanzak bangin Pathian in ka khut zangin ka galte a thehzakta, a chi hi. Tuachi-in, tua mun Baal Perizim a kichi hi. 12 Filistiate'n tua ah a pathiante uh a taisaan uh a, David in tuate meia haltum dingin thu a pia hi. 13 Filistiate'n tua phaizang khatvei a luh kik uh a, 14 tuachi-in David in Pathian a dong kik a, Pathian in a dawng a: Tangtakin kuantou ken la, amaute kimvel inla, balsam singkungte zawn ah amaute dou in. 15 Balsam singkungte dawna paiging na zak chiangin, kidou dingin naih in, ahang bel, Filistia sepaihte dou dingin Pathian a na kuankhe masata chihna hi ding hiven, a chi hi. 16 Tuachi-in, David in Pathian' thupiak bangin a hih a, Gibeon apan Gezer dongin Filistia sepaihte a phukpai uhi. 17 Tuachi-in, gam teng ah David' minthanna a dim a, Tangtawn Toupa'n namte khempeuh amah a lausakta hi.
Jerusalem ah Singkuang Kitun
1 David in Tangtawn Toupa Singkuang adinga mun a bawlna muna tua singkuang hon latou dingin, Jerusalem ah Israelte khempeuh a kaikhawm hi. 4 Ama'n Aron' suante leh Levite a samkhawm hi. 5 Kohath' suante lak apan makai Uriel leh tanau 120; 6 Merari' suante lak apan makai Asaia leh tanau 220; 7 Gershon' suante lak apan makai Joel leh tanau 130; 8 Elizafan' suante lak apan makai Shemaia leh tanau 200; 9 Hebron' suante lak apan makai Eliel leh tanau 80; 10 Uziel' suante lak apan makai Aminadab leh tanau 112. 11 Tua khitin, David in siampite Zadok leh Abiathar leh Levite Uriel, Asaia, Joel, Shemaia, Eliel leh Aminadab a sam a, 12 amaute kiang ah: Noute Levi innkuante lutangte na hi uh a, nou leh na Levipihte uh na kisiansuah ding uh a, Tangtawn Toupa, Israel Pathian' singkuang adinga mun bawlna-a singkuang na tuttouh ding uh ahi. 13 Nou Levite'n a chila na puaktouh louh man uh ahi, Tangtawn Toupa, i Pathian eite tunga heh-a a puahzak. Hih ding dan sehsa banga bangchi hih ding hiam chih amah i dong kei ua ahi, a chi hi. 14 Tuachi-in, siampite leh Levite, Tangtawn Toupa, Israel Pathian' singkuang pawtou dingin a kisiansuah uhi. 5 Tua bangin, Levite'n, Tangtawn Toupa' thu bangbanga Mosi' thupiak bangin, Pathian' singkuang, a zawlte liangzanga ngain a pua uhi. 16 David in, Levi makaite kiang ah, a sanggamte uh lungnopna la sa a, tumgingte, tua pekgingte, kaihgingte leh dakkhutbette tawh thuah dingte sep dingin a hilh hi. 17 Tuachi-in, Levite'n Joel' tapa Heman a sep uh a, a sanggamte' lak apan Berekia' tapa Asaf leh amaute' sanggam Merarite lak apan Kushaia' tapa Ethan, 18 tua ban ah, amaute tawh kitonin, amaute zoma dinmun nei, kongpi veeng, a sanggamte uh Zekharia, Ben Jaaziel, Shemiramoth, Jehiel, Uni, Eliab, Benaia, Maaseia, Matithia, Elifelehu, Mikneia, Obed Edom leh Jeiel a sep uhi. 19 Tumging tumte Heman, Asaf leh Ethan in sumsan dakkhutbet a gingsak ding uh ahi. 20 Zekharia, Aziel, Shemiramoth, Jehiel, Uni, Eliab, Maaseia leh Benaia, alamoth kaiha pekging tum dingte ahi uhi. 21 Matitha, Elifelehu, Mikneia, Obed Edom, Jeiel leh Azazia, sheminith kaiha kaihging tum dingte ahi uhi. 22 Levi makai Kenania bel lapu ahi, amah la siam ahih manin tua mah ama' mawhpuak ahi. 23 Berekia leh Elkana bel Pathian' singkuang adinga kongkhak veeng ahi uhi. 24 Siampite, Shebania, Joshafat, Nethanel, Amasai, Zekharia, Benaia leh Eliezer bel Pathian' singkuang maia pengkul mut dingte ahi uhi. Obed Edom leh Jehia zong Pathian' singkuang adinga kongkhak veeng ahi uhi. 25 Tuachi-in, David leh Israel upate leh sepaih 1,000 pawlpawl makaite, Obed Edom' inn-a Tangtawn Toupa' thukhun singkuang pawtou dingin kipaktakin a kuan uhi. 26 Pathian in, Tangtawn Toupa' thukhun singkuang pua siampite a huh manin bawngtal sagih leh belamtal sagih a laan uhi. 27 Singkuang pua Levite leh lasate leh lapawl makai Kenania kivat bangin David in puan malngat tuai a silh a, siampi puanak puan malngat zong a silh hi. 28 Tuachi-in, Israelte khempeuh in kipahna kikou aw tawh, belamtal' ki leh pengkulte mut tawh, dakkhutbet tawh, kaihgingte leh pekgingte tumging tawh thuahin Tangtawn Toupa' thukhun singkuang a latouta uhi. 29 Tua Tangtawn Toupa' thukhun singkuang, David Khawpi a lut takin, Saul' tanu Mikhal in tawhlet apan a na en hi. Kumpipa David lam leh kipaka om a mu a, Mikhal in a lungsung ah a simmawh hi.
1 Amaute'n Pathian' singkuang hon la uh a, David in tua dinga puanbuk a kaih sung ah a tung uh a, Pathian' mai ah haltum thillatte leh lemna thillatte a laan uhi. 2 David in, tua haltum thillatte leh lemna thillatte a lat khitin, Tangtawn Toupa' minin mipite a vualzawl hi. 3 Tua khitin, tanghou beu khat, nisuh-keu beu khat leh grep-keu beu khat chiat Israel numeite leh pasalte a pia hi. 4 Tangtawn Toupa' singkuang maia nasem ding, thilnget thumnate nei ding, kipahthu gen ding leh Tangtawn Toupa, Israel Pathian phat dingin David in Levite pawlkhat a sep a, tuate: 5 Makaipen Asaf, a nihna Zekharia, tua baan ah Jeiel, Shemiramoth, Jehiel, Matithia, Eliab, Benaia, Obed Edom leh Jeiel ahi. Amaute, Pathian' thukhun singkuang maia kaihgingte leh pekgingte tum ding, Asaf in dakkhutbet gingsak ding, 6 siampite Benaia leh Jahaziel in pengkulte mut gige ding ahi uhi.
David' Kipahthu-genna Phatnala
7 Tua ni-in, David in Asaf leh a seppihte kiang ah, Tangtawn Toupa tunga kipahthu genna, hiai phatnala a pia a: 8 Tangtawn Toupa tung ah, kipahthu gen unla, a min sialin sam unla. A thilhihsa namte lak ah theisak un. 9 Ama' mai ah la sa unla, Amah phatla sa un. A thilhih lamdangte khempeuh gen un. 10 Ama' min siangthou sial unla, Tangtawn Toupa zongte khempeuh lungtang nuam hen. 11 Tangtawn Toupa leh a thahatna mitsuan unla, a maitang zong gige un. 12 A thilhih lamdangte thei gige unla, a chiamtehna thillamdangte leh thukhenna a genkhiakte thei gige un. 13 A sila Israel suante aw, a teelte, Jakob tapate aw, 14 Amah Tangtawn Toupa, i Pathian hi a, a thukhennatein leitung teng dim hi. 15 Nang a thukhun thei gige a, thu a piaksa khang 1,000 donga theigige na hi. 16 Tua thukhun Abraham tawh kala a khun, Isak kianga kichiama a kipsak theigige hi. 17 Jakob kiang ah tua thuseh kipsak kik a, Israelte kianga Tangtawn thukhunin kipsak kik a: 18 Kanaan gam goutana na tantuan dinga hon pe ding hi'ng, chi hi. 19 Noute na tawm lai ua, tawm taktak uchin a, tua gama mikhuala om na hi uh. 20 Nam khat apan nam dang kianga pem uh a, kumpigam khat apan kumpigam dang tung uhi. 21 Hinapi-a aman amaute nuaisiah dinga kuamah phallou a, amaute guma kumpipate taihilh zaw a: 22 Ka thaunilhte khoih kei un, ka kamsangte hihna kei un, chi hi. 23 Leitung bup in Tangtawn Toupa phatla sa unla, nisimin a hotdamna phuang un. 24 Namte lak ah a thupina phuang unla, mi khempeuh lak ah a thilhih lamdangte phuang un. 25 Ahang bel, Tangtawn Toupa lian a, phattaak penpen a, amah pathian dangte teng sanga lau zawk ding hiven. 26 Namte' pathiante khempeuh milim mannabei hi lei a, Tangtawn Toupa bel vaante bawlpa hiven. 27 Ama' mai ah thupina leh letna om a, a tenna muna thahatna leh lungnopna om hi. 28 Namte' laka innkuante aw, Tangtawn Toupa kiang ah: Nang na thupi, nang na hat, chi-in thupina pia un. 29 Tangtawn Toupa kiang ah a min tawh kikhom thupina pia un. Thillat hon tawiin a mai ah hong pai unla, a thupina kilawmna leh siangthouna bangin Tangtawn Toupa bia un. 30 Leitung teng a mai ah ling un! Leitung phutkippa, amah hi-a, liinglou ding hi. 31 Vaante nuam uhenla, leitung kipak hen. Nam teng lak ah: Tangtawn Toupa'n vaihawm hi! chi uhen. 32 Tuipi leh a sunga omte khempeuh in mualthawn bangin thawnsak hen. Gamte leh a sunga omte kipak uhen! 33 Tua chiangin, gammang singkungte khempeuh in nuama Tangtawn Toupa' mai a la sa ding uhi. Leitung thukhen dinga amah hong pai dek hiven. 34 Tangtawn Toupa tung ah kipahthu gen un, amah hoih hi, a zahngaihna Tangtawn daih hi. 35 Na min siangthou tunga kipahthu ka gen theih nadingin, nang phatna-a nuam dingin Pathian, koute' Hondampa aw, hon humbit in, hon kaikhawm inla, namte lak apan hon hukhia in, chi-in kikou un. 36 Tangtawn Toupa, Israel Pathian in Tangtawn Tangtawnin phatna tang hen, a chi hi. Tua khitin, mipite khempeuh in: Amen, Tangtawn Toupa phat un, a chi uhi. 37 David in Asaf leh a seppihte, nisima a kul banga nasem gige dingin, Tangtawn Toupa' thukhun singkuang mai ah a nusia hi. 38 Tua baan ah, Obed Edom leh a seppih mi 68-te, amaute tawh sem dingin zong a nusia hi. Jeduthun' tapa Obed Edom leh Hosa bel kongpi veengte ahi uhi. 39 David in siampi Zadok leh a siampi hihpihte, Gibeon-a munsanga Tangtawn Toupa' biakbuk mai ah a nusia hi. 40 Tua bel, Tangtawn Toupa'n Israel kianga a thupiak Dan laibu-a kigelh khempeuh bangbanga, haltum thillatte zinglam leh nitaklama, tua haltum thillatna maitam tunga laan gige ding, chihna ahi. 41 Heman leh Jeduthun leh, Tangtawn Toupa kianga kipahthu gen dinga a min min ua teel leh seh dangte zong amaute kiang ah a om uhi. Kipahthu gen nading san bel, ama' zahngaihna Tangtawn daih ahih man ahi. 42 Heman leh Jeduthun bel pengkulte, dakkhutbette leh la zek siangthou tawh thuah tumgingte-a mawhpua ahi uhi. Jeduthun' tapate ahih leh kongpi-a koih ahi uhi. 43 Tua khitin, midangte khempeuh a inn tek uah a chiahta uh a, David zong a innkuante vualzawl dingin inn ah a chiahta hi.
David kianga Pathian Thuchiam
1 David, ama' innpi-a a teenkip nungin, kamsang Nathan kiang ah: Tangtawn Toupa' thukhun singkuang puanbuk peuha a om laiin, kei hiai sidar singa kilam innpi ah ka teeng mawk a! a chi hi. 2 Nathan in David a dawng a: Lungsima na vei peuhmah hih mai in, Pathian in hon ompih ahi, a chi hi. 3 Tua zanin Pathian' thu Nathan kiang ah hong tung a: 4 Pai inla, ka sila David kiang ah: Tangtawn Toupa' thugen hiai ahi. Ama'n: Ka tenna ding inn lam ding nang na hi kei. 5 Aigupta apan Israel ka pikhiak apan tuni dong inn ah ka teeng nai kei. Puanbuk mun khat apan mun dang ah, tenna mun khat apan tenna mun dang ah, ka kituah kawi kawi hi. 6 Israelte khempeuh tawh tona ka paina peuha, ka mite ching dinga thu ka piakna, a makaite uh khat peuh kiang ah: Bang hanga sidar singa inn hon lamsak lou na hi ua? ka chi ngei-a hia? chi ahi, chi in, 7 Tu'n ka sila David kiang ah: Tangtawn Toupa Vanglianpen' thugen hiai ahi. Ama'n: Ka mi Isrelte tunga ukpa hi dingin gantatna mun leh belamhon chinna apanin, kon la hi. 8 Na paina peuha hon ompih ing a, na meima khempeuh na mai apan satkhia ka hi ing a, tu'n leitunga mi lianpente' min banga na min thupisak ding ka hi. 9 Tua ban ah, ka mi Israelte adinga mun khat pe ding ing a, amau' inn mahmah neita ding uh a, lou neiin khaichi pawita ding uh a, hihbuai hi nawn lou ding uhi. A chila a hih bangun, migiloute'n nuaisiah nawn lou ding uh a, 10 ka mi Israelte tunga vaihawm makaite ka seh ni apan a hih bang ua zong hih nawn lou ding uhi. Na melmate khempeuh zong ke'n hon zawhsak ding ka hi. Tangtawn Toupa'n nang ading inn hon lamsak ding chih ka phuang hi: nNa nite a bei chianga, na pu na pate kianga na pai chiangin, na mun luah ding na suan, na tapate laka khat tengkhe ding ing a, ama' kumpigam tungkhe ding ka hi. 12 Amah ahi, kei adinga inn hon lamsak ding. Ama' kumpitutphah kipsak ding ka hi. 13 Ama adinga Pa hi ding ing a, amah ka tapa hi ding hi. Nang ma-a ukpa apan ka zahngaihna ka lakkik banga, na tapa apan ka zahngaihna lakik ngei lou ding ka hi. 4 Amah zaw ka inn tung ah leh ka kumpigam tung ah koihden ding ing a, a kumpitutphah kipden ding ahi, chi ahi, chi in, a chi hi. 15 Nathan in hiai kilakna thute avekpi-in, David kiang ah a gen sawn hi.
David' Thuumna
16 Tua khitin, David a lut a, Tangtawn Toupa' mai ah a tu a: Tangtawn Toupa Pathian aw, kei kua hi a, ka innkawte zong bang hi uh ahia, hitan tan non pii? 17 Pathian aw, na mitmuh a, hiai zong kiching lou bangin, na sila' innkuan khawnung thu ding bang na gen lai a, mihing laka pahtawipen hileng kilawm hialin non en a, Tangtawn Toupa ka Pathian aw! 18 Na sila hon pahtawita china, David in na kianga bang gen nalai ding ahia? 19 Tangtawn Toupa aw, nang na sila hon theitel hi vechin. Na sila hang leh na deihlam banga hiai thil thupi hih chin a, hiai thuchiam thupi luate khempeuh hon theisak hi vechin. 20 Tangtawn Toupa aw, nang bang kuamah om lou hi. Koute'n bila ka zaktak bangun, nang lou ngai Pathian om lou hi. 21 Tua baan ah, na mi Israelte bang kua a om a? Leitunga nam khat, amaute' Pathian kuankhia a, ama'-a tuam ding, ama' min paw dinga a tatkhiakte bang kua om ahia? Nang Aigupta apan amaute tankhia chin a, amaute' maia namte hawlkhia a, thillamdang pipi, thupi taktak hih na hi. 2 Nang na mi Israelte nanga hiden dinga bawl chin a, Tangtawn Toupa aw, nang amaute' Pathian hong hi na hi. 23 Tu'n, Tangtawn Toupa, na silapa leh a innkawte tawh kisaia na thuchiam tangtunin kipsakden in. Na chiamsa bangbangin hih in, 24 tuachi-in, hihkipin om ding a, na min lianden ding hi. Tua hun chiangin mite'n Tangtawn Toupa Vanglianpen, Israel tunga Pathian mah Israel Pathian ahi! chi ding uhi. Tuachi-in, na mai ah na silapa David innkawte hihkipin a om ding hi. 25 Nang ka Pathian in na silapa adingin inn na lamsak ding chih amah kiang ah na hilh a, tua hangin, na silapa'n na kianga thuum dingin hangsanna a ngahta hi. 26 Tangtawn Toupa aw, nang mahmah Pathian na hi! Nang hiai thuchiam hoihte na silapa kiang ah na chiamta. 27 Tuin, na silapa' innkawte na mitmuha omden dinga vualzawl ding na kipahlam ahi. Ahang bel, Tangtawn Toupa aw, nang na vualzawlta a, vualzawlin a omdenta ding hi, a chi hi.
David' Vualzawhnate
1 Hun hong paipai a, David in Filistiate a zou a, a nuaisiahta a, amaute' ukna nuaia om Gath* leh a kiim a kianga khawtate a laksak hi, 2 David in Moabte zong a zou a, amah nuaia toukaiin, siah a pia uhi. 3 Tua baan ah, Iufratis lui dung tawna a ukna hihkip dinga a kuan laiin, Hamath dong Zoba kumpipa Hadadezer a dou hi. 4 David in a kangtalai 1,000 leh kangtalai hawi 7,000 leh khe sepaih 20,000 a matsak hi. Kangtalai kai sakolte zagui a sattansak a, sakol 100 kia a hawi hi. 5 Damaska-a om Aramte, Zoba kumpipa Hadadezer huh dinga hong kuan takun, David in Aramte 22,000 a na that hi. 6 David in Aram kumpigam Damaska ah sepaih hon khat a koih a, Aramte ama' nuai ah a toukai uh a, siah a pia uhi. David a kuanna peuh ah, Tangtawn Toupa'n vualzawhna a pia hi. 7 David in, Hadadezer' uliante' puak, khama kibawl lumte a la a, Jerusalem hon tun hi. 8 David in Hadadezer' khawpi Teba leh Kun apanin sumsan tampi a la a, Solomon in tuate zangin sumsan Tuikuangpi leh khuampite leh sumsan van tuamtuamte a bawl hi. 9 David in Zoba kumpipa Hadadezer' sepaihhon khempeuh a zou, chih thu, Hamath kumpipa Tou in a zak takin, 10 Kumpipa David in kidouna-a Hadadezer a zawh mana, David muak a, va chibai ding leh va kipahpih dingin, a tapa Hadoram a sawl hi. Hadadezer leh Tou bel na kidou dou khinta uh ahi. Hadoram in kham leh ngun leh sumsana bawl van tampi hon puak hi. 11 Kumpipa David in namte, Edom leh Moab, Amonte leh Filistiate leh Amalekte apan a lak ngun leh khamte a lat bangin, hiai a van lakte zong Tangtawn Toupa kiang ah a laan hi. 12 Zeruia' tapa Abishai in, Chi Phaizang ah Edomte 18,000 a vatpai hi. 13 Edom ah sepaihhon pawlkhat a koih a, Edomte khempeuh David nuai ah a toukai uhi. David a kuanna peuh ah Tangtawn Toupa'n vualzawhna a pia hi,
David' Uliante
14 David in Israel gam khempeuh ah vai a hawm a, a mite adinga hoih leh dik in thu a khen zel hi. 15 Zeruia' tapa Joab, sepaihhon makailian ahi a, Ahilud' tapa Jehoshafat, laibu-a thil gelhlutpa ahi a, 16 Ahitub' tapa Zadok leh Abiathar' tapa Ahimelekh, siampi ahi uh a, Shavsha bel laigelhpa ahi. 17 Jehoiada' tapa Benaia bel Kerethte leh Pelethte tunga toupa ahi. David' tapate, kumpipa kianga ulian makaite ahi uhi.
Amonte Douna
1 Hun hong pai pai a, Amon kumpipa Nahash hong si a, a tapa in a mun a luah a, kumpipain hong pang hi. 2 David in: Nahash' tapa Hanun tung ah chitna siamna ka suah ding, a pa'n ka tunga chitna siamna na suah hiven, chi-in a ngaihtuah hi. Tuachi-in, David in Hanun kiang ah, a pa Nahash sihna tunga thuakpihna thu tun dingin palai a sawl hi. Hanun thuakpihna thu tun dinga Amon gama David' mite hong tun takun, 3 Amon miliante'n Hanun kiang ah: David in thuakpihna thu tun dinga mi hon sawl na pa pahtawi hi-in na gingta maw? Gam hong vel a, hong enkhia a, hong lumlet dinga hiai mite hong pai ahi zaw kei umaw? a chi uhi. 4 Tuachi-in, Hanun in David' mite a man a, a mul uh a metmaisak a, a puansilhte uh, a tawbou san uah, a laizang ah a bawhtansak a, a sawlkik hi. 5 Mi kuahiam khat hong pai a, tua mite' tungthu David hong hilh hi. Amaute zahlaka maizum lua ahih manun, David in amaute tuak dingin khualtaite a sawl hi. Kumpipa'n: Na khamul uh hong khan nawn mateng Jerikho ah hong taam tadih unla, tua khit chiangin hong pai un, a chisak hi. 6 Amonte'n David nakvanga namsia hong suakta uh ahi, chih a theih takun, Hanun leh Amonte'n, Aram Naharaim, Aram Maaka leh Zoba apan kangtalaite leh kangtalai hawlte goih nadingin ngun talen 1,000 a khak uhi. kangtalai leh a hawi 32,000 tawh, Maaka kumpipa leh a sepaihte tawh a guai uh a, amaute hong kuanin Medeba kiang ah giahphual a sat uhi. Amonte zong a khawpite uapan a kikaikhawm uh a, kidou dingin hong kuankhia uhi. 8 Hiai thu za-in, David in Joab, galdou thei sepaihhon khempeuh tawh a sawlkhia hi. 9 Amonte hong kuankhia uh a, amaute' khawpi lutna tak ah kidou dingin a kivual uhi. Amaute huh dinga hong kuan khempeuh bel gamlak munawng ah amaute kiain a omtuam uhi. 10 Joab in a mailam ah leh a nunglam ah galdou dinga kivuala kisa a om chih a mu a, Israel sepaih hoih hoih pawlkhat a teelkhia a, Aramte dou dingin panmun a khawhsak hi. nMidangte khempeuh, a sanggampa Abishai makaihna nuai ah a koih a, Amonte dou dingin panmun a khawhsak hi. 12 Joab in: Aramte kei adinga a hat luat uleh, nong hutkhiak ding ahi. Amonte nang adinga a hat luat uleh kong hunkhe ding. 13 Thahat suah inla, i mite leh Pathian' khawpite adingin hangsantakin dou ni. Tangtawn Toupa'n a mitmuha hoih a sak bangbang a hih ding, a chi hi. 14 Tua khitin, Joab, sepaihte tawh, Aramte dou dingin a kuan uh a, a mai ah Aramte a taikek uhi. 15 Aramte a taikek uh chih Amonte'n a muh takun, Joab' sanggampa Abishai mai ah a taikek samta uh a, khawpi sung ah a tailut uhi. Tuachi-in, Joab Jerusalem ah a kilehkikta hi. 16 Israelte'n amaute a zougawp uh chih Aramte'n a muh takun, thangkoute a sawl uh a, Luipi gala Aramte, Hadadezer' sepaihhon makai Shofakh in amaute makaihin, a samkhesak uhi. 17 Hiai thu David a hilh takun, Israelte khempeuh a kaikhawm a, Jordan lui a kaan a, amaute dou dingin mailam a nawt a, amaute' mazawn ah kidou dingin panmun a khawh hi. David in tua bangin Aramte dou dingin panmun a khawh a, amaute'n David hon douta uhi. 18 Ahihhangin, Israelte' mai ah Aramte a taikek uh a, David in Aram kangtalai hawlte 7,000 leh khe sepaih 40,000 a that hi. A sepaihhon makai uh Shofakh zong a that hi. 19 Hadadezer' nuaia omte'n Israelte' zawhin a omta uh chih a kimuh takun, David tawh kal ah lemna a bawl uh a, a nuai ah a toukaita uhi. Tuachi-in, Aramte'n Amonte a huh nuam nawn kei uhi.
Raba Laakna
1 Phalbi beia, nipi kipat chil, kumpipate galdou dinga a kuankuan lai un, Joab in galvan tawite a piikhia hi. Amonte gam a hihsiatsak a, Raba ah a kuan a, a uum a, ahihhangin, David bel Jerusalem ah a om tadih a, Joab in Raba a luh a, zawhsain a nusia hi. 2 David in a kumpipa uh lutang apan kumpilukhu a la hi. Tua kumpilukhu gikdan khamsik talen khat ahi a, suangmanphate-a zep ahi. Tua kumpilukhu David khuksakin a om hi. David in tua khawpi apan gallak van tampi a la a, 3 tua muna om mite a kaikhia a, singatnate, sik suanggalte leh heipitea nasem dingin a zang hi. David in Amon khawpi mite khempeuh hibangin a zang a, tua khitin, sepaihhonte khempeuh tawh Jerusalem ah a kilehkikta hi.
Filistiate tawh Kidouna
5 Filistiate tawh kidouna dang khat ah, Jair' tapa Elhanan in Git mi Goliath' sanggampa Lami a that hi. Lami bel siamganmi' siamkolpi chia teipikung neipa ahi. 6 Gath-a kidouna dang khat leuleu ah, mi lianpi khat, khut langniha khutzung guk tuak leh, khe langniha khezung guk tuak nei, a om hi. Khutzung leh khezung kigawm 24 a nei hi. Amah zong Rafa' suante khat ahi. 7 Ama'n Israelte a galtot laiin, Shimea' tapa Jonathan in amah a that hi. Shimea bel David' sanggampa ahi. Hiaite Gath-a Rafa' suante ahi uhi. David leh a mite khut ah a puk vek uhi.
David' Misimna 1 Setan in Israel a dou a, Israelte sim dingin David a tokthou hi. 2 Tuachi-in, David in Joab leh sepaih makaite kiang ah: Kuan unla, Beersheba apan Dan dong, Israelte hon sim un. Mi bangzah pha hiam, chih ka theih nadingin hong hilh un, a chi hi. 3 Joab in a dawng a: Tangtawn Toupa'n sepaihte a lehzain pungsak lezong, ka toupa kumpipa aw, ka toupa' khua-le-tui muanhuai hi vek lou umaw? Banghanga ka toupa'n hibang hih nuam na hia? Banghanga Israel tunga mawhna tun ding na hia? a chi hi. 4 Ahihhangin, kumpipa thu in Joab a thuneihkhum a, tuachi-in, Joab a kuankhia a, Israel gamsung teng a tawnsuak a, tua khitin, Jerusalem ah hong kilehkik nawn hi. 5 Joab in galdouthei phazah David kiang ah a tun hi: Israel gamsung teng ah, namsau tawi thei mi 1,100,000 a om. Tuate lak ah Judah gama 470,000 simtel ahi. 6 Ahihhangin, Joab in Levi leh Benjamin a simtel kei hi. Ahang bel, ama' ngaihin kumpipa' thupiak haihuai ahi. Hiai thupiak, Tangtawn Toupa' mitmuhin zong thil gilou ahi. Tuachi-in, ama'n Israel a gawt hi. 8 Tua khitin, David in Pathian kiang ah: Hiai ka hih, nakpitaka khial ka hi. Tu'n na silapa mawhna lamang in, kon ngen ahi. Thil haihuaipi hih ka hi, a chi hi. 9 Tangtawn Toupa'n David adia mailam mutheipa Gad kiang ah: 10 Pai inla David kiang ah: Hiai Tangtawn Toupa' thugen ahi. Ama'n: Teel ding thum kon pia. Na tunga ka tunsak dingin khat teel in, chi ahi, chi-in va hilh in, a chi hi. 11 Tuachi-in, David kiang ah Gad a va hawh a, a kiang ah: Hiai Tangtawn Toupa' thugen ahi. Ama'n: Na deih tel in: 12 Kumthum kial kiak ding, ahih kei leh, na melmate' maia kha thum sung na taai a, a namsau un hon delhphak ding, ahih kei leh, ni thum sung Tangtawn Toupa' namsau tua nitea gamsunga hipi leeng a, Tangtawn Toupa' vansawltak in Israel gamsung munchih a sukgam ding, chi ahi. Kei hon sawlpa bangchi dawn ding ka hia, thupukna tuin bawl in, a chi hi. 13 David in Pathian kiang ah: Ka lungzing mahmah hi, Tangtawn Toupa' zahngaihna lian mahmah ahih chiangin, a khutsung ah ka puklut ding, mihing khutsung ah zaw hon puklutsak ken, a chi hi. 14 Tuachi-in, Tangtawn Toupa'n Israel tung ah hipi a sawl a, Israel mi 70,000 a si uhi. 15 Tua baan ah, Pathian in Jerusalem hihse dingin vansawltak khat a sawl hi. Ahihhangin, tua vansawltak tua banga a gamtat laiin, Tangtawn Toupa'n a mu a, tua siatna thupi hangin a dah a, mipite hihmangthang vansawltak kiang ah: Kichingta! Na khut dokkik in, a chi hi. Tua hun laitakin, tua Tangtawn Toupa' vansawltak Jebus mi Arauna buhphuala ding ahi. 16 David a daktou a, lei leh van kala tua Tangtawn Toupa' vansawltak namsau tawia, Jerusalem tunga a namsau lik lai a mu hi. Tua phetin, David leh upate saiippuan silhin a khupbawh uhi. 17 David in Pathian kiang ah: Galdouthei mite sim dinga thu pepa kei hilou ka hi maw? Kei ka hi a khial a, thil diklou hihpa. Hiaite belamte hi lei uhi. Amaute'n bang a hih ua eita? Tangtawn Toupa, ka Pathian aw, kei leh ka innkuante tung ah na khut tu henla, hiai hipi na mite tung ah om nawn kei hen, a chi hi. 18 Tua khitin, tua Tangtawn Toupa' vansawltak in, David va kuantou a, Jebus mi Arauna buhphuala maitam dawh dinga va hilh dingin, Gad thu a pia hi. 19 Tuachi-in, Tangtawn Toupa' mina Gad thugen mangin, David a kuantou hi. 20 Arauna in huitbuh a nachil laitakin, a kihei a, tua vansawltak a mu hi. Ama' ompih a tapa lite bel a na kibu uhi. 21 Tua khitin David in Arauna a va naih a, Arauna a kiheia amah a na muhtakin, buhphual a nusia a, David' mai ah lei si-in a kuun hi. 22 David in a kiang ah: Tangtawn Toupa' maia maitam ka dawh a, mipite tunga hipi a bei nadingin, na buhphual mun hon pia in, a man kimin hon leisak in, a chi hi. 23 Arauna in David kiang ah: La in! Ka toupa kumpipa'n na deih bangbangin zang in. Ngai in, bawngtalte haltum thillat dingin kon pe ding a, buhkhetna chiangte a sing dingin, huitbuhte an thillat dingin, hiaite khempeuh a man beiin kon pe ding, a chi hi. 24 Ahihhangin, Kumpipa David in Arauna a dawng a: Hilou e, a man kim kon pe teitei ding. Kei adinga man nei louin, Tangtawn Toupa adingin nanga ka la kei ding a, halmang thillat zong ka laan kei ding, a chi hi. 25 Tuachi-in, David in tua mun man dingin kham shekel 600-a gik, Arauna a pia hi. 26 David in tua ah Tangtawn Toupa adingin maitam khat a dawh a, haltum thillatte leh lemna thillatte a laan hi. Ama'n Tangtawn Toupa a sam a, Tangtawn Toupa'n van apan tua haltum thillat latna maitam tunga mei kesukin a dawng hi. 27 Tua khitin, Tangtawn Toupa'n tua vansawltak a houpih a, tua vansawltak in a namsau a paai ah a thunkikta hi. 28 Tua hun laiin, Tangtawn Toupa'n, tua Jebus mi Arauna' buhphual ah a dawng chih David in a muh takin, tua ah kithoihnate a laan hi. 29 Mosi in gamdai-gamkeua a bawl tua Tangtawn Toupa' biakbuk leh haltum thillatna maitam bel, tua hun laiin, Gibeona munsanga om ahi uhi. 30 Ahihhangin, David bel, Tangtawn Toupa' vansawltak namsau a lau manin, Pathian apan thu dong dingin tua maitam mai ah a hawh thei kei hi.
1 Tua khitin, David in: Tangtawn Toupa Pathian' inn hiai muna a om ding ahi. Tua baan ah, Israel adinga haltum thillat maitam zong hiai muna a om ding ahi, a chi hi.
Tempul Lam dinga Kisakkholhna
2 Tuachi-in, David in Israela teeng gamdang mite kaihkhawm ding thu a pia a, Pathian inn lam nading suangsek mite, suang sek dingin amaute lak apanin a sep hi. 3 Kongpite-a kongkhakte leh a bulhna ding inkilhnate bawl nading sik tampitak a pia a, sumsan buuk senglouh zong a pia hi. 4 Sidar singtumte zong simsenglouh a pia hi. Tua banga a piak theihna bel Sidonte leh Turate'n tuate tampitak hon puak ua ahi. 5 David in: Ka tapa Solomon a naupang laia, a taka tuah leh theih a hau nai kei a, Tangtawn Toupa adinga inn lam ding lah namte khempeuh muh-a thupi, etlawm leh minthang hi ding a hih manin, ke'n tua dingin kisakkholhna ka bawl ding, a chi hi. Tuachi-in, David in a sih main kisakkholhna nakpitakin a bawl hi. 6 Tua khitin, David in a tapa Solomon a samsak a, Tangtawn Toupa, Israel Pathian' inn lam ding mawhpuakna a guan hi. 7 David in Solomon kiang ah: Ka tapa, Tangtawn Toupa, ka Pathian' Min ading inn lam ding ka lungtanga ka vei ahi. 8 Ahihhangin, hiai Tangtawn Toupa' thu ka kiang ah hong tung a, ama'n: Sisan tam na suah a, gal tam na dou a, ka mitmuha leitunga sisan tam na suah manin, nang zaw ka Min adingin inn na lam kei ding. 9 Ahihhangin, ngai in, tapa khat na nei ding a, amah chingkam leh lungnel ahi ding a, ke'n a kiim a kianga galte khempeuh apan galmuanna ka pe ding. Ama' min Solomon ahi ding a, ama' vaihawm sungteng, Israel galmuanna ka pe ding. 10 Amah ahi ka Min ading inn lam ding. Amah ka tapa ahi ding a, kei a pa ka hi ding. Tua baan ah, Israel tunga a kumpitutphah ka kipsakden ding hi, a chi hi. 11 Tuin, ka tapa aw, Tangtawn Toupa'n nang hon ompih ding a, na mavang ding a, Tangtawn Toupa'n a gensa bangin, Tangtawn Toupa, na Pathian adingin inn na lam ding. 12 Tangtawn Toupa'n Israel tunga makaihna hon piak chianga, Tangtawn Toupa, na Pathian dan na zuih theih nadingin Tangtawn Toupa'n theihna thu leh theihsiamna hon guan hen aw. 13 Tuachi-in, Tangtawn Toupa'n Israel adinga Mosi kianga dankhunte leh thukhennate a piak zui dinga na pilvan peuhmah leh na lawhching ding hi. Hattak leh hangsantakin om peuhmah phot mai in. Lau kenla, lungke sam ken. 14 Nakpitaka kisuuk-in, Tangtawn Toupa' tempul ading kham talen 100,000, ngun talen 1,000,000, sumsan leh sik buuk senglouh tampi, leh sing leh suang ka khol hi. Tuate na behlap thei lai ding. 15 Nasem mi hau a, suanglate, suangsek siamte leh singsiamte, tua ban ah, van chikim bawlsiamte 16 ngun leh kham leh sumsan leh sik simsenglouh nei hi vechin. Tu'n nasep pan inla, Tangtawn Toupa'n hon ompih hen aw, a chi hi. 17 Tua khitin, David in, a tapa Solomon huh dingin Israel makaite khempeuh thu a pia hi. 18 Ama'n amaute kiang ah: Tangtawn Toupa, noute' Pathian in noute hon ompih hi lou hia? Kim leh kiang apan galmuanna tawlngakna noute hon pia hilou hia? Ahang bel, ama'n gamsunga teengte ka khut sunga hon peta a, a gam lah Tangtawn Toupa leh a mite nuaia omta hiven. 19 Tuin, Tangtawn Toupa, na Pathian uh lungsim zong dingin na lungtang uleh hinna teng utawh kipia un. Tangtawn Toupa thukhun singkuang leh Pathian thilzek siangthoute khempeuh, Tangtawn Toupa' Min adinga kilam ding tua tempul sunga na laklut theih nadingun, Tangtawn Toupa, Pathian' munsiangthou lam panta un, a chi hi.
Levite
1 David hong kum tama hong teek takin, Israel tung ah, a tapa Solomon kumpipain a koih hi. 2 Ama'n Israel makaite khempeuh leh siampite leh Levite zong a kaikhawm hi. 3 Levite, kum 30 leh a tunglama upate a kisim a, 38,000 a pha hi. 4 David in: Hiaite laka mi 24,000 Tangtawn Toupa' tempul kilamna nna enkaiin a pang ding uh a, mi 6,000 bel uliante leh thukhentein a pang ding uh ahi. 5 Mi 4,000 kongpi veengin a pang ding uh a, mi 4,000 dangte bel tumgingte zanga Tangtawn Toupa phatin a pang ding uh ahi. Tua dinga tumgingte ka piaksa ahi, a chi hi. 6 David in Levi' tapate' min Gershon, Kohath leh Merari zuiin Levite a pawlpawlin a khen hi.
Gershonte
7 Gershonte laka pangte: Ladan leh Shimei. 8 Ladan' tapate: Tapa masapen Jehiel, tua chiangin Zetham leh Joel, avekun thum. 9 Shimei' tapate: Shelomoth, Haziel leh Haran, a vekun thum. Hiaite Ladan' pate inkuana ahi uhi. 10 Tua ban ah, Shimei' tapate: Jahath, Ziza, Jeush leh Beria. Hiai Shimei' tapate, avekun li. 11 Jahath a khatna, Ziza a nihna: ahihhangin, Jeush leh Beria in tapa tam a nei kei uh. Tua hangin amaute innkuan khat banga sim ahi uh a, nna khat piakkhawm ahi uhi.
Kohathte
12 Kohath' tapate: Amram, Izhar, Hebron leh Uziel, avekun li. 13 Amram' tapate: Aron leh Mosi. Aron bel a suante tawh a dendena thil zek siangthoupente septuampa ding, Tangtawn Toupa' maia kithoihnate laan ding leh a maia nasem ding leh a mina vualzawlnate gen dinga sehtuam ahi uhi. 14 Pathian' mi Mosi' tapate bel Levi nam laka pang banga sim ahi. 15 Mosi' tapate: Gershom leh Eliezer. 16 Gershom' suante: Tapa masapen Shubael ahi. 17 Eliezer' suante: Tapa masapen Rehabia. Eliezer in tapa dang a nei kei a, ahihhangin, Rehabia' tapate bel a tam mahmah uhi. 18 Izhar' tapate: Tapa masapen Shelomith ahi. 19 Hebron' tapate: Tapa masapen Jeria. A nihna Amaria, a thumna Jahaziel, a lina Jekameam. 20 Uziel' tapate: Tapa masapen Mika, a nihna Ishia.
Merarite
21 Merari' tapate: Mali leh Mushi. Mali' tapate: Eleazar leh Kish. 22 Eleazar bel tapabeiin a si a, tanu ngen a nei hi. A sanggamte uh Kish' tapate'n amaute zi-in a nei uhi. 23 Mushi' tapate: Mali, Eder leh Jerimoth, avekun thum. 24 Hiaite Levi' suante, a behbeh-in ahi uh a, amaute behtulpite' ahi uh a, a suante uh hiai behtuulpite mina minkhum, a mai mala sim ahi uhi. Tua bel, kum 20 leh a tunglama upate, Tangtawn Toupa' tempula nasemte ahi uh chihna ahi. 25 Ahang bel, David in: Tangtawn Toupa, Israel Pathian in a mite tawlngakna peta a, amah Jerusalema teengden dinga hong paita ahih manin, 26 Levite'n biakbuk hiam, ahih kei leh, nasep nadinga vanzat khat peuh a puak puak uh kul nawn lou hi, a na chita-a ahi. 27 David' thuhilhna nanungpen bangbangin, Levite, kum 20 leh a tunglama upate kisim ahi. 28 Levite' nasep bel, Tangtawn Toupa' tempula nasepna-a Aron' suante huh ahi. Tua bel, huangsung inntual, a panga inndante, thil zeka siangthoute hih siangthou leh Pathian' inn-a nna dangdang sepna-a mawhpuakna amaute'-a ahi, chihna ahi. 29 Dawhkan tunga tanghou beute a vuala koih, an thillat ding anvui nei, silngou sawhlouh tanghou neem, tanghou em, a helkhawm, a tamdan teh, chih khawng amaute' mawhpuak ahi. 30 Zingsang tenga Tangtawn Toupa tunga kipahthu gen leh phata a din ding uh ahi. Nitaklam tenga zong tua bangmah a hih ding uh, 31 Sabbath nite leh Kha Thak nite leh sehsa ankuanglui nite-a Tangtawn Toupa' maia haltum thillat a kilat tenga tua bang maha hih ding uh ahi. Amaute'n a mi phazah ding sehsa bang geih leh sep ding dan piaksa bangbanga, Tangtawn Toupa' maia a sep gige ding uh ahi. Tua bangin, Levite'n Kihoupihna Puanbuk hita leh, Mun Siangthou hita leh, a sanggamte uh Aron' suante huh a, Tangtawn Toupa' tempula nasep ding a mawhpuakte uh a sem uhi.
Siampite a Pawlpawla Kikhenna
1 Aron' tapate a pawlpawla kikhendan hibang ahi: Aron' tapate Nadab, Abihu, Eleazer leh Ithamar ahi. 2 Ahihhangin, Nadab leh Abihu bel a pa uh sih main a si uh a, tapate zong a nei kei uhi. Tuachi-in, Eleazer leh Ithamar in siampi nna a sem uhi. 3 Eleazer' suan Zadok leh Ithamar' suan Ahimelekh' huhna tawh, David in nasem pawl om ding dan a sehsa bangin, amaute a pawlpawlin a khen hi. 4 Ithamar' suante lak sangin Eleazer' suante lak ah makai tam a om zaw a, tua tamdan zuiin a kikhen uhi: Eleazer' suante lak ah behtuulpi sawm leh guk a om a, Ithamar' suante lak ah behtuulpi giat a om hi. 5 Eleazer leh Ithamar suante laka mun siangthoua nasem uliante leh Pathian' nasem uliante om tuak ahih manin, khentuam neilou-a aisaanin amaute khen detdet ahi uhi. 6 Laigelh mi khat, Levi mi Nethanel' tapa Shemaia in kumpipa leh uliante, siampi Zadok, Abiathar' tapa Ahimelekh leh siampi innkuan lutangte leh Levi behtuulpite' mitmuhin Eleazer' beh laka innkuan khat leh Ithamar beh laka innkuan khat teelkhiak, hiai teng a min min ua khumin a gelhlut hi. 7 Aisaan khatna, Jehoiarib tung a tu a, a nihna, Jedaia tung; 8 a thumna, Harim tung; a lina, Seorim tung; 9 a ngana, Malkija tung; a gukna, Mijamin tung; 10 a sagihna, Hakoz tung; a giatna, Abija tung; 11 a kuana, Jeshua tung; a sawmna, Shekania tung; 12 a sawmlekhatna Eliashib tung; a sawmlenihna, Jakim tung; 13 a sawmlethumna, Hupa tung; a sawmlelina, Jeshebeab tung; 14 a sawmlengana, Bilga tung; a sawmlegukna, Imer tung; 15 a sawmlesagihna, Hezir tung; a sawmlegiatna, Hapizez tung; 16 a sawmlekuana, Pethahia tung; a 20-na Jehezkel tung; 17 a 21-na, Jakin tung; a 22-na, Gamul tung; 18 a 23-na, Delaia tung; a 24-na, Maazia tung a tu hi. 19 Tangtawn Toupa, Israel Pathian in a pu a pa uh Aron kianga thu a piak banga, amaute adinga seh dante banga, amaute Tangtawn Toupa' tempul a lut chiang ua, nasem dinga a kizom zoma kiseh dan hibang ahita hi.
Levi Dangte
20 Levi' suan dangte ading ahih leh: Amram' tapate lak apanin: Shubael; Shubael' tapate lak apanin Jedaia. 21 Rehabia ahih leh, a tapate lak apanin: Ishia a khatna ahi. 22 Izhar-te apanin: Shelomoth; Shelomoth' tapate lak apanin Jahath. 23 Hebron' tapate: Khatna Jeria, nihna Amaria, thumna Jahaziel, lina, Jekameam. 24 Uziel' tapa: Mika. Mika' tapate lak apanin, Shamir. 25 Mika' sanggampa: Ishia. Ishia' tapate lak apanin, Zekharia. 26 Merari' tapate: Mali lehi Mushi. Jaazia' tapa: Beno. 27 Merari' tapate: Jaazia apan Beno, Shoham, Zakir leh Ibri. 28 Mali apanin: Eleazar. Amah tapabei ahi. 29 Kish apanin: Kish' tapa: Jerameel. 30 Mushi' tapate: Mali, Eder leh Jerimoth. Hiaite a beh a beh-a gen Levite ahi uhi. 31 Amaute'n zong a sanggamte uh, Aron suante' hih bangin, ai a san uhi. Tua zong, kumpipa David, Zadok, Ahimelekh leh siampite leh Levite laka behtuulpite mitmuhin a hih uhi. Sanggam upapen' behte zong sanggam naupangpen' behte tawh kibanga et ahi uhi.
Lasate
1 David in, sepaihhon makaite tawh kithuahin, kaihgingte, pekgingte leh dakkhutbette tawh thuaha la samkhiaka sa dingin Asaf tapate laka pawlkhat leh Heman leh Jeduthun a sep hi. Hiai nasep semte hiaite ahi: 2 Asaf tapate lak apan: Zakur, Josef, Nethania leh Asarela. Asaf tapate bel Asaf etkaina nuai ah a om uh a, kumpipa thu nuai ah Pathian apan thutungte a gen uhi. 3 Jeduthun ahih leh, a tapate lak apan: Gedalia, Zeri, Jeshaia, Shimei, Hashabia leh Matithia, avekun guk. Amaute'n a pa uh Jeduthun' etkaina nuai ah, Pathian apan thutungte genin, kaihgingte zangin, Tangtawn Toupa tunga kipahthu genna leh phatna a pia uhi. 4 Heman ahih leh, a tapate lak apan: Bukia, Matania, Uziel, Shubael leh Jerimoth, Hanania, Hanani, Eliatha, Gidalti leh Romamti Ezer. Joshbekasha, Malothi, Hothir leh Mahazioth. 5 A vekun kumpipa-a tuam mailam muthei Heman' tapate ahi uhi. Pathian in amah tawisang dinga, thuchiam tungtawna Heman a piakte ahi uhi. Pathian in Heman kiang ah tapa sawmleh li leh tanu thum a pia hi. 6 Hiai mite khempeuh, a pate uh thunuaia, Tangtawn Toupa' tempula tumgingte, dakkhutbette, kaihgingte leh pekgingte saia, Pathian' inn-a nasemte ahi uhi. Asaf leh Jeduthun leh Heman bel kumpipa thunuai ah a om uhi. 7 Tangtawn Toupa adinga tumging kisinsiam leh kichilsiam, a tanaute uh tawh mi 288 a pha uhi. 8 A teek a khang, sinsakmi leh a sinmi kibangin hiai mawhpuakna adingin ai a saan uhi. 9 Aisaan masa Asaf ading aisaan a tukna Josef, a tapate leh tanaute tawh avekun 12. A nihna, Gedalia ading aisaan a tukna amah leh a tapate leh tanaute tawh avekun 12. 10 A thumna, Zakur ading aisaan a tukna amah leh a tapate leh tanaute tawh avekun 12. nA lina, Izri ading aisaan a tukna amah leh a tapate leh tanaute tawh avekun 12. 12 A ngana, Nethania ading aisaan a tukna amah leh a tapate leh tanaute tawh avekun 12. 13 A gukna, Bukia ading aisaan a tukna amah leh a tapate leh tanaute tawh avekun 12. 14 A sagihna, Jesarela ading aisaan a tukna amah leh a tapate leh tanaute tawh avekun 12 15 A giatna, Jeshaia ading aisaan a tukna amah leh a tapate leh tanaute tawh avekun 12. 16 A kuana, Matania ading aisaan a tukna amah leh a tapate leh tanaute tawh avekun 12. 17 A sawmna, Shimei ading aisaan a tukna amah leh a tapate leh tanaute tawh avekun 12. 18 A sawmlekhatna, Azarel ading aisaan a tukna amah leh a tapate leh tanaute tawh avekun 12. 19 A sawmlenihna, Hashabia ading aisaan a tukna amah leh a tapate leh tanaute tawh avekun 12. 20 A sawmlethumna, Shubael ading aisaan a tukna amah leh a tapate leh tanaute tawh avekun 12. 21 A sawmlelina, Matithia ading aisaan a tukna amah leh a tapate leh tanaute tawh avekun 12. 22 A sawmlengana, Jerimoth ading aisaan a tukna amah leh a tapate leh tanaute tawh avekun 12. 23 A sawmlegukna, Hanania ading aisaan a tukna amah leh a tapate leh tanaute tawh avekun 12. 24 A sawmlesagihna, Joshbakasha ading aisaan a tukna amah leh a tapate leh tanaute tawh avekun 12. 25 A sawmlegiatna, Hanani ading aisaan a tukna amah leh a tapate leh tanaute tawh avekun 12. 26 A sawmlekuana, Malothi ading aisaan a tukna amah leh a tapate leh tanaute tawh avekun 12. JA 20-na, Eliatha ading aisaan a tukna amah leh a tapate leh tanaute tawh avekun 12. A 21-na, Hothir ading aisaan a tukna amah leh a tapate leh tanaute tawh avekun 12. }A 22-na, Gidalti ading aisaan a tukna amah leh a tapate leh tanaute tawh avekun 12. }A 23-na, Mahazioth ading aisaan a tukna amah leh a tapate leh tanaute tawh avekun 12. lA 24-na, Romamti Ezer ading aisaan a tukna amah leh a tapate leh tanaute tawh avekun 12.
Kongpi Veengte
1 Kongpi veengte pawl kikhen dan: Kora-te apanin: Kore tapa Meshalemia. Kore bel, Asaf tapate laka khat ahi. 2 Meshelamia in tapate a nei: A tamasa, Zekharia; a nihna, Jediael; a thumna, Zebadia; a lina, Jathniel; 3 a ngana, Elam; a gukna, Jehohanan leh a sagihna, Eliehoenai. 4 Obed Edom in zong tapate a nei: A tamasa, Shemaia; a nihna, Jehozabad; a thumna, Joa; a lina Sakar; a ngana Nethanel; 5 a gukna, Amiel; a sagihna, Isakhar leh a giatna, Peullethai. Pathian in Obed Edom a vualzawla ahi. 6 A tapa Shemaia in zong tapate a nei: Amaute sepaih hangsan a hih manun, a pa uh innkawte' makaite-in a pang uhi. 7 Shemaia' tapate: Othni, Rafael, Obed leh Elzabad. A tanaute Elihu leh Semakia zong tapa kizente ahi uhi. 8 Hiaite khempeuh Obed Edom' suante ahi. Amaute leh a tapate uh leh a tanaute uh, nasem dinga hatna nei mi hatte ahi uh. Obed Edom' suante a vekun 62 ahi. 9 Meshelemia in a hat ngen tapate leh tanaute a nei a, a vekun sawmlegiat ahi uhi. 10 Merari mi Hosa in tapate a nei: A khatna Shimri. A piang masa hi keimah leh, a pa'n a masain a sep hi. 11 A nih na, Hilkia, a thumna Tabalia, a lina Zekharia. Hosa' tapate leh tanaute a vekun sawmlethum ahi uh. 12 Hiai kongpi veeng pawlpawlte'n a makaite uh tungtawnin, a unaute uh neih bangin, Tangtawn Toupa' tempula sep ding mawhpuakna a nei uhi. 13 Kongpi teng adingin, amau inkuan beh dungzui-a teek a khang kibangin, ai a san uhi. 14 Suahlam Kongpi veen ding Shelemia tung ah aisaan a tu hi. Tua khitin, a tapa Zekharia adingin ai a san uh a, Mallam Kongpi veen ding a tu hi. Amah bel mi thuhilha makaih siam ahi. 15 Simlam Kongpi veen ding Obed Edom tung a tu a, van koihna innte veen ding a tapate tung a tu hi. 16 Tumlam Kongpi leh lampi saknunga Shaleketh Kongpi veen ding Shupim leh Hosa tung a tu hi. Veeng mi leh veeng mi kimaituah in a om uhi. 17 Suahlam pang ah ni khatin Levite guk, Mallam pang ah ni khat in li, van koihna inn ah hun khatin nih a om uhi. 18 Tumlam panga huangsung inntual ading ahih leh, lampi lai ah nih, a huangsung tak ah nih a om uhi. 19 Hiaite Kora leh Merari suan kongpi veeng pawl pawla kibawlte ahi.
Sumkemte leh Ulian Dangte
20 Levite ahih leh, Pathian inn-a sum koihnate leh thil siangthoua latte koihnate kepna mawhpuakna Ahija in a tang hi. Ladan' suante, Ladan tungtawna Gershon mi hong hi uh a, tua Gershon mi Ladan beh tuulpite bel Jehieli, 22 Jehieli' tapate, Zetham leh a sanggampa Joel ahi. Amaute Tangtawn Toupa' tempula sum koihnate kem mawhpua ahi uhi. 23 Amramte, Izharte, Hebronte leh Uzielte lak apanin: 24 Mosi' tapa Gershon' suan Shubael, sumkoihnate keem ulian ahi. 25 Eliezer tungtawna a tanaute: A tapa Rehabia. Rehabia' tapa Jeshaia, Jeshaia' tapa Joram, Joram' tapa Zikri leh Zikri' tapa Shelomith. 26 Shelomith leh a tanaute, sumkoihnate khempeuh leh Kumpipa David leh sepaih 1,000 pawlpawl, 100 pawlpawl tunga makaite leh makai dangte'n a lat uh thil zeka siangthoute kema mawhpua ahi uhi. 27 Kidouna apan a gallak thilte uh pawlkhat, Tangtawn Toupa' tempul puahphat nadingin a laan uhi. 8 Mailam muthei Samuel leh Kish' tapa Saul leh, Ner' tapa Abner leh Zeruia' tapa Joabte' lat leh thillat zeka siangthoute khempeuh Shelomith leh a tanaute'n a keem uhi. 29 Ezhar suante apanin: Kenania leh a tapate bel tempul pawlam ah mawhpuakna piak ahi uh a, Israel tunga uliante leh thukhentein a pang uhi. 30 Hebron suante apanin: Hashabia leh a tanaute, a vekun mihat 1,700. Amaute Tangtawn Toupa' nasep ah leh kumpipa' nasep ah, Jordan lui tumlam siaha Israel ah mawh a pua ahi uhi. 31 Hebronte lak ah, a beh a beh, a innkuan a innkuan beha khanggui-a min kikhum dan bangin Jeria, a makai uh ahi. David' vaihawm kum, a kum 40-na ah, minkhumna bute sung a kizong a, Hebronte laka mi hatte, Gilead gama Jazer mun ah a kimukhia hi. 32 Jeria in tanau hangsan 2,700 a nei a, amaute beh tuipite ahi uh a, Kumpipa David in, Pathian lam leh kumpi lam tawh kisai thilte peuhmah ah Reubente, Gadte, leh Manase nam kimkhatte tunga mawhpuain amaute a koih hi.
Sepaihhon a Pawlpawla Kikhen dan
1 Hiai Israelte' min khumdan ahi. Inkuan lutangte, 1,000 pawl pawl tunga makaite leh 100 pawlpawl tunga makaite leh a uliante uh, a pawl pawla kikhen sepaihhonte nasepna lam tawh kisaia kumpipa' nna sem ahi uhi. Kumkhat sung zel, a kha khain mawhpuakna a hawm uhi. Tua sepaihhon pawlkhat ah mi 24,000 zel a om hi. 2 A kha khatna adinga seh sepaih pawlkhat tunga mawhpua bel Zadiel' tapa Jashobeam ahi. Ama' pawl ah mi 24,000 a om hi.3 Amah Perez' suan ahi a, a kha khatna adinga seh sepaihpawla uliante khempeuh laka makai ahi. 4 A kha nihna adinga seh sepaihpawl tunga mawhpua Ahoha mi Dodai ahi. Ama' pawla makai Mikloth ahi. Ama' pawl ah mi 24,000 a om hi. 5 A kha thumna adinga seh sepaihpawl thumna makai siampi Jehoiada' tapa Benaia ahi. Ama' makaihna nuai ah mi 24,000 a om hi. 6 Amah mihat 30-te laka mihat leh 30-te laka makai ahi. A tapa Amzabad, tua sepaihpawlte laka khat ahi. 7 A kha lina adinga seh makai lina, Joab sanggampa Asahel ahi. A tapa Zebadia ama' mun luah ahi. Ama' pawl ah mi 24,000 a om hi. 8 A kha ngana adinga seh, makai ngana Izra mi Shamhuth ahi. Ama' pawl ah mi 24,000 a om hi. 9 A kha gukna adinga seh, a gukna Teko mi Ikesh' tapa Ira ahi. Ama' pawl ah mi 24,000 a om hi. 10 A kha sagihna adinga seh, sagihna Efraim apan Pelon mi Helez ahi. Ama' pawl ah mi 24,000 a om hi. 11 A kha giatna adinga seh, a giatna Zera apan Hushath mi Sibekai ahi. Ama' pawl ah mi 24,000 a om hi. 12 A kha kuana adinga seh, a kuana Benjamin apan Anathoth mi Abiezer ahi. Ama' pawl ah mi 24,000 a om hi. 13 A kha sawmna adinga seh, a sawmna Zera apan Netofat mi Maharai ahi. Ama' pawl ah mi 24,000 a om hi. 14 A kha sawmlekhatna adinga seh, a sawmlehkhatna Efraim pan Pirathon mi Benaia ahi. Ama' pawl ah mi 24,000 a om hi. 15 A kha sawmlenihna adinga seh, sawmlehnihna, Othniel innkuan apan Netofat mi Heldai ahi. Ama' pawl ah mi 24,000 a om hi. Israel Namte' Uliante 16 Israel namte' tunga uliante: Reubente tung ah: Zikri tapa Eliezer. Simeonte tung ah: Maaka' tapa Shefatia. 17 Levi tung ah: Kemuel' tapa Hashabia. Aron tung ah: Zadok. 18 Judah tung ah: David sanggampa Elihu. Isakhar tung ah: Mikhael' tapa Omri. 19 Zebulun tung ah: Obadia' tapa Eshmaia. Naftali tung ah: Azriel' tapa Jerimoth. 20 Efraim tung ah:Azazia' tapa Hoshea. Manase nam kimkhat tung ah: Pedaia' tapa Joel. 21 Gilead gama Manase nam kimkhat tung ah: Zekharia' tapa Ido. Benjamin tung ah: Abner' tapa Jaasiel. 22 Dan tung ah: Jeroham' tapa Azarel. Hiaite Israel namte' tunga uliante ahi. 23 Tangtawn Toupa'n Israel, vaana aksi zaha tamsak ding chih thu chiamkhinta ahih manin, David in kum 20 leh a nuailama upate a sim kei hi. 24 Zeruia' tapa Joab in a sim pana, ahihhangin a simkhin kei hi. Hiai kisimna hangin Israel tung ah hehna hong tung a, tua bangin Kumpipa David' tungthu kigelhna bu ah a phazah a kigelhlutta kei hi.
Kumpipa' Van Kema Enkaite
25 Adiel' tapa Azmaveth, kumpi vankoihna enkaia mawhpuain a pang hi. Uzia' tapa Jonathan, a pawlam gam sehkhente leh khawpite leh khawtate leh galvil innsangtea van koihnate enkaia mawhpuain a pang hi. 26 Kelub' tapa Ezri, loukhoua loua nasemte enkaia mawhpuain a pang hi. 27 Ramath mi Shimei, grephuante enkaia mawhpuain a pang hi. Shifma Zabdi, grep sukna adinga grephuan gahsuahte enkaia mawhpuain a pang hi. 28 Geder mi Baal Hanan tumlam mual bulte-a Oliv leh theipikungte enkaia mawhpuain a pang hi. Joash, oliv thau piakna lama mawhpuain a pang hi. 29 Sharon mi Shitrai, Sharon gama gamta ganhonte enkaia mawhpuain a pang hi. Adlai' tapa Shafat, phaizanga gamta ganhonte enkaia mawhpuain a pang hi. Ishmael mi Obil, sangawngsaute enkaia mawhpuain a pang hi. Meronoth mi Jedeia, sabiltungte enkaia mawhpuain a pang hi. 31 Hoara mi Jaziz, belamhonte enkaia mawhpuain a pang hi. Hiaite khempeuh Kumpipa David neihsate tunga mawhpua uliante ahi uhi. 32 David' paneu Jonathan, mi thuhilha makaih siam, thil theisiam leh laigelhmi ahi. Hakmoni' tapa Jehiel in kumpipa' tapate a don a, a keem hi. 33 Ahithofel, kumpipa thuhilhpa ahi. Arka mi Hushai, kumpipa' lawm ahi. 34 Ahithofel' mun Benaia' tapa Jehoiada in a luah a, tua khitin Abiathar in a luah hi. Joab bel kumpi sepaihhon makaipi ahi.
Tempul adinga David Thilgelte
1 David in Israel uliante khempeuh Jerusalema paikhawm dingin a samkhawm hi. Israel namte tunga uliante, kumpipa nasem pawlpawl tunga makaite, 1,000 pawlpawl tunga makaite, 100 pawlpawl tunga makaite, vante khempeuh enkaia mawhpawte, kumpipa leh a tapate' gantate kema mawhpawte, kumpi innpi sunga uliante, mihatte leh galhangte khempeuh a kaikhawm hi. 2 Kumpipa David a dingkhia a: Ka sanggamte, ka mite aw, ka thu na ngai un. Tangtawn Toupa' thukhun singkuang tawlngak nading, i Pathian' khengak nading lungsung ah ka vei a, tua lam dingdan thilgelte ka bawlta hi. 3 Ahihhangin, Pathian in ka kiang ah: Nang galdou mi na hi a, sisan na suahta a, ka Min ading inn lam ding nang na hi kei, hon chi hi. 4 Hinapi-in, Tangtawn Toupa, Israel Pathian in Israel tunga kumpipa hiden dingin, ka behte khempeuh lak ah kei hon teel hi. Makai dingin Judah a teel a, Judah innkuan lak ah kei innkuan a teel a, ka pa' tapate lak apanin, Israel khempeuh tunga kumpipa-a kei hon bawl ding a kipahlam ahi. 5 Tangtawn Toupa'n tapa tampi hon pia hiven, tua ka tapate khempeuh lak apan ka tapa Solomon, Israel tunga Tangtawn Toupa' kumpigam tutphah tunga tu dingin a teel hi. 6 Ama'n ka kiang ah: Na tapa Solomon ahi ka inn leh ka huangsung inntual lam ding. Amah ka tapa hi dinga teel ing a, kei a pa hi ding ka hi. 7 Tu huna a kihih banga, ka thupiakte leh thukhennate pialsan lou a, a letkip peuhmah leh, a kumpigam kipsak den ding ka hi, chi ahi. 8 Tua bang ahih manin, tu'n Israelte khempeuh leh Tangtawn Toupa' mipi omkhawmte' mitmuh leh i Pathian zakin mawhpuakna noute kon guan hi: Hiai gam hoih na tan theih nading uleh, na suante uh' goutan hiden dinga na piaksawn theih nadingun Tangtawn Toupa na Pathian uh' thupiakte khempeuh zui dingin pilvang un. Tua baan ah, nang ka tapa Solomon, na pa' Pathian a hihna sang inla, na lungtang khempeuha kipiakna tawh, lungsima kilawpna tawh a nna sem in. Tangtawn Toupa'n lungtang peuhmah phekleka zonga, ngaihtuahna khempeuh a san a hang theivek hiven. Amah na zon aleh, na mu ding. Amah na nutsiat leh bel, ama'n hon nolhden ding hi. 10 Tu'n ngaihtuah in, Tangtawn Toupa'n munsiangthou hi ding tempul lam dinga nang hon teel ahi. Thahat suah inla, tua nna sem in, a chi hi. 11 Tua khitin, David in a tapa Solomon kiang ah tempul innliim, a innte, a vankoihnate, a tunglamte, a inndan sungnungte leh khelhna khuhna mun gelnate a pia hi. 12 Tangtawn Toupa' tempul huangsung inntualte leh Pathian tempula thillat siangthoute koih nading a kimkota indante geelna Kha in a theihsak khempeuh zong a pia hi. 13 Siampite leh Levite a pawlpawla khen ding dan leh Tangtawn Toupa' tempula biakna nna sepding dan leh tua nasepna-a vanzat ding khempeuh tawh kisai hilhna zong a pia hi. 14 Biakna nasepna-a zat ding khama kibawl vante khempeuh bawl nading khamte gikdan a bikhiah detdet a, nguna kibawl vanzatte bawl nading leh meivakte, 15 meivak mung leh a meivak chiat ading kham gikdan hita leh, ngun meivak mungte leh a meivakte, meivak mung leh a meivak chiat ading ngun gikdan hita leh, 16 tanghou lat siangthoua zekte koih nading kham dawhkante bawl nading kham gikdan hita leh, ngun dawhkante bawl nading ngun gikdan hita leh a bikhiah detdet hi. 17 Tua baan ah, sikkhutte-a zat ding, tuithehna belkuangte leh noutung gonggekte bawl nading kham siang gikdan hita leh a bikhiah detdet hi. 18 Tua baan ah, gimnamtui halna maitam bawl nading kham siang gikdan zong a bikhiah detdet hi. Tua ban ah, kangtalai bawl ding dan, tua bel, Tangtawn Toupa' thukhun singkuang kha-a zakkhum ding tua cherubte khama bawl ding dan geelsa zong a pia hi. 19 David in: Hiaite khempeuh, ka tunga Toupa' khut apan ka muhte gelhin ka nei a, tua thil bawl ding dan gelhnate theihsiamna zong hon pia hi, a chi hi. 20 David in a tapa Solomon kiang ah: Thahat leh hangsan suah inla, tua nna sem in. Lau kenla, lungke sam ken. Tangtawn Toupa Pathian, ka Pathian in hon ompih ahi. Ama'n hon zuausan lou ding a, Tangtawn Toupa' tempula biakna nasep nading bawl a kizawh masiah hon taisaan sam lou ding hi. 21 Siampite leh Levite a pawlpawla kikhente khempeuh tua Pathian' tempul lamna nna khempeuh sem dingin mansain a om a, lunglawpna neia silbawl khatpeuha khutsiamna pilna neite peuhmah in nasepna khempeuha hon huh ding uh ahi. Uliante leh mite khempeuh in na thupiak peuhmah mang ding uh ahi, a chi lai hi.
Tempul Lam nading Thawnpiakte
1 Tua khitin, Kumpipa David in mi kikhawmte khempeuh kiang ah: Pathian in a teelpa, a tapa Solomon a naupang laia, thiltuah leh theih a hau nai kei. Hiai innpi lam ding lah mihing ading hi lou a, Tangtawn Toupa Pathian ading ahih manin, tua lama nasep ding nna lian leh thupi ahi. 2 Ka Pathian' tempul lam nadingin, ka khop theih khempeuh ka khawm khin a, ka pekhinta. Khama bawl ding vante ading kham, nguna bawl ding vante ading ngun, sumsana bawl ding vante ading sumsan, sika bawl ding vante ading sik, singa bawl ding vante ading sing, a bulhsawn ding onik suangmanpha, torkuis suangmanpha, suang ze tuamtuam, suang hoih chikim leh suangpakte hiaite khempeuh tampipi ka peta. 3 Tuate baan ah, ka Pathian' tempul adinga ka kipiakzawhna bangbangin, kei mimal gou neihsa kham leh ngun, ka Pathian' tempul lam nadingin tu'n ka pia hi. Tempul siangthou lam nadinga ka na khopsate bana ka piak ahi. 4 Tuate, Ofir gama kham, talen 3,000, ngun siang talen 7,000, inn baang tuam nading, 5 khama bawl leh nguna bawl vante ading, khutsiamte bawl ding vante ading ahi. Tu'n Tangtawn Toupa adinga tuni-a sehtuam siangthou kipe nuam kua ahia? a chi hi. 6 Tua khitin, behtulpite, Israel nam inkuante, 1,000 pawlpawl tunga makaite, 100 pawlpawl tunga makaite, kumpipa nasepna-a mawhpua nam innkuante'n phaltakin thawnpiakte a pia uhi. Pathian' tempul lam nadinga a piak uh kham talen 5,000 leh darik 10,000, ngun talen 10,000, sumsan talen 18,000 leh sik talen 100,000 ahi. 8 Suangmanpha neite peuhmah in Tangtawn Toupa' tempul gou koihkhawmna ah, Gershon mi Jehiel kep dingin a pia uhi. 9 Mipite zong a makaite uh kipiak zawhna ah lungnuamin a kipak mahmah uhi. Ahang bel, Tangtawn Toupa kianga phaltak leh lungtang taka pia ahi ua ahi. Kumpipa David zong nakpitakin a nuam hi.
David' Thuumna
10 David in kikhawmte khempeuh mai ah Tangtawn Toupa a phat a: Tangtawn Toupa aw, phatna nang tang in. Ka pa uh Israel' Pathian aw, Tangtawn Tangtawnin phatin om in. 11 Tangtawn Toupa aw, letna leh vangletna Thupina, kumpithupina leh etlawm thupina tawh, nanga ahi. Lei leh vaana thilte khempeuh nanga hiven. Tangtawn Toupa aw, kumpigam nanga ahi. Bangkim tunga tawisang na hi. 12 Hauhna leh pahtawina nang apan hong tung ahi, thil bangkim ukpa na hi. Mi khempeuh pahtawi dingin, thahatna pe dingin, na khut ah thahatna leh vangletna om hi. 13 Koute' Pathian, tu'n na tung ah kipahthu gen ung, na min thupi hon phat ung. 14 Ahihhangin, kei kua ahia ka hih a, ka mite zong kua ahia ahih uh, hibang lawmlawma thilphaltaka ka piak theih uh? Bangkim nang akipan hi a, na khut apan hong tungte mah hon pia hi lei ung. 15 Koute zaw ka pu ka pate khempeuh uh banga, na mitmuha melmakmite leh gamdang mite hi ung. Leitunga ka damsung nite uh limliap banga mangpah thei hi. 16 Tangtawn Toupa koute' Pathian aw, na Min Siangthou adinga tempul lam nading hi zahzah kon piak uh nang khut akipan ahi a, nanga mawng ahi. 17 Ka Pathian aw, lungtang na enchian a, takna na kipahpih chih ka thei. Hiaite khempeuh kiphaltak leh lungtang diktak neia kon piak ahi. Hiaia om na mite'n zong kiphaltakin nang hon pia uh chih tuin ka muta. 18 Tangtawn Toupa, ka pu ka pate uh Abraham, Isak leh Israel' Pathian aw, na mite' lungsung ah hiai deihna lunggulhna omsakden inla, a lungtangte uh nang lam ah muanhuaisak in. 19 Na thupiakte, na theihpihnate leh dankhunte a lungtang khempeuh utawh zui ding leh, hiai innpi lam nadinga bangkim hih dinga lungtang kipiakzawhna, ka tapa Solomon neisak in. Hiai lam nading ken ka topsa ahita, a chi hi. 20 Tua khitin, David in kikhawmte khempeuh kiang ah: Tangtawn Toupa na Pathian uh phat un, a chi a, tuachi-in, Tangtawn Toupa, a pu a pate uh' Pathian a phat uh a, Tangtawn Toupa' mai leh kumpipa' mai ah a kuun uh a, a bia uhi.
Solomon, Kumpipa-a Kisang
21 A zingchiangin Tangtawn Toupa' mai ah kithoihnate a laan uh a, a mai ah haltum thillatte a pia uhi: Tuate, bawngtal 1,000, belamtal 1,000, belamnoupa 1,000, dawn thillatte leh a kiching mahmah thillat dangte tawh Israelte khempeuh adinga a lat uh ahi. 22 Tua ni-in, Tangtawn Toupa' mai ah lungnopna thupitak tawh, nein a dawn uhi. Tua khitin, David' tapa Solomon, a nihvei nadingin, kumpipain a sang uh a, amah ukpa hi dingin leh Zadok siampi hi dingin Tangtawn Toupa' mai ah thau a nilh uhi. 23 Tuachi-in, Solomon, a pa mun ah kumpipain Tangtawn Toupa' kumpitutphah tung ah a tu hi. Amah a mavang a, Israelte khempeuh in a thu a mang uhi. 24 Uliante leh mihatte khempeuh in kumpipa David' tapate khempeuh tawh, Kumpipa Solomon nuaia toukai ding thu a chiam uhi. 25 Tangtawn Toupa'n Israel khempeuh mitmuhin, sangpitakin Solomon a tawisang a, Israel tunga'kumpipa kuamah in a neih ngei louh uh, kumpithupina a khusak hi.
David Sihna
26 Jese' tapa David, Israel khempeuh tung ah kumpipain a na pang hi. 27 Israel tung ah kum 40 sung vai a hawm a, Hebron ah kum sagih, Jerusalem ah kum 33. 28 Damsawtna leh hauhna leh pahtawina tangin, putekpi-in a sita hi. A tapa Solomon in a kumpipa hihna a luah hi. 29 Kumpipa David' vaihawm sunga thiltungte a bul apan a tawp dong, mailam muthei Samuel laibute, kamsang Nathan' laibute leh, mailam muthei Gad laibute sung ah a kigelh hi. 30 Ama' vaihawm lai leh a vanglet lai hita leh, amah leh Israel hita leh, a kiim a kianga gamdang khempeuh kumpigamte tawh kisai thu peuhmah a kip a kawiin a kigelh hi.
Solomon in Pilna Ngen
1 David' tapa Solomon a kumpigam tung ah a kiphutkip a, Tangtawn Toupa a Pathian in a ompih manin, nakpitaka thupi-in a tungkhia hi. Tua khitin, Solomon in Israelte khempeuh, 1,000 pawlpawl leh 100 pawlpawl tunga makaite, vaihawm thukhente leh Israela makaite khempeuh leh behtuulpite kiang ah thu a gen a, 3 tua khitin, Solomon leh mikikhawmte khempeuh, Gibeon-a munsang ah a paitou uhi. Ahang bel, Tangtawn Toupa' sila Mosi in gamdai-gamkeua a bawl Kihoupihna Puanbuk tua muna om hiven. 4 David in Jerusalem-a Pathian' singkuang koih nading Mun a bawl puanbuk ah tua Pathian' singkuang, Keriath Jearim apan a latou khin hi. 5 Ahihhangin, Ner' tapa Uri' tapa Bezalel in a bawl sumsan maitam bel Gibeon ah Tangtawn Toupa' biakbuk mai ah a om hi. Tuachi-in, Solomon leh kikhawmte'n tua ah amah apan thu a dong zel uhi. 6 Tua Kihoupihna Puanbuk sunga Tangtawn Toupa maia sumsan maitam ah Solomon a hawhtou a, tua maitam tung ah haltum thillatte 1,000 a laan hi. 7 Tua zanin, Solomon kiang ah Pathian hong kilak a, a kiang ah: Na deih peuhmah hon pe dingin hon ngen in, a chi hi. 8 Solomon in Pathian a dawng a: Ka pa David tung ah zahngaihna thupitak na lakta a, ama' mun ah kei kumpipa-in non bawlta. 9 Tangtawn Toupa Pathian aw, tuin ka pa David kianga na thuchiam hihkipin om hen. Ahang bel, nang leia leivui zaha tam nam khat tunga kumpipa-a hon bawlta hi vechin. Hiai nam ka pii theih nadingin tuin pilna leh theihna hon pia in. Na mite hiaizahta kua'n uk thei ding ahia? a chi hi. 11 Pathian in Solomon kiang ah: Hiai na lungtang' lunggulh hi a, hauhna, sum leh pai leh pahtawina, ahih kei leh, na melmate' sihna ngen lou a, ahih kei leh, damsawtna zong ngen lou a, ka mite, a tung ua kumpipa-a kon bawlnate uk nading pilna leh theihna na nget zawk manin, 12 pilna leh theihna piak na hi ding. Hauhna, sum leh pai leh pahtawina, nang ma-a kumpipa kuamah in a neih ngei louh leh na nunga zong kuama'n a neih ngei louh ding zah zong kon pe ding, a chi hi. 13 Tua khitin, Gibeona munsang apan leh Kihoupihna Puanbuk mai apanin Jerusalem ah Solomon a pai a, Israel tung ah vai a hawm hi. 14 Solomon in kangtalaite leh sakolte a kholkhawm a, kidouna kangtalai 1,400 leh sakol 12,000 a nei a, tuate kangtalai koihna khawpite ah a koih a, Jerusalema amah kiang ah zong a koih hi. 15 Kumpipa'n Jerusalem ah suangtumte bang maia tamin ngunsik leh khamsik a kaikhawm a, theipikungte bang maia tamin sidar sing a kaikhawm hi. 16 Solomon' sakolte bel Aigupta gam leh Kue gam apan laklut, Kue apan kumpi sumsinte' lei ahi. 17 Aigupta apan laklut kangtalaite khata ngun shekel 600, sakol khata shekel 150-a a lei ahi. Hit leh Aram kumpipate kiang ah zong a khakkhesawn uhi.
Tempul Lam dinga Kisakna
1 Solomon in Tangtawn Toupa' Min ading tempul lam ding leh ama' innpi lam dingin thu a pia hi. 2 Ama'n van paw ding mi 70,000, mual khawnga suang toukhe ding mi 80,000 leh amaute tunga nasem makai ding mi 3,600 a sep hi. 3 Solomon in Tura kumpipa Hiram kiang ah hibangin thu a khak hi: Ka pa David adinga teen nading innpi lam nading sidar singte na khak bangin, sidar singtumte hon khak in. 4 Tangtawn Toupa ka Pathian' Min ading tempul ka lam dek a, a maia gimnamtui hal nadinga lat ding leh tanghou lat siangthou koih gige nading, zingsang teng leh nitaklam teng leh Sabbath ni teng leh Khathak ni teng leh Tangtawn Toupa, koute Pathian' ankuanglui tenga haltum thillatte lat nadingin tua tempul ka lam dek hi. Hiai Israelte adinga thuseh omden ding ahi. 5 Koute' Pathian, pathian dangte khempeuh sanga thupi zaw a hih manin, tua tempul ka lam dek a thupi ding ahi. 6 Ahihhangin, vaante, ahi, vaan sangpente nangawnin amah tasak zoulou ahih chiangin, amah ading tempul kua'n lam thei ding ahia? Ama' maia kithoihnate hal nading mun a hih kei ngai leh, amah adinga tempul lam ding kei kua ahia ka hih? 7 Tua bang ahih manin, kham leh ngun, sumsan leh sik, khau sandup leh sanau leh dum zanga nasem pii leh siam, tua baan ah khuakthawh lama siamna nei, ka pa David hon piaksa kei' khutsiamte tawh Judah leh Jerusalema semkhawm ding mi khat hon sawl in. 8 Lebanon apanin sidar singtumte, meilah singtumte leh algum singtumte zong hon khak in. Na mite Lebanon ah singtum suih a siam uh chih ka thei hi. Ka mite'n na mite tawh semkhawmin, 9 sing tampi hon pe le uh, ahang bel, Tempul ka lam ding pen lah lian mahmah, thupi mahmaha, hih teitei kul hi a! 10 Ke'n na nasem tua singtum bawl sing saite, huit buh vui nei kor 20,000, barlibuh vui nei kor 20,000, grepzu bath 20,000 leh oliv thau bath 20,000 ka pe ding, a chi hi. 11 Tura kumpipa Hiram laikhakin hibangin Solomon a dawng hi: Tangtawn Toupa'n a mite a it mana, nang amaute' kumpipa-a hon bawl ahi, a chi hi. 12 Tua baan ah, hibangin a chi lai hi: Lei leh vaan bawlpa, Tangtawn Toupa, Israel Pathian phatin om hen! Ama'n Kumpipa David kiang ah tapa pii, theihtheihna leh thil theihsiamna nei a pia a, ama'n Tangtawn Toupa' ading tempul leh ama' ten nading innpi lam ding ahi. Khutsiam a pii mahmah leh theisiam Huram Abi na kiang ah kon sawl ding. 14 Ama' nu Dan apan ahi a, a pa bel Tura mi ahi. Amah zaw kham leh ngun, sumsan leh sik, suang leh sing, khau sandup leh dum leh sanau leh ziza khau zangngata thil bawl kisinsiamsa ahi. A khuakthawh chituam tuam lam zong a siamsa ahi a, a lim a mei ding piak bangbanga bawl thei dinga pilna leh theihna nei mi ahi. Nang' mi, khutsiamte leh na pa, ka toupa David-ate tawh a semkhawm ding hi. 15 Tu'n ka toupa'n na silapa kiang ah, na chiamsa huit buhte, barli buhte, oliv thaute, grepzute honkhak in, 16 koute'n na kul zahzah sing, Lebanon apan ka na sat ding uh a, Jopa dong Tuipi tung ah pumin kon tolhsuk ding uhi. Nang Jerusalem ah na pawtou ding hi, a chi hi. 17 Solomon in, a pa David in misimna a bawl khit nunga Israel gama gamdangmi hong om thakte khempeuh a sim a, 153,600 a pha hi. 18 Tuate laka 70,000 van paw ding, 80,000 muala suangte toukhe dingin a sep a, amaute' nasepna-a makai ding 3,600 a sep lai hi.
Solomon In Tempul Lam
1 Tua khitin, Solomon in Jerusalema Moria Mual tung ah Tangtawn Toupa' tempul a lampanta hi. Tua mual bel a pa David kianga Tangtawn Toupa hong kilakna mun ahi. Tua lah, Jebus mi Arauna' buhphual, David in a piakna mun ahi. 2 Solomon in a vaihawm kum, a kum lina, a kha nihna, a ni nih ni-in inn lam a pan hi. 3 Solomon in Pathian' tempul lam nadinga suangphum a phum, tong 60-a sau, tong 20-a za ahi. Tua bel, tehna lui ngeina zanga a teh ani. 4 Tempul mailama innlim bel innpi vailam a dunglama neiin tong 20-a sau, tong 20-a sang ahi. A sunglam teng kham siangin a tuam hi. Inn sungpi taktak baangte ahih leh, meilahsingin a thuah a bawl a, tua tung ah kham siang hoih in a tuam a, tua tung ah tumsing leh khainiang limtein a zem hi. Tua tempul suang manphatein a zem a, tua inna khamsik a zatte bel Parvaim khamsik ahi se hi. 7 A tung dala inkamte, kongbiangte, baangte leh kongkhakte khamsikin a tuam a, baangte ah cherub limte khuakin a koih hi. 8 A Mun Siangthoupen a lam a, tempul vailam a dunglama neiin tong 20-a sau, tong 20-a za ahi. A sunglam teng khamsik hoih talen 600 in a tuam hi. 9 Khamsik inkilhnate shekel 50-a gik ahi. A tunglam teng zong khamsikin a tuam hi. 10 Tua Mun Siangthoupen ah a suihthawha bawl cherub nih, khamsika tuam, a koih hi. nCherubte khate saudan kigawm tong 20 ahi. Cherub khatna kha langkhat tong nga ahi a, tempul baang khat sunphain a om a, a langkhat dang tong nga mah in cherub dang khamong a sunkha hi. 12 Tua mah bangin, cherub nihna kha langkhat tong nga ahi a, tempul baang langkhat a sunkha hi. 13 Hiai cherubte khate tong 20 in a kizak a, innsung lam ngain khein a ding uhi. 14 Khau dum, sandup leh sanau leh ziza khau zangngat puanzak a bawl a, tua puanzak ah cherub limte a khui hi. 15 Tempul mailam ah khuampi nih a bawl a, a kigawma sau dan tong 35 ahi. Tua khuampite tuakin khuamlukhu a nei tuak a, tong nga tuaka sau ahi. 16 Tua khuamlukhute, khainiang kiphante-in a tuam hi. Mimthei gah 100 zong a bawl a, tua khainiang kiphante ah a bulh hi. 17 Tempul mailam ah tua khuampite, khat simlam pang ah, khat mallam pang ah a dingsak hi. Tua simlam panga ding pen Jakin chi-in a minvawh a, mallam panga ding pen Boaz chi-in a minvawh hi.
Tempul Vanzatte
4 Ama'n sumsan maitam khat, tong 20-a sau, tong 20-a za, tong sawma sang a bawl hi. 2 Ama'n sik sunthawh in Tuikuangpi a beemin a bawl a, a gei leh gei kal tong sawm a pha a, tua Tuikuangpi tong nga-a sang ahi. A gei kimvela tehin tong 30 a pha hi. A gei nuai chiang ah bawngtal lim ngen in a dou kimvel a, tong khat sung ah sawmkhat zel a om hi. Tua bawngtal limte, vual nih in, Tuikuangpi tawh sunkhawm ahi. 4 Tua Tuikuangpi, bawngtal sawmlenih tung ah a kinga a, thum in mallam a nga a, thum in tumlam, thum in simlam, thum in suahlam a nga hi. Tuate tung ah Tuikuangpi a kinga a, a nunglam uh a laizang lam ngatin a om hi. 5 Tua Tuikuangpi, khutpek chiain a sah a, a gei ahih leh nou gei bang, lilipak pakpalh bang ahi. Tua Tuikuangpi ah tui bath 3,000 a ta hi. 6 Tua khitin bangpeuh sil nading kuangdai sawm khat a bawl a, simlam pang ah nga, mallam pang ah nga a koih hi. Tuate, haltum thillat dingte silsiangnain a kizang hi. Ahihhangin, tua Tuikuangpi bel siampite' kisilna-a zat ding ahi. 7 Ama'n kham meivakmung sawmkhat, a bawl ding dan gelsa bangbangin a bawl a, tempul sung ah, simlam pang ah nga, mallam pang ah nga a koih hi. 8 Ama'n dawhkan sawmkhat a bawl a, tempul sung ah, simlam pang ah nga, mallam pang ah nga a koih hi. Ama'n tui thehna kham belkuang 100 zong a bawl hi. 9 Ama'n siampite huangsung inntual a bawl a, huangsung lian leh a kongkhakte a bawl a, tua kongkhakte sumsanin a tuam hi. 10 Tuikuangpi pen huangsung simlam pang, simsuah kiu ah a koih hi. 11 Ama'n belte, suahdulte leh tuithehna belkuangte zong a bawl hi. Tua bangin Huram Abi in Kumpipa Solomon adinga Pathian' tempul sung vante a bawlkhinta hi. Tuate: 12 Khuampi nihte: tua khuampite tunga khuamlukhu belkuang melpu nihte; khuampi tunga khuamlukhute tunga belkuang melpu nih zepna khainiang phan nihte; 13 tua khainiang phan kopnihte adinga mimthei 400-te, tua khuampite' tunga belkuang melpu khuamlukhute zepna khainiang phante chiata mimthei vual nihnih- a kikoih hiven, 14 a tunnate leh a kuangdaite; 15 tuikuangpi leh a nuaia bawngtal sawmlenihte; 16 belte, suahdulte, salepna sikkhutte, leh a kisaipih van dangte khempeuh ahi. Tangtawn Toupa' tempul sung adinga Solomon adinga Huram Abi in van a bawlte khempeuh sumsan nawttet ahi vek hi. 17 Kumpipa'n Sukoth leh Zarethan kal Jordan phaizanga, a sun nading belleia bawlsate-a tuate a sunsak ahi. 18 Solomon in a bawl hiai vante khempeuh a tam a, sumsan gikdan a kibuk se kei hi. 19 Solomon in Pathian' tempul sunga vanzatte khempeuh zong a bawl hi, tuate: Khamsik maitam; Ompihna tanghou koihna dawhkan; 20 sehsa banga munsiangthou sungnung maia det ding, khamsik sianga bawl meivak mungte leh a meivakte; 21 khamsika kibawl paklim leh meivakte leh taiteh, tuate khamsik tang hiven; 22 khamsik sianga bawl meiek siaknate, tuithehna belkuangte leh gimnamtui halnate, khamsika tuam Pathian' tempul kongkhakte, Mun Siangthoupen kongkhak sungnungte leh innsungpi-a kongkhakte.
1 Solomon in Tangtawn Toupa' tempul adinga a sep khempeuh a kizawhtakin, a pa David in a latsa thilte hon lalut hi. Tuate, ngun leh kham leh innsung vanzatte khempeuh ahi a, Pathian' tempula gou koihkhawmna ah a koihlut hi.
Tempula Singkuang Laklutna
2 Tua khitin, Solomon in Israel upate, nam makaite khempeuh leh Israel behtuulpite, David Khawpi Ziona, Tangtawn Toupa' thukhun singkuang latou dingin Jerualem ah a samkhawm hi. Tuachi-in, kha sagihna ankuanglui hunin, Israel mite khempeuh kumpipa kiang ah hong paikhawm uhi. 4 Israel upate khempeuh hong tun takun, Levite'n singkuang a kisuan uh a, 5 amaute'n singkuang leh Kihoupihna Puanbuk leh Tuikuangpi-a vanzat zeka siangthou khempeuh a pawtou uhi. Siampi lah hi Levi lah hite'n tua vanzatte a pawtou uh a, 6 Kumpipa Solomon leh Israel kikhawm ama' maia hong paikhawmte khempeuh, singkuang mai ah a om uh a, belam leh bawng tam a laan lua ua, sim seng leh chiamteh seng ahi kei hi. 7 Tua khitin, siampite'n Tangtawn Toupa' thukhun singkuang, tua tempul sunga munsiangthou sungnung, Mun Siangthoupen kichi sunga ama' mun, tua cherubte khazak nuai ah a koih uhi. 8 Tua cherubte'n singkuang omna tung ah kha a zak uh a, tua singkuang leh a zawnna zawlte a zakkhum uhi. 9 Hiai zawlte a sau a, tua singkuang apan valkhia, Munsiangthou sungnung mai apan a kimu thei a, Mun Siangthoupen pawlam apan bel a kimu thei kei hi. Tuni dongin tua ah tua zawlte a om uhi. 10 Tua singkuang sung ah, Mosi in Horeb-a a sunga a koih suangpek nihte loungal bangmah dang a om kei hi. Tua Horeb bel, Israelte Aigupta apan hong paikhiak nung ua, Tangtawn Toupa'n Israelte tawh kala thukhun a bawlna mun ahi. 11 Tua khitin, siampite, Mun Siangthou apan hong pawtkhia uhi. Tua muna om siampite khempeuh nahawmna ah koi pawl koi pawl na hita le-uh, amau siangthoua kiseptuam ahi uhi. 12 Tumging tum Levite khempeuh, Asaf, Heman, Jeduthun leh a tapate uh leh tanaute uh, ziza puan malngatte silh a, dakkhutbette, kaihgingte leh pekgingte tumin maitam suahlam pang ah a ding uhi. Siampi 120 in zong pengkul mutin amaute a dinpih uhi. 13 Pengkul mutte leh lasate Tangtawn Toupa phat ding leh, ama' tunga kipahthu gen dingin aw khat suahin a pangkhawm uhi. Pengkulte, dakkhutbette leh tumging dangte tawh thuah-in Tangtawn Toupa phatin aw a ngaihsak uh a: Amah hoih hi, a zahngaihna in Tangtawn daih hi, chi-in la a sa uhi. Tua khitin, Tangtawn Toupa' tempul meipi-in a dim a, 14 tua meipi hangin, siampite'n a hih ding uh a hih theita kei uhi. Tangtawn Toupa' thupina in Pathian' tempul dimsak hiven.
1 Tua khitin, Solomon in: Tangtawn Toupa'n meipi vom ah ka teng ding na chikhin chin a, 2 ke'n nang ading, na teenden nadinga tempul thupitak hon lamsakta ka hi, a chi hi. 3 Tua muna Israel mipi kikhawmte a din laiun, kumpipa hong kihei a, amaute a vualzawl hi. 4 Tua khitin, ama'n: Ka pa David kianga a kam mahmaha thu na chiam a, a khut mahmaha tangtunsak Tangtawn Toupa Israel' Pathian phatin om hen. 5 Ama'n: Aigupta apan ka mite ka pikhiak ni apan ka Min om nading tempul lamsak nading mun Israel nam laka khawpi khat mah ka teel nai kei a, ka mi Israelte tunga makai dingin zong kuamah ka tel nai kei hi. 6 Ahihhangin, tu'n ka Min omna ding in Jerusalem ka teelta a, ka mi Israel uk dingin David ka teelta, chi hiven. 7 Ka pa David in Tangtawn Toupa, Israel' Pathian' Min ading tempul lam ding lungin a vei hi. 8 Ahihhangin, Tangtawn Toupa'n ka pa David kiang ah: Ka Min ading tempul khat lam ding lunga na vei, hibanga lunga na neih na hih hoih hi. Hinapi-in, tua tempul lam ding nang na hi kei a, na sa leh sisan mahmah, na tapa ahi zaw, amah ahi ka Min ading tua tempul lam ding, a chi hi. 10 Tangtawn Toupa'n thuchiam a bawlsa a lenkip a, ke'n ka pa David dinmun ka luah a, tu'n Tangtawn Toupa' thuchiam bangin Israel kumpitutphah ah ka tu a, Tangtawn Toupa, Israel' Pathian' Min ading tempul ka lamta hi. nTua ah Pathian singkuang ka koih a, tua sung ah Tangtawn Toupa'n Israel mite tawh kala thukhun a bawl a om hi, a chi hi.
Solomon' Tempul Latna Thuumna
12 Tua khitin, Israel kikhawmte' mai ah, Tangtawn Toupa' maitam mai ah, Solomon a ding a, a baan a zak hi. 13 Ama'n sumsan dawhkang tong nga-a sau, tong nga-a za, tong thuma sang a na bawlsa, huangsung inntual pawnung laizang tak ah a koih hi. Amah tua dawhkang tung ah a ding a, tua khitin, Israel kikhawmte' mai ah a khukdin a, vanlam ah a khut a zak a, 14 a thuum a: Tangtawn Toupa, Israel' Pathian aw, vaantung ah leh leitung ah nang bang Pathian om lou hi. Lungtang khempeuh tawh na lampi tawn lailai na silate tawh kala thukhun kem a, zahngaihna langsak nang bang Pathian dans om lou hi. 15 Na sila, ka pa David kianga na thuchiam na lenkip a, na kamin thu na chiam a, tuni-a bang in, na khutin na tangtun hi. 16 Tuin, Tangtawn Toupa, Israel Pathian aw, na sila ka pa David kianga: Nang hih banga na tapate ka dan banga, ka maia pai dinga a pilvan peuhmah uleh, Israel kumpitutphah-a tu ding mi na tasam ngei kei ding na chih laia na thuchiam lenkip in. 17 Tangtawn Toupa, Israel Pathian aw, na sila David kianga na thuchiam tu'n tangtungta hen. Ahihhangin, Pathian leitunga mite tawh a tengkhawm tel dia hia? Vaante, vaansangpente nangawnin nang hon dawl lou hi a, hiai ka lam tempul in hon dawl kei sem nan chia maw! 19 19 Hinapi-in, na sila' thuumna leh zahngaihna a nget limsak in. Na maia na sila' kikouna leh thuumna za in. 20 Sun leh zanin hiai tempul, na Min koih nading na chihna mun lam ah na mitte hak hen. Hiai mun lam nga-a na sila' thuumna na za in. 21 Na sila leh mi Israelte hiai mun lam nga-a a thuum chiangun, a thilnget thuumnate uh na za in. Na tenna mun vaantung apan na za inla, na zak chiangin, ngaidam in. 22 Mi khatpeuh a innveng tunga a khelh a, kichiamna neihsak a kul a, hiai tempula maitam mai hon zot chiangin, 23 vaantung apan na za inla, gamtang in. Na silate kal ah nang thu khen inla, a mawhpen' thilhih ama' lutung tusakin a mawhna thuk in. Mawhneilou pen mawhneilou a hih phuang inla, a mawhlouhna langsakin kipaksak in. 4 Na mi Israelte na tunga a khelh man ua, a meima uh' zawha a om chiangun leh, hong kiheikika na min a gup ua, hiai tempula thuuma nget a neih chiangun, 25 vaantung apan na za inla, na mi Israelte khelhna ngaidam inla, amaute leh a pu a pate uh kianga gam na piak ah piikik nawn in. 26 Na mite na tunga a khelh man ua, vaante a kikhakbinga vuah a zuk louh chianga, hiai munlam nga-a thuuma na min a gup chiangun leh, a khelhna ua nang amaute na thuaksak chianga, a khelhna uapan hong kihei chiangun, 27 vaantung apan na za inla, na silate, na mi Israelte' khelhna ngaidam in. Hindan lampi dik amaute zuih ding sinsak inla, gouluah dinga na mite gam na piak ah vuah zusak in. 28 Gam tunga kial hiam, hipi hiam, keuna hiam, apna hiam, khaupete hiam, khaukhupte hiam hong tun chiang hiam, ahih kei leh, a melmate un khawpi koipeuha a umchip chiangun hiam, ahih kei leh, tuahsiatna khatpeuh hiam, natna khatpeuh hong tun a, 29 na mi Israel khatpeuh in a thuaknate leh natnate phawk a, thuumna hiam tauna hiam nei a, hiai tempul lam nga-a khut a zak leh, 30 tua bang hun chiangin, vaantung na tenna apan na za in. Ngaidam inla, michih a thilhihte khempeuh bang zelin sai in. Nang a lungtang thei chin a, nang kia'n mite lungtang thei hi vechin. 31 Tua hi leh, amaute'n nang hon lau ding uh a, ka pu ka pate uh na piak gama a teen sungteng uh na lampite tawn ding uhi. Na mi Israelte hilou, gamdang mi hinapi-a na min thupi leh baan thahat leh khut hat na zakkhiak hanga gamlapi apan nang hon zuan mi ahih leh, hong pai a, hiai tempul lam nga-a hong thuum chiangin, 33 vaantung na tenna mun apan na za inla, tua gamdang mi in a nget peuhmah pia in. Tua hileh, nangma' mite bangin, leitung mi khempeuh in na min theia lau ding uh a, hiai inn ka lam in na Min pu ahi, chih thei ding uhi. 34 Nang na mite na sawlna peuha a melmate uh dou dinga a kuan chiangun, na telsa hiai khawpi leh na Min adinga ka lam hiai tempul lam nga-a hong thuum chiangun, 35 a thuumna uleh a tauna uh vaantung apan na za inla, amaute gum in. 36 A khial lou lah kuamah omlou a, amaute zong na tunga a khelh ua, amaute tunga na heh a, meima' khutsunga na piakkhiak a, amaute'n gam gamla ah hi-in a nai ah hita leh, sala a kaihmang chiangun, 37 tua bang huna tua bang saltanna muna lungtang khenga lungheia na kianga a thuum ngutngut ua: Ka na khialta uh, thil diklou ka na hihta uh, Pathian limsaklou takin ka na gamtata uh, a chih uleh, tua kia hilou a, tua piimanga a omna uleh a tanna uh gama lungtang teng tawh na kianga hong kik ua, a pu a pate uh na piak gam leh na telsa hiai khawpi leh na Min adinga ka lam hiai tempul lam nga-a hong thuum uleh, 39 tua bang hunin, nang na tenna vaantung apanin, a thuumna uleh tauna uh na za inla, amaute gum in. Na tunga khial na mite ngaidam in. 40 Ka Pathian aw, tuin hiai muna thuumnate ah na mitte hak inla, na bilte na dawh in. 41 Tangtawn Toupa Pathian aw, tu'n kisa inla, na khawlna mun ah hong paita in, na vangletna singkuang tawh. Tangtawn Toupa Pathian aw, na siampite, hotdamna silhsakin om uh henla, na misiangthoute na hoihna ah nuam uhen. Tangtawn Toupa Pathian aw, na thaunilhpa nolh ken. Na sila David kianga na chiamsa zahngaihna thupi thei gige in, a chi hi.
Tempul Latna
1 Solomon in thuumna a zawh takin, vaan apanin mei hong kesuk a, haltum thillat leh kithoihnate a kangtum a, tua tempul sung ah Tangtawn Toupa' thupina a dim hi. 2 Tua banga Tangtawn Toupa' thupina a dim manin, Tangtawn Toupa' tempul sung a lut thei kei uhi. 3 Israelte khempeuh in tempul tunga mei hong kesuk leh Tangtawn Toupa' thupina a muh takun, tua inntual ah maia lei si-in a khukdin uh a, Tangtawn Toupa a bia uh a, a tung ah kipahthu a gen uh a: Amah hoih hi, a zahngaihna in Tangtawn daih hi, a chi uhi. 4 Tua khitin, kumpipa leh mipite khempeuh in Tangtawn Toupa' mai ah kithoihnate a laan uhi. 5 Kumpipa Solomon in zong kithoihna bawng 22,000 leh belam leh kei 120,000 a laan hi. Tuachi-in, kumpipa leh mipite khempeuh in tua Pathian' tempul a laan uhi. 6 Siampite'n a mun uh a luah uh a, Levite'n zong Tangtawn Toupa' tumgingte tawh a mun uh a luah uhi. Tua tumgingte bel Kumpipa David in Tangtawn Toupa phat nadinga a na bawl ahi. Ama'n tuate zangin Tangtawn Toupa' tung ah kipahthu a na gen a: A zahngaihna in Tangtawn daih hi, a nachi hi. Levite' mazawn ah siampite'n pengkul a mut uh a, Israel mipite khempeuh a ding uhi. 7 Solomon in Tangtawn Toupa' tempul huangsung inntual laizang teng siangthoua sehtuamna a bawl a, tua ah haltum thillatte leh lemna thillat sathaute a laan hi. Ahang bel, ama' bawlsa sumsan maitam in haltum thillatte, an-gah thillate leh a sathaute dawl zoulou hiven. 8 Tuachi-in, Solomon in tua hunin, ni sagih sung ankuangluina a bawl a, Israelte khempeuh tawh a om uh a, Lebo Hamath apan Aigupta Wadi donga mi kikaikhawm ahi uh a, a tam mahmah uhi. 9 Ni sagih sung maitam latna lopna neikhinin, a ni giat ni-in khawmpi a nei uh a, ankuangluina ni sagih dang a nei lai uhi. A kha sagihna, a ni 23 ni-in, mipite inn lam ah a paisakta hi. Tangtawn Toupa'n David leh Solomon leh Israel mipite adinga thilhoihte a hihsak mana kipak leh lungnuam mahmahin inlam a zuanta uhi.
Solomon kianga Tangtawn Toupa' Kilakna
11 Solomon in Tangtawn Toupa' tempul leh kumpi innpi a lam zouta a, Tangtawn Toupa' tempul leh ama' innpi-a sepkhit dinga lungtanga a veite lawhchingtaka a sepkhit takin, 12 Tangtawn Toupa a kiang ah zan-khangin hong kilaak a, a kiang ah: Na thuumna ka zata a, kithoihnate latna tempul hi dingin hiai mun kei adingin ka telta. 13 Vaante ka khak bing a, vuah a zuk kei hiam, gam nese ding khaupete thu ka piak hiam, ahih kei leh ka mite laka hipi ka tunsak chiang hiama, 14 ka mina kilou ka mite kingainiama a thuum ua, ka maitang a zon ua, a gamtat giloute uh a kiheisan uleh, vaantung apanin ka na za ding a, a khelhna uh ka ngaidam ding a, a gam uh ka damsak ding. 15 Tu'n ka mit ka hak ding a, hiai muna thuumnate bil ka dawh ding. 16 Tuin, ka Min a omden nadingin hiai tempul ka telta a, siangthoua sehtuamin ka bawlta. Tua ah ka mit a tu ding a, ka lungtang a om gige ding. 17 Nang na hih leh, na pa David banga ka maia na pai a, ka thupiak khempeuh zuia, ka dankhunte leh thukhennate na zuih leh, 18 na pa David tawh kala ka thukhun bangin, na kumpitutphah ka kipsak ding. Tua laiin, amah kiang ah: Israel uk ding mi na tasam ngei kei ding, ka na chita hi. Ahihhangin, na kiheimang a, nang kon piaksa thusehte leh thupiakte taisana pathian dangte' nasem ding leh amaute be dinga na paikhiak leh, 20 ka gam amaute ka piaksa apan Israel ka satkhe ding a, ka Min adinga ka siansuahsa hiai tempul ka nolh ding a, amaute ka mai apan ka paaimang ding a, namte khempeuh laka paunak leh simmawh ka suaksak ding hi. 21 Tuin hiai tempul thupi-in mi deep mah leh, a kianga paite peuhmah in dipvota lamdangsakna a nei ding uh a: Banghanga Tangtawn Toupa'n hiai gam leh hiai tempul hibang lawhta zen ahia? a chi ding uhi. 22 Mite'n a dawng ding uh a: A pu a pate uh Aigupta apan piikhepa, Tangtawn Toupa, a pu a pate uh' Pathian taisana pathian dangte pom a, bia a, amaute' nna a sep man uh ahi ve amaute tunga hibang siatna a tut, a chi ding uhi, a chi hi.
Solomon' Gamtatna dangte
1 Solomon in Tangtawn Toupa' tempul leh ama' innpi a lam sung tua kum 20 a bei nungin, 2 Hiram in a piaksa khawtate Solomon in a lamthak a, tuate ah Israelte a teengsak hi. 3 Tua khitin, Solomon a kuan a, Hamath Zeba a la hi. 4 Gamdai-gamkeua Tadmor a lamtou a, Hamath-a a lamsa van koihkhawmna khawpite khempeuh zong a lamtou lai hi. 5 Beth Horon Saknung leh Beth Horon Khangnung zong kulhbaangnei khawpitein a lamthak a, kongpite leh a kaihna zawlpite a neisak hi. 6 Tuate baan ah, Baalath leh vankoihkhawmna khawpite khempeuh leh a kangtalaite leh sakolte koih nading khawpite zong a lam hi. Jerusalem, Lebanon leh a uk gam sung khempeuha a lam nop peuhmah zong a lam hi. 7 Hitte, Amorte, Perizte, Hivte leh Jebuste lak apan kinusete khempeuh, Israel mi hilou hinapi-in, 8 a suan a khakte uh Israel gam ah a om lai uh a, Israelte'n a hihchimit louh uh ahi. Solomon in sila nasemte hidinga a seh, tuni donga tua banga om ahi uhi. 9 Ahihhangin, Solomon in Israel mite bel a nasem dingin silain a bawl kei hi. A galdou sepaihte, sepaih makaite, a kangtalaite leh kangtalai hawlte tunga makaitein a bawl hi. 10 Israelte mah Solomon' ulianpentein a pang uh a, tua banga nasemte enkaite 250 a pha uhi. nSolomon in Faro' tanu, David Khawpi apanin, ama' innpi dinga a lamsak ah a latou hi. Ahang bel ama'n: Tangtawn Toupa' singkuang lutna peuhpeuh siangthou ahih manin, ka zi zaw Israel kumpipa David' innpi-a a teen ding hi lou ahi, chi hiven. 12 Tempul innlim maia Tangtawn Toupa' maitam a dawh tung ah, Solomon in Tangtawn Toupa' mai ah haltum thillatte a laan hi. 13 Tua bel, Mosi in, Sabath Ni, Khathak Ni leh kumsim Ankuanglui thumte Silngou Sawhlouh Tanghou Ankuang, Nipikalte Ankuang leh Bawkta Ankuang adinga thillatte thu a piak tawh kisaia nisima a kulna banga a lat ahi. 14 A pa David' thusehte zuiin, a pawlpawla kikhen siampite sep ding a guan a, Levite lah phatna piakna-a makai ding leh nisim kulna banga siampite huh dingin a sep hi. 15 Kongpi tuamtuam adingin kongpi vengte zong a pawlpawlin a sep hi. Hiai bel, Pathian' mi David' thupiak ahih man ahi. Kumpipa'n siampite ahih kei leh Levite, thil bangpeuh tawh kisai, gou koihkhawmnate tawh kisai ding, thu a na piakte zui louin a pialsan kei hi. 16 Tangtawn Toupa' tempul suangphum a kiphum ni apan, innlam a kizawh dongin, Solomon' nasep a kisemkhia hi. Tuachi-in, Tangtawn Toupa' tempul a kilamkhia hi. 17 Tua khitin, Edom gama luipi geia Ezion Geber leh Elath ah Solomon a hawh hi. Hiram in, tuipi lam thei mahmah ama' uliante' makaihin longte Solomon kiang ah a sawl hi. Hiaite Solomon mite tawh tonin Ofir ah a kuan uh a, khamsik talen 450 hon pua uh a, Solomon kiang ah a pekhia uhi.
Sheba Kumpinu' Vehna
l Sheba kumpinu in Solomon' minthanna a na zak takin, dotna haksapipite-a amah ze-et dingin Jerusalem ah hong hawh hi. Gimnamtuite, khamsik tampi leh mi tampi leh suangmanphate pua sangawngsau tampi kizui tawh hong tung a, Solomon kiang ah hong hawh a, a lungsima omte khempeuh genin a houlimpih hi. 2 Solomon in a dotnate khempeuh a dawng a, amah kianga a hilhchian theih louh bangmah a om kei hi. 3 Sheba kumpinu'n Solomon' pilna hita leh, a innpi lam hita leh, 4 a dawhkana an hita leh, a uliante kivuala a tut dan uh hita leh, amah don puanaktual silh silate, puanaktual silh zupete leh Tangtawn Toupa' tempula haltum thillatte khawng a muh takin, lamdangsaknain a dim hi. 5 Ama'n kumpipa kiang ah: Lawhchinga na sepkhiakte leh na pilna thu kigen ka gama ka zakte a dik a na hi. 6 Ahihhangin, hong pai a, ka mit mahmaha kong muh mateng, tua thu a gente uh ka na um kei hi. A taktakin na pilna thupi dan a kim a lang zong hon na hilh lou uh ahi ve! Thu kigensawn ka na zakte na kheng a, na khup vek hi. 7 Na mite nak kipah na maizen un chia! Na maia ding gige a, na pilna za na uliante nak kipah na maizen un chia! 8 Tangtawn Toupa, na Pathian adinga vaihawm dinga ama' kumpitutphaha kumpipa-a hon tusakpa Tangtawn Toupa na Pathian pahtawiin om hen. Na Pathian in Israel a it man leh amaute a tunding den nop man a, a dik a tanga thukhen ding leh kem dinga, amaute tunga nang kumpipa-a hon bawl ahi ve maw! a chi hi. 9 Tua khitin, ama'n khamsik talen 120 tawh anlaka hel gimnamtui tampi tawh, suangmanphate tawh kumpipa a pia hi. Sheba kumpinu'n kumpipa Solomon a piak bang gimnamtui a om ngei nai kei hi. 10 Hiram' mite leh Solomon' mite'n Ofir apan khamsik hon pua uh a, algum sing leh suangmanphate zong hon pua uhi. HKumpipa'n tua algum singte Tangtawn Toupa' tempul siksante, kumpi innpi siksante bawl na-ding leh tumging tumte ading pekgingte leh kaihgingte bawl nadingin a zang hi. Judah gam ah tuate bang himhim a kibawl ngei nai kei hi. 12 Kumpipa Solomon in Sheba kumpinu kiang ah a lunggulh khempeuh leh a nget khempeuh a pethuk hi. Kumpinu'n amah piak dinga hon puak sanga tamzaw kumpipa'n amah a pia hi. Tua khitin, kumpinu a kipankhia a, a hon tonpih nungzui teng tawh a gam lam a zuanta hi.
Solomon' Thupina
15 Kumpipa Solomon in khamsik sekthawhin lum lian 200 a bawl a, a lum khat bawlnain khamsik beka 600 zel a lut hi. 16 Tua baan ah, khamsik sekthawhin lum neu 300 a bawl a, lum khat bawlnain khamsik beka 300 zel a lut hi. Kumpipa'n tuate Lebanon Gammang Innpi kichi ah a koih hi. 17 Tua khitin, kumpipa'n saiha kiphum leh khama kituam kumpitutphah thupitak a bawl hi. 18 Tua kumpitutphah in siksan chial guk leh khama kibawl khengakna khat, tua kumpitutphaha kibulh a bawl hi. Tua tutphah pang tuak ah khutngakna tutphahbante leh a kianga humpinelkai khat tuak ding tawh a om hi. 19 Tua kumpitutphah siksante mong tuak ah, humpinelkaite a ding a, siksan khat mong tuak ah khat tuak a ding a, avekin humpinelkai sawm leh nih ahi. Kumpigam dang ah a kibatpih a kibawl ngei nai kei hi. 20 Kumpipa Solomon zunoutungte khempeuh khamsika kibawl ahi a, tua Lebanon Gammang Innpi sunga kizang vante khempeuh zong khamsik sianga kibawl ahi. Solomon' hun laiin ngunsik bel manpha lou zaw-a ngaih ahih manin, ngunsikin bangmah a kibawl kei hi.2 Kumpipa'n sumsinna long Tarshish gam donga pai thei tampi a nei a, tuate Hiram' mite'n a hawi uhi. Kum thum sunga khatvei, tua longte, khamsik leh ngunsik leh saiha, zawng liante leh zawng neute puain hong kilehkik zel uhi. 22 Kumpipa Solomon bel leitung kumpipa dangte khempeuh sangin hauhna leh pilna ah a thupi zaw hi. 23 Pathian in Solomon lungtanga pilna a koih ngai nuamin, leitung kumpipate khempeuh in amah houpih theihna a zong uhi. 24 A kum a kumin amah kianga hong pai peuhmah in thawnpiak ngun leh khama kibawl vante, kumpipuante, galvante leh nektheih gimnamtuite, sakolte leh sabiltungte hon puak zel uhi. 25 Solomon in sakolte leh kangtalaite koih nadingin buk 4,000 a nei a, kangtalai koihna khawpite-a a koih leh ama' kianga Jerusalema a koih sakol 12,000 zong a nei hi. 26 Iufratis Luipi apan Filistiate gam dong leh Aigupta gamgi chiang donga kumpipate khempeuh tung ah vai a hawm hi. 27 Kumpipa'n Jerusalem ah ngunsik, suang bang maia neih taangpi-in a bawl a, sidar singte zong mualbul gamte-a theipikungte bang maia neih taangpi-in a bawl hi. 28 Solomon' sakolte Aigupta leh gam dang teng apan laklut ahi.
Solomon' Sihna
29 Solomon vaihawm sunga thiltung dangte ahih leh, a bul apan a tawp dongin, kamsang Nathan thil chiamtehna laibu leh Shilon mi Ahija genkholhna leh Nebat' tapa Jeroboam tawh kisaia, mailam mutheipa Ido' mengmuhte gelhna ah kigelh hi lou hia? 30 Solomon in Jerusalem ah Israel gam khempeuh tung ah kum 40 sung vai a hawm hi. 31 Tua khitin, a pu a pate kiang ah a khawlta a, a pa David Khawpi ah a kivui hi. A tapa Rehoboam in a mun a luah a, kumpipain a pang hi.
Israelte' Helna
1 Rehoboam Kumpipa-a bawl dinga Israelte khempeuh Shekhema a hawhtak manun, Rehoboam zong Shekhem ah a hawh hi. 2 Nebat' tapa Jeroboam in hiai a zak takin Aigupta apanin hong kilehkik hi. Jeroboam bel Solomon apan tai a, Aigupta-a tai ahi. 3 Tuachi-in, Jeroboam a samsak uh a, amah leh Israelte khempeuh Rehoboam kiang ah a va hawh uh a, a kiang ah: 4Na pa'n hakkol gikpi koute hon suan a, nasep haksa hon got leh hakkol gikpi hon got tu'n nang zangsakta in, nang nuaia semin kon zui ding uh, a chi uhi. 5Rehoboam in a dawng a: Ni thum nungin hong nawn un, a chi hi. Tuachi-in, mipite a paikhia uhi. 6 Tua khitin, Kumpipa Rehoboam in a pa Solomon damsunga a nuaia sem upate thu a kum a: Hiai mite dawn ding dan bang thuhilhna non pe thei ua? a chi hi. 7 Amaute'n a dawng uh a: Hiai mite tunga na siam a, amaute kipaksak a, dawnna hoih na piak leh, na silate hi den ding uh ahi, a chi uhi. 8 Ahihhangin, Rehoboam in upate' thuhilhna piak a nolh a, a khanvual, a nasem tangvalte thu a kum hi. 9 Ama'n amaute kiang ah: Non thuhilhna uh bang ahia? Na pa'n hakkol gikpi hon sot zangsak in, hon chite bangchi'n i dawng dia? a chi hi. 10 A khanvual tangvalte'n a dawng uh a: Na kianga: Na pa'n hakkol gikpi koute hon suan a, ka hakkol uh zangsak in, hon chite hilh inla: Ka pa' kawng sangin ka khutme lian zaw hi. lTKa pa n hakkol gikpi noute hon suan a, ke'n ka giksak sem ding. Ka pa'n zepna khauhualin noute hon zep a, ken aikamte in kon zep ding, chi in, a chi uhi. 12 Kumpipa'n: Ni thum nungin ka kiang ah hong hawh nawn un, a chih bangin Jeroboam leh mipite khempeuh ni thum nungin Rehoboam kiang ah hong hawhkik uhi. 13 Kumpipa'n khauhtakin amaute a dawng hi. Upate' thuhilhna nolh in, 14 tangvalte thuhilhna zuiin, amaute kiang ah: Ka pa'n na hakkol uh a giksak a, ke'n ka giksak sem ding. Ka pa'n khauhualin noute hon zep a, ke'n aikamte in kon zep ding, a chi hi. 15 Tuachi-in, kumpipa'n mipite aw a ngaikhe kei. Ahang bel, hibang hong piangte, Shilon mi Ahija tungtawna Nebat' tapa Jeroboam kianga Tangtawn Toupa' thugen tangtun nadinga Pathian akipan hiven. 16 Kumpipa'n amaute a ngaikhe nuam kei chih Israel khempeuh in a muh takun, kumpipa a dawng uh a: David ah bang tan nei ka hi ua? Jese' tapa ah bang tan nei ka hi ua? Israel aw, na puanbuk tek uah kik un! David aw, na innsung kikep aw! a chi uhi. Tuachi-in, Israelte khempeuh innlam zuanin a paita uhi. 17 Ahihhangin, Judah gam khempeuha teeng Israelte ahih leh, Rehoboam in amaute tung ah vai a hawm lai hi. 18 Kumpipa Rehoboam in nasema a lak teiteite tunga makai Adoniram a sawlkhia a, ahihhangin, Israelte'n suangin a denglum uhi. Ahihhangin, Kumpipa Rehoboam, a kangtalai ah a lut thei hamham a, Jerusalem tungin a suakta hi. 19 Tuachi-in, Israelte tuni dongin David innkuan tung ah a hel uhi.
1 Jerusalema Rehoboam hong tuntakin, Israel dou ding leh Rehoboam adinga kumpigam lakik dingin Judah leh Benjamin innkuante a kaikhawm a, galdouthei mi 180,000 a pha uhi. 2 Ahihhangin, hiai Tangtawn Toupa' thu, Pathian' mi Shemaia kiang ah hong tung hi. 3 Ama'n; Judah kumpipa Solomon' tapa Rehoboam kiang ah leh, Judah leh Benjamin gama Israel mi omte khempeuh kiang ah hiai gen in: 4 Hiai Tangtawn Toupa' thugen ahi. Na sanggamte uh dou dingin kuantou kei un. Inn ah pai un, na vek un, hiai thil kei hih hiven, chi in, chi ahi, a chi hi, Tuachi-in Tangtawn Toupa' thu a mang uh a, Jeroboam dou dinga kuanlou-in, a kilehkik uhi.
Rehoboam in Judah Hatsak
5 Rehoboam bel Jerusalem ah a teng a, Judah gam hutna dingin khawpite a lam hi. Tuate bel, 6 Bethlehem, Etam, Tekoa, 7 Beth Zur, Soko, Adulam, 8 Gad, Maresha, Zif, 9 Adoraim, Lakhish, Azeka, 10 Zora, Aijalon leh Hebron ahi. Hiaite Judah leh Benjamin gama kulhnei khawpite ahi. nAma'n kihutnate a hatsak a, tuate ah makaite a sep a, an, oliv thau leh grepzu a koihkhol hi. 12 Tua khawpite khempeuh ah lumte leh teipite a koih a, tua khawpite muanhuai takin a koih vek hi. Tuachi-in Judah leh Benjamin amaha ahita hi. 1 Israel gama gam sehkhen sung khempeuha siampite leh Levite khempeuh Rehoboam lam ah a pang uhi. 14 Tangtawn Toupa' siampite banga sang lou a, nolh uh ahih manin, a gantatna gamte uleh, a gou neihte uh taisanin Judah leh Jerusalem hon zuan uhi. 15 Jeroboam in munsangte ading leh kei leh bawngnou lim a bawlte adingin ama' siampi dingte a kisehtuamsak hi. 16 Israel nam tuamtuamte laka mi, Tangtawn Toupa, Israel Pathian zong nuamte khempeuh in Tangtawn Toupa, a pu a pate uh' Pathian' maia kithoihnate laan dingin, Jerusalem dong tua Levite a zuisuak uhi. 17 Kum thum sung Judah kumpigam a kipsak uh a, Solomon' tapa Rehoboam a gum uhi. Hiai hunin, David leh Solomon lampite a tawn uhi.
Rehoboam Innkawte
18 Rehoboam in David' tapa Jerimoth leh Abihail' tanu Mahalath a kitenpih hi. Abihail bel Jese' tapa Eliab' tanu ahi. 19 Ama'n tapate Jeush, Shemaria leh Zaham a neihsak hi. 20 Tua khitin, Absalom' tanu Maaka a kitenpih a, ama'n zong tate Abija, Atai, Ziza leh Shelomith a neihsak hi. 21 Rehoboam in a veka gawmin zi sawmlegiat leh mei 60 a nei a, tapa 28 leh tanu 60 a nei hi. 22 Rehoboam in Maaka' tapa Abija, kumpipa-a bawl sawmin, a sanggamte laka makaipen in a sep hi. Piltak in a gamta a, a tapate pawlkhat Judah leh Benjamin gam sehkhente leh kulhnei khawpite lak ah a hawmzak hi. Amaute, nek leh tak kichingtakin a pia a, zi tampi a guan hi.
Shishak in Jerusalem Dou
1 Rehoboam' kumpipa hihna dinmun a kip nungin leh amah hong hattakin, amah leh Israel khempeuh in Tangtawn Toupa' dan a taisan uhi. 2 Tangtawn Toupa' tunga a muanhuai louh manun, Aigupta kumpipa Shishak in Kumpipa Rehoboam vaihawm kum, a kum ngana ah, Jerusalem hong sim hi. 3 Kangtalai 1,200 leh sakoltungtuang mi 60,000 tawh, Aigupta apan hon zui Libiate leh Sukate leh Ethiopiate sepaih simseng louh tawh, 4 Judah gama khawpi kulhnei tampi a la a, Jerusalem dong hong tung hi. 5 Tua khitin, kamsang Shemaia, Rehoboam kiang ah leh Shisak lau mana Jerusalema paikhawm Judah makaite kiang ah hong hawh a, amaute kiang ah: Hiai Tangtawn Toupa' thugen ahi. Ama'n: Noute'n kei non taisan uh a, tua hanga ke'n tu-a Shishak khuta noute hon taisan ka hi, chi ahi, a chi hi. 6 Israel makaite leh kumpipa a kiniamkhiak uh a: Tangtawn Toupa a dik ahi, a chi uhi. 7 Tangtawn Toupa'n amaute a kiniamkhiakta uh, chih a muhtakin, hiai Tangtawn Toupa' thu Shemaia kiang ah hong tung hi. Ama'n: Amaute a kiniamkhiaktak manun, amaute ka hihmangthang kei ding a, hutkhiakna piak tuin ka neipah zaw ding. Ka thangpaihna zong Shishak tungtawnin Jerusalem tung ah a kisungbaw kei ding. 8 Ahihhangin, ama nuai ah a toukai ding uh a, kei nuaia sep leh gamdang kumpipate nuaia sep kibatlouhna a thei ding uhi, a chi hi. 9 Aigupta kumpipa Shishak in Jerusalem a sim takin, Tangtawn Toupa' tempul leh kumpi innpi gou koihkhawmna-a goute a pawmang hi. Bangkim, Solomon in khama a na bawl lumte tawh a la vek hi. 10 Tuachi-in, Kumpipa Rehoboam in tuate taangin sumsan lumte a bawl a, kumpi innpi lutna kongpi-a vengmi makaite a zangsak hi. 11 Kumpipa, Tangtawn Toupa' tempula a hawh tengin, vengmite'n tua lumte tawiin a zui uh a, tua khit chiangin vengmite omna inndan sung ah a koihkik zel uhi. 12 Rehoboam a kiniamkhiak manin Tangtawn Toupa' hehna amah akipan lakkhiakin a om a, hihmanthat sipsipin a om kei hi. A taktakin, Judah gam ah a hoih pawlkhat a om hi. 13 Kumpipa Rehoboam bel Jerusalem ah a kiphutkip a, kumpipa ahi lailai hi. Kumpipa-a hong pan laia kum 41-a upa ahi a, Tangtawn Toupa'n a Min om nadinga, Israel namte khempeuh lak apan a teelkhiak Jerusalem ah kum sawmlesagih sung vai a hawm hi. A nu' Naama ahi a, Amon mi ahi. 14 Rehoboam in Tangtawn Toupa zon ding lungtanga a neih louh manin thil gilou a hih hi. 15 Rehoboam' vaihawm sunga thiltungte ahih leh, a bul apan a tawp dong, kamsang Shemaia leh mailam muthei' Ido thil chiamtehna sunga khangthute kigelhna bute-a kigelh hi lou hia? Rehoboam leh Jeroboam kal ah a damsung teng uh, kidouna a om zihzeh hi. 16 Rehoboam a pu a pate kiang ah a khawlta a, David Khawpi ah a kivui hi. A tapa Abija in a mun a luah a, kumpipain hong pang hi.
Judah Kumpipa Abija
1 Jeroboam' vaihawm kum, a kum sawmlegiatna ah, Abija, Judah kumpipain hong pang a, Jerusalem ah kum thum sung vai a hawm hi. A nu' min Maaka ahi a, Gibea mi Uriel' tanu ahi. Abija leh Jeroboam kal ah kidouna hong om a, 3 Abija, galdou mi 400,000 tawh kidouna phual ah a kuan a, Jeroboam in kidousiam sepaih 800,000 tawh amah dou dingin panmun a khawh hi. Abija, Efraim tanggama Zemaraim Mual ah a ding a: Jeroboam leh Israelte khempeuh aw, hon na ngaikhia un! 5 Tangtawn Toupa, Israel Pathian in Israel tunga kumpipa hihna David leh a suante kianga chi-ala thukhun zanga a jMak ahi, chih na thei kei ua hia? Hinapi-in, Nebat' tapa Jeroboam a pu tung ah a hel hi. Jeroboam lah David' tapa Solomon nuaia ulian khat hi lei a! 7 Mi lungsimsia, namanlou pawl khat amah nungzuia kikaikhawm uh a, Solomon' tapa Rehoboam langa pang uhi. Rehoboam lah tua laia naupang laia thukhentat siam nai lou a, amaute nang dinga hat zou lou hi. 8 Tu'n Tangtawn Toupa' kumpigam, David' suante' khuta om, nan na sawm uhi. Sepaih tampitak zaw na hi nguttak uh a, Jeroboam in noute' pathiante hi dinga hon bawlsak kham bawngnoute na nei mah ve ua. 9 Ahihhangin, Tangtawn Toupa' siampite, Aron' tapate leh Levite hawlkhia-a, gamdangte' hih banga siampite kibawltawm na hi kei ua hia? Mi khatpeuh hong pai a, bawngtaltuai khat leh belamtal sagih zanga amah siangthoua hong kisehtawm peuh leh, pathian hiloupite' siampi hong suak mai ahi ve. 10 Koute ka hih uleh, Tangtawn Toupa ahi ka Pathian uh. Amah taisan lou hi ung. Tua Tangtawn Toupa' nasemte Aron' tapate hi uh a, Levite'n huh uhi. nZingsang teng leh nitaklam tenga amaute'n Tangtawn Toupa' maia haltum thillatte leh gimnamtui manpha mahmahte laan uhi. A siangthoua seh dawhkan tunga tanghou a vuala koih uh a, nitak lam tenga kham meivakmung tunga meivakte de uhi. Tangtawn Toupa, ka Pathian uh ngiat dandan zui hi ung. Noute'n bel amah taisan hi uteh. 1 Ngai un, Pathian in koute hon ompih a, amah ka makai uh hi ahi. Ama' siampite'n noute dou a, kidouna pengkul mut ding uhi. Israel mite aw, Tangtawn Toupa na pu na pate uh' Pathian dou kei un, na lawhching tuan kei ding uhi, a chi hi. Jeroboam in sepaihte a kuala paisakin nunglam ah a sawl a, amah Judah mailama om in, galbukpawl Judah mite nunglam ah a omsak hi. 14 Judah mite a kihei uleh, mailam apan leh nunglam apan hon dou uh, chih a mu uhi. Tua laitakin Tangtawn Toupa a sam uh a, siampite'n a pengkulte uh a mut uh a, judah mite kidouna kikouin a awng zuazua uhi. Tua kidouna kikou aw a gintakin, Pathian in Jeroboam leh Israelte khempeuh, Abija leh Judah mite' mai ah a zougawp hi. 16 Israelte Judah' mai ah a taikek uh a, Pathian in Judah khut sung ah Israelte a pia hi. 17 Abija leh a mite'n amaute tung ah manna thupitak a tun uh a, Israel galhatte 500,000 a si uhi. 18 Tua hunin, Israelte zawhin a om uh a, Judah mite bel, Tangtawn Toupa, a pu a pate uh' Pathian tunga kinga a hih manun hihhatin a om uhi. 19 Abija in Jeroboam a delhzui a, amah apanin Bethel leh Jeshana leh Efron, tuate' kim leh kianga khawtate tawh a sut hi. 20 Jeroboam in Abija' damsung in thahatna a nei zou nawn kei hi. Tangtawn Toupa'n a tung ah khut a kha a, a sita hi. 21 Ahihhangin, Abija bel a hat hiaihiai hi. Zi sawmleli a nei a, tapa 22 leh tanu sawmleguk a nei hi. 22 Abija' vaihawm sunga thiltung dangte, a thilhih leh a thugente tawh, kamsang Ido' chiamtehna laibu sung ah a kigelh hi.
1 Abija, a pu a pate kiang ah a khawlta a, David Khawpi ah a kivui hi. A tapa Asa in a mun a luah a, kumpipain a pang a, ama' vaihawm sungin, tua gam in kum sawm sung galmuanna a mu hi.
Judah Kumpipa Asa
2 Asa in Tangtawn Toupa, a Pathian' mitmuha a hoih leh a dik a hih hi. 3 Gamdang maitamte leh munsangte a beisak a, a zek suang siangthoute a hihzan a, Ashera songte a phuk hi. 4 Judahte Tangtawn Toupa, a pu a pate uh' Pathian zong ding leh a Dan leh thupiakte zui dingin thu a pia hi. 5 Judah gam khawpite peuhmaha munsangte leh gimnamtui halna maitamte a beisak a, ama' nuai ah kumpigam in galmuanna a nei hi. 6 Gam in galmuanna nei ahih manin, Judah gama kulhnei khawpite a lamthak hi. Tangtawn Toupa'n amah tawlngakna pia ahih manin, tua hun laiin kuamah amah tawh a kidou kei hi. 7 Judah mite kiang ah: Hiai khawpite lam ni-in, tuate kimkot ah kulhbaangte bawlin, innsangte, kongpite leh a kalhnate bawl ni. Tangtawn Toupa, i Pathian i zon mana, gam eite-a hi lai ahi. Amah i zong a, ama'n kilchiha tawlngakna hon pia ahi, a chi hi. Tuachi-in, a kilamtou uh a, a mavang uhi. 8 Asa in Judah gam apan sepaihhon 300,000, lum liante leh teipite-a kigalvan, leh Benjamin gam apan 280,000, lum neute leh thalphelte-a kigalvan a nei hi. Hiaite khempeuh galhat hangsan ngen ahi uhi. 9 Kush mi Zera, sepaih tampi mahmah leh kangtalai 300 tawh, amaute dou dingin a kuan a, Maresha dong hong pai hi. 10 Asa zong amah tuak dingin a kuankhia a, Maresha kianga Zefatha Phaizang ah panmun a khawh uhi. 11 Tua khitin, Asa in Tangtawn Toupa, a Pathian a sam a: Tangtawn Toupa aw, a hatte dou dinga hatnabeite huh ding nang bang kuamah om lou hi. Tangtawn Toupa, koute' Pathian aw, nang tung leh na mina kinga ka hih manun, hon huh in, hiai sepaih tampitak dou dinga hong kuan ka hi uh. Tangtawn Toupa aw, koute' Pathian na hi. Na tung ah mihing vualzousak ken, a chi hi. 12 Tangtawn Toupa'n Asa leh Judah' mai ah, Kushte tung ah khut a kha a, Kushte a taikek uh a, 13 Asa leh a sepaihte'n Gerar dong a delhzui uhi. Kushte a puk tam lua a, a dingkhe zou nawn kei uhi. Tangtawn Toupa leh a sepaihte' mai ah nehpekin a om uh a, Judah mite'n gallak tampi a pawkhia uhi. 14 Gerar kimkota khawtate khempeuh a hihmangthang uhi. Ahang bel, Tangtawn Toupa launa mulkimna in amaute manta hiven. Tua khawtate ah gallak sum tam mahmah a, tuate a pawmang vek uhi. 15 Ganchingte' giahphualte zong a buluh uh a, belamhon, kelhon leh sangawngsaute a kaimang uhi. Tua khitin, Jerusalem ah a kilehkikta uhi.
Asa' Thilpuahthakna
1 Obed' tapa Azaria tung ah Pathian' Kha hong tung a, 2 tuachi-in, Azaria, Asa tuak dingin a kuankhia a, a kiang ah: Asa leh Judah leh Benjamin khempeuh in hon na ngaikhia un. Tangtawn Toupa na zon chiangun ama'n hon ompih ahi. Amah na zon uleh, na mu ding uhi. Amah na taisan uleh bel, ama'n zong hon taisan ding hi. 3 Ahang bel, Israel hun sawtpi sung Pathian dik bei, amaute sinsak ding siampi bei leh Dan beia om uhi. 4 Ahihhangin, a mangbat laiun, Tangtawn Toupa, Israel Pathian lam ah a kihei uh a, amah a zong uh a, amaute' muhin a om hi. 5 Tua gama teengte khempeuh pumbuai uh ahih manin, tua hun laiin zin leh vak a bit kei hi. 6 Pathian in amaute, mangbatna chikima buaigawpsak ahih manin, nam khat in nam dang, khawpi khat in khawpi dang nuaisiahin tuanchil hi. 7 Ahihhangin, noute'n bel, thahat suah unla, lungkiain kithadahsak kei un, na nasep uh kithaman na ding hi, a chi hi. 8 Asa in Obed' tapa kamsang Azaria' thugenkholh hiai thute a zak takin, a kihansuah a, Judah leh Benjamin gam khempeuh leh Efraim tanggama a suhsa khawpite apan in, milim kihhuaite a paimang vek hi. Tangtawn Toupa' tempul innliim maia Tangtawn Toupa' maitam a puahthak hi. 9 Tua khitin, Judah mi leh Benjamin mi khempeuh leh Efraim, Manase leh Simeon gam apan mite a kaikhawm hi. Efraim leh Manase leh Simeon apan mite bel Judah leh Benjaminte laka teeng ahi uhi. Amaute bel, Tangtawn Toupa, Asa' Pathian in amah a ompih chih a muhtak ua, Israel gam apan amah kiang hong zuante ahi uhi. 10 Amaute, Asa' vaihawm kum, a kum sawmlengana, a kha thumna ah, Jerusalem ah hong paikhawm uhi. uTua hunin, gallaaka hon puakte ua pan bawng 700 leh belam leh kei 7,000, Tangtawn Toupa' mai ah a laan uhi. 12 Amaute'n lungtang tak leh lungsim takin Tangtawn Toupa, a pu a pate uh' Pathian tawh kal ah thukhun a bawl uhi. 13 Tangtawn Toupa, Israel' Pathian zong nuamloute khempeuh, a lian hi-in a neu hita leh, numei hi-in pasal hita leh, thah ding ahi. 14 Ngaihtaka pahtawina tawh kikou aw tawh, pengkul leh kite mutging tawh, Tangtawn Toupa tung ah kichiamna a bawl uhi. 15 Lungtang taka kichiam uh a hih manin, hiai kichiamna tawh kisaiin Judahte khempeuh lungnuamin a kipak uhi. Kilawptakin Pathian a zong uh a, amaute' muhin a om hi. Tuachi-in, Tangtawn Toupa'n kil chih ah galmuanna a pia hi. 16 Kumpipa Asa in a nu Maaka zong, a kihhuai Ashera song a bawl manin, kumpipa nu' hihna dinmun apanin a kesak hi. Asa in tua song a phuk a, a tumtan vek a, Kidron Phaizang ah meiin a hal hi. 17 Ama'n Israel apanin munsangte phiatmang kei mah leh, a damsung teng Tangtawn Toupa ah a lungtang khempeuh a pia hi. 18 Amah leh a pa'n a na latsa uh ngun leh kham leh thildangte, ama'n Tangtawn Toupa' tempul sung ah a pawlut hi. Asa' vaihawm kum, a kum 35-na mateng, gal kidouna a om kei hi.
Asa Hun Nunung
1 Asa' vaihawm kum, a kum 36-na ah, Israel kumpipa Baasha in Judah gam hong dou a, Judah kumpipa Asa' gam sunga kuamah lutsak lou ding leh pawtsak lou dingin Rama kulhin a bawl hi. 2 Tua khitin, Asa in Tangtawn Toupa' tempula gou koihna leh ama' innpi-a gou koihna apanin ngun leh kham a la a, Damaska-a vaihawmpa Aram kumpipa Ben Hadad kiang ah a khak hi. 3 Ama'n Ben Hadad kiang ah: Ka pa leh na pa kala lemna thukhun a na om bangin, kei leh nang kal ah lemna thukhun om hen. En in, ngun leh kham kon khak hi. Israel kumpipa Baasha in kei hon kihepsan theih nadingin, amah tawh kala lemna thukhun na neih uh na tatsakta in, a chi hi. 4 Ben Hadad in Kumpipa Asa a thukimpih a, Israel khawpite dou dingin a sepaih makaite a sawl hi. Amaute'n Ijion, Dan, Abel Maim, tua Naftali gam van koihna khawpite a zou uhi. 5 Baasha in hiai thu a zaktakin, Rama alamlai a tawpsan a, a nasep a tawpsanta hi. 6 Tua bang hong hih takin, Kumpipa Asa in Judah gam mite khempeuh a tonpih a, Baasha zat lai suangte leh singte Rama apan a pawmang vek hi. Tuate zangin Geba leh Mizpa a lam hi. 7 Tua hunin, mailam muthei Hanani, Judah kumpipa Asa kiang ah hong hawh a, a kiang ah: Tangtawn Toupa, na Pathian tunga kinga lou a, Aram kumpipa tunga na kingak zawk manin, Aram kumpipa' sepaihte na khut sung apan suaktata uh ahi ve. 8 Kangtalaite leh sakoltungtuang tampi nei, Kushte leh Libiate, sepaihhon hat mahmah hilou uhia? Hinapi-in, Tangtawn Toupa tunga na kingak laiin, ama'n amaute na khut sung ah hon pia hi. 9 Ahang bel, Tangtawn Toupa' mit, ama' tunga lungtang kipumpiakte hatsak dinga leitung khempeuha vak dundun hiven. Nang bel thil haihuaipi hih na hi ve. Tu apanin galdou na neita ding hi, a chi hi. 10 Hiai thu hangin, mailam mutheipa tung ah Asa a heh a, a hehluat manin suangkul ah amah a khum hi. Tua hun lai mahin, mi pawlkhat, hiamgam takin a nuaisiah hi. 11 Asa' vaihawm sunga thiltungte, a bul apan a tawp dong, Judah leh Israel kumpipate' tungthu gelhna laibu sung ah a kigelh hi. Ama' vaihawm kum, a kum 39-na ah, Asa bel a khe ah natna khat thuak sakin a om hi. Hiai a natna nase mahleh, a chinatna a thuak lai nangawnin Tangtawn Toupa apan huhna a zong kei a, damdawi siamte apan a zong zaw hi. 13 Tua khitin, a vaihawm kum, a kum 41-na ah, Asa a sita a, a pu a pate kiang ah a khawlta hi. David Khawpi-a amah mah-in a khuak hankhuk ah a vui uhi. Laang tung ah amah a sial uh a, gimnamtuite leh gimnamtui hel tuamtuam a buak uh a, amah zahnain meikuang thupitak a bawl uhi.
Judah Kumpipa Jehoshafat
1 A tapa Jehoshafat in ama' mun a luah a, kumpipa-in hong pang a, Israel dou dingin hong kihihhat hi. 2 Judah gamsunga khawpi kulhneite khempeuh ah sepaihte a koih a, Judah gam leh a pa Asa in Efraim gamsunga khawpi a lakte ah zong sepaihte a koih hi. 3 Jehoshafat in a chil laia a pa David' lampi tot mah a tot manin, Tangtawn Toupa'n amah a ompih hi. Ama'n Baalte lah thu a dong kei a, 4 a pa' Pathian a zong zaw a, Israelte' gamtat dan sangin Pathian' thupiakte a zui zaw hi. 5 Tangtawn Toupa'n ama' ukna nuai ah kumpigam a kipsak a, Judah gam khempeuh in thawnpiakte Johoshafat kiang ah a puak uh a, hauhna thupitak leh pahtawina a ngah hi. 6 Tangtawn Toupa' lampi tawnin lungtang khempeuh tawh a kipezou hi. Tua baan ah, Judah gam apan munsangte leh Ashera songte a phiatmang hi. 7 A vaihawm kum, a kum thumna ah, Judah khawpite-a sinsak dingin, a uliante Ben Hail, Obadia, Zekharia, Nethanel leh Mikaia a sawl hi. 8 Amaute' kiang ah Levite pawlkhat Shemaia, Nethania, Debadia, Asahel, Shemiramoth, Jehonathan, Adonija, Tobija leh Tob Adonija leh siampite Elishama leh Jehoram zong a om uhi. 9 Amaute'n Tangtawn Toupa' Dan Laibu a keng uh a, Judah gam sung teng ah a sinsak uh a, Judah khawpite khempeuh a tawn kawikawi uh a, mipite a sinsak uhi. 10 Judah gam kiim leh kianga kumpigamte khempeuh ah Tangtawn Toupa launa a tung a, Jehoshafat tung ah gal a bawl kei uhi. nFilistiate pawlkhat in siah danin thawnpiakte leh ngunte, Jehoshafat hong puak uh a, Arabte'n zong belam leh kelhon hong puak uhi. Tuate belamtal 7,700 leh kei 7,700 a pha hi. 12 Jehoshafat a vanglian semsem a, Judah gam ah kulhte leh vankoihna khawpite a lam a, 13 Judah khawpite ah nek leh tak tampi a nei hi. Jerusalem ah zong pldou siamsa zong a koih hi. 4 Amaute a beh beha min kikhum dan hibang ahi: Judah nam apan, 1,000 pawlpawl tunga makaite: Makai Adna, galdouthei mi 700,000 tawh; 15 tua zomin, makai Jehohanan, mi 280,000 tawh; 16 tua zomin, Zikri' tapa Amasia, mi 200,000 tawh, Amasia bel ama' utthu-a Tangtawn Toupa' nasema kipia ahi. 17 Benjamin nam apan: Sepaih hangsan Eliada, thai leh lumte-a kigalvan mi 200,000 tawh; 18 tua zomin, Jehozabad, galdou dinga kigalvansa mi 180,000 tawh. 19 Hiaite bel, Judah gamsung tenga khawpi kulhneia kumpipa'n a koihte baana, kumpipa' nasem mite ahi uhi.
Mikaia in Ahab vau
1 Jehoshafat in a dawng a: Kei nang bangbang ka hi, ka mite zong na mite bangbang ahi. Galdouna kong doupih ding uh, a chi hi. 4 Ahihhangin, Jehoshafat in Israel kumpipa kiang ah: Tangtawn Toupa' thuhilhna zong masa in, a chi lai hi. 5 Tuachi-in, Israel kumpipa'n kamsangte 400 a samkhawm a, amaute kiang ah: Ramoth Gilead douin ka kuan ding uam, ka kikham zaw diam? chi-in a dong hi. Amaute'n a dawng uh a: Kuan in, Pathian in kumpipa khutsunga tua gam hon pe ding ahi, a chi uhi. 6 Ahihhangin, Jehoshafat in: Hiai ah Tangtawn Toupa' kamsang i dot theih ding omlou hia? chi-in a dong hi. 7 Israel kumpipa'n Jehoshafat a dawng a: Kamsang khat, ama' tungtawna Tangtawn Toupa i dot theih ding om lai mah e, ahihhangin, kei tungthua a hoihlam genkhol ngeilou a, a sia ngen genkhol gige a, amah mudah ka hi. Amah Imla' tapa Mikaia ahi ve, a chi hi. Jehoshafat in a dawng a: Kumpipa'n tua bang na chih ding hi lou ahi, a chi hi. 8 Tuachi-in, Israel kumpipa'n a uliante khat a sam a, a kiang ah: Kintakin Imla' tapa Mikaia hon tonpih in, a chi hi. Israel kumpipa leh Judah kumpipa Jehoshafat bel, a kumpipuan silh utawh, Samaria kongpi lutna kianga buhphual ah a kumpitutphahte uah a tu uhi. Amaute' mai ah tua kamsangte khempeuh zong genkholhna thu genin a om uhi. 10 Kanaana' tapa Zedekia in sik kite a bawl a: Hiai Tangtawn Toupa' thugen ahi. Ama'n: Aramte hihmanthat a hih mateng hiaite-in amaute na sun ekek ding, chi ahi, a chi hi. 11 Kamsang dangte khempeuh in zong a kibang mah a genkhol uh a: Ramoth Gilead dou inla vualzou in. Tangtawn Toupa'n kumpipa khutsunga tua gam hon pe ding hiven, a chi uhi. 12 Mikaia sam dinga kuanpa'n amah kiang ah: Ngai dih, kamsang dangte'n mi khat bang maia kumpipa adinga lawhchinna genkhol uh eive. Nang' thugen zong amaute-a tawh kibangsak inla, a hoihlam gen in, a chi hi. 13 Ahihhangin, Mikaia in: Tangtawn Toupa' hinna sialin ka gen ahi. Ka Pathian' gen teng kia amah ka hilh thei ding, a chi hi. 14 Amah hong tun takin, kumpipa'n amah a dong a: Mikaia, Ramoth Gilead dou-in ka kuan ding uam, ka kikham zaw diam? a chi hi. Ama'n a dawng a: Kuan inla, vavualzou in! amaute na khutsunga piak hi ding uhi! a chi hi. 15 Kumpipa'n amah kiang ah: Tangtawn Toupa' mina thutak loungal bangmah hon hilh lou dinga bangzah vei hon kichiamsak ding ka hia? a chi hi. Tua khitin, Mikaia in a dawng a: A ching ding omlou belamte banga Israelte khempeuh mualtung khawnga kithehzak ka mu a, Tangtawn Toupa'n: Hiai mite'n makai nei lou uh ahi, mi chih a inn uah lungmuangtakin pai chiat uhen, chi ahi, a chi hi. 17 Israel kumpipa'n Jehoshafat kiang ah: Hiai mipa'n ka tungthu a sia loungal, a hoih himhim genkhol ngeilou ahi, chih kon hilh kei-a hia? a chi hi. 18 Mikaia in a gen lai a: Tua bang ahih manin Tangtawn Toupa' thu ngai in. Tangtawn Toupa, a kumpitutphah tunga tu a, a vei leh a taka vaan mipi honpi ding ka mu hi. 19 Tua Tangtawn Toupa'n: Ramoth Gilead dou ding leh tua-a vasi dingin Israel kumpipa Ahab kuan zol ding ahia? a chi hi. Khat in hiai hoih inteh, a chi a, a dang khat in tua hoih inteh, a chi hi. 20 Atawpin kha khat hong pai a, Tangtawn Toupa' mai ah a ding a: Ken amah ka zol ding, a chi hi. Tangtawn Toupa'n: Bang zangin na zol dia? chi-in a dong a, 21 ma'n: Ka kuan dinga a kamsangte khempeuh' kam ah kha zuauthei ka va hi ding, a chi hi. Tangtawn Toupa'n: Amah na zol zou ding. Va kuan inla, tua bangin va hih in, a chi hi. 22 Tua bangin, tu'n Tangtawn Toupa'n hiai na kamsangte' kam ah kha zuauthei a koihta. Tangtawn Toupa'n nang adingin siatna a sehsa ahita, a chi hi. 23 Tua khitin, Kanaana' tapa Zedekia in a naihtou a, Mikaia' maitang a beeng a: Tangtawn Toupa apan tua kha, nang hon houpih dinga kei apan a paikhiak laiin koi lam ah a pai a? a chi hi. 24 Mikaia in a dawng a: Inndan sungnunga bu dinga na tailut ni-in theikhe na ve teh, a chi hi. 25 Tua khitin, Israel kumpipa'n thu a pia a: Mikaia tonpih unla, khawpi ukpa Amon kiang ah leh kumpipa' tapa Joash kiang ah khakik unla: 26 Hiai kumpipa' thugen ahi. Ama'n: Hiai mipa suangkul ah khum unla, bittaka kong kiknawn masiah, tanghou leh tui loungal bangmah na pe kei un, chi ahi, chi un, a chi hi. 27 Mikaia in: Bittaka nong kiknawn peuhmah leh Tangtawn Toupa'n kei tungtawnin thu a gen keia hi'n teh, chi-in a phuang hi. Tua khitin: Nou, mipite khempeuh aw, ka thugente chiamteh un! a chi lai hi.
Ahab' Sihna
28 Tuachi-in, Israel kumpipa leh Judah kumpipa Jehoshafat, Ramoth Gilead ah a kuantou uhi. 29 Israel kumpipa'n Jehoshafat kiang ah: Kei kibawllamdangin kidouna phual sung ah ka lut ding a, nang zaw na kumpipuan mah silh in om in, a chi hi. Tuachi-in, Israel kumpipa a kibawllamdang a, kidouna phual sung ah a lut hi. 30 Aram kumpipa'n a kangtalai hawi makaite thu a pia a: Aneu hi-in a lian hita leh, Israel kumpipa loungal kuamah, suai kei un, a chi hi. 3 Tua kangtalai hawi makaite'n Jehoshafat a muh takun: Hiai Israel kumpipa hi mahmah e, chi-in a ngaihtuah uhi. Tua chi-in amah suai dingin a kisa uh a, ahihhangin, Jehoshafat a kikoukhia a, Tangtawn Toupa'n amah a huh hi. Pathian in amah apanin amaute a heimang a, 32 tua kangtalai hawi makaite'n amah Israel kumpipa ahi kei, chih a muh takun, amah a delh nawn kei uhi. 33 Ahihhangin, mi kuahiam khat in ngimtuam neilou-a a thai a khoh leh, Israel kumpipa a galthuam kituahna kal tak ah a kapkha hi. Kumpipa'n kangtalai hawlpa kiang ah: Kilehhei inla, kidouna phual apan hon paikhiakpih in, liamta ka hi, a chi hi. 34 Sun nitumin kidouna a nase mahmah a, Israel kumpipa lah nitaklam dong, a kangtalai tunga kingaiin Aramte lam ngain a op hi. Ni a tum takin a sita hi.
1 Judah kumpipa Jehoshafat, Jerusalema a innpi-a bittaka a kilehkik takin, 2 Hanani' tapa, tua mailam mutheipa Jehu in kumpipa a na tuak a, a kiang ah: Nang midikloute huh a, Tangtawn Toupa mudahte it ding maw? Hiai hangin, Tangtawn Toupa' thangpaihna na tunga om ahi. 3 Ahihhangin, nang ah thil hoih bangzah hiam bel a om. Tua ahih leh, gamsung apanin Ashera songte na paimang a, Pathian zonna lam ah na lungtang na koih hi, a chi hi.
Jehoshafat in Thukhente Sep
4 Jehoshafat, Jerusalem ah a teeng a, Beersheba apan Efraim tanggam dongin, mipite lak ah a hawh kik a, Tangtawn Toupa, a pu a pate uh' Pathian lam ah amaute a piikik hi. 5 Ama'n gamsung ah, kulhnei Judah khawpite khempeuh ah thukhente a sep chiat hi. 6 Amaute kiang ah: Na thilhih uh pilvangtakin ngaihtuah un, mihing adinga thukhen na hi kei uh a, Tangtawn Toupa noute hon ompihpa adinga thukhen na hi zaw uhi. 7 Tuin, Tangtawn Toupa launa na tung uah om hen. Pilvangtakin thu khen un, ahang bel, Tangtawn Toupa i Pathian adinga a dikloua thukhen hita leh, deihsaktuam neihna hita leh, golhgukna hita leh bangmah om lou ahi, a chi hi. Jerusalem ah zong, Jehoshafat in Levite, siampite leh Israel beh tuulpite laka pawlkhat Tangtawn Toupa' thukhenna zang ding leh thubuaite lem dingin a sep a, tuate Jeusalem ah a teeng uhi. 9 Ama'n amaute kiang ah hiai thupiakte a pia a: Tangtawn Toupa launa tawh muanhuaitak leh lungtang khempeuh in nna sem un. 10 Khawpite-a teeng na gammi hihpihte uapana thubuai, sisan suahna thu hita leh, dan leh thupiakte, dankhunte leh thukhennate tawh kisai khatpeuh, hong kitun peuhmah ah, Tangtawn Toupa tunga khial lou dingin amaute na vau ding uh ahi. Tua banga na hih kei uleh, ama' thangpaihna, noute leh na sanggamte uh tung ah hong tung ding hi. Hiai hih un, hi leh na khial kei ding uhi. 11 Tangtawn Toupa tawh kisai khatpeuh ah, siampi makai Amaria noute tung ah a om ding a, kumpipa tawh kisai thil khatpeuh ah, Ishmael' tapa Zebadia, Judah nam makai noute tung ah a om ding. Tua baan ah Levite'n ulian hihna tawh noute' mai ah a sem ding uhi. Hangsantakin gamta unla, a sem hoihte, Tangtawn Toupa'n ompihta hen, a chi hi.
Jehoshafat' Vualzawhna
1 Hiai nungin, Moabte leh Amonte, Meunate pawlkhat tawh, Jehoshafat tunga gal bawl dingin hong kuan uhi. Mi pawlkhat hong pai uh a, Jehoshafat kiang ah: Tuipi gal langkhat apanin, Aram apan nang hong dou dingin sepaihhon tampi mahmah hong kuan uh a, Hazazon Tamar-a omkhin ahi uh, a chi uhi. Hazazon bel En Gedi ahi. 3 Patauin, Jehoshafat in Tangtawn Toupa thu dot a tum tinten a, Judah gamsung teng ah an ngawl ding a phuang hi. 4 Judah gam mite, Tangtawn Toupa apan huhna zong dingin hong paikhawm uh a, ahi, amah zong dingin Judah gam khawchih apan hong pai uhi. 5 Tua khitin, Tangtawn Toupa' tempul mai ah, tua huangsung inntual thaka Judah leh Jerusalem mi kikhawmte lak ah Jehoshafat a dingtou a: 6 Tangtawn Toupa, ka pu ka pate uh Pathian aw, nang vaantunga om Pathian hi lou na hi maw? Nang namte' kumpigamte khempeuh na uk a, vangletna leh thahatna na khut ah a om a, kuama'n hon nang zou kei hi. 7 Koute' Pathian aw, na mi Israelte' maia hiai gam luahte hawlkhia, na lawm Abraham' suante kianga a denden dinga pia hi lou na hi-a hia? 8 Amaute hiai gamsunga teeng uh a, na Min adinga a sunga munsiangthou lam uh a: 9 Ka tung ua tuahsiatna, gawtna namsau hi-in, hipi hi-in, kial hita leh hong tun leh na omna, na Min pua hiai tempul mai ah kong ding ding uh a, mangbangin nang kon sam ding uh a, non za ding a, non hondam ding hi, chi uhi. 10 Ahihhangin, tu'n hiai ah Amon leh Moab leh Seir Mual apan mite om uhi. Israelte Aigupta apan hong pai laiun, a gam uh dou dingin Israelte na phal kei hi. Tuachi-in, amaute apan a kiheimang uh a, a hihmangthang kei uhi. 11 Tu'n hon thuk dan uh en in. Goutan dinga koute non piak gam apan hon hawlkhiak sawma hong kuan uhi. 12 Koute' Pathian aw, amaute gawt lou ding maw? Koute hon dou dinga kisa hiai sepaihhon tampi maituah dinga koute'n vangletna nei lou hi ung. Bang lawhta ding chih thei lou a, nang hon mitsuan hi ung, a chi hi. 13 Judah gam mite khempeuh tua mun ah, a zi a tate uleh a taneute utawh, Tangtawn Toupa' mai ah a ding uhi. Tua hunin, Tangtawn Toupa' Kha Zekharia' tapa Jahaziel tung ah hong tung hi. Zekharia bel Benaia' tapa ahi a, Benaia bel Jeiel' tapa ahi a, Jeiel lah Matania' tapa ahi. Matania bel Levi mi Asaf suan ahi. Jahaziel, tua kikhawmte laka a din laia Kha hong tung ahi. 15 Ama'n: Kumpipa Jehoshafat leh Judah gam leh Jerusalema teengte khempeuh aw, na ngai un! Hiai Tangtawn Toupa'n noute kianga a thugen ahi. Ama'n: Hiai sepaihhon tampite hangin lau kei unla, lungke sam kei un. Ahang bel, kidouna noutea hi lou a, Pathiana hi zaw ahi. 16 Zingchiangin, amaute dou dingin kuansuk un. Amaute Ziz taangkanna chiangkota kaltou ahi uh a, Jeruel Gamdai-gamkeua kuam thuk mong ah na tuak ding uhi. 17 Hiai kidouna noute dou a kul kei ding. Panmun khawh unla, kiptakin ding unla, Tangtawn Toupa'n noute hutkhiakna hon piak ding mu un, Judah leh Jerusalem aw, lau kei unla, lungke kei un. Zing chiangin amaute tuak dingin kuankhia un. Tangtawn Toupa'n hon ompih ding ahi, chi ahi, a chi hi. 18 Jehoshafat lei si-in a kun a, Judah leh Jerusalem mite khempeuh in zong Tangtawn Toupa' maia bokin a bia uhi. 19 Tua khitin, Kohathte leh Korate apan pawlkhat a dingtou uh a, Tangtawn Toupa, Israel Pathian, aw ngaihtakin a phat uhi. 20 Zingsang beltakin Tekoa Gamdai-gamkeu zuanin a kipankhia uhi. A kipatkhiak takun Jehoshafat a ding a: Judah leh Jerusalem mite aw, hon ngaikhia un! Tangtawn Toupa na Pathian uh muang un, hi leh tawisanga om ding na hi uhi. A kamsangte muang un, hi leh, lawhching ding na hi uhi, a chi hi. 2 IMipite thu a kup khitin, Jehoshafat in, sepaihhon' maia pai kawma, Tangtawn Toupa' sianthouna kilawmna hanga a maia la sa ding leh amah phat ding mite a sep a: A zahngaihna Tangtawn daih ahih manin, Tangtawn Toupa tung ah kipahthu gen un, a chi hi. 22 Tua banga la sa a, a phat pat takun, Tangtawn Toupa'n Judah gam hong dou Amonte leh Moabte leh Seir Muala teengte buka dou ding a koih a, amaute' zawhin a omta uhi. 23 Amonte leh Moabte, Seir Muala teengte hihmangthang ding leh hihchimit dingin a dingkhia uhi. Seir Muala mite a thah ekek nungun, amau kihih-mangthang tuah dingin a kihuhtuah leuleu uhi. 24 Judah gam mite, gamdai-gamkeu kimuh sukna mun ah hong pai uh a, tua sepaihhon tampite a gal et uh a, ngai in, leilaka misiluang lum phengphung kia a mu uhi. A suakta kuamah omlou dan ahi. 25 Tuachi-in, Jehoshafat leh a mite, gallak sumte paw dingin a kuan uh a, misi luangte lak ah galvan leh puansilh thil manpha tampi, a puak seng louh uh a mu uhi. Gallak sum a tam lua a, ni thum sung khop a ching hi. 26 A ni lina ah, Beraka Phaizang ah a kikhawm uh a, Tangtawn Toupa a phat uhi. Hiai hang ahi, tua mun, tuni donga Beraka Phaizang a kichih. 27 Tua khitin, Jehoshafat' makaih in, Judah gam leh Jerusalem khaw mite khempeuh lungnuama kipaktakin Jerusalem ah a kiik uhi. Ahang bel, Tangtawn Toupa'n a melmate uh tunga a thilhih hanga kipah nading neisak hiven. 28 Amaute Jerusalem a lut uh a, kaihging leh tamngai leh pengkul ging tawh Tangtawn Toupa' tempul ah a hawh uhi. 29 Tangtawn Toupa'n Israel adinga a melmate uh dousak hi tah, chih a zak-takun, gamdang kumpigamte khempeuh tung ah Pathian launa a tung hi. 30 Tuachi-in, a Pathian in amah kilchiha tawlngakna pia ahih manin, Jehoshafat' kumpigam in galmuanna a nei hi.
Jehoshafat' Vaihawm Nununglam
31 Jehoshafat in Judah tung ah vai a hawm a, Judah kumpipa hong hih laiin kum 35-a upa ahi a, Jerusalem ah kum 25 sung vai a hawm hi. A nu' min Azuba ahi a, Shilhi' tanu ahi. 32 Jehoshafat in a pa Asa' lampite a tawn a, tuate a pialsan kei a, Tangtawn Toupa' mitmuha thildik a hih hi. 33 Hinapi-in, munsangte a kiphiat kei a, mipite'n zong a pu a pate uh' Pathian ah lungtang a nga kei uhi. Jehoshafat' vaihawm sunga thiltung dangte ahih leh, a bul apan a tawp dong, Henani' tapa Jehu tangthu, Israel kumpipate laibu-a kigelh ah a kigelh hi. 35 A hun nunung lamin, Judah kumpipa Jehoshafat in Israel kumpipa Ahazia tawh pankhawmna a bawl a, gitlouhna-a mawh hong hi ahi. 36 Sumsinna long hon khat bawlkhawm dingin thukimna a bawl a, hiai longte Ezion Geber-a a kibawlkhit nungin, 37 Maresha mi Dodavahu' tapa Eliezer in Jehoshafat vauna thu a genkhol a: Ahazia tawh pankhawmna na bawl manin, Tangtawn Toupa'n na thilbawlsate hihmangthang ding ahi, a chi hi. Tuachi-in, longte a kisia a, sumsin nadingin tui tung ah a pai thei kei uhi.
1 Tua khitin, Jehoshafat, a pu a pate kiang ah a khawlta a, David Khawpi ah amaute kiang ah a kivui hi. A tapa Jehoram in a mun a luah hi. 2 Jehoram sanggamte, Jehoshafat' tapa dangte bel Azaria, Jehiel, Zekharia, Azariahu, Mikhael leh Shefatia ahi. Israel kumpipa Jehoshafat' tapate avekun hiaite ahi uh a, 3 a pa un amaute kiang ah thawnpiak tampi ngun leh kham leh thil manphate leh Judah gama khawpi kulhneite nangawn a pia hi. Ahihhangin, Jehoram bel a ta upa ahih manin, kumpigam a pia ahi.
Judah Kumpipa Jehoram
4 Jehoram, a pa' kumpigam tunga a kihihkip takin, a sanggamte khempeuh leh Israel kumpi tapate pawl khat namsauin a that khawm hi. 5 Jehoram, kumpipa-a hong pan chilin kum 32-a upa ahi a, Jerusalem ah kum giat sung vai a hawm hi. 6 Ama'n Ahab innkawte bangin, Israel kumpipate' lampite a tawn hi, Ahang bel, Ahab' tanu khat a kitenpih man ahi. Ama'n Tangtawn Toupa' mitmuha thilgilou hih ahi. 7 Ahihhangin, Tangtawn Toupa'n David tawh kala thukhun a na bawlkhit manin, David khanggui a hihmangthang nuam kei hi. Ama'n amah leh a suante adinga meivak khat tunden ding na chiamkhinta hiven. 8 Jehoram' damlaiin, Judah tung ah Edom a hel a, amah adingin kumpipa tuam a kitunkhiak hi. 9 Tuachi-in, Jehoram, a uliante leh a kangtalaite khempeuh tawh tua ah a va hawh hi. Edomte'n amah leh kangtalaihawl makaite a na umchip uh a, ahihhangin, amah zankhangin a dingkhia a, Edomte a suai hi. 10 Tuni dongin Judah tung ah Edom a hel gige hi. Tua hun lai mahin, Libna zong Judah tung ah a hel hi. Ahang bel, Jehoram in Tangtawn Toupa, a pu a pate' Pathian a taisan man ahi. 11 Ama'n Judah gam mualtungte-a munsangte lam a, Jerusalem mite kizuaksak a, Judah gam lampialsak hiven. 12 Jehoram in kamsang Elija apan laikhak khat a mu a, tua in hibangin a gen hi: Hiai Tangtawn Toupa na pa David' Pathian' thugen ahi. Ama'n: Na pa Jehoshafat hi-in, Judah kumpipa Asa hita leh, amaute' lampite na tawn kei. 13 Israel kumpipate' lampite na tawn zaw a, Judah leh Jerusalem mite, Ahab hih banga amau kizuak dingin na lampialsak hi. Na sanggamte mahmah, na pa inkuan sung mite, nang sanga mi hoihzawte nangawn na that hi. 14 Tu'n Tangtawn Toupa'n na mite, na tapate, na zite leh na neihsa thil peuhmah tunga khut kha ding hita a, gik mahmah ding hi. 15 Nang mahmah in zong sungnatna damtheilou na vei ding a, na ngoi teng a tolhkhiaksak masiah nakpitaka china ding na hi, chi ahi, chi-in. 16 Tangtawn Toupa'n Jehoram dou dingin Filistiate leh Arabte, tua Kushte kianga teengte' lungsim ah melmakna lungsim a tokthou a, 17 Judah gam a dou uh a, a sim uh a, kumpi innpi sunga vante khempeuh, a tapate leh a zite uh nangawn tawh a pawmang uhi. A tapa nautumpen Ahazia lou siah tapa khat lei zong nutsiat a om kei hi. 18 Hiai thilte khempeuh nungin, Tangtawn Toupa'n sunglam natna damtheilou khatin Jehoram a chinasak hi. 19 Hun hong pai zel a, a kum nihna bei takin, tua chinatna hangin a ngoite a tolhkhia a, na sa mahmahin a sita hi. A mite'n a pu a pate a bawl bangun, amah zahbawlna meipi zong a seem kei uhi. 20 Jehoram kumpipa-a hong pan chilin kum 32-a upa ahi a, Jerualem ah kum giat sung vai a hawm hi. Kuamah' phamawhsak louhin a sita a, David Khawpi ah a kivui a, ahihhangin, kumpipate' hankhuk ah a kivui kei hi.
Judah Kumpipa Ahazia
1 Jerusalem mite'n Jehoram' tapa tumpen Ahazia, Jehoram mun ah kumpipain a bawl uhi. Ahang bel, galsim pawl, Arabte tawh giahphuala hong lutte'n Jehoram tapa uzawte khempeuh a that vek ua ahi. Tuachi-in, Jehoram tapa Ahazia, Judah kumpipa'n vai a hawm panta hi. 2 Ahazia kumpipa hong hih chilin kum 22-a upa ahi a, Jerusalem ah kum khat sung vai a hawm hi. A nu' min Athalia ahi a, Omri' tanu ahi. 3 Ahazia in zong Ahab innkawte' lampite a tawn hi. Ahang bel, a nu'n thil diklou hih dingin amah a hasuan-a ahi. 4 Ama'n Ahab innkawte bangin, Tangtawn Toupa' mitmuha thil diklou hih ahi, ahang bel, ama'n a pa' sih nungin, a thil diklou hihna ah amaute, amah thuhilhmi hong hi uh ahi. 5 Ama'n zong, Ramoth Gileada Aram kumpipa Hazael dou dinga Israel kumpipa Ahab' tapa Joram tawh a kuan laiin amaute' thuhilhna a zui hi. Tua ah Aramte'n Joram a na liamsak uh a, 6 tuachi-in, Aram kumpipa Hazael a dou laia Ramoth Gilead-a amaute' liamsakna apan kikem dingin Jezreel ah a kilehkik hi. Tua khitin, Judah kumpipa Jehoram' tapa Ahazia zong, Ahab' tapa Joram Ham ahih manin, amah mu dingin Jezreel ah a hawhsuk hi. 7 Ahazia in Joram a vehna tungtawnin Pathian in Ahazia' pukna a tun hi. Ahazia hong tuntakin, Nimshi' tapa Jehu tuak dingin Joram tawh a kuankhia uhi. Jehu bel Tangtawn Toupa'n Ahab innkuan hihmangthang dinga a thaunilhpa ahi. 8 Jeshu in Ahab innkuan tunga gawtna a tunsak laiin, Judah gam makaite leh Ahazia' nasem a tanaute a mukhia a, amaute a that hi, 9 Tua khitin, Ahazia zong dingin a kuan a, a mite'n Smaria-a a bukna ah a man uhi. Jehu kiang a tun uh a, thahin a om hi. Amaute'n: Amah zaw, lungtang khempeuh tawh Tangtawn Toupa zongpa Jehoshafat' tapa ahi, chi-in a vui uhi. Tuachi-in, Ahazia' innkuan sung ah kumpigam lenden dinga thanei kuamah a omta kei hi.
Athalia leh Joash
10 Ahazia' nu Athalia in a tapa a sita chih a muh takin, Judah kumpi inkuan bup hihmangthang dingin a kipan hi. 11 Ahihhangin, kumpipa Jehoram' tanu Jehosheba in Ahazia' tapa Joash a la a, thah dinga om kumpi tapate lak apan a gumang a, lupna inndan sung ah amah leh a donnu a sel hi. Kumpipa Jehoram' tanu leh siampi Jehoiada' zi, tua Jehosheba bel Ahazia' sanggamnu a hih mana, tua naupang Joash thaha a om louh nadinga Athalia apan na seel ahi. 12 Athalia in tua gama kum guk sung vai a hawm sung teng, Pathian' tempul ah amaute tawh Joash selin a om den hi.
1 A kum sagihna ah, Jehoiada in a thahatna a suah a, 100 pawlpawl tunga makaite tawh kal ah thukhun a bawl hi. Tua makaite bel, Jeroham' tapa' Azaria, Jehohanan' tapa Ishamael tawh, Obed' tapa Azaria tawh, Zikri' tapa Elishafat tawh ahi uhi. 2 Amaute'n Judia gamsung teng a tawnsuak uh a, khawpite khempeuh apanin Levite leh Israel behtuulpite a kaikhawm uh a, 3 tua kikhawmte'n Pathian' tempul ah kumpipa tawh thukhun a bawl uhi. Jehoiada in amaute kiang ah: Tangtawn Toupa'n David' suante tawh kisaia thu a chiam bangin, kumpipa' tapa in vai a hawm ding ahi. 4 Tuin na hih ding uh hiai ahi: Nou siampite leh Levite, Sabbath ni-a nasepna tangte sehthum suah seh khat, kongkhakte ah galvilin pang unla, 5 sehthum suah sehkhat dangte kumpi innpi ah galvilin pang un. Adangte khempeuh bel Tangtawn Toupa' tempul huangsung inntual ah na om ding uh ahi. 6 Nasepna tang siampite leh Levite loungal Tangtawn Toupa' tempul ah a lut ding ahi kei. Amaute bel sehtuam siangthou ahih manun a lut thei ding uh. Ahihhangin, midangte bel Tangtawn Toupa'n amaute' ven dinga a seh a veng ding uh ahi. 7 Levite, kumpipa kimkot ah a kikoih ding uh ahi a, mi chih in a galvan a tawi ding ahi. Tempul sunga lut peuhmah a thah teitei ding uh ahi. Kumpipa a paina peuh ah, a kiang nai ah om un, a chi hi, 8 Levite leh Judah gam mite khempeuh in siampi Jehoiada' thupiak bang takin a hih uhi. Siampi Jehoiada in a pawlpawla kikhente a koimah awlsak neilou ahih manin, makai chih in ama' mite, tua Sabbath ni-a nagawt neite leh, a nei tadih loute zong a makaih chiat uhi. 9 Tua khitin, 100 khat pawlpawl tunga makaite kiang ah David' neihsa teipite leh lum lian leh neute a pe chiat hi. Tua galvante bel Pathian' tempula kikem ahi. 10 Tua mite khempeuh, kumpipa' kimkot ah, maitam kiang leh tempul kiang ah, amaute' mun dinga sehsa chiat ah, khuta a galvan uh tawi chiatin a koih hi. Tempul simlam pang apan a mallam dongin a om uhi. 11 Jehoiada leh a tapate'n kumpipa' tapa Joash hon tonkhiakpih uh a, kumpilukhu a khusak uhi. Theihpihna Thukhun kawpi khat a pia uh a, kumpipain a phuangta uhi. Amah thau a nilh uh a: Kumpipa damsawt hen! chi-in a kikou zuazua uhi. 12 Athalia in mipite tai duam-duam leh kumpipa kipahpihna husa a zak takin, Tangtawn Toupa' tempula amaute kiang ah a va hawh hi. 13 A en a, tempul lutna-a khuampi kianga kumpipa dingin a om hi. Uliante leh pengkul mutte, kumpipa kiang ah a om uh a, gam mipite khempeuh kipak leh pengkulte mutin a om uh a, lasapawlte'n tumgingte tawh thuahin phatna ma a kai uhi. Athalia in bel a puansilhte a botkek a: lehbawla kikhotkhiakna! Lehbawla kikhotkhiakna! chi-in a kikou hi. 14 Siampi Jehoiada in sepaih 100 pawlpawl tunga makaite a sawlkhia a, amaute kiang ah: Mipite kikal apan Athalia hon piikhia unla, amah zui peuhmah namsauin that un, a chi hi. Ahang bel, tua siampi mah in: Tangtawn Toupa' tempul ah zaw amah that kei un, a na chikhinta-a ahi. 15 Tuachi-in, Athalia, kumpi kongtuala Sakol Kongpi lutna a tun takin, a man uh a, tua mun mah ah a that uhi. 16 Tua khitin, Jehoiada in, amah leh mipite leh kumpipa, Tangtawn Toupa' mite hi ding, chi-in thukhun khat a bawl hi. 17 Mipite khempeuh a kuan uh a, Baal' tempul a laichim uh a, maitamte leh milimte a khenzan uh a, tua maitamte' mai ah Baal siampi Matan a that uhi. 18 Tua khitin, Jehoiada in Tangtawn Toupa' tempul kepna nna, siampite khut ah a koih hi. Tua siampite bel, Levite ahi uh a, David in amaute' khuta tempul nasep, Mosi Dan Laibu-a kigelh bang leh David mah in thu a na piak banga kipaktak leh lasa-a Tangtawn Toupa' haltum thillatte lat ding, a na gotsa ahi. 19 Ama'n bangpeuha sianlouhna a na nei mi peuhmah a lut louh nadingin, Tangtawn Toupa' tempul kongpite ah kongkhak vengmite zong a koih hi. Ama'n 100 pawlpawl tunga makaite leh miliante, mipite leh gamsung mite khempeuh tunga vaihawmmite a tonpih a, Tangtawn Toupa' tempul apan kumpipa a piikhesuk uhi. Amaute, Kongpi Saknung tawnin, kumpi' innpi sung ah a lut uh a, kumpitutphah tung ah kumpipa a tusak uh a, 21 gamsung mite khempeuh lungnuamin a kipak mahmah uhi. Athalia thah-a a omtak manin, tua khawpi sung a daisip sipta hi.
Tempul Puahphatna
1 Joash, kumpipa-a hong pan chilin, kum sagiha upa ahi a, Jerusalem ah kum 40 sung vai a hawm hi. A nu' min Zibia ahi a, Beersheba' mi ahi. 2 Siampi Jehoiada' damsung teng, Joash in Tangtawn Toupa' mitmuha thildik a hih hi. 3 Jehoiada in Joash adingin zi nih a teelsak a, tuate tawh kal ah tapate leh tanute a nei hi. 4 Hun bangtan hiam nungin, Joash in Tangtawn Toupa' tempul jDuahthak ding thupukna a bawl hi. Siampite leh Levite a samkhawm a, amaute kiang ah: Judah gama khawpite ah hawh unla, na Pathian uh' tempul puahthak nadingin, Israel khempeuh in kumsima a piak ding uh siah sumte dongkhawm unla, tu'n hih pah un, a chi hi. Ahihhangin, Levite a gamtang pah kei uhi. 6 Tua bang ahih manin, kumpipa'n siampi makaipen Jehoiada a samsak a, a kiang ah: Banghanga Tangtawn Toupa' sila Mosi leh Israel kikhawmpite'n Theihpihna Puanbuk adinga siah sum a seh uh, Judah gam leh Jerusalem apan dongkhawm dinga Levite ngiat lou na hia? a chi hi. 7 Tua numei gilou Athalia' tapate'n Pathian' tempul sung a luh uh a, thilzek siangthoute nangawn Baalte adingin a zang uhi. 8 Kumpipa' thupiakin, singkuang khat a kibawl a, innpua ah, Tangtawn Toupa' tempul kongpi ah a kikoih hi. 9 Tua khitin, Judah gamsung leh Jerusalem ah thuphuan a kipia a, Pathian' sila Mosi in gamdai-gamkeua Israelte' piak dinga a phut siahsum, Tangtawn Toupa' maia hon tawi ding uh, chih ahi. 10 Uliante khempeuh leh mipite khempeuh in kipaktakin amau' thawh dingte hon tawi uh a, tua singkuang sung ah, a dim mateng, a khia khia uhi. nLevite'n kumpipa' uliante kianga tua singkuang hon puaklut peuhpeuh chiangun, leh sum tampi a om chih a muh chiangun, kumpi laigelhpa leh siampi makaipen' ulian hong pai uh a, tua singkuang a suahkhia uh a, a koihna mun ngei ah a koihkik zel uhi, Hibangin nisimin a hih gige uh a, sum tampitak a kaikhawm uhi. 12 Kumpipa leh Jehoiada in, tua Tangtawn Toupa' tempul puahphat kul bang banga nasemte kiang ah a pia uhi. Tangtawn Toupa' tempul lamthak dingin suangseksiamte leh singsiamte a guai uh a, tua tempul puah dingin siika nasemte leh sumsana nasemte zong a guai uhi. 13 Tua nasepna tunga mawhpawte a thanuam uh a, amaute nuai ah puahphatna a kitelh mahmah hi. Tua Pathian' tempul, lim leh mei gel masakpen bangbangin a lamthak uh a, a kipsak sem lai uhi. 14 Na a zawhsiang khitun, sum vai teng kumpipa leh Jehoiada kiang ah hon tawi uh a, tuatein Tangtawn Toupa' tempul vanzatte a bawl uhi. Tuate bel, biakna nasep nading leh haltum thillatte-a zat ding vante ahi a, tuate baan ah, ankuangte leh kham leh nguna bawl vante peuhmah ahi. Jehoiada a dam sung teng, Tangtawn Toupa' tempul ah haltum thillatte a kilaan gige hi. 15 Jehoiada hong upata a, hong teekta a, kum 130 a phakin a sita hi. 16 Pathian leh a tempul adinga, Israela a nasep hoihte hangin, David Khawpi ah, kumpipate kiang ah a kivui hi.
Joash' Gitlouhna
17 Jehoiada' sih nungin, Judah gam uliante hong pai uh a, kumpipa kiang ah zahna leh toukaina hong pia uh a, ama'n amaute a na ngaikhia hi. 18 Amaute'n Tangtawn Toupa, a pu a pate uh Pathian' tempul tawpsanin, Ashera songte leh milimte a beta uhi. Amaute' mawhna hangin, Pathian' hehna Judah gam leh Jerusalem tung ah hong tung hi. 19 Tangtawn Toupa'n amaute piikik dingin, mipite kiang ah kamsangte sawl mahleh, tua kamsangte'n amaute vauin thu gen mahle uh, a ngaikhe nuam kei uhi. 20 Tuachi-in, Jehoiada' tapa Zekharia tung ah Pathian' Kha hong tung hi. Zekharia, mipite' mai ah a ding a: Hiai Pathian thugen ahi. Ama'n: Banghanga noute'n Tangtawn Toupa' thupiakte mang lou na hi ua? Na mavang kei ding uh. Tangtawn Toupa na tawpsan manun, ama'n zong noute hon tawpsanta ahi, chi ahi, a chi hi. Ahihhangin, amaute'n amah a sawm uh a, kumpipa thupiakin, Tangtawn Toupa' tempul huangsung inntual ah suangin a denglum uhi. 22 Kumpipa Joash in ama' tunga Zekharia' pa' chitna siamna a theigige kei a, a tapa a that maimah hi. Zekharia si dinga lumlai in: Tangtawn Toupa'n hiai mu henla, na hihna bangbangin thu khen hen, a chi hi. 23 Kum hong bei kuanin, Aram' sepaihte Joash dou dingin hong kuan uh a, Judah gam leh Jerusalem a sim uh a, mipite' makaite khempeuh a that uhi. Gallak sum khempeuh, a kumpipa uh kiang ah, Damaska ah a tun uhi. 24 Aramte mi tawmchik hong kuan himahle uh, Tangtawn Toupa'n amaute' khutsung ah a tamzaw tham sepaihhonte a pia hi. Ahang bel, Judah in Tangtawn Toupa, a pu a pate uh' Pathian a tawpsan man ua, Joash tunga gawtna tung ahi. 25 Aramte a nungkik takun, Joash zong nakpitaka liamin a nusia uhi. Ama'n siampi Jehoiada' tapa tualthaha a thah manin, ama' uliante'n amah a sawm uh a, a lupna ah a that uhi. Tuachi-in, a sita a, David Khawpi ah a kivui a, ahihhangin, kumpipate' hankhuk ah a kivui kei hi. 26 Amah sawmte bel, Shimeath' tapa Zabad leh Shimrith' tapa Jehozabad ahi. Shimeath bel Amon numei ahi a, Shimrith lah Moab numei ahi. 27 Joash' tapate tungthu, ama' tungtang genkholhnate, Pathian' tempul a lamthak thute, kumpipate' tungthu gelhna laibu hilhchetnabu sung ah a kigelh hi. A tapa Amazia in a mun a luah a, kumpipain hong pang hi.
Judah Kumpipa Amazia
1 Amazia kumpipa hong hih chilin, kum 25-a upa ahi a, Jerusalem ah kum 29 sung vai a hawm hi. A nu' min Jehoadin ahi a, Jerusalem mi ahi. 2 Ama'n Tangtawn Toupa' mitmuha thildik hih a, ahihhanga, lungtang khempeuh tawh hih lou hi. 3 Kumpigam ama' nuaia kiptaka a uk nungin, a pa kumpipa that uliante a that hi. 4 Ahihhangin, amaute' tapate bel a that kei a, Mosi Laibu-a kigelh Dan bangin a gamta zaw hi. Tua Dan sung ah Tangtawn Toupa'n: Tate hanga pate thah ding ahi kei a, pate hanga tate thah ding zong ahi sam kei. Mi khatpeuh ama' khelhnate hanga thah ding ahi, a na chi hi. 5 Amazia in Judah gam mite a samkhawm a, amau' beh dungzuiin Judah leh Benjamin khempeuh adingin 1,000 pawlpawl tunga makaite leh 100 khat pawlpawl tunga makaite hi dingin mite a sep hi. Tua khitin, ama'n kum 20 leh a tunglama upate a kaikhawm a, teipi leh lum zang thei, sepaih nasem dinga mansa mi 300,000 a pha chih a mu hi. 6 Galdou thei Israel mi 100,000 zong ngun talen 100-in a guai hi. 7 Ahihhangin, Pathian' mi khat amah kiang ah hong hawh a: Kumpipa aw, hiai Israel apan sepaihte nang tawh a ton louh ding uh ahi, Tangtawn Toupa'n Israel ompih lou a, Efraim mi khat beek zong ompih lou ahi. 8 Kidouna ah hangsantakin pang mah lechin Pathian in meima' maia hon vuallelsak veve ding ahi. Ahang bel, Pathian in huh nading vangletna hi-in, vuallelhsak nading vangletna hita leh, nei taktak ahi, a chi hi. 9 Amazia in Pathian' mi kiang ah: Ahih leh, Israel sepaihte ka goihna talen 100 ka piak bangchita ding? a chi hi. Tua Pathian' mi in a dawng a: Tangtawn Toupa'n tua sanga tamzaw hon pethei ahi, a chi hi. 10 Tuachi-in, Amazia in Efraim apan amah kianga hong kuan sepaihte a tawpsak a, inn ah a paisakta hi. Amaute Judah tung ah a heh mahmah uh a, thangpaitakin innlam a zuanta uhi. 11 Tua khitin, Amazia a kithakhauhsaka, a sepaihte Chi Phaizang ah a pii a, tua ah Seir mi 10,000 a that hi. 12 Judah sepaihte'n zong mi 10,000 a hingmat uh a, kawltung khat ah a pii uh a, a sawnkhia uh a, a phiahzak vek uhi. 13 Tua hun sung mahin Amazia in a sawlkik, kidouna-a a pansak noplouhte'n Samaria apan Beth Horon dong Judia gam khawpite a na sim uhi. Mi 3,000 a that uh a, gallak sum tampi a pawmang uhi. 14 Amazia, Edomte that hong kilehkik takin, Seir mite' pathiante hon pua a, ama' pathiante dingin a tung a, amaute biain a kun a, amaute' mai ah gimnamtuite a hal hi. 15 Amazia tung ah Tangtawn Toupa' hehna a kuang a, amah kiang ah kamsang khat a sawl a, ama'n: Na khut apan amau' mite mahmah bawn humbit theiloupi hiai mite' pathiante banghanga thu dong himhim na hia? a chi hi. 16 Tua banga a pau lai mahin, kumpipa'n amah kiang ah: Kumpipa thuhilh dingin nang kon sep ua hia? Tawp in! Banghanga satpaiha om ding na hia? a chi hi. Tuachi-in, kamsangpa a tawp a, ahihhangin: Hiai na hih manin leh, kon thuhilhna na ngaihkhiak noplouh manin, Pathian in nang hon hihmanthat tum tinten ahi, chih ka thei, a chi hi. 17 Judah kumpipa Amazia in amah thuhilh mite thu a kup nungin, Jehoahaz' tapa Jehoash kiang ah hiai totna thu a khak a: Hong pai inla, kimaituah ni, a chi hi. Jehoahaz bel, Israel kumpipa Jehu' tapa ahi. 18 Ahihhangin, Israel kumpipa Jehoash in Judah kumpipa Amazia a dawng a: Lebanon-a loulingnei in Lebanon-a sidar singkung kiang ah: Ka tapa' zi dingin na tanu hon pia in, a chi a, tua khitin Lebanon gamsa gilou hong pai a, tua loulingnei a chilgawpta ve! 19 Edom ka zouta, chi-in nang leh nang na kihilh a, tu'n na kiuangsak a, na kisatheita ve. Ahihhangin, inn ah na kiomsuk in! Banghanga buaina zong a, nangma puk nading leh Judah puk nading zong zenzen ding na hia? a chi hi. 20 Ahihhangin, Amazia in a ngaikhe nuam kei hi. Ahang bel, Edom' pathiante a zon man ua, amaute Jehoash khut sunga pe dinga Pathian in tua banga nna sem hiven. 21 Tuachi-in, Israel kumpipa Jehoash in a douta hi. Amah leh Judah kumpipa Amazia, Judah gama Beth Shemesh ah a kimaituah uhi. 22 Judah bel Israel' zawhthalin a om a, michih ama' inn ah a taita hi. 23 Israel kumpipa Jehoash in Judah kumpipa Amazia, Beth Shemesh ah a man hi. Amazia bel Joash' tapa ahi a, Joash lah Ahazia' tapa ahi. Tua khitin, Jehoash in Jerusalem ah Amazia a tonpih a, Jerusalem kulhbaang, Efraim Kongpi apan Akiu Kongpi dong, tong 400 khawnga sau, a laichim hi. 24 Pathian' tempula Obed Edom' kep kham leh ngun leh van dang kimute khempeuh tawh, kumpipa' goute leh a galmatte zong a pawkhawm a, Samaria ah a kilehkikta hi. 25 Judah kumpipa Joash' tapa Amazia bel, Israel kumpipa Jehoahaz' tapa' Jehoash' sihnung kum 15 a dam lai hi. 26 Amazia' vaihawm sunga thiltung dangte, ngai in, a bul apan a tawp dong, Judah leh Israel kumpipate tungthu kigelhna laibu sunga kigelh hilou hia? 27 Amazia in Tangtawn Toupa zuih a pialsan hun apanin, amaute'n Jerusalem ah amah aguukin suksiat a sawm uh a, amah bel, Lakhish ah a taai hi. Ahihhangin, Lakhish dong mi a delhsak uh a, tua ah a that uhi. 28 Sakolin amah hon pawkik uh a, Judah Khawpi ah, a pu a pate kiang ah a kivui hi.
Judah Kumpipa Uzia
1 Tua khitin, Judah gam mite khempeuh in kum sawmleguka upa Uzia a la uh a, a pa Amazia mun ah kumpipain a bawl uhi. 2 Amah ahi, Amazia, a pu a pate kianga a khawl nunga Elath lamthak a, Judah kianga pekik nawnpa. 3 Uzia, kumpipa-a hong pan chilin kum sawmleguka upa ahi a, Jerusalem ah kum 52 sung vai a hawm hi. A nu' min Jekolia ahi a, Jerusalem mi ahi. 4 Uzia in a pa Amazia bangin, Tangtawn Toupa' mitmuhin thildik a hih hi. 5 Pathian laudan amah sinsakpa Zekharia damsungin Uzia in Pathian a zong a, Tangtawn Toupa a zon sungteng lah, Pathian in lawhchinna a pia hi. 6 Filistiate tawh kidouna ah a kuan a, Gath leh Jabne leh Ashdod kulhbaangte a hihchim hi. Tua khitin, Ashdod kiang leh mundang Filistiate laka khawpite a lamthak hi. 7 Pathian in Filistiate, Gur Baal kianga Arabte leh Meunimte douna ah amah a huh hi. 8 Amah hong thuneih zawh mahmah manin, Amonte'n amah kiang ah siah a pia uh a, a minthanna Aigupta gam dong a tung hi. 9 Uzia in Jerusalem ah, Akiu Kongpi, Phaizang Kongpi leh baang kawina kiu ahte innsangte a lam a, a muanhuaiin a bawlthuah lai hi. 10 Gamdai-gamkeu ah innsangte a lam a, tuikholna tampi a tou hi. Ahang bel, ama'n mualbulte leh phaizang ah ganhon tampi a neia ahi. A loute-a sem ding leh mualtungte leh leihoihna gam khawnga grephuante kem ding mi zong a koih hi. Ahang bel, amah louma lam lunglut mi ahi-a ahi. 11 Uzia in chilsiamsa sepaihpawlpi, galdou dinga a pawlpawla kuankhe thei ding mansa a nei hi. Tuate, kumpipa' uliante laka khat Hanania makaihna nuaia laigelhpa Jeiel leh ulian Maaseia' khopkhawm leh tamdan dungzuia a pawlpawla khena a lep detdet uh ahi. 2 Tua galdou pawl tunga makai beh tuulpite 2,600 a pha uhi. 13 Amaute' makaihna nuai ah, kidou dinga chilsiamsa sepaih pawlpi 307,500 a om hi. Amaute kumpipa' melmate doua amah huh ding sepaihpawlpi hat mahmah ahi uhi. 14 Uzia in lumte, teipite, siklukhute, awmphawte, thalphelte leh suanglot khaute, sepaih pawlpi' kim dingin a pia hi. 15 Jerusalem ah khutsiamte' bawl, thalkapkhiak nading leh suangtumte lotkhiak nading khawlte, innsang tung khawng leh kulhbaang tung kiute khawng ah a koih hi. Amah hong hat mateng nakpitaka huhna piak ahih manin, hong hat mahmah a, gamla leh nai ah a min hong thangta hi. 16 Ahihhangin, Uzia hong hat mahmah takin, hong kisathei a, a kisaktheihna in a pukna a tun hi. Tangtawn Toupa, a Pathian tung ah a muanhuaita kei a, gimnamtui halna maitam tunga gimnamtui hal dingin Tangtawn Toupa' tempul ah a lut hi. 17 Siampi Azaria in Tangtawn Toupa' siampi hangsan dang 80 tawh, amah a zui lut a, 18 amah maituahin a kiang ah: Uzia, Tangtawn Toupa' maia gimnamtui hal, nang adinga thildik hi lou ahi. Hiai zaw, Aron' suan siampite sep ding ahi. Amaute ahi gimnamtui hal thei dinga siansuah leh sehtuamte. Muanhuailou na hita a, munsiangthou nusia in. Tangtawn Toupa Pathian in hon pakta a, hon sang lou ding ahi, a chi hi. 19 Uzia, gimnamtui halna belkuang tawia, hal dinga mansa-a om, a heh hi. Tangtawn Toupa' tempula gimnamtui halna maitam maia siampite muha, amaute tunga heh a, a han laitakin, a taltang hong phaakta hi. 20 Siampi makai Azaria leh siampi dangte'n amah a et uleh, a taltang ah phaakna a vei, chih a mu uhi. Tuachi-in, amah a paikhesak pah uhi. Tangtawn Toupa'n amah thuaksakta ahih manin, amah zong taikhiak pah a ut him ahi. 21 Kumpipa Uzia in a sih dongin tua phaakna a veita hi. A phaakpi-in inn tuam khat ah a teeng tuam a phaakpi, Tangtawn Toupa' tempul apan pawsiah ahita hi. A tapa Jotham in kumpi innpi a ngak a, gamsung mite a uk hi. 22 Uzia' vaihawm sunga thiltung dangte, a bul apan a tawp dong, Amoz' tapa kamsang Isai in a gelh hi. 23 Uzia, a pu a pate kiang ah a khawlta a, kumpipate' han mun gam ah, amaute kiang nai ah a kivui hi. Ahang bel, mite'n: Amah zaw phaak ahi, chi uh hiven. A tapa Jotham in a mun a luah a, kumpipain hong pang hi.
Judah Kumpipa Jotham
1 Jotham, kumpipa-a hong pan chilin, kum 25-a upa ahi a, Jerusalem ah kum sawmleguk sung vai a hawm hi. A nu' min Jerusha ahi a, Zadok' tanu ahi. 2 Jotham in a pa Uzia hih bangin, Tangtawn Toupa' mitmuha thil dik a hih a, ahihhangin, a pa hih bangin, Tangtawn Toupa' tempul ah a lut kei hi. Ahihhangin, mipite bel gamtatsiain a gamta lailai uhi. 3 Jotham in Tangtawn Toupa' tempul Kongpi Saknung a bawlthak a, kulhbaang zong Ofel mual ah saupi a puahpha hi. 4 Judah tanggam ah khawpite a lam a, singgam teng ah zong kulhte leh innsangte a lam hi. Jotham in Amonte tung ah gal a bawl a, amaute a zou hi. Tua kumin Amonte'n amah kiang ah ngun talen 100, huitbuh kor 10,000 leh barlibuh kor 10,000 a pia uhi. A kum nihna leh a kum thumna ah zong tua zah mah a pia uhi. 6 Jotham, Tangtawn Toupa, a Pathian' maia chitak mahmah a, a gamtat manin, hong thunei zouin, hong hat semsem hi. 7 Jotham' vaihawm sunga thiltung dangte, a galdouna khempeuh leh a thilhih dangte tawh, Israel leh Judah kumpipate' tungthu kigelhna laibu sung ah a kigelh hi. 8 Amah kumpipa-a hong pan chilin kum 25-a upa ahi a, Jerusalem ah kum sawmleguk sung vai a hawm hi. 9 Jotham, a pu a pate kiang ah a khawlta a, David Khawpi ah a kivui hi. A tapa Ahaz in a mun a luah a, kumpipa-in hong pang hi.
Judah Kumpipa Ahaz
1 Ahaz, kumpipa-a hong pan chilin, kum 20-a upa ahi a, Jerusalem ah kum sawmleguk sung vai a hawm hi. A pa David banglou takin, Tangtawn Toupa' mitmuha thildik a hih kei hi. 2 Israel kumpipate' lampite a tawn a, Baalte biak nadingin sunthawh milimte zong a bawl hi. 3 Ben Hinom Phaizang ah kithoihnate a hal a, Tangtawn Toupa'n Israelte maia a hawlkhiak namte' hihdan kihhuai zuiin, a tapate mei ah a laan hi. 4 Mualtungte-a munsangte leh singkung zaipha nuai teng ah kithoihnate a laan a, gimnamtuite a hal hi. 5 Tuabang ahih manin, Tangtawn Toupa, a Pathian in Aram kumpipa' khutsung ah amah a pekhia hi. Aramte'n amah a zou uh a, a mite tampi salin a kai uh a, Damaska a tun uhi. Israel kumpipa' khutsung ah zong piakkhiakin a om a, Israelte'n a mite tampi a that uhi. 6 Ni khat sungin, Remalia' tapa Peka in Judah gam ah sepaih 120,000 a that hi. Ahang bel, Judah gam in Tangtawn Toupa, a pu a pate uh Pathian taisan uh hiven. 7 Efraim mi galhat khat Zikri in kumpipa' tapa Maaseia leh kumpi innpi uk ulian Azrikam leh kumpipa' nuaia dinmun nihna len Elkana a that hi. 8 Israelte'n a tanute uh lak apan zite, tapate leh tanute 200,000 tak salin a man uhi. Gallak vante tampi zong a la uh a, Samaria ah a pua uhi. 9 Ahihhangin, tua ah Tangtawn Toupa' kamsang khat Obed kichi a om a, Samaria-a kilehkik sepaihpawlpi tuak dingin a kuankhia hi. Ama'n amaute' kiang ah: Tangtawn Toupa, na pu na pate uh' Pathian, Judah tunga heh ahih manin, amaute na khutsunga hon pekhia ahi. Ahihhangin, nang, thangpaihna vaansun neiin, amaute na that gawpsuk hi. 10 Tu'n Judah leh Jerusalem pasalte leh numeite na sala bawl na sawm hi. Ahihhangin, Tangtawn Toupa, na Pathian tunga khiala mawh hi lou na hi maw? nTu'n ka thu ngai in! Tangtawn Toupa' hehna thupi na tunga om a hih manin, sala na kaih tua na gammi hihpihte sawlkik in, a chi hi. 12 Tua khitin, Efraim makai pawlkhat, Jehohanan' tapa Azaria leh Meshilemoth' tapa Berekia leh Shalum' tapa Jehizkia leh Hadlai' tapa Amasa in galmun apan hong tungte a na maituah uh a, amaute kiang ah: 13 Tua salmatte hiaia non puaklut louh ding uh ahi. Tuachi louin zaw Tangtawn Toupa' mai ah na mawh ding uhi. I khelhna leh mawhna behlap lai sawm na hi umaw? I mawhna lian mahmah khin a, ama' hehna thupi Israel tunga om ahi vele, a chi uhi. Tuachi-in, sepaihte'n salmatte leh gallak vante, tua uliante leh kikhawmte' mai ah a nuseta uhi. 15 Minlawha sepding gotte'n tua salmatte a la uh a, gallak vante apan puansilhte lain, savuakte a silhsak uhi. Puansilhte, khedapte, nek ding leh dawn ding, tua baan ah kizutdam nading damdawi a pia uhi. A hatlou leh zawngkhalte khempeuh sakolneute tung ah a tuangsak uhi. Tuachi-in, Jerikho, tua Nisuh Khawpi-a amau gammite lak ah amaute a kha uh a, Samaria ah a kilehkikta uhi. 16 Tua hun laiin, Kumpipa Ahaz in Asuria kumpipa kiang ah huhna ngen dingin mi a sawl hi. 17 Edomte hong kuan nawn uh a, Judah gam hon dou uh a, salmatte a pawmang uhi. 18 Tua bel, Filistiate'n mualbul khawng leh Judah gam Negev khawnga khawpite a sim lai mah uh ahi. Filistiate'n Beth Shemesh, Aijalon leh Gederoth, tua baan ah Soko leh Timna leh Gimzo, a kima khawtate tawh a la zou uh a, a luah uhi. 19 Israel kumpipa Ahaz hangin Tangtawn Toupa'n Judah gam a niamsak hi. Ahang bel, ama'n Judah gama giltlouhna angvan a, Tangtawn Toupa' adinga muanhuai lou lua hiven. 20 Asuria kumpipa Tiglath Pilesar a kiang ah hong hawh a, ahihhangin huhna sangin buaina a pe zaw hi. 21 Ahaz in Tangtawn Toupa' tempul apan leh kumpi innpi apan leh makaite apan bangbang hiam a la a, Asuria kumpipa a pia hi, ahihhangin, amah adingin a phatuam kei hi. 22 Kumpipa Ahaz a buaia a mangbat chiangin Tangtawn Toupa' tung ah a muanhuai kei semsem hi. 23 Amah nuaisiah Damaskate' pathiante' mai ah kithoihnate a laan hi. Ahang bel, ama'n: Aram kumpipate' pathiante'n amaute huh a hih chiangun, kei zong hon huh theih nadingun, amaute' mai ah kithoihnate ka laan ding, chi-in a ngaihtuah hi. Ahihhangin, ama' pukna leh Israel gam khempeuh pukna a suak hi. 24 Ahaz in Pathian' tempul apanin vanzatte a lakhawm a, a satgawp hi. Tangtawn Toupa' tempul kongte a khak a, Jerusalem kongzing kiu teng ah maitamte a dawh hi.2 Judah gama khawpi teng ah, pathian dangte' maia kithoihnate hal nadingin Tangtawn Toupa, a pu a pate' Pathian hehsak dingin, munsang a dawh hi. 26 Ama' vaihawm sunga thiltung dangte leh gamtatna khempeuh, a bul apan a tawp dong, Judah leh Israel kumpipate' tungthu kigelhna laibu sung ah a kigelh hi. 27 Ahaz, a pu a pate kiang ah a khawlta a, Jerusalem khawpi ah a kivui hi, ahihhangin, Israel kumpipate' hankhuk ah a kisial kei hi. A tapa Hezekia in a mun a luah a, kumpipain hong pang hi.
Tempul Siansakna
1 Hezekia, kumpipa-a hong pan chilin kum 25-a upa ahi a, Jerusalem ah kum 29 sung vai a hawm hi. A nu' min Abija ahi a, Zekharia' tanu ahi. 2 A pa David' hihte khempeuh bangin, Tangtawn Toupa' mitmuhin thildik a hih hi. 3 A vaihawm kum, a kum khatna, a kha khatna ah, Hezekia in Tangtawn Toupa' tempul kongkhakte a hong a, tuate a puahpha hi. 4 Siampite leh Levite a hon piilut a, suahlam panga mun zang ah a kaikhawm a, amaute kiang ah: Hon ngaikhia un, nou Levite aw! Tu'n kisiansuah unla, Tangtawn Toupa, na pu na pate uh' Pathian' tempul siansuah un. Tua mun siangthou apan a kihihbuahnate khempeuh hihmang un, 6 I pu i pate a na muanhuai kei uh a, Tangtawn Toupa, i Pathian' mitmuha thil diklou a na hih uh a, amah a na taisan uhi. Tangtawn Toupa' tenna mun apan a maitangte uh a lehngatsak uh a, amah a nung-ngatsan uhi. 7 A innliim kongkhakte a khak uh a, meivakte a hihmit uhi. Gim namtuite a hal kei uh a, Israel Pathian' mai ah mun siangthou ah haltum thillatte zong a laan kei uhi. 8 Tua bang ahih manin, Judah gam leh Jerusalem tung ah Tangtawn Toupa' hehna a tuta a, na mit ua na muh bangun, amaute, mite' Hinna leh mulkimna leh simmawh thil a suaksakta hi, 9 Hiai hang ahi, i pu i pate, namsaua a puk uh a, i tapate, i tanute leh i zite salmata a om uh. 10 Tu'n Tangtawn Toupa, Israel Pathian' hehna nasia, eite apan a kiheimang nadingin, amah tawh kala thukhun bawl sawm ka hi. 11 Ka tapate aw, tu'n zongzawin om kei un, Tangtawn Toupa'n ama' maia ding a, amah bia a, a maia seem ding leh gimnamtui hal dinga noute hon teel hiven, a chi hi. 12 Tua khitin, hiai Levite'n nna a sem panta uhi. Amaute hiaite ahi uhi: Kohathte apanin: Amasai' tapa Mahat leh Azaria' tapa Joel. Merarite apanin: Abdi' tapa Kish leh Jehalelel' tapa Azaria. Gershonte apanin: Zima' tapa Joa leh Joa' tapa Eden. 13 Elisafan' suante apanin: Shimri leh Jeiel. Asaf suante apanin: Zekharia leh Matania. 14 Heman' suante apanin: Jehiel leh Shimei. Jeduthun' suante apanin: Shemaia leh Uziel. 15 A sanggamte uh a kaihkhawm khitun leh amaute a kisiansuah khit takun, Tangtawn Toupa' thu zuia kumpipa' thupiak bangin, Tangtawn Toupa' munsiangthou hihsiang dingin a lut uhi. 16 Tangtawn Toupa' mun siangthou hihsiang dingin siampite munsiangthou ah a lut uhi. Tangtawn Toupa' tempul sunga thil sianglou a muh peuhmah uh, Tangtawn Toupa' tempul pua ah a lakhia uhi. Levite'n tuate a la uh a, Kidron Phaizang a tun uhi. 17 A kha khatna, a ni giat ni-in Tangtawn Toupa' innlim dong a siansuah uhi. Ni giat dang sungin, Tangtawn Toupa' tempul mahmah a siansuah uh a, a kha khatna, a ni sawm leh guk ni-in a zousiang uhi. Tua khitin, kumpipa Hezekia kiang ah a lut uh a, a nasep thu uh a tun uh a: Tangtawn Toupa' tempul a vekpi-in ka siangsakta uh, haltum thillatna maitam leh a tuium belsuante leh, tanghoubeu siansuahsa koihna dawhkan, a vanzat teng tawh ka siangsakta uh. 19 Kumpipa Ahaz, kumpipa a hih laia, a muanhuai louh mana, a lakkhiak vante khempeuh ka bawl hoih uh a, ka siansuahta uhi. Tu'n Tangtawn Toupa' maitam mai ah a om vek uhi, a chi uhi. 20 A zingchiang zingsang beltakin Kumpipa Hezekia in khawpi uliante a kaikhawm a, Tangtawn Toupa' tempul ah a paitouhpih hi. 21 Bawngtal sagih, belamtal sagih, belamnoupa sagih, kumpigam ading, munsiangthou ading leh Judah gam adinga lat ding, tua baan ah khelhna thillat ding keltal sagih hon tawi uhi. Kumpipa'n Aron' suan siampite, Tangtawn Toupa' maitam tunga hiaite laan dingin thu a pia hi. 22 Tuachi-in, tua bawngtalte a gou uh a, siampite'n a sisan a la uh a, maitam tung ah a theh uhi. Tua khitin, belamnoute zong a gou uh a, a sisan maitam tung ah a theh uhi. 23 Tua khitin, khelhna thillat ding keltalte, kumpipa leh kikhawmte' mai ah hon la uh a, amaute'n a lutung ah a khutte uh a nga uhi. 24 Tua khitin, siampite'n tuate a gou uh a, Israel gam bup adinga khelhna khuh nadinga khelhna thillat hi dingin a sisan maitam tung ah a pia uhi. Tua bel, kumpipa'n Israel khempeuh adinga haltum thillat leh khelhna thillat lat ding thu a piak man ahi. Ama'n Tangtawn Toupa' tempul ah, Levite, dakkhutbette, kaihgingte leh pekgingte tawiin a mun chiat uah a koih hi. David leh mailam muthei, kumpipa-a tuam Gad leh kamsang Nathan in ahi dingdan a seh bangbang ua kumpipa'n amaute a koih ahi. Hiai lah Tangtawn Toupa'n a kamsangte tungtawna thu a piak ahi. 26 Tuachi-in, David' tumgingte tawiin Levite mansain a ding uh a, siampite zong a pengkulte uh tawiin a ding uhi. 27 Hezekia in maitam tunga haltum thillatte laan dingin thu a pia hi. Tua thillat a kilat pat takin, pengkulte leh Israel kumpipa David' tumgingte tawh thuaha Tangtawn Toupa phatna lasak zong a kipan hi. 28 Kikhawmte khempeuh Pathian biain a kun uh a, lasate'n la a sa uh a, pengkul mutte'n pengkulte a mut uhi. Haltum thillatte a kizawh mateng, hibang biakna khempeuh a paitou hi. 29 Thillatte a kizawh takin, kumpipa leh amah kianga om kuapeuh a khukdin uh a, Pathian a bia uhi. 30 Kumpipa Hezekia leh a uliante'n David leh mailam muthei Asaf thute zanga Tangtawn Toupa phat dingin Levite thu a pia uhi. Tuachi-in, amaute'n kipaktakin phatnalate a sa uh a, a lu uh kunin Pathian a bia uhi. 31 Tua khitin, Hezekia in: Noute, tu'n Tangtawn Toupa adingin na kiseptuamta uh. Hong pai unla, kithoihnate leh kipahthugenna thillatte, Tangtawn Toupa' tempul ah hon tawi un, a chi hi. Tuachi-in, kikhawmte'n kithoihnate leh kipahthugenna thillatte hon tawi uh a, lungtanga utna nei peuhmah in haltum thillatte hon tawi uhi. 32 Kikhawmte'n haltum thillat hon tawite uh bawngtal 70, belamtal 100 leh belamnoupa 200 a pha hi. Hiaite khempeuh Tangtawn Toupa' maia haltum thillat ding ahi. 33 Kithoih nadinga sehtuam siangthou gantate a vekin bawngtal 600, belam leh kei 3,000 a pha hi. 34 Ahihhangin, tua haltum thillat khempeuhte vun hawk dingin siampite a tawm lua uh a, a beh a phungte uh Levite'n tua nasep a kizawh masiah leh siampi dangte a kisiansuah masiah, a huh uhi. Ahang bel, kisiansuah thu-a siampite sanga sia leh pha sianga Levite gamta zaw-a na om uhi. 35 Haltum thillatte a tam mahmah a, tuate tawh tonkhawm lemna thillat thaute leh dawn thillatte tawh simin thillat a tam mahmah hi. Tuachi-in, Tangtawn Toupa' tempula biakna dan a kiphutkip thakta hi. 36 Pathian in a mite adinga tua zaha thakina a thil tunsak pahte hangin Hezekia leh mipite khempeuh a kipak mahmah uhi.
Paikan Lopna
1 Hezekia in Israel leh Judah gamsung teng ah thu a khak a, Efraim leh Manase ah zong lai a khak a, Jerusalema Tangtawn Toupa' tempula hong paia, Tangtawn Toupa, Israel Pathian kianga Paikan lopna-a hong kihel dingin chialna a bawl hi. 2 Kumpipa leh a uliante leh Jerusalema kikhawmte khempeuh in kha nihna-a Paikan lopna bawl dingin thupukna a bawl uhi. 3 Kisiansuahsa siampi a kiching a om louh manin, leh mipite'n Jerusalema kikhopkhawmna a neih louh manun, a hun ngeinain lopna a na nei thei kei uhi. Hiai thilsawm, kumpipa leh kikhawmte'n dik a sa uhi. Israel gambup ah, Beersheba apan Dan dong ah, mite Jerusalema hong pai a, Tangtawn Toupa, Israel Pathian' maia Paikan kipahpihna-a hong kihel dinga sapna thuphuan khak dingin thupukna a bawl uhi. A malamin a kigelhsa banga mi tampi-in lopna a kinei nai kei hi. 6 Kumpipa' thupiakin Israel leh Judah gam tawnsuakin kumpipa leh a uliante apan laikhak pawte a pai uhi. Tua laikhak hibang ahi: Israel mipite, Asuria kumpipate khut apan khawsuak sun noute kianga, Tangtawn Toupa, Abraham leh Isak leh Israel' Pathian hong kik theih nadingin, nou amah kiang ah kik un. 7 Na pate uleh na sanggamte uh bang kei un. Amaute zaw Tangtawn Toupa, a pu a pate uh' Pathian tung ah a muanhuai kei uh a, ama'n a muh bangin, mulkimna mite a suak sak hi. 8 Na pate uh bangin genhakin om kei unla, Tangtawn Toupa' nuai ah lut un. Ama'n Tangtawna sehtuam siangthou dana a siansuahsa munsiangthou ah hong pai un. Tangtawn Toupa, na Pathian uh' nna sem un, Ama'n a hehna thupi noute apan a paimang ding hi. 9 Tangtawn Toupa kianga nong kik uleh, tua chiangin na sanggamte uleh na tate uh tung ah, amau sala mante'n lainatna a nei ding uh a, hiai gam ah hong kik nawn ding uhi. Ahang bel, Tangtawn Toupa na Pathian uh, hehpihna hau leh lainatna hau hiven. Amah kianga na kik uleh, hon kiheisan lou hiai ding hi, chi-in. 10 Lai pawte, Efraim leh Manase gam ah khawpi khat apan khawpi dang ah, Zebulun dongin, a pai uh a, ahihhangin, mite'n a na simmawh uh a, engbawlin a nuihsan uhi. 11 Ahihhangin, Asher leh Manase leh Zebulun mi pawlkhat bel a kiniamkhiak uh a, Jerusalem ah a hawh uhi. 12 Judah gam ah zong mite tung ah Pathian khut a om a, kumpipa leh a uliante' thupiak zui dingin lungsim munkhat a pusak hi. Tua lah kumpipa leh a uliante'n Tangtawn Toupa' thu a zuihna uh ahi hi. 13 A kha nihna-a Tanghou Silngou Sawhlouh Ankuang lawm dingin, mipi tampi mahmah Jerusalem ah a paikhawm uhi. 14 Amaute'n Jerusalema maitamte a lakhia uh a, gimnamtui halna maitamte a pawkhia uh a, Kidron Phaizang ah a pai vek uhi. 15 A kha nihna, a ni sawmleli ni-in, Paikan belamnou a gou uhi. Siampite leh Levite a maizumta uh a, a kisiansuah uh a, Tangtawn Toupa' tempul ah haltum thillatte hon tawi uhi. 16 Tua khitin, Pathian' mi Mosi' Dan in a seh bangin amau mun chiat a luahta uh a, siampite'n, Levite' piak sisante a theh uhi. 17 Mipite laka tampite kisiansuah lou ahih manun, Levite'n a sianga ngaih hiloute leh Tangtawn Toupa' maia a belamnoute uh siansuah theiloute taanga Paikan belamnoute a gawh uh a kul hi. 18 Efraim, Manase, Isakhar leh Zebulun apan hong pai tampite a vek phial ua, kisiansuah lou hi mah le uh, a kigelhsa tawh kikalhin Paikan ankuang a um veve uhi. Ahihhangin, Hezekia in amaute a thuumsak a: A hoih mahmahpa Tangtawn Toupa'n, 19 munsiangthou dana siang hi lou napi-a lungtang teng tawh Pathian, Tangtawn Toupa, a pu a pate' Pathian zong mi peuhmah ngaidam hen, a chi hi. 20 Tangtawn Toupa'n Hezekia' thuumna a za a, mite a damsakta hi. 21 Tua huna Jerusalema om Israelte'n ni sagih sung, tua Tanghou Silngou Sawhlouh Ankuang kipaktakin a uum uh a, tua sung teng Levite leh siampite'n Tangtawn Toupa' tumgingte tawh thuah in, nisimin Tangtawn Toupa phatin la a sa uhi. 22 Hezekia in tua Tangtawn Toupa theihna hoih sinsakte Levite kiang ah hanthawnna thute a gen hi. Amaute'n tua ni sagih sunga amau adia an seh a ne uh a, lemna thillatte a laan uh a, Tangtawn Toupa, a pu a pate uh' Pathian a phat uhi. 23 Tua kikhawmte khempeuh tua Paikan lopna ni sagih dang behlap ding a kithukim uh a, kipaktakin ni sagih dang Paikan a zang lai uhi. 24 Judah kumpipa Hezekia in kikhawmte adingin bawngtal 1,000 leh belam leh kei 7,000 a pia a, uliante'n bawngtal 1,000 leh belam leh kei 10,000 a pia uhi. Tua hun in siampi tampi a kisiansuah uhi. 25 Judah kikhawmpite a vekpiun, siampite leh Levite leh Israel apan hong kikhawmpite tawh a kipak mahmah uhi. Tuate lak ah Israel apan hong paite leh Judah gama teeng, gamdang mite zong hong kihel uhi. 26 Israel kumpipa David' tapa Solomon hun apan, Jerusalema hibang thil tung ngei lou ahih manin, hiai hunin Jerusalem ah kipahna leh lungnopna a lian mahmah hi. 27 Mipite vualzawl dingin siampite leh Levite a ding uh a, a thuumna uh Pathian teenna siangthou vantung tungtou ahih manin, Pathian in amaute a za hi.
1 Hiaite khempeuh hong bei takin, tua laia om Israelte, Judah khawpite ah a hawh uh a, zeksiangthoua seh suangte a khentam gawp uh a, Ashera songte a phuk uhi. Judah leh Benjamin gam leh Efraim leh Manase gam sunga munsangte leh maitamte a phiatmang uhi. Tuate khempeuh a hihsiat vek nungun, Israelte amau' khawpite leh amau gam ah a kilehkikta uhi.
Biakna ding Thilpiakte
2 Hezekia in siampite leh Levite a pawlpawla kikhente kiang ah tan a guan a, tua pawl chih amau mawhpuakna nei tek uh hiven, tua a tan uh bel, haltum thillatte leh lemna thillatte lat ding, nasep sem ding, kipahthu genna nei ding leh Tangtawn Toupa' tenna kongpite-a phatna lasak ding ahi. 3 Kumpipa'n ama' neihsa apanin, zingsang leh nitaklama haltum thillat ding leh Sabbath nite leh Khathak nite leh Tangtawn Toupa' Dan Laibu-a kigelh banga ankuanglui sehsate-a haltum thillat ding a thawh hi. 4 Siampite leh Levite, Tangtawn Toupa' Dan tawh kisaia a kipumpiak theih nadingun, a tantuan uh pia un, chi-in kumpipa'n Jerusalema teengte kiang ah thu a pia hi. 5 Tua thupiak a om takin Israelte'n a haigah masate uh, zu thak, sathau thak leh khuaizu leh louma-a piang peuhmah thilpiak khuttawi lian takin a pia uhi. Thil teng apana sawma khat hon pia uh a, a tam mahmah hi. 6 Judah khawpite-a teeng Israel mi leh Judah mite'n zong a ganhonte uleh belam leh kelhonte apan leh, Tangtawn Toupa, a Pathian uh maia lat thilsiangthoute apanin sawma khat a pia uh a, a tawi khawmte uh a vumin a vum maimah hi. 7 A kha thumna-a hiai thilhih a pat uh ahi a, a kha sagihna ah a zou uhi. 8Hezekia leh uliante hong pai uh a, tua thilpiak kivumte a mu uh a, Tangtawn Toupa a phat uh a, a mi Israelte a vualzawl uhi. 9 Hezekia in siampite leh Levite kiang ah tua thilpiak kivumte' thu a dong a, 10 Zadok innkuan apan siampi makai Azaria in a dawng a: Mipite'n a thilpiakte uh Tangtawn Toupa' tempula hon tawi nungsiah uh, nek leh tak kiching ka nei uh a, a vai zong tampi a om lai. Tangtawn Toupa'n a mite a vualzawl manin, hiai zahzaha tam vai lai ahi, a chi hi. 11 Hezekia in Tangtawn Toupa' tempula vankoihna bawl ding thu a pia a, a kibawl hi. 12 Tua khitin, muanhuaitakin a thilpiakte uh, sawma khatte leh thawnpiak latsate hon pawlut uhi. Levi mi Konania, hiai thilte tunga mawhpua ahi a, a sanggampa Shimei amah zoma a nuaia sem ahi. 13 Kumpipa Hezekia leh Pathian' tempul tawh kisai mawhpua ulian Azaria' sehin, Konania leh a sanggampa Shimei nuai ah, Jehiel, Azazia, Nahath, Asahel, Neremoth, Jozabad, Eliel, Ismakia, Mahath leh Beraiate nasep enkaiin a pang uhi. 14 Levi mi Imna' tapa Kore, tua Suahlam Kongpi ngakpa bel Pathian kianga ut thillat kipete tunga mawhpua ahi a, Tangtawn Toupa kianga thilpiak kipete leh thawnpiak latsate ama'n a hawm hi. 15 Eden, Miniamin, Jeshua, Shemaia, Amaria leh Shekania in siampite khawpite ah muanhuaitakin Kore huhin, a siampi hihpihte uh kiang ah, a pawlpawla a kikhen dan bangin, a upa a naupang kibangin, tua thilpiakte a hawm uh. 16 Tua baan ah, khangthu gelhlutna laibute-a min kikhumte, pasal kum thum leh a tunglama upate kiang ah zong a hawm uhi. Tuate khempeuh bel, a pawlpawla kikhenna zuia, a mawhpuaknate uh banga a nisim nna uh sem dinga Tangtawn Toupa' tempula lut gigete ahi uhi. 17 Khangthu gelhlutna-a innkuan kuana minkhum siampite kiang ah a hawm uh a, Levite kum 20 leh a tunglama upate kiang ah zong, a mawhpuakna uleh a pawlpawla a kikhenna bangun, a hawm uhi. 18 Hiai khangthu gelhna laibute-a minkhumte khempeuh laka a neute, a zite, tapate leh tanute uh khempeuh zong a uap vek uhi. Amaute bel amau kisehtuamna-a muanhuaite ahi uhi. 19 Khawpi pua-a lougama teeng, ahih kei leh khawpi danga teeng Aron suan siampite ahih leh, amaute laka pasalte leh Levite' khangthu gelhna laibu-a min kikhumte laka tan hawm dingin, min mina kilouin mi a kisep hi. 20 Hezekia in Judah gamsung tenga, Tangtawn Toupa, a Pathian' maia thil hoih leh muanhuai hibang a hihta hi. 21 Pathian' inn-a sep ding a kipiakna peuhmah leh dan leh thupiakte zuihna ah, Hezekia in a Pathian' mai a zong a, lungtang khempeuh tawh a sem hi. Tua bang ahih manin, a mavang hi.
Asuria Kumpipa Senakherib leh Judah Gam
1 Hezekia in muanhuaitaka a hihte khempeuh nungin, Asuria kumpipa Senakherib hong kuan a, Judah gam hong dou hi. Khawpi kulhneite amah adinga lak zawh sawmin, khawpite' kimkot ah buluh nading panmun a khawh hi. 2 Senakherib hong kuana, Jerusalem dou a sawm, chih Hezekia in a muh takin, 3 a uliante leh sepaihhonte kiang ah, khawpi pua-a luinakte apan tui khakbing ding thu ah, thu a kum a, amaute'n amah a huh uhi. 4 Mi tampi a paikhawm uh a, gam sunga tuinakte leh luitate a khakbing uhi. Amaute'n: Banghanga Asuria kumpipa hong paia, lui tampi mu ding ahia? a chi uhi. 5 Tua khitin, ama'n kulhbaang siatnate khempeuh a puahpha a, a tung ah innsangte a lam hi. Kulhbaang omsa pua ah kulhbaang dang a lamthuah a, David Khawpi kulhbaang pua-a, baang sehsangte behlapin a muanhuaisak hi. Galvan tampi leh lum tampi zong a bawl hi. 6 Ama'n mipite uk dingin sepaih makaite a koih a, khawpi kongpi-a mun awng ah, ama' mai ah amaute a kaikhawm a, amaute kianga hanthawnna thute genin: 7 Thahat leh hangsan suah un. Lau kei unla, Asuria kumpipa leh a kianga sepaihhon tampite hangin lungke sam kei un, amah ompih vangletna sangin, eite hon ompih vangletna vanglian zaw hi. 8 Amah ompih zaw mihing banthahatna hi lei a, eite hon ompih bel, hon huh ding leh i kidounate hon dousak ding Tangtawn Toupa i Pathian hiven, a chi hi. Tuachi-in, Judah kumpipa Hezekia' thugen apanin mipite'n kimuanna a ngah uhi. 9 Tua nungin, Asuria kumpipa Senakherib leh a sepaihhonte khempeuh in Lakhish a luh takun, ama'n Judah kumpipa Hezekia leh Jerusalema om Judah mite khempeuh ading thu puain a uliante a sawl hi. Senakherib' uliante'n: 10 Hiai Asuria kumpipa Senakherib thugen ahi: Jerusalem kibuluh laia Jerusalema na om lailai uh, na kimuanna uh koia nga na hi ua? 11 Hezekia in: Asuria kumpipa' khut apan Tangtawn Toupa, i Pathian in hon humbit ding ahi, a chih chiangin, gilkial leh dangtaka hon sisak dinga hon piikawi ahi. 12 Hezekia mahmah in Judah leh Jerusalem kianga: Maitam khat maia na biak ding ua, a tunga kithoihnate na hal ding uh ahi, chi-a hiai pathian' munsangte leh maitamte paikhia hilou hia? 13 Kei leh ka pu ka pate'n gamdang mite khempeuh tunga ka thilhih uh thei lou maw? Tua namte' pathiante'n ka khut apanin a gam uh a humbit thei ngei ua hia? 14 Ka pu ka pate' hihmanthat namte' pathiante khempeuh laka a koipen ahia kei apan a mite humbit thei ngei? Tua bang ahih nung, na pathian un bangchi-a ka khut apan noute hong hukhethei ding ahia? 15 Tu'n Hezekia kikhemzousak kei unla, hibangin kipikawisak kei un. Koi nam pathian mahin, ahih kei leh, koi kumpigam pathian mahin ka khut apan hi-in, ka pu ka pate' khut apan hita leh, a mite humbit thei lou ahih manin, Hezekia um kei un. Noute' pathian in ka khut apan noute hon humbit lou ding hi! chi ahi, a chi uhi. 16 Senakherib' uliante'n Tangtawn Toupa Pathian leh a sila Hezekia a demse lai uhi. 17 Kumpipa'n zong Tangtawn Toupa, Israel Pathian enghouin laikhakte a gelh lai a, amah demin hibang a gen hi: Gamdangte' mite' pathiante'n ka khut apan a mite humbit lou hi. Tua banga Hezekia' Pathian in zong a mite humbit thei lou ding hi, a chi hi. 18 Tua khitin, Jerusalem kulhbaang tunga om Jerusalem mite mulkimsak ding leh lausaka, tua khawpi lak sawmin, Hebru pau in a gal sap uhi. 19 Leitunga namdangte' pathiante, mihing' khutsuak lelte tungthu a gen bangun, Jerusalem Pathian tungthu a gen uhi. 20 Kumpipa Hezekia leh Amoz' tapa, tua kamsang Isai, hiai thu ah vaan Pathian sama thuumin a kikou uhi. 21 Tuachi-in, Tangtawn Toupa'n vaansawltak khat a sawl a, ama'n Asuria kumpipa giahphual ah sepaihte leh makaite leh uliante khempeuh a thatvek sipsip hi. Tuachi-in, amah zahlaktakin a gam lam ah a kilehkikta hi. Ama' pathian' tempula a lut laiin ama' tapate mahmah pawlkhat in namsau in a satlum uhi. 22 Tuachi-in, Tangtawn Toupa'n Hezekia leh Jerusalem mite, Asuria kumpipa Senakherib khut apan leh midang khempeuhte' khut apan a hukhia hi. Ama'n lam chiteng ah amaute a khawtuah hi. 23 Mi tampite'n Tangtawn Toupa ading thillatte hon tawi uh a, Judah kumpipa Hezekia ading thawnpiakte hon tawi uhi. Tua hun apanin namte khempeuh in amah nakpitaka tungetin a zahtak uhi.
Hezekia' Kisaktheihna, Lawhchinna leh Sihna
24 Tua hun laiin Hezekia hong china a, hong si dektak hi. Tangtawn Toupa kiang ah a thuum a, ama'n a dawng a, chiamtehna lamdang khat a pia hi. 25 Ahihhangin, Hezekia' lungtang a kisathei a, ama' tunga chitna kilak a limsak kei hi. Tua bang ahih manin, Tangtawn Toupa' thangpaihna ama' tung ah leh Judah gam leh Jerusalem tung ah a tung hi. 26 Tua phetin, Hezakia a lungtang kisaktheihna apan a lunghei a, Jerusalem mite zong a lunghei uhi. Tua bang ahih manin, Tangtawn Toupa' thangpaihna, Hezekia dam sungin amaute tung ah a tungta kei hi. 27 Hezekia in hauhna thupitak leh pahtawina thupitak a tang a, a ngun leh a khamte leh suang manphate, gim namtuite, lumte leh thil manpha namkim koih nading goukholnate a bawl hi. 28 An gahte, zu thakte leh sathau koih nading innte zong a lam a, bawng chituam tuamte ading bukte, belam leh kelhonte ading huangte zong a bawl hi. 29 Khawtate a lam a, belam leh kelhon tampi, ganhon tampi a nei hi. Ahang bel, Pathian in hauhna thupi mahmah a pia-a ahi. 30 Hezekia ahi Gihon tuinak pawtna saknung hubing a, David Khawpi tumlam panga leinuaia tui zawllutpa. A sep peuhmah ah a lawhching a, 31 ahihhangin, gamsunga chimatehna lamdang hong om thu amah dong dinga Babulon vaihawmte'n palaite a sawltakun, Pathian in amah ze-et ding leh a lungtanga om peuhmah thei dingin amah a nusia hi. 32 Hezekia' vaihawm sunga thiltung dangte leh a kipiakzawhna thilhihte, Amoz' tapa, Kamsang Isai' mengmuh kigelhna, Judah leh Israel kumpipate' laibu sung ah a kigelh hi. 3 Hezekia, a pu a pate kiang ah a khawlta a, David' suante hante omna mual ah a kivui hi. Amah a sihtakin, Judah mite khempeuh leh Jerusalem mite'n amah a pahtawi uhi. A tapa Manase in a mun a luah a, kumpipa-in hong pang hi.
Judah Kumpipa Manase
1 Manase, kumpipa-a hong pan chilin, kum sawmleniha upa ahi a, Jerusalem ah kum 55 sung vai a hawm hi. 2 Tangtawn Toupa'n Israelte' maia a hawlkhiak namte' gamtat kihhuaite Manase in a zui a, Tangtawn Toupa' mitmuhin thil gilou a hih hi. 3 A pa Hezekia' phelgawpsa munsangte a lam thak a, Baalte' maitamte zong a dawh a, Ashera songte zong a phut hi. Vaan aksihonte khempeuh mai ah a kun a, a bia hi. 4 Tangtawn Toupa'n: Jerusalem ah ka Min a om den ding, a chih tua Tangtawn Toupa' tempul ah maitamte a dawh hi. 5 Tangtawn Toupa' tempul huangsung inntual tegel ah vaan aksihonte khempeuh ading maitamte a dawh hi. 6 Ben Hinom Phaizang ah, mei ah a tapate a laan a, bum leh aisan leh dawi-aisan a hih a, dawizawlte leh kha napeuh zawlte thu a dong hi. Tangtawn Toupa' mitmuha thil gilou lua a hih a, amah a hehsak hi. 7 Ama' bawlsa khuakthawh milimte a la a, Pathian' tempul sung ah a koih hi. Tua tempul lah Pathian in David leh a tapa Solomon kianga: Hiai tempul ah leh Israel namte khempeuh apan ka telkhiak Jerusalem ah ka Min ka koihden ding, a chih ahi. 8 Mosi tungtawna ka piak Dan khempeuh leh dankhunte, leh thusehte khempeuh tawh kisai ka thupiak zui dinga Israelte a pilvan uleh, na pu na pate uh kianga ka piak hiai gam a khete uh ka nusesak ngei nawn kei ding, chi-a a na gensa lah hi tawk a! 9 Ahihhangin, Manase in Judah gam mite leh Jerusalem mite a piimang a, Tangtawn Toupa'n Israelte' maia a hihmanthat namte sang mahin a tatse zaw uhi. 10 Tangtawn Toupa'n Manase leh a mite kiang ah thu a gen a, ahihhangin, amaute'n a limsak kei uhi. nTuachi-in, Tangtawn Toupa'n Asuria sepaih makaite amaute dou dingin hon pii a, amaute'n Manase manin a koltangsak uh a, a nak ah ngakuai a bulh uh a, sumsan sikkol in a hen uh a, Babulon gam a tun uhi. 12 Mangbang lungzingin Tangtawn Toupa, a Pathian' deihsakna a zong a, a pu a pate' Pathian mai ah nakpitakin a kiniamkhiak hi. 13 Amah kianga a thuum takin, a thuum a mauna in Tangtawn Toupa' lung a khoih a, a nget ngutngutna a ngaikhia a, Jerusalem leh a kumpigam ah amah a tunkik hi. Tua bang hong hih takin, Manase in Tangtawn Toupa a hoih, chih a theita hi. 14 Tua nunglamin, luiphaia Gihon tuinak tumlama David Khawpi kulhbaang pawnung zaw, Ngasa Kongpi leh Ofel mun umkualna dong, a puahpha a, a sangzaw thamin a bawl hi. Judah gam sunga khawpi kulhneite khempeuh ah sepaih makaite a koih hi. 15 Gamdang pathiante a paimang vek a, Tangtawn Toupa' tempula milim a paikhia a, tempul mual tung leh Jerusalema maitam a dawhte khempeuh zong a paikhia a, khawpi pawlam ah a lawnkhia hi. 16 Tua khitin, Tangtawn Toupa' maitam a dawh thak a, a tung ah lemna thillatte leh kipahna thillatte a laan a, Tangtawn Toupa, Israel' Pathian nna sema be dingin Judah mite a hilh hi. 17 Ahihhangin, mipite'n munsangte ah kithoihna a laan lailai uh a, ahihhangin, tuate Tangtawn Toupa, a Pathian uh mai kia-a a lat uh ahita hi. 18 Manase' vaihawm sunga thiltung dangte, a Pathian kianga a thuumna leh mailam mute'n Tangtawn Toupa, Israel Pathian' mina amah kianga a thugente utawh, Israel kumpite tungthu kigelhna ah a kigelh hi. 19 A thuumna leh a thuum a mauna in Pathian' lung a khoih dan, a kiniamkhiak ma-a a khelhnate leh a muanhuailouhnate leh munsang a bawlna munte leh Ashera song leh milim a tunkhiakna munte tawh kisai thute tawh, avekpi-in Hozai' laibute ah a kigelh hi.2 Manase, a pu a pate kiang ah a khawlta a, ama' innpi ah a kivui hi. A tapa Amon in a mun a luah a, kumpipain hong pang hi.
Judah Kumpipa Amon
21 Amon, kumpipa-a hong pan chilin, kum 22-a upa ahi a, Jerusalem ah kum nih sung vai a hawm hi. 22 A pa Manase bangin, Tangtawn Toupa' mitmuhin thil gilou a hih hi. Amon in Manase' bawlsa milimte khempeuh a bia a, tuate mai' ah kithoihnate a laan hi. 23 Ahihhangin, Amon bel a pa Manase banglou takin, Tangtawn Toupa' mai ah a kiniamkhiak kei a, a mawhna a tamsak semsem hi. 24 Amon' uliante'n amah a sawm uh a, a kumpi innpi sung ah a that uhi. 25 Tua khitin, tua gamsung mite khempeuh in kumpipa Amon thah sawmte khempeuh a that uh a, ama' mun ah a tapa Josia kumpipain a bawl uhi.
Josia' Puahphatte
1 Josia, kumpipa-a hong pan chilin kum giata upa ahi a, Jerusalem ah kum 31 sung vai a hawm hi. 2 Ama'n Tangtawn Toupa' mitmuhin thildik a hih a, a pa David' lampite khempeuh a tawn a, veilam hiam taklam hiam ah zong a pialsan kei hi. 3 A vaihawm kum, a kum giatna ah, tuailai a hih laiin, a pa David' Pathian a zong pan a, a kum sawm leh nihna ah Judah leh Jerusalem apanin munsangte, Ashera songte, khuakthawh milimte leh sunthawh milimte a paikhia hi. 4 Ama' thuhilhna nuai ah, Baalte' maitamte a kilaichim a, tuate tunga om gimnamtui halna maitamte a satnen a, ama'n Ashera songte, milimte leh limte a satzan hi. Hiaite a satzan a, tua a nente, hiaite' maia kithoihna laante' hantung ah a theh hi. 5 Ama'n siampite' guhte, amau' maitamte tung ah a hal a, tua bangin Judah leh Jerusalem a hahsiang hi. 6 Manase, Efraim leh Simeon khawpite ah, Naftali dongin leh tuate' kim leh kianga khawpi sesate-a 7 maitamte leh Ashera songte a laipai a, milimte a gawivui a, Israel gam sung tenga gimnamtui halna maitamte a satzan vek hi. Tua khitin Jerusalem ah a kilehkikta hi. 8 Josia' vaihawm kum, a kum sawmlegiatna ah, gam sung leh tempul hihsiang dingin Azalia' tapa Shafan leh khawpi ukpa Maaseia a sawl a, amaute tawh kitonin Tangtawn Toupa, a Pathian' tempul puahpha dingin Joahaz' tapa Joa, laibu-a thil chiamtehpa, a sawl hi. 9 Amaute, siampilian Hilkia kiang ah a hawh uh a, Pathian' tempula hong kitawilut sumte a pia uhi. Tua sumte bel kongkhak venga pang Levite'n Manasete, Efraimte leh Israel mi khawsuak sunte leh Judah leh Benjamin mite khempeuh leh Jerusalema teengte apan a donkhiak uh ahi. Hiai mite'n tempul puahpha-a bawlthak nasemte a pia uhi. 1 Tua khitin, Tangtawn Toupa' tempul puahpha-a nasep enkai dinga seh mite khut ah tua a kemsak uhi. 11 Amaute'n sing nasemte leh innlamte kiang ah zong suangseksa leh singzawlte a lian a neu lei nading sum a pia uhi. Tua van leite bel, Judah kumpipate'n a siat ding a na phal uh, tua innte lamthak nading ahi. 12 Mipite'n muanhuaitakin nna a sem uh a, amaute uk a, makaih dingin Merari' suan Levite Johath leh Obadia, tua chiangin, Kohath' suan Levite Zekharia leh Meshulam a pang uhi. Tumging lam siam chiat Levite bel, 13 khut nasemte tunga mawhpua in a pang uh a, nna tuamtuam semte ukin a enkai uhi. Levite pawlkhat leuleu lah, laigelh mi, dan sinsakmi leh kongkhak veengin a pang uhi.
Dan Laibu Kimukhia
14 Tangtawn Toupa' tempula kikoihlut sumte a lakkhiak laiun, siampi Hilkia in Tangtawn Toupa' Dan Laibu, Mosi tungtawna kipia, a mukhia hi. 15 Hilkia in laigelhpa Shafan kiang ah: Tangtawn Toupa' tempul sung ah Dan Laibu ka mukheta, a chi a, a kiang ah a pia hi. 16 Tuachi-in, Shafan in tua laibu kumpipa kiang ah a va tawi a, a kiang ah: Na uliante'n amau sep dinga kipete peuhmah a sem uhi. 17 Tangtawn Toupa' tempula om sumte a pekhia uh a, nasemte tunga mawhpawte leh nasemte a kemsak uhi, a chi hi. 18 Tua khitin, laigelhpa Shafan in kumpipa kiang ah: Siampi Hilkia in laibu khat kei hon pia, chi-in, a hilh a, kumpipa' mai ah tua laibu apan a sim hi. 19 Kumpipa'n tua Dan thute a zak takin, a puansilhte a botkek hi. 20 Kumpipa'n Hilkia, Shafan' tapa Ahikam, Mika' tapa Abdon, laigelhpa Shafan leh kumpipa' sawltawl Asaia thu a pia a: 21 Kuan unla, kei adingin leh Israel leh Judah khawsuaksunte adingin, hiai laibu kimukhia sunga kigelh tawh kisai, Tangtawn Toupa hon dotsak un. I pu i pate'n Tangtawn Toupa' thu a man louh man ua, Tangtawn Toupa' hehna eite tunga kisungbua thupi lua hi. Amaute, hiai laibu sunga kigelh banga na gamta lou uh hi, chi-in thu a pia hi. 22 Hilkia leh amah tawh tona kumpipa' sawlte kamsangnu Hulda houpih dingin a kuan uhi. Hulda bel Shalum' zi ahi a, Shalum bel Tokhat' tapa ahi a, Tokhath lah Hasra' tapa ahi. Hasra bel puankoihna kempa ahi. Hulda ahih leh, Jerusalema Biaf sehkhen Nihna-a teeng ahi. 23 Hulda in amaute kiang ah: Hiai Tangtawn Toupa, Israel' Pathian' thugen ahi. Noute ka kianga hon sawlpa kiang ah hilh un, 24 hiai Tangtawn Toupa thugen ahi. Ama'n: Hiai mun leh a mite tunga siatna tun ding ka hi. Judah kumpipa' maia kisim laibu sunga kigelh hamsiate khempeuh tun ding ka hi. 25 Kei hon taisan a, pathian dangte' maia gimnamtui hal a, amau' khuta a bawlte khempeuh uh zanga hon hehsak manun, ka hehna hiai muna sunbuaka om ding a kiphelh mit zoukei ding hi, chi ahi. 26 Tangtawn Toupa thu dong dinga noute hon sawlpa, Judah kumpipa hilh un. Hiai Tangtawn Toupa, Israel' Pathian in na thuzakte uh tawh kisaia a thugen ahi. 27 Ama'n: Na lungtang in thu ngaikhe nuam a, hiai mun leh a mite doua a thugen na zak laia, Pathian' maia na kingaihniam manin, leh ka maia kingainiama na puanakpi na bawhkek a, ka maia na kah manin, kon zata hi, chi-in Tangtawn Toupa'n phuang hi. 28 Tua bang ahih manin, na pu na pate kiang ah kon la ding a, khamuangtaka vui in na om ding. Hiai mun leh hiaia teengte tunga ka tunsak ding siatna na mit in a mu kei ding, chi ahi, a chi hi. Tuachi-in, Hulda' dawnna, kumpipa kiang ah a tunkikta uhi. 29 Tua khitin, kumpipa'n Judah leh Jerusalem upate khempeuh a samkhawm hi.30 Amah, Judah mite, Jerusalem mite, siampite leh Levite mi khempeuh a neupen apan a thupipen dong tawh, Tangtawn Toupa' tempul ah a hawhtou hi. Tangtawn Toupa' tempula kimukhia Thukhun Laibu-a thute khempeuh amaute' zakin a sim hi. 31 Kumpipa bel ama' mun ah a ding a, Tangtawn Toupa' mai ah tua Thukhun a thaksak a, a lungtang khempeuh leh a hinna khempeuh tawh Tangtawn Toupa zui ding, a thupiakte, dante leh danthusehte zui ding leh hiai laibu-a kigelh thukhun thute mang dingin thukhun a thaksak hi. 32 Tua khitin, Jerusalem leh Benjamin gama mi peuhmah hiai thukhun zui dingin a kichiamsak a, Jerusalem mite'n Pathian, a pu a pate uh' Pathian' thukhun bangin hiai a hihta uhi. 33 Josia in Israelte' neih gam khempeuh apan milim kihhuaite khempeuh a paimang a, Israel gama omte khempeuh, Tangtawn Toupa, a Pathian uh' nna a semsakta hi. Josia a dam sung teng, amaute'n Tangtawn Toupa, a pu a pate uh' Pathian a zui khial kei uhi.
Josia' Paikan Ankuang
1 Josia in Jerusalem ah Paikan Ankuang kipahpihna Tangtawn Toupa' mai ah a bawl a, a kha khatna, a ni sawmlenih ni-in Paikan belamnou a gou hi. 2 Siampite amaute sep ding mawhpuakna a guan chiat a, Tangtawn Toupa' tempula biakna nna sem dingin a hanthawn hi. 3 Ama'n Israelte khempeuh sinsak leh Tangtawn Toupa' adinga kisiansuah tua Levite kiang ah: Israel kumpipa David' tapa Solomon in a lam tempul ah tua singkuang siangthou koih un. Tua singkuang bel na liangzang ua puak ding ahi kei hi. Tu'n Tangtawn Toupa, na Pathian uleh a mite' nna sem un. 4 A pawlpawla kikhenin innkuan kuanin kisakhol un, Israel kumpipa David leh a tapa Solomon' thuhilhna bangin om un. 5 Mi vantang, na gammi hihpihte uh a pawlpawla kikhente adinga seh Levite pawlkhat chiat tawh munsiangthou ah dingkhawm un. 6 Tuachi-in, Paikan belamnoute gou unla, noute kisiansuah unla, Tangtawn Toupa'n Mosi tungtawna thu a piak bangin, na gammi hihpihte uh adingin tua belamnoute' sa bawl un, a chi hi. 7 Josia in tua-a om mi vantangte adingin Paikan thillata zat ding belam leh kei 30,000 tak a tuak a, bawng 3,000 zong a tuak hi. Tuate khempeuh, kumpipa' neihsa mawng ahi. 8 Josia' uliante'n zong amau' utthuin mipite leh siampite leh Levite ading a tuak uhi. Pathian' tempul vaisai Hilkia leh Zekharia leh Jehiel in siampite kiang ah Paikan thillat belam leh kei 2,600 leh bawng 300 a pia uhi. 9 Konania in zong a sanggamte Shemaia leh Nethanel tawh Levi makaite Hashabia, Jeiel leh Jozabad tawh Paikan thillatte belam leh kei 5,000 leh bawng 500 Levite adingin a tuak uhi. 10 Kumpipa' thupiak bangin, tua biakna nasep a kiguang dimdiam a, siampite amau mun chiat ah, amau tan pawla Levite tawh a dingkhawm uhi. 11 Paikan belamnoute a kigou a, siampite'n amau kianga kipia tua sisan a theh uh a, a vunte bel Levite'n a hawk uhi. 12 Mipite innkuan kuana pawl kikhensawnte'n, Mosi' Dan Laibu-a kigelh banga Tangtawn Toupa' maia a lat dingun, haltum thillatte bel, tua innkuan kuana kikhente piak dingin a koihtuam uhi. Tua bang mahin bawngte zong a sai uhi. 13 Paikan gante ahih dingdan thuseh bangin mei tung ah a haimin uh a, thillat siangthoute ahih leh, belte leh belpite leh beldaitein a huan uh a, mite khempeuh kiang ah kintakin a lui pah hi. 14 Hiai nungin, amaute leh siampite adingin nek ding a bawl uhi. Aron' suan siampite bel haltum thillatte leh a sathaute khawmial ma-a a lat ding ahih man ahi. Tuachi-in, Levite'n amau ading leh Aron suan siampite adingin nek ding a bawl uhi. 15 Tumging tum Asaf suante leh Asaf leh Heman leh kumpipa-a tuam mailam muthei Jeduthun bel David in a seh bangin amau' mun chiat ah a om uhi. Kongpite-a kongpi vengte'n bel, a Levipihte un amau adinga nek ding bawlsak uh ahih manun, a mun uh a nutsiat uh a kul kei hi. 16 Tua bangin, Kumpipa Josia' thupiak bangin, Paikan zatna hita leh, Tangtawn Toupa' maitam tunga haltum thillatte adinga Tangtawn Toupa' nasep hita leh, avekpi-in tua ni mahin a kizouta hi. 17 Tua muna om Israelte'n tua hun mahin Pathian a zong uh a, Paikan leh Tanghou Silngousawhlouh Ankuanglui ni sagih sung a zang uhi. 18 Kamsang Samuel hun nungsiah, Israel gam sung ah hibanga Paikan zatna a om kei a, Israel kumpipate kuamah in Josia hih bangin, siampite leh Levite leh tua muna Jerusalem mite tawh omkhawm, Judah leh Israel gam mite tawh, Paikan a zang kei hi. 19 Hiai Paikan, Josia' vaihawm kum, a kum sawmlegiatna ah a zang uhi.
Josia Sihna
20 Hiaite khempeuh nungin, Josia in tempul puahpha-a a kephoih khit takin, Aigupta kumpipa Neko, Iufratis luipi geia Karkhemish sim dingin a kuantou a, Josia zong amah tuak dingin a kuankhia hi. 21 Ahihhangin, Neko in amah kiang ah thupua a sawl a: Nang leh kei kala bang kinakna om ahia, Judah kumpipa aw? Tutunga ka dou zaw nang hilou na hi, ka kidoupihsa innkuan ahi zaw ka dou. Pathian in kintat dinga hon sawl ahi, kei hon ompihpa Pathian nang ken, tuachilouin zaw nang hon hihmangthang ding ahi, a chi hi. 22 Ahihhangin, Josia in amah a kiheisan nuam kei a, kibawl lamdangin a kidoupihta hi. Pathian' thupiaka Neko' thugen a ngaikhe nuam kei a, Megido phaizang ah amah dou dingin a kuan hi. 23 Thaltawite'n kumpipa Josia a kapkha uh a, ama'n a uliante kiang ah: Kei hon lakhia un, nakpitaka Ham ka hi, a chi hi. 24 Tuachi-in, amaute'n a kangtalai apan amah a lakhia uh a, kangtalai dang a neih ah a koih uh a, Jerusalem hon tun uh a, tua ah a sita hi. A pu a pate' hankhuk ah a kivui a, Judah leh Jerusalem mite' khempeuh in amah a suun uhi. 25 Jeremia in Josia suunna late a phuak a, tua late sain numei leh pasal lasapawlte'n Josia phawka sunna tuni dongin a nei zel uhi. Hibanga hih Israel gam ah ngeina hong suak a, Kahlate sung ah hiai late a kigelhlut hi. 26 Josia' vaihawm sunga thiltungte, Tangtawn Toupa' Dan Laibu sunga kigelh banga a hoihna thilhihte, 27 tua thiltungte khempeuh a bul apan a tawp dong, Israel leh Judah kumpipate' laibu sung ah a kigelh hi.
1 Tua gam mite'n Josia' tapa Jehoahaz a la uh a, Jerusalem ah a pa mun ah kumpipain a bawl uhi.
Judah Kumpipa Jehoahaz
2 Jehoahaz kumpipa-a hong pan chilin, kum 23-a upa ahi a, Jerusalem ah kha thum sung vai a hawm hi. 3 Aigupta kumpipa'n Jerusalem ah, amah kumpi hihna apan a laikhia a, Judah gam apan ngun talen 100 leh kham talen khat siah a kai hi. 4 Aigupta kumpipa'n Jehoahaz' sanggampa Eliakim, Judah leh Jerusalem tunga kumpipain a tusak a, a min Jehoiakim chi-in a kheeksak hi. Eliakim' sanggampa Jehoahaz bel Aigupta ah a pawmang hi.
Judah Kumpipa Jehoiakim
5 Jehoiakim, kumpipa-a hong pan chilin, kum 25-a upa ahi a, Jerusalem ah kum sawmlekhat sung vai a hawm hi. Ama'n Tangtawn Toupa, a Pathian' mitmuhin thil gilou a hih hi. 6 Babulon kumpipa Nebukhadnezar in amah a dou a, sumsan koi a bulh a, Babulon ah a pua hi. 7 Nebukhadnezar in Tangtawn Toupa' tempul apanin vante a la a, Babulona ama' tempul ah a koih hi. 8 Jehoiakim' vaihawm sunga thiltung dangte, thil kihhuai a hihte leh amah demna lam khempeuh, Israel leh Judah kumpipate' laibu sung ah a kigelh hi. A tapa Jehoiakhin in a mun a luah a, kumpipain hong pang hi.
Judah Kumpipa Jehoiakhin
9 Jehoiakhin, kumpipa-a hong pan chilin kum sawmlegiata upa ahi a, Jerusalem ah kha thum leh ni sawm sung vai a hawm hi. Ama'n Tangtawn Toupa' mitmuhin thil gilou a hih hi. 10 Nipi hun kipat laiin Kumpipa Nebukhadnezar in amah a samsak a, Tangtawn Toupa' tempula van manphate tawh Babulon a tun a, Jehoiakhin' pangak Zedekia, Juda leh Jerusalem kumpipain a tungkhia hi.
Judah Kumpipa Zedekia
11 Zedekia, kumpipa-a hong pan chilin kum 21-a upa ahi a, Jerusalem ah kum sawmlekhat sung vai a hawm hi. 12 Ama'n Tangtawn Toupa, a Pathian' mitmuhin thilgilou a hih a, Tangtawn Toupa' thugenpa kamsang Jeremia' mai ah a kingainiam kei hi. 13 Pathian' mina kichiamsakpa, Kumpipa Nebukhadnezar tung ah zong a hel a, genhakin a lungtang a khauhsak a, Tangtawn Toupa, Israel' Pathian lam ah a kihei nuam kei hi. 14 Tua teng baan ah siampi makaite khempeuh leh mipite, namte' gamtatna kihhuaite zuiin hong muanhuai kei semsem uh a, Jerusalema siansuahsa Tangtawn Toupa' tempul a hihbuah uhi.
Jerusalem Pukna
15 Tangtawn Toupa, a pu a pate uh' Pathian in a mite leh a tenna mun lainat a hih manin, amaute kiang ah a thupawte tungtawnin thu a khak thakthak hi. 16 Ahihhangin, hihdamna himhim om lou khopa Tangtawn Toupa a mite tunga a hehsak mateng uh, Pathian' thupawte a engbawl uh a, a thute a simmawh uh a, a kamsangte um louin a nuihsan uhi. 17 Ama'n amaute dou dingin Babulonte' kumpipa a piitou a, ama'n munsiangthou ah, a tangvalte uh a that a, tangval hi-in nungak hita leh, a teekte hita leh namsauin a that hi. 18 Ama'n Pathian' tempula vante khempeuh, a lian hi-in a neu hita leh, Tangtawn Toupa' tempula goute leh kumpipa leh uliante' goute Babulon ah a pawmang vek hi. 19 Pathian' tempul meiin a hal uh a, Jerusalem kulhbaang a laichim uh a, kumpi' innpite khempeuh a hal uh a, tua-a van manpha peuhmah a hihmangthang uhi. 20 Ama'n a khawsuaksun, namsau apan suaktate, Babulon ah a pimang a, Persia kumipigam hong let masiah amah leh a tapate' sal a suak uhi. 21 Tangtawn Toupa' thu Jeremia in a gen tangtunna-a kum 70 a bei mateng, tua gam in Sabbath khawlnate a nei a, tua banga loih a hih sung khawlna a nei hi. 22 Persia kumpipa Kura' vaihawm kum, a kum khatna ah, Jeremia in Tangtawn Toupa' thu a gen a tangtun nadingin, Tangtawn Toupa'n Persia kumpipa Kura lungtang a khoih a, ama'n a gamsung teng ah thuphuan a bawl a, gelhin a koihsak hi. 23 Hiai Persia kumpipa Kura thugen ahi. Ama'n: Tangtawn Toupa, vaan Pathian in leitung kumpigamte khempeuh kei hon pia a, Judah gama Jerusalem ah ama' ading tempul lam dingin hon septa. Noute laka ama' mi peuhmah Tangtawn Toupa, a Pathian in ompih henla, kuantou heh, a chi, chi-in a phuangsak a, a gelhsak hi.
Kura' Thuseh
1 Persia kumpipa Kura' vaihawm kum, a kum khatna ah, Jeremia' kama Tangtawn Toupa' thugen a tangtun nadingin, Tangtawn Toupa'n Persia kumpipa Kura' lungtang a tokthou a, a kumpigam sung khempeuh ah thuphuan bawl ding leh a gelha zong koih dingin thu a pia hi. 2 Persia kumpipa Kura in hibangin thu a gen a: Tangtawn Toupa vaan Pathian in leitung kumpigam khempeuh kei hon pia hi. Ama'n Judah gama om Jerusalem khua-a ama' ading inn lamsak dingin thu hon pia hi. 3 Nou a mite khempeuh laka khatpeuh lungtang tawhthawh a om leh, tua bang mi a Pathian in ompih henla, Judah gama Jerusalem khua ah kuan tou henla, Tangtawn Toupa Israel Pathian' tempul lam hen. Amah zaw Pathian ahi a, Jerusalema om ahi. 4 A khualtamna ua a khaw-suaksun peuhmahte'n, Jerusalema Pathian' tempul adingin ngun leh kham, van leh gantate tawh, ut thillatte tawh, tua bang mi pia hen, a chi hi.
Israel leh Kura' Thilpiakte
5 Tuachi-in, Judah leh Benjamin inkawte laka beh tuulpite leh siampite leh Levite, Pathian in a lungtang uh a tawhthawh khem-peuhte Jerusalem khua-a Tangtawn Toupa' tempul lam dingin a kisa uhi. 6 Amaute' innvengte khempeuh in ngun leh khama kibawl vante, vandang himhimte, gantate, thawnpiak manphapipite leh ut thillattein amaute a huh uhi. 7 Kumpipa Kura in zong tua Jerusalem apan Tangtawn Toupa' tempula Nebukhadnezar in a puakkhiak tempul vante, ama' pathian' tempula a koihte a lakhia hi. 8 Persia kumpipa Kura in a sumkempa Mithredath a pawsak a, Judah makai Sheshbazar khuta piain a simsak hi. 9 A phazah hibang ahi: Kham kuang 30; ngun kuang 1,000; ngun kuangdai 29; 10 kham belkuang 30; a kibatpih ngun belkuang 410; vandang dang 1,000. 11 Avekin kham leh nguna kibawl van 5,400 ahi. Sheshbazar in Babulon saltanna apan Jerusalema hong paitouh laiun hiaite khempeuh hon pua hi.
Saltanna apan Hong Kikte
1 Nebukhadnezar in Babulona sala a kaihmang tua saltanna apan hong kik Judah gam sehkhena mi hiaite ahi. Amaute Jerusalem leh Judah gam ah, amau' khawpi tek ah hong kik uhi. 2 Amaute tawh hong ton Zerubabel, Jeshua, Nehemia, Seraia, Reelaia, Mordekai, Bilshan, Mispar, Bigvai, Rehum leh Baana ahi. Israel mite laka pasal pha zah hiai ahi: 3 Parosh suante 2,172; 4 Shefatia suante 372; 5 Ara suante 775; 6 Jeshua leh Joab khanggui tawna Pahath-Moab suante 2,812; 7 Elam suante 1,254; 8 Zatu suante 945; 9 Zakai suante 760; 10 Bani suante 642; 11 Bebai suante 623; 12 Azgad suante 1,222; 13 Adonikam suante 666; 14 Bigvai suante 2,056; 15 Adin suante 454; 16 Hezekia khanggui tawna Ater suante 98; 17 Bezai suante 323; 18 Jora suante 112; 19 Hashum suante 223; 20 Gibar suante 95; 21 Bethlehem mite 123; 22 Netofa mite 56; 23 Anathoth mite 128; 24 Azmaveth mite 42; Kiriath Jearim, Kefira leh Beeroth mite 743; 26 Rama leh Geba mite 621; 27 Mikmash mite 122; 28 Bethel leh Ai mite 223; 29 Nebo mite 52; 30 Magbish mite 156; 31 Elam dang khat mite 1,254; 32 Harim mite 320; 33 Lod, Hadid leh Ono mite 725; 34 Jerikho mite 345; 35 Senaa mite 3,630. 36 Siampite: Jeshua innkuan tawna Jedaia suante 973; 37 Imer suante 1,052; 38 Pashur suante 1,247; 39 Harim suante 1,017. 40 Levite: Hodavia khanggui tawna Jeshua leh Kadmiel suante 74. 41 Lasate: Asaf suante 128. 42 Kongpi ngakte: Shallum, Ater, Talmon, Akub, Hatita leh Shobai suante 139. 43 Tempul sawltawlte: Ziha, Hasufa, Tabaoth, 44 Keros, Siaha, Padon, 45 Labana, Hagaba, Akub, 46 Hagab, Shalmai, Hanan, 47 Gidel, Gahar, Reaia, 48 Rezin, Nekoda, Gazam, 49 Uza, Pasea, Besai, 50 Asna, Meunim, Nefusim, 51 Bakbuk, Hakufa, Harhur, 52 Bazluth, Mehida, Harsha, 53 Barkos, Sisera, Tema, 54 Nezia leh Hatifa suante. 55 Solomon' silate' suante: Sotai, Hasofereth, Peruda, 56 Jaala, Darkon, Gidel, 57 Shefatia, Hatil, Pokereth Hazebaim leh Ami suante. 58 Tempul sawltawlte leh Solomon' silate suante 392. 59 Tel Mela, Tel Harsha, Kerub, Adon leh Imer khawpite apan hong paitou, ahihhanga, a inkawte uh Israel suan ahihna uh lak theiloute hiaite ahi uh. 60 Delaia, Tobia leh Nekoda suante 652. 61 Siampite lak apan: Hobaia, Hakoz leh Barzilai suante, Barzilai bel Gilead mi Barzilai' tanu kitenpih pasal khat tua mina kisam ahi. 62 Hiai mite'n inkuan minkhumna laibu a zong uh a, ahihhangin, a mu kei uhi. Tuabang a hih manin, a sianglou bangin siampi hihna pan pawsiah ahi uhi. 63 Amaute bel, ukpipa'n, Urim leh Thumin zanga nasem thei siampi khat om mateng, an zeka siangthou ne lou dinga thu a piak ahi uhi.
Jerusalem Zuana Chiahkikte
64 Mipite avekpiun 42,360 ahi uh a, 65 tuate laka sila pasal leh sila numei 7,337 simtel louh ahi. Amaute'n lasa mi pasal leh numei 200 zong a nei uhi. 66 Sakol 736, sabiltung 245, leh 67 sangawngsau 435 leh sakolneu 6,720 a nei uhi. 68 Jerusalema Tangtawn Toupa' inn hong tun takun, innkuan beh tuipite pawl khat in Pathian' inn lam nadingin ut thillatte hon tawi uhi. 69 Amau' hih theih khamkhama hiai nasep nadinga sum koihna inna a piak uh kham drakma 61,000, ngun mina 5,000 leh siampi puansilh 100 ahi. 70 Siampite, Levite, lasate, kongpi ngakte leh tempul sawltawlte, midang pawl khat tawh, amau' khawpi tek ah a teeng uhi. Israel dangte bel amau' khawpi chiat ah a teeng uhi.
Khalam Kisakkholhna
1 A kha sagihna hong tun takin leh Israelte'n amau khawpi chiat a luah takun, mipite mi khat bang maiin Jerusalem ah hong kikhawm uhi. 2 Tua ah, Jehozadak' tapa Jeshua leh a siampi hihpihte leh Shealtiel' tapa Zerubabel leh a sanggamte a kisa uh a, Israel Pathian' maitam a dawh uhi. Tua bel, Pathian' mipa Mosi' dan banga haltum thillat a lat nading uh ahi. 3 A kim a pam ua mite lau mah le uh, maitam a suangphum tung ah a dawh uh a, tua tung ah Tangtawn Toupa' mai ah haltum thillatte, zingsang kithoihna leh nitak lam kithoihnate a laan uhi. 4 Tua baan ah, a kigelh bangbangin, Bawktate Ankuanglui a bawl uh a, dan in ni khat zel adinga a ngiat zah, nisim haltum thillatte a laan uhi. 5 Tua khitin, haltum thillat ngeinate a laan uh a, Kha Thak thillatte, Tangtawn Toupa adinga seh siangthou ankuanglui thillatte leh Tangtawn Toupa ading ut thillatte a laan uhi. 6 Tangtawn Toupa' tempul suangphum kiphum nai kei mah leh, a kha sagihna, a ni khat ni-in Tangtawn Toupa' mai ah haltum thillatte a laan panta uhi.
Tempul Lamthakna
7 Tua khitin, suangsekte leh singsiamte kiang ah sum a pia uh a, Sidonte leh Turate kiang ah an leh dawn ding leh sathau a pia uhi. Tua bel, amaute'n Lebanon apan Jopa dong, Persia kumpipa' thupiak banga tuipi tunga sidar singtumte hon puak nading uh ahi. 8 Jerusalema Pathian' inn hong tun nung uh, a kum nihna, a kha nihna ah Shealtiel' tapa Zerubabel, Jozadak' tapa Jeshua leh a sanggam dangte uh, siampite leh Levite, saltanna apan Jerusalema hong kikte'n nasep a pan uh a, Levite kum 20 apan a tunglamte Tangtawn Toupa' inn lam nasep enkai dingin a sep uhi. 9 Tuachi-in, Jeshua leh a tapate leh sanggamte, Kadmiel leh a tapate tua Hodavia' suante leh Henadad leh a tapate leh sanggamte, a vek ua Levi suante hivek, tuate Pathian' inn lamte enkaiin a pangkhawm uhi. 10 Inn lamte'n Tangtawn Toupa' tempul suangphum a phum takun, siampite' siampi puante silha, pengkulte tawiin, Levite, tua Asaf tapate, dak khutbette tawiin, Israel kumpipa David' seh bangin, Tangtawn Toupa phat dingin amau mun chiat ah a om uhi. 11 Phatna leh lungdamthu piain Tangtawn Toupa' mai ah la a sa uh a: Amah hoih hi, Israel a itna in Tangtawn daih hi, a chi uhi. Tangtawn Toupa' inn suangphum a kiphum manin, mipite khempeuh Tangtawn Toupa phatin nakpitakin a kikou uhi. 12 Ahihhangin, tempul masa mukha siampite, Levite leh innkuan lutangte bel, hiai tempul suangphum lai mu mi tampite' lungnop laitakin, nakpitakin a kap maimah uhi. 13 Mipite' husa ngaih mahmah ahih manin lungnop aw leh kah aw kuama'n a khenkak thei kei hi.
Tempul Lamthak Dalna
1 Saltanga pimanga omte'n Tangtawn Toupa, Israel Pathian' tempul a lam uh chih Judah leh Benjamin' melmate'n a zak takun, 2 Zerubabel kiang leh tua innkuan lutangte kiang ah hong pai uh a: Hiai san hon tun Asuria kumpipa Esarhadon hun laia pan noute' Pathian zong a, a maia kithoihnate lan sam ka hih manun, koute'n zong inn hon lampih n'ung, a chi uhi. 3 Ahihhangin, Zerubabel, Jeshua leh Israel inkuan lutangte'n a dawng uh a: Koute' Pathian ading tempul lam dingin koute lak ah tan na nei kei uhi. Kumpipa Kura, tua Persia kumpipa'n koute thu hon piak bangin, Tangtawn Toupa, Israel Pathian adingin koute kiain tempul ka lam ding uhi, a chi uhi. 4 Tua khitin, a kim a kiang ua mite'n Judah mite lungkiaksak sawmin a kipan uh a, inn lam zom ding a lausak uhi. 5 Persia kumpipa Kura' vaihawm sung teng leh Persia kumpipa Daria' vaihawm dong tua mite'n amaute' thil sawm dou a, lawhsamsak dingin thuhilh mite a guai uhi.
Ahasuera' Vaihawm laia Douna
6 Ahasuera vaihawm kum a kipat chil laiin Judah gama teengte leh Jerusalema teengte hekna lai amah kiang ah a gelh uhi.
Arteksersa' Vaihawm laia Douna
7 Persia kumpipa Arteksersa' vaihawm laiin zong Bishlam, Mithredath, Tabeel leh a seppih dangte khempeuh in Arteksersa kiang ah hekna lai a gelh uhi. Tua lai bel Aram pauin Aram laimalin a kigelh hi. 8 Sepaih makai Rehum leh laigelhpa Shimshai in kumpipa Arteksersa kiang ah Jerusalem hekna lai a gelh uh a: 9 Amaute bel, sepaih makai Rehum leh laigelhpa Shimshai leh a seppihte uh Tripolis, Persia, Erek leh Babulon leh Susa khawpi-a Elamte 10 leh mi thupi leh zahtakhuai Ashurbanipal in a hawlkhiak Samaria khawpi leh Luipi gal gam khawnga teengte tunga vaihawm-mite leh unliante ahi uh. 11 Arteksersa kianga a laigelh uh kawpi hiai ahi: Kumpipa Arteksersa kiang ah kou na silate, Luipi gal gama teengte'n lai kon gelh uhi. 12 Nang apan hong paitou Judate Jerusalem ah a paitou uh a, tua khawpi gilou leh helhat a lamthak uh, chih na thei lechin ka chi uhi. Kulhbaangte a lam thak uh a, a suangphumte a puahpha uhi. 13 Tua baan ah, hiai khawpi a kilamthak a, kulhbaangte a kilamkhit leh, leimante, siahte, zuaksum mante, a pe kei ding uh a, kumpipa' summuhna a kiam ding chih na thei in. 14 Koute'n kumpi' innpi apan huhna ngah ka hih manun, kumpipa'n zahlakna a tuah ka muh ding uh koute adingin kilawm lou hi. Tua banga mi hon sawl a, hiai thu hon theisak hi ung. 15 Na pu na pate' thillui koihkhawmna-a Laibute apan kizong leh hiai khawpi helhat hi a, tanglai apan kumpite leh gam sehkhente adinga buaihuai leh helna kipatna mun a hih lam kimu ding hi. Tua hang maha hiai khawpi hihsiat na hita ahi. Hiai khawpi kilam thakin a kulhbaangte kipuahpha thak peuhmah leh, Luipi gal gam peuhmah ah thu na nei zou kei ding chih kon hilh uhi, a chi uhi. 17 Kumpipa'n hiai dawnna a khak hi: Sepaih makai lian Rehum, laigelhpa Shimshai leh a seppih dangte uh, Samaria leh Luipi gala teengte khempeuh kiang ah lai kon gelh hi. Chibai! 18 Noute'n non laikhak uh ka mai ah a kisim a, kei pauin a kilet khia a, ka za hi. 19 Thupiak ka pia a, a kizon zon leh, tuma lamin kumpipate' douin hiai khawpi a pang a, helna leh kituamhuina kipatna ahi chih a kimu hi. Jerusalem in kumpi hattakte a nanei a, Luipi gal gam khempeuh a na uk uh a, leimante, siahte leh zuaksum mante a na dong uhi. 21 Tuin, hiai mite nasep tawp dingin thu pia un. Thu ka piak masiah hiai khawpi kilam kei hen. 22 Hiai thu limsak louha koihlou dingin pilvang un. Kumpi' makhua siatsak ding lauhuaina banghanga tung semsem ding ahia? a chi hi. Kumpipa Arteksersa' laikhak kawpi pen Rehum leh laigelhpa Shimshai leh a seppihte kianga a kisim takin, Judate dai ding leh thagum zanga nasep tawpsak dingin Jerusalem ah a kuantou pah uhi. 24 Tua bangin Persia kumpipa Daria' vaihawm kum, a kum nihna chiang dong Jerusalema Pathian' inn lam a khawl dideta mai hi.
Tempul lam Patkikna
1 Tua laiin kamsang Hagai leh Ido' suan kamsang Zekharia in Judah gam leh Jerusalema om Judate kiang ah, amaute tunga om Israel' Pathian' minin thu a gen uhi. 2 Tua khitin, Shealtiel' tapa Zerubabel leh Jozadak' tapa Jeshua a kisa uh a, Jerusalem ah Pathian inn lamkik dingin a kipan uh a, Pathian' kamsangte'n amaute a huh uhi. 3 Tua laiin Luipi gal gama ukpipa Tatenai leh Shethar Bozenai leh a seppihte uh, amaute kiang ah hong pai uh a: Hiai tempul lamkik ding leh a kulhbaangte lam dinga kua'n noute thuneihna hon pia ahia? hong chi uhi. 4 Tua baan ah: Hiai inn lam mite' min bangbang ahia chi-in a dong uhi. 5 Ahihhangin, amaute' Pathian' mit in Juda upate a veng a, Daria kianga a thu a kitut a, a dawnna a gelha a kimuh mateng amaute nasep khawlsak ahi kei hi. 6 Luipi gal gam ukpipa Tatenai leh Shethar Bozenai leh a seppihte uh tua Luipi gala uliante'n Kumpipa Daria kiang ah laikhak a gelh uhi. 7 Tua laikhak ah hibangin a kigelh hi: Kumpipa Daria kiang ah lai kon gelh uhi. Lungtang tak apan chibai! 8 Judah gam ah leh Pathian' tempul ah ka vahawh uh, chih kumpipa'n na thei lechin ka chi uhi. Tua mite'n suang lianpipi-in tua tempul a lam uh a, a kulhbaang khawng ah singzawl lianpipi a khung uhi. Taimatakin nna a sem uh a, nasep a telh mahmah uhi. 9 Tua upate thu ka dong uh a: Hiai tempul lam ding leh a kulhbaangte lamkhin dinga kuan thuneihna hon pia ahia? ka chi uhi. 10 Amaute laka makaite' min na kianga hon gelh theih nadingin a minte uh zong ka dong uhi. 11 Dawnna hon piak uh hibang ahi: Lei leh vaan Pathian' silate ka hi uh a, tang laia Israel kumpipa' thupitak khat in hiai tempul a lamkhiak a, a zawhsiang a hi a, tuin koute'n ka lamthak uh ahi. 12 Ahihhangin, ka pu ka pate un vaan Pathian a na hih thangpaih manun, ama'n Babulon kumpipa Nebukhadnezar, tua Kaldai mi khut ah amaute a na-pekhia hi. Tua kumpipa'n hiai tempul a hihsia a, amaute Babulon ah a pawmang hi. 13 Ahihhangin, Babulon kumpipa Kura' vaihawm kum, a kum khatna ah, Kumpipa Kura in Pathian' inn lamthak nading thuseh khat a bawl hi. 14 Nebukhadnezar in, Pathian' inn-a om kham leh nguna kibawl tuium belsuante, Jerusalem tempul apan a puakkhiak laka Babulon tempula a puaklutte nangawn Kumpipa Kura in tua Babulon tempul apan a lakhesak a, Sheshbazar khut ah a pesak hi. Sheshbazar bel ukpipa hi dinga bawl ahi. 15 Kumpipa Kura in amah kiang ah: Hiai tuium belsuante la inla, Jerusalema tempul ah koih inla, tua Pathian' inn a mun ngei ah kilamthak hen, a na-chi hi. 16 Tuachi-in hiai Sheshbazar hong kuan a, Jerusalem ah Pathian' inn suangphumte hong phum hi. Tua hun apan tu dongin a kilamtou zel a, ahihhangin, a kizousiang nai kei hi, a chi uhi. 17 Tuin, kumpipa' deihlam ahih leh, Babulona kumpi thillui koihkhawmna lak kipheklekin kizong hen. Kumpipa Kura in Jerusalema Pathian' inn lamthak nading thuseh na bawl taktak hiam chih kithei hen. Tua khit chiangin, hiai thu kumpipa'n a thupukna hon khak hen, chi-in a gelh uhi
Kumpipa Daria' Thuseh
1 Tua khitin, Kumpipa Daria in thupiak a pia a, Babulon kumpi thillui koihkhawmna lak phekleka zon ding, a chi hi. 2 Media gam uk ah, Ekbatana muna kumpi innpi ah laibu zial khat a kimukhia a, tua ah hibangin a na kigelh hi: Theih dinga koih. 3 Kumpipa Kura' vaihawm kum, a kum khatna ah, Kumpipa Kura in Jerualema Pathian' inn tawh kisai thuseh khat a bawl a: Kithoihnate latna mun hi dingin hiai tempul kilam thak henla, a suangphumte kiptakin kiphum hen. A sanlam tong 60, a zat lam tong 60-in kilam hen. 4 Suang lianpipi zing thum leh singzawl thak zing khat in kilam hen. Sumsen pen kumpipa' sum kizang hen. 5 Tua baan ah, Nebukhadnezar in Jerusalem tempul apan Pathian' inn tuium belsuan kham leh nguna kibawl a lak a, Babulona a puakte kipekik henla, Jerusalema tempul ah amau' mun mun ah, Pathian' inn sung ah kikoihkik hen, chi-in. 6 Tua bang ahih manin, Luipi gal gama ukpipa Tatenai leh Sethar Bozenai leh nou a seppih, Luipi gala uliante aw, tua mun apan kikangkoih un. 7 Hiai Pathian' inn lamna ah kuamah kikum kei un. Judate ukpipa leh Juda upate'n hiai Pathian' inn a mun ngei mah ah lam uhen. 8 Tua baan ah, hiai Pathian' inn lamna ah Juda makaite adinga na hih dingun hiai thuseh ka bawl ahi: Hiai nna a khawl louh nadingin sumsen khempeuh kumpipa' sum, Luipi gal gam apan siah sum kimute apan piak ahi ding ahi. Vaan Pathian' maia haltum thillat dinga kisam bawngtal tuaite, belamtalte, belampate, leh Jerusalema siampite' nget bangin huit buh, chi, grepzu leh sathau, nisima pelloua piak ding ahi. ^Tuachi-in, vaan Pathian lungkim nadinga thillatte a lat theih nading uh, kumpipa leh a tapate' hoih nadinga a thuum theih nading uh ahi ding ahi. 11 Tua baan ah, mi khatpeuh in hiai dante a khek leh, a inn apan inkam kaihkhiaka, phuhkipa, a tunga amah khailup ding ahi. A inn zong hiai banga hihsiat dimdem ding ahi, chi-in thuseh ka bawl ahi. 12 Hiai thuseh khek lamdang ding hiam, hiai Jerusalema Pathian' inn hihse ding hiama khut lik kumpi kuapeuh, ahih kei leh mi kuapeuh tua muna a min tengsakpa Pathian in hihmangthang hen. Kei Daria in hiai thuseh ka bawl a, ngenteltakin kizui suak hen, a chi hi.
Tempul Zawhsiangna
13 Tua khitin, Luipi gal gama ukpipa Tatenai leh Shethar Bozenai leh a seppihte'n Kumpipa Daria' thuseh a khak ngenteltakin a zui uhi. 14 Tuachi-in, kamsang Hagai leh Ido suan Zekharia thugenna nuai ah Juda upate'n inn a lamtou zel uh a, a lawhching uhi. Amaute'n Israel Pathian' thupiak bangin leh Persia kumpipate Kura, Daria leh Arteksersa' thusehte bangin, tempul lam a zousiangta uhi. 15 Adar kha, a ni thum ni-in hiai tempul a zousiang uhi. Tua bel, Kumpipa Daria' vaihawm kum, a kum gukna ahi. 16 Israel suan siampite, Levite leh saltangte'n lungnuamtakin hiai Pathian' inn latna a lawm uhi. 17 Hiai Pathian' inn latna adingin, bawngtal 100, belamtal 200, belamnoupa 400 a lan uh a, Israelte khempeuh adinga khelhna thillat dingin, Israel namte zahzah keltal sawmlenih zong a lan uhi. 18 Tua khitin, Jerualema Pathian' nasem dingin siampite a pawlpawlin, Levite zong amau pawlpawlin Mosi Laibu sunga kigelh bangin, a sep uhi.
Paikan Ankuang
19 A kha khatna, a ni sawm-le-li ni-in saltangte'n Paikanankuang luina a bawl uhi. 20 Siampite leh Levite kisiansuah khin ahih manun, daan banga siang ahi vekta uhi. Tua khitin, saltangte khempeuh a sanggamte uh tua siampite leh amaute adingin Paikan belamnou a gou uhi. 21 Saltanna apan hong kik Israel suante leh Tangtawn Toupa Israel Pathian' mai zong dinga a innvengte uh tua Zentelte' gamtat siangthouloute apan kituamkoihte khempeuh in tua Paikanankuang a umkhawm uhi. 22 Ni sagih sung Silngou sawhlouh Tanghou Ankuanglui lungnuamtaka lopna a nei uhi. Ahang bel, Tangtawn Toupa'n Asuria kumpipa' ngaihdan kheksak a, ama'n Pathian, Israel Pathian' inn lamna nasep huh hiven.
Jerusalema Ezra
1 Hiaite nungin, Persia Kumpipa Arteksersa' vaihawm laiin, Seraia' tapa Ezra kichi a om hi. Seraia bel Azaria' tapa ahi a, Azaria bel Hilkia' tapa ahi a, 2 Hilkia bel Shalum' tapa ahi a, Shalum bel Zadok' tapa ahi a, Zadok bel Ahitub' tapa ahi a, 3 Ahitub bel Amaria' tapa ahi a, Amaria bel Azaria' tapa ahi a, Azaria bel Meraioth' tapa ahi a, 4 Meraioth bel Buki' tapa ahi a, 5 Buki bel Abishua' tapa ahi a, Abishua bel Fineha' tapa ahi a, Fineha bel Eleazar' tapa ahi a, Eleasar lah siampi makai Aron' tapa ahi. 6 Hiai Ezra bel Babulon apan hong pai ahi. Amah, Tangtawn Toupa, Israel Pathian' piak Mosi' Dan thei mahmaha sinsakpa ahi. Tangtawn Toupa, a Pathian' khut in amah a ompih manin, a nget peuhmah kumpipa'n a pia hi. Israelte pawlkhat zong siampite, Levite, Lasate, Kongpi ngakte leh Tempul sawltawlte telin, Jerusalem ah hong paitou uhi. Tua bel, Kumpipa Arteksersa' vaihawm kum, a kum sagihna ah ahi. 8 Kumpipa' vaihawm kum, a kum sagihna, a kha ngana ah Ezra, Jerusalem hong tung hi. 9 Tua kum a kha khatna, a ni khat ni-in Babulon apan hong kipankhia a, a Pathian' hehpihna khut in amah ompih ahih manin, a kha ngana, a ni khat ni-in Jerusalem hong tung hi. 10 Ezra bel, Tangtawn Toupa' Dan suuta, zang a, Israela tua dan thusehte leh dante sinsakna-a kipumpiak a hih mana a Pathian in ompih ahi.
Kumpipa Arteksersa' Laikhak
11 Ezra kianga Kumpipa Arteksersa' laikhak kawpi hiai ahi: Ezra bel siampi lah hi, sinsakpa lah hi ahi. Amah zaw Tangtawn Toupa'n Israel adinga a thupiakte leh thusehte tawh kisaia siam mahmah ahi. 12 Arteksersa, kumpipate' kumpipa'n van Pathian' Dan sinsakpa, siampi Ezra kiang ah lai kon gelh hi. Chibai! 13 Ka thuseh hiai ahi. Ka kumpigam sunga Isaelte, siampite leh Levite zong nang tawh tona Jerusalema pai nuam peuhmah a pai thei ding uh. 14 Na khuta om Pathian' Dan tawh kisai Judah gam leh Jerusalem thu kan dingin kumpipa leh a thuhilhmi sagihte'n nang hon sawl hi. 15 Tua baan ah, Jerusalema teengpa Israel Pathian adinga kumpipa leh amah thuhilhmite'n manbeia a piak uh ngun leh khamte zong na puak ding ahi. 16 Babulon gam apan na ngah ngun leh khamte khempeuh tawh, Jerusalema om a Pathian uh inn adinga mipite leh a siampite' ut thilpiakte tawh zong na pawkhawm ding ahi. 17 Hiai sumtein bawngtalte, belamtalte leh belamnoupate, an thillatte leh dawn thillatte lei ngeingei inla, Jerusalema na Pathian tempula maitam tung ah laan in. 18 Nang leh na sanggam Judate'n na Pathian uh deihna bangbangin, pha na sak bangun tua kham leh ngun zatbangte zang un. Na Pathian un' tempula biak nadinga na khuta tui-um belsuan hong kipete khempeuh Jerusalema Pathian' mai ah a kim sipsipin pia in. 20 Thil dang, na Pathian uh' tempul adinga kisam na puak ding kul om leh kumpipa sum koihna apan na pe thei ding hi. 21 Kei Kumpipa Arteksersa in Luipi gal gama sumkemte khempeuh thu kon pia hi. Siampi Ezra, tua vaan Pathian' Dan sinsakpa' hon nget peuhmah kim sipsipin na pia un. 22 Ngun talen 100 chiang dong, huitbuh kor 100, zu bath 100, oliv thau bath 100 leh chi bikhiah zah omlouin pia un. 23 Vaan Pathian in a seh dandan, vaan Pathian' tempul adingin kihih kim sipsip hen. Banghanga kumpipa' gam leh a tapate tunga thangpaihna tung ding ahia? 4 Hiai zong na theih ding uh ahi: Siampite, Levite, Lasate, Kongpi ngakte, tempul sawltawlte, ahih kei leh, hiai Pathian' inna nasem dang kuamah tung ah leiman, siah leh zuaksum tunga siah lak theihna thuneihna na nei kei uhi. 25 Nang Ezra in zong, na Pathian' pilna na neih bangbangin na Pathian' dante thei tua Luipi gala om mite khempeuh tunga thudika vaihawm ding thukhen mite leh thubuai sai ding mite sep in. Tua Pathian' dan theiloute zong sinsak in. Na Pathian' dan leh kumpipa' danthuseh zui lou peuhmah, gawtna hiam, sawl-mangna hiam, a neih a lam suhsakna hiam, ahih kei leh, suangkula khumna hiam thuaksak teitei ding ahi, chi-in. 27 I pu i pate' Pathian Tangtawn Toupa phatin om hen. Ama'n hibanga Jeusalema Tangtawn Toupa' inn-a pahtawina tut ding lungsim kumpipa lungtanga koihpa, 28 kumpipa leh a thuhilh mite leh a uliante' maia hibang deihsakna kei hon pepa amah ahi. Tangtawn Toupa ka Pathian' khut ka tunga om ahih manin, ka kihangsansak a, kei tawh tontou dingin Israelte laka makaite ka kaikhawm hi.
Ezra tawh Ton Inkuan Lutangte
1 Kumpipa Arteksersa' vaihawm chila Babulon apan kei hon zuite laka min kikhum inkuan lutangte hiaite ahi. 2 Fineha' suante lak apan Gershom; Ithamar' suante lak apan Daniel; David' suante lak apan Hatush, 3 amah Shekania' tapate laka khat ahi; Parosh suante lak apan, Zekharia. Amah tawh minkhum khawm mi 150 ahi. 4 Pahath Moab' suante lak apan Eliehoenai. Eliehoenai bel Zerahia' tapa ahi. Amah tawh minkhum khawm mi 200 ahi. 5 Zatu' suante lak apan Shekania. Shekania bel Jahaziel' tapa ahi. Amah tawh minkhum khawm mi 300 ahi. 6 Adin' suante lak apan Ebed. Ebed bel Jonathan' tapa ahi. Amah tawh minkhum khawm mi 50 ahi. 7 Elam' suante lak apan Jeshaia. Jeshaia bel Athalia' tapa ahi. Amah tawh minkhum khawm mi 70 ahi. 8 Shefatia' suante lak apan Zebadia. Zebadia bel Mikhael' tapa ahi. Amah tawh minkhum mi 80 ahi. 9 Joab' suante lak apan Obadia. Obadia bel Jehiel' tapa ahi. Amah tawh minkhum khawm mi 218 ahi. 'Bani' suante lak apan Shelomith. Shelomith bel Josifia' tapa ahi. Amah tawh minkhum khawm mi 160 ahi. uBebai' suante lak apan Zekharia. Zekharia bel Bebai' tapa ahi. Amah tawh minkhum khawm mi 28 ahi. 12 Azgad' suante lak apan Johanan. Johanan bel Hakatan' tapa ahi. Amah tawh minkhum khawm mi 110 ahi. 13 Adonikam' suante' lak apan, a nanungpente' min Elifelet, Jeuel leh Shemaia. Amau tawh minkhum khawm mi 60 ahi. 14 Bigvai' suante lak apan Uthai leh Zakur. Amaute tawh minkhum khawm mi 70 ahi.
Jerusalema Kikna
15 Ke'n amaute, Ahava lama luang Tuilam ah ka kaikhawm a, tua mun ah ni thum sung giahphual ah ka giak uhi. Amaute leh siampite lak ka et leh Levite kuamah ka mu kei hi. 16 Tuachi-in, Eliezer, Ariel, Shemaia, Elnathan, Jarib, Elnathan, Nathan, Zekharia leh Meshulam ka samsak hi. Amaute makaite ahi uhi. Hiaite baan ah, laisiam Joiarib leh Elnathan zong ka samsak hi. 17 Amaute, Kasifia khua-a makai Ido kiang ah ka sawl a, Ido leh a behte tua Kasifia-a tempul sawltawlte tawh kianga gen ding ka hilh hi. Tua bel, i Pathian' inn-a hong sem ding mi hon sawl theih nading uh ahi. 18 I Pathian' hehpihna khut koute tunga om a hih manin, amaute'n hiai mite hon pia uhi. Israel' tapa Levi' tapa Mali' suante lak apan mi kizentak Sherebia leh Shenabia' tapate leh sanggampate a vek-un pasal sawmlegiat hon tonpih uhi. 19 Tua baan ah, Merari suante lak apan Jeshaia tawh Hashabia leh a sanggamte leh tupate a vekun mi 20 zong hon tonpih uhi. 20 Tua baan ah, tempul sawltawl mi 220 hon tonpih uhi. Amaute bel Levite huh dinga David leh a uliante'n a na sehte ahi uhi. Amaute a min minun minkhumna ah minkhum ahi uhi. 21 I Pathian' maia ka ki-ngaihniam theih nading uleh, ka tu ka tate utawh ka neih ka lam khempeuh utawh bittaka ka zinsuak theih nading ua ka thuum theih nadingin, tua Ahava Tuilam kiang ah anngolh ding ka phuang hi. 22 Lampi-a melmate apan hon veng ding kumpipa kianga sepaihte leh sakoltungtuangte nget ding ka zum hi. Ahang bel, koute'n kumpipa kianga ka Pathian uh' mai zong peuhmahte tunga a hehpihna khut om a, amah taisante tunga bel a hehna om hi, ka na chihkhit man uh ahi. 23 Tuachi-in, an ka ngawl uh a, hiai thu tawh kisaiin ka Pathian uh kiang ah ngetna ka bawl uh a, ama'n ka thuumna uh hon dawng hi. 24 Tua khitin siampi makaite lak apan sawmlehnih, Sherebia, Hashabia leh a sanggamte uh sawm khat tawh, ka sepkhia a, 25 i Pathian' inn adinga kumpipa, amah thuhilh mite, a uliante leh tua laia om Israelte khempeuh in a piak uh kham leh ngun leh thildangte, tua ka mi sehkhiakte puak dingin ka buukkhia hi. 26 Ka buukkhiak ngun sik talen 650, ngun sika bawl vante talen 100-a gik, khamsik talen 100, 27 khama bawl belkuang 20, darik 1,000 man, sumsan nawtteta kibawl kham banga manpha tuium belsuan nih ahi. 28 Amaute kiang ah: Noute leh hiai tuium belsuante Tangtawn Toupa' adinga sehtuam siangthou na hi uh ahi. Ngunte leh khamte, Tangtawn Toupa, i pu i pate' Pathian' maia ut thillat ahi. 29 Jerusalema Tangtawn Toupa inn-a inndante sunga siampi makaite leh Levite leh Israel inkuana lutangte' maia na buukkhiak mateng uh pilvangtakin hiaite kembit un, ka chi hi. 30 Tua khitin, siampite leh Levite'n Jerusalema Pathian' inn adinga ngun leh kham leh tuium belsuan siangthou kibuukkhete a sang uhi. A kha khatna, a ni sawmlenih ni-in, Jerusalem zuan dingin Ahava Tuilam apan ka kipankhia uhi. I Pathian' khut ka tung uah a om a, lampi ah, melmate leh gutate khut apan ama'n hon humbit hi. 32 Tua-chi-in, Jerusalem ka tung uh a, tua ah ni thum sung ka tawlnga uhi. 33 A ni li ni-in i Pathian' inn sung ah ngun leh kham leh tuium belsuan siangthoute, siampi Uria' tapa Meremoth khut ah ka pia uhi. Amah kiang ah Fineha' tapa Eleazar a om a, Levite, Jeshua' tapa Jozabad leh Binui' tapa Noadia zong a om uhi. 34 Bangkim a tam dan leh a gik dan a kisim sipsip a, a gikdan tua hun mahin laibu ah a kichiamteh hi. 35 Tua khitin, saltanna apan hong kik tua saltangte'n Israel Pathian' mai ah haltum thillatte a laan uhi. Israel mi khempeuh adinga bawngtal sawmlenih, khelhna thoihna thillat dingin belamtal 96, belamnoupa 77 leh keltal sawmlenih a kilaan a, a vekin Tangtawn Toupa' maia haltum thillat ahi. 36 Tua khitin, kumpipa' gam ukte leh Luipi gala ukpipate' khut ah kumpipa' thupiakte a pekhia uhi. Amaute'n Pathian' mite leh Pathian' inn lam a huh uhi.
Kitentuahna
9 Hiai thilte a kihihkhitin, makaite ka kiang ah hong pai uh a: Israel mipite, siampite leh Levite hiai gam mite apan a kikoihtuam kei uh. Kanante, Hitte, Perizte, Jebuste, Amonte, Moabte, Aiguptate leh Amorte' kihhuai gamtatte apan a kikoihtuam kei uh. Amau ading leh a tapate uh zi dingin hiai mite' tanute a pi uh a, a kim a kiang ua mite tawh nam siangthou a helkhawm uhi. Hiai tatlekna ah makaite leh vaihawmte a masain a pang uhi, hong chi uhi.
Ezra' Mangbatna
3 Ke'n hiai thu ka zak takin, ka puansilh ka botkek a, ka luzanga sam ka phaikhia a, mangbangin ka tu hi. 4 Tua phetin, sala kaihmangte' tatlekna hangin, Israel' Pathian' thu laua lingte khempeuh ka kiang ah hong kikhawm uh a, nitaklam kithoih hun dong mangbangin ka tu hi.
Pathian' Muanhuaina
5 Nitaklam kithoih hunin ka an ngolhna apan ka dingkhia a, ka puansilh leh ka puanakpi bohkeksain ka khukdin a, Tangtawn Toupa ka Pathian lama ka khutte zakin ka thuum a: 6 Ka Pathian aw, Nang ka Pathian lam hon entou dingin ka maizum lua a, ka zahlak lua hi. Ka khelhnate un ka lutung uh a khup a, ka mawhna un vaan a sunta hi. 7 Ka pu ka pate uh damlai apan tu dong ka mawh mahmah uhi. Ka khelhnate uh hangin koute, ka kumpipate uh leh ka siampite uh gamdang kumpipate' khut sunga piakkhiak ahita uh a, tuni banga namsaua thah ding, lawhgawp ding, zahlaksak dinga piak ka hi uhi. 8 Ahi a, tu'n Tangtawn Toupa ka Pathian un a sibang suakta ding hon hawisak ding leh a mun siangthoua mun kip hon pe dingin hun tomkha hehpihna hon langsak a, tua lah ka Pathian un ka mitte uh hon vaksak nading leh ka saltanna uapan hutkhiakna neukha hun hon piak nop man ahi hi. 9 Saltang himah le ung ka Pathian un hon taisan kei hi. Ama'n Persia kumpipate' mitmuh in a itsiamna hon langsak a, ka Pathian uh inn lamkhiak ding leh a siatnate puahthak dingin hinna thak hon pia hi. 10 Ahihhangin, tuin, ka Pathian uh aw, hiai teng nungin bang ka genta ding ua le? uNa thupiakte lah mang lou ung a, na sila na kamsangte tungtawnin thu non pia a: Luah dinga na lut dekna uh gam zaw a mite' tatsiatna hanga gam niin ahi. Amaute' gamtatna kihhuaitein gam mong khat apan a mong langkhat dong nitnain a dimsak uh. 12 Tua bang ahih manin, na tanute uh a tapate uh zi dingin pe kei unla, a tanute uh na tapate uh zi dingin zong pii kei un. Na hat ua gam gah hoihte na nek ua, na tate uh goutan hiden dinga na nutsiat theih nadingun, chiklai mah-in amaute tawh kilawmbawlin thu khung kei un, na chita hi. 13 Ka tung ua thil tung zaw, ka gamtat giloute uh leh ka mawhna uh lianpi gah ahi. Hinapi-in, nang ka Pathian un ka khelhnate un a thalawh sanga nem zawin non gawt a, hibangin a sibang non hawi lai hi. 14 Na thupiakte palsatin tuabang gamtat kihhuaia gamtate tawh ka kitengtuah nawn ding ua hia? A sibang khat beek hon hawi lou leh a suakta omsak lou dingin non hehsan kei dia hia? 15 Tangtawn Toupa, Israel Pathian aw, nang na diktat a, tuni-in a sibang koute non hawi ahi! Ka mawhna uh hanga na maia ding taak hi kei mah le ung, na mai ah ka mawhna utawh hiai ah ka om uhi, ka chi hi.
Israelte Khelhna Kiphuanna
1 Ezra thuuma khelhna phuanga, kapa, Pathian' Inn maia a kun laiin, Israel mipite numei pasal leh naupangte a kimkot ah hong kikhawm uh a, amaute zong nakpitakin a kap uhi. 2 Tua khitin, Elam suante laka mi khat, Jehiel' tapa Shekania in Ezra kiang ah: Ka kim ka kiang ua hiai gam mi awilou numeite zi-a neiin, Pathian tung ah ka na talekta uhi. Hinapi-in, hizahta a hih nung nangawnin Israel adingin lametna a om lai hi. 3 Tuni'n ka toupa thuhilhna banga hiai numeite leh a tate uh sawlmang dingin Pathian thupiakte lau khempeuhte'n i Pathian mai ah thukhun khat bawl ni. Dan bangbangin kihih hen. 4 Kisa in. Hiai thil nang khuta om ahi. Kon gum ding uhi. Hangsantakin om inla, hih in, a chi hi. 5 Tuachi-in, Ezra a kisa a, thilsawm banga hih dingin siampi makaite leh Levite leh Isaelte khempeuh a kichiamsak a, amaute tua bangin a kichiam uhi. 6 Tua khitin, Ezra, Pathian' inn apan a paikhia a, Eliashib' tapa Jehohanan' inndan ah a lut hi. Saltanna apan hong paite' tatlekna hanga lungkhama tua-a a om sung teng an lah a ne kei a, tui lah a dawn kei hi. 7 Tua laitakin saltang kiknawnte khempeuh Jerusalema paikhawm dingin Juda gamte leh Jerusalem ah thuphuan a kibawl hi. 8 Ni thum sunga kilang lou peuhmah in, uliante leh upate thuphuan bangbanga neih leh lam taan dinga, saltangte lak apan hawlkhiak hi ding, chih ahi. Ni thum sungin, Judah mite leh Benjaminte, Jerusalem ah a paikhawm uhi. A kha kuana, a ni 20 ni-in mi khempeuh Pathian' inn maia kongtual ah a tu uh a, hiai thu hang leh vuahpi hangin a mangbang mahmah uhi. 10 Tua khitin, siampi Ezra a dingtou a, amaute kiang ah: Noute na muanhuai kei uh a, gamdang numeite na kitenpih uh a, Israel mawhna na behlap uhi. uTuin Tangtawn Toupa, na pu na pate uh' Pathian' mai ah khelhna phuang unla, a deihlam hih un. Na kim na kiang ua mite leh na gamdang zite uapan kihemkhiain kikoihtuam un, a chi hi. 12 Kikhawmte khempeuh in aw ngaihtakin a dawng uh a: Na gen a dik ahi! Na gen bangbangin ka hih teitei ding uhi. 13 Ahihhangin, hiai ah mi tampi kipaikhawm a, vuah zuk hun lah hi a, innpua-a kiding theilou a, hiai thil ni khat ni nih sunga ki hihkhin theilou ding hi. Hiai thila khial lah tam mahmah ung a. 14 Hehpihtakin ka uliante uh mipi taangin ding uhen. Hiai thila Pathian' hehna thupi koute apan a kithaimang mateng koute' khuatea gamdang numei zi-a nei khempeuh, khawchiha upate leh thukhente tawh hun seh khat ah hong pai uhen, a chi uhi. 15 Asahel' tapa Jonathan leh Tikva' tapa Jazeia kia in hiai thu a sel uhi. Meshulam leh Shabethai in zong amaute a gum uhi. 16 Tuachi-in, saltangte' suante'n tua thusawm bangin a hih uhi. Siampi Ezra in innkuan lutangte, inkuan khata khat zel, a telkhia a, a min minun a minlawh hi. A kha sawmna, a ni khat ni-in, amaute thu kanchian dingin a tu uhi. I7 A kha khatna, a ni khat ni-in gamdang numei kitenpihte a kanchian khinta uhi.
Gamdang Numei Kitenpihte
18 Siampite' tapate, gamdang numei kitenpihte hiaite ahi hi: Jozadak' tapa Jeshua' suante leh a sanggamte lak ah:Maaseia, Eliezer, Jarib leh Gedalia. 19 Amaute'n avekun, a zite uh koihkhiak ding thuchiam a bawl uh a, mawh uh ahih manin, mawhna thillat dingin belamhon lak apan belamtal khat chiat a pia uhi. 20 Imer' suante lak ah: Hanani leh Zebadia. 21 Harim' suante lak ah: Maaseia, Elija, Shemaia, Jehiel leh Uzia. 22 Pashur' suante lak ah: Elioenai, Maaseia, Ishmael, Nathanel, Jozabad leh Elasa. 23 Levite lak ah: Jozabad, Shimei, Kelaia, Pethahia, Judah leh Eliezer. Kelaia bel Kelita ahi. 24 Lasate lak ah: Eliashib. Kongpi ngakte lak ah: Shalum, Telem leh Uri. 25 Israel dangte laka, Parosh' suante lak ah: Ramia, Izia, Malkija, Mijamin, Eleazar, Malkija leh Benaia. 26 Elam' suante lak ah: Matania, Zekharia, Jehiel, Abdi, Jeremoth leh Elija. 27 Zatu' suante lak ah: Elioenai, Eliashib, Matania, Jeremoth, Zabad leh Aziza. 28 Bebai' suante lak ah: Jehohanan, Hanania, Zabai leh Athlai. 29 Bani' suante lak ah: Meshulam, Maluk, Adaia, Jashub, Sheal leh Jeremoth. 30 Pahath Moab' suante lak ah: Adna, Kelal, Benaia, Maaseia, Matania, Bezalel, Binui leh Manase. 31 Harim' suante lak ah: Eliezer, Ishija, Malkija, Shemaia, Shimeon, 32 Benjamin, Maluk leh Shemaria. 33 Hashum' suante lak ah: Matenai, Matata, Zabad, Elifelet, Jeremai, Manase leh Shimei. 34 Bani' suante lak ah: Maadai, Amram, Uel, 35 Benaia, Bedeia, Keluhi, 36 Vania, Meremoth, Eliashib, 37 Matania, Matenai leh Jaasu. 38 Binui' suante lak ah: Shimei, 39 Shelemia, Nathan, Adaia, 40 Maknadebai, Shashai, Sharai, 41 Azarel, Shelemia, Shemaria, 42 Shalum, Amaria leh Josef. 43 Nebo' suante lak ah: Jeiel, Matithia, Zabad, Zebina, Jadai, Joel leh Benaia. 44 Hiaite khempeuh, gamdang numei kitenpihte ahi uh a, a lak ua pawlkhatte' n a zite uapan tate zong a nei uhi.
Kulhbaang Kisia Muhna
1 Hakalia' tapa Nehemia' thugente hiaite ahi: Kum 20-na, Khisleu khain, Susa innpi-a ka om laiin, hichi hong hi a, 2 ka sanggamte laka khat Hanani, mi dang pawl khat tawh Judah gam apan hong pai uhi. Ke'n amaute kiang ah sala kaih louha nutsiat, a khawsuak sun Judate tungtang thu leh Jerusalem tungtang thu ka na dong hi. 3 Amaute'n ka kiang ah: Sala kaih louha nutsiat a khawsuaksun, tua gama omlaite nakpitaka lungkham leh zahlakin a om uh. Jerusalem kulhbaang lah a kisia a, a kongpite lah mei in a kangtum hi, a chi uhi.
Nehemia Thilnget Thuumna
4 Hiai thute ka zak takin, ka tu a, ka kap hi. Ni bangzah hiam sung khasiain an ka ngawl a, van Pathian' mai ah ka thum a: 5 Tangtawn Toupa vaan Pathian, Pathian thupi leh lauhhuai, nang hon it a, na thupiakte zuite tawh kala itna thukhun pen kema muanhuaipa aw, 6 na sila in na sila Israel suante adinga tu huna a sun a zan na maia ka thumna za dingin, hehpihtakin na bil hon dawh inla, na mit hak in. Israel suante'n na tunga ka khelhnate uh ka phuang hi. Kei leh ka pa' innkawte ka na khialta uh. Na tung ah giloutakin ka na gamta uh a, na sila Mosi kianga na thupiakte, na thusehte, na dante ka zui kei uhi. 8 Na sila Mosi kianga thu pia a: Na muanhuai kei uleh, namte lak ah kon thehthang ding. 9 Ahihhangin, ka kianga nong kik uh a, ka thupiakte na zuih uleh bel, na mi saltangte kawlmong dong apan nangawnin kon kaikhawm ding a, ka min om nadinga ka teel mun kon tun ding, na chih thei gige dingin kon ngen hi. 10 Hiaite na silate ahi uh a, na vangletna lianpi leh na ban thahat-a tatsa na mite ahi uhi. uToupa aw, kon ngen ahi. Hehpihtakin, na sila ka thuumna leh na min lau ding lunggulh na silate' thuumna bil dawh inla, tuni'n hiai mipa' mitmuhin, na sila deihsakna hon pia inla, hon lawhchingsak in, ka chi hi. Kei bel kumpipa' zupepa ka hi.
Arteksersa kianga Ngetna
1 Kumpipa Arteksersa' vaihawm kum, a kum 20-na, Nisan khain, amah adinga zu hong kitawi ka la a, kumpipa ka pia hi. Tua malamin a mai ah ka dahmel ngei kei hi. 2 Tua bang ahih manin, kumpipa'n hon dong a: China lah hi lou chin a, banghanga hibanga dahmel na hia le? Hiai zaw lungtanga dahna ahi lou thei kei, a chi hi. Kei bel ka lau mahmah a, 3 ahihhangin, kumpipa kiang ah: Kumpipa dam sawt hen! Ka pu ka pate kivuina khawpi segawp a, a kongpite mei in kangtum a, banghanga dahmel lou thei ding ka hia? ka chi hi. 4 Kumpipa'n ka kiang ah: Bang na deih ale? hon chi hi. Tuachi-in, vaan Pathian kiang ah ka thuum a, 5 kumpipa kiang ah: Kumpipa'n pha na sak a, na sila in na mitmuha deihsakna ka tan leh, Judah gam ah, ka pu ka pate' kivuina khawpi ka lamthak theih nadingin hon sawl dingin kon ngen hi, ka chi hi. 6 Tua khitin, kumpipa'n a kianga kumpinu a tut laiin, ka kiang ah: Na zin sung bangtana sawt ding ahia, chik chianga hong kilehkik ding na hia? chi-in hon dong hi. Kumpipa'n hon sawl ding pha sa ahih manin, hun bikhiah ka hilh hi. 7 Tua baan ah, amah kiang ah: Kumpipa'n pha na sak leh, Luipi gal Judah gam ka tun masiah bita ka paisuak theih nadingin Luipi gal gama ukpipate' ading lai hon tawisak ve aw. 8 Tua baan ah, kumpipa' gammang ngakpa Asaf in tempul omna kulh kongpite ading, khawpi kulhbaang ading leh ka luah ding inn ading singtumte hon piak theih nadingin zong ama' lai ding hon tawisak ve aw, ka chi hi. Ka Pathian' hehpihna khut ka tunga om ahih manin, kumpipa'n ka ngette hon phalsak hi. 9 Tuachi-in, Luipi galgama ukpipate kiang ah ka hawh a, kumpipa' laite ka pia hi. Kumpipa'n sepaih makaite leh sakoltungtuang sepaihte zong kei hon zuisak hi. 10 Horon mi Sanbalat leh Amonte' ulian Tobia in hiai thu a zak takun, Israel suante' makhua khual ding mi khat hong kuan ahih manin a patau mahmah uhi.
Jerusalem Tunna leh Kulhbaang Velna
11 Tuachi-in, Jerusalem kong tung a, ni thum ka taam hi. 12 Zan laiin ka thoukhia a, mi tawmkha tawh ka kuankhia a, Jerusalema ka hih ding ka Pathian in ka lungtanga a koih bel kuamah ka hilh kei hi. Kei' tuanna loungal sakol dang zong ka keng kei hi. 13 Zan laiin, Luiphai Kongpi tawna paiin, Gulpi Tuileh leh Ek Kongpi ka tung a, Jerusalem kulhbaang kisiate leh mei katgawp Kongpite ka en hi. 14 Tua khitin, Tuikhuk Kongpi leh Kumpipa' Dil manawhin ka pai a, ahihhangin, ka sakol paisuak nading a thawlna a om kei hi. 15 Tuachi-in, zanin luiphai zuiin ka paitou a, baangte ka vel hi. Atawpin ka nungkik a, Luiphai Kongpi ah ka lut kik hi. 16 Judate kiang hita leh, siampite leh dinmun liante, uliante leh midang hiai nasem dingte kiang hita leh kuamah ka hilh nai louh manin, kumpi nasem uliante'n koia hawh a, bang hih ka hi hiam, chih a thei kei uhi.
Nehemia' Hanthawnna
17 Tua khitin, amaute kiang ah: I dinmun siat dan na mu uhi. Jerusalem segawpin a om a, a Kongpite mei in a kangtum hi. Kisa ni-in, Jerusalem kulhbaang lamkik ni-in, zahlakin om nawn kei ni, ka chi hi. 18 Tua baan ah, ka tunga ka Pathian' hehpihna khut a om dan leh kumpipa'n ka kianga a thugen zong amaute ka hilh hi. Amaute'n hon dawng uh a: Kisa ni-in, kulhbaang lam ni, a chi uhi. Tuachi-in, hiai nahoih sem dingin a khutte uh a hatsak uhi.
Melmate' Dawnna
19 Ahihhangin, Horon mi Sanbalat leh Amonte' ulian Tobia leh Arab mi Geshem in hiai thu a zak takun, koute hon enghou in hon nuihsan uh a, hon simmawhbawl uh a: Bang hih na mai ua? Kumpipa tunga hel dek na hi umaw? hon chi uhi. 20 Ke'n amaute ka dawng a: Vaan Pathian in koute hon lawhchingsak ding ahi. Ama' sila koute kipanta ding a, kulhbaang lam thakta ding ka hi uh, noute'n bel Jerusalem ah tan na nei kei uh, noua na chih theih uh zong na nei kei uh, hamphatna phut theih zong na nei kei uh, ka chi hi.
Kulhbaang Lamte
1 Siampilian Eliashib leh a siampi hihpih a sanggamte a kipan uh a, Belam Kongpi a lam thak uhi. A latna a bawl uh a, a kongkhakte a bulh uhi. Hamea Innsang kichi dong a lam uh a, a latna a bawl uh a, tua khitin, Hananel Innsang dong a lam uhi. 2 Eliashib baan zomin Jerikhote'n kulhbaang a lam uh a, amaute baan ah Imri' tapa Zakur in a lam hi. 3 Hasenaa' tate'n Ngasa Kongpi a lam uhi. A zawlpite a khung uh a, a kongkhakte a bawl uh a, tholhthawh kong kalhnate leh a kaihna zawlsaute a bulh uhi. 4 Uria' tapa Meremoth in a baan a puahpha hi. Uria bel Hakoz' tapa ahi. Tua zomin Berekia' tapa Meshulam in a puahpha hi. Berekia bel Meshezabel' tapa ahi. Tua zomin Baana' tapa Zadok in a puahpha hi. 5 A baan ah, Tekoate'n a puahpha uh a, ahihhangin, a dinmun lian neite un amaute' enkaite nuai ah a sem nuam kei uhi. 6 Pasea' tapa Joiada leh Besodeia' tapa Meshulam in Kongpi Lui a puahpha uh a, a zawlpite khungin, a kongkhakte a bawl uh a, tholhthawh a kalhnate leh a kaihna zawlsaute a bulh uhi. 7 Amaute baan ah Gibeon leh Mizpa apan mite'n a puahpha uhi. Amaute bel Gibeon mi Melatia leh Meronoth mi Jadon ahi uhi. A puahphatna uh bel, Luipi gal gam ukpipa' thuneihna nuaia kikoihna munte ahi. 8 Harhaia' tapa Uziel, khamsiksekte laka khat in a baan a puahpha hi. Gimnamtui bawl mi khat Hanania in tua baan a puahpha hi. Amaute'n Kulhbaang Zapi dongin Jerusalem a tung ding thakta uhi. 9 Hur' tapa Refaia, Jerusalem sehkhen khat ukpa in a baan a puahpha hi. 10 Hiai tawh kizomin, Harumaf' tapa Jedaia in a inn baang zawn a puahpha a, Hashabneia' tapa Hatush in tua baan a puahpha hi. nHarim' tapa Malkhija leh Pahath Moab' tapa Hashub in mun dang leh Thukkhuk Innsang a puahpha uhi. 12 Halohesh' tapa Shalum, Jerusalem sehkhen kim khat ukpa in a baan a puahpha a, a tanute'n a huh uhi. 13 Hanun leh Zanoa khua-a teengte'n Luiphai Kongpi a puahpha uhi. A lamthak uh a, a kongkhakte a bawl uh a, tholhthawh a kalhnate leh a kaihna zawlte a bulh uhi. Ek Kongpi dong, kulhbaang tong 1,000 dong a puahpha uhi. 14 Rekab' tapa Malkhija, Beth Hakerem gam sehkhen ukpa in Ek Kongpi a puahpha a, a lam a, a kongkhakte a bawl a, tholhthawh a kalhnate leh a kaihna zawlte a bulh hi. 15 Kol Hoze' tapa Shalum, Mizpa gam sehkhen khat ukpa in Tuikhuk Kongpi a puahpha a, a lam a, a kongkhakte a bawl a, tholhthawh a kalhnate leh a kaihna zawlte a bulh hi. Ama'n Kumpipa' Huan geia Shilo Dil kulhbaang zong a puahpha a, David Khawpi apan chialdawh paisuk dong a puahpha hi. 16 Amah baan ah, Azbuk' tapa Nehemia, Beth Zur gam sehkhen kimkhat ukpa in David' hante zawn dong leh bawltawm dil leh Mihatkhawkhengte Inn tan dong a puahpha hi. 17 Amah baan ah, Bani' tapa Rehum makaihin Levite'n kulhbaang a puahpha uhi. Amah baan ah, Keila' gam sehkhen ukpa Hashabia in ama' gam sehkhen sung a puahpha hi. 8 Amah baan ah, Henadad' tapa Bavai, Keila gam sehkhen kimkhat dang ukpa makaihin a tanaute un kulhbaang a puahpha uhi. 19 Amah baan ah, Jeshua' tapa Ezer, Mizpa ukpa in galvan koihna paitouhna zawn apan a kiu dong a puahpha hi. 20 Zabai' tapa Baruk in phatuamngaitakin tua kiu apan siampilian Eliashib' inn kongkhak dong, kulhbaang sehkhen dang khat a puahpha hi. 21 Amah baan ah, Uria' tapa Meremoth in sehkhen dang, Eliashib inn kongkhak apan tua inn tawp dong a puahpha hi. Uria bel Hakoz' tapa ahi. 22 Tua baan ah, tua kim gama siampite'n a puahpha uhi.23 Amaute baan ah, Benjamin leh Hashub in amau' inn zawn a puahpha uh a, amaute baan ah, Maasaia' tapa Azaria in ama' inn kiang a puahpha hi. Maasaia bel Anania' tapa ahi. 24 Amah baan ah, Henadad' tapa Binui in Azaria inn apan a kawipatna kiu dong, sehkhen khat a puahpha a, 25 tua chiangin, Uzai' tapa Palal in tua baang kiu leh Galvilmite' inntual kianga innpi saknunga innsang dawkkhia zawn apan a sem hi. Amah baan ah, Parosh' tapa Pedaia leh 26 tempul sawltawlte, tua Of el muala teengte'n suahlama Tui Kongpi leh innsang dawkkhia zawn apan a puahpha uhi. 27 Amaute baan ah, Tekoa khua mite'n innsang dawkkhia thupi apan Ofel baang dong, sehkhen khat a puahpha uhi. 28 Siampite'n Sakol Kongpi tung apan, amau' inn zawn tek a puahpha uhi. 29 Amaute baan ah, Imer' tapa Zadok in ama' inn zawn a puahpha hi. Ama baan ah, Suahlam Kongpi ngakpa, Shekonia' tapa Shemaia in a puahpha hi. 30 Ama baan ah, Shelemia' tapa Hanania leh Zalaf tapa gukna Hanun in sehkhen khat a puahpha uhi. Amaute baan ah, Berekia' tapa Meshulam in ama' tapa' inn dan zawn a puahpha hi. 31 Ama baan ah, khamsiksekte laka khat tapa Malkhija in tempul sawltawlte leh sumsinmite' inn zawn Mipkad Kongpi dong leh a kiu a inndan tungnung chiang dong a puahpha hi. 2 Tua a kiua inndan tungnung leh Belam Kongpi kikal bel khamsiksekte leh sumsinmite'n a puahpha uhi.
Simmawhbawlna zanga Dal Tupna
1 Ahihhangin, hichi hong hi a, kulhbaang a kilamthak chih Sanbalat in a theih takin, a heh a, a lung a sou hi. Judate a simmawhbawl a, 2 a seppihte khempeuh' mai ah leh Samaria sepaihhonte mai' ah: Hiai Juda zawngkhalte'n bang ahia a hih uh? A kulhbaang uh kia lamthak ding uhia? Kithoihnate laan ding uhia? Ni khat sunga lamkhin ding uhia? Hiaia baang gawpsa, a kanggawpsa suang kivumte apan suangte thaksak thei ding uhia? a chi hi. 3 Ama' kianga ding tua Amon mi Tobia in: A lamsate uah, sihal nangawn va kaltou leh a suangbaangte uh a sikchimta ke! a chi hi. 4 Tuachi-in Pathian kiang ah ka toukou a: Ka Pathian uh aw, hon za in, simmawha om hi ung. Hon mawkbawlna uh amaute lutung tusak in. Saltanna gama gallak sumte bangin amaute pekhia in. 5 A mawhna uh khuh kenla, na mitmuhin a khelhnate uh nulmang ken, ahang bel, kulhbaang lamte' mitmuha nang hon tawngheh uh ahi, ka chi hi. 6 Kulhbaang lamte'n lungtang khempeuh tawh nna sem ahih manun, kulhbaang khempeuh a saanna kim chiang tan ka tun uhi.
Thaguma Dal Tupna
7 Hichi hong hi a, Sanbalat, Tobia, Arabte, Amonte leh Ashdodte'n Jerusalem kulhbaangte a kilamthak a, a vangte a kihubit panta, chih a zak takun, a heh mahmah uhi. 8 Hong kuan a, Jerusalem hong dou a, buaina tunsak ding a sawm uhi. 9 Ahihhangin, ka Pathian uh mai ah ka thuum uh a, amaute hangin, amaute nang dingin galvilmite a sun a zanin ka dingsak uhi.
Lungkiaksakna Zanga Dal Tupna
10 Tua sungin Judah gama mite'n: Vanse nawnte' hatna lah bahta, vansesate lah tam lua a, kulhbaang lam thei lou hi ung, a chi uhi. nKa melmate un zong: A phawk maun, eite hon muh maun, amaute lak i tung ding a, amaute i that ding a, hiai nasep i tawpsak ding, a chi uhi. 12 Amaute kima teeng Judate hong pai uh a, sawmvei tak tuate mah hon hilh uh a: Non kiheisanna lamlam uah koute hon dou ding uh ahi, hong chi uhi. 13 Tua bang ahih manin, ke'n a niamna, a muanhuai louhna mun awngte liah ah innkuan kuanin, namsaute, teipite leh thalte tawiin mi ka koih hi. 14 Tua banga ka et kimvel khitin, ka dingtou a, dinmun liante, uliante leh midangte kiang ah: Amaute lau peuhmah kei un. A thupi leh a lauhhuai mahmahpa Toupa thei gige unla, na sanggamte uh, na tapate uh leh na tanute uh, na zite uh leh na innte uh huin gal dou un, ka chi hi. 15 Ka melmate un a thil sawm uh ka phawk uh, chih leh Pathian in a thil sawm uh a lawhsamsak, chih a zak takun, ka vekun kulhbaang ah kong kik uh a, michih in a nna a sem kik uhi. 16 Tua ni apanin ka mite a kimkhat in nna a sem uh a, a kimkhat bel teipite, lumte, thalte leh ganvantein a kivan uhi. Uliante bel kulhbaang lam Judah mite khempeuh nung ah a ding uhi. 17 Vanzat ding pua khempeuh in khut langkhata galvan tawiin khut langkhatin nna a sem uh a, 18 kulhbaang lamte khempeuh in a pang uah a namsau uh a kuah chiat uhi. Pengkul mutpa bel ka kiang ah a om gige hi. 19 Tua khitin, dinmun liante, uliante leh midangte khempeuh kiang ah: Ma a za a, nna a kizalh a, eite kulhbaang tung ah gamlapipi-in i kihal uhi. 20 Pengkul ging na zak peuhpeuh chiangun, pengkul ginna koute kiang hon naihkhawm un. I Pathian in ei adinga hon dousak ding ahi, ka chi hi. 21 Tua bangin, mi a kimkhatte'n teipi tawi kawmin zing phalvak apan aksi suah dong tua nna ka sem uhi. 22 Tua lai mahin, mite kiang ah: Zan chiangin, pasal kuapeuh, amah huhpa tawh, Jerusalem khaw sung ah om hen, zan kala koute hon veng ding leh sun chianga nasem ding ahi ding uh, chi-in zong ka gen hi. 23 Kei hita leng, ka mite hita leh, ka kianga vengmite hita leh, kuama'n puansilh ka suah kei uh a, michih in galvan ka tawi chiat uh a, tuikhuka hawh nangawn in galvan a tawi uhi.
Laksuhna zanga Dal Tupna
1 Tua laiin, mipite leh a zite uh, a Juda-pihte uh tung ah nakpitakin hong phun uhi. 2 Pawl khat in: Koute leh ka tapate uh leh ka tanute uh tampi ka pha uh a, ne-a ka hin theih nading un buh-le-bal ka ngah ding uh ahi, a chi uhi. 3 Midangte'n lah: Kial sunga puktawk nadinga ka loute uh, ka grephuante uh leh ka innte uh na banda khinta ka hi uh, a chi uhi. 4 Midang pawlkhatte leuleu in lah: Ka loute uh leh ka grephuante uh tunga leiman kumpipa ka piak theih nading ua sum na leitawi ka hi uh. 5 Gam sung mite tawh chi khat sa khat hinapi, ka tapate uh zong amaute' tapate bangbang hinapi, tu-a koute ka tapate uleh ka tanute uh suak leh sal banga ka omsak teitei uh kul se a, ka tanute uh pawl khat bang sala tangkhin taktak uhi, a chi uhi. Midangte'n: Ka loute uh leh ka grephuante uh midangtea suakkhin a hih chianga, ka tanute uh tatkhiak nading hih theihna neilou hi ung, a chi uhi. 6 A kihouna uh leh a ngawhna thute uh ka zak takin, ka heh mahmah hi. 7 Lungsung ah ka ngaihtuah tuah a, dinmun liante leh uliante ka taai a, amaute kiang ah: Na chi na sate uh tunga a kaan a vala sumpung ne tek na hi uh! ka chi hi. Amaute ngawhna thu ngaihtuah dingin kikhopna lianpi ka sam a, amaute kiang ah: 8 Namte laka khotkhiaksa i Juda-pihte, ahi thei tan a, piikik hang a, tu-a na sanggamte uh eite kianga hon zuak kik nading ua noute'n zuakkhe ding maw! ka chi hi. Amaute gen ding thei louin a dai dide uhi. 9 Amaute kiang ah: Na thil hih uh dik lou ahi. Namdang i melmate' simmawhna i pelh nadinga Pathian lau kawma na gamtat ding uh hilou maw? 10 Kei leh ka sanggamte leh ka mite'n zong mite kianga sumtang leh buh-leh-bal leitawisak sam ka kei ua. Ahihhangin, hiai a kaan a vala sumpung nek beisak mahmah ve ni aw! 11 A loute uh, a grephuante uh, a oliv kungte uh leh a innte uh leh a kaan a vai sumpung na lakte uh tuni-in, tuin, tuni mahmahin pekik pah un. Sumtang, buh, zuthak leh sathau na laksakte uh tung ah seh zakhata khen seh khat zel behlapin pia un, ka chi lai hi. 12 Amaute'n: Ka pe kik ding uh. Amaute apan bangmah ka ngiat nawn kei ding uh. Na gen bangin ka hih ding uh, a chi uhi.
Nehemia' Thilhih Hoih
Tua khitin, ke'n siampite ka sam a, dinmun liante leh uliante a thuchiam uh tangtun dingin siampite' mai ah ka kichiamsak hi. 13 Tua baan ah, ka puanakpi khepte ka singsiang a: A thuchiam tangtunlou mi peuhmah Pathian in hibangin kungsin henla, a inn a lou, a neih a lam khuahsiang vek hen. Ahi, tua bang mi kungsinin om henla, vuaksuak hen! ka chi hi. Tua kikhawmte'n: Amen! a chi uh a, Tangtawn Toupa a phat uhi. Tuachi-in mipite'n a thuchiam bangun a hihta uhi. 14 Tua baan ah, Kumpipa Arteksersa' vaihawm kum, a kum 20-na ah, Judah gama ukpipa hi dinga seha ka om lai apan hiai a kum 32-na dong, kum sawm leh nih sung, kei leh ka sanggamte kuamah in ukpipa tan dinga seh an ka ne kei uhi. 1 Ahihhangin, ukpipa masa, kei ma-a om masate'n mipite tung ah puakgik a na guan uh a, tua baan ah, amaute apanin an leh zu baan ah, sum shekel 40 zel a la uhi. A silate uh zong mipite tung ah a na kiliansak mahmah uhi. Ke'n zaw Pathian zahtakin tua bangin ka hih kei hi. 16 Tua naksangin, hiai kulhbaang lamna ah ka kipumpiak hi. Gam himhim ka lei kei uh a, ka mite khempeuh tua nasepna ah a kikaikhawm zaw uhi. 17 Tua baan ah, Juda mi 150 leh uliante leh ka kim ka kiang ua namte lak apan koute kianga hong paite'n zong ka ankuang a um uhi. 8 Nisimin bawngtal khat, belam thau guk leh ak bangzah hiam kei adingin a kigou a, ni sawm danin zu nam tuamtuam kichingtakin hong kipia hi. Hitengpi hinapi-in, mipite tunggik a hih manin, ken ukpipa adinga sehsa an ka ngiat ngei kei hi. 19 Ka Pathian aw, hiai mite adinga ka thil hihte khempeuh hangin, deihsakna tawh kei hon thei gige in.
Kilempihna zanga Dal Tupna
1 Tua hunin, kongpite ah kongkhakte bulh nai kei mah leng, kulhbaang lam ka zouta a, awngvang a om nawn kei, chih thu Sanbalat, Tobia, Arab mi Geshem leh ka meima dang khempeuhte uh kiang a tun takin, 2 Sanbalat leh Geshem in thu hon khak uh a: Hong pai inla, Ono phaizanga khua khat ah kimu ni, a chi uhi, Ahihhangin, kei hon suksiat sawm ahi uh a, 3 amaute kiang ah mi ka sawla: Na thupitak sem ka hi a, kong paisuk thei kei. Hiai nna nusia-a noute kianga kong paisuk kala banghanga nasep khawl ding ahia? chi-in thu ka pawsak hi. 4 Livei tak thu kibang hon khak uh a, hon khak teng-un dawnna kibang ka pia hi. Tua khitin, a ngaveina dingin, Sanbalat in ama' silapa, thu kibang mah pua-in ka kiang ah hon sawl a, a khut ah laikhak honsa hon tawi hi. 6 Tua laikhak ah: Namte lak ah thu a thang a, Geshem in a dik ahi, a chi hi. Tua bel, nang leh Judate'n hel na sawm man ua kulhbaang lamlam na hi uh. Tuachi-a amaute' kumpipa-a na pan theih nading ahi. Judah gam ah kumpipa khat a om, chi-a Jerusalema nangmah tungtang thu phuang ding kamsangte nangawn septa na hi. Tua bang ahih manin, hong pai inla, thu kikum ve ni, chi-in a kigelh hi. 8 Ke'n hiai dawnna ka khak a: Na gen bang thu bangmah om lou ahi. Na lungsunga na phuahtawm thu hi lei ahi, ka chi hi. 9 Ahang bel, amaute khempeuh in koute hon suklau sawma hibanga hih ahi uh a: Nasem dingin a khutte uh hong zawngkhal ding a, kulhbaang a kilamkhin kei ding, chi-a ngaihtuah ahi uhi. Ahihhangin, ka thuum a: Pathian aw, tu'n ka khutte hatsak in, ka chi hi. 10 Ni khat, Delaia' tapa Shemaia' inn ah ka vahawh hi. Delaia bel Mehetabel' tapa ahi. Shemaia bel kong kikhakkhum in a om a: Pathian' inn ah, tempul sung ah kimu ni. Ahang bel, nang that ding mi hong kuan ding ahi uh. Nang that dinga zana hong kuan ding uh ahih manin tempul kongkhakte kikhakkhum ni, a chi hi. 11 Ahihhangin, ke'n: Kei bang mi, lauin a taai dia hia? Ka hinna humbit dinga tempul sunga bu ding kua ka hia? Kong pai peuhmah kei ding! ka chi hi. 1 Ngai dih uh, amah Pathian sawl hi louin, Tobia leh Sanbalat in a guai ua, ka siat nadinga thu genkhol ahi zaw, chih ka phawk hi. Hon lausak a, hiai thil hiha ka khelh theih nading leh hon hihminsiat ua, hon simmawh theih nading ua goiha om a na hi hi. 14 Tuachi-in ka thuum a: Ka Pathian aw, a thil hih manun Tobia leh Sanbalat thei gige in. Kei hon lausak sawm kamsangnu Noadia leh kamsang dangte zong thei gige in, ka chi hi.
Kulhbaang Lamkhitna
15 Tuachi-in, Eluf kha, ni 25 ni-in, kulhbaang a kilamkhin siang hi. Tua bel, ni 52 sunga kizou ahi. 16 Ka melmate un hiai thu a zak takun leh hiai nna ka zouta uh, chih ka kim ka kiang ua namte khempeuh in a muh takun, ka Pathian uh thilhih ahi, chih a thei uh a, amau' kimuanna a mansuahta uhi. 17 Tua lou zong, tua hun laia Judah gama dinmun liante'n Tobia kianga laikhakte na-khak khak uh ahi a, Tobia apan dawnnate amau kiang tungtung mai ahi. 18 Ahang bel, Tobia lah Ara' tupa Shekania adingin makpapa ahi a, tua baan ah, Tobia' tapa Jehohanan in Meshulam' tanu a na kitenpih a, Meshulam lah Berekia' tapa ahi a, Judah gama mi tampite Tobia' maia kichiamna a kihenkhin a na hi uhi. 19 Tua tham louin, amaute'n Tobia' nasep hoihte ka kiang ah a gengen uh a, kei' thugen zong amah a na hilh zel dan uh ahi. Tua bang maha Tobia in kei hon lausak dinga laikhakte hon khakkhak na hi ahi.
Jerusalem Kipuakdan
1 Kulhbaang a kilamkhit a, kongkhakte a munmuna ka tunkhitin, kongpi ngakte, lasate leh Levite a kisep hi. Jerusalem ukna nna ka sanggampa Hanani ka guan a, amah tawh kitonin Hanania, kulh veeng makaipa zong mi muanhuai leh midang teng sanga Pathian laudansiam a hih manin, ukna nna ka guan hi. 3 Amaute kiang ah: Ni a san mateng Jerusalem kongpite hon louh ding ahi. Kongpi ngakte'n kongpi a ngak lai teng uh kongpite khaksa leh kalhsa-a koih ding ahi. Jerusalema teengte zong galvilmi-in sep unla, pawlkhatte amau' mun dinga sehna ah, pawl khatte amau inn kiang tek ah pang uhen, ka chi hi.
Kaihmanga om Hongkikte
4 Khawpi a lian a, a za hi. Ahihhangin, a sunga teeng a tawm a, innte zong a kilam thak nai kei hi. 5 Tuachi-in, dinmun liante leh mi nautangte innkuan kuana min khum dinga kaihkhawm ding, ka Pathian in ka lungtang ah hon koihsak hi. Saltanna apan hong kik masate' khang suina bu ka mukhia a, tua-a kigelh hibang ahi: 6 Babulon kumpipa Nebukhadnezer in sala a kaihmang, saltanna apan hong kik hiai Judah gam sehkhena om hiaite ahi. Amaute Jerusalem leh Judah gam ah, amau khua tek ah hong kik uhi. 7 Amaute bel, Jerubabel, Jeshua, Nehemia, Azaria, Raamia, Nahamani, Mordekai, Bilshan, Mispereth, Bigvai, Nehum leh Baana tawh hong ton ahi uhi.
Israel pasalte
Israel pasalte: 8 Parosh suante 2,172; 9 Shefatia suante 372; 10 Ara suante 652; 11 Jeshua leh Joab khanggui apan Pahath Moab suante 2,818; 12 Elam suante 1,254; 13 Zatu suante 845; 14 Zakai suante 760; 15 Binui suante 648; 16 Bebai suante 628; 17 Azgad suante 2,322; 18 Adonikam suante 667; 19 Bigvai suante 2,067; 20 Adin suante 655; 21 Hezekia khangguia Ater suante 98; 22 Hashum suante 328; 23 Bezai suante 324; 24 Harif suante 112; 25 Gibeon suante 95. 26 Bethlehem leh Netofa mite 188; 27 Anathot mite 128; 28 Beth Azmaveth mite 42; 29 Kiriath Jearim, Kefira leh Beereth mite 743; 30 Rama leh Geba mite 621; 31 Mikma mite 122; 32 Bethel leh Ai mite 123; 33 Nebo dang khat mite 52; 34 Elam dang khat mite 1,254 ; 35 Harim mite 320; 36 Jerikho mite 345; 37 Lod, Hadid leh Ono mite 721; 38 Senaa mite 3,930;
Siampite
39 Siampite: Jeshua khanggui apan Jedaia suante 973; 40 Imer suante 1,052; 41 Pashur suante 1,247; 42 Harim suante 1,017.
Levite
43 Levite: Kadmiel leh Hodavia khanggui apan Jeshua suante 74.
Lasate
44 Lasate: Asaf suante 148.
Kongpi Ngakte
45 Kongpi ngakte: Shalum, Ater, Talmon, Akub, Hatita leh Shobai suante 138.
Tempul Sawltawlte
46 Tempul sawltawlte: Ziha, Hasufa, Tabaoth suante, 47 Keros, Sia, Padon suante, 48 Lebena, Hagaba, Shalmai suante, 49 Hanan, Gidel, Gahar suante, 50 Reaia, Rezin, Nekoda suante, 51 Gazam, Uzza, Pasea suante, 52 Besai, Mewiim, Nefiisim suante, 53 Bakbuk, Hakufa, Harhur suante, 54 Bazluth, Mehida, Hasha suante, 55 Barkos, Sisera, Tema suante, 56 Nezia leh Hatipa' suante, 57 Solomon' silate' suante: Sotai, Sofereth, Perida, 58 Jaala, Darkon, Gidel, 59 Shefatia, Hatil, Pokereth Nazebaim leh Amon suante. 60 Tempul sawltawlte leh Solomon' silate suante 392. 61 Tel Mela, Tel Harsha, Kerub, Adon leh Imer khawpite apan hong paitou, ahihanga amaute Israel suan a hihna uh lak thei lou hiaite ahi: 62 Delaia, Tobia leh Nekoda suante 642. 63 Siampite lak apan in Hobaia, Hakoz leh Barzilai suante ahi uh. Hiai Barzilai bel, mi khat, Gilead mi Barzilai' tanu kitenpihpa, tua mina kilou ahi. 64 Hiai mite'n amau beh khangthu gelhna laibu a zong uh a, ahihhangin, a mu zou kei uhi. Tua hangin, a siang lou banga siampite apan pawsiah ahi uhi. 65 Tua bang ahih manin, ukpipa'n amaute, Urim leh Thumin zanga siampi nasem a hih mateng uh a zek an siangthou ne lou dingin a kham hi. 66 A vekpiun 42,360 ahi uh a, 67 a sila pasalte uh leh sila numeite uh 7,337 sim louhin ahi lai. Amaute'n pasal leh numei lasate 245 zong a nei uhi. 68 Sakol 736, sabiltung 245, 69 sangawngsau 435 leh sakol neu 6,720 a pha hi. 70 Beh tuulpite pawl khat in nasep nadinga thawh a nei uhi. Ukpipa'n sumkoihna ah kham drakma' 1,000, belkuang 50 leh siampi puansilh 530 a pia hi. 71 Beh tuulpi pawl khat in nasep nadingin sum koihna ah kham drakma 20,000, ngun mina 2,200 a pia uhi. 72 Midangte' piak kigawmkhawm kham drakma 20,000, ngun mina 2,000, leh siampi puansilh 67 a pha hi. 73 Siampite, Levite, kongpi ngakte, lasate leh midang pawlkhat leh tempul sawltawlte bel, midang pawl khat tawh Israel dangte tawh, amau' khawpi tek ah a teengta uhi. Kha sagihna hong hihin, Israelte khempeuh amau' khawpi tek ah a tengkipta uhi.
Dan Simkhiakna
1 Tui Kongpi maia mun awng ah mipite khempeuh mi khat bang maiin a kikhawm uh a, laigelhpa Ezra kiang ah, Tangtawn Toupa'n Israelte adinga a piak Mosi' Dan Laibu hon lakhe dingin a hilh uhi. 2 Tuachi-in, kha sagihna, a ni khat ni-in, siampi Ezra in kikhawmte' mai ah Dan Laibu hon tawi hi. Tua kikhawmte bel numei pasal dan theisiam thei dingte ahi uhi. 3 Ama'n zingsang phalvak apan sun dong tua Tui Kongpi maia mun awng lam ngain, numeite leh pasalte leh a theisiam theite' mai ah ngaihtakin a simkhia a, mite khempeuh in Dan Laibu lungluttakin bil a dawh uhi. Laigelhpa Ezra bel tua hun adinga sing kidawh tau tung ah a ding hi. A taklam ah Matithia, Shema, Anaia, Uria, Hilkia leh Maaseia a ding uh a, a veilam ah Pedaia, Mishael, Malkija, Hashum, Hashbadana, Zekharia leh Meshulam a ding uhi. 5 Ezra in tua laibu a phen a, amaute sanga sang zaw-a ding ahih manin, mite khempeuh in amah a mu thei uhi. Ama'n tua laibu a phen takin, mipite khempeuh a dingtou uhi. 6 Ezra in Tangtawn Toupa, tua Pathian thupi a phat a, mipite khempeuh in khut liktouin: Amen! Amen! chi-in a dawng uhi. Tua khitin, a kunsuk uh a, maia lei si-in Tangtawn Toupa a bia uhi. 7 Jeshua, Bani, Sherebia, Jamin, Akub, Shabethai, Hodia, Maaseia, Kelita, Azaria, Jozabad, Hanan, Pelaia leh Levi dangte'n mipite tua banga a din laiun, Dan a sinsak uhi. Amaute'n Pathian' Dan Laibu apan kiteltakin a sim uh a, a gente mipite a theisiamsak uhi.
Dan Theihsiamna Lopna
9 Tua khitin, ukpipa Nehemia leh siampi leh laigelhpa Ezra leh mipite sinsaka ding Levite'n mipite khempeuh kiang ah: Tuni Tangtawn Toupa na Pathian uh adinga ni zek siangthou ahi. Dah kei unla, kap kei un, a chi uhi. Ahang bel, Dan thute a ngaihkhiak laiun mipite khempeuh a kap ua ahi. 10 Nehemia in: Pai unla, an limlim ne unla, a khumkhum dawn unla, a huanloute zong khol un. Tuni i Toupa adinga ni zek siangthou ahi. Khase kei un, ahang bel, Tangtawn Toupa' lungnopna mah noute' thahatna hiven, a chi hi. 11 Levite'n mipite khempeuh a neem uh a: Dai un. Tuni ni zek siangthou ahi. Khase kei un, a chi uh a, a daaisak uhi. 12 Tua khitin, mipite khempeuh ne ding leh dawn dingin, kikholtuah ding leh, lungnuamtaka vualnuam dingin a paita uhi. Ahang bel, amaute kianga kitheisak thute a theisiamta ua ahi. 13 Tua kha, a ni nih ni-in beh tuulpite khempeuh, siampite leh Levite tawh, laigelhpa Ezra kiim ah Dan thute sinsaka om dingin a paikhawm uhi. 14 A kha sagihna ankuanglui sungin Israelte bawkta ahte a teen ding uh ahi, chi-a Tangtawn Toupa'n Mosi tungtawna a thupiak tua Dan sung ah a kigelh chih a mukhia uhi. 15 Tua baan ah: Tanggam ahte kuan unla, bawkta lam nadingin oliv singhiangte, gamlak oliv hiangte, martil sing hiangte, tum tehte, sawlbawkphate hon pua un, chi-a a khuate uh leh Jerusalem ah thu phuang zak un, chi-a kigelh ahi, chih zong a mukhia uhi. 16 Tuachi-in, mite a kuankhia uh a, singhiangte hon puain, amau' inntung tek ah, amau huang kongtual tek ah, ahih kei leh Pathian' inn huang kongtual ah leh, Tui Kongpi maia mun awng ah leh Efraim Kongpi kianga mun awng ah bawktate a kilam uhi. 17 Saltanna-a kaihmanga a omna uh pana kikte'n avekpiun bawktate a lam uh a, tua ah a teeng uhi. Nun' tapa Joshua damlai apan tua ni dong, Israelte'n tua bangin, tua ankuanglui a um ngei kei uhi. A lungnopna uh a lian mahmah mai hi. Nisimin, ni masapen apan a nunung dong, Ezra in Pathian' Dan Laibu apan a sim hi. Amaute'n ni sagih sung tua ankuanglui a um uh a, thupiak bangin, a ni giat ni-in khawmpi khat a om hi.
Khelhna Phuanna
9 Tua kha mah, a ni 24 ni-in, Israelte an-ngawl leh saiip puan silh-in leh luzang leivui kibuakin hong paikhawm uhi. 2 Israel suante gamdang mite khempeuh apan a kikoihtuam uh a, dingin a khelhnate uh leh a pu a pate uh' gitlouhna a phuang uhi. 3 A omna mun tek uah a ding uh a, ni khat sehli suah sehkhat sung Tangtawn Toupa a Pathian uh' Dan Laibu simnain a zang uh a, seh li suah seh khat sung dang Tangtawn Toupa a Pathian uh maia khelhna phuanna leh biaknain a zang uhi. Levite Jeshua, Bani, Kadmiel, Shebania, Buni, Sherebia, Bani, leh Kenani bel kelleitea dingin aw ngaihtakin Tangtawn Toupa a Pathian uh a sam uhi. 5 Tua baan ah, Levite Jeshua, Kadmiel, Bani, Hashabneia, Sherebia, Hodia, Shebania leh Pethahia in mipite kiang ah: Dingtou unla, Tangtawn apan Tangtawn donga Ompa, Tangtawn Toupa na Pathian uh phat unla: Na min thupi phatin om hen. Phatna leh pahtawina khempeuh' tunglam pek ah na min thupi phatin om hen. 6 Nang kia Tangtawn Toupa na hi, nang lei leh vaan siam chin a, Vaan sangpen pen siam chin a, aksi honpi zong siam na hi. Leitung leh a sunga omte khempeuh, tuipi leh a sunga omte khempeuh siam na hi. Amaute keem chin a, hawi chin a, vaan thilsiam simseng-louhte'n nang hon bia uhi. 7 Abram teel a, Kaldaite' Ur apan piikhia a, Abraham chi-a minvawhpa Tangtawn Toupa Pathian na hi. 8 Na maia a lungtang muanhuai sa chin a, Kanante, Hitte, Amorte, Perizte, Jebuste leh Girgashte' gam a suante piak ding chi-a, amah tawh kala thukhun bawl chin a, na thugente tangtun na hi. 9 Aigupta gama ka pu ka pate uh' thuakgimna mu chin a, Tuipi San geia a kah husa uh za na hi. 1 Amaute tunga Faro leh a silate leh a gamsung mite kisatheitaka gamta uh ahi, chih na theih mana, amaute dou-a chiamtehnate leh thillamdangte lak chin a, tuni-a banga, tua lai a, na min kitheisak na hi. 11 Amaute' maia tuipi kikhentatsak chin a, tuipi laizanga leikeua paisuak uhi. Tuipi thukpi-a suang paihlut banga, amau nungdelhte bel tuipi thukpi-a pailut na hi. 12 Amaute suna meipi khuama pii chin a, amaute' pai na dinga lampi vaksak dinga, zana meikuang khuama pii na hi. 13 Sinai Muala zong hong kumsuk chin a, van apana amaute houpih chin a, thukhenna diktatte leh dan dikte, zuih ding thusehte leh thupiakte pia chin a, 14 na Sabbath siangthou amaute kianga theisak chin a, amaute' zuih ding dan paipite, thukhamte leh dante na sila Mosi tungtawna pia na hi. I5 A gilkial chiang ua vaan apan an pia chin a, a dangtak chiang ua suangpi apan tui pia chin a, amaute piak ding chi-a kichiam zena na chiamsa gam luah dinga amaute hilh na hi.
Israel Khelhna Lianpite
16 Ahihhanga, amaute leh ka pu ka pate uh kisathei uh a, genhak uh a, na thupiakte thudon lou uhi. 17 Thu man ding nial uh a, amaute laka na thillamdang hihte phawk nuam lou uhi. Ahihhanga, genhak uh a, hela makai khat kibawl a, saltanna-a kik nawn sawm uhi. Ahihhanga, amaute ngaidam dinga mansa Pathian hehpihna hau, zahngai thei, lungnel, hehhak hi chin a, migitna hau hi chin a, amaute taisan lou na hi. 18 Bawngnou lim kibawl uh a, Aigupta apan hon piikhia na pathian uh hiai ahi, chi-a nang hon sukthangpaih ua, nakpitaka Pathian a gensiat lai nangawn ua, taisan lou na hi. 19 Nang na zahngaihna thuah tampi-a na neih mana amaute gamdai-gamkeua taisan lou na hi. Amaute lampi-a pii dinga suna meipi khuam in nuse lou a, a paina ding ua vaak pe dinga, zana zong meikuang khuam in nusia lou hi. Amaute sinsak dinga na kha hoihtak pia chin a, a kam uapan mana lakik lou chin a, a dangtak lai ua tui pia na hi. 21 Kum 40 sung gamdai-gamkeua amaute vaak chin a, bangmah mah tasam lou uhi. A puansilhte nangawn uh zong se lou a, a khete uh zong bawk lou hi. 22 Tua baan ah, kumpigamte leh namte amaute' khuta pia chin a, gam kihawm uh a, Heshbon kumpipa Sihon gamte, Bashan kumpipa' Og' gamte luah uhi. 23 A tate uh vaana aksi banga pungsak chin a, a pu a pate' valuah dinga na hilhna gam tun na hi. 24 Tuachi-a a tate uh valut uh a, valuah uhi. Nang amaute' maia tua gama teeng Kanante nuaisiah chin a, Kanante, tua gam mite leh a kumpipate uh a utut ua a bawl ding ua, amaute' khut sunga pia na hi. 25 Khawpi muanhuaite leh leihoih gam la uh a, thil hoiha dim innte, tuikhuk tawhsate, grephuante, oliv-huante leh theikung tampite tang uhi. Tuate nea vah uh a, thau uhi. Na hoihna thupitaka taia nuam mahmah uhi. 26 Hinapi-a, thu mang lou uh a, na tunga hel uh a, Na Dan nungngatsan uh a, nang lama hong kihei nading ua amaute na vauhilhna thugen na kamsangte that uh a, nakpitaka hon thangpaisak uhi. 27 Tua bang ahih mana nang amaute a melmate uh khuta pekhia chin a, amaute'n na nuaisiah uhi. Tua banga a buai chiang ua, nang hon sam uh a, nang vaan apan ngaikhia na hi. Na zahngaihna thuah tam bangbanga a melmate uh' khut apan hukhe ding mi pia chin a, tuate'n amaute hukhia uhi. 28 Ahihhanga, a tawldam chiang ua, na maia thil hoih lou hih uh a, kihei kik zel uhi. Tua bang hun chianga a melmate un a thuneihkhum nading ua, a melmate uh khuta amaute koih zel na hi. Hinapi-a, hong kik a, nang hon sap chiang ua, vaan apana za na hi. Nang zahngaihna hanga, tamveipi amaute humbit na hi. 29 Na Dan lama amaute na piikik theih nadinga amaute taihilh na hi. Hinapi-a, kisathei-taka gamta uh a, na thupiakte zui lou uh a, na thusehte tunga khial uhi. Tuate zui mi lah tuate pansana hing ding hi tawk a. Thusim lou kisa-a hon nungngatsan uh a, a lungtang uh khauhsak uh a, za nuam lou uhi. 30 Hinapi-a, kum tampi sung amaute thuak zou chin a, na kamsangte-a na kha zanga, amaute dema thu gen na hi. Hinapi-a, ngai nuam lou uhi. Tua banga, tua gam mite khuta amaute pekhia na hi. 31 Ahihhanga, na zahngaihna lianpi hanga, amaute kangtum lou chin a, taisan sam lou na hi. Ahang bel, nang Pathian, hehpihsiam leh lainatsiam hi vechin.
Thukhun Khunthakna
32 Tua bang ahih mana, ka Pathian uh Pathian thupi, thahat leh lauhuai, a thukhun leh zahngaihna-a muanhuaipa hi chin a, Asuria kumpipate' vaihawm laia pan, tuni donga, koute, ka kumpipate uh, ka makaite uh, ka siampite uh, ka kamsangte uh, ka pu ka pate uh leh na mite khempeuh tunga hong tung haksatnate khempeuh tuin na mai ah neulua sa ken. 33 Ka tuahte khempeuh ua, nang a dika thu khen chin a, muanhuaitaka hih zel na hi. Hinapi-a, koute zaw giloutaka gamta hi ung. 34 Ka kumpipate uleh ka makaite uh, ka siampite uleh ka pu ka pate un zong na dan zui tuan lou uhi. Na thupiakte leh amaute dema na theihsaknate thudon tuan lou uhi. 35 A kumpigam ua teenga, na hoihna thupi hanga na piaksa gam lianpi leh hoiha na piak thil tampite ne napi, na nna sem lou uh a, a gamtat giloute uh zong nuse tuan lou uhi. 36 Tuni-in na silate hiah om hi ung! Ngai in, ka pu ka pate un a gahte leh a thilhoihte a nek na ding ua, gam na piak ah, tuni'n koute sila suak ung! 37 Koute khelhnate hanga, ka tung ua kumpipa na koihte adinga, gah tampi suah hi lei uhi. Amaute'n ka pumpite uh, ka gantate uh tunga, a ut bangbang-ua thu nei uh a, koute mangbang mahmah hi ung. Hiaite khempeuh hanga, Thukhun kip bawla gelh hi ung, ka makaite uh, ka Levite uh leh ka siampite un namkip uhi, chi un, a chi uhi.
Thukhun Pomte
1 Tua thukhun kigelh namkipte hiaite ahi: Hakalia' tapa ukpipa Nehemia, Zedekia, 2 Seraia, Azaria, Jeremia, 3 Pashur, Amaria, Malkija, 4 Hatush, Shebania, Malukh, 5 Harim, Meremoth, Obadia, 6 Daniel, Ginethon, Barukh, 7 Meshulam, Abija, Mijamin, 8 Maazia, Bilgai leh Shemaia. Hiaite bel siampite ahi uhi. 9 Levite: Azaria' tapa Jeshua, Henadad' tapate laka Binui, tua ban ah Kadmiel. 10 A seppihte uh: Shebania, Hodia, Kelita, Pelaia, Hanan, 11 Mika, Rehob, Hashabia, 12 Zakur, Sherebia, Shebania, 13 Hodia, Bani leh Beninu. 14 Mipite makaite: Parosh, Pahath Moab, Elam, Zatu, Bani, 15 Buni, Azgad, Bebai, 16 Adonija, Bigvai, Adin, 17 Ater, Hezekia, Azur, 18 Hodia, Hashum, Bezai, 19 Harif, Anathoth, Nebai, 20 Magpiash, Meshulam, Hezir, 21 Meshezabel, Zadok, Jadua, 22 Pelatia, Hanan, Anaia, 23 Hoshea, Hanania, Hashub, 24 Halohesh, Pilha, Shobek, 25 Rehum, Hashabna, Maaseia, 26 Ahia, Hanan, Anan, 27 Malukh, Harim leh Baana,
Thukhun
28 Midangte siampite, Levite, kongpi ngakte, lasate, tempul sawltawlte leh tua gamtea teeng mite apan Pathian' Dan adinga kiseptuam khempeuh, a zite uh, a tapate uh leh a tanute uh, theihna leh theihsiamna nei khempeuhte'n 29 a sanggamte uh, dinmunliana tulelte a zui uhi. Pathian' sila Mosi' piak Pathian Dan zui ding leh Tangtawn Toupa i Toupa uh' thupiakte, a thusehte leh zuih ding a piak thusehte zui dingin, hamsia leh kichiamnain a kigak uh a: 30 Ka kim ka kiang ua mite' kitenpih dingin ka tanute uh ka pe kei ding uh a, a tanute uh zong ka tapate uh adingin ka pii kei ding uhi. 31 Hiai gam mite'n Sabbath ni-a van hiam, buh hiam hong zuak uleh, Sabbath ni leh ni siangthou khat peuh ah zong ka na leisak kei ding uh. Kum sagihna tengin, lou ah nna ka sem kei ding uh a, leibat khempeuh ka maisak ding uhi. 32 Ka Pathian uh' inna nasep nading kumsima shekel khat seh thum suah seh khat piak ding thupiakte zui dingin mawhpuakna ka kilak uhi. 33 Dawhkana tanghou koih ding bang, an thillat gige leh haltum thillat gige ading bang, Sabbath ni-a thillat ding bang, Kha Thak ankuangluina leh sehsa ankuangluite ading bang, thillat siangthoute ading bang, Israel adinga khelhna khuhna thillat ading leh ka Pathian uh' inna nasep khempeuh ading bangin ka pe ding uh. 34 Dan Laibu-a kigelh bangin, Tangtawn Toupa ka Pathian uh' maitama khul ding sing, kumsima a hunsehtea koi innkawte'n ka Pathian uh' inna hon thawh ding hiam, chih theih nadingin siampi koute leh Levite leh mipite'n ai ka saan uhi. 35 Kumsima loua piang gah masate leh sing gah khempeuh, Tangtawn Toupa' inna ka puaklut dingun mawhpuakna zong ka kilak uhi. 36 Dan Laibu-a kigelh bangin, ka tapate uh laka piang masapen leh bawng hon laka piang masapen leh belam leh keel hon laka piang masapente ka Pathian uh' inn ah, tua-a nasem siampite' mai ah kon tawi ding uhi. 37 Tua baan ah, ka Pathian uh' inn a, inndan ah, siampite' mai ah, ka anvui nei masate uh, ka buh thak masate uh, thillatte, ka singkung ua gah masate leh ka zu thak uleh ka sathau thak masate uh kon tawi ding uh. Ka nasepna uh khawpite khempeuha sawma khat lakhawmte Levite ahih manun, lou-a piangte sawma khat Levite' mai ah kon tawi ding uh. 38 Levite'n sawma khat a san chiangun, Aron suan siampi khat in Levite a zui ding uh ahi. Levite'n zong sawma khat laka sawma khat mah, ka Pathian uh' inn ah, sumkoihna-a vankoihna dantante ah a tawitou ding uhi. 39 Israel mipite leh Levite'n zong, buh, zu thak leh sathau thak a thawhte uh, mun siangthoua van koihna ah, tua-a nasem siampite, kongpi ngakte leh lasate' omna ah kon tawi ding uhi. Ka Pathian uh' inn limsak louhin ka nuse kei ding uh, a chi uhi.
Jerusalema Teeng Thakte
1 Mipite' makaite Jerusalem ah a teeng uhi. Midangte'n mi sawm laka khat zel khawpi siangthou Jerusalema teeng ding aisanin a tengkhia uh a, a dang kuate bel amau' khua dangte ah a teeng uhi. 2 Mipite'n Jerusalema teeng dinga amau' deihtelna bawlte a phat uhi. 3 Hiaite bel, gam sehkhena makai, Jerusalema teengte ahi uhi. Israelte pawl khat bel, siampite, Levite, tempul sawltawlte, Solomon' silate' suante Judah gam khuatea teengte ahi uhi. Khaw tuamtuam ah michih ama' mun mawng ah a teeng uhi. 4 Judah leh Benjamin suan midangte bel, Jerusalem ah a teeng uhi. Judah suante lak pan: Uzia tapa Athaia. Uzia bel Zekharia' tapa ahi. Zekharia bel Amaria' tapa ahi. Amaria bel Shefatia' tapa ahi. Shefatia bel Mahalalel' tapa ahi. Mahalalel bel Perez' suante laka khat ahi. 5 Tua chiangin, Barukh' tapa Maaseia. Barukh bel Koi Hoze' tapa ahi. Koi Hoze bel Hazaia' tapa ahi. Hazaia bel Adaia' tapa ahi. Adaia bel Joiarib' tapa ahi. Joiarib bel Zekharia' tapa ahi. Zekharia bel Shela' suante laka khat ahi. 6 Perez' suante Jerusalema teengte bel a vekun 468 a pha uhi. 7 Benjamin' suante lak apan: Meshulam' tapa Salu. Meshulam bel Joed' tapa ahi. Joed bel Pedaia' tapa ahi. Pedaia bel Kolaia' tapa ahi. Kodaia bel Maaseia' tapa ahi. Maaseia bel Ithiel tapa ahi. Ithiel bel Jeshaia' tapa ahi. 8 Tua chiangin, Salu' nungzuite Gabai leh Salai ahi. A vekun 928 a pha uhi. 9 Zikri tapa Joel a makaipipen uh ahi a, Hasenua' tapa Judah bel tua khawpi sehkhen nihna tunga vaihawm ahi. 10 Siampite lak apan: Jedaia, Joiarib, Gakhin, 11 Hilkia' tapa Seraia. Hilkia bel Meshhulam' tapa ahi. Meshulam bel Zadok' tapa ahi. Zadok bel Meraioth' tapa ahi. Meraioth bel Ahitub' tapa ahi. Ahitub bel Pathian' inn enkaaipa ahi. 12 Tuachiangin, amaute seppih sanggamte tempula nasemte ahi uhi. Avekun 822 a pha uhi. Tua baan ah Jehoram' tapa Adaia ahi. Jehoram leh Pelalia' tapa ahi. Pelalia bel Amzi' tapa ahi. Amzi bel Zekharia' tapa ahi. Zekharia bel Pashur tapa ahi. Pashur bel Malkhija tapa ahi. 13 Adaia' seppihte, beh tuipite tawh a vekun 242 a pha uhi. Tua ban ah, Azarel' tapa Amashsai ahi. Azarel bel Azai' tapa ahi. Azai bel Meshilemoth' tapa ahi. Meshilemoth bel Imer' tapa ahi. 14 Amashsai' seppih galhat ngenta tawh a vekun 128 a pha uhi. Amaute' makai lianpen Hagedolim' tapa Zabdiel ahi. 15 Levite lak apan: Hashuf tapa Shemaia ahi. Hashuf bel Azrikam' tapa ahi. Azrikam bel Hashabia' tapa ahi. Hashabia bel Buni' tapa ahi. 16 Tua ban ah, Shabethai leh Jozabad ahi uh a, amaute gel Levite' makai ahi uh a, Pathian' inn pawlama nnate tunga mawhpua ahi uhi. 17 Tua ban ah, Mika' tapa Matania ahi. Mika bel Zabdi' tapa ahi. Zabdi bel Asaf tapa ahi. Asaf bel kipahthu genna leh thumna-a makai ahi. Bakbukia a seppih sanggamte laka nihna ahi. Tua baan ah, Shamua' tapa Abda ahi. Shamua bel Galal' tapa ahi. Galal' bel Jeduthun' tapa ahi. 18 Tua khawpi siangthou-a Levite 284 a pha uhi. 19 Kongpi ngakte hiaite ahi: Akub, Talmon leh a seppih sanggamte kongpi ngakte a vekun 172 a pha uhi. 20 Israel dangte, siampite leh Levite tawh Judah gam khuate khempeuh ah, michih a pu a pate uh neihsa mun ah a om uhi. 21 Tempul sawltawlte Ofel mual ah a teeng uh a, Ziha leh Gishpa in amaute a uk uhi. 22 Jerusalema Levite' makai Uzi ahi. Uzi bel Bani tapa ahi. Hashabia' tapa Bani, Matania' tapa Hashabia. Mika' tapa Matania ahi. Uzi bel Asaf suante laka khat ahi a, tua Asaf suante bel Pathian' inna mawhpua lasate ahi uhi. 23 Tua lasate bel a nisim nasep uh bawlsak kumpipa' thupiak nuaia om ahi uhi. 24 Judah' tapa Zera' suante khat Meshezabel' tapa Pethahia bel mipite tawh kisai thu peuhmah-a kumpipa' palai ahi.
Jerusalem Pawlama Tenna
25 Khawtate leh a loute uh ahih leh, Judah mi pawl khatte' tenna Kiriath Arba leh a kiima khuate, Dibon leh a kiima khuate, Jekabzeel leh a kiima khuate, 26 Jeshua, Molada, Beth Pelet, 27 Hazar Shual, Beersheba leh a kiima khuate, 28 Ziklag, Mekona leh a kiima khuate, En Rimon, Zora, Jarmuth, 30 Zanoa, Adulam leh a kiima khuate, Lakhish leh a loute leh Azeka leh a kiima khuate ahi. Tuachi-in, Beersheba phaizang dong khempeuh ah a teeng uhi. 31 Geba apan Benjamin suante' tenna Mikmash, Aija, Bethel leh a kiima khuate, 32 Anathoth, Nob leh Anania, 33 Hazor, Rama leh Gitaim 34 Hadid, Zeboim leh Nebalat, 35 Lod leh Ono leh Khutsiamte Phaizang kichi mun ahi. 36 Judah gam mi Levi pawlte laka pawl khatte Benjamin gam ah a teeng uhi.
Siampite leh Levite Minkhumna
1 Shealtiel' tapa Jerubabel leh Jeshua tawh hong kikton siampite leh Levite hiaite ahi: Seraia, Jeremia, Ezra, 2 Amaria, Malukh, Hatush, 3 Shekania, Rehum, Meremoth, 4 Ido, Ginethon, Abija, 5 Mijamin, Moadia, Bilga, 6 Shemaia, Joiarib, Jedaia, 7 Salu, Amok, Hilkia leh Jedaia. Hiaite, Jeshua dam laia siampite leh a seppihte' makaite ahi uhi. 8Tua baan ah, Levite bel Jeshua, Binui, Kadmiel, Sherebia, Judah leh Matania ahi. Matania leh a seppihte'n lungdamthu genna leh phatna ah ma a kai uhi. 9 Amaute' mazawn ah Bakbukia leh Uni leh a seppihte uh nasemin a ding uhi. 10 Joiakim' pa Jeshua ahi a, Eliashib' pa Joiakim ahi a, Joiada' pa Eliashib ahi. 11 Jonathan' pa Joiada ahi a, Jadua' pa Jonathan ahi. 12 Joiakim dam laiin, siampi beh tuipite hiaite ahi uhi: Seraia beh ah Meraia, Jeremia beh ah Hanania, 13 Ezra beh ah Meshulam, Amaria beh ah Jehohanan, 14 Malukh beh ah Jonathan, Shekania beh ah Josef, 15 Harim beh ah Adna, Meremoth beh ah Helkai, 16 Ido beh ah Zekharia, Ginethon beh ah Meshulam, 17 Abija beh ah Zikri, Miniamin leh Moadia beh ah Piltai, 18 Bilga beh ah Shamua, Shemaia beh ah Jehonathan, 19 Joiarib beh ah Matenai, Jedaia beh ah Uzi, Salu beh ah Kalai, Amok beh ah Eber, 21 Hilkia beh ah Hashabia, Jedaia beh ah Nethanel. 22 Eliashib, Joiada, Johanan leh Jaduate dam laia Levite lak leh siampite laka beh tuipite, Persia kumpipa Daria' vaihawm lai donga min kikhum ahi. 23 Eliashib' tapa Johanan hun donga Levi suante laka beh tuulpite bel khangthu bu-a min kikhum ahi. 24 Levi makaite Hashabia, Sherebia leh Kadmiel' tapa Jeshua ahi uh a, amaute mazawn ah a sanggamte uh, a pawlpawla kikhela phatna leh lungdamthu gen dinga om ahi uhi. Tua bel, Pathian' mi David in a na-seh banga a hih uh ahi. 25 Kongpi ngakte, Matania, Bakbukia, Obadia, Meshulam, Talmon, leh Akub ahi uhi. Amaute'n kongpitea vankoihna inndante zong a ngak uhi. 26 Amaute'n Jeshua' tapa Joiakim dam lai leh ukpipa Nehemia leh siampi leh laigelhpa Ezra dam laiin na a sem uhi. Jeshua bel Jozadak' tapa ahi.
Jerusalem Kulhbaang Latna
27 Jerusalem kulhbaang latna ah, Levite a tenna uapan a kizongkhia a, kipaktaka lungdamthu genna leh lasak tawh dakkhutbette, kaihging guineite leh pekgingte thuaha kipaktaka kulhbaang latna lawm dingin, Jerusalem ah a kipaipih hi. 28 Lasapawlte zong Jerusalem kiim gam Netofathte khuate apan, 29 Beth Gilgal apan leh Geba leh Azmaveth gam apan kikaikhawm uh a, hiai lasapawlte Jerusalem kiim ah teen nading khuate na sat uh ahi. 30 Siampite leh Levite a kisiansuah khitun, mipite, kongpite leh kulhbaang a siansuah uhi. 31 Ke'n Judah makaite kulhbaang tung ah ka kaltousak a, lasapawl lianpi nih zong phatnala sa dingin ka sep hi. Pawl khat taklam pang ah, kulhbaang tung ah, Ek Kongpi lam nga-a pang dingin a kizui uhi. 32 Hoshaia leh Judah makai kim khat in amaute a zui uh a,33 Azaria, Ezra, Meshulam, 34 Judah, Bejamin, Shemaia, Jeremia in zong a zui uhi. 35 Pengkul tawi siampi pawl khat leh Jonathan' tapa Zekharia in zong a zui uhi. Jonathan bel Shemaia' tapa ahi a, Shemaia bel Matania' tapa ahi. Matania bel Mikaia' tapa ahi a, Mikaia' bel Zakur' tapa ahi a, Zakur bel Asaf tapa ahi. 3 Amaute zui a seppihte uh Shemaia, Azarel, Milalai, Gilalai, Maai, Nethanel, Judah leh Hanani ahi uh a, Pathian' mi David in a na seh bangin tumgingte a tawi uhi. Laigelhpa Ezra in tua a hona paite a makaih hi. 37 Tuikhuk Kongpi apanin, David' Khawpi kalbi ah a kaltou uh a, kulhbaang tung ah a kaltou uh a, David' inn tung zawn ah a pai uh a, suahlam panga Tui Kongpi dong a pai uhi. 38 Lasapawl nihna lehlam manawhin a kizui uhi. Ke'n mipi kim khat tawh kulhbaang tung ah amaute ka zuitou hi. Thukkhuk Innsang paikhengin, Kulhbaang Za kichi ah, 39 Efraim Kongpi tung ah, Kongpi Lui tung ah, Ngasa Kongpi tung ah, Hananel Innsang ah, Zakhat Innsang ah, Belam Kongpi ah ka pai uh a, Galvilmi Kongpi ah ka khawl uhi. 40 Tua phatna lasapawl nihte, Pathian' inn ah amau' mun tek ah a ding uh a, kei zong uliante kim khat tawh ka ding hi.4 Siampite Eliakim, Maaseia, Miniamin, Mikaia, Elioenai, Zekharia leh Hanania zong a pengkulte utawh a ding uh a, 2 Maaseia, Shemaia, Eleazer, Uzi, Jehohanan, Malkija, Elam leh Ezer zong tua ah a om uhi. Jezrahia' makaihna nuai ah lasapawlte'n la a sa uhi. 43 Tua ni-in, kithoihna tampitak a lan uh a, Pathian in lungnopna lianpi pia ahih manin, a lungnuam mahmah uhi. Numeite leh naupangte zong a lungnuam uhi. Jerusalema tua lungnopna husa gamlapi ah zong a kiza hi. 44 Tua laiin, thawhlawmte, gah masate leh sawma khatte koihkhawmna inndante ngak dingin mite a kisep hi. Siampite leh Levite adinga Dan in a ngiat zah khawkim leh kianga loute apan a koihkhawmna inndante ah hon pawlut ding uh ahi. Ahang bel, tua-a nasem siampite leh Levite tunga Judah lungdam mahmah hiven. 45 Amaute'n a Pathian uh nasepna, siansuahna nnate, David leh a tapa Solomon' thupiak bangin, a sem uhi. Lasate leh kongpi ngakte'n zong tua bangin a sem uhi. 46 Ahang bel, tanglaia David leh Asaf dam laiin, lasate adinga makai, Pathian' maia phatna late leh kipahthu genna adinga makaite na omkhin ahi. 47 Tua bangin, Zerubabel leh Nehemia hun laiin, Israel mi khempeuh in lasate leh kongpi ngakte adingin, nisim tan ding a pia uh a, Levi dangte ading zong tan a koihkhia uhi. Levite'n zong Aron' suante adingin tan a koihkhia uhi.
Kipuahthakna
1 Mipite laka Mosi' Laibu a kisimkhiak ni-in, Amonte, Moabte kuamah Pathian' mite kikhopna-a kihelsak ngei louh ding, chih a kimukhia hi. Ahang bel, amaute'n Israelte an leh tui in a na dawn kei uh a, amaute hamsiat dingin Balaam a na guai zawsop uhi. Ahihhangin, i Pathian in tua hamsia pen vualzawlna a suaksak zaw hi. 3 Mipite'n hiai dan a zak takun, gamdang mite' suante peuhmah Israelte apan a pawsiah uhi. 4 Hiai ma lamin, i Pathian uh' inna vankoihna inndantante ngak dingin siampi Eliashib a na kisepkhin hi. Amah bel, Tobia tawh kizom a na hi mawk hi. 5 Ama'n nidanga vankoihna-a kizang dantan Tobia luah dingin lianpi-in a bawlsak hi. Tua dantan bel, Levite, lasate, kongpi ngakte leh siampite adinga seh buh thillatte, gimnamtuite, tempul tuium belsuante, buh sawma khatte, zu thakte leh sathaute koihkhawmna-a kizang ahi. 6 Hibanga thil a om laitakin, kei bel Jerusalem ah ka om kei hi. Ahang bel, Babulon kumpipa Arteksersa' vaihawm kum, a kum 32-na ah kumpipa kiang ah ka kileh kik hi. Tua nung lamin, ama' phalna ka ngen a, Jerusalem ah kong kik hi. Hiai ah Eliashib' thilhih gilou, Pathian' inn huang sunga inndantan Tobia a piak thu ka thei hi. 8 Ka lung a na lua a, Tobia' innsung vante khempeuh tua dantan apan ka lawnkhia hi. 9 Tua dantante siansuah dingin thu ka pia a, tua khitin, Pathian' inn vanzatte leh buh thillatte leh gimnamtuite ka koih kik hi. 10 Tua lai mahin, Levite adinga tan gotte amaute a kipe kei a, Levite leh lasate khempeuh lah a sep ding ua mawhpuakna nusiain amau' lou nnate sem dingin a taikhia uh, chih zong ka thei hi. 11 Tuachi-in, uliante ka taaihilh a, amaute kiang ah: Banghanga Pathian' inn thudonlouha kitaisan ahia? ka chi hi. Tua khitin, amaute ka samkhawm a, amau' mun tek ah ka koih hi. 12 Judah gam khempeuh in buh sawma khat, zu thak leh sathaute koihkhawmna inndantan ah hon pawlut uhi. 13 Ke'n siampi Shelemia, laigelhpa Zadok leh Levi mi khat Pedaia kichi, vankoihna dantante tunga thuneiin ka koih a, Zakur' tapa Hanan a huhpain ka koih hi. Hiaite mi muanhuaia ngaih ahi uhi. Zakur bel Matania' tapa ahi. Hiai misehte, a sanggamte uh kianga nek leh taak hawm dinga mawhpua ahi uhi. 14 Tua lai mahin: Ka Pathian aw, hiai hangin kei hon thei gige inla, ka Pathian' inn leh a nasepnate adinga muanhuaitaka ka hihte nulmang ken, chi-in ka thum hi. 15 Tua hun laiin Judah gam ah Sabbath ni-a grep chil a, buhte pua a, zute, grepte, theipite, van dang namkim tawh, sakolneute suan lai ka mu hi. Amaute'n hiaite khempeuh Jerusalem ah Sabbath ni-in hon pawlut uhi. Tua bang ahih manin, tua ni-a zuak lou dingin amaute ka vau hi. 16 Jerusalema teeng, Tura-a hong kipante'n ngasa leh van tuamtuam hon pawlutin Jerusalem ah Judah mite lak ah Sabbath ni-in a zuak uh a, 17 ke'n Judah gama dinmun liante ka taaihilh a: Hiai thil gilou na hih uh bang ahia, Sabbath ni na buahsak uh? 1 Na pu na pate un hibang mah a hih uh a, i Pathian in eite tung leh hiai khawpi tung ah hiai thil hoihloute khempeuh hon tun hi lou maw? Tu'n Sabbath ni buahsakin Israel tunga thangpaihna tamsem tokthou na hi ve ua, ka chi hi. 19 Sabbath ni ma-a nitaklam limliapte'n Jerusalem kongpite a phak taka, kongkhakte khak ding leh Sabbath bei mateng hong lou dingin thu ka pia hi. Sabbath ni-a van hong kipuaklut louh nadingin, ka mite pawl khat kongpite ka ngaksak hi. 20 Sumsinte leh van nam tuamtuam zuakte, khatvei hiam nihvei hiam Jerusalem pua ah a giak uhi. 21 Ahihhangin, amaute ka vau a: Banghanga kulhbaang pua-a giak na hi ua? Hibanga na giah nawn uleh, na tung uah khut ka kha ding, ka chi hi. Tua apanin Sabbath ni-in hong kuan nawn kei uhi. 22 Tua khitin, Sabbath ni siangthoutaka a kitan nadingin, Levite kihhih-siangthou a, kongpite ngak dingin thu ka pia hi. Tuachi-in ke'n: Ka Pathian aw, hiai hangin zong kei hon thei gige inla, na itsiamna bangbangin deihsakna hon ngahsak in, chi-in ka thuum hi. 23 Tua baan ah, tua laiin, Ashdod, Amon leh Moab numeite kitenpih Judah gam mite ka mu hi. 24 A tate uh kim khat Ashdod pau-in leh namdangte khatpeuh pauin a pau uh a, Judah pauin a pau thei kei uhi. 25 Amaute ka taai a, amaute tung ah hamsia ka sam hi. Pasal pawl khat ka vua a, ka humsamlai hi. Pathian' min louin ka kichiamsak a: Namdangte' tapate adingin, na tanute uh na pe ding uh ahi kei. Na tapate uh ading leh noute adingin zong a tanute uh na pii ding uh ahi kei. 26 Hibanga kitentuahna hangin ahi kei ahia Israel kumpipa Solomon a na khelhtak? Nam tampite lak ah amah bang kumpipa a om kei. Amah Pathian' it ahi a, Pathian in Israelte khempeuh tunga kumpipain a bawl a, ahihhangin, amah nangawn gamdang numeite'n khelhna ah a kailut uhi. 27 Noute'n zong tua banga gam dang numeite kitenpihin hiai gitlouhna mulkimhuai leh i Pathian tunga muanhuailouhna na hih uh, chih tu'n ka za ding ua hia? ka chi hi. 28 Siampilian Eliashib' tapa Joiada ahi. Joiada' tapate laka khat bel Horon mi Sanbalat' makpapa a na hi a, amah ka muh phak louh ah ka hawlmang hi. 29 Tuachi-in, ke'n: Ka Pathian aw, siampi nasep leh siampite leh Levite tawh kala thukhun a buahsak manun, amaute thei gige in, chi-in ka thuum hi. 30 Tuachi-in, gamdang thil himhim apan siampite leh Levite ka siansuah a, mi chih amau sep ding tek ka guan hi. 31 Tua baan ah, a hun sehte-a sing a thawh ding dan uleh gahmasate a piak ding dan uh ka bawl hi. Tuachi-in, ke'n: Ka Pathian aw, deihsakna tawh kei hon thei gige in, chi-in ka thuum hi.
Ahasuera' Ankuangluina
1 Ahasuera dam laia thil tung hibang ahi. Hiaia Ahasuera bel India apan Ethiopia donga gam sehkhen 127 tunga vaihawmpa ahi. 2 Tua laia Kumpipa Ahasuera, tua Susa kulhpi sunga a innpi-a, a gam kumpitutphah tunga a tut laiin, a vaihawm kum, a kum thumna ah a miliante leh a uliante ading in ankuang a lui hi. Amaute Persia leh Media gam thuneite, makaite leh gam sehkhente-a miliante ahi uh a, a mai ah a om uhi. 4 Ni 180 sung mahmah a kumpigam hauhnate leh ama' letna thupina leh zahtakhuaina khempeuh a lak hi. 5 Hiai nite hong bei takin, kumpipa'n a innpi huan sung ah, Susa innpi-a om mi khempeuh a neupen apan a lianpen dong ading ni sagih sung ankuang a lui hi! 6 Tua huan ah, puanduang puan malngat ngou leh duma kibawlte a kikhai hi. A khaina khaute ziza khau zangngat ngou leh khau sandupa kibawl ahi a, suangpak khuampitea ngunsik biltea kikhih ahi. Tutna nem kham leh nguna kizemte a om a, tua tutnate a kitunna sualte porfiri suangpak, tuikep suang leh suangmanpha nam tuamtuama giala kibawl ahi. 7 Kham nou gonggek, a kibanglou ngentain zu a kihawm a, kumpipa' thilphalna tawh kituakin zu a tam mahmah hi. 8 Kumpipa' thupiakin, zute khempeuh ama' ut dandana a dawn uh phal ahi. Ahang bel, kumpipa'n zu saite kianga thuhilh a, michih ama' duh dandan zu piak ding, chi hiven.
Kumpinu Vasti' Nialna
9 Kumpinu Vasti in zong kumpipa Ahasuera' innpi sunga om numeite adingin ankuang a lui teei hi. 10 A ni sagih ni-in, zu in kumpipa Ahasuera a kipahsak laitakin, a nasem michilgeh sagihte, Mehuman, Biztha, Harbona, Bigtha, Abagtha, Zethar leh Karka thu a pia a, 1 Kumpinu Vasti a kumpilukhu khuin non tonpih ding uh, mi omkhawmte leh miliante' mai ah a melhoihna a hong lak ding, a chi hi. Vasti bel, eta mittunhuai mahmah ahi. 12 Ahihhangin, Kumpinu Vasti in tua michilgehte hong gen kumpipa' thupiak nialin hong pai nuam kei hi. Kumpipa a thangpai mahmah a, a sung ah a hehna a kuang hi.
Kumpipa Ahasuera Kithuhilhna
13 Dan thu leh thudika thukhenna tawh kisaia siamte kumpipa'n a dot ngeina hiven, kumpipa'n tua mipil, tua hunte theisiamte a houpih hi. 14 Kumpipa tawh kinaipente bel Karshena, Shethar, Admatha, Tarshish, Meres, Marsena leh Memukan ahi. Tuate bel Persia leh Media milian sagih, kumpipa kianga hawh theihna tuam nei leh tua kumpigama dinmun sangpente nei ahi uhi. 15 Kumpipa'n: Dan tawh kituakin Kumpinu Vasti bang kilawh ding ahia? Ama'n lah Kumpipa Ahasuera' thupiak, tua michilgehte va gen manglou hita a? chi-in a dong hi. 1 Memukan in kumpipa leh miliante zakin a dawng a: Kumpinu Vasti in thil diklou a hih ahi. Kumpipa' tung kia-a diklou hih ahi kei a, Kumpipa Ahasuera' gam sehkhen sunga milian khempeuh leh pasalte khempeuh tunga diklou hih ahi. 17 Ahang bel, kumpinu' gamtat dan numei khempeuh in a thei ding ua, a pasalte uh simmawhin: Kumpipa Ahasuera in Kumpinu Vasti a maia tonpih ding thu a pia a, hinapi-in hong pai nuam kei, a chi ding uh. Tuni mahmah in, Persia leh Media numei milian, tua kumpinu' gamtat dan zate'n tua bang mahin kumpipa' miliante a dawng ding uh. Kizahtak louhna leh kihoutheih louhna in tawp leh bei a nei kei ding.
Kumpipa' Thupiak
19 Tua bang ahih manin, kumpipa'n pha a sak leh, kumpipa'n thuseh khat suah henla, tua pen a kikheng theilou dingin Persia leh Media dan ah kigelh henla, Kumpipa Ahasuera' maia Vasti a lut ngei nawnlouh ding, kichi hen. Tua baan ah, kumpipa'n Vasti sanga melhoih zaw mi dang kiang ah tua a kumpi dinmun pia hen. 20 Tua kumpi' thuseh a gam lianpi sung tenga a kiphuankhit chiangin numeite khempeuh in a neupen apan a lianpen dongin a pasalte uh a zahtak ding uh, a chi hi. 21 Kumpipa leh a miliante'n hiai thuhilhna pha a sa uh a, tuachi-in kumpipa'n Memukan' sawm bangin a hihta a, 22 pasal peuhmah ama' innsung vaihawm thuneipen a hih ding ahi, chi-in a kumpigam sung leh gam sehkhena mite pau leh laigelh dan kima gelhin thu a khaksuak vek hi.
Vasti' Mun Luah ding Zonna
1 Tua nungin, Kumpipa Ahasuera' hehna a dam takin, Vasti, a thilhih tawh, ama' tungtanga a thuseh tawh a phawk gige hi. 2 Kumpipa keema a nasemte'n amah kiang ah: Kumpipa adingin nungak siangthou melhoihte kizong hen. 3 Kumpipa'n a gam sunga gam sehkhen teng ah mi sep henla, amaute'n gam sunga nungak melhoih khempeuh hon tonpihin, Susa innpi-a numei inn ah hon koih uhen. Tua nungakte bel numeite kempa, kumpipa' michilgeh Hegai kepna nuai ah kikoih henla, melhoihna ding damdawite kinuhin kipia hen. 4 Tua khit chiangin, kumpipa lungkimna nungak pen Vasti' mun ah kumpinuin pang hen aw, a chi uhi. Hiai thuhilhna in kumpipa a kipaksak a, tua bangin a hihta hi.
Esther' Kisakkholhna
5 Tua laiin Susa khawpi ah Judami Benjamin beh Mordekai kichi Jair' tapa a om hi. Jair bel Shimei' tapa ahi a, Shimei lah Kish' tapa ahi. 6 Mordekai bel Babulon kumpipa Nebukhadnezar in Jerusalem apan a puakmang, Judah kumpipa Jehoaikhin tawh saltangkhawm ahi. Mordekai in a pangak' tanu' sanggam numei khat Hadasa kichi a nei a, ama' kep pi-ching ahi. Tua nu'n nu leh pa a nei nawn keia ahi. Hiai nungak, Esther zong kichi, a piandan leh mei ah a hoih mahmah hi. A nu leh a pa a sihkhit nungun, Mordekai in ama' tanu bangin a la hi. 8 Kumpipa' thupiak leh thuphuan a kizak takin, nungak tampi tua Susa khawpi ah a kipaipih a, Hegai' kepna nuai ah a kikoih hi. Esther zong kumpipa innpi ah a kipaipih a, Hegai a kikemsak hi. Hegai bel numeite koihna kempa ahi. 9 Tua nungak in amah a lungkimsak a, a deihsakna a ngah hi. Ama'n melhoih nading nuh leh zut ding leh an hoih tuam a pia hi. Tua baan ah, kumpipa' innpi sunga sawltawl numei telkhiak sagih a kemsak a, nungaknu leh a kem numeite, numeite koihna inn-a mun hoih pen a pia hi. 10 Mordekai in a khaam bikbek manin, tua nungak in a minam hihna leh a beh a phung a genkhe kei hi. uMordekai bel tua numeite koihna huangsung intual kiang ah a kilehleh sek a, Esther bang a chi hiam, bang thu bang la om hiam, chih theih a sawm hi. 12 Kumpipa Ahasuera' maia tua nungak kilat hun a tun main, kha sawmlenih bang melhoih nadinga kibawl ding numeite adinga seh, a zawh a kul hi, Kha guk sung mura thaua kizut ding, kha guk sung gimnamtui leh nuhtheih dangte kinuh ding ahi. 13 Kumpipa' maia a vakilat ding dan hibang ahi: Numeite koihna inn apan kumpipa' innpi-a a ken ding a deihdeih piak hi ding ahi. 14 Nitaklamin tua ah a vahawh ding a, a zingsang chiangin numeite omna inn sung mun tuam ah, kumpipa' michilgeh Shaashgaz' kep dingin a paikik ding ahi. Shaashgaz bel kumpipa' meite kempa ahi. Kumpipa amaha a lungkima a min a sap sak kei ngalleh, kumpipa kianga kik nawn lou ding ahi.
Esther Teelna
15 Kumpipa' maia Esther a lut hun a tun takin, kumpipa' michilgeh Hegai, tua numeite kempa' gen louh ngai bangmah dang a ngen kei hi. Esther bel Mordekai in a pangak Abihail' tanu, ama' tanu dinga a lak ahi. Esther in amah mu peuhmahte' deihsak a lawh hi. 16 Kumpipa Ahasuera' vaihawm kum, a kum sagihna, a kha sawmna, Tebeth kha-in, Esther, kumpipa' tenna ah tonpihin a om hi. 7 Kumpipa'n numei dang kuamah sangin, Esther a deih zaw a, nungak siangthou dangte sangin Esther in kumpipa' deihsakna leh lungtunna a ngah hi. Tuachi-in, kumpipa'n Esther' lutung ah kumpilukhu a khusak a, Vasti' mun ah kumpinu-in a tusakta hi. 18 Kumpipa'n a miliante leh uliante adingin Esther ankuang thupitak a lui a, a gam sehkhen khempeuh ah khawlni a phuang a, kumpi' thilphalna bangbangin thawnpiakte a hawm hi.
Mordekai in Kumpipa a Kisawmna Genkhia
19 Nungak siangthoute a nihvei nadinga hong paikhawm laiun, Mordekai bel, kumpipa' kongpi ah a tu hi. 20 Ahihhangin, Mordekai' hilh bangin Esther in ama' hong kipatna innkuan leh a minam hihna a iim hi. Esther in Mordekai' thuhilhnate, ama' inn sunga a khoi piching laia mah bangin a zui hi. 21 Kumpipa' kongpi-a Mordekai a tut laiin, kumpipa' ulian nihte, Bigthana leh Teresh kongkhak ngaka omte a hel uh a, Kumpipa Ahasuera thah a sawm uhi. 22 Mordekai in hiai a sima thusawm a phawkkhia a, Kumpinu Esther a hilh a, Esther in Mordekai minin kumpipa a hilhsak hi. 23 Hiai thu a kikantel leh a dik ahi, chih a kimukhia a, tua ulian nihte khailupin a om uhi. Hiai thute kumpipa' maia khangtangthu gelhna bu ah a kigelh hi.
Haman' Kaisangna
1 Hiai thilte nungin, Kumpipa Ahasuera in Agag mi Hamedatha' tapa Haman pahtawina a pia a, a kaisangsak a, milian dangte khempeuh sanga zahtakna sangzaw tutna a pia hi. 2 Kumpipa' uliante khempeuh in kumpipa' kongpi ah khukdin-in Haman zahna a pia uhi. Kumpipa'n tua bang dinga thu a piak ahi. Ahihhangin, Mordekai bel a khukdin nuam kei a, zahna zong Haman a pe nuam kei hi. 3 Kumpipa' kongpi-a uliante'n Mordekai kiang ah: Banghanga nang kumpipa' thupiak mang lou? a chi uhi. Nisimin tua bangin a hilh uh a, ahihhangin, ama'n a mang tuan kei hi. Tua bang ahih nungin, amaute'n, Mordekai' gamtat dan Haman in thuakzou nading hiam, chi-in Haman a hilh uhi. Ahang bel, ama'n Juda mi a hihlam amaute hilh hiven. 5 Mordekai in khukdinin amah zahna a pe nuam kei chih Haman in a theih takin a heh mahmah hi. 6 Haman in Mordekai' mite kuate hi uhiam chih thei ahih manin, Mordekai kia thah ding a hawmthawh a, Mordekai' mite Ahasuera gam sung tenga Judate khempeuh thah chimih dingdan lampi a zong hi.
Haman' Thusawm
7 Kumpipa Ahasuera' vaihawm kum, a kum sawmlenihna, a kha khatna Nisan khain, a ni leh kha teel nadingin Haman' mai ah Pur kichi aisanna a bawl uh a, tua aisan pen a kha sawmlenihna, Adar kha ah a kia hi. 8 Haman in Kumpipa Ahasuera kiang ah: Na kumpigam sehkhen khempeuh-a kithehdalh minam khat a om a, amaute' ngeina leh tawndan pen midangte' ngeina leh tawndan tawh a kibang kei a, kumpipa' dan zong a zui kei uhi. Amaute hibanga omsaksak pen kumpipa adinga hoih lou ding ahi. 9 Na deihdan ahih leh, amaute sukchimih nading thuseh khat kiphuang hen, hiai nna semkhete adingin ke'n ngun talen 10,000 kumpi sumkoihna ah pia ning, a chi hi.
Thuseh Phuanna
10 Tuachi-in, kumpipa'n a khut apan a suainamna zungbuh a lakhia a, Hamedatha' tapa Agag mi Haman, Judate' melmapa a pia hi. uKumpipa'n Haman kiang ah: Na sum kineek inla, tua mite na ut ut lawhta in, a chi hi. 12 Tua khitin, kha khatna a ni sawmlethum ni-in, kumpipa' laigelhmite a kisam a, amaute'n gam sehkhente-a laigelh dan leh pau chih-in, gam sehkhena kumpipa' palaite, ukpipate leh minam tuamtuamte' miliante kiangah Haman' thupiak a gelh uhi. Hiaite bel kumpipa Ahasuera' mina kigelh leh a suainamna zungbuha suai kinam ahi. 13 Kumpipa' gam sehkhen khempeuh ah laitaite a kisawl a, thu a kikhak a, kha sawmlenihna Adar kha, a ni sawmlethum ni-a Judami khempeuh, a tek a khang, numeite leh naupang neute, nikhat thu-a sukchimih sipsip ding, a neih a lamte uh gallak suma laksak ding, chih ahi. 4 Tua thupuan kawpi khat, gam sehkhen khempeuha dana gelhlut ding, tua ni adinga kisakhol dinga minam chih theihsak ding thupiak ahi. 15 Kumpipa' thupiakin laitaite kintakin a kuankhia uh a, tua thuphuan Susa khawpi ah a phuang uhi. Kumpipa leh Haman bel zu dawnkhawmin a tu uh a, ahihhangin, Susa khawpi a mangbang hi.
Judate' Dahna
1 Thil kihihte khempeuh Mordekai in a theih takin, a puansilhte a botkek a, saiippuan silhin leivui a kibuak a, khawpi sung ah a lut a, ngaihtak leh khasetakin a kap tuaituai hi. 2 Ahihhangin, kumpipa' kongpi tan lei a pai hi. Ahang bel, saiippuan silh kuamah kumpipa' kongpi sunga lut theilou hiven. 3 Kumpipa' thupiak leh thuphuan a tunna gam sehkhen peuhmaha Judate lak ah dahna a tung a, an ngolhna, kahna, kikou tuaituaina a tung a, tampite saiippuan silhin leivui a kibuak uhi.
Mordekai' Thilgel
4 Esther' numei sawltawlte leh michilgehte hong pai uh a, Mordekai' thu Esther kianga hong hilh takun, Esther nakpitakin a mangbang hi. A saiippuan suah a, a silh ding puante Esther in a pesak a, ahihhangin Mordekai in a sang nuam kei hi. 5 Esther in amah kem dinga seh kumpipa' michilgeh laka khat Hathakh a samsak a, Mordekai' dahna bang hi a, bang hang hi hiam, chih thei dingin a sawl hi. 6 Tuachi-in, kumpipa' kongpi maia mun awng ah, Mordekai kiang ah Hathakh a vahawh hi. 7 Mordekai in a tunga thil tung ana hilh a, Judate sukchimih nadinga Haman in kumpipa' sumkoihna-a koih dinga a chiam zah zong a hilh hi. 8 Susa khawpi-a kiphuang amaute sukchimih nading thupuak kigelh kawpi zong a na pia a, Esther kianga lak a, hilhchian dingin a ngen hi. Tua baan ah, kumpipa' maia va lut a, a mite adinga hehpihna va ngen ngutngut dinga Esther kun dingin zong a hilh hi. 9 Hathakh hong kilehkik a, Mordekai' gente Esther kiang ah a gen hi. 10 Tua khitin, Esther in amah a thuhilh a, Mordekai kiang ah: nPasal hi-in numei hita leh sap louha kumpipa' thukhenna inndan sungnunga lut peuhmah adingin kumpipa'n dan khat a nei chih kumpipa' uliante leh kumpigam sehkhena mite khempeuh in a theih uh ahi. Tua bang mi thah ding, chih ahi. Hiai pelh theihna omsun bel, tua banga va lut mi' lama kumpipa'n khama kibawl kumpichiang a na liik leh hinghawi ding, chih ahi. Ahihhangin kumpipa' maia pai dinga sapa ka om nung ni 30 beita hi, vachi-in, a chi hi. 12 Mordekai kianga Esther' thugente a va kihilh takin, 13 ama'n thu a khak kik a: Kumpipa' inn sunga om na hih man leia nang kia suakta dingin kium ken. Hiai huna na daih dide leh huhna leh hutkhiakna mun dang apan hong piang ding a, nang leh na pa' innkawte na mangthang ding uh. Hibang hun adinga kumpi hihna dinmun hong tung na hih mei kua'n a theia eita? a chi hi.
Kumpinu' Esther' Thuchiam
15 Tua khitin, Esther in Mordekai kiang ah thu a khak a: 16 Kisa inla, Susa khawpi-a Judate khempeuh kaikhawm inla, kei adingin an nangawl un. Ni thum sung a sun a zanin nek lah ne kei unla, dawn lah dawn kei un. Noute bangin kei leh ka sawltawl numeite'n zong an ka ngawl ding uh. Tua khit chiangin dan kaih himah leh, kumpipa' mai ah ka va pai ding. Ka manthat leh mangthang ka hi mai ding, a chi hi. 17 Tuachi-in, Mordekai a paikhia-a, Esther' thuhilhte khempeuh a hih vek hi.
Kumpipa' maia Esther
5 A ni thum ni-in, Esther in a kumpipuan a silh a, kumpipa' inndan lian maia thukhenna inndan sungnung ah a vading hi. Kumpipa bel tua inndan lian sung ah a kumpitutphah tung ah, kongkhak lam ngain a na tu hi. 2 Kumpipa'n Kumpinu Esther thukhenna inndan sunga ding a muhtakin, ana kipahpih a, a khuta kumpichiang khama kibawl amah lam ah a na liik hi. Tuachi-in, Esther in a vanaih a, tua kumpichiang mong a valawng hi. 3 Tua khitin, kumpipa'n: Kumpinu Esther, bang deih na hia? Bang ngen nuam na hia? Ka kumpigam kimkhat nangawn zong kon pe nuam, a chi hi. 4 Esther in a dawng a: Kumpipa'n pha na sak leh, tuni-in kumpipa adinga ankuang ka lui, Haman tawh hong um un aw, a chi hi. 5 Kumpipa'n: Esther' nget banga ka hih theih nadingun Haman hon tonpih zok un, a chi hi. Tuachi-in, kumpipa leh Haman bel Esther' ankuanglui um dingin a hawh uhi. 6 Zu a dawn laiun, kumpipa'n Kumpinu Esther a dong kik a: Bang ahia le na thuumna? Kon pe ding. Bang ahia na nget? Kumpigam kimkhat nangawn phal ahi, a chi hi. 7 Esther in a dawng a: Ka thuumna leh ka nget hiai ahi: 8 Kumpipa'n non deihsak a, ka thuumna phalsak ding kumpipa'n pha na sak leh, zingchianga kumpipa leh Haman adinga ankuang ka lui ding hong um un aw. Tua khit chiangin, kumpipa' dotna ka dawng ding, a chi hi.
Mordekai tunga Haman Thilsawm
9 Tua ni-in, Haman bel kipak leh lunglawptakin a paikhia hi. Ahihhangin, kumpipa' kongpi bul ah Mordekai a mu a, din lah a na ding kei a, a mai ah lauhna mei zong a nei kei a, Mordekai tung ah a heh mahmah hi. 10 Hinapi-in, Haman a kidaam teitei a, inn ah a pai hi. A lawmte leh a zi Zeresh a samkhawm a, uamaute kiang ah a hauhnate, a tapa tampite leh kumpipa'n amah lam tampi-a a pahtawinate leh milian leh ulian dangte tunga a koihsang dan sialin a kiotpih hi. 12 Haman in: Tua teng kia zong hilou lai, Kumpinu Esther in a ankuangluina-a kumpipa zui dinga a chial kei kia ka hi. Zingchiang adinga zong kumpipa tawh hon chialkhawm ahi. 13 Ahihhangin, hiaite khempeuh in zong kumpipa' kongpi bula Mordekai ka muh lai teng lungkimna hon pe kei, a chi hi. A zi Zeresh leh a lawmte khempeuh in amah kiang ah: Kikhailupna khuam tong 50-a sang phutsak inla, zingsang chiangin Mordekai khailup dingin kumpipa ngen in. Tua khit chiangin, kumpipa tawh ankuang um dingin kuan inla kipak in, a chi uhi. Hiai thusawm in Haman a kipaksak a, kikhailupna khuam a phutsak hi.
Mordekai Pahtawi Sawmna
1 Tua zanin, kumpipa a ihmu thei kei hi. Tuachi-in, a vaihawm sung tangthu gelhna laibu la ding leh a maia sim dingin thu a pia hi. 2 Tuachi-in, kongkhak ngakte'n Kumpipa Ahasuera tunga khut khak a sawm thu uh Mordekai in kumpipa' a hilh a, kumpipa' michilgeh nihte Bigthana leh Teresh tunga a thilhih thu tua laibu-a kigelh a kimu hi. 3 Kumpipa'n: Hiai hangin Mordekai in bang pahtawina a ngahta hiam? chi-in a dong hi. Kumpipa kem a nasemte'n: Ama' adingin bangmah kihihsak lou ahi, a chi uhi.
Haman amah Kipahtawi Sawm
4 Kumpipa'n: Thukhenna dantan ah kua a om? a chi hi. Tua lai takin, Haman kumpipa' thukhenna dantan pawnung hong lut hi. Amah bel Mordekai adinga khailupna khuam a phuha khailup ding thu kumpipa hilh dinga hong pai ahi. 5 Kumpipa' silate'n: Thukhenna dantan ah Haman a ding, a chi uhi. Kumpipa'n thu a pia a: Amah hon piilut un, a chi hi. 6 Haman hong lut takin, kumpipa'n: Kumpipa'n a pahtawi nop mi adingin bang kihihsak peuhmah ding ahia le? chi-in amah a dong hi. Haman in bel: Keimah lou buang kumpipa'n a pahtawi nop kua dang om ding ahia? chi-in a ngaihtuah hi. 7 Tuachi-in, ama'n kumpipa a dawng a: Kumpipa'n a pahtawi nop mi adingin, kumpipa' silh ngei kumpipuan leh kumpipa' tuanna ngei sakol, a lutunga kumpilukhu kikoih kilasak henla, 9 tuate kumpipa' milian zahtakhuaite laka khat khut ah kipia hen. Kumpipa'n a pahtawi nop mi, tua kumpipuan kisilhsak henla, tua sakol tung ah kituangsak henla, khawpi kongzingte tawnin kipii henla, a mai ah: Kumpipa'n a pahtawi nop mi hibanga kihih ahi! chi-in kiphuang malam zel hen, a chi hi.
Kumpipa' Thu Zanga Mordekai Kipahtawi
10 Kumpipa'n Haman thu a pia a: Pai pah inla, kumpipuan leh sakol la inla, tua na gen bangbangin kumpipa' kongpi-a tu tua Juda mi Mordekai adingin va hihta in, Hih dinga na deihdan tu-a na gen bang hih louh peuhmah nei ken, a chi hi. 11 Tuachi-in, Haman in kumpipuan leh sakol a la a, kumpipuan Mordekai a silhsak a, sakol tunga tuangsakin khawpi kongzingte ah a kai a: Kumpipa'n a pahtawi nop mi hibanga kihih ahi! chi-in a phuang malam zel hi. 12 Tua nungin, Mordekai bel kumpipa' kongpi ah a kik hi. Ahihhangin, Haman bel inn ah a tai pah vingveng a, dah lungkhamin a lu a kikhuh hi. 13 Ama'n thil omdan khempeuh a zi Zeresh leh a lawmte a hilh hi. Amah thuhilh a mipilte leh a zi in amah kiang ah: A maia na puk kipatnapa Judami a hih leh zaw amah douin na ding zou kei ding. A mai ah na pukgawp ding, a chi uhi. 14 Tua banga a kikup lai mahmah un, kumpipa' michilgehte hong tung uh a, Esther' ankuanglui um dingin a tonpih pah uhi.
Esther' Ankuanglui Nihveina
1 Tuachi-in, kumpipa leh Haman bel Kumpinu Esther' tawh ankuang umkhawm dingin a kuan uhi. 2 A nih ua zu a dawn laiun, kumpipa'n Kumpinu Esther kiang ah: Kumpinu Esther, bang ahia na thuumna? Piak na hi ding. Bang ahia na nget? Kumpigam kimkhat nangawn phal ahi, a chi hi. 3 Tua khitin, Kumpinu Esther in a dawng a: Na mitmuha deihsakna hon ngahsak na hih a, kumpipa aw, na deihlam a hih leh, ka hinna hon hawisak in, hiai ka thuumna ahi. Tua baan ah, ka mite zong hinghawi in, hiai ka nget ahi. 4 Ahang bel, kei leh ka mite hihmanthat ding, thah ding leh hihchimih dinga khotkhiak ka hita uhi. Sila pasalte leh sila numeite hi dinga khotkhiak hi le ung zaw, kumpipa buaisak nadinga tua bang lungdonna simtham hilou ding hi a, dai maimai ding hi'ng, a chi hi.
Haman' Mawhna Kiman
5 Kumpipa Ahasuera in Kumpinu Esther a dong a: Tua bang hih kua ahia? Tua bang thil hih ngampa koia om ahia? a chi hi. 6 Esther in: Langpangpa leh melmapa hiai tatsepa Haman ahi ve, a chi hi. Tuachi-in, kumpipa leh kumpinu' mai ah Haman a lau mahmah hi. 7 Kumpipa hehin a dingtou a, a zu dawn nusiain innpi huan ah a paikhia hi. Ahihhangin, Haman in bel kumpipa'n amah bang a lawh dia chih thu a khentat khinta chih a phawk a, Kumpinu Esther' maia dingin, a hinna hawisak dingin a ngen hi. 8 Kumpipa' huan apan ankuangluina dantan sunga kumpipa hong kik nawn takin, Esther' kingaia a omna tutphah nem tunga Haman bok a mu hi. Kumpipa a kikoukhia a: Inn sunga kei tawh omkhawm lai kumpinu suai sawm ahi lai tazen maw? a chi hi.
Haman Khailupna
Kumpipa' kama thu a pawt tawh kitonin, Haman a maituam pah uhi. 9 Kumpipa keem michilgehte laka khat Harbona in: Khailupna khuam tong 50-a sang khat Haman' inn kiang ah a kiphut. Kumpipa' hoih nading genkhepa Mordekai khailup nadinga Haman in a phuhsak ahi, a chi hi. Kumpipa'n: Tua ah amah khailum un! a chi hi. 10 Tuachi-in, Mordekai khailup nadinga a bawlkholh kikhailupna mahmah ah Haman a khailum uhi. Tua khitin, kumpipa thangpaihna sou a daita hi.
Haman' Inn Mordekai Kipia
1 Tua ni mahin Kumpipa Ahasuera in Kumpinu Esther kiang ah Judate' melmapa Haman' inn a pia hi. Esther in Mordekai tawh a kitanau dan uh gen ahih manin, kumpipa' mai ah Mordekai hong pai hi. 2 Kumpipa'n a suainamna zungbuh Haman khut apan a lakkik a suahkhia a, Mordekai' khut ah a pia hi. Tua baan ah, Esther in Haman' inn tunga thu nei ding-in Mordekai a sep hi. 3 Tua baan ah, Esther in kumpipa' khebula boka, kapin, hehpihna ngetna a bawl a, tua Agag mi Haman' thilsawm gilou Judate siatna ding thil gel tawpsak dingin a ngen ngut ngut hi. 4 Tua laiin, kumpipa'n a kham chiang Esther lam ah a na-liik a, Esther hong thou a, a mai ah a ding hi. 5 Ama'n: Kumpipa'n pha a sak a, deihsakna hon ngahsak a, thil dik hi-a a theih a, kei a lungkimna ka hih leh, kumpipa' gam sehkhen khempeuha Judate siat nadinga tua Agag mi Hamedatha' tapa Haman in a gel, a gelh kikhak phei nadingin thupiak khat bawl hen. 6 Ka mite tunga siatna tung bangchi-a ke'n thuak zou mahmah ding? Ka innkawte hihmanthatna bangchi-a ke'n en ngam mahmah ding ka hia?
Kumpipa Ahasuera Thuseh dang
7 Kumpipa Ahasuera in Kumpinu Esther leh tua Juda mi Mordekai a dawng a: Haman in Judate tunga khut a khak manin, ke'n a inn Esther ka peta a, amah zong kikhailupna khuam ah a khailumta uh. 8 Tuin hoih na sak dandanun kumpipa' minin Judate adingin gelh unla, kumpipa' suainamna zungbuh in nam un. Kumpipa' min leh kumpipa' suainamna zungbuh kinamna laigelh peuhmah kuamah phei theihlouh ahi, a chi hi. 9 Kumpipa' laigelh mite a kisam pah a, tua kha thumna Sivan kha, a ni 23 ni-in India apan Ethiopia donga gam sehkhen 127-a om Judate, ukpi neute, ukpipate leh miliante ading Mordekai' thupiakte khempeuh a gelh uhi. Hiai thupiakte bel gam sehkhente-a laigelh dan leh pau chiha kigelh ahi a, Judate' lai leh pauin zong a kigelh hi. 10 Mordekai in Kumpipa Ahasuera' minin lai a gelh a, kumpipa suainamna zungbuhin a nam a, laitai sakoltungtuangte khut ah a khakkhia hi. Tua laitaite bel kumpipa adinga kikhoi tuam sakol hatte-a tuang ahi uhi. 11 Tua kumpipa' thuseh in khawpi tenga om Juda omkhawmte amau kihut theihna thuneihna a pia hi. Tua baan ah, tua thuseh in kua minam hi-in koi gam mi hita leh amaute'n a numeite uleh, tate leh dou dinga kigalvan mi peuhmah hihmanthat theih, thah theih, hihchimih theihna leh a melmate uh neihsa laksak theihna thuneihna a pia hi. 12 Kumpipa Ahasuera' gam sehkhen khempeuha hibang hih nadinga Judate ading ni seh, kha sawmlenihna, Adar kha, a ni sawmlethum ni ahi. 13 Hiai thuseh kawpi, gam sehkhen khempeuh-a dan hi dinga gelhlut hi ding ahi. Minam kua peuh kianga theihsak ding ahi. Tua ni-a Judate'n a melmate uh thuk dinga a kisakkholh theih nading uh ahi. 14 Kumpipa' thupiak kinawh ahih manin, kumpi sakolte-a tuangin laitaite a taikhia uhi. Tua thuseh bel Susa kulhpi ah zong a kisuah hi.
Mi tampi Judami suak
15 Mordekai bel kumpipuan dum leh ngoua kizemin, khama kibawl kumpilukhu lianpi khuin leh puan malngat sandup silhin, kumpipa' omna apan a paikhia hi. Tua Susa khawpi ah kipaktaka omna leh lopna a om hi. 6 Ahang bel, Judate adinga lungdam ni leh lungnop ni, kipah ni leh pahtawina ni hiven. 17 Kumpipa' thuseh tunna gam sehkhen teng ah leh khawpi teng ah, Judate lak ah lungnopna leh kipahna a om a, ankuangluina leh lopna a om hi. Tua baan ah, Judate launa in mite man ahih manin, minam dang tampite Judami hong suak uhi.
Nikhatni-a Vualzawhnate
1 Kha sawmlenihna, Adar kha, a ni sawmlethum ni-in, kumpipa' thupiak thuseh sepkhiak ding ahi. Hiai ni-in Judate' melmate'n amaute zawh a kinem uhi. Ahihhangin, thil hong kilumlet a, amau mudahte tung ah Judate a vualzou uhi. 2 Kumpipa Ahasuera' gam sehkhen khempeuh ah Judate amau omna khawpi teng ah a kikaikhawm uh a, amaute hihmanthat sawmte dou dingin a kisa uhi. Minam dangte khempeuh in amaute lau uh ahih manin amaute kuama'n a nang zou kei hi. 3 Gam sehkhena miliante, ukpi liante, ukpi neute leh kumpipa' vaihawmte'n Mordekai lauta uh ahih manin, Judate a huh uhi. 4 Mordekai lah kumpi innpi ah a tallang mahmah a, gam sehkhente ah a min a thang a, hong thupai semsem hi. 5 Judate'n namsauin a melmate uh a sat uh a, a that uh a, a hihmangthang uhi. Amau mudahte tung ah utut a hih uhi, 6 Susa khawpi ah Judate'n mi 500 a hihmangthang uhi. 7 Parshandatha, Dalfon, Aspatha, 8 Poratha, Adalia, Aridatha, ^armashta, Arisai, Aridai leh Vaizatha, 10 tua Judate' melmapa Haman' tapa sawmte zong a that uhi. Haman bel Hamedatha' tapa ahi. Ahihhangin, gallak sum bangmah a la kei uhi. 11 Tua ni-in Susa khawpi-a thahte a pha zah kumpipa kiang ah a hilh pah uhi.
Ni Nihni-a Vualzawhnate
12 Kumpipa'n Kumpinu Esther kiang ah: Judate'n Susa khawpi ah pasal 500 leh Haman' tapa sawm a that uh a, a hihmangthangta uh. Kumpipa' gam sehkhen dangte ah bang a hihta ua chih na kiang ah hon kihilh ding. Tu'n bang ahia na nget? Piak na hi ding. Bang na deih a? Tua zong phal ahi ding, a chi hi. 13 Esther in a dawng a: Nang pha nasak leh, Susa-a om Judate'n tua thuseh zingchiangin zong a zat uh phalna pe lechin khailupna ah Haman' tapa sawmte kikhai leh, a chi hi. 14 Tuachi-in, kumpipa'n hiai hih dingin thu a pia hi. Susa ah thuseh khat a kisuah a, khailupna ah Haman' tapate a khai uhi. 15 Adar kha, a ni sawmleli ni-in, Susa-a Judate hong paikhawm uh a, Susa ah mi 300 a that uh a, ahihhangin, gallak sum bangmah a la kei uhi. 16 Tua sung tengin, kumpipa gam sehkhente-a om Juda om laite zong amaute kihu ding leh a melmate ua pan tungzanna mu dingin a kikaikhawm uhi. Amaute'n mi 75,000 a that uh a, ahihhangin, gallak sum bangmah a la kei uhi. 7 Hiai bel, Adar kha, a ni sawmlethum ni-a thil tung ahi a, a ni sawmleli ni-in a tawlnga uh a, ankuanglui ni leh lungnop ni-in a zang uhi.
Purim Ankuangluina
18 Ahihhangin, Susa-a Judate bel, ni sawmlethum ni leh ni sawmleli ni-in a kikhawm uh a, a ni sawmlenga ni a tawlnga uh a, ankuanglui ni leh lungnopna ni-in a zang uhi. 19 Tua hang ahi, khawpi pawlama Juda omte, khawta-a teengte'n Adar kha ni sawmleli ni pen lungnop ni leh ankuanglui ni, tua baan ah, thawnpiakte kipiaktuah ni-a a zat uh. 20 Mordekai in tua thil tungte laiin a gelh a, kumpipa Ahasuera' gam sehkhen khempeuh-a Judate, a gamla a nai zong a khakkim vek a, 21 kum sima Adar kha ni sawmleli ni leh ni sawmlenga ni tan ding, 22 Judate a melmate uapan a tawldamna hun, a dahnate uh lungnopna a suah kha, a sisuunna uh thil kipahhuai lopna a suahna kha ahi ding hi, a chi hi. Tua nite ankuangluina leh lungnopna leh an kikholhtuahna, gentheite kianga thawnpiakte piakna nite-a zat dingin amaute kiang ah a gelh hi. 23 Tuachi-in, Mordekai in amaute kianga a gelh zuia a na-patsa uh lopna bawl zom ding a thukim uhi. 24 Ahang bel, Hamedatha' tapa Agag mi Haman, Judate khempeuh' melmapa'n Judate hihmanthat ding a simsawm a, amaute' siat nading leh manthat nadingin Pur na bawl hiven. Pur bel aisan chihna ahi. 25 Ahihhangin, tua thil simsawm thu pen kumpipa'n a theih takin, Haman' thil sawm leh Judate dou dingdan a gel thilgilou ama' lutung a tuk nading leh, amah leh a tapate, khailupna-a khai nadingin thupiak a suah hi. 26 Tua bang ahih manin, hiai nite Purim a kichi hi. Tua bel, Pur thumal apan kila ahi. Hiai laikhaka kigelh khempeuh hangin, 27 Judate'n amaute leh a khangsawn sawnte' tan ding dan leh a hun seh bangbanga kumsima tan louh theihlouha ngaihna neih ding, chi-in thu a kiphialkhum uhi. 28 A khangsawn sawna innkuan kuana, gam sehkhen khempeuh leh khawpi khempeuha hiai nite theihgige-a tan kim ding ahi. Judate'n hiai Purim nite lop tawpsan ngeilouh ding, a suan sawnte uh laka zong hiai theihgigena a bei louh ding ahi. 29 Tuachi-in, Purim tawh kisai hiai laikhak nihna hihkip nadingin, Abihail' tanu Kumpinu Esther in tua Judami Mordekai tawh lai a gelh uhi. 30 Tua baan ah, Mordekai in Kumpipa Ahasuera' gam sehkhen 127 sunga om Judate khempeuh kiang ah deihsakna leh khamuanna laikhakte a khak hi. 31 Tua bel, tua Judami Mordekai leh Kumpinu Esther in amaute adinga a seh bang uleh anngawl hun leh dah hun tawh kisaia amaute leh a suansawnte uh adinga a kiseh bang ua Purim nite hihkip nadingin ahi. 32 Esther' thuseh in Purim tawh kisai dante a hihkip a, tua thuseh bel thil chiamtehna laibute ah a kigelh hi.
Mordekai' Minthanna
1 Kumpipa Ahasuera in kumpigam khempeuh ah leh tuikulh gamte ah siahkaih a bawl hi. 2 A vangletna leh thahatna thilhihte, kumpipa'n Mordekai a koihsangna thupi a kigennate, Media leh Persia kumpipate' khangtangthubu ah kigelh hilou hia? 3 Tua Juda mi Mordekai bel, Kumpipa Ahasuera zoma lian, Judate laka tungtuang, a Judapihte'n a zahtak uleh tunget uh ahi. Banghang hiam chih leh, ama'n a mite hoih nadinga nna sem a, Judate khempeuh angvana thu genkhia hiven.
1 Uz gam ah mi khat a min Job kichi a teeng hi. Hiai mi genbaanglou mi tang ahi a, Pathian a lau a, thil gilou a lehngatsan hi. 2 Ama'n tapa sagih leh tanu thum a nei a, 3 belam 7,000, sangawngsau 3,000, bawngtal nasem 500 leh sakolneu 500 leh sila tampi zong a nei hi. Amah suahlam mite khempeuh laka mi thupipen ahi. 4 A tapate'n aban bana kikhain a inn chiat uah ankuangluina a nei uh a, amaute tawh nekhawm dawnkhawm dingin a sanggamnute uh a chial sek uhi. 5 Tua bangin ankuanglui a neih laiun, Job in amaute samin amaute hihsiangna a bawl hi. Ama'n: Ka tate na khialin lungsung ah Pathian a na hamsiat kha ding uh, chi-in, zingsang beltakin amaute ading haltum kithoihna a latsak chiat hi. Hibanga hih bel Job' hih dan ngeina ahi.
Job Ze-etna Khatna
6 Ni khat, Tangtawn Toupa' maia kilak dingin Pathian' tapate hong pai uh a, Setan zong amaute tawh tonin hong pai hi. 7 Tangtawn Toupa'n Setan kiang ah: Koi apan hong pai na hia? a chi hi. Setan in Tangtawn Toupa a dawng a: Leitunga vak kawikawi a, thil enkhia-a a suk a tunga ka vakna apan hong pai ka hi, a chi hi. 8 Tua khitin, Tangtawn Toupa'n Setan kiang ah: Ka sila Job na ngaihtuah ngeita hia? Leitung ah amah bang kuamah omlou ahi. Amah zaw genbaangloua tang, Pathian lau leh thilgilou kiheisan mi ahi, a chi hi. 9 Setan in a dawng a: Job in a san a hang beipi-a Pathian lau ahi-a hia? 10 Nang amah leh a innsung mite leh a neih peuhmah kiim ah umna dai na kaia ahi kei maw? Nang a khut nasepte na vualzawl a, a belam leh kelhonte leh bawnghonte gamsung teng dim ahi ve. 1 Ahihhangin, na khut zankhia inla, a neih peuhmah tung ah khut kha dih, ama'n na maitanga hon hamsiat ngeingei ding ahi, a chi hi. 12 Tangtawn Toupa'n Setan kiang ah: Tua bang ahih leh hoih e. A neih peuhmah na khuta om ahi, ahihhangin, amah tung ah bel na khut kha ken, a chi hi. Tua khitin, Setan, Tangtawn Toupa' omna apan a paikhia hi. Ni khat, Job' tapate leh tanute, a sanggampa uh upapen' inn sunga nekhawm dawnkhawma a om laitakun, 14 Job kiang ah thangkou khat hong tung a: Bawngtalte'n lou kai a, sakolneute a kiang nai ah gamtain om a, 15 tua laitakin Sabeate'n hong sim uh a, a pawmang vek uhi. Silate zong namsauin a that uh a, hiai thu nang hon hilh dinga a suakta sun kei ka hi! a chi hi. 16 Tua banga a pau laitakin, thangkou dang khat hong tung a: Van apan Pathian' mei hong kia a, belamte leh silate a kangtum a, hiai thu nang hon hilh dinga a suakta sun kei ka hi! a chi hi. 17 Tua banga thu a gen laitakin, thangkou dang khat hong tung a: Kaldai misim pawl thumte'n na sangawngsaute hong um uh a, a pawmang vek uhi. Silate zong namsau in a that uh a, hiai thu nang hon hilh dinga suakta sun kei ka hi! a chi hi. 18 Amah a pau laitakin, thangkou dang khat hong tung a: Na tapate leh tanute a sanggampa uh upapen inn-a nekhawm dawnkhawma a om laitakun 19 gamdai gamkeu apan huihpi in inn a kiu li apan hon muut a, amaute tung ah inn a chim a, amaute a si uhi. Hiai thu nang hon hilh dinga suakta sun kei ka hi! a chi hi. 20 Hiai a zaktakin, Job a dingkhia a, a puansilh a botkek a, a sam a metmai hi. Tua khitin leilak ah Pathian biain a bok a: 21 Ka nu' suul apan vuaktanga hong piang ing a, vuaktang maha kik ding hi'ng. Tangtawn Toupa'n pia a, Tangtawn Toupa'n lamangta hi, Tangtawn Toupa' min phatin om hen, a chi hi. 22 Hiaite khempeuh ah, Pathian thildiklou hih a ngawh in, Job a khial kei hi.
Job Ze-etna Nihna
1 Ni dang khat, Pathian' tapate, Tangtawn Toupa' maia kilak dingin hong pai uh a, Setan zong a maia kilak dingin amaute tawh tonin hong pai hi. 2 Tangtawn Toupa'n Setan kiang ah: Koi apan hong pai na hia? a chi hi. Setan in Tangtawn Toupa a dawng a: Leitunga vak kawikawi a, thil enkhia-a a suk a tunga ka vakna apan hong pai ka hi, a chi hi. 3 Tua takin, Tangtawn Toupa'n Setan kiang ah: Ka sila Job na ngaihtuah ngeita hia? Leitung ah amah bang kuamah om lou ahi. Amah zaw genbaangloua tang, Pathian lau leh thilgilou kiheisan mi ahi. Nang a san ahang beipi-in amah hihse dingin hon gamtaangsak mah lechin, ama'n a mitakna nei lailai ahi, a chi hi. 4 Setan in a dawng a: Vun sikin vun! Mihing in ama' hin nadingin a neih khempeuh pe mah ding hi. 5 Ahihhangin, na khut zankhia inla, a sa leh a guhte tung ah na khut kha lechin, ama'n na maitanga hon hamsiat ngeingei lou ding hia? a chi hi. 6 Tangtawn Toupa'n Setan kiang ah: Tua bang ahih leh hoih e. Amah na khuta om ahi, ahihhangin, a hinna na hawi ngeingei ding ahi, a chi hi. 7 Tuachi-in, Setan, Tangtawn Toupa' omna apan a paikhia a, Job, a khenuai apan a luzang dong chithak meima nasetak mai a thuaksak hi. 8 Tuachi-in, Job in belpei khat a la a, vut laka tu-in a kikhuat khuat hi. 9 A zi in a kiang ah: Na mitakna len lailai na hi maw? Pathian hamsiat inla sisuk mai ve! a chi hi. 10 Job in a dawng a: Numei hai bangin na pau ka chi. Pathian apan a hoih zong, a hoihlou zong i saang kei dia hia? a chi hi. Hiaite khempeuh ah, Job a thugen ah a khial kei hi.
Job Lawm Thumte
11 Job' lawm thumte, Teman mi Elifaz leh Shua mi Bildad leh Naamath mi Zofar in Job tunga lungkham buaina hong tung thu a zak takun, a innte uapan hong kuankhia uh a, kithukimna nei in, hong pai uh a, amah khasiat ding leh khamuan dingin a kituakkhawm uhi. 12 Amaute'n a gal et uleh a muh takun, amah a meltheih kei phial uhi. A kap uh a, a puansilhte uh a botkek uh a, a luzang uah leivui a kibuak uhi. Tua khitin, leivui lak ah amah tawh ni sagih leh zan sagih sung a tukhawm uhi. Thuakna a natluat dan muin kuama'n a kiang ah thu kam khat zong a gen kei uhi.
Job' Thugen
1 Hiai nungin, Job a kamka a, a pian ni a hamsiat a, 2 ama'n: 3 Ka pianni na om kei henla, Pasal naupang a piang, a kichih zan zong na om kei leh maw! 4 Tua ni mial suak henla, tung Pathian in limsak kei henla, a tung ah vak taang kei leh aw! 5 Mialna leh sihna limliap sahpi in khatvei tang nawn henla, meipi in khuh meuhmouh henla, a vakna zong mialin khuh zou leh. 6 Tua zan, mial sah in man henla, kum khat sung nite lak ah kisim kei henla, khate lak ah zong kihel kei leh. 7 Tua zan bangmah piang theilou a chiing hi henla, a sung ah lungnop kikou aw kiza kei leh. 8 Nite a hamsiat mite'n tua ni hamsiat henla, Leviathan phawng dinga mansa-a omte mah in hamsiat leh. 9 A zingsol aksite mial suak henla, sun khawvak a ngak amawkna suak henla, phalvak mu kei leh. 10 Ahang bel, tua in kei adinga sul kong khak lou a, ka mit apan lungkham buaina selmang lou hiven. 11 Banghanga sul apan sisa-a piang mai lou ka hia, banghanga gilsung apan ka pawtkhiaka si pah mai lou ka hia? 12 Banghanga kei hon na dom dinga khukte na om ahia, banghanga ka tep ding nawite na om ahia? 13 Ahang bel, kei tua khamuanga lum ding ing a, daidide a ihmu-a tawlngata ding hi'ng a. 14 Tu-a a sekhinta munte, amau adinga a nalam kumpipate leh thuhilhmite tawh, 15 khamsik nei, innsung dima ngunsik nei vaihawmte tawh, ihmu-a tawlngata ding hi'ng. 16 Ahih kei leh, banghanga sisa-a piang naungek banga, nivak mu manlou naungek banga lei nuaia phum manga na om mai lou ka hia? 17 Tua-a migiloute' buaina beia a tawite zong tawlngata hi a. 18 Salmatte'n zong nuamsata a, amau vialhawlte' aw za nawn se lou uhi. 19 Tua-a a lian a neu kibanga om uh a, sila zong a pu apan suaktata hi. 20 Banghanga gimthuakte vak kipia a, banghangalungkham mangbangte hinna kipia a, 21 sihna hong tung loupi lunggulh a, gou kisel sanga sihna zongzawte, 22 hankhuk tun chianga kipahna tawh kidim a lungnuamte banghanga vak kipia ahia? 23 Banghanga Pathian in daia a um mi a lampi kisel mi kianga hinna kipia ahia? 24 Kei adinga zaw an sanga khawisatna hong tung a, ka thuum ka mauna tui sunbuak bang hiven. 25 Ka laulau ka tunga hong tung a, ka kihtaak tak ka tunga hong tung hiven. 26 Lungmuanna nei lou ing a, daih dide leh tawldamna nei lou ing a, buaisiatna kia nei hi vengin, a chi hi.
Elifaz' Thugen
1 Tua khitin, Teman mi Elifaz in a dawng a: 2 Khat teiin na kiang ah thu khat gen ngam leh, dawhzou louin na om diam? Ahihhanga lah kua ahia pau lou thei ding? 3 Mi tampi na thuhilhtak dan ngaihtuah inla, khuk zawte na hatsak dan ngaihtuah in. 4 Na thugente'n a kipalpaite phong a, khuk zawa vuangte na hatsakta ve le. 5 Ahihhanga, tu-a nang tunga buaina hong tun leh lungkia chin a, buaina in nang hon nuai leh patau na hi. 6 Na Pathian launa na kimuana a hih ding hi lou maw, gensiatbeia na gamtatna na lametna a hih ding hi lou maw? 7 Tuin theigige in: Mawhneilou kua mangthang ngei eita? Mitangte koia hihsiat hi ngei eita? Ke'n ka muhtak bangin, gitlouhna leilette'n, buaina pawite'n tuate mah at uhi. 9 Pathian' hu-a mangthang uh a, a hehna phitkhiaka mangthang uhi. 10 Humpinelkai in humhamin mi ngikta leh zong, humpinelkai thupite' hate kitan hi. nHumpinelkai samat neilou mangthang a, humpinelkaite' noute kithehzak uhi. 12 Ka kiang ah thu khat a simin hong kitun a, ka bilte'n tua thu a huau-a za uhi. 13 Mite' tunga ihmut lim a tun laia, kei bel ka zan ihmut mang nuamloute laka 14 launa leh liinna in hon patausak a, ka guh ka tang khempeuh kiliingsakin hon lausak hi. 15 Ka mai ah kha khat in hon kheng zual a, ka mulsi thou hi. 16 Hong khawl a, ahihhanga bang hi hiam, gen thei lou hi'ng. Ka mitmuha pumpi neia ding a, aw khat ahuau siausiaua pau za ing a: 17 Pathian sanga a si thei mi diktat zaw thei ding hiam? A Siampa sanga a siamsa mihing siang zaw thei ding hiam? 18 Pathian in a silate a muan kei a, a vansawltakte dikloua a ngawh leh, 19 belleia bawl innte-a tengte, tua inn suangphumte leivui hi maimahte, lungnou sanga nehtap baihlam zawte muanglouin mawhsa sem lou ding hiam! 20 Zing phalvak leh khawmui kala hihtapa om uh a, kuamah' phawk louha mangden uhi. 21 A puan inn kaihna khaute uh kizialkhia a, pilnabeia si hi lou umaw? chi hi.
1 Na ut leh tu'n sam le chin, ahihhanga, kua'n hon dawng ding? Misiangthoute a kua pen kianga taai ding na hia? 2 Hehna in mihat that a, thikthusiatna in mimawl that hi. 3 Keimah in zong mihai khat zungkai mu ing a, ahihhanga a inn hamsiata om guih hi. 4 A tate bitna pana gamla uh a, a humbit ding omlou a, khawpi kongpi-a nehtapa om uhi. 5 A gilkialte'n tua mi' buhlaksa, linglak apan a kaihkhawm nangawn nekgaihsak uh a, a dangtak mi a neihsa lunggulha nak hawphawp hi. 6 Ahang bel, haksatna leilak apan poutou hi lou a, lungkham buaina zong leilak apan dawnkhia hilou hiven. 7 Hinapi-a, mihing bel lungkham buaina nei dinga piang hi a, meiek, tunglama a lentouh teitei bang hi mawk hi. 8 Kei ka hih leh, Pathian kianga ka ngetna tun ding ing a, a maia ka thu tun ding hi'ng. 9 Ama'n teh vuallouh thillamdangte hih a, sim senglouh thillamdangte hih hi. 10 Ama'n leitung ading vuahtui pia a, gam ading tui pia hi. nA niamte sangsak a, a dah-a suunte bitna muna domtou hi. 12 Pil lepchiahte' thilsawm dai a, a khutte un lawhehinna mu lou hi. 13 A pilte a pillepchiahna ua man a, lemtheite' thilsawmte phiatmanga om hi. 14 Sun tanglaia mialna a tung ua tung a, sun tanglaia miallaka pai banga kimai mai uhi. 15 Ama'n a tasamte, a kamsung ua namsau apan hukhia a, a vangliante' khut apan hukhia hi. 16 Tuachi-a mizawngte'n lametna nei uh a, dikloua vaihawmna daidide hi. 17 Pathian in taihilha a bawlhoihte mi nunnuam hi uhi. Tua bang ahih manin, Vanglianpen' thununna simmawh ken. 18 Ahang bel, ama'n liamsak a, amah mah in liamna mekbing a, ama'n hihna a, amah khut mah in damsak hiven. 19 Ama'n tuahsiatna guk apan nang hon humbit ding a, sagih apan zong siatna in hon pha lou ding hi. 20 Ama'n kial laiin, sihna apan hon tankhe ding a, kidouna phual ah zong, namsau apan hon tankhe ding hi. 21 Kamsunga lei zeepna satna apan huma om ding chin a, siatna hong tun chianga zong lau lou ding hi teh. 22 Siatna leh kial nuihsan ding chin a, leitung gamsate na lau kul lou ding hi. 23 Ahang bel, gamlak suangtumte tawh kala thukhun nei ding chin a, gamsa giloute'n hon kilempih ding hiven. 24 Na puanbuk a bit chih thei ding chin a, na van neihsate sim ding chin a,kuamah natunga khiallou ding hi. 25 Na tate tam ding a, na suan na khakte leitung loupakungte bang ding hi. 26 Thahat laipi-a hankhuk tung ding chin a, a hun taka buhphal khopkhawmte bang ding hi teh. 27 Koute'n hiai entelta ung a, a dik mah hi ahi. Tuabang ahih manin, hiai ngaikhia inla, nang adingin zang in, a chi hi.
Job' Thugen
1 Tua khitin, Job in a dawng a: 2 Ka lungzinna kibuuk thei mahmah henla, ka thuakgimate selphalain kikhai thei leh aw! 3 Tuipi piaua sehnel sanga gik zaw thamtham ding hi. Ka thugente a huham lamdang hilou hi. Vanglianpen' thaltangte kei ah taang a, ka kha in a gu uh dawn a, Pathian' mulkimhuaina ka tunga tung hi. 5 Gamlak sakolneu nek ding loupa mu a ham ngei-a hia? Bawngtal gan an mu zong a ham ngei-a hia? 6 Gim neilou an, chi beiin a kine-a hia? Aktuida in zong limna a nei-a hia? 7 Ke'n tua bang khoih nuam lou, tua bang an in ka chi nasak hi. Ka nget mu thei lengla, Pathian in ka lamet hon pe leh aw. 9 Pathian in hon gawizan nuam henla, a khut khain hon satkhe mai leh aw! 10 Hi leh, hiai ka kikhamuanna hi ding hi: Natna kiamtheiloua zong lungnopna nei ding hi'ng. Tua bel, a siangthoupa' thu ka nial kei, chih kikhamuanna hi ding hi. 11 Lamet nei lai dinga bang thahatna nei ka hia? Ngakzoutaka om dinga, mailam lamet bang nei ka hia? 12 Suang' hatna bang hatna ka nei-a hia? Ka sa zong sumsan ahi-a hia? 13 Kei leh kei kihuh dingin vangletna ka nei-a hia, tu'n kingakna ding kei apan hawlmanga omta hilou maw? 14 Mi chimawh in Vanglianpen launa kiheisan taleh zong, a lawmte' khawtuahna a ngah ding hi tawk a! 15 Ahihhanga ka sanggamte lah luita kang thepthup bang uh a, kingak theihna hi lou uhi, luita khanga leet zual bang hi uhi. 16 Tua luitate vuk tuisuak in ninsak a, vuktui in khangsak hi lei hi. 17 Ahihhanga khawkeu laia luang nawn lou uh a, khawlum laia a luannate lah keuta hi. 18 Ganta vanpua-a kizuite a lampi uapan lampial uh a, gamsia-a paitou uh a, mangthang uhi. 19 Tema-a ganta kizuite'n tui zong uh a, Sheba sumsin khualzinte'n lamena zong uhi. 20 Kimuanna a na neih man ua, lungkia-a mangbangta uhi. Maizum ding leia tua mun tung uhi. 21 Tu'n noute zong tuate bang uchin a, huh dinga phatuamlou na hi uh chih kilangsak na hi uhi. Ka tan mulkimhuai mu uchin a, lau hi ve uchin. 22 Ke'n: Kei ading golhgukna banghiam pia un, na hauhna uh pansanin hon tankhia un. 23 Melma khut apan hon hukhia un, dop neiloute' khut apan hon tankhia un, kon chi ngei-a hia? 24 Hon sinsak un, ka dai dide ding. Ka diklouhna hon lak un. 25 A siang sianga kigen thute na namaizen e! Ahihhangin, na pansante uh bang pansan ahia? 26 Ka thugensa hihdik sawm maw, mi chimawh' thugensa huih bang leia ngai ding maw? 27 Pabeite tung ah ai na san nuam ding uh a, na lawm nangawn van khekna'n na zang nuam ding uh. 28 Ahihhangin, kei hon en dingin siamna suah un. Na mai uah zuau ka gen dia hia? 29 Kisikin lunghei un, diktat lou kei un. Ngaihtuah thak un, ka dikna a man ding lauhuai hi. 30 Ka muk ah gitlouhna a om-a hia? Asia kideihsakna ka kam in thei thei lou hia?
1 Mihing in leitunga semgim lou hia? A nite kithalawh mi' nite bang hi lou hia? 2 Sila in nitaklam limliap a ngaklah banga, kithalawh mi in a thamante ngaklah hi. 3 Tua banga kei adinga mannabei nilekhate piak hi a, kei adinga gimna zante piak hi ahi. 4 Ka lupsuk chianga kingaihtuah ing a, ka thawhtouh ma bangtana sawt ding ahia? Zankhua sawt a, phalvak mateng kilep lep hi'ng. 5 Ka pumpi thante leh leivui khaite'n tuam a, ka vun khangkham a, tuisuak hi. 6 Ka nite siamgan mi' khawhthei sanga kinzaw-a bei a, lametna beia hong bei hi. 7 Pathian aw, thei gige in: Ka hinna khatvei naksuk hi lei hi. Ka mitte'n kipahna mu nawn lou ding hi. 8 Tu-a hon mu mit in hon mu nawn lou ding a, hon zong ding chin a, om nawn lou ding hi'ng. 9 Meipi lengmang a, a bei sipsip banga hankhuka paisuk mi hong kik nawn lou hi. 10 A inn-a hong paikik ngei nawn lou ding a, ama' mun in amah meltheih nawn lou ding hi. 11 Tua bang ahih mana kamsim maimai thei lou hi'ng. Ka kha lungkhamna apan paukhe ding hi'ng. Ka lungkham mangbatna apan lungkimlouhna gen ding hi'ng. 12 Kei, tuipi ka hi-a hia, tuipi-a ganhing lauhuai ka hi-a hia, hibanga venvena non koih? 13 Ka lupna in hon khamuan inteh, ka tutna in ka lungkimlouhna phadawmsak inteh ka chih chianga, 14 tua chiang nangawna, ihmut mangtea hon lausak chin a, mengmuhtea hon mulkimsak hi teh. 15 Tua hanga hiai ka pumpi sanga ngawnghekna leh sihna tel zaw hi'ng. 16 Ka hinna simmawh hi'ng, nungta den nuamlou hi'ng. Hong kikum louin, hon omsak maimai in. Ka damsung nite'n gen neilou hi. 17 Mihing bang atel a, hibanga na thupibawl a, hizahta-a na ngaihsak a, 18 zingsang tenga na ettel a, mitphiatkal tenga na etchet? 19 Kei apan lehlam nga ngeilou ding maw, mitphiatkal khat beek hon nuse lou ding maw? 20 A nakhialta ka hih leh, na tunga bang hih ka hia mihing vengpa aw? Banghanga ngimpipena hon nei na hia oi? Nang adingin puakgik kong suakta ahia? 21 Banghanga ka tatieknate maisak a, ka tatsiatnate ngaidam lou? Ahang bel, leivuia lum pahta ding ing a, hon zong ding chin a, om nawn lou ding hi'ng, a chi hi.
Bildad' Thugen
1 Tua khitin, Shua mi Bildad in a dawng a: 2 Tua bang thilte bangtan gen ding na hia? Na thugente mi dulhsakthei huih hiveh! 3 Pathian in a dika thukhenna kaikawi hia? Vanglianpen in a dik kaikawi hia? 4 Na tate ama' tunga a khelh chiang ua, tatlekna gawtna thuak dinga amaute pekhia hi. 5 Ahihhanga, lamena Pathian na etnop a, Vanglianpen kianga na thum nop leh, 6 a siang leh a tang na hih nak leh, tumah maha zong nang adinga amah hong kiphawng ding a, na mun maha hon tungding thak ding hi. 7 Na kipat chilna niamin kilang mahleh, na tunung lawhching ding hi. 8 Khang masate dong inla, a pu apate un a na sinsate uh mukhia in. 9 Ahang bel, eite zan zeka piang bangmah theilou hi hang a, leitunga i damsung nite liimliap lei hiven. 10 Amaute'n nang hon thuhilh a, hon hilh lou ding uhia? A theihsiamna uapan thu hon sekhe lou ding uhia? 11 Chiknawng omlouhna-a tahum khangsang thei hia? Tui omlou-a pumpeng khanpha thei hia? 12 A khan lai ua, sattan hiloupi-a loupa sanga vuai baih zaw uhi. 13 Pathian mangngilhte' tawpna tua bang hi a, Pathian beia omte' lametna tua bang hi ahi. A muan thil tou loua sebaih a, a kingakna maimomlen hi lei hi. 15 A maimomlena kingai a, kitatpah hi, tua-a luai a, amah khouh lou hi. 16 Amah, nisa nuaia tuikham haichi kung bang hi a, a hiangte huan sung tenga kizalhsak hi. 17 A zungte suangpite vialin zam a, suang laka mun a zong hi. 18 Ahihhanga, a kibawhkhiak chianga, tua mun in amah nolh a, Nang hon mu ngei ke'ng, chi hi. 19 A damsung nopsakna tua bang lei hi a, a pouna leilaka sing leh lou pou hi. 20 Pathian in genbaanglou mi zaw nolh lou taktak a, thilgilou hihte khut hatsak lou hi. 21 Ama'n na kam, nuihna-a dimsak lai ding a, na mukte lungnuama kikousak ding hi. 22 Na melmate'n maizumna silh ding uh a, migiloute' puanbuk om nawn lou ding hi, a chi hi.
Job' Thugen
1 Tua khitin, Job in a dawng a: 2 Hiai a dik chih ka thei taktak hi. Ahihhangin, a sithei mi Pathian' maia bangchi-a diktat ding? 3 Mi khatpeuh in amah kiselpih nuamta leh zong, sang khat vei laka khatvei zong amah dawng theilou ding hi. 4 Ama' pilna thuk a, a vangletna za hi. Kua'n amah nang a, thuak lou-a suakta thei ding? 5 Ama'n amaute' theih louh-a mualte khinkhia a, thangpai a, amaute lumlet hi. 6 Ama'n leitung a omna apan kungsin a, a khuampite kiliingsak hi. 7 Ama'n ni kianga thu pia a, taangkhe nawnlou a, aksi vakte zong khuhmang hi. 8 Amah kia in vaante zalh a, tuipi tuihualte tung sikin pai hi. 9 Amah ahi aksihon Zangkhua leh Zuheisuktun leh Siguk leh Simlam aksihonte Bawlpa. I0 Ama'n teh vuallouha thuk a lamdangte hih a, sim senglouh thillamdangte hih hi. 11 Ama'n kei hon pelh lai a, amah mu theilou ing a, amah ka kianga a pai laia, amah phawk thei lou hi'ng. 12 Ama'n a kaihkhiak leh, kua'n khou ding ahia? Kua'n amah kianga: Bang hih na maia? chi thei ding ahia? 13 Pathian a hehna kidaam lou a, Rahab kaih zatamte nangawn a khebula kuun hi. 14 Tua bang hi a, bangchi-a ken amah kiselpih thei ding? Ke'n amah seel nading thute bangchi-a mu ding? 15 Mawhneilou hita mahleng amah dawng theilou hi'ng. Ka langpa kianga zahngaihna ngetthawh thei lei hi'ng. 16 Amah sapthawh lengla, hon ngaikhia hita le zong, thu hon gensak dinga um lou hi'ng. 17 Ama'n huihpi-in hon nuaigawp ding a, a san beipi-in ka liammate tamsak sem ding hi. 18 Ka nakna hon neisak kik nuam lou ding a, gimnain hon khuhzou zaw ding hi. 19 Hatna thu ahih leh, amah thahat lua hi! Dika thukhenna ahih leh, kua'n amah sapthawh thei ding? 20 Mawhneilou hita leng zong, ka kam in mawh hon tangsak ding a, genbaanglou hita leng zong, ka kam in mawh hon chi ding hi. 21 Genbaanglou hi mah leng, kei kiawlmawh keng, keimah mah hinna simmawh ing. 22 A kibang sap hi a, tua hanga ken: Ama'n genbaangloute leh giloute kibanga hihmangthang hi, chita mai hi'ng. 23 Zeepna khauhual in thakhata sihna a tut chianga, mawhneiloute' manphatna nuihsan hi. 24 Migiloute' khutsunga gam a puklut chianga, ama'n a thukhente maituam hi. Amah ahih kei leh, kua ahi-a eita? 25 Kitaiteh mi sanga ka damsung nite thakin zaw a, lungnopna mu lou a, lengmang pah uhi. 26 Tahum longte banga paimang uh a, muvanlai a samat bawhsuk banga thakin uhi. 27 Ke'n: Ka phunna mangngilhta ning, ka melput khengin nuihmai ning, chi leng, 28 ka thuakna khempeuh lau lailai hi'ng. Ahang bel, nang mawhneilou hon hisak tuan lou hi ve chin. 29 Mawhneia muhsa ka hih nung, banghanga a mawkna-a kitung tung ding ka hia? 30 Sahbonin kisil leng zong, tangalin ka khutte sil leng zong, 31 Nang sunu khuka hon pawsuk veve ding chin a, ka puansilhlai nangawn in kei hon kih ding hi. 32 Amah ka dawn theih ding, kei banga mihing lah hilou a, thukhenna muna ka kikhinpih theih lah hilou hi. 33 Koute kal hon gensak ding mi om hi mai leh zaw, ka nih ua tunga a khut kha ding mi om hi mai leh zaw, 34 kei apan Pathian' chiang lamang ding om hi mai leh zaw, Ama' mulkimhuaina in hon lausak nawn lou ding hiven. 35 Tua bang hi leh, amau lau lou-a pau ding hi'ng a, tu-a thil omdan bel, tua banga pau theiou hi'ng.
1 Ka hinna, mahmah kih ing a, tua bang ahihmana ka phunna gen ziahziah ding ing a, ka hinna khatak maia thu genkhe ding hi'ng. 2 Pathian kianga: Hon mawhsa kenla, non ngawhna hon hilh in. 3 Migiloute' thilgel deihsak kawma na et lai a, kei hon nuaisiah ding, na khutsuak non pampaih ding, na kipahlam ahi-a hia? 4 Nang sa leh sisan neite' mit na nei-a hia? A sitheite' et bangin na en-a hia? 5 Na nite, a sitheite' nite bang ahi-a hia? Na kumte, mihing' kumte bang ahi-a hia? 6 Ka diklouhnate na zon a, ka khelhna na pheklek lek ding, 7 mawhlou ka hi chih thei mah lechin, kuama'n lah na khut apan hon humbit thei lou dia? 8 Na khutte-a kei hon sek, hon bawl chin a, nang tu-a kihei a, hon hihmangthang ding maw? 9 Bellei banga non veisa hi ve'ng, chih thei gige in. Tua leivui hon suaksakkik ding na hi-a hia? 10 Nawitui banga hon sungkheta a, bawngnawidat banga hon tokta a, 11 vun leh sa-a hon tuamta a, guh leh thaguia hon phankhawmta hi lou na hi maw? 12 Hinna hon pia chin a, chitna hon lak chin a, non khawtuahna-a ka kha kem na hi. 13 Ahihhanga na lungsunga hiai seel chin a, na lungsim sunga om ahi, chih thei hi'ng. 14 Ka khelh aleh, nang hon ching ding chin a, mawhtansak louha hon koih lou ding na hi. 15 Ka mawh aleh ka tung gik hi, mawhneilou na hita leng zong, maizumna tawh kidim a, thuakna in hon tuum ahih mana, ka lutang phong ngamlou hi'ng. 16 Ka lutang ka sang puak aleh, nang humpinelkai sagep banga hon gem chin a, na vangletna mulkimhuai kei doua kilangsak na hi. 17 Ka langpang ding theihpihmi thak hon tonpih chin a, ka tunga na hehna khangsak na hi. Non dounate ka tunga abanbana tung zihzeh hi. 18 Ahihleh banghanga suul apan hon lakhe himhim na hia? Kuamah' muh main na sikhin hi leng ka ut. 19 A piangkhe ngeilou hi mai leng, sul apan hankhuk puaktung pah hi mai leng! 20 Ka damsung ni tawmchik bei phial hilou hia? Lungnop tomchik beek ka neih theih nadingin, hon kiheimangsan ve. 21 Kik nawnlouhna mun ka tun main, mialna sahpi leh sihna limliap sahpi gam ka tun main, 22 zanmial sahna gam ka tun main, sihna limliap sahpi omna, buai vengvungna, khawvak nangawn khawmial a batna mun ka tun main, hon kiheisan mai in, chi ka hi, a chi hi.
Zofar' Thugen
1 Tua khitin, Naamath mi Zofar in a dawng a: 2 Hiai thu kigente khempeuh dawn louha om ding hia? Hiai kamhatpa diksaka om ding hia? 3 Hibang thugen mawkmawk mi diktansaka om ding hia? Simmawhna thu na gen chianga kuama'n hon taihilh lou ding hia? 4 Nang, Pathian kianga: Ka upte a diklou omlou, na mitmuha siang hi'ng chi vial chin a. 5 Pathian in thu gen leh chi namah ing e aw, nang dema kamka ding a, 6 pilna thusimte na kianga hon lak ding hi-a. Ahang bel, pilna dik in pang langnih nei hiven. Hiai thei in: Pathian in na khel gamtatna pawlkhat nangawn mangngilhta hi. 7 Pathian' thusim-kiseelte na zongkhe vek thei-a hia? Vanglianpen' phaktawp na zongkhe thei-a hia? 8 Tuate vante sanga sangzaw a, eite'n bang hih thei ding? Hankhuk thukte sanga thuk zaw a, nang bang thei thei ding? 9 Teh dinga leitung sanga sangzaw a, tuipi sanga zazaw hi. 10 Amah hong paiin suangkul ah nang hon khum henla, vaihawm-thukhenna sam leh, kua'n amah sel thei ding? 11 Mannabeite ama'n meltheih mah mah a, ama'n gidouhna a muh chianga theikhintham hi. 12 Ahihhanga, sabiltung nou mihinga a pian theihlouh banga, a pilloumi zaw hong pii thei tuan lou ding hi. 13 Hinapi-a na lungtang amah na piak a, na khut amah na khak a, 14 na khuta khelhna om na koihmang a, na puanbuk sunga khelhna na tensak phal kei leh, 15 tua chianga maizum loua dakkhe ngam ding chin a, lau loua dingkip ding na hi. 16 Na lungkham buaina mangngilh ngeingei ding chin a, a luangmangsa tui bang leia phawk ding hi teh. 17 Hinna suntang lai sangin tangpha zaw ding a, khawmial zong zingkhawvak bang ding hi 18 Lametna om a hih mana bit ding chin a, na kim na kiang en ding chin a, bita tawldam ding hi teh. 19 Kuamah nang hon lausak ding om loua lumsuk ding chin a, mi tampite'n na deihsakna zong ding uhi. 20 Ahihhanga migiloute' mit vai ding a, suahtakna in amaute khem ding a, a lametna uh zong laitat kuan hulak bang ding hi, a chi hi.
Job' Thugen
1 Tua khitin, Job in a dawng a: 2 Uplahhuai loutakin, noute na hi ve ua pilna tawh sikhawm dingte! 3 Ahihhanga, ke'n noute banga lungsim nei sam hi'ng. Noute sanga niam zaw tuanlou hi'ng. Kua'n hiai thilte khempeuh thei mawh ahia? 4 Ke'n Pathian samin ama'n hon dawng mahleh, kei zaw ka lawmte adinga nuihzatna suakta hi'ng. Diktatin genbaanglou hi mah leng, nuihzabuk suakta hi'ng. 5 Nuamtaka khawsate'n, Vangsiatna kichi khe kitaalte' tan dinga seh hi, chi a, simmawh uhi. 6 Hihsemite' puanbukte lawhching a, Pathian tawnghehte, tua a khut ua a pathian uh tawithawhte ngei bit uhi. 7 Ahihhanga ganhingte dong lechin, hon sinsak ding uhi. Huikhua-a vasate dong lechin, hon hilh ding uhi. 8 Leitang houpih lechin zong hon sinsak ding a, ahih kei leh, tuipi' ngasate'n phuangkhiain hon hilh hen. 9 Hiaite laka a koipen in ahia, Tangtawn Toupa' khut in hiai hih ahi chih theilou? 10 Ama' khuta thilsiam peuhmahte' hinna om a, mihing khempeuhte' naakna zong ama' khuta om hi. 11 Lei in an a chep banga, bil in thute entel lou hia? 12 A teekte laka pilna kimu lou hia? Damsawtna in theihsiamna tun lou hia? 13 Pilna leh vangletna zaw Pathian-a hi a, thuhilhna leh theihsiamna amaha hi ahi. 14 Ama'n a phelgawpsa kilamthak theilou a, ama'n a koltaansaksa kikhahkhe thei lou hi. 15 Ama'n tuite a lettang leh khawkeu om a, ama'n tuite a khah leh lui khanglian om hi. 16 Thahatna leh vualzawhna amaha hi a, khempa leh khemzawhpa zong amah-a hi ahi. 17 Ama'n thuhilh mite gallaaka lamang a, thukhente a hai suaksak hi. 18 Kumpipate' butsak kolte ama'n suut a, a kawng uah puan teengsak hi. 19 Ama'n siampite gallaaka lamang a, sawtpi-a kitungdingsate lumlet hi. 20 Muan mahmah thuhilhmite' kamte chihsak a, upate' theihkakna lamang hi. Miliante tung ah simmmawhna bungkhia a, galhatte' kawnggak kolsak hi. 22 Ama'n miala thilkisel thuukte lakkhia a, limliap sahte khawvaka lakkhia hi. 23 Ama'n namte thupisak a, hihmangthang a, namte liansak a, thehdalh hi. 24 Leitung makaite' lungpilna suhsak a, lampibei gamdaia amaute taamvaksak hi. 25 Meivak beia miallaka amaute kimai kimaisak a, zukhamte banga hoisak duangduang hi.
1 Ka mitte'n hiaite khempeuh muta a, ka bilte'n zata a, theisiamta hi. 2 Noute' theih bang ken zong thei ing a, noute sanga niamzaw tuanlou hi'ng. 3 Ahihhanga, Vanglianpenpa houpih nuam ing a, Pathian kiselpih nuam hi'ng. 4 Ahihhanga noute'n zuauthu hon nuh uchin a, mannabei daktor na hi ve ua, na vekpi un! 5 Na vek-un dai maimai le uchin aw! Nou adinga tua mah pilna hi mah ding hiven. 6 Tu'n ka pansan na ngai un, ka muk apan ngetna ngaikhia un. 7 Nou, Pathian taanga giloutaka pau ding maw? Amah adinga zuautheitaka thu gen ding maw? 8 Deihsaktuam nei ding maw? Pathian adia panga selsel ding maw? 9 Ama'n noute hon entel leh, a hoiha hong kilang ding hia? Mihing na khemzawh bang ua amah khem zou ding maw? 10 Asim athama deihsaktuam na neih peuhmah uleh, ama'n hon taihilh teitei ding hi. 11 A thupina hatna in hon mulkimsak lou ding hia? Amah launa in hon man lou ding hia? 12 Na thupilte uh vutbang leia mannabei paunakte ahi ve, na kihutnate uh zong belleia kihutna lei ahi ve. 13 Ka mai ah daaisuk unla, ken thu gen ning, tua chiangin a tung nuamnuam tung tave. 14 Banghanga kei-le-kei kisuse ding ka hia? Banghanga ka hinna ka khuta tawi ka hia? 15 Ama'n kei hon that hiai le zong, ke'n amaha lametna nga lailai ding ing a, a maitanga ka gamtatna gum lai ding hi'ng. 16 Hiai mah ka suahtakna hong hi ding hi, pathian neilou mihing ka maia hong pai thei lou ding hiven. 17 Ka thute pilvangtakin ngai un, ka thugen na bil-un za hen. 18 Ngai un, ka pansan gelkhitsa diama nei ka hih chianga, diktansaka om ding ka hi, chih thei hi'ng. 19 A khiala kei hon ngawh thei ding kua om ahia? A oma leh daai maimaiin si ta ve'ng. 20 Pathian aw, hiai thil nih hon phalsak tapeuh in, hi leh, nang apan kisel lou ding hi'ng. 21 Kei apan gamlapi ah na khut lakik inla, na mulkimhuaina-a non lausak tawpta in. 22 Tua khit chiangin hon sam lechin, hon dawng ding hi'ng. Ahih kei leh, thu hon gensak inla, hon dawng in. 23 Ke'n khel gamtatna leh khelhna bangzah hih ka hia? Ka tatlekna leh khelhna hon lak in. 24 Banghanga nang na mai sel a, na meima banga hon ngai na hia? 25 Nahpa huihmutleng na gawt beh lai dia hia? Buhsi keu na nungdelh dia hia? 26 Nang kei dema thil khatak tak gelhkhia chin a, gou banga ka tuailai khelhna hon luahsak hi vechin. 27 Ka khete koi bunsak chin a, ka lampite limtaka ching a, ka khenuaia phaktawp gi khung hi vechin. 28 Tuachi-a thilmuat banga mihing muatmang a, ngetnek puansilh bang hita hi.
1 Numei' suan mihing Damsung nite tawm mahmah na-inchin, lungkham buaina tawh kidim hi. 2 Amah pak banga hong khangkhia inchin, vuaia mangthang pah hi! Limliap pai zulzul banga, sawt daih lou hi. 3 Tua bang mi na en gimgem ngei hia? Thukhenkhum dingin na mai ah amah non pi diam? 4 Hibang ngetna kua'n hon ngaihsak ding! Kua'n a sianglou apan a siang hon la thei dia? Kuama'n la thei lou! 5 Mihing' nite sehsa hi a, a khate phazah ding na sehsa hi ahi. Ama' kaan theih louh ding phaktawp gi na khunsa ahi. 6 Tua bang ahih manin, kithalawh mi banga a hun a piakkhit mateng, amah kiheisan inla, omsak maimai in. 7 Singkung ading beekin lametna om hi. Kiphukpaita mah leh selkik ding a, a selthakte om teitei ding hi. 8 Leisung ah a guite upa mahleh, a bulsum zong leilak ah si mahleh, 9 tuigim a zak chianga dawnkhe ding a, sing leh lou banga selnoute suang ding hi. 10 Ahihhanga, mihing bel si a, niamchika siala om a, a naktawpna tung a, amah om nawn lou hi. 11 Tuipi apan tui a hu-a lengmang banga, ahih kei leh, tui luanna keu a, a hul banga, 12 mihing lumsuk a, thou nawnlou a, vaante a om nawnlouh mateng, mihingte khanglou lou ding a, ahih kei leh, a ihmutna ua pan kiphawng lou ding hi. 13 Hibang ngetna kua'n hon ngaihkhiaksak ding! Na vaansawltak in hon paikheng masiah, hankhuka hon selin hon selmang tapeuh lechin maw! Hun khat hon sehsakin, tua hunin hon thei gige tapeuh lechin maw! 14 Mi si leh hing nawn ding hia? Ka sepgim nite khempeuh apan thaksaka ka om hun hong tung ding ngak ding hi'ng. 15 Nang hon sam ding chin a, ken hon dawng ding hi'ng. Nang na khutsuak thilsiamte lunggulh ding hi vechin. 16 Tua chianga nang ka kalsuante sim teitei ding chin a, ka khelhna zuizui lou ding hi vechin. 17 Ka tatleknate ip sunga kikhumbilh ding a, ka tatsiatnate khuikhum ding hi vechin. 18 Ahihhanga, mualte lei tolha a chip banga, suangte a mun uapan a tukmang banga, 19 tuiin suangte a taihmang banga, hawktuiin leitang a silkhiak banga, nang mihing lametna hihmangthang hi vechin. 20 Nang khatvei thu-a setdet dinga amah zougawp chin a, amah mangta hi. Nang a mai mialsak a, sawlmang hi vechin. 21 A tapate pahtawia a om uleh, ama'n lah thei lou a, hihniama a om uleh zong, ama'n mu lou hi. 22 Ama' pumpi natna kia phawk a, amah kikhasiata kisuun hi, a chi hi.
Elifaz' Thugen
1 Tua khitin, Teman mi Elifaz in a dawng a: 2 Mipil in thu namanlouin a dawng dia hia? Ahih kei leh, suahlam huihin a gilpi a vahsak dia hia? 3 Ama'n thu namanlouin a sel dia hia? Manphatnabei thugenin a sel dia hia? 4 Ahihhanga, nang Pathian laua zahna nangawn bulkalh chin a, Pathian a kipumpiakna dai hi vechin. 5 Na mawhna in na kam sinsak a, pillepchiahte' paukam teel hi vechin. 6 Na kam in nangmah hon mawhpaih a, ke'n hon mawhpaih lou hi'ng. Na muk nang demin theihpihin pang hi. 7 Nang mi piang khete laka a masapen na hi-a hia? Mualte ma-a piansak na hi-a hia? Pathian' vaihawmpawl thukikup na vasimngaiha hia? Pilna nang-a kia-in na bawl-a hia? 9 Koute' theihlouh nang bang na theia eita? Koute' neihlouh theihsiamna nang bang na neia eita? 10 Samkangte leh putekte koulama pang uh a, tuate na pa sanga upazaw hi uhi. 11 Pathian' khamuannate, kamnema thugente na ika nam lou hia? 12 Banghanga na lungtang in nang hon pawmang a, banghanga na mitte phiaphia ahia? 13 Pathian doua hehna na siatkhiak a, na kama tua bang thu na buakkhiak khiak? 14 Mihing bang ahia, a sianthou theih ding? Ahih kei leh, numei apan piangkhia bang ahia, a diktat theih ding? 15 Pathian in a mi siangthoute-a muanna a koih kei leh, a mitmuha vaante nangawn a sianthou kei leh, 16 a gilou leh a tatsia mihing, gitlouhna tuidawna dawn mi nak sianthou kei sem nan chia! 17 Kei hon na ngakhia in, na kiang ah hon hilhchian ning, ka thil muhsa hon hilh ning, 18 tua, mipilte' genkhiaksa, a pu a pate uapana a ngah uh, bangmah a seel louhte mah uh. 19 Amaute laka gamdang mi omlouh laia, amaute kiang kia-a gam piak hi a, 20 migilou in a damsung teng gimna thuak a, dopneiloute' adinga kum tampi gimna kikholsak hi. 21 A mulkimhuaia gingte'n a bil dimsak a, muanna om a bat laia, suamhatte'n amah suam uhi. 22 Mialna pelh ding kinepna nei lou a, namsaua thah dinga bil-atsa hiven. 23 An zong dingin amah vaak kawikawi a, mialna ni hong tung dek chih thei hi. 24 Mangbatna leh lungzinnate'n amah mulkimsak a, galdou dinga kisa kumpipa banga amah zouthawh uhi. 25 Ahang bel, Pathian' maia a khuttum liik vouvou a, Vanglianpen doua kiuangsak hiven. 26 Ngamthawhtaka amah pumbawh a, lum sahpi leh khauhpi-a amah dou hiven. 27 A maitang thau liahluah mahleh, a kawng thau leiloi mahleh, 28 ama'n khawpi sesate luah ding a, mi' loihsa leh a chimsesa innte luah ding hi. 29 Amah hau nawnlou ding a, a hauhnain daih nawn lou ding hi. A neihsa zong gam sunga dimsak nawnlou ding hi. 30 Ama'n mialna pel lou ding a, ama' selnoute mei in kang ding a, Pathian' kama hu in amah mutmang ding hi. 31 Bangmahlou thil peuh muangin, amah kikhemzou kei hen. Bangmah mukik lou ding hiven. 32 Ama' hun tun ma nangawna, a kim sipsipa thuk hi ding a, a kahiangte khanpha lou ding hi. 33 Amah, grepgui, a gah minlou pulh vek bang ding a, oliv kung, a paklunte pulhsa bang ding hi. 34 Ahang bel, pathianbeite tawh kipawlte huut ding a, nekguk itmite' puanbuk mei in kangtum ding hi. 35 Lungkham buaina paai uh a, gitlouhna neikhia uhi. Amaute' suite'n khemna sutuahin phankhawm uhi, a chi hi.
1 Tua khitin, Job in a dawng a: 2 Hibang thil tampi zata ing, khamuanmi mi buaihuaite hi vek uteh! 3 Thu ginalou na gengente uh bei thei lou ding hia? Mi na selsel uh, a bang thuaklah na hi ua? 4 Kei' muna ding hi le uchin aw, ke'n zong noute banga thu genthei sam ding hi'ng. Noute dema thu kilawmpipi ka lu hon sinkhum sam ding hi'ng. 5 Ahihhanga, ke'n zaw ka kama thute-a hon hanthawn zaw ding ing a, ka muk apan khamuanna in noute hon kouzangsak ding hi. 6 Hinapi-a, thu gen leng, kei natna phadawm tuan lou a, kidawmta leng zong ka natna bangchi dam tuan ding hiam? 7 Pathian aw, hon bahgawpsak taktak chin a, ka neih ka lamte segawpsak vek taktak na hi. 8 Nang kei hon man a, hon hentom chin a, tua kei dema theihpihna hong suak hi. Gawnggawp huaihuai ing a, Tua in kei dema hon zahlaksak hi. 9 Pathian in a hehnain hon botzaan a, hon hagawikhum a, hon melmabawl a, ka langpa'n hon ensaal hi. 10 Kei hon enghou dinga lampi-a mite kamka uh a, simmawha hon ngeibet uh a, kei hon dou dinga kithutuaka pangkhawm uhi. 11 Pathian in migiloute' khut sunga kei hon pia a, mi tatsete' khutsung hon denna hi. 12 Kei muangtaka om hithiat hi'ng a, ahihhanga, ama'n hon mektamgawp hi. Ngimpena hon nei a, ka gawla hon man a, hon kungsin hi. 13 A thaltawite'n hon umchip uh a, lainatna beia ka kailingte kappailet uh a, ka sinkha leilaka bua uhi. 14 Siatna tunga siatna hon thuapsak a, galhatpa banga hon delh delh hi. 15 Ka vun tunga saiippi kikhuhkhum ing a, leivui laka ka maitang phual hi'ng. 16 Ka kah kahna-a ka mai sangawpta a, ka mitvunte dup gawpta hi. 17 Hinapi-a ka khutte huham lou a, ka thumnate siangthou hi. 18 Leitung aw, ka sisan khuh ken aw, ka kahna tawlnga ngei kei hen aw! 19 Tulaitak nangawna hon theihpihpa vaantunga om a, hon genpihpa tunglam sangpi-a om hi. 20 Ka lawmte hon simmawhte hi. Ke'n ka Pathian' maia ka khitui sungbua hi'ng. 21 Mihing in a lawm adinga a ngetsak banga, ama'n mihing adinga Pathian kianga ngetsak hi. 22 Kiknawn louhna gam zuana ka zinkhiak nading kum tawmchik kia omta hi.
1 Ka kha kitamkham a, ka nite hihtoma om a, hankhuk in hon ngak hi. 2 Hon simmawhte'n hon um pelpul uh a, ka mitte'n hon muhdahna uh enen hi. 3 Pathian aw, na ngiat kichiamna thil nangmah in hon pia in, kei adinga kichiamna kipsakpa hi dinga kua ding diing ahia? 4 Theihsiamna lama a lungsim uh khakbingsak chin a, amaute vualzousak lou ding hi vechin. 5 Mi'n pahtakman delh a, a lawm lehbawla a khotkhiak leh a tate' mit lawhsam ding hi. 6 Pathian in kei zaw mi teng kianga paunak hon suaksakta a, maitanga mite' chilphih gawpgawp hon hisakta hi. 7 Dahna hanga ka mitte mialta a, ka lim ka mei, ka pumpi zong limliap lei hita hi. 8 Mitangte'n hiai mu-a lamdangsa uh a, mawhneiloute zong pathianlimsak loute' tunga phun dinga kisa uhi. 9 Tua bang teng hita mahleh, midiktatte'n a lampite uh lenkip ding uh a, khut siangthou neite hat semsem ding uhi. 10 Ahihhangin, noute khempeuh tu'n hong pai unla, pangthakve ua le. Noute laka a pii mu lou hi'ng. 11 Ka nite beita, ka gelsate vuaksuakta, ka lungtang' lunggulhte zong tua banga muihta hi. 12 Amaute'n zanmial sun suaksak uh a, khawmial' maia: Khawvak naita, chi uhi. 13 Ka lamet inn omsun hankhuk ahih leh, misilaka awngphah ka hih leh, 14 tatsiatna kianga: Ka pa na hi, chi ka hih a, lunggam kianga: Ka nu na hi, hiam, ka sanggamnu na hi, hiam ka chih leh, 15 ka lametna koia om hita ding eita? Kua'n kei adinga lametna himhim mu thei ding? 16 Tua lametna, sihna kongpi-a lutsuk ding hia? Leivui laka tumkhawmsuk ding ka hi ua hia? a chi hi.
Bildad' Thugen
1 Tua khitin, Shua mi Bildad in a dawng a: 2 Thugen ding zonzon chik chianga tawpsan ding na hia? A kilawm ngaihtuah ngai ve, i houlim ke. 3 Banghanga kou na mitmuha gamsa banga hon ngai a, haia seha om ka hi ua? 4 Heh laia kipumpei a, mahni kitennenpa aw, nang hanga leitung kitaisan ding hia? Ahih kei leh suangpite kikhukkhe ding hia? 5 Migilou' meivak kimutmit a, a meikuang kuang nawnlou hi. 6 A puanbuk sunga khawvak mialta a, a kianga meivak mitta hi. 7 A kalsuan thahatna zawngkhalta a, ama' thilsawm mah in amah phuk hi. 8 A khepekte'n amah lenthaang sung tun a, len kiphan sunga vial vak hi. 9 Pial in a khetula man a, thang antah in amah mankip hi. 10 Amah ading thangkual leilaka kiseel a, a lampi-a pial om hi. 11 Mulkimna in kimkota kiguihsak a, a khekhapa zui hi. 12 A hatna gilkialin bah a, a puk chianga tuahsiatna amah adinga mansa-a na om hi. 13 Tua in a vun munkhat khat negai a, sihna' tamasa in a khut a khe negai hi. 14 Ama' puanbuk sung galmuanna apan amah kaihkhiaka om a, mulkimna kumpipa' mai delh hi. 15 Ama' puanbuka amaha chih ding bangmah omlou, a tenna tunga kaat kuang kitheh hi. 16 Nuailam ah a zung keu a, tunglam ah a hiangte vuai hi. 17 Amah theih gigena leitung apan bei a, pawlam ah theihin om nawn lou hi. 18 Amaute'n vak apan miallaka amah hawllut uh a, leitung apan hawlmang uhi. 19 Ama'n ta neilou a, a mite laka suan leh khak neilou a, ama' ten ngeina muna a khawsuak omlou hi. 20 Tumlam mite'n a tunga thiltung lamdangsa-a dak heuhou uh a, suahlam mite zong mulkim uhi. 19 Midiktatlou' teenna tua bang hi lou theilou a, Pathian theilou mi' mun tua bang hi mah hi, a chi hi.
Job' Thugen
1 Tua khitin, Job in a dawng a: 2 Bangtan thute zanga hon gimbawl a, hon gawizan ding na hi ua? 3 Sawmveitak non zahlaksakta uh a, zumlou hialin non tawngta uh a! 4 Na lampial taktak ka hih leh, ka hihkhelhna kei kia' kisai ding mah ahi. 5 Ka tunga nong kipahtawi nop taktak ua, ka kingaihniamna ka thuakna na suahsak nop uleh, 6 Pathian in a mawhloupi mawh hon tangsak a, a lenthaanga hon um ahi, chih thei un. 7 A dikloupi-a mawhtansak hi'ng! chimin kikou mah leng, dawnna bangmah mulou hi'ng. Huhna ngen mah leng, dika thukhenna omlou hi. 8 Ama'n ka lampi daal a, paisuak theilou hi'ng. Ama'n ka lampite mialsak hi. 9 Ama'n ka zahtakhuaina hawkkhia a, ka lutunga kumpilukhu lakhia hi. 10 Ka bei masiah, kilchih apan hon heuhkhia khia a, ka lametna singkung banga bulkalh hi. 11 Ama' hehna ka tunga kuang a, a melmate laka hon simtel hi. 12 Ama' sepaihte hattaka hong kuan uh a, kei dou dinga ka kimkota panmun khawh uh a, ka puanbuk kimkota giahphual sat uhi. 13 Ama'n ka sanggamte kei apan gamlasak a, ka meltheihte khempeuh kei apan melmakmi suaksak hi. 14 Ka tanaute paimang uh a, ka lawmte'n hon mangngilhta uhi. 15 Ka zinte leh ka sila numeite'n mikhuala hon bawl uh a, gamdang mi banga hon en uhi. 16 Ka sila samin, ka kamin ngetthawh hiai leng zong, ama'n hon dawng lou hi. 17 Ka zi adinga ka kam namsia a, ka laizomte adinga kihhuai suak hi'ng. 18 Naupang neute nangawn in hon simmawh uh a, kong kilat chianga hon nuihsan uhi. 19 Ka dotte, thu ka kupte khempeuh in hon kih uh a, ka itte nangawn in hon dou uhi. 20 Vun leh guh kia hi lei hi'ng a, ka ha vun tawh kia suakta lei hi'ng. 21 Lawmte aw, hon lainat un, hon lainat un, Pathian' khut thuak hi vengin. 22 Banghanga Pathian' hon delh banga hon delh na hi ua? Ka sa kham ngeilou ding maw? 23 Ka thute kigelhkhe leh aw, laibuzial ah kigelh leh, 24 ngen tung ah sikin kigelh leh, ahih kei leh suangpek tung ah omden dingin kikhuak hi leh aw! 25 Ka Tanpa a hing chih ka thei, a tawpin leitung ah hong dingkik ding, chih thei hi'ng. 26 Ka vun hihmanthat ahih khit chianga ka sa mahmah-a Pathian mu ding hi'ng. 27 Keimah mah in ka mit mahmaha mu ding hi'ng. Midang hilouin, keimah mahin mu ding hi'ng. Ka sunga lungtang in lunggulh namah e! 28 Noute'n: Lungkham buaina bul amaha om hiven, bangchi'n amah i sawi taphet de aw, na chih uleh, 29 noute mahmah in namsau na lauh ding uh ahi. Hehna in namsaua gawtna tun ding a, tua khit chianga thukhenna om hitah chih thei ding hi uteh, a chi hi.
Zofar' Thugen
1 Tua khitin, Naamath mi Zofar in a dawng a: 2 Ka lungbuai mahmah ahih mana, ka ngaihtuahna buai in hon dawng dinga honsawl hi. 3 Kei hon zahlaksak taihilhna za ing a, ka theihsiamna lungtang in hon dawng dinga hon sawl hi. 4 Tanglai pek apan, leitunga mihing a kikoih apan, hiai na om hita, chih na thei mahmah ding a, 5 migiloute' nopsakna in tom daih a, pathianbeite' lungnopna in mitphial kal lei daih ahi, chih na thei mahmah ding hi. 6 A kisaktheihnain van sun mah leh, a lutang in meipi sutou mah leh, 7 amah a ek banga mangthang den ding a, amah mute'n: Amah koia om ahita a? chi ding uhi. 8 Amah ihmut mang bangin lengmang a, zana mengmuh bangin paimang a, amah mu nawnlou uhi. 9 Amah mu ngei mit in amah mu nawnlou ding a, a omna mun in amah en nawnlou ding hi. 10 Ama' tate'n a zawngte kipahsak nading zong ding uh a, ama' khutte mah in a hauhna pekik ding hi. 11 A guhte-a dim tuailai thahatna amah tawh leivui laka lumkhawm ding hi. 12 A kam in thilgilou khumsain a lei nuai ah tua seel mah leh, 13 khah phal mahmah louin a kam ah muam muam mah leh, 14 a an nangawn a gilpi sunga hong kikheng ding a, ama' sunga gulgu suak ding hi. 15 Ama'n a valhsa hauhna lawkhe kik ding a, Pathian in tuate a gilpi lawkhesak ding hi. 16 Ama'n gulgu tawplut ding a, gul dekpak hate'n amah that ding hi. 17 Ama'n luita tuite lunggulhin melh melh nawnlou ding hi. Khuaizu leh bawngnawidata luang gam zong lunggulhin melh melh nawnlou ding hi. 18 A sepgim gah neklouha khahsuah ding a, a sumsinna apan a mette zong limtaka zaalzou lou ding hi. 19 Ahang bel, ama'n a zawngte nuaisiah a, tasam lua-a nusia a, ama' lam louh innte sut hiven. 20 A ngaihtuahna apan tawlnga ngeilou ding a, a gou kholte-a amah kihondam thei lou ding hi. 21 A mite' nek ding bangmah kinutsiat lou a, a hauhna in daih sawt lou ding hi. 22 A hauhlet laitaka mangbatna in pha ding a, gimna tawpkhawk hong tung ding hi. 23 A gilpi a vahsak laitaka Pathian in a tunga a hehna kuangkhesak ding a, a nek laitak maha a khuttuma tupna zusuksak ding hi. 24 Sik galvan apan taai mah leh, sumsan thaltang luzum in amah sun hi. 25 Ama'n a nungzang apan tua botkhia a, a sin apan thaltang luzum teset set botkhia a, a tunga mulkimna tung ding hi. 26 Ama' goute mial bikbek in ngak a, mutlouh meikuang in amah haltum ding a, a puanbuka kinusete nangawn negai ding hi. 27 Vaante'n ama' thulimlouhna dawksak ding a, lei in zong amah dou ding hi. Pathian' thangpaihna ni-a tuikhanglian in, tui khauh in a inn taimang ding hi. 29 Migiloute tan dinga Pathian' seh tua bang hi a, Pathian in amau' goutan dinga a seh tua bang hi ahi, a chi hi.
Job' Thugen
1 Tua khitin, Job in a dawng a: 2 Pilvangtakin ka thu na ngai unla, non thuakpihna uh hiai hi hen. 3 Ka thugen laiin hon na thuakzou teitei unla, ka genkhit chiangin hon engbawl na nuteh. 4 Ka phunna mihing tung ahi-a hia? Banghanga thuakthei loutaka om mah lou ding ka hia? 5 Hon en unla, lamdang sa ve ua, na khut un na kam uh hum ve ua, 6 ke'n hiai ka ngaihtuah kik chianga mulkim ing a, ka chi liing hi. 7 Banghanga migiloute hing lailai a, hong upa uh a, vanglian semsem uh ahia? 8 Amaute'n a tate uh a kiim ua pichinsaka om mu uh a, a suante uh a mitmuh ua kipa om mu uhi. 9 A innte uh galmuang a, lau ding om lou a, Pathian' chiang amaute tunga ke lou hi. 10 A bawngtalte un chi suang lou ngeilou a, a bawngpite un nou nei uh a, nousiat chih omlou hi. 11 A tate uh belamhon bang a, khahkhia uh a, a taneute uh laam selsel uhi. 12 Khuangta leh kaihging tawh la sa uh a, tamngai tuma nop bawl uhi. 13 A kumte uh hauhna tawh zangtou uh a, khamuanga hankhuk tung uhi. 14 Hinapi-a Pathian kianga: Hon omsan maimai in, na lampite thei nuam kei ung! 15 Vanglianpen kua ahia a nna ka sep ding uh? Amah kiang ah thum le ung bang lawhtak ding! chi uhi. 16 Ahihhanga, a hauhna uh amau' khuta om hilou a, tua hi a, migiloute' thuhilhna apan kikaangkoih hi'ng. 17 Hinapi-a, migiloute' meivak bangzaha muna kimutmit ahia? Amaute tunga siatna, Pathian in a hehna-a amau' tan dia a seh bangzaha muna tung ahia? 18 Bangzah-a muna loupa keu banga huih mutmang, buhsi banga huihpi' mutmang hi uhiam? 19 Pathian in a tate' thuak dinga mihing gawtna kholkhawm hi, kichi hiven, ama'n a theih nadingin amah mah in thuk leh ake. 20 Ama' siatna ama' mit mah in mu henla, Vanglianpen' thangpaihna ama'n tuidawnin dawn hen. 21 Ahang bel, amah adingin sehsa khate a bei chiangin ama'n a nunga a siahsa innkuan khualna bang a nei peuhmaha eita? 22 Pathian in a sangpente nangawn' tunga thu khen hiven, kua'n theihna amah sinsak thei ding eita? 23 Mi khat a hat laitak, a bit mahmah lai, a om hiathiat laitaka si a, 24 a pumpi a vualzawh laitak, a guhte guhngeka a dim laitaka si hi. 25 Midang khat lah hinna khataka si a, thilhoih Wmhim tang ngeilou hi. 26 Leivui laka lumkhawm uh a, thante'n ne tuak uhi. 27 Non hihsiat nadinga na ngaihtuah, na thilgel thei mahmah hi'ng. 28 Nang: Milian' inn tua kaw omta a, migiloute' tenna puanbukte kaw omta ahia? chi na hi. 29 Khualzinte kianga thu kan ngeilou maw? A gente uh thupi ngaih ngeilou maw? 30 Tuahsiat ni-a mi tatsia hawia om a, thangpaihna ni-a hutkhiaka om hi, a chih uh? 31 Kua'n a maitanga a gamtatna mawhpaih ahia? A thil hih kua'n dinkik a hia? 32 Amah hankhuk tuta om a, a han tunga vengmi kikoih lai hi. 33 Amah adinga luiphai lei khum a, mi khempeuh in amah nungzuih a, mipi simsenglouh a maia pai uhi. 34 Tua bang hi a, noute'n a mannabei na thugente ua kei hon bangchi nep ding? Zuauthu chih louhngal na dawnnate uh bangmah om nawnlou pi! a chi hi.
Elifaz' Thugen
1 Tua khitin, Teman mi Elifaz in a dawng a: 2 Mi khatpeuh Pathian adinga phatuam thei ding adiam? Mipil khat zong ama' phattuampih hi thei ding adiam? 3 Nang midiktat hi lechin, tua in Vanglianpen kiang ah bang kipahna a pe dia ahia? Na lampite genbaanglou hileh, ama'n bang a lawhtak dia? 4 Na pathianmitna hanga ama'n hon taihilha ngawhna hon nei ahi maw? 5 Na gitlouhna lian hi lou hia? Na lungsimsiatna tawpneilou hilou hia? 6 Nang a san beipi-a na sanggamte apan bitna ngen chin a, mite' puansilh hawkkhia chin a, amaute savuaka nusia hiteh. 7 A tawite kianga tui pe lou chin a, a gilkialte zong an pe lou chin a, 8 nang a vanglian, gam nei, zahtakhuai, na gama teeng hinapi-a tui leh an it na hive. 9 Meigongte khutvuaka paisak chin a, pabeite' hatna zawngkhalsak na hi. 10 Hiai hang ahi ve, thaang in nang hon um kimvel a, lauhuaina in hon mulkimsak guih a, na mialluat a, na muh theihlouh a, tui khanglian in hon tup. 12 Vaan saanna pentea Pathian om hilou hia? Aksi sangpen' sandan en ve! 13 Hinapi-a nang: Pathian in bang thei ahia? Tua bangzaha mial lak ah thu a khen-a hia? 14 Vaankuum nuaia a paipai laia, meipi sah in amah liah a, eite hon mu thei lou aka, chi na hi. 15 Migiloute' tot lampi lui nang zuiden ding maw? 16 Amau' hun tun ma-a puakmanga om uh a, a kingakna uh suangphumte tuikhanglian in taimang hi. 17 Amaute'n Pathian kianga: Koute tungthu ah hong kikum dah in! Vanglianpen in koute bang hon lawh thei dia eita? chi uhi. 18 Hinapi-a, a innte uh thilhoiha dimsak amah hi a, tuachi-a migiloute' thuhilhna apan kikaangkoih hi'ng. 19 Midiktatte'n amaute' siatna mu in kipak uh a, mawhneiloute'n amaute engbawl uh a: 20 I galte uh hihmanthat hi taktak uh ei, mei in a hauhna uh kangtumta ei, chi uhi. 21 Pathian nuai ah lut inla, amah tawh kilem in. Hibanga hauhna na tunga hong tung ding hi. 22 Ama' kam apan thuhilhna sang inla, na lungsung ah a thute kholkhawm in. 23 Vanglianpen kianga na kik nawn-a leh, lamkipthak hi ding chin a, na puanbuk apan gidouhna gamlapi-a na koihmang a, 24 na suangmanpha vuite leivui laka na paih a, na Ofir kham zong kawlkal suangpi laka na paih leh, 25 ahi, tua hun chianga Vanglianpen nang adinga na kham leh na ngun hoihpen hi ding hi. 26 Tua hun chianga Vanglianpena kipahna mu ding chin a, Pathian' maia daktouta ding na hi. 27 Amah kianga thum ding chin a, ama'n hon za ding a, na thuchiamte tangtun ding na hi. 28 Na thupuknasa thil kihihta ding a, na lampitea vaak taang ding hi. 29 Mite laipuka om a, nang: Phongtou un! na chih chianga, ama'n sikniama omte hukhe ding hi. 30 Ama'n mawhneilou hi tuanlou mi nangawn hukhe ding hi, tuabang mite bel nang' khut sianna tungtawna hutkhiaka om ding hi, a chi hi.
Job' Thugen
1 Tua khitin, Job in a dawng a: 2 Tuni nangawna ka lungkimlouhna nasia a, thuumin mau leng zong ama' khut gik hi. 3 Amah muh nading mun thei hi tapeuh lengla, ama' teenna mun ah hawh thei hi tapeuh leng maw! 4 Ama' maia ka thu tun ding ing a, ka panna kamdima gen ding hi'ng. 5 Ama' hon dawn nading theikhe ding ing a, a gen ding ngaihtuaha suut ding hi'ng. 6 Ama'n hattakin hon nang nuam dia hia? Nuam lou e, ngawhna hon nei nuamlou ding hi. 7 Tua muna mitang in ama' maia a thu tun thei a, ka thukhenpa apan hutkhiaka omden ding hi'ng. 8 Ahihhanga, suahlam ah pai leng amah tua-a om lou a, tumlam ah pai leng zong amah mu lou hi'ng. 9 Amah mallama nasema a om chianga mu lou inga, simlama a pai chianga zong galmuh beek lou hi'ng. 10 Ahihhanga, ama'n ka paina lam thei a, ama'n kei hon halsiang zawh chianga, kham siang banga hong pawtkhe ding hi'ng. 11 Ka khete'n a khekhapte zui tettet a, pialsan lou hiaia a lampi tawnta hi'ng. 12 A muka thupiakte pialsan lou ing a, a kama thute ka nisim an sanga manpha sa zaw hi'ng. 13 Ahihhanga, amah amah kia-a ding a, kua'n amah nang thei ding ahia? Ama'n a ut ut hih hiven. 14 Ama'n ka tunga a danthuseh tangtun a, thil gelsa tampi koih lai hi. 15 Hiai hang ahi ama' maia ka mulkim. Hiai ka ngaaihtuah chianga amah lau hi'ng. 16 Pathian in ka lungtang sidangsak a, Vanglianpen in hon mulkimsak hi, 17 Hinapi-a mial in hon selmang lou a, mial bikbek in zong ka mai khuh lou hi.
1 Banghanga Vanglianpen in thukhen nading hunte sep lou ahia? Banghanga amah theite'n tua bang nite amawkna-a zong ding uh ahia? Mite'n gamgi suangte khiin uh a, a guksa uh belamhonte gamtasaka an pia uhi. 3 Tagah' neihsun sakolneu hawlmangsak uh a, meigong' bawngtal kichiamna adinga laksak uhi. ^asamte lampi apan sawnkhia uh a, gamsunga mizawngte khempeuh kibu lou theiloua koih uhi. 5 Gamdai-gamkeua sabiltungte banga, mizawngte'n an zong a, semgima diangdiang uhi. Khawhlouh gamsia in a tate uh an pia hi. 6 Gamlaka gan an kaikhawm uh a, migiloute' grephuana a sang zong uhi. 7 Puansilh tasama, vuaktanga zankhawvaka om uh a, khawdama kikhuh nading bangmah neilou uhi. 8 Mualtunga vuah thuaka kawt uh a, bukna neiloua suangpite kawi uhi. 9 Pabei nawinelai naungekte, nawi apan kaikhia uh a, leiba dit nadinga a zawngte' naungekte zat sawma kichiamna-a zang uhi. 10 Puansilh tasama vuaktanga vaksak uh a, buhphalte paw napi, gilkiala om lai uhi. 11 Tangkuang laka oliv thau suk uh a, grepsukna-a grep chil napi dangtaka om lai uhi. 12 A si dingte' mauna khawpi sunga kiza a, huhna ngena a Hamte' hinna kikou hi. Ahihhanga, Pathian in thil hihkhiala kuamah ngawh lou hi. 13 Vaak doua helte om uh a, tuate'n a lampite thei lou uh a, a lampite zong zui lou uhi. 14 Sun khawvak a bei chianga tualthatpa thou a, mizawngte leh tasamte that a, zankhanga guta banga simpai khualkhual hi. 15 Angkawmpa mit in khawmui ngak a, Kuama' mit in hon mu kei, chi-a ngaihtuah a, a maitang seel hi. 16 Miallaka mite'n innte luh uh a, sunlaia bel kibukhum uh a, vaak tawh kisai nuamlou uhi. 17 Amaute khempeuh adinga mial sah bekbuk a zingsang uh hi mawk a, zankhang mulkimnate lawma nei uhi. 18 Hinapi-a tui tunga tuiphuan lei hi uh a, a gam goutan uh hamselawhsa hi a, kuamah tua grephuantea hawh lou hi. 19 Satna leh khawkeu in vuuk tuisuak a lakmang banga, hankhuk in a khialte lamang hi. 20 Suul in amah mangngilh a, thante, amautea kivak uhi. Migiloute kuama'n theigige lou a, singkung banga kitan uhi. 21 A chiingte leh tabei numeite nekin nei uh a, meigong tunga chitna lak lou uhi. 22 Ahihhanga Pathian in a vangletna-a a hatte kaimang a, phuhkip himah le uh, hing ding chih theihtelna neilou uhi. 23 Ama'n amaute bit kisakna neiin khawlna pe maithei a, ahihhanga a mit in a gamtatnate uh en hi. 24 Hun tomkha sung pahtawia om uh a, tua khit chianga bei uhi. Niamsaka om uh a, midangte banga khopkhiaka om uh a, buhvui at banga atkhiaka om uhi. 25 Hibang hilou hileh, kua'n kei zuauthu hon suaksak theia, ka thugente bangmahlou suah thei ding? a chi hi.
Bildad' Thugen
1 Tua khitin, Shua mi Bildad in a dawng a: 2 Ukna leh zahtakhuaia lauhuaina Pathian-a hi ahi; ama'n vansangtea thil kilemtaka koihkip hi. 3 Ama' sepaihhonte kua'n simseng ding? Kua tung ah ahia ama' vaak a taan louh? 4 Tua bang ahih nung, Pathian' maia kua ahia diktat hi thei ding? Numei' suan kua ahia siangthou hi thei ding? 5 Khavaak nangawn a taanphat kei a, a mitmuha aksite a sian kei leh, 6 than ahi leltak mihing, lunggam ahi leltak mihing tapa, siangthouin taangpha kei sem nan chia maw! a chi hi.
Job' Thugen
Tua khitin, Job in a dawng a: 2 Vangletnabeite nak huh na maizen chia! Bantha hatlou hukhe na maizen chia! 3 Pilnabei mi thuhilhna pe na maizen chia! Thil thukmuhna tam lak na maizen chia! 4 Hiai thute genkhe dinga nang kua'n hon huh ahia? Kua kha in na kam apan thu gen ahia? 5 Tui nuaia om a, a sunga teeng tua misite lungdong mahmah uhi. 6 Pathian' maia sihna vuaktang hi a, hihsiatna zong khuhnabei hi ahi. 7 Ama'n mallam vaante, awngvang tung ah phalh a, leitung zong bangmah omlou awngvang tunga kilaamsak hi. 8 Ama'n a meipitea tuite tuun a, hinapi-a gikna hanga meipite kikek tuanlou hi. 9 Ama'n khaliklai maitang khuh a, a tunga meipite phalh hi. 10 Ama'n tuite tunga kawlmong chiamteh a, tua lah mial leh vak kikala gamgi hi ahi. 11 Ama' taihilhna lauin vaante' khuampite kivuang hi. 12 A vangletna-a tuipi tok a, a pilna-a Rahab semnen hi. 13 A kha in vaante kilawmsak a, a khut in gulpi kitholh sun hi. 14 Hiaite khempeuh a nasepte' laka athem lei hi a, amah apan i zak a huau-a thugen hi siausiau nah e! Tua bang hi a, a vangletna vaanpi banga ging kua'n theisiam thei ding ahia? a chi hi.
1 Job in a gen lai a: 2 Pathian' hinna sialin ka gen ahi, Thudika thukhenna kei adinga phallou amah hi a, lungkham mangbatna hon chiamsak Vanglianpen amah hi a, 3 ka sunga hinna a om lai teng, ka nakvangtea Pathian' hu a om lai teng, 4 ka mukte'n gitlouhna gen lou ding a, ka lei in khemnathu genkhe lou ding hi. 5 Nang na dik chi-a saang ngeilou ding ing a, ka sih mateng ka takna kilepsan lou ding hi'ng. 6 Ka diktatna kem lailai ding ing a, khah ngeilou ding ing a, ka damsung teng ka lungtang in hon tai lou ding hi. 7 Ka melmate migiloute bang uh henla, ka langte diktatloute bang uhen. 8 Pathian neilou mi satkhiak ahih chianga, Pathian in a hinna a lakmang chianga, ama'n bang lametna nei eita? 9 Ama' tunga lungdonna hong tun chianga, Pathian in a kikouna aw ngaikhia hia? 10 Ama'n Vanglianpen tunga kipahna mu ding hia? Ama'n hun khempeuha Pathian sam ding hia? 11 Ke'n Pathian' vangletna hon sinsak ding ing a, Vanglianpen tawh kisai thil peuhmah seel lou ding hi'ng. 12 Noute mahmah in theikhinta uchin a, tuabang ahih nung, banghanga a mawkna-a paupau? 13 Pathian in migiloute' tan dinga a seh, dop neilou mi in Vanglianpen apan goutan a saan hiai ah om hi. 14 A tate bangzahtain tam mah leh, amau tawp nading nammsau hi a, a suan in nek ding kiching nei lou ding hi. 15 Amah sanga damsawt a tate hipi in vui ding a, a meigongte un amaute kah lou ding uhi. 16 Ama'n ngunte leivui bangin vum mahleh, puansilhte bellei bangin sekkhawm mahleh, 17 a kholsate midiktat in silh ding a, mawhneiloute'n a ngunte kihawm ding uhi. 18 Ama' inn lam lah lungbu hawm hi a, vengmi' buuklamte bang hi ahi. 19 Hau mahmahin lum a, ahihhanga tua banga om nawnlou ding hi. A mit a hah chianga tuate na beivek hi. 20 Mulkimnate'n tuikhanglian banga amah delhpha a, zana huihpi in lenmang hi. 21 Suahlam huih in amah lenmang a, amah om nawnlou a, a mun apan mutmang hi. 22 Zahngaihna beiin huih in amah deeng okok ding a, huih thahatna apan kimuktuk hialin taai ding hi. 23 Huih in simmawhin a khut betkhum a, a mun apan mutmang hi.
1 Ngun, a kitawhna khuk om a, kham a kihihsiangna mun zong om hi. 2 Siik, lei apan kilakhia a, sumsan, suang tawh kihel apan kihalkhia hi. 3 Mihing in mialna beisakin a thukna gamlapi dong zong hi. Siik, suang tawh a kihellai, mun thukna penpena om hiven. 4 Mihing' teenna apan gamlapi-a a tawhkhiakna khuk khuaksuk a, mihing khe in a sik ngeilouhna mun muna khuak a, kiveikhesuk gonggong hi. 5 A hong pianna mun lei, meia haal banga hong kikheng a, 6 Safaiar suang manpha, suangpite apan kilakhia a, tua suang vuite laka kham nente om hi. 7 Sasial ne vasa in tua a kiseel lampi thei lou a, mupigial' mit in zong mu ngeilou hi. 8 Gamsa kisatheite'n tua lai sik lou a, humpinelkai in zong tua laia nek ding zong lou hi. 9 Mihing' khut in meisah suangpite sat a, mualte zungpite dawksak hi. 10 Suangpi laizang khuaksuk a, a mit in suangpi-a goute mu hi. 11 Lui nakte zongkhia a, ia hi. 12 Ahihhanga, pilna koia kimu thei ding ahia? Theihsiamna koia om ahia? 13 Mihing in pilna manphatna theikhe zou lou hi a, mihing' gama kimu thei lou hi. 14 Tui thukpi in: Kei sung ah om kei, chi a, tuipi in: Kei sung ah om kei, chi hi. 15 Kham hoihpena zong kilei theilou a, a man zong nguna kibuk theilou hi. 16 Ofir khama kilei thei lou a, Onik suangmanpha hiam, safaiar suangmanpha hiama zong kilei theilou hi. 17 Kham tawh ahi zong, krustal suang tawh ahi zongin kiteh theilou a, khamsik manphatea zong kilei theilou hi. 18 Koral suangmanpha leh zaspar suangmanpha zong gentaak hilou a, pilna manin zaw rubi suangmanpha' man nangawn khuup hi. 19 Kush gama topaz tawh kiteh theilou a, kham sianga zong kilei theilou hi. 20 Tua bang ahih leh, pilna koi apan hong om ahia? Theihsiamna koia om ahia? 21 Thilhing peuhmah' mit apan kisel a, huihkhua-a vasate apan nangawn kisel hi. 22 Abadon leh Sihna in: A thu kigensawnsawn kia i bil uh tung hi, chi uhi. 23 Pathian in pilna kiang tunna lampi theisiam a, amah kia in a tenna mun thei hi. 24 Ahang bel, ama'n lei mongte en a, khua vannuai khempeuh musuak vek hiven. 25 Ama'n huih' gikna hihkip a, tuite a teh sipsip laia, 26 vuah adinga danthuseh bawl a, huihpi vuahpi ading lampi a bawl laia, 27 ama'n pilna en a, vel sipsip a, ama'n hihkip a, entel hi. 28 Tua chianga ama'n mihing kianga: Toupa lau ahi pilna. Tua baana gilou kiheisan ahi theihsiamna, chi hi, a chi hi.
1 Job in a thugen a genzom lai a: 2 Pathian in hon veen lai nite, kha beisate hon pekik leh chi nang e aw! 3 Ama' meivak ka lutunga a taan lai, miallaka ama' vaaka ka pai lai ngai namah ing e! 4 Ka lut lai nitea, Pathian in hon lawmbawl a, ka innsung a vualzawl lai, 5 Vanglianpen in hon ompih a, ka kiima ka tate' om lai, 6 ka lampite bawngnawidata a dim lai leh kei adinga suangpi in sathau, tui luana a luansak lai nite aw! 7 Khawpi kongpi-a ka hawh a, taangpi kikhopna muna ka tut laia, 8 tangvalte'n hon mu uh a, upate zong ding uh a, 9 makaite lah pau loua om uh a, khuta a kam uh hum uh a, 10 miliante' awte dai sipsip a, a leite uh a dangtung ua belh hi. 11 Ka thugen za peuhmah in hon phat uh a, hon mu peuhmah in hon phat uhi. 12 Ahang bel, huhna ngena kikou mizawngte leh, a huh ding neilou pabeite ka hutkhiak man ahi. 13 Mi si ding kuanin hon vualzawl a, meigong' lungtang kipaka la sasak ing a, 14 diktatna puansilha silh ing a, dika thukhenna ka kumpipuan leh ka dialkhip hi ahi. 15 Mittawte adinga mit hi ing a, khebaite adinga khe hi ka hi. 16 Tasamte adinga pa hi ing a, ka theihlouh thu zongkhia hi'ng. 17 Midiktatlouhte hapakte khaguh hihtan ing a, a thuaksakte uh a ha uapan dokkhia hi'ng. 18 Keima' inn-a si ding kisa ing a, ka nite sehnel banga pungsak hi'ng. 19 Ka zung in tui banpha ding a, zankhawvaka ka hianga daitui omden ding hi. 20 Ka thupina kei sunga thak gige ding a, ka khuta thalphel kithaksak gige ding hi, chi-a ngaihtuah hi'ng. 21 Mite'n kei hon ngaihtuah uh a, ka thuhilhna daai dide-a ngak uhi. 22 Thu ka genkhit chianga amaute pau nawnlou uh a, ka thugente a bil ua nemtaka lut hi. 23 Amaute'n vuahtui ngaak taka kei hon ngaak uh a, ka thugente vuahtui nunung dawntaka dawn uhi. 24 Amaute lama ka nuihmai chianga, um ngamlou phial uh a, ka maitang taang amaute'n nawlkhin lou uhi. 25 Amaute adinga lampi teelsak ing a, amaute' makaipen banga tu ing a, kumpipa a sepaihte laka om banga teeng ing a, sisuunte khamuanpa bang hi ka hi.
1 Ahihhanga tu-a zaw amaute'n hon engbawl uh a, amaute lah kei sanga naupang zaw, a pate uh ka simmawh theih ka belamching uite tawh ka koihkhawm theihte hi uhi. 2 Amaute' banthahatna kei adinga a kiman nading bang om eita, a thahatna un amaute nuseta hiven. 3 Taksapna leh gilkialna hanga gawnggawpa mual uh a, zanmial nuaia, gamkeu leh gamsia singzungte seuh nguatnguat uhi. 4 Loupa laka loupa al khawm uh a, munphiah sing zungte a an uh hi mai hi. 5 A mihinpihte uapan hawlmanga om uh a, gutate banga otkhaia om uhi. 6 Tui kanga keusa luikuam khawnga teensak teitei hi uh a, suanglak leh lei kawhawm khawnga teeng uhi. 7 Loupataam laka sabiltung' hama ham uh a, sing nuai khawnga tukhawm teektuuk uhi. 8 Mi niamlua leh minbei' tate gamsung apan hawlkhiakte hi uhi. 9 Tu'n lah tua bangte' tate' simmawhla suakta ing a, amaute laka paunak suakta hi'ng. 10 Amaute'n hon kih uh a, kei apan kikaangkoih uh a, ka maitang chilphih nangawn kisuanglah lou uhi. 11 Tu'n Pathian in a thalin hon kaap a, hon thuaksak a, amaute'n lah hon dawm mahmah lou uhi. 12 Ka taklama tu nam in hon dou a, amaute'n ka khe kaitaal uh a, kei hon dou dinga panmun khawh uhi. 13 Ka lampi hihsegawp uh a, kei hon hihsia-a lawhching uh a, kuamah' huh zong hilou uhi. 14 A awngkala hon naih uh a, thil sesa laka hong tuklut uhi. 15 Mulkimnate'n hon umchip a, ka zahtaakhuaina huihmut banga hawlmanga om a, ka bitna zong meipi banga lengmang hi. 16 Tu'n zaw ka hinna kiam hiaihiai a, gimthuakna nite'n hon lenkip hi. 17 Zanin ka natna in ka guhte sunpailet a, hon keih nguatnguat khawl ngeilou hi. 18 Natna thahatna in puansilh bangin hon tuam a, puanak ngawng bangin hon vial hi. 19 Ama'n buannawi lak denna-a hon nei a, vut leh leivui suak hi'ng. 20 Pathian aw, huhna ngena hon sam ing a, lah hon dawnglou chin a, dingtou ing a, lah hon en maimah chin a. 21 Dawmlou hiaia hon suai chin a, na banthahata hon vua hi vechin. 22 Hon dokkhetou chin a, huih ma-a hon hawi chin a, huihpi laka lehlam lehlama hon seep hi vechin. 23 A hinglaite khempeuh adinga sehsa sihna mun hon tunsuk ding na hi, chih thei hi'ng. 24 A tongkhong mi in a buaina adinga huhna a nget laia kuama'n a tunga khut kha ngei loupi! 25 Lungkhama buaite adingin ka kap keia hia? Mizawngte adingin ka lunggim keia hia? 26 Hinapi-a, thil hoih ka lamet laia, thil hoihlou hong tung a, khawvak ka zon laia, mial hong tung hi. 27 Ka lungsung kilok pha ngeilou a, thuakgimna nite'n hon maituah hi. 28 Hihvomgawpsa-a vialvak ing a, nisa hai lah hilou hi'ng. Kikhawmte' laka dingtou a, huhna ngena kikou hi'ng. 29 Kei zaw sihalte' sanggam hong suak ing a, simbute' lawm hita hi'ng. 30 Ka vun lah vomgawpa kilip a, ka pumpi lah nattuna sagawp hi. 31 Ka tongpeleng in kahla sa a, ka tamngai in maunala sa hi.
1 Ka mitte tawh kala thukhun bawlkhin ing a, bangchi-a etlahna tawh numei melh thei ding ka hia? 2 Ahang bel, tung Pathian apan mihing' tan bang hi a, tunga Vanglianpen apan a goutan bang hi eita? 3 Midiktatlouhte adinga siatna hi a, thilhih diklou hihte adinga tuahsiatna hilou maw? 4 Ama'n ka lampite mu lou a, ka kalsuan teng sim lou hia? 5 A mannabeia ka gamtat a, ahih kei leh, khemna delha ka kalsuan a kinawh leh, 6 buukna dikin hon buuk henla, genbaanglou hi'ng chih Pathian in thei hen aw. 7 Ka kalsuante a lampial a, ka mitmuh banga ka lungtang a kihei leh, ahih kei leh, ka khutte-a, banghiam thil hoihlou a belh leh, 8 ka pawisa ka suansa midang in ne henla, ka louhaite kibulkalh hen aw. 9 Numei in ka lungtang a zol zawh a, ahih kei leh, ka inn veng kongkhaka ka dak guauguau leh, 10 ka zi in midang' buh hek henla, midang in amah luppih hen aw. 11 Ahang bel, tua lah zumhuai dinga, vaihawmte' gawttaak, ahi loulou-a gamtatna hi ding hiven. 12 Tua in mei banga Abadon kangtum dinga, ka sepgim gah kangtumta ding hi. 13 Ka sila pasalte leh sila numeite'n ka tunga lungkimlouhna a neih chiang ua, amaute diklou taka ka bawl leh, 14 Pathian in hon maituah chianga bang lawh ding ka hia? Ka tungthu gen dinga sapa ka om chianga banga dawng ding ka hia? 15 Suula kei hon bawlpa 'n amaute zong bawl hilou hia? Hon bawlpa kibang in ka nute uh sunga hon bawl hituak lou ka hi umaw? 16 Mizawngte' lunggulh ka na piak nop louh a, ahih kei leh, meigong' mit ka na gimsak leh, 17 ka tanghou kei kia'n ka ne ut a, pabeite ka na hop kei leh 18 ahihhanga, amah lah pa' kep banga ka tuailai apan ka kep a hih a, ka pianchil apan tua meigong ka makaih ahih leh 19 mi khatpeuh puansilh tasama si, ahih kei leh, puansilh beia tasam khat ka muh a, 20 ama' lungtang in hon vualzawl ding zaha ka belam mula amah ka na tuamlum kei leh, 21 thukhenna muna thupaia kithei napi-a, pabeite langa panga khut ka na liik leh, 22 ka liang apan ka baan kia henla, a lawi apan kekhia hen. 23 Ahang bel, Pathian apan hihsiatna kei adinga i mulkimhuahi a, a thupina launa hanga tuabang hih theilou hi vengin. 24 Kham-a muanna ka ngak a, kham siang kianga: Nang ka bitna na hi, ka na chih leh, 25 ka hauhna tampi tung leh ka khutte' lamkhiak neih-le-lam tunga ka na lungnop leh, 26 ni a taanphat laitak, ahih kei leh, khapi thupitaka kihei ka zahtak a, 27 a sima ka lungtang tuate' zolzawha a na om a, amaute tawpa biakna khut ka na liik leh, 28 hiaite zong mawhtansak ding lungsimsiatna hi ding hi, ahang bel, tung Pathian tunga muanhuai lou hi ding hi vengin. 29 Ka meima' vangtahna tunga ka na kipah a, ahih kei leh, a tunga lungkham buaina hong tung ka na awi-am khum leh 30 ama' hinna hamselawha khial dinga zaw ka kam phallou hi'ng 31 ka innsung mite'n: Job' an a gilvaha ne lou kua om ahia? chi ngeilou uh a na hileh 32 ahihhanga, gamdang mi kuamah konglak khawnga a zantaam kul lou a, khualzinte adinga ka kongkhak honsa-a koih gige hi'ng 33 Mite' iim banga ka helna ka na iim a, ka tatsiatnate ka na iim leh, 34 tua lah mipite lauh man leh, behte' simmawh lauh mana kamsima om a, pawpawt lou na hita leng 35 Ka thu za ding kua hiam beek nei leng aw! Tu'n ka kihuutna suai kaita ka hih chiangin, Vanglianpen in hon dawng henla, kei hon ngawhpa'n hon mawhsakna gelh hen. 36 Ke'n ka lianga tua paw ngeingei ding ing a, kumpilukhu banga khu ding hi'ng. 37 Ka kalsuan peuhpeuh tawh kisai thu a kiang tun ding ing a, kumpi' tapa banga amah zuan ding hi'ng. 38 Ka gam kei hon dema a kikou a, a leilehna zingte khituia a kawt leh, 39 aman pelou a, a gamgah ka nekguk a, ahih kei leh, a khawhlawhte lungtang tua banga ka na liamsak leh, 40 huitbuh sikin loulingneite hong pou henla, barlibuh sikin loupa hong pou hen, a chi hi. Job' thugente tua tengin bei hi.
Elihu' Thugen
1 Job, ama' mita diktat a hih manin, hiai mi thumte'n a dawng nawn kei uhi. 2 Ahihhangin, Job in Pathian sanga amah a kidiktansak manin, Buz mi Barakel' tapa Elihu, Ram' innsung mi bel, Job tung ah a heh mahmah hi. 3 Tua lawm thumte'n Job sel zawh nading bangmah neiloupi-a a mawhsak teitei manun, amaute tung ah zong Elihu a heh hi. 4 Amaute, amah sanga upazaw ahih manun, Elihu in Job a houpih main a na ngak hi. 5 Ahihhangin, tua lawm thumte'n gen ding dang bangmah a nei nawn kei uh chih a muhtakin a heh a suak hi. 6 Tuachi-in, Buz mi, Barakel' tapa Elihu in: Kum lam ah ka naupang a, noute na upa uhi. Hiai hangin ka lauthawng a, ka theih nangawn kon na hilh ngam kei hi. 7 Kum in thu a gen ding hi a, kum upatna in pilna a sinsak ding hi a, chi-in ka ngaihtuah hi. 8 Ahihhang a, kha om a, Vanglianpen' hatkhumna in amaute theihsiamna pia hi. 9 A pilte a thupite kia hilou a, a dik theisiamte zong a teekte kia hilou hi. 10 Tua bang ahih mana ke'n: Hon na ngaikhia un, ken zong ka theih hon hilh ding hi'ng, chi hi'ng. 11 Noute' pau sung teng hon na ngak ing a, thugen dingdan na zon sung ua, na ngaituah dan uh na ngaikhia ing a, 12 na ngaikhe kilkel hi'ng. Ahihhanga noute laka kuama'n Job a dikloua ngawh zoulou uchin a, na lak ua kuama'n a pansante dawng theilou hi uteh. 13 Pilna ka muta uh, mihing hilouin Pathian in amah seldong hen, chi kei un. 14 Ahihhanga, Job in kei dem nading thu zongkhawm lou hiven, ke'n noute' selnate zanga amah sel lou ding hi'ng. 15 Amaute lungmang uh a, gen ding nei nawn lou uh a, gen ding bei uhi. 16 Amaute kamsimta uh a, dawnna ding neiloua ding ahih chiangun, ke'n ka ngakngak dia hia? 17 Ke'n zong thu ka gen sam na ke, ke'n zong ka theih ka gen na ke. 18 Ahang bel, ke'n thu a dimteeka nei ing a, ka sunga kha in hon sawl teitei hiven. 19 Thawla kithun dim zu bangin ka sunglam om a, savun thawl thak a phut keek dek bang hi ing. 20 Ka tungzaan nadingin hon pausak un, kamka-a kiselpih ding hi'ng. 21 Ke'n kuamah deihsaktuam neilou ding, kuamah lah maitangphat lou ding hi'ng. 22 Ahang bel, mi maitangphat siam hi leng, kei hon Bawlpa'n hon lamang pah ding hiven.
1 Ahihhangin, Job, tu'n ka thute na ngai inla, ka thu gen peuhmah ngaihsak in. 2 Ke'n ka kam ka ding hi'ng. Ka thute ka lei dawna om hi. 3 Ka thute lungtang tawng apan hi a, ka mukte'n ka theihte mah a siang sianga gen hi. 4 Pathian' Kha in kei hon bawl a, Vanglianpen' hu in hinna hon pia hi. 5 Non sel theih leh, hon sel ve leh. Kisa inla, hon maituah ve. 6 Pathian' mai ah nang bangbang hi veng. 7 Kei non launa in hon patausak kei henla, ka khut zong na tung ah gik kei hen. 8 Nang ka zaka thu gen chin a, a ging mahmah za ing a: 9 Kei a siangthou a, tatleknabei ka hi, a siang, tatsiatna neilou ka hi, 10 hinapi-a, Pathian in demna ding hon zong a, a melma-in hon ngai a, 11 ka khete kolbulh a, ka lampi tenga hon enzui hi, chi na hive. 12 Ahihhanga, hiai thu-a diklou hi chin a, hon sel hi'ng. Ahang bel, mihing sanga Pathian lianzaw hiven. 13 Ama'n mihing' thute bangmah dawng lou, chi-a, banghanga a tunga phun na hia? 14 Pathian in khatvei thu gen khin tham a, mihing in a phawk keita zong a, tu-a lam khata gen a, hun danga lam danga thu gen mah hi. 15 Mite ihmut suak lua-a lupna tunga a ihmut buahbuah lai khawnga, ihmut mangte, zana mengmuhte tungtawn khawnga 16 a bil bul ua thu gen thei a, vauna-a amaute mulkimsak hi. 17 Tua bel, thil diklou hihna apan mihing kiheisak nading leh kisaktheihna apan amah kep nading hi a, 18 kawkhuk apan hinna huutsak nading leh namsaua manthatna apan a hinna bitsak nading hi ahi. 19 Ahih kei leh, lupna tunga chinate'n guh natna a vei gige zong mihing taihilha a om nading hi thei hi. 20 Tua bang huna a hinna mahmah in an duh lou a, a hinna in an limpen nangawn kih hi. 21 A sa teemgawp a, bangmahlou suak a, satak in a tuam a guhte tu-a dawk hiai hi. 22 A hinna in hankhuk naih a, a hinna in sihna thangkoute naih hi. 23 Hinapi-in, amah lama panga gensak ding, a dik a tang hilh ding vansawltakte 1,000 lak ah khat beek om henla, 24 amah tunga hehpihsiamin: Amah hankhuk a tun louh nadingin hawi in, amah adinga tatna mu ka hi, chi ding om leh. 25 Ama' chi naungeka banga thaksaka om ding a, a tuailaia bang batsak hi ding hi. 26 Amah Pathian kianga thuum a, a deihsakna ngah a, ama'n Pathian' mai mu a, lungnuama kikou a, a diktatna din muna Pathian' dinsak thaka om hi. 27 Tua khita mite kianga amah hong pai a: Na khialta ing a, a dik na kaikawita hi'ng. Ahihhanga, ka lawhtak dia kilawm mu lou hi'ng. 28 Ama'n hankhuk tung lou dinga ka hinna tan a, ka hinna in vaak mu ding hi, chi hi. 29 Pathian in mihing tunga hibangte hih a, nihvei, thumvei nangawn hih hi. 30 Tua bel, a hinna hankhuk apan kaihkik nading leh, hinna vaak a tunga a taan nading hi ahi. 31 Job, hon ngaihsak inla, ka thu ngai inla, dai dide in, thu gen ding hi'ng. 32 Gen ding na neih leh, hon dawng in. Genkhesuk in, hon hahsiang nuam hi'ng. 33 Ahihhanga, tua banga na hih kei leh, hon ngaikhia in. Daai dide inla, ke'n pilna hon sinsak ning, a chi hi.
1 Tua khitin, Elihu in: 2 Nou mipilte'n ka thute na ngai un, nou laisiamna neite'n hon ngaikhia un. 3 Ahang bel, lei in an a chep banga bil in thu entel hi. 4 Adik bang hi hiam, chih ei adingin ki-etchian ni, a hoih sinkhawm ni. 5 Job in: Mawhneilou hi ing, ahihhanga Pathian in a dika thukhenna hon pe lou hi, 6 talek lou himah leng, zuauthei banga ngaih hi ing, mawhlou himah leng, ama' thaltang in liamma damtheilou hon tun hi, chi hi. 7 Job bang mi, mi bangchi ahia, kua'n simmawhna tui banga dawn ahia? 8 Ama'n gidouhna hihte kikholhpih a, migiloute tawh kithuah hi. 9 Ahang bel, ama'n: Mihing in Pathian lungkimsak a tup chianga amah adinga phatuam lou hi, chi hiven. 10 Tua bang ahih manin, nou theihna neite'n hon ngaikhia un. Pathian in thilgilou hih lou hiai a, Vanglianpen in thil diklou hih lou hiai hi. 11 Ama'n, mi a thilhih banga thuk a, a gamtat in a lawhkhiak bangbang pia hiven. 12 Pathian in thil diklou hih inteh, chih ngaihtuah theih hise lou a, Vanglianpen in dika thukhenna kaikawi in teh, chih zong ngaihtuah theih hise lou hi. 13 Kua'n amah leitunga thuneia koih a, kua'n leitung khuavannuai tunga mawhpua-a koih ahia? 14 Ama' tup na hi henla, a kha leh a nakna lakik ding hileh, 15 mi khempeuh mangthangkhawm khinta ding a, mihing leivuia kikta ding hi. 16 Theihsiamna nei na hih uleh, hiai za unla, ka thugen ngaikhia un. 17 Dika vaihawm zadah mi in, vai hawm thei ding hia? A dik leh a Vanglianpa na mawhpaih ding ua hia? 18 Kumpipate kianga: A mannabei na hi, chipa leh, miliante kianga: Gilou na hi, chipa, amah hilou hia? 19 Ama'n miliante deihsaktuam lou a, a zawngte sanga a haute deihsak zaw tuan lou hi, ahang bel, amaute ama' khutsuak hi vek uh hiven. 20 Amaute zankhanga siguih uh, a mipite zong liing uh a, mangthang uhi. A hatte zong mihing khut telloua paihkhiaka om uhi. 21 Ama' mitte'n mihingte' lampite en a, a kalsuan teng uh mu hi. 22 Thil gilou hihte' buk theih nading munmial leh limliap lua om lou hi. 23 Mihingte tunga thu a khen theih nadinga, ama' maia hong kilat ua, ama'n a na-ettel sawnsawn ding, Pathian adinga kul lou hi. 24 Ama'n a thu uh kan sese lou a, mihatte hihzan vek a, amaute' muna midangte tungkhia hi, 25 Ama'n amaute' thilhihte a chiamteh mana, zankhanga amaute lumlet a, gawizana om hi uhi. 26 Ama'n amaute a gitlouh man ua, miteng' muh dinga gawt hi. 27 Tua bel, amah zui lou a, a lampial man uh, a lampite khat zong a zahtak louh man uh hi ahi. 28 Amaute'n mizawngte kapsak uh a, a kah uh ama' mai hong tung a, ama'n tasamte' kah za hi. 29 Ahihhangin, amah dai dide leh, kua'n mawhsa thei ding? Ama'n a mai seel leh, kua'n amah mu thei ding? Hinapi-a amah mimal leh nam tunga a kibanga om veve a, 30 vaihawm dinga pathianbeite phal loua, mite mat nading thang zong kamsak lou hi. 31 Mi'n Pathian kiang ah: Kei a mawh hi'ng, khial nawn kei ning. 32 Ka muh theihlouhte hon sinsak in. Thildiklou ka na hihtak leh hih nawn kei ning, a chi, chi ni. 33 Nang a kisik nuam lou hinapi, nang chih dandana Pathian in, hon pakta ding hia? Kei hi louin, nang na hi ve a khentat ding. Tua bang ahih nung na theihte hon hilh ve le. 34 Theihsiamna neite'n phuangkhia uh a, a pilte'n ka thu za a, ka kianga: 35 Job in theihnabeipi-a thu gen a, a thugente-a muhna thuuk omloupi, chi uhi. 36 Job in migilou banga a dawn manin, a tawp dongin amah ze-etin om leh aw! 37 Ama'n a khelhna-a helna behlap a, simmawh hattaka eite laka khut beeng a, Pathian demna thu gentam semsem hi, a chi hi.
1 Tua khitin, Elihu in: 2 Hiai a dika thukhenna hi-in na ngaihtuah hia? Nang: Ka diktatna in Pathian diktatna khup hi, na chih! 3 Hinapi-in nang: Kei adinga tua bang phatuam hiam, khial loua ka om ke'n bang lawhtak ka hia? na chi a. 4 Ke'n nang leh na ompih na lawmte hon dawng nuam hi'ng. 5 Vaante entou unla, mu un. Noute' tunglam peka om meipite en en un. 6 Noute na khelh uleh, tua in amah bang lawh a, na tatleknate uh a tam leh, tua in amah bang lawh a? 7 Noute na diktat uleh, amah bang na pia ua eita? Ahih keileh, ama'n na khut uapan bang a ngaha eita? 8 Na gitlouhna un nou bangbang mihing kia khoihkha a, na diktatna un mihing tapate kia khoihkha hi. 9 Nuaisiahna nuai apan mihingte kikoukhia a, a vangliante' bantha apan tungzanna ngen uhi. 10 Ahihhanga, kuama'n: Kei hon Bawlpa Pathian zankhanga la hon pepa koia om a, 11 leitung gamsate kiang sanga eite kianga tam hon sinsakzawpa, tungleng vasate sanga eite pilzaw-a hon bawlpa koia om ahia? chi lou hi. 12 Migiloute' kiotsak mana mihingte a kikoukhiak chianga zong, ama'n dawng lou hi. 13 Amaute' ngetna a hawmpi Pathian in ngaikhelou taktak a, Vanglianpen in ngaihsak lou hi. 14 Na thu ama' maia om lai nangawna, amah na ngak teitei kul ahih leh, amah mu lou na kichih chiangin, hon ngaikhe kei sem nan chia. 15 Tua baan ah, a hehna in gawt ngeilou, ama'n tatlekna a nengthema zong phawklou, na chih chiangin, hon ngaikhe kei sem nan chia. 16 Tua banga Job in a hawmpi thu gen gena kamka a, theihnabeipi-a thu gen tamsem sem hi, a chi hi.
1 Elihu in a gen lai a: 2 Hon na thuakzou lai teitei un, Pathian' tanga gen ding tampi om lai ahi, chih hon lak ning. 3 Ke'n ka theihna, gamlapi apan ka ngah hi a, dika thukhenna kei hon Bawlpa-a hi ahi, chi-a amah pe ding hi'ng. 4 Ka thute a diklou ahi kei, chih leh, theihna-a bukim khat noute kianga om ahi, chih thei un. 5 Pathian vanglian a, ahihhanga, mihingte simmawh lou hi. Ama' vangletna zaw theihsiamna thahatna-a kibulphuh hiven. 6 Ama'n migiloute hawi lou a, a thuakte kianga bel dika thukhenna pia hi. 7 Ama'n midiktatte apan a mit heimang ngeilou a, kumpipate tawh kumpitutphaha tukhawmsak a, amaute pahtawi den hi. 8 Ahihhanga, mite khainianga hena a om chiang uleh gimthuakna-a henchip a hih chiang ua, 9 ama'n a thilhihte uh amaute hilh a, kiuangsaktakin khialta uh e, chi-a hilh hi. 10 Ama'n bawlhoihna ngaikhesak a, a thilgilou hih uh kisik dinga thu pia hi. 11 Amaute'n thu mang a, a nna a sep uleh, a damsung nite ua mavang ding uh a, a damsung kumte uh lungkimtaka zangkhin ding uhi. 12 Ahihhanga, a ngaihkhiak kei ua leh bel, namsaua mangthang ding uh a, theihnabeia laitat ding uhi. 13 Lungsunga pathianbeite bel hehsa-a om gige uh a, amaute koi a buhsak chiang nangawna, huhna ngena kikou lou uhi. 14 A tuailai ua si uh a, milim biakna biakina kizuak pasalte laka si uhi. 15 Ahihhanga, a thuakte bel a thuakna uapan hukhia a, nuaisiah-a a om lai ua, a bil uh vaaksak hi. 16 Ama'n lungzinna kamsung apan noute hon zolkhia a, phalchiang chihse om louhna mun kiching hon tun nuam a, anlim lim omna ankuang hon tun nuam hi. 17 Ahihhanga, migiloute' thuak dinga kilawm gawtna in noute hon delhkhum a, gawtna leh thudika thukhenna in noute hon man ahi. 18 Kuama'n hauhna zanga hon zolzawh louh nadingin, pilvang un. Golhna tampi in hon lampialsak dingin kiphal kei un. 19 Na hauhnate un, ahih kei leh, na haksatna khempeuh un zong na lungzin louh nading ua, hon kembit toutou ding hia? 20 Mite a inn uapan kaihkhiak nading zaan hun lunggulh kei un. 21 Gilou lama kihei lou dingin pilvang un, tua lah gimthuakna sanga teelzawka nei na bang uh a! 22 Pathian zaw a vangletna-a tawisanga om ahi. Amah bang sinsak mi kua ahia? 23 Amah adinga a lampite geelsak-a a sehsak kua ahia? Ahih kei leh, amah kianga: Na hih dik kei, chi ding kua ahia? 24 Mihingte'n la-a na sak uh a nasep phat ding thei gige un. 25 Mihing teng in tua muta a, mite'n gamlapi apan en en uhi. Pathian na na thupi hi na maizen e! Theihsiam vual hi kei nah e! Ama' kumte sutkhiak vual hi kei nah e! 27 Ama'n tuipite apan tuimalte thaalkhetou a, tuate kikhaihsiangna tuimei vuah suak a, 28 meipite'n tuate mah bawkhia a, mihingte tunga vuah tampi-a zusuk buabua hi. 29 Ama'n meipite a phalh dan kua'n theisiam ding a, a innsang apan vaanpi ging kua'n theisiam ding? 30 Ama'n a kim a kianga, a khawphiate a thehzak dan, tui thukpitak a khuh dan en ve ua. 31 Ama'n namte a uk dan leh, a kichinga an a piak dan hibang hi ahi. 32 Ama'n khawphia a khutdimin pham a, a mun geihgeih khawhsak hi. 33 A vaanpi ging in huihpi nung ding genkhol a, gantate nangawn in huihpi'n hon pha dek chih thei uhi.
1 Hibang teng ka zak chianga, ka lungtang kisaai a, phudut dut hi. 2 Ngai dih uh! Ama' aw ging loiloi ngai dih uh, a kam apan ging loiloi ngai dih uh. 3 Ama'n vannuai teng ah a khawphia sawlkhia a, leimong dong tungsak hi. 4 Tua khita aw hong ging loiloi a, amah a vangletna aw-a kikoukhe loiloi hi. 5 Pathian' aw lamdangpi-a ging loiloi a, eite' theihsiam vuallouha thil thupi taktak hih hi. 6 Ama'n vuuk kianga: Leitung ah kia in, chi a, vuah kianga: Nakpitakin zu in, chi hi. 7 A mi bawlsa khempeuh in a nasep a theih nadinga, ama'n michih khut tunga chiamtehna nam hi. 8 Gamsate kiseel in bu uh a, a kawsung ua omden uhi. 9 Huihpi a inn dantan sung apan hong pawtkhia a, huih hattak apan khawvot hong om hi. 10 Pathian' hu in tuikhal omsak a, tui zapi hong khai hi. 11 Ama'n meipite tuipaaisak kiihkeih a, tuite tungtawna khawphe zolzol sawlkhia hi. 12 Ama' thuhilh banga ama' thupiak semkhe dinga leitung maikaiha kipei vutvut uhi. 13 Ama'n mihingte bawlhoih dinga meipite kaaisak a, ahih kei leh, a leitung tui buak dinga, a itna lak dinga kaaisak hi. 14 Job, hiai ngaikhia inla, khawl inla, Pathian' thillamdangte ngaihtuah in. 15 Pathian in meipite a thunun a, a paisak dan, a khawphiate a phiatsak pahpah dan na thei hia? 16 Meipite kal a, akituaka pai diandian a, tua theihna-a bukimpa' thillamdangte na thei hia? 17 Simlam huih hong nung a, leitung a daih sipsip laitaka puandum tawh om nang, 18 vaante, sumsan limlang banga taaka zalh dingin amah tawh kikumin na pangkhawm thei ahia? 19 Amah kianga ka gen ding uh hon sinsak ve. Koute'n mialna hanga ka thu uh gen ding a, lepkhawm dan thei lou hi ung. 20 Thu ka gen nuam chi-a amah hilh kul hia? Mi kuapeuh in nawmvalha om ding a ngen dia hia? 21 Huih in vaante a mutsiang khita ni a sat vaang laitaka kuama'n ni en theilou hilou maw! 22 Mallam apan a thupina taang selsol tawh hong pai a, Pathian' kimkota thupina mulkimhuai in umkimvel hi. 23 Vanglianpen eite batphak vual hi lou a, amah vanglian tungtuang hinapi-a, ama'n dika a thukhenna leh a diktatna-a mi simmawh-a nuaisiah lou hi. 24 24 Tuabang ahih mana mite'n amah zahtak hi. Tua hanga ama'n lungsunga pilte khempeuh zahna pia hilou maw? a chi hi.
Tangtawn Toupa' Thugen
1 Tua khitin, Tangtawn Toupa'n huihpi apan Job a dawng a: 2 Hiai ka thuhilhna, theihnabei thute peuha mialsak kua ahia? 3 Kipasalsak inla, na kawng gak in. Thu hon dong lei ding hi'ng, non dawn ding ahi. 4 Leitung kingakna suangphum ka phum laiin nang koi ah na om a? Theisiam na hih leh hon dawng in. 5 A letdan tehkhia kua ahia? Thei mahmah hilou na hi hia! Kua'n a tehna khau a tunga zan paisuak ahia? 6 Bang tunga kinga a, ahih kei leh, kua'n a kiu suangphum phum ahia? 7 Zingsol aksite'n la a sakkhawm lai leh vansawltakte khempeuh lungnuama a kikou lai ua kua phat ahi ua le? 8 Kua'n kongkhak liaha tuipi kalhkhum ahia? Suul apan hong suakkhia banga hong pawtkhiak laia, 9 a puansilh dinga meipite ka bawl a, mial bikbeka ka tuam laiin, 10 amah adinga phaktawp ding ka seh a, a kongkhakte leh a kalhnate ka bulh laiin leh, 11 Hiai chiang nong pai thei ding a, a baan nong pai thei kei ding, hiai ah na tuihual kisatheite a khawl ding, ka chih laiin, kua'n thunun ahia? 12 Nang zingsang kiang ah thupiakte na pe ngei-a hia? Ahih kei leh, phalvak kiang ah a mun ding na hilh ngei-a hia? 13 Leitung a geia len-in a sung apan migiloute a sinkhiak theih nadingin thu na pia-a hia? 14 Bellei in a lim a mei namna bangbanga lim leh mei hon neih banga, leitang in zong lim leh mei hon nei a, khawvak in puansilh banga tua kilangsak hi. 15 Migiloute a vaak uh piak louh hi uh a, a banliik uh hihtansak hi uhi. 16 Tuipi nakte ah na vapaita-a hia? Ahih kei leh, tuipi thuk kilkawi teng ah na paita-a hia? 17 Sihna kongpite nang kianga hong kiensakta hia? Sihna limliap kongpite na mu ngeita-a hia? 18 Leitung zatdan na theikheta-a hia? Hiaite khempeuh na thei-a hia, honhilh daw le. 19 Vaak teenna zotna lampi koia om ahia? Mial koia teeng ahia? 20 Amaute amau' mun ah na va koih thei-a hia? Amaute' teenna mun zotna lampi na baan thei-a hia? 21 Na thei mah ve, piangkhinta hi ve chin! 22 Vuk koihkhawmna inn ah na lutta-a hia? Ahih kei leh, gialpi koihkhawmna inn na muta-a hia? 23 Tuate lungkham buaina hunte, kidouna leh kisualna nite adinga ka siit ahi ve. 24 Khawphia a kithehzakna mun zotna lampi koi ahia le? Ahih kei leh, suahlam huihte leitunga a kithehzakna mun zotna lampi koi ahia le? 25 Kua'n vuah zuk zuazuana lampi leh, huihpi leh vuahpi kithuah lampi sial a, 26 mihing' teen louhna gam, kuamah om louhna gamdai-gamkeu tuia buakin, 27 bangmah omlouhna gamsia ah loupa a pousak-a eita? 28 Vuah in pa a nei-a hia? Kua'n daitui malte piangsak ahia? 29 Kua' suul apan tuikhal piang eita? Vaan apan daituikhal sungkhia kua eita? 30 Tuite suang banga hong tak chianga tuipi tung tham a khalh chianga kua piansak eita? 31 Nang, Siguk kilawmtak na henkhawm thei-a hia? Zuheisuktun henna khau na phei thei-a hia? 32 Nang, aksihonte amau hunhunin na suaksak thei-a hia? Ahih kei leh, Siguk a noute tawh na piikhe thei-a hia? 33 Nang, vaante kihei dante na thei-a hia? Nang, leitung ah a vaihawmna gam na tungkhe thei-a hia? 34 Nang, meipite samin, tuun na kikhuh thei-a hia? 35 Khawphia-a kekkiate a lampi ua nang sawl theih ahi ua hia? Na kiang ah: Hiah om ung e, hong chi ua hia? 36 Kua'n meipite pilna pia a, mei a thuah a thuaha kaite theihsiamna pia ahia? 37 Kua'n meipite sim theihna pilna nei ahia? Kua'n vaante-a tuibelte sawnpaia, 38 leivuite hong taak a, leikhalte hong kimat chianga kua'n tua banga tui buak eita? 39 Nang, humpinelkaipi ading sa betsakin, humpinelkaite' gilkialna na vahsak thei-a hia? 40 Amaute a kua ua a kual lai ua, sa mat ding buka loupa laka a kual lai ua, nang sa matsak maw? 41 Va-ak noute'n Pathian sama, an duha a vaak vaak lai ua, va-akte kua'n an pia eita?
1 Nang, sakelte' nou neih lai na thei-a hia? Sazukpi in nou a neih laiin na en-a hia? 2 Nang, a nou a suah mateng uh, ni leh khate na sim-a hia? Nang, a nou suah hun uh na thei-a hia? 3 Amaute boksuk uh a, a noute uh suaksak uh a, a nauvei natna uh beita hi. 4 A noute uh gamlak tawh kingeih uh a, thahata hong khang uhi. Amaute piikhia uh a, hong kiik nawnlou uhi. 5 Kua'n gamlak sakol khahzan ahia? Kua'n a khihna khaute phei ahia? 6 Ke'n a inn ding gamlak gamsia pia ing a, a teen nading chi omna mun zong pia hi'ng. 7 Ama'n khawpi sung buai vengvung nuihsan a, kangtalai hawlte kikou kangkang za lou hi. 8 Ama'n a gamtat nading mualsangte tawn a, loupa hingte zong hi. 9 Gam bawngtal in na nna sem nuam ding hia? Na gan an piakna kianga zan-giak nuam ding hia? 10 Nang, hakkol suanin leilehna kuak ah nna na semsak thei dia hia? Na nunga paiin phaizang lei na letsak thei dia hia? 11 Nang, ama' hatna thupi na muang thei dia hia? Nang, na nna giktak seem dingin amah na seen thei dia hia? 12 Na buh na bal hon nawnlut dingin amah na seen thei dia hia? Na phuala buh hon kaikhawm dingin amah na seen thei dia hia? 13 Gamdai vapi Ostrit in khate kipaktakin zap mah leh, vakengsang khavengte leh multe tawh teh theih hiloupi. 14 Ostrit in lei lak ah tui tha a, a lumsak dingin sehnel seen hi. 15 Kisiktam kha'n teh chih zong khual se lou a, gamsa khattou in tuan kha'n teh chih zong khual se lou hi. 16 A noute nangawn amaha hilou bangtaka huhamtaka kem a, amaute neia a gimna amawkna suak kha'n teh chi se lou hi. 17 Ahang bel, Pathian in pilna amah guan lou a, a kilawm chih theihna zong guan lou hiven. 18 Hinapi-a tai dinga a multe a phalh chianga sakol leh a tungtuangte nuihsan lai hi. 19 Nang, sakol kiang ah hatna na pia-a hia? Ahih kei leh, a ngawng ngawngmul kai nuapnuapte-a khuhsak nang na hi-a hia? 20 Nang, a nakphita mi mulkimsak dingin, khaukhup bangin sakol na tawmsak-a hia? 21 Ama'n a khechina lei khuata a thahatna kipahpih a, kigalvante lak phu hi. 22 Ama'n launa kichi nuihsan a, bangmah lau lou a, namsau zong peel lou hi. 23 A pang ah thalbawm ging netneta, teipi te zolzol leh teizum sau tawh kiton hi. 24 Pengkul a gin chianga ding kinken thei mahmah lou a, kithalawp lua-a lung ommawhin taitum gulgul hi. 25 Pengkul a gin chianga: Ehe! chi-in phit a, gamlapi apan kidou husa za a, makaaite thupiak kikou leh galnawhna la zong za hi. 26 Nang' pilna zanga mupi in kha zak a, simlam manawha leng hia? 27 Nang' thupiaka muvanlai sangpi-a lengtou a, sangpi-a bu sep hia? 28 Amah kawltung khawnga teeng a, zana giak a, kawlbaang khawng a kulhpi hi ahi. 29 Tua apanin an zong dingin kuan a, gamlapi apan a mit in mu pah hi. 30 A noute, sisanin kivak uh a, thahsa omna peuh ah amah om hi, a chi hi.
1 Tangtawn Toupa'n Job kiang ah: 2 Vanglianpen tawh kikhingpa'n amah bawldik ding hia? Pathian ngawhpa'n amah dawng hen! a chi hi. 3 Tua khitin Job in Tangtawn Toupa a dawng a: 4 Kei, a chihtaaklou ka hi. Bangchi'n nang kon dawng thei dia? Khutin kam ka hum hi. 5 Khatvei thu genta ing a, ahihhanga, dawn nading himhim nei lou hi'ng. Nihvei thu genta ing a, ahihhanga, gen nawnlou ding hi'ng, a chi hi. 6 Tua khitin, Tangtawn Toupa'n huihpi lak apanin Job a dawng a: 7 Kipasalsak inla, na kawng gak in. Thu hon dong ding ing a, non dawn ding ahi. 8 Dika ka thukhenna nang mawhsa ding maw? Na kidiktansak nadinga, kei hon mawhtangsak ding maw? 9 Pathian-a bang baan na nei-a hia? Ama' aw bangin na aw Vaan gingin a ging thei-a hia? 10 Ahih leh, thupina leh let tungtuangnain kizem ve leh, pahtawina leh kumpi thupinain kithuam ve leh. 11 Na hehna thangpaihna sungbua inla, mi kisathei peuhmah en inla, niamsak ve. 12 Mi kisathei peuhmah en inla, kingainiamsak ve, migiloute a dinna mun uh tuanchil ve. 13 Amaute khempeuh leivui lak ah phumkhawm ve, hankhuk ah a mai uh khuh ve. 14 Tua hi leh, na khut taklama kihondam thei na hive, chi-in, keimah mah in na kiang ah kon theihpih ke. 15 Nang tawh kitona ka bawl, bawngtal banga loupa ne behemoth en dih, 16 ama'n a kawnga bang hatna neia, a gil sataka bang tha nei a hita maia! 17 A mei sidar sing banga kipei a, a pheipi thaguite kiphankhawm mitmet hi. 18 A guhte sumsan siklawngte hi mai a, a khete sikchiangte hi mai hi. 19 Pathian' khutsuakte laka a khatna pawl hi a, hinapi-a a Siampa in a namsau tawh amah naih thei hi. 20 Mualte'n a thilpiangte uh a an dinga hon puak uh a, gamsate khempeuh a kiang naia mawl uhi. 21 Amah Lotas kungte nuaia lum a, chiknawng pumpengte laka kiseel hi. 22 Lotaste'n a limliap lak ua amah sel uh a, luigei singteh kaite'n kimkota um uhi. 23 Luitui heha a khan chianga, amah patau lou a, Jordan lui a kam chiang tumin phul vonvonta leh, amah bit hi. 24 Kuapeuh in a mit humsakin a man thei dia hia? Ahih kei leh, thaanga manin a nakpheh thei dia hia?
1 Nang, ngakuaiin Leviathan na kaikhe thei-a hia? Ahih kei leh, khauzenin a lei na khih thei-a hia? 2 Nang, khauhualin amah na nakpheh thei-a hia? Ahih kei leh, a khaguh ah ngakuai na baat thei-a hia? 3 Ama'n nang apan zahngaihna a ngen dia hia? Kam nemin nang hon houpih dia hia? 4 Damsung sal dinga amah na mat manin, kilemna hon bawlpih dia hia? 5 Vasa bangin amah na khoizual thei-a hia? Ahih kei leh, na nungakte adingin amah na hen thei-a hia? 6 Sumsinpihte'n amah hon kikhekpih dia hia? Sumbuuk bawlte lak ah a hawmzak thei ding ua hia? 7 Sik kuaikatein a vun ah na baat thei dia hia? Ahih kei leh, ngamatna teipitein a lutang na khawh thei dia hia? 8 Ama' tung ah na khut kha lechin kitom ven chin, hiamgam nawn lou dingin thei gige na ve teh! 9 Amah zawh dinga lamet zaw zuausawsan hi a, a muha muh lei in zong hon mulkimsak hi. 10 Amah tawnghang dinga kuamah' hansanna lauhuai tham lou hi. Hi leh, kei dou dinga kua ding thei ding? 11 Ka piak louh theihlouh kua'n ka tunga ngiat nei ahia? Vannuaia bangkim keia vek hiven. 12 A sa kahiangte' a hatna leh a lim a mei kilawmna gen lou thei lou ding hi'ng. 13 Kua'n a puansilh tungnung hawkkhiaksak thei ding ahia? Kua'n kamkaihna tawh amah naih thei ding ahia? 14 Kua'n a ha lauhuaia kium dianduan a kam kongkhak hong ngam ding ahia? 15 A nungzang in phaw a vualvuala kiptaka kikhilkhawm nei a, 16 Khat leh khat kinaitaka kimat a, a kala huih nangawn lut lou hi. 17 Khat leh khat kiptaka kizom a, kilentuah tek uh a, kikaikhen theilou hi. 18 A nak a phit chianga, khawphia lengkhia a, a mitte zing phalvak zung bang hi ahi. 19 A kam apan meikuang pawt a, meiekte lengkhe phungphung hi. 20 A nakvangte apan meikhu pawt a, pumpeng kuang tunga belsou apan pawtkhia bang hi. 21 A nakna hu in suangmeiholte amsak a, a kam apan meikuangte lengkhia hi. 22 A ngawng ah hatna teeng a, a mai ah lungdonna pai hi. 23 A satak kikhepte kinehtakin kimata, kipa kikhoihtaang thei lou hi. 24 A awm lah suangpi banga taak a, buhhek suang nuainung bang hi. 25 Amah a thawhtouh chianga, mihatte mulkim uh a, a kipeek zek leh a mai apan taai uhi. 26 Namsau in va dawt le-zong, bangmah lawnglou a, teipi leh thai leh sikzum in sun le-zong bangmah lawnglou hi. 27 Ama'n sik zong buhpawl bangin bawl a, sumsan zong, singmuat bangin bawl hi. 28 Thaltangte'n amah taaisak loua, suanglot suangte zong amah adinga buhsi bang hi ahi. 29 Khetbuk zong amah adinga buhpawl zang khat lei bang a, teipi sau ging zong nuihsan hi. 30 A gil vun lah belpei hiamte hi a, a paina nung, buhkhetna-a khet bang hi. 31 Ama'n tuithukte belpi sunga tuisou bulhbulh bangsak a, tuipi zong gimnamtui thawl banga sing lumlet hi. 32 A paina nunglam phuan a, pak phua phua-a, mi'n tuithuk in zong samkaang nei sa uhi. 33 Leitung ah ama' kimpih omlou a, lau neilou ganhing hi ahi. 34 Ama'n a kisatheia kiuangsak khempeuh simmawh a, amah zaw a kisatheite khempeuh tunga kumpipa hi ahi, a chi hi.
Job' Thugen
1 Tua khitin, Job in Tangtawn Toupa a dawng a: 2 Nang bangkim na hih thei chih thei hi'ng, na thilsawm dai theih hilou hi. 3 Nang: Ka thuhilhna theinapi-a sel hiai mi kua ahia? chi-in na dong a, ke'n ka theihsiamlouhpi thilte, kei adia thil lamdang luate, gen ka na hi taktak hi. 4 Nang: Tu'n ngaikhia in, thu gen ding hi'ng. Nang hon dong ding ing a, non dawn ding ahi, na chi hi. 5 Ka bilin nang hon zata, tu'n zaw ka mit in kon muta. 6 Tua bang ahih manin, ka kikih a, leivui leh meivu lak ah ka kisiik hi, a chi hi.
Thu Nunung
7 Tangtawn Toupa'n Job kianga hiai thilte a genkhit in, tua Teman mi Elifaz kiang ah: Ka sila Job banga ka tungtang thu a dika na gen louh manun, nang leh na lawm nihte tunga heh ka hi. 8 Tua bang ahih manin, bawngtal sagih leh belamtal sagih la unla, ka sila Job kianga va paiin, noute adingin haltum thillat va laan un. Ka sila Job in noute adingin hon thumsak ding a, ama' thumna ka saang ding a, na khelhna bangun na tung uah ka gamta kei ding. Ka sila Job bangin, ka tungthu na gen kei uhi, a chi hi. 9 Tuachi-in, tua Teman mi Elifaz leh Shua mi Bildad leh Naamath mi Zofar in Tangtawn Toupa' hilh thil a hih uh a, Tangtawn Toupa'n Job' thuumna a saang hi. 10 Job in a lawmte adinga a thumsak nungin, Tangtawn Toupa'n amah a phungvuh kik a, a malama a piak lehnih a pia hi. 11 A sanggampate leh a sanggamnute khempeuh leh amah a na thei ngeisate peuhmah hong pai uh a, a inn ah amah tawh an hong ne uhi. Tangtawn Toupa'n ama' tunga lungkham buaina a tut khempeuh tung ah amah a nem uh a, a khamuan uh a, ngun tang khat leh kham zungbuh khat a pe chiat uhi. 12 Tangtawn Toupa'n Job damsung nununglam, a masa lam sangin a vualzawl zaw hi. Belam 14,000, sangawngsau 6,000, hakkol bat theih bawngtal 1,000 leh sakolneu 1,000 a nei hi. 13 Tua baan ah, tapa sagih leh tanu thum zong a nei hi. 14 A tanu masapen' min Jemima a sa a, a nihna Kezia, a thumna Keren Hapukh a sa hi. 15 Amaute' omna gamsung khempeuh koimah ah, Job' tanute sanga melhoihzaw a kimu kei hi. A pa un, a sanggampate uh tawh kitonin goutan a pe chiat hi. 16 Hiai nungin, Job kum 140 a nungta lai a, ama' tate leh a tate' tate, a khang lina a mu hi. 17 Tuachi-in, amah kum tampi dong a nungta a, upapi, teekkunin a sita hi.
1 Mi diktatloute' thuhilhna zuia gamta lou a, mikhialte' lampi-a zong ding lou a, simmawhhatte' tutphaha zong tu lou, 2 ahihhanga, Tangtawn Toupa' dan kipahpih a, a sun a zana a dan sutsut mi, mi nunnuam hi na maizen e! 3 Amah zaw luiluang kianga singsuan, a hunhuna gah zel, a teh nangawn vuai lou bang hi ding a, a thilhih peuhmaha ma vang ding hi. 4 Mi diktatloute bel huih mutmang buhsi bang hi zaw uhi. 5 Mi diktatloute zaw, thukhenna-a ding thei lou ding uh a, mikhialte zong midiktatte' kikhopna-a ding thei lou ding uhi. 6 Ahang bel, Tangtawn Toupa'n midiktatte' lampi thei a, mi diktatloute' lampi zaw mangthang ding hiven.
Toupa' Thaunilh Kumpipa
1 Banghanga namte hel a, banghanga mite'n a phatuam lou sawm uhiam? 2 Leitung kumpipate'n pankhawh uh a, Tangtawn Toupa leh a Thaunilhpa dou a, vaihawmmite kikaikhawm uhi. 3 A sikkhaute uh bottat ni, a henna khaute uh eite apan paikhe ni, kichi uhi. 4 Vana kumpitutphah tunga Tupa nui a, Tangtawn Toupa'n amaute nuihzabuk suaksak hi, 5 Tua khit chianga ama'n thangpaia, amaute taihilh a, heh mahmaha amaute lausak ding a: 6 Ka Mual siangthou Ziona, ka Kumpipa kipsak hi'ng, chi hi. 7 Ama'n: Tangtawn Toupa' thuseh phuang ding hi'ng, chi a: Ka kiang a: Nang zaw ka Tapa na hi, tuni'n na Pa k'ong hita. 8 Hon ngen in, na gouluah dinga namte hon pe ding hi'ng. Na neih dinga leimong dong hon pe ding hi'ng. 9 Nang sikchianga amaute uk ding chin a, leibel banga amaute paitam dimdem ding hi teh, hon chi hi, chi hi. 10 Tua bang hi a, nou kumpipate aw, pii un. Leitung vaihawm noute aw, vauhilhna ngai un. 11 Laudan siamin Tangtawn Toupa' nna sem unla, lingkawmin kipak un. 12 Tapa tawp un, tuachi louin zaw, heh kha ding a, lampi ah hon hihmangthang kha ding hi. A thangpaihna mitphiat kal loua kuang thei hi. Amah beelte bel mi nunnuam hi uhi.
A tapa Absolom apan a tailaia David' Phatnala 1 Tangtawn Toupa aw, ka galte pung hina tel e! Kei hon doute pung hina mahmah e! 2 Pathian in amah hukhe lou ding hi, chi a, ka tungthu gente tampi pha uhi.
Sela
3 Ahihhanga Tangtawn Toupa aw, nang ka kima kidalna lum hi chin a, ka thupina hi chin a, ka lutang domkangpa hi na hi. 4 Aw ngaihtaka Tangtawn Toupa sam ing a, ama'n a mual siangthou apan hon dawng hi.
Sela
5 Lumsuka ihmu ing a, Tangtawn Toupa'n hon nakem ahih mana khanglou nawn hi'ng. 6 Ka kimkota hon um mi 10,000 nangawn lau lou ding hi'ng. 7 Tangtawn Toupa aw, hong thou in. Ka Pathian aw, hon hondam in! Ka melmate khempeuh a biangguh ua sat ding chin a, mi diktatloute' ha hihtan ding na hi. 8 Hutkhiakna Tangtawn Toupa apan hong tung hi. Na mite tung ah na vualzawlna om hen aw.
Sela
Nitaklam Thumna
Lapulian ading. Pekging Guineia Sak. David' Phatnala. 1 PATHIAN ka diktatna aw, kon sap chiangin hon dawng in. Ka lungzinna hon dawnzang inla, ka tunga zahngaiin, ka thumna za in. 2 Mihing' tate aw, ka thupina bangtan zahlaksak ding na hi ua? Bangtan thil bangmahlou it a, zuauthu zong ding na hi ua?
Sela
3 Ahihhangin, Tangtawn Toupa'n Pathian limsak mi, amah adinga septuam ahi, chih thei un. Toupa ka sap chianga ama'n hon za ding hi. 4 Na hehna uah khelh zaw khial kei un. Na lupna tung uah na lungtangun thu suut unla, dai dide un. 5 Diktatna kithoihna laan unla, Tangtawn Toupa muang un. 6 Mi tampite'n: Kua'n thil hoih himhim hon lak thei ding ahia? chi uhi. Tangtawn Toupa aw, ka tung uah na melvaak taangsak in. 7 Nang ka lungtanga kipahna koih chin a, buh leh zu hauh laia mite kipahna sanga kipahna lianzaw hi ahi. 8 Khamuangtaka lumsuk ding ing a, ihmu ding hi'ng. Tangtawn Toupa aw, nang kia in bitna muna hon teengsak hi vechin.
Zingsang Thumna
Lapulian ading. Tamngaia Turn. David' Phatnala. 1 Tangtawn Toupa aw, ka thute bil na dawh in. 2 Ka kikou aw na limsak in. ka Kumpipa leh ka Pathian, nang kianga thum hi'ng. 3 Tangtawn Toupa aw, zingsangin ka aw za in. Zingsanga na maia ka ngetna hon tun ding ing a, lamentaka hon ngak ding hi'ng. 4 Nang zaw diktatlouhna kipahpih Pathian hi lou chin a, giloute na kianga teeng thei lou ding hi. Migiloute na muhphaka ding thei lou ding uhi. Thil thulimlou hihte khempeuh mudah na hi. 6 Zuauthu gente hihmangthang ding na hi. Tangtawn Toupa'n sisan suahhat leh khemhat mi kih hi. 7 Kei zaw, na chitna tampite hanga na inn-a hong lut ding ing a, nang zahtaka na tempul siangthou lam nga-a kuun ding hi'ng. 8 Tangtawn Toupa aw, ka galte tam a, na diktatnain hon pii in. Ka mai ah na lampi tangsak in. 9 Amaute' kama muanhuaina om lou a, a lungsung ua siatna om hi. A gawl uh hankhuk kamka hi a, a lei ua mi maitangphat uhi. 10 Pathian aw, amaute mawhtangsak in. Amau' thuhilhna mah ah puksak in. A tatlekna uh tampite hangin amaute thehzak in. Amaute nang hon dou a, hel uh hiven. 11 Ahihhangin, nang hon muangte khempeuh lungnopna pia in. Amaute na gup manin nuamin kipak uhen. Na min itte zong nang ah kipak uhen. 12 Tangtawn Toupa aw, nang midiktatte vualzawl ding chin a, deihsakna tawh lum banga liah ding na hi.
Zahngaihna Ngena Thumna
Lapulian ading. Kaihging Guineia Sak. Sheminith banga sak. David' Phatnala. 1 Tangtawn Toupa aw, heh-in hon tai ken. Thangpaiin hon thunun sam ken. 2 Tangtawn Toupa aw, ka tung ah zahngai in. Kei zaw zawngkhalpi hi ing. Tangtawn Toupa aw, hon damsak in, ka guhte na vek hi. 3 Ka hinna zong nakpitaka lungkham hi. Ahihhangin, Tangtawn Toupa aw, bangtan hi ding ahia, bangtan hi ding ahia? 4 Tangtawn Toupa aw, hong kiik inla, hon hukhia in. Na itna zahngaihna hangin hon hondam in. 5 Sisa-a nang theih gige chih om lou hiven. Hankhuka kua'n nang phatna la sa ding ahia? 6 Ka thuum ka mauna-a tawlta hi'ng. Zankhua-a ka lupna kawtsak ing a, khituia ka lupna kawtsak hi'ng. 7 Dahna hanga ka mit seta a, ka galte khempeuh hanga ka mit mialta hi. 8 Thulimlouhna nasem noute khempeuh aw, hon taisan un. Tangtawn Toupa'n ka kah aw zata hi. 9 Tangtawn Toupa'n ka ngetna zata a, Tangtawn Toupa'n ka thumna sang ding hi. 10 Hon doute khempeuh zahlak uh henla, nakpitakin buaigawp uhen. Kilehhei uh henla, thakhatin zahlak uhen.
David' Thusut. Benjamin Mi Kush tawh kisai Tangtawn Toupa' Maia Sak. 1 Tangtawn Toupa, ka Pathian aw, nang hon muang hi'ng. Kei hon bawlsete khempeuh apan hon hondam inla, hon humbit in. 2 Humpinelkai banga hon balzak kha ding uh a, hon humbit ding om loua hon balnen kha ding uhi. 3 Tangtawn Toupa, ka Pathian aw, hiai hih ka na hih leh: Ka khuta mawhna na om a, 4 kei hon kilempih mi thil giloua thuk ka na hih a, a san a hang beipi-a ka galte lok ka na hih leh, 5 ka gal in hon delh henla, hon pha hen. Ahi, ka hinna leilak ah sikden henla, ka zahtakhuaina leivui suak hen.
Sela
6 Tangtawn Toupa aw, hehin thou inla, ka galte' hehna hangin nang kiliiksangtou in. Pathian aw, kei adingin khanglou inla, dika thukhenna bawl in. 7 Tua hi leh, kikhawm mipite'n na kimkota hon um ding uhi. Amaute hangin sangpi apan vaihawm in. 8 Tangtawn Toupa, mipite tung ah thukhenpa hi hen. Tangtawn Toupa aw, ka diktatna bangin leh, ka sunga takna bangbangin, ka tung ah thu khen in. 9 Migiloute' gitlouhna beita leh aw! Ahihhangin, midikte zaw hihkip in. Pathian diktat in lungtangte leh lungsimte entel hi. 10 Ka kihutna zaw Pathian hi a, amah zaw lungtanga tangte hukhepa hi ahi. 11 Pathian zaw dika Thukhenpa hi a, migiloute tunga hehna langsakpa hi ahi. 12 Mi a lunghei kei leh, Pathian in a namsau tathiam ding a, a thalphel laia mansa-a om ding hi. 13 Ama'n sihna vanzat mansa-a koih ding a, a thaltangte kuangsak ding hi. 14 Ngai in, a lunghei nuam lou migilou in thulimlouhna nauveiin vei a, ahi, thilgilou paai a, zuauthu piangsak hi. 15 Gum khuak a, a lei luakkhia a, ama' khuaksa kawkhuka ke ding hi. 16 A lungkhamna ama' lutung tu ding hi. Ahi, ama' hiamgamna ama' lutung tu ding hi. 17 Tangtawn Toupa a diktatna bangbanga phat ding ing a, Tangtawn Toupa Tungnungpen phata la sa ding hi'ng.
Pathian' Thupina leh Mihing' Vaihawmna Gam
Lapulian ading. Gittitti banga Kaihginga tum ding. David' Phatnala. 1 Tangtawn Toupa, koute' Toupa aw, leitung khempeuh ah, na min hoih hina tele! Nang zaw vante tunga na thupina koihpa na hi. 2 Helna leh phulami na daihsak nadinga, nang hondoute hanga naungekte leh nawinelaite kama phatna hihkip na hi. 3 Na khutsuak na vante, khapi leh aksite a mun mun ua na koihkipte ka ngaihtuah chianga, 4 mihing bang hi peuhmah ahia, hizahta-a na awlmawh? Mihing' tapa zong bang hi peuhmah ahia, hizahta-a na khawtuah? chi hi'ng. 5 Nang amah vansawltakte sanga nuainung zaw zeka bawl chin a, thupina leh pahtawina khusak na hi. 6 Na khutsuakte uksak chin a, ama' khepek nuaia thil bangkim koih chin a, 7 belamte leh bawngtalte khempeuh, gamlak gamsate nangawn, Vasate, tuipi-a ngasate, tuipi-a paite khempeuh nangawn tawh uksak hi china! 8 Thulu - Gittith, la kaih genna hileh kilawm. 9 Tangtawn Toupa, koute' Toupa aw, leitung khempeuh ah na min hoih hina tel e!
Vualzawhna hanga Pathian Phatna Lapulian ading. "Tapa' Sihna" chih kaih. David' Phatnala. 1 Tangtawn Toupa aw, ka lungtang khempeuh-a nang hon phat ding ing a, na thillamdang hihte khempeuh gengen ding hi'ng. 2 Nanga kipah leh lungnop ut hi'ng, Tungnungpen aw, na min phat nuam hi'ng. 3 Ka melmate na nungkiksak chiangin, amaute kisuisak inla, na omna mun ah puksak in. 4 Nang ka hamphatna leh ka thu gum chin a, kumpitutphah tunga tu-a diktattaka thu khen hi vechin. 5 Nang namte taai chin a, mi diktatloute hihmangthang chin a, Tangtawn Tangtawn adinga a min uh phiatmang na hi. 6 Siatdenna in melmate delhpha a, nang a khawpite uh bulkalh chin a, amaute kithei gige nawn lou hi. 7 Tangtawn Toupa'n Tangtawna vaihawm a, thukhen nading kumpitutphah dawhta hi. 8 Ahi, ama'n diktattaka leitung khempeuh thu khen ding a, namte tunga a dik a tanga thu khen ding hi. 9 Ahi, Tangtawn Toupa zaw, nuaisiaha omte adinga bukna innsang hi a, mangbat huna belh ding kulhpi hi ahi. 10 Na min theite'n hon muang ding a, Tangtawn Toupa'n, nang hon zongte taisan ngei lou ding hi vechin. 11 Ziona kumpi-a tu Tangtawn Toupa phat la sa un. A thilhihte namte lak ah theisak un. 12 Ama'n sisan phuba a laak chianga, amaute thei gige ding a, mi nuainungte' kahna mangngilh lou ding hi. 13 Tangtawn Toupa aw, kei hon mudahte' hon bawldan en in. Ka tung ah zahngai inla, sihna kongpite apan hon domkang in. 14 Tua hi leh, Zion' Tanu' kongpite ah na phatna phuang ding hi'ng. Na hotdamna-a nuam ding hi'ng. 15 Namte amau' khuaksa guma kia uh a, amau' seel lenthanga a khete uh awk hi. 16 Tangtawn Toupa zaw a thukhenna dik apan kithei hi. Mi diktatloute lah amau' bawlsa thanga awk uhi.
Hagaion Sela
17 Mi diktatloute leh Pathian mangngilh namte hankhuk ah kiik ding uh a, 18 ahihhanga, tasamte mangngilha om lou ding uhi. Gimthuaka omte' lamet zong beiden lou ding hi. 19 Tangtawn Toupa aw, thou inla, mihing zaw vualzousak ken. Na mitmuhin namte mawhpaihin om hen. 20 Tangtawn Toupa aw, amaute lausak inla, namte'n mihing lei a hih lam uh thei uhen.
Pathian' Thukhenna Ngetna
1 Tangtawn Toupa aw, banghanga gamlapi-a ding na hia? 2 Mi diktatloute kisatheitaka mizawngte hihgenthei uh a, migiloute'n a thil simsawm ua amaute man uhi. 3 Mi diktatlou in a lungtang' lunggulh kisaktheihpih a, duhgawl huaihamte vualzawl a, Tangtawn Toupa simmawh hi. 4 Mi diktatlou in kisaktheih mei pu a, Pathian' mai zong lou hi. A ngaihtuahna-a Pathian ading mun om lou hi. 5 A gamtatnate-a lawhching a, kisathei hi. Na thukhennate mu pha lou a, a melmate khempeuh simmawh hi. 6 Ama'n a lungsunga: Hihliina om lou ding hi'ng. A khang a khanga zong tasam lou ding hi'ng, chi hi. 7 A kam hamselawhna, khemna leh nuaisiahnain dimsak a, a lei nuaia thusia leh thuginalou om hi. 8 Khawsung a mialna muna tu a, kuamah muh louhna-a mawhneiloute that a, a sima gentheite mitsuan gige hi. 9 Humpinelkai sa buk banga a sima mi buk a, gentheite man dinga taang hi. A lenthanga zollut a, gentheite man hi. 10 Mi buka bok a, a thahatna nuaia gentheite puk uhi. 11 Ama'n a lungsunga: Pathian in mangngilhta, a maitang selta, hon mu ngei lou ding hi, chi hi. 12 Tangtawn Toupa Pathian aw, na khut liik inla, mi nuainungte mangngilh mahmah ken. 13 Mi diktatlou in banghanga Pathian simmawh ahia? Banghanga a lungsunga: Ka tungthu gen dingin hon phut kei niteh, chi ahia? 14 Ahihhangin, Pathian aw, nang lah lungkhamna leh dahna mu gige chin a, na khuta thuk ding chin a, migenthei na khutsunga hong kikemsak a, Nang pabeite huhpa hi vechin. 15 Mi diktatloute' baan sattan inla, ahi, mi diktatlou' gitlouhna siit nei louin zongkhe sipsip in. 16 Tangtawn Toupa zaw Tangtawna Kumpipa hiden ding a, a gam apan namte mangthang ding hi. 17 Tangtawn Toupa aw, mi nuainungte' lunggulh za hita vechin, a lungtang uh hihkip ding chin a, amaute bil dawh ding hi vechin. 18 Tagah leh nuaisiaha omte tunga a dika vaihawm ding chin a, leimi in amaute nuaisiah nawn lou ding hi.
Pathian' Ettelna
Lapulian ading. David' Phatnala. 1 Tangtawn Toupa beela bu hi vengin, banghanga nang: Vasa bangin na mual tunglam ah leng in, hon chi thei na hia? 2 En in, mi diktatloute'n thalphel lai a, thalkhaua thaltangte bulh a, miallaka midiktatte' lungtang kaap sawm uhi. 3 Kibulphuhna suangphumte hihsiatin om leh, midiktat in bang hih thei ding ahia? 4 Tangtawn Toupa, a tempul siangthou-a om a, Tangtawn Toupa, a vantung kumpitutphah tunga tu hi. Mihing tate en a, a mit in amaute entel zel hi. 5 Tangtawn Toupa'n mi diktatte entel a, ahihhanga mi diktatlou leh thagum suah ut mi bel a hinna in mudah hi. 6 Tangtawn Toupa'n mi diktatlou tunga mei leh kaat zusak ding a, huih sa a tan uh hi ding hi. 7 Tua bel, Tangtawn Toupa a diktat man hi ahi. Ama'n diktatna it a, mitangte'n a mei mu ding hi.
Toupa'Thu Siang
Lapulian ading. Pekging Guigiat neia Sak. David' Phatnala. 1 Tangtawn Toupa aw, hon huh in, Pathian limsakte om nawnlou hi, mihing tate lak apan a muanhuaite beibei hi. 2 Michih in a innveng kianga zuauthu gen a, maitangphat leh lungsim thuah neipi-a thu gengen hi. 3 Tangtawn Toupa aw, maitangphatna thu gengente satkhia in! Kisatheitaka thu lianpipi gen leite attan in! 4 Amaute'n: Leia vualzou ding ung a, ka mukte uh koua hi a, koute tunga thunei kua ahia? chi uhi. 5 A zawng gentheite hihsia uh a, genthei tasamte mau uhi. Tua hanga, Tangtawn Toupa'n: Dingkhe ding ing a, a lunggulh bitna muna amaute koih ding hi'ng, chi hi. 6 Tangtawn Toupa' thute zaw siangthou a, belleia kibawl haltuina meia sagihvei halsiangsa ngun banga siang hi. 7 Tangtawn Toupa aw, tasamte kem inla, hiai khang apan amaute humbit gige in. 8 Mi diktatloute vialvak vak uh a, mihing tate laka thil gilou pahtawia om hi.
Pathian' Dawnna Ngetna
Lapulian ading. David' Phatnala. 1 Tangtawn Toupa aw, bangtan hi ding ahia? Hon mangngilh den ding na hi-a hia? Bangtan kei apan na maitang sel ding na hia? 2 Bangtan ahia, nisima ka hinna lungkhama a kingaihtuah ding? Bangtan ahia, ka meima ka tunga a ki otsak ding? 3 Tangtawn Toupa, ka Pathian aw, hon en inla, hon dawng in. Ka mit vaksak in, sihna-a ihmu kha ding hi'ng. 4 Ka meima in: Amah zouta ing, hon chi ding a, ka puuk chianga kipak ding hi. 5 Ahihhanga, ke'n na itna muang hi'ng. Na hotdamna-a ka lungtang nuam ding hi. Tangtawn Toupa'n ka phu hon laaksak ding ahih mana, amah phat la sa ding hi'ng.
Pathian' Theiloute' Omdan
Lapulian ading. David' Phatnala. 1 Mihai in a lungsung ah, Pathian om kei, a chi hi. Amaute kisegawp uh a, thil kihhuai hih uh a, thil hoih hih himhim om lou hi. 2 Tangtawn Toupa'n vaan apan mihing tate ensuk a, a theisiam leh Pathian zong himhim om uhiam, chi-a en hi. 3 A vekun lampialta uh a, a vek ua kihihsegawpkhin uhi. Thil hoih hih himhim om lou, khat lei zong om lou hi. 4 Thulimlouhna nasemte'n theihna nei lou uhia? Tanghou neka ka mite nete'n theihna nei lou uhia? Tangtawn Toupa zong sam lou uhia? 5 Mihing khang diktatte Pathian in a ompih mana, giloute tua-a laua liing uhi. 6 Mizawng genthei' suangtuahna selphou uchin a, ahihhanga, Tangtawn Toupa a bukna hi ahi. 7 Zion khawpi apan Israel hotdamna hong tung leh aw! Tangtawn Toupa'n saltanna apan a mite a piikiik chiangin, Jakob nuam henla, Israel kipak hen.
Pathianlimsakte' Omdan
David' Phatnala. 1 Tangtawn Toupa aw, na puanbuk ah kua teeng thei ding ahia? Na mual siangthou ah kua teeng thei ding ahia? 2 Genbaang loua gamta mi leh diktatna hih mi, a lungtang apan thutak gen mi, 3 a leia mi genselou mi, a mihinpihte' siat nading gen lou mi, a inveng kamsia-a hou lou mi, 4 Tangtawn Toupa' muhdahte mudah a, Tangtawn Toupa laute nakpi-a pahtawi mi, ama' thuak nading nangawna, a thuchiama zuautat lou mi. 5 A pung delha sum leitawisak lou mi, mawhneilou mawhpaih dinga golhgukna ne lou mi, hibanga gamta mi puuk ngei lou ding hi.
Amuangte adinga Tangtawn Hinna
David' Miktam 1 Pathian aw, nang hon muang hi'ng, hon humbit in. 2 Ke'n, Tangtawn Toupa kianga: Nang ka Toupa na hi, nang loua thil hoih bangmah neilou hi'ng, chita hi'ng. 3 Leitung misiangthoute ahih leh, ka kipahna khempeuh omna mi thupite hi uhi. 4 Pathian dang zong pahpahte zaw, a lungkhamna uh pung ding hi. Amaute apan dawn thillat sisan lan lou ding ing a, ka muk in a min uh lou sam lou ding hi. 5 Tangtawn Toupa aw, nang ka goutan leh ka nou hon sehsak chin a, ka tantuan bitsak na hi. 6 Ka tantuan gamgi mun hoih ah pai a, goutan hoih tang hi'ng. 7 Thuhilhna hon pepa Tangtawn Toupa phat ding hi'ng. Zan laia zong ka lungtang in hon thuhilh zel hi. 8 Ka maia Tangtawn Toupa koih gige hi'ng. Amah ka taklama om a hih mana hihliina om lou ding hi'ng. 9 Hiai hanga ka lungtang kipaka ka lei zong nuam hi. Ka pumpi zong lametna neia tawlnga ding hi. 10 Ahang bel, nang hankhuka hon nuse lou ding chin a, na Misiangthoupa a muatmang zong phallou ding hi vechin. 11 Nangma'n hinna lampite hon lakta chin a, non ompihna sunga lungnopna tawh, na khut taklama Tangtawn nopsakna tawh hon kidimsak ding na hi.
Kha Nuai Bukna
David' Thumna. 1 Tangtawn Toupa aw, ka dikna thu za in. Hehpihtakin ka kikou aw hon ngaihsak in. Ka thumna bil dawh in, khemhat mukte apan hi lou hi. 2 Dika latsaka ka omna nang apan hong tung hen. Ka mit in thil dik leh tang mu hen. 3 Nang ka lungtang entel chin a, zankhanga hong veh na hi. Nang hon entel a, bangmah mu lou na hi. Ka kam a khelhna om lou dinga tum tinten hi'ng. 4 Mihingte' nasep tawh kisai ahih leh, na kam apan thu pawt pansana ngongtatte' lampi apan kiveng hi'ng. 5 Ka kalsuante'n na lampite tawn a, ka khete taai lou hi. 6 Pathian aw, nang hon dawng ding na hih mana, nang hon sam hi'ng. Na bil hon dawh inla, ka thugen ngaikhia in. 7 Khut taklama hondampa'n, nang hon beelte zaw a melmate uapan hondam na hi. Na zahngaihna lamdangte hon lak in. 8 Na mit nauta bangin hon kem inla, na khaliim nuai ah hon seel in. 9 Kei hon nuaisiah mi diktatloute apan hon seel inla, kei hon thah sawm, kimkota hon uumte apan hon seel in. 10 Amaute'n a lungtang kheengte uh khakchip uh a, kisaktheihna kama thu gen uhi. 11 Tuin ka kalsuanna lamlama hon uum uh a, leilak hon denna dinga hon mitsuan uhi. 12 A samat bawhzan ding kilawp humpinelkai bang leh, mun daia sa mat ding zong humpinelkai lunlai bang hi uhi. 13 Tangtawn Toupa aw, thou mahmah in! Amaute maituah inla, puksuksak in. Na namtemin mi diktatloupa apan ka hinna hukhia in. 14 Tangtawn Toupa aw, tua bang mite apan hon hukhia in. Amaute zaw leitung mihingte hi uh a, leitung hinna lei mah lawhtak uhi. Na deihthawhte bel a gilkial lai ua vahsak chin a, a tate un nek ding kiching mu uh a, tuate'n a tate uh ading hauhna nutsiat lai uhi. 15 Ke'n zaw diktatna tawh na mei mu ding hi'ng. Ka khanlawh chianga nang batna neia lungkimta ding hi'ng.
Kipahthugenna
Lapulian ading. Tangtawn Toupa' Sila David' Phatnala. A melmate khempeuh leh Saul apan Tangtawn Toupa'n a humbit laia Tangtawn Toupa' maia hiai La-thute a Gen. 1 Tangtawn Toupa, ka hatna aw, nang hon it mahmah hi'ng. 2 Tangtawn Toupa ka Suangpi, ka kulhpi leh kei hon hukhepa hi. Ka Pathian ka Suangpi, ka Bukna hi ahi. Amah ka Lum hi a, ka Hotdamna kii, ka kulhpi ahi. 3 Tangtawn Toupa sam hi'ng. Amah zaw phat taak hi ahi. Ka galte apan hotdam a om hi'ng. 4 Sihna khauhualte'n hon vial a, siatna hawktui luangte'n hon tuum hi. 5 Misikhua khauhualte'n hon vial a, sihna thangte ka maia om hi. 6 Mangbanga Tangtawn Toupa sam ing a, ka Pathian sam hi'ng. Ama'n a tempul apan ka aw za a, ka kikou aw a maia ging a, a bil tungtou hi. 7 Lei kiliing a, kivuang a, mualte kingakna suangphumte liing hi. Amah heh ahih mana amaute kiliing uhi. 8 A nakvangte apan meikhu kitung a, a kam apan kangtumthei meikuang pawt a, tua apan meiamte pawtkhia hi. 9 Ama'n vaante phenvang a, hong kumsuk a, meipi vomte siiksuk hi. 10 Amah Cherubte tunga tuangin leng a, huih khate tunga tuangin sangpi-a lengtou hi. 11 A kimkota kikkhuh nadingin khawmial bawl a, a tunga khuhsuk dingin tua vuah pua van meivomte bawl hi. 12 Ama' omna vak taangpha apan meipite paikhia a, gialpi leh keekte tawh ton hi. 13 Vaan apan Tangtawn Toupa vanpi-in ging a, Tungnungpen aw in thawn hi. 14 Ama'n thaltangte kaapkhia a, galte thehzak a, kek sawl a, amaute phiatmang hi. 15 Tangtawn Toupa aw, nang heha sal chin a, na nakvanga hu na phit chiang a, tuipi sung kuam thuukte hong dawk a, leitung kingakna suangphumte kihawkkhia-a hong dawk hi. 16 Ama'n tungsaang apan hon sawksuk a, hon len a, tuithuukte apan hon domkhia hi. 17 Ama'n a haat mahmah ka galte apan hon humbit a, kei adinga hat lua ka melmate apan hon hukhia hi. 18 Amaute'n ka tuahsiat ni-a hon maituah uh a, ahihhanga, Tangtawn Toupa kei hon huhpa hi ahi. 19 Ama'n mun awngthawl hon tun a, ka tunga lungdam ahih mana hon hukhia ahi. 20 Tangtawn Toupa'n ka diktatna banga ka tunga hihta a, ka khut siangthouna banga hon dinkik hi. 21 Ahang bel, ke'n Tangtawn Toupa' lampite tawn ing a, ka Pathian apan lampiala thil diklou hih lou hi'ng. 22 A dante khempeuh ka maia om a, a thusehte pialsan lou hi'ng. 23 Ama' maia genbaangloua om ing a, khelhnate apan kikem hi'ng. 24 Tangtawn Toupa'n ka diktatna bangbang leh, a mitmuha ka khut sianna bangbanga hon dinkikta hi. 25 A muanhuaite tunga a muanhuaia kilaak chin a, genbaangloute tunga genbaangloua kilaak na hi. 26 A siangte tunga a sianga kilaak chin a, lungsim kawite tunga lemtheitaka kilaak na hi. 27 Nang a kingainiamte hondam chin a, a kisatheite bel en chin a, niamsak na hi. 28 Tangtawn Toupa aw, nang ka meivak kuangsak chin a, ka Pathian aw, nang ka khawmial vaak suaksak na hi. 29 Nang' huhna tawh sepaihhonte naih ngam ing a, ka Pathian tawh kulhbaang kal thei hi'ng. 30 Pathian zaw a lampi hoihkim a, Tangtawn Toupa' thu dikkim hi. Amah zaw amah beelte khempeuh adinga lum hi ahi. 31 Tangtawn Toupa loungal Pathian dang kua om ahia? Eite' Pathian loungal Suangpi kua dang om ahia? 32 Pathian ahi thahatna tawh hon thuam a, ka lampi hoihkimsak. 33 Ama'n ka khete zukpi khete banga bawl a, munsang ahte hon dingsak hi. 34 Amah ahi ka khutte galdou dan sinsak a, ka baante'n sumsan thalphel lai zou hi. 35 Nang na vualzawhna lum hon pia chin a, na khut taklam in hon dingzousak hi. kei hon liansak dinga hong kuunsuk na hi. 36 Nang ka nuaia ka lampi liansak chin a, ka siakguhte kihek lou hi. 37 Ka galte delh ing a, pha ing a, amaute hihmanthat ahih mateng uh kilehkik lou hi'ng. 38 Amaute thou zou nawn lou dinga sikzan ing a, ka khe nuaia puk uhi. 39 Nang kidou dinga thahatna-a hon thuam chin a, kei langte ka khe nuaia kuunsak na hi. 40 Ka galte taikeksak chin a, ka melmate hihmangthangta hi'ng. 41 Amaute huhna ngena kikou uh a, hukhe ding kuamah omlou hi. Tangtawn Toupa nangawn sam uh a, ama'n dawng tuan lou hi. 42 Ke'n amaute huihmut mang leivui banga gawivui ing a, konglak buannawi banga bungkhia hi'ng. 43 Nang ka mite' hon douna apan hon hukhia chin a, namte lutanga hon bawl na hi. Ka theih ngeilouh mite ka nuaia lut uhi. 44 Gamdang mite ka nuaia ton uh a, ka aw a zak phet chiang ua ka thu mang pah uhi. 45 Amaute khempeuh lungkia uh a, a kulhpite ua-pan liing kawmkawma hong paikhia uhi. 46 Tangtawn Toupa hing hi! Ka Suangpi phatin om hen! Pathian ka Hondampa pahtawiin om hen! 47 Amah zaw ka phuba hon laaksakpa Pathian hi a, namte ka nuaia koihpa hi a, 48 ka galte apan hon hukhepa hi ahi. Nang ka galte tunglam peka hon pahtawi chin a, hiamgamte apan hon humbit na hi. 49 Tuabang ahih mana Tangtawn Toupa aw, namte laka nang hon phat ding ing a, na min phata la sa ding hi'ng. 50 Ama'n a kumpipa vualzwhna thupite pia a, a thaunilhpa David leh a suan a khakte tunga chitna peden den hi.
Pathian' Nasepte leh Thute
Lapulian ading. David' Phatnala. 1 Vante'n Pathian' thupina phuang a, huihkhua zapi in a khutsuakte genkhia hi. 2 Sun teng in thu gen a, zan teng in amah theihna phuangkhia hi. 3 Amaute' aw kizak theihlouhna thugen himhim leh pau himhim om lou hi. 4 Amaute' aw leitung khempeuh tung a, a thu uh kawlmong donga thang hi. Ama'n vante laka ni adinga puanbuk bawlsak hi. 5 Ni lah mouneipa a dantan apan hong pusuak bang hi a, mihat kitaiteh ding kipak bang hi ahi. 6 Vaan mong khat apan hong paikhia a, mong langkhat dong pai a, a satna apan bangmah kisel theilou hi. 7 Tangtawn Toupa' dan hoihkim a, hinna bawlhoih zel hi. Tangtawn Toupa' thuhilhna thu muanhuai a, mimawl piisak hi. 8 Tangtawn Toupa' thusehte dik a, lungtang kipaksak hi. Tangtawn Toupa' thupiak siangthou a, mit vaaksak hi. 9 Tangtawn Toupa launa siang a, Tangtawn daih hi. Tangtawn Toupa' thukhennate dik a, diktat kimvel vek hi. 10 Kham sanga deihhuai zaw a, ahi, khamsik siang sanga deihhuai zaw hi. Khuaikhaka khuaizu luangkhia sanga khum zaw hi. 11 Tuate apan na sila in vauhilhna ngah a, tuate zuih zaw pahtakman thupitak hi ahi. 12 Kua'n ama' diklouhna theithei ahia? Ka diklouhna kiselte apan hon siangsak in. 13 Tup mawnga khelhnate apan na sila hon veeng inla, ka tung ah khelhnate thu neisak ken, tua hi leh, tatlekna thupi apan genbaang lou leh mawh loua om ding hi'ng. 14 Tangtawn Toupa aw, ka kama ka thugente leh ka lungtanga ka thusuutte na saan taak hi leh maw! Tangtawn Toupa ka Suangpi leh ka Tanpa aw.
Pathian kia Muan ding
Lapulian ading. David' Phatnala. 1 Mangbat lungzin ni-in Tangtawn Toupa'n nang hon dawng henla, Jakob' Pathian' min in nang hon gum hen. 2 Mun siangthou apan nang hon huhna hon sawl henla, Zion apan hon hatsak hen. 3 Na an thillatte khempeuh thei gige henla, na haltum kithoihna sang hen.
Sela
4 Na lungtang' lunggulh bangbang hon pia henla, na thiltupte hon lawhchingsak hen. 5 Nang na vualzawh chianga, nuama kikou ding ung a, ka Pathian uh mina ka puanlapte uh khaisang ding hi ung. Tangtawn Toupa'n na ngetnate khempeuh hon lawhchingsak hen. 6 Tangtawn Toupa'n a thaunilhpa hukhe ding ahi, chih tu'n theita ing. A vaanmun siangthou apan dawng ding a, a khut taklam thahatna-a hukhe ding hi. 7 Mi pawlkhatte'n kangtalaite muang uh a, mi pawlkhatte'n lah sakolte muang uhi. Ahihhanga, koute'n zaw Tangtawn Toupa, koute' Pathian' min muang hi ung. 8 Tuabang mite kuunsuk uh a, puk uhi. Koute bel thoutou ding ung a, dingtang ding hi ung. 9 Tangtawn Toupa aw, kumpipa hondam in! Kon sap chiangun hon dawng in.
Kumpipa' Vualzawlna
Lapulian ading. David' Phatnala. 1 Tangtawn Toupa aw, na thahatna ah kumpipa kipak ding a, na hutkhiakna ah nakpitaka nuam ding hi! 2 Nang a lungtang' lunggulh peta chin a, a kama a ngette it lou na hi.
Sela
3 Ahang bel, hoihna-a vualzawlna tawh amah na tuak chin a, a lutunga kham lukhu khusak hi vechin. 4 Ama'n nang apan hinna hon ngen a, nang peta na hi a damsung nite Tangtawn adinga sausak na hi. 5 Vualzawhna na piak tungtawnin a thupina lian hi. Nang pahtawina leh thupina amah khusak na hi. 6 Ahang bel, nang amah mi nunnuampen hisak chin a, na ompihna tawh nakpitaka kipaksak hi vechin. 7 Kumpipa'n lah Tangtawn Toupa muang a, Tungnungpen' zahngaihna hanga amah liing lou ding hiven. 8 Na khut in na galte khempeuh zongkhe ding a, na khut taklam in nang hon mudahte zongkhe ding hi. 9 Nang nong kilat chianga, amaute thukkhuuk sa banga bawl ding chin a, Tangtawn Toupa'n a thangpaihna-a amaute nawmvalh ding hi. 10 Nang leitung apan a suante uh phiatmang ding chin a, ahi, a suan a khakte uh mihing tate lak apan phiatmang ding na hi. 11 Ahang bel, nang tunga thil gilou sawm uh a, a sima kikum uh hiven. Ahihhanga, lawhching tuan lou ding uhi. 12 Nang amaute hawlkiik ding chin a, a mai ua thalphel laisa-a ding diing na hi. 13 Tangtawn Toupa aw, nangma' thahatna maha pahtawiin om in. La sa-a na vangletna phat ding hi ung.
Khros tawh kisai Phatnala
Lapulian ading. "Phalvak Sazuk" Kaih. David' Phatnala. 1 Ka Pathian, ka Pathian, banghanga hon taisan na hia? Banghanga panpih ka ngetna gamlat mahmah na hia? Banghanga ka thuum ka maunate gamlat mahmah na hia? 2 Ka Pathian aw, a sun a zana hon sam ing a, hon dawng lou na hi. Zankhua-a kikou ing a, kei adinga tawlngakna himhim om lou hi. 3 Ahihhanga nang zaw siangthou chin a, Israel' phatnala laka teeng na hi. 4 Ka pu ka pate un nang hon na muang uh a, hon muang uh a, nang amaute hukhe zel na hi. 5 Na kianga hong beel uh a, hutkhiaka om zel uhi. Nang hon muang uh a, zahlaak lou uhi. 6 Ahihhanga kei zaw tangtel phet hi ing a, chihtaak hilou hi'ng. Mite' simmawh leh gensiat hi'ng. 7 Kei hon mu peuh in hon simmawh uh a, hon nuihsan uh a, hon nehphen uh a, lu hon sinkhum uh a: 8 Tangtawn Toupa muang hiven, ama'n hukhe leh ake! Amah-a kipak hiven, ama'n humbit leh ake! hon chi uhi. 9 Ahihhanga sul apan hon lakhia nang mahmah hi chin a, ka nu anga nawi ka nek lai nangawna, nang muan dan hon sinsakpa hi na hi. 10 Ka pianchil apan na tunga ngakkhiak himah hi'ng. Ka nu' sul apan ka Pathian hita na hi. 11 Kei hon gamlat ken, lungkham mangbatna nai a, hon huh ding lah om lou hi. 12 Bawngtal tampi in ka kimkota hon um a, Bashan bawngtal hatte'n hon umchip uhi. 13 Hon kamkatkhum uh a, humpinelkai kitoma humham bang hi uhi. 14 Tui banga hon sungbua uh a, ka guh ka taang kilawikhinta hi. Ka lungtang lah khuainun banga ka sunga zulgawpta hi. 15 Ka thahatna belpei banga keugawp a, ka lei ka dangtunga belh hi. Ahi, sihna leivui laka hon sial na hi. 16 Uite'n ka kimkota hon uum a, migilou kikhawmte'n hon uumchip uh a, ka khutte leh ka khete sun pailet uhi. 17 Ka guhte khempeuh zong sim thei hiai ing a, mite'n lah hon en gegu uh a, hon ensaal uhi. 18 Ka puansilhte kihawm uh a, ka puanaktual adinga ai san uhi. 19 Ahihhangin, Tangtawn Toupa aw, nang hon gamlat ken. Ka thahatna hi vechin, huh dingin hon delh in. 20 Namsau apan ka hinna humbit inla, uite' vangletna apan ka hinna manpha humbit in. 21 Humpinelkai kam apan hon hukhia inla, ahi, gam bawngtal' ki apan hon hondam in. 22 Ka sanggamte kianga na min phuang ding ing a, kikhawmte laka nang hon phat ding hi'ng. 23 Tangtawn Toupa lau mi noute aw, nakpitakin amah phat un! Israel suante khempeuh aw, amah zahtakin lau un! 24 Ama'n gimsaka ompa' gimna simmawh lou a, kih lou a, amah apan a maitang zong sel lou a, ama kianga a toukou chianga za hi. 25 Kikhawmte laka thupitaka ka phatpa, nangmah hi ding chin a, nang hon laute' maia ka thuchiamte tangtun ding hi'ng. 26 Mizawngte'n ne ding uh a, tai ding uh a; Tangtawn Toupa zongte'n amah phat ding uhi na lungtangte uh Tangtawnin hing gige hen! 27 Lei mong donga mite'n thei gige ding uh a, Tangtawn Toupa lam nga ding uh a, ahi, namchiha innkuan khempeuh na maia kuun ding uhi. 28 Kumpigam lah Tangtawn Toupa-a hi a, ama'n namte tunga vaihawm hiven. 29 Leitung mihaute'n ankuang uum ding uh a, amah bia-a kuun ding uhi. Leivuia paisukte khempeuh a maia khukdin ding uhi. Ama' hinna kihu theilou mi nangawn in amah be ding hi. 30 Khangsawnte'n ama' nna seem ding uh a, khangsawn sawn donga Toupa' thu kigen ding hi. 31 Hong pai ding uh a, hong piang lai dingte kianga a dikna phuang ding uh a, ama' thilhih gensawn ding uhi.
Belamchingpa Phatnala
David' Phatnala. 1 Tangtawn Toupa, kei hon Chingpa hi a, tasam lou ding hi'ng. 2 Ama'n loupa hing nou dipdip muna hon kualsak zel a, tuivung dai dide kianga hon pii zel hi. 3 Ama'n ka hinna hon bawlhoih thaksak zel a, ama' min vanga diktatna lampi zuia hon pii zel hi. 4 Ahi, sihna liim phaizang tawnin pai mah leng, thil hoihlou himhim lau lou ding hi'ng. Ahang bel, nang hon ompih chin a, na chiang leh na khetbuuk in hon khamuan hiven. 5 Nang kei hon doute' mitmuh a, ka maia ankuang hon lui chin a, ka lutang thau nilh chin a, ka nou dimlet hi. 6 Ka damsung teng hoihna leh zahngaihna in kei hon zui taktak ding a, tua khit chianga, Tangtawn Toupa' inn-a tengdenta ding hi'ng.
Thupina Kumpipa Phatnala
David' Phatnala. 1 Leitung, a sunga thil om khempeuh tawh Tangtawn Toupa-a hi ahi. Leitung leh a sunga teeng khempeuh zong Tangtawn Toupa-a hi ahi. 2 Ahang bel, tuipite tunga tua leitung ama' lamkhiak hi a, tuite tunga ama' hihkip hiven. 3 Tangtawn Toupa' muala kua kaltou thei ding a, ama' mun siangthoua kua ding thei ding ahia? 4 Khut siang leh lungtang siangthou nei mi, a hinna milim lam ngasak lou mi, zuauthu-a kichiam lou mi, 5 tua bang mi in Tangtawn Toupa apan vualzawlna ngah ding a, hotdamna Pathian apan diktatna mu ding hi. 6 Tua bang mi bel, amah zong mi' suan hi a, Jakob' Pathian aw, na mei zong mi mah, chi ahi.
Sela
7 Nou kongpite aw, na lutangte uh liiksangtou un! Nou Tangtawn kongkhakte aw, kiliiksangtou un! Thupina Kumpipa hong lut ding hi. 8 Hiai thupina Kumpipa kua ahia? Amah Tangtawn Toupa thahat leh haat tungnung, kidouna-a haat tungnung Tangtawn Toupa ahi. 9 Nou kongpite aw, na lutangte uh liiksangtou un! Tangtawn kongkhakte aw, kiliiksangtou un! Thupina Kumpipa hong lut ding hi. 10 Hiai thupina Kumpipa kua ahia? Amah Tangtawn Toupa Vanglianpen, thupina Kumpipa ahi.
Sela
Thuhilhna Ngena Thumna
David' Phatnala. 1 Tangtawn Toupa aw, na kianga ka hinna hon liiktou hi'ng. 2 Ka Pathian aw, hon zahlaksak ken. Nang hon muang hi'ng. Ka galte ka tung ah vualzousak ken. 3 Ahi, nang hon ngakte kuamah zahlak lou ding hi. A san a hang beia muanhuailoute bel zahlak ding uhi. 4 Tangtawn Toupa aw, na lampite hon lak inla, na lampite hon sinsak in. 5 Na thutak ah hon pii inla, hon sinsak in. Nang ka hotdamna Pathian hi taktak chin a, nitum tuma nang hon ngak 6 hing' Tangtawn Toupa aw, na zahngaihna leh na itna thei gige in, tanglai apan om gigesa hi ahi. 7 Ka tuailai khelhnate leh tatleknate thei gige kenla, Tangtawn Toupa aw, na zahngaihna bangbangin leh, na hoihna hangin hon thei gige in. 8 Tangtawn Toupa zaw hoih a, tang a, mikhialte ama' lampi sinsak gige hi. 9 Mi niamte, dika thukhenna-a pii a, mi niamte ama' lampi sinsak hi. 10 A thukhun zui peuhmah leh, a theihsakna zui peuhmahte adinga, Tangtawn Toupa' lampite khempeuh zahngaihna leh thutak hi ahi. 11 Tangtawn Toupa aw, na min vangin ka tatsiatna ngaidam in, ka tatsiatna lian mahmah hi. 12 Tangtawn Toupa lau mi kua ahia? Ama'n tua bang mi kianga a teel ding lampi sinsak ding hi. 13 Tua bang mi mavang ding a, a suan a khakte'n lei gouluaha luah ding uhi. 14 Tangtawn Toupa'n amah laute kianga a thuhilhna pia a, a thukhun theihsiamna pia hi. 15 Ka mit in Tangtawn Toupa en gige hi. Ahang bel, ama'n thaang apan ka khete suaktasak ding hiven. 16 Kei lam hong nga inla, hon hehpih siam in. Khattanga om a, gimthuaka om hi'ng. 17 Ka lungkham buainate pung a, ka mangbat lungzinna apan hon lakhia in aw. 18 Ka thuakna leh ka gimna en inla, ka khelhnate khempeuh lamang in. 19 Ka galte tam dan en inla, kei hon mudahte' hiamgam dan en in. 20 Ka hinna kem inla, hon humbit in aw. Hon zahlaksak ken, nang hon muang hi'ng. 21 Nang lamena hon ngak ka hih manin, diktatna leh muanhuaina in hon humbit hen. 22 Pathian aw, Israel a lungzinna khempeuh apan tankhia in.
Humbitna leh Tatna Ngetna
David' Phatnala. 1 Tangtawn Toupa aw, genbaanglou-a nungta ka hih manin, nang ka tungthu khen in. lungtang vuang loua Tangtawn Toupa muang hi'ng. 2 Tangtawn Toupa aw, nang hon entel inla, hon chian in. Ka lungtang leh ka lungsim nang entel in. 3 Ka maia na itna om gige ahih manin, na thutak zuia nungta gige ding hi'ng. 4 Zuautheite tawh tukhawm lou a, lepchiahte tawh zong kithuah lou hi'ng. 5 Thil gilou hihte' kikhopna hua ing a, mi diktatlou tawh tukhawm lou ding hi'ng. 6 Tangtawn Toupa aw, mawhna nei lou a, ka khut sil ding ing a, na maitam kimkota pai ding ing a, 7 ngaihtaka nang hon phat ding ing a, na nasep lamdangte gen ding hi'ng. 8 Tangtawn Toupa aw, na teenna inn, na thupina omna it hi'ng. 9 Mikhialte tawh ka hinna lakhawm kenla, sisan suahte tawh ka hinna lakhawm ken. 10 Amaute' khuta thil gilou sawmna om a, amaute' khut taklam golhna tawh kidim hi. 11 Kei zaw genbaang loua nungta hi'ng a, hon tan inla, ka tung ah zahngai in. 12 Ka khete mun lema ding hi a, kikhawmte laka Tangtawn Toupa phat ding hi'ng.
Upna Genkhiakna
David' Phatnala. 1 Tangtawn Toupa ka meivak leh ka hotdamna hi a, kua lau ding ka hia? Tangtawn Toupa ka hinna kulhpi hi a, kua lau ding ka hia? 2 Migiloute'n ka sa ne dinga hon naih chiang ua, ka melmate leh ka galte'n hon suai chiang ua, kipal uh a, kipuk uhi. 3 Hon dou ding meima tampi'n giahphual sat mah leh, ka lungtang lau lou ding hi. Ka tung ah kidouna hong tung mah leh, kimuang lai ding hi'ng. 4 Tangtawn Toupa apan thil khat lunggulh hi'ng. Tua mah zong gige ding hi'ng. Toupa' kilawmna enen ding leh, a tempul sunga amah zong dingin, ka damsung teng Tangtawn Toupa' inn ah teeng leng chi hi'ng. 5 Ahang bel, hun haksa-a ama'n humbitna puanbuk sunga bita hon kern ding a, a teenna mun simthama hon sel ding a, suangpi tunga hon tuangtousak ding hiven. 6 Tua hun chianga, ama'n ka meima kei hon kimkotte tunga ka lutang domsang ding a, ke'n a biakbuk sunga lungnopna kikouna aw tawh kithoihna laan ding ing a, ging kilawm tawh Tangtawn Toupa phatla sa teitei ding hi'ng. 7 Tangtawn Toupa aw, nang kon sap chiangin ka aw za inla, ka tunga hehpih siamin hon dawng in. 8 Ka lungtang in nang tawh kisaia: A maitang zong in, hon chi a, Tangtawn Toupa aw, na maitang hon zong ding hi'ng. 9 Kei apan na maitang seel kenla, hehin na sila hon hawlkhe ken, kei hon huhpa na hi. Pathian ka Hondampa aw, hon nial kenla, hon nuse ken. 10 Ka nu leh ka pa'n hon taisan mah leh, Tangtawn Toupa'n kei hon huai ding hi. 11 Tangtawn Toupa aw, kei hon en gegute hangin na lampi hon sinsak inla, lampi tang ah hon pii in. 12 Ka galte' deih bangin a khut uah hon pekhe ken. Theihpih takloute'n hon hek a, khutlum zat ding gen uhi. 13 Mihing gam ah Tangtawn Toupa' hoihna mu lailai ding hi'ng, chih um kei leng, bahta ding hi'ng. 14 Tangtawn Toupa ngak in. Thahat leh hangsan suah in! Ahi, Tangtawn Toupa ngak in!
Thumna Dawnna
1 Tangtawn Toupa, ka Suangpi aw, nang hon sam hi'ng. Hon dawng louin kamsim ken. Na daih dide leh, hankhuka paisukte bang hi ding hi'ng. 2 Na kianga huhna ngena na Mun Siangthoupen lama ka khut ka zak laiin, zahngaihna ka ngetna aw za in. 3 Migiloute leh thil thulimlou hihte tawh hon lamangkhawm ken. Kamdamin a innvengte uh houpih mah le uh, a lungtang uah gilou thilte keem uhi. 4 A thilhihte uleh, a gamtat giloute uh nangma'n thuk in. A khut nasepte uh thuk inla, amaute tawh kikhom bangbangin thuk in. 5 Amaute'n Tangtawn Toupa' thilhihte leh, a khut nasep dante zahtak lou ahih manun, ama'n amaute phelgawp ding a, lamkik nawn lou ding hi. 6 Tangtawn Toupa'n ka ngetna a zak manin, amah phatin omhen! 7 Tangtawn Toupa ka thahatna leh ka lum ahi. Ka lungtang in amah muang a, panpihna muta hi'ng. Ka lungtang nakpitakin nuam a, ka la-a amah phat ding hi'ng. 8 Tangtawn Toupa zaw a mite adinga thahatna hi a, a thaunilhpa adinga hutkhiakna Kulhpi hi ahi. 9 Na mite hondam inla, na goutan vualzawl in. Belamchingpa bangin amaute keem inla, Tangtawnin amaute angpomin pua in.
A Siangthouna banga Phatna
David' Phatnala. 1 Mihat vanglian noute aw, Tangtawn Toupa a hihna bangbang pia un. Ahi, a min tawh kikhomin thupina leh thahatna Tangtawn Toupa pia un. 2 Tangtawn Toupa' kiang ah, a min tawh kikhom thupina pia un. A siangthouna kilawmna tawh kilawmin Tangtawn Toupa bia un. 3 Tangtawn Toupa' aw tuite tung ah om a, thupina Pathian in vanpi ging bangin aw suah a, tui tampite tunga Tangtawn Toupa'n aw suah hi. 4 Tangtawn Toupa' aw vanglian a, Tangtawn Toupa' aw thupi mahmah hi. 5 Tangtawn Toupa' aw in sidar singkungte hihtan a, Ahi, Tangtawn Toupa'n Lebanon sidar singkungte hihzaan hi. 6 Ama'n Lebanon bawngnou bangin diangsak a, Sirion zong gam bawngtal bangin tawmsak hi. 7 Tangtawn Toupa' aw in khawphia bangin sun a, 8 Tangtawn Toupa' aw in gamdai-gamkeu kungsin hi. 9 Tangtawn Toupa'n Kadesh gamdai-gamkeu kungsin hi. 10 Tangtawn Toupa tuichiimpi tung ah a kumpitutphah tung ah tu a, ahi, Tangtawn Toupa, kumpipain tuden ding hi. 11 Tangtawn Toupa'n a mite thahatna pe ding a, Tangtawn Toupa'n a mite galmuannain vualzawl ding hi.
David' Phatnala: Tempul latna La. 1 Tangtawn Toupa aw, thuukpi apan hon kaikhia chin a, ka melmate ka tunga a kisial ding phallou chin a, nakpitaka hon pahtawi ding hi'ng. 2 Tangtawn Toupa ka Pathian aw, panpihna hon ngen ing a, nang hon damsakta na hi. 3 Tangtawn Toupa aw, misikhua apan ka hinna lakhia chin a, kawkhuk lutsuk lou ding a, hon hingsak kiik na hi. 4 Nou a misiangthoute aw, Tangtawn Toupa phat la sa un. A siangthouna thei gige dingin kipahthu gen un. 5 Ahang bel, ama' hehna in tomchik lei daih a, ama'n hon saan kiik chianga hinna om hi. Kah sung zan khat lei hi a, zingsanga lungnopna kikou om hi. 6 Bita ka kitheih chianga: Bangmah in hon liingsak ngei ken teh, chi hi'ng. 7 Tangtawn Toupa aw, nang non deihsak chianga, ka mual dingkipsak chin a, na maitang na seel chianga bel lungdong mahmah hi'ng. 8 Tangtawn Toupa aw, nang hon sam hi'ng. Tangtawn Toupa kianga zahngaihna hon ngen hi'ng. 9 Ka sisan luang bang phatuama, hankhuk ka lutsuk bang phatuam ding ahia? Leivui in nang hon phat dia hia? Na thutak phuang ding hia? chi hi'ng. 10 Tangtawn Toupa aw, hon za inla, ka tung ah zahngai in. Tangtawn Toupa aw, kei hon panpihpa hi in. 11 Nang ka kahna laamna suaksak chin a, ka saiip puan hon suahsak a, lungnopna hon silhsak na hi. 12 Tua mah ka thupina in nang phata la a sak nading, ka kamsimlouh nading hi ahi. Tangtawn Toupa ka Pathian aw, na tunga kipahthu gen tawntung ding hi'ng.
Tangtawn Toupa' Kulpi
Lapulian ading. David' Phatnala. 1 Tangtawn Toupa aw, nanga buta hi'ng. maizumin hon omsak ngei ken. Na diktatnain hon hukhia in. 2 Na bil hon dawh inla, kei hon humbit dingin kintakin hong pai in. Ka bukna Suangpi hi inla, hon hondam ding ka kihutna Kulhpi muanhuai hi in. 3 Nang ka Suangpi leh ka Kulhpi na hih manin, na min vaangin hon pii-in, hon makaih in. 4 Nang ka bukna na hih manin, ka maia thaang kikam apan hon suaktasak in. 5 Na khutsunga ka kha hon kemsak hi'ng. Tangtawn Toupa, thutak Pathian aw, hon tankhia in. 6 Ke'n a mannabei milim lenlente mudah ing a, Tangtawn Toupa nang hon muang hi'ng. 7 Na itna-a kipak ding ing a, nuam ding hi'ng. Ahang bel, nang ka gimthuakna muta chin a, ka hinna mangbat lungzinna theita na hi. 8 Melma' khutsunga hon pekhe lou chin a, ka khete mun zapi-a dingsak zaw na hi. 9 Tangtawn Toupa aw, ka tung ah zahngai in, ka lung dong hi. Lungkhamna hanga ka mitte khamta a, ka hinna leh ka pumpi bahta hi. 10 Lungkham mangbatna in ka hinna negai a, mauna in ka damsung nite negaita hi. Ka gimthuakna hanga ka thahatna bah a, ka guhte zawngkhalta hi. 11 Ka melmate khempeuh laka zahlaka om ing a, ka innvengte' simmawh suak ing a, ka meltheihte adinga muhthadahhuai hita ing a, kongzinga hon mute kei apan kihem uhi. 12 A sikhinsa mah banga amaute' mangngilh hita ing a, leibeel kitam bang hita hi'ng. 13 Ahang bel, mi tampite' gensiatna za ing a, ka kimkota mulkimna om hi. Ka hinna la dinga hon sawmsawm uhi. 14 Ahihhanga Tangtawn Toupa aw, nang hon muang hi'ng. Nang ka Pathian na hi, hon chi hi'ng. 15 Ka hunte nang' khutsunga om hi a, ka melmate apan hon humbit inla, kei hon deihte apan hon humbit in. 16 Na sila tung ah na meivak taangsak inla, na itna muanhuaina-in hon hondam in. 17 Tangtawn Toupa aw, hon zahlaksak ken, na kianga toukou hi'ng. Mi diktatloute zahlak uh henla, hankhuk sung ah dai didein om zaw uhen. 18 A zuaugenna mukte uh chihsakin om hen. Kisaktheih leh simmawhhat thuah a, midiktatte doua kisatheitaka thu gengen uhi. 19 Na hoihna lian hina maizen e, nang hon laute adinga kholkhawm chin a, mihingte mitmuh a, nanga bute tunga na piak sek hi-a maw! 20 Nang na omna muna amaute busak a, mihingte' thil simsawmte apan amaute seel chin a, ngawhhat leite apan amaute na teenna muna seel na hi. 21 Khawpi doua kiumchip sunga ka om laia, a itna lamdang hon muhsak manin, Tangtawn Toupa phatin om hen. 22 Patau a: Na mitmuh apan satkhiak hita hi'ng, chi ing a, ahihhanga huhna ngena kon sap laia zahngaihna ngena ka kikou za na hi. 23 A misiangthoute khempeuh in Tangtawn Toupa it un! Tangtawn Toupa'n a muanhuaite kembit a, kisatheite bel a kim sipsipa dinkiik hi. 24 Tangtawn Toupa lamen noute khempeuh, hattakin om unla, kihansuah un.
Ngaihdamna Kipahna
David' Lapi, Maskil. 1 A tatlekna ngaihdama om a, a khelhnate khuhsaka om mi mi nunnuam hi ahi. 2 Tangtawn Toupa'n a khelhna ama' tunga a kibaansak louh, a lungsima zekhemna omlou mi mi nunnuam hi ahi. 3 Ka daih dide laia, sun nitumtuma ka mauna-a ka guhte teemgawpta hi. 4 Ahang bel, sun leh zana ka tunga na khut gik a, ka thahatna zong nipi khawluma tuikang banga tawpkanga om hiven.
Sela
5 Tua khita ka khelhna ahi bangbanga gen ing a, ka tatsiatna iim lou hi'ng. Ka tatleknate Tangtawn Toupa' mai ah phuang ni'ng, chi inga, tuachi-a nang ka khelh mawhna hon ngaidamta na hi.
Sela
6 Tua bang ahih manin, Pathian limsak mi peuhmah, muh theiha na om sungin na kiang ah thum hen. Tui hatte hong khan chianga amah banpha hetlou ding hi. 7 Nang ka bukna mun hi chin a, lungkham buaina apan hon hum dinga hutkhiakna late-a hon umsuak ding na hi.
Sela
8 Na pai nading lampi-a hon chiil ding ing a, hon sinsak ding hi'ng. Hon thuhilh ding ing a, hon ching ding hi'ng. 9 Theihsiamnabei sakol hiam, sabiltung hiam bangin om ken. Amaute zaw kamkaihna leh sikbah-a thunun kul hi. Tua loua hon naih lou ding uh hiven. 10 Mi diktatloute' tunggikna tam a, ahihhanga Tangtawn Toupa' itna muanhuai a, amah muang mi umsuak hi. 11 Nou a diktatte aw, Tangtawn Toupa ah nuamin kipak unla, nou lungtang tangte khempeuh aw, la sa un.
Thilbangkim Siampa
1 Midiktat noute aw, Tangtawn Toupa tung ah nuamin la sa un. Mitangte apan phatna kilawm hi. 2 Kaihging tawh Tangtawn Toupa phat unla, pekging gui sawm neiin amah phat un. 3 Ama' mai ah la thak sa unla, siamtakin tum unla, nuamin kikou un. 4 Ahang bel, Tangtawn Toupa' thu dika tang a, a thilhih khempeuha muanhuai hiven. 5 Tangtawn Toupa'n diktatna leh dika thukhenna it a, a itna muanhuaia leitung kidim hiven. 6 Tangtawn Toupa' thu-a vaante kibawl a, a kama hu-a vana aksi honpite kibawl hi. 7 Ama'n beelte sunga tuipite koihkhawm a, koihkhawmna inn ahte tuipi koih hi. 8 Leitung bup in Tangtawn Toupa lau henla, leitung mi khempeuh in amah zahtak hen. 9 Ahang bel, ama'n thu gen a, thil hong om a, ama'n thu pia a, tua thupiak dingkip hiven. 10 Tangtawn Toupa'n namte' thilgelkholhna vuaksuaksak a, mite' thil sawmte daal hi. 11 Ahihhanga Tangtawn Toupa' thilgelkholhte bel kipden hi. Lungtang' thil sawmte zong a khang a khang donga kipden hi. 12 Tangtawn Toupa a Pathian-a nei nam, nam nunnuam hi a, ama'n a goutan dinga a tel nam, nam nunnuam hi ahi. 13 Tangtawn Toupa'n vantung apan ensuk a, mihingte khempeuh mu hi. 14 Ama'n a teenna mun apana leitunga teengte khempeuh en gige hi. 15 Ama'n amaute khempeuh' lungtangte bawl a, a thilhih khempeuh uh thei a, entel hi. 16 Kumpipa kuamah a sepaih tam thu-a hutkhiak hi lou a, galhaat mi zong ama' thatang haat thu-a humbit hi sam lou hi. 17 Kihutkhiak nadinga sakol muan a mawkna hi a, a haat mahmah hanga hondam thei hilou hi. 18 Tangtawn Toupa' mit bel, amah laute tunga tu a, a itna muanhuai lamente tunga tu a, 19 a hinna uh sihna apan hondam ding leh, kial kiak laia huhing dinga tu gige hi. 20 Tangtawn Toupa lamentaka ngak ung a, amah koute adinga huhna leh lum hi ahi. 21 Ama' min siangthou ka muan man ua, ka lungtang uh amaha nuam ding hi. 22 Tangtawn Toupa aw, nangmah-a lametna ka ngak bangbangun a itna muanhuai koute tung ah om hen.
Pathian Muangte' Nunnopna
David' Phatnala. Abimelek' maia Kihaisaka, Ama'n a hawlkhiaka, a Paikhiak laia. 1 Chiklai peuha Tangtawn Toupa pahtawi ding ing a, amah phatna ka kama pawt gige ding hi. 2 Ka hinna in Tangtawn Toupa suang ding hi. Gimthuakte'n za ding uh a, nuam ding uhi. 3 Tangtawn Toupa hon pahtawipih un, a min pahtawikhawm ni. 4 Tangtawn Toupa zong ing a, ama'n hon dawngta hi. Ama'n ka launa khempeuh apan hon humbit hi. 5 Amah lamente' mai taang a, a maitang ua maizumna om ngeilou hi. 6 Hiai mizawng in sam a, Tangtawn Toupa'n zata hi. A lungkhamnate khempeuh apan hondam hi. 7 Amah lau mite' kimkota Tangtawn Toupa' Vansawltak in giahphual saat a, amaute hukhia hi. 8 Tangtawn Toupa' hoihna chiam unla, thei him dih ua. Amaha bu mi, mi nunnuam hi ahi. 9 Nou a misiangthoute aw, Tangtawn Toupa lau un, amah laute'n bangmah tasam lou hi. 10 Humpinelkaite zawngkhala gilkial thei uhi. Tangtawn Toupa zongte'n bel thilhoih bangmah tasam lou uhi. 11 Ka tate aw, hong pai unla, ka thu ngai un. Tangtawn Toupa lau dan hon sinsak ding hi'ng. 12 Na lak ua hinna it a, damsung ni hoih tampi muh lunggulh peuhmah in 13 gilou apan a lei veng henla, zuau gen lou dingin a muk veng hen. 14 Thil hoihlou kiheisan henla, thilhoih hih hen. Kilemna zong henla, a delhin delh hen. 15 Tangtawn Toupa' mit zaw midiktatte tung ah tu a, a thuumna uh bil dawh hi. 16 Thil hoihlou hihte tunga Tangtawn Toupa' mai gum a, amaute theih gigena leitung apan lamang ding hi. 17 Mi diktatte kikoukhia uh a, Tangtawn Toupa'n za a, a lungkhamna khempeuh uapan, amaute humbit hi. 18 Lungtang tamkhamte kianga Tangtawn Toupa nai a, lungsima nehtapte hondam hi. 19 Mi diktat in lungkhamna tam nei a, ahihhanga Tangtawn Toupa'n tuate khempeuh apan humbit a, 20 a guhte khempeuh humbit a, a laka khat leltak zong kitan lou hi. 21 Thil hoihlou in mi diktatloute that ding a, mi diktat mudahte mawhpaih hi ding uhi. 22 Tangtawn Toupa'n a silate hinna tan a, amah beel kuamah mawhpaiha om lou ding hi.
Phulapa Tangtawn Toupa
David' Phatnala. 1 Tangtawn Toupa aw, kei hon doute nang dou inla, kei hon sualte nang suai in. 2 Lum lian leh lum neu la inla, kisa inla, kei hong huh in. 3 Kei hon deihte douin teipi leh chiangzum lek in. Ka hinna kiang ah: Na hotdamna kei hi'ng, chi in. 4 Ka hinna laak sawmte zahlakin maizum uh henla, ka siat nading zongte lungkiain lehkik uhen. 5 Tangtawn Toupa' Vansawltak in amaute hawlmang henla, huihmut buhsi bang uhen. 6 Tangtawn Toupa' Vansawltak in amaute delh henla, a lampi uh mialin naal hen. 7 Asan ahang beipi-a lenthang hon siah manun leh, asan ahang beipi-a kei adinga gum a khuak manun, 8 a theihkholh louh-un siatna in amaute pha guih henla, lenthang hon siah uah awk uh henla, a siat nadingun tua gum ah kia uhen. 9 Tuachiangin, Tangtawn Toupa ah ka hinna nuam ding a, a hotdamna ah kipak ding hi. 10 Ka guhte khempeuh in: Tangtawn Toupa aw, nang bang mahmah kua om ahia? Amau adia hatluate apan mizawngte humbit chin a, amau lok pahpahte apan mizawngte leh tasamte humbit na hi, chi ding hi. 11 Dop neilou theihpih mite hong pai uh a, ka theih louh thilte hon teldot dot uhi. 12 Hoihna hoihlou-a hon thuk uh a, ka hinna khava-a nusia uhi. 13 Hinapi-a a chinat chiang ua ke'n saiippuan silh ing a, an ngawla kiniamkhiak zel hi'ng. Ka thumnate dawnlouha hong kilehkik chianga, 14 ka lawm hiam, ka sanggam hiam suun banga dah ing a, ka nu suuna kap banga kuunkuun sek hi'ng. 15 Ahihhanga kei ka kipalpaih chianga, kipaka kikhawm uh a, ka phawk louh kala kei hon doute kikhawm uh a, tawp lou-a hon gensia sia uhi. 16 Pathian limsakloute bang uh a, siattut nuama hon engbawl uh a, hon halitkhum khum uhi. 17 Tangtawn Toupa aw, bangtan hon en maimah ding na hia? Hon hihsiatna uapan ka hinna hukhia inla, hiai humpinelkaite apan ka hinna manpha hukhia in. 18 Hi leh, kikhawmpi thupi laka kipahthu hon hilh ding ing a, mipi tampite laka nang hon phat ding hi'ng. 19 Asan ahang beipi-a ka meima hite ka tung ah kisial kei uh henla, asan ahang beipi-a kei hon mudahte'n hon mitsikat kei uhen. 20 Lemna thu lah gen ngei lou uh a, gamsunga galmuanga om hiathiatte, a dikloupi-a ngawh nading zong zong uhi. 21 Kei hon ensaal uh a: Awi hang e, awi hang! I mittang mahmahin muta hang! kichi uhi. 22 Tangtawn Toupa aw, hiai muta na hih chiangin, kamsim maimai ken. Toupa aw, hon gamlat mahmah ken. 23 Khanglou inla, kei hu dingin kisa in. Ka Pathian leh ka Toupa aw, kei hon gum in. 24 Tangtawn Toupa ka Pathian aw, na diktatnain ka dikna gen inla, ka tung ah amaute kisatheisak ken. 25 Awi hang e, i deih bangbang! chi ding hiam, ahih kei leh, Amah i nawmvalhta ve! chi ding hiamin amaute phal het ken. 26 Ka mangbatna kisaktheihkhumte khempeuh zahlaksak leh buaigawpsakin om le uh aw! Ka tunga kiliansakte khempeuh in maizumna leh zahlakna silh le uh aw! 27 Ka diktatna kipahpihte bel, nuam leh kipakin kikou uhenla: A silapa' hamphatna leh hoihna kipahpih Tangtawn Toupa pahtawiin om hen, chi gige le uh aw! 28 Hi leh ka lei in na diktatna thu gen ding a, suun nitum tuma nang phatna thu gengen ding hi.
Pathian Hoihna
Lapulian ading. Tangtawn Toupa' Sila David' Phatnala. 1 Mi diktatlou' tatlekna tawh kisai Pathian thu ka lungsung ah oma: A mit ah Pathian launa himhim omlou hi. 2 Ahang bel, a khelhna mukhe ding leh a khelhna haw dinga amah kiphat lua hiven. 3 A kama thute gilou a, khemhat hi a, pilna leh thil hoih hih tawpsanta hi. 4 A lupna tung nangawna gitlouh ding dan geelgeel a, khelhna lam zui dinga kipia a, a gilou kih lou hi. 5 Tangtawn Toupa aw, na itna in vaante sun a, na muanhuaina in zong meipi sun hi. 6 Na diktatna mual lianpipi bang hi a, dika vaihawmna tuipi thuk hi ahi. Tangtawn Toupa aw, nang mihing leh gamsa hingdama kern tuaktuak na hi. 7 Pathian aw, na itna muanhuai manpha hi nah e! Mihingte a niam a sang in na khazak lim nuai ah bukna mu hi. 8 Amaute'n na innsunga na hauhna ne-in dawn uh a, nang na kipahna luituite amaute dawnsak na hi. 9 Ahang bel, hinna tuikhuk nang kianga om a, na vaak taang apan vaak mu hive ung. 10 Nang hon theite na itna pe lailai inla, lungtang tangte na diktatna pe lailai in. 11 Kisatheite' khe kei dou dingin kalsuan kei uh henla, mi diktatloute' khut in kei hon hawlmang kei hen. 12 En dih, thil gilou hihte puuk uh a, sawnpaih hi uh a, thou thei lou uhi.
Diktatte leh Giloute
David' Phatnala. 1 Migiloute hangin kilungkhamsak ken la, gitlouh thil hihte zong eeng ken. 2 Ahang bel, amaute loupa banga vatpaih hi pah ding uh a, louhingte banga vuai pah ding uh hiven. 3 Tangtawn Toupa muang inla, thilhoih hih inla, gamsung ah teeng inla, a gahte ne in. 4 Tangtawn Toupa ah nuam lechin, ama'n na lungtang' lunggulhte hon peding hi. 5 Na lampi ding Tangtawn Toupa' khut ah nga inla, amah muang lechin, ama'n hih vek ding hi. 6 Ama'n na diktatna zing phalvak banga taangsak ding a, nang adinga dik suun nisa banga taangsak ding hi. 7 Tangtawn Toupa ah tawlnga inla, amah ngak nilouh in. A gamtatna ua lawhchingte hangin kilungkhamsak kenla, thilgilou a sawm uh a lawhchin chiangun, kilungkhamsak ken. 8 Heh kidek inla, thangpaihna taisan in. Na lung sousak ken, thil hoihlou tun naak ahi. 9 Ahang bel, migiloute satkhiak hi ding a, Tangtawn Toupa-a lametna ngate'n gam luah ding uh hiven. 10 Sawtlou kala migiloute om nawn lou ding a, amaute na zonzon hanga mu lou ding na hi. 11 Mi lungnemte'n bel gam luah ding uh a, lungmuanna thupitak tang ding uhi. 12 Mi diktatloute'n mi diktatte sawm uh a, a ha uh gawikhum uhi. 13 Ahihhanga amaute' ni hong tung ding, chih a theih mana Tangtawn Toupa'n migiloute nuihsan hi. 14 Gentheite leh tasamte phuk ding leh, gamtat tangte that ding a, mi diktatloute'n namsau phawi uh a, thalphel lai uhi. 15 Ahihhanga a namsaute un amau' lungtangte dawt pailet ding a, a thalphelte uh kitan ding hi. 16 Mi diktatte' tawmchik neih, mi diktatloute' hauhna tampi sanga hoih zaw hi. 17 Ahang bel, mi diktatloute' baan kitan ding a, mi diktatte bel Tangtawn Toupa'n dom ding hiven. 18 Tangtawn Toupa'n genbaangloute thei a, a goutante uh Tangtawna omden ding hi. 19 Tuahsiat hunte-a zahlak lou ding uh a, kial laia zong vah ding uhi. 20 Mi diktatloute bel mangthang ding uh a, Tangtawn Toupa' melmate zong gamlak paak kilawm banga mangthang pah ding uh a, meikhu banga lengmang ding uhi. 21 Mi diktatloute'n leitawi uh a, dinkiik lou uhi. Ahihhanga, mi diktatte'n bel phaltaka pia uhi. 22 Tangtawn Toupa' vualzawlte'n gam luah ding uh a, a hamsiatte bel satkhiaka om ding uhi. 23 Tangtawn Toupa'n mi a gamtatna a kipahpih leh, a kalsuante kipsak hi. 24 Amah kisui mah leh, puk lou ding hi. Ahang bel, Tangtawn Toupa'n a khuta amah dom ding hiven. 25 Naupang na hi ngeita ing a, tu-a teekta hi'ng. Ahihhanga mi diktatte taisana om mu ngeilou hi'ng. A tate uh zong khutdawh-a vaak mu ngeilou hi'ng. 26 Amaute thilphal gige uh a, leitawisak gige uhi. A tate uh zong mi nunnuam hi uhi. 27 Gilou kiheisan inla, thil hoih hih in. Hi leh, gam luah a, teeng tawntung ding na hi. 28 Ahang bel, Tangtawn Toupa'n mi diktatte it a, a mi muanhuaite taisan ngeilou ding hiven. Amaute Tangtawna humbita om ding uh a, mi diktatloute' suante bel matkhiaka om ding uhi. 29 Mi diktatte'n gam luah ding uh a, a sunga tengden ding uhi. 30 Mi diktat' kam in pilna thu gen a, a lei in a dik a tang gen hi. 31 A lungsung ah a Pathian' dan om a, a khete taai lou hi. 32 Mi diktatloute'n mi diktatte buk uh a, a hinna mahmah uh laksak sawm uhi. 33 Ahihhanga, Tangtawn Toupa'n amaute' khut sunga mi diktate nuse lou ding a, thukhenna maia mawhpaih dinga phal lou ding hi. 34 Tangtawn Toupa ngak inla, a lampi tawn in. Ama'n gam luah dinga hon pahtawi ding a, mi diktatloute satkhiak ahih chianga mu ding na hi. 35 Mi diktatlou, dop neilou mi khat mu ing a, amah lei hoiha pou singkung banga pha a, 36 Ahihhanga mang pah a, kimu nawn lou hi. Ka zonzon hanga muh=a om lou hi. 37 Genbaangloute ngaihtuah dih, mitangte en dih, lemna deih mi in maban limchi nei hi. 38 Ahihhanga talekte khempeuh hihmanthat hi ding uh a, mi diktatloute' tawpna ding zaw manthatna hi ahi. 39 Mi diktatte' hotdamna Tangtawn Toupa apan hong tung hi a, a lungkham lai ua a kulhpi uh amah hi ahi. 40 Tangtawn Toupa'n amaute huh a, hukhia hi. Amah a belh man ua, ama'n Mi diktatloute apan amaute hukhia a, hondam hi.
Taihilh Laia Thuumna
David' Phatnala. Ngetna. 1 Tangtawn Toupa aw, hehin hon taai kenla, thangpaiin hon sawi ken. 2 Ahang bel, na thalte'n hon kaap pailet a, ka tunga na khut tu bukbuk hiven. 3 Na thangpaihna hanga ka pumpi-a chidamna omta lou a, ka khelhna hanga ka guhte'n damlai nei lou hi. 4 Ka mawhna in hon khuh a, ka puak zawhlouh vangik bang hi. 5 Ka khelh mawhna hanga ka liammate uih a, kihhuai hi. 6 Lungzinga kun kheukheu ing a, sun nitum tuma thuum hithit hi'ng. 7 Ka nungzang na mahmah a, ka pumpi-a chidamna mun himhim omlou hi. 8 Zawngkhala gim lua ing a, ka lungtang lungkhamna hanga maumau hi'ng. 9 Tangtawn Toupa aw, ka lunggulh khempeuh na theihlouh hi lou a, ka khawisatna na zak louh hi lou hi. 10 Ka lungtang phu dudut a, ka thahatna bahta a, ka mit nangawn mialgawpta hi. 11 Ka dahnate hanga ka lawmte leh ka kikholhpihte'n hon peel uh a, ka innvengte'n hon gamlat uhi. 12 Ka hinna lak sawma hon thaangsiah uh a, hon suksiat sawmte'n ka siat nading kikum kum uhi. 13 Nangong khawzalou mah bang ing a, pau theilou, thu gen thei lou mah bang hi'ng. 14 Khawzalou mi bang hong hita ing a, kama dawng theilou bang hong hita hi'ng. 15 Tangtawn Toupa aw, nang hon ngak ing a, Tangtawn Toupa ka Pathian aw, nang hon dawng ding na hi. 16 Ke'n: Hon dawng in, ka tunga ki-uangsak kha ding uh a, kiliansak kha ding uhi, chi hi'ng. 17 Kei puk dekdek ing a, ka lunggimna in hon zui gige hi. 18 Ka mawhna phuang ing a, ka khelhna in hon lungkhamsak hi. 19 Ka melmate, thaittaka kipeite tam a, a san a hang beia hon mudahte tam hi. 20 Ka hoihna giloua hon thukte'n a hoih lam ka deih chianga hon gensia uhi. 21 Tangtawn Toupa aw, hon paisan kenla, Pathian aw, hon gamlat mahmah ken. 22 Tangtawn Toupa, ka Hondampa aw, kei hon huh dingin hon delh meng in.
Pilna leh Ngaihdamna Ngetna
Lapulian ading. Jeduthun ading. David' Phatnala. 1 Ka gamtatnate-a kiveng ding ing a, khial lou dinga ka lei veng ding hi'ng. Mi diktatloute ka kianga om laiteng, ka kam chih ding hi'ng, chi hi'ng. 2 Ahihhanga dai dide a, pau lou a, a hoih nangawn gen loua ka om chianga, ka lunggimna kibehlap semsem hi. 3 Ka sunga ka lungtang sa vutvut a, ka kingaihtuah chianga, mei kuang hi. Tua chianga ka leia thu gen kha zel ing a: 4 Tangtawn Toupa aw, ka hinna tawpna leh ka damsung tan ding hon lak inla, ka hinna bei kin dan hon theisak in. 5 Ka damsung khutpek tan tela bawl chin a, ka kumte nang ngaiha bangtan mah hilou hi. Mihing' hinna khatvei naksuk bang lei hi ahi.
Sela
6 Mihing zaw vialtai mah leh, kineih bang lei hi a, kisalaha buai na inchin a mawkna lei hi ahi. Hauhnate khol na inchin, kua'n tang ding chih thei lou hi. 7 Ahihhanga Tangtawn Toupa, tu'n ke'n bang zong ka hiam? Ka lametna nanga om hi. 8 Ka tatleknate khempeuh apan hon humbit in. Mihaite' simmawh hon suaksak ken. 9 Dai dide ing a, ka kam ka lou hi'ng. Ahang bel, hiai hihpa nang hi vechin. 10 Non satna kei apan lakhia in, na khutkhaak thuak gim lua hi'ng. 11 Mihingte a khelhna uh hanga taihilha thunun chin a, a hauhnate uh nget nek banga negai na hi. Michih, naka hu bang lei hi uhi.
Sela
12 Tangtawn Toupa aw, ka thumna za in, huhna ngena ka kikou ngai in. Ka kahna za lou dingin na bil ngongsak ken. Ka pu ka pate banga, na kianga mikhual leh gamdang mi banga teeng hi'ng. 13 Ka paikhiak a, ka om nawn louh ma-a, ka lungnop nawn nadingin, hon en gegu louin hon hawi in, chi hi'ng.
Upna Muanhuai
Lapulian ading. David' Phatnala. 1 Ke'n ngakzoutaka Tangtawn Toupa ngak ing a, amah kei lama hong kihei a, ka kahna aw za hi. 2 Ama'n manthatna kawkhuk apan leh, buannawi lak apan kei hon kaikhia a, ka khe suangpi tunga nga a, din nading munkip hon pia hi. 3 Ka kam ah la thak hon guan a, ka Pathian phatna la hon pia hi. Mi tampi in tua mu ding a, lau ding uh a, Tangtawn Toupa-a muanna nga ding uhi, 4 Tangtawn Toupa a muanpa-a nei a, kisatheite muang lou a, pathian takloute lama kiheite muang lou mi, mi nunnuam hi ahi. 5 Tangtawn Toupa ka Pathian aw, thillamdang na hihte tam mahmah hi. Koute adinga thil non suangtuahsakte simseng hi lou hi. Tuate genin sut ding chi leng, genseng sut seng mahmah hi lou ding hi. 6 Kithoihna leh thillat lunggulh lou chin a, ka bilte hon vuhsakta na hi. Haltum thillatte leh khelhna thillatte ngiat lou na hi. 7 Tua khita ke'n: Kei hiah om ing. Laibu ziala ka tungthu kigelh banga hong pai hita'ng. 8 Ka Pathian aw, na deihlam hih ka lunggulh hi a, na dan ka lungsunga om hi, chi hi'ng. 9 Khawmpi thupitak laka diktatna thu tangkoupih ing a, Tangtawn Toupa aw, kamsim lou hi'ng, chih na theihsa hi. 10 Na diktatna lungsunga iim lou ing a, na muanhuaina leh hotdamna thu phuangkhe zaw hi'ng. Kikhawmpi thupitak laka na itna muanhuai leh thutak iim lou hi'ng. 11 Tangtawn Toupa aw, na zahngaihna hon it kenla, na itna leh thutak in hon humbit gige zaw hen, 12 Ahang bel, thil hoihlou simsenglouh in kei hon umchip a, ka khelhnate'n hon delhpha a, dakkhe ngam lou hi'ng. Ka luzanga samzangte sanga tamzaw a, ka sunga ka lungtang bahta hi. 13 Tangtawn Toupa aw, hon hotdam ding na lungtaina hi henla, Tangtawn Toupa aw, hon humbit dingin hon delh meng in. 14 Ka hinna lak sawmte khempeuh maizumsak leh buaigawpsakin om uhenla, ka siat ding deihte khempeuh zahlaka kiiksak hi uhen. 15 Awi hang e, awi hang! hon chite'n a maizumna uh lamdang sa uhen. 16 Ahihhangin, nang hon zongte bel nangmaha nuamin kipak uhenla, na hotdamna it peuhmahte'n: Tangtawn Toupa pahtawiin om hen, chi gige uhen. 17 Hinapi-in, kei zaw zawng leh tasam hi ing, Tangtawn Toupa'n kei hon ngaihtuah hen. Kei hon huhpa leh hukhepa nang na hi. Ka Pathian aw, hong zekai ken.
Pathian limsakte Vualzawlna
Lapulian ading. David' Phatnala. 1 Gentheite awlmawh mi mi nunnuam hi ahi. Tangtawn Toupa'n a lungzinna huna amah hukhe zel hi. 2 Tangtawn Toupa'n amah humbit ding a, a hinna hawisak ding hi. Leitunga amah vualzawl ding a, a galte' ut uta bawl dinga amah pekhe lou ding hi. 3 Amah china-a a lupna tunga Tangtawn Toupa'n kem ding a, a chinatna zong damsak ding hi. 4 Ke'n: Tangtawn Toupa aw, ka tung ah zahngai inla, ka hinna damsak in, na tunga khial hi'ng, chi hi'ng. 5 Ka melmate'n hon gensia uh a: Chik chiangin a si de aw, chik chiangin a min a mangthang de aw, hon chi uhi. 6 Mi kuapeuh in kei hong veh chianga, zuaupipi gen a, a lungtang ah gensiatna kaikhawm a, paikhia a, tuate thehzak zel hi. 7 Ka melmate khempeuh kei gensia-a kihuau uh a, kei adinga setheitawp suangtuah uh a: 8 Natsia in amah buakta, a lupna apan thoukhe nawn ken teh, hon chi uhi. 9 Ka muan mahmah, ka ankuang umpih ka lawm naipen nangawn in ka tunga a khetul liikta hi. 10 Ahihhangin, Tangtawn Toupa aw, ka tung ah zahngai inla, amaute ka thuk theih nadingin hon phong in. 11 Ka tunga lungdam na hi, chih ka theihna hiai ahi: Ka melmate ka tunga a vualzawhlouhna. 12 Nang ka diktatna ah non domkang a, na omna mun ah non koih denta hi. 13 Tangtawn Toupa, Israel Pathian, Tangtawn Tangtawn dongin phatin om hen. Amen, Amen.
Mangbat laia Pathian Ngaihna
Lapulian ading. Kora' Tapate' Lapi. Maskil 1 Sakhital luita tui duha nak hawphawp banga, Pathian aw, ka hinna nangmah ngaia nak hawphawp hi. 2 Pathian ngaia, Pathian hing ngaia ka hinna dangtak hi. Chik chianga pai a, amah tuak ding ka hi hiam? 3 Sun nitum tum a: Na Pathian koia om ahia? hon chih lai ua, ka khituite a sun a zana ka an hi mai hi. 4 Ka kingaihtuah chianga, mipite tawh kizui a, Pathian' inn lam zuana lungnopna leh phatna aw suah a, mipite tawh nopna ankuang lui lai phawk hi'ng. 5 Ka hinna aw, banghanga dah? Banghanga ka sunga lungmuang mawh? Pathian lamen in. Ka tunga a mei a taansak mana amah ka Hondampa leh ka Pathian phat lai ding hi'ng 6 Ka Pathian aw, ka sung ah ka hinna dah hi. Tua hanga Jordan gam apan Hermon mual saannate apan leh, Mizar Mual apan nang hon phawk gige ding hi'ng. 7 Na tui tuakkhia ging ah, tui thukpi in tui thukpi sam a, na tuihualte leh na tui kilokte'n kei hon khuh hi. 8 Suuna Tangtawn Toupa'n a itna muanhuai hon sawl a, zana a la in hon ompih a, tua mah hi ahi ka hinna Pathian kianga a thumna. 9 Ka Pathian ka Suangpi kianga: Banghanga hon mangngilhta na hia? Banghanga meima' nuaisiaha daha om ding ka hia? chi hi'ng. 10 Ka galte'n sun nitum tuma: Na Pathian koia om ahia? chi-a hon tot chiang ua, ka guhte'n sihna khopa na sa hi. 11 Ka hinna aw, banghanga dah? Banghanga ka sunga lungmuang mawh? Pathian lamen in, ka Hondampa leh ka Pathian phat lai ding hi'ng.
Mangbatlaia Thumna
1 Pathian aw, ka dikna langsak inla, Pathian limsaklou nam lak ah hon gum in. Migilou leh khemhatte lak ah hon hukhia in. 2 Nang ka Pathian ka Kulhpi na hi. Banghanga hon paikhia na hia? Banghanga melmate' nuaisiaha thumthum ding ka hia? 3 Na vak leh thutak taangkhesak in! Amaute'n kei hon pii uhen. Amaute'n na mual siangthou ah leh, na biakbuk ah hon tun uhen. 4 Tua hi leh, Pathian, nakpitaka ka lungnopna leh kipahna Pathian' maitama hawh ding hi'ng. Pathian, ka Pathian aw, kaihginga hon phat ding hi'ng. 5 Ka hinna aw, banghanga daha kunkun? Banghanga ka sunga lungmuang mawh? Pathian lamen in, ka Hondampa leh ka Pathian phat lai ding hi'ng.
Tatna Phawk Gigena
Lapulian ading. Kora' Tapate' Lapi. Maskil 1 Pathian aw, bilin zata ung. Tanglai ka pu ka pate uh khanga na thilhih amaute'n hon hilhta uhi. 2 Namte na khuta hawlkhia chin a, ka pu ka pate uh bel kipsak na hi. Namte thuaksak a, paikhia chin a, ka pu ka pate uh bel mavangsak na hi. 3 Amau' namsau pansana gam luah hi lou uh a, amau' banthahata kihumbit hi sam lou uhi. Nang amaute na deihsak mana na khut taklam, na banthahat leh na meel vaka na humbit hizaw uhi. 4 Pathian aw, nang ka Kumpipa na hi. Jakob adinga vualzawlna sehsakpa na hi. 5 Nangma' vanga galte nawhkik ung a, nangma' min vanga hon dou galte sikden hi ung. 6 Ke'n ka thalphel muang lou ding hi'ng. Ka namsau in zong hon hu zou lou ding hi. 7 Nangma'n ka galte uh tunga vualzawhna hon pia chin a, kou hon mudahte maizumsakta na hi. 8 Sun nitum tuma Pathian kisialpih a, na min phatden hi ung.
Sela
9 Hinapi-a tu-a hon paikhia a, hon maizumsak a, ka sepaihhonte uh makaih nawnlou na hi. 10 Melmate' maia hon nungkiksak chin a, hon mudahte'n hon lok uhi. 11 Belam banga nek dinga hon taisan chin a, namte laka hon thehzak na hi. 12 Na mite manbei phiala hon khawng chin a, ka man uh bangmah tham hi lou hi. 13 Ka veeng ka pamte uh laka hon maimawksak chin a, ka kim ka kiangte uh adinga simmawh leh nuihsan hon suaksak na hi. 14 Namte laka paunak hon suaksak chin a, mite'n lu hon sinkhum uhi. 15 Ka zahlakna ka maia sun nituma om a, ka maizumna in hon khuh hi. 16 Hon zahlaksakte leh hon simmawhte' hon totna hang hi a, phulak sawm tentan meima' hang ahi. 17 Hibang teng koute tunga tungta a, hinapi-a nang hon mangngilh lou hi ung. Na thukhun zong zuausan lou hi ung. 18 Ka lungtang uh nungkik lou a, ka khete un na lampi nuse lou hi. 19 Hinapi-a nang hon gawizana, sihalte' mun hon suaksak a, miala hon tuam na hi. 20 Koute'n ka Pathian uh ka mangngilh uleh, gamdang pathian bia-a khut ka zak uleh, 21 Pathian in phawk lou ding hia, ama'n lungtang thusimte thei hiven? 22 Hinapi-a nangma' hanga sun nitum tuma sihna maituah ung a, gawh ding belam banga sim hi ung. 23 Khanglou in, Toupa aw! Banghanga ihmu na hia? Thou in! hon paikheden ken. 24 Banghanga na mai sel na hia? Banghanga ka thuakna uleh zawhthawha ka om uh mangngilh na hia? 25 Leivui laka sawnpaih hi ung a, leivui laka lum hi ung. 26 Thou inla, hon huh in. Na itna muanhuai-in hon tan in.
Mesia leh A Mou9 Thupina
Lapulian ading. "Lili Pakte" Kaih. Kora' Tapate' La. Kitenna La. 1 La thupi mahmah tawh ka lungsung kidim a, Kumpipa tawh kisai ka la phuah gen ing a, ka lei zong lai gelh mi' laikung bang hi ahi. 2 Mihing' tapate sanga nangmah hoih tungnung chin a, na mukte hehpihnain kinuh a, Pathian in nang hon vualzawl hi. 3 A Vanglianpa aw, na namsau kuah inla, thupina leh kumpi hihna silh in. 4 Thutak leh kingaihniamna leh diktatna hanga vualzou dingin na kumpi thupina tawh kuankhia in. Na khut taklam in thilhih lamdang mulkimhuaite lak hen. 5 Na thalte kumpipate' melmate adingin hiam a, namte na khepek nuaia puk uhi. 6 Pathian aw, na kumpitutphah Tangtawn Tangtawnin omden ding a, na kumpichiang lah diktatna kumpichiang hi ding hi. 7 Nang diktatna it chin a, diktatlouhna hua na hi. Tua ahih mana, Pathian na Pathian in na lawmte khempeuh tunga hon koih a, nakpitaka lungnopna sathau hon nilh hi. 8 Na puansilhte khempeuh mura leh aloe leh nahnam gimnamtui kibuak a, kumpi' innpi apan tumgingte'n nang hon kipaksak hi. 9 Na numei zahtakhuaite laka kumpi' tanute om a, na taklama Ofir khama kizem kumpipa' mou ding hi. 10 Tanu aw, ngai in, ngaihsun inla bil dawh in. Na mite mangngilh inla, na pa' innkawte mangngilh in. 11 Tua hi leh, na kilawmna-a kumpipa lungtung ding hi. Amah bia in, amah na Toupa hi ahi. 12 Tura' Tanu in thawnpiak hon tawi ding a, mihaute'n na deihsakna zong ding uhi. 13 Kumpi' tanu zaw ama' dantan sunga thupi lua hi. Ama' puanaktual khamsik tawh kigan hi ahi. 14 Ama' puan ze tampi-a kizem a, kumpipa kianga kipii ding a, amah zui, a lawm nungak siangthoute na kianga hong kipaipih ding hi. 15 Lungnuam leh kipaka amaute kipilut ding a, kumpipa' innpi sunga lut ding uhi. 16 Na tapate'n na pate' mun luah ding uh a, amaute leitung vaihawm makaite-a bawl ding na hi. 17 Suansawn sawn donga na min theih gige hisak ding ing a, namte'n Tangtawna nang hon phat den ding uhi.
Pathian, A Mite' Bukna
Lapulian ading. Kora' Tapate' Phatnala Alamoth-a Sak La. 1 Pathian i bukna leh thahatna, mangbat laia huhpa nai gige hi ahi. 2 Tua ahih mana lau lou ding hi hang. Lei taimangin, mualte tuipi sung ah tumin, 3 tuipi tuite ging zuazua-a phulin tuihualte'n mualte liingsak mah leh lau lou ding hi hang.
Sela
4 Lui khat om a, a tuite'n Tungnungpen' teenna mun siangthou, Pathian khawpi kipaksak hi. 5 Tua khawpi sunga Pathian om a, tua khawpi puk lou ding hi. Zing phalvaka Pathian in amah huh ding hi. 6 Namte hehin kitom uh a, kumpigamte puk uhi. Ama'n a aw suah a, lei zulmang hi. 7 Tangtawn Toupa Vanglianpen in eite hon ompih a, Jakob' Pathian eite' bukna hi ahi.
Sela
8 Hong pai unla, Tangtawn Toupa' nasepte en un. Ama'n leitung a hihsiat en un. 9 Ama'n leitunga kidounate beisak a, ama'n thalphel kuaitan a, teipi tum nih suah a, lumte haltum hi. 10 Dai dide unla, Pathian ka hi, chih thei un. Namte laka pahtawia om ding hi'ng. Leitunga pahtawia om ding hi'ng. 11 Tangtawn Toupa Vanglianpen in eite hon ompih a, Jakob' Pathian eite' Kulhpi hi ahi.
Sela
Leitung Ukpa Pathian Phatna
Lapulian ading. Kora' Tapate' Phatnala. 1 Namte khempeuh aw, khut beng unla, lungnopna kikou aw tawh Pathian phat un. 2 Tangtawn Toupa Tungnungpen lauhuai a, mulkimhuai hi. 3 Amah leitung khempeuh Kumpipa hi ahi. 4 Ama'n eite ading, i gouluah ding teel a, a it Jakob' thupina hi ahi.
Sela
5 Lungnopna kikou aw laka Pathian kaltou a, pengkul gingte tawh Tangtawn Toupa kaltou hi. 6 Pathian phatin la sa unla, phatla sa un. I Kumpipa phatin la sa unla, phatla sa un. 7 Pathian, leitung khempeuh Kumpipa hi a, amah phatla sa un. 8 Pathian in namte tunga vai hawm a, Pathian, a Kumpitutphah siangthou tunga tu hi. 9 Leitung kumpipate kikhawm uh a, Abraham' Pathian' mite kikhawm uhi. Leitung kumpipate Pathian-a hi uh a, amah nakpitaka pahtawia om hi.
Ziona Pathian Thupina
La. Kora' Tapate' Phatnala. 1 Tangtawn Toupa thupi hi, i Pathian' khawpi, a mual siangthoua amah nakpitaka phat taak hi ahi. 2 Tua khawpi a saanna kilawm mahmah a, leitung buppi' lungnopna Zion hi ahi. Zion Mual zaw Zafon mualsangpente bang hi a, Kumpipa Thupi' khawpi hi ahi. 3 Tua khawpi-a innpi sunga Pathian om a, tua khawpi Kulhpi amah hi ahi, chih kimusak hi. 4 Ngai un, kumpipate kikhawm uh a, pangkhawma hong kuan uhi. 5 Tua khawpi mu uh a, lamdang sa uh a, mulkima taaikeek uhi. 6 Launa in amaute manchip a, numei nauvei banga natna in amaute manchip hi. 7 Amaute Tarshish longte banga hihmangthang chin a, suahlam huih-a hihsia na hi. 8 Eite'n i zaktak banga Tangtawn Toupa Vanglianpen' khawpi, tua i Pathian khawpi-a muta hi hang: Pathian in tua khawpi kipsak den hi, chih.
Sela
9 Pathian aw, na tempul siangthou ah, na itna muanhuai sutsut hi ung. 10 Pathian aw, na min banga nang phatna kawlmong dong tungta hi. Na khut taklam zong diktatna tawh kidim hi. 11 Na vaihawm diktat hangin Zion Mual nuam henla, Judah gam khuate kipak hen. 12 Zion khawpi sung tawnsuak unla, a kimkot ah pai unla, a innsangte sim un. 13 Khangsawn sawnte na hilh dingun a kulhtung baangdaite chiamteh unla, a innpite ngaihsun un. 14 Hiai Pathian, Tangtawna i Pathian hi a, amah i sih donga i makai hi ding hi.
Mihatte' Kimuanna
Lapulian ading. Kora' Tapate' Phatnala. 1 Namte khempeuh aw, hiai za un. Lei tunga teengte khempeuh aw, ngai unla, 2 a niam a sang, a zawng a haute'n kibangin ngai un. 3 Ka kam in pilna thu gen ding a, ka lungtang apan ka genkhiak in theihsiamna hon pe ding hi. 4 Paunak khata bil dawh ding ing a, kaihginga ka thu haksa genchian ding hi'ng. 5 Ni hoihloute hong tun chianga, banghanga lau ding ka hia? Migilou khemhatte'n hon kimkot chianga, banghanga lau ding ka hia? 6 A hauhna uh muangte hi uh a, a hauhletna uh kisaktheihpihte hi uh a, banghanga amaute lau ding ka hia? 7 Mihing kuama'n mihing dang' hinna tan thei lou a, ama' adinga Pathian kianga tatna pe thei lou hi. 8 Hinna tatna man tam lua a, tatna man piak kiching ngeilou hi. 9 Kawkhuka muatna mu lou dinga hin tawntung nading tatna kiching om lou hi. 10 Mipilte si uh chih mi khempeuh' muh theih hi ahi. Mihaite leh theihsiamnabeite zong mangthang tuaktuak uh a, a hauhnate uh midang nutsiat uhi. 11 A innte uh omden ding leh, a tenna munte uh khangsawn sawn donga om ding sa a, ngaihtuah uh a, a minte uh tama gam minte phuak uhi. 12 Ahihhanga mihing zaw hau mah leh, sawt daih lou hi. A mangthang thei gamsate bang lei hi ahi. 13 Amau kimuangte' tawpna hiai hi a, a thugente uh phasakpih a nungzuite uh tawpna zong hibang hi ahi.
Sela
14 Belam banga hankhuk tung dinga sehsa hi uh a, sihna in amaute ne ding hi. Mitangte'n zingsanga amaute tunga vaihawm ding uhi. A pumpite uh hankhuk sunga muat ding a, a innpite uapan gamlapi-a om ding uhi. 15 Kei bel Pathian in hankhuk apan ka hinna kha tan ding a, amah kianga hon la taktak ding hi.
Sela
16 Mi hong hauh chianga, a inn thupina hong let semsem chiangin lamdang sa law dah in. 17 Ahang bel, ama'n a sih chianga bangmah keng thei lou ding hi. A thupina in amah zuisuk thei lou ding hi. 18 A dam laiin nunnuam kisa mah leh na lawhchin chiangin mi'n hon phat mah leh 19 A pu a pate kiang mah tung ding hi. Tuate'n hinna khawvak mu ngei lou ding uhi. 20 Theihsiamnabei hauhna nei mi zaw a mangthang thei gamsa bang lei hi ahi.
Pathian, Thukhenpa Diktat
Asaf Phatnala. 1 A vanglian Pathian, Tangtawn Toupa'n thu gen a, ni suahna lam apan ni tumna lam donga lei sam hi. 2 Kilawmna kim Zion apan Pathian taangkhia hi. 3 Eite' Pathian hong pai ding a, dai dide lou ding hi. A mai ah meikuang in thilte kangtum a, a kimkot ah huihpi nung hi. 4 A mite tunga thu a khen theih nadinga, tunga vaante leh lei sam a: 5 Ka seh siangthoute aw, keimah tawh kala kithoihna thillat tawh thukhun bawlte aw, ka kiang ah hong kikhawm un, chi ding hi. 6 Tuachi-in, vaante'n a diktatna phuang uhen, Pathian mahmah Thukhenpa hi ahi.
Sela
7 Ama'n: Ka mite aw, ngai un, thu gen ding hi'ng. Israel aw, nang dema theihpihna thu gen ding hi'ng. Kei Pathian, na Pathian ka hi. 8 Na kithoihnate, ahih kei leh, na haltum thillatte ka maia na lat gige mana hon tai hilou ka hi. 9 Na gan inn-a bawngtala kisam hi lou hi'ng. Na belam huanga keltea zong kisam hi lou hi'ng. 10 Ahang bel, gamlak gamsate khempeuh keia hi a, mual sang tampi-a gantate keia hiven. 11 Mualte tunga vasate khempeuh thei ing a, gamlak gamsate khempeuh keia hi ahi. 12 Gilkial leng nang hon hilh lou ding hi'ng. Ahang bel, leitung keia hi a, a sunga omte khempeuh tawh keia hi ahi. 13 Bawngtalte' sa ka ne ahia? Ahih kei leh, kelte' sisan ka dawn-a hia? 14 Pathian' mai ah kipahna thillat lan unla, a Tungnungpen' mai ah na thuchiamte uh tangtun un. 15 Tua khit chiangin, na lungkham ni-in hon sam lechin, hon hukhe ding ing a, nang hon pahtawi ding na hi, chi hi. 16 Ahihhanga mi diktatloute kianga bel Pathian in: Ka dante gen dinga bang thuneihna nei na hia? Ahih kei leh, ka thukhun na kama gen dinga bang thuneihna nei na hia? 17 Ka thuhilhna hua chin a, ka thute na nunglama sia hiteh. 18 Guta na muh chianga, zui chin a, angkawmte laka kihel hiteh. 19 Na kam thil hoihlou gen nadinga zang chin a, na lei zong khem nadinga zang hiteh. 20 Na sanggamte gense tawntung chin a, na nu mahmah' tapa gensia hiteh. 21 Hiai thilte hih chin a, kei dai sipsip ing a, nang bang ding hon sa na hive. Ahihhanga hon taihilh ding ing a, na maitanga hih dik vek ding ka hi aw! 22 Hiai ngaihsun un, Pathian mangngilh noute aw, tua banga na hih kei uleh, hon humbit ding om loua, hon balzan ding ka hi aw! 23 Kipahthu genna lan mi in kei hon pahtawi hi a, Pathian' hotdamna ka lah theih nadinga lamsial hi ahi, chi hi.
Kisikna Thuumna
Lapulian ading. David' Phatnala. Bathsheba tunga a khelh a, Kamsang Nathan in a kianga Thu a gen laia. 1 Pathian aw, na itsiamna bangbangin, ka tung ah zahngai in. Na lainatna thupina bangbangin ka tatlekna nulmang in. 2 Ka mawhna apan hon silsiang vilvel inla, ka khelhna apan hon siangsak in. 3 Ahang bel, ka tatleknate kiphawk ing a, ka khelhna ka maia om gige hi. 4 Nang tung ah, nang tung kia ah ahi ka khelh. Na mitmuha thil gilou na hihta hi'ng. Tuachi-a nang thu na gen chianga dik na suah theih nading, thu na khen chianga dik na tan nading ahi. 5 Ngai dih, kei zaw mawhsa-a piang hi'ng a, ka nu'n hon paai laia khialsa hita hi'ng. 6 Ngai in, nang zaw sunglama takna deih chin a, a kimulou sunglama pilna theisak ding na hi. 7 Husawp sawlin hon hihsiang in, hi leh, siang ding hi'ng. Hon sil in, hi leh, vuk sanga ngou zaw ding hi'ng. 8 Lungnopna leh kipahna hon zasak in, hi leh, na hihtansa guhte nuama kipak ding hi. 9 Ka khelhnate apan na mai sel inla, ka tatsiatna thilhihte khempeuh nulmang in. 10 Pathian aw, ka sung ah lungtang thak siam inla, ka sung ah lungput dik siamthak in. 11 Na omna apan hon paikhe kenla, kei apan na Kha Siangthou lakhe ken. 12 Na hotdamna lungnopna hon pekik inla, lungsim thumang nuam hon guan inla, hon tungding in. 13 Tua khit chiangin, talekte kianga na lampite sinsak ding ing a, mikhialte nang lama hong kihei ding uhi. 14 Pathian, ka hotdamna Pathian aw, sisan suaha mawhna apan hon humbit in, hi leh, ka lei in na diktatna phata la sa ding hi. 15 Toupa aw, ka mukte thu gensak in, hi leh, ka kam in na phatna phuang ding hi. 16 Ahang bel, nang kithoihna thillat lunggulh lou hi vechin. Lunggulh hi lechin zaw, hon pe thamta ding hi'ng. Haltum thillat zong kipahpih lou hi vechin. 17 Pathian' maia kithoihna thillat zaw, lungsung thuka lungkham leh kisik tuntuna lungtang tamkham ahi. Pathian aw, nang tua bang kisikna simmawh lou hi vechin. 18 Na deih bangbangin Zion tung ah thil hoih hih inla, Jerusalem kulhbaangte lam in. 19 Tua hun chianga, thillat diktatte, haltum leh a puma hal thillatte, kipahpih ding chin a, na maitama bawngtalte lan ding uhi.
Lungmuanna
Lapulian ading. David' Phatnala. Maskil Edom mi Doeg in Saul kianga: Ahimelekh inn-a David lut ahi, chi-a a hilh laia. 1 Mihatpa aw, banghanga thil hoihlou kisaktheihpih na hia? Pathian' mita zahlak nang banghanga sun nitum tuma kisial na hia? 2 Na lei in thil hihse thei gel a, gengen a, nang khemhatpa, na lei mulmettem banga hiam hi. 3 A hoih sanga a hoihlou it zaw chin a, a dik gen sanga zuau gen nuam zaw hi vechin.
Sela
4 Zuauthei lei aw, duhgawltaka nawmvalh theih thute nuamsa hi vechin. 5 Ahihhanga Pathian in nang a seden dinga hon lainiam ding ahi aw. Ama'n hon botkhe ding a, na puanbuk apan hon kaikhe ding hi. Ama'n mihing gam apan hon bulkalh ding hi.
Sela
6 Mi diktatte'n mu ding uh a, lau ding uhi. Amah nuihsan ding uh a: 7 Pathian a bitna kulhpi-a neiloua, ama' hauhna muang mi, siatna lampi tawna hong hat mi hiai ah om e! hon chi ding uhi. 8 Kei ka hih leh, Pathian' inna gahpha oliv singkung hi ing a, Tangtawn tangtwna muanhuai Pathian' itna muang hi'ng. 9 Pathian aw, na thilhih hanga hon phat ding hi'ng. Misiangthoute' ngaiha na min hoih a, na mina lametna nga ding hi'ng.
Israel Tundingkikna
Lapulian ading. David' Phatnala. Lapi. Maskil. 1 Mihai in a lungsung ah: Pathian om kei, chi hi. Amaute kisegawp uh a, a thangtatna uh kihhuai hi. Kuamah thilhoih hih om lou hi. 2 Pathian in vaan apan mihing tapate ensuk a, a theisiam leh Pathian zong himhim om uhiam, chi-a en hi. 3 Michih lampialta. Avek ua kihihsegawpta uhi. Thilhoih hih himhim om lou. Khat lei zong om lou hi. 4 Thil gilou hihte'n Pathian phawk lou uh hilou hia? Tanghou nek banga ka mite nete'n Pathian sam lou uhi. 5 Lau ding om loupi-a lau mahmah uhi. Ahang bel, nang hon doute' guh Pathian in paaithang hiven. Pathian in amaute a simmawh mana nang amaute zahlaksak hi vechin. 6 Pathian in Israel hotdamna Zion apan tungsak leh ut natel ing e! Pathian in a mite a piikik chianga, Jakob lungnuam ding a, Israel kipak ding hiven!
Hutkhiakna Ngetna Dawnna
Lapulian ading. David' Phatnala. Maskil. Guineia Sak. Zifte'n Saul kianga: David koute laka bu, chi-a a gen lai ua. 1 Pathian aw, na minin hon hondam in, na hatnain ka mawhlouhna phuang in. 2 Pathian aw, ka thuumna za in. Ka kama ka thugen na ngaikhia in. 3 Ahang bel, gamdang mite'n kei hon dou a, dop neilou mite'n ka hinna lak sawm uh a, Pathian masuan lou uh hiven.
Sela
4 Ngai dih, Pathian kei hon panpihpa hi taktak a, ka hinna khoihingpa Toupa hi ahi. 5 Kei hon enkhete' gitlouhna Pathian in thuk leh aw! Na muanhuaina in amaute hihmangthang leh aw! 6 Na maia ut thillatte lan ding hi'ng. Tangtawn Toupa aw, Na min hoih a, ke'n phat ding hi'ng. 7 Ahang bel, ama'n ka mangbatna khempeuh apan hon humbit a, vualzoutaka ka melmate hon ensak hiven.
Lawmte' Muanhuailouh laia Pathian Muanna
Lapulian ading. David' Lapi. Maskil. 1 Pathian aw, ka thuumna na ngaikhia in. Hehpih ka ngetna kiheisan ken. 2 Hon ngaihsak inla, hon dawng in. Ka thuumthuumna-a tawlngak mu loua mau hi'ng. 3 Ka melmapa' aw leh mi diktatloute' hon nuaisiahna hang hi ahi. Ahang bel, ka tunga mangbatna hon tun uh a, heha kei hon muhdah uh hiven. 4 Ka sunga ka lungtang na mahmah a, ka tunga sih launa hong tung hi. 5 Ka tunga launa leh linna hong tung a, mulkimna in hon pumtuam hi. 6 Tua bang huna: Vakhu banga kha nei hi leng ut nang e, hi leh, lengmang ding ing a, galmuang ding hi'ng, chi hi'ng. 7 Tua bang hi leh, gamlapi-a lengmang ding ing a, gam daihna muna om ding hi'ng.
Sela
8 Tua bang hi leh, pingpei leh huihpi apan ka bukna-a kintaka tai ding hi'ng. 9 Toupa aw, amaute' paute kituamsak vek inla, amaute buaisak in. Ahang bel, khawpi-a hiamgamna leh kisuknatna om mu hi vengin. 10 Sun leh zana khawpi kulhbaang tunga paipai uh a, kulhpi sunga mangbatna leh siatna om hi. 11 Khawpi sunga siatna om a, kivauna leh kikhemna in kongzingte nuse lou hi. 12 Melma in ngawhna khat hon nei hi leh zaw, thuakzou ding hi vengin. Tua bang lah hi lou hi. Hon mudah khat in hon dou hi leh zaw, buksan thei ding hi vengin. Tua bang lah hi lou hi. 13 Nang zaw, keimah bang mihing khat ka kithuahpih, ka lawm nai hi chin a, 14 Nuamtaka kikhawl hang a, midangte laka Pathian inna paikhawm hi hang. 15 Sihna in amaute naih khiankhian henla, misi khua ah a hingin lutsuk le uh hi ding! Ahang bel, amaute' innsunga amaute laka thil hoih lou om hiven. 16 Ke'n ahih leh, Pathian sam ding ing a, Tangtawn Toupa'n hon hondam ding hi. 17 Nitak leh zingsang leh sunlaia thuuma maumau ding ing a, ama'n ka aw za ding hi. 18 Kei hon doute tampi hitamah leh, ama'n ka tunga kidouna apan ka hinna lungmuangtaka tankheta hi. 19 Tanglai apan omkhinsa Pathian in amaute za ding a, thuaksak ding hi.
Sela
Ahang bel, amaute lunghei ngeilou uh a, Pathian lah lau lou uh hiven. 20 Ka lawm in, amah tawh kilemtaka omte tunga khut kha a, a thukhun palsat mawk hi. 21 A kam lah bawngnawi thau sanga naal zaw a, hinapi-a a lungtanga kidouna om mawk hiven. A thugen lah sathau sanga nem zaw a, hinapi-a namsau a pai apan phawikhiaksa hi mawk ven. 22 Tangtawn Toupa tung ah na lungsim nga in, ama'n na hinna keem ding hi. Ama'n midiktatte liingsak ngei lou ding hi. 23 Pathian aw, nang zaw siatna tun mite kawkhuk sung tun ding chin a, sisan suahhatte leh khemhatte' damsung a kimkhata khiam ding hi chin a, ke'n a hih leh, nang hon muang ding hi'ng.
Pathian' Muanhuaina
Lapulian ading. David' Phatnala. Miktam "Gamlapi-a Dai dide Vakhu" Kaih. Filistiate'n Gath khawpi-a David a mat lai ua. 1 Pathian aw, ka tung ah zahngai in. Mihing in hon sikden nuam a, nitum tuma hon dou uhi. 2 Kei hon enkhete'n nitum tuma hon simzuih uh a, Tungnungpen aw, kei hon doute tam lua uhi. 3 Ka lau chianga nang hon muang ding hi'ng. 4 A thu ka phat Pathian muang ing a, lau lou ding hi'ng. Mihing leltak in bang hon lawh thei ding ahia? 5 Ka thugen nitum tuma kaikawi uh a, ka tunga thil hoihlou tut ding gelgel uhi. 6 Amaute'n a sia sawm uh a, hon buk uhi. Ka kalsuan en uh a, ka hinna lak ding ngak uhi. 7 Buaina bawla suakta ding uh hia? Pathian aw, hehin namte laipai in. 8 Nang ka vialvaknate chiamtehta hi vechin. Ka khituite savun thawl ah thun in. Nang chiamtehsa vek hina lou maw? 9 Nang hon beela ka kikou chianga, ka melmate nungkik ding uhi. Pathian kei lama pang ahih mana hiai thei hi'ng. 10 Pathian muang ing a, a thu phat ding hi'ng. Tangtawn Toupa muang ing a, a thu phat ding hi'ng. 11 Pathian muang ing a, lau lou ding hi'ng. Mihing leltak in bang hon lawh thei ding ahia? 12 Pathian aw, na maia kichiamna in hon hen a, na maia kipahthu genna-a din ding hi'ng. 13 Ahang bel, nang sihna apan ka hinna humbit chin a, kipalpaihna apan ka khete vengbit hi vechin. Hinna vaka Pathian tawh tona ka pai theih nadinga tua bang hihta hi vechin.
Bitna Ngetna
Lapulian ading. David' Phatnala. Miktam. "Hihmangthang Ken" chih Kaih. Saul apan David Kawkhuka a tai laia. 1 Pathian aw, ka tung ah zahngai inla, ka tung ah zahngai in. Ka hinna in nang hon beel hi. Siatnate'n hon khen mateng, na khalim nuai beel ding hi'ng. 2 Kei adinga a thiltup tangtungsakpa Tungnungpen Pathian kianga toukou hi'ng. 3 Ama'n vantung apan huhna hon pe ding hi. Kei hon delhpa taihilh ding a, hon hondam ding hi.
Sela
Pathian in a itna leh a muanhuaina kei hon pe ding hi. 4 Ka hinna humpinelkai laka om a, gamsa duhgawl bang mite laka lum hi'ng. A hate uh tei leh thaltang hi a, a lei uh namsau hiam hi mawk hi. 5 Pathian aw, mite'n vaan sanga sang zaw ah nang hon pahtawi uhen. Na thupina lei tunglam pek ah om hen. 6 Amaute'n ka khete mat nading lenthang kam uh a, ka hinna lungdonga kuunkuun hi. Amaute'n ka maia gum khuak uh a, amaute mah kia uhi.
Sela
7 Ka lungtang kip hi, Pathian aw, ka lungtang kip hi. La sa ding ing a, phatna gingsak ding hi'ng. 8 Ka hinna aw, khanglou in! Kaihging leh tumging aw, khanglou un! Phalvak nangawn phawng ding hi'ng. 9 Toupa aw, namte laka hon phat ding ing a, mihonte laka nang' tungthu la-a sa ding hi'ng. 10 Ahang bel, na itna lian a, vaante sanga sangzaw a, na muanhuaina in vaante suntou hi. 11 Pathian aw, vaante tunglam pek ah, pahtawiin om inla, leitung teng na thupinain dim hen.
Thukhenna Dik
Lapulian ading. David' Phatna la. Miktam. "Hihmangthang Ken" chih kaih. 1 Vaihawmmi noute'n diktatna thu na gen taktak ua hia? Thukhenmi noute'n a dik a tangin thu na khen taktak ua hia? 2 Lungtang sung ah gitlouhna thu na gelgel zaw ve ua! Leitung ah na khut-un hiamgamna na tehkhia khia zaw ve ua! 3 Mi diktatloute zaw suul apan nangawn lampialsa hi uh a, a piankhiak uapan lampial uh a, zuauthu gen uhi. 4 A gu uh gulgu bang hi ahi. Mualtan ngongtatte bang hi uh a, bangmah za nuam lou a, bil hum uhi. 5 Amaute khoizualte'n siamtakin khoizual mah le uh, amaute khoizualte' aw ngaihsak lou uhi. 6 Pathian aw, a kam uah a hate uh hihtan inla, Tangtawn Toupa aw, humpinelkai lunlaite' hapak tongkhia in. 7 Tui luang gige bangin, luangmang uhen. Migilou in a thalphel a laitakin, a thaltangte a kitansa bang hen. 8 Dokdawn banga a pai laiun tuimang uhen. Lamzuih-a si bangin ni mu kei uhen. 9 Na beelte'n lingkung kangsa a phawk ma-a a hing hi-in a keu hita leh, giloute mutmanga om ding hi. 10 Mi diktatte'n phulakna a muh chiangun leh, mi diktatloute' sisana khe a sil chiangun nuam ding uhi. 11 Tua hun chianga mite'n: Mi diktatte adingin pahtakman om mahmah na e, leitunga Thukhenpa Pathian hi mahmah na e, chi ding uhi.
Hiamgamna apan Hutkhiakna Ngetna
Lapulian ading. "Hihmangthang Ken" chih Kaih. Saul in mi sawl a, amah that dinga a inn a Taansak laia David' Phatnala. Miktam. 1 Ka Pathian aw, ka melmate apan hon humbit in. Kei hon suai dinga kisate apan hon hu in. 2 Gitlouhna nasemte apan hon humbit inla, sisan suahhatte apan hon hondam in. 3 En dih, ka hinna buk uh a, mi hiamgamte'n kei hon dou dinga thu kikum uhi. Tangtawn Toupa aw, ka tatlekna hang hi lou a, ka khelhna hang zong hi lou hi. 4 Kei' diklouhna om loupi, kei suai dinga kisa uhi. Hon huh dingin khanglou inla, en in. 5 Tangtawn Toupa Pathian Vanglianpen, Israelte' Pathian aw, namte gawt dingin kisa in. A langpan giloute tung ah zahngai ken.
Sela
6 Nitaklamin hong kik uh a, ui banga hon ngikin, khawpi kimkot ah pai khualkhual uhi. 7 A kam uapan a phihkhiak uh en dih a muk uah namsau phihkhia uh a, kua'n hon za dia, kichi uhi. 8 Ahihhangin, Tangtawn Toupa aw, nang amaute nuihsan chin a, tua namte khempeuh zahpih hi vechin. 9 Nang ka Hatna aw, nang hon ngak hi'ng. Pathian aw, ka kihutna Kulhpi na hi. 10 Kei hon it ka Pathian na hi. Pathian ka maia pai ding a, kei hon gensete hon kisialkhumsak ding na hi. 11 Toupa koute' lum aw, amaute thah zaw that ken, ka mite'n mangngilh kha ding uhi. Na vangletnain amaute thehzak inla, hihniam in. 12 A kam ua a khelhna uleh a muk ua a thugente uh hangin a kisaktheihna ua matin om uhen. A hamselawhte uleh zuauthu a gente uh hangin 13 thangpaiin amaute kangtum in, amaute om nawn louh dongin kangtum in. Tuachi-in Pathian in Jakob tunga vaihawm ahi, chih leimong donga kithei ding hi.
Sela
14 Nitaklamin hong kik uh a, ui banga hon ngikin khawpi kimkot ah pai khualkhual uhi. 15 An zonga a suk a tunga diang uh a, an khamzou lou banga ham ngoungou uhi. 16 Ken zaw na hatna phata la sa ding hi'ng. Ahi, zingsanga na zahngaihna phata nakpitaka la sa ding hi'ng. Nang ka kihutna hi chin a, mangbat laia ka bukna hi vechin. 17 Ka Thahatna aw, nang phata la sa ding hi'ng. Pathian, itna muanhuai nei Pathian, ka kihutna hi vechin.
1 Pathian aw, koute hon paikhia a, hon satpaita chin a, ka tung ua lungkim lou na hi, hon tungding kik in aw. 2 Lei liingsak a, kitamsak chin a, tu'n a kitapnate kichihkiksakin, liing liing lai hi. 3 Na mite thil haksapipi tuaksak chin a, hoi dongdong nading zu hon dawnsak hi vechin. 4 Nang hon laudan siamte kianga puanlap na piak bel, Thutak hanga a kikhaitouh theih nading hi ahi.
Sela
5 Na itte hutkhiak a hih theih nading-un, na khut taklamin hon hondam inla, hon huh in. 6 Pathian in a mun siangthou apan thu gen a: Vualzoua Shekhem huikhe ding ing a, Sukoth Phaizang tehkhe ding hi'ng. 7 Gilead keia hi a, Manase keia hi a, Efraim zong ka siklukhu hi a, Judah lah ka kumpichiang hi ahi. 8 Moab ka puansawp kuang hi a, Edom tunga ka khedap paih ing a, Filistia tunga vualzoua kikou hi'ng, chi hi. 9 Kua'n khawpi kulhneia kei hon pii ding ahia? Kua'n Edom hon tun ding ahia? 10 Pathian aw, nangmah hilou na hi maw koute hon nolh a, ka sepaihhonte uh tonpih nawn lou? 11 Melma douin huhna hon pia in, mihing' huhna zaw a mawkna hi ahi. 12 Pathian tawh panga vualzawhna ngah ding hi ung. Ama'n ka melmate uh sikden ding hi.
Lapulian ading. Kaihginga Sak. David' Phatnala. 1 Pathian aw, ka kikou husa za inla, ka thumna limsak in. 2 Ka lungtang mangbanga a bah chianga kawlmong apan hon sam ding hi'ng. Kei sanga sangzaw suangpi ah hon pii in. 3 Kei adinga bukna hi chin a, meima apan belh ding innsang muanhuai hi na hi. 4 Na puanbuka teen gige ding lunggulh ing a, na kha limnuai bukna beel nuam hi' ng.
Sela
5 Ahang bel, Pathian aw, nang ka thuchiam zata chin a, na min laudan siamte' goutan hon peta hi vechin. 6 Kumpipa'damsung nite sausak ding chin a, a damsung kumte khang tampi pha ding hi. 7 Pathian' maia teeng gige ding hi'ng. Amah humbit ding itna leh muanhuaina bawlsak in. 8 Ka thuchiamte nisima ka tangtun theih nadinga na min phat la sa gige ding hi'ng.
Pathian Ngakna
Lapulian ading. Jeduthun ading. David' Phatnala. 1 Ka hinna in Pathian kia ah khawlna mu a, amah apan ka hotdamna hong tung hi. 2 Amah kia ka Suangpi leh ka hotdamna ahi. Amah ka Kulhpi hi a, hihliina om ngei lou ding hing. 3 Bangtan ahia mi khat na dou ding uh? Hiai baang awn leh gawl puk dekdek bang lei, na vek ua phukpai ding maw? 4 A dinmun sang apan paikhesuk ding lei a, thu kikuma zuauthu gen nuamsa uhi. Kama vualzawl uh a, sunggil lama bel hamsiat uhi.
Sela
5 Ka hinna aw, Pathian kia ah khawl tawldamna mu in. Ahang bel, ka lametna amah akipan hiven. 6 Amah kia ka Suangpi leh ka hotdamna hi ahi. Amah ka Kulhpi hi a, hihliina om lou ding hi'ng. 7 Ka hotdamna leh ka minletna Pathiana kinga ahi. Amah ka Suangpi kip hi a, ka bukna hi ahi. 8 Mite aw, hun khempeuh-in amah muang unla, ama' mai ah na lungtangte uh sungbua un. Pathian, eite adinga bukna hi ahi.
Sela
9 Dinmun niam mite lah tuihu bang lei hi taktak uh a, dinmun sang mite lah zuau leltak hi uhi. Buuknain kibuk leh, a vekpi ua zong tuihu sanga zaangzaw ding uhi. 10 Nuaisiaha mi' neihsa laksak muang ken, guksa vante zong kisaktheihpih ken, a mawkna hi uhi. Na hauhna a pun hangin tuate ah na lungtang nga ken. 11 Pathian in khatvei thu gen a, hiai nih vei za hi'ng: Vangletna Pathian-a hi ahi, chih. 12 Toupa aw, itna muanhuai zong nanga hi ahi. Michih a nasep bangbang ua dinkik taktak ding na hi.
Pathian Ngaia Dangtakna
Judah Gamdai-gamkeua a om laia David' Phatnala. 1 Pathian aw, nang ka Pathian hi chin a, bel taka nang hon zong ding hi'ng. Ka hinna nang ngaia dangtak gam keu tui om louhna gama ka sa in nang hon ngai hi. 2 Na vangletna leh na thupina mu dinga mun siangthoua nang hon zong hi'ng. 3 Na itna zaw hinna sanga manph zaw ahih mana ka mukte'n nang hon phat ding hi. 4 Ahi, ka damsung tenga nang hon phat ding ing a, na mina ka khutte liiktou ding hi'ng. 5 Guh ngek leh sathaua tai banga ka hinna tai ding a, ka kam in kipahna mukte-a nang phatla sa ding hi. 6 Ka lupna tunga nang hon thei gige ing a, zan veen sung teng nang hon ngaihtuah hi'ng. 7 Kei hon huhpa na hih mana na khalim nuaia nuam ding hi'ng 8 Ka hinna in nang hon leen a, na khut taklam in hon domkaang hi. 9 Ka hinna hihmanthat tuma zongte bel, a thukna mun lei nuailam tung ding uhi. 10 Namsaua puk ding uh a, sihalte' an suak ding uhi. 11 Ahihhanga kumpipa bel Pathiana nuam ding hi. Pathian' min siala kichiamte peuhmah in a min phat ding hi. Zuautheite kam ahih leh chihsak hi ding hi.
Tangtawn Toupa-a Lungnopna
Lapulian ading. David' Phatnala. 1 Pathian aw, ka mangbat thu ka gen laiin, ka aw na za inla, ka meima ka launa apan ka hinna humbit in. 2 Migiloute' kithuhilh siamna apan hon seel inla, khelhna nasem buai vengvungte lak apan hon seel in. 3 Amaute'n namsau banga a lei uh tathiam uh a, a thusiate uh sih theihna thai banga kaap dinga kisa uhi. 4 Kuamah muh louhna muna genbaanglou mi kaap dinga kisa uh a, thakhata amah kaap uh a, lau lou uhi. 5 Thil gilou sawma kihasuan uh a, a sima thangkam ding kikum uh a: Kua'n thangte a mu dia? kichi uhi. 6 Gitlouh dante gelkhia uh a: Thilsawm piltak geelkheta hang, kichi uhi. Mihing lungsim leh lungtang zaw pilkhel mahmah hi. 7 Ahihhanga Pathian in thala amaute kaap ding a, thakhata kaappaiha om ding uhi. 8 Tua banga a lei ua a thugen mah ua kipalpai ding uh a, amau mute khempeuh taaimang ding uhi. 9 Mihing khempeuh lau ding uh a, Pathian thilhih phuang ding uhi. A nasep thilhih ngaihtuah vengveng ding uh hiven. 10 Mi diktat, Tangtawn Toupa ah nuam henla, amah ah bu hen. Lungtang tangte khempeuh in amah phat uhen.
A Nasep Lamdangte hanga Pathian Phatna
Lapulian ading. David' Phatnala. La. 1 Pathian aw, phatna in Ziona nang hon ngak hi. Na kianga thuchiamte kitangtun ding hi. 2 Thuumna zapa aw, na kianga mi khempeuh hong pai ding hi. 3 Tatsiatnate'n hon pumtuam laia, nang ka tatleknate uh hon ngaidam hi vechin. 4 Na huang sunga teeng thei ding leh, nang hon naih dinga na mi teel mi nunnuam hi ahi! Na inn apan leh na tempul siangthou apan thilhoiha tai hi ung. 5 Ka Hondampa uh Pathian aw, diktatna thilhih lauhuaite-a hon dawng na hi. Lei mong dong leh tuipite mong donga mi khempeuh' muan leh kinepna nang na hi. 6 Nang na vangletna-a mualte tangte hihkip chin a, vangletna-a kithuam taktak na hi. 7 Nang tuipi kihawt ging zuazuate, tuihual ging honhonte leh namte' buai husa chiak vengvungte daaisak na hi. 8 Gamlapi-a teengte nangawn in na chiamtehna lamdangte lau uhi. Nang zingsang phalvak apan nitak khawmui dong lungnopna late gingsak na hi. 9 Nang leitung veh chin a, tui buak chin a, gah tampi suahsak na hi. Pathian' luite tui dimsak chin a, mihingte adinga buh leh bal bawlsak chin a, ahi, tua bang dinga hihkip na hi. 10 Leilehna saite tui buak chin a, leilehna kuakte zalh chin a, lei nipsak chin a, hai kichiingte khangsak na hi. 11 Kumte na hoihna khusak chin a, na lampite-a niang leh taina om hi. 12 Gamdai-gamkeu zong loupa dimsak chin a, mualte zong kipahna khusak na hi. 13 Gantatna loupa munte puana khuh banga belamhonte dimsak chin a, phaizangte zong puana khuh banga buh leh bala dimsak chin a, nuama kikou uh a, la sa uhi.
Pathian' Thilhih Phawk Gigena
Lapulian ading. La. Phatnala. 1 Leitung bup aw, Pathian kiang ah nuamin kikou un! 2 A min thupi lain sa unla, phatna thupitak amah pia un! 3 Pathian kiang ah: Na nasep thilhihte lamdangin mulkimhuai nah e! Na vangletna lian hanga na melmate khempeuh na maia tonkhin uhi. 4 Leitung mite khempeuh na maia kuun uh a, nang phata la sa uh a, ahi, na min phata la sa uhi, chi un.
Sela
5 Hong pai unla, Pathian' nasepte hong en him dih ua. Mihing' tate adinga a nasep lamdangin mulkimhuai nah e! 6 Ama'n tuipi gamhul suaksak a, luite khe-a kaan uhi. Hong pai unla, amah ah nuamin kipak ve ni. 7 Ama'n a vangletna-a vaihawm tawntung a, a mitte'n namte en gige hi. Helhatte amah dou dingin kisa mahmah kei uhen.
Sela
8 Mite aw, koute' Pathian phat un. Amah phatna ging kiza hen. 9 Ama'n koute' hinna, a hingte laka hon hawisak a, ka khete uh a taai ding phal lou hi. 10 Pathian aw, nang koute hon entel chin a, ngunsik banga hon halsiangta na hi. 11 Nang lenthanga hon awksak chin a, ka nungzang ua haksatna vangik hon suan na hi. 12 Ka luzang ua mite tuangsak chin a, meikuang leh tuite tawna pai hi ung. Ahihhanga niang leh taia omna mun hon tunta na hi. 13 Haltum thillatte tawh na tempul hong lut ding ing a, ka thuchiamte tangtun ding hi'ng. 14 Ahi, ka lungkham laia ka muk in a chiamte ka kam in a gente mah tangtun ding hi'ng. 15 Ganthau haltuma kithoihnate, belamtal hal gim namtui tawh na maia laan ding ing a, bawngtalte leh kelte laan ding hi'ng.
Sela
16 Nou Pathian laudan siam khempeuhte aw, hong pai unla, hong ngai un. Kei adinga a thilhih phuang ding hi'ng. 17 Ka kama amah sam ing a, ka leia amah pahtawi hi'ng. 18 Ka lungtang in khelhna a pahtak leh, Toupa'n hon ngaikhe lou ding hi. 19 Ahihhanga Pathian in hon ngaikhe taktak a, ka thumna aw ngaihsakta hi. 20 Pathian phatin om hen, ama'n ka thuumna nialkhe lou a, a itsiamna zong hon it lou hi.
Pathian in Leitung Vaihawm ding
Lapulian ading. Kaihginga Sak. Phatnala. 1 Pathian eite tung ah hehpihsiam henla, hon vualzawl henla, eite tung ah a mai taangsak hen.
Sela
2 Hi leh, leitunga na lampi kithei ding a, namte khempeuh laka na hotdamna kithei ding hi. 3 Pathian aw, mite'n nang hon phat henla, namte khempeuh in nang hon phat hen. 4 Namte kipak henla, nuamin la sa uhen aw! Ahang bel, nang diktattaka namte tunga thu khen chin a, leitung namte uk a, makaih hi vechin.
Sela
5 Pathian aw, mite'n nang hon phat henla, namte khempeuh in hon phat hen. 6 Tua chianga lei in gah suah ding a, Pathian, eite'Pathian in hon vualzawl ding hi. 7 Pathian in hon vualzawl ding a, leimong donga namte khempeuh in amah lau ding uhi.
Pathian, Pabeite' Pa
Lapulian ading. David' Phatnala. La. 1 Pathian thou henla, a melmate thehzakin om leh aw! Amah mudahte a mai ah taikek leh aw! 2 Meikhu mutmanga om bangin, amaute mutmang in. Mei luma khuainun a zulmang bangin, Pathian' mai ah mi diktatloute mangthang hen. 3 Ahihhangin, mi diktatte kipak uh henla, Pathian' mai ah nuam uhen. Ahi, nakpitakin nuam uhen. 4 Pathian' mai ah la sa unla, a min phatin la sa un. Meipi tunga tuangpa pahtawi un. Ama' min Tangtawn Toupa hi ahi. A mai ah nuam un. 5 Amah, pabeite' Pa hi a, meigongte gumpa hi ahi. Amah zaw a tenna munsiangthoua Pathian hi ahi. 6 Pathian in mi tangkhatte, innkuan laka omsak a, hentate zong hauhna gama piikhia a, helhatte bel gamkeua teengsak hi. 7 Pathian aw, na mite' maia na paikhiak laia gamdai-gamkeu tawna na pai laia,
Sela
8 tua laia lei liing a, vante'n zong Pathian' maia vuah zusak a, Sinaia Ompa Pathian, Israel' Pathian' maia liing hi. 9 Pathian aw, nang vuahtui tampi sawl chin a, tua in na goutan gamdai bahtak nawngsaka halhsak hi. 10 A sunga na mite teeng uh a, Pathian aw, nang na hauhna apan mizawngte nek ding pia na hi. 11 Toupa'n thu pia a, a phuangkhe mite tampi mahmah pha uh a: 12 Sepaihhonte leh kumpipate taikeek uh a, innngaknu'n gallaakte hawm hi. 13 Giahphual khawnga na lup lai nangawn ua, nguntuia luan vakhu khate leh khamtuia luan vakhu multe bang hi uchin a, chi uhi. 14 A Vanglianpen in gamsunga kumpipate a delhzak laia Zalmon muala vuk kia bang hi uhi. 15 Bashan Mual, Pathian' mual hi a, Bashan Mualte mualvum tampi nei hi ahi. 16 Mualvum tampi nei mualte aw, banghanga Pathian' vaihawm nopna mual eenga enen na hi ua? Ahi, tua-a Tangtawn Toupa teengden ding hi. 17 Pathian' kangtalaite sang tampi leh sang mun sang tampi hi ahi. Sinai Muala tuate laka Tangtawn Toupa a om banga, mun siangthoua om hi. 18 Tunglama na kaltouh laia, saltanna sala kai chin a, mihingte ading, helhatte ading nangawna thawnpiakte saang chin a, tua bel, Tangtawn Toupa Pathian aw, amaute laka na teen theih nading hi ahi. 19 Toupa, i hotdamna Pathian phatin om hen. Ama'n i puakgikte nisima pua hi.
Sela
20 Pathian zaw hotdamna Pathian ahi. Tangtawn Toupa Thuneipen apana, sihna apan suahtakna hong tung hi. 21 Ahihhanga Pathian in a melmate' lungtang liamsak mahmah ding a, a khelhnate ua om nilouhlouhte' sam pouna luzangte liamsak ding hi. 22 Toupa'n: Ka mite Bashan apan hon piikik ding ing a, tui thukpi apan hon piikik ding hi'ng. 23 Na galte uh' sisana na khete uh diah uchin a, na uite un na melmate uapan leia liah ding a neih nading uh hi ding hi, chi hi. 24 Pathian aw, nang' makaiha a hona kizuihna kimuta hi. Ka Pathian leh Kumpipa mun siangthou sunga kizuihlut kimuta hi. 25 Mailam ah lasate pai uh a, tumging tumte'n zui uhi. Amaute' lak ah nungakte'n khuangtate tum uhi. 26 Kikhawmte lak ah Pathian phat unla, Israel suan kikhawmte lak ah Tangtawn Toupa phat un. 27 Amaute' lamkaiin behneu Benjamin pang a, Judah lamkai tampite leh Zebulun lamkaite leh, Naftali lamkaite zong om uhi. 28 Pathian aw, na vangletna suah inla, Pathian aw, ni dang laia na hih bangin, koute adingin na thahatna suah in. 29 Jerusalema na tempul hanga, kumpipate' n thawnpiakte nang hon puak ding uhi. 30 Sialluang laka gamsate, namte' bawngnoute laka bawngtal honte tawh taihilh in. Kingainiamin ngun tangte hon tawi hen. Kidou ut namte nang thehzak in. 31 Aigupta apan palaite hong pai ding uh a, Ethiopia in kintaka Pathian lama khut zak ding hi. 32 Nou leitung kumpigamte aw, Pathian' mai ah la sa unla, Toupa' mai ah phatna la sa un aw.
Sela
33 Tanglaia tung vansangte-a tuangpa' mai ah phatla sa un. En dih, ama'n vanpiging banga aw suah hi. 34 Pathian' vangletna phuang un, a thupina mulkimhuai Israelte tunga om hi. A vangletna in tung vaante daapsuak hi. 35 Pathian aw, na mun siangthou ah na mulkimhuai hi. Israel Pathian in a mite kianga vangletna leh thahatna pia hi. Pathian phatin om hen!
Pathian Nai dinga Ngetna
Lapulian ading. "Lilipakte" Kaih. David' Phatnala. 1 Pathian aw, hon hondam in, tuite'n ka ngawng chiang hon tumta hi. 2 Buannawi thukpi-a tum ing a, siksan ding om het lou hi. Tui thukpi sung tung ing a, tuite'n hon tum hi. 3 Ka kahkahna-a tawlta ing a, ka gawl keugawpta hi. Ka Pathian ka ngakna lama ka mitte bahta hi. 4 Asan ahang beia kei hon mudahte ka luzanga samzangte sanga tam zaw hi. Ahang beipi-a ka melma-a kibawl, hihmanthat hon sawmte tam mahmah hi. Ka guk louhpi din dinga hon phut uhi. 5 Pathian aw, ka haina thei chin a, ka mawhnate na mai apan kiseel lou hi. 6 Toupa Tangtawn Toupa Vanglianpen aw, nang hon ngaite, kei hanga zahlakin om kei uhen. Israel Pathian aw, nang hon zongte, kei hanga maimawksakin om kei uhen. 7 Nang hanga zahlakna thuak ka hih mana maizumna in hon khuh hi. 8 Ka sanggamte adinga melmak mi suakta ing a, ka nu' tate adinga gamdang mi suakta hi'ng. 9 Na inn adinga phatuamngaihna in hon negai ahih mana nang hon zahlaksakte' zahlakna ka tunga kibung hi. 10 An ngawla kapa ka hinna a bah chianga ka zahlakna phet suak hi. 11 Sai-ip puan ka silh chianga, mite' thawh lei suak hi'ng. 12 Kongpi-a tute' simmawh leh gensiat hi ing a, zukhamte' la suak lei hi'ng. 13 Ahihhanga Tangtawn Toupa aw, na deihsakna huna na kianga thum hi'ng. Pathian aw, na itna muanhuai hauh bangbangin hon dawng inla, na hotdamna thutakin hon dawng in. 14 Buannawi lak apan hon humbit inla, hon tumsuksak ken. Hon mudahte apan leh tuithukte apan hon humbit in. 15 Tuikhang lian in hon tum kei henla, tuithuk in hon valh kei henla, kawkhuk in zong a kam hon chihkhum kei hen. 16 Tangtawn Toupa, na itna muanhuai apan hon dawng inla, na zahngaihna thupitakin kei lam hong nga in. 17 Na sila apan na mai seel kenla, mangbang hi ing, hon dawng meeng in. 18 Kei hon naih inla, hon tankhia in. Ka galte hangin hon tankhia in. 19 Simmawh leh zahlaksak leh maizumsak ka hih dan na thei hi. Kei hon doute khempeuh na maia om uhi. 20 Zahlakna in ka lungtang khasesak a, lungkhamna in hon delhgik hi. Hon khasiat ding mi zong ing a, kuamah om lou hi. Hon khamuan ding mi zong ing a, kuamah om lou hi. 21 Ka an dinga thilkha hon pia uh a, ka dangtaka lah dawn dinga greptui thuk hon pia uhi. 22 A mai ua ankuang kilui thang suak henla, amaute thukna leh pial suak hen. 23 A muh theihlouh nadingun, a mitte uh mialsakin om henla, a nungzang uh kulden hen. 24 Na thangpaihna amaute tung ah sungbua inla, na hehluatna in amaute delhpha hen. 25 Amaute' mun kilawi henla, a puanbukte uh luah ding kuamah om kei hen. 26 Ahang bel, nang na satpa engbawl uh a, nang liamsakpa' lungkham natna gengen uh hiven. 27 A khelh mawhna tung uah khelhna ngawh behlap inla, na diktatna tangsak ken. 28 Hinna laibu apan thaimangin om uh henla, midiktatte laka gelh hi kei uhen. 29 Kei zaw na thuaka mangbang hi'ng. Pathian aw, na hotdamna in sangpi-in hon liktou hen. 30 La-a Pathian' min phat ding ing a, kipahthu genna tawh amah pahtawi ding hi'ng. 31 Bawngtal hiam, ki leh chin nei bawngtaltuai hiam lat sanga hiai in Tangtawn Toupa lungtaisak zaw ding hi. 32 Thunuailutte'n hiai mu ding uh a, kipak ding uh a nou Pathian zongte aw, na lungtangte uh hing hen. 33 Tangtawn Toupa'n tasamte' aw za a, a mi saltangte simmawh lou hi. 34 Lei leh vaan in amah phat henla, tuipi leh a sunga gamtate khempeuh in amah phat hen. 35 Ahang bel, Pathian in Zion hondam ding hiven. Ama'n Judah khawpite lamthak ding a, tuate-a mite teeng ding uh a, nei ding uhi. 36 A silate' suante'n tuate luah ding uh a, ama' min itte tua-a teeng ding uhi.
Azang leh Tasamte adinga Thumna
Lapulian ading. David' Phatnala. 1 Pathian aw, kei hon humbit dingin hong pai meng in! Tangtawn Toupa aw, hon huh dingin hong kinawh in! 2 Ka hinna lak sawmte maizumsak leh buaigawpsakin om uhenla, ka siatna deihte zahlaka kiksak hi uhen. 3 Awi hang e, awi hang! chi-a hon nuihsante maizumin lehkik uhen. 4 Ahihhangin, nang hon zongte bel nang ah nuamin kipak uh hen la, na hotdamna it peuhmah in: Pathian pahtawiin om hen! chi uhen. 5 Hinapi-in, kei zaw zawng leh tasam hi ing. Pathian aw, hong naih meng in! Hon huhpa leh hon hukhepa nang na hi. Tangtawn Toupa aw, hong zekai ken.
Pathian, Hotdamna Suangpi.
1 Tangtawn Toupa aw, nanga buta hi'ng. Maizumin hon omsak ngei ken. 2 Na diktatnain hon humbit inla, hon suaktasak in. Na bil hon dawh inla, hon hondam in. 3 Ka taai gige theihna, ka bukna suangpi hi inla, nang ka suangpi leh ka kulhpi na hih manin, ka hotdam nading thu pia in. 4 Ka Pathian aw, lungtang giloute' khut apan hon hukhia inla, mi diktatlou leh hiamgamte' khutsung apan hon hukhia in. 5 Ahang bel, Toupa, Tangtawn Pathian aw, nang ka lamet hi chin a, ka tuailai apan ka muan hi vechin. 6 Ka pian apan nanga kinga ing a, nang ka nu' sul apan hon lakhia na hi. Nang hon phat tawntung ding hi'ng. 7 Mi tampi adinga chiamtehna sianglou suak ing a, ahihhanga nang ka bukna muanhuai hi na hi. 8 Ka kam ah nang phatna dim a, nitum tuma na thupina phuang hi. 9 Ka teek chiangin hon paikhe kenla, ka thahatna a bei chiangin hon taisan ken. 10 Ahang bel, ka galte'n hon gensia a, thah dinga hon ngakte'n thu sawmkhawm khawm uh hiven. 11 Amaute'n: Pathian in amah taisanta, delh unla, man un, amah humbit ding kuamah om lou hi, kichi uhi. 12 Pathian aw, hon gamlat ken. Ka Pathian aw, hong pai meng inla, hong huh in. 13 Kei langa pang a, hon ngawhte maizumin mangthang hen. Kei hon hihnat sawmte zahlakna leh daina in khuh hen. 14 Ahihhanga kei zaw lametna neia om gige ding ing a, nang hon phat semsem ding hi'ng. 15 Ka damsung bei hun ding theilou hi mah leng, ka kam in na diktatna leh na hotdamna thu sun nitum tuma gen ding hi. 16 Toupa, Tangtawn Pathian aw, hong pai ding ing a, na thilhih thupite gen ding ing a, phuang ding hi'ng. 17 Pathian aw, ka tuailai nite apan, tuni dong na thilhih lamdangte hon sinsak na hi. 18 Tu-a teeka ka sam a kaan nung nangawnin, Pathian aw, khangthakte kianga na vangletna gen a, khang hong omlai dingte kianga na thahatna ka gen mateng hon taisan ken. 19 Pathian aw, na diktatna in van sun a, thil thupite hihpa Pathian aw, nang bang kua om ahia? 20 Nang lungkham buaina thupi tampi hon tuaksakpa mah in ka hinna halhthaksak ding chin a, leimun thukpi apan hon piikhetou nawn ding na hi. 21 Nang ka zahtakhuaina khangsak ding chin a, hon khamuan lai ding na hi. 22 Ka Pathian aw, na muanhuaina hanga pekging-a hon phat ding ing a, nang Israel Misiangthoupa aw, kaihginga nang phata la sa ding hi'ng. 23 Nang phata la ka sak chianga, ka mukte nuama kikou ding a, na tatsa keima' hinna mahmah nuama kipak ding hi'ng. 24 Ka lei in zong nitum tuma na diktatna thilhihte gen ding hi. Ahang bel, kei hon hihnat sawmte zahlaksak leh buaizaksaka omta uh hiven.
Mesia' Vaihawmna
Solomon' Phatnala. 1 Pathian aw, a dik a tanga thukhennate kumpipa pia inla, na diktatna kumpipa' tapa pia in. 2 Ama'n na mite tunga diktatna tawh vai hawm ding a, gimna thuak na mite tunga a dik a tanga thukhenna tawh vai hawm ding hi. 3 Tangte'n mite tunga niang leh taina tun ding a, mual neute'n diktatna-a niang leh taina tun ding hi. 4 Ama'n mite laka a gentheite dik tangsak ding a, a tasamte' tate hondam ding a, nuaisiahhatpa bel satzan ding hi. 5 Amaute'n ni leh kha om laiteng, a khang akhang donga nang hon lau ding uhi. 6 Amah lah loupa metsa tunga vuahzu bang leh, lei buakkawt vuahphin bang hi ding hi. 7 Ama' damsung nite-a a midiktatte tuahpha ding uh a, khapi om nawn louh donga - niang leh taina khang ding hi. 8 Ama'n tuipi apan tuipi donga vai hawm ding a, tua Luipi apan lei mong donga vai hawm ding hi. 9 Gamdai-gamkeua teengte a maia kuun ding uh a, a melmate'n leivui liak ding uhi. 10 Tarshish leh tuikulh gam kumpipate'n siahte puak ding uh a, Sheba leh Seba kumpipate'n thawnpiakte pe ding uhi. 11 Ahi, kumpipate khempeuh a maia kuun ding uh a, namte khempeuh in Ama' nna sem ding uhi. 12 Ahang bel, tasam mi in a sap chianga ama'n humbit ding a, mizawng tagah, panpihbei zong humbit ding hi. 13 Ama'n mi hatlou leh tasam hehpih ding a, tasamte' hinna hondam ding hi. 14 Nuaisiahna leh hiamgamna apan amaute' hinna tankhe ding a, ama' mitmuha a sisan uh manpha hi ding hi. 15 A damsung sawt hen! Sheba apan ngun piakin om hen. Mite'n amah thumsak gige uh henla, sun nitum tumin amah vualzawl uhen. 16 Gamsung teng ah buh tam henla, mualtung teng ah liing duamduam hen. A vuite Lebanon sidar singkungte bang henla, khawpi-a mite gamlak loupate bangin pha luahluah hen. 17 A min Tangtawnin om henla, ni a taan laiteng a min om hen. Namte khempeuh amah tungtawna vualzawla om ding a, namte khempeuh in, amah nunnuam hi, chi ding uhi. 18 Tangtawn Toupa Pathian, Israel Pathian phatin om hen. Amah kia'n thilhih lamdangte hih hiven. 19 Ama' min thupi phatin om tawntung henla, leitung ah a thupina dim hen. Amen, Amen. 20 Hiai tengin, Jese' tapa David' thumnate beita hi.
Tangtawn Omdan
Asaf Phatnala 1 Israel tung ah Pathian hoih taktak a, lungtang siangthoute tunga hoih taktak hi, 2 Ahihhanga kei bel, ka khete kipalpai dekdek a, ka kalsuante taai dekdek hi. 3 Ahang bel, mi diktatloute' lawhchinna ka muh chianga a ki-uangsakte eng khanak hi'ng. 4 Nakpitaka panga nathuaka om lou uh a, a pumpite ulah damthei a, thahat uhi. 5 Mihingte' lungkhamna ngeina thuak lou uh a, midangte' vangtahna bang lah thuak lou uhi. 6 Kisaktheihna khiawha ok uh a, hiamgamna puansilha silh uhi. 7 Hauleet uh a, a tamsem deiha haklian uh a, a lungtang kisathei duhgawl un: Kichingta, chi ngei mahmah lou hi. 8 Simmawh uh a, siatna deihsaka khataka pau uh a, kisatheihtaka nuaisiah sawm uhi. 9 A kam un vaante nangawn ngiat a, a lei un leitung tangkhin hi. 10 Tua bang ahih mana, a mite un amaute zuan uh a, tui tampipi phailouha dawnkang uh a: 11 Pathian in a thei-a hia? Tungnungpen in theihna a nei-a hia? kichi uhi. 12 Ngai dih, hiaite mi diktatlou, khawksak neiloua om gigete hi uh a, a hauhna uh pung semsem hi. 13 Ke'n ka lungtang ka kep siangthou a, mawh loua ka khutte ka silsiang, a mawkna hitak tak hi. 14 Nitum tuma gimthuaka om ing a, zingsang tenga thununa om hi'ng. 15 Ke'n: Hibangin thu genkhe mahmah ning, chi dek leng, ngaidih, na tate khang adinga muanhuai lou suak ding hi'ng. 16 Hiai theihsiam ding dan ka ngaihtuah chianga, kei adinga gik lua hi 17 Pathian' mun siangthou ka lut mateng, tua bang hi a, tua khit nunga bel, a bei nading uh bang hi hiam, chih theisiamta hi'ng. 18 Nang amaute a naalna muna koih taktak chin a, manthatna-a paaikhesuk na hi. 19 A manthat dan uh thakhat thu hi guih natel e! Mulkimna in amaute a taihmang dan sipsip hi natel e! 20 Mi a khanlawh nunga, a ihmut mang bangmah a hih louh banga, Toupa aw, na thawhkhiak chianga milim banga amaute bangmah sa het lou ding na hi. 21 Tua banga ka lungtang dah a, ka lungsim natluat chianga, 22 hai lua ing a, bangmah thei lou ing a, na maia gamsa bang lei hi'ng. 23 Hinapi-a na kianga om gige hi'ng a, ka khut taklama hon len na hi. 24 Na thuhilhna-a hon makaih chin a, tua khit chianga thupina-a hon la lai ding na hi. 25 Vantunga nang lou kua nei ka hia? Leitung in nang lou ka deih ding dang nei lou hi. 26 Ka sa leh ka lungtang bah mah leh, Pathian ka lungtang' thahatna hi a, ka tantuan hiden hi. 27 Ahang bel, nang hon gamlatte mangthang taktak ding uh a, nang hon nusia a, ang hon kawmsante hihmangthang ding na hi. 28 Ahihhanga, Pathian kiang naia om kei adinga hoih a, Tangtawn Toupa Thuneihnakim nei ka bukna-a nei hi'ng. Na thilhihte khempeuh gen ding hi'ng.
A Thukhun Phawk dinga Ngetna
Asaf Phatnala. Maskil 1 Pathian aw, banghanga koute hon paikhe denden na hia? Banghanga na gantatna muna belamte tunga na hehna kuang ahia? 2 Tanglaia na leisa na mi kikhawmte thei gige inla, na goutan dinga na tatsa nam thei gige in. 3 Tangtawna hihsiatsa lam ah na kalsuan hei in. Meima in mun siangthou sunga hihsiatna hon tun hi. 4 Koute non tuahna mun ah melmate humham uh a, chiamtehna hi dinga puanlapte khai uhi. 5 Sing lianpipite sat dinga heipi liikte banga gamta uh a, 6 khuakthawh baangthuah khempeuh heipite leh heitate-a satzan vek uhi. 7 Na mun siangthou meia haltum uh a, na Min omna hihnin uhi. 8 Amaute'n lungtanga: Amaute hihse vek ni, kichi uh a, gam sunga Pathian biakna mun khempeuh haltum uhi. 9 Chiamtehnate piak hi lou ung a, kamsang zong om nawn lou hi. Bangtan hi ding hiam, chih a thei zong ka lak ua kuamah om lou hi. 10 Pathian aw, meima in bangtan hon zahlaksak ding ahia? Meima in na min genseden ding hia? 11 Banghanga na khut, na khut taklam dokkik na hia? Na awm apan zankhia inla, amaute hihmangthang in. 12 Ahang bel, tanglai apan Pathian ka Kumpipa hi chin a, leitunga hotdamna hon tun na hi. 13 Nang na thahatna-a tuipi kikhensak chin a, tui sunga tui-gulpi lutangte khentam na hi. 14 Leviathan' lutang khentampa nang hi chin a, gamdai-gamkeua ganhingte an dinga pia nang na hi. 15 Tuikhukte leh tuite luangsakpa nang hi chin a, luipite kangtatsakpa nang na hi. 16 Sun hun nanga hi a, zan hun zong nanga hi ahi. Khawvak leh ni bawlpa nang na hi. 17 Lei mong gamgite khempeuh khung chin a, nipi leh phalbi bawl nang na hi. 18 Hiai thei gige in Tangtawn Toupa aw, meima in nang hon selphou dan leh, nam hai in na min a gendai dan! 19 Na kawlvakhu' hinna gamsate kiang ah pe ken aw! Na migentheite' hinna zong mangngilh den ken. 20 Na thukhun zahtak in aw, leitunga a mialna munte hiamgamna-a dim ahi. 21 Nuaisiahna thuakte maizumin kiksak ken aw! Mizawngte leh genthei tasamte'n na min phat uhen. 22 Pathian aw, thou inla, nang leh nang kigum in. Mihai in nisima hon zahlaksak dan thei gige in. 23 Na melmate' aw mangngilh kenla, nang hon doute' husa ngaih kitungtou nilouh hi.
Thunkhenpa Pathian
Lapulian ading. Asaf Phatnala. La. 1 Pathian aw, na tung ah kipahthu kon gen uhi, kipahthu kon gen uhi. Na Min hong nai hiven, mi'n na thilhih lamdangte gen uh hi. 2 Nang: A hun kituak geih teel a, diktattaka thukhenpa kei hi'ng. 3 Leitung leh a sunga teengte khempeuh a liin chianga, a khuampite lenkippa kei hi'ng, chi chin a,
Sela
4 kiuangsakte kianga: Kiuangsaktakin gamta kei un, chi ing a, mi diktatloute kianga: Van douin na kii uh liiksang kei un. 5 Sangpi ah na kii uh liiksang kei un, kisatheitakin pau kei un, chi hi'ng, chita na hi. 6 Suahlam hiam, tumlam hiam, gamdai-gamkeu hiam apan kuama'n mi pahtawi thei lou hi. 7 Pathian hi zaw hi Thukhenpa. Ama'n khat niamsak a, adang khat domsang hi. 8 Tangtawn Toupa' khuta nou khat om a, a zu san a, zuhel hi ahi. Ama'n sungkhe ding a, leitung mi diktatloute'n tua dawn gai sipsip ding uhi. 9 Ke'n bel hiai phuangzak gige ding ing a, Jakob' Pathian maia phatna late sa gige ding hi'ng. 10 Ama'n: Mi diktatloute' kiite khempeuh sattan ding ing a, midiktatte' kiite bel pahtawi ding hi'ng, chi hi.
Pathian Thahatna Thupi
Lapulian ading. Kaihging Guineia Sak. Asaf Phatnala. La. 1 Judah gam ah Pathian theihin om a, Israel gam ah a min lian hi. 2 Salem ah zong a biakbuk om a, Zion ah a teenna mun om hi. 3 Tua ah ama'n thai kuangtheite hihtan a, lum leh namsau leh kidouna galvante hihgawp hi,
Sela
4 Nang zaw vaak tawh kidim chin a, sabet ding tamna mual sanga thupi zaw na hi. 5 A hangsan salphate mi'n lok uh a, thou nawn lou dinga ihmusuk uh a, galhat kuamah in khut zang thei nawn lou hi. 6 Jakob Pathian aw, nang na taaihilh leh, kangtalai leh sakol dai dide-a om uhi. 7 Nang, nang kia lauh tuak na hi. Nang na heh chianga na maia kua ding thei ding ahia? 8 Nang na thukhenna vaan apan phuangkhia chin a, lei in hon lau a, dai dide hi. 9 Pathian, thukhen ding leh leitunga nuaisiaha omte hukhe dinga na thawhkhiak chianga tuabang hi ahi.
Sela
10 Mihingte tunga na thangpaihna in nang hon phat taktak ding a, na thangpaihna apan suaktate bel kikhamchip ding uhi. 11 Tangtawn Toupa na Pathian uh mai ah thuchiam bawl unla, tangtun un. A kiim a kianga omte khempeuh in lau dinga kilawmpa kiang ah thawnpiak puak uhen. 12 Ama'n vaihawm makaite' hangsanna beisak ding hi. Leitung kumpipate adinga amah a lauhuaipa hi ahi.
Mangbat chianga Pathian' Thupina Phawkna
Lapulian ading. Jeduthun ading. Asaf Phatnala. 1 Pathian sama aw suah ing a, ka aw-a Pathian kianga kikou ing a, ama'n bil hon dawh hi. 2 Ka mangbat ni-a Toupa zong ing a, zankhua-a tawlnga loua banzakkhia ing a, ka hinna khamuan theih hilou hi. 3 Pathian aw, nang hon phawk ing a, thuuma mau hi'ng. Ka khawisatna-a ka kha bahta hi.
Sela
4 Ka mit mitsisak lou chin a, lungkham lua ing a, pau zoulou hi'ng. 5 Nidang lai ngaihtuah a, sawtpi-a a beisa kumte khawng ngaihtuah a, 6 zan laia ka lasakte phawkthak ing a, ka lungsunga thute suut ing a, ka lungsim in dong a: 7 Toupa'n eite hon paikheden dia hia? A deihsakna hon lak ngei nawn lou ding hia? 8 A itna muanhuai a mangden dia hia? A thuchiam zuau a suakden dia hia? 9 Pathian in zahngaih ding mangngilhta hia? Heha a lainatna lentaangta hia? chi hi'ng.
Sela
10 Tua khit a: Lungkham mah leng, hiai ka kihehnepna hi lai hi. Tungnungpen' khut taklam in a thilhih lai kumte thei gige ding hi'ng, chi-a ngaihtuah hi'ng. 11 Tangtawn Toupa' nasepte thei gige ding ing a, tanglaia na thillamdang hihte thei gige taktak ding hi'ng. 12 Na nasep khempeuh zong suutsuut ding ing a, na thilhihte gengen ding hi'ng. 13 Pathian aw, na lampite siangthou hi. Koute' Pathian banga thupi kua pathian ahia? 14 Nang zaw thillamdangte hihpa Pathian hi chin a, namte laka na vangletna suah na hi. 15 Nang na banthahata na mite, Jakob leh Josef suante tanta na hi.
Sela
16 Pathian aw, tuite'n nang hon mu hi. Tuite'n nang hon mu a, kilimzial uh a, tui thukpite nangawn liing uhi. 17 Meipite'n tui bawsuk uh a, vanpiging in vante thawn a, na thaltangte khawng vak zolzol hi. 18 Pingpei laka na vanpiging om a, khawphiate'n leitung taan a, lei liing a, kivuang hi. 19 Na lampi, tuipi tunga pai a, na lamtate tui tampi tunga pai a, na khekhapte lah kimu het lou hi. 20 Nang na mite belamhon banga Mosi leh Aron' khut zanga pii na hi.
Pathian' Pilna
Asaf Phatnala. Maskil 1 Ka mite aw, ka dan bil dawh un. Ka kama thute ngai un. 2 Gentehnate-a ka kam ka ding ing a, tanglai thilte, thil kiselte genkhe ding hi'ng. 3 Tua i zak uh, i pu i pate'n hon hilhsate hi uhi. 4 A tate uh laka iim lou ding hanga, Tangtawn Toupa' thilhih phathuaite, a thahatna leh a vangletna thilhihte khangsawn sawnte hilh ding hi hang. 5 Ahang bel, ama'n Jakob adinga a thusehte hihkip a, Israel gama a dan hihkip a, a tate uh sinsak ding uhi, chi-a i pu i pate thu na pia hi. 6 Tua bel, khangsawn sawnte'n tuate a theih nading uh, naungek piang nailoute nangawn in a tate uh a hilhsawn ding uh a deihna hi ahi. 7 Tua lah, Pathian tunga lametna a ngak theih nading uh, Pathian' nasepte a mangngilh louh nading uh, a thupiakte a zuih theih zawk nading uh hi ahi. 8 Tua ban ah, a pu a pate uh banga a om louh nading uh hi ahi. A pu apate uh khang genhak leh helhat hi uh a, a lungtangte uh Pathian adinga kip lou a, a lungsimte uh Pathian adinga muanhuai lou hiven. 9 Efraim suante, thalte-a kigalvan hinapi, kidou ni-a nungkik uh a, 10 Pathian' thukhun zui lou uh a, a dan zuih ding nial uhi. 11 A thilhihte, thillamdang a etsakte mangngilh uhi. 12 Ama'n Aigupta gama Zoan-a a pu a pate uh muh-a thillamdangte hih hi. 13 Tuipi kikhensak a, amaute pii galkai a, tuite baang banga dingkipsak hi. 14 Ama'n suna meipi-a amaute pii a, zan khawvaka meikuanga pii hi. 15 Gamdai-gemkeua suangpite hihtam a, amaute tuipi tui zah tui pia hi. 16 Tua suangpi heng apan tuinakte pawtsak a, a tuite luitui banga luangsak hi. 17 Ahihhanga ama' tunga khial lailai uh a, gamdai-gamkeua Tungnungpen tunga hel lailai uhi. 18 Thei gegu-a a lunggulh lam uh an ngena Pathian ze-et uh a, 19 Pathian nangawn gensia uh a: Pathian in gamdai-gamkeu ah ankuang hon lui thei dia hia? 20 En dih ua, suangpi a sat laia tui hong pawt a, luitui tampi luangkhia hi. An zong hon pe thei dia hia? A mite ading sa hon pe thei dia hia? chi uhi. 21 Tangtawn Toupa'n amaute' thugen a zak taka heh mahmah a, Jakob tunga a mei kuangkhia a, Israel tunga a thangpaihna sou hi. 22 Ahang bel, Pathian um lou uh a, a hutkhiakna zong muang lou uhi. 23 Hinapi-a ama'n tung vante thu pia a, van kongkhakte hong a, 24 mipite' nek dinga mana zusuksak a, amaute vaan apan an pia hi. 25 Mihingte'n vansawltakte' an ne uh a, a nek zawh zahzah uh an pia hi. 26 Vaante apan suahlam huih nungsak a, a vangletna-a simlam huih piikhia a, 27 amaute tunga leivui zaha, sa zusak a, tuipi gei sehnel zaha vasate zusak hi. 28 Ama'n tuate giahphual sunga puanbuk kiim tenga zusak a, 29 amaute'n vahtaka ne uhi. Ama'n a lunggulh uh pia hiven. 30 Ahihhanga a lunggulh uh an ne a dinkhiak ma ua, a kamsung ua an a om lai nangawna 31 Pathian' hehna a tung ua sou a, amaute laka sa hoihpenpente that a, Israel tangvalte phukpai hi. 32 Hitengpi hinapi, khial lailai uh a, thillamdangte mu napi um lou lailai uhi. 33 Tua bang ahih mana, a nite uh a phatuam loua beisak a, a kumte uh mulkimna-a beisak hi. 34 Pathian in amaute a thah peuhpeuh chianga, amaute'n amah zong nuam uh a, kilawptaka amah kianga kik uhi. 35 Pathian a Suangpi uh ahi, chih thei uh a, Pathian Tungnungpen, amaute' Tanpa ahi, chih thei thak uhi. 36 Ahihhanga a kam ua amah maitang phat uh a, a lei ua zuau hilh uhi. 37 A lungtangte uh ama' tunga kip lou a, a thukhuna zong muanhuai lou uhi. 38 Hinapi-a amah zahngaithei a, a tatsiatnate uh ngaidam a, amaute hihmangthang lou hi. Tamveipi a thangpaihna kideek a, a thangpaihna buchingsak nuam lou hi. 39 Sa lei ahi uh, chih leh huih hong nunga hong kik nawn lou bang lei ahi uh, chih thei gige hi. 40 Gammdai-gamkeua bangzah veitak ama' tunga hel a, bangzahta-a gammangthang sunga amah lungkhamsak tazen uh ahia! 41 Pathian ze-et zihzeh uh a, Israel Misiangthoupa lungkhamsak uhi. 42 A vangletna thei gige lou uh a, nuaisiahpa apan amaute a tatkhiak ni bang, 43 Aigupta gama chiamtehna lamdang a lah ni bang, Zoan-a thillamdang a lahte bang thei gige lou uhi. 44 Ama'n a luituite uh sisan suaksak a, luite apan tui dawn thei lou uhi. 45 Thoupihonte sawl a, amaute negai uhi. Upite sawl a, amaute hihsia uhi. 46 A haichinte uh khaupete pia a, a haigahte uh khaukhupte pia hi. 47 A grepguite uh gial in hihsia a, a theipite uh vuk in hihsia hi. 48 A bawngnoute uh gialpi dengsak a, a gantate uh keek dengsak hi. 49 Hihmangthang thei vansawltakte sawl a, a hehna nasia, a thangpaihna, a lunghihlouhna leh buaina amaute tunga tungsak hi. 50 A hehna ading lampite bawl a, sihna apan amaute hawi lou a, hipi thuak dinga amaute lehngatsan hi. 51 Ama'n Aiguptate' tamasa khempeuh hihmangthang a, Ham' puanbuk sungte-a pasal hat' gah masate hihmangthang hi. 52 Ahihhanga a mite bel belamhon banga piikhia a, belamte banga gamdai-gamkeua pii hi. 53 Bittaka amaute pii a, lau lou uhi. Ahihhanga a melmate uh bel tuipi khuhkhumsak hi. 54 Tua banga amaute a gam siangthou tun a, a khut taklama a laksa tanggam tun hi. 55 Amaute' maia nam dangte hawlkhia a, a gamte uh a goutan ding ua hawmsak a, Israel behte a inn chiat ua teengsak hi. 56 Ahihhanga amaute'n Pathian Tungnungpen ze-et uh a, ama' tunga hel uh a, a thusehte zui lou uhi. 57 A pu a pate uh banga muanhuai lou uh a, kilehhei uhi. Thalphel suihkhelh muanhuai lou bang uhi. 58 Biakna mun sangte bawl uh a, amah hihthangpai uh a, milimte-a a thikthusiatna tokthouuhi. 59 Pathian in tua bang a zak taka heh mahmah a, Israelte nolhta hi. 60 Ama'n mihingte laka a lam Shilo biakbuk taisan hi. 61 A thahatna thukhun singkuang saltanna-a khamang a, a thupina, melmate' khutsunga pelut hi. 62 A mite, namsaua thah dinga pia a, ama' goutan mahmahte tunga heh hi. 63 Mei in a tangvalte uh kangtum a, a nungakte uh pasal nei dinga khakkhiak om nawn lou hi. 64 A siampite uh namsaua thaha om uh a, a meigongte uh kah nangawn kap thei lou uhi. 65 Tua laitaka ihmu khanglou banga Toupa khanglou a, pasal hat zukham pengnawng khanglou banga khanglou hi. 66 Ama'n a melmate douthuk a, maizum tawntung dinga koih hi. 67 Tua khita, ama'n Josef puanbukte nolh a, Efraim beh teel lou a, 68 Judah beh, a it Zion Mual teel zaw hi. 69 A mun siangthou, mualsangte banga lam a, a hihkip den leitung banga lam hi. 70 A sila David teel a, belam huang apan lakhia hi. 71 Belam chinna apan amah la a, a mite Jakob leh a goutan Israel ching dinga bawl hi. 72 David in lungtang dik leh muanhuaia amaute ching a, siamneltaka amaute pii hi.
Jerusalem Hihsiatna Thukna
Asaf Phatnala. 1 Pathian aw, namte'n na goutan dou uh a, na tempul siangthou buahsak uh a, Jerusalem leivui suaksak uhi. 2 Na silate' siluangte, tungleng vasate an dinga pia uh a, na misiangthoute' sate, leitung gamsate' an dinga pia uhi. 3 A sisan suah uh, Jerusalem kimkota tui banga luangsak uh a, amaute vui ding kuamah om lou hi. 4 Ka invengte uh adinga muhdahhuai suak ung a, ka kiim ka kiang uate adinga simmawh leh nuihzabuk suak hi ung. 5 Tangtawn Toupa aw, bang tan hibanga om ding ka hi ua? Na heh den tel dia hia? Bangtan na thikthusiatna mei banga kuang ding ahia? 6 Nang hon saang lou namte tung ah na thangpaihna sungbua inla, na min lou nuam lou kumpigamte tung ah sungbua in. 7 Ahangbel, Jakob negai uh a, a tenna mun hihsia uh hiven. 8 Hun paisa-a ka pu ka pate uh' khelhnate koute tung ah bung ken aw. Koute adingin na zahngaihna hon sawl meng in, nakpitaka hihniama om hi ung. 9 Pathian ka Hondampa uh aw, na min thupi nadingin koute hon huh inla, na min vangin hon humbit inla, ka khelhnate uh khuh in. 10 Banghanga namte'n: A Pathian uh koia om ahia? chise ding uh ahia? Na silate' sisan luang phuba la na hi, chih ka mitmuh-un namte lak ah kithei hen. 11 Suangkul tangte' mauna na mai hong tung henla, sidinga mawhpaiha omte, na banthahatin humbit in. 12 Toupa aw, ka innvengte un nang hon selphouna uh, amaute tung ah a leh-sagih in thuk in. 13 Tua khit chiangin, kou na gantatna muna belamte'n hon phat tawntung ding hi ung. Nang phatna akhang akhanga gen kikkik ding hi ung.
Zahngaihna Ngetna
Lapulian ading. "Thukhun Lili" Kaih. Asaf Phatnala. Phatnala. 1 ISRAELTE Chingpa aw, Josef suante belam banga piipa Nang na bil hon dawh in. Nang cherubte kala teengpa hong taangkhia in. 2 Efraim, Benjamin leh Manase' mai ah na thahatna tokthou inla, hong paiin hon hondam in. 3 Pathian aw, koute hon tungding thak in. Hotdama ka om theih nadingun ka tung uah na mai taangsak in. 4 Tangtawn Toupa Pathian Vanglianpen aw, na mite' bangtan hehsan ding na hia? 5 Amaute khituia vak chin a, khitui belkuang dimdima dawnsak na hi. 6 Ka innvengte uh adinga phunna bul hon suaksak chin a, ka melmate un hon simmawh hi. 7 Pathian Vanglianpen aw, koute hon tungding thak in. Hotdama ka om theih nadingun ka tung uah na mai taangsak in. 8 Aigupta apan grepgui hon pua chin a, namte hawlkhia chin a, tua-a suan na hi. 9 Na suan nading mun hahsiang chin a, tua-a zungkha a, gam sung dim hi. 10 Mualte a liim in khuh a, a hiangte sidar singkung liante hiang bang hi. 11 A hiang liante Tuipi donga zam a, a hiang neute tua Luipi donga kizalh hi. 12 A kianga paite'n a gah a lawh theih nading ua, banghanga a umna daite hihgawp na hia? 13 Gamlak apan ngalte'n phukhia uh a, gamlak vasate'n ne uhi, 14 Pathian Vanglianpen aw, hon ngen hi ung, ka kiang uah hong kik in! Vantung apan hon ensuk inla hon mu in. Hiai grepgui veng in. 15 A guipi na khut taklam in a suan hi a, a hiang nang adinga na khoilet hi ahi. 16 Na grepgui meiin kihal a, kisattan a, na taihilhna-a na mite mangthang uhi. 17 Na taklama ompa tung ah na khut nga inla, nang adinga na khoilet mihing tapa tung ah khut nga in. 18 Tua chianga, nang apan pialkhe lou ding hi ung. Hon halhthaksak le chin, na min lou ding hi ung. 19 Tangtawn Toupa, Pathian Vanglianpen aw, koute hon tungdingthak in. Hotdama ka om theih nadingun, ka tung uah na mai taangsak in.
Thuman ding Pathian' Deih
Lapulian ading. Gittith Tumginga Sak. Asaf Phatnala. 1 I thahatna Pathian' mai ah, nuamin la sa unla, Jakob' Pathian' mai ah nakpi-in kikou un. 2 Tumging pan unla, khuangtate tum unla, kaihging kilawm leh pekging kilawm tum un. 3 Kha thak ni-in leh kha liik ni, i ankuanglui ni-in, pengkul mut un. 4 Ahang bel, hiai Israel adinga danthuseh hi a, Jakob' Pathian' thuseh hi ahi. 5 Ka theihlouh pau ka zakna gam Aiguta doua gamsung a totsuak laia, Jakob' Pathian in Josef adinga a hihkip theihpihna hi ahi. 6 Ama'n: Amaute' liangkou apan puakgik sangkhia ing a, a khutte uh lawh gik apan suaktasak hi'ng. 7 Mangbat laia hon sam uchin a, ke'n hon hukhia ing a, vanpiging omna meipi lak apan hon dawng a, Meriba tuite-a hon entel hi'ng.
Sela
8 Ka mite aw, za un, Israel aw, hon ngaikhe nuam lechin zaw, hon taihilh ding hi'ng! 9 Na lak ua gamdang' pathian a om ding hi lou hi. Gamdang' pathian zong na biak ding uh hilou hi. 10 Aigupta gam apan hon lakhepa ka hi. Na kam uh liankat un, sungdim ding hi'ng. 11 Ahihhanga ka mite'n ka aw ngai nuam lou uhi. Israel in kei hon deih lou hi. 12 Tuachi-a, a lungtang genhak bang ua gamta ding leh, a lemtheih bang uh zui dinga amaute khahzan hi'ng. 13 Ka mite'n ka thu ngaikhe mai le u zaw! Israel in ka lampi tawn mai le zaw! 14 Ke'n a melmate uh zawhsak dinga, a galte uh dou a, ka khut liik mah ding hivengin! 15 Tangtawn Toupa mudahte a maia tonsak ding ing a, amaute gawtna Tangtawn daihsak ding ing a, 16 noute an hoihpena hon vak a, suangpi apan khuaizu-a hon taisak ding hivengin! chi hi.
Israel Vaihawm Diktatloute
Asaf Phatnala. 1 Leitung mihat kikhawmte laka Pathian ding a, pathiante tunga thu khen hi. 2 Bangtan diktatloutaka vaihawm ding na hi ua? Bangtan mi diktatloute deihsak tuam ding na hi ua? chi hi.
Sela
3 Mi hatloute leh pabeite' makhua khualin gum unla, mizawngte leh nuaisiahna thuakte' hamphatna hu un. 4 Mi hatloute leh tasamte humbit unla, mi diktatloute' khutsung apan suaktasak un. 5 Aman: Amaute'n thei lou uh a, theihsiam zong theisiam lou uhi. Miallaka vialpai uh a, leitung kingakna suangphumte liing uhi. 6 Ken: Noute khempeuh pathiante hi na hi uh. Tungnungpen' tate hi mah na hi uh. 7 Ahihhanga, mihingte bang leia si ding hi uchin a, vaihawm makai dangte banga puk ding na hi uh, chi hi'ng, chi hi. 8 Pathian aw, kisa inla, leitung thu khen in. Namte khempeuh na goutan hiven.
Melmate' Manthatna Ngetna
La. Asaf Phatnala. 1 Pathian aw, dai dide ken. Pathian aw, kamsim kenla, om maimai ken. 2 Na melmate a kitawhthawh dan uh, nang hon mudahte a dakkhiaktak dan uh en in. 3 Pil lepchiahtakin na mite dou dingdan simsawm uh a, na deihthawhte dou dinga thu kikum uhi. 4 Amaute kikum uh a: Hong pai unla, nam a hihna uh hihbei ni. Israel min kithei gige nawn kei hen, chi uhi. 5 Amaute'n lungsim munkhata thil gilou sawmkhawm uh a, nang langa panga thukhun bawlkhawm uhi. 6 Amaute Edomte leh Ishmaelte' puanbukte Moabte leh Hagarte' puanbukte, 7 Gebalte, Amonte leh Amalekte, Filistiate, Turate' puanbukte hi uhi. 8 Asuria nangawnin amaute kizoppiha a thahatna Lot' suante kheelsak hi.
Sela
9 Midiante tunga na hih bangin Kishon luia Sisera leh Jabin tunga na hih bangin, amaute' tung ah hih in. 10 Tuate bel Endor-a mangthang uh a, leilaka nin paih bang hi uhi. 11 A uliante uh Oreb leh Zeeb bangsak inla, a vaihawm makaite khempeuh uh Zeba leh Zalmuna bangsak in. 12 Tuate'n: Pathian' gantatna loupa munte tang ni, kichi uhi. 13 Ka Pathian aw, amaute leivui khu leng bangin bawl inla, huihmut leeng buhsi bangin bawl in. 14 Gamlak mei in a kattum bangin, meikuang in mualtungte a peh bangin, 15 Na pingpeiin amaute delh inla, na huihpi-in lausak in. 16 Tangtawn Toupa aw, mite'n na min a zon nadingun, hiai mite' maitang maizumnain khuh in. 17 Amaute maizumin mangbang uh henla, ahi, maizumin zahlak den uhen. 18 Tuachi-a Tangtawn Toupa' min nei nang kia na hi, chih leh, nang kia leitung khempeuha Tungnungpen na hi, chih thei ding uhi.
Pathian tawh Tenkhawm a Nopna
Lapulian ading. Gath Tumginga Sak. Kora' Tapate' Phatnala. 1 Tangtawn Toupa Vanglianpen aw, na tenna mun kilawm hi nah e! 2 Ka hinna in Tangtawn Toupa' huangsung ngaia sawlsam hialta hi. Pathian hing ngaia ka lungtang leh ka sa kikoukhia hi. 3 Kawlgitte nangawnin inn nei uh a, phialphiah in zong a nou neih nading bu nei hi. Ahi, Tangtawn Toupa Vanglianpen ka Kumpipa leh ka Pathian aw, na maitamte ngai hi'ng. 4 Na inn-a teengte mi nunnuam hi a, nang hon phat gige uhi.
Sela
5 A hatna uh nanj? apan mute, na tenna mun zuana khualzin lunggulha sawm tintente, mi nunnuam hi uhi. 6 Beka Phaizanga a pai lai ua, tuinakte mun suaksak uh a, phavang vuahte'n zong vualzawl hi. 7 Ziona Pathian maia a kilat mateng uh, thahatna apan thahat semna tawh pai uhi. 8 Tangtawn Toupa Pathian Vanglianpen aw, ka thumna za inla, Jakob' Pathian aw, bil hon dawh in.
Sela
9 Pathian aw, ka lumte uh en inla, deihsakna tawh na Thaunilhpa maitang en in. 10 Ahang bel, mundanga ni sang khat om sanga, na huangsunga ni khat om hoihzaw hiven. Diktatlouhna puanbuk sunga teen sanga ka Pathian' inn kongkhak ngaka pan ut zaw hi'ng. 11 Ahang bel, Tangtawn Toupa Pathian, ni hi a, lum hi ahi. Tangtawn Toupa'n deihsakna leh pahtawina pe ding a, genbaang loua gamtate adinga thilhoih it ngei lou ding hi. 12 Tangtawn Toupa Vanglianpen aw, nang hon muang mi, mi nunnuam hi ahi.
Halhthakna Ngetna
Lapulian ading. Kora' Tapate' Phatnala. 1 Tangtawn Toupa aw, na gam adinga deihsakna langsak chin a, saltanna apan Jakob piikik na hi. 2 Na mite' mawhna ngaidam chin a, a khelhnate khempeuh uh khuhsak na hi.
Sela
3 Na thangpaihna khempeuh heimang chin a, na hehna sousang kiheisan na hi. 4 Pathian ka Hondampa uh aw, koute hon tungding thak inla, ka tung ua na lungnoplouhna koihmang in. 5 Ka tung uah na heh den dia hia? Ka tung uah akhang akhang dongin na heh dia hia? 6 Na mite nangmaha ka lungnop nadingun, ka hinna uh non halhthaksak nawn kei dia hia? 7 Tangtawn Toupa aw, na itna muanhuai hon musak inla, na hotdamna hon pia in. 8 Tangtawn Toupa Pathian in a gen ding ngaikhe ding hi'ng. Ahang bel, ama'n a mite leh a misiangthoute kianga lungmuanna thuchiamte pe ding hiven. Ahihhangin amaute haina lam ah kik nawn kei uhen. 9 A thupina i gama a teen theih nadingin, amah laudan siamte adinga a hotdamna nai taktak hi. 10 Itna muanhuai leh thutak kituak a, diktatna leh khamuanna kitawp hi. 11 Leitung apan thutak poutou a, vantung apana diktatna in ensuk hi. 12 Tangtawn Toupa' n thil hoih pe taktak ding a, i gam in a gah suah ding hi. 13 A mai ah diktatna pai a, a kalsuan nading lampi bawlsak hi.
Sinsakna Ngetna
David' Thuumna. 1 Tangtawn Toupa aw, bil hon dawh inla, hon dawng in. A zawng leh tasam hi ing. 2 Ka hinna humbit in, nanga kipumpiak hi ing. Ka Pathian hi chin a, na sila nang hon muang hon hondam in. 3 Toupa aw, ka tung ah zahngai in, sun nitum tuma hon sam hi'ng. 4 Toupa aw, na sila' hinna hon kipaksak in. Ahang bel, Toupa aw, na maia ka hinna hon liiktou hi'ng. 5 Ahang bel, Toupa nang hoih chin a, ngaidam dinga mansa hi chin a, nang hon samte tunga zahngaihna hau hi vechin. 6 Tangtawn Toupa aw, ka thumna za in, zahngaihna ngena ka kikounate ngaikhia in. 7 Ka mangbat ni-a nang hon sam ding hi'ng, ahang bel, nang hon dawng ding hi vechin. 8 Toupa aw, pathiante laka nang bang kuamah om lou hi. Na thilhihte tehpihbei hi uhi. 9 Toupa aw, na siamsa namte khempeuh hong pai ding uh a, na min pahtawi ding uhi. 10 Ahang bel, nang thupi chin a, thillamdangte nang hih hi a, nang kia Pathian hi vechin. 11 Tangtawn Toupa aw, na lampite kei hon sinsak in, na thutak zuia pai nuam hi'ng. Na min ka lau theih nadingin, lungtang thuah neilou hon pia in. 12 Toupa ka Pathian aw, ka lungtang khempeuha nang hon phat ding ing a, na min pahtawi tawntung ding hi'ng. 13 Ahang bel, kei lama na itna muanhuai lian a, hankhuk thuk apan ka hinna humbitta hi vechin. 14 Pathian aw, mi kiliansakte'n hon suai uh a, mi ngongtatte'n ka hinna lak sawm uh a, nang hon ngaisang lou uhi. 15 Ahihhanga Toupa aw, Nang zaw lainatsiam leh hehpihsiam, lungnel, itna leh muanhuaina-a thutaka dim Pathian hi na hi. 16 Kei lam hong nga inla, ka tung ah zahngai in. Na sila adingin na thahatna hon pia inla, na silanu' tapa hon hondam in. 17 Ka melmate'n a muh ua, a maizum nadingun, ka tung ah na hoih chih, a chiamtehna hon pia in. Ahang bel, Tangtawn Toupa aw, nang hon huhta a, hon khamuanta hi vechin.
Pathian Khawpi Zion Thupina
Kora Tapate' Phatnala. La. 1 Ama'n Mual siangthou tunga a suangphum phum a, 2 Tangtawn Toupa'n Jakob' teenna mun teng sanga Zion kongpite it zaw hi. 3 Na tungthu ah thil thupite kigen hi, nang Pathian khawpi aw.
Sela
4 Kei hon theite laka Rahab leh Babulon minlawh ding hi'ng. Filistia, Tura leh Kush aw, hiai mi Ziona piang ahi, chi ding hi'ng. 5 Ahi, Zion tungthu-a, hiai mi, tua mi, hiai khawpi-a piang ahi, Tungnungpen mahmah in hiai khawpi kipsak ding hi, kichi ding hi. 6 Tangtawn Toupa'n mite' min a kikhum chianga, hiai mi zaw Ziona piang ahi, chi-a chiamteh ding hi.
Sela
7 Lasate leh tumging tumte'n: Ka lungnopna tuikhuk khempeuh uh nangma' sunga om hi, chi-a sa ding uhi.
Gimthuakna apan Sapna
La. Kora' tapate' Phatnala. Lapulian ading. "Mahelath Leannoth" Kaih. Ezra mi Heman' maskil. 1 Tangtawn Toupa ka hotdamna Pathian aw, sun leh zana na maia kikou hi'ng. 2 Ka thumna na mai ah hong tung hen. Ka kikou aw bil na dawh in. 3 Ahang bel, ka hinna in lungkhamna a thuak kichingta a, ka hinna in hankhuk naih mahmah hiven. 4 Kawkhuka paisukte tawh simkhawm hi ing a, thahatnabei mi bang hita hi'ng. 5 Misiluangte tawh tui taihkhawm bang, thahsa hankhuka lum na theih gige nawnlouhte bang leh na kepna khut apan satkhiaksate bang hita hi'ng. 6 Kawkhuk thuknapen thukpi, a mialna muna hon sialta na hi. 7 Na thangpaihna ka tunga gik hi, na tuihualte khempeuh in hon tum pahpah hi.
Sela
8 Ka lawm naipente kei apan lamang chin a, amaute' mitmuha muhthadahhuaia hon bawl na hi. Khumchipa om ing a, suakta theilou hi'ng. 9 Gimthuakna hanga ka mitte mialta hi. Tangtawn Toupa aw, nisima nang hon sam ing a, nang lama ka khutte zakta hi'ng. 10 Misite adingin thillamdangte na hih dia hia? Misite' khate hong thouin, nang hon phat ding ua hia?
Sela
11 Hankhuk sung ah na itna a kiphuang ahia? Manthatna mun ah na muanhuaina zong a kigen dia hia? 12 A mialna mun ah na thillamdang hihte a kithei dia hia? Mangngilhna gam ah zong na diktatna thilhih a kithei dia hia? 13 Ahihhangin, Tangtawn Toupa aw, nang kiang ah ahi ka kikoukhiak. Ahi, zingsanga ka thuumna na maia hong tungtou hi. 14 Tangtawn Toupa aw, banghanga ka hinna paikhia na hia? Banghanga kei apan na mai sel na hia? 15 Ka tuailai nungsang, gimthuaksaka om ing a, si dinga mansa gige hi ing. Na mulkimhuaina thuak ing a, chimawha om hi'ng. 16 Na thangpaihna nase mahmah in hon khuh a, na mulkimhuainate'n hon kongkawsak hi. 17 Sun nitum tuma tuilian banga hon kimkot uh a, hon tummang sipsip uhi. 18 Kei hon it mi leh ka lawm hon lakmangsak venveng chin a, kei hon theite miallaka hon selmangsak na hi.
Pathian' Thuchiamte Ngetna
Ezra-mi Ethan' Thusuut Maskil. 1 Tangtawn Toupa' itna la-a sa tawntung ding hi'ng. Na muanhuaina khangsawn sawnte kianga kama theisak ding hi'ng. 2 Ke'n: Na itna kipden ding hi, chih leh, na muanhuaina vantung nangawna kipsak ding na hi, na chikhinta hi'ng. 3 Nang: Ka miteelpa tawh kala thu khungta ing a, ka sila David kianga kichiamta ing a: 4 Na chisuan kipsak ding ing a, na kumpitutphah khangsawn sawn donga kipsak ding hi'ng, chi na hi.
Sela
5 Tangtawn Toupa aw, vante'n na thillamdangte phat ding a, misiangthou kikhawmte laka na muanhuaina phat ding hi. 6 Ahang bel, tung vaana kua tawh Tangtawn Toupa kiteh thei ding ahia? Vantungmite laka zong Tangtawn Toupa bang kua om eita? 7 Misiangthou kikhawmte laka Pathian nakpitaka lauh ding hi a, amah a kiima vaihawm upate sanga lauhuai zaw a, mulkimhuai zaw hi. 8 Tangtawn Toupa Pathian Vanglianpen aw, nang banga hat kua om ahia? nang, na muanhuaina in hon uum zawmah lai hi. 9 Nang tuipi kihawt zuazua uk chin a, a tuihualte a kisep chianga daisak sipsip na hi. 10 Nang, galthahte laka khat banga Aigupta khenzan chin a, na banthahata na melmate thehzak na hi. 11 Vaante nanga hi a, leitung zong nanga hi ahi. Leitung leh a sunga omte nangma' siamkhiak hi ahi. 12 Mallam leh simlam zong nangma' siam hi ahi. Tabor leh Hermon in na min lungnoppih uhi. 13 Nang banthahat nei chin a, na khut hat a, na khut taklam pahtawia om hi. 14 Na kumpitutphah kibulphuhnate, diktatna leh dika thukhenna hi uhi. Na maia itna muanhuai leh thutak pai hi. 15 Lungnopna aw ging theisiamte mi nunnuam hi uhi! Tangtawn Toupa aw, amaute na ompihna vaka pai uhi. 16 Sun nitum tuma na min lungnoppih uh a, na diktatna-a kipak uhi. 17 Ahang bel, a thahatna thupina uh nang hi chin a, na deihsakna-a ka kii uh pahtawia om hiven. 18 Ahang bel, ka lum uh Tangtawn Toupa-a hi a, ka kumpipa uh Israel' Misiangthoupa hiven. 19 Nang tua laia mengmuhna tungtawna na Misiangthou kianga thu gen chin a: Galhatpa kianga thahatna pia ing a, mipite laka teelkhiak tangval pahtawi hi'ng. 20 Ka sila David mukheta ing a, amah ka sathau siangthou nilhta hi'ng. 21 Ka khut in amah kipsak ding a, ka bantha in amah hatsak taktak ding hi. 22 Meima kuamah in amah apan siah kai lou ding a, migilou kuamah in zong amah nuaisiah lou ding hi. 23 A galte a maia zansak ding ing a, amah doua langpangte satpai ding hi'ng. 24 Ka itna muanhuai in amah zui ding a, ka min tungtawna a kii pahtawia om ding hi. 25 Tuipi tunga a khut koih ding ing a, luite tunga a khut taklam koih ding hi'ng. 26 Ama'n kei hon sam ding a: Nang ka Pa na hi, ka Pathian, ka Hotdamna Suangpi na hi, hon chi ding hi. 27 Ke'n amah ka tamasa, leitung kumpipate laka pahtawi pena bawl ding hi'ng. 28 Ama' tunga ka itna kipsak ding ing a, amah tawh kala ka thukhun zuau ngeilou ding hi. 29 A chisuan zong kipsak den ding ing a, a kumpitutphah zong van omsung teng om ding hi. 30 A tapate'n ka dan lehngatsan a, ka thukhenate zui lou a, 31 Ka dan palsat a, ka thupiakte a zuih kei uleh, 32 a tatlekna uh chianga gawt ding ing a, a mawhna uh chianga sata gawt ding hi'ng. 33 Ahihhanga amah ka itna lakik lou ding ing a, ka muanhuaina in zong zuausan lou ding hi. 34 Ke'n ka thukhun palsat lou ding ing a, ka kam in a gensa khelkik lou ding hi. 35 Khatvei ka siangthouna pansana setden dinga kichiamta ing a, David tunga ka zuau gen lou ding hi'ng. 36 A chisuan omden ding a, a kumpitutphah zong ka maia hi banga omden ding hi. 37 Khapi banga hihkipa omden ding a, vana theihpihna muanhuaia omden ding hi, chita na hi.
Sela
38 Ahihhanga paikhia chin a, nolh chin a, na thaunilhpa tunga heh mahmah chin a, 39 na sila tawh kala na thukhun tawpsan chin a, a kumpilukhu leivui laka ninsak na hi. 40 A daite khempeuh phuvang a, a kulhpi muanhuaite sesak dimdem na hi. 41 A kianga paite khempeuh in amah lok uh a, a innvengte' simmawh suakta hi. 42 Amah doute' khut taklam tawisang chin a, a melmate khempeuh lungnuamsak na hi. 43 A namsau ha lehheisak chin a, kidouna-a amah huh lou na hi. 44 A thupina beisak chin a, a kumpitutphah leilak denna-a nei na hi. 45 A tuailai nite tomsak chin a, maizumna-a amah khuh na hi.
Sela
46 Tangtawn Toupa aw, bangtan hi ding ahia? Na kisel den dia hia? Bangtan na thangpaihna mei kuang ding ahia? 47 Ka damsung tom dan thei gige in. Bangmahlou dinga mihingte khempeuh bawl na hi-a hia? 48 Bang mihing ahia sihna thuak lou dinga hing thei a, hankhuk vangletna peel dinga kihu thei? 49 Toupa aw, a thupi na itna masa, thutaka David kianga na kichiamna koia omta ahia? 50 Toupa aw, na silate zahlaksaka ka om dan uh thei gige inla, namte khempeuh' hon zahlaksakna lungtanga ka thuak dan uh thei gige in. 51 Tangtawn Toupa aw, na melmate'n hon zahlaksakna uleh, na thaunilhpa' kalsuan chiteng a zahlaksak dan uh thei gige in. 52 Tangtawn Toupa phatin om tawntung hen. Amen, Amen.
Damsung Nite Simdan Ngetna
Pathian' Mi Mosi' Thumna. 1 Toupa, nang a khang a khanga ka teenna uh na hi. 2 Tangte mualte pian ma-a leitung leh leitung mite na bawlkhiak ma-a, Tangtawn apan Tangtawn donga Pathian hi na hi. 3 Nang mihingte leivui suaksak chin a: Mihing tate aw, leivui ah kik un, chi na hi. 4 Nang mitmuha kum 1,000 zong a beisa zanni bang lei hi a, zan veen khat sung bang lei hi ahi. 5 Tuilian banga amaute taimang chin a, khang khat ihmu bang lei hi uh a, zingsang loupa dawnkhia bang lei hi uhi. 6 Zingsanga hong dawnkhia a, hong khang a, nitak lama mual a, vuaigawp hi. 7 Ahang bel, na hehna in hon kangtum a, na thangpaihna in hon mulkimsak hi. 8 Ka mawhnate uh na maia koih chin a, a sima ka khelhnate uh na mei vaka phoulak hi vechin. 9 Ka damsung nite uh na thangpaihna nuaia mang taktak a, ka damsung kumte uh thuum huthut-a beisak zel hi ung. 10 Ka damsung uh kum 70 hi a, hatna a nei bang hile-ung kum 80 zong hi thei hi. Hinapi-a a sawtna zong sepgim leh lungkhamna lei hi a, bei pah a, lengmang hi ung. 11 Na hehna vanglet dan kua'n thei ahia? Na hehna zaw na lauhuaina zahzaha mulkimhuai hi. 12 Pilna lungtang ka neih lawh hiai nadingun, ka damsung nite uh simdik dan hon sinsak in. 13 Tangtawn Toupa aw, hong kik in, bangtan heh ding na hia? Na silate tung ah lainatna nei in. 14 Ka damsung teng ua nuama ka kipah theih nadingun, zingkhangin na itna muanhuaiin hon taisak in. 15 Nang non hihgim ni zahzah leh, thil hoihlou ka tan kum zahzah uh, hon kipaksak in. 16 Na silate kiang ah na nasep kilang henla, na thupina a tate uh kiang ah kilang hen. 17 Toupa ka Pathian uh' deihsakna ka tung uah om hen. Ka khut nasep uh koute adingin hon hihkipsak inla, a hi, ka khut nasep uh hihkip in.
Pathian' Ompihna Bitna
1 Tungnungpen' neih bukna muna kisela teeng mi, Pathian Vanglianpen' liim nuaia tawldam gige ding hi. 2 Tangtawn Toupa' tungthu ah: Amah ka bukna leh ka kulhpi hi. Amah ka Pathian hi a, amah muang ding hi'ng, chi ding hi'ng. 3 Ama'n vasabeng mi' thang apan hon humbit ding a, hileeng lauhuai apan hon humbit ding hi. 4 Ama'n a khate-a nang hon khuh ding a, a khalim nuaia bu ding na hi. A muanhuaina na lum lian leh na lum neu hi ding a, 5 zanlaia mulkimna lau lou ding chin a, suntang laia thaltang leeng zong lau lou ding na hi. 6 Miallaka hileeng zong lau lou ding chin a, sunlaia siatna zong lau louding na hi. 7 Na siik ah 1,000 pukin, na taklam ah 10,000 puk mah leh, sihna in nang hon naih lou ding hi. 8 Na mita en lei ding chin a, mi diktatloute' gamtatna mu lei ding na hi. 9 Ahang bel, ka bukna ahipa Tangtawn Toupa tua Tungnungpen mah na teenna-a bawlta na hih leh, 10 na tunga thil hoihlou tung lou ding a, natpi zong na puanbuk naiha tung lou ding hi. 11 Ahang bel, ama'n na tungthu-a a vansawltakte thu pe ding a, na lampi tenga hon veeng ding uh hiven. 12 Suanga na khe na tah khak louh nadinga amaute'n khuta hon na dom ding uhi. 13 Humpinelkai leh mualtan sik ding chin a, humpinelkai lunlai leh gulpi sikden ding na hi. 14 Tangtawn Toupa'n: Ama'n kei hon it mana amah hukhe ding hi'ng. Ama'n ka min a theihsak mana amah domkhetou ding hi'ng. 15 Ama'n kei hon sam ding a, dawng ding hi'ng. A lungkham chianga ompih ding ing a, hukhe ding ing a, pahtawi lai ding hi'ng. 16 Damsawtna-a amah taisak ding ing a, ka hotdamna musak ding hi'ng, chi hi.
Toupa Phat a Hoihna
Phatnala. Sabbath ni ading. 1 Tangtawn Toupa tunga kipahthu gen hoih a, Tungnungpen aw, na min phata lasak hoih hi. 2 Zingsang beltaka na itna phuankhiak hoih a, zan tenga na muanhuaina phuankhiak hoih hi. 3 Ahi, kaihging gui sawm tawh, gawsem tawh, kaihging tawh, ging kilawm bawl a, hiai hih ding hi'ng. 4 Ahang bel, Tangtawn Toupa aw, nang na nasep hoiha hon kipaksak chin a, na khut nasepte hanga nuama la sa ding hi'ng. 5 Tangtawn Toupa aw, na nasepte thupi hi na tel e! Na ngaihtuahnate thuk hi na tel e! 6 Khawphawklou mi in hiai theilou a, mihai in zong hiai theisiam lou hi. 7 Mi diktatloute loupa banga hong dawnkhiain thil gilou hihte khempeuh lawhching tadih mah leh, hihmanthata om veve ding uhi. 8 Ahihhanga Tangtawn Toupa aw, nang zaw pahtawia om gige na hi. 9 Ahang bel, Tangtawn Toupa aw, na melmate, na melmate mahmah mangthang taktak ding uh a, thil gilou hihte thehzak hi taktak ding uh hiven. 10 Ahihhanga kei' ki bel gam bawngtal ki banga pahtawita chin a, sathau manpha nilha om hita hi'ng. 11 Ka melmate tunga tung ka muh nop, ka mit in muta a, kei hon dou migiloute' tungthu ka zak nop, ka bil in zata hi. 12 Midiktatte tumsing banga khanpha ding uh a, Lebanon sidar singkung banga khanglian ding hi. 13 Tangtawn Toupa' innsunga kisuana i Pathian' huang sunga khanpha ding uhi. 14 Upat nung nangawna gah lailai ding uh a, tuipai kiihkeiha hing dipdip gige ding uh a, 15 Tangtawn Toupa dika tang a, amah ka Suangpi hi a, amah-a diktatlouhna himhim omlou hi, chih phuang ding uhi.
Tangtawn Toupa' Vaihawmna
1 Tangtawn Toupa'n vai hawm a, thupina zahtakhuaina silh hi. Tangtawn Toupa'n thupina Zahtakhuaina silh taktak a, hatna-a kithuam lai hi. Leitung khuavannuai kiptaka a lamkhiak hi a, kiliing lou ding hi. 2 Na kumpitutphah tanglai pek apan hihkipsa hi a, nang zaw Tangtawn Tangtawna omsa na hi. 3 Tangtawn Toupa aw, tuite khangtou a, tuikhangliante ging honhon a, ahi, tuipi tuihualte kivawksang hi. 4 Vansanga Tangtawn Toupa vanglianpen a, tui tampi ging sanga thupi zaw hi. 5 Ka theihpihna thute kip a, Tangtawn Toupa aw, na inn zepna siangthou hi a, tua bang hi tawntung hi.
Phulakna Pathiana
1 Tangtawn Toupa Pathian aw, phulakna nang-a hi, Pathian aw, phulakna nanga hi, taangkhia in! 2 Leitung thukhenpa aw, kisa inla, kisatheite thuk in. 3 Tangtawn Toupa aw, bangtan ahia, bangtan ahia mi diktatloute kipaka a tawmtawm ding uh? 4 Zumna mei theiloute'n kiotsakna thu sekhia khia uh a, thil gilou hihte kiphat phat uhi. 5 Tangtawn Toupa aw, na mite nehtamgawp uh a, na goutan nuaisiah uhi. 6 Meigong leh mikhual hihlum uh a, pabeite that uhi. 7 Amaute'n: Tangtawn Toupa'n mu kei, Jakob' Pathian in phamawh sa kei, chi uhi. 8 Mite laka khawphawkloute aw, limsak un. Mihaite aw, chik chianga pii ding na hi ua? 9 Bil bawlpa'n za lou ding hia? Mit bawlpa'n mu lou ding hia? 10 Namte sinsakpa'n gawt lou ding hia? Sinsakpa'n theihna nei lou ding hia? 11 Tangtawn Toupa'n mihing' suangtuahte thei a, a hawmpi ahi, chih thei hi. 12 Tangtawn Toupa aw, na taihilh mi mi nunnuam hi ahi. Na dan na sinsak mi mah mi nunnuam hi ahi. 13 Tua bel, mi diktatloute adinga kawkhuk a kikhuak mateng, lungkham ni-a amah na dawnzang theih nading ahi. 14 Ahang bel, Tangtawn Toupa'n a mite nolh lou ding a, a goutan taisan ngeilou ding hiven. 15 Thukhenna zaw diktatna tunga kibulphuh kik ding a, lungtang tangte khempeuh in tua zui ding hi. 16 Kei adinga migilou hon dousak dinga kua kisa ding ahia? Thil gilou hihte dou dinga kei adinga kua ding ding ahia? 17 Tangtawn Toupa'n kei hon panpih lou hi leh, ka hinna sihna-a dai dideta ding hi. 18 Ka khe taai, ka chih chianga, Tangtawn Toupa aw, na itna in hon na len hi. 19 Lunggimna ka sunga a letluat chianga, non khamuannate'n ka hinna kipaksak hi. 20 Kineksiatna tutphaha tute'n thusehte pansana gimna tun uhi. Nang tuate tawh kipawlna na nei dia hia? 21 Amaute bel, midiktatte' hinna doua kizawnkhawm uh a, mawhneiloute' sisan mawhpaih uhi. 22 Tangtawn Toupa bel ka Kulhpi muanhuai hong hi a, ka Pathian zong ka bukna Suangpi hong hi ahi. 23 Ama'n amaute' khelhna thuk ding a, a gitlouhna uh thuk a, hihmangthang ding hi. Tangtawn Toupa i Pathian in amaute hihmangthang ding hi.
Toupa Biakna
1 Hong pai unla, Tangtawn Toupa pahtawiin lungnuamin la sa ni aw. I hotdamna Suangpi phatin nakpitakin kikou ni. 2 Kipahthu genin a mai ah pai ni, tumging leh phatnala tawh amah phat ni. 3 Ahang bel, Tangtawn Toupa Pathian thupi mahmah a, pathian khempeuh tunga Kumpipa hiven. 4 Ama' khut sunga leimun thuktakte om a, mualdawn sangte ama-a hiven. 5 Tuipi ama-a hi a, ama' bawlsa hi a, gamhul zong a khuta a bawlsa hiven. 6 Hong pai unla, amah biain kun ni e, Tangtawn Toupa eite hon bawlpa' mai ah khukdin ni. 7 Ahang bel, amah i Pathian hi a, eite a gantatna muna gamta mite leh, a chin belamhonte hi ve hang. Ama'n: Tuni-a a aw na zak chiangun, na lungtang uh khauhsak kei un. 8 Meriba-a na hih bang uleh gamdai-gamkeua Masa-a na hih bangun, na lungtang uh khauhsak kei un. 9 Tua ah na pu na pate un ka thilhihte mu napi-in kei hon enkhiain hon ze-et uhi. 10 Kum 40 sung tua khangte tunga heh ing a: A lungtang ua lampial gige nam hi uh a, ka lampite thei lou uhi, chi hi'ng. 11 Tua bang ahih mana, thangpaia kichiam zena: Ka khawl tawldamna ah lut ngei kei un teh, chi-a phuang hi'ng, chi hi.
Pathian' Thupina
1 Tangtawn Toupa' mai ah la thak sa unla, Leitung bup aw, Tangtawn Toupa mai ah la sa un. 2 Tangtawn Toupa' mai ah la sa unla, a min phat un. Nisimin a hotdamna phuang un. 3 Namte lak ah a thupina phuang unla, mi khempeuh lak ah a thilhih lamdangte phuang un. - helna, chihna. ze-etna, chihna. 4 Ahang bel, Tangtawn Toupa lian a, phattaak penpen a, amah pathian dangte teng sanga lauh zawk ding hiven. 5 Namte' pathiante khempeuh lah milim mannabei hi lei a, Tangtawn Toupa bel vante bawlpa hiven. 6 Ama' maia thupina leh letna om a, a mun siangthoua thahatna leh thupina om hi. 7 Namte laka innkuante aw, Tangtawn Toupa' kiang ah: Nang na thupi, nang na hat chi-in, thupina pia un. 8 Tangtawn Toupa kiang ah a min tawh kikhom thupina pia un. Thillatte tawi unla, a huang sung ah hong lut un. 9 A thupina kilawmna leh siangthouna bangin, Tangtawn Toupa bia unla, leitung bup a mai ah liing un. 10 Namteng lak ah: Tangtawn Toupa'n vaihawm hi. Leitung phutkippa amah hi a, liing lou ding hi. Ama'n deihsak tuam nei lou a, namte tunga vaihawm ding hi, chi-in gen un. 11 Vaante nuam uh henla, leitung kipak hen. Tuipi leh a sunga omte khempeuh in mualthawn bangin thawnsak hen. 12 Gamte leh a sunga omte kipak uhen. Tua chiangin, gammaang singkungte khempeuh in nuama Tangtawn Toupa' maia la sa ding uhi. 13 Ahang bel, amah hong pai dek a, leitung thukhen dinga hong pai dek hiven. Ama'n leitung bup tunga diktattaka thu khen ding a, a muanhuaina bangbanga mi khempeuh tunga thu khen ding hi.
Toupa'n Vaihawm
1 Tangtawn Toupa'n vaihawm hi. Leitung nuam henla, tuikulh gam khempeuh kipak hen. 2 Meipi leh mial sah bekbuk in amah um kimvel a, A kumpitutphah kingakna suangphum diktatna leh dika thukhenna hi ahi. 3 A mai ah meikuang paikhia a, a kimkot ah melmate kangtum hi. 4 A khawphiate'n leitung taanvak puappuap a, leitung in mu a, liing hi. 5 Tangtawn Toupa' mai ah mualte khuainun bangin zui a, leitung khempeuh neipa Toupa' mai ah zulkhin hi. 6 Vaante'n ama' diktatna phuang uh a, mite khempeuh in a thupina mu uhi. 7 Suihthawh milim bete khempeuh, milim kisaktheihpihte khempeuh maizumsakin om uhen. Nou pathiante khempeuh in amah bia un. 8 Tangtawn Toupa aw, na thukhennate Zion in za a, kipak a, Judah' tanute nuamta uhi. 9 Ahang bel, nang Tangtawn Toupa zaw leitung khempeuh tunglampek, sangpi-a om chin a, pathian khempeuh tunglam peka pahtawia om hi vechin. 10 Nou Tangtawn Toupa itte'n gitlouhna hua un. Ama'n a misiangthoute' hinna humbit a, mi diktatloute' khutsung apan hondam hi. 11 Midiktat tunga khawvak taangkhia a, lungtang tangte tunga lungnopna taangkhia hi. 12 Nou midiktatte aw, Tangtawn Toupa ah kipak unla, a min siangthou thei gigein kipahthu gen un.
Tangtawn Toupa Phat dinga Sapna
Phatnala. 1 Tangtawn Toupa' mai ah la thak sa un aw! Ahang bel, ama'n thillamdangte hihta a, a khut taklam leh a baan siangthou in amah vualzousak hiven. 2 Tangtawn Toupa'n a hotdamna theisak a, namte kianga a diktatna laakkhia hi. 3 Ama'n Israel innkawte a itna zuaulou leh a muanhuaina thei gige a, lei mong dong in i Pathian' hotdamna muta hi. 4 Leitung khempeuh aw, Tangtawn Toupa tung ah kipakin kikou unla, tumging tawh thuahin kipahluatna aw suahin a phatna la sa unla, 5 Tangtawn Toupa phatin kaihging tawh la sa unla, kaihging tawh thuahin la sa un. 6 Pengkul ging tawh, belamtal ki tawh, Tangtawn Toupa Kumpipa' mai ah nuamin kikou un. 7 Tuipi leh a sunga om khempeuh leh leitung leh a sunga om khempeuh thawn henla, a ging dawngkik uhen. 8 Tangtawn Toupa' mai ah luite'n khut beng uh henla, mualte'n nuamin la sakhawm uhen. 9 Ahang bel, amah leitung thukhen dinga hong pai dek hi. Ama'n diktatna tawh leitung khempeuh thu khen ding a, khentuam neilou-a mite tunga thu khen ding hiven.
Pathian Pahtawina
1 Tangtawn Toupa'n vai hawm hi, mite liing uhen. Amah cherubte kal ah kumpitutphah tunga tu hi, leitung liing hen. 2 Zion ah Tangtawn Toupa lian a, namte khempeuh tunglam ah pahtawiin om hi. 3 Na min thupi leh mulkimhuai phat uhen amah siangthou hi. 4 Kumpipa' thahatna in dika thukhenna it hi. Deihsaktuam neihlouhna hihkip chin a, Jakob-a a dik a tanga vaihawmna leh diktatna tangtungsak na hi. 5 Tangtawn Toupa i Pathian pahtawi unla, a khengakna ah bia un, amah siangthou hi. 6 A siampite lak ah Mosi leh Aron om uh a, A min loute lak ah Samuel om hi. Amaute'n Tangtawn Toupa sam uh a, ama'n dawng hi. 7 Ama'n meipi khuampi apana amaute houpih a, amaute'n ama' piaksa theihpihnate leh thusehte zui uh hi. 8 Tangtawn Toupa ka Pathian uh aw, nang amaute dawng chin a, a thilhih giloute uh thuk zel mah lechin, amaute adinga ngaidam Pathian hi na hi. 9 Tangtawn Toupa i Pathian pahtawi unla, a mual siangthou ah bia un. Ahang bel, Tangtawn Toupa i Pathian siangthou hiven.
Kipaka Tangtawn Toupa' Nna Sep
Phatnala. Kipahthu Gen nading. 1 Leitung khempeuh aw, Tangtawn Toupa tung ah nuamin kikou un. 2 Kipaktakin Tangtawn Toupa' nna sem unla, lungnuamtaka la sa kawmin a mai ah hong pai un. 3 Tangtawn Toupa zaw Pathian ahi, chih thei un. Eite hon bawlpa amah hi a, A mite hi hang a, a gantatna muna gamta belamte hi i hi. 4 Kipahthu genin a kongpite ah lut unla, phatna tawh a huangsung ah lut un. Ama' tung ah kipahthu gen unla, a min phat un. 5 Ahang bel, Tangtawn Toupa hoih a, a itna Tangtawn daih hi a, a muanhuaina a khang a khanga om tawntung hiven.
Nuntakna Siangthou
David-a. Phatnala. 1 NA itna leh dika na thukhenna lain sa ning e, Tangtawn Toupa aw, nang phatna lain sa ning. 2 Genbaangloua nungta dinga pilvang ding hi'ng chik chianga ka kianga hong pai ding na hi de aw! Ka innsunga lungtang genbaangloua gamta ding hi'ng. 3 Thil hoihlou himhim ka mitmuha koih lou ding hi'ng. Lampialte' nasep mudah ing a, keia belh lou ding hi. 4 Lungtang siatna in kei hon gamlat ding a, gitlouhna tawh kisai lou ding hi'ng. 5 A sima a innveng gensia peuhmah phiatmang ding ing a, kisathei mit leh kisathei lungtang peuhmah thuak thei lou ding hi'ng. 6 Gamsunga mi muanhuaite tunga ka mit tu ding a, kei tawh tengkhawm ding uhi. Genbaangloua gamtate khempeuh in ka nna sem ding hi. 7 Khemna zang mi kuamah ka inna teeng lou ding a, zuau gen mi kuamah ka maia ding lou ding hi. 8 Gam sunga mi diktatloute khempeuh hihmangthang pah ding ing a, thil gilou hih mi peuhmah, Tangtawn Toupa' khawpi apan satkhe ding hi'ng.
Misiangthou' Thumna
Gimthuakmi' Thumna. A Bah laia Tangtawn Toupa' maia Mangbat Thu a Tut. 1 Tangtawn Toupa aw, ka thumna za inla, huhna ka nget na kiang hong tung hen. 2 Ka lungkham ni-in kei apan na mai sel ken. Na bil hon dawh inla, kon sap ni-in hon dawng pahpah in. 3 Ahang bel, ka damsung nite meikhu bang leia mangpah zel hi a, ka guhte zong thukkhuk banga sa hiven. 4 Ka lungtang maibuak in ne a, loupa banga keugawp a, annek ding nangawn mangngilhta hi'ng. 5 Ka thuum ka mauna husa hanga ka guhte ka sa-a belhkhinta hi. 6 Gamdai simbupi bang hi ing a, khawtul simbutanglit bang hita hi'ng. 7 Lum ing a, ahihhanga ihmut mu tuan lou hi'ng. Inntung kawlgit thawmhau bang hita hi'ng. 8 Sun nitum tuma ka melmate'n hon tawng uh a, hon gensete'n hon hamsiat uhi. 9 Tuachi-a meivu an-a nei ing a, ka zudawn lah khitui tawh kihel hi ahi. 10 Na thangpaihna thupitak hanga hon dom a, hon lawnmangsuk na hi. 11 Ka damsung nite lah nitaklam limliap bang hi a, loupa banga vuaigawp pah hi'ng. 12 Tangtawn Toupa aw, nang zaw Tangtawn daih hi chin a, a khang a khanga na min kithei gige ding hi. 13 Nang thou ding chin a, Zion tunga zahngaihna nei ding na hi. Ahi, na deihsakna huna hun seh bang tungta hiven. 14 Ahang bel, na silate'n a suangte nangawn deihthawh uh a, a leivuite nangawn nuamtuam uh hiven. 15 Namte'n Tangtawn Toupa' min lau ding uh a, leitung kumpipate khempeuh in na thupina zahtaak ding uhi. 16 Ahang bel, Tangtawn Toupa'n Zion lamthak ding a, a thupina tawh hong kilang ding hiven. 17 Ama'n a chimawhte' thumna dawng ding a, a ngetnate uh simmawh lou ding hi. 18 Hiai thu khangsawn sawnte adinga kigelh ding hi. Hiai bel mi kisiam lai dingte nangawn in Tangtawn Toupa a phat theih nading uh hi ahi. 19 Tangtawn Toupa'n tung sanga a mun siangthou apan ensuk a, van apan leitung mu hi. 20 Ama'n suangkul tangte' thum leh mau za ding a, si dinga mawhpaihte khahkhe ding hi. 21 Tua hun chianga, Tangtawn Toupa' min Ziona kiphuang ding a, amah phatna Jerusalema kiphuang ding hi. 22 Namte leh kumpigamte, Tangtawn Toupa be dinga a kikhopkhawm hun chianga tua tung ding hi. 23 Ama'n lampi-a ka thahatna zawngkhalsak a, ka damsung nite tomsak hi. 24 Ke'n amah kianga: Ka Pathian aw, hon lamang kenla, ka damsung nite tomsak ken. Nang kumte zaw a khang a khanga bei lou ding hi. 25 Nang a chila leitung kingakna suangphum phum chin a, vante na khutsuak hi ahi. 26 Tuate hong mangthang ding uh a, ahihhanga nang bel omden na hi. Tuate puansilh banga hong lui ding uh a, puansilh banga kheng ding chin a, paihkhiaka om ding uhi. 27 Ahihhanga nang bel a ngeingeia omden ding na hi. Na kumte zong bei ngei lou ding hi. 28 Na silate' tate hing gige ding uh a, a suante uh na maia hihkipa om ding uhi, chi hi'ng.
Toupa Phatna
David' Phatnala. 1 Ka hinna aw, Tangtawn Toupa phat in. Ka sunga omte khempeuh aw, a min siangthou phat un! 2 Ka hinna aw, Tangtawn Toupa phat inla, ama'n thil hoih hon hihsakte khempeuh mangngilh ken. 3 Amah ahi na khelhnate khempeuh ngaidam a, na chinatna khempeuh damsak. 4 Amah ahi manthatna apan na hinna tankhia a, itna leh lainatna hon khusak. 5 Amah ahi thil hoiha hon taisak a, na tuailaina muvanlaia banga thaksak zel. 6 Tangtawn Toupa'n nuaisiahna thuakte khempeuh adinga diktatna leh a dik a tanga thukhenna tungsak ding hi. 7 Ama'n Mosi kianga a lampite theisak a, Israel tate kianga a thilhihte theisak hi. 8 Tangtawn Toupa zaw lainatsiam leh hehpihsiam hi a, hehhak, lungnel leh itna muanhuai hau hi ahi. 9 Ama'n eite hon taai gige lou ding hi, heh zong heh gige lou ding hi. 10 Ama'n i khelhnate banga i tunga thil hih lou a, i tatsiatnate banga hon thuk lou hi. 11 Ahang bel, lei sanga van a sanzawk banga, amah laute adinga a itna lian hiven. 12 Tumlam apan suahlam a gamlat banga eite' tatleknate koihmangta hi. 13 Pa in tate a lainat banga Tangtawn Toupa'n amah laute lainat hi. 14 Ahang bel, ama'n i pumpi kibawl dan thei a, leivui leltak i hih dan thei gige hiven. 15 Mihing zaw a damsung nite loupa bang lei hi a, gampalak pak banga hong lun a, 16 ahihhanga huih in tua pak a mut chianga, beimang pah a, a omna mun nangawn kithei nawn lou hi. 17 Ahihhanga Tangtawn Toupa' itna bel, amah laute tunga Tangtawna omden a, a diktatna zong a tate uh' tate tunga omden hi. 18 Ama' thukhun zuite tung ah leh, a thupiak zui dinga thei gigete tung ah, a itna leh diktatna omden hi. 19 Tangtawn Toupa'n vantung ah, a kumpitutphah hihkip a, a kumpigam in mi khempeuh uk hi. 20 Nou a vansawltakte, hatna-a vualtungtuangte leh a thumangte aw, a thugen ngaihsakin, Tangtawn Toupa phat un, 21 Nou a thilsiam honpite leh a nasemte leh a deihlam hihte khempeuh aw, Tangtawn Toupa phat un. 22 Ama' kumpigam ah mun khempeuha ama' nasepte khempeuh in amah phat un. Ka hinna aw, Tangtawn Toupa phat in.
Thilsiampa Pathian Phatna
1 Ka hinna aw, Tangtawn Toupa phat in! Tangtawn Toupa ka Pathian aw, nang zaw thupi mahmah na hi. Pahtawina leh letna silh na hi. 2 Vaak, puan banga silh chin a, vaante puanbuk banga zak na hi. 3 Ama'n inndan tungnung zawlpite tui tung ahte khung a, meipite kangtalaia nei a, huih khate tunga tuang hi. 4 Ama'n huihte a thupua-a zang a, meikuangte a nasema zang hi. 5 Ama'n leitung, a suangphumte tunga hihkip a, liing ngeilou ding hi. 6 Puansilh banga tui thukpi-a leitung khuh chin a, tuite lah mualte tunglama ding hi. 7 Nang amaute na taihilh chianga taimang uh a, na vanpiging aw a zak chiang ua kintaka paimang uhi. 8 Mualte tungtawna luangtou uh a, luikuamtea luangsuk uh a, amaute adinga na sehna mun muna om chiat uhi. 9 Tua banga tuite a luanzak louh nading leh, leitung khuh dinga hong kik louh nadinga gamgite khung na hi. 10 Luikuam thuktea tuinakte luangsak chin a, mual kaltea luang uhi. 11 Gamlak gamsate khempeuh dawn dinga luituite pia uh a, gamlak sabiltungte' dangtak phasak uhi. 12 Huihkhua-a vasate'n luite gei khawnga bu nei uh a, singhiangtea la sa uhi. 13 Ama'n a inndan tungnung apan mualte tui buak a, a nasep gahtea leitung taisak hi. 14 Ama'n ganhonte adinga loupate pousak a, mihing adinga sing leh louhingte pousak hi. Tua bel, ama'n lei apan an nekding a sepkhiak theih nading hi ahi. 15 Ama'n mihing' lungtang kipaksak dinga zu pia a, a mai taangsak dinga sathau pia a, a lungtang hatsak dinga an pia hi. 16 Tangtawn Toupa' sing suansa Lebanon sidar singkungte'n tui kham uhi. 17 Tua singkungtea vasate'n bu sep uh a, vakengsang in zong taksing kungtea inn nei hi. 18 Mualsangte zong sakelte ading hi a, kawlhengte zong zusapite bukna hi ahi. 19 Khapi in khawhunte khen a, ni in zong tum hun thei hi. 20 Nang mial tungsak chin a, zan hong hi a, gamlak gamsate khempeuh gamta uhi. 21 Humpinelkaite'n samat ding ngik a, humham uh a, Pathian apan an zong uhi. 22 Ni hongsuak a, kigelmang vek uh a, a kuate ua kik a, kual uhi. 23 Tua hun chianga mihing a nasem dinga kuankhia a, nitaklam donga sem hi. 24 Tangtawn Toupa aw, na nasep bangzah hita zen ahia! Na pilna-a tuate khempeuh bawl chin a, na siamsa ganhingtea leitung dim hi. 25 Tuipi a leta lian, a zata za om a, tua sunga simseng louh ganhingte dim a, thil hing a neu a lian kiching hi. 26 Tua ah longliante a suk a tunga pai a, tua-a mawl dinga na bawl leviathan zong om hi. 27 Hiaite khempeuh in a hunhuna an pe dinga nang hon ngak uhi. 28 Amaute'n na piak peuhpeuh tomkhawm uh a, na khut na zakkhiak chianga thil hoiha tai uhi. 29 Na maitang sel chin a, buaia lungkham pah uhi. A nakna hu uh lakmangsak chin a, si uh a, leivui suak uhi. 30 Nang na Kha sawlkhia chin a, amaute siama hong om uh a, leitung mei thaksak na hi. 31 Tangtawn Toupa' thupina in Tangtawn daih henla, Tangtawn Toupa a nasepte ah nuam hen. 32 Ama'n lei en a, lei liing a, mualte lawng a, khu lunglung hi. 33 Ka damsung teng Tangtawn Toupa phat la sa ding ing a, a hina ka hin sung teng, ka Pathian phata la sa ding hi'ng. 34 Ka thusuutte ama' lungtaina hi hen. Kei bel, Tangtawn Toupa-a nuam ding hi'ng. 35 Mikhialte leitung apan mang uh henla, mi diktatloute om nawn kei uhen. Ka hinna aw, Tangtawn Toupa phat in. Tangtawn Toupa phat un.
Tangtawn Toupa' Muanhuaina
1 Tangtawn Toupa tungah kipahthu genin a min sialin sam unla, a thilhihsa gena, namte lak ah theisak un. 2 Ama' mai ah la sa unla, amah phatla sa un. A thilhih lamdangte khempeuh gen un. 3 A min siangthou sial unla, Tangtawn Toupa zongte khempeuh' lungtang nuam hen. 4 Tangtawn Toupa leh a thahatna mitsuan unla, a maitang zong gige un. 5 A thilhih lamdangte thei gige unla, a chiamtehna lamdangte leh thukhenna a genkhiakte thei gige un, 6 a sila Abraham' suante aw, a teelte Jakob' tapate aw. 7 Amah Tangtawn Toupa, i Pathian hi a, a thukhennatein leitung teng dim hi. 8 Ama'n a thukhun thei gige a, thu a piak khang 1,000 donga thei gige hi. 9 Tua thukhun Abraham tawh kala a khun, Isak kianga kichiama a kipsak theigige hi. 10 Ama'n Jakob kianga tua thuseh mah kipsak kik a, Israel kianga Tangtawn thukhuna hihkip kik a: 11 Kanan gam goutana na tantuan dinga hon pe ding hi'ng, chi hi. 12 Amaute a tawm lai ua, tawm taktak uh a, tua gama mikhuala om uhi. 13 Nam khat apan nam dang kianga pem uh a, kumpigam khat apan kumpigam dang tung uhi. 14 Hinapi-a ama'n amaute nuaisiah dinga kuamah phal lou a, amaute guma kumpipate taihilh zaw a: 15 Ka thaunilhte khoih kei un, ka kamsangte hihna kei un, chi hi. 16 Ama'n gam tunga kialpi samkhesuk a, a an neihsa khempeuh uh hihsiatsak a, 17 amaute' maia mi khat Josef sawl a, amah sala khota om hi. 18 A khete kolbulha dulhsak uh a, a ngawnga zong sikkol bulh uhi. 19 Amah mah in thil hong tung ding a na genkholhsa a tunkim mateng leh, Tangtawn Toupa' thu in amah a ettelkhit mateng, tua banga om nilouh hi. 20 Tua khita kumpipa'n amah khahsak a, mipite ukpa'n amah noplensak hi. 21 Kumpipa'n a innsung ukpa-a amah bawl a, a neih khempeuh uksak hi. 22 A deih bangbanga a vaihawm makaite a thunun nading leh, a upate pilna a sinsak nadinga thuneihna pia hi. 23 Tua khita Israel zong Aigupta gam hong lut a, tuachi-a Ham gama Jakob taam hi. 24 Tangtawn Toupa'n a mite nakpitaka pungsak a, a melmate uh sanga hatzaw-a bawl hi. 25 Ama'n a mite mudah dinga Aiguptate' lungtang heisaka, a silate tunga pilkheltaka gamta dinga amaute bawl hi. 26 Tua laia ama'n a sila Mosi leh a teelsa Aron sawl a, 27 amaute'n a chiamtehna thillamdangte hih uh a, Ham gama a thillamdangte hih uhi. 28 Ama'n mial sawl a, tua gam mialsak hi ahang bel, amaute ama' tunga hel uh hilou maw? 29 Ama'n a tuite uh sisan suaksak a, a nasemte uh sisak hi. 30 A gam ua upite dimsak a, a vaihawm makaite uh' lupna dantan sung nangawn dim uhi. 31 Ama'n thu gen a, chippihon hong tung a, gam sung khempeuha chippite hong dim hi. 32 Ama'n gamsung tenga gialpite vuahin zusak a, khawphia khawng tawh kithuah hi. 33 A grephuante uleh theipi kungte uh denggawpsak a, a gam ua singte nangawn denggawp uhi. 34 Ama'n thu gen a, khaukhupte hong tung a, khaupete nangawn simsenglouha hong tung uhi. 35 Tuate'n a gam ua singte, louhingte negai uh a, leigahte khempeuh tawh negai uhi. 36 Ama'n tua gama ta masa, thahatna ta masate khempeuh hihmangthang hi. 37 Ama' Israel, ngun leh kham pua-a piikhia a, Israel behte laka a hatlou himhim om lou hi. 38 Amaute a paikhiak tak ua, Aiguptate kipak hi. Ahang bel, Israel kihtakna in amaute khuhta hiven. 39 Ama'n khuhna dinga a tung ua meipi zak a, zana vak taangsak dinga meikuang pia hi. 40 Amaute'n ngen uh a, ama'n vengkengte pia a, van ana amaute taisak hi. 41 Ama'n suangpi kitamsak a, tui hong kikhawhkhia a, gamdai-gamkeua tui luang hi. 42 Ahang bel, ama'n a thuchiam siangthou leh a sila Abraham thei gige hiven. 43 Ama'n a mite kipaktaka piikhia a, a telsate lungnopna kikou aw tawh piikhia hi. 44 Ama'n namte' gamte amau pia a, midangte sepsa luah uhi. 45 Tua bel, a thusehte a zuih ua, a dante a zuih theih nading uh hi ahi. Tangtawn Toupa phat un.
Khelhna Kiphuanna
1 Tangtawn Toupa phat un, Tangtawn Toupa tung ah kipahthu gen un. Amah hoih hi, a zahngaihna in Tangtawn daih hi. 2 Kua'n Tangtawn Toupa' nasep thupite phuangkhe thei ding ahia? Ahih kei leh, kua'n a phatna genseng ding ahia? 3 A dik a tanga thukhenna tawh gamta mi mi nunnuam hi a, diktatna thil hih gigete mi nunnuam hi ahi. 4 Tangtawn Toupa aw, na mite na deihsakna tawh kei hon thei gige inla, na hotdamna tawh hong veh in. 5 Tua hi leh, na teelsate adinga na thilhih hoihte mu thei ding ing a, na minamte lungnopna zong tanpih a, nang phatna tawh na goutan hon tanpih thei sam ding hi'ng. 6 Ka pu ka pate uh' banga na khialta ung a, tatsetaka na gamtata unga, diktatloutaka na khawsata hi ung. 7 Ka pu ka pate un Aigupta-a na thillamdang hihte ngaihsun lou uh a, na itna simsenglouhte thei gige lou uh a, Tuipi tua Tuipi San geia hel zawsop uhi. 8 Hinapi-a Tangtawn Toupa'n ama' min vanga amaute hondam a, ama' vangletna thupi a theihsak theih nading hi ahi. 9 Ama'n Tuipi San taai a, kangsatta a, gamdai-gamkeua pai banga tui thukpi-a amaute pii galkai hi. 10 Amaute mudahpa' khut sung apan amaute hondam a, meima' khut sung apan amaute tankhia hi. 11 Tui in amau doute tummang a, khat leltak zong suakta lou uhi. 12 Tua khita, a thute um uh a, amah phat la sa uhi. 13 Ahihhanga, ama' nasep mangngilh pah uh a, a thuhilhna ngak lou uhi. 14 Gamlakpi-a nakpi-a duhgawl uh a, gamdai-gamkeua Pathian ze-et uhi. 15 Ama'n a nget uh pia a, ahihhanga a hinna ua gawnna tungsak hi. 16 Amaute'n giahphuala Mosi leh Tangtawn Toupa adinga sehtuam Aron haza uhi. 17 Lei hong kamka a, Dathan nawmvalh a, Abiram pawlte tummang hi. 18 Amau' pawl laka mei hong kuangkhia a, mi diktatloute kangtum hi. 19 Horeb-a bawngnou lim kibawl uh a, sunthawh sik milim bia uhi. 20 Loupa ne bawngtal lima a Thupina uh khek tazen uhi. 21 Amaute' Hondampa Pathian mangngilh uhi. Amah lah Aigupta gama thil thupi hihpa hi ngai a! 22 Ham' gama thil mulkimhuaite hihpa, Tuipi San geia thillamdang luate hihpa lah amah hi ngai a! 23 Tuachi-a ama'n amaute hihmanthat ding thu gen hi. A thangpaihna heimang dinga a maia awngvanga a teelpa Mosi ding lou hileh, amaute hihmangthang khinta ding hi. 24 Tua khita amaute'n tua gam hoih simmawh uh a, ama' thu um lou uhi. 25 A puanbuk khawng ua phun uh a, Tangtawn Toupa' thu limsak lou uhi. 26 Tuachi-a ama'n amaute doua khut liik zena kichiam a, gamdai-gamkeua amaute puksak ding leh, 27 a suan a khakte uh, namte laka puksak ding leh, gam tenga nawhzak ding sawm hi. 28 Amaute lah Peora Baal tawh kizom uh a, misite kianga lat kithoihna sa ne uhi. 29 A thilhihte ua amah hihthangpai uh a, amaute laka hipi hong tung hi. 30 Tua laia amaute laka Fineha dingtoua palaia pang hi. Tuachi-a hipi damsaka om hi. 31 Tua a thilhih ama' adinga akhang a khanga diktatna-a kisimsak hiden hi. 32 Meriba tuitea amah hihthangpai uh a, amaute hanga Mosi tunga thil hoihlou hong tung hi. 33 Ama' Kha tunga a hel man ua, a kam in khatak thu gen hi. 34 Amaute'n Tangtawn Toupa' thupiak banga tua gam mite hihmangthang lou uhi. 35 Zentel namte tawh kithei uh a, a gensiatnate uh sin zawsop uhi. 36 Amau' pathiante bia uh a, tuate amaute adinga thang suak hi. 37 Dawite' maia a tapate uleh a tanute uh laan uhi. 38 Mawhneiloute' sisan suah uh a, a tapate uleh a tanute nangawn uh Kanan milimte maia laan uh a, amaute' sisan suah uhi. Tua banga tua gam sisana hihbuaha om hi. 39 Amau' nasepte maha kihihbuah uh a, a thilhih ua kizuak suak uhi. 40 Tua bang ahih mana Tangtawn Toupa' hehna a mite tunga kuang a, ama' goutan mahmah kih hi. 41 Ama'n amaute khut sunga amaute pia a, amau mudahte'n amaute uk uhi. 42 A melmate un zong amaute nuaisiah uh a, a khut nuai ua koih uhi. 43 Ama'n tamveipi amaute humbit a, ahihhanga amau' lungput bangbanga hel teitei uh a, a mawhna uh hanga hihniama om uhi. 44 Hinapi-a ama'n a kahnate uh a zak chianga, a thuaknate uh thudon zel hi. 45 Amaute hanga a thukhun phawk gige a, itna thupi a hauh bangbanga a hehna beisak zel hi. 46 Amaute sala kaite khempeuh' mitmuha A lainat mite hi dinga amaute bawl hi. 47 Tangtawn Toupa, koute' Pathian aw, koute hon hondam inla, na min siangthou phat ding leh, na phatna-a nuam dingin, namte lak apan hon kaikhawm in. 48 Tangtawn Toupa, Israel Pathian, Tangtawn Tangtawna phatin om hen! Mi khempeuh in: Amen! chi hen. Tangtawn Toupa phat un!
Kipahthu Genna
1 Tangtawn Toupa tung ah kipahthu gen un. Amah hoih a, a itna in Tangtawn daih hi. 2 Tangtawn Toupa' tatsate, meima' khut apan a tatsate, 3 gam teng apan a kaihkhawm, suahlam leh tumlam leh mallam leh simlam apan a kaihkhawmte'n kipahthu gen un. 4 Pawlkhatte gamdai-gamkeu ahte vakvak uh a, teen nading khawpi mu lou uhi. 5 Gilkial dangtakte om uh a, a hinna uh bah a, kiam hi. 6 Tua bang hun chianga lungkhama Tangtawn Toupa sam uh a, ama'n a mangbatna uapan humbit hi. 7 Ama'n amaute lampi tanga pii a, a teen nading uh khawpi tun hi. 8 Tangtawn Toupa' itna muanhuai hang leh, mihingte adinga a thilhih lamdangte hangin a tung ah kipahthu gen uhen. 9 Ama'n a dangtakte dawnsak a, a gilkialte thilhoiha taisak hiven. 10 Pawlkhatte miallak leh sihna lim nuaia tu uh a, thuakgim leh sikkola hena om uhi. 11 Ahang bel, amaute'n Pathian thu dou-a hel uh a, Tungnungpen' thilhih simmawh uh hiven. 12 Tua banga ama'n sepgimna-a a lungtang uh kunsak a, kisui uh a, huh ding kuamah om lou hi. 13 Tua bang hun chianga lungkhama Tangtawn Toupa sam uh a, ama'n a mangbatna uapan amaute hukhe zel hi. 14 Ama'n miallak apan leh sihna lim nuai apan amaute piikhia a, henna khainiangte tansak hi. 15 Mite'n Tangtawn Toupa' itna muanhuai leh mihingte adinga thillamdang a hihte hangin, a tung ah kipahthu gen uhen. 16 Ahang bel, sumsan kongpite hihgawp a, a kaihna sikzawlte tum nih suah hi. 17 Pawlkhatte a hel nalam ua mihai hong suak uh a, a tatsiatnate uh hanga thuakgim uhi. 18 A hinna un an himhim kih a, sihna kongpi naih uhi. 19 Tua bang hun chianga lungkhama Tangtawn Toupa sam uh a, ama'n a mangbatna uapan hukhe zel hi. 20 Ama'n a thu sawlkhia a, amaute damsak a, siatna apan amaute hukhia hi. 21 Tangtawn Toupa' itna muanhuai leh mihing tate tunga a thilhih lamdangte hangin a tung ah 22 kipahthu gen uh henla, kipahthu genna kithoihna laanin, a nasepte lungnopna latein phuang uhen. 23 Tuipi tunga longa pai a, tuitunga sumsinte'n, 24 Tangtawn Toupa' nasepte leh tuipi thuktaka a nasep lamdang mu uhi. 25 Ama'n thu pia a, huihpi nungsak a, tua in tuipi tuite kiloksak hi. 26 Tuate vaan suna kivawktou uh a, tui thuktak tungsuk zel uhi. A dinmun uh lauhuaina hanga hin lamet beia om uhi. 27 Zukham banga lehlam lehlama awn uh a, kimuktuk dekdek uh a, lawhngaihna theiloua om uhi. 28 Tua hun chianga lungkhama Tangtawn Toupa sam uh a, ama'n a mangbatna uapan piikhe zel hi. 29 Ama'n huihpi thengsak a, tuihualte dai sipsip hi. 30 Tua banga hong daih sipsip chianga kipak uh a, ama'n a lunggulh uh longkhawlna muna pitung zel hi. 31 Tangtawn Toupa' itna muanhuai hang leh mihingte adinga thillamdang a hihte hangin, mite'n ama' tung ah kipahthu tun uhen. 32 Mi kikhawmte lak ah amah pahtawi uh henla, upa vaihawm kikhawmte lak ah amah phat uhen. 33 Ama'n luite gamkeu suaksak a, tuinakte zong leikeu suaksak hi. 34 Gahsuah thei gam hoih zong gahsuah theilou gam suaksak a, a sunga teengte a gitlouh man uh hi zel hi. 35 Ama'n gamdai-gemkeu zong tui tamna mun suaksak a, leikeunate zong tuinak luanna suaksak zel hi. 36 Ama'n tua ah gilkialte teengsak a, luah ding khawpi lam uhi. 37 Loute bawlin grephuante bawl uh a, tuate'n gah tampi suah uhi. 38 Ama'n amaute vualzawl a, nakpitaka hong pung uhi. A gantate uh zong kiamsak lou hi. 39 Nuaisiahna, tuahsiatna leh lungkhamnate hanga amaute hong kiam uh a, niamsaka om uhi. 40 Ama'n makaite iplah a, lampi om louhna gamdai-gamkeua amaute vakvaisak hi. 41 Ahihhanga ama'n tasamte bel a gimthuakna uapan domkhia a, a innkuante uh belamhon banga pungsak hi. 42 Midiktat in tua mu a, nuam a, migiloute khempeuh kamsim uhi. 43 A pii peuhmah in hiai thilte ngaihsak henla, Tangtawn Toupa' itna nasepte ngaihtuah hen.
Pathian Vualzawlna
La. David' Phatnala. 1 Pathian aw, ka lungtang kip a, la sain ka hinna pumpi tawh phatna gingsak ding hi'ng. 2 Kaihging leh tumging aw, khanglou un! Phalvak nangawn phawng ding hi'ng. 3 Tangtawn Toupa aw, namte laka hon phat ding ing a, Mihonte laka nang tungthu la-a sa ding hi'ng. 4 Ahang bel, na itna lian a, vaante sanga sangzaw a, na muanhuaina in vaante suntou hiven. 5 Pathian aw, vaante tunglam pek ah, pahtawiin om inla, na thupina leitung teng dim hen. 6 Na itte hutkhiak a hih theih nadingun na khut taklamin hon hondam inla, hon huh in. 7 Pathian in a mun siangthou apan thu genta a: Vualzoua Shekhem huikhe ding ing a, Sukoth Phaizang tehkhe ding hi'ng. 8 Gilead keia hi a, Manase keia hi a, Efraim zong ka siklukhu hi a, Judah lah ka kumpichiang hi ahi. 9 Moab ka puansawp kuang hi a, Edom tunga ka khedap paih inga, Filistia tunga vualzoua kikou hi'ng, chi hi. 10 Kua'n kulhnei khawpi-a kei hon tun ding ahia? Kua'n Edoma hon makaih ding ahia? 11 Pathian aw, nangmah hilou na hi maw koute hon nolh a, ka sepaihhonte uh tonpih nawn lou? 12 Melmate douin huhna hon pia in, mihing huhna zaw a mawkna hi ahi. 13 Pathian tawh panga vualzou ding hi ung. Ama'n ka melmate uh sikden ding hi.
Thukhenna Ngetna
Lapulian ading. David' Phatnala. l Ka phatpa Pathian aw, dai didein om ken! 2 Ahang bel, diktatloute leh khemhatte'n kei hon douin kamka uh a, leia zuauthu gena kei hon dou uhi. 3 Muhdahna thu gena ka kimkota hon um uh a, a san beipi-a kei hon suai uhi. 4 Ka itna thukna-a kei hon hekte suak uh a, ahihhanga kei zaw thum mi hi mah hi'ng. 5 Ka hoihna thil hoihlou-a hon thuk uh a, ka itna muhdahna-a hon thuk uhi. 6 Amah dou ding mi diktatlou koih inla, a taklam ah hekmi dingsak in. 7 A tunga thukhenna a tun chiangin, diktatlouhna tang henla, a thuumna in amah khialsak hen! 8 A damsung nite tawm henla, ama' makaihna dinmun midang in luah hen. 9 A tate pabeiin om uh henla, a zi zong meigong suak hen. 10 A tate vakvai uh henla, khut dawh uhen. A inn sesate uapan hawlmangin om uhen. 11 Leiba sik mi'n a neih teng laksak henla, gamdang mite'n a sepsa sut hen. 12 A tunga zahngai ding kuamah om kei henla, pabeia om a tate zong a deihsak ding kuamah om kei hen. 13 A suan a khakte satkhiakin om henla, khangsawn sawnte lak apan a min uh thaimangin om hen. 14 A pu apate' mawhnate Tangtawn Toupa' maia theih gigein om henla, a nu' khelhna kinulmang kei hen. 15 Amaute theih gigena leitung apan a beisak nadingin, Tangtawn Toupa' mai ah a khelhnate uh om gige hen. 16 Ahang bel, ama'n itsiamna suah ding ngaihtuah ngeilou a, lungtang tamkhamte thah theih nadinga, mizawng leh tasamte gimbawl zaw hiven. 17 Hamsiat ding kilawp hiven, ama' tung tu hen. Vualzawl ding nopsakna neilou hiven, vualzawlna in amah gamlat hen. 18 Ama'n hamsia puana silh a, a pumpi ah tui bangin lut a, a guhte ah sathau bangin lut hi. 19 Tua hamsia in puanak tungsilh bangin amah tuam henla, kawnggak bangin amah gak gige hen. 20 Kei hon heekte leh hon gensete tunga Tangtawn Toupa' thukna hibang hi hen. 21 Ahihhangin, Tangtawn Toupa Pathian aw, nang zaw na min vangin ka tung ah siam inla, Na itna thupi-in ka hinna humbit in. 22 Kei zaw mizawng leh tasam hi'ng a, ka sunga ka lungtang liam hi. 23 Nitaklam limliap banga mang hiaihiai ing a, khaupete banga sinkhiaka om hi'ng. 24 Anngolhna-a ka khukte zaw a, ka sa gawnggawp a, ka tha nem hi. 25 Kei hon heekte adinga simmawh hi ing a, hon muh chiang ua lu hon sinkhum uhi. 26 Tangtawn Toupa ka Pathian aw, hon huh in, na itna tawh kituakin hon hondam in. 27 Amaute'n nang' khut ahi a, Tangtawn Toupa aw, Nang' hih ahi chih thei uhen aw. 28 Amaute'n hamsiat taleh, nang zaw vualzawl ding na hi. Hon suai uhen aw, maizum ding uh a, na sila zaw lungnuam ding hi. 29 Kei hon hekte a zahlakna-un kikhuh uh henla, puan bangin maizumna-in kikhuh uhen. 30 Ke'n zaw ka kama Tangtawn Toupa nakpitaka pahtawi ding ing a, mi tampite laka amah phat ding hi'ng. 31 Ahangbel, mawhtangsakte apana tasamte' hinna hondam dinga Tangtawn Toupa a taklama ding hiven.
Mesia Vaihawmna
David' Phatnala. 1 Tangtawn Toupa'n ka Toupa kianga: Na melmate na khepekngakna-a ka bawl masiah, ka taklam ah tu in, chi hi. 2 Tangtawn Toupa'n na vangletna kumpichiang Zion apan liansak ding a, na melmate lak ah vaihawm ding na hi! 3 Na sepaihhonte zong kidou ni-a lunglawp ding uhi. Phalvakin thupina siangthou tawh kithuam ding uh a, na tuailaite zong daitui thak banga hong pai ding uhi. 4 Tangtawn Toupa kichiamta a, a lungsim khelkik lou ding hi. Nang zaw Melkisedek tawh hihna kibang nei Siampi hi tawntung na hi, chi hi. 5 Toupa na taklam ah om a, a thangpaihna ni-a kumpipate gawitam ding hi. 6 Ama'n misite kivumsakin leh, leitung buppi-a vaihawmte gawitamin namte tunga thu khen ding hi. 7 Lam geia luita tui dawn ding a, tua hanga a lutang phongtou ding hi.
Pathian Muanhuaina leh Diktatna Phatna
1 Tangtawn Toupa phat un. Ke'n mitangte kikhopna leh khawmpite lak ah ka lungtang khempeuh tawh Tangtawn Toupa pahtawi ding hi'ng. 2 Tangtawn Toupa' thilhihte thupi a, a kipahpihte khempeuh in tuate suutsuut uhi. 3 A thilhihte thupi-in lamdang mahmah a, a diktatna zong Tangtawna omden hi. 4 Ama'n a thillamdang hihte theih gige dinga bawl a, Tangtawn Toupa zaw hehpihsiam leh lainat siam hi ahi. 5 Amah laudan siamte an pia a, a thukhun thei gige hi. 6 Ama'n a thilhihte' vangletna a mite lak a, amaute adinga namte' gamte pia hi. 7 A khut nasepte muanhuai a, diktat a, a dante muanhuai hi. 8 Tangtawn Tangtawna kipden a, diktak leh tangtaka sepkhiak hi ahi. 9 Ama'n a mite adinga tatna bawlsak a, a thukhun Tangtawn adinga kipsak a, a min siangthou a, lauhuai hi. 10 Tangtawn Toupa laudan siam zaw pilna bul hi ahi. A thuhilhnate zui peuhmah in theihsiamna hoih nei uhi. Tangtawn phatna amaha hi ahi.
Midiktatte Nunnopna 1 Tangtawn Toupa phat un. Tangtawn Toupa laudan siam mi, a thupiakte kipahpih mahmah mi, mi nunnuam hi ahi. 2 A suan a khakte leitung ah mi hat hi ding uh a, midik mitangte' khang a nunnuam hi ding hi. 3 A inn ah gou leh hauhnate om ding a, a diktatna omden ding hi. 4 Midik mitangte adinga mialna gama vak taangkhe ding a, hehpihsiamte leh lainatsiamte leh midiktatte adinga vak taang ding hi. 5 Thil phal a, a mawka leitawisak a, a dik thil hih mi tunga thil hoih hong tung ding hi. 6 Midiktat zaw pataua liing ngei lou ding a, theih gige-a om ding hi. 7 Thuthang setak lau lou a, Tangtawn Toupa muanga a lungtang kip hi. 8 A lungtang galmuang a, lau lou ding hi. A tawpa vualzou a, a meima en ding hi. 9 Ama'n a tasamte kianga thawnpiakte hawmzak a, a diktatna Tangtawnin omden hi. A kii sangpi-a pahtawia om ding hi. 10 Mi diktatlou in tua mu ding a, dah ding hi. A ha gawi ding a, lametbeia om ding hi. Mi diktatloute' lunggulhte zaw vuaksuak ding hi.
Pathian Thupi Kiniamkhiakna
1 Tangtawn Toupa phat un. Tangtawn Toupa' silate aw, amah phat unla, Tangtawn Toupa' min phat un. 2 Tangtawn Toupa' min, tu leh Tangtawn dongin phatin om hen. 3 Ni suahna lam apan nitumna dongin, Tangtawn Toupa' min phat ding ahi. 4 Tangtawn Toupa, namte khempeuh tunga pahtawiin om a, a thupina vaante tunglama pahtawia om hi. 5 Sangpi-a kumpitutphaha tupa, Tangtawn Toupa i Pathian bang kua om ahia? 6 Vaante leh leitung en dinga kunsuk bang kua om ahia? 7 Ama'n mizawngte leivui apan phong a, tasamte meivu apan domkang a, 8 ama'n a mite, milian milalte tawh tukhawmsak a, a mite laka makaite tawh tukhawmsak hi. 9 Numei chiing kianga inn pia a, tanei numei banga kipaksak hi. Tangtawn Toupa phat un.
Pathian' Vangletna
1 Aigupta apan Israel a paikhiak laia, pautheihlouhte lak apan Jakob inkuante a paikhiak lai ua, 2 Judah bel Pathian' mun siangthou hi a, Israel zong a kumpigam hi ahi. 3 Tuipi in na en a, taaimang a, Jordan lui lehngat hi. 4 Taangte belamtalte banga diang uh a, mualte zong belamnoute banga diang uhi. 5 Tuipi aw, bang na chi-a ahia na taimang? Jordan lui aw, bang na chi-a ahia na nungkik? 6 Taangte aw, bang na chi-ua ahia belamtalte banga na dian uh? Mualte aw, bang na chi-ua ahia belamnoute banga na dian uh? 7 Lei aw, Toupa' mai ah liing inla, Jakob' Pathian' mai ah liing in. 8 Amah suangpi nangawn tuivung suaksakpa hi a, meisah suang zong tuinak suaksakpa hi ahi.
Milian milal Muanhuailouhna leh Pathian' Muanhuaina
1 Na itna leh na muanhuaina hangin, na min in thupina tang hen. Koute hon pe ken, Tangtawn Toupa aw, koute hon pe ken. 2 Banghanga Zentelte'n: A Pathian uh koia om ahia? hon chise ding ua hia? 3 Koute' Pathian vantung ah om a, ama'n a ut ut hih a, 4 amaute' milimte bel ngun leh kham hi a, mihing khutsuak lei hiven. 5 Kam nei napi, pau theilou, mit nei napi, mu theilou, 6 bil nei napi, za theilou, nak nei napi, gim za theilou, 7 khut nei napi, lawng theilou, khe nei napi, pai theilou, gawl nei napi, aw suah theilou uhi. 8 Amaute bawlkhete lah amaute bang lei hi ding uh a, tuate muangte zong, amaute bang lei hi ding uhi. 9 Israel inkawte aw, Tangtawn Toupa muang un amah zaw amah muangte adinga huhpa leh lum hi ahi. 10 Aron innkawte aw, Tangtawn Toupa muang un. Amah zaw amah muangte adinga huhpa leh lum hi ahi. 11 Nou amah laute'n Tangtawn Toupa muang un, amah zaw amah muangte adinga huhpa leh lum hi ahi. 12 Tangtawn Toupa'n eite hon thei gige a, hon vualzawl ding hi. Israel innkawte vualzawl ding a, Aron innkawte vualzawl ding hi. 13 Tangtawn Toupa laudan siamte vualzawl ding a, aneu alian vualzawl ding hi. 14 Tangtawn Toupa'n noute hon pungsak henla, noute leh na tate mahmah uh hon pungsak semsem hen. 15 Lei leh van siampa Tangtawn Toupa'n noute hon vualzawl hen. 16 Vaan sangpente nangawn Tangtawn Toupa-a hi a, lei bel mihing tate kianga pia hi. 17 Tangtawn Toupa phatte zaw misite hilou a, daih didena muna paisukte zong hilou uhi. 18 Eite'n tu apan Tangtawn dongin, Tangtawn Toupa i phat ding hi. Tangtawn Toupa phat un.
Kipahthu Genna
1 Tangtawn Toupa'n ka aw leh ka ngetna a zak mana amah it hi'ng. 2 Kei lama a bil hon dawh mana ka damsung teng amah sam ding hi'ng. 3 Sihna khauhualte'n hon vial a, sheol natna in hon man a, lungkham dahna in hon khuh hi. 4 Tua laitaka Tangtawn Toupa' min sam ing a: Tangtawn Toupa aw, hon ngen hi'ng ka hinna hondam in, chi hi'ng. 5 Tangtawn Toupa zaw hehpihsiam, diktat hi ahi. Ahi, i Pathian zaw lainatna-a dim hi ahi. 6 Tangtawn Toupa'n mimawlte humbit a, hihniama ka om laia ama'n hon hondam hi. 7 Ka hinna aw, na khawlna ah kik nawn in. Ahang bel, Tangtawn Toupa na tunga hoih mahmah hiven. 8 Nang, sihna apan ka hinna humbit chin a, khitui apan ka mitte humbit chin a, pukna apan ka khete humbit na hi. 9 A nungta laite gam ah Tangtawn Toupa' maia pai ding hi'ng. 10 Ke'n um ing a, tua hanga thu gen ing a: Nakpitaka thuakgim hi'ng, chi hi'ng. 11 Ka mangbat mana: Mi khempeuh zuauthei hi, chi mawk hi'ng. 12 Tangtawn Toupa ka tunga a hoihnate bangchi-a thuk thei ding ka hia? 13 Hotdamna nou dom ding ing a, Tangtawn Toupa' min lou ding hi'ng. 14 Tangtawn Toupa tunga ka chiamsate a mite khempeuh maia tangtun ding hi'ng. 15 A misiangthoute sihna Tangtawn Toupa' mitmuha manpha hi. 16 Tangtawn Toupa aw, na sila hi taktak ing a, na sila, na silanu' tapa hi ka hi. Ka khainiang butte nang suutta na hi. 17 Kipahthu genna thillat na maia laan ding ing a, Tangtawn Toupa' min lou ding hi'ng. 18 Tangtawn Toupa tunga ka chiamsate a mite khempeuh mai ah, 19 Tangtawn Toupa in huangsung ah, Jerusalem aw, na sung ah tangtun ding hi'ng. Tangtawn Toupa phat un.
Mi Khempeuh Phat ding Tangtawn Toupa
1 Nou namte khempeuh aw, Tangtawn Toupa phat un! Nou mihonte khempeuh aw, amah phat un! 2 Ahang bel, eite adinga a itna lian a, Tangtawn Toupa' muanhuaina in Tangtawn daih hiven. Tangtawn Toupa phat un.
Phatna Piak ding
1 Tangtawn Toupa tung ah kipahthu gen un. Amah hoih hi! A itna in Tangtawn daih hi. 2 Tuin Israelte'n: A itna in Tangtawn daih hi, chi uhen. 3 Aron innkawte'n: A itna in Tangtawn daih hi, chi uhen. 4 Tangtawn Toupa laudan siamte'n: A itna in Tangtawn daih hi, chi uhen. 5 Ka mangbat laia, Tangtawn Toupa sam ing a, Tangtawn Toupa'n hon dawng a, hon suaktasak hi. 6 Tangtawn Toupa kei lama pang hiven, lau lou ding hi'ng. Mihingte'n bang hon lawh thei ding ahia? 7 Tangtawn Toupa'n hon ompih a, amah hon huhpa hi ahi. Hon mudahte vualzoutaka en ding hi'ng. 8 Mihingte muan sanga Tangtawn Toupa belh hoihzaw hi. 9 Kumpite muan sanga Tangtawn Toupa belh hoihzaw hi. 10 Namte khempeuh in hon umchip a, ahihhanga Tangtawn Toupa' mina amaute satkhe vek hi'ng. 11 Amaute'n kimkota hon umchip uh a, ahi, hon umchip uh a, ahihhanga Tangtawn Toupa' mina amaute satkhe vek hi'ng. 12 Amaute'n khuai banga hon umchip uh a, ahihhanga linglak kaang banga phelhmita om pah uhi. Tangtawn Toupa' mina amaute satkhe vek pah hi'ng. 13 Noute'n nakpitaka hon sawm uchin a, puk dekdek hi'ng. Ahihhanga Tangtawn Toupa'n hon huh hi. 14 Tangtawn Toupa ka thahatna hi a, ka la zong hi ahi. Amah ka hotdamna hong hita hi. 15 Midiktatte' puanbuk ah lungnopna leh vualzawhna kikou husa om a, Tangtawn Toupa' khut taklam in vualzawhna thil thupitak hihta! 16 Tangtawn Toupa khut taklam dopkanga om a, Tangtawn Toupa' khut taklam in thil thupitak hihta! chih husa om hi. 17 Kei si lou ding ing a, nungta ding ing a, Tangtawn Toupa' thilhih phuang ding hi'ng. 18 Tangtawn Toupa'n nakpitaka hon taihilh a, ahihhanga sihna-a hon pekhe lou hi. 19 Diktatna kongpite hon hon in, tuatea lut ding ing a, kipahthu gena Tangtawn Toupa phat ding hi'ng. 20 Hiai Tangtawn Toupa' kongpi hi a, midiktatte lut ding hi. 21 Nang hon dawngta chin a, ka hotdamna nong hihtak mana, na tunga kipahthu gen ding hi'ng. 22 Innlamte'n a nolh uh Suang a kiusuang poimawhpen hong hita hi. 23 Hiai, Tangtawn Toupa' thilhih hi a, i mitmuha lamdang hi. 24 Tuni Tangtawn Toupa' bawl ahi, tuni-in nuamin kipak ve ni. 25 Tangtawn Toupa aw, tu'n hon hondam in, hon ngen hi'ng. Tangtawn Toupa aw, tu'n hon mavangsak in, hon ngen hi'ng. 26 Tangtawn Toupa' mina hong paipa mi nunnuam ahi. Tangtawn Toupa' inn apan nang hon phat ding hi ung. 27 Pathian zaw Tangtawn Toupa hi a, ama'n eite tunga a vak taangsak a, singhiangte tawia maitam kii dong nopna ankuang lui tawh hon kizuisak hi. 28 Nang ka Pathian hi chin a, kipahthu gena hon phat ding hi'ng. Nang ka Pathian hi chin a, hon pahtawi ding hi'ng. 29 Tangtawn Toupa tung ah kipahthu gen un. Ahang bel, amah hoih a, a itna in Tangtawn daih hiven.
Pathian' Thu Hoihna Suutna
Alef
1 Tangtawn Toupa' dan zuia a gamtatna genbaangloute mi nunnuam hi uhi! 2 A dankhunte zui a, lungtang khempeuh tawh amah zongte mi nunnuam hi uhi! 3 A diklou thil hih lou a, a lampite tawn uhi. 4 Zuihkim sipsip ding thuhilhna thupiakte nang piak hi ahi. 5 Na thusehte zui dingin ka gamtatnate kip leh aw! 6 Hi leh, na thupiakte khempeuh ka suut suut chianga zahlak lou ding ing a, 7 Na thukhenna diktatte ka sin chianga, lungtang diktaka nang hon phat ding hi'ng. 8 Na thusehte zui ding hi'ng, hon nuseden ken aw.
Beth
9 Valnou in bangchi'n a gamtat dan hihsiangthou thei ding ahia? Na thu bang zela gamtain hihsiangthou ding hi. 10 Ka lungtang khempeuha nang hon zong ding hi'ng. Na thupiakte hon pialsansak ken aw. 11 Na tunga ka khelh louh nadinga, ka lungsunga na thu kem hi'ng. 12 Tangtawn Toupa aw, nang a nunnuam hi chin a, na dante hon sinsak in. 13 Na kam apan na thukhennate khempeuh ka muk in phuang ding hi. 14 Mi'n hauhnate a lungnoppih banga na thusehte lungnoppih hi'ng. 15 Na thuhilhna dante suutsuut ing a, na lampite ngaihtuah tuah hi'ng. 16 Na thusehte kipahpih ing a, na thu thudonlouha koih lou ding hi'ng.
Gimel
17 Kei na silapa tunga na hoihna suah lechin hing ding ing a, na thu zui ding hi'ng. 18 Na dante apan thillamdangte ka muh theih nadingin ka mitte vaksak in. 19 Lei ah zaw mikhual hi ing, kei apan na thupiakte seel ken. 20 Na dante lunggulh gigena in ka hinna negai hi. 21 Nang mi kisathei hamsethuakte, tua na thupiak pialsante mah taihilh na hi. 22 Ke'n na dankhunte zui hi'ng, simmawhna leh zahlakna kei apan lamang in. 23 Milian makaite tukhawmin kei hon gense mah le uh, kei na sila in na thusehte suutsuut hi'ng. 24 Na dankhunte ka kipahpih hi a, kei hon thuhilhte hi uhi.
Daleth
25 Ka hinna leivui laka niamsuk hi, na thu bangin hon halhthaksak in. 26 Ka gamtatnate gen ing a, nang hon dawng chin a, na thusehte hon sinsak na hi. 27 Na thuhilhna thusehte theisiam dingin hon sinsak in. Hi leh, na thillamdang hihte suutsuut ding hi'ng. 28 Ka hinna daha tawi hi, na thu bangin hon hatsak in. 29 Khemhat gamtatna apan hon hemkhia inla, na dan tungtawnin ka tung ah hehpih siam in. 30 Thutak lampi teel ing a, na thukhenna thute-a ka lungtang nga hi'ng. 31 Tangtawn Toupa aw, na dankhunte lenkip hi'ng, hon maizumsak ken. 32 Na thupiakte zuia taai ding hi'ng, ahang bel, nang ka lungtang noplensak hi vechin.
He
33 Tangtawn Toupa aw, na thukhennate zuih dan hon sinsak in, hi leh, a tawp dong zui ding hi'ng. 34 Theihsiamna hon pia in, hi leh, na dan zui ding ing a, ka lungtang khempeuh tawh zui taktak ding hi'ng. 35 Na thupiakte zuihna lampi ah hon pii in, tua-a kipahna mu hi'ng. 36 Angsung khualna lam ah hilouin, na dankhunte' lam ah ka lungtang hei in. 37 Mannabei thilte apan ka mitte hei inla, na lampi lam ah hon halhthak sak in. 38 Nang lauhdan ka siam nadingin, kei na sila tung ah na thuchiam tangtun in. 39 Ka kihtak zahlakna lamang in, ahang bel, na dante hoih hiven. 40 Na thuhilhna lunggulh nang e! Na diktatnain hon halhthak sak in.
Vau
41 Tangtawn Toupa aw, na itna muanhuai ka tung ah hong lang hen, na thu bangbanga na hotdamna mah. 42 Hileh kei hon tawngpa dawn nading nei ding hi'ng. 43 Ahang bel, ke'n na thu muang hi vengin. Ka kam apan thutak thu lamang vek ken, ahang bel, na dante lamen hi vengin. 44 Tangtawn Tangtawna na dan zui gige ding hi'ng. 45 Na thuhilhna ka zonkhiak taktak mana, noplena pai ding hi'ng. 46 Kumpipate maia na dankhunte gen ding ing a, maizum lou ding hi'ng. 47 Ahang bel, ka it na thupiakte kipahpih hi vengin. 48 Ka it na thupiakte sawka ka khutte zankhe ding ing a, na thusehte suutsuut ding hi'ng.
Zayin
49 Na sila kianga kinepna thu non piak thei gige in. 50 Na thu in hon halhthaksakta a, gimthuak laia ka khamuanna hiai mah hi ahi. 51 Kisatheite'n kidaamlou hiaia kei hon mawkbawl uh a, na dan apan pial tuan lou ding hi'ng. 52 Tangtawn Toupa aw, taang laia na dante thei gige ing a, tuate khamuanpih hi'ng. 53 Na dan taisan mi diktatloute hanga lunghihlouhna in kei hon man hi. 54 Ka khualtamna inn-a la-a ka sak tua na thusehte hi ahi. 55 Tangtawn Toupa aw, zankhanga na min thei gige ing a, na dan zui hi'ng. 56 Na thuhilhna ka zuih gige mah, ka hih ngeina dan hi ahi.
Heth
57 Tangtawn Toupa aw, nang ka tantuan hi na hi. Na thute mang ding hi'ng, chi-a thu hon chiamkhinta hi'ng. 58 Ka lungtang khempeuh tawh na deihsakna hon ngen hi'ng a, na thu bang zelin ka tung ah hehpih siam in. 59 Ka lampite ngaihtuah ing a, na dankhunte lama kalsuan hi'ng. 60 Na thupiakte zui dinga kinawh ding ing a, zekai lou ding hi'ng. 61 Mi diktatloute'n khauin hon hen mah leh, na dan mangngilh lou ding hi'ng. 62 Na thukhenna diktatte hanga zankim laia thoukhia-a na tunga kipahthu gen hi'ng. 63 Nang laudan siama na thuhilhna zuite khempeuh' lawm hi ka hi. 64 Tangtawn Toupa aw, na itna leitung dim hi. Na thusehte hon sinsak in.
Teth
65 Tangtawn Toupa aw, na thu bang zelin, kei na sila tung ah siam in. 66 Na thupiakte um ka hih manin, theihna leh thukhentat dan hon sinsak in. 67 Hihhaksata ka om ma-a lampial kha zel ing a, tu-a zaw na thu mangta hi'ng. 68 Nang zaw hoih chin a, thil hoih hih na hi, na thusehte hon sinsak in. 69 Kisatheite'n zuau thu-in hon minsesak mah leh, ka lungtang khempeuh tawh na thuhilhna zui ding hi'ng. 70 A lungtangte uh kheeng a, poisak nei lou uhi. Ke'n zaw na dan kipahpih hi'ng. 71 Na thusehte ka sin theih nadinga hihhaksata ka om kei adinga hoih hi. 72 Ngun leh kham beu sang tampi sanga, na kama na dan kei adinga hoih zaw hi.
Yodh
73 Na khutte'n kei hon bawl a, ka lim ka mei nang' bawl hi ahi. Na thupiakte ka sin theih nadingin theihsiamna hon pia in. 74 Na thu-a lametna nga ka hih mana nangmah laudan siamte'n kei hon muh chiang ua, kipak ding uhi. 75 Tangtawn Toupa aw, na thukhenna thute dik a, na muanhuaina banga hon hihhaksa na hi, chih theita hi'ng. 76 Kei na silapa kianga na thuchiam bangbangin, na itna muanhuai ka kikhamuanna hi hen. 77 Na dan ka kipahpih mana ka hin theih nadingin, na lainatna ka tung ah tung hen, A san beipi-a kei hon zaangsak mi kisatheite maizumsak in. 78 Ke'n zaw na thuhilhna suutsuut ding hi'ng. 79 Nangmah laudan siam na dankhunte theisiamte, kei lam hong nga uhen. 80 Ka maizum louh nadingin na thusehte lam ah ka lungtang gensiatbeiin om hen.
Kaf
81 Na hutkhiakna ngaia ka hinna bah a, ahihhanga na thu lamen hi'ng. 82 Na thuchiam zonga ka mitte vaita a: Chikchianga hon khamuan ding na hia? chi hi'ng. 83 Meikhu' ukton gawp savun thawl bang hi mah leng, na thusehte mangngilh lou hi'ng. 84 Na sila in bangtan hon ngak ding ka hia? Kei hon hihgentheite chik chianga gawt ding na hia? 85 Kisatheite'n na dan tawh kituakloupi-a, kei adinga gumte khuak uhi. 86 Na thupiakte khempeuh muanhuai hi. Hon huh in, a san beipi-a hon hihgenthei uhi. 87 Leitung apan hon nulmang dekdek uh a, hinapi-a ke'n na thuhilhna nuse lou hi'ng. 88 Na kama na dankhunte ka zuih theih nadingin, na itna bangbangin hon halhthaksak in.
Lamedh
89 Tangtawn Toupa aw, na thu Tangtawna om hi a, vantunga hihkip hita hi. 90 Na muanhuaina akhang akhanga omden hi. Leitung dingkipsak chin a, omden hi. 91 Ahang bel, na thukhenna banga tuni dong tuate dingkip a, thil bangkim in na deihlam sem hiven. 92 Na dan kipahpih lou hi leng, ka gimthuakna-a mangthangta ding hi'ng. 93 Na thuhilhna mangngilh ngeilou ding hi'ng. Ahang bel, tuate tungtawna hinna hon pia hi vechin. 94 Nanga ka hih manin hon hukhia in. Ahang bel, na thuhilhna zongkhia hi vengin. 95 Mi diktatloute'n kei hon hihmangthang dinga hon ngak uh a, ahihhanga ke'n zaw na dankhunte suutsuut ding hi'ng. 96 Hoihkimna khempeuh zong phaktawp neia mu ing a, na thupiak bel tawp neilou hi.
Mem
97 Na dan it hi natel ing e aw! Sun nitum tuma ka suut hi ahi. 98 Na thupiakte'n ka galte sanga pilzaw-a hon bawl hi. Ahang bel, na thupiakte'n hon ompih gige hiven. 99 Na dankhunte ka suutsuut ahih mana, kei hon sinsakte sanga theihsiamna hau zaw hi'ng. 100 Na thuhilhnate ka zuih mana upate sanga zong theihsiamna hau zaw hi'ng. 101 Na thu ka man theih nadinga gitlouhna lampi khempeuh apan ka khete keem hi'ng. 102 Nangmah mah in non sinsak mana, na dante pialsan lou hi'ng. 103 Na thuchiamte kei adingin khum hi natel e! Ka kam ah khuaizu sangin khum zaw hi. 104 Na thuhilhnate apan theihsiamna ngah ing a, lampi diklou khempeuh hua hi'ng.
Nun
105 Na thu ka khe adinga meivak hi a, ka lampi ah khawvak hi ahi. 106 Na thukhenna diktatte zui dinga thu chiamta ing a, hihkipta hi'ng. 107 Nakpitaka thuakgim hi'ng, Tangtawn Toupa aw, na thu bang zelin hon halhthaksak in. 108 Tangtawn Toupa aw, ka kama ka phatna, ut thillat bangin na sang inla, na dante hon sinsak in. 109 Ka hinna ka khut sunga tawi bang hi nak mah leng, na dan mangngilh lou ding hi'ng. 110 Mi diktadoute'n thang hon siah uh a, ahihhanga na thuhilhnate pialsan lou hi'ng. 111 Na dankhunte ka goutan hi gige a, ka lungsung nopna hiven. 112 Na thusehte a tawp donga zui dinga ka lungtang hihkipta hi'ng.
Samekh
113 Lungsim thuah neite mudah ing a, na dan bel it hi'ng. 114 Nang ka bukna leh ka lum hi chin a, na thu-a lametna nga hi'ng. 115 Ka Pathian' thupiakte ka zuih theih nadingin, nou thilgilou hihte'n hon paimangsan un. 116 Ka hin theih nadingin, na thu bangin hon tungding inla, ka lametna ah hon maizumsak ken. 117 Hon lenkip lechin, bit ding ing a, na thusehte zui gige ding hi'ng. 118 Na dankhunte kiheisante, khemhatte ahih man ua, nang amaute nolh na hi. 119 Leitunga mi diktatloute khempeuh sik eksia banga na paihkhiak mana na dankhunte it hi'ng. 120 Nang zahtaaka lauin ka sa liing a, na dan thute zong lau hi'ng.
Ayin
121 A diktat thil leh a dik hih ing a, hon nuaisiahte khut ah hon nuse ken. 122 Kei na sila hoih nadingin kei adingin ding teitei in. Kisatheite hon nuaisiahsak ken. 123 Na hutkhiakna zongin leh na thuchiam diktatte zonga ka mitte vaikhinta hi. 124 Na itna bangbangin kei na sila tung ah gamta inla, na thusehte hon sinsak in. 125 Na sila hi ing a, na dankhunte ka theih nadingin, theihsiamna hon pia in. 126 Tangtawn Toupa aw, Nang na gamtat hunta hi. Na dan palsat uhi. 127 Kham leh khamsiang sanga na thupiakte ka itzawk man leh, 128 thil khat peuh tawh kisaia na thuhilhna thute dika ka ngaih mana, lampi diklou peuhmah hua hi'ng.
Pe
129 Na dankhunte lamdang mahmah a, ka hinna in zui hi. 130 Na thute lutna in vak taangsak a, mimawlte theihsiamna pia hi. 131 Na thupiakte ngaia kamka ing a, nak hawp hawp hi'ng. 132 Na min itte' lam na ngat bangin kei lam hong nga inla, ka tung ah zahngai in. 133 Na thu bang zelin ka kalsuan pii inla, ka tung ah khelhna peuhmah hon uksak ken. 134 Na thuhilhnate ka zuih theih nadingin, mihingte' nuaisiahna apan hon tankhia in. 135 Kei na sila tung ah na mai taangsak inla, na thuseh hon sinsak in. 136 Na dan kizuih louh mana ka mita khitui, luitui banga luang hi.
Tsadhe
137 Tangtawn Toupa aw, nang diktat chin a, na dante dik hi. 138 Thupiaka na piak dankhunte diktat a, muanhuai vek sipsip hi. 139 Ka melmate'n na thute a ngaihnoplouh man ua, ka phatuamngaihna in hon negaita hi. 140 Na thuchiamte ettelsa hi vek a, na sila in it hi'ng. 141 Niamtak leh simmawh hi mah leng, na thuhilhnate mangngilh lou hi'ng. 142 Na diktatna Tangtawn diktatna hi a, na dan muanhuai hi. 143 Lungkhamna leh lungzinna in hon delhpha a, hinapi-a na thupiakte ka kipahna hi lailai hi. 144 Na dankhunte Tangtawnin dik hi. Ka hin theih nadingin theihsiamna hon guan in.
Kof
145 Ka lungtang khempeuh tawh hon sam hi'ng, Tangtawn Toupa aw, hon dawng in. Na thusehte zui ding hi'ng. 146 Nang hon sam hi'ng hon hukhia in. Na dankhunte zui ding hi'ng. 147 Zing phalvak ma-a thou ing a, huhna ngena kikou ing a, na thu-a lametna nga hi'ng. 148 Na thuchiamte ka suutsuut theih nadinga, zanven sung khempeuh hak hi'ng 149 Na itna bangbangin ka aw ngaikhia inla, Tangtawn Toupa aw, na dante bangbangin hon halhthaksak in. 150 Thil gilou sawmte hong nai uh a, ahihhanga na dan gamlat uhi. 151 Hinapi-a Tangtawn Toupa aw, nang hong nai chin a, na thupiakte khempeuh muanhuai hi. 152 Tangtawn daih dinga na hihkipsa na dankhunte apana nidang laia na sinta hi'ng.
Resh
153 Na dan ka mangngilh louh manin, ka gimthuakna en inla, hon hukhia in. 154 Hon gum inla, hon tankhia inla, na thuchiam bangin hon halhthaksak in. 155 Mi diktatloute'n na thusehte a zon louh man ua, hotdamna in amaute gamlat hi. 156 Tangtawn Toupa aw, na lainatna lian a, na dante dungzui in hon halhthaksak in. 157 Hon gimbawl ka galte tam a, ahihhanga na dankhunte taisan lou hi'ng. 158 Mi muanhuailoute'n na thu a muan louh man ua, amaute kiha en hi'ng. 159 Na thuhilhnate ka it dan en inla, Tangtawn Toupa aw, na itna bangbangin ka hinna humbit in. 160 Na thu kigawmkhawm muanhuai vek sipsip a, na thukhenna diktatte khempeuh Tangtawn daih hi vek uhi.
Shin
161 Vaihawmmite'n a san beipi-a hon gimbawl uh a, ahihhanga na thu laua kei zaw ka lungtang liing hi. 162 Gallak sum manpha mu mi banga na thu lungnoppih hi'ng. 163 Zuautatte mudah a, kih ing a, ahihhanga na dan bel it hi'ng. 164 Na thukhenna diktatte hanga nikhata sagihvei nang hon phat hi'ng. 165 Na dan itte'n lungmuanna thupitak nei uh a, bangmah in kisuisak lou ding hi. 166 Tangtawn Toupa aw, na hutkhiakna ngak hi'ng. Na thupiakte zui hi'ng. 167 Na thusehte ka hinna in zui a, it mahmah hi. 168 Ka lampite khempeuh thei chin a, na thuhilhnate leh na dankhunte zui hi'ng.
Tau
169 Tangtawn Toupa aw, ka kikou aw na mai hong tungtou henla, na thu bangin theihsiamna hon pia in. 170 Ka ngetna na mai hong tung henla, na thuchiam bangin hon humbit in. 171 Na thusehte non sinsak manin, ka muk ah nang phatna luanglet hen. 172 Na thupiakte khempeuh a diktat manin, ka lei in na thu lain sa hen. 173 Na thuhilhnate ka teel manin, kei hon huh dingin na khut mansain om hen. 174 Tangtawn Toupa aw, na hutkhiakna ngai ing a, na dan ka kipahpih hi ahi. 175 Nang kon phat theih nadingin hon hingsak inla, na dante'n kei hon kern hen. 176 Belam mang banga na vakmangta hi'ng. Na thupiakte ka mangngilh louh manin, kei na sila hon zongkhia in.
Hutkhiakna Ngetna
Mualtung Kaltouhla. David-a. 1 Ka mangbat ni-a Tangtawn Toupa sam ing a, ama'n hon dawng hi. 2 Tangtawn Toupa aw, zuauthei mukte leh khemhat leite apan ka hinna humbit in. 3 Nang khemhat lei aw, ama'n nang bang hon pe ding a, bang hon lawh ding ahia? 4 Galhat' thaltang hiamte leh Munphiah sing meihol am-a nang hon gawt ding hi. 5 Meshek gama ka khualtam a, Kedar puanbuktea ka teen ka tung gik hi! 6 Lemna deihloute laka amaute tawh teengkhawm sawtlua hi'ng! 7 Kei lah lemna deih mi hi ing a, hinapi-a lemna thu ka gen chianga amaute kidou dinga kisa nak uhi.
Amah Zongte Huhpa Pathian
Mualtung Kaltouhla. 1 Mualte lam mitsuantou hi'ng Kei ading panpihna koi apan hong tung ding ahia? 2 Kei adinga panpihna zaw Tangtawn Toupa, lei leh van bawlpa apan hong tung ding hi. 3 Ama'n na khete a taai ding phallou ding hi nang hon Chingpa lusu lou ding hi. 4 Ngai dih, Israel Chingpa lusu lou ding a, ihmu lou ding hi. 5 Tangtawn Toupa nang hon ching hi Tangtawn Toupa na taklama hon liah limliap hi ahi. 6 Suna nisa in hon hai lou ding a, zana khapi in zong hon hai lou ding hi. 7 Tangtawn Toupa'n thil hoihlou khempeuh apan nang hon ching ding hi tu apan Tangtawn donga hon ching ding hi. 8 Tangtawn Toupa'n nong lut leh na pawtkhiak tu leh Tangtawna hon ching gige ding hi.
Toupa' Inna Hawh a Nopdan
Mualtung Kaltouhla. David-a. 1 Toupa' inn ah hawh ni, hon chih chiang ua kipak hi'ng. 2 Jerusalem aw, na kongpite sunga ka khete uh ding hi! 3 Jerusalem zaw inn kinai chikchika kizoma kilamkhawm khawpi bang hi ahi. 4 Tua ah namte, Tangtawn Toupa' namte hawhtou uh a, Israel kianga dankhun kipia banga Tangtawn Toupa' min phat dinga hawhtou uhi. 5 Ahang bel, tua-a thukhenna kumpitutphahte kidawh a, David' innkawte' kumpitutphahte kidawh hiven. 6 Jerusalem khamuan nadingin thum un. Nang hon itte bit uhen. 7 Na kulhbang sung ah muanna om henla, na innpi innsangte sung ah bitna om hen. 8 Ka sanggamte leh ka lawmte ka khual mana, na sung ah muanna om hen, chi ding hi'ng. 9 Tangtawn Toupa koute Pathian' inn ka khual mana, na hoih nading zong ding hi'ng.
Simmawhna apan Huhna Ngetna
Mualtung Kaltouhla. 1 Nang vantunga teengpa, nang lama ka mit hon suantou hi'ng. 2 Ngai dih, silate'n a pute uh' khutliik a mitmei gige bangun leh, silanu'n a pi' khutliik a mitmei gige banga, Tangtawn Toupa ka Pathian un ka tung ua zahngaihna a neih mateng nang hon mitsuan hi ung. 3 Ka tung uah zahngai in, Tangtawn Toupa aw, ka tung uah zahngai in. Nakpitaka simmawhna thuak hi ung. 4 Huhamtaka khawsate' simmawhna leh kisatheite' nuihsanna nak thuak mahmah hi ung.
Tangtawn Toupa-a Kihutna
Mualtung Kaltouhla. David-a. 1 Israel in: Tangtawn Toupa eilama panglou hi leh, chi hen. 2 Mite'n hon dou laiun, Tangtawn Toupa eilama pang lou hi maizen leh, 3 eite tunga a hehna uh a kuan laiin, a hingin hon nawmvalhta ding uhi. 4 Tui khanglian in hon tummangta ding a, tuihat in hon taimangta ding a, 5 tuihual in hon taimangta ding hi, chi hen. 6 A ha ua hon petzansak lou, Tangtawn Toupa phatin om hen. 7 Vasa thangkampa thang apan vasa banga suaktata hi hang. Tua thang kisia a, i hinna suakta zenzen hi. 8 Eite adinga panpihna zaw, lei leh van bawlpa Tangtawn Toupa' min ah om hi.
Tangtawn Toupa A Mite' Hatna
Mualtung Kaltouhla. 1 Tangtawn Toupa muangte zaw, Zion Mual hihliin vuallouha om gige bang hi ahi. 2 Mualte'n Jerusalem a kimkot banga Tangtawn Toupa'n a mite Tangtawn donga kimkota khiang gige hi. 3 Midiktatte' gama diktatlouhna' chiang omden lou ding hi. Tua hi kei leh, midiktate'n thil diklou hih dinga khut zang kha ding hi. 4 Tangtawn Toupa aw, mipite tung ah thil hoih hih inla, lungtang tangte tung ah hih in. 5 A lampi kawite ua pialmangte ahih leh, Tangtawn Toupa'n thil gilou hihte tawh hawlmangkhawm ding hi. Israel tung ah lemna-muanna om hen.
Ziona Lungnuama Kikna
Mualtung Kaltouhla. 1 Tangtawn Toupa'n saltangte Ziona hon piikik lai-in i manglam mah bang hi. 2 Tua laia i kam nuihnain dim a, i lei zong lungnop lasaknain dim hi. Tua hun laia namte laka: Tangtawn Toupa'n amaute adingin thil thupite hihsak nah e! kichi uhi. 3 Ahi, Tangtawn Toupa'n eite adinga thil thupite hon hihsak a, tuate-a lungnuam mahmah hi hang. 4 Tangtawn Toupa aw, ka vangphatna uh Simlam luite bangin hon pekik nawn in, 5 Khitui ke kawma khaichi pawite'n lungnop la sa kawma at ding uh a, 6 kap kawmkawma buhchi pua-a kuankhe mi'n zong lungnuama kikoua buhphalte hon paw ngeingei ding hi.
Tangtawn Toupa tawh Sepkhawm
Mualtung Kaltouhla. Solomon-a. 1 Tangtawn Toupa'n inn a lam kei leh, a lamte'n amawkna-a semgim suak uh a, Tangtawn Toupa'n khawpi a ven kei leh, a vengte amawkna-a hak hi lei hi. 2 Zingsang beltak taka thou a, zansawt pipi hak a, nek ding an zonga na sepgim uh a mawkna ahi Toupa'n zaw a itte ihmusak hithit ahi. 3 Ngaidih, tapate Tangtawn Toupa apan goutan hi a, sula piang tate zong a pahtakman piak hi ahi. 4 Tuailai' tate zaw galhat khuta thaltangte bang hi ahi. 5 A thalbawm thala dim mi, mi nunnuam ahi. A melmate utawh kongpi-a a kihou chiang ua zahlak lou ding uhi.
Toupa Laudan Siamte Vualzawlna
Mualtung Kaltouhla. 1 Tangtawn Toupa laudan siam a, a lampi tawnte peuhmah mi nunnuam hi ahi. 2 Na khut sepgim gah ne ding chin a, kipak ding chin a, nang adinga hoih ding hi. 3 Na zi zong na inn sung ah, grepgui gah nuam mahmah bang ding hi. Na tate lah na ankuang kim ah, oliv selnoute bang hi ding hi. 4 Ngai dih, Tangtawn Toupa laudan siam mi tua bang hi ding hi. 5 Tangtawn Toupa'n Zion apan hon vualzawl henla, na damsung teng Jerusalem hauhna mu in. 6 Ahi, na tusawn sawnte mu in dam in, Israel tung ah lemna muanna om hen.
Vualzawlna La
Mualtung Kaltouhla. 1 Tu'n Israel in: Ka tuailai hun apan tamveipi hon nuaisiah uhi. 2 Ka tuailai hun apan tamveipi hon gimbawl uh a, ahihhanga hon zou lou uhi, chi hen. 3 Leilette'n ka nungzang let uh a, leilehna kuakte sausak uhi. 4 Tangtawn Toupa diktat a, mi diktatloute' hon henna khaute a tumtuma attan vek hi. 5 Zion mudahte khempeuh maizumsakin om uh henla, nawhkikin om uhen. 6 Inntung vuma loupa pou, a khankhiak ma-a keu bang hi uhen. 7 Buh-at mi in a khutdim zong a ngah louhna buhkung bang leh, buhphal hen mi in a ang dim zong a ngah louhna buhphal bang hi uhen. 8 A kianga paite'n zong: Tangtawn Toupa' vualzawlna na tung ah om hen. Tangtawn Toupa' mina hon vualzawl hi ung, chi kei uhen.
Tangtawn Toupa' Tatna Ngakna
Mualtung Kaltouhla. 1 Tangtawn Toupa aw, tui thukpi apan nang hon sam hi'ng. 2 Toupa aw, ka aw za in! Ka ngetna za dingin na bil hon dawh in. 3 Tangtawn Toupa aw, nang khelhnate chiamteh ding hile-chin, Toupa aw, kua ding zou ding ahia? 4 Ahihhangin, kihtaka na om theih nadinga ngaihdamna na kianga om hi. 5 Tangtawn Toupa ngak ing a, ka hinna in ngak a, a thu-a lametna nga hi'ng. 6 Galvilmite'n zingsang a ngaklah sanga ka hinna in Toupa ngaklah zaw hi. 7 Israel aw, Tangtawn Toupa lamen in. Ahang bel, Tangtawn Toupa'n itna muanhuai nei a, ama' kianga tatna kiching om hiven. 8 Ama'n Israel tan ding a, a mawhnate khempeuh apan tan ding hi.
Tangtawn Toupa Muanna
Mualtung Kaltouhla. David-a. 1 Tangtawn Toupa aw, ka lungtang kisathei lou a, ka mit zong sanghah lou hi. Thil thupite buaipih lou ing a, kei adinga thupi luate zong buaipih lou hi'ng. 2 Ka hinna khim ing a, daisak dide ing a, nau nawinek tawpta a nu kianga om hiathiat banga om hi'ng. Nau nawinek tawpta banga ka hinna ka sunga om hiathiat hi. 3 Israel aw, tu apan Tangtawn dongin, Tangtawn Toupa lamen in.
Pathian tenna Zion
1 Tangtawn Toupa aw, David leh ama' haksatna thuakte khempeuh thei gige in. 2 Ama'n Tangtawn Toupa kianga thu chiam a, Jakob' Pathian Vanglian kianga kichiamta a: 3 Ka innsung tawnga lut lou ding ing a, ka lupna-a zong nuamtaka lum lou ding hi'ng. 4 Ka mitte ihmut musak lou ding ing a, ka mitvunte zong ihmut nuam musak lou ding hi'ng. 5 Tangtawn Toupa ading mun khat, Jakob' Pathian Vanglian ading tenna mun khat ka muh mateng khawl lou ding hi'ng, chi hi. 6 Ngai dih, Efratha ah tua za ung a, Jaar gamlaka tua thu tuak ung a 7 A tenna mun ah pai ni, a khengakna bul ah amah bia ni. 8 Tangtawn Toupa aw, kisa inla, na khawlna mun ah hong paita in, na vangletna singkuang tawh. 9 Na siampite diktatna silhsakin om uh henla, na misiangthoute'n nuamin la sa uhen, chi uhi. 10 Na sila David vangin, na thaunilhpa nolh ken. 11 Tangtawn Toupa David kianga kichiam a, kichiamna kip hi a, khelkik lou ding hi. Ama'n: Na suante laka khat, na kumpitutphah-a tusak ding hi'ng. 12 Na tapate'n ka thukhun a zuih uh a, ka sinsak ka dankhunte a zuih uleh, a tapate uh zong na kumpitutphaha Tangtawna tu ding uhi, chi hi. 13 Ahang bel, Tangtawn Toupa'n Zion teelta a, a tenna mun dinga deih a: 14 Hiai ka tendenna mun ding ahi. Ka deihna mun ahih mana hiaia teeng ding hi'ng. 15 A nek a taak kichinga Zion vualzawl ding ing a, a mizawngte ana taisak ding hi'ng. 16 A siampite uh zong hotdamna silhsak ding ing a, a misiangthoute'n nuama la sa ding uhi. 17 Hiai ah David adinga kii khangsak ding ing a, ka thaunilhpa adinga meivak tungkhe ding hi'ng. 18 A melmate maizumna silhsak ding ing a, ama' lutang ah bel kumpilukhu khusak ding hi'ng, chikhinta hiven.
Pathian' Mite' Kipumkhatna
Mualtung Kaltouhla. 1 Ngai dih, unau sanggamte kituak diamdiama teenkhawm nak hoihin nak nop hi nah e! 2 Luzanga thau manpha nilh khamula luangsuk, Aron' khamula luangkhia, a puanak tuai ngawnga luangkhia bang hi ahi. 3 Zion mualte tunga kia Hermon daitui bang hi ahi. Ahang bel, Tangtawn Toupa'n tua muna vualzawlna thupia-a hin tawntungna nangawn pia hiven.
Tangtawn Toupa Phatna
Mualtung Kaltouhla. 1 Tangtawn Toupa' sila noute, Tangtawn Toupa' inna zana nasem noute khempeuh in amah phat un. 2 Mun siangthou ah na khut uh liiktou unla, Tangtawn Toupa phat un. 3 Lei leh van bawlpa Tangtawn Toupa'n Zion apan noute hon vualzawl hen!
Thilsiam ah leh Tatna-a Pathian Phatna
1 Tangtawn Toupa' min phat unla, Tangtawn Toupa' sila noute aw, 2 Tangtawn Toupa' inna nasem noute, i Pathian inn huang sung intuala nasem noute aw, amah phat un! 3 Tangtawn Toupa phat un, Tangtawn Toupa hoih hi. A min phatna la sa un, nuam mahmah hi. 4 Tangtawn Toupa'n ama' adinga Jakob teelta a, a gou tantuan dinga Israel teelta hi. 5 Tangtawn Toupa a thupi chih thei hi'ng. I Toupa zaw pathiante khempeuh sanga tungnung hi. 6 Tangtawn Toupa'n lei ah leh van ah leh, tuipi leh a thukna mun khempeuh ah a ut ut hih hi. 7 Lei mong apan tuimei kaltousak a, khawphia leh vuah kithuah sawlkhia a, a koihkhawmna inn apan huih nungkhesak hi. 8 Ama'n Aigupta tamasa that a, mihing leh ganta nangawn that hi. 9 Aigupta aw, ama'n na sunga chiamtehnate leh thillamdangte hon sawl a, Faro leh a silate khempeuh tung ah zong hon sawl hi. 10 Ama'n nam tampi zou a, kumpipa hatte that hi. 11 Amorte kumpipa Sihon, Bashan kumpipa Og leh Kanan kumpipate khempeuh that a, 12 a gam uh goutan dinga, ahi, a mi Israelte' goutan dinga pia hi. Tangtawn Toupa aw, na min Tangtawnin omden a, 13 Tangtawn Toupa aw, na min suan khempeuh donga thang hi. 14 Ahang bel, Tangtawn Toupa'n a mite tunga thu khen ding a, a silate tunga lainatna nei ding hiven. 15 Namte' milimte lah ngun leh kham peuh hi a, mihingte' khutsuak hi lei hi. 16 Kam nei napi, pau thei lou, mit nei napi, mu thei lou, 17 bil nei napi, za thei lou, a kam ua lah nakna hu om lou hi. 18 Amaute bawlkhete lah amaute bang lei hi ding uh a, amaute muang peuhmah zong tua bang mah hi ding uhi. 19 Israel innkawte aw, Tangtawn Toupa phat un! Aron innkawte aw, Tangtawn Toupa phat un. 20 Levi innkawte aw, Tangtawn Toupa phat un! Nou amah lau peuhmahte'n Tangtawn Toupa phat un! 21 Jerusalema teengte aw, Zion apan Tangtawn Toupa phat un! Tangtawn Toupa Phat un!
A Itna hanga Pathian Phatna
1 Tangtawn Toupa hoih hi, amah phat un, a itna Tangtawn daih ahi. 2 Pathiante' Pathian tung ah kipahthu gen un, a itna Tangtawn daih ahi. 3 Toute' Toupa tung ah kipahthu gen un, a itna Tangtawn daih ahi. 4 Thil lamdang thupi lua hihpa tung kia ah kipahthu gen un, a itna Tangtawn daih ahi. 5 Theihsiamna pilna-a vante bawlpa tung ah kipahthu gen un, a itna Tangtawn daih ahi. 6 Tuite tunga leitung zalhpa tung ah kipahthu gen un, a itna Tangtawn daih ahi. 7 Vaak thupite bawlpa tung ah kipahthu gen un, a itna Tangtawn daih ahi. 8 Sun hun uk dinga ni bawlpa tung ah kipahthu gen un, a itna Tangtawn daih ahi. 9 Zan hun uk dinga khapi leh aksite bawlpa tung ah kipahthu gen un, a itna Tangtawn daih ahi. 10 Aigupta tamasate thatpa tung ah kipahthu gen un, a itna Tangtawn daih ahi. 11 Aiguptate lak apan Israel pikhepa tung ah kipahthu gen un, a itna Tangtawn daih ahi. 12 Khut hat leh banthahat zankhia a amaute pikhepa tung ah kipahthu gen un, a itna Tangtawn daih ahi 13 Tuipi San kikhensakpa tung ah kipahthu gen un, a itna Tangtawn daih ahi. 14 Tuipi San laizanga Israelte pii paisuakpa tung ah kipahthu gen un, a itna Tangtawn daih ahi. 15 Faro leh a sepaihhonte Tuipi Sana tummangsakpa tung ah kipahthu gen un, a itna Tangtawn daih ahi. 16 Gamdai-gamkeua a mite pii paisuakpa tung ah kipahthu gen un, a itna Tangtawn daih ahi. 17 Kumpipa thupite phukpaipa tung ah kipahthu gen un, a itna Tangtawn daih ahi. 18 Kumpipa hatte thatpa tung ah kipahthu gen un, a itna Tangtawn daih ahi. 19 Amorte' kumpipa Sihon thatpa tung ah kipahthu gen un, a itna Tangtawn daih ahi. 20 Bashan kumpipa Og thatpa tung ah kipahthu gen un, a itna Tangtawn daih ahi. 21 A gam uh goutan dinga pepa tung ah kipahthu gen un, a itna Tangtawn daih ahi. 22 A sila Israel kianga goutan dinga pepa tung ah kipahthu gen un, a itna Tangtawn daih ahi. 23 I niam dan thei gigepa tung ah kipahthu gen un, a itna Tangtawn daih ahi. 24 I niam dan thei a, i melmate apan hon hukhepa tung ah kipahthu gen un, a itna Tangtawn daih ahi. 25 Thilsiam peuhmah an-a vakpa tung ah kipahthu gen un, a itna Tangtawn daih ahi. 26 Van Pathian tung ah kipahthu gen un, a itna Tangtawn daih ahi.
Saltanna-a Khitui
1 Babulon luigeite khawnga tu ung a, ahi, Zion thei gige ung a, kap hi ung. 2 Tua laia muisum hiang khawnga ka kaihgingte uh khai ung a, 3 sala hon kaite'n la hon ngiat uh a, hon lunggimsakte'n lungnop la hon phut uh a: Zion late khat hon saksak un, hon chi uhi! 4 Mi gam peuh ah bangchi'n Tangtawn Toupa' late sa thei ding ka hi ua? 5 Jerusalem aw, nang kon mangngilh leh ka khut taklam in a khutsiamna mangngilh hen. 6 Nang kon theih gige kei a, Jerusalem mah ka lungnopnapen sanga ka teelzawk kei leh, ka lei ka dangtung ah belh dikdek hen. 7 Tangtawn Toupa aw, Jerusalem puk ni a, Edom tate'n: Phelgawp un, a suangphum dongin phelgawp un, a chih manun, amaute a selamin thei gige in. 8 Babulon' tanu hihsiat dinga laitansa aw, ka tung ua na hih banga hon thuk dingpa kipak ding hi. 9 Na taneute man a, suangpi satna-a nei dingpa kipak ding hi!
Thuumna Dawnna
David' Phatnala. 1 Tangtawn Toupa aw, ka lungtang khempeuha kipahthu gena nang hon phat ding hi'ng. Pathiante' maia nang phat la sa ding hi'ng. 2 Na tempul lam nga-a kun ding ing a, na itna leh na muanhuaina hanga kipahthu gen a, na min phat ding hi'ng. Ahang bel, nang na min hanga na thu pahtawi hi vechin. 3 Kon sap chianga hon dawng chin a, hon hangsansak chin a, hon lungkhauhsak hi ve chin. 4 Tangtawn Toupa aw, leitung kumpipate'n na kama thute a zak chiangun, nang hon phat uhen. 5 Ahi, Tangtawn Toupa thupi-a lian mahmah ahih manin, a gamtatnate lain sa uhen. 6 Tangtawn Toupa sangpi-a om himahleh, miniamte ngaihsak a, kisatheite bel gamlapi apan thei hi. 7 Lungkham mangbatna lak ah gamta mah leng, nang ka hinna humbit chin a, ka melmate' hehna doua khutlik chin a, na khut taklamin hon hondam hi. 8 Tangtawn Toupa'n kei adinga a tup tangtun ding hi. Tangtawn Toupa aw, na itna in Tangtawn daih hi. Na khut nasepte tawpsan ken.
Pheklek dia Ngetna
Lapulian ading. David-a. Phatnala. 1 Tangtawn Toupa aw, nang ngenteltaka hon phekleka hon theita na hi. 2 Nang ka tutsuk lai leh ka dintouh lai thei chin a, ka ngaihtuahte gamlapi apan phawk na hi. 3 Nang ka pawtkhiak leh ka lupsuk teltaka musuak chin a, ka lampite khempeuh na theihsa hi ahi. 4 Tangtawn Toupa aw, nang na theihvek louh, ka lei ah thu himhim om lou hi. 5 Nang ka nung leh ka maia hon khiang chin a, ka tunga na khuta hon hum na hi. 6 Tua bang theihna kei adinga lamdang lua a, sang lua a, ka phawkzawh vual hi lou hi. 7 Na Kha apan koia paimang thei ding ka hia? Na omna apan koia taimang thei ding ka hia? 8 Van ah kaltou ning chi leng, tua-a om chin a, misikhua ah lupna dawh ning chi leng, ngai dih, tua-a om zel hi chin a! 9 Zingkha zakin leng mah leng, tuipi gallam pek tung mah leng, 10 tua lai nangawna na khut in hon pii ding a, na khut taklam in hon lenkip ding hi. 11 khawmial in hon sel mahmah inteh, khawvak zong ka kim ah zanmial suak inteh, chi dek leng, 12 khawmial zong nang adinga mial lou hi. Nang adinga khawmial zong khawvak bang ahih mana, zanmial zong sun khawvak banga taang ding hi. 13 Ahang bel, ka hinna sungnung nangma' siamsa hi a, ka nu' sula hon phankhawm hi vechin. 14 Lauhuaipi leh lamdangpi-a bawl ka hih mana nang hon phat hi'ng. Na nasepte lamdang mahmah ahi, chih theitel mahmah hi'ng. 15 Mun simthama bawla ka om laia ka guh ka tangte nang apan kisel lou hi. Leimun thuktaka phankhawm ka hih laia, 16 ka pumpi kibawl nailou na mit in mu gige a, a kahiang khat lei zong a om ma nangawna kei adinga sehsa nite na laibu sunga kigelh khinta hi. 17 Pathian aw, na ngaihtuahte kei adingin manpha hi natel e! A gawmkhawm tam hi natel e! 18 Sim dek leng, sehnel sanga tamzaw ding hi. Ka khanlawh taka na kianga om na hi lai hi'ng. 19 Pathian aw, mi diktatloute that mai lechin maw! Sisansuahhat noute aw, hon paimangsan un! 20 Amaute'n giloutaka nang hon gensia uh a, na melmate'n na min mawkbawl uhi. 21 Tangtawn Toupa aw, nang hon mudahte mudah lou ka hi-a hia? Nang hon doute kih lou ka hi-a hia? 22 Amaute muhdah petmah-a mudah ing a, ka melmate-a sim hi'ng. 23 Pathian aw, hon pheklekin hon pumvel sipsip inla, ka lungtang theivek in. Hon entel inla, patautaka ka ngaihtuahte thei in. 24 Kei ah gamtat gilou om hiam, en inla, Tangtawn lampi ah hon pii in.
Hiamgamna apan Humbitna Ngetna
Lapulian ading. David' Phatnala. 1 Tangtawn Toupa aw, migiloute apan hon hukhia inla, hiamgamte apan hon humbit in. 2 Amaute'n lungsung ah thil gilou sawm uh a, nisima kidouna tokthou gige uhi. 3 Gul' lei banga a lei uh hiamsak uh a, a muk ua gul dekpak gu om hi.
Sela
4 Tangtawn Toupa aw, mi diktatloute' khut apan hon veng inla, ka khe siktaalsak sawm hiamgamte apan hon humbit in. 5 Kisatheite'n thaang kiseel leh khauhual hon siah uh a, lenthaang leh thaangkual zak uh a, ka lampi-a thaang hon siah uhi.
Sela
6 Tangtawn Toupa aw, na kiang a: Nang ka Pathian na hi, hon chi hi'ng. Tangtawn Toupa aw, Zahngaihna ngena ka kikou za in. 7 Tangtawn Toupa Pathian, Hondampa hat aw, kidou ni-in ka lutang na humta hi. 8 Tangtawn Toupa aw, mi diktatloute' lunggulhte pe kenla, a thilsawmte uh lawhchingsak ken, kisathei kha ding uhi.
Sela
9 Kei hon umchipte' lutangte, a thil gilou gente un khuh hen. 10 Mei-amte'n amaute buak henla, meikhuka paihin om uh henla, thoukhe nawnlou dingin buannawi khuka paihin om uhen. 11 Gamsung ah gensiathat mi phuhkipin om kei henla, gitlouhna in hiamgamte sabet bangin delhpha hen. 12 Tangtawn Toupa'n dika thukhenna mizawngte ngahsak ding a, tasamte gum ding ahi, chih thei hi'ng. 13 Midiktatte'n na min phat taktak ding a, mitangte na maia nungta ding uhi.
Muk Veng dinga Ngetna
David' Phatnala. 1 Tangtawn Toupa aw, nang hon sam hi'ng, hon delh meng in! Kon sap chiangin bil hon dawh in. 2 Ka thumna na mai ah gimnamtui bangin kitungtou henla, ka khut liiktouhte nitaklam kithoihna bang hi hen. 3 Tangtawn Toupa aw, ka kam veng dingin vengmi koih inla, ka muk kongkhak vengsak in. 4 Gitlouhna hih mite tawh thil gilou hihkhawm dingin, ka lungtang thil gilou lama kaihin omsak kenla, a anlimte uh zong hon nesak ken. 5 Mi diktatte'n kei hon sat uhen, itsiamna ding hi. Kei hon taihilh uhen, lutanga thaunilh bang hi ding hi. Ka lutang in tua nial lou ding hi. Hinapi-in, ka thuumna zaw, migiloute' thilhihte douna hi gige hi. 6 A vaihawmmite uh kawlkhou apan lotkhiaksuk hi ding hi. Migiloute'n ka thugente kitel mahmah sa ding uhi. 7 Amaute'n: Mi'n lei a leh a, a leikhalte a khetnen bangin, ka guhte uh hankhuk gei ah kithehzak hi, chi ding uhi. 8 Ahihhangin, Tangtawn Toupa Pathian aw, nang hon mitsuan hi'ng. Nang hon beel hi'ng a, ka hinna vuaksuaksak ken. 9 Kei hon thangsiahte uapan hon kem inla, thil gilou hihte' hon thangkam apan hon humbit in. 10 Kei bita ka suahtak laiin, mi diktatloute amau' lenthangte mah ah awk uhen.
Kuamah Awlmawhlouh Kisakna
Kawkhuka a om laia David' Kingaihtuahna. Thuumna. 1 Tangtawn Toupa sama nakpitaka kikou ing a, zahngaihna ngena Tangtawn Toupa sam hi'ng. 2 Ama' maia ka mangbat thuumna gen ing a, ama' maia lungkham thu gen hi'ng. 3 Ka sunga ka kha a bah chianga ka lampi theipa nang mah na hi. Ka paina lampi-a mite'n thang hon siah uhi. 4 Ka taklam ah en in, kuama'n kei hon awlmawh lou hi. Belh ding nei lou ing a, kuama'n ka hinna awlmawh lou hi. 5 Tangtawn Toupa aw, nang hon sam ing a, nang ka bukna hi chin a, mihing gama nang ka tantuan hi na hi. 6 Ka kikou ngaikhia in, panpih ngai petmah ka hi. Kei hon deihte apan hon humbit in, kei adinga hat lua uhi. 7 Na min ka phat theih nadingin, suangkul apan hon suaktasak in. Nang ka tunga na hoih mahmah mana, mi diktatte ka kima hong kikaikhawm ding uhi, chi hi'ng.
Pathian' Deihlam Lunggulhna
David' Phatnala. 1 Tangtawn Toupa aw, ka thumna za in. Ka ngetnate bil dawh in! Na muanhuaina leh diktatnain hon dawng in. 2 Na maia a damlai kuamah diktat om lou hi. Na sila tung ah thu khen ken. 3 Melma in kei hon delh a, ka hinna leilaka siktam hi. Sawtpi-a sisate banga miallaka hon teengsak hi. 4 Tua hanga ka sunga ka kha bahta a, ka sunga ka lungtang mangbang hi. 5 Nidang lai nite theigige ing a, na nasepte khempeuh suut ing a, na khut thilhihte ngaihsun hi'ng. 6 Nang lama khut zak ing a, leikeu khi banga ka hinna nang ngaia dangtak hi.
Sela
7 Tangtawn Toupa aw, hon dawng meng in, ka kha bah hi! Kei apan na mai sel ken, kawkhuka lutsukte bang kha ding hi'ng. 8 Zingsangin na itna muanhuai hon zasak in, nang hon muang hi'ng. Ka pai nading lampi hon lak in, ka hinna in nang hon entou hi. 9 Tangtawn Toupa aw, ka melmate apan hon humbit in, nanga bu hi'ng. Na deihlam hih dingin hon sinsak in, nang ka Pathian hi na hi. 10 Na Kha hoih in lampi mam hon tawnsak hen. 11 Tangtawn Toupa aw, na min vangin ka hinna humbit in. Na diktatnain lungkhamna apan hon lakhia in. 12 Na itna muanhuaiin ka melmate satkhia inla, ka galte khempeuh hihmangthang in, na sila hi ing.
Mihing Bang hi Hiam
David' Phatnala. 1 Tangtawn Toupa ka Suangpi phatin om hen. Ama'n ka khutte kidou dan sinsak a, ka khutzungte kidouna mun adinga chiil hi. 2 Amah hon it ka Pathian leh ka kulhpi hi a, ka innsang muanhuai leh ka kihumbitna hi ahi. Ka phaw leh ka bukna hi a, ama'n mite ka nuaia nuaisiah hi. 3 Tangtawn Toupa aw, mihing bang hi ahia, na khawtuah nak? Mihing tapa zong bang hi ahia, na ngaihsak nak? 4 Mihing lah naka hu bang lei hi a, a damsung nite zong limliap mangpah bang lei hi ahi. 5 Tangtawn Toup aw, na vaante pheenvang inla, hong kumsuk in. Mualte lawng in, khu lunglung ding uhi. 6 Khawphia sawlkhia inla, melmate thehzak in. Na thaltangte kapkhia inla, amaute buaigawpsak in. 7 Tunglam apan na khutin hon sawksuk inla, hon suaktasak in. Tui hatpipite apan leh gamdang mite khut apan hon humbit in. 8 Amaute' kam zuauthuin dim a, a khut taklam uh khemhat hi. 9 9 Pathian aw, nang phatna lathak sa ding ing a, pekging gui sawm neia nang phatna la sa ding hi'ng. 10 Kumpipate kianga vualzawhna pepa leh, sihna apan David hukhepa na hi. 11 Gamdang mite khut apan hon suaktasak inla, hon humbit in. Amaute kam zuauthu genna hia,a khut taklam uh zong zuautatna khut hi ahi. 12 Tua hi leh, ka tapate uh a tuailai ua, singnou khangthei bang hi ding uh a, ka tanute uh zong kumpi innpi-a zehoihtaka khuak a kiu khuampite bang hi ding uhi. 13 Ka buhbukte uh an chi tuamtuama dim ding a, ka belamte uh a sang a sanga pung ding a, ka gamlakte ua sangsawm sawma nou neiding uhi. 14 Ka bawngtalte un van gikpipi kai ding uh a, kulhbaang vangte omlou ding a, sala kaiha om lou ding hi ung. Ka kongzingte ua zong lungdon kahna om lou ding hi. 15 Hibang dinmun nei mite mi nunnuam hi uh a, a Pathian uh Tangtawn Toupa hite, mi nunnuam hi uhi!
Pathian Thilhih Thupite
David' Phatnala. 1 Kumpipa ka Pathian aw, nang hon pahtawi ding ing a, Tangtawn Tangtawna na min phat ding hi'ng. 2 Nisima nang hon phat ding ing a, Tangtawn Tangtawna na min pahtawi ding hi'ng. 3 Tangtawn Toupa lian a, nakpitaka phattaak penpen hi ahi, a thupina kuamah suivual hilou hi. 4 Khang khat in khang dang kiang ah, na thilhihte phat ding a, na thilhih thupite gen ding hi. 5 Na kumpi thupina kilawmna thupitak suutsuut ding inga, na thilhih lamdangte suut ding hi'ng. 6 Na thilhih mulkimhuai vangletnate gen ding ing a, na thilhih thupite phuang ding hi'ng, 7 Na hoihna thupi tampite gengen ding uh a, na diktatna lungnuamtaka la-a sa ding uhi. 8 Tangtawn Toupa hehpihsiam leh, lainat siam hi a, hehhak, lungnel leh itna hau hi ahi. 9 Tangtawn Toupa zaw mi khempeuh tung ah hoih a, a thilsiamte khempeuh tung ah lainatna hau hi. 10 Tangtawn Toupa aw, na thilsiamsate khempeuh in nang hon phat ding a, na misiangthoute'n nang hon pahtawi ding hi. 11 Na kumpigam thupina gen ding uh a, na thahatna thu gen ding uhi. 12 Mi khempeuh in na thilhih thupitakte thei ding uh a, na kumpigam thupina thupi dan thei ding uhi. 13 Na kumpigam zaw Tangtawn kumpigam hi a, na ukna zong a khang a khang donga omden dng hi. Tangtawn Toupa zaw a thuchiam khempeuh ah muanhuai a, a thilsiamte khempeuh tung ah itsiam hi ahi. 14 Tangtawn Toupa'n a pukte khempeuh phongtou a, a kun kheukheute khempeuh dingtangtousak hi. 15 Mi khempeuh in nang hon mitsuan a, nang a hun huna amaute an pia na hi. 16 Nang na khut zalkhia chin a, thilhing peuhmahte' lunggulh pia-a taisak na hi. 17 Tangtawn Toupa zaw a gamtatna khempeuh-a diktat a, a thilsiamte tunga itsiam ahi. 18 Tangtawn Toupa zaw amah samte khempeuh leh, thutaka amah samte khempeuh kianga nai ahi. 19 Amah laudan siamte' lunggulhte pia a, a kahna husa uh za a, amaute hondam hi. 20 Amah itte khempeuh Tangtawn Toupa'n ching a, Mi diktatloute khempeuh bel hihmangthang ding hi. 21 Ka kam in Tangtawn Toupa phata thu gen ding hi. Thilsiamte peuhmah in Tangtawn Tangtawnin a min siangthou phat hen.
Makai Liante Muan Louh ding
1 Tangtawn Toupa phat un! Ka hinna aw, Tangtawn Toupa phat in! 2 Ka damsung tenga Tangtawn Toupa phat ding ing a, ka damsung teng ka Pathian phatla sa ding hi'ng. 3 Makai liante muang kenla, a sithei mihing, mi hondam theilou peuh muang ken. 4 A kha a paikhiak chiang a, amah leia kik nawn maimah a, tua ni mah a, a thilsawmte bangmah lou suak hi. 5 Amah huh dinga Jakob' Pathian nei mi, Tangtawn Toupa a Pathiana lametna nga mi, mi nunnuam hi ahi. 6 Amah lei leh van leh tuipi leh a sunga omte khempeuh Siampa, a muanhuai tawntung Tangtawn Toupa hi ahi. 7 Ama'n nuaisiahna thuakte gum a, dika thu khensak a, gilkialte kianga an pia hi. Tangtawn Toupa'n koltangte suaktasak hi. 8 Tangtawn Toupa'n mittawte' mit vaksak a, Tangtawn Toupa'n a kun kheukheute phongtou a, Tangtawn Toupa'n midiktatte it hi. 9 Tangtawn Toupa'n gamdang mite ching a, pabeite leh meigongte an pia a, mi diktatloute gamtatna bel lumlehsak hi. 10 Tangtawn Toupa'n Tangtawnin vai hawm ding a, Zion aw, na Pathian in a khang a khanga vai hawm ding hi. Tangtawn Toupa phat un.
Jerusalem Tundingkikna
1 Tangtawn Toupa phat un. I Pathian phatnate la-a sak hoih mahmah a, amah phat nuam a, amah adinga kituak mahmah hi! 2 Tangtawn Toupa'n Jerusalem lam a, sala kaih Israelte kaikhawm hi. 3 Ama'n lungtang tamkhamte damsak a, a liammate uh tuamsak hi. 4 Ama'n aksite a tam ding zah bikhiah a, a min min ua sam chiat hi. 5 I Toupa thupi a, vangletna thahatna nei hi. A theihsiamna in tawp neilou hi. 6 Tangtawn Toupa'n mi niamte tungding a, mi diktatloute bel leilak dennain nei hi. 7 Tangtawn Toupa tunga kipahthu genin la sa unla, pekging tumin i Pathian mai ah ging kilawm bawl un. 8 Ama'n meipi-in van khuh a, leitung ah vuah zusak a, mualtung ahte loupate pousak hi. 9 Ama'n ganhonte an pia a, va-ak noute a ham chianga an pia hi. 10 Amah sakol thahatna ah kipak lou a, mihing khete ah zong kipak lou hi. 11 Tangtawn Toupa zaw amah laudan siamte ah kipak a, a itna muanhuai lamente ah kipak hi. 12 Jerusalem aw, Tangtawn Toupa pahtawi in. Zion aw, na Pathian phat in. 13 Ama'n na kongpi kalhnate kipsak a, na sunga na mite vualzawl hi. 14 Ama'n na gamgi sunga galmuanna hon pia a, huitbuh hoihpena hon taisak hi. 15 Ama'n leitung ah a thupiak sawlkhia a, a thu kintakin taai hi. 16 Ama'n samul banga vuk phalh a, meivu banga vukte theh hi. 17 Ama'n suangtangte banga gialpi bawsuk a, a votna kua'n thuakzou ding ahia? 18 Ama'n thu pia a, tuate zulsak a, huih nungsak a, a tuite luangsak hi. 19 Ama'n Jakob kianga a thu kilangsak a, Israel kianga a thusehte leh a dante kilangsak hi. 20 Hibanga namdang kuamah adinga hih lou a, a dante zong theilou uhi. Tangtawn Toupa phat un!
Thilsiam Khempeuh in Toupa Phat
1 Tangtawn Toupa phat un! Vaante apan Tangtawn Toupa phat un, tung sang ah amah phat un. 2 Nou a vansawltakte khempeuh in amah phat un. 3 Ni leh khapi in amah phat un, aksi taangte khempeuh in amah phat un. 4 Vaan sangpente'n amah phat un, tung vana tuite'n amah phat un. 5 Amaute'n Tangtawn Toupa' min phat uhen. Ama'n thu pia a, amaute siama om uh hiven. 6 Ama'n amaute amau' mun teka koihden a, ama'n a mangthang ngeilou ding thuseh pia hi. 7 Nou tuipi ganhing liante leh tui thukpite'n leitung apanin Tangtawn Toupa phat un. 8 Khawphia leh gialpi, vuk leh meipite, a thumang huihpi, 9 mualsangte leh mualniamte khempeuh, singkung gahtheite leh sidar singkung khempeuh, 10 gamsate leh gantate khempeuh, bokvak ganhingte leh tungleng vasate, 11 leitung kumpipate leh namte khempeuh, makaite leh leitung thukhente khempeuh, 12 tangvalte leh nungakte, teekte leh naupangte khempeuh in Tangtawn Toupa phat un! 13 Amaute'n Tangtawn Toupa' min phat uhen, ama' min kia pahtawi taak hi ahi. A thupina lei leh vante' tunglam peka om ahi. 14 Ama'n a mite adinga kii tungkhia a, a misiangthoute khempeuh phata omna tua hi a, a lungsunga manpha Israel phata omna zong tua hi ahi. Tangtawn Toupa phat un!
A Mite-a Kipak Tangtawn Toupa
1 Tangtawn Toupa phat un! Tangtawn Toupa mai ah lathak sa un, misiangthou kikhawmte lak ah, amah phatla sa un. 2 Israelte, amau Siampa ah lungnuam uhen, Zion mipite a Kumpipa uah kipak uhen. 3 Amaute'n laamin a min phat uh henla, a mai ah khuangta leh kaihging tum uhen. 4 Ahang bel, Tangtawn Toupa'n a mite kipahpih a, miniamte hotdamna khusak hiven. 5 Misiangthoute ama' thupina ah nuam uh henla, a lupna tung uah lungnuamin nakpitakin la sa uhen. 6 A kam uah Pathian phatna om henla, a khut uah namsau hiamtuah om henla, 7 namte tung ah phu la uh henla, mite tung ah gawtna tun uhen. 8 A kumpipate uh khainiangin khih uh henla, a uliante uh sikkol bunsak uhen. 9 Amaute adinga gawtna kigelhsa tangtun uhen. Hiai a misiangthoute khempeuh' thupina hi ahi. Tangtawn Toupa phat un!
Tangtawn Toupa Phat un
1 Tangtawn Toupa phat un! A mun siangthou ah Pathian phat unla, huihkhua zapi thupitak ah amah phat un. 2 A vangletna thilhihte hangin, amah phat unla, tehpihbei a thupina hangin, amah phat un. 3 Pengkul gingin amah phat unla, kaihging leh pekgingin amah phat un. 4 Khuangta leh laamin amah phat unla, tumging guineite leh tamngaiin amah phat un. 5 Dakkhutbettein amah phat unla, dakkhutbet ngaihtein amah phat un. 6 A nakthei peuhmah in Tangtawn Toupa phat hen. Tangtawn Toupa phat un!
A Tup leh Ngim
1 David' tapa, Israel kumpipa Solomon' paunakte: 2 Pilna leh thununna ngah nading, a thuk muhna thute theihsiam nading, 3 kithunun hinkhua leh khawhei siamna ngah nading, adik a tang leh kilawma gamtat nading, 4 mimawlte kianga lungpilna pe ding, tuailaite kianga theihna leh a thuk muhna pe ding paunakte ahi. 5 Mipil in ngaikhiain theihna sin semsem henla, a thuk muhna nei mi in thuhilhna pii sinsiamta hen. 6 Tua mah, paunakte leh gentehnate theihsiam nading, a pilte' thugente leh thu theihhakte theih siam nading ahi. 7 Tangtawn Toupa laudan siam mah theihna kipatna bul hi ahi, ahihhanga, mihaite'n pilna leh thununna simmawh uhi.
Nu leh Pa' Thumanna
8 Ka tapa aw, na pa' thuhilhna ngaikhia inla, na nu' sinsakna pampaih ken. 9 Ahang bel, tuate na lutang zepna pakkhi hi ding a, na ngawng zepna khainiang hi ding hi.
Lawm Hoihlou Kholhlouh
10 Ka tapa aw, mikhialte'n hon zol leh, mang het ken. 11 Amaute'n: Koute hon zui in, sisan suah dingin mi buk ni, a san a hang beiin, mawhneiloute' sisan buk ni. 12 Amaute hankhuk bangin hingvalh ni, gum sunga kia bangin nawmvalh ni. 13 Van manpha namkim sut ni, gallaak sumte inn dimin nei ni. 14 Koute hon pawl inla, sumbawm kikop ni, hon chih uleh, 15 ka tapa aw, amaute zui kenla, a lampi uh tawnin kalsuan ken. 16 Amaute gilou hih dinga tai uh a, sisan suah dinga kinawh uhi. 17 Vasate' muh tangpi-a lenthang kam amawkna hi taktak hi. 18 Ahihhanga hibang mite'n amau' sisan mah buk hi leltak uhi. 19 Muhna diklou lunggulh mite khempeuh' tawpna tua bang hi tawntung a, amau' hinna mah in sawng hi.
Pilna Nolhmi Vauhilhna
20 Kongzing ah pilna kikou a, konglai ahte nakpi-in kikou hi. 21 Mi tampi omna munte ah kikou a, khawpi kongpite ah thu gen a: 22 Nou mimawlte aw, bangtan mawl gamtat lai ding? Simmawhhatte'n simmawhna bangtan kipahpih lai ding? Mihaite'n theihna bangtan haw lai ding? 23 Kon taihilhna ngaikhia hi le uchin, na tung ua ka lungtang sungbawta ding ing a, ka ngaihtuahte hon theisakta ding hi'ng. 24 Ahang bel, ke'n kon sap laia, hon nial uchin a, noute lama ka ban ka zak laia, kuama'n hon thudon lou hi ve uchin, 25 Kon thuhilhna thudon lou a, kon taihilhna lah na saan louh man ua, Ke'n zong na tuahsiat ni ua, hon nuihsan lei ding ing a, na lau luat chiang ua, hon engbawl lai ding hi'ng. 27 Tuahsiatna in huihpi banga noute hon phak chianga, siatna in pingpei banga noute hon tuam chianga, lungzinna leh lungkiakna noute tunga hong tun chianga, hon don lou ding hi'ng. 28 Ama'n: Tua bang hun chianga kei hon sam ding uh a, ke'n lah dawng lou ding hi'ng. 29 Amaute'n theihna hua uh a, Tangtawn Toupa lau ding teel lou uh a, 30 ka thuhilhna deih loua ka taihilhna simmawh uh ahih mana, 31 a gamtatna bangbang uh thuak ding uh a, a thilgelte mah uh amau' tunga kibung vek ding hi. 32 Ahang bel, mimawlte'n a lampialna uh sihlawh ding uh a, mihaite'n bangmah a thudon louhna uh manthat lawh ding uhi. 33 Kei hon bildawhte bel, bittaka teeng ding uh a, siat lau lou-a bit ding uhi, chi hi.
Pilna Phattuamna
1 Ka tapa aw, ka thute na saan a, ka thupiakte lungsunga na kholkhawm a, 2 pilna thu bil na dawh a, theihsiamna zonga lungtang na suuk leh, 3 theihkaktheihna na nget a, theihsiamna nakpi-a na nget a, 4 ngun banga na zon a, gou kisel banga na zonzon leh, 5 tua chianga Tangtawn Toupa lau daan theisiam ding chin a, Pathian theihna ngah ding na hi. 6 Ahang bel, pilna pepa Tangtawn Toupa hi a, theihna leh theihkakna pia ama' kam mah hiven. 7 Ama'n mitangte adinga pilna dik kholkhawm a, amah genbaangloua gamtate adinga kidalna lum hi ahi. 8 Ahang bel, ama'n midikte' gamtatna ching a, ama'n a muanhuaite' lampi kembit hiven. 9 Tua chianga, a dik leh tang theikak ding chin a, gamtatna hoih kilawm theitel ding na hi. 10 Ahang bel, pilna na lungsunga lut ding a, na hinna in theihna nuamsa ding hiven. nTheihkak theihna in hon hu ding a, theihsiamna in hon ching ding hiven. 12 Pilna in, giloute' gamtatna apan hon hukhe ding a, pilna in thusia gente apan, 13 a dik a tanga gamta lou miallaka gamtate apan hon hukhe ding hiven. 14 Thil gilou hih nuamsate, gitlouhna kipahpihte apan hon hukhe ding hi. 15 Amau' lampi kawite, amau' gamtat kawite apan hon hukhe ding hi. 16 Tua baana, angkawmnu kamkhum mizol siam apan hon humbit 17 a tuailai koppihpa taisan a, Pathian' thukhun mangngilhnu apan hon humbit ding hi. 18 Tua bang numei' inn sihna ah tumsuk a, a lampi in misikhua sunsuk hi. 19 Tua bang numei kianga hawh kuamah kiknawn lou a, hinna lampi zong ngahkik nawn lou hi. 20 Tua a hih manin, mihoihte' lampi zui inla, midikte' gamtat bangin gamta in. 21 Ahang bel, a dik a tanga gamtate'n gamsung luah ding a, genbaangte mah in luahden ding hi. 22 Migiloute bel gamsung apan kisatkhe ding a, a muanhuailoute kibotkhe ding hi.
1 Ka tapa aw, ka sinsakna mangngilh kenla, ka thupiakte na lungsung ah kem in. 2 Tuate'n na damsung ni leh kumte sausak ding a, lungmuanna hon behlap lai ding hi. 3 ltna leh muanhuaina khahsuah ken, na ngawng ah vial inla, na lungtang pek ah gelh in. 4 Tua hi leh, Pathian leh mihing' maia deihsakna leh zahtakna ngah ding na hi. 5 Na lungtang khempeuh-in Tangtawn Toupa muang inla, nangma' theihna muang ken. 6 Na gamtatna khempeuh ah amah phawk in, ama'n na lampi tangsak ding hi. 7 Nang kimuh danin pii kisa ken, Tangtawn Toupa lau inla, gilou taisan in. 8 Tua in na pumpi ah chidamna tun ding a, na guhte ah hatthakna tun ding hi. 9 Na hauhnate leh na louma-a gahmasate-in Tangtawn Toupa pahtawi in. 10 Tua hileh, na buhpangte dimlet ding a, na grep sukna bel zong grepzu thakin dimlet ding hi. 11 Ka tapa aw, Tangtawn Toupa' thununna simmawh kenla, hon taihilhna hehsan ken. 12 Pa in a pahtak a tapa a thunun banga, Tangtawn Toupa'n a itte thunun nak ahi. 13 Pilna a tomkhawm mi, mi nunnuam hi a, theihsiamna a ngah mi, mi nunnuam hi ahi. 14 Ngun sanga tua neih thaman zaw a, kham sanga manpha zaw hi. 15 Suangmanpha rubi sanga manpha zaw a, mihingte deihtheih khempeuh tawh teh theih vual hilou hi. 16 Ama' khut taklam in damsawtna tawi a, ama' khut veilam in hauhna leh pahtawina tawi hi. 17 Ama' lampite nuam a, ama' tot lampite lungmuanna hi ahi. 18 Pilna, a angpom mi adinga hinna singkung hi a, a lenkipmi, mi nunnuam hi ahi. 19 Tangtawn Toupa'n pilna-a leitung kingakna suang phum a, theihsiamna-a vante amau mun teka koih hi. 20 Ama'n a theihna-a tuipite khenzak a, meipite daituia kesuksak hi. 21 Ka tapa aw, thukhenna dik leh theihkakna len inla, na muhphak louh dingin paimangsak ken. Amaute nang adinga hinna hi ding a, na ngawng adinga zepna kilawm hi ding hi. 23 Tua hi leh, bittaka na lampi zui ding chin a, na khe kisui lou ding hi. 24 Na lup chianga lau lou ding chin a, na ihmut lim ding hi. 25 Mulkim guihna lau kenla, migiloute' tunga tung siatna zong lau ken. 26 Ahang bel, Tangtawn Toupa, na kimuanna hi ding a, na khe zong thangawk lou dinga ama'n kem ding hiven. 27 Na hih theih ahih nak leh, huh dia kilawmte thil hoih it ken. 28 Na neih nak leh, na innveng kiang ah: Hong pai kik in, zing chiangin hon pe ning, chi-in sawlkik ken. 29 Na innveng in nang hon muang a, na kianga teeng ahih manin, a siat nading sawm ken. 30 Na tunga thusia bawllou mi, a san a hang beipi-in a sia ngawh ken. 31 A ngongtat mi eng kenla, a gamtat dan zong zui ken. 32 Ahang bel, a tatse mi Tangtawn Toupa'n kih a, a dik a tanga gamta mi bel thu-iim kem dinga zong muang hiven. 33 Migiloute' innsung ah Tangtawn Toupa' hamsiatna om a, a diktatte' innsung ah bel, a vualzawlna om hi. 34 Simmawhhata kisatheite ama'n simmawh taktak a, a kiniamkhiakte bel hehpihna pia hi. 35 A pilte'n pahtawina gou luah a, a hai teiteite bel ama'n a zahlakna uh pulak ding hi.
Pilna Mah Thupipen
1 Ka tapate aw, pa' thuhilhna ngaikhia unla, theihsiamna nei dingin thudon un. 2 Ahang bel, ke'n sinsakna hoih hon pia hi vengin, ka sinsakna taisan kei un. 3 Kei ka pa' inna naupang ka hih laia, ka nu' ta neihsun naupangnou ka hih laia, 4 ka pa'n hon sinsak a: Na lungtang khempeuhin ka thugente lenkip inla, ka thupiakte zui lechin, hing ding na hi. 5 Pilna ngah inla, theihsiamna ngah in! Ka kama thute mangngilh kenla, pialsan ken. 6 Pilna nuse kei lechin, ama'n nang hon hu ding a, pilna it lechin, ama'n nang hon kem a, hon ching ding hi. 7 Pilna mah a thupi masapen ahih manin, pilna mah zong in. Na neih khempeuh na manlawhta zong, theihsiamna mah zong in. 8 Pilna pakta lechin, ama'n hon pahtawi ding hi. Pilna na angpom chianga, pahtawina hon tun ding hi. 9 Na lutang kilawm nadinga hehpihna pakkhi hon khimsak ding a, thupina lukhu hon khusak ding hi, chi hi. 10 Ka tapa aw, ka thugente ngai inla, saang in. Tua hi leh, na damsung sawt ding hi. nNa pii nading lampi hon hilh a, lampi tanga hon pii hi'ng. 12 Na pai chianga na kalsuan hon nang om lou ding a, na taai chianga kisui lou ding na hi. 13 Thuhilhna lenkip inla, khahsuah ken. Na hinna hi ahi, hoihtakin kem in. 14 Migiloute' lampi zui kenla, gitlouhna lampi tawn ken. 15 Tua lampi tawn kenla, pel zaw in. Kiheisan inla, nusia in. 16 Ahang bel, migiloute'n a sia khatpeuh a hih khak masiah uh ihmu theilou uh a, khattei kipalpaisak lou-a ihmut mu lou uhi. 17 Gitlouhna ne uh a, ngongtatna zu dawn taktak uhi. 18 Midikte lampi ahih leh, zingsang phalvak bang hi a, suntanglai ni banga taangpha semsem hi. 19 Migiloute' lampi bel, mial bikbek a, banga kisui uhiam, chih nangawn theilou uhi. 20 Ka tapa aw, ka thute ngai inla, ka thugente bil dawh in. 21 Na muhphak louh dingin koih het kenla, na lungsung ah kem in. 22 Ahang bel, a ngah mite adinga hinna hi a, amaute' pumpi adinga chidamna hiven. 23 Bangteng sangin na lungtang ching in, ahang bel, tua apan hinna tuisik luangkhia hi ahi. 24 Khemhat kam koihkhia inla, thusia genna mukte koihmang in. 25 Na mitin mailam tangtakin en gimgem inla, saik louin en kilkel in. 26 Na zuih ding lampi ngaihsun inla, a kip lampi tawn in. 27 Taklam ah zong, veilam ah zong lampial kenla, a gilou lampi tawn ken.
Angkawm thu-a Vauhilhna
1 Ka tapa aw, ka pilna thudon inla, ka theihsiamna thute bil dawh in. 2 Tua hi leh, deihtel siamna nei ding chin a, na mukte'n pilna thute kem ding hi. 3 Angkawmnu, khuaizu banga kamkhum a, sathau banga dangnal hi. 4 Ahihhanga, a tawpa amah sinkha banga kha a, namsau hiamtuah banga hiam hiven. 5 Sihna lam manawha pai a, a kalsuante'n misikhua tun hiven. 6 Hinna lampi ngaihsun lou a, a lampite kawi a, ama'n lah phawklou hiven. 7 Tu'n, ka tapate aw, hon ngaikhia unla, ka thugente pialsan kei un. 8 Angkawmnu gamlapi ah pel unla, a kongkhak naihin pai kei un. 9 Tua a hih kei leh, na thahatna uh midang pe ding uchin a, hehpihnabei mi' khuta na damsung uh pe ding hi uteh. 10 Gamdang mite'n na neih na lam uh tang ding a, na sepgimna un midang hausak ding hi. nA tawpa na sa uleh pumpi hong teekkun chianga, daha mau phing ding hi uteh. 12 Tua chianga: Thuhilhna ka na hua a, thununna ka na pampaiha ahi! 13 Kei hon sinsakte' thu ka na mang nuam kei a, hon thuhilhte' thu lah ka na ngai nuam kei a, 14 tu'n lah, kikhawmte leh khawmpite laka se dimdem dektak hita vengin, chi phing ding hi uteh. 15 Nangma' tuibem apan dawn inla, nangma' tuileh apan dawn in. 16 Na tuileh kongzinga letkhiain, na luitui konglai ah a letkhe dia hia? 17 Tuate nangkia-a hi henla, midang tawh kikop ken. 18 Na tuikhuk nunnuam henla, na tuailai zi ah lungkim in. 19 Amah a etlahhuai sazuk leh heksiam zukpi bangin en inla, a nawite ah lungkim inla, a itna in na lung kuaiden hen. 20 Ka tapa aw, banghanga angkawmnu na lung kuaisak ding na hia? Banghanga midang' zi ang kawi ding na hia oi? 21 Tangtawn Toupa'n pasal' gamtatna mu gige a, a kalsuan khempeuh entel 22 gige hi' Migilou zaw, ama' gitlouh thilhih mah in man a, a khelhna khaute maha awk hi. 23 A kithunun zawhlouhna sihlawh ding a, a haigamtatna lian in pialmangsak ding hi.
Haigamtatna thu-a Vauhilhna
1 Ka tapa aw, sum thu-a na lawm taanga mawhpaw dinga na din a, mikhual taanga thuchiama na kihen leh, 2 nangma' kampautea awk a, na kampaute'n hon man hi ahi. 3 Ka tapa aw, na suahtak nadingin hibangin hih in: Na innveng khutsunga taang na hih manin, pai inla, a mai ah kiniamkhiakin vathum in. 4 Lusu kenla, ihmu ken. 5 Sabengmi' khut apan sasan suakta bangin, thangsiahpa' thang apan vasa suakta bangin suahtak teitei sawm in. 6 Thadahpa aw, miksite kianga paiin a gamtat dan uh va en inla pii in. 7 Amaute'n makai lah nei lou, chingpa lah nei lou, ukpa lah nei lou uhi. 8 Hinapi-a, khawkhal laia nek ding kaikhawm uh a, pawltak laia an kholkhawm uhi. 9 Thadahpa aw, bangtan lum ding a, chik chianga thoukhe ding na hia? 10 Tomkha ihmu lai ding, tomkha mitsi lai ding, tomkha khutzep lai ding, na chih sunga, 11 zawnna in suamhat banga hon pha ding a, taksapna in gal banga hon lap ding hi. 12 Miginalou leh migilou, thuginalou gena vak kawikawi a, 13 mita mi houpih a, khetaata gen a, khuttal a huui hi. 14 A lungsunga khemnate om a, gitlouh ding sawm a, kilemlouhna piangsak hi. 15 Tua ahih mana, siatna in pha pah ding a, bawlphat theih louh-a segawp guih ding hi. 16 Tangtawn Toupa'n a muhdah thil guk om a, ahi, kihhuai a sak thil sagih om hi. 17 Tuate, kisaktheihna mit-hah, zuauthei lei, mawhneilou' sisan suah khutte, 18 gitlouh sawm gige lungtang, gilou hih dinga kintai khete, 19 theihpih zuautheia pang mi leh, sanggam kal kilemlouhna piangsak mi.
Angkawmna thu-a Vauhilhna
20 Ka tapa aw, na pa' thupiak zui inla, na nu' sinsakna taisan ken. 21 Na lungtang ah vial gige inla, na ngawng ah khihkip gige in. 22 Na paina peuh ah lam hon hilh ding a, na ihmut kala hon ching gige ding a, na khanlawh chianga hon houpih ding hi. 23 Hiai thupiak meivak hi a, hiai sinsakna vak hi a, hiai kithununna in a bawlphatna hinna lampi hi ahi. 24 Numei paktat apan nang hon kem ding a, melmak numei mizol siam' kamkhum apan hon kem ding hi. 25 Tua bang numei' melhoihna lungtangin enlah het kenla, a mitmeia zolphakin om het ken. 26 Ahang bel, kizuaknu adinga an kam khat bang lei hi ding chin a, angkawmnu'n lah na hinna mahmah netum ding hi. 27 Mi'n a puan kangsak loua mei-am angpom thei ding hia? 28 Mi'n a khe kangkeusak loua mei-am sik thei ding hia? 29 A innveng' zi luppi mi tua bang hi a, amah khoih mi in thuak teitei ding hi. 30 A puksi dek guta in gu leh, kuama'n simmawh lou hi. 31 Ahihhanga matin om lebel, a innsung hauhna beivek ding ahi zonga a leh sagiha a dit teitei ding hi veve hi. 32 Angkawmpa in lungpilna tasam hi a, tua banga gamta mi in a hinna sesak hi ahi. 33 Vuakna leh daina thuak ding a, a zahlakna bei ngeilou ding hi. 34 Ahang bel, thikthusiatna in a pasal thangpaisak a, phu a lak chianga, zahngaihna neilou ding hiven. 35 Ama'n zangnadopna sang lou ding a, golhna tampi na piak hanga sang nuamlou ding hi.
Angkawmna thu-a Vauhilhna
1 Ka tapa aw, ka thute kem inla, ka thupiakte na lungsung ah kholkhawm in. 2 Ka thupiakte zui inla hing in. Ka sinsaknate mit nauta bangin kem in. 3 Na khutzungte ah vial inla, na lungtang pek tung ah gelh in. 4 Pilna kiang ah: Ka sanggamnu na hi, chi inla, theihsiamna, tanau naipen, chi-in sam in. 5 Tua hi leh, amaute'n angkawmnu apan hon hu ding a, paktatmi' kamkhum zolna apan hon hu ding hi. 6 Ka inn tawhleta vathangkalh vangte apan khawdak ing a, 7 mimawlte laka tangvalnou khat mu ing a, tuailaite laka lungpilna tasam tangvalnou khat mukha hi'ng. 8 Amah, kongzing zuiin, numei paktatnu' inn kianga pai a, tua inn manawh hi. 9 Nitum khawmui lai leh khawmialkuan hi a, 10 tua muna numei in amah na muak a, kizuaknu' kizep ngeina puan silh a, tup leh ngim gilou khat nei hi. 11 Zumna mei theilou a, hangsantaka pau a, inna om kinken ngeilou hi. 12 Kongzing teng, khawdung khawvai teng, inn kawmkal tenga mi buk hi. 13 Tua mipa na kawi a, na tawp hi. Zum mahmah lou-in houpih a: 14 Lemna kithoihna bawl ing a, tuni-a ka thuchiam tangtun hi'ng. 15 Tu'n nang tuak dinga hong pusuak a, kongzinga hong muta ka hi ve. 16 Lupna awngphahsa-a koih ing a, a nuam mahmah dinga Aigupta puanzem hoihte khuh hi'ng. 17 A nuam mahmah ding gimnamtui murate, aloe-te, singguithakte buak hi'ng. 18 Hong pai inla, zing khawvak dong kikawi kawi ve ni, ang kikawmin nuam kisa ve ni. 19 Ka pasal lah om lou a, gamlapi-a zinmang a, 20 sum tampitak keng a, khalik dong hong chiah lou ding hi. chi-a kun hi. 21 Ama'n kamkhumtaka amah zolzou a, kamsiamtaka khemzouta hi. 22 Tua valnou in amah zuipahta a, a kigawh na'ng zuana kikai biaubiau bawngtal bang hi a, a awk nading thanggum zuan leh 23 thaltang in a sin a kapkhak ding delhphong phong sakhi bang hi a, a sihlawh ding lam phawklou thaang bawha leng vasa bang hi ahi. 24 Tua bang hi a, ka tapate aw, ka thugen ngai un. Ka kama thuhilhnate thudon un. 25 Tua bang numei' zolna lunggulh kha mahmah kei unla, a lampi zuiin pial kha mahmah kei un. 26 Tua bang numei in mi tampi pukgawpsakta a, ama' thahte mihat khawkhengte eive! 27 Ama' inn zaw hankhuk zotna lampi hi a, tua in misikhua sunsuk hi.
Pilna' Ngetna
8 Pilna kikoukhia a, theihkak siamna in aw suah hilou hia? 2 A saanna mun teng, lamka thuam tenga ding a, 3 khawpi lutna kongpite-a kikou a: 4 Mihingte aw, noute hon sam a, mi khempeuh sama aw suah hi'ng. 5 Mimawl noute aw, khawhei siamna nei unla, mihaite aw, theihsiamna nei un. 6 Ngai dih ua, thilhoihpente gen ding ing a, a dik a tang peuhmah ka kam apan pawt ding hi. 7 Ahang bel, ka kam in thutak gen ding hi. Ka mukte'n gitlouhna kih hiven. 8 Ka kama ka thugen peuhmah dik a, thu kawi leh thu gilou omlou hi. 9 A theisiam mi adinga tua thute dik vek a, theihna ngahte adinga gensiatbei hi uhi. 10 Ngun sangin ka thuhilhna teel zaw unla, kham siang sangin theihna teel zaw un. 11 Ahang bel, rubi suang manpha sanga pilna manpha zaw a, na lunggulh theih thil dang bangmah in tehpih thei lou hi. 12 Kei, pilna, khawhei siamna tawh teengkhawm ing a, theihna leh thukhenkak siamna zong nei hi'ng. 13 Tangtawn Toupa laudan siam kichi, gilou hua, chihna hi a, ke'n kisaktheihna, kiotsakna leh gamtatsia leh kamsia hua hi'ng. 14 Thu-a makaih siamna leh thukhenkak siamna kei-a ahi a, theihsiamna leh vangletna nei hi'ng. 15 Keimah zangin kumpipate'n vaihawm uh a, vaihawmte'n dan dik bawl uhi. 16 Keimah zangin kumpi' tapate, miliante leh thukhenmi khempeuh in leitung vai hawm uhi. 17 Kei hon itte itthuk ing a, kei hon zong taktakte'n hon mu hi. 18 Hauhna leh pahtawina keia hi a, hauhna sawt daih leh lamzanna keia hi ahi. 19 Ka gah, kham siang sanga hoih zaw a, ka sepsuah zong ngun manphapen sanga mapha zaw hi. 20 Diktatna lampi, a dik a tanga gamtatna lampi zui hi'ng. 21 Tua mah, kei hon itte, hauhna ka luahsak theihna hi a, a goubawm uh ka dimsak theihna hi lai hi. 22 Tangtawn Toupa'n a gamtat patchil apan kei hon neikhia a, taanglai a nna a pat ma nangawna hon neita hi. 23 Tangtawn apan, a chil apan, leitung om ma nangawna sehsa hita hi'ng. 24 Tuipite pian ma-a, tuinakte apan tui a luan ma-a, kei piangkhinta hi'ng. 25 Tangte leh mualte phuhkip ahih ma-a, kei piangkhinta hi'ng. 26 Leitung leh khuavannuai leh, leivuite a kibawl ma-a kei omkhinta hi'ng. 27 Vaante a mun taka a koih laia, tuipi tunga kawlmong a khun laia, 28 tunga meipite a koih laia, tuipi tuinakte a bawl laia, 29 tuipite'n a thupiak a pelhlouh nadinga gite a khun laia, leitung kingakna a phum laia, kei omkhinta hi'ng. 30 Ama' kianga om khutsiam nasem mi hi ing a, nisima a lungdamna hi ing a, ke'n amah tawh om nuamsa gige hi'ng. 31 Ama' leitung khuavannuai nuamsa a, mihingtate kipahpih hi'ng. 32 Tua ahih manin, ka tate aw, ka thu ngai un, ka lampi tawnte mi nunnuam hi ahi. 33 Ka thuhilhna ngai unla, pii unla, thudon louin om kei un. 34 Ka thu ngai mi, mi nunnuam hi a, nisima ka kongkhaka hon ngak a, ka kongvanga hon ngak mi, mi nunnuam hi ahi. 35 Ahang bel, kei hon mu mi in hinna mu a, Tangtawn Toupa apan deihsakna ngah hiven. 36 Kei tunga a khial mi bel, amah kihihna hi a, kei hon hawte peuhmah lah, sihna it mi hi mawk hi, chi hi.
Pilna' Chialna
1 Pilna in a innlam a, khuampi sagihte phut hi. 2 Ama'n sa gou a, zu khaih a, ankuang lui hi. A nasem nungakte sawl a, khawsung munsang tenga mi sama kikousak a: 4 Mimawl peuhmah hiai ah hong lut hen! chisak hi. Theihsiamna tasam mi kianga: 5 Hong pai inla, ka an hong ne inla, ka zu hong dawn in, 6 mimawl gamtat nuse lechin, hing ding na hi, theihsiamna lampi zui in, chisak hi. 7 Simmawhhatte taihilh mi in engbawlna ngen hi a, migilou tai mi in mawkbawlna ngen hi mawk hi. 8 Simmawhhat mi taihilh dah in, nang hon mudah ding hi. Mipil taihilh lechin bel, nang hon it ding hi. 9 Mipil thuhilh lechin, pii semsem ding a, midik sinsak lechin, theitam semsem ding hi, chisak hi. 10 Tangtawn Toupa lau mah pilna kipatna bul hi a, Asiangthoupa theih mah theihsiamna kipatna bul hi ahi. 11 Ahang bel, keima' tungtawna na damsung nite kibehlap ding a, na damsung kumte kibehlap ding hiven. 12 Na pii leh nang adinga pii, simmawhhat na hih leh bel, nang kia-a thuak ding na hi, chisak hi. 13 Numei Hai Numei hai aphuai a, kithunun lou, theihnabei hi ahi. 14 A inn kongkhaka tu a, khawpi sung mun sannapen-a tutna-a tu a, 15 amau lampi zuia tangtaka pai, tua lai tawnte peuh sam hi. 16 Lungpilna tasamte kianga: Mimawl peuhmah hiah hong pai uhen! na nachi hi. 17 Tui guuk lim diak a, a sima annek lim diak hi, chi hi. 18 Ahihhanga, amaute'n tua laia misite om a, tua nu' inna tung a mikhualte hankhuk thukpi sunga om a hih lam uh theilou uhi.
Solomon' Paunakte
1 Solomon' paunakte: Tapa pii in a pa kipaksak a, tapa hai in bel a nu dahsak hi. 2 Gitlouhna tungtawna ngah hauhnate phatuam lou a, diktatna in bel sihna apan mi hukhia hi. 3 Tangtawn Toupa'n midiktatte gilkialin koih lou a, migiloute' lunggulhna bel vuaksuaksak hi. 4 Thadahna khutte'n zawnna tun a, thanopna khutte'n bel hauhna tun hi. 5 Nipi laia an lakhawm mi, tapa pii hi a, anlak laia ihmu mu bel zahlak tapa hi ahi. 6 Midiktatte'n vualzawlna khu a, migiloute' kam bel hiamgamna thugenna tawh kidim hi. 7 Midiktatte' min theih gige nuam a, migiloute' min bel muatmang hi. 8 Mi lungpil in thupiak sang thei a, mihai kamtam in bel siatna tuak hi. 9 Midiktat lungmuangin gamta hiathiat a, migilou bel, a gamtatnate phawkkhiak hi ding hi. 10 Mitsikata mi enpa'n dahna tungsak a, mihai kamtam in lah siatna tuak hi. 11 Midiktatte' kam hinna tuikhuk hi a, migiloute' kam bel, hiamgamna tuikhuk hi ahi. 12 Muhdahna in kilangkhenna piangsak a, itna in bel, tatlekna khempeuh khuh hi. 13 Theihsiamna nei mi' muk ah pilnathu kimu a, lungsimbei mi' nungzang in bel chiangduai thuak hi. 14 Mipilte'n theihna kholkhawm a, mihai' kam in bel siatna tun hi. 15 Mihau' hauhna bel, ama' adinga kulhpi hi a, taksapna bel mizawngte siatna hi ahi. 16 Midiktatte' thaman in hinna tun a, migiloute' thaman in bel gawtna tun hi. 17 Thununna thudon mi in hinna lampi lak hi a, taihilhna zadahmi in bel midangte nangawn pimang hi. 18 A muhdahna iim mi in muk zuauthei nei a, mi gensiat hat mi lah mihai hi ahi. 19 Thu tampi genna ah tatlekna beilou a, a kamsimthei mi bel a pii hi ahi. 20 Midiktatte' lei, ngun bangin manpha a, migiloute' lungtang bel mannabei hi ahi. 21 Midiktatte' muk in mi tampi vak a, mihaite bel, deihtelna pii tasamin si hi. 22 Tangtawn Toupa' vualzawlna in hauhna tun a, dahna tawh kihel lou hi. 23 Mihai in tatsiat nuam a sak banga, theihsiamna nei mi in pilgamtat nuamsa hi. 24 Migilou in a lauh pen mah tuak ding a, midiktatte'n bel a lunggulh uh ngah ding uhi. 25 Huihpi hong nun chianga, migiloute mangthang uh a, midiktatte bel kipden uhi. 26 Greptuithuk in ha zausak a, meikhu in mit siipsak a, tua banga thadah mi in amah sawlte lung nasak hi. 27 Tangtawn Toupa launa in damsung nite sausak a, migiloute' damsung kumte bel tom ding hi. 28 Midiktatte' lamet lungnopna hi ding a, migiloute' lamet bel vuaksuak ding hi. 29 Tangtawn Toupa' lampi, midiktatte' bukna hi dinga, tatsete ading bel siatna hi ding hi. 30 Midiktatte' tenna kipden ding a, migiloute bel gamsunga tengden lou ding hi. 31 Midiktatte' kam in pilna thu genkhia a, kamsia zang lei bel ki-attan ding hi. 32 Midiktatte' mukte'n a kilawm genkhe thei a, migiloute' kam in bel a sia gen ding thei hi.
1 Tangtawn Toupa'n buukna selphala diklou kih a, bukna suang dik bel kipahpih hi. 2 Kisaktheihna in daina tun a, kiniamkhiakna in bel pilna tun hi. 3 Mitangte a diktatna un pii a, mi muanhuailoute bel a zuautatna un amau' siatna tun hi. 4 Thangpaih ni-in hauhna phatuam lou a, diktatna in bel sihna apan mi hukhe thei hi. 5 Genbaanglou mi a diktatna in amah adinga lamtang bawlsak a, migilou bel a gitlouhna-a puk hi. 6 Mitangte a diktatna un hukhia a, mi muanhuailoute bel, amau' lunggulhna giloua awk uhi. 7 Migilou a sih chianga, a lametna teng tawh beikhawm a, tua banga Pathian Biak limsakloute' kilametna vuaksuak mah hi. 8 Midiktat a lungkham buaina apan hutkhiakin om a, migiloute bel, tua lungkham-buaina sunga lut hi. 9 Pathian neiloute' kam in a innveng sesak a, midiktatte bel theihna tungtawna suakta hi. 10 Midiktatte' tuahphat chianga, khawsungbup kipak a, migiloute' sih chianga bel, lungdamna kikou aw kiza hi. 11 Mitangte' vualzawlna in khawsungbup pahtawi a, migiloute' kampau in bel khawsungbup phelgawp hi. 12 Ngaihsutnabei mi in a innveng simmawh a, theihsiamna nei mi bel kamsim thei hi. 13 Mi kamtam in thu-iim khahsuah nak a, mi muanhuai in bel thu iim thei hi. 14 Kithuhilha kimakaihnate omlouh chianga nambup kipuk a, kithuhilha kimakaihna a tam leh bel nambup hutkhiaka om hi. 15 Meltheihlouh mi adinga mawhpaw dinga na din leh, thuak ngeingei ding na hi. Midang taanga thuchiama kihen nuamloute bel bit hi. 16 Hehpihsiam numei in pahtak lawh a, zahngailou mi in bel hauhna len tentun hi. 17 Migitna, a neimi ading maha hoih a, tatsiatna bel, a tatsemi ading maha lunggimna hi ahi. 18 Migilou in thaman gina saang lou a, diktatna khaichi pawi mi in bel, pahtakman saang teitei hi. 19 A diktat taktak mi in hinna a ngah taktak banga, gitlouhna delh mi in sihna ngah teitei hi. 20 Tangtawn Toupa'n lungtang kawite kih a, genbaangloua gamtate bel pakta hi. 21 Hiai chiamteh in: Migilou zaw gawtlouha suakta lou ding a, midiktatte' suante bel suakta ding hi. 22 Ngaihsutna beia gamta numei' melhoihna zaw, vok naka kham nakbah bang hi ahi. 23 Midiktatte' lunggulh zaw thil hoiha tawp a, migiloute' lamet bel thangpaihna-a tawp hi. 24 A hawmsem mi in a tam semsem ngah a, a chiilkon lua mi bel tasam semsem hi. 25 A hawmsem mi hau ding a, midang bawlhoih mi lah, bawlhoih sema om ding hi. 26 Buh man a khan ngaka buh seel mi, mi'n hamsiat a, a zuak nuam mi bel mi'n vualzawl hi. 27 Thilhoih zong teiteite'n deihsakna ngah a, thilgilou zongte'n bel thilgilou mah ngah hi. 28 Ama' hauhna muang mi giau ding a, midiktat bel singteh pha banga pha ding hi. 29 Ama' innsunga buaina tun mi kihawmkhai ding a, mihatte leh mipilte' nasema pang ding hi. 30 Midiktatte' gah hinna sing hi a, mihing' hinna kha man mi lah, mipil hi ahi. 31 Midiktatte'n a muh tuak uh leitunga a muh leh, Pathian biak limsakloute leh mikhialte'n a muhkik uh na sem ve!
1 Thuhilhna it mi peuhmah, theihna it mi hi a, bawlhoihna zadah mi peuhmah lah, a hai lua hi ahi. 2 Mi hoih in Tangtawn Toupa apan deihsakna ngah a, pii lepchiah mi bel, 4 Tangtawn Toupa'n mawhpaih hi. 3 Gitlouhna pansan mi kip theilou a, midiktatte bel kibulkalh theilou hi. 4 A nunhoih-a lunglian zi bel, a pasal adinga kumpilukhu hi a, daina tun zi bel a pasal adinga guh natna hi ahi. 5 Midiktatte' lunggelte dik a, migiloute' thuhilhna bel khemna lei hi ahi. 6 Migiloute' thute in sisan buk a, mitangte' thute'n bel amaute hukhia hi. 7 Migiloute si uh a, suanmang uh a, midiktatte khanggui bel sau hi. 8 Mi'n a pilna bangbanga phatlawh a, lungsim semi bel kimudah hi. 9 Nek ding neiloupi-a kiliankoih sanga, nasemmi guai zou kuamah phawklouh mi hih zong hoih zaw hi. 10 Midiktat in a ganta' hinna it a, migiloute bel, a zahngaihna sun uh zong gilou lai hi. 11 Ama' lou khou hiathiat mi in an hau ding a, deihthusam leltak tawh nungta mi bel ngaihsutnabei hi ahi. 12 Migilote'n giloute' sepsuahsa nangawn deihgawh a, midiktatte' gui bel khang hoih hi. 13 Migilou bel, ama' thugen gilou mah ah awk a, midiktat bel lungkham buaina apan suakta hi. 14 Mi'n a khut nasep apan a nek banga, a kampha apan thilhoiha tai hi. 15 Mihai' lampi ama' ngaiha dika tang hi a, mipil in bel thuhilhna bil dawh hi. 16 Mihai in a hehna langsak pah a, khawheisiam mi in bel, enghouna zong thudon lou hi. 17 Theihpih mi tak in a dik theihpihna thutak gen a, theihpih mi taklou in bel a diklou theihpihna thu gen hi. 18 Ngaihtuah se loua thugen in namsau bangin liamsak a, mipil' kampau in bel liamna damsak hi. 19 Thutak gen mukte omden a, zuau gen lei in bel tomchik lei daih hi. 20 Gitlouh sawmte' lungsung ah, zuauthu om a, lemna omsak mi' lungsung ah bel, lungnopna om hi. 21 Midiktat in siatna tuak lou a, migiloute bel lungkham buaina in bawm hi. 22 Tangtawn Toupa'n zuauthei mukte kih a, mi thutakte bel pakta hi. 23 Khawheisiam mi in theihna seel khilkhial a, mihaite' lungtang in bel haithu gen phuakphuak hi. 24 Thanuamte' khut in vai hawm a, thadahte bel mite' sala lut hi. 25 Lunghihmawhna in mi lunggimsak a, thu hoih in bel mi lungnuamsak hi. 26 Midiktat in pilvangtakin lawmte teel a, migiloute' gamtat in bel lawmte lampialsak hi. 27 Mi thadah in ama' matsa nangawn em ngap lou a, mi thanuam in bel a neihsate manpha sa hi. 28 Diktatna lampi ah hinna om a, tua lampi dungtawn ah sihtheihlouhna om hi.
1 Tapa pii in a pa' Thuhilhna thudon a, simmawhhat mi in bel taihilhna ngaikhe lou hi. 2 Mi'n a mukte' gah apan thil hoih ne a, mi muanhuailoute'n bel hiamgamna ne hi. 3 A kam veeng zou mi in, a hinna hu a, a muk veng lou mi in bel siatna kitun hi. 4 Thadah mi in lunggulh a, lah bangmah lawhtak lou a, thanuam mi bel a lunggulh bangbanga tai hi. 5 Midiktat in zuauthu hua a, migilou in bel maizumna leh daina tun hi. 6 Genbaangloua gamta mi, diktatna in kem a, mikhialte bel Pathian limsaklouhna in phuk hi. 7 A kihausak a, lah bangmah neilou om a, a kizawngsak a, lah hauhna thupitak nei om hi. 8 Ahau mi, a hauhnain kitankhe mai thei a, mizawng in bel vauna za lou hi. 9 Midiktatte' vak taangpha a, migiloute meivak bel kimutmit hi. 10 Kisaktheihna in kinakna tun lei a, thuhilhna thudon mi apan bel pilna kimu hi. 11 Zuautatna tawh sum muh kiampah ding a, tawmtawma thalawh sum bel pung ding hi. 12 Lamet hong zekai chianga, lungtang nasak a, lunggulh a tangtun chianga bel hinna sing hi ahi. 13 Thuhilhna simmawh mi in manlawh ding a, thupiak lau siam mi in bel pahtakna saang hi. 14 Mipilte' sinsakna hinna tuikhuk hi a, sihna thang pelhna hi ahi. 15 Theihsiamna hoih in deihsakna lawhtak a, mi muanhuailoute' lampi bel haksa hi. 16 Khawheisiam mi peuhmah, theihna tawh kituaka gamta a, mihai in bel a haina pulak hi. 17 Sawltak gilou in lungkham-buaina tuak a, palai muanhuai in bel chidamna puak hi. 18 Thununna thudon lou mi in zawnna leh daina tuak a, bawlhoihna ngaikhe mi in bel pahtakna lawh hi. 19 Lunggulh bangbang ngahna hinna adingin khum a, mihaite'n bel thil gilou nutsiat ding ut lou hi. 20 A pilte tawh tonkhawm mi hong pii a, a haite tawh kipawl mi in bel siatna thuak hi. 21 Siatna in mikhialte delh a, mavanna bel midiktatte' pahtakman hi ahi. 22 Mihoih in a tate' tate adinga gou kholsak a, mikhialte' hauhna bel midiktatte adinga gou kikhol suak hi. 23 Azawng' lou kilet a, an tampi piang thei a, hinapi-a a dik a tanga vaihawmlouhna in a mannabeia phiatmang thei hi. 24 A chiang zang lou mi in a tapa mudah hi a, a tapa it mi in bel thunun pah teitei hi. 25 Midiktatte'n taitakin ne a, migiloute' gil bel kial nak hi.
1 Numei pii in a inn lam a, numei hai in bel ama' khut mahmaha a inn phei hi. 2 Gamtatna tanga gamta mi in Tangtawn Toupa lau hi a, gamtat gilou mi in bel amah simmawh hi ahi. 3 Mihai' kama kisaktheihna chiang om a, mipilte' mukte bel amaute hutna hi ahi. 4 Bawngtalte omlouhna-a gankuang vuak a, bawngtal thahatna in bel buhlak ding tampi piangsak hi. 5 Theihpihmi tak in zuau gen lou a, theihpihmi taklou in bel zuaugen ziahziah hi. 6 Simmawhhat mi in pilna zong a, lah mulou a, theihsiamna nei mi in bel Phat baihlamtaka theihna mu hi. 7 Mihai apan kihemkhia in, ahang bel, ama' kam apan theihna mu lou ding hi vechin. 8 Khawheisiamte' pilna in a gamtatna uh ngaihsun vengveng a, mihaite' haina bel khemna hi mawk hi. 9 Mihaite'n mawhna apan kibawlphat ding nuihsan a, mitangte laka bel deihsakna om hi. 10 Lungtang chih in ama' lungnoplouhna kitheih a, a lungnopna zong kuamah dang in kikoppih thei lou hi. 11 Mihaite' inn hihsiat hi ding a, mitangte' puanbuk bel dingkip ding hi. 12 Mihing adinga lampi dik hi leh kilawm om a, a tawpna bel sihna hi thei hi. 13 Nuihna-a zong lungsung natna om thei a, lungnopna zong dahna suak thei hi. 14 Lungtanga muanhuailou mi in, a gamtatna thaman saang ding a, mihoih in bel a gamtatna-a pahtakman saang ding hi. 15 Mimawl in bangpeuh um vek a, khawheisiam mi in bel a kalsuan khempeuh entel masa hi. 16 Mipil in thil gilou taisan a, mihai bel amah kimuang a ngongtat hi. 17 Hehbaih mi, hai gamtat a, gitlouhpil mi lah kimudah hi. 18 Mimawl in haina lawhtak a, khawheisiam mi in bel theihna lukhu-a nei hi. 19 Mihoihte' maia mihoihloute kuun ding a, midiktatte' kongpi-a migiloute kun ding hi. 20 Azawngte bel a innvengte nangawn in mudah a, mihaute'n bel lawm tampi nei hi. 21 A innveng mudah mi, mikhial hi a, mizawngte hehpih mi, mi nunnuam hi ahi. 22 Gitlouh sawmte lampial nak hilou maw? Thil hoih hih sawmte'n bel itna leh muanhuaina mu hi. 23 Sepgim peuhmah metna hi a, kamkia sik bel zawnna hi ahi. 24 Mipilte'n hauhna lukhuin nei a, mihaite' haina in bel haina mah gahsuah hi. 25 Theihpih mitak in, hinna hukhia a, theihpih mitaklou bel zuauthei hi ahi. 26 Tangtawn Toupa lau mi in kulhpi muanhuai nei a, a tate adinga bukna om ding hi. 27 Tangtawn Toupa launa hinna tuikhuk hi a, sihna thaang pelhna hi ahi. 28 Mihing a tam leh Kumpipa adinga pahtawina hi a, gam mi neilou vaihawm mi bel hihhsiata om hi. 29 A hehhak mi theihsiamna tampi nei hi a, a hehbaih mi bel a haina pulak hi lei hi. 30 Lungnopna in pumpi hingsak a, hazatna in bel guh nangawn muatsak hi. 31 Mizawngte zawhthawh bawl mi in amah Siampa simmawh hi a, a tasamte tunga siam mi bel Pathian pahtawi mi hi ahi. 32 Siatna hong tun chianga, migiloute tavaih a, sihna nangawn hong tung mah leh, midiktatte'n bel bukna nei lai hi. 33 Theihsiamna nei mi' lungsunga pilna teeng a, mihaite lak nangawna amah kilangsak hi. 34 Diktatna in nam pahtawi a, khelhna in bel nam khat peuh daisak hi. 35 A pii sila bel kumpipa'n pakta a, a zumhuai sila in bel amah hehsak hi.
1 Kam nema dawnna in Thangpaihna heimanga, kam khauh in bel hehna sousak hi. 2 Mipilte' lei in theihna diktakin zang a, mihaite' kam in bel hai thu sekhia hi. 3 Tangtawn Toupa' mit in gam chih mun chih mu a, migilou leh mipha zong en hi. 4 Damsakna tun kam khum bel hinna sing hi a, kamsia in bel lungtang kitamsak hi. 5 Mihai in a pa' thuhilhna simmawh a, bawlhoihna saang thei mi peuhmah bel khawhei dan siam hi. 6 Midiktat' innsunga gou tampi om a, migilou' lawhkhiak hauhna bel buaina lei hi ahi. 7 Mipil mukte'n theihna hawmzak a, mihaite' lungtang bel tua bang hilou hi. 8 Migiloute' kithoihna Tangtawn Toupa'n kih a, mitangte' thumna bel kipahpih hi. 9 Migiloute' gamtatna, Tangtawn Toupa'n kih a, diktatna delh mi bel ama'n it hi. 10 Lampialmi pen khauhtaka thunun kul a, bawlhoihna deihlou mi lah si ding hi. 11 Misikhua leh siatna Tangtawn Toupa' maia kihongsa hiven, mihingte lungtangte telmuh nazen inchia! 12 Simmawhhat mi in bawlhoihna it lou ahih chianga, mipil zong lamnaih lou ding mah hi. 13 Lungsung nopna in mai taisak a, lungsung dahna in bel lungsim nasak hi. 14 Theihsiamna nei mi' lungtang in theihna zong a, mihaite' kam bel haithuin kivak hi. 15 Nuaisiahna thuak mi' damsung teng gimna ngen hi a, lungnuam mi bel a ankam lim gige hi. 16 Lungkhambuaina tawh kithuah hauhna sanga, Tangtawn Toupa launa tawh kithuah tawmchik neih hoihzaw hi. 17 Kimuhdahna tawh bawng thau sa nek sanga, ki itna tawh antehlouhing nek hoihzaw hi. 18 Hehbaih mi in kilangkhenna piangsak a, lungduai mi in bel kinakna phelh hi. 19 Mi thadahte' lampi linglak bang hi a, mitangte' lampi bel lamlianpi bang hi ahi. 20 Tapa pii in a pa lungnuamsak a, tapa hai in bel a nu simmawh hi. 21 Thukhensiamna neilou mi in hai nuamsa a, theihhsiamna nei mi in bel lampi tang zui hi. 22 Ngaihtuah vengveng loua thil sawm vuaksuak a, thuhilhna tampi omna-a bel lawhchinna om hi. 23 Mi, ama' dawnna kampau mah in kipaksak hi a, a huntaka a kituak thugen hoih hi nah e! 24 Mipil adingin hinna lampi toupai a, hankhuk zuana sukpai lou hi. 25 Tangtawn Toupa'n kisatheite' inn phelsak ding a, meigongte' gamgi bel humbit ding hi. 26 Ngaihtuahna giloute zaw Tangtawn Toupa'n kih a, thugen siangthou bel kipahpih hi. 27 A huaiham mi in a innsunga buaina tun a, golhgukna hawmi bel hing ding hi. 28 Midiktat' lungtang in dawnna ding ngaihtuah detdet a, migiloute kam in bel a sia a kha sekhia hi. 29 Tangtawn Toupa'n migiloute gamlat a, midiktatte' thumna bel za hi. 30 Maitaina in lungtang kipaksak a, thupha zakna in guhte chidamsak hi. 31 Nuntak nadinga taihilhna ngaikhe mi in, mipilte laka om nuamsa hi. 32 Thuhilhna thudon lou mi, amah leh amah kimudah hi a, bawlhoihna thudon mi in bel theihsiamna ngah hi. 33 Tangtawn Toupa launa in mi pilna hilh a, pahtawina ma-a kiniamkhiakna om masa hi.
1 Lungtanga thilgel mihinga hi a, leia dawnna bel Tangtawn Toupa apan hong tung hi ahi. 2 Mihing in ama' lampite khempeuh kitelin siang sa a, lungtang' tup bel Tangtawn Toupa'n entel hi. 3 Na hih ding peuhmah, Tangtawn Toupa' aap lechin, na hih khempeuha mavang ding na hi. 4 Tangtawn Toupa'n nna khempeuh ama' ngimna banga sem a, migiloute' siatna nangawn in tua ngimna zui hi. 5 Lungtang kisatheite, Tangtawn Toupa'n kih a, gawtlouha suakta lou ding uhi, chih thei in. 6 Itna leh muanhuaina thutak tungtawna khelhna kikhuh a, Tangtawn Toupa launa tungtawna gitlouhna kiphel hi. 7 Mi'n a gamtatna tungtawna Tangtawn Toupa a lungtaisak chianga, a melmate nangawn amah tawh kilemsak hi. 8 Dikna telloua hauhna tampi neih sanga, diktatna tawh tawmchik neih mah hoihzaw hi. 9 Mi'n a gamtat nading a lungsunga gelkhol a, a semkhesakpa bel Tangtawn Toupa mah hi ahi. 10 Kumpipa' mukte'n Pathian' gen thu gen a, tua bel a kam in dika thukhenna a kilepsan louh nading hi ahi. 11 Buukna selphala leh buukna dik, Tangtawn Toupa-a hi a, ipsunga buukna suangte ama' bawl hi ahi. 12 Ahang bel, gitlouhna hih zaw, kumpipate adinga kihhuai hi a, diktatna tungtawna kumpitutphah hihkip hi ahi. 13 Diktatna mukte'n kumpipate lungtaisak a, amaute'n thutak gente manpha sa uhi. 14 Kumpipa' thangpaihna mi khat peuh in sihlawh thei a, mipil in bel a thangpaihna damsak thei hi. 15 Kumpipa a maitai chianga, mi khat peuh in hinlawh thei a, a deihsakna lah khai vuahpua meipi bang hi ahi. 16 Kham sangin pilna hoihzaw hi natel e! Ngun sanga theihsiamna teel hoihzaw hi natel e! 17 Mitangte'n gilou tawh kipelh nading lampi tawn a, a lampi tot veeng mi in a hinna veengbit hi ahi. 18 Kisaktheihna in siatna ma kai a, kiphatsakna lungsim in pukna ma kai hi. 19 Kisatheite tawh gallak sum kihawm sanga, kiniamkhiaka, nuaisiahte tawh kikholh hoihzaw hi. 20 Thuhilhna limsak mi mavang a, Tangtawn Toupa muang mi lah mi nunnuam hi ahi. 21 A lungpil mi, a theisiam mi kichi a, a zaknophuai thu nemte'n lah thuhilhna manphasak hi. 22 Theihsiamna, a nei mi adinga hinna tuinak hi a, a haite' thuhilhna bel, haina mah hi ahi. 23 Mipil' lungtang in a kam makaih a, a mukte mi zoutheiin bawl hi. 24 Thu ngaihnophuaite, hinna adinga khuaizu banga khum a, guhte chidamsak hi. 25 Mihing adinga lampi dik hi leh kilawm om a, a tawpna in bel sihna tun thei hi. 26 Nasem mi' anduhna in ama' adinga sem a, a gilkialna in nna semsak hi. 27 Mannabei mi in siat nading zongzong a, a kampau nangawn meikuang bang hi ahi. 28 Lungsim kawi mi in kilangkhenna thehzak a, gensiatna in lawmta zong kilangkhensak hi. 29 Mi ngongtat in a innveng zol a, lampi hoihlou lama paipih hi. 30 Mitsikata mi houpih mi in, a hoihloulam sawm hi a, a muk chiha mi huau mi in thil gilou hih teitei sawm ahi. 31 Samkaang zaw thupina lukhu hi a, diktatna gamtat apan kingah ahi. 32 A galhang mi sanga a hehhak mi hoihzaw a, khawpi a simzou mi sanga amah kithununzou mi hoihzaw hi. 33 Pheitunga ai a kisan hanga, thukhentatna peuhmah zaw Tangtawn Toupa apan hi ahi.
1 Kinana kitawng tawn^ kawma anlim nekna innsung sanga, kihouthei dialdial kawma ankhing keu nek hoihzaw hi. 2 Sila pii in daina piangsak apu' tapa tunga vaihawm ding a, tua sanggamte laka goutan ngah ding hi. 3 Kham leh ngunte, meiphualpi sunga ettel leh siansak hi a, mihing' lungtang bel Tangtawn Toupa'n entela siangsak hi. 4 Migilou in kam gilou ngai nuam a, zuauthei in lah thusia mah ngai nuam hi. 5 Mizawngte simmawh mi in amah Siampa simmawh hi a, siatna tunga kisathei peuhmah lah, gawtlouha suakta lou ding hi. 6 A teekte adinga tate' tate, thupina lukhu hi a, pate lah, tate' adinga suanpen hi ahi. 7 Mihai adinga thupha genna muk kilawm lou a, kumpipa adinga zuau genna muk kilawm lou sem hi nah e! 8 Golhgukna sum a pe mi adinga ai hi a, a kiheina lamlama mavanlawh hi. 9 Tatlekna khuh mi in itna khangsak a, tua bang hihkik kik mi in bel, lawm hoihte nangawn kikhensak hi. 10 Mihai zavei sat sanga, mipil khatvei taai phatuam zaw hi. 11 Migilou in hel kia sawm a, amah thuk ding zahngaihnabei kumpi nasem ama kianga kisawl ding hi. 12 Mihai, a hai gamtat lai tuah sanga, vompi a nou kimatsak lai tuah phadawm zaw hi. 13 Thil hoih, thil giloua dinkik mi peuhmah, thusia in a innsung lawi lou ding hi. 14 Kinakna pat zaw, tuichin keh bang hi a, pat vanglak louh hoihzaw hi. 15 Mawhnei mi diktangsak mi leh mawhneilou mi mawhpaih mi, Tangtawn Toupa adinga a kihhuaidan kibang hi. 16 Mihai in pilna lunggulh lou hiven, pilna lei nading sum a khuta piak bang phatuam ding ahia? 17 Lawm in bel hun tenga hon it gige a, sanggam zong haksatna hun adinga piang hi ahi. 18 Ngaihsutnabei mi, midang taanga mawhkhu dinga kichiam pah a, a innveng taanga mawhkhu dinga ding pah hi. 19 Kinakna it mi in tatlekna it hi a, a kongpi sangpi-a bawl mi lah, siatna zong hi ahi. 20 Lungtang kawi nei mi in, thil hoih mu lou a, zuaugen lei in lah lungkham-buaina tuak hi. 21 Simmawhhat ta nei mi in lungkhamlawh a, a hai ta nei mi in lah lungnopna mu lou hi. 22 Lungnopna in damdawi banga chi damsak a, lungsima gimna in bel guhte keusak hi. 23 Migilou in thudika thukhenna kaikawi dinga golhna sum asima ne hi. 24 Thukhensat siam mi in pilna ngim a, mihai mit bel leimong dong vaakthaap hi. 25 Tapa hai, a pa adinga lungkhamna hi a, a pianna nu adinga kha mahmah hi. 26 Mawhneilou mi gawt hoih lou a, mi lunglian, a thutakna hanga sat zong hoih lou hi. 27 Theihna nei mi, kamsim thei a, theihsiamna nei mi lah lungsim tawldamtaka om thei hi. 28 Mihai nangawn a daih dide leh, a pila kisim a, a pau kei leh, a theia kisim hi.
1 A tangtat mi zaw, ama' angsung khual hi a, thukhenkakna hoih ngainuam lou hi. 2 Mihai in theihsiamna kipahpih lou a, ama' ngaihsutna mah gen nuamsa hi. 3 Gitlouhna hong tun chianga, simmawhna tawh hong ton a, maizumna hong tun chianga lah, zahlakna tawh hong ton hi. 4 Mihing' kampau tui thukpi hi a, pilna tuikhuk bel luita banga luang biahbiah hi. 5 Amawhte guptuam lah hoih lou a, mawhneiloute adika thukhenna taansak lah hoih lou hi. 6 Mihai' muk in amah kinakna sung tun a, a kam in amah vuakthuaksak hi. 7 Mihai' kam in ama' siatna tun a, a mukte lah ama' hinna adinga thaang hi mawk hi. 8 Kigensiatna thute anlim banga mihing' lungsunga tumsuk pahpah hi. 9 Nasep thadah mi pen, thilsia hih mi adinga sanggam hi ahi. 10 Tangtawn Toupa' min bel innsang muanhuai hi a, midiktatte'n beela, bit uhi. 11 Ahaute' hauhna, amaute adinga khawpi muanhuai hi a, amaute'n kulhbaang sang banga ngaihsun uhi. 12 Lungtang kisaktheihna in siatna ma kai a, kiniamkhiakna in bel pahtawina ma kai hi. 13 Kiteltaka a zak ma-a dawng pah mi adinga, tua mah, a haina leh maizumna hi lei hi. 14 Mi, a lungsim a panzawh nak leh, chinatna thuak zou a, ahihhanga, lungtang kitamkham kua'n thuak zou ding ahia? 15 A lungpil mi in theihna ngah a, mipilte' bil in theihna zongkhia hi. 16 Thawnpiak in a pepa adinga lam honsak a, miliante' mai tun hi. 17 Midang hong pai a, a kidottel mateng, a thubuai gen masasa adika kilang hi. 18 Aisan in kinakna thu khen a, nakpi-a kikhingte' kal vengsak hi. 19 Sanggam nuak nepzawh zaw, kulhpi muanhuai laak sanga haksa zaw a, kinakna zong kulhpi kongpi kongkhak kikalh bang hi ahi. 20 Mi'n ama' kampau gah apan gilvahna ngah a, a thugente' gahsuah apan taina ngah hi. 21 Lei in hinna leh sihna vangletna thu nei a, tua it mi in a gah ne ding hi. 22 Zi mupa in thil hoih mu hi a, Tangtawn Toupa apan deihsakna ngah hi ahi. 23 Azawng mi in thuumna kampau zang a, a hau in bel aw khauh-a dawng hi. 24 Lawm hau mi in zong siatna tuak thei a, sanggam sanga naizaw leh kipzaw lawm zong om thei hi.
1 Kamsia zang mihai sanga genbaangloua gamta mizawng hoihzaw hi. 2 Theihnabei hahkatna hoih lou a, kinawh lua-a kalsuan a, lamhaih lah hoih lou hi. 3 Haina in mihing' gamtat sesak a, hinapi-a a lungtang in Tangtawn Toupa hehsan lai hi. 4 Hauhna in lawm tampi bawl a, mizawng bel a lawm nangawn in taisan hi. 5 Theihpihmi taklou gawt louh-a suakta lou ding a, zuaugenhat mi lah suakta lou ding hi. 6 Mi tampi in vaihawm mi' deihsakna zong a, thawnpiak pe mi adinga lah michih a lawm suak hi. 7 Mizawng a sanggamte khempeuh nangawnin a kihepsan leh, a lawmte'n kihepsan sem lou ding hia! Kampha tawh amaute a delh hanga muhphak hilou uhi. 8 Pilna nei mi in a hinna it hi a, theihsiamna a lunggulh mi lah mavang hi. 9 Theihpihmi taklou gawtlouh-a suakta lou ding a, zuauthu sekhe mi lah mangthang ding hi. 10 Mihai adinga nuamtat kilawm lou a, sila in kumpite a uk ding lah kilawm lou sem hi. 11 Mi, a lungpilna in hehhaksak a, tatlekna a kimuh mawhbawlna zong a pahtakhuaina hi ahi. 12 Kumpipa thangpaia a kikouna humpinelkai humham bang a, a deihsakna bel loupa tunga daikia bang hi ahi. 13 Tapa hai, a pa adinga siatna hi a, zi hanhat lah inntung keh-a tuitaak gige bang hi ahi. 14 Innte leh hauhnate bel nu leh pate apan luah hi a, khawheisiam zi bel Tangtawn Toupa apan kingah hi. 15 Thadahna in mi ihmusak buahbuah a, mi thadah zaw gilkial ding hi. 16 Thupiak zui mi in a hinna hu ding a, a gamtatna simmawhhat mi bel si ding hi. 17 Azawngte hehpih mi in Tangtawn Toupa leitawisak hi a, ama'n dinkik teitei ding hi. 18 Lametna om laiin na tapa thunun inla, a siatna tun-in pang kha het ken. 19 Hehbaih mi in gawtna thuak ding a, na hutkhiak hanga na hut thak zihzeh kul ding hi. 20 Thuhilhna ngai inla, mang in, na hinkhua nunung lama pillawh ding na hi. 21 Mihing in a lungsunga thil tampi sawm a, ahihhanga, Tangtawn Toupa' deihlam mah ziksuak hi. 22 Mihing in a lunggulh bel itna muanhuai hi a, zuauthei mi hih sanga mizawng hih hoihzaw hi. 23 Tangtawn Toupa launa in hinna tun a, tua hinna nei mi sunga lungkimna teengden ding hi. 24 Mi zongzaw in ankuang sung sawk a, a kam nangawn tuntou ngap lou hi. 25 Simmawhhat mi sat lechin, mimawlte'n khawheisiamna neihlawh ding a, theihsiamna nei mi taihilh lechin, theihna khenkak thei ding hi. 26 A pa mawkbawl a, a nu hawlkhia tapa in maizumna leh daina tun hi. 27 Ka tapa aw, thuhilhna na ngaihkhiak nawn louh chianga, pilna thute apan lampial ding na hi. 28 Theihpihmi taklou in thutanga thukhenna simmawh a, migiloute'n lah mawhna nawmvalh uhi. 29 Simmawhhatte kigawt ngeingei ding a, mihaite' nungzang lah kisat ngeingei ding hi.
1 Zu zaw simmawhhat hi a, zukhauh lah kisualhat hi a, a zolzawh mi peuhmah zaw a pii hi lou hi. 2 Kumpipa' thangpaihna lauhuai, humpinelkai humham bang hi a, a thangpaisak mi in a hinna taanlawh hi. 3 Kinak kiselna damsak mi in minphatna lawh a, mihai peuhmah lah kinakna-a kikum pahpah hi. 4 Zongzaw mi in lou khawh huna khou nuam lou a, buh at hun chianga at ding nei lou hi. 5 Mihing lungsunga tupnate leh ngimnate, tuili thuk banga vung a, theihsiamna nei mi in bel tuate thalkhia khia hi. 6 Mi tamzawte itna muanhuai nei kichi-a kiphat uh a, ahihhanga, mi muanhuai taktak kua'n mu zou ding ahia? 7 Midiktat genbaanglou-a gamta a, a suan a khakte mi nunnuam hi uhi. 8 Thukhenna tutphah tunga tu kumpipa'n gitlouhnate a mita haihkhia hi. 9 Kua'n: Ka lungtang siangthoua kem ing a, khelhna beia siang hi ing, chi thei ding ahia? 10 Tehna kibang lou, bukna dik lou, a niha Tangtawn Toupa'n kih hi. 11 Naupang nangawn a gamtatnate apan a mihin zia kithei a, a gamtat sia hia, pha hia kithei hi. 12 Zakna ding bil leh, muh nading mit, a niha Tangtawn Toupa' bawl ahi. 13 Ihmut hai ken, tua ahih kei leh, zawnlawh ding na hi. Na mit hak gige in, khamval nei ding na hi. 14 A lei mi in: Kiman kei, kiman kei, chi napi, a paikhiak chianga siam kisa a, ki-uangsak lai hi. 15 Kham om taleh, rubi suang manpha tampi om taleh, pilna mukte mah gou manpha zaw hi lailai hi. 16 Theihlouh melmak mi adinga mawhkhu dinga kichiam mi' puansilh la inla, numei paktat adinga kichiam ahih ngial leh a kichiamna sum dingin koih in. 17 Zuautatte' lawhkhiak an, mihing adingin lim se a, ahihhanga, nungchianga suangtang baak tawh kibang hi. 18 Thuhilhna hoihtak tawh thil geel inla, makaihna pii hoihtak tawh gal dou in. 19 Gensiatna thu gensawn mi, thu iim theilou hi a, kamtam mi tawh kikholh louh hoih hi. 20 Mi'n a nu hiam, a pa hiam, a hamsiat leh a meivak kimutmit a, miallaka khawsa ding hi. 21 Gou luah guih pen, a tawpa hamphathuai lou ding hi. 22 Hiai gitlouhna thuk na veng! chi kenla, Tangtawn Toupa ngak zaw in, ama'n hon hukhe na ding hi. 23 Buukna suang kibang lou, Tangtawn Toupa adinga kihhuai hi a, ama'n buukna dik lou deih lou hi. 24 Mihing' kalsuan Tangtawn Toupa' thu hi a, kua'n ama' lampi theisiam ding ahia? 25 Ngaihtuah detdet masa lou a, Pathian kianga thilpiak chiam pah a, kikhawnung ngaihtuah zaw thaang suak thei hi, 26 Kumpipa pii in migiloute haihkhia khia a, a tung ua buh vuakna pei hual hi. 27 Tangtawn Toupa' meivak in mihing lungsim pheklek a, a lungsung tawng zong mukhia hi. 28 Itna muanhuai leh thutak in kumpipa humbit a, itna muanhuai tungtawna a kumpitutphah kipsak hi. 29 Tangvalte' thupina a thahatna uh hi a, puteekte' thupina bel a samkaang uh hi ahi. 30 Nakpi-a saatna in gitlouhna siangsak a, vuakna in lungsung siangsak hi.
1 Kumpipa' lungtang Tangtawn Toupa' khutsunga om a, ama'n a deihna na-a luituite banga heikawi kawi hi. 2 Mihing in ama' gamtatna khempeuh dik sa a, ahihhanga, Tangtawn Toupa'n a lungtang buuk hi. 3 Tangtawn Toupa'n kithoihna sanga dikna leh a dika vaihawmna deihzaw hi. 4 Mit sanghah leh lungtang kisathei, tua chianga, migiloute' meivak khelhna hi ahi. 5 Limtaka thilgeel in hauhna tun a, kinawhtaka thilgeel in bel zawnna tun taktak hi. 6 Zuautheihna lei tawh hauhnate ngah zaw, tuihu lengmang pah leh sihna thaang hi ahi. 7 Migiloute, a hiamgamna un kaimang hi, ahang bel, a dik a tanga gamta nuam lou uh hiven. 8 Migiloute' lampi kawi a, lungsim siangthoute' gamtatna bel dik hi. 9 Hangsawk zi tawh inn khata teenkhawm sanga, inntung ning khata tolteen hoih zaw hi. 10 Migilou' lungtang in a gilou lunggulh a, a innveng nangawn in a deihsakna ngah lou hi. 11 Simmawhhat a kigawt chianga, mimawlte'n pillawh a, mipil a kithuhilh chianga, ama'n theihna ngah hi. 12 A Diktatpa'n migiloute' innsung chiamteh a, migiloute tunga siatna tun hi. 13 Mizawngte' kah za lou dinga bil hum mi peuhmah, a kah hun om ding a, kuama'n bil dawh lou ding hi. 14 Asima thawnpiak piakna in hehna damsak a, asima golhgukna piakna in thangpaihna lianpi damsak hi. 15 Diktatna a kihih chianga midiktatte lungnuam a, giloute bel mulkim uhi. 16 Theihsiamna apan lampial mi, misite kikhopna-a khawl lei hi. 17 Nuamtatna khelah mi, mizawng suak ding a, zu leh sathau hai mi lah, hau ngeilou ding hi. 18 Migiloute bel midikte adinga tatna man suak ding a, mi lungsim kawite lah mi lungsim tangte adinga tatna man suak ding hi. 19 Numei hansawk leh haanhat tawh teenkhawm sanga, gamdaia tolteen hoihzaw hi. 20 Mipilte' innsunga an lim leh sathau kikhol a, mihai in bel a neih zahzah negai tawmtawm hi. 21 Diktatna leh itna muanhuai deih mi in hinna, diktatna leh pahtawina ngah hi. 22 Mipil bel mihatte' khawpi kulhbaanga kal a, a muan mahmah uh kulhpi laichim hi. 23 A kam leh a lei veng thei mi in lungkham buaina apan a hinna veng thei hi. 24 Kisathei leh kiuangsak, Simmawhhat, chih mina nei mi, a uanglua kisaktheihna tawh gamta hi. 25 Mi thadah zaw, a lunggulhna in amah that ding hi, ahang bel, ama'n nna sem nuam lou hiven. 26 Amah nitum tuma huaiham semsem a, ahihhanga, midiktatte'n bel, siit neilou a, a vekpi-a pekhin thei hi. 27 Migiloute' kithoihna kihhuai hi a, tup leh ngim gilou tawh a kithuah lai chiangin, nak kihhuai sem nan chia! 28 Theihpihmi taklou mangthang ding a, thutak bildawh mi'n bel thu gen lailai ding hi. 29 Migilou kihangsansak gemgam a, mitang in bel, a gamtat nading geelkhol dimdiam hi. 30 Tangtawn Toupa doua ding thei pilna, theihsiamna, thuhilhna om lou hi. 31 Sakol bel kidou dinga chilsain kikoih a, ahihhanga, vualzawhna taktak zaw, Tangtawn Toupa-a hi ahi.
1 Hauhna thupi sanga lu La min hoih teelhuai zaw a, ngun leh kham sanga zahna, tungetna teelhuai zaw hi. 2 Ahau leh azawngte'n kikop khat nei hi: Amaute bawlpa, Tangtawn Toupa mah hi veve hi. 3 A pii thei mi in thil hoih lou mukhol a, kihem thei a, mimawl in bel phusuak teitei a, thuaklawh zel hi. 4 Kingaihniamna leh Tangtawn Toupa launa apan hauhnate, pahtawina leh hinna om hi. 5 A tatsete' lampi-a lingte leh thaangte om a, ama' hinna kemsiam mi in bel, tuate gamlapi-a peel thei hi. 6 Naupang a pai nading lampi ah chil lechin, a teek donga zong tua nuse lou ding hi. 7 Ahaute'n azawngte uk a, sum leitawi mi lah, a leitawisakpa nasema pang hi. 8 Diktatlouhna khaichi pawi mi in lungkham buaina at ding a, a hehna chiangduai zong bangmahlou suak ding hi. 9 Hawmsem mi in mizawngte an hawm a, amah mi nunnuam suak hi. 10 Simmawhhat mi hawlkhe lechin kitotna bei ding a, kinakna leh zahlakna bei ding hi. 11 Lungsim siang deih mi leh hehpihna kam nei mi in kumpipa lawma nei ding hi. 12 Tangtawn Toupa' mitte'n theihna chingin veeng a, mi muanhuailoute' thu bel vuallelsak hi. 13 Mi thadah in: Pawlam ah humpinelkai om a, konglak ah hon that kha inteh, chi hi. 14 Angkawm numei' kam, thaang gum thuk hi a, Tangtawn Toupa' thangpaihna nuaia om mi tua-a ke ding hi. 15 Naupang' lungsung ah haina a tuunin om a, thununna chiang in gamlapi-a tua hawlkhe ding hi. 16 Hauhsem nadinga mihingte nuaisiah mi leh, ahaute kianga piak behlap mi, hong zawng teitei ding hi.
Mipil' Paunakte
17 Mipilte' thugente na bil dawh inla, ngaikhia inla, ka sinsakna ah na lungtang nga in. 18 Na lungsunga kem a, na muka mansa-a na koih leh, mi nunnuam hi ding na hi. 19 Na muanpen Tangtawn Toupa a hih theih nadinga, tuni-a nang mahmah hon sinsak hi'ng. 20 Nang adinga thuhilhna leh theihna thute sawmthum gelh hi lou ka hi hia? 21 Nang hon sawlmi diktaka na dawn theih nadinga, thutak leh muanhuaite hon sinsak hilou ka hi hia?
(1)
22 Azawngte a zawn manun lok kenla, a tasamte lah, thukhenna ah nehtamgawp ken. 23 Ahang bel, Tangtawn Toupa'n amaute gum ding a, amau lokte lok ding hi.
(2)
24 A lungngot mi lawmin nei kenla, a chihbaih mi tawh lah kipawl ken. 25 Tuachi louin zaw, a gamtat na zui kha mahmah ding a, na hinna thaangsiah lei na hi ding hi.
(3)
26 Midang adinga thuchiama kihenin pang kenla, leibat thu-a mawhpuain zong ding ken. 27 Banghanga leiba dit nading na neih louh mana, na lupna nangawn dopkhiaksaka om ding na hia?
(4)
28 Na nu na pate' phuhsa gamgi suang khiin ken.
(5)
29 Mi, ama' nasep lam siama kizen na mu hia? Amah kumpipate' nasema pang ding a, mi maimai' nasema pang lou ding hi.
(6)
1 Milian milal tawh ankuang na umkhawm chiangin, na maia kilui limtakin en inla, 2 uisan mi na hih ngial leh, kideek teitei in. 3 A anlimte enlah law ken, nang adinga thaang suak thei hi.
(7)
Hauh nop manin bah zenin sem kenla, na theihsiamna zangin kidop dan siam in. 5 Banghanga a mangpah hauhnate enlah ding na hia? Hauhnate'n kha nei a, muvanlai banga lengmang ahi aw!
(8)
6 A chiilkon-mi' an ne kenla, a anlimte enlah ken. 7 Amah zaw a lungtang banga gamta hi a: Ne inla dawn in, a chih hanga, hon deihsak taktak hilou hi. 8 Na neksa kamkhat nangawn lawkhe ding chin a, na kipahthu gen a mawkna suak ding hi.
(9)
9 Mihai' zakin thu gen ken, pilnathu na gente simmawh ding hi.
(10)
10 Tanglai gamgi suang khiin kenla, pabeite' gamsung ah na gam keek ken. nAmaute Tanpa hat mahmah a, amaute guma, na langa pang ding hi.
(11)
12 Thuhilhna ah lungtang nga inla, theihna thute bil dawh in.
(12)
13 Naupang thunun ding na khut kiksak ken, chianga na sat hanga si lou hiai ding hi. 14 Chianga satin misikhua apan a hinna hu zaw in.
(13)
15 Ka tapa aw, na lung a pii leh, keimah lungnuam ding hi'ng. 16 Ahi, na kam in a dik a gen chianga, keimah lungnuam ding hi'ng.
(14)
17 Mikhialte engin na lung zuangsak ken, Tangtawn Toupa launa lam ah hahkat gige zaw in. 18 Nang ading tunung lametna om taktak a, na lametna vuaksuak lou ding hi.
(15)
19 Ka tapa aw, ngaikhia inla, pii in, lampi dik ah na lungtang nga in. 20 Zuhaite tawh kipawl kenla, uisante tawh lah nein dawnkhawm ken. 21 Ahang bel, zuhaite leh uisante hong zawng ding uh a, ihmut-haite'n puansepi silh ding uhi.
(16)
22 Hon neipa na pa' thu ngai inla, na nu a teek chiangin simmawh ken. 23 Thutak lei inla, zuakkik nawn ken. Pilna, thuhilhna leh theihsiamna lei in. 24 Tapa diktat neipa, nakpiin lungnuam ding a, tapa pii neipa'n a tapa pakta mahmah ding hi. 25 Tua bangin na nu leh na pa kipak henla, na pianna nu lungnuam hen!
(17)
26 Ka tapa aw, na lungtang hon pia inla, na mitin ka gamtatnate en in. 27 Kizuaknu lah kiak theihna gum thukpi hi a, zi beven lah taan theihna guam kawchik hi ahi. 28 Suamhaat banga mi buk a, pasalte laka mi muanhuailou pungsak hi.
(18)
29 Kua tung gik a, kua dah a, kua lungkimmawh a, kua phun a, kua a kulloupi-a Ham a, kua' mit san ahia? 30 Zupeeng opte, zulehbulh dawnte ahi ve. 31 Zu a mei a san laitak en kenla, hai sunga kisungphuan biahbiah a, kivei ziahziah laitak en ken. 32 A tawpa gul banga tu a, gul deekpak banga gu nei hi. 33 Na mit vai ding a, thil lamdangpipi mu ding chin a, a kilawmlou pipi gen ding na hi. 34 Tuipi tunga lum bang hi ding chin a, longmung dawna lum bang hi ding china: 35 Hon sat hangun liam keng! Hon vuk hangun na sa keng! Zu ka dawnkik theih nadinga chik chianga khanglou ding ka hi de aw, chi ding na hi.
(19)
1 Migiloute eng kenla, amaute tawh kipawl ding lunggulh kha ken. 2 A lungtangte un hiamgam ding sawm a, a mukte un buaina bawl ding gen hi.
(20)
3 Pilna tungtawna inn kilam a, theihsiamna tungtawna inn kikipsak hi. 4 Theihsiamna tungtawna hauhna gou manpha leh hoihte-a a dantan sungte kidimsak hi.
(21)
5 Mipil in vangletna lianpi nei a, theihna nei mi in thahatna khangsak hi. 6 Ahang bel, galdou dinga thuhilhna pilna kul a, vualzou dinga thuhilh mi tampi kul hiven. Pau
(22)
7 Mihai adinga pilna sanglua a, kongpi-a kikhopna-a gen ding nei lou hi.
(23)
8 Thil gilou geelmi zaw, Tupna gilou neia simpan mi, chi-a kingawh ding hi. 9 Mihai' tupna gilou bel khelhna hi a, simmawhhat mi lah mite'n kih hi.
(24)
10 Lungkham buai ni-a na bah a, na lungkiak leh, na hatna neu hi nan chia!
(25)
11 Sihna lam zuana paite hukhia inla, thah dinga kikaite kaikik in. 12 Ahang bel, nang: Hiai thu bangmah thei kei ung, na chih hanga, lungtang enpa'n phawk lou ding hia? Ama'n michih a gamtat bangbanga thuk lou ding hia?
(26)
13 Ka tapa aw, khuaizu khum hi, ne in. Khuaikhaka khuaizu chiam lechin khum sa ding na hi. 14 Hibanga pilna zong na hinna adinga khum ding ahi, chih thei in. Pilna na ngah leh, nungchiang lametna nei ding chin a, lametbeia om lou ding na hi.
(27)
15 Migilou bangin midiktat' inn buk kenla, a teenna mun buluh ken. 16 Ahang bel, midiktat sagihvei dong a puk hanga thoukik ding a, migiloute bel, tuahsiatna in hihniam ding hiven.
(28)
17 Na meima a puk chiangin kiuangsak kenla, hihniama a om chiangin na lung nuamsak ken. 18 Tuachi louin, Tangtawn Toupa'n hon mu ding a, lungkim lou ding a, a tunga a hehna damsak kha ding hi.
(29)
19 A giloute hangin na lung nuammawhsak kenla, amaute eng kha mahmah ken. 20 A giloute'n nungchiang lamet ding neilou a, a meivak uh zong kimutmit ding hi.
(30)
21 Ka tapa aw, Tangtawn Toupa leh kumpipa lau inla, a hel mite tawh kipawl ken. 22 Ahang bel, amaute gel in, amaute tung mah a siatna tun guih ding hive-un. Amaute gel in a tut theih bang siatna hiam, chih kua'n a theia eita?
Mipilte' Thugen Dangte
23 Mipilte' thugen hiaite zong ahi: Thukhenna-a deihsaktuam neih hoih lou hi. 24 Mimawh kianga: Mawhneilou na hi, chi mi peuhmah, mite'n hamsiat ding a, namte'n kih ding hi. 25 Ahihhanga, mimawhte mawhtangsakte tuahpha ding a, vualzawlna hoih ngah ding uhi. 26 Lungsim sianga dawnna diktat piak bel, muka mi tawp bang hi ahi. 27 Pawlama nna na sep zou inla, na lou khou masa inla, tua khit chiangin, na inn lam in. 28 A san a hang beipi-a na innveng' langa pangin theihpih mi in pang ken. Banghanga na kama khemna thu gen ding na hia? 29 Ka tunga a hih bangbanga ama' tunga hih ding ka hi, a hih bangbang thuk ding ka hi, chi ken. 30 Thadahte' lou en ing a, geelsiamnabeite grephuan en ing a, 31 lou lingnei leh loupain dim a, a suangdaite chimsa-a om hi. 32 Ka muhte lungtanga suut ing a, thuhilhna manpha mukhia hi'ng: 33 Tomchik mitsi lai ding, tomchik ihmu lai ding, tomchik khutzepa tawlnga lai ding, chichi lechin, 34 zawnna in suamhat banga hon pha ding a, taksapna in galte banga hon phading hi.
Solomon' Paunak Dangte
1 Solomon' paunak dang hiaite Judah kumpipa Hezekia' mite' teisawn ahi: 2 Pathian in thil a iim leh a thupina hi a, tuate zonkhiak pen, kumpipate' thupina hi ahi. 3 Vaante a sanluat a, leitung a thukluat banga, kumpipate' lungtang kitheikhe thei lou hi. 4 Ngun apan a eksia paikhia in, hileh, siksekpa' thil bawl nading vanzat manpha hong pawt ding hi. 5 Kumpipa' mai apan migiloute lakhia in, hi leh, diktatna-a a kumpitutphah kipsak ding hi. 6 Kumpipa' mai ah nangmah kiliankoih kenla, miliante' mun ah ding ken. 7 Ama'n milian' maia hon maizumsak sanga: Hiai ah hong paitou in, hon chih hoihzaw hi. 8 Na mita na muh peuhpeuh, thukhenna tun pahpah ken. A tawpin na innveng in hon maizumsak kha leh, bang lawhta ding na hia? 9 Na thubuai na innveng tawh kimaituahin gen inla, midang kiang ah gensawn ken. 10 Tua hi kei leh, na thu zapa'n, hon maizumsak kha ding a, na minsiatna bei ngeilou kha ding hi. 11 A kituaktak thu kamkhat gen, ngun kuak sunga kham tang kichiang diudeu tawh kibang hi. 12 Mipil' taihilhna zaw, thuhilhna saangthei mi adinga kham bilbah leh kizepna kham siang tawh kibang hi. 13 Thangkou muanhuai zaw a sawlmite adinga buhlak laia vuktui vot tawh kibang hi. Ahang bel, ama'n a toute' lungsim halhsak hiven. 14 Thil a piak louhpi kisialpih mi peuhmah, tui pailou meipi leh huih tawh kibang hi. 15 Lungduaina pansana gam ukpa kizol zou a, kam nema guhtaak kisattan thei hi. 16 Khuaizu na muh leh, na kul zah lei ne in, na tamnek luat leh, hon nimin na lawkhe ding hi. 17 Na innveng' inn ah hawh mun law ken, hon chimtakin hon muhdahlawh kha ding hi. 18 A innveng' langa panga theihpihna zuau gen mi zaw, khetbuk leh namsau leh thaltang hiam tawh kibang hi. 19 Haksat huna mi muanhuai lou muankhak zaw, hana leh kheheh tawh kibang hi. 20 A dah lungkham mi kianga la sasa mi zaw, khawdam ni-a puanak suah mi tawh kibang a, zuthuk leh tangal hel tawh kibang hi. 21 Na meima a gilkial leh, nek ding an pia inla, a dangtak leh, dawn ding tui pia in. 22 Tua banga na hih leh, a luzanga meiam sung hi ding chin a, Tangtawn Toupa'n pahtakman hon pe ding hi. 23 Mallam huih in vuah hon puak teitei bang a, kisim gensiatna in hehna piangsak teitei hi. 24 Haanhat zi tawh tenkhawm sanga, inntung kiu khata tolten hoihzaw hi. 25 Gam gamlapi apan thupha hong tung bel, thatawlte adinga tuisik tawh kibang hi. 26 Migiloute' zolzawh midiktat zaw, tuinak nin leh tuikhuk nin tawh kibang hi. 27 Khuaizu tampi nek a hoih louh banga, pahtakna kizon hoih lou hi. 28 Amah kithunun theilou mi zaw, kulhbaang chimsa khawpi tawh kibang hi.
1 Nipi laia vuk kia leh buhlak laia vuahzu a kilawm louh banga, mihai kianga pahtawina piak kilawm lou hi. 2 Kawlgit leh phialphiah a kawilen len banga, a san a hang beia hamsiatna kawilen len hi. 3 Sakol adinga zeepna kul a, sabiltung adinga kamkaihna a kul banga, mihai' nungzang adinga chiang kul hi. 4 Mihai, a haipau bangin dawng ken, amah bang leltak na suak kha ding hi. 5 Mihai, a haipau bangin dawng in, a kipilsak kha ding hi. 6 Thangkou dinga mihai sawl zaw, khe sattan leh hiamgamna tuidawna dawn tawh kibang hi. 7 Mihai' kama suak paunak zaw, mi khebai kikhai nelnelte tawh kibang hi. 8 Mihai kianga pahtawina piak zaw, suanglot khaua suangtang henkhawm tawh kibang hi. 9 Mihai' kama suak paunak zaw zukham khuta lou lingnei tawh kibang hi. 10 Mihai peuh, a tuahkhak khak peuh nasema guai mi zaw, thai tawi a, a tuah peuh baankap Ham mi tawh kibang hi. 11 Ui ama' luak lama kik nawn banga, mihai, a hai gamtatna lama kik nawn hi. 12 Amah kipilsak mi ading sanga mihai adinga lamet om zaw lai hi. 13 Mi zongzaw in: Lampi ah humpinelkai om a, konglak ah humpinelkai gilou vakvak hi, chi hi. 14 Kongkhak, a kopza tunga kihei hei banga, mi zongzaw, a lupna tunga kihei hei hi. 15 Mi zongzaw in ankuang sung sawk a, a khut liiktou ngap nawn lou hi. 16 Mi zongzaw zaw, piltaka dawng thei mi sagih sanga pii kisa zaw lai hi. 17 Mi' kinakna va tuak a va kikum zaw, ui a bila len mi tawh kibang hi. 18 Singkhuaham peuh, thai peuh mawklot lungsim venglou mi zaw, 19 a innveng khem a: Ka chiamnuihna! chi mawk mi tawh kibang hi. 20 Singkhuah om kei leh, mei mit a, tua banga, gensiatna thu zong a gensawn mi om kei leh, kinakna bei hi. 21 Meihol in meiam omsak a, singkhuah in meikuang a omsak banga kinakhat mi in zong kilangneihna piangsak hi. 22 Gensiatna thu an lim banga mihing sung thukpi-a tumsuk thei hi. 23 Lungtang gilou, kamzol mi zaw, chima kizut leibel tawh kibang hi. 24 Lungsim sia nei mi, a kama kilep a, a lungtang bel khemna tawh kidim hi. 25 A kam a khum hangin amah muang ken, a lungtang sunga kihhuai sagih om hi. 26 Khemhat thuin a lungsim sia sel zouta leh zong, kikhawmte' maia a gitlouhna kilang ding hi. 27 Mi'n gum a khuak leh, amah mah ke ding a, mi'n suang a khuuk leh, amah mah dengkik ding hi. 28 Zuauthei lei in ama' liamsakte mudah a, maitangphatna kam in zong mi susia hi.
1 Zingchiang ding sialsial ken, bang hong tung ding hiam, chih thei lou na hi. 2 Nangma' kamin kiphat kenla, midang in hon phat zaw hen. 3 Nangma' mukin kiphat kenla, midangte'n hon phat zaw hen. 3 Suangtum leh sehnel gik a, tuate sanga mihai' hon tothehna gikzaw lai hi. 4 Hehna tatsia a, thangpaihna lah tuikhang lian bang hi ahi. Ahihhanga, hazatna maia kua ding zou ding ahia? 5 A sima ki-it sanga a langtanga kitaai hoihzaw hi. 6 Lawm khat peuh in hon liamsak leh hon deihsak hi a, meima khat peuh in hon biangtawp leh bel, hon lehbawl nop man hi ahi. 7 A gilvah mi adinga khuaizu nangawn kihhuai a, a gilkial mi adinga bel, a kha nangawn khum hi. 8 A innsung apan vakthap mi zaw, a bu apan mang vasa tawh kibang hi. 9 Sathau namtui leh gimnamtui in lungsung nuamsak a, mi khatpeuh adinga a lawm kianga om a nopna, deihsak taktaka a thuhilhna pana piang ahi. 10 Nangma' lawm hita leh, na pa' lawm hita leh, taisan kenla, na tuahsiat ni'n na sanggampa' inn lah delh ken. Gamlapi-a om sanggampa sanga innveng nai hoihzaw hi. 11 Ka tapa aw, pii inla, ka lung nuamsak in. Tuachi-in, kei hon mawkbawl kuapeuh dawng thei ding hi'ng. 12 Piltaka mailam mukholsiam mi in thilhoihlou mukhol a, kihem thei a, mimawl in bel phusuak teitei a, thuaklawh zel hi. 13 Theihlouh melmak mi adinga mawhkhu dinga kichiam mi' puansilh la inla, numei paktat adinga kichiam a hih ngial leh, a kichiamna sum dingin koih in. 14 Mi'n zingkhangpi-a aw ngaihtaka a innveng a vualzawl leh, hamsiatna-a kisim ding hi. 15 Numei hansawk zaw vuahchiin ni-a innkeh tawh kibang hi. 16 Amah kikhou taleh, huih khouh tawh kibang a, khuta sathau phaam tawh kibang hi. 17 Sik in sik hiamsak a, mihing in a lawm hiamsak hi. 18 Theipi kung suan mi in a gah ne a, a toupa keem mi in lah pahtakna ngah hi. 19 Tui in maitang lim langsak a, mihing lungtang in lah ama' zia langsak hi. 20 Misikhua leh manthatna inn dim ngeilou a, mihing' mit lah lungkim ngeilou hi. 21 Ngun hihsiangna, bela mei hi a, kham hihsiangna, meiphualpi hi a, mihing bel, phatna a ngah in a hihna tak kitelsak hi. 22 Buhsuk banga suma mihai na suk hanga a haina paaikhe zoulou ding na hi. 23 Na belamhonte omdan hoihtakin theitel mahmah inla, na bawnghonte hoihtakin kem in. 24 Ahang bel, hauhnate omden lou a, kumpilukhu zong, akhang akhanga kipden lou hi. 25 Gan an loupa ki-atkhit a, lounou thak hong pou chiang leh, mualtung loupate a kikaihkhawm chianga, 26 belamhonte'n puansilh hon pe ding a, kelte'n na lou man ding hon pe ding hi. 27 Tua baana, nang leh na innkuante vak nading kei nawitui kiching nei ding chin a, na innsung nasem numeite adinga thauna mamna hi lai ding hi.
1 Kuamah' delh louhpi-a migilou taai a, midiktatte bel, humpinelkai banga hangsan uhi. 2 Gam khat peuh a hel chianga, vaihawm mi tampi pha a, ahihhanga, theihsiamna leh theihna nei mi khat in zong gam khat ukna vaivengsak hi. 3 Azawngte nuaisiah vaihawm mi zaw, loua haaigahte susia vuahpi tawh kibang hi. 4 Dan thudon loute'n migiloute pakta a, dan zui mite'n bel amaute dou hi. 5 Mi lungsim sete'n a dika vaihawm bang hi hiam, chih theilou a, Tangtawn Toupa zong mite'n bel theisiam mahmah hi. 6 Mihai tatsia sanga genbanglou-a gamta mizawng hoihzaw hi. 7 Dan zui mi peuhmah tapa lungpil hi a, uisante' lawm in bel a pa maizumsak hi. 8 Sumpung tampipi lak mana a hau mi zaw, a zawngte hehpih thei midang adinga sumkhol hi lei hi. 9 Dan thudon lou mi zaw, a thuumna nangawn kihhuai hi. 10 Midik mitang gilou lama piimang mi zaw, ama' gum khuak maha ke ding a, gensiatbei mi in bel gou hoih tang ding hi. 11 Ahau mi bel, amah pii kisa maithei a, ahihhanga theihsiamna nei mizawng in tua mi' lungsim mu paisuak hi. 12 Midiktat a vualzawh chianga, lungnopna lianpi om a, migilou a let chianga bel mite kibu hi. 13 A khelhna sela khuh mi mavang lou a, a tatlekna pulaka tawpsan mi in bel zahngaihna ngah hi. 14 Tangtawn Toupa laudan siam mi, mi nunnuam hi a, lungtang khauhsak mi in bel lungkham buaina thuak hi. 15 Mizawngte tunga vaihawm migilou zaw, humpinelkai humham leh, vompi hang mi delh tawh kibang hi. 16 Ama' thu kia deih, huhama vaihawm mi in theihsiamna tasam hi a, punna diklou haw mi bel khantou ding hi. 17 Sisan suaha mawhna in a lunggimsak mi, a sih dong taaitaai henla, kuama'n huh kei hen. 18 Genbaangloua gamta mi, bittaka kepa om ding a, gilou-a gamta mi bel pukguih ding hi. 19 Ama' lou khou mi in an hau ding a, a mannabeia mawkbuai mi zaw zawng teitei ding hi. 20 Mi muanhuai nakpi-a vualzawla om ding a, hauhpah ut mi bel gawtlouha suakta lou ding hi. 21 Deihsak tuam neih hoihlou hi. Ahang bel, an kam khat hanga zong mi talek thei hiven. 22 A chiilkon mi zaw hauhna lunggulh mi hi a, taksapna in amah a ngak lam phawk lou hi. 23 A leia maitangphat hat mi sanga taihilh mi in a tawpa deihsakna ngah zaw ding hi. 24 A nu hiam, a pa hiam lok a: Tatlekna hi kei, chi mi zaw, siatna bawl mi' lawm hi ahi. 25 A deihgawl mi in kisiat kinakna piangsak a, Tangtawn Toupa muang mi bel hihhauha om ding hi. 26 Amah kimuang mi, mihai hi a, piltaka gamta mi bel bit ding hi. 27 Mizawngte kianga pe mi in bangmah tasam lou ding a, amaute kimuhmawhbawl mi in bel hamsiatna tampi khu ding hi. 28 Migiloute hong let chianga, midangte bu a, amaute a manthat chianga bel midiktatte lawhching hi.
1 Taihilhna tampi dong a, lungkhauh lailai mi, thakhata hihmanthat hi ding a, hihdam kik theih hilou ding hi. 2 Midiktatte a let chiang ua, mite kipak mahmah a, migiloute'n vai a hawm chianga bel mite thuma mau hi. 3 Pilna it mi in a pa lungdamsak a, kizuakte tawh kikhawl mi in bel a neihsa teng thehthang hi. 4 Thudik thutanga vaihawm kumpipa'n a gam kipaksak a, golhgukna nepa in bel a gam puksak hi. 5 A innveng maitangphat mi in amah lenthang siah hi lei hi. 6 Migilou, ama' khelhna-a awk a, midiktat in bel nuama la sa hi. 7 Midiktat in mizawngte khual a, migilou in bel tua bang khualna nei lou hi. 8 Simmawhhatte'n khawpi buppi hehsak a, mipilte'n bel hehna damsak hi. 9 Mipil khat in mihai khat a hek chianga, tua mihaipa heh taleh, nui taleh, kilemna piang tuan lou hi. 10 Sisan suahhat mi in genbaanglou mi mudah a, mitang in bel gensiatbei mi' hoih nading khual hi. 11 Mihai in a lungsim gen vek pah a, mipil bel ki-iip thei hi. 12 Vaihawmpa'n zuauthu a ngeingaih leh, a uliante khempeuh hong gilou vek ding uhi. 13 Mizawng leh mi nuaisiahhatte'n kikop khat nei uhi: Tangtawn Toupa'n a nih ua khawmuh theihna mit pe tuak hi. 14 Kumpipa'n mizawngte adinga thutaka thu a khen leh, a kumpitutphah kipden ding hi. 15 Thununna chiang in pilna pia a, khahzana om naupang in bel a nu maizumsak hi. 16 Migilou a tam semsem leh, tatlekna tam semsem a, ahihhanga, midiktatte'n amaute' pukna mu ding hi. 17 Na tapa thunun lechin, hon tawldamsak ding a, na hin nuamsak ding hi. 18 Muhkholhna thugen omlouhna ah, mite zautat a, dan zui mi bel mi nunnuam hi ahi. 19 Kama hilhna leia sila kibawlpha theilou hi. A theihsiam hanga zui tuanlou hi. 20 Mi kamlawp na mu hia? Amah ading sanga mihai adinga lamet om zaw hi. 21 A innsung nasem mi, a neu apan deihbawl lua mi in a tawpa tapa banga amah nei khong ding hi. 22 A heh mi in kisiat kinakna piangsak a, hehbaih mi in lah tatlekna tampi hih nak hi. 23 Hehna in a hehmi niamsak a, lungsim kiniamkhiak mi in bel pahtawina ngah hi. 24 Guta tawh gamtakhawm mi in ama' hinna mah hua hi a, a kichiam hanga thutak gen tuan lou hi. 25 Mihing launa, thaang suak ding a, Tangtawn Toupa muang mi bel bit ding hi. 26 Mi tampi te'n vaihawmpa' maia deihsakna zong a, hinapi-a, a dik a tanga thukhenna zaw Tangtawn Toupa apan kingah hi ahi. 27 Midiktatte'n midiktatloute kih a, migiloute'n lah mitangte kih hi.
Agur' Thupilte
1 Jake' tapa Agur in Pathian' thutung a puakgik a gente: Hiai mi in Ithiel kiang, Ithiel kiang mahmah leh Ukal kianga thu phuangkhia a; 2 Mihing hi dinga bangmah theilou lua hi'ng. Mihing' theihsiamna nei lou hi'ng. 3 Pilna lah na sinlou ing a, a Siangthoupa lah na thei lou hi'ng. 4 Vantunga kua kaltou a, hong kumsuk ahia? Kua'n a khut kuak sunga huih sim thei a, kua'n a puana tui tuun thei a, kua'n leitungbup hihkip ahia? Tua bang mi' min bang hi a, a tapa min bang hi ahia? Na theih leh honhilh dih ve! 5 Pathian thu peuhmah hoihkim a, amaha bute adinga kidaalna hi ahi. 6 A thute behlap ken, hon taai ding a, zuaugen suak kha ding na hi. 7 Tangtawn Toupa aw, nang apan thil nih hon ngen hi'ng, ka sih main tua hon iit ken. 8 Zuauthu genna leh khemna kei apan gamlapi ah koih in. Zawnna lah hon pe kenla, hauhna lah honpe kenla, ka nisim an ding hon pia in. 9 Hau law leng, nang hon mangngilh kha ding ing a, Tangtawn Toupa kua ahia? chi vial kha ding hi'ng. Zawng law leng lah, gu kha ding ing a, ka Pathian' min daisak kha ding hi'ng. 10 Sila khatpeuh a toupa kiang ah gen se ken. Hon hamsiat kha ding a, mawh na tang kha ding hi. 11 A pate uh hamsiat a, a nute uh vualzawl lou mi pawl khat om hi. 12 Amau' mita siangthou kisa, a nitna uh kisilsiang lou mi pawl khat om hi. 13 Kiuangsak mahmah a, mit tunghah a, vandak veuvau mi pawlkhat om hi. 14 A zawngte leitung apan negai ding leh, a tasamte, mite lak apan negai dinga a hate uh namsau bang hi a, a khaguhte uh temta bang hi mi pawl khat om hi. 15 Vot in tanu nih nei a, tuate'n: Hon pia in! Hon pia in! chi uhi. A lungkim ngeilou thil thum om a, Kichingta, hunta! chi ngeilou li om hi. 16 Tuate, hankhuk, numei chiing, tui mu lou leikeu leh Kichingta, hunta! chi ngeilou meikuang. 17 Pate simmawh mi, nute' thu manglou mi, a mit phaizang va-akte'n tukkhiaksak ding a, musane noute'n ne ding hi. 18 Kei adinga lamdang lua thil thum om a, ahi, ka theihsiam louh thil li om hi. 19 Huihkhua-a muvanlai' lampi, suangpi tunga gul' lampi, tuipi tunga long' lampi leh, nungak ngai tangval' gamtatna. 20 Angkawmnu' gamtatna hibang hi ahi: Ne a, a nekkhit a, a muk nui a: Giitlouhna bangmah hih ke'ng, chi hi. 21 Leitung a linna thil thum om a, ahi, a thuakzawh louh thil li om hi: 22 Sila hisa kumpipa-a pang, mihai gilvah, 23 a pasal' it louh numei, sila numei a pi' mun suan. 24 Leitunga a neu mahmah, ahihhanga pii mahmah li om hi: 25 Miksite, a hatlou ganhinghon hinapi, nipi laia ann kholkhawm uhi. 26 Zupite thahatna neuchik nei hi mah leh, suangheng kala inn nei uhi. 27 Khaupete, kumpipa neilou hinapi, ahon hona gamta uhi. 28 Innhikte, khutmuuka tawi theih lei hinapi, kumpite' innpi sunga teeng uhi. 29 A pai chiang ua thupisuak thum om a, ahi, kalsuan kilawm li om hi: 30 Gamsate laka thahat pen, bangmah maia tai lou humpinelkai, 31 akluisan, keltal, a sepaihhon laka kumpipa. 32 Mihaia na kibawl a, nangmah kiphat a, ahih kei leh, gitlouh na sawm leh, na kam hum in. 33 Bawngnawitui toktok lehang, bawngnawi thau dat suak a, naak heek ek lehang, naaksi luang hi. Tua bang mah a, kitawng lehang kinakna piang hi, chi hi.
Kumpipa Lemuel' Paunakte
1 Kumpipa Lemuel thupilte, a nu'n Pathian thutung puakgik a muh, amah a hilhte: 2 Ka tapa, ka sunga piang ka tapa, ka thuchiam tapa aw, 3 na thahatna numeite tung ah zangkhin kenla, kumpipate segawpsakte tung ah na hinna hatna pe ken. 4 Lemuel aw, kumpipate ading hilou Zudawn kumpipate ading hilou hi, vaihawmmite adinga zukhauh lunggulh hoih lou hi. 5 Dawn le uh, dana thukhennate mangngilh ding uh a, nuaisiahna thuakte adinga thutanga vaihawmna kaikawi kha ding uhi. 6 A si dekdekta zukhauh pia inla, a lungkhama lungzingte zukhauh pia in. 7 Zukhamin a zawnna uh mangngilh uh henla, a gimna uh phawk nawn kei uhen. 8 Amau' thu kigen theiloute adingin kamka inla, a tasam lungzingte gum in. 9 Thu gen inla, a dik a tangin thu khen inla, mizawngte leh tasamte' hamphatna gum in.
Zi Hoih
10 Zi nunhoih kua'n mu thei ding ahia? A manphatna, rubi suangmanpha sanga manpha zaw tham hi. 11 A pasal' lungtang in amah muang mahmah a, ama'n lah a manpha bangmah tasam lou hi. 12 A pasal tunga siam a, a damsung teng thusia bawl lou hi. 13 Ama'n samul khau leh zizakhau zong a, a khuta thanuamtaka nna sem hi. 14 Amah sumsin mi' long bang hi a, gamlapi apan an pua hi. 15 Phalvak chila thou a, a innkuante ading nektaak bawl a, a nasem nungakte ading an pia hi. 16 Ama'n lou mun hoih zongin lei a, a khut nasep gahte-a grephuan bawl hi. 17 Thahatna-a a kawng gak a, a banthate hatsak hi. 18 A sumsinna meet dan mu a, zankhanga zong a meivak mitlou hi. 19 Muia khau kheek a, siama puan gan hi. 20 Azawngte lama khut zankhia a, tasamte huh hi. 21 A inkuante puanlum sandaang guan a, phalbi vuuk kiak ding lau lou hi. 22 Lupna khuhna puante kibawl a, puanmalngat leh puansandupte silh hi. 23 A pasal, gamsung upate laka kongpi-a a tut chianga kizahtak tuam hi. 24 Puanmalngat puanakte khui a, tuate zuak a, sumsinmite kianga puanduang kawnggakte zuak hi. 25 Thahatna leh zahtakna silh a, a mailam huna lungnuam semsema nui ding hi. 26 Amah piltaka kamka a, a leia itna muanhuai sinsak hiathiat hi. 27 Ama'n a innkuan sung kem a, thadahna an ne ngeilou hi. 28 A tate hong thou uh a: Mi nunnuamnu, chi-a sam uhi. 29 Thil hoih, thil thupi hih numei tampi om teei napi, ahihhanga nang tuate khup vek hi teh, chi-a amah phat uhi. 30 Ngaihbaanna zaw khemhat a, melhoihna zong mualpah hi. Tangtawn Toupa laudan siam numei in bel phat lawh ding hi. 31 A lawhtaak pahtakman pia unla, ama' nasepte mah in kongpi ah amah phat hen aw.
Bangmahlou
1 Sinsakpa, David' tapa, Jerusalem kumpipa' thugente hiaite ahi: 2 Bangmahlou! Bangmahlou! Bangteng bangmahlou hivek, Sinsakpa'n chi hi. 3 Mihing in a sepgimna khempeuh apana vaan ni nuaia a sepgimna apan bang lawhtak hiam? 4 Mihing khang tampi hong om a, khang tampi bei a, ahihhanga, leitung a ngeingeia omden hi. 5 Ni hong suak a, ni hong tum a, kintaka a suahna lam tungkik pah hi. 6 Simlam manawhin huih nung a, mallam tung hi. Huih a kualin nung nung a, a lampi ngei tawnin nung hi. 7 Lui khempeuh tuipi tung a, hinapi-a tuipi dim ngeilou hi. Luituite hong kipatna nak lam tungkik zel hi. 8 Thil teng khempeuh chimtakhuai a, gen sanga chimtakhuai zaw hi. Mit in eta lungkim chih nei lou a, bil in zaaka lungkim chih nei lou hi. 9 A omkhinsa mah om kik ding a, a kihihkhinsa mah kihih kik ding hi. Vaan ni nuai ah a thak bangmah om lou hi. 10 En dih ua, hiai a thak! chih ding thil om hiam? Sawtlam peka na omsa hi a, eite hun ma-a omsa hi ahi. 11 Taanglai khang masate kithei gige lou a, hong om lai dingte nangawn amau nunga hong omdingte'n thei gige tuan lou ding hi.
Pilna Zon Bangmahlou
12 Kei, Sinsakpa Jerusalem tunga kumpipa ka na hita. 13 Pilnain van ni nuaia thil kihih khempeuh zong a, theichian dingin lungtang ka na peta a, Pathian in mihingte tung ah puakgik na guan na maizen e! ka chi. 14 Vaan ni nuaia thil kihih khempeuh ka muta, thil bangteng bangmahlou, huih nungdelh lei a na hi. 15 A kihekkawisa lah kizetang theilou a, a omlou leh kimlou lah kisim theilou hi. 16 Ngai dih, kong piching a, nidang laia Jerusalem na ukte khempeuh sangin pilna leh theihna ka hau zaw, chi-in ka kingaihsun a, 17 pilna theisiam ding, haina leh haigamtatna na-ngawn theisiam dingin ka na pang a, ahihhangin, hiai nangawn huih nungdelh lei ahi. 18 Ahang bel, pilna a tam semsem leh, lungkhamna tam semsem a, theihna a tam semsem leh, dahna tam semsem hi.
Nuamsakna Bangmahlou
1 Ka lungtang kiang ah: Kisa inla, nuamsaknain kon chian ding. Nuamsakna noptal mah dih in, ka chi a, ahihhangin, nuamsakna zong bangmahlou mah ahi. 2 Nuihna lah haina lei ahi a, nuamsakna in bang lawhtak ahia? ka chi hi. 3 Zuin kei leh kei kipahsak ka kisawm a, pilna zanga ka kingaihtuah leh, haihuaina leen lei ka na hi. Mihing adingin, vaan ni nuaia ni tawmchik a dam sung bang kithaman pen hiam, chih muh sawm ka hi. 4 Thil sawm leh guan tampi ka na nei hi: Kei adingin innte ka lam a, grep huante ka bawl hi. 5 Huante ka bawl a, sing nuaia khawlmun nuamte ka bawl a, theikung namkimte ka suan a, 6 ka sing suante buah nading tuikholnate ka bawl hi. 7 Sila numei leh sila pasalte ka lei a, ka innsunga piang sila dang tampi zong ka nei. Kei ma-a Jerusalema na om kua peuh sangin, bawnghonte leh belamhonte ka hau zaw. 8 Keia dingin ngun leh kham ka kaikhawm a, kumpite leh gam sehkhente apan goute ka kaikhawm hi. Numei leh pasal lasamite ka nei a, pasal' nopsakna numei koihkhawmna nangawn ka nei. 9 Kei ma-a Jerusalema vai na hawm kuapeuh sangin ka thupi zaw thamtham a, hiaite khempeuh ah ka pilna in kei hong ompih hi. 10 Ka mit in a lunggulh peuhmah piak louh nei lou hi'ng. Nopsakna bangmah zong ka Lungtang it lou hi'ng. Ka khut nasep peuhmah ah ka lungtang kipak a, hiai mah ka sepgim thaman hi ahi. 11 Hinapi-a, ka khuta ka septe khempeuh leh, sepkhiak ka sawmte khempeuh ka et chianga, bangteng bangmahlou hi a, huih nungdelh lei hi ahi. Vaan ni nuai ah bangmah Lawhtak ding om lou hi.
Pilna leh Haina Bangmahlou
12 Tua khita, pilna suut dinga ka ngaihtuahna hei ing a, haina leh haihuaina zong suut hi'ng. A kihihsa baan kumpipa' thakhengpa'n bang hih thei tuan ding eita? 13 Khawmial sanga khawvak a hoih zawk banga, haina sanga pilna hoihzaw hi, chih mukhia hi'ng. 14 Mipil in a lutang ah mit nei a, mihai bel miallaka pai hi ahi. Ahihhanga, a nih ua a tawpna uh kibang hi. 15 Tua khita ka lungtanga ngaihtuah ing a, mihai' tawpna in kei zong hon pha ding a, pilna-a ka lawhtak bang hi tuan hiam? chi ing a, tuachi-a, ka lungtang in: Hiai zong bangmahlou hi, chi hi. 16 Ahang bel, mipil zong mihai banga sawtpi kithei gige lou ding a, tunung chianga a nih ua mangngilh hi ding uh a, mihai zong, mipil bang banga si ding hiven.
Sepgim Bangmahlou
17 Vaan ni nuaia nasep peuhmah kei adinga a haksat manin, hinna ka hua. Tuate khempeuh bangmahlou ahi a, huih nungdelh lei ahi. 18 Ka nasepsa peuhmah, ka nunga hong om ding mi adinga nutsiat lei ding ka hih manin, van ni nuaia ka sep khempeuh zong ka hua hi. 19 Ka nunga hong om ding mi lah a pii ahi diam, a hai ahi diam, chih kua'n a thei theia eita? Hinapi-in, vaan ni nuaia tha leh pilna tenga ka sepsa khempeuh ama'n thuneihkhum ding a, hiai zong bangmahlou hi ahi. 20 Vaan ni nuaia ka sepgimna khempeuh lungkiakhuai ka sa dekta hi. 21 Ahang bel, mi'n pilna teng, theihna teng leh siamna teng tawh a nna sem ding a, tuate sem khalou midang khat nutsiat vek ding hi mawk ven. Hiai zong bangmahlou ahi a, a hoihlou lianpi ahi. 22 Mi'n van ni nuaia a sepgimna leh a lungzinpih apan bang lawhtak ahia? 23 A damsung tenga a nasep, tawlna leh lunggimna ahi a, zaan nangawnin a lungsim a tawlnga kei. Hiai zong bangmahlou ahi. 24 Mihing adingin, a nek a dawn leh, a nasepa a lungkim kana hoihzaw bangmah hih theih a nei kei. Hiai zong Pathian' khut apan ahi, chih ka mu. 25 Ahang bel, amah tel lou-a kua'n ne a, nopsa thei ahia? 26 Amah lungtaisak mi kiang ah Pathian in pilna, theihna leh kipahna a pia a, mikhial kiang ah bel, Pathian lungtaisak mi kianga nutsiat lei ding, hauhna kaihkhawmna leh kholkhawmna sepgimna a pia. Hiai zong bangmahlou ahi a, huih nungdelh lei ahi.
Bangkim in Ama' Hun Tek nei
1 Bangteng adingin ama' hun tek om a, van ni nuaia gamtatna bang teng adingin ama' hunbi om hi: 2 Pian hun om a, sih hun om hi. Suan hun om a, bawhkhiak hun om hi. 3 Thah hun om a, hihdam hun om hi. Phei hun om a, lam hun om hi. 4 Kah hun om a, nuih hun om hi. Sisuun hun om a, laam hun om hi. 5 Suang paihkhiak hun om a, kaihkhawm hun om hi. Kikawi hun om a, kikawi kideek hun om hi. 6 Zon hun om a, tawpsana mansak hun om hi. Khol hun om a, paihkhiak hun om hi. 7 Bawhkek hun om a, khuikhawm hun om hi. Daih dide hun om a, pau hun om hi. 8 Ki-it hun om a, kimuhdah hun om hi. Kidou hun om a, kilem hun om hi. 9 Nasem mi in a sepgim man bang a lawhtaka ahia? 10 Pathian in mihingte tunga puakgik a got ka mu a, tua bel semgima buai gige nading ahi. 11 Ama'n thil peuhmah ama' hun ah kilawm vekin a bawl hi. Ama'n mihingte' lungtang ah Tangtawn a koih a, hinapi-in, Pathian in a chil apan a tawp donga a hih a thei khezou kei uh. 12 Mihingte adingin a damsung ua kipah leh a damsung ua thil hoih a hih uh kana hoih zaw bangmah a om kei, chih ka thei. 13 Michih in a nek a dawn a, a sepgimna-a lungkimna a muh mah Pathian' thawnpiak ahi. 14 Pathian' hih peuhmah Tangtawn daih ahi a, bangmah a kibehlap thei kei a, bangmah a kilamang thei sam kei, chih ka thei. Mihingte'n amah zahtaka a lauh theih nadingin tua bangin a hih ahi. 15 Thil om lei peuhmah a na omkhinsa hi a, hong om ding zong a na omkhinsa hi ahi. Pathian in thil omkhinsa tawh kisai thu khen ding hi. 16 Vaan ni nuai ah thil dang khat zong ka muh om hi: Dika thukhenna sika gitlouhna om a, dika vaihawmna sika gitlouhna om hi. 17 Ka lungtanga ngaihtuah ing a: Midiktatte leh migiloute tunga Pathian in thu khen tuaktuak ding hi. Ahang bel, gamtatna khempeuh adinga ama' hun tek om ding a, thilhih khempeuh adinga ama' hun tek om ding hiven, chi-a ngaihtuah ka hi. 18 Tua louin zong, mihingte ahih leh, ganhing lei ahi uh, chih a kiphawk nadingun Pathian in amaute a enchian, chi-in ka ngaihtuah hi. 19 Mihing tawpna zong ganhingte tawpna mah ahi. Anih-un tawpna kibangin a ngak tuaktuak hi. Khat a sih bangin a dang zong a si. 20 A vekun naakna hu kibang a nei uh a, mihing in ganhing tung ah hamphattuamna a nei kei. Bangteng bangmahlou ahi vek. 20 A vekun mun khat kibang ah a pai uh a, a vekun leivui a suak uh a, a vekun leivui ah a kik uh. 21 Mihing' kha tunglam ah a paitou hia, ganhing' kha lei nuailam ah a paisuk hia, chih kua'n a thei a? 22 Mihing adingin nasep a tan a hih manin, a nasepa a lungkim kaana thil hoih zaw bangmah a om kei, chih ka mu. Ahang bel, ama' nunga bang hong tung ding hiam, chih kua'n a theisak theia eita?
Kinuaisiahna, Sepgimna, Tangomna
1 En ing a, vaan ni nuaia om kinuaisiahna khempeuh mu hi'ng: Nuaisiaha omte' khitui mu ing a, khamuan ding mi nei lou uhi. Midang nuaisiahte'n vangletna nei uh a, nuaisiaha omte'n khamuan ding nei lou uhi. 2 A sikhinsa misite, a hinga nungtalaite sanga kipak zaw uhi. 3 Amaute gel sanga a piang nailoute, vaan ni nuaia thil gilou kihihte mu nailoute' tan hoih zaw lai hi, chih phuang hi'ng. 4 Tua baan ah, sepgimna khempeuh, sepkhiak lawhchinna khempeuh zong insak inkhang enna hanga om ahi, chih ka mu. Hiai zong bangmahlou ahi a, huih nungdelh lei ahi. 5 Mihai khut zepin om maimai a, amah leh amah kisusia hi. 6 Sepgimna tawh huih nungdelh tawh kithuah khut langnih dim neih sanga, khamuangtaka khut langkhat dim neih hoih zaw hi. 7 Vaan ni nuaia bangmahlou dang khat ka muh om hi: 8 Tapa lah nei lou, sanggam lah nei loua tangom mi om hi. A sepgimna lah bei lou, hinapi-a, a hauhna-a a mit lungkim tuan lou. Kua adinga semgim a, banghanga nuamtaka nek kidek laizang ka hiam? chi-a amah leh amah kidong hi. Hiai zong bangmahlou hi a, lunggimhuai leltak hi ahi! 9 Khat sanga nih hoih zaw hi. A sepgim gah uh tam zaw hiven. 10 Khat a puk leh a lawm in phong thei hiven. A phong ding nei loua puk mi hehpihhuai hi! 11 Tua loua zong, nih a lupkhawm uleh, kikhawlumsuah thei uh hiven. Khat kia lum bel bangchi-a khawlum thei ding hiam? 12 Khat kia bel vuallel thei a, nih bel kiveng thei uh hiven. Khau zang thum hekkhawm zong, kitat mengmeng lou hiven.
Mi' Ettlieih sung Tomchik
13 Kumpipa teek leh hai, vauhilhna sang thei nawnlou sangin, tuailai zawng mahmah, ahihhanga pii a hoih zaw. 14 Tuailai bel kumpipa hi dinga suangkula hong kipan ahi mai thei. Ahih kei leh, ama' kumpigam sunga zawngtaka piang ahi mai thei. 15 Vaan ni nuaia nungta leh gamta khempeuh in tuailai, tua kumpipa thakhengpa a zui, chih ka mu. 16 Amaute' ma-a kumpipa ahihna mite bei chih a om kei. Ahihhangin, a khawnung lama hong omte'n amah a kipahpih tuan kei uh. Hiai zong bangmahlou ahi a, huih nungdelh ahi.
Pathian Zahtak
1 Pathian' inn-a na hawh chiangin, na kalsuan veng in. Thil hih khial hihlam kiphawkloute' kithoihna bang kithoihna lat sangin, thu ngaikhe dingin kuan zaw in. 2 Kamlawp kenla, Pathian' maia thugen dingin lungtang lawptawp sam ken. Pathian vantunga om hi a, nang bel leitunga om na hi, thu gentawm zaw in. 3 Lunghimawha gimna tam in ihmut mang tamsak hi. Tua banga mihai' thugen tam hi. 4 Pathian' maia thuchiam na bawl chiangin, tangtun zekai ken. Ama'n mihaite kipahpih lou ahi. Na thuchiam tangtun in. 5 Thuchiam bawla tangtun louh sangin, thuchiam bawl louh vanglak a hoih zaw. 6 Na kam in khelhna hon tut ding kiphal ken. Thuchiam ka bawl zaw, ka hihkhelh khak lei ahi, chi-in tempul sawltak kiang ah phun ken. Banghanga na kampaua Pathian hehsak a, na khut nasep hihse ding na hia oi? 7 Ihmut mang tampi mat leh thu tampi gen bangmah phatuam lou ahi. Pathian zahtaka lau khinkhianin ding zaw in.
Hauhna Bangmahlou
8 Gam sunga mi zawng gentheite nuaisiaha om na muh a, dika vaihawmna leh hamphatna suhsaka om na muh leh, lamdang sa ken. Uliante tunga ulian zaw om a, amaute tunga ulian sangsawn om lai a, tua in muna ahi. 9 Gam sunga thil piangte michih ading ahi a, kumpipa'n zong lou apan tan a nei hi. 10 Dangka deihta mi in, kichingta chih nei lou hi. Hauhna deihta mi zong a neihsa-a lungkim ngei sam lou hi. Hiai zong bangmahlou hi ahi. 11 Neih leh lam a pun semsem leh, a ne ding pung semsem hi. A neipa adinga bang phatuam tuan eita? Mita a etet ding lei ahih kei ngalleh? 12 Ne tawmin ne tam taleh, semgim mi ihmut nuam a, ahau mi bel a hauhna in ihmutmawhna pia hi. 13 Vaan ni nuai ah a hoih lou mahmah khat ka muh om hi: A neipa adia siatna tun hauhna. 14 Ahih kei leh, tuahsiatna hanga kimansuah hauhna. Tua bang mi in tapa nei leh zong, a tapa adinga nutsiat bangmah om loupi. 15 Mihing bel, a nu' sul apan savuaka piang a, hong pian bangbanga savuaka paikhia hi. A sepgimna apan bangmah paipih thei lou a, a khutin zong bangmah tawikhe thei lou hi. 16 Hiai zong thil hoih lou mahmah hi ahi. Mihing a hong pai bangbanga paikhe kik a, huih adinga semgim lei, bang lawhtak eita? 17 A damsung teng miallak-a an ne a, lungkiakna thupitak, gentheihna thupitak leh hehna tawh thuah lai! 18 Tua chiangin, Pathian in mihing adinga damsung ni tawmchik a piak sunga a nek a dawn a, vaan ni nuaia a sepgimna-a a lungkim leh, amah adingin a hoihin a dik ahi, chih ka phawkkhia hi. Ahang bel, tua mah a tan hiven. 19 Tua baan ah, Pathian in mi khat peuh kianga hauhna leh neih-leh-lam a piak a, tuate nuamtaka a zatsak leh, hiai Pathian' thawnpiak ahi. 20 Pathian in tua bang mi lungkimtaka a koih manin, ama'n a damsung nite a suikik sese kei hi.
Hauhna ah Lungkimna Omlou
1 Vaan ni nuai ah thil hoih lou dang khat ka muh a om a, tua thil hoih lou in mihingte delh gik mahmah hi. 2 Pathian in mihing kianga hauhna leh neih-leh-lam leh pahtawina a pia a, a lungtang' lunggulh peuhmah taksap a nei kei. Ahihhangin, Pathian in amah tuate nuamtakin a zangsak kei a, midang in a zang zaw. Hiai mahmah bangmahlou ahi a, thil hoih lou mahmah ahi. 3 Mi khat peuh in suan leh khak za khat dong a nei mai thei a, kum tampi zong a nungta mai thei. Hinapi-in, kum bang zah nungta taleh, a hauhna a zat theih kei a, hoihtaka kivui nangawn ahih kei leh, amah sangin a sisa-a piang naungek nangawn a hampha zaw, ka chi hi. 4 Amah bangmah louin hong piang a, misilak ah a paimang a, a min zong mial in a khuh. 5 Ama'n ni mu lou, bangmah thei lou hi mah leh, tua mipa sangin a tawldam zaw. 6 Kum 1,000 khat nungta lezong, a hauhna a zat theih tuan kei leh, bang phatuam? Mi khempeuh tunna kibang mun khat hilou maw? 7 Mi khempeuh' hahkatna a kam vakna hi lei ahi. Hinapi-a, a an duhna bei ngei lou hi. 8 Mipil in mihai sanga hamphat zawkna bang nei eita? Migenthei in midangte' maia gamtat a siam hanga bang lawhtak eita? 9 Lunggulhna taamvak sanga, mita muh theih thil hoih zaw hi. Hiai zong bangmahlou hi a, huih nungdelh lei hi ahi. 10 Tulai taka thil omte peuhmah a na kiminlawhsa hi a, tulai taka mihing hihna zong a kitheikhinsa hi ahi. Mi khatpeuh in amah sanga hatzaw suai thei lou hi. 11 Thu a kigen tam peuh leh a mannabei hi semsem hi. Tua in kua suphatuam eita? 12 Ahang bel, damsung adinga mihing adia hoih kua'n thei eita, amah lah a damsung ni tawmchik a mannabei limliap banga pai hi a? Amah a om nawn louh nunga vaan ni nuaia thil tung ding kua'n amah hilh thei eita?
Pilna leh Haina Tehkakna
1 Kinuh gimnamtui manphatak sanga min hoih manpha zaw a, pianni sanga sihni hoih zaw hi. 2 Ankuangluina inn-a hawh sanga sisuunna inn-a hawh hoih zaw hi. Ahang bel, mi khempeuh tawpna sihna hiven. A damlaite'n hiai ngaihtuah uhen. 3 Nuihna sanga dahna hoih zaw hi. Ahang bel, lungtang adinga dah mei hoih zaw hiven. 4 Mipilte' lungtang sisuunna inn ah om a, mihaite lungtang bel nopbawlna inn ah om hi. 5 Mihaite' lasak ngaihkhiak sanga mipilte' taihilhna limsak hoih zaw hi. 6 Mihaite' nuih zaw, anbel nuaia lingsing kang ging iak-iak bang lei hi ahi. Hiai zong bangmahlou hi ahi. 7 Sumsuhthawh in mipil zong mihai suaksak a, golhgukna in lungtang sesak hi. 8 Thil peuhmah a kipatna sanga a tawpna hoih zaw a, kisaktheihna sanga dawhzawhna hoih zaw hi. 9 Na lungsimin hehbaih ken, hehna zaw mihaite' pheipi tunga teeng hi ahi. 10 Banghanga tulai nite sanga a beisa nite hoihzaw ahia? chi ken. Tua bang dotnate dot zaw pilhuai lou hi. 11 Pilna zaw goutan banga thil hoih hi ahi, ni mute adinga phatuam ahi. 12 Dangka sum kihumbitna ahih banga, pilna zong kihumbitna hi ahi. Ahihhanga theihna phattuamna hiai hi ahi: Pilna in a nei mi hinna humbit hi. 13 Pathian' thilhihsa ngaihtuah in: Ama'n a kawisaksa kua'n tangsak thei ding ahiam? 14 Hunte a hoih laiin, kipak in. Hunte a hoih louh chiangin bel, hiai ngaihtuah in: Pathian in a khat a bawl banga adang khat zong bawl hi. Tua bang hi a, kuama'n a tunung ding bangmah mukhe thei lou hi. 15 Hiai ka damsung bangmahlou sungin hiai thilte ka mu tuaktuak: Midiktat a diktatna tawh mangthang a, migilou a gitlouhna tawh a khankhua sawt hi. 16 Kidiktatsak khengval kenla, kipilsak khengval sam ken. Banghanga nang leh nang kihihse ding na hia? 17 Gilou lawzen kenla, mihai suak sam ken. Banghanga na hun tun ma-a si ding na hia? 18 Thil khat letkip a, a dang zong khahsuah louh hoih hi. Pathian laudan siam mi in tua a lekluate peuhmah peel ding hi. 19 Pilna in mi pii khat, om lou hi. 21 Mite' thugen ngaihsak vek ken, na sila' hon hamsiatna zong za kha ni teh 22 nang zong midangte tamveipi hamsiatta na hi, chih na lungsunga kithei na hi. 23 Pilna zanga hiaite khempeuh enchianta ing a, pii sawm tinten ing a, hinapi-a kei hih theih vual hi lou hi. 24 Pilna kichi bangteng na hi taleh, gamlapi-a om thuuk mahmah a, kua'n mukhe thei ding ahia? 25 Pilna leh thil peuhmah omna san bang hi hiam, chih theisiam ding, velchian ding leh zongkhe dinga ka lungsim pia ing a, gitlouhna haihuai dan, haina haihuai dan theisiam dinga ka lungsim pia hi'ng. 26 Sihna sanga kha zaw ka muh bel amah thaang antah hi a, a lungtang pial hi a, a khutte sik khainiang ahi gige numei ahi. Pathian' lungtuak pasal in tua bang numei peel ding hi. Ahihhanga, mikhial zaw a thaanga man tham ding hi. 27 Sinsakpa'n: En dih, hiai ka muhkhiak ahi: Thil peuhmah tawpna mukhe dinga, khat khata enchian ing a, 28 thil ka zonzon hanga ka muhkhiak louh laia, mi 1,000 khat laka pasal tang khat mu ing a, ahihhanga, amaute teng laka numei tang khat zong mu lou hi'ng. 29 Ka muhkhiak sun hiai ahi: Pathian in mihing a tanga bawl a, ahihhanga mihing in ama' geltawm tampi phuakkhia hi, chih mukhia hi'ng, chi hi.
1 Mipil bang kua ahia? Thilte khiatna thei kua ahia? Mihing' pilna in a neipa maitang taangsak a, a maigumna beisak hi. Kumpi' Thuman 2 Pathian' maia kichiamkhin na hih manin, kumpipa' thupiak zui in, ka chi ahi. 3 Kumpipa' omna nutsiat ding kinawh ken. Ama'n a ut uta vaihawm ahih manin, a hoihlou gumin ding ken. 4 Kumpipa' thugen in vangletna lianpen nei ahih manin, kuama'n amah kiang ah: Bang ahia na hih? a chi thei kei hi. 5 Ama' thupiak zui peuhmah in thil hoihlou tuak lou ding a, mipil' lungtang in thil peuhmah a hun leh a hih ding daan thei hi. 6 Ahang bel, mihing' lungzinna a tung ah gik mah leh, thil peuhmah in ama' hunbi leh ahi ding dan nei tek hi. 7 Kuama'n tunung hun theilou hiven, thil hong tung ding kua'n gen thei ding hiam? 8 Kuama'n huih tuun dinga huih tunga vangletna nei lou ahih mana, a sih ni ding tunga thuneihna nei lou hi. Kidou laia kuamah peng thei lou a hih banga, gitlouhna hih mi zaw gitlouhna in suaktasak lou ding hi. 9 Vaan ni nuaia thil kihih peuhmah ngaihtuahin lungsim ka seeng a, hiaite khempeuh ka mu hi. Mihing in ama' siat nading leia midang tunga a kiletsak hun a om. 10 Tua louin zong, mi giloute kivui ka mu. Amaute mun siangthoua hawha kilehkikte a hi uh a, thil gilou a hihna khawpi mahmah uah mite'n a na mangngilh uh. Hiai zong bangmahlou ahi. 11 Tatsiatna a kigawt pah louh chiangin, mite' lungtang ah thil gilou hih ding geelna a dim. 12 Mikhialte'n gitlouhna za khat hih-in sawtpi dam mah le uh, Pathian zahtak dan siam Pathian lau mite tan mah a hoih zaw ding, chih ka thei. 13 Hinapi-in, migiloute'n Pathian a lau louh manun, amau' tan a hoih kei ding a, a damsung nite uh limliap a bang ding a, a sawt kei ding. 14 Leitung ah bangmahlou dang khat a om. Migiloute' tan dinga kilawm midiktatte'n a tang uh a, mi diktatte' tan dinga kilawm migiloute'n a tang. Hiai zong bangmahlou ahi, ka chi. 15 Vaan ni nuai ah mihing adingin ne-a dawna nopsak sanga hoih zaw om lou ahih manin, damsung nopsak mah ka phat hi. Pathian in van ni nuaia, damsung nite a piak sunga, a sepgimna, lungopna in zui ding hiven. 16 Pilna thei ding leh leitunga mihing in a sun a zan ihmut mu lou lianga a sepgimna thei dinga lungsim ka sen laiin, 17 Pathian' thilhih khempeuh kuama'n a theisiam thei kei a, zonkhiak a kisawm hangin, mihing in a om zia, a san a hang a theikhe thei kei a, mipil in thei kisa mah leh, a theisiam taktak thei kei, chih ka mu.
Mi Khempeuh' Tawpna Kibang
1 Hiaite khempeuh ka sut kik a, mi diktatte leh mipilte leh a thilhihte uh Pathian khuta om ahi a, ahihhangin, kuama'n itna in hia, muhdahna in hia amah ngak, chih a thei kei, chi-in thukhupna ka bawl hi. 2 Mi khempeuh mi diktat leh Pathian limsaklou, mi sia leh mi pha, a siang leh a sianglou, kithoihna lante leh a lanloute, a tawpna uh a kibang. Mi hoih tunga tung bangbang mi khial tung ah tung hi. Kichiamna bawlte tunga tung bangbang, kichiamna bawl ngeiloute tung ah tung hi. 3 Vaan ni nuaia thil peuhmah tunga tung hiai thil hoih leh hoihlou ahi. Tawpna kibang in amaute a pha vek. Tua louin, mihingte'lungtangte thil hoihlouin a dim a, a damsungun a lungtang uah haina a om a, tua khit chiangin, misite kiang a tung uh. 4 A damlaite laka om kuapeuh in lametna a nei. A sisa humpinelkai sangin, a hinglai ui a hoih zaw! 5 Ahang bel, a damlaite'n zong siding ahi uh, chih kithei uh a, ahihhanga, misi in bangmah thei lou hi. Pahtakman dang nei tuan nawn lou uh a, amaute phawk gigena om lou a, mangngilha om uh hiven, 6 A itna uh leh a muhdahna uh leh, a hazatna uh a manthatna sawtta hi. Vaan ni nuaia thil tung peuhmah ah tan nei lou uh hiven. 7 Pai inla, kipaktakin na an ne inla, lungnuamtakin na zu dawn in. Ahang bel, na thilhih, Pathian' phasak hun tu hun ahi. 8 Puan ngouin kizem gige inla, na lutang sathau nilh gige in. 9 Vaan ni nuaia hinna bangmahlou Pathian in hon piak sungin, na it na zi tawh damsung nuamsa in, ahi, bangmahlou na damsung ni omlai tengin nuamsa in. Ahang bel, damsung leh van ni nuaia na sepgim sunga na tan hiai ahi. 10 Na khut in sep ding a muh peuhmah na hat theihtawpin sem in. Na pai nading sheol ah nasep lah om lou, thil sawm lah om lou, theihna lah om lou a, pilna lah omlou hiven. 11 Vaan ni nuai ah thil dang ka muh om hi: Kitaitehna mi kin-gangte' zawh hi tuan lou, kidouna zong mi hatte' zawh hi tuan lou, an zong a pilte-a hi tuan lou, hauhna lah a piltuamte-a hi tuan lou, deihsakna lah laisiamte-a hi tuanlou, hun leh hunlem michih tunga tung hi, chih mu hi'ng. 12 Tua baan ah, kuama'n ama' hun chik chianga hong tung ding hiam, chih thei lou hi: Lena ngasa awk banga, thaanga vasa awk banga, mihingte zong a tung ua theihkholh louha hong tung hun hoihlou ah awk uhi.
Haigamtat leh Pilna
13 Vaan ni nuai ah pilna etteh nading ka mu a, tua in nakpitakin ka lung a khoih hi. 14 Khatvei, mi tawmchik tenna khawpi neuchik khat a om. Kumpi hattak in tua khawpi a sim a, a kimkot ah a umchip a, dou nading panmun sangin a umsuak. 15 Tua khawpi ah, mi khat zawng mahmah, ahihhanga pii a teeng a, tua mipa'n a pilnain tua khawpi a humbit. Ahihhangin, kuama'n amah a thei gige kei. 16 Tua bang ahih manin, ke'n: Thahatna sangin pilna a hoih zaw, ka chi. Ahihhangin, tua mipa' pilna a kisimmawh a, a thugente a kingaikhe nawn kei zawsop hi. 17 Vaihawm mihatte'n nakpipi-a thu a gente uh sanga mipil in awlkha kha-a a thugente uh ngaihsak zawk ding ahi. 18 Kidouna galvante sanga pilna hoih zaw hi. Ahihhanga, mi khial khat in thil hoih tampi hihsia hi.
Pilna Pianzia
1 Thoupi sisate'n gimnamtui a namsiatsak banga, gamtat haihuai neuchik in pilna leh zahna bukzou zaw hi. 2 Mipil' lungtang taklam nga a, mihai' lungtang bel veilam nga hi. 3 Mihai in lampi-a a pai laitak nangawna khua phawk lou a, a hai dan michih lak hi. 4 Vaihawm mi' hehna na tunga a sou leh, na dinmun taisan ken. Daih didena in khelhna lianpi daaisak hi. 5 Vaan ni nuaia thil hoih lou ka muh khat om a, tua bel, vaihawm mi apan thil hihkhelhna pawt ahi. 6 Mihaite dinmun sang tampi piakin om uh a, ahaute'n dinmun nuainung tang uhi. 7 Makai liante, silate banga khea pai a, silate, sakol tunga tuang mu hi'ng. 8 Gum khuak mi gum ah ke thei a, baang phenvang mi gul in tu thei hi. 9 Suanglakna khuka suang la mi suangin liam thei a, sing ek mi zong sing eh-in liam thei hi. 10 Heipi a mol a, a kitat hiam kei leh, thahatna tamsem kul a, ahihhanga, sepsiamna in lawhchinna tun ding hi. 11 Gul in a zual ma-a mi a tuk leh, a khoizual mi adinga kithaman lou hi. 12 Mipil' kama thupawtte hehpihna hi a, ahihhanga, mihai zaw ama' kama thupawtte'n negai hi. 13 A chilin a thugente haihuai a, a tawpna gitlouh haina hi a, 14 mihai in thu gen tam semsem hi. Kuama'n thil hong tung ding thei lou hiven, ama' nunga bang hong tung ding hiam, chih kua'n gen thei ding hiam? 15 Mihai' nasep in amah mah gimsak a, khawpi zotna lampi nangawn thei lou hi! 16 Sila a nahi ngei kumpi-a nei leh, zingsanga ankuanglui mi makaite-a nei gam aw, na tung gik hi! 17 Mi lungliana piang kumpi-a nei leh, zukhamna hilou, thahatna ankuang a hunhuna lui makaite-a nei gam aw, a nunnuam na hi! 18 Mi thadahte' innsunte kuai a, khut om maimaite' inn keh hi. 19 Ankuanglui bel nuih nading hi a, zu zong hinna kipahsak nading hi ahi. Ahihhanga, dangka zaw taksap awng khempeuh hukna hi ahi. 20 Na lungsim ngaihtuahna nangawnin kumpipa gense kenla, na lupna dantan sung nangawn ah ahau mi hamsiat ken. Huihkhua-a vasa nangawn in thu na tun ding a, vasa leng nangawn in na thugen gensawn kha ding hi.
Tuilaka Tanghou Paih
1 Tui tung ah na tanghou pai in, ni tampi nunga mukik ding na hi. 2 Sagih kiang ah tan hawm in, ahi, giat kiang ah. Leitung ah bang thil hoihlou hong tung ding hiam, chih thei lou na hi. 3 Meipite vuahtuia a dim leh, leitung ah vuah zusuksak uhi. Simlam hiam, mallam hiama singkung a puk leh, a pukna munmuna omden ding hi. 4 Huih ngeingaih peuhmah in khaichi pawi lou ding a, meipi enen peuhmah in buh at lou ding hi. 5 Huih lampi na theih kei leh, ahih kei leh, nute' sula pumpi kibawl dan na theih kei leh, thil khempeuh Bawlpa Pathian' nasep theisiam lou ding mah na hi. 6 Zingsangin na khaichi pawi inla, nitaklam dong na khutte thadahsak ken. Hiai maw, tua maw, a koipen lawhching ding chih thei lou chin a, a nihtuaka lawhching ding hiam, chih zong thei lou na hi. 7 Tuailaina leh a Siampa Khawvak nuam a, mitte'n ni muh nuamsa hi. 8 Mi'n a damsung kum zahzah tua khawvak nopsakpih hen. Ahihhangin, mial nite theigige hen, a mial nite tam ding hiven. Thil hong tung ding peuhmah bangmahlou hi ahi. 9 Tuailai aw, na tuailai in kipak in, na tuailai nitein na lungtang in lungnopna hon pia hen. Na lungtang' deihlam lam zui inla, na mit muhna lamlam zui in. Ahihhangin, thil bangkim ah Pathian in na tunga thu khen ding ahi, chih thei in. 10 Tua ahih manin, na lungtang apan lunghimawhna hawlmang inla, na pumpi haksatnate paikhia in. Tuailai hun leh hatlai hun bangmahlou hi ahi.
1 Lungkham buaina nite hong tun main, Tuailai nite zong nuam kei, na chih hun in hon phak ma-in, na tuailai nitein nang hon Siampa thei gige in. 2 Ni leh khawvak leh, kha leh aksite hong mial a, vuahzuk nunga meipite hong kai nawn ma-in, 3 inn ngaaka veengte a liin a, mi hatte a kun kheukheu a, ansute a tawm tak man ua, a khawl ua, tawhleta dakkhete a vaakphat nawnlouh main, 4 kongzing lam nga kongkhakte kikhak a, ansuk gin a daih hiaihiai a, vasa hama mite a thawh hanga vasa hamte a ngaih nawnlouha, 5 mite a sang kal ding lau a, kongzing khawng lau a, almon paklunta a, khaupete pai zawtzawt a, lunggulh tenten chih zong om nawnlouh main. Tua hun chianga, mihing in a Tangtawn inn zuan a, a suunte kongzing khawnga a pai hun uh tun main. 6 Ngun khau kitat a, kham belkuang kitam a, tuikhuka belgong-gek kitam a, ahih kei leh, tuileh-a tuikhaina pei kitan a, 7 leivui a hong kipatna lei maha, kik nawn a, kha a pepa Pathian kianga a kik nawn main, hon Siampa thei gige in. 8 Bangmahlou! Bangmahlou! Bangteng bangmahlou hi vek hi, Sinsakpa'n chi hi.
Thukhupna
9 Sinsakpa a pii a, tua tham louin, mite tung ah theihna a guan hi. Thil a suut a suut a, a zongkhia a, paunakte a lemkhawm khawm hi. 10 Sinsakpa'n thumal leh kammal dik a zongkhia a, a gelhkhiakte a tang a, a dik hi. 11 Mipir thugente zaw sutna chiangzum bang ahi a, Belamchingpa' thugente kigawmkhawm lah sikkilhte kiptaka khetlut bang ahi. 12 Ka tapa aw, hiaite baan ah, thil khatpeuha vauhilhna ngaikhia in. Laibu tampi bawl ahih leh, tawpni a om kei a, sim tam lah pumpi gimna ahi. 13 Avekpi-in kizata a, hiai thukhupna ahi: Pathian lau inla, a thupiakte zui in. Hiai mihing peuhmah hih dingpen ahi. 14 Ahang bel, thil kihih peuhmah, thil kisel peuhmah, a sia a pha nangawn tawh kisaia thu kikhen ding hi.
1 Solomon' Late' La:
Sannem' Tongdam
2 Ka tongsan in a mukin hon tawp hen aw Anbang non itna grep ningzu Sang' khum zaw! 3 Na duang zunna gimsi'n ka lung nuamsak e, Na sakmin lawh nangawn gimnamtui buakkhiak bang. Lianute' laikuai ding mah hi veteh! 4 Tui bang hong la ve aw, kinawh ve ni! Lunmang in a zalna siangsung hon tun hen.
Jerusalem Lianute' Tongdam
Nang ah nuamin lungtai ung, anbang na itna grep ningzu sang' phat zaw n'ung.
Sannem' Tongdam
Maimit suan, lambang hon pak uh hi ding mah hi-na uh e! 5 Jerusalem lianute aw, Kei ka sakmel puanbang a dum hang', ngaihbaang veve hi'ng. Kedar puanbukte, Solomon' Inndan puankhaite bang ka dum mah ve. 6 Ka sakmel puanbang a dum hang' nuihchiamin hong lei lou aw, tang nisa ka thuak vang hi. Ka tunnu' von ngalliamte'n mawhlung hong paih uh a, grephuan chingin hong nei uh, keima' grephuan ching manlou. 7 Lunga it aw, hong hilh dih ve, na belamte koilai' ching na hiam? Sunlai' koikuam tutkhawlsak na hiam? Banghang' kei ka lawmvualte' belam nena maikhuh lianu bang ding ka hiam?
Sannem' Lawmvualte' Tongdam
8 Lianu zatam laia sakmel etlawmpen aw, na theih kei leh, belamte sulin zui vaw, belamchingte' puanbuk nen ah na lengkelte ching ve'n.
Tongsan Ngalliam' Tongdam
9 Ka sannem ka ngaihnou aw, Faro' kangtalai kai kolsala tawh hon teh ve'ng' 10 Na biangnou bengbil na bah tawh lawm e, nangawng zong kham bahkhi tawh lawm hi.
Jerusalem Lianute' Tongdam
11 Nang ading' ngunsika zep kham bahkhite hong bawlsak n'ung.
Sannem' Tongdam
12 Lunmang' ankuang um lai' ka duang zutna gimsi zamsak hi'ng. 13 Lunga ka it tang ngalliam, kei ading' mura thawl, ka nunkhumte kala kikhai bang. 14 Hon it ka tongsan kei ading' En Gedi grephuana henna paksillun bang.
Tongsan Ngalliam' Tongdam
15 Ka ngaihnou aw, ngai dih ve, sakmel etlawm ve chia, etlawm veteh! Na maimitte zong khuva maimit bang.
Sannem' Tongdam
16 Hon it ka tongsan aw, ngai dih ve, laikuai sakmel lawmnou hi chia, ngaihbaang veteh! I laikhun zong hing dum diidiai e! Tongsan Ngalliam' Tongdam 17 I siangsung inkamte sidar sing, i innsunte zong lahmei chiim sing hi.
Sannem' Tongdam
1 Kei, Sharon rose pallun hi'ng, Gamzang lili pallun hi'ng. Tongsan Ngalliam' Tongdam 2 Linglak lili pallun bang ka ngaihnou, Lianu zatam laia hei aw.
Sannem' Tongdam
3 Tulsing zing nuaia epul thei bang ka tongsan, tang ngalliam zatam laia hei aw, a limnuaia tutkhawl nuam sa'ng, a gah zong ningzu bang khum. 4 Ama'n laikuang luina inn ah hon tonpih, a puanlap lah ka tung ah anbang itna. 5 Grepgah keutein hon hatsak inla, epul theiin hon halhsak ve aw, zawlngaia khamkha vei hi'ng. 6 A veilam banzai khamin hon zalsak a, a ziatlam banzalin hon kawi. 7 Jerusalem lianute aw, gamlak sansa leh zuksa taltuai siala hon ngen hi'ng: Anbang itna zaw ama' ut mateng phawngin lungzuangsak dah un.
Sannem' Tongdam
8 Ngai dih vaw! Ka tongsan hi veh! En dih vaw! Mual dung tawnin hong tai, mualte kantanin sih sial bang hon zuan. 9 Ka tongsan zaw, sansa bang, zuksa talta bang, En dih vaw, i baang liah ah ding, tawhlet ah hong daak, vathangkalh vang pan hon en veh! 10 Hon it ka tongsan in tongdam hong kha: Ka sannemnou aw, zuangthou in, hon zui in. 11 En in tunsik vuksan beita, tulvuah luang nawn lou. 12 Simlei pan paksilte hong langta, zaila oih hun hong tungta, I gam ah khuva zaiawi kizata. 13 Theipi kung in gah masa suangta, grepgui pallunta, a gimsi hong laangta. Ka sannem nou, etlawmpen in zuangthouin hon zui in, hong chi.
Tongsan Ngalliam' Tongdam
14 Lumsuang henga ka khuva aw, mualpang bukna-a ka khuva aw, na sakmel hon lak ven vel nuam ing. Na tongdam hong kha aw ngai nuam ing. Na kam khum a, na sakmel ngaihbaang lua hi.
Sannem' Sanggamte' Tongdam
15 Koute ading' gamsihalte hong matsak aw, grepgui nesia sihal noute hong matsak ve'n, koute' grephuante pallun lai hi.
Sannem' Tongdam
16 Hon it ka tongsan keia hi a, kei ama'-a hi'ng. Aman lilipalte lak ah a belamte ching. 17 Mualtung phoklakte ah, sansa leh zuksa talta bangin Zing taikhawval mateng limliapte'n mualkhup mateng, hon it ka tongsan, kei lam hong nga in.
1 Muikhawzin taikhawval dong ka laikhun tung ah, lunga ka it sangbang vaai ing, sangbang ka vaai hang' muzoulou e! 2 Ke'n: Tu'n zuangthouin, vangkhawlai teng ah sangbang va vaai ning. Khawdung khawvai ah ka itpa sangbang va vaai ning, chi'ng e, ka vaai vaai hang' mu zoulou. 3 Vangkhawlaia galvilte'n kei hong mu a, ke'n amaute kiang': Ka itpa mu lou maw? chi'ng. 4 Amaute ka khen phet leh, lunga ka itpa mu'ng e, ka tunnu' siangsung ka tut a, kei hong paai, lamgial bang ka kiakna ka tunnu' inndan ka sungtumpih mateng amah khah nuam lou hi'ng. 5 Jerusalem lianute aw, nahnuai sansa leh zuksa talta siala hong ngen hi'ng: Anbang itna zaw ama' ut mateng, phawngin lungzuangsak dah un, chi'ng. 6 Hiai gamdai-gamkeu pana meikhu tung bang hong paikhia kua hi hiam? Hiai mura leh begaw kizuta namtui, sumsinte' namtui namkim kizut kua hi hiam? 7 En un! Solomon kizawnna laang hi veh, Israel suan ngalliam tungtuang sawmguk in hong kha. 8 Amaute'n namtem paibang kuah chiat uh a, lalnawh siamsa hi uhi. Zankhang dipkuatna om ding khualin pheiphung ah namtem kuah chiat uh. 9 Lunmang Solomon in Lebanon tulsingin kizawnna laang bawl a, 10 A khuampite ngunsikin bawl a, a nuaiphah khamsikin bawl a, Jerusalem lianute'n a tutna ah sanpuan phah a, a sung teng ah anbang itna tawh phahsuak uh. 11 Nou Zion lianute a, hong tualsuak unla, kumpikhuklu khu Solomon mitsuan un. A thai lianu a pii ni'n, a lungnop kim ni'n, a tunnu'n kumpikhuklu khusak hi.
Tongsan Ngalliam' Tongdam
1 Ka ngaihnou etlawm ve chia, etlawm veteh! Na lakmai khuhna liah ah, na maimitte khuva maimit bang. Na besam lah Gilead Mual pan hong tuaksuk belamte bang phe velvel. 2 Na hate lah belam mulmetsa, silsiangsate bang paak ve'n, tuate'n a phik ngenin nou nei a, a chiing khat beek omlou. 3 Na mukte sawnsan bang e, na kam lah etlawm. Na lakmai khuhna liah ah na biangte mimthei min bang san lihleh e! 4 Na ngawng lah ngalliamte galvan, namtem leh lumte kikhaina David innsang kilam bang. 5 Na nunkhum geel lah lilipal laia gamta sansa nih, a phiikte bang. 6 Zing taikhua hong vala, limliapte bei mateng, mura gimsi lenna mual leh gimnamtui lenna mual ah pai ning. 7 Ka ngaihnou aw, nang zaw gen baang lou mellawm kim hi chia, 8 Ka thai lianu aw, Lebanon pan hon zui in, Lebanon panin ton ve ni e. Amana mualdawn pan tuaksukin, Semir leh Hermon mualvum pan pai ni. Salimlian humpinelkai kuate panin, kamkei gialbem tatna mualte panin tuaksuk ve ni. 9 Nang ka laizom, ka thai lianu, ka lai kuai ve chia, khatvei maimit nong suan in ka lung hon len. Na awhkhi-a suang manpha khat in zong ka lai kuai. 10 Anbang non itna nuam nah e, ka laizom, ka thai lianu aw! Anbang non itna ningzu sang khumzaw, na duang zunna gimsi nam gimnamtui dang teng zong khup. 11 Ka thai lianu aw, na mukte khuaikhak bang khumna taakkhesak, na lei nuai ah khuaizu leh nawitui om, na silhpuan Lebanon gimsi nam. 12 Ka laizom ka thai lianu aw, huan kium, damtui khuk kiumchip hi ve teh. 13 Na huansung zong mimthei huan, hinna paksil, nard leh thei limpente omkhawmna huan hi. 14 Nard, safron, kalama, singguithak, begaw namkim, mura leh aloe, gimnamtuipente tawh kimna hi teh. 15 Huan sung damtui nak hi chia, siktui siang libang ching hi chia, Lebanon damtui luang hi teh.
Sannem' Tongdam
16 Khanglou aw, mallam huihkhi aw, hong leeng hiauhiau aw, simlam huihkhi aw, ka huansung gimsi hong nam hen, gamchin mualchin teng zeel hen. Ka tongsan a huan ah hong sungtum hen, theilim namkim sungnekin nei hen.
Tongsan Ngalliam' Tongdam
1 Ka laizom, ka thai lianu aw, ka huan sung ah hong sungtum ing. Ka mura leh ka nahnam hong khawm ing. Ka khuaikhak leh khuaizu nekhin ta'ng! Ka ningzu leh ka bawngnawi dawnkhin ta'ng. Ka lawmvualte aw, nein dawn un, nou zawlngaite aw, niang leh taiin om un.
Sannem' Tongdam
2 Laikhun tung' maimit kasiin ha'ng sinlungsung maimit sing lou, Ngai dih! Ka tongsan in Dawngkot hong kiu: Ka laizom ka thai lianu aw, dawngkot hong hon in. Ka khuva, a hoihkimnu aw! Ka tuklu daitui in luan a, ka besam daituiin kawt, hong chi. 3 Ke'n ka silhpuan suahkhin zou, bangchi'n silhkik thei ding? Ke'n ka khete silkhin zou, bangchi'n ninkiksak thei ding? 4 Ka tongsan ngalliam in banzai hong khak e, awngvang pan banzai hong khak, amah ngaiin ka lung phu ditdit. 5 Ka tongsan dongkot hon ding' zuangthou ing, ka banzai zong mura-in zut ing, ka khutzungte zong mura tui luan ing, dongkot hong ding chi'n a kaihna len ing. 6 Ka it tongsan dongkot hon ta'ng, hihhang' ama'n sul hon heisan, mualkhumta. Sul hong heisan ka sinlai liap hi. Amah sangbang zong leng, dawnbang ka tuak nawn lou. Amah malbang kou leng, tong hon dawng nawn lou hi. 7 Galvilte'n vangkhawlai ah dawnbang hon tuak, ka tunga khut khain hong liamsak uh, kulhbang tunga galvilte'n ka silhpuan hon lasak uh. 8 Jerusalem lianute aw, hon ngen hi'ng: Ka it ka tongsan na muh uleh, amah bang na hilh ding? Zawlngaia khamkha veilawh hi'ng, chih hilh un.
Jerusalem Lianute' Tongdam
9 Lianu zatam laia sakmel etlawm tungtuang aw, it tongsan dang sanga nang' tongsan bang hi tuam hiam? Hibang nong nget, nang' tongsan bang hi tuam hiam?
Sannem' Tongsan
10 Ka it ka tongsan mei tangpha a, a duang san hithet, sangsawm laia etlawm tungtuang hi. 11 A tuklu zong khamsik manphapen bang, a besam lah kawi lingleng etlawm, akva bang dum kelkel. 12 A maimitte damtui nena khuva gamta, nunkhuma bualsa khuva maimit bang. 13 A biangte silpak namtui' huan, gimsi lengsak bang, a muk lah lili pallun mura tuite taak bang. 14 A banzalte lah khrusolait suangmanpha kisuang khamsik chiang bang. A duang lah safaiar suanga kizem ngousai hapak kizun bang. 15 A pheiphung lah khamsik tunga kitung suangpak khuamte bang. A duang etlawmnou lah sidar tulsing sangte-a zep Lebanon bang. 16 A kam lah, a khum, kichi hi mai a, ahi, pumtanga etlawm tungtuang hi. Jerusalem von lianute aw, amah ahi ve anbang ka it. Hiai ahi ve ka lawmvual.
Jerusalem Lianute' Tongdam
1 Lianu zatam laia sakmel etlawm tungtuang aw, Na laikuai tang ngalliam koi lam sulhei hiam? Hon hilh dih ve, sangbang hong zonpih n'ung.
Sannem' Tongdam
2 Ka tongsan ngalliam a huan sung, gim namtui huan sung ah hawh. A huan sunga belamte ching ding, Lilipal khawm ding' kuansuk. 3 Kei ka tongsan ngalliama hi'ng, amah zong keia hi. Ama'n a belamte lilipal lak ah ching.
Tongsan Ngalliam' Tongdam
4 Anbang ka it aw, Tirza bang etlawm ve chia, Jerusalem bang etlawm veteh. Puanlap kipei tawh lalnawh honpi bang etlawm ve teh. 5 Na maimitte'n lung hon len lua veh e, ka lungsung luah zou. Na besam lah Gilead Mual pan hong tuaksuk lengkelhon bang. 6 Na hate lah muantui phula sil belamhon bang, tuate'n a phiik ngenin nou nei, a chiing khat beek om lou. 7 Na lakmai khuhna liah ah na biangnou, mimthei phelte bang san lihleh. 8 Lunmang' thai lianu sawmguk om thei, thaikeem sawmgiat om thei, lianu zong simsenglouh om thei. 9 Lunga ka it, ka khuva a hoihkimnu, zatam laia tehpihbei, A tunnu' von lianu neihsun, a tunnu' von zouzam hi. Von lianu dangte khempeuh in, amah nunnuam chi se hi. Lunmang' thai lianute, thaikeemte leh lianu dang khempeuh in lambang pak.
Sannem' Lawmvualte' Tongdam
10 Hiai zing taikhawval bang eeng singsemg, tung solkha lik bang taang, sun nitang banga siang, si-al honpi taangpha bang etlawm kua hi hiam?
Tongsan Ngalliam' Tongdam
11 Gamzang nahthak suang teng en ding, grepguite'n dawn suangta hiam en ding, mimthei pallunta hiam en ding, makha thei huan sung paisuk hi'ng. 12 Khua ka phawk main ka lunggulhna in ka mite' kumpi leengpei lak hong tun.
Sannem' Lawmvualte' Tongdam
13 Shulam lianu aw, sul hong hei vaw, sul hong hei ve'n. Sul hong hei vaw, sul hong hei ve'n. Na sakmel vel n'ung!
Tongsan Ngalliam' Tongdam
Banghang Mahanaima lamsai vel bang, Shulam lianu maimit suansuan ding?
1 Nang, Lunmang' vontawi lianu aw, na pheiphungte na khedap tawh lawm veh e! Na pheiphung etlawm zong khutsiamte' banzai khamsik manpha bang etlawm veh e! 2 Na laikuak lah ningzu hel tasamlou ningzu nou beem bang ve'n, na kawng lah huit buhvum lilipal' um kimvel bang veh. 3 Na nunkhumte gel lah zuksa nih, sansa phiikte bang. 4 Na ngawng lah ngousai ha khuampi bang, na maimitte lah Bath Rahim kongpi nena Heshbon tuichinte bang. Na naak lah Damaska lam nga Lebanon innsang bang. 5 Na tuklu lah Karmel Mual bang kumpikhuklu hi. Na besam lah kumpi puan sandup bang. Tua na besam bawk in Lunmang' lung kuai. 6 Lunga ka it ka sannemnou aw, etlawm in mittaihuai ve chia! Na lungtaina in hon lungtaisak na veh e! 7 Na duang tunsang lah tumsing bang, Na nunkhumte lah theigah bawkte bang. 8 Tua tumsing ah hong kal ve ning, na nunkhum ah luailuai ve ning. Na nunkhumte grepgah bawkte bang hen. Na naksuk naaktouh hu lah epul gimsi nam hen. 9 Na kam lah ningzu khumpen bang hen! chi chi mai veng.
Sannem' Tongdam
Tua grep ningzu chiik, lunga ka itpa lam ah luang hen aw, a muk a kam tawksuak hen. 10 Kei ka it ka tongsan-a hi'ng, ama' laikuai a lunggulh kei hi'ng. 11 Ka it ka tongsan aw, khuakim gamsung ah tai ve ni! Khawtate ah zan sialbang giak ve ni! 12 Taikhawval chiang' grephuan ah pai ve ni, grepguite'n dawn suangta hiam en ve ni, a pallun ding kamkata hiam en ve ni, mimthei pallunta hiam en ve ni, tua ah anbang kon itna hon pia ning. 13 Dawh-aite'n gimsi suahta e, i kongpite ah zong nek ding tam, a lui a thak kiching. Hon it ka tongsan aw, nangma' ading ka khol, ka koihching hi ven.
1 Nang pawh ka tunnu' nunkhum luai, ka laizom ngalliam bang hi mahmah leteh, gamsung ah hon tuak leng, hon tawp mahmah ning. Kuama'n hong simmawh tuam lou lai ding hi. 2 Hon tonpih-in, hon sinsak ka tunnu' siangsung hon tun nuam ing. Mimthei ningzukhum, gimnamtui kihel hon dawnsak nuam ing.
Jerusalem Lianute Kiang ah
3 A veilam banzai khamin hon zalsak a, a ziatlam banzalin hon kawi. Jerusalem lianute aw, hon ngen hi'ng: Anbang itna zaw, ama' ut mateng phawngin lungzuangsak dah un.
Sannem' Lawmvualte' Tongdam
5 A tongsan tunga kingaia gamdai gam simtham apan pheiphung hon suan kua hi hiam?
Tongsan Ngalliam' Tongdam
Epul kung nuai na tunnu'n nang hon paaina, mimbang nong pianna mun ah nang hon phawng hi'ng. 6 Na lailung ah namkipna bangin, na banzai ah chiamtehna bangin hon koih in. Anbang itna zaw khaphamna bang hat-a, a thikthusia zong hankhuk bang. Kammei bang kuang a, kammei Phualpi bang kuang. 7 Anbang itna khang damtui tampi'n zong buakmit thei lou, luipi luita in zong taimang theilou. Mi'n sesum lamtamin lei sawm leh, anbang itna lei zoulou ding, nuihchiamin kilei lei ding.
Sannem' Laizom Ngalliamte' Tongdam
8 Laizom lianu neu khat nei ung, nunkhum sawmsialki bang meng lou lai. Mi'n tongdam hong kha leh, ama' ading bang kihihsak zen ding hiam! 9 Amah kulhbaang khattou hi leh maw, a tung ah ngun innsang beek kilam venchin, amah dawngkot khattou hi leh maw, sidar sing beekin a khakna kibawl ve.
Sannem' Tongdam
10 Kei kulhbaang hi mah ve'ng e, ka nunkhumte zong innsangte bang, Ama' maimit ah a lungkimna-nu hi ve'ng. 11 Solomon in Baal Hamon ah grephuan nei, a khawhlawhte' khut ah keemsak, a gahte taangin ngun dangka shekel sangkhat tek a piak uh kul. 12 Kei' grephuan bel keia hi a, ka thuthu-a ka piak theih hi. Tua shekel sangkhat nang ading hi, Solomon aw. Shekel zanih bel a gah keemte' ading hi.
Tongsan Ngalliam' Tongdam
13 Huan sunga teeng noute aw, na nassem lawmvualte tawh na tongdam uh hong zasak ve ua!
Sannem' Tongdam
14 Hon it ka tongsan aw, hong kinawh ven, gim namtuia dim mualte tung ah, zuksa talta bang, sansa bang hong tai ven.
Agelh - Isai 1 Judah kumpipate Uzia, Jotham, Ahaz leh Hezekia vaihawm laia Amoz' tapa Isai in Judah leh Jerusalem tawh kisaia mengmuh a muh hiai ahi. Judah' Gitlouhna 2 Nou vaante aw na ngai unla, nang leitung aw, bil na dawh in! Tangtawn Toupa'n thu gen a: Tate khoilian ing a, vaak piching ing a, ahihhanga amaute ka tunga hel uhi. 3 Bawngtal in a pu thei a, sabiltung in zong a pu' anpiakna kuang thei hi. Ahihhanga Israelte'n thei lou uh. Ka mite'n theisiam lou uhi, chi hi. 4 Maizen! khelhhat nam hi uh a, mawhna gik pua hi uhi. Thil gilou hihte' tate, gilou taka gamtate hi uhi. Tangtawn Toupa taisan uh a, Israel' Misiangthoupa nial uh a, kiheimangsan uhi. 5 Na hel semsem uh banghanga hon sat lai ding ka hia? Na lutang uh a puma liam a, na lungtang uh zong a puma nathuak ahi. 6 Na khepek nuai uapan nalusip donguh a damna lai himhim om lou hi. Liammate, sidupte leh meima ngena dim hi. Sil lah kisilsiang lou, tuam lah kituam lou, sathau lah kinuh lou! 7 Na gam uh kilawita, na khawpite uh mei in kangtumta. Na mitmuh ua gamdang mite'n na gam gah uh negaita. Gamdang mite' hihsiat banga kise dimdemta hi. 8 Grephuana a venbukta banga, mazel huana venbukta banga Zion' Tanu kinuseta, galte' sim khawpi bang hita. 9 Tangtawn Toupa Vanglianpen in a khawsuak sun tawmchik hon nutsiat lou hi leh, Sodom bangta ding hang a, Gomora bangta ding hi hang. 10 Sodom vaihawmte aw, Tangtawn Toupa' thu za un. Gomora mite aw, i Pathian' dan ngai un! 11 Tangtawn Toupa'n: Na kithoihna zouzaite' un kei adinga bang manphatna nei ahia? chi hi. Noute' haltum thillat belamtalte leh gan vakthaute' thaute'n hon nimta hi. Bawngtalte, belamnoute leh kelte' sisan ah kipahna neilou hi'ng. 12 Ka maia kimu dinga nong pai chiang ua, ka inntualte na siik ding uh kua'n hon ngiat ahia? 13 Thillat mannabeite hon tawi nawn kei un, na gimnamtui latte uh keia dinga kihhuai hi. Na khawmpi kulmutte uh -Khathakte, Sabbathte, a muhthadahhuai khawmpi na sapte utawh, thuakzou nawn lou hi'ng. 14 Na Khathakte uh, khawmpi na sapte uh na ankuangluite uh, ka hinna in hua hi. Kei adinga puakgik lei hi a, chimtak mahmahta hi'ng. 15 Thum-a khut na zak peuhmah chiang ua, ka mitte hum ding hi'ng. Ahi, thumna tam semsem na neih chiangua, ngaikhe lou ding hi'ng. Na khutte uh sisana kidim hiven. 16 Kisil unla, kihihsiang un! Ka mitmuh apan na thilhih giloute uh koihmang unla, thil gilou hih tawpta un. 17 Thil hoih hih kisin unla, dika vaihawm thukhenna zong un. Midang nuaisiahte taihilh unla, pabeite gum unla, meigongte adingin diktakin vai hawm un. 18 Tangtawn Toupa'n: Hong pai unla, ngaihtuah khawm dih ve ni. Na khelhnate uh san-au bangin san mahleh, vuk bangin ngou ding a, sandup bangin san mahleh, samul banga ngou ding hi. 19 Gennop taka thu na man uleh, gam gah hoihte ne ding na hi uh. 20 Ahihhanga, genhaktaka na hel lai uleh bel, Tangtawn Toupa'n a gensa bangbanga namsau nekgaiha om ding hi uteh, chi hi. 21 Banghanga khawpi muanhuai kizuak suakta mai ahia? Dika vaihawm thukhenna tawh kidim hi a, diktatna a sunga om hi a, tu-a tualthatte teengta mai! 22 Na ngun siikek suakta, na zu tui tawh kihelta. 23 Na vaihawm makaite genhak uh a, gutate' lawm suakta. Michih in golhna duh a, thilpiak deih uh. Pabeite gum lou uh a, meigongte' vai dika hawmsak lou uh, 24 Tua bang ahih mana, Toupa, Tangtawn Toupa Vanglianpen, Israelte' Vanglianpen in: Khaile! Kei hon doute apan kihahsiang ding ing a, ka melmate tunga phuba la ding hi'ng. 25 Na tunga khut kha ding ing a, nanga siik eksia hihsiang sipsip ding ing a, Na sianlouhna khempeuh lakhe ding hi'ng. 26 Na thukhente a chiil laia banga tungding thak ding ing a, na lemtheite a chiil laia banga tungding thak ding hi'ng. Tu nung chianga mite'n: Diktatna Khawpi, Khawpi Muanhuai, hon chi ding hi. 27 Dika vaihawm thukhenna-a Zion kitankhe ding a, a sunga kisik mite, diktatna-a kitankhe ding hi. 28 Ahihhanga, talekte leh khialte' siatna a kitona tung ding hi. Ahi, Tangtawn Toupa taisante Mangthang ding uhi. 29 Ahang bel, na kipahpih uh tawsaw singkung zekte hanga maizum ding hi ve uchin. Na teelsa huante hanga zahlak ding hi vechin. 30 Ahang bel, na lunggulh tua tawsaw singkung tehkeu bangbang hita ding chin a, tui mulou huan bang ding hi vechin. 31 Mihat zong ziza keu bang hi ding a, a thilhih mei-ek bang hi ding hi. Mei in kaangkhawm ding a, a phelh ding kuamah omlou ding hi, chi hi.
Pathian Innkawte' Tunung ding
1 Hiai, Amoz' tapa Isai in, Judah leh Jerusalem tawh kisaia mengmuh a muh ahi: 2 Ni nanungte ah Tangtawn Toupa' tempul mual, mualte laka thupipen dinga hihkip hi ding a, tangte tung lama tawisang hi ding a, namte khempeuh hong lunglut ding hi. 3 Nam tampite hong pai ding uh a: Hong pai unla, a lampite i tot theih nadingin, Tangtawn Toupa' mual ah, Jakob' Pathian' inn ah pai ni, ama'n a lampite hon sinsak ding ahi, chi ding uhi. Ahang bel, Zion apan Dan pawt ding a, Jerusalem apan Tangtawn Toupa' thu hong pawt ding hiven. 4 Ama'n namte kal ah thu khen ding a, nam tampite adinga kinate, lem ding hi. Tua hun chianga amaute'n a namsaute uh leilehnatu-a seek ding uh a, a teite uh theikung heuhna temkuia seek ding uhi. Nam khat in nam dang doua naamsau lik nawn lou ding a, ahi, kidoudan sin nawn lou ding uhi. 5 Jakob innkawte aw, hong pai unla, Tangtawn Toupa' vak ah pai ni.
Toupa' Ni
6 Na mi Jakob innkawte tawpsanta chin a, amaute'n Suahlam mite' tatdan a zeka mulkimna hau uh a, Filistiate banga dawi aisan uh a, gamdang mite tawh kipawl nuamsa uh hiven. 7 A gam uh ngun leh khama dimsak uh a, a goute uh simseng hilou hi. A gam uh sakola dimsak uh a, a kangtalaite uh simseng hilou hi. gam uh milimtea dimsak uh a, amau' khutsuakte mah bia uh a, amau' khut mahmaha a bawlte uh bia uhi. 9 Michih milim bia-a kunsak uh a, mi teng zong khupbawh uhi Amaute' mawhna ngaidam ken. 10 Suangpite lak ah lut unla, lei nuai ah bu un. Tangtawn Toupa' mulkimhuaina leh a thupina apan kisel un. 11 Mi kideihkhop tunghahte kainiama khupbawhsak dinga mite' kisaktheihpih kaihniama om ding hi. Tua ni chianga Tangtawn Toupa kia kitawisang ding hi. 12 Ahang bel, mi kideihkhop leh kiliansak peuhmah adinga Tangtawn Toupa Vanglianpen in ni khat sehsa-a koih hiven. Amau kitawisangte khempeuh kaihniam hi ding uhi. 13 Tua ni in Lebanon singkung sangte dou ding a, Bashan tawsaw singkungte dou ding hi. 14 Mualsangte khempeuh dou ding a, a kitawisang mualte khempeuh dou ding hi. 15 Innsang khempeuh dou ding a, kulhbaang muanhuai khempeuh dou ding hi. 16 Tarshish longte dou ding a, tui long kilawmte khempeuh dou ding hi. 17 Mihing saanna kainiam ding a, mihing kisaktheihna zong kainiam ding hi. Tua ni-a Tangtawn Toupa kia kitawisang ding a, 18 milimte beimang vek ding hi. 19 Leitung kungsin dinga Tangtawn Toupa a dinkhiak chianga, a thupina leh mulkimhuaina apan mite taai ding uh a, lei kawhawm ahte taailut ding uhi. 20 Tua ni chianga, mite'n biak dinga a kibawl uh ngun leh kham milimte, zuute leh baakte' maia paih ding uh a, 21 suangpi heng leh kawlhawm khawng ah tai ding uhi. Leitung kungsin dinga Tangtawn Toupa a din khiak chianga, a thupina leh mulkimhuaina apana tai ding uhi. 22 A nakvanga hu dika hing tua bang mihing muan tawpta un, banglama muantak hi mahmah ahia?
Judah leh Jerusalem Gawtna
1 Tu'n ngai in, Toupa Tangtawn Toupa Vanglianpen in Jerusalem apan leh Judah apana buh koihkhawm leh tui khempeuh lamang vek ding hi. 2 Mi hat leh galhat, thukhenmi leh kamsang, aisan mi leh upa lamang ding hi. 3 Sepaih 50 tunga makai leh mi zahtakhuai leh thuhilh lemgel siam leh khutsiammi leh mitkhialdawi siam lamang ding hi. 4 Tua hun chianga amaute tunga makai dinga pasal naupangte koih ding ing a, naupang lelte'n amaute uk ding uhi. 5 Tua hun chianga, mipite kinuaisiah tuah ding uh a, michih in a innveng nuaisiah ding hi. Tangvalte'n upate selphou ding uh a, mi simmawhhuaite'n mi zahtakhuaite selphou ding uhi. 6 Mi'n a pa' inn sunga a sanggampa len ding a: Nang silh-le-ten nei hive chin, ka tung uah vaihawm inla, hiai siatgawpna na khut nuai ah om hen, chi ding hi. 7 Ahihhanga, tua ni chianga a sanggam in nial ding a: Ke'n na haksatna damsak thei lou hi'ng, ka inn-a lah nek ding leh silh ding om lou a, mite tunga vaihawmin hon koih ken, chi ding hi. 8 Jerusalem kipal a, Judah puk hi. Ahang bel, a lei uleh a gamtat un Tangtawn Toupa dou a, a thupina simmawh uh hiven. 9 A melput un amau mah mawhtan a, a khelhna uh Sodom bangsak uh hiven. A khelhna uh lah seel lou uh a, a hinna tung uh gik hi! Amau tunga siatna kitut uh hita hi. 10 Midiktatte'n bel a thilhih gah uh ne ding uh ahih mana amaute adinga bangkim hoih ding hi, chi-in amaute hilh in. 11 Migiloute tung gik hi! Amah adinga bangmah hoih lou ding hi, ahang bel, ama gamtat bangbanga amah tunga midang gamta ding hiven. 12 Naupangte'n ka mite nuaisiah uh a, numeite'n amaute uk uhi. Ka mite aw, nou hon makaihte'n hon khialsak uh a, na lampite uh sesak uhi. Nuaisiahna leh Nuamtatna Demna 13 Tangtawn Toupa, ngetsak dingin ding a, mite tunga thukhen dingin ding hi. 14 Tangtawn Toupa'n a mite' upate leh vaihawm makaite tung ah thu khen ding a: Ka grephuan negaite hi uchin a, mizawngte sum na nek uh na inn sung ua om hiven. 15 Ka mite na nehtap uh, mi zawngte maitang na gawizan uh, bang na chihna uh ahia? Chi-a Toupa Tangtawn Toupa Vanglianpen in phuang hi. 16 Tua baan ah, Tangtawn Toupa'n: Zion tanute kisathei uh a, ngawng pheipuakin pai uh a, mi mitsik-at uh a, tawhei lawtlawta pai uh a, khe talkaih in gingsak se uhi. 17 Tuate hanga Toupa'n Zion tanute' lutang giausak ding a, Tangtawn Toupa'n a zahmawhte uh dawksak ding hi. 18 Tua ni chianga, Toupa'n kizepna kilawm khebuh gingtheite, dial awh kilawmte leh sikkhipte, 19 bilbahte, taute, maikhuhpuante, 20 lugakna dialte, khebuh khainiangte, puanduang vehte, gimnamtui thawlte banbuh aite, 21 zungbuhte, nakbahte, 22 dial puansilhte, lukhuh puante, puantungsilhte, sum ipte, 23 limlangte, puan malngatte, dialkhipte, kikhuhna puante, lamang vek ding hi. 24 Tua bang hi ding a, gimnamtui taanga uih gim, puanduang veh taanga khauhual, sam hoih taanga lugiauna, kikhuhna puan taanga saiip puan, melhoihna taanga meiama bikna pawn om ding hi. 25 Na mite namsaua si ding uh a, na galhatte kidouna phuala si ding uhi, 26 Zion kongpite si suuna kap ding a, gal in a hawma taisan ding a, leilaka tu maimah ding hi.
1 Tua hun chianga, numei sagih in pasal khat len ding uh a: Kou' ann mah kinek ni ung, kou' puan mah kisilh ni ung, ahihhangin, ka zahlakna uh bei nadingin, na minin hon kilousak mahmah in, chi ding uhi, chi hi.
Tangtawn Toupa' Kahiang
2 Tua ni chianga Tangtawn Toupa' Kahiang kilawm ding a, Thupi mahmah ding hi. A gam gah zong, Israel khawsuak sunte adinga kisaktheihna leh thupina hi ding hi. 3 Tua khit chiangin, Ziona a khawsuak sun, Jerusalema om laite, mi siangthou chi-a minlawh hi ding uhi. 4 Tangtawn Toupa'n Zion' numeite apan ek a silsiang chiangin, Toupa'n thukhenna kha leh halsiangna khain Jerusalem sunga sisan baang hihsiang vek ding hi. 5 Tua nung chiangin, Tangtawn Toupa'n Zion Muala tenna mun tung leh tua-a kikhawmte tung ah, sunin meikhu banga zam meipi, zanin meikuang vaakpha omsak ding hi. Tua thupina, tunglama khuhna kuum hiding hi. 6 Tua khuhna kuum mah sun nisa apan bukna nilim leh huihpi vuahpi apan bukna leh kikhuhna zong hi ding hi.
Grephuan La
1 Ka itluat adingin, a grephuan Tawh kisai lain sata mai ning. Ka itluat in mual lei hoih ah grephuan nei a, 2 A lei tounel a, a suangte tom siang a, grepgui hoihpen suan hi. A laizang ah inn sang lam a, grep sukna khuk zong tou hi. Grep gah hoiha gah ding lamen a, ahihhanga, grep takloua gah maimah hi! 3 Ama'n: Tu'n Jerusalem khua-a tengte leh Judah mite aw, kei leh ka grephuan kal thu hon khensak mahmah un. 4 Ka grephuan tunga ka hihsa kaan ka hih theih ding ka na hihkhak louh, bang om hita mai ahia? Grep taka gah dinga ka lamet et tawh, banghanga grep takloua gah maimah ahia? 5 Tu'n ka grephuan tunga ka hih ding hon hilh ning. A lingdai lamang ding ing a, haltuma om ding hi. A suangdai hihchim ding inga, sikdena om ding hi. 6 Hihse vek ding ing a, satnoua om lou ding a, khawhsianga zong om lou ding a, loulingneite leh lingte pou ding hi. Vuah zuk louh nadinga meipi khaam nalai ding hi'ng, chi hi. 7 Tua Tangtawn Toupa Vanglianpen' grephuan bel, Israel innkawte hi uh a, a deihthawh grepgui lah, Judah mite mah hi uhi. Ama'n dika thukhenna lamen a, ngai dih, tatlekna om a, diktatna lamen a, ngai dih, kahna om hi.
Tunggikna leh Thukhennate
8 Inn leh inn kizomsakte leh lou leh lou kizomsakte tung gik hi! Mun awng himhim omsak nawn lou uh a, gam laizanga noute hon tangtensak uhi. 9 Tangtawn Toupa Vanglianpen in ka zaka thu gen a: Innte kilawi vek ding a, inn thupi leh kilawmte zong a sunga teng ding om lou ding hi. 10 Ahang bel, grephuan jemet sawmkhata za in grepzu bath khat kia gahsuah ding a, buhchi omer khat in buh ephah khat kia gahsuah ding hi, chi hi. 11 Zu khauh delha zingkhangpi-a thoute leh zukham gawp mateng zan sawtpipi hakte tung gik hi! 12 Tumging leh kaihging, khuangta leh tamngai thuaha zu dawnkhawm uh a, Tangtawn Toupa' thilhihte ngaisang mahmah lou uh a, a khut nasepte zong zahtak mahmah ngeilou uhi. 13 Tua banga theihna a taksap man ua, ka mite sala kaiha om ding uh a, a milian milalte uh gilkiala om ding uh a, mipite dangtaka keugawp ding uhi. 14 Misikhua kigilkialsak ding a, teh vuallouha liana kamka ding hi. Misikhua-a lutsuk vek ding uhi, kisualhat leh noptatte tawh. 15 A niam a sang, michih kaihniama om ding uh a, mihatte mit niamhah ding hi. 16 Tua hun chianga, dika a thukhenna tungtawna Tangtawn Toupa Vanglianpen pahtawia om ding a, diktatna tungtawna a siangthou Pathian a siangthoua kilangsak ding hi. 17 Tua hun chianga belamte, a tatna mun mawng ua ta banga gamta ding uh a, mihaute' mun kisesate-a, belamnoute'n nek mu ding uhi. 18 Khemna khau-a gitlouhna kaite tung gik hi! Kangtalai kaih banga khelhna kai uhi. 19 Pathian kintat hen! A nasep i muh theih nadingin kinawh hen, Israelte' Misiangthoupa' thilgel i muh theih nadingin hong tung pah hen, chite tung gik hi! 20 Thil hoihloupi thil hoih, chi a, thil hoih lah thil hoihlou chi zelte tung gik hi! Mial lah vaka ngai a, vak lah miala ngaite, thil kha thil khuma ngai a, thil khum lah thil kha-a ngaite tung gik hi! 21 Amaute' mitmuha pii kisate leh amau' mitmuha thei kisate tung gik hi! 22 Zu dawn lama hatte leh zuhel lama hangsante tung gik hi! 23 Golhgukna nek mana mi gilou dik tangsak a, midiktat' hamphatna lakmangsak gige hi ve-un! 24 Meikuang in buhpawl a kattum dundun banga, loupakeu meikuang laka kangtum banga, amaute' zungte muat ding a, a pallutna uh leivui banga lengmang ding hi. Ahang bel, Tangtawn Toupa Vanglianpen' dan nial uh a, Israel' Misiangthoupa' thu simmawh uh hive'n. 25 Tua bang ahih mana, Tangtawn Toupa' hehna a mite tunga kuang a, amaute' tunga khut kha hi. Mualte liing a, a luangte uh konglai khawnga ninbuak banga vum hi. Hiai teng nunga zong a hehna daai lou a, amaute tunga khut kha lailai hi. 26 Gamlapi-a om namte ading puanlap liiktou ding a, leitung mong apan amaute singsita sam ding a, ngai in, amaute'n kintaka hon zuan pah ding uhi. 27 Amaute laka kuamah tawi lou ding a, kisuih zong kisui lou ding uhi. Kuamah lusu lou ding a, ihmu sam lou ding hi. Kuamah' kawnga kawnggak koi lou ding a, kuamah' khedap khau kitat lou ding hi. 28 A thaltangte uh hiam ding a, thalphel khempeuh laisa-a om ding hi. A sakol khechinte uh meisah suang bang ding a, a kangtalai peite uh pingpei bang ding hi. 29 Humpinelkai banga humham ding uh a, humpinelkai lunlai banga humham ding uhi. Ahi, humhamin a samat uh bawh ding uh a, a hukhe ding om louin taipih ding uhi. 30 Tua ni chianga, tuipi ging banga a samat tung uah humham ding uhi. Mi'n gamsung en ding a, mialna leh dahna mu ding a, meipi'n khua mialsak ding hi.
Isai Sapna
1 Kumpipa Uzia sih kumin, kumpitutphah tunga tu Toupa ka mu a, tua kumpitutphah bel, sangtaka om leh tawisanga om ahi. Ama' kumpipuan tuai in tempul sung a luahdim hi. 2 Ama' tung lam ah Serafte a ding uh a, amaute'n kha guk tek a nei uh a, kha nihin a maitang uh a khuh uh a, kha nihin a khepek uh a khuh uh a, kha nihin a leng uhi. 3 Tua Serafte a kidawng tuah uh a: Tangtawn Toupa Vanglianpen, A siangthou hi, a siangthou hi, a siangthou hi. Leitung khua vannuai ah a thupina dim hi, a chi uhi. 4 Tua banga kisapna ah aw ging in kongpi khuamte a liingsak a, tempul sung meikhuin a dim hi. 5 Tua khitin, ke'n: Ka tung gik hi! Mangthang hita ing! Muknin pu mi hi ing a, muknin pute laka teeng hi'ng. Tu'n lah ka mit in Kumpipa, Tangtawn Toupa Vanglianpen muta mawk a! ka chi hi. 6 Tua khitin, Serafte laka khat maitama mei-am taiteha a teh tawiin, ka kiang ah hong leng a, 7 tua meiamin ka muk hon biksak a: Ngai in, hiai in na muk bita ahih manin, na mawhna kilamangta a, na khelhna kikhuhta hi, a chi hi. 8 Tua khitin, Toupa' aw ka za a, tua in: Kua sawl ding ka hia? Koute adinga kua kuan ding ahia? a chi hi. Ke'n: Kei hiah om ing. Kei hon sawl in! ka chi hi. 9 Ama'n: Kuan inla, hiai mite kiang ah: Za gige unla, ahihhangin theisiam ngei kei un; Mu gige unla, ahihhangin muchian ngei kei un, chi in. 10 Hiai mite' lungtang kheengsak in; a bil uh ngongsak inla, a mit uh sisak in. Tuachi louin zaw, mitin mu ding uh a, bilin za ding uh a, lungtangin theisiam ding uh a, lungheiin damsakin om kha ding uhi, chi hi, a chi hi. 11 Tua khitin, ke'n: Toupa aw, bangtan hi ding ahia? ka chi hi. Ama'n hon dawng a: Khawpite hihsiata om a, a luah ding om louh mateng; innte a kiloih vek a, loute a kisiat a, a tulsiat vek mateng; 12 Tangtawn Toupa'n mi chih gamlapi-a a sawlmang mateng; gam a kiloih sipsip mateng. 13 Gam sung ah mihing sehsawm suah seh khat om lai mah leh, gam hihsiat kik hi lai ding hi. Ahihhangin, nahhi sing leh, tawsaw sing kipuk a, a bulsumte a kinutsiat banga tua gama tua a bulsum mah chi siangthou hi ding hi, a chi hi.
Chiamtehna Imanuel
1 Uzia' tapa Jotham ahi a, Jotham' tapa Ahaz ahi. Ahaz, Judah kumpipa ahih laiin, Aram kumpipa Rezin leh Israel kumpipa, Remalia' tapa Peka, Jerusalem dou dingin a kuantou uh a, ahihhangin, a zou kei uhi. 2 Mi'n David innkawte kiang ah: Aram leh Efraim a kizawl uh, chi-in a hilh uh a, Ahaz' lungtang leh a mite' lungtang, gamlak singte huih muta liing bangin a liing hi. 3 Tua laiin, Tangtawn Toupa'n Isai kiang ah: Dil saknunga tuilakna mong ah, puansawpmi' gam zotna lampi ah, Ahaz tuak dingin kuantou inla, na tapa Shear Jashub tonpih in. 4 Ahaz kiang ah: Kiveng inla, dai didein om in. Na lungtang lau kei hen. Rezin leh Aram hangin leh, Remalia' tapa' hehna hangin liing ken. Anih-un, meisel tum bang khu viaiviai bang lei ahi uh. 5 Aram leh Efraim leh Remalia' tapa in nang hon sawm hangun liing ken. 6 Judah gam dou ni in, a kulhbaang vutvang ni in, Tabeel' tapa kumpipain tusak ni, a kichi mah ve uah. 7 Ahihhangin, Toupa Tangtawn Pathian gen hiai ahi: A thu sawm uh tangtung lou ding, vuaksuak ding hi. 8 Aram lutang Damaska hi a, Damaska lutang lah Rezin hi lei hi. Kum 65 sunga Efraim se dimdem ding a, nam chihtaak hi nawn lou ding hi. 9 Tua baan ah, Efraim' lutang Samaria hi a, Samaria lutang lah Remalia' tapa hi lei hi. Na up kipnop kei le bel, khawsuaka ding khe lou hiai ding na hi, chi hi, chi in, a chi hi. 10 Tua baan ah, Tangtawn Toupa'n Ahaz kiang ah thu a gen kik a: 11 Tangtawn Toupa apan nang ading chiamtehna ngen in. Nuailam misikhua thuktak apan hiam, tunglam sangpi apan hiam, chiamtehna ngen in, a chi hi. 12 Ahihhangin, Ahaz in: Ngen kei ning. Tangtawn Toupa ze-et kei ning, a chi hi. 13 Tua khitin, Isai in: Nou David' innkawte khempeuh in ngai un. Mihingte' thuaklaha na om uh kiching sa lou a, ka Pathian nangawn' thuaklaha om sawm na hita umaw? 14 Tua bang na hih manun, Toupa mahmah in noute khempeuh chiamtehna khat hon pe ding. Ngai un, tua nungak siangthou a gai ding a, tapa a nei ding a, a min dingin Imanuel a sa ding. 15 Ama'n a sia nial nadan leh, a pha teel nadan theia a khanlet chiangin bawngnawi dat leh khuaizu a ne ding. 16 Ahihhangin, tua naupang in a sia nial a, a dik a teel theih main na lau tua kumpipa nihte' gam a se dimdem ding. 17 Efraim in Judah a taisan nungsiah-a om ngeilou thil, nang leh na mite tung ah leh na pa innkawte tung ah Tangtawn Toupa'n a tungsak ding hi. Ahang bel, Tangtawn Toupa'n Asuria kumpipa na tunga hon tun ding hiven, a chi hi. 18 Tua ni chianga, Tangtawn Toupa'n Aigupta luipite-a om thoute singsitin sam ding a, Asuria gama om khuaite sam ding hi. 19 Amaute hong pai ding uh a, kuam thukpi ahte, suangpi heng ahte leh, lingkungte leh gantatna munte ah dim ding uhi. 20 Tua ni chianga Toupa'n Iufratis luipi gal lama Asuria kumpipa apan a khelh, mulmet tem-a na luzanga samte leh na khe-a multe met ding a, ahi, na khamul laikhe ding hi. 21 Tua ni chianga mi khat in bawngpi khat kia leh belam nih kia vui ding a, 22 ahihhanga, a nawitui kichin mana bawngnawi dat nek ding nei ding hi. Tua banga gam sunga om lai mi chih in bawngnawi dat leh khuaizu ne ding hi. 23 Tua ni chianga hichi hi ding a, ngun dangka shekel 1,000 man grepgui 1,000 pouna mun peuhmaha, ling leh khau lingneite om ding hi. 24 Gam sung khempeuh ling leh lou lingneite dim ding ahih mana, tua munte-a thalphel leh thai tawia mi gamvak ding hi. 25 Mi'n lou a khawh theihna mualte nangawna, ling leh lou lingneite lau mana kuan lou ding na hi. Tua munte, bawnghonte kikhahna mun leh belamte gamtatna mun suak ding hi.
Asuria in Israel Gam Sim ding
1 Tua baan ah, Tangtawn Toupa'n ka kiang ah: Laibuzial pek lianpi la inla, mite simtheih dingin laikung ngeina khat in: Maher Shalal Hash Baz chih gelh in. 2 Kei adinga theihpih muanhuai hi dingin, siampi Uria leh Jeberekia' tapa Zekharia ka sam ding a, amaute'n gelhin a chiamteh ding uh, a chi hi. 3 Tua khitin, kamsangnu ka luppih a, a gai a, tapa a nei hi. Tua khitin, Tangtawn Toupa'n ka kiang ah: A min dingin Maher Shalal Hash Baz sa in. 4 Ahang bel, tua naupang in: Nu, Pa, chih nadan a theih main, Asuria kumpipa'n Damaska khawpi hauhna leh Samaria khawpi apan gallak sumte pawmang ding ahi, a chi hi. 5 Tua khitin, Tangtawn Toupa'n hon houpih kik a: 6 Hiai mite'n Shiloa tuinak tui luang biahbiahte nialin, Rezin leh Remalia' tapa kipahpih uhi. 7 Tua hanga Toupa'n amaute tunga Luipi tui lian leh tui hat luangsak ding hi. Tua bel, Asuria kumpipa leh, a thupina genna hi ahi. Amah, luipi banga a luanna tenga leet ding a, a piau teng dimleet ding hi. 8 Judah gam sunga tung ding a, luipi banga luanglet ding hi. Luanglet zuazua ding a, ngawng chiang tum ding hi. Imanuel aw, ama'n kha zakin, na gam zatna khempeuh khuh ding hi. 9 Nou namte aw, kidou dingin awng un. Ahihhanga, ama'n hon gawitam vek ding hi! Gamlapi-a omte khempeuh in ngai un. Kigalvan un, ahihhanga, Gawitap vek hi ding hi uteh! Kigalvan un, ahihhanga, Gawitap vek hi ding hi uteh! 10 Thu kikum un, ahihhanga ama'n vuaksuaksak ding hi. Vaihawm dingin kikaikhawm un, ahihhanga, piching tuan lou ding hi. Ahang bel, Pathian in koute hon ompih hive'n, a chi hi.
Pathian Lau: A Thu Ngaihsak
11 Ahang bel, Tangtawn Toupa'n khut hattak ka tunga nga-a, ka kianga thu gen a, hiai mite' lampi-a pai lou dinga hon vauhilh hive'n. 12 Ama'n: Hiai mite'n thil simsawm, a chih peuh uh, thil simsawm ahi, chihpih kenla, amaute' kihtakte zong kihta kenla, liin zong liing ken. 13 Tangtawn Toupa Vanglianpen ahi siangthoua na ngaih ding. Amah ahi na kihtak ding, amah ahi na lauh ding. 14 Amah na mun siangthou hi ding hi. Ahihhanga Israel innkuan nihte adinga amah kipalpaihna suang, pukna suangpi hi ding a, Jerusalema tengte adinga thaang leh pial hi ding hi. 15 A lak ua tampi mahmah kipalpai ding uh a, puk ding uh a, amaute delhtam ding hi, Thaang ah awk ding uh a, pial ah taang ding uhi, chi hi. 16 Hiai theihpihna belhchip inla, ka nungzuite lak ah hiai dan belhchip in. 17 Ke'n zaw Jakob innkawte apana a maitang selpa, Tangtawn Toupa ngak ding ing a, ama' tunga ka muanna nga ding hi'ng. 18 En in, kei Tangtawn Toupa' hon piak tate tawh hiai ah om ing. Koute Ziona teeng Tangtawn Toupa Vanglianpen apan chiamtehna leh etsakna hi ung. 19 Amaute'n noute kianga: Aisan-siam leh dawisiam, phun nulnul leh ham bualbualte dong un, hon chih chiangun, Minam khat in a Pathian uh a dot uh dik zaw lou hia? Banghanga, mihingte adinga misite dong ding? chi un. 20 Dan leh theihpihna tungtawna amah a zon ding uh ahi. Amaute'n hiai thu banga thu a gen kei uleh, amaute adinga phalvak a om louh man ahi. 21 Lauthawng leh gilkialin gam sung teng ah a pai ding uh. A gil uh a kial chiangin, heha vandakin a kumpipa uleh a Pathian uh a hamsiat ding uh. 22 Leilam a en ding uh a, lungdonna leh mialna, lametbeina leh lungkham mialna a mu ding uh. Mial laka hawlmangin a om ding uhi.
Tapa Piakin i om
1 Ahihhangin, a lungdongte adingin lungkham mialna a om nawn kei ding. Hun paisain, ama'n Zebulunte gam leh Naftali gam na nuaisiahta mah leh, hun nunung ah, Jordan gala Zentelte' Galili gama tuipi gei lam ah pahtawina a tun ding hi. 2 Miallaka paite'n vak thupitak muta uh a, sihna lim gama teengte tunga vak hong tangta hi. 3 Nang Zentelte liansak ding chin a, a lungnopna uh khangsak ding chin a, buhlak laia lungnopna banga na' maia amaute lungnuamsak ding chin a, gallak sum hawmte' lungnopna bang hi ding hi. 4 Ahang bel, nang Midiante' vuallelh lai banga, a puakgik puakna hakkol uh tansak ding chin a, a liangzang ua zawl leh amaute nuaisiahte' chiang zong tansak ding hi vechin. 5 Kidouna phuala galhatte' khedapte leh sisan banna puansilhte, haal ding sehsa hi ding a, meiphualpi sem nadinga kizang ding hi. 6 Ahang bel eite adinga nau piang a, eite adinga tapa piak hiven. Ama' liangkoua kumpi vaihawmna kinga ding a, a min Thuhilhpa Lamdang, Vanglian Pathian, Tangtawn' Pa, Lemna Kumpitapa kichi ding hiven. 7 Ama' vaihawm thuneihna lian semsem ding a, tua kumpigam lemna muanna bei ngei lou ding hi. Amah David' kumpitutphah tunga tu ding a, a kumpigam uk ding hi. Tua hun apan Tangtawn dongin, ama'n dika vaihawmna leh diktatna-a tua kumpigam kipsak ding a, tungding ding hi. Tangtawn Toupa Vanglianpen' phatuamngaihna in tua tungsak ding hi.
Samaria Gawtna
8 Toupa'n Jakob douna thu thukhak a, Israel tunga tung ding hi. 9 Efraim gam mi khempeuh, tua Samaria khawpi-a teeng khempeuh leh lungtang kisathei leh kiuangsaktaka thugente'n thei ding uhi. 10 Amaute'n: Tekleia kilamte chimta, ahihhanga, suangseka lam thak ding hi hang. Theithek kungte kiphukta, ahihhanga, sidar singte-a khek ding hi hang, chi ding uhi. 11 Tua bang ahih mana Tangtawn Toupa'n Israel dou dinga Rezin' galte kisasak ding a, a melmate lungtang tokthou ding hi. 12 Suahlam ah Aram mite om ding a, tumlam ah Filistiate om ding a, Israelte nawmvalh ding uhi. Ahihhanga, a hehna daituan lou ding a, amaute doua khut liik lai ding hi. 13 Ahihhanga Israelte amaute satpa' lama kihei lou ding uh a, Tangtawn Toupa Vanglianpen zong tuan lou ding uhi. 14 Tua bang ahih mana Tangtawn Toupa'n ni khat thu-a Israel apan a lutang leh a mei satkhe ding a, tumsing hiang leh pumpeng zong satkhe ding hi. 15 Upa leh mi zahtakhuai a lutang hi a, zuauthu sinsak kamsangte a mei hi ahi. 16 Hiai nam makaite'n amaute lampialsak ding a, a makaihte uh hihmanthat hi ding uhi. 17 Tua bang ahih mana a tuailaite uh tunga Toupa'n lungnopna nei lou ding hi. Pa beite leh meigongte tunga zong zahngaihna nei lou ding hi. Ahang bel, michih kihihnin a, thil hoihlou hih a, kam chih in thil haihuai gen hive'n. Tuate khempeuh ah a hehna daai lou ding a, amaute tung ah khut liik lailai ding hi. 18 Ahang bel, ling leh khaulingnei kangtum mei banga gitlouhna kuang hi. Gammang sahpi kang a, tunglam ah pingpei banga meikhu kitungtou hi. 19 Tangtawn Toupa Vanglianpen' thangpaihna in gam kangkeu vek ding hi. Ahi, mipite lah thuka khul ding sing bang hi ding uhi. Kuama'n a sanggampa nangawn hawi lou ding hi. 20 Tua khit chianga mi'n taklama om negai ding a, ahihhanga vah tuan lou ding hi. Veilama om negai ding a, ahihhanga gil kial lai ding hi. Michih ama' tate' sa-a kivak ding hi. 21 Manase in Efraim huh ding a, Efraim in Manase huh ding a, a nih-ua Judah dou ding uhi. Hiai teng hanga zong a hehna dai lou ding hi. A khut liik lailai ding hi.
1 Dan dikloupi bawlte, nuaisiahna ding lei gelhte tung gik hi! 2 Ka mite laka tasamte apan dika vaihawmna lamang ding leh mihonpite apan hamphatna lamang dinga, meigongte nese ding, pabeite gallaka la dinga gelh uhi. 3 Gawtna ni hong tun chianga, ahih kei leh, gamlapi apan na siatna uh hong tun chianga bang chita ding na hi ua? Huhna ngen dinga kua kianga tai ding na hi ua oi? Ahih kei leh, na neih na lam uh kua kianga nutsiat ding na hi ua? 4 Saltangte laka kun ding leh kidouna phuala misiluangte laka puk ding loungal maban om lou hi. Tua zah nunga zong a hehna daai lou ding a, dou-a khut liik lailai ding hi.
Kisathei Asuria Gawtna
5 Ka hehna chiang Asuria mipa tung gik hi! Ama' khuta ka thangpaihna khetbuk om hi. 6 Amah Pathian biak limsaklou nam dousak ding ing a, ahi, ka thangpaihna khu mite tunga amah thuneia koih ding hi'ng. Amaute gallaaka la ding leh samata mansak dinga amah bawl ding hi'ng. Konglak buannawi banga amaute chilsak ding hi'ng. 7 Ahihhanga ama'n tua bang sawm lou ding a, a lungtang ah zong suangtuah lou ding hi. A lungtang in nam tampi hihmanthat leh satkhiak sawmzaw ding hi. 8 Ahang bel, ama'n ka makaite khempeuh kumpipa bang hi vek lou hia? chi hi. 9 Kalno khua Karkhemish bang hilou hia? Namath zong Arpad bang hilou hia? Samaria zong Damaska bang hilou hia? 10 Ka khut in milim kumpigamte manta. Tua milim kumpigamte, Jerusalem leh Samaria kumpigamte sanga thupizaw hi. 11 Samaria leh a milimte tunga ka hih banga, Jerusalem leh a milimte tunga hih lou ding ka hi-a hia? chi hi. 12 Tua bang ahih manin hichi ahi ding a, Tangtawn Toupa'n Zion Mual leh Jerusalem tunga a nasep khempeuh a tangtunsak khit chianga: Asuria kumpipa a lungtang kisaktheihna leh a kisaktheih mit hahna hanga gawt ding ka hi, chi ding hi. 13 Ahang bel, ama'n: Ka bantha hata hiai hihta hi'ng, theihsiamna ka neih mana ka pilna-a hiai hihta hi'ng. Namte' gamgite suan ing a, a goute uh laksakta hi'ng, kumpitutphah tunga tute laikheta hi'ng. 14vMi'n vasabu sunga vasa tui kinusete a sawk a, a lak banga, namte hauhnate sawk a, lata hi'ng, leitung gamteng kaikhawmta hi'ng, a khazap himhim hawilou ing a, haam dinga kamka thei zong hawi lou hi'ng, chi hiven. 15 Heipi, amah zanga singsatpa tunga kisathei ding hia? Ahih kei leh, singatna, amah zanga sing atpa tunga kiliansak ding hia? Chiang in amah dompa liik dek zawsop henla, khetbuk in zong, sing hiloupa liik dek zawsop leh maw! 16 Tua bang ahih mana Toupa, Tangtawn Toupa Vanglianpen in, Asuria' galhat thahoih thaute laka, amaute teemsak ding chinatna sawl ding a, ama' thupina nuaia mei tawh ding a, kuangsak ding hi. 17 Israel' Vaak mei suak ding a, a Misiangthoupa meikuang suak ding a, nikhat thu-a ling leh loulingneite kangtum ding hi. 18 Ahi, a Misiangthoupa'n Israel gammang thupina leh, a grephuan gahphatna kangtum ding a, china gim teemgawp bang hi ding hi. 19 Gammang singkung khawsuak tawm mahmah ding a, naupang neu nangawn in gelhkhe vek thei ding hi.
Israel Khawsuaksunte
20 Tua ni chianga hichi hi ding a, Israel khawsuaksunte leh Jakob innkuan khawsuaksunte amaute phukpaipa muang nawnlou a, Tangtawn Toupa, Israel Misiangthoupa muang zawta ding uhi. 21 A khawsuaksun, Jakob khawsuaksunte a Vanglian, Pathian kianga kiik ding uhi. 22 Israel aw, na mite tuipi piaua sehnel banga tam himah leh, a khawsuaksun kia hong kiik ding hi. A selua mahmah leh a dik hihsiatna sehsa hi ahi. 23 Toupa Tangtawn Toupa Vanglianpen in gambup tunga siatna a sehsa tangtun ding hi. 24 Ahang bel, Toupa, Tangtawn Toupa Vanglianpen in: Ziona teeng ka mite aw, Asuriate lau kei un. Chiangin hon sat henla, Aiguptate hih bangin nang hon dou dingin khetbuk liik mah leh, kihta kei un. 25 Noute tunga ka hehna daai pah ding a, ka thangpaihna na galte' siatna hi ding hi, chi hi. 26 Tangtawn Toupa Vanglianpen in zepna khauhuala amaute zep ding a, Oreb suangpi-a Midiante a thah lai bang hi ding hi. Aigupta gama a hih banga ama'n tuipi tunga a chiang liik ding hi. 27 Tua ni chianga hichi hi ding a, na liangzang apan amaute puakgik lakkhiak hi ding a, a hakkol un na ngawng nuse ding hi. Ahi, na thauluat mana tua hakkol kitan ding hi. 28 Asuriate Aiath khua ah hong pai uh a, Migron khua tawnin pai uh a, Mikmash khua ah nek leh taak koihkhawm uhi. 29 Tangkaanna ah pai uh a, Geba ah zangiak ni, kichi uhi. Rama liing a, Saul' khawpi Gibea laua galtai hi. 30 Galim Tanu aw, nakpitakin kikoukhia in! Laisha khua leh hehpihhuai Anathoth aw, ngai un! 31 Madmena khua laua tai hi, Gebima teengte khempeuh in bukna zong hi. 32 Tuni mahmaha Asuriate Nob khua-a taam uh a, Zion' Tanu' mual leh Jerusalem mual khuttum liikkhum uhi. 33 Ngai in, Toupa, Tangtawn Toupa Vanglianpen in kahiangte mulkimhuai taka satkhe ding a, a sangtuamte phuk ding a, a kisatheite niamsak ding hi. 34 Amah, sik heipi tawh gammang sahtaka lut ding a, a Thahatpa' maia Lebanon gam puk ding hi.
Jese' Suan' Vaihawmna
1 Jese' bulsum apan kahiang khat selkhe ding a, a zungpi apan kahiang in gah suah ding hi. 2 Tangtawn Toupa' Khaatungahom dinga, tua Kha bel pilna leh theihsiamna Kha, thuhilhna leh vangletna Kha, theihna leh Tangtawn Toupa launa Kha hi ahi. 3 Toupa launa a kipahpih hi ding a, ama'n mita a muh banga thu khen lou ding a, a bila a zak banga thukhentatna bawl lou ding hi. 4 Azawngte' adinga diktatna-a thu khen zaw ding a, leitunga azawngte adinga thukhentatna dik bawl zaw ding hi. Ama'n a kama chianga lei sat ding a, a kama hu-a migiloute that ding hi. 5 Diktatna a kawnggak hi ding a, muanhuaina a kawngveh puanduang hi ding hi. 6 Ngia leh belamnou teengkhawm ding a, gialbem leh kelnou kualkhawm ding a, bawngnou leh humpinelkai nou leh gan vakthau omkhawm ding a, naupang neu in amaute pii ding uhi. 7 Bawngpi leh vompi gamtakhawm ding a, a noute uh kualkhawm gige ding a, humpinelkai in bawngtal banga buhpawl ne ding hi. 8 Nawi nelai naupang, mualtan kaw geia mawl ding a, nawinek tawp lei in gul bu sawk ding hi. 9 Ka mual siangthou ah kihihnata lou ding uh a, kihihmangthang sam lou ding uhi. Ahang bel, tuite'n tuipi a khuh banga Tangtawn Toupa theihna in leitung khuh ding hiven. 10 Tua ni chianga Jese Zungpi mite adinga puanlapa ding diing a, nautangte amah zuana a kianga kikhawm ding uh a, ama' tenna mun thupi ding hi. 11 Tua ni chianga Toupa'n a nihvei nadinga a khut zankhe ding a, a mite laka khawsuaksun Asuria gama omte, Aigupta gama omte, Pathros gama omte, Kush gama omte leh, Elam gama omte, Shinar gam, Hamath gam leh tuipi-a tuikulh gama omte, a saltanna uapan leikhe ding hi. 12 Ama'n namte adinga puanlap liiksang ding a, namte'n mun tenga a thehdalhsa, Isaelte kaikhawm ding a, Judah mi kithehdalhte kaikhawm ding hi. 13 Efraim hazatna beita ding a, Judah tunga mangbat lungzinna tunte Toupa'n satkhe ding hi. Efraim in Judah haza nawn lou ding a, Judah in zong Efraim lungzingsak nawn lou ding hi. 14 Amaute'n tumlama Filistiate mualpang bawhsuk ding uh a, Suahlam mite lokkhawm ding uh a, Edom leh Moab tung ah khut kha ding uh a, Amonte'n amaute' thu mang ding uhi. 15 Tangtawn Toupa'n Aigupta tuipi zum kangsak ding hi. Iufratis luipi tung ah khuttum liik ding a, huih mutkeusak ding hi. Tua luipi, luika sagih suah ding a, min khedap bunsa nangawna, ngap galkai ding hi. 16 Asuria gama om a khawsuaksun a mite adinga, lamlianpi om ding a, Aigupta gam apan hong paitouh lai ua, Israelte lamlianpi bang hi ding hi.
Phatna Late
1 Tua ni chianga noute'n: Tangtawn Toupa aw, na tung ah kipak ing e, ahang bel, ka tung ah hehta mah le chin, na hehna daisakta chin a, hon khamuanta hi vechin. 2 Ngai dih, ka hotdamna Pathian hi taktak hi. Amah muang ding ing a, laua liing lou ding hi'ng. Tangtawn Toupa, Tangtawn Toupa ka hatna leh ka la hi ahi. Kei adinga hotdamna hong hita, chi ding hi uteh. 3 Tua bang ahih mana, hotdamna tuikhuk apana lungnuama tui tawita ding hi uteh. 4 Tua ni chianga noute'n: Tangtawn Toupa tung ah kipahthu gen unla, a min samin beel unla, a thilhihte Zentelte theisak un. A min tawisanga om hi, chi-in phuang un. 5 Ama'n thilhoihpente ahih manin Tangtawn Toupa phatna la sain phat un, leitung khempeuh ah theihin om hen. 6 Ziona omte aw, nuamin kikou unla, nuamin la sa un. Na lak uah Israel Misiangthoupa thupi hi, chi ding hi uteh.
Babulon Pukna
1 Amoz' tapa Isai in, Babulon tawh kisai, genkholh ding puakgik a muh hiai ahi. 2 Mualsang tung ah puanlap tungkhia un. Amaute kikoukhum un. Milian milalte kongpi-a a lut nadingun, amaute khutvan un. 3 Kei mahmah in ka misiangthoute thu peta ing a, Ka hehna semkhe dinga, Ka galhatte ka thangpaihna tangtun dinga samta hi'ng. 4 Ngai un! tua mi tampi husa bangbang mual tung khawnga husa thupi za un. Zentel kumpigam kikhawmte' kikou husa ngai un. Tangtawn Toupa Vanglianpen in amaute kidou dinga kaikhawm hi. 5 Gam gamlapi apan hong kuan ding uh a, kawlmong dong apan hong kuan ding uhi. Gam khempeuh hihse dinga Tangtawn Toupa' thangpaihna vanzat hi ding uhi. 6 Tangtawn Toupa' ni hong tung dek hi, mau tuaituai un! Vanglianpenpa apan siatna hong tung ding hi. 7 Hiai hanga khut khempeuh zaw ningniang ding a, michih lungtang zui ding hi. 8 Mulkimna in amaute man ding a, natna leh gimthuakna in amaute hentom ding a, numei nauvei banga na sa-a kipek ding uhi. Michih in a innveng en ding a, lamdang sa-a a mei uh san teituai ding hi. 9 Ngai un! Tangtawn Toupa' ni hong tung dek! Thangpaihna nasia leh sou, hehna tawh kithuah ni gilou. Leitung hihsiat nading, a sunga mikhialte hihmanthat nading ni ahi. 10 Van aksite leh aksi omkhawmte'n van taangsak lou ding uhi. Ni a suah chianga mial ding a, kha in zong vak taangsak lou ding hi. 11 Mihing tenna leitungbup gitlouhna gawt ding ing a, migiloute' thulimlouhna gawt ding hi'ng. Mi thukhauhte kiotsakna leilak denna ding hi'ng. 12 Mihing, kham siang sanga vaang zaw-a bawl ding ing a, Ofir gam kham sanga vaang zawa bawl ding hi'ng. 13 Tangtawn Toupa' Vanglianpen thangpaihna leh a hehna sou ni-in vante kungsin ding a, leitung taimang ding hi. 14 Gamvakmite' delhtai saza bangin leh a chingmi bei belamte banga michih a mite kiang leh, ama' pianna gama tai ding uhi. 15 Matkhiaka omte sutpaileta om ding a, mata omte khempeuh namsaua si ding uhi. 16 A mitmuhun a tangekte uh leilaka tahkhapin om ding uh a, a innte uh kiluh ding a, a numeite uh pawngsualin om ding uhi. 17 Ngai un, amaute dou dinga Mediate tokthou dek ka hi. Amaute'n ngun lah enlah lou, kham lah kipahpih lou uhi. 18 A thalphelte-un tangvalte puksak ding a, suula piang peuhmah lainatna nei lou ding uhi. A mit ua naupangte lainatna om lou ding hi. 19 Babulon khawpi zaw kumpigamte kilawmna hi ahi. Kaldaite kisaktheihpih thupina zong hi ahi. Ahihhanga, Pathian in Sodom leh Gomora a lumlet lai bang hi ding hi. 20 A sunga kuamah teng nawn lou ding a, a khang a khanga tenna mun hi nawn lou ding hi. Arabte'n tua ah puanbuk kai nawn lou ding a, belamchingte'n tua ah belamte kualsak nawn lou ding hi. 21 Tua ah gamdai-gamkeua gamsate kual zaw ding a, a innte uah simbute dim ding hi. Ostrit teng ding a, sakelte tua ah kimawl ding hi. 22 A innsangte uah ngiate ham ding a, a innpite uah sehalte ham ding hi. A hun hong tung pah ding a, a nite hihsau hi lou ding hi.
Jakob tunga Zahngaihna
1 Tangtawn Toupa'n Jakob tunga lainatna nei ding a, Israel teel kik ding a, amaute' gam maha teengsak ding hi. Gamdang mite'n amaute zuia Jakob innkawte laka belh ding uhi. 2 Namte'n amaute tonpih ding a, amaute' mun maha hon pii ding uhi. Israel innkawte'n namte nei ding a, Tangtawn Toupa' gama sila pasalte leh sila numeite-a nei ding uhi. Amaute'n salmante salmata bawl zawta ding uhi.
Babulon Kumpipa' Pukna
3 Tua ni chianga Tangtawn Toupa'n haksatna, dahna leh sepgimna apan nou Israelte tawlngakna hon pe ding hi. 4 Babulon kumpipa tung ah hiai gentehna zang ding na hi uh: Bangchi dan ahia hon nuaisiahpa daaita nah e! Bangchi dan ahia a hehna daaita nah e! 5 Tangtawn Toupa'n giloute' chiang sattansakta a, vaihawmte' kumpi chiang nangawn tansakta hi. 6 Nidang laia midangte vuavuate leh, tawploua midangte gelgawtte, a khou ding omloute mah hi uhi. 7 Gam khempeuh tawlngata a, galmuang uh a, la sain kikoukhia uhi. 8 Ahi, meilah singkung leh Lebanon sidar singkungte nangawn na tung ah kipak uh a: Phukpaiha na om taak manin, koute phuk ding sing atmi kuamah hong kuan lou hi, chi ding uhi. 9 Nuailam Sheol nang nong pai hon tuak dingin, ngaklahin phe tottot a, nou leitung makaite hon tuak dingin, a sisa' khate tokthou a, kumpipate a kumpitutphah uapan namte' tungah a tokthouta hi. 10 Amaute'n hon dawng ding uh a: Noute zong koute bangin nong zawngkhalta ua, koute nong bangta uh, chi ding uhi. 11 Pathian in na kithupisakna, na kaihging husa teng tawh, Sheol tunsukta hi. Na nuai ah than kiphalh dim a, na tung ah than kidimsak hi.
Lusifar Kiakna
12 Nang Zingsol aw, phalvak' tapa, van apan na kiaktaak mai! Nang, namte puksakpa, leilaka paihkhiaka na omtaak mai! 13 Tua laiin, na lungsung ah: Van tan ah kaltou ding hi'ng, Pathian' aksite tunglam ah, ka kumpitutphah liiksang ding hi'ng. Maltawp ah, kikhopna mual a sanna laitak ah kumpi-in tu ding hi'ng. 14 Meipi sang tunglam pek ah kaltou ding hi'ng. Atungnungpen bang ding hi'ng, chi hi vechin! 15 Ahihhanga, Pathian in Sheol hankhuk thukna laitak hon tun ding hi. 16 Nang hon mu peuhmahte'n hon en gegu ding uh a, hon ngaihtuah ding uh a: Hiai mi maw leitung kungsin a, kumpigam liingsakpa, 17 leitung, gamdai-gamkeu suaksak a, a khawpite lumlet a, a salmatte khah nuamloupa? hon chi ding uhi. 18 Namte' kumpipate khempeuh a thupina utawh lum uh a, amau' inn tek ah ihmu uhi. 19 Ahihhanga, Pathian in nang bel, singhiang deihlouh banga na hankhuk apan hon lawnkhe ding a, suanghawm sunga lutsukte, namsau' dawt pailet, misi tawh kidim, siluang mite' siikden bang hi ding na hi. 20 Na gam na hihsiat a, na mite na thah mana, a lak ua vuia om lou ding na hi. Migiloute' chisuan min kilou ngei lou ding hi. 21 A pu a pate uh khelhna hanga a tate uh thah nading mun bawl in. Gam luah dinga a thawhkik louh nading uleh leitunga khawpite a dimsak louh nadingun, tua bangin hih in.
Babulon Hihsiatna
22 Tangtawn Toupa Vanglianpen in: Amaute dou dinga kisa ding hi'ng, chi-a, Babulon apan a min leh a suan a khak khawsuaksunte satkhe ding hi'ng, chi-a Tangtawn Toupa'n phuang hi. 23 Tangtawn Toupa Vanglianpen in: Babulon gam, sakuhte tenna leh chiknawng lak suaksak ding ing a, hihsiatna munphiaha phiat ding hi'ng, chi-a phuang hi.
Asuria Hihsiatna
24 Tangtawn Toupa Vanglianpen kichiam a: Ka ngaihtuahna bangbanga tangtun ding ing a, hong tung taktak ding a, ka tup bangbang tung ding hi. 25 Ka gama Asuria nehzan ding ing a, ka mualtung ahte sikden ding hi'ng. Judah apan a hakkol suutkhiak hi ding a, a liangkou apan puakgik lakkhiak hi ding hi. 26 Hiai ahi leitung khempeuh adinga ka tup leh ka ngim. Hiai ahi nam khempeuh tunga liikkhiak khut. 27 Tangtawn Toupa Vanglianpen in a na tupsa kua'n dai thei ding ahia? A khut a liikkhiak leh kua'n dokkik thei ding ahia? chi hi.
Filistia Hihsiatna
28 Kumpipa Ahaz a sih kumin hiai genkholh ding puakgik hong tung hi: 29 Filistiate khempeuh aw, lungnuamin kipak kei un. Noute hong kisatna chiang a kitan manin, kipak kei un. Tua gulpi zungpi apan gul dekpak hong suak ding a, a suan lah gulpi san lengthei hi ding hi. 30 30 Panpihbeite' ta masa in nek mu ding a, a tasamte bittakin lum ding uhi. Ahihhanga, nang' zung bel, kiala that ding ing a, a khawsuaksunte kial in that ding hi. 31 Kongpi aw, mau tuaituai in, khawpi aw, kap in. Filistiate khempeuh aw, zulmangkhin un. Mallam apan meikhu hong kitung ding a, a hun seh ah tuantual tuam om lou hi. 32 Tua nam apan thangkoute banga dawng ding ka hi ua? Tangtawn Toupa'n Zion lamkhia a, a mite laka simmawh thuakte, tua ah bu ding uhi, chi-a dawng ding hi ung.
Moab Siat nading Genna
1 Hiai Moab tawh kisai genkholh ding puakgik ahi: Ahang bel, Moab gama Ar kisia a, zan khat thu-a hihmanthat hive'n. Moab gama Kir kisia a, gal in hihmangthang hive'n. 2 Dibon a tempula paitou a, a munsangtea kap dinga paitou a, Moab in Nebo leh Medeba kaha mau tuaituai hi. A lutangte uh giaukhin a, a khamul teng uh kimetgiau khin hi. 3 Kongzing tenga saiip puan silha om uhi. Inntung ahte, kongzing ahte, mau tuaituai uh a, nakpitakin kap uhi. 4 Heshbon leh Eleale kap uh a, a aw uh Jahaz apan kiza hi. Tua hanga Moab sepaihte pataua kikoukhia uhi. A sung uah a hinna uh bah hi. 5 Moab adingin ka lungtang kikou hi. A galtaite Zoar ah leh Eglath Shelishia dong taai uhi. Luhith kaltouhna lampi ah kap kawm kawmin paitou uh a, Horonaim paitouhna lampi ah nakpi-in a siatna uh kah uhi. 6 Ahang bel, Nimrim tuite kangta a, loupate keukhinta ding a, sing leh louhing om nawn lou a, a hing himhim om lou hiven. 7 Tuachi-in, hauhna a lamkhiakte uh, gou a kholkhawmte uh, Muisum Luikuam ah pawmang vek uhi. 8 A kahna un Moab gamgi thawn a, a mauna uh Eglaim dong tung a, a kahna uh Beer Elim dong tungta hi. 9 Dimon tuite sisan suakta a, ahihhanga ke'n Dimon tunggikna behlap ding ing a, Moab apan suakta kawitaitaite tung ah leh gamsunga omlaite tunga humpinelkai sawl ding hi'ng.
Moab Siatna
1 Gam vaihawmmi ading belamnoute khak unla, Sela apan gamdai-gamkeu lam ah Zion' Tanu' mual ah khak un. 2 A bu apan butkhiak vasa lengdalhte banga Moab numeite Amon luikanna ah om ding uhi. 3 Amaute'n: Thu hon hilh inla, vai hon hawmsak in. Sun tanglaiin na liim in zanmial bangin hon khuh henla, delhkhiakte bukna ding hon pia in. Galtaite hon kilepsan ken. 4 Moab apan delhkhiakte na kiang ah teengsak tadih in. Amaute tunga huhamte apan a bukna uh hi in, chi ding uhi. Nuaisiah mi hong bei ni om ding a, hihsiatna hong bei ni om ding a, nuaisiah mi zong gamsung apan a bei ni om ding hi. 5 Itna-in zahngaihna kumpitutphah kitungkhe ding a, David inkuan sung apan mi khat muanhuaina tawh tu ding hi. Ama'n dika vaihawmna zang ding a, diktatna tungsak pah ding hi. 6 Judah in bel: Moab kisaktheihna zata ung, kimuang lua-a a kisaktheih mahmahna, a kiletsak mahmahna, a kiotsakna leh simmawhna zata hi ung, ahihhanga a kisaktheihna a hawmpi hi, chi ding uhi. 7 Tua bang ahih mana Moabte, Moab adinga mau tuaituai uhi. Kir Hareseth pasalte adingin dahin kap un. 8 Heshbon loute tulkhinta, Sibma grepguite keuta, namte' vaihawmte'n grepgui ngek' tua Jazer donga zam grepguite leh gamdai-gamkeu lama zamte tuanchil uhi. Grepgui pha mahmahte tuipi donga zam hiven maw! chi ding uhi. 9 Tuachi-a Jazer' kah banga Sibma grepguite kah hi'ng. Heshbon aw, Eleale aw, khituia hon kawtsak hi'ng! Na nipi theigah minte tunga kipahna leh na buhlak kipahna kikou daaita hi. 10 Theihuante tunga lungnopna leh kipahna lakmang hita. Kuama'n grep huante-a la sa nawn lou a, kikou zong kikou nawn lou hi. Kuama'n grep chilna khuka grep chil nawn lou hi. Ke'n buhlak kipahna kikou beisakta hi vengin. 11 Ka lungtang in kaihging banga, Moab suun a, ka lungsung thuktak-a Kir Hareseth suunna om hi. 12 Moab a mun sanga a kilat chiang a, bahgawpa biakbuka thum dinga a pai chianga bangmah phatuam lou hi. 13 Hiai thu Tangtawn Toupa'n Moab tawh kisaia a gensa ahi. 14 Ahihhangin, tuin Tangtawn Toupa'n: Sum thalawh sila in kum a sim banga sim, kum thum sungin Moab' thupina leh a mihing zouzaite simmawhin a om ding a, a suakta sunte a tawm mahmah ding a, a zawngkhal mahmah ding uh, chi hi.
Damaska Mawhsakna
1 Hiai Damaska khawpi tawh kisaia genkholh ding puakgik ahi: En in, Damaska khawpi hi nawnlou ding a, a chimsa kivum maimai hita ding hi. 2 En in, Aroer khawpite kilawi ding a, belamhonte' gamtatna hita ding a, amaute lausak ding kuamah om lou ding hi. 3 Efraim apan kulhbaang nei khawpi bei ding a, Damaska apan kumpigam bei ding hi. Aram mi suaktasunte, Israel thupina bang hi ding hi, chi-a Tangtawn Toupa Vanglianpen in phuang hi. 4 Tua ni chianga hong tung ding hiai ahi: Jakob thupina mual ding a, a pumpi thauna teemgawp ding hi. 5 Mi'n buhvuite a zut nunga, buhte a anga a huaikhawm nung bang hi ding a, Refaim Phaizanga buhvui zutsa bang hi ding hi. 6 Hinapi-a buhvui zut ding om lai ding a, mi'n oliv gah a sin nunga, a hiang dawna oliv gah nih leh thum lei om lai bang leh a hiang hoih thum leh li omlai bang hi ding hi, chi-a Tangtawn Toupa, Israel' Pathian in phuang hi. 7 Tua ni chianga mi'n amaute bawlpa lam nga ding a, Israel Misiangthoupa mitsuan ding uhi. 8 Amaute'n a khutsuak uh tua maitamte lam nga lou ding uh a, a khut ua a bawl uh Ashera songte, ahih kei leh, gim namtui halna maitamte zong thupi ngaih lou ding uhi. 9 Tua ni chianga a khawpi muanhuaite uh, Israel hanga a taisansa uh munte bang ding a, pawnlak leh gamlak suak ding a, taisansa bang ding a, luah louh gam suak vek ding hi. 10 Ahang bel, na Hondampa uh Pathian mangngilhta uchin a, na bitna uh Suangpi thei gige nawn lou hi ve uchin. Sing hoihpente suan ding uchin a, gam dang apan na lak uh suan ding na hi uh. 11 Tua ni chianga, na thil suante uh khangsak ding uchin a, zingsanga na haipawite uh dawnkhesak ding na hi uh. Hinapi-a, chinatna leh hihdam theihlouh natna nei a, a gah bangmah om lou ding hi. 12 Tuipi luang ging banga nam tampi husa neite aw, nam tampite kikou husa aw, tui tampi luang banga ging, na tung uh gik hi! 13 Namte, tuipi tampi luang ging bangin ging honhon mah leh, ama'n a salh chianga gamlapi-a taimang vek ding uhi. Mual tunga huihmut leng buhsi bang leh huihpimut pingpei banga gal in amaute delhmang ding hi. 14 Ngai in, nitaklama siatna hong tung ding hi! Phalvak ma-a om nawnta lou ding uhi. Ei hon buluahte' tan tua bang hi ding a, gallaak sum late tua bang hi ding hi.
Ethiopia Mawhsakna
1 Ethiopia luite dunga om, khazak limliapa om gam tung gik hi! 2 Tua gam in Tuipi lam tawna palaite sawl a, tuipi tunga long neutea sawl a: Nou thangkou taihatte aw, nam khat kiang ah hawh un. Tua mi sang zehzawh leh vunmam gamchiha mite' lau, nama a pian tung uapan kihtak huai, dou hat leh pau tuam nei nam hi uhi. A gam uh lui tampi in a khenzak gam hi ahi. 3 Nou leitung luahte leh leitunga teengte khempeuh aw, mualtungte-a puanlap a kiliiksang chianga, mu ding na hi uh. Pengkul a kimut chianga, za ding na hi uh. 4 Tangtawn Toupa'n ka kianga hiai gen a: Kei om kinken ding ing a, ka teenna mun apan gal-et ding hi'ng. Nisat vanglai taka meigau et bang leh, buhlak khawlum laitaka daitui hu lengtou et banga gal et ding hi'ng, chi hi. 5 Ahang bel, grep lawh hun ma-a, a pak bei a, grep puam a min dek chianga, ama'n a hiang neute heuhna tema heuh ding a, a hiangzamte zong attan a, lamang ding hiven. 6 Tuate, sasial ne mualtung vasate leh gamsate adinga nutsiat hi ding uhi. Sasial ne vasate tuatein kivak ding a, leitung gamsate khempeuh in phalbi sung seen ding uhi. 7 Tua hun chianga, misang zehzawh leh vunmamte'n Tangtawn Toupa Vanglianpen kianga thawnpiakte hon tawi ding uhi. Nama a pian tung uapan kihtakhuai hi uhi. Dou hat leh pau tuam nei nam hi uhi. A gam uh lui tampi in a khenzak gam hi ahi. Amaute'n Tangtawn Toupa Vanglianpen' Min omna mun, Zion Muala thawnpiakte hon tawi ding uhi.
Aigupta Mawhsakna
1 Aigupta tawh kisaia genkholh ding puakgik hiai ahi: En in! Tangtawn Toupa meipi hattak tunga tuangin, Aigupta gam tung ah hong tung dek. A mai ah Aigupta milimte liing ding a, Aiguptate' lungtang a sung uah zui ding hi. 2 Aiguptate leh Aiguptate kidousak ding hi'ng. Michih in ama' sanggam dou ding a, michih in ama' innveng dou ding hi. 3 Aiguptate' hansanna bei ding hi. Ke'n a thiltupte uh lawhsam sak ding hi'ng. Milimte kianga thu dong ding uh a, misite' khate, aisansiamte leh dawizawlte thu dong ding uhi. 4 Tou tatsetak khuta Aiguptate pekhe ding ing a, kumpipa huhamtak in a tung ua vaihawm ding hi, chi-a, Tangtawn Toupa Vanglianpen in phuang hi. 5 Ke'n tuipi tuite kangsak ding ing a, luipi zong kangsata keu ding hi. 6 Luite uih ding a, Aigupta luitate kiam ding a, kang ding hi. Pumpeng leh chiknawng loupate keugawp ding hi. 7 Luipi gei leh luipi suaha tahumte leh luipi kianga pou loupate khempeuh keugawp ding a, taihmanga om ding a, kimu nawn lou ding hi. 8 Ngabeng mite'n suun ding uh a, kap ding uhi. Nail luia ngakuai khaite leh luia lenpaite daha kuiku ding uhi. 9 Ziza khau hahsiangte leh puan ngou gante lungke gawp ding uhi. 10 A nekzonna uh kise ding a, sum thalawhte lungkham ding uhi. 11 Zoana vaihawm uliante mihai hi lei uhi. Faro' mipil lemtheipente' mannabei thuhilhna pia uhi. Faro kianga bangchi-a: Kei a pilte laka khat ka hi, tanglai kumpite sinsak ka hi, chi thei ding na hia? 12 Na mipilte kaw om ahi ua? Tangtawn Toupa Vanglianpen in Aigupta tunga thil hong tung ding a seh tu'n hon hilh le uh ake! 13 Zoana vaihawm uliante haita uhi, Memfis-a vaihawm uliante khemzawha omta uhi. A mite laka makaite'n Aigupta lampialsak uhi. 14 Tangtawn Toupa'n Aiguptate laka lungapna kha koih a, zukham mi a luak laka hoi dongdong banga Aiguptate a thilhih peuhmah ua hoisak hi. 15 Aigupta in hihtheih bangmah nei lou, a lutang in zong, a mei in zong, tum nah in zong, pumpeng in zong, bangmah mah hih theih nei lou hi. 16 Tua ni chiangin, Aiguptate numeite bang ding uhi. Tangtawn Toupa Vanglianpen in amaute tunga khut a liik mu ding uh a, lauin kiguih ding uhi. 17 Aiguptate adingin Judah gam lauhuai ding a, mulkimhuai ding hi. Tangtawn Toupa Vanglianpen in Aigupta dou ding a tup mana Judah' min lou peuhmah laua mulkim ding hi.
Aigupta, Asuria leh Israel Vualzawlna
18 Tua ni chiangin, Aigupta gama khawpi nga in Kanan pau zangin, Tangtawn Toupa Vanglianpen nuaia toukaina bawlin kichiam ding uhi. Amaute laka khawpi khat Hihsiatna Khawpi kichi ding hi. 19 Tua ni chiangin, Aigupta gam laizang ah Tangtawn Toupa ading maitam khat om ding a, a gamgi ah Tangtawn Toupa ading suangphuh khat zong om ding hi. 20 Tuate, Aigupta gam ah Tangtawn Toupa Vanglianpen adingin chiamtehna leh theihpihna hi ding uhi. Ahang bel, amaute nuaisiahte hanga Tangtawn Toupa kou ding uh a, ama'n a hondampa a thupi mahmah khat sawl ding a, ama'n amaute hukhe ding hi. 21 Tua ni chiangin, Aiguptate lak ah Tangtawn Toupa kitheisak ding a, Aiguptate'n Tangtawn Toupa thei ding uh a, a mai ah kithoihna leh thillat lan ding uhi. Ahi, Tangtawn Toupa' mai ah thuchiam khat bawl ding uh a, tangtun ding uhi. 22 Tua ni chiangin, Tangtawn Toupa'n hipi-in Aigupta sat ding hi. Ahi, sat ding a, damsak ding hi. Amaute Tangtawn Toupa kiang ah kik ding uh a, ama'n a thumna uh dawng ding a, amaute damsak ding hi. 23 Tua ni chiangin, Aiguta gam apan Asuria gam ah lamlian khat om ding a, Asuriate Aigupta gam ah hawh ding uh a, Aiguptate Asuria gam ah hawh ding uhi. 24 Tua ni chiangin, Israel zong Aigupta leh Asuria laka a thumna hi ding a, a thum-un leitung ah vualzawlna hi ding uhi. 25 Tangtawn Toupa Vanglianpen in amaute vualzawl ding a: Ka mi Aiguptate leh ka khutsuak Asuriate leh, ka goutan Israelte ka vualzawl ding, chi ding hi.
Aigupta leh Ethiopia Mawhsakna
1 Asuria kumpipa Sargon in Ashdoda sepaihhon makaipi a sawl laia, amah hong tun kumin, Ashdod dou a, zou hi. 2 Tua hun lai mahin, Tangtawn Toupa'n Amoz' tapa Isai tungtawnin thu gen a: Kuan inla, na kawng apan saiip puan hawkkhia in. Na khe apan khedapte zong suah in, chi hi. Ama'n tua bangin hih a, vuaktang leh khevuakin pai hi. 3 Tua khitin, Tangtawn Toupa'n: Aigupta leh Ethiopia douna chiamtehna leh kihilna hi dinga ka sila Isai, kum thum sung, vuaktang leh khevuaka a om bangin, 4 tua banga Asuria kumpipa'n Aigupta saltangte leh Ethiopia galtaite a tek akhang vuaktang leh khevuakin, tawdawksain pimang ding a, Aigupta zahlakna hi ding hi. 5 Tua hun chiangin, Ethiopia muangte leh Aigupta kisaktheihpihte lungzing ding uh a, maizum ding uhi. 6 Tua ni chiangin, hiai tuipi geia teengte'n: En un, i muante leh hon panpih ding leh hon hukhe dinga i deih Asuria bang suak ahita mai a! Bangchi-a suakta ding i hita mai a! kichi ding uhi, chi hi.
Babulon Pukna
1 Tuipi gei Gamdai-gamkeu tawh kisai genkholh puakgik hiai ahi:Simlam pingpei banga gamdai-gamkeu apan, gam lauhuai apan gal hong kuan ding hi. 2 Pathian in mengmuhna nasetak hon lak a: A gam lehbawla khawng mi in, mi lehbawla khawng a, mi lok mi in, mi buhal hi. Elam aw, dou in! Media aw, suai in! Ke'n thuum leh mau beisak ding hi'ng, chi hi. 3 Hiai hanga ka kawng na a, natnain hon man a, nauvei banga hon patausak a, ka thil muh in hon lungzingsak hi. 4 Ka lungsim bah a, launa in hon man hi. Khawmui kal ka ngaklah lah mulkimna hong hi maimah hi. 5 Ankuang lui unla, kulh tung ah galvilmi koih unla, nein dawn un. Sepaih makaite thou unla, na lum uh sathau nuh un. 6 Toupa'n ka kianga hiai gen a: Kuan inla, galvil mi koih inla, a thil muh phuangzak hen. 7 Kangtalai kai sakolte leh, sabengtung tunga tuangte leh, sangawngsau tunga tuangte mu a, pilvangtakin, limsaktakin ngaikhia hi. 8 Tua khita galvilmi kikou a: Toupa aw galvilna innsanga Sunkhua khua-a ding ing a, ka galvilna muna zankhua khua-a om hi'ng. 9 Ngai in, sakol kaih kangtalaia tuang mi hong pai! chi hi. Ama'n dawngkik a: Pukta hi, Babulon pukta hi! Suihthawh milim pathian khempeuh leilak ah kitamkham hi! chi hi. 10 Buhphuala siktapa om ka mite aw, Tangtawn Toupa Vanglianpen, Israel Pathian apan ka zak, noute hon hilh hi'ng.
Edom Pukna
11 Duma gam tawh kisai genkholh ding puakgik hiai ahi: Seir mual apana kua hiam khat in kei hon sam a: Galvilmi, zan bangchita hiam? Galvilmi, zan bangchita hiam? chi hi. 12 Galvilmi in dawng a: Zingsang hong tung dekta hi! Ahihhanga zan zong hong tung dek hi! Na kan nop leh kan in. Tua khit chiangin hong pai kik lai in, chi hi.
Arabia Doua Genkholhna
13 Arabia gam tawh kisaia genkholh ding puakgik: Nou gana vanpua-a kizui Dedante, Arabia gamlaka giahphual satte'n 14 dangtakte ading tui hon puak un. Nou Tema-a teengte'n galtaite ading an hon puak un. 15 Amaute namsau apan taai hi uh a, namsau phawisa maia taai, thalphel laisa maia taai, gal kidouna nasiate maia taai hi uhi. 16 Ahang bel, Tangtawn Toupa'n ka kiang ah hiai gen a: Sum thalawh sila in kum a sim banga sim, kum khat sung mahmahin Kedar' thupina bei ding hi, 17 Thalkap mite laka khawsuaksun, Kedar galhatte tawm mahmah ding hi. Ahang bel, Tangtawn Toupa, Israel Pathian in hibanga genkhin hiven, chi hi.
Jerusalem Pukna
1 Mengmuhna Phaizang tawh kisai genkholh ding puakgik hiai ahi. Bangin hon buaisak ahia, na vekpi ua inntung vuma na kaltouh uh? 2 Lungnopna-a kidim nang khawpi aw, nang husatna leh mawlthakna khawpi, na mipite namsaua thah hi lou uhi, kidouna phuala si zong hi lou uhi. 3 Na sepaih makaite a kitonin taizak uh a, galte'n thalphel zang loua amaute hentom uhi. Na sunga makaite henkhawm uh a, gamlapi-a tai sawmte hi uhi. 4 Hiai hang ahi, Kei apan lehlam nga in, khasetaka kap nuam hi'ng. Ka mite' siatna ah hon khamuan teitei sawm ken, ka chih. 5 Ahang bel, Toupa Tangtawn Toupa Vanglianpen in Mengmuhna Phaizanga khamuanna ding om louh ni, sala pimangna ni, buaizakna ni, kulhbaangte hihchip ni, mualte kouhna ni nei hi. 6 Elam in thalbawm la a, kangtalai tungtuangte leh sakolte tawh kisa uh a, Kir in a lum dawksak hi. 7 Na phaizang hoihpente kangtalaia dim a, khawpi kongpi ah sakol tungtuangte pang uhi. 8 Judah kihumbitna kihutna kilamang hi. Tua ni-in Gammang Inn-a galvan koihkhawmte muang uchin a, 9 ahihhanga David Khawpi kulhbaanga a sia-a vang tampi mu na hi uh. Dil Khangnunga tuite kholkhawm na hi uh. 10 Jerusalem khua-a innte sim uchin a, kulhbaang vang huk nadinga innte phei na hi uh. 11 Kulhbaang thuah nih kala tuikholna bawl uchin a, tuate Dil Luipen tui hi ding ahi. Ahihhanga, tua Bawlpa muang lou uchin a, tanglaia tua banga a na sepkholpa zahtaak lou na hi uh. 12 Tua ni-in Toupa Tangtawn Toupa Vanglianpen in, kap ding leh mau ding, na sam uh metmai ding leh saiip puan silh dinga hon sam ding hi. 13 Ahihhangin, en dih uh, lungnopna leh nopbawla laamna, gan gawhna leh belam gawhna, sa nekna leh zu dawnna om hi! Nein dawn leng ake, zingchianga si ding hi lim ve-hang! chi na hi uhi. 14 Ahihhangin, Toupa Tangtawn Toupa Vanglianpen in ka zaka hiai gen a: Na sih donga hiai khelhna kikhuh lou ding hi, chi-a Toupa, Tangtawn Toupa Vanglianpen in gen hi. 15 Toupa Tangtawn Toupa Vanglianpen in hiai gen a: Pai inla, sumkempa Shebna, tua kumpipa' innpi kempa kiang ah gen in: 16 Hiaia bang hih na hi hiam? Na hankhuk ding na khuak, kua phalna hi hiam? Bangchi dana mun sanga na hankhuk ding kikhuak na hi hiam? Bangchi dana suangpi-a na khawlna ding mun khuak na hi hiam? 17 En in, Tangtawn Toupa'n nang hon man dek hi. Hon man ding a, hon lawnmang ding hi. 18 Hon liimzial ding a, gam lianpi sung hon denna ding a, tua-a si ding chin a, tua-a na kangtalaite nutsiat hi ding a, na pu' innsung daina hi ding na hi! 19 Na dinmun sang apan hon kaikhe ding ing a, na dinmun apan hon paikhe ding hi'ng, chi-in. 20 Tua ni chiangin, Hilkia' tapa ka sila Eliakim ka sam ding a, 21 na kumpipuan amah ka silhsak ding a, na puanveh amah ka tengsak ding a, na thuneihna a khut ah ka koih ding a, Jerusalema teengte leh Judah' innkawte adingin Pa ahi ding. 22 David' inn chabi a liangzang ah ka koih ding a, ama'n a hong ding a, kuama'n a khak kei ding. 23 Mun kipa vankhai phim khetlut bangin amah ka kipsak ding a, a pa' innkawte adingin pahtawina omna ahi ding. 24 A pa' innkawte' thupina leh a chisuan leh a suan' thupina khempeuh amah tung ah a kibaang ding. Amaute bel, beel neu khakha - kuang leh belte ahi ding uh, a chi hi. 25 Tua ni-in,mun kip ah van khaina khetphim ka khenlutta. Tua ni chiangin, tua khetphim a kilong ding a, a kilaikhe ding a, a ke ding a, a tunga van kibaang sahkhiak ahi ding, chi-a, Tangtawn Toupa Vanglianpen in phuang hi, Ahang bel, Tangtawn Toupa'n genkhin hiven.
Tura Pukna
1 Tura tawh kisai genkholh ding puakgik hiai ahi. Nou Tarshish longte aw, mau tuaituai un! Tura hihsiata om a, inn leh long khawlna zong om nawn lou hi. Hiai thu kigensawn, Kupra tuikulh apan kiza hi. 2 Nou tuikulh gamte-a teengte, tuipi tunga sumsin khualzinte' hihhauh nou Sidon sumsinte aw, kamsim un. 3 Sidon in Shihor apan buhchi, tui tampite tunga hon pua a, Nail Luipi-a buh Tura adinga sum muhna hi a, namte adinga sumsinna hong suak hi. 4 Sidon aw, nang tuipi kulhpi aw, maizum in. Ahang bel, tuipi in thu genta a: Semgim ke'ng, suan leh khak zong nei ke'ng, ta tangval leh tanu nungak siangthou zong khoi piching ke'ng, chi hi. 5 Tura pukna thu Aigupta gam hong tung a zak chiangun nauvei bangin thuak ding uhi. 6 Tarshish ah galkah un, tuikulh gama teengte mau tuaituai un. 7 Hiai na noptatna khawpi uh, tanglai khawpi kumlui hilou hia? A khete'n gam gamlapi luah dingte pua hilou hia? 8 Kumpilukhute pepa, hiai Tura, a sumsinmite lah mi thupite hi a, a sum kileipihte lah leitung mi thupite hi a, kua'n amah mawhsakna ding thu gel ahia? 9 Thupina kisaktheihna lainiam ding leh leitunga minthangte niamsak ding tup leh ngima neipa Tangtawn Toupa Vanglianpen ahi. 10 Tarshish Tanu aw, Nail luipi bangin, na gam sung ah dimlet in. Nang hon nang ding bangmah om lou hi. 11 Tangtawn Toupa'n tuipi tung ah khut zak a, kumpi gamte liingsak hi. Tangtawn Toupa'n Kanan tawh kisaiin a kulhte hihse dingin thupiak bawlta hi. 12 Ama'n: Nang Sidon' Tanu Nungak siangthou aw, mi'n hon nuaisiahta a, lungnuama kipak nawn lou ding na hi. Kipankhia inla, Kupra tuikulh ah galkah in. Tua ah zong tawlngakna mu lou ding na hi. 13 Kaldaite en in, om nawn lou uhi. Asuriate'n tua gam, gamsate tatna mun dinga bawl uhi. Galdouna innsangte lam uh a, a innpite uh kheuhsiang uh a, khawpi sesak dimdem uhi. 14 Nou Tarshish longte aw, mau tuaituai un Na kulh muanhuai uh hihsiat hita hi. 15 Tua ni chianga hichi hong hi ding a, kumpipa khat damsung kum, kum 70 sung Tura mangngilha om ding hi. Ahihhanga, kum 70 bei chianga kizuaknu' la banga Tura tunga tung ding hi. 16 Tua la in: Nang kizuaknu, mite' mangngilhnu, kaihgingin la sa inla, khawpi sung teng ah pai kawikawi in. Tumging tum inla, la tampi sa in. Hi leh, mite'n hon thei gige ding hi, chi hi. 17 Kum 70 a bei chianga thil tung ding hiai ahi: Tangtawn Toupa'n Tura a veh ding a, ahihhangin, a kizuakna sum delhin a kik ding. Leitung maikaih ah, leitung kumpipate kiang ah a kizuak ding. 18 Ahihhangin, a metna leh a sum thalawh, Tangtawn Toupa'n a tang ding. Tura in tuate a khol ding a, a luah tuan kei ding. Ahang bel, tua metna leh sum thalawhte khempeuh Tangtawn Toupa' maia teengte-a ahi ding a, nek ding leh silh dingin a kiching ding, a chi hi.
Leitung Gawtna
1 Tangtawn Toupa'n hichi-in gen a: Ngai in, Tangtawn Toupa'n gam hihsiain vuaksuaksak ding a, lei lumlet ding a, a lim kise ding a, a sunga tengte thehdalh ding hi. 2 Tua ni chianga mipite' tan bang mah siampite' tan hi ding a, silapa' tan bang mah a pute uh' tan hi ding a, silanu' tan bang mah a pi' tan hi ding a, a lei mi' tan bang mah, a zuak mi' tan hi ding a, a leitawi mi' tan bang mah, a leitawisak mi' tan hi ding a, leitawisak mi' tan bang mah, leiba mi' tan hi ding hi. 3 Lei hihsiat dimdem hi ding a, luh siang sipsip hi ding hi, chi hi. Tangtawn Toupa'n hiai thute gen khin hi. 4 Lei tulta a, kisia, mihing tenna mun teng kisia a, tulgawpta a, milian milalte vuaigawp uhi. 5 Ahang bel, dan palsat uh a, leitunga teengte'n buahsak uh a, dankhunte kheng uh a, Tangtawn thukhun zuilou uh hiven. 6 Tua banga hamsia in lei negai a, Pathian in a sunga teengte mawhtan hi. Tua hanga, leitunga teengte mei in kang a, mi tawmchik kia suakta hi. 7 Grepzu thak tung lou a, grepgui zong vuaigawp a, lungtang kipak thei mi peuhmah thuum uhi. 8 Khuangta tuma lungnopna bei a, kipaka nopsakna husa daai a, kaihging tuma lungnopna bei a, 9 zu dawna la sa nawn lou uhi. Zukhauh dawnte'n kha sa uhi. 10 Khawpi sesa kilawi a, inn chih kongkhak kikhak hi. 11 Kongzing khawnga zu duha kikou uh a, kipahna lungkhamna suak a, gam sung apan lungnopna beita hi. 12 Khawpi sesa-a kinusia a, kongpite kikhengawp hi. 13 Leitung ah leh namte lak ah tua bang hi ding hi. Oliv kung kungsin bang hi ding a, grepgah lawh nunga a sang nutsiat bang ding hi. 14 Amaute'n aw suah uh a, lungnuam taka kikou uhi. Tangtawn Toupa' thupina tumlam apan phat uhi. 15 Tua bang ahih manin, suahlam ah Tangtawn Toupa pahtawi unla, tumlam Tuikulh gam ah Tangtawn Toupa Israel Pathian' min phat un. 16 Midiktatpa thupi hen! chi a, lasak lei mong apanin za ung, chi ding uhi. Ahihhanga ke'n bel: Mangthang hi ing, mangthang hi ing, ka tung gik hi! A muanhuailoute'n lehbawlin mi khawng a, a lepchiahte'n lepchiahtaka hih hi,chi hi'ng. 17 Leitunga teeng noute aw, laua mulkimna leh kawkhukte, thangte'n noute hon ngak hi. 18 Hichi hi ding a, laua mulkimna aw apan taikhete kawkhuk ah ke ding a, kawkhuk apan kalkhete thang ah awk ding hi. Ahang bel, vaante' tui kongpite Kihong a, lei kingakna suangphumte liing hiven! 19 Lei kitamkham a, kiphelkhap a, nakpitaka kiliing a, kisawi ngokngok hiven. 20 Zukhamte banga lehlam lehlama lei vuang a, huihpi muut bukta banga awn hi. Tua lah, taleka mawh man hi a, dingtou zou nawn lou dinga puk hi. 21 Tua ni chianga, hichi hi ding a, Tangtawn Toupa'n tunglama tunglam van thil vangliante gawt ding a, nuailam leitung kumpipate gawt ding hi. 22 Ama'n amaute kawkhuka khumkhawm ding a, kaikhawm ding hi. Suangkul ah khum chibilh ding a, ni tampi nunga amaute gawt ding hi. 23 Tua hun chianga khapi maimawk ding a, ni zong maizum ding hi. Ahang bel, Tangtawn Toupa Vanglianpen in Zion Mual tua Jerusalema Kumpipa a hihna tawh vaihawm ding a, a upate' maia a thupina tangkhesak ding hiven.
Tangtawn Toupa Phatna
1 Tangtawn Toupa aw, nang ka Pathian na hi! Thil lamdangpipi na hihtak mana, hon pahtawi ding ing a, na min phat ding hi'ng. Nang muanhuai kima thil lamdangpipi hih chin a, tuate lah tanglaia pan na gelsa hi ahi. 2 Ahang bel, nang khawpi hihsia a, kulhnei khawpi hihsia a, melmak mite innpite khawpi hi nawn lou dinga bawl chin a, kilam thak ngei nawn lou ding hiven. 3 Tua bang ahih mana, mi hatte'n nang hon pahtawi ding a, zahngaihnabei Zentel khawpite'n nang hon lau ding hi. 4 Ahang bel, panpihbeite adinga, kihumbitna muanhuai hi chin a, tasamte' mangbat laia tenna muanhuai hi ve chin. Huihpi apan bukna hi chin a, nisa apan limliap hi vechin. Zahngaihnabeite' nak huhu lah, baang muta deng okok huihpi bang hi ahi. 5 Gamdai-gamkeu sa mahmah banga melmak mite' kitom daisak ding chin a, meipi limliap in khawlum a daihsak banga ngongtatte' la daisak ding na hi. 6 Tua khit chianga Tangtawn Toupa Vanglianpen in hiai muala michih ading ankuang limchi lui ding a, gan vakthau leh guhngek leh zu limpena ankuangluina hi ding hi. 7 Tua hun chianga, ama'n hiai mual ah minam chih kikhuhna puan, nam khempeuh tunga kizak maikhuhna nawmvalh vek ding hi. 8 Ama'n Tangtawn adinga nawmvalh vek ding hi. Tua hun chianga, Toupa Tangtawn Pathian in maitang khempeuh apan khitui nulhul ding a, leitung khempeuh apan a mite zahlakna lamang ding hi. Tangtawn Toupa'n hiai thu genkhinta hiven. 9 Tua ni chianga mite'n: Ngai un, hiai i Pathian hi taktak hi. Amah ahi i muanpa, ama'n eite hon hondam hi. Hiai Tangtawn Toupa i muanpa ahi, a hotdamna ah nuamin kipak ni, chi ding uhi. 10 Tangtawn Toupa' khut hiai mualtunga kinga taktak ding a, ahihhanga Moab bel gantate'n ek laka buhpawl a siktum banga a khenuaia siktuma om ding hi. 11 Tuiliau mi in ban zaka tui a leuh banga Moab in a lak ua ban zak ding hi. Tangtawn Toupa'n a kisaktheihna uleh a lepchiahna khut uh kheenniam ding hi. 12 Tangtawn Toupa'n kulhbaang sangte laichim ding a, lawnkhesuk ding a, leilak leivui lak denna ding hi.
Phatnala
1 Tua ni chianga, mite'n Judah gama hiai la sa ding uhi: Khawpi muanhuai nei hang, ahang bel, Pathian in hotdamna a kulhbaangte leh a tungdalte-a bawl hiven. 2 Nam diktat a lut theih nadingin, khawpi kongpite hong un. Tua nam a muanhuai gige nam hi ahi. 3 Na tunga kiptaka lungsim nga mi, nangma'n khamuanna kima hu ding na hi. Ahang bel, ama'n nang hon muang hiven. 4 Tangtawn Toupa muang gige un. Amah Tangtawn Toupa, tua Tangtawn Toupa, Tangtawn Suangpi hi ahi. 5 Ama'n sangpi-a teengte kainiam a, khawpi sangpi leilaka puksuksak a, leivui laka paikhesuk hi. 6 Nuaisiah-a omte leh mi niamte' khe leh panpihbeite' khete'n tua sikden ding hi. 7 Midiktatte' lampi tang a, nang mi tang aw, Midiktatpa adingin lampi mamsak in. 8 Ahi, Tangtawn Toupa aw, na dan zuia nang hon ngak hi ung, ka hinna un a lunggulh na min leh nang theihgige hi ahi. 9 Zan chianga ka hinna in nang hon ngai a, zingsang chianga ka kha in nang hon zong hi. Ahang bel, na dante leitunga hong tun chianga leitung mite'n diktatna sin ding hi ve-un. 10 Ama'n migiloute tunga hehpihna a lah hanga diktatna sin tuan lou ding uhi. Diktatna gam nangawna diktatloutaka gamta teitei ding uh a, Tangtawn Toupa' thupina mu lou ding uhi. 11 Tangtawn Toupa aw, na khut liiktou chin a, ahihhanga mu lou uhi. Na mite adinga na phatuamngaihna mu uhenla, maizum uhen. Na galte mei in kangtum taktak ding hi. 12 Tangtawn Toupa aw, koute adingin, galmuanna hon bawlsak in. Ka nasep zawhte khempeuh uh nang hon hihsak vek hi. 13 Tangtawn Toupa, ka Pathian uh aw, nang lou zong, tou dangte'n koute hon uk uh a, hinapi-a nangma hanga, na min kia thei gige ding hi ung. 14 Amaute sita uh a, hing kik lou uhi. Tua a paikhinsa khate thou kik lou uhi. Nang amaute gawt chin a, beisak kiuhkeuh na hi. Amaute theih gigena zong hih mangthang na hi. 15 Tangtawn Toupa aw, Israel nam pungsak chin a, khangsaka, nang na kipahtawi chin a, a gamgite liansakta na hi. 16 Tangtawn Toupa aw, amaute'n mangbanga nang hon zong uh a, huau siausiau leia na maia thum uhi. 17 Numei gai a nausuah dek chianga, na sa-a kipek a, nauveia kap hi. Toupa aw, na mitmuhin tua bang hi ung. 18 Gai ung a, nauveia na sa ung a, huih leltak nei khia ung a, leitung hotdam nading bangmah hihkaw lou hi ung. Huih leltak nakkhia bang hi ung a, leitung mite zong piangsak lou hi ung. 19 Na misite hong hing ding a, a luangte uh thoukik ding hi. Nou leivuia tuamte aw, khanglou unla, la sa un. Ahang bel, na daitui, zingsang daitui bang hi ding a, lei in a misi khate pekhe ding hiven. 20 Ka mite aw, na inndan sung ah lut unla, kongkhakte kikhakkhum un. Hehna a bei ma sung tomkha kisel tadih un. 21 Ahang bel, leitunga teengte a mawhnate uh hanga gawt dinga, Tangtawn Toupa a omna apan hong paikhe ding hiven. Lei in a tunga sisan kisuahte phoulak ding a, a tunga thaha omte, seel nawn lou ding hi.
Israel Hutkhiakna
1 Tua ni chianga Tangtawn Toupa'n namsau lauhuai, gik leh liana, tua gulpi vak ngoingoi Leviathan that ding a, tua tuipi gulpi that ding hi. 2 Tua ni chiangin, a gahpha thak mahmah grephuan thu lain sa un. 3 Tua grephuan hupa kei Tangtawn Toupa hi'ng. Tuia buak ing a, kuama'n a suksiat louh nadinga a sun a zana veng hi'ng. 4 Kei heh lou hi'ng. Kei hon maituahte loulingnei leh loupa hi mai le uh zaw kidouna phuala amaute dou pah ding ing a, haltum vek ding hi'ng. 5 Ahih kei le lah, ka nuaia hong bu le uh, ahi, hon kilempih le uh, chi ding hi. 6 Tua nite hong tun chianga, Jakob in zung kai ding a, Israelte selnou ding a, paklun ding a, leitung khempeuh a gah-a dimsak ding hi. 7 Amah satte a sat banga, Tangtawn Toupa'n Israel sat hia? Gal thah banga thatta hia? 8 Launa thupitak tawh amah na sawlmang laia amah dou chin a-ama'n suahlam huiha amah mutmang hiven. 9 Hibanga Jakob mawhna khuhsak hi ding a, hiai mah khelhna lakkhiak bukimna gah hi ding hi. Ama'n maitam suangte suangpek gawivui bang a suahsak chianga, Ashera song, ahih kei leh, gimnamtui halna maitamte ding nawn lou ding hi. 10 Kulhnei khawpi kilawi ding a, gamdai-gamkeu banga tenna mun nutsiatsa leh taisansa hi ding a, tua-a bawngnoute gamta-a kual ding a, a kahiang selte negai ding uhi. 11 A tehkungte vuaia a keu chianga, kitan a, numeite hong pai a, thuka khul uhi. Hiai mite theihsiamnabei mi ahih man ua, amaute Bawlpa'n amaute lainat lou a, amaute Siampa'n amaute deihsakna lak lou hi. 12 Tua ni chiangin, hichi hong hi ding a, Tangtawn Toupa'n Iufratis luipi luang apan Aigupta Lui dong, sing gahte a satkhe ding a, tua hun chiangin, nou Israel suante khat khatin hon kaikhawm ding. 13 Tua ni chiangin, mi'n pengkul lianpi a mut ding uh a, Asuria gama mangthang, Israelte hong kik ding uh. Tangtawn Toupa'n Aigupta gama a hawlmang, Israelte zong hong pai ding uh a, Jerusalem mual siangthou ah, Tangtawn Toupa biain a mai ah a bok ding uhi.
Efraim leh Jerusalem Tunggikna
1 Zukhamhat Efraimte' kisaktheihpih pakkhi khip tua khawpi tung gik hi! A mual hiaihiai pak, tua khawpi tung gik hi! Efraim namte' kilawmna thupi lah hitah. Tua phaizang lei hoihna a pakkhi khip lah hitah. Zuin a kaihniamte' kisaktheihpih khawpi lah hitah. 2 En un, Tangtawn Toupa'n sepaihhon hat leh thupi nei hi. Gialpi leh siatna huihpi bang hi ding a, gamsung tuummanga luang tui hat bang hi ding a, tua khawpi leilak denna'n nei ding hi. 3 Tua sepaihhon in Efraim nam zukhamhatte' kisaktheihpih khawpi, khenuaia sikden ding hi. 4 Efraim kilawmna pak thupi, phaizang lei hoihna tunga om nipi tun ma-a theipi gah vuai masa bang ding hi. Mi'n a muh phet chianga a khuta loua nawmvalh ding hi. 5 Tua ni chianga Tangtawn Toupa Vanglianpen a mite laka khawsuaksunte adinga, pahtakna lukhu leh kumpilukhu thupi hi ding hi. 6 Thukhen dinga tupa adinga dika thukhenna kha hi ding a, galphual apan kongpi-a kikte adinga, amah thahatna bul hi ding hi. 7 Hita mah leh, zu hanga hiaite hoi duangduang uh a, zukhauh hanga awnawn uhi, Zukhauh hanga siampite leh kamsangte lampial uhi. Zu in amaute nawmvalh hi. Zukhamna hanga awnawn uh a, muh neia tuan phongphong uh a, thupukna bawl a kisui uhi. 8 Dawhkan khempeuh lah a luak uh dim a, mun siang himhim om lou hi. 9 Sinsak a sawm kua ahia? A thupuak kua theisiamsak dia kisa ahiam? Nawitep tawpkhin lelte leh nawi ngolhsakkhit lelte maw? 10 Ahang bel: Thuhilhna tunga thuhilh, dan tunga dan, hiah tawmchika, huah tawmchika chih hi mawk ven. 11 Hiai hangin ahi Tangtawn Toupa'n melmak mite' muk leh pautuamte zanga a mite a houhpih ding. 12 Hiai mite kianga ama'n: Hiai khawlna mun, tawlngakna mun, ahi chi-a hilh a, ahihhanga amaute'n ngaikhe nuamlou uhi. 13 Tua khit chianga Tangtawn Toupa' thu zaw amaute adinga thuhilhna tunga thuhilhna, dan tunga dan hiah tawmchik, huah tawmchik chih hi ding a, pai ding uh a, kipalpaia thalpuk ding uh a, liam ding uh a, thangawk ding uh a, mata om ding uhi. 14 Tua bang ahih manin, nou simmawhhatte, Tangtawn Toupa' thu za un. Nou Jerusalema teeng, paunak gengente, Tangtawn Toupa' thu za un. 15 Ahang bel, noute'n: Sihna tawh thukhun bawl hi ung, misikhua tawh kithukim hi ung. Zepna khau in tuikhang banga hon lenkhup ding a, hon sukha lou ding hi. Ahang bel, bukna dinga zuau saang ung a, zuauthu nuaia kisel hi ung, chi hi ve-uchin.
Zion Innkiu Suang
16 Tuabang ahih mana, Toupa Tangtawn Pathian in hiai gen a: Ngai in, Ziona suang khat phum hi'ng, ettelsa suang hi a, innkiu suang manpha, kingakna kip hi ding suangphum hi ahi. Amah muang peuhmah lungdong lou ding hi. 17 Dika thukhenna a tehna khau hi ding a, diktatna a ulum hi ding hi. Tua hun chianga kibukna zuauthu gialpi in phiatmang ding a, tuite'n bukna mun tuummang ding hi. 18 Ahang bel, ke'n sihna tawh na thukhun uh paikhe ding ing a, misikhua tawh na thukimna uh taksuak lou ding hi. Zepna khau tuikhang banga hong tun chianga, noute hon tuummang ding hi. 19 Tua zepna khau tuikhang banga hong luan tenga, noute hon tai ding hi. Zingsang tenga, a sun a zana luang ding a, thupuak theihsiamna in mulkimna thupitak tun ding hi, chi hi. 20 Mi a kizan nadinga lupna tom lua a, mi' silh dinga komawl neu lua hi. 21 A nasep, nasep kidang leh theih ngeilouh nasep a sep nadinga Tangtawn Toupa'n Perazim Muala a hih banga dingkhe dinga, Gibeon Phaizanga banga kitokthou ding hi. 22 Tu'n na simmawhhatna tawp in. Tua banga na hih kei leh, Toupa'n na khainiang buh giksak semsem ding hi. Ahang bel, Toupa Tangtawn Toupa Vanglianpen in gam khempeuh hihsiat ding a thuseh, amah apana za hi'ng.
Pathian Thusinsak
23 Ngaikhia unla, ka aw za un. Thudon unla, ka thugen bildawh un. 24 Leiletpa'n khaichi a pawi nading, sun nituma leilet lou hia? A zingte bawla, a khaite khenzan lou hia? 25 Leilehsa a zalhtam khita mohur pawi a, zira theh lou hia? Huit buh a vualvuala suan a, taang leh barlibuh a munmuna theh lou hia? 26 Diktaka a hih theih nadinga midang in sinsak a, a Pathian in thuhilha sinsak hi. 27 Ahang bel, kuama'n buhkhetna-a mohur tang khenkhe lou a, kuama'n kangtalai peia zira tang gawi lou hi. Mohur tang bel, khetbuka khenkhia a, zira tang ahih leh, chianga khenkhe zaw hi. 28 Tua louin, tanghou ding buhtang bel buhgawinain kigawivui hi. Tua hi kei leh, khet thawhin kikhenkhin ngei lou ding hi. A kangtalai pei leh sakolte chilsak leh gawivui ngei lou ding hi. 29 Hiaite khempeuh zong Tangtawn Toupa Vanglianpen apan hi ahi. A thuhilhna lamdang a, a pilna thupi hi.
Jerusalem Tunggikna
1 Ariel aw, Ariel, David teenna khawpi aw, na tung gik hi! Na kumte ah kumte behlap inla, ankuangluite kumsim na'n nei in. 2 Hinapi-in, ke'n Ariel dou ding ing a, mangbatna tungsak ding hi'ng. Tua ah, suunna leh kahna om ding hi. Tua hun chianga kei adinga Ariel zaw Pathian thukkhuuk bang ding hi. 3 Tua hun chianga na kimkota giahphual sat ding ing a, na kimkota nang dou nading innsangte lam ding ing a, nang douna thilte tungkhe ding hi'ng. 4 Hon laipai ding ing a, leilak apan pau ding chin a, niamchik leivui apan pau ding na hi. Na aw leilak apan sikha pau bang ding a, leivui apan ging siausiau ding hi. 5 Hinapi-a, na gal tampite, leivui bang hi ding hi. Zahngaihna beia thukhauhte, buhsi huihmut bang hi ding hi. Thakhatin, theihkholh louh-in 6 Tangtawn Toupa Vanglianpen apan thukhenna hun hong tung guih ding hi. Vanpi ging tawh, zinling tawh, husa ngaihtak tawh kithuah ding a, pingpei tawh, huihpi hattak tawh, kangtum thei meikuang tawh kithuah ding hi. 7 Ariel doua galbawl nam tampite, a kulh doua galbawlte khempeuh adinga manglam bang ding a, zana mengmuh bang ding hi. 8 Zion Mual dou tua nam tampite adinga tua bang hi ding hi. Mi gilkial a manglama an ne, a khanlawh chianga gilkial khiamlou bang hi ding uhi. Mi dangtak a manglama tui dawn, a khanlawh chianga dangtak khiamlou bang hi ding uhi. Thumanlouhna Mittawtna 9 Kiguih unla, lamdang sa un! Noumau' mit tawsak unla, mittawin om un! Kham uh a, ahihhanga zudawna kham hi lou uhi. Hoi uh a, ahihhanga zukhama hoi hi lou uhi. 10 Tangtawn Toupa'n noute' tunga ihmutna kha sungbua a, kamsang noute' mit belhchip a, mailam muthei noute' lutang hon khuhsak hiven. 11 Tua bang ahih manin, hiai thilte mengmuhna noute adingin laibu bilhchip bang ahi. Tua laibu laisim thei mi kiang ah kipia henla: Hehpihtakin hiai sim in, kichi leh, ama'n: Kibilhchip hiven ka sim thei kei, a chi ding, 12 Tua khitin, lai simtheilou mi kiang ah kipia henla: Hehpihtakin hiai sim in, kichi leh, ama'n: Lai ka sim thei kei, a chi ding hi. 13 Tua khitin, Toupa'n: Hiai mite'n kamin hon naih uh a, a mukun hon pahtawi uh a, hinapi-a, a lungtang un hon gamlat hi. Hon biakna uh, mihing thupiak leh mihing' kisinsakna pansana kibawltawm lei hi ahi. 14 Tua bang ahih manin, ngai un. Hiai mite laka thillamdang hih kik ding ing a, thillamdang, lamdang mahmah hi ding hi. A pilte' pilna mangthang ding a, atheisiamte' theihsiamna vuaksuak ding hi. 15 A thilsawmte uh Tangtawn Toupa apana seel mite' tung gik hi! A nasepte uh miallaka hih hi a: Kua'n hon mu-a eita? chi uh a, kua'n hon theia eita? chi uhi. 16 Tua banga thil lehbulh vek hi uteh. Kua'n belvelpa a bellei bang leia ngai ding ahia? Thilbawl in a bawlpa' tungthu gen a: Ama' bawl hi ke'ng, chi ding hia? Thilsuktuah in a sutuahpa tungthu gen a: Theihsiamna mahmah nei kei, chi ding hia?
Pilna Muhkik ding
17 Sawtlou nung chianga ama'n Lebanon Mual, grephuan suaksak lou ding hia? Tua grephuan, gammang mah bang lou ding hia? 18 Tua ni chianga nangongte' bilin Laibu sunga thute za ding hi. 19 Tua hun chianga mittawte'n mit-in miallak leh khawnim nuaia mu ding uhi. 19 Tua hun chianga minamte'n Tangtawn Toupa-a lungnopna thupizaw nei ding uhi. A zawngpente Israel Misiangthoupa-a lungnuam ding uhi. 20 Ahang bel, dopneiloute beita ding a, simmawhhatte om nawn lou ding hiven. Tangtawn Toupa'n thil gilou hih sawm gigete satkhe ding hiven. 21 Amaute'n thu kamkhata mite khialsak ding uhi. Kongpi-a mi taihilhte thangsiah uh a, theihpih zuautheia panga mawhneiloute apan thupila thukhenna lamang ding uh hiven. 22 Tua bang ahih manin, Abraham tanpa Tangtawn Toupa'n Jakob innkawte tawh kisai hiai gen a: Jakob in maizum nading nei nawn lou ding hi. A mai mual nawn lou ding hi. 23 Jakob in a suante laka ka khut nasep a tate ngei a muh chianga, amaute'n ka min siangthousak ding uh a, Jakob' Misiangthoupa zahtaaka lau ding uh a, Israel Pathian lau ding uhi. 24 Tua hun chianga, khalama lampialte'n theisiamta ding uh a, phunhatte'n thuhilhna sangsiamta ding uhi, chi hi.
Helhat Nam Tunggikna
1 Tangtawn Toupa'n: Ta helhatte tung gik hi! Midang dong uh a, kei hon dong lou uhi. Thil sawm nei uh a, ka Kha-a kipan lah hi lou hi. Khelhna-a khelhna behlapna hi ahi. 2 Aigupta gama paisuk uh a, ka kama thuhilhna zong lou uhi. Faro kulhpi-a buk sawm hi uh a, Aigupta belh sawm uhi. 3 Tua banga Aigupta kulhpi zaw na maizumna uh hi ding hi. Aigupta na belh uh zong na zahlakna uh hi ding hi. 4 A makaite uh Zoan ah om uh henla, a palaite uh Hanes hong tung mah le uh, 5 amaute phattuampih lou ding ahih man-ua michih maizum ding hi. Phattuampih lou ding uhi. maizum ding uh a, zahlak ding uhi, chi hi. 6 Simlam gamkeu gamsate tawh kisai genkholh ding puakgik hiai ahi: Lungkhamna leh lungzinna gam, humpinelkai leh humpinelkainu omna, gul dekpak leh gulpi lengthei omna hi ahi. Sabiltungtein a hauhna uh pua uh a, sangawngsautein a goute uh nawn uhi. Amaute' phatuampih lou ding nam va-puak uhi. 7 Aiguptate' huhna phatuam lou ding a, a mawkna lei hi ding hi. Tua bang ahih mana Aiguptate' min ding, Bangmah Hih Neilou Rahab, chi-a minlawh hi'ng.
Nam Helhat
8 Tu'n pai inla, a mai uah, suangpek tung ah gelh inla, laibuzial sung ah khuakthawhin gelh in. Hi leh, hun hong tung dingte-a theihpihna a hihden theih nading hi ding hi. 9 Ahang bel, hiaite helhat nam hi uh a, ta zuautheite hi uh a, Tangtawn Toupa' dan ngaikhe nuamlou tate hive un. 10 Mengmuh neite kianga: Mengmuh nei nawn kei un! chi uhi. Kamsangte kianga: Adik mengmuh nei nawn kei un! A zak nuam lamlam gen unla, zuauthu lei leh kikhemna thu genkhol un. nHiai lampi nusia un! 11 Hiai lampi paisan un! Israel Misiangthoupa tawh hon maituah nawn kei un, chi a, phuang hi. 12 Tua bang ahih mana, Israel Misiangthoupa'n hiai gen a: Noute'n hiai thupuak pampaih uchin a, nuaisiahna muang uchin a, zuauthu-a kinga hi uteh. 13 Tua banga na hih man ua hiai mawhna na tung ua, suang baang khangkham thakhata chim dinga kisa puak eng ong hon khuhkhum dek bang hi ahi. 14 Belvelmi'n bel a satkhap bang hi ding a, zahngaihna beia satkham dimdem ding hi. Thukkhuk apan meiluah nading leh tuikhuuk apan tui dip nading nangawna kichinga lian a them nangawn om lou ding hi, chi hi. 15 Ahang bel, Toupa Tangtawn Pathian Israel Misiangthoupa'n hiai gen a: Lungheia na tawlngak chiangun, hon hukhe ding ing a, dai dide-a non muan chiang ua, thahatna hon pe ding hi'ng a, ahihhanga, tua bang lah ut lou hi uteh. 16 Noute'n lah: Ut lou, sakol tunga tuanga taai zaw ding! chi hi uteh. Ahi, taai mahmah n'u teh! Sakol hattaka taimang ding, na chih uh, nou hon deihte hatsem ding ahi u-aw! 17 Mi khat lei suklaua mi 1,000 taikeek ding na hi uh. Mi nga lei suklaua taikeek ding na hi uh. Mual sang tunga puanlap mung tangpou leh, mual tunga puanlap banga nutsiat na hih mateng uh, taai taai ding na hi u-aw! chi hi. 18 Hinapi-a Tangtawn Toupa'n hehpihna noute hon pe nuama hon ngaka,na tung ua lainatna suah dinga dingkhia hi. Tangtawn Toupa zaw dika vaihawm Pathian hi a, amah ngakte mi nunnuam hi ahi. 19 Jerusalema teeng Zion mite aw, nakpi-in na kikou nawn kei ding uh. Huhna ngena na kikou husa uh zain amah hehpihsiam na maizen inchia! Ama'n a zak phet chianga hon dawng pah ding hi. 20 Toupa'n lungkham mangbatna an leh gimthuakna tui hon na peta mahleh, nou hon sinsakte kiseel nawn lou ding uh a, mita mu ding na hi uh. 21 Na taklam uhiam, na veilam uhiama na kihei chiangun, na nunglam uapan aw na za ding uh a, tua in: Hiai ahi lampi, zui un, hon chi ding hi. 22 Tua hun chiangin ngun tuia luan na milimte uleh kham kisung na milimte uh niin na sa ding uh a, numei niikniin bangin na paimang ding uh a: Beimang un! na chi ding uhi. 23 Tua baan ah, Tangtawn Toupa'n haai pawite adingin vuahtui hon sawl ding a, lei apan an piang a tam ding a, a taksa ding. Tua ni chiangin, na ganhonte uh gam zapi ah a gamta ding uh. 24 Loua nasem bawngtalte leh sabiltungte'n, kuaika leh suahdula na suahkhiak uh buhpawl hoih chisawh a ne ding uh. 25 Innsangte a puk chianga kithahna thupi a tun chiangin, tang leh mual sang chih tung ah luite leh tuilamte a luang ding. 26 Tangtawn Toupa'n a mite liamna a tuamsam chiang leh a gimthuaksakte'liam mate a damsak chiangin, khapi vak leh ni vak a bang ding a, ni lah aleh sagihin a vak ding a, sun sagih kigawm bangin a vak ding hi. 27 En in, gamlapi apanin Tangtawn Toupa' min hong tung ding. Hehna meikuang leh, meikhu sahtak tawh hong tung ding. A muk ah thangpaihna om ding a, a lei lah kangtumthei mei hi ding hi. 28 A nakna hu lah luitui leet, ngawng chiang tum bang hi ding hi. Hihmanthatna lawhpi-in namte haih ding hi. Mite kam ah kamkaihna sikbah bulh ding a, tua in amaute lampialsak ding hi. 29 Ankuang siangthou lui zan kima la bang, la nei ding uchin a, Israel Suangpi lam leh Tangtawn Toupa' Muala tamngai tuma mi a kaltouh lai banga lungnuam ding na hi uhi. 30 Tua hun chianga, Tangtawn Toupa'n mite kianga a aw lauhuai zasak ding hi. Hehna mulkimhuai tawh, kangtumthei meikuang tawh, huihpi, vuahpi leh gialpi tawh a banthahat musak ding hi. 31 Tangtawn Toupa' aw in, Asuria hihse dimdem ding a, a kumpi chiang mulkimhuaia sat ding hi. 32 Tangtawn Toupa'n gawtna chianga amaute a sat tengin leh, Tangtawn Toupa'n galvan tawh gal a bawl tenga khuangtate leh kaihgingte banga mun tenga ging ding hi. 33 Ahang bel, Tangtawn Toupa'n tanglai pek apan Tofeth bawlkhola, kumpipa adinga mansa-a koih hi. Meipi khuk thukpi leh lianpi in bawl a, a khul ding sing zong kichingtaka pia hi. Tangtawn Toupa' hu in kaata kuang tuiluang banga tua meipi halkuang ding hi.
Pathian Muangloute' Khelhna
1 Huhna ngen dinga Aigupta gama kuansukte tung gik hi! Sakolte muanga a kangtalaite uh tamna muang a, a sakoltungtuangte uh thahat mahmahna muangte, Israel Misiangthou dong lou a, Tangtawn Toupa zong zaw loute' tung gik hi! 2 Hinapi-a amah zong piltak hi a, siatna tun ding hi. A thugensa lakik lou ding hi. Migiloute' innkawte dou ding a, thil gilou hihte panpihte zong dou ding hi. 3 Aiguptate lah mihing lei hi uh a, Pathian hi lou uhi. A sakolte uh zong sa lei mah hi a, kha hi lou uhi. Tangtawn Toupa'n a baan a zankhiak chianga, huhna pepa kisui ding a, huha ompa zong puk ding a, anih ua mangthangkhawm ding uhi.
Pathian in Jerusalem Hukhe ding
4 Tangtawn Toupa'n ka kianga a thugen hiai ahi: Humpinelkai humham a, humpinelkai lunlai a samat tunga humham hi. Belamching honpite amah dou dingin kisamkhawm mah leh, a kikou uh lau tuan lou a, a husa un lungbuaisak tuanlou hi. Tua banga Tangtawn Toupa Vanglianpen, Zion mual leh mualsangte tunga galdou dinga hong kuansuk ding hi. 5 Vasate'n tunglama kha a zak banga Tangtawn Toupa Vanglianpen in Jerusalem hu ding hi. Lum banga liah ding a, humbit ding hi. Amah paikaan ding a, hukhe ding hi, chi hi. 6 Israelte aw, nakpitaka na helsanpa uh lam ah hong kik un. 7 Hi leh, tua ni chiangin, michih in gilou khuta na bawltawm uh ngun leh kham milimte na pampaihta ding uhi. 8 Tangtawn Toupa'n hiai gen a: Tua hun chianga mihing' namsau hi lou namsaua Asuria puk ding hi. Mihing' namsau hi lou namsau in amah negai ding hi. Ahihhanga namsau apan amah taai ding a, a tuailaite sala kaih sila suak ding uhi. 9 Mulkimin a kulhpi puk ding a, sepaih makai liante'n kidouna puanlap a muh chiang ua laua kon ding uhi, chi-a Tangtawn Toupa'n phuang hi. Ama' meipi Zion ah om a, Ama' haltuina meiphualpi Jerusalem ah om hi, chi hi.
Diktatna Vaihawm
1 Ngai un, kumpipa khat in diktatnain vaihawm ding a, ukmite'n dikin uk ding uhi. 2 Mi chih, huih apan bukna bang hi ding a, huihpi apan kihumbitna bang hi ding hi. Gamkeua luitate bang hi ding a, tawlna gam suangpi liim bang hi ding hi. 3 A mu mitte mial nawn lou ding a, a za bilte ngong nawn lou ding a, 4 ngongtatte lungtang in thei ding a, theisiamta ding a, dangawkte kiteltaka pau ding hi. 5 Mihaite lah lunglian kichi nawn lou ding a, angsung khualte lah thilphal chi-a kitunget nawn lou ding hi. 6 Ahang bel, mihai in haina thu gen ding a, a lungtang in thil hoih sawm a, Pathian limsaklouhna thil hih a, Tangtawn Toupa dema thutaklou gena, anduhte' gil kialsak a, tuiduhte dangtaksak hiven. 7 Angsungkhual mi' lunggel siamdan gilou a, thil hoihlou sawm a, tasamte'n thudik a gen lai nangawn ua ama'n amaute zuauthu-a hihsiat ding dan lem gel hi. 8 Ahihhanga, a lunglian mi in thil lian khualin gel a, tua thil lian hih-a dingkip hi.
Thukhual Louh Gah
9 Nou, numei mawk omte aw, ka aw ngaikhia un. Nou bit kisa tanute aw, ka thugen bil dawh un! 10 Nou bit kisa numeite aw, kum khat leh ni bangzah hiam nung chianga liing ding na hi uhi. Ahang bel, grep gah lawh hun tung lou ding a, gah khop hun tung lou ding hiven. 11 Nou, numei mawk omte aw, liing unla, bit kisate aw, lungkham un! Na puan uh botkek unla, na kawng uah sai-ip puan teeng un. 12 Lou hoihte leh grepgui gah nuam mahmahte it-in awm kituum un. 13 Ka mite' gam, ling leh lou lingnei in a khuhta ahi, nopbawlna inte leh hiai nopsakna khawpi suunin awm kituum un. 14 Kumpi' innpite kilawi ding a, khawpi husa vengvung zong kitaisan ding hi. Kulhte leh innsangte zong gam sabiltungte' buaina khuk leh namanlou mun hiden ding a, belamhonte' tatna hiden ding hi. 15 Tunglam apan Kha i tunga sunbuak ahih mateng, gamdai-gamkeu zong gahsuahthei lei hoih a suah mateng, gamlei hoih zong gammaang a bat mateng tua bang hi ding hi.
Pathian Vaihawmna Galmuanna
16 Tua khit chianga, gamdai-gamkeua dika vaihawmna om ding a, gam gahsuahtheia diktatna teeng ding hi. 17 Diktatna nasep lah lemna muanna hi ding a, diktatna gah lah galmuanna leh kimuanna hiden ding hi. 18 Ka mite galmuanna leh bitna muna teeng ding uh a, tawldamna mun leh bitna muna teeng ding uhi. 19 Gialpi in melmate' gammaang nuaimaat-in khawpi zong leilak ah phiahsuk mah leh, 20 luigei khawnga khaichi pawite leh na bawngte uleh sabiltungte uh galmuanga gamtasakte mi nunnuam hi namah n'uchia!
Lungzin Mangbat laia Thuumna
1 Hihsepa aw, hihsiat hikhin kei mah leteh, na tung gik hi! Mi leh bawla khawngpa aw, leh bawla khot hikhin kei mah leteh, na tunggik hi! Midangte na hihsiat khit chianga, mi'n hon hihse ding a, midangte lehbawla na khot khit chianga, mi'n hon lehbawla hon khawng ding hi. 2 Tangtawn Toupa aw, ka tung uah hehpihsiam in, nang hon ngai hi ung. Zingsang tengin ka thahatna uh hi inla, mangbatni-in ka hotdamna uh hi in. 3 Na aw ging ah mite taai uh a, na dinkhiak chiangin, namte kithehzak uhi. 4 Namte aw, na gallak uh lungnek banga nekgaih hi a, khaupete'n a bawh duamduam banga mite'n tuate bawh duamduam hi. 5 Tangtawn Toupa, tung sanga teeng ahih manin, tawisangin om a, ama'n dika vaihawmna leh diktatna-a Zion dingsak hi. 6 Amah na damsung kingakna kip hi ding a, amah Hotdamna leh pilna leh theihna kiching mahmah hi ding hi. Tangtawn Toupa laudan siamna zaw gou manpha hi ahi. 7 En un, a mi hangsante uh kongzing khawnga pataua kikou uhi. Lemna thupua palaite khasetaka kap uhi. 8 Lamliante kitawn nawn lou a, khualzinmi om nawn lou hi. Kilemna thukhun kipalsat a, a theihpihte simmawha om uh a, kuamah kizahtakna om lou hi. 9 9 Gam sung dahin kuikuta, Lebanon maizum a, teemgawpta. Sharon lah gamdai-gamkeu suak a, Bashan leh Karmel tehte heuta hi.
Zion tunga Thukhenna Nai
10 Tangtawn Toupa'n: Tu'n thou ding hi'ng, tu'n tawisanga om ding hi'ng. Tu'n kitawisang ding hi'ng. 11 Naupaia vai paai ding chin a, buhpawl nauneiha neikhe ding na hi. Na naka hu in mei banga hon kangtum ding hi. 12 Mihonte lah kaang ding uh a, suang-al vui bang ding uh a, lingkung sattan banga kangtum ding uhi. Nou gamlapi-a omte'n ka thilhih za un. 13 Nou naichika omte'n ka vangletna thei un, chi hi. 14 Ziona mikhialte lauin mulkim uh a, Pathian biak limsakloute, liinna in manta hi. Mei tawh kua tengkhawm thei ding i hia? Tangtawna kuangden mei laka kua om thei ding i hia? kichi uhi. 15 Diktattaka gamta mi leh thudik gen mi, kinuaisiahna apan metna mudahte, golhgukna sang dinga khutzan lou mi, sisan suahna thu za nuam loua bilhum mi, gitlouhna en nuam loua mitsi mi, 16 tua bang mi ahi mun sangpite-a teeng ding a, mualtunga suangpi a bukna kulhpi hi ding. Nek ding an piak hi ding a, dawn ding tui kiching mu ding hi.
Kumpipa-thupi' Gam
17 Na mit in kumpipa, a kilawmna bangtaka mu ding a, na mit in gam gamlapi mu ding hi. 18 Na lungtang in mulkimna omkhinsa suutsuut ding a: Tua ulian makai koia omta ahia? Leiman gamman lapa koia omta ahia? Innsangte uk ulian koia omta ahia? chi ding hi. 19 Mi lauhuaite mu nawn lou ding chin a, theihlouh paua pau, pau tuama paute mu nawn lou ding na hi. 20 Zion, a hun bibi-a ankuangluina khawpi en in. Na mit in Jerualem leh galmuanga teenna, hihliin ngeilouh ding puanbuk mu ding hi. A puanbuk kaihna khauhualte zong kitat ngei lou ding hi. 21 Tua ah, Tangtawn Toupa eite adingin a Thahatpa hi ding a, mun lui zapite leh luitate luanna bang hi ding hi. Tua ah, a kaihna nei longneu pai lou ding a, long lian zong pai lou ding hi. 22 Ahang bel, Tangtawn Toupa eite adinga Thukhenpa hi a, Tangtawn Toupa eite adinga dan pepa hiven. Tangtawn Toupa i kumpipa hi a, amah eite hon hondam dingpa hiven. 23 Na long puanzak khaute kiphelsain kikhai a, long mung kikaikip lou a, long puanzak kizak lou hi. Tua hunin gallak sum tampi kihawm ding a, khebaite nangawn in gallak sum paw ding uhi. 24 Ziona teng kuamah in: Ka dam kei, chi lou ding a, tua-a teengte' khelhnate kingaidam ding hi.
Namte tunga Thukhenna
1 Nou namte aw, hon naih unla za un! Nou mihonte aw, limsak un! Leitung leh a sunga om khempeuh in za hen. Leitung khuavannuai leh a sung apan hong pawt khempeuh in za hen. 2 Namte khempeuh tunga Tangtawn Toupa lungkim lou a, a sepaihhonte uh tunga thangpai a, amaute thah dinga sep ding hi. 3 Thaha omte paihkhiak hi ding uh a, a luangte uh uihgawp ding a, a sisan uh mualte tunga luitui banga luang ding hi. 4 Van aksite khempeuh tuimang ding a, vaante zong laibu zial banga kizialkhe ding hi. Van aksite grepgui teh banga ke ding a, theipigah hut banga pulh ding hi. 5 Ka namsau in vaantea dawnkhamta, en in, Edom tung leh ka hamsia thuakte tunga thukhen dinga hong tungsuk ding hi. 6 Tangtawn Toupa' namsau sisana tawk neunuau hi. Sathaua tawk neunuau a, belamnoute leh kelte' sisan leh bawngtalte' kailing thaua dim hi. 7 Gam bawngtalte, amaute tawh pukkhawm ding a, bawngtal noute leh bawngtal liante tawh a gam uh sisana dim ding a, a leivui nangawn sathaua tawk ding hi. 8 Zion guma Tangtawn Toupa' phulak ni leh thukna kum hi ding hiven. 9 Edom luiguamte alkatara suak ding a, a leivuite kaat suak ding a, a gam zong alkatara meia kang suak ding hi. 10 Sunin zong zanin zong meikuang mit lou ding a, meikhu kitungtouden ding hi. A khang akhanga gam se ding a, kuama'n tawn ngei nawn peuhmah lou ding hi. 11 Gamdai simbute leh sakuhte'n tua gam tang ding a, simbupi leh va-akte zong teeng ding hi. Pathian in Edom gam sung teng kichimgawpa buai vengvungna khauzena teh ding a, loihgawpna ulum khau khai ding hi. 12 A miliante un kumpigam a chih theih uh bangmah nei lou ding uhi. Makai uliante khempeuh bangmahlou suak vek ding uhi. 13 A innpite uah lingkungte pou ding a, a kulhpite uah ling leh loupa pou ding a, sihalte leh gamdai Ostritte tenna suak ding hi. 14 Gamdai gamsate leh ngiate tua ah kituakkhawm ding uh a, sakelte kisam ding uh a, gamsa zantatte tua ah khawl ding uh a, tawlngakna-a nei ding uhi. 15 Tua ah simbu in bu sep ding a, a tui tha ding a, keuh ding a, a kha lim nuai ah a noute khoi ding hi. Tua-a musite zong kikhawm ding uh a, musite nupapa-a om ding uhi. 16 Tangtawn Toupa' laibuzial sung zong unla, sim un: Hiai thilte khat mah zong a kim lou om lou ding hi. Ama' kam mahmah in thu pia a, ama' Kha in amaute kaikhawm ding hiven. 17 Ama'n amaute tan guan a, a khuta teh detdeta hawmsak hi. Amaute'n tangden ding uh a, a khang a khanga tua-a teeng ding uhi.
Zion Thupi nading
1 Gamdai leh gamkeu lungnuam ding a, bangmah pou louhna mun lungnuam ding a, paklun ding hi. 2 Raws pak banga nakpitaka paklun ding a, lungnuama lasain kikou ding hi. Lebanon thupina ama' kianga kipe ding a, Karmel leh Sharon thupina zong kipe ding a, Tangtawn Toupa' thupina, i Pathian' thupi kilawmna mu ding uhi. 3 Khut hatloute hatsak unla, khuk zawte khauhsak un. 4 Lungtang lauthawngte kiang ah: Thahat suah unla, lau kei un! En un, na Pathian uh, phulakna tawh Pathian' thukna tawh hong pai ding. Amah hong pai ding a, noute hon hondam ding hi, chi un. 5 Tua hun chianga mittawte' mit vak ding a, nangongte' na vak ding hi. 6 Khebaite sazuk banga tawm ding uh a, pautheiloute ngaihtaka kikou ding uhi. Ahang bel, gamdai gamkeu ah tui phulkhe ding a, gamkeu ah luituite luang ding hiven. 7 Lei keu sa mahmah lah tuivung suak ding a, leikeu dangtak lah tuinakte suak ding a, sihalte teenna leh giahna munte ah loupa leh maute leh tuitahumte pou ding hi. 8 Tua ah lamlianpi pai ding a, Siangthouna Lamlianpi kichi ding hi. Misiangloute'n tua tawn lou ding a, tua Lampi tawn thei dinga thuneihna neitea hi ding hi. Mihai giloute tua ah vialpai pai lou ding hi. 9 Tua ah humpinelkai om lou ding a, sasialne peuhmah in tawn lou ding a, muhphakin zong om lou ding uh a, tatsa mite kiain tawn ding uhi. 10 Tangtawn Toupa' tatsate hong kik ding uh a, lungnuama kikouin Zion lut ding uhi. Tangtawn lungnopna khu ding uh a, kipahna leh lungnopna amautea hi ding a, dahna leh khawisatna taimang ding hi.
Tangtawn Toupa tunga Senakherib Kiletsakna
1 Kumpipa Hezekia' vaihawm kum, a kum sawmlelina ah Asuria kumpipa Senakherib in Judah gam khawpi kulhneite hong dou a, a la hi. 2 Tua khitin, Asuria kumpipa'n Lakhish apan sepaihhon tampi tawh a gamkuan sepaih makai khat Jerusalem khua ah kumpipa Hezekia kiang ah a sawl hi. Tua sepaihhon makai bel, Dil Saknunga tuilakna kiang, puansawpmi' gam zotna lampi ah a ding hi. 3 Kumpipa' innpi ukpa Eliakim, tua Hilkia' tapa tawh, laigelhpa Shebna tawh, laibu-a thil chiamtehpa Joa, tua Asaf tapa tawh, tua sepaihhon makai tuak dingin hong pai uhi. 4 Gamkuan sepaih makaipa'n amaute kiang ah: Hibangin Hezekia hilh un: Hiai kumpipa thupi, Asuria kumpipa'n thugen ahi. Ama'n: Na kimuanna koia na ngak ahia? 5 Pandan gelsiam mi leh sepaih' thahatna nei na kichi a, ahihhangin, a hawmpi gen na hi. Ka tunga na hel kua muang na hia? 6 Tu'n ngai in, Aigupta kumpipa muang na hi a, amah pumpeng chiangkhun kitamsa, mi tua ah kingai leh a khut sun ding a, liamsak ding ahi! Amah muangte khempeuh adinga Aigupta kumpipa Faro tua bang hi ahi. 7 Tangtawn Toupa ka Pathian uh muang ka hi uh, chi na hih leh, Hezekia in Judah leh Jerusalem kianga: Hiai maitam maia na biak ngeingei ding uh ahi, chi-a munsangte leh a maitamte a hihsiatsakpa amah hilou maw? 8 Tu'n hong pai inla, ka pu Asuria kumpipa kiang ah thuum in. A tung tuang ding na neih leh, sakol 2,000 hon pia ning. 9 Kangtalaite leh sakoltungtuangte hon pe dinga Aigupta muang na hih leh, ka pu' uliante laka neupen khat zong bangchi nawhkik zou ding na hia? 10 Tua baan ah, Tangtawn Toupa thu za loupi-a hiai mun dou a, hihgawp dinga hong kuan non sa-a hia? Tangtawn Toupa mahmah in hiai gam dou a, hihgawp dinga kei hon hilh aka hia? chi ahi, a chi hi. 11 Tua khitin, Eliakim, Shebna leh Joa gamkuan in sepaihhon makaipa kiang ah: Hehpihtakin, na silate Aram pau-in hon houpih in, theina hi ung. Kulhbaang tunga omte zakin, Hebru pauin hon houpih dah in, a chi uhi 12 Ahihhangin, tua sepaihhon makaipa'n a dawng a: Ka pu'n na pu uh leh noute kiang kia-a hiai thilte gen dinga hon sawl ahi-a hia? Hiai kulhbaang tunga tu, noute banga a ek uh ne a, a zun uh dawn dingte kianga zong gen dinga honsawl ka hi keia hia? a chi hi. 13 Tua khitin, tua sepaihhon makaipa a dingkhia a, Hebru pauin ngaihtakin thu a gen a: Kumpipa thupi, Asuria kumpipa' thu na ngai un! 14 Kumpipa' thugen hiai ahi: Hezekia kikhemzousak kei un Noute hon hukhe zou lou ding ahi. 15 Hezekia in: Tangtawn Toupa'n eite hon hukhe ngeingei ding ahi. Hiai khawpi Asuria kumpipa khut sunga piakkhiak hi lou ding ahi, chi mah leh, Tangtawn Toupa muang dingin kithuzawhsak kei un. 16 Hezekia' thu ngaikhe kei un. Asuria kumpipa' thu gen hiai ahi: Kei hon kilempih unla, kei kiang ah hong paikhia un. Hi leh, noute tek in noumau grepgui leh noumau theipi kung apan na ne chiat ding uh a, noumau' tuikhuk apan tui na dawn chiat ding uh. 17 Kei hong pai a,noumau gam bangbang, buh leh bal, zu leh sa tamna, an leh grephuante omna gama kon tut mateng, tua bangin na om ding uh 18 Hezekia in: Tangtawn Toupa'n eite hon hukhe ding ahi, a chih chiangin, kipikhialsak kei un. Nam khatpeuh' pathian in Asuria kumpipa khut sung apan ama' gam a hukhe ngeita-a hia? 19 Hamath leh Arpadte pathiante koia om ahi ua? Sefarvaimte' pathiante koia om ahi ua? Ka khut sung apan Samaria a hukhe ngei ua hia? 20 Hiai gamte' pathiante a kuapen in ahia ka khut sung apan a gam a hutkhiak theih ngeitaak? Tangtawn Toupa'n ka khut sung apan Jerusalem bang chi hutkhiak theih mahmah ding? chi ahi, a chi hi. 21 Ahihhangin, kumpipa'n: Amah dawng kei un, a chih manin, tua mite a dai dide uh a, a dawng kei uhi. 22 Tua kumpipa' innsung vaisaipa, Hilkia' tapa Eliakim leh laigelhpa Shebna leh laibupi gelhpa, Asaf tapa Joa, a puansilh kekpi utawh Hezekia kiang ah hong pai uh a, tua sepaihhon makaipa' thugente hong hilh uhi.
Isai in Hutkhiakna Thu Genkhol
1 Kumpipa Hezekia in hiai thu a zak takin, a puansilhte a botkek a, saiippuan silhin, Tangtawn Toupa' inn ah a lut hi. 2 A innsung vaisaipa Eliakim tawh, laigelhpa Shebna tawh, siampi makaite tawh saiippuan silhin Amoz' tapa kamsangpa Isai kiang ah a sawl hi. 3 Amaute'n amah kiang ah: Hezekia in: Tuni mangbat ni, saiha om ni leh zahlakna ni ahi, nausuah hun tungta a, a suahkhiak nading thahatna omlou bang ahi. 4 Sepaihhon makaipa a pu Asuria kumpipa'n Pathian hing simmawh dinga a sawlpa' thugente, Tangtawn Toupa na Pathian in na za ahi mai thei a, Tangtawn Toupa na Pathian in a thuzakte hangin amah a sal nuam mawh ding hia. Nutsiata om a khawsuaksunte adingin thumsak tanla, a chi, a vachi uhi. 5 Tua banga Kumpipa Hezekia' uliante Isai kiang hong tuntakun, 6 Isai in amaute kiang ah: Na pu uh kiang ah hibangin gen un: Tangtawn Toupa'n: Asuria kumpipa' silate'n kei hon gensiatna thu na zakte hangin lau het ken. 7 Ngai in! ama' sung ah kha gilou ka sawl dek a, ama'n thuthang khat a za ding a, a gam ah a kik ding. Keima'n ama' gam sung mahmah ah namsauin amah ka puksak ding, a chi, a chi hi.
Senakherib' Vauna leh Hezekia' Thuumna
8 Tua bangin, Asuria kumpipa'n Lakish a nuseta, chih tua sepaihhon makaipa'n a za a, a nungkik leh, kumpipa'n Libna khawpi a na dou laitak a tuak hi. 9 Senakherib in, Kush mi Tirhaka tua Aigupta kumpipa, amah dou dingin hong kuan, chih thuthang a za hi. Tua thu a zak takin, Hezekia kiang ah mi a sawl a: 10 Judah kumpipa Hezekia kiang ah: Na muan na Pathian in, Asuria kumpipa khut ah Jerusalem piak ahi kei ding, a chih chiangin, kikhemzousak ken. 11 Ngai in, Asuria kumpipate'n gam teng khempeuh tunga ahih dan leh a suksiat dimdem dan uh na zata vele, nang zong hutkhiakin na om tuan dia hia? 12 Ka pu ka pate'n a nahihmanthat, namte, a pathiante un a hukhia-a hia Gozan leh Haran leh Rezef leh Tel Asara om Eden mite' pathiante'n? 13 Hamath kumpipa, Arpad kumpipa, Sefarvaimte khawpi kumpipa, Hena kumpipa, leh Iva kumpipa koi ah a omta ua eita? chi un a chisak hi.
Hezekia Thumna
14 Hezekia in thupawte' khut apan laikhak a sang a, a sim hi. Tua khitin, Tangtawn Toupa' tempul ah a paitou a, Tangtawn Toupa' mai ah a vaphalh hi. 15 Tangtawn Toupa kiang ah a thum a: 16 Tangtawn Toupa Vanglianpen Israel Pathian, cherubte kikala teengpa aw, nang kia leitung kumpigam khempeuh tunga Pathian na hi. Lei leh van bawlpa na hi. 17 Tangtawn Toupa aw, na bil hon dawh inla, za in. Tangtawn Toupa aw, na mit hak inla, en in. Pathian hing simmawha selphou dinga Senakherib in thu hon khakte khempeuh ngai in. 18 Tangtawn Toupa aw, Asuria kumpipate'n hiai namte khempeuh leh a gamte uh a hihse vek uh, chih a dik ahi. 19 A pathiante uh Pathian hilou a, mihing khuta bawltawm sing peuh suang peuh ahih manin, meikhuk ah a khul uhi. 20 Tangtawn Toupa koute' Pathian aw, leitung kumpigam teng khempeuh in, Tangtawn Toupa aw, nang kia Pathian na hi, chih hon theih na dingun, tu'n a khut apan koute hon hukhia in, a chi hi.
Senakherib Puk nading
21 Tua khitin, Amoz' tapa Isai in Hezekia kiang ah thu a khak a: Tangtawn Toupa, Israel Pathian' thugen hiai ahi: Asuria kumpipa Senakherib tawh kisaia ka kianga na thuum manin, 22 Tangtawn Toupa'n amah doua a thugen hiai ahi: Zion' Tanu, Nungak Siangthou in nang hon simmawhin hon nuihsan hi. Jerusalem' Tanu in na taisiat mu-in a lu hon sinkhum hi. 23 Kua simmawha gensia kisa na hia? Kua dema na aw sangsak na hia? Kua tunga kisatheia mit tunghah na hia? Israel Misiangthoupa dem hi lou maw! 24 Na thupawte zangin Toupa simmawhna thu na sungvumta: Ka kangtalai tampi tawh mualsangte tung ah, ahi, Lebanon mual sangpente tung ah ka kaltou. A sidar sing sangpente, a meilahsing hoihpente ka phuk. A mualtung gamlapente leh a gammang hoihpente ka tawnsuak vek. 25 Gamdang ahte tuilehte ka tou, tua ah tuite ka dawn. Ka khenuai ah Aigupta tuite ka sikkang vek, na chi maw! 26 Nang za nailou maw? Tanglai peka ka sehsa, tanglai peka ka gensa, tu-a ka tangtunsak: Nang kulh muanhuaite suangtumlak suaksak na hi ve. 27 A mite un vangletna nei nawn lou uh a, mangbanga zahlakta uh a, gamlak loupate bangta uh a, loupa nou pou bang lei hita uh a, inntung vuma loupa pou tuung nisa haikeu pah bangta uhi. 28 Ahihhanga, ke'n lah na omna mun thei, nong kuan lam leh na chiah lam thei, ka tunga na heh dan zong thei hi'ng. 29 Ka tunga na heh mahmah man leh na zummawhna ka bil tungta ahih mana, ke'n na naka ka ngakuai baat ding ing a, na kama ka kamkaihna bulh ding ing a, nong kuanna lam mah-a hon kiksak ding hi'ng, chi ahi, a chi hi. 30 Hezekia aw, nang adinga chiamtehna hiai hi ding hi: Tukum amah-a pou ne ding chin a, a kum nihna ah tua apan pousawn ne lai ding na hi. A kum thumna ah bel, tuh ding chin a, at ding chin a, grephuan bawl ding chin a, a gah ne ding na hi. 31 Judah innkawte laka a khawsuaksunte' n nuai lama zung kha lai ding, tunglama gahsuah lai ding hi. 32 Ahang bel, Jerusalem apan khawsuak omsun khat hong pawt ding a, Zion Mual apan khawsuaksun pawl khat hong pawt ding hi. Tangtawn Toupa Vanglianpen' phatuamhgaihna in hiai tangtungsak ding hiven. 33 Tua bang ahih manin, Tangtawn Toupa'n Asuria kumpipa tawh kisaia a thugen hiai ahi: Amah hiai khawpi ah lut lou ding a, hiai ah thai zong khah lou ding hi. A mai ah lum tawh hong kilang lou ding a, a kimkot ah panmun lei sepsang sam lou ding hi. 34 Amah hong kuanna lam mah-a kik ding a, hiai khawpi sung lut lou himhim ding hi, chi-in Tangtawn Toupa'n phuang hi. 35 Keima' vang leh ka sila David vanga, hiai khawpi hu ding ing a, humbit ding hi'ng! chi ahi, a chi hi.
Senakherib Vuallelhna leh Sihna
36 Tua zanin, Tangtawn Toupa' Vansawltak a kuankhia a, Asuriate' giahphual ah mi 185,000 a that hi. Zingsanga mi hong thawhkhiak takun siluang ngenta a na om hi. 37 Asuria kumpipa Senakherib tua giahphual nusiain a nungkikta hi. Ninevi khawpi ah a kik a, tua ah a om kinkenta hi. 38 Ni khat bel, Nisrokh tempula a pathian a biak laiin, a tapate Andramelek leh Sharezer in namsauin amah a satlum uh a, Ararat gama taiin a suakta uhi. A tapa Esarhadon in a mun a luah a, kumpipain hong pang hi.
Hezekia' Damsung Kum Behlapna
1 Tua hun laiin, Hezekia hong china a, a si dektak hi. Amoz' tapa, kamsang Isai a kiang ah a vahawh a: Tangtawn Toupa' thugen hiai ahi. Ama'n: Na innsung om dingdan gel fel in, damkhe zou lou-a si ding na hi, chi ahi, a chi hi. 2 Hezekia baang lam ngain a kihei a, Tangtawn Toupa kiang ah a thuum a: 3 Tangtawn Toupa aw, na maia thutak leh lungtang teng khempeuh tawh muanhuaia ka nuntak dan leh, na mitmuha thilhoih ka hih dan thei gige in, a chi a, khasetakin a kap hi. 4 Tua khitin, Tangtawn Toupa' thu Isai kiang ah hong tung a: 5 Pai inla, Hezekia kiang ah: Tangtawn Toupa, na pa David' Pathian in hibangin a gen: Na thumna ka zata a, na khituite ka muta. Na damsung kum, kum sawmlenga in ka behlap ding, 6 Asuria kumpipa' khut apan nang leh hiai khawpi kon hukhe ding a, hiai khawpi ka vengbit ding, chi in, a chi hi. 7 Tangtawn Toupa apan chiamtehna hiai ahi: Tangtawn Toupa'n a gensa a tangtun ding. 8 Ngai in, Ahaz' kalbi-a liimliap tehna kalbi sawm dong ka lehkiksak ding, a chi, a chi hi. Tua bangin ni liimliap tehna kiamsa kalbi sawm a lehkiksak hi. 9 Judah kummpipa Hezekia a chinat a, tua chinatna apan a damkik nunga a gelh hiai ahi: 10 Ke'n: Ka damsung vanglaitakin misikhua kongpi ka lut dia hia? Ka damsung hun omlaite suhsakin ka om dia hia? chi ing a, 11 Tangtawn Toupa mu nawnlou ding ing a, mihing gam ah Tangtawn Toupa mu lou ding ing a, mihing en kha nawn lou ding ing a, leitunga teengte lak ah zong om nawn lou ding hi'ng. 12 Ka damsung ni beita, belamchingmi puanbuk phelkhiak banga ka inn phelkhiak hi a, kei apan lakmang hi ahi. Siamgan mi banga ka hinna zialkhia ing a, ama'n siambu apan hon satkhia hi. Sun leh zana ka hinna beisak na hi. 13 Zingphalvak donga kuhkaltaka ngak ing a, ahihhanga humpinelkai banga ka guhte hihtana, sun leh zan ka hinna beisak na hi. 14 Vakang hiam, phialphiah hiam banga haam ing a, vakhu banga thuum ing a, ka mit lah vanlam etna-a vaaita hi. Tangtawn Toupa aw, thuakgim hi'ng, kei hong huh in! chi ka hi. 15 Ahihhanga, ke'n bang gen thei ding ka hia? Ama'n ka kiang ah thu gen a, a gen bangbanga hih pah hi. Ka hinna ningkitela khagawpta ahih manin, tu'n zaw ka damsung teng awlkha khain vak khiankhian ta ning. 16 Toupa aw, hibang teng tawh, mihingte nungta uhi. Ka hinna zong hibang teng tawh nungta hi. Ka hinna hon bawlhoihsak chin a, hon hingsak na hi. 17 Tua bang lunggimna ka neih kei adinga hoih hi. Nang ka khelhnate khempeuh na nunga nusia sia chin a, ka hinna hukhia hi vechin. 18 Hankhuk in lah nang hon phat thei lou ding a, sihna in zong na phatla sa thei lou ding hi. Hankhuk sung tungsukte'n na muanhuaina lamen thei lou ding hi. 19 Tuni-a nang kon phat banga a hingdamte, a hingdama nungtate kia in nang hon phat thei hi. Pate'n a tate uh kianga na muanhuaina thu hilh uhi. 20 Tangtawn Toupa'n kei hon hondam ding a, Tangtawn Toupa' tempula la sa ding hi'ng, chi hi. 21 Isai in: Theipi hawng gawizan bawl inla, meimatum tuam in, amah a dam ding, a nachikhinta hi. 22 Hezekia in zong: Tangtawn Toupa' tempul ah ka hawhtou nawn ding, chih chiamtehna bang hi ding hiam? chi-in a na dongkhinta-a ahi.
Babulon apan Palaite
1 Tua laiin, Babulon kumpipa, Baladan' tapa Merodakh Baladan in Hezekia a chinatna leh hong damkikna thu a za a, laikhakte leh thawnpiak khat a khak hi. 2 Hezekia in palaite kipaktakin a na muak a, a gou koihkhawmna inn, a ngun leh kham, nektheih gimnamtuite leh sathau manphate leh a galvan khempeuh leh a gou koihkhawmna inna van omte khempeuh amaute a ensak hi. Hezekia in a innsung leh a kumpigam sunga omte khempeuh lah louh himhim khatbek a nei kei hi. 3 Tua khitin, kamsang Isai, Kumpipa Hezekia kiang ah a vahawh a: Tua mite'n bang gen uh ahia, koi apana hong hawh uh ahia? chi-in a dong hi. Hezekia in: Amaute, gam gamlapi Babulon apan ka kianga hong hawh uh ahi, a chi hi. 4 Kamsangpa'n: Na innpi sung ah bang a mu ua? chi in a dong hi. Hezekia in a dawng a: Ka innsunga omte khempeuh a mu uh. Ka goute khempeuh laka amaute ka lah louh bangmah himhim a om kei, a chi hi. 5 Tua khitin, Isai in Hezekia kiang ah: Tangtawn Toupa Vanglianpen' thu na ngai in: 6 Ngai in, na innpi sunga omte khempeuh leh na pu na pate'n tuni mahmah donga a na kholkhawm teng khempeuh uh, Babulona a kipuakmang vek hun hong tung ding ahi. Bangmah kisiit lou ding ahi, Tangtawn Toupa Vanglianpen in a chi. 7 Tua baan ah, na suante pawl khat, na si leh na sa mahmah nang apan piang dingte kikaimang ding uh a, Babulon kumpipa' innpi sunga michilgehte suak ding uhi, a chi hi. 8 Hezekia in a dawng a: Tangtawn Toupa' thu na gen a hoih hi! a chi hi. Ahang bel, ama'n: Kei damsung teng beek muanna leh bitna om na lou ding hia, chi-a a ngaihsut man ahi.
Pathian' Mite Khamuanna
1 Noute' Pathian in: Khamuan un, ahi, ka mite khamuan un! chi hi. 2 Jerusalem kiang ah kamdamtakin gen unla, a sepgimna beita a, a mawhna kidamsakkhinta hi. A mawhnate thukna lehnihin Tangtawn Toupa' khut apan muta hi, chi-in hilh un. 3 Kikoupa' aw in: Gamkeu ah Tangtawn Toupa' adingin lampi bawlkhol unla, gamdai-gamkeu ah i Pathian ading lamlian tang bawl un. 4 Luikuam teng hihsang hi ding a, mual leh tangte hihniam hi ding hi. Lamkawite hihtang hi ding a, a phoklaite hihmam hi ding hi. 5 Tuachi-a, Tangtawn Toupa' thupina latsak hi ding a, mi khempeuh in tua mukhawm ding uhi. Ahang bel, Tangtawn Toupa' kam in genkhinta hiven, chi hi. 6 Tua aw in: Kikoukhia in! chi a, Ke'n: Bang gena kikou ding ka hia, ka chi hi. Tua aw in: Sa nei khempeuh loupa bang hi a, a kilawmna uh zong gampalak pakte bang hi lei hi. 7 Tua loupa vuai a, a pakte pulh hi. Ahang bel, Tangtawn Thuneipen in, kama hu-a tua mut hiven. Mihingte loupa leltak hi taktak hi. 8 Tua loupa vuai a, a pakte pulh a, ahihhanga, Pathian' thu bel kipden hi. 9 Ziona thu kipahhuai hon tun mi aw, mual sang tung ah kaltou in. Jerusalema thu kipahhuai hon tun mi aw, ngaihtakin kikou inla, lau ken. Judah gam khawpite kiang ah: Hiah na Pathian uh om, chi in. 10 En in, Toupa Tangtawn Pathian, ban thahat tawh hong pai a, a ban thahatin vai hawm hi. En in, a pahtakman tawi a, a ditna zong masuan hi. 11 Ama'n belamchingpa banga a belamte ching a, a banin belamnoute huai a, angpom hi. A noukaite damdamin pii hi. 12 Kua'n ahia tuite khut sunga teh a, vaan zong a khuta khapteh? Kua'n ahia leitung leivuite lawha teh a, mualte buukna-a buuk a, tangte selphala-a buuk? 13 Kua'n ahia Tangtawn Toupa' Kha' lungsim thei a, thuhilh mi-a pang a, amah thuhilh? 14 Tangtawn Toupa'n amah navaksak ding a kua ahia a dot a, kua'n ahia amah diktatna lampi hilh? Kua'n ahia ama' theihlouh sinsak a, ahihkei leh theihsiamna lampi lak? 15 Ngai in, namte lah tuibela tui mai khat taak bang lei hi a, buukna selphala-a leivui mai khat baang bang lei hi ahi. Ama'n zaw tuikulh gamte thil neuchik banga lik toua teh hi. 16 Lebanon singte thillat haltum nadinga kiching lou a, Lebanon gamsa khempeuh zong haltum kithoih nadinga ching lou hi. 17 Namte khempeuh ama' maia bangmah tham hi lou hi. Amah adinga a vuak sanga neu zaw lai uhi. 18 Pathian kua tawh teh mahmah ding na hia? Bang batpih ahi, chi mahmah ding na hia? 19 Khutsiam mi in milim sung a, khamsik sek mi in khamtuia luan a, ngun sik sek mi in ngun khainiangte-a zem hi. 20 Tua bangte nei zoulou-a zawnglua mi in, sing muattheilou teel a, khutsiam mi zongkhia a, a kitan lou ding suihthawh milim bawlsak hi. 21 Noute'n theilou maw? Noute'n zata lou maw? A chil apan hilh a omlou maw? Leitung kilamkhiak apana theisiam nailou maw? 22 Lei bem tunga tupa amah hi a, a tunga teengte khaupe bang lei hi uhi. Kua'n ahia vaante puan banga zak a, teenna ding puanbuk banga amaute zalh? 23 Ama'n kumpi tapate bangmahlou suaksak a, leitung thukhen mite mannabei suaksak hi. 24 Amaute a kisuan khit pheta, amaute a kipawi khit phetin, a kungte'n leia zung a khak ma-a amaute muat ding a, vuai ding uhi. Pingpei in amaute loupa keu banga mutmang ding hi. 25 Kei kua tawh hon teh ding na hia? Ka kimpih kua ahia? a Siangthoupa'n chi hi. 26 Daktou inla, vaante en in. Hiai thilte khempeuh kua siam ahia? Ama'n vaan aksite khat khata piikhia a, amaute a min minun sam hi. Ama' thahatna thupi leh ama' vangletna thahatna hanga a kim lou khat lei zong om lou hi. 27 Jakob aw, banghanga thu gen a, Israel aw, banghanga phun a, Tangtawn Toupa'n ka gamtatna mu kei, ka Pathian in ka ngetna ngaihsak kei, chi na hia? 28 Nang thei lou maw? Nang za lou maw? Tangtawn Toupa zaw, Tangtawn Pathian, leitung mong dong Siampa ahi. Amah tawi lou a, bah lou hi. A theihsiamna kuama'n suikhe zou lou ding hi. 29 Ama'n a tawite thahatna pia a, a bahte thahatna behlapsak hi. 30 Tuailaite nangawn tawi ding uh a, bah ding uhi. Tangvalte kisui ding uh a, puk ding uhi. 31 Ahihhanga, Tangtawn Toupa ngakmite'n zaw, thahatna thaksak kikkik ding uhi. Muvanlaite banga kha-a lengtou ding uhi. Taai ding uh a, bah lou ding, pai ding uh a, sawlsam lou ding uhi.
Pathian' Huhna
1 Nou tuikulh gamte aw, ka mai ah dai dide unla, namte'n a thahatna uh thaksak uhen. Hon naih uh henla, thu gen uhen. Thukhenna mun ah kikaikhawm ni. 2 Kua ahia suahlam apan mi tokthou a, diktatna-a nna sem dinga amah sam? Ama'n namte ama' khutsung ah pekhia a, ama' mai ah kumpite zougawp a, namsauin amaute leivui suaksak a, a thalphelin huihmut vai suaksak hi. 3 Ama'n amaute delh a, nidanga a tot ngeihlouh lampi ah bittakin paisuak hi. 4 Kua ahia a chil apan mite a khang a khanga samkhia a, hiai hih a, hih zouvek? Kei, Tangtawn Toupa, amaute a masapen apan a nanungpen tawh om keimah amah hiveng e. 5 Tuikulh gamte'n tua mu uh a, lau uhi. Lei mong dong lauin ling hi. Hon naih uh a, hong pai uhi. 6 Michih in a innveng huh a, a sanggampa kianga: Thahat suah in, chi hi. 7 Khutsiam mi in khamsik sekmi hanthawn a, seka sekmam mi in, seknuaiphaha siksekmi hanthawn a, a sikpeh thu gen a: A hoih e, chi hi. Ama'n tua milim a kilawi louh nadinga, a kilhna-a kilhkip hi. 8 Ahihhanga ka sila nang Israel, ka telsa nang Jakob, ka lawm Abraham' suan, 9 Lei mong dong apan hon la ing a, mun gamlapen apan hon sam ing a, na kiang ua: Noute ka telsa ka silate hon paaikhe lou hi'ng. 10 Lau kei un, hon ompih hi'ng, Lungke kei un, na Pathian uh hi ing. Hon hatsak ding ing a, hon huh ding hi'ng. Ka khut taklam diktatnain hon tungding ding hi. 11 Ngai un, noute hon dou dinga, lungsim nei khempeuh, maizum ding a, zahlaak ding hi. Bangmah suak lou ding uh a, nou hon sualte mangthang ding uhi. 12 Amaute zong mah le uchin, mu lou ding hi uteh. Nou hon sualte mu lou ding hi uteh. Na tung ua gal bawlte bangmah suak lou ding uhi. 13 Kei, Tangtawn Toupa, na Pathian un na khut taklam uh hon len ding hi'ng. Lau kei un, hon huh ding hi'ng, chipa kei hi'ng. 14 Jakob, nang tangteel lei, nang a neu Israel aw, lau ken, hon huh ding hi'ng, Tangtawn Toupa leh nang hon Tanpa, Israel' Misiangthoupa'n chi hi. 15 Ngai in, buhkhetna chiang thak a ha lian neia hon bawl ding ing a, mualte khen ding chin a, zansak ding chin a, buhsi suaksak ding hi teh. 16 Amaute khi ding chin a, huih in mutleeng ding a, pingpei in thehthaang ding hi. Nang bel, Tangtawn Toupa-a nuam ding chin a, Israel Misiangthoupa suang ding na hi. 17 A zawng leh gentheite'n tui zong uh a, tui om lou a, dangtaka a lei uh keugawp hi. Kei, Tangtawn Toupa'n amaute za ding ing a, Kei, Israel Pathian in amaute taisan lou ding hi'ng. 18 Mual gumgawtaak laka lui luangsak ding ing a, Luikuam lian leh za teng tuinakte-a luangsak ding hi'ng. Gamkeute-a tui vung suaksak ding ing a, gamkeute-a luinakte phulsak ding hi'ng. 19 Gamdai-gamkeu ah sidar singte leh akasia singte, Martil singte, oliv singte suan ding ing a, gamdai-gamkeu ah tengtere kungte taksingte, meilah singte suan ding hi'ng. 20 Ahang bel, mite'n tuate mu a, Tangtawn Toupa' hih ahi, Israel Misiangthoupa' hih ahi, chih a muh chiang ua, a theih nading uh, a suutsuut ding uh, a theihsiam nading uh hiven.
Mannabei Milimte
21 Tangtawn Toupa'n: Na thu uh hon tun un, chi a, Jakob' Kumpipa'n: Na paulam pansante uh gen un, chi hi. 22 Ama'n: Thil hong tung dingte gen dingin na milimte uh hon lalut ve ua. Thil tung masate zong bang ahia, hon hilh le uh ake. Hileh, i ngaihtuah dia, a tawp nading i thei ke. Ahih kei leh, thil hong tung dingte hon hilh le uh ake. 23 Tunung thil om dingte hon hilh le uchin, pathiante na hina uh, chih thei ding ka kei ua. I lungzin nading uleh i laukhawm nadingun, thil khat beek, a hoih hi-in a hoihlou hita leh, hih ve ua. 24 Bangmah lou sanga neu zaw hi uteh, na nasep uh mannabei hi, noute hon telpa kihhuai. 25 Mallam apan mi khat tokthouta ing a, amah hong kuankhia hi. Ama'n ni suahna lam apan ka min sam ding a, ama'n kumpipate buanchil banga chil ding a, belvelmi in tungman a chil banga chil ding hi. 26 Hiai i theih nadinga a chiila kua'n hiai hon hilh ahia? Amah dik mah e, i chih nadinga kua'n genkhol ahia? Kuama'n hiai hon hilh lou a, kuama'n genkhol lou, kuama'n noute apan thu himhim za lou hi. 27 En un, hiai ah om uh, chi-a Zion hilh masapen kei hi ve'ng. Ke'n Jerusalem tunga tangthupha tun mi pia ka hi. 28 En ing a, kuamah mu lou, thuhilhna pe ding amaute laka kuamah om lou. Amaute ka dot chianga hon dawng ding kuamah om lou. 29 En un, amaute dik lou hi vek uhi! A nasepte un bangmah man lou, a milimte uh huih hi lei, buaina hi lei uhi.
Tangtawn Toupa' Sila
1 En un, ka tunding ka Sila, ka Teelpa, ka lungkimna mahmah ahi. Ama' tunga ka Kha koih ding ing a, ama'n namte kianga dika thukhenna tun ding hi. 2 Ama'n seel lou ding, kikou lou ding a, kongzing khawnga a aw sangsak lou ding hi. 3 Ama'n pumpeng kitam kuaitan lou ding a, meivak mitdek kuang liakliak hihmit lou ding a, muanhuaitaka thudika thukhenna omsak teitei ding hi. 4 Leitunga dika thukhenna a tunsak mateng, amah zong hihtan hi lou ding a, hihmit hi lou ding hi. Tuikulh gamte'n a dan lamen ding uhi, chi hi. 5 Hiai Tangtawn Toupa Pathian' thugen ahi Vante siam a, amaute zalhpa, leitung leh a sung apan pawtte khempeuh zalhpa, leitung mihingte naakna pepa leh leitunga teengte hinna pepa'n hiai gen a: 6 Kei, Tangtawn Toupa' diktatna-a nang hon sam ing a, na khut len ding hi'ng. Hon kem ding ing a, mite adinga thukhuna hon bawl ding ing a, namte adinga vaaka hon bawl ding hi'ng. 7 Tua bel, mittawte' mit vaksak ding leh saltangte suangkul apan suaktasak ding leh, miallaka tute, suangkul sungnungpen apan khahkhe dingin ahi. 8 Kei, Tangtawn Toupa ka hi, tua ahi ka min! Ka thupina midang kikoppih lou ding ing a, ka phatna zong milimte kikoppih lou ding hi'ng. 9 En un, thil masate omkhinta a, thil thakte tu'n phuangkhe ding hi'ng: A hong tun ma ua Nang hon hilh hi'ng, chi hi.
Tangtawn Toupa Phatna
10 Nou, tuipi-a paisukte leh a sunga omte khempeuh, tuikulh gamte leh tua-a teengte aw, Tangtawn Toupa' mai ah lathak sa unla, lei mong dong apan phatla sa un! 11 Gamdai-gamkeu leh a khawpite'n aw sangsak uhenla, Kedarte tenna gamte lungnuam uhen. Sela khawpi-a teengte'n la sa uh henla, mualdawn khawng apan kikou uhen. 12 Tangtawn Toupa kiang ah thupina pia uh henla, tuikulh gamte ah a phatna phuang uhen. 13 Tangtawn Toupa, mihatpa banga kuankhe ding a, galhatpa banga a phatuamngaihna tokthou ding a, galla sa-a, kikou ding a, a galte tunga vualzou ding hi.
Tangtawn Toupa' Thuchiam
14 Hun sawtpi pau loua om ing a, dai dide a, kideek ka hi. Tu'n numei nauvei banga kikou ding ing a, nak hawphawp ding ing a, khawisa ding hi'ng. 15 Tangte leh mualte hihse ding ing a, a sing leh loute keusak ding hi'ng. Luite tuikulhgam suaksak ding ing a, dilte kangsak ding hi'ng. 16 Mittawte a theih ngeilouh uh lamlian ahte pii ding ing a, tot ngei louh lampi ahte makaih ding hi'ng. Amaute' mai ah mial vaksak ding ing a, a phokna munte mamsak ding hi'ng. Amaute' anga hiai thilte hih ding ing a, amaute taisan lou ding hi'ng. 17 Milimte khawng muang a, milimte kianga: Ka pathiante na hi uh, chite bel maizuma hawlkika om ding uhi. 18 Nou nangongte'n za un, nou mittawte'n en unla mu un. 19 Ka sila lou kua ahia mittaw a, ka sawl ka thangkou hi lou kua ahia nangong? Ka khuta kipumpiakpa banga kua ahia mittaw? Tangtawn Toupa' sila banga kua ahia mittaw? 20 Ama'n thil tampi mu a, lah ngaihsak lou hi. A bilin ngai a, lah bangmah za lou hi.
Israel Thumaniouhna
21 Tangtawn Toupa zaw, diktatna hanga a dan letsak ding leh pahtawi ding a kipah lam hi ahi, 22 Ahihhanga, hiai nam zaw a kibuluhsa leh a kiloksa hi ahi. Avekun kawkhuk ahte awk uh a, suangkul ahte selmangin om uhi. A hukhe ding om louin mi'n lok uh a, mite' kaihmanga om uh a, kuama'n lah: Sawlkikta un, chi lou hi. 23 Na lak ua kua'n ahia hiai ngaikhe ding a, ahih kei leh hong tung ding huna hoihtaka ngaihsak ding? 24 Mi' kaihmanga om dinga Jakob pekhia kua ahia? Milokte' khuta Israel pekhia kua ahia? Tangtawn Toupa mah hi lou hia? Amah hi lou maw a tunga i khelhnapa? A lampi zui nuam kuamah om lou a, a dan zui nuam kuamah om lou hiven. 25 Tua bang ahih mana, Ama'n amaute tunga a hehna meikuang sungbua a, kidouna hiamgamna tun hi. Tua in meikuang banga amaute khuh a, hinapi-a theisiam tuan lou uhi. Amaute kangtum uh a, hinapi-a a lungtang ua ngaihtuah tuan lou uhi.
Israel Tanpa
1 Ahihhangin, Jakob aw, nang hon Siampa, Israel aw, nang hon bawlpa, Tangtawn Toupa'n tu'n hiai gen a: Lau ken, nang hon tanta hi'ng. Na mina hon sam ing a, keia hi na hi. 2 Tuite-a na paisuak chianga hon ompih ding ing a, luite-a na paisuak chianga, tui in hon tum lou ding hi. Meia na paisuak chianga kaang lou ding chin a, meikuang in zong hon hul lou ding hi. 3 Kei, Tangtawn Toupa na Pathian ka hi, Israel Misiangthoupa, nang hon Hondampa ka hi. Nang tat nadinga Aigupta pia ing a, Kush leh Seba, nang taanga pia hi'ng. 4 Ka mitmuha manpha mahmah leh pahtawi leh ka it na hih mana, nang kheekna dinga midangte pia a, na hinna taanga mite pia ka hi aw. 5 Lau ken, hon ompih ka hi. Suahlam apana na suante hon tonpih ding ing a, tumlam apana hon kaikhawm ding hi'ng. 6 Mallam kianga: Amaute hon pekhia in! chi ding ing a, simlam kianga: Amaute lentaang ken! chi ding hi'ng. Gamlapi apan ka tapate hon pii un, leimong dong apan ka tanute hon pii un. 7 Ka mina kilou peuhmah, ka thupi nadinga ka siam peuhmah, hon pii un. Amah ka siamsa ahi, amah ka bawlsa ahi, chi hi. 8 Mit nei mittawte hon piikhia un, bil nei nangongte hon piikhia un. 9 Namte khempeuh kikhawm uh henla, mite kikaikhawm uh hen. Amaute laka kua'n ahia hiai genkhol a, thil masate koute kianga gen thei? Amaute'n: A dik ahi, a chih theih nadingun, amaute' dikna thu theihpih ding theihpih mite hon piikhia uh hen. 10 Tangtawn Toupa'n: Noute ka theihpihte na hi uh, kei non theih ua, non up ua, amah ka hi, chih na theihsiam nadingun, ka teel ka silate na hi uh. 11 Kei, kei mahmah Tangtawn Toupa hi ing a, kei loungal Hondampa dang om lou hi. 12 Ke'n lakheta ing a, hondamta ing a, phuangkheta hi'ng. Na lak ua ompen gamdang pathian hilou a, keimah mah hi ka hi, chih hon theihpih noute na hi uh, chi-in phuang hi. 13 Ahi, tanglai ni apanin, keimah amah ka hi. Kuama'n ka khut apan hukhe thei lou, ka sepsa kua'n phei thei ding eita? chi lai hi.
Pathian' Zahngaihna
14 Tangtawn Toupa, nang hon Tanpa, Israel Misiangthoupa'n hiai gen a: Noute hangin Babulon ah mi sawl ding ing a, a kisaktheihpih uh longte-a Babulonte khempeuh galtaia vakvaisak ding ka hi. 15 Kei Tangtawn Toupa, na Misiangthoupa, Israelte Siampa, na Kumpipa ka hi, chi hi. 16 Tangtawn Toupa, tuipi tunga lamlian sialpa, tui thukpitak tunga lampi sialpa, 17 Kangtalai leh sakolte kaikhepa, sepaihhon leh a huh dinga sawlbehte tawh, tua laia lumkhawmsak a, thoukhe nawn lou dinga bawlpa, amaute meivak phita banga hihmit a, mutmitpa'n hiai gen a: 18 Thil masate mangngilh unla, tanglai thilte ngaihtuah nawn kei un. 19 Ngai un, ke'n thil thak hih ding hi'ng. Tu'n dawnkhetou ding a, na thei kei ding ua hia? Gamdai-gamkeua lamlian khung ding ing a, gamdai-gamkeua luite, luangsak ding hi'ng. 20 Gamsate'n kei hon pahtawi ding a, sihalte leh simbute nangawn in kei hon pahtawi ding hi. Ahang bel, ke'n a dawn ding uh, ka teelsa ka mite dawn ding gamdai-gamkeua luite luangsak hivengin. 21 Keimah adinga ka bawl hiai mite hi uh a, kei hon phat dinga ka bawlte hi uhi.
Israel Muanhuailouhna
22 Hinapi-in, Jakob aw, kei hon sam lou chin a, Israel aw, kei hon chimtaak na hi. 23 Ka maia haltum kithoih nading belamte hon tawi lou chin a, kithoihna-a hon pahtawi lou hi teh. An thillatte ngena puakgik hon guan lou ing a, gimnamtuite ngena hon tawisak lou ka hi. 24 Dangka-a kawltu hon leisak lou chin a, kithoihna thillata zong hon pahtawi lou hi teh. Na khelhnate ua tunggikna hon tun zawsop chin a, na tatsiatnate ua hon tawlgawpsak hi teh. 25 Kei, keimah mah ka hi, keimah vanga na tatleknate nulmangpa. Na khelhnate theigige nawn lou ding hi'ng. 26 Thil paisate hon theihpih inla, kikumkhawm ni. Diktansaka na om nadingin, na thu hon tun in. 27 Na pubul in khial a, na taanga thugente ka tunga talek uhi. 28 28 Tua bang ahih mana na tempul ua makaite zahlaksak ing a, Jakob hamsethuaka koih ding ing a, Israel maimawksak ding hi'ng.
Israel tunga Pathian9 Vualzawlna
1 Hinapi-in, ka sila Jakob aw, ka teelsa Israel aw, tu'n ngai in. 2 Nang hon bawlpa, sula nang hon sutuahpa leh nang hon huh dingpa Tangtawn Toupa'n hiai gen a: Ka sila Jakob aw, nang ka tatsa Jeshurun aw, lau ken. 3 Leikeu dangtak tunga tui sung ding ing a, leikeua luituite luangsak ding hi'ng. Na chisuan tunga ka Kha sungbaw ding ing a, na suante tunga vualzawlna sungbaw ding hi'ng. 4 Loupa muna loupa bangin leh tuiluang kianga muisumte banga dawnkhetou ding uhi. 5 Mi khat in: Kei Tangtawn Toupa'-a ka hi, chi ding a, midang khat Jakob mina kilou ding hi. Midang khat mah in a khut tunga Tangtawn Toupa'-a chi-a gelh ding a, Israel min kivawh ding hi, chi hi.
Pathian Dang Om lou
6 Tangtawn Toupa, Israel Kumpipa leh a Tanpa, Tangtawn Toupa Vanglianpen thugen hiai ahi Kei a masapen leh a nanungpen ka hi, kei loungal Pathian dang om lou hi. 7 Kei bang kua om ahia? Ama'n genkhia henla, phuangkhiain, ka mai ah luikhia hen. Tanglai ka mite ka tunding apan thil omte leh hong tung lai dingte phuang henla, ahi, thil hong tung dingte genkhol hen. 8 Lau henla, liing hen. Ke'n hiai thu na kianga phuangkhiain, sawtpi apan ka genkhol kei maw? Noute hon theihpihte na hi uh, kei lou Pathian dang a om-a hia? Om lou hiai, Suangpi dang om lou hi. Khat lei zong thei lou hi'ng, chi hi.
Milim Biak Haihuaina
9 Suihthawh milim bawl mi khempeuh bangmah hi lou uhi. Manpha a sakte uh mannabei ahi. Amaute theihpiha pangte mittaw hi uhi. Bangmah theilou, kizahlaksak lei hi uhi. 10 Kua'n pathian kibawl a, mannabei milim kisun ding ahia? 11 Ngai in, amah leh akibatpih zahlak ding uhi. Khutsiamte mihing lei hi uhi. Kikaikhawm uh henla, pangkhawm uhen. Lau ding uh a, maizumkhawm ding uhi. 12 Siksekmi'n taiteh tawiin, meiam lak ah sik golh a, sekin milim sek a, a bantha hat-in pum zap hi. A gilkial a, a thahatna bei a, tui ngawl a, taamsawl hi. 13 Singsiammi in khauin sing teh a, chiamtehnain chiamteh a, singnawtnain nawt a, tehna chiangin teh a, mihing limin bawl a, mihing kilawmna bangin zem a, a innsung ah tung hi. 14 Sidar singhiangte sat a, sesing leh tawsaw singte la a, gammang singte lak apan la a, taksingte suan a, vuahtuiin khangsak hi. 15 Mihing' singkhul dingin bawl a, tuate khul a, meilum awi hi. Mei tawh a, tanghou em hi. Tua singte mahin pathian bawl a, bia hi. Milim sui a, a mai ah kun hi. 16 Tua singte pawlkhat thuk ah khul a, anhuanna'n nei hi. Tua ah sa zong em a, vahtakin ne hi. Tua mei awi a: A! lum e, meikuang muta ing, chi hi. 17 Tua sing valtein milim pathian dingin kibawl a, a maia kunin bia a: Hon hukhia in, ka pathian na hi, chi zel hi. 18 Bangmah theilou uh a, bangmah theisiam lou uhi. Mitsi uh a, mu theilou uhi. A lungsim uh kikhakbing a, theisiam thei lou uhi. 19 Kuama'n ngaihtuah lou uh a, kuama'n theihna nei lou uh a, theihsiamna lah nei lou uhi. Kuama'n: A kimkhat singkhul dinga zang ing a, a amte-a tanghou em ing a, sa ema ne ing a, a vai tenga thil kihhuai bawl ding ka hi hia? Singtum vai maia kuna be ding ka hi hia? chi ngeilou hi. 20 Meivuin kivaak a, a lungtang khemzou a, lampialta hi. Amah lah kihukhe thei lou a: Hiai ka taklama om, zuauthu lei hi lou hia? chi thei tel lou hi, chi hi.
Israel Kimangngilh lou
21 Jakob aw, hiaite thei gige in. Israel aw, ka sila na hi. Nang kei hon bawlsa hi chin a, ka sila na hi. Israel aw, hon mangngilh ngei lou hiai ding hi'ng. 22 Na tatlekna meipi banga mutmangta ing a, na khelhnate meipi banga mutmang hi'ng. Hon tanta hi'ng, ka kiang ah hong kik in, chi hi. 23 Vaante aw, nuamin kikou un, hiai hihpa Tangtawn Toupa ahi. Lei nuainung zatak aw, nakpi-in kikou in. Nou mualte, gammangte leh singkung khempeuh aw, kipakin kikoukhia un. Tangtawn Toupa'n Jakob tanta a, Israela amah kipahtawi hiven.
Jakob Kitungdingthak Ding
24 Tangtawn Toupa, nang hon Tanpa, sula nang hon sutuahpa'n hiai gen a: Tangtawn Toupa, thil teng khempeuh Bawlpa kei hi veng. Vaante zalhkhepa, leitung zalhkhepa kei hi veng. 25 Kamsang takloute' chiamtehnate lawhsamsak a, aisan mite hehsak a, mipilte nungkiksak a, a theihnate uh haina suaksakpa kei hi veng. 26 A silate' thugen tangtungsak a, a sawltakte' genkholhnate tangtungsakpa kei hi veng. Jerusalem tungthu a: Kiluahkik ding hi, chipa kei hi veng. Judah khawpite tungthu a: Amaute kilamthak ding hi, a sesate kitungding thak ding hi, chipa kei hi veng. 27 Tui thuktak kianga: Kang in, na tuinakte kangsak ding hi'ng, chipa kei hi veng. 28 Kura tungthu-a: Amah ka belamchingpa hi a, ama'n ka kipahlam khempeuh hih ding a, ama'n Jerusalem tungthu-a: Kilam thak hen, chi ding a, tempul tungthu-a: A suangphumte kiphum ding hi, chi ding hi, chipa kei hi veng, chi hi.
Kura Pathian Khutzat
1 Tangtawn Toupa'n a thaunilhpa Kura kianga a gen hiai ahi: Kura, Tangtawn Toupa' thaunilhpa ahi, a khut taklam ka letpa, a maia namte ka zawhsak dingpa, kumpipate' galvan sut a, a maia kongte hong ding a, kongpite kikhaksak lou dingpa' kianga Ama'n: 2 Na maia pai ding ing a, lamkawite tangsak ding ing a, sumsan kongpite hihse ding ing a, kongpi kaihna sikzawlte hihtan ding hi'ng. 3 Na mina hon sam kei Tangtawn Toupa, Israel Pathian ka hi, chih na theih nadinga, miallaka om gamte leh mun simthama hauhna omte hon pe ding hi'ng. 4 Ka sila Jakob leh ka teelsa Israel hanga na mina hon sam a, nang hon thei kei mah lechin, pahtawina hon pia hi'ng. 5 Kei Tangtawn Toupa hi ing a, kuamah dang om lou hi. Kei lou Pathian dang om lou hi. Nang hon thei kei mah lechin, galvana hon hatsak ding hi'ng. 6 Tua bel, kei Tangtawn Toupa hi ing a, kuamah dang om lou hi. Kei lou kuamah dang om lou hi, chih nisuahna lam apan a tumna lam donga mite'n a theih nading uh ahi. 7 Ke'n khawvak omsak ing a, khawmial zong omsak hi'ng. Tuahphatna bawl ing a, tuahsiatna zong siam ka hi. Kei, Tangtawn Toupa'n hiaite khempeuh bawl ka hi. 8 Nou tung vaante aw, diktatna zusuksak un, meipite'n zusuksak hen. Lei nakpi-in kamka henla, hotdamna hong poutou henla, diktatna tawh poukhawmtou hen. Kei, Tangtawn Toupa'n hiai ka siamsa ahi. 9 Amah Siampa nangawn kinakpih mi tung gik hi! Amah leibel kitamkham laka bellei them leltak hilou maw? Bellei tang in belvelpa kianga: Bang ahia na vel? chi ding hia? Ahih kei leh, na khutsuak in na kianga: Khut nei kei teh, hon chi dia hia? 10 A pa kianga: Bang ta nei na maia? chi mi tung gik hi! Ahih kei leh, a nu kianga: Bang ahia na neihkhiak? chi mi tung gik hi! 11 Tangtawn Toupa Israel Misiangthoupa leh amah Bawlpa'n hiai gen a: Ka tapate tawh kisaiin thil hong tung dingte non dong maw? Ahih kei leh, ka khut nasep tawh kisaiin thu non pe ding maw? 12 Leitung Bawlpa kei hi ing a, a tunga mihingte Siampa kei ka hi. Ka khutte mahmah in vaante zalh a, aksihonte khempeuh thu pia ka hi. 13 Ka diktatna-a Kura tungding ing a, a lampite tangsak ding hi'ng. Ama'n ka khawpi lam thak ding a, tatna man pe loua, pahtakman pe loua, sala pimanga omte suaktasak ding hi. chi-a Tangtawn Toupa Vanglianpen in phuang hi.
Hotdamna Omsun Tangtawn Toupa
14 Tangtawn Toupa'n hiai gen a: Aigupta sepgim gahte leh Kushte' zuaksumte, Sabean mi, dinsangte' zuaksumte na kiang hong tung ding a, nanga hi ding hi. Amaute na nunga hong pai ding uh a, khainianga hensa-a hon zui ding uh a, na maia kun ding uhi. Na kianga thuum a: Pathian in nang hon ompih taktak a, mi dang om lou, Pathian dang om lou, chi ding uhi, chi hi. 15 Israel Pathian, Hondampa aw, nang leh nang kiseelpa Pathian hi taktak na hi. 16 Amaute zaw maizum ding uh a, avekun zahlakkhawm ding uhi. Milim khawng bawlte khempeuh zahlak ding uhi. 17 Tangtawn Toupa'n Tangtawn hotdamnain Israel hon hondam ding a, Tangtawna maizum lou ding uchin a, zahlak lou ding hi uteh. 18 Ahang bel, lei leh vaante sutuah a, Bawlpa leh Hihkippa'n alim amel beia bawl lou a, luah dinga bawl hi. Amah Tangtawn Toupa'n hiai gen a: Kei, Tangtawn Toupa ka hi, Pathian dang kuamah om lou hi. 19 Mun simthama lei mialna apan thu gen lou hi'ng. Jakob suante kianga: Amawknain hon zong un, chi lou hi'ng. Kei, Tangtawn Toupa'n thutak gen ing a, a dik phuangkhia ka hi. 20 Hong kikaikhawm unla, hong pai un, namte lak apan suaktate'n hon naihkhawm un. Suihthawh sing milim khawng vialpuak a, hon hondam theilou pathian kianga thumte'n bangmah theihna neilou uhi. 21 Thil hong tung dingte phuang unla, kikum un. Sawt lama hiai genkhol kua ahia? Tanglaia na genkhepa kua ahia? A genpa keimah, Tangtawn Toupa ka hi kei-a hia? Kei loungal Pathian dang om lou a, Pathian dik leh Hondampa, kei loungal kuamah dang om lou hi. 22 Nou lei mong donga teengte aw, kei hon en unla, hotdamin om un, kei Pathian ka hi, Pathian dang om lou ahi. 23 Keimah min kiloua kichiam ka hi. Diktatna-a ka kam apan thu pawtta a, hong kilehkik lou ding hi. Tua thu bel, khuk chih ka maia kun ding a, lei chih kichiam ding hi, chih hi ahi. 24 Tua bang mi in: Tangtawn Toupa ah diktatna leh hatna nei taktak hi'ng. Ama' kianga mite hong pai ding hi. Amah doute khempeuh bel zahlak ding uhi. 25 Israel suante khempeuh Tangtawn Toupa ah diktansak hi ding uh a, Amah suang ding uhi, chi ding hi, chi hi.
Hinnabei Milimte leh Ahing Pathian
1 Bel a kun a, Nebo boksuk a, a milimte uh ganhing leh gantate'n pua uh a, kangtalaite'n a dimtaka vialpuak uh a, gantate'n gimpih lei uhi. 2 Amaute kun a, boksukkhawm uhi. Vangik lah dawnzang thei tuan lou uh a, gamdanga sala lutkhawm vek uhi. 3 Jakob innkawte aw, ka thu ngaikhia un. A sibang Isael inkawte aw, sula na omlai uapan kon kep leh, na pian uapan kon vialpuakte aw, na vekun ka thu ngaikhia un. 4 Teekkuna, samkanga na om dongun, kei ka hi, keimah mah ka hi, noute hon don a, hon kem ding. Noute ka bawlsa hi uchin a, hon paw ding hi'ng. Hon paw ding ing a, hon hukhe ding hi'ng. 5 Kei kua tawh hon teh ding na hi ua? Kua tawh kikima hon bawl ding na hi ua? Kua tawh kibang hon chi ding na hi ua? 6 Kimkhatte'n a ip uapan kham suahkhia uh a, buknain ngun buk uhi. Kham siksekmi guai uh a, ama'n pathianin bawl a, bokin bia uhi. 7 Liangzanga kisuanin tua pua uh a, a omna ding mun ah tung uh a, tua ah omden hi. Tua mun apan kisuan theilou a, mi'n amah sam mah leh dawng thei lou hi. Lungkham mangbatna apan zong kuamah hondam thei lou hi. 8 Nou helhatte aw, hiai thei gige un, lungsima vomin lungsung ah kem un. 9 Nidang laia thil masate, sawtpi-a na omte thei gige un. Kei Pathian ka hi, kei loungal kuamah dang om lou ahi. 10 A bul apan a tawp nading gen ing a, tanglai hunte apan a tung nailoute gen hi'ng. Ka thiltup kipden ding a, ka ut bangbang hih ding hi'ng. 11 Suahlam apan sasialne vasa sam ing a, ka tupte semkhe dinga gamlapi apan mi khat sam hi'ng. Ka gensa tangtun ding ing a, ka sawmsa hih ding hi'ng. 12 Nou lungtang khauhte, diktatna gamlatte, ka thu ngaikhia un. 13 Ka diktatna naichika hon tun ing a, gamlapi-a om hi lou hi. Ka hotdamna zekai lou ding hi. Ka hotdamna Zion pe ding ing a, ka thupina Israel pe ding hi'ng, chi hi'ng.
Babulon Pukna
1 Kumsuk inla, leivui lak ah tu in. Nang Babulon Tanu Nungak siangthou aw, kumpitutphah tung hilouin, leilak ah tu in. Nang Kaldaite' tanu aw, dawng thinthen leh nou ngikngiak chih hi nawn lou ding na hi. 2 Buhgawina suang la inla, buh gawineel in. Na maikhuhna hawkkhia inla, na nik lemtou in. Na pheipi dawksain tuite ngap in. 3 Na vuaktanna dawk ding a, ahi, na zahmawh kimu ding hi. Ke'n phu lading ing a, kua mah hawi lou ding hi'ng. 4 Koute' Tanpa a min Tangtawn Toupa ahi. Amah Israel Misiangthoupa ahi. 5 Dai didein tu inla, miallak ah pai in. Nang Kaldaite' tanu aw, kumpigamte' kumpinu, chih hi nawn lou ding na hi. 6 Ka mite' tunga heh ing a, ka goutan hihniin ing a, Na khut sunga hon pekhia hi'ng. Amaute tunga zahngaihna suah lou chin a, a tate uh tunga hakkol gik suan na hi. 7 Nang lah: Kumpinu hiden ding ka hi, chi chin a, hiai thilte ngaihsak lou na hi. A tawpna ding zong thei gige lou na hi. 8 Tuin, nou bittaka om a, nuamtatte'n hiai za un. Kei lou kuamah dang om lou, meithai ngeilou ding hi'ng, tate zong suun lou ding hi'ng, na chi umaw! 9 Mitphiat kallouin hiai thil nihte hong tung ding a, ni khat thuin hong tung ding hi. Tate sunna leh meigong hihna a kimsipsipa hong tungkhawm ding. 10 Na gitlouhna muang a: Kuama'n hon mu kei, chi chin a, kei ka hi, kei lou kuamah dang om kei, na chih laia, na pilna leh theihna in hon kaimang ahi. 11 Tua bang ahih mana na tunga tuahsiatna hong tung ding a, beisak nading dan lah thei lou ding na hi. Lungkhamna in hon tum ding a, thoihdam thei lou ding na hi. Na theihkholh louh siatgawpna thakhata na tunga hong tung ding ahi. 12 Na tuailai hun apan na khop, na aisan siamna teng tawh, na mibumna teng tawh, tuin diang ve le, na lawhching khamawh ding hia, mulkimna na tun khamawh ding hia! 13 Thuhilhna na don zouzaite'n hon bahsak hiai hilou maw! Tuin na vaanlam thil suite, aksi etsiam, a kha a kha-a thugenkholte'n hon dinpih uh henla, na tunga thil tung dingte apan hon hukhe le uh ake! 14 En dih, buhpawl bang lei hi ding uh a, mei in kangtum ding hi. Meikuang apan amau leh amau kihukhe thei lou ding uhi. Meilum ding meihol am lei hi lou ding a, awithawh ding meikuang lei hi sam lou ding hi. 15 Na neu apan na seppih, na kisuanpih na sumsinte hibang lei hi ding uhi. Michih a khelhna lama vakmang ding a, kuamah nang hon hondam ding om lou ding hi.
Pathian Thupi nading: Israel Hihsiangthouna
1 Hiai ngaikhia un, nou Israel mina kilou Jakob inkawte aw, hiai ngaikhia un! Nou Judah khanggui apan khangkhia Tangtawn Toupa' min sialte, Israel Pathian samte Thutak leh diktatna tawh sem tuanloute aw, 2 Khawpi siangthou mi kichite, Israel Pathian muang kichite aw, ama' min Tangtawn Toupa Vanglianpen hi. 3 Ama'n: A chil apan thil masate sawtlam peka genkhol ing a, ka kam in genkhia a, hiaite theisak hi'ng. Thakhata gamtang ing a, ka gensate tangtung hi. 4 Noute na genhak dan uh thei hiveng. Na ngawng thaguite uh sik thagui hi a, na taltang uh lah sumsan hi ahi, chih thei hi'ng. 5 Sawtlam peka hiaite genkhol ing a, noute'n: Ka milimte un hiaite hih a, ka sing milimte uleh sik milimte un kipsak ahi, na chih theih louh nading ua hiai thilte hong tun ma-a noute kianga phuangkhinta ka hi ve. 6 Hiai thilte zata hi ve uchin, avekin en un. Ahi mah ahi, chi lou umaw? Tu apanin thilthakte na theih louh uh thil kiselte hon hilh ding hi'ng. 7 Tu-a kisiam hi uh a, sawtlam peka kibawl hi lou uhi. Noute'n: Ka thei mah ve ua, chi thei lou ding hi uteh. 8 Za ngei lou uchin a, theih zong theisiam lou hi uteh. Tanglai apan na bil un za thei lou, na lepchiah dan uh thei mahmah hi'ng. Pianchil apan mihel, chih-a om hita uteh. 9 En un, ka hehna ka min hanga zekaisak ing a, pahtawia ka om nadinga, na tung ua kidek hi'ng. Kon satkhiak louh nadinga, ka hehna kidek hi'ng. 10 Ngai un, ngun bang hi kei mah leh, hon hihsiangta hi'ng. Haksatna meipi-a hon enchianta hi'ng. 11 Keima' hanga, keima' hang lel-a hiai hih ding hi'ng. Banghanga ka min gensiata omsak ding ka hia? Ka thupina mi dang kuamah kikoppih lou ding hi'ng.
Israel Tatna Genkholhna
12 Jakob aw, ka sapsa Israel aw, ka thu ngaikhia un: Kei amah ka hi, a masapen ka hi a, a nanungpen ka hi. 13 Ka khuta leitung kingakna phum ing a, ka khut taklama vaante zalh ka hi. Thu pia ing a, dingkipkhawm vek uhi. 14 Na vekun hong kikhawm unla za un. Milimte laka a koipen in ahia hiai thilte genkhol? Tangtawn Toupa' teel a kizoppih in Babulon tunga a thiltup tangtungsak ding a, a bantha-a Babulonte dou ding hi. 15 Kei, kei mahmah in genta ing a, ahi, amah samta hi'ng. Amah hon tonpih ding ing a, a nasep lawhching ding hi. 16 Hon naih unla, hiai ngaikhia un: A chil apan, a sima thu gen ngei lou hi'ng. A tangtun laia tua-a kei om hi'ng. Tu'n Toupa Tangtawn Pathian in a Kha tawh kei hon sawl hi. 17 Tangtawn Toupa, nang hon Tanpa, Israel Misiangthoupa'n hiai gen a: Kei Tangtawn Toupa na Pathian ka hi. Nang adinga hoihpen hon Sinsakpa, na pai nading lampi-a hon Makaihpa kei ka hi. 18 Noute'n ka thupiakte limsak hi le uchin zaw, na lungmuanna uh luiluang bang hi ding a, na diktatna uh tuihual bang hi ding hiven. 19 Na suante uh sehnel banga tam ding a, na tate uh simsenglouh sehnel bang hi ding a, a min uh ka mai apan thaimanga om lou ding a, hihmanthata om lou ding uh hiven, chi hi. 20 Babulon nusia un! Babulon taisan un! Lungnop kikou aw tawh hiai phuang unla, lei mong dong ah gensawn unla: Tangtawn Toupa'n a sila Jakob tanta hi! chi un. 21 Ama'n amaute gamdai-gamkeua a pii laia dangtak lou uhi. Amaute' dawn ding Suangpi apan tui luangsak hi. Suangpi khisak a, tui kikhawhkhia hi.22 Tangtawn Toupa'n: Migiloute adinga lungmuanna om lou hi, chi hi.
Tangtawn Toupa Sila: Zentelte ading Vak
1 Nou tuikulh gamte aw, hon ngaikhia un! Gamlapi-a om namte'n bil hon dawh un! Tangtawn Toupa'n sul apan kei hon sam a, ka nu' sung apan ka min louta hi. 2 Ka kam namsau hiam banga bawl a, a khut liim nuai ah hon seel a, thaltang nawttet banga hon bawl a, a thalbawma hon seel hi. 3 Ka kianga: Israel aw, ka sila na hi. Nanga pahtawia om ding hi'ng, hon chi hi. 4 Ke'n bel: Amawkna-a semgim ing a, amawkna-a ka thatang pai ing a, phattuamna om lou hi. Hinapi-a ka tunga adik kihih ding Tangtawn Toupa' khuta om a, ka pahtakman ding ka Pathian khuta om hi, chi hi'ng. 5 Amah kianga Jakob piikik ding leh amah kianga Israel kaikhawm dinga, sul apan a sila-a hon bawlpa Tangtawn Toupa'n hiai gen ahi. Ahang bel, Tangtawn Toupa' pahtawia om ing a, ka Pathian, ka thahatna hiven. 6 Ama'n: Jakob behte tungding kik ding, Israel laka ka kepbitte piikik dinga, Ka sila na hih ding, nang adinga thil neu lua ahi. Namte adinga vaaka hon bawl ding ing a, lei mong donga hotdamna tun dinga hon bawl ding hi'ng, hon chi hi. 7 Tangtawn Toupa, Israel Misiangthoupa leh Tanpa'n namte' simmawhpa leh kihpa leh vaihawmte' silapa kianga: A muanhuaipa Tangtawn Toupa, Israel Misiangthoupa, nang hon Teelpa hanga kumpipate'n hon mu ding uh a, dingkhe ding uh a, makaite'n hon mu ding uh a, kuuna hon be ding uhi. Ama'n nang hon teelta hiven, hon chi hi.
Israel Tundingkikna
8 Tangtawn Toupa'n: Kon deihsakna huna hon ngaikhia ing a, hotdamna ni-a hon huh ka hi. Gamsung tungding ding leh, goutan sesate luahsakkik dinga, nang hon kem ding ing a, mite adinga hon bawl ding hi'ng. 9 Tuachi-a, saltangte kianga: Hong pawtkhia un! chi ding chin a, miallaka omte kianga: Suaktata un! chi ding na hi. Amaute'n lampi gei khawnga nek ding mu ding uh a, mual keusatea gantatna loupa mun mu ding uhi. 10 Gilkial lou ding uh a, dangtak lou ding uhi. Gamdai-gamkeu nisa in zong amaute hai lou ding hi. Ahang bel, amaute Lainatpa'n amaute pii ding a, tuiluang kiang khawnga pii ding hiven. 11 Ka mualte khempeuh lamlian suaksak ding ing a, ka lamlianpite khung ding ka hi. 12 En dih, hiaite gamlapi apan hong pai dingte hi uhi. Pawlkhatte mallam apan, pawlkhatte simlam apan, pawlkhatte Sinim gam apan hong pai ding uh, chi hi. 13 Vaante aw, nuamin kikou un! Leitung aw, nuam in! Mualte aw, kikoukhia un! Tangtawn Toupa'n a mite khamuanta a, gimna thuak mite lainatta hiven.
Pathian in Zion Theigige ding
14 Ahihhanga Zion in: Tangtawn Toupa'n kei hon taisanta a, Toupa'n hon mangngilhta hi, chi hi. 15 Nu in a nau nawine lai mangngilh thei ding hia? A sula piang tapa lainat lou thei ding hia? Mangngilh kha thei mah in teh. Ahihhanga ke'n zaw nang hon mangngilh lou ding hi'ng. 16 En dih, ka khutpek sung khuaka hon gelh ing a, na kulhbaangte kem gige hi'ng. 17 Na tapate kintaka hong pai uhi, nang hon hihsia a, segawpsakte nang apan paimang uhi. 18 Dakkhia inla, na kim na pam ah dakin en in, na tapate kikaikhawmin nang hon zuan uhi. A hina ka hin bangin, amaute kizepna banga silh ding chin a, mouthak banga kizepna-a nei ding na hi, chi-a Tangtawn Toupa'n gen hi. 19 Ama'n: Hihsiat leh taisansa hi mah lechin, na gam sekhinvek mah leh, na mite adinga neu lua hita ding a, nang hon nawmvalhte gamla mahmahta ding hi. 20 Na dah laia piang tate'n: Hiai mun koute adinga neu lua hi, teenna mun lianzaw hon pia in, chi-a na bilbula hon gen ding uhi. 21 Tua hun chianga, nang na lungsunga: Hiaite kua suan hi uh ahia? Kei lah tate suun hi ing a, sala kaih leh vakthap hi ing a, kua'n hiaite khoilian ahia, kei kia-a taisansa hi lou ka hi maw? Hiaite koi apan hong pai ahi ua? chi ding na hi, chi hi. 22 Toupa Tangtawn Pathian in: Ngai dih, namte khutvan ding ing a, amaute'n na tapate angpoma, na tanute liangkoua pua-a hon pii ding uhi. 23 Kumpipate pa-a nei ding chin a, kumpinute naudona nei ding na hi. Amaute leisi-a na maia kuun ding uh a, na khebula leivui liak ding uhi. Tua hun chianga, kei Tangtawn Toupa ka hi, chih thei ding na hi. Ahang bel, kei hon lamente maizum lou ding hiven, chi hi. 24 Galhatte' khut apan kua'n gallak sumte sutkhe thei ding ahia? Galmante khut apan kua'n salmatte sutkhe thei ding ahia? chi hi. 25 Ahihhanga Tangtawn Toupa'n: Galhatte apan salmatte suhkhiak hi ding a, mihatte apan gallakte suhkhiak hi ding hi. Ahang bel, nang hon doute douding ing a, na tate hondam ding hi vengin. 26 Nang hon nuaisiahte amau' sa mah nesak ding ing a, amau' sisan mah zu banga kham ding uhi. Tua hun chianga sa nei khempeuh in, Kei Tangtawn Toupa, na Hondampa leh na Tanpa leh Jakob' Mihatpa ka hi, chih thei ding uhi, chi hi.
Israel Lametpa, Silapa
1 Tangtawn Toupa'n hibangin gen a: Na nu uh ka koihkhiakna ka makna lai koi ahia? Ka leibatna a kuapen kiang ah ahia noute kon zuakkhiak? Na mawhnate uh hanga zuakkhiaka om uchin a, na tatleknate uh hanga na nu uh koihkhiak ahi ve. 2 Kei kong pai laia banghanga kuamah om lou hia? Kon sap laia banghanga kei hon dawng ding om lou hia? Nang hon tan dinga ka ban tom lua ahi-a hia? Nang hon hukhe dinga thahatna neilou ka hi-a hia? Ka kama ka tai leltaka tuipi kangsat a, luite gamdai-gamkeu suak a, tui om louh mana ngasate dangtaka si a, uih uhi. 3 Mialna-a van khuh ing a, a kikhuh nading saiip puan bawlsak hi'ng, chi hi. 4 A tawi mi thu-a ka hatsak theih nadinga, Toupa Tangtawn Pathian in sinsaksa lei hon pia a, zingsang tenga hon phawng a, sinsaka om mi banga ka zak theih nadinga ka bil phawnghalh hi. 5 Toupa Tangtawn Pathian in ka bilte vaaksak a, hel lah hel lou ing a, lehngat sam lou hi'ng. 6 Hon satte ka nungzang dawh ing a, ka biangmul phawite ka ngei dawh hi'ng. Zahlakna leh chilphihna apan ka maitang sel lou hi'ng. 7 Ahang bel, Tangtawn Toupa Pathian in hon huh ding a, zahlak lou ding hi'ng. Tua bang ahih mana, ka mai meisah suang banga taksak ing a, maizum lou ding hi'ng, chih thei hi'ng. 8 Kei hon diktangsakpa nai hi, kua'n hon hek ding ahia? Kimaituahin kikhing mah n'ung. Kua ahia kei hon hek? Hon maituah hen aw. 9 Ngai un, Toupa Tangtawn Pathian in hon huh taktak ding hi. Kei mawh hon tangsak ding kua ahia? Amaute puansilh banga lui ding uh a, siim in negai ding hi. 10 Na lak ua kua ahia, Tangtawn Toupa laudan siam a, a sila' thumang? Miallaka pai a, meivak nei lou mi in Tangtawn Toupa' min muang henla, a Pathian tung ah kinga hen. 11 Ngai un, nou mei tawh a, meisel kuang kibawl khempeuhte, na meivak taang uah leh na meisel vaak uah pai ve ua. Ka khut apan na tan ding uh hiai ahi: Na thuaka lum ding hi uteh.
Zion ading Tangtawn Hotdamna
1 Nou diktatna delh a, Tangtawn Toupa zongte'n kei' thu ngai un. Eukhiaka na omna uh suangpi en un. Tawhkhiaka na omna uh suangkhuuk en un. 2 Na pa uh Abraham en unla, nou hon neinu Sara en un. Amah ka sap laia amah khat kia hi a, amah vualzawl ing a, pungsak hi'ng. 3 Tangtawn Toupa'n Zion khamuan ngeingei ding a, a mun sesate khamuan ding hi. A gamdai-gamkeu Eden bangsak ding a, a gam sesate Tangtawn Toupa' huan bangsak ding hi. A sungalungnopna leh kipahna omsak ding a, lungdamthu genna leh ging kilawm om ding hi. 4 Ka mite aw, ka thu limsak unla, ka namte aw, hon za un: Kei apan dan pawt ding a, dika thukhenna, namte adinga khawvak hi ding hi. 5 Ka diktatna kinawhtaka hong nai a, ka hotdamna pawtkheta hi. Ka bantha in namte tunga thu khen ding hi. Tuikulh gamte'n lamena kei hong ngak ding uh a, amaute'n ka bantha muang ding uhi. 6 Vaante entou unla, nuailam en un. Vaante meikhu banga lengmang ding a, lei zong puansilh banga lui ding a, a sunga teengte thoupi banga si ding uhi. Ka hotdamna bel Tangtawna omden ding a, ka diktatna zong bei ngei lou ding hi. 7 Nou diktatna theite leh leitunga ka dan zuite aw, ka thugen ngai un. Mihingte selphouna lau kei un. Hon kougawpte zong lau kei un. 8 Ahang bel, siim in amaute puan banga negai ding a, nget in samul puan banga negai ding hi. Ka diktatna bel omden ding a, ka hotdamna in akhang akhanga daih ding hi, chi hi. 9 Tangtawn Toupa' banthahat aw, khanglou in! khanglou in! Thahatna silh in. Tanglaia bangin, tanglai khangtea bangin khanglou in! Rahab satzanpa nang hi lou maw? Tuipi gulpi liamsakpa nang hi lou maw? 10 Tuipi kangsakpa nang hi lou maw? Tui thukpi tuite kangsakpa nang hi lou maw? Tatsate galkah mateng tuipi thuktaka lampi bawlpa nang hi lou maw? 11 Tua bangin, Tangtawn Toupa' tatsate hong kik ding uh a, lungnopna kikou tawh, tawntung lungnopna khu-a Ziona hong pai ding uhi. Lungnopna leh kipahna ngah ding uh a, dahna leh khawisatna taimang ding hi. 12 Kei, kei mahmah nang hon khamuanpa hi ka hi. A sithei lei mihingte lau ding nang kua na hia? Loupa bang leia bawl mihing tapate lau ding nang kua na hia? 13 Nang lah vaante zalh a, leitung kingakna suangphum phumpa, nang hon Bawlpa Tangtawn Toupa mangngilh chin a, hihse dinga kisa nuaisiah mi' hehna nisima lau na hi. Tua nuaisiah mi' hehna koia om ahia? 14 Sala kaihmang, saltangte khahkhiak pah hi ding uhi. Suangkul sung khawnga si lou ding uh a, an zong tasam lou ding uhi. 15 Ahang bel, kei, amah Tangtawn Toupa, na Pathian uh, tuipi tokthoua, kihualsaka gingsak zuazuapa a min Tangtawn Toupa Vanglianpen ahipa ka hive. 16 Na kamsunga ka thute koihta ing a, ka khut limnuaia hon hum ka hi. Kei, vaante amau mun muna koih a, leitung kingakna suangphumte phum a, Zion kiang a: Noute ka mite na hi uh, chipa ka hi.
Pathian' Hehna Kidaaisak
17 Jerusalem aw, khanglou in! khanglou in! Nang Tangtawn Toupa' hehna nou-a dawnnu dingtou in, mite khamsak a, hoisak dongdong, tua noutung apan a khi nangawn dawnbeinu, 18 Jerusalem tapate khempeuh laka amah pii ding kuamah om lou hi. A khoilet a tapate laka amah khuta kai ding kuamah om lou hi. 19 Hiai thil nih na tung ah hong tungta -kua'n hon suun ding ahia? Siatna leh gamna, kial leh namsau hong tungta kuan hon hehnem ding ahia? 20 Na tapate bahta uh a, kongzing tenga puk uhi. Lenthaanga awk saza bang hi uhi. Tangtawn Toupa' thangpaihna leh na Pathian uh taihilhna nakpitaka thuak uhi. 21 Nou, gimna thuakte, nou zukham hi lou a, thangpaihna khamte'n hiai ngai un. 22 Toupa, Tangtawn Toupa na Pathian uh a mite gumpa'n hiai gen a: En un, khama na hoihoina nou uh na khut uapan lakheta hi'ng. Ka thangpaihna nou apan dawnkhamta hi uteh. Tu'n zaw dawn ngei nawn lou ding hi uteh. 23 Bok un, bok un, na tung uh siika pai ding hi'ng, chi a, noute hon gimsakte'n dawn zawta ding uhi. Na nungzang uh leilaka phah uchin a, kongzing tot ding banga amaute adinga bawlta hi uteh, chi hi.
Pathian in Jerusalem Tan
1 Khanglou in! Khanglou in! Zion aw, na hatnain kithuam in. Khawpi siangthou Jerusalem aw,na puansilh thupi silh in. Zeksumlouhte leh hihnita omte na sung ah lut nawn lou ding uhi. 2 Jerusalem aw, na leivui singkhia in. Thou inla, kumpitutphah ah tu in. Zion tanu saltang aw, na ngawnga khainiang apan suaktata in, chi hi. 3 Tangtawn Toupa'n hiai gen a: Manbeia kikhawngkhia uchin a, dangka loua tatkhiak hi ding hi uteh, chi hi. 4 Ahang bel, Toupa Tangtawn Pathian in hiai gen a: A chilin ka mite Aigupta-a khualtam dinga paisuk uh a, tua khita, a sanbeipi-a Asuria in amaute nuaisiah hi. 5 Tuin ke'n bang nei ka hia? Tangtawn Toupa'n chi hi. Ka mite lah manbeia lakmang hita a, amau tunga vaihawmte'n mawkbawl uh a, sun nitumtuma ka min gensiata om hi. 6 Tua hanga ka mite'n ka min thei ding uh a, tua hanga tua ni-a hiai genkholpa hi ing a, ahi, keimah ka hi, chih thei ding uhi, chi hi. 7 Tangthupha hon puak khete, mualtungte khawng ah kilawm hi nah e! Lemna thu tangkoupih a, tangthupha hon tunte, hotdamna tangkoupihte, Zion kianga: Na Pathian in vaihawm hi! chite mah. 8 Na galvilte'n aw suah uh a, lungnuamin kikoukhawm uhi. Ahang bel, Tangtawn Toupa Zion-a hong paikik chianga, amaute'n mita mu dirig uh hiven. 9 Nou Jerusalem sesate aw, aw suah unla, lungnuamin kikoukhawm un. Tangtawn Toupa'n a mite khamuan a, Jerusalem tankheta hiven. 10 Tangtawn Toupa'n namte khempeuh' muha a baan siangthou leemta a, leimong donga mi khempeuh in i Pathian' hotdamna mu ding hiven. 11 Paikhia un! Paikhia un! Tua mun apan paikhia unla, thil sianglou khoih kei un! Nou Tangtawn Toupa' beel pawte tua mun apan hong paikhia unla, kisiansuahta un. 12 Ahihhanga kinawhtaka paikhe lou ding uchin a, taikhiak thawh lou ding na hi uh. Ahang bel, Tangtawn Toupa na mai ua pai ding a, Israel Pathian na nung dai uh hi ding hiven.
Khelhna pua Sila
13 En dih, ka Sila piltaka thilhihin gamta ding hi. Tawisanga om ding a, sangpi-a liktouh leh nakpitaka pahtawia om ding hi. 14 Amah lamdang sate tampi pha hi. Midang teng sanga ama' mei hihsiatzawka om a, mihing lim leh mei pulou khopa kisegawp hi. 15 Ama'n nam tampi tunga sisan theh ding hi. Ama' hanga kumpipate gen ding theiloua kamsim ding hi. Ahang bel, amau kianga kihilh ngeilou thil mu ding uh a, a zak ngeilouh uh theisiam ding uh hiven.
1 Koute' thupuak kua'n um a, Tangtawn Toupa' khut kua kianga kihil ahia? 2 Amah lah ama' maia kung dawng dawnkhia, leikeua zung apan khangkhia bang hi a, lim leh mei kilawmna nei lou a, amah i muh leh i lunggulh nading lim leh mei kilawmna nei lou hi. 3 Amah kihin om a, mite' deihlouh leh nolh ahi. Dahnate thuakmi, lungkhamna thei mi ahi. Amah mute'n maihum a, a lehngatsan uh mi bang ahi. Amah kihhuai hi a, kuama'n tunget mahmah lou hi. 4 Ama'n i zawngkhalnate kisuan a, i dahnate paw taktak a, eite'n lah Pathian' saat, Pathian vuak leh thuaksak hisak hi hang. 5 Ahihhanga, i tatleknate hanga amah teia dawta om a, i khelhnate hanga nehtapa om hi a, lemna muanna hon tun tua gawtna ama' tung tu a, a liammate pansana hihdama om hi hang. 6 Eite i vekpi-a belam banga na vakmang hang a, michih eima lampi chiata na pialta i hi. Ahi a, Tangtawn Toupa'n ama' tunga eite khempeuh' tatsiatna ngata hi. 7 Amah nuaisiahin om a, gimna thuaksakin om a, hinapi-a, a kam ka lou hi. A kigawh nading muna belamnou kaih banga paipiha om a, belam a mulmette maia dai dide banga a kam ka lou hi. 8 Amah, nuaisiahna leh thukhenna tungtawna lakmanga om a, kua'n a suan a khak sui thei ding ahia? Amah mihing gam apan satkhiaka om hiven. Ahi, ka mite' tatlekna hanga amah sata om hi ahi. 9 Ama'n hiamgamna hih ngei lou himah leh, a kam apan zuauthu pawt ngei lou himah leh, migiloute tawh hankhuuk kikopsaka om a, a sih taka mihaute tawh vuikhawma om hi. 10 Hinapi-a, amah hihtapkhap ding leh dahsak ding Tangtawn Toupa' deihlam na hi ahi. Ahi, Tangtawn Toupa'n ama' hinna, Mawhna thoihna thillatin lan mah leh, ama' chisuan mu ding a, ama' nite sausak ding a, ama' khuta Tangtawn Toupa' deihlam lawhching ding hi. 11 Ama' hinna in a thuakgim nunga tua hinna khawvak mu ding a, lungkimta ding hi. Ka sila diktat in a theihna pansana mi tampi dik tangsak ding hi. Ahang bel, ama'n a tatsiatnate uh paw ding hiven. 12 Ama'n sih donga a hinna sungbua a, talekte tawh simkhawma a om mana, miliante laka tan guan ding hi'ng. Ama'n mihatte tawh gallak sum hawm ding hi. Ahang bel, ama'n mi tampite' khelhna pua a, tdlekte adinga thuumsak hiven.
Lemna Thukhun
1 Tangtawn Toupa'n: Nang numei chiing aw, nang ta nei ngeilounu aw, la sa in. Nang nauvei natna thuak ngeilounu, la sa inla, lungnuamin kikoukhia in. Ahang bel, pasal neinu tate sanga lungzuang nu' tate tamzaw hiven. 2 Na puanbuk mun keek inla, na tenna puanbuk tungzakte kaipalh inla, chiil ken. Na puanbuk kaihna khaute sausak inla, na khetphimte khauhsak in. 3 Ahang bel, taklam leh veilama kiphalh ding chin a, na suan na khakte'n namte suankhe ding uh a, a khawpi nutsiatte ua teeng ding uhi. 4 Lau het ken, maizum lou ding chin a, zahlak lou ding chin a, selphoua om lou ding na hi. Na tuailai maizumna mangngilhta ding chin a, na meigong zahlakna thei gige lou ding na hi. 5 Ahang bel, nang hon Siampa na pasal hi a, ama' min Tangtawn Toupa Vanglianpen hi a, nang hon Tanpa Israel Misiangthoupa hiven. Amah leitung buppi' Pathian chi-a kisam hiven. 6 Zi taisana lungkham leh nolhkik tuailai zi banga, Tangtawn Toupa'n nang hon samkik ahi, na Pathian in chi hiven. 7 Hun tomchik sung hon taisan ing a, ahihhanga, lainatna thuktaka hon piikik ding hi'ng. 8 Ka hehna sousan laitaka hun tomchik ka mai sel ing a, ahihhanga, Tangtawn chitna-a hon piikik ding ing a, na tunga lainatna nei ding hi'ng, nang hon Tanpa, Tangtawn Toupa'n chi hi. 9 Hiai zaw Noa damlaia, Noa tuichimpi in leitung khuh nawn lou ding hi, chi-a ka kichiam ni bang hi ahi. Tua banga na tunga heh-a hon tai ngeinawn lou ding hi'ng, chi-a tu-a kichiam ka hi. 10 Tangte kiliingin, mualte kisuan mah leh, nang kon itna muanhuai liing ngei lou ding a, ka lemna thukhun zong bei lou ding hi, chi-a, nang hon lainatpa Tangtawn Toupa'n gen hi. 11 Nang khawpi genthei, huihpi mut leh khamuanlouh aw, ngai dih, suangmanpha zehoihte-a hon lam ding ing a, safaiar suangmanphate-a na suangphum phum ding ka hi. 12 Rubi suangmanpha-a na tungzum bawl ding ing a, krustal suangmanpha-a na kongpite bawl ding ing a, na kulhbaangte suangmanpha etlawm ngena lam ding hi'ng. 13 Tangtawn Toupa'n na tate teng sinsak ding a, na tate' lungmuanna lian mahmah ding hi. 14 Diktatna-a phuhkip hi ding chin a, nuaisiahna'n hon gamlat ding hi. Lau ding bangmah nei lou ding chin a, laua diphawmna hawlmanga om ding hi. 15 Kuapeuh in nang hon dou leh, kei' hon dousak hi lou ding a, nang hon dou peuhmah na khutsunga hon pe ding hi'ng. 16 Ngai dih, pumzap a, meihol amsak a, a nasepna van ding bawl, tua siksekpa bawlpa kei ka hi. Siatna tun dinga, hihse mi bawlpa kei ka hi. 17 Nang hon dou nading galvan kibawl peuhmah lawhching lou ding hi. Thukhenna-a na langpang kampau peuhmah seldong ding na hi. Hiai Tangtawn Toupa' silate' goutan hi a, a diktatna uh kei apan hi ahi, Tangtawn Toupa'n chi hi.
Dangtakte Sapna
1 Ama'n: Nou, dangtak khempeuhte aw, tuite ah hong pai un. Nou, dangka neiloute aw, hong pai unla, lei unla, ne un! Ahi, hong pai unla, grepzu leh nawitui dangka louin, manbeiin lei un. 2 An hiloupi-a bang dinga dangka pai a, vahna lou dinga banghanga tha pai na hi ua? Ngai unla, ka thu ngaikhia unla, thilhoih ne un. Na hinna uh thilhoihin taisak un. 3 Bil hon dawh unla, kei hon naih un. Na hin theih nadingun ka thu ngai un. Noute tawh kala Tangtawn thukhun David kianga itna zuaulou ka chiam khung ding ka hi. 4 En un, amah mihonte adinga theihpiha bawl ing a, mihonte' enkaipa kempa, leh makaipa-a sep ka hi. 5 Na theihlouh uh namte sam ding uchin a, noute hon thei ngeilou namte'n Israel' Misiangthoupa, Tangtawn Toupa na Pathian uh hanga hon zuan ding uhi. Ama'n noute hon pahtawita hiven, chi hi. 6 Muh baih dinga a om laiin Tangtawn Toupa zong unla, a nai laiin amah sam un. 7 Migilou in a gamtat tawpsan henla, midiktatlou in a ngaihtuahte tawpsan henla, Tangtawn Toupa kiang ah kik hen. Ama'n a tunga zahngai ding a, i Pathian kiang ah kik hen, ngaidam mahmah ding hi. 8 Ahang bel, ka ngaihtuahte lah na ngaihtuahte hi lou a, na lampite zong ka lampite hi lou hiven, chi-a Tangtawn Toupa'n phuang hi. 9 Lei sanga vante a sanzawk banga na lampite sanga ka lampite sangzaw a, ka ngaihtuahte zong na ngaihtuahte sanga sangzaw hi. 10 Vaan apan vuah leh vuk hong zusuk a, kiktou nawn loua lei buak a, sing leh lou pousak a, buhchi thehpa adinga chi pia a, a ne mi adinga an pia hi. 11 Tua banga ka kam apan thu pawt om ding a, amawkna-a ka kianga hong kilehkik lou ding hi. Ka deihlam tangtun ding a, ka sawlna san lawhching ding hi. 12 Lungnopna tawh kuankhe ding chin a, lungmuanna tawh piikhiak hi ding na hi. Tangte leh mualte'n na maia la sa ding uh a, gamlak singkungte khempeuh in khut beng ding uhi. 13 Lou lingnei taanga taksing pou ding a, khau lingnei taanga martil singkung pou ding hi. Tangtawn Toupa' minthansakna dinga, Tangtawn chiamtehna hi ding a, hihsiat hi lou ding hi.
Zentelte ading Hotdamna
1 Tangtawn Toupa'n hiai gen a: Dikin thukhen unla, diktatin gamta un. Ka hotdamna hong nai a, ka diktatna latsak hi pahta ding hi. 2 Hibanga gamta mi leh hiai lenkip mi, mi nunnuam hi ahi. Sabbathte ninsaklou a, thil gilou apan a khut veeng mi mah zong tua bang mi ahi, chi hi. 3 Tangtawn Toupa tawh kizom gamdang mi in: Tangtawn Toupa'n a mite lak apan hon pawsiah mahmah ding, chi kei henla, michilgeh in zong: Ngai in, kei zaw singkung keu hi ing, chi kei hen. 4 Ahang bel, Tangtawn Toupa'n michilgeh ka Sabbathte tang a, ka deihlam hihte leh ka thukhun lenkipte kianga, 5 ka tempul sung leh a kulhbaangte Slings amaute adinga tapate leh tanute sanga manphazaw, theihgigena khat leh min khat koih ding hi'ng. Tangtawna mang lou ding min amaute pe ding ing a, 6 gamdang mi, Tangtawn Toupa' nasem ding leh Tangtawn Toupa' min it ding leh, amah be dinga, Tangtawn Toupa tawh kizopnakip a kihente, Sabbath ninsakloua tangte leh ka thukhun lenkipte mah 7 ka tang siangthoua pii ding ing a, ka thuumna inn-a lungnopna pe ding hi'ng. Ka maitam tunga a haltum thillatte uleh kithoihnate uh sang ding hi'ng. Ahang bel, ka inn, namte khempeuh adinga thuumna inn kichi ding hiven, chi hi. 8 Israel gamdanga tangte kaikhawmpa, Toupa Tangtawn Pathian in: Hiai kaihkhawmsate bana adangte zong kaikhawm ding hi'ng, chi-a phuang hi.
Israel Makai Muanhuailoute
9 Hong pai un, gamlak gamsate khempeuh, gammang gamsate khempeuh hong pai unla negai un! 10 Israel galvilte mittaw hi uh a, avekun theihna tasam uhi. Mi ngak theilou uite hi uh a, lumsuk uh a, mang man uh a, ihmut haite hi uhi. 11 Ui gilkial duhgawlte hi uh a, vah ngei lou uhi. Theihsiamna tasam belamchingte hi uhi. Amau' lampi tek ah pial uh a, michih-in ama' meetna zong hi. 12 Hong pai un, zu hon tawi ding ing a, zukhauh dawnkhawm ding hi hang zingchiang lah tuni bang hi ding a, hoihzaw tham lai ding hi, kichi uhi.
Israel Milimbiakna
1 Midiktatte mangthang a, kuama'lungtang in ngaihtuah lou hi. Hehpihsiamte lakmanga om a, kuama'n lah thil hoihlou apan midiktat lakmang ahi, chih ngaihtuah lou hi. 2 Diktattaka gamtate lungmuanga om ding uh a, a sih chiang ua tawlngakna mu ding uhi. 3 Ahihhangin, nou aisansiamte, angkawmna tate leh kizuakte hiah hong pai un! 4 Kua mawkbawla kinei na hi ua? Kua simmawha leikha na hi ua? Helhatte' suante hilou na hi ua hia? Zuautheite' tate hilou na hi ua hia? 5 Tawsaw lak khawng leh singhiang nuai tenga pathian dangte kidelh uchin a, luikuam teng leh suangheng tenga na tate uh kithoihna-a lan hive uchin. 6 Luiguam suangmam laka milimte na tan uh hi a, ahi, tuate lei ahi na tan uh! Tuate' maia dawn thillat sung uchin a, an thillat lan na hi uh. Hiaite kitheihmawhbawla, kilungkimsak ding ka hi-a hia? 7 Mualsang tung tenga awng phah uchin a, tua lai maha kithoih dinga kuantou na hi uh. 8 Na kongkhak uleh na kongbiang liah khawng ua dawibiakna chiamtehna koih uchin a, kei hon taisana tua-a lupna puan hawk uchin a, kaltoua zapi-a hawk uchin a, a lupna uh na lunggulhte utawh kala thu khung uchin a, a vuaktanna uh enen na hi uhi. 9 Oliv thau tawh Molekh naih uchin a, na gimnamtuite uh tamsak semsem na hi uh. Na palaite uh gamlapipi-a sawl uchin a, noute lah gawtmun tungsuk na hi uhi. 10 Na gamtatnate uh tawlpih uchin a, hinapi a: Lamet ding om kei, chi tuan lou na hi uh. Na hatna uh thaksak uchin a, bahloua pang zel na hi uh. 11 Tua zaha na lau uleh, na mulkimna uh kua ahia, kei adia na muanhuai louh ua, hon zuau sana non theih gige louh ua, lungsunga zong na ngaihtuah louh uh? Ka daih dide gige hang hilou maw non lauh louh uh? 12 Na diktatna uleh na nasepte uh phuangkhe ding ing a, bangmah lawhtak tuan lou ding hi uteh. 13 Pataua na kikou chiangun, na kaihkhawm uh milimte'n hon hunkhe le uh ake! Ahihhanga amaute huih in mutmang vek ding a, nakvanga hu leltak in mutmang vek ding hi. Ahihhanga kei hon muangte 'n bel gam luah ding uh a, ka mual siangthou luah ding uhi.
Kisikte ading Khamuanna
14 Hichi'n kichi ding a: Bawl un, bawl un, lampi sial un. Ka mite lampi-a a kipaltheihnate uh hemkhia un, kichi ding hi. 15 Hiai Mitungnung, Tawisanga Ompa, Tangtawn Mi, Misiangthoupa, chi-a minlawhpa' gen ahi: Mun sang leh siangthoua teeng ing a, ahihhanga, thunuailutte' lungtang halhsak ding leh, kisik tuntunte halhthaksak dinga, kisik tuntunte leh thunuailutte kianga zong om ka hi. 16 Amaute ngawhden lou ding ing a, hehden sam lou ding hi'ng. Tua hi kei leh, ka maia mihing' lungsim tawlgawp ding a, ka siamsa ama' hinna bah kha ding hi. 17 A huaihamna khelhna hanga heh ing a, amah gawta heha ka maitang seel ing a, hinapi-a paupeeng taka om lailai hi. 18 A gamtatnate muta ing a, ahihhanga, amah damsak ding hi'ng. Amah pii ding ing a, amah leh lungkhamte khamuanna pekik ding hi'ng. 19 Israela lungkhama dahte' muka phatna gingsak ding hi'ng. Gamla leh naia omte adinga Muanna, muanna chi ding ing a, amaute damsak ding hi'ng, Tangtawn Toupa'n chi hi. 20 Ahihhanga, migiloute zaw, tuipi kilok daai dide theilou, ninpate leh buannawi phihkhia bang hi ahi. 21 Migiloute adinga lungmuanna om lou hi, ka Pathian in chi hi.
Pathian' Deihlam Anngolhna
1 Nakpi-in kikou inla, kidaam ken. Pengkul mut bangin na aw suah inla, ka mite tatlekna leh Jakob innkawte' khelhna hilh in. 2 Zon zaw nisima kei hong zong zel uh a, ka lampite theih kilawp bang uhi. Diktatna hih namte bang uh a, a Pathian uh' thukhennate taisan loute bang uh a, adika thukhenna hon ngen uh a, Pathian in amaute naih leh chih deih bang uhi. 3 Ahihhanga, ka anngolh uh mu lou na hi hia? Banghanga ka kingaihniam uh nang phawk lou na hia? chi uhi. Hinapi-a an na ngolh chiang ua, nou deihdan leia ngawl uchin a, na nasemte uh nesia hi ve uchin. 4 Ngai-un, na anngolh uh kinakna leh kiselna suak zel a, gilou kitum tuah na hi uh. Tuni-a noumau' ut bang leia an ngawl theilou dinga, tung lama na aw uh kizak ding zong, lamen thei lou ding na hi uh. 5 Hibang lei ahi maw anngolh ka deih, mihing adia ni khat kingaihniam lei maw? Pumpeng banga kunsuk lei maw? Saiip puan phaha vut laka lup lei maw? Tua bang ahi maw, Tangtawn Toupa' saantham anngolh ni na chih uh? 6 Ka deihlam anngolh ahih leh diktatlouhna khainiang suut ding, tanna hakkol phei ding, nuaisiahte suahtaksak ding, hakkol peuhpeuh hihtan ding hilou maw? 7 Gilkialte an piak ding, mizawng vakvaite, inn leh lou beite khawtuah ding, savuaka omte silhsak ding, na chi na sa mahmahte kilepsan louh ding hi lou maw? 8 Tua hi leh, phalvak banga na vak taangkhe ding a, na damna hong kilang pah ding hi. Tua chianga na diktatna na maia pai ding a, tua hun chianga Tangtawn Toupa thupina na nungdal hi ding hi. 9 Tua hun chianga na sapna Tangtawn Toupa'n hon dawng ding hi. Huhna ngena kikou ding chin a, ama'n: Hiah om ing, hon chi pah ding hi. Khuttala kawka, huatna kampau zanga nuaisiahna hakkol na paihkhiak aleh, 10 gilkial dangtakte adinga na kizatbei leh, nuaisiahte' taksap awng na huk leh, na vak miallak ah tang ding a, zanmialte zong sun nisat vanglai bang hi ding hi. 11 Tangtawn Toupa'n hon makaih gige ding a, gamkeua ama'n hon taisak ding a, na thahatna hon dimsak ding hi. Tui kham mahmah huan bang hi ding chin a, tuinak kang ngeilou tuikhuk bang hi ding na hi. 12 Na mite'n tanglaia sesa khuate lamthak ding uh a, a kumlui mahmah suangphumte phum thak ding uhi. Kulhpi Chimsa Tungdingthakpa leh Teenna Kongzing Puahthakpa, chih-a om ding na hi. 13 Tangtawn Toupa' kam in: Sabbath palsat lou dinga na khete na veen a, ka ni siangthou na ut bangbanga bawl lou dinga na kiveen leh, Sabbath kipahhuai ahi, na chih a, Tangtawn Toupa' ni siangthou zahtakhuai, na chih a, nang' utthu-a gamta lou a, tua ni na zahtak a, nang' ut bang leia gamta-a, thu namanlou na mawk gen kei leh, 14 tua hun chianga, Tangtawn Toupa-a lungnopna ngah ding chin a, ke'n gamsung mualsangte-a hon tuangtousak ding ing a, na pu Jakob gamluah gama taitaka hon vahsak ding hi'ng, chi hi,
Khelhna, Kiphuanna leh Tatna
1 Ngai dih, hon hondam theilou dinga, Tangtawn Toupa' ban tom lua hi lou hi. Za theilou dinga nangong lua hi lou hi. 2 Ahihhanga, na tatsiatnate un na Pathian uapan hon khenkhia a, na khelhnate un a mai liah a, hon za theilou hi. 3 Ahang bel, na khutte uh sisana niin a, na khutzungte uh mawhnain niin hi. Na mukte un zuau gen a, na leite un gitlouh thu gen hi. 4 Kuama'n dika thukhenna ngen lou a, kuama'n diktatna ngen lou hi. Thunamanlou muang uh a, zuauthu gen uhi. Thil gilou suangtuah uh a, khelhna gahkhia uhi. 5 Gul dekpak tuite opkeuh uh a, maimom len gaan uhi. A tui ne peuhmah si ding hi. A tui a kitap chianga gul hong pawtkhia hi. 6 Maimom lente puansilha kimang thei lou a, a sepsa ua kikhuh thei lou ding uhi. A thilhihte uh gilou a, a khut ua hiamgamna om hi. 7 A khete uh khelhna delha tai a, mawhneiloute' sisan suah dinga kintai hi. A ngaihtuahte uh thil gilou hi a, a lampi ua siatna leh manthatna dim hi. 8 Lungmuanna lampi thei lou uh a, a lampi ua dikna om lou hi. Amau adinga lamkawi kibawl uh a, tua lampi zui peuhmah in lungmuanna mu lou ding hi.
Khelh Kiphuanna
9 Tua bang ahih mana, dikna in koute hon gamlat a, diktatna in hon banpha lou hi. Khawvak zong ung a, ngai in, mialna vive om hi. Khawvak zong ung a, Mialsah laka pai hi ung. 10 Mittaw banga, baang zut ung a, mitbei banga pai nading maimai hi ung. Suntang lai nangawna kisui ung a, mial laka pai bang hi ung. Mihatte laka misi bang hi ung. 11 Vompi banga ham vomvom ung a, vakhu banga thuum hi ung. Dikna zong ung a, om lou hi. Hotdamna zong ung a, batphak hi lou hi. 12 Na maia ka tatleknate uh tam a, ka khelhnate un hon mawhpaih hi. Ka tatleknate un hon ompihden a, ka tatsiatnate uh thei hi ung. 13 Tangtawn Toupa tunga talek leh zuau gena, ka Pathian uh pialmangsana nuaisiahna leh helna gen ung a, lungsunga zuauthu paai ung a, genkhia hi ung. 14 Dikna kiheimang a, diktatna gamlapi-a om hi. Thutak konglaia kia a, diktatna hong lut thei lou hi. 15 Thutak muhphaka om lou a, thil gilou taisante lah a thuak lama pang uhi.
Zion Tanpa
Tangtawn Toupa'n dika thukhenna om lou hi, chih mu a, lungkim lou hi. 16 Ama'n en a, kuamah om lou, kuamah a kaala palaia thuumsak ding mi omlouh lamdang sa lua hi. Tua bang ahih mana, amah adinga ama' bantha maha hotdamna kibawl a, ama' diktatna maha amah kitungding hi. 17 A diktatna awmphawin silh a, hotdamna siklukhu khu a, phulakna puansilhin nei a, phatuamngaihna puanakpi-in silh hi. 18 Ama'n amaute a thilhih bang ua thuk ding a, a langte tunga thangpaihna, a melmate tunga thukna tun ding a, tuikulh gamte thuk sipsip ding hi. 19 Tumlam apan mite'n Tangtawn Toupa' min lau ding uh a, suahlam apan mite'n a thupina zahtak ding uhi. Tuikhang lian banga meima hong kuan chianga, Tangtawn Toupa' Kha in amah doua taimangsak ding hi. 20 Zion ah Tanpa hong tung ding a, Jakob inn sunga tatlekna kisikte tunga hong tung ding hi, Tangtawn Toupa'n chi hi. 21 Tangtawn Toupa'n: Kei ka hih leh, amaute tawh kala ka thukhun hiai ahi. Na tunga ka Kha om leh, na kama ka koih ka Thu in tu apan Tangtawnin na kam a nuse kei ding a, na suante leh a suansawnte uh kam zong a nuse kei ding, Tangtawn Toupa'n a chi, chi hi.
Zion Thupina
1 Thou inla, taangkhia in, na vak hong taangta hi! Tangtawn Toupa' thupina na tunga hong suakta hi. 2 En in, mial in leitung khuh a, mial sahpi in mite khuh hi. Ahihhanga, Tangtawn Toupa na tunga hong suakta a, a thupina na tunga hong kilangta hi. 3 Namte'n na vak hon zuan ding uh a, na vak taangpha hong suaka kumpipate hong pai ding uhi. 4 Dakkhia inla, na kim na pam en in. Mi khempeuh paikhawm uh a, nang hon zuan uhi. Na tapate gamlapi apan hong pai uh a, na tanute bankaihin hong pai uhi. 5 Tua hun chianga mu ding chin a, kipaka na mai taang ding a, lungtang nuama phudut dut ding hi. Hauhnate tuipi tungtawna hong kipuak ding hi. 6 Sangawngsautein na gam dim ding a, Midian leh Efa apan leh Sheba apanin khamsik leh gimnamtuite puain hong pai ding uh a, Tangtawn Toupa phatna phuang ding uhi, 7 Kedar' belamhonte khempeuh na kianga hong kikaikhawm ding a, Nebaioth belamtalte'n na nna sem ding uhi. Ka maitam tunga amaute sang ding ing a, ka tempul thupi kilawmsak ding hi'ng. 8 Hiai meipi banga lengte leh, vakhu a bu zuana leng banga lengte kuate ahia? 9 Tuikulh gamte'n hon mitsuan uh a, Tarshish longte hong makai uh a, Tangtawn Toupa na Pathian, Israel Misiangthoupa tawisang dinga gamlapi apan na tapate uh ngun leh kham tawh hon pua uhi. Ahang bel, ama'n nang hon pahtawita hiven. 10 Gamdang mite'n na kulhbaang lamthak ding uh a, a kumpipate un na nna sem ding uhi. Heh-in hon sat mah leng, deihsaka na tunga zahngaihna hon nei hi'ng. 11 Namte' hauhnate hon puakkhiak theih nading uleh, a kumpipate uh kizuia hon pii theih nading ua na kongpite kihong gige ding a, sun leh zana kikhak ngei lou ding hi. 12 Na nasemnuam lou nam leh kumpigam mangthang ding a, tua namte hihsiat dimdema om ding uhi. 13 Lebanon' thupina na kianga hong pai ding a, taksing, meilah singte saipres singte'n ka mun siangthou zem ding a, ka khe' sikna mun thupisak ding hi'ng. 14 Nang hon nuaisiahte' tapate na maia hong kun ding a, nang hon simmawhte khempeuh na khebula bok ding a, Tangtawn Toupa' khawpi Israel Misiangthoupa' Zion hon chi ding uhi. 15 Kuamah tot ngeilouh, taisansa leh muhdah hi mah lechin, Tangtawna kisaktheihpih leh akhang akhanga lungnopna-a hon bawl ding hi'ng. 16 Namte' nawitui dawn ding chin a, kumpi' nawituiakivak ding na hi. Tua hun chianga, kei Tangtawn Toupa, na Hondampa, na Tanpa, Jakob' Mihatpa, ka hi chih thei ding hiteh. 17 Sumsan taanga kham hon puak ding ing a, sik taanga ngun hon puak ding ing a, sing taanga sumsan, suang taanga sik hon puak ding hi'ng. Na ukpipa adinga muanna bawl ding ing a hon ukpa adinga diktatna bawl ding hi'ng. 18 Na gam sunga hiamgamna kiza nawn lou ding a, na gamgi sunga siatna leh hihsiatna kiza nawn lou ding hi. Na kulhbaangte Hotdamna chi ding chin a, na kongpite phatna chi zaw ding na hi.
Pathian, A Mite' Thupina
19 Suna na vaak ding ni hi nawn lou ding a, khapi taang zong na vaak ding hi lou ding hi. Tangtawn Toupa mah na Tangtawn vaak hi ding a, na Pathian mah na thupina hi ding hi. 20 Na ni tum nawn lou ding a, na khapi zong kiam nawn lou ding hi. Tangtawn Toupa mah na Tangtawn vaak hi ding a, na dahna nite beita ding hi. 21 Pahtawia ka om nadinga, na mite khempeuh zong diktat hita ding uh a, Tangtawna leitunggam luahta ding uh a, keima' suansa hiang hi uh a, ka khut nasep hi uhi. 22 Na lak ua tawmpen zong 1,000 hong ching ding a, a neupen zong nam hat hong hi ding hi. Kei Tangtawn Toupa ka hi, kintaka hiai hih pah ding hi'ng, chi hi.
Hotdamna Tangthupha
1 Liangvaite kianga tangthupha gen ding a, Tangtawn Toupa'n thau hon nilh mana, Tangtawn Toupa' Kha ka tung-a om hi. Ama'n lungtang tamkhamte damsak ding, saltangte kianga suahtakna thu gen ding leh, suangkultangte mialna apan khahkhe ding, 2 Tangtawn Toupa' deihsakna kum thu phuang ding, i Pathian' phulakna thu phuang ding leh midahte lungmuan ding, 3 Ziona lungkhamte kianga vut taanga kilawmna pe ding, dahna taanga kipahna sathau pe ding leh, lungkham mangbatna taanga phatna puansilh pe dinga kei hon sawl hi. Tua bel, Tangtawn Toupa' thupina lah nadinga amaute ama' suansa diktatna Tawsaw singkungpi chiha om theih nading uh hi ahi. 4 Tanglaia sesa khawpite lam thak ding uh a, kitaisansa tanglai munte tungding thak ding uh a, khang tampi gimna khawpi sesate luah thak ding uhi. 5 Melmak mite'n na belamhonte uh hon chinsak ding uh a, gamdang mite'n na loute uh hon khawhsak ding uh a, na grephuante uh hon kepsak ding uhi. 6 Noute bel, Tangtawn Toupa' siampite chiha om ding uchin a, i Pathian' nasemte chih-a om ding na hi uhi. Namte' hauhnate ne ding uchin a, a thupina uh suang ding na hi uh. 7 Ka mite'n a maizumna gun uh a lehniha pahtawina tang ding uh a, a zahlakna gun uh, goutan tangtuana lungnopna tang ding uhi. Amau gama a lehniha gouluahna tang ding uh a, Tangtawn lungnopna amau-a hita ding hi. 8 Ahang bel, kei Tangtawn Toupa'n dika thukhenna it ing a, kisuamna leh diktatlouhna hua hi'ng. Ka muanhuaina-a amaute Pahtakna pe ding ing a, amaute tawh kala Tangtawn thukhun khung ding hi'ng. 9 A suan a khakte uh namte laka phawk leh theih hi ding uh a, a suante uh michih laka theih hi ding uhi. Mite khempeuh in amaute zaw Tangtawn Toupa' vualzawl suanlekhakte ahi mahmah ve ua, chi ding uhi, chi hi. 10 Tangtawn Toupa-a nakpitaka nuam ing a, ka Pathiana ka hinna nuam hi. Mou nei dingpa puanhoih leh dialkhipa kizem a, mou ding zong van manpha-a a kizep banga, ama'n hotdamna puansilhte hon silhsak a, diktatna kumpipuan hon silhsak hiven. 11 Lei in lounoute dawnkhesak a, huan in khaichi a khankhiaksak banga Toupa Tangtawn Pathian in namte khempeuh' maia diktatna leh phatna dawnkhesak ding hi.
Zion'Min Thak
1 Zion diktatna phalvak banga a taankhiak mateng, a hotdamna meisel kuangpha a bat mateng, Zion hanga kamsim lou ding ing a, Jerusalem hanga daai maimai lou ding hi'ng. 2 Namte'n na diktatna mu ding a, kumpite khempeuh in na thupina mu ding a, Tangtawn Toupa' minphuah minthaka sap hi ding na hi. 3 Tangtawn Toupa' khuta thupina lukhu hi ding chin a, na Pathian' khuta kumpilukhu hi ding na hi. 4 Taisansa chih hi nawn lou ding chin a, na gam zong Loihsa chih hi nawn lou ding a, Hefziba chih hi zawta ding chin a, na gam zong Biula chih hi zawta ding hi. Tangtawn Toupa'n hon pakta ding a, na gam zong kitenpih hita ding hi. 5 Valnou in nungak siangthou a kitenpih banga, na tapate'n nang hon kitenpih ding a, mouneipa'n a mou a kipahpih banga, na Pathian in hon kipahpih ding hiven. 6 Jerusalem aw, na kulhbaang tung ahte galvil mite koih ing a, amaute a sun a zana tawlnga lou ding uhi. Nang Tangtawn Toupa' min lou mi aw, kamsim maimai ken. 7 Jerusalem a tunding mateng leh leitung' pahtawia a bawl mateng amah tawlngasak ken. 8 Tangtawn Toupa, a khut taklam leh a banthahatin kichiamta a: Na buhte na melmate an dinga pe nawn lou ding ing a, na sepsa grepzu thak gamdang mite'n dawn nawn lou ding hi. 9 A sema a atte'n ne ding uh a, Tangtawn Toupa phat ding uhi. Grep gah kaikhawmte'n mun siangthou huangsunga dawn ding uhi, chi hi. 10 Kongpite ah paisuak un, paisuak un! Mite adingin lampi sial un. Lamlianpi sial un, sial un! A suangte hemkhia unla, mite tung ah puanlap domsang un. 11 En in, Tangtawn Toupa'n leimong donga phuangta a: Zion' tanu kianga: En in, na hotdamna hong tung taktak dek, en in, a pahtakman a kiang ah om a, a nasepsa a mai ah om hi, chi in, chi hi. 12 Amaute Nam Siangthou, Tangtawn Toupa' Tatsate chiha om ding uhi. Nang lah Lunggulha Zonzon, Loih Nawnlouh Khawpi chiha om ding na hi.
Tangtawn Toupa' Thukhenna leh Hotdamna
1 Edom apan, Bozra apan, sandupa kidiah puan silha hong pai hiai kua ahia? puanaktual thupi silh a, a thahatna thupitak tawh kal hon suan hiai kua ahia? Keimah hi ing diktatna tawh thugenpa, hondam dinga hat hi ing, chi hi. 2 Banghanga na puansilh san dup a, na silh na ten grep chilna-a kidiah bang ahia? 3 Kei kia-a grepchilna khuk chil ing a, namte apan kuama'n hon ompih lou hi. Heha chil ing a, thangpaia pal ing a, a tui in ka puansilhte theh a,ka puan silhte ah baang hi. 4 Phulak ni ka lungtang ah om a, ka tatna kum hong tungta hiven. 5 En ing a, hon huh ding kuamah om lou a, kuama'n hon panpih louh lamdang sa hi'ng. Keima' bantha mahmah-a kei kihukhia inga, Ka thangpaihna in hon gamtangsak sak hi. 6 Heh ing a, mite chil ing a, ka thangpaihna dawnkhamsak ing a, a sisan uh lei tawh helsak hi'ng, chi hi!
Pathian' Zahngaihna
7 Tangtawn Toupa'n eite adinga thil hon hihsakte bangbanga, Tangtawn Toupa' zahngaihna leh phattuak a thilhihte gen ding hi'ng. Ahi, a zahngaihna leh chitna tampite bangbanga Israel innkawte adinga a thilhoih hih tampite gen ding hi'ng. 8 Ama'n: Amaute ka mite hi taktak uh a, ka tunga zuautat lou ding tapate hi uhi, chi a, amaute adinga Hondampa hong hi ahi. 9 Amaute' mangbatnate khempeuh-a amah zong mangbang a, a ompihna vansawltak in amaute hondamta hi. Ama'n a itna leh lainatna-a amaute tan a, tanglai nitea amaute domtoua pua hi. 10 Hinapi-a amaute hel uh a, a Kha Siangthou lungkhamsak uhi. Tua bang huna ama'n kiheisan a, a meima uh suak a, amah mah in amaute dou hi. 11 Tua khita a mite'n tanglai nite phawk uh a, Mosi leh a mite' damlai nite phawk uh a: A belamte chingpa tawh amaute tuipi kana pikhetoupa koia om ahia? Amaute' laka Kha Siangthou koihpa koia om ahia? 12 Mosi khut taklama a banthahatna thupi koihpa, Tangtawn minthanna a ngah nadinga amaute' maia tuipi kikhensakpa, 13 tui thukpi kana amaute piipa koia om ahia? Amaute gam awnga sakol tai Bang uh a kisui lou uhi. 14 Phaizanga ganhon paisuak banga Tangtawn Toupa' Kha in amaute tawlngakna pia hi. Minthanna thupitak na kibawl nadinga na mite na pii dan hi bang hi ahi.
Kisikna Thuumna
15 Vantung apan hon ensuk inla, na tenna mun, siangthou leh thupi apanin hon mu in. Na phatuamngaihna leh na thahatna koia om ahia? Na lungnemna leh na zahngaihna koute apan kaihkika omta hi. 16 Abraham in koute hon thei kei mah leh, Israel in koute hon sang kei mah leh, Tangtawn Toupa aw, tanglai apan Nang ka Pa uh leh ka Tanpa uh chih mina kilou hita na hi. 17 Tangtawn Toupa aw, banghanga na lampite apan hon vakmangsak a, kon zahtak ua kon lauh theih louh nading ua, banghanga ka lungtang uh khauhsak na hia? Na silate, na goutan namte hangin hong kik in. 18 Hun tomkha sung na mi siangthoute'n na goutan tang uh a, ahihhanga, tua na melmate'n na mun siangthou chilgawp uhi. 19 Koute bel tanglai apan nanga hi ung. Ahihhanga amaute zaw na uk ngeilouh na mina kilou ngeiloute hi uhi.
1 Na maia tangte a liin nadingin,vante hong le chinla, hong kumsuk le chin aw! 2 Mei in singkangte halkuang a, tui a sousak bang a, na melmate'n na min a theih nading leh, na maia namte a liin nadingin, hong kumsuk in. 3 Ka lamet phak louh uh thil mulkimhuaite na hih laia hong kumsuk chin a, na maia tangte-le-mualte liing hi. 4 Amah ngak mi adinga gamtanga sem zel, nang kia loungal Pathian dang, kuama'n leitung pianchil apan thei ngei lou, bila zong za ngei lou, mita zong mu ngei lou uhi. 5 Kipaktaka a dik a tanga gamta mi, na lampite thei gige mi, huh dinga delh zel chin a, ahihhanga, na tunga ka khelh zihzeh chiang ua, ngai in, nang heh na hi. Bangchi'n hotdama om thei mahmah ding ka hi ua? 6 Ka vekpi ua a sianglou mi bang hi ung a, ka diktatna khempeuh uh zong, puanse nin bang hi ahi. Ka vekpi ua singtehte banga vuaigawp ung a, ka khelhnate un huih banga hon lenmang hi. 7 Kuama'n na min sam lou, kuama'n nang letkip ding lungsima nei lou hi. Nang lah koute apan na mai sel chin a, ka khelhnate uh hanga hon teemgawpsak na hi. 8 Tua bang teng hinapi-a, Tangtawn Toupa aw, ka Pa uh hi na hi. Koute a tungman hi ung a, nang a belvelpa hi na hi. Koute khempeuh na khutsuak hi ka hi uhi. 9 Tangtawn Toupa aw, a kaan a valin heh kenla, ka khelhnate uh thei gige ken. Ngai in, koute khempeuh na mite hi ung, hon en in aw. 10 Na khawpi siangthoute khempeuh lawih suakta hi. Zion khawpi nangawn lawih suak a, Jerusalem nangawn kilawita hi. 11 Ka pu ka pate un nang hon phatna uh, ka tempul uh siangthou leh thupi mei in kang a, manpha ka sakte khempeuh uh segawpta hi. 12 Hibang teng nunga, Tangtawn Toupa aw, kidaam ding na hi-a hia? Dai dide-a, a kaan a vaala, hon gawt ding na hi-a hia?
Pathian Thukhenna Diktat
1 Tangtawn Toupa'n: Kei hon ngenloute kianga kilaak ing a, kei hon zongloute' muh-a om hi'ng. Ka min hon samlou nam kianga: Hiah om ing, hiah om ing, chi ing a, 2 nam genhakte lama sun nitum tuma ka ban zak ing a, amaute'n amau' lungsim suangtuah lam, lampi hoih lah hi hetlou zui uhi. 3 Amaute'n huan sung khawnga, kithoihnate lan a, teklei maitam tung khawnga gimnamtui hal a, ka maitanga hon tawngheh gige uhi. 4 Han lak khawnga tu uh a, zankhua khua-a ngak uhi. Voksa peuh ne uh a, sa sianglou bela tuihuan uhi. 5 Kihem in, hon naih ken, nang adinga siangthou lua hi ung, chi uhi. Tua bang mite zaw, ka nakvanga meikhu dik khak leh sun nitum tuma meikuang hi ahi. 6 Ngai dih, ka maia hibanga gelhsa-a om hi: Dai dide-a kamsim nilouh lou ding hi'ng. A kim sipsipa thuk ding hi'ng. A angsung mahmah ua thuk ding hi'ng. 7 Noute' khelhna leh na pu na pate uh khelhnate hon thuk ding hi'ng. Tang tung khawnga kithoihna hal uh a, mual tung khawnga hon tawng uh a, a thilhihsate uh a pheitung ua akim sipsipa tehin thuk ding hi'ng, chi-a Tangtawn Toupa'n gen hi. 8 Tangtawn Toupa'n hiai gen a: Grep gah boma a tui a om laia, mite'n: Hihse kei un, a tui hoih om lai ahi, a chih bang ua, ka silate adinga hih ding hi'ng. Amaute hihmangthang sipsip lou ding hi'ng. 9 Jakob apan suante piangsak ding ing a, Judah apan ka mualte tang ding piangsak ding hi'ng. Ka chitel in luah ding a, ka silate tua ah teeng ding uhi. 10 Kei hon zong ka mite adinga Sharon belam hon tatna hi ding a, Akhor Phaizang zong ganhonte kualna hi ding hi. 11 Ahihhanga, noute bel Tangtawn Toupa' taisante, ka mual siangthou mangngilhte, Gad pathian adinga ankuangluite, Meni pathian adinga dawn thillat lante hi na hi uhi. 12 Kon sap laia hon dawng nuam lou uchin a, thu ka gen laia za nuam lou uchin a, ka mitmuha thil gilou hih uchin a, ka ngaihdah teel zaw na hi uh. Tuate hanga namsaua si dingte laka hon simkhawm ding ing a, thah dinga kun vek ding hi uteh, chi hi. 13 Tuabang ahih mana, Toupa Tangtawn Pathian in hiai gen a: En dih, ka silate'n ne ding uh a, noute bel gilkiala om ding hi uteh. En dih, ka silate'n dawn ding uh a, noute bel dangtaka om ding hi uteh. En dih, ka silate lungnuam ding uh a, noute bel maizum ding hi uteh, chi hi. 14 En dih, ka silate'n lungnuama la sa ding uh a, noute bel, dah lungkhama kapa mau ding hi uteh. 15 Ka teelte adinga na min uh hamsia hi dinga, nutsiat hi ding hi uteh. Ahang bel, Toupa Tangtawn Pathian in noute hon that ding a, a silate kianga min dang pe ding hiven. 16 Tua gama vualzawlna ngen peuhmah in, thutak Pathian' mina ngen ding a, tua gama kichiam peuhmah, thutak Pathian' mina kichiam ding hi. Ahang bel, lungkhamna paisate kimangngilhta ding a, ka mitmuh apan kiselmang ding hiven.
Vaan Thak leh Lei Thak
17 Ngai dih, van thakte leh lei thak siam ding hi'ng. Thil masate kithei gige nawn lou ding hi. Phawk zong kiphawk nawn lou ding hi, 18 Ahihhangin, ka thil siamthak dingte kipahpihin lungnuam gige un. Jerusalem lah kipahna mun dinga bawl ding ing a a mite zong lungnopna-a bawl ding hivengin. 19 Jerusalem tunga lungnuam ding ing a, ka mite-a nuam sa ding hi'ng. A sunga kahna leh mauna kiza nawn lou ding hi. 20 A sung-a naungek ni tawmchik dam chih om nawn lou ding a, teekkuun loua si zong om lou ding hi. Kum 100 dam zouloute khangdawnga si kichi ding a, kum 100 dam zouloute hamsethuak kichi ding hi. 21 Innte lam ding uh a, a sunga teng ding uhi. Grep huante bawl ding uh a, a gah ne ding uhi. 22 Midang' luah ding innte lam nawn lou ding uh a, midang' nek ding grephuante bawl nawn lou ding uhi. Ahang bel, ka mite' dam kum singkung dam kum zah pha ding a, ka teelte'n a khut nasep gah uh sawtpi ne ding uh hiven. 23 Amawkna-a semgim lou ding uh a, vangtah ding lei tate nei lou ding uhi. Ahang bel, amaute, a suante utawh Tangtawn Toupa' vualzawl mite hi ding hive-un. 24 A hon sap mama ua dawng ding ing a, a gen lailai ua za ding hi'ng. 25 Ngia leh belamnou gamtakhawm ding uh a, humpinelkai in zong bawngtal banga buhpawl neta ding hi. Ahihhanga, gulpi an bel leivui hi ding hi. Ka mual siangthou ah kihihna lou ding uh a, kihihmangthang lou ding uhi, chi-a Tangtawn Toupa'n gen hi.
Thukhenna leh Lametna
1 Tangtawn Toupa'n hiai gena: Vaan ka kumpitutphah hi a, lei ka khepek ngakna hi a, kei ading na inn lam ding koia om ahia? Ka khawlmun ding koilai hi ding ahia? 2 Hiai thilte khempeuh ka khut in bawl a, hong om hi lou maw? Tangtawn Toupa'n chi hi. Ahihhanga, ke'n manpha ka sak hiai mi ahi: Kingainiam leh lungtang kisik tuntun a, ka thu za-a liing mi. 3 Bawngtal gou mi peuhmah zaw, mihing that bang hi a, belamnou lan mi peuhmah ui ngawng hektan bang hi ahi. An thillat laan mi peuhmah vok sisan laan bang hi ahi. Gimnamtui lan mi peuhmah zong milim bia bang hi ahi. Amau' lampi tuam tek teel uh a, a hinna un a kihhuainate uh kipahpih hi. 4 Tua banga ke'n zong amaute saidan nasetak teel ding ing a, a lauhpen uh amaute tunga tungsak ding hi'ng. Ahang bel, ka sap chianga kuama'n hon dawng lou uh a, thu ka gen chianga kuama'n ngaikhe lou uh hiven. Ka mitmuha thil gilou hih uh a, ka ngaihdah lamlam teel uhi, chi hi.
Tangtawn Toupa'n Zion Diktan
5 Tangtawn Toupa' thu za-a liingte aw, a thu ngai un: Noute hon mudah a, ka min hanga hon hawlkhia na sanggamte un: Na lungnopna uh ka muh theih nadingun, Tangtawn Toupa pahtawiin om hen! chi uhi. Ahihhanga, maizumsaka om ding uhi. 6 Khawpi apan husa za un, tempul apan tua husa za un! A melmate thuk sipsippa Tangtawn Toupa' aw ahi! 7 A nauvei mama-a a nau suak hi. A nauvei natna hong tun mama-a tapa neikhia hi. 8 Hibang thil kua'n za ngei ahia? Hibang thil kua'n mu ngei ahia? Ni khat thuin gam khat a piang thei-a hia? Mitphiat kal leiin nam khat a piang thei-a hia? Hinapi-in, Zion in nau a vei pheta, a tate neikhe pah hi. 9 Nau suah hun tungsak napi-in, ka suakkhesak kei dia hia? Kei nau suakhesakpa'n sul ka bingsak dia hia? Tangtawn Toupa'n chi hi. 10 Jerusalem itte khempeuh aw, Jerualem lungnoppih unla, amah tawh kipakkhawm un. Amah suunte khempeuh aw, tu'n amah lungnoppihin kipak un. 11 Hon khamuanna nawi teepa tai ding uchin a, a thupina kichinna luanglet apan dawndawna nuam sa ding hi uteh, chi hi. 12 Ahang bel, Tangtawn Toupa'n: Ngai dih, luipi luang banga lemna muanna ama' kiang dong tungsak ding hi'ng. Namte' thupina luitui luang banga tungsak ding hi'ng. Tua hun chianga a angsunga kivaaka kipom ding chin a, a pheitunga tawmsaka om ding na hi. 13 Nu in a ta a khamuan banga hon khamuan ding ing a, Jerusalema khamuana omta ding hi uteh, chi hiven.
Pathian' Vaihawmna leh Lunghihlouhna
14 Hiai na muh hun chianga, na lungtang nuam ding a, loupa hing banga niim diidiai ding na hi. Tangtawn Toupa' khut a silate kianga latsak hi ding a, a melmate tunga bel a thangpaihna latsak hi ding hi. 15 Ngai dih, Tangtawn Toupa meikuang tawh hong pai a, a kangtalaite pingpei bang hi ahi. A hehna thangpaihna naseluain tung ding a, a taihilhna meikuang tawh ton ding hi. 16 Ahang bel, Tangtawn Toupa'n meikuang leh, mi khempeuh tunga namsaua thukhenna tun ding a, Tangtawn Toupa' thahte tam mahmah ding hiven. 17 Voksa peuh, zusa sa peuh leh thil kihhuai peuh nete laka om mi zuia, huan sung khawnga lut dinga kisiansuah a, kihihsiangte ahi, tuate mangthangkhawm vek ding uhi, chi-a Tangtawn Toupa'n phuang hi. 18 A thilhihte uleh a lungsim suangtuahte uh hangin kei kong pai dek a, namchih leh pau chih ka kaikhawm dek. Amaute hong pai ding uh a, ka thupina a mu ding uh. 19 Amaute lak ah chiamtehna khat ka tungkhe ding a, a lak ua dama khawsuaksunte pawl khat namte Tarshish, Pul, Lud, Tubal, Javan gam leh ka minthanna za nailou leh ka thupina mu nailou tuikulh gam gamlapi ah ka sawlkhe ding. Ludte bel thalkap siama minthang ahi uh. Namte lak ah ka thupina a phuang ding uh. 20 Amaute'n namte khempeuh lak apan na sanggamte khempeuh uh, Jerusalema ka mual siangthou ah Tangtawn Toupa maia thillat hi dingin hon paipih ding uh. Sakol tungte, kangtalaite, laangte, sabiltungte leh sangawngsaute tunga tuangsa-in hon paipih ding uh, Tangtawn Toupa'n a chi. Israelte'n, Tangtawn Toupa' tempula an thillatte bel siangthoua hon tawi bangun, amaute'n amaute hon tonpih ding uh. 21 Ke'n amaute laka pawl khat siampi dingin leh Levite hi dingin ka tungkhe ding, Tangtawn Toupa'n a chi. 22 Vaan thakte leh lei thak ka bawlte ka maia omden ding ahih bangin, na min leh na suante a omden ding uh, chi-a Tangtawn Toupa'n phuang hi. 23 Kha Thak khat apan Kha Thak dang, Sabbath khat apan Sabbath dang dongin mihing teng khempeuh hong paiin ka mai ah a kuun ding uh, chi-a Tangtawn Toupa'n gen hi. 24 Amaute a paikhe ding uh a, ka tunga helte' siluangte a en ding uh. A than uh a si kei ding a, amaute kang mei a mit kei ding a, Mihing teng khempeuh adingin kihhuai ahi ding uh, a chi hi.
1 Benjamin' gama Anathoth khua-a siampite laka khat Hilkia' tapa Jeremia' thugente hiaite ahi. 2 Judah kumpipa, Amon' tapa Josia' vaihawm kum, a kum sawmlethumna ah, Jeremia kiang ah Tangtawn Toupa' thu hong tung hi. 3 Tua bel, Jerusalem mite kaihmanga a om lai ua, Judah kumpipa, Josia' tapa Jehoiakim vaihawm sung leh Judah kumpipa, Josia' tapa Zedekia vaihawm kum, a kum sawmlekhatna, a kha ngana dongin zong a tung hi.
Jeremia Sapna
4 Tangtawn Toupa' thu ka kiang ah hong tung a: 5 Sula kon bawl ma-a nang hon theita ing a, na pian ma-a hon septuamta ka hi. Namte kianga kamsang khat hi dinga hon septa ka hi, a chi hi. 6 Ke'n: Ehe, Toupa Tangtawn Pathian aw, thugen siamlou ka hi, naupang chik lei ka hi, ka chi hi. 7 Ahihhangin, Tangtawn Toupa'n a min kiphuak thak ahi. ka kiang ah: Naupang chik lei ka hi, chi ken. Kon sawlnate peuhmah kiang ah na hawh ding a, kon thupiak peuhmah na gen ding ahi. 8 Amaute lau ken. Ke'n hon ompih ing a, hon hukhe ding ka hi, chi-in a phuang hi. 9 Tua khitin, Tangtawn Toupa'n khutin hon sawk a, ka kam a khoih a, ka kiang ah: Tu'n na kam ah ka thute ka koihta. 10 Ngai in, namte leh kumpigamte tunga thu nei a, bulkalh ding, phelgawp ding, hihmangthang ding, lumlet ding, lam ding leh suan dinga tuni-a hon sep ka hi, a chi hi. 11 Tangtawn Toupa' thu ka kiang ah hong tung a: Jeremia, bang na mu a? hon chi hi. Ke'n ka dawng a: Almon sing hiang ka mu, ka chi hi. 12 Tangtawn Toupa'n ka kiang ah: A diktakin na mu ve. Ka thu tangtunsak ahihna mu dinga ngak ka hi, a chi hi. 13 Tangtawn Toupa' thu a nihveina dingin ka kiang ah hong tung kik a: Bang na mu a? hon chi hi. Ke'n ka dawng a: Bel sou bulhbulh, mallam nungngata awn ka mu, ka chi hi. 14 Tangtawn Toupa'n ka kiang ah thu a gen a: Mallam apan siatna, gamsunga teengte khempeuh tunga kisungbaw ding ahi. 15 Ke'n mallam kumpigamte apan mite khempeuh sam dek ka hi, chi-in Tangtawn Toupa'n a phuang hi. A kumpipate uh hong pai ding uh a, Jerusalem kongpite lutna ah a kumpitutphahte uh tungkhe ding uh a, a umna kulhbaangte khempeuh umchipin Judah khawpite khempeuh hong dou ding uhi. 16 Kei hon nusia-a a gitlouh man uleh, pathian dangte' maia gim namtui a hal man uleh, a khutsuakte uh a biak man ua, ka mite tunga ka thukhennate genkhe ding ka hi. 17 Kiging in! Dingkhia inla kon thupiak peuhmah amaute kiang ah gen in. Amaute' mulkimsakin om ken. Tua ahih kei leh, ke'n amaute' maia hon mulkimsak ding ka hi. 18 Tuni'n, khawpi muanhuai kulhnei, sik khuampi leh sumsan kulhbaangin nang kon bawlta. Gamsung khempeuh douin, Judah kumpipate, a uliante, a siampite leh gamsung mite langpangin na ding ding. 19 Amaute'n nang hon dou ding uh a, ahihhangin, hon zou kei ding uh. Ahang bel, ke'n hon ompih ing a, hon hukhe ding ka hi, chi-in Tangtawn Toupa'n a phuang hi.
Israel in Pathian Taisan
1 Tangtawn Toupa thu ka kiang ah hong tung a: 2 Kuan inla, Jerusalem zakin gen inla: Na tuailaia na kipiakzawhna thei gige hi'ng. Mouthak bangin non it a, gamdai-gamkeu leh hai pawi louhna gam tawnsuakin non zui hi. 3 Israel bel Tangtawn Toupa adinga siangthou a, a haigah masapente hi ahi. Amah nawmvalhte khempeuh mawhtansak hi uh a, siatna in amaute delhpha hi, chi-in Tangtawn Toupa'n phuang hi. 4 Jakob inkawte aw, Israel inkuana behte khempeuh aw, Tangtawn Toupa' thupuak ngaikhia un. 5 Tangtawn Toupa' thupuak hiai ahi: Na pu na pate un keia diktatlouhna bang mu ahi ua, gamlapi-a kei hon pialsan uh? A mannabei milimte zui uh a, amaute zong mannabei hong hita uhi. 6 Amaute'n: Tangtawn Toupa, Aigupta gam apan hon piikhetou, gamdai-gamkeu bangmah omlouhna, gamsia leh guam lak, tui omlouhna leh mialna, kuamah tot ngeilouh leh kuamah teen louhna gama hon pii paisuakpa koia om ahia? chi-a kan lou uhi. 7 Gam hoiha, a gah leh a gama piang tam mahmah ne dinga, hon piilut ing a, ahihhanga, hong paia ka gam hihnin uchin a, ka goutan kihhuai suaksak hi uteh. 8 Siampite'n lah: Tangtawn Toupa koia om ahia? chi-a kan lou uhi. Dan saite'n lah kei hon mu thei lou uh a, makaite ka tunga hel uh a, kamsangte'n lah Baal thu-a thu gen uh a, a mannabei milimte zui uhi. 9 Tua bang ahih mana, noute mawhsakna hon nei hi'ng, na tate uh' tate' zong mawhtangsak lai ding hi'ng, chi-a Tangtawn Toupa'n phuang hi. 10 Tuipi zuia Kitim gam ah galkah unla, en unla, Kedar ah mi sawl unla, limtakin velsak un. Hibang thil om ngeita himhim hiam en un. 11 Nam khat in a pathiante kheng ngei hia? Hinapi-a pathiante bel hi het lou uhi. Ahihhanga ka mite'n a Thupina uh a mannabei milimte khenna-a nei uhi. 12 Vaante aw, hiai lamdangsain diphawm unla, mulkimin kiguih un, chi-a Tangtawn Toupa'n phuang hi. 13 Ka mite'n khelhna nih hih uhi: Kei tuihing nak hon nusia uh a, amau tuikhuk kitawh a, tuiching theilou tuikholna sesa kibawl uhi. 14 Israel, suak leh sal hisa-a piang ahi-a hia? Ahih leh banghanga gallaak sum suak uh ahia? 15 Humpinelkaite humham uh a, amaute ngik uhi. A gam uh hihsiatsak uh a, a khawpite kihal a, kilawita hi. 16 Memfiste leh Tepanhes mite'n zong na lu tung ua thupina lukhu uh hon metgiausak uhi. 17 Tangtawn Toupa, na Pathian un, lampi-a hon pii laia, amah taisana, hiai thil noumau tunga kitut hilou na hi umaw? 18 Banghanga, dawn dinga tu-a Shihor Aigupta delh na hi ua? Tua Iufratis Luipi apan tui dawn dinga, banghanga Asuria-a pai ding na hi ua? 19 Na gitlouhna un nou hon gawt ding a, na nungtolhna un hon taihilh ding hi. Kingaihtuah unla, Tangtawn Toupa na Pathian uh taisan a, zahna leh launa non neih louh uh, nou adinga se mahmah, kha mahmah ahi, chih phawk un, chi-a Toupa Tangtawn Toupa Vanglianpen in phuang hi. 20 Sawtpeka na hakkol uh tansakta uchin a, nou hong kihenna khaute, tatsakta uchin a, Na nna sem kei n'ung! chita na hi uh. Ahi, mual tung teng ah leh singhiang zam nuai teng ah kizuaka lumta na hi uh. 21 Ke'n grep chidam leh chi hoih apan grepgui hoihpen banga noute hon na suanta hi'ng a, bangchi dana, grepsia, greptaklou suak a, ka tunga hel thei na hi ua? 22 Tangala+ kisilin, sahbon tampi zang mahle uchin na mawhna nin uh ka maia om lailai hi, chi-a Toupa Tangtawn Pathian in phuang hi. 23 Tangtawn Toupa' thupuak ka kiang ah hong tung a: Hihnit hi ke'ng, Baalte delh ke'ng, bangchi-a chi thei ding na hi ua? Phaizanga na gamtatdan uh en unla, na thil hih uh ngaihtuah ve ua. Sangawngsaunu huka vialtai thethu bang na hi ve ua le. 24 Gamlak sabiltungnu gamdaia ta zongsang, a huk laitaka huih dik futfut, kua'n lentang zou ding ahia? Tua bang delh sabiltung tai a taitawl kul hetlou, a huk laitak mu pah ding hi. 25 Na khete uh khevuaka a om mateng uh leh, na dang uh a hul mateng tai kei un. Noute'n lah: Phatuam kei! Gamdang pathiante it hing, amaute delh ning, na chi uh a! 26 Guta a kimat chianga a zahlak banga, Israel innkawte zahlakta hi. Amaute, a kumpipa uh, a uliante uh, a siampite uh leh a kamsangte uh, a vek ua zahlakta uhi. 27 Sing kianga: Ka pa nang na hi, chi uh a, suang kianga: Ta-a hon neikhepa nang na hi, chi uhi. Kei hon nungngatsan uh a, hon maingat lou uhi. Ahihhanga, a buai chiang ua lah: Hong pai inla, hong hondam in! chi-a hon sam zel uhi. 28 Noute' pathian dinga na kibawl uh milimte kaw' om uh eita? Buaina na tuah chiang ua hon hondam thei ahih uleh, hong pai le uh ake! Judah aw, khawpi na neih zahzah uh, pathian nei hi ve uchin. 29 Banghanga ka tunga mawhsakna hon nei na hi ua? Noute na vek ua ka tunga hel na hi ve ua, chi-a Tangtawn Touupa'n phuang hi. 30 Na mite amawkna-a gawt hi ta'ng. Bawlhoihna sang loupi uh. Na namsau un na kamsangte humpinelkai duhgawl banga negaita. 31 Nou, tulai khanga mite aw, Tangtawn Toupa' thu ngaihtuah un: Ama'n: Israel adingin gamdai-gamkeu, ahih kei leh, mial bikbekna gam ka na hi-a hia? Banghanga ka mite'n: Ut uta vak dinga noplen ka hi uh, na kiang ah kong pai nawn kei ding uh, chi uh ahia? 32 Nungaknou in a kizepna vante mangngilh thei hia? Mou in a kitenna puante mangngilh thei hia? Hinapi-in, ka mite'n zaw kei hon mangngilhta uh a, tuabang nite simseng hi lou hi. 33 Na deihlam delh zaw na siam ngial ve! Numei hoihloupente nangawn in na gamtatnate apan sin ding mu mahmah unteh. 34 Mizawng, mawhneiloute, na inn uh buluha hong lut na mat uh hilou napi, na puansilhte ua a hinna sisan uh mite'n mu hi. Hibang teng hinapi, nang lah: 35 Mawhneilou hi ing, amah ka tung ah heh kei, chi lai na hi ve ua! Khial ke'ng, na chih manua na tung ua thukhenna tungsak ding ka hi. 36 Banghanga na lampite uh khenga vialdian dian na hi ua? Asuria in hon zahlaksak banga, Aigupta in zong hon zahlaksak ding hi. 37 Tangtawn Toupa'n na muante uh pampaih ahih mana khuta lutang hum a, tua munte nuse ding uchin a, amaute' huhna ngah lou hiai ding na hi uh.
1 Pasal in a zi ma henla, a zi in amah nusiain, pasal dang nei leh, tua pasal amah kianga a kik ding ahi diam? Gamsung kibuahsak gawp vek hita lou ding hia? Ahihhangin, hon luppih tampi adingin, kizuakin na kibawlta uh. Ka kiang ah nong kik nawn nuam ding ua hia? chi-a Tangtawn Toupa'n phuang hi. 2 Mualsang giaute lam ah daktou inla, en in. Hon luppih louhna mun uh om himhim hia? Lampi gei khawng ah hon luppih ding ngakin na tu a, gamdaia vialpemte na bang hi. Na kizuakna leh gidouhnain gamsung na buahsak hi. 3 Tua bang ahih mana, vuahtui kilentang a, nipi vuah himhim zu lou hi. Hinapi-a, kizuakte' zummawh mei pu chin a, maizuma maisan ut lou hi teh. 4 Nang ka kianga: Ka pa, ka tuailai apan ka lawm, 5 na heh nilouh dia hia? Na thangpaihna a omden dia hia? hon chikhin phet hilou na hi maw? Na thugen dan hibang hi a, ahihhanga, thil gilou na hih theih zahzah hih na hi, chi ahi.
A muanhuailou Israel
6 Kumpipa Josia' vaihawm sungin, Tangtawn Toupa'n ka kiang ah: A helhat Israel' thilhih na muta hia? Amah mualsang tung teng leh singhiang zam nuai tenga paitou a, angkawmna hih ahi. 7 Hibang ahih nungin ka kiang ah hong kik inteh, chi-a ngaihtuah ing a, ahihhanga hong kik lou a, a sanggamnu muanhuailou Judah in tua mu hi. 8 A helhat Israel kianga makna lai pia ing a, a angkawmnate hanga amah sawlmang hi'ng. Hinapi-a, a sanggamnu muanhuailou Judah in lau lou ahi, chih mu hi'ng. Amah zong paikhia a, angkawmna hih hi. 9 Israel' hukna gamtat ama'n neuchik zong phamawh sa lou a, gam sung subuah a, a sing a suang tawh angkawm hi. 10 Hibang teng hinapi, a sanggamnu muanhuailou Judah, a lungtang khempeuh tawh ka kianga hong kik lou a, a kineih hi lei hi, chi-in Tangtawn Toupa'n a phuang hi. 11 Tangtawn Toupa' thupuak ka kiang ah hong tung a: A muanhuailou Judah sanga a helhat Israel diktat zaw lai hi. 12 Kuan inla, mallam ngain hiai thu va phuang in: A helhat Israel, hong kik in, chi-a Tangtawn Toupa'n phuang ahi. Zahngai thei ka hih mana, hehmela hon en nawn lou ding, Tangtawna hon hehsan nawn lou ding hi'ng. 13 Na mawhna phuang tapeuh in Tangtawn Toupa, na Pathian tunga hel chin a, singhiang pha nuai tenga, gamdang pathiante tunga na deihsakna thehzak chin a, ka thu mangta lou na hi, chi-a Tangtawn Toupa'n phuang hi. 14 Tangtawn Toupa'n phuang a: Kei na pasal hi vengin, ka kiang ah hong kik in. Khawpi khat apan khat, beh khat apan nih hon teel ding ing a, Zion hon tun ding hi'ng. 15 Tua hun chianga ka lungtunna mahmah sabiak makaite hon pe ding ing a, amaute'n theihna leh theihsiamna tawh noute hon pii ding uhi, chi-a phuang ahi. 16 Tua nitea gamsunga nong pun ua, nong tam mahmah chiang ua, mite'n: Tangtawn Toupa' thukhun singkuang, chi nawn lou ding uhi. A lungsim ua thukhun singkuang chih lut ngeilou ding a, theih gige-a omlou ding a, lunggulhna om lou ding a, a dang zong kibawl lou ding hi. 17 Tua hun chianga, Jerusalem, Tangtawn Toupa' Kumpitutphah chi-a minlawh ding uh a, Tangtawn Toupa' min pahtawi dinga namte khempeuh, Jerusalema hong paikhawm ding uhi. A lungtang giloute un genhakna zui nawn lou ding uh a, 18 tua nitea Judah innkawte'n Israel innkawte zom ding uh a, mallam gam apan hong paikhawm ding uh a, na pu na pate uh kianga goutan dinga ka piak gam hong tung ding hi, chi hi. 19 Keimah mah in: Kipaktaka tate banga hon bawla, gam deihhuai mahmah, nam kuapeuh adinga kilawmpen hon pe nuam hi'ng a, chi hi'ng. Pa hon chi ding hon sa ing a, kei non zuihna apan hon pialsan lou ding hon sa hi'ng. 20 Ahihhanga, a itpa adinga muanhuailou numei banga, kei adinga muanhuai lou na hi, Israel innkawte aw, chih Tangtawn Toupa' thupuak ahi. 21 Mualsang giau teng ahte Israel mipite' kahging leh mauna leh ngetna aw kiza hi. Ahang bel, amaute'n a lampite uh segawpsak uh a, Tangtawn Toupa, a Pathian uh mangngilhta uh hiven. 22 Mi muanhuailoute aw, hong kik un, na nungtolhna uh damsak ding hi'ng. Amaute'n: Ahi, na kiang ah hong kik n'ung, nang Tangtawn Toupa, koute' Pathian hive chin. 23 Mualtungte leh tang tungtea milim biak buai vengvungte, kikhemna lei hi taktak hi. Tangtawn Toupa koute Pathian ah Israel hotdamna om taktak hi. 24 Ka tuailai uapan Baal pathian zumhuaite'n ka pu ka pate uh sepsa negai uh a, amaute' belam leh kelhonte, bawnghonte, a tapate uh, a tanute uh negai taktak uhi. 25 Maizumin leilak ah lum n'ung, ka zahlakna un hon khuh hen, koute leh ka pu ka pate un Tangtawn Toupa, koute' Pathian tunga khial hi ung. Ka tuailai uapan tuni dong, Tangtawn Toupa, ka Pathian uh thu manglou hi ung, chi ding uhi.
1 Tangtawn Toupa'n phuang a: Israel aw, nong kik nawn a, ka kianga nong kik nawn aleh na milim kihhuaite ka muhna apan koihmang a, na vakmang nawn kei a, 2 thutak leh dik leh diktata, Tangtawn Toupa hing hi, chih siala na kichiam leh, tua hun chiangin, amah tungtawnin namte vualzawlin om ding uh a, amah suang ding uhi, chi hi. 3 Judah leh Jerusalem kianga Tangtawn Toupa' thupuak hiai ahi: Na lei lehlouh hihnen unla, ling lak ah haichi pawi kei un. 4 Tangtawn Toupa lam ah zek kisum unla, na lungtang uh sum un, nou Judah mite leh Jerusalem mite aw. Tua ahih kei leh, thil gilou na hih man ua, ka hehna puakzak ding a, mei banga kuang ding a, kuama'n phelh zoulou ding hi, chi hi.
Mallam apan Siatna
5 Tangtawn Toupa'n: Judah gam ah genkhia unla, Jerusalem ah phuang unla: Gamsung khempeuh ah pengkul mut un! chi un. Nakpi-in kikou unla: Kikaikhawm un! Khawpi kulhneite ah taai ni! chi un. 6 Zion-a pai nading puanlap khai un! Zekai louin bitna delhin tai un! Ke'n mallam apan siatna, hihsiatna mulkimhuai nangawn hon tun ding hi'ng, chi hi. 7 Humpinelkai khat a bukna apan hong paikhia a, namte hihmangthangpa khat kuankhia hi. Ama'n na gam uh hihse dinga, ama' omna nuseta hi. Na khawpite uh a luah omlou a, kisegawp ding hi. 8 Tua bang ahih manin, saiippuan teeng unla, dah-a kapin mau un. Tangtawn Toupa' hehna mulkimhuai, eite apan kiheimang lou hiven. 9 Tua ni chianga, kumpipa leh uliante lungke ding a, siampite mulkim ding a, kamsangte'n lamdang sa-a, dip-hawm ding uhi, chi-a Tangtawn Toupa'n phuang hi. 10 Tua khitin, ke'n: Eh, Toupa Tangtawn Pathian aw, ka gawl ua namsau a kisuktuah laitaka, Lemna muanna na nei ding uh, na chih hiai mite leh Jerusalem nak khemthal hi na maizen chia ka chi hi. 11 Tua hun chiangin, hiai mite leh Jerusalem kiang ah: Gamdai gamkeua mualsang giaute apan keuna huih, ka mite lam ah hong nung, haihsiang dine leh hihsiang dinga nung hi lou hi. 12 Tua dinga hat lua huih keima' thupiakin hong nung hi. Amaute tunga ka thukhenna tu-a genkhia hi'ng, chi-a kihilh ding hi. 13 Ngai un! Amah meipi bangin kaltou-in mainawt a, a kangtalaite pingpei bangin, hong kuan a, a sakolte, muvanlaite sangin thakin zaw hi. Eite tung gik hi! Hihsiat hita hang! 14 Jerusalem aw, na lungtang apan thil gilou silsiang inla, hotdamin om in. Ngaihtuahna giloute bang tan kem ding na hia? 15 Dan apanin aw khat in phuang a, Efraim tang gam apan siatna phuang hi. 16 Tangtawn Toupa'n: Hiai thu, namte kiang ah hilh unla, Jerusalem ah phuang unla: Gam gamlapi apanin, Judah gam khawpite langbawla dou dingin, sepaihhon galdouna aw ngaihtak suaha hong kuan ding hi. 17 Judah gam ka tunga a hel mana, tua sepaihhonte'n lou vengmite banga umchip uhi, chi-a Tangtawn Toupa'n phuang hi. 18 Ama'n: Na gamtatna leh thilhihte'n na tunga hiai tun hita. Hiai nang hong kigawtna hita. Nase na maizen e! Lungtang sun na maizen e! chi hi. 19 Ka lungzing e, ka lungzing! Na sain kipek ing. Ka lungtang na e, ka lungtang na! Ka lungtang kihot a, om kinken theilou hi'ng, pengkul ging zata ing a, galla zata hi'ng. 20 Siatna in siatna zui a, gamsung bup kisia-a om hi. Thakhata ka puanbukte hihsiata om a, mitphiat kalloua ka bukna sia hi. 21 Bangtan kidouna puanlap mu ding a, pengkul ging za ding ka hia? 22 Ama'n: Ka mite lah mihai hi uh a, kei hon thei lou uhi. Thil kilawm theilou naupangte hi uh a, theihsiamna neilou uhi. Thil gilou hih lam siam uh a, thil hoih hihdan thei lou uhi, chi hi. 23 Leitung en ing a, lim leh mei bei, a mial hi a, vaante en ing a, amaute' vaak bei hi uhi. 24 Tangsangte en ing a, liing uh a, mualte kivuang uhi. 25 En ing a, mihingte omlou a, vaana vasate lengmang vek uhi. 26 En ing a, gam gahsuahthei gamdai-gamkeu suak a, a khawpite khempeuh, Tangtawn Toupa' mai leh a hehna maia sesa-a om uhi. 27 Tangtawn Toupa' thugen hiai ahi: Gamsung bup a vekin hihmangthang kei mah leng, sesa-a om ding hi. 28 Tua bang ahih mana, leitung in kah ding a, tunga vaante mial ding hi. Ahang bel, ke'n genkhinta ing a, lakik lou ding ing a, thu khentatta ing a, lehkik nawn lou ding hi'ng, chi ahi. 29 Sakoltungtuangte leh thaltawite ging za a, khawpi-a teeng khempeuh taikeek hi. Pawl khat loupa laka lut uh a, pawl khat suang laka kaltou uhi. Khawpite khempeuh kilawita a, a sunga kuamah teeng lou hi. 30 Hihsiata ompa nang aw, bang hih na hia? Banghanga a sanau silh a, banghanga khama kizem? Banghanga na mukte nuhvom a, a mawkna-a kizem na hia? Nang hon deihtate'n hon simmawh a, na hinna lak sawm uhi. 31 Numei nauvei banga kap, a ta masa nei banga mau zata hi'ng. Zion' tanu kap a, nak hawphawp a, a khut zankhia a: Maizen! sidangta ing a, ka hinna tualthatte' khuta piakkhiak hita hi, chi hi.
Kuamah Mitang Omlou
1 Tangtawn Toupa'n: Jerusalem kongzingte ah sukpai toupai inla, na kim na kiang enin ngaihtuah inla, a tenna innte zongsuak in. Diktattaka thil hih a, thutak zong mi khat na muh leh, hiai khawpi ngaidam ding hi'ng. 2 Amaute'n: Tangtawn Toupa' hinna sialin, chi mahle uh, zuaupi-a kichiam hi uhi, chi hi. 3 Tangtawn Toupa aw, na mitte'n thutak zong hi lou hia? Nang amaute sat chin a, lah na sa lou uhi. Amaute sikpek chin a, lah bawlhoihna nial uhi. A maitangte uh suang sanga takzaw-a bawl uh a, kisik nuamlou uhi. 4 Ke'n: Hiaite a zawngte hi lei uh, a hai hi uh, Tangtawn Toupa thei lou uh a, a Pathian un bang ngiat, chih thei lou uh hiven. 5 Tuachi-a a uliante uh kianga hawh a, amaute houpih ding hi'ng. Amaute'n Tangtawn Toupa' lampi thei mahmah uh a, a Pathian un bang ngiat hiam, chih thei uhi, chi-a ngaihtuah hi'ng. Ahihhanga, kithutuak taka hakkol hihtan uh a, hennate hihtat uhi. 6 Tua bang ahih mana, gammang apan humpinelkai hong pai in amaute suai ding a, gamdai-gamkeu apan ngia hongpai ding a, amaute negai ding a, amaute khawpite kianga gialbem in na buk ding a, a pawtkhete balzan ding hi. Ahang bel, amaute' helna nasia a, a nungtolhna uh tam hiven. 7 Tangtawn Toupa'n gen a: Banghanga noute hon ngaidam ding ka hia? Na tate un kei hon taisan uh a, Pathian hilou pathiante' mina kichiam uh hiven. Amaute' taksap khempeuh pia ing a, hinapi-a angkawm uh a, kizuakte' innsung dim uh hiven. 8 Amaute sakoltal vak vah, lan a, midang zi enlaha ham hi uhi. 9 Hiai hanga ke'n amaute gawt lou ding maw? Hibang nam himhim tunga ke'n phuba la lou ding maw? 10 A grephuante uh tawnsuak inla, hihsia inla, hihmangthang sipsip ken. A hiangte satkhia in, hiai mite Tangtawn Toupa-a hilou uhi. 11 Israel innkawte leh Judah innkawte ka tunga muanhuai mahmah lou uhi, chi-a Tangtawn Toupa'n phuang hi. 12 Amaute'n Tangtawn Toupa tungthu-a zuau gen uh a: Ama'n bangmah hon lawh ken teh, eite' tung ah siatna tung ken teh, namsau zong, kial zong tuak kei ni. 13 Kamsangte lah huih leltak hi uh a, amaute' sunga thu omlou hi, a thugen uh amau tung tu hen, chi uhi. 14 Tua bang ahih manin, Tangtawn Toupa Pathian Vanglianpen' thugen hiai ahi: Mite'n hiai thute a gen man ua ken na kama thute meikuang suaksak ding ing a, hiai mite a kattum sing suaksak ding hi'ng, chi hi. 15 Tangtawn Toupa'n phuang a: Israel innkawte aw, gamlapi-a om nam khat nang dou dinga hon pii ding hi'ng. Tanglai nam, nam sekdou, a pau uh na theih louh uh, a gen uh na theihsiam louh uh nam hi ding hi. 16 Amaute' thalbawmte hankhuk kamka bang hi a, amaute khempeuh galhat thupite hi uhi. 17 Amaute'n na buh na bake uh leh ante negai ding uh a, na tapate uh, na tanute uh negai ding uh a, na belam leh kelhonte uh leh ganhonte negai ding uh a, na grepte uleh theipite negai ding uhi. Na muan mahmah uh khawpi kulhneite, namsaua hihgawp ding uhi, chi hi. 18 Tangtawn Toupa'n phuang a: Hinapi-in, tua nitein noute kon hihmangthang sipsip kei ding hi. 19 Mite'n: Banghanga Tangtawn Toupa i Pathian in i tunga hibang hih ahia? chi-a hon dot chiangun, nang: Noute'n kei hon taisan a, gamdang pathiante' nna na sep bang ua, tu-a noutea hilou gam sunga gamdang mite' nna semta ding na hi ve ua, chi-in amaute na hilh ding hi. 20 Jakob innkawte kiang ah hiai genkhia inla, Judah gam ah phuang inla: 21 Nou mihai leh pilnabeite, mit nei napi-a muloute, bil nei napi-a zaloute, hiai za un. 22 Noute'n kei non lau ding uh hi lou maw? chi-a Tangtawn Touupa'n phuang hi. Ka maia na liin ding uh hi lou maw? Tuipi gamgi dinga sehnel bawl ing a, tua a omden gamgi hi a, tuipi in kaan theilou hi. Tuihualte kihual volvolin luang mahleh, tua zou zoulou uh a, ging zuazua mah leh, tua kaan zoulou uhi. 23 Ahihhanga, hiai mite'n genhakna leh helhat lungsim nei uh a, lampial uh a, paimang uhi. 24 Amaute'n: Tangtawn Toupa, i Pathian lau ve ni, a hun geihgeih a, phavang vuah leh nipi vuah hon pepa, buhlak nipi kalte hon pe gige ngeingei ding chipa amah hiven, kichi lou uhi. 25 Na tatsiatnate un hiaite hawlmang a, na khelhnate un thil hoih hon taansak hi. 26 Ka mite laka migiloute, vasa thang kam banga mi bukte, mihing mat nadinga thangsiahte om uhi. 27 Vasa bawm sunga vasa a dima om banga, a innte uh khemna-a dim a, hong hau uh a, vangletna nei uh a, 28 hong thau uh a, hong mam uhi. A thil hih giloute un tawp neilou a, pabeite' vualzawh nadinga a thu uh gensak lou uh a, a zawngte hamphatna hulou uhi. 29 Hiai hanga ke'n amaute gawt lou ding ka hi maw? Hibang nam tunga phuba la lou ding ka hi maw? cih-a Tangtawn Toupa'n phuang hi: 30 Hiai gam tunga thil mulkimhuai leh lungphawng hong tungta hi: 31 Kamsangte'n zuauthu gen uh a, siampite'n amau thuneihna-a vaihawm uh a, ka mite'n lah hi bang a deihlam uh hi mawk hi. Ahihhanga, a tawpna-a nang bang lawh ding?
Jerusalem Simna
1 Benjamin mite aw, bitna delh-in taai unla, Jerusalem apan taaikhia un! Tekoa ah pengkul mut un! Beth Hakerem ah theihsakna puanlap khai un! Mallam apan siatna hong nai a, siatna mulkimhuai hiven. 2 Zion tanu, melhoih leh khangdawng hihmangthang ding hi'ng. 3 Belamchingte'n a belamhonte uleh amah dou ding uh a, a kimkota puanbukte kai ding uh a, amau chiat in ama' tan ching ding hi. 4 Amah dou dingin kisa un! Thou unla, suntang laiin dou ni! Ahihhangin, maizen, sun khawvak kiam a, nitaklam limliap hong sauta hi. 5 Tua hi a, thou unla, zanlaia dou-in a kulhpite laigawp ni! chi hi. 6 Tangtawn Toupa Vanglianpen' thugen hiai ahi: Singte phuk unla, Jerusalem dou nading dawh ni. Hiai khawpi gawt ngeingei ding ahi, nuaisiahna-a dim ahi. 7 Tuileh in a tui a sunkhiak banga, ama'n a gitlouhna sungkhia hi. A sunga hiamgamna leh hihsiatna kithawn tuah a, a chinatna leh a liammate ka maia om gige hi. 8 Jerusalem aw, vaukholhna ngaihsak in, tuachi louin zaw hon kiheisan ding ing a, na gam sesak ding ing a, a sunga kuamah teeng thei lou ding hi, chi hi. 9 Tangtawn Toupa Vanglianpen' thugen hiai ahi: Israel khawsuaksunte, buhsang bangin dongkhawm un, grep bangin khawmsiang sipsip un. A hiangte khutin zut thak unla, grep gah khop bangin khawmkhia un, chi hi. 10 Ke'n kua houpih a, vaukholhna pe thei ding ka hia? Kua'n kei hon ngaikhe ding ahia? Bilsum louh hi uh a, za thei lou uhi. Tangtawn Toupa' thu zak thadahhuai sa uh a, tua thu ngaihnopna nei lou uhi. 11 Ahihhanga, kei Tangtawn Toupa' thangpaihna-a dim ing a, pawzou nawn lou hi'ng. Konglaka naungekte tung ah sungkhia inla, tua laia kikhawmte tung ah sungkhia in. Tua sung ah zi leh pasal matin om ding uh a, kumtam mana teekkunte mata om ding uhi. 12 A innte uh midangte' khuta piak hi ding a, a loute utawh, a zite utawh piak hi ding hi. Gamsunga teengte dou a, khut ka zankhiak chianga, tua bang hi ding hi, chi-a Tangtawn Toupa'n phuang hi. 13 Tangtawn Toupa'n: A neupen apan a lianpen dong, a vekpi ua metna deiha, huaiham uh a, kamsangte leh siampite kibang uh a, khemna chiteng zang uhi. 14 Ka mite liamma, nase lou banga tuam uh a: Lemna muanna om louh laia, Lemna muanna, chi khemkhem uhi. 15 A gamtatna uh kihhuaite zahpih uhia? Hilou, maizumna nei het lou uh a, maizuma maisan chih theilou uhi. Tuachi-a a pukte laka puk uh a, amaute ka gawt chianga lainiama om ding uhi, chi hi. 16 Tangtawn Toupa' thugen hiai ahi: Lamkathuam ah ding unla, dak un. Tanglai lampite kan unla, lampi hoih koia om hiam kan unla, tua tawnin pai un. Tua hileh na hinna uh ading khawlna mu ding chi hi, Ahihhangin, noute'n: Tua tawnin pai kei ni ung, chi na hi uh. 17 Noute tung ah galvilmite sep ing a: Pengkul ging ngaikhia un! chi ka hi. Ahihhanga noute'n: Ngaikhe kei n'ung, chi na hi uh. 18 Tua bang ahih manin, namte aw, ngaikhia un. Theihpihte aw, amaute tunga bang tung ding hiam, en un. 19 Leitung aw, za in: Hiai mite'n ka thugen ngaikhe lou uh a, ka dan pampaih uh ahih mana, amaute' thilsawmgah, siatna amaute tunga tun ding hi'ng. 20 Sheba apan gimnamtui, ahih kei leh, gam gamlapi apan loupa namtui bang kiphatmawhna nei ka hia? Na haltum thillatte uh santaak hi lou hi. Na kithoihnate un hon kipaksak lou hi, chi hi. 21 Tua bang ahih manin, Tangtawn Toupa' thugen hiai ahi: Hiai mite' maia lamdalna koih ding ing a, pate leh tapate tua-a kipalpaikhawm ding uh a, ki-innvengte leh lawmta mangthangkhawm ding uhi, chi hi. 22 Tangtawn Toupa' thugen hiai ahi: Ngai dih ua, mallam gam apan sepaihhon hong kuan uh a, nam thupi khat, leimong dong apan tawhthawha om hi. 23 Amaute thai leh teipi-in kigalvan uh a, ngongtat uh a, zahngaihna nei lou uhi. A sakolte uh tunga tuanga taai tuipi kihot ging bang uhi. Zion tanu aw, gal dou dinga kivual banga, nang hon dou dinga hong kuan uhi, chi hi. 24 Amaute' tungthu kigen zata hang a, i khutte uh zaw-a kai niingniang hi. Lungzinna in hon manta a, numei nauvei natna bangin hon pha hi. 25 Gamlak ah paikhe kei unla, lampi zuiin zong pai kei un. Meima in namsau tawi a, laua mulkimna kilchiha om hi. 26 Ka mite aw, saiippuan silh unla, vut lak ah kikhuk un. Tapa neihsun suuna kap bangin mau tuaituai un. Hihmangthangpa i tunga thakhata hong tung ding hiven. 27 Ama'n: Nang, sik enchian mi-a hon bawl hi'ng. Ka mite sik leh suang kihel beu hi uhi. A lampite uh ena, chian dinga hon sep hi'ng. 28 Amaute zaw, helhat, lungkhauh ngen hi uh a, gense dinga vialtai uhi. Amaute sik leh sumsan hi uh a, a sia ngena gamta vek uhi. 29 Meia ngen halsiang dinga pum zap ging humhum a, ahihhanga halsiangna amawkna suak hi. Migiloute siang tuan lou hiven. 30 Tangtawn Toupa'n amaute pampaihta ahih mana, ngunsik pampaihsate, chi-a minlawh hita uhi, chi hi.
Sabiak Taklou Mannabei
1 Tangtawn Toupa apan Jeremia kianga thu hong tung hiai ahi: 2 Tangtawn Toupa' inn kongpi ah ding inla, tua ah hiai thupuak phuang in: Tangtawn Toupa be dinga hiai kongpite tawna hong pai nou Judah mite'n, Tangtawn Toupa' thu ngai un: 3 Tangtawn Toupa Vanglianpen, Israel Pathian' gen hiai ahi: Na lampite uleh na gamtatnate uh bawl hoih-in puahpha un. Hi leh, hiai muna hon teengsak ding hi'ng. 4 Khemna thu muangin: Hiai Tangtawn Toupa' tempul, Tangtawn Toupa' tempul, Tangtawn Toupa' tempul ahi! Chi-in, khemna thu muang kei un. 5 Na lampite uleh na gamtatnate uh bawlhoiha na puahphat ua, diktattaka innveng kal na kisai tuah ua, 6 gamdang mite pabeite, meigongte nuaisiah loua, hiai muna mawhneilou sisan na suah kei ua leh, tua bana, noumau' siat nading leia pathian dangte na zuih kei peuhmah uleh, 7 na pu na pate uh kianga ka piak gam, hiai mun ah kon teengdensak ding hi. 8 Ahihhangin, ngai dih uh, a mannabei khemna thute na muang uhi. 9 Gukgu a, tuai that a, angkawm a, zuaua kichiam a, Baal maia gimnamtui hal a, na theih ngei louh uh pathiante zui kawmkawmin, 10 ka Min pu hiai inna ka maia hong dinga, hiai thil kihhuaite hih dinga bit kisain: Ka bit uh, na chi ding ua hia? 11 Ka Min pu hiai inn, noute adinga suamhatte' khuk hong suakta hia? Ahihhanga, ke'n en gige hi'ng! chi-a Tangtawn Toupa'n phuang hi. 12 Ka Min omna dinga ka bawl masak Shilo ah hawh unla, ka mi Israelte gitlouhna hanga tua mun tunga ka thilhih en un. 13 Hiai thilte khempeuh na hih hih lai ua, na kiang ua thu gen zihzeh ing a, ahihhanga ngaikhe nuam lou uchin a, hon sam ing a, ahihhanga, hon dawng lou na hi uh, chi-a Tangtawn Toupa'n phuang hi. 14 Tua bang ahih mana, Shilo tunga ka hih bangbang, ka Min pu hiai inn, na muan uh tempul, noute leh na pu na pate uh kianga kon piak mun tunga hih ding hi'ng. 15 Na sanggamte uh, Efraimte ka bawl banga, ka mai apan noute hon lawnkhe ding ka hi, chi ahi. 16 Tua bang ahih manin, hiai mite adingin thumsak kenla, amaute adingin nget zong ngetsak ken. Ka kiang ah zong ngen ngungut ken, hon ngaikhe lou ding hi'ng. 17 Judah khawpite leh Jerusalem kongzingte-a a thilhih uh na mu kei-a hia? 18 Naupangte'n sing tom uh a, pate'n mei sem uh a, nute'n anvui mekman uh a, Vaan Kumpinu adinga tanghou beu bawl uhi. Kei hon hehsak dinga pathian dangte maia dawn thillatte lan uhi. 19 Ahihhanga, a hehsakpa uh keimah hi lou ka hi maw? Amau' maizum nadinga, amau tunga siat kitut uh hilou maw? chi-a Tangtawn Toupa'n phuang hi. 20 Tua bang ahih mana, Toupa' Tangtawn Pathian thupuak hiai ahi: Ka hehna leh ka thangpaihna hiai mun tung ah, mihing leh gamsa tung ah, gamlak singte leh theikungte tung ah sunbuak ahi ding a, a kang ding a, a kiphelhmit kei ding, chi ahi. 21 Tangtawn Toupa Vanglianpen, Israel Pathian' thupuak hiai ahi: Hih un, hih un. Na haltum thillatte uah kithoihna dangte behlap unla, a sa kinek un! 22 Ahang bel, ke'n na pu na pate uh, Aigupta apan ka piikhiak a, amaute kianga thu ka gen laia, haltum thillatte leh kithoihnate tawh kisaia thupiakte pe lei hi lou a, 23 hiai thupiak pia ing a: Ka thu mang un, noute' Pathian hi ding ing a, noute ka mite hi ding na hi uh. Kon thupiak lampite tawn un, noute adinga hoih ding ahi, chi ka hi. 24 Ahihhanga, hon ngaikhe lou uh a, thudon zong hon thudon lou uhi. Tua naksanga, a lungtang giloute uh' deihdan khamzawhlouh zui uhi. Mailam nawt lou a, nunglama kik zawsop uhi. 25 Na pu na pate un Aigupta a nuutsiat ua pan tu donga, a nisima ka sila kamsangte na kiang ua hon sawl zihzeh ing a, 26 ahihhanga, amaute'n hon ngaikhe mahmah lou uh a, hon thudon mahmah lou uhi. Genhak uh a, a pu a pate uh sanga thilgilou hih zaw uhi. 27 Hiaite khempeuh amaute na hilh chianga hon ngaikhe lou ding uhi. Amaute na sap chianga, hon dawng lou ding uhi. 28 Tuabang ahih manin, amaute kiang ah: Tangtawn Toupa, a Pathian uh' thu manglou, bawlhoihna sang lou nam hiai ahi. Thutak mangthangta, a kam uapan beimangta. 29 Na sam metkhia inla, paimang in. Mualtung giaute ah kahtam lou in, Tangtawn Toupa'n a thangpaihna nuaia om hiai khang pampaih a, tawpsanta hiven, chi ahi.
Kithahna Phaizang
30 Tangtawn Toupa'n: Judah mite'n ka mitmuh-a thilgilou hih uhi. Ka Min pu inn-a milim kihhuaite tung uh a, hihbuah uhi. 31 Ben Hinom Phaizanga a tapate uh, a tanute uh meia hal nadinga Tofeth munsangte lam uhi. Hiai hih dinga ka thupiak hilou a, ka lungsima lut ngei zong hilou hi. 32 Tua ahih manin, thei un, nite hong tung dek, mite'n Tofeth hiam, Ben Hinom Phaizang hiam minlawh nawnlou a, Kithahna Phaizang chi-a a minlawh nite uh hong tung dek, chi-a Tangtawn Toupa'n phuang ahi. Ahang bel, mun a om nawnlouh donga, amaute'n Tofeth-a misite vui ding uh hiven. 33 Tua khit chianga, hiai mite' luangte, tungleng vasate leh leia gamsate' an hong hi ding a, amaute lausak ding kuamah omlou ding hi. 34 Ke'n Judah khawpite leh Jerusalem kongzingte apan lungnopna leh, kipahna husate leh, mou leh mouneipa' awte beisak ding hi'ng. Ahang bel, gam kiluah loua segawp ding hiven, chi-a phuang hi.
1 Tua hun chianga, Judah kumpipate leh uliante' guhte, siampite leh kamsangte' guhte leh Jerusalem mite' guhte, a hankhukte uapan kilakhe ding hi, chi-a Tangtawn Toupa'n phuang hi. 2 Tua guhte bel, amau-te'n a it uh, a nna a sep uh, a zuih uh, a dot uh leh a biak uh, vaan-a ni leh kha leh aksite khempeuh kihaisak ding hi. Tuate kaihkhawm lah hilou ding, vui lah kivui lou ding a, leilaka nin paihkhawm bang lei hi ding uhi. 3 Hiai nam gilou laka khawsuak sun ka hawlmangte'n hinna sanga sihna teel zaw ding uhi, chi-a Tangtawn Toupa Vanglianpen in phuang hi.
Khelhna leh Gawtna
4 Amaute kianga Tangtawn Toupa' thugen hiai ahi: Mite a puk chiang ua, thoukik lou uhia? Mi khat a pialmang chiang a, hong kik lou hia? 5 Banghanga hiai mite pialmang uh ahia? Banghanga Jerusalem pialmang gige ahia? Zuauthu lenkip uh a, hong kik nawn nuamlou uhi. 6 Ke'n limtaka ngaikhia ing a, ahihhanga, amaute'n a dik a tang gen lou uhi. Kuamah in a gitlouhna kisik a, Bang hih ka hita maia? chi lou hi. Michih in ama' lampi chiat tawn a, kidouna phual delh sakol bang uhi. 7 Vaana vakengsangte nangawn in ama' adinga hunbi sehte thei a, Vahui, a lenhat leh suklen hatte'n a pem hun uh phawka thei uhi. Ahihhanga ka mite'n Tangtawn Toupa' ngiatte theilou uhi. 8 Noute'n bangchi-a, laigelh mite'n laikung zuauthei zanga a dikloupi mah a gelh lai ua: Koute pii ung, Tangtawn Toupa' dan nei hi ve-ung, chi thei na hi ua? 9 A pilte maizumsaka om ding uh a, lungdonga mata om ding uhi. Tangtawn Toupa' thu a pampaih nung uh, bangchibang pilna nei hi ding uh ahia? 10 Tua bang ahih mana, ke'n a zite uh pasal dangte pe ding ing a, a loute uh midang kianga pe ding hi'ng. A niampen apan a thupipen donga, a vek ua punna deiha duhgawla huaiham uhi. Kamsangte leh siampite'n a vek ua zuauthu zang uhi. 11 Ka mite' liamma, a nase lou banga tuam uhi. Lemna muanna omloupi-a: Muanna, muanna, chi uhi. 12 A gamtat uh luaksuahhuai zumpih uhia? Zumpih lou, maizumna himhim neilou uh a, maizumna maitangsan, chih zong theilou uhi. Tua bang ahih man ua, a pukte laka puk ding uh a, gawta a om chiang ua, lainiama om ding uhi, Tangtawn Toupa'n chi hi, chi-in hilh in. 13 Tangtawn Toupa'n phuang a: A an koihkhawm uh lamang ding ing a, grepguia zong grepgah omlou ding hi. Theipi kunga theipigah omlou ding a, a tehte zong vuai ding hi. Amau ka piaksate, amau apan laksaka om ding hi. 14 Amaute'n: Banghanga hiaia tu i hia? Kikaikhawm un! Kulhnei khawpite ah tai ni-in tua ah mangthangsuk ni! Ahang bel, Tangtawn Toupa i Pathian in ama' tunga i khelh mana, mangthang dinga hon mawhpaih a, dawn dinga gutui hon pia hiven. 15 Muanna lamen hang a, ahihhanga thil hoih hong tung lou hi. Damna hun lamen hanga, ahihhanga mulkimna kia hong tung hi. 16 Melmate' sakolte phiit, Dan apan kiza a, a sakolte uh ham zain gambup liing uhi. Amaute, gam leh a sunga om peuhmah, khawpi leh a sunga teengte negai dingin hong pai uhi, chi uhi. 17 Tangtawn Toupa'n phuang a: Ngai dih, gul guneite na lak ua hon sawl ding ing a, khoizual theihlouh guldekpakte hon sawl ding ing a, noute hon tu ding uhi, chi-a phuang hi. 18 Dah laia ka Khamuanpa aw, ka sunga ka lungtang bah hi. 19 Ziona Tangtawn Toupa omlou hia? A Kumpipa tua muna om nawn lou hia? chi-a gam gamlapi apan ka mite' kikou ngaikhia in. Ama'n: Banghanga a milimte uleh a gamdang milimte-ua kei hon hehsak uh eita? chi hi. 20 Amaute'n: Buhlak hun in hon khengta a, nipi hun beita a, eite lah hotdam hi lou lailai hanga, chi uhi. 21 Ka mite nuaisiah hita uh a, kei nuaisiah hita hi'ng. Daha suun ing a, mulkimna in hon man hi. 22 Nuhtheih damdawi Gileada omlou hia? Tua-a damdawi siam omlou hia? Ahih leh banghanga ka mite' liamma damsaka omlou hiam?
1 Ka lutang luinak hi leh aw, ka mitte khitui tuikhuk hi leh aw! Thah-a om ka mite adinga a sun a zana kap ding hi'ng. 2 Khualzinte adingin, gamdai-gamkeu ah giahbuk nei leng aw! Hi leh, ka mite nusia-a paisan thei ding hi'nga. Amaute khempeuh lah angkawmte hi uh a, a muanhuailou mihonpi hi uh hiven. 3 Tangtawn Toupa'n: Zuauthu thala kapkhe ding a, a lei uh thalphel banga lai uh a, thutak zanga gamsunga vualzou hilou uhi. Khelhna khat apan khelhna dang hih uh a, kei hon phawka hon sang mahmah lou uhi, chi-a Tangtawn Toupa'n phuang hi. 4 Tangtawn Toupa'n: Na lawmte lak ah kiveng inla, na sanggamte muang ken. Ahang bel, sanggam peuhmah, khemmi hi a, lawm peuhmah lah gensemi hiven. 5 Lawm in lawm khem a, kuama'n thutak gen lou hi. A leite uh zuau gen dinga sinsak uh a, khelhna zanga amaute kitawlsak uhi. 6 Noute kikhemna laka om uchin a, amaute zuauthei uh a, kei ka hihna banga hon saang lou uhi, chi-a Tangtawn Toupa'n phuang hi. 7 Tua bang ahih manin, Tangtawn Toupa Vanglianpen' thugen hiai ahi. Ama'n: Ngai dih, amaute halsianga enchian ding hi'ng. Ka mite khial uh ahih mana ke'n bangdang hih thei ding? 8 A lei uh sihna tun thaltang hi a, khemna thu gen hi. Michih in a kama a innveng kampha-a houpih a, a lungtanga lah amah thangkam mawk hi. 9 Hiai hangin amaute ka gawt kei dia hia? chi-a Tangtawn Toupa'n phuang a, Nam hibang bang ka thuk kei dia hia? chi hi. 10 Mualte kah-a mau tuaituai ding ing a, gamdai-gamkeua loupa munte suuna kahtam lou ding hi'ng. Amaute lah teenlouhna gamsia, tot ngeilouh hita uh a, bawngham zong kiza nawn lou hi. Tungleng vasate lengmangta a, gamsate taimangta hi. 11 Jerusalem, thilsia kivum lei suaksak ding ing a, sihalte' gamtatna mun suaksak ding hi'ng. Judah khawpite sesak ding ing a, kuamah teeng thei lou ding hi, chi hi. 12 Hiai theisiam ding khopa pii kua ahia? Tangtawn Toupa' sinsakna ngah a, tua hilhchian thei kua ahia? Banghanga gam hihsiata om a, kuamah pai theih louh nadinga gamdai-gamkeu banga hihsiata om ahia? 13 Tangtawn Toupa'n: Amaute' maia ka koih dan a taisan man uh ahi. Ka thu mang lou uh a, ka dan zui lou uhi. 14 Tua naksanga, a lungtang khauh uh zui uh a, a pu a pate un amaute a sinsak banga, Baalte zui zaw uhi, chi hi. 15 Tua bang ahih mana Tangtawn Toupa Vanglianpen, Israel Pathian in hiai gen a: Ngai dih, hiai mite, an kha ka nesak ding a, tuikha ka dawnsak ding. 16 Amaute hita leh, a pu a pate un zong a theih ngei louh uh gamdang mite lak ah ka thehzak ding a, amaute ka hihmanthat mateng namsauin ka delh ding, chi hi. 17 Tangtawn Toupa Vanglianpen' thugen hiai ahi: Ama'n: Tu'n ngaihtuah un! Kapa mau ding numeite samsak unla, kahsiamte samsak un. 18 Amaute hong pai meng uh henla, i mitte khituia dimlet a, i mit apan luitui a luan mateng, amaute'n hon kah uhen. 19 Zion apan kah leh mauna husa kiza a: Se namah hang e! I maizumna lian namah mah! I innte segawpta hiven, i gam i nutsiat louh theihlouh hita, chi uhi, chi hi. 20 Numeite aw, tu'n Tangtawn Toupa' thugente za unla, a kama thute za dingin bil dawh un. Na tanute uh kapa mau dan sinsak unla, kisuuntuah dan sinsak un. 21 I tawhlette apan sihna hong lut a, i kulhbaang sunga hong lut hi. I kongzingte apan naungekte satkhia uh a, tangpi omkhawmna munte apan tuailaite satkhia uhi. 22 Nang thu gen inla: Tangtawn Toupa thugen hiai ahi: Ama'n: Mihing' siluangte gamdaia deihlouh thilpaihte banga lum ding a, buh atte nunga buhphalte bang ding a, kuama'n khawm lou ding hi, chi hi. 23 Hiai Tangtawn Toupa' thugen ahi: Ama'n: Mipil in a pilna sial kei hen. Mihat in zong a hatna sial kei hen. Ahau mi in zong a hauhna sial kei hen. 24 A sial peuhmah in hiai sial hen: Ama'n kei hon theisiam a, kei hon thei a, leitunga chitna, thudika thukhenna leh diktatna zang Tangtawn Toupa hi ing a, tuate-a kipak hi'ng, chih a theih sial hen, chi-a Tangtawn Toupa'n phuang hi, chi in. 25 Tangtawn Toupa'n phuang a: Sa tunga zeksum leltakte khempeuh ka gawt nading nite hong tung dek hi Aigupta, Judah, Edom, Amon, Moab gamte leh gam gamlapi, gamdai-gamkeua teengte ka gawt nading nite. Ahang bel, hiai namte khempeuh zeksum louh hi uh a, Israel innkawte khempeuh nangawn lungtanga sum louh hive un, chi hi.
Pathian leh Milimte
1 Israel inkawte aw, Tangtawn Toupa'n noute kianga a thugen za un. 2 Tangtawn Toupa' thupuak hiai ahi: Namte' lampite sin kei unla, vaana chiamtehnate'n namte lausak mahleh, noute zaw lausakin om kei un. 3 Namte' tatdan ngeinate a mannabei hiven. Amaute'n gamlak singte phuk uh a, khutsiam khat in a sikkhu-a tua sing, lim leh mei neia bawl hi. 4 Tua sing milim, ngun leh khama zem uh a, a kipuk louh nadinga sek zanga sik tukkilha kilhkip uhi. 5 Dawnpawl huana vasa lauh dinga milim bawltawm tawh kibang, a milimte uh pauthei loupi. Pai theilou ahih chiang ua, puak kul uhi. Tua bangte lau kei un. Hon hihna theilou uh a, thil hoih zong hih theilou uhi, chi hi. 6 Tangtawn Toupa aw, nang bang kuamah omlou hi. Nang zaw thupi chin a, na min in thil hih theia vanglian hi. 7 Nang kua'n hon zahtak lou ding ahia, namte' Kumpipa aw! Hiai na tan tuak hi mah hi. Namte laka mipilte khempeuh leh amaute' kumpigam' khempeuh laka nang bang kuamah omlou hi. 8 Amaute khempeuh khawksak neilou mihai hi uh a, mannabei sing milimte' sinsak hi uhi. 9 Ngunsik kisekte Tarshish apan pua uh a, khamsik kisekte Ufaz apan pua uhi. Khutsiamte leh khamsiksekte' bawlsate, a dum leh a sandupa zem uh a, khutsiamte' khutsuak hi vek hi. 10 Ahihhanga, Tangtawn Toupa zaw Pathian tak hi a, Pathian hing, Tangtawn Kumpipa hi ahi. Amah a heh chianga, lei kiliing a, namte'n a thangpaihna thuak zoulou hi. 11 Nang amaute hiai hilh inla: Leitung leh vaante bawl hilou hiai pathiante leitung leh vaan ni nuai apan mangthang ding uhi, chi in. 12 Pathian in bel a vangletna-a leitung bawl a, a pilna-a leitung lamkhia a, a theihsiamna-a vaante zalh hi. 13 Ama'n vaanpiging banga aw a suah chianga vaana tuite ging hon hon a, leimongte apan meipite tungkahsak hi. Ama'n vuah tawh kithuaha khawphia sawlkhia a, huihte a koihkhawmna innte apan nungkhesak hi. 14 Michih lungsimbei, theihna bei hi a, khamsiksek mi peuhmah a milim sekte'n maizumsak hi. Ama' milimte kikhemna hi a, amaute'n nakna neilou uhi. 15 Amaute a mannabei, thil simmawhhuai hi uh a, amaute gawtna hong tun chianga, mangthang ding uhi. 16 Jakob' Tantuan a hipa zaw hibangte bang hilou hi. Amah bangkim Siampa hi a, a nam gouluah Israel Siampa zong hi hiven Ama' min Tangtawn Toupa Vanglianpen hi ahi.
Hong Tung ding Siatna
17 Nou, dou leh umchipa omte aw, gamsung nuse dingin na neih na lamte uh kaikhawm un. 18 Hiai Tangtawn Toupa' thugen ahi: Hiai huna hiai gam sunga teengte lawnkhe ding ing a, mata om nading ua amaute tunga lungkham mangbatna tun ding hi'ng, chi hi. 19 Ka liamma hanga ka tung gik hi! Ka liamma hihdam theih hilou hi! Hinapi-a ke'n: Hiai kei' chinatna hi a, ka thuak zawh teitei kul hi, kichi hi'ng. 20 Ka puanbuk hihsiat hi a, a khaute khempeuh kitat hi. Ka tapate'n hon taisan a, om nawn lou uh a, ka puanbuk tungding ding hiam, ka bukna bawl ding hiam om lou hi. 21 Belamchingte lah lungsim bei hi uh a, Tangtawn Toupa apan thil kan lou uhi. Tua hanga mavang lou uh a, amaute' belamhonte khempeuh kithehzak hi. 22 Ngai dih uh! Thu hong kitundek -mallam gam apan buai vengvungna lianpi om! Judah khawpite kilawi ding a, sihalte' gamtatna mun suak ding hi. Jeremia' Thuumna 23 Tangtawn Toupa aw, mihing' hinna ama'-a hilou hi, chih thei hi'ng. Mihing in ama' kalsuante a kipii ding hi lou hi. 24 Tangtawn Toupa aw, hon bawldik inla, ahihhangin, dika vaihawmna kiain hon bawldik in. Na hehna-in hi kei hen, tuachi louin zaw bangmah suak lou ding hi'ng. 25 Nang hon sang lou namte tung ah na thangpaihna sungbua inla, na min lou nuamlou mite tung ah sungbua in. Ahang bel, amaute'n Jakob negai uh a, negai sipsipa, ama' gam hihsiatsak uh hiven.
Thukhun Palsatna
1 Tangtawn Toupa apan Jeremia kianga thu hong tung hiai ahi: 2 Hiai thukhun thute ngaikhia inla, tuate Judah mite kiang ah leh, Jerusalem-a teengte kiang ah hilh in. 3 Hiai Tangtawn Toupa, Israel Pathian gen ahi. Ama'n: Hiai thukhun thute mang lou peuhmah hamsiat ahi a, 4 tua bel, Aigupta apan, sik haltuina meiphualpi apan na pu na pate uh ka piikhiak lai apan, amaute kianga ka thupiak thute ahi. Ke'n: Hon thuman unla, kon thupiak peuhmah hih un, ka mite hi ding uchin a, kei na Pathian uh hi ding ka hi. 5 Tua chianga, nawitui leh khuaizu-a luang gam, tua na luah uh piak ding, chi-a na pu na pate uh kianga kichiama ka chiamsa tangtungsak ding hi'ng, chi hi, chi-in hilh in, a chi hi. Ke'n: Amen, Tangtawn Toupa, chi-in ka dawng hi. 6 Tangtawn Toupa'n ka kiang ah: Judah khawpite khempeuh leh Jerusalem kongzingte ah hiai thute khempeuh phuang inla: Hiai thukhun thute ngaikhia unla, zui un. 7 Aigupta apan na pu na pate uh ka piikhiak apan tuni dong amaute vauhilh zihzeh ing a: Hon thuman un, chi chi ka hi. 8 Ahihhanga hon ngaikhe lou uh a, hon thudon lou uh a, tua naksanga, a lungtang gilou genhakte uh zui zaw uhi. Tuachi-a amaute' zuih dinga ka thupiak thukhuna hamsia khempeuh amaute tunga tun ing a, ahihhanga, zui tuan lou uhi, chi hi, chi-in hilh in, a chi hi. 9 Tua khitin, Tangtawn Toupa'n ka kiang ah: Judah mite leh, Jerusalema teengte laka thu simsawmna om hi. 10 Ka thu ngaikhe nuam lou a pu a pate uh khelhnate-a kik uhi. Pathian dangte' nna sem dinga zui uhi. Israel innkawte leh Judah innkawte'n, a pu a pate uh tawh kala ka thukhun palsat tuak uhi. 11 Tua bang ahih mana, Tangtawn Toupa'n hiai gen a: A pelh theih louh uh siatna amaute tunga tun ding hi'ng. Kei hon sam mahle uh, ngaikhe lou ding hi'ng. 12 Judah khawpite leh, Jerusalema teengte va pai a, gimnamtui hala a biak uh pathiante sam ding uh a, ahihhanga siatna hong tun chianga dawng het lou ding uhi. 13 Judah aw, khawpi na neih zahzah uh pathian nei uchin a, pathian zumhuai Baal maia gimnamtui hal nading maitam na dawhte uh zong, Jerusalem kongzing zah pha hi, a chi hi. 14 Ama'n: Hiai mite adingin thuumsak kenla, amaute adingin ngetsakna leh thuumsakna zong nei ken. A mangbat lungzin hun ua hon sap chiang ua, dawng lou ding hi vengin, chi hi. 15 Mi dang tampite tawh thilsawm gilou a sawmkhawm lai ua, ka itpa'n ka tempula bang hih ahia? An sehsiangthou in nang hong kigawt nading heimang thei ding hia? Giloua gamta kawmkawmin na lungnuam ve, chi hi. 16 Tangtawn Toupa'n oliv kung khanpha leh, gah kilawm mahmah chi-a hon minlawh a, ahihhanga, huihpi hat ging honhon tawh meia nang hon haltum ding a, na hiang teng kitan ding hi. 17 Israel innkawte leh Judah inkawte'n thil gilou hih uh a, Baal maia gimnamtui hala hon hehsak man ua, Tangtawn Toupa, nang hon suan a, honphutpa'n nang adinga siatna sehkhiaksa-a nei hi.
Jeremia Thah Sawmna
18 Amaute' thil simsawm Tangtawn Toupa'n ka kianga a latsak mana, ke'n thei hi'ng. Ahang bel, amaute' thil hih tua hun laia hon lakta hiven. 19 Kei zaw, belamnou nunnem, gawh dinga kaih bang hi ing a, kei hon thah sawm uh ahih lam phawk lou hi'ng. Amaute'n: Tua singkung leh a gah hihmangthang ni, a min kitheih nawnlouh nadingin mihing' gam apan amah satkhia ni, kichi uhi. 20 Ahihhangin, Tangtawn Toupa Vanglianpen, diktattaka vaihawm a, mihing' lungsim leh lungtang enpa aw, amaute tunga na phulakna hon musak in, ahang bel, nang khuta ka thu hon nga hi'ng. 21 Tua bang ahih mana, Anathoth mite, na hinna lak sawma, Tangtawn Toupa' minin thu gen ken, koute khuta si ding na hi, hon chite tungthu-a Tangtawn Toupa' gen 22 ahi, Tangtawn Toupa Vanglianpen' thugen hiai ahi: Amaute gawt ding hi'ng. A tangvalte uh namsaua si ding uh a, a tapate uleh a tanute uh kiala si ding uhi. 23 Anathoth mite tunga gawtna ka tut chianga, amaute tunga siatna tun ding ka hih mana, amaute laka a khawsuak kihawi lou ding hi, a chi hi.
Jeremia' Lungkimlouhna Phunna
1 Tangtawn Toupa aw, nang zaw na maia ka thu kon tut chianga, diktat gige na hi. Hinapi-a dika na thukhenna tawh kisaia hon houpih nuam hi'ng. Banghanga migiloute' gamtatna lawhching ahia? Banghanga a muanhuailoute nuamtaka khawsa uh ahia? 2 Amaute nang' suan hi a, zung kai uh a, khang uh a, gah suang uhi. A mukte ua nang' min lou gige uh a, ahihhanga a lungtang ua hon gamlat uhi. 3 Hinapi-a, Tangtawn Toupa aw, kei hon thei chin a, hon mu a, nang kon ngaihtuahnate entel na hi. Belam gawh ding bangin amaute kaikhia in! A gawh ni adingin amaute koihtuam in! 4 Bangtan tua gam keu a, gam nuai tenga loupate vuai ding ahia? A sunga teengte' gitlouh mana gamsate leh vasate mangthang uhi. Tua thamlou a, mite'n: I tunga thil tung Ama'n mu ke'n teh, chi lai uhi.
Pathian' Dawnna
5 Tangtawn Toupa'n gen a: Mite tawh khea na kitaiteh a, hon bahsak uleh, bangchi-a sakolte tawh kitaiteh thei ding na hia? Gam galmuanga na kisuih leh, Jordan luigei taamlaka bang suak ding na hia? 6 Na sanggamte, na innkawte amaute nangawn in hon lehbawl uh a, nang dema nakpi-a aw suah uhi. Nang hon phat mahle uh, amaute muang ken. 7 Ke'n ka inn nuse ding ing a, ka goutan nuse ding hi'ng. Ka itnu, a melmate khut sunga pekhe ding hi'ng. 8 Ka goutan kei adinga gamlak humpinelkai bang hong hita hi. Hon humham khum a, amah mudahta hi'ng. 9 Ka goutan kei adinga musane, musane dangte'n a um ua, a suai uh bang hong hita hilou hia? Kuan inla gamsa giloute, amaute negai dingin kaikhawm in. 10 Belamching tampite'n ka grephuan hihse ding uh a, ka lou tuanchil ding uh a, ka gam mun nuam, gamsia lehlouh suaksak ding uhi. 11 Gamsia-a bawl hi ding a, ka mitmuha gamsia lehlouh hi ding a, a thudon leh a keem kuamah om louh mana, gambuppi-a hihsiat hi ding hi. 12 Gamdai-gamkeua mualsang giau khempeuh tunga hihsemite dim ding hi. Ahang bel, Tangtawn Toupa' namsau in gam mong khat apan mong langkhat donga negai ding hiven. Tua hun chianga a bit kuamah om lou ding hi. 13 Huitbuh tuh ding uh a, lingte at ding uhi. Amaute tawlgawp ding uh a, bangmah lawhtak lou ding uhi. Tua bang ahih manin, Tangtawn Toupa' thangpaihna nasia hanga na gahkhop zumhuaina thuak in, chi hi. 14 Tangtawn Toupa' thugen hiai ahi: Ka mi Israelte ka piak goutan laaksuh ka innveng giloute khempeuh ahih leh, a gam uapan bulkalh ding ing a, amau lak apan Judah innkawte bulkalh ding hi'ng. 15 Ahihhanga, amaute ka bulkalhkhit chianga, amaute lainatna nei ding ing a, amaute tek a goutan leh a gama piikik ding hi'ng. 16 Amaute'n ka mite' lampite hoihtaka a sin uh a, ka min siala a kichiam ua: Khat vei laia, Baal' min siala kichiam dinga ka mite a sinsak bang ua, Tangtawn Toupa' min siala a kichiam ualeh, tua hun chianga ka mite laka tundinga om ding uhi. 17 Ahihhanga, nam kuapeuh in a ngaihkhiak kei leh bel, tua nam bulkalh a, hihmangthang sipsip ding hi'ng, chi-a Tangtawn Toupa'n phuang hi, chi hi.
Puan malngat Kawnggak
1 Tangtawn Toupa'n ka kianga a thugen hiai ahi: Kuan inla, puan malngata bawl kawnggak khat lei inla, tuain na kawng gak in. Ahihhangin, tui sukhasak ken, chi hi. 2 Tuachi-in, Tangtawn Toupa' hon thuhilh bangin, kawnggak khat ka lei a, tuain ka kawng ka gak hi. 3 Tua khitin, Tangtawn Toupa' thu nihveina dingin ka kiang ah hong tung a: 4 Na kawnggak lei, na kawnga na kigakna tawi inla, Perath ah hawh inla, suangheng ah va seel in, a chi hi. 5 Tuachi-in, ka kuan a, Tangtawn Toupa' hon hilh bangin ka va seel hi. 6 Ni tampi nungin, Tangtawn Toupa'n ka kiang ah: Tu'n Perath ah va hawh inla, tua lai ah va seel in ka chih kawnggak va la in, hon chi hi. 7 Tuachi-in, Perath ah ka hawh a, tua kawnggak ka toukhia a, ka selna mun apanin ka la a, ahihhangin, a naseta a, a zat theih nawn mahmah kei hi. 8 Tua khitin, Tangtawn Toupa' thu ka kiang ah hong tung a, 9 Tangtawn Toupa' thugen hiai ahi: Hibangin Judah kisaktheihna leh Jerusalem kisaktheihna thupi ka hihse ding. 10 Hiai ka thugente ngaikhe nuam lou, a lungtang khauh uh zui a, pathian dangte delh a, a nna uh sem a, amaute bia hiai migiloute, hiai kawnggak bang ding uh a, zattheih mahmah louh suak ding uhi! 11 Ahang bel, kawnggak, mihing kawnga kizang ahih banga, Israel innkawte leh Judah innkawte khempeuh, ka mite hi ding, ka minthanna, phatna leh pahtawina hi dinga zong ing a, ahihhanga hon ngaikhe lou uhi, chi-a Tangtawn Toupa'n phuang hi.
Savun Zuthawlte
12 Amaute kiang ah: Tangtawn Toupa, Israel' Pathian thugen hiai ahi: Savun zuthawl peuhmah zu-a hihdim ding ahi, chi in, a chi hi. Mi'n na kianga: Savun zuthawl peuhmah zu-a hihdim ding ahi, chih ka thei kei ua hia? hon chih uleh, 13 amaute kiang ah: Tangtawn Toupa' thugen hiai ahi: Hiai gama teengte khempeuh, David' kumpitutphah tunga tu kumpipate, siampite, kamsangte leh Jerusalema teengte khempeuh zukhamna-a dimsak ding hi'ng, 14 Amaute tattuahin, pate leh tapate tattuahin ka zaansak ding, chi- in Tangtawn Toupa'n phuang hi. Amaute hihmangthang lou dinga khasiatna hi-in, zahngaihna hi-in, lainatna hita leh, kidalsak lou ding hi'ng, chi hi, chi in, a chi hi.
Sala Mat ding Vauna
15 Za unla, thudon un, kiuangsak kei un. Tangtawn Toupa'n thu genta ahi. 16 Tangtawn Toupa, na Pathian un mial hon tut main, mual tunga mial khawnga na kipalpaih maun, Amah thupina pia un. Vaak na lamen uh a, ahihhangin, ama'n mial sahtak suaksak ding a, mial vom bekbukin kheng ding hi. 17 Ahihhanga na ngaihkhiak kei ua lebel, na kisaktheihna uh hanga a sima kap ding ing a, khitui luang puappuapa ka mitte khasetaka kap ding hi. Ahang bel, Tangtawn Toupa' belamhonte sala pimanga om ding uh hiven. 18 Kumpipa leh kumpipa nu kiang ah: Na kumpitutphah tung uapan hong kumsuk un, ahang bel, na kumpilukhu thupite uh, na lutung uapan ke ding hiven, chi in. 19 Negev-a khawpite kikhakbing ding a, a hong ding kuamah om lou ding hi. Judahte khempeuh khakmang leh pimanga om ding uhi. 20 Dakkhia unla, mallam apan hong kuante mu un. Noute' kep dinga piak belamhon na kisaktheihpihte uh koia om ahia? 21 Na lawmte uh hi dinga na zolte uh, Tangtawn Toupa'n noute tunga a koih chiangin bang na genta ding ua? Numei nauvei bangin natna in hon tuam lou ding hia? 22 Banghanga ka tunga hibang tung ahia? chi-a na kidot uleh na khelhna tampite uh hanga na niikte kihawkkhia a, na pumpi kithangbawl ahi ve. 23 Ethiopia mi in a vun khek thei ding hia? Ahih kei leh, gialbem in a gial khek thei ding hia? Nou, thilgilou hih zongsangte'n zong, thil hoih hih thei tuan lou na hi uhi. 24 Tangtawn Toupa'n: Gamdai-gamkeu huih in a mutleng buhsi banga hon thehthang ding hi'ng. 25 Hiai mah noute tan ding, noute tantuan dinga ka sehsa ahi. Ahang bel, kei hon mangngilh uchin a, pathian takloute muang hi ve uchin, chi-a Tangtawn Toupa'n phuang hi. 26 Na zumhuaina uh a kimuh nading a, na maitang uh khuh hiaia na niikte uh lemtou ding hi'ng. 27 Na angkawmnate uh, huka na ham ngong ngongna uh, zummawhtaka na kizuaknate uh kimu ding hi! Gamlak mualtung khawnga na thilhih kihhuaite uh muta hi'ng. Jerusalem aw, na tung gik hi! Bangtan buaha om lai ding na hia? chi hi.
Khawkeu, Kial, Namsau
1 Khawkeu tawh kisaia, Jeremia kianga Tangtawn Toupa' thugen hiai ahi: 2 Judah in suun a, a khawpite nguai hi. Gamsung kapin mau uh a, Jerusalem apan kah aw gingkhia hi. 3 Miliante'n a silate uh tui zong dingin sawl uh a, tuikholna khukte delh uh a, ahihhanga tui mu lou uhi. A tuibel vuakpi utawh kik uh a, lungdonga patauin a lu uh kikhuh uhi. 4 Gamsunga vuah zu lou ahih mana, lei keugawpa khangkham hi. Louneimite lungdong uh a, a lu uh kikhuh uhi. 5 Loupa om louh mana, zukpi nangawn in a nou suaktung taisan hi. 6 Gamlak sabiltung, mualtung giaute ah ding uh a, sihalte bangin nam futfut uhi. Loupa mun om louh mana, a mit uh mialgawp hi, chi hi. 7 Ka khelhnate un ka tatsiatnate uh gen mahleh, Tangtawn Toupa aw, na min suangin bang hiam beek hih ve. Ka nungtolhna uh lian a, nang tunga khial hi ung. 8 Israel' Lamet aw, a mangbat laia Hondampa aw, banghanga gamsunga mikhual banga, zankhat lei taam khualzin mi bang na hia? 9 Banghanga kigingkhol lou-a, bingphawn leh, hondam theilou vangletnabei galhat bang na hia? Tangtawn Toupa aw, koute laka om chin a, hon taisan ke'n, na min pu hi ung. 10 Mite tawh kisaia Tangtawn Toupa' thugen hiai ahi: Amaute'n vakthap nakpitaka ut uh a, a khete uh khaam zoulou uhi. Tuachi-a, Tangtawn Toupa'n amaute saang lou a, a tatsiatna uh thei gige a, a khelhnate uh hanga amaute gawt ding hi'ng, chi hi. 11 Tua khitin, Tangtawn Toupa'n ka kiang ah: Hiai mite' hoih nadingin thuum ken. 12 Anngawl mahle uh, a kah uh ngaikhe lou ding hi'ng. Haltum thillatte leh an thillatte lan mahle uh, amaute saang lou ding hi'ng. Amaute saan naksanga, namsau leh kial leh hipi-a amaute hihmangthang ding hi'ng, a chi hi. 13 Ahihhangin, ke'n: Maizen, Toupa Tangtawn Pathian' kamsangte'n: Namsau mu lou ding uchin a, kial zong thuak lou ding hi uteh. Hiai muna muandenna hon pe ding hi'ng, chi-a amaute hilh hilh uhi, ka chi hi, 14 Tua khitin, Tangtawn Toupa'n ka kiang ah: Kamsangte'n zuauthu gen uhi. Amaute sawl lou ing a, thu pe lou ing a, houpih zong houpih lou hi'ng. Amaute'n na kianga mengmuh takloute, aisanthute, milimbiak thute leh, amau' lungsim kitaksansak thute gen uh hi lei hi. 15 Tua bang ahih mana, ka mina thugen kamsangte tawh kisaia Tangtawn Toupa' thugen hiai ahi. Amaute ke'n sawl lou napi: Namsau in zong, kial in zong hiai gam khoih lou ding hi, chi uhi. Tua kamsangte mah, namsau leh kiala si ding uhi. 16 Tua a thugenkholhna mite uh, tua kial leh namsau hanga Jerusalem kongzing khawnga lotkhiaka om ding uhi. Amaute hita leh, a zite uh, a tapate uh, ahih kei leh a tanute uh hita leh a vui ding nangawn kuamah om lou ding hi. Amaute' tan dinga kilawm siatna, amaute tunga tungsak ding hi'ng. 17 Amaute kiang ah hiai thu gen inla: Sun leh zan tawp louin ka mit ah khitui luanglet hen, ka tanu, nungak siangthou -ka mite'n - liamma nasia thuak a, khutkhakna na lua thuak hi. 18 Khawpi pawlam ah pai leng, namsaua thahte mu ing a, khawpi sung lut leng, kiala site mu hi'ng. Kamsang leh siampi, a theih louh gam uh tung tuaktuak uhi, chi in, a chi hi. 19 Ke'n: Nang, Judah na pum nutsiatta-a hia? Zion na simmawhta-a hia? Banghanga hihdam theihlouh khopa hon thuaksak na hia? Koute'n muanna lamen ung a, thil hoih lah hong tung lou a, hihdamna hun lamen ung a, mulkimna kia om hi. 20 Tangtawn Toupa aw, ka gitlouhna uh pulak ung, ka pu ka pate uh mawhna pulak ung. Na tunga khial taktak hi ung. 21 Na min gum inla hon simmawh ken, na kumpitutphah thupi zahlaksak ke'n. Koute tawh kala na thukhun thei gige inla, palsat ke'n. 22 Namte' milim mannabeite'n vuah hon puak-a hia? Vaante'n zong vuah hon sawlsuk ua hia? Tangtawn Toupa, koute' Pathian aw, nang na hi vuah hon sawl. Tua bang ahih mana, nanga lametna nga hi ung. Hiai thilte khempeuh hihpa nang hi vechin, ka chi hi.
1 Tua khitin, Tangtawn Toupa'n ka kiang ah: Mosi leh Samuel ka maia ding ding hi le uh zong, hiai mite lama ka lungtang kihei lou ding hi. Ka mai apan amaute sawlmang in! Pai uhen! 2 Amaute'n: Koia pai ding ka hi ua? chi-a hon dot uleh, Tangtawn Toupa' gen hiai ahi, chi-in hilh in: Si dinga sehte, sihna ah, namsaua si dinga sehte, namsau ah, puksi dinga sehte, puksihna ah, salmat dinga sehte, salmatna ah pai un, chi hi, chi-in hilh in. 3 Tangtawn Toupa'n: Amaute dou dinga hihsethei li, a that ding namsau, a tuahmang ding uite leh negaia hihmangthang ding tungleng vasate leh leitung gamsate sawl ding hi'ng. 4 Hezekia' tapa Manase, Judah kumpipa'n Jerusalema a thilhih hanga amaute leitung kumpigamte' kih dinga bawl ding hi'ng. 5 Jerusalem aw, nang kua'n hon khasiat ding ahia? Kua'n hon kah ding ahia? Kua hong khawla na dam na dam louh hong kan ding ahia? 6 Nang, kei hon pampaih hi vechin, chi-in Tangtawn Toupa'n phuangkhia hi. Nungtolh gige chin a, tuachi-a na tunga khut kha ding ing a, hon hihmangthang ding hi'ng. Lainatna hon nei thei nawn lou hi'ng. 7 Tua gam khawpi kongpite-a amaute buh khitna chiangka-a khi ding hi'ng. Ka mite'n a gamtat uh khiamlou uh ahih mana, a tung ua sisunna leh siatna tun ding hi'ng. 8 A meigongte uh, luipi sehnel sanga tama pungsak ding hi'ng. Suntang laia a tuailaite uh' nute tunga hihse mi khat sawl ding ing a, amaute tunga mangbatna leh mulkimna tun guih ding hi'ng. 9 Ta sagih neinu sibup ding a, si ding hi. Suntang laia ama' ni tum ding a, zahlaksak leh simmawha om ding hi. A khawsuaksunte, a melmate uh maia namsaua that ding hi'ng, chi-a Tangtawn Toupa'n phuang hi. 10 Maizen aw maw nu, gambup in a kidoupih leh a kinakpih kei non na neihkhiak! Ke'n kuamah leitawisak lou, leitawi lah leitawi lou, hinapi-a michih in hon hamsiat uhi. 11 Tangtawn Toupa'n: A san a hang hoihtak neia hon hukhe ding ing a, siatni leh mangbat ni-a na melmate na kianga thumsak tham ding hi'ng. 12 Mi'n sik mallam sik ahih kei leh, sumsan a kuaitan zou dia hia? 13 Gamsung tenga na khelhnate khempeuh hanga na hauhna leh goute gallak suma a manbeia pekhe ding hi'ng. 14 Ka hehna kuang ding a, nang hon kang ding a, na theihlouh gam na melmate' sala hon pe ding hi'ng, chi hi. 15 Tangtawn Toupa aw, nang na theisiam hi. Hon thei gige inla, hon khawtuah in. Kei hon bawlsete tung ah phu hon laksak in. Nang zaw thuakzou hi chin a, hon lamang ke'n. Nang hanga selphouna tuak ka hih dan ngaihtuah in. 16 Na thute hong tun taka tuate ne ing a, na min pu ka hih mana tuate ka lungnopna leh ka kipahna hi ahi, Tangtawn Toupa Pathian Vanglianpen aw. 17 Kei zaw nopbawla diang souhsouhte laka tu ngeilou ing a, amaute tawh nopbawlkhawm ngeilou hi'ng. Na khut ka tunga om ahih mana, kei kia-a tangtut ing a, lungkimlouhna tawh hon kidimsak na hi. 18 Banghanga ka natna bei theilou a, ka liammate nase mahmah a, hihdam theihlouh hi ahia? Kei adingin khemhat luita bang, tuinak kang bang na hi dia hia? 19 Tua bang ahih manin, Tangtawn Toupa' thugen hiai ahi: Kisika na lunghei leh, ka sikha deihthawh na hih theih nadinga hon tungding thak ding ing a, thu namanlou hi loua, thu namante na gen leh, ka sika thugenpa hi ding na hi. 20 Hiai mite'n nang lam nga uhen la, nang zaw amau lam na ngat ding hi lou hi. Hiai mite adinga baang hon hisak ding ing a, sumsan kulhbaang hon hisak ding hi'ng. Amaute'n nang hon dou ding uh a, ahihhanga hon zoulou ding uhi. Ahang bel, hon ompih ding ing a, hon hukhia a, hon hondam ding hi'ng, chi-a Tangtawn Toupa'n phuang a, 21 migiloute' khut apan nang hon hukhe ding ing a, dopneiloute' khut apan hon tankhe ding hi'ng, chi hi.
Tuahsiat Ni
1 Tua khitin, TangtawnToupa' thu ka kiang ah hong tung a: 2 Hiai mun ah zi neiin tapate tanute na nei ding ahi kei, a chi hi. 3 Ahang bel, Tangtawn Toupa'n hiai muna piang tapate leh, tanute leh, amaute' nu a hite, amaute' pa a hite tungthu-a a gen hiai hiven: 4 Amaute natna mulkimhuaia si ding uhi. Kuama'n amaute kah lou ding a, vuia zong om lou ding uh a, lei laka nin paihkhawm bang zaw ding uhi. Namsau leh kiala mangthang ding uh a, a luangte uh tungleng vasate leh leitung gamsate' an hi ding hi, a chi hi. 5 Ahang bel, Tangtawn Toupa'n hiai gen hiven: Sisuunna inn ah lut ke'n. Hiai mite apan ka vualzawlna, ka itna leh ka khasiatna lakikta ka hih manin, si suun ding leh thuakpihna lak dingin hawh ke'n, chi-a phuang hi. 6 Hiai gam ah a niam a sang si tuak ding uhi. Vuia om lou ding uh a, suunna zong om lou ding uh a, amaute hanga kuamah ki-atkeh lou ding uh a, a lu uh zong metmai lou ding uhi. 7 Misite pa hi-in nu hita leh a suunte khamuan dinga kuama'n nek ding lui lou ding a, amaute hehnem dinga dawn ding pe lou ding hi. 8 Ankuangluina inn ah lut ken la, ne ding leh dawn dingin tu ke'n. 9 Ahang bel, hiai Tangtawn Toupa Vanglianpen, Israel Pathian' thugen hiven: Na mitmuh leh na damlaia, lungnopna leh kipahna husa beisak ding ing a, hiai muna mou leh mouneipa' awte beisak ding hi'ng. 10 Hiai thilte khempeuh hiai mite na hilh chianga, amaute'n: Banghanga Tangtawn Toupa'n koute tunga hibang tuahsiatna kia tung dinga sep ahia? Bang khelhna hih ka hi ua? Tangtawn Toupa ka Pathian uh tunga bang khelhna hih ka hi ua? a chih chiangun, 11 namaute kiang ah: Tangtawn Toupa'n phuang a: Na pu na pate un kei hon taisan a, pathian dangte zui a, a nna uh sem a, bia uh hiven. Kei hon taisan uh a, ka dan zui lou uhi. 12 Ahihhanga, noute, na pu na pate uh sanga gilouzaw-a gamta hi ve uchin. En ve ua, noute'n non thuman sangsik ua, na lungtang giloute uh genhakna zui na hi ve ua. 13 Tuachi-a hiai gama pan hon lawnkhia a, noute hi-in na pu na pate uh hita leh, na theih louh uh gam hon tun ding ing a, noute hon deihsakna nei lou ding ka hih mana, tua gama pathian dangte' nna sunlezana sem ding na hi uh, chi hi. 14 Ahihhanga mite'n: Tangtawn Toupa, Aigupta apan Israelte pikhetoupa' hinna sialin, a chih nawn louh hun uh nite hong tung ding a, 15 tua hun chianga: Tangtawn Toupa, mallam gam leh, Israelte a sawlmangna gamte apan amaute piikhetoupa' hinna sialin, chi zaw ding uhi. Ahang bel, ke'n a pu a pate uh kianga ka piak gama amaute tungding thak ding hivengin, chi-a Tangtawn Toupa'n phuang hi. 16 Ahihhangin, tu'n bel ngaman mi tampi ka sam ding a, amaute man ding uhi. Tua nung chiangin sabengmi tampi ka sam ding a, mual chih, tang chih leh suanghawm chih apan amaute, sabeta beng ding uhi. 17 Ka mit in a gamtatna khempeuh uh mu a, ka mit apan kisel lou a, a khelhnate uh zong ka mit apan kikhuh lou hi. 18 Hinna neilou a milim huathuaite-ua ka gam hihbuah a, milim kihhuaitea ka goutan a hihbuahtak man ua, a tatsiatnate uleh khelhnate uh, a lehniha thuk ding hi'ng, chi-a Tangtawn Toupa'n phuang hi, chi-in hilh in. 19 Tangtawn Toupa, ka hatna leh ka kulhpi, mangbat laia ka bukna aw, Leimong dong apan namte na kianga hong pai ding uh a: Ka pu ka pate un, pathian takloute, amau adinga thil hoih hihsak lou, a mannabei milimte chihlouh bangmah neilou uhi. 20 Mihingte'n amau pathiante kibawl umaw? He, ahihhanga pathiante hiloupi! hong chi ding uhi. 21 Tangtawn Toupa'n: Tua bang ahih mana, amaute sinsak ding ing a, hiai huna vangletna leh thahatna amaute sinsak ding hi'ng. Tua hun chianga ka min Tangtawn Toupa ahi, chih thei ding uhi.
1 Judah khelhna, amaute' lungtang pek tung leh, maitam kite tunga sikzum leh meisah suang zuma khuak thawh-a kigelh hi. 2 Amaute' taneute nangawn in singhiang zam nuai teng leh, mualtung tenga kidawh leh kiphut maitamte leh Ashera songte thei gige uhi. 3 Na gamsung tung ua, khelhna hanga tua gama ka mual leh, na hauhna uleh na goute khempeuh uh, na munsangte utawh, gallak sum banga pekhevek ding hi'ng. 4 Noumau' hih diktatlouhna hanga, kon piak goutan mansuah ding hi uteh. Na melmate uh khuta, na theih louh uh gama sala hon khawngkhe ding hi'ng. Ahang bel, ka hehna kuangsak uchin a, kuang gige ding hiven, chi-a Tangtawn Toupa'n gen hi. 5 Tangtawn Toupa' thugen hiai ahi: Mihing muang mi, a hatna dinga si-le-sa suang mi leh, a lungtanga Tangtawn Toupa kiheisan mi hamselawh ahi. 6 Amah zaw gamsia-a loupa bang hi ding a, hauhna phatna hong tun chianga muphalou ding hi. Gamdai-gamkeua leigum gawtak leh kuamah teen louhna chi gama teeng ding hi. 7 Tangtawn Toupa muang mi, a kimuanna Amah hipa bel, mi nunnuam hi ahi. 8 Amah zaw tuiluang kianga sing suan, luigeia zungkha bang ding hi. Ama'n khawkhal khawlum hong tun chianga, lau loua, a tehte hing gige hi. Khawkeu kuma lungzinna nei lou a, gahsuah loua hut ngeilou hi, chi hi. 9 Bangteng sangin lungtang khemhat zaw a, hihdam theih hilou hi, kua'n a theisiam thei dia? 10 Tangtawn Toupa'n: Kei, Tangtawn Toupa, mi a thilhih in a lawhkhiak bangbanga, a gamtatna bangbanga pahtakman pe dinga, mihing lungtang entela, pheklekpa ka hi, chi hi. 11 A dikloupi-a hauhna ngah mi zaw, ama' tui loupi opkeuh veengkeeng bang ahi. A damsung kimkhat a bei chianga tua hauhnate'n amah taisan ding a, atawp tawpa amah mah in mihai ahihna kilangsak ding hi. 12 Koute' munsiangthou omna bel, a chil apan pahtawia om kumpitutphah thupi ahi. 13 Tangtawn Toupa, Israel' lametpa aw, nang hon taisante khempeuh, maizumsaka om ding uhi. Nang hon kiheisante peuhmah in, tuihing nak ahipa Tangtawn Toupa taisan ahih mana, leivui laka kigelh bang lei hi ding hi. 14 Tangtawn Toupa aw, nang ka phatpa hi vechin, hon damsak in, hileh dam ding hi'ng. Hon hondam in, hileh hotdam hi ding hi'ng. 15 Amaute'n ka kianga: Tangtawn Toupa' thu koia om ahia? Tu'n tangtunsak hileh ake! hon chi chi uhi. 16 Na belamchingpa ka hihna ka taimangsan kei a, lungzin mangbatna ni lah ka lunggulh kei chih na thei hi. Ka kama pawt peuhmah na maia kihongsa ahi. 17 Kei adingin mulkimna hi ke'n. Tuahsiatni-a ka bukna na hi. 18 Kei hon bawlsete maizumsakin om uh henla, kei bel maizumna apan hon hum in. Amaute mulkimsakin om uh henla, kei zaw mulkimna apan hon keem in. Amaute tung ah tuahsiatna tungsak inla, tuahsiatna a lehnihin amaute hihmangthang in.
Sabbath Tansiangthouna
19 Tangtawn Toupa'n ka kianga a thugen hiai ahi: Kuan inla, Judah kumpipate a lut a pawtna uh, tua mipite' kongpi ah va ding in. Tua baan ah, Jerusalem kongpi dangte ah zong va ding inla, 20 amaute kiang ah: Judah kumpipate leh Judah mi khempeuh leh, hiai kongpitea hong lut Jerusalema teengte peuhmah aw, Tangtawn Toupa' thu ngai un, chi hi. 21 Tangtawn Toupa' thugen hiai ahi: Sabbath ni-a van gik paw lou ding, ahih kei leh, Jerusalem kongpite-a van gik pawlut lou dingin pilvang un. 22 Sabbath ni-in nna sem kei un. Na pu na pate uh thu ka piak bangin, Sabbath ni tang siangthou un ka chi. 23 Hinapi-in, amaute'n a ngaikhe kei uh a, a thudon sam kei uhi. Mi genhakte ahi uh a, a ngaikhe kei uh a, thununna zong a zui kei uhi, a chi hi. 24 Tangtawn Toupa'n: Ahihhangin, ka thu mang dinga na pilvan ua, Sabbath ni-a hiai khawpi kongpitea van gik non puaklut kei ua, tua ni-a nna sem lou a, Sabbath ni na tan siangthou uleh, 25 David' kumpitutphah tunga tu kumpipate, a uliante utawh, hiai khawpi kongpite ah hong lut ding uhi. Amaute leh a uliante uh, kangtalaite leh sakolte tunga tuangin hong pai ding uh a, Judah mite leh Jerusalema teengte'n hon zui ding uh a, hiai khawpi a kiluah gige ding hi. 26 Judah khawpite leh Jerusalem kimkota khawtate apan bang, Benjamin gam leh tumlam mual bul khawng apan bang, tanggam leh Negev apan bangin mite hong pai ding uh a, haltum thillatte leh kithoihnate, an thillatte leh kipahna thillatte Tangtawn Toupa' inn ah hon paw ding uhi. 27 Ahihhangin, Sabbath ni-a Jerusalem kongpitea hong luta, van gik pua-a, ka thumang lou a, Sabbath na tan siangthou kei uleh, Jerusalem kongpite ah phelhmit vuallouh mei ka kuangsak ding a, a kulhpite ka kangtumsak ding hi, chi in, chi ahi, a chi hi.
Belvelpa' Inn ah
1 Tangtawn Toupa apan Jeremia kianga thu hong tung hiai ahi: 2 Belvelpa' inn ah va hawhsuk inla, tua ah ka thupuak kon pe ding, chi hi. 3 Tuachi-in, belvelpa' inn ah ka hawhsuk a, amah, belvelna peia nasemin ka mu hi. 4 Ahihhangin, bellei apan a belvel, a khut ah a deih bang mei pulouin hong om a, tuachi-in, belvelpa'n bel dang khat dingin a vel a, ama' hoihsak dan penin a bawl hi. 5 Tua khitin, Tangtawn Toupa' thu ka kiang ah hong tung a: 6 Israel innkawte aw, hiai belvelpa' hih bangin nang tung ah ka hih thei keia hia? chi-in Tangtawn Toupa'n a phuang hi. Israel innkawte aw, belvelpa' khuta tungman bangin, ka khuta om na hi uh aw. 7 Nam khat peuh hi-in, kumpigam khat peuh hita leh, bulkalh, phelgawp leh hihmanthat ahi ding, chi-a hun khat peuh-a ka phuan a, 8 tua nam ka vauhilhna pen, a thilgilou hih a kisik leh, ka lunghei ding a, siatna tut ka sawm, a tung ah a tung kei ding. 9 Tua baan ah, nam khat peuh hi-in, kumpigam khat peuh hita leh, lamtouh leh suankip ahi ding, chi-a hun dang khat peuha ka phuan a, 10 tua nam in ka mitmuha thilgilou a hih a, ka thu a man kei leh, ama' adinga thil hoih hih ka sawm ka kikhelsak ding. 11 Tua bang ahih manin, tuin Judah mite leh Jerusalema teengte kiang ah thu gen inla: Hiai Tangtawn Toupa' thugen ahi: Ngai dih uh! Noute adinga tuahsiatna gelkhol ing a, noute doua thil sawm ka hi. Tua bang ahih manin, na gamtatna giloute uh kiheisan unla, na lampite uleh na gamtatna uh puahpha un, chi in. 12 Ahihhangin, amaute'n: Phatuam kei. Ka gelsa bangbang uh hih n'ung. Michih in ka lungtang genhak mah uh zui n'ung, chi-a hon dawng ding uhi, a chi hi. 13 Tua bang ahih manin, Tangtawn Toupa' thugen hiai ahi: Namte lak ah kan unla: Kua'n hibang thu za ngei ahia? Israel nungak siangthou in thil mulkimhuaipen khat hih hi. 14 Lebanon vukte, a pangken suang laka tuimang ngei hia? A tui vot didite, gamlapi-a a nakte apan luan tawp ngei hia? chi-in kan un. 15 Hinapi-a ka mite'n kei hon mangngilhta a, a mannabei milimte' maia gimnamtuite hal uhi. Tuate'n lah a lampite uleh, tanglai lampite-a amaute kipalpaisak uhi. Amaute lamneu kawchikte leh, a kikemlou lampite tawnsak uhi. 16 A gam uh hihsiat hi ding a, simmawh gige hi ding hi. Tua gam tawnte peuhmah in lamdang sa ding uh a, lu sinkhum ding uhi. 17 Suahlam apan huih nung banga, a melmate uh maia amaute thehthang ding hi'ng. Amaute a tuahsiat ni ua, ka maitang hilou a, ka nunglam musak ding hi'ng, chi hi. 18 Amaute'n: Kisa unla, Jeremia sawm ni. Ahang bel, siampi in a sinsak dan mang lou dinga, mipilte apan thuhilhna zong, kamsangte apan thugen zong mang lou ding hiven. Tua bang hi a, kisa unla, i leite in amah dou ni, a thugen bangmah thudon kei ni, chi uhi. 19 Tangtawn Toupa aw, hon ngaikhia inla, kei hon hekte' thugen za in! 20 Thil hoih, thilhoihloua thuk hi ding hia? Hinapi-a kei adinga gum khuak uhi. Na maia ding ing a, na thangpaihna amaute apan heimang dinga, amaute tanga thu gen ka hi, chih thei gige in. 21 Tua bang ahih manin, a tate uh, kialpi ah pekhia inla, namsau vangletna ah pekhia in. A zite uh tabei leh meigong suaksak in. A pasalte uh thahin om uhenla, a tangvalte uh kidouna phuala namsaua thahin om uhen. 22 Galsimmite amaute tunga na tunsak guih chiangin, a innte uapan kah husa kiza hen, kei hon mat nading ua gum khuak uh a, ka khe adinga a sima thang hon siah uh hiven. 23 Ahihhanga, Tangtawn Toupa aw, kei thah hon sawmna khempeuh uh nang theivek na hi. A mawhna liante uh ngaidam kenla, a khelhnate uh zong na mitmuh apan thaimang ken. Na maia paihkhiakin om uhenla, na heh ni-in, amaute tung ah gamtang in.
1 Tangtawn Toupa' thugen hiai ahi: Kuan inla, belvelpa apan lei bel khat lei in. Mite laka upate pawl khat leh, siampite laka pawlkhat tonpih inla, 2 Belvelpa Kongpi lutna kianga, Ben Hinom Phaizang ah kumkhia inla, tua ah, kon thu hilhte phuang inla: 3 Judah kumpipate leh, Jerusalema teengte aw, Tangtawn Toupa' thu za un, hiai Tangtawn Toupa Vanglianpen, Israel Pathian' thugen ahi: Ngai un! Hiai muna tuahsiatna tungsak ding ing a, a za peuhmah bil khawng ding hi. 4 Ahang bel, amaute'n kei hon taisan uh a, hiai mun, gamdang pathiante' mun suaksak uh hiven. Amaute'n, hiai muna, amaute hi-in, a pu a pate uh hita leh, a theih ngeilouh uh pathiante maia gimnamtui hal uh a, mawhneiloute' sisana hiai mun dimsak uh hiven. 5 Amaute'n Baal maia thillat dinga, a tapate uh meia a hal theih nading ua, Baal munsangte lam uhi. Hibang peuhmah thu pe lou ing a, minlawh zong minlawh kha lou, ka lungsima zong lut lou hi. 6 Tua bang ahih manin, pilvang un. Nite hong tung ding a, mite'n hiai mun, Tofeth, ahih kei leh, Ben Hinom Phaizang, chi nawnlou ding uh a, Kithahna Phaizang chi zawta ding uhi. 7 Hiai muna Judah leh Jerusalem thilsawm muihsak ding ing a, amaute' hinna lak sawmte' khuta, a melmate uh maia namsaua puksak ding ing a, a luangte uh, tungleng vasate leh leitung gamsate' an dinga pe ding hi'ng. 8 Hiai khawpi sesak dimdem ding ing a, simmawh thil suaksak ding ing a, a kianga pai peuhmah in lamdang sa ding uh a, a liamma khempeuh hanga simmawh ding uhi. 9 Amau' tapate leh tanute' sa mahmah nesak ding ing a, amaute' hinna laksawm melmate'n amaute dou a, umchip a, lungkham mangbatna a tun chiang ua, amaute sa kinetuah ding uhi, chi in. 10 Tua hun chiangin, nang hon zuite' mitmuhin tua leibel sattam inla, 11 amaute kiang ah: Tangtawn Toupa Vanglianpen' thugen hiai ahi: Hiai leibel khettap banga, hiai nam leh khawpi khentam ding ing a, kipuahpha thei nawn lou ding hi. Kivui nading mun awng om nawnlouh donga, a misite uh Tofeth-a vui ding uhi. 12 Hiai mun leh hiai muna teengte tunga ka hih ding hiai ahi, chi-in Tangtawn Toupa'n phuang hi. Hiai khawpi Tofeth bangsak ding hi'ng. 13 Jerusalema innte leh Judah kumpipate' innte leh, inntung apana, aksihonte' maia gimnamtuite a halna uleh, pathian dangte' maia dawn thillatte a sunbuakna uh, tua innte tawh, hiai mun, Tofeth banga buahsak ding hi'ng, chi in, a chi hi. 14 Tua khitin Tangtawn Toupa'n genkholhna thu gen dinga a sawlna, tua Tofeth apan Jeremia a kilehkik a, Tangtawn Toupa' tempul huangsung inntual ah a ding a, mipite khempeuh kiang ah: 15 Tangtawn Toupa Vanglianpen, Israel Pathian' thugen hiai ahi: Ngai un! Amaute genhak uh a, ka thugente ngai nuamlou ahih manun, amaute' thuak ding ka gensa tuahsiatna peuhmah, hiai khawpi leh a kimkota khawtate tunga tungsak ding hi'ng, chi ahi, a chi hi.
Jeremia leh Pashur
1 Jeremia in hiai genkholhna thute a gen Imar' tapa siampi Pashur, Tangtawn Toupa' tempula ulian makaipa'n a zaktakin, 2 Jeremia a vawsak a, Tangtawn Toupa' tempula Benjamin Kongpi Saknung ah koi a bunsak hi. 3 A zingchianga, Pashur in tua kolte apan Jeremia a khah takin, Jeremia in Pashur kiang ah: Tangtawn Toupa'n na min dinga a sak Pashur ahi kei a, Magor Misabib ahi. 4 Ahang bel, Tangtawn Toupa' thugen hiai hiven: Nangmah ading leh na lawmte khempeuh adinga mulkimna-a nang hon bawl ding ing a, amaute a melmate uh' namsaua a puk lai uh na mit mahmaha mu ding na hi. Judah khempeuh Babulon kumpipa khuta pekhe ding ing a, ama'n amaute, Babulona pawmang ding a, ahih kei leh, namsaua that ding ahi. 5 Hiai khawpi' hauhnate khempeuh, a sepsuah khempeuh, a melmate uh khuta pe ding hi'ng. Amaute'n gallak suma tua la ding uh a, Babulon tun ding uhi. 6 Nang Pashm leh na inna teengte khempeuh, Babulon ah kaihmangin na om ding uh a, tua ah na si ding a, na kivui ding a, nang leh genkholhna thuzuau na genna na lawmte khempeuh tawh, tua muna si-in na kivui ding uhi, chi ahi, a chi hi.
Jeremia' Lungkimlouhna
7 Tangtawn Toupa aw, hon khem chin a, khemzawha om hita ing. Hon thazawh chin a, vualzou hita na hi. Sun nitum tuma nuihzabuk hita Kilchih apan lauhuai ing a, kuapeuh in hon enghou hi. 8 Thu ka gen peuhmah chianga, kikoukhia a, hiamgamna leh hihmanthatna tangkoupih hi'ng. Tuachi-a Tangtawn Toupa' thu in ka tunga selphouna leh zahlakna hon tun hi. 9 Ahihhanga, ama' min gen lou dinga a mina zong thu gen nawn lou ding hi'ng, chi dek leng, Ama' thu ka lungsunga mei banga om a, ka guhte sunga bilh bang hi. Ka sunga kep tawi ing a, kem thei lou taktak hi'ng. 10 Kilchih ah mulkimna om! Amah hek un! Amah hek ni! chi-a kihuau tampi za hi'ng. Ka lawmte khempeuh in ka kipuk ding tang uh a: Khempaiha om kha ding a, tua hun chianga amah zou ding hang a, ama' tunga phuba la ding hi hang, kichi uhi. 11 Ahihhanga, Tangtawn Toupa'n galhat mahmah banga hon ompih a, kei hon bawlsete kipal ding uh a, hon zou lou ding uhi. Amaute lawhsam ding uh a, zahlak ding uh a, a zahlakna uh kimangngilh ngeilou ding hi. 12 Tangtawn Toupa Vanglianpen, midiktatte entel a, lungtang leh lungsim ensuakpa aw, nang khuta ka thu nga hi vengin, maute tunga na phulakna hon musak in. 13 Tangtawn Toupa phatin la sa un! Ama'n migiloute' khut apan a tasamte' hinna hukhia hi. 14 Ka pian ni hamsiatin om hen! Ka nu'n hon neihkhiak ni vualzawlin om kei hen! 15 Ka pianni vualzawla, ka pa kianga: Ta na nei a, tapa ahi! chipa hamsiatin om hen! 16 Tua bang mi pen, Tangtawn Toupa'n lainatna beia a lumlet khawpite bang hen. Zingsangin kapa mauna za henla, sun laiin galla za hen. 17 Ahang bel, ama'n sula hon that lou a, ka nu' sung, ka hankhuk suaksak a, a sul khaksakden lou hiven. 18 Banghanga lungkham dahna mu ding leh, ka nite zumhuaitaka beisak dinga, sul apan hong pawtkhe mahmah ka hia?
Zedekia' Thumna Nialna
1 Kumpipa Zedekia in Malkija' tapa Pashur leh, Maaseia' tapa siampi Zefania kianga Jeremia a sawl laiin, Tangtawn Toupa apan thu, Jeremia kiang ah hong tung hi. Amaute'n: 2 Babulon kumpipa Nebukhadnezar in eite hon dou dek ahih manin, Tangtawn Toupa kiang ah thu dong in. Amah a nungkik nadingin, nidang laia bangin, Tangtawn Toupa'n eite adingin thillamdang a hih khamawh ding hia? a chi uhi. 3 Ahihhangin, Jeremia in amaute a dawng a: Zedekia na hilh un, 4 Hiai Tangtawn Toupa, Israel' Pathian' thugen ahi: Noute hon sim a, kulhbaang pua-a om Babulon kumpipa leh, Kaldaite dou nadinga na zat uh, na khut ua galvan omte, noute tunga hei dek ka hi. Amaute hiai khawpi sunga kaikhawm ding ing a, 5 keimah mah in nakpitaka heh leh thangpaia soua ka khut thahat zankhia-a noute hon dou ding ka hi. 6 Hiai khawpi-a teengte, mihing leh gante satpai ding ing a, hipi-a nasetaka si ding uhi. 7 Tua nung chianga, Judah kumpipa Zedekia leh a uliante leh, hiai khawpi-a teeng laite hipi leh namsau leh kial apan suaktate, Babulon kumpipa leh amaute' hinna laksawm a melmate uh khuta pe ding hi'ng. Ama'n amaute, namsaua that ding a, amaute tunga zahngaihna, khasiatna leh lainatna lak het lou ding hi'ng, chi hi, chi-in hilh un. 8 Tua baan ah, mipite kiang ah: Tangtawn Toupa' thugen hiai ahi: Ngai un, na mai uah hinna lampi leh sihna lampi ka khung hi. 9 Hiai khawpi-a om peuhmah, namsau leh kial, ahih kei leh, hipi-a si ding hi. Ahihhangin, paikhia a, hon sim Kaldaite khutsunga kipelut peuhmah hing ding a, a hinna kia utawh suakta ding uhi. 10 Hiai khawpi tunga a hoih hilou, a sia tut ding sawmkip khin hi'ng, chi-a Tangtawn Toupa'n phuangkhia hi. Hiai khawpi, Babulon kumpipa' khutsunga piak hi ding a, ama'n meia hihse ding hi, chi ahi, chi-in hilh un. 11 Tua ban ah, Judah kumpi innkawte kiang ah: Tangtawn Toupa thu za un, 12 David innkawte aw, hiai Tangtawn Toupa' thugen ahi: Zingsang tengin thudika vaihawmna zong unla, lawha om mi, a nuaisiah mi khut apan hukhia un. Tua bang ahih kei leh, thil gilou na hih man ua, ka thangpaihna puakzak ding a, mei banga kang ding a, kuamah phelh zawhlouha kuang ding hi. 13 Nang khawpi aw, hiai phaizang tunglam, suanglak mualtunga teengnu nang aw, Eite kua'n hon dou thei ding ahia? I bukna sunga kua hong lut thei ding ahia? chipa nang aw, ke'n nang hon dou hi'ng, chi-a Tangtawn Toupa'n phuang hi. 14 Na thilhihte un a lawhtak bangbanga hon gawt ding hi'ng. Na gammangte uh meia hal ding ing a, na kim na pam ua thil bangkim kangtum ding hi, chi-a Tangtawn Toupa'n phuang ahi, chi-in hilh un, chi hi.
Kumpipa Giloute tunga Thukhenna
1 Tangtawn Toupa' thugen hiai ahi: Judah kumpipa' innpi ah hawhsuk inla, hiai thu va phuang in, chi hi. 2 David' kumpitutphah tunga tupa, Judah kumpipa aw, nang leh na uliante leh hiai kongpite-a lut na mite'n Tangtawn Toupa' thu za un. 3 Tangtawn Toupa' thugen hiai ahi: A dik a tang hih un. Lawha om mi, amah nuaisiah mi apan hukhia un. Gamdang mite, pabeite leh meigongte tung ah a diklou hih kei unla, khut zong kha kei unla, hiai mun ah mawhneilou sisan suah kei un. 4 Ahang bel, hiai thupiakte zui dinga na pilvan uleh, David kumpitutphah tunga tu kumpipate, kumpi innpi kongpite ah, kangtalaite leh sakolte-a tuanga hong lut ding uh a, a uliante uleh a mite un hon zui lai ding uh hiven. 5 Ahihhanga, hiai thupiakte na zuih kei uleh bel, hiai kumpi innpi segawp ding hi, chi-a keima' min siala kichiam hi'ng, chi-a Tangtawn Toupa'n phuang hi. 6 Ahang bel, Judah kumpipa' innpi tawh kisaia Tangtawn Toupa' thugen hiai ahi: Kei adingin Gilead bang hi mah lechin, Lebanon mualvum bang hi mah lechin, gamdai-gamkeu leh luahlouh khawpite hon bangsak ngeingei ding hi'ng. 7 Nang dou dinga, hihse mite, a galvan uh tawi chiata hon sawl ding ing a, na sidar singtum hoihte uh satnen ding uh a, meikhuka khul ding uhi. 8 Nam tampite apan mite'n, hiai khawpi hong tawn ding uh a: Banghanga Tangtawn Toupa'n hiai khawpi tunga hibang hih mahmah ahia? chi-a kidong ding uhi. 9 A dawnna bel: Amaute'n Tangtawn Toupa, a Pathian uh thukhun a taisan ua, pathian dangte bia a, a nna uh a sep man uh ahi ve, chih hi ding hi, a chi hi. 10 Kumpipa sisa kah kei unla, ama mansuahsa zong suun kei un. Piimanga om mi bel nakpitakin kah un. Amah hong kik ngei nawnlou ding a, a pianna gam mu ngei nawn lou ding hiven. 11 Ahang bel, Josia' tapa Shalum, a pa' mun luah a, Judah kumpipa-a hong pang napi-a hiai mun paisanpa tungthu Tangtawn Toupa'n a gen hiai hiven: Amah hong kik ngei nawn lou ding hi. 12 Amah sala a kaihna mun ua si ding a, hiai gam mu ngei nawn lou ding hi, chi hi. 13 Diktatlouhna zanga a innpi lam a, diktatloutaka vaihawmna zang a, a inndan tungnungte lam a, a gammite a mawkna-a semsak a, a thaman uh pelou mi tunggik hi. 14 Ama'n: Innpi thupitak, inndan tungnung lianpipi ka kilam ding, chi hi. Tuachi-a tawhlet lianpipi bawl a, sidar singa bangthuahte bawl a, a sana zem lai hi. 15 Sidar sing tamsem sem neihna in nang kumpipa-a hon bawl ding hia? Na pa'n nek leh dawn ding nei hilou hia? Ama'n a dik a tang hih a, amah adinga bangkim hoih ahi ve. 16 Ama'n a zawngte leh tasamte gum a, amah adinga bangkim hoih hi. Kei hon thei kichi tua bang hilou maw? chi-a Tangtawn Toupa'n phuang hi. 17 Ahihhanga na mit leh na lungtang, punna diklou lam nga a, mawhneiloute' sisan suahna leh nuaisiahna leh sum laksakna lam nga hi, chi ahi. 18 Tua bang ahih mana, Tangtawn Toupa'n, Judah kumpipa Josia' tapa Jehoiakim tungthu a gen hiai ahi: Maizen, ka sanggampa aw, chi hiam, Maizen, ka sanggamnu aw, chi hiama amah kah lou ding uhi. Maizen, ka pu aw! Maizen a thupina aw! chi-a amah kah lou ding uhi. 19 Amah, sakol vuia kivui ding a, talkaih leh Jerusalem kongpite' pawlama paih hi ding hi, chi hi. 20 Lebanon ah kuantou inla, kikoukhia in. Bashan ah na aw kiza hen. Abarim apan kikou inla, na pankhawmpihte khempeuh sikdena om uh hiven. 21 Bit na kisak laitaka, hon vauhilh hi'ng. Ahihhanga, nang lah: Ngaikhe kei ning! chi na hi. Na tuailai apan na gamtat dan hibang hi mah hi, ka thu manglou hiteh. 22 Huih in na belampute khempeuh mutmang ding a, na pankhawmpihte sila-a kaihmang hi ding hi. Tua hun chianga, maizum ding chin a, zahlak ding hi teh. Tua lah na gitlouhnate khempeuh hang hi ding hi. 23 Nou Lebanona sidar innte-a teeng hiathiatte, natna hong tun chianga, numei nauvei banga thuum-a na mau dingdan! chi hi. 24 Tangtawn Toupa'n phuang a: Keima' hinna sialin ka gen hi. Judah kumpipa Jehoiakim' tapa Jehoiakhin aw, ka khut taklam suainamna zungbuh bang hi mah lechin, hon tolkhe veve ding hi'ng. 25 Na hinna laksawm na laute' Babulon kumpipa Nebukhadnezar leh Kaldaite' khut sunga hon pekhe ding hi'ng. 26 Nang leh na pianna nu, a kua zaw sam zong na pian louhna uh gamdang hon denna ding ing a, tua-a si tuak ding na hi uhi. 27 Kik ding na lunggulhna gam ua hong kik ngei nawn lou ding na hi uh, chi hi. 28 Hiai mi Konia, kuamah deihlouh, simmawhhuai beel kitamsa ahi maw? Banghanga amah leh a tate lotkhiaka om a, a theihlouh uh gam deenna hi ding uh ahia? 29 Gam aw, gam aw, gam, Tangtawn Toupa' thu za in! 30 Tangtawn Toupa' thugen hiai ahi: Hiai mipa, tabei banga a damsung teng lawhching ngeilou dingin minkhum in. Ahang bel, a suante kuamah lawhching lou ding a, David' kumpitutphah tunga tu lou ding a, Judah tunga vaihawm nawn lou ding hi, chi hi.
Kahiang Diktat
1 Ka gantatna muna belamte hihmangthang a, thehzak belamchingte tung a gik hi! chi a Tangtawn Toupa'n phuang hi. 2 Tua bang ahih manin, Tangtawn Toupa, Israel' Pathian in ka mite kem, belamchingte tungthu a a gen hiai ahi: Ka belamhonte thehzak a, hawlmang a, amaute na don louh manun, na thilhih gilou hang na tung ua gawtna hon pe ding hi'ng, chi-a Tangtawn Toupa'n phuang hi. 3 Keimah mah in ka belamhon laka suaktasunte, amaute ka hawlmangna gamte apan kaikhawm ding ing a, chipha-a a pun nading mun uh,;antatna muna piikik ding hi'ng. 4 Amaute tunga belamchingte koih ding ing a, tuate'n amaute don ding uh a, lau ngei nawnlou ding, mulkim ngei nawn lou ding, a manga kimlou zong om ngei nawn lou ding hi, chi-a Tangtawn Toupa'n phuang hi. 5 Tangtawn Toupa'n phuangkhia a: Nite hong tung dek, David ading Kahiang diktat khat ka tunkhiak ding hun. Amah, piltaka vaihawm ding, gamsunga a dik a tang hih ding, Kumpipa hi ding hi. 6 Ama' hun sungin, Judah hotdam hi ding a, Israel bita teeng ding hi. Amah a kisapna ding min: JEHOVA TSITKENU, chih hi ding hi. 7 Tangtawn Toupa'n phuangkhia a: Tua bangin nite hong tung dek. Mite'n: Aigupta apan Israel piikhetoupa, Tangtawn Toupa' hinna sialin, chi nawn loua, 8 mallam gam leh amaute a hawlmangna gamte khempeuh apan Israel suante piikhetoupa, Tangtawn Toupa' hinna sial in, a chih zawk hun uh hi ding hi. Tua hun chianga amau' gam mahmaha teeng ding uhi, chi hi. Zuauthei Kamsangte 9 Kamsangte tawh kisaiin: Ka sung ah ka lungtang kitamkham a, ka guhte khempeuh liing hi. Tangtawn Toupa leh a thu siangthoute hanga, zukham leh zu' zelhzawh mi hong hita hi'ng. 10 Gamsung lah angkawmte-a dim a, hamselawha om gam keugawpta, gamdai-gamkeua gantatna munte lah teemgawpta. Kamsangte'n lampi gilou tawn uh a, a theihna uh diktatloutaka zang uhi. 11 Tangtawn Toupa'n gen a: Kamsang leh siampi, pathianbei hi tuak uh a, ka tempul sung nangawna a gitlouhna uh mu hi'ng, chi-a Tangtawn Toupa'n phuang hi. 12 Tua bang ahih mana, a lampi uh nai ding a, miallaka sawlmanga om ding uh a, tua muna kitolh puk ding uhi. Amaute gawt a hih kum ua, a tung ua tuahsiatna tun ding hi'ng, chi-a Tangtawn Toupa'n phuang hi. 13 Ama'n: Samaria kamsangte laka thil muh thadahhuai khat mu hi'ng: Amaute'n Baal mina thil gen uh a, ka mi Israelte piikawi uhi. 14 Jerusalem kamsangte laka zong, thil mulkimhuai mu hi'ng: Amaute'n angkawm uh a, zuauthu tawh khawsa uhi. Migiloute' khut hatsak uh a, kuama'n a gitlouhna nuse lou hi. Ka mitmuha Sodom bang hi uh a, Jerusalem mite zong Gomora bang hi uhi, chi hi. 15 Tua bang ahih mana, kamsangte' tungthu, Tangtawn Toupa Vanglianpen' thugen hiai ahi: Jerusalem kamsangte apan, Pathian biak limsaklouhna gamsung tenga a daih mana, amaute an kha nesak ding ing a, tui kha dawnsak ding hi'ng, chi hi. 16 Tangtawn Toupa Vanglianpen' thugen hiai ahi: Kamsangte'n na kiang ua a genkholhte uh ngaikhe kei un. Amaute'n lametna takloua hon kidimsak uhi. Amau' lungsim suak mengmuhte gen uh a, Tangtawn Toupa' kam apan hi lou hi. 17 Kei hon simmawhte kianga thu gen gen uh a, Tangtawn Toupa'n: Lemna na nei ding uh, chi ahi, chi uhi. A lungtang engtatte uh zuite khempeuh kianga: Na tung ua thilsia tung lou ding hi, chi uhi. 18 Ahihhanga a lak ua kua eita, Tangtawn Toupa' thu mu ding leh za dinga Tangtawn Toupa' vaihawmpawl laka ding ngei? Kua ahia ama' thu ngaikhia a, za ngei? 19 Ngai dih, Tangtawn Toupa' huihpi thangpaia nungkik ding a, migiloute' lutunga pingpeia kipei ding hi. 20 Tangtawn Toupa'n lungtanga a tup a tangtun kim mateng, a hehna nungkik lou ding hi. Hong tung ding nitea hiai theitel mahmah ding hi uteh. 21 Hiai kamsangte ka sawl hilou napi, amau' thu mah pua-a taai uhi. Amaute kianga thu gen lou napi ing a, genkholhna thu gen uhi. 22 Ahihhanga, keia' Thukikumpawl laka pang hi le uh bel, ka mite kianga ka thu tangkoupih ding uh a, a gamtat giloute uleh a thilhih giloute uh kiheisanta ding uhi. 23 Naichika om kia hi a, gamlapi-a om Pathian zong ka hi kei-a hia? chi-a Tangtawn Toupa'n phuang hi. 24 Ka muh theih louh dinga, mun simthama kua kibu thei ahia? chi-a Tangtawn Toupa'n phuang hi. Lei leh vaana dim ka hi kei-a hia, chi-a Tangtawn Toupa'n phuang hi. 25 Ka mina zuauthu gen kamsangte' thugen zata hi'ng. Amaute'n: Mang ka man! Mang ka man! chi uhi. 26 Amau' lungsima suangtuahna maimai gena, hiai kamsang zuau-theite' lungtang hibanga bangtan om ding ahia? 27 A pu a pate un Baal biakna tungtawna ka min a mangngilh bang ua, mang a kihilhtuah tuahte uh tungtawna ka mite, ka min mangngilhsak dinga kingaihtuah uhi. 28 Mangnei kamsang in a mang gen hen, ahihhangin, ka thu nei mi in muanhuai takin tua ka thu gen hen. Ahang bel, buhpawl in buhtang tawh bang kisaina nei eita? chi-a Tangtawn Toupa'n phuang hi. 29 Ka thu mei bang hilou maw? Suang seknen thei sek bang hilou maw? chi-a Tangtawn Toupa'n phuang hi. 30 Tangtawn Toupa'n gen a: Tua bang ahih mana, kei apan hileh kilawm thute kiguksaktuah kamsangte dou hi'ng, chi-a phuang hi. 31 Tangtawn Toupa'n: Ahi, a lei uh lok maimai a: Tangtawn Toupa'n phuangkhia hi, chi mawkmawk kamsangte dou hi'ng, chi hi. 32 Tangtawn Toupa'n: Mang takloute gen kamsangte dou taktak hi'ng, chi a phuang hi. Tangtawn Toupa'n: Amaute'n mang takloute gen uh a, thu zuau hangsantaka gena ka mite piimang uhi. Hinapi-a kei' sawl leh kei' seh hilou uhi. Hiai mite'n phattuampih hetlou uhi, chi-a phuang hi.
Puakgik Thugen Taklou leh Kamsang Takloute
33 Hiai mite hi-in, kamsang khat hi-in, siampi khat hita leh, na kianga: Tangtawn Toupa' puakgik thu bang ahia? chi-a hon dot chiangun, amaute kiang ah: Bang puakgik thu eita? Noute hon taisan ding hi'ng, chi-a Tangtawn Toupa'n phuang hi, chi in. 34 Kamsang khat peuh, siampi khat peuh, ahih kei leh mi khat peuh in: Hiai Tangtawn Toupa' puakgik thu ahi, a chihtang pah leh, tua bang mi leh a innkawte gawt ding hi'ng. 35 Noute tek in na lawm kiang hiam, na tanau kiang hiama na gen gen uh hiai ahi: Tangtawn Toupa' dawnna bang ahia? chih. 36 Ahihhanga, mi khat peuh adinga, ama' thu mah, ama' puakgik thu hong hi mawk a, Pathian hing, Tangtawn Toupa Vanglianpen, i Pathian' thute kaikawi nak na hih manun, Tangtawn Toupa' puakgik thu, na chih nawn het louh ding uh ahi. 37 Kamsang khat peuh kianga na gen gen uh hiai ahi: Tangtawn Toupa'n nang hon dawnna bang ahia? chih hiam, Tangtawn Toupa'n bang a gen a? chih hiam ahi. 38 Hiai Tangtawn Toupa' puakgik thu ahi, chitang pah ken, hon chi mahleng, hiai Tangtawn Toupa' puakgik thu ahi, chihtang pah na zang nak uhi. 39 Tua bang ahih manin, noute kon mangngilh ngeingei ding a, kon ompihna apan, noute leh na pu na pate uh kianga ka piaksa hiai khawpi tawh kon paikhe ding hi. 40 Na tung uah zahlakdenna kon tun ding hi, chi hi.
Theipi Lawh Nihte
1 Babulon kumpipa Nebukhadnezar in Judah kumpipa Jehoiakim' tapa Jehoiakhin leh, a uliante leh, khutsiamte leh sinsakte, Jerusalem apan Babulona a puakmang nungin, Tangtawn Toupa'n, Tangtawn Toupa' tempul maia theipigah lawh niha kikoih hon ensak hi. 2 Lawh khat ah theipigah hoih mahmahte, a min hoihte bangbang, a om a, lawh khat pen ah bel, theipigah hoih loute, nek zong nek theih louh ding a om hi. 3 Tua khitin, Tangtawn Toupa'n ka kiang ah: Jeremia, bang na mu a? chi-in hon dong hi. Ke'n ka dawng a: Theipigahte ka mu. A hoihte a hoih mahmah a, a hoihloute lah a se lua a, nek theih dinj ahi kei, ka chi hi. 4 Tua khitin, Tangtawn Toupa' thu ka kiang ah hong tung a, 5 Tangtawn Toupa, Israel Pathian' thugen hiai ahi: Hiai mun apan Kaldaite gama ka sawlmang, tua Judah gam apan khakmanga omte, hiai theipi hoihte banga hoihin ka ngai hi. 6 Amaute' hoih nadingin ka mitin amaute ka ching ding a, amaute hiai gam ka tunkik ding. Amaute ka lamtou ding a, ka phelgawp kei ding. Amaute ka suanin ka phut ding a, ka bulkalh kei ding. 7 Kei Tangtawn Toupa ka hi, chih hon theih nading uh lungtang amaute ka pe ding. Amaute ka mite ahi ding uh a, kei a Pathian uh ka hi ding. Ahang bel, a lungtang khempeuh utawh ka kianga hong kik ding uh hiven, chi hi. 8 Tangtawn Toupa'n gen a: Judah kumpipa Zedekia leh a uliante leh, Jerusalema suaktate bel, hiai gama om hi-in, Aigupta-a om hita le uh, theipi hoihlou, nek theih louh ding khopa sete bangin, ka lehngatsan ding. 9 Amaute ka khakmangna leitung kumpigam khempeuh' kih leh muhdah, zahlakna leh paunak, nuihzabuk leh hamsia ka suaksak ding. 10 Amaute leh a pu a pate uh kianga ka piak gam apan hihmanthata a om mateng uh, amaute dou dingin namsau leh kial leh hipi ka sawl ding, chi hi.
Saitan sung Kum
1 Judah kumpipa, Josia' tapa Jehoiakim' vaihawm kum, a kum lina ah, Judah mite khempeuh tawh kisai thu, Jeremia kiang ah hong tung hi. Tua bel, Babulon kumpipa Nebukhadnezar' vaihawm kum, a kum khatna ahi. 2 Tuachi-in, kamsangpa Jeremia in Judah mite khempeuh leh, Jerusalema omte khempeuh kiang ah thu a gen a: 3 Kum 23 sung, Judah kumpipa Amon' tapa Josia' vaihawm kum, a kum sawm-lethumna apan tuni dong, Tangtawn Toupa' thu ka kiang ah hong tungta a, noute kiang ah thu ka gen a, ahihhangin, na ngaikhe kei uhi. 4 Tangtawn Toupa'n, a sila, tua kamsangte khempeuh na kiang uah hon sawl thak mahleh, na ngaikhe kei uh a, na thudon mahmah kei uhi. 5 Amaute'n: Tuni'n noute chiat, na gamtat giloute uh leh na thilhih giloute uapan kihei un. Hi leh, Tangtawn Toupa'n noute leh na pu na pate uh kianga hon piak gam ah na teeng denden thei ding uhi. 6 Pathian dangte zuiin be kei un. Na khutsuakte-un hon hehsak kei un. Hi leh, hon hihna lou ding hi'ng, chi hi. 7 Tangtawn Toupa'n phuang a: Ahihhanga kei hon ngaikhe lou uchin a, na khutsuakte ua hon hehsak uchin a, noumau tunga siatna kitut hi uteh, chi hi. 8 Tua bang ahih mana, Tangtawn Toupa Vanglianpen in hiai gen a: Ka thute na ngaihkhiak louh man ua, 9 mallam mite khempeuh leh ka sila, Babulon kumpipa Nebukhadnezar sam ding ing a, hiai gam leh a sunga teengte leh, a kim a pama namte khempeuh dousak ding hi'ng, chi-a Tangtawn Toupa'n phuang hi. Amaute hihmangthang sipsip ding ing a, mulkimna leh simmawh leh, a se tawntunga bawl ding hi'ng. 10 Tuate apan lungnopna leh kipahna husa leh, mou leh mouneipa' awte, buhgawi suang gingte leh, meivak vakte hawlmang ding hi'ng. 11 Hiai gambup, gamsia suaksak ding ing a, hiai namte'n Babulon kumpipa' nna kum 70 sung sem ding uhi. 12 Tangtawn Toupa'n phuang a: Ahihhanga, kum 70 a bei chianga, Babulon kumpipa leh a nam, Kaldaite gam, a mawhna uh hanga gawt ding ing a, gamsia suaksakden ding hi'ng. 13 Tua gam' thuak ding ka gensate, hiai laibu-a kigelhte khempeuh leh kamsangpa Jeremia in namte khempeuh a vauna, tua gam tunga tungsak ding hi'ng. 14 Amaute mah, namdang tampite leh kumpipa thupite' sala lut ding uh a, amau' thilhihte leh a khut nasepte uh bangbanga thuk ding hi'ng, chi hi.
Pathian' Thangpaihna Nou
15 Tangtawn Toupa, Israel Pathian thugen hiai ahi: Ka thangpaihna zu-a dim hiai nou ka khut apan la inla, kon sawlna namte khempeuh dawnsak in. 16 Hiai a dawn chiangun, hoi dongdong ding uh a, amaute laka ka sawl ding namsau hanga hai ding uhi, chi hi. 17 Tuachi-in, Tangtawn Toupa' khut apan tua nou ka la a, Ama' hon sawlna namte khempeuh ka dawnsak hi. 18 Jerusalem leh Judah khawpite, a kumpipate uleh uliante, tuni-a a om bang ua, se vek a, mulkimna leh simmawh leh hamsiat suaksak dinga dawnsaka om ahi uhi. 19 Tuate bel, Aigupta kumpipa Faro, amah doute, a uliante leh a mite khempeuh leh, 20 tua-a om gamdang mite khempeuh, Uz kumpipate khempeuh, Filistia kumpipate khempeuh ahi uhi. Tua Filistiate kumpite bel, Ashkelon, Gaza, Ekron kumpipate leh midang, Ashdod-a nutsiatte ahi uhi. 21 Tuate baan ah, Edom, Moab leh Amon, 22 Tura leh Sidon kumpipate, tua tuipi geia tuipi gei gamte' kumpipate, 23 Dedan, Tema, Buz leh gamlapi-a omte khempeuh. 24 Arabia kumpipate gamdai-gamkeua khempeuh leh, teeng gamdang kumpipate khempeuh leh, 25 Zimri, Edom leh Media kumpipate khempeuh leh, 26 mallam kumpipate khempeuh, a nai a gamla, a ban banin, leitung maikaih-a kumpigamte khempeuh ahi. Hiai teng baan ah, Sheshakh kumpipa'n zong a dawn ding hi. 27 Tua khit chianga Tangtawn Toupa Vanglianpen, Israel' Pathian' thugen hiai ahi: Na lak ua namsau kon sawl ding manin, dawn unla, kham unla, lua unla, thou nawn lou dingin puk un, chi hi, chi-in amaute hilh in. 28 Ahihhangin, amaute'n na khut apan nou la nuam loua, dawn zong a dawn nop kei uleh, amaute kiang ah: Hiai Tangtawn Toupa Vanglianpen' thugen ahi: Na dawn teitei ding uh ahi! 29 Ngai un, ka Min pu khawpi tunga siatna tun panta hi'ng a, noute gawt louhin na suakta taktak ding ua hia? Gawt louhin na suakta kei ding uh. Ke'n leitung maikaiha teengte khempeuh tunga, namsau samkhia hi vengin, chi-a Tangtawn Toupa Vanglianpen in phuang hi, chi-in hilh in. 30 Tu'n amaute demin hiai thugen genkhol in: Tangtawn Toupa, tungsang apan humham ding a, teenna munsiangthou apan vaanpi-a ging ding a, hiai gam doua nakpitaka humham ding hi. Grep chilte banga kikou ding a, leitunga teengte khempeuh doua kikou ding hi. 31 Buai vengvungnain leimong dong thawn ding hi. Tangtawn Toupa'n namte khempeuh mawhsakna tun ding hiven. Mi'n mihingte khempeuh tunga thu khen ding a, migiloute namsaua that ding hi, chi-a Tangtawn Toupa'n phuang hi. 32 Tangtawn Toupa Vanglianpen' thugen hiai ahi: Ngai in! Siatgawpna nam khat apan nam dang ah kithehzak a, leimong apan huihpi hat lua hong nung hi, chi hi. 33 Tua hun laiin, Tangtawn Toupa' thahsate mun teng ah om ding a, leimong khat apan leimong langkhat phain om ding hi. Amaute kuama'n kah lou ding a, kaihkhawma zong om lou ding, vui zong kivui lou ding uh a, lei laka deihlouh paih bang ding uhi. 34 Kap unla mau un, nou, belamchingte, leivui lak ah kikhuk un, nou, belamhon makaite. Thah-a na om nading hun uh hong tungta hiven. Puk ding uchin a, leibeel hoih banga kitamzan ding hi uteh. 35 Belamchingte'n taai nading mun nei lou ding uh a, belamhon makaite'n suahtak nading mun neilou ding uhi. 36 Belamchingte' kah za unla, belamhon makaite' mau za un, Tangtawn Toupa'n a gantatna mun uh hihsia hiven. 37 Tangtawn Toupa' thangpaihna hanga loupa mun hoihte hihsiat hita hi. 38 Ama'n humpinelkai banga a bukna mun nuse ding a, Tangtawn Toupa' hehna nasia hanga a gam uh kisia-a kilawi ding hi.
Jeremia Vau-a Omna
1 Judah kumpipa, Josia' tapa Jehoiakim' vaihawm chil lamin, Tangtawn Toupa apan thu hong tung hi, 2 Tangtawn Toupa' thugen hiai ahi: Tangtawn Toupa' inn huangsung inntual ah va ding inla, Judah khawpite-a teeng, Tangtawn Toupa' inna be dinga hong paite khempeuh kiang ah thu gen in. Kon thupiak peuhmah amaute hilh inla, malkhat zong im ken. 3 Amaute'n ngaikhiain michih, a gamtat gilou apan hong kihei khamawh ding hia. Tua chianga ken, thil gilou a hih man ua, a tung ua siatna tut ding ka gel kikhaam ding ka hi. 4 Amaute kiang ah: Hiai Tangtawn Toupa' thugen ahi: Non ngaihkhiak kei ua, na mai ua ka koih ka dan na zuih kei uleh, 5 tua baana, noute kianga kon sawl zihzeh ka sila, tua kamsangte' thugente na ngaihkhiak kei uleh, ngaikhe ngeilou bel hita mahle uchin, 6 hiai inn Shilo bangsak ding ing a, hiai khawpi, leitung namte khempeuh laka hamsiat suaksak ding hi'ng, chi hi, chi in, a chi hi. 7 Siampite, kamsangte leh mipite khempeuh in Tangtawn Toupa' inn-a Jeremia' thugen a za uhi. 8 Ahihhangin, Jeremia in Tangtawn Toupa'n gen dinga a thupiak peuhmah, mite khempeuh a hilh khit phetin, siampite, kamsangte leh mipite khempeuh in amah a man uh a: Na sih teitei ding ahi! 9 Banghanga hiai inn, Shilo a bang ding a, hiai khawpi segawp ding a, a kilawi ding chi-a Tangtawn Toupa' mina thu genkhol peuhmah na hia? a chi uhi. Mipite'n Tangtawn Toupa' inn ah Jeremia a umkimvel uhi. 10 Judah uliante'n hiai thilte a zak takun, kumpi' innpi apan Tangtawn Toupa' inn ah a hawhtou uh a, Tangtawn Toupa' inn lutna Kongpi Thak ah, amau' mun tek ah a va tu uhi. 11 Siampite leh kamsangte'n uliante leh mite kiang ah: Hiai mipa'n hiai inn leh hiai khawpi siat nading a genkholh manin, a sih nadinga gawt ding ahi. Na bil un na za ve ua le! a chi uhi. 12 Tua khitin, Jeremia in uliante leh mipite khempeuh kiang ah: Tangtawn Toupa'n hiai inn leh hiai khawpi dema, tua na zakte uh genkhol dinga kei hon sawl ahi. 13 Tu'n na gamtatnate uleh na thilhihte uh bawlhoih unla, Tangtawn Toupa na Pathian uh' thu mang un. Hi leh, Tangtawn Toupa'n noute tunga siatna tun ding chi-a a phuansa a kikhelsak ding a, a tangtun kei ding hi. 14 Kei ka hih leh, noute' khuta om ka hi. Hoih leh dik na sak bangbang uh hon lawh un. 15 Ahihhangin, non thah uleh, mawhneilou sisan tunga mawhna noumau ngei tung ah leh, hiai khawpi tung leh, a sunga teengte tung na tusak ding uh, chih thei un. Ahang bel, Tangtawn Toupa'n hiai thute na zak ua gen dinga kei hon sawl taktak hiven, a chi hi. 16 Tua khitin, uliante leh mipite khempeuh in siampite leh kamsangte kiang ah: Hiai mipa, sih donga gawt louh ding ahi! Ama'n Tangtawn Toupa, i Pathian' mina thu gen ahi, a chi uhi. 17 Tua gamsung upate pawlkhat hong dingkhia uh a, mipi naikhawmte khempeuh kiang ah: 18 Judah kumpipa Hezekia hun laiin, Moresheth mi Mika in thu a genkhol a, Judah mi khempeuh kiang ah: Hiai Tangtawn Toupa Vanglianpen' thugen ahi: Zion, lou leh bangin kilet ding a, Jerusalem thilsia kivum hong suak ding a, tempul mual lah loupa sahtak in khuh ding hi, a chih laiin, 19 Judah kumpipa Hezekia hi-in, Judah midang hita leh, amah a that ua hia? Hezekia in Tangtawn Toupa lau a, a deihsakna zong zaw hilou maw? Tuachi-a Tangtawn Toupa'n amaute tunga siatna tut ding a phuansa kikhelsak a, tun lou hilou maw? Eite tunga siatna mulkimhuai kitut dektak i hi ve! a chi uhi. 20 Tangtawn Toupa' mina gen-kholhna gen dang khat bel, Kiriath Jearim mi, Shemaia' tapa Uria ahi. Ama'n Jeremia gen thilte mah, hiai khawpi leh, hiai gam demin a gen hi. 21 Kumpipa Jehoiakim leh a uliante leh, kumpi galkap uliante'n hiai thute a zak takun, kumpipa'n amah thah a sawm hi. Uria in tua a za a, lauin Aigupta ah a taai hi. 22 Ahihhangin, Kumpipa Jehoiakim in Akbor' tapa Elnathan, mi bangzah hiam tawh, Aigupta ah a sawl hi. 23 Amaute'n Aigupta apan Uria hon piikhia uh a, Kumpipa Jehoiakim kiang a tun uhi. Kumpipa Jehoiakim in namsauin amah a thatsak a, a luang mi nautangte kivuina mun ah a lawnlut uhi. 24 Tua chi-in, Shafan' tapa Ahikam in Jeremia a gum a, mipite khut ah thah dinga piakkhiak ahita kei hi.
Nebukhadnezar nuaia Judah
1 Judah kumpipa, Josia' tapa Zedekia' vaihawm chil lamin, Tangtawn Toupa apan Jeremia kiang ah thu hong tung hi. 2 Hiai Tangtawn Toupa'n ka kianga a thugen ahi: Savun duapte leh kolte in hakkol khat bawl inla, na ngawng ah bat in. 3 Tua khit in, Edom, Moab, Amon, Tura leh Sidon kumpipate kiang ah, Jerusalema Judah kumpipa Zedekia kianga hong hawh palaite tungtawnin thu khak in. 4 A pute uh ading thukhah thu pia inla, amaute kiang ah: Hiai Tangtawn Toupa Vanglianpen, Israel Pathian' thugen ahi: Na pute uh kiang ah hiai hilh un: 5 Ka vangletna thupitak leh ka baan zakin, leitung leh a mite leh, a tunga ganhingte ka bawl a, ka ut peuh kiang ah tua ka pia hi. 6 Tu'n na gamte khempeuh uh, ka sila Babulon kumpipa Nebukhadnezar kiang ah ka pekhe ding a, gamsate nangawn a thu thuin ka koih ding. 7 Namte khempeuh in amah leh a tapa leh a tupa' nna, hiai gam ading hun a tun masiah, a sem ding uh a, tua khit chiangin, nam tampite leh kumpipa thupite'n a nuaisiah ding uhi. 8 Ahihhangin, nam khat peuh, ahih kei leh, kumpigam khat peuh in zong, Babulon kumpipa Nebukhadnezar' nna sem nuamlou hiam, a hakkola a ngawng dawh nuam lou hiam a om leh, ke'n tua nam, namsau leh kial leh hipi-in, ama' khut tungtawna ka hihmanthat masiah, ka gawt ding, chi-a Tangtawn Toupa'n phuang hi. 9 Tua bang ahih manin, Babulon kumpipa' nna sem kei un, hon chi na kamsangte uh, na aisansiamte uh, ahih kei leh, na bumsiamte uh ngaikhe kei un. 10 Amaute'n, na gamte uapan gamlapi-a hon suanmang ding lei zuauthu genkhol uh hi a, hon hawlmang ding ing a, mangthang ding hi uteh. 11 Ahihhanga, nam khat peuh in Babulon kumpipa' hakkol nuaia a ngawng a kun a, a naa a sep leh bel, tua bang nam pen, a gam khou ding leh tua-a teeng dinga omdensak ding hi'ng, chi-a Tangtawn Toupa'n phuang hi, chi in, a chi hi. 12 Judah kumpipa Zedekia kiang ah tua thukhah mah ka pia a: Babulon kumpipa' hakkol nuai ah na ngawng kun inla, amah leh a mite' nna sem in, hi leh na hing ding hi. 13 Banghanga, Tangtawn Toupa'n Babulon kumpipa' nna sem nuam lou nam khatpeuh a vauna, tua namsau leh kial leh hipi-a nang leh na mite si ding na hi ua? 14 Na kianga: Babulon kumpipa' nna sem ken, hon chi kamsangte' thugente ngaikhe ken, amaute'n na kianga genkholhna zuaute gen uh ahi. 15 Amaute ka sawl hi lou uh ahi. Ka mina zuauthu genkhol ahi uh. Tua bang ahih mana, noute, nang leh na kianga genkholhna thugen kamsangte hon hawlmang ding hi'ng, chi-a Tangtawn Toupa'n phuang hi. 16 Tua khitin, siampite leh hiai mite khempeuh kiang ah: Tangtawn Toupa' thugen hiai ahi: Babulon apan Tangtawn Toupa' inn sung vante hon kipawkik pahta ding ahi, a chi kamsangte ngaikhe kei un. Na kiang ua zuauthu genkhol uh ahi. 17 Amaute ngaikhe kei un. Babulon kumpipa' nna sem zaw un, hi leh na hing ding uhi. Banghanga hiai khawpi se ding ahia? 18 Amaute, kamsang a hih ua, Tangtawn Toupa' thu nei ahih uleh, Tangtawn Toupa' inn sung, Judah kumpipa' innpi leh Jerusalem sunga vanzat om laite, Babulon a kitut louh nadingin, Tangtawn Toupa Vanglianpen ngen le uh a ke. 19 Ahang bel, Tangtawn Toupa Vanglianpen in tua khuampite, tua Tuipi, tua tuahtheih leh khawpi-a kinusia vanzat dangte tawh kisaia a thugen hiai hiven. 20 Tua bel, Babulon kumpipa Nebukhadnezar in Judah kumpipa, Jehoiakim' tapa Jehoiakhin, Judah leh Jerusalem miliante khempeuh tawh, Jerusalem apan Babulona a puakmang laia a gen ahi. 21 Ahi, Tangtawn Toupa Vanglianpen, Israel' Pathian in Tangtawn Toupa' inn sung leh, Judah kumpipa' kumpi innpi sung leh, Jerusalema nutsiat thilte tawh kisaia a gen ahi. 22 Tangtawn Toupa'n: Hiaite Babulona puakmanga om ding a, tuate la dinga kong pai mateng tua-a om ding uhi. Tua khit chianga, tuate hon pawkik ding ing a, hiai muna koihkik ding hi'ng, chi-a phuang hi, ka chi hi.
Kamsang Taklou Hanania
1 Tua kum, a kum lina, a kha ngana, Judah kumpipa Zedekia' vaihawm chil lamin, Gibeon apan Azur' tapa kamsang Hanania in Tangtawn Toupa' inn ah, siampite leh mite khempeuh mai ah, ka kiang ah: 2 Tangtawn Toupa Vanglianpen, Israel' Pathian' thugen hiai ahi: Babulon kumpipa' hakkol hihtan ding ka hi. 3 Babulon kumpipa Nebukhadnezar in Tangtawn Toupa' inn sunga van, hiai apan a puakkhiaka Babulon a tutte khempeuh, kum nih sunga hiai mun hon tunkik vek ding ka hi. 4 Judah kumpipa, Jehoiakim' tapa Jehoiakhin leh, Judah gam apan Babulona kaihmangte khempeuh zong hiai mun hon tunkik ding ka hi, ahang bel, Babulon kumpipa' hakkol hihtan ding hi vengin, chi-a Tangtawn Toupa'n phuang hi, a chi hi. 5 Tua khitin, kamsang Jeremia in siampite leh Tangtawn Toupa' inna dingte khempeuh mai ah, kamsang Hanania a dawng a: 6 Amen! Tua bangin Tangtawn Toupa'n hih hen aw! Tangtawn Toupa'n, Tangtawn Toupa' inna vante leh kaihmanga omte khempeuh Babulon apan hiai mun hon tunkikin, tua na genkholhna thute tangtun hen aw. 7 Ahihhangin nang zak leh, mi khempeuh zaka ka gen nop na ngaikhia in: 8 Hun masa lama, nang leh kei ma-a na om kamsangte'n, gam tampi leh kumpigam thupitakte tunga kidouna leh siatna leh hipite tung dinga na genkhol uhi. 9 Ahihhanga, muanna thu genkhol kamsang bel, a genkholh a tun taktak leh, Tangtawn Toupa' sawl ahi, chi-a kisang lei ding hi, a chi hi. 10 Tua khitin, kamsang Hanania in kamsang Jeremia' ngawng apan tua hakkol a lakhia a, a hihtan a, 11 mipite khempeuh mai ah: Hiai Tangtawn Toupa' thugen ahi: Kum nih sunga hibanga Babulon kumpipa' hakkol, namte khempeuh ngawng apan hihtan ding ka hi, chi hi, a chi hi. Hibang a hih takin, kamsang Jeremia a paita hi. 12 Kamsang Hanania in, kamsang Jeremia' ngawng apan hakkol a hihtankhiak nung sawt louin, Jeremia kiang ah Tangtawn Toupa' thu hong tung hi: 13 Kuan inla, Hanania kiang ah: Hiai Tangtawn Toupa' thugen ahi: Nang sing hakkol na hihtan a, a taangin sik hakkol na tang ding, chi hi. 14 Hiai Tangtawn Toupa Vanglianpen, Israel Pathian' thugen ahi: Ke'n hiai namte khempeuh, Babulon kumpipa' nna semsak dingin a ngawng uah sik hakkol ka bat ding a, a nna a sem ding uh. Gamsate nangawn ukna amah ka pe ding, chi hi, chi in, a chi hi. 15 Tua khitin, kamsang Jeremia in kamsang Hanania kiang ah: Ngai in, Hanania! Tangtawn Toupa' sawl hilou na hi. Hinapi-a hiai nam, zuauthu taksangsak na hi. 16 Tua bang ahih manin, hiai Tangtawn Toupa' thugen ahi: Leitung apan nang hon paikhe dek ka hi. Tangtawn Toupa tunga helna na gen mana, tu kum mahmaha si ding na hi, chi ahi, a chi hi. 17 Tua kum, a kha sagihna ah, kamsang Hanania a sita hi.
Kaihmangte kianga Laikhak
1 Kamsang Jeremia in Jerusalem apana, kaihmanga omte laka khawsuaksun upate leh siampite leh, kamsangte leh, Nebukhadnezar in Jerusalem apan Babulona a kaihmang dangte khempeuh kianga a laikhak hiai ahi. 2 Hiai bel, kumpipa Jekonia leh kumpipa' nu leh, Judah leh Jerusalem upate, khutsiamte, Jerusalem apan kaihmanga a om nung uh ahi. 3 Tua laikhak bel, Shafan' tapa Elasa leh Hilkia' tapa Gemaria a pawsak hi. Judah kumpipa Zedekia in amaute, Babulon kumpipa Nebukhadnezar kiang ah a sawl hi. Tua laikhak ah hibangin a kigelh hi: 4 Tangtawn Toupa Vanglianpen, Israel' Pathian in Jerusalem apan Babulona kaihmanga omte kianga a thugen hiai ahi: 5 Innte lam unla, teeng kinken un. Huante bawl unla, a gah ne un. 6 Zi leh pasal kinei unla, tapate tanute nei un. Na tapate uh zi neisak unla, na tanute uh mou-in kha un. Tua bel, amaute'n zong tapate leh tanute a neih theih nading uh ahi. Tua ah hong pung unla, hong kiam kei un. 7 Noute kon khakmangna tua khawpi-a muanna leh niang leh taia omna zong un. Tua dingin, Tangtawn Toupa kiang ah thuum un. Tua khawpi, niang leh taia a om leh, noute zong niang leh taiin na om ding uhi, chi ahi. 8 Ahi, Tangtawn Toupa Vanglianpen, Israel Pathian' thugen hiai ahi: Na lak ua kamsangte leh aisante kikhemzousak kei un. Mang nei dinga na hanthawnte uh' mangte ngaikhe kei un. 9 Amaute'n ka mina zuauthute genkhol uhi. Amaute sawl lou ka hi, chi-a Tangtawn Toupa'n phuang hi. 10 Tangtawn Toupa' thugen hiai ahi: Babulon adinga kum 70 a chin chianga, na kiang ua hong pai ding ing a, hiai muna hon piikik dinga ka hehpihna thuchiam tangtun ding hi'ng. 11 Ahang bel, noute adinga ka gelkholh thei ing a, noute hon hihna loua hon lawhchinsak nading thilgel, lametna leh tununga hoih hon piak ding thil gelkholh ahi. 12 Tua chianga, kei hon sam ding uchin a, hong pai a, ka kianga thuum ding uchin a, ke'n hon na ngaikhe ding hi'ng. uchin tawh non zon chiangua hon mu ding hi uteh, chi-a_Tangtawn 13 Kei hon zong ding a, lungtang khempeuh Toupa'n phuang hi. 14 Tangtawn Toupa'n: Noute' muh-a om ding ing a, ke'n saltanna apan hon piikik ding hi'ng. Namte khempeuh leh, kon sawlmangna mun khempeuh apan hon piikik ding ing a, hon sawlmang dinga kon kaihkhiakna mun hon tunkik ding hi'ng, chi-a phuang lai hi. 15 Noute'n: Tangtawn Toupa'n, Babulona eite adinga kamsangte tungkhia hi, na chi mai thei uhi. 16 Ahihhanga, David' kumpitutphah tunga tu kumpipa leh, gamdanga sawlmanga na omna ua hon zuilou, na gam mipih uh, hiai khawpi-a omdente khempeuh tawh kisaia Tangtawn Toupa' thugen hiai ahi. 17 Ahi, hiai Tangtawn Toupa' thugen ahi: Amaute' tunga namsau leh kial leh hipi sawl ding ing a, nek theih louh ding khopa sia, theipi sia banga amaute bawl ding hi'ng. 18 Namsau leh kial leh hipi-a amaute delh ding ing a, leitung kumpigam khempeuh adinga kihhuai, amaute ka sawlmangna namte laka hamsiat leh mulkim huai, simmawh leh selphou suaksak ding hi'ng. 19 Ahang bel, amaute'n ka thugente, ka sila kamsangte kama ka gengente ngaikhe lou uh hiven. Nou, kaihmanga omte'n zong ngaikhe tuan lou hi uteh, chi-a phuangkhia hi. 20 Tua bang ahih manin, Jerusalem apan Babulona kon sawlmang noute khempeuh in, Tangtawn Toupa thu za un. 21 Tangtawn Toupa Vanglianpen, Israel' Pathian in Kolaia' tapa Ahab leh Maaseia' tapa Zedekia, ka mina na kiang ua zuauthute genkholte tawh kisaia a thugen hiai ahi: Babulon kumpipa Nebukhadnezar' khuta amaute pekhe ding ing a, ama'n na mitmuh ua, amaute that ding hi. 22 Amaute' hanga, Judah gam apan kaihmang, Babulona omte'n hiai hamsia zang ding uhi. Babulon kumpipa'n meia a hal Zedekia leh Ahab banga, Tangtawn Toupa'n noute hon bawl ahi, chih. 23 Ahang bel, amaute'n ngaihdahhuai thilte, Israel gamsunga hih uh a, a inn-vengte uh' zite tawh angkikawm uh a, hih un, ka chih louhpi-a ka mina zuauthute gen uhi. Ke'n thei ing a, a theihpih hi vengin, chi-a Tangtawn Toupa'n phuang hi, chi-a kigelh ahi.
Shemaia kianga Thukhah
24 Nehelam mi Shemaia hibangin hilh in: 25 Tangtawn Toupa Vanglianpen, Israel Pathian' thugen hiai ahi: Nangma' minin Jerusalema mi khempeuh kiang, siampi Maaseia' tapa Zefania kiang leh siampi dangte khempeuh kiang ah, laikhak na khak hi. Zefania kiang ah: 26 Tangtawn Toupa'n Jehoiada' mun ah, Tangtawn Toupa' inna mawhpaw dingin nang hon sep a, kamsang banga thilhih mihai peuhmah, singkolte leh ngawnga sikkolte na bulh ding hi a, 27 tua bang a hih nung, Anathoth khaw mi, noute laka kamsanga kibawl, tua Jeremia banghanga taai lou na hia? 28 Ama'n Babulona eite kianga thu khak a: Hun sawtpi hi ding ahi. Innte lam unla, teengkip un. Huante bawl unla, a gah ne un, na chi, chi ahi, chi in. 29 Ahihhangin, siampi Zefania in, kamsang Jeremia kiang ah tua laikhak a sim hi. 30 Tua khitin, Tangtawn Toupa' thu Jeremia kiang ah hong tung hi: 31 Kaihmanga om khempeuhte kiang ah hiai thukhah khak in, a chi hi. Hiai Tangtawn Toupa'n Nehelam mi Shemaia tawh kisaia a gen ahi: Shemaia in ka sawl louhpi-a na kiang ua genkholhna thu gen a, zuauthu hon taksangsak ahi. 32 Tangtawn Toupa' thugen hiai ahi: Tua Nehelam mi Shemaia leh a suante gawt ngeingei ding ka hi. Hiai mite laka nutsiat khawsuak kuamah nei lou ding ing a, ka mite adinga thil hoih ka hih dingte zong muhkhak nei lou ding ahi, ama'n ka tunga helna thu gen hiven, chi-a Tangtawn Toupa'n phuang hi, a chi hi.
Israel Tundingkikna
1 Tangtawn Toupa apan jeremia kianga thu hong tung a, 2 Tangtawn Toupa, Israel Pathian' thugen hiai ahi: Na kianga ka thugente khempeuh laibu khat ah gelh in. 3 Saltanna apan ka mi Israelte leh, Judahte ka piikik a, a pu a pate uh tan dinga ka piak gama ka tundingkik ding nite hong tung dek hi, chi-a Tangtawn Toupa'n gen hi, a chi hi. 4 Hiaite Tangtawn Toupa'n Israel leh Judah tawh kisaia a thugente ahi. 5 Tangtawn Toupa' thugen hiai ahi: Muanna hilou a, mulkimna, launa kikou kiza hi. 6 Dong unla ngai un: Pasal in tate a neikhe thei-a hia? Ahih leh banghanga numei nauvei banga pasal, a gil humhum a, maimual dikdeka om ahia? 7 Tua ni mulkimhuai na maizen in chia! A kibatpih om lou ding hi. Jakob adinga mangbat ni hi ding a, ahihhanga tua apan hutkhiak hi ding hi. 8 Tangtawn Toupa Vanglianpen in: Tua ni chianga, a ngawng uapan hakkol kitankhesak ding ing a, a henna khaute uh suutkhe ding ing a, gamdang mite'n amaute sala kai nawnlou ding uhi. 9 Tua naksanga, Tangtawn Toupa a Pathian uh leh, amaute adinga ka tunding diing a kumpipa uh David' nna sem zaw ding uhi, chi-a phuang hi. 10 Tangtawn Toupa'n: Ka sila Jakob aw, lau ken, Israel aw, lungdong ken. Mun gamlapi apan hon hukhe ngeingei ding ing a, na suante kaihmanga a omna gam uapan hukhe ding hi'ng. Jakob in muanna leh bitna neikik ding a, kuama'n amah lausak nawnlou ding hi, chi-a phuang hi. 11 Tangtawn Toupa'n: Hon ompih ing a, hon hondam ding hi'ng. Kon thehzakna namte hihmangthang sipsip mah leng, nang zaw hon hihmangthang sipsip lou ding hi'ng. Hon thunun ding ing a, dika vaihawmna tawh hi lei ding hi. Gawtlouh hilhiala bel hon khahzan lou ding hi'ng, chi-a phuang hi. 12 Ahang bel, Tangtawn Toupa' gen hiai ahi: Na thuakna hihdam theihlouh hi a, na liamma nasia hi. 13 Na thu hon gensak ding kuamah omlou a, na meima dam nading, nang adinga dam nading omlou hi. 14 Na pankhawmpihte khempeuh in nang hon mangngilhta uh a, hon thudon hetlou uhi. Na mawhna thupi a, na khelhnate tam a, meima' hon hih ding banga hon sat ing a, hiamgamte' hih ding banga hon gawt hi'ng. 15 Banghanga na liamma leh, na natna hihdam theihlouh bahpih na hia? Na mawhna thupi leh na khelhna tampite' hanga, na tunga hibang teng hih hi'ng. 16 Ahihhanga, nang hon negaite khempeuh, nekgaiha om ding uh a, na melmate khempeuh sala kaihmang hi ding uhi. Nang hon lokte khempeuh, lawha om ding uh a, gallaka hon late keima'n gallaka la ding hi'ng. 17 Ahang bel, amaute'n: Ngaihlouhpa, kuamah donlouh Zion, hon chih man ua, ke'n hon damsak kik ding ing a, na liammate damsak ding hi'ng, chi-a Tangtawn Toupa'n phuang hiven, chi hi. 18 Tangtawn Toupa' thugen hiai ahi: Jakob' puanbukte' vangphatnate pekik ding ing a, a teennate lainat ding hi'ng. Tua khawpi a siatna muna lamthak ding ing a, kumpi innpi zong a mun ding taka ding diing hi. 19 Amaute apan kipahthugenna late gingkhe ding a, lungnopna husa om ding hi. Amaute pungsak ding ing a, kiamsak lou ding hi'ng. Amaute pahtawina puak ding ing a, simmawha om lou ding uhi. 20 A tate uh tanglaia banga om ding uh a, a teengkhawmte ka maia kip ding uh a, amau nuaisiahte ke'n gawt ding hi'ng. 21 Amaute' makai lah amaute laka mi hi ding a, amaute ukpa lah amau laka mi hi ding hi. Ke'n amah naichika pii ding ing a, ama'n kei hon naih ding hi. Ahang bel, kei hon naih dinga kipumpiakpa kua ahia? chi-a Tangtawn Toupa'n phuang ahi. 22 Tua bang hi a, noute ka mite hi ding uchin a, na Pathian uh hi ding hi'ng, chi hi. 23 Ngai un, Tangtawn Toupa' huihpi, thangpaia puakzak ding a, migiloute lutunga huih hat kipei ding hi. 24 Tangtawn Toupa' hehna nasia in a lungtang tupte a tangtun kim masiah nungkik lou ding hi. Nite hong tung ding a, tua hun chianga hiai theisiam ding hi uteh.
1 Tangtawn Toupa'n phuang a: Tua hun chiangin, Israel behte khempeuh' Pathian ka hi ding a, amaute ka mite ahi ding uh, chi hi. 2 Tangtawn Toupa' thugen hiai ahi: Namsau apan suaktate'n gamdai-gamkeu ah deihsakna mu ding uh a, Israel kianga khawlna pe dinga hong pai ding hi'ng, chi hi. 3 Hun paisa-in Tangtawn Toupa i kiang ah hong kilang a: Tangtawn itna-in nang hon na itta ing a, itsiamna-a nang hon na itta hi'ng. 4 Nang hon tungding thak ding ing a, lamthaka om ding na hi. Israel nungak siangthou aw, na khuangtate la thak ding chin a, a lungnuamte tawh laam dinga paikhe ding na hi. 5 Samaria mualte ah grep suan thak ding chin a, louneite'n suan ding uh a, a gah ne ding uhi. 6 Efraim mualtungte ah galvilte kikoukhia a: Hong pai un, Zion ah hawhtou ni, Tangtawn Toupa, i Pathian kiang ah, a chih hun uh hong tung ding hi, chi hi. 7 Tangtawn Toupa' thugen hiai ahi: Jakob kipahpihin la sa un. Namte laka madawkpen adingin kikou un. Na phatnate uh kizasak unla: Tangtawn Toupa aw, na mi, Israel khawsuaksunte hondam in, chi un. 8 Ngai un, mallam gam apan amaute hon pii ding ing a, leimong dong apan amaute hon kaikhawm ding hi'ng. Amaute laka mittawte leh khebaite om ding uh a, a gaisanlai nute leh nauvei numeite zong om ding uh a, mi tampi mahmah hong kiik ding uhi. 9 Kap kawma hong pai ding uh a, amaute kon piikik sunga thungena thuum ding uhi. Lui luang kiang khawnga amaute pii ding ing a, a kipalpaih louh nading uh lampi mamte-a pii ding hi'ng. Ahang bel, kei Israel' pa hi ing a, Efraim ka tapa piang masa hiven. 10 Namte khempeuh aw, Tangtawn Toupa' thu za unla, gamlapi tuipigei khawng ah phuang unla: Israel thehzakpa'n amaute piikik nawn ding a, belamchingpa banga a belamhonte ching ding hi, chi un. 11 Ahang bel, Tangtawn Toupa'n Jakob hondamta a, amaute sanga hatzawte' khut apan amaute tankheta hiven. 12 Amaute hong pai ding uh a, lungnuama zion mualsang tungte-a kikou ding uhi. Tangtawn Toupa' hauhna, buh leh bal, zuthak leh sathau, belamhonte laka a noute leh, bawnghonte hanga kipak ding uhi. Amaute tuikham huante bang ding uh a, lungkhama dah nawnlou ding uhi. 13 Tua hun chianga, nungakte laam ding uh a, kipak ding uh a, a teek a khang zong laam ding uhi. Ke'n a sisuunna uh kipahna suaksak ding ing a, dahna taanga khamuanna leh lungnopna pe ding hi'ng. 14 Siampite, hauhna-a taisak ding ing a, ka mite, ka hauhna-a kidim ding uhi, chi-a Tangtawn Toupa'n phuang hi. 15 Tangtawn Toupa' thugen hiai ahi: Rama ah kah aw kiza a, suunna leh nakpi-a kahna hi ahi. Rakhel in a tate a om nawn louh manun kah a, nep zawh hilou hi, chi hi. 16 Tangtawn Toupa' thugen hiai ahi: Na kahna aw kidek in, na mitte' khitui apan kidek in. Na nasep in pahtak lawh ding hiven, chi-a Tangtawn Toupa'n phuang hi. Amaute meima' gam apan hong kik ding uhi. 17 Tua bang hi a, na tunung ading lametna om hi. Na tate, a gam ua kik nawn ding uhi, chi-a Tangtawn Toupa'n phuang hi. 18 Efraim' mauna za taktak ing a: Bawngnou hel banga hon thunun chin a, thununa omta hi'ng. Hon tungding thak inla, hong kik ning. Nang Tangtawn Toupa, ka Pathian hi vechin. 19 Ka pialmang taka kisik ing a, ka theihsiam taka phei kituum hi'ng. Ka tuailai' zahlakna ka thuak mana maizum ing a, simmawha om hi'ng, chi hi. 20 Efraim, ka tapa deihthawh hilou maw, ka lungtaina ta hilou maw? Ke'n amah demin thu gen sek mah leng, amah thei gige lai hi'ng. Tua bang ahih mana, ka lungtang in amah lunggulh a, amau lainatna lianpi nei hi'ng, chi-a Tangtawn Toupa'n phuang hi. 21 Lampi chiamtehnate bawl inla, lamhilhnate phut inla, lamlian, na kuanna lampi teltakin chiamteh in. Israel nungak siangthou aw, na khawpite ah hong kik in. 22 Tanu muanhuailou aw, bangtan vakthap ding na hia? Tangtawn Toupa'n leitunga thilthak khat bawl ding hi - numei khat in pasal khat umchip ding hi, chi hi. 23 Tangtawn Toupa Vanglianpen, Israel Pathian' thugen hiai ahi: Saltanna apan amaute ka piikik nawn chiangin, Judah gam leh khawpite-a mite'n hiai thute zang kik ding uhi: Nang, teenna diktat aw, Nang, mual siangthou aw, Tangtawn Toupa'n hon vualzawl hen, chih. 24 Judah gam leh a khawpite khempeuh ah mite teengkhawm ding uhi tua lounei mite, a belamhonte utawh vialpai paite mah. 25 Bahte halhsak ding ing a, taamsawlte vaha taisak ding hi'ng, chi hi. 26 Hiai ka zak takin ka khanglou a, ka dakkhia hi. Ka ihmut nuam mahmah a na hive. 27 Tangtawn Toupa'n gen a: Israel innkawte leh Judah innkawte, mihingte tusuan tasuante leh gantate' noute tawh ka suankip nite hong tung dek hi. 28 Amaute bulkalh ding leh phelgawp ding, lumlet ding, hihmangthang ding leh siatna tun dinga amaute ka et-et bangin amaute lam ding leh suan dinga amaute ching ding hi'ng, chi-a Tangtawn Toupa'n phuang hi. 29 Tua nite hong tun chiangin, mite'n: Pate'n grep thuk ne uh a, Tate' ha zau, chih chi nawnlou ding uhi. 30 Tua naksanga, mi chih in ama' khelhna sihpih ding a, grepthuk ne peuhmah lah ama' ha zau ding hi. 31 Tangtawn Toupa'n phuangkhia a: Israel innkawte leh Judah innkawte tawh kala thukhun thak ka bawl ding hun a hong tung dekta. 32 A pu a pate uh, Aigupta apan piikhe ding a, bantaanga ka kaihkhiak laia, amaute tawh kala ka thukhun bang hilou ding hi. Ahang bel, amaute' pasal hi napi ing a, ka thukhun palsat uh hiven, chi-a Tangtawn Toupa'n phuang hi. 33 Tangtawn Toupa'n phuangkhia a: Tua nung chianga Israel innkawte tawh kala a thukhun ka bawl ding hiai ahi: Amaute' lungsim sunga ka dante koih ding ing a, amaute' lungtang pek tunga gelh nalai ding hi'ng. Amaute' Pathian hi ding ing a, amaute ka mite hi ding uhi. 34 Mi'n a innveng kiang hiam, a sanggam kiang hiama: Tangtawn Toupa thei in, chi-a sinsak nawnlou ding hi. Ahang bel, amaute, a neupen apan a lianpen dong in kei hon theita ding uh a, amaute' mawhnate ngaidam ding ing a, a khelhnate uh thei gige nawnlou ding hi'ng, chi-a Tangtawn Toupa'n phuang hiven. 35 Sun huna taang dinga ni thu pia a, zan huna taang dinga khapi leh aksite thu pia a, tuipi tuihualte gingsak honhon dinga tuipite toka lokpa, Tangtawn Toupa' thugen hiai ahi. Ama' min Tangtawn Toupa Vanglianpen ahi. 36 Tangtawn Toupa'n thu gen a: Hiai dante ka mitmuh apan a beimang hiai leh, tua chiang kiain ka mitmuh apan Israel suante nam khat hihna bei inteh, chi hi. 37 Tangtawn Toupa' thugen hiai ahi: Tunga vaante a kiteh theih a, nuaia leitung kingakna suangphumte zonkhiak theih ahih hiai leh, tua chiang kiain, Israel suante khempeuh, a thilhihte khempeuh uh hangin, amaute ka nolh ding, chi-a Tangtawn Toupa'n phuang hi. 38 Tangtawn Toupa'n gen a: Hiai khawpi kei adinga Hananel Insang apan Akiu Kongpi dong a kilam thak nite hong tung ding hi. 39 Tua apanin Gareb mual dong tehna khau kizan ding a, tua bana Goa donga kizan ding hi. 40 Siluangte leh meivute a kipaihna phaizang teng leh, suahlama Kidron Phaizang donga mualpang khempeuh, Sakol Kongpi chiang, Tangtawn Toupa adinga siangthou hi ding hi. Tua khawpi, kibulkalh ngei nawn lou ding a, phei zong kiphelgawp ngei nawn lou ding hi, chi hi.
Jeremia Lou Leina
1 Judah kumpipa Zedekia' vaihawm kum, a kum sawmna, Nebukhadnezar' vaihawm kum, a kum giatna-a, Jeremia kianga Tangtawn Toupa' thu hong tung hiai ahi. 2 Tua bel, Babulon kumpipa' sepaihte'n Jerusalem a sim laitak hi a, kamsang Jeremia bel Judah kumpi innpi huangsunga kikhum ahi. 3 Judah kumpipa Zedekia in amah tua ah a koltangsak a: Banghanga tua na gen banga genkholhna gen na hia? Tangtawn Toupa'n: Hiai khawpi, Babulon kumpipa khut ah ka pe ding a, ama'n a lazou ding. 4 Judah kumpipa Zedekia lah Kaldaite khut apan a suakta kei ding a, Babulon kumpipa khuta piak ahi ngeingei ding a, kimaituahin a kihou ding uh a, a mitin amah a mu ding. 5 Ama'n Zedekia, Babulon a tun ding a, tua ah amah ka sai mateng a om ding, chi-a Tangtawn Toupa'n phuang hi. Kaldaite na dou leh na lawhching kei ding, chi hi, na chi a, a chi hi. 6 Jeremia in: Tangtawn Toupa' thu ka kiang ah a hong tung a: 7 Na pangak Shalum' tapa Hanamel na kiang ah hong hawh ding a: Anathoth-a ka lou lei in, ka tanau naipen na hih manin, tua tat ding nang hamphatna leh nang hih ding mawng ahi, hong chi ding ahi, a chi hi, 8 Tua khitin, Tangtawn Toupa' chih bangbangin, ka pangak' tapa Hanamel, kongpi veengpa huang sung ah, ka kiang ah hong hawh petmah a: Benjamin gama, Anathoth-a ka lou lei in. Nang na tat-a, na neih ding nang hamphatna hi mawng ahih manin, kilei in, hong chi hi. Hiai Tangtawn Toupa' thu ahi, chih ka thei a, 9 ka pangak' tapa, Hanamel ka tanau apan in Anathoth-a lou ka lei a, a man ding ngun shekel sawmlesagih ka bukkhia hi. 10 Tua ka lai ah suai ka kai a, namkipnain ka namkip a, theihpihmi ka theihpihsak a, a man ngun zong a bukna selphala ah ka buk hi. 11 Tua van kileina lai, kileina dante kigelhna, namkipna-a kinam pen leh, a kinamlou kawpi tawh ka la a, 12 hiai van kileina lai, ka tanau nai Hanamel leh theihpihte leh, tua kongpi veengpa' huang sunga Juda mi omte khempeuh' mai ah, Neria' tapa Barukh khut ah ka pia hi. Neria bel, Maseia' tapa ahi. 13 Amaute' mai ah, Barukh kiang ah hiai thuhilhnate ka pia hi. 14 Tangtawn Toupa Vanglianpen, Israel Pathian' thugen hiai ahi: Hiai van kileina laite, namkipna-a kinamkip leh a kawpi, namkipna-a kinamloute la inla, sawtpi om dingin leibel sung ah koih in. 15 Ahang bel, Tangtawn Toupa Vanglianpen, Israel Pathian' thugen hiai hi a, ama'n: Innte, loute leh grephuante, hiai gam sunga kilei kik ding ahi, chi hiven, ka chi hi. 16 Tua van kileina lai, Neria' tapa Barukh kianga ka piak khitin, Tangtawn Toupa kiang ah ka thuum a: 17 Maizen, Toupa Tangtawn Pathian, nang na vangletna thupitak leh, na banzaka lei leh vaante bawl chin a, nang adinga a haksa lua om mahmah lou hi. 18 Sang tampi kianga na itna musak chin a, ahihhanga, pate' khelhnate gawtna, amau nunga a tate uh phei tunga nga na hi. Pathian thupi leh vanglian, Tangtawn Toupa Vanglianpen chih min neipa aw, 19 na thiltupte thupi a, na thilhihte vanglian hi. Mihingte' lampite khempeuh na mit in enchian a, mi chih kianga, a gamtatna leh a thilhihte bangbanga pahtakman pia-a thuk zel hi na hi. 20 Nang, Aigupta-a chiamtehna lamdangte leh nalamdangte hih chin a, tuni dong Israel gam leh, mihing khempeuh laka tua banga hih tou lai lai chin a, minthanna nangasa mah ngaha lawhtak na hi. 21 Chiamtehnate leh nalamdangte leh mulkimna lianpi zanga, na mi Israelte, Aigupta apan na banthahat leh na banzaka piikhia na hi. 22 Kichiam zena, a pu a pate uh piak ding na chih gam, nawitui leh khuaizu-a luang gam, hiai gam amaute pia na hi. 23 Amaute hong lut uh a, hiai gam hong nei uh a, ahihhanga na thu mang lou uh a, na dan zong zui lou uhi. Amaute' hih dinga na thupiak hih lou uhi. Tuachi-a nang, hiai siatnate khempeuh amaute tunga tun na hi. 24 Khawpi la dinga galdouna panmunte a kibawl dan en in. Namsau leh kial leh hipi hanga, hiai khawpi, a hong sim Kaldaite khuta kipe ding hita. Tua na muh banga, na gensa hong tung hita. 25 Kaldaite khuta hiai khawpi kipe ding hi mahleh, Toupa Tangtawn Pathian aw, nang ka kianga: Theihpihmite mai ah, ngun' in lou lei in, chi na hi, a chi hi. 26 Tua khitin, Tangtawn Toupa' thu Jeremia kiang ah hong tung a: 27 Kei, Tangtawn Toupa, mihingte khempeuh' Pathian ka hi. Kei adinga a haksa lua himhim om-a hia? 28 Tua bang ahih manin, Tangtawn Toupa' thugen hiai ahi: Hiai khawpi Kaldaite leh Babulon kumpipa Nebukhadnezar khuta pekhe dek ka hi. Ama'n hiai khawpi la ding hi. 29 Hiai khawpi hong sim Kaldaite, hiai khawpi ah hong lut ding uh a, meiin a hal ding uhi. Inntung vum khawnga, Baal maia gimnamtui hal leh, pathian dangte' maia an thillatte laana kei hon hehsakna innte utawh, hiai khawpi a haltumkhawm ding uhi. 30 Israel leh Judah mite'n a tuailai ua pana ka mitmuha thil gilou loungal bangmah hih lou uh a, a khutsuakte ua kei hon hehsak uhi, chi-a Tangtawn Toupa'n phuangkhia ahi. 31 Hiai khawpi in, a kilamkhiak apan tuni dong ka hehna leh thangpaihna tokthou lua a, ka mitmuh apan paaimang teitei ding hi'ng. 32 Israel leh Judah mite, amaute hi-in, a kumpipate uh hi-in a uliante uh hita leh, a siampite uh leh kamsangte hi-in, Judah mite hi-in, Jerusalem mite hita le uh, a thilhih giloute ua hon hehsak uhi. 33 Kei hon nungngat uh a, hon maingat lou uhi. Amaute sinsak sak mah leng, ngai nuam lou uh a, thununna zong saang lou uhi. 34 Ka Min pu tua inn nangawna, milim kihhuaite tung uh a, hihbuah uhi. 35 thil kihhuai hih a, Judah khialsak dinga thu ka piak ngei louh, ka lungsima zong tua bang lut ngeilou hinapi, amaute'n a tapate uh leh a tanute uh, Molekh adinga lat nadinga, Ben Hinom Phaizanga Baal munsaangte lam uhi. 36 Hiai khawpi tawh kisaia, namsau leh kial leh hipi zanga, Babulon kumpipa khuta kipe ding hi, chi chin a, ahihhanga, Tangtawn Toupa, Israel Pathian' thugen hiai ahi: 37 Heh lua leh thangpai lua-a amaute ka sawlmangna gamte apan, amaute kaikhawm ngeingei ding ing a, hiai mun tunkik ding ing a, bittaka teengsak ding hi'ng. 38 Amaute, ka mite hi ding uh a, kei, amaute' Pathian hi ding hi'ng. 39 Amaute, lungtang sakhat leh thilhih gamtat sakhat pe ding ing a, amau' hoih nading leh, amaute' nunga a tate uh hoih nadinga kei hon lau gige ding uhi. 40 Amaute tawh kala a omden ding thukhun khat bawl ding hi'ng. Amaute tunga thilhoih hih tawp ngeilou ding ing a, kei hon lau dinga amaute hatkhum ding ing a, kei hon kiheisan ngei lou ding uhi. 41 Amau tunga thilhoih hiha lungnuam ding ing a, amaute, hiai gama ka lungtang khempeuh leh, ka hinna khempeuh pang a, phutkip ding hi'ng, chi hi. 42 Tangtawn Toupa' thugen hiai ahi: Hiai mite tunga siatna thupi ka tunsaktak bangbanga, amaute tunga ka chiamsa hauhna khempeuh tungsak ding hi'ng. 43 Nang: Hiai gam Kaldaite khuta piakkhiak ahih mana, zattheihlouh gamsia, mihing leh gamsa om louhna gam, na chih hiai gama loute kilei ding hi. 44 Amaute' hauhnate pekik ding ka hih mana, Benjamin gam sung leh, Jerusalem kimkota khawtate leh, Judah khawpite leh, tanggam leh tumlam mualbulte leh, Negev-a khawpite, loute ngunin kilei ding a, kileina laite-a suai kikai ding a, kipsakna chiamtehnate-a kichiamteh ding a, theihpih-a om ding hi, chi-a Tangtawn Toupa'n phuang hi.
Tundingthakna Thuchiam
1 Kongpi ngakpa' huang sunga Jeremia khum chibilh-a a om sungin, Tangtawn Toupa' thu a kiang ah a nihveina dingin hong tung hi. 2 Tangtawn Toupa, leitung siampa, leitung lim leh mei neia bawl a, hihkippa Tangtawn Toupa' thugen hiai ahi. Tangtawn Toupa, chih a min ahi. 3 Ama'n: Hon sam in, kon dawng ding a, na theihlouh leh zonkhiak theihlouh thil thupite kon hilh ding hi. 4 Ahang bel, Tangtawn Toupa, Israel' Pathian in khawpi simna dinga panmun kibawlte leh namsau dou nadinga zat dinga hiai khawpi-a innte leh Judah kumpi innpi kiphelte leh, 5 Kaldaite dou nadinga zat dingte tawh kisaia a gen hiven. Ama'n: Heh leh thangpaia ka thah ding mite' siluangte-a tuate dim ding hi. Hiai khawpi a gitlouhnate khempeuh hanga, hiai khawpi apan ka mai sel ding hi'ng. 6 Ahihhanga, chidamna leh hih-damna hon tun ding ing a, ka mite damsak a, muanna leh bitna kiching neisak ding hi'ng. 7 Saltanna apan Judah leh Israel hon piikik ding ing a, nidanglaia banga amaute tungding thak ding hi'ng. 8 Ka tunga a khelhnate uh hanga a mawhnate khempeuh uapan siangsak ding inga, a khelhnate uh hanga a mawhnate khempeuh uh ngaidam hing. Hibangin kei tungah hel uhi. 9 Tua hun chianga, hiai khawpi tunga thil hoih ka hihte khempeuh a na za namte khempeuh' maia, hiai khawpi in ka tunga minthanna, lungnopna leh pahtawina hon tun ding hi. Tua bang huna, hiai khawpi kianga hauhna kiching leh muanna ka piak mu-a lamdang sa a, liing ding uhi, chi hi. 10 Tangtawn Toupa' thugen hiai ahi: Nang hiai mun tawh kisaia: Zatnabei gam kisia, mihing lah omlou, ganhing lah omlou, chi chin a, hinapi-a, Judah khawpite leh Jerusalem kongzingte taisana om a, mihingte hi-in, ganhingte hita leh a omlouhna muna, 11 lungnopna leh kipahna husa, mou leh mouneipa awte leh, Tangtawn Toupa' inna kipahthu genna thillat hon tawite' awte leh tua thillatte hon tawite'n: Tangtawn Toupa Vanglianpen tung ah Kipahthu gen un; Tangtawn Toupa hoih a, a itna Tangtawn daih hi, a chih uh kiza ding hi. Ahang bel, nidang laia banga tua gam vangphatna pekik ding hi vengin, chi-a Tangtawn Toupa'n gen hi. 12 Tangtawn Toupa Vanglianpen' thugen hiai ahi: Hiai mun loihsa, mihingte hi-in ganhingte hita leh a omlouhna, a khawpite khempeuh ah, belamchingte'n a belamte uh a khawlsak nading uh, gantatna munte omthak ding ahi. 13 Benjamin gama tanggam khawpite ah bang, tumlam mualbulte ah bang leh, Negev ah bang, Jerusalem kimkota khawtate leh Judah gam khawpite ah bang, belamhonte, amaute simpa khut nuai ah a paisuak nawn ding uhi, chi-a Tangtawn Toupa'n gen hi, a chi hi. 14 Tangtawn Toupa'n gen a: Israel innkawte leh Judah innkawte kianga hehpihna thuchiam ka bawlte ka tangtun nite hong tung ding hi. 15 Tua nite leh tua huna David khanggui apan Kahiang diktat selkhesak ding ing a, ama'n tua gam sunga a dik a tang hih ding hi. 16 Tua nite-a Judah hotdam hi ding a, Jerusalem bita om ding a, Jehova Tsitkenu chi-a kiminlawh ding hi, chi-a phuang hi. 17 Ahang bel, Tangtawn Toupa' thugen hiai ahi: David in Israel innkaw-te' kumpitutphah tunga tu ding mi tasam ngeilou ding a, 18 Levi mi siampite'n zong haltum thillatte laan ding, an thillatte hal ding leh, kithoihnate pe dinga ka maia ding gige ding mi tasam ngeilou ding uhi, chi hiven. 19 Tangtawn Toupa' thu Jeremia kiang ah hong tung a, 20 Tangtawn Toupa' thugen hiai ahi: Sun tawh kisaia ka thukhun na palsat theih a, zan tawh kisaia ka thukhun na palsat theih a, amaute adinga hun seh banga sun leh zan hong tun kei leh, 21 tua hun chiangin, ka sila David tawh kala ka thukhun leh, ka maia nasem siampite tawh kala ka thukhun a kise thei ding a, David in a kumpitutphah tunga tu-a vaihawm ding suan leh khakte a nei nawn kei ding hi. 22 Ke'n ka sila David suante leh, ka maia nasem Levite, vaana aksi simsenglouh bangin ka tamsak ding hi, chi hi. 23 Tangtawn Toupa' thu Jeremia kiang ah hong tung a: 24 Hiai mite' thugen theita lou maw: Tangtawn Toupa'n a teelsa kumpigam nihte nolh ahi, a chih uh? Tua banga ka mite simmawh uh a, nam khat banga zahtak nuam lou uhi, chi hi. 25 Tangtawn Toupa' thugen hiai ahi: Sun leh zan tawh kisai ka thukhun kipsakin lei leh van ading dan khung lou ka hih tel leh, 26 Jakob suante leh ka sila David' suante ka nolh mah ding a, Abraham, Isak leh Jakob suante tunga vaihawm ding, a suante laka khat ka teel kei ding hi. Ahang bel, a hauhnate uh pekiik ding ing a, a tung ua lainatna nei ding hi vengin chi hi.
Zedekia Vauhilhna
1 Babulon kumpipa Nebukhadnezar leh a sepaihte khempeuh leh, a uk sunga kumpigamte leh mite'n Jerusalem leh a kimkota khawpite khempeuh sim a, a dou sung-un, Jeremia kiang ah Tangtawn Toupa' thu hong tung hi. 2 Tangtawn Toupa, Israel Pathian' thugen hiai ahi: Judah kumpipa Zedekia kiang ah hawh inla: Tangtawn Toupa' thugen hiai ahi, ama'n: Babulon kumpipa' khuta hiai khawpi pe dek ing a, ama'n halgawp ding ahi. 3 Ama' khut apan suakta lou ding chin a, mata om ngeingei ding chin a, ama' khuta piakkhiak hi ding na hi. Na mit mahmaha Babulon kumpipa mu ding chin a, ama'n kimaituaha hon houpih ding ahi. Tua banga Babulona pai ding na hi. 4 Hinapi-in, Judah kumpipa Zedekia aw, Tangtawn Toupa' thuchiam za in. Nang tawh kisaia Tangtawn Toupa' thugen hiai ahi: Namsauin na si kei ding a, 5 khamuangtakin na si ding. Nang ma-a kumpipa-a na pang na pu na pate pahtawi nadinga kivuina meiphualpi mite'n a seh bangun, nang pahtawina-in meiphualpi a sep ding uh a: Maizen, Pu aw! chi-in hon kah ding uhi, chi hi. Keimah mah in hiai thuchiam bawl ka hi, chi-a Tangtawn Toupa'n phuang hi, chi in, a chi hi. 6 Tua khitin, kamsang Jeremia in Jerusalem ah, Judah kumpipa Zedekia kiang ah hiaite khempeuh a hilh hi. 7 Tua bel, Babulon kumpipa' sepaihte'n Jerusalem leh Judah khawpi omlaite, Lakhish leh Azeka a sim laitak uh ahi. Hiai khawpite kia mah Judah gama kulhbaang nei khawpite ahi.
Salte' Suahtakna
8 Kumpipa Zedekia in salte suahtak nading thu phuang dinga, Jerusalem mite khempeuh tawh kala thukhun a bawl nungin, Tangtawn Toupa apan Jeremia kiang ah thu hong tung hi. 9 Kuapeuh in a Hebru salte uh, numei pasal a suahtaksak ding uh ahi. Kuama'n a Hebru-pih a saltansak louh ding ahi. 10 Tuachi-in, hiai thukhunna-a pang uliante leh mite khempeuh, a sal numeite uleh a sal pasalte uh suaktasak ding leh, amaute saltaangsak nawn lou dingin a thukim uhi. 11 Ahihhangin, a nungin lungsim a khek uh a, a suahtaksaksate uh a lakik uh a, salin a taangsak kik uhi. 12 Tua khitin, Tangtawn Toupa' thu Jeremia kiang ah hong tung a, 13 Tangtawn Toupa, Israel Pathian' thugen hiai ahi: Aigupta gam, sal-tanna gam apan na pu na pate uh ka piikhiak laiin, amaute tawh kal ah thukhun ka bawl a: 14 Kum sagihna zel ah na Hebru-pih uh, na kiang ua sala hong kikhawng mi na suahtaksak ngeingei chiat ding ahi. Kum guk sung na nna a sep nungin, na suaktasak ding uh ahi, ka chi hi. Hinapi-in, na pu na pate un hon ngaikhe kei uh a, thudon zong hon thudon kei uhi. 15 Tuma zekin na kisik uh a, ka mitmuha thildik na hih uhi. Noute tekin na gammi hihpihte uh kiang ah, suahtakna thu na phuang uhi. Ka min pu inn ah, ka mai ah thukhun nangawn na bawl uhi. 16 Ahihhangin, tu'n na kilehhei uh a, ka min na buahsak uhi. Michih in, sal numei leh pasal a utna na ua pai dinga, na suahtaksakte uh na lakik uh a, na suak na sal ua om kik dingin, thagumin na kai uhi. 17 Tua bang ahih manin, Tangtawn Toupa' thugen hiai ahi: Non thuman kei uh a, na gammi hihpihte uh suahtak nading na phuang kei uh. Tua bang ahih manin, ke'n tu'n noute adingin suahtakna ka phuang hi. Tua suahtakna bel namsau leh hipi leh kiala pukna ding apan suahtakna ahi, chi-in Tangtawn Toupa'n a phuang hi. Leitung kumpigam khempeuhte' kihin noute kon bawl ding hi. 18 Ka thukhun mangloua, ka maia thukhun a bawl uh thute tangtun loute, bawngnou phelnih suah a, a kala a paisuakna uh bangin ka bawl ding hi. 19 Judah leh Jerusalem makaite, vaihawm thukhenna muna uliante, siampite leh tua bawngnou phei nih kala pai, tua gam mite khempeuh, 20 amaute thah sawma zong melmate' khut ah ka pe ding hi. A siluangte uh tungleng vasate leh leitung gamsate' an ahi ding. 21 Jndah kumpipa Zedekia leh a uliante, amaute' hinna lak sawma zong a melmate uh khut ah leh, noute apan nungkik Babulon kumpipa' sepaihte khut ah ka pe ding hi. 22 Tangtawn Toupa'n: Thupiak pe ding ing a, amaute hiai khawpi tunkik ding ing a, hiai khawpi sim ding uh a, la ding uh a, halgawp ding uhi. Tua bana ke'n Judah khawpite hihgawp vek ding ing a, tua-a kuamah teeng thei lou ding hi, chi-a phuang hi.
Rekabte
1 Judah kumpipa, Josia' tapa Jehoiakim' vaihawm sunga, Jeremia kianga Tangtawn Toupa' thu hong tung hiai ahi: 2 Rekab innkawte kiang ah hawh inla, Tangtawn Toupa inn-a a pang inndante khata hong pai dingin chial inla, a dawn ding uh zu pia in, a chi hi. 3 Tuachi-in, Jeremia' tapa Jaazania leh a sanggamte leh a tapate khempeuh Rekab innkawte khempeuh pii dingin ka hawh hi. Jeremia bel, Habazinia' tapa ahi. 4 Tangtawn Toupa' inn ah, Hanan' tapate' inn sung ah amaute ka piilut hi. Hanan bel Pathian' mipa Igdalia' tapa ahi. Tua inn bel, uliante' inn tawh kizom ahi a, kongkhak ngakpa Shalum' tapa Maaseia' inntung zawna om ahi. 5 Tua khitin, zu-a dim thawlte leh noute, tua Rekab innkawte laka pasalte' mai ah ka tung a, amaute kiang ah: Zu dawn un, ka chi hi. 6 Ahihhangin, amaute'n hon dawng uh a: Koute'n zu dawn lou hi ung. Ahang bel, ka pu uh Rekab' tapa Jonadab in hiai thupiak hon pia a: Noute hi-in, na suante uh hita leh, zu na dawn ngeilouh ding uh ahi. 7 Innte zong na lam ngeilouh ding uh, khaichi na pawi louh ding uh, grephuante na bawl louh ding uh. Hiai thilte peuhmah na neih ngeilouh ding uh, ahihhanga puanbukte-a na teen zawk ding uh ahi. Tua hi leh, pemta na hihna gam sung uah, damsawtin na teeng sawt ding uhi, a chih man ahi. 8 Ka pu uh Rekab' tapa Jonadab in hon thupiak peuhmah ka zui uhi. Koute hi-in, ka zite uh, ka tapate uh, ka tanute uh hita leh, zu ka dawn ngei kei uh a, 9 teen nading innte zong ka lam kei uh a, grephuante, loute leh anteh louhing chiin zong ka hih kei uhi. 10 Puanbukte ah ka teeng uh a, ka pu uh Jonadab hon thupiak peuhmah ka zui kim sipsip uhi. 11 Ahihhangin, Babulon kumpipa Nebukhadnezar in hiai gam hon sim takin: Kisa un, Kaldai sepaihte leh Aram sepaihte apan i suahtak theih nadingin, Jerusalem ah taai teitei ni, ka kichi uh a, tuachi-in, Jerusalem ah ka omdenta uhi, a chi uhi. 12 Tua khitin, Tangtawn Toupa' thu Jeremia kiang ah hong tung hi. 13 Tangtawn Toupa Vanglianpen, Israel Pathan' thugen hiai ahi: Kuan inla, Judah mite leh Jerusalem mite kiang ah: Noute'n sin ding khat sin a, ka thute zui lou ding maw? 14 Rekab' tapa Jonadab in zu dawn lou dinga a tapate thu pia a, amaute'n hiai thupiak zui uhi. A pu uh' thupiak a zuih man ua, tuni donga zu dawn lou uhi. Ahihhanga, noute kianga thu gengen hinapi ing a, hon thuman lou na hi uh. 15 Ka sila, kamsangte na kiang ua hon sawl zihzeh ing a, amaute'n: Na gamtat giloute uapan na kihei ngeingei ding uh, na thilhihte uh na bawlphat ding uh, pathian dangte' nna sem dinga amaute na zuih louh ding uh. Tua hileh, na pu na pate uh kianga a piak gama teeng ding na hi uh, chi uhi. Ahihhangin, non thudon kei uh a, non ngaikhe sam kei uhi. 16 Rekab' tapa Jonadab' suante'n bel a pubul uh thupiak a zui uh a, ahihhangin hiai mite'n zaw kei hon thuman lou uhi, chi hi, chi in. 17 Tua bang ahih manin, Tangtawn Toupa Pathian Vanglianpen, Israel' Pathian' thugen hiai ahi: Ngai un! Judah gam tung ahte, Jerusalema teeng peuhmahte tunga ka phuankhiaksa siatna chiteng tun ding hi'ng. Amaute kianga thu gen ing a, ahihhanga ngaikhe lou uh a, amaute sam ing a, ahihhanga hon dawng lou uhi, chi ahi, a chi hi. 18 Tua khitin, Jeremia in Rekab innkawte kiang ah: Tangtawn Toupa Vanglianpen, Israel' Pathian' thugen hiai ahi: Noute'n na pu uh Jonadab thupiak na zui uh a, a thuhilhnate khempeuh zuiin, a thupiakte peuhmah na hih uhi. 19 Tua bang ahih manin, Tangtawn Toupa Vanglianpen, Israel' Pathian thugen hiai ahi: Rekab' tapa Jonadab in ka nasem ding mi tasam ngeilou ding hi, chi hi, a chi hi.
Laibuzial Halna
1 Judah kumpipa Josia' tapa Jehoiakim' vaihawm kum, a kum lina ah, Tangtawn Toupa apan Jeremia kiang ah hiai thu hong tung hi: 2 Laibuzial khat la inla, tua ah Josia' vaihawm apan tuni dong na kianga, Israel leh Judah leh nam dangte khempeuh tawh kisaia ka thugente khempeuh gelh in. 3 Amaute tunga siatna tut ding ka sawm, Judah mite'n a zak chiangun, amaute kuapeuh in a gamtatna gilou a kiheisan khamawh ding uhia. Tua hileh, ke'n a gitlouhnate uleh, a khelhna uh ngaidam ding hi'ng, a chi hi. 4 Tuachi-in, Jeremia in Neria' tapa Barukh a sam a, Tangtawn Toupa'n amah kianga a thugen khempeuh a gen a, Barukh in tua laibuzial ah a gelh hi. 5 Tua khitin, Jeremia in Barukh kiang ah: Kei pen dala om ka hih chiangin, Tangtawn Toupa' tempula hawh thei lou ka hi. 6 An ngawlni khatin, Tangtawn Toupa' inn ah nang va hawh inla, ka gen banga kigelh tua Tangtawn Toupa' thugente, laibuzial apanin mite zakin va simkhia in. Judah mite, a khawpite uapan hong paite khempeuh zakin simkhia in. 7 Amaute'n Tangtawn Toupa' maia ngetna bawlin, mi chih a gamtatna giloute uapan a kihei khamawh ding uhia. Tangtawn Toupa'n hiai mite' tunga hehna leh thangpaihna a genkhiak thupi mahmah hiven, a chi hi. 8 Neria' tapa Barukh in, kamsang Jeremia in hih ding chi-a amah a hilh khempeuh a hih a, Tangtawn Toupa' tempul ah, laibuzial apan Tangtawn Toupa' thute a simkhia hi. 9 Judah kumpipa Josia' tapa Jehoaikim' vaihawm kum, a kum ngana, a kha kuana ah, Jerusalema mite khempeuh leh, Judah khawpite apan hong paite adingin, Tangtawn Toupa' maia anngawl hun a kiphuang hi. 10 Laigelhpa Shafan' tapa Gemaria' inndan apanin Barukh in Tangtawn Toupa inn-a om mite khempeuh zakin, tua laibuzial apan Jeremia' thugente a simkhia hi. Tua Gemaria' inndan bel, tempul Kongpi Thak kichi huangsung intual saknunga om ahi. 11 Shafan' tapa Gemaria, Gemaria' tapa Mikaia ahi. Mikaia in tua laibuziala Tangtawn Toupa' thute khempeuh a zak takin, 12 uliante khempeuh a tutkhawmna uh, kumpi' innpi-a laigelhpa inndan ah a va hawhsuk hi. Tua ulian tukhawmte bel, laigelhpa Elishama, tua chiangin, Shemaia' tapa Delaia, Akbor' tapa Elnathan, Shafan' tapa Gemaria, Hanania' tapa Zedekia leh ulian dangte khempeuh ahi. 13 Barukh in, tua laibuzial apan mipite zaka a sim, Mikaia in a zakte khempeuh amaute a hilh khitin, 14 tua uliante khempeuh in: Mipite zaka na sim laibuzial hon tawi inla, hong pai in, chi dingin Barukh kiang ah Nethania' tapa Jehudi a sawl uhi. Nethania bel Shelemia' tapa ahi a, Shelemia lah Kushi' tapa ahi. Tuachi-in, Neria' tapa Barukh, a khuta tua laibuzial tawiin amaute kiang ah a va hawh hi. 15 Amaute'n amah kiang ah: Hehpihtakin tu inla, koute kiang ah laibuzial hon sim in, a chi uhi. Tuachi-in, Barukh in amaute zakin tua laibuzial a sim hi. 16 Amaute'n hiai thute khempeuh a zak takun, lauin a kien uh a, Barukh kiang ah: Hiai thute khempeuh, kumpipa kiang i tut ngeingei ding ahi, a chi uhi. 17 Tua khitin, amaute'n Barukh kiang ah: Hon hilh dih, hiai tengpi bang chi-a gelh na hia? Jeremia in na gelh ding hon gen hia? a chi uhi. 18 Barukh in a dawng a: He, ama'n hiaite ka kianga hon gen a, ken laibuziala laituia gelh ka hi, a chi hi. 19 Tua khitin, uliante'n Barukh kiang ah: Nang leh Jeremia kuan unla, va bu un. Na omna uh kuamah kitheisak kei un, a chi uhi. 20 Amaute'n laigelhpa Elishama' inndan sunga tua laibuzial a koih khitun, kumpipa kiang ah, huangsung inntual ah a va hawh uh a, bangkim a va hilh uhi. 21 Kumpipa'n tua laibuzial la dingin, Jehudi a sawl a, Jehudi in laigelhpa' inndan apan tua laibuzial hon tawi a, kumpipa leh a kianga ding uliante zakin a sim hi. 22 A kha kuana ahi a, kumpipa zong a phalbi inn ah, a maia meisemna bela mei kiseem awiin a tu hi. 23 Jehudi in laibuzial bawng thum hiam li hiam a simkhit tengin, kumpipa'n tua a kisimsa bawng teng, laigelhmi temta-in a atkhia a, tua meisemna bel ah a khul zel a, tua laibuzial a vekpi-a a kattum dong, tua bangin a hih hi. 24 Hiai thu khempeuh za kumpipa leh a nasemte'n laumel a pu kei uh a, a puansilhte uh zong a botkek kei uhi. 25 Elnathan, Delaia leh Gemaria in tua laibuzial hal lou dingin kumpipa kun mahle uh, amaute a ngaikhe kei hi, 26 Ngaihkhiak naksangin, kumpipa'n laigelhpa Barukh leh kamsang Jeremia man dingin kumpipa' tapa khat Jerameel leh, Azriel' tapa Seraia leh, Abdeel' tapa Shelemia a sawl hi. Ahihhangin, Tangtawn Toupa'n amaute a selmang hi. 27 Kumpipa'n Jeremia' gen banga Barukh in a gelh thute omna laibuzial a halkhit-in, Jeremia kiang ah, Tangtawn Toupa' thu hong tung a: 28 Laibuzial dang khat la inla, Judah kumpipa Jehoiakim in a haltum laibuzial khatna-a om thute gelh in. 29 Tua baan ah, Judah kumpipa Jehoiakim kiang ah: Hiai Tangtawn Toupa' thugen ahi. Nang tua laibuzial haltum a: Babulon kumpipa hong kuan ngeingei ding a, hiai gam a hihse ding a, hiai gam apan mihingte leh ganhingte a satkhe ding, chi-a banghanga gelh na hia? chi na hi. 30 Tua bang ahih mana, Judah kumpipa Jehoiakim tawh kisaia, Tangtawn Toupa'n hiai gen ahi: Jehoiakim in David kumpitutphah tunga tu ding kuamah nei lou ding a, ama' siluang zong paihkhiaka om ding a, suna lumnain hai dinga, zana vuk in thah ding hi. 31 Amah leh a tate leh a nasemte, a gitlouhna uh hanga gawt ding ing a, amaute tung leh Jerusalema teengte leh, Judah mite tunga siatna tun ding chi-a thutanna ka bawl banga tun ding hi'ng. Ahang bel, ka thu a ngaihkhiak louh man uh ahi, chi hi, a chi hi. 32 Tuachi-in, Jeremia in laibuzial dang khat a la a, laigelhpa, Neria' tapa Barukh kiang ah a pia hi. Barukh in Jeremia gen bangbang, Judah kumpipa Jehoiakim in meia a haltum laibuziala thute khempeuh a gelh hi. Tuate baan ah, a kibatpih thu tampi a kibehlap hi.
Suangkula Jeremia
1 Babulon kumpipa Nebukhadnezar in Josia' tapa Zedekia, Judah kumpipa-in a bawl a, ama'n Jehoiakim' tapa Konia mun ah vai a hawm hi. 2 Amah hi-in, a nasemte hi-in, tua gam mite hita leh, amaute'n kamsang Jeremia tungtawna Tangtawn Toupa' thugente a thudon kei uhi. 3 Ahihhangin, kumpipa Zedekia in bel, Shelemia' tapa Jehukal, Maaseia' tapa siampi Zefania tawh, hiai thu pua-in kamsang Jeremia kiang ah a sawl a: Hehpihtakin, koute adingin Tangtawn Toupa kiang ah hon thumsak in, a chisak hi. 4 Jeremia bel hong pai a, mipite laka pai dinga noplen ahita hi. Ahang bel, suangkula khum hi nailou hiven. 5 Faro' sepaihhonte, Aigupta apan a kuankhekhin uh a, Jerusalem vasima om Kaldaite'n tua Aiguptate' thu kigen a zak takun, Jerusalem apan a nungkik uhi. 6 Tua khitin, Tangtawn Toupa' thu, kamsang Jeremia kiang hong tung a, 7 Tangtawn Toupa, Israel Pathian' thugen hiai ahi: Kei kianga thu dong dinga hon sawlpa, Judah kumpipa kiang ah: Faro' sepaihhon, nang hong huh dinga hong kuante, a gam uh Aigupta-a kilehkik ding uh ahi. 8 Tua khit chiangin, Kaldaite hong kik ding uh a, hiai khawpi a sim ding uh a, a la ding uh a, a halgawp ding uh, chi ahi. 9 Tangtawn Toupa' thugen hiai ahi: Kaldaite'n eite hon nuse ngeingei ding uh ahi, chi-a ngaihtuahin kikhemzou kei un. Hon nuse lou hiai ding uhi! 10 Noute hon dou Kaldai sepaihhon zou vek a, a liamte kia a puanbukte ua kinuse ding hi hiai taleh zong, hong kuankhe ding uh a, hiai khawpi a halgawp ding uh, chi ahi, chi in a chi hi. 11 Faro' sepaihhonte hanga Kaldai sepaihhonte a nungkik nungun, 12 Jeremia in, Benjamin gama mite laka a tantuan gam va nei dinga kuan dingin, tua khawpi a nuse panta hi. 13 Ahihhangin, Benjamin Kongpi a tun takin, vengmi makai in amah a na man a: Kaldaite lama pang dinga hon simtaisan dek na hi! a chi hi. Tua makai bel Shelemia' tapa Irija ahi. Shelemia bel, Hanania' tapa ahi. 14 Jeremia in: Hi zenzen lou e! Kaldaite lama pang dinga hon taisan dek ka hi kei, a chi hi. Ahihhangin, Irija in amah a ngaikhe kei a, ngaihkhiak naksangin, amah a man a, uliante kiang a tun hi. 15 Uliante'n Jeremia a hehsan uh a, a vua uh a, laigelhpa Jonathan inn ah a khum uhi. Jonathan' inn bel suangkul dinga a bawl uh ahi. 16 Jeremia bel suangkul sung thuk ah khum chibilhin a om a, tua ah hun sawtpi a taang hi. 17 Tua khitin, Kumpipa Zedekia in a samsak a, kumpi' innpi ah a piisak a, tua ah a simin thu a dong a: Tangtawn Toupa apan thu tung a om hia? a chi hi. Jeremia in a dawng a: Om mah e! Babulon kumpipa' khuta piakkhiak hi ding na hi, a chi hi. 18 Tua khitin, Jeremia in Kumpipa Zedekia kiang ah: Nang tung hi-in, na uliante hi-in, hiai mite tung hita leh, bang gitlouhna ka hiha ahia, hibanga suangkula non khum? 19 Na kianga genkholhnate gen a: Babulon kumpipa'n nang hi-in, hiai gam hita leh hong dou lou ding ahi, chi na kamsangte koia om ahi ua? 20 Ahihhangin, tu'n ka toupa kumpipa aw, hehpihtakin ngaikhia in. Ka ngetna na mai hon tunsak in, hiai ahi: Laigelhpa Jonathan inn ah hon koih kik ken, tuachi louin zaw tua-a si ding hi'ng, a chi hi. 21 Tua khitin, Kumpipa Zedekia in, veengmi' huangsunga Jeremia koih ding leh, khawpi-a tanghou a bei matan, tanghou emte' kongzing apan nisima tanghou piak ding, chi-in thupiak a bawl hi. Tuachi-in, tua veengmi huangsung ah Jeremia a omta hi.
Tuibem sunga Jeremia
1 Matan' tapa Shefatia, Pashur' tapa Gedalia, Shelemia' tapa Jehukal leh Malkija' tapa Pashur in, mite khempeuh kianga Jeremia' thugen a na za uhi. 2 Tua bel, ama'n: Tangtawn Toupa' thugen hiai ahi. Hiai khawpi-a omte khempeuh namsau leh kial leh hipi-a si ding ahi, ahihhanga Kaldaite lama pang peuhmah hing ding ahi. Tua bang mi a hinna kia tawh suakta ding a, hing ding ahi, a chih ahi. 3 Tua ban ah, Tangtawn Toupa' thugen hiai ahi: Hiai khawpi, Babulon kumpipa' sepaih-honte khuta piakkhiak ngeingei hi ding a, amaute'n khawpi la ding uh ahi, chi hi, chih ahi. 4 Tua khitin, uliante'n kumpipa kiang ah: Hiai mipa thah ding ahi. Ama'n hiai khawpi-a nutsiata om sepaihte leh mipite, amaute kianga a thugente pansana liinthawn ahi. Hiai mipa'n hiai mite' hoih nading zong lou a, a siat nading uh zong zaw ahi, a chi uhi. 5 Kumpipa Zedekia in a dawng a: Amah na khut ua om ahi. Kumpipa'n noute kaiha bangmah hih theilou ahi, a chi hi. 6 Tuachi-in, amaute'n Jeremia a man uh a, kumpipa' tapa Malkija' tuibem sung ah a koih uhi. Tua tuibem bel, veengmi' huangsunga om ahi. Amaute'n tua tuibem sung ah, khauzenin Jeremia a khaikhesuk uhi. Tua tuibem ah tui a om kei a, buannawi kia a om a, Jeremia tua buannawi lak ah a tumsuk hi. 7 Ahihhangin, tuibem sung ah Jeremia a khia uh, chih kumpi innpi-a ulian khat, Kush mi, michilgeh Ebed Melekh in a na za hi. Benjamin Kongpi-a kumpipa a tut laitakin, 8 Ebed Melekh, kumpi innpi apan hong pusuak a, kumpipa kiang ah: 9 Ka toupa kumpipa aw, hiai mite, kamsang Jeremia tunga a gamtatna khempeuh uh, gilou lua-a gamta uh ahi. Amaute'n tuibem sunga amah khia uh a, khawpi sunga tanghou om nawn louh chianga, amah puksi ding ahi, a chi hi. 10 Tua khitin, kumpipa'n, tua Kush mi Ebed Melekh thu a pia a: Hiai apanin mi 30 tonpih inla, tuibem sunga kamsang Jeremia a sih ma-in, khaikhetou un, a chi hi. 11Tuachi-in, Ebed Melekh in mite a tonpih a, kumpi innpi-a sum koihna nuaia indan khat ah a hawh hi. Tua apanin, puanthem lui leh puansia bangzah hiam a la a, tuibem sunga Jeremia kiang ah tuate khauzenin a khaikhesuk hi. 12 Tua Kush mi Ebed Melekh in Jeremia kiang ah: Hiai puanthem luite leh puansiate na lenuai ah khauzen thapna dingin na koih in, a chi a, Jeremia in tua bangin a koih hi. 13 Tuachi-in, amaute'n khauzenin tua tuibem apan Jeremia a khaikhia uhi. Tua nungin, tua veengmi' huang sung ah Jeremia a omta hi.
Zedekia Dotnate
14 Tua nungin, Kumpipa Zedekia in kamsang Jeremia a samsak a, Tangtawn Toupa' tempul lutna thumna ah hon tonpihsak hi. Kumpipa'n Jeremia kiang ah: Thil banghiam hon dong ding ka hi a, ka kiang ah bangmah hon im ken, a chi hi. 15 Jeremia in Zedekia kiang ah: Dawnna hon pe leng, non that kei ding maw? Thuhilhna hon pe leng zong, non ngaikhe kei ding, a chi hi. 16 Ahihhangin, Kumpipa Zedekia in a simin Jeremia kiang ah a kichiam a: Nakna hon pepa Tangtawn Toupa' hinna sialin ka gen ahi. Kon that kei ding a, na hinna lak sawma zongte' khut ah zong kon pekhe kei ding, a chi hi. 17 Tua khitin, Jeremia in Zedekia kiang ah: Tangtawn Toupa Pathian Vanglianpen, Israel' Pathian' thugen hiai ahi: Babulon kumpipa' uliante khuta na kipiak leh, na hinna hawi ahi ding a, hiai khawpi zong a kihalgawp kei ding a, nang leh na innkawte zong na nungta ding uh. 18 Ahihhangin, Babulon kumpipa uliante' khuta na kipiak kei leh bel, amaute' khut ah hiai khawpi piakkhiak ahi ding a, a halgawp ding uh a, nang mahmah zong a khut uapan na suakta kei ding, chi ahi, a chi hi. 19 Kumpipa Zedekia in, Jeremia kiang ah: Kaldaite lama pang Judah gama mite ka lau hi. Ahang bel, Kaldaite'n tuate khuta hon pekhe ding ua, amaute'n kei hon mawkbawl kha ding uh hiven, a chi hi. 20 Jeremia in a dawng a: Amaute'n tua banga hon pekhe lou ding uhi. Kon hilh bangin hih inla, Tangtawn Toupa' thu mang in. Tua hi leh, nang adinga hoih ding a, na hinna hawia om ding hi. 21 Ahihhanga, na kipiakkhiak nop kei leh bel, Tangtawn Toupa'n ka kianga a latsak hiai ahi. 22 Judah kumpipa' innpi-a nutsiat numeite khempeuh, Babulon kumpipa' uliante kianga piakkhiaka om ding uh a, tua numeite'n na kianga: Na muan mahmah na lawmte'n nang hon piikawi uh a, hon zouta uh ahi ve. Na khete nin kihhuai laka tum a, na lawmte'n hon taisan hi, hon chi ding uhi. 23 Na zite leh na tate khempeuh, Kaldaite kianga piakkhiak hi ding uh a, nang nangawn a khut uapan suakta lou ding chin a, Babulon kumpipa'n hon man ding a, hiai khawpi halgawpa om ding ahi, a chi hi. 24 Tua khitin, Zedekia in Jeremia kiang ah: Hiai i kihouna kuamah theisak het ken, tuachi lou-in zaw na si kha ding hi. 25 Uliante'n nang kon houpih chih a zak ua, na kianga hong hawh a: Kumpipa kianga na gen bang ahia, kumpipa'n na kianga a gen bang ahia hon hilh in. Koute hon im ken, tuachi louin zaw kon that ding uh, hon chih uleh, 26 amaute kiang ah: Si dingin Jonathan inn ah hon khakik ken, chi-a kumpipa ngen ka hi, na chi ding hi, a chi hi. 27 Uliante khempeuh, Jeremia kiang ah hong hawh petmah uh a, a dong uh a, ama'n, kumpipa'n gen dinga a thupiak khempeuh amaute a hilh hi. Tuachi-in, amah kiang ah bangmah a gen nawn kei uhi. Ahang bel, kumpipa tawh a kihou thu kuama'n za lou hiven. 28 Tua bangin, Jerusalem khua lakzawh ahih dong, Jeremia bel amah veengpa' huangsung ah a omden hi.
Jerusalem Pukna
1 Jerusalem lakzawh-a a om dan hibang ahi. Judah kumpipa Zedekia' vaihawm kum, a kum kuana, a kha sawmna ah, Babulon kumpipa Nebukhadnezar, a sepaihhon tawh Jerusalem sim dingin hong kuan a, a umchip hi. 2 Zedekia' vaihawm kum, a kum sawmlekhatna, a kha lina, a ni kuana ah, khawpi kulhbaang phutkek paisuakin a om hi. 3 Babulon kumpipa' uliante khempeuh hong pai uh a, Kongpi Laita ah hong tu uhi. Amaute, Samgar mi Nergal Sharezer, ulian makai Nebo Sarsekim, ulian saangtak Nergal Sharezer leh Babulon kumpi' ulian dangte khempeuh ahi uhi. 4 Judah kumpipa Zedekia leh sepaihte khempeuh in amaute a muh takun, a taai uh a, zan laiin, kumpipa' huan lampi tawnin, khawpi a nusia uh a, kulhbaang nih kala kongpi-a paisuakin Araba lam a manawh uhi. 5 Ahihhangin, Kaldaite sepaihhonte'n amaute a delh uh a, Jerikho phaizang ah Zedekia a delhpha uhi. Amah a man uh a, Hamath gama Ribla ah, Babulon kumpipa Nebukhadnezar kiang a tun uhi. Tua ah, Nebukhadnezar in amah gawt nading thutanna a bawl hi. 6 Tua Ribla ah, Babulon kumpipa'n Zedekia' mitmuh mahmahin a tapate, hiamgamtakin a that a, Judah miliante khempeuh zong a that hi. 7 Tua khitin, Zedekia' mitte a khelkhiaksak a, Babulona puak dingin sumsan kolte a bunsak hi. 8 Kaldaite'n kumpi innpi leh mipite' innte meiin a hal uh a, Jerusalem kulhbaangte a laichim uhi, 9 Babulon kumpi' vengpawl makai Nebuzaradan in tua khawpi-a om lai teng, ama lama pang dinga makaite tawh, midang teng tawh Babulon ah a pawmang hi. 10 Ahihhangin, kumpi vengpawl makai Nebuzaradan in, mizawng bangmah neilou pawlkhat, Judah gam ah a nusia a, tua hunin, amaute kiang ah grephuante leh loute a pia hi. 11 Babulon kumpipa Nebukhadnezar in Jeremia tawh kisaiin, tua kumpi vengpawl makai Nebuzaradan tungtawnin, hiai thupiakte a pia hi: 12 Amah tonpih unla, amah kem un. Hihna kei unla, a nget peuhmah pia un, a chi hi. 13 Tuachi-in, tua vengpawl makai Nebuzaradan, ulian makai Nebushazban, ulian saangtak Nergal Sharezer leh Babulon kumpipa' ulian dangte khempeuh in 14 mi a sawl uh a, vengmi huang sung apan Jeremia a piikhesak uhi. Amaute'n Ahikam' tapa Gedalia kiang ah, amah a inn-a piikik dingin, amah a pekhia uhi. Ahikam bel Shafan' tapa ahi. Tuachi-in, Jeremia bel ama' mite lak ah a omden hi. 15 Jeremia, tua vengmi' huang-sunga khum chibilha a om sungin, a kiang ah Tangtawn Toupa' thu hong tung a: 16 Kuan inla, Kush mi Ebed Melekh va hilh inla, Tangtawn Toupa Vanglianpen, Israel' Pathian' thugen hiai ahi: Hauhna hiloua, siatna tungtawna hiai khawpi gawt ding chi-a ka thugente tangtun dek ka hi. Tua hun chiangin, na mitmuha tangtun ding ka hi. 17 Ahihhangin, Tangtawn Toupa'n phuangkhia a: Tua ni chiangin nang kon hukhe ding a, na milauhte khuta piakkhiak hilou ding na hi. 18 Hon hondam ding ing a, namsaua puk lou ding na hi. Kei non muan mana na hinna tawh suakta ding na hi, chi-a Tangtawn Toupa'n phuang ahi, chi in, a chi hi.
Jeremia Khahkhiakna
1 Kumpi vengpawl makai Nebuzaradan in Rama-a Jeremia a khahkhiak nungin, Jeremia kiang ah Tangtawn Toupa' thu hong tung hi. Nebuzaradan in Jeremia, Jerusalem leh Judah apan saltang, Babulona kaihmang dinga omte khempeuh laka, khainianga hensa a omin a mu hi. 2 Tua vengpawl makai in Jeremia a muh takin, a kiang ah: Tangtawn Toupa, na Pathian in hiai mun adingin hiai siatna a na sep hi. 3 Tu'n Tangtawn Toupa'n tua hon tungsak a, hih ding a chih bangtaka hihta ahi. Noute'n Tangtawn Toupa tunga khial a, a thu na manlouh man ua, hiaite khempeuh hong tung ahi. 4 Ahihhangin, tuni-in na khuta khainiangte hon suutsak ding hi'ng. Ahihhangin, na ut kei leh, hon zui ken. Ngai in, gambuppi na mai ah a om, na utna na ah pai in, a chi hi. 5 Ahihhangin, Jeremia a pai main, Nebuzaradan in a kiang ah: Babulon kumpipa'n Judah khawpite uk dinga a seh Gedalia kiang ah vapai inla, na mite lak ah amah kiang ah teng in, ahih keileh mun dang na utna na ah pai in, a chi lai hi. Tua khitin, tua makaipa'n nek leh tak ding leh thawnpiak khat a pia a, a paisakta hi. 6 Tuachi-in, Mizpa ah, Ahikam' tapa Gedalia kiang ah Jeremia a va pai a, tua gamsunga nutsiat a mite lak ah, Gedalia tawh a omkhawm hi.
Gedalia Thahna
7 Babulon kumpipa'n Ahikam' tapa Gedalia, ukpipain a koih a, Babulona kaihmang louh, a zawng-pen, numei pasal leh naupangte a kemsak chih thu, gamlaka omlai sepaih makaite leh a sepaihte un a zak takun, 8 Mizpa ah Gedalia kiang ah hong hawh uhi. Tua a hong hawhte bel, Nethania' tapa Ishmael, Karea' tapate Johanan leh Jonathan, Tanhumeth' tapa Seraia, Netofath mi Efai' tapate, Maakath mi' tapa Jaazania leh a sepaihte uh ahi uhi. 9 Shafan' tapa Ahikam hi a, Ahikam' tapa Gedalia hiven, Gedalia in tua sepaih makaite leh a sepaihte uh khamuan dingin kichiamna a bawla: Kaldaite nuaia oma, a nna uh sep ding lau kei un. Gamsung ah teengkip unla, Babulon kumpipa' nna sem un, nou adinga hoih ding ahi. 10 Kei ka hih leh, Mizpa ah ka om ding a, eite kianga hong hawh Kaldaite' maia na palai uh ka hi ding. Ahihhangin, grepzute, nipi thei leh sathau kaikhawm unla, beel sung khawng ah koihching unla, na khawpi laksate uah teeng un, a chi hi. 11 Babulon kumpipa'n Judah gam ah a khawsuaksunte a nusia a, tuate tunga ukpipain Ahikam' tapa Gedalia a sep hi. Ahikam bel Shafan' tapa ahi. Moab gam, Amon gam, Edom gam leh gamdang khempeuha om Judate'n tua thu a zak takun, 12 a kithehzakna gamte uapanin Judah gam ah, Mizpa-a Gedalia kiang ah hong kik uhi. Amaute'n grepzu leh nipi thei tampi a kaikhawm uhi. 13 Gamlaka om Karea' tapa Johanan leh sepaih makai dangte khempeuh Mizpa-a Gedalia kiang ah hong hawh uh a, 14 amah kiang ah: Amonte' kumpipa Baali in na hinna la dingin Nethania' tapa Ishmael a sawl chih na thei kei-a hia? a chi uhi. Ahihhangin, Ahikam' tapa Gedalia in amaute a um kei hi. 15 Tua khitin, Karea' tapa Johanan in Mizpa-a Gedalia kiang ah a simin: Ka kuan ding a, Nethania' tapa Ishmael ka that ding aw, kuama'n thei lou ding ahi. Ama'n banghanga na hinna la a, nang hon bela kikaikhawm Judate kithehzaksak a, Judah gama khawsuaksunte mangthangsak ding ahia oi? a chi hi. 16 Ahihhangin, Ahikam' tapa Gedalia in Karea' tapa Johanan kiang ah: Tua bang thil hih het ken! Ishmael tung thu na gen a tak hi lou ahi, a chi hi.
1 Ishmael bel Nethania' tapa ahi a, Nethania lah Elishama' tapa ahi. Amah kumpi chi ahi a, kumpipa' sepaih makaite laka khat ahi. A kha sagihna ah, Ishmael, mi sawmkhat tawh hong kuan a, Mizpa-a Ahikam' tapa Gedalia kiang ah hong hawh hi. Tua muna an a nekkhawm lai-un, 2 Nethania' tapa Ishmael leh a ompih, mi sawmte a dingkhia uh a, namsauin Ahikam' tapa Gedalia a that uhi. Ahikam bel Shafan' tapa ahi. Tua bangin, Babulon kumpipa'n tua gam ukpipa-a a sehpa a that uhi. 3 Ishmael in, Mizpa-a Gedalia kianga om Judate khempeuh leh, tua-a om Kaldai sepaihte zong a that hi. 4 Gedalia a kithah nung ni khatin, kuama'n tua kithah thu a theih main, 5 a khamul uh metmai, a puansilhte uh botkek, amau ki-atkeh ngen mi 80, Shekhem leh Shilo leh Samaria apanin Tangtawn Toupa' inn ah, an thillatte leh gimnamtuite tawiin hong hawh uhi. 6 Nethania' tapa Ishmael bel, Mizpa apanin, amaute tuak dingin kap kawmin hong pai hi. Amaute a tuah takin: Ahikam' tapa Gedalia kiang ah hong pai un, a chi hi. 7 Amaute khawpi sung a lut takun, Nethania' tapa Ishmael leh a tonpihte'n, amaute a that uh a, tuibem sung ah a pailut uhi. 8 Ahihhangin, amaute laka mi sawmkhat in Ishmael kiang ah: Koute hon that kei un! Koute'n huitbuh, barlibuh, sathau leh khuaizu, loua ka sel uh nei hi ung, a chi uhi. Tuachi-in, Ishmael in amaute a hawi a, a dangte tawh a thatkhawm kei hi. 9 A mithahte' luangte leh Gedalia' luang a paihlutna tua tuibem bel, kumpipa Asa in, Israel kumpipa Baasha apan a kihut nadinga a bawl khat a na hi hi. Nethania' tapa Ishmael in tua tuibem, misi luangin a dimsak hi. 10 Ishmael in Mizpa-a om midangte khempeuh, salmatte a suaksak hi. Amaute bel, kumpipa' tanaute leh tua muna nutsiata omte ahi uhi. Amaute kem dingin kumpi vengpawl makai Nebuzaradan in Ahikam' tapa Gedalia a na septa hi. Nethania' tapa Ishmael in amaute salin a pii a, Amonte gam lam ah a galkahpihta hi. 11 Karea' tapa Johanan leh a ompih sepaih makaite khempeuh in, Nethania' tapa Ishmael' gitlouhna thilhihte a zak takun, 12 a sepaihte khempeuh uh tonpihin, Nethania' tapa Ishmael dou dingin a kuan uh a, Gibeona tuikul lianpi ah amah a delhpha uhi. 13 Ishmael' tonpihte'n Karea' tapa Johanan leh a tonpih sepaih makaite a muh takun, a kipak uhi. 14 Ishmael in Mizpa-a sala a kaihte khempeuh a kihei uh a, Karea' tapa Johanan lam ah a taai uhi. 15 Ahihhangin, Nethania' tapa Ishmael leh a mi giatte bel, Johanan apan a suakta uh a, Amonte kiang ah a taai uhi.
Aigupta-a Taina
16 Tua khitin, Karea' tapa Johanan leh a tonpih sepaih makaite khempeuh in Nethania' tapa Ishmael' khut apan a laakkik tua khawsuaksunte khempeuh Mizpa apan a piikik uhi. Tua bel, Nethania' tapa Ishmael in Ahikam' tapa Gedalia a thahkhit nung ahi. Johanan in a laakkikte bel, ama'n Gibeon apan hon tonpih sepaihte, numeite, naupangte leh thukhen vaihawm ulian michilgehte ahi uhi. 17 Amaute a pai zel uh a, Aigupta lam manawha paiin, Bethlehem kiang naia Geruth Kimham ah a khawl uhi. 18 Amaute bel, Babulonte apan suahtak sawma, Aigupta-a taai ahi uhi. Ahang bel, Nethania' tapa Ishmael in gam ukpipa dinga Babulon kumpipa'n a seh Ahikam' tapa Gedalia a thah mana Babulonte kihta uh hiven.
1 Tua khitin, sepaih makaite khempeuh, Karea' tapa Johanan leh Hoshaia' tapa Jezania telin, tua baan ah, mi khempeuh a neupen apan a lianpen dongin, 2 kamsang Jeremia kiang ah hong pai uh a, a kiang ah: Hehpihtakin ka ngetna uh za inla, hiai a khawsuaksunte ading leh koute adingin Tangtawn Toupa, na Pathian kiang ah hon thumsak in. Ahang bel, nidang laia na tam mahmah hinapi, na muh banga, tu-a tawmchik kia nutsiata om hi ung. 3 Koilam manawha, bang hih ding ka hita uhiam, hon hilh dingin, Tangtawn Toupa, na Pathian kiangah thuum in, a chi uhi. 4 Jeremia in a dawng a: Kon zata. Na nget bangun Tangtawn Toupa na Pathian uh kiang ah ka thuum ngeingei ding. Tangtawn Toupa' gen peuhmah kon hilh ding a, bangmah kon im kei ding, a chi hi. 5 Tua khitin, Jeremia kiang ah: Tangtawn Toupa, na Pathian in, nang hon sawl a, hon hilh peuhmah banga ka gamtat kei uleh, Tangtawn Toupa mah koute dema theihpihpa dik leh muanhuai hi hen aw. 6 A hoihlam hi-in a selarn hita leh, tua kon sawlnapa uh, Tangtawn Toupa ka Pathian uh thu mang ding hi ung. Tua hi leh koute adinga hoih ding hi. Ahang bel, Tangtawn Toupa ka Pathian uh' thu mang ding hi ve ungin, a chi uhi. 7 Ni sawm nungin, Jeremia kiang ah Tangtawn Toupa' thu hong tung hi. 8 Tuachi-in, ama'n Karea' tapa Johanan leh a tonpih sepaih makaite khempeuh leh mi khempeuh, a neupen apan a lianpen dongin a samkhawm a, 9 amaute kiang ah: Na ngetna uh tun dinga non sawlnapa uh, Tangtawn Toupa, Israel Pathian' thugen hiai ahi: 10 Hiai gama na om uleh noute kon lamtou ding a, kon phelgawp kei ding. Kon phutkip ding a, kon bulkalh kei ding. Ahang bel, noute tunga siatna kon tutna tunga lungkhama dah hi vengin. 11 Tu-a na lauh uh Babulon kumpipa lau kei unla, kihta kei un. Noute hon ompih ing a, hon hondam a, a khut apan hon hukhe ding hi'ng, chi-a Tangtawn Toupa'n phuang hi. 12 Noute kon lainatna kilangsak ding ing a, ama'n noute hon lainat ding a, na gam uh hon tunkik ding ahi, chi hi. 13 Ahihhangin, noute'n: Hiai gam ah om kei n'ung, chi-a Tangtawn Toupa, na Pathian uh thuman lou a: 14 Hiai gama om lou ding. Pai a, Aigupta gama om zaw ding hi ung. Tua-a kidouna lah mu lou ding, pengkul ging lah za lou ding, anduha lah gilkial lou ding, na chih uleh bel, 15 nou Judah khawsuaksunte aw, Tangtawn Toupa' thu za un. Tangtawn Toupa Vanglianpen, Israel Pathian' thugen hiai ahi: Aigupta-a pai na tup tinten ua, tua-a teeng dinga na pai petmah uleh, 16 na lau uh namsau in tua ah hon delhpha ding a, na kihtak ua na mulkimna uh kial in Aigupta ah hon zuilut ding a, tua ah na si ding uhi. 17 Aigupta-a teeng dinga pai tum tintente, namsau leh kial leh hipi-in a si taktak ding uh a, amaute tunga ka tut ding, siatna apan a suakta kei ding uhi, chi ahi. 18 Tangtawn Toupa Vanglianpen, Israel' Pathian' thugen hiai ahi: Jerusalema teengte tunga ka hehna leh thangpaihna sunbuaka a om banga, Aigupta-a na pai chiangua, noute tunga ka hehna sunbuaka om ding ahi. Hamselawhte, mulkimnate, mawhpaihte leh selphoute hi ding uchin a, hiai mun mu ngei nawn lou ding na hi uh, chi ahi. 19 Judah apan khawsuaksunte aw, Tangtawn Toupa'n noute hon hilhta a: Aigupta zuan kei un, chi ahi. Hiai thei un: Tuni'n kon vauhilh ahi. 20 Tangtawn Toupa, na Pathian uh kianga kei non sawl ua: Tangtawn Toupa, na Pathian kiang ah koute adingin hon thuumsak in. A gen peuhmah ka kiang uah hon hilh in, ka hih ding uh, non chih lai ua, lepchiah lua na hi uh. 21 Tuni'n kon hilhta a, lah Tangtawn Toupa, na Pathian un noute hilh dinga hon piakte khempeuh na zui tuan kei lai uhi. 22 Tua bang ahih manin, tu'n hiai thei un. Teeng dinga na zotna mun ua namsau leh kial leh hipi-a si ding na hi uhi, a chi hi.
1 Jeremia in Tangtawn Toupa, a Pathian uh thugente, Tangtawn Toupa'n amaute hilh dinga a piakte khempeuh, mipite a hilh khitin, 2 Hoshaia' tapa Azaria leh, Karea' tapa Johanan leh, mi ki-uangsakte khempeuh in Jeremia kiang ah: Zuau gen na hi. Koute kianga: Teeng dingin Aigupta na zot hetlouh ding uh ahi, chi dinga Tangtawn Toupa ka Pathian un nang hon sawl lou ahi. 3 Kaldaite'n hon thah theih nading uh hiam, ahih kei leh, Babulona hon kaihmang theih nading ua, Kaldaite' khuta hon pekhe dinga, Neria' tapa Barukh in koute langa pang dinga nang hon zolzou ahi ve, a chi uhi. 4 Tuachi-in, Karea' tapa Johanan leh, sepaih makaite khempeuh leh, mipite khempeuh in Judah gama omden dinga Tangtawn Toupa' thupiak a mang kei uhi. 5 Man naksangin, Karea' tapa Johanan leh, sepaih makaite khempeuh in Judah mi khawsuaksunte khempeuh, tua a kithehzakna uh namte khempeuh apana Judah gama teeng dinga hong kilehkikte mah a piimang uhi. 6 Numei pasalte khempeuh leh, naupangte leh kumpipa' tanute zong a piimang uhi. Tuate bel, kumpi vengpawl makai Nebuzaradan in Ahikam' tapa Gedalia leh, kamsang Jeremia leh, Neria' tapa Barukh tawh a nutsiat ahi uhi. Ahikam bel Shafan' tapa ahi. 7 Tuachi-in, Tangtawn Toupa' thu manglouin Aigupta gamsung a lut uh a, Tapanhes dong a pai uhi. 8 Tapanhes ah, Jeremia kiang ah Tangtawn Toupa' thu hong tung hi. 9 Ama'n: Judate' et gige laiin, suang lian bangzah hiam pua inla, Tapanhes-a Faro innpi lutna-a teklei kilem nuai ah tuate phum in. 10 Tua khit chiangin, amaute kiang ah: Tangtawn Toupa Vanglianpen, Israel Pathian' thugen hiai ahi: Ka sila Babulon kumpipa Nebukhadnezar samsak ding ing a, hiai ka phum suang tunga a kumpitutphah tungkhe ding ing a, ama'n a kumpi puanzak tuate tunga zak ding ahi. 11 Amah hong kuan ding a, Aigupta hong dou ding a, a si dinga sehte tunga sihna tun ding a, namsau thuak dinga sehte tunga namsau tun ding hi. 12 Ama'n Aigupta pathiante' tempulte meia hal ding a, a pathiante uh sala kai ding hi. Belamchingpa'n a puansilhte a silh banga, ama'n Aigupta, puansilha nei ding a, bangmah lawh hetlouha tua apan paikhekik ding hi. 13 Tua Aigupta-a, ni' tempul sunga khuam zek omte phelkhe ding a, Aigupta pathiante' tempulte halgawp ding hi, chi ahi, chi in, a chi hi.
Milimbiakna hanga Siatna
1 Aigupta mallam Migdol, mm Tapanhes leh Memfis leh Aigupta simlama teeng, Judate khempeuh tawh kisai hiai thu Jeremia kiang ah hong tung hi. 2 Tangtawn Toupa Vanglianpen, Israel' Pathian' thugen hiai ahi: Jerusalem tung leh Judah khawpite tunga siatna thupi ka tut na muta uh. Tuni-in a sesa-a taisan leh loih ahi uh. 3 Thil gilou a hih man uh ahi. Amaute hi-in, noute hi-in, na pu na pate uh hita leh, na theih ngeilouh uh pathiante' maia gimnamtuite hal a, bia a, kei hon hehsak uhi. 4 Amaute kiang ah ka sila kamsangte ka sawl a, amaute'n: Hiai ka huat thil kihhuai hih kei un! a chi uhi. 5 Ahihhangin, a ngaikhe kei uh a, a thudon kei uh a, pathian dangte' maia gimnamtui hal lah a tawp tuan kei uhi. 6 Tua bang ahih manin, ka hehna nasia a soukhia a, Judah khawpite leh Jerusalem kongzingte tung ah a sou a, tuni-a bangin a sia leh loih a suaksak hi. 7 Tu'n Tangtawn Toupa Pathian Vanglianpen, Israel' Pathian' thugen hiai ahi: Banghanga Judah apan numei pasalte, naupang leh naungekte satkhia-a, noumau tunga hizahta-a siatna kitut a, a khawsuak omlou-a kikoih na hi ua? 8 Banghanga Aigupta gama teeng dinga nong paina ua, pathian dangte' maia gimnamtuite hal a, noumau khutsuakte-a hon hehsak na hi ua? Noumau ki-hihse ding uchin a, leitung namte khempeuh laka hamsiat leh zahlakna kisuah ding na hi uhi. 9 Na pu na pate uleh, Judah kumpipate leh kumpinute'n gitlouhna a hihte uleh, noute leh na zite un Judah gam leh, Jerusalem kongzing khawnga gitlouhna na hihte uh mangngilhta maw? 10 Tuni donga kingainiam nai lou a, zahtakna lah lak lou, noute leh na pu na pate uh maia ka koih ka dan piak leh thukhennate lah zui lou uhi. 11 Tua bang ahih mana, Tangtawn Toupa Vanglianpen, Israel Pathian' thugen hiai ahi: Noute tunga siatna tut ding leh, Judah gam khempeuh hihmanthat ding tum tinten hi'ng. 12 Aigupta gama teeng dinga pai sawm tinten Judah mi khawsuaksunte lamang ding hi'ng. A vekpi ua Aigupta gama mangthang ding uh a, namsaua puk ding uh a, kiala si ding uhi. A neupen apan a lianpen dong namsau hiam, kial hiama si ding uhi. Hamselawh leh mulkimna, mawhpaihna leh zahlakna mite suak ding uhi. 13 Ke'n Jerusalem ka gawt banga, Aigupta gama teengte, namsau leh kial leh hipi-a gawt ding hi'ng. 14 Judah gama khawsuaksun, Aigupta-a teeng dinga paite kuamah suakta lou ding uh a, hong kik a, teen a lunggulhna uh Judah gam tung dinga suakta lou ding uhi. A tavaih tawmchik loungal kuamah hong kik lou ding uhi, chi ahi. 15 Tua khitin, a zite uh, tua-a om numeite khempeuh tawh, tampi petmah in pathian dangte' mai ah gimnamtui a hal uh, chih thei pasalte khempeuh leh Aigupta mallam leh simlama teengte'n Jeremia kiang ah: 16 Tangtawn Toupa' mina koute kianga thupuak na gen ngaikhe lou ding hi ung! 17 Hih ding ka chihsa peuhmah uh hih ngeingei ding hi ung. Koute leh ka pu ka pate uh, ka kumpipate uleh ka uliante un, Judah khawpite leh Jerusalem kongzing khawnga ka hih ngeisa bang ua, Vantung Kumpinu' maia gimnamtui hal leh dawn thillatte sung baw ding hi ung. Tua hun laia an hau ung a, khawsa thei ung a, a sia thuak lou hi ung. 18 Ahihhanga, Vantung Kumpinu' maia gimnamtui hal leh, a maia dawn thillatte sun ka tawp nungsang uh bangmah nei lou ung a, namsau leh kiala mangthang thang hi ung, a chi uhi. 19 Numeite'n: Vantung Kumpinu' maia gimnamtui ka hal ua, a maia dawn thillatte ka sun lai ua, ama' lim leh mei suna tanghou peite bawl ung a, a maia dawn thillatte sung ka hi uh, chih ka pasalte un thei uh hilou hia? a chi behlap lai uhi. mite 20 Tua khitin, Jeremia in khempeuh, amah dawng numeite leh pasalte kiang ah: 21 Tangtawn Toupa'n noute leh na pu na pate uh, na kumpipate uleh, na uliante uleh, gamsung mite'n Judah khawpite leh Jerusalem kongzing khawnga gimnamtui na hal uh thei gige a, ngaihtuah lou hia? 22 Tangtawn Toupa'n na gamtat giloute uleh, thil kihhuai na hihte uh a thuak zawh nawn louh taka, na gam uh tuni-a banga hamselawh leh a teeng ding omlou gamsia leh loih hong hi ahi ve. 23 Gimnamtui na hal man uleh, Tangtawn Toupa tunga na khelh man uleh, a thu mang lou a, a dan hi-in, dan banga a thukhennate hi-in, a thu theihsakte hita leh, na zuih louh man ua, tu-a na muh bang ua, ha tung ua hiai siatna hong tung ahi, a chi hi. 24 Tua khitin, Jeremia in mite khempeuh, numeite tawh kiang ah: Nou, Aiguta gama Judah gam mite aw, Tangtawn Toupa' thugen za un. 25 Tangtawn Toupa Vanglianpen, Israel Pathian' thugen hiai ahi: Vantung Kumpinu' maia gimnamtui hal ding leh, dawn thillatte sungkhe dinga kichiamna ka bawl uh tangtun taktak ding hi ung, na chih uh, noute leh na zite un na thilhihte-un na langsakta uhi. Hih ve ua, na chiamsa uh hih ve ua! Na kichiamna uh tangtun ve ua! 26 Ahihhangin, Aigupta-a teeng Judah gam mite khempeuh in Tangtawn Toupa' thu za un. Ama'n: Keima min thupi sialin ka kichiam a, Aigupta gam koimun peuha teeng, Judah gama kipan kuamah in ka min lou a, ahih kei leh, kichiama: Toupa Tangtawn Pathian hing hi, chi ngei nawn lou ding hi. 27 Ahang bel, amaute adinga a hoih sawm lou a, a sia sawm a, amaute enkhia khia hi vengin, Aigupta gama Judah gam mite hihmanthat vek ahih mateng ua, namsau leh kiala mangthang ding uhi. 28 Namsau apan suakta a, Aigupta apan Judah gama kik tawm mahmah ding hi. Tua hun chianga Judah gam mi, a suaktasun, Aigupta-a teeng hong paite'n a vekpi ua, kua thu ahia kip ding kei thu maw, amaute' thu chih thei ding uhi. 29 Hiai mun ah noute kon gawt ding, chih chiamtehna hiai ahi ding. Tuachi-in, noute hihnat sawma kon vaunate a kip, chih na thei ding uhi, chi-a Tangtawn Toupa'n phuang ahi. 30 Tangtawn Toupa' thugen hiai ahi: Judah kumpipa Zedekia, a meima' hinna lak sawma zong Babulon kumpipa' Nebukhadnezar khuta ka piak banga, Aigupta kumpipa Faro Hofra a hinna lak sawma zong meima khuta pe ding hi'ng, chi hi, a chi hi.
Barukh kianga Thupuak
1 Judah kumpipa, Josia' tapa Jehoiakim' vaihawm kum, a kum lina-a Jeremia in a genthawh thute Barukh in laibuziala a gelh nunga, kamsang Jeremia in Neria' tapa Barukh kianga a hilh hiai ahi: 2 Barukh aw, Tangtawn Toupa, Israel' Pathian in na kianga a thugen hiai ahi: 3 Nang, ka tung a gik, Tangtawn Toupa'n ka lung khamna ah dahna hon behlapsak a, ka mauna-in ka bah gawpta a, tawlngakna ka mu kei, na chi hi, a chi hi. 4 Tangtawn Toupa'n gen a: Amah kiang ah hiai gen in. Tangtawn Toupa' gen hiai ahi: Gamsung khempeuha ka lamsa phelgawp ding ing a, ka suansa bulkalh ding hi'ng. 5 Tua nunga nang, nang adinga thil thupite kizon ding na hi maw? Tuate zong ken. Ahang bel, mi khempeuh tunga siatna tun ding ing a, ahihhanga, nang bel na paina peuha na hinna tawh hon suaktasak ding hi'ng, chi-a Tangtawn Toupa'n phuang hiven, chi hi, chi in, a chi hi.
Aigupta tawh Kisai Thupuak
1 Namte tawh kisaia Jeremia kianga Tangtawn Toupa' thu hong tung hiai ahi: 2 Aigupta tawh kisaia ama'n: Judah kumpipa Josia' tapa Jehoiakim' vaihawm kum, a kum lina a, Babulon kumpipa Nebukhadnezar in Iufratis Luipi-a om Karkhemis muna Aigupta kumpipa Faro Neko a zawhpa' sepaihhon demna thupuak hiai ahi: 3 Na lumte, a lian a neu, mansain koih unla, kidou dingin kuankhia un. 4 Sakolte tuanphah phah unla, sakoltung tuang un! Siklukhu khuin panmun khawh un! Na teipite uh tathiam unla, na galvan uh silh un! 5 Bang ka mu ale? Laua liingin taikek uh e, a galhangte uh vuallel uh. Baksam leng zenin taai uh a, nunghei mahmah lou uh a, kilchih ah mulkimna om, chi-a Tangtawn Toupa'n phuang hi. 6 Taihatte zong tai zoulou, a hatte zong suakta zoulou, mallam ah Iufratis Luipi gei ah, kisuiin puk uh. 7 Kua ahia, hiai Nail Luipi banga khang a, luitui khang banga phul vonvon? 8 Aigupta, Nail Luipi bangin khang a, luitui khang banga phul vonvon hi. Ama'n: Ka khang ding a, leitung ka khuh ding a, khawpite leh mite ka hihmangthang ding, chi hi. 9 Sakolte aw, bawh un, Kangtalaite aw, hehtakin delh un, Galhatte aw, mainawt un Thaltawi Kushte, Putte leh Ludiate aw, masuan un. 10 Ahihhangin, tua ni zaw Toupa Tangtawn Toupa Vanglianpen-a hi a, phulak ni, a melmate tunga phulakni hi. Namsau in a vah mateng, sisana a dangtakna a phat mateng dawn ding hi. Ahang bel, Toupa, Tangtawn Toupa Vanglianpen in mallam gam, Iufratis Luipi geia kithoihna laan ding hiven. 11 Aigupta Tanu Nungak Siangthou aw, Gilead ah kuantou inla, singnai damdawi va la in. Ahihhangin damdawi na zat tam hanga nang adinga damna om tuan lou hi. 12 Namte'n na zumhuaina za ding a, na kah husa leitung dim ding hi. Galhat khat galhat danga kisui ding a, a nih ua pukkhawm ding uhi, chi hi. 13 Babulon kumpipa Nebukhadnezar in Aigupta a dou ding thu tawh kisai thupuak, Tangtawn Toupa'n Jeremia kianga a gen hiai ahi: 14 Aigupta ah hiai genkhia inla, Migdol ah phuang inla, Memfis leh Tapanhes ah zong phuang lai inla: Panmun khawh unla, kimansain om un, na kimkota omte namsau in negai hiven. 15 Banghanga na galhangte phiatmanga om ahi ua? Amaute ding zoulou uh, Tangtawn Toupa'n amaute nengniam hiven. 16 Amaute kisui zihzeh ding uh a, kipukkhum lemlum ding uhi. Amaute'n: Thou in, i mite kiang ah, i pianna gam ah kik ni, ei hon nelhsiahpa' namsau apan gamlapi ah pai ni, kichi ding uhi. 17 Amaute'n tua ah: Aigupta kumpipa Faro, a hawmpi husa ngaih hi lei a, ama'n a hun hoih mansuah hi, chi ding uhi. 18 Kumpipa, a min Tangtawn Toupa Vanglianpen ahipa'n phuang a: Keima' hinna sialin ka gen ahi, mualte laka Tabor bang tuipi geia Karmel bang, mi khat hong kuan ding hi. 19 Aigupta-a teengte aw, kaihmanga om dingin, na neihsate uh tuun un. Memfis kihihse ding a, a teeng omlou a, sesa-a kinuse ding hiven. 20 Aigupta bel bawngla hoih hi a, ahihhanga mallam apan amah kei ding chippi hong kuan ding hi. 21 Alak ua sumthalawha galdoute, bawngnou vakthau bang hi uhi. Amaute zong kiheia taikek ding uh a, kiptaka pang lou hiai ding uhi. 22 Melma in thahattaka hon naih chianga Aigupta zaw gulpi tai banga ham susu ding hi. Amah dou dinga heipite tawh hong kuan ding uh a, singphuk dinga kuante bang ding uhi. 23 A gammaangte sah mah leh, phukmaai ding uhi. Amaute khaupe hon sanga tam uh a, simseng hilou uhi. 24 Aigupta' Tanu zahlaksaka om ding a, mallam mite khuta piak hi ding hi, chi ahi. 25 Tangtawn Toupa Vanglianpen, Israel' Pathian in gen a: Amon pathian Thebes tung ah, Faro tung ah, Aigupta tung ah leh, a pathiante, a kumpipate tung ah leh, Faro muangte tunga gawtna tundek hi'ng. 26 Ama' hinna lak sawma zongte khut ah, Babulon kumpipa Nebukhadnezar leh a uliante khuta amaute pe ding hi'ng. Ahihhanga, tua nunglama, nidang laia banga Aigupta kiluah kik ding hi, chi-a Tangtawn Toupa'n phuang hi. 27 Ka sila Jakob aw, lau kenla, Israel aw, lauin lungke ken. Ke'n mun gamlapi apan hon hondam ding ing a, na suante kaihmang ahihna gam uapan hondam ding hi'ng. Jakob in muanna leh bitna nei kik ding a, kuama'n lausak lou ding hi. 28 Ka sila Jakob aw, lau ken. Nang hon ompih ding hi'ng, chi-a Tangtawn Toupa'n phuang hi. Nang kon thehzakna namte khempeuh hihmangthang mah leng, nang zaw hon hihmangthang sipsip lou ding hi'ng. Nang hon thunun ding ing a, dika thukhenna tawh hi lei ding a, gawtlouh hiaia bel hon khah lou ding hi'ng, chi hi.
Filistiate tawh Kisai Thupuak
1 Faro in Gaza a sim ma-a, Filistiate tawh kisai Tangtawn Toupa' thu, Jeremia kianga hong tung hiai ahi: 2 Hiai Tangtawn Toupa' thugen ahi: Mallam apan tuite a khandan en in. Tuikhanglian hong suak ding hi. Gam leh a sunga omte tum ding a, khawpi leh a sunga omte tum ding hi. Mite kikou ding uh a, gamsunga teengte mau ding hi. 3 Sakol tai gingte, galte' kangtalai gingte, a pel ging luamluamte za-a, mau ding uhi. Pate nangawn tate hu dinga kihei lou ding uh a, a khutte uh zaw-a kikhai maimah ding hi. 4 Ahang bel, Filistiate hihmanthatna ni leh, Tura leh Sidon huh thei ding a khawsuaksunte khempeuh satkhiakna ni hong tung hiven. Tangtawn Toupa'n Kaftor tuipi gei apan khosuaksun Filistiate hihmangthang dek hi. 5 Gaza in daha a sam metmai ding a, Ashkelon zong kamhuma om ding hi. Phaizanga om a khawsuaksunte aw, bangtan nou ki-atkeh ding? 6 Na kikou uh a: Maizen, Tangtawn Toupa' namsau, na tawlngak ma bangtana sawt ding ahia? Na paai ah kik nawn inla, tawp inla, om kinkenta ve, na chi uhi. 7 Ahihhangin, Tangtawn Toupa'n thu pia a, Ashkelon leh Tuipi gei suai dinga thu pia hiven, bangchi'n a om kinken thei dia, chi hi.
Moab tawh Kisai Thupuak
1 Moab tawh kisaia Tangtawn Toupa Vanglianpen, Israel Pathian' thugen hiai ahi: Nebo tung gik hi, amah hihsiata om ding hiven! Kiriathaim zahlaksaka om ding, lakzawha om ding a, a kulh muanhuai zahlak dinga, phiahgawp ding hi. 2 Moab in phat lawh nawn lou ding hi. Heshbona mite'n a siatna ding sawm uh a: Kisa un, tua nam beisak ni, kichi uhi. Madmen aw, nang zong kamhuma om ding hi teh, namsau in hon delh ding hiven. 3 Horonaim apan kahna kiza ngai un, siatna thupi leh manna lian hanga kahna hi. 4 Moab kitamkham ding a, taneute kapkhe ding hi. 5 Luhith zotna lampi zuia paitou uh a, khasetaka kapkawma paitou uhi. Siatna hanga kahna, Horonaim zotna lampi zotsukna-a kiza hi. 6 Taai un na hin nadingun taai un. Gamdai-gamkeua loupabuk bang hong suak un. 7 Na thilhihte uleh na hauhna uh muang hive uchin, noute zong sala kaih hi ding hi uteh. Khemosh zong a siampite leh uliante tawh kaihmang hi ding hi. 8 Hihsepa'n khawpi teng hon sim ding a, khawpi khat zong suakta lou ding hi. Phaizang kise ding a, mualtung gam kihihse ding hi, chi-a Tangtawn Toupa' n gen khin hiven. 9 Moab kihihse ding hiven, a tung ah chi koih un. A khawpite a sia-a kilawi ding a, a teeng ding kuamah omlou ding hi. 10 Tangtawn Toupa' nna sep ding thadah mi hamsiatin om hen! Sisan suah dinga a namsau zang lou mi hamsiatin om hen! 11 Moab, a tuailai apan awl a, zu khaihkhiak ngeilouh beel khat apan beel danga tei louh banga, sala kaih hi ngei lou hi. A limna kibang gige a, a gimnamtuina zong theng lou hi. 12 Ahihhanga nite hong tung ding a, zubeel apan sungkhe ding mite sawl ding ing a, amaute sungkhe ding uhi. A zubeelte vuaksak ding uh a, a noutungte paikham ding uhi, chi-a Tangtawn Toupa'n phuang hi. 13 Tua hun chianga, Israel innkawte'n Bethel a muanna uh a maizumpih banga, Moab in Khemosh maizumpih ding hi. 14 Koute galhat, kidouna phuala galhang hi ung, bangchi chiha chi thei ding na hi ua? 15 Moab hihsiata om ding a, a khawpite kisim ding hi. A tangval hoihpente thahgama om ding uhi, chi-a Kumpipa, a min Tangtawn Toupa Vanglianpen ahipa'n phuang hi. 16 Moab pukna tung dek a, a siatna tung pah ding hi. 17 A minthanna thei a kim a kianga omte'n amah kah unla: Kumpi chiang thahat kinaktan in chiang thupi kitanta na maizen e! chi un. 18 Debon' Tanu luaha teengte aw, na thupinate uapan hong kumsukin leikeu lak ah tu un. Moab hihsepa hong kuantoua, nang hon suai dinga, na khawpi kulhneite hihse ding hiven. 19 Nou, Aroera teengte'n lampi geia dingin en un. A taisia pasal leh a suakta numei dong unla: Bangthu bang la ahia? chi-in dong un. 20 Moab hihsiat hita ven, zahlakta mau unla, kikoukhia un Moab hihsiat ahita, chi-in, Amon ah phuang un. 21 Mualtung gam ah thukhenna hong tungta Holon, Jaza leh Mefaath tung ah, 22 Dibon, Neko leh Beth Diblathaim khawpite tung ah, 23 Kiriathaim, Beth Gamul leh Beth Meon tung ah, 24 Kerioth leh Bozra tung ah Moab khawpia gamla leh naite khempeuh tung ah tungta. 25 Moab' ki tankhiak hita a, a ban kitankhia hi, chi-a Tangtawn Toupa'n phuang hi. 26 Amah zu khamsak un, ama'n Tangtawn Toupa tawng hiven, Moab ama' luak ah buai henla, nuihzabuk suak hen. 27 Israel na nuihzabuka na bawl ahi keia hia? Gutate laka amah kimanta hia, ama' tungthu na gen tenga simmawha lu na sinkhum? 28 Moaba teeng noute'n na khawpite uh taisan unla, suangpi lak ah teeng un. Kawlbuk khawnga bu sep vakhu bang un. 29 Moab' kisaktheihna, kimuang lua-a a kisaktheih luatna leh kiletsakna, a lungtang kisaktheihna leh kiotsakna zata hi ung. 30 Tangtawn Toupa'n: A kithupisakna thei ing a, ahihhanga mannabei ahi, chi-a phuang hi. A kisialna in bangmah lawhtak lou hi. 31 Tua hanga, Moab kah ing a, Moab khempeuh adinga kapkhia ing a, Kir Hareseth mite suun hi'ng. 32 Sibma grepguite aw, Jazer kap banga, nang adinga kap hi'ng. Na kahiangte tuipi donga zam a, Jazer tuipi dong tung hi. Hihsepa'n na gah minte leh grepte a lawha lou hi. 33 Moab thei huante leh loute apan lungnopna leh kipahna beita. Grep sukna-a greptui luang beisak ing a, kuama'n lungnopna kikou tawh amaute chil nawn lou hi. Kikou husa omta leh zong lungnopna husa hilou hi. 34 A kikou husa uh Heshbon apan Eleale leh Jahaza tung a, Zoar apan Horonaim leh Eglath Shelishia dong tungta. Ahang bel, Nimrim tuite nangawn kangta hiven. 35 Munsangte-a thillatte laan a, a pathiante uh maia gimnamtui hal mite Moab ah, beisak ding hi'ng, chi-a Tangtawn Toupa'n phuang hi. 36 Tuachi-a ka lungtang in Moab a kahna kaihging bang a, Kir Hareseth mite a suunna tamngai bang hi. Hauhna a kaihkhawmte uh beita hi. 37 Lutang teng kimetgiauta a, khamul teng kimetkheta. Khut teng kizikkehta, kawng tenga saiip puan kitengta. 38 Moab-a inntung khempeuh leh, tangpi khawlkhawmna muntea sunna loungal bangmah omlou. Ahang bel, kuamah deihlouh tuibel banga Moab sattam hi vengin, chi-a Tangtawn Toupa'n phuang hi. 39 Naksiat na maizen e! Nak mau na tuaituai uh e Moab, zahlak luain lehngatta! Moab nuihzabuk suakta, a kim a kianga omte' nuihzabuk suakta, chi hi. 40 Tangtawn Toupa' thugen hiai ahi: En un! Muvanlai in kha zakin Moab bawhsuk hi. 41 Kerioth kizou ding a, a kulhpite kila ding hi. Tua ni chianga, Moab galhatte' lungtang, numei nauvei' lungtang bang ding hi. 42 Moab in Tangtawn Toupa doua a tot mana, nam a hihna hihbei hi ding hi. 43 Nou, Moab mite aw, mulkimna leh kawkhuk leh thaang in hon ngak hi, chi-a Tangtawn Toupa'n phuang hi. 44 Tua mulkimna apan taite peuhmah kawkhuka ke ding a, tua kawkhuk apan kaikhia peuhmah thaanga awk ding hi. Ahang bel, Moab tunga, amah gawtna kum tungsak ding hi vengin, chi-a Tangtawn Toupa'n phuang hi. 45 Heshbon limliap ah galtaite panpihbeiin ding uhi. Heshbon apan mei kipan a, Sihon-a kuangkhia a, Moab taltangte leh ki-uangsak lawlawte' lutangte kang hi. 46 Moab aw, na tung gik hi! Khemosh mite hihmanthat hita, na tapate sala kaih hita a, na tanute saltangta. 47 Hinapi-a tunung chianga Moab' vangphatna pe kik ding hi'ng, chi-a Tangtawn Toupa'n phuang hi. Hiai ah Moab tunga thukhenna beita.
Amon tawh kisai Thupuak
1 Amonte tawh kisaia Tangtawn Toupa' thugen hiai ahi: Israel in tapate nei lou hia? Gouluah dingte nei lou hia? Banghanga Molekh in Gad tangta mai ahia? Banghanga a khawpitea mite teeng uh ahia? 2 Tangtawn Toupa'n phuang a: Ahihhangin, nite hong tung ding a, ke'n Amonte' Raba dou dinga husa ka ginsak hun hong tung ding hi. Raba, a sia kivum suak ding a, a kim a kianga khawtate kihalgawp ding hi. Tuachianga Israel in amah delhkhete delhkhe ding hi, chi-a Tangtawn Toupa'n gen hi. 3 Heshbon aw, Ai kihihmangthang ahih manin mau tuaituai in! Raba-a teengte aw, kikoukhia un! Saiippuan silh unla, suun un. kulh sung ah vialtai kawikawi un, Molekh, a siampute leh uliante tawh kaihmanga om ding hiven. 4 Banghanga na phaizang uh kisaktheihpih a, na phaizang gahsuahtheite uh kisaktheihpih ding na hi ua? Tanu muanhuailou aw, na hauhnate na suang a: Kua'n kei hong dou ding ahia? a chi hi. 5 Na kim na pama omte khempeuh apan na tunga mulkimna hon tun ding hi'ng, chi-a Toupa Tangtawn Toupa Vanglianpen in phuang hi. Noute kaihmanga om vek ding uchin a, galtaia vakthapte kaikhawm ding kuamah omlou ding hi. 6 Hinapi-a, nungchianga, ke'n Amonte' vangphatna pe kik ding hi'ng, chi-a Tangtawn Toupa'n phuang hi.
Edom tawh kisai Thupuak
7 Edom tawh kisaia Tangtawn Toupa Vanglianpen' thugen hiai ahi: Temana pilna om nawnlou hia? A theisiamte apan thuhilhna mangthangta hia? A pilna uh muatkhin hia? 8 Kiheiin taai unla, kawkhuk thuk ah bu un, ahang bel, ke'n Esau ka gawt chianga, a tunga siatna tun ding hi'ng. 9 Grepgah khawmte na kiang uah hong pai le uh, grep tawmkha beek hon nutsiat lou ding uhia? Zanlaiin guta hong pai le uh, a deihzah kia uh gu ding uhia? 10 Ahihhanga, ke'n Esau savuak dia hawksiang ding ing a, a bukna mun hawkkhe ding ing a, amah kisel theilou ding hi. A tate, a tanaute leh innvengte mangthang ding uh a, amah zong om nawnlou ding hi. 11 Na tagahte nusia in Keima'n a hinna uh hu ding hi'ng. Na meigongte un zong kei hon muang thei ding uhi, chi hi. 12 Tangtawn Toupa' thugen hiai ahi: Tua nou dawn taakloute'n a dawn teitei ding uh ahih leh, banghanga nang gawt louha suakta thei ding? Gawt louhin na suakta kei ding a, tua nou na dawn teitei ding hi. 13 Keimah min sialin ka kichiam a, Bozra a sia hong suak ding a, mulkimna, zahlakna leh hamsiat hong suak ding a, a khawpite khempeuh seden ding hi, chi-a Tangtawn Toupa'n phuang hi. 14 Tangtawn Toupa apan thupuak zata ing a, ama'n: Tua gam dou dingin kikaikhawm unla, kidou dingin kisa un! chi-a namte kianga gen ding palai khat sawl hi. 15 Tuin, ke'n namte laka a neu, mihingte laka simmawha hon bawl ding hi'ng. 16 Nou, suangpi henga teengte leh, mualsang tungte luahte, mi na mulkimsakna uleh, na lungtang kisaktheihna un noute hon khem zou hi. Muvanlai bangin sangpi ah bu sep mahle uchin, tua apan hon kaikhe ding hi'ng, chi-a Tangtawn Toupa'n phuang hi. 17 Edom zaw mulkimna thil hi ding a, a liammate hanga, a kianga paite'n lamdang sa ding uh a, nuihsan lai ding uhi. 18 Tangtawn Toupa'n phuang a: Sodom leh Gomora, a kim a kiang ua khawpite tawh lumleha a om bang ua, tua-a kuamah teeng lou ding a, kuamah khawsa lou ding hi. 19 Jordan luigei gampalak apan gantatna loupa mun hoiha humpinelkai hong paikhia banga, Edom a gam apan delhkhe guih ding hi'ng. Hiai dinga ka seh ding mi teelsa kua ahia? Kei bang kua om a, kei kua'n hon tawng ngam ahia? Belamching kua ahia kei hon nang ngam ding? chi hi. 20 Tua bang ahih manin, Tangtawn Toupa'n Edom dou nadinga a ngim za unla, Temana teengte dou nadinga a tup za un. Belamhonte laka a noute kaihmang hi ding a, amaute hanga a gantatna loupa mun ama'n hihse dimdem ding hi. 21 Amaute pukging in lei liingsak ding a, a kah husa un Tuipi San thawn ding hi. 22 Ngai un! Muvanlai khat lengtou ding a, bawhsuk ding a, Bozra tunga a kha zak ding hi. Tua ni chianga Edom galhangte' lungtangte, numei nauvei' lungtang bang ding hi.
Damaska tawh kisai Thupuak
23 Damaska tawh kisai thupuak hiai ahi: Hamath leh Arpad, thusia a zak man ua lungdong uhi. Amaute lungkia uh a, luipitui kihawt banga lungkhama buai uhi. 24 Damaska hong hatlou a, taai dinga kihei a, lauluatna in man hi. Mangbatna leh natna in man a, numei nauvei natna bang natna ahi. 25 Banghanga tua khawpi minthang, ka kipahna khawpi taisan hilou lai ahia? 26 A tangvalte kongzing khawnga puk taktak ding uh a, tua ni chianga sepaihte kamhuma om ding uhi, chi-a Tangtawn Toupa Vanglianpen in phuang hi. 27 Damaska kulhbaangte meia hal ding ing a, Ben Hadad kulhpite mei in haltum ding hi, chi hi.
Kedar leh Hazor tawh kisai Thupuak
28 Babulon kumpipa Nebukhadnezar in a dou, Kedar leh Hazor kumpigamte tawh kisaia Tangtawn Toupa' thugen hiai ahi: Thou inla, Kedar dou inla, Suahlam mite hihmangthang in. 29 A puanbukte uleh belamhonte uh kilaksak ding a, a bukna innte uh, a van neihte uleh, a sangawngsaute utawh, kipawmang ding hi. 30 Nou, Hazora teengte, kintakin taikhe meng un! chi-a Tangtawn Toupa'n phuang hi. Babulon kumpipa Nebukhadnezar in noute hon dou ding simsawm a, noute dou dingdan gel hi. 31 Thou inla, muangtaka om a, amah kimuang nam khat dou in. Kongpite lah neilou, a kalhnate lah neilou, a mite khahzan nam dou in, chi-a Tangtawn Toupa'n phuang hi. 32 A sangawngsaute uh kisut ding a, a ganhonte uh gallak sum suak ding uhi. Gamlapi-a omte huih laka thehzak ding ing a, kilchih apan a tung ua siatna tun ding hi'ng, chi-a Tangtawn Toupa'n phuang hi. 33 Hazor, sihalte' tatna mun suak ding a, mun kilawi hiden ding hi. Tua-a kuamah teeng tadih lou ding a, a sunga kuamah khawsaden lou ding hi, chi hi.
Elam tawh kisai Thupuak
34 Judah kumpipa Zedekia' vaihawm pat chil lai in, Elam tawh kisai Tangtawn Toupa' thu Jeremia kianga hong tung hi. 35 Tangtawn Toupa Vanglianpen' thugen hiai ahi: En in, Elam' thalphel, a thahatnapen uh hihtan ding hi'ng. 36 Vaan kiuli apan huih lite, Elam doua nungsak ding ing a, huih lite laka amaute thehzak ding ing a, Elamte kaihmanga a omlouhna nam himhim omlou ding hi. 37 Elamte a galte uh maia, amaute' hinna lak sawma zongte maia, phiatgawpsak ding ing a, amaute tunga siatna, ka hehna nasia tun ding hi'ng, chi-a Tangtawn Toupa'n phuang hi. Amaute ka beisak masiah Namsaua delh ding hi'ng. 38 Elama ka kumpitutphah tungkhe ding ing a, ama' kumpipa leh uliante hihmangthang ding hi'ng, chi-a Tangtawn Toupa'n phuang hi. 39 Hinapi-a tunung huna Elam vangphatna pekik ding hi'ng, chi-a Tangtawn Toupa'n phuang hi.
Babulon tawh kisai Thupuak
1 Babulon leh Kaldaite gam tawh kisaia Tangtawn Toupa'n kamsang Jeremia' tungtawna a thugen hiai ahi: 2 Genkhia inla, namte lak ah phuang in. Puanlap liksang inla, phuang inla, bangmah iim ken. Ahihhangin: Babulon, lakzawha om ding a, Bel zahlaksaka om ding a, Marduk mulkimna-a dim ding a, a milimte zahlaksak hi ding a, mulkimna-a dim ding hi, chi in. 3 Mallam apan nam khat in amah dou ding a, a gam sesak ding hi. A sunga kuamah teeng lou ding a, mihing leh ganhing taimang ding hi. 4 Tua nite leh tua huna, Israel mite leh Judah mite'n Tangtawn Toupa a Pathian uh khitui luang kawma zongkhawm ding uhi. 5 Zion zotna lampi koi hiam, chi-a kan ding uh a, tua lam a mai uh ngat ding uhi. Hong pai ding uh a, Tangtawn Toupa tawh Tangtawn thukhuna kihenkhawm ding uh a, tua thukhun kimangngilh lou ding hi, chi hi. 6 Ka mite belam mang hi uh a, a chingte'n lampialsak uh a, mualtung khawnga vakthaangsak uhi. Amaute mual leh tangtung khawnga vakvai uh a, a khawlna mun uh mangngilh uhi. 7 Amau mute peuhmah in negai uh a, a melmate un: Koute mawh kei ung. Amaute' tatna mun diktak, Tangtawn Toupa, a pu a pate uh' lametna Tangtawn Toupa tunga a khelh man uh ahi, chi uhi. 8 Babulon apan taikhia un, Kaldaite gam nusia unla, kelhon makai kelte bang un. 9 Ahang bel, Babulon dou dinga mallam gama nam thupi pangkhawmte tokthou ding hi'ng. Amah dou a, panmun khawh ding uh a, mallam apan lakzawha om ding hi. A thaltangte uh, galdou siam galhat khutvuaka kik ngeiloute bang ding hi. 10 Tuachi-in, Kaldai gam kibuluh ding a, a buluhte'n a deihkhop uh ngah ding uhi, chi-a Tangtawn Toupa'n phuang hi. 11 Ka goutan buluha gupa nang, lungnuama na kipah mana, bawngla buhchil banga mawlkhah a, sakoltal banga na ham thawtholh mana, 12 na nu maizum mahmah ding a, nang hon neikhenu zahlak ding hi. Amah namte laka a neupen hi ding a, gamdai, gamkeu kuamah tot louh hi ding hi, 13 Tangtawn Toupa' hehna hanga luah louh gam hi ding a, se dimdem ding hi. A liammate khempeuh hanga Babulon tawnkha peuhmah mulkim ding a, nuihsan ding hi. 14 Thalphel lai noute khempeuh in Babulon kimkot ah panmun khawh un. Thalin kap un! Thalte siit kei un, amah Tangtawn Toupa' tunga khial hiven. 15 Kimkot ah amah otkhai un! Amah kipelut a, a insaangte chimta, a kulhbaangte kilaichimta. Hiai, Tangtawn Toupa' phulakna ahih manin, ama tung ah phu la unla, ama'n midangte tunga a hih bangin ama' tung ah hih un. 16 Khaichi pawipa Babulon apan satkhia unla, buhlak laia buhlapa, a kawite tawh satkhia un. Nuaisiah mi' namsau hangin michih a mite kiang ah kilehkik henla, michih ama' gam ah taai hen. 17 Israel zaw humpinelkaite' delhmang belamhon kithehzak hita. Amah ne masapen Asuria hi a, a guhte hihzan nanung, Babulon kumpipa Nebukhadnezar ahi, chi hi. 18 Tua bang ahih manin, Tangtawn Toupa Vanglianpen, Israel Pathian' thugen hiai ahi: Asuria kumpipa ka gawt banga, Babulon kumpipa gawt ding hi'ng. 19 Ahihhangin, Israel bel, ama' gantatna muna piikik ding ing a, Karmel leh Bashana gamta ding a, Efraim tanggam leh Gileada gilvah ding hi. 20 Tua nite leh tua huna, Israel' mawhna kizong ding a, khatbeek omlou ding hi. Judah khelhnate kizong ding a, khatbeek kimu lou ding hi. Ahang bel, ke'n ka hawi, a khawsuaksunte ngaidam ding hivengin, chi-a Tangtawn Toupa'n phuang hi. 21 Merathaim gam leh Pekoda teengte dou un. Amaute delh unla, that unla, hihmangthang sipsip un. Kon thupiak peuhmah hih un, chi-a Tangtawn Toupa'n phuang hi. 22 Tua gam ah kidou husa om a, siatna thupi husa om hi! 23 Leitungbup' sekpi kinak-tapin kisegawp zou na maizen e! Namte lak ah Babulon kinak-siat na maizen e! 24 Babulon aw, hon thangkam ing a, na phawk ma-a awk na hive. Tangtawn Toupa na nan mana, muhkhiaka om a, mata om na hi. 25 Tangtawn Toupa'n a galvan koihkhawmna hong a, a thangpaihna galvante suahkhia hi. Ahang bel, Toupa Tangtawn Toupa Vanglianpen in Babulon gama hih ding nei hiven. 26 Gamlapi apanin amah dou dingin hong kuan un. A buhpangte sat hong unla, buhvum bangin sekhawm un. Amah hihmangthang sipsip unla, a khawsuak hawi kei un. 27 A bawngtal tuaite khempeuh that unla, a gawhna mun ah paisuk uhen! Amaute tung gik hi! Amaute' ni hong tungta a, amaute gawtna hun hong tungta hiven. 28 Tangtawn Toupa i Pathian in a phulak dan, a tempul adia a phulak dan, Babulon apana vakvaite leh galtaite'n Ziona a phuan uh ngai un. 29 Thalkappawl, thalphel tawite khempeuh Babulon dou dingin sam un. A kimkot ah giahphual sat unla, kuamah suaktasak kei un. A thilhihte thuk unla, ama' hih bangbang a tung ah hih un. Ahang bel, ama'n Tangtawn Toupa Israel Misiangthoupa tawng hiven. 30 Tua bang ahih mana, a tangvalte kongzing khawng ah puk ding uh a, a sepaihte khempeuh, tua ni chianga dai sipsip ding uhi, chi-a Tangtawn Toupa'n phuang hi. 31 En in, nang kiuangsakpa hon dou hi'ng, nang kon gawt ni hong tungta hiven, chi-a Toupa Tangtawn Toupa Vanglianpen in phuang hi. 32 A ki-uangsakpa kisui ding a, puk ding a, a phong ding kuamah omlou ding hi. Ke'n a khawpitea mei tawh ding ing a, tua in ama' kimkota omte khempeuh kangtum ding hi. 33 Tangtawn Toupa Vanglianpen' thugen hiai ahi: Israel mite nuaisiaha om uh a, Judah mite zong nuaisiaha om uhi. Amau mante'n amaute lenchip uh a, khah nuamlou uhi. 34 Hinapi-a amaute Tanpa hat a, a min Tangtawn Toupa Vanglianpen hi ahi. Ama'n amaute hattaka gum ding a, a gam uh tawlngakna pe ding hi. Babulona teengte bel tawlnga ngeiloua bawl ding hi. 35 Kaldaite dou, Babulona teengte leh a uliante leh a mipilte dou namsau! chi-a, Tangtawn Toupa'n phuang hi. 36 A kamsang takloute dou namsau! Amaute mihaite hong suak ding uhi. A galhatte dou namsau! Amaute mulkimna-a dim ding uhi. 37 A sakolte leh kidouna kangtalaite leh, amaute laka nam dangte' suante dou namsau! Amaute numei hong suak ding uhi. A goute dou namsau! Amaute lawh-a om ding uhi. 38 A tuite kang ding! Amaute keugawp ding! Tua gam milim gam hi a, mulkima, laua hai ding milimte hi uhi. 39 Tuachi-a gamdai-gamkeu sate leh ngiate tua-a teeng ding a, simbute teeng ding hi. Kiluah nawnlou ding a, a khang a khanga kilawi ding hi. 40 Pathian in Sodom leh Gomora leh a kimkota khawpite a lumleh banga, tua-a kuamah khawsa lou ding a, kuamah teeng lou ding hi, chi-a Tangtawn Toupa'n phuang hi. 41 En un! mallam apan sepaihhon hong kuan uh a, nam thupi khat leh kumpipa tampite, leimong dong apan tawhthawh-a om uhi. 42 Thalphelte leh teipitea kigalvan uh a, hiamgam uh a, zahngaihna neilou uhi. A sakolte uh tunga tuang a, tuipi kihot banga ging zuazua uh a, kidou dinga kuante banga nang dou dinga hong kuan uhi, Babulon Tanu aw. 43 Babulon kumpipa'n amaute' thu zata, a khutte kai niangniangta. Mangbatna in amah man a, numei nauvei banga na thuakta. 44 Jordan luigei gampalak apan gamtatna muna hong paikhia humpinelkai banga, Babulon gam apan delhkhe I pah ding hi'ng. Hiai dinga ka seh dinga teelsa a hipa kua ahia? Kei bang kua om a, kua ahia kei hon tawng thei ding? Bangchi bang belamchingmi ahia kei hon tawng thei ding? chi hi. 45 Tua bang ahih manin, Tangtawn Toupa'n Babulon dou nadinga a thilgel za unla, Kaldai gam dou nadinga a thiltup za un. Belamhon laka a noute kikaimang ding a, amaute hanga gantatna mun kihihse dimdem ding hi. 46 Babulon a kilaakzawhna husa-a leitung liing ding a, a kikou husa in namte' lak thawn ding hi.
1 Tangtawn Toupa' thugen hiai ahi: En in, Babulon leh Leb Kamai mite dou dinga hihmangthangpa kha tokthou ding hi'ng. 2 Babulon haih-a khi ding leh, a gam hihse dinga gamdang mite Babulona sawl ding ing a, a tuahsiat ni-a kilchih apan amah dou ding uhi. 3 Thalkap mi in a thalphel khau vuah kei henla, a galvan in kithuam kei hen. A tangvalte hawi kei unla, a sepaihhonte hihmangthang sipsip un. 4 Kaldai gam ah thaha puk ding uh a, a kongzing khawnga liama si ding uhi. 5 Ahang bel, Israel leh Judah' mawhna Israel Misiangthoupa' mai ah, a gamsung uh dim mah leh, a Pathian uh, Tangtawn Toupa Vanglianpen in amaute taisan lou hiven. 6 Babulon apan taikhia un! Na hinna uh huin taai un! Ama' khelhna hangin noute si kei un. Tangtawn Toupa' phulak hun hi a, ama' thalawhsa bangbang ama'n pe ding hi. 7 Babulon zaw Tangtawn Toupa' khuta kham nou hi a, ama'n leitungbup zu khamsak hi. Namte'n a zu dawn uh a, tu-a amaute haigawpta uhi. 8 Babulon puk guih ding a, kitamkham ding hi. Amah kahin mau tuaituai un! A natna nuh ding singnai damdawi la un, hihdam theih ahi lai khamawh ding hia. 9 Babulon hihdam nuam hang a, ahihhanga hihdam theih hilou hi. Amah nusiain, eima' gam tek ah pai ni, amah gawtna in vaan suntou a, meipite tana sang hiven. 10 Tangtawn Toupa'n eite' dikna gen hi, hong pai unla, Tangtawn Toupa i Pathian' thilhih Zion ah gen ni, kichi uhi. 11 Thalte tathiam unla, lumte la un! Tangtawn Toupa'n a thiltup Babulon hihmanthat ding ahih mana, Media tokthou hi. Tangtawn Toupa'n phu la ding a, a tempul adinga phu la ding hi. 12 Babulon kulhbaangte douin puanlap liiksang un! Vengmi kibehlap unla, galvilmite a mun mun ah koih un, galte lampi-a buk dingin kisa un! Tangtawn Toupa'n a tup tangtun ding a, Babulonte a douna thuseh tangtun ding hi. 13 Nou, tui tampite kianga teengte, goua haute, na beina uh hong tung a, satkhiaka na om hun uh hong tungta. 14 Tangtawn Toupa Vanglianpen amah mah kisialin kichiam a: Khaupehon banga mihingte-a nang hon dimsak ding ing a, na tunga vualzoua kikou ding uhi. 15 Ama'n a vangletna pansana leitung bawl a, a pilna pansana leitung khuavannuai tungkhia a, a theihsiamna pansana vaante phalh hi. 16 Ama'n vanpiging banga aw a suah chianga, vaante-a tuite ging zuazua a, leimong dong apan meipite tungkahsak hi. Ama'n vuah tawh kithuaha khawphia sawlkhia a, a koihchingnate apan huih nungkhesak hi. 17 Michih poisakneilou, theihnabei hi uh a, khamsiksek peuhmah lah a milimbawlte'n maizumsak hi. A milimte kikhemna hi a, amaua nakna omlou hi. 18 Amaute mannabei hi uh a, kiengbawlna thil hi uhi. Amaute gawtna hong tun chianga mangthang ding uhi. 19 Jakob' Tantuan hipa zaw hiaite bang hi lou hi. Amah thil bangkim siampa hi a, a goutan nangawn siampa hi a, A min Tangtawn Toupa Vanglianpen hiven. 20 Nang ka galdouna khetbuk hi chin a, ka galdouna galvan hi na hi. Nang zanga namte saatzaan ing a, nang zanga kumpigamte hihmangthang hi'ng. 21 Nang zanga sakol leh a tungtuang kheenzaan ing a, nang zanga kangtalai leh a hawlpa saatzaan hi'ng. 22 Nang zanga numei pasal saatzaan ing a, nang zanga putek leh tuailai saatzaan ing a, nang zanga nungak tangval saatzaan hi'ng. 23 Nang zanga belamchingpa leh a belamte saatzaan ing a, nang zanga lounei mi leh bawngtalte saatzaan ing a, nang zanga ukpipate leh uliante saatzaan hi'ng. 24 Nangma' mitmuha Babulon leh Kaldaite gama teengte khempeuh, Ziona thil diklou a hihte khempeuh uh banga thuk ding hi'ng, chi-a Tangtawn Toupa'n phuang hi. 25 Nang, a hihmangthang mual aw, nang, leitungbup hihsepa, nang hon khing hi'ng. Nang doua ka khut zankhe ding ing a, kawla hon khukkhe ding ing a, a kanggiau mual hon suaksak ding hi'ng, chi-a Tangtawn Toupa'n phuang hi. 26 A kiu suang dinga nang apan suang kila lou ding a, suangphum dinga zong suang kila lou ding hi. Ahang bel, nang a kisesa hiden den ding hi vechin, chi-a Tangtawn Toupa'n phuang hi. 27 Gamsung ah puanlap liksang un! Namte lak ah pengkul mut un! Tua gam dou dingin namte kisasak un! Amah dou dingin hiai kumpigamte, Ararat, Mini leh Ashkenaz samkhawm un. Amah dou dingin makai sep unla, khaupehon banga tam sakolte sawltou un. 28 Amah dou dingin namte kisasak un. Mediate' kumpipate, a ukpipate uleh a uliante khempeuh uleh a uk gam khempeuh uh kisasak un. 29 Tangtawn Toupa'n Babulon dou ding a thiltup kip ahih mana tua gam liinga kisat hi. Tua a thiltup bel, Babulon gam kuamah teen louh nadinga hihse ding chih ahi. 30 Babulon galhatte kidou tawpta uh a, amau' kulhpite sunga om kinken uhi. A thahatna uh bahta a, numei bang lei hita. A tenna munte uh meiin kihal a, a kongpi kalhnate kitanta. 31 Babulon kumpipa kianga a khawpi kilakkhit thu gen dinga, khualtai khat khualtai dangin zui a, thupua khat thupua dangin zui hi. 32 Tuate'n: Luikannate kilakhin a, chiknawng nangawn kihal a, sepaihte lau lua hi, chi-a hilh uhi, chi uhi. 33 Tangtawn Toupa Vanglianpen, Israel Pathian thugen hiai ahi: Babulon' Tanu lah, buh chil laia kisikchim buhphual bang hita a, amah buhlak banga lak hun hong tung pah ding hita, chi hi. 34 Babulon kumpipa Nebukhadnezar in eite hon negaita, hon buaigawpsakta, tuibel vuak hon suaksakta. Ama'n gulpi banga eite hon valhta a, eite' anlim lima amah kivahsak a, tua khita hon sekheta. 35 Ziona teengte'n: Eite tunga khut thuakna, Babulon tung tu hen, chi uhi. Jerusalem in: Eite' sisan mawh Kaldaia teengte tung tu hen, chi hi. 36 Tua bang ahih mana, Tangtawn Toupa' thugen hiai ahi: Ngai in, nang hon gum ding ing a, na phu hon laaksak ding hi'ng. A tuipi kangsak ding ing a, a tuinakte kangsak ding hi'ng. 37 Babulon, van sesa sehvum hi ding a, sihalte' nekzonna hi ding a, mulkimna leh simmawh thil hi ding a, kuamah teen louhna mun hi ding hi. 38 A mite lah humpinelkai hatlai humham hivek ding uh a, mi ngik humpinelkai noute bang ding uhi. 39 Ahihhanga, tawhthawh ahih sung ua amau adinga zu dawnna bawl ding ing a, zu khamsak ding hi'ng. Tua chianga nuia kikou ding uh a, tua khit chianga ihmuden ding uh a, khanglou nawn lou ding uhi, chi-a Tangtawn Toupa'n phuang hi. 40 Belamnoute a gawhna muna kaihsuk bang leh, belamtal leh keltalte banga amaute piikhesuk ding hi'ng. 41 Sheshakh kila zou ding a, leitung in a kisialpih pen mat leh lakzawh hiding hi tela! Babulon, namte laka mulkimna hi na maizen inchia! 42 Babulon tunga luipi khang ding a, a tuailaite khuh ding hi. 43 A khawpite kilawi a, kise ding a, gamkeu leh gamdai suak ding a, kuamah tenlouhna gam suak ding a, khualzin kuamah inlah tawn lou ding hi. 44 Babulona Bef gawt ding ing a, a valhsa lawkhesak ding hi'ng. Namte'n amah zuan nawn lou ding a, Babulon kulhbaang chim ding hi. 45 Ka mite aw, Babulon apan hong paikhia un! Na hin nading un taai un! Tangtawn Toupa' hehna apan taikhia un. 46 Gamsunga thuthang na zak chiangun lungke kei unla, lau zong lau kei un. Tu kuma thuthang khat hong thang a, kum nawn chianga thuthang dang hong thang ding a, tua thu lah, gamsunga hiamgamna thuthang hi ding a, vaihawm mi khat in vaihawm mi dang a demna thuthang hi ding hi. 47 Ahang bel, Babulon milimte ka gawt hun hong tung ding a, a gambupa zahlak ding a, a mi thaha omte a sunga puk a, kisekhawm lemlum ding uhi. 48 Tua hun chianga lei leh vaan leh a sung ua omte khempeuh lungnuama Babulon otkhai ding uhi. Ahang bel, mallam apan hihmangthangte'n amah dou ding uh hiven, chi-a Tangtawn Toupa'n phuang hi. 49 Babulon hanga leitungbupa thaha omte khempeuh a puk banga, Israela thaha omte hanga Babulon puk teitei ding hi. 50 Nou, namsau apan suaktate, paikhe zok unla, zekai kei un! Gam gamlapi ah Tangtawn Toupa thei gige unla, Jerusalem ngaihsun un, chi hi. 51 Tangtawn Toupa' inn-a mun siangthoute sunga, gamdang mite a lut man ua, selphoua om hang a, i maizumna in hon khuh a, zahlak gawp hi hang, chi hi. 52 Tangtawn Toupa'n phuang a: Ahihhanga, a milimte ka gawtna nite hong tung ding a, a gamsung tenga liamte thuuma mau ding uhi. 53 Babulon van sunin sang mahleh, a kulhpi sangte hihkip mahleh, amah dou dinga hihmangthangte sawl ding hi'ng, chi-a Tangtawn Toupa'n phuang hi. 54 Babulon apan kahna husa hong om a, Kaldaite gam apan hihsiatna thupi husa hong om hi. 55 Tangtawn Toupa'n Babulon hihmangthang ding a, a husa vengvung daisak ding a, tuihualte banga a tunga melmate hong tung ding uh a, a aw un gam teng thawn zuazua ding hi. 56 Hihmangthangpa khat in Babulon dou ding a, a galhatte mata om ding uh a, a thalphelte uh hihtana om ding hi. Ahang bel, Tangtawn Toupa mah a thukpa Pathian hi a, a kim sipsipa thuk ding hiven. 57 Ama' uliante leh mipilte zu khamsak ding ing a, a ukpipate, makaite leh galhatte tawh, khamsak ding hi'ng. Amaute ihmu den ding uh a, khanglou nawnlou ding uhi, chi-a Kumpipa, a min Tangtawn Toupa Vanglianpen ahipa'n phuang hi. 58 Tangtawn Toupa Vanglianpen' thugen hiai ahi: Babulon kulhbaang sahpi puk ding a, a kongpi sangte meia kihal ding hi. A mite lah a phatuam loupi-a kihihbahgawp uh a, namte' sepgimna ah meikuangsak singkhul bang hi mai hi, chi hi. 59 judah kumpipa Zedekia' vaihawm kum, a kum lina-a, kumpi' ulian, nek-le-tak saipa Seraia, tua Neria' tapa, Babulona a hawh laia, Jeremia in a kianga thu a khak hiai ahi. Neria bel Maseia' tapa ahi. 60 Jeremia in Babulon tunga siatna tung dingte khempeuh, laibuzial ah a gelh a, Babulon tawh kisaia kichiamtehte khempeuh ahi. 61 Ama'n Seraia kiang ah: Babulon na tun chiangin, hiai thute khempeuh ngaihtakin simkhia in. 62 Tua khit chiangin: Tangtawn Toupa aw, hiai mun hihse ding chin a, mihing hi-in ganhing hita leh, a sunga bangmah teeng lou ding a, segawp-a omden ding ahi, chi khin na hi, chi in. 63 Hiai laibuzial na sim khit chiangin, suang tawh henkhawm inla, Iufratis luipi ah lawnlut in. 64 Tua khit chiangin: Babulon tunga siatna tun ding ka hih mana, hibanga Babulon thou kik nawnlou dinga tum ding hi. A mite zong kihihbahin puk ding uhi, chi in, a chi hi. Hiai ah Jeremia thugente a beita hi.
Jerusalem Pukna
1 Zedekia kumpipa hong hih chilin, kum sawm-nihlekhata upa ahi a, Jerusalem ah kum sawmlekhat sung vai a hawm hi. A nu' min Hamu-tal ahi a, Jeremia' tanu ahi a, Libna khawmi ahi. 2 Zedekia in, Jehoiakim bangin, Tangtawn Toupa mitmuh-in thilgilou a hih hi. 3 Tangtawn Toupa' hehna hanga hibang teng Jerusalem leh Judah gama tung ahi a, a tawpin Ama'n a ompihna apan amah a paikhia hi. Tu'n Zedekia, Babulon kumpipa tung ah a hel hi. 4 Tuachi-in, Zedekia' vaihawm kum, a kum kuana, a ni sawmna ah, Babulon kumpipa Nebukhadnezar, Jerusalem dou dingin, a sepaih honpi tawh hong kuan hi. Tua khawpi pua ah giahphual a sat uh a, a kimkot ah panmun a khawh hi. 5 Zedekia' vaihawm kum, a kum sawmlekhatna dong, tua khawpi a umchip uhi. 6 Tua kum, a kha lina, a ni kua ni-in, tua khawpi sunga kial a nase mahmah a, mite' nek ding bangmah a om nawn kei hi. 7 Tua chi-in kulhbaang a kiphuvang a, Israel sepaihte khempeuh a taizak uhi. Kaldaite'n tua khawpi umchip mahleh, Israel sepaihte'n kumpipa' huan kianga kulhbaang nihte kala kongpi ah, a zan a zanin khawpi a taisan uhi. Araba lam manawhin a tai uh a, 8 ahihhangin, Babulon sepaihte'n Kumpipa Zedekia a delh uh a, Jerikho phaizang ah a pha uhi. A sepaihte khempeuh tawh a kikhen kha uh a, amaute a kithehzak uh a, 9 amah, matin a om hi. Hamath gama Ribla ah, Babulon kumpipa kiang ah amah paipih-in a om a, tua ah Babulon kumpipa'n a tunga gawt nading thutanna a bawl hi. 10 Tua Ribla mun ah, Babulon kumpipa'n Zedekia mitmuh tangpi-in a tapate a that a, Judah gam uliante zong a that hi. 11 Tua khitin, Zedekia' mittangte a khelkhia a, sumsan kolte a bunsak a, Babulon ah a pua a, tua ah a sih dong, suangkul ah a khum hi. 12 Babulon kumpipa Nebukhadnezar' vaihawm kum, a kum sawmlekuana, a kha ngana, a ni sawm ni-in, kumpi vengpawl makai Nebuzaradan, tua Babulon kumpipa' nasempa, Jerusalem ah hong kuan a, 13 Tangtawn Toupa' tempul, kumpi innpi leh Jerusalema innte khempeuh meiin a hal a, inn poimawh peuhmah zong a haltum hi. 14 Tua baan ah, kumpipa veng sepaihpawl makaipa' makaih-in Babulon sepaih honnte'n Jerusalem kiimvela kulhbaangte a hihchim vek uhi. 15 Tua kumpi vengpawl makai Nebuzaradan in, mizawngpente pawlkhat leh khawpi-a omlaite, khutsiam dangte leh Babulon kumpipa lama toukaite tawh, suakin a kaimang hi. 16 Ahihhangin, Nebuzaradan in, gamsunga mizawngpen dangte bel, grephuante leh loute kem dingin a nusia hi. 17 Kaldaite'n, Tangtawn Toupa' tempula om sumsan khuampite, van baanna tuahtheihte leh sumsan liimlang Tuipi a hihsia uh a, a sumsan sikte khempeuh Babulon ah a pua uhi. 18 Tempula zat beelte, suahdulte, mei-ek siaknate, tui sunna belkuangte, annek kuangte leh sumsana bawl vanzatte zong a pawmang vek uhi. 19 Tua kumpi vengpawl makai in kham leh nguna kibawl tuibelte, gimnamtui halnate, tui sunna belkuangte, beelte, meivak mungte, ankuangte leh dawn thillat nadinga zat belkuangte a pawmang vek hi. 20 Kumpipa Solomon in Tangtawn Toupa' tempul adinga a bawl, tua khuampi nihte leh liimlang Tuipi leh, a nuaia bawngtal sawmlenihte leh tuahtheih van khaina-a kizang sumsante buk seng louha gik ahi. 21 Tua khuampite khat tong sawm-legiata sang, a kiimvela teha sawmlenih-a lian ahi a, a sung hawm, zung li-a sah ahi tuak hi. 22 Khuampi dawna khuam lukhu bel tong nga-a sang, siklena kituam, a kimvela sumsana kibawl mimtheia kizem ahi. A khuampi nihna zong tua banga mimtheia kizem ahi. 23 A panga kaikhia mimtheite 96 ahi a, a tunga siklen monga mimtheite zakhat ahi. 24 Tua vengpawl makai in siampimakai Seraia, ama' zoma siampi Zefania leh kongkhak veng thumte salin a kai hi. 25 Khawpi sunga om laite lak apan galdoupawl ulian leh, kumpipa huhsagih a tonpih a, tua baan ah, laigelhpa, tua sepaih lakna lama mawhpua michilgeh ulian leh khawpi-a omlai mite laka 60 zong a tonpih hi. 26 Makaipa Nebuzaradan in tuate khempeuh a kai a, Ribla ah Babulon kumpipa kiang a tun hi. 27 Tua Hamath gama Ribla ah, kumpipa'n amaute a thatsak vek hi. Tuachi-in, Judah, a gam apan salin a taang hi. 28 Nebukhadnezar in sala a kaihte tamdan hibang ahi: A kum sagihna ah Judate 3,023. 29 Nebukhadnezar' vaihawm kum, a kum sawmlegiatna ah, Jerusalem apan mi 832. 30 A vaihawm kum, a kum 23-na ah, Judate 745, tua kumpi vengpawl makai Nebuzaradan kaihmang ahi. A vek un mi 4,600 ahi uhi.
Jehoiakhin Khahkhiakna
31 Judah kumpipa Jehoiakhin saltan kum, a kum 37-na bel Evil Merodakh, Babulon kumpipa-a hong pan kum ahi. Tua kum, a kha sawmlenihna, a ni 25 ni-in, ama'n Judah kumpipa Jehoiakhin a khahkhia a, a noplensak hi. 32 Amah kam nemtakin a houpih a, Babulona om kumpipa dangte sangin amah pahtawina kumpitutphah sangzaw a pia hi. 33 Tuachi-in, Jehoiakhin in a koltan puante a suahkhia a, a dam sung omlai tengin, kumpipa' dawhkan ah an a ne gige hi. 34 Babulon kumpipa'n Jehoiakhin adingin a nisim taksap awng a huk nading tantuan a pe gige a, tua bangin, a sih mateng a pia hi.
Kahla Khatna
1 Khatvei laia mipi dimna tua khawpi, bangchi-a kilawita mai hiam! Khatvei laia namte laka a thupi mahmah bangchi-a meigong bangta mai hiam! Khatvei laia gam sehkhente laka kumpinu ahinu tu-a sal hong suakta mai! 2 Zan khawvaka khasetaka kap a, a bianga khitui luang a, amah itte laka amah khamuan ding khat bek om lou. A lawmte khempeuh in amah lehbawla khawngta, a meima suakvekta. 3 Gimthuakna leh sepgimna khita Judah zaw sala pii hi a, namte laka teeng a, tawlngakna ding mun mu lou hi. Amah gelgawtte khempeuh in patau mahmaha om delhphata. 4 A ankuanglui kulmutte um dinga kuamah hong pai lou a, Zion lampite lah daha nguaita. A kongpite kilawita a, a nungak siangthoute lungkham mangbanga om a, lungsung dahna tawh kunkun uhi. 5 A melmate a tunga vaihawmte suakta, a melmate'n nuamsata. A tadekna tampite hanga Tangtawn Toupa'n dahna thuaksakta. A tate gamdanga khakmang hita, meima in sala kaimangta. 6 Zion' Tanu' melhoihna khempeuh mualta. A milian makaite lah tatna mulou sazuk bangta. Amah deihte' maia bahtaka taaita. 7 Jerusalem in dah lungkhama a vak kawikawi laia, nidang laia a neih gou manpha khempeuh phawk hi. Tu-a a mite, meima khut sunga a puk taka, amah huh ding kuamah om lou. A meima in amah en a, a siatna nuihsan. 8 Jerusalem in nakpitaka khial a, hong ningawpta. Amah zahtak ngeite'n a vuaktanna mu a, simmawhta. Amah zong thum leh maua lehlam nga maimahta. 9 A nitna kihhuaite a niika baang a, tunung lamet ding gelphak neilou, a pukna lamdang lua a, a khamuan ding kuamah omlou. Ke'n: Tangtawn Toupa aw, ka thuak en in, melmapa kivualzousak lua hi, chi hi. 10 A goute khempeuh meima in la a, a mun siangthoua awilou namte a lut uh mu hi. Amaute lah na mi kikhawmte laka lut dinga na phallouhte hi uhi. 11 Nek ding an zonga a mite khempeuh thum huthut uh. A hin theih nading ua, a gou manphate ua an khek uhi. Ke'n: Tangtawn Toupa aw, en inla, simmawhluat ka hih dan ngaihtuah in, chi hi'ng. 12 Ke'n: Hon paikheng kheng khempeuhte aw, nou adinga bangmah hilou hiam? Kimkota dakin en ve ua, Tangtawn Toupa'n a heh mahmah ni-a ka tunga a tunsak tua ka thuakna, thuakna dang tawh kibang himhim hiam? 13 Ama'n tunglam apan mei hon sawl a, ka guh ka tangte kaang hi. Ama'n ka khete awk nading len zak a, sun nitum tuma tangom leh baha hon koih hi. 14 Ka tatleknate hakkol suak a, a khutte'n tuate phankhawm hi. Tuate ka ngawnga hong kibaat a, Toupa'n ka thahatna tawpkang hi. Ama'n ka nan zawhlouhte' khuta hon pekhia hi. 15 Ka sunga galhatte khempeuh Toupa'n nolh a, hon dou ding leh ka tuailaite suse dinga sepaihhon samkhawm hi. Toupa'n a grepsukna sunga Judah' tanu nungak siangthou chil hi. 16 Hiai hang ahi ka kah a, ka mita khituite a luanlet. Hon khamuan dinga hon naih kuamah om lou, ka kha halhsak ding kuamah om lou. Meima vualzou a, ka tate tasama liangvaita, chi hi'ng. 17 Zion in a baan zak a, ahihhanga amah khamuan ding kuamah om lou. A innvengte a meima a suah ding, Tangtawn Toupa'n Judah adinga a seh hi. Jerusalem, amaute laka a sianglou suakta. 18 Ke'n: Tangtawn Toupa zaw diktat a, hinapi-a a thupiak tunga kei hel hi'ng. Mite khempeuh aw, ngai un, ka thuakna en un. Ka tangvalte leh ka nungak siangthoute sala piimang hita. 19 Ka pankhawmpih sekte sam ing a, ahihhanga hon lehbawla hon khawngta uhi. Ka siampite leh ka upate lah, a hin theih nading ua khawpi sunga an a zon lai ua mangthang vek uhi. 20 Tangtawn Toupa aw, en ve, ka mangbat dan! Sunglama thuakgim mahmah ing a, ka lungsunga buaigawp hi'ng. Ahang bel, a helhat pen ka na hih man ahi. Pawlama namsau leeng a, dahna tun a, sunglama sihna kia om hi. 21 Mite'n ka thuum ka mau za a, hinapi-a hon khamuan ding kuamah omlou. Ka patauhna ka melmate khempeuh in za a, non bawldan mu a, lungnuam uhi. Amaute zong keimah bang a suah nadingun, na phuankhiaksa tua ni tungsak ve. 22 Amaute' gitlouhnate khempeuh na mai hong tung henla, % ka tadeknate khempeuh hanga kei hon bawl bangun, amaute zong bawl in. Ka thuum ka mauna tam a, ka lungtang bahgawpta hi, chi hi'ng.
Kahla Nihna
1 Toupa'n a hehna meipi-in Zion' Tanu pumtuam na maizen e! Ama'n Israel thupina vaan apan leilak dennain nei hi. Ama'n a khengaknanu a heh ni-a thei gige lou hi. 2 Toupa'n lainatnabeia Jakob' teenna khempeuh nawmvalh a, thangpaia Judah Tanu' kulhpite laichim hi. Ama'n Judah kumpigam leh a uliante zahlaktaka leilak denna hi. 3 Ama'n heh law mahmah a, Israel' ki peuhmah sattan hi. Meima in amah a naih laia, ama'n a khut dokkik hi. Amah, a kim a kiang kangtum mei banga Jakob sunga kuang hi. 4 Ama'n meima banga a thalphel lai a, a khut taklam mansa-a om hi. Ama'n meima banga mitmuha kilawmte khempeuh that hi. Ama'n a thangpaihna meikuang banga Zion' Tanu' puanbuk tunga sungbua hi. 5 Toupa zaw meima bang hita a, Israel nawmvalhta. A kumpi innpite khempeuh nawmvalh a, a kulhpi muanhuaite hihgawpta. Ama'n Judah Tanu adinga suunna leh kahna pungsakta. 6 Ama'n a teenna huan sung banga khul a, a kikhopna mun hihgawpta. Tangtawn Toupa'n a ankuangluite leh a Sabbathte Zion mangngilhsakta. Amah heh lua a, kumpipa leh Siampi a nih-a nolhta. 7 Toupa'n amaitam nolh a, a mun siangthou taisanta. A innpi kulhbaangte meima' khuta pia a, ankuang lui ni-a kikou banga Tangtawn Toupa' inn-a amaute kikou uhi. 8 Tangtawn Toupa'n Zion Tanu' kimkota kulhbaangte laichip ding tum tinten hi. Ama'n tehna khau zan a, hihgawp lou dinga a khut kiksak mahmah lou hi. Ama'n inntungzaang umnate leh kulhbaangte suunna-a dahsak a, a vek ua teemgawpkhawm vek uhi. 9 A kongpi leilaka tumsuk a, a kaihna zawlte hihtan a, hihgawp hi. A kumpipa leh a uliante, namte laka piimanga om uh a, dan lah om nawn lou, a kamsangte'n lah Tangtawn Toupa apan mengmuhte mu nawn lou. 10 Zion' Tanu' upate leilaka dai dide-a tu uh a, a luzang ua leivui kibuak uh a, saiippuan silha om uhi. Jerusalem nungakte lutanga leisi-in kuunkuun uhi. 11 Ka kahkahna ka mit mialta, sunglama nathuaka om ing a, ka mite hihgawpa a om man uleh, khawpi sung kongzing khawnga naupangte leh naungekte sidanga a om man ua, ka lungtang leilaka buakkhiak hita. 12 Amaute pasal liam mah banga khawpi kongzing khawnga sidang uh a, a hinna uh, a nute uh angsunga kiam hiaihiaia a om lai ua, a nute uh kianga: Tanghou leh grepzu koia om ahia? chi uhi. 13 Nang adinga bang gen thei ding ka hiam? Jerusalem Tanu aw, bang tawh hon teh thei ding ka hiam? Zion' Tanu nungak siangthou aw, kon khamuan nadinga bang tawh hon teh thei ding ka hiam? Na siatna lah tuipi banga lian a, kua'n hon damsak thei ding ahiam? 14 Na kamsangte uh' mengmuhte lah a taklou, a mannabei hi a, na saltanna uh beisak dinga na mawhna ulah pulak lou uh hiven. Thu mu chi-a noute hon piakte ulah a taklou, mi piimang thei hi mawk a! 15 Na kiang hon tawnkhate khempeuh in khut hon betkhum uh a, Jerusalem' Tanu enghou a, lu sinkhum uh a: A hoih bukim, leitung bup lungnuamsak khawpi maw hiai? chi uhi. 16 Na melmate khempeuh in nang dema a kam uh liankat uh a, hon enghou a, hon hagawikhum uh a: Amah i nawmvalhta ve, i ngakngak ni hiai ahi ve, hiai mu dinga hing i hi ve, kichi uhi. 17 Tangtawn Toupa'n a geelkholh hihta a, ama'n sawtpi-a a sehsa a thu tangtungsakta. Ama'n lainatnabeia hon khupletta a, na tunga meima kisatheisak a, galte' kitawisangta uhi. 18 Toupa' maia mite' lungtangte kikoukhia hi. Zion' Tanu' kulhbaang aw, a sun a zanin na khituite luitui bangin luang henla, kikouzangsak kenla, na mitte tawlngasak ken. 19 Thou inla, zankhangin zanvente kipat laiin kikoukhia in. Toupa' mai ah na lungtang tui bangin sungbua in. Kongzing tenga gilkiala sidang na tate' hinna adingin, ama' mai ah na khutte liiktou in. 20 Ke'n: Tangtawn Toupa aw, en inla, ngaihtuah in. Hibanga kua bawl ngei na hiam? Numeite'n a suante uh ne ding maw? A khoikhoi uh a tate uh ne ding maw? Siampite leh kamsangte Toupa' munsiangthou sunga thah-a om ding maw? 21 A teek a khang kongzing leivui laka kisekhawm a, ka tangvalte leh ka nungak siangthoute namsaua puuk uhi. Nangma'n na heh ni-a amaute that chin a, lainatnabeia amaute gou na hi. 22 Ankuanglui ni-a mi na sap banga, lamchiha ka tunga mulkimnate samkhawm na hi. Tangtawn Toupa' thangpaih ni-a suakta zou lou. Ka khawtuaha ka khoilette ka melmapa'n hihgawp vekta! chi hi'ng.
Kahla Thumna
1 Ama' thangpaihna chiang apan thuakna theikhin mi hi'ng. 2 Ama'n hon hawlmang a, vak ah hilouin miallak ah hon paisak. 3 Ama'n a khut hon thuaksak taktak a, sun nitum tuma hon thuaksak zihzeh. 4 Ama'n ka vun leh sa vuaisak a, ka guhte tansakta. 5 Ama'n kei hon dou a, gimluatna leh haksatluatna-a hon umkimvelta. 6 Ama'n sawtpi-a sisate banga miallaka hon teengsakta. 7 Ama'n ka suahtak theih louh nadinga ka kimkota hon um a, khainiang gikte hon ngakkhumta. 8 Huhna ngena ka sap a, ka kikoukhiak chiang nangawna ka thuumnate zalou dinga hon bilhumsan hi. 9 Ama'n suangtumte-a ka lampi khak a, ka lampite kawisak lai hi. 10 Vompi mi buk bang leh, humpinelkai kibu banga, 11 Ama'n lampi apan hon kaikhia a, hon malgawp a, panpihbeia hon nuseta. 12 Ama'n a thalphel lai a, a thaltangte-a hon ngim. 13 A thalbawm apan thaltangte-a ka lungtang kap pailetta. 14 Ka mite khempeuh' nuihzabuk suak ing a, sun nitum tuma la-a hon enghou hou uhi. 15 Ama'n khaatna tawh hon kidimsak a, singkha hon dawnsakta. 16 Ama'n suangtata ka hate hihtan a, leivui laka hon sikdenta. 17 Lungmuanna laksaka om ing a, niang leh taia om kichi bang hi hiam, chih mangngilhta hi'ng. 18 Tua bang hi ing a: Ka thupina leh Tangtawn Toupa apan ka lamette khempeuh beita, chita hi'ng. 19 Ka gimthuakna leh ka vakthapna, tua singkha leh sinkha thei gige ing a, 20 tuate thei gegu-a, ka hinna ka sunga lungkia hi. 21 Hinapi-a hiai kiphawksak teitei ing a, tua hanga lametna nei hi'ng: 22 Tangtawn Toupa' itna thupi a hih mana, nekgaiha om lou hi hang, ahang bel, ama' lainatnate zuau lou hiven. 23 Tuate zingsang tenga thak gige a, na muanhuaina lian hi. 24 Tangtawn Toupa ka tantuan hi a, amah ngak ding hi'ng, chi hi'ng. 25 Ama' tunga lametna ngate leh amah zong mi adinga, Tangtawn Toupa hoih hi. 26 Dai dide-a Tangtawn Toupa' hotdamna ngak hoih hi. 27 Mi'n a tuailaia hakkol a puak amah adinga hoih hi. 28 Dai didein tuta hen, ahang bel, Tangtawn Toupa'n ama' tunga a ngak hiven. 29 Leivui lak ah a mai phual hen aw, lamet omlai khamawh lou ding hi. 30 Amah beeng mi' mai ah a ngeibeng dawh henla, zahlakna'n dim hen. 31 Ahang bel, Toupa'n mihingte paikheden lou hiven. 32 Lungkham dahna hon tun mah leh, lainatna hon lak ding hi, a itna muanhuai lian mahmah hi. 33 Ahang bel, ama'n gimthuakna a ut mawnga hon tun hilou a, mihing tate tua banga dahsak hilou hi. 34 Gamsunga suangkultangte khempeuh khenuaia sikden, 35 Tungnungpen' maia mihing hamphatna taansak, 36 thudika thukhenna mihingte taansak, chihte khempeuh Toupa'n mu lou hiam? 37 Toupa' seh ahih kei leh, kua'n ahia gen a, tangtungsak thei? 38 Tungnungpen' kam apan hilou maw, tuahsiatnate leh thilhoihte a hong tun tuaktuak? 39 A khelhnate hanga gawta a om chianga Banghanga ahinglai mihing phun ding ahia? 40 I lampite entelin, chian ve ni, Tangtawn Toupa kiang ah kik ve ni. 41 Vantunga Pathian' mai ah, i lungtangte leh i khutte liiktou-in: 42 Koute na talekta, na helta ung a, nang hon ngaidam nai lou. 43 Hehna-a kikhuh chin a, koute hon delh a, lainatnabeia hon thatta. 44 Meipi-a kikhuh chin a, thuumna himhim in tua pailet zou lou hi. 45 Koute, namte laka anneng leh ninneng hon suaksakta na hi. 46 Ka melmate khempeuh uh koute doua kam liankat uhi. 47 Mulkimna leh kiakna gumte, siatna leh manthatna thuakta hi ung, chi ve ni. 48 Ka mite hihmanthata om man ua, ka mitte apan khituite luitui banga luang hiven. 49 Ka mitte apan khituite tawp loua luangden ding a, 50 Tangtawn Toupa'n van apan ensuk a, a muh mateng luangden ding hi. 51 Ka khawpi sunga numeite khempeuh hanga ka mitmuhte'n ka hinna dahsak hi. 52 A san a hang beipi-a hon mudahte'n vasa bet taka hon beng uh a, 53 ka hinna kawkhuk sunga beisak sawm uh a, suanga hon deng uh a, 54 tui in ka luzang tan hon tum a, satkhiaka om dek hita ning, chi-a kingaihtuah hi'ng. 55 Tangtawn Toupa aw, kawkhuk thukpi apan na min hon sam hi'ng. 56 Huhna ka nget za lou dingin na bil hum ken, chi-a kon nget zata na hi. 57 Kon sap chianga hon naih chin a: Lau ken, hon chi na hi. 58 Toupa aw, ka tungthu ngaihtuah chin a, ka hinna tanta na hi. 59 Tangtawn Toupa aw, ka tunga thil diklou kihih muta hi chin a, kei hon gum in. 60 A phulakna uh thuuk dan muta chin a, kei hon sawm dan khempeuh uh muta na hi. 61 Tangtawn Toupa aw, hon zahlaksakna khempeuh uh zata chin a, kei hon sawmdan khempeuh uh muta na hi 62 Ka melmate kei hon sawma sun nitum tuma kihuaua a gen suihsuihte uh zata na hi. 63 Amaute en ve! La-a kei hon enghou a, tu hiam ding hiama a om uh. 64 Tangtawn Toupa aw, a khut nasepte ua a lawhkhiak dandanun thuk in. 65 A lungtangte uh, khuhnain khuh inla, amaute tung ah na hamsia tung hen! 66 Heh-in amaute delh inla, Tangtawn Toupa' van ni nuai apan amaute hihmangthang in.
Kahla Lina
1 Bangchi dana khamsik in a teetna mansuah a, kham siang hong mualta mai ahia! A zek suangmanphate kongzing kipatna bul tenga kipaithangta hi. 2 Zion' tapa manphate, amau gik zah suangmanpha zaha manphate, tu-a lah belvelte' khutsuak leibelte bang leia kisimta. 3 Sihalte nangawn in a noute uh vaka nawi pia a, ahihhanga, ka mite' tanu gamdai Ostrit vapi banga lungtang itnabei hita. 4 Dangtakna hanga naungek' lei a dangtunga belh a, tate'n tanghou ngen a, kuama'n lah pe lou hi. 5 Khatvei laia anlim lim nete kongzing khawnga tasam leh liangvaia om a, puan sandup silha khoilette tu-a ekvum laka lum uhi. 6 Ka mite' mawhna gawtna zaw, Sodom khelhna gawtna sanga nase zaw tham hi. Tua Sodom bel, a panpih ding khut om lou a, thakhatthu-a lumleta om hi. 7 A sehtuam mite vuk sanga ngou zaw a, bawngnawitui sanga puang zaw uhi. Amaute' pumpite lah rubi suang manpha sanga chisan suak zaw a, a mellat dan ulah safair suang manpha bang hi. 8 Ahihhanga, tu-a lah innking sanga vom zaw uh a, kongzing khawnga zong melhaiha om uhi. A vunte uh a guhte ua belh a, chiangkang banga keu uhi. 9 Kiala puksite sanga namsaua thahte tanpha zaw uhi. Ahang bel, hiaite'n loua piang an neilou uh a, gilkiala puksi uh hiven. 10 Lainatna hau numeite' khutte'n amaute' tate mahmah huan uh a, ka mite' tanu hihmanthat ahih laia, a an uh suak tel uhi. 11 Tangtawn Toupa'n a thangpaihna suahkhevek a, a hehna sousang bungkhia hi. Ziona mei tawh a, tua in a suanghumte kangtum hi. 12 Melmate leh galte, Jerusalem kongpite ah lut thei unteh, chih, leitung kumpite'n um lou uh a, leitung namte'n zong um lou hi. 13 Ahihhanga, a kamsangte' khelhna hang leh, a sunga midiktatte' sisan suah a siampite' mawhna hanga hiai hong tung veve hi. 14 Tu'n amaute, mittawte banga kongzing khawnga kimai pompom uh a, sisana kihihnin uh a, kuama'n amaute' puansilhte nangawn lawng nuamlou hi. 15 Mite'n amaute kianga: Paimang un! Sianglou hi uteh! Paimang un! Paimang un! Hon lawngkha kei un! chi uhi. Amaute taikhia a, a vialvakna ua, namte laka mite'n: Amaute Jerusalem ah om thei nawn kei unteh, na chi lai uhi. 16 Tangtawn Toupa mahmah in amaute thehthang a, amaute veenga ching nawnlou hi. Siampite'n lah zahtakna lawh nawn lou a, upate'n zong deihsakna ngah nawnlou hi. 17 Tua teng baana ka mitte uh bahta a, huhna ka zon hang ua, a mawkna suakta. Koute hon hu thei lou nam khat, ka innsangte uapan gal-eta ngak hi ung. 18 Mite'n ka paina peuh ua hon simzuih uh a, ka kongzingte ua pai theilou hi ung. Ka tawpna uh naita, ka nite uh simthawh lei hita, ka tawpna uh hong tungta hiven. 19 Kou hon deihte, vanlai zawla muvanlaite sanga hatzaw uh a, mualtung khawnga hon delh uh a, gamdaihna mun khawnga hon buk uhi. 20 Tangtawn Toupa' thaunilh, ka hinna uh' nakna hu ahipa, amaute'n a thangte ua man uhi. Namte laka ama' khalim nuaia nungta dinga kingai hi mah ve ung! 21 Uz gama teeng, nang Edom' Tanu aw, nuamin kipak in. Ahihhangin, nang kianga zong nou hong kipe ding a, dawnkham ding chin a, puansuahsaka vuaktanga hong kikoih ding hi. 22 Zion' Tanu aw, na mawhna gawtna hong bei ding a, ama'n na saltanna sawtsak nawn lou ding hi. Ahihhangin, Edom' Tanu aw, ama'n na mawhna gawt ding a, na khelhna phoulak ding hi.
Kahla Ngana
1 Tangtawn Toupa aw, ka tung ua thil tung thei gige in. En inla, ka zahlakna uh mu in. 2 Ka gouluah uh melmakte kipia a, ka innte uh gamdang mite kipia hi. 3 Tagah leh pabeite suakta ung a, ka nute ulah meigong bang hita uhi. 4 Ka dawn uh tuite ka lei uh kul a, ka singkhulte uh a man piaka kimu thei lei hi. 5 Kou hon delhte'n hon khetulsuih uh a, tawiin bahta le-ung, tawlngakna mu lou hi ung. 6 Nek ding kiching ka muh theih nading ua, Aigupta leh Asuria nuaia lut hi ung. 7 Ka pu ka pate uh na khial uh a, om nawn lou ua, amaute' mawhna koute'n thuak hi ung. 8 Silate'n koute tunga vai hawm uh a, amaute khut apan hon suaktasak ding kuamah om lou hi. 9 Gamdai-gamkeua namsau om mana, ka hinna uh mansuah lauhuai hiaia nek mu lei hi ung. 10 Ka vun uh thukkhuk mah banga sa a, gilkiala nattun chisa suak hi. 11 Numeite Ziona pawngsuala om uh a, Judah khawpite sunga nungak siangthoute pawngsuala om uhi. 12 Ulian makaite a khut ua khaia om uh a, upate zahtakna piak hi lou uhi. 13 Tangvalte'n buhhek suangte-a semgim uh a, pasal naupangte singlom gik nuaia tuanpheng phenga pai uhi. 14 Upate lah khawpi kongpite-a om nawn lou uh a, tuailaite'n lah tumging tum nawn lou uhi. 15 Ka lungsung ua lungnopna beita a, ka laamna uh suunna suakta hi. 16 Ka lutung uapan kumpilukhu keta a, tung gik mi hita unge ka khelh man uh hi! 17 Hiai hanga ka lungtangte uh bahta a, hiai thilte hanga ka mitte uh mialta hi. 18 Zion Mual loih-a omtak man leh, sihalte gamtatna mun a suahtak man ahi ve. 19 Tangtawn Toupa aw, nang tangtawna omden chin a, na kumpitutphah a khang a khanga omden hi. 20 Banghanga koute hon mangngilh nak na hia? Banghanga hitan tan hon taisan na hia? 21 Tangtawn Toupa aw, kong kik theih nadingun, nang kiang ah hon piikik in. Tanglaia bangin ka nite uh thaksak in. 22 Koute hon pampaih den a, ka tung ua heh law mahmah lai ding na hih kei ngai leh, hon piikik nawn in.
Tangtawn Toupa' Thupina
1 Saltan kum, a kum 30-na, a kha lina, a ninga ni-in hibang hong hi hi. Kebar Luipi geia saltangte laka ka om laiin, vaante hong kihong a, Pathian apan mengmuhte ka mu hi. 2 Kumpipa Jehoiakhin' saltan kum, a kum ngana, a kha lina, a ni nga ni-in, 3 Babulon gama Kebar Luipi gei ah Buzi' tapa siampi Ezekiel kiang ah Tangtawn Toupa' thu hong tung hi. Tua ah Tangtawn Toupa' khut a tung ah hong om hi. 4 Ka khawdak a, mallam apan huihpi hong nung ka mu hi. Meipi sahpi leh khawphia phe zolzol tawh kithuah ahi a, meikuang kuangpha mahmah in a kimkot lai hi. Tua meikuang laizang bel sik ampha a bang hi. 5 Tua meikuang lak mah ah thilhing lite bang a om hi. A melput dan uh, mihing mei put ahi a, 6 ahihhangin maitang li chiat leh kha li chiat a nei uhi. 7 A khete uh a tang zetzot a, a khepekte uh bawngnou khe a bang a, sumsan nawttet bangin a tesolsol hi, 8 A pang li ua a khate uh nuai ah, mihing' khutte a nei uhi. A li-un maitangte leh khate a nei tek uh a, 9 a khate uh a kisutuah tek hi. Amaute a mazawn tek uah tangtakin a pai uh a, kihei het louin a pai uhi. 10 A maitangte uh hibang ahi: Tua thilhing lite'n mihing maitang a nei uh a, a taklam pang uah humpinelkai maitang a nei uh a, a veilam pang uah bawngtal maitang a nei uh a, muvanlai maitang zong a nei tek uhi. 11 A maitangte uh tua bang ahi. A khate uh vanlam ah a zaktou tek uhi. Kha nih tek a zak uh a, a kha mongte uh a kisukha tek a, kha nih in a pumpi uh a khuh tek uhi. 12 Amaute tangtakin mailam ah, kha paina lam lam ah a pai uh a, a pai kawmun a kihei het kei uhi. 13 Tua thilhingte' melput, meiam, ahih kei leh, meisel kuang a bang hi. Tua thilhingte lak ah meikuang a suk a tungin a pai hi. Tua meikuang a tangpha a, tua apan khawphia a tangkhezolzol hi. 14 Tua thilhingte khawphia phezolzol bangin mailama taiin, nunglam ah a kik zel uhi. 15 Tua thilhingte ka et laitakin, tua thilhingte' pang leilak ah kangtalaipei khat tek a om hi. Tua thilhing te'n maitang li a neitek uhi. 16 Tua kangtalaipeite' melput hibang ahi: Khrusolait suang bangin a tesolsol uh a, a melput uh a kibang vek hi. Kangtalaipeite bel kangtalaipei dang tawh kikalhtuah teka kibawl bang ahi uhi. 17 Tua thilhingte ngatna lam lam ah, ngatna lite khatpeuh lam ah, tua kangtalaite kikhukin a pai tek uhi. Tua thilhingte mah bangin, tua kangtalaite kihei het louin a pai uhi. 18 Tua kangtalaipei kualte a sang uh a, a mulkimhuai uh a, mitin a dimkual uhi. 19 Tua thilhingte a pai chiangun, a pang ua kangtalaipeite zong a pai uhi. Thilhingte leilak apan a dinkhiak chiangun, kangtalaipeite zong a dingkhia uhi. 20 Kha a paina lamlam ah amaute a pai uh a, kangtalaipeite'n zong a zui uhi. Ahang bel, tua thilhingte' kha, tua kangtalaipeite-a zong om hiven. 21 Tua thilhingte a pai chiangun, kangtalaipeite a pai uh a, thilhingte a din kinken chiangun, kangtalaipeite zong a ding kinken uhi. Thilhingte leilak apan a dintouh chiangun, kangtalaipeite zong a dingtou uhi. Ahang bel, thilhingte' kha, kangtalaipeite-a zong om hiven. 22 Thilhingte lutunga vankuum banga kizalh khat a om a, tuikhal banga tesolsola mulkimhuai ahi. 23 Tua vankuum banga kizalh nuai ah, thilhingte kha nih mong kisukhatuah tekin a kizak a, kha nih tekin a pumpi uh a khuh uhi. 24 Thilhingte a pai chiangun, a khazap ging uh ka za a, tui tampi luang ging, Vanglianpen' aw ging leh sepaihhon husa thupitak a bang hi. Amaute a khawl chiangun, a khate uh a zap kei uhi. 25 Amaute kha zap loua a din sungun, tua vankuum tunglam apan aw hong ging hi. 26 Amaute' lutunga vankuum tunglam ah safaiar suanga kibawl kumpitutphah bang khat a om a, tua kumpitutphah tunglam pek ah mihing lim leh mei pu khat a om hi. 27 A kawng chiang tunglam siah sik hal-ap banga kilangin ka mu a, a kawng nuailam siah zong meikuang a bang a, a vak tangpha in amah a kimkot hi. 28 Tua a kimkot tang pempam pen, vuahchin ni-a, meipi laka sakhituihup a bang hi. Tua Tangtawn Toupa' thupina kibatpih a kilat dan hibang ahi. Ke'n tua ka muh takin, lei si-in ka bok a, hon houpih aw khat ka za hi.
Ezekiel Sapna
1 Ama'n ka kiang ah: Mihing' tapa, na khein ding in, na kianga thu gen ding ka hi, a chi hi. 2 Ama'n thu a gen laitakin, ka sung ah Kha hong lut a, ka khein hon dingtousak a, ka kianga a thugen ka za hi. 3 Ama'n: Mihing' tapa, Israelte, nam helhat ka tunga helte kianga hon sawl ding ka hi. Amaute leh a pu a pate uh tuni mahmah chiang dong ka tunga talek ahi uh. 4 Kon sawl nading mite, mi genhak leh lungkhauhte ahi uh. Amaute kiang ah: Toupa Tangtawn Pathian' thugen hiai ahi, chi in. 5 Amaute'n ngaikhia-in ngaikhe kei tale uh, inkuan helhat lah hi uh a, amaute lak ah kamsang khat a om, chih thei ding uhi. 6 Nang mihing tapa, amaute hi in, a thugente uh hita leh, lau ken. Na kimkot ah ling leh lou lingneite'n hon umchipin, aikamte laka om himah lechin, lau ken. A thugen uh lau kenla, innkuan helhat hita mahle uh, amaute lauin zong mulkim ken. 7 Innkuan helhat ahih manun, ngaikhiain ngaikhe kei tale uh, ka thute amaute kianga na gen teitei ding ahi. 8 Ahihhangin, mihing tapa, nang na kianga ka thugen ngaikhia in. Tua innkuan helhatte bangin hel ken. Na kam ka inla, nang kon piak pen ne in, a chi hi. 9 Tua khitin, ka en a, kei lam hon sawk khut ka mu hi. Ngai in, laibuzial a tawi a, 10 ka mai ah hon zal hi. Tua laibuzial pang tuak ah kahna leh sunna leh lunggimna thute a kigelh hi.
1 Ama'n ka kiang ah: Mihing' tapa, na maia om thil ne in. Hiai laibuzial ne inla, tua khit chiangin, pai inla, Israel innkawte kiang ah thu gen in, a chi hi. 2 Tuachi-in, ka kam ka ka a, ama'n tua laibuzial ka nek dingin hon pia hi. 3 Tua khitin, ama'n ka kiang ah: Mihing' tapa, nang kon piak hiai laibuzial ne inla, na gil vahsak in, a chi hi. Tua bangin ka ne a, ka kam ah khuaizu bangin a khum hi. 4 Tua khitin, ama'n ka kiang ah: Mihing' tapa, tuin Israel innkawte kiang ah hawh inla, amaute kiang ah ka thute gen in. 5 A pau uh na theih louh leh pau haksate kianga hon sawl ka hi kei a, Israel innkawte kianga hon sawl ka hi. 6 Theih ngeilouh leh a haksa, theihhak na sak pau nei tampite kianga hon sawl ka hi kei. Tua bang mite kianga hon sawl hi leng bel, na thugen a ngaikhe tham ding uhi. 7 Ahihhangin, Israel innkawte'n kei hon ngaihkhiak nop louh manun, nang hon ngaikhe nuam lou ding uh ahi. Ahang bel, Israel innkawte a vekpi ua lungtang khauh a, genhak uh hiven. 8 Ahihhanga ken nang amaute khauh banga hon hihkhauhta ing a, amaute' mitkhauh banga hon khauhsakta hi'ng. 9 Na taltang, suang takpen, meisahsuang sanga takzaw banga bawlta ka hi. Amaute lau het kenla, innkuan helhatte himah le uh, amaute lauin mulkim het ken, a chi hi. 10 Tua baan ah, ama'n ka kiang ah: Mihing' tapa, pilvang takin ngaikhia inla, na kianga ka thugente khempeuh lungtangin chiamteh in. 11 Tu'n na gammi saltanga omte kiang ah pai inla, amaute kiang ah thu gen in. Amaute'n ngaikhiain ngaikhe keita le uh, a kiang uah: Toupa Tangtawn Pathian' thugen hiai ahi, chi in, a chi hi. 12 Tua khitin, Kha in hon domkangtou a, ka nunglam ah ngaihtaka ging lomlom khat ka zak in: Tangtawn Toupa tenna mun ah a thupina phatin om hen! a chi hi. 13 Thilhingte kha kizaptuah ging leh a gei ua kangtalaipeite' ging zong ka za a, a ging lomlom hi. 14 Kha in hon domkangtou a, hon lakhia a, ka kha-a khaatna leh hehna tawh, ka tunga Tangtawn Toupa' khut hattak omin ka paita hi. 15 Kebar Luipi kianga Tel Abib-a om saltangte kiang ka tung hi. Tua-a amaute omna ah, amaute lak mah ah lungmangtakin ni sagih sung ka om hi.
Israel Vauhilhna
16 Ni sagih a bei takin, Tangtawn Toupa' thu ka kiang ah hong tung a, 17 ama'n: Mihing' tapa, Israel innkawte adinga galvilpa-a hon bawl ka hi. Tua bang ahih manin, ka thugen ngaikhia inla, kei apan vauhilhna amaute pia in. 18 Migilou kianga: Si ngeingei ding na hi, ka chih a, amah na vauhilh kei a, a hinna hut nadinga a gamtat gilou apan kiheisak dinga thu kiteltaka na genkhiak kei leh, tua mi gilou a khelhna ah a si ding a, a sisan mawh nang kon khusak ding hi. 19 Ahihhangin, tua migilou na vauhilh a, a gitlouhna hiam, a gamtat gilou hiam apan a kihei kei leh, a khelhna ah a si ding a, ahihhangin, nang na hinna na hukhe ding hi. 20 Tua baan ah, mi diktat, a diktatna apan kihei a, thil hoihlou a hih chiangin, a mai ah kipalpaihna ka koih ding a, a si ding hi. Nang amah kianga vauhilhna pe lou na hih manin, a khelhna hangin a si ding hi. Thil diktat a hihte theihgige ahi kei ding a, ama' sisan mawh nang kon khusak ding hi. 21 Ahihhangin, mi diktat khial lou ding a, na vau-hilh a, a khelh kei leh, ama'n vauhilhna a ngaihsak manin a hing taktak ding a, nang zong na hinna na hukhe ding hi, a chi hi. 22 Tua mun ah, Tangtawn Toupa' khut ka tung ah a om a, ama'n ka kiang ah: Dingkhia inla, phaizang ah vapaikhia in. Tua ah kon houpih ding, a chi hi. 23 Tua bangin ka dingkhia a, phaizang ah ka va paikhia hi. Kebar Luipi kianga ka muh bangbang Tangtawn Toupa' thupina tua ah a ding a, leilam ngain ka boksuk hi. 24 Tua khitin, ka sung ah Kha hong lut a, ka khein hon dingtousak hi. Ama'n kei hon houpih a, ka kiang ah: Pai inla, na inn sung ah kikhumbilh in. 25 Nang, mihing tapa, khauhualin hon hen ding uh ahi. Hentoma om ding na hih manin, na mite lak ah na paikhe thei kei ding hi. 26 Na lei na dangtung ah ka belhsak ding a, pau louin na dai dideta ding. Amaute helhat innkawte hi mahle uh, na taihilh thei kei ding hi. 27 Ahihhangin, nang kon houpih chiangin, na kam kon kasak ding a, amaute kiang ah: Toupa' Tangtawn Pathian thugen hiai ahi, chi in. A ngaikhe nuam peuh in ngaikheta henla, a ngaikhe nuamlou peuhin ngaikhe dah hen. Amaute helhat innkawte hive-un.
Jerusalem Simna a Lima Etsakna
1 Mihing' tapa, tu'n bellei beu khat la inla, na mai ah koih inla, a tung ah Jerusalem khawpi lim gelh in. 2 Tua khit chiangin tua khawpi simna leh kiumchipna lei sehsang bawl in. A kimkot ah khawpi simna vante tung inla, lei sehsangtein kulhbaangte sunsak inla, kongpite sukvang nading zawlte a kimkot ah koih in. 3 Tua khit chiangin, sik beldai khat la inla, nang leh khawpi kala sikbaang hi dingin tung inla, khawpi lam maingat in! Tua khawpi a kisim ding a, nang na sim ding ahi. Hibangteng, Israel innkawte adinga chiamtehna ahi ding hi. 4 Tua khit chiangin, na veilam delhin siklup inla, Israel innkawte' khel gamtatna nang tung ah na nga ding ahi. Tua banga na siklup sung ni phazah, amaute khel gamtatna paw ding na hi. 5 Amaute khel gamtatna sung kum pha zahzah, nang tunga ni phazaha sim ding ka hi. Tua bang ahih manin, Israel inkawte' khel gamtatna uh ni 390 sung paw ding na hi. 6 Hibang teng na zawhkhit nung chiangin, lumsuk kik in. Hiai hunin bel, na taklam delhin siklup inla, Judah inkawte khelhna pua in. Kum khat zel ni khata simin, ni 40 sung nang tunga sim ding ka hi. 7 Jerusalem khawpi kisimlai maingat inla, na baan khuh louha zakin tua khawpi demin genkholhna thu gen in. 8 Khauhual in nang kon hentom ding a, khawpi sim sung nite na buchinsak mateng pang khat apan pang langkhat lam ah na kihei thei kei ding hi. 9 Huit buh leh barli buh, bekungkah leh besan, mini leh taang zong kilak inla, kuang sung khat ah koihkhawm inla, nang adinga tanghou bawlna-in zang in. Ni 390 na siklup sung teng tua tanghou na ne ding ahi. 10 Ni khat ading an shekel 20 zel tehkhia inla, a hun sehsa geihgeih ah ne in. 11 Tua baan ah, tui hin khat seh giat suah seh khat tehkhia inla, a hun sehsa geihgeih ah dawn in. 12 Barli tanghou kan beu na nek bangin an ne in. Mihing ekgaw singa zangin, mite mitmuhin, tua tanghou em in. 13 Tangtawn Toupa'n: Israelte'n amaute ka hawlmangna-a namte laka tua bang an hihbuahsa hibanga ne ding uh ahi, chi ahi, chi in, a chi hi. 14 Tua khitin, ke'n: Hilou e, Toupa Tangtawn Pathian! Keimah mah in zong hihbuahsa an ne ngei lou ka hi. Ka tuailai apan tu dong a sisa-a kitawm, sa hita leh, gamsate balgawpsa sa hita leh ne ngei nailou ka hi. Sa sianglou peuhmah ka kama lut ngeilou ahi, ka chi hi. 15 Ama'n: Hoih e. Mihing ekgaw hilouin, bawng ekgaw singa zangin na tanghou em dingin kon phal hi, a chi hi. 16 Tua khitin, ama'n ka kiang ah: Mihing' tapa, Jerusalema an puaklut ka tawpsak ding a, mite'n lungzingtakin, teh detdeta hawm an a ne ding uh a, tongkhongtakin, teh detdeta hawm tui a dawn ding uhi. 17 Ahang bel, an leh tui kiching lou ding a, vaang ding hiven. Amaute lamdang sain kientuah ding uh a, a khel gamtatna uh hanga segawp ding uh hiven.
1 Mihing' tapa, tu'n namsau hiam khat la inla, sammet mite' mul-met tema tua zangin na khamul leh na sam metsiang in. Tua khit chiangin, bukna selphala khat la inla, tua samte bukin khenzak in. 2 Na khawpi sim nite hong bei chiangin, tua khawpi sung ah, tua sam sehthum suah seh khat meiin hal in. Sehthum suah sehkhat dang la inla, tua khawpi kimkot ah, namsauin satzan in. Sehthum suah seh khat dang huih lak ah thehzak in. Ahang bel, ke'n amaute, namsaua delh ding hi vengin. 3 Ahihhangin, samzang tawmchik la inla, na silh na teen puan kikhep kal khawng ah zeplut in. 4 Tua baan ah, tua samzangte tawmchik la inla, meikhuk ah khul inla, haltum in. Tua apan mei hongdalhzak ding a, Israel innkawte khempeuh lak a kang ding hi. 5 Toupa Tangtawn Pathian' thugen hiai ahi: Namte' laizang taka ka koih Jerusalem hiai ahi a, a kimkot ah gamte a om hi. 6 Hinapi-in, a gitlouh nalamin, a kim a kianga namte leh gamte sangin, ka dante leh thukhennate douin a hel zawtham hi. Ka dante a nolh a, ka danthusehte a zui kei hi, a chi hi. 7 Tua bang ahih manin, Toupa Tangtawn Pathian' thugen hiai ahi: Na kim na kianga namte sangin na genhak zaw a, ka thukhennate na zui kei a, ka dante zong na kem kei hi. Na kim na kianga namte' gamtat siamna chiang zong na pha kei hi, a chi hi. 8 Tua bang ahih manin, Toupa Tangtawn Pathian thugen hiai ahi: Jerusalem aw, keimah mah in zong nang kon dou a, namte' mitmuhin kon mawhtangsak ding hi. 9 A kihhuai milimte khempeuh hangin, ka na hih ngeilouh leh ka hih ngei nawn louh ding thil na tung ah ka hih ding. 10 Tua bang ahih manin, na lak uah pate'n a tate uh a ne ding uh a, tate'n a pate uh a ne ding uhi. Noute tung ah mawhtansakna ka tungsak ding a, noute laka a khawsuaksunte lah huih lak ah ka thehthang ding, a chi hi. 11 Tua bang ahih manin, Toupa Tangtawn Pathian in a phuang a: Ka hinna sialin ka gen ahi. Kon deihsakna ka lakik ding a, lainatnain kon en nawn kei ding a, kon hinghawi kei hiai ding hi. 12 Na mite uh sehthum suah sehkhat hipi-in a si ding uh a, ahih kei leh na lak ua kialin a si ding uh. Sehthum suah sehkhat na kulhkong pawlam uah namsauin a si ding uh. Sehthum suah sehkhat, huih lak ah kon thehthang ding a, namsau phawisa in kon delh ding hi. 13 Tua khit chiangin, ka hehna a dam ding a, amaute tunga ka thangpaihna a daai ding a, ka batphu kilakhin ahi ding. Amaute tunga ka thangpaihna a bei chiangin, kei, Tangtawn Toupa'n ka phatuamngaihna bangbangin thu ka genta, chih a thei ding uhi. 14 Na kim na kiang ua namte lak ah, leh noute kianga paite' mitmuh-in a kisesa leh minsia-a zumhuai na hi ding uh. 15 Heh leh thangpai leh taihilhna nataka noute tunga mawhtansakna ka tut chiangin, na kim na kiang ua namte adinga a zumhuai, paunak, vauhilhna leh mulkimna na hi ding uhi. Kei, Tangtawn Toupa'n genkhinta hi vengin. 16 Ke'n thalpi banga, sihna leh siatna kialpi-a kon kap chiangin, noute hihmangthang dinga hon kap ding ing a, na tung ua kialpi nasem sem tun ding ing a, na an uh beisak ding ka hi. 17 Noute dou dinga kialpi leh gamsate hon sawl ding ing a, tabeia hon koih ding uh ahi. Na lak ua hipi leh sisan suahna tung ding a, noute doua namsau hon sawl ding ka hi. Ahang bel, kei, Tangtawn Toupa'n genkhinta hi vengin, chi ahi.
Israel Mualte Mawhsakna
1 Tangtawn Toupa' thu ka kiang ah hong tung a, 2 ama'n: Mihing tapa, Israel mualte mawhsain maituah in. Amaute mawhsain thu gen inla: 3 Israel mualte aw, Toupa Tangtawn Pathian' thu za un. Toupa Tangtawn Pathian in tangte, mualte leh kuamthukte leh luikuamte kianga a thugen ahi: Noute tunga namsau hon tun dek ka hi. Na munsangte uh hihmangthang ding ka hi. 4 Na maitamte uh kilawi ding a, na gimnamtui maitamte uh kichim ding a, na mite, na milimte uh maia that ding ka hi. 5 Israel misiluangte, a milimte uh maia sekhawm ding ing a, na guhte uh, na milimte uh kimkota thehthang ding ka hi. 6 Na teenna uh khawpite peuhmah kihihse ding a, munsangte kiphelgawp ding a, na maitamte uh kihihchim ding a, kiphiatmang ding ahi. Na milimte uh kikhentam ding a, kihihse ding hi. Na gimnamtui maitam uh kisattam ding a, na khutsuakte kiphiatmang ding hi. 7 Thah-a omte na lak uah puk ding uh a, tua chiangin, kei Tangtawn Toupa ka hi, chih non thei ding uh. 8 Ahihhangin, na lak ua pawlkhat ka hinghawi ding a, namte leh gamte laka thehthanga na om chiangun, pawl khat, namsau apan a suakta ding uhi. 9 Tua hun chiangin, sala kaih a hihna uh namte lak ah, a suaktasunte'n kei hon theigige ding uhi. Angkawmhat, a lungtangte ua kei hon kiheisan a, a mitte ua milimte en uh a, kei hon lungkhamsak dan uh a thei ding uh a, a thil gilou hihte uleh a gamtat kihhuaite uh hangin amau a kikih ding uhi. 10 Tua chiangin, kei, Tangtawn Toupa ka hi, chih hon thei ding uhi. Amaute tunga thil hoihlou tun ding ka hi, ka chih, amawkna-a ka chih ahi kei, chi in, a chi hi. 11 Toupa Tangtawn Pathian' thugen hiai ahi: Na khut nuaituah inla, na khete taat inla, Israel innkawte gamtat gilou leh kihhuaite khempeuh hangin, Maizen! chi-in kikoukhia in. Ahang bel, namsau leh hipi leh kialpi-a si ding uh hiven. 12 Gamlapi-a omte hipi-a si ding uh a, a naia omte namsaua si ding uh a, a khawsuaksunte leh hinghawia omsunte kialpi-a si ding uhi. Tua banga amaute tunga ka thangpaihna sungbaw ding hi'ng. 13 Amaute'n a milimte uh maia gimnamtui a halna ua, mual tung teng, mual sang tung teng, sing nuai teng leh tawsaw sing bawkpha nuai tenga a maitamte uh kim leh kianga a mite uh sisa-a lum a muh chiangun, tua hun chiangin, kei Tangtawn Toupa ka hi, chih hon thei ding uhi. 14 Ke'n amaute douin baan ka likkhe ding a, a tenna mun peuh uh, gamdai-gamkeu apan Dibla dong gam sia leh loih ka suaksak ding hi. Tua hun chiangin, kei, Tangtawn Toupa ka hi, chih hon thei ding uhi, a chi hi.
A Tawp Tunna
1 Tangtawn Toupa' thu ka kiang ah hong tung a, 2 ama'n: Mihing' tapa, hiai Toupa Tangtawn Pathian in Israel gam kianga a thugen ahi: A tawpkhawk! Tua gam kiu li tung ah a tawpkhawk hong tungta hi. 3 Tu'n a tawpkhawk noute tung ah hong tungta a, na tung uah ka thangpaihna ka khahzan ding hi. Na gamtatna bangbangun mawh kon tangsak ding a, a kihhuai na thilchinte bangbangun kon thuk ding. 4 Lainatnain kon en kei ding a, kon hinghawi kei ding. Na gamtatna bangbang uleh, na lak ua a kihhuai na thilchinte bangbangun kon thuk ding. Tua chiangin, kei, Tangtawn Toupa ka hi, chih na thei ding uh, a chi hi. 5 Toupa Tangtawn Pathian' thugen hiai ahi: Siattuahna! A kiza ngei nailou siattuahna hong tung dek. 6 A tawp hong tung khongkhongta! A tawp hong tung khongkhongta. Noute dou dingin amah leh amah kitokthouta. Hong tung petmahta! 7 Tua gama teeng noute tung ah siatna tawpkhawk hong tungta, a hun hong tungta, a ni hong naita. Mualtungte ah lungnopna om louin, laua mulkimna om hi. 8 Noute tunga ka thangpaihna sungbaw dek ka hi. Na gamtatna bangbang ua hon gawt ding ing a, a kihhuai na thilchinte khempeuh uh hon din ding ka hi. 9 Lainatna-a hon en lou ding ing a, hon hinghawi lou ding ka hi. Tua hun chiangin heha hon satpa kei, Tangtawn Toupa ka hi, chih na thei ding uhi. 10 Ngai un, a ni hong tung khongkhongta! A hong tung petmahta! Siatna tawpkhawk hong kipanta, satna chiang a pakmumta, kiletsakna paklunta! 11 Gitlouhna gawt dingin, hiamgamna mah satna chiang a suakta, tua mite nutsiat om lou ding, mipite hi-in, hauhna leh thil manpha hita leh bangmah nutsiata hawi om lou ding hi. 12 A hun hong tungta a, a ni hong tungta hi. A zuak mi lungnuam kei henla, a lei mi lah dah tuan kei hen. Ahang bel, mipite, a vekpi ua tunga thangpaihna tungkim hiven. 13 A zuakmi leh a lei mi a damkhawm sung teng uh, a zuakmi in a gam khotsa mu kik lou ding hi. Ahang bel, tua mipite tawh kisaia meng-muhna kikhelkik lou ding hiven. Amaute khel gamtat uh ahih mana, a lak ua kuama'n a nuntakna humbit lou ding hi. 14 Pengkul mutin michih kisakholkhin mahle uh, kuamah midang dou dingin a kuan kei ding, mite khempeuh tunga ka thangpaihna a kibanga om hiven. 15 Pawlam ah lah namsau leng a, sunglam ah hipi leh kialpi tung hi. Gama omte namsauin si ding a, khawpi-a omte hipi leh kialpi in negai ding hi. 16 A khawsuak a, a suaktasunte lah, a khelhna uh hanga luikuam vakhute banga mualtung khawnga thuuma mau ding uhi. 17 Khut teng zawin kaikhe ding a, khuk teng tuibanga nem ding hi. 18 Saiip puan teeng ding uh a, mulkimna in amaute khuh ding hi. A maitangte uh maizumna in khuh ding a, a lutang samte uh kimetmai ding hi. 19 A ngunte uh konglak khawnga paithang ding uh a, a khamte uh thil sianglou suak ding hi. A ngun uleh a kham un Tangtawn Toupa' thangpaihna apan amaute hukhe thei lou ding hi. Tuate'n a gilkial uh nem lou ding a, a gil uh zong vahsak lou ding hi. Ahang bel, amaute tatlouh louha gamtasaka puksak tuate mah hiven. 20 Ngun leh kham leh suangmanpha kizepna kilawm a neihte uh kisaktheihpih uh a, tuate-a a kihhuai biakthil leh a mannabei milimte bawl uh hiven. Tua bang ahih mana, hiaite mah amaute adinga thil sianglou suaksak ding ka hi. 21 Hiaite gamdangmite' gallak sum dinga pe ding ing a, leitunga migiloute' van laksuh suaksak ding ing a, amaute'n tuate buahsak vek ding uhi. 22 Amaute lehngatsan ding ing a, amaute'n lah ka mun siang deihthawh buahsak ding uhi. Suamhatte tua muna lut ding uh a, buahsaka ninsak ding uhi. 23 Gamsung, sisan suahna-a dim a, khawpi sung lah hiamgamna-a dim ahih manin, sik khainiangte bawl in. 24 Ke'n namte laka a giloupente, hiai mite' innte sut dinga hon pii ding ing a, a hatte' kisaktheihna beisak ding ing a, a mun siangthoute uh buahsaka om ding ahi. 25 Mulkima linna hong tun chianga, hiai mite'n muanna zong ding uh a, ahihhanga, muanna om het lou ding ahi. 26 Siattuahna tunga siattuah nawnsawnna hong tung ding a, thuthang tunga thuthang nawnsawn hong tung ding hi. Kamsangte apan mengmuhna zong ding uhi. Upate apan thuhilhna zong kimansuah banga siampite apan dan sinsakna kimansuah ding hi. 27 Kumpipa'n suun ding a, kumpitapa in lah lungdon mangbatna silh ding a, tua gam mite' khut liing ding hi. Amaute a gamtatna bangbang ua sai ding ing a, a gamtatna bangbang ua a tung ua thu khen ding hi'ng. Tua hun chianga, kei Tangtawn Toupa ka hi, chih thei ding uhi, a chi hi.
Tempula Milim Biakna
1 A kum gukna, a kha gukna, a ni nga ni-in, kei ka inn sunga ka tut laia, Judah upate ka maia a tut laiun, Toupa Tangtawn Pathian' khut ka tung ah a om hi. 2 Ka et leh mihing banga kilang thil khat ka mu hi. A kawng chiang hileh kilawm nuailam siah meikuang bangin a taang a, a tunglam siah sik hal-ap bangin a om pempom hi. 3 Ama'n khut hilehkilawm khat a hon zankhia a, ka samin hon man hi. Kha in lei leh vaan kal ah hon domkangtou a, Pathian apan mengmuhte tungtawnin Jerusalem hon tun a, a huangsung intual sungnunga mallam kongpi lutna ah hon pii a, tua ah thikthusiatna tokthou milim a ding hi. 4 Tua-a ka mai ah, phaizanga mengmuhna-a ka muh bangin, Israel Pathian' thupina a om hi. 5 Tua khitin, ama'n ka kiang ah: Mihing' tapa, mallam en dih, hon chi hi. Tua bangin mallam ka en a, maitam kongpi mallama lutna ah hiai thikthusiatna milim ka mu hi. 6 Tua baan ah, ama'n ka kiang ah: Mihing' tapa, Israel innkawte khempeuh in hiai muna thil kihhuai tawpkhawk a hih uh, ka mun siangthou apan kei hon hawlmang ding thil a hihte uh na mu hia! A kihhuai zawtham thilte mu lai ding na hi, hon chi hi. 7 Tua khitin, ama'n tempul huangsung intual lutna ah hon pii hi. Ka en a, baang ah a vang khat ka mu hi. 8 Ama'n ka kiang ah: Mihing' tapa, tu'n tua baang khuak in, a chi a, ka khuak leh tua ah kongvang khat ka mu hi. 9 Tua baan ah, ama'n ka kiang ah: Lut inla, tua-a thil gilou leh kihhuai a hihte uh en in, a chi hi. 10 Tuachi-in, ka lut a, ka en a, tua baang tunga kisuang bokvak ganhingte leh ganhing kihhuaite leh Israel inkuante' milimte khempeuh lim ka mu hi, 11 Tuate' mai ah, Israel innkawte' upa 70-te leh amaute laka ding Shafan' tapa Jaazania ka mu hi. Amaute'n gimnamtui halna kuangdai a tawi tek uh a, gimnamtui mahmah khulunglungin a zamtou hi. 12 Ama'n ka kiang ah: Mihing' tapa, Israel innkawte' upate'n mial laka, amau' milim biakin teka a thil hih uh na muta hia? Amaute'n: Tangtawn Toupa'n eite hon mu nawn kei. Tangtawn Toupa'n gam taisanta aka, chi uh ahi, a chi hi. 13 Tua baan ah, ama'n: A kihhuai zawtham thil a hih uh mu lai ding na hi, a chi hi. 14 Tua khitin, ama'n Tangtawn Toupa' inna, mallam kongpi lutna ah hon pii a, Tamuz suuna tu numeite ka mu hi. 15 Ama'n ka kiang ah: Mihing tapa, hiai na mu hia? Hiai sanga kihhuai zawtham thil a hih uh mu lai ding na hi, a chi hi. 16 Tua khitin, ama'n Tangtawn Toupa' inn huangsung inntual sungnung zaw ah hon piilut a, tua tempul lutna, tua innliim leh maitam kikal ah, pasal 25 khawng a om uhi. Amaute'n Tangtawn Toupa' inn nungngatin, suahlam maingatin, suahlama ni biain a kuun uhi. 17 Ama'n ka kiang ah: Mihing' tapa, hiai na muta hia? Hiai muna thil kihhuai hibanga a hih uh, Judah innkawte adinga thil neu ahi-a hia? Hiamgamna gamsung dimsak a, hon hehsak gige lai ding uhia? A nak ua tua sing hiang bat amaute en dih! 18 Tua bang hitel ahih manin, heh-in amaute ka sai ding. Amaute lainattakin ka en nawn kei ding a, hinghawi zong ka hinghawi nawn kei ding. Ka bil bul ah ngaihtakin kikou mahle uh, amaute ka ngaikhe nawn kei ding, a chi hi.
Milimbete Thahna
1 Tua khitin, aw ngaihtakin amah ka bilbul ah a kikoukhia a: Khawpi vengte galvan tawi tekin hiai ah hon pii un, a chi hi. 2 Tuachi-in, kongpi saknungzaw, mallam nga apan pasal guk, mi thah theihna galvan tawi teka hong paikhia ka mu hi. Amaute tawh hong ton pasal khat a om a, ama'n puan malngat a silh a, a pang ah laigelhna vanzatte koihna ip a kikhai hi. Amaute hong lut uh a, sumsan maitam kiang ah hong ding uhi. 3 Israel' Pathian' thupina, a omna ngei cherubte tung apan a paitou a, tempul innliim ah a kisuan hi. Tua khitin, Tangtawn Toupa'n tua laigelhna vanzatte neipa, puan malngat silhpa a sam a, a kiang ah: 4 Jerusalem khawpi sung tawnsuak inla, Jerusalem sunga thil kihhuai kihihte hanga daha lungkhamte' taltang ah chiamtehna koih in, a chi hi. 5 Ka ngaihkhiak leh midangte kiang ah: Khawpi sung teng ah amah zui unla, lainatna leh zahngaihna nei het louin mite that un. 6 Putekte, tangvalte leh nungakte, numeite leh naupangte satlum unla, ahihhangin, chiamtehna neite peuhmah khoih kei un. Mun siangthou ah pan un, a chi hi. Tuachi-in, tempul maia om upate apanin a that panta uhi. 7 Tua khitin, ama'n amaute kiang ah: Tempul hihbuah unla, a huangsung inntual teng ah misi luang dimsak un. Kuan un! a chi hi. Tuachi-in, amaute a kuankhia uh a, khawpi sung teng ah mi a that panta uhi. 8 Tua banga mi a thah sungun kei kia-a nutsiata ka om sungin, leilam ngain ka bok a, ka kikoukhia a: Maizen, Toupa Tangtawn Pathian! Jerusalem tunga na thangpaihna na sunbuakna ah, Israel khawsuaksunte a vekpi ua that ding na hi maw? ka chi hi. 9 Ama'n hon dawng a: Israel leh Judah innkawte khel gamtatna a lian law mahmah hi. Gamsung lah sisan suahnain a dim a, khawpi sung lah dikloutaka vaihawmnain a dim hi. Amaute'n: Tangtawn Toupa'n gam taisanta, Tangtawn Toupa'n a ngaihsak nawn kei, a chi uhi. 10 Tua bang ahih mana, lainatna-a amaute en nawn lou ding, hinghawi zong hinghawi nawn lou ding, a thilhih uh amau' lutung tusak ding ka hi, a chi hi. 11 Tua khitin, tua puan malngat silh, laigelhna vanzat a panga khaipa'n thu hon pawkik a: Non thupiak bangin ka hihta, a chi hi.
Thupina in Tempul a Nutsiatna
1 Ka a' cherubte lutung lama om vansin tung lama om safaiar suang manpha-a kibawl kumpitutphah banga tutphah khat ka mu hi. 2 Tangtawn Toupa'n puan malngat silhpa kiang ah: Cherubte nuaia kangtalaipeite lak ah va pai inla, cherubte lak apan meiamte na khutdimin vala inla, khawpi tungah theh in, a chi hi. Tua banga ka et laiin, amah a va pailut hi. 3 Tua mipa a valut laiin, cherubte bel tempul simlam pang ah a ding uh a, a huangsung inntual dimin meipi a zing hi. 4 Tua khitin, cherubte tunglam apanin Tangtawn Toupa' thupina a paikhia a, tempul innlim ah a kisuan hi. Tua meipi-in tempul sung a dim a, a huangsung inntual khempeuh ah Tangtawn Toupa' thupina a taang pempom hi. 5 Pathian Vanglianpen a pau chianga a aw ging bang maiin, tempul huangsung inntual pawnung dong cherubte' khazap ging a kiza hi. 6 Tangtawn Toupa'n tua puan malngat silhpa thu a pia a: Tua kangtalaipei kipeite lak apan leh cherubte lak apan meiam la in, a chih takin, tua mipa a lut pah a, kangtalaipei khat kiang ah a vading pah hi. 7 Tua khitin, cherub khat in amaute laka om meiamte a sawk a, bangzah hiam a la a, tua mipa khut ah a pia hi. Tua khit phetin, ama'n tua meiamte a la a, a paikhia hi. 8 Cherubte' khate nuai ah mihing khutte bangbang a kimu hi. 9 Ka en a, cherubte kianga kangtalaipei li, cherub khat kianga pei khat tek om ka mu hi. Tua kangtalaipeite bel krusolait suang manpha bangin a tesolsol hi. 10 Tua pei lite, a mellat dan uh a kibang vek hi. Tua pei khat zel pei dang tawh kikokalha kithuap a bang tek uhi. 11 Tuate a pai chiangun, cherubte ngatna lam mun lite, a khat teitei lam manawhin a pai uhi. Cherubte pai bangin, kihei hetlouin a pai uhi. Cherubte lah a lutang uh ngatna lamlam ah, kihei hetlouin a pai uhi. 12 A pumpite uleh, a nunglam uh, a khutte uleh a khate uh, a pei lite uh mah bangin, mitin a pumdim uhi. 13 Tua kangtalaipeite bel, pingpei banga kipei kangtalaipeite ahi uh, a kichih lam ka za hi. 14 Tua cherubte'n maitang li tek a nei uhi. Maitang khatna, cherub maitang ahi a, maitang nihna, mihing maitang ahi a, maitang thumna, humpinelkai maitang ahi a, maitang lina, muvanlai maitang ahi. 15 Tua khitin, cherubte, tunglam ah a lengtou uhi. Hiaite bel Kebar Luipi geia ka muh thilhingte ahi uhi. 16 Cherubte kisuana a pai chiangun, a kiang ua kangtalaipeite a pai uhi. Cherubte'n lei apan lengtou dinga kha a zak chiangun, kangtalaite'n zong amaute pang a nuse ngeikei uhi. 17 Cherubte a din kinken chiangun, amaute zong a ding kinken uhi. Cherubte a dinkhiak chiangun, amaute zong amaute tawh kitonin a dingkhekhawm zel uhi. Ahang bel, thilhingte' khate amaute sunga om hiven. 18 Tua khitin, tempul innliim tung apanin Tangtawn Toupa' thupina a paikhia a, cherubte tung ah a khawl hi. 19 Tua banga ka et sungin, cherubte'n a khate uh a zak uh a, leilak apan a lengkhetou uh a, a pai laiun, kangtalaipeite zong amaute tawh tonin a pai uhi. Tangtawn Toupa' inn suahlam kongpi lutna ah a khawl uh a, amaute' tunglam ah Tangtawn Toupa' thupina a om hi. 20 Hiaite, Kebar Luipi geia, Israel Pathian' nuaia thilhing ka muhte ahi uh a, cherubte ahi uh chih ka theikheta hi. 21 Amaute'n maitang li tek, kha li tek a nei uh a, a kha nuai uah mihing khutte bang a om tek hi. 22 A maitangte uh mellat dan Kebar Luipi geia ka muhte bangbang ahi. Amaute mailam ah tangtakin a pai tek uhi.
Israel Makaite tunga Thukhenna
1 Tua khitin, Kha in hon domkangtou a, Tangtawn Toupa' inn kongpi tua suahlam nga ah hon tun hi. Tua kongpi lutna ah, pasal 25 a om uh a, amaute lak ah mipite' makaite, Azur' tapa Jaazania leh Benaia' tapa Pelatia ka mu hi. 2 Tangtawn Toupa'n ka kiang ah: Mihing' tapa, hiaite ahi thil gilou sawm a, hiai khawpi a thuhilhna gilou pia. 3 Amaute'n: Innte lam hun tung pahta lou ding hia? Hiai khawpi lah sa huanna bel hi a, eite a sa hi ve hangin, chi uh ahi. 4 Tua bang ahih manin, amaute demin thu gen inla, mihing' tapa aw, genkholhna thu gen in, a chi hi. 5 Tua khitin, Tangtawn Toupa' Kha ka tung ah hong tung a, ama'n hiai gen dingin hon hilh hi: Hiai Tangtawn Toupa' thugen ahi, ama'n: Israel innkawte aw, tua ahi na gen uh, ahihhangin, ke'n na lungsim uh ka thei. 6 Hiai khawpi sung ah mi tam semsem na that uh a, thahsatein a kongzingte na dimsak uh. 7 Tua bang ahih manin, Toupa' Tangtawn Pathian thugen hiai ahi: Tua laia na paih uh thahsa luangte a sa hi a, hiai khawpi a huanna beel ahi. Ahihhangin, tua apanin noute kon hawlkhe ding. 8 Namsau na lau uh. Namsau ahi aw, na tung ua kon tut ding, chi-a Tangtawn Toupa'n phuang ahi. 9 Khawpi apan noute hon hawlkhe ding ing a, gamdang mite' khutsunga hon pe ding ing a, noute tunga gawtna hon tun ding ka hi. 10 Namsaua puk ding uchin a, Israel gam mongte-a noute hon gawt ding ka hi. Tua hun chianga, kei Tangtawn Toupa ka hi, chih thei ding na hi uh. 11 Hiai khawpi noute adingin anhuanna beel ahi kei ding a, noute zong a sunga sa na hi kei ding uh. Israel gam mongte-a na tung ua gawtna tun ding ka hi. 12 Tua hun chiangin, kei Tangtawn Toupa ka hi, chih na thei ding uh. Ahang bel, ka danthusehte zui lou a, ka dante kem lou a, na kim na kiang ua namte' tatdan zui zaw hi ve uchin, a chi hi. 13 Tua banga genkholhna thu ka gen laiin, Benaia' tapa Pelatia a si hi. Tuachi-in leilam ngain ka bok a, aw ngaihtakin ka kikoukhia a: Maizen, Toupa Tangtawn Pathian! Israel khawsuaksunte nangawn beisak vek ding na hi tel-a hia? ka chi hi. 14 Tangtawn Toupa' thu ka kiang ah hong tung a, 15 ama'n: Mihing' tapa, na sanggamte tua sisana na kizoppih na sanggamte leh Israel innkawte khempeuh zaw, Jerusalema teengte'n: Amaute'n Tangtawn Toupa gamlat uhi. Hiai eite' tan dinga piak ahi, a chihte uh ahi uhi.
Israel Kiknawnna Thuchiam
16 Tua bang ahih manin, Toupa Tangtawn Pathian' thugen hiai ahi: Gamlapi ah namte lak ah amaute sawlmangin gam teng ah thehthangta mah leng, a va taamna gamte uah, keimah hun tomkha sung amaute adingin munsiangthou ka hi, chi ahi, chi in. 17 Tua bang ahih manin, Toupa' Tangtawn Pathian thugen hiai ahi: Namte lak apan kon piikhe ding a, thehthanga na omna gamte uapan kon kaikhawm ding a, Israel' gam ah kon koihkik ding, chi ahi, chi in. 18 Amaute Israel gam ah hong kik ding uh a, a mannabei thilte leh a kihhuai milimte khempeuh a paimang ding uh. 19 Ke'n amaute lungtang kipumkhat ka pe ding a, amaute sung ah kha thak ka koih ding. A sa uapan a suang lungtang uh ka lakhe ding a, sa lungtang ka pe ding. 20 Tua hun chiangin, ka danthusehte a zui ding uh a, ka dante a kemta ding uh a, a zuita ding uhi. Amaute ka mite ahi ding uh a, kei a Pathian uh ka hi ding. 21 Ahihhangin, mannabei milimte leh a kihhuai milimte lama lungtang pete bel, a thilhih uh, amaute lutung mah ka tusak ding, chi-a Toupa Tangtawn Pathian in phuang ahi, chi in, a chi hi. 22 Tua khitin, cherubte a kiang ua kangtalaipeite tawh, kha a zak uh a, Israel Pathian' thupina, amaute tunglam ah a om hi. 23 Tua khawpi sung apanin Tangtawn Toupa' thupina a paitou a, suahlama mual tung ah a khawl hi. 24 Kha in kei hon domkangtou a, Pathian' Kha in mengmuh a hon piak Babulona saltangte kiang hon tun hi. Tua khitin, mengmuh ka muh in hon paitouhsan a, 25 Tangtawn Toupa'n hon lahte khempeuh saltangte ka hilh hi.
Saltanna a Lima Lahna
1 Tangtawn Toupa' thu lu ka kiang ah hong tung a, 2 ama'n: Mihing' tapa, mi helhatte laka teeng na hi. Amaute'n muh nading mit nei napi mu lou, zak nading bil nei napi za lou uh ahi. Ahang bel, mi helhatte hive un. 3 Tua bang ahih manin, mihing' tapa, sala pimanga om dingin na van zialin kisa inla, mite muhin, sun tang laiin kipankhia inla, na omna apan mun dang ah pai in. Hi leh, nam helhatte hi mahle uh, a theisiam khamawh ding uhia. 4 Amaute' muhin sun tang laiin, saltanna adinga na van na bawlsa hon pawkhia in. Nitaklamin, amaute' muh tang lai mahin, sala kaihte bangin paikhia in. 5 Hon et laiun, kulhbaang khuatvang paisuak inla, tua ah na van lakhia in. 6 Hon et laiun, na van kisuan inla, khawmuiin pawkhia in. Gam sung mu lou dingin na maitang khuh in. Ahang bel, Israel innkawte adinga chiamtehna hi dinga hon bawl ka hi, a chi hi. 7 Tuachi-in, thupiaka ka om bangin ka hih hi. Sun laiin saltanna-a puak dinga ka bawlsa ka vante ka pawkhia hi. Tua khitin, nitaklamin, ka khut in kulhbaang ka khuatvang a, khawmuiin ka vante ka la a, hon et lai mah-un ka liangzang ah ka pua hi. 8 Zingsangin Tangtawn Toupa' thu ka kiang ah hong tung a, 9 ama'n: Mihing tapa, tua Israel innkuan helhatte'n: Bang hih na hia? hon chi lou uhia? 10 Amaute kiang ah: Toupa Tangtawn Pathian thugen hiai ahi: Hiai puakgik, Jerusalema kumpi' tapa leh tua-a om Israel innkawte khempeuh tawh kisai ahi, chi ahi. 11 Amaute kiang ah: Noute adinga chiamtehna ka hi, chi in. Ka hihkhitsa bangbangin, amaute tunga kihih ding a, sala kaihmanga om ding uhi. 12 Amaute' laka makaipa'n, khaw-mui chiangin, a van a liang ah a kisuan ding a, a kipankhe ding a, amah paikhiak nading kulhbaang a khuatvang ding. Gam sung a muh theihlouh nadingin, a maitang a khuh ding. 13 Amah adingin ka lenthaang ka zak ding a, ka thaang ah a awk ding. Amah, Kaldaite gam Babulon ah ka pii ding a, ahihhangin, tua a mu kei ding a, tua ah a si ding. 14 A kim a kianga omte, a nasema a zatte leh a sepaihpawlpi huih lak ah ka thehthaang ding a, namsau phawisain amaute ka delh ding hi. 15 Amaute, namte laka thehthaang a, gamdangte laka ka thehdalh chiangin, kei Tangtawn Toupa ka hi, chih a thei ding uhi. 16 Ahang bel, amaute laka tawmkha namsau leh kial leh hipi apan ka hinghawi ding a, tuachi-in, a kithehthaangna uh namte lak ah, a gamtatna kihhuaite khempeuh uh a theikhe thei ding uh. Tua hun chiangin, kei Tangtawn Toupa ka hi, chih a thei ding uhi, a chi hi. 17 Tangtawn Toupa' thu ka kiang ah hong tung a, ama'n: 18 Mihing' tapa, na an na nek kawmkawmin liing inla, na tui na dawn kawmkawmin lauin kiguih guih in. 19 Tua gam mite kiang ah: Jerusalema teengte leh Israel gam tawh kisaia Toupa Tangtawn Pathian' thugen hiai ahi: Amaute'n lungkham kawmin a an uh a ne ding uh a, lungdong kawmin a tui uh a dawn ding uh, ahang bel, tua muna teengte' hiamgamna hanga tua gam apan bangteng kiphiatmang sipsipvek ding hiven. 20 A kiluah khawpite hihsiat hi ding a, a gam kilawi ding ahi. Tua hun chiangin, kei Tangtawn Toupa ka hi, chih na thei ding uh, chi ahi, chi in, a chi hi. 21 Tangtawn Toupa' thu ka kiang ah hong tung a, 22 ama'n: Mihing' tapa, Israel gama hiai paunak na neih uh: Nite lah paipai, mengmuh peuhmah lah bangmah suak lou, kichi bang ahia? 23 Amaute kiang ah: Toupa Tangtawn Pathian' thugen hiai ahi: Hiai paunak beisak ding ing a, Israel gam sunga kigen ngei nawnlou ding ahi. Mengmuh peuhmah a tunkim nading nite hong naita. 24 Israelte laka mengmuh takloute, ahih kei leh, kimaitang phatna aisante om nawnlou ding hi. 25 Ahang bel, kei Tangtawn Toupa' hi ing a, ka gen nopnop gen ding ing a, zekai lou hiaia tungkim ding ahi. Ahang bel, ka gensa peuhmah, nou helhat innkawte' damsunga tangtungsak ding ka hi, chi-a Toupa Tangtawn Pathian in phuang hive'n, chi in, a chi hi. 26 Tangtawn Toupa' thu ka kiang ah hong tung a, 27 ama'n: Mihing' tapa, Israel innkawte'n: Mengmuh a muh uh tu apan kum tampi ading ahi, tunung sawtpi ading genkhol ahi, hon chi uh ahi. 28 Tua bang ahih manin, amaute kiang ah: Toupa Tangtawn Pathian' thugen hiai ahi: Ka thute khatbeek zong zekai nawnlou ding a, ka gen peuhmah tangtung ding ahi, chi-a Toupa Tangtawn Pathian in phuang ahi, chi in, a chi hi.
Kamsang Takloute Mawhsakna
1 Tangtawn Toupa' thu lu ka kiang ah hong tung a, 2 ama'n: Mihing' tapa, tu huna genkholhna thugen Israel kamsangte mawhsain thugen in. Amau' lungsim suangtuahna maimai gen a: Tangtawn Toupa' thu ngai un! chite kiang ah: 3 Toupa Tangtawn Pathian' thugen hiai ahi: Bangmah mu loupi-a, amau' lungsim ngaihsut lei zui kamsang haite' tung a gik hi. 4 Israel aw, na kamsangte uh, mun sesa laka om sihalte bang ahi uh. 5 Tangtawn Toupa ni-a kidouna-a kulhbaangte a dinkip theih nadingin, tua kulhbaang kisia Israel adinga puahpha dingin na kuantou kei uhi. 6 Amaute' mengmuhte a taklou hi a, a aisante uh thuzuau hi ahi. 7 Ke'n thu ka gen hetlouh laia: Tangtawn Toupa'n a phuang, na chih chiangun, a hawmpi mengmuhte mu a, thuzuaupi gen na hi kei ua hia? chi ahi. 8 Tua bang ahih manin, Toupa Tangtawn Pathian' thugen hiai ahi: Thuzuaupi na gente uleh a hawmpi mengmuh na muhte uh hanga, noute hon dou ka hi, chi-a Toupa Tangtawn Pathian in phuang ahi. 9 Mengmuh taklou mu leh zuauthu-a aisan kamsangte ka khut in dou ding hi. Amaute zaw ka mi vaihawmpawlte-a hi lou ding uh a, Israel innkawte' minkhumna-a zong gelhlut hi lou ding uh a, Israel gam sung zong lut het lou ding uhi. Tua hun chiangin, kei Tangtawn Toupa Thuneipen ka hi, chih na thei ding uhi. 10 Amaute'n galmuanna om louh laia, Muanna om, chi-a ka mite a lampialsak manun leh kulhbaang muanhuailoupi a lam chiang ua, a tung a nuh ngou maimai manun, 11 tua bang nuhngoute kiang ah, tua baang chim ding ahi, chi-in hilh in. Vuahpi hong zu ding a, gialpi dengsak ding ing a, huihpi in hon nuai ding hi. 12 Kulhbaang a chip chiangin, mite'n: Na baang nuhngouna uh koia omta ahia? chi lou ding uhia? chi ahi. 13 Tua bang ahih manin, Toupa Tangtawn Pathian' thugen hiai ahi: Thangpaiin huihpi ka nungsak ding a, hehin gial ka kesak ding a, thil hihsethei vuahpi zusakin hawktui ka luangsak zuazua ding. 14 Na baang nuh ngou uh ka laichim ding a, leilak ka dengsak ding a, a suangphumte ka dawksak ding. Tua banga ka hih chiangin, a sung ah hihmanthatin na om ding uh. Tuachi-in, kei, Tangtawn Toupa ka hi, chih na thei ding uh. 15 Tua kulhbaang tung ah leh a ngoua vazut maimaite tung ah ka thangpaihna ka bung ding a, na kiang uah: Kulhbaang segawpta, tua bang maha a zutngou mite beita, 16 galmuanna om loupi-a Jerusalem kianga galmuanna thu gen a, galmuanna mengmuh mu, Israel kamsangte mah beita, chi-a Toupa Tangtawn Pathian in phuang ahi, ka chi ding. 17 Mihing' tapa, tu'n amau' lungsim suangtuahna maimai apana genkholhna thugen ka mite' tanute douin ensal ek in. Amaute douin thu gen inla: 18 Toupa Tangtawn Pathian' thugen hiai ahi: A khutdawh ua mitkhial dawi-ai bun a, mite mat nading thang tua lukhuhna puan tuamtuama kikhuh numeite' tung a gik hi. Ka mite' hinna thaanga manin, nou' hinna na hawi thei tuan ding ua hia? 19 Barli buh khutdim khat leh tanghou themgaw khat thalawhin, ka mite lak ah ka min na buahsak uhi. Zuauthu ngainuam ka mite kianga zuauthu genin, si dinga kilawmloute na that uh a, hing dinga kilawmloute na hinghawi uhi, chi ahi, chi in. 20 Tua bang ahih manin, Toupa Tangtawn Pathian' thugen hiai ahi: Vasa mat banga ka mite thaanga na matna uh na mitkhial dawi-ai butte uh ka dou a, na baan uapan ka laikhe ding. Vasa banga tua thaanga na mat uh ka mite ka suaktasak ding. 21 Na lukhuhna puante uh ka hawkkhe ding a, ka mite na khut uapan ka hukhe ding a, noute' khut thuakin a puk nawn kei ding uh. Tua hun chiangin, kei, Tangtawn Toupa ka hi, chih na thei ding uhi. 22 Ke'n midiktatte ka lungkhamsak louh laia, noute'n zuauthu pansana lungkesak uchin a, a hinna uh hu dinga a gamtat giloute uh kiheisan ding hinapi-a kiheisan lou dinga hasuan zawsop uchin a, 23 tuate na hih theih nawnlouh nading ua a hawmpi mengmuhte lah mu thei nawn lou ding uchin a, dawi aisan lah chiing thei nawn lou ding uchin a, ke'n ka mite na khut uapan hukhe ding ka hi. Tua hun chingin, kei Tangtawn Toupa ka hi, chih na thei ding uh, chi ahi, chi in, a chi hi.
Milim bete Mawhsakna
1 Israel upate pawlkhat ka kiang ah hong hawh uh a, ka mai ah hong tu uhi. 2 Tua laiin Tangtawn Toupa' thu ka kiang ah hong tung a: 3 Mihing' tapa, hiai mite'n a lungsung ua milimte tungkhia uh a, a mai ua kipalpaihna giloute koih uhi. Tua bang mite thu ka kansak peuhmah dia hia? 4 Tua bang ahih manin, amaute houpih inla, amaute kiang ah: Toupa Tangtawn Pathian' thugen hiai ahi: Israel mi kuapeuh in a lungsunga milimte a tunkhiak a, a mai ua kipalpaihna giloutak a koih a, tua khita kamsang khat kianga a va hawh leh, kei, Tangtawn Toupa mahmah in, a milimbiakna tawh kituakin ka dawng ding. 5 A milimte uh delh a, kei hon taisan Israel mipite' lungtangte mankik dingin hiai ka hih ding, chi ahi, chi in. 6 Tua bang ahih manin, Israel innkawte kiang ah thu gen inla, Toupa Tangtawn Pathian' thugen hiai ahi: Lunghei un! Na milimte uh kiheisan unla, a kihhuai mahmah na gamtatnate uh tawpsan un! 7 Israel mi kuapeuh hi-in, Israel gama teeng gamdang mi kuapeuh hita leh, kei apan a kituamkoih a, a lungsunga milimte a tunkhiak a, a maia kipalpaihna giloutak a koih a, tua khita kei apan thu kan dinga kamsang khatpeuh kianga a va hawh leh, kei, Tangtawn Toupa mahmah in ka dawng ding. 8 Tua bang mi douin ka ensal gemgum ding a, amah etteh hi ding leh paunak hi dingin ka bawl ding. Amah ka mite apan ka satkhe ding a, tua hun chiangin, kei, Tangtawn Toupa ka hi, chih na thei ding uh. 9 Tua chiangin, tua kamsang pen, genkholhna thugen dinga zolzawh-a a om leh, kei, Tangtawn Toupa'n tua kamsang ka zolzawh ahi ding a, amah douin ka khut ka lik ding a, ka mi Israelte lak apan amah ka satkhe ding. 10 Amaute'n a mawhna uh a khu ding uh a, kamsangpa zong amah kianga thukanpa' mawhna zah zahin a mawh ding. 11 Tua khit chiangin, Israel mite kei apan a pialmang nawn kei ding uh a, a tatlekna khempeuh-un a kihihbuah nawn kei ding uh hi. Amaute ka mite ahi ding uh a, kei amaute' Pathian ka hi ding, chi-a Toupa Tangtawn Pathian in phuang ahi, chi in, a chi hi.
Pelhtheihlouh Thukhenna
12 Tangtawn Toupa' thu ka kiang ah hong tung a, 13 ama'n: Mihing' tapa, gam khat peuh muanhuai louin ka tung ah khial henla, ke'n tua gam nek leh tak satkhe dingin tua gam douin ka khut liik lengla, tua gam tung ah kial sawlin, a mite leh a gantate that leng, 14 hiai mi thumte Noa leh Daniel leh Job nangawn tua gam sung ah om leh, amaute a diktatna bangun amau kia lei mah a kihukhe thei ding uh, chi-a Toupa Tangtawn Pathian in phuang ahi. 15 Ahih kei leh, tua gam sung ah gamsate sawl lengla, amaute'n tua gam tabeiin koih uhenla, tua gam kuamah' tot theihlouh zahin kilawi leh, 16 ka hinna sialin ka gen ahi, hiai mi thumte tua gam sungah omta le uh zong a tapate uh hi-in, a tanute uh hita leh zong a hukhe thei kei ding uh a, amaute kia lei hutkhiakin om ding uh a, gam bel a kilawi ding, chi-a Toupa Tangtawn Pathian in phuang ahi. 17 Ahih kei leh, tua gam tunga namsau ka lensak a: Gamsung khempeuh ah namsau lengsuak hen, ka chih a, mite leh gantate ka satlup leh, 18 ka hinna sialin ka gen ahi, hiai mi thumte tua gam sung ah omta leh zong, a tapte uh hi-in, a tanute uh hita leh, a hukhe thei kei ding uh. Amaute kia lei hutkhiakin om ding uh, chi-a Toupa Tangtawn Pathian in phuang ahi. 19 Ahih kei leh, tua gam tunga hipi ka sawl a, a tunga ka thangpaihna, sisan suahna tungtawna ka sunbuak a, a mite leh gantate ka thah leh, 20 a sung ah Noa leh Daniel leh Job omta leh zong, a tapate uh hi-in, a tanute uh hita leh, a hukhe thei kei ding uh. Amaute kia a diktatna uh hangin a kihukhe lei ding uh, chi-a Toupa Tangtawn Pathian in phuang ahi. 21 Ahang bel, Toupa Tangtawn Pathian' thugen hiai ahi: Jerusalem tunga a mite leh gantate that dinga ka gawtna mulkimhuai li, namsau leh kial leh gamsate leh hipi ka sawl chianga bangzahta-a nase zaw ding ahia! 22 Hinapi-in a khawsuak sun, tanute leh tapate om ding a, tua khawpi apan piikhiaka om ding uhi. Amaute na kiang ah hong pai ding uh a, nang amaute' gamtatna leh a thilhihte uh na muh chianga Jerusalem tunga siatna ka tut peuhpeuh tawh kisaia na lungkhamna damtuam ding hi. 23 Asan ahang beipi-a tua khawpi sunga bangmah hih lou ka hi, chih thei ding na hih mana, a gamtatna uleh a thilhihte uh na muh chianga na lungkhamna damtuam ding ahi, chi-a Toupa Tangtawn Pathian in phuang hiven, a chi hi.
Jerusalem: Grepgui Mannabei
1 Tangtawn Toupa' thu ka kiang ah hong tung a, 2 ama'n: Milling' tapa, gammaanga sing khatpeuh hiang sanga grepgui sing bangchi-a hoihzaw ahia? 3 A mantaak thil khatpeuh bawl nadinga grepgui apan sing kila ngei hia? Van khai nading singbekte, grepgui apan bawl ngei uhia? 4 Singkhul laka thukkhuka a kikhul khit a, a mong tuak kuanga, a laizang meihol a suah chianga thil khatpeuha kizang thei hia? 5 A kaanglou ahih laia bawn bangmah dinga zattheih phatuam ahih kei leh, a katgawpa meihol a suah nungin banga kibawl thei ding ahia? a chi hi. 6 Tua bang ahih manin, Toupa Tangtawn Pathian' thugen hiai ahi: Thukkhuka khul dinga, gammang singte tawh grepgui ka piak bangin, Jerusalema teengte ka pe ding. 7 Amaute douin ka ensal gemgum ding. Thukkhuk apan suakta mahle uh, mei in amaute a kangtum teitei ding. Amaute doua ka etsal gemgum chiangin, kei Tangtawn Toupa ka hi, chih na thei ding. 8 Amaute a muanhuai louh manun, tua gam ka sesak ding, chi-a Toupa Tangtawn Pathian in phuang ahi, a chi hi.
Jerusalem' Muanhuailouhna Gentehna
1 Tangtawn Toupa' thu ka kiang ah hong tung a, 2 ama'n: Mihing' tapa, Jerusalem, a gamtat kihhuaite theisak inla, a kiang ah gen in. 3 Toupa Tangtawn Pathian in Jerusalem kianga a gen hiai ahi: Na pu na pate apan na kipatna leh na pianna Kanante gam ah ahi. 4 Na pianni-in na laigui lah attan louh, tuia lah silsiang louh, chi lah nuh louh, puan-a lah tuam louh na hi. 5 Na tunga hiaite hih ding zaha kuama'n hehpihna leh lainatna tawh hon en lou ahi. Gamlaka paih maimai hi zaw na hi, Ahang bel, na pianni-a simmawha om hi vechin. 6 Tua laia ke'n hong tuak ing a, sisana pumdima kipek pek lai hon mu ing a, sisana na kidiah laia, Hing in! hon chi ka hi. 7 Gamlak loupa selnou banga hon khangsak ing a, hong khangliana hong piching chin a, suangmanpha kilawmpen pen hong suak na hi. Savuak leh vuaktang hi china, na nawite hong bawka, na sam hong sau hi. 8 Tua nunglama hon tuak nawn ing a, hon en a, zi-a neih theiha piching na hi, chih hon mu ing a, ka puanmong hon khuh ing a, na vuaktanna hon khuh ka hi. Kichiamna kiptak hon pia ing a, nang tawh kala thukhun bawl ing a, keia hong hi na hi, chi-a Toupa Tangtawn Pathian in phuang ahi. 9 Tuia hon sil ing a, nang apan sisan silkhia ing a, sathau hon nuh ka hi. 10 Puanzem kilawmtaka hon zem ing a, khedap nem hon bunsak ka hi. Puan malngatte-a hon tuam ing a, puan mantamte-a hon khuh ka hi. 11 Buh leh bah manphate-a hon zem ing a, na baana taute hon bunsak a, na ngawnga khi hon oksak a, 12 na naka nakbah, na bila bilbah hon batsak a, na lutunga kumpilukhu kilawmtak hon khusak ka hi. 13 Tua banga ngun leh khama hon zem ing a, na puansilhte, puanmalngat, puan manpha leh ze kilawma zep hi ahi. Na an lah annel hoih, khuaizu leh sathau hi a, na mei hong hoih mahmah a, kumpi chi hong suak na hi. 14 Tua khit chianga, thupina kon piak in na kilawmna kimsak ahih mana, na kilawmna hanga na minthanna namchih laka thang hi, chi-a Toupa Tangtawn Pathian in phuang ahi. 15 Ahihhanga, na kilawmna muang a, na minthanna kizuak nadinga zang maimah na hi. Na kianga hong pai peuhpeuh kiang ah deihsakna na tangphal a, na kilawmna amaha na suaksak hi, 16 Na puansilhte pawlkhat la-in biakna munsangte na bawl a, tua lai mah ah na kizuakna na hih zongsang hi. Tua bang thilte a om ding hilou a, a tun zong a tun ngeilouh ding ahi. 17 Tua baan ah, kon piaksa kizepna thil manphate, ka ngun leh ka khamte na la a, milim pasalte na kibawl a, tuate tawh ang na kikawm uh a, na kizuak lai hi. 18 Amaute silhsak dingin na puan zehoiha zepte na la a, amaute' mai ah ka sathaute leh gimnamtuite na laan hi. 19 Tua baan ah, nek dinga kon piaksa an annel hoih, sathau leh khuaizute, kithoihna namtui hi dingin amaute' mai ah na laan hi. Tua bang teng hi mah ahi, chi-a Toupa Tangtawn Pathian in phuang ahi. 20 Tua baan ah, kei tawh kala na neih na tapate leh tanute na pii a, milimte an dingin na laan hi. Nang na kizuak bawn kiching lou lai hia? 21 Ka tate na that a, milimte' mai ah na laan hi. 22 A kihhuai mahmah na gamtatnate khempeuh leh na kizuakna ah, na tuailaia na savuakna leh vuaktanna leh sisana pumdima na kipekpek lai theigige lou na hi. 23 Na tung gik e, na tung gik! chi-a Toupa Tangtawn Pathian in phuang ahi. Na gitlouhnate khempeuh baana, 24 nang adinga mun sehsang kibawl chin a, tangpi omna mun tenga biakna inn sang kilam behlap na hi. 25 Kongzing mong teng ah biakna inn sang na lam a, hon tuakkha teng tawh ang kikawmin na pumpi na tangphal a, na kilawmna na zahlaksak hi. 26 Mi etlahhat, na invengte hi buang tua Aiguptate tawh kala kizuaka, na paktat semsemna in kei hon hehsak ahi. 27 Tua bang ahih manin, nang dou-in baan ka liik a, na gam ka neusak a, na melmate khut sung ah kon pekhia hi. Amaute bel na paktatna lamdangsa, Filistia tanute ahi uhi. 28 Lungkim theilou na hih manin, Asuriate tawh kal ah zong na kizuak hi. Tua nung nangawnin, na lungkim nai kei lai hi. 29 Na paktatna in sumsinte' gam, tua Babulon gam dong a baan a, hibang teng nangawn ah na lungkim zou kei lai hi. 30 Bangzahta-a lungtang zawngkhal nei hitel na hi maia, hibang teng hih-a zumna mei thei mahmah lou beven kizuaknu banga na gamtat tel, chi-a Toupa Tangtawn Pathian in phuang ahi! 31 Kongzing mong tenga mun-sehsang na kibawl a, tangpi omna mun tenga biakna inn sang na kilam chiangin, kizuak ngeina zong na bang kei hi. Ahang bel, kizuakna man la nuam lou hi vechin. 32 Nang angkawmhat zi aw! Na pasal sanga melmakmi deih zawnu aw! 33 Kizuakte'n zaw kizuakna man la uh hi a, nang bel na angkawmpihte kianga thawnpiakte pe zawmah a, daan tawh kituaklou deihsakna na piak ding deiha koimun peuh apan hon zotna ding ua nang golh zawsop na hi. 34 Mi kilehlak tawpkhawk na hi ve, kizuak chi a, kuama'n deihsakna hong zong lou a, kizuak dangte banglou taka kizuak man nang pe zawsop chin a, nang lah piaka omlou na hi, chi ahi. 35 Tua bang ahih manin, nang kizuaknu, Tangtawn Toupa' thu na ngai in! 36 Toupa Tangtawn Pathian' thugen hiai ahi: Na hauhna sungkhia a, na angkawmpihte tawh na paktatna-a na vuaktanna dawksak na hih manin leh, a kihhuai mahmah na milimte hangin leh, na tate' sisan amaute na piak manin, 37 nuam na sakpih, ang na kikawmpihte khempeuh, na itte leh na muhdahte tawh ka kaikhawm ding a, na kimkot ah nang kon dousak ding a, amaute' mai ah na puansilhte ka laikhe ding a, na vuaktanna a mu ding uhi. 38 Angkawm leh sisan suah numeite gawtnain kon gawt ding a, ka thangpaihna leh ka thikthusiat hehnain na tung ah sisan phuba ka la ding. 39 Tua hun changin, na angkawmpihte' khutsung ah kon pe ding a, amaute'n na mun sehsangte a laichim ding uh a, na biakna inn sangte a hihse ding uh. Amaute'n na puansilhte a kaikhe ding uh a, na kizepna van suangmanphate a la ding uh a, savuak leh vuaktangin hon nuse ding uhi. 40 Nang douin mipi a kaikhawm ding uh a, a kitomsak ding uh a, amaute'n suangin hon deng ding uh a, namsauin hon satzan ding uhi. 41 Na innte a haltum ding uh a, numei tampite' muhin hon gawt ding uh. Ke'n na kizuakna ka beisak ding a, na angkawmpihte sum na pe nawn kei ding. 42 Tua hun chiangin, na tunga ka thangpaihna a daai ding a, thikthusia-a ka hehna, nang apan a kiheimang ding. Ka daai ding a, ka heh nawn kei ding. 43 Na tuailai nite theigige lou a, hiai thilte khempeuh-a non hehsak manin, na thilhihte na lutung tusak ding ka hi, chi-a Toupa Tangtawn Pathian in phuang ahi. A kihhuai mahmah na thilhihte tunga paktatna behlap lai hilou na hi-a hia? 44 Paunak gen peuhmah in, nang tawh kisaiin, hiai paunak a gen ding a: Tanu in a nu suun, a chi ding uhi. 45 Nang, na nu' tanu diktak na hi ve. Ama'n a pasal leh a tate simmawh hi. Nang, na sanggamnute' sanggamnu diktak na hi ve. Amaute'n a pasalte uleh a tate uh simmawh uhi. Na nu lah Hit mi hi a, na pa lah Amor mi ahi. 46 Na sanggamnu, na unu Samaria hi a, amah a tanute tawh nang' mallam ah a teeng hi. Na sanggamnu, na naunu, a tanute tawh nang' simlama tengnu Sodom ahi. 47 Amaute' lampite tawna, a kihhuai a gamtatnate uh na zuih kia hilouin, na lampite khempeuha amaute sanga a sezaw, hoihnabei na hi ve. 48 Ka hinna sialin ka gen ahi, na sanggamnu Sodom leh a tanute'n nang leh na tanute hih bang hih ngeilou uh ahi, chi-a Toupa Tangtawn Pathian in phuang ahi. 49 Na sanggamnu Sodom' khelhna hiai ahi: Amah leh a tanute kisatheiin ki-uangsak uh a, nevah luain khawksak nei lou uh a, mizawngte leh tasamte huh lou uhi. 50 Simmawhhatin a kisathei uh a, ka mai ah thil kihhuaite a hih uhi. Tua bang ahih manin, na muh bangin, amaute ka beisakta hi. 51 Samaria in zaw khelhna na hih kimkhat zong hih lou ahi. Nang amaute sanga thil kihhuai tamsem hih chin a, hiai a kihhuai na thilhihte khempeuh in na sanggamnu diktata kilangsak hiai ahi. 52 Na sanggamnute' gamtatna a dik hi leh kilawm hiaia langsak dinga thil hih na hih manin, na zahlakna na khuk ding ahi. Amaute' khelhnate sanga nang khelhnate nase zaw ahih manin, nang sanga amaute diktatzaw-a kilang uh ahi. Tua bang ahih nung, na sanggamnute diktatzaw-a kilangsak na hih manin, maizum inla, na zahlakna khu in. 53 Hinapi-in, Sodom leh a tanute hita leh, Samaria leh a tanute hita leh, a vangphatnate uh pekik ding ing a, tuate tawh kitona na vangphatnate zong hon pekik ding ka hi. 54 Tua lah na zahlakna na khuk a, amaute khamuangsak dinga na thilhihte khempeuh na zahpih theih nading ahi. 55 Na sanggamnute, Sodom leh a tanute leh Samaria leh a tanute bel, tuma huna a hihna dinmun ngeisa uh a tungkik ding uh a, nang leh na tanute zong tuma lama na hihna dinmun ngeisa na tungkik ding uhi. 56 Na kisaktheih ni-in na sanggamnu Sodom' min na lou kha nuam kei hi. 57 Tua bel, na gitlouhna phoulaka a om ding main chihna ahi. Tua bang zah hinapi, tu'n Edom' tanute leh a innvengte khempeuh leh nang hon simmawha na kimkota om Filistia tanute' simmawhin na om hi. 58 Zummawha na paktatna leh a kihhuai mahmah na gamtatnate gah na lou ding, chi-a Tangtawn Toupa'n phuang ahi. 59 Toupa Tangtawn Pathian' thugen hiai ahi: Thukhun palsat a, ka kichiamna simmawh na hih manin, na thilhih bangbanga hon thuk ding ka hi. 60 Hinapi-in, na tuailaia nang tawh kala ka thukhun ka theigige ding a, nang tawh kal ah Tangtawn thukhun ka khung ding. 61 Nang sanga uzaw leh nauzaw na sanggamnute kipahpiha na san chiangin, na lampite na theigige ding a, na maizum ding. Ke'n amaute na tanute hi dingin na kiang ah kon pe ding a, ahihhangin, nang tawh kala ka thukhun bangin bel ahi kei ding. 62 Tuachi-in, nang tawh kal ah ka thukhun ka kipsak ding a, kei, Tangtawn Toupa ka hi, chih na thei ding. 63 Tua khita, na thilhihte khempeuh hanga nang adinga khelhna khuhna ka bawl chiangin, tuate na theigige ding a, na maizum ding. Zahlaksak hi ding na hih manin, pau dingin na kam na ka nawn kei ding, chi-a Toupa Tangtawn Pathian in phuang ahi, chi ahi, chi in, a chi hi.
Muvanlai Nih leh Grepgui Khat
1 Tangtawn Toupa' thu ka kiang ah hong tung a, 2 ama'n: Mihing' tapa, gentehna thu gen inla, Israel innkawte kiang ah gentehna khat gen in. 3 Amaute kiang ah: Toupa Tangtawn Pathian' thugen hiai ahi: Muvanlai lianpi, kha sau hattakte nei, zetuam tuama gial multe nei khat, Lebanon ah hong tung hi. Sidar singkungte a dawna manin, 4 a hiang tungnungte a laitan a, sumsin mite gam tunin, sumsin mite khawpi ah a suan hi. 5 Na gam uapan khaichi pawl khat a la a, lei hoih ah a pawi hi. Tui tampi kianga muisum sing bangin a suan a, 6 tua hong dawnkhia a, grepgui niamchik, pha mahmah hong suak hi. A hiangte tua muvanlai omna lam ah a zam uh a, ahihhangin, a zungte a nuai ah a omden hi. Tuachi-in, grepguipi hong suak a, a hiangte teh phataka zamin a om uhi. 7 Ahihhangin, muvanlai dang thupitak khat, kha hattak leh mul sautak nei, a om hi. Tua grepgui in a kisuanna mun apan a zungte tua muvanlai omna lam ah a zamsak a, a hiangte zong tui hip dingin amah lam ah a zamsak hi. 8 Hiangte zamsak a, gah a, grepgui hoih mahmah hong suah nadinga tui tampi kianga, lei hoihna muna kisuan ahi, chi ahi, chi in. 9 Israelte kiang ah: Toupa Tangtawn Pathian' thugen hiai ahi: Hiai grepgui hoihtakin a khang na diam? A keu gawp nadingin, kizung kalhin a gah a kiheusak diam? A hiang leh tehthakte a teem gawp ding. A zung tawh botkhe dingin banthahat leh mi tampi a kul kei ding. 10 Mundang ah kisuankhe mah leh a khang hoih tuan diam? Suahlam huih in hon nuai chiangin, vuaigawpin, a pouna mun apan a mangthang kei diam? a chi, chi in. 11 Tua khitin, Tangtawn Toupa' thu ka kiang ah hong tung a, 12 ama'n: Innkuan helhatte kiang ah: Hiai thilte bang genna hi hiam, na thei kei ua hia? chi in. Amaute kiang ah: Babulon kumpipa, Jerusalem ah a lut a, a kumpipa leh a miliante, Babulona tonpihin a pawmang hi. 13 Tua khitin, kumpi innsung mi khat a tonpih a, amah tawh thukhun a bawl a, a kichiamsak hi. Tua gam makaite zong a pawmang hi. 14 Tua banga a hihna bel, tua kumpigam hihniama a om a, dingkhe zou nawn lou a, hiai a thukhun bawl zui leia a hin liailiai nading ahi. 15 Ahihhangin, sakolte leh sepaih pawl tampi la dinga Aigupta gama palai sawlin, Israel kumpipa bel Babulon kumpipa tung ah a hel hi. A lawhching na diam? Hibang thilte hihpa a suakta na diam? Thukhun palsatin a suakta diam? chi in. 16 Ka hinna sialin ka gen ahi. Amah kumpitutphaha tusakpa, a kichiamna simmawhsakpa, leh a thukhun bawl palsatsakpa, tua kumpipa gam Babulon ah a si ding, chi-a Toupa Tangtawn Pathian in phuang ahi. 17 Hinna tampi hihmangthang dinga khawpi simna leiseh sang leh panmun a kikhawh chiangin, Faro leh a sepaihhon hat mahmahte leh mi tampite zaw kidouna phual ah amah adingin phatuam lou ding hi. 18 Ahang bel, ama'n thukhun palsat a, kichiamna simmawh hiven. Thu chiam dinga a khut pe napi a, hiai thilte khempeuh hih hiven, suakta peuhmah lou ding ahi. 19 Tua bang ahih manin, Toupa Tangtawn Pathian' thugen hiai ahi: Ka hinna sialin ka gen ahi. A simmawh tua kichiamna leh a palsat tua thukhun ama' tunga bung ding ka hi. 20 Amah lenthaang siah ding ing a, ka thaanga awk ding ahi. Amah kei adinga a muanhuai louh mana, Babulon tun ding ing a, tua-a gawtna thuaksak ding ka hi. 21 A taikek, a sepaihte khempeuh, namsaua puk ding uh a, a suaktasunte lah huih laka thehzak ding ka hi. Tua hun chiangin, kei, Tangtawn Toupa'n thu ka genta, chih na thei ding hi, chi ahi. 22 Toupa Tangtawn Pathian' thugen hiai ahi: Keimah mah in sidar sing dawna a selnou khat ka la ding a, ka suan ding. Tua selnou tungnungte-a a hiang ngek ngiingei khat ka khiaktan ding a, mual kitawi sangpi tung ah ka suan ding. 23 Tua Israel mual a sanna munte ah ka suan ding a, kahiangte a nei ding a, gah a suang ding a, sidar sing lianpi hong suak ding. Tua sing ah tungleng vasa nam kim in bute a sep ding uh a, a hiang liimte ah bukna a mu ding uhi. 24 Gamlak singte khempeuh in, kei, Tangtawn Toupa'n sing sangte ka lainiam a, sing niamte ka khangsangsak; sing hingte ka keusak a, singkeute ka hingsak, chih a thei ding uh. Kei, Tangtawn Toupa'n genkheta ing a, tangtun ding ka hi, chi ahi, chi in, a chi hi.
A Khial Mi Si ding
1 Tangtawn Toupa' thu ka kiang ah hong tung a, 2 ama'n: Israel gam tawh kisaia hiai paunak na gen uh bang na chihna uh ahia: Pate'n grepthuk ne uh a, tate ha zau, na chih uh? 3 Ka hinna sialin ka gen ahi. Israel gam sung ah hiai paunak na gen nawn kei ding uh, chi-a Toupa Tangtawn Pathian in phuang ahi. 4 Hinna nei mi peuhmah, pa hi-in tapa hita leh, a nih-un keia ahi. A khial mi ahi a si ding. 5 A dik a tang hih mi diktat khat om hi, chi ni. 6 Ama'n mualtung biakna inn ah ne lou. Israel innkawte' milimte lam zong nga lou, a invengpa zi hihbuah lou, numei sinei lai zong luppih lou hi. 7 Kuamah nuaisiah lou a, leibat thu-a kichiamna thil a lak pekik zaw hi. Kuamah lok lou a, gilkialte an piain, savuakte silh ding puan pe zaw hi. 8 Sumpung delhin leitawisak lou a, sumpung tamlua ngiat lou hi. Thil diklou hih dingin a khut kuansak lou a, mihing khat leh khat kal ah a dikin thu khen hi. 9 Ka danthusehte zui a, ka dante muanhuaitakin kem hi. Tua mi a diktat hi a, hing ngeingei ding hi, chi-a Toupa Tangtawn Pathian in phuang ahi. 10 Ama'n tapa hiamgam, sisan suah hat, ahih kei leh, thil gilou dangdang hih khat a nei, chi ni. 11 A pa'n tua bang thil himhim hih kei mahleh a tapa in a hih hi. Ama'n mualtung biakna innte ah ne a, a innvengpa' zi hihbuah hi. 12 Mizawngte leh tasamte nuaisiah a, mi lok hi. Leibat thu-a kichiamna thil a lak pekik lou a, milimte lam nga hi. A kihhuai thilte hih a, 13 sumpung delh in, sumpung tamlua ngiat hi. Tua bang mi a hing diam? A hing kei ding! A kihhuai thil hibangte a hih manin, thah ahi ngeingei ding a, a sisan mawh ama' tung a tu ding. 14 Ahihhangin, hiai tapa in tapa khat a nei chi ni. Hiai tapa in a pa' khelhna khempeuh a mu hi. Tuate mu napi-in, ama'n bel tua bang thil a hih kei hi. 15 Ama'n mualtung biakna innte ah ne lou a, Israel innkuan sunga milimte lam nga lou hi. A innvengpa' zi hihbuah lou a, 16 kuamah nuaisiah lou hi. Leibat thu ah zong kichiamna thil ngiat lou hi. Mi lok lou a, gilkialte an pe zaw a, savuakte silh ding puan pe zaw hi. 17 Khelhna apan a khut dokkik a, sumpung delha sumpung tamlua ngiat lou hi. Ka dante kem a, ka dan piakte zui hi. Amah, a pa' khelhna hangin a si kei ding a, a hing ngeingei ding. 18 Ahihhangin, a pa bel, ama' khelhna hang mahin a si ding. Ahang bel, ama'n sum laksuh a, a sanggam lok a, a mite laka a diklou thil hih hiven. 19 Hinapi-in, noute'n: Banghanga ama'n a pa' mawhna mawhpih lou ahia? chi-in non dong uhi. Tua tapa in a dik leh a tang hih a, ka danthusehte kem dinga pilvang hiven, hing ngeingei ding ahi. 20 A khial mi mah ahi a si ding pen. Tapa in a pa' mawhna mawhpih lou ding a, pa in zong a tapa mawhna mawhpih lou ding hi. Mi diktat diktatna ama' diktatna-a kisimsak ding a, Pathian limsaklou mi' pathian limsaklouhna zong ama' mawhna-a kisimsak ding hi. 21 Ahihhangin, migilou khat in khelhna a hihte khempeuh kiheisan henla, ka danthusehte khempeuh kem henla, a dik leh a tang hih leh, tua mi a hing ngeingei ding a, a si kei ding. 22 A tatlekna khatbeek zong ama' tung ah theihgige a hita kei ding. Thildik a hihte hangin a hing ding. 23 Migiloute' sihna ah ka kipak himhim ahia? A lampite uapan kiheia a hin chiangun ka kipak zaw keia hia? chi-a Toupa Tangtawn Pathian in phuang ahi. 24 Ahihhangin, midiktat khat, a diktatna apan kihei henla, khelhna hihin, Pathian limsaklou mi' thilhih kihhuaite hih leh a hing dia hia? Thil diktat a hihsate khat beek zong theihgige ahita kei ding. Muanhuailouhna mawhna-a mawh ahih man leh, a thil hihkhelhte hangin a si ding hi. 25 Hinapi-in, noute'n: Tangtawn Toupa' lampi a dik kei, na chi uhi. Israel innkawte aw, za un: Ka lampi diklou maw? Nou lampite hilou maw a diklou? 26 Mi diktat, a diktatna apan kihei a, khelhna a hih leh, tua khelhna hangin a si ding. Tua khelhna ahih mana si ding ahi. 27 Ahihhangin, migilou, gitlouhna a hihsa apan kihei a, a dik leh tang a hih leh, a hinna a hondam dine. 90 28 A tatlekna khempeuh ngaihtuah vengveng a, tuate kihhheisan ahih manin, a hing ngeingei ding a, a si kei ding. 29 Hinapi-in, Israel innkawte'n: Tangtawn Toupa' lampi a dik kei, na chi uh. Israel innkawte aw, ka lampite diklou maw? Nou lampite hilou maw a dik lou? 30 Tua bang ahih manin, Israel innkawte aw, na tung ua thu khen ding ing a, michih a gamtat bang zela thu khen ding ka hi, chi-a Toupa Tangtawn Pathian in phuang ahi. Lunghei un! Na tatlekna khempeuh uh kiheisan un. Tua hileh, na mawhna uh, na pukna uh hilou ding ahi. 31 Na tatleknate khempeuh uh nou apan paikhia unla, lungtang thak la unla, kha thak la un. Israel inkawte aw, banghanga si ding na hi ua? 32 Kuamah sihna-a kipak lou ka hi, Toupa Tangtawn Pathian in chi hi. Lunghei unla, hing un! a chi hi.
Israel Makaite Suuna Kahna
1 Israel makaite tawh kisai kahtam lou unla: 2 Na nu uh, humpinelkai laka humpinelkainu! Humpinelkai lunlaite laka kual a, a noute vaklian. 3 A noute laka khat vaklian a, humpinelkai hat hong suak. A samatte balzan dan sin a, mihing nangawn ne. 4 Namte'n a thu za uh a, a gumkhuak ua man uh. Sik ngakuaia kai a, Aigupta tun uh. 5 A lametna vuaksuak mu a, a lamet beita. A noute khat la nawn a, humpinelkai hata bawl. 6 Humpinelkaite laka gamta, humpinelkai hat hita ven. A samat balzan dan sin a, mihing nangawn ne. 7 A kulhpite uh phelgawp a, a khawpite uh hihsia. Gam leh a sungate khempeuh a humhamnain lausak. 8 Namte'n hong dou uh a, a kimkota gamte'n hong dou. A mat nading lenthaang zak uh a, guma kimanta. 9 Bawm sunga sik ngakuaia kailut uh a, Babulon kumpipa kiang tun uh. Suangkula khum uh a, a humham lah Israel mualte tunga kiza nawn lou. 10 Na nu uh, na grephuan ua grepgui bang hi a, tuigeia kisuan bang hi ahi. Tui kham ahih mana gahpha-a kapha hi. 11 A hiangte khauh a, kumpi chiang dinga ching hi. Sing leh loute sanga sangzaw a, a sanna leh kaphatna kimu thei mahmah. 12 Ahihhanga, hehluatna in bulkalh a, leilak denna-a, suahlam huihin mutvuai a, a gah teng heuta. A hiang khauhte teemta, mei in kangtumta. 13 Tuin gamdai-gamkeu, tui om loua keuna ah kisuan hi. 14 A hiang khat pan mei hong kuang a, a gahte kangtumta. Kumpi chiang dinga chin a hiangkhauh om nawn lou, chi un. Hiai kahla, kahtam loua sak ding ahi, a chi hi.
Helhat Israel
1 A kum sagihna, a kha ngana, a ni sawm ni-in Israel upate pawlkhat, Tangtawn Toupa apan thukan dingin hong hawh uh a, ka mai ah hong tu uhi. 2 Tua laiin, Tangtawn Toupa' thu ka kiang ah hong tung a, 3 ama'n: Mihing' tapa, Israel upate houpih inla, amaute kiang ah: Toupa Tangtawn Pathian' thugen hiai ahi: Kei apan thukan dingin nong pai u maw? Ka hinna sialin ka gen ahi. Kei apan thu kon kansak kei ding, chi-a Toupa Tangtawn Pathian in gen ahi, chi in. 4 Amaute tung ah thu na khen diam? Amaute tung ah thu na khen diam, mihing' tapa? Khen ding na hih leh, 5 a pu a pate uh gamtatna kihhuaite, a maitang uah gen inla, amaute kiang ah: Toupa Tangtawn Pathian' thugen hiai ahi: Israel ka teel ni-in, Jakob inkawte, a suante uh lama baan zaakin ka kichiam a, Aigupta gam ah amaute kiang ah ka kilaak hi. Baan zakin, amaute kiang ah: Kei, Tangtawn Toupa na Pathian uh ka hi, ka chi hi. 6 Tua ni-in, Aigupta gam apan amaute ka pikhe ding a, amaute adinga ka zonkhiak, nawitui leh khuaizu-a luang gam, gam teng laka gam kilawm pen ah, ka piilut ding chi-in, khut zakin ka kichiamta hi. 7 Amaute kiang ah: Mita enlahtaka na et et uh milim mannabeite paikhe chiat unla, Aigupta milimtein kihihbuah kei un. Kei, Tangtawn Toupa na Pathian uh ka hi, ka chi, chi ahi, chi-in gen in. 8 Ahihhangin, ka tung ah a hel uh a, hon ngaikhe kei uh. A etet uh Aigupta milim mannabeite a nuse kei uh. Tua bang ahih manin, amaute tung ah ka thangpaihna ka sungbaw ding a, Aigupta gam ah ka hehna amaute tung ah ka sungbei ding, ka chi hi. 9 Ahihhangin, ka min vangin, a tenna uh namte mitmuha ka min gensiata om lou dinga dai dingin thil ka hih hi. Tua namte mitmuhin, Israelte kiang ah ka kilaak hi. Tua bel, Aigupta gam apan amaute ka piikhiakna tungtawnin ahi. 10 Tua bangin, Aigupta gam apan amaute ka piikhia a, gamdai-gamkeu sung ah ka tun hi. 11 Ka danthusehte amaute ka pia a, ka dante amaute ka theisak hi. Ahang bel, tuate zui mi, tuate pansana nungta ding hiven. 12 Tua baan ah, kei Tangtawn Toupa'n amaute a siangthoua ka bawl ahi uh, chih a theih nadingun, koute kala chiamtehna hi dingin, ka Sabbathte amaute kiang ah ka pia hi. 13 Hinapi-in, tua gamdai-gamkeu sung ah, Israel mite ka tung ah a hel uh a, ka dankhunte leh ka dante zui mi, tuate pansana nungta ding hinapi, amaute'n ka danthusehte a zui kei uh a, ka dante a nolh uh a, ka Sabbathte a hihniin dimdem uhi. Tuachi-in, ka thangpaihna amaute tung ah ka sungbaw ding a, gamdai-gamkeu sung ah amaute ka hihmangthang ding, ka chi hi. 14 Ahihhangin, ka min gensiata om lou dinga dai ding thil ka hih hi. Tua namte mitmuha amaute piikhia hi vengin. 15 Tua baan ah, amaute ka piaksa tua nawitui leh khuaizu-a luang gam ah amaute ka piilut kei ding, chi-in gamdai-gamkeu sung ah baan zakin ka kichiam hi. 16 Ahang bel, amaute'n ka dante nolh a, ka danthusehte zui lou a, ka Sabbathte a hinit man uh ahi. Ahang bel a lungtangte uh, a milimte uh kianga kipumpiakkhin hiven. 17 Hinapi-in, hehpih khasiatnain amaute ka en a, gamdai-gamkeu ah amaute ka hihmangthang kei a, ka beisak kei hi. 18 Gamdai-gamkeu ah a tate uh kiang ah: Na pu na pate uh dante zui kei unla, a dante uh zui kei unla, a milimteun kihihniin sam kei un. 19 Kei Tangtawn Toupa na Pathian uh ka hi. Kei' danthusehte zui unla, ka dante pilvangtakin zui un. 20 Ka Sabbathte, noute leh kei kala chiamtehna hi dingin keem siangthou un. Tua hun chiangin, kei Tangtawn Toupa na Pathian uh ka hi, chih na thei ding uh, ka chi hi. 21 Ahihhangin, tua a tate uh ka tung ah a hel uh a, ka danthusehte a zui kei uh a, ka dante kem dingin a pilvang kei uh tuate zui mi lah tuate pansana nungta ding hinapi tuachi-in ka Sabbathte a hihnin uhi. Tua bang ahih manin, amaute tung ah ka thangpaihna ka sungbaw ding a, gamdai-gamkeu sung ah amaute tung ah ka hehna ka sungbei ding, ka chi hi. 22 Ahihhangin, ka min vangin ka khut ka dokkik a, mite ka piikhiak lai mita mu tua namte' maia ka min gensiat a hih louh nadinga dai ding thil ka hih hi. 23 Tua baan ah, namte lak ah amaute ka hawmzak ding a, gamte ah amaute ka thehzak ding, chi-in, tua gamdai-gamkeu sung ah amaute kiang ah, baan zakin ka kichiam lai hi. 24 Ahang bel, amaute'n ka dante zui lou uh a, ka danthusehte nolh zaw uh a, ka Sabbathte hihnin uh a, a mitte un a pu a pate uh' milimte lunggulha en nuam uh hiven. 25 Tua baan ah, danthuseh hoihloute leh a zuih zawhlouh ding uh dante zui dinga amaute pekhia ing a, 26 amaute mulkimna-a ka dimsak theih nading leh, kei Tangtawn Toupa ka hi, chih a theih nading ua, a thawnpiakte uh, tua a tamasa khempeuhte uh latna tungtawnin amaute ka hihnin hi. 27 Tua bang ahih manin, mihing' tapa, Israel mite houpih inla, amaute kiang ah: Toupa Tangtawn Pathian' thugen hiai ahi: Hiai thu ah zong na pu na pate un kei hon nutsiatna uh tungtawnin hon gensia uh: 28 Amaute piak dinga ka kichiam hialna gama ka piilut a, mualsang khatpeuh, sing bawkpha khatpeuh a muh chiangun, tua ah kithoihnate a lan uh a, kei hon hehsak dingin thillatte a lan uh a, a gimnamtuite uh a hal uh a, a dawn thillatte uh a laan uhi. 29 Tua hun chiangin, amaute kiang ah: Hiai na hawhna zel uh munsangte bang mahmah ahi ua ka chi? a chi, chi in. Tuni dongin hiai munte Bama a kichi hi.
Gawtna leh Tundingnawnna
30 Tua bang ahih manin, Israel innkawte kiang ah: Toupa' Tangtawn Pathian thugen hiai ahi: Na pu na pate uh hih banga, noumau kihihnin-in, a milim mannabeite uh na lunggulh ding ua hia? 31 Na thawnpiakte uh, tua na tapate uh meia na lat chiangun, tuni donga na milimte ua noumau kihihnin lailai na hi uhi. Israel innkawte aw, kei apan thu kon kansak dia hia? Ka hinna sialin ka gen ahi. Kei apan thu kon kansak kei ding, chi-a Toupa Tangtawn Pathian in phuang ahi. 32 Noute'n: Namte, leitunga omte, sing leh suang bete bat ka ut uh, na chi uh. Ahihhangin, lungsima na veite uh tangtung ngeilou ding ahi. 33 Ka hinna sialin ka gen ahi. Noute tung ah khut hatin leh baan zakin leh thangpaihna sungbuain vai ka hawm ding, chi-a Toupa Tangtawn Pathian in phuang ahi. 34 Namte lak apan kon piikhe ding a, thehthanga na omna uh gamte apan kon kaikhawm ding. Tua lah, khut hat leh, banzak leh thangpaihna sungbuain ka hih ding. 35 Namte' gamdai-gamkeu kon tun ding a, tua ah kimaituahin na tung uah thukhenna kon tun ding. 36 Aigupta gamdai-gamkeua na pu na pate uh tunga thukhenna ka tut bangin, noute tung ah thukhenna kon tun ding, chi-a Toupa Tangtawn Pathian in phuang ahi. 37 Ka chiang nuaia na paisuak chiangun, kon chiamteh ding a, thukhun in kon hen ding. 38 Kitoma ka tunga hehte, noute apanin ka lakhe ding a, kon siangsak ding. Amaute, a teenna gam uapan lakhe ding hi mah leng, Israel gam zaw a lut kei ding uh. Tua hun chiangin, kei, Tangtawn Toupa ka hi, chih na thei ding uh. 39 Israel innkawte aw, noute tawh kisai ahih leh, Toupa Tangtawn Pathian thugen hiai ahi: Pai unla, na vekun, na milimte uh nna sem un! Tua nung chiangin ka thu na ngaikhe ngeingei ding uh a, na thawnpiakte uleh milimteun ka min siangthou na ninsak nawn kei ding uhi. 40 Ahang bel, ka mual siangthou, Israel mual sang tua gam ah, Israel innkawte'n a vekpiun ka nna a sem ding uh a, tua ah amaute ka sang ding. Tua ah na thillatte uleh na thawnpiak hoihpente uh, na kithoihna siangthoute khempeuh utawh ka ngiat ding, chi-a Toupa Tangtawn Pathian in phuang ahi. 41 Namte lak apan kon piikhiak a, thehzaka na omna gamte uapan kon kaihkhawm chiangin, gimnamtui mahmah bangin noute kon sang ding a, namte' mitmuhin, noute lak ah a siangthouin ka kiensak ding. 42 Tua hun a, na pu na pate uh piak ding chi-a baan zaka ka chiam gam, tua Israel gama kon piilut chiangin, kei, Tangtawn Toupa ka hi, chih na thei ding uh. 43 Tua ah na kihihnitna gamtat uleh na thilhih khempeuh uh na theigige ding uh a, na gamtat giloute uh bangin na kikih ding uhi. 44 Israel' innkawte aw, na lampi hoihloute uleh na gamtatna uh kisesa bang hilou a, ka min vanga noute kon sai chiangin, kei Tangtawn Toupa ka hi, chih na thei ding uh, chi-a Toupa Tangtawn Pathian in phuang ahi, chi in, a chi hi.
Simlam Mawhsakna Genkholhna
45 Tangtawn Toupa' thu ka kiang ah hong tung a, 46 ama'n: Mihing' tapa, simlam nga inla, simlam mawhsa-in thu gen inla, simlam gammaang demin genkholhna gen in. 47 Simlam gammaang tung ah thu gen inla: Tangtawn Toupa' thu za un. Toupa Tangtawn Pathian' thugen hiai ahi: Noute meia hon hal dek ka hi. Na singkungte khempeuh uh, a hing hi-in a keu hita leh, hon kangtum vek ding ahi. Tua meikuang kiphelhmit lou ding a, leitung maikaih simlam apan mallam dong, kangkeu ding ahi. 48 Michih in, kei, Tangtawn Toupa'n tua mei ka tawhkuang hi a, kiphelhmit lou ding ahi, chih mu ding hi, chi ahi, chi in, a chi hi. 49 Tua khitin, ke'n: Maizen, Toupa Tangtawn Pathian! Ka tungthu gen a: Gentehna gen hi lei lou hia? hon chi uhi, ka chi hi.
Pathian1 Gawtna Namsau Babulon
1 Tangtawn Toupa' thu ka kiang ah hong tung a, 2 ama'n: Mihing' tapa, Jerusalem mawhsain ensal inla, tua munsiangthou douin thu gen in. Israel gam mawhsain thu gen inla, 3 a kiang ah: Tangtawn Toupa' thugen hiai ahi: Nang hon dou ka hi. Ka namsau a pai apan phawi ding ing a, nang apan a diktatte leh a giloute satkhe ding ka hi. 4 A diktatte leh a giloute satkhe ding ka hih mana, simlam apan mallam donga michih doua ka namsau phawisa-a om gige ding ahi. 5 Tua hun chianga, kei, Tangtawn Toupa'n ka namsau a pai apan phawita ing a, a paia kisiat nawn lou ding ahi, chih mi khempeuh in thei din^ uhi, chi ahi, chi in. 6 Tua bang ahih manin, mihing' tapa, thuumin mau in! Amaute' mai ah lungtang tamkham leh dah mahmahin mau in. 7 Banghanga mau na hia? chi-a hon dot chiangun, Hong tung ding thuthang hanga mau ka hi. Lungtang khempeuh zulgawp ding a, khut khempeuh zaw ding a, lungsim khempeuh sidang ding a, khuk khempeuh tui banga nem ding hiven, chi in. Hong tung ding ahi! Hong tung taktak ding, chi-a Toupa Tangtawn Pathian in phuang ahi, a chi hi. 8 Tangtawn Toupa' thu ka kiang ah hong tungkik a, 9 ama'n: Mihing' tapa, genkholhna gen inla: Tangtawn Toupa' thugen hiai ahi: Namsau, namsau tathiam leh nawttet 10 thah nadinga tathiam, khawphia banga tezolzol dinga nawttet! Ka tapa Judah' kumpichiang ah kipak thei ding i hi hia, namsau in lah tua bang chiang simmawh a? 11 Namsau bel nawttet dinga seh hi a, khuta sim dinga seh hi. Tathiam leh nawttet hi a, mithatpa khut adinga mansa-a kikoih ahi. 12 Kapkhia inla mau in, mihing' tapa aw, ka mite namsau in dou hiven. Israel makaite khempeuh dou hiven. Ka mite tawh namsau' satkhiak dinga piaka om uhi. Tua hangin awm kitumin om in. 13 Ze-etna hong tung ngeingei ding hi. Namsau in a simmawh tua Judah' kumpichiang om lailai kei leh, bangchita ding? chi-a Tangtawn Toupa Thuneipen in phuang ahi. 14 Tua bang ahih manin, mihing' tapa, genkholhna gen inla, na khut nuaituah in. Namsau in nihvei sat henla, thumvei nangawn sat hen. Thah nadinga kibawl namsau hi a, tampi mahmah thah nadinga kimkota umsuak hi. 15 Lungtangte zulgawp nading, a pukte lah tampi phak nading, amaute' kongpi tenga that dinga namsau pangsak hi'ng. Maizen! khawphia banga tezolzol ding a, thah nadinga namsau letkip ahi. 16 Namsau aw, taklam ah sat inla, tua chiangin veilam ah na ha hiam a kilekna lamlam ah. 17 Ken zong ka khut nuaituah ding ing a, ka thangpaihna hong dai ding hi, chi-a kei, Tangtawn Toupa'n genkhin ka hi, a chi hi. 18 Tangtawn Toupa' thu ka kiang ah hong tungkik a, 19 ama'n: Mihing' tapa, Babulon kumpipa' namsau' tot ding, gam kibang khat apan kipankhia lampi nih chiamteh in. Khawpi tung ding lampi a katkhiakna ah chiamtehna khuam phut in. 20 Amonte' Raba dou ding tua namsau tot ding lampi khat chiamteh inla, Judah gam kulhbaang nei Jerusalem dou ding lampi dang khat chiamteh in. 21 Babulon kumpipa, lampi-a lamka thuam ah hong khawl ding a, tua lampi nih katna ah, vaang etna chiamtehna zong dingin khawl ding hiven. Ama'n thaltangte zanga aisan ding a, a milimte thu dong ding a, aisanna sin en ding hi. 22 A khut taklam ah Jerusalem ai tu ding a, tua bel, baang phutvang nading zawlte a bawl ding, that dinga thu a piak ding, kidouna thu sama kikousak ding, kongpite phutvang nading zawlte bawl ding, khawpi dou nading lei sepsangsak ding, kidouna panmun sang bawlsak ding, chihna hi ding hi. 23 Ama' tunga muanhuaia toukai ding chi-a kichiamte adingin, tua bang chiamtehna, chiamtehna zuau bang ding a, ahihhanga, ama'n a mawhna uh theisak thak ding a, amaute sala kai ding hi, a chi hi. 24 Tua bang ahih manin, Toupa Tangtawn Pathian' thugen hiai ahi: Nou mipite'n a langtanga helna bawl a, na mawhna uh kitheisak, na thilhih khempeuh ua na khelhnate uh langsak na hih manun, ahi, hiai na hih manun, sala kaih na hi ding uhi. 25 Nang, Israel makai, a niin leh a gilou aw, na ni hong tungta, nang gawtna in a tawpkhawk phata. 26 Toupa Tangtawn Pathian' thugen hiai ahi: Dialkhip lakhia in, kumpilukhu lakhia in. Nidanglaia bang hi lou ding ahi. A niamte kitawisang ding a, a kitawisangte kiniamsak ding hi. 27 Siatna! Siatna! Ke'n a siatna tun ding ka hi! A neipa diktak kianga amah hongpai mateng kitungding nawn lou ding a, ke'n tua gam amah pe ding hi'ng, chi ahi. 28 Tua baan ah, nang Mihing' tapa, genkhol inla: Toupa Tangtawn Pathian in Amonte leh a zahlaknate utawh kisaia a gen hiai ahi: Namsau, namsau, thah nadinga kiphawisa, negai dinga kinawtsiang, khawphia bang dinga kinawtte! 29 Nang tawh kisaiin mengmuh taklou om mahleh, nang tawh kisaiin aisan zuau om mahleh, thah ding migiloute ngawng ah kinga ding hi. A ni uh hong tungta a, amaute gawtna hun tawpkhawk tungta hiven. 30 Namsau a pai ah siatnawn in, nang na khawlna mun, na pianna mun ah na tung ah gawtna hon tun ding ka hi. 31 Ka thangpaihna na tung ah sungbaw ding ing a, ka hehna huih na tunga nungsak ding ka hi. Huhamte' khuta hon pe ding ing a, hihsiat siamte khuta hon pe ding ka hi. 32 Thukkhuka meia khul ding singkhuah lei hi ding chin a, na gama na sisan kisuah ding a, theihgige hita lou ding na hi. Kei, Tangtawn Toupa'n genkhin hi vengin, chi ahi, chi in, a chi hi.
Jerusalem Khelhnate
1 Tua baan ah, Tangtawn Toupa' thu hong tung kik a, 2 ama'n: Nang mihing' tapa, a tung ah thu na khen diam? Hiai sisansuahhat khawpi tung ah thu na khen diam? A gamtatna kihhuaite tawh amah maituah inla: 3 Toupa Tangtawn Pathian' thugen hiai ahi: Na sunga sisan suahna leh milimte kibawla kihihnina siat kitut nang khawpi aw, na hun beina hong tung ding ahi, 4 sisan suahna leh na bawlsa milimte tungtawna kihihnin na hih mana mawh na hi. Na nite beisak chin a, na kumte tawpna hong tungta ahi. Tua bang ahih mana, namte' simmawh leh gam khempeuh' nuihzabuk hon suaksak ding ka hi. 5 A nai leh a gamla-a omte'n, nang buaina tawh kidim khawpi minthang aw, hon nuihsan ding uh ahi. 6 Na sunga om Israel makai peuhmah in sisan suah nadinga a vangletna zang ahi. 7 Na sunga nu leh pa simmawh uh a, na sunga gamdang mi nuaisiah uh a, pabeite leh meigongte mawkbawl uhi. 8 Ka thil siangthoute simmawh chin a, ka Sabbathte ninsak na hi. 9 Na sunga migensiat hatte'n sisan suah tum tinten uh a, mualtunga biakna inn-a an nete na sunga om uh a, zahmawh thil hih uhi. 10 A pate' uh lupnapi zahtak loute na sunga om uh a, numei sineia sianglou luppihte na sunga om uhi. 11 Na sunga pasal khat in a innveng tunga khelhna kihhuai hih a, a dang khat in a mounu zumhuai taka hihnin a, a dang khat in a sanggamnu, a pa' tanu suai hi. 12 Na sunga mite'n sisan suah dinga golhgukna ne uh a, sumpung delha sumpung tamlua ne chin a, na innveng sum suta punna diklou la na hi. Tua banga kei hon mangngilh na hi, chi-a Toupa Tangtawn Pathian in phuang ahi. 13 Punna diklou na lakna tung leh na sunga sisan na suahna tunga ka khut nuaituah ding ka hi. 14 Na hansanna in tua thuakzou ding maw? Ahih kei leh, nang kon sai ni chianga na bantha hatna kiching ding hia? Kei, Tangtawn Toupa'n genkhinta ing a, hih taktak ding ka hi. 15 Namte laka hon thehzak ding ing a, gamte kianga hon thehzak ding ka hi. Tua banga na sianthou louhna beisak ding ka hi. 16 Namte mitmuha hihnit na hihkhit chianga, kei, Tangtawn Toupa ka hi, chih thei ding na hi, chi ahi, chi in, a chi hi. 17 Tua khitin, Tangtawn Toupa' thu ka kiang ah hong tung kik a, 18 ama'n: Mihing' tapa, Israel innkawte kei adingin sik eksia hong suak uh a, a vekpiun dai sik, tin sik, sik leh hak sik, meipi sunga paih bang uhi. Amaute ngun eksia lei hi uhi. 19 Tua bang ahih mana Toupa Tangtawn Pathian' thugen hiai ahi: Na vekpi ua sik eksia nong suah man ua, Jerusalema hon kaikhawm ding ka hi. 20 Mi'n ngun, dai, sik, hak leh tin haltui dinga meiphualpi sunga a koihkhawm banga, ka hehna leh ka thangpaihna sunga hon koih ding ing a, hon haltui ding ka hi. 21 Hon kaikhawm ding ing a, ka thangpaihna meikuanga hon hul ding ing a, khawpi sunga tuigawp ding na hi uh. 22 Haltuina meiphualpi-a ngun a kihaltui banga, khawpi sunga haltuia om ding uchin a, kei, Tangtawn Toupa'n na tung ua ka thangpaihna sungbua ka hi, chih thei ding na hi uh, chi ahi, chi in, a chi hi. 23 Tangtawn Toupa thu ka kiang ah hong tung kik a, 24 ama'n: Mihing' tapa, gam kiang ah thu gen inla: Nang, thangpaihna ni-a vuahtui lah mu lou, vuahzu lah mu lou gam na hi, chi in. 25 Humpinelkai humham in a samat a botzan banga, a sunga a kamsangte laka thilsia simsawmna om ahi. Amaute'n mite negai uh a, goute leh thil manphate la uh a, a sunga meigong tampi bawl uhi. 26 A siampite'n ka dan palsat uh a, ka thil siangthoute niinsak uh a, a zek leh a nautang khen lou uhi. A siang leh a sianglou kibatlouhna om chih sinsak lou uhi. Tua baan ah, ka Sabbathte tang lou dinga mitsinsan uh a, amaute laka gensiata om hi'ng. 27 A sunga a uliante, a samat uh botzan ngiate bang uh a, punna diklou delha sisan suah uh a, mite that uhi. 28 A kamsangte'n mengmuhna taklou leh aisanna zuaua hiai thilhihte amau adinga selguksak uhi. Tangtawn Toupa'n thu gen lou napi, amaute'n: Toupa Tangtawn Pathian thugen hiai ahi, chi uhi. 29 Tua gam mite'n sum kimawksuhna leh kilawh na hih uh a, mizawngte leh tasamte nuaisiah uh a, gamdang mite mawkbawl uh a, a dika thukhenna bawlsak lou uhi. 30 Gam ka hihmanthat a kul louh nadinga kulhbaang lam ding leh tua banga vauna-a gam sik leh tanga ka maia ding ding mi, amaute laka zong ing a, ahihhanga khat beek mu lou ka hi. 31 Tua hanga amaute tunga ka thangpaihna sungbaw ding ing a, a thilhihte khempeuh uh amau lutung tusak a, ka hehna meikuanga amaute kangtumsak ding ka hi, chi-a Toupa Tangtawn Pathian in gen ahi, chi ahi, chi in.
Kizuak Unau Numei Nihte
1 Tangtawn Toupa' thu ka kiang ah hong tung a, 2 ama'n: Mihing' tapa, nu khat suan numei nih om hi. 3 Amaute Aigupta gam ah kizuak hong suak uh a, a tuailai uapan kizuak uhi. Tua gam ah a nawite uh kimeksak a, a ang siangthoute uh kizawtsak hi. 4 A uzaw pen' min Ohola hi a, a sanggamnu' min Oholiba ahi. Amaute keia hi uh a, amaute'n tapate leh tanute nei uhi. Ohola bel Samaria hi a, Oholiba lah Jerusalem ahi. 5 Ohola keia a hih lailaia kizuak a, ama'n a angkawmpih Asuriate lunggulh hi. Amaute galhat, 6 a duma kizem, ukpipate leh sepaihhon makaite hi uh a, tangval melhoih, sakoltung tuan siam hi vek uhi. 7 Amah Asuria mihoihte khempeuh kianga kizuak a, lunggulha a delh milimte khempeuh-a kihihnin gawp hi. 8 Mite'n a tuailaia a luppih ua, a ang siangthou a zawtsak ua, a tunga a mi lunggulhna uh a sunbuak ua, Aigupta gama a patsa a kizuakna tawpsan lou hi. 9 Tua bang a hih mana, ke'n amah luppih, tua a lunggulh Asuriate khuta pekhia ka hi. 10 Ama' puansilhte suahkhia a, savuaka koih uh a, a tapate leh tanute lakmangsak uh a, amah namsaua that uhi. Amah, numeite laka paunak hong suak a, a tunga gawtna kitun hi. 11 A sanggamnu Oholiba in hiai a mu a, hinapi-in, a hukna leh kizuakna ah, a sanggamnu sangin a uang zaw hi. 12 Ama' n zong Asuriate, tua ukpipate leh sepaih makaite, galhat kigalvante, sakoltungtuangte, a melhoih ngenta, a lunggulh hi. 13 Amah zong a kihihnin gawp chih ka mu. A nihun lampi khat a tawnkhawm uhi. 14 Ahihhangin, amah a angkawmna ah a uangtat zaw hi. Baanga pasal lim kigelhte, Kaldaite lim, a sana kigelh, 15 a kawng ua kawnggaksa leh a lutung ua dialkhip kainiapniapte a mu hi. Amaute khempeuh Kaldaia teeng, Babulonte' makaite a bang uhi. 16 Ama'n amaute a muh phetin, amaute a lunggulh a, Kaldai gam ah, amaute kiang ah, thupawte a sawl hi. 17 Tua khitin, Babulonte amah kiang ah, lupkhawmna lupna ah, hong hawh uh a, a lannaun amah a buahsak uhi. Amah hihbuaha a omkhitin, amaute a kiheisan hi. 18 Ama'n a langtanga kizuakna a hih a, a vuaktanna a latsak laiin, a sanggamnu ka kiheisan bangin, amah ka kiheisan hi. 19 Hinapi-in, a tuailai nitea Aigupta gama a kizuak lai nite phawkthakin, hong paktat semsem hi. 20 Tua ah amah luppihte a lunggulh hi. Amaute' zahmawhte lah sabiltunga bang a, a bawpawtte ulah sakola bang ahi. 21 Tua bangin, Aigupta gama na ang hon zawtsak ua, na nawi hon meksak lai uh, na tuailai paktatna lunggulh na hi, a chi hi. 22 Tua bang ahih manin, Oholiba, Toupa Tangtawn Pathian' thugen hiai ahi: Kih-a na kiheisansa, tua hon luppihte, nang hon dou dinga tokthou ding ing a, kilchih apan nang hon dousak ding ka hi. 23 Amaute, Babulonte, Kaldaite khempeuh leh Pekod leh Shoa leh Koa mite leh Asuriate khempeuh, tangval melhoihte, ukpipate, sepaihhon makaite leh dinmun sangte, sakoltungtuangte hi vek uhi. 24 Amaute, galvan tawh galdouna kangtalaite tawh, kangtalaite tawh, mi tampi tawh, nang dou dingin hong kuan ding uhi. Lumlian leh lumneu tawiin, siklukhu khuin, na kimkot ah panmun a khawh ding uh. Noute gawtnain amaute' khutsung ah kon pelut ding a, amau' migawtdan ngeinain hon gawt ding uhi. 25 Thikthusia-a ka hehna na tung ah ka bung ding a, amaute'n heh mahmahin hon nuai ding uhi. Na nakte, na bilte a satkhe ding uh a, nutsiata omte namsauin a puk ding uhi. Na tapate, na tanute a kaimang ding uh a, nutsiata omte meiin hon kangtum ding hi. 26 Na puante hon suahkhiaksak ding uh a, na kizepna van manphate a la ding uh. 27 Tua bangin, Aigupta gama na patsa na paktatna leh na kizuakna ka tawpsak ding. Hiai thilte lunggulhin na en nawn kei ding a, Aigupta gam zong na theigige kei ding hi, chi ahi. 28 Ahang bel, Toupa Tangtawn Pathian' thugen hiai ahi: Na muhdahte uh, kiha na kiheisante uh khuta hon pelut ding ing a, 29 amaute'n mudaha na tung ua gamta ding uh a, na sepgah khempeuh lamang ding uhi. Vuaktang leh savuaka hon nuse ding uh a, na kizuakna zumhuaina dawk ding hi. Na paktatna leh na zumhuaina gamtat in 30 na tunga hiai hon tun ahi. Namte lunggulh a, a milimte ua na kihihbuah man ahi. 31 Na sanggamnu' lampi tawn chin a, ke'n na khuta ama' nou koih ka hi, chi hiven. 32 Toupa Tangtawn Pathian' thugen hiai ahi: Na sanggamnu' nou, nou lianpi leh thukpi dawn ding chin a, tua in simmawhna leh nuihsanna hon tun ding hi. Tua noua tampitak ta hiven. 33 Zukham leh lungkhama om ding na hi. Tua nou mulkimna leh siatna nou, na sanggamnu Samaria' nou hiven. 34 Dawn ding chin a, dawnkang ding na hi. Tua nou paitam ding chin a, na nawi liamsak ding na hi. Ken genkhinta hi vengin, chi-a Toupa Tangtawn Pathian in phuang ahi, chi ahi. 35 Tua bang ahih manin, Toupa Tangtawn Pathian' thugen hiai ahi: Kei hon mangngilhta a, hon nungngat na hih chiangin, na paktatna leh na kizuakna mawh na khu ding hi, chi ahi, a chi hi. 36 Tangtawn Toupa' thu ka kiang ah hong tung kik a, ama'n: Mihing' tapa, Ohola leh Oholiba tung ah thu na khen diam? Na khen ding leh, a gamtat zumhuaitein amaute maituah in, 37 amaute'n angkawmna hih uh a, a khut ua sisan baang hiven. 39 A milimte utawh ang kikawm uh a, kei adinga hon neihsak uh a tate nangawn uh, milimte' an dinga laan uh hiven. 38 Kei tunga zong hibang mah hih uh a, tua hun mahin ka munsiangthou hihbuah uh a, ka Sabbathte hihniin uhi. 39 A milimte uh maia a tate uh a lat ni ua, ka mun siangthou sunga lut uh a, hihbuah uhi. Ka inn sunga a thilhih uh tuabang ahi. 40 Gamlapi apan hong pai mite adinga thupawte nangawn sawl uh a, a hong tun chiang ua, amaute adinga kisilsiang uchin a, na mitte uh mitnuha nuh uchin a, kizepna manphate bun a, bat na hi uh. 41 Tutna sau hoih tunga tu a, na mai ua dawhkan dawh a, a tunga ka gim namtui leh sathau koih na hi uhi. 42 Bangmah khual lou mipite' husa a kimkota om a, gamdai-gamkeu apan Sabeate tawh mi nautangte hon tonpih uhi. Tua Sabeate'n a baan ua tau bun uh a, a lutung ua kumpilukhu kilawmtakte khu uhi. 43 Tua khita ke'n kizuakna-a bahgawppen' thu gen ing a: Tu'n amah kizuakin bawl uhen, a hihna mah hiven, chi ka hi. 44 Tuachi-in, amah luppih uhi. Mi'n kizuak a luppih banga, numei paktat Ohola leh Oholiba luppih uhi. 45 Ahihhangin, amaute angkawmhat hi uh a, a khut ua sisan om ahih mana mi diktatte'n angkawm hat leh sisan suah numeite gawtna-a gawt ding uhi, chi ahi. 46 Toupa Tangtawn Pathian' thugen hiai ahi: Amaute dou dingin mipi kaikhawm unla, mulkimtaka pimang ding leh gallak sum hi dingin pekhia un. 47 Mipite'n amaute suanga deng ding uh a, namsaua vatpai ding uhi. A tapate uleh tanute that ding uh a, a innte uh haltum ding uhi. 48 Tua banga, gam sung apan paktatna beisak ding ing a, numeite khempeuh in vauhilhna a saan theih ua, noute' gamtat hon etton louh theih nading uh hi ding hi. 49 Na paktatna gah uh thuak ding uchin a, na milimbiak khelhnate uh gah thuak ding na hi uh. Tua hun chiangin, kei, Toupa Tangtawn Pathian ka hi, chih na thei ding uh, chi ahi.
Anhuanna Beel
1 A kum kuana, a kha sawmna, a ni sawm ni-in, Tangtawn Toupa' thu a kiang ah hong tung a, 2 ama'n: Mihing tapa, Babulon kumpipa'n hiai ni mahmaha Jerusalem khawpi sim ahih manin, hiai ni, hiai ni mahmah gelhkhiain chiamteh in. 3 Hiai helhat innkuante I kiang ah gentehna khat gen inla, amaute kiang ah: Toupa Tangtawn Pathian' thugen hiai ahi: An beel suang in, suang inla, tui leih in. 4 A sung ah sa atnen kha inla, a sa hoihte khempeuh, a khe leh a Hang kha in. A guh hoih ngenin tua beel dimsak in. 5 Belamhon laka hoihpen la inla, tua guhte huan nadingin, a nuai ah sing chih inla, tua beel sousak inla, a sung ah tua guhte huan in. 6 Ahang bel, Toupa Tangtawn Pathian' thugen hiai ahi: Sisan suahna khawpi tung a gik! A sunga ankhing belh beel tung a gik! Tua ankhing belhna bei lou ding hiven! amaute adia aisan louin a themthemin lakhia in. 7 Ahang bel, a sunga sisan suah a, suangpi tunga sung hiven. Leivui in a khuh dinga leilaka sungbaw lou hiven. 8 Thangpaihna tokthou a, phuba la ding a, a sisan suangpi tunga sung ka hi, a kikhuh louh nading ahi. 9 Tua bang ahih manin, Toupa Tangtawn Pathian' thugen hiai ahi: Sisan suahna khawpi tung a gik! Ke'n zong singkhuah se sang ding ka hi. 10 Tuachi-in, singkhuah chih thuah inla, mei tawh kuang in. Hoihtakin sa huan inla, a limsak ding mehnam hel in, a guhte kaang hen. 11 Tua khit chiangin, a beel vuak hong sa a, sumsan a ap mateng, tua bel vuak meiam tung ah tung in. A nitnate tuisuak a, a kheengte a katbei nading ahi. 12 Nakpitaka panna khempeuh vuaksuak a, a sunga omte kilakhe lou a, mei nangawn in lakhe lou hi. 13 Tua sianlouhna pen paktatna ahi. Hon siansak tum ing a, ahihhanga na sianlouhna apan siansak na ut louh mana, na tunga ka thangpaihna a daih mateng siang nawn lou ding na hi. 14 Kei, Tangtawn Toupa'n genkhinta ka hi. Ka gamtat hun hong tungta, tawpkik lou ding ka hi. Lainatna nei lou ding ing a, lunghei sam lou ding ka hi. Na gamtatna leh na thilhih tawh kiguna gawt hiding na hi, chi-a Toupa Tangtawn Pathian in phuang ahi, chi ahi, chi in.
Ezekiel' Zi Sihna
15 Tangtawn Toupa' thu ka kiang ah hong tung a, 16 ama'n: Mihing' tapa, na mit hon taisak pen khatvei thil thu-a nang apan lamang ding ka hi. Hinapi-in, amah suun kenla, kap zong kap kenla, khitui zong luangsak het ken. 17 Dai didein thuum hithit lei in. Misite suun ken. Na dialkhip kiptakin khim inla, na khedapte bun in. Na maitang nuailam khuh kenla, sisuunte annek sek zong ne ken, a chi hi. 18 Tuachi-in, zingsangin mite ka houpih a, nitaklamin ka zi a si hi. A zing chiangin, thupiaka ka om bangin ka hih hi. 19 Tua khitin, mite'n: Hiai thil na hihte'n koute tawh kisaina bang nei ahia, non hilh kei dia hia? chi-in hong dong uhi. 20 Tuachi-in, ke'n amaute kiang ah: Tangtawn Toupa thu ka kiang ah hong tung a, 21 ama'n: Israel innkawte kiang ah: Toupa Tangtawn Pathian' thugen hiai ahi: Na kisaktheihpih mahmah ua na mit taina uh, na it uh tua kulhpi, ka mun siangthou hihnin dek ka hi. Na nung ua na nutsiat uh na tapate uleh tanute, namsauin a puk ding uh. 22 Tua chiangin, kei hih bangbangin na hih ding uh. Na maitang uh nuailam na khuh kei ding uh. Sisuunte annek zong na ne kei ding uh. 23 Na dialkhipte uh kiptakin na khim ding uh a, na khe uah khedap na bun ding uh. Na suun kei ding uh a, na kap kei ding uh. Na khelhnate uh hangin na teemgawp ding uh a, noute lak ah thuumin na mau zaw ding uh. 24 Noute adingin, Ezekiel, chiamtehna ahi ding a, ama' hihte khempeuh bangbangin na hih ding uh. Hibang thil hong tun chiangin, kei, Toupa Tangtawn Pathian ka hi, chih na thei ding uh, chi ahi, chi in. 25 Nang, mihing' tapa, a lungnopna uh leh thupina uh, a mittaina uh, a lungtang uh' lunggulh tua kulhpi, a tapate uleh tanute utawh ka lakmang ni chiangin, 26 tua ni chiangin, gala suakta mi vakthap khat in tua thu hong hilh ding hi. 27 Tua hun chiangin, na kam ka ding a, amah na houpih ding a, na daai maimai nawn kei ding. Tuachi-in, amaute adingin chiamtehna na hi ding a, kei, Tangtawn Toupa ka hi, chih a thei ding uhi, a chi hi.
Amon Mawhsakna Genkholhna
1 Tangtawn Toupa' thu ka kiang ah hong tung a, 2 ama'n: Mihing' tapa, Amonte mawhsain ensal inla, amaute mawhsakna genkholhna gen in. 3 Amaute kiang ah: Toupa Tangtawn Pathian' thu za un. Tangtawn Toupa Thuneipen' thugen hiai ahi: Ka munsiangthou a kihihbuah laia, Israel gam kihihsiat laia, Judah mite sala a kipimang laia, tuate tawh kisaia, Awi ing e! na chih manun, 4 ke'n zong Suahlam mite' neih dinga a khut ua hon pekhe ding ka hi. Amaute'n noute' laka giahphualte sat a, puanbukte kai ding uh a, na theigahte uh ne ding uh a, na bawngnawitui uh dawn ding uhi. 5 Raba lah sangawngsaute' gamtatna suaksak ding ing a, Amon lah belamte khawlna mun suaksak ding ka hi. Tua hun chiangin, kei Tangtawn Toupa ka hi, chih na thei ding uhi. 6 Ahangbel, Toupa Tangtawn Pathian' thugen hiai ahi: Israel gam dou a, a sia na deihsakna lungtang khempeuh tawh kipaka khutbenga khe na tah man ua, 7 noute doua ka khut zankhe ding ing a, namte laka gallak suma hon pekhe ding ka hi. Namte lak apan hon satkhe ding ing a, gamte apan hon beisak ding ka hi. Hon hihmangthang ding ing a, kei Tangtawn Toupa ka hi, chih thei ding na hi uh, chi ahi, chi in, a chi hi.
Moab Mawhsakna Genkholhna
8 Toupa Tangtawn Pathian' thugen hiai ahi: Moab leh Seir in: En un, Judah inkuante, nam dangte khempeuh bangta uh, a chih man un, 9 ngai un, Moab pangkhat ka dawksak ding a, a gamgi-a khuate, Beth Jeshimoth, Baal Meon leh Kiriathaim, tua gam thupinate ah ka pan ding. 10 Suahlam mite' neih dingin Moab leh Amonte ka pekhe ding a, tuachi-in, namte lak ah Amonte theihgige ahita kei ding uh a, 11 Moab tung ah gawtna ka tun ding. Tua hun chiangin, kei, Tangtawn Toupa ka hi, chih a thei ding uh, a chi hi.
Edom Mawhsakna Genkholhna
12 Toupa Tangtawn Pathian' thugen hiai ahi: Edom in Judah innkawte tunga phuba a lak a, tua bang hiha, mawh mahmah ahih manin, 13 Toupa Tangtawn Pathian' thugen hiai ahi: Ke'n zong Edom tung ah ka khut ka lik ding a, a mite leh a gantate ka satkhe ding a, gamsia ka suaksak ding. Teman apan Dedan dong namsauin a puk ding uh. 14 Ka mi Israelte khut tungtawnin phuba ka la ding a, ka hehna leh ka thangpaihna bang bangin Edom tung ah a gamta ding uh. Ka phulakna ahi, chih a thei ding uh, chi-a Toupa Tangtawn Pathian in phuang ahi, a chi hi.
Filistia Mawhsakna Genkholhna
15 Toupa Tangtawn Pathian' thugen hiai ahi: Filisitiate'n nasetaka gamta a, lungtanga a sia deihsakna tawh phuba la uh a, tanglai pan a neih uh hehna tawh Judah hihmanthat sawm ahih manun, 16 Toupa Tangtawn Pathian' thugen hiai ahi: Filistiate tunga khut lik dek ka hi. Kerethte satkhe ding ing a, tuipi geia suaktate hihmangthang ding ka hi. 17 Amaute tunga nasetaka phuba la ding ing a, ka thangpaihna-a amaute gawt ding ka hi. Amaute tunga phuba ka lak hun chianga, amaute'n, kei, Tangtawn Toupa ka hi, chih thei ding uh ahi, a chi hi.
Tura Mawhsakna Genkholhna
1 A kum sawm leh khatna, tua kha, a ni khat ni-in, Tangtawn Toupa' thu ka kiang ah hong tung a, 2 ama'n: Mihing tapa, Tura in Jerusalem tawh kisaia: Awi ing e! Namte lutna kongpi kiseta a, kei adinga a kongkhakte kihongta a, tua khawpi kise dimdem a, kei tan hoih ding hita, a chih manin, 3 Toupa Tangtawn Pathian' thugen hiai ahi, ama'n: Tura aw, kon dou ahi. Tuipi in a tuihualte a vawksang bangin, nang dou dingin nam tampi kon tonpih ding. 4 Amaute'n Tura kulhbaang a hihse ding uh a, a insangte a laichim ding uh. A thil kisete ka kheuhsiang ding a, paankailou suangpi ka suaksak ding. 5 Tuipi gei lah, len phouna lei a suak ding, ke'n thu genkhin hi vengin, chi-a Toupa Tangtawn Pathian in phuang ahi. Namte' gallak sum a suak ding a, 6 gamsunga tenna munte, namsau in a negai ding. Tua hun chiangin, kei, Tangtawn Toupa ka hi, chih a thei ding uh. 7 Ahang bel, Toupa Tangtawn Pathian' thugen hiai ahi: Ngai in, mallam apanin kumpite' kumpipa, Babulon kumpipa Nebukhadnezar, sakolte leh kidouna kangtalaite tawh sakoltungtuangte leh sepaihhon tampi tawh, Tura dou dinga hon pii ding ka hi. 8 Ama'n gamsunga tenna munte, namsaua vatmai ding a, nang douna ding lamtou ding a, na kulhbaanga lei sepsangtou ding a, nang doua a lumte liktou ding ahi. 9 Ama'n na kulhbaang phutgawp nading zawlpite-a hon sun ding a, a galvante-a na insangte sawichim ding hi. 10 Ama' sakolte tamluat mana, leivui in hon khuh ding a, kidouna sakolte, vanpuakna kangtalite leh kidouna kangtalaite' husa in na kulhbaangte lingsak ding hi. Khawpi kulhbaangte kisuvanga mite a lut banga, na kongpite-a amah hong lut chianga tua banga om ding hi. 11 A sakolte' khechinte'n na kongzingte khempeuh tuan ding a, ama'n na mite namsaua that ding a, na khuampi liante leilaka puk ding hi. 12 Amaute'n na hauhna hon lok ding uh a, na zuaksumte hon guksak ding uhi. Na kulhbaangte laichim ding uh a, na inn hoihte phelgawp ding uh a, na suangte, na singtumte leh na vankisete tuipi-a pailut ding uhi. 13 Ke' n na lasak husate uh daisak ding ing a, na kaihgingte uh kiza nawn lou ding hi. 14 Paankailou suangpi savuak hon suaksak ding ing a, len phouna mun hita ding na hi. Lamthak hi ngei nawn lou ding na hi, kei, Tangtawn Toupa'n genkhin hi vengin, chi-a Toupa Tangtawn Pathian in phuang hi. 15 Toupa Tangtawn Pathian in Tura kianga a thugen hiai ahi: Na sunga a liamte thum leh maua om a, kithahna a om chianga, nang na puk ging za-a, tuipi gei gamte ling lou ding hia? 16 Tua hun chianga tuipigei gama kumpite khempeuh a kumpitutphah uapan hong kumkhe ding uh a, a kumpipuante uh suahkhe ding uh a, a puansilh zephoihte uh suahkhe ding uhi. Mulkimna silha leilaka tu ding uh a, liing liing ding uh a, nang mulkimhuai hon sa ding uhi. 17 Tua hun chianga, nang tawh kisaia kahtam lou ding uh a, na kianga: Nang khawpi minthang aw, hihsiat hi na mai chia, tuipi-a khawsate' teenna hi mah vechin! Nang leh na khawmite, tuipi tunga vanglian hi mah ve uchin, tua-a teengte' lauh hi chin a! 18 Tu'n lah, na puk ni-in, tuipigei gamte liingta, tuipi-a tuikulh gamte na chipna ah mulkimta, chi ding uhi. 19 Toupa Tangtawn Pathian' thugen hiai ahi: Khawpi loihsa, kuamah teen louhna kon suahsak chiang leh, luipi thuktaka kon khuhsak a, tuite'n hon tup chiangin, 20 tua hun chiangin, hankhuka lutsukte tawh kon lutsuksak ding a, tanglai mite kiang na tungsuk ding uhi. Tanglai mun sesa-a teeng bangin, hankhuka luutsukte tawh, nuailam lei sung ah kon teengsak ding a, nong kik nawn kei ding uh. A nungtate' gam ka thupisak ding. 21 Beina mulkimhuai ah kon tun ding a, na om nawn kei ding uh. Zonin na om ding uh a, ahihhangin muhin na om ngei nawn het kei ding uh, chi-a Toupa Tangtawn Pathian in phuang ahi, a chi hi.
Tura Suuna Kahtam Lawhna
1 Tangtawn Toupa'thu ka kiang ah hong tung kik a, 2 ama'n: Mihing tapa, Tura tawh kisaiin kahtam lou in. 3 Tui naihna kongpi-a om Tura, tuipigei gam tampi-a mite' sumsinpa kiang ah: Toupa Tangtawn Pathian' thugen hiai ahi: Tura aw, nang: Kei, melkilawmna bukim nei hi'ng na chi. 4 Na ukna gam tuipi tung hi a, na innlam mite'n na melkilawmna bukimsak uhi. 5 Amaute'n Seir apan meilah singin singtumte bawl uh a, Lebanon apan sidar singin nang ading longmung bawl uhi. 6 Bashan apan tawsaw singin long kalhnate bawl uh a, Kupra tuipigei apan saipres singin, na longtung suai bawl uh a, saiha phahkhum uhi. 7 Aigupta apan puan malngat zephoih na long puanzak hi a, tua mah na puanlapin kizang hi. Elisha tuipigei gamte apan na liimsunte a dum leh sandup hi uhi. 8 Sidon leh Arvad mite, longkalte hi uh a, Tura aw, na khutsiamte, na longpute-a pangin long ah tuang uhi. 9 Gebal khutsiam a pii leh upate long zutbita pangin, long ah tuang uhi. Tuipi-a longte khempeuh leh longpute nang tawh sum kisin dingin hong kuan uhi. 10 Persia leh Libia leh Put mite, na sepaihhon lak ah pang uh a, a lumte uh, a siklukhute uh na baang ah khai uh a, thupina hon tun uhi. 11 Arvad mite leh na sepaihte'n na kimkot ah na kulhbaang ching uh a, na galhangte'n na galvil insangte veng uhi. A lumte uh na baang ah khai uh a, na melkilawmna bukimsak uhi. 12 Nang zuaksum na hauh manin, Tarshish in nang tawh kal ah sum a sin a, na ngun, sik, tin leh haak in na zuaksumte hong kheng hi. 13 Grik apan Tubal leh Meshekh gam in nang tawh kal ah sum a sin uh a, salte leh sumsan vantein na zuaksumte hong kheng uhi, 14 Togarma mite'n sakol nasemte, galdou sakolte leh sabiltungte in na zuaksumte hong kheng uhi. 15 Rhodite'n nang tawh sum a kisintuah uh a, tuipigei gam tampite, na van leite ahi uh a, saiha leh eboni sing in na van hong lei uhi. 16 Na gama piang tampite deihin, Aram in nang tawh kal ah sum a sin hi. Suangmanpha, khau sandup, puan zep, puan malngat, tuikep, rubi suang in na zuaksumte hong kheng hi. 17 Judah leh Israel in nang tawh kal ah sum a sin uh a, Minith apan huitbuh, nektheih thilkhumte, khuaizu, sathau leh kizutna damdawi in na zuaksumte hong kheng uhi. 18 Na gam gah leh na van hauhna thupitak bangin, Damaska in Helbon zu leh Zahar samulte in nang tawh kal ah sum a sin hi. 19 Uzal apan Dante leh Grikte'n na zuaksumte hong lei uh a, sikseksa, singguithak leh kawltu in na vante hong kheng uhi. 20 Dedan in sakol tuanphahpuante in nang tawh kal ah sum a sin hi. 21 Arabia leh Kedar kumpite khempeuh na van leite ahi uh a, amaute'n belamnoute, belamtalte leh kelte hon zuak uhi. 22 Sheba leh Raama sumsinmite'n nang tawh kal ah sum a sin uh a, gim namtui hoih namkim leh suangmanpha leh khamin na vante hong kheng uhi. 23 Haran, Kane leh Eden, tua chiangin Sheba, Ashur leh Kilmad sumsinte'n, nang tawh kal ah sum a sin uh a, 24 na sumsinna mun ah puansilh kilawmte, khau dumte, puan zep hoihte leh suala phah puan zetuamtuama gial, a kaihna khau hual leh kiptaka kikhihbawkte tawh kithuahte hong zuak uhi. 25 Tarshish longte na van puain pang uh a, Tuipi lai ah van gikpi tawh na kidim hi. 26 Na long kalte'n tuipi hon tun uh a, hinapi-in, suahlam huih in tuipi laizang ah hon mutzan ding hi. 27 Na hauhna, na zuaksum leh vante, na longpute, tuipi tungthu theite, long kemte, na sumsinmite, na sepaihte khempeuh leh longa tuang dangte khempeuh, na long siatni-in tuipi sung thuk ah kelum ding uhi. 28 Na tuipi mite a kikou chiangun, tuipigei gamte liing ding hi. 29 Long kalte khempeuh in, a longte uh taisan ding uh a, tuipi tungthu theite leh longpute khempeuh tuipi gei ah ding ding uhi. 30 Ngaihtakin kikou ding uh a, khasetakin nang hon kah ding uh a, leivui kibuakin vut lak ah kikhuk ding uhi. 31 Nang hangin sam metgiau ding uh a, saiip puan silh ding uhi. Lungtang na mahmah leh khasetakin hon kah ding uh a, 32 nang hon suuna a mau tuaituai chiangun, nang tunga kahtam lou ding uh a: Tuipi' um Tura banga gialbang dai kua om ngei hiam? chi ding uhi. 33 Na zuaksumte, tuipi tunga a kipuak chianga, nam tampi lung taisak chin a, na hauhna leh na vante-a leitung kumpite hausak na hi. 34 Tu'n lah tuipi'n hon valhta, tuithuka tummangta. Na zuaksumte leh na kithuahpihte khempeuh nang tawh tumkhawmta. 35 Tuipigei gama teengte khempeuh nang mu-a lamdang sa, a kumpipate uh mulkima liing uh a, laua maimualin a lim uh kidangta. 36 Namte laka sumsinte'n hon khawisatkhum a, beina mulkimhuai tungta chin a, om ngei nawnlou ding hi teh, chi ahi, chi in, a chi hi.
Tura Kumpipa Mawhsakna Genkholhna
1 Tangtawn Toupa' thu ka kiang ah hong tung kik a, 2 ama'n: Mihing' tapa, Tura vaihawmpa kiang ah: Toupa Tangtawn Pathian thugen hiai ahi: Na lungtang kisatheiin: Kei, pathian ka hi, tuipi sung laizanga pathian tutphah tunga tu ka hi, na chi. Ahihhangin, pathian bangin pii kisa mah lechin, mihing lei hi chin a, pathian hi lou na hi. 3 Daniel sangin na pilzaw-a hia? Nang apan thusim kiseel om lou ahi-a hia? 4 Na pilna leh theihsiamnain hauhna na kikhol a, na gou kholna ah ngun leh kham na khol hi. 5 Na sumsin siamnain na hauhna na khangsak a, na hauhna hangin na lungtang kisathei hi. 6 Tua bang ahih manin, Toupa Tangtawn Pathian' thugen hiai ahi: Pii kisa a, pathian banga pii na kisak manin, 7 gamdang mite hon dousak ding ing a, amaute'n na kilawmna leh pilna, namsaua hong dou ding uh a, na thupina taangpha hon sun pailet ding uhi. 8 Amaute'n hankhuk sung hon tunsuk ding uh a, tuipi sunga khutluma si ding na hi. 9 Tua hun chiangin nang hon thatte' mai ah: Pathian khat ka hi, na chi dia hia? Nang hon thatte' maia, mihing leltak hi ding chin a, pathian hi lou ding hi teh. 10 Gamdang mite' khuta zeksumlouh sih-a si ding hi teh. Ke'n, thu genkhinta ka hi, chi-a Toupa Tangtawn Pathian in phuang ahi, chi in, a chi hi. 11 Tua baan ah, Tangtawn Toupa' thu ka kiang ah hong tung kik a, 12 ama'n: Mihing' tapa, Tura tawh kisaiin kahtam lou inla, a kiang ah: Toupa Tangtawn Pathian' thugen hiai ahi: Nang, hoihkimna etteh, pilna tawh kidim, kilawmna-a bukim na hi. 13 Pathian' huan Eden ah om chin a, suang manpha namkim, rubi, topaz leh emeral, krusolait, oniks leh jaspar, safair, torkuiz suangmanpha leh beril, kham chihte-a zep na hi. Na kizepna suangmanpha kisuansawnnate leh a sunga kisuangte khama kibawl hi a, siamkhiak na hih ni-a tuate kibawl hi ahi. 14 A veng, a chingpa cherub banga thaunilh hi chin a, tua bang dinga kon seh hi na hi. Pathian' mual siangthoua om chin a, suang am laka pai na hi. 15 Siamkhiak na hih ni apan nanga gitlouhna kimuh mateng, na gamtata genbaanglou hi na hi. 16 Na sumsinna kizalh tungtawnin, hiamgamna tawh na kidim a, na khialta hi. Tuachi-a Pathian' mual apan zahlaka hon hawlkhia ing a, a vengpa-a pang cherub aw, meia am suang lak apan hon hawlkhia ka hi. 17 Na kilawmna hangin na lungtang hong kisathei a, na thupina hanga na pilna hihsia na hi. Tuachi-a, leilak denna-a hon nei ing a, kumpipate' maia etnop hon suah ka hi. 18 Na khelhna tampite leh na sumsinna zuautatna-a na mun siangthoute buahsak na hi. Tuachi-a nang apan mei kuangkhesak ing a, nang hon kangtum hi. Hon galette khempeuh' muha leilaka vut hon suaksak ka hi. 19 Nang hon thei namte khempeuh in lamdang hon sa uh. Na beina mulkimhuaina tungta chin a, om ngei nawn het lou ding hiteh, chi ahi, chi in, a chi hi.
Sidon Mawhsakna Genkholhna
20 Tangtawn Toupa' thu ka kiang ah hong tung kik a, 21 ama'n: Mihing' tapa, Sidon mawhsa-in ensal inla, amah demin genkholhna gen inla: 22 Toupa Tangtawn Pathian' thugen hiai ahi: Sidon aw, en in nang hon dou ing a, na sunga thupina tang ding hi'ng. Amah tunga gawtna ka tut a, a sunga siangthoua ka kilat chianga, kei, Tangtawn Toupa ka hi, chih thei ding uhi. 23 Ama' tunga hipi sawl ding ing a, a kongzing khawnga sisan luangsak ding hi'ng. Namsau in kimkot ding a, thaha omte a sunga puk ding uhi. Tua hun chianga, kei, Tangtawn Toupa ka hi, chih thei ding uhi. 24 Tua hun chianga, Israel mite'n amau' siatna deih, mi hihna thei, lou lingnei leh ling hi gige, innsak innkhangte nei nawn lou ding uhi. Tua hun chianga, kei, Toupa Tangtawn Pathian ka hi, chih thei ding uhi. 25 Toupa Tangtawn Pathian' thugen hiai ahi: Israelte thehzaka a omna uh namte lak apan ka kaihkhawm hun chianga namte' mitmuha amaute laka siangthoua kilak ding ka hi. Tua hun chianga amaute'n ka sila Jakob kianga ka piak, tua amau' gama teeng ding uhi. 26 Tua gama bita teeng ding uh a, innte lam ding uh a, grephuante bawl ding uhi. Amau' siatna deih, a innsak a innkhangte uh tunga gawtna ka tut chianga, Israelte bel bittaka teeng ding uhi. Tua hun chianga, kei, Tangtawn Toupa ka hi, chih thei ding uhi, chi ahi, chi in, a chi hi.
Aigupta Mawhsakna Genkholhna
1 A kum sawmna, a kha sawmna, a ni sawm leh nih ni-in, Tangtawn Toupa' thu ka kiang ah hong tung a, 2 ama'n: Mihing' tapa, Aigupta kumpipa mawhsain ensal inla, amah leh Aigupta khempeuh mawhsakna genkholhna gen in. 3 Amah houpih inla, a kiang ah: Toupa Tangtawn Pathian' thugen hiai ahi: Aigupta kumpipa Faro, na luiluangte laka lum gulpi aw, nang hon dou ka hi. Nail luipi keia hi a, kei adinga ka bawlsa hi ahi, chi na hi. 4 Ahihhanga na khadanga ngakuai bat ding ing a, na luiluangte-a ngate, na phulipa belhsak ding ing a, nang hon kaikhe ding ka hi. 5 Nang leh na luiluangte-a ngate khempeuh, gamdai-gamkeua hon nuse ding ka hi, Gamlaka puk ding chin a, top louh leh phot louha om ding na hi. Leitung gamsate leh huihkhua-a vasate' an dinga hon pe ding ka hi. 6 Tua hun chiangin, Aigupta gama teengte khempeuh in, kei, Tangtawn Toupa ka hi, chih hon thei ding uhi. Israel inkawte adingin pumpeng chiang na hi. 7 Amaute'n khuta hon let chiangun, na kitam a, a liangkoute uh na kehsak a, na tunga a kingaih chiangun, na kitan a, a nungzangte uh na liamsak hi. 8 Tua bang ahih manin Toupa Tangtawn Pathian' thugen hiai ahi: Nang dou dingin namsau kon tun ding a, na mite leh a gantate uh ka that ding. 9 Aigupta gam, gamsia leh gam loih a suak ding a, tua hun chiangin, kei, Tangtawn Toupa ka hi, chih a thei ding uhi. Nail luipi keia ahi, kei bawl ahi, na chih manin, 10 nang leh na luiluangte kon dou a, Aigupta gam, Migdol apan Asuan dong, Kush gamgi chiang dongin, gamsia leh gamloih ka suaksak ding. 11 Mihing khe, ahih kei leh, ganhing in a tawn kei ding a, kum 40 sung kuamah a teeng kei ding. 12 Aigupta gam, gamsete laka gamsia ka suaksak ding a, a khawpite zong kum 40 sung khawpi kisete laka khawpi kisia ka suaksak ding. Aiguptate, namte lak ah ka delhzak ding a, gam teng ah ka thehzak ding. 13 Hinapi-in, Toupa Tangtawn Pathian' thugen hiai ahi: Kum 40 bei chiangin, Aiguptate, ka thehzakna gamte apan ka kaikhawm ding. 14 Amaute saltanna apan ka piikik ding a, a pu a pate uh gam, tua Aigupta gam Pathros ka tun ding a, tua ah kumpigam niamkiak ahi ding uh. 15 Tua kumpigam bel kumpigamte laka niampen ahi ding a, nam dangte tung ah a kiliansak nawn kei ding. Ke'n tua gam hatloutaka bawl ding ka hih manin, namte tung ah vai a hawm nawn kei ding. 16 Aigupta zaw Israelte adingin muantham ahi nawn kei ding a, amaute' huhna deiha amaute lam a ngat uh a khelhna uh ahi, chih phawksakthakna ahi lei zaw ding. Tua hun chiangin, kei, Toupa Tangtawn Pathian ka hi, chih a thei ding uhi, chi ahi, chi in, a chi hi. 17 A kum 27-na, a kha khatna, a ni khat ni-in, Tangtawn Toupa' thu ka kiang ah hong tung a, 18 ama'n: Mihing' tapa, Babulon kumpipa Nebukhadnezar in Tura nakpitaka dou dingin a sepaihpawlpi a hawi teitei a, lutang chih a giau a, liangkou chih a dulh hi. Hinapi-in, amah leh a sepaihpawlpi in, Tura kidoupihna apan metna bangmah a lawhtak kei uhi. 19 Tua bang ahih manin, Toupa Tangtawn Pathian' thugen hiai ahi: Babulon kumpipa Nebukhadnezar khut ah Aigupta ka pe ding a, ama'n tua gam hauhna a pawmang ding. Ama'n a sepaihpawlpi' khasum dingin, Aigupta a lok ding a, gallaak sumin a la ding. 20 Amah leh a sepaihpawlpi in tua banga a hih, kei adinga hih a hih manun, pahtakman dinga, a khuta Aigupta pia ka hi, chi-a Toupa Tangtawn Pathian in phuang ahi. 21 Tua ni-in, Israel adingin ki khat ka khangkhesak ding a, amaute lak ah kon kamkasak ding. Tua hun chiangin, kei, Tangtawn Toupa ka hi, chih a thei ding uhi, a chi hi, chi in, a chi ahi.
Aigupta Suunna Kahtam Lawhna
1 Tangtawn Toupa' thu ka kiang ah hong tung kik a, 2 ama'n: Mihing tapa, thu genkhol inla, Toupa' Tangtawn Pathian thugen hiai ahi, chi-in. Kapin mau tuaituai inla: Tua ni tel aw! chi in. 3 Ahang bel, tua ni hong nai a, Tangtawn Toupa' ni hong nai hi meipi zinni, namte' tuahsiatna hun hita. 4 Aigupta tung ah namsau leng ding a, Kush tung ah lungzinna tung ding hi. Aigupta gama thaha omte a puk chiang ua a hauhnate kipawmang ding a, a suangphumte kilongkhe ding hi, 5 Kush leh Put, Ludia leh Arabia khempeuh, Libia leh thukhun gam mite, Aigupta tawh namsaua pukkhawm ding uhi, chi ahi. 6 Hiai Tangtawn Toupa' thugen ahi: Aigupta tawh pangkhawmte puk ding a, a kisaktheihpih a hatna lawhsam ding hi. Migdol apan Asuan dongin, a sung ah namsauin puk ding uhi. chi-a Toupa Tangtawn Pathian in phuang hi. 7 Amaute gam sesate lak ah, a sesa leh loih hi ding uh a, a khawpite uh, khawpi sesate lak ah om ding hi. 8 Meia Aigupta ka hal a, amah huhte khempeuh nehtap ahih chiangun, kei, Tangtawn Toupa ka hi, chih thei ding uhi. 9 Tua ni chiangin, Kush, bangmah ngaihsaklou, khawphawk loua a omna apan lausak ding a, kei apan thupawte longa ka sawlkhiak chiangin, Aigupta tuahsiat ni-in, lungzinna in amaute man ding hi. Ngai in, tua ni tung ngeingei ding hiven, chi ahi, chi in. 10 Toupa Tangtawn Pathian' thugen hiai ahi: Babulon kumpipa Nebukhadnezar' khut zangin, Aigupta mihonpite beisak ding ka hi. 11 Amah leh a sepaihpawlpi namte laka huhampente gam hihse dingin hong kitonpih ding a, amaute'n Aigupta dou dingin, a namsau uh phawi ding uh a, gam sung teng misite luang dimsak ding uhi. 12 Nail luipi tuite kangsak ding ing a, a gam, migiloute leisak ding hi'ng. Gamdang mite' khut zanga gam leh a sunga om khempeuh hihse dimdem ding ka hi. Kei, Tangtawn Toupa'n genkhinta hi'ng, chi ahi. 13 Toupa Tangtawn Pathian' thugen hiai ahi: Milimte hihse ding ing a, Memfis-a milimte beisak ding hi'ng. Aigupta ah kumpi vaihawm om nawn lou ding a, Aigupta sung teng ah launa dimsak ding hi'ng. 14 Aigupta Pathros sesak ding ing a, meia Zoan hal ding ing a, Thebes tunga gawtna tun ding hi'ng. 15 Aigupta kulhpi Pelusiam tunga ka thangpaihna bung ding ing a, Thebes mihonpite satkhe ding hi'ng. 16 Meia Aigupta hal ding ing a, Pelusiam lungkhama kuiku ding hi. Huihpi in Thebes lamang ding a, Memfis lah lungzing gige ding hi. 17 Heliopoli leh Bubasti tangvalte namsauin puk ding uh a, tua khawpite lah salin taang ding uh. 18 Aigupta hakkol ka sattan chianga, Tapanhe ah tua ni mial ding a, tua ah a kisaktheihpih a hatna beisak ding hi'ng. Amah meipi' khuhin om ding a, a khawtate salin taang ding uhi. 19 Tua banga Aigupta gawt ding ing a, kei, Tangtawn Toupa ka hi, chih thei ding uhi, chi ahi, chi in, a chi hi. 20 A kum sawmlekhatna, a kha khatna, a ni sagih ni-in, Tangtawn Toupa' thu ka kiang ah hong tung a, 21 ama'n: Mihing' tapa, Aigupta kumpipa Faro' baan ka hihtanta. Damsak dingin a kituam kei a, namsau len ding khopa hat dingin zong singbek tawh a kituamkhawm sam kei. 22 Tua bang ahih manin, Toupa Tangtawn Pathian thugen hiai ahi: Ngai in, Aigupta kumpipa Faro ka dou ahi. A baante gel, a hoih lam hi-in a kitansa lam hita leh ka hihtan ding a, a khut apan namsau ka kesak ding. 23 Aiguptate, namte lak ah ka dalhsak ding a, gam teng ah ka thehzak ding. 24 Babulon kumpipa' baante ka hatsak ding a, a khut ah ka namsau ka tawisak ding. Ahihhangin, Faro' baante bel ka hihtan ding a, Babulon kumpipa' mai ah si ding khopa liam bangin, a thum huthut ding. 25 Babulon kumpipa' baante ka hatsak ding a, Faro' baante bel a zaw ningniang ding. Babulon kumpipa' khuta ka namsau ka tawisak a, ama'n Aigupta dou a, tua namsau a lik hun chiangin, kei, Tangtawn Toupa ka hi, chih a thei ding uhi. 26 Namte lak ah Aiguptate ka dalhsak ding a, gamteng ah ka thehzak ding. Tua hun chiangin, kei, Tangtawn Toupa ka hi, chih a thei ding uhi, a chi hi.
Lebanon-a Sidar
1 A kum sawmlekhatna, a kha thumna, a ni khat ni-in, Tangtawn Toupa' thu ka kiang ah hong tung a, 2 ama'n: Mihing' tapa, Aigupta kumpipa Faro leh a mihonte kiang ah: Thupina lam ah nang tawh tehpih theih kua om dia? 3 Khatvei laia, Lebanona sidar hi ngei, sangpi-in khangtou a, a dawn in gammang sahtak khup hi. 4 Tuite'n tua sing vaklian a, tuinak thukte'n sangpi-a khangsak a, tuite a bul kimkot ah luang a, gama singte khempeuh tui pia uhi. 5 Tuachi-in, gamlak sing khempeuh sangin sangzaw a, a hiangte pha a, sau a, tui khama zam zeizoi hi. 6 Huihkhua vasate khempeuh in a hiangte ah bu sep uh a, gamsate khempeuh in a liim ah nou nei uhi. Nam thupite khempeuh a liim nuai ah teeng uhi. 7 Kilawmna thupi nei a, a hiang zamte'n thupisak hi. Ahang bel, a zungte tui tampi ne dinga thuktaka lutsuk hiven. 8 Pathian' huan sunga sidarte'n dem zou lou, meilah singte'n zong a hiangte dem zou lou, sesingte'n zong a hiangte dem zou lou, Pathian' huan sunga singte'n zong a kilawmna pha zou lou hi. 9 Ke'n hiang tampi neia kilawmsak ing a, Pathian' huan Eden singte khempeuh in eng uhi. 10 Tua bang ahih manin, Toupa Tangtawn Pathian' thugen hiai ahi: Tua sing gammang singtehte tunglam pek sangpi-a a khantouh man leh a sanna a kisaktheihpih mana, 11 namte tunga vaihawmpa'n a gitlouhna hanga khauhtaka sai dinga, a khut sunga pia ka hi. Ke'n tua sing nawlkhin ing a, 12 nam dangte laka huhampen phuk a, nusia ka hi. A hiangte, mualtung khawng leh phaizang tenga puk a, tua gam luikuam tenga a hiangte khempeuh kitansa-a om hi. Leitung namte khempeuh a limliap apan hong paikhia uh a, amah nusia uhi. 13 Huihkhua vasate khempeuh tua sing puksa tunga giak uh a, gamlak gamsate khempeuh a hiangte laka om uhi. 14 Tua bang ahih mana, tui geia sing dang peuhmah, kisatheitaka khang sangtuam a, gammang singtehte tung lama kilik sangtou lou ding hi. Tui kham mahmah sing dang peuhmah in zong a sanna pha lou ding hi. Amaute khempeuh si dinga sehsa hi uhi. Ahang bel, amaute nuai lei adinga a sithei mihingte laka, hankhuk tungsuk ding hi vek uh hiven, a chi hi. 15 Toupa Tangtawn Pathian' thugen hiai ahi: Tua sing hankhuk a kitutsuk ni-in, tuinak thukte ka suunsak a, a tuite ka luangsak kei a, a tui tampite luang lou dingin ka kham hi. Amah hangin Lebanon ka dahsak a, gamlak singte khempeuh teemgawp hi. 16 Kawkhuk tungsukte tawh amah hankhuk ka tunsuksak laiin, tua sing puk ging zain namte ka lingsak hi. Tua laiin, Edena singte khempeuh, tua Lebanon sing hoihpente, tui kham mahmah singte khempeuh, hiai nuai lei ah khamuanin a om uhi. 17 A liim nuaia teengte, namte laka a kizoppihte, amah tawh tonin hankhuk a tungsuk uh a, namsaua thahte tawh a ton uhi. 18 Edena singte koi pen tawh na thupina leh etlawmna kiteh thei ding ahia? Hinapi-in, nang zong Edena singte tawh nuai leia laipaih suk na hi ding a, namsaua thahte tawh, zeksumlouhte lak ah na lum ding. Hiai singkung bel Faro leh a mihonte khempeuh genna ahi ve, chi-a Toupa Tangtawn Pathian in phuang ahi, a chi, chi in, a chi hi.
Faro Suunna Kahtam
1 A kum sawmlenihna, a kha sawmlenihna, a ni khat ni-in, Tangtawn Toupa' thu ka kiang ah hong tung a, 2 ama'n: Mihing' tapa, Aigupta kumpipa Faro tawh kisaiin kahtam lou inla, a kiang ah: Nang zaw namte lak ah humpinelkai bang na hi. Tuipi sunga tui kiloksak, na khe-a tui lokphuan zuazua, luitate buannawia ninsak tuipi-a gulpi bang na hi, chi in. 3 Toupa Tangtawn Pathian' thugen hiai ahi: Mipi tampi omkhawmte tawh, na tunga ka lena hon khuh ding ing a, amaute'n ka lena hon kaikhe ding uhi. 4 Leihula hon paikhe ding ing a, gamlaka hon lawnkhe ding hi'ng. Huihkhua vasate hon bawhsak ding ing a, gamsate khempeuh nanga kinevahsak ding hi' ng. 5 Mualtung khawnga na sa thehthaang ding ing a, na sa omlai teng luikuam teng dimsak ding hi'ng. 6 Tua gam sung teng, mualdawn sangte donga na sisana kawtsak ding ing a, mualkal kuam teng na sa dimsak ding hi'ng. 7 Mei banga kon mekmit chianga, vaante khuh a, a aksite mialsak ding ing a, ni lah meipi-a khuh ding ing a, khapi tang nawnlou ding hi. 8 Vaana vaak taangte khempeuh na tunga mialsak ding ing a, na gam tunga mialna tungsak ding hi'ng, chi-a Toupa Tangtawn Pathian in phuang ahi. 9 Namte laka na siatna ka tut chianga, na theihlouh gamte laka mi tampite lungkhamsak ding hi'ng. 10 Mi tampite nanga mulkimsak ding ing a, a kumpipate uh' maia ka namsau ka lik chianga, nang hanga mulkima liing ding uhi. Na pukni-a amaute tek, hinna lauthawnga mitphiatkal teng liingliing ding uhi. 11 Ahang bel, Toupa Tangtawn Pathian' thugen hiai ahi: Babulon kumpipa' namsau in nang hongdou ding hi. 12 Na mihonte khempeuh mihatte' namsaua puksak ding hi'ng. Amaute, namte laka huhampente hi uhi. Amaute'n Aigupta kisaktheihna phelgawp ding uh a, a mihonte khempeuh zawhlumleta om ding uhi. 13 A gantate khempeuh, luitui tampite' gei apan hihmangthang ding ing a, tua luituite kuama'n khea chil nawn lou ding a, gantate' khe in zong ninsak nawn lou ding hi. 14 Tua khit chianga, a luituite luangsak hiauhiau ding ing a, a luituite sathau banga luangsak ding hi'ng, chi-a Toupa Tangtawn Pathian in phuang hiven. 15 Aigupta gam giausak a, a sunga bangkim ka phiatmang chianga, tua-a teengte khempeuh ka phukpaih chianga, kei, Tangtawn Toupa ka hi, chih thei ding uhi, chi ahi. 16 Hiai amah suuna a lawh ding uh kahtam ahi. Namte' tanute'n hiai kahtam, Aigupta leh a mihonte khempeuh tunga lou ding uhi, chi-a Toupa Tangtawn Pathian in phuang ahi, a chi hi. 17 A kum sawmlenihna, tua kha a ni sawmlenga ni-in, Tangtawn Toupa' thu ka kiang ah hong tung a, 18 ama'n: Mihing' tapa, Aigupta mihonte kah in mau tuaituai inla, amah leh nam hattakte' tanute, kawkhuk tungsukte tawh, lei nuainung lam tunsuk in. 19 Amaute kiang ah: Midangte sanga deihsak tuam na hi ua hia? Paisuk unla, zeksumlouhte laka sialin om un, chi in. 20 Amaute, namsau-a thahte lak ah puk ding uhi. Namsau kiphawita a, amah a mihonte tawh kaihkhiakin om hen. 21 Hankhuk sung apanin, makai hat mahmahte'n Aigupta leh amah tawh pangkhawmte tawh kisaiin: Amaute hong tungsuk uh a, zeksumlouhte, namsaua site tawh kisialkhawmta uhi, chi ding uhi. 22 Asuria, a sepaih pawlpi khempeuh tawh tua ah om a, a thahsate khempeuh, tua namsaua puk khempeuhte' hankhukte'n amah um kimvel hi. 23 A hankhukte uh bel, lei sung thukpi ah om a, ama' hankhuk kimvel ah, ama' sepaih pawlpi lum hi. A hinglaite' gama mulkimna dimsakte khempeuh thahin om uh a, namsauin puk uhi. 24 Tua ah, a hankhuk kimkot ah Elam, a mihonte khempeuh tawh om hi. Amaute khempeuh thahsa hi uh a, namsaua puk hi uhi. A hinglaite' gama mulkimna dimsakte khempeuh, zeksumlouhin lei nuai tungsuk uhi. Kawkhuk tungsukte tawh, a maizumna zahlakna uh pua uhi. 25 Thahsate lak ah, amah leh a hankhuk kiima a mihonte khempeuh adingin lupna kibawl hi. Amaute khempeuh, zeksumlouh, namsaua thah hi uhi. A mulkimhuaina uh, a hinglaite' gama a thansuak manin, kawkhuk tungsukte tawh a maizumna zahlakna uh pua uh a, thahsate laka sialin om uhi. 26 Tua ah Meshekh leh Tubal om uh a, a hankhuk kimkot ua a mihonte khempeuh utawh om uhi. Amaute khempeuh zeksumlouh, a hinglaite' gama mulkimna a dimsak man ua namsaua thahte hi uhi. 27 Zeksumlouh galhang puksate, a galvante utawh hankhuk tungsuk khin, a namsaute uh lukhama neite tawh kisialkhawm lou uhia? Hiai galhangte' mulkimhuaina in, a hinglaite' gam zelsuak mahleh, a khelhnate uh gawtna, a guhte ua taamden ahi. 28 Faro aw, nang zong kitamkham ding chin a, zeksumlouhte laka, namsaua thahte tawh, lum ding na hi aw. 29 Tua ah, Edom, a kumpipate leh a makaite khempeuh tawh om a, thahatna nei hi mahle uh, namsaua thahsate tawh sialkhawma om uhi. Zeksumlouh, hankhuk sung tungsate tawh kisialkhawm uhi. 30 Mallam kumpite khempeuh leh Sidonte khempeuh tua ah om uh a, a thahatna un mulkimna omsak mahleh, zahlaktaka thahte tawh paisukkhawm uhi. Namsaua thahte tawh zeksumlouha lum uh a, kawkhuk tungsukte tawh a maizumna zahlakna uh pua uhi. 31 Faro, amah leh a sepaihhon in amaute mu ding uh a, namsaua thahsa mihonte khempeuh hanga kihehnem ding hi, chi-a Toupa Tangtawn Pathian in phuang ahi. 32 Ke'n a hinglaite' gama mulkimna dimsak dingin amah zang mah leng, Faro leh a mihonte khempeuh, zeksumlouhte laka namsaua thahte tawh lum ding uhi, chi-a Toupa Tangtawn Pathian in phuang ahi, chi ahi.
Galvil Ezekiel
1 Tangtawn Toupa' thu ka kiang ah hong tung kik a, 2 ama'n: Mihing' tapa, na gammite houpih inla, amaute kiang ah: Gam khat tunga namsau ka lensak a, tua gam mite'n amaute laka mi khat telkhia a, a galvil mi ding ua a bawl chiang ua, 3 ama'n tua gam tunga namsau hong tung ding mu a, mipite vauhilh nadinga pengkul a mut chiangin, 4 mi kuapeuh in tua vauhilhna za napi-a a limsak kei leh, namsau hong tung a, tua bang mi' hinna a lak leh, a sisan mawh ama' lutung mah a tu ding. 5 Pengkul ging za napi-a vauhilhna limsak lou ahih manin, a sisan mawh ama' lutung mah a tu ding. Tua vauhilhna a limsak leh bel, amah a kihondam ding. 6 Ahihhangin, tua galvil mi in namsau hong tung ding mu a, mipite vauhilh nadinga pengkul a mut kei leh bel, namsau hong tunga amaute laka mi khatpeuh' hinna a lak leh, tua bang mi a khelhna hanga lakmang ahi ding, ahihhangin, a sisan mawh tua galvil mi tung ah ka nga ding. 7 Mihing' tapa, Israel innkawte adingin nang, galvil mi-in kon bawl hi. Tua bang ahih manin, ka thugen za inla, kei apan vauhilhna amaute pia in. 8 Migilou kianga: Migilou aw, si ngeingei ding na hi, ka chih a, tua bang mi a gamtatnate kiheisan dinga kuna na va hilh kei leh, tua migilou, a khelhna hangin a si ding a, a sisan mawh nang tung ah ka nga ding. 9 Ahihhangin, tua migilou, a gamtatnate kiheisan dinga na hilh a, a kiheisan tuan kei leh, a khelhna hangin a si ding, ahihhangin nang na kihukhe ding. 10 Mihing' tapa, Israel innkawte kiang ah: Hiai na thugen dan uh ahi: Ka tatleknate uleh khelhnate un hon delhgik a, tuate hanga kuiku-gawp hi ung. Bangchi-a hing thei ding ka hi ua? na chi uh, chi in. 11 Amaute kiang ah: Toupa Tangtawn Pathian in: Ka hinna sialin ka gen ahi. Migilou sihna ah kipahna himhim nei lou ka hi, a gamtatnate uh kiheisana a hin uh ka kipahlam hi zaw ahi. Kihei un! Na gamtatna giloute uh kiheisan un! Israel inkawte aw, banghanga si ding na hi ua? chi-a phuang ahi, chi-in gen in. 12 Tua bang ahih manin, mihing' tapa, na gammite kiang ah: Midiktat hisa a tatlek chianga, ama' diktatna in amah hukhe lou ding a, migilou hisa zong a gitlouhna a kiheisan chianga, a na gitlouhna in amah puksak lou ding hi. Midiktat hisa, a khelh leh, a na diktatnasa hanga a hin kiphal lou ding hi, chi in. 13 Midiktat kianga: Hing ngei ngei ding na hi, ka chih a, ama'n a diktatna muanga thil gilou a hih leh, a thilhih diktatte laka khat beek zong kitheigige lou ding a, a thil gilou hih hanga si ding hi. 14 Tuabanah, Pathian limsaklou kianga: Si ngeingei ding na hi, ka chih a, ama'n a khelhna a kiheisan a, a dik a tang thil a hih leh, 15 sum leitawia kichiamna thil a lak a piakkik a, a guksa thil a piakkik a, hinna pia dankhun a zuih a, thil gilou a hih kei leh, a hing ngeingei ding, a si kei ding. 16 Khelhna a na hihsate khat beek zong amah mawhtansak nadinga theihgige ahi kei ding. A dik a tang hih ahita a, a hing ngeingei ding. 17 Hinapi-a, na gammite'n: Tangtawn Toupa' lampi a dik kei, chi uhi. Ahihhangin, amaute' lampi ahi a dik lou. 18 Midiktat in a diktatna a kiheisan a, thil gilou a hih leh, a si ding. 19 Tua bangin, migilou in a gitlouhna a kiheisan a, a dik a tang a hih leh, tua bang hihin a hing ding. 20 Hinapi-in, Israel inkawte aw, Tangtawn Toupa' lampi a dik kei, na chi uhi. Ahihhangin, noute na gamtatna bangbang-un na tung chiat uah thu ka khen ding, a chi hi.
Jerusalem Pukna
21 I saltanna, a kum sawmlenihna, a kha sawmna, a ni nga ni-in, Jerusalem apan suakta mi khat hong pai a: Khawpi a pukta! hong chi hi. 22 Tua mipa hong tun ma nitaklamin, Tangtawn Toupa' khut ka tung ah a om a, zingsanga tua mipa hong tun main ka kam hon kasak hi. Tuachi-in, ka kam katsak ahi a, ka dai dide nawn kei hi. 23 Tua khitin, Tangtawn Toupa' thu ka kiang ah hong tung a, 24 ama'n: Mihing' tapa, Israel gam sunga mun sesatea teengte'n: Abraham, mi khat kia hinapi, ama'n hiai gam luah a, eite, mi tampi hi hanga, hiai gam i luah dinga piak hi tawk lou ding hia! chi uhi. 25 Tua bang ahih manin, amaute kiang ah: Toupa Tangtawn Pathian' thugen hiai ahi: Sa, a sisan kai tawh na nek manun leh, na milimte uh muanga sisan na suah manun, gam na luah ding ua hia? 26 Na namsau uh na muang uh a, thil kihhuaite na hih uh a, mi chih in a innveng' zi na buahsak tek uh. Tua bang nungin gam na luah ding ua hia? chi ahi, chi in. 27 Amaute kiang ah: Toupa Tangtawn Pathian' thugen hiai ahi: Ka hinna sialin ka gen ahi. Tua munsesate-a nutsiata om laite, namsauin a puk ding uh a, khawpi pua, gamsunga omte lah gamsate nek dingin ka pe ding a, mun muanhuai leh kawhawma omte lah hipi-in a si ding uh. 28 Gamsung lah gamsia ka suaksak ding a, akisaktheihpih a thahatna a bei chianga, Israel mualte nutsiata taisan ahi ding a, kuama'n a tawn kei ding. 29 Thil kihhuaite a hih man ua, tua gam, gamsia leh loih ka suahsak chiangin, kei, Tangtawn Toupa ka hi, chih a thei ding uh, chi ahi, chi in. 30 Mihing' tapa, na gammite, kulhbaang kiangte, kongkhak bulte ah nang tawh kisaiin, kihou suihsuih uh a: Hong pai dih ua, Tangtawn Toupa apan thupuak i ngaikhe ding, kichi uhi. 31 Ka mite na kiang ah, a ngeina bangun hong pai uh a, na thugente ngai dingin na mai ah hong tu uhi. Ahihhangin, zuih bel a zui kei uh. A kamun kipumpiak a kichi uh a, ahihhangin, a lungtangte uh punna diklou delhin, huaiham hi. 32 Amaute adingin nang zaw, aw hoihtaka zawlla kulmuuttak sa a, tumging siamtaka tum bang lei na suak hi. Amaute'n na thugen za uh a, zui tuanlou uh hiven. 33 Hibang teng amaute tunga dik taktak ding a, tua bang hong tun chianga, amaute laka kamsang khat om hitah, chih thei ding uhi, a chi, chi in, a chi hi.
Belamchingte leh Belamte
1 Tangtawn Toupa' thu ka kiang ah hong tung a, 2 ama'n: Mihing' tapa, Israel belamchingte demin genkholhna gen in. Genkholhna gen inla, amaute kiang ah: Toupa Tangtawn Pathian' thugen hiai ahi: Amau kia kiawlmawh Israel belamchingte tung a gik! Belamchingte'n belamte a kep ding uh hilou maw? 3 Noute'n a sa limlim ne a, a mul puana silh a, a hoihhoih gou uchin a, belamhonte lah kem lou na hi uh. 4 A zawngkhal hatloute kem lou, a china lah khoi lou, a liam lah tuam lou. A vak-mangte lah piikik lou, a mangte lah zong lou. Dawmlou leh huham taka amaute uk na hi uh. 5 Belamching a om louh mana, belamte kithehthang uh a, tua banga a dalhzak chiang ua, gamsate' an hong suak uhi. 6 Ka belamte, mualtung khawng leh tang sang tung khawnga vakmang uhi. Leitung tenga vakzak uh a, kuama'n lah zong lou a, kan lah kankhe lou hi. 7 Tua bang ahih manin, nou, belamchingte aw, Tangtawn Toupa' thu ngai un. 8 Toupa Tangtawn Pathian in phuang a: Ka hinna sialin ka gen ahi. Ka belamhonte'n belamchingmi nei lou uh a, gukmanga om uh a, gamsate' an suak uh a, ka belamchingte'n lah amaute zong lou a, ka belamte awlmawha kem lou a, amau kia kiawlmawh uhi, chi ahi. 9 Tua bang ahih manin, nou, belamchingte aw, Tangtawn Toupa' thu ngai un. 10 Toupa Tangtawn Pathian' thugen hiai ahi: Belamchingte ka dou a, ka belamhonte tawh kisaiin amaute mawh ka khusak ding. Belamte kepna nna apan amaute ka paikhe ding a, amau leh amau kivak leiin a om thei nawn kei ding uh. A kam ua pan ka belamte ka hukhe ding a, amaute adingin an ahi nawn kei ding uh, chi ahi. 11 Ahang bel, Toupa Tangtawn Pathian' thugen hiai ahi: Kei mahmah in ka belamte ka zongkhe ding a, amaute ka kankhe vek ding. 12 Belamching in a belamte a ompih laia, a kithehzakte a kep bangin, ken ka belamte ka kem ding. Meikai leh khawmial ni-a a kithehzakna mun khempeuh uapan ka hukhe ding. 13 Namte lak apanin amaute ka pii ding a, gam teng apan ka kaikhawm ding a, amaute' gam ka tun ding. Israel mual tungte ah, luikuamte ah leh, tua gam sunga tenna munte ah ka gamtasak ding. 14 Loupa mun hoih ah amaute ka vak ding a, Israel mual sang tungte, a gamtatna uh ahi ding. Tua gantatna mun hoih ah a kual ding uh a, Israel mualte ah loupa hoihin a kivaak ding uh. 15 Keimah mah in ka belamte ka ching ding a, ka kualsak ding, chi-a Toupa Tangtawn Pathian in phuang ahi. 16 A mangte ka zongkhe ding a, a vakmangte ka piikik ding. A liamte ka tuam ding a, a hatloute ka hatsak ding a, a thaute leh a hatte bel ka hihmangthang ding. Dika vaihawmna tawh belamte ka ching ding, chi ahi. 17 Nou, ka belamhonte tawh kisai ahih leh, Toupa Tangtawn Pathian' thugen hiai ahi: Belam khat leh khat kal thu ka khen ding a, belamtalte leh kelte kal thu ka khen ding. 18 Loupa mun hoiha na kivak uh noute adinga kichinglou ahi-a hia? Na gamtatna uh loupa mun dangte nangawn khein na chilgawp teitei ding ua hia? Noute'n tuisiang na dawn uh kiching lou hia? A dangte nangawn khein na chilniin teitei ding ua hia? 19 Noute' chilgawpsa belamte'n ne-in, noute chilnitsa ka belamte'n a dawn teitei ding ua hia? chi ahi. 20 Tua bang ahih manin, amaute kianga Toupa Tangtawn Pathian' thugen hiai ahi: Ngai un, kei mahmah in belam thau leh belam gawng kal ah thu ka khen ding. 21 Noute'n na pang uleh na Hang ua phu a, belam zawngkhal hatloute khempeuh na hawlmang masiah uh, na ki ua na sik manun, 22 ke'n ka belamhonte ka hondam ding a, suamin a om nawn kei ding uh. Ke'n belam khat leh khat kal thu ka khen ding. 23 Amaute' tung ah chingpa khat, ka sila David mahmah ka koih ding a, ama'n amaute a ching ding. Ama'n amaute a ching ding a, amaute chingpa ahi ding. 24 Kei, Tangtawn Toupa, amaute' Pathian ka hi ding a, ka sila David, amaute laka makai ahi ding. Kei Tangtawn Toupa'n ka genkhinta. 25 Ke'n amaute tawh kal ah lemna muanna thukhun khat ka khung ding a, amaute gamdai-gamkeu khawnga teenga, gammang khawnga galmuang leh bita a ihmut theih nadingun, tua gam apan gamsate ka hawlmang ding. 26 Amaute leh ka mual kimkota munte ka vualzawl ding. A hunhunin vuah ka sawl ding a, vualzawlna vuahte a zu ding. 27 Gamlak singte'n gah a suah ding uh a, lei in haigahte a suah ding. Mipite a gam uah a bit ding uh. Amaute' taanna hakkolte ka tansak a, amaute sala kaite khut apan amaute ka hutkhiak chiangin, kei, Tangtawn Toupa ka hi, chih a thei ding uhi. 28 Namte'n amaute a lok nawn kei ding uh. Bitin a teeng ding uh a, kuama'n amaute a lausakta kei ding uh. 29 A gam hai-chiinte hoih mahmah mana gam minthang khat amaute ka pe ding a, tua gam ah kial a thuak nawn kei ding uh. Namte' simmawhna zong a thuak nawn kei ding uh. 30 Tua hun chiangin, kei, Tangtawn Toupa a Pathian un amaute ka ompih, chih leh, amau Israel innkawte ka mite ahi uh, chih a thei ding uh, chi-a Toupa Tangtawn Pathian in phuang ahi. 31 Nou, ka belamte, ka gantatna loupamun-a gamta belamte, ka mite na hi uh a, kei na Pathian uh ka hi, chi-a Toupa Tangtawn Pathian in phuang ahi, chi in, a chi hi.
Edom Mawhsakna Genkholhna
1 Tua baan ah, Tangtawn Toupa' thu ka kiang ah hong tung a, 2 ama'n: Mihing tapa, Seir mual mawhsain ensal inla, amaute mawhsain genkholhna gen inla, 3 amaute kiang ah: Toupa Tangtawn Pathian' thugen hiai ahi: Nang, Seir mual kon dou ahi. Nang douin ka khut ka liik ding a, a kisia leh loihin kon bawl ding. 4 Na khawpite a sia ka suaksak ding a, a kisia leh loih na hi ding. Tua hun chiangin, kei Tangtawn Toupa ka hi, chih na thei ding. 5 Tanglai kisiat kihoutheihlouhna nei lailai a, Israel a tuahsiat ua, amaute gawtna in a tawpkhawk a tun huna, namsaua thah dinga na piakkhiak manin, 6 ka hinna sialin ka gen ahi, chi-a Toupa Tangtawn Pathian in phuang ahi. Sisan suahna ah kon pekhe ding a, tua in nang hon nungzuih ding. Sisan suahna haw lou na hih manin, sisan suahna in nang hon nungzuih ding. 7 Seir Mual a kisia leh a kilawi ka suaksak ding a, tua-a hong lut leh pawtte khempeuh, tua apan ka satkhe ding. 8 Na mualte thahsa siluangtein ka dimsak ding a, namsaua thahte, na mual tung ahte, na luiphai ahte, leh mualkal guamte khempeuh ah ka dimsak ding. 9 A sedenin kon bawl ding a, na khawpite a kiluahkik kei ding. Tua hun chiangin, kei, Tangtawn Toupa ka hi, chih na thei ding. 10 Kei Tangtawn Toupa tua-a om hinapi-in, nang: Hiai nam nihte leh gam nihte, eite-a hiven i luah ke, na chih manin, 11 ka hinna sialin ka gen ahi, chi-a Toupa Tangtawn Pathian in gen ahi. Amaute na muhdahna hanga na hehna leh, hazatna na latsak bangbangin noute kon sai ding a, na tunga thu ka khen chiangin, amaute lak ah ka kitheisak ding. 12 Tua hun chiangin, kei, Tangtawn Toupa'n Israel mualte dema thil kihhuai na gente khempeuh ka zata, chih na thei ding. Nang: Amaute hihsiat hita, nekgaih dinga eite' khuta piakkhiak hita uh, na chi hi. 13 Ka tung ah na kiuangsak a, kidaam lou hialin kei demin thu tampi na gen a, ka za hi. 14 Toupa Tangtawn Pathian' thugen hiai ahi: Leitung khempeuh lung nuama a kipah laitakin, nang a kisia leh a kilawi kon suaksak ding. 15 Israel inkawte' goutan hihsiat leh loih ahih laitaka, nang lungnuama na kipah manin, tua bang mah ahi nang kon bawl ding dan. Seir Mual aw, nang leh Edom khempeuh hihsiat leh loiha om ding na hi uh. Tua hun chiangin, kei, Tangtawn Toupa ka hi, chih na thei ding, chi ahi, chi in, a chi hi.
Israel Mualte kianga Genkholhna
1 Mihing' tapa, Israel mualte kiang ah genkholhna gen inla, amaute kiang ah: Israel mualte aw, Tangtawn Toupa' thu za un. 2 Toupa Tangtawn Pathian' thugen hiai ahi: Meima in na kiang ah: Ka chita ve! Tanglai mualsangte eite' tan hong hita, chi ahi, chi in. 3 Tua bang ahih manin, genkholhna gen inla: Toupa Tangtawn Pathian' thugen hiai ahi: Amaute'n na kimkota hon hihsia a, sabeta hon bet man ua, namdangte' luah hong hi chin a, mite'n a sia sia-a hon gen uh a, hon minsesak uhi. 4 Tua hangin, Israel mualte aw, Toupa Tangtawn Pathian' thugen za un. Mualte, tangte, luikuamte leh phaizangte kiang leh, a kisesa munte leh, na kim na kianga namte' suam leh nuihsan khawpi loihsate kianga Toupa Tangtawn Pathian thugen hiai ahi. 5 Tua bang ahih mana, Toupa'n Tangawn Pathian in mei banga kuang a, namdangte leh Edom khempeuh dema thu genta ka hi. Ahang bel, amaute'n a lungtang ua kipahna leh, a sia deihsakna tawh ka gama gantatna loupa munte a tan theih nading ua, ka gam amau adinga bawl uh hiven, chi ahi, chi in. 6 Tua ahih manin, Israel gam tawh kisaiin genkholhna gen inla, mualte leh tangte tung ah, luikuamte leh phaizangte kiang ah: Toupa Tangtawn Pathian' thugen hiai ahi: Noute'n namte' simmawhna na thuak manun, ka thikthusiatna thangpaihna hangin thu ka genta. 7 Tua bang ahih manin, hiai Toupa Tangtawn Pathian' thugen ahi: Na kim na kiang ua namte'n zong simmawhna a thuak ding uh, chi-in baanzaakin ka kichiamta. 8 Ahihhangin, Israel mualte aw, ka mi Israelte adingin kahiangte leh gah na suah ding uhi. Ahang bel, inn-a hong pai pah ding hi ve-un. 9 Noute kon awlmawh a, deihsakna tawh kon en ding a, na lei a kilet ding a, hai a kipawi ding a, 10 tua chiangin, na tung ah mite ka pungsak ding, amaute Israel inkawte mah ahi uhi. Khawpite a kiluah ding a, a kisesate a kilamthak ding hi. 11 Na kiang ah mihingte leh gantate ka pungsak ding a, a chipha ding uh a, hong tam ding uhi. Nidang laia bangin na tung ah mite ka teengsak ding a, a malam sangin kon lawhchingsak zaw ding hi. Tua hun chiangin, kei, Tangtawn Toupa ka hi, chih na thei ding uhi. 12 Mite, tua ka mi Israelte na tung ah ka paisak ding. Nang hon luah ding uh a, nang, a goutan uh na hi ding. A tate uh na lakmangsak ngei nawn kei ding. 13 Toupa Tangtawn Pathian' thugen hiai ahi: Mite'n na kianga: Noute'n mite na negai uh a, na minam uh tabeiin na koihsak uh, hon chih manun, 14 mite lah na negai nawn kei ding uh a, na minam uh lah suan leh khak beiin na koih nawn kei ding, chi-a Toupa Tangtawn Pathian in phuang ahi. 15 Namte' totna kon zasak nawn kei ding a, namte' simmawhna lah na thuak nawn kei ding uh a, na minam uh lah ka puksak nawn kei ding, chi-a Toupa Tangtawn Pathian in phuang ahi, chi ahi, chi in, a chi hi. 16 Tangtawn Toupa' thu ka kiang ah hong tung kik a, 17 ama'n: Mihing' tapa, Israelte amau gam sunga a teen laiun, a gamtatna uleh a thilhihteun gam a buahsak uhi. A gamtatna uh ka mitmuhin numei sinei banga niin ahi. 18 Tuachi-in, amaute'n gamsunga sisan a suah man uleh, a milimte ua a buahsak manun, amaute tung ah ka thangpaihna ka sungbua hi. 19 Namte lak ah amaute ka dalhsak a, gamte lak ah a kithehzak uhi. Amaute' gamtatna leh thilhihte bangin amaute tung ah thukhenna gawtna ka tun hi. 20 Namte lak a tunna peuh uah, ka min siangthou a niinsak uhi. Ahang bel, amaute tawh kisaia: Hiaite Tangtawn Toupa' mite hi uh a, hinapi-a hiai gam a nutsiat louh theihlouh uh hita, kichi hi. 21 Namte laka a paina ua, Israel inkawte'n a nitsak uh ka min siangthou gum ka hi. 22 Tua bang ahih manin, Israel innkawte kiang ah: Toupa Tangtawn Pathian' thugen hiai ahi: Israel innkawte aw, hiai thil ka hih dingte, noute vang ahi kei a, na tenna uh namte laka na hihnit uh ka min siangthou vang ahi zaw. 23 Namte laka kihihniin, noute'n namte laka na hihnit uh ka min thupi a sianthouna ka ensak ding. Tuachi-a namte' mitmuha, noute' tungtawna a siangthoua ka kietsak chiangin, kei, Tangtawn Toupa ka hi, chih tua namte'n a thei ding uh, chi-a Toupa Tangtawn Pathian in phuang ahi, chi ahi. 24 Ahang bel, ke'n namte lak apan noute hon lakhe ding ing a, gamte khempeuh apan hon kaikhawm ding ing a, noumau' gam sung hon tunkik ding hi vengin. 25 Na tung ua tuisiang hon theh ding ing a, siang ding na hi uh. Na sianlouhna khempeuh uleh, na milimte khempeuh uapari hon siangsak ding ka hi. 26 Noute sunga lungtang thak koih ding ing a, noute sunga kha thak koih ding ka hi. Noute sung apan suang banga taak na lungtang uh paikhe ding ing a, sa lungtang hon pe ding ka hi. 27 Noute sunga ka Kha koih ding ing a, ka danthusehte hon zuisak ding, ka danpiakte kem dinga hon pilvangsak ding ka hi. 28 Na pu na pate uh kianga ka piak gama teeng ding uchin a, noute ka mite hi ding, kei na Pathian uh hi ding ka hi. 29 Na sianlouhnate khempeuh ua-pan hon hondam ding ing a, buh leh bal piangsak ding, kichingsak ding, na tung ua kial tungsak lou ding ka hi. 30 Kialpi hanga namte laka na maimawk nawn louh nading ua, singgahte leh loua haigahte pungsak ding ka hi. 31 Tua hun chiangin, na gamtatna giloute uh, na thilhih giloute uh theigige ding uchin a, na khelhnate uleh a kihhuai mahmah na thilhihte uh hanga kikih ding na hi uh. 32 Noute vanga hiai thilte hih ding ka hi kei, chih na theih uh ka deih, chi-a Toupa Tangtawn Pathian in phuang ahi. Israel inkawte aw, na gamtatna uh hangin maizumin zahlak un! chi ahi. 33 Toupa Tangtawn Pathian' thugen hiai ahi: Na khelhnate khempeuh uapan kon siansak ni chiangin, na khawpite uh ka kiluahsak kik ding a, a sesate khempeuh a kilamthak ding. 34 Gam kilawisa, a tawnkhate khempeuh' mitmuha sesa hi nawnlouin, ka kiletthaksak ding. 35 Amaute'n: Hiai gam sesa, Eden huan hong bangta a, khawpi sesa, a kilawisa leh hihsiatsate tu'n kulhin kium a, kiluahta, a chi ding uhi. 36 Tua hun chiangin, na kim na pam ua omlai namte'n, kei, Tangtawn Toupa'n a kihihsesate ka lamthak a, gamdai-gamkeu ka niimsak dimdem nawnta, chih a thei ding uh. Kei, Tangtawn Toupa'n ka genkhinta a, ka hih ding, a chi hi. 37 Toupa Tangtawn Pathian' thugen hiai ahi: Israel innkawte' thuumna leh ngetna khatvei ka sang lai ding a, amaute adingin hiai ka hihsak ding: A mite uh, belamte bangin ka tamsak ding a, 38 sehsa ankuanglui laia Jerusalem khua-a thillat siangthou ding belamhonte bangin ka tamsak ding. Tuachi-in, khawpi kisesate mihontein a dim ding. Tua hun chiangin, kei, Tangtawn Toupa ka hi, chih a thei ding uh, chi ahi, chi in, a chi hi.
Guhkeu-a dim Phaizang
1 Tangtawn Toupa' khut ka tung ah a om a, ama'n Tangtawn Toupa' Khain hon piikhia a, phaizang laizang khat ah hon koih hi. Tua phaizang bel guha dim ahi. 2 Ama'n tua guhte lak ah a suk a tungin hon pii a, tua phaizang ah guh tampi mahmah ka mu a, tua guhte a keu mahmah ngen ahi uh. 3 Ama'n ka kiang ah: Mihing' tapa, hiai guhte a hing nawn thei ding uam? chi-in hon dong hi. Ke'n: Toupa Tangtawn Pathian aw, nang kia in na thei, ka chi hi. 4 Tua khitin, ama'n ka kiang ah: Hiai guhte kiang ah thu gen inla, a kiang uah: Guhkeute, Tangtawn Toupa' thu za un. 5 Toupa Tangtawn Pathian in hiai guhte kianga a thugen hiai ahi: Ke'n na sung uah nakna hu ka lutsak ding a, na hong hing nawn ding uh. 6 Noute ah thaguite ka bulh ding a, na tung uah satak ka omsak ding a, vun in kon tuam ding. Na sung uah nakna hu ka lutsak ding a, na hong hing nawn ding uh. Tua khit chiangin, kei, Tangtawn Toupa ka hi, chih na thei ding uh, chi ahi, chi in, a chi hi. 7 Tuachi-in, thupiaka ka om bangin, thu ka gen hi. Tua banga thu ka gen laiin, husa hong om a, a ging luapluap husa ahi a, guhte hong kinaihtuahin guh leh guh hong kinaihtuah uhi. 8 Ka en a, a tung uah thaguite leh satak hong kilang a, vunin amaute hon tuam hi. Ahihhangin, amaute sung ah nakna hu a om kei hi. 9 Tua khitin, ama'n ka kiang ah: Nakna hu kiang ah thu gen in. Mihing' tapa, thu gen inla, a kiang ah: Toupa Tangtawn Pathian' thugen hiai ahi: Nakna hu aw, huih lite apan hong pai inla, hiai thahsate hong hin theih nadingun, a sung uah naklut in, chi ahi, chi in, a chi hi. 10 Tuachi-in, thupiaka ka om bangin, thu ka gen a, amaute sung ah nakna hu hong lut a, hong hing uh a, khein hong ding uh a, sepaihhon tampitak hong hi uhi. 11 Tua khitin, ama'n ka kiang ah: Mihing' tapa, hiai guhte, Israel innkuan buppi ahi. Amaute'n: Ka guhte uh keugawpta a, ka lametna uh beita. Satkhiak hita ung, a chi uhi. 12 Tua bang ahih manin, thu gen inla, amaute kiang ah: Toupa Tangtawn Pathian' thugen hiai ahi: Ka mite aw, na hankhukte uh ka hong ding a, tuate apanin noute kon lakhetou ding a, Israel gam kon tunkik ding. 13 Tua banga na hankhukte uh ka hon a, tuate apana noute kon lakkhiaktouh chiangin, nou ka mite'n, kei, Tangtawn Toupa ka hi, chih na thei ding uh. 14 Na sung uah ka Kha ka koih ding a, na hing ding uh a, noumau' gam ah kon teengsak ding. Tua hun chiangin, kei, Tangtawn Toupa'n ka genkhinta a, ka hihkhinta, chih na thei ding uh, chi-a Tangtawn Toupa'n phuang ahi, chi in, a chi hi,
Kumpipa khat nuaia Minam khat
15 Tangtawn Toupa' thu ka kiang ah hong tung kik a, 16 ama'n: Mihing' tapa, sing chiang khat la inla, a tung ah: Judah ading, a ki pawlpih Israel ading, chi-in gelh in. Tua khit chiangin, sing chiang dang khat la inla, a tung ah: Efraim' chiang, Josef leh a kipawlpih Israel innkuan buppi ading, chi-in gelh in. 17 Tua chiang nihte, na khuta chiang khat a hih theih nadingin, zom inla, chiang khat suaksak in, a chi hi. 18 Na gammite'n: Hiai bang na chihna hiam? chi-a hon dot chiangun, 19 amaute kiang ah: Toupa Tangtawn Pathian' thugen hiai ahi: Efraim' khuta om Josef chiang leh amah tawh kipawl Israel namte' chiang la ding ing a, Judah' chiang tawh zomkhawm ding ing a, tua chiangte, sing chiang khata bawl ding ing a, ka khuta chiang khat suak ding uhi, chi ahi, chi in. 20 A tunga lai na gelhna chiangte amaute' mitmuhin tawi inla, 21 amaute kiang ah: Toupa Tangtawn Pathian' thugen hiai ahi: Israelte a tunna gam uapanin ka lakhe ding a, kim leh pama gamte khempeuh apanin ka kaikhawm ding a, amau' gam ah ka piikik ding. 22 Tua gam ah, Israel mualte tung ah, amaute minam khat ka suaksak ding a, amaute khempeuh tung ah kumpipa khat a om ding a, minam nih ahi nawn het kei ding uh a, kumpigam nihin zong a kikhen nawn ngeikei ding uh. 23 Amaute a khelhna mun uh, tua a teenna khempeuh uapan hondam ding ing a, amaute siangsak ding hi vengin, a milimte uleh lim kihhuaite, ahih kei leh, a tatleknate ua kihihniin ngei nawn lou ding uhi. Amaute ka mite ahi ding uh a, kei a Pathian uh ka hi ding. 24 Amaute' tunga ka sila David, kumpipa hi ding a, amaute khempeuh in chingpa khat nei ding uhi. Amaute'n ka thukhennate zui ding uh a, ka danthusehte keem dinga pilvang ding uhi. 25 Ka sila Jakob kianga ka piak, na pu na pate uh tenna, tua gama teeng ding uhi. Amaute leh a tate uleh a tate uh' tate tua-a teengden ding uh a, ka sila David, amaute tunga kumpipa hiden denta ding hi. 26 Amaute tawh kala lemna thukhun khung ding ing a, Tangtawn thukhun hi ding hi. Amaute kipsak ding ing a, a tam lam uh pungsak ding ing a, amaute laka ka mun siangthou koihden ding ka hi. 27 Ka biakbuk mun amaute tawh omkhawm ding a, amaute' Pathian hi ding ing a, amaute lah ka mite hi ding uhi. 28 Tua hun chianga ka mun siangthou, amaute laka a omden chianga, minamte khempeuh in, kei Tangtawn Toupa ka hi, chih thei ding uhi, chi ahi, chi in, a chi hi.
Gog Mawhsakna Genkholhna
1 Tangtawn Toupa' thu ka kiang ah hong tung a, 2 ama'n: Mihing' tapa, Magog gama Gog, tua Meshekh leh Tubal makaipipen ensal inla, mawhsain genkholhna gen in. 3 Amah mawhsain thu gen inla: Toupa Tangtawn Pathian' thugen hiai ahi: Meshekh leh Tubal makaipipen Gog aw, nang hon mawhsa-a hon dou ka hi. 4 Hon lehngatsan ding ing a, na khadanga ngakuai bat ding ing a, na sepaihhon teng tawh, na sakolte, kigalvansa sakoltungtuangte, lum lian leh lum neu tawi mihonte, a vek ua namsau lekte tawh hon kaikhe ding ka hi. 5 Persia, Kush leh Put, amaute tawh pang ding uhi. Amaute khempeuh in lumte tawi uh a, siklukhute khu uhi. 6 Gomer zong a sepaihte khempeuh tawh, maltawp apan Beth Togarma dong a sepaihte khempeuh tawh, tua nam tampite nang tawh pangkhawm uhi. 7 Kiging inla, nang leh na kimkota kikaikhawm mihonpite mansain om unla, nang amaute tunga makaiin pang in. 8 Ni tampi nungin, kigalvan dinga sapa om ding na hi. Tunung chiangin, gallaaka laksa gam na dou ding hi. Tua gam mite bel, nam tampi lak apana Israel' muntea kaihkhawm ahi uh. Tua gam lah sawtlam peka kisesa-a loih ahita hi. Tua mite leuleu lah nam tampi lak apan lakkhiak, a vek ua tu-a bittaka teeng ahi uhi. 9 Nang leh na sepaihte khempeuh, na kithuahpih nam tampi tawh na kuan tou ding uh a, huihpi bangin, mainawtin na pai ding uh a, meipi bangin tua gam na khuh ding hi, chi ahi. 10 Toupa Tangtawn Pathian' thugen hiai ahi: Tua ni chiangin, na lungsim sung ah kingaihtuahna a om ding a, tup giloutak neiin thil na gel ding. 11 Galmuangtak leh muan-mawhna lauhthawngna nei hetlou, kulhbaang hita leh, kongpi hita leh, kongpi kaihna zawlte hita leh neiloua khawtate simin ka dou ding. 12 Mun sesa kiluah thakte, a mite leh nam tampi lak apan kaihkhawm mite, gante leh vante hau mahmah, gam laizanga teeng, tua bang gam leh a mite ka lok ding a, ka suam ding, na chi ding hi. 13 Sheba leh Dedan leh Tarshish sumsinmite leh a khawtate khempeuh in na kiang ah: Lok dinga hong kuan na hi hia? Mi lok ding, suam ding, ngun leh kham pawmang ding, gante leh vante pawmang ding, gallaak sum tampi la dinga mi tampi tawh hong kuan na hi hia? hon chi ding uhi, a chi hi, 14 Tua bang ahih manin, Mihing' tapa, genkholhna thu gen inla, Gog kiang ah: Toupa Tangtawn Pathian' thugen hiai ahi: Ka mi Israel-te galmuanga a ten lai uh, tua ni chiangin nang na phawkin na mu kei dia hia? 15 Mallam gamlapi-a na mun apanin nang leh na kithuahpih nam tampi, sakoltung tuang ngenta, mi tampi, sepaihhon tawh nong kuan ding uh. 16 Gam khuh meipi kai bangin, ka mi Israelte dou dingin nang Gog aw, kon pii ding a, nang tungtawna namte' mitmuha, a siangthoua ka kilat ni chiangin, tua namte'n kei hon thei ding uh, chi ahi, chi in. 17 Toupa Tangtawn Pathian' thugen hiai ahi: Ni masate-a ka sila, Israel kamsangte tungtawna a tungthu ka na gensa nang na hi kei-a hia? Tua hun laiin, amaute'n kum tampi sung genkholhna thu a na gen uh a, amaute dou dingin nang kon pii ding, chih a gen uhi. 18 Tua ni chianga hong tung ding thil hiai ahi: Gog in Israel gam a dou chiangin, ka hehna sousang tawhthawhin a om ding, chi-a Toupa Tangtawn Pathian in phuang ahi. 19 Tua hun chiangin, Israel gam ah zinpi a liing ding, chi-in, ka phatuamngaihna leh ka thangpaihna sousangin ka phuang hi. 20 Tuipi-a ngasate, huihkhua-a vasate, gamlak gamsate, bokvak ganhing namkim leh leitung maikaiha mihingte khempeuh, ka mai ah a liing ding uh. Mualte a kilumlet ding a, kawite a chim ding a, kulhbaang peuhmah leilak ah a puk ding, 21 Ka mual tung teng ah Gog dou dingin namsau ka pangsak ding, chi-a Toupa Tangtawn Pathian in phuang ahi. Michih in namsauin a sanggam a dou ding. 22 Gog tung ah hipi leh sisan suahna gawtna ka tungsak ding. Amah leh a sepaihhon leh a kithuahpih nam tampite tung ah gialpi, mei leh kaat tawh kithuah vuahpi ka zusak ding. 23 Tuachi-in, ka letna leh siangthouna ka lak ding a, nam tampite' mitmuhin ka kitheisak ding. Tua hun chiangin, kei, Tangtawn Toupa ka hi, chih a thei ding uhi, chi ahi, chi in, a chi hi.
1 Ama'n, Mihing' tapa, Gog langa pangin genkholhna gen inla: Toupa Tangtawn Pathian' thugen hiai ahi: Meshekh leh Tubal makaipipa nang Gog aw, na langa pang ka hi. 2 Hon lehngatsak ding ing a, hon taalkaih ding ka hi. Mallam gamlapi apan hon pii ding ing a, Israel mualte langa pang dinga hon sawl ding ka hi. 3 Tua hun chianga, na khut veilam apan na thalphel satkhe ding ing a, na khut taklam apan na thaltangte kesak ding ka hi. 4 Israel mualtungtea puk ding chin a, nang leh na sepaihte leh na pankhawmpih namte tawh puk ding na hi. Sasial ne vasa namkim leh gamsate' an dinga hon pekhe ding ka hi. 5 Ke'n genkhinta hi vengin, gampalak khawnga pul ding na hi, Toupa Tangtawn Pathian in chi hi. 6 Magog tung ah leh tuipi geia galmuangtaka teengte tunga mei sawl ding ing a, kei, Tangtawn Toupa ka hi, chih thei ding uhi, chi-a Tangtawn Toupa Thuneipen in phuang ahi. 7 Ka min siangthou, ka mi Israelte laka theisak ding ka hi. Ka min siangthou buahsaka omsak nawn lou ding ing a, kei Israel gama a Siangthoupa ka hi, chih namte'n thei ding uhi. 8 Tua ni hong tung dek ahi! Hong tung taktak ding ahi, chi-a Toupa Tangtawn Pathian in phuang ahi. Ka gen-gen hiai ni ahi. 9 Tua khit chiangin, Israel khawpi-a teengte kuan ding uh a, a galvante uh singin chih ding uh a, haltum ding uhi. Lumlian leh lumneute, thalphelte leh thaltangte, kidouna khetbukte leh teipite singa chih ding uhi. Kum sagih sung khawl ding uhi. 10 Gamlak sing a puak uh kul lou ding a, gammang sing a sat uh zong kul lou ding hi. Ahang bel, a galvante uh singa chih ding hita ve-un. Tua chianga amau lokte lokthukta ding uh a, amau suamte suamthukta ding uhi, chi-a Toupa Tangtawn Pathian in phuang ahi. 11 Tua ni chiangin, Israel gam sung ah, suahlama Tuipi zotna lama phaizang ah, Gog adingin kivuina mun ding ka pe ding. Tua muna Gog leh a mipite kivui ding ahih manin, khualzinte lampi a dai ding. Tuachi-in, tua mun, Hamon Gog Phaizang a kichi ding hi. 12 Kha sagih sung Israel inkawte'n gamsung hihsiang dingin amaute a vui ding uhi. 13 Tua gammite khempeuh in amaute a vui ding uh a, amaute adingin tua pahtawia ka omna ni theihgige tham ahi ding, chi-a Toupa Tangtawn Pathian in phuang ahi. 14 Tua gam hihsiang dingin mite sehtuam ahi gige ding uh. Tua mite'n gamsung a tawnsuak ding uh a, amaute'n leilaka omlaite a vui lai ding uh. Tua kha sagih a bei chiangin, a baan zong lailai dingin a kipan ding uh a, 15 gamsung a totsuak chiang ua, a lak ua khatpeuh in mihing guh a muh leh, hankhuk toute'n Hamon Gog Phaizanga, tua guh a vui mateng, guh a muhna mun ah chiamtehna a koih ding hi. 16 Tua mun ah Hamona kichi khua khat zong a om ding. Tua bangin, gamsung a hihsiang ding uhi, a chi hi. 17 Mihing' tapa, Toupa Tangtawn Pathian' thugen hiai ahi: Vasa namkim kiang ah leh gamsate khempeuh kiang ah sapna bawl inla: Noute adinga kithoihna thillat ka bawl dek, Israel mualte tunga kithoihna thupitak ah, kilchih apan hong kikaikhawm unla hong kikhawm un. Tua mun ah sa ne-in sisan na dawn ding uhi. 18 Tua ah, Bashan apan ganta vakthau belamtalte, belamnoute, kelte leh bawngtalte hileh kilawma, mihatte' sa ne a, leitung miliante' sisan dawn ding hi uteh. 19 Noute adinga kithoihna thillat ka bawl dek ah, na vah mateng uh sathau ne ding uchin a, zukhama na kham mateng uh sisan dawn ding hi uteh. 20 Vahtakin ka ankuang ah sakolte, a tungtuangte, mihatte, sepaih nam tuamtuamte ne ding hi uteh, chi-a Toupa Tangtawn Pathian in phuang ahi, chi in. 21 Ke'n ka thupina namte laka ensak ding ing a, namte khempeuh in amaute tunga gawtna ka tut leh ka khut khak mu ding uhi. 22 Tua ni apan Israel inkuante'n, kei, Tangtawn Toupa a Pathian uh ka hi, chih thei ding uhi. 23 Tua baan ah, Israelte ka tunga a muanhuai louh man ua, a khelhna uh hanga sala kaih ahi uh, chih namte'n thei ding uhi. Tua bangin amaute apan ka maitang ka na sel a, a melmate uh' khutsung ah amaute ka na pekhia a, a vekpiun namsauin a puk uhi. 24 Amaute a sianlouhna bangbangun leh, a khelhna bangbang-un ka na sal a, amaute apan ka maitang ka na sel hi. 25 Tua bang ahih manin, Toupa Tangtawn Pathian' thugen hiai ahi: Tuin saltanna apan Jakob ka piikik ding a, Israel mite khempeuh tung ah lainatna ka nei ding a, ka min siangthou adingin phatuam ka ngai ding. 26 Amaute, a gamsung ua bittaka teeng a, amaute lausak ding kuamah a om louh hun chiangin, a maizumna uleh ka tunga muanhuailouhna a neihte khempeuh uh a theigige nawn kei ding uh. 27 Namte lak apan amaute piikik a, a melmate uh gam apan amaute ka kaihkhawm hun chiangin, nam tampite' mitmuhin keimah, amaute tungtawnin a siangthouin ka kilak ding. 28 Tua hun chiangin, kei Tangtawn Toupa a Pathian uh ka hi, chih a thei ding uh. Ahang bel, ke'n namte lak ah amaute salin paisak mahleng, khat beek zong nutsiat neiloua, amau' gama kaikhawm kik ding hi vengin. 29 Amaute apan ka maitang sel nawn lou ding ka hi. Ahang bel, ke'n Israel innkawte tunga ka Kha sungbaw ding hi vengin, chi-a Toupa Tangtawn Pathian in phuang ahi, chi ahi, chi in, a chi hi.
Tempul Thak Huangsung
1 I Saltan kum, a kum 25-na, tua kum kipatna, tua kha a ni sawm ni, khawpi puk nung a kum sawmlelina hong hita a, tua ni mahmahin Tangtawn Toupa khut ka tung ah a om a, ama'n tua lai ah hon tun hi. 2 Pathian apan mengmuhnain ama'n Israel gam ah hon tun a, mual sangpi khat tung ah hon koih hi. Tua mual simlam ah khawpi banga kilang innte a om hi. 3 Ama'n tua lai hon tun a, tua ah mi khat, sumsan sik banga kilang, ka mu hi. Amah kongpi ah, ziza khau leh tehna chiang tawiin a ding hi. 4 Tua mipa'n ka kiang ah: Mihing' tapa, na mitin en inla, na bilin za inla, nang kon lah ding thil peuhmah thudon in, Ahang bel, tua dinga hiai lai hon kitun hiven. Thil na muh peuhmah Israel inkawte hilh in, hon chi hi.
Huangsung Pawnung Lutna Suahlam Kelkong
5 Tempul kimkot umsuak sipsip baang khat ka mu hi. Tua mipa' khuta tehna chiang sau dan bel tong guka sau ahi. Tua tong khat sau dan tong khat leh khap khat chiat ahi. Tua mipa'n tua baang a teh a, tua baang tehna chiang khata sah leh tehna chiang khata sang ahi. 6 Tua khitin, suahlam nga tua kelkong ah a vapai a, a kalbite ah a kaltou a, tua kelkong lutna sangkilbul a teh hi. Tua sangkilbul bel tehna chiang khata za ahi. Tua bel kelkong khatna ahi. 7 Kelkong vengte dinna baangkuakte bel tehna chiang khata sau, chiang khata za ahi a, tua baangkuakte kala baang dawkkhete tong nga-a sah ahi. Tempul lam nga inliim tawh kizom tua kongpi inliim tawh kizom tua kelkong pen tehna chiang khata za ahi. Tua bel kelkong nihna ahi. 8 Tua khitin, ama'n kelkong lutna hulliap a teh a, 9 tong giata za ahi a, kelkong khuamte tong niha sah chiat ahi uh. Tua kelkong lutna hulliap in tempul lam a nga hi. 10 Tua suahlam kelkong sunglam, a pang tuak ah baang kuak thum tuak a om a, tuate letdan kikim ahi a, a panga baang lawkkhete zong a kikim chiat ahi. 11 Tua khitin, tua kelkong lutna zat dan a teh a, tong sawm ahi a, a sau dan tong sawm leh thum ahi. 12 Tua baang kuakte mai ah baang khat, tong khata sang a om chiat a, tua baang kuakte bel, a dung leh a vai tong guk chiat ahi. 13 Tua khitin, tua kelkong lutna, tua baang kuak nunglam baang tung apan a langkhat baang tung dong a teh a, a kal kigamlat dan, baang tunga umna dai kuak apan a lang khat umna dai kuak dong, tong 25 ahi. 14 Tua kelkong sunglam baang lawkkhete a tawnsuakin kelkong khuamte a teh a, tong 60 ahi. Tua a tehna bel huangsung intual lam nga, tua hulliap dong ahi. 15 Tua kelkong lutna apan, tua hulliap gamlapen dong tong 50 ahi. 16 Kelkong lutna sunglama baang kuakte leh baang lawkkhete, tawlet bangin neuchik chik in a kimkotin a umsuak a, tua umna dai ah a kuak neu om phei phei a, tuate sunglam nga ahi uhi. Tua baang lawkkhete' mai tumsing lima kizem ahi.
Huangsung Pawnung
17 Tua khitin, huangsung pawnung ah hon pii a, tua ah dantan pawl khat leh huangsung kimkota lampi kibawlsuak ka mu hi. Tua lampi dung ah dantan 30 a om hi. 18 Kelkong lutnate saudan tantana a sik ua paisuak tua bang maha za lampi nuainung zaw a om hi. 19 Ama'n kelkong lutna khangnung zaw sunglam apanin huangsung sungnung pawlam dong a gamlat dan a teh a, suahlam pang leh mallam pang ah tong 100 a pha hi.
Mallam Kelkong
20 Tua khitin mallam nga, tua kelkong saudan leh zat dan, huangsung pawnung sung dong a teh hi. 21 A pang tuaka baang kuak thum tuak omte, a baang lawkkhete leh a hulliap bel, kelkong lutna masa-ate tawh a kikim hi. Tong 50-a sau, tong 25-a za ahi uh. 22 A kongvangte, a hulliap leh a zepna tumsing bel, suahlam nga kelkong lutna-ate tawh a kikim hi. Tua kelkong sunin kalbi sagih a om a, tuate tawh kizawnin hulliap a om hi. 23 Mallam kelkong lam ngain, huangsung sungnung lutna kelkong a om a, suahlam nga kelkong bangbang ahi. Ama'n kelkong khat apan a kizawnpih kelkong dong a teh a, tong 100-a kigamla ahi. 24 Tua khitin, simlam pang ah hon pii a, simlam nga kelkong khat ka mu hi. A kelkong khuamte leh a hulliap a teh a, a kelkong dangte tawh a kikim hi. 25 Tua kelkong lutna leh a hulliap in kelkong dangte mah bangin, kongvang kawchikte, a dungtawnin a nei hi. Tong 50-a sau, tong 25-a za ahi. 26 Tua kelkong sunin kalbi sagih a om a, tuate tawh kizawnin hulliap a om hi. A pang tuaka kelkong khuampite zepna tumsing a nei uhi. 27 Tua huangsung sungnung in zong simlam nga kelkong khat a nei a, ama'n hiai kelkong leh, simlam nga kelkong pawnung kal a teh a, tong 100-a kigamla ahi.
Huangsung Intual Sungnung Lutna Kelkongte
28 Tua khitin, ama'n simlam kelkong tawnin huangsung intual sungnung ah hon lutpih a, simlam kelkong a teh a, kelkong dangte tawh a kikim hi. 29 A baang kuakte, a kelkong khuampite leh a innliim zong a dangte tawh a kikim hi. Kelkong lutna leh a inliim in a kimkot ah kongvang a nei uhi. Tua kelkong lutna bel tong 50-a sau, tong 25-a za ahi. 30 Tua huangsung intual kimkota kelkong lutna-a inliimte tong 25-a za, tong nga-a sau ahi. 31 A inliim bel huangsung intual pawnung lam nga ahi. A khuamte lah tumsing lima zep ahi a, kalbi giat in a suntou hi. 32 Tua khitin, ama'n suahlam panga huangsung sungnung intual ah hon tonpih a, tua kelkong a teh a, a dangte tawh a kikim hi. 33 A baang kuakte, a kelkong khuamte leh a inliim zong a dangte tawh a kikim hi. Tua kongpi lutna leh a inliim in a kimkot ah kongvangte a nei uhi. Tua kongpi lutna bel tong 50-a sau, tong 25-a za ahi. 34 A inliim bel suahlam huangsung pawnung intual lam nga ahi a, a kelkong khuamte lah a pang tuaka tumsingte-a zep ahi a, kalbi giat in tua a suntou hi. 35 Tua khitin, ama'n mallam kelkong ah hon tonpih a, tua kongpi a teh hi. A dangte tawh a kikim a, 36 a baang kuakte, a kelkong khuamte leh a inliim zong a dangte tawh a kikim a, a kimkot ah kongvangte zong a nei hi. Tua kelkong bel tong 50-a sau, tong 25 a za ahi. 37 A inliim tempul lam nga ahi a, a kelkong khuamte a pang tuaka tumsingte-a zep ahi a, kalbi giat in tua a suntou hi.
Kithoihna Lat nading Indante
38 Kelkong lutna sungnungte chiata inliimte' kiang ah indan khat, a kongvang khat tawh a om a tua ah haltum thillatte a kisil hi. 39 Tua kelkong lutna-a inliim ah, a pang tuak ah dawhkan nih tuak a om a, tua ah haltum thillatte, khelhna thillatte leh mawhna thillatte a kigou hi. 40 Tua kelkong lutna-a inliim baang pawlam ah tua mallam kelkong lutna-a a kalbite pang langkhat ah dawhkan nih a om hi. 41 Tua chi-in, kelkong lutna pang lang khat ah dawhkan li a om a, pang lehlam ah li mah, a vekin dawhkan giat a om hi. Tuate tung ah kithoih-na thillatte a kigou hi. 42 Tuate baan ah, haltum thillat ading sekthawh suang dawhkan li a om a, tuate tong khat leh a langa sau, tong khat leh a langa za, tong khata sang ahi chiat hi. Tua dawhkante tung ah, haltum thillat leh thillat danga gan gawhna vanzat tuium belsuante a kikoih hi. 43 A kimkot baang ah vankhaina sik kanih neite, khap khata sau chiat, a kikhai hi. Tua dawhkante bel thillat sate koih nading ahi.
Siampite ading Indante
44 Kelkong sungnung bana huangsung inntual sungnung sung ah, indan nih, simlam nga, mallam kelkong kiang ah khat, a mallam nga, simlam kelkong sungnung kiang ah a dang khat, lasapawlte ading a om hi. 45 Ama'n ka kiang ah: Simlam nga inndan pen, tempula mawhpua siampite ading ahi a, 46 mallam nga indan pen maitama mawhpua siampite ading ahi. Hiaite bel, Zadok tapate, Tangtawn Toupa naiha a maia nasem thei omsun Levite ahi uh, a chi hi. 47 Tua khitin, ama'n tua huangsung inntual a teh hi. Tua huangsung bel a dung a vai kikim, tong 100-a sau, tong 100-a za ahi. Tua maitam lah tua tempul mai ah a om hi.
Tempul
48 Ama'n tempul inliim ah hon tonpih a, tua inlim kongbiang khuampite a teh a, a pang tuak tong nga-a za ahi. Tua tempul lutna bel tong sawm leh li-a za ahi a, a baang lawkkhete lah a pang tuak ah tong thuma za ahi. 49 Tua inliim bel, tong 20-a za, a mailam apan a nunglam tong sawm leh nih ahi. Tua sunin kalbi giat a kidawhtou a, tua kongbiangte pang tuak ah khuampite a ding hi.
1 Tua khitin, tua mipa'n mun siangthou pawnung hon tun a, a kongbiangte a teh a, tua kongbiangte zatdan a pang tuak ah tong guk ahi. Tua bel a inn letdan ahi. 2 Tua mun siangthou pawnung kongvang tong sawma za ahi a, a pang tuaka baangte tong nga-a za ahi. Tua mun siangthou pawnung zong a teh a, tong 40-a sau, tong 20-a za ahi. 3 Tua khitin, amah, mun siangthou sungnung ah a lut a, a kongbiangte a teh a, tong niha za ahi chiat uhi. A kongvang ahih leh, tong guka za ahi a, a panga baangte bel, tong sagiha za ahi. 4 Ama'n mun siangthou sungnung saudan a teh a, tong 20-a sau ahi a, a zatdan lah, mun siangthou pawnung kantanin tong 20 mah ahi. Ama'n ka kiang ah: Hiai Mun Siangthoupen ahi, a chi hi. 5 Tua khitin, ama'n tempul baang a teh a, tong guka sah ahi a, tempul pang kimkota indante bel, tong li-a za ahi. 6 Tua apanga indante a chiala kisuangsawn, chial khata indan 30 zel om ahi. Tua tempul baang kimkot ah, a panga indante letkipna a om a, tuachi-in, tua a panga indante letkipnate tempul baanga thunlut ahi kei hi. 7 Tempul baang kimkota, a panga indante a chial chialin a lian hiaihiaia kibawl ahi. Tuachi-in, tempul baang kimkota, a panga indante bel, a sang semsema liansema kilam ahi. Suai apan indantea kaltouhna suai laita tawnin, suai tungnung dong a paitou hi. 8 Tempul in a kimkot ah a panga indante kingak nading a bul kisepsang, a nei chih ka mu hi. Tehna chiang tawn khat tong guka sau ahi. 9 Tua a panga indante baang pawnung bel tong nga-a sah ahi. Tua tempula, apang indante leh 10 indan dangte kikal bel, tempul kimkot suakin, tong 20-a kikak ahi. 11 Kongtual mun awng apan, tua a pang indante lutna kongvangte, mallam ah khat, simlam ah khat a om a, inn kingakna bul kisepsang, tua mun awng tawh kizom bel, a kimkotin tong nga-a za-a paisuak ahi. 12 Tumlam panga tempul huangsung inntual lam nga, tua inn bel tong 70-a za ahi a, a baang lah, a kimkotin tong nga-a sah, tong 90-a sau ahi. 13 Tua khitin, ama'n tempul a teh a, tong 100-a sau ahi a, tempul huangsung inntual leh tua inn, a baangte tawh zong tong 100-a sau ahi. 14 Suahlam pang ah tempul huangsung inntual, tempul mailam uapin tong 100-a lian ahi. 15 Tua khitin, ama'n tempul nunglam huangsung inntual lam nga inn sau dan, a pang tuaka dawhkangte uapin a teh a, tong 100 mah ahi. Mun siangthou pawnung, mun siangthou sungnung leh tua huangsung intual lam nga inliim, 16 tua baan ah, bikhalapnuai leh tawhlet neute leh tua thumte sung kimkota dawhkangte leh huangsung inliimte, singa kium vek ahi. Suai leh tawhlet dong baangte leh tawhlette zong singa kium ahi. 17 Mun siangthou lutna pawlam tung mun awng leh, mun siangthou sungnung leh pawnung baang ah a kimkot suakin, a kivangkimin, 18 cherubte leh tumsingte a khuakthawh in a kigelh hi. Tumsingte leh cherubte zong a kikalhelh in a om uh a, cherubte'n maitang nih a nei tek uhi. 19 Pang langkhat ah tumsing khat lam nga, tua cherub maitang, mihing maitang ahi a, a lehlam panga tumsing dang khat lam nga lah, humpinelkai maitang ahi. Tempul kimkot suakin tuate a kigelh hi, 20 Sual apan kongvang tung dongin, mun siangthou pawnung baang tung ah, cherubte leh tumsingte khuakthawh in a kigelh hi. 21 Mun siangthou pawnung in kongbiang dung zawl khat a nei a, Mun siangthoupen mai ah zong tua bang khat a om hi. 22 Tong thuma sang, adung avai tong nih, sing maitam khat a om a, a kiute, a tung a taw leh a pangte zong sing ahi. Tua mipa'n ka kiang ah: Tangtawn Toupa' maia om dawhkan hiai ahi, a chi hi. 23 Mun siangthou pawnung leh Mun Siangthoupen in kongkhak nih a nei tuak uhi. 24 Tua kongkhakte'n phei nih a nei chiat uh a, a langtuaka hon theih dinga kopza-a kibulh ahi. 25 Mun siangthou pawnung kongkhakte ah cherubte leh tumsingte, baang tung-ate bangin, khuakthawh in a kigelh a, inliim mai, a tung ah sing liimsun a kikhai hi. 26 Tua inliim pang baangte ah tawhlet kawchikte, a pang tuaka tumsing khuakthawha kigelh a om hi. Tempul panga indante'n zong liimsun a nei uhi.
Siampite ading Indante
1 Tua khitin, tua mipa'n mallam manawhin huangsung intual pawnung ah hon tonpih a, tempul huangsung intual zawn leh, mallam pang baang pawnung zawna indante hon tun hi. 2 Tua inn kongvang mallam nga bel tong 100-a sau, tong 50-a za ahi. 3 Huangsung inntual sungnung apan tong 20 chiang sung leh, huangsung intual pawnunga paina zawn chiang sung ah, chial thumin dawhsawng leh dawhsawng kimaingatin a om hi. 4 Tua inndante mai ah, tong sawma za, tong 100-a sau, paisuak theihna a om a, a kongkhakte bel mallam pang ah a om hi. 5 Dawhsawngte'n mun a luah manin inndan tungnungte bel, insawng laita leh sawng nuainunga indante sangin a neuzaw hi. 6 Inn sawng thumna-a indante'n, huangsung intualte' neih bang khuampi a nei kei uh a, insawng nuainung leh insawng laitate sangin innsual a neuzaw hi. 7 Inndante leh huangsung inntual pawnung tawh kihiangin, a mallam pang ah, tua inndante mai ah, baang pawnung khat, tong 50-a sau a om hi. 8 Huangsung inntual pawnung tawh kizom, a pang inndan a vuala kizomte tong 50-a sau ahi a, mun siangthou tawh kinai pen a panga inndan kizomte bel, tong 100-a sau ahi. 9 Indan nuainungte'n suahlam pang ah lutna kongvang khat a nei uhi. Tua bel, huangsung inntual pawnung apan tua inndan sung lut chianga suahlam pang chihna ahi. 10 Simlam pang ah, huangsung inntual baang zuulzuul ah, tempul huangsung intual tawh kizom leh baang pawnung tawh kizomin inndante a om a, 11 tua indante mai ah paisuak theihna a om hi. Hiaite bel mallam panga inndante bang ahi uh a, sau dan, let dan leh pawtna kongvangte, a let a neu kibang ahi. Mallam panga kongvangte tawh kibang, 12 simlam pang ah inndante kongvangte zong a om hi. Paisuak theihna kichi kipatna ah kongvang khat a om hi. Tua paisuak theihna bel, suahlam panga baang tawh kizawna kihianga paisuak ahi. Tua kongvang lah tua inndante-a lutna ahi. 13 Tua khitin, ama'n ka kiang ah: Tempul huangsung inntual lam nga, mallam leh simlam inndante siampite' indante ahi a, tuate ah Tangtawn Toupa naih siampite'n thillat siangthoupente a ne zel uhi. Tuate ah thillat siangthoupente, anvui nei thillatte, khelhna thillatte leh mawhna thillatte, a koih ding uhi. Ahang bel, tua mun a siangthou hiven. 14 Mun siangthou sunga siampite a lut peuhmah chiangun, a nasepna puansilhte uh nuse louin, huangsung inntual pawnung sung a lut ding uh ahi kei hi. Ahang bel, tua puansilhte a siangthou hiven. Mipi nautangte ading munte a naih maun, puansilh dangte a silh phot ding uh ahi, a chi hi. 15 Tempul huang sunga omte a tehkhit takin, ama'n suahlam kelkong ah hon pawtkhiakpih a, a kim a kiang teng a teh hi. 16 Tehna chiang in suahlam pang a teh a, tehna chiang 500-a sau ahi. 17 Mallam pang a teh a, tehna chiang 500 ahi. 18 Simlam pang a teh a, tehna chiang 500 ahi. 19 Tua khitin, tumlam pang ah a kihei a, a teh hi. Tehna chiang 500 ahi. 20 Tuachi-in a pang li sung khempeuh a teh hi. Tua mun in a kimkot ah baang a nei a, tehna chiang 500-a sau, tehna chiang 500-a za ahi. Tua baang in mun siangthou leh a nautang mun a deidan hi.
Tempul sung ah Thupina Lutkik
1 Tua khitin, tua mipa'n suahlam nga kelkong ah hon tonpih a, 2 Israel' Pathian' thupina, suahlam apan hong pai ka mu hi. Ama' aw bel, tui tampi luangging bang ahi a, tua gam teng a thupina in a taanvak hi. 3 Tua mengmuh ka muh bel, khawpi hihse dinga amah hong pai laia ka mengmuh leh, Kebar Luipi geia ka mengmuh bang ahi a, kei lah a khuplamin ka puk hi. 4 Tua Tangtawn Toupa' thupina, suahlam nga kelkong tawnin tempul sung hong lut hi. 5 Tua khitin, Kha in hon domkang a, huangsung inntual sungnung hon tun a, Tangtawn Toupa' thupina in tempul sung a luah dim hi. 6 Tua mipa ka kianga a din sungin, kua hiam khat in tempul sung apan hon houpih ka za hi. 7 Ama'n: Mihing' tapa, hiai ka kumpitutphah omna mun ahi a, ka khe ngakna mun zong ahi. Hiai Israelte laka ka omden nading mun ahi. Israel innkawte'n ka min siangthou a niinsak ngei nawn kei ding uh. Amaute hi-in, a kumpipate uh hita leh, a kizuakna uleh a kumpipate un a munsangte ua a koih uh hinnabei a milimteun zong a niinsak nawn kei ding uh. 8 A inliim uh ka innliim tawh kizoma a koih ua, a kongbiangte uh ka kongbiang tawh kizoma a koih laiun, amaute leh kei kala baang khat kia in hon hal laiin, a kihhuai a gamtatnateun ka min siangthou a ninsak uhi. Tuachi-in, ke'n hehin amaute ka hihmangthang hi. 9 Tuin a kizuakna uleh a kumpipate uh' milim hinnabei kei apan koihmangta uhen, tuachi-in amaute lak ah ka teengden denta ding. 10 Mihing' tapa, Israelte'n a khelhnate uh a zumpih theih nadingun, a kiang uah tempul thu gen in. A kigel khiak dan sut uhenla, 11 a thilhihsate khempeuh uh a zumpih ua leh tempul kigelkhiak dan, a kilep dan, a pawtkhiaknate leh lutnate tawh, a lim a mei kigel dan leh a kizat ding dan dante leh, dante khempeuh tawh amaute theisak in. A kigelkhiak dante thei a, a kizat ding dan, dante khempeuh muanhuaitaka a zuih theih nadingun, amaute' mai ah hiaite gelh vek in. 12 Tempul tawh kisai dan piak hiai ahi: Tua mual tunga a kimkot mun khempeuh a siangthoupen ahi ding. Tempul tawh kisai dan piak hibang ahi, chi hi.
Maitam
13 Hiai tong saua teha maitam letdan ahi. Tua tong sau bel tong khat leh khap khata sau ahi. Tua maitam kilvela tuiluanna bel tong khata sang, tong khata za, a gei khap khata liana paisuak ahi. Tua maitam sandan hibang ahi: 14 Tua maitam bul tuiluanna apan maitam sik nuainung dong tong niha sang, tong khata za ahi a, tua a sik neuzaw apan a sik lianzaw dong tong li-a sang, tong khata za ahi. 15 Maitam taptung bel tong li-a sang ahi a, tua taptung apan ki li, vanlam ah a lawktou hi. 16 Tua maitam taptung bel a dung a vai kikim, tong sawmleniha sau, tong sawmleniha za ahi. 17 A sik tungnung zong a dung a vai kikim, tong sawmlelia sau, tong sawmlelia za ahi. A kimvela sik tong kimkhata zain a paisuak a, a kimvela maitambul zong tong khata za-a paisuak ahi. Tua maitam kalbite'n suahlam a nga hi, a chi hi. 18 Tua khitin, ama'n ka kiang ah: Mihing' tapa, Toupa Tangtawn Pathian' thugen hiai ahi: Hiaite, maitam a kidawhkhit chianga haltum thillatte leh sisan thehna ding tawh kisaia hih ding dante ahi. 19 Ka maia hon naiha nasem ding, Levi hi a, Zadok inkuansung mi tua siampite kianga, khelhna thillat ding bawngtal tuai khat na piak ding ahi, chi-a Toupa Tangtawn Pathian in phuang ahi. 20 A sisan pawlkhat na la dinga, tua maitam kii lite ah leh, a sik tungnung kiu lite ah leh, a gei kimvel ah na taat ding a, tua maitam siansuahin maitam adingin khelhna khuhna na bawl ding ahi. 21 Khelhna thillat ding tua bawngtal tuai na la ding a, mun siangthou pua ah, tempul huang sung, tua dinga sehna mun ah na haltum ding ahi. 22 A ni nih ni-in, genbaanglou keltal khat, khelhna thillatin na lan ding a, bawngtal tuaia siansuah bangin maitam a kisiansuah ding ahi. 23 Tua na siansuah khit chiangin, bawngtal tuai khat leh belamhon laka belamtal khat, melhemnabei tuak na laan ding ahi. 24 Tuate Tangtawn Toupa' mai ah na laan ding a, siampite'n tuate tung ah chi a theh ding ua, Tangtawn Toupa' mai ah haltum thillatin a laan ding uh ahi. 25 Ni sagih sung, nisima khelhna thillat dingin keltal khat na pe zel ding a, tua baan ah, bawngtal tuai khat leh belamhon lak apan belamtal khat, genbaanglou tuak, zong na pe ding ahi. 26 Ni sagih sung, maitam adingin a siansuahna na bawl ding uh a, tua bangin sehtuamsa latna a bawl ding uh ahi. 27 Hiai nite a bei chiangin, a ni giatni apanin siampite'n na haltum thillatte leh lemna thillatte, tua maitam tung ah a laan ding uh ahi. Tua khit chiangin, noute kon sang ding hi, chi-a Toupa Tangtawn Pathian in phuang ahi, a chi hi.
Kumpi tapa, Levite, Siampite
1 Tua khitin, ama'n mun siangthou kelkong pawnung, tua suahlam nga pen ah hon tonpih kik a, tua kelkong a kikhak hi. 2 Tangtawn Toupa'n ka kiang ah: Hiai kelkong kikhaksain a om gige ding ahi. Hon ding ahi kei a, kuamah zong tua ah a lut ding ahi kei, Tangtawn Toupa, Israel' Pathian tua-a lut ahih manin a kikhak gige ding ahi. 3 Kumpi' tapa tua kelkong lutna sunga tu thei a, Tangtawn Toupa' maia, ne thei, tua mah-a pawtkhe thei ding ahi, a chi hi. 4 Tua khitin, tua mipa'n mallam kelkong tawnin hon tonpih a, tempul mailam hon tun hi. Ka et leh, Tangtawn Toupa' tempul, Tangtawn Toupa' thupina tawh kidim ka mu a, kei bel a khuplamin ka puk hi. 5 Tangtawn Toupa'n ka kiang ah: Mihing' tapa, pilvangtakin en inla, hoihtakin ngaikhia inla, Tangtawn Toupa' tempul tawh kisaia hih ding dan kipia kon hilhte khempeuh limtakin thudon in. Tempul lutna leh mun siangthou apan pawtkhiaknate khempeuh thudon in. 6 A helhat Israel innkawte kiang ah: Toupa Tangtawn Pathian' thugen hiai ahi: Israel innkawte aw, na gamtatna uh kihhuaite kichingta! 7 Na gamtatna uh kihhuaite baan ah, lungtang leh sa-a zeksum louh gamdang mite, mun siangthou sung ah na piilut uh a, an leh sathau leh sisan na lat sungun, ka tempul na ninsak uh a, ka thukhun na palsat uhi. 8 Ka thil siangthoute tawh kisaia na hih dingte uh hih sang sikin, ka mun siangthou mawhpuain midangte na koih uhi, chi ahi. 9 Toupa Tangtawn Pathian' thugen hiai ahi: Lungtang leh sa-a zeksum louh gamdang mi himhim Israel laka teeng gamdang mi nangawn, ka mun siangthoua a lut louh ding ahi, chi ahi, chi in. 10 Israelte a lampial lai ua, gamlapi-a hon taisan Levite leh a milimte uh delh a, kei hon taisante'n a khelhna mawh uh a khu ding uhi. 11 Tempul kelkongte veeng a, tua sunga nna semin, ka mun siangthou ah a sem thei ding uh. Haltum thillat gante a gou thefding uh a, mipite adingin thillatte a laan thei ding uh a, amaute' nna a sepsak thei ding uh. 12 Ahihhangin, a milimte uh maia milimte' nna a sep manun leh, Israel innkawte a khelhsak manun, a khelhna mawh uh a khu ding uh, chi-in banzakin ka kichiamta, chi-a Toupa Tangtawn Pathian in phuang ahi. 13 Siampi banga nasemin kei hon naih ding uh ahi kei. Ka thil siangthoute zong a naih ding uh ahi kei. A gamtatna kihhuaite uh zumhuaina a khu ding uh ahi. 14 Hinapi-in, tempula mawhpuakna amaute ka guan ding a, a sunga nna khempeuh ah mawhpuakna ka guan ding. 15 Ahihhangin, Israelte'n hon lampialsan lai ua, ka mun siangthoua sem Levi hi a, Zadok suan, tua siampite'n bel ka nna sem dingin hon naih ding uh ahi. Ka maia sathau leh sisana kithoihna laan dingin ka mai ah a ding ding uh ahi, chi-a Toupa Tangtawn Pathian in phuang ahi. 16 Amaute kia ka mun siangthou ah a lut ding uh a, nna sema, ka maia nna sem dingin, amaute kia'n ka dawhkan a naih ding uh ahi. 17 Huangsung inntual sungnung a lut chiangun, puan malngat a silh ding uh ahi. Huangsung inntual sungnung kelkongte ah hiam, tempul sung ah hiama nna a sep laiun samul puan himhim a silh ding uh ahi kei. 18 Puan malngat dial a khim ding uh a, puan malngat puan sungsilh a teeng ding uh ahi. Khawul suah thei puan himhim a silh ding uh ahi kei. 19 Huangsung intual pawnung, mipite omna sunga a pawtkhiak ding chiangun, a puansilhte ua mite sehtuam siangthou a suahsak khak louh nading-un nasepna-a a silh uh puante suahkhiain, inndan siangthou sung ah a koih ding ua, puan dang a silh ding uh ahi. 20 A sam uh leh khamul a metsiang louh ding uh, hawisau zong a hawisau louh ding uh, a met tom ding uh ahi. 21 Siampi kuamah in huangsung inntual sungnung a lut chianga zu a dawn louh ding ahi. 22 Meigong hi-in, maaksa numei hita leh, a kitenpih louh ding uh ahi. Israel chisuan nungak siangthou leh siampite' meigongte kia a kitenpih thei ding uhi. 23 Ka mite kianga a siangthou leh a nautang kibatlouhna leh a sianglou leh a siang a khentuam theih nading ua a sinsak ding uh ahi. 24 Kinakna thubuai peuhmah ah siampite mah thukhenin a pang ding ua, ka dankhun bangin thu a khen ding uh ahi. Ka ankuanglui sehtuamte tawh kisai ka dante leh dankhunte a zuih ding uh, ka Sabbath siangthou a tan ding uh ahi. 25 Siampi in misi luang naiha a kinitsak louh ding ahi. Ahihhangin, tua misi pen a pa hiam, a nu hiam, a tapa hiam, a tanu hiam, a sanggampa hiam, pasal neilou a sanggamnu hiam ahih leh bel, a kininsak thei ding. 26 A kisiansuah kik khit chiangin, ni sagih sung a ngak lai ding ahi. 27 Mun siangthou sunga nasem dinga, huangsung intual sung a lut ni-in, ama' adingin khelhna thillat a lan ding ahi, chi-a Toupa Tangtawn Pathian in phuang ahi. 28 Siampite' goutan kei kia ka hi ding ahi. Israel gam sunga goutan dinga gam amaute na piak louh ding ahi. Kei amaute' goutan ka hi. 29 Amaute'n annel thillatte, khelhna thillatte leh mawhna thillatte a ne ding uhi. Tua baan ah, Israel gama Tangtawn Toupa adinga thil sehtuam peuhmah amau tan ding ahi. 30 Gahmasa khempeuh leh a tuam mawnga na thillatte khempeuh uh laka a hoihpente, siampite ading ahi. Na innkuan sunga vualzawlna a om theih nadingin, na anvuinel mekman laka a masate, amaute na piak ding ahi. 31 Siampite'n a sisa-a top thil himhim, vasa hi-in, ganhing hi-in, gamsa' thah hiam, balzan hiama muh hita leh, a nek het louh ding uh ahi, chi ahi, chi in.
Gam Hawmna
1 Goutan dinga gam na piak chiangin, gam sehtuam siangthou hi dingin, tua gam apan khenkhiak, tong 25,000-a sau, tong 20,000-a za, Tangtawn Toupa kiang ah na pe ding ahi. Tua gam bel a siangthou ahi ding hi. 2 Hiai gam apan gam khenkhiak dang, a dung a vai kikim, tong 500 munsiangthou hi ding ahi a, a kimkota teh tong 50, a awnga koih ding ahi. 3 Tua gam khenkhiak sehtuam siangthou sung ah, tong 25,000-a sau, tong 10,000-a za tehkhia inla, tua sung ah, mun siangthou, tua Mun Siangthoupen, a om ding ahi. 4 Tua bel, mun siangthou sunga nasem leh, Tangtawn Toupa' maia nasem dinga hon naih siampite adinga gam tan, a siangthou ahi ding. Tua mun bel, a innte uh leh mun siangthou adinga a siangthou mun ahi ding. 5 Gam, tong 25,000-a sau, tong 10,000-a za lah, tempul sunga nasem Levite, a teen nading uh khawpite om nadinga sehtuam siangthou ahi ding hi. 6 Tua khawpi' tan dingin, tua sehtuam siangthou tawh kizom mun tong 5,000-a za, tong 25,000-a sau na pe ding ahi. Tua bel Israel inkawte khempeuh-a ahi ding hi. 7 Vaihawmpa' gam khenkhiak sehtuam siangthou' pang tuaka kigi gam leh tua khawpi tawh kigi, gam a tang ding hi. Tua bel, tumlam pang leh suahlam pang ah, a kikhung ding a, tumlam apan suahlam lah, a nam nama gam tan khat tawh kihiang hilhelin a om ding ahi. 8 Israel gama vaihawmpa' gamtan hiai ahi ding hi. Ka vaihawmpa' tapate'n ka mite a sikden nawn kei ding uh a, Israel in a nam nama gam a tan uh a phal ding uhi, chi ahi. 9 Toupa Tangtawn Pathian' thugen hiai ahi: Na pai gamlat huntawkta uh, nou Israel vaihawmpa' tapate aw! Na hiamgamna uh leh na mi sikdenna uh tawpsanta unla, a dik leh a tang hihta un. Ka mite' neihsa suhsak tawpta un, chi-a Tangtawn Toupa Thuneipen in phuang ahi. 10 Bukna selphala dik, ephah dik, bath dik na zat ding uh ahi. 11 Ephah leh bath a let dan kibang, bath khata homer khat seh sawm suah seh khat ta a hih leh, ephah zong homer khat seh sawm suah seh khat ta ahi ding ahi. Homer pen ephah leh bath a tehna dik etna ahi tuak ding ahi. 12 Shekel ahih leh, gera 20 ahi ding a, shekel 20 tawh shekel 25 tawh, shekel sawmlenga tawh gawm, mina khat tawh a kikim ding ahi.
Thillat leh Ni Siangthoute
13 Hiai thawnpiak tuam mawng hi dinga na lat ding ahi: Huitbuh homer khat apana ephah khat seh guk suah seh khat leh, barlibuh homer khat apan ephah khat seh guk suah seh khat, 14 sathau bikhiah zah, bath-a teh bel kor khat apan bath khat seh sawm suah seh khat ahi. Kor khat bel, bath sawm hiam, homer khat hiam ahi. Ahang bel, bath sawm leh homer khat kikim hiven. 15 Tua baan ah, Israel gama ganan loupa mun tuikham mahmah apana, belamhon 200 lak zela belam khat zel lak ding ahi. Hiaite bel mipite adinga khelhna khuhna bawl nading anvuinel thillatte, haltum thillatte leh lemna thillatte hi dinga zat ding ahi, chi-a Toupa Tangtawn Pathian in phuang ahi. 16 Gamsung mite khempeuh, hiai Israel gama vaihawmpa' tapa adinga thillatna ah a kihel ding uh ahi. 17 Ankuangluinate, Kha Thakte leh Sabbathte leh Israel inkawte' sehtuam ankuangluinatea haltum thillat, an thillat leh dawn thillatte piak ding, vaihawmpa' mawhpuak ahi. Ama'n khelhna thillatte, an thillatte, haltum thillatte leh lemna thillatte, Israel innkawte adinga khelhna khuhna bawl nadingin a pe ding ahi, chi hi. 18 Toupa Tangtawn Pathian' thugen hiai ahi: A kha khatna, a ni khat ni-in, bawngtal tuai, genbaanglou khat na la ding a, mun siangthou na siansuah ding ahi. 19 Siampi in tua khelhna thillat sisan bangzah hiam a la ding a, tempul kongbiang maitam khung kiu lite leh, huangsung inntual kongpi biangte ah a taat ding ahi. 20 Tua kha a ni sagih ni-in, tupkholh louha khial, ahih kei leh, theiloua khial kuapeuh adingin tua bang mah na hih ding ahi. Tuachi-in, tempul adingin khelhna khuhna na bawl ding ahi. 21 A kha khatna, a ni sawm leh li ni-in, Paikan, ni sagih sung ankuanglui na bawl ding uh ahi. Tua sungin, silngou sawh louh tanghou na ne ding uh ahi. 22 Tua ni-in vaihawmpa'n amah ading leh, gamsung mite khempeuh ading khelhna thillat ding bawngtal a pe ding ahi. 23 Tua ni sagih Ankuang lui sung nisimin ni sagih sung bawngtal sagih, belamtal sagih, genbaanglou ngen, Tangtawn Toupa' maia haltum thillat dingin, tua baan ah khelhna thillat keltal khat, a pe ding ahi. 24 An thillat dingin bawngtal khat zel ading, anvuinel ephah khat zel leh, belamtal khat zel ading anvuinel ephah khat zel, tua ephah khat zel ading sathau hin khat zel tawh a pe ding ahi. 25 Tua a kha sagihna, a ni sawmlenga ni apan ni sagih Ankuanglui sungin, khelhna thillat, haltum thillat, an thillat ding leh sathau a pe ding ahi, chi ahi.
1 Toupa Tangtawn Pathian' thugen hiai ahi: Nasep hun ni guk sung suahlam nga huangsung inntual kelkong a kikhak ding a, ahihhangin, Sabbath ni-in leh, Kha Thak ni-in a kihong ding ahi. 2 Pawlam apan kelkong lutna innliim tawnin vaihawmpa a lut ding a, kelkong biang khuam bul ah a ding ding ahi. Siampite'n haltum thillat leh a lemna thillat uh a laan ding uh ahi. Ama'n tua kongpi lutna innliim ah a be ding a, tua khit chiangin, a paikhe ding a, ahihhangin kongpi bel nitaklam ahih mateng a kikhak kei ding ahi. 3 Sabbath nite leh Kha Thak nitein, tua gam mite'n tua kelkong lutna ah, Tangtawn Toupa' mai ah a be ding uh ahi. 4 Sabbath ni-a vaihawmpa'n haltum thillat ding hon tawi, belamnou apa guk leh belamtal khat, genbaanglou ngen ahi ding ahi. 5 Tua belamtal tawh latkhawm ding an thillat, anvuinel ephah khat ahi ding a, belamnoute tawh lat khawm ding an thillat a ut zahzah ahi ding a, ephah khat zel ading sathau hin khat ahi ding ahi. 6 Kha Thak ni-in bawngtal tuai khat, belamnou guk leh belamtal khat, genbaanglou ngen ahi ding ahi. 7 Ama'n bawngtal tawh latkhawm ding an thillat dingin anvuinel ephah khat, belamtal tawh lat ding anvuinel ephah khat, belamnoute tawh lat ding an thillat a ut zahzah, ephah khat zel ading sathau hin khat zel a pe ding ahi. 8 Vaihawmpa a lut chiangin kelkong lutna innliim tawnin a lut ding a, tua mah tawnin a pawtkhe ding ahi. 9 Sehsa ankuangluitea Tangtawn Toupa' maia tua gam mite hong pai chiangun, be dinga mallam kelkonga hong lut peuhmah, simlam kelkong ah a pawtkhe ding ahi. Simlam kelkonga lut peuhmah lah, mallam kelkong ah a pawtkhe ding ahi. Kuamah, a lutna kelkong tawnin a pawtkhe ding ahi kei a, a lehlam kelkong ah a pawtkhe ding ahi zaw. 10 Vaihawmpa amaute lak ah a om ding a, amaute lut chiangin a lut ding a, amaute pawtkhiak chiangin a pawtkhe ding ahi. 11 Nopbawlna leh sehsa angkuangluitea an thillat ding, bawngtal khat tawh anvui-nel ephah khat lat ding, belam tai tawh anvuinel ephah khat, belamnou tawh ut zahzah an thillat ding, ephah khat zel ading sathau hin khat hi ding ahi. 12 Vaihawmpa in Tangtawn Toupa' maia ut thillat a piak chiangin, haltum thillat hi-in, lemna thillat hita leh, amah adinga mallam nga kelkong hon ding ahi. A haltum thillat hiam, a lemna thillat hiam, Sabbath ni-a bangin, a laan ding ahi. Tua khit chiangin, a pawtkhe ding a, a pawtkhiak khit chiangin, kelkong a kikhak ding ahi. 13 Tangtawn Toupa' maia haltum thillat dingin belamnou, kum khata upa, genbaanglou, ni simin na pe ding a, zingsang phalvak tengin na pe ding ahi. 14 Zingsang phalvak tengin tua tawh kitonin, an thillat ding, anvuinel ephah khat seh guk suah seh khat leh annel nomsak nading sathau hin khat sehthum suah seh khat tawh zong na pe ding ahi. Tangtawn Toupa' maia an thillat ding, a omdenden ding thuseh ahi. 15 Tua bang ahih manin, haltum thillat gige dingin, zingsang phalvak tengin belam-nou, an thillat leh sathau piak ding ahi, chi ahi. 16 Toupa Tangtawn Pathian' thugen hiai ahi: Vaihawmpa'n a mite laka khat kianga a goutan apan thawnpiak a piak leh, tua goutan pen a suantea zong ahi ding a, gou kiluah dana a thilneih uh ahi ding hi. 17 Ahihhangin, a silate laka khat kianga, a goutan apan thawnpiak a piak leh bel, tua sila in tua thawnpiak, suahtakna kum dong a kem thei ding a, tua khit chiangin tua thawnpiak, vaihawmpa kiang ah a kik ding ahi. A goutan a tapate kia-a ahi a, amautea ahi. 18 Vaihawmpa'n mite' a goutan gam apan hawlkhia-in, tua goutan a sut ding ahi het kei hi. Ka mite a goutan utawh a kikhen louh nadingun, vaihawmpa'n ama' goutan apanin, a tate goutan a pe ding ahi, chi ahi, chi in, a chi hi. 19 Tua khitin, tua mipa'n, mallam nga inndan sehtuam siangthoute sung lutna kelkong panga om kongvang tawnin hon tonpih hi. Tua inndante bel siampitea ahi. Ama'n tumlam monga mun khat hon ensak hi. 20 Ama'n ka kiang ah: Siampite'n mawhna thillat leh khelhna thillat a huan nading uleh, an thillat a em nading mun uh hiaisan ahi. Tua bel, tuate huangsung pawnung pawlama lakhia a, mite sehtuam siangthou a suahsak khak louh nading uh ahi, a chi hi. 21 Tua khitin, ama'n huangsung pawnung ah hon tonpih a, a kiu lite hon kimvel pih a, tua a kiu teng ah huangsung dang ka mu hi. 2 Tua huangsung pawnung kiu lite ah huangsung kium, tong 40-a sau, tong 30-a za a om uh a, tua kiu lite-a huangsung a kikim vek uhi. 23 Tua huangsung kiu lite' kimkot ah, suang dawkkhia a om chiat a, tua nuai kimkot ah mei chih nading munte a om hi. 24 Ama'n ka kiang ah: Tempula nasemte'n mipite' kithoihna thillatte a huan nading uh anhuan buk hiaite ahi, a chi hi.
Tempul apan Luipi
1 Tua mipa'n tempul lutna ah hon kik pih a, tempul innliim nuai apan suahlam manawha luang tui ka mu hi. Tua tempul bel suahlam nga ahi. Tua tui, tempul taklam pang nuai, maitam simlam pang apan hong luangkhia ahi. 2 Ama'n, mallam kelkong tawnin hon piikhia a, a kimkota paiin, suahlam nga kelkong pawnung hon tun a, tua tui lah simlam apan hong luang ahi. 3 Tua mipa, tehna khau tawia suahlam manawha a pai kawmin, tong 1,000 a teh khia a, tua khitin, tua tui paiin hon tonpih a, siak chiang phain a thuk hi. 4 Tong 1,000 dang a tehkhe lai a, tua tui paiin hon tonpih a, khuk chiang phain a thuk hi. Ama'n tong 1,000 dang a tehkhe lai a, tua tui paiin hon tonpih a, kawng chiang phain a thuk hi. 5 Ama'n tong 1,000 dang a tehkhia a, ahihhangin, a tui pala kan vual ahita kei hi. Ahang bel, tua tui tam a, leuh thama thuk hiven. Kuamah pal galkai zawhlouh tui ahi hi. 6 Ama'n ka kiang ah: Mihing tapa, hiai na mu hia? hon chi hi. Tua khitin, ama'n tua tui luang gei ah hon kikpih hi. 7 Tua lai ka tun takin, tua lui gei tuak ah singkung tampi mahmah ka mu hi. 8 Ama'n ka kiang ah: Hiai tui suahlam gam manawha luang a, Araba ah, Tuipi ah a luanglut hi. Tua tuipi a lut takin, tua tuipi tui, tuisiang hong suak hi. 9 Tua tui luanna peuh ah thilhing honpipi a teeng ding hi. Tua tuipi-a tui, tuilim suaksaka luang ahih manin, a luanna peuh ah ngasa tampipi a om ding. Tuachi-in, tua lui luanna ah bang teng a hing ding hi. 10 Ngabengte a luigei ah a ding ding uh a, En Gedi apan En Eglaim dongin, lente zaka phalhna munte a om ding. Tuipi Liana ngate bangin, ngasa nam tuamtuam a om ding. 11 Ahihhangin, chiknawng leh tuivunnate bel, tuisiang a suak kei ding uh, chi omna hi dinga nutsiat ahi ding uh. 12 Tua luigei tuak ah, thei sing nam tuamtuam a pou ding a, a tehte uh a vuai kei ding a, a gahte uh zong a pulh kei ding. Mun siangthou apana tui in amaute vak ahih manin, a kha simin a gah ding uh. A gahte uh an ahi ding a, a tehte uh hihdamna ahi ding uhi, a chi hi.
Tua Gam Gamgite
13 Toupa Tangtawn Pathian' thugen hiai ahi: Israel nam sawm leh nihte kianga goutan gam hawm a, Josef ading tan nih pia a, gam na hawm nading gamgite hiaite ahi. 14 Amaute lak ah a kikimin gam na hawm ding ahi. Na pu na pate uh kianga piak ding chi-a banzaka ka kichiam manin, hiai gam na goutan uh ahi ding hi. 15 Hiai tua gam gamgi ahi ding: Mallam pang ah, Tuipi Lian apanin Hethlon lampi zuiin, Labo Hamath khengin, Zedad sunin gamgi a pai ding ahi. 16 Hamath Beroth leh Sibraim ah a pai ding a, Hauran gamgi-a om Hazer Hatikon dong a pai ding ahi. Sibraim bel Damaska leh Hamath kala om ahi. 17 Tuipi apanin Hazar Enan ah, Damaska mallam gamgi zuiin a pai ding a, mallam ah Hamath tawh a kigi ding ahi. Hibangin mallam pang gamgi a pai ding hi. 18 Suahlam pang ah, Hauran leh Damaska kal ah gamgi a pai ding a, Gilead leh Israel gam kala Jordan lui zuiin, Tamar dongin suahlam tuipi a sun ding hi. Hibangin suahlam pang gamgi a pai ding hi. 19 Simlam pang ah, Tamar apanin Meriba Kadesh tuite dongin gamgi a pai ding a, Aigupta luipi a sun ding hi. Hibangin simlam pang gamgi a pai ding hi. 20 Tumlam pang ah, Lebo Hamath gal tak ah, Tuipi Lian gamgi ahi ding ahi. Hibangin tumlam pang gamgi a pai ding hi. 21 Israel nam bang zelin, na lak uah hiai gam na hawm ding uh ahi. 22 Noute ading leh, na lak ua teeng, tate neite adinga gam goutan hi dingin na kiguan ding uh ahi. Tua gamdang mite, Israela piang, Israel mi-in na ngai ding uh ahi. Israel namte lak ah, noute mah bangin goutan got ahi ding uh ahi. 23 Tua gamdang mi koi nam lak peuha a teenna ah, goutan na guan ding uh ahi, chi-a Toupa Tangtawn Pathian in phuang ahi, chi ahi.
Gam Hawmna
1 Hiaite, min mina kikhum namte ahi: Mallam pang gamgi bul ah Dan in tan khat a tang ding a, a gamgi Hethlon lampi tawnin, Lebo Hamath a sun ding. Hamath ban ah, suahlam apan tumlam dongin, Hazar leh Damaska mallam pang gamgi kal ah gamgi a pai ding. 2 Asher in tan khat a tang ding a, suahlam apan tumlam dongin, Dan gam tawh a kigi ding. 3 Naftali in tan khat a tang ding a, suahlam apan tumlam dongin, Asher gam tawh a kigi ding. 4 Manase in tan khat a tang ding a, suahlam apan tumlam dongin Naftali gam tawh a kigi ding. 5 Efraim in tan khat a tang ding a, suahlam apan tumlam dongin Manase gam tawh a kigi ding. 6 Reuben in tan khat a tang ding a, suahlam apan tumlam dongin Efraim gam tawh a kigi ding. 7 Judah in tan khat a tang ding a, suahlam apan tumlam dongin Reuben gam tawh a kigi ding. 8 Suahlam apan tumlam donga Judah gam tawh kigi gam seh khat thawnpiak tuam mawng hi dinga na lat ding ahi. Tua gam tong 25,000-a za ahi ding a, suahlam apan tumlam dongin, namte tan gam zahzaha a dung sau ahi ding ahi. Tua gam laizang tak ah mun siangthou a om ding ahi. 9 Tangtawn Toupa' kianga na lat ding tua mun sehtuam mawng bel, tong 25,000-a sau, tong 10,000-a za ahi ding ahi. 10 Hiai mah siampite adinga tantuam, a zeka siangthou ahi ding hi. Mallam panga tong 25,000-a sau, tumlam panga tong 10,000-a za, suahlam panga tong 10,000-a za, simlam panga tong 25,000-a sau ahi ding ahi. Tua gam laizang tak ah, Tangtawn Toupa' mun siangthou a om ding ahi. 11 Hiai bel sehtuam siangthou siampite, tua Zadok' suante, kei' nasema muanhuai, Israelte' lampial laia Levite banga lampialloute ading ahi. 12 Tua gam sehtuam siangthou apana, amaute adinga thawnpiak tuam mawng ahi ding a, tantuan siangthoupen ahi ding a, Leivite gam tawh kigi ahi ding ahi. 13 Tua Levi chi siampite' gam dungtawna kikhung tua gam, tong 25,000-a sau, tong 10,000-a za gam sehtuam a om ding ahi. A dung sau daan, a tawnsuakin tong 25,000, a vailam zatdan tong 10,000 ahi ding ahi. 14 Siampite'n tua gam bangchik maha a zuak louh ding uh, thil khekna-a zong a khotkhiak louh ding uh ahi. Hiai mun, tua gama mun hoihpen ahi a, Tangtawn Toupa adinga a siangthou ahih manin, midang' khut a tun louh ding ahi. 15 Mun om lai, tong 5,000-a za, tong 25,000-a sau, khawpi in zatna tangpi, inn lam nading khawng, gan tatna ding khawnga zat ding ahi. Tua gam laizang ah khawpi a om ding a, 16 a let daan hibang ahi ding: A mallam pang tong 4,500, a simlam pang tong 4,500, a suahlam pang tong 4,500, a tumlam pang tong 4,500. 17 Khawpi adinga gantatna mun, mallam pang ah tong 250, simlam pang ah tong 250, suahlam pang ah tong 250, tumlam pang ah tong 250 ahi ding ahi. 18 Gam om lai teng, tua a zeka koih tawh a dunglama kigi, a suah lam pang tong 10,000, a tum lampang tong 10,000 ahi ding ahi. Tua gam sunga piangte'n khawpi-a teng nasemte a vak ding uh ahi. 19 Tua khawpi apan nasemte, tua gam khoute, Israel nam chih apan hong kuan ahi ding uh ahi. 20 Tua gam let dan kigawm, a dung a vai kikim, tong 25,000-a za vek ahi ding. Thawnpiak tuam mawng hi dingin, tua sehtuam siangthou mun, khawpi gam dung tawnsuakin na sepkhe ding ahi. 21 Tua mun, gam sehtuam siangthou in a bawl gam pangtuaka gam omlai teng, vaihawmpa-a ahi ding ahi. Suahlam pang ah, tua gam sehtuam siangthou apan suah lam panga tong 25,000, suahlam gam mong donga kizalh, tumlam panga zong tong 25,000, tumlam gam mong donga kizalh ahi ding a, tua gam tegel, Israel namte' tante sauna tana kikhung, vaihawmpa-a ahi ding a, tua gamte laizang ah, gam sehtuam siangthou leh tempul mun siangthou leh khawpi a om ding ahi. 22 Tuachi-in, Levite' gam leh khawpi gam bel, vaihawmpa' tan gam laizang ah a om ding ahi. Tua vaihawmpa' gam lah, Judah gam mong leh Benjamin gam kikal ah a om ding ahi. 23 Nam om laite ading ahih leh, hiaite ahi: Benjamin in tan khat a tang ding a, suahlam pang apan tumlam ah a kikhung ding. 24 Simeon in tan khat a tang ding a, suahlam apan tumlam ah, Benjamin gam tawh kigi-in a kikhung ding. 25 Isakhar in tan khat a tang ding a, suahlam apan tumlam ah, Simeon gam tawh kigi-in a kikhung ding. 26 Zebulun in tan khat a tang ding a, suahlam apan tumlam ah, Isakhar gam tawh kigi-in a kikhung ding. 27 Gad in tan khat a tang ding a, suahlam apan tumlam ah, Zebulun gam tawh kigi-in a kikhung ding. 28 Gad gam simlam gamgi bel, Tamar apan simlam manawhin, Meriba Kadesh tuite dong a pai ding a, Aigupta Luipi zuiin Tuipi Lian sunin a pai ding. 29 Israel namte adinga goutan na hawm ding hiai gam ahi a, a tan ding uh hiaite ahi, chi-a Toupa Tangtawn Pathian in phuang ahi. Kha wpi Kongpite 30 Khawpi pawtkhiakna hiaite ahi ding: Mallam pang apat, tua tehna tong 4,500-a sau ah, 31 khawpi kongpite, Israel namte min tama min phuah ding ahi. Mallam panga kongpi thumte Reuben Kongpi, Judah Kongpi leh Levi Kongpi chih ahi ding. 32 Suahlam pang tehna tong 4,500-a sau ah, kongpi thumte Josef Kongpi, Benjamin Kongpi leh Dan Kongpi chih ahi ding. 33 Simlam pang tehna tong 4,500-a sau ah, kongpi thumte, Simeon Kongpi, Isakhar Kongpi leh Zebulun Kongpi chih ahi ding. 34 Tumlam pang tehna tong 4,500-a sau ah, kongpi thumte, Gad Kongpi, Asher Kongpi leh Naftali Kongpi chih ahi ding. 35 A kimkota teha a sau dan tehna tong 18,000 ahi ding. Tua khawpi min, tua hun akipanin, JEHOVA SHAMA chih ahi ding, chi ahi, chi in, a chi hi.
Babulona Daniel
1 Judah kumpipa Jehoiakim' vaihawm kum, a kum thumna ah, Babulon kumpipa Nebukhadnezar hong kuan a, Jerusalem hong sim hi. 2 Toupa'n lah a khut ah Judah kumpipa Jehoiakim, Pathian' tempul apan van pawlkhat tawh a pekhia hi. Nebukhadnezar in hiai vante, Babulon gama ama' pathian biakinn sung a tun a, a pathian' gou kholna mun ah a koih hi. 3 Tua khitin, Kumpipa Nebu-khadnezer in, a vaihawm uliante laka makai Ashpenaz thu a pia a, Israel kumpi innkuan leh miliante lak apan mi pawlkhat hon piilut dingin a sawl hi. 4 Tua mite bel, satunga melhemna omlou, melhoih, pilna chitenga kizen, theihna khempeuh nei, thil theibaih, kumpipa' innpi sunga nasem dinga ching tangval vive ahi uhi. Ashpenaz in amaute, Babulonte' pau leh lailam a sinsak dinga thupiak ahi. 5 Kumpipa'n ama' nekna dawhkan apan, amaute annek ding leh zudawn ding sehsa diamin a pia hi. Kum thum sung tua banga sinsaka om ding, tua khit chianga kumpipa' nna a sep ding uh, chih ahi. 6 Tua tangvalte lak ah Judah beh mi pawlkhat a om uh a, amaute Daniel, Hanania, Mishael leh Azaria ahi uh. 7 Tua ulian makaipa'n bel amaute min ding a phuahsak a, Daniel' min dingin Belteshazar, Hanania' min dingin Shadrak, Mishael' min dingin Meshak, Azaria' min dingin Abednego a phuak hi. 8 Ahihhangin, Daniel in bel, kumpipa' an leh zu-a kihihbuah louh a tum bikbek a, tua ulian makaipa kiang ah tua banga kihihbuah louh nadingin phalna a ngen hi. 9 Pathian in Daniel deihsak nading leh lainat nading lungtang tua ulian a neisak hi. 10 Ahihhangin, tua ulian in Daniel kiang ah: Na nek ding uleh na dawn ding uh hon sehsak ka toupa, kumpipa ka lau. Banghanga na khanvualte uh sanga hoihlou zaw-a hon muse ding ahia? Tua bangin kumpipa'n hon mu leh ka lutang la nuam ding hi veh, a chi hi. 11 Tuachi-in, Daniel, Hanania, Mishael leh Azaria uka ching dinga ulian makaipa'n a sehsawnpa kiang ah Daniel in: 12 Hehpihtakin na silate ni sawm sung hon enkhia in. Nek ding anteh-louhing leh dawn ding tuisik loungal bangmah hon pe ken. 13 Tua khit chiangin, ka melput uh, tua kumpipa' an ne tangvalte' melput tawh enkak inla, na muh dan bangbangin, na silate tung ah hih in, a chi hi. 14 Tua bangin, amaute chingpa'n zong a thukimpih a, ni sawm sung amaute a enkhia hi. 15 Ni sawm a bei takin, kumpipa' an ne tangvalte sangin amaute chidam zaw leh khanpha zaw mei a pu uhi. 16 Tuachi-in, amaute chingpa'n tua an hoihpen leh a dawn ding ua piak zu a hemkhia a, anteh-louhing ngen a peta hi. 17 Pathian in tua tangvalte, lailam leh siamsinna lama theihna leh theihsiamna leh pilna a pia hi. Daniel in mengmuhte leh mangte khempeuh a theisiam thei hi. 18 Kumpipa'n amaute piilut nadinga a hunseh a tun takin, tua ulian makaipa'n Nebukhadnezar' mai ah amaute a tonpih a, a valak hi. 19 Kumpipa'n amaute a houpih a, Daniel, Hanania, Mishael leh Azaria' kimpih midang kuamah a om kei, chih a mu a, amaute zong kumpipa' nna semin a lutta uhi. 20 Kumpipa'n pilna leh theihsiamna thil a dot khempeuh ah, a kumpigam sunga mitkhialdawi tawite leh aisan siamte khempeuh sanga a lehsawma hoih zawin amaute a mu hi. 21 Daniel bel, Kumpipa Kura' vaihawm kum, a kum khatna dong tua ah a om hi.
Nebukhadnezar' Mang
1 Nebukhadnezar in a vaihawm kum, a kum nihna ah, mang a man a, a lungbuai mahmah a, a ihmu thei kei hi. 2 Tuachi-in, a mangmatte hilh dingin mitkhialdawi tawite, aisan siamte leh bumsiamte, aksilam siamte a samkhawm a, 3 amaute kiang ah; Hon lungbuaisak mahmah mang khat ka man a, a khiakna ka thei nuam hi, a chi hi. 4 Aksilam siamte'n kumpipa a dawng uh a, Aram pauin: Kumpipa aw, damsawt in! Na silate kiang ah na mang hon hilh in, kon khiaksak ding uh, a chi uhi. 5 Kumpipa'n aksilam siamte kiang ah: Hiai kiptaka ka thupukna ahi: Ka mang bang hi hiam, chih leh a khiakna bang hi hiam, chih non hilh kei uleh, kon satzansak ding a, na innte uh a sia kivum leltak ka suaksak ding. 6 Tua ka mang non hilh ua, non hilhchian uleh bel, thawnpiakte, pahtakmante leh pahtawina thupitak na ngah ding uh. Tua mang hon hilh unla, hon hilhchian un, a chi hi. 7 Amaute'n a dawngkik uh a: Kumpipa'n a silate kiang ah a mang hon hilh leh, tua chiangin a khiakna ka gen ding uh, a chi uhi. 8 Kumpipa'n: Ka thupukna kip na theih man ua hun sawtsak sawm na hi lei uh chih ka thei. 9 Ka thupukna lah, tua mang non hilh kei uleh, nou adinga gawtna ding omsa om ahi, chih ahi. Tua sungin thil hong kilamdang nanteh chih lamen a, a hilou lou leh thil gilou sawm hi lei uteh. Tua mang hon hilh phot peuhmah le uchin, non khiaksak thei ding uh, chih ka thei ding, a chi hi. 10 Aksilam siamte'n kumpipa a dawng uh a: Kumpipa' thil ngiat hih thei ding leitung ah kuamah om kei! Kumpipa kuamah in, bangzaha lian leh vanglian hita leh zong, mitkhialdawi tawite, aisan siamte leh aksilam siamte hita leh, hibang peuhmah amaute apan ngiat ngeilou hi. 11 Kumpipa' nget pen haksa lua hi. Pathiante loungal kuama'n kumpipa kiang ah tua bang laakkhe lou ding hi, amaute lah mihing laka om hilou uh a! a chi uhi. 12 Hiai dawnna in kumpipa a hehsak mahmah a, Babulon mipilte khempeuh thah ding thu a peta mai hi. 13 Mipilte khempeuh thah ding thuseh a kipekhia a, amaute that ding Daniel leh a lawmte vazong dinga amaute that ding mi a kisawl hi. 14 Babulon mipilte that dinga kumpipa veng sepaih makai Ariokh a kuankhiak takin, Daniel in piltak leh lemtheitakin amah a houpih hi. 15 Tua kumpipa' ulian kiang ah: Banghanga kumpipa'n tua bang thuseh khauh bawl a hia oi? a chi hi. Ariokh in thu omdan teng khempeuh Daniel a hilhta hi. 16 Tua a zak takin, kumpipa kiang ah Daniel a va-lut a, mang a khiaksak theih nadingin ngakna hun a ngen hi. 17 Daniel bel inn ah a chiahkik a, thu omdan khempeuh a lawmte Hanania, Mishael leh Azaria a hilh hi. 18 Amaute nangawn, Babulon mipil dangte tawh thahkhawma om lou dingin, hiai thusimkiseel tawh kisaia vaan Pathian apan zahngaihna ngen ngutngut dingin amaute a ngen hi. 19 Tua zanin, mengmuhna tungtawnin Daniel kiang ah tua thusim-kiseel theihsakin a om hi. Daniel in vaan Pathian a phat a: 20 Pathian' min phatin om tawntung hen, pilna leh vangletna amaha ahi. 21 Ama'n hunte leh hunbite, a hunhunin kheng a, kumpipate tungkhia a, a pilte kiang ah pilna pia a, a theikak theite kiang ah, theihna pia hi. 22 Ama'n thil thuk leh kiselte laakkhia a, miallaka omte thei a, a kiang ah khawvak om hi. 23 Ka pu ka pate' Pathian aw, na tung ah ka kipak a, nang kon phat hi. Pilna leh vangletna non pia a, nang kon ngette uh non theisak a, kumpipa' mang nang non theisakta hi, a chi hi.
Daniel in Mang Khia
24 Tua khitin, kumpipa'n Babulon mipilte that dinga a seh Ariokh kiang ah Daniel a vahawh a, a kiang ah: Babulon mipilte that het ken. Kumpipa kiang ah kei hon tonpih inla, ke'n amah adingin a mang ka khiaksak ding, a chi hi. 25 Ariokh in kumpipa kiang ah Daniel a tonpih pah a: Kumpipa' mang khiakna a kianga hilh thei ding Judah nam apan salmatte lak ah mi khat ka muta, a chi hi. 26 Daniel, tua Belteshazar kichipa kiang ah kumpipa'n: Ka manga ka muh bang hi hiam, chih hon hilhin a khiakna non hilh thei ding maw? a chi hi. 27 Daniel in a dawng a: Aisan siam hi-in, mitkhialdawi tawi hi-in, bumsiam hita leh, mipil kuamah in kumpipa nget, tua thusimkiseel a hilhchian thei kei ding. 28 Ahihhangin, thusimkiseelte laakkhe thei Pathian khat vaan ah a om. Ama'n tunung huna hong tung ding bang hi hiam, chih kumpipa Nebukhadnezar kiang ah a lak ahi. Na lupna tunga na lup laia na mang leh na lungsim sunga mengmuh hong lang hiaite ahi: 29 Kumpipa aw, lupna tunga na lup laiin, hong tung ding thilte lam ah na lungsim a kihei a, thusimkiseelte langsakpa'n bang hong tung ding hiam, chih nang hon lak ahi. 30 Kei ka hih leh, a nungtalai mihing dangte sanga ka pilzawk mana hiai thusimkiseel ka kianga latsak ahi kei a, Kumpipa aw, a khiakna na theih nading leh na lungsim sunga om na theihsiam nading ahi zaw. 31 Kumpipa aw, na khawdak a, na maia ding milim lianpi, a leta lian, a tesol sol, a lim a mei kihtakhuai na mu hi. 32 Tua milim lutang kham sianga kibawl ahi a, a awm leh a baante ngunsika kibawl, a gil leh a pheite sumsana kibawl, 33 a khete sika kibawl, a khepekte sik leh bellei haltak kihela kibawl ahi. 34 Tua banga na et laitakin, mihing khuta satkhiak hilou suangtum khat in tua milim khepek sik leh bellei haltak kihel a deng a, a deng zaan gawp hi. 35 Tua khitin, tua sik, bellei, sumsan, ngun leh kham a delhtamgawp khawm vek a, nipi laia buhchilpa phuala buhsite bang mai ahi uhi. Huih in tuate a mutmang vek sipsip a, a omna uh a kitheita kei hi. Tua milim denggawp tua suangtum bel mual lianpi hong suak a, leitungbup a dimsuak hi. 36 Hiai ahi na mang. Tu'n kumpipa kiang ah a khiakna kon hilh ding uhi. 37 Kumpipa aw, nang kumpipate' kumpipa na hi. Vaan Pathian in kumpigam leh vangletna leh thahatna leh thupina nang hon pia a, 38 mi khempeuh leh gamlak gamsate leh huihkhua-a vasate na khut sung ah a koih hi. A omna peuh ua amaute ukpain nang hon bawl hi. Nangmah tua milim lutang khamsika kibawl pen na hi, 39 Nang nungin kumpigam dang khat hong dingkhe ding a, nang' kumpigam sanga thupilou zaw ahi ding. Tua khit chiangin, kumpigam thumna, sumsana kibawl in leitungbup a uk ding. 40 A tawpna ah, kumpigam lina, sik banga khauh leh hat ahi ding. Sik in bel thil dang gawitama zansak hiven, tua kumpigam in kumpigam dangte a gawitam vek ding. 41 Tua milim khepek leh khezungte, bellei haltak leh sik kihel na muh bangbangin, hiai kumpigam bel kumpigam kisakhat lou ahi ding. Hinapi-in, sik banga hatna tak a nei ding a, na muh banga sik leh bellei kihel ahi ding. 42 A khezungte sik leh bellei kihel ahih manin, hatna chiang leh ngotna chiang a nei ding. 43 Sik leh bellei haltak kihel na muh bangin, tua kumpigam mite zong mi kihel, kipumkhat lou ahi ding uh a, sik leh bellei kisakhat lou bangbang ahi ding. 44 Hiai kumpipate' vaihawm sungin, vaan Pathian in hihsiat ngeilouh ding kumpigam khat a tungkhe ding a, midang kianga piak zong ahi kei ding. Tua kumpigam in kumpigam dangte khempeuh a gawizan ding a, a beisak ding a, amah bel a dingden ding. 45 Mual apan satkhiak, mihing khuta satkhiak hilou, tua suangtum, mengmuhna-a na muh, a khiakna hiai ahi. Tua bel, sik, sumsan, bellei, ngunsik leh kham gawizan suangtum ahi. Pathian thupi in tununga hong tung ding thil kumpipa kianga hon lak ahi. Tua mang a dik a, a khiakna zong a muanhuai hi, a chi hi. 46 Tua khitin, Daniel' mai ah Kumpipa Nebukhadnezar a bok a, pahtawina a pia a, a maia thillat leh gimnamtui lat ding thu a pia hi. 47 Kumpipa'n Daniel kiang ah: Na Pathian zaw, pathiante' Pathian leh kumpipate' Toupa, thusim kiseelte laakkhepa ahi taktak. Hiai thusim kiseel langsak thei taktak hi vechin, a chi hi. 48 Tua khitin, kumpipa'n dinmun sangpi Daniel a pia a, thawnpiak tampitak a pia hi. Babulon gambup tunga ukpain a bawl a, tua gam mipilte khempeuh tunga vaihawm-pain a koih hi. 49 Tua teng baan ah, Daniel' ngetna bangin, kumpipa'n Shadrak, Meshak leh Abednego zong Babulon gam tunga vaihawmin a koih a, Daniel bel kumpi vaihawmthukhenna ah a tuden hi.
Kham Milim leh Haltuina Meiphualpi
1 Kumpipa Nebukhadnezar in khamin milim khat, tong 60-a sang, tong guka lian khat a bawl a, Babulon gama Dura phaizang ah a tungkhia hi. 2 Tua khitin, gam sehkhen neuzaw ukte, vaisaite, ukpipate, thudotte, sumkemte, vaihawmte, thukhente leh gamsung uliante khempeuh, a milim tunkhiak latna-a kihel dingin a sam a, 3 tuachi-in, gam sehkhen neuzaw ukte, vaisaite, ukpipate, sumkemte, vaihawmte, thukhente leh gamsung uliante, tua Kumpipa Nebukhadnezar' milim tunkhiak latna adingin hong paikhawm uh a, tua milim mai ah a ding uhi. 4 Tua khitin, tangkoupa'n thu a phuang a: Mipite, namte leh pau chiha mite aw, na hih ding ua thupiak hiai ahi: 5 Pengkul, tamngai, kaihging, pekging, gawsem leh gingthei namkim na zak chiangun, boka tua Kumpipa Nebukhadnezar in a tunkhiak kham milim na biak ding uh ahi. 6 Tua banga boka belou peuhmah, haltuina meiphualpi-a paihlut hi ding ahi, a chi hi. 7 Tua bang thupiak ahih manin, pengkul, tamngai, kaihging, pekging leh a gingthei namkim a zak takun, mipite, namte, pauchih-a mite khempeuh a bok uh a, tua Kumpipa Nebukhadnezar' tunkhiak milim a bia uhi. 8 Hiai hunin, aksilam siam pawlkhat hong pai uh a, Judate hong heek uhi. 9 Kumpipa Nebukhadnezar kiang ah: Kumpipa aw, damsawt in! 10 Kumpipa aw, pengkul, tamngai, kaihging, pekging, tumging, gawsem leh a ging thei namkim a zak chiang ua michih in boka tua kham milim a biak ding chi-in, thuseh na bawl a, 11 tua banga boka belou peuhmah haltuina meiphualpi-a paihlut ding, chi-in thuseh na bawl hi. 12 Ahihhangin, Babulon gam tunga na koih, Juda mi pawlkhat, Shadrak, Meshak leh Abednego in nang hon thusim lou uhi. Kumpipa aw, na pathiante' nna lah sem lou, tua kham milim na tunkhiak lah belou uhi, hong chi uhi. 13 Heh-a thangpai mahmahin Nebukhadnezar in Shadrak, Meshak leh Abednego a samsak hi. Tuachi-in, kumpipa' mai ah hiai mite hon tonpih uh a, 14 Nebukhadnezar in amaute kiang ah: Shadrak, Meshak leh Abednego, ka pathiante' nna na sem kei uh a, ka tunkhiak kham milim zong na be kei uh, chih a dik ahi maw? 15 Tu'n pengkul, tamngai, kaihging, pekging, tumging, gawsem leh a gingthei namkim gin na zak chiang ua, boka ka milim tunkhiak be dinga na kiman uleh, hoih. Na biak kei uleh bel, haltuina meiphualpi sunga paihlut na hi pah ding uhi. Bang pathian in ka khut sung apan noute hon hukhe thei ding ahia? a chi hi. 16 Shadrak, Meshak leh Abednego in kumpipa a dawng uh a: Nebukhadnezar aw, hiai thu ah, na maia ka kihut uh kul lou hi. 17 Haltuina meiphualpi-a paihluta ka om uleh, a nna ka sep uh Pathian in hon hu thei a, na khut sung apan hon hukhe ding hi, Kumpipa aw. 18 Hon hukhe keita zongin, Kumpipa aw, na pathiante' nna sem lou ding, na tunkhiak milim zong be lou ding hi ung, chih na theih ka deih uhi, a chi uhi. 19 Shadrak, Meshak leh Abednego tung ah Nebukhadnezar a heh lua a, amaute a etdan hong lamdangta hi. Haltuina mei phualpi a leh sagih-a satsak dingin thu a pia a, 20 Shadrak, 20 Meshak leh Abednego hentoma haltuina meiphualpi sunga pailut dingin a sepaihhon laka sepaih thahat pawlkhat thu a pia hi. 21 Tuachi-in, hiai mite, a puanakpi uh silh, a pheituamte uh teeng, a dialte uh khimsain, hentoma tua haltuina meiphualpi sunga paihlutin a om uhi. 22 Kumpipa' thupiak lah kinawh a, haltuina meiphualpi lah sa lua ahih manin, 23 Shadrak, Meshak leh Abednego pumdom sepaihte mei in a hullum vek a, hiai mi thumte, kiptaka hentomsa, haltuina meiphualpi sung ah a kesuk uhi. 24 Tua khitin, Kumpipa Nebukhadnezar, lamdang sa luain a dingkhetou a, a thudotte kiang ah: I hentoma meiphualpi sunga i paihlut mi thum hilou maw? chi-in a dong hi. Amaute'n: Kumpipa aw, hi mah e, a chi uhi. 25 Ama'n: En dih ua! Meiphualpi sung ah mi li, kihen lah kihen lou, bangmah lah chi loua vialpai ka mu a, a lina houh pathiante' tapa a bang, a chi hi. 26 Tua chi kawmin, Nebukhadnezar in meiphualpi kongvang a naih a: Pathian Tungnungpen' sila Shadrak, Meshak leh Abednego aw, hong paikhia un! Hiai ah hong pai un! chi-in a vakikou hi. Tuachi-in, Shadrak, Meshak leh Abednego, meiphualpi apan Siam Phat hong paikhia uh a, 27 gam sehkhen ukte, vaisaite, ukpipate, kumpi' thudotte a kiim uah hong paikhawm uhi. Mi thumte, a pumpi uh mei in a kaang kei a, a puanakpite uh zong a kaangdaang kei a, meikhu gim zong a nam kei uh, chih a mu uhi. 28 Tua khitin, Nebukhadnezar in: Shadrak, Meshak leh Abednego' Pathian phatin om hen aw. Ama'n a vansawltakte sawl a, a silate hukhia hi! Amaute'n amah muang uh a, kumpipa' thupiak nang uhi. Amaute' Pathian loungal pathian dang himhim biak sanga a hinna nangawn uh mansuah nuam zaw uhi. 29 Tua bang ahih manin, Shadrak, Meshak leh Abednego' Pathian gensia, kua nam hi-in, bang pau hita leh, satzan hi ding a, a inn a lou hihsiat dimdem hi ding hi. Ahang bel, pathian dang peuhmah in hibanga kuamah hukhe ngeilou hiven, a chi hi. 30 Tua khitin, kumpipa'n Shadrak, Meshak leh Abednego a kaisangsak a, Babulon gam ah nna lianzaw a semsak hi.
Nebukhadnezar'Manga Singkung
1 Kumpipa Nebukhadnezar in: Leitung maikaiha mite, namte, pauchiha mite kiang ah thu kon gen hi: Nakpitaka mavangin lawhching un! 2 Pathian Tungnungpen in kei adinga chiamtehna lamdangte leh thillamdangte a hih noute hon hilh nuam hi'ng. 3 A chiamtehnate thupi lua a, a thillamdangte naselua hi! A kumpigam lah Tangtawn kumpigam hia, a kumpigam in a khang a khang daih hi. 4 Kei, Nebukhadnezar, lungkim-tak leh lawhchingtaka ka kumpi innpi sunga ka om laitakin, 5 mang khat ka man a, tua mang in hon lausak mahmah hi. Ka lupna tunga ka lup laiin, ka lungsim sunga hong kilang milimte leh mengmuhte'n hon mulkimsak lua hi. 6 Tuachi-in, Babulon mipilte khempeuh ka kianga hon piikhawm a, ka mang hon khiaksak dingin thu ka pia hi. 7 Mitkhialdawi tawite, aisan siamte, aksilam siamte leh mang aisan siamte hong paikhawm takun, ka mang ka na hilh a, ahihhangin, hon khiaksak thei kei uhi. 8 A tawpin, ka kiang ah Daniel hong hawh a, ka mang ka na hilh hi. Amah bel ka pathian' min tama minsak Belteshazar ahi. Ama' sung ah pathian siangthoute' kha a om hi. 9 Ke'n amah kiang ah: Mitkhialdawi tawite laka makai Belteshazar aw, pathian siangthoute' kha na sung ah a om a, nang adingin thu kisel haksa lua a om kei, chih ka thei. Hiai ka mang ahi, hon khiaksak in. 10 Ka lupna tunga ka lup laia ka mengmuhte hiaite ahi: Ka khawdah leh, ka mai ah gamsung laizang taka singkung lianpi ding a na om hi. Tua singkung a sang mahmah mai a, 11 a lian mahmah a, a khauh mahmah a, a dawn in vaan a sun a, leimong dong apan muhphakin a om hi. 12 A tehte a etlawm a, a gahpha a, mi khempeuh adingin an ahi. Tua singkung nuai ah gamsate'n bukna a mu uh a, a hiangte ah huihkhua-a vasate a giak uh a, tua singkung apan ganhing khempeuh a kivaak uhi. 13 Ka lupna tunga ka lupin mengmuhte ka mu lai a. Ka dakkhiak leh ka mai ah thangkou khat a siangthoupa khat vaan apan hong kumsuk, a om hi. 14 Ama'n aw ngaihtakin hon sam a: Tua singkung phuk inla, a hiangte heuh inla, a tehte zutkhe vek inla, a gahte thehzak in. Tua singkung nuai apanin gamsate, a hiangte apanin vasate taimang uhen. 15 Ahihhangin, a bulsum leh a zungte bel, sik leh sumsana hensain, gamlak loupa lak ah, leia nutsiatsain om hen. Vaan daituiin amah kawt henla, leitung sing leh lou lak ah, gamsate tawh teengkhawm hen. 16 Amah adinga hun sagih a bei mateng, a mihing lungsim kikhengin gamsa lungsim piakin om hen. 17 Tungnungpen, mihing kumpigamte tunga thuneipen ahi a, a ut peuh kiang ah a pia a, mi niampente a uksak, chih a damlai teng in a theih nadingun, thangkoute'n hiai thutanna a genkhia uh a, tua a siangthoute'n hiai thutanna a phuang uhi. 18 Hiai mang ahi, kei Kumpipa Nebukhadnezar in ka mat. Ka kumpigam sunga mipil kuamah in hon khiaksak thei lou ahih manin, Belteshazar aw, nang hon khiaksak in. Nang sunga pathian siangthoute' kha om ahih mana, nang khe thei ding na hi, ka chi hi.
Daniel in Mang khia
19 Belteshazar kichi tua Daniel bel hun khat sung peuhmah nakpitakin a lungbuai a, a ngaih- tuahnate'n a patausak mahmah hi. Tuachi-in, kumpipa'n: Belteshazar aw, mang leh a khiakna kipa-tausak ken, a chi hi. Belteshazar in a dawng a: Ka toupa aw, tua mang leh a khiakna, na melmate tunga tung ding hi zaw mai leh maw! 20 Na muh tua singkung a leta lian, a kipa kip phetphut, a dawn in van sun a, leimong dong apan kimu, 21 a tehte etlawm a, gahpha a, miteng adinga an pia, gamsate adinga bukna, huihkhua-a vasate' buseh nading hiangte nei, 22 Kumpipa aw, nangmah tua singkung na hi! Nong lian a, nong hat a, na thupina in vaan a sun a, na kumpigam leitung gamlapi dongin a zai hi. 23 Kumpipa aw, thangkou khat, a siangthoupa, vaan apan hong kumsuk a, na kianga: Tua singkung phuk inla, hihgawp in, ahihhangin, a bulsum bel sik leh sumsan sika hensain leilaka loupa lak ah nusia in. Van daituiin kawt henla, amah adinga hun sagih a bei mateng, gamsate bangin khawsa hen, hon chi na mu hi. 24 Kumpipa aw, a khiakna hiai ahi, Tungnungpen in nang ka toupa, kumpipa doua a thuseh hiai ahi: 25 Mihingte lak apan hawlkhiakin na om ding a, gamsate lak ah na teeng ding a, bawng bangin loupa na ne ding a, vaan daituiin na kawt ding. Tungnungpenpa zaw mihing' kumpigamte tunga thuneipen ahi a, a ut peuh kiang ah a pia, chih na saan mateng nang adingin hun sagih a bei ding. 26 Tua singkung bulsum leh a zungte nutsiat dinga thupiak bel, van Pathian in vai a hawm, chih na saan chiangin, na kumpigam piakkik na hi ding, chihna ahi. 27 Tua bang ahih manin, Kumpipa aw, kon thuhilhna saang in: A dik hihin na khelhnate tawpsan inla, nuaisiahna thuakte tunga chitna suahin, na gitlouhna tawpsan in. Tuachi-in, haua na lawhchinna om zomtou kha ding hi, a chi hi.
Mang a Tangtunna
28 Hiaite khempeuh, Kumpipa Nebukhadnezar tung ah hong tangtung hi. 29 Kha sawmlenih nungin, kumpipa, Babulon kumpi innpi tunga a vialpai pai laiin: 30 Hiai Babulon thupi, ka kumpi thupi nadinga ka vangletna thahatna-a ka lamkhiak, kumpipa' teen nadinga ka lamkhiak hi lou hia? a chi hi. 31 Tua thute a genkhit mamain, vaan apan aw khat hong ging a: Kumpipa Nebukhadnezar, nang adinga thuseh hiai ahi: Na kumpi thuneihna nang apan lakkhiak ahita. 32 Mihingte lak apan hawlkhiak na hi ding a, gamsate tawh na teengkhawm ding a, bawng bangin loupa na ne ding. Tungnungpen zaw mihing kumpigamte tunga thuneipen ahi a, a ut peuh kiang ah a pia, chih na saan mateng nang adingin hun sagih a bei ding, a chi hi. 33 Nebukhadnezar tungthu kigen a tangtung pah a, mihingte lak apan hawlkhiakin a om a, bawng bangin loupa a ne hi. A sam, muvanlai mul banga sau a, a chinte vasa chin a bat dongin vaan daituiin a pumtangin a kawt hi. 34 Tua hunseh a bei takin, kei, Nebukhadnezar in vanlam ka mitsuan a, ka lungsim ngei ka pukik hi. Tungnungpen ka phat a, a nungtadenpa pahtawiin pahtawina ka pia hi. Ama' kumpigam zaw, Tangtawn kumpigam hi a, a kumpigam in a khang a khang daih hi. 35 Leitung mite khempeuh bangmahlou-a ngaih hi uhi. Ama'n zaw vaana vangletnate leh leitung mite tunga a ut bangbang hih hi. Kuama'n a khut lena khaam thei lou hi. Bang hih namai a? zong chi theilou hi, ka chi hi. 36 Tua hun mahin ka lungsim ngei ka pukik a, ka kumpigam thupi nadingin, ka zahtakhuaina leh ka thupina piakkikin ka om hi. Ka thudot mite leh ka miliante'n hong zongkhia uh a, ka kumpitutphaha tutsakin ka omkik a, ama sangin ka thupina a lianzaw lai hi. 37 Tu'n kei, Nebukhadnezar in, vantung Kumpipa'n a dik thil hih a, a gamtatna khempeuh dik a, kisatheitaka gamtate bel a niamsak theih manin, amah ka phat a, ka pahtawi hi.
Baanga Laikigelh
1 Kumpipa Belshazar in a miliante 1,000 adingin ankuang a lui a, amaute tawh zu a dawnkhawm hi. 2 Belshazar in tua banga zu a dawn laiin, a pa Nebukhadnezar in Jerusalem tempul apan kham leh nguna kibawl noutung a lakte-a kumpipa leh a miliante leh a zite leh a meite'n zu a dawn theih nadingun, tua noutungte vala dingin thu a pia hi. 3 Tuachi-in, Jerusalema Pathian' tempul apan kila khama kibawl noutungte hon la uh a, kumpipa leh a miliante leh a zite leh a meite'n tua noutungtein zu a dawn uhi. 4 Tua banga zu dawnin, kham, ngun, sumsan, sik leh sing leh suanga kibawl pathiante a phat uhi. 5 Thakhatin mihing khutzung hong dawk a, tua kumpi innpi sunga meivak mung kianga baang hon gelh hi. Kumpipa'n tua baang hon gelh khutzung a en gegu a, 6 a maitang hong mualgawp a, lau mahmahin a khuk a kitattuah a, a khete a zaw hi. 7 Kumpipa'n aisan siamte, aksilam siamte, mang aisan siamte hon piilut dingin thu a pia a, hiai Babulon mipilte kiang ah: Hiai laikigelh sim a, a gen hon hilh peuhmah, puansandup silhsak a, a ngawnga kham khainiang awhsak ding, kumpigama vaihawm lianpen thumna-a tutsak ahi ding, a chi hi. 8 Tua khitin, kumpipa' mipilte hong lut uh a, ahihhangin, tua laikigelh a sim thei kei uh a, bang gen hiam, chih zong kumpipa a hilh thei kei uhi. 9 Tuachi-in, Kumpipa Belshazar a lau semsem a, a maitang a mual semsem a, a miliante zong a lungdong uhi. 10 Kumpinu'n kumpipa leh a miliante' awte a zak takin, ankuangluina inndan sung ah hong lut a: Kumpipa aw, damsawt in! Patau kenla, maitang mualin zong om ken! 11 Na kumpigam sunga pathian siangthoute' kha omna mi khat om ahi. Na pa' hun laia zong aman pathiante pilna, ngaihtuahna chiim leh pilna nei ahihna kimu hi. Na pa, Kumpipa Nebukhadnezar, na pa kumpipa ka chih in tua mipa, mitkhialdawi tawite, aisan siamte, aksilam siamte, mang aisan siamte' makaipipena sep a hi. 12 Hiai mi Daniel hi a, kumpipa'n Belteshazar a chihpa hi a, ama'n lungsim pilna, theihna leh theihsiamna leh mangte khiak theihna, thu haksa hilhchet theihna leh thil haksate hih vaiveng theihna zong nei ahih lam kimu hi. Daniel samsak inla, ama'n tua laikigelh bang genna hi hiam, hon hilh ding eive, a chi hi. 13 Tuachi-in, kumpipa' mai ah Daniel piilutin a om a, kumpipa'n a kiang ah: Ka pa kumpipa'n Judah gam apan salmat hon piilutte laka mi khat Daniel na hi maw? 14 Nang sunga pathiante' kha om a, thil thukmuhna, vaak leh pilna sangtuam nei na hi, chih ka na za hi. 15 Hiai laikigelh sim a, a gente hon hilh dinga mipilte leh aisan siamte ka maia hon piilut uh a, ahihhanga hon hilhchian thei om lou uhi. 16 Nang bel buaihuai thil haksate khiak theihna leh hih vaiveng theihna na nei, chih tu'n ka na za hi. Hiai laikigelh na sim theih a, a gente non hilh theih peuhmah leh, puansandup silhsak a, kham khainiang awhsak na hi ding a, kumpigam sunga vaihawm lian thumna-a tutsak na hi ding, a chi hi. 17 Daniel in kumpipa a dawng a: Na thawnpiakte zaw nang adingin kem inla, na pahtakmante zong midang pia in. Ahihhangin, kumpipa adingin tua laikigelh kon simsak ding a, a gente zong kon hilh ding. 18 Kumpipa aw, Pathian Tungnungpen in thuneihna kim, letna leh pahtawina leh thupina na pa a pia hi. 19 Tua dinmun sang a piak manin, mite leh namte leh pauchiha mite khempeuh in na pa a lau uhi. Kumpipa'n a thah ut peuh a that a, a hawi nop peuh a hawi a, a niamsak ut peuh a niamsak hi. 20 Ahihhangin, a lungtang kiuangsak a, kisathei a, hong takgawp takin, a kumpitutphah apan amah kaihkhiak a, a thupina suahkhiaksakin a om hi. 21 Mihingte lak apan hawlkhiakin a om a, gamsa lungsim piakin a om. Gamlak sabiltungte lak ah a khawsa a, bawng bangin loupa a ne hi. Mihing kumpigamte tung ah Pathian Tungnungpen in thuneihna kim a nei a, a ut peuh a uksak chih a saan mateng tua banga khawsain, vaan daituiin a kawt gige hi. 22 Ahihhangin, nang a tapa Belshazar aw, hibang teng thei napi-in, na kingainiam het kei hi. 23 Kingainiam naksangin vaantung Toupa tung ah na kiliksang a, a tempul apan noutungte na kiang ah na lasak a, nang leh na miliante leh na zite leh na meite tawh, tua noutungtein zu na dawn uhi. Khawmu lou, khawza lou leh bangmah theilou ngun, kham, sumsan, sik, sing leh suanga kibawl pathiante na phat hi. 24 Tua bang a hih manin, ama'n hiai lai gelh ding khut hon sawl ahi. 25 Hiai ahi laikigelh: MENE, MENE, TEKEL PARSIN. 26 Tua thumalte' gen hiai ahi: Mene: Pathian in na vaihawm sung nite a sim a, a beisakta. 27 Tekel: Bukna-a bukin na om a, na ching kei. 28 Peres: Na kumpigam a kiphelkek a, Mediate leh Persiate kianga piak ahi, chih ahi, a chi hi. 29 Tua khitin, Belshazar' thupiakin, Daniel bel puansandup silhsakin a om a, a ngawng ah kham khainiang awhsakin a om a, tua kumpigam sunga ukna dinmun lian thumna piakin a om hi. 30 Tua zan mahmahin, Babulon kumpipa Belshazar thahin a om a, 31 Media mi Daria in kumpigam a tang hi. Tua bel, Daria kum 62-a upa ahih kum ahi.
Humpinelkai Kul sunga Daniel
1 Daria in kumpigam sung uk dingin gam sehkhen 120 tung ah ukmi 120 a sep a, 2 amaute tung ah ukmi thum a sepsawn a, tuate laka khat Daniel ahi. Kumpipa adinga manna a om louh nadingin, tua gam sehkhen ukte bel, amaute uksawnte' nuai ah a om uhi. 3 Daniel bel, tua ukmi a liante leh gam sehkhen ukte lak ah a kizen tuamin, a vou tuam mahmah a, kumpipa'n kumpigam bup tunga koih a tum hi. 4 Tua bang thu hangin, ukmi dangte leh gam sehkhen ukmite'n gamsung ukna tawh kisaia hek nading a zong uhi. Ahihhangin, hek nading a mu thei kei uhi. Amah mi muanhuai, diktat, lungsimsia neilou ahih manin, a siatna a mu kei uhi. 5 A tawptawpin hiai mite'n; A Pathian' dan lam tawh kisai ahih kei ngai leh, hiai Daniel hek nading mu ngeikei ni, a kichi uhi. 6 Tuachi-in, tua ukmi a liante leh gam sehkhen ukmite kitonin kumpipa kiang ah hong hawhkhawm uh a: Kumpipa Daria aw, damsawt in! 7 Kumpigam ukmite, vaisaite, gam sehkhen ukmite, ukpipate leh thudot mite khempeuh ka kithukimna uh hiai ahi: Kumpipa aw, tuban ni 30 sung peuhmah, nang loungal, midang hiam, pathian dang hiam a bia a om peuhmah leh, tua bang mi pen humpinelkai kul sunga paihlut hi hen, chi-in thuseh bawl lechinla, kizang pah leh, ka chi uhi. 8 Tuin, Kumpipa aw, thuseh bawl inla, Mediate leh Persiate dan a kikheng theilou bangbang, a kikheng theilou dingin gelhin koih in, a chi uhi. 9 Tua bangin, Kumpipa Daria in thuseh a gelhin a koih hi. 10 Daniel in tua thuseh a kisuah, chih a theih takin, inn-a paiin, a inndan tungnung ah a kaltou a, Jerusalem lam nga tawhlette a hong hi. Nidanga a hih ngeina bangin, ni khatin thumvei khukdinin a thum a, Pathian kiang ah kipahthu a gen hi. 11 Tua ukmite kitonin hong pai uh a, Pathian' huhna ngena thuum lai Daniel hong mu uhi. 12 Tua khitin, kumpipa kiang ah hong hawh uh a, kumpipa' thuseh thu genin: Kumpipa aw, tu ban ni 30 sung peuhmah, nang kiang loungal, pathian dang himhim hiam, midang himhim kianga thuum a om peuhmah leh, humpinelkai kul sunga paihlut ding, chi-in thuseh na suah hilou hia? hong chi uhi. Kumpipa'n a dawng a: Tua thuseh, a kikheng theilou Mediate leh Persiate dan banga dingkip lai ahi, a chi hi. 13 Tua takin, amaute'n kumpipa kiang ah: Kumpipa aw, Judah gam apan salmat khat Daniel in nang lah hon thusim lou, na thuseh a gelha na koih lah thusim lou ahi. Ni khata thumvei thuum lailai ahi, a chi uhi. 14 Kumpipa'n hiai thu a zak takin a lungdong mahmah hi. Daniel hutkhiak teitei a sawm a, nitum ma peuhmaha hutkhiak nadingin bangteng gelin theihtawp a suah hi. 15 Tua khitin, tua ukmite kumpipa kiang ah a kitonin hong hawh leuleu uh a: Kumpipa aw, Mediate leh Persiate dan banga zaw, kumpipa thuseh leh dan himhim kikheng theilou ahi, hong chi uhi. 16 Tuachi-in, kumpipa'n thupiak a pe khong a, Daniel hon tonpih uh a, humpinelkai kul sung ah a pailutta uhi. Kumpipa'n Daniel kiang ah: A nna na sep na biak gige na Pathian in hon hu hen aw! a chi hi. 17 Suangtum khat hon la uh a, tua humpinelkai kul kong a khak uh a, Daniel dinmun a kikhek theih nawnlouh nadingin kumpipa'n ama' suainamna zungbuh leh a miliante' suainamna zungbuhin a namkip hi. 18 Tua khitin, kumpipa a innpi ah a kilehkik a, ne lou dawn louin leh nopbawlna omsak louin a zanhak a, nek ding dawn ding bangmah piak theihin a om kei a, amah lah a ihmu thei kei hi. 19 Phalvak takin, kumpipa hong thoukhia a, humpinelkai kul lam hon delh pah hi. 20 Tua kul hong tun mamain, patauh aw in Daniel a sam a: Pathian hing' sila Daniel aw, a nna na sepa na biak gige na Pathian in humpinelkaite apan hon hukhe theina maw? a chi hi. 21 Daniel in a na dawng a: Kumpipa aw, damsawt in! 22 Ka Pathian in a vansawltak hon sawl a, ama'n humpinelkaite kamte a humsak hi. Ama' mitmuha mawhneilou ka hih mana humpinelkaite'n bangmah hon lawh lou uhi. Kumpipa aw, nangma' maia zong thil gilou hih ngeilou hi'ng, a chi hi. 23 Kumpipa a kipak lua a, tua kul sung apan Daniel lakkhiak dingin thu a pia hi. Daniel in a Pathian muang ahih manin, amah tua kul sung apan a kilakkhiakin, a satung ah liamma neuchik zong a kimu kei hi. 24 Kumpipa' thupiakin, a dikloupi-a Daniel hekte hon tonpih uh a, humpinelkai kul sung ah, a zi a tate utawh paihlutin a om uh a, a nuai a tuksuk mamaun humpinelkaite'n na malgawpin a guh a tang uh a botzaanvek uhi. 25 Kumpipa Daria in mipite, namte leh pauchiha mite khempeuh kiang ah lai a khak a: Nakpitaka mavangin lawhching un! 26 Ka kumpigam sung kilchiha mite'n Daniel' Pathian a kihtak ngeingei ding, chi-in thuseh ka bawl hi. Ahang bel, amah Pathian hing hi a, Tangtawna omden hi a, ama' kumpigam se ngeilou ding, a ukna zong bei ngeilou ding hi. 27 Ama'n hukhia a, hondam a, tung vaan ah leh nuai leitung ah chiamtehnate leh thillamdangte hih hi. Ama'n humpinelkaite' thahatna apan Daniel hukhia hi, a chi hi. 28 Tuachi-in, Daria' vaihawm sung teng leh Persia mi Kura' vaihawm sung teng Daniel a lawhching a, a mavang denta hi.
Daniel Manga Gamsa Lite
1 Kumpipa Belshazar vaihawm kum, a kum khatna ah, Daniel in, lupna tunga a lup laiin mang a man a, a lungsim ah mengmuhte hong kilang a, a mangmat a gelhkhia hi. 2 Daniel in hibangin a gelh a: Zana ka mengmuhna ah, ka khawdak a, ka mai ah vaan huih lite'n tuipi a mut uh a, a kiloksak zuazua uhi. 3 Tua tuipi apanin gamsa lauhuai kibang lou ngen li hong paikhetou uhi. 4 Gamsa khatna humpinelkai a bang a, muvanlai khate a nei hi. A khate a kilaikhiak dong ka en a, tua gamsa leitung apan dopkangin a om a, mihing bangin khe nihin a ding a, mihing lungtang piakin a om hi. 5 Tua khitin, ka mai ah gamsa nihna a om a, vompi a bang hi. Pang langkhat delha dopkangin a om hi. Tua gamsa in a hate kal, a kam ah, nakguh thum a nei hi. Amah kiang ah: Thoutou inla, na gilvahin sa ne in, chi-a hilhin a om hi. 6 Tua nungin, ka khawdak a, ka mai ah gamsa dang khat a om a, gialbem a bang hi. A nungzang ah vasa kha bang kha li a nei hi. Hiai gamsa in lutang li a nei a, vaihawmna leh uk nading thuneihna piakin a om hi. 7 Tua nungin, zana ka mengmuhna ah ka khawdak a, ka mai ah gamsa lina a om hi. A mulkimhuai a, a lauhuai a, a vanglian mahmah hi. Ama'n sik ha lianpipi a nei a, a matte a haizan a, a negai a, a nek bang a tuanchil lai hi. Gamsa masate tawh a kibang kei a, ki sawm a nei hi, 8 Tua kite ka ngaihtuah tuah laiin, ka mai ah ki dang aneu khat, tuate lak apan hong poutou a om hi. Tua ki neu' mai ah, ki masate laka thum bulkalhkhiakin a om uhi. Hiai ki in mihing mit bang mitte a nei a, kisatheitaka pau kam khat zong a nei hi. 9 Tua banga ka et laiin, kumpitutphahte hong kitung a, Taanglai Mi in a tutna a luah hi. A puansilh vuk bangin a pak a, a lutanga samte lah samul bangin a ngou hi. A kumpitutphah meiin a kuang a, a peite zong a kuang vek hi. 10 Meikuang luipi khat a luang a, ama' mai apan luangkhia ahi. Mi sangmun sang tampite'n amah a don uh a, Mi sangsawm mun sangsawmte a mai ah a ding uhi. Vaihawm thukhen a kipan a, laibute a kiphen hi. 11 Tua khitin zong, tua kisatheitaka pau ki hangin ka en lailai hi. Tua gamsa kithat a, a pumpi kihihgawp a, meikuag laka a kipaih dong ka enen hi. 12 Gamsa dangte bel a thuneihna uh suhsakin a om uh a, hun khat sung bel a nuntak ding uh phal ahi uhi. 13 Zana ka mengmuhna ah ka en a, mihing tapa bang mi khat a om hi. Amah vaan meipite tawh tona hong pai ahi. Ama'n Taanglai Mi a vanaih a, a maia pi-in a om hi. 14 Amah, thuneihna, thupina leh vangletna kim piakin a om a, mite khempeuh, namte leh pauchiha mite khempeuh in a bia uhi. Ama' kumpigam bel a bei ngeilou ding, Tangtawn kumpigam ahi, hihsiata om ngeilou ding kumpigam ahi.
Mang Khiakna
15 Kei Daniel ka lungbuai a, ka lungsima hong kilang mengmuhte'n hon lungbuaisak hi. 16 Tua muna dingte khat ka vanaih a, hiaite khempeuh khiakna ka vadong hi. Ama'n hiai thilte khiakna hon hilh a: 17 Hiai gamsa lite ahih leh, leitunga hong kitungkhia a, hong dingkhe ding kumpigamte ahi uhi. 18 Ahihhangin, Tungnungpen' misiangthoute'n bel kumpigam tuam a ngah ding uh a, Tangtawn Tangtawnin a tangden ding uhi, a chi hi. 19 Tua khitin, ke'n gamsa dangte tawh kibang lou, a lauhuai phapen, tua gamsa lina, sik hate nei, sumsan chinte nei, a samatte botzana negai a, a nek bangte khea tuanchilgawp pen a khiakna diktak ka thei nuam hi. 20 Tua lutanga ki sawmte thu leh ki dang khat hong poutou a, ki sawmte laka thum, a maia kibulkalh, a dangte sanga tallang zaw, mitte nei a, kisatheitaka pau kam nei pen thu ka thei nuam hi. 21 Tua banga ka et laiin, hiai ki in misiangthoute douin gal a bawl a, 22 tua Taanglai Mi in Tungnungpen' misiangthoute guma thu a khen a, kumpigam a ngah hun uh a tun mateng amaute a zou hi. 23 Ama'n hilhchetna hon piak hiai ahi: Gamsa lina ahih leh, leitunga hong kilang ding kumpigam lina ahi. Kumpigam dangte khempeuh tawh a kibang kei ding a, ama'n leitung bup a negai ding a, khea chilin a hihzan ding. 24 Tua ki sawmte bel, tua kumpigam apan hong dingkhe ding kumpipa sawmte ahi. Amaute nungin, kumpi dang khat hong dingkhe ding a, a masate tawh a kibang kei ding. Ama'n kumpipa thum a zou ding. 25 Tungnungpen a gense ding a, a misiangthoute a nuaisiah ding a, hun sehsate leh dan khek a sawm ding. Hun khat, hunte leh hun kimkhat sung a khut sung ah misiangthoute piakkhiak ahi ding. 26 Ahihhangin, vaihawm thukhenna a om ding a, a vangletna lakmangsak leh hihgawp sipsip ahi den ding. 27 Tua khit chiangin, khuavannuaia kumpigamte' thuneihna, vangletna leh thupina khempeuh, Tungnungpen' misiangthoute kianga piak ahi ding. Ama' kumpigam zaw Tangtawn kumpigam ahi ding a, kumpigam uka vaihawmte khempeuh in amah biain a thu a mangta ding uhi, a chi hi. 28 Hiai thu a beina hibang ahita a, kei Daniel bel ka ngaihtuahnate'n hon lungbuaisak mahmah a, ka mai a mual a, ahihhangin, hiai thu ka kikep khinkhian hi.
Daniel' Mengmuh Belamtal leh Keltal
1 Kumpipa Belshazar' vaihawm kum, a kum thumna ah, kei, Daniel in ka kianga kilangsa pen nungin, mengmuh khat ka nei hi. 2 Ka mengmuhna ah, Elam gama Susa kulhpi-a omin ka kithei a, Ulai Tuilam gei ah ka om hi. 3 Ka khawdak a, ka mai ah, tua tuilam geia ding belamtal khat a om hi. A kite a sau a, ki khat pen houh, a langkhat sangin a sau zaw a, ahihhangin, a pou nanung ahi. 4 A ki-a si dingin, tumlam, mallam leh simlam nawta diangin ka mu hi. Sa dang bangmah in amah a nang zou kei a, a khut apan zong tua belamtal a hukhe zou kei hi. A ut utin a gamtaang a, hong thupi mahmah hi. 5 Hiai ka ngaihtuah laiin, thakhatin, a mitte kala pou ki lianpi khat nei keltal khat, tumlam apan hong pai a, leilak sukha louin leitung bup ah a paisuak hi. 6 Tuilam geia ding ki nih nei, tua belamtal hon naih a, hehtakin hon bawh hi. 7 Tua banga hehtaka belamtal a sik leh, a ki nihte a sitan a, belamtal in lah amah nan zawh nading thahatna a nei kei hi. Keltal in belamtal a sipuk a, leilak ah a sikdeen a, kuama'n a thahatna apan tua belamtal a hukhe zou kei hi. 8 Tua keltal hong lianin hong thupi mahmah a, ahihhangin, tua banga a vanglet laitakin, a ki lianpi a kitankheta a, a mun ah vaan huih lite lama khangkhetou ki lianpipi li hong poutou hi. 9 Tua kite laka khat apan ki dang khat hong kakhia a, a chilin neu mah leh, simlam, suahlam leh Gam Kilawm lam ngain thahattakin hong khang hi. 10 Vaan thilsiam honpite tan a phak dongin a khangtou a, vaana aksi honpite laka pawlkhat lei ah a paikhesuk a, a sikdeen hi. 11 Vaan thilsiam honpite' Makai banga lianin amah leh amah a kitungkhia hi. Amah apanin nisim kithoihna thillatte a beisak a, a munsiangthou a niamkiaksak hi. 12 Helna hangin, misiangthou honpi leh nisim kithoihna thillatte ama' khutsunga piakkhiakin a om hi. Amah bel a sep a bawl khempeuh ah mavangin a lawhching a, thutak lah lei dennain a nei hi. 13 Tua khitin, a siangthoupa khat in thu a gen lai ka za a, a siangthoupa dang khat in a kiang ah: Hiai mengmuh nisim kithoihna, siatgawpna tun helna leh munsiangthou leh thilsiam honpi sikdeen dinga piakkhiak na muh a tangtun nading bangtana sawt hi ding ahia? a chi hi. 14 Ama'n ka kiang ah: Nitaklam leh zinglam 2,300 a bei ding a, tua khit chiangin, munsiangthou siansuah thak ahi ding, a chi hi. Mengmuh Khiakna 15 Kei, Daniel in mengmuh en a, theihsiam ka tup sungin, ka mai ah mihing bang khat hong ding hi. 16 Ulai apan kikou mihing' aw khat ka za a, tua in: Gabriel aw, hiai mipa kiang ah tua mengmuh a khiakna hilh in, a chi hi. 17 Gabriel in ka dinna mun hon naih takin, ka lau a, a khupin ka bok hi. Ama'n ka kiang ah: Mihing tapa, hiai mengmuh zaw hun tawp hun tawh kisai ahi, theisiam in, hon chi hi. 18 Tua banga hon houpih sungin, leilam nga-a bokin, nakpitakin ka ihmu huthut hi. Ama'n khutin hon lawng a, ka khein hon dingtousak hi. 19 Ama'n: Tununga thangpaihna huna hong tung ding bang hi hiam, chih nang hon hilh ding ka hi, ahang bel, tua mengmuh pen hun tawp nading hun seh tawh kisai hiven. 20 Tua ki nih nei belamtal na muh, Media leh Persia kumpipate genna ahi. 21 Tua keltal gawng ahih leh, Grik gam kumpipa genna ahi a, a mitte kala ki lianpi pen a kumpipa masapen ahi. 22 A kitankhia ki pen' mun luah ki lite bel ama' nam apan hong dingkhe ding kumpigam lite genna ahi a, ahihhangin, tua zaha hatna a nei kei ding uhi. 23 Amaute' vaihawm sung hun nunung lama a helte hong tatsiat mahmah chiangun, kumpipa mai-gumtak, zekhem a, a sia simsawm siam khat hong dingkhe ding. 24 Amah hong hat mahmah ding a, ama' vangletna zang bel ahi kei ding. Ama'n siatna thupi lua a tun ding a, a sep a bawl peuh ah a lawhching ding. Mi hatte leh mi siangthoute a hihsegawp ding. 25 Khemna a lawhchingsak ding a, amah a tungnungpen a kisa ding. Mite bit a kisak laitakun, ama'n mi tampi a hihse ding a, kumpipate' Kumpipa a dou ding. Ahihhangin, amah mah hihsiatin a om ding a, mihing vangletna-a hihsiat bel ahi kei ding hi. 26 Nitaklam leh zinglam tawh kisai mengmuh, nang kianga hong kipia a dik ahi. Ahihhangin, tua mengmuh pen tunung gamlapi tawh kisai ahih manin bilhchip in, a chi hi. 27 Kei, Daniel ka tawlgawp a, ni tampi sung chinain ka lum hi. Tua khitin, ka thou a, kumpipa' nna ka sem hi. Tua mengmuh lamdang ka sa a, ka theihsiam phak louh ahi.
Daniel' Thuumna
1 Ahasuera' tapa Daria, piandana Media mi, Babulon kumpigam ukpa-a bawl ahi. Ama' vaihawm kum, a kum khatna ah, 2 kei Daniel in, Jerusalem siatna in kum 70 sung a daih ding, chih Laisiangthou apan ka theisiam hi. Tua bel, Tangtawn Toupa'n kamsangpa Jeremia kianga a gen, Laisiangthou sunga thu om apan ka theih ahi. 3 Tuachi-in, Toupa Pathian lam ka nga a, thuumna leh ngetna, an ngawlna leh saiippuan silh a, vut laka kikhuka thuum ngutngutna ka nei hi. 4 Tangtawn Toupa ka Pathian kiang ah ka thuum a, ka kiphuang a: Toupa Pathian thupi leh mulkimhuai, amah itte leh a thupiak zuite tawh kala itna thukhun lenkippa aw, 5 ka nakhialta uh a, a diklou ka na hihta uhi. Koute ka na gilou uh a, ka na helta uh. Na thupiakte leh na dante ka na lehngatsanta uh. 6 Ka kumpipate uleh ka makaite uh, ka pu ka pate uh, leh gamsunga mite khempeuh kianga na mina thugen tua kamsang na silate ka na ngaikhe kei uhi. 7 Toupa aw, nang na diktat a, ahihhangin, koute zaw tuni-in maizumna in hon khuh hi. Koute na tunga ka muanhuai louh man ua, Judah gam mi Jerusalema teeng mi leh Israel mi ngen, gamla leh nai leh gam chiha thehzak ka hi uhi. 8 Tangtawn Toupa aw, na tunga ka khelh manun, koute leh ka kumpipate uh, ka makaite uh, ka pu ka pate uh, maizumna in hon khuhta. 9 Ama' tung ah na hel mah le ung, Toupa ka Pathian uh a zahngaithei a, ngaihdamna a hau hi. 10 Koute'n Tangtawn Toupa ka Pathian uh thu ka na mang kei uh a, kamsang a silate tungtawna dan hon piakte ka na zui kei uhi. 11 Israel khempeuh in na dan zuilou uh a, hon kihei sanin, nang hon thuman nuam kei uhi. Tua banga na tunga ka khelh manun, Pathian' sila Mosi' Dan sunga kigelh hamsiate leh mawhpaihnate ka tung uah sunbuakin a omta hi. 12 Ka tung ua siatna thupi hon tunin koute leh ka vaihawmte uh dema thu kigente na tangtunta hi. Jerusalem tunga kihih bang peuhmah vansinnuai koimah ah kihih ngei lou hi. 13 Mosi' Dan sunga kigelh bangbangin, hiai siatna khempeuh ka tung uah tung a, hinapi-in, koute'n ka khelhnate uh kiheisan a, na thutak theihna thuk nei ding leh theisiam ding a Tangtawn Toupa ka Pathian uh' kianga thuum lou lai hi ung. 14 Tangtawn Toupa ka Pathian uh a thilhih khempeuha diktat ahih manin, koute tunga siatna tut ding ki-ip hetlou hi. Hinapi-a koute'n a thu mang tuanlou hi ung. 15 Toupa ka Pathian uh aw, khut hata Aigupta apan hon piikhepa, tuni donga omden min, nang adinga kibawlpa aw, koute ka na khialta uh a, a diklou ka na hihta uhi. 16 Toupa aw, na gamtatna diktat khempeuh tawh kituakin, na khawpi, na mual siangthou Jerusalem apan na hehna leh na thangpaihna tu'n heimang in. Ka khelhnate uleh ka pu ka pate uh' lungsimsiatnate'n ka kim ka kiang ua mite' mitmuhin Jerusalem simmawhhuai suaksak uhi. 17 Koute' Pathian aw, tu'n na sila' thuumnate leh ngetnate za in. Toupa aw, nang' vangin na deihsakna tawh, hiai a kisesa ka munsiangthou uh en in. 18 Pathian aw, bil hon dawh in. Na mit hak inla, na Mina kilou khawpi siatna en in. Ka diktat uh, chi-a nang apan ngetna bawl ka hi kei uh a, na zahngaihna thupitak hanga ngetna hon bawl ka hi zaw uhi. 19 Toupa aw, hon ngaikhia in! Toupa aw, hon ngaidam in! Toupa aw, hon za inla, gamtang in! Ka Pathian aw, nangma' vangin hong zekai ken. Na khawpi leh na mite na Mina kilou hi uhi, ka chi hi.
Sagiha sim 70
20 Tua banga thu gen a, thuum a, keima' khelhna leh ka mi Israelte' khelhna phuang a, Tangtawn Toupa ka Pathian kianga, a mual siangthou adinga ngetna ka bawl sungin leh, 21 ka thuum laitak mahin, mengmuh masalama ka muhpa Gabriel hattaka lengin ka kiang hong tung hi. Tua bel, nitaklam kithoihna thillat hun ahi. 22 Ama'n hon thuhilh a, ka kiang ah: Daniel aw, thil thukmuhna leh theihsiamna nang hon pe dinga hong pai ka hi. 23 Na thuum pat phetin a dawnna piak ahi a, tua hilh dinga hong pai ka hi. Ahang bel, nang nakpitaka zahtaka om hi na hi. Tua bang ahih manin, thupuak ngaihtuah inla, mengmuh theisiam in. 24 Na mite leh na khawpi adingin, tatlekna tawpsak nading, khelhna beisak nading, gitlouhna man piaka khuh nading, Tangtawn diktatna laklut nading, mengmuh leh genkholhna bilhchip nading leh a siangthoupa thaunilh nadingin, sagiha sim 70 hun seh ahi. 25 Hiai thei inla, theisiam in: Jerusalem tungdinga lamkik nading thuseh a kibawl apan Thaunilha Ompa, tua ukpa hong tun dong, sagiha sim sagih leh sagiha sim 62 hun a om ding. Tua khawpi, kongzingte leh bukna guamte tawh lamkik ahi ding a, ahihhangin, buaina hunte ahi ding. 26 Sagiha sim 62 hun a bei nungin Thauhilha Ompa satkhiakin a om ding a, bangmah a nei kei ding. A hong pai ding ukpa khat' mite'n tua khawpi leh munsiangthou a hihgawp ding uh a, hun tawpna, tui khanglian bangin hong tung ding. A tawp dongin kidouna a om ding a, siatgawpna sehsa ahi. 27 Tua ukpa khat in sagiha sim hun khat sung lei mi tampi tawh kala thukhun a lenkip ding. Tua hun kimlai ah, kithoihna leh thillat a tawpsak ding a, tua tempul kiu khat ah, siatgawpna tun tua a muhthadahhuaia kihhuai khat a tungkhe ding. Ama' tunga tung dinga sehsa tawpna a sunbuak a om dong tua bangin a om ding, a chi hi.
Daniel' Mengmuh Mi khat
1 Persia kumpipa Daria' vaihawm kum, a kum thumna ah, Belteshazar kichi Daniel kiang ah kilaakna khat piakin a om hi. Tua kilaakna thupuak a dik a, kidouna thupi tawh kisai ahi. Mengmuhna tungtawn mahin tua mengmuhna thupuak theihsiamna amah kiang ah hong tung hi. 2 Tua hun laiin, kei, Daniel nipikal thum sung dahna leh suunna neiin ka om a, 3 anlim ka ne kei a, zu in zong ka muk a sukha kei a, tua nipikal thum a bei mateng, nuhtheih bangmah zong ka kinuh het kei hi. 4 Tua kha, a ni 24 ni-in, tua Taigris lui lianpi geia ka din laiin, 5 ka khawdah leh, ka mai ah puanmalngat silh mi khat a om a, a kawng khamsiang hoiha kibawl kawnggakin a kigak hi. 6 A pumpi lah krusolait suang manpha a bang a, a maitang lah khawphia a bang a, a mitte lah meisel kuangpha a bang a, a baante leh a khete lah sumsan nawttet a bang a, a aw lah mi tampi awging a bang hi. 7 Tua mengmuh mu kei Daniel kia ka hi. Ka kianga om mite'n a mu kei uh a, ahihhangin, mulkimna in amaute a man a, a taikek uh a, a kibu uhi. 8 Kei kia-a nutsiatin ka om hi. Tha himhim ka nei kei a, ka maitang lah misi-a bangin a mual a, ka taang zou kei a, 9 ka muh mipa' pau ka za a, ka ngaihkhiak leh, ka maia lei si-in nakpitakin ka ihmusuk huthut hi. 10 Khut khat in hon lawng a, ka khutte leh ka khukte-a kidomin hon phong a, ka liing kawmkawm hi. 11 Ama'n: Daniel aw, nang nakpitaka zahtaka ompa, na kianga ka gen ding thute pilvangtakin suut inla, dingtou in. Na kianga sawla ompa ka hi, a chi hi. Ka kianga hiai a gen takin, liing kawmkawmin ka dingtou hi. 12 Tua khitin, ama'n hon houpih lai a: Daniel, lau ken. Theihsiamna ngah ding leh na Pathian' maia kingainiam dinga lungsim na khentat ni masapen apan na thugente a kizata a, tuate dawnna-a kei hong pai ka hi. 13 Ahihhangin, Persia kumpigam makai in ni 21 sung hon nang nilouh hi. Tua khitin, Persia kumpipa kianga tamdensaka ka om manin, makai lianpente laka khat Mikhael, kei huh dingin hong pai hi. 14 Tununga na mite tunga tung ding bang hi hiam, chih hilhchian dinga tu-a na kianga hong pai ka hi. Ahang bel, tua mengmuh pen hong tung ding, lah hong tung lou lai, tawh kisai hiven, a chi hi. 15 Hiai thu ka kianga a gen sungin, lei si-in ka kun a, pau theilouin ka om hi. 16 Tua khitin, mihing tawh kibangpa'n ka muk a lawng a, tuachi-in, ka kamka a, ka pau thei panta hi. Ka maia dingpa kiang ah: Mengmuh hangin, ka toupa aw, lungkham patauhnain ka dim a, thabeiin ka om hi. 17 Kei na sila in bangchi'n kon houpih thei dia oi, ka toupa aw. Ka tha bei a, nak nangawn nak theilou phial ka hi, ka chi hi. 18 Tua mihing tawh kibangpa'n hon lawngkik a, tha hon guan hi. 19 Ama'n: Nakpitaka zahtakpa mihing aw, lau kenla, khamuang in! Tu'n thahatta inla, hat in, hon chi hi. Tua banga hon houpihtakin, hatsakin ka om a: Ka toupa aw, thahatna hon peta na hih chiangin, thu gen in, ka chi hi. 20 Tuachi-in, ama'n: Na kianga ka hongna san na thei hia? Persia gam makai dou dingin ka kilehkik pah ding a, ka pai chiangin, Grik gam makai hong kuan ding. 21 Ahihhangin, a masain Thutak Laibu sunga kigelh nang kon hilh ding. Na makai Mikhael chih louhngal kuama'n amaute douin hon huh kei.
1 Media mi Daria' vaihawm kum, a kum khatna ah, amah huh ding leh hu dingin ka pang hi.
Simlam leh Mallam Kumpipate
2 Tu'n thutak kon hilh ahi: Persia gam ah kumpipa dang thum hong kilang ding a, a lina pen, a dang teng sanga hau zaw tham ahi ding. A hauhna pansana vangletna a ngah chiangin, Grik gam dou dingin michih a kilawpsak ding. 3 Tua hun chiangin, vangletna thupitaka uk ding kumpipa hattak khat hong kilang ding a, a ut bangbangin a gamta ding. 4 Amah hong kilat nungin, a kumpigam a kiphelkhap gawp ding a, van huih lite lam ah khenzakin a om ding. A suante'n kumpigam a luah kei ding uh a, kumpigam kibulkalh a, midangte kianga piak hi ding ahih manin, tua kumpigam in tua kumpipa' neih bangbang vangletna a nei kei ding. 5 Simlam kumpipa hong hat ding a, ahihhangin, a sepaih makaite laka khat, amah sangin hong hat zaw ding a, hattakin ama' kumpigam a uk ding. 6 Kum bangzah hiam nungin, amaute kizomin hong pangkhawm ding uh. Simlam kumpipa' tanu, pankhawmna bawl dingin Mallam kumpipa kiang ah hong hawh ding a, ahihhangin, ama'n bel a thahatna vangletna a neiden kei ding. Amah leh a thahatna in a daih sawt kei ding. Tua nitein, amah tonpiha vengmite leh a pa leh amah huhpa tawh, piakkhiakin a omta ding hi. 7 A khanggui apan mi khat hong khangkhe ding a, ama' mun a luah ding. Tua mipa'n Mallam kumpipa' sepaihte a dou ding a, a kulh sung ah a lut ding. Ama'n amaute a dou ding a, a vualzou ding. 8 Ama'n a pathiante uh, a sik milimte uh, ngun leh khama kibawl a van manphate uh a laksak ding a, Aigupta gam ah a pawmang ding. Ahang bel, ama'n kum bangzah hiam sung, Mallam kumpipa khoihlouha nuse ding hiven. 9 Tua khit chiangin, Mallam kumpipa'n Simlam kumpigam a sim leuleu ding a, ahihhangin, a gam ah a nungtolhkik ding. 10 A tapate gal bawl dingin a kisa ding uh a, sepaihhon thupitak a kaikhawm ding uh a, tua sepaihhon in tui khanglian bangin ma a telh ding a, a kulhpi dong a dou ding uh. 11 Tua khit chiangin, Simlam kumpipa hehin hong kuankhe ding a, Mallam kumpipa hong dou ding. Mallam kumpipa'n sepaihhon tampitak tungkhe mah leh a vuallel ding. 12 Tua sepaihhonte puakmanga a om chiangin, Simlam kumpipa a kisathei ding a, mi sang tampi a that ding. Ahihhangin a vualzou den kei ding. 13 Ahang bel, Mallam kumpipa'n sepaihhon, amau sanga tamzaw khawm ding a, kum tamtak nunga a bukima kigalvan sepaihhon tamp tawh hong kuan ding hiven. 14 Tua hun chiangin, mi tampi, Simlam kumpipa' mite lak apan mi hiamgamte hong hel ding uh a, lawhchin bel a lawhching kei ding uhi. 15 Tua khit chiangin, Mallam kumpipa hong kuan ding a, panmun khawhin kulhnei khawpi khat a zou ding hi. Simlam sepaihte'n lah amah nang zou dingin hatna a nei kei ding uh. 16 A hong simpa, a ut dandanin a gamta ding a, kuama'n amah a nang zou kei ding. Amah, Gam Kilawm ah hong kitungkhe ding a, hihse dingin thahatna vangletna a nei ding. 17 A kumpigam thahatna khempeuh tawh hong kuan a tum tentan ding a, Simlam kumpigam tawh kizoma pankhawmna a bawl ding. Tua kumpigam zawh nadingin, a zi dingin a tanu a pe ding a, ahihhangin, a thilsawm a lawhching kei ding a, a phattuampih zou kei ding. 18 Tua khit chiangin, tuipi gei gam lam ah a lungsim a hei ding a, tua gamte a la ding. Ahihhangin, sepaih makai khat in a kiotsakna a beisak ding a, ama' tung ah a tusak ding. 19 Hiai nungin, ama' gama kulhpite ah a kilehkik ding a, ahihhangin, kipalpaiin a puk ding a, muhkhak ahi nawn kei ding hi. 20 Ama' nunga ama' mun luahpa'n kumpi thupina puah dingin leiman dongte a sawlkhe ding. Ahihhangin, kum tawmchik nungin, amah hihsiatin a om ding. Hehna hiam, kidouna hiama hihsiat bel ahi kei ding. 21 Kumpipa hihna pahtakna piak ngeilouh, mi simmawhhuaipi khat in ama' mun a luah ding. Tua gam mite bit a kisak laitakun, tua mipa'n tua kumpigam a sim ding a, zebawlna pansanin tua gam a la ding. 22 Tua hunin, a mai ah sepaihhon tam mahmahte phiatmangin a om ding a, tua sepaihhonte leh thukhun kumpipa khat hihmanthatin a om ding uhi. 23 Amah tawh kithukimna bawlkhin phetin, zuautattakin a gamta ding a, mi tawmchik kia tawh thuneihna neiin hong dingkhe ding. 24 A hau mahmah gamkhena teeng mite bit a kisak laitakun, ama'n amaute a sim ding a, a pu a pute hih ngeilouh thil a hih zou ding. Ama'n a nungzuite lak ah gallaak sumte leh a pawnglak vante leh hauhnate a hawm ding. Kulh nei khawpite zawh nading a simsawm ding a, ahihhangin, hun khat kia daih ahi ding. 25 Simlam kumpipa dou dingin amah, sepaihhon tampi tawh, a hatna leh hangsanna a kitokthou ding a, Simlam kumpipa'n zong sepaihhon tampi leh hatna tak tawh a na-dou sam ding a, ahihhangin, amah dou nadinga thu simsawmna hangin, a ding zou kei ding hi. 26 Ama' an nete mah in amah suksiat a sawm ding uh a, a sepaihhonte hawlzakin a om ding uh a, kidouna phual ah mi tampi a puk ding uhi. 27 Tua kumpipa nihte, gilou tupna lungtang pu kawmin, dawhkan khata tukhawmin a kikhemtuah ding uh a, a phatuam tuan kei ding. Ahang bel, a hun sehsa a tawpna hong tung veve ding hiven. 28 Mallam kumpipa bel, hauhna thupitak tawh a gam ah a kilehkik ding a, ahihhangin, a lungtang in tua thukhun siangthou a dou ding. Tua douin a gamta ding a, tua khit chiangin ama' gam ah a kilehkik ding hi. 29 Hun sehsa ah, ama'n Simlam a sim kik ding a, hiai tungin bel amalama thil om sangin a tuampi a gahsuah ding. 30 Tumlama tuipigei gamte' tuilongte'n amah a nang ding uh a, amah a lungke ding. Tua khitin, a kilehkik ding a, tua thukhun siangthou douin a hehluatna a sungbaw ding. Hong kilehkikin, thukhun nungngata tawpsante tung ah deihsakna a lak ding. 31 A sepaih kigalvante'n tempul kulh a niinsak ding uh a, nisim kithoihna thillat a tawpsak ding uh. Tua khitin, siatna tun tua a muhthadahhuaia kihhuai a tungkhe ding uh. 32 Thukhun palsatte maitangphatin a hihsegawp ding a, a Pathian uh thei mite'n bel amah nakpitakin a nang ding uhi. 33 Theihna thuk neite'n tawlkhat sung namsaua puk hiam, meia hal hiam, mat hiam, ahih kei leh, lawh hiamin om mah le uh, mi tampi a sinsak ding uh. 34 Amaute a puk chiang-un, huhna tawmchik a ngah ding uh a, a chitak lou tampite'n amaute a pawlmat ding uh. 35 Theihna thuk neite laka pawlkhatte hun tawp donga halsiang, hihsiang leh genbaanglou ahih theih nadingun, a kisuipuk ding uh. Ahang bel, a hun seh-a tua hong tung teitei lai ding hiven.
Amah Kipahtawi Kumpipa
36 Tua kumpipa a ut utin a gamta ding a, Pathian kichi peuhmah tunga kikoihin, amah leh amah kipahtawiin a kisangkoih ding a, pathiante' Pathian douin zak ngeilouh thilte a gen ding. Thangpaihna hun a kim mateng a lawhching ding, Ahang bel, sehsa thil tung teitei ding hiven. 37 Ama'n a pu a pate' pathiante ahita zong, numeite' lunggulhpa ahita zong, ahih kei leh, pathian himhim zong zahna a pe kei ding a, tuate khempeuh tunglam ah amah a kipahtawi ding. 38 Tuate zahtak sang sikin, kulhpite' pathian a pahtawi ding a, a pu a pate' theihlouh pathian, kham leh ngun, suangmanpha leh thawnpiak manphatein a pahtawi ding. 39 Gamdang pathian' huhna tawh kulhpi thupipente a dou ding a, ama' thupina kipahpihte nakpitakin a pahtawi ding. Amaute, mi tampite tunga vaihawma uk mi-in a bawl ding a, man neiin gam a hawm ding hi. 40 A tawpna hun ah, Simlam kumpipa'n amah a kidoupih ding a, Mallam kum-pipa'n kangtalaite leh sakol tungtuang sepaihte leh tuilong tampi-in amah a dou ding. Gam tampi a sim ding a, tui khanglian bangin amaute a tum ding. 41 Ama'n Gam Kilawm zong a sim ding. Gam tampi a puk ding a, ahihhangin, Edom, Moab leh Amon makaite a khut apan hutkhiakin a om ding uh. 42 Gam tampi tung ah a thuneihna vangletna a langsak ding a, Aigupta a suakta kei hiai ding. 43 Aigupta gou, kham leh ngun leh a hauhnate khempeuh a uk ding a, Libiate leh Nubiate a nuai ah a lut ding uh. 44 Ahihhangin, suahlam leh mallam apan thuthang in amah a patausak ding a, mi tampi hihse ding leh hihchimit dingin hehtakin a kipankhe ding. 45 Tuipite kala mual siangthou kilawm ah a kumpi puanbukte a kai ding. Hinapi-in ama' beina hong tung ding a, kuama'n amah a huh kei hiai ding hi.
A Tawpna Hunte
1 Tua hun laiin, na mite humbitpa, makai thupi Mikael hong ding khe ding. Noute' pianchil apan tua hun donga om ngei nailou lungdonna hun hong om ding. Ahihhangin, tua hunin, na mite laibu sunga min kikhumte hutkhiakin a om ding uh. 2 Leivui laka ihmu mi tampi mahmahte hong khanglou ding uh a, pawlkhatte hinna tangin, pawlkhatte maizuma simmawha omdenna tangin a khanglou ding uh. 3 A pilte bel vaana vaaknate bangin a taang ding uh a, mi tampite diktatna ngaha na piite lah aksite bangin a taang denden ding uhi. 4 Ahihhangin, nang Daniel aw, tawpna hun tun mateng, laibuziala thute khakchipin bilhchip in. Mi tampite, a vialpai kawikawi ding uh a, theihna a khang ding, a chi hi. 5 Tua khitin, kei Daniel in ka en a, ka mai ah midang nih a ding uhi. Luigei hiai lampang ah khat a ding a, a dang khat pen lehlam pang ah a ding hi. 6 A lak ua khat in puanmalngat silh, tua luitui tunglama ompa pen kiang ah: Hiai thillamdangte a tangtun nading bangtana sawt lai ding ahia? a chi hi. 7 Puanmalngat silh, tua luitui tunglama ompa'n a khut taklam leh a khut veilam vanlam ah a liktou a, Tangtawna a nungtadenpa' mina a kihaksial ka za a, ama'n: Hun khat, hunte leh hun kimkhat ahi ding. Misiangthoute' thuneihna vangletna a siat dimdem khit chiangin, hiai thilte khempeuh a tungkimta ding, a chi hi. 8 Ke'n za napi-in, ka theisiam kei a: Ka toupa aw, hiai thilte khempeuh in a tawpa a tut bang hi ding ahia? chi-in ka dong hi. 9 Ama'n hon dawng a: Tawpna hun dong adinga tua thute kikhak-chip a, kibilhchipta ahih manin, na pai nading ding ah paita in. 10 Mi tampite hihsiangthou, gen baanglou leh halsiang hi ding uhi. Ahihhanga a giloute bel gilou lailai ding uhi. A giloute laka kuama'n theisiam lou ding, ahihhanga a pilte'n bel theisiam ding uhi. 11 Nisim kithoihna thillat a kihihtawp hun apan leh siatna tun tua a muhthadahhuaia kihhuai a kitunding apan ni 1,290 om ding hi. 12 Ni 1,335 beina ngak mi leh tua hun tung mi a nunnuam ahi. 13 Nang na hih leh, a tawpna a tun mateng na pai nading ding ah paita in. Na tawlnga ding a, tua khita nite tawpna ah, na gouluah dinga seh saang dingin na thoukhe ding hi, a chi hi.
1 Kumpipa Uzia, Jotham, Ahaz leh Hezekia in Judah gama vai a hawm lai uleh, Joash' tapa Kumpipa Jeroboam in Israel gama vai a hawm laia, Beeri' tapa Hosia kianga Tangtawn Toupa' thu hong tung hiai ahi:
Hosia Innkawte
2 Tangtawn Toupa'n Hosia tungtawna thu a gen pat laiin a kiang ah: Gam in Tangtawn Toupa taisana angkawm gamtat teelzaw ahih mana, kuan a, zi kizuak khat leh ta kizuakte nang adinga na pii ding ahi, a chi hi. 3 Hosia a kuan a, Diblaim' tanu Gomer a zi dingin a pii hi. Gomer hong gai a, Hosia apan tapa a nei hi. 4 Tua khitin, Tangtawn Toupa'n Hosia kiang ah: Jezreel Phaizanga sisan suah mana Jehu innkawte gawt pah ding ka hih mana, na tapa' min dinga Jezreel na sak ding ahi. Israel innkawte' kumpigam beisak 5 ding hi'ng. Tua ni chianga, Jezreel Phaizanga Israel thalphel kitansak ding hi'ng, a chi hi. 6 Gomer a gai kik a, tanu a nei hi. Tangtawn Toupa'n Hosia kiang ah: Israel innkawte lainat nawn lou ding ka hih mana, na tanu' min dinga Lo Ruhama na sak ding ahi. Amaute bangchi maha ngaidam lou ding hi'ng. 7 Ahihhanga, Judah inkawte bel lainat ding hi'ng. Thalphel hiam, namsau hiam, kidouna hiam, ahih kei leh, sakol leh sakoltungtuangte hiam zanga amaute hukhe lou ding ing a, a Pathian uh Tangtawn Toupa zanga hondam zaw ding hi'ng, a chi hi. 8 Gomer in Lo Ruhama nawinek a tawpsak khitin, a gai kik a, tapa a nei hi. 9 Tangtawn Toupa'n: Nang ka mite hilou chin a, kei na Pathian zong hilou ka hih mana, na tapa' min dinga, Lo Ami na sak ding ahi, a chi hi.
Israel Tundingkikna
10 Ahihhanga Israelte tamdan kuamah teh senglouh, kuamah simseng louh, tuipi piaua sehnel bang hi lai ding hi. Pathian in: Ka mite hi kei uteh, a chihna mun a, Pathian hing' tate hi uteh, chi ding hi, chi-a Tangtawn Toupa'n gen hi. 11 Tua hun chianga, Pathian in Judah gam mite leh Israel gam mite gawm kik ding a, amaute'n makai khat kibawl ding uh a, amaute a sawlmangna gam apan kik ding uhi. Ahang bel, Jezreel ni thupi ding hiven, a chi hi.
1 Tangtawn Toupa'n thu a phuang a: Na sanggampate kiang ah: Ami chi inla, na sanggamnute kiang ah: Ruhama, chi in.
Pathian' Mite' Muanhuailouhna
2 Na nu uh taihilh un, taihilh un. Amah ka zi hi lou hi, a pasal hilou hi'ng. A maitang apan kizuak gamtatnate koihmang hen. A nawite apan angkawm gamtatnate koihmang hen. 3 Tua bang ahih kei leh, a puansilhte hawkkhe ding ing a, savuaka koih ding hi'ng. A pianni-a banga vuaktanga omsak ding hi'ng. Gamdai-gamkeu banga giausak ding ing a, gamkeu banga keusak ding ing a, dangtaka sisak ding hi'ng. 4 A tate uh kizuak gamtata gamta ahih man-ua lainat lou ding hi'ng. 5 Ahang bel, a nu uh kizuak banga gamta a, amaute paainu zumhuaipi-a gamta hiven. Ahang bel, ama'n: Kei hon itte delh ding hi'ng. Amaute ahi nek leh dawn hon pia, ka samulpuan leh puanmalngat hon pia a, ka sathau leh grepzu hon pia, chi hiven. 6 Tua hanga, lingkungtea a lampi um ding ing a, kulhbaanga amah umchip ding hi'ng. 7 Amah itte delh ding a, ahihhanga, pha lou ding hi. Amaute zong ding a, ahihhanga, mu lou ding hi. Tua hun chianga, ama'n: Pai ding ing a, ka pasal masa kianga kik ding hi'ng. Ahang bel, tu sanga tua laia ka dinmun hoihzaw hiven, chi ding hi. 8 Amah kianga buhte, zu thakte leh sathaute pepa keimah ka hi, chih thei lou hi. Baal adinga a zat ngun leh kham kichingtaka pepa keimah lah hi tawk ing a. 9 Tua bang ahih mana ka buhte a tun hun chianga, lamang ding ing a, ka zu thakte a tun hun chianga lamang ding hi'ng. Tua hun chianga, a savuak khuhna ka samulpuan leh puanmalngat hawkkhe ding hi'ng. 10 Amah itte' mitmuha a zumhuaina dawksak ding ing a, kuama'n ka khut apan amah hukhe lou ding hi. 11 A vualnop hun khempeuh a ankuangluite, a Kha Thakte, a Sabathte leh, ngeina-a a neih khawmpite beisak ding hi'ng. 12 A grepguite, leh a theipikungte lah hihgawp ding hi'ng. Ama'n: Hiaite kei hon itte apan ka thaman ahi, chi vial a, ke'n tuate gamlak suaksak ding ing a, gamlak gamsate'n tuate ne ding hi. 13 Baal pathiante a biak lai nite hanga, amah gawt ding hi'ng. Tua nite-a Baal pathiante' maia gimnamtui hal a, nakbahte leh suangmanphate-a kizem a, amah itte delh a, kei bel hon mangngilh hi, chi-a Tangtawn Toupa'n phuang hi.
A Mite tunga Pathian' Zahngaihna
14 Tangtawn Toupa'n thu phuang a: Tua banga amah zol ding ing a, gamdai-gamkeua pii ding ing a, kamdamtaka khamuan ding hi'ng. 15 Tua ah, grephuante pekik ding ing a, Abhor Phaizang, lametna kongpi suaksak ding hi'ng. Tua ah tuailai banga la sa ding a, Aigupta apan hong paikhiak lai banga la sa ding hi, chi hi. 16 Tangtawn Toupa'n thu phuangkhia a: Tua ni chianga hichi hi ding a, Ishi, chi-a hon sam ding chin a, Baali, hon chi nawn lou ding na hi. 17 Ke'n a kam apan Baal pathiante' min koihmang ding ing a, a min uh lou nawn lou ding hi. 18 Tua ni chianga, Israel mite adinga thukhun bawl ding ing a: Gamlak gamsate, huihkhua vasate, bokvak ganhingte tawh thu khung ding ka hi. Tua gam apan thalphel leh namsau hihtan ding ing a, kidouna lamang ding ing a, amaute galmuangtaka lumsak ding hi'ng. 19 Tangtawn adinga hon kitenpih ding ing a, diktatna leh dika thukhenna tawh, itna leh lainatna tawh, hon kitenpih ding hi'ng. 20 Muanhuaina tawh hon kitenpih ding ing a, tua hun chianga Tangtawn Toupa hon thei ding na hi, chi hi. 21 Tangtawn Toupa'n thu phuang a: Tua ni chianga hichi hi ding a, ke'n dawng ding ing a, vaante dawng ding ing a, amaute'n leitung dawng ding uhi. 22 Leitung in buh leh zu thak leh sathaua dawng ding a, amaute'n Jezreel dawng ding uhi. 23 Amah kei adinga gam sunga phut ding ing a, lainatna ngah lou nu lainat ding ing a, ka mi hiloute kianga: Ka mite na hi uh, chi ding ing a, amaute'n: Ka Pathian na hi, hon chi ding uhi, chi hi.
Pathian kianga Israel Kik ding
1 Tua khitin, Tangtawn Toupa'n ka kiang ah: Kuan kik inla, mi dang in a it angkawmnu it in. Tangtawn Toupa'n Israelte a itna tua bang ahi. Amaute pathian dangte lam ah a kihei uh a, grepgah keu beute a lunggulh, a chi hi. 2 Tua bangin, kei adingin ngun shekel sawmlenga leh barli buh homer khat leh lethek khatin amah ka lei a, 3 amah kiang ah: Ka kiang ah ni tampi na om nilouh ding a, kizuak bangin na gamta nawn kei ding. Pasal danga na hi kei ding a, kei zong nang adingin ka muanhuai ding, ka chi hi. 4 Ahang bel, Israel mite, kumpipa hiam, vaihawmmi hiam beiin, kithoihna hiam, biakna suang zek hiam beiin leh, siampi puanakzem hiam, innsung milimte hiam beia ni tampi om ding uh hiven. 5 Tua nung chiangin ahih leh, Israel mite hong kik ding uh a, a Pathian uh Tangtawn Toupa leh a kumpipa uh David a zong ding uh. Ni nunungte ah Tangtawn Toupa' mai ah liing kawmin hong pai ding uh a, a vualzawlnate a zuan ding uhi.
Israelte Ngawhna
1 Nou Israelte aw, Tangtawn Toupa' thu ngai un. Gam sunga teeng noute tung ah Tangtawn Toupa'n ngawhna hon tut ding nei hi: Gam sung ah muanhuaina om lou hi, itna om lou hi, Pathian phawkna om lou hi. 2 Hamsia lou uh a, zuau gen uh a, tuai that uh a, gu uh a, ang kawm uhi. Thagum suaha kitom uh a, sisan suahna in sisan suahna zui hi, chi ding hi. 3 Tuate hanga gam in suun ding hi. Gamlak gamsate leh huihkhua vasate leh, tuipi-a ngasate tawh kitona gamsunga teengte mangthangkhawm ding uhi. 4 Tu'n kuama'n kuamah dang ngawh kei henla, kuama'n kuamah dang sal kei hen. Na mite zaw siampi tunga ngawhna tunte bang hi ding uh hi. 5 Suntang laia kisui ding uchin a, zan laia kamsangpa zong nang tawh kisuikhawm ding hi. Tua banga, na nu uh hihmangthang ding hi'ng. 6 Ka mite'n theihna a taksap man ua, hihmanthata om uhi. Theihna na deih louh man ua, ke'n zong hon deih lou ding ing a, ka siampi hi lou ding hi uteh. Na Pathian uh' dan na mangngilh man ua, ke'n zong na tate uh mangngilh ding hi'ng. 7 Siampite a tam semsem chianga, ka tunga khial semsem uhi. A thupina uh a daina uh suaksak ding hi'ng. 8 Ka mite' khelhna-a siampite kivak uh a, a tatsiatna uah nuamsa uhi. 9 Mipite'n siampite suun uhi, chih paunak dik ding hi. A gamtatnate uh hanga amaute gawt tuaktuak ding ing a, a thilhihte uh banga amaute thuk tuaktuak ding hi'ng. 10 Ne ding uha, vah tuan lou ding uhi. Kizuak banga gamta ding uha, pung tuanlou ding uhi. Ahang bel, amaute'n Tangtawn Toupa thuman nawn lou uh hiven.
Israel Milimbiakna
11 Kizuakna leh zugei leh zu thak in a lungtangte uh sala kai hi. 12 Ka mite'n a sing milimte uh kianga thu kan uh a, sing chiangkhunte'n dawng hi. Ahang bel, kizuakna lungsim in amaute piimang a, a Pathian uh nusia-a kizuak uh hiven. 13 Mualsang tung ah kithoihnate laan uh a, mualvum ahte gimnamtui hal uhi. Singliim nuamsa-a tawsaw singte, khiang singte leh gelsingte nuaia gimnamtui hal uhi. Tua bang ahih mana, na tanute uh kizuak uh a, na mouthakte un ang kawm uhi. 14 Na tanute uh a kizuak chiang ua, amaute gawt lou ding ing a, na mouthakte un ang a kawm chiang ua, amaute gawt lou ding hi'ng. Ahang bel, pasalte nangawn in kizuakte delh uh a, biakbuka kizuakte tawh kithoihna laankhawm uh hiven. Tua bang ahih mana, a theisiamloute sikdena om ding uhi. 15 Israel aw, kizuak banga gamta na hi. Ahihhangin, Judah aw, nang zaw mawh ken. Gilgal ah hawh ke'n, Beth Aven ah hawhtou ken. Tangtawn Toupa a hin-a a hin sung teng, chi-in kichiam ken. 16 Israel bawngla genhak banga genhak hiven, bangchi-a Tangtawn Toupa'n belam banga gamtatna muna gamtasak ding eita? 17 Efraim gam milimbia ahi, va ngaihsak ken. 18 A zu uh bei chiang nangawna, kizuak banga gamta lailai uhi, A vaihawmmite' un zumhuai gamtatnate it lailai uhi. 19 Pingpei in amaute zialmang ding a, a kithoihnate uh hanga zahlak ding uhi.
Israel leh Judah tunga Thukhenna
1 Siampite aw, hiai za un! Israel innkawte aw, thudon un! Kumpi innkawte aw, ngai un! Na tung ua hiai thukhenna tu ding hi: Mizpa khua ah thaangantah hi uchin a, Tabor mual ah lenthaang hi na hi uhi. 2 Helhatte' mithahna ah kihel uh a, amaute a vekpi ua thunun dinga gawt ding hi'ng. 3 Efraim gam thei ing a, Israel gam ka maia kisel theilou hi. Efraim gam kizuak a, Israel gam amah leh amah kihihsia hi. 4 Amaute' gamtatna in Pathian lama kik nading dai hi. Ahang bel, a lungsung ua kizuakna lungsim om a, Tangtawn Toupa theilou uh hiven. 5 Israel a kisaktheihna in amaute mawhtangsak a, Israel leh Efraim gam a mawhna ua kisui uhi. Judah gam zong amaute tawh kisuikhawm hi. 6 A belamhonte uleh bawnghonte utawh Tangtawn Toupa zong dinga kuan ding uh a, amah mu lou ding uhi. amah amaute apan kihemkheta hi. 7 Tangtawn Toupa tung ah muanhuailouin omta uhi. Ahang bel, zawlta khawng nei uh a, a Khathak angkuangluite un amaute leh a goutante uh negai ding hiven. 8 Gibea khua ah pengkul mut unla, Rama khua ah belamtal' kii mut un. Beth Aven khua ah galdouna aw suah unla: Benjamin aw! masawnzel in, chi un. 9 Salhna thuak ni chianga, Efraim gam segawp ding hi. Ke'n a tung ngeingei ding thil Israel namte lak ah phuang ding hi'ng. 10 Judah gam makaite lah gamgi suang suansuante bang uhi. Ka thangpaihna-a amaute tuikhang banga tum ding hi'ng. 11 Pathian in Efraim gam tunga thu khenin nuaisiah a, sikden hi. Ahang bel, Efraim in mihing' thupiak kilawptaka zui zaw hiven. 12 Efraim gam adinga puannget hi ding ing a, Judah inkawte adinga muatna hi ding hi'ng. 13 Efraim in a chinatna mu a, Judah in a liamma a muh laia, Efraim in lah Asuria lam nga a, tua kumpipa thupi' huhna ngen a, ahihhanga, ama'n na chinatna damsak theilou a, na liamma lah damsak thei lou hi. 14 Ahang bel, kei Efraim tunga humpinelkai banga gamta ding ing a, Judah innkawte tunga humpinelkai banga gamta ding hi vengin. Keimah mah in amaute botzan ding ing a, taisan ding hi'ng. Amaute pawmang ding ing a, kuama'n amaute hukhe lou ding hi. 15 A mawhna uh kiphawk a, ka mai a zon mateng uh, amaute pawmang ding ing a, ka omna-a kiksan ding hi'ng. Tua hun chianga lungkham mangbanga kei hon zong taktak ding uhi, chi hi.
Lunghei dinga Sapna
1 Hong pai un, Tangtawn Toupa lam ah kik ni. Ama'n hon botzanta mah leh, hon damsak ding hi. Ama'n hon liamsakta mah leh, i liammate hon tuam ding hi. 2 Ni nih nunga ama'n hon halhsak ding a, a ni thum ni-a ama'n hon phongtou ding a, a omna muna teeng ding hi hang. 3 Pathian thei ni, Tangtawn Toupa theihna delh ni. Zingsang phalvak a tung ngeingei banga, ama' hong kilatna tung ngeingei ding hi. Amah vuahzu banga hong tung ding a, leitung buakkawt khawkhal vuah masa banga hong tung ding hi.
Israel leh Judah Lungheinoplouhna
4 Efraim aw, bang hon lawh thei ding ka hia? Judah aw, bang hon lawh thei ding ka hia? Na muanhuaina uh zingsang tuimei bang hi a, zingsang daitui theng pah bang hi ahi. 5 Tua bang a hih mana, ka kamsangte zanga hon satzan ing a, ka kama thutea hon that ing a, na tung ua ka thukhennate khawphia banga tangkhia hi. 6 Ahang bel, ke'n kithoihna sanga zahngaihna lunggulh zaw ing a, haltum thillatte sanga Pathian' theihpihna lunggulh zaw hi vengin. 7 Adam banga thukhun manglou uh a, tua-a kei adinga muanhuai lou uhi. 8 Gilead lah migiloute' khawpi hi a, sisan baanna khekhapa dim hi. 9 Suamhatte'n mi a buk banga, siampihonte'n Shekhem lampi-a tuai that uh a, thil zumhuai hih uhi. 10 Israel innkawte laka thil mulkimhuai mu hi'ng: Tua Efraim kizuak a, Israel hihnita om hi. 11 Judah aw, nang adinga zong buhlak hun sep ing a, ka mite saltanna apan ka piikik chianga tua hun tung ding hi.
1 Israel damsak ka sawm tenga Efraim' mawhna phoulak ing a, Samaria' thilhih giloute phoulak hi'ng. Amaute zuauthu gena gamta uh a, gutate'n inn buluh uh a, kongzing khawnga suamhatte'n mi suam uhi. 2 Ahihhanga, a thilhih giloute uh thei gige ka hi, chih phawk lou uhi. Tu mahmaha a khelhnate un amaute pumtuam a, a thilhihte uh ka maia om gige hi. 3 A gitlouhna ua kumpipa kipaksak uh a, a zuaugenna ua makaite kipaksak uhi. 4 Avekpi ua ang kawm uh a, thukkhuk sa gige bang hi uhi. Tanghou emmi in anvui nei mekman a empuak mateng tua mei a duulsak thak kullou bang hi uhi. 5 I kumpipa' angkuanglui ni-a makaite'n zu kham uh a, amah lah simmawhhatte tawh pangkhawm hi. 6 A lungtang uh thukkhuk sa bang a, thil gilou simsawmna tawh amah naih uh a, a lunggulhna uh zankhawvaka ampha-a duul a, zingsanga kuangkhia hi. 7 Avekpi ua thukkhuk sa bang hi uh a, a tung ua vaihawmte negai uhi. A kumpipate uh puk uh a, amaute kuama'n kei hon sam lou uhi. 8 Efraim lah namte lak ah kihel a, tanghou em lumlet louh bang hi ahi. 9 Gamdang mite'n a thahatna tawpkang uh a, ama'n lah phawk lou hi. A sam kaang khin a, ahihhanga phawk lou hi. 10 Israel a kiotsakna in mawhtan a, hinapi-a lah Tangtawn Toupa, a Pathian kianga kik lou lai a, amah zong lou hi.
Namte Muanna Phatuamlou
11 Efraim zaw khemnop, khawphawklou vakhu bang hong hita hi, Aigupta sam thepthup a, Asuria sam thepthup hi. 12 Amaute a lampial peuhpeuh chiang ua, ke'n amaute lena khuh ding ing a, huihkhua-a vasate banga kaikhe ding hi'ng. A kikhopkhawm uh ka zak chianga, amaute man ding hi'ng. 13 Amaute tung gik hi! Ahang bel, kei hon taisan uh hiven! Amaute' tunga siatna tung hi. Ahang bel, ka tunga talek uh hiven! Amaute tankhe nuam ing a, ahihhanga kei dema zuau gengen uhi. 14 A lupna tung ua a kah chiang ua, lungtang taka kei hon sam nuam lou uhi. Buh leh zu thak duha kikhawm uh a, ka tunga hel uhi. 15 Kei mahmah in a banthate uh chiila hatsak ing a, ahihhanga ka tunga thil gilou sawm uhi. 16 Tungnungpen kiang ah kik lou uh a, thalphel muanhuailou bang hi uhi. A kiotsakna kampaute uh hanga a makaite uh namsaua si ding uhi. Hiaite mah Aigupta gama nuihzabuk a suah nading uh hi ahi.
Israel' Pukmangna
1 Pengkul na muk tawh sutuah in, Tangtawn Toupa' inn tung ah muvanlai khat om hi. Ahang bel, amaute ka thukhun manglou uha, ka dan helsan uh hiven. 2 Kei hon sama Israel kikoukhe ding a: Koute' Pathian aw, nang hon thei hi ung, chi ding uhi. 3 Ahihhanga Israel in a hoih nolh a, meima in amah delh ding hi. 4 Kumpipate tungkhia uh a, kei tungtawn bel hi lou hi. Makaite sep uh a, ke'n amaute thukimpih lou hi'ng. A kham uleh a ngun-ua milimte kibawl uh a, tua banga kei apan kisatkhia uhi. 5 Samaria aw, na bawngnou milim paikhia in! Amaute tunga ka hehna kuang hi. Bangtan siangthou theiloua om ding na hi ua? 6 Bawngnou milim Israel apan hi a, a khutsiamte un bawngnou milim bawl uh a, Pathian lah hi dek het lou hi. Samaria' bawngnou milim kitamzan ding hi. 7 Huih pawi uh a, pingpei at uhi. Buhkung in vui nei lou a, anvui nei piangsak lou ding hi. Piangsak kha mah leh, gamdang mite'n nawmvalh ding hi. 8 Israel gam nawmvalhin om a, namte laka kuamah' lunggulh louh namanlou bang hi ahi. 9 Ahang bel, Asuria gama paitou uh a, sabiltung tangtat bang hi uhi. Efraim, amau it mi kianga kizuak hi. 10 Namte lak ah kizuak mah le uh, ke'n tuin amaute kaikhawm ding hi'ng. Kumpi hat' nuaisiahna nuaia siah pia-a a hauhna uh bei ding hi. 11 Efraim in khelh thoih nading maitamte tampi dawh mah leh, tua maitamte mah khelhna munte hong suak hi. 12 Amaute adinga ka dan tampi gelh ing a, tuate lah amaua hilou banga ngai uhi. 13 Ka mai ah kithoihna thillatte laan uh a, tua kithoihna sate ne uhi. Ahihhanga, Tangtawn Toupa kipaksak lou uhi. Tu'n ama'n a mawhna uh thei gige ding a, a khelhnate uh gawt ding a, Aigupta-a kiik ding uhi. 14 Israel in innpite lam a, amah bawlpa mangngilh hi. Judah gam in khawpi kulh neite lam a, ahihhanga, ke'n a khawpite ua mei sawl ding ing a, mei in a kulhpite uh kangtum ding hi, chi hi.
Israel Khelhna Gawtna
1 Israel aw, nam dangte' lungnop bangin, uangluain nuam ken. Na Pathian tunga na gamtat kizuak gamtat hi ahi. Na buhchilna phual tenga kizuakna man lunggulh na hi vele. 2 Buhchilna phual leh grepsukna khuk in mite vaak lou ding a, zu thak tung sam lou ding hi. 3 Tangtawn Toupa' gama omden lou ding uhi, Efraim lah Aigupta gam ah kik ding a, Asuria gama an sianglou ne ding hi. 4 Tangtawn Toupa' mai ah grep zu laan lou ding uh a, a kithoihnate un amah lungtaisak sam lou ding hi. A tanghoute uh sisuunte' tanghou bang ding a, a ne peuhmah niin ding hi. A tanghou uh amaute kia ading hi ding a, Tangtawn Toupa' tempula lut lou ding hi. 5 Ni tan sehtuam ni-in bang na hih dia? Ahih kei leh, Tangtawn Toupa' ankuanglui ni-in bang na hih dia? 6 Khutluma siatna tuak kei mah le uh, Aigupta in amaute khawmsiang ding a, Memfis in amau vui ding hi. A ngun goute uh loupa in khuh ding a, a puan innte uah loulingneite pou ding hi. 7 Gawtna nite hong tung dekta, phulak nite hong naita. Israel in thei hen! Kamsangpa mihaia seh hi a, khami zong mihaia seh hi ahi. Ahang bel, na mawhna thilhihte uh tam a, na helna uh thupi lua hiven. 8 Kamsangpa, ka Pathian tawh Efraim tunga galvil hikhawm hi. Ahihhanga, a lampi tenga thang in amah ngak a, Pathian' inna kigalbawlna om hi. 9 Gibea nitea banga siatgawpna thupi-a tum uhi. Ama'n a mawhna thilhihte uh thei gige ding a, a khelhnate uh hanga amaute gawt ding hi. 10 Israel ka muhkhiak laia gamdai-gamkeua grepgahte muh mah bang a, na pu na pate uh ka muhkhiak laia theipi kunga a gah masa mah bang uhi. Ahihhanga, Baal Peor hong tung uh a, zahlak dinga kipekhia uhi. A thil lunggulhte uh bangbanga amaute kihhuai uhi. 11 Efraim thupina, vasa banga lengmang ding hi. Nausuak om lou ding a, gai om lou ding a, nau paai zong om lou ding hi. 12 Tate khoi mah le uh, ke'n amaute suunsak vek ding hi'ng. Khat lei zong hawi lou ding hi'ng. Ahi, amaute ka taisan chiangin, a tung uh gik nan chia! 13 Efraim ka muh laia Tura khawpi bang a, mun nuama phuha mu hi'ng a, ahihhanga, Efraim in tualthat mi kianga piak ding leia tate piikhe ding hi. 14 Tangtawn Toupa aw, amaute banghiam beek pia in. Ahihhangin, bang na pe dia ahia? Nausiatna suulte pia inla, nawituibei nawite pia in. 15 Gilgala a thilhih giloute uh hanga amaute mudah taktak hi'ng. A thilhih giloute uh hanga ka innsung apan amaute hawlkhe ding ing a, amaute it nawn lou ding hi'ng. A makai liante uh mihel ngen hi uhi. 16 Pathian in Efraim sat a, a zung keu a, gah suah lou uhi. Tate nei mah le uh, suula gah ta deihthawhte ke'n that ding hi'ng, chi hi. 17 Amaute'n ka Pathian a thuman louh man ua, ama'n amaute nolhta ding a, namte laka vakthaapte hong hi ding uhi.
Israelte' Khelhna leh Saltanna
1 Israel zaw grepgui gah nuam bang hi ahi, amah adinga gah kisuah a, a gah phat semsem chianga maitam tam semsem dawh hi. A gam a lawhchin zahzaha biakna suang zekte zeem hi. 2 A lungtang uh khemhat hi a, a mawhna uh khu ngeingei ding uhi. Tangtawn Toupa'n a maitamte uh chimsak ding a, a biakna suang zekte uh phuksak ding hi. 3 Tua khit chianga: Tangtawn Toupa laudan i theihlouh mana, kumpi nei lou hita hang, kumpi nei lehang zong, eite adinga bang hon hihsak ding eita, chi ding uhi. 4 Thukhun tampi bawl uh a, kichiam khemkhem uh a, thu tampi gen uhi. Ahihhanga, lou kaihna-a pou loupa guneite banga kihekkipeina hong piang hi. 5 Samaria khawpi-a tengte, Beth Aven bawngnou milim hanga lau ding uhi. Mipite'n bawngnou milim suun ding uh a, a thupina kipahpih tua milim bia siampite'n tua kah ding uhi. Ahang bel, thupina in bawngnou milim nuseta hiven. 6 Asuria gam ah tua bawngnou milim kipaw ding a, kumpipa thupi kiang ah thawnpiakin pe ding uhi. Efraim zahlak ding a, Israel in a sing milimte maizumlawh ding hi. 7 Pathian in Samaria satkhe ding a, a kumpipa zong tui tunga kilam chiangkang bang hi ding hi. 8 Pathian in Avena biakna munte hihgawp ding hi. Tua munte Israel khelhna mun hiven. A maitamte tunga ling leh loulingnei pou ding hi. Tangte kianga: Hon khuh un, chi ding uh a, mualte kianga: Hon pukkhum un, chi ding uhi. 9 Ama'n: Israel aw, Gibea nite nungsang khial tawntung uchin a, tua muna omden hi uteh. Gibea-a om mi diktatloute gal in delhpha lou ding ahi-a hia? 10 Gawtna-a amaute ka bawlphat nop hun chianga, tua banga hih ding hi'ng. Amaute dou dinga namte kaikhawm ding hi'ng. Amaute' mawhna thuahnih hanga namte'n amaute hentom ding uhi. 11 Efraim bel bawngla chilsiamsa hi a, buhchil nuamsa hi. Ahihhanga, a ngawng kilawma hakkol bat ding ing a, lou kaisak ding hi'ng. Judah in lei let ding a, Jakob suante'n lei khennen ding hi. 12 Nou adingin diktatna pawi unla, itna muanhuai gah at un. Na lei siit uh let unla, a leitangte khentam un. Tangtawn Toupa zon hunta hi. Amah hong tung a, na tung ua diktatna a zuksak masiah amah zong un. 13 Gitlouhna lou kaiha kai uchin a, diktatlouhna at hi uteh. Zuauthu gen gahsuah ne hi uteh. Ahang bel, noumau' hatnate leh na galhat tampite uh suang hive uchin. 14 Na douna husa ngaihtak om ding a, na kulhte chim ding hi. Kidou ni-a Shalman in Beth Arbel a suksiat ni bang ding hi. Nute leh a tate uh leilak, denna-a a kineih ni bang ding hi, 15 Na gitlouhna a let mahmah mana, Bethel aw, tua banga na tunga hong tung ding hi. Tua zingkhua hong vak chianga Israel kumpipa hihmanthat sipsip hi ding hi.
Pathian in Israel It Lailai
1 Israel naungek ahih laia ka it hi a, Aigupta gam apan ka tapa samkhia hi'ng. 2 Kamsangte'n amaute a nak sap semsem chiang ua, amaute apan pai gamla semsem uhi. Baal pathiante' maia kithoihnate laan uh a, milimte' maia gimnamtui hal uhi. 3 Kei mahmah in Efraim pai kisinsak ing a, a baan ua len hi'ng. Ahihhanga, amaute damsak ka hi, chih thei lou uhi. 4 Mihing' chitna leh siamna khaua, amaute kai ing a, itna khaua khih hi'ng. A ngawng uapan hakkol sutkhia kei hi'ng a, kunsuk ing a, amaute vaak hi'ng. 5 Kei lama hong kik nop louh man ua, Efraim, Aigupta gama kik lou ding hia? Asuria kumpi-a nei lou ding uhia? 6 A khawpite uah namsau leng ding a, a kongpi kaihna zawlte sattan ding hi. Amau' lunggelte hanga namsau in amaute negai ding hi. 7 Ka mite'n hon kiheisan sawm teitei uh hiven, Tungungpen sam mah le uh, ama'ns amaute tawisang het lou ding hi. 8 Efraim aw, bangchi-a hon tawpsan thei ding ka hia? Israel aw, bangchi-a hon pekhe thei ding ka hia? Bang chi-a Adma bang hon suaksak thei ding ka hia? Bangchi-a Zeboim banga hon bawl thei ding ka hia? Ka sunga ka lungtang kibungbukhai a, Kon khasiat tha suak tuntun hi. 9 Ka thangpaihna lauhuai tangtun lou ding hi'ng. Kiheia Efraim hihse lou ding hi'ng. Ahang bel, kei Pathian hi ing a, mihing hilou hi vengin. Na lak ua om, a Siangthoupa hi'ng a, mulkimhuaina tawh hong pai lou ding hi'ng. 10 Amaute'n Tangtawn Toupa zui ding uh a, amah humpinelkai banga humham ding hi. Ahi, humham ding a, a tate tumlam apan liing kawmkawma hong pai ding uhi. 11 Aigupta gam apan vasa banga liing kawmkawma hong pai ding uh a, Suria gam apan vakhu banga hong pai ding uh a, ke'n amaute a inn ua teengsak ding hi'ng, chi-a Tangtawn Toupa'n phuang hi.
Judah' Khelhna tunga Pathian' Thangpaihna
12 Efraim in zuauthu-a hon umkimvel a, Israel innkawte'n khemna-a hon uum hi. Judah nangawn Pathian ah lungkim lou hi. Amah lah a Siangthoupa leh Muanhuaipa hi tawk a!
1 Efraim huih-in kivaak a, sun nituma suahlam huih delh a, zuaugen leh khutlumzat khangsak semsem hi. Asuria tawh thukhun bawl a, Aigupta gama sathau pawlut hi. 2 Tangtawn Toupa'n zong Judah tunga ngawhna ding nei hi. Jakob a gamtatna bangbanga gawt ding a, a thilhih bangbanga din ding hi. 3 Sula a om laia Jakob in a sanggampa' khetul len a, hong khanlet taka Pathian buan hi. 4 Ama n tua vansawltak buan a, zou hi. Tua khita, kapa Pathian' deihsakna ngen hi. Jakob in Bethela Pathian mu a, tua muna amah houpih hi. 5 Tangtawn Toupa Pathian Vanglianpen hi a, theih-a a omna min Tangtawn Toupa chih hi ahi. 6 Nang zaw, na Pathian lama na kik teitei ding ahi. Itna leh thukhenna lenkip inla, na Pathian ngak gige in. 7 Sumsin mi in a khuta buukna diklou tawi a, a kan a vala mi nek ut hi. 8 Efraim in: Hau taktakta ing, kei adingin hauhna kikholta ing, ka khut sepgim gah khawm ka hih manin, kuama'n tatsia hiam khial hiam hon ngawh lou ding, chi hi. 9 Kei Tangtawn Toupa, Aigupta gam apan na Pathian hita hi'ng. Hun seh ankuang lui lai banga, puanbukte khawnga hon teengsak kik ding hi'ng. 10 Ke'n kamsangte kianga thu genta ing a: Mengmuhte tamsak semsem ing a, kamsangte tungtawna gentehnate pia hi'ng. 11 Gilead gam gilou hia? He, a mite mannabei hi uhi. Gilgal ah bawngtalte laan uhia? He, a maitamte uh leilehna-a suang kivum bang mai hi ahi. 12 Jakob, Aram gam ah tai a, Israel in zi thalawhin nna sem a, zi thalawhin belamte ching hi. 13 Tangtawn Toupa'n kamsang zanga Aigupta apan Israel piikhia a, kamsang zanga Israel ching hi. 14 Efraim in Tangtawn Toupa thangpaisak a, Efraim' sisan suah mawhna Toupa'n ama' tunga nga ding a, a zahlakna lehkik ding hi.
Israel tunga Gawtna
1 Efraim in thu a gen chianga, mite liing uhi. Israelte laka amah kitawisang a, ahihhanga, Baal pathiante biain mawh a, sita hi. 2 Tuni chiang dong khial semsem uh a, a ngunsik ua milimte kibawl uh a, siamneltaka milimte kibawl uhi. Tuate lah khutsiamte' khutsuak hi lei hi. Hiai mite tungtang thu kigen a: Kithoihna dinga mihing laan uh a, bawngnou milim tawp uhi, kichi hi. 3 Tua bang ahih mana, amaute zingsang tuimei leh zing daikia bang hi ding uhi. Buhchilna phuala buhsi Lengmang bang hi ding uh a, meikhu pawtna apan meikhu lengmang bang hi ding uhi. 4 Ama'n: Ahihhanga, Aigupta gam apana kei Tangtawn Toupa, na Pathian uh hi ka hi. Kei loungal Pathian dang himhim na neih louh ding uh, kei loungal Hondampa dang om lou hi. 5 Gamdai-gamkeua nang hon don ing a, tui om louhna-a nang hon kem hi'ng. 6 Amaute ana ka vaak laia, vaha tai uhi. A lungtang uh kisathei a, kei hon mangngilh uhi. 7 Tua bang hun chianga amaute adinga humpinelkai bang hi ding ing a, lamgei khawnga gialbem banga amaute buk ding hi'ng. 8 A nou kilaksak vompi banga amaute tuaka botzaan ding ing a, humpinelkainu banga amaute negai ding hi'ng. Gamsa gilou in amaute botzan ding hi. 9 Israel aw, nang leh nang kihihsegawp na hi. Nang hon huhpa kei non dou man ahi. 10 Nang hon hukhe din, Na kumpipa koia om ahia? Na khawpite ah nang hon hukhe diam? Na vaihawm thukhente koia om ahia? Kumpipa hon pia in, vaihawm thukhente hon pia in, na chihte hilou umaw? 11 Heh a, kumpi hon pia ing a, thangpaia amah lamang hi'ng. 12 Efraim' mawhna kholkhawm ing a, a khelhna chiamteh hi'ng. 13 Nauvei gim banga a na thuak ding hi. Ahihhanga, a nau suak ding pen a pii hi lou ding hi. Nausuah hun hong tungta, hinapi-a sul a kihon nunga zong suakkhe lou hi. 14 Hankhuk vangletna apan amaute hondam ding ing a, sihna apan amaute hukhe ding hi'ng. Sihna aw, na gu koia om ahia? Hankhuk aw, na hihmanthatna koia omta ahia? Ka mit apan lainatna kiselmang ding hi. 15 Efraim a sanggamte laka khanpha mai thei hi. Ahihhanga, suahlam huih hong nung ding a, gamdai-gamkeu apan Tangtawn Toupa' huih hong nung ding hi. Efraim tuinakte kangsak ing a, a luikhukte keu ding hi. A gou koihna kiluh ding a, a goute khempeuh kipawmang ding hi. 16 Samaria mite'n a mawhna uh khu ding uhi. A Pathian uh tunga hel hi ve-un. Namsauin si ding uh a, a taneute uh leilak dennain kinei ding a, a numei gailaite uh gil kipikkham ding hi, chi hi.
Israel Tundingkikna
1 Israel aw, Tangtawn Toupa na Pathian kiang ah kik nawn in. Na mawhnate hanga kipalpai na hi. 2 Thute hon pua inla, Tangtawn Toupa kiang ah kik nawn inla, amah kiang ah: Ka mawhnate khempeuh uh maisak inla, hehpihsiamin hon nasang in. Muk apan kithoihna hon laan ding hi ung. 3 Asuria in koute hon hukhe theilou. Sakol tung ah tuang lou ding hi ung. Ka khutsuakte uh kiang ah zong: Ka pathiante na hi uh, chi nawn lou ding hi ung. Ahang bel, pabeite'n nang ah zahngaihna mu hi, chi un. 4 Ama'n: A hon taisanna uh damsak ding ing a, manbeia amaute it ding hi'ng. Ahang bel, ka hehna amaute apan kiheimangta hiven. 5 Israel gam adinga daitui bang hi ding ing a, lilipak banga paklun ding uh a, Lebanon singkungte banga zung kha ding uh a, a selnoute khangtou ding hi. 6 Hiang thakte selkhe ding a, oliv singkung banga kilawm ding uh a, a gimnamtui Lebanon sidar singkung bang ding hi. 7 Sing limliap ah mite teeng kik ding a, amah buhvuipha banga gahpha ding a, grepgui banga paklun ding uh a, a minthanna Lebanon apan grepzu bang hi ding hi. 8 Efraim in: Milimte tawh bang kisaina nei lai ding ka hia? chi ding hi. Ke'n amaute zata ing a, khawtuah ding hi'ng. Kei zaw meilah sing hing bang hi ing a, na gah suahna kei apan ahi, chi hi. 9 A pii kua ahia? Hiai thilte theisiam hen. A theikaksiam kua ahia? Hiai thilte thei hen. Ahang bel, Tangtawn Toupa' lampite dik a, midiktatte'n tuate tawn ding a, a helhatte bel tuatea kipalpai ding hiven.
1 Pethuel' tapa Joel kianga Tangtawn Toupa' thu hong tung hiai ahi. Khaupete Laang 2 Nou upate'n hiai za un, gamsunga teengte khempeuh in ngai un: Noute' khan lai leh na pu na pate uh khan lai nangawna hibang himhim om ngei hiam? 3 Na tate uh kiang ah gen un, na tate un a tate uh kiang ah gensawn uhen, a tate un khangsawnte hilhsawn uhen. 4 Khaupehonte' nekbang khaukhupte'n ne a, khaukhupte' nekbang khaupenoute'n ne a, khaupenoute' nekbang khaupe dangte'n negaita. 5 Zukhamte aw, khanglou unla, kap un! Zudawnmi khempeuhte'n mu un. Na kam uapan zu thak kilamangta ahih manin mau un. 6 Nam khat in ka gam hong dou a, nam hat khat, a tamdan uh simseng louh in ka gam hong dou hi. Humpinelkai' hapak bang hapak nei a, Hupinnelkainu' hapi bang hapi nei hi ahi. 7 Ka grepguite geusakta a, ka theipikungte hihsia a, a hawngte kheuhsiangta a, a hiangte keuta. 8 Nungak siangthou, a pasal khaam suuna saiip puan silh bangin, mauin kap un. 9 An thillatte leh dawn thillatte, Tangtawn Toupa' inn apan beita. Siampite leh Tangtawn Toupa' inn-a nasemte mau un. 10 Khaupete'n loute hihsia a, lei keugawpta. Khaupete'n haigah hihsia a, greptui thak kangta, sathau lah om lou. 11 Nou louneite, lungdong un, nou grep chingmite, mau un. Huit buh leh barli buh lak ding om nawn lou ahih manin, dahin mau un. 12 Grepgui lah vuaita, theipikung lah keuta. Mimtheite, nisuhkhumte, epulte, loua theikung khempeuhte keuta. Mihing tate' lungnopna teng khaupete'n beisakta.
Kisik dinga Sapna
13 Nou siampite aw, saiippuan silh unla, kap un. Nou maitam nasemte aw, mau un. Nou ka Pathian' nasemte aw, hong pai unla, zankhuain, saiippuan silh un. An thillatte leh dawn thillatte na Pathian uh inn adingin om nawn lou. 14 An ngawl hun sep un, khawmpi siangthou bawl un. Putekte, ahi, gamsung mite khempeuh, Tangtawn Toupa, na Pathian uh' inn ah kaikhawm unla, Tangtawn Toupa' mai ah kap un. 15 Maizen! tua tunggik ni! Tua Tangtawn Toupa ni hong naita. Vanglianpen apan hong tung Manthatna tawh kibang ding. 16 I mitmuhin ante kilamangta hilou maw? I Pathian' inn apan lungnopna leh kipahna kilamangta hilou maw? 17 Khaichite leikhal nuaia keuta. Buhte segawpsakta ahih manin, buhbukte hawmta, buhbukte chimgawpta. 18 Gantate nangawn mauta! Gantatna munte keuta a, bawnghonte buaigawpta, belamhonte nangawn gimgawpta. 19 Tangtawn Toupa aw, nang kiang' kong beel hi. Gantatna munte mei in kangtumta a, meikuang in gamlak singte kangtumta hi. 20 Gamsate nangawn nang ngaiin nak hawp hawp. Luituite kangta a, gantatna mun loupate mei in kangtumta.
Khaupehonpi
1 Zion khawpi sung ah pengkul mut unla, ka mual siangthou ah patauh dak tum un. Tangtawn Toupa' ni hong naita a, hong tung dekta hiven, gam sunga teengte khempeuh liing hen. 2 Mial ni leh lungkham ni, meipi zin ni leh mial bikbek ni hi ding. Mualsangte tung phalvak thakhata tangsuak banga sepaihhon tampi leh thahat hong pai ding. Hibang himhim om ngei nailou, kumsawta zong om ngei nawnlou ding. 3 Amaute' maban meikuang in kangtum, a nunglam uh meikuang in hul. A mailam uh gam, Eden huan bang, a nunglam uh gamdai-gamkeu suak, a mai uah kuamah suakta lou. 4 A mei uh sakolte bang, sakoltungtuang sepaihte banga tawm uh. 5 Kangtalai mualtunga tai bang a husa uh ging lomlom, mei in loupa keu a kat ging bang. Kidou dinga mansa sepaihhon banga kikhung uh. 6 Amaute mu-a namte patau, a maitang uh mual. 7 Galhatte banga mainawta delh uh a, sepaihte banga kulhbaanga kal uh. Mailam tangtaka nawh uh a, lampial omlou. 8 Kiphukha om loua mailama tangtaka pai uh. Galte' panna phu paisuak uh a, kitaisan om lou uh. 9 Khawpi a bawhin bawh uh a, kulhbaang zuiin tai uh. Inn sung ah tawmlut uh a, guta bang tawhleta lut uh. 10 Amaute' mai ah lei kiliing a, vaante zong kiliing hi. Ni leh kha mialta a, aksite zong taang nawnlou. 11 Tangtawn Toupa'n, a sepaihhonte' maia aw suah a, a sepaihhonte' simsenglouh, a thupiak zuite thahat uh. Tangtawn Toupa' ni thupi a, mulkimhuai kua'n thuak zou ding hiam?
Lungtang Bawhkek ding
12 Tu mahmah in zong, na lungtang khempeuh tawh, kei lam ah hong kihei un. An ngawlin, kapin, suun unla, hong kik un, chi-a Tangtawn Toupa'n gen. 13 Na puansilhte uh hilouin, na lungtangte uh botkek unla, Tangtawn Toupa kiang ah kik un. Amah hehpihsiam, lainatna hau, lungnel, hehhak, itna tawh kidim hi. Siatna tun lou dinga, lunghei ding hi. 14 Ama'n lungheiin, zahngaiin, vualzawlna hon nutsiat ken teh, Tangtawn Toupa, na Pathian kianga, an thillat leh dawn thillat ding hon nutsiat ken teh, chi thei kua om eita? 15 Zion khawpi sung ah pengkul mut un, anngawl siangthou phuang un, khawmpi siangthou sam un. 16 Mipi kaikhawm unla, kikhawmte siansuah un. Upate kaikhawm unla, naupangte kaikhawm unla, nawinelaite nangawn kaikhawm un. Mou neipa'n a dantan nusia henla, mou in a dantan sunggil nusia hen. 17 Tangtawn Toupa' nasem siampite innlim leh maitam kal ah kap uhen la: Tangtawn Toupa aw, na mite zahngaiin hawi in. Na goutan zahlaksak kenla, namte' paunak suaksak ken. Banghanga namte laka: Amaute' Pathian kaw om hiam, kichise ding ahia? chi uhen.
Toupa' Dawnna
18 Tua chiangin, Tangtawn Toupa'n thikthusekhopin a gam it ding a, a mite lainat ding hi. 19 Tangtawn Toupa'n dawng ding a, amaute kianga: Ngai un, an leh greptui thak leh sathau hon pe ding hi'ng. Taitak leh vahtakin na om ding uh, namte laka hon zahlaksak nawn lou ding hi'ng. 20 Mallam sepaihhonte, noute apan gamlapi ah, gamdai-gamkeua hawlmang ding ing a, a masalamte suahlam tuipi ah lut ding a, a nunungte tumlam tuipi ah. Hong uihkhe ding a, a namsiatna kiza ding, chi ding hi. Ama'n thil thupite hih taktak hi. 21 Gam aw, lau nawn ken, Tangtawn Toupa'n thil thupi hih ahih manin kipakin nuam in. 22 Gamsate aw, lau nawn kei un, gamdai-gamkeu ah loupa sel ding. Singte'n gah suah ding a, theipi leh grep in gah suah ding hi. 23 Zion tate aw, Tangtawn Toupa ah kipakin nuam un, ama'n vuah masa a kichingin hon pe ding. Nidanglaia bangin vuah masa leh vuah nunung hon pe ding hi. 24 Buhphualte buhin dim ding a, grep sukna ah grep tui thak, sathau beel ah sathau thak dimlet ding hi. 25 Noute laka kon sawl ka sepaihhonpi tua khaukhupte, khaupete, khaupenoute, leh khaupehonte' haigah nekgaih kumte hon din kik ding hi'ng. 26 Vahtak leh taitaka om ding uchin a, Tangtawn Toupa, na Pathian uh' min phat ding na hi uh. Ama'n noute adinga thillamdangte hon hihsak ding a, ka mite zahlak ngei nawn lou ding uhi. 27 Tua hun chianga kei, Tangtawn Toupa, na Pathian uh ka hi, kei, Israelte lak ah ka om, Pathian dang himhim om lou hi, chih thei ding uchin a, ka mite zahlak ngei nawn lou ding uhi.
Toupa' Ni
28 Tua nung chianga, mi khempeuh tunga ka Kha sungbaw ding ing a, na tapate uleh na tanute un, kamsangthugen gen ding uh a, na putekte un mangte man ding uh a, na tangvalte un mengmuhte mu ding uhi. 29 Ka sila numeite leh pasalte tung nangawna ka Kha sungbaw ding hi'ng. 30 Tung vaan ah leh lei ah thillamdangte langsak ding ing a, sisan leh mei leh meikhutung om ding hi. 31 Ni mial ding a, khapi sisan suak ding a. Tua Tangtawn Toupa' ni thupi leh mulkimhuai hong tun ma in: Ni mial ding a, khapi sisan suak ding hi. 32 Tua hun chianga Tangtawn Toupa' min sam peuhmah hotdam hi ding hi. Ahang bel, Tangtawn Toupa' gensa banga Zion mual tung leh Jerusalem sung-a a suakta omsunte lak apan Tangtawn Toupa'n a sap dingte laka hutkhiakna om ding hiven.
Namte tunga Thukhenna
1 Ngai un, Judah leh Jerusalem ka pikik chianga, tua nite leh tua hun-a 2 namte khempeuh kaikhawm ding ing a, Jehosafat Phaizanga piisuk ding hi'ng. Tua muna ka goutan ka mi Israel tawh kisaia amaute tunga thu khen ding hi'ng. Amaute'n namte laka ka mite thehzak a, ka gam a hawmzak man ua, hiai hih ding hi'ng. 3 Ka mite ading ai san uh a, pasal naupangte, numei kizuakte leina-a nei uhi. Zu dawn theih nadinga numei naupangte zu man dinga pia uhi. 4 Tuin, nou Tura leh Sidonte leh Filistia gam khempeuh aw, kei demna bang na nei ua? Ka thilhihsa hon thuk nuam na hi uhiam? Non thuk uleh, ken kintakin kon thukkik ding. 5 Noute'n ka ngun leh ka kham na la uh a, ka gou hoihpente na biakinnte uah na pawmangta uhi. 6 Judah leh Jerusalem tate a gam uapan gamlapi-a khakmang dingin, Grikte kiang ah na zuakkhinta uhi. 7 Ngai un, amaute na zuakna munte uapan ke'n amaute tokthou-in ka piikhe dek. Na thilhihte uh bangbang na lutung uah kon thuk ding, 8 Na tanu na tapate uh Judah mite kianga khawng ding ing a, amaute'n nam gamlapi Seba mite kiang ah zuaksawn ding uhi. Hiai, Tangtawn Toupa'n a genkhitsa ahih mana tangtung ding hi, chi hi. 9 Namte lak ah hiai phuangzak un: Galdou dingin kisa un! Galhatte tokthou un! Galdou mi khempeuh hong paikhawm uhen la, dou uhen. 10 Na leilehna tute uh namsauin seek unla, na theikung heuhna temkuite uh teipi-in sek un. A zawngkhal in zong, Ka tha hat hi, chi hen. 11 Hong kuan zok un, kilchiha namte khempeuh tua lai ah hong paikhawm un. Tangtawn Toupa aw, na galhatte hon kuansuksak in! 12 Namte tawhthawhin om uhen la, Jehosafat Phaizang ah kuantou uhen. Kei tua muna tu ding ing a, a kim a kianga namte tunga thu khen ding hi'ng. 13 Kawite lik un, buhlak ding minta hi. Hong pai unla, kuansuk un: Grep sukna kuang dimta, greptui beelte dimletta, a gitlouhna uh uang lua! 14 Mihonpite, thukhentatna Phaizanga om mihonpite! Thukhentatna Phaizang ah Tangtawn Toupa' ni hong naita! 15 Ni leh kha mial ding a, aksite taang nawn lou ding. 16 Zion apana Tangtawn Toupa humham ding a, Jerusalem apana vanging banga ging ding a, lei leh van ling ding hi. Tangtawn Toupa bel, a mite adinga bukna hi ding a, Israel mite adinga kulhpi hi ding hi.
Pathian' Mite ading Vualzawlna
17 Tua hun chianga, kei Tangtawn Toupa, Toupa na Pathian uh, ka mual siangthou Zion ah ka teeng, chih thei ding na hi uh. Jerusalem siangthou ding a, gamdang mite'n sim nawn lou ding hi. 18 Tua ni chianga, taangte greptui thaka phul ding a, mualte nawituia luang ding hi. Judah gam luite tuiin dim ding a, Tangtawn Toupa' inn apan tuinak pawt ding a, Sittim Luiphai buak ding. 19 Ahihhanga, Aigupta keu ding a, Edom lah gamdai-gamkeu suak ding. Tua bel, Judah mite tunga a hiamgam man uh hi ding a, amau' gama mawhneiloute' sisan a suah man uh hi ding hi. 20 Judah gam kiluahdenta ding a, Jerusalem zong a khang a khanga kiluahta ding hi. 21 Sisan suaha a mawhna uh ka ngaihdam nailouh ngaidamta ding hi'ng, chih phuang un. Tangtawn Toupa, Ziona teeng hi!
1 Amos, Tekoa khua-a belamchingte laka khat ahi. Ama'n zinpi liin ma kum nih khawnga Judah kumpipa Uzia' vaihawm lai leh Israel kumpipa Joash' tapa Jeroboam' vaihawm laia, Israel gam tawh kisaia a muh a gente hiaite ahi: 2 Ama'n: Zion Mual apan Tangtawn Toupa humham a, Jerusalem khawpi apan aw suah a, belamchingte' gamtatna munte keu a, Karmel mual tung giauta hi, chi hi.
Namte tunga Thukhenna
3 Tangtawn Toupa'n hibangin gen a: Damaska khawpi' tatlekna thum, ahi, tatlekna li hanga ka thangpaihna daisak lou ding hi'ng. Ahang bel amaute'n sik ha nei buhkhetnatea Gileadte khen uh hiven. 4 Hazael innkawte tunga mei sawl ding ing a, Ben Hadad innkawte kangtum ding hi. 5 Damaska khawpi kongpi kaihna zawl sattan ding ing a, Aven Phaizang apan vaihawmpa leh, Beth Edena kumpi chiang tawipa satkhe ding hi'ng. Aram mite Kir ah sala kaihin om ding uhi, Tangtawn Toupa'n a chi, chi hi. 6 Tangtawn Toupa'n hibangin gen a: Gaza khawpi tatlekna thum, ahi, tatlekna li hanga ka thangpaihna daaisak lou ding hi'ng. Ahang bel, Edomte kianga zuak ding a, khawzang zanga mite sala kai uh hiven. 7 Gaza kulhbaang tunga mei sawl ding ing a, a innpite kangtum ding hi. 8 Ashdod khawpi-a pan vaihawmpa leh, Ashkelon kumpi chiang tawipa satkhe ding ing a, Filistiate laka khawsuaksun a nanungpen a sih mateng Ekron khawpi tunga ka khut kha ding hi'ng. Toupa Tangtawn Pathian in a chi, chi hi. 9 Tangtawn Toupa'n hibangin gen a: Tura khawpi tatlekna thum, ahi, tatlekna li hanga ka thangpaihna daaisak lou ding hi'ng. Ahang bel, Edomte kianga mihonpi-a sala zuak a, unau sanggam kala thukhun thei gige lou hiven. 10 Tura kulhbaang tunga mei sawl ding ing a, tua innpite kangtum ding hi, chi hi. 11 Tangtawn Toupa'n hibangin gen a: Edom tatlekna thum, ahi, tatlekna li hanga ka thangpaihna daaisak lou ding hi'ng. Ahang bel, ama'n a sanggampa namsaua delh a, lainatna paimang a, a hehna daai thei lou a, a thangpaihna sousak gige hiven. 12 Temon khawpi tunga mei sawl ding ing a, Bozra khawpi innpite kangtum ding hi, chi hi. 13 Tangtawn Toupa'n hibangin gen a: Amon' tapate' tatlekna thum, ahi, tatlekna li hanga ka thangpaihna daisak lou ding hi'ng. Ahang bel, a gamgite uh kek ding a, Gilead numei gaite kuikek hiven. 14 Raba khawpi kulbaang tunga mei sawl ding ing a, a innpite kangtum ding hi. Kidou ni banga kikou husa tawh, pingpei kipei ni banga, huihpi tawh kithuah ding hi. 15 A kumpipa sala kaih hi ding a, a sepaih makaite khempeuh tawh, Tangtawn Toupa'n a chi, chi hi.
1 Tangtawn Toupa'n hibangin gen a: Moab tatlekna thum, ahi, tatlekna li hanga ka thangpaihna daaisak lou ding hi'ng. Ahang bel, ama'n Edom kumpipa' guhte meia hal a, meivu suaksak hiven. 2 Moab tunga mei sawl ding ing a, Kerioth khawpi kulhpite kangtum ding hi. Kikou husa leh galdou husa leh pengkul ging laka Moab puk ding hi. 3 Gam sung apan a makaite satkhe ding ing a, sepaih makaite khempeuh tawh that ding hi'ng, Tangtawn Toupa'n a chi, chi hi.
Judah tunga Thukhenna
4 Tangtawn Toupa'n hibangin gen a: Judah tatlekna thum, ahi, tatlekna li hanga ka thangpaihna daisak lou ding hi'ng. Ahang bel, Tangtawn Toupa' thuhilhna nial uh a, a thusehte lenkip lou uh a, Pathian takloute' pimanga om uh a, a pu a pate uh zuih, a takloute mah zui uh hiven. 5 Judah tunga mei sawl diing ing a, Jerusalem innpite kangtum ding hi, chi hi.
Israel tunga Thukhenna
6 Tangtawn Toupa'n hibangin gen a: Israel nam tatlekna thum, ahi, tatlekna li hanga ka thangpaihna daisak lou ding hi'ng. Ahang bel, midiktatte dangka suma zuak uh a, mizawngte khedap but khata khawng uh hiven. 7 Leia leivui sik banga, mizawngte sikden uh a, mizawngte adinga vaihawmna kaikawi uh hiven. Pa leh tapa in numei khat kikop uh a, ka min siangthou ninsak uh hiven. 8 Kichiamna-a puansilh a lakte uh maitam khat peuh kianga phah uh a, lum uh hiven. A migawtna zu uh a pathian uh inn-a dawn uh hiven. 9 Amaute' maia Amor mi hihmangthangpa kei ka hi. Sidar sing banga sang, tawsaw sing banga khauh hi mah le-uh, amaute hihmangthang ding hi'ng. 10 Amorte' gam luah dinga Aigupta gam apan hon piikhia a, gamdai gamkeua kum 40 hon makaihpa kei ka hi. 11 Na tapate laka mi pawlkhat kumpipatea dingsak ing a, na tuailaite laka pawlkhat Nazir mi-a bawl hi'ng. Israelte aw, hibang hina lou hia? chi-a Tangtawn Toupa'n phuang hi. 12 Ahihhanga, Nazir mi grepzu dawnsak teitei uchin a, kamsangte khaam uchin a: Pathian thu gen kei un! chi hi uteh. 13 Ngai un, buh dimtaka pua kangtalai nehtap ahih banga hon nehtam ding ing a, taihatte'n 14 suahtakna mu lou ding a, mihatte'n hatna mansuah ding a, galhatpa'n zong a hinna hu zoulou ding hi. 15 Thalkap mi ding zou lou diing a, sepaih taihat suakta lou ding a, sakoltungtuang mi'n a hinna hu zou sam lou ding hi. 16 Tua ni chianga, galhangpente vuaktanga taikek ding uhi, chi-a Tangtawn Toupa'n phuang hi, chi hi.
Kamsang Thuneihna
1 Israelte aw, noute' tungthu-a Tangtawn Toupa' thugen hiai na ngai un. Aigupta gam apan kon piikhiak Israel innkawte khempeuh douna thu ahi: 2 Leitung innkawte khempeuh laka noute kia hon thei hi'ng. Tua bang ahih mana na mawhna thilhihte khempeuh uh ettelna ngiat ding hi'ng, chi hi. 3 Mi nih kithukim masa lou-a, tonkhawm thei ding hia? 4 Humpinelkai samat ding nei loupi gamlak ah humham ngei hia? Humpinelkai nou zong samat neiloupi a bukna hawm apan ham ngei hia? 5 Thaang kam louhpi ah, vasa awk thei hia? A awk ding omloupi-a thaang kisai ngei hia? 6 Khawpi-a pengkul a gin chianga mipite laua liing lou uhia? Khawpi sunga siatna a tun chianga Tangtawn Toupa' hih hi lou hia? 7 Toupa Tangtawn Pathian in a tup a ngimte ama' sila kamsangte hilh lou a, bangmah hih het lou hi. 8 Humpinelkai humhamta a, kua ahia lau lou ding? Toupa Tangtawn Pathian in thu genta a, kua ahia Pathian thu gen lou thei ding?
Israel Tatlekna Gawtna
9 Ashdod innpite ah leh Aigupta gam innpite ah thu phuang unla: Samaria mualtungte ah kikhawm unla, a sunga kitomna leh zawhthawhna thuakte en un, chi un. 10 Tangtawn Toupa'n hibangin phuang a: Amaute'n thil dik hih nadan thei lou uhi. A innpite uah hiamgamna leh kibuluhna hih zaw uhi, chi hi. 11 Tua bang ahih mana, Toupa Tangtawn Pathian in: Meima in gam umchip ding a, na hatna uh lamang ding a, na innpite uh buluh-a lok ding uhi, chi hi. 12 Tangtawn Toupa'n hibangin gen a: Belamchingpa'n humpinelkai kam apan belam khe nih lei, ahih kei leh, bil them khat lei, a dawhkhiak banga Samaria khawpi-a lupna kiu khat leh tutphah kiu khata tu, nou Israel tate hon hukhe ding hi'ng, chi hi. 13 Hiai za unla, Jakob innkawte douin theihpihna thu gen un, chi-in Toupa Tangtawn Toupa Pathian Vanglianpen in phuang a: 14 Israel' tatlekna tawh kisai ettelna ka ngiat chianga Bethel khawpi-a maitamte entel ding hi'ng. Maitam kite satkhiak hi ding a, leilak ah ke ding uhi. 15 Nipi inn leh phalbi inn chimsak ding ing a, saiha innte hihgawp hi ding a, innpi thupite kiphelgawp ding hi, chi-a Tangtawn Toupa'n phuang hi, chi hi.
Israel Kisiknoplouhna
1 Nou, Bashan gam bawngpi, Samaria mual tunga gamtate, mizawngte leh tasamte zawhthawhna tawh sikdeente, na pasalte uh kianga: Dawn ding hon pia in! chite'n hiai thu ngai un: 2 Toupa Tangtawn Pathian, a siangthouna siala kichiamta a: Noute sik kuaika-a hon kaihkhiak ua, na suan na khakte uh ngakuaia hon kaihkhiak nite uh hong tung ding hi. 3 Bang tawhvang khawnga tuahnana apan Hermon lama lotkhiak hi ding hi uteh, chi-a Tangtawn Toupa'n phuang hi. 4 Bethel khawpi ah hawh unla, taleek unla, Gilgal khawpi ah tatleekna piangsak semsem un. Zingsang tengin na kithoihnate uh laan unla, nithum ni tengin na sawma khatte uh hon tawi un. 5 Kipahthu genna thillat dingin silngou sawh peuh laan unla, utthu-a thillat phuangin kisialpih unla, na utlam tak uh hiven, kisial ve ua, nou Israel suante aw, chi-a Toupa Tangtawn Pathian in phuang hi.
Israel in Thumanna Ngeingaihlou
6 Na khawpite khempeuh uah sung hawmna hon pia ing a, na teenna khempeuh uah an taksapna hon pia hi'ng. Ahihhanga ka kianga hong kik lou hi uteh, chi-a Tangtawn Toupa'n phuang hi. 7 Buhlak nading kha thum a sap laia, noute apan vuah leentang ing a, khawpi khata vuah zusak ing a, khawpi danga vuah zusak lou ka hi. Lou khat tunga vuah zu a, lou dangin vuah mulou a, keugawp hi. 8 Mite, khawpi nih leh thum apan tui duha baantaai uh a, dangtak phatna khop mu lou uhi. Ahihhanga ka kianga hong kik tuan lou hi uteh, chi-a Tangtawn Toupa'n phuang hi. 9 Keuna huih leh apna-a hon gawt ing a, na huante uh lian semsem a, na theipi kungte uh, na oliv kungte uh lah khaupete'n negaita hi. Ahihhanga, ka kianga hong kik lou lai hi uteh, chi-a Tangtawn Toupa'n phuang hi. 10 Aigupta gam gawtnate na tung uah sawl ing a, na tuailaite uh namsaua that ing a, na sakol matte utawh that hi'ng. Na giahphual uih ua nakvangte dimsak ing a, ahihhanga, ka kianga hong kik lou lai hi uteh, chi-a Tangtawn Toupa'n phuang hi. 11 Pathian in Sodom leh Gomora khawpite a lumlet banga, noute pawlkhat hon lumlet ing a, thukkhuka singkhuah kangtum ding dawhkhiak bang hi uteh. Ahihhanga, ka kianga hong kik lou lai hi uteh, chi-a Tangtawn Toupa'n phuang hi. 12 Tua bang ahih mana Israel aw, na tung ua ka hih ding hiai ahi: Tua banga na tung ua hih ding ka hih manin, Israel aw, na Pathian tuak dingin kisakhol in! chi hi. 13 Amah mualte bawlpa leh huih siampa, a lungsima a suangtuahte mihing kianga hilhpa, phalvak mialsakpa leh, leitung munsangtea khepek ngapa, Tangtawn Toupa Pathian Vanglianpen a min ahi.
Israelte Suunna
1 Israel innkawte aw, noute doua ka thugen ka kahla na ngai un: 2 Israel nungak siangthou pukta, thou zou nawn lou ding hi. Ama' gam sung maha taisanin lum a, a phong ding kuamah om lou hi, chi ahi. 3 Toupa Tangtawn Pathian thugen hiai ahi: Israel adinga galdou ding asang asanga sawlkhia khawpi in zakhat kia mu kik ding hi. Galdou dinga mi aza aza-a sawlkhia khawpi in Israel innkawte kianga kik ding, sawmkhat khat kia mukik ding hi, chi hi.
Kisik dinga Sapna
4 Israel innkawte kianga Tangtawn Toupa thugen hiai ahi: Kei hon zong unla, hing un, 5 Bethel zong kei un, Gilgal ah lut kei un. Beersheba ah galkah kei un. Ahang bel, Gilgal sala piimanga om ding a, Bethel bangmahlou suahsaka om ding hiven, chi hi, 6 Tangtawn Toupa zong unla, hing un. Tua banga na hih kei uleh, mei bangin kuang ding a, Josef inkawte hul ding a, amaute kangtum ding a, Bethel ah a phelh ding kuamah om lou ding hi. 7 Dika thukhenna singkha banga khasak a, diktatna leilak denna-a nei noute aw, 8 Tangtawn Toupa ahi, siguk aksite, zuheisuktun aksite bawlpa, ama'n sihna limliap zing khawvak suaksak a, sun khawvak zan mial suaksak hi. Tuipi tuite samkhawm a, gam tung ah vuahin zusak hi. Ama' min Tangtawn Toupa ahi, amah tak zong un. 9 Ama'n mihatte tung ah siatna zusak a, khawpi kulhpite tung ah kek bangin kia hi. 10 Amaute'n bel, kongpi-a taihilhpa mudah uh a, thudik thutang genpa kih uhi. 11 Noute'n mizawngte zawhthawhna tawh sikden uchin a, amaute apan phutluiha buhhumte ne hi uteh. Suangpek hoih pipi-in innte lamkhin mahle uchin, a sunga teeng lou ding hi uteh. Grephuan hoih pipi suan mahle uchin, grepzu dawn tuan lou ding hi uteh. 12 Ahang bel, na tatlekna uh thuah tampi leh na khelhna uh thupite thei hi vengin. Mi diktatte gimsak uchin a, golhguknate ne uchin a, kongpi-a mizawngte ading dika vaihawmna kaikawi hi ve uchin. 13 Tua bang ahih mana tua bang huna, theihna thuk nei mi dai dide ding hi. Ahang bel, hun hoihlou hiven. 14 Na hin theih nadingun, thil hoih zong unla, thil hoihlou zong kei un. Tua hileh, Tangtawn Toupa Pathian Vanglianpen in na gen bang ua hon ompih ding hi. 15 Thil hoihlou hua unla, thil hoih it unla, kongpi ah dika thukhenna, tungkhia un. Tua hileh, Josef innkawte laka damsunte tunga Tangtawn Toupa Pathian Vanglianpen in zahngaihna nei khamawh lou ding hia? chi hiven.
Tangtawn Toupa' Ni
16 Tua bang ahih manin, Tangtawn Toupa' Pathian Vanglianpen thugen hiai ahi: Kongzing teng ah kahna om ding a, lamlian dungte ah: Maizen! Maizen! chi ding uhi. Daha suun dingin lounei mite sam ding uh a, kap dingin kahsiamte sam ding uhi. 17 Grephuan teng ah kahna om ding hi. Ahang bel, ke'n noute lak Tawnsuak ding hi vengin, chi-a Tangtawn Toupa'n gen hi. 18 Tangtawn Toupa ni lunggulhte na tung uh a gik hi! Banghanga Tangtawn Toupa ni lunggulhna hi ua? 19 Vompi tuak ding leia, humpinelkai apan a tai, a in sunga lut, baanga khut nga gul in a na tuk mi bang ding hi. 20 Tangtawn Toupa ni, mial ni hi a, khawvak ni hi lou ding hi mial bikbeka, ni vaang nangawn tang lou ding hi lou hia? 21 Tangtawn Toupa'n: Na sabiak ankuangluite uh ka hua, ka kih, na khawmpite ka thuak zou kei. 22 Haltum thillatte leh an thillate hon lan mah le uchin ka sang kei ding. Lemna thillat hoihpente hon lan mahle uchin ka pakta kei ding hi. 23 Na lasak gingte uh bei hen! Na kaihgingte uh ka ngaikhe kei ding. 24 Dika thukhenna tui luang bangin luang henla, diktatna zong a kang ngeilou luitui luang bang zaw hen! 25 Israel inkawte aw, gamdai-gamkeu ah kum 40 sung kithoihna thillatte leh thilpiakte non lan u maw? 26 Na kumpipa uh' biakinneu, na milimte uh tunna, na pathian uh' aksi na kibawltawm uh tuate mah na tawisang uhi. 27 Tuateng hangin ke'n Damaska khen lam ah kon khamang ding, chi-a, Pathian Vanglianpen, chih min nei Tangtawn Toupa'n gen hi.
Zion leh Samaria Vauna
1 Nou Zion khawpi-a awlmawh neilou-a omte, Samaria Mual tunga galmuang kisate leh Israel innkawte' taaina nam telpipen sunga mi thupite tung gik hi! 2 Kalne ah galkah unla, va en un. Tua mun apan Hamath Raba ah pai un. Tua khit chiangin, Filistiate' Gath khawpi ah paisuk un. Tua kumpigamte sangin noute' kumpigam nihte a hoihzaw ua hia? Ahih kei leh, noute sangin amaute' gamte a thupizaw-a hia? 3 Siat ni gamlasak a, hiamgama vaihawmna naisak noute, na tung uh gik hi! 4 Saiha lupna tunga lum a, tutphah sau nuam tunga kizia zia, ganhon laka belam sa leh ganinn apan bawngtuai sa limlim nete hi uteh. 5 David banga awlmawh nei loua kaihging tumtum uchin a, tumginga lasak nading phuak phuak hi ve uchin. 6 Hai dimdima zu kitulh uchin a, sathau namtui phapha kinuh uchin a, Josef thuakna lah dahpih lou hi uteh. 7 Tuin sala kaihmang masak pawl hi ding uchin a, na ankuangluite uleh nuamsa-a na kiziat ziat uh beita ding hi.
Israel' Kisaktheihna
8 Toupa Tangtawn Toupa, ama' hinna sialin kichiamta hi. Tangtawn Toupa Pathian Vanglianpen in hiai gen a: Jakob' kisaktheihna kih hi'ng, a kulhpite simmawh hi'ng, kulhpi leh a sunga omte khempeuh mite' khuta pekhe ding hi'ng, chi hi. 9 Hichi bang ahi ding a, inn khata mi sawm teeng a sivek ding uh. 10 Tua misite' tanau khattou, misi guhte hal dinga, tua inn apan siluangte pawkhe ding mi tawh hong lut ding. Ama'n inn sung tawnga kisel a damlai khattou om hiam, chi-in: Hingdam na om lai uhia? a chi ding. Khat in: Kuamah om kei! a chi ding. Khat in: Kamsim in! Tangtawn Toupa' min i lawh het louh ding ahi, a chi ding. 11 Ahang bel, ngai dih uh, Tangtawn Toupa'n thu peta a: Ama'n inn thupi satzan ding a, inn neu gawizaan ding hiven. 12 Suangpi lak ah sakolte tai ding hia? Mi'n suangpi lak ah bawngtalin lou kai ding hia? Hinapi-a, dika thukhenna gu suaksak uchin a, diktatna gah singkha suaksak hi uteh. 13 Lo Debar zawhna kipahpih a: I thahatna-a Karnaim la zou i ka, chite noute na hi uh. 14 Ngai dih uh, Tangtawn Toupa Pathian Vanglianpen in phuang a: Israel innkawte aw, noute dou dinga, nam khat tungding ding ing a, Lebo Hamath lutna apan Araba phaizang donga hon sikdeen ding uhi, chi hi.
Khaupete Muhna
1 Toupa Tangtawn Pathian in hiai hon lak a: Ngai dih, buh suan nanung laiin, ama'n khaupehonpite hon omsak hi. Ahi, kumpipa' tan ding buh lak nunga buh suan nanung lai ahi. 2 Tua khaupete'n gam sunga sing-le-loute a nekgaih khitun, ke'n: Toupa Tangtawn Pathian aw, hehpihtakin ngaidam in. Jakob ding zou mahmah ding hia, a neuneu tawh! ka chi hi. 3 Tangtawn Toupa'n tua tawh kisaia a tup khawl a: Hiai hong tung lou ding hi, Tangtawn Toupa'n, chi hi.
Mei Muhna
4 Toupa Tangtawn Pathian in kei kiang ah hiai hon lak a: Ngai dih, Toupa Tangtawn Pathian in meia gawtna a sam a, tui thukpi a kangsak a, gam a kaang siang vek. 5 Tua khitin, kei ka kikoukhia a: Toupa Tangtawn Pathian aw, hehpihtakin tawp in, kon ngen ahi. Bangchi-a Jakob ding zou mahmah ding ahia, a neuneu tawh! ka chi hi. 6 Toupa Tangtawn Pathian hiai tawh kisaiin zong a tup a khawl a: Hiai zong hong tung kei ding, Tangtawn Toupa Pathian in a chi hi.
Ulum Muhna
7 Tua khitin, ama'n hiai hon lak a: Uluma teh-a diktaka lam kulhbaang kiang ah Toupa a ding a, a khutin ulum a tawi hi. 8 Tangtawn Toupa'n ka kiang ah: Amos, bang na mu a? hon chi hi. Ke'n: Ulum, ka chi hi. Thakhatin, Toupa'n: Ngai dih, ka mi Israelte lak ah ulum ka khai ding a, amaute ka hawi nawn kei ding. 9 Isak' munsangte hihmangthang ding ing a, Israel' mun siangthoute kise ding hi. Jeroboam innkawte namsaua dou ding hi'ng, a chi hi.
Amos leh Amazia
10 Tua khitin, Bethel khawpi-a siampi Amazia in Israel kumpipa Jeroboam kiang ah thu a khak a: Israel gamsung mahmah ah Amos in nang hon sawm ahi. A thugen teng khempeuh gam sung ah ta zou lou hi. 11 Ahang bel, Amos in hiai gen a: Jeroboam namsaua si ding a, Israel a gam apan sala kaih hi ngeingei ding hi, chi hiven, a chi hi. 12 Amazia in Amos kiang ah: Nang kamsang, paimang in! Judah gam ah kilehkik in. Na nek ding thalawh inla, tua ah Pathian thu gen in! 13 Bethel khawpi ah thu gen nawn ken. Ahang bel, kumpipa' mun siangthou ahi a, kumpipa' innpi ahi, a chi hi. 14 Tua khitin, Amos in Amazia a dawng a: Kei kamsang ka hi kei. Kamsang hi dinga kisin mi ka hi kei. Belamching mi leh theipi kung suan mi ka hi. 15 Ahihhangin, Tangtawn Toupa'n belam chinna apan hon lakhia a, ka kiang ah: Kuan inla, ka mi Israelte gam ah Pathian thu gen in! hon chi ahi. 16 Tua bang ahih manin, tu'n Tangtawn Toupa' thu na ngai in. Nang, Israel doua Pathian thu na gen ding hi lou hi. Isak' innkawte doua Pathian thu na gengen ding hi lou hi, na chih. 17 Tua banga thu na gen mana Tangtawn Toupa'n: Khawpi ah na zi kizuak ding a, na tapate leh na tanute namsaua puk ding uhi. Na gam tehna khaua khenzak hi ding a, nangmah mah zong mun siangloua si ding chin a, Israelte a gam uapan sala kaih hi ding uhi, chi hi,a chi hi.
Theigah Min Muhna
1 Toupa Tangtawn Pathian in hiai hon lak a: Ngai dih nipi lai theigah min lawh sung ah a om hi. 2 Ama'n ka kiang ah: Amos, bang na mu a? hon chi hi. Ke'n: Nipi lai theigah min lawh sunga om ka mu, ka chi hi. Tua khitin Tangtawn Toupa'n ka kiang ah: Ka mi Israel gam adingin tawpna hun hong tungta. Amaute' khelhna ngeingaih louin ka hawi nawn kei ding, a chi hi. 3 Toupa Tangtawn Pathian in hibangin phuang a: Tua ni chianga biakina lasakte kahna suak ding a, tua ah siluang tampi mahmah, mun teng ah dai dide-a paihthang hi ding hi, a chi hi. 4 A tasamte sikdeen a, gama mi zawngte lawhsamsakte'n hiai ngai un. 5 Buh ka zuak theih nadingin chik chianga kha thak bei ding a, huit buh ka khot theih nadingin, chik chianga Sabbath bei ding ahia? na chih uh. Tehna ephah neusak a, a gikna behlap uchin a, a man sangsak hi uteh. 6 Dangka suma mizawngte lei uchin a, khedap but khata tasamte lei uchin a, huit buh a si nangawn tawh zuak hi uteh. 7 Tangtawn Toupa'n Jakob' Kisak-theihpihpa sialin kichiam a: A thilhih uh khat lei zong mangngilh lou ding hi'ng! 8 Hiai hangin gamsung liingin, a sunga teengte khempeuh kap lou ding hia? Nail luipi bangin gam buppi khang ding a, Aigupta luipi banga khangin, kiamsuk ding hi, chi hi. 9 Tua ni chiangin, hibang hi ding na hi, chi-in Toupa Tangtawn Pathian in phuang a: Suntang laia ni tumsak ding ing a, suntang laia lei mialsak ding hi'ng, chi hi. 10 Na biakna ankuangluite uh kahna suaksak ding ing a, na late uh kahla suaksak ding hi'ng. Kawng teng saiip puan teengsak ding ing a, lutang teng giausak ding ing a, tapa tang neihsun suun ni bangsak ding ing a, a tawpna khaatna ni bang ding hi, chi hi. 11 Toupa Tangtawn Pathian in hibangin phuang a: Gamsunga kial ka tunsak nite hong tung dek hi: An duha kialna hi lou ding a, tui duha dangtakna zong hi lou ding hi. Tangtawn Toupa' thu zak ding lunggulha kialna hi ding hi. 12 Tuipi khat apan tuipi dang donga, mite diang ding uh a, mallam apan suahlam donga taamvak ding uhi. Pathian apan thu zong ding uh a, mu lou ding uhi. 13 Tua ni chianga nungak siangthou melhoihte leh, tangvalnou thahatlaite dangtaka sibup ding uhi. 14 Samaria' zahlakna siala kichiam a, Dan aw, na pathian a hin-a a hin laiteng, chite ahih kei leh, Beersheba aw, na pathian a hin-a a hin laiteng, chite puk ding uh a, thou nawn ngei lou ding uhi, chi hi.
Israel Hihmanthatna
1 Maitam kianga Toupa ding mu ing a, ama'n: Innlim tung kilingsak ding leh mite' lu tunga kichimsuksak dingin, kongpi khuam tunga khuam lukhute sat in. Ke'n a sibang teng namsaua that vek ding hi'ng. Tuate apan taikhia kuamah suakta lou ding hi. A suakta zong hotdam hi lou ding hi. 2 Nuailam misikhua dongin kumsuk mah le uh, tua apana ka khuta amaute kaikhetou ding hi'ng. Tunglama vaan tan ah kaltou mah le uh, tua apana amaute kaikhesuk ding hi'ng. 3 Karmel mual tung ah kibu mah le uh, tua apana amaute zongkhe ding ing a, kaikhe ding hi'ng. Ka muhlouh dingin tuipi taw ah kibu mah le uh, tua ah gulpi sawl ding ing a, amaute tu ding hi. 4 A galte un gamlapi ah salin kai mah le uh, tua ah namsau sawl ding ing a, amaute that ding hi. A hoihlam hilouin, a selama en gegu ding hi'ng, chi hi. 5 Lei lawng a, tui gawpsakpa, Toupa Tangtawn Toupa Vanglianpen amah ahi. Tua-a teengte khempeuh kap uhi, gam khempeuh Nail luipi banga khangtou ding a, Aigupta luipi banga niamsuk kik ding hi. 6 Vaankuum a chial chiala bawlpa, leinuai a thuah thuaha bawlpa, amah ahi. Tuipi tuite samkhetou a, leitung maikaiha zusakpa amah ahi. Tangtawn Toupa a min ahi. 7 Tangtawn Toupa'n hibangin phuang a: Nou Israel tapate aw, kei adingin Ethiopia mite bang hilou na hi ua hia? chi hi. Aigupta gam apan Israel pikhetou lou ka hi-a hia? Kaftor gam apan Filistiate piikhetou lou ka hi-a hia? Kir gam apan Aramte piikhetou lou ka hi-a hia? 8 Ngai dih, Toupa Tangtawn Pathian' mit khelhhat kumpigam tung ah tu a, leitung maikaih apan tua hihmangthang ding hi. Jakob innkawte bel hihmangthang sipsip lou ding hi'ng. chi-a Tangtawn Toupa'n phuang hi. 9 Ahang bel, ke'n thu pe ngeingei ding ing a, mi'n lawhpi-a buh a sep banga namte laka Israel inkawte sep ding hi'ng. Hinapi-a, a tang neupen nangawn leilaka ke lou ding hi. 10 Ka mite laka a khialte khempeuh leh Tuahsiatna in koute hon delhpha lou ding a, hon maituah sam lou ding hi, chite namsaua si ding uhi.
Israel Tundingkikna
11 Tua ni chianga a chimkhinsa David' puanbuk lamthak ding ing a, a siatna munte puahpha a, a kisesa tungdingthak ding ing a, a tunglai banga lamthak ding hi'ng. 12 Tua bel Edoma dama khawsuak sunte leh, ka min pu Zentelte khempeuh tawh a tan nading uh ahi, chi-a hiai thilte hih dingpa Tangtawn Toupa'n phuang hi. 13 Ngai dih, nite hong tung dek, chi-a Tangtawn Toupa'n phuang hi. Tua hun chianga leiletpa'n buh-atpa delhpha ding a, grepgah chilpa'n a chi pawipa delhpha ding a, tuate apana grepzu khum taakkhe ding a, mualte khempeuh apana luangkhe zuazua ding hi. 14 Tua hun chianga ka mi Israelte a saltanna uapan piikik ding hi'ng. Khawpi sesate lam thak ding uh a, a sung ah teeng ding uhi. Grepguite suan ding uh a, grepzute dawn ding uhi. Huante bawl ding uh a, a gahte ne ding uhi. 15 Israelte amau' gam ah suan ding ing a, amaute gam ka piakna apan kuama'n botkhe nawn lou ding hi, chi-a Tangtawn Toupa na Pathian un gen hi.
Obadia Mengmuh
1 Edom toh kisaia Obadia' mengmuh hiai ahi. Toupa Tangtawn Pathian in Edom tawh kisai a thugen hiai ahi: Tangtawn Toupa apan thupuak zata ung a, Kisa unla, amah dou dingin kuan ni, chi dinga, namte kiang ah palai khat kisawl hi, kichi hi, chi hi. 2 En in, nang namte laka neua hon bawl ding ing a, nakpitaka simmawh hi ding na hi. 3 Na lungtang kisaktheihna in nang hon khem hi. Nang kawl suangheng laka tengpa, nang asanna muntea inn lampa, Kua'n leilak ah kei hon kaikhesuk dia eita? lungtanga chipa, 4 muvanlai bangin sangpi ah lengtou mah lechin, aksite lak ah bu sep mah lechin, tua apana hon kaikhesuk ding ka hi, chi-a Tangtawn Toupa'n phuang hi. 5 Gutate'n nang hon naih le uh, buluhhatte'n zaanin hon buluh le uh, siatna in nang hon ngak namai e! A ut zahzah uh hon guuksaklou ding uhia? Grepgah khawmte na kiang ah hong pai le uh, grepgah sang kia hon nutsiat lou ding uhia? 6 Esau aw, na melmate'n hon nak buluh na unchia, na gou seelte khempeuh khuahsiang vek ding uh ahi aw! 7 Nang tawh thukhun bawlte'n na gamgi dong hon nawh ding uh a, na kilempihte'n hon khema, hon nuaisiah ding uhi. Na an nete mah in nang hon thaangsiah ding uh a, nang lah phawk lou ding hi teh. 8 Tua ni chianga, Edom mipilte hihmangthang lou ding ka hi-a hia? chi-a Tangtawn Toupa'n phuang hi. 9 Teman aw, na galhatte laua ling ding uh a, Esau' mualtungtea om mi peuhmah kithahna phuala phukpaiha om ding uhi. 10 Na sanggampa Jakob tunga na hiamgam mana, maizumna in hon khuh ding a, hihmanthat dena om ding na hi, 11 Gamdang mite'n a hauhna a puakmang lai ua, gamdang mite'n a kongpitea ai a san lai ua nang na kikaangkoih ni-a, amaute laka pang bang na hi ve. 12 Sala kaih ahih ni-a, na sanggampa na awibawl ding hi lou hi. Judah' suante' siattuah ni-a zong nang na kipah ding hi lou hi. 13 Ka mite' siattuah ni-a a kongpite ua na lut ding hi lou hi. A lungzin ni uleh a siattuah ni-ua, nang nangawnin na simmawh ding hi lou hi. A siattuah ni-ua a neih a lam uh na vatuh ding hi lou hi. 14 A galtaite uh vatpai dinga lamkathuam khawnga na dinngak ding hi lou hi. A lungkham ni ua, a khawsuak sunte galte khuta na piakkhiak ding hi lou hi. 15 Ahang bel, namte khempeuh adinga Tangtawn Toupa' ni naita a: Na hih bangbang nang tunga kihih ding a, na thilhihte mah na lutung tu ding hiven. 16 Ka mual siangthoua na dawn banga, namte khempeuh in dawn ding uhi. Dawn ding uh a, valh ding uh a, a piang ngeilou mah banga mang den ding uhi. 17 Ahihhanga, Zion Muala hutkhiakna om ding a, tua mual siangthou ding hi. Tua hun chianga, Jakob innkawte'n a gouluah uh tang ding uhi. 18 Jakob innkawte mei hi ding a, Josef innkawte meikuang hi ding a, Esau' innkawte bel loupabul keu bang hi ding hi. Jakob in Esau kaangtum ding a, kaangtum ding hi. Esau innkawte a suakta khatbek om lou ding hi. Ahang bel, Tangtawn Toupa'n phuang khinta hiven, 19 Tua chianga, Negev apana mite hong pai ding uh a, Esau mualte luah ding uhi. Mualbul khawnga teeng Filistiate'n gam luah ding uhi. Amaute'n Efraim leh Samaria loute luah ding uh a, Benjamin in Gilead gam luah ding hi. 20 Israel suan galtai mipi, Kanan gama omte'n Zarefath dong gam luah ding uh a, Jerusalem apan galtai, Sefarada omte'n Negev khawpite luah ding uhi. 21 Esau' mualtungte uk dinga Zion Mual tunga hunkhemite kaltou ding hi. Tua hun chianga, tua kumpigam Tangtawn Toupa' kumpigam hi ding hi.
Jona Thumanlouhna
1 Amitai' tapa Jona kiang ah Tangtawn Toupa' thu hong tung a, tua in: 2 Dingkhia inla, khawpi thupi Ninevi gitlouhna ka mai hong tungtou ahih manin, tua ah vahawh inla, mawhsakna thu vaphuang in, a chi hi. 3 Ahihhangin, Jona bel Tangtawn Toupa apan a taimang a, Tarshish lam manawhin a tai hi. Jopa khua ah a paisuk a, Tarshish zuan ding long khat a mu hi. Tuanman piain long ah a tuang a, Tangtawn Toupa' mai apan taimang dingin Tarshish lam zuanin a paita hi. 4 Tua khitin, Tangtawn Toupa'n huih a sawl a, tuipi tung ah huihpi a nung a, long kise dingin a kisa hi. 5 Longpute khempeuh a lau uh a, michih in ama' pathian a sam tek uhi. Long zaangsak dingin long vanpuakte nangawn a lawnkhia uhi. Ahihhangin, Jona bel long sung nuainung lama na lutsukkhin ahi a, lumin ana ihmu huthut hi. 6 Longpu makaipa'n amah a vanaih a, a kiang ah: Bangchi dana nang hiai-a ihmu thei mawk na hia? Thou inla, na pathian sam taven! Ama'n eite hon ngaihsakin, manthatna apan i suakta khamawh dia hia, a chi hi. 7 Tua khitin, longpute'n: Khai, hiai siatna kua mawhna hiam, aisan ve ni, a kichi uhi. Tua banga ai a san uleh, Jona tung a tu hi. 8 Tuachi-in, amaute'n Jona kiang ah: Hon hilh mahmah dih ve. Eite tunga hiai lungkhamna hong tung kua mawhna hiam? Nang bang nasem na hia? Koia kipan na hia? Bang gammi na hia? Bang mi na hia? a chi uhi. 9 Ama'n a dawng a: Kei Hebru mi ka hi a, Tangtawn Toupa vaan Pathian, tuipi leh gamhul bawlpa lau mi ka hi, a chi hi.
Tuipi sunga Jona
10 Ama'n amaute hilh a, Tangtawn Toupa apan taimang ahih lam thei uh ahih manin, amaute a lauta mahmah uh a, amah kiang ah: Bang hih na hita maia? a chi uhi. 11 Tuipi lah a kilok semsem a, amaute'n: Tuipi kilok eite adinga a daih nadingin nang bang hon lawh ding ka hi ua? a chi uhi. 12 Ama'n a dawng a: Hon dom unla, tuipi ah hon lawnlut le uchin, tuipi a daai mai ding. Keima' mawhna hanga noute tunga huihpi hong nung ahi, chih ka thei, a chi hi. 13 Ahihhangin, tua mite'n gamlama long kalhkai sawmin nakpitakin a pang uh a, tuipi kilok semsem ahih manin, long a kal zou kei uhi. 14 Tua khitin, Tangtawn Toupa a sam uh a: Tangtawn Toupa aw, hehpihtakin, hiai mipa hinna hangin koute hon mangthangsak ken. Tangtawn Toupa aw, nang na ut uta thil hih na hih chiangin, hehpihtakin a mawhlou' sisan mawh hon khusak ken, a chi uhi. 15 Tua khitin, Jona a dom uh a, tuipi ah a lawnlutta uhi. Tua khitin, tuipi kilok a daai pah hi. 16 Amaute'n Tangtawn Toupa a lau mahmahta uh a, Tangtawn Toupa' mai ah kithoihna laanin, thuchiamte a bawl uhi. 17 Tangtawn Toupa'n Jona valh dingin ngasa lianpi khat a sep hi. Tuachi-in, sun thum leh zan thum sung, ngapi gilsung ah Jona a om hi.
Jona Thuumna
1 Ngapi gilsung apanin Jona, Tangtawn Toupa a Pathian kiang ah a thuum a: 2 Mangbang lungzinga Tangtawn Toupa sam ing a, ama'n hon dawng hi. Hankhuk thukpi apana huhna ngen ing a, ka aw na za hi. 3 Nang tui thukpi sung, tuipite sung laizanga hon lawnlut chin a, tuipi luangte'n ka kimkot-a hon vial vutvut a, na tuihualte leh tui kilokte'n hon tum hi. 4 Tua laitaka ke'n: Na muh phaklouha hon sawlmang chin a, hinapi-a na tempul siangthou lam nga kik ding hi'ng, chi ka hi. 5 Hon kimkot tuite'n hon naksamsak a, tui thukpi in hon kimkot a, tui loupate'n ka lutang vial hi. 6 Mual tawlam peka tumsuk ing a, nuailam lei in hon umchipden hi. Ahihhangin, Tangtawn Toupa ka Pathian aw, nang khukthuk apan ka hinna domkhetou na hi. 7 Ka hinna a kiam hiaihiai laia, Tangtawn Toupa thei gige ka hi. Ka thuumna na kiang hong tungtou a, na tempul siangthou hong tungtou hi. 8 Mannabei milim khawng zahtakte'n amau adinga om hehpihna nangawn taan uhi. 9 Ahihhanga, ke'n zaw lungdamthu genna la tawh na maia kithoihna laan ding ing a, ka thuchiam tangtun ding ka hi. Hutkhiakna Tangtawn Toupa apan hong tung ahi, a chi hi. 10 Tua khitin, Tangtawn Toupa'n tua ngapi thu a pia a, ngapi in gamhul ah Jona a lawkhia hi.
Ninevi-ajona
1 Tua khitin, Tangtawn Toupa' thu a nihveina Jona kiang ah hong tung a: 2 Dingkhia inla, khawpi thupi Ninevi ah vahawh inla, thupuak kon piak vaphuang in, a chi hi. 3 Jona in Tangtawn Toupa' thu a mang a, Ninevi khawpi ah a vahawh hi. Ninevi bel khawpi lian mahmah ahi a, khawpi sung totsuak nadingin ni thum a kul hi. 4 A ni masa ni-in, Jona tua khawpi sung ah a kipankhia a, thu a phuang a: Ni 40 bei chiangin, Ninevi khawpi kisuse ding ahi, a chi hi. 5 Ninevi khawpi mite'n Pathian a um uhi. An ngolh ding a phuang uh a, a vekpiun a lianpen apan a neupen dongin saiippuan a silh uhi. 6 Tua thu Ninevi kumpipa kiang a tun takin, a kumpitutphah apan a dingkhia a, a kumpipuan a suahkhia a, saiippuan a kikhuh a, leivui lak ah a tu hi. 7 Tua khitin, Ninevi khawpi ah thuphuan a bawl a: Kumpipa leh a uliante' thuseh hiai ahi: Mihing hita leh, ganta hita leh, bawnghon hita leh belamhon hita leh, kuama'n bangmah chiam kei hen, an zong ne kei henla, tui zong dawn kei hen. 8 Mihing leh ganta in saiippuan silh hen. Michih in nakpitakin Pathian sam uhen. A gamtat gilou leh ngongtatna kiheisan hen. 9 I manthat louh nadingin, Pathian in lainatna neiin a hehna nasetak apan a kihei khamawh ding hiam, chih kuan a thei a? a chi hi. 10 Pathian in amaute' thilhih leh a gamtat gilou uapan a lunghei uh chih a mu a, lainatna neiin, siatna tut ding a chih a tungsakta kei hi.
Jona' Hehna leh Tangtawn Toupa' Lainatna
1 Ahihhangin, Jona a lungkim kei mahmah a, a hehta hi. 2 Tangtawn Toupa kiang ah a thuum a: Tangtawn Toupa aw, ka gama ka om laia ka gen hiai hilou maw? Amasa a, Tarshish lama ka taina hiai hang mah ahi. Nang hehpihsiam leh lainatsiam Pathian na hi a, lungnel, hehhak leh itna-a dim na hi a, siatna tun lou dinga lunghei Pathian na hi chih ka thei. 3 Tangtawn Toupa aw, tuin ka hinna la mai in. Kei adingin hin sangin sih a hoih zaw hi, a chi hi. 4 Ahihhangin, Tangtawn Toupa'n a dawng a: Heh nading san kilawm na nei-a hia? a chi hi. 5 Jona bel a paikhia a, khawpi suah lam ah mun khat ah a tu hi. Tua ah bukta khat a lam a, a liima tuin, tua khawpi tung ah bang hong piang hiam, chi-in a ngak hi. 6 Tangtawn Toupa Pathian in khaugui khat a sep a, a liimliapa Jona haksatna apan hukhe dingin a tung ah a zamsak hi. Tuachi-in, tua khaugui tawh kisaiin Jona a kipak mahmah hi. 7 Ahihhangin, a zingchiang phalvakin, Pathian in lung khat a sep a, tua lung in tua khaugui a seuh a, khaugui a keugawpta hi. 8 Ni hong suah takin, Pathian in suahlam huih sa a nungsak a, Jona lutang nisa in a hai a, amah a bahta hi. Sih a ut a: Kei adingin hin sangin sih a hoih zaw ding, a chi hi. 9 Ahihhangin, Pathian in Jona kiang ah: Khaugui tawh kisaiin heh nading san kilawm na nei-a hia? a chi hi. Ama'n: Nei mah ing. Sih nading khopa heh ka hi, a chi hi. 10 Ahihhangin, Tangtawn Toupa'n: Nang hiai khaugui na buaipih a, na kepsa zong hi lou, na khansaksa zong hilou ahi ve. Zan kal khata hong pou a, zankal khat maha si ahi. 11 Ahih leh, ke'n Ninevi khawpi sunga taklam veilam khen thei lou, mihing 120,000 sanga tamzaw leh ganta tua zah mah omna ka lungkhampih kei dia hia? a chi hi.
1 Judah kumpipate Jotham, Ahaz leh Hezekia vaihawm laia Moresheth khawmi Mika kianga Tangtawn Toupa' thu hong tung, Samaria leh Jerusalem tawh kisaia a muh hiai ahi.
Hong Tung Ding Israel Gawtna
2 Mite aw, Tangtawn Toupa Pathian in noute doua theihpihna a gen theih nading leh Toupa'n a tempul siangthou Apan tua bang a hih theih Nadingin na vekpiun za unla, Leitung leh a sunga omte aw, ngaikhia un. 3 Ngai un, Tangtawn Toupa a teenna mun apan hong paikhe ding a, hong kumsukin, leimun sangte siksuk ding hi. 4 Ama' mai ah mualte zui ding a, phaizangte kitamkham ding hi. Meisa-a khuainun bang ding a, mun keena tuisun bang ding hi. 5 Hiaite khempeuh, Jakob tatleknate hang hi vek a, Israel inkawte' khelhna hang hi ahi. Jakob' tatlekna bang hi hiam? Samaria hilou maw? Judah mun sangte bang hi hiam? Jerusalem hilou maw? 6 Tua bang hi a, Samaria lah thil sesa kivum banga bawl ding ing a, grephuan bawlna mun suaksak ding hi'ng. A suangte guama lawnlut ding ing a, a suangphumte dawksak ding hi'ng. 7 A khuakthawh milimte a kaanggawp ding a, tempula a thawnpiakte mei in kanggawp ding hi. A milimte khempeuh gawpsak ding ing a, kizuakna man dinga a khopkhawmte kizuakna man maha kipekik ding hi, chi hi.
Israel leh Judah Suuna Kahna
8 Hiai hanga suuna mau tuaituai ding ing a, khevuak leh vuaktanga pai ding hi'ng. Sihalte banga aw suah ding ing a, gamdai ostritte banga thuum ding hi'ng, chi hi. 9 Ahang bel, a liammate hihdam theihlouh hi a, Judah tung hong tu a, ka mite' kongpi Jerusalem dong hong tung hiven. 10 Gath ah gen kei unla, kap het kei un. Beth Ofra ah leivui lak ah kikhuk un. 11 Safir khua-a teeng noute, vuaktanga maizumin pai un, Zaanan-a teengte hong pusuak lou ding hi. Beth Ezel in suun a, a kihutna nang apan kilamang hi. 12 Maroth-a teengte thil hoih ngakin bahta. Ahang bel, Tangtawn Toupa apan siatna Jerusalem kongpi dong tung hiven. 13 Lakhish-a teengte aw, kangtalai leh a kai ding sakol tuakkhat bulh un. Zion' Tanu adinga khelhna kipatna hi uteh. Israel tatleknate noute sunga kimu hiven. 14 Tua bang hi a, Moresheth Gath kianga kikhakna thawnpiak pe ding hi uteh. Akzib khawpi lah Israel kumpipate adinga zuauthei hi ding hi. 15 Maresha-a teeng noute tunga galhata vualzou khat hon sawl ding hi'ng. Israel' thupina ahipa, Adulam chiang hong tung ding hi. 16 Na lungdamna tate uh suunin na sam uh metgiau un. Noute apan amaute kaihmang hi ding hi ve-un, na lutangte uh mulukolh-a bangin giausak un.
Mihing Thilsawmte leh Pathian Thilsawmte
1 A lupna tung ua thulimlouhna sawm a, thil gilou sawmte tung gik hi! Tua bang hih theihna nei uh a, zing khawvak chianga hih pah uhi. 2 Loute deihgawh uh a, sut uh a, innte deihgawh uh a, sut uhi. Zuautata mi' inn laksak uh a, a mihinpih' goutan laksak uhi. 3 Tua bang hi a, Tangtawn Toupa'n: Hiai mite tunga siatna tut sawm hi'ng, tua siatna apan kihu thei lou ding hi uteh. Kisatheitaka pai nawnlou ding hi uteh, Siatna manna ni hi ding hiven. 4 Tua ni chianga mite'n hon nuihsan ding uh a, hiai kahla-a hon tawng ding uh a: Segawp dimdem hang. Ka mite' neih leh lam kihawmzakta. Ama'n kei apan lamangta! Ka loute uh gam adinga muanhuailoute kianga peta, chi ding uhi, chi hi. 5 Tua bang hi a, aisana gam hawm ding Tangtawn Toupa' mi kikhawmte laka kuamah kimu lou ding hi.
Kamsang Takloute
6 A kamsangte un: Genkholhna gen kei un, hiai thilte tawh kisai genkholhna thu gen kei un, zahlakna'n hon pha lou ding hi, chi uhi. 7 Jakob inkawte aw, Tangtawn Toupa' Kha heh hia? Ama'n tua bang thil hih hia? a kichih kul ding hia? Mi diktat mitangte tung ah ka thugente'n thilhoih tun lou hia? 8 Tu nai zekin ka mite meima bangin hong dingkhia uhi. Kidouna phual apan hong paikik banga bangmah khawksaloua hon kheng vangvangte apan puan manphate na suahkhiaksak uhi. 9 Ka mite laka numeite, a inn nuamte uapan hawlkhia uchin a, a tate uapan ka vualzawlnate lakhedenta hi uteh. 10 Thou unla, paimang un! Hiai na khawlmun uh hilou hi. Hihbuah hita a, bawlphat vuallouha hihsiat hita hi. 11 A zuauthei leh khemhatpa hong paiin: Noute adingin zu leh vaizu-a na tai nading uh genkhol ding hi'ng, hong chi leh, amah hiai mite adinga kituak geih kamsang ahi ve!
Hutkhiakna Thuchiam
12 Jakob aw, na vekpiun hon kaikhawm tham ning. Israel sibangte hon pikhawm tham ning. Belam huanga belamte kaihkhawm banga, gantatna muna belamhon banga, amaute kaikhawm ding ing a, tua mun mipi-a dim ding hi. 13 Amaute' mai ah lamhongpa pai ding a, amaute kongpi phuhongin paikhe ding uhi. Amaute' mai ah a kumpipa uh pai ding a, a mai uah Tangtawn Toupa pai ding hi, chi hi.
Makai leh Kamsang Giloute
1 Tua baan ah, ke'n thu gen ing a: Jakob makai noute aw, Israel inkuan makai noute aw, ngai un. Dika vaihawmna thei ding noute hilou maw? 2 Thil hoih hua a, thil hoihlou it noute, ka mite vunhawk noute, a guhte uapan satak satkhia noute, 3 ka mite' sa ne noute, a vun uh hawkkhete, a guh uh hihtante, bela sa huan ding bang leh belpi-a sa huan ding banga amaute atnente aw, chi hi'ng. 4 Tua hun chiangin Tangtawn Toupa sam ding uh a, aliihhanga, ama'n dawng lou ding hi. Amaute' gamtat gilou ahih mana, ama'n amaute apan a maitang nangawn seel ding hi. 5 Tangtawn Toupa' thugen hiai hi a: Ka mite kaimang tua kamsangte, khattei in nek ding a piak chianga, galmuanna thu gen a, kuama'n a piak louh chianga amah dou dinga kisa zel uh. 6 Tua bang ahih mana, mengmuh muh theih louh hun zaan hun hong tung ding a, aisan theih louh hun mial hong tung ding hi. Kamsangte tung ah ni tum ding a, amaute adingin sun tanglai zong mial ding hi. 7 Mengmuh mute maizum ding uh a, aisante maimawk ding uhi. A muk uh hum vek ding uh hi, Pathian' dawnna omlou hiven, chi hi. 8 Kei ka hih leh, Jakob kianga a tatleknate phuang ding, Israel kianga a khelhna phuang dinga thilhihtheihna vangletna tawh kidim, Tangtawn Toupa Kha tawh kidim, dika vaihawmna leh thahatna tawh kidim hi'ng. 9 Jakob inkuan makai noute, Israel inkuan vaihawmte, dika vaihawmna mudahte, a dik khempeuh kaikawite, hiai za un. 10 Sisan suahna tawh Zion lam a, gitlouhna tawh Jerusalem lamte'n za un. 11 A makaite'n nekguk deiha thu khen a, a siampite'n manneia sinsak a, a kamsangte'n suma vangletna zuak. Hinapi-a Tangtawn Toupa tunga kingai a: Tangtawn Toupa eite laka om hilou maw? Eite tunga siatna tung lou ding, chi uhi. 12 Tua bang hi a, noute hanga leileh banga Zion kilet ding a, Jerusalem lah thilsia kivum lei, tempul mual lah loupa tup lei suak ding hi.
Tangtawn Toupa' Mual
1 Ni nanungte ah, Tangtawn Toupa' tempul, mualte khempeuh tunga thupipena kitungding ding a, mualte tunga tawisang hi ding a, mite'n zuan ding uhi. 2 Nam tampite hong pai ding uh a: Hong pai un, Tangtawn Toupa mual ah pai ni, Jakob' Pathian' inn ah pai ni. Ama'n a lampite hon sinsak ding a, a lampite tawn thei ding hi hang, chi ding uhi. Zion apan dan pawtkhe ding a, Jerusalem apan Tangtawn Toupa' thu pawtkhe ding hi. 3 Ama'n namte kala thu khen ding a, a gamla leh naia nam hatte adinga kinaknate lem ding hi. Amaute'n a namsaute uh leilehna tu-a seek ding uh a, a teipite uh theikung heuhna temkuia seek ding uhi. Nam khat in nam dang dou dinga namsau Liik nawn lou ding a, ahi kidou dan sin nawn lou ding uhi. 4 Michih ama' grepgui nuai ah, ama' theipikung nuai ah tu hiathiat ding a, kuama'n amaute lausak lou ding hi, Tangtawn Toupa Vanglianpen in thu genta hiven. 5 Namte khempeuh, amau' pathiante' minin gamta tave uh, eite zaw Tangtawn Toupa i Pathian' mina gamta a, pai denta ding hi hang.
Tangtawn Toupa' Thilguan
6 Tangtawn Toupa'n phuang a: Tua ni chianga ke'n a liam a baite kaikhawm ding ing a, nawhkhiaka kaihmanga omte leh keimah in ka dalhsakte kaikhawm ding hi'ng. 7 A liam a baite a khawsuaka bawl a, hawlmanga omte nam hattak suaksak ding hi'ng. Tua ni apan Tangtawn donga, Tangtawn Toupa'n Zion Muala amaute tunga vaihawm gigeta ding hi. 8 Belamhon veenna innsang aw, Zion Tanu' kulhpi muanhuai aw, nang adinga hun paisa-a vaihawmna ukna hong kipekik ding a, Jerusalem Tanu adinga kumpi hihna hong tung ding hi, chi hi. 9 Banghanga tutaka nakpitaka kap na hia? Kumpipa nei lou maw? Numei nauvei banga natna in hon phak mai, hon thuhilhmi mangthangta maw? 10 Zion Tanu aw, numei nauvei bangin mangbangin ton volvol in, gampalaka giahbuk sat dinga khawpi na nutsiat hunta hiven. Babulona pai ding chin a, tua-a hutkhiak hi ding hiteh. Tua ah na melmate' khut apan Tangtawn Toupa'n hon tan ding hi. 11 Tu-a bel nang dou dinga nam tampi kikaikhawm uhi. Amah hihbuahin om hen, Zion tung ah i mitte kisathei hen! kichi uhi. 12 Ahihhanga Tangtawn Toupa' ngaihtuahte theilou uh a, a thilguan theisiam lou uhi. Buhphuala buhphalte kaihkhawm banga amaute kaikhawmpa theilou uhi. 13 Zion Tanu aw, thou inla, chilin khen in, buhkhetna sik chiangka hon pe ding hi'ng. Sumsan tin hon pe ding ing a, nam tampite chilzaan ding hiteh, chi hi. Nang dikloutaka a ngahte uh Tangtawn Toupa kianga pe ding chin a, a hauhnate uh leitungbup' Toupa kianga pe ding hiteh.
Bethlehem apan Ukpa khat Piang dinga Chiam
1 Sepaihte' khawpi aw, eite hong kisim nading panmun kikhawhta, na sepaihhonte kaikhawm in. Israel ukpa a biang ah sikchiangin sat ding uhi. 2 Ahihhangin, nang Bethlehem Efratha, Judah behte lak ah neu mah lechin, kei adinga Israel tunga ukpa hi ding khat nang apan hong pawt ding hi, ama' kipatchilna sawtlam taanglai hunte apan hita ahi. 3 Tua bang hi a, nauveinu' nau a suah mateng, Israelte tawh kigawm dinga a sanggam dangte hong kik mateng, Israel nutsiata om ding hi. 4 Tua ukpain ding a, Tangtawn Toupa' hatna-a belamhonte ching ding a, Tangtawn Toupa a Pathian Kumpi thupina-a ching ding hi. Ama' letna thupina in leimong dong pha ding a, amaute bittaka teeng ding uhi. 5 Amah, amaute' lungmuanna hi ding hi.
Hutkhiakna leh Hihsiatna
Asuria mi in i gam hong dou a, i kulhpitea a paisuak chianga, belamchingmi sagih, ahi, mite' makai giat, amah nang dinga tungkhe ding hi hang. 6 Amaute'n namsauin Asuria gam uk ding uh a, namsau phawisain Nimrod gam uk ding uhi. Asuria mi in i gam dou a, i gammongte apan hong lut chianga, ama'n Asuria mi apan hon hukhe ding hi. 7 Jakob sibang khawsuaksunte bel mi tampite laka Tangtawn Toupa' daitui banga, mihing zong ngak lou, mihingte adinga zong omden loua, loupa tunga vuahtui banga om ding uhi. 8 Jakob sibang khawsuaksunte, namte leh mi tampite laka, gamlak gamsate laka humpinelkai bang leh, a paina lamlama belamte balgawp a, kuama'n lah a hutkhiak theihlouh belamhon laka humpinelkai lunlai banga om ding uhi. 9 Na melmate tunga vualzoua khut liik ding chin a, na galte khempeuh hihmanthata om ding uhi. 10 Tangtawn Toupa'n phuangkhia a: Tua ni chianga na lak ua na sakolte uh hihmangthang ding ing a, na kidouna kangtalaite uh phelgawp ding hi'ng. 11Na gamsung ua khawpite hihse ding ing a, na kulhpite uh phelgawp ding hi'ng. 12 Na mibumna uh hihse ding ing a, kuamah bum nawnlou ding hi uteh. 13 Khuakthawh na milimte uh leh na suang zekte uh na lak uapan hihgawp vek ding ing a, na khutsuakte uh maia kuun nawn lou ding hi uteh. 14 Na Ashera songte uh botkhe ding ing a, na khawpite uh phiatmang ding hi'ng. 15 Ka thu manglou namte tunga heh leh thangpaia phuba la ding hi'ng, chi hi.
Israel tunga Tangtawn Toupa' Lungkimlouhna
1 Tangtawn Toupa' thugen ngai un. Ama'n: Dingtou unla, taangdungte kiang ah na thu uh gen unla, mualte'n na gen ding uhza uhen. 2 Tangdungte aw, Tangtawn Toupa' heekna thu za un. Tangtawn suangphum, leitung kingaknate aw, ngaikhia un. Tangtawn Toupa'n a mite heekna thusia nei a, Israel tunga hekna thu sung hi. 3 Ka mite aw, na tung ua ke'n bang hih ka hi hiam? Bangchi-a puakgik hon guan ka hi hiam? Hon dawng un. 4 Aigupta apan hon pikhetou ing a, saltanna gam apan hon tankhia hi'ng. Noute hon pii dinga Mosi hon sawl ing a, Aron zong Miriam zong hon sawl hi'ng. 5 Ka mite aw, Moab kumpipa Balak in bang gen a, Beor' tapa Balaam in bangchi dawn hiam theigige un. Tangtawn Toupa' thilhih diktatte na theih nadingun, Shitim apan Gilgal dong na khualzinna uh theigige un, chi hi. 6 Tangtawn Toupa' maia bang tawh hong pai a, tawisanga om Pathian' maia kuun ding ka hi hiam? Bawngnou kum khata upa tawh, haltum thillat tawh a maia hong pai ding ka hi hiam? 7 Belamtal a sang asanga sim leh, lui sangsawm sawma sim sathaua luang in Tangtawn Toupa lungtaisak thei ding hiam? Ka tatlekna thoih nadinga ka tapa masapen laan ding maw? Ka hinna khelhna thoih nadinga ka sa-a piang laan ding ka hi hiam? 8 Mihing aw, ama'n a hoih thil hon lakta a, Tangtawn Toupa'n nang apan bang ngiat ahia? A diktata gamtat ding, zahngnaihna it ding, kingainiamtaka na Pathian tawh ton ding, chih ahi.
Israel' Mawhna leh Gawtna
9 Ngai dih: Tangtawn Toupa'n khawpi sam veh Na min lau mah pilna hi ahi khetna chiang leh tua a Seppa limsak in. 10 Inkuan gilou aw, muhna dikloua muh na hauhna leh hamsiatsa efah diklou mangngilh lai ding ka hi maw? 11 Buukna diklou zang mi, buukna diklou ip sunga kem mi, mi hoih banga khah ding ka hi maw? 12 A mi haute hiamgam uh a, a mite zuauthei hi uh a, a lei un khemhattaka thu gen. 13 Tua bang hi a, nang hihmanthat ding, na khelhnate hanga hon hihsiat kipanta hi'ng. 14 Ne ding chin a, lah vah tuan lou ding, na gil kial lailai ding. Khol ding chin a, lah bit tuanlou ding. Na kholsa namsau negaisak ding hi vengin. 15 Suan ding chin a, lah at tuanlou ding. Oliv suk ding chin a, a thau lah kinuh tuan lou ding. Grep suk ding chin a, grepzu lah dawn tuan lou ding. 16 Omri' dankhunte zui chin a, Ahab inkawte' tatdan khempeuh zui chin a, a ngeinate uh zui hi vechin. Tua hanga siatna-a hon pekhe ding ing a, na sunga teengte simmawhna thuaksak ding ing a, namte' simmawhna khu ding hi teh, chi hi.
Israel' Gimna
1 Ka gimthuakna thupi namah e! Grephuana a sang zon laia, nipilai theigah zongkhawm mi bang hi veng. Nek ding grep gahbom lah omlou, ka lunggulh theipi gah min masa lah omlou. 2 Pathian biak limsakte lah gam apan phiatmanga omta, mitang khat beek zong om nawnlou. Mi khempeuh in sisan suah ding buk a, michih in a sanggam leenthanga mat dinga sabeta beng. 3 Thil gilou hih dinga khut langniha khutsiam, vaihawm mi in lah thawnpiak ngiat, thukhen mi in negu, thuneihna tawi mi in a deihdan daan midangte zuisak teiteia a vektaang ua pangkhawm vek uhi. 4 Amaute laka a hoih pen zong lingkung bang hi a, amaute laka mitangpen zong lingdai bang hita. Pathian' hong veh ni, na galvilmite' ni hong tungta. A buaisiat ni uh tu hun hita. 5 Innvengpa muang ken, lawm zong muang ken. Na anga lumnu tawh kal ah zong, na thugen ah pilvang in. 6 Ahang bel, tapa in pa zahtak lou, tanu in lah a nu dou a, mounu in lah a pasal' nu dou mihing' meima zaw ama' innsung mite mah hi mawk hi. 7 Ke'n bel lamenin Tangtawn Toupa ngak hi'ng. Pathian ka Hondampa ngak hi'ng. Ka Pathian in hon za ding hi.
Israel Dingkhe ding
8 Ka meima aw, ka tung ah kiuangsak ken! Puk mah leng thoukik ding hi'ng. Miallak ah tu mah leng, Tangtawn Toupa ka khawvak hi ding hi. 9 Ama' tunga ka khelh mana Tangtawn Toupa' thangpaihna thuak ding mah hi'ng. Ama'n kei guma thu gen a, ka hamphatna a hihkip mateng, thuak ding mah hi'ng. Ama'n khawvak ah hon piikhe ding a, a diktatna mu ding hi'ng. 10 Tua hun chianga ka meima in tua mu ding a, maizumna tawh kidim ding hi. Tangtawn Toupa na Pathian koia om ahia? hon chinu maizum ding hi. Ka mit in a puk lam mu ding a, tu-a zong konglak buannawi banga sikdeen hita ding hi. 11 Na kulhbaangte lam ni hong tung ding a, na gamgite keklet ni hong tung ding hi. 12 Tua ni chianga Asuria leh Aigupta khawpite apan Aigupta nangawn apan Iufratis dong, tuipi apan tuipi dong, mual apan mual dong apan zong mite na kianga hong pai ding uhi, 13 Leitung bel a sunga teengte hanga a thilhihte uh gah mu-a segawp dimdem ding hi.
Thuumna leh Phatna
14 Na mite, na goutan belamhonte, gamlak leh gantatna mun hoiha amau thuthu-a teengte, na chiangin ching in. Taanglaia bangin Bashan leh Gilead ah kivak uhen. 15 Nang: Aigupta apan nong paikhiak nite uh banga, amaute kianga ka thillamdangte lak ding hi'ng, chi na hi. 16 Namte'n tua mu ding uh a, amaute' vangletna zumpih ding uhi. A muk uh hum ding uh a, a na uh ngong ding hi. 17 Gul banga leivui liak ding uh a, leilaka bokvak ganhingte bang ding uhi. A kua uapan liing kawmkawma hong pai ding uh a, laua Tangtawn Toupa i Pathian lama kihei ding uh a, noute hon lauta ding uhi. 18 A goutan laka khawsuaksunte' mawhna maisak a, a tatlekna uh ngaidam, nang bang Pathian kua ahia? Hehsa-a omden lou chin a, zahngaihna latsak kipaak zaw hi teh. 19 Koute tunga lainatna neikik ding chin a, ka khelhnate uh sikdeen a, ka tatsiatnate khempeuh uh tuipi thuk sunga paitum vek ding hi teh. 20 Jakob tunga muanhuaia dik ding chin a, Abraham tunga zahngaihna langsak ding chin a, taanglaia ka pu ka pate uh kianga kichiama na thuchiam banga hih ding na hi.
1 Ninevi tawh kisai tunung puakgik hiai ahi a, Elkosh mi Nahum' mengmuh laibu ahi. Ninevi tunga Tangtawn Toupa' Hehna 2 Tangtawn Toupa zaw thikthusia leh phulapa Pathian hi a, Tangtawn Toupa'n phu la a, thangpaihna-a dim hi. Tangtawn Toupa'n a galte tunga phu la a, a melmate tunga thangpaihna nei gige hi. 3 Tangtawn Toupa lungduai a, vangletna lianpi nei hi. Tangtawn Toupa'n a mawhte gawt louha hawi lou ding hi. Pingpei leh huihpi laka a lampi om a, meipite lah a khea leivui baang hi lei hi. 4 Ama'n tuipi sal a, kangsak a, luite khempeuh kangkeusak hi. Bashan leh Karmel vuaigawpsak a, Lebanon paklunlaite vuaisak hi. 5 A mai ah taangte liing a, mualte zulgawp hi. Ama' om chianga a maia lei liing a, leitung leh a sunga teengte khempeuh zong liing hi. 6 Ama' lunghihlouhna kua'n nang zou ding a, kua'n a hehluatna thuak zou ding? A thangpaihna mei banga sunbuaka om a, a maia suangpite kitamkhamsak hi. 7 Tangtawn Toupa hoihin siam a, lungkham buai huna bukna hi ahi. Ama'n amah muangte khawtuah a, 8 ahihhanga Ninevi zaw tuikhanglian zanga beisak ding a, a galte miallaka delhlut ding hi. 9 Tangtawn Toupa doua a simsawm khempeuhte ama'n beisak ding a, a nihveina tung chih omlou ding hi. 10 Amaute linglak ah awk ding uh a, a zu uh kham ding uh a, loupa keu banga haltuma om ding uhi. 11 Ninevi aw, Tangtawn Toupa tunga gitlouh simsawm, gilou dinga mi thuhilhmi khat nang apan hong pawtta hi. 12 Tangtawn Toupa' thugen hiai ahi: Amaute'n pankhawmpihte neiin amaute tam mah le uh, satkhiaka om ding, mangthang ding uhi. Judah aw, ke'n hon gimsakta mah leng, hon gimsak nawnlou ding hi'ng. 13 Tu'n na ngawng apan a hakkol uh tansak ding ing a, na taanna kolte tansak ding hi'ng, chi hi. 14 Ninevi aw, Tangtawn Toupa'n nang tawh kisai thupiak khat pia a: Na min paw ding suan leh khak neilou ding hi teh. Na pathiante' tempul sunga om khuakthawh leh sunthawh milimte gawpsak vek ding hi'ng. Ke'n na hankhuk ding uh bawl ding hi'ng, gilou hi ve uchin, chi hi. 15 En dih, tangthupha hon puakpa leh, lungmuanna thu hong phuangpa' khete, mualte tung ah hong kalsuan veh! Judah aw, ankuanglui nopbawlna bawl inla, na thuchiamte tangtun in. Giloute'n hong dou nawnlou ding hi, amaute hihmanthat sisipa om ding uhi.
Ninevi Puk nading
1 Ninevi aw, nang hong sim ding hong kuan. Kulhte vengin ching in, lampi Vengin ching in. Kisa inla, na thahatna khempeuh suah in! 2 Hihse mite'n Jakob' thupina hihsia-in, a grepte uh hihse mah le uh, Tangtawn Toupa'n Jakob' thupina pekik ding a, Israel thupina bangbang hi ding hi. 3 Ama' sepaihte' lumte san a, galhatte a sanauin kizem uhi. A kisakkholh khittak ua, kidouna kangtalaia sikte tesolsol a, tawsaw teipite liik uhi. 4 Kidouna kangtalaite kongzing khawng ah taisuak uh a, kongtual khawng ah vialtai uhi. Meisel kuangpha bang uh a, khawphia bangin kikhawh zol zol uhi. 5 Ama'n a sepaih teeltuamte sam a, ahihhanga a lampai lai ua kipalpai uhi. Khawpi kulhbaang delha bawh uh a, kidalna lum silh uhi. 6 Lui kongpite kihong a, kumpi innpite chim hi. 7 Tua khawpi, gallaaka kila ding a, kipawmang ding hi, chih sehsa ahi. A sila nungakte lah vakhu banga thuum a, awm kitum ding uhi. 8 Ninevi zaw tuivung bang hi a, a tui luangkang hi. Tawp in! Tawp in! chi uh a, ahihhanga kuamah kilehkik lou hi. 9 Ngunsikte pawmang un! Khamsikte pawmang un! Tuate bei theilou a, goukholna-a hauhnate bei theilou hi! 10 Amah kiphelzaka kigumang a, kilokgawp a, kikhuahsiang keuhkeuh hi! Lungtangte zulgawpta, khukte kitattuahta, pumpite liinggawpta, maitang teng mualgawpta. 11 Humpinelkaite omna khuk kaw omta a, a noute a vakna mun uh kaw omta a, humpinelkai tai leh a pi paina, a noute'n lau ding a neih louhna mun uh kaw omta? 12 Humpinelkai in a noute ading a kiching sa man a, a pi ading samat balzan a, a omna mun samata dimsak a, a bukna mun dimsak hi. 13 Tangtawn Toupa Vanglianpen in: Nang hon dou hi'ng, na galdouna kangtalaite haltuma, meikhu-a lengmangsak ding ing a, na humpinelkai noute, namsau in negai ding hi. Leitunga na samat ding hon hawisak lou ding hi'ng. Na thangkoute' awte kiza nawnlou ding hi, chi-a phuang hi.
Ninevi Tunggik
1 Sisan suahna khawpi, zuauthu-a dim, van guksa-a dim, a thuak omlou ngeilou, tua khawpi tung gik hi! 2 Zeepna ging zotzotte, kangtalaipei ging luapluapte, sakol taiging loplopte, galdouna kangtalai ging lomlomte! 3 Galnawh sakol tungtuang sepaihte, namsau tesolsolte, teipi tezolzolte! A liam lah tam, a si lah vum, mite misiluanga kipalpai 4 Kizuaknu huukna hang leh mi zola bum hatnu, a kizuakna-a nam teng sala kai, a aisanna-a mite sala man, tua teng hang hi vek hi. 5 Tangtawn Toupa Vanglianpen in: Nang hon dou hi'ng, na maitang khuhtoua na nik lemtou ding ing a, na vuaktanna namte lak ding ing a, na zumhuaina kumpigamte lak ding hi'ng. 6 Niin kihhuaia hon theh ding ing a, mite' simmawha, etnopa hon bawl ding hi'ng. 7 Nang hon mute khempeuh in hon taisan ding uh a, Ninevi segawpta, kua'n suun ding? chi ding uhi. Nang hon khamuan ding koia mu ding ka hia? chi ding uhi, chi-a phuang hi. 8 Nail luigeia om a, a kimkota tui om, tua Thebes sanga nang hoihzaw maw? Tua lui a kihutna hi a, a tuite a kulhbaang hi eive. 9 Kush leh Aigupta a hatna hi a, Put leh Libia a kizoppihte laka pang uhi. 10 Hinapi-a sala kiman, sala kaihmang hi ding hi. A tangekte kongzing tenga lei denna-a kinei ding hi. A miliante tang dinga ai kisan ding hi. A mi thupite khempeuh koi kibunsak ding hi. 11 Nang zong dawnkhamgawp a, kibu ding chin a, melmate apan bukna zong ding hi teh. 12 Na kulhpite khempeuh a min masa theipi kungte bang ding a, a nete' kamsunga a gahte tusuk ding hi. 13 Na sepaihhonte en dih numeihon ahi ve ua! Na gam sunga kongpite lah, na galte adinga honsa, a kaihna zawlte lah mei in kangtumta. 14 Kimkota hong kium sung ading tui tawikhol inla, na kihutna baangte kipsak in. Bellei tung vel inla, belhkipnate chilman inla, suante khat hi a, hiai ah Afrika genna hong hi mai thei. lei haltaka bawl baangte puahpha in. 15 Tua ah mei in hon kangtum ding a, namsau in hon vatpai ding a, khaupete' nek banga hon negai ding hi. Khaupete bangin kihihpung inla, khaukhupte bangin kihihpung in. 16 Na sumsinmite tamsaka pungsak chin a, vaana aksite sanga tamzaw uhi. Ahihhanga khaupete banga gamsung negiaua leng mang uhi. 17 Na khawpi vengmite khaukhupte bang uh a, na uliante khaupe honpi bang uh a, khawdam ni-a daai kawma omkhawm a, ni hong sat chianga lengmang, a omna kitheilou khaukhupte bang uhi. 18 Asuria kumpipa aw, na belamchingte ihmu uh a, na miliante tawldam dinga lum uhi. Na mite mualtung khawnga dalhzak uh a, amaute kaikhawm ding omlou hi. 19 Na liamma bangmah in damsak theilou, na liamma sihna tham hi. Na tungthu za kha peuh in na pukna khutbetkhum hi. Ahang bel, na gitlouhna bei theilou, a thuak kha lou om peuhmah-a hia?
Habakuk' Phunna
1 Kamsang Habakuk in turning thu puakgik thu a muh hiai ahi: 2 Habakuk in: Tangtawn Toupa aw, kei bangtan kikou ding a, nang hon za lou ding na hia? Hiamgamna om, ka chiha zong, banghanga nang hon hukhe lou ding na hia? 3 Banghanga dika thukhenna omlouh lam hon ensak sak ding na hia? Banghanga dikloua gamtat thuakzou zou ding na hia? Ka mai ah siatna leh hiamgamna om a, kihoutheihlouhna leh kinakna tamsem sem hi. 4 Tua banga, dan kizui lou a, dika thukhenna vualzou ngei lou hi. Migiloute'n midiktatte umchip uh a, dika thukhenna kikaikawi hi, chi hi.
Tangtawn Toupa' Dawnna
5 Tangtawn Toupa'n dawng a: Namte en inla, mu inla, lamdang sain ding in. Noute' khanga thil khat hih ding ing a, noute hong kihilh hanga um lou ding hi uteh. 6 En in, Kaldaite, huham leh ngongtata leitung buppi tuansuakte tung ding diing ing a, amaua hilou tenna munte sut diing uhi. 7 Amaute nam lauhuai leh mulkimhuai hi uh a, amaute adinga amaute mah dan hi pah uh a, amaute' thupina ding mah zong uhi. 8 A sakolte uh gialbemte sanga thakin zaw a, khawmuia ngehonte sanga lauhuaizaw uhi. A sakoltungtuang sepaihte uh hattaka hong tai uh a, a sakoltungtuangte uh gamlapi apan hong kuan uhi. Sapul ne dinga bawhsuk dek musane lengte bang hi uhi. 9 Hiamgamna hih sawm tinten hi vek uhi. Gamdai-gamkeu huih bang hi uh a, a pawlpawla mailam en gegu-a tai uh a, sehnel banga salmatte phaamkhawm uhi. 10 Kumpite simmawh uh a, vaihawmte nuihsan uhi. Khawpi kulhnei peuhmah nuihsan uh a, panmun lei sepvuma tua khawpite la uhi. 11 Huihnung banga paisuak uh a, mailam nawt zel uhi. A thahatna uh pathiana nei mite zaw mawhtansak hi ding uhi, chi hi.
Habakuk' Phunna Nihna
12 Tua khitin Habakuk in: Tangtawn Toupa ka Pathian, a Siangthoupa keia aw, nang Tangtawn apan omsa na hi keia hia? Koute si lou ding hi ung, Tangtawn Toupa aw, amaute zaw thukhenna tun dinga na sehte na hi uhi. Ka Suangpi aw, amaute zaw, gawtna tun dinga na hihkip na hi uhi. 13 Thil gilou pha sa-a en dinga, na mit siang lua a, thil diklou dawh zou lou hi chin a, banghanga zuautat taka gamtate dawhdawh thei na hia? Migiloute'n amaute sanga diktatzawte a nawmvalh lai ua, banghanga dai dide thei na hia? 14 Nang mihingte, tuipi-a ngasate banga bawl chin a, vaihawm ding nei lou bokvak ganhingte banga bawl na hi. 15 Melma gilou in ngakuaiin amaute kaikhetou a,a leenkhangpi-in amaute man a, a lenkhangpi-in amaute kaikhawm a, lungnuamin kipak hi. 16 Tua bang ahih manin, ama'n a leen biain, a mai ah kithoihnate laan a, a leenkhangpi mai ah gimnamtui haal hi. Ahang bel, a leena nuamtattaka kivaak a, an limlim nea nuamsa hiven. 17 Ahih leh, ama'n a leen apan bungkhia a, zahngaihnabeia namte hihse tawntung ding ahi maw?
1 Ka galvilna muna ding ding ing a, intung kiumna daia om ding hi'ng. Ama'n kei kianga bang gen ding hiam, hiai hekna ngawhna dawnna bang pe ding ka hiam, chih ngak ding hi'ng.
Tangtawn Toupa' Dawnna
2 Tua khitin, Tangtawn Toupa'n hon dawng a: Thangkou in a simkhiaka a taipih theih dingin, suangpek tung ah kilakna kiteltakin gelh in. 3 Ahang bel, kilakna in hunseh ngak a, huntawp thu gen a, diklou theilou ding hiven. Tuin khawl tadihin, ngak zek tadih mah leh, hong tung ngeingei ding a, zekai lou ding hiven. 4 En in, kisathei mi zaw, a hinna diktat lou hi. Mi diktat bel a upna pansana hing ding hi. 5 Ahi, zu in amah muanhuai louin gamtasak a, kiuangsak a, tawlngak mu ngei lou hi. Hankhuk banga duhgawl ahih man leh, sihna banga lungkim chih nei lou ahih mana, namte khempeuh amah adinga kikaikhawm a, mite khempeuh sala kai hi. 6 Namte khempeuh in: Vanguksa kholkhawm a, mi neihsa pawngsuha kihihhau mi tung gik hi! Hibang thil bangtan om ding ahia? chi-a haibawlna leh simmawhna tawh amah tawng lou uhia? 7 Na sumbate heh guih lou ding uhia? Amaute khangloua, nang hon kungsin lou ding uhia? Tua hun chianga, a thuakpa hi ding na hi. 8 Nam tampite na buluhtak mana, tuate laka khawsuakte'n nang hon buluh ding uhi. Ahang bel, nang mihing' sisan suah a, gamte leh khawpite leh a sunga teengte hihmangthang hive chin. 9 Siatna apan kihutkhiak nading a bu sangpi-a a seh nadinga, muhna dikloupi-a kilamtou mi tung gik hi! 10 Nang mi tampite siat nading sawm chin a, nangma' innsung zahlakna leh nangma' hinna taanna lei hi ahi. 11 Baanga suangte kikoukhe ding a, singa kibawl innkamte'n na dawng ding hi. 12 Sisan suahna tawh khawpi lam a, gamtat gilou tawh khawsat mi tung gik hi! 13 Mihingte' sepgimna zaw thuka khul ding singkhuah lei a suah nading leh, namte khempeuh zong a mawkna-a gim a suah nading lei ua, Tangtawn Toupa Vanglianpen in a gelsa hi lou hia? 14 Ahang bel, tui in tuipite a khuh bang a, Tangtawn Toupa' thupina theihna in leitung khuh ding hiven. 15 A vuaktanna uh a etet nadinga a innvengte zu pia a, a khamsiat mateng a thawlthawla tulh mi tung gik hi! 16 Thupina sanga zahlakna tawh kidim zaw ding na hi. Tuin nang hun tungta hi. Dawn inla, na savuakna dawk hen! Tangtawn Toupa' khut taklam apan nou nang kiang hong tungta hi. Zahlakna in na thupina khuh ding hi. 17 Lebanon tunga na hiamgamna in nang hon khuh ding a, gantate na hihmanthatna in nang hon mulkimsak ding hi. Ahang bel, mihing sisan suah a, gamte leh khawpite leh a sunga teengte hihmangthang hi vechin. 18 Mihing in milim a suih tua milim in bang hamphatna nei ahia? Milim bawlpa'n a khutsuak mah muang a, a pau theilou milimte bawl ahi ve! 19 Singtum kiang a: Khanglou in! chi mi, ahih kei leh, hinnabei suang kianga: Dingkhia in! chi mi tung gik hi! Tua in hon makaih thei-a hia? Ngun leh khama kituam hi a, nak theiloupi! 20 Ahihhanga, Tangtawn Toupa zaw a tempul siangthoua om ahi. Leitung teng khempeuh a mai ah dai dide hen, chi hi.
Habakuk' Thuumna
1 Shigionoth' tunga kamsangpa Habakuk' thuumna: 2 Tangtawn Toupa aw, na minthanna zata ing a, lau hi'ng. Tangtawn Toupa aw, na thilhihte lamdangsa-a ding hi'ng. Koute' damlaiin tuate hihthak inla, koute' khang ah tuate theisak in. Na thangpaih laiin zong zahngai in. 3 Teman apanin Pathian hong pai a, Paran Mual apan a Siangthoupa hong pai hi.
Sela
4 Ama' thupina in vaante khuh a, a phatna leitung dim hi. 4 Ama' thupina vaak nisuak bang hi a, a khut apan vaakzungte taangkhia a, tua ah a vangletna kisel hi. 5 Ama' mai ah hipi pai a, chisa hileng in ama' kalsuante nungzuih hi. 6 Amah ding a, lei liingsak a, ama'n en a, namte lingsak hi Taanglai taangte kitamkham a, taanglai mualte chimgawp hi. Ama' lampite Tangtawn daih hi ahi. 7 Mangbanga Kushan puanbukte mu ing a, lungzinga Midiante' tennate mu hi'ng. 8 Tangtawn Toupa aw, luite na hehsan-a hia? Luitate tung ah na thangpai-a hia? Na sakolte tunga tuanga na pai laiin, hutkhiakna kangtalaite tunga tuanga na pai laiin, tuipi tung ah na heh-a hia? 9 Nang ka thalphel lakhia chin a, namte kianga na thu chiamsa hi ahi.
Sela
Luitea leitung kikhensak na hi. 10 Mualte'n nang hon mu uh a, ton uhi. Hawktuite luang a, tuithuk ging honhon a, tuihualte sangpipi-a luang hi. 11 Na thaltangte te zolzola leng uh a, na teipi vaak zolzola kikhawh a, ni leh khapi bel vaante ah ding kinken uhi. 12 Thangpaia leitunga paisuak chin a, heha namte chil na hi. 13 Na mite hukhe ding, na thaunilhpa hukhe ding a, nang hong kuan na hi. Gitlouhna inna makai sat chin a, a luzang apan a khenuai dong a puansilh hawkkhiaksak na hi.
Sela
14 Koute thehzak dinga, a galhatte a kuankhiak lai ua, genthei kibute negai dinga, a kiotsak lai ua, nang amau' teipi maha amaute dawt pailet na hi. 15 Nang na sakolte tawh tuipi tuansuk chin a, tui kiloktea paisuak na hi. 16 Ke'n za ing a, ka dip kihot a, tua ging za ing a, ka mukte liing supsup a, ka guhte muat dinga kisa a, ka khukte liinga kitattuah hi. Ahihhanga, ke'n zaw siatna hong tung ding kuhkaltaka na ngak ding hi'ng. 17 Theipi kung sel kei henla, grepguite gah kei henla, olive gah lawh ding om kei henla, loute'n gah suah kei henla, belam huang ah belam om kei henla, ganinnte ah ganta om kei mah leh, 18 kei zaw Tangtawn Toupa ah nuam lai ding ing a, Pathian ka Hondampa ah kipak ding hi'ng. 19 Tangtawn Toupa Pathian ka hatna hi a, ama'n ka khete sazuk khe bangsak a, mual sangpipi-a hon paisak hi. Lapulian ading. Ka pekging guitea sak ding.
1 Amon' tapa, Judah kumpipa Josia vaihawm sungin, Kushi' tapa Zefania kiang ah Tangtawn Toupa' thu hong tung hi. Kushi bel, Gedalia' tapa ahi a, Gedalia bel Amaria' tapa ahi a, Amaria lah Hezekia' tapa ahi. Tua thu hong tung hiai ahi:
Hong Tung ding Siatna
2 Tangtawn Toupa'n: Leitung maikaih apan bangkim phiatmang sipsip ding hi'ng, chi-a phuang hi. 3 Mihing leh ganta phiatmangkhawm ding ing a, huihkhua-a vasate leh tuipi-a ngasate phiatmang ding ing a, leitung maikaih apan mihing ka satkhiak chianga, migiloute'n thil kisesa kivumte leltak nei ding uhi, chi-a Tangtawn Toupa'n phuang hi. Judah tunga Tung ding Douna 4 Judah doua ka khut likkhe ding ing a, Jerualema teengte khempeuh doua likkhe ding hi'ng. Hiai apan Baal bemi a sibang teng, awilou mite' minte leh milim bia siampite 5 aksihon be dinga inntung vuma kunte, kuna Tangtawn Toupa' min siala kichiamte leh Molekh' min siala kichiamte, 6 Tangtawn Toupa zuihna lehkiksante leh, Tangtawn Toupa zong lou, kan zong kanloute satkhe vek ding hi'ng. 7 Toupa Tangtawn Pathian' mai ah dai sipsip un, Tangtawn Toupa' ni hong nai hi. Tangtawn Toupa'n thillat ding khat mansain nei a, a chialte lah siansuahta hi. 8 Tangtawn Toupa' thillat ni-in, makaite leh kumpi' tapate leh, gamdang puana kizemte gawt ding hi'ng. 9 Tua ni chianga, innliim siik nuamloute, a pathiante uh' tempul sung hiamgamna leh zuauthu-a dimsakte gawt ding hing. 10 Tangtawn Toupa'n phuang a: Tua ni chianga, Ngasa Kongpi apan kahna husa om ding a, Teennamun Thak apan mauna husa leh, mualte apan pukna husa om ding hi. 11 Sumsinna gama teengte aw, mau tuaituai un. Sumsinna sumbuuk neite khempeuh phiatmang hi ding a, ngunsika sumsinte khempeuh segawpa mang ding uhi. 12 Tua hun chianga ke'n meivak de a, Jerusalem phekleka ensuak ding ing a, bangmah ngaihsak lou zunou-a zukhi bang lelte, Tangtawn Toupa'n a sia hi-in a pha hita leh, bangmah hih ken teh, chi-a ngaihtuahte gawt ding hi'ng. 13 A hauhnate uh kigumang ding a, a innte uh kiphelgawp ding hi. Innte lam ding uh a, a sunga teeng tuanlou ding uhi. Grephuante bawl ding uh a, a tui dawn tuanlou ding uhi, chi hi.
Tangtawn Toupa Ni thupi
14 Tangtawn Toupa ni thupi hong naita hong naita a, hong tung pah ding hi. Ngai dih! Tangtawn Toupa ni-a kahna nase mahmah ding a, tua-a galhatte' kikou nase mahmah ding hi. 15 Tua ni, thangpaihna ni hi ding a, lungzin ni leh lungkham ni hi ding a, buai ni leh siat ni, mial ni leh lungkiak ni, meipi kai ni leh mial bikbek ni hi ding hi. 16 Khawpi kulhneite leh a kiu innsangte douna pengkul gin ni, galnawh kikou ni hi ding hi. 17 Ama'n: Tangtawn Toupa tunga a khelh man ua, ke'n mite tunga lungzinna tun ding ing a, mittaw banga kimai kimai ding uhi. A sisan uh leivui banga kibawkhe ding a, a gilzangte uh nin kihhuai banga bawkhe ding hi. 18 Tangtawn Toupa' thangpaihna ni-a a ngun uleh a khamte un amau hukhe theilou ding a, a thikthusiatna mei in leitungbup kangtum ding hi. Ahang bel, ama'n leitunga nungtate khempeuh thakhata beisak ding hiven, chi hi.
1 Nam zumhuaite aw, kikaikhawm un, kikaikhawm un. 2 A hun seh hong tun main, tua ni in buhsi banga hon mutmang main, na tung ua Tangtawn Toupa' hehna nasia hong tun main, na tung ua Tangtawn Toupa' hehna ni nasia hong tun main, kikaikhawm un. 3 Gamsunga dinmun niam noute khempeuh aw, a thupiakte zui noute aw, Tangtawn Toupa zong un. Diktatna zong unla, kiniamkhiakna zong un. Tangtawn Toupa' hehna ni-in bukna na mu mawh ding uhia.
Filistia tunga Tung ding
4 Gaza taisanin om ding a, Ashkelon a sesa-a nutsiata om ding hi. Suntang laiin, Ashdod vuaksuak ding a, Ekron kibulkalh ding hi. 5 Tuipi geia teeng Kereth mite aw, na tung uh gik hi! Filistia gama Kanan aw, Tangtawn Toupa' thu in noute hon dou hi. Noute hon hihse ding ing a, kuamah hawia nutsiat om lou ding hi, chi hi. 6 Tuipi gei gam Kerethte' teenna lah belamchingte teenna mun leh belam huangte suak ding hi. 7 Judah inkaw sung mi laka a khawsuaksun suak ding a, tua ah gantatna mun mu ding uhi. Nitaklam-in Ashkelon innte ah lum ding uh a, Tangtawn Toupa a Pathian un amaute khawtuah ding a, a vangphatnate uh pekik ding hi.
Moab leh Amon tunga Tung ding
8 Moab in hon selphounate za ing a, Amonte' hon totnate zata hi'ng. Amaute'n ka mite selphou uh a, a gam uh dou dinga vau uhi. 9 Tua hanga ka hinna siala gen hi'ng: Moab lah Sodom bang ding a, Amonte lah Gomora bang ding loupa mun leh chikhukte leh gam kisia suakden ding uhi. Ka mite laka a sibangte'n amaute lok ding uh a, ka minam laka a khawsuaksunte'n amaute' gam luah ding hi, chi-a Tangtawn Toupa Vanglianpen Israel Pathian in phuang hi. 10 A kisaktheihna uh hang leh, Tangtawn Toupa Vanglianpen' mite a selphouna uleh, a simmawhna uh hanga a lawhtak ding uh hibang hi ahi, 11 Tua gam pathiante a hihmanthat chianga, Tangtawn Toupa mulkimhuai ding a, tuipi geia namte khempeuh leh michih in ama' gam teka amah be ding hi. Kush tunga Tung ding 12 Kush mite aw, noute zong ka namsaua thah hi ding hi uteh. Asuria tunga Tung ding 13 Ama'n mallam douin a khut likkhe ding a, Asuria hihgawp ding a, Ninevi lah a se dimdema nutsiat gamdai banga keu ding hi. 14 Tua ah belamhonte, bawnghonte kual ding a, gamsa namkim zong gamta ding hi. Gamdai simbu leh simbu tanglit, tua khuampite ah giak ding a, a hamte un tawhlette thawn ding a, kongpite ah thil sesa kivum ding a, sidar inkamte dawk ding hi. 15 Hiai khawpi, nuamtat leh bita om hi a: Keimah hi'ng, kei lou kuamah dang omlou hi, kichi hi. Tu'n hong se namai e, gamsate teenna suak namai e! A kianga paite peuhmah in simmawh a, khuttum zialkhum hi.
Jerusalem' Tunung ding
1 Nuaisiahhatte, helhatte leh, hihnita omte' khawpi tung gik hi! 2 Kuamah' thu mang lou a, bawlhoihna sang lou a, Tangtawn Toupa lah muang lou a, a Pathian lah naih lou hi. 3 A uliante lah humpinelkai humhamte hi a, a vaihawmte lah zingsanga nek ding neilou nitaklam ngiate hi uhi. 4 A kamsangte kisathei uh a, a sima misawmhatte hi uhi. A siampite'n munsiangthou buahsak uh a, dan palsat uhi. 5 A sunga om Tangtawn Toupa bel diktat a, a diklou hih lou hi. Ama'n zingsang tenga a dika thu khen a, ni hong thak tenga zong dika vai hawmkhial ngeilou hi. Hinapi-a diktatloute'n maizumna mei theilou uhi, chi hi. 6 Tangtawn Toupa'n phuang a: Namte satkheta ing a, a kulhpite uh kiphelgawta. A kongzingte uh nutsiata bawl ing a, kuamah paisuak lou hi. A khawpite uh kihihsia a, kuamah kihawi lou ding, kuamah mah kihawi lou ding hi. 7 Tua khawpi kianga: Kei hon lau ngeingei ding chin a, bawlhoihna sang ding hiteh! chi hi'ng. Tua hun chianga a teenna satkhiaka omlou ding a, ka gawtnate zong a tunga tung lou ding hi. Ahihhanga a thilhih khempeuh ua, setaka gamtat ding kilawp lailai uhi, chi hi. 8 Tangtawn Toupa'n phuang a: Tua bang ahih mana: Kei hon na ngak dih, theihpihna thu gen dinga ka din ni ding na ngak dih. Namte kaikhawm ding, kumpigamte kaikhawm ding leh, ka thangpaihna, ka hehna lauhuai amaute tunga sungbaw dinga thutanna bawlta hi'ng. Thikthusetaka ka hehna mei in leitung bup kangtum ding hi. 9 Tua hun chianga namte khempeuh in Tangtawn Toupa' min sama a toukou nading uleh, liangkou kisutuaha amah a biak nading ua, a mukte uh siangsak ding hi'ng. 10 Kei hon bia, a kithehzak ka mite'n Kush luite' gallam apan thillatte hon puak ding uhi. 11 Tua ni chianga, a kisaktheihna uh nuamtak sate, hiai khawpi apan hawlmang ding ka hih mana, noute'n ka tunga a dikloutaka na tatleknate uh hanga maizumsaka omlou ding hi uteh. Ka mual siangthou tunga kiuangsak ngei nawn lou ding hi uteh. 12 Ahihhanga Tangtawn Toupa' min muang a genthei leh a tasamte bel na sunga nusia-a hawi ding hi'ng. 13 Israelte laka a sibang omsunte'n a diklou thil hih lou ding uh a, zuau gen lou ding uh a, a kamsung ua khemna kimu lou ding hi. Ne ding uh a, lum ding uh a, kuama'n amaute lausak lou ding hi, chi hi. 14 Zion tanu aw, la sa in! Israel aw, nakpitakin kikou in! Jerusalem tanu aw, kipak inla, nakpitakin nuam in! 15 Tangtawn Toupa'n nang hong kigawtna lamangta a, na meima hawlkhia hi. Tangtawn Toupa, Israel Kumpipa'n nang hon ompih a, hihnatna lau ngei nawnlou ding hiteh. 16 Tua ni chianga, amaute'n Jerusalem kianga: Zion aw, lau kenla, na khutte khai nengnuang ken. 17 Tangtawn Toupa na Pathian in nang hon ompih a, amah zaw hondam dinga hat hi. Nakpitakin hon kipahpih ding a, a itna-a hon daaisak vengveng ding a, na tunga nuama la sa ding hi, chi uhi. 18 Ankuangluia nopbawlnate hanga dahnate, noute apan lamang ding hing, noute adinga puakgik leh zahlakna hi ve-un. 19 Tua hun chianga, nou hon nuaisiahte khempeuh ke'n sai ding ing a, a khebaite damsak ding ing a, a kithehdalhsate kaikhawm ding hi'ng. Maizumsaka a omna gam khempeuh ua, amaute, phatna leh pahtawina pe ding hi'ng. 20 Tua hun chianga, noute hon kaikhawm ding ing a, inn hon tun ding hi'ng. Na hamphatnate uh na mitmuh mahmah ua kon piakkik chianga leitung namte khempeuh laka minthanna leh phatna hon pe ding hi'ng, Tangtawn Toupa'n chi hi.
Tangtawn Toupa ' Inn Lam ding thu
1 Kumpipa Daria' vaihawm kum, a kum nihna, a kha gukna, a ni khat ni-in, Tangtawn Toupa' thu, kamsang Hagai tungtawnin Zerubabel kiang leh Joshua kiang ah hong tung hi. Zerubabel ahih leh Shealtiel' tapa ahi a, Judah ukpipa ahi. Joshua ahih leh Jehozadak' tapa ahi a, siampilian ahi. 2 Tangtawn Toupa Vanglianpen in hiai a gen a: Hiai mite'n, Tangtawn Toupa' inn lam hun ahi nai kei, a chi uh, a chi hi. 3 Tua chiangin, Tangtawn Toupa' thu, kamsang Hagai tungtawnin hong tung a: 4 Hiai inn kisia-a a om laitaka, noute baang thuahnei innte leh inntungdal neitea na teen hun uh ahi maw? a chi hi. 5 Tuin, Tangtawn Toupa Vanglianpen in hiai a gen a: Na gamtat dan uh limtakin ngaihtuah un. 6 Khaichi tampi pawi uchin a, lah tawmchik at na hi uh. Tampi ne uchin a, lah vah lou na hi uh. Tampi dawn uchin a, lah khamtuan lou na hi uh. Tampi silh uchin a, lah lum sa tuan lou na hi uh. Sum tampi thalawh uchin a, lah ip tawvanga guan bang lei hi ahi, a chi hi. 7 Tangtawn Toupa Vanglianpen in hiai a gen a: Na gamtat dan uh limtakin ngaihtuah un. 8 Mual ah kaltou unla, sing va la unla, inn lam un. Tua ka kipahpih ding a, tuachi-in, noute'n thupina kei non pe thei ding uh, Tangtawn Toupa'n a chi. 9 Tampi na lamen uh a, ahihhangin tawmchik hong suak maimah. Inn na hon tutte uh ken ka na mutmang hi. Banghang hiam? Michih noumau' inn tek lamin na vialtai uh a, kei inn sesa-a a om man ahi, Tangtawn Toupa Vanglianpen in a chi. 10 Tua ahih manin, noute hangin vaan in daitui a lentaang a, lei in gahsuah ding a lentaang hi. 11 Ahang bel, gamte, mualte, hai gahte, zu thakte, sathau leh lei gahte khempeuh, mihingte leh gantate leh a sepgimnate uh tung ah keima'n keuna ka samkhia-a ahi, a chi hi. 12 Tuachi-in, Shealtiel' tapa Zerubabel leh Jehozadak' tapa, siampilian Joshua leh a suaktasunte khempeuh in, Tangtawn Toupa, a Pathian uh thu leh kamsangpa Hagai' thupuak a mang uhi, Tua bel Tangtawn Toupa, a Pathian un a sawl ahih man ahi. Tuachi-in, mipite'n Tangtawn Toupa a lauta uhi. 13 Tua chiangin, Tangtawn Toupa' thupawpa Hagai in mipite kiang ah, Tangtawn Toupa' thupuak hiai a gen a: Noute kon ompih, chi-in Tangtawn Toupa'n a gen hi, a chi hi. 14 Tua chiangin, Tangtawn Toupa'n Shealtiel' tapa Judah ukpipa Zerubabel' lungsim leh Jehozadak' tapa, siampilian Joshua' lungsim leh a suaktasunte' lungsim a tokthou hi. Amaute hong kuan uh a, Tangtawn Toupa Vanglianpen a Pathian uh inn a lam panta uhi. 15 Inn a lampat ni uh bel, Kumpi Daria vaihawm kum, a kum nihna, a kha gukna, a ni sawmleli ni ahi.
Inn Thak Thupina
1 Tuin, a kha sagihna, a ni 21 ni a hong hita. Tangtawn Toupa' thu, kamsang Hagai tungtawnin hiai hong tung a: 2 Shealtiel' tapa, Judah ukpipa Zerubabel leh Jehozadak' tapa, siampilian Joshua leh a suaktasunte kiang ah thu gen in. 3 Nidang laia hiai inn thupina mu, noute lak ah kua a dam lai a? Tuin, hiai pen bangchi na sa ua? Thulim lou na sa uhia? 4 Tangtawn Toupa'n: Hita mah leh tuin, Zerubabel aw, thahat suah in, hon ompih hi'ng chi-a Tangtawn Toupa Vanglianpen in phuang hi. 5 Noute Aigupta apan nong paikhiak lai ua, noute tawh kala ka thukhun bangbangin thu mang un. Ka Kha noute lak ah a omden hi, lau kei un, chi-in Tangtawn Toupa'n a phuang hi. 6 Tangtawn Toupa Vanglianpen' thugen hiai ahi: Sawtlou nung chiangin vaante leh lei, tuipi leh gamhul khatvei ka kungsin lai ding hi. 7 Ahi, namte khempeuh ka lingsak ding. Namte' lunggulh hong tung ding a, thupinain hiai inn ka dimsak ding hi, chi-in Tangtawn Toupa Vanglianpen in a phuang hi. 8 Ngunte keia ahi a, khamte kei-a ahi, chi-in Tangtawn Toupa Vanglianpen in a phuang hi. 9 Hiai inn nunung' thupina in inn masa' thupina a khup ding, chi-in Tangtawn Toupa Vanglianpen in a phuang hi. Tua chiangin, hiai mun ah muanna ka pe ding hi, chi-in Tangtawn Toupa Vanglianpen in a phuang hi, chi in, a chi hi.
Aninsa Mite Vualzawlnate
10 Tuin, Daria' vaihawm kum, a kum nihna, a kha kuana, a ni 24 ni ahita. Tangtawn Toupa' thu, kamsang Hagai tungtawnin hong tung hi: 11 Tangtawn Toupa Vanglianpen in hiai a gen: Dan in bang gen hiam, siampite dong un: 12 Mi khatpeuh in a puansilh mong ah, kithoihna sa siang tuunin pua henla, tua puan mong in tanghou hiam mehtui alhuan hiam, zu hiam, sathau hiam, ahih kei leh, an dang himhim hiam sukha taleh, tua an a sukkhak pen a siangthousak diam? a chi hi. Siampite' dawnna bel, I ii, chih ahi. 13 Tua chiangin, Hagai in: Mi khatpeuh in siluang sukha-in, a sianlouhna in hibang an khat peuh sukha taleh, tua an sianglou a suak diam? a chi hi. Siampite' dawnna bel, He, sianglou suak mah, chih ahi. 14 Tua chiangin, Hagai in a dawng a, Tangtawn Toupa' mai ah hiai mite leh hiai nam tua bangbanga niin ahi uh. A khut nasep peuhmah uh, kithoihna thil a piak peuhmah uh a niin, chi-in Tangtawn Toupa'n a phuang hi, a chi hi. 15 Tangtawn Toupa' tempul suangphum kiphum a, suang khat tunga suang dang a kilepni ma thu, tuni-in limtakin ngaihtuah un. 16 Mi'n nidang laia buh, tehna 20 a neihna ah tuin tehna sawmkhat kia a om, Mi'n grep sukna muna tehna 50 a dipkhiakna ah, tuin tehna 20 kia a om. 17 Na khut ngakna peuhmah uh ka keusak a, ka apsak a, gial ka hihsesak. Hinapi-in ka kiang ah nong kik kei uh, chi-in Tangtawn Toupa'n a phuang hi. 18 Tuni, a kha kuana, a ni sawmleli ni apan, na lungtangun limtakin ngaihtuah un. Tangtawn Toupa' tempul suangphum a kiphum ni, na lungtangun ngaihtuah un. Limtakin ngaihtuah un: 19 Buhbuk ah buhchi a om lai hia leh? Tu dongin, grep gui hiam, theipi kung hiam, mimthei kung hiam, ahih kei leh oliv kung hiam in gah a suah kei hi. Hinapi-in, tuni apanin noute kon vualzawl ding hi, chi-in Tangtawn Toupa'n phuang hi, a chi hi.
Zerubabel, Toupa' Suainamna Zungbuh
20 Tua kha, a ni 24 ni-in, Tangtawn Toupa' thu Hagai kiang ah, a nihveina hong tung hi: 21 Judah ukpipa Zerubabel kiang ah thu gen inla: Vaante leh lei kungsin ding ka hi, 22 ahi, kumpitutphahte khuplet ding ing a, namte' kumpigam thahatnate hihse ding ka hi. Kangtalaite leh a hawlte khuplet ding ka hi. Sakolte leh a tungtuangte puk ding uh a, mi chih a sanggampa' namsau-a satlup hi ding hi. 23 Tangtawn Toupa Vanglianpen in: Tua ni chiangin, Shealtiel' tapa, ka nasempa Zerubabel aw, nang kon la ding a, ka suainamna zungbuh bangin kon bawl ding. Tua bel, nang kon teel man ahi, chi-in Tangtawn Toupa Vanglianpen in a phuang hi, chi in, a chi hi.
Tangtawn Toupa kianga Kik dinga Sapna
1 Daria' vaihawm kum, a kum nihna, a kha giatna-a kamsang Zekharia kianga Tangtawn Toupa' thu hong tung hiai ahi. Zekharia bel Berekia' tapa ahi a, Berekia lah Ido' tapa ahi. 2 Na pu na pate uh tung ah Tangtawn Toupa a na heh mahmah hi. 3 Tua ahih manin amaute kiang ah thu gen inla: Tangtawn Toupa Vanglianpen in hiai a gen a: Ka kiang ah hong kik unla, na kiang uah kong kik ding, Tangtawn Toupa Vanglianpen in a chi. 4 Na pu na pate uh bangin om kei un. Kamsang masate'n amaute kiang ah: Na gamtat giloute uapan leh na thilhih giloute uapan lunghei un, ana chi uh a, ahihhangin, kei hon thudon kei uh a, hon ngaikhe kei uh, Tangtawn Toupa'n a chi, a chi uhi. 5 Tuin, na pu na pate uh koia omta uhiam? Tua kamsangte zong a nungtaden ua hiam? 6 Kamsang ka silate kianga ka thugente leh ka thusehte'n na pu na pate uh a delhpha keia hiam? Tua hun laiin amaute lunghei uh a: I gamtatna leh i thilhihte'n a lawhtak bangbangin, Tangtawn Toupa Vanglianpen in a tup bangtakin i tung ah a hihta, chi 2 Khang uhi, chi in, a chi hi.
Sakolte Muhna
7 Daria' vaihawm kum, a kum nihna, a kha sawmlekhatna, tua Shebath kha-in, Tangtawn Toupa' thu kamsang Zekharia kiang hong tung hi. Zekharia bel Berekia' tapa ahi a, Berekia lah Ido' tapa ahi. 8 Zankhangin mengmuh ka mu a, ka mai ah sakol san tunga tuang mi khat a om hi! Amah kuam sung khata martil sing lak ah a ding hi. Ama' nung ah sakol dang a san, a puang leh a kaang a om hi. 9 Ke'n: Toupa, hiaite bang ahi ua? chi-in ka dong hi. Kei hon houpih tua vansawltak in hon dawng a: Bang ahi uhiam nang kon lak ding, a chi hi. 10 Tua khitin, martil sing laka dingpa'n hon hilhchian a: Amaute ahih leh, Tangtawn Toupa'n leitung tawnsuak dinga a sawlte ahi uh, a chi hi. 11 Amaute'n Tangtawn Toupa' vansawltak, tua martil sing laka dingpa kiang ah thu a tun uh a: Koute'n leitung ka tawnsuakkhinta uh a, leitung bup galmuangin a om khipkhep hi, a chi uhi.
Tangtawn Toupa'n Zion Khamuan ding
12 Tua khitin, Tangtawn Toupa' vansawltak in: Tangtawn Toupa Vanglianpen aw, Jerusalem leh Judah gam khawpite tung ah kum 70 sung vengveng na hehta a, bang tanvei zahngaihna lentaang lai ding na hia? a chi hi. 13 Tuachi-in, Tangtawn Toupa'n tua kei hon houpih vansawltak kiang ah chitna leh hehnepna thu a gen hi. 14 Tua khitin, tua kei hon houpih vansawltak in ka kiang ah: Hiai thu phuangzak in: Tangtawn Toupa Vanglianpen' thugen hiai ahi: Jerusalem leh Zion ka gupluat manin ka thikthu se mahmah a, 15 ahihhangin, galmuang kisa nam dangte tung ah ka heh mahmah hi. Ka mite tunga ka hehna ka ki-ip tentan laiin, namdangte'n amaute' gimna nasesak semsem uhi. 16 Tua ahih manin, Tangtawn Toupa'n hiai gen hi: Zahngaihna tawh Jerusalem kianga kik ding ing a, tua-a ka inn kilam thak ding hi. Jerusalem tung ah tehna khau kizan ding hi, chi-in Tangtawn Toupa Vanglianpen in gen hi. 17 Tua baan ah, Tangtawn Toupa Vanglianpen in hiai gen a: Ka khawpite niang leh taiin om ding a, Tangtawn Toupa'n Zion khamuan ding a, Jerusalem teel ding hi, chi-in phuang lai in, a chi hi.
Kite Muhna
18 Tua khitin, khawdaka ka et leh, ka mai ah ki li a om hi! 19 Ke'n bel hon houpihpa tua vansawltak kiang ah: Hiaite bang ahi ua? chi-in ka dong hi. Ama'n hon dawng a: Hiai kite ahi Judah leh Israel leh Jerusalem thehthanggawpte, a chi hi. 20 Tua khitin, Tangtawn Toupa'n khutsiam mi li hon lak hi. 21 Ke'n: Hiaite bang hih dinga hong pai ahi ua? chi-in ka dong hi. Ama'n hon dawng a: Hiai kite ahi kuama'n a lutang a phot zawh nawn louh nadinga Judah thelthangte. Ahihhangin, Judah mite thehthang dinga Judah gam dou dinga a kite uh liksang namte' kite lausak ding leh lawnthal dinga hiai khutsiam mite hong kuan ahi uh, a chi hi.
Tehna Khau Muhna
1 Tua khitin, khawdaka ka et leh, ka mai ah tehna khau tawi mi khat a om hi! 2 Ke'n: Koia hawh dek na hia? chi-in ka dong hi. Ama'n hon dawng a: Jerusalem bangzaha za a, bangzaha sau hiam chih thei dinga hong kuan ka hi, a chi hi. 3 Tua khitin, kei hon houpih tua vansawltak a paikhia a, vansawltak dang khat amah tuak dingin hong pai a, 4 amah kiang ah: Taai inla tua tangval kiang ah va hilh in: Jerusalem zaw a sunga a mihing leh ganta a tam luat mana kulhbaang neilou khawpi hong hi ding ahi. 5 Keimah mah a kimkot ah meikuang kulhbaang ka hi ding a, a sunga a thupina ka hi ding, Tangtawn Toupa'n a chi.
Zion' Lungnopna
6 Kisa un! Kisa un! Mallam gam apan tai un, chi-in Tangtawn Toupa'n a phuang. Ahang bel, vaan huih lite ah noute kon thehthang khinta, chi-in Tangtawn Toupa'n a phuang hi. 7 Zion aw, kisa in! Babulon' Tanu-a teengte aw, taikhia un! 8 Ahang bel, Tangtawn Toupa Vanglianpen in hiai gen a: Ama'n kei hon pahtawi khitin, nang hon lok namte dou dingin kei hon sawl khitin ahang bel, nang hon dou peuhmah a mitnauta dou hiven 9 keima'n amaute tung ah khut ka kha ngeingei ding a, a silate un amaute a lokta ding uh. Tua hun chiangin, Tangtawn Toupa Vanglianpen in kei hon sawl, chih na thei ding uh. 10 Zion' Tanu aw, awng inla, kipak in. Ahang bel, kei hong pai ding ing a, na lak ua teeng ding hi vengin, chi-in Tangtawn Toupa'n phuang hi. 11 Tua ni chiangin, nam tampite Tangtawn Toupa tawh a kizomta ding uh a, ka mite hong hi ding uh. Noute lak ah ka teeng ding a, Tangtawn Toupa'n kei hon sawl, chih na thei ding uh. 12 Tangtawn Toupa'n gam siangthoua a tantuan dingin, gouluahin Judah luah ding a, Jerusalem teelkik ding hi. 13 Mi khempeuh aw, Tangtawn Toupa' mai ah dai didein om un. Amah a teenna mun siangthou apan hong paikhia hi, a chi hi.
Siampilian Muhna
1 Tua khitin, siampilian Jeshua, Tangtawn Toupa' vansawltak' maia ding a, amah hek dinga a taklama Setan ding tawh hon ensak hi. 2 Tangtawn Toupa'n Setan kiang ah: Tangtawn Toupa'n nang hon taai hi. Setan aw, Jerusalem teelpa Tangtawn Toupa'n nang hon taai hi! Hiai mipa meikhuk apan dawhkhiak singkhuah kuang hilou ahi hiam? a chi hi. 3 Jeshua bel puan niinpi silhin tua vansawltak' mai ah a ding hi. 4 Tua vansawltak in a maia dingte kiang ah: A puansilh niinpite suahkhiaksak un, a chi hi. Tua khitin, ama'n Jeshua kiang ah: En in, na khelhna ka lamangta a, puansilh manphate kon silhsak ding, a chi hi. 5 Tua khitin, ke'n: Dialkhip siang amah khimsak un, ka chi lai hi. Tuachi-in, Tangtawn Toupa' vansawltak a kianga a din laitakin, dialkhip siang amah a khimsak uhi.
Hong Pai ding Kahiang Sel
6 Tangtawn Toupa' vansawltak in hiai mawhpuakna Jeshua a guan hi. 7 Tangtawn Toupa Vanglianpen in hiai a gen a: Ka lampite tawna na pai a, ka ngiat bangbang na zuih leh, ka innsung vai na hawm ding a, ka inn huangsung ah thu na nei ding a, hiaia dingte lak ah mun kon pe ding. 8 Siampilian Jeshua aw, nang leh na maia tu na seppihte'n thu ngai un. Amaute, thil hong tung dingte chiamtehna lim hi uhi. Ka sila, tua Kahiang Sel hon sawlkhe ding hi'ng. 9 En un, Jeshua' maia ka koih suang! Tua suang in mit sagih nei a, tua suang tung ah laigelh khuakthawh koih ding ing a, nikhat thu-a hiai gam khelhna lamang ding hi'ng, chi-a Tangtawn Toupa Vanglianpen in gen hi. 10 Tua ni chianga, noute tek a grepgui leh a theipikung nuaia tu dinga a innveng chial ding hi, chi-a Tangtawn Toupa Vanglianpen in phuang hi, a chi hi.
Meivak Mung leh Oliv Singkung Nih
1 Tua khitin, kei hon houpih tua vansawltak ka kiang ah hong kilehkik a, ihmu phawn bangin kei hon phawng hi. 2 Ama'n ka kiang ah: Bang na mu a? hon chi hi. Ke'n ka dawng a: Kham sik sianga kibawl meivak mung khat, a dawna meivaktui koihna belkuang khat om a, meivak sagih leh meivak gui sagih tawh kithuah ka mu. 3 Tua baan ah, a kianga oliv singkung nih om a, tua meivaktui koihna belkuang taklam ah khat, a veilam ah khat om ka mu hi, ka chi hi. 4 Kei hon houpih tua vansawltak kiang ah: Toupa, hiaite bang hi hiam? chi-in ka dong hi. 5 Ama'n hon dawng a: Hiaite bang ahia, chih thei lou na hi maw? hon chi hi. Ke'n: Thei lou, toupa, chi-in ka dawng hi. 6 Tuachi-in, ama'n ka kiang ah: Hiai maw, Tangtawn Toupa'n Zerubabel kianga a thugen ahi ve: Thahatna hi louin, vangletna zong hi louin, ka Kha pansanin ma na tun zou ding, Tangtawn Toupa Vanglianpen in chi hi. 7 Mual sangpi aw, nang bang na hi leltak a? Zerubabel' mai ah munzang suak ding hi teh. Tua hun chianga, Pathian in vualzawl hen! Pathian in vualzawl hen! chi-a kikou aw tawh ama'n a tungkhupna suang hon lakhe ding hi, a chi hi. 8 Tua khitin, Tangtawn Toupa' thu ka kiang ah hong tung a: 9 Zerubabel khutte'n hiai tempul suangphumte phumta a, ama' khutte mah in lamkhin ding hi. Tua hun chianga, Tangtawn Toupa Vanglianpen in na kiang uah kei hon sawl, chih thei ding hi uteh. 10 Thil peuhmah a kipat chil a neu lai kua'n a simmawh-a ahia? Zerubabel' khuta ulum khau a muh chiangua, mite lungnuam ding uhi. Hiai Tangtawn Toupa' mit sagihte bel leitung bup ensuakte ahi, a chi hi. 11 Tua khitin, tua vansawltak kiang ah: Tua meivakmung taklam leh veilama oliv singkung nihte bang hi hiam? chi-in ka dong hi. 12 Tua baan ah, kham meivaktui a luangkhesak tua khamgui kianga oliv kahiang sel nihte bang hi hiam? ka chi lai hi. 13 Ama'n hon dawng a: Hiaite bang hi hiam chih thei lou na hi maw? hon chi hi. Ke'n: Thei lou, toupa, ka chi hi. 14 Tuachi-in, ama'n: Hiaite maw, leitung bup' Toupa' nasem dinga thau kinilh nihte ahi ve, a chi hi.
Laibuzial Lengthei
1 Tua khitin, ka dakkhiak leh, ka mai ah laibuzial leng lai a om hi! 2 Tua vansawltak in ka kiang ah: Bang na mu a? hon chi hi. Ke'n ka dawng a: Laibuzial leng lai ka mu, tong 20-a sau, tong 10-a za ahi, ka chi hi. 3 Ama'n ka kiang ah: Gam sung tenga paisuak hamsia hiai ahi a, pang langkhata kigelh bangin, guta peuhmah a kihawlmang ding a, a pang lehlam panga kigelh bangin, zuauthu-a kichiam peuhmah a kihawlmang ding. 4 Tangtawn Toupa Vanglianpen in: Tua hamsia sawlkhe ding ing a, gutate' inn ah lut ding a, ka min siala zuauthu-a kichiamte' inn ah lut ding hi. Tua inn sung ah omden ding a, a sing leh a suangte tawh kangtum ding hi, chi ahi, chi-in hon hilh hi.
Seng sunga Numei
5 Tua khitin, kei hon houpih tua vansawltak hong paikhia a, ka kiang ah: Hiai hong kilang bang hi hiam, en in, hon chi hi. 6 Ke'n: Bang ahia? chi-in ka dong hi. Ama'n hon dawng a: Tehna seeng ahi, a chi hi. Tua baan ah, gam sung tenga mite' khelhna hiai ahi, a chi hi. 7 Tua khitin, a ngensik sin a kihong a, tua seeng sung ah numei khat a natu hi. 8 Tua vansawltak in: Hiai gitlouhna ahi, a chi a, seeng sung ah a sawntumkik a, a gong tung ah a ngensik sin a khupkhumsuk hi. 9 Tua khitin, ka dakkhiak leh, ka mai ah numei nih, a kha tung ua huih om, a om uhi! Vakengsang kha bang kha a nei uhi. Amaute'n lei leh vaan kal ah tua seeng a khaitou uhi. 10 Kei hon houpih tua vansawltak kiang ah ke'n: Tua seeng koia paw dek uh hiam? chi-in ka dong hi. 11 Ama'n hon dawng a: Tua gitlouhna' inn ding lam dingin Babulon gama paw dek uh ahi. A lamkhit chiangun tua seeng ama' mun ding ah a kitung ding hi, a chi hi.
Kangtalai Lite
1 Tua khitin, ka dakkhiak leh, ka mai ah sumsan mual nih kal apan hong paikhia kangtalai li a om hi! 2 Kangtalai khatna sakol sante'n a kai a, a nihna a vomte'n, 3 a thumna a kaangte'n, a lina a puangte'n a kai uhi. Sakolte a hat vive ahi. 4 Kei hon houpih tua vansawltak kiang ah ke'n: Hiaite bang hi hiam, ka toupa aw? chi-in ka dong hi. 5 Tua vansawltak in hon dawng a: Hiaite vantunga kha lite, leitungbup' Toupa' omna muna a dinna uapan hong paikhia ahi uhi. 6 Sakol vomte' kaih pen mallam gama pai ding ahi. Sakol kaangte kaih pen tumlam ah, sakol puangte kaih pen simlama pai ding ahi, a chi hi. 7 Tua sakol sante a paikhiak takun, leitung maikaiha paisuak a sawm tinten uhi. Tua vansawltak in: Leitung maikaih ah paisuak un! a chi a, tuachi-in, leitung maikaih ah a paisuak uhi. 8 Tua vansawltak in kei hon sam a: En dih, mallam gama paite'n mallam gam ah ka Kha tawldamna a pia uhi, a chi hi.
Jeshua ading Kumpilukhu
9 Tangtawn Toupa' thu ka kiang hong tung a: 10 Babulon apan hong pai saltangte Heldai, Tobija leh Jedaia apan thawnpiak ngun leh khamte la inla, tua ni mahin Zefania' tapa Josia' inn ah hawh in. 11 Tua ngun leh khamte la inla, kumpilukhu khat bawl inla, Jehozadak' tapa tua siampilian Jeshua khusak in. 12 Amah kiang ah: Tangtawn Toupa Vanglianpen' thugen hiai ahi: Kahiang Sel chih min kivawhpa hiai ahi. Ama' mun apan selkhe ding a, ama'n Tangtawn Toupa' tempul lam ding hi. 13 Tangtawn Toupa' tempul lam dingpa amah hi a, thupina silhsakin om ding a, a kumpitutphah tunga tuin vai hawm ding hi. Tua baan ah, a kumpitutphah tung ah siampi hi ding hi. Hiai hihna nihte kilem ding hi, chi hi, chi in. 14 Tangtawn Toupa' tempula theihgigena hi dingin, tua kumpilukhu, Heldai, Tobija, Jedaia leh Zefania' tapa Helem kianga piak ahi ding. 15 Gamlapi-a omte hong pai ding uh a, Tangtawn Toupa' tempul a lampih ding uh a, Tangtawn Toupa Vanglianpen in noute kiang ah kei hon sawl, chih na thei ding uh. Tangtawn Toupa na Pathian' thu muanhuaitaka na zuih tinten leh, hiai hong tangtung ding ahi, a chi hi.
Anngolh Thu
1 Kumpipa Daria' vaihawm kum, a kum lina, a kha kuana, Kislev kha, a ni li ni-in Tangtawn Toupa' thu Zekharia kiang ah a hong tung hi. 2 Bethel khawmite'n Sharezer leh Regem Melekh leh a mite utawh Pathian' inn ah a na sawlta uhi. Amaute Tangtawn Toupa Vanglianpen' inn-a 3 siampite leh kamsangte' tungtawna Tangtawn Toupa Vanglianpen maia thu dong a: Kum tampi ka na hihtak bangin a kha ngana ah, daha suunin an ka ngawl diam? chi-a dong dinga kisawl ahi uhi.
Lepchiahna Taihilhna
4 Tua khitin, Tangtawn Toupa Vanglianpen' thu ka kiang ah hong tung a: 5 Gamsung mite kiang ah: A paisa kum 70 sung, a kha ngana leh a kha sagihna tenga an na ngolh laiun, kei hanga an ngawl na hi taktak ua hia? 6 Na nek ua na dawn chiangun, noumau kivak lei na hi kei ua hia? 7 Jerusalem leh a kim a pama khuate a galmuan lai uleh, niang leh taia a om lai uleh, Negev leh tumlam gam mualbul khawng a kiluah laia, Tangtawn Toupa'n kamsang masate tungtawna hiai thute a phuankhiak ahi keia hia? chi-in dong in, a chi hi.
Thumanlouhna Kisik ding
8 Tua khitin, Tangtawn Toupa' thu Zekharia kiang ah hong tung a: 9 Tangtawn Toupa Vanglianpen in: Diktattaka vaihawmna omsak un. Michih in a sanggam tung ah zahngaihna leh lainatna nei un. 10 Meigongte leh pabeite leh gamsung mi leh a zawngte nuaisiahin sikden kei un. Kuamah in a sanggam siat nading lungtangin gel kei un, chi ahi. 11 Ahihhangin, amaute'n a thudon kei uh a, genhakin a nungngat san uh a, bil a hum uhi. 12 A lungtangte uh meisah suang bangin a taaksak uh a, dan leh Tangtawn Toupa Vanglianpen in a Kha-a kamsang masate tungtawna a thugente a ngaikhe kei uh a, Tangtawn Toupa Vanglianpen a heh mahmah hi. 13 Amaute ka sap chiangin a ngaikhe kei uh. Tua bang ahih manin, amaute'n hon sap chiangun ke'n zong ka ngaikhe kei ding, Tangtawn Toupa Vanglianpen in a chi. 14 Namte lak ah amaute pingpeiin ka thehthang a, namte lak ah theihlouh mikhual a suak uhi. Amaute nung ah gamsung a kilawi a, a segawpta a, tua ah kuamah a paisuak kei a, kuamah lah a kik kei. Gam hoih gam nuampi kilawita hiven, a chi hi.
Israel Tundingkikna
1 Tangtawn Toupa Vanglianpen' thu ka kiang ah a hong tungkik a, 2 Tangtawn Toupa Vanglianpen' thugen hiai ahi: Zion adingin ka thikthu se mahmah a, ama' adinga ka thikthusiatna kuang hi, chi hi. 3 Tangtawn Toupa'n hibangin thu gen a: Zion ah ka kik ding a, Jerusalem ah ka teeng ding. Jerusalem, Thutak Khawpi, Tangtawn Toupa Vanglianpen' Mual, Mual Siangthou kichi ding hi, chi-a gen hi. 4 Tangtawn Toupa Vanglianpen in hiai gen a: Puteekte leh piteekte Jerusalem kongzing khawng ah tu kik ding uhi. Amaute a teektak manun chiangkhun khun tek ding uhi. 5 Tua khawpi kongzingte ah, pasal leh numei naupangte kimawlin dim ding uhi, chi-a gen hi. 6 Tangtawn Toupa Vanglianpen in hiai gen a: Tua hun chiangin, hiai mite laka sibang khawsuaksunte' mitmuhin hiai lamdang ahi mai thei. Keimah mitmuhin zong a lamdang diam? chi-a Tangtawn Toupa Vanglianpen in gen hi. 7 Tangtawn Toupa Vanglianpen in hibangin thu gen a: Ngai dih, suahlam gam apan ka mite hondam ding ing a, tumlam gam apan hondam ding hi'ng. 8 Amaute piikik ding ing a, Jerusalem ah teeng ding uhi. Amaute ka mite hi ding uh a, kei a Pathian uh hi ding ing a, amau adinga muanhuaia diktat ding hi'ng, chi hi. 9 Tangtawn Toupa Vanglianpen in hibangin thu gen a: Tangtawn Toupa vanglianpen' inn suangphum a kiphum lai a om kamsangte tungtawna thu kigen tu-a a zakha noute'n Temple a kilam theihna ding in na khut uh hatsak un. 10 Tua malamin mihing adingin thaman om lou a, gante goih man zong om lou hi. Hiai apan pawtkhete leh hong lutte adingin meima apan galmuanna om lou hi. Ke'n michih a innveng dousak hi vengin. 11 Ahihhangin, tuin zaw hiai mite laka a sibang khawsuaksunte, nidang laia bangin ka bawl nawn kei ding, chi-a Tangtawn Toupa Vanglianpen in phuang hi. 12 Ahang bel, khaichi khang hoih ding a, grepgui in gah suah ding a, lei in nek leh tak suah ding a, vaante'n a daitui kesak ding a, hiai mite laka sibang khawsuaksunte hiai thilte khempeuh goutana tangsak ding hi vengin. 13 Namte laka hamse thuak na hihtak bangun, Judah leh Israel aw, ke'n hon hondam ding ing a, vualzawlna hita ding hi uteh. Lau kei unla, na khutte uh hatsak un, chi hi. 14 Tangtawn Toupa Vanglianpen in hibangin thu gen a: Na pu na pate un hon thangpaihsak lai ua, noute tunga siatna tut ding ka tup tinten bangin, ka kizukkik kei ding, chi-a Tangtawn Toupa Vanglianpen in gen hi. 15 Tuin Jerusalem leh Judah tunga thil hoih hih tum tinten hi'ng, lau kei un. 16 Hiai thilte na hih ding uh ahi: Khat leh khat kal ah thutak gen unla, na kongpite uah thutak, dika vaihawmna leh kilemna omsak un. 17 Na innveng tung uah thilgilou sawm kei un. Zuauthu-a kichiam kilawp kei un. Hiai thilte hua ka hi, Tangtawn Toupa'n chi hi, chi hiven.
Israel Turning ding
18 Tua khitin, Tangtawn Toupa Vanglianpen' thu ka kiang ah hong tung kik a: 19 Tangtawn Toupa Vanglianpen in: Judah innkawte adingin a kha lina, a kha ngana, a kha sagihna leh, kha sawmna anngawlte' lungnopna, kipahna leh kilawpna ankuanglui hi ding hi. Tua hangin, thutakna leh kilemna it un, chi hi. 20 Tangtawn Toupa Vanglianpen in hibangin thu gen a: Mi tampite leh khawpi tampi-a teengte hong pai lai ding uh a, 21 khawpi khata teengte khawpi dang ah pai ding uh a: Tangtawn Toupa' maia paiin thuum lailai ni, Tangtawn Toupa Vanglianpen zong ni, keimah mah zong pai ding hi'ng, chi ding uhi. 22 Ahi, mi tampite leh nam hattakte, Tangtawn Toupa Vanglianpen' maia thuum dingin, Jerusalem ah hong pai ding uhi, chi hi. 23 Tangtawn Toupa Vanglianpen in hibangin thu gen a: Tua nite in pau chih leh namchih apan mi sawm pawlpawl hong pai ding uh a, Judah mi khat chiat puanak ah lenin: Pathian in nang hon ompih chih za ka hih manun, nang hon zui n'ung, chi ding uhi, chi hi.
Israel'Melmate Gawtna
1 Hiai Tangtawn Toupa thu puakgik ahi: Hadrakh gam douna puakgik hi a, Damaska tunga tung ding hi. Ahang bel, mite leh Israel namte' mit Tangtawn Toupa tunga tu hiven. 2 Tua baan ah, pii mah le uh a kigamgitpih Hamath leh Tura leh Sidon tunga tung ding hi. 3 Tura in kulh muanhuai kilam mah leh, ngun sik leivui zah khawm mah leh, khamsik kongzing nin zah khawm mah leh, 4 ngai dih, Tangtawn Toupa'n a neih a lam lamang ding a, tuipi tunga a vangletna hihse ding a, mei in kangtum ding hi. 5 Ashkelon in tua mu ding a, lau ding hi. Gaza zong dah mahmah ding hi. Toupa'n a lametna a beisak ding mana, Ekron zong dah ding hi. Gaza apan kumpipa mangthang ding a, Ashkelon kilawi ding hi. 6 Gamdang mite'n Ashdod luah ding a, Filistiate' kisaktheihna beisak ding hi'ng. 7 A kam sung uapan sisan lakhe ding ing a, a hate uh kal apan a kikhaam an lakhe ding hi'ng. Nutsiata omte i Pathiana hi ding a, Judah gam ah makaiin pang ding uhi. Ekron bel Jebuste bang ding hi. 8 Ahihhanga, ka inn bel hon doute apan hu ding hi'ng. Nuaisiahhat in ka mite zouthawh ngei nawn lou ding hi. Keima'n amaute veng ding hita vengin.
Mesia hong Pai Masakna
9 Zion tanu aw, nakpitakin nuam in! Jerusalem aw, awng in! En in, na kumpipa chingkamtakin, sabiltung tung, sabiltung nou, atalnou tunga tuangin na kiang ah hong pai. Amah diktat a, hotdamna nei hi.
Mesia hongpai Nihveina
10 Efraim apan kangtalaite lamang ding ing a, Jerusalem apan kidouna sakolte lamang ding hi'ng. Galdouna thalphel kitan ding a, ama'n namte kianga lemna phuang ding hi. A ukna, tuipi apan tuipi dong kizalh ding hi. 11 Ama'n: Nang na hih le bel, nang tawh kala ka thukhunna sisan hangin, tui om louhna kawkhuk sung apanin, na saltangte suaktasak ding hi'ng. 12 Lametna sala taang noute aw, na kulhpi uah kiknawn un. Tu mahmah in zong a leh nih hon pekik ding hi'ng. 13 Ka thalphel ka lai banga Judah laikun ing a, Efraim a thaltanga nei hi'ng. Zion aw, na tapate tokthou ing a, Grik gam aw, na tapate dousak ing a, mihat' khuta namsau banga bawl hi'ng, chi hi. 14 Tua khit chianga amaute tunga Tangtawn Toupa hong kilang ding a, a thaltangte khawphia banga lengkhe ding hi. Tangtawn Toupa Pathian in pengkul mut ding a, simlam apan pingpei tawh tonin paikhe ding hi. 15 Tangtawn Toupa Vanglianpen in amaute hum ding a, amaute'n suanglota hihsiain vualzou ding uhi. Dawn ding uh a, zukham banga humham ding uhi. Sisana maitam kite buahna belkuang banga dim ding uhi. 16 Tua ni chiangin, Tangtawn Toupa a Pathian un a mite belam bangin hondam ding hi. Amaute kumpilukhu-a suangmanphate banga a gama tesolsol ding uhi. 17 Kilawmin deihhuai na maizen un chia! Buh leh bal in a tuailaite uh taisak ding a, zuthak in a nungaknoute uh taisak ding hi, chi hi.
Judah Khawtuahna
1 Vuah nunung zuk hunin, Tangtawn Toupa kiang ah vuah ngen un, vuah pua meipi bawlpa Tangtawn Toupa ahi. Ama'n mihingte adingin vuahpite pia a, michih adingin gam ah sing leh lou pousak hi. 2 Milimte'n zuauthu gen uh a, aisansiamte'n mengmuh taklou mu uh a, mang taklouin khamuanna thu gen uhi. Tua ahihmanin, mite belam bangin vakthang uh a, a ching ding om louin, nuaisiahin om uhi. 3 Belamchingte tung ah ka hehna kuang a, belamchingte gawt ding hi'ng. Ahang bel, Tangtawn Toupa Vanglianpen in ama' belamhon, Judah innkawte kem ding a, kidouna sakolte banga bawl ding hiven. 4 Judah apan a kiu suang, amah apan puanbuk khetphim, amah apan kidouna thalphel, amah apan vaihawm thukhen mi khempeuh hong pai ding hi. 5 Amaute lah kidouna phuala buannawi sik mihatte bang hi ding uhi. Tangtawn Toupa'n amaute a ompih mana sakoltungtuangte doua zougawp ding uhi. 6 Ke'n Judah innkawte hatsak ding ing a, Jese' inkawte hondam ding hi'ng. Amaute ka lainat mana tungding kik ding hi'ng. Amaute ka pampaih ngeilouh mah bang ding uhi. Ahang bel, kei Tangtawn Toupa amaute' Pathian hivengin, amaute dawng ding hi'ng. 7 Efraimte mihat khawkheng bang hi ding uh a, zudawn banga lungnuam ding uhi. A tate un tua mu ding uh a, Tangtawn Toupa ah lungnuam ding uhi. 8 Ke'n amaute khutvan ding ing a, kaikhawm ding hi'ng. Amaute tankhe ding hivengin, nidang laia a pun bang-ua pung kik ding uhi. 9 Namte lak ah amaute na thehthangta mah leng, gam gamlapi apan kei hon thei gige ding uhi. Tua ah a tate utawh khawsuak ding uh a, hong kilehkik nawn ding uhi. 10 Aigupta apan amaute piikik ding ing a, Asuria apan amaute kaikhawm ding hi'ng. Gilead gam leh Lebanon gam ah tun ding ing a, tua ah a taak louh dongun pung ding uhi. 11 Buaina tuipi ah paisuak ding uh a, tuipi sousangte zou ding uh a, Nail luipi thukna pen dongin kang ding hi. Asuria' kisaktheihna kainiam ding ing a, Aigupta' kumpichiang bei ding hi. 12 Tangtawn Toupa ah amaute hatsak ding ing a, a min siala pai ding uhi. chi-a Tangtawn Toupa'n phuang hi.
1 Lebanon aw, na sidar singte mei in a haltum theih nadingin, na kongkhakte hong in. 2 Meilah singkung aw, sidar singkungte a puktak manin, mau tuaituai in. Singkung kilawmte kisegawp hi. Bashan tawsaw singkungte aw, mau tuaituai un, gammang singkung tamna kiphukmaita hi. 3 Belamchingte' mauna ngai un, gantatna loupamun hoihte segawpta! umpinelkai humham ngai un, Jordan gampalak hing diidiai munte segawpta!
Belamching Nihte
4 Tangtawn Toupa ka Pathian in hiai gen a: Gawh dinga chiamtehsa belamte loupamun ah gamtasak un. 5 A leite'n gou uh a, kuama'n lah amaute mawhpaih lou uhi. A zuakte'n: Tangtawn Toupa phatin om hen, kei ka hauta! chi uhi. Amaute chingte'n lah amaute hinghawi sam lou uhi. 6 Ahang bel, tua gam mite tung ah lainatna ka nei nawn kei ding, chi-a Tangtawn Toupa'n phuangta hiven. Kua peuhmah a innveng khut sung leh a kumpipa' khut sung ah ka pe ding. Amaute'n gam a nuaisiah ding uh a, ke'n lah a khut uapan amaute ka hu kei ding, chi hi. 7 Tuachi-in, gawh dinga chiamtehsa, adiakin nuaisiaha om belamte loupamun ah ka gamtasak a, tua khitin, chiangkhun nih ka la a, khat pen Deihsakna chi-in ka minvawh a, adang khat pen Kigawmna chi-in ka minvawh a, belamte loupamun ah ka gamtasak hi. 8 Kha khat sungin, belamching thumte ka paikhia hi. Belamte'n kei hon mudah uh a, ke'n zong amaute ka chimtaak a: 9 Noute' chingpa ka hi nuam kei. A sisi si unla, a mangmang mangthang un. A khawsuak sunte kinegai tuah un, ka chi hi. 10 Tua khitin, Deihsakna chi-a ka minvawh ka chiang pen ka la a, namte khempeuh tawh kala ka thukhun lakikin, tua chiang ka kuaitan hi. 11 Tua ni-in, thukhun lakkik ahi a, kei hon na en tua nuaisiahna thuak belamte'n Tangtawn Toupa' thu ahi, chih a thei uhi. 12 Ke'n amaute kiang ah: Hoihpena na theih ua leh, ka thaman hon pia un, tua bang ahih kei lelah, hon pe kei un, ka chi hi. Tuachi-in, ngun dangka 30 hon pia uhi. 13 Kei hon sakzah uh ka man kilawmtak pen, Tangtawn Toupa'n: Belvelmi' mun ah paikhia in! a chi hi. Tuachi-in, tua ngun dangka 30 ka la a, belvelmi adingin Tangtawn Toupa' inn ah ka pailut hi. 14 Tua khitin, Kigawmna chi-a ka minvawh ka chiang pen ka la a, Judah leh Israel kitanauna kitatsakin ka kuaitan hi. 15 Tua khitin, Tangtawn Toupa'n ka kiang ah: Belamching mihai' vanzat nang adingin la lai in. 16 Ahang bel, a mangte lah khawtuah lou, a noute lah zong lou, a liam a baite lah kem lou, a chidamte lah vak lou a, a thauthaute' sa ne a, a khechinte uh nangawn tolsak belamching khat gam tung ah tungkhe ding ka hi. 17 Mannabei, belamte taisan leltak belamchingmi tung a gik! Namsau in a bantha leh a taklam mit dou ding hi. A ban teemgawp ding a, a taklam mit taw bikbek ding hi, chi hi.
Jerusalem Hutkhiakna
1 Israel doua Tangtawn Toupa' thu hong tung puakgik hiai ahi: Vaante zalhpa leh mihing sunga kha bawlpa Tangtawn Toupa'n thu a phuang a: 2 En dih, Jerusalem zukhamna nouin ka bawl ding a, a kim a pama mite'n Judah leh Jerusalem a dou chiangun, ka hoisak dongdong ding. 3 Tua ni chiangin, leitung namte khempeuh in Jerusalem dou mah leh, khukkhiak vuallouh suangtumpi-in amah ka bawl ding a, khukkhiak sawmte khempeuh a gawizan vek ding. 4 Tua ni chiangin, sakol peuhmah ka lausak ding a, a tungtuangte ka haisak ding, chi-in Tangtawn Toupa'n a phuang hi. Judah innkawte ka mitin ka veng ding a, namte' sakolte' mit ka tawsak ding. 5 Tua hun chiangin, Judah makaite'n a lungtangun: Jerusalem mite zaw Tangtawn Toupa Vanglianpen a Pathian uh ahih mana hat uh ahi ve, a chi ding uhi. 6 Tua ni chiangin, Judah makaite, singkhuah lorn laka mei-am meiphu bangin ka bawl ding a, buhphal laka meisel kuang bangin ka bawl ding. A kim a pama mite khempeuh vei leh tak ah a kangtum ding uh. Ahihhangin, Jerusalem bel ama' mun ah a bit ding. 7 Tangtawn Toupa'n Judah teennate a humbit masa ding a, tuachi-in, David innkawte' thupina leh Jerusalema teengte' thupina, Judah' thupina sangin a thupi zaw kei ding. 8 Tua ni chiangin, Tangtawn Toupa'n Jerusalema teengte a hum ding a, tuachi-in, amaute' laka hatloupente zong David a bang ding uh a, David' inkawte bel Pathian a bang ding uh. 9 Tua ni chiangin, Jerusalem dou namte khempeuh hihmangthang dingin ka kuankhe ding.
Teia Dawta Ompa Suunna
10 Tua chiangin, David' innkawte tung ah leh Jerusalema teengte tung ah hehpihna leh ngetsakna kha ka sungbaw ding. Amaute'n teia a dawtpa uh kei hon en ding uh a, mi'n a tapa tang neihsun a suun bangin amah suunin khasetakin a dah ding uh. 11 Tua ni chiangin, Jerusalema kahna a nase mahmah ding a, Megido phaizanga Hadad Rimona suunna a bang ding. 12 Gam in a suun ding a, beh teng in a tuamin a suun ding a, a zite un a tuamin a suun ding uh: David' inkaw sunga beh omte leh a zite uh, Nathan innkaw sunga beh omte leh a zite uh, 13 Levi innkaw sunga beh omte leh a zite uh, Shimei behte leh a zite uh leh, 14 beh dangte khempeuh leh a zite un a tuamin a suun tek ding uh.
Khelhna apan Siansakna
1 Tua ni chiangin, David' innkawte leh Jerusalema teengte adingin, khelhna leh sian-thoulouhna apan siansak nadingin tuikhuk khat a kihong ding. 2 Tua ni chiangin, gam sung apan miliante' minte ka beisak ding a, a kitheigige nawn kei ding, chi-in Tangtawn Toupa Vanglianpen in a phuang hi. Gamsung apanin kamsangte leh sianlouhna kha ka lakhe ding. 3 Kuapeuh in kamsang thugen a gen leh, a pianna nu leh pa'n: Tangtawn Toupa' mina zuauthu na gen manin, na si ngeingei ding ahi, a chi ding uh. Kamsang thugen a gen chiangin, ama' nulepa mahmah in amah a dawt pailet ding uhi. 4 Tua ni chiangin, kamsang peuhmah in a kamsang mengmuh a zahpih ding. Mikhem nadingin kamsang puansilh, samulpuan a silh kei ding. 5 Ama'n: Kamsang ka hi kei. Louneimi ka hi. Ka tuailai apan loukhoua kivak ka hi, a chi ding. 6 Kuapeuh in: Na khuta hiai liammate bang ahia? a chih chiangin, ama'n: Ka lawmte' inn-a liamsaka ka omna ahi, chi-in a dawng ding hi.
Belamchingpa Kisaat
7 Namsau aw, ka Belamchingpa, ka Lawm ahipa dou dingin khanglou in! chi-a Tangtawn Toupa Vanglianpen in phuang hi. Belamchingpa saat in, belamte a kithehthang ding. Tua chiangin, ke'n a nou neute tung ah khut kha ding hi'ng. 8 Gamsung khempeuh ah, a sunga om sehthum suah sehnih satkhiakin om ding a, mangthang ding uhi. Sehthum suah seh khat bel nutsiat hi ding hi, chi-a Tangtawn Toupa'n phuang hi. 9 Hiai a sehthumna meikuang ah paisuaksak ding ing a, ngunsik banga entel ding hi'ng. Amaute'n Ka min samin hong toukou ding uh a, ke'n amaute dawng ding hi'ng. Ke'n: Hiai ka mite ahi, chi ding ing a, amaute'n: Tangtawn Toupa ka Pathian uh ahi, hon chi tek ding uhi.
Jerusalem Simna Nunung
1 Ngai dih, gallaak sum na kihawm hun uh Tangtawn Toupa' ni hong tung dek. 2 Ahang bel, Jerusalem dou dinga keima'n namte khempeuh kaikhawm ding hivengin. Tua khawpi kila ding a, innte kibuluh ding a, numeite kipawngsual ding hi. Tua khawpi kimkhat sala kaihmanga om ding a, a sibang khawsuaksunte kia tua khawpi apan satkhiak hi lou ding hi.
Mesia hong Pai Nihveina
3 Tua khit chianga Tangtawn Toupa kuankhe ding a, tua namte dou ding a, galsat ni-a a dou bang hi ding hi. 4 Tua ni chianga Oliv Mual khea sikin amah ding ding hi. Tua mual, Jerusalem suahlama om ahi. Tua Oliv Mual phelnih kisuah ding a, suahlam apan tumlam dongin kiphelkhap ding a, a kal ah phaizang lianpi om ding hi. Tua mual phei khat mallam ah kikhin ding a, a phei khat simlam ah kikhin ding hi. 5 Tua ka mual kal phaizanga taai ding hi teh. Tua phaizang in Azel dong sun ding hiven. Ahi, kumpipa Uzia dam laia zinlinga na taai banga taai ding hi teh. Tua banga Tangtawn Toupa ka Pathian hong pai ding a, misiangthoute khempeuh tawh hong ton ding hi. 6 Tua ni chianga khawvak om lou ding a, khawdam zong, vuuk zong om lou ding hi. 7 Ni tuam mawng khat hi ding a, sun hun zan hun om lou ding! Tangtawn Toupa' theih ni hi ding! Nitaklam hong tun chianga khua vaak ding hi. 8 Tua ni chianga Jerusalem apan tui hing luangkhe ding a, a kimkhat suahlam tuipi lam ah, a kimkhat tumlam tuipi lam ah nipi leh phalbi-in zong luang ding hi.
Mesia' Kumpigam
9 Tua ni chianga leitung khempeuha Tangtawn Toupa kumpipa hi ding a, tua ni chianga Tangtawn Toupa khat om ding a, ama' min khat mah a omsun hi ding hi. 10 Gam sung khempeuh Jerusalem simlama Geba apan Rimon dongin, Araba phaizang a bang ding hi. Ahihhangin, Jerusalem a sangtuam ding a, Benjamin kongpi apan Kongpi Khatna mun leh Akiu Kongpi dong, Hananel Innsang apan kumpi' grepkhuk dongin ama' mun ah a omden ding. 11 Tua sunga mite teeng ding a, siat dimdemna om nawn lou ding a, Jerusalem bittaka kiluah zaw ding hi. 12 Jerusalem doua sim namte khempeuh, Tangtawn Toupa'n a saat nading hiai hipi ahi ding. Khe-a a din lai nangawnun a sa uh muatkhe ding a, a mitte uh a mitkhuk sung uah muat ding a, a lei uh a kamsung uah muat ding hi. 13 Tua ni chianga Tangtawn Toupa'n launa thupitakin mite man ding a, michih in a innveng' khut man ding a, kisual ding uhi. 14 Judah in zong Jerusalem ah gal dou ding a, a kim a pama namte khempeuh' hauhna kham leh ngun leh puansilh tampi mahmah kikaikhawm ding hi. 15 Tua bang hipi mah sakolte, sakol neute, sangawngsaute, sabiltungte leh giahphuala gante khempeuh tung ah tung ding hi. 16 Tua khit chiangin, Jerusalem doua sim namte khempeuh laka a sibang khawsuaksunte, Kumpipa Tangtawn Toupa Vanglianpen be dingin leh Bawktate Ankuangluite nei dingin, kum simin Jerualem ah a kuantou ding uh. 17 Leitung mite laka kuapeuh, Kumpipa Tangtawn Toupa Vanglianpen be dinga Jerusalema kuantou lou a om leh, tuate'n vuahtui a mu kei ding uh. 18 Aigupta mite kuantou a, a va kihel kei uleh, vuahtui a mu kei ding uh. Tangtawn Toupa'n Bawktate Ankuanglui dinga kuantou loute tunga a tunsak hipi amaute tung ah a tungsak ding. 19 Hiai bel Aiguptate leh Bawktate Ankuanglui dinga kuantou lou namte khempeuh khelhna gawtna ahi ding. 20 Tua ni chiangin, Tangtawn TOUPA ADINGA SIANGTHOU chi-in sakol longte tung ah khuakthawh-in a kigelh ding. Tangtawn Toupa' inn sunga beelte, maitam maia belkuangte a bang ding. 21 Jerusalem leh Judah gama beelte peuhmah Tangtawn Toupa Vanglianpen adinga siangthou ahi ding a, kithoihna lan dinga hong pai peuhmah in tua beelte a la ding uh a, tuatein an a huan ding uh. Tua ni chiangin, Tangtawn Toupa Vanglianpen' inn ah Kanan mi a om nawn kei ding.
1 Tunung thu puakgik: Israel kianga, Malakhi tungtawna Tangtawn Toupa' thu hong tung genkholhna hiai ahi.
Jakob leh Esau
2 Tangtawn Toupa'n: Noute hon na itta hi'ng, chi hi. Ahihhanga, noute'n: Nang bangchi-in koute non na itta-a eita? chi hi uteh, chi hi. Tangtawn Toupa'n: Esau, Jakob sanggampa hilou maw? Hinapi-a, Jakob na itta ing a, 3 ahihhanga, Esau bel na mudahta ing a, ama' mualsangte na keusak hi'ng. A gam goutan gamdai sihalte kianga pia hi'ng, chi hi. 4 Edom in: Sikdenin om mah lehang, kik nawn ding hang a, mun sesate lamthak ding hi hang, chi maithei hi. Ahihhanga, Tangtawn Toupa Vanglianpen in hiai gen a: Lamthak mah le uh phelgawp ding ing a, gam gilou, Tangtawn Toupa' thangpaih gigena nam chiha om ding uhi, chi hi. 5 Israelte'n na mitun mu ding uchin a, Israel gamgi khen lampek dongin Tangtawn Toupa'n a thupina lak hen, chi ding hi uteh, chi hi.
Kithoihna Melhemte
6 Tangtawn Toupa Vanglianpen in gen a: Tapa in a pa pahtawi a, sila in a tou zahtak hi a, pa ka hih leh kei non pahtawina uh koia om ahia? tou ka hih leh, kei non zahtakna uh koia om ahia? Siampite aw, ka min simmawh noute mahmah na hi ve ua. Ahihhanga, noute'n: Bangchi-in koute'n na min ka simmawh ua eita? chi hi uteh, chi hi. 7 Tangtawn Toupa Vanglianpen in gen a: Noute'n ka maitam tung ah an niinsa na koih ve ua. Noute'n lah: Bangchi-a nang hon hihniin ka hi ua? chi lai hi uteh. Tangtawn Toupa' dawhkan simmawhhuai, na chihna uah minsesak na hive uah! 8 Kithoih nadinga gan mittaw peuh na piak uleh, thil gilou ahi kei-a hia? Gan khebai, gan zawngkhal peuh na piak uleh, thil gilou ahi kei-a hia? Na ukpipa uh kiang ah hibangte pe dih ua, a lungdam na hiam, noute hon deihsak na hiam! 9 Eite tunga hehpih a siam nadingin Pathian ngen ni, chi-in thilpiakte pe mah dih ua, na khut uapan hibang thilpiakte tawh noute hon sang na hiam, chi hi. 10 Tangtawn Toupa Vanglianpen in gen a: Ka maitam tunga a mawkna-a mei na tawh louh nadingun, tempul kongkhak khak ding noute lak ah mi khat beek om leh chi natel ing e! Noute tunga lungtai hetlou ka hi. Na khut thilpiakte uh sang lou ding hi'ng, chi hi. 11 Tangtawn Toupa Vanglianpen in gen a: Ni suahna lam apan ni tumna lam donga namte lak ah ka min lian ding hi. Namte khempeuh laka ka min lian ding a hih mana mun khempeuha mite'n ka min adinga gimnamtui leh thilpiak siangthou hon puak ding uhi, chi hi. 12 Tangtawn Toupa Vanglianpen in gen a: Noute'n: Toupa' dawhkan tawh kisaia, Hihnit hita! chi a, a an thillat tawh kisaia, Kihhuai! chi-a hihniin na hi ve ua. 13 Chimtakhuai lua! chi-a simmawhtaka na nak uh phitkhum lai uchin a, hibang hiha ka min simmawh hi uteh, chi hi. Tangtawn Toupa'n: Ganta liamsa peuh, a melhem peuh, a zawngkhal peuh, kithoih nadinga non piak chiangun, ke'n na khut uapan ka sang dia hia? chi hi. 14 Tangtawn Toupa Vanglianpen in gen a: Ganhon laka a pa hoihtak nei a, piak dinga chiamkhin napi-a, kithoih nadinga ganta melhem Toupa' maia lan zuautat mi hamsethuak ahi, chi hi. Tangtawn Toupa Vanglianpen in gen a: Kei kumpipa thupi hi ka hi, namte'n ka min a lau ding ahi, chi hi.
Siampite Taina
1 Tangtawn Toupa Vanglianpen in gen a: Tuin, siampite aw, hiai taihilhna noute ading ahi. 2 Na ngaihkhiak kei ua, ka min pahtawi ding lungtanga na neih kei uleh, noute tunga hamsia hon sawl ding ing a, vualzawlna na tante uh hamsiat ding ka hi. Ahi, kei hon pahtawi ding lungtanga na neih louh man ua vualzawlna na tante uh ke'n hamsiatkhin ka hi. 3 Ngai un, noute hanga na suan na khakte uh taai ding ka hi. Na maitang ua ek taat ding ing a, na kithoihna ganta uleh ankuangluina ekte mahmah taat ding ka hi. Tuate tawh suak leh sala kaihmanga om ding na hi uh. 4 Levi tawh kala ka thukhun a omden theih nadinga hiai tailhilhna hon peta ka hi, chih thei ding hi uteh, chi hi. 5 Tangtawn Toupa Vanglianpen in gen a: Ka thukhun zaw amah tawh kala ka khun hi a, hinna leh lungmuanna thukhun hi a, amah ka piak hi ahi. Hiai mah kei hon zahtak nading san hi a, ama'n hon zahtak ngeitak a, ka min lau hi. 6 A kama thuhilhna dik om a, a muk apan thutaklou himhim pawt lou hi. Ama'n lemna muanna leh diktatna teng tawh kei hon zui a, khelhna apan mi tampi kiheisak hi, chi hi. 7 Tangtawn Toupa Vanglianpen in gen a: Siampi' mukte'n theihna a kep a, mite'n a kam apan thuhilhna a zon ding mah hi ahi. Ahang bel, amah Tangtawn Toupa Vanglianpen' thupawpa hiven. 8 Ahihhanga, noute bel na lampialta uchin a, na sinsakna un mi tampi kipalpaisakta hi. Levi tawh kala ka thukhun buahsakta na hi uh. 9 Tua ahih mana ken zong mi khempeuh maia simmawh leh zahlaka hon koihta ka hi. Ka lampite tawn lou uchin a, deihsaktuam neia dan sinsak na hi uh, chi hi.
Judah' Lepchiahna
10 Eite'n i vekpi-in Pa khat i neikhawm kei-a hia? Pathian khat' hon siam ihi kei-a hia? Banghanga eite khat leh khat lepchiahtaka kibawl a, i pu i pate' thukhun buahsak i hi ua? 11 Judah lepchiahta hi: Israel gam sung leh Jerusalem khawpi sunga thil kihhuai hihta uhi: Judah in pathian dang' tanu kitenpihta a, Tangtawn Toupa' it mahmah mun siangthou buahsakta hi. 12 Hibang hih mi pen, a hasuanpa hi-in, a zuipa hita leh, Tangtawn Toupa Vanglianpen in Jakob puanin apan satkhia hen aw. 13 Thil dang na hih lai uh hiai ahi: Khituitea Tangtawn Toupa' maitam na kawtsak uh. Ama'n na thilpiak uh bangmaha sim loua, na khut uapan kipaka a saan nop louh mana kapa mau na hi ve ua! 14 Noute'n: Banghang hiam? chi-in na dong uhi. Ahang hiai ahi: Noute tek in ngaihtuah un. Nang leh na tuailai zi kikala kichiamna theihpihpain Tangtawn Toupa pang a, tu-a nang na thukhun zi, na koppihnu tunga na lepchiah man ahi ve. 15 Ahih leh, Tangtawn Toupa'n nihte sa khata bawl hi lou maw? Sa leh kha ah amaute amaha hi uh a, banghanga nihte sa pum khata bawl eita? Ama'n amaute apan Pathian limsak chisuan zong ahi-a ahi. Tua ahih manin, na khalam uah kiveng unla, kuamah na tuailai zi tung uah lepchiah kei un. 16 Tangtawn Toupa, Israel' Pathian in: Kimak ka hua, chi a, Mi, huhamna-a a kikhuhna, a puansilh-a a kikhuhna tawh ka hua, chi a, Tangtawn Toupa Vanglianpen in gen hi. Tua ahih manin, na khalam uah kiveng unla, na tuailai zi tung uah lepchiah kei un.
Thukhen Ni
17 Noute'n na thugen ua Tangtawn Toupa lunggimsakta na hi uh. Noute'n: Bangchi-a amah lunggimsak ka hi ua eita? na chi lai uhi. Thil gilou hihte, Tangtawn Toupa' mitmuha a hoih hi uhi, amaute tunga amah kipak hi, na chih chiang-ua amah lunggimsak na hi ve ua! Thutanga vaihawm Pathian koia om hiam? na chih chiang ua, amah lunggimsak na hi ve ua!
1 Tangtawn Toupa Vanglianpen in gen a: Ka thangkoupa hon sawl ding ing a, ama'n ka maia lampi bawlkhol ding a, na zonpa uh Toupa a tempul sunga hong pai guih ding hi. Ngai un, na lunggulh uh, tua thukhun thangkoupa hong pai ding hi, chi hi. 2 Ahihhanga, ama' hong pai ni kua'n thuakzou dinga hia? Amah zaw halsiangpa' mei bang, puansawppa sahbon bang hi ding hi. 3 Ngunsik halsiangpa leh siangthousakpa banga tu ding a, Levite siangsak ding a, kham leh ngun banga halsiang ding hi. Tua chianga amaute Tangtawn Toupa'n diktatna-a thilpiakte hon tawi ding mite nei ding a, 4 Judah leh Jerusalem' thilpiakte, tanglaia banga Tangtawn Toupa' maia namtuia san theih hita ding hi. 5 Tangtawn Toupa Vanglianpen in gen a: Tua chianga thukhen dinga noute hon naih ding ing a, aisansiamte, angkawmte leh zuaua kichiamte, sum thalawha nasemte khema neksak mite, tagah leh meigongte nelhsiahte leh gamdang mite tunga thutanga vaihawmna pe lou a, kei hon lauloute doua theihpihna thu gen pah ding hi'ng, chi hi.
Pathian Lok
6 Tangtawn Toupa Vanglianpen in gen a: Kei Tangtawn Toupa ka hi. Lepchiah-a ka zia kheng lou ka hi. Hiai hang ahi Jakob' ta noute aw, hihchimiha na om louh uh. 7 Na pu na pate uh hun lai apana, ka thusehte kiheisana zui lou hi uteh. Ka kiang ah hong kik un, na kiang uah kong kik ding, chi hi. Tangtawn Toupa Vanglianpen in gen a: Noute'n: Bangchi kik ding? na chi uhi. 8 Ahih leh, mihing in Pathian a lok dia hia? Hinapi-a, noute'n kei hon lok na hi uh. Noute'n: Koute'n nang bang kon chilawh ua eita? na chi uhi. Sawma khat leh thilpiakte ah non lok uh. 9 Kei non lawh manun, noute na nam buppi ua hon hamsiat ka hi, chi hi. 10 Tangtawn Toupa Vanglianpen in gen a: Ka inn sunga an a om theih nadingin, buhpang ah sawma khat khempeuh hon koih unla, hiai-in hon chian un. Vaan tawhlette kon hong kei na hiam. A koih nading om nawn louh donga na tung ua vualzawlna hon sung ding hi'ng. 11 Ke'n na lou haite uh leh na grepte uh hihse thei ganhingte apan hon vensak ding ing a, noute adinga gahsuah loua om lou ding uhi, chi hi. 12 Tua chianga, na gamte uh gam nuam hi ding a, namte khempeuh in, Nunnuam, hon chi ding uhi, chi hi. 13 Tangtawn Toupa'n gen a: Kei dem-a na thute uh khauh hi. Hinapi-in, noute'n: Nang dema bang gen keita ua? na chi uhi. 14 Noute'n: Pathian' nna i sep a mawkna hi. A thu i man bang phatuam hiam? Tangtawn Toupa Vanglianpen' maia sisuunte banga i om a, a deihlam i zon bang phatuam hiam? 15 A kisatheite hampha sa hang a, thil gilou hihte mavang uh a, Pathian tawngte nangawn suakta uh, chi hi hang, chi hi uteh, chi hi. 16 Tua chianga, Tangtawn Toupa kihtate kihou uh a, Tangtawn Toupa'n ngaikhia a, za hi. Ama'n amaute' maia, Tangtawn Toupa kihta a, a min pahtawite tawh kisaia theihgigena laibuzial kigelh hi. 17 Tangtawn Toupa Vanglianpen in gen a: Amaute ka gou manpha-a ka bawl ni chianga, amaute keia hi ding uhi. Mi'n a nasem a tapa a lainat banga ke'n amaute lainat ding hi'ng. 18 Tua hun chianga, noute hong kik ding uchin a, mi diktatte leh migiloute' kibatlouhna mu ding uchin a, Pathian' nasemte leh semloute' kibatlouhna mu ding hi uteh, chi hi.
Tangtawn Toupa' Ni
1 Tangtawn Toupa Vanglianpen in gen a: Ngai un, tua ni hong tung taktak ding hi. Haltuina meiphualpi banga kuang ding hi. A kisatheite, ahi, giloutaka gamtate buhpawl bang hi ding uh a, tua mei in kangtum ding hi. A hiang zong, a zung zong hawi lou ding hi. 2 Ahihhanga, ka min kihta noute adinga Diktatna Ni, a khatea hihdamna tawh hong suak ding hi. A buk apan khahkhiak bawngnoute banga pawtkhe ding uchin a, tawmvelh velh ding hi uteh, chi hi. 3 Tangtawn Toupa Vanglianpen in gen a: Hiai thilte ka hih chianga noute'n migiloute sikden ding uchin a, na khepek nuai ua vut suak ding uhi. 4 Mosi' Dan theigige un. Amah ka nasempa ka sila ahi. Horeb-a Israel khempeuh adinga amah ka piak thusehte leh thukhennate theigige un, chi hi. 5 En un, tua Tangtawn Toupa ni mulkimhuai hong tun ma-a noute kianga kamsangpa Elija hon sawl ding hi'ng. 6 Ama'n pate' lungtangte a tate uh lama kiheisak ding a, tate' lungtangte a pate uh lama kiheisak ding hi. Tua bel, hong pai a, hamsia lawh a, gam ka hihsiat louh nading ahi, chi hi.
The New Testament of our Lord and Saviour Jesus Christ
Khrist' Khangthu
1 Hiai, Jesu Khrist khangthu bu ahi. Amah David' tapa ahi a, David bel Abraham' tapa ahi. 2 Abraham in Isak a suang a, Isak in Jacob a suang a, Jacob in Judah leh a sanggamte a suang hi. 3 Judah in Tamar apanin Perez leh Zera a suang a, Perez in Hezron a suang a, Hezron in Ram a suang hi. 4 Ram in Aminadab a suang a, Aminadab in Nashon a suang a, Nashon in Salmon a suang hi. 5 Salmon in Rahab a panin Boaz a suang a, Boaz in Ruth a panin Obed a suang a, Obed in Jese a suang hi. 6 Jese in Kumpipa David a suang a, David in Uria' zi hi ngei apanin Solomon a suang hi. 7 Solomon in Rehoboam a suang a, Rehoboam in Abija a suang a, Abija in Asa a suang hi. 8 Asa in Jehoshafat a suang a, Jehoshafat in Jehoram a suang a, Jehoram in Uzia a suang hi. 9 Uzia in Jotham a suang a, Jotham in Ahaz a Suang a, Ahaz in Hezekia a suang hi. 10 Hezekia in Manase a suang a, Manase in Amon a suang a, Amon in Josia a suang hi. nJosia in Babulona saltan laiin Jekonia leh a sanggamte a suang hi. 12 Babulona saltan nungin, Jekonia in Shealtiel a suang a, Shealtiel in Zerubabel a suang hi. 3 Zerubabel in Abiud a suang a, Abiud in Eliakim a suang a, Eliakim in Azor a suang hi. 14 Azor in Zadok a suang a, Zadok in Akim a suang a, Akim in Eliud a suang hi. 15 Eliud in Eleazer a suang a, Eleazer in Mathan a suang a, Mathan in Jakob a suang hi. 16 Jakob in Josef a suang a, Josef bel Mari' pasal ahi a, Mari apanin Jesu a piang a, amah Khrist a chih uh ahi. 17 Hibang ahih manin, Abraham apan David dong khang sawmlehli ahi a, David apan Babulon saltan dong khang sawmlehli ahi a, Babulon saltan apan Khrist sawmlehli ahi. dong khang
Jesu Khrist' pianna
18 Jesu Khrist pian dan hibang ahi: A nu Mari bel Josef zi dinga kham ahi a, nupa banga a omkhawm maun, Kha Siangthou in a gaisak hi. 19 A pasal Josef bel mi diktat ahi a, tangpi' maia Mari mindaisak a ut kei hi. Tua ahih manin, a sima amah koihkhiak a sawm hi. 20 Ahihhangin, hiai thilte a ngaihtuah laiin, a mangin Toupa' vansawltak khat a kiang ah a hong kilaak a: David' tapa Josef, na zi dia Mary inna tawnpih ding saik ken. Ahangbel, a naupaai pen Kha Siangthou apan ahi. 21 Ama'n tapa a nei ding a, tua tapa in a mite, a khelhna uapan hondam ding ahih manin, a min dinga JESU na sak ding ahi, a chi hi. 22 Toupa'n kamsangpa tungtawna a gensa, a tangtun nadinga hibang tung ahi. 23 Ama'n kamsangpa tungtawnin: Ngai un, tua nungak siangthou a gaai ding a, tapa a nei ding a, a min dingin Imanuel a sa ding uh, a na chi hi. Tua min khiatna bel, Eite tawh omkhawm Pathian, chihna ahi. 24 Tua nungin, Josef a khanglou a, Toupa' vansawltak' hilh bangin a gamta a, a zi dingin Mari a pii hi. Ahihhangin, a zi in a ta masa tapa a neih mateng, a luppih kei hi. Tua tapa pian takin a min dingin JESU a sa hi.
Mipilte' Vehna
1 Kumpipa Herod' vaihawm laia Judia gama Bethlehem khua-a Jesu a pian nungin, suahlam apan mipilte, Jerusalem khua ah hong hawh uhi. 2 Amaute'n: Judate' kumpipa piang koia om ahia? Suahlam ah a aksi ka mu uh a, amah be dinga hong pai ka hi uh, a chi uhi. 3 Kumpipa Herod in hiai a zak takin patauin a lungzing a, Jerusalem khua-a miteng zong a lungzing uhi. 4 Ama'n siampi makaite leh Judate' Dan sinsakte khempeuh a samkhawm a, Khrist koia piang ding hiam, chih a dong hi. 5 Amaute'n a dawng uh a: Judia gama Bethlehem ah. Kamsangpa in: 6 Nang Judia gama Bethlehem aw, Judah ukmite lak ah neupen lou hiai na hi. Ahang bel, ka mi Israelte chinga kem ding, Ukpa khat nang apan hong piang ding hiven, chi-a na kigelh ahi, a chi uhi. 7 Herod in mipilte a simin a sam a, tua aksi hong kilat hun ngenteltakin a dong hi. 8 Tua khitin, amaute Bethlehem khua ah a sawl a: Pai unla, ngenteltakin tua naungek va zongkhia un. Ke'n zong amah ka vabiak theih nadingin, amah na muh chiangun kei hong hilh kik un, a chi hi. 9 Amaute'n kumpipa' thu a zak takun, a paita uh a, suahlama tua aksi a muh uh, tua naungek tung zawn a tun a, a khawl masiah amaute' mai ah a pai hi. 10 Amaute'n tua aksi a muh takun, nakpitakin a lungnuam uhi. 11 Tua inn sung a valut takun, tua naungek, a nu Mari tawh a vamu uh a, bokin amah a bia uhi. Tua khitin, a goubawmte uh a hong uh a, thawnpiakte a pia uhi. A thawnpiakte uh bel kham leh gimnamtui begawte leh murate ahi. 12 Herod kianga kik nawn lou dinga Toupa' vansawltak in amaute manglama a hilh manin, lampi tuam ah, a gam lam uh a zuanta uhi.
Aigupta Gama Taaina
13 Amaute paikhit nungin, ngai in, Toupa' vansawltak, Josef kiang ah, a mangin hong kilaak a: Dingkhia inla, naungek leh a nu tonpih inla, Aigupta gam ah taai in. Herod in naungek thah dinga zong dek a hih manin, thu kon hilh mateng tua ah om in, a chi hi. 14 Tua bangin, amah a dingkhia a, naungek leh a nu a tonpih a, zankhangin Aigupta gam zuanin a kipankhia uhi. 15 Amaute, Herod sih dong tua ah a om uhi. Tua bel, Toupa'n kamsangpa' kama: Aigupta gam apan ka tapa ka samkhia, chi-a a na gen a tangtun nading ahi.
Naupangte Thahna
16 Mipilte'n amah a zekhem uh, chih Herod in a phawkkhiak takin a heh mahmah hi. Tuachi-in, mi a sawl a, Bethlehem leh a kiim gama om pasal naupang, kum nih chiang nuailam teng a thatsak hi. Hiai bel, mipilte a dotna apan a hun a suikhiak banga a hih ahi. 17 Hibangin kamsang Jeremia' gensa tangtung ahi. Ama'n: 18 Rama ah aw kiza a, kahna leh nakpi-a suunna aw hi ahi. Rakhel in a tate a om nawnlouh manun kah a, nep zawh hi lou hi, a na chi hi.
Nazareth Khua-a Jesu' Kikna
19 Herod a sih takin, ngai in, Aigupta gama Josef kiang ah, a mangin Toupa' vansawltak hong kilaak a: 20 Dingkhia inla, naungek leh a nu tonpih inla, Israel gam ah paita in. Naungek thah dinga zongte sita uhi, a chi hi. 21 Amah a dingkhia a, naungek leh a nu a tonpih a, Israel gam ah hong pai uhi. 22 Ahihhangin, Arkhelos in a pa Herod' mun luahin Judia gam ah vai a hawm, chih Josef in a zak takin, a lau a, Judia gam a tung ngam kei hi. A manga hilha a om bangin, Galili gam lam ah a kiheita hi. 23 Nazareth kichi khua khat hong tung a, tua ah a teengta hi. Hiai bel, kamsangpa kama: Amah Nazareth mi kichi ding ahi, chi-a kigen a tangtunna ahi.
Baptispa Johan
1 Tua laiin, Judia gamdai-gamkeu ah Baptispa Johan, Pathian thugenin hong pai hi. 2 Ama'n: Kisikin lunghei un, vantung kumpigam hong naita hi, a chi hi. 3 Hiai mi ahi, kamsangpa Isai tungtawna: Gamdai-gamkeua kikoupa' aw in: Toupa ading lamlian sial unla, ama' lampite tangsak un, chi hi, chi-a a na kigenpa. 4 Johan in sangawngsau mul kigan puante a silh a, savun kawnggakin a kawng a gak a, a annek lah gambe leh gamlak khuaizu ahi. 5 Tua laiin, Jerusalem khawpi apan leh Judia gam leh Jordan lui kim gam apan mite amah kiang ah hong pai uh a, 6 a khelhnate uh a pulak uh a, Johan in Jordan lui ah a maute a na baptis hi.
Baptispa Johan' Thugen
7 Ama'n ama' baptisna muna Farisaite leh Sadukaite tampi hong pai a muh takin, amaute kiang ah: Nou gulsuante! Hong tung ding thangpaihna apan taai dinga kua'n noute hon vauhilh ahia? 8 Kisika lungheina tawh kikhom gah suah ve ua. 9 Kapa uh Abraham' ahi, chi-in kingaihtuah kei un. Kon hilh ahi: Pathian in hiai suangte nangawn Abraham' suante-a dingsak thei ahi. 10 Pathian in sing bul teng ah heipi a taakta. Gah hoih suah lou singkung peuhmah a phuk ding a, meikhuk ah a khul ding hi. 11 Ke'n kisika lungheina tawh kisaiin noute tuiin kon baptis ngeitak a, ahihhangin, ka nunga hong paipa zaw kei sanga hatzaw ahi. Ama' khedap tawi taak zong hilou ka hi. Ama'n zaw Kha Siangthouin leh meiin hon baptis ding ahi. 12 Ama'n a khutin phazah a tawi a, a phual a zap siang sipsip ding a, a buhtakte buhpang ah a koih ding a, buhsite bel mei mit theilouin a haltum ding, a chi hi.
Jesu Baptisna
13 Tua nungin, Jesu, Johan' baptis dingin, Galili gam apan Jordan lui ah hong pai hi. 14 Johan in amah khaam a sawm a: Kei, nang hon baptis kul zaw ka hi, banghanga kei kianga hong pai zawsop na hia? a chi hi. 15 Jesu'n a dawng a: Tu'n lem sa teitei in, diktatna teng khempeuh hihkim nadinga hiai hih eite adingin a dik him ahi, a chi hi. Tuachi-in, Johan in lem a sata hi. 16 Ama'n Jesu a baptis khitin, tui apanin Jesu hong pai khetou pah hi. Ngai un, ama' adingin vaan hong kihong a, vakhu banga Pathian' Kha hong kumsuk a, a tunga tuang Johan in a mu hi. 17 Tua baan ah, vaan apan aw khat in: Hiai ka it ka Tapa ahi. Ama' tung ah ka lungkim mahmah hi, a chi hi.
Jesu Gilou Dinga a Kizolna
1 Tua nungin, dawimangpa' ze-et dingin, Kha in gamdai-gamkeu lam ah Jesu a paipih hi. 2 Jesu'n ni 40 leh zan 40 sung an a ngolh nungin a gil a kial hi. 3 Tua laitakin, khema zolpa amah kiang ah hong pai a: Nang, Pathian' Tapa hi vechin, hiai suangte tanghou suak dingin thu pia in, a chi hi. 4 Jesu'n a dawng a: Tanghou kiain mihingte nungta lou hi, ahihhangin, Pathian' kama thu pawt teng apan nungta zaw ding uhi, chi-a kigelh ahi, a chi hi. 5 Tua nungin, dawimangpa'n khawpi siangthou ah amah a paipih a, tempul tung vum ah a dingsak a: 6 Nang, Pathian' Tapa hi vechin, kilawnkhesuk in. Ama'n na tungthu-a a vansawltakte thu pe ding a, suang na suihkhak louh nadinga amaute'n khuta hon na dom ding uhi, chi-a na kigelh hiven, a chi hi. 7 Jesu'n a kiang ah: Toupa na Pathian ze-etin na enkhe ding ahi kei, chi-a zong kigelh ahi, a chi hi. 8 Dawimangpa'n mual sangpi tung ah amah a paipih leuleu a, leitung kumpigam khempeuh leh a thupina khempeuh a ensak hi. 9 Tua khitin, dawimangpa'n a kiang ah: Bokin kei hon be lechin, hiaite khempeuh hon pe ding ka hi, a chi hi. 10 Jesu'n a kiang ah: Setan, paimang in! Toupa na Pathian kia na biak ding, ama' nna kia na sep ding ahi, chi-a kigelh ahi, a chi hi. 11 Tuachi-in, dawimangpa'n amah a nusia a, ngai in, vansawltakte hong pai uh a, amah hong don uhi.
Jesu' Nasep Patna
12 Johan, suangkula kikhum ahi, chih Jesu'n a theih takin, Galili gam zuanin a kipankhia hi. 13 Nazareth khua nusiain Zebulun leh Naftali gama dil geia om Kapernaum khua ah a teeng hi. 14 Tua bel, kamsang Isai in a na gen a tangtun nading ahi. 15 Isai in: Zebulun gam leh Naftali gam, Jordan lui gal lama dil zotna lampi-a Zentelte tenna Galili gama 16 miallaka teengte'n vak thupitak muta uh a, sihna lim nuai gama teengte tung ah, vak hong taangta, a na chi hi. 17 Tua hun apanin, Jesu'n Pathian thu a gen panta a: Kisikin lunghei un, vantung kumpigam hong naita hi, a chi hi.
Nungzui Sap Masakte
18 Jesu, Galili dil geia a pai laitakin, unau nih, Peter kichi Simon leh a sanggampa Andru a mu hi. Amaute bel, ngabeng mi ahi uh a, dila lendenga om ahi uhi. 19 Ama'n amaute kiang ah: Kei hon zui un! Mihingte man dinga hon bawl ding ka hi, a chi hi. 20 Amaute'n a lente uh a nuse pah uh a, amah a zui uhi. 21 Amah tua apan a pai laiin, unau nih dang, Zebedai' tapa Jakob leh a sanggampa Johan a mu hi. Amaute bel a pa uh Zebedai tawh, long sunga len khuia om ahi uhi. Ama'n amaute a sam a, 22 amaute'n long leh a pa uh a nuse pah uh a, amah a zuita uhi.
Galili Gama Jesu' Nasep
Nunnopnate
Jesu'n mipi tampite a muh takin, mual pang ah a paitou a, tua ah a tu hi. A nungzuite a kiang ah hong pai uh a, 2 ama'n thu a gen a, amaute a sinsak a:
3 Khalama gentheite, vantung kumpigam amautea ahih manin, a nunnuam hi uhi. 4 Daha lungkhamte, Pathian in lungmuan ding ahih manin, a nunnuam hi uhi. 5 A lungnemte, leitung gou luah ding ahih manun, a nunnuam hi uhi. 6 Diktatna lunggulha gilkial dangtakte, Pathian in taisak ding ahih manin, a nunnuam hi uhi. 7 A zahngaitheite, amau' tunga Pathian zahngai ding ahih manin, a nunnuam hi uhi. 8 Lungtanga siangte, Pathian mu ding ahih manun, a nunnuam hi uhi. 9 Lemna bawlte, Pathian' tate chi-a kiminlawh ding ahih manun, a nunnuam hi uhi. 10 Diktatna hanga bawlsiatna thuakte, vantung kumpigam amautea ahih manin, a nunnuam hi uhi. 11 Mite'n noute hon selphou a, hon bawlsiat a, keima' hanga a dikloupi maha gilou chiteng hon siattut chiangun, a nunnuam na hi uhi. 12 Nuam unla, nakpitakin kipak un. Ahang bel, vantunga noute' pahtakman thupi ahi. Noute ma-a kamsangte zong tua banga bawlsia uh ahi.
Chi leh Meivak apan Sinsakna
13 Noute, leitung adingin chi na hi uhi. Ahihhangin, chi in a alna mansuah zenzen leh, bangchi alsak kik thei mawk ding na hi ua? Paihkhiak a, mite' chilgawp gawp ding loungalin, bangmah phattuamna neilou ahi ding hi. 14 Noute, leitung adingin meivak na hi uhi. Mual tunga khawpi om pen kisel thei lou hi. 15 Mite'n meivak dein lawh khuhkhum sam lou hi. Meivak mung tung ah tung zaw uh a, tua in inn sunga omte khempeuh vak pia hi. 16 Tua bangin, na vak uh mite' mai ah taangsak un, tua hi leh, amaute'n nna hoih na septe uh mu thei ding uh a, vantunga om na Pa uh pahtawi thei ding uhi.
Dan Tangtunsakna
17 Dan, ahihkei leh, Kamsangte' gen phiat dinga hong pai hon sa kei un. Tuate phiat ding hilouin, tangtungsak dinga hong pai ka hi zaw. 18 Noute thutak kon hilh ahi: Lei leh vaan a man masiah, Dan tungkim sipsip louin, laimal neupen nangawn, thaikawi neupen nangawn a mangthang het kei ding. 19 Tua bang a hih manin, hiai thupiakte laka neupen khat nangawn palsat a, tua bang dinga sinsak mi peuhmah, vantung kumpigam ah a neupen a kichi ding. Ahihhangin, tuate zui a, tua bang ding maha sinsak mite bel, vantung kumpigam ah a lian a kichi ding. 20 Na diktatna un Dan sinsakte leh Farisaite' diktatna a khup kei leh, vantung kumpigam na lut het kei ding uh, chih kon hilh a hi.
Tualthahna
21 Dan in tanglai mite kianga: Tuai na that ding ahi kei. Tualthat mi zaw thukhenna thuak ding din mun lauhuaia ding ahi, a chih na zata uhi. 22 Ahihhangin, ke'n zaw noute kon hilh ahi: A san a hang beipi-a, a sanggam tunga heh mi peuhmah, thukhenna thuak ding dinmun lauhuaia ding ahi. Tua baan ah, a sangam kianga: Nang miginalou mannabei chi mi peuhmah, vaihawm pawl maia din ding lauhuai dinmuna ding ahi. 22 Ahihhangin, a sanggam kianga: Nang mihai! chi mi peuhmah gawtmun mei thuak ding lauhuai dinmuna ding ahi. 23 Tua bang ahih manin, maitama na thawnpiak laan dinga na kisak lai a, na sanggam in na tunga khasiatna a neih na theih leh, 24 maitam mai ah na thawnpiak ding nuse phot in. Tua khit chiangin, na sanggam kiang ah va pai inla, amah tawh kal ah kilemna vabawl masa phot inla, tua khit chiangin hong pai inla, na thawnpiak laan in. 25 Thukhenna inna nang hon hek na langpa tawh kal ah kilemna bawl mengmeng in. Thukhenna inn zuana na pai lai nangawnin, kilemna bawl pah in. Tua banga kilemna na bawl kei leh, nang hon hekpa'n thukhenpa khut ah hon pelut ding a, ama'n mimanpa khut ah hon pelut ding a, ama'n suangkulh ah hon khumlut ding hi. 26 Kon hilh ahi, paisa san khat donga na piak kim sipsip mateng, suangkulh apan na suakta het kei ding hi.
Angkawmna
27 Dan in tanglai mite kianga: Ang na kawm ding ahi kei, a chih na zata uhi. 28 Ahihhangin, ke'n zaw noute kon hilh ahi: Etlahna neia numei en peuhmah in a lungsimin ang a kawmkhinta, kon chi ahi. 29 Tua bang ahih manin, na mit taklam in hon kipalpaihsak ding sangin, khelkhia inla, paimang in. Ahang bel, na pumpi-a meidil sunga paih na hih sangin, na pumpi kahiang khat mansuah, nang adingin a hoih zaw hi. 30 Tua baan ah, na khut taklam in hon kipalpaihsak ding sangin tankhia inla, paimang in. Ahang bel, na pumpi-a meidil sunga paih na hih sangin, na pumpi kahiang khat mansuah nang adingin a hoih zaw hi.
Kimakna
31 Tua baan ah, Dan in: A zi ma peuhmah in makna lai pia hen, a chi hi. 32 Ahihhangin, ke'n zaw noute kon hilh ahi: Angkawmna hang hiloua a zi ma peuhmah in a zi angkawmsak ahi. Maksa numei kitenpih peuhmah zong angkawm ahi, kon chi ahi.
Kichiamna
33 Tua baan ah, Dan in tanglai mite kianga: Na kichiamna palsat kenla, Toupa kianga na kichiamna tangtun teitei in, a chih na zata uhi. 34 Ahihhangin, ke'n zaw noute kon hilh ahi: Kichiam himhim kichiam kei un. Vantung sialin kichiam kei un, Pathian' kumpitutphah ahi. 35 Ahih kei leh, leitung sialin kichiam kei un, Pathian' khepek ngakna ahi. Jerusalem sialin zong kichiam kei un, Kumpipa Thupi' khawpi ahi. 36 Na lutang uh sialin kichiam kei un, na samzang khat uh zong kaangsak a, vomsak thei na hi kei uhi. 37 Ahi, na chih uh, ahi, hi henla, ahilou, na chih uh, ahi lou, hi lei hen! Hibang kaan peuhmah zaw giloupa apan ahi.
Kithukna
38 Dan in: Mit taanga mit, ha taanga ha, a chih na zata uhi. 39 Ahihhangin, ke'n zaw noute kon hilh ahi: Migilou dou kei un. Mi'n na biang taklam hon bet leh, a langkhat zong dawh in. 40 Mi'n hon hek a, na puanak hon laksak leh, na puantung silh zong pia in. 41 Mi'n mei khat pai dinga hon ngiat leh, mei nih pai in. 42 A hon ngen mi kiang ah hon nget pia in. Nang apan leitawi zong mi kiheisan ken.
Itna
43 Dan in: Na veng na pamte it inla, na meima mudah in, a chih na zata uhi. 44 Ahihhangin, ke'n zaw noute kon hilh ahi: Na melmate uh it unla, hon hamsiatte vualzawl unla, hon mudahte tung ah siam unla, hon bawlsete adingin thumsak un. 45 Vantunga om na Pa uh' tate na hih theih nadingun hiaite hih un. Ama'n zaw migiloute leh mihoihte tung ah a kibangin ni a taangsak a, mi diktatte leh mi diktatloute tung ah a kibangin vuah a zusak hi. 46 Nou hon itte kia na it uleh, bang pahtakman ngah ding neita ua? 47 Na sanggamte uh kia na pahtakun midang sanga na hih hoihzawkna uh bang a om tuan dia? Siahdongte nangawnin hibanga hih zel uh hilou maw? 48 Tua bang ahih manin, vantunga om na Pa uh a hoihkim bangin, noute zong hoihkim un!
Siamna Thilhihte
1 Mihing muh ding deiha mihing' maia na zahngaihna thilhihte uh hih lou dingin pilvang un. Hibang na hih uleh, vangtunga na Pa uh apan pahtakman na ngah kei ding uhi. 2 Tua bang ahih manin, a tasamte adinga zahngaihna thil na hih chiangun, lepchiahte'n mihing maipha zonga kikhopna inn khawng leh kongzing khawnga a hih bangun, na mai uah pengkul mut kei un. Thutak kon hilh ahi. Tua bang mite'n a pahtakman uh sangkhin tawmtawm ahi uhi. 3 Ahihhangin, tasamte adinga zahngaihna thil na hih chiangun, na khut taklam un a hih, na khut veilam un thei kei hen. 4 Tua hi leh, zahngaihna thil na hih uh, a sima hih ahi ding a, a sima thilhih mupa na Pa mahmah un a langtangin pahtakman hon pe ding hi.
Thuumna
5 Tua baan ah, na thuum chiangun, lepchiahte hih bangin hih kei un. Amaute'n zaw, kikhopna inn khawng leh kongzing khawnga ding a, mite muh dinga thuum a ut se uhi. Thutak kon hilh ahi: Amaute'n a pahtakman uh sangkhin tawmtawm ahi uhi. 6 Noute'n zaw na thuum chiangun, inndan sungnunga lutin, kong kikhakkhum unla, a sima om na Pa uh kiang ah thuum un. A sima thilhih mupa na Pa un a langtangin hon pe ding hi. 7 Na thuum chiangun, Zentelte bangin gensa gentuan tuan kei un. Amaute'n zaw gentuan tuan mana zak hi tuam ding sa uh ahi. 8 Amaute bangin om kei un. Na nget maun, na Pa un na taksap uh theikhin ahi. 9 Tua bang ahih manin, hibangin thuum un: Vantunga om koute' Pa, na min kisiangthousak hen. 10 Na kumpigam hong tung hen. Na deihlam vantunga kihih bangin, leitung ah koute hon hihsakin. 11 Koute' taksap nisim an tuni'n honpia in. 12 Koute'n zong ka leibate uh ka ngaidam bangun, ka leibatte uh hon ngaidam in. 13 Ze-etna sung ah hon piilut kenla, giloupa apan hon hukhe zaw in. Ahang bel, kumpigam leh vangletna leh thupina nanga hiden den hi. Amen, chi-in. 14 Ahang bel, noute tunga talekte na ngaihdam uleh, vantunga om noute' Pa in zong noute' tatlekna hon ngaidam ding ahi. 15 Ahihhangin, mite' tatlekna na ngaihdam kei uleh, noute' Pa in zong na tatlekna uh hon ngaidam lou ding ahi.
Anngolhna
16 Tua baan ah, an na ngolh chiangun, lepchiahte' hih bangin, dahmel pu kei un. Amaute'n zaw, an ngawl ahi uh, chih kilat nadingin, a mei uh a tuamsak uhi. Noute thutak kon hilh ahi: Amaute'n a pahtakman uh sangkhin tawmtawm ahi uhi. 17 Ahihhangin, an na ngolh chiangun, sathau kinilhin mai phiatsiang un. 18 Tuachi-in, mite'n an ngawl na hihlam uh a mu kei ding uh a, ahihhangin, a sima om na Pa un bel a mu ding a, a sima hon mupa na Pa un a langtangin pahtakman hon pe ding hi.
Hauhna
19 Noute adingin leitung ah gou kikhol kei un. Leitung zaw nget leh tuiek in a hihsiatna mun leh gutate'n a luh a, a gukna mun ahi. 20 Vantung ah gou kikhol zaw un. Vantung bel nget leh tuiek in a hihsiat louhna mun leh, gutate'n a luh a, a guk louhna mun ahi. 21 Ahang bel, na gou omna peuha na lungtang zong om ding hiven. 22 Pumpi adinga meivak bel mit ahi. Na mit a chidam leh, na pumpi a vekpi-in a taangsuak ding hi. 23 Na mit a chidam kei leh bel na pumpi a vekpi-in a mialsuak ding hi. Tua bang ahih manin, nanga om vak pen mial hi mawk leh, tua mialna nak mial nazen in chia! 24 Kuama'n tou nih' nna a semkhawm thei kei ding. Ahang bel, ama'n khat mudah a, khat it ding hiven. Ahihkeileh, khat muang dinga, khat simmawh ding hiven. Pathian' nna leh sum nna na semkhawm thei kei ding uhi.
Pathian Muanna
25 Tua bang ahih manin, noute kon hilh ahi: Na nuntakna uh tawh kisaiin, bang ne a, bang dawn ding, chi-in hiam, ahih kei leh, na pumpi utawh kisaiin, bang silh ding, chi-in lunghimawh in patau kei un. Nek leh tak sangin hinna thupizaw a, silh leh ten sangin pumpi thupizaw hi lou hiam? 26 Tungleng vasate en un. Amaute'n buh lah tuh lou, lah at lou, pang sunga lah kholkhawm lou uhi. Hinapi-a vantunga om noute' Pa in amaute vaak hi. Tungleng vasate sanga noute manphazaw tham hilou na hi umaw? 27 Noute laka kua ahia, lunghimawh mana ama' dunglam tong khat lei zong behlap thei? 28 Banghanga silh leh ten tawh kisaia lunghimawh na hi ua? Gamlak lili pakte khandan ngaihsun un. Amaute'n na sem lou, khau zong khek lou uhi. 29 Ahihhangin, Kon hilh ahi: Solomon nangawn a thupina pena a kizep hanga hiai lili pakte khat thupina zaha zep hilou ahi. 30 Tuni-a om a, zingchianga meikhuka khul ding leltak gamlak loupa bawn Pathian in tua zaha a zep leh, noute silh leh teen hon pezaw tawk lou ding hia, upna neu nei noute aw! 31 Tua bang ahih manin, Bang nein bang i dawn dia? chi-in hiam, Bang i silh dia? chi-in hiam lunghimawh kei un. 32 Zentelte'n hiaite a zong uh. Vantunga om noute' Pa in hiaite na kul uh, chih a thei. 33 Pathian' kumpigam leh ama' diktatna lunggulhin zong masa le uchin, ama'n tuate baana hiai thilte hon piak behlap ding ahi. 34 Tua bang ahih manin, zingchiang ading lunghimawh kei un. Zingchiang in amah kilunghimawh tawm na ding ahi. Ni khat adingin ni khat buai kiching mahmah lei hi.
Kidem Kigensiat Thu
1 Mi demin mawhsa kei un, dema mawhsakin na om kha ding uhi. 2 Na tehna bangbangun noute ading a kiteh ding hi. 3 Nangma' mita singtum om phawk loupi-a banghanga na sanggam' mita ninneng enen na hia? 4 Nangma' mita singtum om napi-a bangchi dana na sanggam kianga: Sanggampa aw na mita ninneng hon lakkhiaksak ning, chi thei na hia? 5 Milepchiah aw! Nangma' mita singtum lakhe masa lechin, na sanggam' mita ninneng lakkhiak ding hoihtaka mu thei ding hi teh. 6 Thil siangthou, uite pe kei un. Na kepsuangte uh zong vokte' mai ah tah sam kei un. Tua banga na hih uleh, khein tuate a chil ding uh a, tua khit chiangin kiheiin nou hon philkehgawp kha ding uhi.
Nget ding, Zon ding, Kiuh ding
7 Ngen un, piak na hi ding uh. Zong un, na mu ding uh. Kiu un, honsak na hi ding uh. 8 Ahang bel, a ngen peuhmah in ngah dinga, a zong peuhmah in mu dinga, a kiu peuhmah kihonsak ding hi. 9 Noute laka kua ahia a tapa in tanghou a nget chianga suang pe ding? 10 Ahih kei leh, ngasa a nget chianga gul pe ding? UA gilou noute nangawn in na tate uh, thawnpiak hoihte piak dan thei hive uchin, vantunga om noute' Pa in a ngente kiang ah thil hoihte hon pe tawk lou ding hia!
Dan Manpha
12 Tua bang ahih manin, mite'n na tung ua a hih ding uh na deih bangbang uh, amaute tung ah hih un. Ahangbel, hiai in Dan leh Kamsangte' gen khaikhawm hiven.
Lampi Nihte
13 Kongpi kawchik ah lut un. Manthatna kongpi za a, a lampi lian a, tua-a lutte zong tam ahi. 14 Hinna kongpi bel kawchik a, a lampi zong neu a, a mute zong tawm ahi.
Sinsakna Diklou leh a Dik
15 Kamsang takloute apan kiveng un. Amaute belamvun silhin, noute kiang ah hong pai uh a, ahihhangin, sunglam ah ngia hang duhgawl ahi uhi. 16 Amaute a gah uapanin na thei ding uhi. Mi'n khaugui lingnei apan grep gah a lou ngei ua hia? Ahih kei leh, lingkung apanin theipi gah a lou ngei ua hia? 17 Tua bang mahin, singkung hoih peuhmah gah hoihin a gah a, singkung hoihlou bel gah hoihlouin a gah nak hi. 18 Singkung hoih gah hoihlouin a gah thei kei a, singkung hoihlou zong gah hoihin a gah thei kei hi. 19 Gah hoiha gah lou singkung peuhmah Pathian in a phuk dinga, meikhuk ah a khul ding hi. 20 Tua bang ahih manin, amaute a gah uapanin na thei ding uhi.
Kumpigam Lutna Lampi
21 Ka kianga: Toupa, Toupa, hon chi na peuh vantung kumpigam lut kim lou ding a, vantunga om ka Pa' deihlam hih mi kia lut ding hi. 22 Tua ni chiangin, mi tampi in ka kiang ah: Toupa, Toupa, na mina thu gen a, na mina dawite hawlkhia a, na mina thillamdang tampi hih hilou ka hi umaw? hon chi ding uhi. 23 Tua hun chiangin, amaute kiang ah: Noute hon thei ngei ke'ng. Danbeia gamta noute! Ka kiang apan paimang un, ka chihsan ding hi.
Inlam Mi Nih Gentehna
24 Tua bang ahih manin, hiai ka thugente za a, zui mi peuhmah mipil, suangpi tunga innlam mi tawh ka teh hi. 25 Vuah hong zu a, tui hong khang a, huih hong nung a, tua inn hon nuai a, ahihhangin, tua inn, suangpi tunga kilam ahih manin, a chim kei hi. 26 Ahihhangin, hiai ka thugente za a, zui lou mi bel, mihai, sehnel tunga innlam mi tawh ka teh hi. 27 Vuah hong zu a, tui hong khang a, huih hong nung a, tua inn a nuai a, tua inn a chim a, a nak siat mahmah hi, a chi hi. 28 Jesu'n a thugen a khit takin, tua mipite'n a sinsakna lamdang a sa uhi. 29 Ahangbel, ama'n Dan sinsakte' sinsak bangin a sinsak keia, thuneihna neimi bangin a sinsaka ahi.
Phak Siansakna
1 Jesu tua mual tung apan hong paisuk takin, mipi tampi in a zui uhi. 2 Ngai un, miphaak khat a kiang ah hong pai a, a mai ah a khukdin a: Toupa, na ut peuh leh hon siangsak thei na hi, a chi hi. 3 Jesu'n a khutin a sawk a, amah a lawng a: Ka ut hi, siangta in, a chi hi. Tuachi-in, tua mipa' phaakna a siang pah hi. 4 Tua khitin, Jesu'n a kiang ah: Kuamah hilh lou dingin pilvang in. Ahihhangin, pai inla, siampi kiang ah vakilak inla, amaute kianga theihpihna hi dingin, Mosi' thupiak bangin, thawnpiak thillat valaan in, a chi hi.
Sepaih Zaheupa' Upna
5 Jesu, Kapernaum hong lut takin, sepaih zaheupa khat a kiang ah hong pai a, panpih a ngen a: 6 Toupa, ka silapa zawin inn ah a lum maimah a, a thuak gim mahmah hi, a chi hi. 7 Jesu'n a kiang ah: Kong pai ding a, amah ka damsak ding, a chi hi. 8 Sepaih zaheupa'n a dawng a: Toupa, ka inn nong lut nadingin a taak kei. Thu leltak gen lechin, ka silapa a dam ding. 9 Kei zong thunuaia om mi ka hi a, ka nuai ah sepaihte a om sawn hi. Khat kianga: Nang pai in, ka chih leh a pai a, a dang khat kianga: Nang hong pai in, ka chih leh hong pai hi. Ka silapa kiang ah zong: Hiai hih in, ka chih leh a hih mai hi, a chi hi. 10 Jesu'n hiai a zak takin, lamdang a sa a, amah zuite kiang ah: Noute thutak kon hilh ahi: Israelte lak nangawn ah hibang upnalian ka mu nai kei! 11 Noute kon hilh ahi: Suahlam leh tumlam apan mi tampi hong pai ding uh a, vantung kumpigam ah Abraham, Isak leh Jakob kiang ah a tu ding uh. 12 Ahihhangin, tua kumpigam mite bel pawlam mial laka paihkhiak ahi ding uh. Tua ah kah leh hagawi a om ding, a chi hi. 13 Tua khitin, Jesu'n sepaih zaheupa kiang ah: Paikikta in, na up bangbangin na tung ah ka hih ding, a chi hi. Tua hun laitak mah-in sepaih zaheupa' silapa a damta hi.
Peter' Sungnu Damsakna
14 Jesu, Peter' innsung hong lut takin, Peter' sungnu nattuna lum a mu hi. 15 Ama'n a khut a lawng a, a nattun a dam a, dingkhiain Jesu' nektak a bawl pah hi. 16 Nitaklam hong hih takin, mite'n a kiang ah dawimat tampi hon paipih uh a, ama'n thu kamkhatin dawite a hawlkhia a, chinate khempeuh a damsak hi. 17 Hiai bel kamsang Isai kama: Amah mah in eite' zawngkhalnate a kisuan a, eite' chinatnate a pua hi, chi-a kigen a tangtun nadinga thil tung ahi.
Nungzuih Man
18 Jesu'n a kimkota mipi tampi om a muh takin, gal khat lama pai dingin thu a pia hi. 19 Tua khitin Dan sinsakmi khat hong pai a, a kiang ah: Sinsakpa, na paina peuh ah kon zui nuam, a chi hi. 20 Jesu'n amah kiangah: Sihalte'n kua a nei a, tungleng vasate'n bu a nei a, ahihhangin, Mihing Tapa in ka lutang ngak nading nangawn mun nei lou ka hi, a chi hi. 21 Tua khitin, Jesu' nungzui dang khat in a kiang ah: Toupa, vapaia ka pa vavui phot dingin hon phal in, a chi hi. 22 Ahihhangin, Jesu'n a kiang ah: Hon zui in, misite'n a misite uh kivui uhen, a chi hi.
Huihpi Thensakna
23 Jesu, longa a tuan takin, a nungzuite'n a zui uhi. 24 Thakhatin, huihpi hat lua hong nung a, tuihualte'n long a buak hi. Jesu bel long sung ah a ihmu hi. 25 Nungzuite'n amah a phawng uh a: Toupa, koute hon hukhia in! Mangthang dek ung! a chi uhi. 26 Jesu'n amaute a dawng a: Upna neu nei noute aw, banghanga tua zaha lau na hi ua? a chi hi. Tua chi kawmin a dingtou a, huih leh tuihualte a taai a, tuate hong dai sipsip uhi. 27 Tua mite'n lamdang a sa uh a: Hiai mi bangchi mi hi peuhmah ding ahia leh, huih leh tuipi nangawn in a thu a man uh? a kichi uhi.
Dawite Hawlkhiakna
28 Jesu, dil gal khat lama Gadara gam hong tun nungin, dawimat mi nih in amah a na tuak uhi. Amaute hanmun khawng apan hong paikhia, gilou huham mahmah ahi uh a, tua lam ah kuamah a pai ngam kei hi. 29 Amaute'n: Nang, Pathian' Tapa Jesu aw, koute'n nang tawh kisaina bang nei ka hi ua? A hun tun ma-a hon sawi dinga hong pai na hi maw? a chi uhi. 30 Amaute apan gamla sim ah vokhon tampi gamta a om hi. 31 Tua dawite'n Jesu kiang ah a ngen uh a: Koute non hawlkhiat aleh, hua vokhonte sung ah hon lutsak in, a chi uhi. 32 Ama'n amaute kiang ah: Lut un! a chi hi. Tuachi-in, amaute hong pawtkhiak takun vokhonte sung ah a lut uhi. Ngaidih, tua vokhonte khempeuh dil gei kenlak ah a taisuk uh a, dil sung ah a tuaklut uh a tui ah a si uhi. 33 Tua khitin, vokchingte a tai pah vingveng uh a, khawpi ah bangkim, dawimatte tunga thil tungte tawh, a gen uhi. 34 Ngaidih, khawsung mi khempeuh Jesu tuak dingin hong paikhia uh a, amah a muh takun, amaute' gam nuse dingin a ngen uhi.
Mizaw Damsakna
1 Jesu, long sung ah a tuang a, galkhat lam tungin, ama' khawpi hong tung hi. 2 Ngaidih, mi pawlkhat in a kiang ah mizaw khat, a lupna pheka lumsain hon paipih uhi. Jesu'n amaute' upna a mu a, mizaw kiang ah: Ka tapa, khamuangtakin om in. Na khelhnate kangaidamta, a chi hi. 3 Hiai a zak takun, Dan sinsakte pawlkhat in a lung sung uah: Hiai mi in Pathian a gensia! a chi pah uhi. 4 Jesu'n a lungsung ua a ngaih-sutte uh a thei a: Banghanga na lungsung ua thil hoihlou ngaihsun na hi ua? 5 Koi ahia baihlamzaw: Na khelhnate ka ngaidamta, ka chih maw, ahih kei leh, Dingtou inla khe in pai in, ka chih? Ahihhangin, Mihing Tapa in leitung ah khelhnate ngaihdam theihna thuneihna ka nei, chih na theih nadingun, a chih kawmin, mizaw kiang ah: Dingtou inla, na lupna phek la inla, na inn ah paita in, a chi hi. 7 Amah a dingtou a, a inn a zuanta hi. 8 Mipite'n tua a muh takun, lamdang a sa uh a, mihingte kianga tua bang thuneihna pepa Pathian a pahtawi uhi.
Mathai Sapna
9 Tua khitin, Jesu tua apan a paikhia a, Mathai kichi mi khat, siahdonna buk sunga tu a mu a, a kiang ah: Kei hon zui in, a chi hi. Mathai zong a dingkhia a, Jesu a zui hi.
Farisaite' Demna
10 Jesu, Mathai' inn sunga ankuang uma a tut laiin, siahdongte leh mikhialte tampi hong pai uh a, amah leh a nungzuite tawh nekhawm takhawm dingin a tu uhi. 11 Farisaite'n tua a muh takun, a nungzuite kiang ah: Banghanga noute' Sinsakpa'n siahdongte leh mikhialte tawh nekhawm takhawm ahia? a chi uhi. 12 Jesun'n hiai a zak takin, amaute kiang ah: Chidamte'n daktor kisam lou a, chinate ahi zaw daktor kisam. 13 Ahihangin, pai unla: Zahngaihna ka lunggulh a, kithoihna ka lunggulh kei, kichi bang chihna hi hiam va sin un. Ahang bel, midiktatte sam dinga hongpai ka hi kei a, kisika lunghei dinga mikhialte sam dinga hong pai ka hi zaw, a chi hi.
Anngolhna thu-a Dotna
14 Tua khitin, Johan' nungzuite Jesu kiang ah hong pai uh a: Koute leh Farisaite'n an ngawl pahpah a, banghanga na nungzuite'n ngawl lou uh ahia? Chi-in a dong uhi. 15 Jesu'n amaute kiang ah: Moulopna-a michialte, mouneipa tawh a omkhawm sungun lungkhamin a dah thei ua hia? Ahihhangin, amaute lak apan mouneipa a kilakkhiak hun hong tung ding a, tua hun chiangin an ngawl na ve uh. 16 Kuama'n puanthak tuikhailouh themin puanluipi a thuap ngei kei. Thuap leh, puanthak them in a puanlui pen a kai kek ding a, a kekna a kek semsem ding hi. 17 Kuama'n savun thawl lui ah zuthak a thun ngei kei. Thun leh, zuthak in savun thawl lui a phu kek ding a, a zu a baw ding a, savun thawl zong a mangthang ding. Mi'n zuthak peuhmah savun thawl thaka a thun ding ahi. Hileh, zu leh a thawl a kihumbit ding hi, a chi hi.
Misisa Hinsakna
18 Jesu'n amaute kianga hiai thilte a gen laitakin, ngai in, sabiak lama makai vaihawm mi khat hong pai a, ama' mai ah a khukdin a: Ka tanu tu mahmahin a si hi. Ahihangin, hong pai inla, a tung ah na khut hong nga lechin hing ding ahi, a chi hi. 19 Jesu a dingkhia a, amah a zui a, nungzuite'n zong a zui uhi. 20 Tua laitakin, ngaidih, numei khat, kum sawmlenih sung siluanga china a nung ah hong pai a, a puanakpi mong hong lawng hi. 21 Ama'n a lungsung ah: A puanakpi lawng peuh leng ka dam ding, chi-in a ngaihsuna ahi. 22 Jesu a kihei a, amah a mu a: Tanu aw, khamuangtakin om in, na upna in hon damsak ahi, a chi hi. Tua laitak mahin tua numei a damta hi. 23 Jesu, tua sabiak lama makai vaihawm mi' inn sung ah a lut a, tamngai tumte leh kap vengvunga mi tampi omkhawm a mu hi. 24 Ama'n: Na kihem un, nungaknou a si ahi kei a, a ihmu ahi, a chi a, amaute'n bel a nuihsan maimah uhi. 25 Mipite a sawl khiak nungin, a lut a, nungaknou' khut a len a, nungaknou a thoutou hi. 26 Tua thu, tua gam sung teng ah a thangsuak hi.
Mittaw Damsakna
27 Tua mun apan Jesu a paikhiak laiin, mittaw nih in amah a zui uh a: David' Tapa, koute tung ah zahngai in! chi-in a kikou uhi. 28 Amah innsunga a lut takin, tua mittawte a kiang ah hong pai uh a, Jesu'n amaute kiang ah: Hiai hih thei dingin non um umaw? a chi a, amaute'n: He, Toupa, a chi uhi. 29 Tua khitin, ama'n a mitte uh a lawng a: Na upna uh bangbangin na tung uah tungta hen, a chi a, 30 tuachi-in, a mitte uh hong vak hi. Jesu'n bel: Hiai thu kuamah theisak kei un, chi-in khauhtakin a kham hi. 31 Ahihangin, amaute a paikhia uh a, ama' tungtang thu tua gam sung teng ah a genthangta uhi.
Pautheilou Damsakna
32 Amaute a paikhiak laiun, ngaidih, mite'n Jesu kiang ah a pautheilou leh dawimat khat hon paipih uhi. 33 Jesu'n tua dawi a hawlkhiak takin, pautheilou hong pau thei hi. Mipite'n lamdang a sa uh a: Israel gam sung ah hibang kimu ngei nai kei! a chi uhi. 34 Ahihhangin, Farisaite'n: Ama'n dawite' kumpipa mina dawite hawlkhia ahi, a chi uhi.
Vangletna Kipiaksawnna
35 Jesu bel khawpi leh khawta khempeuh tawnin a pai a, sunagogte ah a sinsak a, kumpigam tangthupha a gen a, mipite laka chinate leh natna veite khempeuh a damsak hi. 36 Ama'n mipite a muh takin, amaute a ching ding omlou, gim-le-tawla kithehdalh belamte bang ahih manun, a lainat mahmah hi. 37 Ama'n a nungzuite kiang ah: Buhlak ding tam mahmah a, nasemmi tawm hi. 38 Tua bang ahih manin, a buhlakna loua nasem ding nasemmite hon sawl dingin, buhla Toupa ngen un, a chi hi.
Sawltaklian Sawmlenihte Sawlkhiakna
1 Jesu'n a nungzui sawmlenihte a kiang ah a sam a, dawite tunga thuneihna neia hawlkhiak nading leh chinatna khempeuh leh, natna khempeuh damsak nading thuneihna amaute a pia hi. 2 Tua sawltaklian sawmlenihte' min hiaite ahi: A masapenin, Peter kichi Simon leh a sanggampa Andru. Zebedai' tapa Jacob leh a sanggampa Johan. 3 Filip leh Bartholomai, Thoma leh siahdong Mathai, Alfai' tapa Jakob leh Thaddai. 4 Kanan mi Simon leh Jesu lehbawla khawngpa Juda Iskariot.
Sawltaklian Sawmlenihte Thuhilhna
5 Jesu'n hiai sawmlenihte sawlkhia-in, thu a pia a: Zentelte lak ah hawh kei unla, Samarite khuate ah zong hawh kei un. 6 Ahihhangin, Israel innkuan apan belam mangte kiang ah hawh zaw un. 7 Na pai kawmun, Pathian thu gen unla: Vantung kumpigam hong tung dek, chi unla, 8 chinate damsak unla, misite kaithou unla, phaakte siangsak unla, dawite hawlkhia un. Manbeiin na ngah uh a, manbeiin pia un. 9 Na kawnggak uah, kham leh ngun, ahih kei leh, dai dangka zong keng kei un. 10 Na khualzinna uah, kawlzal keng kei unla, puanak, khedap zong keng thuah kei unla, chiangkhun nangawn zong keng kei un. Ahang bel, nasem mi pen nek mu taak hi ahi. 11 Khawpi hiam, khawta hiam na lut chiangun, kingakna taak mi kankhia unla, tua khua na nutsiat masiah uh, ama' inn ah kingaden un. 12 Inn khat peuha na lut chiangun, tua innkuan chibai un. 13 Tua innkuan khamuanna tang taak ahih leh, na khamuanna uh tua inn ah a teeng ding. Ahihhangin, tua innkuan khamuanna tang taak ahih kei leh, na khamuanna uh hong kilehkik ding. 14 Kuapeuh in noute hon na saan kei leh, ahih kei leh, na thugen uh a ngaihkhiak kei leh, tua inn hiam, tua khua hiam na nutsiat chiangun, na khepek uapan leivui singkhia un. 15 Noute thutak kon hilh ahi: Pathian in thu a khen ni chiangin tua khua' thuakna sangin, Sodom leh Gomora thuakna a phadawm zaw ding hi. 16 Ngai un, ngiate laka belamte bangin noute kon sawlkhia ahi. Tua bang ahih manin, gul banga pii, vakhu banga poi khoihlou na hih ding uh ahi. 17 Ahihhangin, mihingte apan kiveng un. Amaute'n vaihawm pawl khut ah hon pelut ding uh a, sunagog khawng ah hon vaw ding uhi. 18 Keima' hangin ukpipate' mai ah bang, kumpipate' mai ah bang hon dingsak ding uh. Hiai bel, amaute leh Zentelte' maia theihpihna na suah theih na ding uh ahi. 19 Ahihhangin, noute hon mat chiangun, bang gen ding, bangchi gen ding, chih lunghimawhin nei kei un. Pathian in na gen ding uh a hun takin hon pe ding. 20 Ahang bel, a thugen noute hilou a, Pa' Kha in noute tungtawna a thu gen ding hiven. 21 Sanggam in a sanggam thah dingin a khawng ding a, pa in a ta a khawng ding. Tate'n nu leh pate a dou ding uh a, a thatsak ding uh. 22 Keima' min hangin, mi khempeuh' muhdah na hi ding uh. Ahihhangin, a tawp donga thuak mualsuah mi hotdam ahi ding. 23 Hiai khawpi-a hon bawlsiat chiangun, khawpi dang ah taai un. Noute thutak kon hilh ahi: Israel gam sunga khawpi tenga na taisuak maun, Mihing Tapa kong pai nading hi. 24 A sin mi zaw a sinsakpa sanga lianzaw lou a, sila zong a toupa sanga lianzaw lou ahi. 25 A sin mi pen amah sinsakpa a bat a, sila zong a pu a bat leh, akiching hi khin ahi. Inkuan pa pen Belzebub chi uh hiven, tua inkuan sung mite chi sem lou dins uhia? 26 Tua bang ahih manin, amaute lau kei un. Ahangbel, a kihawk lou dinga kikhuh bangmah a om kei a, theih louh dinga kisel zong bangmah a om kei hi. 27 Miallaka noute kon hilh, khawvak ah gen unla, bil bula na zak uh, inntung khumvum ah phuang un. 28 Pumpi that a, hinna that theiloute lau kei un. Ahihhangin, gawtmun meia pumpi leh hinna hihmangthang khawmtheipa lau zaw un. 29 Mi'n paisa san khatin kawlgit nih a khawng uh hilou maw? Hinapi-in, na Pa uh phawk louhin kawlgit khat zong leituala ke lou ahi. 30 Ama'n na luzang ua samzangte khempeuh zong simvek ahi. 31 Tua bang ahih manin, lau kei un. Kawlgit tampi sanga manpha zaw na hi uhi. 32 Mite' maia hon gum peuhmah, ke'n zong vantunga ka Pa' mai ah ka gum ding a, 33 mite' maia hon kilepsan peuhmah, ke'n zong vantunga ka Pa' mai ah ka kilepsan ding. 34 Leitunga lemna tun dinga hong pai hon sa kei un. Lemna tun dinga hong pai ka hi kei a, namsau lengsak dinga hong pai ka hi zaw hi. 35 Ahang bel, Pasal a pa dousak ding, tanu a nu dousak ding, mou a pasal' nu dousak dinga hong pai ka hi. 36 Mihing' meima zaw ama' innsung mite mah ahi ding hi. 37 A pa hiam, a nu hiam, kei sanga it zaw peuhmah ka mi hi taak ahi kei. 38 Ama' khros pua-a hon zui lou peuhmah zong ka mi hi taak ahi kei. 39 A hinna ngah mi in a mansuah ding a, keima' hanga a hinna mansuah mi in a ngah ding. 40 Noute hon sang mi in kei hon sang ahi a, kei hon sang mi in kei hon Sawlpa sang ahi. 41 Kamsang khat peuh, kamsang a hihna mina sang mi in kamsang pahtakman a sang ding. Midiktat khat peuh midiktat a hihna mina sang mi in midiktat pahtakman a sang ding. 42 Hiai mi neute khat peuh kianga, ka nungzui hihna mina dawn ding tui sik nou khat lei tak pemi peuhmahin a pahtakman a mansuah kei hiai ding, a chi hi.
Jesu leh Baptispa Johan
1 Jesu'n a nungzui sawmlenihte a thuhilh khitin, a khawpite ua sinsak ding leh thugen dingin tua mun a nusia hi. 2 Johan in Khrist' nasepte suangkul apan a na zak takin, a nungzuite nih a sawl a, 3 amah kiang ah: Hong pai dingpa na hi hia, ahih kei leh, mi dang na ngak lai ding ka hi uhia? a chisak hi. 4 Jesu'n a dawng a: Pai unla, na zakte uleh na muhte uh Johan hilh unla: 5 Mittawte'n khua mutheita, khebaite paitheita, phaakte siansak hita, nangongte'n zatheita, misite kaihthawh hita, gentheite'n tangthupha zata. 6 Keima hanga kipal lou mi, mi nunnuam ahi, chi-in vagen un, a chi hi. 7 Johan' nungzuite a paikhiak takun, Jesu'n mipite kiang ah Johan tungthu a gen a: Bang mu nuama gamdai-gamkeua vapai na hi ua leh? Pumpeng huihmut liing en ding in maw? 8 Ahih kei leh, bang mahmah mu nuama vapai na hi ua? Puan hoih silh mi maw? Puan hoih silh mite zaw kumpi' innsung khawnga om eive. 9 Bang mahmah mu nuama vapai na hi ua? Kamsang mi maw? Ahi tawk vele! Noute kon hilh ahi: Amah zaw kamsang mi sanga thupizaw ahi ve. 10 Hiai mi ahi a tungthu hibanga kigelhpa: Ngai in, na maia ka thangkou sawl ding ing a, ama'n na maia na lampi bawlkhol ding hi, chi-a kigelh ahi. 11 Noute thutak kon hilh ahi: Numei apan piang lak ah Baptispa Johan sanga thupi zaw mi a piang ngei nai kei. Ahihhangin, vantung kumpigama neupen nangawn amah sangin a thupi zaw hi. 12 Baptispa Johan' dam lai apan tuni dongin, vantung kumpigam in hiamgamna a thuak a, hiamgamte'n thagumin a la uhi. 13 Ahang bel, Johan hong kilat dongin, kamsangte leh Dan in na genkhol khinta hiven. 14 Tua na saan nop uleh amah ahi hong pai ding Elija. 15 Zak nading bil nei peuh in zata hen!
Mite' Thudonlouhna
16 Tulai khanga mite bang tawh hon teh ding ka hia? Sumsinna muna tu a, a lawmte uh sam a: 17 Tamngai hon tumsak ung a, lam lou uchin a, dahla hon saksak ung a, lah kap tuanlou uchin a, a chi naupangte bang na hi uhi. 18 Ahang bel, Johan hong pai a, ne lah nelou, dawn lah dawn louin a om a, amaute'n: Dawizawl eive, a chi uhi. 19 Mihing Tapa kong pai a, ka ne a, ka dawn a, amaute'n: En un, anhaipa, zuhaipa siahdongte leh mikhialte' lawmpa! hon chi zel uhi. Ahihhangin, pilna zaw a thilhihte khempeuh in dik a tangsak hi, a chi hi.
Lunghei Nuamlou Khawpite Tunggikna
20 Tua khitin, Jesu'n thillamdangte a hih tamna pen khawpite kisika a lunghei noplouh manun a taai a: 21 Korazin, na tung a gik hi! Bethsaida, na tung a gik hi! Ahang bel, noute sunga thillamdang ka hihte, Tura leh Sidon sunga kihih hi leh, sawtpi-in saiip puan silh a, vutkhu-in lungheita ding uhi. 22 Ahihhangin, noute kon hilh ahi: Thukhen ni chiangin, noute' thuak sangin, Tura leh Sidon thuak a phadawm zaw ding hi. 23 Nang Kapernaum, Pathian in van sunin hon tawisang a, khukthuk donga hon laikhesuk ding ahi aw! Ahang bel, na sunga ka hih thillamdangte Sodoma kihih hi leh, tuni donga om nalai ding hi. 24 Ahihhangin, kon hilh ahi. Thukhen ni chiangin, nang thuak sangin, Sodom thuak a phadawm zaw ding, a chi hi.
Tawlngakna Khawlna
25 Tua hun lai mahin, Jesu'n: Lei leh vaan Toupa, ka Pa aw, nang a pilte leh a lemtheite apan hiai thilte na sel a, naungekte kianga na lakkhiak manin kon pahtawi hi. 26 Ahi, Pa aw, hibanga hih mah na kipahlam ahi, a chi hi. 27 Tua khitin, ama'n mipite kiang ah: Ka Pa'n ka khut ah thil bangkim hon pekhia a, Pa loungal kuama'n Tapa hon thei kei. Pa zong, Tapa loungal leh amah ka latsak nopna mi loungal kuama'n a thei kei. 28 Semgim leh puakgik pua noute khempeuh ka kiang ah hong pai un, keima'n tawlngak khawlna kon pe ding. 29 Ka hakkol kisuan unla, kei apan kisin un. Kei a lungnem leh lungtanga a kiniamkhiat ka hi a, a hinna ua dingin tawlngak khawlna na ngah ding uhi. 30 Kei' hakkol puaknop a, ka puak zong zaang ahi, a chi hi.
Sabbath-ni Toupa
1 Tua hun laiin, Sabbath ni-lu in Jesu, buhlei kantanin a pai hi. Tua laiin, a nungzuite a gilkial uh a, buhvuite zutin a baak uhi. 2 Farisaite'n tua a muh takun, amah kiang ah: En dih! Na nungzuite'n Sabbath ni-a hih sianglou a hih uh! a chi uhi. 3 Jesu'n a dawng a: David gilkial laia amah leh a lawmte' thil hih sim kha lou na hi umaw? 4 Pathian' inn sunga a lut ua, amah leh a lawmte'n nek siang louh, siampite kia nek siang tua tanghou sehtuam Pathian maia kilui a nek thu uh? 5 Ahih kei leh, Sabbath ni-a siampite'n tempula Sabbath ni a tan louh ua, hinapi-a mawh a tan tuanlouh thu uh, Dan Laibu sunga sim kha lou na hi umaw? 6 Ahihhangin, noute kon hilh ahi: Hiai ah tempul sanga lianzaw mi khat a om. 7 Zahngaihna ka lunggulh a, kithoihna ka deih kei, kichi theita hi le uchin zaw, a mawhloute mawh tangsak nak lou ding hi ve uchin. 8 Ahangbel, Mihing Tapa, Sabbath ni tunga zong Toupa ka hi, a chi hi.
Sabbath Ni-a Damsakna thu-a Kikalhna
9 Jesu'n tua mun a nutsiat nungin, amaute' sunagog ah a lut hi. 10 Ngaidih, tua ah a khut teem mi khat a om hi. Amaute'n amah ngawh nading zongin, a kiang ah: Sabbath ni-a damsak a siang hia? a chi uhi. 11 Ama'n amaute kiang ah: Noute laka mi khat peuh in belam khat nei henla, Sabbath ni-in tua belam kawkhuk ah ke taleh, valena vakaikhe lou ding kua na hi ua om? 12 Belam sanga mihing manpha zaw tham hilou a maw? Tua bang a hih manin, Sabbath ni-a thil hoih hih a siang hi, a chi hi. 13 Tua khitin, ama'n tua khut teempa kiang ah: Na khut zankhia in, a chi a, tua mipa'n a khut a zankhia a, a khut langkhat bangbangin a damta hi. 14 Tua khitin, Farisaite bel a paikhia uh a, Jesu thah ding dan a kikum uhi.
Pathian' Teel Sila
15 Ahihhangin, Jesu'n tua thu a thei a, tua mun apan a kihemkhia hi. Mipi tampi in amah a zui uh a, ama'n a chinate khempeuh uh a damsak hi. 16 Ahihhangin, amah kua hi hiam, chih gen lou dingin a maute a kham hi. 17 Hiai bel, kamsang Isai' thugen a tangtun nadinga a hih ahi. Ama'n: 18 En un, ka teel ka sila hiai ahi. Amah ka lungkimna mahmah ka itpa ahi. Ama' tunga ka Kha koih ding ing a, ama'n Zentelte laka thudika vaihawmna thu phuang ding hi. 19 Ama'n seel lou ding a, kikoukhe sam lou ding hi. Kuama'n a aw kongzing khawnga za lou ding hi. 20 Ama'n thudika vaihawmna a vualzawhsak masiah pumpeng kitam kuaitan lou ding a, meivak mitdek kuang liakliak mutmit sam lou ding hi. 21 Zentelte'n ama' min lamen ding uhi, a na chi hi.
Jesu leh Belzebub
22 Tua khitin, mite'n dawimat mi khat Jesu kiang ah hon paipih uhi. Amah mittaw leh pautheilou ahi. Ama'n tua mipa a damsak a, mittaw leh pautheiloupa a pautheita a, a mutheita hi. 23 Mipite khempeuh in lamdang a sa uh a: Hiai mi David' Tapa ahi kha zenzen diam aw? a chi uhi. 24 Ahihhangin, Farisaite'n hiai a zak takun: Hiai mipa'n dawite' kumpipa Belzebub pansana dawite hawlkhia ahi lei ve, a chi uhi. 25 Ahihhangin, Jesu'n a maute' ngaihsut a thei a, amaute kiang ah: Kumpigam peuhmah amah leh amah a kilangkhen a, a kidou leh a mangthang nak. Khawpi khat peuh hi-in, innkuan khat peuh hita leh, amah leh amah kilangkhen a, a kidou leh a ding thei kei ding. 26 Setan in Setan mah hawlkhe leh, amah leh amah kidou hi ding ahi. Bangchi'n a kumpigam a ding dia oi? 27 Ke'n Belzebub pansana dawite hawlkhia na hita leng, na tate un kua pansana hawlkhia hi ding uh eita? Tua hanga, noute tunga thukhena pang ding ahi ve ua. 28 Ahihhangin, ke'n Pathian' Kha pansana dawite hawlkhia hi vengin, Pathian' kumpigam in noute hon naihta, chihna ahi ve. 29 Mi'n mihatpa a hentom masak kei leh, bangchi'n a inn sunga lutin a neih a lam a laksak thei dia? Mihatpa a hentom masak lebel, a inn lok thei ve. 30 Kei lama pang lou peuhmah kei hon dou ahi a, hon kaihkhawmpih lou peuhmah, a thehzak mi ahi.
Ngaihdam Theihlouh Khelhna
31 Tua bang a hih manin, noute kon hilh ahi: Mi a khelhna peuhmah ah leh a Pathian gensiatna peuhmah ah, ngaihdam ahi ding. Ahihhangin, mi'n Kha a gensiatna ah zaw ngaihdam ahi kei ding. 32 Thu kam khata mihing Tapa hon gensia mi kuapeuh Pathian in a ngaidam ding. Ahihhangin, Kha Siangthou gensia mi kuapeuh Pathian in a ngaidam kei ding. 33 Singkung a hoihin bawl le uchin, a gah a hoih ding. Ahih kei leh, singkung a siain bawl le uchin, a gah a se ding. Ahang bel, singkung hoih leh hoihlou, a gaha kithei hiven. 34 Nou, gulsuante! Nou migiloupi in thil hoih bangchi'n na gen thei ding ua eita? Ahang bel, lungsunga dimlet kam in genkhia hiven. 35 Mi hoih in a lungsunga gou hoih a kholkhawmte apanin thil hoihte a suahkhia a, mi gilou in bel, a lungsunga gou hoihlou a kholkhawmte apanin thil hoihloute a suahkhia hi. 36 Ahihhangin, noute kon hilh ahi: Mi'n thu a mawk gen peuhmah, thukhen ni chiangin, tuate a dawn kim sipsip kul ding ahi. 37 Ahang bel, na thugente mah uh pansana diktansak hi ding uchin a, na thugente mah uh pansana mawhtansak hi ding hive uchin, a chi hi.
Chiamtehna Jona
38 Tua khitin, Dan sinsakte leh Farisaite pawlkhat in a dawng uh a: Sinsakpa, nang apan chiamtehna khat mu nuam ung, a chi uhi. 39 Ahihhangin, ama'n a dawng a: Tulai khang gilou leh angkawmhat in chiamtehna lamdang a ngen uh! Ahihangin, kamsang Jona, chiamtehna ahihna loungal chiamtehna bangmah piak ahi kei ding. 40 Ahang bel, ngapi gilsunga Jona ni thum leh zan thum a om bangin, lei gilsung ah, Mihing Tapa ni thum leh zan thum ka om ding. 41 Thukhen ni chiangin, Ninevi mite, tulai khanga mite kiang ah a ding ding uh a, tulai khanga mite mawh a tangsak ding uh. Ahang bel, Jona' thugena Ninevi mite kisika lunghei uh hiven. Ngai un, Jona sanga lianzaw mi khat hiaia ding ahi. 42 Thukhenni chiangin, simlam Kumpinu, tulai khanga mite kiang ah a ding ding a, tulai khanga mite mawh a tangsak ding. Ahangbel, amah Solomon' pilna ngai dinga leimong apan hong pai hiven. Ngai un, Solomon sanga lian zaw mi khat hiaia ding ahi. 43 Mi khat sung apan dawi nin khat a pawtkhiak khitin, tawlngak nading zongin a keuna munte ah a vaakvaak a, ahihhangin, tawlngak nading a mu kei. 44 Tuachi-in, ama'n: Ka nutsiatsa inn ah ka kiknawn mai ding, a chi hi. Tua banga hong kiknawn takin, tua inn phiatsiangsa leh hoihtaka kepin a mu hi. 45 Tua khitin, a vapai a, amah sanga gilou zaw kha sagih hon tonpih a, tua inna lutin a teeng uhi. Tua mipa' omdan nanung, a masa sangin a sezaw tham hi. Tulai khanga migiloute tua bang I ahi ding hi, a chi hi.
Jesu' Nu leh a Sanggamte
46 Jesu'n mipite kianga thu a gen laiin, ngaidih, a nu leh a sanggamte amah houpih nuamin, inn pua ah a ding uhi. 47 Mi khat in a kiang ah: Ngai dih, na nu leh na sanggamte nang hon houpih nuamin inn pua ah a ding uh, a chi hi. 48 Ahihhangin, ama'n a dawng a: Ka nu kua hi a, ka sangamte kuate hi ahia? a chi hi. 49 Tua khitin, a nungzuite lam ah a khut a vaan a: Hiai ah ka nu leh ka sanggamte om uh! 50 Ahang bel, vantunga om ka Pa' deihlam hihte ahi ka sanggampate leh ka sanggamnute leh ka nu, a chi hi.
Buchi Theh Gentehna
1 Tua ni mahin Jesu tua inn apan a paikhia a, dil gei ah a tu hi. 2 A kiang ah mipi tampitak hong paikhawm uh a, amah bel, long khat sung ah a lut a, a tu hi. Tua mipite khempeuh ahih leh, dil gei ah a ding uhi. 3 Tua laitakin, ama'n amaute kiang ah gentehnate zangin thil tampi a gen a: Ngai un, buhchi thehpa khat, buhchi theh dingin a kuan hi. 4 Tua banga buhchi a thehte lain, buhchi pawl khat lamdung ah a kia hi. Vasate hongpai uh a, tua buhchi kiate a negai uhi. 5Buhchi pawl khat suangtung lei pan ah a kia hi. Leitak sah lou ahih manin, buhchite a pou pah hi. 6 Ahihangin, ni hong san takin, buhkungte a hai a, zungkai lou a hih manun, a keugawp uhi. 7 Buhchi pawlkhat lou lingnei lak ah a kia hi. Tua lou lingneite hong khang a, buhkungte a deplum hi. 8 Ahihhangin, buhchi pawlkhat bel, lei hoih ah a kia uh a, gah a suah uh a, a leh 100 bang, a leh 60 bang, ahih kei leh, a leh 30 bang a pha uhi. 9 Zak nading bil nei peuh in zata hen! a chi hi. 10 A nungzuite hong pai uh a, a kiang ah: Banghanga mipite kianga gentehnate zanga thu gen na hia le? hong chi uhi. 11 Ama'n a dawng a: Vantung kumpigam thusim kiseelte theih theihna noute kianga piak ahi a, amaute kianga piak hilou ahi. 12 A neihsa lenkip mi peuhmah piak behlap ahi ding a, a hau ding. Ahihhangin, a neihsa lenkiplou mi peuhmah a neihsun nangawn laksak ahi ding. 13 Hiai hang ahi gentehnate zanga amaute kianga thu ka gen a: Mu gige napi, mu taktak lou, za gige napi, za taktak lou, theihsiam zong theihsiam lou uhi, ka chih. 14 Kamsang Isai in a na genkholhsa, amaute tunga tangtung ahi ve. Ama'n: Za gige ding uchin a, ahihhanga theihsiam ngeilou ding hi uteh. Mu gige ding uchin a, ahihhanga Muchian ngeilou ding hi uteh. a na chih. 15 Ahang bel, hiai mite' lungtang kheengta a, bila za lou phial uh a, mitsi uhi. Tua hi kei leh, mitin mu ding uh a, bilin za ding uh a, lungtangin theisiam ding uh a, lunghei ding uh a, ke'n a maute na damsak ding hi'ng. a na chi hi. 16 Ahihhangin, na mitte un a muhtak manin, na mitte uh a nunnuam a, na bilte un a zaktak manin, na biite uh a nunnuam hi. 17 Ahang bel, noute thutak kon hilh ahi: Kamsang tampite leh midiktatte'n na muhte uh mu nuam napi-in a mu kei uh. Na zakte uh za nuam napi-in a za kei uhi. 18 Tu'n buhchi thehpa tawh kisai gentehna khiakna na ngai un: 19 Mi kuapeuh in kumpigam thu a zak chianga, a theihsiam kei leh, giloupa hong pai a, a lungtanga kipawi pen a lakmangsak hi. Hiai bel lampi geia buhchi a kiakna mi ahi. 20 Suangtung lei pan buchi kiakna mi ahih leh, thu za a, kipaktaka sang pah mi ahi. 21 Ahihhangin, ama'n zung kai lou ahih manin, tomchik kia a pang zou hi. Ahang bel, thu hanga gimthuakna hiam, bawlsiatna hiam hong tun takin a pukmang pah hi. 22 Lou lingnei laka buhchi kiakna mi ahih leh, thu za a, hiai leitung kikhual lunggimna leh hauhna khemhatna in thu a deplupna mi ahi a, gah a suah kei hi. 23 Lei hoiha buhchi kiakna mi ahih leh, thu za a, thei siam a, gahsuah mi ahi. A leh 100 bang, a leh 60 bang, a hihkei leh, a leh 30 bang a pha hi, a chi hi.
Buhtakleh Buhlem Gentehna
24 Ama'n amaute kiang ah gentehna dang khat a gen a: Vantung kumpigam zaw, pasal khat a loua buhtak chi thehpa tawh kibang ahi. 25 Ahihhangin, mi khempeuh ihmut kalin, tua mipa' melmapa hong pai a, buhtak lak ah buhlem a theh a, a paimangta hi. 26 Tua buhtak chite hongpou a, hong vuih takin buhlemte zong hong kilang hi. 27 Tua louneipa' nasemte hong pai uh a, amah kiang ah: Pu, na loua buhtak chi theh hilou na hi maw? Koi apana buhlemte hong om mawk ahia? a chi uhi. 28 Ama'n amaute kiang ah: Melmapa' hih ahi, a chi hi. A nasemte 'n: Vapaiin buhlemte vabot-khe le-ung non chi hia? a chi uhi. 29 Ahihhangin, ama'n: Chi lou e. Buhlemte na bawhkhiak chiangun buhtakte na botkhekhawm kha ding uh. 30 Buhlaak dongin poukhawm uheh aw. Buhlak hun chiangin, buhlate kiang ah: Buhlemte khawmkhe masa unla, lomhenin haltum unla, buhtakte bel ka buhpang ah sungkhawm un, ka chi ding, a chi, a chi hi.
Ankamtang Gentehna
31 Jesu'n amaute kiang ah gentehna dang khat a gen a: Vantung kumpigam zaw, mi'n ankamtang a lak a, a loua a theh tawh kibang ahi. 32 Tua ankamtang bel, chi laklaka neupen ahi. Ahihhangin, hong khanlet chiangin, loupa kung dangte sangin a lianzaw a, bukphapi a suak a, tungleng vasate hong paiin, a kahiangte ah bu a sep uhi, a chi hi.
Silngou Gentehna
33 Jesu'n amaute kiang ah gentehna dang khat a gen a: Vantung kumpigam zaw, numei khat in silngou a lak a, anvui neel tehna thum laka a bilh a, tua anvui neel mekman a vekpi-a a thawh dong a koih tawh kibang ahi, a chi hi. 34 Jesu'n hiai thute khempeuh, mipite kiang ah gentehna zangin a gen a, gentehna zang louin bangmah a gen kei hi. 35Tua bel, kamsangpa gensa a tangtun nadinga a hih ahi. Kamsangpa in: Gentehnate-a ka kam ka ding ing a, leitung kisiamchil apan thusim kiselte genkhe ding hi'ng, a na chi hi.
Buhlem Gentehna Khiakna
36 Tua khitin, Jesun'n mipite a paisak a, amah bel inn sung ah a lut hi. A nungzuite amah kiang ah hong pai uh a: Loua buhlemte gentehna khiakna koute hon hilh in, a chi uhi. 37 Ama'n a dawng a: Tua buhtak chi thehpa bel Mihing Tapa ka hi. 38 Tua lou bel leitung ahi. Buhtak chite bel kumpigam tate ahi uh a, buhlem chite ahih leh giloupa' tate ahi. 39 Tua buhlem chi theh melmapa bel dawimangpa ahi. Buhlaak hun ahih leh tulai hun tawpna ahi a, buhlate ahih leh vansawltakte ahi. 40 Buhlemte a kikaihkhawm a, meiphuala a kihaltum bangin, tulai hun tawpna ah thil a om ding. 41 Mihing Tapa'n ka vansawltakte ka sawlkhe ding a, amaute'n midang kipalpaisakte khempeuh leh danbeia gamtate khempeuh, ka kumpigam apanin a kaikhawm ding uh a, 42 haltuina meiphual ah a pailut ding uh a, tua ah kah leh hagawi a om ding. 43 Tua hun chiangin, midiktatte bel a Pa uh kumpigam ah ni bangin a taang ding uhi. Zak nading bil nei peuh in zata hen!
Gou Kisel Gentehna
44 Vantung kumpigam zaw, kua hiam khat in loua gou a seel tawh kibang ahi. Mi khat in tua gou a muh takin, a seel kik a, lungnuam mahmahin a pai a, a neih khempeuh a zuak a, tua lou a lei hi.
Kepsuang Manpha Gentehna
45 Tua baan ah, vantung kumpigam zaw, sumsin mi, kepsuang manpha kilawm mahmah zong tawh kibang ahi. 46 Ama'n tua bang kepsuang manpha khat a muh takin, vapaiin a neih khempeuh a zuak a, tua kepsuang a lei hi.
Lenpi Gentehna
47 Tua baan ah, vantung kumpigam zaw, tuipi-a lenpi kaih, nga namkim tunkhawm tawh kibang ahi. 48 Tua lenpi a dim takin, ngabeng mite'n tui gei ah a kaikhia uh a, tuin nga hoih teng a tengkhawm uh a, bawmte ah a koihkhawm uh a, nga hoihloute bel a paimang uhi. 49 Tulai hun a bei chiangin, tua bang ahi ding hi. Vansawltakte hong kuan ding uh a, midiktatte lak apan migiloute a tengkhe ding uh a, 50 haltuina meiphualpi ah a pailut ding uhi. Tua hun chiangin, kah leh hagawi a om ding hi, a chi hi.
Innteekpa Gentehna
51 Jesu'n amaute kiang ah: Hiai thilte khempeuh na theisiam uhia? a chi hi. Amaute'n: He, Toupa, a chi uhi, 52 Tua khitin, ama'n: Hibang ahih manin, vantung kumpigam thu sinsakna ngah Dan sinsak mi peuhmah zaw, a gou koihkhawmna apan gou lui leh gou thak suahkhia innteekpa bang ahi, a chi hi.
Phatlawhlou Kamsangte
53 Jesu'n hiai gentehnate a gen khitin, tua mun apan a paikhia hi. 54 Ama' khankhiakna khua hong tun takin, sunagog ah amaute a sinsak a, amaute'n lamdang a sa uh a: Hiai mi in koi apan hiai pilna leh hiai thillamdangte ngah ahia? 55 Singlep siampa' tapa hilou maw? A nu zong Mari kichi hilou maw? A sanggamte zong Jakobte, Josefte, Simonte, Judate hilou maw? 56 A sanggam numeite zong eite kianga om hilou umaw? Tua bang hi a, hiai mi in hiai thilte khempeuh koi apan ngah ahia? a chi uhi. 57 Tua bangin, amah ah a thangpaihkum uhi. Ahihhangin, Jesu'n amaute kiang ah: Kamsang zaw ama' khankhiakna khua leh ama' innsung mite lak loungal ah pahtawi louhin a om kei, a chi hi. 58 Tua banga amaute'n upna a taksap manun, ama'n tua ah thillamdang tampi a hih kei hi.
Baptispa Johan' Ngawngtanna
1 Tua hun laiin, hausalian lite laka khat Herod in Jesu tawh kisai thu a na ngah a, 2 a sawltawl a nasemte kiang ah: Hiai Baptispa Johan ahi tham, amah misite lak apan thoukik a, hiai thillamdangte hih ahi ve, a chi hi. 3 Herod in a sanggampa Filip' zi Herodia hanga Johan man a, hen a, suangkula a na khumsa ahi. 4 Ahang bel, Johan in a mah kianga: Na sanggampa' zi na kitenpih a siang kei, a na chih man ahi. 5 Tua hangin Herod in Johan thah a na ut him a, ahihhangin, mipite'n Johan lah kamsang khat hi-a a na koih manun mipite a lau hi. 6 Ahihhangin, Herod' pianni hun hong tun takin, amaute' mai ah Herodia' tanu a lam a, Herod a lungtaisak mahmah hi. 7 Herod in tua nu' nget peuhmah piak ding, chi-in kichiam zenin thu a chiam hi. 8 Ama'n a nu' thuhilhin; Baptistpa Johan' lutang, kuangdaia koihin hon pia in, a chi hi. 9 Tua in kumpipa a lungzing sak mahmah a, ahihhangin, a kichiamkhit manin leh ankuang a umpihte hangin Johan' lutang piak dingin thu a peta hi. 10 Tuachi-in, mi a sawl a, suangkula Johan' lutang a tankhesak hi. 11 Tua bangin, Johan' lutang kuangdaiin hon tawi uh a, tua nungaknu a pia uh a, ama'n a nu kiang ah hon tawi hi. 12 Tua khitin, Johan' nungzuite hong pai uh a, Johan' luang a la uh a, a vui uhi. Tua khitin, amaute hong pai uh a, Jesu hong hilh uhi.
Mi 5,000 Vaakna
13 Jesu'n hiai thu a zak takin, tua mun apan longin a kipankhia a, a simin kuamah omlouhna ah a kihemkhia hi. Ahihhangin, a paikhiak thu mipite'n a zak takun, khawpite apan khein amah a zuan uhi. 14 Jesu long apan hong kum a, mipite a muhin amaute a lainat mahmah a, a chinate uh a damsak hi. 15 Nitaklam hong hih takin, a nungzuite amah kiang ah hong pai uh a: Hiai kuamah omlouhna mun hi a, ni lah niamta a, mipite khawta khawnga vapai a, an vakilei dingin sawlkhe tanla, hong chi uhi. 16 Ahihhangin, Jesu'n amaute kiang ah: Amaute a paikhiak uh kul kei. Noute'n nek ding ann pia un, a chi hi. 17 Amaute'n a dawng uh a: Koute'n tanghou beu nga leh ngasa nih kia ahi ka neih uh, a chi uhi. 18 Ama'n: Tuate ka kiang ah hon tawi un, a chi hi. 19 Tua khitin, mipite, loupa tunga tu dingin thu a pia hi. Tua tanghou beu nga leh ngasa nihte a la a, a vandak a, a vualzawl a, tua tanghou beute a balkham a, nungzuite khut ah a pia a, nungzuite'n mipite a pia uhi. 20 Mipite'n avekun a ne uh a, a vah uhi. A khamval uh seng sawmlehnih dimin a luak uhi. 21 Tua an nete, numei leh naupang sim louhin pasal 5,000 khawng ahi uhi.
Tui tunga Khea Paina
22 Tua khit phetin, Jesu'n a nungzuite longa tuang dingin thu a pia a, mipite a paisak sunga dil gal khata pai masa dingin ahilh hi. 23 Mipite a paisak khitin, amah bel amah kiain mual tung lama thuum dingin a paitou hi. Nitak khua hong mial a, amah kiain a om hi. 24 Ahihhangin, tua long bel dil laizang ah a om a, huih in a lehmut manin, tuihualte'n a seep seep hi. 25 Zan ven lina khawngin, Jesu'n amaute hon naih a, tui tung ah khein hong pai hi. 26 Nungzuite'n amah tui tunga pai a muh takun lauin a kikou uhi. 27 Ahihhangin, Jesu'n amaute a houpih pah a: Hangsan suah un. Kei ka hi, lau kei un, a chi hi. 28 Peter in a dawng a: Toupa, nang lah na hi maimah a! Tui tunga pai dingin thu hon pia in, a chi hi. 29 Jesu'n: Hong pai in, a chi hi. Peter zong long apanin a kumsuk a, Jesu kiang zuanin tui tung ah a pai hi. 30 Ahihhangin, ama'n huih a hat, chih a muh takin a lauta hi. tum dingin a kisa a, a kikoukhia a: Toupa, hon hukhia in! a chi hi. 31 Jesu'n khutin a sawk pah a, amah a len a, a kiang ah: Nang upna neu nei aw, banghanga muanglah na hia? a chi hi. 32 Amau gel long sunga a tuantouh takun, huih a thengta hi. Tua long sunga omte'n amah a bia uh a: Nang Pathian' Tapa na hi taktak ve, a chi uhi.
Mi Tampi Damsakna
34 Amaute dil galkhat a tun takun, Genesaret gam hong tung uhi. 35 Tua gam mite'n amah a meltheih takun, a kiim gam teng ah thu a than uh a, mite'n a chinate khempeuh uh amah kiang ah hon paipih uh a, 36 a puan silh mong lawnsak ding a ngen uhi. Tua banga puansilh mong lawngte khempeuh lah ama'n a damsiangsak sipsip hi.
Thugousiah thu-a Kiselna
1 Tua khitin, Jerusalema om Dan sinsakte leh Farisaite Jesu kiang ah hong pai uh a: 2 Banghanga na nungzuite'n upate' thugousiah* palsat a, khutsil masa loua an ne uh ahia? a chi uhi. 3 Jesu'n a dawng a: Banghanga noute'n zong thugousiah paulama Pathian' thupiak palsat na hi ua? 4 Pathian' thupiak in: Na nu na pa pahtawi in, chi a, tua baana, A nu hiam, a pa hiam gensia peuhmah si teitei hen, chi ahi. 5 Ahihhangin, noute'n bel: A nu hiam, a pa hiam kianga: Noute' phattuampih ding ka neih ka lam teng Pathian kianga kilankhin ahita, chi mi peuhmah, 6 a nu a pa tunga a mawhpuakna pana siang ahi, chi-in na thugousiah uh pansanin, Pathian' thupiak bangmahlou na suaksak uhi. 7 Nou lepchiahte aw! Isai in noute tungthu a gen dik ngei e. Ama'n: 8 Hiai mite'n a kamun kei hon pahtawi uh a, ahihhanga a lungtang ua hon gamlat uhi uh. 9 A mawknain hon bia uh a, a sinsaknate uh mihing' thupiakte lei ahi, a na chi hi, a chi hi. 10 Tua khitin, Jesu'n a kiang ah mipite a samkhawm a: Ka thu ngaikhia unla, theisiam un. 11 Mihing' kamsunga lut in mihing a ninsak kei a, mihing kam apan pawt ahi mihing ninsak, a chi hi. 12 Tua khitin, a nungzuite amah kiang ah hong pai uh a: Farisaite'n hiai thu a zak takun a ngaidah uh, chih na thei hia? hong chi uhi. 13 Ama'n a dawng a: Vantunga om ka Pa' phuh louh kung peuhmah bawhkhiak hi ding ahi. 14 Amaute thudon kei un. Amaute, mittawte' lamkaia pang mittaw lamkaite ahi uhi. Mittaw in mittaw a lamkaih taakin, kawkhuk ah a kekhawm mah kei ding ua, a chi hi. 15 Peter in a dawng a: Hiai gentehna koute hon hilhchian in, a chi hi. 16 Jesu'n amaute kiang ah: Noute tua zaha ngong lai na hi umaw? 17 Mihing kamsunga lut pen gilpi-a lut a, dailenna-a thakkhiak ahi, chih theisiam lou maw? 18 Ahihhangin, mihing kam apan pawtkhete bel lungtang apan hi a, tuate'n mihing ninsak ahi. 19 Ahang bel, lungtang apana ngaihsutna giloute, tualthahnate, angkawmnate, kingaihna ninte, guktaknate, theihpih taklouhnate, Pathian gensiatnate hong pawtkhia ahi. 20 Hiaite ahi mihing ninsak. Khut sil loua an nek in mihing a ninsak kei, a chi hi.
Kanan Numei' Tanu Damsakna
21 Tua khitin, Jesu tua mun apanin Tura leh Sidon gam zuanin a kipankhia hi. 22 Ngai in, tua ah Kanan numei khat, tua gam apan hong pai a om hi. Amah a kikou a, Jesu kiang ah: Toupa, David' Tapa, ka tung ah zahngai in! Ka tanu dawi in a man a, nakpitakin a thuak hi, a chi hi. 23 Ahihhangin, ama'n kam khatin zong a dawng kei hi. A nungzuite hong pai uh a: Eite nung ah hon samin kikou kou veh aw, amah paisak vaw, a chi uhi. 24 Ama'n a dawng a: Israel belam mangte kiang kia-a sawl ka hi, a chi hi. 25 Tua khitin, tua numei hong pai a, amah a bia a: Toupa, hon panpih in! a chi hi. 26 Ahihhangin, ama'n a dawng a: Tate' tanghou laksak a, uite kianga piak a kilawm kei, a chi hi. 27 Tua numei in: Hi mah e, Toupa. Ahihhangin, uite'n zong a pu uh' dohkan nuaia apan anneng kete a ne sam ve ua oi, a chi hi. 28 Tua khitin, Jesu'n a dawng a: Numei, na upna a lian hi. Na nget bangin kon pia hi, a chi a, tua hun laitak mahin a tanu a damta hi.
Mi Tampi Damsakna
29 Tua nungin, Jesu tua apan a kipankhia a, Galili Tuipi gei zuiin a pai a, mual pang ah a kaltou a, tua ah a tu hi. 30 Tua ah mipi tampi a kiang ah hong pai uh a, khebaite, mittawte, pautheiloute, poihlongte leh a dang tampi hon paipih uh a, Jesu' khebul hon tun uh a, ama'n amaute a na damsak hi. 31 Mipite'n pautheiloute pautheita a, poihlongte damta a, khebaite paitheita a, mittawte'n mutheita, chih a muh takun, lamdang a sa uh a, Israel' Pathian a pahtawi uhi.
Mi 4,000 Vaakna
32 Tua nungin, Jesu'n a nungzuite a kiang ah a sam a: Hiai mipite ka kiang ah ni thum a omta uh a, nek ding bangmah lah a nei kei uh a, ka lainat mahmah hi. Amaute gilkialin ka paisak nuam kei, lamkal ah sawlsamin a bah kha ding uh, a chi hi. 33 A nungzuite'n a dawng uh a: Hiai mun gamlapi hi a, mipi hiai zahzah nek ding kiching koi apan la mawk ding i hia? a chi uhi. 34 Jesu'n: Tanghou beu bangzah na nei ua? chi-in a dong a, amaute'n: Sagih leh ngasa neu chikchik tawmkha, a chi uhi. 35 Ama'n mipite leilaka tu dingin a hilh a, 36 tua khitin, tanghou beu sagihte leh tua ngasate a la a, kipahthu a gen a, a balkham a, nungzuite khut ah a pia hi. Nungzuite'n mipite a pia uh a, 37 mipite khempeuh in a ne uh a, a vah uhi. Tua khitin, mipite' khamval nen seng sagih dim a luakkhawm uhi. 38 Tua an nete, numei leh naupang sim louhin 4,000 ahi uhi. 39 Tua khitin, ama'n mipite a paisak a, amah bel long ah a tuang a, Magdala gam ah a pai hi.
Van apan Chiamtehna thu-a Kiselna
1 Tua nungin, Farisaite leh Sadukaite hong pai uh a, amah ze-etin, vaan apan chiamtehna lamdang lak dingin a ngiat uhi. 2 Ama'n a dawng a: Nitaklam ahih chiangin, vaan a san a, khua pha ding ahi, na chi uh a, 3 zinglam ahih chiangin, van a san a, khua nima khua se ding ahi, na chi uhi. Lepchiahte! Van omdan na theithei uh a, ahihhangin, hun chiamtehnate na theithei kei uh. 4 Tulai khang gilou leh angkawmhat in chiamtehna lamdang a zong, ahihhangin, kamsang Jona, chiamtehna ahihna loungal chiamtehna bangmah piak ahi kei ding, a chi hi. Tua khitin, Jesu amaute nusiain a paikhia hi.
Jesu' Kihepkhiakna
5 Galkhat lam hong tun takun, nungzuite'n tanghou puak ding a mangngilh uhi. 6 Jesu'n amaute kiang ah: Pilvang unla, Farisaite leh Sadukaite' silngou apan kiveng un, a chi hi. 7 Amaute bel amau lak ah a kikum uh a: Tanghou i puak louh man ahi ve, a kichi uhi. 8 Ahihhangin, Jesu'n amaute' kikup a thei a: Nou upna neu neite aw, tanghou non puak louh uh banghanga kikum kum na hi ua? 9 Theisiam nai lou maw? Ahih kei leh, 5,000-te' nek tanghou beu nga leh a khamval uh seng bangzah ahia na luahdim uh, thei nawnlou maw? 10 Ahih kei leh, mi 4,000-te' nek tanghou beu sagih leh a khamval uh seng bangzah ahia na luahdim uh, thei nawnlou maw? 11 Noute kianga tanghou thu gen ka hih louh lam bangchi dana theisiam lou na hi ua? Farisaite leh Sadukaite' silngou apan kiveng un, chi ka hi zaw, a chi hi. 12 Tua khitin, ama'n tanghou tawh kisai silngou apan kiveng dinga amaute hilh hilou a, Farisaite leh Sadukaite' sinsakna apan kiveng dinga hilh ahi, chih a theisiamta uhi.
Jesu Kua hi hiam chih Latsakna
13 Jesu, Kaisaria Filipi gam hong tun takin, a nungzuite kiang ah: Mi'n kei Mihing Tapa kua ahi, hon chi ua? chi-in a dong hi. 14 Amaute'n a dawng uh a: Mi pawlkhatte'n: Baptistpa Johan ahi, hon chi uh a, mi pawlkhatte'n: Elija ahi, hon chi uh a, mi pawlkhat dangte leuleu in lah: Jeremia, ahih kei leh, kamsang dangte laka khat ahi, hon chi uh, a chi uhi. 15 Ama'n amaute kiang ah: Ahih leh, noute'n kua ahi, non chi ua? a chi hi. 16 Simon Peter in a dawng a: Nang Mesia, Pathian hing' Tapa na hi, a chi hi. 17 Jesu'n a dawng a: Nang Simon, Jona' tapa, mi nunnuam na hi. Nang kianga hiai hon lakkhia, sa leh sisan ahi kei, vantunga om ka Pa ahi zaw. 18 Hiai kon hilh ahi: Nang Peter na hi. Hiai suangpi tung ah ka saptuam ka lam ding a, misikhua kongpite'n a zou kei ding. 19 Vantung kumpigam chabite na khut ah kon pe ding a, leitunga na hen peuhmah vantung ah hen ahi ding a, leitunga na phei peuhmah vantung ah phei ahi ding, a chi hi. 20 Tua khitin, amah Mesia ahipa Jesu ahih lam kuamah hilh lou dingin a nungzuite thu a pia hi.
Jesu Sih ding Genkholhna
21 Tua hun apanin Jesu'n a nungzuite kiang ah hiai thilte a lak panta a: Jerusalema ka hawh teitei ding ahi. Upate leh siampi makaite leh Dan sinsakte' khut ah thil tampi ka thuak ding a, hon that ding uh a, a ni thum ni-in Pathian in hon kaithou ding, a chi hi. 22 Peter in amah a huituam a, a taai a: Hi peuhmah lou e, Toupa. Tua bang tung ngei kei hiai hen! a chi hi. 23 Ahihhangin, Jesu a kihei a, Peter kiang ah: Setan, ka nung lam ah om in! Kei adingin kipalpaihna na hi. Pathian' thilte ngaihsun louin mihing thilte na ngaihsun, a chi hi.
Jesu' Pathianna Latsakna
24 Tua khitin, Jesu'n a nungzuite kiang ah: Kuapeuh in ka nung hon zuih nop leh, amah kizaangsaka, ama' khros kisuana hon zuih teitei ding ahi. 25 Ahang bel, ama' hinna humbit sawm peuhmah in a mansuah ding a, keima' hanga ama' hinna mansuah peuhmah in a humbit ding. 26 Mi'n leitung bup nei henla, ama' hinna mansuah leh amah adingin bang a meet dia? Mi'n ama' hinna lei nadingin bang a pe thei dia?
Jesu Hong Paikik nading Genkholhna
27 Ahang bel, kei Mihing Tapa, ka Pa' thupina silhin ka vansawltakte tawh kong pai ding a, tua hun chiangin, michih a nasep bangbangin pahtakman ka pe ding hi. 28 Noute thutak kon hilh ahi: Hiaia ding mi pawlkhat, kei Mihing Tapa, ka kumpigama kong pai hon muh masiah uh sihna chiam lou ding a om uh, a chi hi.
Mellamdanna
1 Ni guk nungin, Jesu'n Peter tawh Jakob tawh, Jakob sanggampa Johan tawh a tonpih a, amau teng kia mual sangpi tung ah a paitouhpih hi. 2 Tua ah, amaute' mai ah Jesu' mei hong lamdang a, a maitang ni bangin a taang a, a puansilhte khawvak bangin a vaak hi. 3 Tua laitakin, ngaidih, Mosi leh Elija amaute kiang ah hong kilang uh a Jesu tawh a kihou uhi. 4 Peter in Jesu kiang ah: Toupa koute adingin hiaia om a nuam. Pha na sak leh, bukta thum lam le-ung khat nang ading, khat Mosi ading khat Elija adingin, a chi hi. 5 Tua banga a pau laitakin ngaidih, meipi ngou hong kai a amaute a khuh a, tua meipi lak apan aw hong ging a: Hiai ka it ka Tapa ahi. Ama' tung ah ka lungkim mahmah hi. Ama' thu ngai un! a chi hi. 6 Nungzuite'n tua a zak takun, lau luain leilak ah a bok uhi. 7 Ahihhangin, Jesu hong pai a, amaute a lawng a: Thou un, lau kei un, a chi hi. 8 Tuachi-a a dakkhiak uleh, Jesu kia loungal kuamah a mu kei uhi. 9 Amaute tua mual tung apan hong kumsuk laiun, Jesu'n amaute a thuhilh a: Mihing Tapa, misite lak apan ka thawhkik masiah, na thil muh uh kuamah hilh kei un, a chi hi. 10 A nungzuite'n a kiang ah: Banghanga Dan sinsakte'n: Elija hong pai masa teitei ding ahi, chi uh ahia? Chi-in a dong uh. 11 Jesu'n a dawng a: Elija hong pai masa ding mah ahi. Ama'n bangkim tungdingthak ding ahi. 12 Ahihhangin, noute kon hilh ahi: Elija hong paikhinta a, amaute'n amah a na thei kei uh a, a ut ut uh a na lawh uhi. Tua mah bangin, Mihing Tapa in zong amaute' khut ah thil tampi ka thuak ding hi, a chi hi. 13 Tua khitin, ama'n Baptispa Johan tungthu gen ahi, chih nungzuite'n a theisiamta uhi.
Upna Thu Sinsakna
14 Amaute, mipite kiang hong tun takun, mi khat a kiang ah hong pai a, a mai ah a khukdin a: 15 Toupa, ka tapa tung ah zahngai in. Amah kaihvei ahi a, a thuakgim mahmahta hi. Mei sung ah leh tui sung ah bang a puk pahpah hi. 16 Na nungzuite kiang ah kon paipih a, amaute'n lah a damsak thei kei uhi, a chi hi. 17 Jesu'n a dawng a: Upnabei leh khang lehtatte aw, noute bangtan hon ompihlai ding ka hia? Bangtan hon thuak zoulai ding ka hia? Naupangpa ka kiang ah hon paipih in, a chi hi. 18 Jesu'n tua dawi a taai a, tua naupang apan tua dawi hong pawtkhia a, tua hun laitak mahin tua naupang a damta hi. 19 Tua khitin, Jesu' nungzuite amah kiang ah a simin a hong pai uh a: Banghanga koute'n tua dawi hawlkhe theilou ka hi ua le? Chi-in a dong uhi. 20 Jesu'n amaute kiang ah: Na uplah hang uh ahi ve. Noute thutak kon hilh ahi: Noute'n ankamtang bang upna nei peuh le uchin, hiai mual kiang ah: Hiai apan hua lai ah kisuan in, na chi ding uh a, a kisuan ding. Hih theih louh na nei kei ding uh. 21 Ahihhangin, anngawla na thuum chiang kia-un hibang dawi a pawtkhe lei ding, a chi hi. 22 Amaute Galili gam sunga a om laiun, Jesu'n a kiang uah: Mihing Tapa lehbawla mihingte' khuta khawtkhiak ka hi ding hi. 23 Amaute'n hon that ding uh a, a ni thum ni-in Pathian in hon kaithou ding, a chi hi. Tua a zak takun, amaute nakpitakin a dah uhi.
Tempul Siah
24 Amaute Kapernaum hong tun takun, tempul siah, drakma nih zel dongte Peter kiang ah hong pai uh a: Noute hon Sinsakpa'n tempul siah pe lou hia? a chi uhi. 25 Peter in a dawng a: Pia e, a chi hi. Inn sunga Peter hong lut takin, Jesu'n Peter' gen ding theiin: Simon, bang ahia na ngaih dan? Leitung kumpipate'n neih leh lam tunga siah hita leh, leiman siah hita leh, kuate apan dong uh ahia? Amau' tate apan dong umaw, ahih kei leh, midangte apanin? a chi hi. 26 Peter in a dawng a: Midangte apanin, a chi hi. Jesu'n: Ahih leh, tate awl eive maw? 27 Ahihhangin, amaute' kipalpaihna khat i hi kha dia, vapai inla, dil ah ngakuai vakhai in. Na mat masak pen kam sung sawk lechin, drakma li sum tang khat na mu ding. Tua hon tawi inla, nang leh kei' siah dingin pia in, a chi hi.
Kingaihniamna thu-a Thuhilhna
1 Tua hun laiin, Jesu nungzuite a kiang ah hong pai uh a: Ahih leh, vantung kumpigam ah kua thupipen ahia? a chi uhi. 2 Jesu'n naupang neu khat a sam a, amaute lak ah a dingsak a: 3 Noute thutak kon hilh ahi: Lungsim khek a, naupang neute bang nong suah kei uleh, vantung kumpigam sung na lut het kei ding uhi. 4 Tua bang ahih manin, hiai naupang neu banga, amah kingainiam peuhmah, vantung kumpigam ah thupipen ahi ding. 5 Tua baan ah, keima' min hanga hiai banga naupang neu sang mi in kei hon sang ahi.
Mi Puksakte Gawtna
6 Ahihhangin, keimah hon um, hiai naupang neute laka khat peuh kipalpaisak mi om taleh tuabang mi zaw a ngawnga buhgawi suang awhsak a, tuipi sunga paihlut hi leh, ama' adingin a hoihzaw ding hi. 7 Mite kipalpaisak thilte hangin leitung bup tunggik hinah e! Kipalpaisak thilte bel om ding mah ahi, ahihhangin, kipalpaisak mi tung gik hinah e! 8 Na khut hiam, ahih kei leh, na khe hiam in hon kipalpaihsak aleh, tankhia inla, paimang in. Khut nih nei hiam, khe nih nei hiama tangtawn meidil sunga paihlut na hih sangin, khut kimlou hiam, khe kimlou hiama hinna sung tun nang adingin a hoih zaw. 9 Na mit in hon kipalpaihsak aleh, khelkhia inla, paimang in. Mit nih neia tangtawn meidil sunga paihlut na hih sangin, mit kim loua hinna' sung tun nang adingin a hoih zaw.
Belam Mang Gentehna
10 Hiai naupang neute laka khat lei zong, simmawh lou dingin pilvang un. Noute kon hilh ahi: Vantunga om, amaute' vansawltakte'n vantunga om ka Pa' maitang en gige uh ahi. 11 Ahang bel, mangthangte hondam dinea Mihing Tapa hong pai hiveng in. 12 Bangchi'n na ngai ua? Mi khat in belam 100 nei henla, a laka khat vakmang leh, 99-te nusiain, a vaakmang pen zong dingin, mual tung lam ah kuan lou ding hia? 13 Tua baan ah, noute thutak kon hilh ahi: Belam vakmang pen vamu taleh, a vaakmang lou 99-te tung ah sangin, tua belam khat tunga a kipahna a lian zaw ding hi. 14 Tua mah bangin, hiai naupang neute laka khat lei zong a manthat ding, vantunga om na Pa uh' deihlam ahi kei hi.
Akhial Sanggam
15 Tua baan ah, na sanggam in na tunga a khelh leh, vapai inla, nou gel kia theihin, a khelhna vahilh in. Na thu a ngaihnop leh, na sanggam na humbitta, chihna ahi. 16 Na thu a ngaihnop kei a, theihpih mi nih hiam, thum hiam' kam pansana thu kikipsak ding ahi, chih banga, midang khat hiam, nih hiam, na tonpih nung a, 17 ama'n amaute' thu zong a ngaihnop kei lai leh, Pathian neilou mi leh siahdong mi bangin en in. 18 Noute thutak kon hilh ahi: Leitunga na hen peuhmah uh, vantung ah kihen ding a, leitunga na phei peuhmah uh, vantunga kiphel ding ahi. 19 Tua baan ah, noute kon hilh ahi. Noute laka mi nih bek zong leitunga kithukima thil khat na nget uh, vantunga om ka Pa'n hon lawhchingsak ding ahi. 20 Ahang bel, keima' min siala nih hiam, thum hiam na kikhop khawmna peuh ua, noute laka om ka hi, a chi hi.
Ngaihdamna thu-a Thuhilhna
21 Tua khitin, Peter, a kiang ah hong pai a: Toupa, ka sanggam in ka tung ah khialta leh, bangzah vei tan ngaidam ding ka hia? Sagih vei chiang maw? a chi hi. 22 Jesu'n a dawng a: Sagih vei chiang kon chi kei, sagih mun 70 vei chiang, kon chi zaw hi. 23 Ahang bel, vantung kumpigam zaw, a silate tawh sum thu hih vaiveng ding ut kumpipa tawh kibang ahi. 24 Ama'n sum thu hih vaiveng dinga a kipat takin, talen 10,000 ba sila khat a mai ah hon paipih uhi. 25 Ahihhangin, tua mipa'n a sumbat a dit zawh louh manin, a pu in amah, a zi tawh a tate tawh, a neih teng tawh zuak a, a bat ditna-a zat ding thu a pia hi. 26 Tua bang a hih manin, tua silapa a mai ah a bok a: Pu aw, ka tung ah lungduai inla, ka din vek ding, a chi hi. 27 Tua silapa' pu in amah a lainat a, a leibat a ngaidam a, a paisak hi. 28 Ahihhangin, tua silapa a paikhia a, ama' tunga dinari 100 ba a sila hihpih khat a mu hi. Ama'n tua pa a man a, a gawlmek a: Na leibat hon din in, a chi hi. 29 A sila hihpihpa a khebul ah a bok a: Ka tung ah lungduai inla, kon din vek ding, chi-in a thuum ngutngut hi. 30 Ahihhangin, tua silapa a ut kei a, a kuan a, a sila hihpihpa'n a leibat a ditkhit masiah, suangkul ah a vakhum hi, 31 Sila dangte'n tua a thil hih a muh takun, a lungkham mahmah uh a, hong paiin, tua mipa' thilhih teng a pu uh hong hilh uhi. 32 A pu in tua silapa a sam a: Nang sila gilou! Non nget ngutngut manin, na leibat khempeuh kon ngaidam hi. 33 Nang tunga zahngaihna ka neih banga, nang zong na sila hihpih tunga zahngaihna na neih tuak hilou maw? a chi hi. 34 A pu a heh a, a leibat khempeuh a ditkhit masiah, mi gawtte khut ah amah a pia hi. 35 Noute tek in, na tung ua talek na sanggam uh, lungtang taktaka ngaidam lou hive uchin, vantunga om ka Pa'n zong na tung ua tua bang hih ding ahi, a chi hi.
Kimakna thu-a Thuhilhna
1 Hibang hong hi a, Jesu'n hiai thilte a gen khitin, Galili gam nusiain, Jordan lui gala Judia gam hong tung hi. 2 Mipi tampitakin amah a zui uh a, ama'n amaute tua ah a na damsak hi. 3 Farisaite a kiang ah hong pai uh a, amah ze-etin: Banghangpeuhin pasal in a zi a mak a siang hia? a chi uhi. 4 Jesu'n a dawng a: A chil apanin Pathian in amaute pasal leh numeiin a bawl. 5 Tua hangin, pasal in a nu leh a pa nusiain a zi ah a belh ding a, amau nihte sa pum khat hong suak ding uh, a chi, chih sim kha ngeilou na hi umaw? 6 Tuachi-in, amaute nih a hita kei uh a, sa pumkhat hong hita uhi. Tua bang ahih manin, Pathian in a gawmsa, mihing in khen kei hen, a chi hi. 7 Amaute'n a kiang ah: Ahih leh, banghanga Mosi in makna lai piaka zi mak ding thu pia ahia leh? a chi uhi. 8 Jesu'n a dawng a: Noute' lungtang khauh mana Mosi in na zite uh mak ding hon phalsak ahi. A chila tua bang hilou ahi. 9 Noute kon hilh ahi: Angkawmna hang hiloua, a zi | ma a, midang kitenpih peuhmah angkawm ahi, Maksa numei kitenpih peuhmah zong angkawm ahi, a chi hi. 10 A nungzuite'n a kiang ah: Pasal leh a zi kal thu tua bang ahih nung, zi neih louh a hoih zaw, a chi uhi. 11 Jesu'n amaute kiang ah: Hiai zaw piak ahihnamite loungal, mi kim' san theih a hi kei. 12 Ahang bel, mi pawlkhat, nute' sung apan gehsa-a piang a om a, mi pawlkhat lah mihing' geh a om a, mi pawlkhat leuleu lah, vantung kumpigam thu hanga kiget a om uhi. Hiai a saang thei mi in saangta hen, a chi hi.
Jesu leh Naupang Neute
13 Tua nungin, naupang neute tunga Jesu'n khut a ngaka a thuumsak ding deihin, mite'n naupang neute a kiang ah hon tonpih uhi. Ahihhangin, nungzuite'n amaute a na taai uhi. 14 Ahihhangin, Jesu'n: Naupang neute ka kiang ah hon paisak unla, kham kei un. Vantung kumpigam zaw hiai naupangte bang mite-a ahi, a chi hi. 15 Ama'n naupang neute tunga khut a ngak khitin, tua mun nusiain a paita hi.
Ahau Tangval
16 Ngai un, mi khat Jesu kiang ah hong pai a: Sinsakpa hoih, tangtawn hinna ka luah nadingin, bang thil hoih ka hih kul ahia? chi-in a dong hi. 17 Jesu'n a dawng a: Banghanga hoih hon chi na hia? Pathian kia loungal kuamah mi hoih om lou ahi. Ahihhangin, hinna sung lut nuam hi vechin, thupiakte zui in, a chi hi. 18 Ama'n: Koi thupiakte maw? chi-in a dong hi. Jesu'n a dawng a: Tualthat ken, Angkawm ken, Gu ken, Theihpih taklouin pang ken, 19 Na nu na pa pahtawi in, Nang na ki-it bangin na veng na pamte it in, chihte, a chi hi. 20 Tua tangval in: Hiaite khempeuh ka tuailai apan ka zuihsa ahita. Bang ka sam laia? a chi hi. 21 Jesu'n a dawng a: Hoihkim ut hi vechin, pai inla, na neih khempeuh zuak inla, a sum mizawngte kiang ah pia in. Hi leh, vantung ah gou na nei ding. Tua khit chiangin, hong pai inla, hon zui in, a chi hi. 22 Tua tangval in tua thu a zak takin, dah mahmahin a paikhia hi. Ahang bel, amah neih leh lam hau mahmah a nahi-a ahi. 23 Tua khitin, a nungzuite kiang ah: Noute kon hilh ahi. Ahau mi adingin vantung kumpigam sung lut a haksa hi. 24 Tua baan ah, noute kon hilh ahi. Ahau mi Pathian' kumpigam sung a lut sangin sangawngsau phim bil vanga a lut paisuak a baihlam zaw, a chi hi. 25 A nungzuite'n hiai thu a zak takun, lamdang a sa mahmah uh a: Kua hotdama om thei ding ahia? a chi uhi. 26 Jesu'n amaute a en a, amaute kiang ah: Mihing adingin hiai thil hithei lou ahi. Ahihhangin, Pathian adingin bel thil bangkim hithei vek ahi, a chi hi.
Sawltakliante' Pahtakman
27 Tua khitin, Peter in a dawng a: En dih, koute'n bangkim nusiain nang kon zui ua, bang ka lawhtak ding ua leh? a chi hi. 28 Jesu'n amaute kiang ah: Noute thutak kon hilh ahi. Pathian in bangkim a siamthak khit chiangin, ka thupina kumpitutphah tung ah kei Mihing Tapa ka tu ding hi. Tua hun chiangin, kei hon zui noute zong, Israel nam sawmlenihte' tunga thukhenin, kumpitutphah sawmlenih tung ah na tu sam ding uhi. 29 Keima' min hanga innte hiam, sanggampate hiam, sanggamnute hiam, gamte hiam, nusia mi kuapeuh in a lehza a ngah ding a, Tangtawn hinna a luah ding hi. 30 Ahihhangin, a masapena pang tampite a nanungpenin a pang ding uh a, a nanungpena pang tampite zong a masapenin a pang ding uhi.
Kilawh Nasemte Gentehna
1 Ahang bel, vantung kumpigam zaw gam nei mi, zingsang beltaka kuankhia a, a grephuana nasem ding, mi goih ding zong tawh kibang ahi. 2 Tua kithalawh mite tawh nitha dinari khat dingin a kilem uh a, grephuan nasem dingin amaute a sawl hi. 3 Amah dak thumna ding khawngin a kuankhia a, midang, sumsinna muna ding maimaite a vamu hi. 4 Ama'n amaute kiang ah: Noute zong grephuan ah vakuan un, a dik mah thaman hon pia ning, a chi hi. Tua bangin, amaute a kuan uhi. 5 Amah, dak gukna leh dak kuana ding khawngin a kuankhe kik a, tua bang mahin, kithalawh mite a guai hi. 6 Dak sawmlekhatna khawngin, a kuankhe kik leuleu a, mi om maimaite a vamu a, amaute kiang ah: Banghanga hiaia sun nituma om maimai na hi ua? a chi hi. 7 Amaute'n a dawng uh a: Kuama'n hon guai lou hiven, a chi uhi. Ama'n amaute kiang ah: Noute zong grephuan ah vakuan un, a dik mah thaman sangna nuteh, a chi hi. 8 Nitaklam hong hih takin, grephuan neipa'n a sumkempa kiang ah: Kithalawhte sam inla, a nanungpen apan a masapen dong, a thaman uh pia in, a chi hi. 9 Dak sawmlekhatna khawng apan a goihte hong pai uh a, dinari khat tek a sang uhi. 10 Amasate hong pai takun, a tamzaw sang dingin a kinem uhi. Ahihhangin, amaute'n zong dinari khat tek mah a sang uhi. 11 Tua banga a sankhit takun, grephuan neipa tung ah a phun uh a: 12 Hiai a nanungpente'n dak kal khat kia sem uh a, a haksa teng sem a, nisa thuak koute tawh kibanga na bawl! a chi uhi. 13 Ahihhangin, ama'n a dawng a: Lawm, na tung ah ka khial kei vele. Dinari khat sang dinga lemsa hilou na hi maw? 14 Na thaman la inla, pai mai in. Ka goih nanungpen zong nang kon piak zah pe nuam hi'ng. 15 Ka neihsa ka ut dandana ka zat a siang kei-a hia? Ahih kei leh, ka hoihna hanga hazatna nei na hi maw? a chi hi. 16 Tua bangin, a nanungpen a masapenin a pang ding a, a masapen zong a nanungpenin a pang ding hi. Ahang bel, sapte tampi ahi a, ahihhangin, teelte bel tawmchik ahi, a chi hi.
Jesu' Sih ding Genkholhna
17 Tua nungin, Jesu, Jerusalem ah a hawhtou a, lampi ah nungzui sawmlenihte a paipihtuam a, amaute kiang ah: 18 Eite Jerusalema hawhtou ding i hi a, Mihing Tapa hon lehbawla, siampi makaite leh Dan sinsakte kiang hon khawng ding uh a, amaute'n thah dinga mawh hon tangsak ding uh ahi. 19 Amaute'n mawkbawl ding leh saat ding leh, khros tunga kilhlup dinga Zentelte khuta hon pekhe ding uh ahi, a chi hi.
Let ding Lunggulh thu
20 Tua nungin, Zebedai' tapate' nu Jesu kiang ah hong pai a, khukdinin, deihsakna a ngen hi. 21 Ama'n a kiang ah: Bang deih na hia? a chi hi. Ama'n: Na kumpigam ah, hiai ka tapa nihte, na taklam leh na veilama a tut ding uh hon phalsak in, a chi hi. 22 Jesu'n a dawng a: Na nget uh na thei kei ua ahi. Ka dawn ding nou apan na dawn thei ding ua hia, ka kibaptis nading ah na kibaptis thei ding ua hia? a chi hi. Amaute'n: Thei e, a chi uhi. 23 Jesu'n amaute kiang ah: Ka nou apan na dawn tham ding uh. Ka kibaptis nading ah na kibaptis tham ding uh. Ahihhangin, ka taklam leh ka veilama tut ding pen, kei piak theih ahi kei, ka Pa'n a sehsate ading ahi, a chi hi. 24 Nungzui sawmte'n hiai thu a zak takun, tua unau nihte tunga lungkim louin a heh uhi. 25 Ahihhangin, Jesu'n a kiang ah amaute a samkhawm a: Zentelte' vaihawmte zaw, amaute tung ah a kiliansak uh a, a uliante uh, amaute tung ah a kithuneisak uh, chih na thei uhi. 26 Noute lak ah bel tua bang hilou ding ahi. Noute laka let ut peuhmah, na nasem ua a pan ding ahi. 27 Noute laka khatna-a pang nuam peuhmah, na silaun pang hen. 28 Kei Mihing Tapa nangawn mi'n ka nna hon sepsak dinga hong pai ka hi kei a, mite nna sem dinga hong pai a, mi tampi tatna man hi dinga ka hinna pe dinga hong pai ka hi zaw, kei bangbang na hih ding uh ahi, a chi hi.
Mittaw Nih Damsakna
29 Jesu leh a nungzuite Jerikho apan a kipatkhiak takun, mipi tampitak in amah a zui uhi. 30 Lampi gei ah, mittaw nih a na tu uh a, amaute'n Jesu hong pai a zak takun, a kikou uh a: Toupa, David' Tapa, koute tung ah zahngai in, a chi uhi. 31 Mipite'n amaute a taai uh a, kamsim dingin a hilh uhi. Ahihhangin, amaute ngaihsemin a kikou uh a: Toupa, David' Tapa, koute tung ah zahngai in! a chi teitei uhi. 32 Jesu a khawl a, amaute a sam a: Noute bang hon hihsak leng na ut ua? a chi hi. 33 Amaute'n a dawng uh a: Toupa, mitvaak ka ut uh, a chi uhi. 34 Jesu'n amaute a lainat a, a mitte uh a lawng a, amaute' mitte a vaak pah a, amah a zui uhi.
Pahtawia Jerusalem Lutna
1 Amaute, Jerusalem tun dek kuana Oliv Muala Bethfage hong tung uhi. Jesu'n a nungzuite nih a sawl a, amaute kiang ah: 2 Na mai ua khua ah valut unla, hi leh, sabiltung kikhih khat, a nou tawh omkhawm na mu pah ding uhi. Tua phei unla, ka kiang ah hon kai un. 3 Mi khat peuh in na kiang ua gen a neih leh, Toupa'n amaute zat nopna a neia ahi, chi le uchin, hon kaisak ding hi, a chi hi. 4 Kamsang in a na-gensa a tangtun nadinga, hibang teng tung ahi. Tua kamsangpa in: 5 En dih, na kumpipa, chingkamtakin, sabiltung tung, sabiltung talnou' tunga tuangin, na kiang ah hong pai, chi-in Zion' tanu hilh in, a na chi hi. 6 Jesu'n amaute thu a piak bangin, nungzuite a vapai uh a, a vahih uhi. 7 Amaute'n tua sabiltung leh a nou hon kai uh a, tuate tung ah a puansilhte uh phahin, amah a tuangsak uhi. 8 Mipi tampi mah-mahte'n a puansilhte uh lampi ah a phah uh a, midangte'n gamlak sing sawlte a khiak uh a, lampi ah a phah uhi. 9 A mailama paite leh a nunglama zui mipite a kikou uh a: David' Tapa ading' Hosana! Toupa' mina hong paipa a nunnuam hi! Tungnungpen ah Hosana! a chi uhi. 10 Amah Jerusalem hong lut takin, khawsung mite khempeuh lung a phawng a: Hiai mi kua ahia? a chi uhi. 11 Mipite'n: Hiai, Galili gama Nazareth apan kamsang Jesu ahi, chi-in a dawng uhi.
Tempul Hahsiangna
12 Tua nungin, tempul huang sung ah a lut a, tempul huang sunga van zuak leh leia omte khempeuh a hawlkhia a, sumkhengte' dawhkante leh vakhu zuakte tutphahte a lumlet hi. 13 Ama'n amaute kiang ah: Ka inn, thuumna inn a kichi ding, chi-a kigelh ahi, noute'n suamhatte' kawkhuk na suaksak uh, a chi hi. 14 Tua khitin, mittawte leh khebaite, tempul huang sung ah a kiang ah hong pai uh a, ama'n amaute a na damsak hi. 15 Ahihhangin, siampi makaite leh Dan sinsakte'n ama' thillamdang hihte leh naupangte'n tempul huang sunga: David' Tapa ading' ah Hosana! a chih uh a muh takun, a heh uhi. 16 Amaute'n Jesu kiang ah: Hiai naupangte' gen na za hia? a chi uhi. Jesu'n amaute kiang ah: Za e. Naungekte leh nawinelaite' kam apan nang adinga phatna hihkip na hi, chi-a kigelh na sim ngei kei ua hia? a chi hi. 17 Tua khitin, ama'n amaute a nusia a, Bethani khua zuanin a pai a, tua ah a giak hi.
Theipikung Hamsiatna
18 Zingsang hong hih takin, khawpi lam zuanin amah a kilehkik a, lampi ah a gilkialta hi. 19 Lampi geia theipikung khat a mu a, a vanaih a, a tehte loungal bangmah a muh louh takin: Chikmahin na gah ngei nawn het ken! a chi hi. Tua hun mahmahin tua theipikung a keugawp pah hi, 20 Nungzuite'n tua a muh takun, lamdang a sa uh a: Bangchi dana tua theipikung keugawp pah ahia le? chi-in a dong uhi. 21 Jesu'n a dawng a: Noute thutak kon hilh ahi: Upna na neih ua, na muanlah kei peuh uleh, theipikung tunga kihih kia na hih kei ding uh. Hiai mual kiang ah: Kisuankhia inla, tuipi sung ah kipailut in, chi le uchin zong, na chih bangbang ua om ding ahi. 22 Thil bangkim uma na nget peuhmah uh na ngah ding uhi, a chi hi.
Jesu' Thuneihna Muanlahna
23 Amah tempul huang sung hong tung a, a sinsak laitakin, siampi makaite leh nam upate'n amah a maituah uh a: Bang thuneihna neia hiai thilte hih na hia? Kua'n hiai thuneihna nang hon pia ahia? a chi uhi. 24 Jesu'n a dawng a: Ke'n zong thil khat hon dong ning. Non hilh uleh, ke'n zong bang thuneihna neia hiai thilte hih ka hi hiam, hon hilh ning. 25 Johan' baptisna van apan thuneihna maw, ahih kei leh, mihingte apan? a chi hi. Amaute a kikum uh a: Van apan, chi lehang, Banghanga amah um lou? hon chi se ding a, 26 mihingte apan, chi lehang lah, mi khempeuh in Johan pen kamsang ahi, chi-a sangta a, mipite lau hang a, a kichi uhi. 27 Tuachi-in, Jesu a dawng uh a: Thei kei ung, a chi uhi, Ama'n amaute kiang ah: Bang thuneihna neia hiai thilte hih ka hi hiam, chih ke'n zong hon hilh kei ning, a chi hi.
Tapa Nih Gentehna
28 Ahihhangin, hiai bangchi'n na ngai ua? Mi khat in tapa nih a nei a, tapa uzaw kiang ah hong pai a: Tapa aw, vakuan inla, tuni-in ka grephuan ah nna vasem in, a chi hi. 29 A tapa in a dawng a: Kuan nuam ke'ng, a chi a, ahihhangin, a khawnung lamin a lunghei a, a vakuan hi. 30 Tua nungin, tua pa, a tapa nauzaw kiang ah hong pai a, tua mah bangin a vachi hi. A tapa in: Pu aw, kuan mah ning, a chi a, ahihhangin, a kuan kei hi. 31 Tua tapa nihte laka koipen in a pa' deihlam a hih ale? a chi hi. Amaute'n a dawng uh a: A uzaw pen in, a chi uhi. Jesu'n amaute kiang ah: Noute kon hilh ahi. Siahdongte leh kizuakte'n Pathian' kumpigam hon lutsan ding uh ahi. 32 Ahang bel, diktatna lampi tawnin Johan noute kiang ah hong pai a, amah na um kei uh. Ahihhangin, siahdongte leh kizuakte'n amah a um uh. Tua mukhin hinapi-in lungheiin amah na um tuan kei uh.
Gamneipa Gentehna
33 Gentehna dang na ngai un. Gamneipa khat a om a, ama'n grephuan a bawl a, a kimkotin suang daiin a um a, grep sukna khuk a tou a, galvil buk sang khat a lam hi. Tua khitin, louneimite kiang ah khawhlawh dingin tua grephuan a pia a, a zin mangsan hi. 34 Grep gah lawh hun hong nai takin, a khawhlawhte apan gah khawm dingin, a silate a sawl hi. 35 Tua lou khawhlawhte'n a silate a na man uh a, khat a vua uh a, a dang khat a that uh a, a dang khat suangin a deng uhi. 36 Tua khitin, ama'n amaute kiang ah, amasate sanga tamzaw sila dangte a sawl hi. Amaute'n a masate tunga a hih bangbang uh, tuate tung ah a hih uhi. 37 Atawptawpin, ama'n amaute kiang ah a tapa a sawl a: Ka tapa na zahtak unte, a chi hi. 38 Ahihhangin, grephuan kemte'n tua a tapa a na muh takun a kikum uh a: Hiai gouluah dingpa ahi vele. Kisa ni in, that ni-in, a gouluah ding sut ni, a kichi uhi. 39 Tuachi-in, amaute'n amah a man uh a, grephuan apan a kaikhia uh a, a that uhi. 40 Tua bang ahih manin, grephuan neipa hong pai chiangin, tua grephuan kemte bang a lawhta dia le? a chi hi. 41 Amaute'n a dawng uh a: Ama'n tua migiloute thuakgimsakin a hihmangthang ding a, grep gah a hunhuna pe ding, grephuan kem midangte a khawhlawhsak ding, a chi uhi. 42 Jesu'n amaute kiang ah: Inlamte'n a nolh uh suang, a kiu suang poimawhpen hong hita hi. Hiai, Toupa thilhih hi a, i mitmuha lamdang hi, kichi, Laisiangthou thu sim ngeilou maw? 43 Tua bang ahih manin, noute kon hilh ahi: Noute apanin Pathian' kumpigam a kilamang ding a, a gah suah ding minam dang kianga piak ahi ding. 44 Hiai suang tunga kipalpai mi peuhmah a kitamkham ding a, a delhkhak peuhmah lah a gawizan ding, a chi hi. 45 Siampi makaite leh Farisaite'n Jesu' gentehnate a zak takun, amaute a genna ahi, chih a thei uh a, 46 amah mat ding dan a zong uh a, ahihhangin, mipite'n amah kamsang hi-a a san uh a hih manin, mipite a lau uhi.
Kitenna Ankuang Gentehna
1 Jesu'n amaute a dawng a, gentehna zangin thu a gen a: 2Vantung kumpigam zaw kumpipa khat, a tapa ading kitenna ankuang lui tawh kibang ahi. 3 Ama'n, kitenna ankuang um dinga chialte sam dingin, a silate a sawl a, ahihhangin, michialte hong pai nuam kei uhi. 4 Ama'n sila dangte a sawl leuleu a: Chialte kiang ah: Ka ankuang a manta. Ka bawngtal leh ka gan vakthaute kigou a, bangkim kimanta hi. Kitenna ankuang hong um un, chi-in vahilh un, a chi hi. 5 Ahihhangin, chialte'n a ngeingaih kei uh a, amau' utna tek ah, khat a lou ah, a dang a sumsinna ah, a hawh uhi. 6 Midangte'n a silate a man uh a, a mawkbawl uh a, a that uhi. 7 Ahihhangin, kumpipa'n hiai thu a zak takin, a heh mahmah a, a sepaihte a sawl a, tua tualthatte a hihmangthang a, a khawpi uh a haltum hi. 8 Tua khitin, ama'n a silate kiang ah: Kitenna ankuang manta a, chialte lah ankuang um taak hilou uhi. 9 Lam tangpi khawng ah vakuan unla, mi na muh muh uh, kitenna ankuang um dingin hon chial un, a chi hi. 10 Tua bangin, silate lam taangpi khawng ah a kuan uh a, mi a muh muh uh, mi sia leh mi pha zong, a vekpiun hon kaikhawm uhi. Tuachi-in, ankuangluina inn sung teng, ankuang um ding mi-in a dimta hi. 11 Ahihhangin, ankuang um dinga hong paite en dinga kumpipa hong lut takin, tua ah, kitenna puan silh lou mi khat a mu hi. 12 Ama'n tua pa kiang ah: Lawm, kitenna puan silh loua hiaia bangchi-a hong lut na hia? a chi a, tua pa bel, gen ding theilouin a om hi. 13 Tua khitin, kumpipa'n a silate kiang ah: A khut a khe hentom unla, kai khia unla, pawlam mial ah lawnkhia un. Tua ah kah leh hagawi a om ding, a chi hi. 14 Ahang bel, sapte tampi ahi a, telte bel tawmchik ahi, a chi hi.
Siah Piak thu
15 Tua khitin, Farisaite a kisa uh a, Jesu, a kampaua mat ding dan a simzon uhi. 16 Amah kiang ah amau' nungzuite, Herod pawlte tawh, a sawl uh a: Sinsakpa, Nang na dik a, thutak tawh kituakin Pathian' lampi na sinsak a, kuamah deihsak tuam leh mitmeiven tuam na nei kei, chih ka thei uh. 17 Tua bang ahih manin, koute na ngaihdan hon hilh in. Kaisar kianga siah piak a siang hia, siang lou? a chi uhi. 18 Ahihhangin, Jesu'n amaute' lungsim siatna a thei a: Nou lepchiahte aw, banghanga hon ze-et na hi ua? 19 Siah sum tang khat hon lak un, a chi a, amaute'n dinari tang khat hon tawi uhi. 20 Ama'n amaute kiang ah: Hiaia kigelh kua' lim hi a, kua' min hi ahia? a chi hi. 21 Amaute'n a kiang ah: Kaisar-a, a chi uhi. Ama'n amaute kiang ah: Tua ahih nung, Kaisar' thilte Kaisar pia unla, Pathian' thilte Pathian pe ve ua, a chi hi. 22 Amaute'n hiai a zak takun, lamdang a sa uh a, amah nusiain a paikheta uhi.
Thawhkik Nung thu
23 Tua ni mahin, Sadukaite Jesu kiang ah hong pai uhi. Amaute bel, thawhkikna om lou, chite ahi uhi. 24 Amaute'n a kiang ah: Sinsakpa, Mosi in: Mi ta neiloua a sih leh, a sanggampa'n a zi a kitenpih a, a sanggampa adinga chi suan a neihsak ding ahi, a chi hi. 25 Koute lak ah unau sanggam pasal sagih pha a om uhi. A upapen in zi a neih khitin, ta neilouin a si a, a sanggampa adingin a zi a nutsiat hi. 26 Anihna, a thumna, a sagihna dongin, tua bangin tabeiin a si vek uhi. 27 Atawptawpin, tua numei zong a si hi. 28 Tua bang ahi a, sanggam pasal sagihte'n tua nu kitenpih tek uh hi a, thawhkikna ah a kuapen' zi a hita dia leh? Chi-in a dong uhi. 29 Jesu'n a dawng a: Noute'n Laisiangthou thute lah thei lou, Pathian' vangletna lah thei lou na hih man uh ahi ve, na theihkhelh nak uh. 30 Thawhkikna ah zi leh pasal kineihna om lou ding, vantunga Pathian' vansawltakte bang ding uhi. 31 Misite' thawhkikna thu Pathian in noute kianga a gen: 32 Kei Abraham' Pathian, Isak' Pathian, Jakob' Pathian ka hi, a chih sim lou maw? Pathian zaw asite' Pathian hilou a, ahingte' Pathian hi zaw ahi, a chi hi. 33 Mipite'n hiai a zak takun, a sinsakna lamdang a sa uhi.
Thupiak Thupipen
34 Ahihhangin, Jesu'n Sadukaite a seldong, chih Farisate'n a zak takun, a kikaikhawm uhi. 35 Amaute laka danthei mi khat in, amah ze-etin thu a dong a: 36 Sinsakpa, Dan sunga thupipen koi thupiak pen ahia? a chi hi. 37 Jesu'n a dawng a: Toupa na Pathian, na lungtang khempeuh, na hinna khempeuh leh na lungsim khempeuha na it ding ahi, chih. 38 Hiai ahi thupiak khatna leh thupipen. 39 A nihna tua mah bang ahi: Nang na ki-it bangin, na veng na pamte na it ding ahi, chih. 40 Dan leh Kamsangte gen khempeuh hiai thupiak nihte'n khaikhawm ahi, a chi hi.
David' Tapa
41 Tua banga Farisaite a kikaih-khawm laitakun, Jesu'n amaute kiang ah: 42 Mesia tawh kisai bangchi-in na ngai ua? Amah kua tapa ahia? chi-in a dong hi. Amaute'n: David' tapa, a chi uhi. 43 Ama'n amaute kiang ah: David in Khain thu a gen a, amah, Toupa, chi-a a sap bangchi dan hi ding ahia leh? Ama'n: 44 Toupa'n ka Toupa kianga: Na melmate na khengakna-a ka bawl masiah, ka taklam ah tu in, chi hi, a na chi hi. 45 David in amah, Toupa, a chih ngai leh, bangchi-a amah a tapa hithei ding ahia? a chi hi. 46 Tua a chih takin, kuama'n kam khatin zong a dawng thei kei uh a, tua ni apanin, kuama'n amah thu a dong ngam nawn kei hi.
Tunggiknate
1 Tua nungin, Jesu'n mipite leh a nungzuite kiang ah thu a gen a: 2 Dan sinsakte leh Farisaite, Mosi' tutphah ah a tu uh. 3 Tua ahih manin, noute hon hilh peuhmah uh zui unla, hih un. Ahihhangin, amaute' hihte bel hih kei un. Ahang bel, a gente uh amau mah in zong zui lou uh hiven. 4 Puakgik puakzawhlouh pipi mite a suan uh a, amaute'n lah tuate khut melengin zong a dom nuam kei uhi. 5 Ahih peuhmah uh mite muh ding deiha a hih uh ahi lei hi. Taia a khip uleh khuta a buhte uh a lianphaphain a bawl uh a, a puansilh mong nelkaite uh zapipi in a hawi uhi. 6 Ankuang luina muna zahbawlna tutna leh sunagog a tutna poimawhpente a deih uh a, 7 sumsinna muna mite' muah khawng, Rabi chi-a sap khawng a nuamtuam uhi. 8 Ahihhangin, noute zaw, Rabi, chihin om kei un. Ahang bel, Sinsakpa khat na nei uh a, amah Khrist ahi a, noute lah unau sanggam ngen na hi uhi. 9 Leitung ah kuamah, Pa, chi-in sam kei un. Pa khat na nei uh a, amah vantunga om ahi. 10 Sinsakpa, chihin om kei un. Sinsakpa khat na nei uh a, amah Mesia ahi. 11 Noute laka lianpen, na sila ua a pan ding ahi. 12 Amah kipahtawi mi peuhmah niamsak ahi ding a, amah kiniamsak mi peuhmah pahtawi ahi ding hi.
Dan Sinsakte leh Farisaite' Tunggiknate
13 Nou Dan sinsakte leh Farisai lepchiahte aw, na tung uh a gik hi. Mite' mai ah vantung kumpigam kongkhakte na khak uh a, nou lah lut nuamlou, midang lah lutsak lou hi ve uchin. 14 Nou Dan sinsakte leh Farisai lepchiahte aw, na tung uh a gik hi! Meigongte' innte nawmvalh a, kineiha sawtpipi thum khemkhem hi ve uchin. 15 Nou Dan sinsakte leh Farisai lepchiahte aw, na tung uh a gik hi! Juda sabiaka phungkai khat leltak man dingin, gam leh tuipi kanin na zin uh a, na mat khit chiangun noute sanga a lehniha gawtmun ta suaksak zel hi ve uchin. 16 Nou makai mittawte aw, na tung uh a gik hi! Tempul siala kichiam mi kuapeuh in bangmah a hih a kul kei, ahihhangin, tempula kham sum siala kichiam mi peuhmah in, a tangtun teitei a kul, na chi uh. 17 Koi thupizaw-a lianzaw ahia, tua kham maw, ahih kei leh tua kham siangthousak tua tempul? 18 Tua baan ah, maitam siala kichiam mi peuhmah in bangmah ahih a kul kei, ahihhangin, maitam tunga kikoih thawnpiak siala kichiam mi peumah in a tangtun teitei a kul, na chi uh. 19 Nou mittaw mihaite! Koi thupi zaw-a lianzaw ahia, tua thawnpiak maw, ahih kei leh, tua thawnpiak siangthousak tua maitam? 20 Tua bang ahih manin, maitam siala kichiam mi kuapeuh, tua maitam leh a tunga omte khempeuh siala kichiam ahi. 21 Tempul siala kichiam mi kuapeuh, tua tempul leh a sunga Teengpa siala kichiam ahi. 22 Tua baan ah, vaan siala kichiam mi kuapeuh, Pathian' kumpitutphah leh a tunga Tuna siala kichiam ahi. 23 Nou Dan sinsakte leh Farisai lepchiahte aw, na tung uh a gik hi! Pudinate, lengmaselte, pasikhawmte sawma khat na pia uh a, dan poimawh zaw- dika vaihawmnate, zahngaihnate leh muanhuainate na limsak kei uh. Adangte hih lou tuan louin, hiaite ahi na hih ding uh. 24 Makai mittawte aw! thouvai khisiangin, sangawngsau na nawmvalh uh. 25 Nou Dan sinsakte leh Farisaite, mi lepchiahte aw! Nou leh kuang a pawlam na silsiang uh a, a sunglam lah nekgukna leh nuamtatna-in a dim hi. 26 Farisai mittawte aw! Nou leh kuang a sunglam silsiang masa le uchin, a pawlam zong siang thei ding hi. 27 Nou Dan sinsakte leh Farisai lepchiahte aw, na tung uh a gik hi! Han pua nuhngou kilawm mahmah, a sung lah misi guhte leh a niin chitenga dim tawh kibang na hi uh. 28 Mite' muhin tua bangin na kilang uhi. Pawlam ah midiktat bangin na kilang uh a, sunglam ah lah lepchiahna leh danbei gamtatna tawh na kidim uhi. 29 Nou Dan sinsakte leh Farisai lepchiahte aw, na tung uh a gik hi! Kamsangte' hansuangte na dawh uh a, mi diktatte' hante na zem uh a: 30 I pu i pate khanlaia om kha hi lehang, kamsangte' sisan suahna ah i pang kei mah ding, na chi uhi. 31 Tua bang ahih manin, kamsangte thatte' suante na hi uh, chih noumau mah kitheihpih na hi uhi. 32 Na pu na pate uh' mawhna sungdim vanglak ve ua! 33 Nou gulte, gul suante aw! Gawtmun mawhtansakna bangchi pelh ding na hi ua? 34 Tua bang ahih manin, na kiang uah kamsangte, mipilte leh Dan sinsakte kon sawl ding a, amaute pawlkhat na that ding uh a, na kilhlum ding uh. Pawlkhat na sunagogte khawng uah na sat ding uh a, khua teng ah na mawkbawl ding uh. 35 Tuachi-in, mi diktatte' sisan, midiktat Abel sisan apan tempul leh maitam kala na thah uh Berekhia' tapa Zekharia' sisan donga mawh noute tung a tu ding. 36 Noute thutak kon hilh ahi: Hiaite khempeuh, hiai khanga mite tung ah a tung ding hi.
Jerusalem Kahkhumna
37 Jerusalem aw, Jerusalem, nang kamsangte that a, na kianga hong kisawlte suanga deng! Bangzah vei ahia, akpi in a noute a khanuaia a opkhum banga na tate opkhum ka tup a, na utlouh uh! 38 En un! Pathian in na innte uh kilawisak ding a hita. 39 Ahang bel, Toupa' mina hong paipa mi nunnuam ahi, na chih masiah uh kei non mu nawn kei ding uhi, kon chi ahi, a chi hi.
Tuhun Bei nading Chiamtehna
1 Tua nungin, Jesu tempul nusiain a paikhia a, tua laitak mahin, a nungzuite a kiang ah hong pai uh a, tempula innte a et ding deihin a kawkkawk uhi. 2 Jesu'n amaute kiang ah: Hiaite khempeuh na mu umaw? Noute thutak kon hilh ahi: Mi'n hiai suangte, khat tunga suang dang kichiangsawn nuse loua hihchim vek sipsip ding uh ahi, a chi hi. 3 Tua nungin, Jesu Oliv Mual tunga a tut laiin, a nungzuite a simin a kiang ah hong pai uh a: Koute hon hilh in. Hiai thilte chik chianga tung ding ahia? Na hong pai nading leh, tulai hun beina chiamtehna bang hi ding ahia? a chi uhi. 4 Jesu'n amaute a dawng a: Kuama'n hon khempuk louh nadingin, pilvang un. 5 Ahang bel, keima' min siala mi tampi hong pai ding uh a: Keimah Mesia ka hi, chi-a mi tampi khemzou ding uh ahi. 6 Kidou thute, kidou thuthangte na za ding uh. Hiaite kilausak kei un. Ahang bel, hiai thilte khempeuh hong tung ding him ahi, ahihhangin, tawpna hi nai lou ding ahi. 7 Nam leh nam kidou ding a, kumpigam leh kumpigam kidou ding a, mun tuamtuam a kialte, hilengte, zinlingte tung ding ahi. 8 Hiaite khempeuh nauvei gim kipatna hi ding ahi. 9 Tua hun chiangin, noute hon thuaksak nadingun, hon mansak ding uh a, hon that ding uh. Ka min hangin namte khempeuh' muhdah na hi ding uh. 10 Tua hun chiangin, mi tampi a kipalpai ding uh a, khat leh khat akilepsan ding uh a, a kimudah ding uhi. 11 Kamsang takloute hong pawt ding uh a, mi tampi a khemzou ding uh. 12 Danbeia gamtatna uang ding a hih manin, mi tampite'n itna a mansuah ding uh. 13 Ahihhangin, a tawp donga thuak mualsuah mi bel, hotdam ahi ding hi. 14 Namte khempeuh adinga theihpihna hi dingin, hiai kumpigam tangthupha leitung bup ah a kigen ding. Tua khit chiangin, tawpna hong tung ding hi. 15 Tua bang a hih manin, siatna tunpa Pathian muhdahpa, a kihhuaipa, mun siangthou ah a ding ding. Kamsang Daniel in a na gen hiai pa ahi, chih a sim peuhmah in thei hen. 16 16 Hiai hong tun chiangin, Judia gama omte mual tung lam ah tai uhen. 17 Inntunga om kuamah insunga vante la dingin kumsuk kei hen. 18 Loua om kuamah in a puante la dingin inn lam delh kei hen. 19 Tua nitein, gaite leh naunou pomte' tung gik nanchia! 20 Phalbi lai hiam, ahih kei leh, Sabbath ni hiama na galtai uh a kul louh nadingin thum un. 21 Ahang bel, gimthuakna thupi lua, leitung pian chil apan om ngei nailou, om zong om ngei nawn lou ding, hong tung ding ahi. 22 Pathian in tua nite a hihtom kei leh, kuamah a suakta kei ding hi. Ahihhangin, ama' teelsate hangin, tua nite a hihtom ding, 23 Tua hun chianga, mi khatpeuh in: En un, hiai ah Mesia a om, a chih chiangin um kei un. Ahih kei leh: Hua lai ah amah a om, a chih chiangin um kei un. 24 Ahang bel, Mesia takloute leh kamsang takloute hong pai ding uh a, mite a khemzawh na ding un chiamtehna lamdangte leh vangletna nasepte a lak ding uh. Hithei liai hi leh, Pathian' teelte nangawn khemmang a ut ding uhi. 25 Ngai un, a hun tun ma-a hon hilh ka hi. 26 Tua bang a hih manin, noute kianga: En un, amah gamdai-gamkeu ah a om! a chih chiangun vapai kei un. Ahih kei leh: En un, amah inndan sungnung ah a om! a chih uleh, um kei un.
Khrist Hong Pai Nihveina
27 Ahang bel, Mihing Tapa kong paina zaw, suahlam apan khua phia-a, tumlam a tun pah bang ahi ding hi. 28 Ahang bel, saluang omna peuha musanete kikhawm ding hiven. 29 Tua lungzinna nite a tunkhit phetin, Pathian in ni mialsak ding a, kha taang lou ding a, aksite van apan keding a, Pathian in vana vangletnate kungsin ding hi. 30 Tua hun chiangin, Mihing Tapa' chiamtehna vaan ah hong kilang ding a, leitung namte khempeuh awm kitumin a kap ding uh a, kei Mihing Tapa, vaan meipi tunga, vangletna leh thupina thupi mahmah tawh kong pai hon mu ding uhi. 31 Ka vansawltakte, pengkul ging ngaihtak tawh ka sawlkhe ding a, amaute'n lei kiuli apan leh vaan mong langkhat apan mong langkhat dong apanin ka teelsate a khawm ding uhi.
Theipikung Gentehna
32 Tu'n theipikung apan hiai gentehna sin un: Theipi kung hiangte hong dawn a, a tehte hong sel chiangin, nipi a naita, chih na thei uhi. 33 Tua bangin, hiai thilte khempeuh hong tung na muh chiangun, ka hong naita, kongkhak bul mahmah ah ka omta, chih thei un. 34 Noute thutak kon hilh ahi. Hiai thilte a tun kim masiah, hiai khang a bei kei ding. 35 Lei leh van a mangthang ding a, ka thute bel bangchi mahin a mangthang kei ding hi.
Noa Damlai Nite apan Etsakna
36 Ahihhangin, tua ni leh tua hun kuama'n a thei kei. Vantunga vansawltakte'n zong a thei kei uh. Tapa nangawn in zong ka thei kei. Ka Pa kia in a thei hi. 37 Mihing Tapa kong pai ding chiangin Noa damlai nite bangin thil a om ding hi. 38 Tuichimpi tun ma nitein, mite'n nein a dawn uh a, zi leh pasalin a kizong tuah uh a, tua bangin longpi sunga Noa a lut ni dong a om uhi. 39 Tuichimpi hong tung a, amaute khempeuh a lakmang dong khua phawk louin a om uhi. Mihing Tapa kong kilat chiangin, tua bang ahi ding hi. 40 Lou ah pasal nih a om ding uh a, khat laak ahi ding a, khat nutsiat ahi ding. 41 Numei nih ansuin a om ding uh a, khat laak ahi ding a, khat nutsiat ahi ding. 42 Tua bang ahih manin, kiveng un. Kei Toupa bang huna hong pai ding ka hi hiam, chih na thei kei uhi. 43 Ahihhangin, hiai thei un. Inn neipa'n guta hong pai ding hun theikhol leh, a kiveng ding a, a inn a luhsak kei ding hi, 44 Tua bang ahih manin, noute zong kimansain om un, Na lamet louh hun takun Mihing Tapa kong pai ding hi.
Sila Nihte apan Etsakna
45 Ahih leh, kua ahia sila muanhuai leh pii, a toupa'n a innsung ukpa ding leh a hunhuna innsung mite kianga ann pe dinga a seh ding? 46 A toupa hong pai chianga, tua bang tak sema a muh sila, mi nunnuam ahi. 47 Noute thutak kon hilh ahi: Ama'n tua silapa, a neih a lam tunga thunei in ka koih ding hi. 48 Ahihhangin, sila thulimlou in a lungsung ah: Ka toupa hong tung zok kei nanteh, chi-in, 49 a sila hihpihte vuain zukhamhatte tawh nein na dawnta leh, 50 a lamet louh ni leh a theih louh hunin a toupa hong tung guih ding a, 51 amah tumnih a suah ding a, lepchiahte' mun a pe ding a, tua ah kah leh hagawi a om ding hi.
Nungak Siangthou Sawm Gentehna
1 Tua hun chiangin, vantung kumpigam zaw, nungak siangthou sawm, mouneipa muak dinga kuankhia tawh kibang ding hi. 2 Tua nungakte laka nga a pii uh a, nga bel a hai uhi. 3 Ahaite'n meivakte keng napi-in, a meivaktui a keng kei uhi. 4 A pilte'n bel, meivakte tawh meivaktui a keng khawm uhi. 5 Mouneipa hong zekai manin, amaute khempeuh ihmut suakin a na ihmu uhi. 6 Zankhang laiin, kikou aw khat in: Ngai un, mouneipa hong pai! Amah muak dingin kuankhia un! a chi hi. 7 Tua nungak siangthoute a vekun a khanglou uh a, a meivakte uh a hahsiang uhi. 8 A haite'n a pilte kiang ah: Na meivaktui uh hon hawm un. Ka meivakte uh mit dek hi, a chi uhi. 9 Apilte'n a dawng uh a: Hi lou e, koute leh noute adinga kiching lou ding hi. Pai unla, a zuakte kiang apan nou ading valei un, a chi uhi. 10 Tua banga meivaktui lei dinga a kuan kal-un, mouneipa hong tung a, a mansate'n bel, kitenna ankuang um dingin amah a zuilut uhi. Amaute a lutkhitun, kongkhak khak ahita hi. 11 Tua nungin, nungak siangthou dangte zong a hong pai uh a: Toupa, Toupa, kong hon hon in! hong chi uhi. 12 Ahihhangin, ama'n a dawng a: Noute thutak kon hilh ahi. Noute kon thei ngei kei, a chi hi. 13 Tua bang ahih manin, kiveng un. Mihing Tapa kong pai nading a ni, ahih kei leh, a hun na thei kei uhi.
Talen Sum Gentehna
14 Tua baan ah, vantung kumpigam zaw, mi khat khualzin dinga kisa a, a silate sam a, amaute muanga sum zangsak tawh kibang ahi. 15 Ama'n sila khat khut ah talen nga a pia a, sila dang khat khut ah talen nih a pia a, a dang khat khut ah talen khat a pia hi. Amaute' hihtheihna tawh kikhom a piak tek ahi. Tua khitin, amah a zinkhe pahta hi. 16 Talen nga sangpa a pai a, talen ngain a sumsin a, talen nga dang a meetsak pah hi. 17 Tua mah bangin, talen nih sangpa'n talen nih dang a meetsak pah hi. 18 Ahihhangin, talen khat sangpa bel a pai a, lei a khuak a, tua ah a pu' sum a seel hi. 19 Hun sawtpi nungin, tua silate toupa hong tung kik a, amaute tawh sum thu a suutkhawm uhi. 20 Talen nga sangpa hong pai a, talen nga dang tawh hon tawi a: Toupa aw talen nga zang dingin non muanga, en in, talen nga dang ka metsak hi a chi hi. 21 A toupa'n a kiang ah: Na hih hoih e, sila hoih leh muanhuai. Thil tawmchik tung ah na muanhuai a, tampi tunga thuneiin kon bawl ding. Na toupa' lungnopna tanpihta in! a chi hi. 22 Talen nih sangpa zong hong pai a, talen nih dang tawh hon tawi a: Toupa aw, talen nih zang dingin non muanga, en in, talen nih dang ka metsak hi, a chi hi. 23 A toupa'n a kiang ah: Na hih hoih e, sila hoih leh muanhuai. Thil tawmchik tung ah na muanhuai a, tampi tunga thuneiin kon bawl ding. Na toupa' lungnopna tanpihta in! a chi hi. 24 Tua khitin, talen khat sangpa hong pai a: Toupa aw, mi chilgiltak, na tuh louna-a at a, na theh louhna-a kaikhawm mi na hi, chih ka thei. 25 Tua bang ahih manin, ka lau a, vapaiin na talen leilak ah ka vaphum hi. En in, hiai nang'-a ngei mah ahi, a chi hi. 26 A toupa'n a dawng a: Nang sila gilou leh thadah! Ka tuh louhna-a at a, ka theh louhna-a kaikhawm mi ka hi chih na thei maw? 27 Tua hang mahin, sum leitawisakte khuta ka sum na koih a, kong pai kik chianga, ka sumpi, a meet tawh ka muh kik ding hilou maw! 28 Tua talen laksak unla, sawm neipa pia un. 29 Ahang bel, a nei mi peuhmah tamsem kipiak behlap ding a, tampi nei ding hi. Ahihhangin, a nei lou mi bel, a neihsun nangawn kilaksak ding hi. 30 Tua khit chiangin, mannabei sila pen, pawlam miallak ah paikhia un. Tua ah kah leh hagawi a om ding, a chi hi.
Belamte leh Keelte kal Thukhenna
31 Mihing Tapa, ka thupina tawh, vansawltak siangthoute khempeuh tawh, kong pai chiangin, ka thupina kumpitutphah tung ah ka tu ding. 32 Tua hun chiangin, namte khempeuh ka mai ah kaihkhawm ahi ding a, amaute pawl nihin ka khen ding. Belamchingpa'n kelte apan belamte a khenkhiak bang ahi ding hi. 33 Tua hun chiangin, ke'n belamte ka taklam ah ka koih ding a, kelte ka veilam ah ka koih ding. 34 Tua khit chiangin, kei Kumpipa'n ka taklama omte kiang ah: Ka Pa' vualzawlte aw, hong pai unla, leitung kisiam ma-a noute adinga bawlsa kumpigam luah un. 35 Ahang bel, gilkiala ka omin an non pia uh a, dangtaka ka omin dawn ding non pia uh. Mikhuala ka omin non zintun uh a, 36 vuaktanga ka omin silh ding non pia uh a, china-a ka omin, nong veh uh a, suangkula ka tanin nong veh uh, ka chi ding. 37 Tua hun chiangin, mi diktatte'n hon dawng ding uh a: Toupa, chikin eita nang gilkiala kon muh ua, an kon piak uh? Ahih kei leh, dangtaka kon muh ua dawn ding kon piak uh? 38 Chikin eita nang mikhuala kon muh ua, kon zintun uh? Ahih kei leh vuaktanga kon muh ua, silh ding kon piak uh? 39 Chikin eita china-a kon muh ua, ahih kei leh suangkul tanga kon muh ua, kong veh uh? a chi ding uhi. 40 Kei kumpipa'n amaute ka dawng ding a: Noute thutak kon hilh ahi: Hiai ka sanggamte laka neupen tunga na hih zahzah uh, keima' tunga hih na hi uh, ka chi ding hi. 41 Tua baan ah, ke'n veilama omte kiang ah: Nou hamsethuakte aw, ka kiang apan paimang unla, dawimangpa leh a vansawltakte adinga kibawl Tangtawn meidil ah lut un. 42 Ahang bel, gilkiala ka omin an non pe kei uh a, dangtaka ka omin dawn ding non pe kei uh. 43 Mikhuala ka omin non zintun kei uh a, vuaktanga ka omin silh ding non pe kei uh a, china leh suangkul tanga ka omin nong veh kei uh, ka chi ding. 44 Tua hun chiangin, amaute'n zong hon dawng ding uh a: Toupa, chikin eita, gilkialin hiam, dangtakin hiam, mikhualin hiam, vuaktangin hiam, chinain hiam, suangkul tangin hiam kon muh ua, kon don louh uh? a chi ding uh. 45 Ken amaute ka dawng ding a: Noute thutak kon hilh ahi: Hiai ka sanggamte laka neupen tunga na hih louh uh, keima' tunga hih lou na hi uh, ka chi ding hi. 46 Tua hun chiangin, amaute Tangtawn gawtna ah a lut ding uh a, mi diktatte bel Tangtawn hinna ah a lut ding uhi, a chi hi
Jesu Thah Sawmna
1 Hibang hong hi a, Jesu'n hiaite a genkhitin, a nungzuite kiang ah: 2 Ni nih nung chiangin, Paikan Ankuang lui hi ding ahi. Tua hun chiangin, kei Mihing Tapa khrosa kilhlup dinga hon pekhe ding uh ahi, chih na thei uhi, a chi hi. 3 Tua khitin, siampi makaite leh nam upate, Kaiafa kichi siampilian' innpi ah a kikhawm uh a, 4 Jesu, lepchiah piltaka mat a, thah ding a sawm uhi. 5 Amaute'n: Mipite lak ah kitomna om kha ding a, Ankuang lui laiin zaw hi kei leh, a kichi uhi.
Mari' Thaunilhna
6 Bethani khua-a Simon kichi, miphak khat inn-a Jesu a om laitakin, 7 numei khat, sathau namtui manpha, alabastar thawla tawiin, amah kiang ah hong pai a, ankuang uma tulai a lutang ah tua sathau a hong buak hi. 8 Nungzuite'n tua a muh takun, a ngaidah uh a: Banghanga hibanga tua sathau thangbawl ahia? 9 Hiai sathau namtui tampi-a kikhawng a, mizawngte kianga piak theih hi tawk a, a chi uhi. 10 Jesu'n tua a theih takin, amaute kiang ah: Banghanga tua numei subuai na hi ua oi? Ama'n kei tunga thilhoih hih ahi. 11 Ahang bel, mizawngte noute kianga om gige a, kei bel noute kianga om gige lou ding ka hi. 12 Hiai sathau namtuia ka pumpi a buah pen ka kivui nadinga a hih ahi. 13 Noute thutak kon hilh ahi: Leitung bupa hiai tangthupha a kigen na peuh ah, hiai numei' thilhih zong, amah theihgige nadingin a kigen ding hi, a chi hi.
Juda' Lehbawla Khotna ding
14 Tua khitin, Juda Iskariot kichi, sawmlenihte laka khat, siampi makaite kiang ah a vahawh a: 15 Amah na khut sung uah hon pe leng, bang non pe ding ua? a chi hi. Amaute'n amah adingin ngun dangka tang 30 a sehkhiak uhi. 16 Tua hun apanin ama'n, amah lehbawla khotkhiak nading hun lem a zong panta hi.
Paikan Ankuang Bawlna
17 Tanghou Silngou sawhlouh Ankuang lui ni masapen ni-in, nungzuite Jesu kiang ah hong pai uh a: Paikan Ankuang na um nading koi ah hon bawlsak le ung na ut a? hong chi uhi. 18 Ama'n: Khawpi ah va lut unla, pasal khat kiang ah: Sinsakpa'n: Ka hun a tung dekta a, na inn ah ka nungzuite tawh Paikan Ankuang ka um nuam, a chi, vachi un, a chi hi. 19 Nungzuite'n Jesu hilh bangin a hih uh a, Paikan Ankuang a vabawl uhi.
Paikan Ankuang
20 Nitaklam hong hih takin, Sawmlehnihte tawh ankuang umin Jesu a tu hi. 21 An a nek laiun, ama'n: Noute thutak kon hilh ahi. Noute laka khat in kei hon lehbawla hon khawng ding ahi, a chi hi. 22 Amaute a lungliap mahmah uh a, a banban in amah kiang ah: Toupa, kei zaw hi buang kei ning maw? a chi tek uhi. 23 Jesu'n a dawng a: Belkuang sung hon sawkpihpa ahi kei hon lehbawla hon khawng dingpa. 24 Mihing Tapa zaw ka tungthu kigelhsa bangbanga pai ding ka hi. Ahihhangin, Mihing Tapa lehbawla hon khawng dingpa' tung a gik hi! Piang lou hizaw leh, amah adingin a hoih zaw ding hi, a chi hi. 25 Tua khitin, amah lehbawla khawng dingpa Juda in amah kiang ah: Sinsakpa, kei ka hi hia? a chi a, ama'n amah kiang ah: He, nang na hi, a chi hi.
Toupa Nitak-an Kipatna
26 Tua banga an a nek laiun, Jesu'n tanghou a la a, a vualzawl a, a balkham a, nungzuite a pia a: La unla, ne un. Hiai ka pumpi ahi, a chi hi. 27 Tua khitin, nou a la a, kipahthu a gen a, amaute a pia a: Na vekun hiai nou apan dawn un. 28 Hiai thukhunthakna ka sisan ahi. Khelhnate ngaihdam nadinga mi tampi adinga buakkhiak ahi. 29 Ahihhangin, noute kon hilh ahi. Ke'n zaw ka Pa' kumpigama noute tawh ka dawnthak ni a tun masiah, hiai grepzu ka dawn nawn kei ding hi, a chi hi.
Peter' Kilepsan ding Genkholhna
30 Amaute'n la khat a sak khitun, Oliv Mual zuanin a paita uhi. 31 Tua ah Jesu'n amaute kiang ah: Tu zan mahmah in, keima' hangin noute khempeuh na kipalpai ding uhi, ahang bel: Belamchingpa sat ding inga, belamte kithehdalh ding hi, chi-in a na kigelh hi. 32 Ahihhangin, Pathian in misite lak apan hon kaithawh nung chiangin noute' main, Galili gam ah ka na pai masa ding, a chi hi. 33 Peter in a dawng a: Nang hangin mi khempeuh kipalpaiin hon kilepsan mah leh, ke'n zaw kon kilepsan ngei kei ding, a chi hi. 34 Jesu'n a dawng a: Nang thutak kon hilh ahi: Tuzan mahmah-in, akkhuan main thumvei non kilepsan ding, a chi hi. 35 Peter in a kiang ah: Nang tawh sikhawm ding ka hita zongin, kon kilepsan kei ding! a chi hi. Nungzuite khempeuh in zong tua bangin a chi uhi.
Jesu Thumvei Thuumna
36 Tua nungin, Jesu amaute tawh Gethsemani kichi mun hong tung uhi. Ama'n amaute kiang ah: Hua laia vapai a, ka vathuum sungin, noute hiai ah na tu un, a chi hi. 37 Ama'n Peter leh Zebedai' tapa nihte a tonpih a, nakpitaka lungzing in hong lungkham hi. 38 Amaute kiang ah: Ka lung a kham mahmah a, sih theih nading khop hiai ahi. Hiai ah na om unla, pilvanga kiveng in om un, a chi hi. 39 Tua khitin, amah a vapai gamla deuh a, a maia lei si-in a thuum a: Ka Pa aw, a hih theih liai leh hiai nou tawh hon kipelsak in. Ahihhangin, kei deihna bang hilouin nangma' deihna bang hi zaw hen, a chi hi. 40 Tua khitin, amah nungzuite kiang ah hong pai a, amaute ihmuin a mu a, Peter kiang ah: Dakkal khat zong kei tawh pilvanga kiveng zou lou na hi umaw? 41 Khemna zolna-a na lut louh nadingun kiveng unla, thuum un. Kha zaw a ut a, ahihhangin, sa bel a hat kei hi, a chi hi. 42 Amah, a nihveina dingin a vapaikhe kik a, a thuum a: Ka Pa aw, hiai nou ka dawn louh a, hon pel theilou ahih leh, nang deihlam kihih hen, a chi hi. 43 Tua khitin, amah hong pai a, amaute ihmuin a mu kik hi. Ahang bel, amaute ihmut suak lua a, hak zou mahmah lou a hih man uh ahi. 44 Amah, amaute nusiain a vapaikhe kik a, a thumveina dingin a vathuum a, a gen ngei teng mah a gen hi. 45 Tua khitin, amah a nungzuite kiang ah hong pai a: Noute ihmu lailaia tawlnga lailai na hi umaw? Ngai un, a hun hong tung ahita. Mihing Tapa lehbawla mikhialte khut sunga khotkhiak ka hita. 46 Thou unla, pai ni. En un, lehbawla kei hon khawngpa hong naita, a chi hi.
Jesu Matna
47 Amah tua banga a pau lai mahin, ngai un, Juda, Sawmlenihte laka khat, namsaute leh khetbukte tawi mi tampi tawh hong pai hi. Amaute, siampi makaite leh nam upate' sawl ahi uhi. 48 Amah lehbawla khawngpa'n amaute chiamtehna a na pia a: Ka tawp penpen amah hi ding ahi, man un, a na chikhin hi. 49 Ama'n Jesu a vanaih pah a: Chibai, Sinsakpa! chi-in amah a tawp tantan hi. 50 Jesu'n amah kiang ah: Lawm, hih dinga nong paina san pen hih pah mai in, a chi hi. Tua khitin, tua mipite'n hon naih uh a, amah a len uh a, a manta uhi. 51 Jesu' ompihte khat in a namsau sawkin a phawi a, siampilian' silapa a sat a, a bil a satkhia hi. 52 Jesu'n amah kiang ah: Na namsau a pai ah siat in. Namsau zang mi namsaua mangthang ding ahi. 53 Ahih kei leh, ke'n ka Pa ngen theilou dingin non ngaihtuah ua hia? Ngen leng ama'n vansawltak 6,000 mun sawmlenih tu mahmaha hon sawl theilou dingin na ngaihtuah ua hia? 54 Tua bangin hih leng, hibanga tangtung ding, chi-a kigen Laisiangthou thute bangchi-in a tangtung thei dia eita? a chi hi. 55 Tua hun mahin, Jesu'n mipite kiang ah: Suamhat hi leng kilawmin namsaute leh khetbukte tawh kei man dingin nong kuan uh maw? Nisimin tempul ah sinsakin ka tu a, non man kei uh. 56 Ahihhangin, Kamsangte' Laigelhte a tangtun nadinga hiai hong tung ahi ve, a chi hi. Tua khitin, nungzuite khempeuh in amah a nusia uh a, a taimang uhi. 57 Tua khitin, Jesu mante'n siampilian Kaiafa kiang ah amah a paipih uhi. Tua ah Dan sinsakte leh upate a na kikhawm uhi. 58 Peter in zong gamla sim ah, siampilian' huangsung dong a zui hi. Amah tua huang sung ah a valut a, bang hong suak hiam, chih en dingin, tua-a Tempul vengte kiang ah a tu hi.
Juda Vaihawmpawl maia Jesu
59 Siampi makaite, upate leh Juda Sanhedrinte'n Jesu a thah theih nadingun, amah hekna zuau a zong uh a, 60 ahihhangin, a mu kei uh. Theihpih taklou tampi hong ding mah leh, hekna a mu kei uhi. Atawpin, theihpih tak lou nih hong ding uh a: 61 Hiai mipa'n, Pathian' tempul hihsia-a ni thum sunga lamthak thei ka hi, a chi, a chi uhi. 62 Siampilian a dingtou a, Jesu kiang ah: Nang bangmaha dawng lou ding maw? Hiai mite' hon hekna bang thu a hia? a chi hi. 63 Ahihhangin, Jesu bel a dai dide hi. Siampilian in amah kiang ah: Pathian hing mina kichiamin thu kon pia hi. Pathian' Tapa Mesia na hi hia, koute hon hilh in, a chi hi. 64 Jesu'n a dawng a: Na gen bangin hi mah ing. Ahihhangin, nang kon hilh a hi. Tunung chiangin, Mihing Tapa, a Vanglianpa' taklama tu, vaan meipite laka hong pai non mu ding uh, a chi hi. 65 Tua khitin, siampilian in a puansilhte a botkek a: Ama'n Pathian a gensia! Banghanga theihpih mi dang kul lai ding i hia? En un, a Pathian gensiatna na zata ve uale. 66 Bangchi na sa ua eita? a chi hi. Amaute'n a dawng uh a: Amah si taak ahi, a chi uhi. 67 Tua khitin, amaute'n ama' maitang ah a chilphih uh a, khuttum in a tum uhi. Midangte'n khut in amah a beeng uh a: 68 Nang Mesia, koute kiang ah kamsang bangin gen ve leh: Kua pen ahia nang hon beeng? a chi uhi.
Peter' Kilepsanna Thumvei
69 Peter bel, pawlam ah inn huang sunga tu ahi. Tua ah sila numei khat a kiang ah hong pai a: Nang zong Galili mi, Jesu tawh omkhawm hiteh maw? a chi hi. 70 Ahihhangin, Peter in amaute khempeuh' mai ah tua a nial a: Na thugen ka thei kei, chi-in a kilep hi. 71 Tua khitin, Peter, kongpi lam ah a pawtkhia a, numei dang khat in amah a mu a, tua muna omte kiang ah: Hiai mi zong Nazareth Jesu tawh omkhawm ahi, a chi hi. 72 Peter in kichiamin, tua a nial kik a: Tua mipa ka thei kei, chi-in a kilep hi. 73 A sawtlou nungin, tua muna dingte'n Peter kiang ah: Nang zong amaute laka kihel na hi mah ve. Na paukam suakin a kithei ve, a chi uhi. 74 Tua khitin, Peter hamsia kilawh hialin a kichiam a: Tua mipa thei ngei het keng! chi-in a kilep a, ak a khuang pahta hi. 75 Tua khitin, Peter in amah kianga Jesu' thugen: Akkhuan main, thumvei non kilepsan ding, a na chih a phawkkhia a, a va pusuak a, khasetakin a kap hi.
Pilat Khuta Jesu Piakkhiakna
1 Zingkhangpi-in, siampi makai khempeuh leh upate kikumin Jesu thah theih nading a gel uhi. 2 Amaute'n amah a hen khitun, a paipih uh a, ukpipa Pontia Pilat khut ah a pekhia uhi.
Juda' Kisikna
3 Tua nungin, Jesu lehbawla khawngpa Juda in amah mawhtansak ahi, chih a theih takin kisikin a lungkham hi. Tuachi-in, siampi makaite leh upate kiang ah, tua ngun dangka tang 30 hong pe kik a: 4 Midik' sisan khawngin ka khialta, a chi hi. Amaute'n: Tua kou tawh bang kisai ahia? Na lawhlawh kilawh ve! a chi uhi. 5 Tua khitin, Juda in, tua ngun dangkate tempul ah a lawnlut a, a paikhia a, a kuan a, a va-awklum hi. 6 Ahihhangin, siampi makaite'n tua ngun dangkate a la uh a: Hiai sumte sisan man ahih manin sumbawma koih a siang kei, a chi uhi. 7 Tuachi-in, a kikum uh a, gamdang mite' kivuina mun dingin, belvel mi' mun leinain a zang uhi. 8 Tua bang ahih manin, tua mun pen, tuni dongin Sisan Mun a kichi hi. 9 Tua hunin, kamsangpa Jeremia' gensa a tangtung hi. Ama'n: Amaute'n tua ngun dangka tang, ama' man dinga, Israel tate'n a sak uh la uh a, 10 Tangtawn Toupa'n kei hon hilh bangin, belvel mi' mun man dingin pia uhi, chi-in a na gen hi.
Pilat' maia Jesu
11 Jesu bel ukpipa' mai ah a ding hi. Ukpipa'n amah thu a dong a: Nang Judate' Kumpipa na hi maw? a chi hi. Jesu'n a dawng a: Na gen bangin hi mah ing, a chi hi. 12 Siampi makaite leh upate'n amah a hek laiun, ama'n bangmahin a dawng kei hi. 13 Tua khitin, Pilat in ama kiang ah: Nang hon hekna uh tampite za lou maw? a chi hi. 14 Ahihhangin, Jesu'n kam khatin zong a dawng kei a, ukpipa'n lamdang a sa mahmah hi.
Baraba Khahkhiakna
15 Paikan Ankuanglui laia, mipite deih suangkul tang khat khahkhiak zel, ukpipa hihdan ngeina a na hi hi. 16 Tua hun laiin, Baraba kichi gilou minthang suangkultang khat a nei uhi. 17 Mipite hong paikhawm takun, Pilat in amaute kiang ah: Noute kianga kon khah dingin kua na deih ua? Baraba maw, ahih keileh, Khrist kichi Jesu? a chi hi. 18 Ahang bel, hazat mana Jesu ama' khuta pia uh ahi, chih Pilat in a thei hi. 19 Pilat, thukhenna tutphah tunga a tut laiin, a zi in amah kiang ah: Hiai midiktat mi tawh kisaiin bangmah kinuh kha ken, ama' hanga tuni-a ka manga thil tampitak thuak ka hi, chi-in thu a khak hi. 20 Ahihhangin, siampi makaite leh upate'n, Baraba ngenkhia a, Jesu bel hihmangthang dinga ngen dingin mipite a thuzawh uhi. 21 Ukpipa'n a dong a: Mi nihte a kua pen ahia kon khahsak ding na deih uh? a chi hi. Amaute'n: Baraba! a chi uhi. 22 Ukpipa'n: Tua hi leh, Khrist kichi Jesu bang lawh ding ka hia? a chi hi. Amaute'n: Amah khros ah kilhlum in! a chi uhi. 23 Pilat in! Banghangin maw? Ama'n thil gilou bang a hih-a eita? a chi hi. Amaute ngaih semin a kikou uh a: Amah khros ah kilhlum in! a chi uhi. 24 Pilat in, a thu a pai zou kei a, mipi helna om dinga kisa ahi, chih a muh takin, tui a la a, mipite' mai ah a khut a sil a: Hiai midiktat sisan ah mawhlou ka hi. Noute' mawhpuakna ahita, a chi hi. 25 Tua mipite khempeuh in: Ama' sisan mawh koute leh ka suante uh' tung ah om hen, a chi uhi.
Jesu Satna
26 Tua khitin Pilat in amaute kiang ah Baraba a khahkheta a, Jesu bel a satsak khitin khrosa kilhlup dingin a pekheta hi. 27 Tua khitin, ukpipa' sepaihte'n innpi sung ah Jesu a pilut uh a, sepaihpawl khempeuh ama' kim ah hong paikhawm uhi. 28 Amaute'n a puante a suahkhiaksak uh a, kumpipuan sandup a silhsak uhi.
Golgotha lama Jesu Paipihna
29 Amaute'n lingkung hiangin kumpilukhu a phan uh a, a lutung ah a khusak uh a, a khut taklam ah pumpeng chiang a tawisak uhi. A maia khukdinin a kun uh a, amah a mawkbawl uh a: Chibai, Judate Kumpipa! a chi uhi. 30 Amah a chilphih uh a, tua pumpeng chiang sutin, a luzang khetna'n a nei uhi. 31 Amah a mawkbawl khitun, kumpipuan a suahkhiaksak uh a, ama' puante a silhsak kik uh a, khrosa kilhden dingin a paipihta uhi. 32 Amaute hong paikhiak laiun, Kurini gam mi khat Simon kichi, a tuak uh a, Jesu' khros amah suan teiteiin a pawsak uhi. 33 Tua khitin, Golgotha kichi mun hong tung uhi. Golgotha bel, Luguh Mun chihna ahi.
Jesu Kilhdenna
34 Tua ah Jesu' dawn dingin zuthuk leh thil kha kihel a pia uhi. Ahihhangin, ama'n a chiam a, a dawn nuam kei hi. 35 Tua khitin, amah khros ah a kilhden uh a, aisanin a puansilhte a kihawm uhi. Tua bel kamsang' gensa a tangtun nading ahi. Tua kamsangpa in: Amaute'n ka puansilhte kihawm uh a, ka puanaktual adinga aisan uhi, a na chi hi. 36 Amaute'n tua muna tuin amah a veng uhi. 37 Ama' lutung ah amah a hekna uh Pilat in a gelh, HIAI JUDATE' KUMPIPA JESU AHI chi-in a suang uhi. 38 Amah tawh kitonin suamhat nih khros ah khat a taklam ah, khat a veilam ah a kilhden uhi. 39 Ama' kianga paite'n amah a kousia uh a, lu a sinkhum uh a: 40 Nang, tempul hihgawp a, ni thum sunga lamkik dingpa, nang kihukhe tanla! Pathian Tapa hi vechin, khros apan hong kumsuk tanla! a chi uhi. 41 Tua bangin, siampi makaite'n zong, Dan sinsakte leh upate tawh amah enghouin: 42 Midang bawn hukhia a, amah kihukhe theiloupi! Israelte' Kumpipa ahi vele! Tu'n khros apan hong kumsuk leh ake. Hi leh, amah i um na ke. 43 Pathian muang hiven, Pathian in amah hukhe na'n teh. Pathian' Tapa ka hi, a chi vele, a chi uhi. 44 Tua bang mahin amah tawh kitona khros a kilhdena om suamhatte'n zong amah a enghou uhi.
Jesu' Sihna
45 Dak gukna apan dak kuana dong gamsung khempeuh ah khimpi hong zing hi. 46 Dak kuana khawngin, Jesu ngaihtakin a kikou a: Eloi, Eloi, lama sabakthani? a chi hi. Tua bel, Ka Pathian, ka Pathian, banghanga hon taisan na hia? chihna ahi. 47 A kiang naia ding mi pawlkhatte'n tua a zak takun: Ngaidih ua, ama'n Elija sam ahi! a kichi uhi. 48 Amaute laka khat a vatai tingteng a, tuihupthei khat a la a, greptui thuk ah a diah a, chiang dawna koihin Jesu' hip dingin a tahtou hi. 49 Ahihhangin, midangte'n: Vahuh ken. Amah hukhe dingin Elija hong pai hiam en dih ni, a chi uhi. 50 Tua khitin, Jesu ngaihtakin a kikou kik a, a kha a khahta hi.
Jesu Sihna Chiamtehna
51 Tua laitakin, ngaidih, mun siangthou sunga deidanna puanzak, a khung apan a taw dong, phei nih kisuahin a kikeksuak hi. Zin a ling a, suangpite a kitam a, 52 hankhukte a kihong a, misiangthou sisa tampite' pumpite kaihthawhin a om a, 53 hankhukte apan hong pawtkhia uh a, amah a thawhkik nungin, khawpi siangthou ah a lut uh a, mi tampi kiang ah a kilak uhi. 54 Sepaih zaheupa leh a kianga Jesu vengte'n, zinling leh thil hong tungte a muh takun, a lau mahmah uh a: Hiai mi Pathian' Tapa a na hi taktak! a chi uhi. 55 Galili gam apan Jesu zui a, amah kema nasem numei tampi tua ah a om uh a, gamlapi apan a gal et uhi. 56 Amaute lak ah Makdala apan Mari, Jakob leh Josef nu Mari leh, Zebedai' tapate' nu a kihel uhi.
Jesu Vuina
57 Nitaklam hong hita a, Josef kichi, Arimathai khua apan ahau mi khat hong pai hi. Amah zong Jesu nungzui khat ahi. 58 Hiai mi Pilat kiang ah a vapai a, Jesu' luang a vangen hi. Pilat in, Jesu' luang amah piak dingin thu a pia hi. 59 Josef in Jesu' luang a lakkhiakkhitin, puan malngat siangtakin a tuam a, 60 hankhuk thak, suangpi kikhuak ah a sial a, suang lianpi-in hankhuk kong a khak a, a paisan hi. 61 Makdala apan Mari leh Mari dang khat, tua hankhuk mai ah a tu uhi. 62 A zing chiangin, siampi makaite leh Farisaite, Pilat mai ah hong paikhawm uhi. Tua bel, Ankuanglui Kisakkholh Ni ahi. 63 Amaute'n: Pu, mite khempa hiai mipa'n a dam laiin: Ni thum nungin ka thoukik ding, a chih koute'n ka thei gige uhi. 64 Tua bang ahih manin, ni thum ni dong, tua hankhuk hoihtaka venbit ding thu pia in. Tua ahih kei leh, a nungzuite zan kalin hong pai ding uh a, amah a gumang ding uh a, ka minamte uh kiang ah: Misite lak apan a thoukikta, a chi kha ding uhi. Tua hileh, khemna masa sangin khemna nanung nase zaw ding hi, a chi uhi. 65 Pilat in a kiang uah: Veng sepaih na nei ve ua le. Pai unla, na hih theih bangbangun hankhuk vengbitsak un, a chi hi. 66 Tua bangin, amaute a pai uh a, belhchipnain tua suang a belhchip uh a, tua hankhuk a vengsak uhi.
Hankhuk Vuak
1 Sabbath ni khit, nipikala ni masapen phalvakin, Magdala apan Mari leh Mari dang khat, hankhuk veh dingin a kuan uhi. 2 Ngai dih uh, zinling thupitak hong om hi. Ahang bel, Toupa' vansawltak khat vaan apan hong kumsuk a, tua hankhuk kongkhak suang a lehkhuk a, a tung ah a tu hi. 3 Tua vansawltak mei khawphia bangin a taang a, a puansilhte vuk bangin a paak hi. 4 Tua hankhuk veng sepaihte amah lauin a ling uh a, misi bang maiin a om uhi. 5 Ahihhangin, tua vansawltak in tua numeite kiang ah: Lau kei un. Kilhdena om Jesu zong na hi uh, chih ka thei. 6 Amah hiaia om lou ahi. A gensa banga thoukikta ahi. Hong pai unla, a lupna mun hong en un. 7 Tua khit chiangin, pai mengmeng unla, a nungzuite kiang ah: Galili gam ah noute' maia pai ahi. Tua ah amah na mu ding uhi, chi-in vahilh un. Ngai un noute kon hilhta ahi, a chi hi.
Jesu' Kilakna
8 Tua numeite lau mahmah napi, lungnuam mahmahin hankhuk apan kintakin a paikhia uh a, Jesu' nungzuite kianga thu vatun dingin a tai uhi. 9 Amaute tua banga a nungzuite vahilh dinga a pai laiun, thakhatin Jesu'n amaute a na tuak a: Nuam un! a chi hi. Amaute'n amah a naih uh a, a khete a len uh a, amah a bia uhi. 10 Jesu'n amaute kiang ah: Lau kei un. Pai unla, Galili gama pai dingin ka sanggamte vahilh un, tua ah kei hon mu ding uhi, a chi hi.
Sepaihte Golhna
11 Amaute tua banga a pai sungun, hankhuk veng sepaih pawlkhat khawpi ah hong pai uh a, thil hong tungte khempeuh, siampi makaite kiang hong tun uhi. 12 Amaute'n upate kaikhawma thu a kikup nungun, sepaihte sum tampi a pia uh a: 13 Ka ihmut kalun, zanin ama' nungzuite hong pai uh a, amah hong gumang uh, chi-in gen un. 14 Hiai thu ukpipa kiang a tun khak leh zong, koute'n amah ka khem lungdam ding uh a, noute kon bitsak ding uh, a chi uhi. 15 Sepaihte'n tua sum a sang uh a, siampi makaite' hilh bangin a hih uhi. Amaute' genthang bangin, tuni dongin Judate lak ah tua bangin a thang hi.
Nungzuite kianga Jesu' Kilaakna
16 Tua nungin, nungzui sawm-lekhatte Galili gam zuanin a pai uh a, amaute adinga Jesu'n a sehsak mual ah a vahawh uhi. 17 Amah a muh takun amaute'n amah a bia uhi. Ahihhangin, pawlkhat in bel a umlah lai uhi.
Nagotna Thupi
18 Tua nungin, Jesu amaute kiang ah hong hawh a, amaute a houpih a: Leitung leh vantunga thuneihna khempeuh keima' kianga piak a hita. 19 Tua bang ahih manin, pai unla, nam chih apan nungzuite bawl un: Pa tawh, Tapa tawh, Kha Siangthou tawh min siala amaute baptisin leh, 20 noute kon thupiak khempeuh zui dingin sinsak un. Ngai un, khang hun tawp dongin noute kon ompih gige hi, a chi hi. Amen.
Baptispa Johan
1 Pathian' Tapa, Jesu Khrist tawh kisai tangthupha kipatna hibang ahi: 2 Kamsangpa Isai' laibu sung ah: Ngai in, na maia ka thangkou sawl ding ing a, ama'n na maia na lampi bawlkhol ding hi. 3 Gamdai-gamkeua kikoupa' aw in: Toupa ading lamlian sial unla, A lampite tangsak un, chi hi, chi-in a kigelh hi. 4 Tua bangin, Johan hong pai a, gamdai-gamkeu ah a baptis a, khelhna ngaihdam nadingin kisika lungheina baptisna thu a gen hi. 5 Amah kiang ah Judia gam teng leh, Jerusalem khawmi khempeuh hong pai uh a, a khelhnate uh a pulak uh a, Johan in Jordan Lui ah amaute a na baptis hi. 6 Johan in sangawngsau mul puan a silh a, savun kawng-gakin a kawng a gak a, gambe leh gamlak khuaizu an in a nei hi. 7 Ama'n: Ka nunga hong paipa zaw kei sanga hatzaw ahi. Kun-a ama' khedap khau phei ding nangawn chin lou ka hi. 8 Ke'n tuiin kon baptis a, ahihhangin, ama'n Kha Siangthoua hon baptis ding ahi, chi-in thu a gen hi.
Jesu' Baptisna Tanna
9 Tua laiin, Galili gama Nazareth apan Jesu hong pai a, Johan in Jordan Lui ah amah a na baptis hi. 10 Amah tui apan hong paikhiak phetin, vaan kihong a, vakhu banga Kha hong kumsuk a, a tunga tuang, Johan in a mu hi. 11 Vaan apan aw khat in: Nang ka Tapa it na hi. Na tung ah ka lungkim mahmah hi, a chi hi.
Jesu Zola Omna
12 Tua khit phetin, Kha in amah gamdai-gamkeu ah a sawl pah hi. 13 Amah tua gamdai-gamkeu ah ni 40 sung a om a, Setan in khial dingin a zol hi. Gamsate tawh a omkhawm a, vansawltakte'n a don uhi.
Jesu' Nasep
14 Johan suangkul a taan nungin, Galili gam sung ah Jesu a lut a, Pathian' kumpigam tangthupha a phuang hi. 15 Ama'n: A hun hong tungta, Pathian' kumpigam hong naita. Noute kisikin lunghei unla, tangthupha um un! a chi hi.
Nungzui Masate Sapna
16 Jesu Galili dil geia a pai laiin, Simon leh a sanggampa Andru, dila len paai a mu hi. Amaute ngaman mi ahi uhi. 17 Jesu'n amaute kiang ah: Kei hon zui un! Mihingte man dinga hon bawl ding ka hi, a chi hi. 18 Amaute'n a lente uh nuse pahin amah a zuita uhi. 19 Amah gamla zaw deuh a vapai nungin, Zebedai' tapa, Jakob leh a sanggampa Johan, long sunga a lente uh khuia om a mu hi. 20 Amaute a sam pah a, amaute'n a pa uh Zebedai leh a mi goihte nusiain, amah a zui pah uhi.
Dawi Hawlkhiakna
21 Tua nungin, Kapernaum khua ah a lut uhi. Sabbath ni-in, Judate' sunagog ah amah a lut a, a sinsak pahta hi. 22 Ama'n Dan sinsakte bangin a sinsak kei a, thuneihna nei mi bangin a sinsak hi. Tua ahih manin, mite'n a sinsakna lamdang a sa uhi. 23 Amaute' sunagog sung ah kha nin paai pasal khat a om a, a kikoukhia a: 24 Eh! Nazareth Jesu, nang leh koute'n bang kisaina nei i hia? Koute hihmangthang dinga hong pai na hita hia? Nang kua na hi hiam, chih kon thei. Pathian' apan Misiangthoupa na hi, a chi hi. 25 Jesu'n khauhtakin amah a taai a: Kamsim inla, ama' sung apan hong pawtkhia in, a chi hi. 26 Tua kha nin in, tua mipa nakpitakin a kungsin a, kikou vomvomin a sung apan a pawtkhia hi. 27 Mite khempeuh in lamdang a sa lua uh a: Hiai bang hita mai ahia? Bang sinsakna thak hita mai ahia? Thuneitaka kha ninte thu a piak chiang nangawna, amaute'n a thu a man uh, a kichi uhi. 28 Ama' min, Galili gam sung teng ah a thangsuak pah hi.
Simon' Sungnu Damsakna
29 Amaute tua sunagog apan hong pawtkhiak khit phetun, Simon leh Andru' inn ah, Jakob leh Johan tawh, a lut uhi. 30 Simon' sungnu nattunin lupna ah a na lum a, tua thu Jesu kiang ah a hilh pah uhi. 31 A kiang ah Jesu hong pai a, a khut lenin a phongtou hi. Tua bangin ama' nattun dam pahin, amaute' nektaak a bawlsak hi.
Mi Tampi Damsakna
32 Tua nitaklam ni turn nungin, Jesu kiang ah natna vei khempeuh leh dawimatte hon pii uhi. 33 Khaw sung mite khempeuh, kongkhak bul ah hong paikhawm uh a, 34 ama'n natna tuamtuam veite a damsak a, dawite tampi zong a hawlkhia hi. Ahihhangin, dawite'n amah kua hi hiam, chih thei a hih manun, amaute' pau ding a phal kei hi.
Jesu' Thuumna
35 A zing chiang zingkhangpi, khawmial laiin, Jesu a thou a, a pusuak hi. Kuamah om louhna muna paiin, tua ah a thum hi. 36 Simon leh a lawmte, amah zong dingin a kuan uh a, 37 amah a muh takun: Mikhempeuh in nang hon zong uh eive! a chi uhi. 38 Jesu'n a dawng a: Mun dang, khaw nai khawnga zong thu ka gen theih nadingin pai ni. Tua mah kong paina san ahi, a chi hi. 39 Tua bangin, sunagogte ah thu genin, dawite a hawlkhia a, Galili gam sung teng ah a pai kawikawi hi.
Phak Siansakna
40 Phak vei mi khat a kiang ah hong pai a, a mai ah a khukdin a: Na ut peuh leh hon siangsak thei na hi, chi-in a ngen hi. 41 Jesu'n amah a lainat mahmah a, a khuta sawkin a lawng a: Ka ut hi, siangta in, a chi hi. 42 Tua thu a genkhit phetin, a phakna bei pahin hong siangta hi. 43 Jesu'n khauhtaka khamna tawh, amah a sawlkhe pah a: 44 Kuamah hilh lou dingin pilvang in. Ahihhangin, pai inla, siampi kiang ah vakilak in. Siangta na hih manin amaute kianga theihpihna hi dingin, Mosi thupiak bangin thillat valan in, a chi hi. 45 Amah a paikhia a, kamsim naksangin, tua thu tangpi lak ah a genzakta hi. Tua bang ahih manin, Jesu a langtangin khawpi ah a lut thei nawn kei hi. Tua ahih manin, pawlam ah kuamah om louhna mun ah a om hi. Hinapi-in, mun chih apan mite amah kiang ah hong pai lailai uhi.
Mizaw Damsakna
1 Ni tam lou nungin, Jesu, Kapernaum hong lut kik a, inn-a a om lam mite'n a thei uhi. 2 Mi tampitak hong paikhawm uh ahih manin, kongkhak pawlam nangawn a awng nawn kei hi. Ama'n amaute kiang ah Pathian thu a gen hi. 3 Tua lai ah, mi li in a zawn uh, mizaw khat hon paipih uhi. 4 Mipi tam lua ahih manin, Jesu kiang nai a tung thei kei uh a, Jesu' omna zawn, inntung a phelvang uh a, mizaw, a lupna phek tawh a khaikhesuk uhi. 5 Jesu'n amaute' upna a muhin, mizaw kiang ah: Ka tapa aw, na khelhnate ka ngaidam, a chi hi. 6 Tua lai ah, Dan sinsakte pawlkhat a tu uhi. Tuate'n a lungsung uah: 7 Banghanga hiai mipa'n hibang thu gen ahia? Pathian gensia ahi! Pathian loungal kua ahia khelhnate ngaidam thei? chi-in a ngaihsun uhi. 8 Amaute'n hibangin a lungsim sung uah a ngaihsun uh, chih Jesu'n a khain a na thei pah hi. Amaute kiang ah: Banghanga hibang thilte ngaihsun na hi ua? 9 Koi ahia baihlam zaw? Mizaw kianga: Na khelhnate ka ngaidam, ka chih maw, ahih kei leh: Dingtou inla, na lupna phek la inla, pai in ka chih? 10 Ahihhangin, Mihing Tapa in leitung ah khelhnate ngaihdam theihna thuneihna a nei, chih na theih uh ka deih man ahi, a chi hi. Tua bangin, mizaw kiang ah: 11 Dingtou inla, na lupna phek la inla, na inn ah paita in, a chi hi. 12 Amah a thou pah a, a lupna phek a la a, amaute khempeuh mitmuhin a paikhia hi. Mi chih in lamdang a sa uh a: Hibang mahmah mu ngei kei hang! chi-in Pathian a phat uhi.
Levi Sapna
13 Jesu, dil geia a pai kik laiin, mipi tampi a kiang ah hong pai uh a, ama'n amaute a na sinsak hi. 14 Tua banga a pai laiin, Alfai' tapa Levi, siah donna buk sunga tu a mu a, amah kiang ah: Kei hon zui in, a chi hi. Levi a dingkhia a, Jesu a zuita hi. 15 Levi' inn-a Jesu'n an a nek laiin, siahdongte tampi leh mikhialte'n amah leh a nungzuite tawh an a nekhawm uhi. Ahang bel, siahdongte leh mikhialte tampi in amah a zui ua ahi. 16 Dan sinsak Farisaite'n amah siahdongte leh mikhialte tawh an nekhawma om a mu uh a, a nungzuite kiang ah: Banghanga ama'n siahdongte leh mikhialte tawh nea dawn ahia? a chi uhi. 17 Hiai a zak takin, Jesu'n amaute kiang ah: Daktor kulte a chidamte ahi kei a, a chinate a hi zaw. Mi diktatte sam dinga hong pai ka hi kei a, kisika lunghei dinga mikhialte sam dinga hong pai ka hi zaw, a chi hi.
Puan leh Zuthawl Gentehna
18 Johan' nungzuite leh Farisaite' nungzuite'n an ngolh ngeinain a nei uhi. Mi pawlkhat Jesu kiang ah hong pai uh a: Johan' nungzuite leh Farisaite' nungzuite'n lah an a ngawl pahpah uh a, banghanga na nungzuite'n ngawl lou uh ahia? chi-in a dong uhi. 19 Jesu'n: Mouneipa' michialte'n mouneipa tawh a omkhawm sung uh, bangchi'n an a ngawl thei ding ua? Mouneipa amaute kianga a om sung an ngawl thei buang lou e. 20 Ahihhangin, mouneipa pen amaute apan lakmang nite hong tung ding a, tua hun chiangin, an a ngawl tham ding uhi. 21 Kuama'n puan thak tuikhailouh themin puanluipi a thuap ngei kei. Thuap leh, puan thak them in puan lui pen a kaikek ding a, a kekna a kek semsem ding hi. 22 Kuama'n savun-thawl lui ah zuthak a thun ngei kei. Thun leh, zuthak in savun thawl lui a phukek ding a, a zu a baw dinga, savunthawl zong a mangthang ding. Mi'n zu thak peuhmah savun thawl thaka a thun ding ahi, a chi hi.
Sabbath Toupa
23 Sabbath ni khatin, Jesu buhlei kantanin a pai a, a nungzuite'n amah a zui uh a, a paikawmun buhvui a zut uhi. 24 Farisaite'n amah kiang ah: En dih, banghanga amaute Sabbath ni-a, Dan tawh kituakloua gamta uhiam? a chi uhi. 25 Ama'n a dawng a: David leh a lawmte gilkiala a taksap lai ua a gamtat dan uh na sim ngeita uhia? 26 Siampilian Abiathar dam laiin, Pathian' inn sung ah David a lut a, tua-a tanghou sehtuam Pathian maia kilui a ne hi. Tua tanghou, siampite kia nek siang hi napi-in, ama'n a lawmte nangawn a hawm lai hi, a chi hi. 27 Tua chiangin, ama'n amaute kiang ah: Pathian in mihing adinga Sabbath a bawl ahi a, Sabbath adinga mihing a bawl ahi kei hi. 28 Ahangbel, Mihing Tapa, Sabbath ni tunga zong Toupa ka hi, a chi hi.
Sabbath Ni-a Damsak thu-a Kiselna
1 Hun dang khat ah, Jesu, Judate' sunagog ah a valut a, tua mun ah a khut teem khat a na om hi. 2 Mi pawlkhat in Jesu hek theih nading zongin, Sabbath ni-in tua mipa a damsak hiam, chi-in limtakin a ensim uhi. 3 Jesu'n khut teempa kiang ah: Mi chih mai ah hong ding in, a chi hi. 4 Tua khitin, Jesu'n amaute a dong a: Dan in Sabbath ni-a thil hoih hih hia a phal, ahih kei leh, thil hoihlou hih? Hinna hut hia a phal, ahih kei leh, hinna hihmanthat? a chi hi. Ahihhangin, amaute a dai sipsip uhi. 5 Ama'n heh kawmin amaute a bantakin a en a, a lungtang uh khauh dan a muhin, a lungkham a, tua mipa kiang ah: Na khut zankhia in, a chi a, tua mipa'n a khut a zankhia a, a khut langkhat bangbangin a damta hi.
Jesu Thah Sawm Farisaite leh Herod Pawlte
6 Tua nungin, Farisaite a paikhia uh a, Herod pawlte tawh, Jesu thah theih ding dan a simin a sawmkhawm uhi.
Mitampi'n Jesu Zui
7 Jesu bel, a nungzuite tawh, dil gei lam ah a kihemkhia uh a, ahihhangin, Galili leh Judia gam apan mipi tampi in a zui uhi. 8 Ama'n thil thupi a hih dan a zak takun, Judia, Jerusalem, Idumia gam leh Jordan gal lam gam leh, Tura leh Sidon kiim gam apan mipi tampi amah kiang ah hong pai uhi. 9 Mipi tam a, amah nehchip uh ahih manin, Jesu'n nungzuite kiang ah, long khat mansa-a koih a, amah ngak dingin a hilh hi. 10 Ama'n mi tampi damsakta ahih manin, natna vei khempeuh amah lawng nuamin a phutin a kiphu uhi. 11 Kha ninte'n amah a muh takun, a maia bokin: Nang Pathian' Tapa na hi, chi-in a kikou uhi. 12 Ahihhangin, ama'n amah kua hi hiam, chih gen lou dingin amaute a khaam bikbek hi.
Sawltaklian Sawmlenihte Sehna
13 Jesu, mualtung lam ah a kaltou a, ama' deihtuamte a sam a, a maute amah kiang ah hong pai uhi. 14 Ama' kianga om ding leh Pathian gam thu phuang dinga sawlkhiak dingin, mi sawmlenih a sep a, 15 natnate damsakna leh dawite hawlkhiakna thuneihna amaute a pia hi. 16 Ama' seh sawmlenihte hiaite ahi: Jesu'n Peter chih min a phuahsakpa Simon tawh, 17 Zebedai' tapa Jakob leh a sanggampa Johan ahi. Tua unaute' min dingin, Boanerzi a phuahsak a, tua bel Vanpiging Tapate chihna ahi. 18 Tua baan ah, Andru tawh, Filip tawh, Bartholomai tawh, Mathai tawh, Thoma tawh, Alfai' tapa Jakob tawh, Thaddai tawh, Gam itpa Simon tawh, 19tua baan ah, Jesu lehbawla khawngpa Juda Iskariot tawh ahi uhi.
Jesu leh Belzebub
20 Tua nungin, Jesu, inn khat ah a lut a, tua ah mi tampi hong paikhawm kik uh a, amah leh a nungzuite'n an nangawn a ne thei kei uhi. 21 Ama' innkawte'n hiai thu a zak takun: A lungsim veng lou hita, chi-in pummat a sawm uhi.
Ngaihdam Theihlouh Khelhna
22 Tua nungin, Jerusalem apan hong paisuk, Dan sinsakte'n: Amah Belzebub paai ahi! Ama'n dawite' kumpipa pansana dawite hawlkhia ahi, a chi uhi. 23 Jesu'n amaute a sam a, amaute kiang ah gentehna zangin thu a gen a: Bangchi'n Setan in Setan a hawlkhe thei dia? 24 Kumpigam khat amah leh amah a kidou chiangin, tua kumpigam a ding thei kei ding hi. 25 Innkuan khat amah leh amah a kidou chiangin, tua innkuan a ding thei kei ding hi. 26 Setan zong amah leh amah a kidou a, a kilangkhen mawk leh a ding thei kei ding a, a beina a tung zaw ding hi. 27 Ataktakin, kuama'n mihatpa hentom masa louin, a inn sunga lutin, a neih a lam sut thei loupi. Amah a hentom masak le bel, a inn sung lok thei ve. 28 Noute thutak kon hilh ahi: Mihingte' khelhna peuhpeuh leh Pathian gensiatna khempeuh Pathian in a ngaidam ding. 29 Ahihhangin, Kha Siangthou gensia mi kuapeuh, Pathian in hiai khang bei dongin zong a ngaidam ngei kei ding hi. Tua bang mi pen, Tangtawn khelhna-a mawh ahi, a chi hi. 30 Hiai a genna hang bel, amaute'n amah dawimat ahi, chi-a a ngawh man uh ahi.
Kitanauna Thak
31 Tua nungin, Jesu' nu leh sanggamte hong pai uh a, inn pua-a dingin amah sam dingin mi a sawl uhi. 32 Ama' kim leh kiang ah mipi tampi a tu uhi. Amaute'n amah kiang ah: Ngai dih, na nu leh na sanggamte nang mu nuam in inn pua ah a om uh, a chi uhi. 33 Ama'n: Ka nu kua hi a, ka sanggamte kuate hi ahia? chi-in a dong hi. 34 Tua khitin, ama'n a kim a kianga tute a en a: En un, hiai ah ka nu leh ka sanggamte a om uh! 35 Pathian' deihlam hih mi peuhmah, ka sanggampa, ka sanggamnu, ahih kei leh, ka nu ahi, a chi hi.
Buhchi Thehpa Gentehna
1 Hun dang khat ah, Jesu'n dil geia a sinsak laiin, amah kiang ah mipi hong paikhawm uhi. Amaute a tam mahmah manun, tui tung gamla lou ah, long sung ah Jesu a tu a, mipite khempeuh tui gei ah a om uhi. 2 Ama'n gentehnate zangin thil tampi a sinsak a: 3 Ngai un! Buhchi thehpa khat buhchi thehin a kuan hi. 4 Tua banga buhchi a theh laiin, buhchi pawlkhat lamdung ah a kia hi. Tungleng vasate hong paiin, tua buhchi kiate a negai uhi. 5 Buhchi pawlkhat suang tung lei pan ah kia hi. Leitak sah lou ahih manin, buhchite a pou pah hi. 6 Ahihhangin, ni a hong saan takin, buhkungte a hai a, zungkai lou ahih manun a keugawp uhi. 7 Buhchi pawlkhat, lou lingnei lak lei ah a kia hi. Tua lou lingneite hong khang a, buhkungte a deplum a, gah a suah kei uhi. 8 Buhchi pawlkhat bel, lei hoih ah a kia a, gah a suah a, a leh 100 bang, a leh 60 bang, ahih kei leh, a leh 30 bang a pha hi, a chi hi. 9 Tua khitin, Jesu'n: Zak nading bil nei peuh in zata hen, a chi hi. 10 Jesu amah kia-a a om laiin, Sawmlenihte leh a kim a kianga midangte hong pai uh a, tua gentehna thute a dong uhi. 11 Ama'n amaute kiang ah: Pathian kumpigam thusim kiseel theih theihna noute kianga piak ahi a, ahihhangin, pawlam mite kiang ah bel thil bangkim gentehnate zanga kigen ahi. 12 Tuachia, mu gige napi-a, theitel ngeilou ding, za gige napi-a theihsiam ngeilou ding uhi. Tua hi kei leh, lunghei ding uh a, ngaihdam hi ding uhi, chih a tangtunna hi ding hi. 13 Tua khitin, Jesu'n amaute kiang ah thu a gen a: Noute'n hiai gentehna thei lou maw? Tua bang na hih mawk uleh, gentehna khatpeuh bangchi theih ding na hi ua? 14 Louneipa'n Thu a theh hi. 15 Mi pawlkhatte, buhchi kiakna lamgdung bang ahi. Amaute'n thu a zak takun, Setan hong pai a, amaute' sunga thu kipawi pen a lamang hi. 16 Mi dang pawlkhatte lah buhchi suang tung lei pan bang ahi. Thu a za uh a, kipaktakin a sang pah uhi. 17 Ahihhangin, zung kailou uh ahih manin, tomchik kia a daih uhi. Thu hanga gimthuakna hiam, bawlsiatna hiam hong tun takin a pukmang pah uhi. 18 Mi dang pawlkhatte leuleu ahih leh, buhchi kiakna lou lingnei lak lei bang ahi uhi. Thu a za uh a, 19 ahihhangin, damsung buainate, leitung hauhna khemhatna leh thil dangte lunggulh-a deihgawhnate'n thu a deplupna ahi uh a, gah a suah kei uhi. 20 Midang pawlkhatte bel, buhchi kiakna lei hoih bang ahi uhi. Thu a za uh a, kipahpihin a saang uh a, gah a suah uhi. A leh 100 bang, a leh 60 bang, ahih kei leh, a leh 30 bang a pha hi, a chi hi.
Meivak Gentehna
21 Ama'n amaute kiang ah: Noute'n lawh nuai hiam, lupna nuai hiama koih dingin meivak na de ngei ua hia? A mung tunga meivak koih zaw lou maw? 22 Theih louh dinga im bang mah a om kei a, muh louh dinga kisel bangmah a om kei. 23 Zak nading bil nei peuh in zata hen, a chi hi. 24 Ama'n a gen lai a: Na zak uh pilvangtakin ngaihsun un. Na tehna bang bangun noute ading a kiteh ding a, a tamzaw nangawna tehsak na hi ding uhi. 25 A neihsa lenkip mi peuhmah piak behlap ahi ding a, a neihsa lenkip lou mi peuhmah, a neihsa nangawn laksak ahi ding, a chi hi.
Buh Khandan Gentehna
26 Ama'n hiai gentehna zong a gen hi: Pathian' kumpigam hibang ahi: Mi khat in lei ah buhchi a theh hi. 27 Bang hong chi pian hiam, chih a theih louh hangin, a sun a zan, ihmu ta leh hak ta leh, tua khaichi a pou a, a khang hi. 28 Lei in amahin gah hon suah hi, A kung a om masa a, tua khit chiangin a vui hong om a, tua khit chiangin a vui ah a tang hong om hi. 29 Tua buhte a min takin, buhlak hunta, chi-in, tua mipa'n a kawitein a at hi, a chi hi.
Ankamtang Gentehna
30 Ama'n a gen lai a: Pathian' kumpigam bang tawh i teh dia? Ahih kei leh, bang gentehna zangin i genchian dia? 31 Pathian' kumpigam zaw ankam tang bang ahi. Ankam tang bel, leia na pawi khaichi neupen ahi. 32 Hinapi-in, na pawi chiangin hong poutou a, huanhai kung lianpen hong suakin, hiang lianpipi a nei a, tungleng vasate hong paiin tua hiangte' liim ah bu a sep thei uhi, a chi hi. 33 Tua bang gentehna dang tampi-in, Jesu'n amaute theihsiam theih ding zahzah thu a gen hi. 34 Gentehna zang louin, amaute kiang ah bangmah a gen kei hi. Ahihhangin, a nungzuite tawh kia a om chiangin bel thil bangkim a hilhchian tawmtawm hi.
Huihpi Thensakna
35 Tua ni-in, nitak lam a hong hita a, ama'n nungzuite kiang ah: Gal langkhat lam ah galkah ni, a chi hi. 36 Mipite nusiain, amah long sung ah a om bangbangin a tonpih uhi. Amah kiang ah long dang zong a om hi. 37 Huihpi hattak hong nung a, tuihualte'n long a buah manin long a turn dekdek hi. 38 Jesu bel, long meilam ah, lukham khamin a ihmu hi. Nungzuite'n amah a phawng uh a, a kiang ah: Sinsakpa, tui ke le-ung phamawh sa lou na hi maw? a chi uhi. 39 Amah hong thoukhia a, huih a taai a, tuihualte kiang ah: Dai un! Om kinken un! a chi a, huih a thengta a, dil a dai khipkhep hi. 40 Ama'n nungzuite kiang ah: Banghanga hibang lawmlawma lau na hi ua? Upna nei nai lou maw? a chi hi. 41 Amaute lau petmahin a lau uh a: Hiai mi bangchi mi hi peuhmah ding ahia le, huih leh tuipi nangawn in a thu a man uh? a kichi uhi.
Dawimat Damsakna
1 Tua nungin, dil gal khat lama galkaha Gadara gam hong tun un, 2 long apan Jesu hong paikhiak laiin, kha nin paai pasal khat hanmunte apan hong pai a, amah a na tuak pah hi. 3 Hiai mipa bel, hanmun khawnga teeng, kuama'n sik khainiang nangawna a henchip theih nawn louh ahi. 4 A khut a khe khainianga a kihen hangin, tua khainiangte a phutat a, a khea sikkolte a phutan a, kuama'n amah a nemsak zou kei hi. 5 A sun a zanin, hanmun khawng leh mual tung khawng ah a kikou a, suangpeuhin a ki-at pahpah hi. 6 Ama'n gamlapi apan Jesu a na muh takin, a delh a, a mai ah a khukdin hi. 7 Amah nakpitakin a kikou a: Jesu, Pathian Tungnungpen' Tapa aw, nang tawh bang kisaina nei i hia? Kei hon sawi lou dingin Pathian' minin kon ngen hi! a chi hi. 8 Ahang bel, Jesu'n amah kiang ah: Nang kha nin, hiai mipa apan hong pawtkhia in! a na chikhinta-a ahi. 9 Jesu'n amah kiang ah: Na min bang ahia? chi-in a dong hi. Ama'n a dawng a: Ka min Sang Tampi ahi, tampi mahmah ka hi uhi, a chi hi. 10 Tua gam apan amaute sawlmang lou dingin a ma'n Jesu a ngen ngutngut hi. 11 A kiang nai, mual pang khawng ah vokhon tampi gamta a om hi. 12 Tua dawite'n Jesu kiang ah: Koute, vokte sunga lut ding hon phal in, chi-in a ngen uhi. 13 Ama'n amaute a phal pah a, tua kha ninte hong pawtkhia uh a, vokhonte sung ah a lut uhi. Tua vokhonte, 2,000 khawng a pha hi. Amaute dil gei ken ah a taisuk uh a, dil sung ah a tuaklut uh a, tui ah a kelum uhi. 14 Tua vokchingte a tai pah vingveng uh a, hiai thu khawpi leh gam sung teng ah a gen uhi. Bang thil hong tung hita hiam, chi-a en dingin mite hong taikhawm uhi. 15 Amaute, Jesu kiang hong tung uh a, dawi honpi in a mat mipa, tua laia tu, puansilha, a lungsim ngei pu, a mu uhi. Tuachi-in, amaute a lauta uhi. 16 Tua thil hong tun lai mute'n dawimatpa tunga thil tung leh vokte tunga thil tung, amaute a na hilh sipsip uhi. 17 Tua bang ahih manin, tua mipite'n amaute gam nuse dingin Jesu a ngen uhi. 18 Jesu long sunga a lut laiin, dawimatpa'n amah zuih ding a ngen hi. 19 Jesu'n a phal kei a, a kiang ah: Inn ah, na innkawte leh na tanaute kiang ah pai inla, Toupa'n nang adinga bangzahta-a thil thupi hon hihsak hiam chih leh nang tunga zahngaihna a neih dan vahilh in, a chi hi. 20 Tuachi-in, tua mipa a pai a, amah adinga Jesu'n thil thupi a hihsakte, Dekapoli gam sung teng ah a genta a, mi khempeuh in lamdang a sa mahmah uhi.
Jaira Ngetna
21 Jesu, longa dil gal khat lam hong tun kik takin, amah kiang ah mipi tampi hong paikhawm uhi. Dil geia amah a om laiin, 22 Judate' sunagog ukte laka khat a hong pai hi. Ama' min Jaira ahi. Ama'n Jesu a muh takin, a khebul ah a bok a: 23 Ka ta nungaknou si dekdekin a om a, amah hong dam a, hong hin theih nadingin, hehpihtakin hong pai inla, a tung ah khut hong nga in, chi-in a ngen ngutngut hi. 24 Jesu'n zong amah a zui pah hi.
Numei Sipawt Damsakna
Mipi tampi mah in a zui uh a, a kimkot ah a nehchip uhi. 25 Tua lai ah numei khat, kum sawmlenih sung sisan luanga china a om hi. 26 Daktor tampite' kepna nuai ah, nakpitakin a gimpihta a, a neihsa khempeuh zong a zangkhinta a, noptuam naksangin a gim semsem hi. 27 Tua nu in Jesu' thu a zak takin, a nung ah, mipite lak ah hong pai a, Jesu' puanakpi mong hong lawng hi. 28 Ahang bel, ama'n: A puansilhte lawng tapeuh leng ka dam ding, chi-in a ngaihsuna ahi. 29 Tua bangin, ama' sipawt dam pahin, a chinatna a damta, chih a sa ah a phawk hi. 30 Jesu'n amah apan vangletna a pawtkhia, chih a thei pah a, mipite lak ah a kihei a: Kua'n ka puante lawng hiam? chi-in a kan hi. 31 A nungzuite'n a dawng uh a: Mi tampi'n na kimkot ah hon nehchip, chih na mu zen a, nang: Kua'n kei hon lawng hiam? chi-a na kan mawk, a chi uhi. 32 Ahihhangin, amah lawng mi muh sawmin Jesu a kim a kiang enin a dak lailai hi. 33 Tua laitak mahin, numeinu'n ama' tunga thiltung pen thei ahih manin, hong pai a, Jesu khebul ah a bok a, laua ling kawmkawmin, thutak khempeuh amah a hilhta hi. 34 Jesu'n a kiang ah: Tanu aw, na upna in hondamsak ahi. Lungmuangtakin pai inla, na thuakna apan suaktata in, a chi hi.
Jaira' Tanu Damsakna
35 Tua banga Jesu a pau laitakin tua sunagog ukpa' inn apan mi pawlkhat hong pai uh a: Na tanu a sita a, Sinsakpa buaisak nawn dah in, hong chi uhi. 36 Amaute' thugen thudon louin, Jesu'n tua sunagog ukpa kiang ah: Lau ken. Um tapeuh in, chi-in a hilh hi. 37 Ama'n Peter, Jakob leh Jakob sanggampa Johan loungal, midang kuamah a kizuisak kei hi. 38 Amaute tua sunagog ukpa' inn hong tung uh a, Jesu'n mite nakpitaka kap leh maua om vengvung a mu hi. 39 Amah inn sung ah a valut a, amaute kiang ah: Banghanga kapa mau vengvung na hi ua? Nungaknou a si ahi kei a, a ihmu ahi, a chi hi. 40 Ahihhangin, amaute'n amah a nuihsan maimah uh a, a chiamnuihbawl uhi. Ama'n amaute a hawlkhiak vek nungin, nungaknou' nu leh pa lei a ompih a, nungzuite a tonpih a, nungaknou' lupna mun ah a lutpih hi. 41 Ama'n tua nungaknou' khut a len a, a kiang ah: Talitha Kumi! a chi hi. Tua bel, Bawi aw, hong thou in, kon chi ahi, chihna ahi. 42 Nungaknou a dingtou pah a, a vialpaita hi. Amah bel kum sawmlenih mi ahi. Amaute'n lamdang a sa petmah uhi. 43 Jesu'n hiai thu kuamah hilh lou dingin amaute a khaam bikbek hi. Nungaknou ahih leh nek ding an pe dingin amaute thu a pia hi.
Jesu, Nazareth-a Nolhna
1 Jesu tua mun nusiain, ama' khankhiakna gam ah hong pai a, nungzuite'n a zui uhi. 2 Sabbath ni hong tunin, Judate' sunagog ah a sinsak a, a thugen za mi tampite'n lamdang a sa uhi. Hiai mi in hibang teng koia a muh ahia? Kua'n amah kianga hiai bang pilna pia ahia, thillamdangte nangawn a khuta a hih mawk! 3 Hiai mi Mari' tapa, singlam sempa hilou maw? Jakob, Jose, Juda leh Simon' sanggampa hilou maw? A sanggamte zong eite kianga om hilou umaw? chi-in a kidong uhi. Tua bangin, ama' hangin a thangpai uhi. 4 Jesu'n bel amaute kiang ah: Kamsang zaw, ama' khankhiakna khua leh a u a nau leh ama' innkuan sung mite lak loungal ah pahtawi louhin a om kei, a chi hi. 5 Ama'n china tamloute tunga khut nga-a a damsak chih louh, tua mun ah thillamdangte a hih thei kei a, 6 amaute' upna taksap dan lamdang a sa hi.
Nungzui Sawmlenihte Sawlkhiakna
6 Tua nungin, Jesu khua khat apan khua dang ah a pai a, a sinsak hi. 7 Ama'n nungzui sawmlenihte a kiang ah a sam a, nih nihin a sawlkhia a, dawite tunga thuneihna a pia hi. 8 Amaute hibangin a thuhilh a: Na khualzinna uah, chiangkhun loungal tanghou, kawlzal, kawnggaka sum chihte bangmah keng kei un. 9 Khedap bun unla, puanaktung kengthuah kei un. 10 Inn khat peuha na lut chiangun, tua khua na nutsiat masiah uh, tua inn ah kinga kinken un. 11 Khua khat peuh in noute hon na saan kei leh, ahih kei leh, na thugen uh a ngaihkhiak kei uleh, tua khua na nutsiat chiangun, na khepek uapan leivui singkhia un. Tua bel, amaute' mawhna theihpihna ahi ding hi. Noute thutak kon hilh ahi: Pathian' in thu a khen ni chiangin, tua khua thuakna sangin Sodom leh Gomora thuakna a phadawm zaw ding hi, a chi hi. 12 Tuachi-in, amaute a paikhia uh a, mipite kisika lunghei dingin thu a hilh uhi. 13 Dawite tampi a hawlkhia uh a, damloute thau nilhin a damsak uhi.
Baptispa Johan Ngawng Tanna
14 Jesu' min a thangta mahmah a, kumpipa Herod in ama' thu a na za hi. Ama'n Baptispa Johan, misite lak apan hong thoukik a, hiai thillamdangte hih ahi ve, chi-in a ngaihsun hi. 15 Midangte'n: Amah Elija ahi, a chi uh a, midang pawlkhat leuleu in lah: Amah nidang lai kamsangte bang, kamsangpa khat ahi, a chi uhi. 16 Ahihhangin, Herod in tuate a zak takin: A ngawng ka tansak Johan, misite lak apan thoukik ahi! a chi hi. 17 Johan bel, Herod mahmah in a matsak a, a hensak a, suangkula a na-khum ahi. Hibanga a gamtatna hang bel, a sanggampa Filip' zi a kitenpihnu Herodia hang ahi. 18 Johan in Herod kiang ah: Nang na sanggampa' zi na kitenpih a siang kei, a na chikhinta hi. 19 Tua bang ahih manin, Herodia in Johan a mudah a, thah a na ut him ahi. Ahihhangin, amah a that thei kei hi. 20 Ahang bel, Herod in Johan mi diktat leh mi siangthou ahi, chih theiin a lau a, a na hu-a ahi. Johan in thil tampi a hihte Herod in a zak manin a lungbuai a, ahihhangin a thugen a ngai nuam hi. 21 Atawptawpin, Herodia adingin hun lem hong om hi: Herod pianni hun hong tung a, tua ni-in, Herod in ama' nuaia nalian semte, sepaih liante, Galili gam sunga uliante ankuang um dingin a chial hi. 22 Tua ah Herodia' tanu hong lut a, amaute' mai ah hong laam a, tua in Herod leh amah tawh ankuang um dinga tute a lungtaisak mahmah hi. Kumpipa'n tua nungaknou kiang ah: Na deih hon ngen in, kon pe ding, a chi hi. 23 Kichiam zenin a kiang ah thu a chiam a: Non nget peuhmah kon pe ding, ka kumpigam kimkhat chiang dong kon pe ding, a chi hi. 24 Tua nungaknou a pawtkhia a, a nu kiang ah: Bang ka ngen dia? a chi hi. Ama'n: Baptispa Johan' lutang, chi-in a dawng hi. 25 Tua nungaknou bel, hiai ngetna tawh, kumpipa kiang ah a valut kik pah a: Baptispa Johan' lutang kuangdaia non piak ka ut, a chi hi. 26 Tua in Kumpipa a lungzingsak mahmah a, ahihhangin, a kichiam khit man leh ankuang a umpihte hangin nungaknou' ngetna a nial nuam kei hi. 27 Tangveeng khat a sawl pah a, Johan' lutang hon tawi dingin thu a pia hi. Tua mipa a kuan a, suangkul sung ah Johan' lutang a vatankhia a, 28 kuangdai in Johan lutang hon tawi a, nungaknou kiang ah a pia hi. Tua nungaknou a vapai a, a nu kiang ah tua lutang hon tawi hi. 29 Hiai thu a zak takun, Johan' nungzuite hong pai uh a, a luang hong la uh a, hankhuk ah a sial uhi.
Sawltakliante Hong Kikna
30 Sawltakliante Jesu kiang ah hong paikhawm uh a, a nasepte khempeuh uleh, a sinsak khempeuh uh hong gen uhi. 31 Tua laiin, mi tampi hong kuan leh kik kiphamat ahih manin, an nek hun nangawn a mu kei uhi. Jesu'n amaute kiang ah: Gam daihna mun ah noumau kiain hong pai unla, tawlnga tadih un, a chi hi.
Mi 5,000 Vakna
32 Tua bangin, amaute, amau kiain, longa tuangin, a daihna mun khat ah hong pai uhi. 33 Ahihhangin, a paikhiak uh mu mi tampi in amah a meltheih uh a, khua chih apan khein hong paikhawm uh a, amaute main tua mun a na tung uhi. 34 Long apan Jesu hong paitouh takin, mi tampite a mu a, a ching ding omlou belamte bang ahi uh a, amaute a lainat mahmah hi. Tua ah amaute thil tampi a sinsak hi. 35 Tua hun laiin, ni a niam mahmahta hi. A nungzuite a kiang ah hong pai uh a: Hiai mun gamlapi hi a, ni lah niamta a, 36 mipite'n nek ding lah nei lou uh a, i kim i kiang gama khuate-a paia nek ding a kilei theih nadingun, paisak ve, a chi uhi. 37 Ahihhangin, Jesu'n a dawng a: Noute'n nek ding an pia un, a chi hi. Amaute'n a kiang ah: Koute vapai a, dinari 200 man tanghou lei-a, amaute pe ding ka hi uhia! a chi uhi. 38 Ama'n: Tanghou beu bangzah na nei ua, vaen dih ua, a chi hi. Amaute'n a theih takun: Beu nga leh ngasa nih, a chi uhi. 39 Jesu'n mipite a pawlpawla loupa tunga tusak dingin, amaute a hilh a, 40 mipite 100 pawlpawl, 50 pawlpawlin a tu uhi. 41 Ama'n tanghou beu ngate leh ngasa nihte a la a, vandak a, kipahthu a gen a, tua khitin, tanghou beute a balkhamta hi. Tuate, mipite' maia lui dingin a nungzuite kiang ah a pia hi. Tua mah bangin, ngasa nihte zong amaute khempeuh lak ah a hawm hi. 42 Mipite'n a vekun a ne uh a, a vah uhi. 43 Nungzuite'n tanghou nente leh ngasa nente a luakkhawm uh a, seng sawmlenih a dim hi. 44 Tua annete mi 5,000 ahi uhi.
Jesu Tui tunga Paina
45 Tua khit phetin, Jesu'n a nungzuite longa tuang dingin thu a pia a, mipite a paisak sunga dil gal khata Bethsaida zuana pai dingin a hilh hi. 46 Amaute a nutsiat nungin, thuum dingin mual tung lam ah a paitou hi. 47 Nitak a hong hi a, dil laizang ah long a om a, amah lah amah kiain gamsung ah a om hi. 48 Ama'n nungzuite long hawta nakpitaka pang a mu hi. Huih in lah amaute nakpitakin a lehmut hi. Zan ven lina khawngin, Jesu'n amaute hon naih a, tui tung ah khe in hong pai a, amaute a paikheng dektak hi. 49 Ahihhangin, amaute'n amah tui tunga pai a muh takun, sikha a sa uh a, a kikoukhia uhi. 50 Amaute'n amah mu a, a lau manun, a patau uhi. Ama'n amaute a houpih pah a: Hangsan suah un. Kei ka hi, lau kei un, a chi hi. 51 Tua khitin, amah long sung ah a kalluttou a, huih a thengta a, amaute'n lamdang a sa 25. lua uhi. 52 Ahang bel, a lungtang uh a khauh manin, tanghou beute thu a theisiam thei kei ua ahi. 53 Amaute dil gal khat a tun takun Genesaret gam hong tung uh a, dil gei ah long a khih uhi. 54 Long apan amaute a kumkhia uh a, mite'n Jesu a na meltheih pah uhi. 55 Amaute, tua gam bup apan hong taikhawm uh a, amah a om, chih a zakna mun mun uah chinate, lupna phektein hon zawng uhi. 56 Amah a paina lam lam ah, khawtate, khawpite, ahih kei leh, singtang gam ahte leh sumsinna mun ahte a chinate uh hong koih uhi. A puanaktual mong beek lawngsak dingin a ngen ngutngut uh a, tua banga amah lawngte khempeuh lah a damsak vek hi.
Asiangleh Sianglou
1 Farisaite leh Dan sinsak mi pawlkhat, Jerusalem khua apan hong pai uh a, Jesu kiang ah hong paikhawm uhi. 2 Tuate'n Jesu' nungzuite, khut siangloua an ne a mu uhi. Tua bel, khut sil lou, chihna ahi a, a ngaidah uhi. 3 Farisaite leh Judate'n bel, a upate uh piaksawn thugousiah banga khut sil masa louin an a ne kei uhi. Tua bel, a upate uh piaksawn thugousiah a zuihna uh ahi. 4 Sumsinna mun apan hong pai chiangun, khut sil louin an a ne kei uhi. Tua bang thugousiah dang tampi zong zuih dinga a kipiaksawn uh a om hi. Tuate bel, nou leh tuibel, sumsan belte leh dawhkante sil thu khawng ahi. 5 Tua bangin, Farisaite leh Dan sinsakte'n Jesu kiang ah: Banghanga na nungzuite'n upate thugousiah palsat a, khut siangloua an ne uh ahia? a chi uhi. 6 Ama'n a dawng a: Nou lepchiahte aw, Isai in noute tung thu a gen dik ngei ve. Ama'n: Hiai mite'n a kam ua kei hon pahtawi uh a, ahihhanga a lungtang ua hon gamlat uhi. 7 A mawknain hon bia uh a, a sinsaknate uh mihing' thupiakte lei hi ahi, chi-in a na gelh hi. 8 Mihingte' piaksawn thugousiahte na zuih nadingun, Pathian' thupiakte na pampaih uh. Tua mihing piaksawn thugousiahte bel, nou leh belte sil thu khawng ahi a, tua bang a dang tampi zong na hih uhi, a chi hi. 9 Ama'n amaute kiang ah: Noumau' thugousiahte na zuih theih na dingun, Pathian' thupiakte na pampaih uh a, hih hoih na kisa ngial uh aka! 10 Mosi in: Na nu na pa pahtawi in. A nu hiam, a pa hiam gensia peuhmah si teitei hen, a na chi hi. 11 Noute'n bel: A nu hiam, a pa hiam kianga: Noute' phattuampih ding ka neih ka lam teng Korban ahita - tua bel, Pathian kianga kilan khin ahita chihna ahi- chi mi peuhmah 12 a nu a pa tunga a mawhpuakna pana siang ahi, na chi uhi. 13 Tua bangin, upate' piaksawn thugousiahte pansanin, Pathian' thu bangmahlou na suaksak uhi. Tua bang thil tampitak na hih uhi, a chi lai hi. 14 Tua baan ah, Jesu'n mipite a samkhawm a: Na vekun ka thu ngaikhia unla, theisiam un. 15 Pawlam apan milling' sunga lut bangmah in amah a ninsak thei kei. Amah ninsak pen, a sunglam apan hong pawt pen ahi zaw. 16 Zak nading bil nei peuhin za hen, a chi hi. 17 Ama'n mipite nusia a, inn hong lut takin, a nungzuite'n hiai gentehna thu a dong uhi. 18 Ama'n: Noute hizahta-a ngong na hi umaw? Pawlam apan mihing sunga lut bangmah in amah a ninsak thei kei, chih na thei kei ua hia? 19 Tua pen a lungtang sunga lut hilou a, a gilpi sunga lut a, dailenna-a pawt ahi, chih na thei kei ua hia? a chi hi. Tua bel, Jesu'n an peuhmah a siang, a chihna ahi. 20 Ama'n a gen lai a: Mihing' sunglam apan hong pawt pen in amah a ninsak hi. 21 Sunglam mihing lungtang apan ngaihsutna giloute, angkawmnate, kingaihna ninte, tualthahnate, 22 guktaknate, huaihamnate, lungsim siatnate, zekhemnate, bevennate, Pathian gensiatnate, kisaktheihnate leh numei pasal kal paktatnate hongpawt hi. 23 Hiai thil hoihlou khempeuh sunglam apan hong pawt ahi a, mihing a ninsak hi, a chi hi.
Jesu leh Zentel Numei
24 Jesu a dingkhia a, tua mun apan a pawtkhia a, Tura leh Sidon kim ah a paita hi. Amah inn khat ah a lut a, kuamah theih a deih kei hi. Hinapi-in, amah omna a ki-im thei kei hi. 25 Numei khat, a tanu kha niin paai in amah thu a zak takin, a hong pai a, a khebul ah a bok hi. 26 Tua nu bel, Grik mi, Suria Foinikia gama piang ahi. Ama'n a tanu sung apan dawi hawlkhe dingin Jesu a ngen ngutngut hi. 27 Jesu'n a dawng a: Tate'n a khamun ne masa phot uhen aw. Tate' tanghou laksak a, uite kianga piak a kilawm kei, a chi hi. 28 Numeinu'n a dawng a: Himah e Toupa. Ahihhangin, uite nangawn in tate' tanghou neng dawhkan nuaia kete a ne sam ve ua oi, a chi hi. 29 Tua a zak takin, Jesu'n numeinu kiang ah: Tua banga na dawn manin, paita in le. Dawi in na tanu a nuseta, a chi hi. 30 Tua numeinu inn ah a pai a, a tanu lupna tunga lum, dawi nutsiatsain a muta hi.
Nangong leh Pautheilou Damsakna
31 Jesu'n Tura leh Sidon kim gam a nusia a, Dekapoli gam tawnin, Galili dil hong tung hi. 32 Tua ah, mi pawlkhat in a nangong, a kitela pau thei lou pasal khat a kiang ah hon tonpih uhi. Amaute'n ama' tunga khut nga dingin Jesu a ngen uhi. 33 Jesu'n tua mipa, mipite apan a tuamin a paipih a, a khutzungte in a bil sung a sawk a, tua khitin, a chil a phih a, tua mipa' lei a lawng hi. 34 vaan lam enin a khawisa a, tua mipa kiang ah: Efatha, a chi hi. Tua bel, Kihongta in, chihna ahi. 35 Thakhatin, tua mipa hong navak pah a, kiteltakin a pau thei pahta hi. 36 Tua thu kuamah hilh lou dingin Jesu'n amaute thu a pia a, ahihhangin, tua bangin khaam semsem taleh, amaute'n tua thu a gen semsem uhi. 37 Mite'n lamdang a sa mahmah uh a: Ama'n bangteng bawl hoih vek. Nangongte nangawn navaksak a, a kitela pau theiloute nangawn kiteltaka pausak, a kichi uhi.
Mi 4,000 Vakna
1 Tua laiin, midang tampi mahmah hong paikhawm uhi. Amaute'n nek ding a nei kei uh a, Jesu'n a nungzuite a sam a: 2 Hiai mite ka lainat mahmah hi. Amaute ka kiang ah ni thum a omta uh a, nek ding lah bangmah a nei kei uhi. 3 Amaute gilkialpi-a inn-a ka paisak ding hilou hi, lamkal ah sawlsamin a bah kha ding uh. Amaute laka pawlkhatte houh gamlapitak apan hong pai hi uh a, a chi hi. 4 A nungzuite'n a dawng uh a: Hita mah leh, amaute vak nadinga kiching tanghou, hiai mun tantan ah kua'n ngah zou ding ahia? a chi uhi. 5 Jesu'n: Tanghou beu bangzah na nei ua le? chi-in amaute a dong hi. Amaute'n: Beu sagih, chi-in a dawng uhi. 6 Ama'n mipite leilaka tu dingin a hilh a, tua khitin tanghou beu sagihte lain kipahthu a gen a, a genkhitin a balkham a, mipite laka hawm dingin nungzuite kiang ah a pia a, amaute'n tua bangin a hawm uhi. 7 Tua baan ah, ngasa neu khakha tawmchik zong a nei uhi. Jesu'n tuate a vualzawl a, hawm dingin nungzuite a hilh hi. 8 Tua mipite'n a ne uh a, a vahta uhi. Tua nungin, nungzuite' khamval nente seng sagih dim a luakkhawm uhi. 9 Tua annete mi 4,000 khawng ahi uhi. Tua khitin, ama'n amaute a paisakta hi. 10 Amah ahih leh, a nungzuite tawh long ah a tuang a, Dalmanutha gam ah a pai hi.
Farisaite n Chiamtehna Lamdang Ngiat
11 Farisaite hong pai uh a, Jesu a kiselpih uh a, amah ze-etnain, vaan apan chiamtehna lamdang a ngiat uhi. 12 Amah a khain a khawisa huthut a: Banghanga tulai khangthakte'n chiamtehna lamdang ngiat ahi ua? Noute thutak kon hilh ahi: Tulai khangthakte kiang ah chiamtehna bangmah ka pe het kei ding, a chi hi. 13 Tua khitin, amaute a nusia a, longa tuangin gal khat lam ah a galkaita hi.
Farisate' Silngou leh Herod' Silngou
14 Nungzuite'n tanghou puak ding a mangngilh uh a, tua long sung ah tanghou beu khat kia a nei uhi. 15 Jesu'n amaute a vauhilh a: Pilvang un. Farisaite leh Herod pawl' silngou apan kiveng un, a chi hi. 16 Amaute hiai thu a kikum uh a: Tanghou i neih louh man hitah, a kichi uhi. 17 Amaute' thu kikup phawkin, Jesu'n amaute kiang ah: Banghanga noute'n tanghou neih louh thu kikum na hi ua? Mu nai lou lai maw? Ahih kei leh, theisiam nailou lai maw? Na lungtangte uh taak khinta hia? 18 Mit nei napi-a mu lou maw? Bil nei napi-a za lou maw? Noute'n thei nawn lou maw? 19 Mihing 5,000 adinga tanghou beu nga ka balkhap laiin, a nen seng bangzah dim ahia na luahkhawm uh? a chi hi. Amaute'n: Seng sawmlenih, a chi uhi. 20 Ama'n: Ahih leh mihing 4,000 adinga tanghou beu sagih ka balkhap laiin, a nen seng bangzah ahia na luahkhawm uh? a chi hi. Amaute'n: Seng sagih, a chi uhi. 21 Ama'n amaute kiang ah: Bangchi dana theisiam lou lailai na hi ua le? a chi hi.
Mittaw Damsakna
22 Tua nungin, Bethsaida hong tung hi. Mi pawlkhat in mittaw pasal khat hon tonpih uh a, amah lawng dingin Jesu a ngen uhi. 23 Ama'n mittawpa' khut a len a, khaw pawlam ah a paipih hi. Jesu'n a mitte a chilphih khitin, a tung ah khut a nga a: Khua na mu thei hia? a chi hi. 24 Mittawpa hong khawdak a: Mite ka mu a, singkung pai bangin ka mu, a chi hi. 25 Jesu'n mittawpa' mitte khatvei a lawng kik a, a khawdaksak hi. Tua bangin, a mitte a vaksak a, kuapeuh kiteltakin a mu theita hi. 26 Jesu'n amah inn ah a paisak a: Khawsung ah lut kenla, kuamah bangmah hilh ken, a chi hi.
Peter in Khrist a Gupna
27 Jesu leh a nungzuite a paikhia uh a, Kaisaria Filipi kim khuate ah a pai uhi. Lampi ah ama'n amaute kiang ah: Mite'n kei kua ahi hon chi ua? a chi hi. 28 Amaute'n a dawng uh a: Mi pawlkhatte'n: Baptispa Johan ahi, hon chi uh a, mi pawlkhatte'n: Elija ahi, hon chi uh a, pawlkhat dangte leuleu in lah: Kamsangte laka khat ahi, hon chi uh, a chi uhi. 29 Ama'n: Ahih leh, noute'n kua ahi non chi ua? a chi hi. Peter in a dawng a: Nang Mesia na hi, a chi hi. 30 Jesu'n ama' tungtang thu kuamah hilh lou dingin amaute a khaam hi.
Jesu' Sih ding Genkholhna
31 Tua nungin, ama'n: Kei Mihing Tapa in thil tampi ka thuak a kul. Upate, siampi makaite leh Dan sinsakte'n hon nolh ding uh a, hon that ngeingei ding uh, ahihhangin, ni thum nungin ka thoukik ding, chi-in amaute a sinsak panta hi. 32 Ama'n kiteltaka hiai thu a gen laitakin, Peter in amah a hui tuam a, a taihilh panta hi. 33 Ahihhangin, Jesu hong kihei a, a nungzuite a en a, Peter a taaita a: Setan, ka nung lam ah om in! Pathian thilte ngaihsun louin, mihing' thilte na ngaihsun, a chi hi.
Nungzuih Man
34 Tua nungin, Jesu'n mipite, a nungzuite tawh amah kiang ah a sam a, amaute kiang ah: Kuapeuh in ka nung hon zuih nop leh, amah kizaangsak a, ama' khros kisuana hon zuih teitei ding ahi. 35 Ahangbel, ama' hinna humbit sawm peuhmah in a mansuah ding a, keima' hang leh tangthupha hanga ama' hinna mansuah peuhmah in a hinna a humbit ding. 36 Mi'n leitung bup nei henla, ama' hinna mansuah leh amah adingin bang^ a meet dia? 37 Mi'n ama' hinna lei nadingin bang a pe thei dia? 38 Tulai khangthak angkawmhat leh khelhhatte aw, mi kuapeuh in keimah leh ka thu a zumpih leh, kei Mihing Tapa ka Pa thupina khu-a, vansawltak siangthoute tawh kong pai chiangin, tua mi ka zumpih ding hi, a chi hi.
1 Ama'n amaute kiang ah: Noute thutak kon hilh ahi: Hiaia ding mi pawlkhat Pathian' kumpigam, vangletna tawh hong tung a muh masiah uh, sihna chiam lou ding a om uh, a chi hi.
Metiamdanna
2 Ni guk nungin, Jesu'n Peter tawh Jakob tawh Johan tawh a tonpih a, mual sangpi tung ah a paitouhpih a, tua ah amau teng kia a om uhi. Tua ah, amaute' mai ah Jesu mei hong lamdang a, 3 a puansilhte a te solsol a, vuk bangin ngou chihtakin a ngou a, leia puansawp mi'n a ngousak theih zah sangin a ngou zaw hi. 4 Tua ah amaute kiang ah Elija leh Mosi hong kilang uh a, Jesu tawh a kihou uhi. 5 Peter in Jesu kiang ah: Sinsakpa, koute adingin hiaia om a nuam. Bukta thum lam le-ung, khat nang ading, khat Mosi ading, khat Elija ading, a chi hi. 6 Amaute lau mahmah uh ahih manin, ama'n gen ding thei lou ahi. 7 Tua laitakin, meipi hong kai a, amaute a khuh hi. Tua meipi lak apan aw hong ging a: Hiai ka it, ka Tapa ahi. Ama' thu ngai un! a chi hi. 8 Amaute'n a kim a kiang uh a et uleh, Jesu loungal kuamah a mu nawn kei guih uhi. 9 Amaute, tua mualtung apan hong kumsuk laiun, Jesu'n amaute thu a pia a: Kei Mihing Tapa, misite lak apan a ka thawhkik masiah, na thil muh uh kuamah hilh kei un, a chi hi. 10 Ahihhangin, amaute lak ah: Misite lak apan thoukik, a chih bang chihna hi ding ahia, chi-in a kikum uhi. Tua thu bel kuamah a hilh kei uhi. 11 Amaute'n Jesu kiang ah: Banghanga Dan sinsakte'n: Elija hong pai masa teitei ding ahi, chi uh ahia? chi-in a dong uhi. 12 Jesu'n a dawng a: Elija hong pai masa ding mah ahi. Ama'n thil bangkim tung ding thak ding ahi. Ahih leh, banghanga: Mihing Tapa in nakpitakin a thuak ding a, nolh in a om ding, chi-a kigelh ahia? 13 Ahihhangin, noute kon hilh ahi: Elija hong paikhinta a, ama' tungthu kigelh bangin, amaute'n amah a ut ut uh a na lawh uhi, a chi hi.
Dawimat Naupang Damsakna
14 Amaute nungzui dangte kiang a tun takun, amaute' kimkota mi tampi om a, Dan sinsakte tawh a kisel lai uh a mu uhi. 15 Tua mite'n Jesu a muh phetun, lamdang a sa mahmah uh a, amah muak dingin hong tai uhi. 16 Ama'n Dan sinsakte kiang ah: Amaute tawh na kiselna uh bang thu ahia? chi-in a dong hi. 17 Mipite laka khat in a dawng a: Sinsakpa, ka tapa dawi pautheilou in a mat, na kianga kon paipih ahi. 18 Tua dawi in amah a suai pahpah chiangin, leilak dennain a nei a, a kam ah chilphuan a pawt a, a ha a gawi a, a sa a segawpta hi. Tua dawi hawlkhe dingin na nungzuite ka ngen a, ahihhangin a hawlkhe thei kei uh, a chi hi. 19 Jesu'n: Upnabei aw, noute bangtan hon ompih lai ding ka hia? Bangtan hon thuak zou lai ding ka hia? Naupangpa ka kiang ah hon paipih in, a chi hi. 20 Tua bangin, amah hon paipih uhi. Tua dawi in Jesu a muh takin, naupang a kisatsak pah hi. Amah leilak ah a puk a, a kam ah chilphuan a pawt hi. 21 Jesu'n naupang' pa kiang ah: Hibanga a omna bangtan phata ahia? chi-in a dong hi. Ama'n: A neu lai apan hita. 22 Tamveipi dawi in thah sawmin, kawkhuk peuh, tui 23 Jesu'n: Na up theih leh hi thei. A um mi adingin bangteng ahi thei hi, a chi hi. 24 Naupang' pa'n khitui kai kawmin: Toupa, um mah ing. Ka uplahna hon huh in! a chi hi. 25 Tua muna mi tampi hong taikhawm a muhin, Jesu'n tua kha nin a taai a: Nang kha nin nangong leh pau theilou thu kon pia hi. Ama' sung apan hong pawtkhia inla, lut ngei nawn ken, a chi hi. 26 Tua kha nin a kikou vomvom a, nakpitakin naupang a kisatsak a, hong pawtkhia hi. Tua naupang pen misiluang bangbang a suak a, tampite'n: A si ahita, a chi uhi. 27 Ahihhangin, Jesu'n ama' khut a len a, a dingtousak a, a dingta hi. 28 Inn sunga Jesu hong lut nungin, a nungzuite'n a simin: Banghanga koute'n tua dawi hawlkhe thei lou ka hi ua le? chi-in a dong uhi. 29 Ama'n a dawng a: An ngawla na thum chiang kia-un hibang dawi a pawtkhe lei ding, a chi hi.
Jesu Sih ding Genkholhna
30 Amaute tua mun nusiain, Galili gam tawnin a pai uhi. Jesu'n amaute' omna kuamah theih ding a deih kei hi. 31 Ahang bel, a nungzuite a sinsak lai ahih man ahi. Ama'n a nungzuite kiang ah: Kei Mihing Tapa hon kilepsanin mihingte khut sung ah hon khawng ding uh. Hon that ding uh a, ni thum nungin ka thoukik ding, a chi hi. 32 Ahihhangin, amaute'n tua thu bang genna hi hiam, chih a theisiam kei uh a, dottel ding lah a lau uhi.
Letna Dik
33 Amah Kapernaum hong tung a, inn sunga a om laiin, amaute kiang ah: Lampi-a bang thu kisel na hi ua le? a chi hi. 34 Ahihhangin, lampi-a a kiselna uh: Kua liana thupipen ding hiam, chih thu ahih manin, amaute a dai dide uhi. 35 Jesu a tusuk a, a kiang ah Sawmlenihte a sam a, amaute kiang ah: Mi kuapeuh in a masapen hih a ut leh, a nanungpena a pan ding, mi khempeuh' nasempa-a a pan ngeingei ding ahi, a chi hi. 36 Ama'n naupang neu khat a kai a, amaute lak ah a dingsak hi. Tua khitin a ang ah a pom a, amaute kiang ah: 37 Keima' mina hiai naupang neute laka khat lei zong a na saang mi in, kei hon saang ahi. Kei hon saang mi in kei hon saang ahi kei a, kei hon Sawlpa saang ahi, a chi hi.
Hon Dou lou peuh Eilam Pang
38 Johan in: Sinsakpa, na mina dawite hawlkhia mi khat ka mu uh a, amah eite hon zui ahih louh manin ka khou uh, a chi hi. 39 Jesu'n: Amah khou kei un. Ka mina thillamdang hih mi in kei gensiat tawh a thuah thei kei hi. 40 Noute hon dou lou peuhmah noulam pang ahi. 41 Noute thutak kon hilh ahi: Noute Khrist-a na hih man ua ka min vanga tuisik nou khat hon pia peuhmah in a pahtakman a mansuah kei hiai ding hi.
Gawtmun thu-a Vauhilhna
42 Kei hon um, hiai naupang neute laka khat peuh kipalpaisak mi om taleh, tua bang mi zaw, a ngawnga buhhek suang awhsak a, tuipi sunga paihlut hi leh, amah adingin thil hoihzaw ahi ding hi. 43 Na khut in hon kipalpaihsak aleh, tankhia in. Meikuang a mih ngeilouhna gehena khut nih neia lut sangin, khut kim lou-a hinna sung tun nang adingin a hoih zaw. 44 Tua gehen ah, a than uh lah si ngei lou, meisa lah daai ngei lou ahi. 45 Na khe in hon kipalpaihsak aleh, tankhia in. Gehena khe nih neia lut sangin, khe kimlou-a hinna sung tun nang adingin a hoih zaw. 46 Tua gehen ah, a than uh lah si ngei lou, meisa lah daai ngei lou ahi. 47 Tua baan ah, na mit in hon kipalpaihsak leh, khelkhia in. Gehena mit nih neia paihluta om sangin, mit kimloua Pathian kumpigam lut nang adingin a hoih zaw. 48 Tua gehen ah, a than uh lah si ngei lou, meisa lah daai ngei lou ahi. 49 Ahang bel, tua ah Pathian in michih chisawh bangin meiin a sawh ding a, kithoihna peuhmah zong chi a sawh ding hi. 50 Chi a hoih a, ahihhangin, chi in a alna mansuah leh, bangchi alsak kik thei mawk ding na hi ua? Noumau sung ah chi nei unla, khat leh khat kilemtakin om un, a chi hi.
Kimakna
1 Tua nungin, Jesu tua mun apan a paikhia a, Judia gam leh Jordan gal khat lam ah a paita hi. Mipi tampi amah kiang ah hong paikhawm uh a, ama'n a hih ngeina bangin amaute a na sinsak hi. 2 Farisai pawlkhat hong pai uh a, amah ze-etin: Pasal in a zi a mak a siang hia? a chi uhi. 3 Ama'n a dawng a: Mosi in noute hon thupiak bang ahia? a chi hi. 4 Amaute'n: Mosi in zaw, pasal in makna lai tawh a zi a paisak a phal hi, a chi uhi. 5 Jesu'n a dawng a: Noute' lungtang khauh mana, Mosi in tua thupiak hon gelhsak ahi. 6 Ahihhangin, a chil apanin, Pathian in amaute pasal leh numeiin a bawl. 7 Tua hangin, pasal in a nu leh a pa nusiain a zi ah a belh ding a, 8 amau nihte sa pum khat hong suak ding uh, a chi. Amaute nih a hita kei uh a, sa pumkhat hong hita uhi. 9 Tua bang ahih manin, Pathian in a gawmsa mihing in khen kei hen, a chi hi. 10 Amaute inn sunga a om laiun, a nungzuite'n hiai thu a dong kik uhi. 11 Ama'n a dawng a: A zi ma a, mi dang kitenpih peuhmah in a zi angkawmsan ahi. 12 Zi in a pasal ma henla, pasal dang nei leh, angkawm ahi, a chi hi.
Naupang Neute leh Kumpigam
13 Mite'n Jesu' lawn dingin naupang neute hon tonpih uhi. Ahihhangin, a nungzuite'n amaute a na taai uhi. 14 Jesu'n hiai a muh takin, a lunghi kei mahmah a, amaute kiang ah: Naupang neute ka kiang ah hon paisak unla, kham kei un. Pathian' kumpigam zaw hiai naupangte bang mite-a ahi. 15 Noute thutak kon hilh ahi: Naupang neute banga Pathian' kumpigam saang lou mi peuhmah, a sung ah a lut het kei ding, a chi hi. 16Ama'n naupangte a ang ah a pom a, amaute tunga khut ngain a vualzawl hi.
Ahau Tangvalpa
17 Jesu lampi-a a pai laiin, pasal khat a vatai a, a mai ah a khukdin a: Sinsakpa hoih, tangtawn hinna ka luah nadingin bang ka hih kul ahia? a chi hi. 18 Jesu'n a dawng a: Banghanga kei, hoih hon chi na hia? Pathian kia loungal kuamah mi hoih om lou ahi. 19 Thupiakte na thei ve le: Angkawm ken, Tualthat ken, Gu ken, Theihpih taklou-in pang ken, Khem ken, Na nu na pa pahtawi in, chihte, a chi hi. 20 Ama'n: Sinsakpa, hiaite khempeuh ka tuailai apan ka zuihsa ahita, a chi hi. 21 Jesu'n amah a en a, a it a: Thil khat na kisam lai. Pai inla, na neih khempeuh zuak inla, a sum mizawngte kiang ah pia in, tua hi leh, vantung ah gou na nei ding. Tua khit chiangin, hong pai inla, khros kisuanin kei hon zui in, a chi hi. 22 Hiai a zak takin, tua mipa' dah mahmah in a paikhia hi. Ahangbel amah neih leh lam hau mahmah a na hi-a ahi.
Ahaute' Haksatna
23 Jesu'n a kim a kiang a en a, a nungzuite kiang ah: Ahaute a dingin Pathian' kumpigam sung lut a haksa hi, a chi hi. 24 Nungzuite'n Jesu thugen lamdang a sa mahmah uh a, ahihhangin, ama'n: Tate aw, hauhna muangte adingin, Pathian' kumpigam' sung lut haksa na maizen e! 25 Ahau Pathian' kumpigam sung a lut sangin sangawngsau phim bil vanga a lut paisuak a baihlam zaw, a chi hi. 26 Nungzuite'n lamdang a sa semsem uh a: Tua bang ahih leh, kua hotdama om thei ding ahia? a kichi uhi. 27 Jesu'n amaute a en a: Mihing adingin hiai thil hithei lou ahi. Ahihhangin, Pathian adingin bel thil bangkim hi thei vek ahi, a chi hi.
Tangtawn Pahtakman
28 Peter in amah kiang ah: En dih, koute'n thil bangkim nusiain nang kon zui ua! a chi hi. 29 Jesu'n a dawng a: Noute thutak kon hilh ahi: Inn hiam, sanggampate hiam, sanggamnute hiam, nu hiam, pa hiam, zi hiam, tate hiam, loute hiam, keimah leh tangthupha hanga nusia kuamah, 30 tu huna a lehza ngah lou ding a om kei. Tu hunin innte, sanggampate, sanggamnute, nute, tate leh loute, bawlsiatna tawh a ngah ding a, hong tung ding hun ah Tangtawn hinna a ngah ding hi. 31 Ahihhangin, a masapena pang tampite a nanungpenin a pang ding uh a, a nanungpena pang tampite a masapenin a pang ding uh, a chi hi.
Hong Tung ding Kilhdenna
32 Amaute Jerusalem manawhin a pai uh a, Jesu'n ma a kai hi. Nungzuite'n lamdang a sa uh a, amah zui dangte a lau uhi. Ama'n Sawmlenihte a tuamin a paipih a, amah tunga thil hong tung dingte a hilh hi. 33 Ama'n: Ngai un, eite Jerusalema hawhtou ding i hi a, kei Mihing Tapa lehbawla siampi makaite leh Dan sinsakte kianga hon khawng ding uh ahi. Amaute'n thah dinga mawh hon tangsak ding uh a, Zentelte khut ah hon pekhe ding uh ahi. 34 Zentelte'n hon engbawl ding uh a, hon sat ding uh a, hon chilphih ding uh a, hon that ding uhi. Tua nung ni thum ni-in ka thoukik ding hi, a chi hi.
Let Utte
35 Tua nungin, Zebedai' tapate, Jakob leh Johan amah kiang ah hong pai uh a: Sinsakpa, ka nget peuhpeuh uh non hihsak ka ut uhi, hong chi uhi. 36 Ama'n: Noute adingin bang hon hih sak leng na ut ua eita? chi-in a dong hi. 37 Amaute'n a dawng uh a: Na thupina ah, khat na taklam ah, khat na veilam ah hon tusak ve, a chi uhi. 38 Ahihhangin, Jesu'n: Na nget uh na thei kei ua ahi. Ka dawn ding nou apan na dawn thei ding ua hia? Ahih keileh, ka kibaptis nadingin na kibaptis thei ding ua hia? a chi hi. 39 Amaute'n: Thei e, a chi uhi. Jesu'n amaute kiang ah: Ka dawn nou apan na dawn tham ding uh a, ka kibaptis nadingin na kibaptis tham ding uh. 40 Ahihhangin, ka taklam leh ka veilama tut ding pen kei piak theih ahi kei, Pathian in a sehsate ading ahi, a chi hi. 41 Nungzui sawmte'n hiai thu a zak takun, Jakob leh Johan tunga lungkim louin a heh uhi. 42 Jesu'n amaute a samkhawm a: Zentelte tunga vaihawmte zaw amaute' tung ah a kiliansak uh a, a uliante uh amaute tung ah a kithuneisak uhi. 43 Noute lak ah bel, tua bang hilou ding ahi. Noute laka let ut peuhmah, na nasem ua a pan ding ahi. 44 Noute laka khatna-a pang nuam peuhmah, mi khempeuh' silain pang hen. 45 Kei Mihing Tapa nangawn mite'n ka nna hon sepsak dinga hong pai ka hi kei a, mite' nasem dinga hong pai a, mi tampi tatna man hi dinga ka hinna pe dinga hong pai ka hi zaw, a chi hi.
Mittaw Bartimai Damsakna
46 Amaute Jerikho hong tung uhi. Jesu leh a nungzuite'n mipi tampi tawh tonin tua khawpi nusia-a a pai laitakun Timai' tapa Bartimai kichi, mittaw khat lamgei ah khutdawhin a na tu hi. 47 Ama'n Nazareth Jesu ahi, chih a zak takin: David' Tapa Jesu ka tung ah zahngai in! chi-in a kikou hi. 48 Tampite'n amah a taai uh a, kamsim dingin a hilh uhi. Ahihhangin, amah ngaihsemin a kikou a: David' Tapa, ka tung ah zahngai in! a chi hi. 49 Jesu a khawl a: Amah hon sam un, a chi hi. Tua bangin, amaute'n mittawpa a sam uh a: Kipaktakin om inla, ding in! Ama'n nang hon sam, a chi uhi. 50 Ama'n puanaktual paikhe zokin, a ding tou a, Jesu kiang ah hong pai hi. 51 Jesu'n amah kiang ah: Nang adingin bang hon hihsak leng na uta eita? chi-in a dong hi. Mittawpa'n: Sinsakpa, khawmuh theih ka ut, a chi hi. 52 Jesu'n: Paita in. Na upna in hon damsak ahi, a chi hi. Ama'n khawmuh theihna a ngah pah a, lampi ah Jesu a zuita hi.
Pahtawia Jerusalem Lutna
1 Amaute Jerusalem a hong tun ding kuanun, Oliv Muala om Bethfage leh Bethani kiang a tungta uhi. Tua apan, Jesu'n a nungzuite nih a sawl a, amaute kiang ah: 2 Na mai ua khua ah vapai unla, tua khua na lut phet chiangun, kuamah tuan ngei nailouhna sabiltungnou khat kikhih na mu ding uh. Suut unla, hiai ah hon kai un. 3 Kuapeuh in: Banghanga suut na hi ua? hon chih chiangun, Toupa'n deihna a neia ahi, hon pekik pah ding, chi un, a chi hi. 4 Amaute a vapai uh a, kongzing ah, kongkhak kiang inn pua-a kikhih sabiltungnou khat a mu uh a, a phei uhi. 5 Tua laia ding mi pawlkhat in: Banghanga sabiltung nou suut na hi ua? a chi uhi. 6 Amaute'n Jesu' hilhsa bangin a dawng uh a, tua mite'n amaute a paisakta uhi. 7 Tua sabiltung nou Jesu kiang ah hon kaitung uh a, amaute'n a tung ah puanaktualte a phah uh a, amah a tuang hi. 8 Mi tampite'n lampi ah a puansilhte uh a phah uh a, midangte'n gamlak singsawlte a khiak uh a, lampi ah a phah uhi. 9 A mailama paite leh a nunglama zui mipite a kikou uha: Hosana! Toupa' mina hong paipa a nunnuam hi! 10 Hong tung ding i pa David kumpigam a nunnuam hi. Tungnungpen ah Hosana! a chi uhi. 11 Jesu, Jerusalem ah a lut a, Judate' tempul ah a lut hi. A kim a kiang enin a dak a, bang teng a en hi. Ahihhangin, ni niamta ahih manin, Bethani khua ah Sawmlenihte tawh a paita hi.
Theipikung Hamsiatna
12 A zing chiangin, amaute'n Bethani a nutsiat laiun, Jesu a gilkial hi. 13 Gamlapi ah theipi kung tehnei a mu a, a gah pha hiam chih en dingin a vanaih hi. A mun a vatun takin, a tehte loungal bangmah a mu kei hi. Theipi gah hun ahi kei him hi. 14 Ama'n theipi kung kiang ah: Kuama'n nang apan theipi gah ne nawn kei hen, a chi hi. Nungzuite'n tua a gen lai a za uhi.
Tempul Hahsiangna
15 Amaute Jerusalem khua a tun kik takun, Jesu, Judate' tempul huang sung ah a lut a, tua muna van zuak leh leia omte khempeuh a hawlkhia a, sumkhengte' dawhkante leh vakhu zuakte' tutphahte a lumlet hi. 16 Tempul sunga kuama'n zuaksum a puaklut a phal kei hi. 17 Ama'n amaute a sinsak a: Mite'n ka inn, namte khempeuh adinga thuumna mun, a chi ding uh, chi-a kigelh hilou maw? Noute'n lah suamhatte kaw khuk na suaksak uh, a chi hi. 18 Siampi makaite leh Dan sinsakte'n hiai thu a za uh a, amah thah theih nading lampi a zong uhi. Tua bel, amah a lau man uh ahi. Ahang bel, mipite khempeuh in a sinsakna lamdang a sa ua ahi. 19 Nitaklam a hong hihin, amah khawpi apan a paikhia hi.
Upna Vangletna
20 Zingsangin, amaute a pai laiun, tua theipikung, a zungte apan pumkeuin a mu uhi. 21 Peter in a theikhia a, Jesu kiang ah: Sinsakpa, en dih! Theipikung na hamsiat pen a keuta! a chi hi. 22 Jesu'n a dawng a: Pathian um in. 23 Noute thutak kon hilh ahi: Kuapeuh in hiai mual kiang ah: Kisuankhia inla, tuipi sung ah kipailut in, chi henla, a lungtang ah uplahna nei louin, a chih banga tung teitei dingin um leh, amah adingin a tung taktak ding hi. 24 Tua bang ahih manin, kon hilh ahi: Thuumna-a na nget peuhmah uh, ngah khinta ing, chi-in um un. Tua hileh, na ngah ding uhi.
Ngaihdamna Kulna
25 Tua baan ah, thuuma na din chiangun, mi kuapeuh tunga lungkimlouhna na neih uleh, a tatlekna ngaidam un. Tua bel, vantunga om noute' Pa in zong na tatleknate uh hon ngaihdam theih nading ahi. 26 Ahihhangin, ngaidam lou hive uchin, vantunga om noute' Pa in zong, na tatleknate uh hon ngaidam lou ding hi, a chi hi.
Jesu' Thuneihna Khinna
27 Amaute, Jerusalem khua hong tung kik uh a, Jesu bel, tempul huang sunga a pai laiin, siampi makaite, Dan sinsakte leh upate amah kiang ah hong hawh uhi. 28 Amaute'n: Bang thuneihna neia hiai thilte hih na hia? Kua'n hiai thuneihna hon pia ahia? chi-in a dong uhi. 29 Jesu'n a dawng a: Noute dotna khat hon dong ning. Hon dawng le uchin, ke'n zong bang thuneihna neia hiai thilte hih ka hi hiam, hon hilh ning. 30 Johan' baptisna vaan apan thuneihna maw, ahih kei leh, mihingte apan? Hon hilh un! a chi hi. 31 Amaute a kikum uh a: Vaan apan, chi lehang lah, Banghanga amah um lou? hon chise ding a, a kichi uhi. 32 Mihingte apan, chih leng lah, mite a lau zel uhi. Ahang bel, mi kuapeuh in Johan pen kamsang taktaka saangta uh hiven. 33 Tuachi-in, Jesu a dawng uh a: Thei kei ung, a chi uhi. Jesu'n: Bang thuneihna neia hiai thilte hih ka hi hiam, chih ke'n zong hon hilh kei ning, a chi hi.
Lou Khawhlawh Gentehna
1 Ama'n amaute kiang ah, gentehna zangin thu a gen panta a: Mi khat in grephuan a bawl a, a kimkotin suang daiin a um a, grep suk nading khuk a tou a, galvil buk sang khat a lam hi. Tua khitin, lounei mi pawlkhat kiang ah, grep huan khawhlawh dingin a pia a, a zinmangsan hi. 2 Grep gah lawh a hun takin, a khawhlawhte apan gah khawm dingin, a silate khat a sawl hi. 3 Ahihhangin, amaute'n silapa a na man uh a, a vua uh a, khutvuakin a paisak uhi. 4 Grephuan neipa'n amaute kiang ah sila dang khat a sawl nawn hi. Amaute'n amah suangin a na deng uh a, a lutang a liamsak uh a, zumhuaipi-a bawlin a paisak uhi. 5 Ama'n mi dangkhat a sawl leuleu a, tua pa zong a na that uhi. Tua bangin, mi dang tampi zong a sawl a, pawlkhatte a na vua uh a, pawlkhatte a na that uhi. 6 Grephuan neipa'n mi khat lei sawl ding a neita a, tua bel a it mahmah a tapa ahi. Ama'n: Ka tapa na zahtak unte, chi-in a nanungpenin amah a sawl hi. 7 Ahihhangin, lou khawhlawhte a kikum uh a: Hiai gouluah dingpa ahi vele, kisa ni-in that ni, a gouluah ding teng eia hi ding hi, a kichi uhi. 8 Tua bangin, amah a man uh a, a that uh a, grephuan pawlam ah a lawnkhia uhi. 9 Grephuan neipa'n a khawhlawhte bang a lawhta dia le? A hong kuan ding a, lou khawhlawhte a that ding a, midangte kiang ah grephuan a pe ding hi. 10 Noute'n hiai Laisiangthou thu sim lou maw: Innlamte'n a nolh uh suang, a kiu suang poimawhpen hong hita hi. 11 Hiai Toupa' thilhih hi a, i mitmuha lamdang hi, chih? a chi hi. 12 Tua gentehna amaute dema a gen ahi, chih a theih manun, amaute'n amah mat theih nading lampi a zong uhi. Ahihhangin, amaute'n mipite a lau uh a, amah nusiain a paimangta uhi.
Siah Piak Thu
13 Tua nunglamin, Jesu a kampaua man dingin, amaute'n Farisaite leh Herod pawlte apan mi pawlkhat, Jesu kiang ah a sawl uhi. 14 Tuate Jesu kiang ah hong pai uh a, a kiang ah: Sinsakpa, nang na dik a, kuamah deihsak tuam leh mitmeiven tuam na nei kei a, thutak tawh kituakin Pathian lampi na sinsak chih ka thei uh. Ahih leh, Kaisar kianga siah piak a siang hia, ahih kei leh siang lou? 15 Siah ka pe ding uhia, ahih kei leh, pe lou ding? a chi uhi. Ahihhangin, Jesu'n amaute' lepchiahna a mu a: Banghanga hon ze-et na hi ua? Dinari tang khat hon lak un, ka en ding, a chi hi. 16 Amaute'n dinari tang khat hon tawi uh a, ama'n: Hiai kua lim hi a, kua min hi a hia le? a chi a, amaute a dong hi. Amaute'n: Kaisar-a, chi-in a dawng uhi. 17 Jesu'n amaute kiang ah: Tua ahih nung, Kaisar'-thilte Kaisar pia unla, Pathian' thilte Pathian pe ve ua, a chi hi. Amaute'n amah lamdang a sa mahmah uhi.
ThawhkikNung Thu
18 Tua nungin, Sadukaite Jesu kiang ah hong pai uhi. Amaute bel, thawhkikna omlou, chite ahi uhi. 19 Amaute'n amah kiang ah: Sinsakpa, Mosi in koute adingin hibangin a na gelh hi: Mi ta neiloua a sih leh a sanggampa'n amah adinga chisuan a neihsak nadingin, tua meigong a kitenpih ngeingei ding ahi chi-in. 20 Ahi a, unau pasal sagih om uhi. A upapen in zi a nei a, tabeiin a sihsan hi. 21 Anihna in tua meigong a kitenpih a, tabei mahin a sihsan hi. A thumna zong tua mah bangin a si hi. 22 Unau pasal sagihte a kuamah in amah tawh kal ah ta a nei kei uhi. Atawpin tua numei zong a si hi. 23 Amaute'n tua nu kitenpih tek uh hi a, thawhkikna ah a kuape'n zi a hita dia le? chi-in a dong uhi. 24 Jesu'n a dawng a: Noute'n Laisiangthou thute lah thei lou, Pathian' vangletna lah thei lou na hih man uh ahi ve na theihkhelh nak uh. 25 Thawhkikna ah zi leh pasal kineihna omlou ding a, vantunga vansawltakte bang ding uhi. 26 Misite thawhkikna thu tawh kisaiin, Mosi laibu na simta kei ua hia? Loupabuk ah, Pathian in amah kiang ah: Kei Abraham' Pathian, Isak' Pathian, Jakob' Pathian ka hi, a chi hi. 27 Amah a site' Pathian hi lou a, a hingte' Pathian hi zaw ahi. Nakpitaka theikhial na hi ve ua! a chi hi.
Thupiak Thupipen
28 Dan sinsakte laka khat hong pai a, amaute' kiselna hong za hi. Jesu'n amaute dotna diktakin a dawng, chih a muh takin, amah kiang ah: Thupiakte khempeuh lak ah a koi pen thupipen ahia? chi-in a dong hi. 29 Jesu'n a dawng a: Thupiakte khempeuh laka thupipen hiai ahi: Israel aw, za in: Tangtawn Toupa na Pathian, Tangtawn Toupa khat ahi. 30 Toupa na Pathian, na lungtang khempeuh, na hinna khempeuh, na lungsim khempeuh, na thahatna khempeuha na it ding ahi, chih. Hiai ahi thupiak thupipen. 31 A zom hiai ahi: Nang na ki-it bangin na veng na pamte it in, chih. Hiaite sanga thupiak thupi zaw a om kei, a chi hi. 32 Tua mipa'n a dawng a: Sinsakpa, thutak na gen. Pathian khat ahi a, amah loungal a dang a om kei, chih na gen dik. 33 Lungtang khempeuh, theihsiamna khempeuh, hinna khempeuh, thahatna khempeuha Pathian it ding leh, mi'n amah a ki-it banga a veng a pamte a it ding mah, haltum thillat leh kithoihnate khempeuh sangin a poimawh zaw hi, a chi hi. 34 Ama'n piltakin a dawng, chih Jesu'n a muhin, amah kiang ah: Pathian' kumpigam na gamlat kei, a chi hi. Tua nungsang, kuama'n dotna dang himhim a dong ngam nawn kei uhi.
Mesia, Kua' Tapa
35 Jesu'n Judate' tempul huang sunga a sinsak laiin, amaute kiang ah: Dan sinsakte'n: Mesia, David' Tapa ahi, a chih uh bang a chihna uh ahia? 36 David mahmah in Kha Siangthou tungtawnin thu a gen a: Toupa'n ka Toupa kianga: Na melmate na khengakna-a ka bawl masiah, ka taklam ah tu in, chi hi, a na chi hi. 37 David in amah, Toupa, a chih ngai leh, bang chi-a amah a tapa hi thei ding ahia? a chi hi. Mi nautangte'n kipaktakin amah a ngaikhia uhi.
Makaite Mawhtansakna
38 Tua banga a sinsak laiin, Jesu'n amaute kiang ah: Dan sinsakte apan kiveng un. Amaute'n puanaktual silha pai a, sumsinna mun khawnga mite' muah leh, 39 sunagogte-a tutna poimawh pena tut leh, ankuang luina muna zahbawlna tutna khawng a nuamtuam nak uhi. 40 Meigongte' innte a nawmvalh uh a, tangpi khem nadingin sawtpipi a thuum uhi. Tua bang mite'n mawhtansakna lianzaw a ngah ding uhi, a chi hi. 41 Meigong' Thilpiak AKhatvei bel, Jesu, thilpiak koihkhawmna mun mai ah a tu a, mite'n sumbawma sum a khiak uh a en hi. Ahau tampite'n sum tampipi a khia uh a, 42 ahihhangin, meigong zongtak khat hong pai a, paisa san neu chik chik nih a khia hi. Tua bel, sum tawmchik ahi. 43 Jesu'n nungzuite a kiang ah a sam a, amaute kiang ah: Noute thutak kon hilh ahi: Hiai meigong zongtakin midang teng sangin sum bawm ah a khetam zaw. 44 Midang in a hauhlet uapan a pia uh a, ama'n zaw, a neih zawhlouh sasain, a nuntak nading teng, a vekpi-in a pia hi, a chi hi.
Nungzuite' Thudot
1 Ama'n tempul a nutsiat A %3 laiin, a nungzuite khat in amah kiang ah: Sinsakpa, en dih! Suangte lian thei nah e! Inn thupi hi na mah e! a chi hi. 2 Jesu'n a dawng a: Hiai inn thupite na mu maw? Mi'n hiai suangte, khat tunga suang dang kichiangsawn hawi loua hihchim vek sipsip ding uh ahi, a chi hi. 3 Tua tempul gala Oliv Mual tunga Jesu a tut laiin, Peter, Jakob, Johan leh Andru in a simin thu a dong uh a: 4 Hiai thilte chik chiangin hong tung ding a, hiaite khempeuh hong tungkim ding hita, chih chiamtehna bang hi ding ahia? a chi uhi.
Gimthuakna Hun
5 Jesu'n amaute kiang ah thu a gen a: Kuama'n hon khempuk louh nadingin pilvang un. 6 Mi tampi keima' minin hong pai ding uh a: Kei Mesia ka hi, hong chi ding uh a, mi tampi a khemzou ding uhi. 7 Kidou thute leh kidou ding thuthangte na zak chiangun patau kei un. Hiai thilte a tung ding him ahi. Ahihhangin, tawpna hi nai lou ding ahi. 8 Nam leh nam kidou ding a, kumpigam leh kumpigam kidou ding a, mun tuamtuam ah zin ling ding a, kialte leh mipi kitomnate tung ding hi. Hiaite khempeuh nauvei natna kipatna hi ding hi. 9 Noute na kiven ding uh ahi. Tualsung Juda vaihawmpawlte khut ah hon pelut ding uh a, Judate' sunagog khawngah hon vaw ding uh. Keima hangin ukpipate leh kumpipate' mai ah hon dingsak ding uh. Ahang bel, amaute maia theihpihna na suah theih nading uh ahi. 10 Namte khempeuh kiang ah tangthupha a kigen masa teitei ding ahi. 11 Noute hon mat uh a, thukhenna maia hon paipih chiangun, na gen ding uh lunghimawh masa kei unla, na dawn nading uh lungkham kei un. A hun taka hong kipia pen gen un. Ahang bel, a thu gen noute hilouin, Kha Siangthou ahi zaw ding hi. 12 Sanggam in a sanggam thah dingin a khawng ding a, pa in a ta thah dingin a khawng ding. Tate'n nu leh pate a dou ding uh a, a thatsak ding uh. 13 Keima' min hangin mi khempeuh mudah na hi ding uh. Ahihhangin, a tawp donga thuak mualsuak mi bel hotdam ahi ding hi. 14 Kamsangpa Daniel in a na gensa thil kihhuai thu a sim mi in theisiam hen, Ama'n a na gensa banga siatna tunpa, a muhthadah huai pa, a kihhuaipa ama' mun hiloupi-a ding na muh chiangun, Judia gama omte mual tung lam ah tai uhen. 15 Inn tunga om kuamah kum kei hen. Ahih kei leh, inn sunga om van la dingin lut kei hen. 16 Loua om kuamah in puantung silh la dingin inn lam delh kei hen. 17 Tua nitein gaite leh naunou pomte tung gik nan chia! 18 Phalbi laia na galtai uh a kul louhna dingin thum un. 19 Ahang bel, tua nite lungzin mangbat nite hi ding a, a chila Pathian in leitung khuavannuai a siam apan tu donga a kimpih om nailou, om zong om ngei nawn lou ding ahi. 20 Toupa'n tua nite hih tom kei leh, kuamah a suakta kei ding hi. Ahihhangin, ama' telsate hangin tua nite hih tom ahi ding hi. 21 Tua hun chianga, mi khatpeuh in: En un, hiai ah Mesia a om! a chih chiangin um kei un. Ahih kei leh: En un, amah hua lai ah a om! a chih chiangin, um kei un. 22 Ahangbel, Mesia takloute leh kamsang takloute hong pai ding uh a, hi thei liai hi leh, Pathian' telte nangawn khemmang dingin chiamtehna lamdangte leh vangletna nasepte a bawl ding uhi. 23 Tua bang ahih manin, noute kiveng un. Ngai un a hun tun ma-a thil bangkim hon hilh ka hi.
Jesu' hong Pai Nihveina
24 Ahihhangin, tua nite ah, tua lungzin mangbatna zuiin Pathianin ni mialsak dinga, kha taang lou ding a, 25 aksite vaan apan ke ding a, Pathianin vaana vangletnate kungsin ding hi. 26 Tua hun chiangin, mite'n: Kei Mihing Tapa, vangletna lianpi leh thupina tawh meipi laka hong pai hon mu ding uhi. 27 Ka vansawltakte ka sawl ding a, lei kiuli apan, leimong apan vaan mong dong ka teelsate a khawm ding uhi.
Theipikung Gehtehna
28 Theipi kung apan hiai gentehna sin un: Theipi hiangte hong dawn a, a tehte hong sel chiangin, nipi a naita, chih na thei uhi. 29 Tua mah bangin, hiai thilte hong tung na muh chiangun, ka hong naita, kongkhak bul mahmah ah ka omta, chih thei un. 30 Noute thutak kon hilh ahi: Hiai thilte a tunkim masiah, hiai khang a bei kei ding. 31 Lei leh vaan a mangthang ding a, ka thute bel, bangchi mahin a mangthang kei ding hi.
Kiging dinga Hanthawnna
32 Tua ni leh tua hun kuama'n a thei kei. Vantunga vansawltakte'n zawng a thei kei uh. Tapa nangawn in zawng ka thei kei. Pa kia in a thei hi. 33 Kiveng un! Kigingsain om unla, thuum un. Tua hun chik chianga hong tung ding hiam, chih na thei kei uhi. 34 Mi khat, a silate khuta a inn nusia a, amaute sep ding pe chiat a, kongkhak chingpa kiging gige dinga hilh a, gamlapi-a zinmang bang ahi. 35 Tua hi a, inn neipa hong tun ding hun na theih louh manun, kiging gigein om un. Nitak hi thei, zankim lai hi thei, akkhuan hi thei, phalvak hi thei hi. 36 Amah hong tung guih leh noute ihmusain hon mu kha ding hi. 37 Noute kianga ka gen, mi chih kianga ka gen ahi. Kiging gige un! a chi hi.
Makaite'n Jesu Thah Sawm
1 Tu'n Paikan Ankuang leh Tanghou Silngou sawhlouh Ankuang lui nading ni nih kia a omta hi. Siampi makaite leh Dan sinsakte'n Jesu mat a, thah nading san zekhemna piltak a zong uhi. 2 Amaute'n: Mipite lak ah kitomna om kha ding a, Ankuang lui laiin zaw hi kei leh, a kichi uhi.
Jesu Sathau Nilhna
3 Amah Bethani khua-a om, mi khat Simon Miphakpa kichi' inn sung ah ankuang umin a om hi. Tua laitakin, numei khat sathau namtui manpha mahmah, nardi sianga kibawl sathau, alabastar thawla hon tawiin hong lut hi. Ama'n tua thawl tatkhamin, Jesu lu tung ah tua sathau namtui a sung hi. 4 Tua muna om mi pawlkhatte'n, kiawiloutakin; Banghanga tua sathau hibanga thangbawl ahia? 5 Dinari zathuma zuak a, a sum mizawngte kianga piak theih hi tawk a, a kichi uh a, numeinu aw khauhtakin a dem uhi. 6 Jesu'n amaute kiang ah: Vakikum kei un. Banghanga tua numei subuai na hi ua? Kei tunga thil hoih hih ahi. 7 Mizawngte ahih leh, noute kianga om gige uh a, na ut hun peuh ua amaute huh thei nahi uhi. Kei bel, noute kianga om gige lou ding ka hi. 8 Ama'n a hih theih khamkham hih ahi. Ka pumpi vui dinga bawl khol a, sathau namtui buak ahi. 9 Noute thutak kon hilh ahi: Leitung bupa hiai tangthupha a kigenna peuh ah, hiai numei' thilhih zong amah theih gige nadingin a kigen ding hi, a chi hi.
Juda in Jesu Khot Sawm
10 Tua nungin, Sawmlenihte laka khat, Juda Iskariot in siampi makaite' khut sunga Jesu khawng nuamin, amaute kiang ah a vapawt hi. 11 Amaute'n hiai thu a zak takun, a kipak uh a, dangka piak ding a chiam uhi. Tua bangin, ama'n amah piakkhiak nading hun lem a taang gige hi.
Paikan Ankuang Bawlna
12 Tanghou Silngou sawhlouh Ankuang lui ni masapena Paikan belamnou gawh ngeina ahi. Tua niin, a nungzuite'n amah kiang ah: Nang adingin Paikan Ankuang na um theih nading koi ah hon bawlsak le-ung na ut a? chi-in Jesu a dong uhi. 13 Jesu'n a nungzuite nih a sawl a: Khawpi sung valut le uchin, tuibel pua pasal khat in hon na tuak ding. Ama' lutna inn ah zuilut unla, 14 tua inntekpa kiang ah: Sinsakpa'n: Ka nungzuite tawh Paikan Ankuang ka um nading uh mikhual inndan koilai ahia? chi-in hon dong, na chi ding uh ahi. 15 Ama'n inndan tungnung lianpi khat, vanzat kim mansa-a om hon ensak ding a, tua ah Paikan Ankuang vabawl un, a chi hi. 16 A nungzuite a kuankhia uh a, khawpi sung a valut uh a, Jesu'n amaute a hilh bangin, thil bangkim a vamu uhi. Tua ah, Paikan Ankuang a vabawl uhi.
Paikan Ankuang Umna
17 Nitaklamin, Jesu, Sawmlenihte tawh tua mun a tung uhi. 18 An a nek lai un, ama'n: Noute thutak kon hilh ahi: Noute laka khat in, kei hon lehbawla hon khawng ding ahi. Amah kei tawh annkuang sawkkhawmpa ahi, a chi hi. 19 Amaute a lungliap mahmah uh a, a banbanin, amah kiang ah: Kei hi buang kei ning maw? a chi tek uhi. 20 Ama'n a dawng a: Nou nungzui sawmlenihte laka khat kei tawh belkuang khata tanghou diahkhawmpa pen ahi. 21 Mihing Tapa zaw ka tungthu kigelhsa bangbanga pai ding ka hi. Ahihhangin, Mihing Tapa lehbawla hon khawngpa tung a gik hi. Amah piang lou hi mai leh, amah adingin a hoih zaw, a chi hi.
Toupa Nitakan
22 Tua banga ann a nek laiun, Jesu'n tanghou a la a, a vualzawl a, a balkham a, amaute a pia a: La unla, ne un. Hiai ka pumpi ahi, a chi hi. 23 Tua khitin, nou a la a, kipahthu a gen a, amaute a pia a, amaute'n tua nou apan a dawn tek uhi. 24 Ama'n amaute kiang ah: Hiai thukhunthakna ka sisan, mi tampi adinga buakkhiak ahi. 25 Noute thutak kon hilh ahi: Pathian' kumpigama ka dawn thak masiah, grepzu ka dawn nawn kei ding, a chi hi. 26 Amaute'n la khat a sak khitun, Oliv Mual zuanin a paita uhi.
Peter' Kilepsan ding Thu
27 Jesu'n amaute kiang ah: Tuzan mahmahin keima hangin, noute khempeuh na kipalpai ding uh a, non kilepsan ding uhi, ahangbel, Belamchingpa sat ding ing a, belamte kithehdalh ding hi, chi-in a na kigelh hi. 28 Ahihhangin, misite lak apan ka thawhkik nung chiangin, noute main Galili gam ah ka na pai masa ding, a chi hi. 29 Peter in amah kiang ah: Mi khempeuh kipalpai mah leh, kei zaw ka kipalpai kei ding, a chi hi. 30 Jesu'n a dawng a: Nang thutak kon hilh ahi: Tu zan mahmahin ak nihvei a khuan main, thumvei non kilepsan ding, a chi hi. 31 Ahihhangin, Peter in khauhtakin: Nang tawh sikhawm ding ka hita zongin, kon kilepsan kei hiai ding, a chi gemgam hi. Amaute khempeuh in zong tua bangin a chi uhi.
Gethsemani
32 Amaute, Gethsemani kichi mun ah a pai uh a, Jesu'n amaute kiang ah: Ka vathum sung hiah na tu un, a chi hi. 33 Ama'n Peter, Jakob leh Johan a tonpih a, nakpitaka lungzingin hong mangbang hi. 34 Amaute kiang ah: Ka lungkham mahmah a, sih theih nading khop hiai ahi. Hiai ah na om unla, pilvanga kiveng in om un, a chi hi. 35 Tua khitin, amah a vapai gamla deuh a, a maia leisi-in a thum a: A hih theih liai leh, hiai hun in hon pel hen. 36 Abba, Pa, nang adingin thil bangkim ahi thei vek ahi. Hiai nou kei apan lamang in. Ahihhangin, kei' deihna bang hilouin, nang' deihna bang hi zaw hen, a chi hi. 37 Tua khitin, amah a nungzuite kiang ah hong pai a, amaute ihmuin a mu hi. Ama'n Peter kiang ah: Simon, ihmu na hi maw? Dakkal khat zong pilvanga kiveng zou lou maw? 38 Khema zolna sunga na lut louh nadingun kiveng unla, thuum un. Kha zaw a ut a, ahihhangin, sa bel a hat kei hi, a chi hi. 39 Amah khatvei a vapaikhe kik a, a ngei mah ngenin a thuum kik hi. 40 Amah hong pai a, amaute ihmuin a mu kik hi. Ahangbel amaute ihmut suak lua a, hak zou mahmah lou ahih manun, ama' kiang ah gen ding a thei kei uhi. 41 A thumveina-a a hong kilehkikin, amaute kiang ah: Noute ihmu lailai a, tawlnga lailai na hi umaw? Kichingta! A hun hong tung ahita. En un, Mihing Tapa, mikhialte khut sunga khotkhiak kahi ta. 42 Thou unla, pai ni! En un, lehbawla kei hon khawngpa hong tungta! a chi hi.
Juda' Lehbawla Khotna
43 Amah tua banga a paupau lai mahin, Sawmlenihte laka khat, Juda in hon naih hi. Amah tawh tonin, mipi tampi, namsaute leh khetbukte tawiin hong pai uhi. Amaute bel siampi makaite, Dan sinsakte leh upate' sawl ahi uhi. 44 Amah lehbawla khawngpa'n, amaute chiamtehna a na pia a: Ka tawp penpen amah hi ding ahi, man unla, hoihtaka vengin paipih un, a na chikhin hi. 45 Juda in, Jesu a vanaih pah a: Sinsakpa, Sinsakpa! chi-in a tawp tantan hi. 46 Tua tawh kiton mahin, tua mipite'n Jesu a len uh a, a manta uhi. 47 A kiang naia ding mi khat in a namsau a phawi a, siampilian' silapa a sat a, a bil a satkhia hi. 48 Suamhat hi leng kilawmin namsaute leh khetbukte tawh kei man dingin nong kuan umaw? 49 Nisimin, tempul huang sunga sinsakin, noute kiang ah ka om a, lah non man kei uh. Ahihhangin, hiai in Laisiangthou thute a tunkimsak ding mah ahi, a chi hi. 50 Tua khitin, nungzuite khempeuh in amah a nusia uh a, a taimang uhi. 51 Puan malngat kia silh tangval kua hiam khat in Jesu a zui hi. 52 Mipite laka tangvalte'n tua mipa, a puansilhin a mankha uh a, amah a puansilh taisanin, vuaktangin a tai hi.
Juda Valhawmpawl mala Jesu
53 Amaute'n siampilian kiang ah Jesu a paipih uhi. Tua ah, siampilian kiang ah, siampi makaite khempeuh, upate leh Dan sinsakte hong paikhawm uhi. 54 Peter in gamla sim ah, siampilian' inn huang sung dong a zui hi. Tua ah, Tempul vengte tawh tukhawmin mei a awi hi. 55 Siampi makaite leh Sanhedrinte'n Jesu a thah theih nadingun, theihpihna zuau a zong uh a, ahihhangin, a mu kei uhi. 56 Mi tampite'n amah zuauthuin a hek uh a, ahihhangin, a theihpihna thute uh a kituak kei hi. 57 Tua nungin, mi pawlkhat a ding uh a, amah hekna zuauthu a gen uh a: 58 Hiai mipa'n: Hiai mihing khuta kilam tempul ka hihgawp ding a, ni thum sungin, mihing khuta lam louh, a dang khat ka lam ding, a chih koute'n ka za uh, a chi uhi. 59 Ahihhangin, a theihpihna thu uh a kituak samsam kei hi. 60 Tua baan ah, amaute lak ah siampilian a dingtou a, Jesu kiang ah: Nang bangmaha dawng lou ding maw? Hiai mite' hon hekna bang thu a hia? a chi hi. 61 Ahihhangin, Jesu a dai dide a, bangmahin a dawng kei hi. Siampilian in a dong kik a: Nang, a Nunnuampa' Tapa Mesia na hi hia? a chi hi. 62 Jesu'n: Hi mah ing. Tunung chiangin, a Vanglianpa' taklama Mihing Tapa tu, vaan meipite laka hong pai non mu ding uh, a chi hi. 63 Tua khitin, siampilian in a puansilhte a botkek a: Banghanga theihpih mi midang kul lai ding i hia? 64 Pathian a gensiatna na zata ve uale. Bangchi na sa ua eita? a chi hi. Amaute khempeuh in: Si taak ahi, chi-in, amah a mawhpaih uhi. 65 Pawlkhatte'n amah a chilphih uh a, a maituam uh a, khuttumin a tum uh a: Kamsang bangin gen ve leh a chi uhi. Tua baan ah, siampilian' silate'n amah a tonpih uh a, a ngeibet uhi.
Peter' Kilepsanna
66 Peter bel, nuailam ah, huangsung inntual ah a om hi. Siampilian' sila nungakte laka khat hong pai a, 67 Peter mei awi a muh takin, limtakin a vaen a: Nang zong Nazareth Jesu tawh omkhawm hi teh, a chi hi. 68 Ahihhangin, Peter in tua a nial a: Na thugen ka thei kei, a ngaihna himhim ka thei kei, a chi a, innlim ah a paikhia hi. Tua laitakin, ak a khuang hi. 69 Tua lai ah, tua sila nungak in, amah a vamu kik a, a kim a kianga dingte kiang ah: Hiai mipa amaute laka khat ahi, a chi panta hi. 70 Peter in tua zong a nial kik hi. A sawtlou nungin, tua muna dingte'n Peter kiang ah: Nang, amaute laka pang hi mah teh, Galili mi na hi tawk vele, a chi uhi. 71 Peter bel hamsia kilawh hiai in a kichiam a: Hiai mi na gen uh ka thei kei, a chi hi. 72 Tua laitakin ak a nihveina a khuang hi. Peter in, ama' kianga Jesu' thugen: Ak nihvei a khuan main, thumvei non kilepsan ding, a chih a phawkkhia a, thuakzoulouin a kap hi.
Pilat maia Jesu
1 Zingkhangpi-in, siampi makaite, upate tawh, Dan sinsakte leh Vaihawmpawl buppi tawh, thukhensatna a neita uhi. Amaute'n Jesu a hen uh a, a paikhiakpih uh a, Pilat khut ah a pia uhi. 2 Pilat in: Amah a dong a: Judate' Kumpipa na hi maw? a chi hi. Jesu'n a dawng a: Na gen bangin hi mah ing, a chi hi. 3 Siampi makaite'n thil tampitakin amah a hek uh a, ahihhangin, ama'n bangmahin a dawng kei hi. 4 Pilat in Jesu a dong a: Nang dawng lou ding maw? Thil tampitaka nang hon hek uh en ve, a chi hi. 5 Jesu a dai dide a, Pilat in lamdang a sa mahmah hi. 6 Ankuang lui ni-a mipite nget penpen, suangkul tang khat khah khiak zel, ngeina ahi. 7 Baraba kichi mi khat suangkul tang a om hi. Amah bel, helna-a pang, tualthatte laka kihel khat ahi. 8 Mipite a kikou uh a, Pilat in amaute adinga, a hih ngeina mah banga, a hihsak dingin, nakpitakin a ngen uhi. 9 Pilat in: Noute kianga Judate' Kumpipa kon khahkhiak ding deih na hi uhia? a chi hi. 10 Ahang bel, hazat mana siampi makaite'n Jesu ama' khuta pia ahi uh, chih a theih man ahi. 11 Ahihhangin, siampi makaite'n mipite a hasuan uh a, Pilat in Baraba a khahkhiak zawk ding a ngensak uhi. 12 Pilat in amaute kiang ah: Ahih leh, Judate' Kumpipa na chih pen uh bang ka lawh dia le? a chi hi. 13 Amaute'n kikouin: Amah khros ah kilhlum in! a chi uhi. 14 Pilat in: Banghangin maw? Ama'n thil gilou bang a hih-a eita? a chi hi. Ahihhangin, amaute ngaihsemin a kikou uh a: Amah khros ah kilhlum in! a chi uhi. 15 Pilat in mipite' lungtuah ding ut ahih manin, amaute kiang ah, Baraba a khahkheta a, Jesu bel a satsak khitin, khrosa kilhlup dingin a pekheta hi.
Jesu Simmawhbawlna
16 Sepaihte'n Jesu a paipih uh a, Pilat' innpi huang sung, Pretoriam kichi ah a kailuut uhi. Sepaih teng a kisamkhawm uh a, 17 Jesu, kumpipuan sandup a silhsak uh a, lingkung hiangin kumpilukhu a phan uh a, a khusak uhi. 18 Amaute'n: Chibai! Judate' Kumpipa, a chi uhi. 19 Sialluang chiangin a lutang a sat zihzeh uh a, a chilphih uh a, khukdinin amah a bia uhi. 20 Tua banga a mawkbawl khitun, kumpipuan sandup a suahkhiaksak uh a, ama' puan a silhsak uhi. Tua khitin, khrosa kilhlup dingin amah a paikhiakpih uhi.
Jesu Kilhdenna
21 Kurini gam mi khat, Simon kichi, tua ah hong pai hi. Amah Aleksandar leh Rufa' pa ahi. Gamsung lam apan hong pai a, tua lai hon tawn ahi. Amaute'n Jesu' khros amah suan teiteiin a pawsak uhi. 22Golgotha kichi mun khat ah Jesu a paipih uhi. 22 Golgotha bel, Luguh Mun chihna ahi. 23 Amaute'n mura tawh kihel zu amah a pia uh a, ahihhangin, ama'n a dawn nuam kei hi. 24 Tua khitin, amah khros ah a kilhdenta uhi. A puansilhte a phelkhap uh a, a tang ding kizongin ai a san uhi. 25 Amah khros tunga a kilhden hun uh, zinglam dak kuana khawng ahi. 26 Pilat in amah a hekna uh theisakna, JUDATE' KUMPIPA chi-in a gelh hi. 27 Amah tawh kitonin, suamhat nih, khat a taklam ah, khat a veilam ah khros ah a kilhden uhi. 28 Tua bangin, amah danbeia gamtate tawh simkhawm ahi, chi-a kigelh Laisiangthou thu a tungkimta hi. 29 A kianga paite'n amah a kousia uh a, a lu uh singin, a otkhai uh a: Ehe! Nang, tempul hihgawp a, ni thum sunga lamkik dingpa, 30 kihukhia inla, khros apan hong kumsuk tanla! a chi uhi. 31 Tua mah bangin, siampi makaite leh Dan sinsakte'n amah enghouin: Midangte bawn hukhia a, amah kihukhe theiloupi! 32 I muh a, amah i up theih nadingin, hiai Mesia, Israelte' Kumpipa, tu'n khros apan hong kumsuk leh ake! a kichi uhi. Amah tawh kitona khrosa kilhdente'n zong amah a enghou uhi.
Jesu' Sihna
33 Dak gukna apan dak kuana dong, gamsung khempeuh ah khimpi hong zing hi. 34 Dak kuana khawngin, Jesu aw ngaihtakin a kikou a: Eloi, Eloi, lama sabakthani? a chi hi. Tua bel, Ka Pathian, ka Pathian, banghanga hon taisan na hia? chihna ahi. 35 A kiang naia ding mi pawlkhatte'n tua a zak takun: Ngaidih ua, ama'n Elija sam ahi, a kichi uhi. 36 Amaute laka khat a vatai a, greptui thuk ah tuihiipthei a diah a, chiang dawna koihin, Jesu' dawn dingin a tahtou hi. Midangte'n: Va huh ken. Amah lakhesuk dingin Elija hong pai hiam en dih ni, a chi uhi. 37 Jesu, ngaihtakin a kikou a, a kha a khahta hi. 38 Judate' mun siangthou sunga deidanna puanzak, a khung apan a taw dong phei nih kisuahin a kek suak hi. 39 Tua lai ah sepaih zaheupa, Jesu' mai ah a ding a, tua a kikou a za a, a sih daan a mu a: Hiai mi, Pathian' Tapa a na hi taktak! a chi hi. 40 Numei pawlkhat in, gamla sim apan a na galet uhi. Amaute lak ah Magdala apan Mari, Jakob naupangzaw leh Jose' nu Mari leh, Salomi a om uhi. 41 Hiai numeite bel, Galili gam sunga Jesu zuia huhte ahi uhi. Jerusalema amah tawh hong tontou, numei dang tampi zong tua lai ah a om uhi.
Jesu Vuina
42 Kisakkholh Ni hong hita a, tua bel, Sabbath ma ni ahi. Nitaklam a hong hita a, 43 tua ah, Arimathai khawmi Josef, Vaihawmpawla mi poimawh khat a om hi. Amah zong Pathian' kumpigam ngak mi khat ahi. Amah hangsantakin Pilat kiang ah hong pai a, Jesu' luang a ngen hi. 44 Pilat in sepaih zaheupa a sam a, amah a si khinta hiam, chih a kan a, sikhinta ahih manin, lamdang a sa hi. 45 Ama'n sepaih zaheupa apan tua thu a zak takin, Josef khut ah Jesu luang a pekhia hi. 46 Josef in puan malngat hoih a lei a, Jesu' luang a lakhia a, a puan malngatin a tuam a, suang kikhuaksa hankhuk sung ah a sialta hi. Tua khitin, suang khat a khuk a, tuain hankhuk kong a khak hi. 47 Magdala apan Mari leh Josef nu Mari in amah kisialna mun a mu uhi.
Jesu' Thawhkikna
1 Sabbath ni a bei takin, Magdala apan Mari, Jakob' nu Mari leh Salomi in, Jesu' luang zut nading gim namtui a lei uhi. 2 Nipikala ni masapen, zingsang ni suah phetin, hankhuk lam ah amaute hong pai uh a: 3 Kua'n hankhuk kongkhak suang hon khukkhiaksak ding ahita ale? a kichi uhi. 4 Ahihhangin, amaute a khawdah uleh, tua suang lianpi khukkhiaksain a mu uhi. 5 Hankhuk sung a lut uleh, tangval khat, puantual ngou silh, taklam panga tu a mu uh a, a patau uhi. 6 Ama'n amaute kiang ah: Patau kei un. A kikilhlum Nazareth Jesu zong na hi uh a, amah thoukik khinta ahi! Hiai ah a om kei. En un, amah a sialna uh. 7 Ahihhangin, pai unla, a nungzuite leh Peter vahilh un. Amah na mai uah, Galili gam sung ah a na paita hi. Noute hon hilhsa bangin, tua ah amah na mu ding uhi, vachi un, a chi hi. 8 Amaute linna leh lamdangsakna in man ahih manin, hankhuk apan a tai pah uh a, kuamah kiang ah bangmah a gen kei uhi.
Jesu' Kilaakna
9 Nipikala ni masapen, zingkhangpi-a Jesu a thawhkik laiin, a sunga dawi sagih a hawlkhiaknanu, Magdala apan Mari kiangah a kilaak masapen hi. 10 Amah a taai vingveng a, Jesu tawh omkhawm ngeita, tua amah suuna kapte a vahilh hi. 11 Amaute'n Jesu a hing ahi, chih leh, ama'n zong a mu, chih a zak takun, a um kei uhi. 12 Tua nunglamin, amaute laka mi nih, gam sunga a pai laiun, Jesu, meltuamin amaute kiang ah a kilaak hi. 13 Amaute kilehkikin, midangte a vahilh uh a, ahihhangin, tua mite'n tuate zong a um kei uhi. 14 Tua nungin, Sawmlekhatte'n an a nek laiun, Jesu, amaute kiang ah a kilaak hi. Amah a thawhkik nunga amah mute' thugen a uplouh manun amaute a taai hi. 15 Ama'n amaute kiang ah: Noute leitung khempeuh ah pai unla, thilsiam khempeuh kiang ah tangthupha gen un. 16 A um a, baptisa om peuhmah hotdam ahi ding a, ahihhangin, a um lou peuhmah mawhtansak ahi ding. 17 Hiai chiamtehna lamdangte'n a umte a zui ding: Keima' minin dawite a hawlkhe ding uh a, pauthaktein a pau ding uh. 18 Khutin gulte a man ding uh. Sihna gu dawn mah le uh, tua in amaute a hihna kei ding. Chinate tung ah khut a nga ding uh a, a dam ding uh, a chi hi.
Jesu' Vankahna
19 Toupa'n amaute kianga thu a gen khitin, Pathian in amah van ah a latou a, Pathian' taklam ah a tuta hi. 20 Tua nungin, nungzuite a kuankhia uh a, gam teng ah thu a gen uhi. Toupa'n amaute a seppih a, amaute zui chiamtehna lamdangte tungtawnin thu a kipsak hi. Amen.
Tup leh Ngim
1 Mi tampite'n eite laka tung thilte tungtang a na gelhta uhi. 2 Amaute bel, tua thilte mita mu teek teekte leh thu nasemte ahi uhi. A bul apan a muh bangbangun hon pesawn uhi. 3 Tua bang ahih manin, a zahtakhuai Theofila aw, keimah mah in tua thilte khempeuh a bul apanin pilvangtakin ka na sui a, nang adinga a kizom zoma gelhkhiak hoih ka sa hi. 4 Tua bel, midangte'n nang hon na sinsak thilte a taktak ahi, chih na theih ding ka deihna ahi.
Baptispa Johan Pian ding Thu
5 Judia gam kumpipa Herod' vaihawm laiin, Zekharia kichi siampi khat a om hi. Amah bel Abija' makaihna nuaia Abija' pawla kihel ahi. A zi Elizabeth zong Aron' suante laka khat ahi. 6 Pathian' mitmuhin amaute gel mi diktat ahi uh a, Toupa' thupiakte leh thusehte zuihna ah genbaanglou ahi uhi. 7 Ahihhangin, Elizabeth a chiing ahih manin, ta a nei kei uh a, amaute' lah a upa tuak mahmahta uhi. 8 Khatvei, Zekharia pawl' nasep huna Pathian' maia siampi nna a sep laiin, 9 siampi nasep daan ngeina banga ama' sep ding aisana a tan bel, Toupa' tempul sunga lut a, gim namtui hal ding ahi. 10 Tua banga gim namtui a hal laitakin, Pathian be dinga kikhawmte, tempul pua ah a thuum uhi. 11 Tua laitakin, Toupa' vansawltak khat, Zekharia kiang ah hong kilaak a, gim namtui halna maitam taklam pang ah hong ding hi. 12 Zekharia in tua vansawltak a muh takin, a lung a phawng a, a lau mahmah hi. 13 Tua vansawltak in amah kiang ah: Na Pathian in na thuumna a za hi, lau ken. Na zi Elizabeth in nang adingin tapa khat a nei ding a, a min dingin Johan na sa ding ahi. 14 Na lung a nuam ding a, na kipak ding. Amah a pian chiangin, mi tampi a lungnuam ding hi. 15 Ahang bel, Toupa' mitmuhin amah mi thupi hi ding ahi-a ahi. Ama'n zu leh zukhauh a dawn ngei kei ding a, a nu' sul apan nangawnin Pathian in Kha Siangthouin a luahdim ding. 16 Ama'n Israel mi tampi, Toupa a Pathian uh lam ah a kiheisak ding. 17 Pate' lungtangte a tate uh lama kiheisak ding, thumangloute mi diktatte' pilna lama kiheisak ding leh, Toupa adinga minam khat bawlkhol a, mansa-a koih dingin amah Toupa' mai ah, Elija lungsim leh vangletna neiin a pai masa ding hi, a chi hi. 18 Zekharia in tua vansawltak kiang ah: Hibang taka hong tung ding ahi, chih ke'n bangchi theih ding ka hia, kei lah putekpi hita ing a, ka zi lah upapi hita a? a chi hi. 19 Tua vansawltak in amah a dawng a: Kei, Pathian' maia ding Gabriel ka hi. Pathian in nang kianga thu gen a, hiai thupha hon hilh dinga hon sawl ka hi. 20 Tuin, ka thugen na taksan louh manin, ka thugen a tangtun mateng, na pau thei kei ding a, na dai dide ding. Pathian in a hun geihin ka thugente a tangtungsak ding, a chi hi. 21 Tua hun sung teng, mi kikhawmte'n Zekharia a ngak uh a, tempul sunga tua tanpi a om lamdang a sa uhi. 22 Amah hong pusuah takin, amaute a houpih thei kei hi. Pau theiloua khutvana amaute kianga thu a gen manin, tempul sunga mengmuh khat mu hi tah, chih a thei uhi. 23 Ama'n a nasep a zawhkhitin, inn ah a pai hi. 24 Hiai nungin, a zi Elizabeth a gai a, kha nga sung a kisungkhum hi. 25 Elizabeth in: Mite laka ka zahlakna Toupa'n a lamang a, deihsakna hon pia a, hiai thil kei adinga hon hihsak ahi ve, a chi hi.
Jesu Pian ding Thu
26 A kha gukna ah, Pathian in Galili gama Nazareth khua ah vansawltak Gabriel a sawl hi. 27 Amah, Mari kichi nungak siangthou khat kianga hawh dinga a sawl ahi. Mari bel, David' suan Josef kichi pasal khat in zi dinga a kham ahi. 28 Tua vansawltak, Mari kiang ah hong hawh a: Chibai! Pathian' deihsakna tang na hi. Toupa'n nang hon ompih hi, a chi hi. 29 Mari in amah a muh takin, a thugen in a phawng mahmah a: Hiai bangchi bang chibai bukna ahi mahmah de aw? a chi hi. 30 Ahihhangin, tua vansawltak in amah kiang ah: Mari, lau ken. Pathian' deihsakna tang na hi. 31 Na gai ding a, tapa khat na nei ding a, a min dingin Jesu na sak ding ahi. 32 Amah mi thupi hong hi ding a, Tungnungpen' Tapa, chih ahi ding. Toupa Pathian in amah kiang ah a Pa David' kumpitutphah a pe ding. 33 Tua bangin, ama'n Jakob' innkawte tung ah vai a hawm tawntung ding a, a kumpi vaihawmna a bei ngei kei ding, a chi hi. 34 Mari in tua vansawltak kiang ah: Pasal tawh lumkhawm ngeilou ka hih chiangin, hiai thu bangchi-a tangtung thei ding ahia? a chi hi. 35 Tua vansawltak in a dawng a: Kha Siangthou na tung ah hong tung ding a, Tungnungpen' vangletna in nang hon khuh ding hi. Hiai bang hi ding ahih manin, na neih ding a Siangthouna zong, Pathian' Tapa, chih ahi ding. 36 Ngai in, na sanggamnu nai Elizabeth in zong teknungpi-in tapa khat a paai hi. Mite'n a chiing, a chih uh hi a, tuin a naupaai nung kha guk a hita. 37 Pathian adinga hih theihlouh omloupi, a chi hi. 38 Mari in a dawng a: Kei, Toupa' silanu ka hi. Na gen bangbang ka tung ah tungta hen, a chi a, tua khitin, tua vansawltak in amah a nuseta hi.
Mari leh Elizabeth Kivehna
39 Tua laiin, Mari a kuankhia a, Judia tang gama khua khat a zuan pah vingveng hi. 40 Zekharia' inn sung a valut a, Elizabeth chibai a vabuk hi. 41 Elizabeth in Mari' chibai bukna a zak takin, a sula naungek a tawm hi. Tuachi-in, Elizabeth Kha Siangthoua luahdimsakin a om a, 42 aw ngaihtakin: Numei laklak ah numei nunnuam hi namai chia! Na sul apan nau piang ding nunnuam hi namai zen e! 43 Hita lezong, banghanga nang hiai pahtawina kei hon pia na hia? 44 Non chibai bukna ka zak takin, ka sula naungek lungnuamin a tawm! 45 Toupa'n na kianga a gen bangbang tangtungsak ding ahi, chi-a um nang minu a nunnuam na hi, a chi hi.
Mari La
46 Mari in: Ka hinna in Toupa pahtawi hi. 47 Ka kha zong ka Pathian, ka Hondampa ah nuam hi. 48 Ama'n a silanu' dinmun niam awlmawh a, ngai in, tu apanin, khangsawn sawnte'n mi nunnuam, hon chita ding hi. 49 Amah a Vanglianpa'n kei adinga thil thupite hon hihsakta, a min siangthou hi. 50 Khang khat apan khangsawn sawn dongin, a zahngaihna in amah laute baan hi. 51 Ama'n a bantha in uk a, lungtang kisatheite bel thehzak hi. 52 Ukpipate a kumpitutphah uapan kaikhia a, kingainiamte bel tawisang hi. 53 A gilkialte thilhoihin taisak a, ahaute bel, gilkiala paimangsak hiven. 54 A zahngaihna thei gigein, a sila Israel huhta hi. 55 I pu i pate, Abraham leh a chisuante kianga a Tangtawn thuchiam bangbang hi ahi, a chi hi. 56 Mari bel, Elizabeth kianga kha thum a taam nungin, inn ah a kilehkikta hi.
Baptispa Johan Pianna
57 Elizabeth' nau suah hong hunta a, tapa a nei hi. 58 A innvengte leh tanau naite'n ama' tunga Toupa'n zahngaihna lian a latsak thu a za uh a, ama' lungnopna a lungnoppih uhi. 59 A ni giat ni-in, naungek zeksum dingin amaute hong pai uhi. Amaute'n a pa' min tamin, naungek' min dingin Zekharia sak a sawm uhi. 60 Ahihhangin, a nu hong pau a: Hi lou ding! A min Johan hi ding ahi, a chi hi. 61 Amaute'n Elizabeth kiang ah: Na sanggam naite tua bang min nei omloupi a! a chi uhi. 62 Tua khitin, amaute'n: Naungek' min ding bang kisa ding ahia? chi-in khutvanin a pa a dong uhi. 63 Ama'n suanglai khat a ngen a, a tung ah: A min Johan ahi, chi-in a gelh hi. Amaute khempeuh in a min lamdang a sa uhi. 64 Tua khitin, Zekharia kam hong kihong a, a lei hong kiphel pah a, Pathian phatin hong pauta hi. 65 Innvengte khempeuh lah lamdangsakna, zahtakna leh launa tawh a kidim uh a; tua Judia tang gam buppi ah, tua thilte a kigen gen hi. 66 A zapha peuh in lamdang a sa uh a: Hiai naungek bang hong chi tazen de aw? a chi uhi. Ahang bel, Toupa' khut in amah ompih hiven.
Zekharia' La pa Zekharia bel
67 A pa Zekharia bel Kha Siangthoua luahdimsakin hong om a, kamsang bangin thu a gen a: 68 Toupa, Israel' Pathian phatin om hen, ama'n a mite veha tankheta hi. 69 Ama'n a sila David' innkuan sunga, eite adinga hotdamna kii tungkheta hi. 70 Leitung pian apan a kamsang siangthoute' kam tungtawna a gensa bangbang hi ahi. 71 I melmate' khut apan leh ei hon mudahte' khut apan hutkhiak i hih nading ahi. 72 I pu i pate kianga zahngaihna a chiamsa tangtunsak nading hi a, a thukhun siangthou a theih gige nading hi ahi. 73 Tua thukhun, i Pa Abraham kianga kichiama a piak ahi. 74 I melmate khut sung apan hutkhiaka i om a, lau lou a, amah biakna nna hon semsak ding a, 75 i nuntak sung teng, siangthouna leh diktatna tawh ama' maia amah biakna nna hon semsak ding, a chih. 76 Bawi aw, nang Tungnungpen' kamsang, chih hi ding chin a, Toupa' lampite sial dinga ama' maia pai masa ding na hi. 77 A khelhnate uh ngaihdamna pansana hotdamna, a mite theisak ding na hi. 78 Tua hotdamna bel, i Pathian in a zahngaihna nou ngiingei pansana amaute pe ding hi. Tua bel, vantunga Zing Ninou kichi in hong vehna tungtawnin hi ding hi. 79 Tua Zing Ninou in mial nuaia tute leh sihna liima tute tanvaak ding a, lungmuanna lampi ah i khete pii ding hi, a chi hi. 80 Tua bangin naupang hong khanglian a, khalam ah hong hat hi. Tangpi muha Israel kianga hong kilat mateng, amah gamdai-gamkeu ah a teeng hi.
Jesu Pianna
1 Tua hun laiin, Kumpipa Kaisar Augasta in leitung mi khempeuh minkhum ding thu a pia hi. 2 Hiai kisimpina masapen bel, ukpipa Khuirinia in Suria gam a uk laitaka om ahi. 3 Michih ama' khawpi tek ah, minkhum dingin a kuan hi. 4 Tua bang ahih manin, Josef zong, Galili gama Nazareth khua apanin Judia gama David khawpi Bethlehem ah a kuan hi. Tua bel, amah zong David' inkawte leh a suante laka khat ahih man ahi. 5 A zikham Mari gai san lai tawh, min khum dingin tua khawpi ah a kuan uhi. 6 Tua muna a taam sungun, nau suah hun hong tung a, 7 Mari in a ta masa penin tapa a nei hi. Ama'n puanduangin naungek a tuam a, khualbuka a taak louh manun, gan anpiakna kuang sung ah a sial hi.
Vantungmite' Lapi
8 Tua khawpi kiang nai, gamlak ah, belamchingte a om uh a, zan laiin a belamte uh a ching uhi. 9 Tua laiin, ngai dih, Toupa' vansawltak khat amaute kiang ah hong kilaak guih a, Toupa' thupina in a kiim a kiang uh a taanvak suak a, amaute bel a lau mahmah uhi. 10 Ahihhangin, tua vansawltak in amaute kiang ah: Lau kei un, mi khempeuh ading lungnopna lianpi thu, tangthupha hon puak ka hi: 11 Tuni-in, David' khua ah noute ading Hondampa hong piang a, amah Toupa ahipa Khrist ahi. 12 Noute adinga chiamtehna hiai ahi ding: Puanduanga kituam, gan anpiakna kuang sunga lum naungek na vamu ding uhi, a chi hi. 13 Thakhatin, van mipite tampitak, tua vansawltak kiang ah hong om uh a, Pathian a phat uh a: 14 Tungnungpen ah Pathian thupi henla, ama' angvan leitung mihingte lak ah, lemna leng hen! a chi uhi.
Belamchingte' Vehna
15 Tua vansawltakte'n belamchingte a nusia uh a, vantung ah a paitou uhi. Belamchingte a kihou uh a: Bethlehem dong pai ni. Hiai thil hong tung, Toupa'n eite hon hilh vaen ni, a kichi uhi. 16 Tua bangin, amaute a pai mengmeng uh a, Mari leh Josef leh gan anpiakna kuang sunga lum naungek a vamu uhi. 17 Amaute'n naungek a muh nungun, a thu a genthang uh a, tua naungek tawh kisaia vansawltak in amaute a hilh thu a gengen uhi. 18 A zate peuhmah in belamchingte' gen, tua thil hong tung, lamdang a sa uhi. 19 Mari in bel, tua thute khempeuh a lungsung ah a kholkhawm a, a suutsuut hi. 20 Tua khitin, belamchingte a chiahkik uh a, vansawltak in amaute a hilh bangbanga thil tung a zakte uleh a muhte uh hangin Pathian pahtawi leh phatin a om uhi.
Jesu Zeksumna
21 Naungek' zeksum ding hun, a ni giat ni hong tun takin, ama' min dingin Jesu a sa uhi. Tua bel, Mari in a paai ma-a, vansawltak in a min dinga a saksa ahi. 22 Mosi' Dan banga Mari kisiansuah nading nite a chin nungin, Toupa' maia pulak dingin, Josef leh Mari in Jerusalem ah amah hon paipih uhi. 23 Toupa' Dan sung ah: Tapa piang masapen peuhmah, Toupa adinga sehtuam, kichi ding ahi, chi-in a kigelh hi. 24 Tua bang ahih manin, Toupa' Dan sunga: Vakhu nupa tuak khat, ahih kei leh, kawlvakhu nih, chi-a kigelh banga thillat lan dingin hong pai uhi.
Simeon' Genkholhna
25 Ngai in, Jerusalem ah, Simeon kichi mi khat a om a, amah mi diktat leh kipezoutak ahi. Israelte Khamuanpa ding a na ngak gige a, Kha Siangthou in a ompih hi. 26 Toupa' Khrist a muh mateng si lou ding ahi, chi-in Kha Siangthou in amah kiang ah a na langsakkhinta hi. 27 Kha Siangthou' theihsakin, tempul huangsung ah a lut a, tua laitak mahin, Dan ngeina in a ngiat, Pathian' maia naungek adinga hihkim dingin, a nu-le-pa'n, tempul sung ah naungek Jesu hon lutpih uhi. 28 Simeon in a mah a na angpom a, Pathian a phat a: 29 Ka Toupa aw, na thu bangin, tuin na sila khamuangtakin hon paisak in. 30 Ka mitte'n na hotdamna a muhtak manin hiai ngen hi'ng. 31 Nang namte khempeuh mitmuha tua hotdamna bawlta chin a, 32 amah Zentelte kianga kilaakna vaak hi ding a, na mi Israelte' thupina hi ding hi, a chi hi. 33 Tua hunin, Josef leh Jesu' nu'n naungek' tungthu kigen lamdang a sa uhi. 34 Tua khitin, Simeon in amaute a vualzawl a, a nu Mari kiang ah: Ngai in, Pathian in Israelte laka mi tampi puk nading leh dinkhiak nadingin hiai naungek a sep hi. Amah, gensiata om ding chiamtehna ahi ding a, 35 ahi, hibangin, mi tampite' lungsung ngaihsutte a kilang ding a, namsau in nangma' hinna zong a dawt pailet ding, a chi hi.
Ana' Theihpihna
36 Ana kichi kamsang numei khat a om a, amah Asher nam, Fanuel' tanu ahi. Amah a tek mahmahta a, a pasal neih nungin a pasal tawh kum sagih kia a damkhawm hi. 37 Meigonga a om nung kum 84 a phata hi. Ama'n, tempul nuse ngeilouin, an ngawla thumin, sun leh zan Pathian' nna a sem hi. 38 Tua laitak mahin, amah hong pai a, Toupa tung ah kipahthu a gen hi. Tua nungin, Jerusalem tatna lamena ngakte khempeuh kiang ah, tua naungek tawh kisai thu a gen hi. 39 Toupa' Dan in a ngiat teng khempeuh Josef leh Mari in a hihkhit vek nungun, Galili gam ah amau khua Nazareth ah a kilehkikta uhi. 40 Tua ah, naungek hong khang a, khalam ah hong hat a, pilna tawh a kidim a, Pathian' hehpihna ama' tung ah a om hi.
Tempula Naupang Jesu
41 Kumsimin, Jesu' nu-le-pate Jerusalem ah, Paikan ankuang um dingin a hawh zel uhi. 42 Amah kum sawmlenih a phakin, Ankuanglui ngeina um dingin Jerusalem ah a hawhtou uhi. 43 Ankuanglui a kizawh takin, a nu-le-pate inn lam zuan dingin a kipankhia uhi. Naupang Jesu bel Jerusalem ah a taam lai a, ahihhangin, Josef leh a nu'n a thei kei uhi. 44 Amaute' laka om hi nanteh, chi-in ni khat lam a paita uhi. Tua khitin, amaute' tanau naite leh a zinpihte uh lak ah amah a zong uhi. 45 Amah a muh louh takun, amah zong dingin Jerusalem ah a kilehkik uhi. 46 Ni thum nungin, tempul huang sung ah amah a vamu uh a, sinsakmite lak ah, amaute' thu ngai leh thu dongin a na tu hi. 47 Ama' thugen za peuhmahte'n a pilna leh a dawnnate lamdang a sa uhi. 48 A nu leh a pa'n amah a muh takun lamdang a sa uh a, a nu'n amah kiang ah: Bawi, banghanga koute hibanga hon bawl na hia oi? Ngai dih, na pa leh ke'n lungzingpi-a hon zong nilouh kei ve ua le, a chi hi. 49 Ahihhangin, ama'n amaute kiang ah: Banghanga kei hon zong na hi ua? Ka Pa' nasep sema ka om kul ahih lam theilou na hi umaw? a chi hi. 50 Ahihhangin, amaute'n a thugen a thei baan kei uhi. 51 Tua nungin, amaute tawh a paisuk a, Nazareth khua a tung uhi. Ama'n a nu-le-pa' thu a mang a, ahihhangin, a nu'n bel hiai thilte khempeuh a lungsung ah a koihching hi. 52 Jesu bel pilna ah a khang a, pumpi lam ah zong a khang a, Pathian leh mihingte' deihsakna a tang hi.
Baptispa Johan' Nasep
1 Tiberia Kaisar' vaihawm sung kum sawmlenga hong chingta hi. Tua hun laiin, Judia gam ukpipa Pontia Pilat ahi a, Galili gam hausalian Herod ahi a, a sanggampa Filip bel Ituria leh Trakoniti gam hausalian ahi a, Abilen gam hausalian Lusania ahi. 2 Tua hun lai mahin, Ana leh Kaiafa, siampilian a hikhawm uhi. Hibang hun laitakin, gamdai-gamkeu ah Zekharia' tapa Johan kiang ah Pathian' thu hong tung hi. 3 Amah Jordan lui kiim gam teng ah a pai a, khelhnate ngaihdam nadingin kisika lungheina baptisna thu a gen hi. 4 Kamsang Isai laibu-a kigelh bangbang ahi. Tua ah: Gamdai-gamkeua kikoupa' aw in: Toupa ading lampi sial unla, ama' adingin lampi tangte bawl un. 5 Luikuam teng vuhdim hi ding a, mual leh tang teng kaihniam hi ding hi. Lamkawite hihtang hi ding a, lampi phokte mamsak hi ding hi. 6 Mi khempeuh in Pathian' hotdamna mu ding uhi, chi hi, chi-in a kigelh hi.
Johan Thugen
7 Ama' khuta baptisna tang dingin mipi tampi'n hong zuan uhi. Johan in bel amaute kiang ah: Nou, gul suante! Hong tung ding thangpaihna taisan dingin kua'n hon vauhilh ahia? 8 Lungheina tawh kikhom gah suah ve ua. Koute' Pa Abraham ahi, chi-in kingaihsun kei un. Ko'n hilh ahi: Pathian in hiai suangte nangawn, Abraham' suante a dingsak thei ahi. 9 Pathian in singbul teng ah heipi a taakta. Gah hoih suah lou singkung peuhmah a phuk ding a, meikhuk ah a khul ding, a chi hi. 10 Mipite'n: Tua bang ahih leh, koute'n bang ka hih uh kul ahia? a chi uhi. 11 Johan in amaute a dawng a: Puanaktung nih nei peuhmah in a neilou mi hawm henla, an nei peuhmah in zong tua bangin hih hen, a chi hi. 12 Siahdongte zong baptisna tang dingin hong pai uh a: Sinsakpa, koute'n bang ka hih ding ua le? hong chi uhi. 13 Johan in amaute kiang ah: Siah don ding bikhiah zah vai ngiat kei un, a chi hi. 14 Tua baan ah, sepaih pawl khat in amah kiang ah: Koute'n lah bang ka hih ding ua? a chi uhi. Ama'n amaute a dawng a: Vauna tawh kuamah dangka sut kei unla, a dikloupi-in kuamah ngawh kei unla, na khasum utawh lungkim un, a chi hi. 15 Tua mipite'n Mesia na lamen ahi uh a, hiai Johan, Mesia hi kha ding hiam, hilou ding, chih lungsung ah a ngaihsun uhi. 16 Johan in amaute khempeuh a dawng a: Ke'n noute tuiin kon baptis ngeitak a, ahihhangin, kei sanga a vanglian zaw hong pai ding ahi. Kei zaw ama' khedap khaute phei ding nangawna chin lou ka hi. Ama'n zaw Kha Siangthou leh meia hon baptis ding ahi. 17 Ama'n a khut ah phazah a tawi a, a phual a hahsiang ding a, tua khit chiangin phazahin buh a zapsiang ding a, buhtakte a buhpang ah a koih ding. Buhsite bel mei mittheilou sung ah a khul ding, a chi hi. 18 Tua baan ah, Johan in thudang tampi-in mipite a hanthawn a, amaute kiang ah tangthupha a gen hi. 19 Hausalian Herod in a sanggampa Filip' zi Herodia a kitenpih manin leh thil gilou tampi zong a hih manin, Johan in amah a taihilh hi. 20 Hibang teng baan ah, Herod in suangkul sung ah Johan a khum zawmah lai hi.
Jesu' Baptisna Tanna
21 Tua main, Johan in mipite khempeuh a baptista a, Jesu zong a na baptis hi. Jesu a thuum laitakin vaan hong kihong a, 22 Kha Siangthou, vakhu banga pumpi neiin hong kumsuk a, ama' tung ah hong tuang hi. Tua khitin, vaan apan aw hong ging a, tua in: Nang, ka it mahmah ka Tapa na hi. Na tung ah ka lungkim mahmah hi, a chi hi.
Jesu' Khangthu
23 Jesu'n a nasep a pat chil laiin, amah kum 30 khawnga upa ahi. Mite' ngaihin amah Josef tapa ahi. Josef bel Heli' tapa ahi. 24 Heli, Mathat' tapa ahi. Mathat, Levi' tapa ahi. Levi, Melkhi' tapa ahi. Melkhi, Janai' tapa ahi. Janai, Josef tapa ahi. 25 Josef, Matathia' tapa ahi. Matathia, Amos' tapa ahi. Amos, Nahum' tapa ahi. Nahum, Esli' tapa ahi. Esli, Nagai' tapa ahi. 26 Nagai, Maath' tapa ahi. Maath, Matathia' tapa ahi. Matathia, Semein' tapa ahi. Semein, Josekh' tapa ahi. Josekh, Joda' tapa ahi. 27 Joda, Joanan' tapa ahi. Joanan, Rhesa' tapa ahi. Rhesa, Zerubabel' tapa ahi. Zerubabel, Shealtiel' tapa ahi. Shealtiel, Neri' tapa ahi. 28 Neri, Melkhi' tapa ahi. Melkhi, Adi' tapa ahi. Adi, Kosam' tapa ahi. Kosam, Elmadam' tapa ahi. Elmadam, 29 Er' tapa ahi. 'Er, Jose' tapa ahi. Jose, Eliezer' tapa ahi. Eliezer, Jorim' tapa ahi. Jorim, Mathat' tapa ahi. Mathat, Levi' tapa ahi. 30 Levi, Simeon' tapa ahi. Simeon, Judah' tapa ahi. Judah, Josef tapa ahi. Josef, Jonam' tapa ahi. Jonam, Eliakim' tapa ahi. 31 Eliakim, Melea' tapa ahi. Melea, Mena' tapa ahi. Mena, Matatha' tapa ahi. Matatha, Nathan' tapa ahi. Nathan, David' tapa ahi. 32 David, Jese' tapa ahi. Jese, Obed' tapa ahi. Obed, Boaz' tapa ahi. Boaz, Salmon' tapa ahi. Salmon, Nashon' tapa ahi. 33 Nashon, Aminadab' tapa ahi. Aminadab, Aram' tapa ahi. Aram, Hezron' tapa ahi. Hezron, Perez' tapa ahi. Perez, Judah' tapa ahi. 34 Judah, Jakob' tapa ahi. Jakob, Isak' tapa ahi. Isak, Abraham' tapa ahi. Abraham, Tera' tapa ahi. Tera, Nahor' tapa ahi. 35 Nahor, Serug' tapa ahi. Serug, Reu' tapa ahi. Reu, Peleg' tapa ahi. Peleg, Eber' tapa ahi. Eber, Shela' tapa ahi. Shela, Kainan' tapa ahi. 36 Kainan, Arfaksad' tapa ahi. Arfaksad Shem' tapa ahi. Shem, Noa' tapa ahi. Noa, Lamekh' tapa ahi. Lamekh, Methusela' tapa ahi. 37 Methusela, Enokh' tapa ahi. Enokh, Jared' tapa ahi. Jared, Mahalalel' tapa ahi. Mahalalel, Kainan' tapa ahi. 38 Kainan, Enos' tapa ahi. Enos, Seth' tapa ahi. Seth, Adam' tapa ahi. Adam bel Pathian' tapa ahi.
Jesu a Kizolna
1 Jesu, Kha Siangthoua dimin, Jordan lui apan a kilehkik a, Kha in gamdai-gamkeu ah a paipih a, 2 tua mun ah, khial dinga dawimangpa' zolin, ni 40 sung a om hi. Tua hun sung peuhmah, ama'n bangmah a ne kei a, a tawpin a gilkialta hi. 3 Dawimangpa'n amah kiang ah: Pathian' Tapa hi vechin, hiai suang tanghou suak dingin thu pia in, a chi hi. 4 Jesu'n a dawng a: Tanghou kiain mihing nungta lou hi, Pathian kama thu pawt teng apan nungta zaw ding hi, chi-a kigelh ahi, a chi hi. 5 Tua nungin, dawimangpa'n mual sang tung ah, amah a paipihtou a, leitung kumpigam khempeuh khatvei thuin a laksuak hi. 6 Dawimangpa'n amah kiang ah: Hiai teng khempeuh tunga thuneihna leh amaute' thupina ka ngahsa ahi a, ka piak nop mi khat peuh kianga pe thei ka hi. Nang hon pe ding ka hi. 7 Tuin hon be leteh, hiaite khempeuh nanga hi vek ding ahi, a chi hi. 8 Jesu'n a dawng a: Setan, ka nung ah pai in! Ahang bel, Toupa na Pathian kia na biak ding, ama' na kia nasep ding ahi, chi-a kigelh ahi, a chi hi. 9 Tua nungin, dawimangpa'n, amah Jerusalem khua ah a paipih a, tempul tung vum ah a dingsak a, amah kiang ah: Nang, Pathian' Tapa hi vechin, kilawnkhesuk in. 10 Ama'n na tungthu-a a vansawltakte thu pe ding a, 11 suang na suihkhak louh nadinga amaute'n khuta hon na dom ding uhi. chi-a kigelh hiven, a chi hi. 12 Ahihhangin, Jesu'n a dawng a: Toupa, na Pathian ze-etin na enkhe ding ahi kei, chi-a kigelh ahi, a chi hi. 13 Dawimangpa'n hibanga a zol khitin, hun lem dang adingin amah a nusia hi.
Galili Gama Jesu
14 Jesu bel Kha' vangletna neiin, Galili gam ah a kilehkik a, ama' tungthu tua kiim gam teng ah a thangsuak hi. 15 Ama'n amaute, sunagog khawng ah a sinsak a, mi kuapeuh in amah a phat hi.
Nazareth Khua-a Jesu
16 Amah a khanletna khua Nazareth ah a hawh a, a hih dan ngeina bangin, Sabbath ni-in, sunagog ah a lut a, lai sim dingin a dingtou hi. 17 Amaute'n kamsangpa Isai' laibu zial a pia uhi. Ama'n tua laibu a phen a, Isai in hibanga a gelhna mun a mu a, a sim hi: 18 Liangvaite kianga tangthupha gen dinga thau hon nilh mana, Toupa' Kha ka tunga om hi. Ama'n lungtang tamkhamte damsak ding, saltangte kianga suahtakna thu gen ding, mittawte kianga mitvakna pe ding, nuaisiahte khahkhe ding leh, 19 Tangtawn Toupa' deihsakna kum thu phuang dinga kei hon sawl ahi, chi-in a sim hi. 20 Ama'n tua laibu a khup a, sawltawl mi kiang ah a pekik a, a tusuk hi. Tua sunagog sunga omte khempeuh in amah a en hiikheek uhi. 21 Ama'n amaute kiang ah: Tuni-in noute zak mahmahin, hiai Laisiangthou thu a tangtung hi, a chi hi. 22 Mi khempeuh in ama' tungthu genin, amah a phat uh a, a kam apan hehpihna thusuakte lamdang a sa uhi. Ahihhangin: Hiai Josef tapa hilou maw? a kichi uhi. 23 Jesu'n amaute kiang ah: Noute'n: Daktor aw, nang leh nang kihihdam in! kichi paunak non genkhum taktak ding uh a, Kapernauma na hih ka zakte uh, hiai nangma' tenna khua ah hih tanla, non chi ding uh. 24 Noute thutak kon hilh ahi: Kamsang kuamah, ama' tenna khua ah kuama'n saang lou ahi. 25 Thutak kon hilh ahi: Elija hun laia, kum thum leh kha guk sung vaan a kikhak a, gamsung tenga nakpitaka kial a kiak laiin, Israel gam sung ah, meigong tampi om napi 26 Sidon gama Sarepta khua-a meigongnu kiang loungal ah amaute kuamah kiang ah Pathian in Elija a sawl kei. 27 Kamsang Elisha hun laiin, Israel gam sung ah phaak tampi om napi, Pathian in Suria mi Naaman kia loungal, amaute kuamah a siangsak kei hi, a chi hi. 28 Hiai thu a zak takun, tua sunagog sunga omte khempeuh a heh mahmah uhi. 29 Amaute a ding suausuau uh a, khawpi apan amah a hawlkhia uh a, tua khua omna mual ah, kawlkhoua sawnkhiak dingin a paipih uhi. 30 Ahihhangin, amah mipite kawmkal ah a kigel a, a paimangta hi.
Dawi Hawlkhiakna
31 Tua nungin, amah Galili gama khua khat Kapernaum ah a paisuk a, Sabbath ni-in mite a sinsak hi. 32 Ama'n thuneitaka thu a gen manin, amaute'n a thu sinsak lamdang a sa uhi. 33 Tua sunagog sung ah, dawi tua kha nin' mat mi khat a om hi. Amah a aw neih tengin a kikou vomvom a: 34 Ehe! Nazareth Jesu, nang leh koute'n bang kisaina nei i hia? Koute hon hihmangthang dinga hong pai na hita hia? Nang kua na hi hiam, chih kon thei. Pathian apan Misiangthoupa na hi, a chi hi. 35 Jesu'n khauhtakin amah a sal a: Kamsim inla, ama' sung apan hong pawtkhia in, a chi hi. Tua dawi in tua mipa, mi teng mai ah leilak dennain a nei a, ahihhangin, amah liamsak louin hong pawtkhia hi. 36 Mite khempeuh in lamdang a sa uh a: Hiai bangchi bang sinsakna hita mai ahia? Dawite nangawn thuneitak leh vangletna neitaka thu a piak a, hong pawtkhiak mawk uh! a kichi uhi. 37 Tua bangin, ama' tungthu a kiim gam teng ah a thangsuak hi.
Peter' Sungnu Damsakna
38 Jesu'n tua sunagog a nusia a, Simon' inn ah a lut hi. Tua ah, Simon' sungnu nakpitaka nattunin a na china a, amaute'n amah huh dingin Jesu a ngen uhi. 39 Jesu, ama' lupna kiang ah a ding a, nattun a taai a, nattun in amah a nuseta hi. Amah hong thoukhe pah a, amaute' nektak a bawlsak hi.
Galili Gama Jesu' Nasep
40 Ni a turn kuanin, natna tuamtuam veia china a nei peuhmah in amah kiang ah hon paipih uh a, ama'n amaute tunga khut ngain, a vekun a nadamsak hi. 41 Tua baan ah, dawite'n zong: Nang, Pathian' Tapa Mesia na hi, chi-a kikouin, mi tampite sung apan a pawtkhia uhi. Ahihhangin, Jesu'n amaute a taai a, amah Mesia ahi, chih a theih uh gen ding a phal kei hi. 42 Zing phalvakin, Jesu a paikhia a, gam daihna mun ah a hawh hi. Mipite'n amah a zong uh a, ama' kiang hong tun takun, amaute nuse lou dingin a khou teitei uhi. 43 Ahihhangin, ama'n: Khaw dangte ah zong Pathian' kumpigam tangthupha ka gen louh theihlouh ahi. Hiai ding maha Pathian' sawl ka hi, a chi a, 44 Galili gam sunga sunagogte ah thu a gengen hi.
Nungzui Masate Sapna
1 Nikhat bel, Genesaret Dil geia Jesu a din laiin, mipite'n Pathian thu ngai ding, chi-in amah a nehchip gawp uhi. 2 Ama'n, ngaman mite'n a lente uh a sawp sung ua dilgeia a nutsiat uh long nih a mu hi. 3 Tua long khat, Simona pen sung ah Jesu a tuangtou a, dil gei apan tuitung gamla deuha long tolhlut dingin Simon a ngen hi. Jesu a tusuk a, long apan mipite a sinsak hi. 4 Ama'n thu a gen khitin, Simon kiang ah: Tui thukna lam ah na long paisak inla, nga man dingin lente khesuk in, a chi hi. 5 Simon in a dawng a: Toupa aw, zan khawvakin nakpitakin ka pangta uh a, bangmah ka man nai kei uh. Ahihhangin, nangma' thuin len ka khesuk ding, a chi hi. 6 Amaute'n tua banga len a khiak uleh, ngasa tampi mahmah a man uh a, a len uh a keek iak iak hi. 7 Amaute huh dingin long danga om, a ngabetpihte uh a khutvan uhi. A lawmte uh hong pai uh a, long nihte dimin ngasa a koih uh a, longte tum dingin a kisa hi. 8 Simon Peter in hibang thil a muh takin, Jesu' khuk si-in a boksuk a: Toupa, mikhial ka hi, hon paisan in, a chi hi. 9 Ahang bel, amah leh a kianga omte khempeuh in a ngamat uh lamdang a sa lua ua ahi. 10 Simon' ngabetpih dangte, Zebedai' tapate Jakob leh Johan in zong lamdang a sa uhi. Jesu'n Simon kiang ah: Lau ken. Tuban siah, mihing na manta ding, a chi hi. 11 Tua khitin, a longte uh dil gei ah a kaikhia uh a, bangkim nusiain amah a zuita uhi.
Phaak Khat Damsakna
12 Jesu, khawpi khata a om laiin, phaakna in a pumtuam pasal khat hong pai a, Jesu a muh takin, lei si-in a bok a: Toupa, na ut peuh leh, hon siangsak thei na hi, chi-in a ngen hi. 13 Jesu'n khutin a sawk a, amah a lawng a: Ka ut hi, siangta in, a chi a, phaakna in amah a nuse pahta hi. 14 Jesu'n amah thu a pia a: Kuamah hilh ken! Siangta na hih manin, pai inla, siampi kiang ah vakilak inla, amaute kianga theihpihna hi dingin Mosi' thupiak bangin thillat va laan in, a chi hi. 15 Hinapi-in, ama' tungthu a thang semsem a, a thu ngai ding leh a chinatnate uh a damsak nadingin, mi tampi in amah hon zuan uhi. 16 Ahihhangin, Jesu bel, gamdai-gamkeu ah a paikhia a, a thuum hi.
Mizaw Khat Damsakna
17 Nikhat bel, ama'n mite a sinsak laiin, Farisaite leh Dan sinsakte tua lai ah a tu uhi. Amaute Galili gam leh Judia gam khawchih leh Jerusalem apan hong pai ahi uhi. Chinate damsak nading Toupa' vangletna in amah a ompih hi. 18 Ngai dih, mi pawlkhat in mizaw khat a lupna phekin hon zawng uh a, Jesu' maia valut dingin, tua inn sunga zawnlut a sawm uhi. 19 Mipi a tam mana inn sung lut theih nading a muh louh takun, inn tung ah a kaltou uh a, inn tung suangpek phelvangin mipite lak ah, Jesu' mai tak ah, tua mizaw pen, phekin a khaikhesuk uhi. 20 Jesu'n amaute' upna a muh takin, mizaw kiang ah: Lawm aw, na khelhnate kon ngaidam, a chi hi. 21 Farisaite leh Dan sinsakte'n a lungsung uah: Pathian gensia hiai mipa kua ahia? Pathian kia loungal, kua'n khelhnate ngaidam thei ahia? chi-in a ngaihsun uhi. 22 Jesu'n amaute' ngaihsut a thei a, amaute kiang ah: Banghanga na lungsung ua hibang ngaihsun na hi ua? 23 Koia baihlam zaw: Na khelhnate kon ngaidam, ka chih maw, ahih kei leh, Dingtou inla, khe-in pai in, ka chih? 24 Leitung ah Mihing Tapa in khelh ngaihdam theihna thuneihna ka nei, chih na theih nadingun, chi-in, mizawpa kiang ah: Dingtou inla, na lupna phek la inla, inn ah paita in, a chi hi. 25 Amah, amaute khempeuh mai ah a dingtou pah a, a lupna phek a la a, Pathian phat kawmin inn ah a chiahta hi. 26 Mi chih lamdangsakna, zahtakna leh launa tawh a kidim uh a, Pathian a phat uhi. A lau uh a: Tuni-in, thil lamdangpipi i muta, a chi uhi.
Levi Sapna
27 Hiaite nungin, Jesu a paikhia a, Levi kichi siahdongpa khat, siahdonna buk sunga tu a mu a, amah kiang ah: Kei hon zui in, a chi a, 28 Levi zong a dingkhia a, bangteng nusiain Jesu a zui hi.
Mikhialte tawh Nekkhawmna
29 Tua nungin, Levi in a inn ah, ankuang thupitak Jesu a lui hi. Siahdongte tampi leh midangte'n amaute tawh ankuang a umkhawm uhi. 30 Ahihhangin, Farisaite leh Dan sinsakte bel, Jesu' nungzuite' tung ah a phun uh a: Banghanga siahdongte leh mikhialte tawh nekhawma takhawm na hi ua? a chi uhi. 31 Jesu'n a dawng a: Mi chidamte'n daktor kisam loupi. Chinate ahi daktor kisam. 32 Mi diktatte sam dinga hong pai ka hi kei a, kisika lunghei dinga mikhialte sam dinga hong pai ka hi zaw, a chi hi.
Anngolh Thu
33 Amaute'n Jesu kiang ah: Johan' nungzuite'n an a ngawl pahpah uh a, a thuum uh. Farisaite' nungzuite'n zong tua bangin a hih uh. Nang' nungzuite'n lah a nene uh a, a dawndawn mawk uh a, a chi uhi. 34 Jesu'n amaute kiang ah: Mouneipa' lawmte mouneipa tawh a omkhawm sungun, an na ngawlsak thei mawk ding ua hia? 35 Ahihhangin, mouneipa'n amaute a nutsiat hun hong tung ding a, tua nite hong tun chiangin bel an a ngawl ding uh, a chi hi.
Puan leh Savun Zuthawl Gehtehna
36 Ama'n amaute kiang ah hiai gentehna zong a gen a: Kuama'n tuikhai louh puan them atkhiain, puanlui thuapnain a nei kei. Tua bangin thuap taleh, puanlui a kaikek vek ding a, puan thak leh puan lui a kilem thei kei ding hi. 37 Tua bangin, kuama'n savunthawl lui ah zu thak a thun ngei kei. Thun taleh, zu thak in savunthawl a phu kek ding a, a zu a baw ding a, savun thawl zong a mangthang ding. 38 Hilou, zu thak ahih leh, savunthawl thaka na thun ding uh ahi. Tua hi leh, a zu leh a thawl na mansuah khawm kei ding uhi. 39 Zu gei dawnkhinsa mi in zu thak duh pah lou ahi. A geisa mah limzaw, chi nak ding ahi, a chi hi.
sabbath Ni-a Nasep
1 Sabbath ni nawnin, Jesu lou lai tawnin a pai hi. A nungzuite'n huitbuh vuite a zut uh a, khut sunga nuaisiangin a baak uhi. 2 Farisaite pawlkhat in amaute kiang ah: Banghanga Sabbath ni-a hih sianglou hih na hi ua? a chi uhi. 3 Jesu'n a dawng a: David leh a lawmte a gilkial lai ua a thilhih na sim ngei ngai kei ua hia? 4 Amah Pathian' inn sung ah a lut a, siampite kia' nek siang tanghou sehtuam Pathian maia kilui a la a, a ne a, a lawmte zong a hawm hi, a chi hi. 5 Tua baan ah: Kei Mihing Tapa, Sabbath ni tunga zong Toupa ka hi, a chi lai hi.
Sabbath Ni-a Damsakna
6 Sabbath ni dang khatin, Jesu sunagog khat ah a lut a, a sinsak hi. A khut taklam teem mi khat tua lai ah a om hi. 7 Farisaite leh Dan sinsakte'n Jesu ngawh theih nading zongin, Sabbath ni-in mi a damsak hiam, chi-in a enkhia uhi. 8 Ahihhangin, Jesu'n amaute' lungsim a thei a, a khut teempa kiang ah: Thoutou inla, mi khempeuh mai ah ding in, a chi hi. Tua bangin, a khut teempa a thoutou a, tua ah a ding hi. 9 Jesu'n amaute kiang ah: Thu khat kon dong ding: Dan in Sabbath ni-a thil hoih hih hia a phal, ahih kei leh, thil hoihlou hih? Hinna hut hia a phal, ahih kei leh, hinna hihmanthat? a chi hi. 10 Ama'n amaute khempeuh a et kawikawi khitin, a khut teempa kiang ah: Na khut zankhia in, a chi a, tua mipa'n a khut a zankhia a, a khut langkhat bang bangin a damta hi. 11 Ahihhangin, amaute a heh mahmah uh a, Jesu bang lawha pha hiam, chi-in a kikum uhi.
Sawltaklian Sawmlenihte Sehna
12 Tua hun laiin, Jesu mual tunglama thuum dingin a paikhia a, tua ah zan khawvakin Pathian kiang ah a thuum hi. 13 Zing khua hong vak takin, ama'n a nungzuite amah kiang ah a sam a, amaute lak apanin sawmlenih a teelkhia a, amaute sawltakliante, chi-in a minvawh hi. 14 Ama' teelte, Peter chi-a a minphuahpa Simon tawh, a sanggampa Andru tawh, Jakob leh Johan, Filip leh Bartholomai, 15 Mathai, Thoma, Alfai' tapa Jakob, Gam itpa kichi Simon, 16 Jakob' tapa Juda leh amah lehbawla khawngpa Juda Iskariot ahi uhi. 17 Tua khitin, Jesu amaute khempeuh tawh hong paisuk a, munzang khat ah a ding hi. A nungzuite tampitak, amah kiang ah hong paikhawm uh a, tuate baan ah, Judia gam teng, Jerusalem leh tuipi geia om Tura leh Sidon kiim gam teng apan mi tampitak zong hong paikhawm uhi. 18 Amaute bel, Jesu' thugen ngai ding leh, a chinatnate uh kidamsak dinga hong pai ahi uhi. 18 Ama'n kha ninte' hihbuaite a damsak hi. 19 Amah apan vangletna pawtkhia a, china khempeuh a damsak manin, tua mipite khempeuh in amah lawnkhak a sawm tek uhi.
Nunnopnate
20 Jesu'n a nungzuite a en a: A genthei noute, Pathian' kumpigam noutea ahih manin, a nunnuam na hi uhi, 21 A gilkial noute, tai ding na hih manun, a nunnuam na hi uhi. Tu-a kap noute, nui ding na hih manun, a nunnuam na hi uhi. 22 Kei Mihing Tapa hanga mite'n hon muhdah a, hon hawlkhiak a, hon selphou a, gilou banga hon gensiat chiangun, a nunnuam na hi uhi. 23 Tua ni chiangin, kipak unla, nuamin diang un. Ngai un, vantung ah, pahtakman thupitak na nei uhi. A pu a pate un tanglai kamsangte a bawldan uh hibang mah hi ahi. 24 Ahihhangin, a hau noute, na kinepna uh tu-a mukhin na hih manun, na tung uh gik hi. 25 Tu-a a tai noute, ni khat ni chianga kial ding na hih manun, na tung uh gik hi. Tu-a a nui noute, ni khat ni chianga daha kap ding na hih manun, na tung uh gik hi. 26 Mi khempeuh in hon phat chiangin, na tung uh gik hi. A pu a pate un tanglai kamsang takloute a bawl dan uh hibang mah hi ahi.
Kumpigam Nuntakzia
27 Ahihhangin, ka thugen ngaikhia noute kon hilh ahi: Na melmate uh it unla, hon mudahte tung ah siam unla, 28 hon hamsiatte vualzawl unla, hon bawlsete adingin thuumsak un. 29 Mi'n na ngeibeng langkhat hon bet leh, a langkhat lam zong dawh un. Mi'n na puanaktung hon laksak leh, na puanaknuai zong lasak un. 30 Hon ngen peuhmah kiang ah pia un. Mi'n na neihsa hon laksak leh, ngenkik kei un, 31 Mi'n na tunga a hih ding dana na deih bangbangun mite tung ah hih un. 32 Mikhialte nangawn in amau itte itthuk hi ve-un, nou hon itte kia na it uleh, bang phathuaina tuam na lawh ding ua? 33 Noute tunga hoihte tunga thil hoih na hih uleh, bang phathuaina tuam na lawh ding ua? Mikhialte'n tua bangin a hih ve uale. 34 Mikhialte nangawn in a kima ditkik ding lamena, mikhialte leitawisak uh hiven, hon dinkik thei dinga na lamette kia uh na leitawisakun, bang ohathuaina tuam na lawh ding ua? 35 Ahihhangin, na melmate uh it unla, amaute tunga siam tuh un. Ditkik ding lamen hetlouin leitawisak un. Tua hi leh, na pahtakman uh thupi ding a, Tungnungpen' tapate na hi ding uhi. Ahang bel, Pathian mahmah zong, kipah dan theiloute leh migiloute tunga siam ahi. 36 Na Pa uh zahngaithei ahih manin, noute zong zahngaithei un.
Midangte Dem
37 Dem kei un, hi leh demin na om kei ding uh. Mawhtangsak kei un, hi leh mawhtansakin na om kei ding uh. Ngaidam un, hi leh ngaihdamin na om ding uh. 38 Pia un, hi leh piakin na om ding uh. Kichingtaka teh, hensip leh sinsip, a let noinoia piak na hi ding uh. Na tehna bang bangun noute ading a kiteh ding, a chi hi.
Mittaw Lamkai
39 Ama'n amaute kiang ah hiai gentehna zong a gen a: Mittaw in mittaw mah a makaih thei dia hia? A nihun kawkhuk ah kekhawm lou ding umaw? 40 A sinmi zaw a sinsakpa sanga lianzaw lou ahi. Ahihhangin, a bukima sinmi ahih leh, amah sinsakpa tawh kibang ding hi. 41 Nangma' mita singtum om phawk loupi-a banghanga na sanggam' mita nin neng enen na hia? 42 Nangma' mita singtumpi mu loupia, bangchi dana na sanggam kianga: Sanggam aw, na mita nin neng hon lakkhiaksak ning, chi thei ding na hia? Mi lepchiah aw! Nangma' mita singtumpi lakhe masa lechin, na sanggam' mita nin neng lakkhiak ding hoihtaka mu ding hi teh.
Singkung leh a Gah
43 Sing hoih in gah sia suah lou a, sing sia in lah gah hoih suah lou hi. 44 Sing peuhmah a gah ah kithei hi. Kuama'n lingkung apan theipi lou ngeilou a, khaugui Hngnei apan zong grep lou ngeilou hi. 45 Mi hoih in a lungsunga gou hoih a kholkhawmte apan thil hoihte a suahkhia a, migilou in bel a lungsunga gou hoihlou a kholkhawmte apan thil hoihloute a suahkhia hi. Ahang bel, mi'n a lungsunga dimlette mah kama gen khia hiven.
Kibulphuhna Nam Nih
46 Noute'n ka thugente zui loupi-a banghanga: Toupa, Toupa, hon chi na hi ua? 47 Ka kianga hong pai a, ka thugente za a, zui mi, mi bangchi hi hiam, kon hilh ding. 48 Tua bang mi zaw, thuktaka lei tou a, suang tunga bulphuha inn lam mi tawh kibang hi. Tua bang inn zaw, suangpi tunga kilam ahih manin, tui hong khangin, tui lian in nuai mah leh, a liing kei hi. 49 Ahihhangin, ka thugente za a, zui lou mi ahih leh, kibulphuhna beia lei laka inn lam mi tawh kibang hi. Tui lian in tua inn a nuai chiangin, chim pah a, segawp dimdem hi, a chi hi.
Sepaih Zaheupa' Sila Damsakna
1 Jesu'n mipite kianga thu a gen khitin, Kapernaum ah a lut hi. 2 Tua ah, sepaih zaheupa khat a om a, a deihthawh mahmah a sila khat a china a, a si dekdek hi. 3 Tua sepaih zaheupa'n Jesu tungthu a za a, Juda upate pawlkhat a sawl a, vapai a, a silapa vadamsak dingin Jesu a ngensak hi. 4 Amaute, Jesu kiang hong tung uh a, vapai a, sepaih zaheupa' silapa vadamsak dingin a ngen ngutngut uh a: Hiai mipa, deihsakna thil na hihsak taak ahi. 5 Ama'n i minam it a, koute adinga sunagog khat hon lamsak ahi, a vachi uh a, 6 Jesu'n amaute a zui hi. Jesu tua sepaih zaheupa' inn a tun dek kuanin, sepaih zaheupa'n a lawmte a sawl a: Toupa aw, kibuaisak ken, ka inn sung na lut nadingin a taak kei. 7 Keimah zong na kianga hong taak ka hi kei. Thu gen lei lechin, ka sila dam ding ahi. 8 Kei zong thunuaia om mi ka hi a ka nuai ah sepaihte a om sawn hi Khat kianga: Nang pai in, ka chih leh a pai a, a dang khat kianga Nang hong pai in, ka chih leh hong pai hi. Ka silapa kiang ah zong Nang hiai hih in, ka chih leh a hih mai hi, a chisak hi. 9 Jesu'n hiai a zak takin, sepaih zaheupa lamdang a sa a, amah zui mipite lam ngain a kihei a: Noute kon hilh ahi. Israelte lak nangawn ah hibang upna lian ka mu nai kei, a chi hi. 10 Sepaih zaheupa' misawlte inn hong tung uh a, tua a china silapa chidama om a mu uhi.
Meigong' Tapa Sisa Hinsakna
11 Tua nung zekin, Jesu, Nain kichi khua khat ah a hawh hi. Ama' nungzuite leh mipi tampi in amah a zui uhi. 12 Tua khawpi kongpi a tun dektakin, misi khat hong kizawngkhia hi. Tua misipa bel, a nu' tapa tang neihsun ahi a, a nu zong meigong ahi. Tua khawpi apan mi tampi in tua numei a zui uhi. 13 Toupa'n tua meigong a mu a, a lainat mahmah a, a kiang ah: Kap ken, a chi hi. 14 Tua khitin, amah a paitou a, tua laang a lawng a, laang zawngte a khawl uhi. Ama'n: Tangval, thoutou in, kon chi ahi, a chi hi. 15 Misipa hong thoutou a, hong paukhia a, Jesu'n amah a nu kiang ah a pia hi. 16 Amaute khempeuh lamdangsakna, zahtakna leh launa tawh a kidim uh a, Pathian a phat uh a: Eite lak ah kamsang thupi khat hong dingkheta. Pathian in a mi eite hong vehta, a chi uhi. 17 Tua bangin, Judia gam sung khempeuh leh a kiim gam teng ah, Jesu tungthu a thangsuakta hi.
Jesu leh Baptispa Johan
18 Tua laiin, Johan' nungzuite'n hiai thilte khempeuh Johan kiang a tun uhi. 19 Johan in a nungzuite nih a sam a, Jesu kiang ah a sawl a: Hong pai dingpa na hi hiam, ahih kei leh, midang na lamen ding ka hi uhia? chi-in a vadongsak hi. 20 Amaute Jesu kiang ah hong pai uh a: Baptispa Johan in na kiang ah koute hon sawl a: Hong pai dingpa na hi hiam, ahih keileh, midang na lamen ding ka hi uhia? chi eive, a chi uhi. 21 Tua hun lai mahmahin, Jesu'n mi tampite, a zawngkhalnate uleh a natnate uh leh dawimatte a damsak a, mittawte' mit a vaksak hi. 22 Jesu'n tua a kianga misawlte a dawng a: Paikikta unla, na zakte uleh na muhte uh Johan hilh un. Mittawte'n khua mutheita, khebaite paitheita, phaakte siansak hita, nangongte'n zatheita, misite ka kaithouta, gentheite tangthupha ka zasakta chih leh, 23 keima' hanga kipuk lou mi, mi nunnuam ahi, chih Johan hilh un, a chi hi.
Baptispa Johan Phatna
24 Johan' misawlte a paikhiak nungun, Jesu'n mipite kiang ah Johan tungthu a gen a: Bang mu nuama gamdai-gamkeua vapai na hi ua le? Huihmut pumpeng en dingin maw? 25 Ahih kei leh, bang en dinga vapai na hi ua? Puan thupi silh mi en dingin maw? Puan thupi silh mi leh niang leh taia nungta mi zaw, kumpite' innpi khawnga om eive. 26 Bang mahmah mu nuama vapai na hi ua? Kamsang mi maw? Ahi tawk vo oi. Noute kon hilh ahi. Amah zaw kamsang mi sanga thupizaw ahi ve. 27 Hiai mi ahi, a tungthu hibanga kigelhpa: Ngai in, na maia ka thangkou sawl ding ing a, ama'n na maia na lampi bawlkhol ding hi, chi-in. 28 Noute kon hilh ahi. Numei apan piang lak ah, Baptispa Johan sanga thupizaw kamsang a om kei. Hinapi-in, Pathian' kumpigama neupen nangawn amah sangin a thupizaw hi, a chi hi. 29 Tua mite khempeuh leh siah- dongte'n Jesu' thugen a za uhi. Amaute'n Johan khut tunga baptisna tangkhin a hih manun, Pathian zaw a diktat ahi, chih a saang uhi. 30 Ahihhangin, Farisaite leh dan theite'n bel, Johan' baptisna a saang nuam kei uh a, Pathian in amaute a thuhilhna a nolh uhi. 31 Toupa'n amaute kiang ah: Tulai khanga mite bang tawh hon teh ding ka hia? Bang na bang ua? 32 Sumsinna muna tu a, a lawmte uh sam a: Tamngai hon tumsak ung a, laam lou uchin a, dahla hon saksak ung a, lah kap tuan lou uchin a, a chi naupangte bang na hi uhi. 33 Ahang bel, Baptispa Johan hong pai a, ne lah ne lou, zu lah dawn louin a om a, noute'n: Dawi zawl eive, na chi uh. 34 Mihing Tapa kong pai a, ka ne a, ka dawn a, noute'n: En un, anhaipa, zuhaipa, siahdongte leh mikhialte' lawm! non chi zel uhi. 35 Ahihhangin, pilna zaw a tate khempeuh in dik a tangsak uhi, a chi hi.
Jesu' Khepekte Sathau Buahna
36 Tua nunglamin, Farisaite khat in Jesu an nekpih dingin a chial a, Jesu zong tua Farisai' inn ah a vahawh a, ankuang umin a tu hi. 37 Tua khua-a teeng, khelhna sunga paktat numei khat a om hi. Tua numei in tua Farisai' inn ah Jesu'n ankuang a um dek, chih a zak takin, alabastar thawla sathau namtui tawiin hong pai hi. 38 Amah, Jesu' nung ah, a khebul ah kap kawmin hong ding a, a khituiin a khepekte a hihkawt a, a sam in a nui hi. Tua khitin, a khepekte a tawp tenten a, sathau namtui a buak lai hi. 39 Jesu an nekpih dinga chialpa, tua Farisai in hiai a muh takin, a lungsimin: Hiai mi kamsang hiven, amah lawngnu kua hi a, bangchi bang numei hi hiam, chih thei leh kilawm a, amah lah mikhial hi a, a chi hi. 40 Jesu'n a dawng a: Simon aw, na kianga gen ding khat ka nei, a chi hi. Simon in: Hon gen ve, Sinsakpa, a chi hi. 41 Jesu'n: Mi nih in sum leitawisakpa khat tung ah leibat a nei tuak uh a, khat in dinari 500 a ba a, a dang khat pen in dinari 50 a ba hi. 42 Tua mi nihte, leiba din zou zaw sam a om kei uh a, a leibatnapa un a nihun a leibat uh a maisak tuak hi. Ahih leh, leiba mi a kua zaw pen in amah a it zaw dia le? a chi hi. 43 Simon in a dawng a: Ka upmawh danin, a maisak leibat hauzaw pen in itzaw kha inte, a chi hi. Jesu'n: Diktakin thu na khen ve, a chi hi. 44 Jesu'n numei lam ngain, Simon kiang ah: Hiai numei na mu hia? Nang' inn sung ah kong lut a, ka khepekte sil nading tui non pe kei. Ama'n zaw a khituiin ka khepekte a sil a, a samin a nui hi. 45 Nang non tawp kei. Ama'n zaw kong lut nungsang, ka khepekte tawp a tawlnga kei. 46 Nang ka lutang sathau namtui non nilh kei. Ama'n zaw ka khepekte sathau namtui a buak hi. 47 Hibang teng muin, nang kon hilh ahi. A khelhna tampite ka ngaidamta. Hiai hanga hizahta-a hon it ahi ve. Ngaihdam ding tawmchik nei mi in neuchika it nak ahi, a chi hi. 48 Tua khitin, ama'n numei kiang ah: Na khelhnate kon ngaidamta, a chi hi. 49 Ankuang umpih midangte' n: Khelhnate nangawn ngaidam, hiai mi kua ahia? a kichi uhi. 50 Jesu'n numei kiang ah: Na upna in hon hondam ahi. Khamuangtakin paita in, a chi hi.
Numeite'n Jesu' Nektaak Bawl
1 Tua nungin, Jesu, khawpite leh khawtate ah a pai kawikawi a, Pathian' kumpigam tangthupha a gen hi. Sawmlenihte'n zong amah a zui uh a, 2 numei pawlkhat in zong a zui uhi. Amaute bel, dawimat leh china a damsakte ahi uhi. Numei khat, dawi sagih pawtkhiakna Magdala apan Mari ahi. 3 Numei dang khat Chuza' zi Joana ahi. Chuza bel, Herod' innsung kempa ahi. Tua baan ah, numei dang khat Susana ahi. Tua numeite leh numei dangte'n amau' neihsa apan Jesu' nektak a pia uhi.
Buhchi Kiakna Lei Gentehna
4 Mi tampi hong paikhawm laiun, khawpi teng apanin zong midangte Jesu kiang ah hong pai lailai uhi. Ama'n amaute kiang ah hiai gentehna a gen a: 5 Buhchi thehpa khat buhchi thehin a kuan hi. Buhchi a thehte pawlkhat lamdung ah a kia hi. Mite'n buhchi kiate a sikden uh a, tungleng vasate'n a negai uhi. 6 Buhchi pawlkhat suangtung lei pan ah a kia a, hong pou takin, tuihul lua ahih manin, a vuaigawp hi. 7 Buhchi pawlkhat lou lingnei lak ah a kia a, lou lingneite hong khang a, buhkungte a deeplum hi. Buhchi pawlkhat bel lei hoih ah a kia a, hong poutou a, gah a suah a, a leh 100-a tam a piang hi, a chi hi. Jesu'n hiai a genkhitin, a kikoukhia a: Zak nading bil nei peuh in zata hen, a chi hi. 9 A nungzuite'n amah a dong uh a: Hiai gentehna bang genna ahia? a chi uhi. 10 Ama'n: Pathian in Pathian' kumpigam thusim kiseelte theihtheihna noute hon pia a, midangte kiang ah bel gehtehna zangin thu ka gen hi. Ahang bel, Mu napi a, a muh taktak louh nading uh, za napi a, a theihsiam louh nading uh ahi. 11 Hiai gentehna khiakna hiai ahi: Buhchi bel Pathian thu ahi. 12 Lamdunga a kiakna lei ahih leh, thu zate, ahihhanga dawimangpa'n a lungtang ua pan tua thu a lakmangsakte ahi. Tua hi kei leh, a um ding uh a, Pathian in amaute a hondam ding hi. 13 Suangtung lei pana a kiakna lei ahih leh, kipahpiha thu saang, ahihhanga, zung kailoute ahi uh. Tomkha sung a um uh a, ze-etna hun hong tun chiangin a pukmang uhi. 14 Lou lingnei laka a kiakna lei ahih leh, thu za, ahihhanga hiai damsung lungzinnate, hauhnate leh nopsaknate' deplupte ahi. Amaute a piching kei uhi. 15 Lei hoiha a kiakna lei bel, thu za lungtang hoih leh dikte ahi. Amaute'n thu a lenkip uh a, lungduaitakin gah a suah zel uhi.
Meivak Gentehna
16 Kuama'n meivak dein, lawh a khuhkhum ngei kei a, lupna nuai peuh ah zong a koih ngei kei. Meivak tunna ah a koih zaw a, inn sunga hong lutte'n a vak a mu thei uhi. 17 A kilang lou dinga im bangmah om lou a, theih louh ding leh a kilakkhe lou dinga kisel bangmah om lou ahi. 18 Tua ahih manin, thu na zak dan uah pilvang un. A nei peuhmah kipiak behlap ding a, a neilou peuhmah, Nei mah ing, chi-a a ngaihsut nangawn kilaksak ding ahi, a chi hi.
Jesu' Tanau Taktak
19 Jesu' nu leh Jesu' sanggamte amah mu dingin hong pai uhi. Ahihhangin, mipi tam lua ahih manin, amah kiang hong tung thei kei uhi. 20 Mi pawlkhat in amah kiang ah: Na nu leh na sanggamte nang mu nuamin inpua ah a ding uh, a chi uhi. 21 Ama'n a dawng a: Pathian thu za a, zuite ahi ka nu leh ka sanggamte, a chi hi.
Huihpi Thensakna
22 Ni khat bel, Jesu a nungzuite tawh long sung ah a tuang uh a, ama'n amaute kiang ah: Dil gei khat lam ah galkah ni, a chi a, tua bangin a paita uhi. 23 Tua banga longa a pai laiun, amah a ihmu hi. Dil tung ah huihpi hong nung a, long in tui a luak a, lauhuaipi-in a om uhi. 24 Nungzuite hong pai uh a, amah hong phawng uh a: Heutupa, Heutupa, tuike ding hita ung! hong chi uhi. Amah hong thoutou a, huihpi leh tuihualte a taai a, huihpi a theng a, tuihualte a dai sipsip hi. 25 Ama'n a nungzuite kiang ah: Na upna uh koia koih na hi ua le? a chi hi. Amaute'n lau leh lamdang sain: Hiai mi bangchi mi hi peuhmah ding ahia le, huihpi leh tui thu pia a, a thuman mawk uh? a kichi uhi.
Dawimat Damsakna
26 Amaute longa paiin, Galili gal, Gadara gam ah a galkah uhi. 27 Jesu, long apan a kumkhiak takin, tua khawpi apan hong pai, dawimat pasal khat in a na tuak hi. Tua pa bel hun sawtpi puansilh lou, inna zong om lou, hanmun khawnga om om ahita hi. 28 Ama'n Jesu a muh takin, a kikou a, a khebul ah a bok a, a aw neih tengin a kikou a: Pathian Tungnungpen' Tapa Jesu aw, nang tawh bang kisaina nei i hia? Hon sawi lou dingin kon ngen hi, a chi hi. 29 Jesu'n tua dawi kiang ah, tua mipa nusia a, pawtkhiak ding thu a na pekhin a, ama'n hibanga ngen ahi. Tua dawi in amah tamveipi a sualta a, mite'n a khut a khete sik khainianga henin veengta leh zong, sik khainiangte phutatin, tua dawi in gamdai-gamkeu lam ah a hawi pahpah hi. 30 Jesu'n amah kiang ah: Na min bang ahia? chi-in a dong a, ama'n: Sang Tampi, a chi hi. Ahang bel, ama' sunga lut dawi tampi ahi. 31 Tua dawite'n kawkhuk tawbeia lutsuk dinga Jesu'n thu a piak louh nadingin a ngen ngutngut uhi. 32 Tua mual pang ah vokhon tampi gamta a om hi. Tua dawite'n tua vokte sunga lutsak dingin Jesu a ngen uh a, ama'n vokte sunga a lut ding uh a phal hi. 33 Tua mipa' sung apan dawite hong pawtkhiak takun, tua vokte sung ah a lut uh a, vokhonte dil gei kenlak ah a taisuk uh a, tui ah a kelum uhi. 34 Tua vokchingte'n tua thil hong tung a mu uh a, a tai uh a, khawpi leh a kiim a kiang khawtate ah tua thu a genthang uhi. 35 Tua thil hong tung en dingin mite hong pai uh a, Jesu kiang hong tung uhi. Dawite' pawtkhiaksan tua mipa, Jesu' khebula tu hithiat, a puan silh a, a lungsim ngei pu-a om a mu uh a, a lau mahmahta uhi. 36 Jesu'n dawimatpa a damsak dan mute'n tua thu a vekin a gen uh a, a phuangzak uhi. 37 Amaute'n a lau manun, Gadara gam nuse dingin Jesu a ngen uh a, amah longa tuangin a paikheta hi. 38 Dawite pawtkhiaknapa'n Jesu zuih ding a ngen a, ahihhangin, ama'n amah a sawl a: 39 Inn ah paita inla, Pathian in nang adinga bangzahta hon hihsak hiam vagen in, a chi hi. Tua bangin, tua mipa a paikhia a, Jesu'n amah adinga a hihsak khempeuh khawsung teng ah a gen hi.
Numei Siluang Damsakna
40 Jesu hong kilehkik takin, mipite'n amah na lamenkhin uh ahih manin, a na muak uhi. 41 Tua laitakin, Zaira kichi, sunagog ukpa khat hong pai a, a inna vahawh dingin Jesu' khebul ah a ngen hi. 42 Ahang bel, a tanu tang neihsun, kum sawmlenih khawng mi, si deka om ahih man ahi. Jesu a vapai laiin, mi tampi in amah a umchip uhi. 43 Tua lai ah, numei khat kum sawmlenih sung siluanga china a om hi. Daktorte goihnain a neihsa khempeuh a zangbeita a, kuama'n lah a damsak thei kei hi. 44 Amah Jesu nung ah hong pai a, a puanaktual mong a lawng hi. Tuachi-in, ama' siluang a kam pah hi, 45 Jesu'n: Kua'n kei hong lawng ahia? chi-in a kan hi. Kei ka hi, chi ding kuamah a om louh takin, Peter in: Heutupa, mi tampi in hon tuam a, hon nehchip ahi vele, a chi hi. 46 Ahihhangin, Jesu'n: Kua hiam khat in hon lawng mah. Kei apan vangletna paikhia ka thei hi, a chi hi. 47 Tua numei in phawk louh theihlouh ahihna a kiphawk a, ling keuhkeuhin hong pai a, Jesu' mai ah hong bok hi. Mipite' mai ah, ama'n banghanga Jesu valawng hiam, chih leh a dam pah dan a gen hi. 48 Jesu'n amah kiang ah: Ka tanu aw, hangsan suah in. Na upna in hon damsak ahi, khamuangtakin paita in, a chi hi.
Jaira Tanu Kaihthawhna
49 Tua banga Jesu a pau lai mahin, sunagog ukpa Jaira' inn apan mi khat hong pai a, Jaira kiang ah: Na tanu a sita, Sinsakpa buaisak nawn dah in, hong chi hi. 50 Jesu'n hiai a zak takin, Jaira kiang ah: Lau ken. Um tapeuh in, hi leh amah damsak ding hi'ng, a chi hi. 51 Amah Jaira' inn hong tung a, Peter, Johan, Jakob leh naupang' nu leh pa loungal, kuamah a kizuilutsak nuam kei hi. 52 Mi khempeuh in amah a suun uh a, a kap vengvung uhi. Jesu'n: Kap nawn kei un. A si ahi kei, a ihmu ahi zaw, a chi hi. 53 Amaute'n amah si ahi, chih thei uh ahih manin, amah a nuihsan uhi. 54 Ama'n amaute a paikhiaksak vek khitin, naupang' khut lenin: Bawi aw, hong thoutou in! a chi hi. 55 Tua bangin, ama' kha hong kik nawn a, amah a thoutou pah hi. Ama'n nungaknou nek ding an pe dingin amaute thu a pia hi. 56 A nu-le-pa'n hiai vangletna nasep lamdang a sa mahmah uh a, ahihhangin, Jesu'n a thilhih kuamah hilh lou dingin amaute a hilh hi.
Sawmlenihte Sawlkhiakna
1 Tua nungin, Jesu'n a nungzui sawmlenihte a samkhawm a, dawite hawlkhiak nading leh chinate damsak nading vangletna leh thuneihna amaute a pia a, 2 Pathian' kumpigam thu gen ding leh chinate damsak dingin, amaute a sawlkhia hi. 3 Ama'n amaute kiang ah: Na khualzinna uah bangmah keng kei un. 4 Na lutna inn peuhmah uah, tua khua na nutsiat mateng uh kingaden un. 5 Mite'n hon kipahpih kei leh, a khawpi uh na nutsiat chiangun, amaute mawhsakna theihpihna-in, na khepek uapan leivui singkhia un, a chi hi. 6 Tua bangin amaute a kuankhia uh a, tangthupha genin leh koipeuha mite damsakin, khawtate a tawn kawikawi uhi. 7 Tua hun laiin, hausalian lite laka khat Herod in Jesu' thilhihte khempeuh a na za a, a lungbuai mahmah hi. Ahang bel, pawlkhatte'n: Amah misite lak apan Johan hong thoukik ahi, a chi uh a, 8 pawlkhatte'n lah: Elija hong kilang ahita, a chi uhi. Pawlkhat dang leuleu in lah: Tanglai kamsangte khat hong hing thak ahi, a chi uhi. 9 Herod in bel: Johan lah a ngawng ka tansa hi a, a thu ka zak kua himah mah ding ahia? a chi a, Jesu muh a sawm hi. 10 Tua sawltakliante hong chiahkik takun, a thilhihte uh Jesu kiang ah a gen uhi. Ama'n amaute a tonpih a, Bethsaida kichi khawpi tawh kinai, gamdai-gamkeu ah a om tuam uhi. 11 Ahihhangin, mipite'n hiai thu a za uh a, amah a vazuan uhi. Ama'n amaute a na kipahpih a, Pathian' kumpigam thu a na hilh a, damsak kulte a na damsak hi.
Mi 5,000 Vaakna
12 Ni a turn dek kuanin, Sawmlenihte Jesu kiang ah hong pai uh a: Hiai mun, gamdai-gamkeu hi a, hiai mipite hiai kiim khawta leh lou khawnga an nek ding leh giah nading zong dingin sawl vaw, hong chi uhi. 13 Ama'n amaute kiang ah: Noute'n nek ding an pia un, a chi hi. Amaute'n: Hiai mipite khempeuh ading tanghou valei dinga vakuan ding ka hih kei ngai uleh, tanghou beu nga leh ngasa nih kaan ka neih louhpi uh, a chi uhi. 14 Mipite bel pasal piching kia zong 5,000 khawng ahi uhi. Ahihhangin, ama'n nungzuite kiang ah: Amaute 50 pawlpawlin tusak un, a chi hi. 15 Amaute'n tua bangin mipite a tusak uh a, kuamah peuh a tu chiat uhi. 16 Tua khitin, Jesu'n tua tanghou beu ngate leh ngasa nihte a la a, vandak in a vualzawl a, tua khitin, a balkham a, mipite laka hawm dingin nungzuite' khut ah a pia hi. 17 Mipite'n a vekun a ne uh a, a vah uhi. Nungzuite'n khamvalte a luakkhawm uh a, seng sawmlenih a dim hi.
Peter' Upna
18 Ni khat bel, Jesu thuuma a om tuam laiin, a nungzuite amah kiang ah a om uhi. Ama'n amaute kiang ah: Mite'n kei kua ahi hon chi ua? a chi hi. 19 Amaute'n: Mi pawlkhatte'n: Baptispa Johan ahi, hon chi uh a, mi pawlkhatte'n: Elija ahi, hon chi uh a, mi pawlkhat dangte leuleu in lah: Tanglai kamsangte khat hong hing kik ahi, hon chi uh, a chi uhi. 20 Ama'n amaute kiang ah: Ahih leh, noute'n kua ahi non chi ua? a chi hi. Peter in a dawng a: Pathian' Mesia na hi, a chi hi. 21 Jesu'n tua thu kuamah hilh lou dingin amaute a kham bikbek a, 22 amaute kiang ah: Kei Mihing Tapa in thil tampi ka thuak a kul. Upate, siampi makaite leh Dan sinsakte'n hon nolh ding uh a, hon that ding uh a, a ni thum ni-in, Pathian in hon kaithou ding, a chi hi.
Nungzuihna Man
23 Tua nungin, ama'n amaute khempeuh kiang ah: Mi kuapeuh in ka nung hon zuih nop leh, amah kizaangsaka nisima ama' khros kisuana hon zuih teitei ding ahi. 24 Ahang bel, ama' hinna humbit sawm peuhmah in a mansuah ding a, ahihhangin, keima' hanga a hinna mansuah peuhmah in a humbit ding. 25 Mi'n leitung bup neiin ama' hinna mansuah hiam, taan hiam hi leh, ama' adingin bang a phatuam dia ahia? 26 Mi kuapeuh in keimah leh ka thu a zumpih leh, kei Mihing Tapa, ka Pa' thupina khu-a keima' thupina tawh vansawltak siangthoute' thupina tawh kong pai chiangin, amah ka zumpih ding. 27 Noute thutak kon hilh ahi. Hiaia ding mi pawlkhat, Pathian' kumpigam a muh masiah uh, sihna chiam lou ding a om uh, a chi hi.
MelLamdanna
28 Jesu'n tua a gen nung ni giat khawngin, Peter, Johan leh Jakob a tonpih a, mualtung lam ah thum dingin a paitou hi. 29 Amah a thum laiin, a mei hong lamdang a, a puansilhte a ngou a, a tesolsol hi. 30 Amah mi nih tawh a kihou a, tuate bel Mosi leh Elija ahi. 31 Amaute vanlam thupina tawh kithuamin hong kilang uhi. Amaute'n Jerusalema a hih tangtun dek tua a paikhiak ding thu a kikum uhi. 32 Peter leh a lawmte bel ihmutsuakin a om uh a, ahihhangin, hong halh siang takun, Jesu' thupina a mu uh a, amah tawh dingkhawm mi nihte' thupina zong a mu uhi. 33 Tua mi nihte'n Jesu a nutsiat dek laiun, Peter in amah kiang ah: Heutupa, koute adingin hiaia om a nuam. Bukta thum lam le-ung, khat nang ading, khat Mosi ading, khat Elija a ding, a chi hi. Peter in bel a thugen in bang ngim hiam, chih zong a theihlouhpi ahi. 34 Tua thilte Peter in a gen lai mahmahin, meipi hong kai a, amaute a tuam hi. Meipi laka a om takun, a lau mahmah uhi. 35 Tua meipi lak apan aw hong ging a: Hiai ka it ka Tapa ahi, ama' thu ngai un, a chi hi. 36 Tua aw in thu a gen khitin, amaute'n Jesu amah kia-a om a mu uh a, a dai dide uhi. Nungzuite'n tua thu a im uh a, a thil muh uh kuamah a hilh kei uhi.
Dawimat Damsakna
37 A zing chiangin, amaute mual tung apan hong kumsuk uh a, mipite'n amah a na lamtuah uhi. 38 Mipite laka mi khat hong kikoukhia a: Sinsakpa, ka tapa en dingin kon ngen hi. Ka tapa tang neihsun ahi. 39 Ngai dih, dawi in a man a, a kikouzak pahpah hi. Dawi in leilak dennain a nei a, a kisat a, a chilphuan a pawt a, dawi in nuse ngeilou phial ahih manin, hihmangthang petmah ding ahita. 40 Tua dawi hawlkhe dingin na nungzuite ka ngen a, lah a hawlkhe thei kei uhi, a chi hi. 41 Jesu'n a dawng a: Upnabei leh khang lehtatte aw, noute bangtan hon ompih lai ding ka hia? Bangtan hon thuak zou lai ding ka hia? Na tapa hiai ah hon paipih in, a chi hi. 42 Tua pasal naupang hong pai lai nangawnin, dawi in leilak denna'n a nei a, nakpitakin a kisat hi. Jesu'n tua dawi a taai a, tua naupang a damsak a, a pa kiang ah a pia hi. 43 Amaute khempeuh in Pathian thupi dan lamdang a sa uhi. Kuapeuh in Jesu' thilhihte khempeuh lamdang sa-a a om laiun, ama'n nungzuite kiang ah: 44 Noute kon hilh ding pilvangtakin ngaikhia un: Kei Mihing Tapa lehbawla mihingte khut sunga hon khawng ding uh ahi, a chi hi. 45 Ama'n a thugen a khiakna a im manin, amaute'n a theisiam kei uh a, dot lah a dong ngam kei uhi.
Letna Dik
46 Nungzuite laka kua liana, thupipen ding hiam, chi-in amaute a kisel uh a, 47 Jesu'n amaute' lungsim ngaihsut a thei a, naupang neu khat a kai a, ama' kiang ah a tusak hi. 48 Ama'n amaute kiang ah: Ka mina hiai naupang neu na saang a, na kipahpih mi peuhmah in kei hon saang ahi. Kei hon saang peuhmah, kei hon Sawlpa saang ahi. Ahang bel, noute khempeuh laka neupen, a liana a thupipen hi ding ahi, a chi hi. 49 Johan in: Heutupa, na mina dawite hawlkhia mi khat ka mu uh a, amah eite hon zui ahih louh manin ka khou uhi, a chi hi. 50 Jesu'n amaute kiang ah: Amah khou kei un. Eite hon dou lou peuhmah eilama pang ahi, a chi hi.
Samarke' Langbawlna
51 Jesu vantunga a kaltouh hun ding a naita a, Jerusalem zuana paitouh a sawm tinten hi. 52 Tua bangin, khualtaite a sawl masa a, ama' ading bangkim mansa-a koih dingin Samari khua khat ah a lut uhi. 53 Ahihhangin, amah Jerusalema paitouh sawm tinten ahih manin, tua khua-a mite'n amah a na saang kei uhi. 54 A nungzuite Jakob leh Johan in hibang thu a theih takun: Toupa, amaute kangtum dingin vantung apanin mei samkhe le ung non chi hia? a chi uhi. 55 Ahihhangin, Jesu a kihei a, amaute a taai a: Noute bang kha apana suak na hi uhiam, chih na thei kei ua hia? 56 Mihingte hihmangthang ding hilou a, hondam dinga Mihing Tapa hong pai ka hi zaw, a chi hi. Tuachi-in khaw dang zuanin a paita uhi.
Nungzuihna Man
57 Amaute lampi-a a pai laiun, mi khat in amah kiang ah: Toupa, na paina peuh ah kon zui nuam, a chi hi. 58 Jesu'n amah kiang ah: Sihalte'n kua a nei a, tungleng vasate'n bu a nei a, ahihhangin, kei Mihing Tapa in ka lutang ngak nading nangawn mun nei lou ka hi, a chi hi. 59 Ama'n: mi dang khat kiang ah: Kei hon zui in, a chi hi. Ama'n: Toupa, vapaia ka pa vavui phot dingin hon phal in, a chi hi. 60 Jesu'n amah kiang ah: Misite a misite uh kivui dingin nusia in. Nang na hih leh, vapai inla, Pathian' kumpigam tangthupha vatangkoupih in, a chi hi. 61 Midang khat mah in: Toupa, ke'n nang kon zui ding. Ahihhangin, va-paiin ka innsung mite mangpha vakhak phot ning, a chi hi. 62 Jesu'n a dawng a: Leilehna tu lenkhin a, nunglam ngakik mi kuamah Pathian' kumpigam adingin a ching kei, a chi hi.
Sawmsagihte Sawl khiakna
1 Tua nungin, Toupa'n midang 70 a sep a, ama' hawh nading khuate leh munte khempeuha na pai masa dingin nih nihin a sawlkhia hi. 2 Ama'n amaute kiang ah: Buhlak ding tarn mahmah a, nasem mi lah tawm mahmah hi. Buhla Toupa kiang ah, a buh la ding mi hon sawl dingin ngen un. 3 Kuan unla, ngai un, ngiate laka belamnoute bangin noute kon sawlkhia ahi. 4 Dangka ip leh kawlzal zong, khedap zong keng kei un. Lampi ah zong kuamah chibai buk kei un. 5 Inn khat peuha na lut chiangun: Hiai inn ah khamuanna tung hen, chi masa un. 6 Tua laia khamuanna mi a om leh, na khamuanna thu uh ama' tung ah a om ding. Khamuanna mi a om kei leh bel, na khamuanna thu uh noute kiang ah hong kilehkik ding. 7 Tua inn ah tung unla, hon lui peuhmah uh nein dawn un. Ahang bel, nasem mi in a thaman a saan ding mah ahi. Inn tuamtuama bantunin kisuan suan kei un. 8 Khua khat peuha na lut chiangun, hon na saan uleh, hon lui peuh uh nein dawn un. 9 Tua khua-a chinate damsak unla, Pathian' kumpigam in noute hon naih mahmah, chi-in amaute hilh zel un. 10 Ahihhangin, khua khat peuha na lut chiangun, hon na saan kei uleh, kongzingte zui unla: 11 Noute' mawhtanna chiamtehna hi dingin ka khepek ua baang na khaw leivuite nangawn uh na tung uah tatsiang ung e. Pathian' kumpigam in noute hon na naih mahmah hiven, chih thei un, chi-in hilh un. 12 Noute kon hilh ahi. Tua Ni chiangin, tua khua thuak sangin, Sodom thuak a phadawm zaw ding hi.
Kisika Lunghei Nuamloute 'Tunggikna
13 Khorazin, na tung a gik hi! Bethsaida, na tung a gik hi! Ahang bel, noute sunga thillamdang ka hihte Tura leh Sidona kihih hileh, sawtpi-in saiip puan silha vut khu in lungheita ding uhi. 14 Ahihhangin, thukhen ni chiangin noute thuak sangin Tura leh Sidon thuak a phadawm zaw ding hi. 15 Nang Kapernaum, van suna tawisangin na om a, Pathian in khukthuk donga hon laikhesuk ding ahi aw! 16 Noute' thu ngai nuam mi peuhmah, ka thu ngai nuam ahi. Noute hon nolh mi peuhmah kei hon nolh ahi. Kei hon nolh mi peuhmah, kei hon Sawlpa nolh ahi, a chi hi. 17 Tua 70-te lungnuam mahmahin hong tungkik uh a: Toupa, na mina dawite nangawn ka thuthu ua om uh eive! a chi uhi. 18 Ama'n amaute kiang ah: Vaan apan khawphia banga Setan kesuk ka mu. 19 En un, gulte leh aikamte khea chil nading leh melmapa' vangletna khempeuh tunga vualzawh nading thuneihna kon pia a, bangmah in noute hon hihna kei ding. 20 Ahihhangin, na thuthu ua khate a om manun lungnuamin kipak kei un. Na minte uh vantunga a kigelhtak manin lungnuamin kipak zaw un, a chi hi. 21 Tua hun laitakin, Jesu, Kha Siangthou tungtawnin lungnuamin a kipak mahmah a: Lei leh vaan Toupa ka Pa aw, nang a pilte leh lemtheite apan hiai thilte na seel a, naungekte kianga na lakkhiak manin kon pahtawi hi. Ahi, Pa aw, hibanga hih mah na kipah lam ahi, a chi hi. 22 Tua khitin, Jesu'n nungzuite kiang ah: Ka Pa'n ka khut ah thil bangkim hon pekhia a, Pa loungal kuamah in Tapa kei hon thei kei. Pa zong Tapa kei loungal leh amah ka latsak nopna mi loungal kuama'n a thei kei, a chi hi. 23 Tua khitin, Jesu a nungzuite lam ngain a kihei a, a simin: Na muhte uh mu mitte a nunnuam. 24 Noute kon hilh ahi: Kamsangte leh kumpi tampite'n na muhte uh mu nuam napi-in a mu kei uh. Na zakte uh za nuam napi-in, a za kei uh, a chi hi.
Samari Mihoih
25 Ngai dih, khatvei danthei mi khat Jesu ze-et dingin a ding a: Sinsakpa, tangtawn hinna luah dingin bang ka hih ding kisam hiam? a chi hi. 26 Jesu'n a dawng a: Dan ah bang kigelh ahia? Bangchi'n na sima eita? a chi hi. 27 Ama'n a dawng a: Toupa na Pathian, na lungtang khempeuh leh na hinna khempeuha na it ding ahi. Amah na thahatna khempeuh leh na lungsim khempeuha na it ding ahi. Tua baan ah, nang na ki-it banga na veng na pamte na it ding ahi, chi-in, a chi hi. 28 Jesu'n a dawng a: A diktakin na dawng hi. Tua bangin hih in, hi leh, na hing ding hi, a chi hi. 29 Ahihhangin, amah kidiktangsak nuamin Jesu kiang ah: Ahih leh ka veng ka pam kua ahia le? a chi hi. 30 Jesu'n a dawng a: Mi khat, Jerusalem apan Jerikho zuanin a paisuk a, suamhatte a tuak hi. Amaute'n a puansilhte a sut uh a, a hihliamgawp uh a, si dektakin a taisan uhi. 31 Tua laitakin, siampi khat tua lampi ah a paisuk a, amah a muh takin lehlam ah a pel hi. 32 Tua mah bangin, Levi mi khat tua lai ah hong pai a, amah a muh takin lehlam ah a pel hi. 33 Ahihhangin, Samari mi khualzin khat amah kiang hong tung a, amah a muh takin a lainat mahmah hi. 34 Amah a vanaih a, a liammate sathau leh grepzu a buak a, a tuamsak a, a gan tunga tuangsakin khualbuk ah a pua a, a kemta hi. 35 A zing chiangin, sumtang dinari nih a lakhia a, khualbuk neipa a pia a: Amah na kem inla, kong paikik chiangin na senbeh khempeuh kon dinkik ding, a chi hi. 36 Tua suamhatte tuakpa adingin, tua mi thumte lak ah a kua pen a veng a pam hi dingin na ngaihsuna le? a chi hi. 37 Tua danthei mi in a dawng a: Amah tunga zahngaihna nei pen, a chi hi. Tua a chih takin, Jesu'n amah kiang ah: Pai inla, tua bangin vahihta in, a chi hi.
Mari leh Martha
38 Jesu leh a nungzuite a pai uh a, khua khat hong tung uhi. Tua ah Martha kichi numei khat in a inn ah amah a nazintun hi. 39 Martha in Mari kichi sanggam numei khat a nei hi. Mari bel Jesu' khebul ah a tu a, a thugen a ngai hi. 40 Ahihhangin, Martha bel nekbawl nasep a thait mahmah hi. Ama'n Jesu a vanaih a, a kiang ah: Toupa, ka sanggamnu'n nekbawl nasep hon khiat phamawh salou na hi maw? Hon huh dingin hilh dih ve, a chi hi. 41 Jesu'n a dawng a: Martha, Martha, thil tampi na awlmawh a, lungbuai na hi. 42 Thil khat kia kul ahi. Mari in tua tan hoih a teel laksak ding ahi kei, a chi hi.
Jesu' Sinsak Thumna
1 Jesu mun khat ah a thuum a, a thuum khitin, a nungzuite khat in a kiang ah: Toupa, Johan in a nungzuite a sinsak bangin, koute zong thuum dan hon sinsak ve, a chi hi. 2 Ama'n amaute kiang ah: Na thuum chiangun, hibangin thuum un: Vantunga om koute' Pa, na min kisiangthousak hen. Na kumpigam hong tung hen. Na deihlam vantunga a kihih bangin, leitung ah koute hon hihsak in. 3 Koute' taksap nisim an tuni'n hon pia in. 4 Koute'n zong ka leibate uh ka ngaihdam bangun, ka khelhnate uh hon ngaidam in. Ze-etna sung ah hon piilut kenla, giloupa apan hon hukhe zaw in, chi un, a chi hi.
Thuum Kuhkalna
5 Ama'n amaute kiang ah: Noute laka khat peuh in lawm khat a nei chi ni. Amah zankhangin a lawm kiang ah a vapai a: Lawm aw, tanghou beu thum hon leitawisak in. 6 Ka lawm khat hong khualzinin hong tung a, a maia lui ding bangmah neilou ka hi, a chi hi. 7 A lawm in inn sung apanin: Hong hihbuai dah in. Kong lah kikalhkhinta a, ka tate lah ka kianga lumta uh a, hong thou a, tanghou hong pe thei lou hi'ng, a chi hi. 8 Noute kon hilh ahi. Lawm ahih manin, vathouin tanghou vape kei mah leh, tua mipa'n kisuanglah lou hiaia a nget teitei manin, vathouin a deih zah a vape ding hi. 9 Tua bang ahih manin, noute kon hilh ahi: Ngen un, piak na hi ding uh. Zong un, na mu ding uh. Kiu un, honsak na hi ding uh. 10 Ahang bel, a ngen peuhmah in ngah ding a, a zong peuhmah in mu ding a, a kiu peuhmah kihonsak ding ahi.
Pa Hoih Gentehna
11 Noute laka pa kuapeuh, a tapa in tanghou hon ngen leh, kua'n ahia suang pe ding? 12 Ahih kei leh, ngasa hon ngen leh, kua'n ahia gul pe ding? Ahih kei leh, aktui hon ngen leh, kua'n ahia aikam pe ding? 13 Migilou noute nangawn in na tate uh thawnpiak hoih piak dan thei hi ve uchin, vangtunga om na Pa un a ngente kiang ah Kha Siangthou pe tawk lou ding a maw? a chi hi.
Jesu leh Beizibub
14 Tua laiin, Jesu'n pautheilouhna dawi khat a hawlkhia hi. Tua dawi a paikhiak takin, tua pautheiloupa a pautheita a, mipite'n lamdang a sa mahmah uhi. 15 Ahihhangin, amaute laka pawlkhatte'n bel: Ama'n dawite' kumpipa Beizibub pansana dawite hawlkhia eive, a chi uhi. 16 Midangte'n lah, amah ze-etin, van apan chiamtehna lamdang amah a ngen uhi. 17 Jesu'n amaute' ngaihsut a thei a, amaute kiang ah: Kumpigam koipeuh zong a kilangkhen leh, a mangthang hi. Innkuan khat peuh zong a kilangkhen leh a puk hi. 18 Setan zong amah leh amah kidou leh, a kumpigam bangchi'n a ding thei dia? 19 Ke'n Beizibub pansana dawite hawlkhia na hita leng, na tate un kua pansana hawlkhia hi ding uh eita? Tua hanga, noute tunga thukhena pang ding ahi ve ua. 20 Ahihhangin, ke'n Pathian' khutzung zanga dawite hawlkhia hi vengin, Pathian' kumpigam in noute hon naihta, chihna ahi. 21 Pasal hat in galvan bukim tawia a innpi a ven leh, a neih a lam a bit hi. 22 Ahihhangin, amah sanga hatzaw mi dang hong pai a, amah a zawh chiangin bel, a muan mahmah a galvan a sut a, a gallak sumte a hawmzak hi. 23 Kei' lama pang lou peuhmah kei hon dou ahi a, hon lakkhawmpih lou peuhmah a thehzak mi ahi. 24 Mi khat sung apan dawi nin a paikhiak khitin, tawlngak nading zongin a keuna mun khawng ah a vakvak a, tawlngak nading a mu kei. Tuachi-in ama'n: Ka nutsiatsa inn ah kiknawn mai ning, a chi hi. 25 Tua banga hong kiknawn takin, tua inn phiatsiangsa leh hoihtaka kepin a mu hi. 26 Tua khitin a vapai a, amah sanga gilouzaw kha sagih hon tonpih a, tua inna lutin a teeng uhi. Tua mipa' omdan nanung, a omdan masa sangin a sezaw tham hi, a chi hi. 27 Jesu'n hiai thu a gen laiin, mipi laka numei khat a kikoukhia a, amah kiang ah: Nang hon paai sul nunnuam hi nah e! Nang hon vak nawite nunnuam hi nah e! a chi hi. 28 Ama'n a dawng a: Pathian thu za a, zuite mi nunnuam ahi zaw, a chi hi.
Jona Chiamtehna
29 Mipite tarn semsem hong paikhawm laiun, Jesu'n: Tulai khang, khang gilou ahi. Chiamtehna lamdang a ngen uh, ahihhangin, kamsang Jona chiamtehna ahihna loungal, chiamtehna bangmah piak ahi kei ding. 30 Ninevi khua mite adinga Jona, chiamtehna ahih bangin, Mihing Tapa zong hiai khang adingin chiamtehna ka hi ding. 31 Thukhen ni chiangin, Simlam Kumpinu tulai khanga mite kiang ah a ding ding a, tulai khanga mite mawh a tangsak ding. Ahang bel, amah Solomon' pilna ngai dinga leimong apan hong pai hiven. Ngai un, Solomon sanga lian zaw mi khat hiaia ding ahi. 32 Thukhen ni chiangin, Ninevi mite tulai khanga mite kiang ah a ding ding uh a, tulai khanga mite mawh a tangsak ding uh. Ahang bel, Jona' thugen za-a Ninevi mite kisika lunghei uh hive'n! Ngai un, Jona sanga lian zaw mi khat hiaia ding ahi.
Pumpi Meivak
33 Kuama'n meivak de-in, a kimu lou dingin a sel kei a, lawh peuh a khuhkhum sam kei. Innsunga hong lutte'n a vak a muh theih dingun, meivak tunna ah a tung zaw hi. 34 Pumpi adinga meivak bel mit ahi. Na mit a chidam leh, na pumpi a vekpi-in a taangsuak ding hi. Na mit a chidam kei leh bel, na pumpi a vekpi-in a mialsuak ding hi. 35 Tua bang ahih manin, nangma' sunga vak om pen mial a hih louh nadingin pilvang in. 36Na pumpi vaka dim a, a mialna mun om lou a hih leh, meivak taangpha in nang adinga khua a vaksak bangin, na pumpi zong a vekpi-in a vaksuak ding hi, a chi hi.
Farisaite' Tunggikna
37 Ama'n thu a gen laiin, Farisai khat in amah tawh an nekhawm dingin a chial hi. Amah a vapai a, an umin a tu hi. 38 Tua ah, annek ma-a a kisil masak louh Farisaipa'n a muh takin lamdang a sa hi. 39 Ahihhangin, Toupa'n amah kiang ah: Nou Farisaite'n ahih leh, nou leh kuang khawng a pawlam na sil uh a, a siangin na ngai uh, na sunglam uh bel, deihgawlna leh lungsim siatna-a dim ahi ve. 40 Nou mihaite aw, a pawlam bawlpa'n a sunglam zong bawl hilou maw? 41 Ahihhangin, sunglama na neih bangbang uh gentheite adingin zahngaihna thil hih le uchin, nou adingin bangkim a siang suak ding hilou maw! 42 Farisaite aw, na tung uh a gik hi! Pudinate, lengmaselte leh anteh louhing namkim sawma khat na pia uh a, dika vaihawmna leh Pathian' itna na limsak kei uh. A dangte hih lou tuan louin hiaite ahi na hih ding uh. 43 Farisaite aw, na tung uh a gik hi! Sunagog khawng ah tutphah hoihpente na lunggulh uh a, sumsinna mun khawnga chibai buk na thupingaih uhi. 44 Dan sinsakte leh Farisai lepchiahte aw, na tung uh a gik hi: Hankhuk chiamteh louh, a tunga mi paipai napi-a a phawk louh uh bang na hi uhi, a chi hi.
Dantheite' Tunggikna
45 Danthei mi khat in a dawng a, amah kiang ah: Sinsakpa, hiai thute na gen, koute zong hon zahlaksak na hi, a chi hi. 46 Jesu'n amah kiang ah: Nou dantheite, na tung uh a gik hi! Puakgik puak zawhlouh dingpi mite na suan uh a, noute'n lah khut meleng nangawnin na khoih nuam kei uh. 47 Na tung uh a gik hi! Kamsangte' hansuangte na dawh uh a, amaute lah na pu na pate uh thah ahi lim uh a! 48 Na pu na pate uh thilhih na lemsakpihna uh hi lei lou maw! Amaute'n tua kamsangte that uh a, noute'n tua kamsangte' hansuangte dawh zel hive uchin. 49 Tua bang ahih manin, Pathian' pilna in: Amaute kiang ah kamsangte leh sawltakliante ka sawl ding a, amaute a na hawlmang ding uh a, a na that ding uh, chi-in a na gen hi. 50 Tua bang ahih manin, leitung siam chil apan kamsangte' sisan kisuah khempeuh, tulai khanga mite tunga mawh man kisik ding ahi. 51 Tuate bel, Abel' sisan kisuah apan maitam leh munsiangthou kala mangthangpa Zekharia' sisan kisuah donga sisante ahi. Ahi, tua sisan kisuahte khempeuh mawh man, tulai khanga mite tunga kisik ding ahi, chih noute kon hilh ahi, 52 Nou dantheite na tung uh a gik hi! Noute'n pilna kong honna chabi na pawmang uh a, noute lah lut nuam louin, a lut nuamte na dai uh, a chi hi. 53 Tua baan ah, ama'n amaute kianga hiai thute a gen laiin, dantheite leh Farisate'n amah douin a pang uh a, thil tampi tawh kisaiin thu a lehdot dot uhi. 54 Amah ngawh nading zong a, a thu gena mat sawma thangsiah ahi nilouh uhi.
Lepchiahna thu-a Vauhilhna
1 Mipi hong paikhawmte a tam mahmah manin, a kiphu mui mui uhi. Jesu'n a nungzuite kiang ah thu a gen masa a: Farisaite' silngou ah kiveng un, tua silngou bel lepchiahna ahi. 2 A kilang lou dinga seel theih bangmah a om kei a, phawkkhiak louh dinga im theih bangmah a om kei. 3 Tua bang ahih manin, miallaka na gen peuhmah uh khawvak ah a kiza ding a, dantan sunggila bilbula a huaua na gen peuhmah uh, inntung khumvuma tangkoupih ahi ding. 4 Lawmte aw, kon hilh ahi: Pumpi that thei a, ahihhanga a nunga hih theih nei nawnloute lau kei un. 5 Ahihhangin, na lau ding uh kon hilh ding. A thah nung nangawna gawtmuna paih theihna vangletna neipa lau un. Ahi, noute kon hilh ahi: Amah lau un. 6 Mi'n paihsa san nihin kawlgit nga a kheng uh hilou maw? Hinapi-in, Pathian in tua kawlgit khat lei zong a mangngilh kei hi. 7 A taktakin, Pathian in na luzang ua samzangte khempeuh zong sim vek sipsip ahi. Tua bang ahih manin, lau kei un. Kawlgit tampi sanga manpha zaw na hi uhi. 8 Noute kon hilh ahi: Mite' maia kei hon gum mi peuhmah, kei Mihing Tapa in zong Pathian' vansawltakte' mai ah ka gum ding. 9 Ahihhangin, mite' maia hon kilepsan peuhmah, Pathian' vansawltakte' mai ah ka kilepsan ding. 10 Ahi, thu kamkhata kei Mihing Tapa hon gensia kuapeuh Pathian in a ngaidam ding. Ahihhangin, Kha Siangthou gensia kuapeuh Pathian in a ngaidam kei ding. 11 Ahi a, sunagog khawng, vaihawmte leh thuneihna tawite' mai khawnga hon kaihlut chiangun, na kihut ding dan uhiam, na gen ding uhiam, lunghimawh kei un. 12 Kha Siangthou in na gen ding uh kilawm a hun takin hon hilh ding ahi, a chi hi.
Ahau Mihai
13 Tua laitakin, mipite laka mi khat in amah kiang ah: Sinsakpa, ka gou hon hawm dingin ka sanggampa hilh ve, a chi hi. 14 Ahihhangin, ama'n amah kiang ah: Mihing aw, noute tunga thukhenpa, ahih kei leh, noute kala thu lem dinga kua'n kei hon sep ahia? a chi hi. 15 Tua khitin, ama'n amaute kiang ah: Pilvang unla, deihgawhna apan kiveng un. Mihing damsan zaw neih leh lam hauhna ahi kei, a chi hi. 16 Tua khitin, amaute kiang ah gentehna khat a gen a: Ahau mi khat' lou in gah a suah mahmah a, 17 a hong hauh takin, hong kingaihsun a: Ka buh koih nading buhbuk kiching nei nawn lou ka hih chiangin, bang lawh ding ka hita a! a chi hi. 18 Tua bangin ama'n: Hichi-in hih ning e: Ka buhbukte ka phei ding a, a lianzawte ka lam ding a, ka buhte leh ka neih ka lam khempeuh ka koihkhawm ding a, 19 tua khit chiangin, ka kha kiangah: Ka kha aw, kum tampi ading thil hoih tampi na kholkhawmta. Tawlnga hithiat inla, nein dawn inla, nuamtakin om in, ka chi ding, a chi hi. 20 Ahihhangin, Pathian in amah kiang ah: Nang mihai! Tuzanin na kha hon laksak ding ka hi. Tua chiangin, tua neih leh lam na khopte kua'n tangta ding ahia? a chi hi. 21 Ama' adinga neih leh lam khawm a, Pathian lama hau lou mi tua bang ahi ding, a chi hi.
Pathian' Kumpigam Neih Poimawhzawkna
22 Tua khitin, Jesu'n a nungzuite kiang ah: Tua bang ahih manin, noute kon hilh ahi: Na nuntakna utawh kisaiin, bang ne ding, ahih kei leh, na pumpi utawh kisaiin, bang silh ding, chih lunghimawhin patau kei un. 23 Nek leh tak sangin hinna thupi zaw a, silh-leh-ten sangin pumpi thupi zaw hi. 24 Va-akte ngaihsun un. Amaute'n buh lah tuhlou, lah at lou, pang sunga lah kholkhawm lou uhi. Hinapi-a Pathian in amaute vak hi. Tungleng vasate sanga noute manpha zaw tham hilou na hi umaw? 25 Noute kua ahia lunghimawh mana ama' dunglam tong khat lei zong behlap thei? 26 Tua banga thil neuchik nangawn hih theilou na hih nungsang uh, banghanga a dang lunghimawha patau na hi ua? 27 Gamlak lilipakte khandan ngaihsun un. Amaute'n nna sem lou, khau zong khek lou uhi. Ahihhangin, noute kon hilh ahi: Solomon nangawn a thupina pena a kizep hanga, hiai lilipakte khat thupina zaha zep hilou ahi. 28 Tuni-a om a, a zingchianga meikhuka khul ding leltak gamlak loupa bawn Pathian in tua zaha a zep leh, noute silh-leh-ten hon pe zaw tawk lou ding hia, upna neu nei noute aw! 29 Tua bang a hih manin, bang nein bang i dawn dia, chi-in lunghimawh kei un. 30 Zentelte'n hiaite a zong uh. Noute' Pa in hiaite na kul uh, chih a thei. 31 Ahihhangin, Pathian' kumpigam lunggulhin zong le uchin, ama'n hiai thilte hon piak behlap ding ahi. 32 Pawl tawmte aw, noute kianga kumpigam piak ding, na Pa uh kipahlam tak ahih manin, 33 na neihsate uh zuak unla, gentheite adingin zahngaihna thil hih un. Dangka ip lui theilou kibawl unla, guta kuamah in a naih theih louh, nget in a neksiat theih louhna vantung ah a bei thei lou gou kikhol un. 34 Ahang bel, na gou omna peuha na lungtang zong om ding hiven.
Mansa-a Om Kul dan Gentehna
35 Kawng gaksa leh meivak desain om unla, 36 a toupa uh kitenna an kuang luina apan hong pai ding, kong hon kiuh chianga hon pah dinga mansa silate bangin om un. 37 A toupa uh hong pai chiangin amah na ngak gige-a a muh silate mi nunnuam ahi uhi. Noute thutak kon hilh ahi: Amah hong pai chiangin, a kawng a gak ding a, amaute ankuang um dingin a tusak ding a, amah mah in amaute an a pe ding hi. 38 Amah zan ven nihna ah hiam, zan ven thumna ah hiam hong pai ding hita lezong, hibanga mansa-a a muh silate adingin a hoih ding hi. 39 Ahihhangin, hiai thei un: Inn neipa'n guta hong pai ding hun theikhol leh, a kiveng ding a, a inn a luhsak kei ding hi. 40 Tua bang ahih manin, noute zong mansain om un. Na lamet louh hun takun, Mihing Tapa kong pai ding hi, a chi hi. 41 Peter in amah kiang ah: Toupa, hiai gentehna koute ading kia-a na gen hia, ahih kei leh, mi chih adingin? a chi hi. 42 Toupa'n a dawng a: Kua ahia sumkem muanhuai leh pii, a toupa'n a innsung ukpa ding leh a hunhuna innsung mite kianga an pe dinga a seh ding? 43 A toupa hong pai chianga tua bang tak sem a muh sila mi nunnuam ahi. 44 Noute thutak kon hilh ahi: Ama'n tua silapa, a neih a lam tunga thuneiin a koih ding hi. 45 Ahihhangin, sila thulim lou in a lungsung ah: Ka toupa hong tung zok kei nanteh, chi-in sila pasalte leh sila numeite na vua henla, nea dawnin zu na kham leh, 46 a lamet louh ni leh a theih louh hunin a toupa hong tung guih ding a, amah tum nih a suah ding a, upnabeite' mun a pe ding hi. 47 Sila, a toupa' deihlam thei a, kimansa-a om lou, ahih kei leh, ama' deihlama na gamta lou mi in tamveipi sat a thuak ding. 48 Ahihhangin, a toupa' deihlam theilou napi-a satna tham thilte hih mi in bel, tawmchik vei sat a thuak ding. Ahang bel, tampi piaka om mi peuhmah apan tampi mah a kingiat ding a, tampi kepsaka om mi peuhmah apan tamsem a kingiat ding hi.
Nungzuihna Man
49 Kei, leitunga mei tun dinga hong pai ka hi, tuin kuangta leh chi natel ing e! 50 Ahihhangin, baptisna tan ding khat ka nei. Tua a kizawh mateng, ka om nuam lou hina maizen e! 51 Leitunga lem lengsak dinga hong pai hon sa na hi uh maw? Hi lou hiai ka hi. Noute kon hilh ahi. Kilangkhenna omsak dinga hong pai ka hi. 52 Tu-a kipanin, inkuan khata mi nga omte a kilangkhen ding uh. Thum in nih a dou ding a, nih in thum a dou ding a, 53 amaute a kilangneih ding uh. Pa in tapa a langneih ding a, tapa in pa a langneih ding. Nu in tanu a langneih ding a, tanu in nu a langneih ding. Nu in mou a langneih ding a, mou in a lutna nu a langneih ding, a chi hi.
Hunte Theihsiam Poimawhna
54 Tua hunin, ama'n mipite kiang ah zong thu a gen a: tum lama mei kai na muh chiangun: Vuahzu ding eive, na chi pah uh a, hong zu petmah. 55 Sim huih hong nung na theih chiangun: Khua lum ding eive, na chi uh a, khua a lum petmah. 56 Lepchiahte aw! Van om dan leh lei om dan na tuat thei uh a, bangchi dana tu hun om dan tuat thei lou na hi ua? 57 Ahi, banghanga diktattaka noumau mah thu kikhen lou na hi ua? 58 Thukhenpa' maia na langpa tawh na pai laiin, amah tawh kilepna zong teitei in. Tua banga na kileppih kei leh, ama'n thukhenpa' mai ah hon kailut ding a, thukhenpa'n miman mi khut ah hon pe ding a, ama'n suangkul ah hon khum ding ahi. 59 Kon hilh ahi, paisa san khat donga na piak kim sipsip mateng, suangkul apan na suakta het kei ding, a chi hi.
Lungheina
1 Pilat in Galili mi pawlkhatte' sisan, a kithoihna utawh a helsak thu, tua huna tua laia om mi pawlkhatte' sisan, Jesu a hilh uhi. 2 Jesu'n amaute a dawng a: Galili mite, midang teng sanga a khelh zawk man ua, tuabanga thuak hi dingun na ngaihtuah ua hia? 3 A khial zaw tuan kei uh, chih kon hilh ahi. Noute zong kisika na lunghei kei uleh, tua bangin na mangthang vek ding uhi. 4 Ahih kei leh, Siloam innsang chimin a delhlup sawm-legiatte, Jerusalema teeng dang teng sanga a khelh zawk man uh hi dingin na ngaihtuah uh maw? A khial zaw tuan kei uh, chih kon hilh ahi. 5 Noute zong kisika na lunghei kei uleh, tua bangin na mangthang vek ding uh, a chi hi. 6 Tua khitin, ama'n a kiang uah hiai gentehna a gen a: Mi khat in grep huan ah theipi kung khat a suan hi. Tua theipi kunga a gah hong zon takin, a gah khat beek a mu kei hi. 7 Tua khitin, ama'n grep huan kempa kiang ah: En dih, kum thum tak hiai theipi kung ah a gah ka zong a, a gah khat beek ka mu kei. Phuk in. Banghanga mun luah leia om nilouh ding ahia? a chi hi. 8 Ahihhangin, grep huan kempa'n a dawng a: Pu aw, tu kum zong bangmah lawh louin omsak lai in. A kimkot touin lei hoih ka buak lai ding. 9 A gah leh hoih, a gah kei leh bel, tua chiangin phuk na niteh, a chi hi.
Numei Zawngkliai Damsakna
10 Sabbath ni khatin, Jesu'n sunagog khat ah a sinsak hi. 11 Ngai dih, tua lai ah numei khat, kum sawmlehgiat sung zawngkhalna dawi in a mat a om hi. Amah a kul gawp a, a dingtang thei kei hi. 12 Jesu'n tua numei a muh takin a sam a, a kiang ah: Numei, na zawngkhalna apan suahtaksak na hita, chi-in, 13 ama' tung ah khut a nga a, amah a ding-tang thei pah a, Pathian a phat hi. 14 Ahihhangin, Jesu'n Sabbath ni-a mite a damsak manin, tua sunagog ukpa'n lungkim lou mahmahin, mipite kiang ah: Mite'n nna a sep nading nipikal khata ni guk om hi lou maw? Sabbath ni sese louin, tua nite khat peuhin zong hong pai unla, hihdamin om ta unla, a chi hi. 15 Toupa'n amah a dawng a: Nang mi lepchiah aw! Noute tek in na bawngtal uhiam, na sabiltung uhiam, a khihna Sabbath ni-a phei a, tui dawnsak dinga kaikhe zel na hi kei ua hia? 16 Hiai numei zong Abraham' tanu khat hi a, Setan in kum sawmlegiat sung a hen, Sabbath ni-a tua henna apan khah tuak hi mah lou maw? a chi hi. 17 Ama'n hiai a gen takin, a langte khempeuh a maizum uhi. Mipite khempeuh bel thil thupi a hihte khempeuh hangin lungdamin a kipak mahmah uhi.
Ankamtang Gentehna
18 Tua khitin, ama'n: Pathian' kumpigam bang a bang a? Bang tawh ka genteh dia? 19 Mi'n ankamtang a laak a, a huana a pawi bang ahi. Tua ankamtang hong pouin hong khang a, sing lianpi hong suak a, a kahiangte ah tungleng vasate'n bu a sep uhi, a chi hi.
Silngou Gentehna
20 Ama'n a gen kik nawn a: Pathian' kumpigam bang tawh ka genteh dia? 21 Numei khat in silngou a laak a, anvui neel tehna thum, a thawh vek mateng, a laka a phual tua silngou bang ahi, a chi hi.
Kumpigam Lutna Lampi
22 Tua nungin, amah Jerusalem zuana a pai kawmin, khawpite leh khawtate ah a sinsak kawikawi hi. 23 Kua hiam khat in amah kiang ah: Toupa, mi tawmchik kia hotdam hi ding hia? chi-in a dong hi. 24 Ama'n amaute kiang ah: Kongpi kawchika lut sawm teitei un. Ahang bel, mi tampi in tua-a lut a sawm ding uh a, a lut thei kei ding uh, chih kon hilh ahi. 25 Inn neipa hong thou a, kongkhak a khak khit vanglak chiangin, kongkhak pua-a dingin kong na kiu ding uh a: Toupa, Toupa, kong hong hon in, na chi ding uh a, ama'n: Noute hon thei ngei keng. Nong kipatna uh zong thei keng, chi-in hon dawng ding hi. 26 Tua hun chiangin noute'n: Nang tawh nekhawma dawnkhawmte ka hi uh a, ka kongzing khawng uah na sinsak aka, na chi ding uhi. 27 Ahihhangin, ama'n: Ke'n noute hon thei ngei ke'ng. Nong kipatna uh zong thei ke'ng. Diktatlouhna thil hih noute, hon paisan un! hon chihsan ding hi. 28 Abraham, Isak, Jakob leh kamsangte khempeuh Pathian' kumpigama om a, noute mahmah paihkhiaka om na kimuh chiangun, kah leh hagawi a om ding. 29 Suahlam leh tumlam, simlam leh mallam apan mite hong pai ding uh a, Pathian' kumpigam ah a tu ding uh. 30 Ngai un, a nanungpente a masapena pang a, a masapente a nanungpena pang om taktak ding eive, a chi hi.
Jerusalem Kahkhumna
31 Tua ni mahin, Farisai pawlkhat hong pai uh a, amah kiang ah: Herod in nang hon that nuam ahih manin, paikhia inla, hiai apan paimang in, hong chi uhi. 32 Ama'n amaute a dawng a: Pai unla, tua sihal kiang ah: Ngai dih, tuni leh zing chiangin, dawite ka hawlkhe ding a, mite ka damsak ding a, a ni thum ni-in ka tup ka mualsuah ding, chih vahilh un. 33 Bangteng hi leh, tuni, zing chiang leh a zing nawn chiangin zong ka pai zel ding. Ahang bel, Jerusalem pawlam ah kamsang kuamah a sih theih hi lou ahi, a chi hi. 34 Jerusalem aw, Jerusalem, nang kamsangte that a, na kianga hong kisawlte suanga deng! Bangzah vei ahia, akpi in a noute a kha nuaia a opkhum banga na tate opkhum ka tup a, na ut louh! 35 En in, nang thutak kon hilh ahi: Pathian in na innte uh kilawisak ding a hita. Toupa' mina hong paipa mi nunnuam ahi, na chih hun uh hong tun masiah, kei non mu nawn kei ding, a chi hi.
Sabbath Ni thu Sinsakna
1 Sabbath ni khatin amah Farisai makaite laka khat inn ah an ne dingin a lut a, amaute'n hoihtakin a ensim uhi. 2 Ngai dih, tua ah a maitang bawka china mi khat a om hi. 3 Jesu'n dantheite leh Farisaite dongin, amaute kiang ah: Sabbath ni-a mi hihdam a siang hia? a chi hi. 4 Ahihhangin, amaute a dai sipsip uhi. Tua khitin, ama'n tua chinapa a lawng a, a damsak a, a paisakta hi. 5 Tua khitin, amaute dongin ama'n: Noute laka khat peuh in sabiltung khat hiam, ahih keileh, bawngtal khat hiam neiin, Sabbath ni-in kawkhuk khat ah ke leh, tua Sabbath ni-a kaikhe pah lou ding maw? a chi a, 6 amaute'n a dawng thei kei uhi.
Michialte Gentehna
7 Tua michialte'n tutna hoihpente a teel uh, chih ama'n a mu a, amaute kiang ah gentehna khat a gen a: 8 Mi'n kitenna ankuang luina-a hon chial chiangun, tutna hoihpen teel kei un. Noute sanga mi zahtakhuai zaw khattou' chialte lak ah a na om kha ding hi. 9 Tua bang mi na om kha leh, noute hon chialpa hong paiin: Na tutna hiai pa awn in, hon chi leh, maizumtakin tutna niampen na naih a kul phing kha ding hi. 10 Ahihhangin, chiala na om chiang un, pai unla, tutna niampen ah tu un, hi leh, hon chialpa hong pai chiangin: Lawm, tutna hoihzaw ah tutou in, hon chi thei ding hi. Tua hun chiangin, dawhkana ankuang na umpihte' mai ah pahtawina na ngah ding hi. 11 Ahang bel, amah leh amah kipahtawi mi peuhmah, niamsak ahi ding a, amah leh amah kiniamkhiak mi peuhmah pahtawi ahi ding hi, a chi hi. 12 Tua khitin, Jesu'n amah chialpa kiang ah zong: Sun an hita leh, nitak an hita leh, na lui chiangin, na lawmte, na sanggamte, na tanaute, ahih keileh ahau na veng na pamte chial ken. Amaute'n hon chial thuk se ding uh a, ditkhit na hi pah kha ding. 13 Ahihhangin, ankuang na lui chiangin, mizawngte, poihlongte, khebaite, mittawte chial in. 14 Hi leh, mi nunnuam na hi ding. Ahang bel, amaute'n hon thuk zou kei mah le uh, mi diktatte' thawhkikna ah, dit na hi ding, a chi hi.
Ankuanglui Thupi Gentehna
15 Amah tawh dawhkana ankuang umkhawm mi khat in tua thu a za a, a kiang ah: Pathian' kumpigama nea dawn ding mi, mi nunnuam hina mai e! a chi hi. 16 Jesu'n a dawng a: Mi khat in nitak ankuang thupitak a lui a, mi tampi a chial hi. 17 Nitak an nek hun takin, ama'n a silapa khat a sawl a, a michialte kiang ah: Hong paita un, bangkim mansiangta, a chisak hi. 18 Ahihhangin, amaute khempeuh in thukhat satin, paulam a bawl tek uhi. A khatpa'n: Gam khat ka na leikhin phet a, ka vaet teitei kul ahi, hon na ngaisiam dingin kon ngen hi, a chi hi. 19 Midang khat in: Nasem bawngtal tuak nga ka na leikhin phet a, lou ka vakaisak chiamteh dek a, hon na ngaisiam dingin kon ngen, a chi hi. 20 Midang khat leuleu in: Zi ka na neikhin phet a, kong pai theikei, a chi hi. 21 Tua bangin, tua silapa hong pai a, hiai thilte a toupa kiang ah a gen hi. Tua a zaktakin, inntekpa a heh a, a silapa kiang ah: Khawpi kongzing liante leh kongzing neute ah va pai mengmeng inla, mizawngte, mi poihlongte, khebaite leh mittawte hiai ah hon piilut in, a chi hi. 22 Tua khitin, tua sialapa'n: Pu aw, na thupiak bangin ka hihta a, ahihhangin, mun awng lai ahi, a chi hi. 23 A toupa'n tua silapa kiang ah: Lamlian ahte, dai kilkal ahte pai inla, ka inn a dim theih nadingin, mite hon lutsak teitei in. 24 Kon hilh ahi, chialte kuamah in ka nitak ankuang um ken teh, a chi, a chi hi.
Nungzuih Thu
25 Tua nungin, mipi tampi mahmah in amah a zui uhi. Amah a kihei a, amaute kiang ah: 26 Mi kuapeuh, keima kianga hong pai a, a nu leh a pa, a zi leh a tate, a sanggampate leh a sanggamnute ahi, ama' hinna nangawn a huat kei leh, ka nungzui ahi thei kei ding. 27 Mi kuapeuh ama' khros pua a, hon zui lou mi, ka nungzui ahi thei kei ding hi. 28 Ahang bel, noute laka kuapeuh in innsang khat lam nuam taleh, a lam zawh nading nei hina hiam, chih, tu phot a, sut masa lou ding kua ahia om? 29 Tua hi kei leh, a kingak nading suang phumkhin napi-in, a lam zou thei kei ding a, a mute khempeuh in amah a enghou ding uh a: 30 Hiai mipa'n inn lam kipan khemin, a lam zawh theihlouhpi, a chi ding uhi. 31 Ahih kei leh, kua kumpipa ahia, kumpipa dang dou dinga kisa a, amah dou dinga sepaih 20,000 tawh hong kuanpa, ama'n sepaih 10,000 tawh tuak ngam ding hiam, chih, tu a, ngaihsun vengveng masa lou ding? 32 Tua banga a tuah ngam kei vanglak leh, a langpa pen gamlapi-a a om laiin, kilemna ngen dingin palai a sawl ding hi. 33 Tua mah bangin, noute laka kuapeuh, a neih bangkim nuse lou mi zaw, ka nungzui ahi thei kei ding. 34 Chi a hoih a, ahihhangin chi in a alna mansuah leh, bangchi alsak kik thei mawk ding na hi ua oi? 35 Lei ading hita leh, ekvum ading hita leh, a kimanna om nawn lou a, mite' paih maimai ding loungalin a phatuam nawn kei hi. Zak nading bil nei peuh in zata hen! a chi hi.
Belam Mang Gentehna
1 Tua nungin, siahdongte leh mikhialte khempeuh in, ama' thu ngai dingin, amah a zui uhi. 2 Farisaite leh Dan sinsakte bel, a phun uh a: Hiai mipa'n mikhialte a saang a, amaute tawh nekhawmin a takhawm, a chi uhi. 3 Ama'n amaute kiang ah hiai gentehna a gen a: 4 Noute laka mi khat in belam 100 neiin, khat mansuah leh, 99-te mun khata nusia a, a mansuah khat pen a muhkik mateng zong lou ding mi bangchi mi hi ding ahia? 5 Ama'n tua belam khat mang a muhkik takin, kipak luain a liangkou ah a pua hi. 6 Inn hong tun takin, a lawmte leh a veng a pamte a samkhawm a: Hong kipahpih un, a mangsa ka belam mukikta hi'ng! a chi hi. 7 Noute kon hilh ahi: Tua mah bangin, kisika lunghei nading neilou midiktat 99-te tung ah sangin, mikhial khat kisika lunghei tung ah, vantunga lungnopna lianzaw ding hi.
Sumtang Mang Gentehna
8 Ahih kei leh, numei kua ahia, ngun dangka drakma sawmkhat nei-in khat mansuah leh, a muhkik mateng meivak de-a inn sung teng phiata taimataka zong lou ding? 9 Ama'n tua dangka tang khat mang a muhkik takin, a lawmte leh a veng a pamte a samkhawm a: Hong kipahpih un, ka dangka tang mansuah mukikta hi'ng! a chi hi. 10 Tuamah bangin, mikhial khat kisika lunghei tungah Pathian' vansawltakte omna ah lungnopna om hi, chih noute kon hilh ahi, a chi hi.
Tapa Mang Gentehna
11 Tua baan ah, ama'n: Mi khat in tapa nih a nei hi. 12 Tua tapate laka a nauzaw pen in a pa kiang ah: Pa, gou ka tan ding zah hon pia in, a chi hi. Tua bangin a pa'n a tapate kiang ah a neih a lam a hawm hi. 13 Tua nung sawt louin, tapa nauzaw pen in a tan gou teng a lakhawm a, gam gamlapi ah a zinta hi. Tua ah nuamtat luain, a neihsa khempeuh a mawk zatbei hi. 14 Tua banga a neihsa khempeuh a zatbei khitin, tua gam ah kial nasetak a kia a, tasamin a omta hi. 15 Tuachi-in, amah a pai a, tua gam mi khat a bel a, tua mipa'n a loua vok an pe dingin a sawl hi. 16 Vok nek behawng khawng neka vah ding a lunggulh mahmah a, kuama'n lah bangmah a pe kei hi. 17 Ahihhangin, amah hong kiphawkkhia a: Ka pa kianga kithalawh silate, nek ding an kiching leh khamval ding nei a tamtam tawh, kei lah hiaia puksi ding hita'ng! 18 Ka thou ding a, ka pa kiang ah ka pai ding a, a kiang ah: Pa aw, vaan Pathian tung ah leh nangma' mai ah ka khialta. 19 Na tapa chih taak ka hi nawn kei. Na kianga kithalawhte khat bangin hon bawl in, ka chi ding, a chi a, 20 a thou a, a pa kiang ah hong kik hi. Gamlapi-a a om laiin, a pa'n a na mu a, a lainat mahmah a, a vatai a, a ngawngkawi a, a tawp hi. 21 Tua tapa in amah kiang ah: Pa aw, vaan Pathian tung ah leh nangma' mai ah ka khialta. Na tapa chih taak ka hi nawn kei, a chi hi. 22 Ahihhangin, a pa'n a silate kiang ah: Kumpipuan hoihpen hon la unla, amah silhsak unla, a khut ah zungbuh bunsak unla, a khe ah khedap bunsak un. 23 Bawngnou vakthau hiai ah hon la unla, gou un. Nein nuamsatakin om ni. 24 Hiai ka tapa sisa hong hingkik ahi. A mangsa kimukik ahi, a chi hi. Tua bangin nuamtakin a om panta uhi. 25 Tua laiin, a tapa uzaw pen bel, lou ah a om hi. Amah hong pai a, inn hong tun dektakin, tumging leh lam husa a za hi. 26 Ama'n a silate khat a sam a, bang thil hita mai hiam, chi-in a dong hi. 27 Ama'n amah kiang ah: Na sanggampa hong tungta a, na pa'n chidam leh bita a muhkik manin, bawngnou vakthau a gawha ahi, a chi hi. 28 Ahihhangin, tua tapa uzaw pen a heh a, inn sung ah a lut nuam kei hi. A pa hong pusuak a, innsung lut dingin amah a kun hi. 29 Ahihhangin, ama'n a pa kiang ah: En dih! Pa, kum hiai zah sila banga na nna semta ing a, chikmaha na thupiak nial ngeilou hi'ng. Hinapi-a ka lawmte tawh ka nopbawl nading kei nou khat lei zong non piak ngeilouhpi. 30 Tu'n hiai na tapa, kizuakte tawh, na neih na lam teng nemangpa hong tun phetin, bawngnou vakthau na gawh pah vial, a chi hi. 31 A pa'n amah kiang ah: Tapa aw, nang ka kianga om gige chin a, ka neih khempeuh nanga aka hia. 32 Na sanggampa bel a sisa hong hingkik a, a mangsa kimukik hi a, kipaktak leh nuamsataka i om ding mah ahi vaw oi, a chi, a chi hi.
Sumkem Diktatlou Gentehna
1 Tua baan Jesu'n a nungzuite kiang ah: Ahau mi khat a om a, ama'n sumkempa khat a nei hi. Hiai mi in a neih a lam a thelthangsak, chi-in ahaupa kiang ah a hek uhi. 2 Ahaupa'n tua sumkemkpa a sam a, a kiang ah: Hiai na tungthu ka zak bang hita ahia? Na sum sai dan hon pelut in, sumkema pang thei nawn lou ding na hi, a chi hi. 3 Tua sumkempa'n a lungsimin: Bang ka lawhta dia? Ka toupa'n lah sumkepna nna hon laksakta ding a, lei lah tou zou lou ing a, khutdawh ding lah maizum ing a! 4 Ka nna apan tawpsak ka hih chianga mite'n a inn sung ua hon na ngaih theih nadingun hih ding dan thukhentatna ka bawlta, a chi hi. 5 Ama'n a toupa' leibate a banbanin a sam a, a masapen kiang ah: Ka toupa tung ah bangzah na ba a? a chi hi. 6 Leibapa'n: Sathau tehna 100, a chi hi. Sumkempa'n amah kiang ah: Na leibatna lai la inla, kintakin tu inla, 50 gelh in, a chi hi. 7 Tua khitin, sumkempa'n midang khat kiang ah: Nang bangzah na ba a? a chi hi. Tua leibapa'n: Buh tehna 100, a chi hi. Sumkempa'n amah kiang ah: Na leibatna lai la inla, 80 gelh in, a chi hi. 8 Tua sumkem diktatloupa'n piltaka thil ahih manin, tua sumkempa' toupa'n a phat hi. Ahang bel, hiai leitung mite, amau khanga mite tawh a kisaina ua, vaak tate sanga pilzaw uh hiven. 9 Tua bang ahih manin, noute kon hilh ahi. Diktatlouhna sumin lawmte kibawl un. Bangmah na neih louh chiang ua, Tangtawn tenna muna nou hon na ngaih nading uh ahi. 10 Tawmchik tawh kisaia muanhuai mi mah, tampi tawh kisaiin a muanhuai a; tawmchik tawh kisaia diktatlou mi mah, tampi tawh kisaiin a diktat kei hi. 11 Leitung diktatlouhna sum zatna tawh kisaia muanhuai lou hi ve uchin, hauhna dik kua'n hon kemsak ding ahia? 12 Midang' neihsa tawh kisaia muanhuai lou hi ve uchin, kua'n nou neih ding bang hon pe ding ahia? 13 Kuama'n tou nih' nna a semkhawm thei kei ding. Ahang bel, ama'n khat mudah a, khat it ding hiven. Ahih kei leh, khat muang ding a, khat simmawh ding hiven. Pathian' nna leh sum nna na semkhawm thei kei ding uhi, a chi hi.
Pathian' Kumpigam in Huhamna Tuak
14 Farisai sum deihtate'n zong hiai thute khempeuh a za uh a, Jesu simmawhbawlin a kousia uhi. 15 Ama'n bel amaute kiang ah: Mihing' maia kidiktatsakte na hi uh a, ahihhangin, Pathian in na lungtang uh a thei hi. Mihing in manpha a sak pen, Pathian mitmuha kihhuai ahi. 16 Johan chiang dongin, Dan leh Kamsangte a kitangkoupih a, tua hun apanin Pathian' kumpigam tangthupha a kigen a, michih in thaguma a sunga lut a sawm uhi. 17 Ahi, Dan thu-a thaikawi neupen a manthat sangin, lei leh van a manthat ding a baihlam zaw hi.
Kimak Thu
18 A zi ma a, midang kitenpih peuhmah angkawm ahi a, a pasal maksa numei kitenpih peuhmah angkawm ahi.
Ahau Mikhat leh Lazar
19 Ahau mi khat a om a, puan sandup leh puan malngat hoihin a kizem a, nisimin a limlim nea dawnin a om hi. 20 Tua ahaupa' kongpi ah Lazar kichi khutdawh khat a kikoih hi. Amah meima-a pumdim ahi. 21 Ama'n ahaupa' dawhkan apan anneng kiate a lunggulh mahmah hi. Tua kia hilouin, uite hong pai uh a, a meimate hong liak uhi. 22 Tua khutdawhpa hong sita a, vansawltakte'n puain, Abraham' angsung a tun uhi. Tua ahaupa zong hong si a, a kivui hi. 23 Tua ahaupa, gawtmuna a gimthuakna apan a daktou a, gamlapi-a Abraham om leh a angsunga Lazar om a mu hi. 24 Amah a kikou a: Pa Abraham, ka tung ah zahngai inla, Lazar hon sawl in. Ama'n a khuttal muk tuia diahin, ka lei hong hihvotsak hen. Kei hiai meikuanga natna thuaka gim mahmah ka hi, a chi hi. 25 Ahihhangin, Abraham in a dawng a: Tapa, nang na dam laiin thil hoih hoih na tang, chih thei gige in. Tua bangin, Lazar in thil hoih loulou a tang hi. Tu'n bel, amah khamuanin a om a, nang a thuakgimin na om leuleu hi. 26 Hibang teng baan ah, koute leh nang kal ah Pathian' koihkip guam lianpi a om a, hiai apan na kiang hong pai nuamte hong pai thei kei uh a, tua apan koute kiang hong pai nuamte zong hong pai thei kei uhi, a chi hi. 27 Ahaupa'n a dawng a: Tua bang ahih leh, pa aw, ka pa' inkawte kianga Lazar sawl dingin kon ngen hi. 28 Ahang bel, sanggam pasal nga ka nei a, amaute zong hiai natna thuak gimna mun ah hong pai kha mahmah ding uh, a chi hi. 29 Abraham in a dawng a: Amaute'n Mosi leh Kamsangte a nei uhi. Amaute' thu na ngai uhen, a chi hi. 30 Ahaupa'n: Hi lou e, pa Abraham, misite lak apan mi khat amaute kiang ah vapaisak lechin, amaute kisikin a lunghei ding uhi, a chi hi. 31 Ahihhangin, Abraham in amah kiang ah: Mosi leh Kamsangte' thu ngai lou uh hiven, misite lak apan mi thoukik mah leh, amaute a taksangsak thei tuan kei ding uh, a chi, a chi hi.
Khelhna, Upna, Nasep
1 Tua khitin, Jesu'n a nungzuite kiang ah: Kipal-paihnate om lou thei ahi kei. Ahihhangin, kipalpaihna omsak mi tung a gik hi! 2 Mi'n hiai naupang neute laka khat peuh a kipalpaihsak sangin, a ngawng ah buhhek suang khihin, tuipi ah paihlut hileh, amah adingin thil hoih zaw ahi ding hi. 3 Tua bang ahih manin, noute kiveng un. Na sanggam in na tunga a khelh leh, taihilh inla, kisika a lunghei chiangin ngaidam in. 4 Ama'n ni khat sunga sagih vei na tunga a khelh a, na kianga sagih vei hong kik a: Kisikin ka lunghei hi, hong chih chiangin, na ngaidam in, a chi hi. 5 Sawltakliante'n Toupa kiang ah: Koute' upna lianzaw hon pia in! a chi uhi. 6 Toupa'n: Noute'n ankamtang bang upna na neih uleh, hiai singtheimi kung kiang ah: Na kizungkalh inla, tuipi ah na kisuan in, chi le uchin, na thu uh a mang ding. 7 Noute laka kua ahia, sila khat nei a, lou kaisak a, ahih kei leh, belamte chingsak a, tua silapa lou apan hong tun taka: Hong pai inla, ankuang hong um pah in, chi ding? 8 Kisa inla, ka nek ding hon bawlsak inla, ka nek ka dawn khit mateng hon ngak in. Tua khit chiangin, nein dawn in, chi zaw lou ding maw? 9 Silapa'n thupiak banga a sep mana ama' tunga kipahthu gen ding hia? Gen lou e. 10 Tua mah bangin, noute'n zong thupiak banga na sep zawh nung nangawnun: Sila phatuamloute ka hi uh. Ka sep ding mah uh sem ka hi lei uh, chi un, a chi hi.
Miphaak Sawm Damsakna
11 Jerusalem zuanin Jesu a pai a, Samari leh Galili gamte a tawn hi. 12 Khawta khata a lut takin, phaak vei sawm in a na tuak uhi. Amaute gamlapi-a dingin, 13 ngaihtakin a kikou uh a: Jesu, Heutupa aw, ka tung uah zahngai in! a chi uhi. 14 Ama'n amaute a muh takin, amaute kiang ah: Pai unla, siampite kiang ah vakllak un, a chi hi. Amaute tua banga a pai sungun a siangta uhi. 15 Jesu'n a damsakta, chih amaute laka khat in a kitheih takin a kilehkik hi. Aw ngaihtakin Pathian a pahtawi a, 16 Jesu' khebul ah lei si-in a bok a, a tung ah kipahthu a gen hi. Amah Samari mi ahi. 17 Jesu'n: Ka siansak mi sawm hilou maw? Kuate koia om ahi ua le? 18 Hiai gamdang mi loungal, hong kilehkik a, Pathian pahtawi ding kuamah om lou ahi maw? a chi hi. 19 Tua khitin, ama'n amah kiang ah: Thou inla, paita in. Na upna in hon damsak ahi, a chi hi.
Jesu' hong Paikik nading
20 Farisaite'n: Pathian' kumpigam chik chianga hong tung ding ahia? chi-in amah a dong uhi. Ama'n amaute a dawng a: Pathian' kumpigam muhtheiha hong tung lou ahi. 21 Kuama'n: En un, hiai ah a om! chi lou ding a, ahih kei leh, En un, tua ah om, zong chi lou ding ahi. Ahang bel, Pathian' kumpigam noute sunga om hiven, a chi hi. 22 Tua khitin, ama'n a nungzuite kiang ah: Mihing Tapa ka damlai nite khat muh ding na lunggulh hun uh hong tung ding a, ahihhangin, na mu kei ding uh. 23 Mite'n: Amah hiai ah a om! hon chi ding uh. Ahih kei leh, amah tua ah a om, hon chi ding uh. Amaute delh kei un. Zuih zong zui kei un. 24 Ahang bel, van mong khat apan mong lang khat donga khawphia a taangzol bangin, kei Mihing Tapa, keima' ni-a om ding ka hi. 25 Ahihhangin, thil tampi ka thuak masa phot ding a, keima' khanga mite'n hon nolh ding uh. 26 Mihing Tapa kong pai chiangin Noa damlai bangin, thil a om ding. 27 Noa longpi sunga a lut a, tuichimpi hong tun a, mi khempeuh a hihmanthat vek ni dongin, mite'n nein a dawn uh a, zi leh pasal in a kizong uhi. 28 Lot damlai hun zong tua bang ahi. Mite'n nein a dawn uh a, leiin a zuak uh a, a suan uh a, a lam uhi. 29 Ahihhangin, Lot in Sodom a nusiat ni-in, vaan apan mei leh kaat a zu a, amaute khempeuh a hihmangthang hi. 30 Pathian in Mihing Tapa hon latsak chiangin, tua bang ahi ding. 31 Tua ni-in, inntung khumvuma om mi, innsunga van omte tuah dingin kumsuk kei hen. Loua om kuamah in vante la dingin inn lam delh kei hen. 32 Lot' zi thei gige un. 33 Mi ama' hinna humbit sawm peuhmah in a mansuah ding a, a hinna mansuah peuhmah in a humbit ding. 34 Noute kon hilh ahi. Tua zanin lupna khat ah mi nih a om ding a, khat laak a hi ding a, khat nutsiat ahi ding. 35 Numei nih ansuin a om ding uh a, khat laak ahi ding a, khat nutsiat ahi ding. 36 Lou ah pasal nih a om ding uh a, khat laak ahi ding a, khat nusiat ahi ding, a chi hi. 37 Amaute'n a dawng uh a, amah kiang ah: Toupa, koi ah eita? a chi uhi. Ama'n amaute kiang ah: Saluang omna peuh a, musanete kikhawm ding hiven, a chi hi.
Numei Khat leh Thukhenpa Gentehna
1 Tua khitin, lunglel loua thum gige ding sinsaknain, Jesu'n a nungzuite kiang ah, gentehna khat a gen a: 2 Khua khat ah, thukhenpa khat a om a, amah bel Pathian lah lau lou, mihing lah zahtak lou mi khat ahi. 3 Tua khua ah meigong khat a om a, amah tua thukhenpa kiang ah hong pai thithe a: Ka langpa tung ah diktattakin thu hon khensak in, a chi hi. 4 Ama'n bangtan hiam sung a nial a, ahihhangin, a tawptawpin a kingaihsun a: Pathian lah lau lou, mihing lah zahtak lou hi mah leng, 5 hiai meigong in hon buaisak a, phuba ka laksak mai ding. Tua bangin hihsak kei leng, hong pai thithe ding a, hon tawlgawpsak ding! a chi hi, a chi hi. 6 Toupa'n: Tua a diktatlou thukhenpa' thugen ngai dih ua. 7 Pathian in ama' telsa, a sun a zana amah kianga toukoute, diktattaka thukhenna ngahsak tawk lou ding maw? Sawt a hal dia hia? 8 Noute kon hilh ahi: Ama'n diktattaka thukhenna a ngahsak pah ding hi. Ahihhangin, Mihing Tapa kong pai chiangin, leitung ah upna ka mu taktak diam maw? a chi hi.
Farisai leh Siahdong Gentehna
9 Ama'n diktat kisa a, kimuanga midangte simmawh pawlkhat kiang ah hiai gentehna a gen a: 10 Mi nih tempula thum dingin a kuantou uhi. Khat pen Farisai ahi a, a dang khat pen siahdong mi ahi. 11 Farisai pen a dingtou a, ama' tungthu ah hibangin a thuum a: Pathian, mi dang vaua sum laksakte, diktatloute, angkawmte, ahih kei leh, hiai siahdongpa bang ka hih louh manin, na tung ah kipahthu kon gen ahi. 12 Nipikal khatin an nihvei ka ngawl a, ka neih khempeuh apan sawma khat ka pia, a chi hi. 13 Siahdongpa bel gamlapi-a dingin, vaanlam zong en ngamlouin, a awm kitumin a thuum a: Pathian, kei mikhial tung ah zahngai in! a chi hi. 14 Noute kon hilh ahi. A masapen hilouin, hiai mi pen diktansakin inn ah a pai hi. Ahang bel, amah leh amah kingaisang mi peuhmah hihniam hi ding a, amah kingainiam mi peuhmah tawisang hi ding hiven, a chi hi.
Naupangneute Vualzawlna
15 Tua nungin, mite'n a taneute uh Jesu lawn dingin a kiang ah hon paipih uhi. A nungzuite'n hiai a muh takun, amaute a taai uhi. 16 Ahihhangin, Jesu'n tua naupang neute a sam a: Naupang neute ka kianga hong pai ding phal unla, kham kei un. Ahang bel, Pathian' kumpigam hibangte ading ahi. 17 Noute thutak kon hilh ahi: Naupang neute banga Pathian' kumpigam saang lou mi peuhmah, a sung ah a lut het kei ding, a chi hi.
Ahau Vaiha wmmi Khat
18 Vaihawmpa kua hiam khat in amah kiang ah thu a dong a: Sinsakpa hoih, tangtawn hinna ka luah nadingin bang ka hih kul ahia? a chi hi. 19 Jesu'n amah kiang ah: Banghanga hoih hon chi na hia? Pathian kia loungal kuamah mi hoih omlou ahi. 20 Thupiakte na thei vele. Angkawm ken, Tualthat ken, Theihpih taklouin pang ken, Na nu na pa pahtawi in, chihte, a chi hi. 21 Tua mipa'n: Hiaite khempeuh ka tuailai apan ka zuihsa ahita, a chi hi. 22 Jesu'n hiai thu a zak takin, a kiang ah: Thil khat na kisam lai. Na neih khempeuh zuak inla, a sum mizawngte lak ah hawm in, tua hi leh, vantung ah gou na nei ding. Tua khit chiangin, hong pai inla, kei hon zui in, a chi hi. 23 Tua mipa'n hiai thu a zak takin a dah mahmah hi. Ahang bel, amah ahau mahmah khat ahi-a ahi. 24 A dah mahmah, chih Jesu'n a muh takin a kiang ah: Ahaute adingin Pathian' kumpigam sung lut a haksa hi! 25 Ahi, ahau Pathian' kumpigam sung a lut sangin, sangawngsau phim bilvanga a lut paisuak a baihlam zaw, a chi hi. 26 Tua thu zate'n: Tua bang ahih leh, kua hotdama om thei ding ahia? a chi uhi. 27 Ahihhangin, Jesu'n: Mihing adinga thil hi theilou, Pathian adingin hi thei ahi, a chi hi
Nungzuihna Kithamatna
28 Tua nungin, Peter in: En dih, koute'n bangkim nusiain nang kon zui ua! a chi hi. 29 Jesu'n a kiang uah: Noute thutak kon hilh ahi. Pathian' kumpigam hanga a inn hiam, a nu a pa hiam, a sanggampa hiam, a zi hiam, ahih kei leh a tate hiam nusia kuamah, 30 tu huna a leh tampi mu lou a, hun hong tung dinga tangtawn hinna ngah lou ding a om kei, a chi hi.
Jesu' Sih ding, Thawhkik ding Genkholhna
31 Tua khitin, Jesu'n Sawmlenihte a sam tuam a, amaute kiang ah: Ngai un, Jerusalema hawhtou ding i hi a, kei Mihing Tapa tawh kisaia kamsangte'n a na gelhsa khempeuh uh tungkim ding ahi. 32 Zentelte' khut sunga piakkhiak ka hi ding a, hon mawkbawl ding uh a, selphouin hon chilphih ding uh. 33 Tua khit chiangin, hon sat ding uh a, hon that ding uh. Ahihhangin, a ni thum ni-in ka thoukik ding, a chi hi. 34 Ahihhangin, nungzuite'n hiai thute bangmah a theisiam kei uhi. Amaute adingin thil kiseel ahi a, a gente a thei kei uhi.
Mittaw Khat Damsakna
35 Tua nungin, Jesu Jerikho a tun dek kuanin, mittaw khat, lamgeia khutdawhin a na tu hi. 36 Tua mittawpa'n a kianga mipi tampi pai ging a zak takin, bang thu hi hiam, chi-in a kan hi. 37 Amaute'n: Nazareth Jesu'n hong tawn ahi, chi-in amah a hilh uhi. 38 Mittawpa a kikoukhia a: David' Tapa Jesu, ka tung ah zahngai in! a chi hi. 39 A masalama mipi paite'n amah kamsim dingin a taihilh uh a, ahihhangin, amah ngaihsemin a kikou a: David' Tapa, ka tung ah zahngai in! a chi hi. 40 Jesu a khawl a, tua mittawpa a kianga hon paipih dingin thu a pia hi. Amah a hong pai takin, Jesu'n a kiang ah: 41 Nang adingin bang hon hihsak leng na uta eita? chi-in a dong hi. Ama'n a dawng a: Pu aw, khawmuh theih ka ut, a chi hi. 42 Jesu'n amah kiang ah: Khua mutheita in. Na upna in hon damsak ahi, a chi hi. 43 Tua bangin ama'n thakhatin khua a muthei pah a, Pathian phat kawmin amah a zuita hi. Mi khempeuh in amah a muh takun, Pathian a phat uhi.
Jesu leh Zakhai
1 Tua nungin, Jesu Jerikho sung lutin, khawsung tawnin a pai hi. 2 Tua ah, Zakhai kichi, siahdong makai khat a om hi. Amah ahau mi ahi. 3 Ama'n Jesu muh a sawm a, ahihangin, mipite hangin a mu thei kei hi. Ahang bel, amah mi dinniam ahih man ahi. 4 Tuachi-in, amah a matai a, Jesu'n tua lampi hon tawn ding ahih manin, theithek kung ah a na kal hi. 5 Jesu tua mun hong tun takin, a daktou a, Zakhai a mu a, a kiang ah: Zakhai, hong kumsuk meng in, tuni-a na inn-a kinga ding ka hi, a chi hi. 6 Zakhai zong hong kum pah a, kipaktakin Jesu a zintun hi. 7 Ahihhangin, tua mite khempeuh a phun uh a: Mikhial' inn-a kinga dingin a paita ve! a chi uhi. 8 Ahihhangin, Zakhai bel a dingtou a, Toupa kiang ah: En dih Toupa! Ka neih ka lam kimkhat mizawngte ka pe ding a, kuapeuh apan dikloutaka lak na nei hita leng zong, a lehli-in ka din ding, a chi hi. 9 Jesu'n amah kiang ah: Hiai pa zong Abraham' suante khat ahih manin, tuni-in hiai inn ah hotdamna hong tungta. 10 Ahang bel, a mang-thangsa zong a, hondam dinga Mihing Tapa hong pai ka hi him ahi, a chi hi,
Mina Sawm Gentehna
11 Amaute'n hiai thu a zak takun, amah Jerusalem a tun dek tawh, Pathian' kumpigam hong tung pah ding a sa uhi. Tua bang ahih manin, ama'n a kiang uah, gentehna dang khat a gen hi. 12 Ama'n: Mi liana piang mi khat, ama' adinga kumpigam neihna thu vasaang a, hong kik nawn dingin, gam gamlapi ah a zin dek hi. 13 Ama'n a silate laka sawm khat a sam a, mina sawm a pia a, amaute kiang ah: Hiaiin na sumsin un, a chi hi. 14 Ahihhangin, a khua-le-tuite'n amah a mudah uh a, palai a nungdelhsak uh a: Koute hon uka kumpipa-a pang dingin hiai mipa deih kei ung, a chisak uhi. 15 Ama'n kumpigam ukna thu a ngah a, hong kilehkik nawn a, sum a piak silate a kianga sap dingin thu a pia hi. Amaute tek in sumsinna-a bangzah na met uhiam, chih a thei nuam hi. 16 Khatna hong pai a: Toupa, na mina in mina sawm dang lawhkhia e, a chi hi. 17 A toupa'n amah kiang ah: Sila hoih, na hih hoih e. Tawmchik tunga na muanhuai manin, khawpi sawm uk in, a chi hi. 18 A nihna hong pai a: Toupa, na mina in mina nga dang lawhkhia e, a chi hi. 19 A toupa'n amah kiang ah: Nang zong khawpi nga uk in, a chi hi. 20 Sila dang khat hong pai leuleu a: Toupa, hiai ah na mina om. Mainul dialin ka tun a, ka kem khinkhian hi. 21 Ahang bel, thu chilgilpi na hi a, na koih louhpi khawm a, na pawi louhpi zong at mi na hih manin kon laua ahi, a chi hi. 22 A toupa'n amah kiang ah: Nang sila gilou, nangma' kama na thugen mah pansanin na tungthu ka khen ding. Thu chilgilpi ka hi a, ka koih louhpi khawm a, ka pawi louhpi zong at mi ka hi, chih na thei maw! 23 Tua ahih nung, kong pai kik chianga ka sum leh a met ka khop dinga, ka sum a met dinga banghanga na koih lou na hia? a chi hi. 24 Tua khitin, ama'n a kianga dingte kiang ah: A mina laksak unla, mina sawm neipa pia un, a chi hi. 25 Amaute'n: Toupa aw, ama'n mina sawm neikhin eive, a chi uhi. 26 Ama'n a dawng a, amaute kiang ah: Noute thutak kon hilh ahi. A nei mi peuhmah tamsem kipiak behlap ding a, a neilou mi bel, a neihsun nangawn kilaksak ding hi. 27 Ahihhangin, amaute uk dinga kei hon deih lou, ka meima hite hiai ah hon paipih unla, ka mai ah that un, a chi, a chi hi.
Pahtawia Jerusalem Lutna
28 Jesu'n hiai a gen khitin, Jerusalem zuanin ma a kai hi. 29 Oliv Mual kichi mual khat kianga om, Bethfage leh Bethani a tun dektakun, a nungzuite laka nih a sawl a: 30 Na mazawn ua khua ah lut un. Na lut takun, tua ah kuamah tuan ngei nailouhna sabiltung nou khat kikhih na mu ding uh. Suut unla, hiai ah hon kai un. 31 Kuapeuh in: Banghanga suut na hi ua? hon chih chiangun, Toupa'n deihna a neia ahi, chi un, a chi hi. 32 Tua bangin, a misawlte a kipankhia uh a, Jesu'n amaute kianga a gen bangbangin, sabiltung nou kikhih a mu uhi. 33 Tua sabiltung nou a suut takun, a neite'n amaute kiang ah: Banghanga sabiltung nou suut na hi ua? a chi uhi. 34 Amaute'n: Toupa'n deihna a neia ahi, a chi uhi. 35 Tuachi-in, amaute'n tua sabiltung nou, Jesu kiang ah hon kai uhi. Amaute'n tua sabiltung tung ah a puansilhte uh a phah uh a, a tung ah Jesu a tuangsak uhi. 36 Tua banga Jesu a pai laitakin, mite'n a puansilhte uh lampi ah a phah uhi. 37 Jesu, Oliv Mual panga lampi sukpai kipatna hong tun dek takin, nungzui tampi mahmahte'n Jesu' thillamdang hihte mukhinta ahih manun, a kipak uh a, Pathian phatin a awng zuazua uh a: 38 Toupa' mina hong pai Kumpipa a nunnuam hi! Vantung ah lem leeng henla, tungnungpen ah thupina om hen! a chi uhi. 39 Mipite laka Farisai pawlkhat in mipite lak apan Jesu galsapin: Sinsakpa, na nungzuite khouin taai ve oi! a chi uhi. 40 Jesu'n amaute a dawng a: Noute kon hilh ahi. Hiai mite a kamsim uleh, suangte kikoukhe pah ding uhi, a chi hi.
Jerusalem Kahkhumna
41 Amah Jerusalem a tun dekin, tua khawpi a mu a, a kahkhum a: 42 Nang aw, nang! Tuni-in, na lungmuan nading thilte thei lechin maw! Tu'n lah na muh phak louh dinga seel hita ven! 43 Na galte'n na kimkota kulh khawha hon umchip a, taikhiak nading omloua hon koih nite'n hon lap ding ahita ve! 44 Nang leh na sunga na tate, leilak vaivut hon suaksak ding uh ahi. Veha na om ni na theih louh manin, suang khat tunga suang dang kichiangsa-a nutsiat himhim a om kei ding, a chi hi.
Tempul Hahsiangna
45 Tua khitin, Jesu tempul huang sung ah a lut a, tempul huang sunga van zuak leh leia omte khempeuh a hawlkhia a, 46 amaute kiang ah: Ka inn zaw thumna inn kichi ding ahi, chi-a kigelh hinapi, noute'n suamhatte kaw khuk na suaksak uh! a chi hi. 47 Ama'n nisimin tempul ah a sinsak a, ahihhangin, siampi makaite, Dan sinsakte leh, nam makaite'n amah thah a sawm uhi. 48 Ahihhangin, mipite'n ama' thugen a kamkam ua a ngaihkhiak manun, bangmah a hih thei kei uhi.
Jesu' Thuneihna Muanlahna
1 Ni khat, Jesu'n tempula mite a sinsak a, tangthupha a gen laiin, siampi makaite leh Dan sinsakte'n nam makai upate tawh, amah a maituah uhi. 2 Amaute'n a kiang ah: Hon hilh in, bang thuneihna neia hiai thilte hih na hia? Kua'n hiai thuneihna nang hon pia ahia? a chi uhi. 3 Ama'n a dawng a, amaute kiang ah: Ke'n zong thil khat hon dong ning, hon dawng un: 4 Johan' baptisna, vaan apan maw, ahih kei leh, mihingte apan? a chi hi. 5 Amaute a kikum uh a: Vaan apan, chi lehang. Banghanga amah um lou? hon chi se ding a, 6 Mihingte apan, chi lehang lah, mi khempeuh in Johan pen kamsang ahi, chi-a muang uh ahih chiangin, suanga hon deng zel ding uh a, a kichi uhi. 7 A tawpin, amaute'n: Koi apan hiam thei kei ung, chi-in a dawng uhi. 8 Jesu'n amaute kiang ah: Bang thuneihna neia hiai thilte hih ka hi hiam, chih ke'n zong hon hilh kei ning, a chi hi.
Grephuan Neipa Gentehna
9 Tua khitin, Jesu'n mipite kiang ah hiai gentehna a gen a: Mi khat in grephuan a bawl a, lounei mite kiang ah khawhlawh dinein a pia a, sawtpi a zinmangsan hi. 10 Grep gah lawh a hun takin, a khawhlawhte'n grephuan apan gah a piak dingun, grephuan neipa'n a sila khat a sawl hi. Ahihhangin, grephuan khawhlawhte'n tua sila a navua uh a, khutvuakin a paisak uhi. 11 Ama'n sila dangkhat a sawl a, amaute'n tua pa zong a navua uh a, zumhuaipi-in a na bawl uh a, khutvuakin a hawlkik uhi. 12 Ama'n a thumvei nadingin, sila dang khat a sawl leuleu hi. Amaute'n tua pa zong a na liamsak uh a, grephuan apan a lawnkhia uhi. 13 Tua bang teng nungin, grephuan neipa'n: Bang ka hihta dia? Ka tapa it mahmah ka sawl ding. Amah a na muh chiangun, a na zahtak khamawh ding uhia, a chi hi. 14 Ahihhangin, tua grephuan khawhlawhte'n amah a na muh takun, a kikum uh a: Hiai gouluah dingpa ahi. Kisa ni-in, amah that ni, hi leh, a gouluah ding teng eia hi ding ahi, a kichi uhi. 15 Tua bangin, amah grephuan pawlam ah a lawnkhia uh a, a that uhi. Grephuan neipa'n a khawhlawhte bang a lawhta dia le? 16 A hong kuan ding a, tua grephuan khawhlawhte a that vek ding a, midangte kiang ah tua grephuan a pe ding, a chi hi. Amaute'n hiai thu a zak takun: Hibang zaw hi mahmah zen kei hen aw! a chi uhi. 17 Jesu'n amaute a en gemgum a, amaute kiang ah: Ahih leh, hiai banga kigelh bang genna ahia: Innlamte'n a nolh uh suang, a kiu suang poimawhpen hong hita hi, chih? 18 Hiai suang tunga kipalpai peuhmah a kitamkham ding a, a delhkhak peuhmah lah a gawizan ding, a chi hi. 19 Siampi makaite leh Dan sinsakte'n tua hun mahmahin, ama' tunga khut khak a sawm uh a, ahihhangin, amaute dema Jesu'n hiai gentehna gen ahi, chih a thei uh a, mipite a lau uhi.
Siah Piak Thu
20 Tua bang ahih manin, amaute'n amah a taang uh a, mi diktata kibawl khemkhem enkhemite a sawl uhi. Amaute'n bel, ama' kam pau apan mat a, ukpipa' vangletna leh thuneihna khut sunga pelut nuam ahi uhi. 21 Tua bangin, enkhemite 'n amah a dong uh a: Sinsakpa, nang thutak na gen a, na sinsak a, deihsak tuam neilouin thutak tawh kituakin, Pathian' lampi na sinsak, chih ka thei uh. 22 Ahih leh, koute'n Kaisar kianga siah ka piak uh a siang hia, ahih kei leh, sianglou? a chi uhi. 23 Jesu'n amaute' pii lepchiahna a mu a: Banghanga hon ze-et na hi ua? 24 Dinari tang khat hon lak un. A tunga kua lim tuang a, kua min kigelh ahia? a chi hi. 25 Amaute'n a dawng uh a: Kaisar-a, a chi uhi. Ama'n a kiang uah: Tua ahih nung, Kaisar thilte Kaisar pia unla, Pathian thilte Pathian pe ve ua, a chi hi. 26 Taangpi zaka a thugente apanin amaute'n amah a man theikei uhi. Ama' dawnna lamdang a sa uh a, a kamsim maimah uhi.
Thawhkik Nung Thu
27 Tua nungin, Sadukaite pawlkhat, thawhkikna om lou, chi-a nial pawl, Jesu kiang ah hong pai uh a, thu a dong uhi: 28 Sinsakpa, Mosi in koute ading a gelhna ah, pasal khat in a zi sihsan henla, tate nei kei leh, a sanggampa'n tua meigong a kitenpih a, a sanggampa ading chisuante a neihsak ding ahi, a chi hi. 29 Sanggam pasal sagih a om a, a upapen in zi a nei a, tabeiin a sihsan hi. 30 A nihna in tua nu a kitenpih a, tabei mahin a si hi. 31 A thumna in zong tua nu a kitenpih hi. Tua bangin sanggam pasal sagihte'n a kitenpih tek uh a, tabei ngenin a sihsan uhi. 32 Atawptawpin, tua nu zong a si hi. 33 Tua bang ahih manin, sanggam pasal sagihte'n tua nu kitenpih tek uh hi a, thawhkikna ah, a kuape'n zi a hita dia le, a chi uhi. 34 Jesu'n a dawng a: Tu huna mite, zi-le-pasalin a kinei uh. 35 Ahihhangin, hong tung ding huna kihel taak leh misite lak apan thawhkikna-a kihel taaka sehte, zi-leh-pasala kinei lou ding uhi. 36 Si zong si thei nawn lou ding uhi. Ahang bel, thawhkikna tate ahih manun, vansawltakte tawh kibang uhi. Pathian' tapate hita uhi. 37 Loupa bawk kaang thu ah, Mosi in Toupa a sap laiin: Abraham' Pathian, Isak' Pathian, Jakob' Pathian, chi-in a sam a, misite kaihthawh ahi uh, chih a lakta hi.38 Amah a site' Pathian hilou a, ahingte' Pathian hi zaw ahi. Ahang bel, Pathian' mitmuha mi khempeuh hing hiven e, a chi hi.
Jesu leh Dan Sinsakte
39 Tua khitin, Dan sinsakte pawlkhat in a dawng uh a: Sinsakpa, na gen dik mahmah, a chi uhi. 40 Tua nungsang, kuama'n amah kiang ah thu a dong ngam nawn kei uhi. 41 Ama'n amaute kiang ah: Bangchi dana mi'n Mesia, David' Tapa ahi, chi thei uh ahia? 42 David mahmah in Phatnalate Bu ah: Toupa'n ka Toupa kianga: 43 Na melmate na khengakna-a ka bawl masiah ka taklam ah tu in, chi hi, a na chi hi. 44 David in amah, Toupa, a chih ngai leh, bangchi-a a tapa hi thei ding ahia? a chi hi. 45 Tua nungin, mipite zakin, ama'n a nungzuite kiang ah: 46 Dan sinsakte apan kiveng un. Amaute'n puanaktual silha pai a, sumsinna mun khawnga mite' muah a nuamtuam uh. Sunagog sunga tutna poimawh pena tut leh ankuang luina muna zahbawlna tutna khawng a nuamtuam nak uhi. 47 Meigongte' innte a nawmvalh uh a, kibawltawm zokin, thumna saupipi a nei uhi. Hiaite'n mawhtansakna lian zaw a tuak ding uh, a chi hi.
Meigong' Thilpiak
1 Tua khitin, Jesu a dakkhiak leh, ahaute'n sumbawma thawnpiak a khiaklut lai uh a mu hi. 2 Tua baan ah, meigong zawngtak khat in paisa san neuchik chik nih a khiak lai zong a mu hi. 3 Ama'n: Noute thutak kon hilh ahi: Hiai meigong zawngtak in mi dang teng sangin sum a khetam zaw. 4 Ahang bel, hiai mite khempeuh in a hauhleet uapan Pathian ading thawnpiak a pia uh a, ama'n zaw a neih zawhlouh sasain a nuntak nading teng a vekpi-in a pia hi, a chi hi.
Hun Tawpna Chiamtehnate
5 Tua nungin, Jesu' nungzuite pawlkhat in tempul thu genin, suang kilawmpipi leh thawnpiak manphapipi-a a kizep hoih dan a kikum uhi. 6 Ama'n: Hiai thil na muhte uh a hih leh, mi'n hiai suangte, khat tunga suang dang kichiangsawn nuse loua hihchim vek sipsip ding uh ahi. Tua nite hong tung petmah ding ahi, a chi hi. 7 Amaute'n: Sinsakpa, hiai thilte chik chianga hong tung ding ahia? Hiai thilte hong tung dektak, chih chiamtehna bang hi ding ahia? chi-in a dong uhi.
Khrist hong Pai nading Chiamtehnate
8 Ama'n: Kuama'n hon khempuk louh nadingin, pilvang un. Ahang bel, ka min sialin mi tampi hong pai ding uh a: Kei, Mesia ka hi, hong chi ding uh a, a hun hong naita, hong chi ding uh ahi. Tua bang ahih manin, amaute na zui kei un. 9 Ahihhangin, kidou thute, gam buai thute na zak chiangun, lau kei un. Hiai thilte tung masa ding mah ahi. Ahihhangin, tawpna hi pah lou ding ahi, a chi hi. 10 Tua khitin, ama'n amaute kiang ah: Nam leh nam kidou ding a, kumpigam leh kumpigam kidou ding ahi. 11 Mun tuamtuam ah zinling nasetakte a om ding a, kialte a ke ding a, hiite a leeng ding a, vaan apan thil mulkimhuaipipi leh chiamtehna thupitaktak a kimu ding hi. 12 Ahihhangin, hiai teng khempeuh tun main, mite'n noute tung ah khut a kha ding uh a, keima' min hangin hon bawlse ding uh a, sunagog apan hon kaikhe ding uh a, suangkul ah bang hon khum ding uh a, kumpipa' mai ah bang hon tun ding uhi. 13 Ahihhangin, amaute' maia kei non theihpih nading ua hunlem a suak ding. 14 Tua bang ahih manin, bangchi dawn ding, chi-in kingaihsun khol masa kei un. 15 Na melmate un hon nan zawh louh dingun, ahih kei leh, hon sel zawh louh dingun, keima'n kam leh pilna kon pe ding hi. 16 Nu-le-pa, sanggamte leh tanaute leh lawmte nangawn in hon kilepsan ding uh a, noute laka pawlkhatte sihna hon tun ding uh. 17 Keima' min hangin mi khempeuh muhdah na hi ding uh. 18 Ahihhangin, na luzang ua sam zang khat zong a mangthang kei ding. 19 Lungnemtaka kiptaka dingin noute na ki humbit ding uhi.
Jerusalem Hihsiatna
20 Sepaihhonte'n Jerusalem a umchip uh na muh chiangun, a kiloihgawp nading a naita chih thei un. 21 Tua hun chiangin, Judia gama omte mualtung lam ah tai uh henla, khawpi-a omte taikhia uh henla, gama omte khawpi sung ah lut kei uhen. 22 Ahang bel, hiai hun, phulakna hun hi ding a, a kigelhsa khempeuh a tangtunna hun hi ding hiven. 23 Ahihhangin, tua huna gaite leh naunou pomte mulkim huai na maizen in chia! Ahang bel, gam sunga lungzinna thupi om ding a, hiai nam tunga thangpaihna tung ding hiven. 24 Tua hun chiangin, namsaua satlup hi ding uh a, nam teng laka sala kaih hi ding uhi. Zentelte hunte a kim mateng Jerusalem Zentelte sikdena om ding ahi.
Toupa' hong Pai Nihveina
25 Ni leh kha leh aksite ah chiamtehnate a om ding a, leitung ah namte' lungzinna leh mangbatna a tung ding a, tuipite a kihawtin a mau ding. 26 Pathian in vana vangletnate kungsin ding ahih manin, leitunga hong tung dingte ngaihsunin mite lauin a lungtang uh a bahgawp ding. 27 Tua hun chiangin, Mihing Tapa, vangletna leh thupina lianpi tawh, meipi laka kong pai hon mu ding uh. 28 Tua thilte hong tun kipat chiangin, dakkhia unla, entou un, noute' tatna hong naita hi, a chi hi.
Theipikung Gentehna
29 Tua khitin, ama'n amaute kiang ah gentehna khat a gen a: Theipi kung leh singkung teng khempeuh en un. 30 Hong selnou chiangun, nipi hong naita, chih na thei uhi. 31 Tua mah bangin, hiai thilte hong tung na muh chiangun, Pathian' kumpigam a naita, chih thei un. 32 Noute thutak kon hilh ahi: Hiai thilte a tunkim masiah, hiai khang a bei het kei ding. 33 Lei leh vaan a mangthang ding a, ka thute bel bangchi mahin a mangthang het kei ding.
Kiveen Nading
34 Ahihhangin, nuamtatna, zukhamna leh damsung khawsak lungzinna-a na lungtangte uh a dim louh nading leh, tua Ni in hon bingphawn louh nadingin kiveeng un. 35 Leitung maikaiha teengte khempeuh tung ah hiai, thang kisai banga hong tung guih ding ahi. 36 Tua bang ahih manin, a hong tung ding khempeuh na pelh nading uleh, kei Mihing Tapa' maia ding taaka seh na hih theih nadingun, kiveeng unla, thuum gige un, a chi hi. 37 Ama'n sun hun tengin, tempul ah a sinsak a, zan hun tengin Oliv Mual kichi ah a vaom hi. 38 Zing-khangpi-in, a sinsakna ngai dingin tempul ah ama' kiang ah mite hong pai zel uhi.
Juda' Lehbawlna leh Khotkhiatna
1 Paikan-Ankuang kichi, Tanghou Silngou Sawhlouh Ankuang lui hun hong naita hi. 2 Siampi makaite leh Dan sinsakte'n amah thah theih nading lampi a zong uh a, mipite lah a lau uhi. 3 Tua lai mahin, Sawmlenihte laka simtel Iskariot kichi Juda sung ah Setan a lut hi. 4 Tuachi-in, Juda Iskariot, siampi makaite leh tempul veeng makaite kiang ah a hawh a, ama'n amah lehbawl a, amaute' khuta a khot khiak theih ding dan, amaute tawh a kikum hi. 5 Amaute a kipak uh a, sum piak ding a thukimta uhi. 6 Tua khitin, tua bangin amaute thu a chiam a, mipite om louh kala amah lehbawla amaute khuta khotkhiak dan ding hunlem a zong panta hi.
Nitakan Nunung
7 Tuin Paikan Belamnou gawh ni ding, Tanghou Silngou sawhlouh Ankuang lui ni hong hita hi. 8 Jesu'n Peter leh Johan a sawl a, amaute kiang ah: Pai unla, eite'n Paikan Ankuang i um theih nadingin, kisakkholhna vabawl un, a chi hi. 9 Amaute'n: Koi ah vabawl le-ung na deih a? chi-in a dong uhi. 10 Ama'n amaute a dawng a: Ngai un, khawpi na lut chiangun, tuibel pua pasal khat in hon na tuak ding. Ama' lutna inn ah zuilut unla, 11 tua inntekpa kiang ah: Sinsakpa'n: Ka nungzuite tawh Paikan Ankuang ka um nading uh, mikhual inndan koilai ahia? chi-in hon dong, na chi ding uh ahi. 12 Ama'n inndan tungnung lianpi khat, vanzat kim mansa-a om hon ensak ding a, tua ah Paikan Ankuang vabawl un, a chi hi. 13 Tua bangin, amaute a kuankhia uh a, Jesu'n amaute a hilh bangbangin bangkim a vamu uh a, tua ah Paikan Ankuang a vabawl uhi.
Paikan Ankuang
14 A hun hong tun takin, Jesu sawltaklian sawmlenihte tawh Ankuang um in a tu hi. 15 Ama'n amaute kiang ah: Ka thuak ding ka thuak main, noute tawh hiai Paikan Ankuang umkhawm ka lunggulh mahmah ahi. 16 Noute kon hilh ahi. Pathian' kumpigama, hiai a taka a tangtun masiah, hiai ka ne nawn kei ding hi, a chi hi. 17 Tua a chih khitin, tua nou a la a, kipahthu a gen a: Hiai la unla, kihawm un. 18 Noute kon hilh ahi. Pathian' kumpigam hong tun masiah, grepzu ka dawn nawn kei ding hi, a chi hi.
Toupa' Nitak Ankuang
19 Tua khitin, ama'n tanghou a la a, kipahthu a gen a, a balkham a, amaute a pia a: Noute adinga ka piak ka pumpi hiai ahi. Kei non theihgigenaun hiai hih un, a chi hi. 20 Tua mah bangin, nitak an anek khitun, tua nou a la a: Hiai thukhunthakna ka sisan noute adinga ka buakkhiak ding ahi. 21 Ahihhangin, ngai un, kei hon lehbawl a, hon khawng dingpa' khut, kei tawh ankuang sawkkhawmin a om. 22 Mihing Tapa zaw sehsa bangbangin ka pai taktak ding a, ahihhangin, lehbawla hon khawngpa tung a gik hi! a chi hi. 23 Amaute'n bel: Hiai thil hih ding amaute laka a kua pen ahi diam aw, chi-in a kidong panta uhi.
Milian Mithupi
24 Ahihhangin, amaute laka kua liana thupipena ngaih hi ding hiam, chi-a kiselna, amaute lak ah a piang hi. 25 Jesu'n amaute kiang ah: Zentelte' kumpipate, amaute tung ah a kiliansak uh a, amaute tunga thuneihna lekte mah, amaute hoih nading sem, chih ahi uhi. 26 Ahihhangin, noute lak ah zaw tua bang hilou ding ahi. Tua naksangin, noute a lianpen, a naupang pen bangin om hen. A ukpa pen zong sila banga nasempa bangin om hen. 27 Ahang bel, kua ahia liana thupizaw ngaihsun un. Dawhkana tupa maw, ahih kei leh, a an pepa? Dawhkana tupa mah hi lou ding maw? Hinapi-in, kei, noute lak ah an pepa bangin ka om. 28 Ahihhangin, haksatna ka thuak laia hon dinpih lailaite noute na hi uhi. 29 Ahi a, ka Pa'n kei hon piak bangin, kumpigam noute kon pia hi. 30 Tua bel, ka kumpigama ka dawhkana nea na dawn theih nading uh leh, Israel nam sawmlenihte tunga vaihawm a, kumpitutphahte-a na tut theih nading uh ahi, a chi hi.
Peter' Kilepsanna Genkholna
31 Tua baan ah, Toupa'n: Simon, Simon! Setan in buhsep banga hon sep nuam a, nang hon ngen taktak ahi. 32 Ahihhangin, na upna a bah louh nadingin, nang adingin kon thumsakta hi. Kei lama nong kihei kik nawn chiangin, na sanggamte hihkip in, a chi hi. 33 Ahihhangin, Peter in amah kiang ah: Toupa, suangkulh ah leh, sihna dongin zong kon zui ngap, a chi hi. 34 Jesu'n adawng a: Peter aw, kon hilh ahi. Tuzanin, ak khuan main, thumvei non kilepsan ding, a chi hi.
Hong Tung ding Kidouna
35 Tua khitin, ama'n amaute kiang ah: Dangka ipte, kawlzalte leh khedapte keng loua noute kon sawlkhiak laiin, taksap na nei ua hia? a chi a, amaute'n: Bangmah tasam lou, a chi uhi. 36 Ama'n amaute kiang ah: Ahih leh, tuin dangka ip nei in keng unla, kawlzal nei in zong keng unla, namsau neilou in a puansilh zuak henla, lei hen. 37 Ahang bel, amah danbeia gamtate laka simkhawm ahi, chi-a kigelhsa, kei tunga tung teitei ding ahi, chih kon hilh ahi. Kei tawh kisai hiai thilte tangtung ding ahita, a chi hi. 38 Amaute'n: En dih, Toupa, hiai ah namsau nih a om, a chi uhi. Ama'n amaute kiang ah: A kiching ve, chi-in a dawng hi.
Oliv Muala Jesu' Thuumna
39 Tua khitin, amah hong paikhia a, ahih ngeina bangin, Oliv Mual zuanin a paita a, a nungzuite'n a zui uhi. 40 Tua mun a tun takin, a nungzuite kiang ah: Khemna zolna-a na puk louh nadingun thuum un, a chi hi. 41 Amah bel, suanga denphakna tan a vapai tuam a, a khukdin a, a thuum a: 42 Pa aw, na deihlam ahih leh, hiai nou kei apan lakhia in. Ahihhangin, kei deihlam hilouin, nang' deihna bang hizaw hen, a chi hi. 43 Tua khitin, vansawltak khat, vaan apan amah kiang ah hong kilang a, amah a thakhauhsak hi. 44 Amah bel, a lunggim mahmah a, phatuamngai semin a thuum a, a khawul sisan mai lianpipi bangin leilak ah a takkhia hi. 45 Tua khitin, a thuumna apan hong dingkhia a, a nungzuite kiang hong tun takin, amaute dahna hanga tawlgawpa ihmuin a mu hi. 46 Ama'n amaute kiang ah: Banghanga ihmu na hi ua oi? Thou unla, khemna zolna-a na puk louh nadingun thuum un, a chi hi.
Jesu Matna
47 Ama'n tua banga thu a gen laitakin, ngaidih, mipi tampi hong pai uh a, Juda kichi, Sawmlenihte laka khat in ma hon kai a, Jesu tawp dingin hon naih hi. 48 Ahihhangin, Jesu'n amah kiang ah: Juda, Mihing Tapa lehbawla khatvei tawpa hon khawng ding na hi maw! a chi hi. 49 Ama' kimkota omte'n thil hong tung ding a muh takun, amah kiang ah: Toupa, namsauin ka sat ding uam? a chi uhi. 50 Amaute laka khat in siampilian' silapa a sat a, a taklam bil a satkhia hi. 51 Ahihhangin, ama'n a dawng a: Tua tengin hunsak un, a chi hi. Ama'n tua silapa' bil a lawng a, a damsak hi. 52 Tua khitin, Jesu'n ama' kianga hong pai siampi makaite leh tempul veng makaite leh upate kiang ah: Suamhat hi leng kilawmin, namsaute leh khetbukte tawh nong kuan umaw? 53 Nisima tempula na lak ua ka om laiin lah, ka tung ah khut na lik het kei ua. Ahihhangin, tu hun, noute' hun leh mial vangletna hun ahi-a ahi ve, a chi hi.
Peter' Kilepsanna
54 Tua khitin, tua mite'n Jesu a pummat uh a, siampilian' inn ah a kailut uhi. Peter in bel gamla sim ah a zui hi. 55 Tua huang sung inntual ah, amaute'n meitual a sem uh a, tuin meitual a awi uhi. Peter in zong amaute laka tuin meitual a awi hi. 56 Nungaknou khat in Peter meitual awia tu a mu a, a en vungvung a: Hiai mi zong amah tawh omkhawm ahi tawk, a chi hi. 57 Peter in amah a kilepsan a: Numei, amah thei kei veng aw, a chi hi. 58 A nung zekin midang khat in hong mu a: Nang zong amaute laka mi hi mah teh, hong chi hi. Peter in: Mihing aw, hilou ka hi, chi-in a dawng hi. 59 Dakkal khat khawng nungin, midang khat in kimuangtakin: Hiai mi amah tawh omkhawm hi mah e. Galili mi ahi vele, a chi hi. 60 Peter in: Na thugen ka thei himhim kei, a chi hi. Tua a chih lai mahin ak a khuang pah hi. 61 Toupa a kihei a, Peter a en hi, Peter in amah kianga Toupa' thugen: Akkhuan main thumvei non kilepsan ding, a chih a phawkkhia a, 62 a vapusuak a, khasetakin a kap hi.
Sepaihte' Engbawlna
63 Jesu lentangte'n amah a engbawl uh a, a beeng uhi. 64 Amah a maituam khitun, a maitang a beeng uh a: Kamsang bangin gen ve leh: Kua pen ahia nang hon beeng? a chi uhi. 65 Amah gensiatna thu tampi zong a gen uhi.
Juda Vaihamnpawl maia Jesu
66 Zingkhua hong vak phetin, nam upa Vaihawmpawl, tua siampi makaite leh Dan sinsakte hong paikhawm uh a, amaute mai ah Jesu a kipaipih hi. 67 Nang Mesia na hi hia, koute hon hilh in, a chi uhi. Ama'n amaute kiang ah: Hon hilh mah leng na um kei ding uh. 68 Ke'n noute thu kon dong ding a, non dawng kei ding uh a, khah zong non khah kei ding uh. 69 Tu apanin Mihing Tapa, Pathian' vangletna khut taklam ah ka tuta ding, a chi hi. 70 Tua khitin, amaute khempeuh in: Pathian' Tapa na hi maw le? a chi uhi. Ama'n amaute kiang ah: Na gen bangin hi mah ing, a chi hi. 71 Amaute'n: Bang hanga theihpih mi dang kul lai ding i hia? Ama' kam mahmah i zata vele, a kichi uhi.
Pilat Maia Jesu
1 Mipi tampite, a vekpiun a kisa uh a, Pilat kiang ah amah a paipih uhi. 2 Amaute'n a ngawhna thu uh a gen uh a: Hiai mipa'n Mesia, kumpipa kichi-a ka minam uh a hihsiatna leh Kaisar kianga siah piak a khamna ka thei uh, a chi uhi. 3 Pilat in amah a dong a: Judate' Kumpipa na hi maw? a chi hi. Jesu'n a dawng a: Na gen bangin hi mah ing, a chi hi. 4 Tua khitin, Pilat in siampi makaite kiang leh mipite kiang ah: Hiai mipa' mawhna ka mu kei, a chi hi. Tua khitin, amaute a uang semsem uh a: Ama'n Galili gam apan hiai mun dongin, Judia gam khempeuh ah a sinsak a, mipite a kitomsak, a chi uhi.
Herod' maia Jesu
6 Pilat in Galili kiminlawh a zak takin, amah Galili mi hi hiam, chi-in mipite a dong hi. 7 Tua baana amah Herod uk sung mi ahi, chih a theih phetin, Herod kiang ah amah a paipihsak hi. Tua hun laiin, Herod zong Jerusalema a om laitak ahi. 8 Herod in Jesu a muh takin, a kipak mahmah hi. Ahang bel, ama'n ama' tungthu kigen tampi a zata a, amah muh a na ut gigesa ahi a, ama' chiamtehna lamdang hih bang hiam muh a kilamena ahi. 9 Ama'n amah thu tampi a dong a, ahihhangin, ama'n bangmahin a dawng kei hi. 10 Siampi makaite leh Dan sinsakte a ding uh a, amah ngawhna thu uangtakin a gen uhi. 11 Herod in a sepaihte tawh, amah simmawhbawltakin nuihzabawlnain a zang uh a, kumpipuan a silhsak uh a, Pilat kiang ah a paipihsak kik hi. 12 Tua ni mahin, Pilat leh Herod a kilawmbawl uhi. Tua ma tenga bel, amaute kimelma ahi uhi.
Pilat' maia Jesu
13 Pilat in siampi makaite leh vaihawmte leh mipite a samkhawm a, 14 amaute kiang ah: Mipite helsak, chi-in hiai mi ka kiang ah non paipih uh a, ngai un, noute' maia amah ka etchet nungin, na ngawhna uah a mawhna ka mu kei. 15 Herod in zong a mawhna a mu kei. Ama' kiang ah kon sawl a, hiai mi in sihna khop a hih bangmah a mu kei. 16 Tua ahih manin, amah ka satsak ding a, ka khah ding, a chi hi. 17 Ahang bel, ama'n Ankuanglui ni-a mi khat a khahsak teitei sek mah ahi. 18 Ahihhangin, amaute kituak takin a kikou uh a: Hiai mi hihmangthang inla, Baraba hon khahsak zaw in, a chi uhi. 19 Baraba bel khawpi-a helna bang hiam ziak leh tualthah ziaka suangkul tang ahi. 20 Pilat in bel Jesu khah a ut a, amaute kiang ah thu a gen thak hi. 21 Ahihhangin, amaute a kikou uh a: Amah khros ah kilhlum in! Amah khros ah kilhlum in! a chi uhi. 22 Ama'n amaute kiang ah, a thumvei nadingin: Banghangin maw? Ama'n thil gilou bang a hih-a eita? Amah ah sihna khop bangmah ka mu kei. Tua ahih manin, amah ka satsak ding a, ka khah ding, a chi hi. 23 Amaute'n aw ngaihtaka kikouin, amah khrosa kilhlum pah dingin a phu teitei uhi. Amaute leh siampi makaite' aw in amah a vaudaita a, 24 Pilat in amaute' ngetna banga hih dingin thu a tanta hi. 25 Helna leh tualthahna hanga suangkul tang khah ding a ngetpa uh a khahsak a, Jesu bel amaute' deihna bangin a pekheta hi. Khros Lampi 26 Amaute'n amah a paipih laiun, lampi ah Simon kichi, Kurini mi khat, gam sung lam apan hong pai a man uh a, Jesu' khros a suan teitei uh a, Jesu' nung lam ah a pangsak uhi. 27 Mi tampi in amah a zui uh a, tuate lak ah numei, amah suun a, kahtam loua maute zong a om hi. 28 Ahihhangin, ama'n amaute lam ngain: Jerusalem tanute aw, kei hon kah kei unla, noute leh na tate uh adingin kap zaw un. 29 Ahang bel, mite'n: Chiingte leh ta nei ngeilou suite leh, naungek' tep ngeilouh nawite nunnuam hina mai e, a chih nite uh hong tung ding ahi. 30 Tua hun chiangin, tang leh mualte kiang ah: Hon delhkhum un, a chi ding uhi. 31 Ahang bel, sing hing tunga bawn hibanga hih hi ve-un, a keu bang a kilawh tazen dia? a chi hi. 32 Migilou nih zong amah tawh thah dingin a paipih uhi.
Khrosa Kilhdeenna
33 Amaute, Kalvari kichi mun hong tung uh a, tua ah, khros tung ah Jesu a kilhdeen uhi. Migilou nih zong khros tung ah a kilhdeen uh a, khat a taklam ah, khat a veilam ah a kilhdeen uhi. 34 Jesu'n: Pa aw, amaute ngaidam in. A thilhih uh thei lou uh ahi, a chi hi. Amaute'n aisanin ama' puansilhte a kihawm uhi. 35 Mipi dangte'n a galet uh a, vaihawmte'n a kougawp uh a: Midang bawn a hukhia aka, amah Pathian' teel Mesia a hihleh, amah leh amah kihukhe leh a ke, a chi uhi. 36 Sepaihte zong hong pai uh a, greptui thuk tahin, a mawkbawl uhi. 37 Judate' kumpipa hi vechin, kihukhe tanla! a chi uhi. 38 Ama' lutung zawn, khros tung ah, Grik pau leh Latin pau leh Hebru paua kigelh: HIAI JUDATE' KUMPIPA AHI, chih a kisuang hi.
Migilou Kisika Lungheina
39 Migilou khros tunga kikhaite laka khat in amah a gensia a: Mesia hi vechin, kihukhia inla, koute zong hon hukhia in, a chi hi. 40 Ahihhangin, a dang khat pen in amah a dawng a, a taai a: Pathian nangawn na lau kei-a hia? Mawhtansakkhawma na om thei tanla. 41 Ei zaw a diktak maha gawta om i hi, i thilhih in a lawhkhiak sang i hi lei hi. Hiai mi in bel a diklou bangmah a hih louhpi, a chi hi. 42 Tua khitin, ama'n Jesu kiang ah: Toupa, na kumpigam nong lut chiangin, kei hon thei gige in aw, a chi hi. 43 Jesu'n amah kiang ah: Nang thutak kon hilh ahi: Tuni mahmahin, Paradis ah ka kianga om ding na hi, a chi hi. 44 Dak gukna khawng a hih lai apan dak kuana dongin, gam sung khempeuh ah khimpi hong zing hi. 45 Ni a mial a, tempul dantan puanzak a laizang ah a kek paisuak suk hi. 46 Jesu ngaihtakin kikou a: Pa aw, na khut sung ah ka kha kon kemsak hi, a chi a, a kha a khahta hi. 47 Sepaih zaheupa'n thil hong tung a muh takin: Hiai mi mi diktat a na hi taktak, chi-in Pathian a phat hi. 48 A en dinga hong paikhawm mipite khempeuh in thil kihihte a mu uh a, awm kitumin, a kilehkikta uhi. 49 Ama' meltheihte khempeuh leh Galili gam apan amah zuite gamlapi ah a ding uh a, hiai thilte a gal-et uhi.
Jesu' Kivuina
50 Ngai in, tua khitin, Josef kichi vaihawm mi khat a om a, amah mi hoih leh mi diktat ahi. 51 Hiai mi in amaute' thutanna leh thil hih a thukimpih kei hi. Amah bel, Arimathai kichi Judate' khawpi khata teeng ahi. Amah, Pathian' kumpigam hong tung ding ngak mi khat ahi. 52 Amah, Pilat mai ah a vapai a, Jesu' luang a vangen hi. 53 Ama'n Jesu' luang a lakhia a, puan malngatin a tuam a, suang kikhuak hankhuk khat ah a sial hi. Tua hankhuk bel, kuamah kisial ngei nailouhna ahi. 54 Tua ni Kisakkholh ni ahi a, Sabbath ni kipan dek ahi. 55 Galili gam apan Jesu tawh hong ton, tua numeite'n zong a nungzuih uh a, tua hankhuk leh Jesu' luang kisial dan a vamu uhi. Tua numeite hong kilehkik uh a, gimnamtui leh kinuh sathau a bawl uhi. Tua Sabbath ni-in, thupiak bangin a khawl uhi.
Jesu' Thawhkikna
1 Nipikala ni masapen zingkhangpi-in, tua numeite a gimnamtui bawlte uh tawiin, numei dang kuate hiam tawh, tua hankhuk ah hong hawh uhi. 2 Tua hankhuk apan tua suang kikhukkhesain a mu uh a, 3 hankhuk sunga a lut uleh, Toupa Jesu' luang a mu kei uhi. 4 Hibanga hiai thu a lungzinpih laitakun, ngai in, puan tesolsol silh mi nih, amaute kiang ah hong ding uhi. 5 Amaute a lau mahmah uh a, lei si-in a kun uhi. Tua mi nihte'n, tua numeite kiang ah: Banghanga misite laka mihing zong na hi ua? 6 Amah hiaia om lou ahi, thoukhinta ahi! Galili gama a om laia, noute kianga a thugen thei un. 7 Ama'n: Mihing Tapa, mikhialte khut sunga piakkhiak ka hi ding a, khros ah kilhlup ka hi ding a, ni thum ni-in ka thoukik ding, a chih, a chi uhi. 8 Amaute'n hibanga a thugente a phawkkhe thak uhi, 9 Tua hankhuk apan a kilehkik uh a, sawltaklian sawmlekhatte leh a dangte khempeuh kiang ah hiai thilte a gen uhi. 10 Sawltakliante kianga hiai thilte vagente bel, Magdala apan Mari tawh, Joana tawh, Jakob' nu Mari tawh, amaute tawh omkhawm numei dangte tawh ahi uhi. 11 Sawltakliante' ngaihin a thugente uh tangthu phuahtawm a bang a, a um kei uhi. 12 Tua khitin, Peter a dingkhia a, tua hankhuk lam ah a vatai hi. Kunsuka hankhuk sung a et leh, puan malngatte a tuama omin a mu hi. A kilehkik a, thil hong tung lamdang sain, a sut sut hi.
Emau Lampi-a Jesu' Kilaakna
13 Ngai in, tua ni mahin, amaute laka mi nih, Emau kichi khua khat zuanin a pai uhi. Tua khua bel, Jerusalem apan louching 60 khawnga gamla ahi. 14 Amaute tua thil hong tungte khempeuh genin a kikum uhi. 15 Tua banga kikuma a paupau laitakun, Jesu mahmah in amaute a pha a, amaute tawh a ton hi. 16 Ahihhangin, amah a meltheih louh nadingun, a mitte uh hihvaihin a om hi. 17 Ama'n amaute kiang ah: Na pai kawm ua bang thuthu kikum a, hibanga dahmel na hi ua oi? a chi hi. 18 Amaute laka khat Kleopa kichi pen in a dawng a: Jerusalema mikhual nang kia na hi ding e aw? tulaia thil tungte na theih louh! a chi hi. 19 Ama'n amaute kiang ah: Bang thilte eita? a chi hi. Amaute'n amah kiang ah: Nazareth Jesu tawh kisai thute la'! Amah kamsang hi a, Pathian' mai leh mi khempeuh maia thilhih leh thugena vanglian mahmah ahih dan khawng. 20 Siampi makaite leh ka vaihawmte un amah thah dinga mawhpaih ding leh khrosa kilhlup dinga a piakkhiak dan khawng uh. 21 Koute'n Israel Tankhepa hi dinga amah ka lamet et utawh! Hiai thilte a kihih nung tuni a ni thumni hita eive. 22 Tua baan ah, koute laka numei pawlkhat, zingkhanga tua hankhuka vahawhte'n hon lungzingsak mahmah uhi. 23 Amaute hong kilehkik uh a, ama' luang a muh louh thu uh leh, mengmuhna-a vansawltakte a muh ua, tua vansawltakte'n amah a hingkikta, a chih thu uh hon gen uhi! 24 Koute tawh om mi pawlkhat zong tua hankhuka vahawh uh a, numeite' gen bangbanga va mu uh a, amah lah vamu lou uhi, a chi uhi. 25 Tua khitin, Jesu'n amaute kiang ah: Mihaite aw, kamsangte' gensa khempeuh upna lama ngongte aw! 26 Khrist in hiai thilte a thuak ding mah, tua khit chianga a thupina-a a lut ding mah hilou maw? a chi a, 27 amah tawh kisai Laisiangthou thute khempeuh Mosi laibute leh kamsang laibute apana hilhchianin a suutpih hi. 28 Tua banga a hawh nading uh khua a tun dektakun, amah bel paisuak ding bangin a kibawl hi. 29 Amaute'n amah a khou uh a: Koute kiang ah taam mai ve aw, ni zong tum dekta a, zan hi ding hita hi, a chi uhi. Amah zong amaute tawh khua ah a lutta hi. 30 Hichi hong hi a, amaute tawh an nea a tutkhawm laiin, tanghou a la a, a vualzawl a, a balkham a, amaute a pia hi. 31 A mitte uh hong vak pah a, amah a meltheihta uhi. Amah bel, a muh louh dingun a mangta hi. 32 Amaute thu a kikum I uh a: Lampi-a hon houlimpih a, Laisiangthou thute hon suutpih laiin, i lungtang a vakkuau hilou hia? a kichi uhi.
Jesu' Kilaakna dang
33 Amaute tua hun mahmahin a dingkhia uh a, Jerusalem ah a kilehkik uhi. Sawltaklian sawmlekhatte leh amaute tawh omkhawmte na pai khawmin, a va kimu uhi. 34 Amaute'n: Toupa a thoukik taktak a, Simon kiang ah a kilaak, a na chi uhi. 35 Amaute'n zong, lampi-a a thiltuahte uleh tanghou balkhapna-a amah a meltheih dan uh a gen uhi. 36 Tua banga a gengen lai takun, Jesu mahmah amaute lak ah a hong ding a, amaute kiang ah: Noute tung ah lungmuanna om hen, a chi hi. 37 Ahihhangin, amaute, sikha mu a kisa uh a, a mulkim lua uh a, a lau lua uhi. 38 Ama'n amaute kiang ah: Banghanga hichi patauh na hi ua? Banghanga na lungtang ua muanlahna om ahia? 39 Ka khutte leh ka khete en ve ua, keimah mah ka hi. Hon lawng unla, hon en un. Misisa kha in tua ka neih na muh uh sa leh guhte nei lou ahi, a chi hi. 40 Hiai a gen khitin, a khut leh a khete amaute a lak hi. 41 Amaute lungnuam lua kisa-a, um ngam zawzen loua lamdang a sak laitakun, ama'n: Nek ding an na nei uhia? a chi hi. 42 Amaute'n ngasa em khat leh khuaizu khak khat a pia uh a, 43 ama'n tuate a la a, amaute' mai ah a ne hi.
Tangthupha Gen ding Thupiak
44 Ama'n amaute kiang ah: Noute kianga ka om laia ka gen: Mosi' Dan leh Kamsangte leh Phatnalate sunga kei tawh kisai kigelhte khempeuh a tungkim teitei ding ahi, ka chih hiai thute ahi, a chi hi. 45 Tua khitin, amaute'n Laisiangthou thute a theihsiam theih nadingun, ama'n a lungtang uh a vaksak a, 46 amaute kiang ah: Hibanga kigelh ahih manin, hibanga Khrist in a thuak a, a ni thum ni-a misite lak apan a thawhkik ding mah ahi. 47 Tua bel, ama' mina kisika lungheina leh khelhnate ngaihdamna thu, Jerusalem apan kipana namchih laka a kigen nading ahi. 48 Hiai thilte theihpihte noute na hi uhi.
Jesu' Vankahna
49 Ngai un, ka Pa'n noute hon chiamsa pen noute kianga hon sawl ding ka hi. Ahihhangin, tunglam apan vangletna tawh thopna na ngah mateng uh, Jerusalem ah taam tadih un, a chi hi. 50 Tua khitin, ama'n Bethani khua dong amaute a tonpih a, banzakin amaute a vualzawl hi. 51 Tua baan ah, hichi hong hi a, ama'n amaute a vualzawl laitak mahin, amaute apan lakkhiak leh vana piitouhin a omta hi. 52 Amaute'n amah a bia uh a, lung-nuamtakin Jerusalem khua ah a kilehkikta uh a, 53 tempula Pathian phat leh pahtawiin a om gige uhi. Amen.
Khrist' Pathianna
1 Chilin Thu a om a, tua Thu Pathian tawh a omkhawm hi. Tua Thu Pathian ahi. 2 A chilin amah, Pathian tawh a omkhawm hi.
Khrist-a Hinna Vaak
3 Ama' tungtawna thil bangkim kisiam ahi a, amah pangloua kisiam bangmah a om kei hi. 4 Amah ah hinna a om a, tua hinna mihingte' vaakna ahi. 5 Tua vaak miallak ah hong taang a, mial in tua vaak a theikhe zou kei hi.
Khrist' maia Mataipa
6 Pathian' sawl mi khat a om a, ama' min Johan ahi. 7 Amah bel, tua vaak tawh kisaia theihpihpa hi dinga hong pai ahi. Ama' tungtawna mi khempeuh in a up theih nading ahi. 8 Amah tak bel, tua vaak ahi kei a, tua Vaak theihpih dinga hong pai ahi zaw hi. 9 Mi chih taanvakpa, tua vaak dik ahi leitunga hong paipa.
Khrist Nolhna
10 Amah leitung ah a om a, leitung khuavannuai ama' siam hinapi-in, leitung khuavannuai in amah a meltheih kei hi. 11 Amah a mite kiang ah hong pai a, ahihhangin, ama' mite'n a na saang kei hi.
Khrist Saangte Pathian' Tate
12 Ahihhangin, amah saangzah zah, ama' min umte mah, Pathian' tate suah theihna hamphatna ama'n a pia hi. 13 Tua bel, piandan ngeina-a sisana piang hilou, sa deihtelna-a piang hilou, pasal' deihtelna-a piang zong hilou, Pathian' suan tate ahi zaw uhi.
Khrist Sa Hong Suahna
14 Tua Thu sa nei mihing hong suak a, eite lak ah a teeng a, ama' thupina i mu hi. Tua thupina bel, Pa' Tapa tang neihsun' thupina ahi a, hehpihna leh thutaka kidim ahi. 15 Johan in amah theihpihna thu a gen a: Ka nunga hong paipa, kei ma-a omsa mawng ahih manin, kei sanga tungnung zaw ahi, chi-a ka genpa hiai ahi, chi-in a tangkou hi. 16 Eite khempeuh in ama' kichinna apanin hehpihna tunga hehpihna nawnsawn i tang hi. 17 Ahang hiai ahi: Dan pen, Mosi' tungtawna kipia ahi a, hehpihna leh thutak bel, Jesu Khrist tungtawna hong tung ahi. 18 Kuama'n chiklai mahin Pathian a mu ngei kei. Pa' angsunga om, Tapa tang neihsun in amah a pulak hi.
Johan' Theihpihna
19 Judate'n Jerusalem apanin siampite leh Levite Johan kiang ah a sawl uh a: Nang kua na hia? chi-in a vadongsak uhi. Tua laitak maha ama'n hibang theihpihna thu na gen ahi. 20 Ama'n imlouin a gen a: Kei Khrist ka hi kei, chi-in a kiphuang hi. 21 Amaute'n: Ahih leh kua na hia? Elija na hi maw? chi-in a dong uhi. Ama'n: Ka hi kei, a chi hi. Amaute'n: Tua Kamsangpa na hi maw leh? a chi uh a, ama'n: Ka hi kei, chi-in a dawng hi. 22 A tawpin amaute'n: Kou hon sawlte ka dawn theih nadingun hon hilh in. Kua na hia? Nang kua kichi na hia? chi-in a dong uhi. 23 Ama'n: Kamsangpa Isai gen banga Toupa adingin lampi tang bawl un chi-a gamdai-gamkeua kikoupa' aw ka hi, a chi hi. 24 Tua mite bel, Farisaite' sawl ahi uhi. 25 Amaute'n: Khrist lah hilou, Elija lah hilou, tua Kamsangpa lah hilou na hih nung banghanga baptis na hia leh? chi-in a dong uhi. 26 Johan in a dawng a: Ke'n bel tuiin ka baptis a, ahihhangin, na lak uah na theih louh uh mi khat a ding hi. 27 Amah ahi ka nunga hong paipa. Kei zaw ama' khedap khaute phei dingin zong ka ching kei hi, a chi hi. 28 Hiai thilte a tunna bel, Johan in a baptisna Jordan lui gala Bethani khua ah ahi.
Khrist Baptis Tanna
29 A zing chiangin, Johan in, Jesu amah lam manawha hong pai a mu a: En un, tua Pathian' Belamnou, leitung khuavannuai' khelhna lamangpa! 30 Ka nunga hong paipa, kei ma-a omsa mawng ahih manin, kei sanga tungnung zaw ahi, chi-a, a thu ka genpa hiai ahi. 31 Keimah tak in amah ka na thei kei a, ahihhangin, tuia baptisa kong paina san bel, Pathian in Israelte kianga amah a latsak nading ahi, a chi hi. 32 Tua baan ah, Johan in hibangin theihpihna thu a gen a: Vantung apanin Kha, vakhu banga hong kumsuk ka mu a, ama' tung ah a omden hi. 33 Tuia baptis dinga hon sawlpa'n: Kua hita leh, Kha hong kumsuk a, a tunga a omdennapa ahi Kha Siangthoua baptis dingpa, chi-in hon hilh kei leh, amah thei lou ding ka hi. 34 Tu'n zaw ka muta a, hiai Pathian' Tapa ahi, chih ka theihpih hi, a chi hi.
Jesu' Nungzui Masate Andru leh Peter
35 A zing chiangin, Johan, ama' nungzuite nih tawh tua mun ah a ding kik uhi. 36 Ama'n Jesu a pailai a en a: En un, tua Pathian' Belamnou! a chi hi. 37 Tua nungzui nihte'n Johan' thugen a zak takun, Jesu a zuita uhi. 38 Jesu a kihei a, amah hon zui amaute a mu a, amaute kiang ah: Bang zong na hi ua? a chi hi. Amaute'n: Rabi, koia kinga na hia? a chi uhi. Rabi chih bel, Sinsakpa chihna ahi. 39 Ama'n a dawng a: Hong pai le uchin, na mu ding uh, a chi hi. Tua bangin, amaute a vapai uh a, ama' kingakna mun a vamu uhi. Tua hun dak sawmna ahita a, ama' kiang ah tua ni a taam uhi. 40 Johan' thugen za a, Jesu zui nihte laka khat Andru ahi. Andru bel, Simon Peter' sanggampa ahi. 41 Andru' thilhih masapen ahih leh, a sanggampa Simon vazonkhiak a, Mesia ka muta uh, chi-a vahilh ahi. Mesia bel, Khrist chihna ahi. 42 Tua khitin, ama'n Jesu kiang ah Simon hon tonpih a, Jesu'n amah a na en a, a kiang ah: Nang Johan' tapa Simon na hi. Kifa chi-a sap na hita ding hi, a chi hi. Kifa bel, Peter chihna ahi.
Filip leh Nathanael
43 A zing chiangin, Jesu, Galili gam zuana paikhiak ding thu a khentat hi. Ama'n Filip a tuak a, a kiang ah: Kei hon zui in, a chi hi. 44 Filip zong Andru leh Peter bangin Bethsaida khaw mi ahi. 45 Filip in Nathanael a mu a, a kiang ah: Mosi in Dan Laibu sunga a tungthu a na gelhpa leh, kamsangte'n zong a tungthu a na gelhpa uh, Nazareth Jesu, Josef tapa ka muta uh, a chi hi. 46 Nathanael in: Nazareth e! Tua khua apanin thil hoih himhim a pawt ngeia hia? a chi hi. Filip in a kiang ah: Hong pai inla, hong en in, a chi hi. 47 Jesu'n Nathanael, ama' lam zuana hong pai a muh takin: En un, hiai ah Israel mi taktak om e. Amah ah taklouhna himhim om lou ahi, a chi hi. 48 Nathanael in a kiang ah: Nang kei bangchi-a hon thei na hia? a chi hi. Jesu'n a dawng a: Filip in nang hong sap main, theipi kung nuaia na om laiin kon muta, a chi hi. 49 Nathanael in tua a zak takin a dawng a: Rabi, nang Pathian' Tapa na hi! Israel Kumpipa na hi! a chi hi. 50 Jesu'n a dawng a, a kiang ah: Theipi kung nuai ah kon muta, kon chih mana um na hi maw? Hiaite sanga thil thupizawte mu ding na hi aw. 51 Nang thutak kon hilh ahi: Vaan kihong a, kei Mihing Tapa tunga Pathian' vansawltakte a suk a tunga kileh mu ding na hi, a chi hi.
Jesu'n Tui Grepzu Suaksak
1 A ni thum ni-in, Galili gama Kana khua ah kitenna a om a, tua ah Jesu' nu zong a om hi. 2 Jesu leh a nungzuite zong kitenna ah chial ahi uhi. 3 Grepzu hong bei takin, Jesu' nu'n amaute kiang ah: Grepzu tasamta uh eive, a chi hi. 4 Jesu'n a kiang ah: Numei, nang lunghimawhna tawh kei bang kisai ka hia? Ka hun tung nai lou ahi, a chi hi. 5 A nu'n tuanvaite kiang ah: Ama' chihchih na mang un, a chi hi. 6 Tua ah, Judate' ngeina dana tuia kisiansuah nadinga kizang suang tuibel guk, litar 80 apan 120 khawng taakna ngen a kitung hi. 7 Jesu'n tuanvaite kiang ah: Tuibelte ah tui sungdim un, a chi a, amaute'n a dim sinsenin a sung uhi. 8 Tua khitin, ama'n: Suakkhe zek unla, nekbawl thusapa kiang ah vatawi un, a chi hi. A chih bangin, amaute'n ahih uhi. 9 Nekbawl thusapa'n tua tui grepzu hong suak a chiam hi. Tua tui suakkhia tuanvaite'n thei mah le uh ama'n koia hong kipan hiam, chih a thei kei hi. Mouneipa a samkhia a, a kiang ah: 10 Midangte'n grepzu chiik hawm masa a, michialte'n a kham chiang ua, a chiik lou deuh hawm uh hi a, nang lah tu dongin a chiik na nei lailai a! a chi hi.
Nungzuite'n Umta
11 Hiai bel, Jesu'n chiamtehna lamdang a hihte laka a masapen ahi. Galili gama Kana khua-a a hih ahi. Hibangin, Jesu'n a thupina a langsak a, a nungzuite'n amah a umta uhi. 12 Hiai nungin, Jesu, a nu tawh, a sanggamte tawh, a nungzuite tawh, Kapernaum ah a hawhsuk a, tua ah, ni tam a taam kei hi.
Tempul Hahsiangna
13 Judate' Paikan a naita a, Jesu, Jerusalem ah a hawhtou hi. 14 Tempul huang sunga bawng, belam leh vakhu zuakte leh dawhkana sumkheka om midangte a mu hi. 15 Ama'n zeepna khau a bawl a, tuain tempul huang sung apan amaute khempeuh, belamte leh bawngte tawh, a hawlkhia a, sumkhengte' sum a sawnbua a, a dawhkante uh a lumlehsak hi. 16 Ama'n, vakhu zuakte kiang ah: Hiai thilte lakhia un! Ka Pa' inn, sumsinna mun suaksak kei un! a chi hi. 17 Tua hunin, na inn adinga ka phatuamngaihna in kei hon negai, chi-a David' gelh, nungzuite'n a phawkthak uhi. 18 Tua khitin, Judate'n a dong uh a, Jesu kiang ah: Hiai thilte na hih ngai leh, na thuneihna kitel nading bang chiamtehna lamdang hon lak ding na hia? a chi uhi. 19 Jesu'n amaute a dawng a: Hiai tempul hihse le uchin, ke'n ni thum sungin ka dingsak kik ding, a chi hi. 20 Judate'n a dawng uh a: Hiai Pathian' tempul lamna hun, kum 46 lut a, nang ni thum sunga dingsak ding maw? a chi uhi. 21 Ahihhangin, ama' gen tempul bel, ama' pumpi ahi nilouh hi. 22 Pathian in amah misite lak apan a kaihthawh takin, nungzuite'n hiai a thugen a phawkkhe thak uhi. Tua bangin, Laisiangthou thu leh Jesu' thugen a umta uhi. 23 Paikan Ankuang lui laia, Jerusalema Jesu a om sungin, chiamtehna lamdang a hihte tampi in a mu uh a, a min a umta uhi. 24 Ahihhangin, ama'n mi khempeuh theitel ahih manin, amaute apan a kikangkoih hi. 25 Mihing lung sunga om a thei a, mihing thu kua' hilh a kul kei hi.
Nikodem Thuhilhna
1 Farisaite lak ah mi khat a om a, a min Nikodem ahi. Amah Juda Vaihawmpawf laka khat ahi. 2 Hiai mi, Jesu kiang ah zankhangin hong hawh a, a kiang ah: Rabi, nang Pathian apan hong pai Sinsakpa na hi, chih ka thei uhi. Pathian' ompih louh mi kuamah in, na hih chiamtehna lamdangte hih thei lou ding hi, a chi hi. 3 Jesu'n a dawng a, a kiang ah: Nang thutak kon hilh ahi: Mi kuapeuh tunglam apan a pianthak kei leh, Pathian' kumpigam a mu thei kei hi, a chi hi. 4 Nikodem in a kiang ah: Mi a upat nungin bangchi'n a piangthak thei dia? A nu' sunga a nihveina luta piang thei ding hia! a chi hi. 5 Jesu'n a dawng a: Nang thutak kon hilh ahi: Mi kuapeuh, tui leh Kha apan a pian kei leh, Pathian' kumpigam a lut thei kei. 6 Sa in sa a piangsak a, Kha in kha a piangsak hi. 7 7 Na pianthak ngeingei ding ahi, kon chih lamdang sa kei ve. 8 Huih a utna lamlam ah a nung a, a ging na za hi. Ahihhangin, koia hong kipan a, koia pai ahia, chih na thei kei hi. Kha apana piang mi peuhmah tua bang ahi, a chi hi. 9 Nikodem in a dawng a, a kiang ah: Bangchi-a hibang thilte om thei ding ahia? a chi hi. 10 Jesu'n a dawng a, amah kiang ah: Nang, Israelte sinsakpa hi napi-a, hiai thilte thei lou na hi maw? 11 Nang thutak kon hilh ahi: Koute'n ka theihsa uh gen ka hi uh a, ka muhsa uh theihpihna thu gen ka hi uhi. Hinapi-in, koute' theihpihna thu na saang kei uh. 12 Ke'n, leilam thilte kon hilh nangawn um lou hive uchin, vanlam thilte hon hilh leng, bangchi up ding na hi ua? 13 Vantunga ompa leh, vantung apan hong kumsukpa, kei Mihing Tapa loungal, kuamah vantung ah a kaltou kei hi. 14 Mosi in gamdai-gamkeua tua gul a khaikang bangin, kei Mihing Tapa kikhaikang ngeingei ding ka hi. 15 Tua bel, kei hon um mi kuapeuh in, mangthang teitei loua, Tangtawn hinna a neih zawk nading ahi. 16 Ahang hiai ahi: Pathian in leitung khuavannuai a it mahmah manin, a Tapa tang neihsun a pia hi. Tua bel, amah um mi kuapeuh in, mangthang teitei loua, Tangtawn hinna a neih zawk nading ahi. 17 Ahang hiai ahi: Pathian in leitung khuavannuai mawhtangsak dinga a Tapa hon sawl ahi kei a, ama' tungtawna leitung khuavannuai hotdam a hih nadinga hon sawl ahi zaw hi. 18 Amah ummi kuamah, Pathian in mawh a tangsak kei hi. Ahihhangin, amah um loumi bel, mawhtangsa ahi. Ahang bel, tua bang mi in Pathian' Tapa tang neihsun' min um lou ahih man ahi. 19 Thukhenna hiai ahi: Leitung khuavannuai ah vaak hong tungta a, ahihhangin, mite'n a thilhih uh gilou ahih manin, tua vaak sangin mial a itzaw uhi. 20 Thil gilou hih mi peuhmah in vaak a hua a, a thilhihte a kilat ding a lau manin, vaak sung ah hong pai nuam kei hi. 21 Ahihhangin, thutak zuia nungta mi peuhmah vaak sung ah hong pai hi. Tua bel, a thilhih pen, Pathian tungtawna hih ahi, chih teltaka a kimuh nading ahi, a chi hi.
Baptispa Johan' Theihpihna
22 Hiaite nungin, Jesu leh a nungzuite, Judia gam ah hong pai uh a, tua ah, amah amaute tawh a taam a, a baptis hi. 23 Salim kianga Ainon ah tui a tam manin, Johan in zong a baptis hi. Baptisna tang dingin, tua ah mite hong paipai uhi. 24 Tua bel, suangkula Johan a kikhum ma ahi. 25 Johan' nungzuite pawlkhat leh Judate pawlkhat kal ah, Judate ngeina dana tuia kisiansuahna thu tawh kisaia kiselna a om hi. 26 Johan' nungzuite Johan kiang ah hong pai uh a: Rabi, ngai dih, Jordan lui gala nang kianga om, a tungthu na genpa'n baptis a, mi chih in amah zuan eive! hong chi uhi. 27 Johan in amaute a dawng a: Mi'n vaan apan piak ahih kei leh, bangmah a ngah theih louhpi. 28 Kei Khrist ka hi kei a, ama' ma-a misawl ka hi zaw, ka chih lamtak noute mahmah in non theihpih uhi. 29 Mou bel, mouneipa-a ahi. Mouneipa dinpih a, a aw ngaikhepa tua mouneipa' lawm in mouneipa' aw a zak chiangin a lungnuam mahmah hi. Tua lungnopna keia hita a, ka lungnopna kiching mahmah eive. 30 Amah lian semsem ding a, kei bel neu semsem ding ka hi. 31 Tunglam apana hong paipa zaw bangkim tunga mi ahi. Leitung apana hong paipa ahih leh, leitunga ahi a, leilam thil mah a gen. Vantung apana hong paipa bel, bangkim tunga mi ahi. 32 Ama'n a muhte leh a zakte theihpihna thu a gen. Ahihhangin, kuama'n a theihpihna thu a saang kei hi. 33 Tua a theihpihna thu saang mi in Pathian a thutak, chih a gum hi. 34 Ahang hiai ahi: Pathian' misawlpa'n Pathian' thu a gen. Pathian in lah bikhiah chiang neilou hialin, amah kiang ah Kha a pia hi. 35 Pa'n Tapa a it a, a khut sung ah bangkim a pia. 36 Tapa um mi in Tangtawn hinna a nei. Tapa um lou mi in bel hinna a mu kei ding. Pathian' thangpaihna ama' tung ah a omden zaw hi, a chi hi.
Jesu'n Samari Numei Thuhilh
1 Jesu'n Johan sangin nungzui tam a bawl zaw a, tam a baptis zaw, chih thu Farisaite'n a za uh, chih Toupa'n a thei a, Judia gam a nusia hi. 2 Jesu'n bel ama' khutin a baptis kei a, a nungzuite'n a baptis uhi. 3 Amah Judia gam nusiain, Galili gam lam ah a kilehkik hi. 4 Samari gam tawna a pai a kul a, 5 tua bangin, Samari khawpi khat, Sukhar kichi hong tung hi. Sukhar bel, Jakob in a tapa Josef kianga a piak gam kianga om ahi. 6 Tua ah Jakob' tuileh a om hi. Jesu zong a khualzinna tawi ahih manin, tua tuileh kiang ah a tu hi. Tua hun bel, dak gukna khawng ahi. 7 Tua ah Samari numei khat, tui tawi dingin hong kuan a, Jesu'n tua numei kiang ah: Tui dawn ding hon pe ve, a chi hi. 8 A nungzuite lah an lei dinga khawpi-a a hawh khitvek kal uh ahi. 9 Tua Samari numei in a kiang ah: Nang Juda mi hi chin a, kei lah Samari numei hi ing a, bangchi dan ahia tui dawn ding non nget mawk? a chi hi. Judate'n bel, Samarite tawh kisaina bangmah nei lou mah ahi uhi. 10 Jesu'n a dawng a, a kiang ah: Pathian' thawnpiak bang hi hiam, chih thei lou na hi. Tui dawn ding hon ngenpa kua hi hiam, chih zong thei lou na hi. Hiaite thei hi lechin, nang ngen zaw ding chin a, ama'n tui hing hon pe mah ding hiven, a chi hi. 11 Tua numei in a kiang ah: Pu aw, tui khaikhiak nading lah bangmah nei lou chin a, tuileh lah thukta buang a! Nang koia tua tui hing nei na hia le? 12 I pu uh Jakob sangin na lianzaw-a hia? Ama'n hiai tuileh koute hon pia a, amah mah in zong hiai tuileh apana dawn a, a tapate leh a gantate nangawn in dawn eive, a chi hi. 13 Jesu'n a dawng a: Hiai tui dawn mi kuapeuh dangtak kik ding ahi. 14 Ke'n ka piak ding tui dawn mi peuhmah bel, dangtak ngeinawn lou ding ahi. Ke'n ka piak ding tui pen, ama' sunga nak neia phultou ding a, Tangtawn hinna suak ding ahi, a chi hi. 15 Tua numei in a kiang ah: Pu aw, ka dangtak kik nawn louh nadingin leh, tui tawi dinga hiaia kong kuan kuan nawn louh nadingin, tua tui hon pe ve, a chi hi. 16 Jesu'n a kiang ah: Pai inla, na pasal vasam inla, hong paikik in, a chi hi. 17 Tua numei in a dawng a, a kiang ah: Ke'n pasal nei lou, a chi hi. Jesu'n a kiang ah: Ke'n pasal nei lou, na chih, na chi dik hi. 18 Atak takin, pasal nga na neita a, tu-a na ompih lei pen na pasal hilou mah ahi. Tua na gen dan a dik mah ve, a chi hi. 19 Tua numei in: Pu aw, kamsang khat hi peuhmah teh, hon theita ing! 20 Ka pu ka pate un hiai mual tung ah Pathian a bia uh a, noute'n lah, Jerusalema biak ding, na chi sese uh a! a chi hi. 21 Jesu'n a kiang ah: Numei aw, hon um in. Hiai mual tung sese lou ah zong, Jerusalem sese lou ah zong, Pa na biak hun uh hong tung ding ahi. 22 Nou Samarite'n na theih louhpi uh na bia uh a, koute'n zaw ka theih taktak uh ka bia uhi. Hotdamna, Judate apan hiven. 23 Ahihhangin, a be taktakte'n kha leh thutaka Pa a biak hun uh hong tung ding ahi. Tu mahmah zong a hun a hita. Pa'n hibanga amah be dingin mi zong mah ahi. 24 Pathian zaw Kha ahi a, amah bete'n, kha leh thutaka a biak teekteek uh kul ahi, a chi hi. 25 Tua numei in a kiang ah: Khrist kichi Mesia a hong pai ding, chih ka thei. Amah hong pai chiangin, thil teng khempeuh kiteltakin hon hilh ding, a chi hi. 26 Tua laitakin, Jesu'n a kiang ah: Kei na kianga thugenpa, amah ka hi, a chi hi. 27 Nungzuite Thuhilhna 'Tua laitak mahin, a nungzuite hong tung uh a, numei khat tawh a kihou mawk lamdang a sa uhi. Hinapi-in, amaute laka kuama'n numei kiang ah: Bang deih na hia? a chi kei a, Jesu kiang ah zong: Banghanga tua numei houpih na hia? a chi kei hi. 28 Tua nungin, tua numei, a tuibel nusiain khawpi ah a vapai kik a, mite kiang ah: 29 Hong pai unla, hong en dih ve ua. Ka gamtatnasate khempeuh hon hilh mi khat om veh! Hiai mi, Mesia hi kha lou ding hiam, a chi hi. 30 Amaute khawpi apan a paikhia uh a, Jesu kiang lam a zuan uhi. 31 Tua sungin, Jesu' nungzuite'n a kiang ah: Rabi, banghiam beek ne vaw, chi-in a kun uhi. 32 Ahihhangin, ama'n amaute kiang ah: Ke'n na theih louh uh nek ding an ka nei, a chi hi. 33 Nungzuite'n: Mi khattei in nek ding banghiam na puak ahia adiam maw? a kichi uhi. 34 Jesu'n amaute kiang ah: Kei hon Sawlpa' deihlam hih leh, ama' nna sep zawh ding ka an ahi. 35 Noute'n: Buhlak nading kha li in a sam lai, na chi kei ua hia? Ngai un, kon hilh ahi: Khawdak unla, loute en un. Buhte minta a, buh lak hunta hi! 36 Buhlapa'n a thaman a sang a, Tangtawn hinna ding gah a khawm hi. Tua bel, buhchi pawipa leh buhlapa a kipahkhawm theih nading ahi. 37 Khat in buhchi a pawi a, midang in a gah a khawm, kichi a dikna hiai ahi. 38 Ke'n na sepgim louhna uh gah khawm dingin noute kon sawl hi. Midangte'n a na semgimta uh a, amaute' sepgim gah na khawm uhi, a chi hi.
Samarite Thuhilhna
39 Tua numei in: Ama'n ka gamtatnasate khempeuh hon hilh, chi-a theihpihna thu a gen manin, tua khawpi apan Samarite tampi in Jesu a umta uhi. 40 Samarite amah kianga hong pai takun, amaute kianga taam tadih dingin amah a khou ngutngut uh a, tua ah ni nih a taam hi. 41 Jesu' thugen hangin, a ummi tampi a kibehlap hi. 42 Amaute'n tua numei kiang ah: Nang' thugen hang leia um ka hi nawn kei uh. Koumau mahmah in ka zata uh a, hiai mah leitung khuavannuai Hondampa Mesia ahi taktak, chih ka theita uhi, a chi uhi.
Galili Mite' Khrist Sang na
43 Ni nih nungin, Jesu'n tua mun a nusia a, Galili gam sung a tung hi. 44 Jesu mahmah in: Kamsangmi in ama' gam ah pahtawina a tang kei, a na chi khin hi. 45 Amah Galili gam a hong tunin, Galili mite'n amah a na saang uhi. Amaute bel, Jerusalem khua-a Paikan Ankuang luina-a pang ahi uh a, tua muna a thilhihte khempeuh mutate ahi uhi.
Kumpi Nasem' Tapa khat Damsakna
46 Tua nungin, Jesu, Galili gama Kana khua hong tung kik hi. Tua bel, tui, grepzu a suahsakna mun ahi. Kumpi nasem ulian khat a om a, a tapa Kapernaum ah chinain a om hi. 47 Ama'n, Judia gam apan Galili gam ah Jesu hong tung, chih a zak takin, amah kiang ah a hong pai a, vapaia, a tapa si dekdek damsak dingin Jesu a ngen ngutngut hi. 48 Jesu'n a kiang ah: Noute'n chiamtehna lamdangte leh vangletna nasepte na muh kei ngai uleh, na um het kei ding uh, a chi hi. 49 Tua kumpi nasem ulian in a kiang ah: Pu aw, ka ta a sih main hong paisuk mahmah in! a chi lai hi. 50 Jesu'n a dawng a: Paita in, na tapa damta hi, a chi hi. Tua mipa'n Jesu' thugen a um taktak a, a paita hi. 51 Amah lampi-a a pai laiin a silate'n a tapa damta, chih thu tawh hong dawn uhi. 52 Ama'n a tapa hong dam hun a dong a, amaute'n: Zanni in, dak sagihna ah a nattun in a nuseta, a chi uhi. 53 Jesu'n: Na tapa a damta, a chih hun laitak mah ahi, chih a pa'n a theikhia hi. Tua bangin, ama'n a um a, a innkawte'n zong a vekpiun a umta uhi. 54 Hiai bel, Judia gam apan Galili gam hong tun nunga, Jesu'n chiamtehna lamdang a hih nihveina ahi.
Mizaw Damsakna
5 Hiai nungin, Judate' ankuangluina khata kihel dingin, Jerusalem ah Jesu a hawhtou hi. 2 Jerusalema Belam Kongpi kiang ah, dil khat a om a, tua bel, Hebru pauin Bethsaida a kichi hi. Tua dil kimkot ah, a tung kikhuh innliim nga a om hi. 3 Tua innliimte ah zawngkhal tampitak, mittawte, khebaite, zawte a lum phengphung uh a, tui hong tat ding a ngak uhi. 4 Ahang bel, bang hun chiang hiamin, vansawltak khat, tua dila vapaisukin, tui a vatok hi. Tua tui a kitawh khita kidiahsuk masa penpen, bang natna vei hita leh dam zel ahi. 5 Tua lai ah, kum 38 sung zawngkhal pasal khat a om hi. 6 Jesu'n tua laia amah lum a muh takin, hibangin hun sawtpi a omta, chih a thei a, a kiang ah: Dam na ut hia? chi-in a dong hi. 7 Zawngkhala lumpa'n a dawng a, Jesu kiang ah: Pu aw, tui a kitawh chianga dila hon diah ding mi nei lou ing a, keimaha ka pai sunga midang a na kidiah man nak ahi, a chi hi. 8 Jesu'n amah kiang ah: Thou inla, na lupna phek la inla pai in, a chi hi. 9 Tua bangin, tua mipa thakhatin a dam pah a, a lupna phek a la a, a paita hi. Tua ni bel, Sabbath ni ahih manin, 10 Judate'n hihdama ompa kiang ah: Sabbath ni eive. Na lupna phek na puak siang lou eive, a chi uhi. 11 Ahihhangin, ama'n amaute a dawng a: Kei hon damsakpa'n: Na lupna phek la inla pai in, hon chi hiven, a chi hi. 12 Amaute'n a kiang ah: Na lupna phek la inla pai in, hon chipa kua ahia? chi-in a dong uhi. 13 Damsaka ompa'n bel, amah damsakpa kua hi hiam, chih a thei kei hi. Ahang bel, tua laia om mipite lakah Jesu na kigelmangta hiven. 14 Tua nunglamin, Jesu'n tempul ah amah a mu a, a kiang ah: Ngai dih, tuin damkikta na hi a, a sezawsem na tunga a tun louh nadingin, khial nawn ken aw, a chi hi. 15 Tua mipa a pai a, amah damsakpa Jesu ahi, chih Judate a vahilh hi.
Tapa Tungtawna Hinna
16 Hiai hangin Judate'n Jesu a bawlsia uhi. Tua baan ah, Sabbath ni-a hiai thilte a hih manin, amah thah theih nading lampi a zong uhi. 17 Jesu'n amaute a dawng a: Ka Pa'n tu dong a nna a sem a, ke'n zong ka sem hi, a chi hi. 18 Jesu'n Sabbath ni a tan louh kia hilouin, Pathian, ama' Pa chi-a, Pathian tawh kikima a kikoih manin, Judate'n amah thah a naksawm sem uhi. 19 Jesu'n amaute a dawng a: Noute thutak kon hilh ahi: Pa' sep ka muhte kia loungal, Tapa in keima' thuin bangmah ka hih thei kei. Ahang bel, Pa'n a sep peuhmah, Tapa in zong sem ka hi. 20 Pa'n Tapa hon it a, ama' nasepte peuhmah Tapa hon lak hi. Lamdang na sak mahmah dingun, hiaite sanga nasep thupizawte nangawn a lak ding hi. 21 Pa'n misite kaithouin, hinna a pia. Tua bang takin, Tapa in ka piak nop mite kiang ah hinna ka pia hi. 22 Tua tham louin, Pa'n kuamah tung ah thu a khen kei. Thukhenna thu peuhmah Tapa' khut ah hon pia. 23 Tua bel, mi khempeuh in Pa a pahtawi uh banga, Tapa hon pahtawi theih nading uh ahi. Tapa pahtawi lou mi in Pa, hon Sawlpa a pahtawi kei hi. 24 Noute thutak kon hilh ahi: Ka thu za a, kei hon Sawlpa um mi peuhmah in Tangtawn hinna a nei a, thukhenna a thuak kei ding. Tua bang mi zaw, sihna apan hinna-a lut ahita hi. 25 Noute thutak kon hilh ahi: A hun hong tung dekta. Misite'n Pathian' Tapa' aw a zak hun uh, tuin hong tung ahita. Ka aw zate a hing ding hi. 26 Ahang bel, Pa'n amah maha hinna a neih banga, Tapa in keimah maha hinna ka neih nading thu ama'n hon pia hi. 27 Tapa mah Mihing Tapa ka hih manin zong, thukhen nading thu hon pe lai hi. 28 Hiai lamdang sa kei un. A hun hong tung dekta. Tua hun chiangin, hankhuk sunga omte khempeuh in ka aw a za ding uh a, 29 hong thoukhe ding uhi. Thilhoih hihte, hinna neiin a thoukik ding uh a, thilhoihlou hihte bel, mawhtangin a thoukik ding uhi. 30 Keima' thuin bangmah ka hih thei kei. Ka zak bangin thu ka khen a, ka thukhenna a dik ahi. Ahang bel, ke'n keima' deihlam ka zong kei a, kei hon Sawlpa' deihlam ka zong zaw hi.
Johan' Theihpihna
31 Kei leh kei kitheihpihna thu gen hi leng zaw, ka theihpihna thu saan tham a ching kei ding hi. 32 Kei adinga theihpihna thugen midang khat a om hi. Ama'n hon theihpihna thu a dik, chih ka thei hi. 33 Noute'n Johan kianga thu kan dingin mi na sawl uh a, ama'n thutak a theihpihna thu a genkhinta hi. 34 Ke'n mihing' theihpihna ka muang, ka chihna ahi kei a, ahihhangin, hotdam na hih theih nadingun, tua thu gen ka hi zaw hi. 35 Johan bel, meivak kuangpha leh tangpha ahi a, ama' vaaka tawlkhat nopsak ut na hi uhi.
Jesu' Nasep' Theihpihna
36 Ke'n Johan' theihpihna sanga theihpihna thupizaw ka nei. Pa'n nasep zawh ding hon piak, tua ka sep lelte mah in, Pa'n kei hon sawl ahi, chih hon theihpih hi.
Pa' Theihpihna
37 Pa, kei hon Sawlpa mahmah in kei hon theihpihna thu a genta. Noute'n chik mahin ama' aw na za ngei kei uh a, a mei zong na mu ngei kei uhi. 38 Ama' sawlpa pen lah um lou na hih manun, a thu zong na lungsung uah a teeng ngei kei hi.
Laisiangthou' Theihpihna
39 Laisiangthou pansana Tangtawn hinna neia na kingaihsut manun, tuate limtakin na sin uh a, na vel uhi. Hiai Laisiangthou thute ahi keima' tungthu gen. 40 Hinapi-in, hinna nei dingin kei non zuan nuam kei uhi. 41 Ke'n mihingte' pahtawina ka saang kei. 42 Ahihhangin, noute kon thei. Na lungsung uah Pathian' itna na nei kei uh, chih ka thei. 43 Kei ka Pa' minin kong pai a, non saang kei uh. Midang khat, ama' min mahin hong pai leh, na saang ding uhi, 44 Pathian khat omsun apan kia pahtawina zong loua, khat leh khat kipahtawituahna zongte'n bangchi-in kei non um thei mah ding ua? 45 Ahihhangin, Pa' maia noute hon hek dingin kei hon muangmawh kei un. Noute hon hekpa zaw na muanpa uh Mosi ahi. 46 Ama'n keima' tungthu na gelh ahih manin, amah um taktak hi le uchin, kei non umta ding uhi. 47 Ahihhangin, ama' gelhte um lou hive uchin, bangchi'n ka thugente na um thei mah ding ua! a chi hi.
Mi 5,000 Vakna
1 Hiai thilte nungin, Jesu Tiberia Tuipi kichi, Galili Tuipi gal a kah hi. 2 Chinate tunga chiamtehna lamdang a hihte a muh manun, mipi tampi in amah a zui uhi. 3 Jesu mual pang ah a kaltou a, tua ah a nungzuite tawh a tu uhi. 4 Tua laiin, Judate' Paikan Ankuang lui hun a naita hi. 5 Jesu a khawdak a, amah hon zuan mipi tampite a mu hi. Ama'n Filip kiang ah: Hiai mite nek ding tanghou koia lei ding i hia? a chi hi. 6 Ama'n a hih ding a theihsa ahi a, Filip ze-et nading leia hiai dong ahi. 7 Filip in a dawng a: Amaute'n tawmchik tek a nek dingun zong, dinari zanih man tanghou kiching lou lai ding ahi! a chi hi. 8 A nungzuite laka mi dang khat, Simon Peter' sanggampa Andru in amah kiang ah: 9 Hiai ah barli tanghou beu nga leh ngasa neu chikchik nih pua pasal naupang khat a om. Ahihhangin, mi hiai zahpi adingin, tuate bang tham hi mahmah ding ahia! a chi hi. 10 Jesu'n: Mite tusak un, a chi a, tua lai ah, loupa tampi lak ah, mite a tu uhi. Avekun 5,000 khawng a pha uhi. 11 Jesu'n tua tanghoute a la a, kipahthu a gen a, nungzuite khut ah a pia hi. Nungzuite'n tua mi tute lak ah, tua tanghoute a duh zah tekun a hawm uhi. Tua bangin, ngasate zong a hawm uhi. 12 Amaute'n gilvaha a nek khitun, ama'n a nungzuite kiang ah: Khamvalte a manthat louh nadingin luak un, a chi hi. 13 Tua banga barli tanghou beu nga nete' khamval nente a luah uh, seng sawmlenih a dim hi. 14 Jesu'n hiai chiamtehna lamdang a hih, mite'n a muh takun: Hiai mi, leitunga hong pai ding Kamsangpa ahi taktak, a chi uhi. 15 Amaute'n thatang hata amah mat a, kumpipa-a bawl teitei a sawm uhi. Jesu'n tua thu a thei a, amah kiain, mual tung lam ah a kihemkhe kik hi.
Tui tunga Paina
16 Nitaklam a hong hi a, a nungzuite tuipi lam ah a paisuk uh a, 17 Kapernaum zuana galkah dingin long ah a tuang uhi. Khua hong mialta a, Jesu lah amaute kiang hong tung nai kei hi. 18 Huih nakpi-in hong nung a, tuihual sangpipi-in a kivawk hi. 19 Amaute'n mei thum hiam, mei thum leh a lang hiam long a kaih nungun, Jesu, tui tunga khea paia long hon zuanin a mu uh a, a lau mahmah uhi. 20 Ahihhangin, ama'n amaute kiang ah: Kei ka hi, lau kei un, a chi hi. 21 Amaute'n tua a zak takun, amah long ah a tuangsak nuam khongkhong uhi. Tua bangin a zotna mun uh tuipi gei a tung pahta uhi. 22 A zing chiangin, tuipi gal khat lam ah mipi tampi a om lai uhi. Nungzuite' tuanna loungal long dang a om kei a, Jesu lah amaute lak ah a tuang kei a, nungzuite amau kiain a paita uh, chih amaute'n a mu uhi. 23 Ahihhangin, Tiberia Tuipi apan long dang pawlkhat hong pai a, Toupa'n kipahthu a gen khita, amaute'n tanghou a nekna mun uh kiang hong tung uhi. 24 Amaute'n tua lai ah Jesu lah om lou, a nungzuite lah om lou, chih a mu uhi. Tua bangin, amaute zong longte ah a tuang uh a, Jesu zongin Kapernaum hong tung uhi.
Hinna Tanghou
25 Amaute'n tuipi gal khat lama amah a muh takun, a kiang ah: Rabi, chika hiai lam na tung na hia? a chi uhi. 26 Jesu'n amaute a dawng a: Noute thutak kon hilh ahi: Noute'n chiamtehna lamdangte na muh man uh hi louin, tua tanghou na nekvah man ua kei hong zong na hi ve ua. 27 A mangthang thei an zongin phiaphia kei unla, Mihing Tapa in kon piak ding, Tangtawn hinna donga omden ding an zongin phe zaw un. Pa Pathian in ka tung ah kei hon saanna chiamtehna a koihta hi, a chi hi. 28 Tua baan ah, amaute'n amah a dong uh a: Pathian' nnate ka sep theih nadingun bang ka hih ding ua? a chi uhi. 29 Jesu'n amaute a dawng a: Pathian' nna hiai ahi: Ama' misawlpa up, a chi hi. 30 Amaute'n a kiang ah: Koute'n ka muh ua, nang kon up theih nadingun bang chiamtehna lamdangte non lak dia? Bang na hih dia? 31 Ka pu ka pate un, hiai gamdai-gamkeu ah mana a na ne uh. Ama'n amaute nek ding vaan apan an a pia, chi-a kigelh bangbang ahi, a chi uhi. 32 Jesu'n amaute kiang ah: Noute thutak kon hilh ahi: Vantung apan noute tanghou hon pepa, Mosi ahi kei. Vantung apana tanghou taktak hon pepa, ka Pa ahi zaw. 33 Pathian' tanghou zaw, vantung apan hong paisuk, leitung khuavannuai kianga hinna pepa ahi, a chi hi. 34 Amaute'n amah kiang ah: Pu aw, tu-a panin hiai tanghou hon pe gige ve aw, a chi uhi. 35 Jesu'n amaute kiang ah: Keimah tua hinna tanghou ka hi. Kei hon zuan peuhmah a gilkial ngei kei ding a, kei hon um peuhmah a dangtak ngei kei ding. 36 Ahihhangin, noute kon hilh ahi: Noute'n kei hon muta napi-in non um kei uh. 37 Ka Pa'n kei hon piak teng khempeuh in kei hon zuan ding. Kei hon zuan peuhmah lah ka hawlkhe het kei ding hi. 38 Ahang bel, keima' deihlam hih dinga vantung apan hong paisuk ka hi kei a, kei hon Sawlpa' deihlam hih dinga hong paisuk ka hi zaw. 39 Pa kei hon Sawlpa' deihlam hiai ahi: Ama'n kei hon piak teng khempeuh, kuamah mansuah louin, ni tawpni chiangin kaithou leng, chih. 40 Ahang bel, Tapa hon mu a, hon um kuapeuh in Tangtawn hinna a neih ding leh, ni tawpni chianga ke'n amah ka kaihthawh ding mah, kei hon Sawlpa' deihlam ahi, a chi hi. 41 Ama'n: Kei vantung apan hong paisuk tanghou ka hi, a chih manin, Judate'n amah a phunsan uhi. 42 Amaute'n: Hiai Josef tapa Jesu hilou maw? A nu a pa i theih hilou maw? Vantung apan hong paisuk ka hi, bangchi chiha chi thei ahia? a chi uhi. 43 Jesu'n amaute a dawng a: Na lak uah phunphun dah un. 44 Pa, kei hon Sawlpa'n a hip kei leh, kuama'n kei hon zuan theiloupi. Tua banga kei hon zuan mi lah, ni tawpni chiangin ke'n ka kaithou ding. 45 Kamsang laibute sung ah: Pathian in amaute khempeuh a sinsak ding, chi-in a na kigelh hi. Tua bang ahih manin, Pa' thu ngaikhia a, amah apan sin mi peuhmah in kei hon zuan hi. 46 Pathian apan hong paipa kei loungal, kuamah in Pa a mu ngei kei. Kei kia in Pa ka muta. 47 Noute thutak kon hilh ahi: Kei hon um mi in Tangtawn hinna a nei. 48 Keimah tua hinna tanghou ka hi. 49 Na pu na pate un gamdai-gamkeu ah mana a ne uh. Hinapi-in, a si uhi. 50 Ahihhangin, mi'n a nek a, a sih nawnlouh nading tanghou, vaan apan hong paisuk hiai ah a om. 51 Vantung apan hong paisuk, tua tanghou hing pen kei ka hi. Mi'n hiai tanghou a nek leh a hing tawntung ding. Hiai tanghou ka piak ding pen, keima' sa ahi a, leitung khuavannuai hin nadinga ka piak ding ahi, a chi hi. 52 Judate'n tua a zak takun, amaute lak ah nakpitakin a kisel uh a: Hiai mi in nek dinga ama' sa bangchi-a pe thei mawk ding ahia? a chi uhi. 53 Jesu'n amaute kiang ah: Noute thutak kon hilh ahi: Noute'n kei Mihing Tapa' sa na nek uh a, ka sisan na dawn kei uleh, noumaua hinna na neih louhpi uh. 54 Keima' sa ne a, keima' sisan dawn mi peuhmah in Tangtawn hinna a nei a, ke'n ni tawpni chiangin amah ka kaithou ding. 55 Ahang bel, keima' sa, nek ding an tak hi a, keima' sisan zong, dawn ding tui tak hiven. 56 Keima' sa ne a, keima' sisan dawn mi peuhmah, keimah ah a om gige a, kei zong amah ah ka om gige hi. 57 Pa hing in kei hon sawl a, vaana om Pa' vanga ka hin bangbangin, keimaha kivak mi pen, keima' vangin a hing ding hi. 58 Vantung apan hong paisuk tanghou hiai ahi. Na pu na pate un mana a na ne uh a, hinapi-in a na si uh. Hiai tanghou pen ne mi bel, tua bang ahi kei ding a, a hing tawntung ding hi, a chi hi. 59 Hiai bel, Jesu'n Kapernauma sunagog sunga a sinsak laia a gen ahi.
Nungzui Tampi' Nolhna
60 A nungzuite tampi'n hiai a zak takun: Hiai zaw sinsakna haksa ahi. Kua'n a saang thei dia? a chi uhi. 61 Hiai thu ah, a nungzuite a phun uh, chih Jesu'n a lungtang uh a thei a, amaute kiang ah: Hiai thu in noute hon thangpaisak hia? 62 Mihing Tapa ka omna ngei maha kaltou hon mu le uchin, bang na suakta ding ua le? 63 Kha ahi hinna pia, sa zaw bangmah dingin a phatuam kei. Noute kianga ka gen thute kha ahi a, hinna ahi. 64 Hinapi-in, na lak uah a umlou pawlkhat na om uhi, a chi hi. Jesu'n bel, kua teng in um a, kua'n amah lehbawla khawng ding hiam, chih nangawn, a chil apan a thei hi. 65 Ama'n: Tua ahih man ahi, ka Pa'n hihtheihna a piak kei leh, kuama'n kei hon zuan thei lou ahi, ka chih, a chi lai hi. 66 Hiai hun apanin a nungzuite tampi a kilehhei kik uh a, amah a zui nawn kei uhi.
Peter' Gupna
67 Jesu'n Sawmlenihte kiang ah: Noute zong kilehhei kik nuam na hi uhia? chi-in a dong hi. 68 Simon Peter in a dawng a: Toupa, kua zuan ding ka hi ua oi? Nangma'n Tangtawn hinna thute na nei. 69 Nang Pathian hing Tapa, Mesia na hi, chih hon umta ung a, hon theita hi ung, a chi hi. 70 Jesu'n a dawng a: Ke'n nou teng, Sawmlenihte hon teel hilou ka hi maw? Hinapi-in, noute laka khat lah, dawi khat ahi tazen a! a chi hi. 71 Tua bel, Simon' tapa Juda Iskariot a genna ahi. Amah Sawmlenihte laka mi hinapi-in, Jesu lehbawla khawng dingpa ahi.
Jesu' Sanggamte 'Uplouhna
1 Hiaite nungin, Jesu Galili gam sung ah a pai kawikawi hi. Judate'n amah thah sawma a buk man ua, Judia gam apan kihemkhia ahi. 2 Judate' Bawkta Ankuang lui hun hong naita a, 3 a sanggamte'n amah kiang ah: Na nungzuite'n chiamtehna lamdang na hihte a muh theih nadingun, hiai apan kuan a, Judia gama na vahawh tuak hi veh aw. 4 Tangpi' theih ut mi in a sima thil a hih ding hiloupi. Hiai thilte hihhih hive chin, leitung khuavannuai muh dingin kilak ve, a chi uhi. 5 Ahang bel, ama' sanggamte nangawn in amah um lou uh ahi. 6 Jesu'n amaute kiang ah: Ka hun tung nailou ahi. Noute hun bel a tung gigea hiven. 7 Noute leitung khuavannuai in hon mudah thei lou a, kei bel, a thil hih giloute uh ka putlak mana hon mudah uh ahi. 8 Noute Ankuang luina ah hawh un, kei zaw ka hun a tun nai louh manin ka hawh kei ding, a chi hi. 9 Hiaite genin, amah Galili gam ah a taam hi. 10 Ahihhangin, a sanggamte, Ankuang luina-a a hawhtouh takun, amah zong a simin, tangpi muh louhin a hawhtou hi. 11 Tua Ankuang luina ah, Judate'n amah a buk uh a: Tua mipa koia om ahia? chi-in a kan uhi. 12 Mipite lak ah ama' tungthu kihuau suausuauin a kigen hi. Pawlkhat in: Amah mi hoih hi veh aw, a chi uh a, midangte'n lah: Hoih dek kei, mipite khemgawp ahi, a chi uhi. 13 Ahihhangin, Judate a lau manun, kuama'n a langtangin ama' tungthu a genkhe kei hi.
Ankuang luina-a Jesu Sinsakna
14 Ankuang lui san laitakin, Jesu tempul huang sung inntual ah a paitou a, a sinsak panta hi. 15 Judate'n lamdang a sa uh a: Hiai mi in sinna neiloupi-a, bangchi-a lai thu hizahta thei ahia? a kichi uhi. 16 Jesu'n amaute a dawng a: Ka sinsakna keia ahi kei a, kei hon Sawlpa-a ahi. 17 Mi kuapeuh in Pathian' deihlam hih ding deihtela a neih leh, ka sinsakna Pathian apan hi hiam, ahih kei leh, keima' thu lei apan, chih a thei ding. 18 Ama' thu lei apana thugen mi in ama' ading pahtawina zong ahi. Ahihhangin, kei hon Sawlpa pahtawi nading zong mi bel thutak gen mi ahi a, amah ah diktatlouhna himhim a om kei hi. 19 Mosi in noute Dan hon pia hilou hia? Hinapi-in, kuama'n tua Dan na zuih louhpi uh. Banghanga kei hon thah sawm na hi ua? a chi hi. 20 Mipite'n a dawng uh a: Dawimat na hita ve. Kua'n nang hon thah sawm ahia? a chi uhi. 21 Jesu'n amaute kiang ah: Thillamdang khat ka hih a, noute khempeuh in lamdang na sa uh. 22 Hinapi-in, Mosi in noute zeksum thu hon piak manin, Sabbath ni-in naupang zek na sum uhi. Tua lah a taktakin Mosi apan ahi kei a, pubulte apan ahi zaw hi. 23 Noute'n Sabbath ni-a naupang' zek sumsak uchin a, Mosi' Dan palsat hi tuanlou na hih uleh, ke'n Sabbath ni-a mi a pumpi-a ka damsak, banghanga heh neita ua? 24 A kilat dan leiin thu khen kei unla, diktakin thu khen zaw ve ua, a chi hi.
Jesu, Mesia ahihna
25 Tua laitakin, Jerusalem apan mi pawlkhat hong pai uh a: Thah a sawm uh hiaipa hilou maw? 26 En dih ua, hangsantakin, tangpi' theihin thu a gen a, amaute'n lah amah kiang ah bangmah a gen kei ua! Vaihawmmite'n, amah Mesia ahi, chi taktak uh ahita ding maw? 27 Ahihhangin, eite'n zaw hiai mipa hong kipatna i thei vele. Mesia hong pai chiangin, hong kipatna kuama'n thei lou ding aka, a chi uhi. 28 Jesu'n tempul huang sung inntuala a sinsak laiin, hong kikoukhia a: Ahi, kei non thei uh. Kong kipatna zong na thei uh. Keima' thu-a hiaia om ka hi kei, ahihhangin, kei hon Sawlpa a dik ahi. Noute'n amah na thei kei uh. 29 Ke'n bel amah apan ka hih manin leh ama' hon sawl ka hih manin amah ka thei, a chi hi. 30 Hiai a chih takin, amaute'n amah mat a sawm uh a, ahihhangin, ama' hun tung nailou ahih manin, kuama'n amah a khoih kei hi. 31 Tua bangteng hinapi-in, mipite laka tampi in amah a um tinten uh a: Mesia hong pai chiangin, hiai mi sangin chiamtehna lamdang tam a hih zaw tuan dia hia? a chi uhi. 32 Farisaite'n hibanga mipite a kihuauna uh a za uh a, siampi makaite leh Farisaite'n, amah man dingin tempul veng sepaihte a sawl uhi. 33 Jesu'n amaute kiang ah: Noute kiang ah hun tomchik lei ka om lai ding a, tua khit chiangin kei hon Sawlpa kiang ah ka pai ding. 34 Tua hun chiangin, noute'n non zong ding uh a, non mu kei ding uh. Ka omna mun ah zong nong pai thei kei ding uh, a chi hi. 35 Judate'n amau lak ah: Hiai mi in, amah i muh theih louh nading koia pai sawm ahia? Grikte laka pemdalh i mite laka vapai a, Grikte vasinsak sawm ahi ding maw? 36 Ama'n: Noute'n non zong ding uh a, non mu kei ding uh. Ka omna mun ah zong nong pai thei kei ding uh, a chih, bang a chihna ahia? a kichi uhi. 37 Ankuang lui ni nanungpen leh a thupini penin, Jesu a dingtou a, a kikoukhia a: Mi kuapeuh a dangtak leh, keima' kiang ah hong pai henla, dawn hen. 38 Kei hon um mi peuhmah, Laisiangthou gen bangin, tui hing luite, ama' lungsung apan a luangkhe ding, a chi hi. 39 Hiai bel, amah umte'n nungchianga a ngah ding uh Kha a genna ahi. Tua hun dongin, Jesu, thupina khuksak a hih nailouh manin, a umte kiang ah Kha piak ahi nai kei hi. 40 Hiai thute a zak takun, mipite laka tampi in: Hiai mi, tua Kamsangpa ahi taktak, a chi uhi. 41 Midangte'n lah: Amah Mesia ahi, a chi uhi. Mi pawlkhatte leuleu in lah: Galili gam apan Mesia hong pawt tel dia hia? 42 Laisiangthou in: David innkuan apanin leh, David' tenna Bethlehem apanin Mesia hong pawt ding, chi hilou maw? a chi uhi. 43 Jesu' tungthu ah mipite tua bangin a kipawlkhen uh a, 44 pawlkhat in amah a man nuam uh a, ahihhangin, kuama'n amah a khoih kei uhi.
Juda Makaite' Upiahna
45 Atawptawpin, siampi makaite leh Farisaite kiang ah tempul veng sepaihte hong tung uh a, amaute'n: Banghanga amah hon kai lou na hi ua oi? a na chi uhi. 46 Tempul veng sepaihte'n: Hiai mipa' thugen bangin kuama'n thu gen ngei kei veh aw! a chi uhi. 47 Farisaite'n a dawng uh a: Noute nangawn hon khemzou ahita maw? a chi uhi. 48 Vaihawmpawl lak ah, ahih kei leh, Farisaite lak ah, amah um a om himhim-a hia? 49 Omlou hiai! Hiai Dan theilou mipite zenzen, hamsethuak a kei ua hia! a chi uhi. 50 Zankhanga Jesu kianga vahawhpa Nikodem, amaute laka mi ahi a, ama'n amaute kiang ah: 51 Mi'n bang hih ahia, chih ama' kam za a, thei masa louin, i dan in mi mawh a tangsak ngei-a hia? a chi hi. 52 Amaute'n a dawng uh a, a kiang ah: Nang zong Galili mi na hi-a hia? Zong inla, en dih. Galili gam apan kamsang kuamah a pawt ngei louh! a chi uhi. Tua bangin, mi chih ama' inn lam chiat ah a paita hi.
Angkawmlai Matnu
1 Ahihhangin, Jesu bel, Oliv Mual ah a pai hi. 2 Zingsang phalvak-in, amah, tempul huang sung inntual ah hong pai kik a, tua ah mite khempeuh hong paikhawm uh a, ama'n tutsain amaute a sinsak hi. 3 Tua lai ah Dan sinsakmite leh Farisaite'n numei khat, angkawm lai a mat uh hon kai uh a, mite' mai ah a dingsak uhi. 4 Amaute'n Jesu kiang ah: Sinsakpa, hiai numei, a angkawm laitaka kiman ahi. 5 Mosi in a Dan sung ah, hibang numei suanga denlup ding, a chi a, nang bang gen ding na nei a? a chi uhi. 6 Amaute'n hiai thu a dot uh bel, amah mat nading zonga a thangsiahna uh ahi. Ahihhangin, Jesu a kunsuk a, a khuttalin leilak a gelh hi. 7 Amaute'n tua banga a dot teitei takun, amah hong dakkhia a, amaute kiang ah: Na lak ua khelhna neilou pen in deng masa heh aw, a chi hi. 8 Amah a kunsuk kik a, leilak a gelh hi. 9 Amaute'n hiai thu a zak takun, a sia-le-pha theihna ua mawh kitanin, a upa pen apan a tawp dongin, khat khatin a paikhia khia uh a, Jesu leh a laia ding numei kia a nusia uhi. 10 Jesu a dakkhia a, numei kiang ah: Numei, nang hon hekte koilam tung ahi ua? Kuama'n nang mawh hon tangsak lou ahi maw? a chi hi. 11 Tua numei in: Pu aw, kuama'n mawh hon tangsak lou, a chi hi. Jesu'n: Ke'n zong mawh kon tangsak kei. Pai inla, khial nawn ke'n, a chi hi. 12 Jesu'n amaute kiang ah thu a gen kik a: Kei leitung khuavannuai vaak ka hi. Kei hon zui mi, miallak ah a pai kei ding a, hinna vaak a nei zaw ding, a chi hi.
Jesu'n ama' Kitheihpihna a Gupna
13 Farisaite'n a kiang ah: Nang leh nang kitheihpihtawm na hi ve. Na theihpihna thu a dik kei, a chi uhi. 14 Jesu'n a dawng a, amaute kiang ah: Kei leh kei kitheihpihna thu gen hita leng zong, ka theihpihna thu a dik ahi. Ahang bel, k'ong kipatna thei ing a, ka manawhna lam zong thei hi vengin. Ahihhangin, noute'n k'ong kipatna na thei kei uh a, ka manawhna lam zong na thei kei uhi. 15 Noute'n mihing' tehna danin thu na khen uh a, ke'n kuamah tung ah thu ka khen kei. 16 Thu khen na hita leng zong, ka thukhenna a dik hi. Ahang bel, kei kia-a ding hilou a, Pa, kei hon Sawlpa'n hon dinpih hiven. 17 Noute' Dan Laibu sung ah zong: Mi nih' theihpihna thu a dik, chi-a kigelh a hive. 18 Keimah ka kitheihpih a, tua baan ah, Pa, kei hon Sawlpa'n hon theihpih lai hi, a chi hi. 19 Amaute'n amah a dong uh a: Na Pa koia om ahia? a chi uhi. Jesu'n amaute a dawng a: Noute'n kei lah non thei kei uh a, ka Pa lah na thei kei uh. Kei hon thei hi le uchin, ka Pa zong theita ding hive uchin, a chi hi. 20 Hiai thute bel, ama'n tempul huang sung inntuala, thillatte a koihna mun geia a sinsak laia a gen ahi. Hinapi-in, ama' hun a tun nai louh manin, kuama'n amah man lou uh ahi.
Jesu'n a Pai ding a Genkholhna
21 Jesu'n amaute kiang ah a gen kik a: Kei paimang ding ka hi. Noute'n non zong ding uh a, na khelhna uah na si ding uh. Ka paina ah nong pai thei kei ding uh, a chi hi. 22 Judate'n: Amah kithah sawm a: Ka paina ah nong pai thei kei ding uh, chi ahi diam aw? a kichi uhi. 23 Ahihhangin, ama'n lah: Noute, nuailam akipan na hi uh a, kei bel, tunglam akipan ka hi. Noute hiai leitunga na hi uh a, kei bel, hiai leitunga ka hi kei. 24 Noute na khelhna uah na si ding uh, chi-in kon hilhta. Ka hi, ka kichih um lou hive uchin, na khelhna ua si taktak ding na hi ve ua, a chi lailai hi. 25 Tua baan ah, amaute'n: Nang kua na hia? chi-in a dong uhi. Jesu'n amaute a dawng a: Ka hi, ka kichih, a chil apana ka gen mah ka hi. 26 Noute tunga thu khena gen ding tampi ka nei. Ahihhangin, kei hon Sawlpa a muanhuai a, amah apana ka zakte, leitung khuavannuai kiang ah ka gen zaw hi, a chi hi. 27 Ama'n amaute kianga a Pa' thu gen a hihlam a theisiam kei uhi. 28 Tua baan ah, Jesu'n amaute kiang ah: Kei Mihing Tapa non khaikang chiangun, kei kua ka hi hiam, chih non thei ding uh. Keima' thuin bangmah ka hih kei a, ka Pa' hon sinsak thilte ka gen, chih na thei ding uh. 29 Kei hon Sawlpa'n hon ompih a, amah' kipahlam thilte ka hih gige manin, keimah kiain hon nuse kei hi, a chi hi. 30 Tua bang thu a gen laitakin, mi tampi in amah a um uhi.
Thutak in a Suahtaksakna
31 Tua ahih manin, Jesu'n amah um Judate kiang ah: Ka thu-a na om gige uleh, ka nungzuite na hi taktak uhi. 32 Tua bangin, thutak na thei ding uh a, tua thutak in noute hon suaktasak ding hi, a chi hi. 33 Amaute'n amah a dawng uh a: Koute, Abraham' suante ka hi uh a, kuama' salin ka taang ngei kei uh. Bangchi dana, noute suahtaksak na hi ding uh, hon chi thei na hia? a chi uhi. 34 Jesu'n amaute a dawng a: Noute thutak kon hilh ahi: Khelhna hih mi peuhmah khelhna sala taang ahi. 35 Sala taang mi in a omna inkuan sung ah munkip a nei kei. Tapa bel tua innkuan sung mi ahi den hi. 36 Tua ahih manin, Tapa in hon suahtaksak leh na suakta taktak ding uhi. 37 Abraham' suante na hi uh chih ka thei. Hinapi-in, ka thu in noumau sunga mun a neih louh manin, thah non sawm uh. 38 Ke'n ka Pa' omna-a ka muh ka gen a, noute'n na pa uh omna-a na muh uh na hih uh, a chi hi.
Abraham' Tate leh Dawimangpa' Tate
39 Amaute'n amah a dawng uh a: Abraham ka pa uh ahi, a chi uhi. Jesu'n amaute kiang ah: Abraham' tate hi le uchin zaw, Abraham hihte na hihta ding uh. 40 Pathian apan ka zak thutak ka gen leh, thah non sawm uh. Abraham in hibang hih lou ahi. 41 Na pa uh' nna sem na hi zaw uhi, a chi hi. Amaute'n: Koute zawlta ka hih louhpi uh. Pa khat ka nei uh. Amah Pathian ahi, chi-in a sel uhi. 42 Jesu'n amaute kiang ah: Pathian na Pa uh na hi leh zaw, kei, Pathian apana hong pai a, hiaia om non itta ding uhi. Keima' thu-a hong pai ka hi kei a, ama' sawl ka hi. 43 Banghanga ka thugen theithei lou na hi ua? Ka thugen na ngaih nop louh man uh ahi ve. 44 Noute na pa uh dawimangpa-a na hi uh a, na pa uh' deihlam tak hih nuam na hi ve ua. Amah a chil apan tualthatpa ahi. Amaha thutak om lou ahih manin, thutak a zui kei hi. Amah zuautheipa leh, zuauthu pianna pa ahih manin, zuau a gen chiangin, ama'-a mawng gen ahi lei hi. 45 Ahihhangin, ke'n thutak ka gen hangin non um kei uhi! 46 Na lak uah kua'n ahia kei khelhna nei chi-a hon ngawh thei? Ke'n thutak gen ing a, banghanga hon um lou na hi ua? 47 Pathian akipan mi in, Pathian' thute a ngaikhia hi. Noute Pathian akipan na hih louh man uh ahi ama' thu na ngaih nop louh uh, a chi hi.
Abraham Om ma a Om Jesu
48 Judate'n amah a dawng uh a: Nang Samari mi na hi a, dawizawl mah na hi, kon chih uh, dik hilou hia? a chi uhi. 49 Jesu'n a dawng a: Kei dawizawl ka hi kei. Ka Pa pahtawi ka hi zaw. Noute'n bel, kei non pahtawi kei uh. 50 Ke'n keima' thupi nading ka zong kei. Kei' thupi nading zong khat a om a, amah thukhenpa ahi. 51 Noute thutak kon hilh ahi: Mi'n ka thu a zuih leh, sihna a thuak ngei kei ding, a chi hi. 52 Judate'n hiai a zak takun, a kiang ah: Dawizawl na hi, chih tu'n ka theita uh! Abraham lah sita, kamsangte lah sita. Hinapi-in, nang: Mi'n ka thu a zuih leh sihna a thuak ngei kei ding, na chi a! 53 Ka pa uh Abraham sangin nang na lianzaw-a hia? Amah lah sita. Nanjj kua kisa na hia? a chi uhi. 54 Jesu'n a dawng a: Kei kipahtawi hi leng, ka thupina bangmah ahi kei ding. Ka Pa ka Pathian uh ahi, na chihpa uh ahi kei hon pahtawi. 55 Hinapi-in, amah na thei kei uh. Ke'n amah ka thei. Amah ka thei kei, chi leng, noute banga zuauthei ka suak ding. Amah ka thei taktak a, a thu zong ka zui hi. 56 Na pa uh Abraham in ka ni muh ding a lungnoppih a, ka ni a muta ngei a, a kipak a, a lungnuam mahmah hi, a chi hi. 57 Judate'n a kiang ah: Nang, kum 50 zong ching nai loupi in Abraham na mu-a hia? a chi uhi. 58 Jesu'n a dawng a, amaute kiang ah: Noute thutak kon hilh ahi: Abraham om ma-a Ompa ka hi! a chi hi. 59 Amaute'n hiai a zak takun, amah deng dingin suang a tawm uhi. Ahihhangin, Jesu a bu a, tempul huangsung inntuala amaute lak apanin a kigelkhia hi.
Mittawsa-a Piang Damsakna
1 Jesu a pai laiin, mittawsa-a piang pasal khat a mu hi. 2 A nungzuite'n, amah a dong uh a: Rabi, hiai mi, mittawsa-a a pian, kua'n khial ahia? Ama'n khial maw, ahih kei leh, a nu a pa'n? a chi uhi. 3 Jesu'n: Hiai mi in lah a khial kei a, a nu a pa'n zong a khial kei uh. Ahihhangin, Pathian' nasep ama' tunga a kilat nadinga hiai thil tung ahi zaw. 4 Sun a hih sung teng, kei hon Sawlpa' nna i sep teitei ding ahi. Zan hong tung ding a, tua hun chiangin, kuama'n nna a sem thei kei ding. 5 Kei, leitunga ka om sung teng, leitung adingin vaak ka hi, a chi hi. 6 Ama'n tua banga a gen khitin, leilak ah chil a sia a, chilin tungman a bawl a, tua tungmanin mittawpa' mitte a nuh a, 7 mittawpa kiang ah: Vapai inla, Siloam dil ah vasil in, a chi hi. Siloam bel, Sawl, chihna ahi. Tua bangin, mittawpa a vapai a, a sil a, mitvakin hong kilehkikta hi. 8 Mittawpa' veng leh pamte leh a khut dawh lam musate'n: Hiai mi, khutdawha tupa hilou maw? a chi uhi. 9 Pawlkhatte'n: Himah e! a chi uhi. Midangte'n lah: Hi kei. Amah tawh kisuun midang khat ahi, a chi uhi. Ahihhangin, mittawpa mahmah in: Tua khut dawhpa hi mah ing, a chi hi. 10 Amaute'n: Ahih leh, na mit bangchi-a hong vaak eita? a chi uhi. 11 Ama'n a dawng a: Mi khat, Jesu a chih un tungman a bawl a, ka mitte hon nuhsak a, tua khitin: Siloam dil ah vapai inla, vasil in, hon chi a, tua bangin ka vapai a, ka vasil a, khua ka mu theita, a chi hi. 12 Amaute'n amah a dong uh a: Hiai mi koia om ahia? a chi uh a, ama'n: Thei ke'ng, a chi hi.
Mittawpa Farisaite' Hawlkhiakna
13 Amaute'n mittawsa-a piangpa a tonpih uh a, Farisaite kiang a tun uhi. 14 Jesu'n tungman bawl a, tua mipa' mit a vaksak ni, Sabbath ni ahi. 15 Tua ahih manin, Farisaite'n zong a khawmuh theih dan, amah a dong uhi. Ama'n amaute kiang ah: Ama'n ka mitte tungman a nuh a, ka sil a, tuin khua ka mu theita, a chi hi. 16 Farisaite pawlkhat in: Hiai mi Pathian apan ahi kei. Sabbath ni a tang kei vele, a chi uhi. Ahihhangin, midangte'n: Mikhial in bangchi'n hibang chiamtehna lamdang hih thei ding ahia? a chi uhi. Tua bangin amaute a kipawlkhenta uhi. 17 Amaute'n mittawpa a dong kik uh a: Nang amah bangchi mi ahi, na chi-a eita, nang' mit hiven a vaksak? a chi uhi. Ama'n: Amah kamsangpa khat ahi, a chi hi. 18 Judate'n bel, tua mipa' nu-le-pa a sap mateng uh, tua mipa mittawsa-a piang a, tu-a khua hon mu thei ahi, chih a um kei lailai uhi. 19 Tua bang ahih manin, amaute'n a nu-le-pa kiang ah: Hiai na tapa uh a hina maw? Mittawsa-a piang na chih uh, hiai a hi taktak maw? Bangchi-a tu-a khua mu thei ahia? a chi uhi. 20 Mittawpa' nu-le-pate'n amaute a dawng uh a: Hiai ka tapa uh a hina chih ka thei uh. Mittawsa-a piang ahi chih zong ka thei uh. 21 Ahihhangin, bangchi-a khua mu theita hiam, ahih kei leh, kua'n a mit vaksak hiam, chih bel ka thei kei uh. Amah dong un, kumching ahita, ama' tungthu kigen thei a hita, a chi uhi. 22 Jesu mah Mesia ahi, chi-a gum peuhmah, sunagog apan hawlkhiak ding, chi-in, Judate'n thu a phial khin uhi. Hiai thu hanga, Judate a lau manun, mittawpa' nu-le-pate'n hibanga thu gen ahi uhi. 23 Hiai hang mah ahi, a nu-le-pate'n: Amah kumching a hita, amah dong un, a na chih uh. 24 Tua nungin, amaute'n a nihvei nadingin mittawpa a sam kik leuleu uh a, a kiang ah: Thupina Pathian pia in. Koute'n hiai mipa mikhial ahih lam ka thei uh, a chi uhi. 25 Ama'n a dawng a: Amah mikhial hi hia, hilou, ke'n ka thei kei. Ahihhangin, theih khat ka nei: Mittaw ka na hi a, tu'n khua ka mu theita! a chi hi. 26 Tua baan ah, amaute'n a kiang ah: Ama'n nang bang hon lawh ahia? Na mit bangchi vaksak ahia? chi-in a dong uhi. 27 Ama'n amaute a dawng a: Kon hilh khinta a, na ngai nuam kei uh. Banghanga za nuam thak na hi ua? Noute zong ama' nungzui suak nuam na hi umaw? a chi hi. 28 Amaute'n tua a zak takun, amah a kousia uh a: Nang na hi ve ama' nungzui! Koute, Mosi' nungzui hi ung! 29 Pathian in Mosi kiang ah thu a gen chih ka thei uh. Hiai mi phiangsan, hong kipatna nanjpwn thei kei ung, a chi uhi. 30 Tua mipa'n a dawng a, amaute kiang ah: Tua ahi ve a lamdanna! Ama' hong kipatna na theih louh uh! Hinapi-a lah ama'n ka mit vaksak a! 31 Pathian in mikhialte a ngaikhe kei, chih i thei. Ahihhangin, Pathian biak limsak a, a deihlam hih mi bel a ngaikhia. 32 Mittawsa-a piang kuamah' mitte a kivaksak chih, leitung pian chil apan kiza ngeiloupi. 33 Hiai mi, Pathian akipan hong pai hi kei leh, bangmah hih thei ke'n teh, a chi hi. 34 Amaute'n a dawng uh a, a kiang ah: Nang khial lumleta piang na hi. Koute non sinsak ngam vial maw! a chi uh a, amah a hawlkhia uhi.
Khalama Mittaw
35 Amaute'n tua mipa a hawlkhia uh chih Jesu'n a za hi. Amah a muh takin, a kiang ah: Pathian' Tapa na um hia? a chi hi. 36 Tua mipa'n a dawng a: Pu aw, amah kua ahia? Amah ka up theih nadingin hon hilh ve, a chi hi. 37 Jesu'n: Tuin amah na muta. Amah tu-a nang hon houpihpa ahi, a chi hi. 38 Ama'n tua a zak takin: Toupa, um mah ing! a chi a, amah a bia hi. 39 Jesu'n: Mittawte' mit a vak nading leh, mitvakte' mit a tawt nadinga, thukhen dinga hiai leitunga hong pai ka hi, a chi hi. 40 Amah kianga om Farisaite pawlkhat in hiai a gen lai a za uh a, amah kiang ah: Koute zong mittaw ka hi ua hia? a chi uhi. 41 Jesu'n amaute kiang ah: Mittaw hi le uchin zaw, mawhna nei lou ding hi ve uchin. Tu'n bel, mitvak na kichih manun, na mawhna uh omden a hi ve! a chi hi.
Belamchingpa Tak
1 Noute thutak kon hilh ahi: Kongpi tawn lou a, lam tuam peuha kal a, belam huanga lut peuhmah, guta leh suamhat ahi. 2 Ahihhangin, kongpi tawna lut bel, a belamte chingpa ahi. 3 Kongpi vengpa'n belamchingpa kong a hon a, belamte'n ama' aw a ngaikhia uh. Ama'n belamte a min minun a sam a, amaute a piikhia hi. 4 Ama'n ama' belamte a piikhiak chiangin, amaute' mai ah a pai a, belamte'n ama' aw theitumta uh ahih manin, amah a zui uhi. 5 Ahihhangin, amaute'n melmak mi' aw thei lou uh ahih manin, melmak mi a zui het kei ding uh a, a taisan zaw ding uh, a chi hi. 6 Jesu'n hibang gentehna zangin thu a hemgen a, ahihhangin, amaute kianga a thugen, a theisiam kei uhi.
Belamchingpa Hoih
7 Tua ahih manin, Jesu'n amaute kiang ah a gen kik a: Noute thutak kon hilh ahi: Kei belamte adinga kongpi ka hi. 8 Ka ma-a hong paite khempeuh, gutate leh suamhatte ahi uh a, belamte'n amaute' aw a ngaikhe kei uhi. 9 Keimah kongpi ka hi. Keimah tawna lut peuhmah, hotdam ahi ding a, lutin a pawt ding a, nek ding an a mu ding. 10 Guta zaw, gu ding leh that ding leh hihse ding kia-a hong pai ahi. Kei bel, amaute'n hinna a neih nading uleh, a kiching mahmaha a neih nading ua hong pai ka hi. 11 Kei tua Belamchingpa hoih ka hi. Belamchingpa hoih in, belamte sik leh taangin a hinna a luikhia. 12 Ahihhangin, sum thalawh mi zaw, belamte neipa leh chingpa ahi kei. Tua bang mi in, ngia hong pai a muh chiangin, belamte a taisan nak. Tua bangin, ngia in belamte a man a, a delhzak hi. 13 Amah sum thalawh lei ahih manin, belamte awlmawhna a nei kei a, a taimangsan hi. 14 Kei, tua Belamchingpa hoih ka hi. Ke'n ka belamte ka thei a, ka belamte'n kei hon thei uh. 15 Pa'n kei hon theih bangbangin, ke'n Pa ka thei a, belamte sik leh taangin ka hinna ka luikhia hi. 16 Hiai belam huanga hilou, belam dangte zong ka nei a, tuate zong ka piilut teitei ding ahi. Amaute'n zong ka aw a ngaikhe ding uh a, belamhon khat leh a chingpa khat a omta ding. 17 Lakkik dinga ka hinna ka luikhiak mana ka Pa'n kei hon it ahi. 18 Kuama'n ka hinna, kei apan hon suh ahi kei a, keima' thu-a ka luikhiak ahi zaw. Hinna luikhiak nading thuneihna ka nei a, lakkik nading thuneihna zong ka nei hi. Hiai thupiak, ka Pa apana ka ngah ahi, a chi hi. 19 Hiai thute hangin Judate a kipawlkhen kik uhi. 20 Amaute laka tampi in: Amah dawimat hi veh aw, haipau hi veh. Banghanga a thugen ngaikhia khia na hi ua? a chi uhi. 21 Ahihhangin, midangte'n bel: Hiai dawimat mihai' thugen hi kei veh aw. Dawi in mittawte' mitte a vaksak thei-a hia? a chi uhi.
Belamchingpa'n a Belamte Thei
22 Jerusalem ah, Latna Ankuang luina a om a, phalbi lai ahi. 23 Jesu zong tempul kianga, Solomon' Innliim ah a kivialleh leh hi. 24 Judate, a kiim ah hong kikhawm uh a: Bangtan ahia lungsim laklawha non koih lai ding? Mesia na hih leh, a kiteltakin hon hilh in, a chi uhi. 25 Jesu'n amaute a dawng a: Kon hilhta tawk vele, na um nuam kei ua hiven. Ka Pa' mina chiamtehna lamdang ka hihte 'n, ka hihna a genkhia hi. 26 Noute kon hilhtak bangin, ka belamte na hih louh manun, umlou na hi uhi. 27 Ka belamte'n ka aw a ngaikhia uh. Ke'n amaute ka thei a, amaute'n kei hon zui uh. 28 Amaute Tangtawn hinna ka pia a, a mangthang ngei kei ding uh. Amaute ka khut sung apanin kuama'n hon sut thei kei ding. 29 Ka khut sunga amaute hon pepa ka Pa, miteng sanga lianzaw ahi. Amaute ka Pa' khut sung apanin kuama'n a sut thei kei ding. 30 Kei leh ka Pa pumkhat ka hi uhi, a chi hi. 31 Judate'n amah deng dingin suang a tawm kik leuleu uhi. 32 Ahihhangin, Jesu'n amaute kiang ah: Ke'n ka Pa apanin nasep hoih tampi kon lakta. Tuate laka a koipen hanga suanga hon deng dek na hi ua? a chi hi. 33 Judate'n a dawng uh a: Nasep hoih na hih mana suanga hon deng dek ka hi kei uh. Nang mihing leltak hinapi-a, Pathiana kibawl a, Pathian na gensiat man ahi zaw ve, a chi uhi. 34 Jesu'n amaute a dawng a: Noute, Dan Laibu sung ah: Noute, pathiante na hi uh, hon chi hi'ng, chi-a kigelh ahi kei-a hia? 35 Ama'n, Pathian' thu tunnate nangawn, pathiante, chi hiven, Laisiangthou thu lah kipelh thei lou a! 36 Ke'n Pathian' Tapa ka hi, ka chih mana, Pa'n a sehtuam a, leitunga a Sawlpa pen, Pathian gensia hon chi na hi umaw? 37 Ka Pa' nnate sem ka hih kei leh, hon um kei ve ua. 38 Ka Pa' nnate sem ka hih chiangin, noute'n kei non umta kei zongun, tua thillamdangte beek um un. Tua hi leh, Pa, keimah ah a om a, kei, Pa ah ka om, chih na thei ding uh a, na theisiam thei ding uhi, a chi hi. 39 Tua khitin, amaute'n amah mat a sawm kik leuleu uhi. Ahihhangin, amah amaute' khut apanin a suakta hi. 40 Jesu bel, Jordan lui gal lam ah, a chil laia Johan in mi a baptisna mun ah, a kilehkikta a, tua mun ah a taam hi. 41 Tua mun ah mi tampi, amah kiang ah hong pai uh a, tua mite'n: Johan in chiamtehna lamdang bangmah na hih kei mah leh, hiai mi' tungthu a gen khempeuh a na dik vek hi, a kichi uhi. 42 Tua mun ah mi tampi in Jesu a umta uhi.
Lazar' Sihna
1 Lazar kichi mi khat a chi a na hi. Amah Mari leh a sanggamnu Martha' tenna, Bethani khua mi ahi. 2 Hiai chinapa Lazar bel, Mari' sanggampa ahi. Hiai Mari mah ahi Toupa' khe sathau namtui buak a, a sama nulsaknu. 3 Tua ahih manin, tua unau numeite'n amah a samsak uh a: Toupa aw, ngai dih, na itpa china eive, a chisak uhi. 4 Jesu'n tua thu a zak takin: Hiai chinatna sih nading ahi kei, Hiai tungtawna Pathian' Tapa in pahtawina a tan a, Pathian in thupina a tan nading ahi zaw, a chi hi. 5 Jesu'n Mari leh a sanggamnu leh Lazar a it a, 6 Lazar' chinat thu a zak takin, ama' omna ah ni nih dang a taam lai hi. 7 Hiai nungin, ama'n a nungzuite kiang ah: Judia gam ah hawh kik ni, a chi hi. 8 Nungzuite'n a kiang ah: Rabi, tuma zeka Judate'n nang, suanga den hon sawm uh hi a, tuachi pi-in tua ah na hawh kik dia hia? a chi uhi. 9 Jesu'n amaute a dawng a: Sun hun sung dakkal sawmlenih hilou maw? Suntang laia mi a pai chiangin, leitung khuavannuai vaak mu ahih manin a kisuipuk kei hi. 10 Ahihhangin, zankhanga mi a pai chiangin bel, ama' sunga vaak omlou ahih manin a kisuipuk hi, a chi hi. 11 Ama'n hiaite a gen khitin, amaute kiang ah: I lawmpa Lazar a na ihmuta. Amah phawng dingin ka vahawh dek, a chi hi. 12 A nungzuite'n a dawng uh a: Toupa, amah ihmu ahih leh, hong dam nalou ding maw? a chi uhi. 13 Jesu'n bel, a sih thu gen a na hi gige a, a nungzuite'n lah, amah tawldam dinga ihmu gen a sa nilouh uhi. 14 Jesu'n amaute kiang ah, a siangsiangin: Lazar a si ahi, a chi hi. 15 Ama'n: Na up theih nading uh ka ngaihtuah chiangin, tua laia ka om louh, noute hangin ka kipak hi. Ahihhangin, amah kiang ah vahawh ni, a chi lai hi. 16 Thoma in a nungzuihpihte kiang ah: Eite zong amah tawh i sihkhawm theih nadingin amah zui ni, a chi hi. Hiai Thoma bel, Didum kichipa ahi.
Thawhkikna leh Hinna
17 Jesu tua mun a vatun takin, Lazar hankhuk sung ah ni li a omkhinta chih a thei hi. 18 Bethani bel, Jerusalem kiang naia om ahi a, mei nih khawnga gamla ahi. 19 A sanggampa uh suuna om, Martha leh Mari khamuan dingin Judate tampi hong pai uhi. 20 Martha in Jesu hong tung dek chih a zak phetin, a vapai a, amah a vamuak hi. Ahihhangin, Mari bel inn ah a na tu hi. 21 Martha in Jesu kiang ah: Toupa, nang hiaia om hi lechin zaw, ka sanggampa si lou mah ding hiven. 22 Ahihhangin, tu nangawnin, na nget peuhmah Pathian in hon pe ding chih ka thei, a chi hi. 23 Jesu'n a kiang ah: Na sanggampa thoukik ding ahi, a chi hi. 24 Martha in a kiang ah: Ni tawpni chiangin, thawhkik ni-in amah a thoukik ding chih ka thei, a chi hi. 25 Jesu'n a kiang ah: Keimah thawhkikna leh hinna ka hi, kei hon um mi peuhmah, si mah leh a hing ding. 26 A hing a, kei hon um mi peuhmah lah a si ngei kei ding. Hiai na um hia? a chi hi. 27 Martha in Jesu kiang ah: He, Toupa, nang leitunga hong pai dingpa Mesia, Pathian' Tapa na hi chih ka um hi, a chi hi,
Jesu leh Sihna
28 Ama'n hiaite a genkhitin a pai a, a simin a sanggamnu Mari a sam a, a kiang ah: Sinsakpa hong tungta a, nang hon kan, a chi hi. 29 Mari in hiai a zak phetin, a dingkhe ^ah a, Jesu kiang ah hong pai hi. 30 Jesu bel, khawsung hong lut nai kei a, Martha in a vamuhna mun ah a om lai hi. 31 Inn sunga amah tawh omkhawm a, amah khamuan Judate'n Mari dingkhe paha, pusuak a mu uhi. Tua bang ahih manin, amah a zuipawt uh a: Hana kap dinga vapai dek ahi maw? a kichi uhi. 32 Mari, Jesu omna mun a hong tung a, Jesu a muh takin, a khebul ah a bok a, a kiang ah: Toupa, nang hiaia om hi lechin zaw, ka sanggampa si lou mah ding hiven, a chi hi. 33 Jesu'n Mari kap leh, amah hon zui Judate kap a muh takin, dahin a lungkham a, a lungsimin a mau hi. 34 Ama'n: Amah koia sial na hi ua? chi-in a kan hi. Amaute'n a kiang ah: Toupa, hong pai inla, hong en in, a chi uhi. 35 Jesu a kap hi. 36 Amaute'n: Endih ua, amah it na-maizen e! a chi uhi. 37 Ahihhangin, amaute laka pawlkhat in: Mittawpa' mitte vaksakpa'n hiai mi zong silou dinga kem thei lou ahia eita? a chi uhi.
Lazar Kaihthawhna
38 Jesu a lungsima mau kawmin, han ah hong pai hi. Tua han bel, kawkhuk khat ahi a, a kong suanga kisin ahi. 39 Jesu'n: A suang hemkhia un, a chi hi. Misipa' sanggamnu Martha in Jesu kiang ah: Toupa, ni li hita a, tu'n zaw namta ding ahi, a chi hi. 40 Jesu'n Martha kiang ah: Na up leh Pathian' thupina na mu ding, kon chi kei-a hia? a chi hi. 41 Tua khitin, amaute'n han kongkhak suang a hemkhia uh a, Jesu'n vanlam a entou a: Pa aw, ka thu na ngaihkhiaktak manin, na tung ah ka kipak hi. 42 Ka thu na ngaikhe gige chih ka thei. Ahihhangin, nang kei non sawl, chih hiaia ding demduamte'n a up nadingun, amaute hangin hiai ka gen ahi, a chi hi. 43 Ama'n hiaite a genkhitin, ngaihtakin a kikoukhia a: Lazar, hong pawtkhia in! a chi hi. 44 Tua khitin, misipa a khut a khe puanduanga kizial, a maitang zong puana kituamsain hong pawtkhia hi. Jesu'n amaute kiang ah: Amah phei unla, paisak un, a chi hi.
Jesu Thah Sawmna
45 Mari kianga hong hawh a, Jesu' thilhih mu, tua Judate tampi in amah a umta uhi. 46 Ahihhangin, amaute laka pawlkhat bel, Farisaite kiang ah a vapai uh a, Jesu' thilhih a vahilh uhi. 47 Tua khitin, siampi makaite leh Farisaite'n Vaihawmpawl a kaikhawm uhi. Amaute'n: Eite'n bang lawhzawh nei i hia le? Hiai mipa'n lah chiamtehna lamdang tampi hihta a! 48 Amah hibang in khahzan lehang, michih in amah um ding uhi. Tua hun chiangin, Romte hong pai ding uh a, i mun leh i minam hong lamang ding uhi, a kichi uhi. 49 Amaute lak ah Kaiafa kichi mi khat a om a, amah tua kuma siampilian ahi. Ama'n amaute kiang ah: Bangmah mah thei kei uteh! 50 I minam buppi a manthat vek sangin, mipite sik leh taanga mi khat a sih, eite adingin a hoihzaw, chih zong phawk kei uteh! a chi hi. 51 Hiai bel, ama' lungsima piang a gen ahi kei hi. Amah tua kuma siampilian ahi a, Juda nam sik leh taang kia-a Jesu si ding hi lou a, 52 a kithehdalh, Pathian' tate, ama'n a kaihkhawm a, khata a gawmkhawm dingte sik leh taanga zong si ding ahih thu genkhol a na hi gige hi. 53 Tua hangin, amaute'n tua ni apanin, amah thah ding dan a gelkhawm khawm uhi. 54 Tua ahih manin, Jesu, Judate lak ah a langtangin a vak nawn kei hi. Tua mun apanin a paikhia a, gamdai-gamkeu kiim gam ah, Efraim kichi khawta khat ah a pai hi. Tua ah a nungzuite tawh a taam hi. 55 Judate' Paikan Ankuang lui hun hong naita a, tua ma-a kisiansuah dingin, mi tampi gam sunglam apanin Jerusalem ah hong hawhtou uhi. 56 Amaute'n Jesu a zong uh a, tempul kima dingin: Bangchi'n na ngaihsun ua? Ankuang luina-a amah hong hawh het lou ding adiam? a kichi uhi. 57 Siampi makaite leh Farisaite'n bel, kuapeuh in Jesu' omna a theih leh, amah a mat theih nading ua, amaute hilh pah dingin thupiak khat a na bawlkhin uhi.
Jesu Sathau Nilhna
1 Paikan Ankuang lui nading lu ni guk a sap laiin, Jesu, Bethani khua ah hong hawh hi. Tua bel, misite lak apan a kaihthawh Lazar teenna khua ahi. 2 Amaute'n Jesu adingin ankuang a lui uhi. Martha in an a pia a, Lazar bel, amah tawh ankuang umkhawmte lak ah a pang hi. 3 Tua laitakin, Mari in nardi thau namtui, manpha mahmah, thawl khat hon tawi a, Jesu' khepekte a buak a, a sam in a khete a nui hi. Tua inn sung khempeuh ah sathau gim namtui hong nam hi. 4 Tua laitak mahin, a nungzuite laka khat, Simon' tapa Juda Iskariot, amah lehbawla khawng dingpa in: 5 Banghanga hiai sathau namtui, dinari za thuma zuaka, a sum mizawngte kianga kipe zaw lou ahia? a chi hi. 6 Ahihhangin, ama'n mizawngte a khual mana hiai gen ahi kei a, amah guta ahi a, dangka ip kem ahih mana hiai gen ahi zaw. Ama'n dangka ipa kikoihte la pahpah dan ahi. 7 Jesu'n a dawng a: Vakikum dah un. Mari in hiai sathau, ka kivui ni adinga a na siit nilouh ahi. 8 Mizawngte ahih leh, noute kianga om gige ding ahi uh. Kei bel, noute kianga om gige lou ding ka hi, a chi hi. 9 Tua hun sungin, tua mun ah Jesu a om chih mite'n a thei uh a, mipi tampi hong paikhawm uhi. Amaute, Jesu mu nuam kia hilouin, misite lak apan a kaihthawh Lazar mu nuam kawma hong pai ahi uhi. 10 Ahihhangin, siampi makaite'n Lazar thah ding dan zong a kikum uhi. 11 Ahang bel, Lazar hanga Judate tampi in amaute nusia a, Jesu a uptak man uh ahi.
Jerusalema Jesu Pahtawina
12 A zing chiangin, Ankuang luina-a hong hawh, mipi tampi mahmahte'n Jesu, Jerusalem hong tung dek, chih thu a na za uhi. 13 Amaute, amah muak dingin, tum nahte tawiin hong kuan uh a: Hosana! Toupa' mina hong pai, Israel Kumpipa, a nunnuam hi! chi-in, a kikou zuazua uhi. 14 Jesu'n sabiltung nou khat a mu a, a tung ah a tuang hi. 15 Zion' Tanu aw, lau ken. En in, na kumpipa, sabiltung nou tunga tuangin hong pai hi, chi-a kigelh bangbang ahi. 16 A nungzuite'n, a chilin hibanga thil hong tungte, a om dan tak a thei pah kei uhi. Ahihhangin, Jesu'n pahtawina a tan khitin a thei pan uhi. Ama' tungthu hibanga na kigelh a, hibang thilte ama' tunga hih uh hitah, chih a phawk uhi. 17 Jesu'n hankhuk apan Lazar a sap a, misite lak apan a kaihthawh laia mipi omte'n, theihpihna thu a genthang uhi. 18 Jesu'n hiai chiamtehna lamdang a hih theihpihna thu, hiaia mipite'n zong a zaksawn manun, amah na muak ahi uhi. 19 Farisaite'n bel: Amah bangmah lawh zoulou i hita ve! En ve ua, leitung bup in amah zuita! a kichi uhi.
Sihna apan Gahsuahna
20 Tua lai ah, Ankuang lui laia Pathian be dinga hong pai Grikte pawlkhat a om uh a, 21 amaute Filip kiang ah hong pai uhi. Filip bel, Galili gama Bethsaida khua-a teeng ahi. Amaute'n Filip kiang ah: Pu aw, Jesu mu nuam ung, chi-in hong ngen uhi. 22 Filip in Andru kiang ah tua thu a vatun a, Andru leh Filip in Jesu a vahilh uhi. 23 Jesu'n amaute a dawng a: Mihing Tapa in pahtawina ka tan hun hong tungta hi. 24 Noute thutak kon hilh ahi: Buhtang leilaka a kiak a, a sih phot kei leh, amah kiain a omden hi. Ahihhangin, a sih chiangin bel, gah tampi a suang hi. 25 A hinna it mi in a mansuah ding a, leitunga a hinna haw mi in bel, Tangtawn hinna dongin a nei zaw ding hi. 26 Ka nasemmi peuhmah in kei hon zuih teitei ding ahi. Ka omnana ah ka nasemmi zong a om sam ding hi. Mi kuapeuh in ka nna a sep leh, ka Pa'n amah a pahtawi ding hi.
Jesu Sih ding Genkholhna
27 Tuin ka lung a kham mahmah hi. Bang gen ding ka hia? Pa aw, hiai hun apan hon hukhia in, chi ding maw? Chi lou e. Hiai ding maha hiai hun tung ka hi. 28 Pa aw, na min pahtawi in! a chi hi. Tua hun laitakin, vantung apan aw hong ging a: Ka pahtawita, ka pahtawi lai ding, a chi hi. 29 Tua laia ding a, tua aw za mipite'n a zak uh, vanpi ging a sa uhi. Midangte'n lah: Vansawltak khat in amah houpih ahi, a chi uhi. 30 Jesu'n: Hiai aw, keimah khualna-a ging ahi kei a, noute khualna-a ging ahi zaw. 31 Leitung khuavannuai tunga thukhen hun, tu hun ahi. Tuin leitung kumpipa kipaikhe ding a hita. 32 Kei bel, leilak apan khaikanga ka om chiangin, kei lam ah mi khempeuh ka hip ding hi, a chi hi. 33 Hiai bel, bangchi bang sihna thuak ding hiam, chih a genna ahi. 34 Mipite'n amah a dawng uh a: Mesia zaw Tangtawna omden ding ahi, chi-in, Dan Laibu sung apan koute'n ka za uh. Bang chi dana nang, Mihing Tapa kikhaikang teitei ding ahi, chi thei na hia? Hiai Mihing Tapa kua ahia? a chi uhi. 35 Jesu'n amaute kiang ah: Tua vaak in noute tomkha sung hon ompih lai tadih ding. Tua vaak na neih sungun, mial in hon lap main, tua vaak ah kalsuan un. Mial laka kalsuan mi in a paina a thei kei hi. 36 Vaak tate na suah theih nadingun, tua vaak na neih sungun, tua vaak um un, a chi hi. Jesu'n hiai thute a gen khitin, a paikhia a, amaute apan a kibu hi.
Judate' Umlah Lailaina
37 Jesu'n amaute mitmuha chiamtehna lamdang tampitak a hih nung nangawnin, amaute'n amah a um nuam kei lailai uhi. kamsangpa Isai' thugen nading ahi. Ama'n: 38 Hiai bel, a tangtun Toupa, koute' thupuak kuan um a, Toupa' khut kua kianga kihil ahia? a na chi hi. 39 Tua bang ahih manin, amaute'n um thei lou uh ahi. Isai mah in mun dang khat ah: 40 Ama'n amaute' mitte tawsak a, amaute' lungtang kheengsak hi. Tua ahih mana, mita lah mu thei lou, lungtanga lah theithei lou uhi. Tua hi kei leh, amaute lunghei ding uh a, ke'n na damsak ding hi'ng, a na chi hi. 41 Isai in Jesu' thupina na mu a, a tungthu na gen ahih manin, hibang thu na gen ahi.
Vaaka Kalsuan
42 Hinapi-in, vaihawm makaite lak nangawn ah, mi tampi in amah a um uhi. Ahihhangin, Farisaite hanga sunagog apan hawlkhiak ding lau uh ahih manin, amaute'n amah a upna uh a langtangin a pulak kei uhi. 43 Ahang bel, amaute'n Pathian' pahtawina sanga mihingte' pahtawina it zaw uh hiven. 44 Tua nungin, Jesu nakpitakin a kikoukhia a: Kei hon um mi in kei kia hon um hilouin, kei hon sawlpa zong um ahi. 45 Kei hon et chiangin kei hon sawlpa a mu hi. 46 Kei hon um mi kuamah miallaka a omden louh nadingin, keimah leitunga vaak hi-a hong pai ka hi. 47 Mi kuapeuh in ka thugente za a, a zuih leh, ke'n amah mawhsak dingin thu ka khen kei. Leitung khuavannuai thu khena, mawhsak dinga hong pai ka hi kei a, hondam dinga hong pai ka hi zaw. 48 Mi kuapeuh in kei hon nial a, ka thugente a saan kei leh, ama' tunga thukhen ding khat a om. Ka thugen mahmah in ni tawpni chiangin, amah mawh a tangsak ding. 49 Ke'n keima' thuin thu ka gen kei. Kei hon sawlpa, ka Pa'n thutak hon pia a, thu gen ding leh, a gen ding dan hon hilh hi. 50 Ama' thupiak Tangtawn hinna ahi, chih ka thei. Tua ahih manin, ka thugen peuhmah, ama' hon thupiak bang teekteeka ka gen ahi, a chi hi.
Nungzuite' Khe Silsakna
1 Paikan Ankuang lui a kipat ma zekin, Jesu'n leitung nusia a, a Pa kianga a pai hun a tungta chih a thei hi. Leitung khuavannuaia om, ama'-ate a it a, a tawp dongin a it hi. 2 Nitakan a nek laiun, dawimangpa'n Simon tapa Juda Iskariot' lungsung ah, Jesu lehbawla khot ding lungsim a guankhinta hi. 3 Jesu'n bel, Pa'n ama' khut sung ah thil bangkim a pia chih a thei hi. Pathian apan hong pai a, Pathian kianga paikik ding ahi chih zong a thei hi. 4 Tua bangin, ankuang apan a dingkhia a, a puanak tungnung teng a suahkhia a, mainul dial a teeng a, 5 tuikuang ah tui a sung a, a nungzuite' khete a sil a, mainul dial a teenin a nui hi. 6 Amah Simon Peter kianga a hong pai takin, Peter in: Toupa, nang tel in ka khete non silsak buang dia hia? a chi hi. 7 Jesu'n a dawng a, a kiang ah: Ka thilhih dek tu'n na thei kei. Ahihhangin, nung chiangin na thei ding, a chi hi. 8 Peter in a kiang ah: Ka khete nang sil ngei buang lou e! a chi hi. Jesu'n a dawng a: Ke'n kon sil kei aleh, kei tawh tankhawm bangmah na nei kei, a chi hi. 9 Simon Peter in a kiang ah: Toupa, tua bang ahih leh, ka khete kia hilouin, ka khutte leh ka lutang zong sil in! a chi hi. 10 Jesu'n amah a dawng a: A kipumsilsa mi pen, a khete loungal sil a kul kei. A pumpi a vekpi-in a siang hi. Noute na siang uhi. Ahihhangin, na vekun zaw na siang kim kei uh, a chi hi. 11 Ama'n amah lehbawla khawng dingpa kua hi hiam chih a thei hi. Tua ahih manin, ama'n: Na vekun zaw na siang kim kei uh, chi ahi.
Nna Kisepsak thu
12 Ama'n amaute' khete a sil khitin, a puanakte a silh a, a tu kik a, amaute kiang ah: Noute tunga ka hih na thei uhia? 13 Noute'n: Sinsakpa leh Toupa, non chi uh a, na chi dik uh. Tua bang ka hi mah hi. 14 Tuin, kei, noute' Toupa leh Sinsakpa'n na khete uh hon silsakta hi vengin, noute zong khat leh khat, khe na kisilsak tek ding uh ahi. 15 Noute tunga ka hih bangbang na hih nadingun, etteh ding hon pia ka hi. 16 Noute thutak kon hilh ahi: Sila zaw a toupa sanga lianzaw lou ahi. Thupaw mi zong amah sawlpa sanga lianzaw lou ahi. 17 Hiai thilte theita hive uchin, na zuih uleh, mi nunnuam na hi ding uhi.
Amah Lehbawlna Genkholhna
18 Noute huam veka thugen ka hi kei hi. Ke'n ka teelsa mite ka thei. Ahihhangin, ka ankuang umpihpa'n kei tunga a khetul liikta, chi-a Laisiangthou sunga kigelh a tangtun nading ahi. 19 Hiai a tangtun chianga noute'n, kei amah ka hi, chih non up theih nadingun, a hun tun ma-a hon hilh ka hi. 20 Noute thutak kon hilh ahi: Ka sawl mi a na saang peuhmah, kei hon saang ahi, a chi hi.
Juda' Lehbawlna Genkholhna
21 Jesu'n hiai a genkhitin, a lungsim a mangbang mahmah a, amaute kiang ah theihpihna thu a gen a: Noute thutak kon hilh ahi: Noute laka khat in kei hon lehbawla hon khawng ding ahi, a chi hi. 22 A nungzuite a kien giaugiau uh a, a kuapen gen ahi diam aw, a chih theilou in a mangbang uhi. 23 Amaute laka khat, Jesu'n a it nungzui pen, Jesu tawh kizoma tu hiven, 24 Jesu'n a kuapen gen hiam, chih dong dingin Simon Peter in hiaipa a khutvan hi. 25 Ama'n Jesu anga kingaiin: Toupa, kua ahia na gen? a chi hi. 26 Jesu'n a dawng a: Tanghou them ka diah khita ka piakpa ahi ding, a chi hi. Tua khitin, ama'n tanghou them a diah a, Simon' tapa Juda Iskariot a pia hi. 27 Juda in tua tanghou a saan khit phetin, ama' sung ah Setan a lut hi. Jesu'n a kiang ah: Na hih ding pen hih meng in, a chi hi. 28 Banghanga Jesu'n amah kianga hiai gen hiam, chih amaute kuamah in a thei kei uhi. 29 Amaute pawlkhat in, Juda in dangka ip keem ahih mana, Ankuang lui nadinga kisam bang peuh lei ding hiam, ahih kei leh, mizawngte bangpeuh pe ding hiama Jesu'n amah sawl hi'nte, chi-in a ngaihsun uhi. 30 Juda in tua tanghou a nekkhitin, a paikhe pah hi. Tua hunin zankhang ahita hi.
Thupiak Thak
31 Juda a paikhiak nungin, Jesu'n: Tuin Mihing Tapa pahtawi a om ka hita a, kei mah ah Pathian pahtawiin a omta. 32 Kei maha Pathian pahtawia a om leh, Pathian in Tapa amah mah ah a pahtawi ding a, a pahtawi pahta ding hi. 33 Ka tate aw, hun tomchik lei noute hon ompih lai ding ka hi. Judate ka hilh bangin, noute kon hilh ahi: Noute'n non zong ding uh a, ka pai nading ah nong pai thei kei ding uh. 34 Thupiak thak khat kon pia hi: Noute ki-ittuah tek un. Ke'n noute kon ittak bangin, noute na ki-ittuah tek ding uh ahi. 35 Noute na ki-ittuah tek chiangun, ka nungzuite na hi uh chih, mite'n hon thei ding uh ahi, a chi hi.
Peter' Kilepsan ding Thu
36 Simon Peter in amah a dong a: Toupa, koia pai ding na hia oi? a chi hi. Jesu'n a dawng a: Ka pai nading ah tuin non zui thei kei ding. Nung chiangin bel non zui ding hi, a chi hi. 37 Peter in a kiang ah: Toupa, banghanga tu-a hon zui thei lou ding ka hia oi? Nang adinga ka hinna luikhe ding ka hi, a chi hi. 38 Jesu'n a dawng a: Kei adingin na hinna na luikhe ding maw? Nang thutak kon hilh ahi: Akkhuan main thumvei hon kilepsan ding na hi aw, a chi hi.
Lampi, Thutak leh Hinna
1 Tua baan Jesu'n: Na lungtang uh dahin lungkhamsak kei un. Pathian muang unla, kei zong hon muang un. 2 Ka Pa' innsung ah tenna mun tampi om ahi. Tua bang hilou hi leh, noute kon hilhkhinta ding hi. Noute ading mun khat bawlkhol dinga pai dek ka hi. 3 Vapai a, noute ading mun khat ka bawlkhit chiangin, kong pai kik ding hi. Ka omna muna noute zong na om theih nadingun, ka kianga om dingin noute kong la ding hi. 4 Ka pai nading mun na thei uh a, a lampi zong na thei uhi, a chi hi. 5 Thoma in a kiang ah: Toupa aw, na pai nading mun ka theih louhpi uh, bangchi-in a lampi ka thei ding ua oi? a chi hi. 6 Jesu'n a dawng a, a kiang ah: Keimah tua lampi, tua thutak leh tua hinna ka hi. Kei hon tawn louin kuamah Pa kiang a tung thei kei. 7 Kei non theih taktak uleh, ka Pa zong na theita ding uhi. Tu apanin amah na thei uh a, na umta uhi, a chi hi. 8 Filip in a kiang ah: Toupa aw, Pa hon lak ve, tua hileh, lungkim pah ding hi ung, a chi hi.
Pa leh Tapa Pumkhat
9 Jesu'n a kiang ah: Filip, noute kianga hitanpi ka om nunga, kei hon thei lou lai na hi maw? Kei hon mukhin mi in ka Pa mukhin ahi. Bangchi dana, Pa hon lak in, chi thei na hia? 10 Kei, Pa ah ka om a, Pa kei ah a om, chih um lou maw? Noute kianga ka thugente, keima' thu-a ka gen ahi kei a, Pa, keia teengpa in tua nnate sem ahi zaw. 11 Kei, Pa ah ka om a, Pa, keimah ah a om, ka chih hon um in. Ahih kei leh, thillamdang ka hihte hang beekin hon um in, 12 Noute thutak kon hilh ahi: Kei hon um mi in ka nasepte mah a sem sam ding. Kei ka Pa kianga ka paitak ding manin, hiaite sanga thupi zaw nangawn a sem ding hi. 13 Pa'n Tapa tungtawna pahtawina a ngah theih nadingin, ka min siala na nget peuhmah uh ka hih ding. 14 Ka min sialin bangpeuh na thei ding ua, ken ka hih ding hi.
Kha Siangthou Chiamna
15 Noute'n kei hon it hive uchin, ka thupiakte zui un. 16 Tua hileh, ke'n ka Pa kiang ah ka ngen ding a, ama'n noute hon ompih gige ding Panpihpa dang khat hon pe ding ahi. 17 Tua Panpihpa bel, Thutak Kha ahi. Leitung khuavannuai in amah mu lou, theih zong thei lou ahih manin, amah a saang thei kei. Ahihhangin, amah noute tawh teengkhawma noute sunga teeng ding ahih manin, noute'n bel amah na thei uhi. 18 Ke'n noute tagahin kon nuse kei ding. Noute kiang ah kong kilehkik ding hi. 19 Hun sawtlou nung chiangin, leitung khuavannuai in kei hon mu nawn kei ding. Ahihhangin, noute'n bel non mu ding uh. Kei a hing gige ka hih manin, noute zong na hing ding uh. 20 Tua ni chiangin, kei Pa ah ka om a, noute keimah ah na om uh a, kei noumau ah ka om, chih na thei ding uhi. 21 Ka thupiakte neia zui mi peuhmah, kei hon it mi ahi. Kei hon it mi ka Pa'n a it ding. Ke'n amah ka it ding a, amah kiang ah ka kilaak ding hi, a chi hi. 22 Iskariot hilou pen Juda in a kiang ah: Toupa, nang koute kianga kilaak ding a, leitung khuavannuai kianga na kilaak louh ding banghang ahia le? a chi hi. 23 Jesu'n a dawng a, a kiang ah: Mi kuapeuh in kei hon it chiangin, ka thu a zui ding a, ka Pa'n amah a it ding a, koute amah kiang ah kong pai ding uh a, amah tawh ka teengkhawm ding uhi. 24 Kei hon it lou mi in bel, ka thute a zui kei ding hi. Na thu zak uh, keia ahi kei a, Pa, kei hon sawlpa-a ahi zaw hi. 25 Noute kianga ka om sunga, hiaite khempeuh hon hilhta ka hi. 26 Ahihhangin, Pa'n Panpihpa, Kha Siangthou, ka mina hon sawl ding ahi. Ama'n thil bangkim noute hon sinsak ding a, kon hilhsate khempeuh hon phawkthaksak ding ahi. 27 Lungmuanna noute kon nutsiat a, keima' lungmuanna kon pia hi. Leitung khuavannuai' piak bangin kon pe kei hi. Na lungtang uh dahin lungkhamsak kei unla, lau zong lausak kei un. 28 Ka paikhe ding a, noute kiang ah kong kilehkik ding, chi-a noute kon hilh thu na zata uhi. Noute'n kei non it uleh, Pa kiang ah ka pai ding, ka chih, na lungnoppih ding uhi. Ahang bel, kei sanga Pa lianzaw ahi. 29 Hiai thil hong tun chianga na up theih nadingun, a tun ma-a hon hilhkhol ka hi. 30 Hiai leitung khuavannuai ukpa hong pai ding ahihtak manin, noute kiang ah thu ka gen sawt nawn kei ding. Ama'n, kei ah bangmah neih a nei kei. 31 Ahihhangin, ke'n Pa ka it, chih leitung khuavannuai in a theih teitei nadingin, ama' hon thupiak bangbangin ka gamta hi. Ding un, hiai apanin paikhe ni.
Jesu leh Nungzuite Kizopna
1 Kei tua a tak grepguipi ka hi a, ka Pa, a grephuan neipa ahi. 2 Hiang, keimaha om hinapi-a gahlou peuhmah, ama'n a lamang a, hiang gah peuhmah lah, a gah phat sem nadingin a dawn a sum a, a hahsiang zel hi. 3 Noute bel, na kiang ua ka gen tua thu hanga asiangsa na hita uhi. 4 Keimah ah om gige un, noute ah ka om gige ding hi. Hiang peuhmah a guipi-a a om gige kei leh, amah kiain a gah thei kei. Noute zong keimaha na om gige kei uleh, na gah thei kei ding uhi. 5 Kei tua grepguipi ka hi a, noute a hiangte na hi uhi. Mi kuapeuh, keimaha a om gige a, kei amaha ka om gige leh, tua mi in gah tampi a suang ding hi. Ahang bel, kei telloua bangmah hih theilou na hi uhi. 6 Mi kuapeuh, keimaha a om gige louh chiangin, hiang bangin paihkhiak ahi a, a keu hi. Tua bang hiangte bel, a kitomkhawm a, meiphual ah a kipai a, a kangtum hi. 7 Noute keimaha na om gige uh a, ka thute noumau sunga a teen leh, na ut peuh uh ngen un, piak na hi ding uhi. 8 Noute na gahphat chiangun, tua in ka Pa a pahtawi hi. Tua mah in ka nungzuite na hi uh, chih a kilangsak ding hi.
Nungzuite' Kizopna
9 Ka Pa'n kei hon ittak bangin, ke'n noute kon itta hi. Ka itna ah om gige un. 10 Ke'n ka Pa' thupiakte ka zui a, a itna ah ka om gige hi. Tua bangin, noute'n zong, ka thupiakte na zuih chiangun, ka itna-a om gige na hi ding uhi. 11 Ka lungnopna noute sunga a om gige a, na lungnopna uh a kim theih nadingin, hiai kon hilh ahi. 12 Noute kon thupiak hiai ahi: Ke'n noute kon ittak bangin, noute ki-ittuah tek un, chih. 13 Mi'n a lawmte adinga a hinna a luikhiak sanga itna lianzaw a om kei hi. 14 Ka thupiakte na zuih uleh, ka lawmte na hi uhi. 15 Sila in a toupa' nasep theihpih lou ahi. Ke'n bel, ka Pa apan ka zakte khempeuh noute kon theisak hi. Tua ahih manin, noute sila kon chi nawn kei a, lawmte kon chi zawta hi. 16 Noute'n kei non teel kei uh a, ke'n noute kon teel zaw hi. Pai a, gah vasuah ding leh, na gah uh omden dingin, noute kon teel a, kon sep hi. Tua bel, ka mina Pa kianga na nget peuhmah uh, ama'n hon piak theih nadingin ahi. 17 Hiai kon thupiak ahi: Noute ki-ittuah tek un.
Nungzuite leh Leitungmite' Kisaina
18 Leitung khuavannuai in noute hon muhdah leh, noute hon muhdah ma-a kei hon mudah masa ahi, chih thei un. 19 Noute, leitung khuavannuai-a hi le uchin zaw, noute hon itta ding hi. Ke'n leitung khuavannuai apan noute kon teelkhiak manin, leitung khuavannuai-a na hi kei uhi. Tua ahih manin, leitung khuavannuai in noute hon mudah ahi. 20 Noute kianga ka thugen thei gige un: Sila zaw, a toupa sanga lianzaw lou ahi, chih. Amaute'n kei hon bawlsia uh hiven, noute zong hon bawlse ding uhi. Amaute'n ka thu zui hi le uh, noute' thu zong a zui ding uhi. 21 Amaute'n kei hon sawlpa a theih louh manun, keima' min hanga noute hibanga hon bawlse ding uh ahi. 22 Kei hong pai lou a, amaute kianga thu gen lou hi leng, khelhna-a mawh lou ding uh hiven. Ahihhangin, tu'n zaw a khelhna uah paulam ding a nei kei uhi. 23 Kei hon mudah mi in ka Pa zong mudah ahi. 24 Midang' hih ngeilouh thilte, amaute laka hih lou hi leng, khelhna-a mawh lou ding uh hiven. Ahihhangin, tu'n zaw ka thil hihte a muta uhi. Hinapi-in, kei leh ka Pa hon mudah uhi. 25 Ahihhangin, amaute' Dan Laibu sunga kigelh a tangtun theih nadinga hibang om ahi. Tua Dan Laibu sung ah David in: Amaute'n a san a hang beipi-in kei hon mudah uh, chi-in a gelh hi.
Kha Siangthou Piak Chiamna
26 Ahihhangin, Panpihpa hong tun chiangin, keima' tungthu a theihpih ding hi. Amah bel, Pa apana kon sawl dingpa Thutak Kha ahi a, Pa apan hong pai ahi. 27 A chil apan kei tawh omkhawm na hih manun, noute'n zong keima' tungthu na theihpih teitei ding uh ahi.
1 Noute kipala na lampial louh nadingun hiaite khempeuh kon hilh ahi: 2 Sunagog ahte hon nongsak ding uh. Ahi, noute hon that khempeuh, Pathian' biakna nasema a kingaihsut hun uh hong tung ding ahi. 3 Amaute'n kei lah hon thei lou, Pa lah thei lou uh ahih manin, hibanga hih taktak ding uh ahi. 4 A hun hong tun chianga, ke'n amaute' thu kon na hilh khinta, chih na theih gige nading ua hiai thilte tu-a hon hilh ka hi. Noute tawh ka omkhawm lai mana, a chila hon na hilh lou ka hi.
Kha Siangthou' Nasep
5 Tu'n kei, hon Sawlpa kianga pai ding ka hita. Ahihhangin, noute kuama'n: Nang koia pai ding na hia? Chi-in non dong kei uh. 6 Hiai thilte kon hilhtak manin, lungkham dahnain na dim uhi. 7 Ahihhangin, noute thutak kon hilh ahi: Ka paikhiak noute adinga hoihzaw ahi. Kei paikhe kei leng, tua Panpihpa noute kianga hong tung lou ding ahi. Ka paikhiak chianga amah noute kianga hon sawl ding ka hi. 8 Amah hong tun chiangin, khelhna thu ahte, diktatna thu ahte, thukhenna thu ahte, leitung khuavannuai mawh a tangsak ding hi. 9 Khelhna thu-a mawh a tansak nading san bel, mite'n kei hon umlou uh a hih man ahi. 10 Diktatna thu-a mawh a tansak nading san bel, kei, ka Pa kianga pai a, noute'n hon mu nawnlou ding na hih manun ahi. 11 Thukhenna thu-a mawh a tansak nading san bel, hiai leitung ukpa'n thukhenna thuaka mawhtang a hih manin ahi. 12 Noute kianga hon hilh ding thil tampi ka nei lai a, ahihhangin, tuin na saang kim thei nai kei ding uh. 13 Ahihhangin, Thutak Kha hong tun chiangin zaw, thutak khempeuh ah noute hon pii ding. Ama' thuin bangmah a gen kei ding a, a zakte peuhmah a gen zaw ding. Ama'n thil hong tung dingte noute hon hilh ding. 14 Ama'n keiate lain noute hon hilh ding a, kei hon pahtawi ding. 15 Pa-a khempeuh keia ahi. Tua bang ahih manin ahi, Kha in keiate la a, noute hon hilh ding, ka chih. 16 Pa kianga pai ding ka hih manin, hun sawtlou nung chiangin, noute'n kei non mu nawn kei ding uh a, hun sawtlou nung mahin, non mu ding uh, a chi hi.
Jesu' Sihna leh Thawhkikna Genkholhna
17 Jesu' nungzuite pawlkhat a kihou uh a: Ama'n: Hun sawtlou nung chiangin, noute'n kei non mu nawn kei ding uh a, hun sawtlou nung mah-in, non mu ding uh, a chih leh: Ka Pa kianga pai ding ka hi, a chih, bang a chihna hi ding ahia? 18 Tua baan ah: Hun sawtlou nung chiangin, a chih, bang a chihna hi ding ahia, i theisiam het kei, a kichi uhi. 19 Nungzuite'n dotna a dong nuam uh, chih, Jesu'n a thei a, amaute kiang ah: Hun sawtlou nung chiangin, noute'n kei non mu nawn kei ding uh a, hun sawtlou nung mahin non mu ding uh, ka chih, bang ka chihna hi hiam, chi-a kidong na hi umaw? 20 Noute thutak kon hilh ahi: Noute dahin na kap ding uh a, ahihhangin, leitung khuavannuai a kipak ding. Noute na dah ding uh a, ahihhangin, na dahna uh lungnopna a suak ding. 21 Numei, a nausuah hun a tun chiangin, nauveiin gim gentheihna a thuak a, ahihhangin, a nau a suah khit chiangin bel, leitunga naungek hong piang mei muin a lungnuam a, a gim gentheihna a phawk nawn kei hi. 22 Tua bangin, noute zong, tuin na dah taktak uhi. Ahihhangin, noute kon mu kik ding a, na lungnuam mahmah ding uhi. Ahi, na lungnopna uh kuama'n hon sut thei kei ding hi. 23 Tua ni chiangin, noute'n keima' mina Pa kianga na nget peuhmah uh ama'n noute hon pe ding. 24 Tuni dongin noute'n ka minin bangmah na ngen nai kei uh. Ngen un, na ngah ding uh a, na lungnopna uh a kim ding hi.
Leitung Khuavannuai Nuaisiahna
25 Noute kiang ah gentehna zangin hiaite hon genta mah leng, a hun hong tung ding a, gentehna zangin thu ka hemgen nawn kei ding. Pa' tungthu a kiteltakin kon hilh zaw ding. 26 Tua ni chiangin, ka minin na ngenta ding uhi. Noute sik leh taangin Pa kiang ah kon ngetsak ding, chi hilou ka hi. 27 Ahang bel, noute'n kei non ittak man uleh, Pathian apan hong pai ka hi, chih na uptak manun, Pa mahmah in noute hon it hi. 28 Kei, Pa apan leitung ah kong pai a, leitung nusiain, Pa kiang ah ka kilehkik dek hi, a chi hi. 29 A nungzuite'n Jesu kiang ah: Tu'n kiteltakin thu na gen a, gentehna zangin na hemgen kei! 30 Nang bangkim na thei a, dotna hon dong ding zong kuamah na kisam se kei, chih ka theitelta uhi. Hiai hang mahin, Pathian apan hong pai na hi chih ka um uhi, a chi uhi. 31 Jesu'n amaute a dawng a: Na um khongkhong umaw! 32 Ngai un, a hun hong tung ding ahi, tu'n zong hong tungkhin ahi. Tua hun chiangin, thehthangin na om ding uh a, noumau' inn tek zuanin, kei kia non nuse ding uh. Hinapi-in, kei kiain ka om kei, Pa'n hon ompih hi. 33 Noute'n keimaha lungmuanna na neih nadingun, hiaite hon hilh ka hi. Leitung ah gim gentheihna na thuak ding uh. Ahihhangin, ke'n leitung khuavannuai nuaisiahta ka hih manin, khamuangtakin om un, a chi hi.
Jesu Thuumna
1 Jesu'n hiai a gen khitin, vanlam entouin a thuum a: Pa aw, a hun hong tungta. Na Tapa in zong thupina nang hon khuksak theih nadingin, thupina, na Tapa khusak in. 2 Nang ama' khuta mi na piak zahzah, ama'n Tangtawn hinna a piak theih nadingin, mi khempeuh tunga thuneihna amah na peta. Tua bang ahih manin, thupina amah pia in. 3 Tangtawn hinna hiai ahi: Pathian tak omsun nangmah leh, na sawl Jesu Khrist theih. 4 Nang non piak sep ding sepkhitna tungtawnin leitung ah thupina kon khusakta. 5 Pa aw, leitung pian ma-a na thupina non khukpih, tua thupina mah, tuin hon khukpih in.
Nungzuite adinga Thuumna
6 Nang leitung apan kei non piak mite khempeuh kiang ah na min ka pulakta. Amaute nanga ahi uh a, amaute kei non pia a, amaute'n na thu a zuita uh. 7 Nang kei non piak thilte khempeuh, nang apan ahi, chih amaute'n a theita uh. 8 Nang non piak thute khempeuh ke'n amaute ka peta a, amaute'n a saangta uh. Nang apan hong pai ka hi, chih amaute'n a thei taktakta uh a, nang kei non sawl, chih a umta uh. 9 Amaute adingin ka thuum a, leitung khuavannuai adingin ka thuum kei. Nang kei non piakte nanga ahih manun, amaute adingin ka thuum hi. 10 Ka neih khempeuh nanga ahi a, nang neih khempeuh zong keia ahi. Amaute' tungtawnin thupina ka ngah hi. 11 Kei leitunga om nawn lou ding ka hi. Amaute bel, leitunga om lai ding ahi uh a, kei zaw na kianga hong pai ding ka hita. Pa Siangthou aw, kei non piak amaute, na min vanglian pansanin hum in. Nang leh kei pumkhat i hih banga, amaute zong pumkhat a suah theih nadingun amaute hum in. 12 Nang kei non piaksa teng tawh leitunga ka omkhawm sungteng na min pansanin amaute ka humbit hi. Mangthang ding tapa loungal, khat leltak zong a mangthang kei hi. Amah lah, Laisiangthou thu a tangtun theih nadinga mangthang ahi hi. 13 Tu'n kei, na kianga hong pai ding ka hita. Amaute'n ka lungnopna a kima a neih theih nadingun, leitunga ka om sungin hiaite ka gen ahi. 14 Amaute na thu ka peta. Kei leitung-a ka hih louh bangin, amaute zong leitung-a ahi kei uh. Tua ahih manin, leitung khuavannuai in amaute a mudah hi. 15 Leitung apan amaute lakhe dingin kon ngen kei a, giloupa apana amaute na hum ding kon ngen zaw hi. 16 Kei, leitung-a ka hih louh bangin, amaute zong leitung-a ahi kei uhi. 17 Na thutakin, amaute sehtuam siangthouin bawl in. Na thu thutak ahi. 18 Nang kei leitunga non sawllut bangin, ke'n amaute leitung ah ka sawlkheta hi. 19 Amaute zong thutak pansana sehtuam siangthou ahih taktak theih nadingun, amaute khualnain kei ka kiseptuam siangthou hi.
A Ummi Khempeuh ading Thuumna
20 Amaute ading kiain kon ngen kei a, amaute' thugen tungtawna kei hon um lai dingte adingin zong kon ngen hi. 21 Pa aw, nang keia na om a, kei nanga ka om banga, amaute khempeuh pumkhat a suah theih nading uleh, eia amaute pumkhat a suah theih nadingun, amaute adingin kon ngen hi. Tua bel, nang kei non sawl chih leitung khuavannuai in a up theih nading ahi. 22 Nang leh kei pumkhat i hi. Tua banga amaute pumkhat a suah theih nadingun, nang kei non piak thupina amaute ka peta hi. 23 Nang kei ah na om a, kei amaute ah ka om. Tua bangin amaute pumkhat a suahna uh tungtawna, nang kei non sawl chih leh, nang kei non ittak bangin amaute na itta chih, leitung khuavannuai in a theih nadingin kon ngen hi. 24 Pa aw, nang kei non piak mite, ka omna mun ah om uh henla, nang kei non it mana, leitung khuavannuai kisiam ma-a thupina non khuksak, tua ka thupina, amaute'n mu sam le uh ka deih hi. 25 Pa diktat aw, leitung khuavannuai in nang hon thei keita mah leh, ke'n kon thei hi. Hiai mite'n zong, nang kei non sawl, chih a thei uhi. 26 Amaute kiang ah na min ka pulakta a, ka pulak lailai ding hi. Tua bel, nang kei non itna bangbang itna amaute sunga a om theih nading leh, kei mahmah, amaute sunga ka om theih nading ahi, a chi hi.
Jesu Matna
1 Jesu hibanga a thuum khitin, a nungzuite tawh a kipankhia uh a, Kidron phaizang a kaan uhi. A gal ah, oliv huan khat a om a, tua huan ah a nungzuite tawh a lut uhi. 2 Jesu leh a nungzuite tua muna kimukhawm pahpah uh ahih manin, amah lehbawla khawng dingpa Juda in zong tua mun a thei hi. 3 Juda in Rom sepaih pawlkhat leh siampi makaite leh, Farisaite' sawl tempul veng sepaih pawlkhat hon makaih a, meivakte, meiselte leh galvante kengin tua oliv huan ah hong kuan uhi. 4 Jesu'n ama' tunga thil tung dingte a thei a, a vapaikhia a, amaute kiang ah: Kua zong na hi ua? a vachi hi. 5 Amaute'n a dawng uh a: Nazareth Jesu, a chi uhi. Jesu'n: Kei, amah ka hi, a chi hi. Amah lehbawla khawngpa Juda zong amaute tawh a dingkhawm hi. 6 Jesu'n: Kei, amah ka hi, a chih takin, amaute nungtawnin leilak ah a puk uhi. 7 Jesu'n amaute kiang ah: Kua zong na hi ua? a chi kik a, amaute'n: Nazareth Jesu, a chi uhi. 8 Jesu'n a dawng a: Kei, amah ka hi, chih kon hilhta. Kei hong zong hive uchin, hiai mite khah un, a chi hi. 9 Hiai bel, ama'n: Nang kei non piaksate khat lei zong ka mansuah kei, a chih, a tangtun nadinga hong tung ahi. 10 Tua laitakin, Simon Peter in a namsau a phawi a, siampilian' silapa a sat a, a taklam bil a satkhia hi. Tua silapa' min Malkhus ahi. 11 Jesu'n Peter kiang ah: Na namsau a pai ah siat in. Ka Pa'n kei hon piak nou ka dawn kei dia hia? a chi hi.
Jesu Ana kiang Kipaipih
12 Tua sepaih pawlte, a makaipa utawh, Judate' sawl tempul veng sepaihte tawh a pangkhawm uh a, Jesu a man uh a, a hen uhi. 13 Amah Ana kiang ah a paipih masapen uhi. Ana bel, tua kuma siampiliana pang, Kaiafa' sungpa ahi. 14 Hiai Kaiafa mah ahi: Miteng taanga mi khat a sih a hoihzaw, chi-a Judate thuhilhpa.
Peter' Kilepsan Khatveina
15 Simon Peter leh nungzui dang khat in Jesu a zui uhi. Tua nungzui dang khat bel, siampilian in a meltheih a hih manin, Jesu tawh siampilian' innhuang kongtual ah a lutkhawm uhi. 16 Ahihhangin, Peter bel, kongpi pawlam ah a ding hi. Tua nungzui dang khat, siampilian in a meltheihpa hong pusuak a, kongpi ngak tua nungak a houpih a, Peter a piilut hi. 17 Tua kongpi ngak, tua nungak in Peter kiang ah: Hiai mi' nungzuite laka khat na hisam kei maw? a chi hi. Peter in: Hi ke'ng, a chi hi. 18 Khua dam ahih manin, silate leh tempul veng sepaite'n meitual a sem uh a, mei awiin a ding uhi. Peter zong amaute tawh mei awiin, tua ah a ding hi.
Siampilian' Thu dotna
19 Tua hun sung teng, siampilian in Jesu kiang ah, a nungzuite tawh kisai leh a sinsakna tawh kisai thu a dong hi. 20 Jesu'n amah a dawng a: Leitung khuavannuai kiang ah a langtangin thu ka gen a, Judate kikhop gigena, sunagog leh tempul ah ka sinsak gige a, a simin bangmah ka gen kei. 21 Banghanga kei thu hon dong na hia? Ka thugen zate dong ve. Bang thu ahia ka gen, amaute'n a thei uhi, a chi hi. 22 Jesu'n hiai a chih takin, a kianga ding tempul veng sepaihte khat in Jesu a ngeibet a: Nang siampilian hibanga dawng vial maw? a chi hi. 23 Jesu'n amah a dawng a: Thudiklou khattou gen ka hih leh a diklouhna theihpihna gen ve. Thudik gen ka hih leh, banghanga hon beeng na hia? a chi hi. 24 Ana in Jesu, hensain, siampilian Kaiafa kiang ah a paipihsak hi.
Kaiafa' maia Jesu: Peter Kilepsannate
25 Simon Peter bel meitual awia ding ahi a, tua-a om mite'n amah kiang ah: Nang zong ama' nungzuite khat hilou na hi maw? a chi uhi. Peter a kilep a: Hi ke'ng, a chi hi. 26 Siampilian' silate khat in: Tua huan sung ah, amah tawh omkhawm kon mu tawk keia hia? a chi hi. Tua pa bel, Peter in a bil a satkhiaksakpa' tanau nai khat ahi. 27 Peter a kilep kik a, ak a khuang pahta hi.
Pilat' maia Jesu
28 Tua khitin, amaute'n Kaiafa apanin Romte' ukpipa' innpi ah Jesu a paipih uhi. A zing chiang, zingsang lam hong hita a, amaute a sianglou a suah louh na'ngun, tua innpi sung ah Judate a lut kei uhi. 29 Pilat hong pusuak a, amaute kiang ah: Hiai mipa na hekna uh bang ahia? chi-in a dong hi. 30 Amaute'n a dawng uh a: Amah thil gilou hih hi kei leh, na kiang hon tun lou ding hi ung, a chi uhi. 31 Pilat in amaute kiang ah: Amah paipih unla, noumau' dan tawh kituakin a tung ah thu khenta un, a chi hi. Judate'n a kiang ah: Koute adingin, kuamah hihlup siang loupi, a chi uhi. 32 Jesu'n bangchi bang sihna thuak ding hiam, chih amah mah in a gensa, a tangtun nadinga hibang thil tung ahi. 33 Pilat, tua innpi sung ah a lut kik a, Jesu a samlut a, a kiang ah: Judate' Kumpipa na hi maw? chi-in a dong hi. 34 Jesu'n a dawng a: Tua na gen, nangma' lungsim suaka na gen hia, ahih kei leh, midangte'n keima tungthu hon hilhsawn? a chi hi. 35 Pilat in a dawng a: Kei, Juda mi non sa-a hia? Nangma' minamte leh, nangma' siampi makaite aka hia ka khuta nang hon pia. Bang na hih-a ahia? a chi hi. 36 Jesu'n a dawng a: Ka kumpigam hiai leitung tawh kisai ahi kei. Hiai leitung tawh kisai hi leh, ka nuaia semte a pang ding uh a, Judate khut ah hibanga piak ka hi kei ding. Tu'n bel, ka kumpigam hiai leitung tawh kisai hi lou ahi, a chi hi. 37 Pilat in a kiang ah: Kumpipa na na hi maw le! a chi hi. Jesu'n a dawng a: Kumpipa non chih, na chi dik hi. Hiai ding maha piang ka hi. Hiai hangin thutak theihpih dinga leitunga hong lut ka hi, Hiai thutak apana piang mi peuhmah in ka thu a ngaikhia, a chi hi. 38 Pilat in a kiang ah: Thutak bang ahia? a chi hi. Ama'n hiai a chih khitin, Judate kiang ah a vapusuak kik a, amaute kiang ah: Amah na hekna uah, a mawhna bangmah ka mu kei.
Judate' Deihtel
39 Ahihhangin, Paikan Ankuang lui huna, henta khat kon khahsak zel, dana na neih uh ahi. Ahih leh, noute kianga Judate' Kumpipa kon khahkhiak ding deih na hi uhia? a chi hi. 40 Amaute a vekpiun kituakin a kikou uh a: Hiai mipa hi lou! Baraba ahi non khah zawk ding! a chi uhi. Baraba bel suamhat ahi.
Jesu Kilhlup ding Thukhentatna
1 Tua khitin, Pilat in Jesu a paipih a, a satsak hi. 2 Rom sepaihte'n lingkung hiangin kumpilukhu a phan uh a, Jesu a khusak uhi. Tua khitin, kumpipuan sandup zong a silhsak uhi. 3 Amaute ama' maia vapaitouin: Judate Kumpipa, na khankhua sawt hen! chi-in a ngeibet zihzeh uhi. 4 Pilat khatvei hong pusuak kik a, Judate kiang ah: En un, amah na hekna thu uah, a mawhna ka mu kei, chih na theih nadingun, noute kiang ah amah kon piikhia hi, a chi hi. 5 Tua banga, Jesu, linglukhu khu-a, kumpipuan sandup silha hong paikhiak takin, Pilat in amaute kiang ah: En un tua mipa! a chi hi. 6 Siampi makaite leh tempul veng sepaihte'n amah a muh takun: Amah khros ah kilhlum in! Amah khros ah kilhlum in! chi-in a kikou uhi. Ahihhangin, Pilat in a dawng a: Noute'n tonpih unla, kilhlum un, ke'n amah diklouhna mu lou ka hi, a chi hi. 7 Judate'n bel: Koute'n dan khat ka nei uh. Amah leh amah Pathian' Tapa, a kichih manin, tua dan banga a sih teitei ding ahi, a chi uhi. 8 Pilat in hiai thu a zak takin, a lau semsem hi. 9 Amah innpi sung ah a valut kik a, Jesu kiang ah: Koia hong kipan na hia? a chi hi. Ahihhangin, Jesu'n bangmahin a dawng kei hi. 10 Pilat in a kiang ah: Hon dawng lou ding maw? Nang hon khah theihna, khros tunga hon kilhlup theihna vangletna nei ka hi, chih na thei keia hia? a chi hi, 11 Jesu'n a dawng a: Tunglam apana piak hi kei lechin, ka tung ah vangletna na nei het kei ding. Tua ahih manin, na khut sunga kei hon pekhepa'n khelhna lianzaw a nei hi, a chi hi. 12 Tua nung siah Pilat in Jesu khahkhiak a sawm hi. Ahihhangin, Judate'n kikouin: Hiai mipa na khah lezaw, Kaisar' lawm hi kei niteh. Kumpipa ka hi, kichi mi kuapeuh Kaisar dou ahi, a chi uhi. 13 Pilat in hiai thu a zak takin, Jesu hon piikhia a, amah Suanglep kichi muna thukhenna tutphah tung ah a tu hi.Tua Suanglep bel, Hebru pauin Gabatha kichi ahi. 14 Tua hun Paikan Ankuang Kisakkholh ni ahi a, dak gukna khawng ahi. Pilat in Judate kiang ah: En un na Kumpipa uh! a chi hi. 15 Ahihhangin, amaute a kikou uh a: Amah lamang in! Amah lamang in! Amah khros ah kilhlum in! a chi uhi. Pilat in: Na Kumpipa uh maw khros tunga ka kilhlup ding! a chi hi. Siampi makaite'n a dawng uh a: Kaisar loungal kumpipa nei kei ung! a chi uhi. 16 A tawptawpin, Pilat in Jesu khros tunga kilhlup dingin, amaute khut ah a pekhia hi.
Jesu Kilhdenna
Tua bangin, sepaihte'n Jesu a paipih uhi. 17 Jesu'n ama' khros a pua a, Luguhmun zuanin a paita hi. Tua mun bel, Hebru pauin, Golgotha kichi ahi. 18 Tua mun ah, khros tung ah amah a kilhden uh a, midang nih zong a pang lang tuak ah a kilhden uh a, amaute kikal ah Jesu a laita hi. 19 Pilat in theihsakna khat a gelh a, tua Jesu' khros tung ah a suang hi. Tua theihsakna bel: NAZARETH JESU, JUDATE' KUMPIPA, chi-a kigelh ahi. 20 Jesu, khros tunga a kilhdenna mun uh, khawpi kiang nai a hih manin, Judate tampi in tua lai kigelh a sim uhi. Tua theihsakna bel Aram pau, Latin pau leh Grik paua kigelh ahi. 21 Judate laka siampi makaite'n Pilat kiang ah: Judate' kumpipa, chi-in gelh kenla. Hiai mi in: Judate' kumpipa ka hi, a chi, chi-in gelh zaw in, a chi uhi. 22 Pilat in a dawng a: Ka gelh khitsa pen, ka gelhkhitsa ahita, a chi hi. 23 Rom sepaihte'n khros tunga Jesu a kilhden khitun, a puansilhte a la uh a, seh khat teka hawm dingin, seh li-in a sehkhen uhi. A puanaktual pen bel, tua bangin a sehkhen kei uhi. Tua pen, khuilouh puan, a ngawng apan a taw dong kizoma kigan ahi. 24 Amaute'n: Hiai zaw phelkhap kei ni. Kua tan ding hiam, aisan ni, a kichi uhi. Hiai bel, Laisiangthou sunga: Amaute'n ka puansilhte kihawm uh a, ka puanaktual adinga ai san uhi, chi-a kigelh a tangtun nadinga thil tung ahi. Tua bang ahih mana, Rom sepaihte'n hibang teekteeka hih ahi uhi. 25 Tua Jesu' khros kiang ah, a nu tawh, a nu' sanggamnu tawh, Klopa' zi Mari tawh, Magdala apan Mari tawh a ding uhi. 26 Jesu'n a nu leh a nungzui a itpa, a kianga ding a mu a, a nu kiang ah: Numei, en in na tapa! a chi a, 27 tua nungzuipa kiang ah: En in na nu! a chi hi. Tua hun apanin, tua nungzuipa'n tua nu, ama' inn ah a tonpihta hi.
Jesu' Sihna
28 Hiai nungin, Jesu'n bangkim a kizou kimta, chih a theih manin leh, Laisiangthou thu a tangtun nadingin: Ka dang a tak! a chi hi. 29 Tua lai ah, greptui thuka dim bel khat a kitung hi. Amaute'n tua tuithuk ah tuihupthei khat a diah uh a, husawp kung dawna koihin, Jesu' kam ah a tahtou uhi. 30 Jesu'n tua tuithuk a dawn khitin: Kizoukimta! chi-in, a lu a kunsuk a, a kha a khahta hi. 31 Tua ni, Kisakkholh ni ahi a, a zing chiang, Sabbath ni thupi diak hi ding a hita hi. Judate'n Sabbath ni-a misiluangte khros tunga a om ding a deih kei uh a, a khete uh khettan ding leh, a luangte uh lakkhiak ding, Pilat kiang ah a ngen uhi. 32 Tua bangin Rom sepaihte hong pai uh a, Jesu tawh kilhden a tuah masakpen uh' khete leh a dang khat pen' khete zong a khentan uhi. 33 Ahihhangin, Jesu kiang hong tun takun, amah a na sikhinta, chih a mu uh a, a khete a khentan kei uhi. 34 Ahihhangin, Rom sepaih khat in, a pang ah teipi-in a dawt a, sisan leh tui hong luangkhe pah hi. 35 Hiai thil a mu teekteekpa'n a theihpihna thu a gen ahi a, a theihpihna thugen a dik ahi. Ama'n thutak gen ahi, chih amah mah in zong a thei a, noute'n zong na up theih nading ua, a theihpihna thu gen ahi. 36 Ama' guhte khat beek zong a kitan kei ding, chi-a Laisiangthou sunga kigelh a tangtun nadinga hibanga thil tung ahi. 37 Laisiangthou sung mun dang ah: Amah a dawtpa uh a en vungvung ding uh, chi-in a kigelh lai hi.
Jesu Vuina
38 Tua nungin, Arimathai khua mi Josef in Jesu' luang lak ding, Pilat kiang ah a ngen hi. Amah bel, Jesu' nungzui ahi a, ahihhangin, Judate a lau mana a sima zui ahi. Pilat in phalna a pia a, tua bangin Josef hong pai a, Jesu' luang a la hi. 39 Zan khanga Jesu kianga hong hawhpa Nikodem in zong Josef hon zui a, mura leh aloe kihel, tehna sawmnga khawnga gik hon pua hi. 40 Amaute'n Jesu' luang a pua uh a, vui dingin gim namtui a nuh uh a, puan malngat duangin a tuam uhi. Hiai bel, Judate' kivui dan ngeina ahi. 41 Khros tunga Jesu a kikilhdenna mun ah, huan khat a om a, tua huan sung ah, kuamah kisial ngei nailouhna hankhuk thak khat a om hi. 42 Tua hankhuk a nai manin leh, Judate' Sabbath Kisakkholhni a hih manin, amaute'n tua ah Jesu a sial uhi.
Jesu' Thawhkikna
1 Nipikala ni masapen, zingsang phalvak main, Magdala apan Mari, hankhuk ah a vahawh a, tua hankhuk kong sitna suang kihemkhesain a mu hi. 2 Amah, Simon Peter leh tua nungzui dang khat, Jesu'n a itpa kiang ah hong tai pah vingveng a: Hankhuk apan Toupa a pawmang uh a, koilaia sial uhiam, chih lah ka thei kei uhi, hong chi hi. 3 Peter leh tua nungzui dang khat in zong, tua hankhuk lam a delh uhi. 4 A nih-un a tai uh a, ahih- hangin, tua nungzui dang khat pen in Peter a makhelh a, hankhuk a tung masa hi. 5 Ama'n kunsuka hankhuk sung a et leh, puan malngat duangte hankhuk sunga om a mu a, amah bel a lut kei hi. 6 Simon Peter zong amah nungin hong tung a, hankhuk sung ah a lut a, tua laia puan malngat duang omte a mu hi. 7 Jesu' lutang tuamna hanpuan pen kikhepsa-a a tuama om zong a mu hi. 8 Tua nungzui dang khat, hankhuk tung masapa zong a lut a, a mu a, a umta hi. 9 Jesu misite lak apanin a thoukik ngeingei ding, chih Laisiangthou thu na theisiam lou nilouh uh ahi.
Mari Magdala Kianga Jesu Kilaakna
10 Tua nungin, nungzuite amau' inn tek ah a kileh kik uhi. 11 Ahihhangin, Mari bel, tua hankhuk pua ah, kap kawmin a ding hi. Kap kawmin a kunsuk a, hankhuk sung a et leh, 12 Jesu' luang lupna lukhung leh khekhuana puan ngou silha tu, vansawltak nih a mu hi. 13 Tua vansawltakte'n a kiang ah: Numei, banghanga kap na hia? a chi uhi. Ama'n amaute kiang ah: Ka Toupa a pawmang uh a, a sialna uh lah ka thei kei a, a chi hi. 14 Hiai chi kawma a kihei leh, tua laia Jesu ding a mu hi. Ahihhangin, ama'n Jesu a hih lam a thei kei hi. 15 Jesu'n a kiang ah: Numei, banghanga kap na hia? Kua zong na hia? a chi hi. Ama'n bel, huan neipa a sa a: Pu aw, amah pawkhia na hih leh zaw, na sialna hon hilh lechin, ke'n amah la nuam ka hi, a chi hi. 16 Jesu'n a kiang ah: Mari! a chi a, Mari a kihei a: Raboni! a chi hi. Raboni bel, Hebru paua Sinsakpa, chihna ahi. 17 Jesu'n a kiang ah: Hon lenden ken, ka Pa kianga paitou nai lou ka hi. Ka sanggamte kiang ah vapai inla, amaute kiang ah: Ka Pa, noute' Pa leh, ka Pathian, noute' Pathian kiang ah ka pai dek, chih vahilh zaw in, a chi hi. 18 Tua bangin, nungzuite kiang ah, Magdala apan Mari hong pai a, Toupa a muhtak thu leh, ama'n hiai thilte a hilh thu amaute kiang ah a hilh hi.
Nungzuite kianga Jesu Kilaakna
19 Tua Nipikala ni masapen, nitak lamin, nungzuite mun khat ah a omkhawm uh a, Judate a lau manun, kong kikalhkhum uh hinapi Jesu hong pai a, amaute lak ah hong ding a, amaute kiang ah: Noute tung ah lungmuanna om hen! a chi hi. 20 Hiai a chih khitin, a khutte leh a pang amaute a lak hi. Nungzuite'n Toupa a muh takun, a lungnuam mahmah uhi. 21 Tua khitin, Jesu'n amaute kiang ah: Lungmuanna in noute hon ompih hen! Pa'n kei hon sawl bangin, ke'n noute kon sawl ahi, a chi kik hi. 22 Hiai a chih kawmin, amaute a hatkhum a: Kha Siangthou ngahta un. 23 Mi kuapeuh' khelhnate na ngaihdam uleh, ngaihdam ahi a, mi kuapeuh' khelhnate na ngaihdam kei uleh, ngaihdam louh ahi, a chi hi.
Thoma kianga Jesu Kilaakna
24 Didum kichi Thoma, Sawmlenihte laka khat ahi. Jesu hong pai laiin, nungzui dangte lak ah amah a om kei hi. 25 Nungzui dangte'n Toupa a muh thu uh amah a hilh uleh, ama'n: Ama' khut sunga sikkilh pawnte ka muh a, tua pawnte ka lawn a, a pang ka sawk masiah ka um kei ding, a chi miikmeek hi. 26 Nipikal khat nungin, nungzuite inn sung ah a omkhawm kik uh a, Thoma zong amaute lak ah a om hi. Kongkhakte a kikalh hinapi, Jesu hong pai a, amaute lak ah hong ding hi. Ama'n: Lungmuanna noutea hi hen! a chi hi. 27 Tua khitin, ama'n Thoma kiang ah: Na khutzung in hon lawng inla, ka khutte en in. Na khutin ka pang sawk in. Umlah nawn kenla, umta in, a chi hi. 28 Thoma in a dawng a, a kiang ah: Ka Toupa leh ka Pathian aw! a chi hi. 29 Jesu'n a kiang ah: Thoma, kei non muhtak mana um na hi. Mu lou napi-a umte mi nunnuam ahi uh, a chi hi.
Johan' Tangthupha Gelhna San
30 Jesu'n a nungzuite' muha a hih chiamtehna lamdang tampi, hiai laibu sunga kigelh lou a om hi. 31 Ahihhangin, hiai laibu sunga kigelhte bel, Jesu mah tua Mesia, Pathian' Tapa ahi, chih na up nading uleh, tua um a, ama' mina hinna na neih nading ua kigelh ahi.
Nungzuite kianga Jesu Kilaakna
1 Hiai thilte nungin, Jesu, Tiberia Tuipi ah, a nungzuite kiang ah a kilaak kik hi. Hibangin a kilaak hi: 2 Peter tawh, Didum kichi Thoma tawh, nungzui dang nih tawh a omkhawm uh a, 3 Simon Peter in amaute kiang ah: Ngamanin ka kuan dek, a chi hi. Amaute'n: Koute zong hong kuan n'ung, a chi uhi. Tua bangin, amaute a kuankhia uh a, long ah a tuang uhi. Ahihhangin, tua zanin bangmah a man kei uhi. 4 A zing chiang zingkhangin, Jesu tuipi gei ah hong ding a, ahihhangin, nungzuite'n Jesu ahih lam a thei kei uhi. 5 Jesu'n amaute kiang ah: Naute aw, nek ding na nei uhia? a chi a, amaute'n: Neilou, a chi uhi. 6 Jesu'n amaute kiang ah: Long taklam pang ah na len uh pai un, nga na man ding uh, a chi hi: Amaute'n tua banga len a paih uleh nga tam a man lua uh a, len a kailuttou zou kei uhi. 7 Jesu'n a itpa, tua nungzui pen in Peter kiang ah: Toupa ahi! a chi hi. Simon Peter in, Toupa ahi, chih a zak takin, a puanak tungnung a teeng zok a, tuilak ah a tuakkhesuk hi. Peter bel, puanak suaha na om ahi. 8 Amaute tuipi gei apan gamla lou, tong 200 khawnga om ahi uhi. Tua longa tuang nungzui dangte'n ngasa-a dim tua len, tuipi gei lam ah hon kai uhi. 9 Amaute'n tuipi geia len a kaihkhiaktouh takun, meihola mei kisem a, a tunga nga kiem leh tanghou bangzah hiam a mu uhi. 10 Jesu'n amaute kiang ah: Na ngamat uh pawlkhat hon tawi dih ua, a chi hi. 11 Simon Peter zong long ah a vakaltou a, tua len tuigei ah a kaikhia hi. Tua lena mat nga lianpipi 153 a pha hi. Ahihhangin, len a kek kei hi. 12 Jesu'n amaute kiang ah: Hong pai unla, zing an hong ne un, a chi hi. Hinapi-in, nungzuite laka kuama'n: Nang kua na hia le? a chi ngam kei hi, Toupa ahi, chih a thei uhi. 13 Tua khitin, Jesu hong pai a, tanghou a la a, amaute a pia a, ngate zong a pia hi. 14 Hiai bel, Jesu misite lak apan kaihthawh ahih nunga, a nungzuite kianga a kilaak thumveina ahi.
Peter Photkikna
15 Amaute'n an a nek khitun, Jesu'n Simon Peter kiang ah: Johan' tapa Simon, nang hiaite sangin kei non it zaw taktak hia? a chi hi. Peter in a kiang ah: He, Toupa, nang kon it, chih na thei hi, a chi hi. Jesu'n a kiang ah: Ka belamnoute vaak in, a chi hi. 16 Jesu'n amah kiang ah, a nihveina dingin: Johan' tapa Simon, nang kei non it taktak hia? a chi hi. Ama'n a dawng a: He, Toupa, nang kon it, chih na thei hi, a chi hi. Jesu'n a kiang ah: Ka belamte ching in, a chi hi. 17 Jesu'n a kiang ah, a thumveina dingin: Johan' tapa Simon, nang kei non it hia? a chi hi. Jesu'n a thumveina dinga, Nang kei non it hia? a chih manin, Peter a lungnuam kei a: Toupa, nang bangkim na thei a, nang kon it, chih na thei hi, a chi hi. Jesu'n a kiang ah: Ka belamte vaak in. 18 Nang thutak kon hilh ahi: Na naupan laiin na kawng na kigak a, na utna lamlam ah na diang hi. Ahihhangin, nong upat chiangin bel, na baan na zak ding a, midangte'n na kawng hon gaksak ding a, na ut louhna lamlam ah hon kai ding uhi, a chi hi. 19 Jesu'n hiai a gen bel, Peter in bangchi bang sihna thuaka Pathian pahtawi ding hiam, chih a genna ahi. Jesu'n hiai a gen khitin, a kiang ah: Kei hon zui in, a chi hi. 20 Peter a kihei a, Jesu' itpa nungzui pen in amaute hon zui, chih a mu hi. Hiai nungzuipa bel, nitak annek laia Jesu' anga kingai a: Toupa, kua ahia nang hon lehbawl a, hon khawng ding? chipa ahi. 21 Peter in hiai mipa a muh takin, Jesu kiang ah: A hih leh, Toupa, hiai mipa bangchi ding ahia? a chi hi. 22 Jesu'n a kiang ah: Amah ka hong pai kik donga dama om nilouh dingin deih leng zong, nang tawh bang kisai zenzen ahia? Nang kei hon zui mai in, a chi hi. 23 Hiai thu hangin, sanggamte lak ah: Hiai nungzuipa si lou ding ahi, chi-in, thu a thang hi. Jesu'n lah: Amah asi kei ding, a chi kei a, amah ka hong pai kik donga dama om nilouh dingin deih leng zong, nang tawh bang kisai zenzen ahia! chi ahi lei zaw hi. 24 Hiai nungzuipa ahi hiai thilte theihpihna thu gen-a gelhpa. Ama' theihpihna thu a dik ahi, chih i thei hi. 25 Jesu' thilhih tampi a om lai hi. Tuate kigelh vek ding hi leh, a kigelh nading laibu teng khempeuh leitung bup ah ta zou dingin ka um kei hi. Amen.
Thumakai
1 Theofil aw, ka laigelh masa ah, Jesu' thilhih leh sinsak a pat teng khempeuh ka gelh hi. 2 Tuate bel, ama'n a teelsa sawltakliante kianga, Kha Siangthou tungtawna thu tampi a vaikhak nunga, Pathian in amah vantunga a laktouh ni donga a nasep thu ahi. 3 Ama'n sihna a thuak nungin, hiai mite kiang ah, ni 40 sung a kilaak a, Pathian' kumpigam tawh kisai thu tampi a gen hi. Tua bangin, amah a hing taktak ahi, chih kiteltaka theihna tampi a pia hi. 4 Amaute tawh a kikhopkhawmna khat ah, ama'n amaute kiang ah: Jerusalem nuse kei unla, Pa'n a chiamsa, noute kon hilhsa mah na ngak un. 5 Ahang bel, Johan in tuiin a baptis a, ahihhangin, ni tamlou nung chiangin, Kha Siangthoua baptis na hi ding uh, a chi hi. 6 Tua bang ahih manin, amaute a kikhopkhawm laiun, amaute'n amah thu a dong uh a: Toupa, tu huna, Israelte kianga kumpigam ukna pe kik ding na hi hia? a chi uhi. 7 Ama'n amaute kiang ah: Hunte leh nite tawh kisai noute' theih ding ahi kei, Pa'n ama' thuneihna-a a seh ahi. 8 Ahihhangin, Kha Siangthou noute tunga hong tun chiangin, vangletna na ngah ding uh a, Jerusalem ah, Judia gam khempeuh ah, Samari gam ah leh, kawlmong dongin, kei hon theihpihte na hi ding uhi, a chi hi.
Jesu' Vantung Paitouhna
9 Hiaite a gen nungin, amaute' muh lai mahmahin, amah vantung ah laktouhin a om hi. Tua banga amaute'n a et laiun, meipi in amah a liah a, a mu thei nawn kei uhi. 10 Amah a pai touh laia, amaute'n vanlam a etet laitak mahun, ngai in, puan ngou silh mi nih, amaute kiang ah hong ding uhi. 11 Tua mi nihte'n amaute kiang ah: Nou Galili mite aw, banghanga vanlam ena, hiaia ding ding na hi ua? Noute apan vantunga kilatou hiai Jesu mah, vantunga paitou na muh bang teekteekun, hong paikik ding ahi, a chi uhi.
Thuumkhawmna
12 Sawltakliante, Oliv Mual apanin Jerusalem ah a kilehkik uhi. Oliv Mual bel, Jerusalem apan naichik, Sabbath ni-a pai siang chiang lei ahi. 13 Amaute inn a tun takun, amaute' kingakna inndan tungnung ah a kaltou uhi. Amaute bel, Peter, Jakob, Johan, Andru, Filip, Thoma, Bartholomai, Mathai, Alfai' tapa Jakob, Gam-itpa Simon leh, Jakob' tapa Juda ahi uhi. 14 Hiai mite leh numei pawlkhat leh, Jesu' nu Mari tawh, Jesu' sanggamte tawh, a omkhawm uh a, lungsim munkhatin thuumna leh thilnget thuumna a nei tawntung uhi.
Mathia Telna
15 Tua laiin, nungzuite 120 khawng lak ah, Peter a dingtou a: 16 Sanggamte aw, nidang laia, Kha Siangthou in David tungtawna Juda tungthu a na gen, Laisiangthou thu a tangtun ding ahi. Hiai Juda ahi Jesu mante' lamhilha hong pangpa. 17 Tua Laisiangthou thu in: Amah eite laka pang leh, hiai nasepna-a tan nei ahi, chi-in a na gen hi. 18 Hinapi-in, hiai mipa' diktatlouhna thaman sumin mun khat a kilei a, tua ah amah a bungbuin a kia hi. Tua bangin, a pumpi leilak ah a puaktam a, a gilteng a lawtkhia hi. 9 19 Jerusalema teengte khempeuh in hiai thu a za uhi. Tua bangin, tua mun min dingin, amaute' pauin, Akeldama a chi uhi. Tua bel, Sisan Mun chihna ahi. 20 Ahang bel, Phatnalate bu sung ah: Ama' tenna inn kilawi henla, a sunga teeng ding kuamah om kei hen, chi-a na kigelh ahi. Tua baan ah: Ama' makaihna dinmun midang in luah hen, chi-a kigelh lai ahi. 21 Tua bang ahih manin, Toupa Jesu, eite laka luta pawta a om sung tenga, eite laka om mite lak apan, mi khat i telkhiak ding kul ahi. 22 Tua bang mi bel, Johan in Jesu a baptis apana, Jesu eite lak apan laktouh ahih ni donga, eite laka pang mi ahi ding ahi. Amah eite tawh, Jesu' thawhkikna theihpih mi a hih teitei ding ahi, a chi hi. 23 Tua bangin, amaute'n mi nih a minlawh uh a, amaute, Barsaba kichi Josef leh Mathia ahi uhi. Barsaba' min khem bel Jasta ahi. 24 Tua khitin, amaute a thuum uh a: Toupa aw, nang mi chih' lungtang na thei. 25 Juda in ama' mun dinga pai a, a nutsiat sawltaklian hihna luah dinga hiai mi nihte laka na teel hon lak in, a chi uhi. 26 Tua khitin, ai a san uh a, Mathia tung a tu hi. Tua bangin, amah sawltaklian sawmlekhatte laka behlap ahita hi.
Kha Siangthou Piakna
1 Pentikos ni hong tunin amaute a vekun, mun khat ah lungsim mun khatin a omkhawm uhi. 2 Thakhatin, huih hattaka nung banga ging, vaan apan hong om a, amaute' tutna inn sung teng hong luahdim hi. 3 Tua baan ah, amaute' muhin, meikuang leite bang, amah leh amah kikhenzakin, amaute luzang ah a tu tek hi. 4 Tua bangin, amaute khempeuh, Kha Siangthoua luahdimsakin a om uh a, tua Kha in hih theihna a piak bang tekin, pau tuamtein a pauta uhi. 5 Tua laiin, vannuai nam chih lak apan Juda kulmutte, Jerusalem ah a om uhi. Amaute bel Pathian lau mi ahi uhi. 6 Amaute'n hiai ging husa a zak takun lamdang lua sain hong taikhawm uhi, ahang bel tua-a thu kigen amau' pau teka za mawk uh hiven. 7 Avekun lamdang lua sain, a mangbang uh a: Ngai dih uh, hiai thugente, Galili mite hi lou umaw? 8 Bangchi ahia le, eite'n i pianpih pau teka i zak theih mawk? 9 Eite Parthai gam, Medai gam leh, Elam gam mi khawng, Mesopotamia gam, Judia gam, Kapadokia gam, Ponta gam, Asia gama teengte khawng leh, 10 Frugia gam leh Pamfulia gam, Aigupta gam apan khawng leh, Kurini gam kiim Libia gam sehkhen apan khawng, Rom khua apan khawng hong khualzin, Judami leh Juda phungkai khawng, 11 Krit mi leh Arab mi khawng hinapi a, amaute'n Pathian' nasep lamdangte a gen uh, eima' pau teka i zak mawk! 12 Hiai bangchi thu hi mahmah ding ahia? chi-in lamdang sa mahmahin a kidong uhi. 13 Midangte'n lah: Grepzu thak kham a kei ua hia! chi-in a nuihsan uhi.
Peter' Thugen
14 Ahihhangin, Peter in, Sawmlekhatte tawh dingkhawmin, a aw a ngaihsak a, amaute kiang ah thu a gen a: Nou Judia gam mite leh, Jerusalema omte khempeuh aw, hiai thei unla, ka thugen na ngai un: 15 Tuin, zinglam dak kuana khawng lei ahi lai. Hiai mite, na up bangun zukham ahi kei uh. 16 Kamsangpa Joel in a na gen hong tung ahi zaw. 17 Ama'n: Pathian in: Ni nanungtea, mi khempeuh tunga ka Kha sungbaw ding ing a, na tapate uleh, na tanute un kamsang thugen gen ding uh a, na tangvalte un mengmuhte mu ding uh a, na putekte un mangte man ding uhi. 18 Ka sila numeite leh pasalte tung nangawna ka Kha sungbaw ding ing a, amaute'n kamsang thugen gen ding uhi. 19 Tung vaan ah vangletna nasepte lak ding ing a, nuai lei ah chiamtehna lamdangte lak ding hi'ng: Sisan leh mei leh meikhutung om ding hi. 20 Ni mial ding a, khapi sisan suak ding hi. Toupa' ni thupi leh mulkimhuai hong tun main, hiai tung ding hi. 21 Tua hun chianga, Toupa' min sama amah beel peuhmah, hotdam hi ding hi, chi hi. chi-in a na genta hi. 22 Nou Israelte aw, hiai thu na ngai un: Pathian in Nazareth Jesu saang ahi, chih, ama' tungtawna vangletna nasepte, thillamdangte leh, chiamtehnate noute laka hihin a langsakta hi. Tua theite noute na hi uhi. 23 Pathian' thilgelsa leh theihkholhsa bangin, amah noute khut sunga piakkhiak ahi a, noute'n danbeia gamtate' khutin khros tunga kilhdenin na that uhi. 24 Ahihhangin, Pathian in sihna thuak natna apanin amah a khahkhia a, a kaithou hi. Ahang bel, sihna in amah lenden theilou ahi. 25 David in ama' tungthu hibangin a na gen a: Ka mai ah Toupa mu gige hi'ng. Amah ka taklama om ahih mana, hihlina om lou ding hi'ng. 26 Hiai hanga ka lungtang kipak a, ka lei zong nuam hi. Ka pumpi zong lametna neia tawlnga ding hi. 27 Ahang bel, nang hankhuka ka hinna nuse lou ding chin a, na Misiangthoupa a muatmang zong phal lou ding hi vechin. 28 Nangma'n hinna lampite hon lakta chin a, hon ompih na hih mana lungnopna tawh hon kidimsak ding na hi, a na chi hi. 29 Sanggamte aw, pubul David zaw a sita a, vuiin a om a, a han zong tuni dongin hiai ah a om lai, chih hangsantakin kon hilh thei hi. 30 Ahihhangin, David bel kamsang ahi a, Pathian in amah kianga kichiam hiaia thu a na chiam, a kumpitutphah tunga tu ding mi, sa dana a suante khat, tua Khrist, misite lak apan a kaithou ding, chih a thei hi. 31 Tua bangin, mailama thil tung ding mukholin, Khrist thawhkik ding thu, hankhuka a hinna taisan ahih louh ding thu leh, ama' pumpi in muatmangna a thuak louh ding thu na gen ahi. 32 Pathian in hiai Jesu a kaithou a, koute khempeuh, hiai thudik theihpihte ka hi uhi. 33 Jesu'n Pathian' taklama tuin, pahtawina a tang a, Pa apanin chiamsa Kha Siangthou a saang a, tu-a na muh uleh na zak uh bangin, ama'n hiai a hih ahi. 34 David bel, vantunga paitou lou hinapi-in, amah mah in hibangin a na gelh a: Tangtawn Toupa'n ka Toupa kiang ah; 35 Na melmate na khengakna-a ka bawl masiah, ka taklam ah tu in, chi hi, a na chi hi. 36 Tua bang ahih manin, Israel inkawte khempeuh in hiai theitel un: Pathian in khrosa na kilhluppa uh hiai Jesu, Toupa leh Khrist-in a bawlta, a chi hi. 37 Mipite'n hiai thu a zak tak-un, a lungtang uh sut bangin a na a, Peter leh sawltaklian dangte kiang ah: Sanggamte aw, koute'n bang hihta ding ka hi ua? a chi uhi. 38 Peter in a dawng a: Na khelhnate uh ngaihdam nadingin kisikin lunghei unla, Jesu' minin kibaptis un. Tuachi-in, thawnpiak Kha Siangthou na ngah ding uhi. 39 Thuchiam pen noute leh na tate uh ading ahi. Tua baan ah, gamlapi-a omte ading leh, Toupa i Pathian in a sap dingte khempeuh ading zong ahi lai hi, a chi hi. 40 Ama'n thu dang tampi-in amaute a vauhilh a: Tulai khangthak giloute apanin kihondam un, chi-in a kun hi. 41 Tua bangin, a thugen saangte khempeuh baptism a om uh a, tua niin, mi 3,000 khawng amaute lak ah a kibehlap hi.
Saptuam Masate
42 Amaute, sawltakliante' sinsakna ah leh, kipawlkhawmna ah leh, tanghou balkhapna ah leh, thuumnate ah, lungtang teng tawh kipiain a om toutou uhi. 43 Mi chih lamdangsakna, zahtakna leh launa tawh a kidim uhi. Sawltakliante'n vangletna nasepte leh chiamtehna lamdang tampi a hih toutou uhi. 44 A ummite khempeuh khawsa khawmin, bangkim a kikop uhi. 45 A gamte uh leh a vante uh a zuakkhia uh a, mi chih, a taksap bangin a hawm zel uhi. 46 Nisimin lungsim munkhatin, tempul huang sung inntual ah a kikhawm uh a, a innte uah a banbana tanghou balkhamin, kipaktak leh lungtaitakin a nekhawm zel uhi. 47 Pathian a phat uh a, mi khempeuh' deihsakna a tang uhi. Tua bangin, hotdama om lellelte Toupa'n nisimin a amaute lak ah a behlap zel hi.
Khebai Damsakna
1 Ni khat, dak kuana, thum hun laitakin, Peter leh Johan tempul ah a hawhtou uhi. 2 Tua ah a pianchil apan khebai mi khat a om hi. Tua mipa bel tempul huang sunga hong lutte kianga khutdawhin a om hi. Amah tua bang dinga mite'n hon pua a, tempul kongpi, Kilawm, kichi bula nisima hong koih zel uh ahi. 3 Ama'n Peter leh Johan, tempul huang sunga lut dek a mu a, khut a na dawh hi. 4 Peter in, Johan tawh tua khebaipa en gegu kawmin: Koute hon en in! a chi hi. 5 Tua mipa'n amaute apan ngah ding lamet neiin, amaute a mitsuan hi. 6 Peter in: Ke'n ngun hita leh, kham hita leh, bangmah ka nei kei. Ahihhangin, ka neih pen kon pia hi: Nazareth Jesu Khrist' minin ding inla, khein paita in, a chi hi. 7 Tua chi kawmin, khebaipa' khut taklam a len a, a kai dingtou hi. Khebaipa' khe leh a siakguhte thakhatin a hatta hi. 8 Amah tua banga a thawhtouh takin, a khein a ding a, a pai theita hi. Tua bangin, amah a khea paia diangin leh, Pathian phat kawmin, amaute tawh, tempul huang sung ah a lutta hi. 9 Mite khempeuh in amah, khea pai thei a, Pathian phata om a muhtakun, 10 amah tempul kongpi, Kilawm, kichi bula tu-a khutdawhpa ahi, chih a meltheih uhi. Amaute'n ama' tunga thil tung lamdang a sa mahmah uhi.
Peter' Thugen Nihveina
11 Damsaka om, tua khebaipa'n, Peter leh Johan meiletin a zui a, mite khempeuh in lamdang a sa uh a, Solomon' Innliim kichi mun ah, amaute kiang ah hong taikhawm uhi. 12 Peter in hiai a muh takin, amaute kiang ah: Israel mite aw, banghanga hiai lamdang sa na hi ua? Banghanga koute gel hon en demduam na hi ua? Koumau' vangletna, ahih kei leh, koumau pathianmitna hanga hiai mipa khea paisak hon sa na hi ua hia? 13 I pu i pate, Abraham, Isak leh Jakobte' Pathian in, a sila Jesu a pahtawi hi. Noute'n na matsak uh, Pilat in khah a tup tinten lai nangawna, a maitanga na nolh teiteipa uh amah ahi. 14 Noute'n a Siangthoupa leh a Diktatpa na deih kei uh a, tualthatpa khat hon khahsak dingin na ngen zaw uhi. 15 Hinna Nak ahipa na that uh a, ahihhangin, Pathian in amah misite lak apan a kaithou a, koute, hiai thudik theihpihte ka hi uhi. 16 Hiai na muh uleh na theihpa un Jesu' min a um a, tua upna tungtawna Jesu'n amah hatsakta ahi. Jesu a upna in, tu-a noute khempeuh in na muh uh bangin, amah damsiangsak sipsip ahi. 17 Hinapi-in, sanggamte aw, noute' makaite hih banga, noute'n zong theiloupi-a hibanga hih na hi uh, chih ka thei hi. 18 Ahihhangin, Khrist in a thuak ding, chih, Pathian in a kamsangte khempeuh' kama a na genkholhsa, hibanga ama'n tang-tungsak ahi. 19 Tua bang ahih manin, na khelhnate uh thaimang ahih theih nadingin leh, Toupa apan halhthak hunte hong tun theih nadingin, kisikin lunghei unla, Toupa lam nga un. 20 Tua hi leh, ama'n Jesu hon sawl ding hi. Pathian in noute adinga a sehtaksa Khrist amah ahi. 21 Pathian in thil bangkim a bawlthak hun hong tun mateng, Jesu bel vantunga a om ding mah ahi. Tua bang bawlthak hun hong tung ding ahi, chi-in Pathian in leitung khuavannuai kipat chil apanin, a kamsang misiangthoute khempeuh' kam ah a na genkhinta hi. 22 Mosi in i pu i pate kiang ah: Toupa na Pathian un, na sang-gamte uh lak apanin kei bangbang kamsang khat, noute ading hon bawlsak ding ahi. Tua kamsangpa'n noute kianga a gen khempeuh ah, ama' thu na ngaihsak un. 23 Ama' thu ngaihsak lou peuhmah, Pathian in a mite lak apan a hihmangthang sipsip ding hi, a na chi hi. 24 A hi taktak a, Samuel akipan anung siaha thu na gen kamsangte khempeuh in tulai hun ding na genkhol ahi uhi. 25 Noute, kamsangte' thugen gouluahte leh, Pathian in i pu i pate tawh kala thukhun a na bawl gouluahte na hi uhi. Pathian in Abraham kiang ah: Na chisuan tungtawnin, leitung innkuante khempeuh ka vualzawl ding, a na chita hi. 26 Tuin Pathian in, a sila Jesu, misite lak apan a kaithou a, noute kiang ah hon sawl masa ahi. Tua bel, ama'n mi chih na lungsim siatna uapan hon lungheisak a, lungheina pansana hon vualzawl ding a ngimna ahi, a chi hi.
Peter leh Johan Suangkula Khumna
1 Peter leh Johan in tua banga mipite kianga thu a gen laitakun, siampite leh tempul veng sepaih makaipa leh Sadukaite, amaute kiang ah hong pai uhi. 2 Amaute'n bel, sawltakliante'n tua banga Jesu tungtawna misite' thawhkikna thu gen a, mite a sinsak uh ngaidah mahmah uh ahi. 3 Amaute'n Peter leh Johan a man uh a, nitak lam a hihtak manin, a zingchiang dong suangkul ah a khum uhi. 4 Ahihhangin, thu zate tampi in a um uh a, a ummi pasal 5,000 khawng a phata uhi.
Juda Vaihawmpawl maia Peter' Thugen
5 A zing chiangin, Juda Vaihawmpawl tua nam upate leh Dan sinsakte, Jerusalem ah a kikhawm uhi. 6 Amaute lak ah siampilian Ana, Kaiafa, Johan leh Aleksandar leh, siampilian' inkawte zong a kihel uhi. 7 Amaute'n a mai uah Peter leh Johan a dingsak uh a, thu a dong uh a: Noute'n bang vangletna leh bang mina hiai hih na hi ua? a chi uhi. 8 Peter bel, Kha Siangthoua luahdimsakin hong om a, amaute kiang ah: Nou vaihawmte leh Israel upate aw! 9 Koute'n china khat tunga nasep hoih ka sepna uleh, amah hong dam dan tawh kisaia, tuni-a thu hon dong na hih chiangun, 10 noute khempeuh leh Israel mipite khempeuh in thei un: Nazareth mi Jesu Khrist, khrosa na kilhluppa uh, Pathian in misite lak apan a kaihthawhpa' mina, hiai mi noute maia, chidama ding ahi. 11 Inlamte'n na nolh uh suang, a kiusuang poimawhpen hong hita, chi-a kigen amah ahi. 12 Kuamah dang' min ah hotdamna na mu kei ding uh. Hotdama i om nadingin, vannuaia mihing' min kisa lak ah, min dang himhim om lou ahi, a chi hi. 13 Amaute'n Peter leh Johan' hangsan dan a mu uh a, laisiam lou leh, kisinsiamna nei lou mi ahi uh, chih a phawk takun, lamdang a sa uhi. Tua bang ahi a, amaute, Jesu tawh na kithuah khin hita uh, chih, a theikhia uhi. 14 Amaute'n hihdama ompa, amaute gel tawh dingkhawm mu gegu ahih manun, a dawng thei kei uhi. 15 Ahihhangin, amaute'n Vaihawmpawl tukhawmte apan amaute gel a paituamsak nungun, amaute thu a kikum uhi: 16 Hiai mite bang lawh ding i hia? Amaute' tungtawna chiamtehna lamdang thupitak kihihta, chih, Jerusalem khaw sung tengin theita a, eite'n zong nial thei lou i hi. 17 Ahihhangin, hiai thu i mite laka a than sawnsawn louh nadingin, tu apan hiai mipa' mina kuamah kianga thu gen nawn het lou dingin, khauhtakin amaute vau ni, a kichi uhi. 18 Tua bangin, amau gel a samlut uh a, Jesu' mina thu gen lou ding, sinsak zong sinsak ngei nawn lou dingin a kham uhi. 19 Ahihhangin, Peter leh Johan in a dawng uh a: Pathian' mitmuhin, noute' thuman hia dik, ahih kei leh, Pathian' thu man, noute'n thu khen un. 20 Koute'n zaw ka muh uleh ka zak uh gen lou thei lou hi ung, a chi uhi. 21 Amaute'n, amau gel vau semsemna tawh thuahin a khah uhi. Mipite'n lah, Pathian' thilhih muta a, Pathian phat uh ahih manin, mipite hangin amau bawlsiat theih dan ding a mu kei uhi. 22 Ahang bel, lamdangtaka hihdama ompa, kum 40 sanga upa zaw hita hi.
Sawltakliante'n Hangsanna Ngen
23 Khahkhiak ahih nungun, Peter leh Johan, a lawmte uh kiang ah a pai uh a, siampi makaite leh upate'n amau gel kianga a thugente uh amaute kiang a tun uhi. 24 Tua hangin, amaute'n tua thu a zak takun lungsim munkhatin, Pathian kiang ah, aw suahin a thuum uh a: Thuneihnakim uun Toupa aw, nang, vaan leh lei leh tuipi leh, tuate sunga omte khempeuh Siampa na hi. 25 Nang na sila, ka pu uh David' kam ah, Kha Siangthouin thu na gen a: Banghanga namte heh a, banghanga mipite'n a phatuam lou sawm uhiam? 26 Leitung kumpipate'n pankhawh uh a, Toupa leh a Thaunilhpa dou a, vaihawmmite kikaikhawm uhi, chi-in a na gen hi. 27 Ahi taktak a, na sila Siangthou, na thaunilh Jesu douin, Herod leh Pontia Pilat leh, Zentelte leh Israelte tawh a kikaikhawm uhi. 28 Nangma' deihna leh, na khut in hih ding a tupsa hih dinga kikhawm ahi lei uhi. 29 Tuin Toupa aw, koute hon vaunate uh thei inla, na thu hangsantaka gen theihna, na sila koute hon pia in. 30 Na sila siangthou Jesu' min tungtawna chinate damsak ding leh chiamtehna lamdangte leh vangletna nasepte hih dingin na khut zankhia in, a chi uhi. 31 Amaute tua banga a thum khitun, a omkhawmna inn uh hong liing a, Kha Siangthoua luahdimsakin hong om uh a, Pathian' thu hangsantakin a gen uhi.
Saptuam Masate Neih Kikop
32 A ummi khempeuh, lungtang leh lungsim munkhatin a om uh a, kuama'n a thilneihte ama-a tuamin a bawl kei a, bangkim a kikop uhi. 33 Tua bangin, sawltakliante'n vangletna thupitak tawh, Toupa Jesu thawhkikna theihpihna thu a gengen uh a, amaute khempeuh tung ah Pathian' hehpihna nasep a kiching mahmah hi. 34 Amaute lak ah tasam kuamah a om kei uhi. Ahang bel, gam neite, ahih kei leh, inn neite'n a zuak zel uh a, a khotna sumte uh hon tawi uh a, 35 sawltakliante' khebul ah hong koih uhi. Mi khat peuh in taksap a neih chiangin, sawltakliante'n tua bang mi sum a hawm zel uhi. 36 Kupra tuikulh akipan Levi mi khat, Josef kichi a om hi. Sawltakliante'n amah Barnaba chi-in a minvawh uhi. Tua min khiakna bel, Kihanthawnna tapa, chihna ahi. 37 Hiai mi in a gam neihsa a zuak a, a khotna sum hon tawi a, sawltakliante' khebul ah hong koih hi.
Anania leh Safira
1 Anania kichi mi khat a om hi. A zi Safira tawh, gam a zuak sam uhi. 2 Hiai mi in a zi theihpihin, a gam man seh khat, ama' adingin a im a, a vai teng sawltakliante' khebul ah hong koih hi. 3 Peter in: Anania, Kha Siangthou khem a, gam mana na muh sum seh khat nang adinga im dinga Setan in na lung sung a dimsak bangchi dan ahia? 4 Gam na zuak main nanga hi lou maw? Na zuak nungin zong, a sum nang thuthu hi lai lou maw? Banghanga hibang thil hih ding na lungtanga suangtuah na hia? Mihing khem na hi kei a, Pathian khem na hi ve! a chi hi. 5 Anania in hiai a zak takin a puk a, a si hi. Hiai thilte za peuhmah a lau mahmah uhi. 6 Tuachi-in, tangvalte a kipan uh a, Anania' luang a tuam uh a, pawkhiain a vuita uhi. 7 Dakkal thum khawng nungin, bang thil tung hiam, chih theiloupi-in, Anania' zi hong lut hi. 8 Peter in amah a dong a, a kiang ah: Hon hilh in. Gam na zuakna uh hiai zah mah hina maw? a chi hi. Ama'n: He, hiai zah mah ahi, a chi hi. 9 Peter in amah kiang ah: Toupa' Kha ze-et dinga bangchi dana kithubup thei na hi ua? Ngai in, na pasal vuite' khe kongkhak bul hong tungta. Nang zong hon zawngkhe ding uhi, a chi hi. 10 Thakhatin, tua minu Peter khebul ah a puk a, a si hi. Tangvalte hong lut uh a, tua nu sisain a mu uhi. Tuachi-in, amah a pawkhia uh a, a pasal kiang ah a vui uhi. 11 Tua bangin, saptuam mite khempeuh leh hiai thilte za peuhmah nakpitakin a lauta uhi.
Sawltakliante'n Thillamdangte Hih
12 Sawltakliante'n mite lak ah chiamtehna lamdangte leh vangletna nasepte tampi a hih uhi. A umte khempeuh, lungsim munkhatin, Solomon Innliim ah a kikhawm zel uhi. 13 Mipite'n amaute zahna lianpi nei mah le uh, mi dang kua mah amaute lak ah a kihel ngam kei uhi. 14 Ahihhangin, pasal leh numei tam semsem in Toupa a um uh a, a umte lak ah mi tampi mahmah a kibehlap hi. 15 Tua bangin, mite'n chinate kongzing khawng ah hon pawkhia uh a, lupnate leh phekte tung ah a lumsak uhi. Tua bel, Peter hong pai chiang a, a liim beek in amaute a liah theih nadinga a hih uh ahi. 16 Jerusalem kimkota khuate apanin zong, mipi tampi hong paikhawm lailai uh a, chinate leh dawimatte hon paipih uh a, amaute khempeuh hihdamin a om uhi.
Sawltakliante Suangkul apan Suakta
17 Tua laiin, siampilian leh a seppih Sadukaite, hazatnain a dim uhi. 18 Tua bangin, amaute'n tua sawltakliante a man uh a, suangkul sung ah a khum uhi. 19 Ahihhangin, zankhangin, Toupa' vansawltak in suangkul kongkhak hong hong a, amaute a piikhia hi. 20 Ama'n: Pai unla, tempul huangsung inntuala dingin, hiai hinna thak thu a bukimin mipite kiang ah vagen un, a chi hi. 21 Amaute'n hiai a zak nungun, a zingchiang khawvakin, tempul huangsung ah a lut uh a, mipite a sinsak panta uhi. Tua hun sungin, siampilian leh a seppihte hong tung uh a, Israel upate tawh, Vaihawmpawl a samkhawm uhi. Tua bangin, tua sawltakliante vakai dingin, suangkul ah mi a sawl uhi. 22 Ahihhangin, tempul veng sepaihte suangkul a vatun takun, sawltakliante tua ah a mu kei uhi. Amaute hong kilehkik uh a: 23 Suangkul kiptaka kikhak a, a vengte'n hoihtaka a ven uh ka vamu uh a, ahihhangin, suangkul kongkhak ka hon uleh, a sung ah kuamah ka mu kei uh, chi-in thu a tun uhi. 24 Siampilian leh tempul veng sepaih makaipa leh siampi makaite'n hiai thute a zak takun: Bang thu hong piang tazen de aw, chi-in, a lungbuai mahmah uhi. 25 Tua laitakin, mi khat hong pai a: Ngai un! Suangkul sunga na mikhumte un tempul huangsung inntuala dingin mipite a sinsak uh! hong chi hi. 26 Tua tempul veng sepaih makaipa leh a sepaihte a vakuan uh a, sawltakliante a vakai uhi. Mipite'n suanga a den ding uh a lau manun, amaute'n thagum a suah kei uhi. 27 Amaute'n sawltakliante hon tut takun, Vaihawmpawlte' mai ah a dingsak uh a, siampilian in amaute thu a dong a: 28 Hiai mina sinsak lou dinga thupiak khauhtak hon pia hi lou ka hi umaw? Hinapi-in, noute'n na sinsakna uh Jerusalem khawpi sung teng na dimsak uh a, hiai mi' sisan mawh koute tunga but sawm teitei na hi uh, a chi hi.
Vaiha wmpa wl' maia Sawltakliante' Thugen
29 Ahihhangin, Peter leh sawltaklian dangte'n a dawng uh a: Koute'n mihingte' thu sanga Pathian' thu ka man zawk ding uh a dik ahi. 30 I pu i pate' Pathian in, sing tunga khaia na thahpa uh Jesu a kaithou a, 31 Kumpi Tapa leh Hondampa hisakin, a taklam ah a tusak a, a pahtawita. Tua bel, Israelte kianga kisika lungheina leh khelhnate ngaihdamna a piak theih nading a na hi. 32 Hiai thilte tawh kisaia, amah theihpihte koute ka hi uhi. Pathian in ama' thu mangte kianga a piak Kha Siangthou zong amah theihpihpa ahi, a chi uhi. 33 Amaute'n hiai a zak takun, a heh mahmah uh a, amaute thah ding thu a sawmpukta uhi. 34 Ahihhangin, Farisai khat a om a, a min Gamaliel ahi. Amah Dan sinsak mi ahi a, mipite'n a zahtak mahmah uh ahi. Amah, Vaihawmpawl mai ah a dingtou a, sawltakliante pawlama hun sawt lou koihkhiak dingin thu a pia hi. 35 Tua bangin, ama'n amaute kiang ah: Israel mite aw, hiai mite tunga na thil hih dek uah pilvang un. 36 Tuma zekin, Theuda kichi hong kilang a, mi poimawh khat hi-in hong kigen a, mi 400 khawngin a nung a zui uhi. Ahihhangin, midangte'n amah a that uh a, amah muanga zuite a kithehzak uh a, bangmah lou hong suakta uhi. 37 Hiai nungin, Galili mi khat, Juda kichi hong kilang leuleu hi. Kisimpi lai ahi a, mi tampi a hip hi. Amah zong a mangthang a, amah muanga zuite a kithehzak uhi. 38 Tuin, noute kiang ah hiai ka gen ahi: Hiai mite omsak maimai unla, khah un! A thiltup uh, ahih kei leh, a thil hih uh, mihing apan ahih aleh, bangmah suak louin a muih ding. 39 Ahihhangin, Pathian apan ahih aleh bel, na hihmang zou kei ding uh. Pathian dou khattou na suak zawmah ding uhi, a chi hi.
Sawltakliante Vuakna
40 Tua bangin, amaute'n hiai mi' thugen a mang uhi. Sawltakliante a samlut uh a, a satsak uhi. Jesu' mina thu gen lou dingin amaute thu a pia uh a, a khahta uhi. 41 Tua bangin, sawltakliante'n Vaihawmpawl a nusia uh a, Pathian in Jesu' min hanga mai mawkna thuak taaka amaute a seh manin, lungnuam mahmahin a paita uhi, 42 Amaute, nisimin tempul huangsung inntual ah hita leh, inn tenga banlutin hita leh, sinsak leh thugen a khawl ngei kei uhi. Jesu mah Khrist ahi, chi-in tangthupha a phuang uhi.
Dekonte Sehna
1 Tua hun laia, nungzuite hong pun semsem laiun, phunna hong piang hi. Nisim an hawm thu tawh kisaiin, Grik pau zang Juda meigongte phawklou, chi-in, Grik pau zang Judate, Hebru pau zang Judate tung ah a phun uhi. 2 Tua bang ahih manin, Sawmlenihte'n nungzuite khempeuh a samkhawm uh a: Koute'n nisima nektak nasem a, Pathian thu gen ka nutsiat uh a dik kei ding. 3 Sanggamte aw, na lak ua Kha Siangthou leh pilna-a dima theih mi sagih hon telkhia un. Hiai mawhpuakna amaute ka guan ding uh a, 4 koute bel, thuumna leh thu nasepna ah ka kipumpiak ding uh, a chi uhi. 5 Hiai thil sawm in amaute khempeuh a kipaksak a, tua chi-in upna leh Kha Siangthou-a dim Stefen tawh, tua baan ah, Filip, Prokora, Nikanor, Timon, Parmena leh Nikola tawh a telkhia uhi. Nikola bel, Antiokh khua apan Juda phungkai khat ahi. 6 Amaute, sawltakliante mai ah hon pulak uh a, sawltakliante'n thuumna neiin, amaute tung ah khutngakna a nei uhi. 7 Tua bangin, Pathian thu hong daih a, Jerusalema nungzuite hong pung semsem pah uh a, siampite tampitak in thu-up a zuita uhi.
Stefen Kiman
8 Pathian' hehpihna leh vangletna-a dim Stefen in vangletna nasepte leh chiamtehna lamdang diupi mahmahte, mite laka hihin a om toutou hi. 9 Ahihhangin, Asuaktate' Sunagog kichi apan mi pawl khat hong kipan uh a, Stefen a kinialpih uhi. Tua Asuaktate bel, Kurini khua, Aleksandria khua leh Silikia leh, Asia gam akipan Judate ahi uhi. 10 Amaute'n Stefen' thugenna pilna leh Kha a nang zou kei uhi. 11 Amaute'n a simin, zuau gen dingin mite a zol uh a: Stefen in Mosi leh Pathian a gensiat ka za uh, a chisak uhi. 12 Tua bangin, amaute'n, mipite, upate leh Dan sinsakte a hasuan uh a, Stefen a mansak uh a, Juda Vaihawmpawl' mai a tunsak uhi. 13 Theihpih zuautheite zong a bawltawm uh a, amaute'n: Hiai mipa, hiai inn siangthou leh Dan gensiat khawl ngei lou ahi. 14 Ama'n: Hiai Nazareth Jesu'n hiai inn hihgawp ding a, Mosi hon piak thugousiahte zong khekgawp ding ahi, a chih lamtak ka za uhi, a chi uhi. 15 Vaihawmpawl kikhopna-a tute khempeuh in Stefen a en gegu uh a, a maitang vansawltak' maitang bangin a mu uhi.
Juda Vaihawmpawl' maia Stefen' Thugen
1 Tua nungin, siampilian in amah kiang ah: Hiai thute a dik hina hia? a chi hi. 2 Stefen in: Sanggamte leh pate aw, ka thugen na ngai un. I pu uh Abraham, Haran khua-a a teen ma-a, Mesopotamia gama a om laiin, thupina Pathian amah kiang ah hong kilaak hi. 3 Ama'n Abraham kiang ah: Na gam leh na tanau lainate nusia inla, kon etsak ding gam ah hong pai in, a chi hi. 4 Tua bangin, Abraham, Kaldaite gam apan hong paikhia a, Haran ah a teeng hi. A pa' sih nungin, tua apanin a pemkhe kik a, tu-a na teenna gam uh hong tung hi. 5 Hiai gam ah Pathian in amah goutan a pe kei a, a khepek taakna lei zong gam a pe kei hi. Ahihhangin, Abraham in ta a neih louh lai nangawnin, Pathian in tua gam, ama' goutan ding leh, a nunga a suante' goutan dinga piak a chiam hi. 6 Pathian in hibangin thu a gen a: Na suante, amaua hilou gam ah a khualtam ding uh a, tua gammite'n amaute kum 400 sung salin a nei ding uh a, gentheitakin a mawkbawl ding uh. 7 Ahihhangin, ke'n amaute sala nei nam ka gawt ding a, tua nung chiangin, amaute hong paikhe ding uh a, hiai mun ah kei hon be ding uhi, a chi hi. 8 Tua bangin, ama'n Abraham kiang ah, zeksum thukhun a pia hi. Tua nungin, Abraham in Isak a suang a, a ni giat ni-in a zek a sum hi. Isak in Jakob a suang a, a ni giat ni-in a zek a sum hi. Jakob in pubul sawmlenihte a suang a, a ni giat ni zelin a zek uh a sum hi. 9 Tua pubulte'n Josef a haza uh a, Aigupta gam ah salin a khawng uhi. Ahihhangin, Pathian in Josef a ompih a, 10 a gimthuakte khempeuh apan a hukhia hi. Amah pilna a pia a, Aigupta kumpipa Faro' deihsakna a ngahsak hi. Tua bangin, Faro in amah, Aigupta gambup tung ah leh, a innpi tunga ukpipain a bawl hi. 11 Tua nungin, Aigupta gambup leh Kanan gambup ah kial a kia a, nakpitaka gimna hong tung a, i pu i pate'n gan an ding nangawn a nei kei uhi. 12 Jakob in Aigupta gam ah buh a om chih a zak takin, i pu i pate tua gam ah a sawl hi. Tua bel, amaute Aigupta gama a hawhsuk masakna pen uh ahi. 13 Amaute nihvei a hawhsukna uah, Josef in amah kua hi hiam, chih a sanggamte a hilh a, Faro in Josef inkawte' thu a na za hi. 14 Hiai nungin, Josef in a pa Jakob leh, a innkawte a vekpiun a samsak hi. Amaute a innkuanun, mi 75 ahi uhi. 15 Tua bangin, Jakob, Aigupta gam ah a hawhsuk a, tua ah a si a, i pu i pate teng zong tua ah a si uhi. 16 Amaute' luangte Sekhem ah a kipua a, Abraham in Hamor' tate apan dangka suma a lei hankhuk ah a kivui uhi. Hamor bel Sekhem' pa ahi. 17 Tua nung lamin, Pathian in Abraham kianga a thuchiam a tangtunsak nading hong naita a, Aigupta gam ah i mite zong hong pung mahmah uhi. 18 Tua laiin, Aigupta gam ah, Josef thei lou kumpipa dang khat hong lian hi. 19 Tua kumpipa'n i mite zebawlin, i pu i pate a mawkbawl a, a ta ngekte uh a nungta zoulou dingin a koihkhesak teitei hi. 20 Tua hun laiin Mosi a piang a, amah Pathian' lungtaina tuam mahmah melpu ahi. Kha thum sung a pa' innsung ah a kikhoi hi. 21 Amah a koihkhiak takun, Faro' tanu in a tawm a, ama' tapa-a bawlin a don hi. 22 Ama'n Aigupta pilna khempeuh a sinsak a, tua bangin, thugen leh thil hih ah, mi thupi hong suak hi. 23 Mosi' kum 40 a phakin, a minampih Israelte veh ding lung-simin a nei hi. 24 Tua banga a veh laiin, Aigupta mi khat in ama' mi khat a mawkbawl lai a mu a, ama' mi pen a vahun a, Aigupta mi pen a that a, phu a laksak hi. 25 Mosi in bel, Pathian in a minampihte hukhe dinga amah zang ahi, chih a minamte'n phawk ding a sa a, ahihhangin, amaute'n a phawk kei uhi. 26 A zing chiangin, Mosi in Israel mi nih kisual a tuak a, amaute kilemsak a sawm a: Lawmte aw, noute, unau sanggam na hi ve ua le, banghanga hibanga siat kizong tuah na hi ua? a vachi hi. 27 Ahihhangin, a lawmpa mawkbawl zawpen in Mosi a sawnkhia a: Koute' tunga vaihawmpa ding leh thukhenpa dinga nang kua'n hon bawl a zenzen a? 28 Zanni-a Aigupta mi na thah banga kei zong hon thah sawm na hi maw? a chi hi. 29 Mosi in hiai a zak takin, Midian gam ah a taai a, tua ah gamdang mi-in a vateeng a, tua ah tapa nih a nei hi. 30 Mosi, tua gama kum 40 a teen nungin, Sinai Mual kianga Gamdai-gamkeua a om laiin, vansawltak khat, loupa buk kaanga meikuangin amah kiang ah hong kilaak hi. 31 Mosi in tua loupa buk kaang a muh takin lamdang a sa hi. Vaentel dinga a vanaih leh, Toupa' aw a za hi. 32 Toupa'n amah kiang ah: Kei na pu na pate' Pathian, Abraham' Pathian, Isak' Pathian, Jakob' Pathian ka hi, a chi hi. Mosi bel a lau a, a liing a, a en ngam kei hi. 33 Tua baan ah, Toupa'n amah kiang ah: Na khepekte apan na khedapte suahkhia in, na dinna mun lei siangthou ahi. 34 Aigupta gama ka mite'n zawhthawhna a thuak uh ka mu gige a, a thum a maute uh ka zata a, amaute hukhe dinga hong paisuk ka hi. Kisa inla, Aigupta gam ah kon sawl ding, a chi hi. 35 Koute tunga vaihawmpa hi ding leh thukhenpa hi dinga nang kua'n hon bawl a zenzen a? chi-a a minampihte'n a nolhpa uh, hiai Mosi mah ahi. Hita mah leh, Pathian mahmah in amaute' vaihawmpa leh hukhepa hi dingin amah a sawl hi. Ama'n amah kianga loupa buk laka kilaak, vansawltak tungtawnin amah a sawl hi. 36 Tua bangin, Mosi in, Aigupta gam ah leh, Tuipi San ah leh, gamdai-gamkeu ah kum 40 sung, vangletna nasepte leh chiamtehna lamdangte hihin amaute a pikhia hi. 37 Israelte kianga: Pathian in noumau lak apanin keimah bangbang kamsang khat hon pe ding a, amah na ngaihkhiak ding uh ahi, chipa hiai Mosi mah ahi. 38 Gamdai-gamkeu saptuamte laka ompa, i pu i pate tawh omkhawmpa leh, Sinai Mual tunga vansawltak in a houpihpa, eite kianga hon piaksawn ding Pathian' thu hingte sangpa hiai Mosi mah ahi. 39 Ahihhangin, i pu i pate'n ama' thu man nak sangin, amah a nolh uh a, a lungtangte uh Aigupta lam a nga kik hi. 40 Amaute'n Aron kiang ah: Koute hon piikik ding pathiante hon bawlsak in. Aigupta gam apan hon piikhia hiai mipa Mosi lah bang suakta hiam ka thei kei uh, a chi uhi. 41 Tua hun lai mahin, bawngnou lim kibawlin tua milim mai ah kithoihna a laan uh a, amaute' khutsuakte mah a paakta uhi. 42 Tua bangin, Pathian in amaute a kiheisan a, van aksite be dingin amaute a lehngatsan hi. Kamsangte' laibu sunga kigelh bangbang ahi. Tua ah: Israel innkawte aw, gamdai-gamkeu ah kum 40 sung ka mai ah kithoihnate leh thillatte non laan u maw? 43 Molekh biakbuk leh na pathian uh Refan aksi, biak ding na kibawl uh milimte na vialpuak puak tawk ve ua le! Hiai hang maha Babulon khen lama sala hon khamang ding hi'ng, chi-in a na kigelh hi. 44 I pu i pate'n gamdai-gamkeu ah, Theihpihna biakbuk a nei uh. Tua bel, Pathian in Mosi a hilh bangbang leh, etteh ding biakbuk lim a muh banga kibawl ahi. 45 I pu i pate'n tua biakbuk lasawnin, Joshua makaihna nuai ah Zentelte gam ah hon pawlut uhi. Pathian in i pu i pate' mai ah, tua Zentelte a hawlkhia a, David khang dongin tua biakbuk a zang uhi. 4 46 David in Pathian' deihsakna a ngah a, Jakob' Pathian adinga tenna munkip lam ding thu Pathian kiang ah a ngen hi. 47 Ahihhangin, Pathian adinga inn lampa Solomon ahi zaw. 48 Ahihhangin, Tungnungpenpa zaw mihing' khuta kilam innte ah a teeng kei. Kamsangpa'n: 49 Vaan ka kumpitutphah hi a, leitung ka khepek ngakna hi a, kei ading bangchi bang inn lam peuhmah ding na hia? Toupa'n chi hi. Ahih kei leh, ka khawl mun ding, koilai hi ding ahia? 50 Hiai thilte khempeuh ka khut in a bawl hi lou maw? chi hi, a na chih bangbang ahi. 51 Nou, lungtang khauh leh genhak, lungtang leh bil sum louhte! Na pu na pate uh bangbang na hi ve ua! Kha Siangthou na nang gige uhi! 52 Na pu na pate un kamsangte laka kua ahia a bawlsiat louh uh? Midiktatpa hong pai ding thu genkholte a that uh a, tua Midiktatpa lehbawla, khawnga thatte noute na hi uhi. 53 Vansawltakte tungtawna kipia, Dan na saang uh a, ahihhangin, na zui kei uh, a chi hi.
Stefen Suanga Denna
54 Amaute'n hiai thilte a zak takun, a heh mahmah uh a, Stefen a hagawikhum uhi. 55 Ahihhangin, Stefen bel, Kha Siangthouin a dim a, vanlam a en gegu a, Pathian' thupina leh Pathian' taklama Jesu ding a mu hi. 56 Tua bangin, ama'n: En un. Vaan kihongsa ka mu a, Pathian' taklama Mihing Tapa ding ka mu, a chi hi. 57 Amaute'n hiai a zak takun, bil a hum uh a, ngaihtakin a kikou uh a, a vekpiun amah a bawhhuan uhi. 58 Khawpi pawlam ah, amah a kaikhia uh a, suangin a deng uhi. Tua mu-a theihpihte'n tangval khat khebul ah a puansilhte uh a koihkhawm uhi. Tua tangvalpa' min Saul ahi. 59 Amaute'n Stefen a den laiun, amah a thuum a: Toupa Jesu aw, ka kha na saang in, a chi hi. 60 Tuachi-in, a khukdin a, ngaihtakin a kikou a: Toupa aw, hiai khelhna ah amaute mawh tangsak ken, a chi a, a chih khitin a ihmuta hi.
Saptuam Bawlsiatna
1 Amaute'n Stefen a thahna uh Saul in a lemsakpih hi. Tua ni-in, Jerusalem khua ah, saptuam bawlsiatna a tung a, sawltakliante chih louh siah, a ummite Judia leh Samaria gam teng ah a taizak uhi. 2 Pathianmitna limsakte'n Stefen a vui uh a, nakpitakin a suun uhi. 3 Ahihhangin, Saul in saptuam hihsiat a pan a, inn chih-a lutin, numei pasal a kaikhia a, suangkul ah a khum tawmtawm hi.
Samaria Gama Filip' Nasep
4 A taizakte'n a paina lamlam uah Pathian thu a gen uhi. 5 Filip zong, Samaria gama khawpi khat ah a hawhsuk a, tua ah Khrist thu a gen hi. 6 Mipi tampi in Filip thugen zain, chiamtehna lamdang a hihte a mu uh a, amaute khempeuh in a thugen a limsak uhi. 7 Dawimat tampite' sung apanin dawite kikou vomvomin a pawtkhia uhi. Ama'n zawte leh khebaite tampi zong a damsak hi. 8 Tua bangin, tua khawpi ah lungnopna lianpi a om hi.
Dawisiam Simon
9 Tua khawpi ah Simon kichi, mi khat a om hi. Amah dawisiam ahi a, milian khatin a kibawl a, Samari mite' lamdang sak dingin, dawi aisan a hih nilouh hi. 10 Mi khempeuh, a lian a neu in amah a thupibawl uh a: Hiai mi, Pathian' Vangletna Thupi ahi, a chi uhi. 11 Ama'n mitkhialdawi zanga hun sawtpi lamdang sataka amaute a koihtak manin, amah a thupibawl uhi. 12 Ahihhangin, Filip in Pathian' kumpigam thu leh, Jesu Khrist' min a gen, numeite leh pasalte'n a up takun, baptisna a tang uhi. 13 Simon in zong a um a, baptisna a tang hi. Ama'n Filip hih thillamdangte leh chiamtehnate lamdang a sa mahmah a, amah a zui samta hi.
Samarite tunga Kha Siangthou Tunna
14 Samarite'n Pathian thu a saangta uh chih, Jerusalema om sawltakliante'n a za uh a, amaute kiang ah, Peter leh Johan a sawl uhi. 15 Amaute gel Samaria gam ah a hawhsuk uh a, tua mite'n Kha Siangthou a ngah nadingun a vathuumsak uhi. 16 Ahang bel, tua mite kuamah tung ah Kha Siangthou a tung nai keia ahi. Toupa Jesu' mina kibaptislut ahi lei uhi. 17 Tua bangin, Peter leh Johan in amaute tung ah khut a nga uh a, Kha Siangthou a ngahta uhi. 18 Sawltakliante' khut ngakna tungtawnin Kha Siangthou a kipia, chih, Simon in a muh takin, amaute sum a tah a: 19 Ke'n zong khut ka ngakna mi peuhmah in Kha Siangthou a ngah nadingin, kei zong hiai vangletna hon pia un, a chi hi. 20 Ahhihhangin, Peter in amah kiang ah: Pathian' thawnpiak, dangka suma lei theih ding na sak manin, na sum, nang tawh mangthangkhawm hen! 21 Pathian' mitmuha na lungtang a dik louh manin, hiai thu ah panna na nei kei a, tan zong na nei kei hi. 22 Tua ahih manin, hiai na lungsim siatna apanin kisikin lunghei inla, Pathian kiang ah thuum in, ama'n na lungtang thiltup hon ngaidam khamawh ding hiam. 23 Khaatna-a dim, diktatlouhna sala taang na hi chih ka mu hi, a chi hi. 24 Simon in a dawng a: Na gente a bangmah ka tunga hong tun louh nadingin, Toupa kiang ah hon thuumsak in, a chi hi. 25 Peter leh Johan in theihpihna thu gena, Toupa thu a phuan khitun, Jerusalem lam a zuan kik uh a, lampi ah, Samaria gama khuate tampi ah tangthupha a gen kawm zel uhi.
Filip leh Ethiopia Mi
26 Toupa' vansawltak in Filip a houpih a: Thou inla, simlam ah, Jerusalem apan Gaza suna lampi paisuk ah vapai in, a chi hi. Tua lampi bel, gamdai-gamkeua pai ahi. 27 Tua bangin, Filip a thou a, a kipankhia hi. Ngai dih, Ethiopia mi, mi chilgeh khat lampi ah a na om hi. Amah Ethiopia kumpinu Kanda' gou khempeuh kempa ulian poimawh ahi. Jerusalem khua-a Pathian be dinga hawh ahi a, 28 amah a kilehkik lam ahi a, a kangtalaia tuangin, kamsangpa Isai' laibu a sim hi. 29 Tua laitakin, Kha in Filip kiang ah: Vapai inla, tua kangtalai vanaih in, a chi hi. 30 Tua bangin, Filip in amah a delhpha a, kamsangpa Isai laibu a sim a za hi. Filip in amah kiang ah: Na laisim na theisiam maw? a chi hi. 31 Tua Ethiopia mi in: Hon makaih ding om loupi-in, bangchi'n ka theisiam dia? a chih kawmin, kaltou a, a kianga tu dingin, Filip a chial hi. 32 Ama'n Isai' laibu a simna hiai ahi: Gawh nading muna belam kaih Banga amah paipiha om a, belamnou a mulmette' maia a dai dide banga a kam ka lou hi. 33 Simmawha nuaisiahna thuaka' a dika thukhenna kingawlsak a, kua'n ama' suan leh khak sui thei ding ahia? leitung apan ama' hinna kilaksak hiven, chih. 34 Tua bangin, mi chilgeh in Filip kiang ah: Kamsangpa'n kua tungthu gen ahia, ama' tungthu maw, ahih keileh, midang khat tungthu? kon dong ahi, a chi hi. 35 Filip in tua Laisiangthou apanin Jesu tawh kisai tangthupha amah a hilh hi. 36 Tua banga lampi-a a pai laiun, tui omna a tung uhi. Mi chilgeh in: En dih, hiai ah tui a om. Nang non baptis nading bangin hon dai ahia? a chi hi. 37 Filip in: Na lungtang taktaka na up peuh leh, baptisna na tang thei hi, a chi hi. Ama'n a dawng a: Jesu mah Khrist ahi a, Pathian' Tapa ahi, chih ka um hi, a chi hi. 38 Tua bangin, mi chilgeh in a kangtalai khawlsak dingin thu a pia a, Filip tawh tui lak ah a kumsuk a, Filip in amah a baptis hi. 39 Amaute tui apan hong paikhiak touh takun, Toupa' Kha in Filip a piimang a, mi chilgeh in amah a mu nawn kei hi. Mi chilgeh bel, lungnuam mahmahin a paita hi. 40 Ahihhangin, Filip bel, Azota ah a kimu hi. Ama'n Kaisaria a tun dongin, a paina lamlam ah, khawchih ah tangthupha a gen hi.
Saul' Pianthakna
1 Tua hun sung teng, Saul in Toupa' nungzuite thah dinga vauna thu a sekhe lailai hi. Siampilian kiang ah a vapai a, 2 Lampi pawl zuite, numei hita leh, pasal hita leh, a muh peuhmah suangkula khum dinga, Jerusalema hensa-a a kaihlut theih nading lai a ngen hi. Tua lai bel, Damaska khua-a sunagog tenga piak dinga a deih ahi. 3 Tua banga Saul a zin laia, Damaska khua a tun kuanin, thakhatin vaan apan vaak, a kimkot ah hong taang puap hi. 4 Amah leilak ah a puk a, aw khat a za a, tua aw in: Saul, Saul! Banghanga nang kei hon bawlsia sia na hia? a chi hi. 5 Saul in: Kua na hia, Toupa? a chi hi. Toupa'n a dawng a: Na bawlsiat siatpa Jesu ka hi. Sutna sikzumte khea pek nang adingin a haksa hi, a chi hi. 6 Tua bangin, liing leh lamdangsa kawmin ama'n: Toupa, bang hih dinga hon deih na hia? a chi hi. Toupa'n amah kiang ah: Thou inla, khawpi ah lut in. Tua ah na hih ngeingei ding hilhin na om ding hi, a chi hi. 7 Saul zinpihte bel, gen ding thei louin a ding uhi. Amaute'n aw ging a za uh a, ahihhangin, kuamah a mu kei uhi. 8 Tua khitin, Saul, leilak apan a thoutou a, a mit a hah leh, bangmah a mu thei kei hi. Tua bangin, amaute'n amah khutin a kai uh a, Damaska khua a lutpih uhi. 9 Amah, ni thum sung khawmu louin a om a, bangmah ne lou, bangmah dawn louin a om hi. 10 Damaska khua ah, nungzui khat a om a, a min Anania ahi. Toupa amah kiang ah, mengmuhna tungtawnin a kilaak a: Anania! chi-in a sam hi. Anania in: Toupa, hiai ah ka om, a chi hi. 11 toupa'n amah kiang ah: Thou inla, kongzing Tang, kichi khat ah vapai in. Tua ah Juda' inn ah Saul kichi, mi khat vakan in. Amah Tarsa khaw mi ahi. Ngai in, amah tulai taka Pathian kianga thuum ahi. 12 Ama'n mengmuhna tungtawnin, Anania kichi mi khat a mu hi. Tua pa hong pai a, a khawmuh theih nadinga a tunga khut ngain a mukhin hi, a chi hi. 13 Anania in a dawng a: Toupa' hiai mipa' tungthu leh Jerusalem khua-a na misiangthoute tunga a tatsiat dan mi tampi' gen ka zata hi. 14 Na min loute khempeuh mat nading siampi makaite' thuneihna tawi a, hiaia hong pai ahi, a chi hi. 15 Ahihhangin, Toupa'n Anania kiang ah: Amah Zentelte leh a kumpipate uleh, Israelte' maia ka min pawlut dinga ka belseh ahih manin, vahawh teitei in. 16 Ka min hanga bangzahta thuak ding hiam, chih amah ka theisak ding hi, a chi hi. 17 Tua bangin, Anania, tua inn ah a valut a, Saul tunga khut ngain: Sanggampa Saul, nong paina lampi-a na kianga Toupa kilaakpa Jesu ahi. Ama'n na khawmuh kik nading leh, Kha Siangthoua luahdimsaka na om nadinga na kianga kei hon sawl ahi, a chi hi. 18 Tua bangin, thakhatin, Saul' mitte apan lip kia bangin banghiam khat a kia a, khua a mu thei kikta hi. Amah hong thoukhia a, baptisna a tang hi. 19 Tua bangin, ama'n an a ne a, a tha ngei a pu kikta hi.
Saul in Khrist Tangkoupih
Saul bel, Damaska khua-a nungzui omte kiang ah nitam kuam a taam hi. 20 Ama'n sunagogte ah Khrist' thu a gen pah a, amah Pathian' Tapa ahi, a chi hi. 21 Ama' thugen zate'n lamdang a sa uh a: Hiai mipa, Jerusalema Jesu' min loute tunga tatsepa hilou ahi maw? Tua bang mite mah mana siampi makaite kianga kai dinga, hiai tan dong hong pai hilou maw? a chi uhi. 22 Ahihhangin, Saul bel, thugen lam ah a thanei semsem a, hiai Jesu mah Khrist ahi, chih a kitelna genin, Damaska khua-a Judate khempeuh gen ding beiin a koih hi. 23 Ni tampi nungin, Judate'n amah thah a sawm uhi. 24 Ahihhangin, Saul in amaute' thil sawm a phawk hi. Amaute'n lah amah a thah theih nadingun, khawpi kongpi teng ah, a sun a zanin amah a taang uhi. 25 Ahihhangin, nungzuite'n amah a tonpih uh a, zan laiin kulhbaang tung awng ah, bawmin a khaikhesuk uhi. 26 Saul, Jerusalem khua hong tunin, nungzuite laka kihel a sawm hi. Ahihhangin, amaute'n amah nungzui khat a suah taktak ding a um thei kei uh a, amah a lau uhi. 27 Ahihhangin, Barnaba in amah a tonpih a, sawltakliante kiang ah a paipih a, Saul in lampi-a Toupa a tuah dan, Toupa'n amah a houpih dan, tua baan ah, Damaska khua-a Jesu' mina hangsantaka thu a gen dan amaute kiang ah a hilhchian hi. 28 Tua bangin, Saul bel Jerusalem ah, amaute tawh a omkhawm a, amaute tawh a kipawl hi. 29 Ama'n hangsantakin, Toupa Jesu' minin thu a gen a, Grik pau zang Judate thu kikuppihin a sel hi. Ahihhangin, amaute'n amah thah a sawm uhi. 30 Sanggamte'n tua thu a zak takun, Kaisaria ah, Saul a tonpisuk uh a, Tarsa zuan dingin longin a kha uhi. 31 Hibang teng nungin, Judia gam, Galili gam leh, Samaria gam khempeuha saptuamte'n muanna a ngah uh a, a khangtou uhi. Tua bangin, Toupa zahtakna, lauhna leh Kha Siangthou' hanthawnna neiin, a khawsa uh a, hong pung semsem uhi.
Peter in Ainia Damsak
32 Peter a zin kawikawi a, Luda khua ah misiangthoute veh dingin a hawh hi. 33 Ama'n tua ah, Ainia kichi mi khat a mu hi. Tua mipa bel, kum giat sung zaw-a lupna ngak ahita hi. 34 Peter in amah kiang ah: Ainia, Khrist ahipa Jesu'n nang hon damsak hi. Thou inla, na lupna pheek heemta in, a chi a, Ainia zong a thou pahta hi. 35 Tua bangin, Luda khua leh Sharon phaizanga teeng mite'n Ainia a mu uh a, Toupa lam hong ngata uhi. 36 T
Peter in Dorka Kaithou
36 Jopa khua ah, Tabitha kichi, nungzui numei khat a om hi. Tabitha' min khiakna bel, Dorka ahi. Hiai numei bel, nahoih sem gige leh, zahngaihna thilhih hih gige mi ahi. 37 Ahihhangin, amah tua laiin hong china a, hong si mawk hi. Ama' luang a sil khitun, inndan tungnung ah a sial uhi. 38 Luda bel, Jopa tawh kinai ahi a, nungzuite'n Luda khua ah Peter a om, chih a thei uh a, amah kiang ah mi nih a sawl uhi. Amaute'n Peter kiang ah: Hehpihtakin hong pai zok mahmah in! a chi uhi. 39 Peter a dingkhia a, amaute a zui hi. Amah hong tun takin, tua inndan tungnung ah a tonpih uhi. Meigongte khempeuh Peter kianga dingin a kap uh a, Dorka a damlaia amaute adinga puanaktual leh puanak a bawlsakte a lak uhi. 40 Peter in amaute khempeuh inndan sung apan a pusuaksak a, khukdinin a thum hi. Tua khitin, tua siluang lam a nga a: Tabitha, hong thou in! a chi hi. Tua bangin, Tabitha a hak a, Peter a muh takin a tutou hi. 41 Peter in ama' khut a len a, a kai dingtou hi. Tua khitin, Peter in tua misiangthoute leh, tua meigongte a sam a, amaute kiang ah Tabitha hingdamin a pia hi. 42 Jopa khawpi sung teng ah hiai thu a kithei a, mi tampi in Toupa a umta uhi. 43 Peter bel, Jopa khua ah, Simon kichi, savun bawl mi khat kiang ah, ni tam kuam a taam lai hi.
Kornelia in Peter Samsak
1 Kaisaria ah Kornelia A" kichi, mi khat a om hi. Amah bel, Itali Sepaihpawla sepaih zaheupa khat ahi. 2 Amah leh a innkawte khempeuh, Pathianmitna limsak leh Pathian lau mi ahi uhi. Ama'n mite adingin zahngaihna thilhih a hih zel a, Pathian kiang ah a thuum gige hi. 3 Ni khat bel, dak thumna khawng laiin, mengmuh kiteltakin Pathian' vansawltak khat a mu a, tua vansawltak amah kiang ah hong pai a: Kornelia! chi-in a sam hi. 4 Kornelia in amah a en gegu a, a lauta a: Bang ahia, Toupa? a chi hi. Tua vansawltak in: Na thumnate leh gentheite kianga na zahngaihna thilhihte Pathian in a thei gige hi. 5 Tuin Jopa khawpi ah mi sawl inla, Simon samsak in. Ama' min Peter ahi. 6 Hiai mi, Simon kichi savun bawlpa' inn-a kinga ahi. Tua inn tuipi geia om ahi. Ama'n na hih ding hon hilh ding ahi, a chi hi. 7 Amah houpihpa, tua vansawltak a paikhitin, Kornelia in a innsung nasemte nih leh a nek bawl gige, Pathianmitna limsak sepaih khat a sam a, 8 amaute kiang ah bangkim a hilhchian a, Jopa khawpi ah a sawl hi.
Peter' Mengmuh
9 A zing chiang, sun dak sawmlenih khawngin, amaute khawpi a tun dek kuanun, thuum dingin Peter inntung zang ah a kaltou hi. 10 Amah hong gilkial a, bang hiam beek nek a ut hi. Ankuang a bawl laiun, amah zeelin a om a, 11 vaan kihong a, banghiam pek lianpi, a kiu li-a kikhih, leitunga kikhaikhesuk a mu hi. 12 Tua sung ah, leitunga kheli nei ganhing namkim, leia kitholhte leh huihkhua-a leng vasate tawh a om hi. 13 Tua khitin, aw khat in amah kiang ah: Peter, thou inla, gou inla ne in, a chi hi. 14 Peter in a dawng a: Hi zenzen lou e, Toupa. Ke'n a sianglou leh a buah himhim ka nek ngei louhpi, a chi hi. 15 Tua aw in a nihvei nadingin, amah a houpih a: Pathian in a siansaksa peuhmah, sianglou na chih ding hi lou ahi, a chi hi. 16 Hibangin, thumvei a om a, tua thilpek vaan ah a kilatoukik hi. 17 Peter in hiai mengmuh a muh, bang genna hi ding hiam, chi-a a buaipih sungin, ngai in, Kornelia' misawlte'n Simon' inn hong zongkhia uh a, kongpi ah hong ding uhi. 18 18 Amaute'n a galsap uh a, Simon, a minkhem Peter kichi, tua laia kinga ahi hiam, chi-in a kan uhi. 19 Peter in tua a mengmuh a ngaihsut sut laiin, Kha in: Ngai dih, mi thum in nang hong zong. 20 Thou inla, kumsuk inla, amaute zui in. Amaute keima' hon sawl ahih manin, amaute zuih ding saikna nei het ken, a chi hi. 21 Tua bangin, Peter, Kornelia' misawlte kiang ah a kumsuk a: Na mi zon uh kei ka hi. Nong paina uh a hang bang ahia le? a chi hi. 22 Tua mite'n a dawng uh a: Sepaih zaheupa Kornelia, mi diktat, Pathian lau mi, Judate khempeuh in a zahtaak uh ahi. Pathian in vansawltak siangthou khat tungtawnin amah a houpih a, ama' inn-a hawh dinga nang hon samsak ding leh, na thugen ngaikhe dingin a hilh hi, a chi uhi. 23 Peter in amaute a chial a, tua inn ah a zintun hi.
Kornelia Inn-a Peter
A zing chiangin, Peter a kisa a, amaute a zuita hi. Jopa khua-a sanggamte pawl khat in zong amah a zui uhi. 24 A zing nawnin, amaute Kaisaria a tung uhi. Kornelia in amaute a nangak a, a tanaute leh a lawm ngaihte a na samkhawm hi. 25 Peter, tua inn sung hong lut dek takin, Kornelia in a na muak a, a khebula bokin a bia hi. 26 Ahihhangin, Peter in amah a kaidingtou a: Ding in. Kei zong mihing lei ka hi, a chi hi. 27 Peter bel, amah tawh kihou kawmin, inn sung ah a lut a, mi tampi na paikhawmte a mu hi. 28 Ama'n amaute kiang ah: Juda mi adingin Zentel mi tawh kithuah leh kiveh a siang kei, chih na theihsa uh ahi. Ahihhangin, mi kuamah a sianglou, ahih kei leh, a buah ka chih ding hilou ahi, chih Pathian in hon lak hi. 29 Tua bang ahih manin, non sapsak laiun, sel se louin kong pai hi. Tuin, banghanga hon samsak na hi hiam? chih kon dong ahi, a chi hi. 30 Kornelia in: Ni li a paita a, tu bang hunin, ka inn sung ah, an ngawlin ka thuum hi. Ngai in sunnung lam dak thumna khawng laiin, ka mai ah, puan vaak silh mi khat hong ding guih a, ka kiang ah: 31 Kornelia, Pathian in na thuumna a zata. Gentheite kianga zahngaihna thil na hihte a thei gige hi. 32 Peter kichi, Simon sam dingin, Jopa khua ah mi sawl in. Amah, tuipi geia teeng, savun bawl mi Simon' inn-a kinga ahi. Amah hong tun chiangin na kiang ah thu a gen ding hi, a chi hi. 33 Tua bangin, nang kon samsak pah a, na hong hawh a hoih mahmah hi. Tuin, na gen dinga Pathian' hon thupiak peuhmah ngai dingin, Pathian' maia na paikhawm ka hi uh, a chi hi.
Kornelia' Inna Peter Thugen
34 Tua khitin, Peter in thu a gen pan a: Pathian in mi deihsak tuam a nei kei, chih diktakin ka theita. 35 Ama'n nam chih lak ah, Pathian laua diktattaka gamta mi peuhmah a saang hi. 36 Israelte kianga Pathian' thupuak na thei uhi. Ama'n amaute kiang ah, Jesu Khrist tungtawnin lungmuanna tangthupha a hilh hi. Jesu Khrist bel, mi khempeuh' Toupa ahi. 37 Judia gam sung tenga, tua thu kitangkoupih na thei uhi. Tua bel, Johan in baptisna tawh kisai thu a gen nunga, Galili gama kipan ahi. 38 Pathian in Kha Siangthou leh vangletna piain, Nazareth Jesu a thaunilh hi. Pathian in amah a ompih manin, amah, thil hoih hihin leh, dawimangpa' gimsakte damsakin, a pai kawikawi, chih na thei uhi. 39 Judia gam sung teng leh, Jerusalema a thilhih khempeuh theihpihte koute ka hi uhi. Judate'n sing tunga amah khaiin a that uh a, 40 ahihhangin, Pathian in a ni thum ni-in, misite lak apanin amah a kaithou a, muh dingin a kilaaksak hi. 41 Mi khempeuh kiang ah bel a kilaak kei a, theihpihmi hi dinga Pathian' teel koute kiang ah a kilaak hi. Koute bel, misite lak apan a thawhkik nunga, amah tawh nekhawm a, dawnkhawmte ka hi uhi. 42 Pathian in mite kianga thu gen ding leh, misite leh mihingte tunga thukhenpa hi dingin amah a sep, chih theihpih dingin, koute thu hon pia hi. 43 Kamsangte khempeuh in, amah tawh kisai theihpihna thu a na gen uh a, amah ummi kuapeuh in ama' tungtawnin, khelhnate ngaihdamna a ngah ding, chi-in a na theihpih uhi, a chi hi.
Zentelte tunga Kha Siangthou Tunna
44 Peter in hiai thute a gen laitakin, tua thu zate khempeuh tung ah Kha Siangthou hong tung hi. 45 Peter hon zui, zeksumte laka a ummite'n, Zentelte tung nangawna Kha Siangthou thawnpiak sunbuaka om a muh takun, lamdang a sa mahmah uhi. 46 Ahang bel, amaute pau tuama pau a, Pathian phat zata uh hiven. 47 Peter in: Eite'n i tan bangbang Kha Siangthou tang hiai mite, tuia baptis ding kua'n a kham thei dia? a chi hi. 48 Tua bangin, Toupa' mina baptisna tang dingin amaute thu a pia hi. Tua nungin, amaute'n amaute kianga ni tamlou beek tam tadih dingin Peter a khou uhi.
Zentelte laka Peter' Nasep Gupna
1 Zentelte'n zong Pathian thu a sangta uh, chih sawltakliante leh, Judia gama sanggam omte'n a za uhi. 2 Jerusalem khua-a Peter hong tuntouh takin, zeksumte laka a ummi pawlkhat in Peter a dem uh a: 3 Nang, zeksumloute laka hawh a, amaute tawh nekhawm leh dawnkhawma na om mawk! a chi uhi. 4 Peter in hibanga a hihna dan kiteltakin, a banbanin, amaute kiang ah a gen a: 5 Jopa khawpi ah thuma ka om laiin, zeelin ka om a, mengmuh ka nei hi. Thilpek lianpi khat kiuli-a kikhih, vaan apan ka mai ah hong kikhaikhesuk a, 6 tua sung ka et leh, kheli nei ganhing namkim, gamsate, leia kitholh ganhingte, huihkhua-a leng vasate ka mu hi. 7 Tua khitin, aw khat ka za a, tua aw in: Peter, thou in! Gou inla, ne in, hon chi hi. 8 Ahihhangin, ke'n: Hi zenzen lou e, Toupa! A sianglou, ahih kei leh, a buah himhim ka kama lut ngei lou ahi, ka chi hi. 9 Tua aw in vaan apanin, a nihveina dingin thu a gen a: Pathian in a siansaksa peuhmah, a sianglou na chih ding hi lou ahi, hon chi hi. 10 Hibangin thumvei hong om a, tua khitin bangkim vanlam ah a kilatou kik hi. 11 Tua hun laitakin, ka kingakna inn kong ah mi thum hong ding uhi. Amaute, Kaisaria apan ka kianga hong kisawl ahi uhi. 12 Amaute zuih ding lung saik lou dingin Kha in hon hilh hi. Tua tham louin, hiai sanggam gukte'n zong hon zui uh a, tua hon samsakpa' inn ah ka lut uhi. 13 Ama'n, a inn sunga vansawltak khat vading a muh dan leh, tua vansawltak in: Jopa khua ah mi sawl inla, Simon kichi Peter samsakin. 14 Ama'n nang leh na innkawte hotdam nading thu hon hilh ding, chi-a a hilh thu koute hon hilh hi. 15 Tua banga thugen ka pat laiin, a chil laia eite tunga Kha Siangthou hong tun bangin, amaute tung ah zong hong tung hi. 16 Tua laitak mahin, Toupa'n: Johan in tuiin a baptis a, ahihhangin, noute Kha Siangthoua baptis na hi ding uh, a na chih ka phawk hi. 17 Tua banga Pathian in, Toupa Jesu Khrist i up taka eite hon piak tua thawnpiak mah, amaute a piak ngai leh, Pathian nial vial ding kei soplai kua ka hia oi? a chi hi. 18 Amaute'n hiai thilte a zak takun a kamsimta uhi. Tua bangin, Pathian a phat zawta uh a: Hin nadinga Pathian in Zentelte nangawn kisika lungheisak a na hi ve maw, a chi uhi.
Antiokh Saptuamte' Theihpihna
19 Stefen tawh kisaia bawlsiatna hangin mite a dalhzak uh a, Foinikia gam khawng, Kupra tuikulh gam khawng leh, Antiokh khawng a tung uhi. Amaute'n a paina lamlam uah Pathian thu a gen uh a, ahihhangin, Judate kiang hilou, midang kiang ah a gen kei uhi. 20 Ahihhangin, Kupra leh Kurini apan mi pawlkhat, Antiokh hong tung uh a, Grikte kiang ah zong Pathian thu a gen uh a, Toupa Jesu' tangthupha a hilh uhi. 21 Toupa' khut in amaute a ompih a, mi tampi in a um uh a, Toupa lam a ngata uhi. 22 Jerusalem saptuamte'n hiai thu a na za uh a, Antiokh dong vahawh dingin Barnaba a sawl uhi. 23 Amah Antiokh a hong tung a, Pathian' hehpihna kitelna a muh takin, a lungdam mahmah a, lungtang khempeuh tawh Toupa lenkipa muanhuai dingin, amaute a hanthawn hi. 24 Ahang bel, amah mi hoih ahi a, Kha Siangthoua dim ahi a, upna-a dim ahi-a ahi. Tua bangin, mi tampi Toupa lam ah a kibehlap uhi. 25 Tua nungin, Barnaba bel, Saul zong dingin Tarsa khua zuanin a kipankhia hi. 26 Barnaba in Saul a muh takin, Antiokh ah a tonpih hi. Barnaba leh Saul in kum khat sung vingveng, tua saptuamte tawh kikhawm khawm-in, mi tampi a sinsak uhi. Antiokh ah ahi, nungzuite Khristian chi-a a kiminlawh masakpen uh. 27 Tua hun sung mahin, Jerusalem apanin, kamsang pawlkhat, Antiokh ah hong hawhsuk uhi. 28 Agaba kichi, amaute laka pang khat a ding a, Khain thu a genkhol a, Klaudia Kaisar dam laia kial kia bang, kial nasetak, Rom gam bupa ke ding ahi, a chi hi. 29 Tua bang ahih manin, tua-a nungzui omte'n Judia gama om sanggamte ading huhna piak ding a thukim uh a, mi chih in a piak theih khamkham piak ding, chi-in thu a khentat uhi. 30 Tua bangin a tangtun uh a, tua thawnpiakte, Barnaba leh Saul' khut tungtawnin, upate kiang ah a khak uhi.
Herod in Jakob That
1 Tua hun laiin, Kumpipa Herod in saptuam mi pawlkhat bawlsiat sawmin a man a, 2 tua nungin, namsauin Jakob a that hi. Jakob bel, Johan' sanggampa ahi.
Peter Suahtakna
3 Hiai a thilhih in Judate a kipaksak, chih Herod in a thei a, Peter zong man dingin a kisa hi. Tua hun bel, Silngou sawhlouh Ankuanglui lai ahi. 4 Ama'n Peter a man a, suangkul ah a khum hi. Sepaih lili-a kipawl, pawl li a veengsak a, Paikan Ankuanglui khit chianga, tangpi' maia thukhen din^a luikhiak a sawm hi. 5 Peter suangkula a om laiin, amah adingin saptuamte Pathian kiang ah nakpitakin a thuum uhi. 6 Herod in amah thukhenna maia ding dinga a luikhiak ma zanin, Peter bel, sepaih nih kikal ah sik khainiang niha hensain a lum hi. Suangkul kongkhak ah kongkhak veeng sepaihte a ding uhi. 7 Ngai dih, Toupa' vansawltak khat, thakhatin Peter kiang ah hong ding guih a, tua suangkul sung ah vaak hong taang hi. Tua vansawltak in Peter pang beengin a phawng a: Kintakin thou in! a chi hi. Tua hun laitak mahin, Peter' sik khainiang butte a khut apan a kekhia hi. 8 Tua baan ah, tua vansawltak in amah kiang ah: Na puan teeng inla, na khedap bun in, a chi a, Peter in zong tua bangin a hih hi. Tua baan ah, tua vansawltak in: Na puanak tungsilh silh inla, hon zui in, a chi hi. 9 Peter in amah, suangkul pua ah a zuikhia a, hinapi-in, tua vansawltak' thilhih a taktaka thiltung ahi hiam chih a thei kei a, mengmu a kisa hi. 10 Amau gel in suangkul veeng sepaih khatna leh nihna a kheng uh a, khawpi lampanga sik kongpi dong a tung uhi. Tua kongpi amaute pawt nadingin, amah mahin a kihong a, a pawt paisuak uhi. Kongzing khat a zuih tawnsuak nungun, thakhatin vansawltak in amah a nusia hi. 11 Tua nungin, Peter hong kiphawk a: Toupa'n a vansawltak hon sawl a, Herod' khut apan leh, Judate' lametna apan hong hukhia ahi, chih, tu'n ka thei taktakta, a chi hi. 12 Hibang a phawk khit nungin, amah Johan' nu Mari' inn ah a vapai a, tua ah mi tampi a na thuumkhawm uhi. Hiai Johan' min khem bel, Marka ahi. 13 Peter in kongpi kongkhak a kiu a, Rhoda kichi, sila nungak khat kong hong dingin a vapai hi. 14 Ama'n Peter' aw a theih takin, a lungnuam lua a, kongkhak hong louin, innsung lam ah a tailut a: Peter kongpi ah a ding! chi-in a vagen hi. 15 Ahihhangin, amaute'n: Hai na hita ve! a chihsan lai uhi. Ahihhangin, ama'n: A taktak ahi, a chi teitei a, amaute'n lah: Ama' vansawltak hi na ve, a chi uhi. 16 Ahihhangin, Peter in kongkhak a kiu lailai hi. Amaute'n kongkhak a hon uleh, Peter a mu petmah uh a, lamdang a sa lua uhi. 17 Peter in amaute daai dingin a khutvan a, Toupa'n suangkul apan amah a piikhiak dan amaute a hilh hi. Ama'n: Pai unla, Jakob leh sanggamte kiang ah hiai thu vahilh un, a chi hi. Tua khitin, amah mun dang ah a paikhia hi. 18 Zingsang hong hih takin, sepaihte buai chihtakin a buai uh a, Peter bang suakta hiam, chih a ngaihtuah khe zou kei uhi. 19 Herod in amah a zonzon nunga a muh zawh louh takin, suangkul veengte a kawi dot dot a, a tawpin amaute thah ding thu a peta hi.
Herod' Sihna
Herod bel, Judia gam apan Kaisaria ah a paisuk a, tua ah a taam tadih hi. 20 Herod in Tura leh Sidon khawmite tawh kisiat kinakna khat a nanei hi. Amaute'n kumpipa gam apan nek-le-dawn la uh ahih manin, kithutuakin hong pai uh a, kumpipa' lupna bawlpa Blasta lawmbawlin lemna zongin Herod kiang ah hong pai uhi. 21 Herod in a ni chiam ni khatin, a kumpipuan silhin, a thukhenna tutphah tung ah a tu a, tangpi' mai ah thu genna a nei hi. 22 Mipite a kikou uh a: Hiai Pathian' aw ahi, mihing' aw ahi kei, a chi uhi. 23 Herod in thupina, Pathian a piaklouh manin, Toupa' vansawltak khat in ama' tung ah khut a kha guih a, hut in a nelumta hi. 24 Ahihhangin, Pathian thu bel a khang semsem a, a daih semsem hi. 25 Barnaba leh Saul in nasep a zawhkhitun, Jerusalem apan a kilehkik uh a, Johan a tonpih uhi. Johan' minkhem bel Marka zong kichi ahi.
Barnaba leh Said Sawlkhiakna
1 Antiokh saptuam ah kamsangte leh sinsakmite a om uhi. Amaute Barnaba tawh, Nigar kichi Simeon tawh, Kurini mi Lusia tawh, hausalian Herod tawh khangkhawm Manaen tawh, Saul tawh ahi uhi. 2 Amaute Toupa bia-a, an ngawla a om laiun, Kha Siangthou in: Barnaba leh Saul ka sapna pen sem dingin, kei adingin hon sehtuamsak un, a chi hi. 3 Tua bangin, amaute an ngawla a thuum nungun, Barnaba leh Saul tunga khut ngain, amaute gel a sawlkheta uhi. 4 Kha Siangthou in amaute a sawl bangin, Selliukia khua ah a paisuk uh a, tua apanin Kupra tuikulh zuanin, longin a pai uhi. 5 Amaute, Salami khawpi-a a om lai un, Judate' sunagogte ah Pathian thu a gen uhi. Amaute'n Johan zong a tonpih uh a, ama'n amaute a huh hi. 6 Amaute, tua tuikulh gam teng tawnin, Pafos hong tung uhi. Tua khua ah Bar Jesu kichi, Juda mi khat a tuak uhi. Amah bel, dawisiam ahi a, kamsang taklou ahi. 7 Amah, ukpineu Sergia Paula' nasemte laka khat ahi. Sergia Paula bel, khuak pilna nei mi ahi. Ama'n Pathian thu a zak nop manin, Barnaba leh Saul a samsak hi. 8 Ahihhangin, dawisiam Elima in amaute a dai hi. Elima bel, amau paua Bar Jesu' min khiakna ahi. Ama'n thu-up apan ukpipa heimang a sawm hi. 9 Saul, Kha Siangthoua luahdimsakin a om a, Elima a en gemgum hi. Saul bel, Paul, chi-in zong a kisam hi. 10 Ama'n: Nang dawimangpa' ta, diktatna khempeuh doupa aw, khemna leh zuautatna chitenga dim na hi. Toupa' lampi tangte kaihkawi tawp ngeilou ding na hi-a hia? 11 Thei in, tuin Toupa' khut in nang hon dou ahi. Na mit a taw ding a, hun bangtan hiam, ni vaak mu theilouin na om ding, a chi hi. Tua bangin, ama' tung ah tuimei leh mial a tung pah a, khuta kai ding mi zongin a kimai mai hi. 12 Ukpineu in tua thil hong tung a muh takin, Toupa tawh kisai sinsakna lamdang sain, a umta hi.
Pisidia Gama Antiokh ah
13 Paul leh a lawmte, Pafos apanin Pamfulia gama Perga zuanin, longin a pai uhi. Tua ah, Johan in amaute a nusia a, Jerusalem ah a kilehkik hi. 14 Amaute bel, Perga apanin Pisidia gama Antiokh a tung uhi. Sabbath niin amaute gel, sunagog ah a lut uh a, a tu uhi. 15 Dan Laibu leh Kamsang laibute apan a sim khitun, sunagog vaihawmte'n amaute a chial uh a: Sanggamte aw, mipite ading hanthawnna thu gen ding na neih uleh gen un, a chi uhi. 16 Paul a dingtou a, amaute a khutvan a: Israel mite leh Pathian bete aw, na ngai un! 17 Israel mite' Pathian in, i pu i pate a nateel hi. Amaute Aigupta gama a khualtaam laiun, Pathian in amaute a tawisang a, a ban thahatin amaute a piikhekik hi. 18 Gamdai-gamkeua kum 40 sung a gamtatna uh a thuak teitei a, 19 Kanan gama nam sagih a zawhsak a, a gam uh, amaute adingin a hawmsak hi. 20 Tua bangin, kum 450 khawng hong bei hi. Hiai nungin, kamsang Samuel chiang dongin, Pathian in Vaihawmte a pia hi. 21 Tua nung lamin, amaute'n kumpipa ding a ngen uh a, Pathian in Benjamin suante khat, Kish' tapa Saul a pia a, ama'n kum 40 sung vai a hawm hi. 22 Pathian in Saul a paihkhiak nungin, amaute' kumpipa dingin David a bawl hi. Pathian in David tungthu ah: Jese' tapa David, ka lungtang bang pu ka muta. Ama'n ka deihlam a sem ding, a chi hi. 23 Pathian in a chiamsa bangin, hiai David' suante lak apanin, Israel ading Hondampa a tungkhia a, amah Jesu ahi. 24 Jesu hong tun main, Johan in Israelte khempeuh kiang ah, kisika lungheina leh baptisna thu a gen hi. 25 Johan in a nasep a zawh ding laiin: Noute'n kei kua hon sa na hi ua? Amah ka hi kei. Amah ahih leh, ka nunga hong pai ding ahi. Kei zaw ama' khedap khaute phei ding nangawnin ka ching kei hi, a chi hi. 26 Nou, Abraham' suan, ka sanggamte leh Pathian lau Zentelte aw, Pathian in hiai hotdamna thu noute hon puak hi. 27 Jerusalema teengte leh, a vaihawmte un Jesu a nameltheih kei uhi. Amah a na mawhtansak laiun, Sabbath tenga a sim uh, kamsangte' thugente tangtungsak a na hi uhi. 28 Amaute'n ama' sih nadinga kiching a san ahang mu keimah le uh, amah thah ding Pilat kiang ah a ngen teitei uhi. 29 Tua banga, amaute'n ama' tungthu, Laisiangthoua kigelhte khempeuh a tangtun khitun, sing tung apan amah a lakhia uh a, hankhuk ah a sial uhi. 30 Ahihhangin, Pathian in misite lak apanin amah a kaithou a, 31 Galili gam apan Jerusalema a tonpihte kiang ah, amah ni tampi sung a kilaak hi. Amah mute mah tu-a i mite kianga amah theihpihte ahi uhi. 32 Koutegel in tu-in tua tangthupha noute kon hilh uhi. Tua tangthupha bel, Pathian in i pu i pate kianga a na chiamsa ahi. 33 Pathian in Jesu a kaihthawhna tungtawnin, tua thuchiam, amaute' suan eite adingin a tangtungsak hi. Phatnala nihna ah, hibangin a na kigelh hi: Nang zaw ka Tapa na hi, tuni'n na Pa kong hita, chi-in. 34 Pathian in Jesu muat lou dinga, misite lak apan a kaihthawh thu hibangin a gen hi: David kianga vualzawlna siangthou leh muanhuai ka chiam, nang hon pe ding hi'ng, chi-in. 35 Tua bang ahih manin, Phatnala dang khat ah, hibangin a kigelh hi: Nang na Misiangthoupa a muatmang ding zong phal lou ding hi vechin, chi-in. 36 David lah, ama' khang adinga Pathian' deihlam a sep laiin a si a, a pu a pate bangin a kivui a, a pumpi a muatmang hi. 37 Ahihhangin, Pathian in misite lak apan a kaihthawh Jesu bel a muatmang kei hi. 38 Tua bang ahih manin, ka sanggamte aw, thei un. Hiai Jesu' tungtawna khelhna ngaihdamna thu noute kianga gen ka hi uhi. 39 Mosi' Dan in dik hon tansak theih louhna thil khempeuh apanin, Pathian in Jesu tungtawnin a ummi kuapeuh dik a tangsak ding hi. 40 Tua bang ahih manin, kamsangte'n a na gen, noute tunga a tun louh nadingin pilvang un. Kamsangte'n: 41 Ngai un, nou simmawhhatte, lamdang sa unla, mangthang un! Ahang bel, noute khanga, thil khat hih ding ing a, noute hong kihilh hanga um ngei lou ding hi uteh, chi-in a na gen uhi, a chi uhi. 42 Sunagog apan Paul leh Barnaba a paikhiak laiun, Sabbath nawn chianga, hiai thilte gen lai dingin, tua mite'n amaute a ngen uhi. 43 Sunagoga kikhop a tawp takin, Judate tampi leh, a kipezoutak Juda phungkai tampi in Paul leh Barnaba a zui uhi. Paul leh Barnaba in amaute kianga thu genin, Pathian' hehpihna-a om gige dingin, amaute a hanthawn uhi.
Paul' Thugen
44 Sabbath nawnin, khawpi sung mi teng khempeuh phial hong kikhawm uh a, Pathian thu a ngaikhia uhi. 45 Ahihhangin, Judate'n mipite a muh takun, hazatnain a dim uhi. Amaute'n Paul' thugente a kaih uh a, a gensia uhi. 46 Paul leh Barnaba in hangsantakin a dawng uh a: Noute kianga Pathian Thu kigen masak ding kuul sese ahi. Hitamahleh, noute'n Pathian Thu nial na hih manun leh, Tangtawn hinna tang taak loua kibawl na hih manun, ngai un, Zentelte lam ka ngata ding uhi. 47 Ahang bel, Toupa'n koute thu hon pia a: Zentelte adinga vaak hi ding leh, lei mong donga hotdamna tun dinga, nang hon sep hi'ng, chi hi, a chi uhi. 48 Zentelte'n hiai thu a zak takun, a lungnuam mahmah uh a, Toupa thu a pahtawi uhi. Tua bangin, Pathian in Tangtawn hinna tang dinga a seh zahzah in a umta uhi. 49 Tua bangin, Toupa thu tua gam sung khempeuh ah a thang a, 50 ahihhangin, Judate'n tua khua-a Pathianmitna limsak numeite, numei zahtakhuaite leh, tangpi' makai pasalte a hasuan uh a, amaute'n Paul leh Barnaba bawlsia in, a gam uapan a hawlkhia uhi. 51 Tua bangin, Paul leh Barnaba in amaute mawhtan-saknain, a khepek uapan leivui a singkhia uh a, Ikoniam ah a paita uhi. 52 Nungzuite bel, lungnopna leh Kha Siangthoua luahdim in a om uhi.
Ikoniama Paul leh Barnaba
1 Ikoniam ah, Paul leh 1 jl Barnaba, Judate' sunagog ah a lut uhi. Tua bel, ahih dan ngeina mah uh ahi. Amaute'n thuneitakin thu a gen uh a, Judate leh Zentelte tampi in a um uhi. 2 Ahihhangin, a umlou Judate'n Zentelte a hasuan gawp uh a, sanggamte dou dingin a lungputte uh a hihsiatsak uhi. 3 Hitamahleh, tua mun ah, Paul leh Barnaba hun sawt kuam a taam uh a, hangsantakin Toupa tawh kisai thu a gen uhi. Toupa'n a hehpihna thu a theihpihnain, amaute khut ah chiamtehna lamdangte leh vangletna nasepte a hihsak hi. 4 Ahihhangin, tua khua-a mipite a kilangkhen uh a, pawlkhat Judate lam ah a pang uh a, pawlkhat sawltakliante lam ah a pang uhi. 5 Zentelte leh Judate, a vaihawmmite utawh pangkhawmin, thagum suaha amaute suanga den a sawm uhi. 6 Ahihhangin, Paul leh Barnaba in hiai thu a phawk uh a, Lukonia gam khawpite, Lustra leh Derbe khuate leh, a kiim gam ahte a taai uhi. 7 Tua gamte ah zong tangthupha a gen lailai uhi.
Lustra-a Paul leh Barnaba
8 Lustra khua ah, khebai khat, a khete kisia a, a pian apan lam pai ngeilou a tu a, 9 hiai mi in Paul' thugen a za hi. Paul in amah limtakin a en a, damsak nadinga kiching upna a nei, chih a thei hi. 10 Tua bangin, Paul in aw ngaihtakin: Na khein dingtangtou in! a chi hi. Amah a tawmtou a, a pai thei maimah hi. 11 Paul thil hih mipite'n a muh takun, aw a suah uh a, Lukonia pauin: Pathiante, mihing mei pu-a eite kianga hong kumsuk ahi uh, a chi uhi. 12 Amaute'n Barnaba pen Zeus, chi-in a sam uh a, Paul bel, thugenpipen ahih manin, Harmis, chi-in a sam uhi. 13 Zeus' tempul tua khawpi pam zeka om ahi a, tua Zeus siampi leh, tua khua mite'n amaute maia kithoihna laan nuamin, bawngtalte leh pakkhite, khawpi kongpite ah hon la uhi. 14 Ahihhangin, sawltaklian Barnaba leh Paul in hiai thu a zak takun, a puansilhte uh a botkek uh a, mipite lak ah a tailut uhi. 15 Kikouin: Pute aw, banghanga hibang hih peuhmah na hi ua? Koute zong, noute banga mihing lei ka hi uh. Hibang mannabei thil na hihte ua pana Pathian hing lama na kihei nading ua, tangthupha hon puakte ka hi uh. Tua Pathian hing ahi lei leh vaan leh tuipi leh, tuate sunga omte khempeuh bawlpa. 16 Ama'n nidang laiin, namte, amau' ut bangbanga a gamtat ding uh a na phal hi. 17 Hinapi-in, amah theihpihnabeiin a kikoih kei a, thil hoih hihin, vaan vuahte leh, a hunhuna louhaite a hon pia hi. An hon pia a, kipahnain i lungtangte a taisak hi, a chi uhi. 18 Hibang teng gen mah le uh, amaute kianga kithoihna laan lou dingin mipite a khou zou kei dektak uhi.
Suanga Denna leh Derbe-a Taina
19 Tua nungin, Antiokh apan leh Ikoniam apan Judate hong tung uh a, mipite a thuzawh uhi. Tua bangin, amaute'n suangin Paul a deng uh a, sita sain, khawpi pawlam ah a kaikhia uhi. 20 Ahihhangin, nungzuite amah kiima hong paikhawm takun, amah hong thoutou a, khawpi sung ah a lut hi. A zing chiangin, Barnaba tawh Derbe ah a paita uhi.
Suria Gama Antiokh-a Chiahkikna
21 Derbe ah, amaute'n tangthupha a gen uh a, nungzui tampi a bawl uhi. Tua nungin, amaute, Lustra, Ikoniam leh Antiokh ah a kilehkik uhi. 22 Amaute'n: Pathian kumpigam i lut kawmin, haksatna tampi i thuak ding mah ahi, chi-in, nungzuite hinna a thakhauhsak uh a, thu-up sunga om gige dingin a hanthawn uhi. 23 Saptuam chiha upate sep a, an ngawla a thum khitun, a muan uh Toupa khut ah amaute a kemsak uhi. 24 Pisidia gam a totsuak khitun, Pamfulia gam hong tung uh a, 25 Perga-a thu a gen khitun, Atalia ah a paisuk uhi. 26 Atalia apanin Antiokh zuanin longin a pai uhi. Tua Antiokh ah ahi, a chila saptuamte'n Pathian' hehpihna sunga amaute a kepsak uh a, sep ding nna a got uh. Tuin, tua nasep a zouta uhi. 27 Amaute, Antiokh a tunun, saptuamte a kaikhawm uh a, Pathian in amaute tungtawna a septe khempeuh leh, Zentelte adinga upna kong a hontak dan a hilh uhi. 28 Tua bangin, tua khua ah, nungzuite tawh hun sawtpi a omkhawm uhi.
Zeksum thu-a Jerusalem Khawmpi
1 Judia gam apanin, Antiok ah mi pawlkhat hong hawhsuk uh a, tua khua-a sanggamte a sinsak uh a: Mosi Dan banga zek na sum kei uleh hotdamin na om thei kei ding uh, a chi uhi. 2 Tua banga a sinsak manun, Paul leh Barnaba in amaute nakpitakin a kaih uh a, a sel uhi. Tua ahih manin, hiai thu tawh kisaia, Jerusalema vapaia, sawltakliante leh upate vamu dingin saptuamte'n amaute gel a sep uhi. 3 Tua bangin, saptuamte'n amaute a sawlkhia uh a, Foinikia gam leh, Samaria gam a totna uah, Zentelte hong kihei dan a gen uh a, tua in tua-a sanggamte khempeuh a lungnuamsak mahmah hi. 4 Jerusalem hong tunun, saptuamte leh sawltakliante leh upate'n amaute a na kipahpih uhi. Pathian in amaute tungtawna a thilhih khempeuh, tua-a omte kiang ah a gen uhi. 5 Ahihhangin, Farisaite laka a ummi pawlkhat a ding uh a: Zentelte'n zek a sum ua, Mosi' Dan a zuih uh kul ahi, a chi uhi. 6 Tua bangin, sawltakliante leh upate, hiai thu ngaihtuah dingin a paikhawm uhi. 7 Kiseelna tampi a om nungin, Peter a dingtou a, amaute kiang ah: Sanggamte aw, hun sawtlou paitain, Pathian in noute lak ah deihtelna a bawl a, Zentelte'n keima' kama tangthupha a zak ding uh leh a up ding uh deih ahi, chih na thei uhi. 8 Ahang bel, lungtang theipa Pathian in, eite tunga a hih bangin amaute a saangta, chih, Kha Siangthou pia-a langsakta hiven. 9 Ama'n eite leh amaute hon deidan lou a, upna tungtawn maha a lungtangte uh siangsak ahi. 10 Tua bang ahih nung, i pu i pate hita leh, eite hita lehang, i puak zawh louh hakkol banghanga nungzuite' ngawnga bat a, Pathian ze-et sawm na hi ua? 11 Tanglai i pu i pate mah bangin, eite zong Toupa Jesu Khrist' hehpihna pansana hotdama om i hi, chih i um hi, a chi hi. 12 Barnaba leh Paul in, amaute tungtawna Pathian in Zentelte laka chiamtehna lamdangte leh vangletna nasepte a hih thu, a banbana a gen laiun, kikhawmte'n dai khipkhepin a ngaikhia uhi. 13 Amaute tua banga a daih khipkhep laitakun, Jakob in thu a gen a: Sanggamte aw, ka thu gen ngai dih uh. 14 Pathian in amasapena Zentelte lak apan, ama' min pu ding mite lakhia a, amaute awlmawhna a latsak dan Simon in a genta. 15 Kamsangte' thugente tawh hiai thu a kituak a, a kilem hi. Kamsangte' thugen hibangin a kigelh hi: 16 Hiai nunga, hong kik ding ing a, a chimkhinsa David' puanbuk lamthak ding ing a, a kisesa lam thaka, tungdingthak ding hi'ng. 17 Tua bel, a khawsuaksunte leh ka min pu Zentelte khempeuh in, Toupa a zon nading uh ahi, chi-a hiai thilte hihpa Toupa'n gen hi. 18 Hiai thilte lah a beikhinsa tangkhua-a kitheikhinsa ahi, chi-in. 19 Tua bang ahih manin, Zentelte lak apan mi Pathian lama hong kiheite puakgik guan kei lehang ka chi ahi. 20 Tua bangin, amaute kiang ah lai gelh lehang la, milim biakna sa nek apan, kingaihna nin apan, heklup sa nek apan leh, sisan nek apan kihem dingin hilh zaw lehang. 21 Ahang bel, Mosi' Dan pen, tanglai pek apana khaw tenga kigen a, Sabbath ni tenga sunagog tenga kisim a hih man ahi, a chi hi.
Jerusalema Kikhawmte' Thuseh
22 Tua khitin, sawltakliante leh upate leh saptuamte khempeuh in, amaute lak apan mi kitelkhia a, a mitelte uleh Paul leh Barnaba, Antiokh khua-a sawl dingin thutanna a bawl uhi. Tua bangin, sanggamte laka makai nih, Barsaba kichi Juda leh Sila a telkhia uhi. 23 Tua bangin, amaute' khut tungtawnin lai a khak uhi. Tua laikhak ah: Na sanggamte un, sawltakliante leh upate'n Antiokh khua leh, Suria gam leh Silikia gama om a um mi Zentelte kiang ah lai kon gelh uhi. Chibai! 24 Koute laka mi pawlkhat, noute kianga hong paiin, a thugenteun noute hon lung- buaisak uh, chih thu ka na za uhi. Amaute'n: Zek na sum ding uh, Dan na zuih ding uh, hong chi uhi. Tua bang thu gen dingin amaute thu ka pe kei uhi. 25 Tua banga koute ka kikhopkhawm takun, mi telkhia a, ka it uh Barnaba leh Paul tawh, noute kianga hon sawl pha sain, ka thukim uhi. ?fi 26 Amaute ahih leh, i Toupa Jesu Khrist' mina a hinna uh phalte ahi uhi. 27 Tua bang ahih manin, Barnaba leh Paul zui dingin Juda leh Sila kon sawl uhi. Amaute'n, thu-a ka gelhte uh, kamin hong gen ding uhi. 28 Hiaia thil kul ka gelhte uh chih louh ngai, noute tunga puakgik lianzaw dang hon ngak louh Kha Siangthou leh koute'n, pha ka sa uhi: 29 Milim biakna sa na nek louh ding uh, sisan na nek louh ding uh, heklup sa na nek louh ding uh, kingaihna nin na hih louh ding uh. Hiaite na hih kei uleh, na hih hoih ding uhi, ka chi uhi. Mangpha, chi-in a gelh uhi. 30 Tua bangin, amaute sawl ahih bangun, a kuankhia uh a, Antiokh ah a hawhsuk uhi. Tua ah, mipite a samkhawm uh a, laikhak a pia uhi. 31 Amaute'n tua laikhak a sim uh a, amaute hanthawnna thu a kipahpih uhi. 32 Juda leh Sila mah zong kamsang ahi uh a, tua muna sanggamte hanthawn ding leh thakhauhsak dingin, thu tampi a gen uhi. 33 Tua muna hun bangtan hiam a taam nungun, amaute sawltakliante kianga kilehkik dingin, tua laia sanggamte'n amaute lungmuanna-a vualzawlin a khakhia uhi. 34 Ahihhangin, Sila in bel tua laia a taam takdih ding hoih a sa hi. 35 Paul leh Barnaba zong Antiokh ah a taam lai uh a, mi dang tampi tawh, a sinsak uh a, Toupa' thu a gen uhi.
Paul leh Barnaba Kikhenna
36 Hun bangtan hiam nungin, Paul in Barnaba kiang ah: Toupa' thu i gennasa khuate khempeuha sanggamte veh a, bang chichi-a om uhiam, chih vamu dingin kuan kik ve ni, a chi hi. 37 Barnaba in Marka kichi, Johan tonpih a ut a, 38 ahihhangin, ama'n Pamfulia gama amaute nusia-a, nasepna-a amaute tawh pangkhawm nawn lou ahih manin, amah tonpih ding Paul in a nial bilbel hi. 39 Tua bangin, amaute gel a kinaaksel luat manun, a kikhenta uhi. Barnaba in Marka a tonpih a, Kupra tuikulh zuanin, longin a paita uhi. 40 Paul in bel Sila a teel a, a kipankhia uh a, Sanggamte'n Toupa' hehpihna sung ah amaute a kemsak uhi. 41 Suria leh Silikia gam teng a tawn uh a, saptuamte a thakhauhsak hi.
Timothi
1 Tua nungin, Derbe ah Paul a hawh a, tua khitin, Lustra ah a hawh hi. Lustra ah, Timothi kichi nungzui khat a om hi. Timothi' nu bel, a ummi Juda numei ahi a, a pa bel Grik mi ahi. 2 Amah bel, Lustra leh Ikoniama sanggamte' phat mahmah mi ahi. 3 Paul in a zinna-a amah tonpih a ut hi. Tua bangin, tua gama Judate'n, a pa Grik mi ahi, chih thei uh ahih manin, amaute hangin, amah zek a sumsak hi. 4 Amaute'n khawpi a totna teng uah, Jerusalema sawltakliante leh upate' thusehte a zuih dingun a pe zel uhi. 5 Tua bangin, thu-up sung ah saptuamte a kipsak uh a, nisimin a pung uhi.
Makedonia Sapna
6 Paul leh a lawmte'n, Frugia gam leh, Galatia gam a totsuak nungun, Asia gama thu gen lou dingin Kha Siangthou in amaute a kham hi. 7 Amaute Musia gamgi a tunun, Bithunia gam lut a sawm uh a, ahihhangin, Jesu' Kha in a phal kei hi. 8 Tua bangin, Musia gam pelin, Troas khua hong tung uhi. 9 Zanin, Paul in mengmuh a mu a, Makedonia gam mi khat ding a: Makedonia gam ah hong pai galkai inla, koute hong huh in, chi-a amah ngenin a mu hi. 10 Paul in tua mengmuh a muh khitin, amaute kianga tangthupha gen dinga Toupa'n hon sam hi ding hi, chi-in, Makedonia gam zuana pai ka sawm pah uhi.
Ludia' Pianthakna
11 Troas khua apanin, long ah ka tuang uh a, Samothre tuikulh gam ka zuan pah vingveng uhi. A zing chiangin, Neopoli ka tung uhi. 12 Tua apanin, Filipi ka zuan uhi. Filipi bel, Makedonia gama, Rom mite' pemkhawmna khaw lianpen ahi. Tua khua ah, ni tam kuam ka taam uhi. 13 Sabbath ni-in, khawpi kongpi pawlam ah ka paikhia uh a, lui khat ka tung uhi. Tua lui gei bel thuumna mun ahi. Tua muna tuin, numei paikhawmte kiang ah thu ka gen uhi. 14 Tua thu ngaikhete laka numei khat' min Ludia ahi. Amah bel Thuatira khaw mi, puan sandupa sumsin mi, Pathian bemi ahi. Paul' thugen ngaihsak dingin Toupa'n ama' lungtang a honsak a, 15 amah leh a innkawte'n baptisna a tang uhi. Ama'n, a inn ua kinga dingin koute hon chial a: Toupa uma non seh uleh hong pai unla, ka inn ah hong kinga mahmah un, chi-in hon ngen hi. Tua bangin koute hon chial zou hi.
Paul leh Sila Suangkula Kiklium
16 Khatvei, thuumna muna ka hawh laiun, sila nungak khat in hon na tuak hi. Amah bel dawinei ahi a, aisan siam ahi. Aisana vaang genin, a pute adingin sum tampipi a mu hi. 17 Tua nungak in Paul leh koute hon zui a, kikouin: Hiai mite, Pathian Tungnungpen' silate ahi uh a, eite kianga hotdamna lampi tangkoupih ahi uh, a chi hi. 18 Hibangin ni tampi a hih hi. A tawptawpin, Paul in a zadah a, a kihei a, tua dawi kiang ah: Nungaknu sung apan hong pawtkhe dingin, Jesu Khrist' minin thu kon pia ahi, a chi hi. Tua hun mah mahin, dawi in nungaknu a nuse pah hi. 19 Tua sila nungak' pute'n sum muh nading lamet a beita, chih a phawk uh a, Paul leh Sila a pummat uh a, thuneite' maia ding dingin, sumsinna mun ah a kailut uhi. 20 Amaute'n thukhen vaihawmte mai ah, amaute hon kai uh a: Hiai mite, Juda mi ahi uh a, i khawpi a buaisak uhi. 21 Ei Rom mite adinga saan theih louh leh zat theih louh, tatdan ngeina khat hon zatsak sawma gengen ahi uh, a chi uhi. 22 Mipi tampite zong, Paul leh Sila douin a pangkhawm uh a, thukhen vaihawmte'n amaute' puan a suahsak uh a, chianga sat ding thu a pia uhi. 23 Amaute'n chianga nakpitaka amaute a sat nungun, suangkul sung ah a khum uh a, pilvangtaka veeng dingin taang veng khat thu a pia uhi. 24 Tua bang thupiak muin, taangveengpa'n suangkul dantan sungnung ah amaute a koih a, a khete uah singkolte a bunsak hi.
Tangvengpa' Pianthakna
25 Zankim laitakin, Paul leh Sila a thuum uh a, Pathian phatin late a sa uh a, koltang dangte'n a ngaikhia uhi. 26 Thakhatin zinpi hat lua hong liing a, suangkul suangphum dongin a liing hi. Suangkul kongkhakte hong kihong pah a, michih' khainiang butte hong kitol hi. 27 Taangveengpa hong khanglou a, suangkul kongkhakte kihongsa-a om a muh takin, suangkul taangte suaktata a sa a, a namsau a phawi a, a kithat dek hi. 28 Ahihhangin, Paul in ngaihtakin: Bangmah kilawh ken! Ka vekun hiai ah ka om uh, a chi hi. 29 Taangveengpa'n meivak a ngen a, a dianglut a, Paul leh Sila' mai ah liingkawmin a bok hi. 30 Tua khitin, amaute a paikhiakpih a: Pute aw, hotdama om dingin bang ka hih kul hiam? chi-in a done hi. 31 Amaute'n a dawng uh a: Toupa Jesu Khrist um in, tua hi leh hotdamin na om ding, na innkawte tawh, a chi uhi. 32 Amaute'n amah kiang ah leh, a inn sunga omte khempeuh kiang ah Toupa' thu a gen uhi. 33 Tua zanlai mahin, ama'n amaute a tonpih a, a liammate uh a silsak hi. Tua khitin, amah leh a innkawte'n baptisna a tang pah uhi. 34 Ama'n amaute a inn sunga piilutin, an a lui hi. Amah leh a inkawte'n Pathian a uptak manun, a lungnuam mahmah uhi.
Paul, Simtai Nuamlou
35 Khua hong vak takin, thukhen vaihawmte'n taangveengpa kiang ah, kumpi nasem uliante a sawl uh a: Tua mite na khah in, a chisak uhi. 36 Taangveengpa'n Paul kiang ah: Thukhen vaihawmte'n nang leh Sila khah ding thu hon pia. Tu'n na pai theita ding uh. Lungmuangtakin paita un, a chi hi. 37 Ahihhangin, Paul in tua kumpi nasem uliante kiang ah: Koute Rom mi hinapi, ka dik ka mawhna uh entel loupi-in, taangpi' mai ah hon sat uh a, suangkul sung ah hon khum uh ahi. Tuin a sima khah hon sawm ahi umaw? Hi peuhmah lou e! Amau mahmah hong pai uh henla, hong lakhia uhen, a chi hi. 38 Tua kumpi nasem uliante'n tua thu, thukhen vaihawmte kiang ah a vatun uhi. Amaute'n Paul leh Sila, Rom mi ahi uh, chih a zak takun, a patau uhi. 39 Tua bangin, amaute hong pai uh a, Paul leh Sila a vanem uh a, suangkul apan piikhiain, khawpi nuse dingin a ngen uhi. 40 Paul leh Sila suangkul apan hong paikhia uh a, Ludia' inn ah a hawh uh a, sanggamte tawh kimuin amaute a hanthawn uh a, tua apanin a paikheta uhi.
Thesalonika-a Nasepna
1 Amaute, Amfipoli leh Apolonia tawnin, Thesalonika hong tung uhi. Tua ah, Judate' sunagog khat a om hi. 2 Paul in a hih dan ngeina bangin, tua sunagog ah a lut a, Sabbath thumvei, Laisiangthou thu amaute a suutpih hi. 3 Khrist in thuak ding mah a hih dan leh, misite lak apan thoukik ding ahih dan hilhchiana lakin: Noute kianga ka tangkoupih hiai Jesu mah Khrist ahi, a chi hi. 4 Judate pawlkhat in a um uh a, tua mah bangin, Pathian bia Grikte tampi mahmah leh, numei makai tawm liai lou in a um uhi. Tua bangin, amaute'n Paul leh Sila a zui uhi.
Jason' Inn Buluhna
5 Ahihhangin, a umlou Judate'n hazatna neiin, sumsinna mun khawnga mi thulimloute a kaikhawm uh a, khawsung mipi kitomna a pan uhi. Mipi' maia Paul leh Sila kaihkhiak sawmin, Jason' inn a buluh uh a, amaute a zong uhi. 6 Amaute a muh louh takun, Jason leh sanggamte pawlkhat a kaikhia uh a, khawpi vaihawmte' mai a tun uh a: Leitung bup buaisaka lumiet, hiai mite hong pai uh a, 7 Jason in a na zintun vial hi. Amaute'n, Kaisar' danthusehte kalhin: Jesu kichi kumpipa dang khat om ahi, a chi uhi, chi-in a kikou uhi. 8 Mipihon leh khawsung vaihawmte'n hiai a zak takun, a pumbuai uhi. 9 Tua bangin, amaute'n Jason leh a dangte apan kihenna thil a la uh a, amaute a khah uhi.
Beria-a Nasepna
10 Zan khawmial laiin, sanggamte'n Paul leh Sila, Beria ah a sawlkhia uhi. Paul leh Sila, tua khua hong tunun, Judate' sunagog ah a lut uhi. 11 Beriate bel, Thesalonikate sangin lungtang kihongin a chitak zaw uh a, lunglawptakin thu a saang uh a, Paul' thugen dik hina hiam, chi-in, nisimin Laisiangthou sung zongin a entel zel uhi. 12 Tua bang ahih manin, Judate tampi in a um uh a, Grikte laka numei leh pasal zahtakhuai tawm liai lou in zong a umta uhi. 13 Paul in Beria ah Pathian thu a gen, chih Thesalonika khua-a Judate'n a phawk uhi. Amaute, Beria ah zong a vahawh uh a, mipite hasuanin, a kitomsak uhi. 14 Tua bang ahih manin, sanggamte'n tuipi lama Paul khakhia-a kibawlin a paikhiakpih uh a, Sila leh Timothi bel, Beria ah a om tadih uhi. 15 Ahihhangin, Paul vakhate'n amah, Athen khawpi a tun uhi. Tua khitin, Sila leh Timothi in a kin thei pena Paul a delhphak ding ua thukhah thu puain, amaute tua apan a kilehkikta uhi.
Athena Nasepna
16 Paul in Athena Sila leh Timothi a ngak sungin, tua khawpi, milimtein a dim, chih a mu a, a lungtang a na mahmah hi. 17 Ama'n sunagog ah, Judate leh Pathian bia Grikte thu a kikuppih zel hi. Tua thamlouin, sumsinna muna omte peuhmah zong nisimin thu a kikuppih hi. 18 Pilna sinmi, Epikurian kichi pawl leh Stoik kichi pawl in amah a sel uhi. Amaute laka pawlkhat in: Hiai kamtampa'n gen a sawm nilouh bang ahia? a chi uhi. Midangte'n lah: Gamdang' pathiante phat phat hi leh kilawm veh aw, a chi uhi. Ahang bel, Paul in, Jesu leh thawhkikna tawh kisai tangthupha a gen mana hibang teng chi ahi uhi. 19 Amaute'n Paul a tonpih uh a, Areopaga kikhopna mun ah a paipih uhi. Tua ah, amaute'n amah kiang ah: Hiai sinsakna thak na gen bang ahia, non theisak thei diam? 20 Thil lamdangpipi non zasakta a, bang chihna hi hiam, ka thei nuam uh, a chi uhi. 21 Athen mite leh, tua-a teeng gamdang mite peuhmah bel, thil thak thak genna leh ngaihkhiakna loungal, bangmah danga hun zanglou ahi uhi.
Areopaga-a Paul Thugen
22 Tua bangin, Areopaga kikhopna lai ah Paul a ding a: Athen mite aw! Banglam peuh ah sabiak limsak na hi uh, chih ka mu hi. 23 Ka vak kawikawina peuh ah, na biak thilte uh limtakin ka en a, THEIHLOUH PATHIAN ADING, chi-a kigelhna maitam nangawn ka mu hi. Tua bang ahih manin, theiloupi-a na biakpa uh noute kianga tangkoupih ka hi. 24 Leitung khuavannuai leh a sunga omte khempeuh bawlpa Pathian pen, lei leh vaan Toupa ahi a, mihing khuta lam tempulte ah a teeng kei hi. 25 Amah zaw taksap nei bangin, mihing' khuta nasepsak kul ahi kei. Ahang bel, ama'n mi khempeuh kianga hinna leh nakna leh, a dang thil bangkim pia ahi. 26 Ama'n mi khat apanin mihing nam chih a bawl a, leitung bup a luahsak a, amaute adingin hunbite sehsakin, tenna ding gamte a hawmsak hi. 27 Pathian in hibanga a hihna hang bel, ama'n eite tek hon gamlat kei mah leh, mihingte'n Toupa a zon ua, a mai a mai ua, a muh theih nading uh a deih man ahi. 28 Ama'n hon gamlat kei. Ahang bel, amaha nungta a, gamtaang a, hinna nei i hi uhi. Noute lak mahmaha laphuak pawlkhatte'n zong: Ama' suante i hi, a na chih bang uhahi. 29 Tua bang ahih manin, Pathian' suante i hih nungsang, mihing' khutsiam silbawl, kham leh ngun, ahih kei leh, suang banga Pathian i ngaihsut ding hilou ahi. 30 Nidang laiin, Pathian in tua banga amah i phawk louhna a kitheihmawbawl a, ahihhangin, tu'n zaw, mun chiha mi khempeuh kisika lunghei ding thu a pia hi. 31 Ahang bel, ama'n a mi sehpa tungtawna diktattaka leitung khuavannuai thu a khen nading hun a sehtak man ahi. Ama'n a mi sehpa, misite lak apan kaithouin, amah ahi mi sehpa, chih, mi khempeuh' mai ah kiteltakin a langsakta hi, a chi hi. 32 Amaute'n misite thawhkikna thu a zak takun, amaute laka pawlkhat in a nuihsan uh a, pawlkhat in lah: Hiai thu nang apan za nuam lai ung, a chi uhi. 33 Tua tan ah, Paul in kikhawmte a paisan hi. 34 Pasal bangzah hiam in Paul a zui uh a, a umta uhi. Tua a umte lak ah, Daionisia leh numei khat Damari kichi leh midang tam kuam a kihel uhi. Daionisia bel, Areopaga vaihawmpawl laka pang ahi.
Korinth-a Nasepna
1 Hiai nungin, Paul in Athen a nusia a, Korinth a zuan hi. 2 Tua khua ah, Akuila kichi, Juda mi khat tawh a kimu hi. Amah Ponta gam mi ahi. Klaudia in Judate khempeuh, Rom khua nuse dinga thu a piak mana, a zi Prisila tawh, tuma zeka Itali apan hong tung ahi. Paul, amaute kiang ah hong hawh hi. 3 Amaute zong amah banga puanbuk bawl mi ahi uh a, nekzonna kibang ahih manun, amaute kiang ah Paul a kinga a, amaute tawh a semkhawm hi. 4 Ama'n Sabbath ni tengin Judate leh Grikte upsak sawmin, sunagog ah thu a kikuppih hi. 5 Makedonia gam apan Sila leh Timothi hong tun takun, Paul in Kha' sawlin, Judate kiang ah theihpihna thu a gen nguatnguat a, Jesu mah Khrist ahi, a chi hi. 6 Ahihhangin, Judate'n amah kaih a, a gensiat takun, ama'n a puansilhte a sing a, amaute kiang ah: Na sisan mawh uh noumau' lutung tu hen! Kei zaw ka mawhpuakna apan ka siangta. Tu apanin, Zentelte kiang ah ka paita ding, a chi hi. 7 Tua bangin, sunagog apan Paul a paikhia a, tua sunagog tawh kizom, Titia Jasta' inn ah a lut hi. Titia bel Pathian bemi khat ahi. 8 Tua sunagog ukpa Krispa leh a innkawte khempeuh in Toupa a um uhi. Korinthte tampi in zong Paul' thugen zain a um uh a, baptisna a tang uhi. 9 Zan khat bel, Toupa'n mengmuhna tungtawnin Paul a houpih a: Lau ken. Thu gengen inla, kamsim ken. 10 Hiai khua-a mi tampi nei ka hih manin, nang kon ompih a, kuama'n hon mawkbawl lou ding ahi, a chi hi. 11 Tua bangin, tua khua ah kum khat leh kha guk sung a taam lai a, Pathian thu amaute a sinsak hi.
Galilio leh Paul
12 Galilio, Akhaia gam ukpa ahih laiin, Judate'n thukhat satin, Paul a dou uh a, thukhenna innpi a tun uhi. 13 Amaute'n: Hiai mi in Dan tawh kituak loupi-a Pathian be dingin mite a zol, chi-in a heek uhi. 14 Paul in thu a gen dek takin, Galilio in Judate kiang ah: Nou Judate aw, thil hoihlou hih thu hiam, gitlouh gamtat thu hiam hon tun hi le uchin, kon ngaihkhiaksak tham ding. 15 Ahihhangin, noumau' dana kammalte leh minte khawng tawh kisai ahih nung, noumau mah thu kikhen un. Tua bang thilte ah zaw thukhenpain ka pang nuam kei, a chi a, 16 thukhenna innpi apanin amaute a hawlkhesak hi. 17 Tua khitin, amaute khempeuh in, Sosthene kichi, sunagog ukpa khat a man uh a, thukhenna innpi mai ah a vua uhi. Ahihhangin, Galilio in a limsak himhim kei hi.
Efesa leh Antiokh-a Paul
18 Korinth ah, hun bangtan hiam Paul a taam lai a, tua nungin, sanggamte a nusia a, Suria gam zuanin longin a kipankhia a, Prisila leh Akuila in a zui uhi. Paul in thuchiam khat a na neih a tang-tuntak manin, a kipatkhiak main Kenkhria khua ah a sam a met phot hi. 19 Amaute Efesa hong tung uh a, Paul bel, sunagog ah a lut a, Judate thu a suutpih hi. Paul in Prisila leh Akuila bel, Efesa khua ah a nusia hi. 20 Amaute'n a kiang ua om tadih dingin amah a khou uh a, ahihhangin, ama'n lem a sa kei hi. 21 Ama'n amaute nusiain: Hong tung ding ankuangluina, Jerusalema zat teitei ut ka hi. Pathian in pha a sak leh, kong kilehkik ding, a chi hi. Tua bangin, Efesa apanin longin a kipankhia hi. 22 Kaisaria hong tung a, paitouin, saptuamte chibai a vabuk a, Antiokh ah a paisuakta hi. 23 Antiokh-a hun bangtan hiam a taam nungin, a kipankhia a, Galatia gam leh Frugia gam a tawnsuak a, nungzuite khempeuh kipsakin a thakhauhsak hi.
Apolo' Nasep
24 Apolo kichi Juda mi khat, Efesa ah hong hawh hi. Amah bel Aleksandria-a piang, thugen siam leh Laisiangthou thu thei mahmah ahi. 25 Amah, Toupa' lampi thu-a sinsakna ngahsa ahi a, phatuamngai takin leh diktakin Toupa' tawh kisai thu a gen a, a sinsak hi. Ahihhangin, ama'n Johan' baptisna kia a thei hi. 26 Ama'n sunagog ah hangsantakin thu a gen a, Akuila leh Prisila in ama' thugen a zak takun, amau inn ah a tonpih uh a, Pathian' lampi thu a kiching zawin a hilhchian uhi. 27 Apolo in Akhaia gama pai a ut a, sanggamte'n amah a hanthawn uh a, amah a na kipahpih nadingun tua gama nungzuite kiang ah lai a gelh uhi. Tua gam a tun takin, hehpihna hanga a na umtate nakpitakin a huh hi. 28 Ahang bel, ama'n tangpi theihin Judate a selthal a, Jesu mah Khrist ahi, chih Laisiangthou pansanin a lak hi.
Efesa-a Nasepna
1 Korinth khua-a Apolo a om sungin, Paul bel, khea paina lam tawnin, Efesa hong tung hi. Tua ah nungzui pawlkhat a mu hi. 2 Ama'n amaute kiang ah: Noute'n na up laiun, Kha Siangthou na tang uhia? a chi hi. Amaute'n a dawng uh a: Tang lou. Kha Siangthou a om, chih lamlam a zak nangawn za nai kei ung, a chi uhi. 3 Paul in: Bang baptisna ahia leh na tan uh? a chi hi. Amaute'n a dawng uh a: Johan' baptisna, a chi uhi. 4 Paul in: Johan in ama' nunga hong pai dingpa um dinga mite hilhin, kisika lungheina baptisnain a baptis mah hi. Tua hong pai dingpen bel, Khrist ahipa Jesu ahi, a chi hi. 5 Amaute'n hiai a zak takun, Toupa Jesu' min ah a kibaptislut uhi. 6 Paul in amaute' tunga khut a ngak takin, amaute tung ah Kha Siangthou hong tung a, pautuamte-a pauin thu a gen uhi. 7 Amaute avekpiun mi sawmlenih khawng ahi uhi. 8 Paul, sunagoga lut zelin, kha thum sung hangsantakin thu a gen hi. Pathian' kumpigam thu gumin amaute thu a suutpih a, mi zou thei ding takin thu a gen hi. 9 Ahihhangin, amaute laka pawlkhat, lungkhauh leh genhakin a om uh a, mipite' mai ah Lampi a gensia uhi. Paul in amaute a taisan a, nungzuite tonpihin, nisimin kisinsakna inn Turana ah thu a suutpih hi. 10 Hibangin kum nih sung a pang a, tua bangin Asia gam bupa om Judate leh Grikte khempeuh in Toupa Jesu' thu a zata uhi. 11 Pathian in Paul' khut tungtawnin thillamdang tuam mawngmawngte a hih hi. 12 Tua bangin, Paul' sa tung tawh kisukha mainul dial neu, ahih kei leh, puanaktungte lain, chinate a zangsak uh a, a dam uh a, dawite zong, amaute' sung apanin a pawtkhia uhi. 13 Ahihhangin, dawi hawlkhia-a vialvak pawlkhat a om uh a, dawimatte tunga Toupa Jesu' min zat a sawm uhi. Amaute'n: Paul in a thu a tangkoupihpa, Jesu' minin thu kon pia hi, hong pawtkhia in, a chi uhi. 14 Juda siampi makai khat Skeva' tapa sagihte'n hibanga a hih uleh, 15 dawi in amaute a dawng a: Jesu ka thei. Paul zong ka thei. Ahihhangin, noute kuate na hi ua? a chi hi. 16 Tua bangin, dawimatpa'n amaute a bawh a, a vekpiun a zougawp a, nakpitakin a vawgawp hi. Amaute vuaktang leh liamin, tua inn apan a suakta uhi. 17 Efesa khua-a om, Judate leh Grikte'n hiai thu a theih takun, a lau mahmah uh a, Toupa Jesu' min nakpitaka tawisangin a om hi. 18 A um mi tampite hong pai uh a, a gamtat giloute uh a kipulak uhi. 19 Mitkhialdawi hih mi tampi in a laibute uh hon pua uh a, taangpi' mai ah a haltum uhi. Tua laibute' man a tuat uleh, drakma 50,000 a pha hi. 20 Hibangin vangliantakin, Toupa' thu a dalhta a, a vualzouta hi. 21 Hibang teng nungin, Paul in Makedonia gam leh Akhaia gam tawna, Jerusalema hawh ding lungsimin a nei a, thu khentatna a bawl hi. Ama'n: Tua muna ka om khit chiangin, Rom khua ah zong ka hawh teitei ding, a chi hi. 22 Amah huh mi nih, Timothi leh Erasta, Makedonia gam ah a sawl a, amah bel, Asia gam ah hun bangtan hiam a taam lai hi.
Efesa Khua-a Mipi Kitomna
23 Tua hun lai mahin, Lampi tawh kisaiin buaina lianpitak a om hi. 24 Demetria kichi, ngun siksek mi khat a om a, ama'n ngun sikin Artemi biakna inntate a bawl a, tua banga khutsiamte adingin sum muhna hoihtak a suak hi. 25 Ama'n tua banga khutsiam a zatte leh hibang nasem dangte a samkhawm a: Pute aw, hiai nasepna apanin sum muhna hoihtak i nei uhi. 26 Efesa khua kia hiloua, Asia gam bupa thil tung na mu uh a, na za uhi. Hiai Paul kichi mipa'n ama' lam ah mi tampi a thuzawh a, a piimang a: Khuta bawl pathiante zaw pathian ahi het kei, a chi hi. 27 Eite' nasep min a siatsak baan ah, numei pathian Artemi min a neusak ding a, Asia gam bup leh leitung bupa mite' biak Artemi' thupina zong a neusak ding, a chi hi. 28 Hiai a zak takun, amaute a heh mahmah uh a: Efesa khua-a Artemi a thupi hi! chi-in a kikou uhi. 29 Tua bangin, a khawsung buppi-in a pumbuai pah hi. Mipite'n Gaia leh Aristarkha a pummat uh a, limchinna mun ah a kituakin a dianglut uhi. Gaia leh Aristarkha bel, Makedonia apan Paul nungzui, a zinpihte ahi uhi. 30 Paul in mipite' maia kilat a ut a, ahihhangin, nungzuite'n a phal kei uhi. 31 Paul' lawmte, Asia gama kumpi nasem pawlkhat in thu a khak uh a, limchinna muna lut lou dingin a ngen uhi. 32 Tua laia taikhawmte a pumbuai uh a, pawlkhat in thil khat a kikoupih uh a, midangte'n thil tuam dang a kikoupih uhi. Amaute laka a tamzaw in a taikhawmna uh, a san a hang zong a thei kei uhi. 33 Mipite' laka Judate pawlkhat in mipite' mai ah, Aleksandar a sawnphei uh a, thugen ding dan a galhilh kuaukuau uhi. Ama'n mipite daai dingin a khutvan a, mipite' mai ah a kihutna thu gen a sawm hi. 34 Amaute'n amah Juda mi ahi, chih a theih takun, aw kituakin dakkal nih sung khawng mahmah a kikou uh a: Efesa' Artemi a thupi hi! a chi uhi. 35 Tua khawpi laigelhpa'n mipi a khoudai a: Efesa mite aw, Artemi thupi' tempul leh Artemi' lim vaan apan hong kia chinga veeng, Efesa khawpi ahi, chih leitung bup in a theihsa hilou hia? 36 Tua bang hi a, hiai thudik nial vuallouh ahih nung, na daih dide ua, ngongtat taka bangmah na hih louh ding ua kilawm ahi. 37 Tempulte lah lok lou, i numei pathian lah gense lou hiai mite non kai ua! 38 Demetria leh khutsiam silbawl siam a lawmte'n mi khat peuh tunga lungkim louhna nei ahih uleh, hekna a piak theih uh ahi. Thukhenna innpi kihong gige a, ukpipate zong om gige uhi. 39 Hiai baan kantel nop na neih uleh daan bangtaka kikhawm pawl in thu a khen ding ahi. 40 Tuni-a thu vengvung hangin, thagum zanga kitom buaina bawl, chi-a ngawh theih i hita. Hibanga kikaikhawma gamtat nading a san a hang gen ding i neih louhpi, a chi hi. 41 Hibanga a gen khitin, ama'n mipi taikhawmte a kikhensakta hi.
Makedonia leh Grik Gama Zinna
1 Tua bang kitom buaina a ven nungin, Paul in nungzuite a samsak a, amaute a hanthawn hi. Amaute mangpha khakin, Makedonia gam zuanin a kipankheta hi. 2 Tua gam sung ah a zin a, amaute hanthawnin thu a gen a, a tawpin, Grik gam hong tung a, 3 tua ah kha thum a taam hi. Suria gam zuana longa a pai ding kuanin, Judate'n amah thah ding a sim sawm uhi. Tua bangin, Makedonia gam tawna kilehkik ding thutanna a bawlta hi. 4 Asia gama a zinna-a amah zuite bel, Beria khaw mi Purha' tapa Sopater, Aristarkha leh Thesalonika khaw mi Sekunda, Derbe khaw mi Gaia leh Timothi, tua baan ah, Asia gam mi Tukika leh Trofima ahi uhi. 5 Hiai mite a na mapai uh a, Troas ah koute gel hon na ngak uhi. 6 Ahihhangin, koute bel, Tanghou Silngousawhlouh Ankuanglui nungin, Filipi apan longin ka pai uhi. Ni nga nungin, Troas ah amaute kiang ka tung uh a, tua ah ni sagih ka taam uhi.
Troas-a Nasepna
7 Nipi kala ni masapen ni-in, tanghou balkham dingin koute ka paikhawm uhi. Paul in tua-a mite Pathian thu a suutpih hi. Ama'n a zing chianga kipatkhiak a sawm manin zankim dong thu a gen hi. 8 Inndan tungnung ka kikhopna uah, meivak tampi a kide hi. 9 Tua kikhopna ah, Eutikha kichi tangval khat a om a, amah tawhlet ah a tu hi. Paul in thu a gengen laiin, amah a na ihmu a, innchial thumna apanin a kesuk a, sisa-in a phong uhi. 10 Paul a vakumsuk a, amah a bawh a, a kawi a: Patau kei un! Amah a hing lai, a chi hi. 11 Paul, inndan tung nung ah a paitou kik a, tanghou a balkham a, an a ne hi. Thu sawtpi a gen lai a, a zing khawvakin a kipankhia hi. 12 Amaute'n tangvalpa hingdamin inn ah a paipih uh a, hanthawn in a om mahmah uhi. 13 Koute longin ka na pai masa uh a, Asos zuanin ka pai uhi. Tua muna longa Paul laak ding ka sawm uh ahi. Paul bel, khea paina lam tot sawma hibanga thil gelkhol ahi. 14 Ama'n koute Asos khua-a hon tuah takin, long ah ka tuangsak uh a, Mitulen ka zuan uhi. 15 Mitulen apanin longin ka pai uh a, a zing chiangin, Khios tuikulh gal ka tung uhi. A zing nawnin, Samos tuikulh ka tung uh a, Troguliam ah ka giak uhi. A zing chiangin, Mileta ka tung uhi. 16 Paul in Jerusalem tun baih ding, a hih thei liai aleh, Pentikos Ankuanglui lap ding a ut hi. Tua bang ahih manin, Asia gama hun sukbei louh nadinga, Efesa paikheng a sawmsa mawng ahi.
Efesa Upate Hanthawnna
17 Paul in Mileta apanin, Efesa ah mi a sawl a, saptuam upate a samsak hi. 18 Amaute hong tun takun, ama'n amaute kiang ah: Asia gam kong siik masak ni apan, noute laka ka om sung tenga ka nuntak dan na thei uhi. 19 Kingainiamtak leh khitui ke kawmin Toupa' nna ka sem a, Judate' hon sawmna hanga ze-etna haksatak ka tuah lai nangawnin ka sem teitei hi. 20 Noute adinga phatuam ding bangmah kon im kei a, tangpi' theihin thu ka gen a, inn teng ah noute kon sinsak gige hi. 21 Judate leh Grikte kiang ah zong theihpihna thu genin, Pathian lam nga-a lungheina thu leh i Toupa Jesu Khrist upna thu ka gen hi. 22 Ngai un, Kha in hon sawl teitei a, tuin Jerusalema hawhtou ding ka hi. Tua ah ka tunga bang tung ding hiam chih ka thei kei. 23 Henna leh gimthuakna in hon nadawn ding, chi-a Kha Siangthou in khua tenga hon hilhkholh ka thei lei hi. 24 Ahihhangin, tuate phamawh ka sa kei. Lungnuamtakin kitaitehna tai khinin, Toupa Jesu' hon piak nasep semkhin peuhmah phot leng, ka hinna nangawn khiaklah tham ka sa kei hi. Tua ka nasep bel, Pathian' hehpihna tangthupha gen ahi. 25 Pathian' kumpigam thu genin, noute lak ah, a lang a lang ah ka na diangta. Ahi a, noute kuamah in ka mei na mu nawn kei ding uh, chih ka thei hi. 26 Tua ahih manin, mi khempeuh' sisan ah ka hul, chih noute kiang ah tuni-in ka phuang ahi. 27 Ahang bel, noute kianga Pathian' deihlam bukim gen ding ka kidaam peuhmah kei hi. 28 Noute kiveng unla, belamhonte khempeuh veng un. Kha Siangthou in, amaute laka bishop hi dingin noute hon bawl ahi. Pathian' saptuam, a sisana a leisa chingte hi un. 29 Ka paikhiak nung chiangin, nge-hang giloute na lak uah hong lut ding a, belamte a hawi kei ding uh, chih ka thei hi. 30 Nungzuite amau lama kaimang dingin, thutak kaikawi pawl, noumau laka mi nangawn hong om ding hi. 31 Hiai hangin kiveng un! Kum thum vingveng, a sun a zan khitui ke kawma noute kuapeuh hon vauhilh ka tawp louh dan thei gige un. 32 Tu'n, Pathian' khut ah leh, noute hon lamtou thei a, Pathian' sehtuam siangthoute laka goutan hon pe thei, Pathian' hehpihna thu ah noute kon kemsak hi. 33 Kuama' sum-le-pai, ahih kei leh, silh-le-ten ka deihgawh ngei kei. 34 Hiai khutte'n kei' taksap leh, ka kianga omte' taksap awng a hu, chih na thei uhi. 35 Thil ka hih peuhmah ah, noute'n hibanga nakpi-a nasem a, a hatloute na huh ding daan uh hon lak ka hi. Laak sangin piak mah, nunnopna ahi zaw hi, chih Toupa' thute thei gige un, a chi hi. 36 Paul in hiaite a gen khitin, amaute khempeuh tawh a khukdin a, a thuum hi. 37 Amaute'n amah ngawngkawiin a tawp uh a, nakpitakin a kap uhi. 38 Amaute'n ama' mei mu ngeinawn lou ding, chih a gen in amaute a dahsakpen hi. Tua khitin, amaute'n long chiang dong amah a vakha uhi.
Tura-a Paul
1 Amaute tawh ka kikhen nungun, longin ka paita uhi. Tangtaka paiin Kos tuikulh ka tung uhi. A zing chiangin, Rodis tuikulh ka tung uh a, tua apanin Patara ka tung uhi. 2 Tua ah Foinikia gama pai ding long khat ka mu uh a, tua ah ka tuang uh a, ka paita uhi. 3 Kupra tuikulh galmuhin, veilam ah ka kheng uhi. Suria gam zuanin ka pai uh a, Tura ka tung uhi. Tua-a van suahkhiak kul ahih manin, tua khawpi ah ka kum uhi. 4 Tua ah nungzuite ka mu uh a, ni sagih ka taam uhi. Amaute'n Kha' theihsakin, Paul kiang ah: Jerusalem ah hawhtou ken, a chi uhi. 5 Tua-a ka hun uh a bei takin, ka kipankhia uh a, ka paita uhi. Nungzuite khempeuh in, a zite uleh a tate utawh, khawpi pua dong hong kha uh a, tuipi piautak ah khukdinin ka thuum uhi. 6 Mangpha ka kikhak khitun, koute bel long ah ka lut uh a, amaute inn ah a kilehkikta uhi.
Kaisaria-a Paul
7 Tura apan longa zinkhia ka pai zel uh a, Tolemai ka tung uhi. Tua ah sanggamte tawh kimuakin, amaute kiang ah ni khat ka taam uhi. 8 A zing chiangin ka kipankhia uh a, Kaisaria ka tung uh a, sawltak Filip' inn ah ka lut uh a, tua ah ka kinga uhi. Amah bel, dekon sagih-te laka khat ahi. 9 Filip in tanu nungak siangthou li a nei a, amaute'n kamsang bangin thu a gen uhi. 10 Tua khua-a ni bang zah hiam ka taam nungun, Agaba kichi kamsang khat Judia gam apan hong hawhsuk hi. 11 Amah koute kiang ah hong hawh a, Paul' kawnggak a la a, a khete leh a khutte a kihen a: Kha Siangthou in hiai a gen: Jerusalem khua-a Judate'n hibangin hiai kawnggak neipa a hen ding uh a, Zentelte khut ah a pe ding uh, a chi, a chi hi. 12 Koute leh tua-a om mite'n hiai ka za uh a, Jerusalema hawhtou lou dingin Paul ka khou uhi. 13 Paul in: Noute'n kap-a non khasiatsak uh, bang na chihna uh ahia? Toupa Jesu' mina Jerusalema hen kia hiloua, sih nangawn ngap ka hi, chi-in hon dawng hi. 14 Tua banga khouh zawhlouh ahih takin, ka kamsimta mai uh a: Toupa' deihna bangbang hita hen, ka chi uhi. 15 Hiai nungin, ka kisa uh a, Jerusalem ah ka paitou uhi. 16 Kaisaria apan nungzui pawlkhat in zong hon zuitou uh a, Nason' inn ah hon paipih uh a, tua ah ka kinga uhi. Amah Kupra gam mi ahi a, nungzui masate laka khat ahi.
Paul in Juda Ngeina Zui
17 Jerusalem ka tuntouh takun, sanggamte'n kipaktakin hon na muak uhi. 18 A zing chiangin Paul leh kou midangte'n Jakob ka vaveh uh a, upate khempeuh zong tua ah a om uhi. 19 Paul in amaute chibai a buk khitin, ama' nasepna tungtawna Zentelte laka Pathian' thilhihte a banbanin a gen hi. 20 Amaute'n hiai a zak takun, Pathian a pahtawi uhi. Amaute'n Paul kiang ah: Sanggam aw, Judate sang tampi in a uptaak dan uh na thei hi. Amaute khempeuh in Dan lam ah phatuam a ngai mahmah uhi. 21 Mi pawlkhat in nang tungthu genin, Zentelte laka om Judate kiang ah, tua bang ngeinate zuih nawn louh ding, chi-in a sinsak, hon chi uhi. 22 Nang nong hawh chih lah thei ding ua, mipi a kaikhawm tham ding uhi. Eite'n bang hihta ding i hia? 23 Tua bang ahih manin, koute' hon hilh bangin gamta in. Kichiamna nei mi li ka neihte uh 24 tonpih inla, amaute' sam metmai nading sum pia inla, amaute kisiansuahna ah vakihel in. Tua hileh, na tungthu kigen a dik kei a, Dan zuia nungta na hi zaw, chih kuamapeuh in a thei ding hi. 25 A um Zentelte ahih leh, milim biakna sa a nek louh ding uh, sisan a nek louh ding uh, heklup sa a nek louh ding uh, kingaihna nin a hih louh ding uh, chi-in amaute kiang ah lai ka na gelhkhinta uhi, a chi uhi. 26 A zing chiangin Paul in tua kichiamna neite a tonpih a, amaute tawh a vakisiansuah hi. Tua khitin, tempul huang sung ah a lut a, kisiansuahna hun bei ni ding leh, tua ni-a amaute tek adinga kithoihna thillat a valat ding uh thu a vatheisak hi.
Paul Kimatna
27 Kisiansuahna ni sagih a bei dek kuanin, Asia gam apan Judate'n tempul huang sung ah Paul a mu uhi. Amaute'n mipite khempeuh a hasuan gawp uh a, Paul a pummat uhi. 28 Amaute'n: Israel mite aw, hong huh un! Hiai mipa ahi i minam leh Dan leh, hiai tempul dou-a mun khempeuha mite sinsakpa. Thamlouin, ama'n Grikte hiai tempul huang sung ah a lutpih a, hiai mun siangthou a buahsak hi, a chi uhi. 29 Amaute'n tua malamin, Paul leh Trofima kichi Efesa khaw mi omkhawmin a mu uh a, tempul huangsunga lutpih hi ngei dingin a ngaihsun ua ahi. 30 Hiai in khawpi bupin a buaisak a, mun chih apan mi hong taikhawmin, Paul a vua uh a, tempul huangsung apanin a kaikhia uh a, kongpi a khak pah uhi. 31 Amah that dinga a kisak laiun, Jerusalem sung teng kitomzak hita, chih thu, Rom sepaihpawl makailian kiang a tung hi. 32 Ama'n sepaih makaipawl pawl khat leh, sepaih pawl khat a tonpih a, mipite kiang ah a vataisuk hi. Mipite'n sepaih makailian leh sepaihte a muh takun, Paul a vaw nawn kei uhi. 33 Tua sepaih makailian hong paiin Paul a man a, sik khainiang niha hen ding thu a pia hi. Tua khitin, ama'n amah kua hi a, bang hih hiam, chih a dong hi. 34 Mipite laka pawlkhat, thu khat genin a kikou uh a, midangte lah thu dang genin a kikou uhi. Ama'n tua banga kimawkkou buai vengvung lak ah, thutak a theitel thei kei a, sepaihte' giahbuka amah paipih dingin sepaihte thu a pia hi. 35 Mipite hiamgam mahmah uh ahih manin, Paul, tua innlutna kalbi a tun takin, sepaihte'n a puakthawh uh a kul hi. 36 Ahang bel, mipite'n a zui uh a: Amah that un! chi-a a kikou man uh ahi. 37 Sepaihte'n giahbuk sunga Paul a lutpih dek laiun, ama'n sepaih makailian kiang ah: Na kianga thu kam khat gen non phal thei diam? a chi hi. Sepaih makailian in: Grik pau na zang thei maw? 38 Tuma-a helna bawl a, mithat pawl 4,000 gamdai-gamkeua piikhepa, tua Aigupta mi zaw na hi keina maw? a chi hi. 39 Paul in: Kei Juda mi ka hi. Silikia gama Tarsa khaw mi ka hi a, khawpi neu liai lou khat' khua-leh-tui ka hi. Judate kianga thugen non phalsak kon ngen hi, a chi hi. 40 Sepaih makailian in phalna a piak takin, Paul, tua kalbi ah a ding a, Judate a khutvan hi. Amaute a daih khipkhep takun, ama'n amaute kiang ah Hebru pauin thu a gen hi.
Mipite kianga Paid' Thugen
1 Ama'n: Pute, sanggamte leh pate aw, tuin ka kihutna thu na ngai un! a chi hi. 2 Amaute'n, Hebru paua amaute kianga thu a gen a zak takun, a dai khipkhep uhi. Paul in: 3 Kei Juda mi ka hi a, Silikia gama Tarsa khua-a piang ka hi. Ahihhangin, hiai khawpi-a Gamaliel' khebula khangkhia ka hi. Ama'n i pu i pate' Dan bangbangin, limtakin hon na sinsak a, hon chiltou a, tuni-a noute a kuamapeuh banga Pathian lama phatuamngai mahmah ka hi. 4 Ka phatuamngaih nalamin, tua Lampi mite, numei leh pasal manin, suangkula khumin a sih dongun ka na bawlsia hi. 5 Tua bang ahi, chih siampilian leh Vaihawmpawl khempeuh in hon theihpih uhi. Amaute apanin, Damaska khua-a a sanggamte uh muh ding lai ka la a, hiai mite Jerusalema gawt dinga, hensa-a hon kai dingin Damaska ah ka kuan hi. 6 Damaska ka tun ding kuanin, ni sut laiin, thakhatin, vaan apan vaak tangpha mahmah ka kimkot ah hong taang hi. 7 Leilak ah ka puk a, aw khat ka za hi. Tua aw in: Saul, Saul! Banghanga nang kei hon bawlsia na hia? hon chi hi. 8 Ken: Kua na hia, Toupa? ka chi hi. Ama'n: Na bawlsiat siat Nazareth Jesu ka hi, a chi hi. 9 Ka lawmte'n tua vaak a mu uh a, kei hon houpihpa' aw bel a theisiam kei uhi. 10 Ke'n: Toupa, bang ka hih dia? ka chi hi. Toupa'n: Thou inla, Damaska ah lut in. Tua ah na hih ding hon na hilh ding uhi, hon chi hi. 11 Tua vaak khauh lua ahih manin, ka mit a taw a, ka lawmte'n hon bankaih uh a, Damaska hon lutpih uhi. 12 Anania kichi mi khat, kei mu dingin hong pai hi. Amah, Dan tawh kisaia mi kipezoutak ahi a, tua khua-a Judate khempeuh in a zahtak mahmah uh ahi. 13 Amah ka kiang ah hong ding a: Sanggampa Saul, mitvakna na neita in! a chi hi. Tua hun laitak mahin, amah ka mu thei pah hi. 14 Tua khitin, ama'n: I pu i pate' Pathian in, ama' deihlam thei dingin nang hon teel ahi. Tua ahih manin, a Diktatpa na muta a, a kam apan thute na zata hi. 15 Na muh leh na zak, mi khempeuh kianga theihpih mi na hih ding ahi. 16 Tu-a bang ngak na hia? Thou inla, baptisna tang in. Toupa' min kouin, na khelhnate silsiang in, hon chi hi. 17 Jerusalema ka kilehkik nungin, tempula ka thum laiin, zeelin ka om a, 18 Jesu'n kei hon houpihin ka mu a: Kinawh in! Jerusalem nusia in, kei non theihpihna thu saang lou ding uh ahi, hon chi hi. 19 Ke'n ka dawng a: Toupa, sunagog tenga banluta, nang hon umte suangkula khuma ka vuak zel dan, hiai mite'n a thei mahmah ding uhi. 20 Nang hon theihpihpa Stefen' sisan a suah laiun, thukimpihin, amaute kiang ah ka ding a, amah thatte' puansilhte ka na keem hi, ka chi hi. 21 Toupa'n ka kiang ah: Pai in! Gamlapi ah Zentelte kiang ah kon sawl ding hi, hon chi hi, a chi hi.
Rom Khawpimi Paul
22 Paul in hitan a gen dong mipite'n a ngaikhia uhi. Tua khitin, nakpitakin a kikou uh a: Amah hing taak ahi kei, leitung apan hihmangthang un, a chi uhi. 23 Tua banga kikouin, a puansilhte uh a botkek uh a, vanlam ah leivui a viktou uhi. 24 Sepaih makailian in, sepaih giahbuk sunga Paul piilut ding thu a pia hi. Mipite banghanga hibanga kikou uhiam, chih a theih nop manin, amah hekna thu dong a, sat dingin sepaihte a hilh hi. 25 Amah savun khaua a kaihzan laiun, Paul in a kianga ding sepaih zaheupa khat a houpih a: Rom khawpi khua-le-tui khat peuh, a mawhna leh dikna ettelna om loupi-a sat sianglou ahi kei maw? a chi hi. 26 Sepaih zaheupa'n hiai a zak takin, sepaih makailian a vahilh a: Bang hih dek na hia? Hiai mi Rom khawpi khua-le-tui ahi mawk vele! a chi hi. 27 Sepaih makailian hong pai a, Paul kiang ah: Hon hilh in, Rom khawpi khua-le-tui na hi hia? a chi hi. Paul in a dawng a: Himah ing, a chi hi. 28 Sepaih makailian in: Ke'n hiai khawpi khua-le-tui ka suah nading sum tampi-a ka lei ei ve, a chi hi. Paul in a dawng a: Kei zaw Rom khawpi khua-le-tui hihna tawh piang him ka hi, a chi hi. 29 Tua bangin, amah thu dong dinga kisate a kikaangkoih pah uhi. Sepaih makailianpa zong, Rom khawpi khua-le-tui khat heen kha ahi, chih a kiphawk takin, a patau hi.
Juda Vaihawmpawl maia Paul
30 A zing chiangin, sepaih makailian in Paul a lakhia a, banghang pena Judate'n amah heek uhiam, chih thei nuamin, siampi makaite leh Vaihawmpawl khempeuh kikhopkhawm ding thu a pia hi. Tua bangin ama'n Paul a tonpihsuk a, amaute' mai ah a dingsak hi.
1 Paul in Juda Vaihawmpawl a en kilkel a: Ka sanggamte aw, tuni donga Pathian lama ka sia-le-pha theihna siangtaka pmta ka hi, a chih pat leh, 2 siampilian Anania in, Paul kianga dingte thu a pia a, amaute'n Paul' kam a betsak uhi. 3 Paul in amah kiang ah: Nang, baang nuhngou bang leltak, Pathian in hon beng ding ahi aw! Dan tawh kituaka ka tunga thukhen dinga tu hinapi, Dan palsatin kei beeng dingin thu na pia maw? a chi hi. 4 Paul kianga dingte'n: Nang Pathian' siampilian na sal ngam vial maw? a chi uhi. 5 Paul in a dawng a: Sanggamte aw, amah siampilian ahih lam ka thei keia ahi. Na mite uh' tunga vaihawmmi gense ken, chi-a kigelh ahi mah ve, a chi hi. 6 Paul in, amaute laka pawl khat Sadukaite ahi uh a, a dangte Farisaite ahi uh, chih a thei a, Vaihawmpawl kiang ah ngaihtakin: Sanggamte aw, kei Farisai ka hi a, Farisai' tapa ka hi. Tuni-in, misite thawhkikna ka lametna tawh kisaia thukhenna maia dinsak ka hi, a chi hi. 7 Hiai a gen takin, Farisaite leh Sadukaite kal ah kiselna a piang a, a paikhawmte a kilangkhenta uhi. 8 Ahang bel, Sadukaite'n thawhkikna om lou, vansawltakte leh khate chih zong om lou, chi uh a, Farisate'n bel tuate om vek, chi uh ahi. 9 Nakpitaka kiselbuaina a om a, Farisaite lama pang, Dan sinsak-mite'n: Hiai mipa' gitlouhna ka mu kei uh. Kha khattou, ahih kei leh, vansawltak khattou in amah kianga thu gen hi leh, Pathian dou khat suak ding hi hang, a chi uhi. 10 Tua banga kilangkhenna lian lua a, thagum suah nangawn a nai takin, sepaih makailian in Paul a laigawp ding uh a lau hi. Tua bangin ama'n amaute lak apan thaguma Paul kaikhia-a sepaihte' giahbuka paipih dingin, sepaihte thu a pia hi. 11 Ahihhangin, a zing chiang zanin, Paul kiang ah Toupa a vading a: Paul, lungke ken! Kei adinga Jerusalem khua-a, kei non theihpihna thu na gen bangin, Rom khawpi-a zong kei non theihpihna thu gen ngeingei ding na hi, a chi hi.
Paul Thah Sawmna
12 Zing khua hong vak takin, Judate pawlkhat kipawlbawlin, Paul a thah khit mateng uh, nek zong ne lou ding, dawn zong dawn lou ding, chi-in kichiamna a bawl uhi. 13 Hibanga kipawlbawlte, mi 40 sanga tamzaw ahi uhi. 14 Amaute, siampi makaite leh upate kiang ah hong pai uh a: Koute'n Paul ka thah khit mateng uh, nek zong ne lou ding, dawn zong dawn lou ding, chi-a kichiamna kiptak nei ka hi uh. 15 Tua bang ahih manin, noute'n Vaihawmpawlte tawh, hiai thu Paul dongtel nuam, chih paulam bawl unla, zing chianga noute maia Paul hon paipih dingin sepaih makailian vangen un. Amah hiai mun hong tun ma-a that dinga mansa hi ung, a chi uhi. 16 Ahihhangin, Paul' sanggamnu' tapa in hiai kithangsiah ding sawmna thu a za a, sepaihte giahbuka vapaiin, Paul a vahilh hi. 17 Paul in sepaih zaheupa khat a sam a: Hiai tangval, sepaih makailian kiang ah tonpih in, ama'n amah hilh ding thil khat nei ahi, a chi hi. 18 Tua bangin, sepaih zaheupa'n amah, sepaih makailian kiang ah a tonpih a: Hentapa Paul in hon sam a, hiai tangval na kianga tonpih dingin hon ngen hi. Ama'n hilh ding thil hon nei ahi, a chi hi. 19 Tua bangin, sepaih makailian in tangvalpa khuta lenin, mun tuam ah a paipih a, a simin a dong a: Bang ahia non hilh nop? a chi hi. 20 Ama'n: Thu dongtel nuam, chih paulam bawla zing chianga Vaihawmpawl' maia Paul paipih-suk dinga nang hon ngen dingin, Judate pawlkhat kithukim uh ahi. 21 Ahihhangin, amaute' ngetna phal ken. Paul a thah khit mateng uh, nek zong ne lou ding, dawn zong dawn lou dinga kichiam mi 40 sanga tamzaw om uh ahi. Tuin lampi-a na lamtana mansa-a om uh ahi. Na phalna ngak lei ahi uh, a chi hi. 22 Tuachi-in, tua sepaih makailian in tua tangvalpa a paikhesak a: Hiai thil ka kiang ah na gen chih kuamah theisak ken, chi-in a kham hi.
Paul Hutkhiakna
23 Tua sepaih makailian in sepaih zaheu nih a sam a: Khe sepaih 200 tawh, sakol tungtuang sepaih 70 tawh, tei tawi sepaih 200 tawh, tuzan dak kuana-a Kaisaria zuana pai dingin kisa un. 24 Paul tuan nading sakolte mansain pia unla, ukpipa Feliks kiang ah, amah bittakin tun un, chi-in thu a pia hi. 25 Ama'n hibangin laikhak a gelh hi: 26 Klaudia Luisia in, zahtakhuai mahmah Ukpipa Feliks chibai kon buk hi. 27 Hiai mi Judate'n a mat uh, thah a sawm uh ahi. Ahihhangin, amah Rom khawpi khua-le-tui ahi, chih ka za a, sepaihte tawh kuanin, amah ka vahukhia hi. 28 Amah a hekna uh thei nuamin, amau' Vahawnm-awl' mai ah ka paipih hi. 29 A hekna thu uh, amau' Dan tawh kisai ahi a, sih nading ching, ahih kei leh, hen nading ching hekna ahi kei, chih ka mu hi. 30 Judate'n amah thah sawmin a lamtaan uh, chih ka za a, nang kiang ah kon khasak pah hi. Tua baan ah, amah a hekna uh nang kiang tun dingin, amah hekte zong thu ka pia hi. Mangpha, chi-in a gelh hi. 31 Tua thupiak bangin, sepaihte'n a zan a zanin Paul a tonpih uh a, Antipatri dong a tun uhi. 32 A zing chiangin, sakol tungtuang sepaihte'n Paul a tonpih uh a, a dang teng, giahbuk ah a kilehkik uhi. 33 Sakol tungtuang sepaihte, Kaisaria a tung uh a, ukpipa kiang ah laikhak leh Paul a pia uhi.
Feliks maia Paul
34 Ukpipa'n laikhak a sim a, Paul kiang ah, amah koi gam akipan ahi hiam, chi-in a dong hi. Amah Silikia gam akipan ahi, chih a theih takin: 35 Nang hon hekte hong tun chiangun, na thu ka ngaihtuah ding, a chi hi. Paul bel, Herod' sepaih' giahbuka koiha veen dingin thu a pia hi.
1 Ni nga nungin, siampilian Anania, upate pawlkhat tawh, dan siam Tertula tawh, Kaisaria ah a hawhsuk uh a, ukpipa' mai ah Paul a hekna thu uh hong tun uhi. 2 Paul saplut ahih takin, Tertula in Paul a hekna thu uh Feliks' mai ah a gen a: Nangma' nuai ah koute'n kum tamtak lemna muanna thupitak ka na neita uh a, mailam na muhkholhna in hiai nam adingin tuahphatnate a tun hi. 3 Zahtakhuai pen Feliks aw, hibang taktak ahihna koimun peuh ah, banglam peuh ah, lungdam mahmahin ka saang gige uhi. 4 A bang a bang hita leh, nang adinga chimtakhuai ka suah louh nadingin, tuin na hehpihna-a koute apan thu tawmkha non ngaih-khiaksak kon ngen hi. 5 Hiai mipa, chimtakhuai mahmah, buaina bawl gige leh, leitung tenga Judate laka kitomna piangsakpa ahihna ka thei uhi. Nazarin pawla gilou makai ahi a, 6 tempul nangawn hihbuah sawm ahi. Tua bang ahih manin, amah ka pummat uh a, koumau' dan tawh kituaka a tunga thukhen ka sawm uh ahi, 7 Ahihhangin, sepaih makailian Lusia hong pai a, thagum hatin koute' khut apan amah hon sutkhia a, 8 amah hekte nangma' maia hong pai dingin thu hon pia hi. Nangmah mah in amah entel lechin, amah ka hekna thilte khempeuh uh a dik, chih na mu ding hi, a chi hi. 9 Tua-a Juda omte'n zong amah hekna thu khempeuh a dik a hina, chi-in a gum uhi. 10 Ukpipa'n thu gen dingin Paul a khutvan a, Paul in a dawnna a gen a: Kum tampitak hiai nam laka vaihawma omta na hi, chih ka theih manin, ka kihutna thu gen ding ka kilawp hi. 11 Jerusalema Pathian be dinga ka hawh touh nung, ni sawmlenih a vai nai kei, chih baihlamtakin na sui khe thei ding hi. 12 Kei hon hekte'n, tempula mi tawh kiselin hiam, ahih kei leh, sunagogte ah hiam, khawpi sung koimun peuh ah zong, mite hasuan gawp a, lungkimlousak hiamin hon mu kei mawngmawng uhi. 13 Tu-a hon heknate uh zong na mai ah a kitelna a lak thei kei ding uhi. 14 Ahihhangin, hiai ka kiphuanna ahi: Dan leh Kamsang laibute-a kigelh khempeuh ka up manin, amaute'n pawl tuam chi-a a gen uh, Lampi pawl' biak dan banga ka pu ka pate uh' Pathian bia ka hi. 15 Amaute' neih bangin, Pathian-a lametna nei ka hi. Tua bel, misite thawhkikna, mi diktatte leh mi diktatloute thawhkikna a om ding, chih lametna tawh kisai ahi. 16 Hibang ahih manin, Pathian leh mihing' mai ah, sia-le-pha theihna siangtaka om ka sawm gige hi. 17 Kum tampi ka om louh san nungin, Jerusalema ka mite ading thawnpiakte puak ding leh, thillatte laan dingin kong pai hi. 18 Amaute'n tempul huang sunga kei hon muh laiun, kisiansuahsa ka hi. Mipi tawh ka kinuh kha kei a, buaina bangmah zong ka bawl kei hi. 19 Ahihhangin, tua ah, Asia gam apan hong pai, Judate pawlkhat a om uhi. Tuate'n ka tunga lungkimlouhna nei a hih uleh, hiai ah na mai ah hong paiin, hon hekna thu uh hong gen le uh ake. 20 Ahih kei leh, hiaia tuni-a gitlouhna neia hon mu uh ahih leh, Vaihawmpawl' maia hon dinsak laiun gen le uh ake. 21 Amaute' maia ka din laia: Misite thawhkikna tawh kisai ahi tuni-a noute' maia thukhenna tuak dinga dinsaka ka om, chi-a ka kikou houh ahih kei ngai leh ka gitlouhna, a chi hi. 22 Feliks in hiaite a zak takin, Lampi tawh kisai thil thei mahmah ahih manin, amaute a paisak a: Sepaih makailian Lusia hong tun chiangin, thu khentatna ka bawl ding, a chi hi. 23 Tua bangin, sepaih zaheupa kiang ah, Paul, sepaihte veensak ding, ahihhanga, a lawmte'n nektak a bawlsak theih ding ua, noplen deuha kep dingin thu a pia hi. 24 Ni tamlou nungin, Feliks, a zi Drusila tawh hong pai hi. Drusila bel Juda numei ahi. Feliks in Paul a samsak a, Paul in Khrist upna thu a gen a, Feliks in a ngaikhia hi. 25 Paul in diktatna thute, kideekna thute, hong tung ding thukhenna thute a suutpih laiin, Feliks a lau a: Pai phot inla, hunlem kizen ka muh chiangin, kon samsak ding, a chi hi. 26 Tua baan ah, Paul in amah khah nadinga sum a tah ding lamen a na hi gige a, Paul a samsak zihzeh a, a houpih pih hi. 27 Tua banga kum nih hong kivei takin, Porsia Festa in, Feliks a khengkhia hi. Feliks in Judate a deihsak manin, suangkul ah Paul a nuse nilouh hi.
Festa maia Paul
1 Festa, tua gam hong tun nung ni thumin, Kaisaria apanin Jerusalem ah a hawhtou hi. 2 Siampi makaite leh Juda makaite a mai ah hong pai uh a, Paul hek kawmin deihsakna a ngen uh a, 3 Jerusalema Paul saptouh nadingin, Festa kiang ah deihsakna hong ngen uhi. Amaute'n lah, a hong pai laia lampi-a thah dinga lamtan sawm ahi gige uhi. 4 Festa in a dawng a: Paul ahih leh, Kaisaria-a kikoih ding ahi. Kei mahmah zong tua-a pai pah ding ka hi. 5 Tua ahih manin, na makaite un hon zuisuk uhen. Paul in gitlouhna hih ahih aleh, hekna tua ah hon pia uhen, a chi hi. 6 Festa amaute kianga ni sawm sanga tamzaw a taam nungin, Kaisaria ah a paisuk hi. A zing chiangin, thukhenna tutphah ah a tu a, a maia Paul dinsak ding thu a pia hi. 7 Paul a hong tun takin, Jerusalem apan hong kuansuk Judate a kimkot ah a ding uh a, a kitelna a piak theih louh uh hekna nase mahmahin amah a hek uhi. 8 Paul in a kihutna thu a gen a: Judate' Dan tawh kisai hita leh, tempul tawh kisai hita leh, ahih kei leh, Kaisar tung ah hita leh, bangmah hihkhelh ka nei kei, a chi hi. 9 Festa in Judate tunga deihsakna thil hih nuamin, Paul a dawng a: Hiai hekna thute tawh kisaia, Jerusalema hawhtouh a, ka maia thukhensaka om na ut hia? a chi hi. 10 Paul in a dawng a: Hiai laia Kaisar' thukhenna tutphah maia ding ka hi a, hiai laia ka tungthu kikhen ding mah ahi. Na theih mahmah bangin, Judate tung ah khelhna ka nei kei. 11 Khelhna nei ka na hih a, sihna khop thil na hih ka hih aleh, sih phamawh ka sa kei. Ahihhangin, hiai mite' hon heknate a dik lou a hih nung, kuama'n amaute khuta hon piak theih ka hi kei. Kaisar kiang ah thu ka tun e, a chi hi. 12 Festa in, a vaihawmpihte tawh thu a kikup nungin a dawng a: Kaisar kiang ah thu na tun a, Kaisar' mai ah na ding ding! a chi hi.
Agripa maia Paul
13 Ni tam lou nungin, Festa chibai buk dingin, Kaisaria ah Kumpipa Agripa leh Barnisi hong hawh uhi. 14 Amaute ni tampi taam uh ahih manin, Festa in Paul tawh kisai thu kumpipa kiang ah a kum hi. Ama'n: Feliks in hensa-a a nutsiat mi khat hiaia om ahi. 15 Jerusalema ka hawh touh laiin, siampi makaite leh Juda upate'n hiai mipa a heknate uh ka kiang ah hon tun uh a, amah ka mawhtansak ding a deih uhi. 16 Mi'n amah hekte maituah a, amah hekna tawh kisai, ama' kihutna thu genna hunlem a neih mateng, amah mawhtansak ding, Romte' ngeina hilou hi, chi-in amaute ka hilh hi. 17 Tua bang ahih manin, amaute hiaia hong paikhawm takun, zekai louin, a zing chiang mahin, thukhenna tutphah ah ka tu a, amah hon piilut dingin thu ka pia hi. 18 Amah hekte, thugen dinga hong din takun, ka up bangin gitlouhna lam himhimin a hek kei uhi. 19 Amau' biakna tawh kisai, amah tawh kiselna bangbang hiam nei a na hi uhi. Paul in, Jesu kichi misisa khat, Hingkik ahi, a chih mana, kinaklawh a na hi uhi. 20 Tua bang thu bangchi-a kantel thei ding ka hia, chi-in ka lungbuai hi. Jerusalema paitou a, hiai hekna thute tawh kisaia, ka maia thukhenna neih ding a ut hiam, chi-in Paul ka dong a, 21 ahihhangin, ama'n a thu khen dinga Augusta kianga thu a tut manin, Kaisar kianga amah ka khaksak theih mateng, amah veen ding thu ka pia hi, a chi hi. 22 Agripa in Festa kiang ah: Kei mahmah in hiai mipa' thugen ka za nuam, a chi hi. Ama'n a dawng a: Zing chiangin ama' thugen na za ding, a chi hi.
Agripa' Maia Paul
23 A zing chiangin, Agripa leh Barnisi thupitak leh zahtakhuaitakin hong pai uh a, thugen ngaihkhiakna inn sung ah a lut uhi. Sepaih makailiante leh, khawpi miliante'n zong a zuilut uhi. Festa in thu a pia a, Paul piilutin a om hi. 24 Festa in: Kumpipa Agripa leh, hiaia om miliante aw, hiai mi en un! Judate khempeuh in, Jerusalem ah leh Kaisaria ah, ka kiang ah thu hon tun uh a: Amah hing taak ahi nawn kei, a chi uhi. 25 Ama'n sihna khop bangmah a hih kei, chih ka mu hi. Ahihhangin, ama'n Augusta kianga a thu a tut manin, amah khaaksak ding ka thupukta hi. 26 Ahihhangin, Kumpipalian kianga ama' tungthu gelh ding kiteltak ka nei kei hi. Tua bang ahih manin, gelh ding kiteltak ka neih theih nadingin, amah na dottel dingun, noute khempeuh mai ah, adiakin nang Kumpipa Agripa mai ah, amah kon pii hi. 27 Ahang bel, hekna kiteltak gen loupi-a, henta kuamah khaaksawn kei adingin hihtuak hi-in ka thei keia ahi, a chi hi.
1 Tua khitin, Agripa in Paul kiang ah: Tuin na kihuutna thu na gen thei ding, a chi hi. Tua bangin, Paul in a khut a vaan a, a kihuutna thu a gen panta a: 2 Kumpipa Agripa aw, Judate' hon hekna tawh kisaia ka kihuutna thu gena, na maia tuni-a ka din theih hampha ka kisa hi. 3 Judate tawh kisai ngeinate leh, thil poimawhte thei mahmah na hih manin, hampha ka kisa diak hi. Tua bang ahih manin, lungduaitaka ka thu non ngaihkhiaksak ding kon ngen hi. 4 Ka tuailai hun apan Jerusalema ka mite laka ka nuntak dan leh, ka khankhiak dan, a chil apan Judate khempeuh in a thei uhi. 5 A chil apan kei hon theita amaute'n koute' sabiaka a chiik penpen pawl' nuntak dana nungta Farisai ka na hi, chih a gen nop liai uleh, a gen thei tham ding uhi. 6 Pathian in ka pu ka pate uh kianga thuchiam ana piak ka muan mana, hiai thukhenna maia ding ka hi. 7 Hiai thuchiam luah ding muangin ka minam ua nam sawmlenihte'n a sun a zanin Pathian' nna a sem uhi. Kumpipa Agripa aw, hiai muanna tawh kisaiin, Judate'n kei hon hek uh ahi. 8 Pathian mahmah in misite a kaithou, chih banghanga noute'n uphuailoua ngai thei na hi ua? 9 Ke'n zong Nazareth Jesu dala thil hih theih teng hih loutheilouin ka na kingai a, 10 Jerusalem ah ka hih taktak hi. Siampi makaite apan thuneihna lai tawiin, misiangthoute tampi suangkul ah ka khum a, amaute a thah laiun, a phasakpih lam ah ka pang hi. 11 Tamveipi sunagog khat apan a dang ah, a bantaka amaute gawtsak sawmin ka pai a, Jesu gensiatsak ka sawm hi. Amaute' tung ah ka heh mahmah a, amaute bawlse dingin, gamdang khawpite nangawn ah ka kuan hi. 12 Ka khualzinnate ah, khatvei Damaska-a hawh ka sawm hi. Tua bangin, siampi makaite' lai tawiin, Damaska zuanin ka pai hi. 13 I aw Kumpipa, tua banga ka pai laiin, sun laitakin vaan apan vaak, ni sanga taangpha zaw ka mu a, kei leh ka tonpihte' kimkot ah hong taang hi. 14 Ka vekun leilak ah ka puk uh a, ke'n Hebru paua kei hon houpih aw khat ka za hi. Tua aw in: Saul, Saul, banghanga nang kei hon bawlsia sia na hia? Sutna sikzumte khe-a pek nang adingin haksa hi, hon chi hi. 15 Ke'n: Kua na hia, Toupa? ka chi hi. Toupa'n: Na bawlsiat siat Jesu ka hi. 16 Tuin thou inla, na khein ding in. Sila hi ding leh, kei apan na muhte leh, nang kon lak lai dingte theihpih mi hi dinga hon bawl dinga, hiai ding maha na kianga hong kilaak ka hi. 17 Nangma' mite leh, 18 Zentelte apan kon hukhe ding. 18 Zentelte' mit vaaksak ding leh, mial apan vaak lam ngasak ding leh, Setan' thuneihna apan Pathian lam ngasak dingin amaute lak ah kon sawl hi. Tua bel, amaute'n khelhna ngaihdamna leh, keimah upna hanga sehtuam siangthoute laka goutan a ngah nading uh ahi, a chi hi. 19 Tua bang ahih manin, Kumpipa Agripa aw, vaan apan mengmuhna thumanglouin ka om kei hi. 20 Amasapenin, Damaska-a omte kiang ah, tua baan ah, Jerusalema omte kiang ah leh, Judia gam sung teng ah leh, Zentelte kiang ah thu ka gen hi. Amaute'n lungheia Pathian lam a ngat ding uh, a lungheina uh gamtat hoiha a latsak ding uh, chi-in thu ka gen hi. 21 Hiaite hang ahi Judate'n tempul huang sunga hon pummat uh a, thah hon sawm uh. 22 Ahihhangin, tuni dongin Pathian' huhna ka ngah a, hiai laia dingte, a neu a lian' mai ah, theihpihna thu ka gen hi. Kamsangte leh Mosi in, hong tung ding chi-a a gen vaai uh bangmah ka gen kei. 23 Amaute' gen bel, Khrist in a thuak ding a, misite lak apan thoukik masapen hi-in, ama' mite leh Zentelte kiang ah vaak thu a tangkoupih ding, chih ahi, a chi hi. 24 Paul in hiai kihuutna thu a gen laitakin, Festa in Paul' thugen a na botsat a, ngaihtakin: Paul, ahai na hita ve! Na sintamna in hon haisak ahita ve! a chi hi. 25 Paul in a dawng a: Festa zahtakhuai aw, hai kei veng e. Lungpiltaka thutak gen ka hi. 26 A maia kimuangtaka thu ka gennapa, kumpipa'n zong hiai thilte a thei hi. Ahang bel, hiai thilte inkiu kawmkal peuha hih ahih louh manin hiaite a koimah phawk louhin a om thei kei ding, chi-in kimuangtakin ka gen hi. 27 Kumpipa Agripa aw, kamsangte na um hia? Ahi, na um, chih ka thei hi, a chi hi. 28 Agripa in Paul kiang ah: Hun tomchik sungin Khristian suak dingin non zou dektak, a chi hi. 29 Paul in a dawng a: Tomin sawt taleh, nang kia hilouin, tuni-a hiaia ka thugen ngaikhete khempeuh, kei bang hi vek le'ng, koi bel bun louin, chih ka deih mahmah a, Pathian kiang ah ka ngen hi, a chi hi. 30 Tua khitin, kumpipa a ding a, ukpipa leh Barnisi leh a tutpihte uh zong a ding uhi. 31 Amaute a pawtkhiak nungun a kihou uh a: Hiai mi in sihna khop, ahih kei leh, suangkul tanna khop bangmah a hih kei, a kichi uhi. 32 Agripa in Festa kiang ah: Hiai mipa'n Kaisar kianga thu tun lou hi leh, khah theih hi mah ven, a chi hi.
Rom Khawpi Zuana Kipatkhiakna
1 Koute Itali zuana ka pai ding uh thupuk a hih takin, Paul leh henta dangte, Julia kichi sepaih zaheupa khat khut ah piakkhiak ahi uhi. Julia bel, Augasta Sepaihpawl kichi laka mi ahi. 2 Tua bangin, Adramutiama hong kipan long khat ah ka tuang uh a, Asia gam tuipi gei tawna pai sawmin ka kipankhia uhi. Aristarkha kichi, Thesalonika-a teeng Makedonia mi khat ka tuanpih uhi. 3 A zing chiangin, Sidon ah ka galkah uhi. Julia in Paul tung ah siam a suah a, Paul' lawmte'n a taksap awng a huk theih nadingun, amaute kianga hawh ding a phalsak hi. 4 Sidon apanin longin ka kipankhe kik uh a, huih in hon lehmut manin, Kupra tuikulh liah lam ah ka pai uhi. 5 Silikia leh Pamfulia lampang tuipi gei zuia tuipi tunga ka paisuk nungun, Lukia gama Mura ah ka galkah uhi. 6 Tua ah, sepaih zaheupa'n Itali zuan ding Aleksandria long khat a mu a, tua ah hon tuangsak hi. 7 Ni tampi sung, kintaka masuan thei louin ka pai uh a, haksapi-in Nidas gam ka tung uhi. Huih a hat manin tangtakin ka pai thei kei uh a, Salmoni zawn ah, Krit tuikulh liah lam ah ka pai uh a, 8 haksapi mahin Lasi khaw kianga mun khat Longkhawlna Kilawm kichi ka tung uhi.
Long Siat ding Paul in Thei
9 Ni tampi beita a, An-ngawl Ni nangawn kheng khinthamta ahih manin, longa pai a lauhuaita mahmah hi. Tua bangin, Paul in amaute a vauhilh a: 10 Pute aw, i zinna in siatna tuak ding a, long leh van leh i hinna nangawn manna thupitak om ding ahi, chih ka thei, a chi hi. 11 Ahihhangin, sepaih zaheupa'n Paul' thugen limsak louin, long-pulian leh long neipa' thu a la zaw hi. 12 Tua longkhawlna pen phalbi sung taam nadingin a gina kei a, mi tamzaw in Finis tung a, tua-a phalbi sung taam ding a lamet manun, maban sawn ding a thupuk uhi. Finis bel Krit tuikulha longkhawlna, simtum lam leh maltum lam nga khat ahi.
Huihpi
13 Simkhang huih nem hong nun takin, amaute'n a deih uh mutain a kingaihsun uh a, sik aisa a khaitou uh a, a kipankhia uh a, Krit tuipi geigei zuiin ka pai uhi. 14 Hun sawt louin, Simsuah Huih kichi huihpi hat, tuikulh gam lam apanin hong nungsuk hi. 15 Tua huihpi in long hon nuai a, huih lak ah ka pai zou kei uhi. Tua bangin, pang zou louin, huihpi in hon mut leengleengta mai hi. 16 Kauda kichi tuikulh liah lama ka pai uleh, bitna long neu nangawn haksapi-in ka khihkip thei hamham uhi. 17 Longpute'n tua bitna long neu, long sunga a kaihtouh khitun, long nuai lam nangawna khauzen paisakin, long a hen uhi. Surti sehnel kiplou phut khak ding lauin, long sik aisa khesukin, awlkhakhain, huihmut dandanin a paisak uhi. 18 Huihpi hat lua in hon mutleeng ahih manin, a zing chiangin, long zangsak dingin long vanpuakte a lawnkhia uhi. 19 A nithum ni-in, long vanzatte nangawn khutin a lawnkhia uhi. 20 Ni lah kimu lou, aksi lah kimu louin, ni tampi huihpi a nung nilouh a, hin kilametna himhim ka nei nawn kei uhi. 21 Mite'n sawtpi an a ngolh takun, Paul amaute' mai ah hong ding a: Pute aw, Krit tuikulh apan kipankhe lou dingin ka aw ngaikhe le uchin zaw, hibang siatna leh manna tuak lou mah ding hi ve uchin. 22 Ahihhangin, noute kuama'n hinna mansuah lou ding na hih manun hangsan suah dingin kon ngen hi. Long ahih leh se ding ahi. 23 Tu zanin, kei hon neipa leh a nna ka seppa Pathian' vansawltak ka kiang ah hong ding a: 24 Lau ken, Paul, Kaisar' maia ding diing na hi. Pathian in a hehpihnain, longa na zinpih khempeuhte' hinna nang hon pia hi, a chi hi. 25 Tua bang ahih manin, Pute aw, hangsan suah un. Ke'n Pathian um ka hi. Ama'n kei hon hilh bangbanga tangtungsak ding ahi. 26 Ahihhangin, koi tuikulh hiama kinga kha ngeingei ding i hi, a chi hi.
Long Siatna
27 A zan sawmleli zanin, huih in Adria Tuipi kichi tung ah lehlam lehlam ah hon mutleeng lailai hi. Zankim laiin, longpute'n gam khat peuhmah naita, chih a phawk uhi. 28 Tui thuk dan a teh uleh, laam 20 khawnga thuk ahi. 29 Suangpi khattou phut khak ding a lau manun, long meilam ah sik aisa li a khia uh a, khawvak kal ngaklahtakin a om uhi. 30 Longpute'n long apan taikhiak a sawm uh a, long mailama sik aisa khia-a kineihin, bitna long neu a khaikhesuk uhi. 31 Paul in sepaih zaheupa leh sepaihte kiang ah: Hiai mite longa a omden kei uleh, kuamah bitin na suakta kei ding uh, a chi hi. 32 Tua bangin, sepaihte'n bitna long neu khaute a sattan uh a, bitna long neute a kesuksak uhi. 33 Zingsang phalvak ma zekin, Paul in amaute an ne dingin a sawl a: Diphawm leh an ne loua na omna uh ni sawmleli a hita. 34 Tua bang ahih manin, na hin nadingun, an ne dingin kon kun ahi. Noute kuama'n samzang khat zong na mansuah kei ding uh, a chi hi. 35 Ama'n hiaite a gen khitin, tanghou beu a la a, amaute khempeuh' muhin, Pathian kiang ah kipahthu a gen a, tanghou beu balkhamin a ne hi. 36 Amaute hong kithakhauhsak uh a, an a ne tek uhi. 37 Longa tuangte ka vekun mi 276 ka hi uhi. 38 Amaute'n an a nek khitun, long zaangsak dingin huitbuhte tuipi ah a lawnkhia uhi. 39 Zing khua hong vak a, koilai gam hiam chih a theihlouh uh, gama tui valutthukna khata piautak a galmuh uhi. A hih theih liai aleh, tua-a long kingaksak ding a sawm uhi. 40 Tua bangin, sik aisate a sattat uh a, tuipi ah a nusia uh a, long heina hennate a phei uh a, long mailam puanzak pen huih mut dingin a zak tou uhi. Tua bangin tui gei lam zuanin long a paisak uhi. 41 Ahihhangin, tuipi nih a kimatna mun khat ah, long in sehnel a phu kha a, long mailam hoihtakin a taanga ma a sawn thei kei hi. Tua bangin, tuihualte'n long meilam a seep ekek a, long a kise panta hi. 42 Hentate tui liaua a suahtak ding uh lauin, sepaihte'n amaute thah mai a sawm sim uhi. 43 Ahihhangin, sepaih zaheupa'n Paul' hinna humbit a ut a, sepaihte thil sawm a daai hi. Tui liau theite long apan tuakkhia a, galkah masa dingin thu a pia hi. 44 Midangte bel, singpek khawng, ahih kei leh, longsia them khawnga tuang dingin thu a pia hi. Tua bangin a vekun bittakin a galkahta uhi.
Malta-a Paul
1 Tuipi gei bittaka ka tun uO nungun, tua tuikulh gam pen Malta kichi ahi, chih a thei uhi. 2 Tua tuikulh gam mite ka tung uah a siam mahmah uhi. Vuah zu a, khua dam mahmah ahih manin, amaute'n meitual a sem uh a, kipaktakin mei hon awisak uhi. 3 Paul in singkang lorn khat tom a, meia a khul takin, mei sa ahih manin, singlom lak apanin gul khat hong pawtkhia a, a khut a tu a, a taangden hi. 4 Tua tuikulh gam mite'n Paul' khuta gul kikhai a muh takun: Hiai mi tualthat khat hi mahmah inteh. Tuipi apan suakta khin napi-a dika thukhenna in a nuntak ding phal lou hi ding hi, a kichi uhi. 5 Ahihhangin, Paul in tua gul meikhuk ah a singkhia a, amah lah bangmah a chi kei hi. 6 Tua mite'n bel, a khut hong bawk hiam, ahih kei leh, thakhata puka si mai dingin a um uhi. Tua banga sawtpi a ngak nungun leh, amah bangmah chi lou a muh takun, lungsim a kheng uh a: Amah pathian khat ahi, a chi leuleu uhi. 7 Tua gam ah, mi poimawh khat Pablia kichi neih gam a om a, ama'n koute hon na zintun a, zindou siamtakin, ni thum tak hon na vaak hi. 8 Pablia' pa bel, nattun leh santen veiin a lum hi. Amah en dingin Paul a valut a, a tunga khut ngain a thuum a, a damsak hi. 9 Hibang thil hong om takin, tua tuikulh gama china teng khempeuh hong pai uh a, Paul in amaute a damsak hi. 10 Amaute'n lam tampi-in koute hon pahtawi uh a, ka paikhiak dingun, ka taksapte uh hon guan uhi.
Rom Khawpi Zotna
11 Kha thum nungin, tua tuikulha phalbi sung na om long khatin ka kipankhia uhi. Tua long pen, Aleksandria long ahi a, pathian- phik Kastor leh Polaks lutang lim a suang hi. 12 Sairakus ka tung uh a, tua ah ni thum ka taam uhi. 13 Tua apanin longin ka kipankhe kik uh a, Rheziam ka tung uhi. Ni khat nungin, sim huih hong nung a, a zing chiangin, Puteoli ka tung uhi. 14 Tua khua ah, sanggamte pawlkhat ka mu uh a, amaute'n amaute kianga ni sagih taam dingin hon khou uhi. Tua nungin, Rom khua lam ka zuan uhi. 15 Rom khua-a sanggam omte'n, Rom khua zuana ka pai thu uh a na za uh a, Apia kichi sumsinna mun leh, Khualbuk Thum kichi dong hong paiin hong muak uhi. Paul in amaute a muh takin, Pathian tung ah kipahthu a gen a, a lungmuangta hi. 16 Rom khua ka tun takun, sepaih zaheupa'n veeng sepaih makai khut ah hentate a pekhia hi. Paul bel, a veengpa sepaih tawh, amah kia-a a om ding phalna piakin a om hi.
Rom Khua-a Paul
17 Nithum nungin, Paul in Juda makaite a samkhawm a, hong paikhawm takun, Paul in amaute kiang ah: Ka sanggamte aw, i mite, ahih kei leh, i pu i pate' ngeina kaiha bangmah hih ka neih louhpi-in, Judate'n Jerusalem apan hen-tasain, Romte khut ah hon pia uhi. 18 Romte'n ka tungthu a ettel nungun, sihna khop gitlouhna ka hih louh manin, hon khah ut uhi. 19 Ahihhangin, Judate'n a nial manun, Kaisar kianga ka thu tun lou theilouin ka om hi. Tua bel, ka minampihte heek nading ka neih man ahi kei hi. 20 Israelte' lamet thil tawh kisaia, hibanga hena om ka hih manin, hiai thu hang maha noute mu ding leh, thu kikuppih dinga hon samkhawm ka hi, a chi hi. 21 Amaute'n a dawng uh a: Koute'n Judia gam apanin, nang tawh kisai laikhak ka ngah kei uh. Tua gam apan hiaia hong pai sanggamte kuama'n na tungthu a se lam bangmah a gen kei uh. 22 Ahihhangin, na ngaihdan, nang' kam apan ka za nuam uh. Ahang bel, mun chih ah hiai pawl a kigensia, chih ka za uhi. 23 Amaute'n Paul tawh kimuh nading ni khat a sep uh a, ama' omna ah, mi tamsem hong paikhawm uhi. Ama'n zingsang apan nitak dong Pathian' kumpigam thu a hilhchian a, a phuang a, Mosi Dan Laibu leh Kamsang laibute suutpihin Jesu lama amaute' lungsim puuksak a sawm hi. 24 A thugen in mi pawlkhat a umsak a, ahihhangin, pawlkhat in a um nuam kei uhi. 25 Amaute lak ah kithukimna a om kei a, Paul in hiai thutawp a gen khitin, amaute a paikhe panta uhi. Paul in tua thutawp hibangin a gen a: Kha Siangthou in na pu na pate uh kianga kamsang Isai tungtawna thu a gen laiin, thutak na gen ahi. Ama'n: 26 Hiai mite kiang ah pai inla: Za gige napi-a, theisiam ngei lou ding hi uteh; Mu gige napi-a, muchian ngeilou ding hi uteh, chi in. 27 Ahang bel, hiai mite' lungtang kheengta a, bila za thei lou phial uh a, mitsi uh hiven. Tua hi kei leh, mitin mu ding uh a, bilin za ding uh a, lungtangin theisiam ding uh a, lunghei ding uh a, ke'n amaute damsak ding hi'ng, a na chi hi. 28 Tua bang ahih manin, Pathian' hotdamna thu Zentelte kianga ki-sawl ahita a, amaute'n a ngaikhe ding uh, chih thei un! a chi hi. 29 Paul in hiai thilte a genkhitin, Judate, amau laka nakpitaka kiselna tawh a paikhia uhi. 30 Kum nih sung vingveng, Paul, ama' inn luah ah a teeng a, amah mu nuam peuhmah a kipahpih hi. 31 Ama'n hangsantakin leh, daalna om louin, Pathian' kumpigam thu a gen a, Toupa Jesu Khrist tungthu a sinsak hi.
Tangthupha
1 Kei, Jesu Khrist' sila Paul, sawltaklian hi dinga sap, Pathian' tangthupha gen dinga sehtuam ka hi. 2 Tua tangthupha bel, a kamsangte tungtawna Laisiangthou sunga a na chiamkholhsa ahi. 3 Tua tangthupha mah a Tapa tawh kisai ahi a, tua a Tapa bel mihing a hihna lama David' suan ahi a, 4 Pathian' Tapa a hihna bel, misite lak apan thawhkikna vangletna tungtawna, siangthouna Kha in a phuankhiak ahi. Amah Jesu Khrist, i Toupa ahi. 5 Koute'n ama' tungtawnin leh, ama' min hangin, hehpihna leh sawltaklian hihna ka ngah uhi. Tua bel, thu-up thu mang dinga Zentelte khempeuh apan mite sam dingin ahi. 6 Tuate lak ah, noute zong Jesu Khrist' sapte na hi uhi. 7 Pathian' itte leh misiangthoute hi dinga ama' sap, Rom khua-a omte khempeuh kiang ah lai kon gelh hi. Pathian i Pa apan leh, Toupa Jesu Khrist apan hehpihna leh lungmuanna noute tung ah om hen.
Romte Veh ding Lunggulhna
8 Amasapenin, noute' upna thu, leitung khempeuha a kigenthangtaak manin, noute khempeuh hangin, ka Pathian tung ah, Jesu Khrist tungtawnin kipahthu ka gen hi. 9 Ka thumnate ah, tawplouin noute' min ka lou gige, chih hon theihpihpa Pathian ahi. Amah mah ahi, a Tapa' tangthupha gena ka lungtang khempeuh tawh a nna ka seppa. 10 Tu beeka noute kianga kong pai theih khongkhong nading, Pathian' deih-lamin kong hong kihong leh chi-in ka ngen hi. 11 Noute hon kipsak ding khalam phattuamna pawlkhat hon kikoppih ka ut manin, noute hong mu leng chih ka lunggulh mahmah hi. 12 Tua bel, noute leh kei, upnain kihan-thawn tuah le'ng ka chihna ahi. 13 Sanggamte aw, noute kianga hong pai ding tamveipi ka sawmta, chih na phawk louh uh ka deih kei hi. Ahihhangin, tu dongin daalin ka om hi. Zentel dangte laka gah ka khop bangin, noute lak ah zong gah khop ka ut mahmah hi. 14 Grikte leh namtomte, a pilte leh a pilloute tunga leiba nei mi ka hi. 15 Hiai hang mah ahi, Rom khua-a om noute kianga zong tangthupha gen ding tua zaha ka kithalawp. 16 Ke'n Khrist' tangthupha ka zahpih kei hi. Ahang bel, tua tangthupha pen, a ummi peuhmah hotdam nadinga Pathian' vangletna ahi. Judami adingin a hi masa a, tua khitin, Zentelmi adingin zong ahi. 17 Ahang bel, tua tangthupha sung ah, Pathian in a diktatna a langsakta hi. Tua diktatna pen, upna pansana latsak ahi a, upna a khangsak semsem hi. Mi diktatte, upna pansanin a hing ding, chi-a na kigelh bangbang ahi.
Mawhna tunga Pathian' Thangpaihna
18 Pathian in diktatlouhna gamtata thutak sikdeen mite' Pathian mitna limsaklouhna leh, diktatlouhna khempeuh tung ah a thangpaihna, vaan apanin a langsak lellel hi. 19 Ama'n amah tawh kisaia theihtheih ding chiang amaute lakkhinta a, tuate amaute adinga kitel mahmah hi. 20 Ahang bel, Pathian' hihnate-a Tangtawn vangletna leh a pathianna muh theihlouh, leitung siam chil apanin, thilsiamte apan kiteltaka theih theih leh muh theih ahi. Tua ahih manin, mihingte'n paulam ding a nei het kei uhi. 21 Amaute'n Pathian thei napi-in, Pathian ahihna bangin a pahtawi kei uh. Ama' tung ah kipahthu zong a gen kei uh. A ngaihsutna uh mantheihlouh a suak a, a lungtang haite uh a mialta hi. 22 Pil kisa mah le uh, mihai a suak uhi. 23 A muatthei mihing leh vasate leh, ganhingte leh bokvak ganhingte batpiha kibawl milimtein a kisetheilou Pathian' thupina a khek uhi.
Zentelte' Mawhna
24 Tua bang ahih manin, Pathian in zong amau' lungtang gilou' lunggulh bangbanga numei pasal kal nitna-a buai ding leh, a pumpite uh paktattaka kizangtuah dingin, amaute a khahzanta hi. 25 Zuau thuin Pathian' thutak a khek uh a, a Siampa be louin, a thilsiamte a bia uh a, tuate nna a sem uhi. Amah zaw Tangtawna phat ding ahi. Amen. 26 Hiai hangin, Pathian in amaute, huukna lanna zumhuai lam ah a khahzanta hi. A numeite nangawn uh, numei kizatdan ngeina bang louin a kizang uhi. 27 Tua mah bangin, pasalte zong, numei zat daan ngeina apan pialmangin, pasal leh pasal, lana kienlahin, kilawmloutakin a kizang tuah uhi. A tan ding ua kilawm, a tatsiat man uh, a sa tung uah a ngah uhi. 28 Tua thamlouin, amaute'n Pathian theihna deih lou uh ahih manin, Pathian in a lungsim uh, a kilawmlou thil hih dingin a hoih nialna lam ah a khahzanta hi. 29 Amaute, diktatlouhna namkim, hukna lanna namkim, lungsim siatna namkim, deihgawlna namkim leh buaina bawlna namkim leh hazatna, tualthahna, kinakna leh zekhemna leh midang siatna deihsakna leh gensiatna tawh a kidim uhi. 30 Gensiathatte, Pathian mudahte, zumnamel theiloute, kisatheite leh kisialhatte thil gilou hih dan thak thakte leh nu-le-pa thumangloute ahi uhi. 31 Theihsiamnabei, muanhuainabei, itnabei, ngaihdamnabei leh zah-ngaihnabei ahi uh. 32 Hibang hihte si taak him ahi uh, chih leh, Pathian' thukhen dik ahi, chih a thei uh. Hinapi-in, hiaite mah hih lailai thamlouin, tua bang hihte pha a sakpih lai uhi.
Judate' Mawhna
1 Tua bang ahih manin, midangte mawhsa-a thukhen nang mihing aw, paulam ding na nei kei hi. Midangte na mawhsakna mah ah, nangmah mawh kitan na hi. Ahang bel, midangte mawhsapa in, amaute na mawhsakna thilte mah na hih hi. 2 Tua bang hih mite tunga Pathian' thukhenna zaw thutak pansan ahi, chih i thei hi. 3 Nang, mihing leltak in, amaute mawhsa napi-a tua thilte na hih zel leh, Pathian' thukhenna pelh theih na kium-a hia? 4 Ahih kei leh, Pathian' migitna, dawhzawhna leh lungduaina hauhna na simmawh-a hia? Pathian' migitna in lungheina ah nang hon pii, chih na thei kei-a hia? 5 Ahihhangin, na genhakna leh na lungtang kihei noplouhna hangin, nangma' tung ah Pathian' thangpaihna na kikholkhawm ahi. Pathian in a thukhenna diktat a langsak ding. 6 Ahang bel, Pathian in, michih tung ah, a thil hih bangbanga thu khenna tun ding ahi. 7 Thilhoih hih teitei a, thupina leh pahtawina leh muat theihlouhna zong mite kiang ah, ama'n Tangtawn hinna a pe ding. 8 Ahihhangin, amau' angsung khualte leh thutak niala, diktatlouhna lam muanga zuite tung ah thangpaihna leh hehna a tun ding. 9 A tatse mi peuhmah tung ah gimthuakna leh lungkhamna a tun ding. Judami tung ah a tun masa ding a, tua khit chiangin, Zentelmi tung ah a tun ding. 10 Ahihhangin, gamtat hoiha gamta mi peuhmah kiang ah, thupina leh pahtawina leh lungmuanna a pe ding. Judami kiang ah a pe masa ding a, tua khit chiangin, Zentelmi kiang ah a pe ding. 11 Ahang bel, Pathian in deihsaktuam nei lou ahih man ahi. 12 Dan neiloua khialte khempeuh, Dan tawh kisai louin a mangthang ding uh. Dan nuaia khialte khempeuh in lah, Dan bangbanga thukhenna a thuak ding uh. 13 Ahang bel, Pathian' mitmuha diktatte, Dan zate ahi kei a, Dan zuite ahi diktata kisim ding. 14 Zentelte'n Dan a nei kei uh. Hinapi-in, Dan in a ngiat thilte, amau' ngeina dana a hih chiangun, tuate amaute adingin dan khat a suak hi. 15 Ahang bel, tua bang ahihna un, amaute' lung sung ah Dan in a ngiatte a kigelh, chih a langsak hi. Amaute' sia-le-pha theihna lungtang in zong a theihpih a, a ngaihsutna un khatvei chiangin mawh a tan a, khatvei chiangin dik a tan hi. 16 Pathian in thu a khen ni chiangin, ka tangkoupih tangthupha' gen bangin, Jesu Khrist tungtawnin mihing' iimte thu a khen ding hi.
Judate leh Dan
17 Nang, Judami kichi na hi ngeitak a, Dan na suang a, Pathian na kisialpih hi. 18 Dan pansana sinsakna ngah na hih manin, Pathian' deihlam na thei a, a hoih zaw thilte hoih na sa hi. 19 Mittawte lamhilhpain na kimuang a, miallaka omte adinga meivak hi-in na kimuang a, 20 Dan sunga theihna leh thutak kikhaikhawm dan tangpi theihna tan na neih manin mihaite chiilpa in na kimuang a, naungekte sinsakpain na kimuang hi. 21 Tua bang teng na hih leh, midangte sinsakpa, nang kisinsak lou maw? Guktak louh ding chi-a thugenpa'n na gu maw? 22 Angkawm louh ding chipa'n ang na kawm maw? Milim hua kichipa'n tempulte na lok maw? 23 Dan kisialpihpa'n Dan palsatin, Pathian na daisak maw? 24 Noute hangin Zentelte lak ah Pathian' min gensiatin a om, chi-a na kigelh bangbang na hita ve ua! 25 Dan na zuih aleh, zeksum in manphatna a nei mah hi. Ahihhangin, Dan na palsat aleh bel, na zeksum pen sumlouh tawh kibang ahi. 26 Zeksum lou mi in, Dan in a ngiat diktatna a zuih chiangin, a zeksum louh, zeksum banga sim hilou ding hia? 27 Ngeina dana zeksum lou mi in, Dan a zuih nungsang, nang Dan a gelha nei a zek zong sum napi-a, Dan palsatpa mawh hon tangsak lou ding hia? 28 Pawlam kia-a Judami hi pen, Judami ahi kei. Zeksum zong pawlama sa-a sum leltak ahi kei. 29 Hi peuhmah lou hi! Sunglama Judami hi pen ahi Judami taktak. Zeksum taktak zong Dan gelh pansana suum hilouin khalama lungtang suum ahi. Tua bang mi in mihing' phat a lawh kei a, Pathian' phat a lawh hi.
1 Tua bang ahih leh, Judami in bang hamphattuamna a neia eita? Zeksum in zong bang phattuamna a neia eita? 2 Banglam peuh ah nei tazen ven chia! Amasapenin, Pathian in amaute khuta a thute a kepsakna ah hamphattuamna a nei uh. 3 Amaute laka pawlkhat in upna nei takei leh bang chi ding? A uplouhna un Pathian' muanhuaina bangmahlou suaksakta ve maw? 4 Suaksak peuhmah lou! Tuachi-a thu na gen chianga diktat na suah theih nading leh, thu na khen chianga, na vualzawh theih nading ahi, chi-a na kigelh bangin Pathian mah dik hen, michih zuauthei suak zaw hen. 5 Tua banga eite' diktatlouhna in Pathian' diktatna a latsak nung, bang i genta dia le? Eite tunga thangpaihna hon tut, Pathian diktat lou ahi chihna ahi diam? Mihing' kisel dana thugen ka hi. 6 Pathian diktatlou hi peuhmah lou! Tua bang na hi leh, Pathian in bangchi'n leitung mite tung ah thu a khenta dia? 7 Mi pawlkhat in: Ka zuautheihna in Pathian' thupi nadinga, Pathian' thutak langsak sem ahih nung, banghanga kei, mikhial chi-a mawh hon tangsak lai ding ahia? a chi mai thei. 8 Mi pawlkhat in hon gensia a, i gen louhpi hon gensak bang ua: Thil hoih hong tun theih nadingin, thilgilou hih ni, banghanga chi mai lou i hia? Tua bang chi mite'n mawhtansakna a tan uh a dik him ahi. 9 Bang i genta dia le? Amaute sangin eite i hoihzaw-a hia leh? Hoihzaw peuhmah lou! Judate leh Zentelte akibangin, khelhna thunuai ah a om vek uh, chi-in kiteltakin i ngawhta vele. 10 A diktat kuamah omlou, khat leltak zong omlou. 11 A theisiam kuamah omlou, Pathian zong kuamah omlou. 12 Mi khempeuh lampialta, a vekpiun mannabei suakta. Thilhoih hih kuamah omlou, khat leltak zong omlou. 13 A gawl uh hankhuk kamka hi a, a lei ua khemna om a, a muk ua gulgu om hi. 14 A kam uh hamse lawhna leh, khaatna tawh kidim a, 15 a khete uh sisan suah dinga kintai hi. 16 A lampite ua siatna leh, gentheihna om hi. 17 Lungmuanna lampi theilou uhi. 18 A mit ua Pathian launa himhim omlou hi, chi-in a na kigelh hi. 19 Dan in a gente khempeuh, Dan nuaia omte kianga kigen ahi chih i thei hi. Tua bel, kam chih a seeldot theih nading leh, leitung mite khempeuh, Pathian' nuaia mawhpua-a a koih theih nading ahi. 20 Tua bang ahih manin, Pathian in Dan zuihna pansanin kuamah ama' mitmuhin dik a tangsak kei ding. Dan tungtawna khelhna phawkna kinei ahi zaw hi.
Upna tungtawna Diktatna
21 Ahihhangin, tuin Dan tawh kisai louin, Pathian apan diktatna latsakin hong om hi. Hiai diktatna bel Dan leh Kamsangte'n a na gen uh ahi. 22 Pathian apan hiai diktatna, Jesu Khrist upna tungtawna, a ummi khempeuh tunga hong tung ahi. Kilamdanna tuam himhim omlou ahi. 23 Ahang bel, mi khempeuh in khialta a, Pathian' thupina tang zoulou hinapi, 24 tatna tungtawna a hehpihna hanga manbeia diktansaka om ahi uhi. Tua tatna lah Khrist Jesu pansana hong om ahi. 25 Pathian in khelhna khuhna thillat hi dinga amah luikhia a, a sisan upna tungtawna khelhna khuhna kingah hiven. Pathian in a thuakzawhna hanga nidang lai khelhnate gawt lou-a a na hawi mana, ama' diktatna latsak nadinga hiai hih ahi ve, 26 ama'n tu huna a diktatna a latsakna ahi a, amah a dik lah hi, Jesu umte diktangsakpa lah hi sawnsawn ahi. 27 Tua bang ahih nung, kisial nading koia om ahia? Kisial nading peuhmah a kipawsiah hi. Bang danin maw? Dan zuihna thilhih danin maw? Hi lou, upna danin ahi zaw. 28 Ahang bel, Dan zuihna tawh kisai louin, upna pansanin, Pathian in mi dik a tangsak i chikhinta vele. 29 Pathian, Judate kia' Pathian ahi-a hia? Zentelte' Pathian zong hi sam lou hia? Hi e, Zentelte' Pathian zong ahi mah hi. 30 Pathian khat kia om hiven. Ama'n zeksumte, upna pansanin dik a tangsak ding a, zeksumloute zong, tua upna tungtawn mahin dik a tangsak ding hi. 31 Ahih leh, eite'n upna pansana Dan bangmahlou suaksak i hi maw? Suaksak peuhmah lou! Dan a hihna taka gum i hi zaw hi.
Abraham Diktansakna
1 Tua bang ahih leh, sa dana i pa Abraham in hiai thu-a a muhtaak bang gen ding i nei a? 2 Pathian in nasep thilhih hanga Abraham dik tangsak na hi leh bel, Abraham in sial ding a nei mah ding hi. Ahihhangin, Pathian mai ah tua bang sial theihna a nei kei. 3 Laisiangthou in bang gen ahia? Abraham in Pathian a um a, Pathian in tua upna ama' adingin diktatnain a simsak, chi-in a na gen hi. 4 Hibang daan ahi: Mi'n nasep thilhih a neih chiangin, a thaman pen, thawnpiakin a kisim kei a, leibatin a kisim zaw hi. 5 Ahihhangin, nasep thilhih muang loua, pathianmitna neilou mi diktangsakpa Pathian muang mi' upna, Pathian in ama' adingin diktatnain a simsak hi. 6 Nasep thilhih tawh kisai loua, Pathian in diktata a sim mi' hamphatna thu, David in a na gen laiin, tua mah na gen ahi. Ama'n: 7 Danbeia a gamtatna uh ngaihdama om mite, a khelhnate uh khuhsaka om mite mi nunnuam hi uhi. 8 Toupa'n ama' tunga khelhna a kibaansak ngeilouh ding mi, mi nunnuam ahi. a na chi hi.
Zeksum Pansan Lou
9 Hiai nunnopna, zeksumte ading kia hi hia? Zeksumloute ading zong hi sam lou hia? Pathian in Abraham' upna, ama' diktatnain a simsak, chih i gengen a, 10 chiklaia tua diktatna-a simsak hi peuhmah ahia? A zeksum nungin hia tua a simsak, ahih kei leh, a zeksum main? A zeksum nungin ahi kei a, a zeksum main ahi! 11 Tua nungin, zeksum chiamtehna a ngah hi. Tua zeksum bel, zeksum lou ahih laia, upna pansana a ngah tua diktatna chiamtehna ahi. Tua bel, Abraham, zeksum lou napi-a, a umte khempeuh' pa ahih nading ahi a, amaute adinga zong diktatna-a a kisimsak nading ahi. 12 Tua baan ah, amah, zeksum kia hiloua, i pa Abraham in zek a sum ma-a a neih upna khekhap zui tua zeksumte' pa ahih nading ahi.
Dan Pansan Lou
13 Abraham leh a chisuante kianga, leitung gouluah nading thuchiam pen, Dan tungtawna a ngah uh ahi kei. Upna pansana hong tung diktatna tungtawna a ngah uh ahi zaw. 14 Dan zuia nungtate gouluah na hi le uh bel, upna a mannabei ahi ding a, thuchiam zong bangmahlou a suak ding hi. 15 Ahang bel, Dan in thangpaihna tun leltak a, Dan om louhna-a tatlekna omlou hiven.
Upna Pansan 16 Tua bang ahih manin, tua thuchiam pen, hehpihna-a piak ahih theih nadingin, upna pansana ngah ahi. Tua bel, Abraham' suante khempeuh, Dan neite
kia hiloua, Abraham' upna bang upna neite'n zong tua thuchiam a luah ngeingei theih nading uh ahi. Amah eite khempeuh' pa ahi. 17 Pathian in Abraham kiang ah: Nam tampite' pain kon bawlta, a chi, chi-a na kigelh bangbang ahi. A uppa Pathian' mitmuhin, amah eite' pa a hita. Tua Pathian ahi misite hinna pia a, thil omloute nangawn a omsa banga genpa. 18 Lamet ding om hetlou napi-in, Abraham in lamenin a um a, nam tampite' pa hong hi taktak hi. Pathian in: Tua bangin na suante a tam ding, chi-a, ama' kianga a gensa bangbang hong hita hi. 19 Tua laiin, Abraham kum 100-a upa ahi. A zi Sara lah a chiingpi ahi. Hinapi-in, ama'n upna bah tuan het louin, ama' pumpi sisa a hihna a maituah hi. 20 Pathian' thuchiam muanglahin, a upna a liing mahmah kei hi. A upna a kip a, Pathian kiang ah thupina a pe zaw hi. 21 Ahang bel, Pathian in a chiamsa pen tang-tungsak dingin vangletna a nei, chih upna kip a neia ahi. 22 Tua a upna, ama' adingin diktatnain a kisimsak, kichi hiai hang ahi. 23 Ama' adingin a kisimsak, chih thute ama' ading kia-a kigelh ahi kei a, 24 eite adinga kigelh zong ahi. Misite lak apan Jesu kaithoupa Pathian um eite adingin zong, i upna, diktatnain hon simsak mahmah ding hi. 25 Pathian in eite' tatlekna hanga si dingin Jesu i Toupa a luikhia a, eite diktansak nadingin a kaithou hi.
Pathian tawh Kilemna
1 Tua bang ahih manin, Pathian in, eite, i upna tungtawnin dik hon tangsakta hi. Tua ahih nungsang, eite'n i Toupa Jesu Khrist tungtawnin Pathian tawh kilemna i neita hi. 2 Amah tungtawn mahin, upna pansanin, eite'n hehpihna sung lut theihna i ngahta hi. Tuin, eite, tua hehpihna sung ah i ding hi. Tua bang ahih manin, Pathian' thupina lametna ah zong lungnuamin i om hi. 3 Tua kia ahi kei. I thuaknate ah zong i lungnuam hi. 4 Ahang bel, thuakna in thuakhatna a gahsuah a, thuakhatna in takna a gahsuah a, takna in lametna a gahsuah, chih i thei hi. 5 Lametna in lah eite hon zahlaksak ngei kei hi. Ahang bel, Pathian in, eite hon piak Kha Siangthou pansanin, eite lungsung ah a itna hon sunglut hi. 6 Eite, thahatna neilou i hih laiin, a hun takin, pathianmitna neiloute adingin Khrist hong si hi. 7 Mi diktat adinga si nuam mi om meengmeeng kei hiai ding. Mihoih adingin bel, a si ngam khattou a om khamawh kei ding. 8 Ahihhangin, Pathian in eite lama a itna phathuaia a latsak dan hibang ahi: Mikhialte i hih laiin Khrist eite adingin hong si hi.
Pathian' Thangpaihna apan Hotdamna
9 Eite ama' sisan pansana diktansak i hita hi. Tua ahih nung-sang, amah tungtawnin, Pathian' thangpaihna apan hotdam nak hihsem na ni e! 10 Eite, melma-a langpangte i hih laiin, ama'n a Tapa sihna tungtawnin amah tawh hon kilempihta hi. Tua ahih nung, a Tapa' sihna tungtawna amah tawh kilemkhinsate, a hinna tungtawnin hotdam nak hihsem na-ni e! 11 Hibang teng kia zong ahi kei. Tuin i Toupa Jesu Khrist tungtawnin, kilemkikna i ngahta. Ama' tungtawnin, Pathian ah zong angtangtakin i om hi.
Adam tungtawna Sihna, Khrist tungtawna Hinna
12 Mi khat tungtawnin leitung ah khelhna hong lut a, khelhna tungtawnin sihna hong lut hi. Tua bangin, mi khempeuh tung ah sihna a paisawn hi. Ahang bel, mi khempeuh in khialta hiven. 13 Dan a kipiak ma-a, leitunga khelhna na omkhinta ahi. Ahihhangin, Dan om louh laiin, khelhna pen, khelhnain a kisim kei hi. 14 Hinapi-in, Adam hun apan Mosi hun dongin, sihna in vai a hawm a, Adam' palsat banga thupiak khat palsat loute tung nangawn ah sihna in vai a hawm veve hi. Adam bel, hong pai dingpa tehpihna lim ahi. 15 Ahihhangin, manbeia thawnpiak bel, tatlekna tawh a kibang kei: Mi khat' tatlekna tungtawnin mi tampi a si. Tua ahih nung, Pathian' hehpihna leh tua mi khat Jesu Khrist' hehpihna pansana thawnpiak pen, mi tampi adingin nak luanlet sem na'n chia! 16 Tua baan ah, Pathian' thawnpiak zong, tua mi khat khelhna gahsuah tawh a kibang kei: Thukhenna in tua khelhna khat hon zui a, mawhtansakna hon tun hi. Ahihhangin thawnpiak in bel, khelhna tampi hon zui diktansakna hon tun hi. 17 Tua mi khat' tatlekna tungtawna sihna in, tua mi khat tungtawna vaihawm ahih nung, Pathian' piak hehpihna luanglet leh diktatna thawnpiak saangte'n, tua mi khat Jesu Khrist tungtawnin hinna ah vai nak hawmsem na unchia! 18 Tua bang ahih manin, tatlekna khat in mi khempeuh adinga mawhtansakna a gahsuah bangbangin, mi khat' diktatna nasep in mi khempeuh adinga hinna hon tun tua diktatna a gahsuah hi. 19 Ahang bel, mi khat' thumanlouhna tungtawnin mi tampite mikhiala bawl ahi. Tua bangbangin, mi khat' thumanna tungtawnin mi tampite diktata bawl ahi ding hi. 20 Tatlekna a pun sem nadingin Dan hong kipiak behlap hi. Ahihhangin, khelhna a pun semna ah, hehpihna a pungzaw sem hi. 21 Tua bel, khelhna in sihna tungtawna mi a uk bangbanga, hehpihna in diktatna tungtawna mi a uk theihna ahi. Tua hehpihna in i Toupa Jesu Khrist tungtawnin Tangtawn hinna hon tun hi.
Khelhna Sihsanna
1 Tua bang ahih leh bang i genta dia le? Hehpihna a pun sem nadingin, eite i khial semsem ding ahi diam? 2 Hi peuhmah lou e! Eite'n khelhna sihsanta i hi. Bangchi'n khelhna sung ah i nungta thei lai dia? 3 Eite, Khrist Jesu-a baptisluta omtate, ama' sihna-a baptislut i hi, chih na thei kei ua hia? 4 Tua bang ahih manin, eite, ama' sihna-a baptislut i hihna tungtawnin, amah tawh vuikhawm i hi uhi. Tua bel, Pa' thupina in misite lak apan Khrist a kaihthawh bangbanga, hinna thaka i nuntak theih nading ahi. 5 Ama' sihna kibatpiha amah tawh kizomta i hih manin, ama' thawhkikna kibatpihin amah tawh i kizom taktak ding hi. 6 I mihing lui, amah tawh kilhlupkhawm ahita, chih i thei, Tua bel, sihna pumpi gamtang thei nawnloua a kikoih theihna ahi. Tua baan ah, eite, khelhna sila-a i om nawn louh theihna ahi sawn lai hi. 7 Ahang bel, a sisa mi pen, khelhna apan suahtaksak hita ven. 8 Eite, Khrist tawh sikhawm i hihtaak manin, amah tawh i nunetakhawm ding, chih i um taktak hi. 9 Ahang bel, Khrist, misite lak apan kaihthawh a hihtaak manin, a si kik thei nawn kei, chih i thei a, sihna in amah uk theihna a nei nawnta kei, chih i thei hi. 10 Ama' sihna bel, khatveia setden dinga khelhna sihsanna ahi. Ahihhangin, a hinna bel, Pathian lama hinga nuntakna ahi. 11 Tua mah bangin, noute zong khelhna sihsantain kisim un. Ahihhangin, Khrist Jesu i Toupa ah, Pathian lama hinga nungtain kisim un. 12 Tua bang ahih manin, pumpi' lunggulhna giloute' thumang dingin, a sithei na pumpi uh, khelhna uksak kei un. 13 Na pumpi kahiangte uh zong, diktatlouhna vanzat dingin, khelhna kiang ah tahlut kei un. Sihna apan hinsak na hih bangun, Pathian kiang ah kitahlut zaw un. Na pumpi kahiangte uh zong, diktatna vanzat dingin amah kiang ah tahlut un. 14 Noute, Dan nuaia om na hi kei uh a, hehpihna nuaia om na hi zaw uhi. Tua bang ahih manin, khelhna in noute hon uk teitei kei ding hi.
Khelhna' Sila apan Pathian' Sila
15 Bang i genta dia le? Dan nuaia om hilou a, hehpihna nuaia om i hih manin, eite i khial ding ahi diam? Khial peuhmah lou e! 16 Kuapeuh nuaia a thu mang dinga sila-a na kitahlut chiangun, a thu na manpa uh' silate na hi uhi. Khelhna' sila suahna in sihna a tun a, thumanna' sila suahna in diktatna a tun hi. Hibang ahih lam na thei kei ua hia? 17 Ahihhangin, Pathian tung ah kipahthu om hen. Noute, khelhna' sila na hita mah le uchin, Pathian in thu-up sinsakna nuai ah hon tahlut a, lungtang takin tua thu-up sinsakna thu na mangta uhi. 18 Khelhna apan suahtaksakin na omta uh a, diktatna' sila na hong hita uhi. 19 Noute, pianken lungsima hatlou na hih manun, mihing thugen daana gen ka hi. Na pumpi kahiangte uh, nitna leh danbeia gamtatna silain na tahlutta uh a, tua in danbeia gamtat semsemna hon tun hi. Tua mah bangin, tuin siangthou nadingin diktatna silain kitahlut un. 20 Noute, khelhna' sila na hih laiun, diktatna nuai ah na om kei uhi. 21 Tua laiin tu-a na zahpih thilte ua panin bang gah na nei ua eita? Tuate'n atawpin sihna hon tun ahi. 22 Ahihhangin, tuin Pathian in noute, khelhna apan hon suaktasakta a, Pathian' silate na hong suakta uhi. Tua hangin, siangthouna lam ah gah na suah uhi. Tua tawpna Tangtawn hinna ahi. 23 Ahang bel, khelhna thaman sihna ahi a, ahihhangin, Pathian' thawnpiak bel, i Toupa Khrist Jesu ah Tangtawn hinna ahi.
Dan Sihsanna Pathian Lama Hinna
1 Sanggamte aw, Dan in mi a damsung teng kia a uk hi. Dan theite kianga thugen ka hi. 2 Ettehna khat la lehang: Pasal nei numei peuhmah, dan khat in a pasal damsung teng, a pasal ah a henkhawm hi. Ahihhangin, a pasal a sih nungin, a pasal neihna dan apan khahkhiak ahi. 3 Tua numei in a pasal damsungin pasal dang nei leh, angkawmnu chih ahi ding hi. Ahihhangin, a pasal a sih nungin, dan apan khahkhiak ahi. Pasal dang nei mah leh, angkawmnu, chih ahi kei ding hi. 4 Tua bang ahih manin, sanggamte aw, noute'n zong, Khrist' pumpi tungtawnin, Dan na sihsanta uhi. Tua bel, mi dang khat, misite lak apan kaihthawhpa na kiteenpih theih nading uh ahi. Tua bel, Pathian lama gah i suah nading ahi. 5 Eite, khelhna pianken lungsim tawh i om laiin, Dan in khelhna lunggulhnate a phawnghalh a, tua khelhna lunggulhnate'n eite sung ah nna a sem a, sihna hon tun hi. 6 Ahihhangin, tu'n bel, eite hon na hen Dan sihsanta i hih manin, tua Dan apan suahtaksak i hita hi. Tua bang ahih manin, Dan a laithu leltak tawh kisai hindan lui bang hilouin, Kha-a thakna tawh, Pathian' nna i sem theita hi.
Dan in Hondam Theilou
7 Tua bang ahih leh, bang i genta dia le? Dan khelhna ahi-a hia leh? Hi peuhmah lou! Dan pansanin thei kei leng, ke'n khelhna ka meltheih kei ding hi. Dan in: Deihgawhna gilou nei ke'n, chi kei leh, ke'n deihgawhna gilou khelhna ahi, chih ka thei kei ding hi. 8 Ahihhangin, khelhna in tua Dan lemtanga zangin, keima' sunga deihgawhna nin namkim om a kilangsak hi. Ahang bel, Dan tawh kisai louin, khelhna a si ahi. 9 Khatvei laiin, Dan tawh kisai louin ka nungta hi. Ahihhangin, thupiak hong tun takin, khelhna keia om hong gamtaang a, kei ka si hi. 10 Hinna tun dinga ngim thupiak in, a taktakin sihna hon tun zawsop, chih ka mu hi. 11 Ahang bel, khelhna in thupiak lemtanga zangin, kei hon khemzou a, thupiak pansanin kei hon hihlum hi. 12 Tua bang a hih manin, Dan a siangthou a, thupiak zong a siangthou a, a dik a, a hoih, chih a kitel hi. 13 A hih leh, thil hoih kei adingin sihna hong suak ahi maw le? Hi peuhmah lou! Ahihhangin, khelhna pen a hihna bangtaka a kimeltheih theih nadingin, thil hoih tungtawnin kei sung ah sihna a tun hi. Tua bel, khelhna pen, khelhna a hih luatdan thupiak tungtawna latsak a hih nading ahi. 14 Dan zaw khalam thil ahi, chih i thei. Ahihhangin, kei bel khelhna pianken nei ka hi a, tua khelhna pianken in khelhna nuai ah salin hon khawngkhia hi, 15 Ka thilhih naak ka theisiam thei kei. Ka hih nop lam ka hih kei nak a, ka huat lam ka hih naak hi. 16 Tua banga ka thilhih naak pen ka huat lam ahih nung, Dan a hoih ka chihpih, chihna ahita hi. 17 Tua a thilhih pen kei ka hi nawn kei a, kei sunga sungteen khelhna ahi zaw hi. 18 Ka sung ah a hoih bangmah a teeng kei, chih ka thei hi. Tua bel, ka khelhna pianken ah, ka chihna ahi. Ahang bel, thil hoih hih nopna ka nei a, ahihhangin, thil hoih hih theihna ka nei kei hi. 19 Ka hih taktak pen, thil hoih ka hih nop pen ahi kei a, a gilou ka hih noplouh pen ahi ka hih naak. 20 Ka hih noplouh pen ka hih naak nung, a hihpa kei ka hi nawn kei a, kei sunga sungteen khelhna in a hih naak ahi zaw hi. 21 Tua teng apanin, kei sunga nasema gamtang hiai dan ka mukhia hi: Thil hoih ka hih nop laitakin, a gilou in kei hon ompih a na hi. 22 Ka sunglam mihinna ah, Pathian' thupiak ka paakta hi. 23 Ahihhangin, ka pumpi kahiangte-a sem, dan dang khat a om, chih ka thei hi. Tua in ka lungsim dan a dou a, ka pumpi kahiangte-a om khelhna dan nuai ah, salin hon kai hi. 24 Migenthei hina lawmlawm ing e! Hiai sihna pumpi apan kua'n hon hukhe mahmah ding ahia? 25 Pathian tung ah kipahthute om hen aw ama'n i Toupa Jesu Khrist tungtawna hon hukhe ding hiven! Tua bang ahi mawk a, ka sunglam mihinna lungsim ah Pathian' Dan nuaia sila ka hi a, ahihhangin, khelhna pianken ah, khelhna dan nuaia sila ka hi.
Kha dana Nuntakna
1 Tua bang ahih manin, tu'n zaw, Khrist Jesu-a om a, khelhna dan zui loua, Kha dan zuia nungtate adingin, mawhtansakna himhim a omta kei hi. 2 Ahang bel, hinna Kha dan in Khrist Jesu tungtawnin, khelhna leh sihna dan apan kei hon suaktasakta hi. 3 Pianken khelhna hanga Dan hatlou ahih mana a hihtheih het louh, Pathian in a hih hi: Ama'n ama' Tapa mahmah, khelhna sa nei mihing batpihin, khelhna thillat hi dingin hon sawl a, ama' tungtawnin, khelhna sa nei mihinga khelhna om pen mawh a tangsakta hi. 4 Tua bel, ama'n, khelhna pianken khelhna sa dan banga nungta nawn lou a, Kha' dan banga nungta eite sunga Dan in a ngiat diktatna a kimsakna ahi. 5 Pianken khelhna sa' lungsim banga nungtate'n pianken khelhna sa' lunggulhte mah a lunggulh uh a, ahihhangin, Kha' lungsim banga nungtate'n bel Kha' lunggulhte mah a lunggulh uhi. 6 Pianken khelhna sa' lungsim put zaw sihna ahi. Ahihhangin, Kha' lungsim put bel hinna leh lungmuanna ahi. 7 Pianken khelhna sa' lungsim put zaw, Pathian tawh kimelmakna ahi. Ahang bel, tua bang lungsim Pathian' Dan nuai ah a kitahlut kei a, kitahlut zong a kitahlut thei kei himhim hi. 8 Tua bang ahih manin, pianken khelhna sa' uka omte'n Pathian a lungtaisak thei kei hi. 9 Ahihhangin, Pathian' Kha noute sunga teeng taktak ahih naak leh, pianken khelhna sa' uka om na hi kei uh a, Kha' uka om na hi zaw uhi. Mi kuapeuh Khrist' Kha neilou lah Khrist-a ahi kei hi. 10 Ahihhangin, noute sunga Khrist om ahih naak leh, khelhna hangin, na pumpi uh a si a, hinapi-in, diktatna hangin, na kha uh bel a hing hi. 11 Misite lak apan Jesu kaithoupa' Kha noute sunga teeng ahih naak leh, misite lak apan Khrist kaithoupa'n, noute sunga teeng a Kha tungtawnin, a sithei na pumpi uh zong a hingsak ding hi.
Kha'Piak Ta-hihna
12 Tua bang ahih manin, sanggamte aw, eite leiba nei mi i hi. Pianken khelhna sa' lungsim banga nungta dingin, pianken khelhna sa tung ah bel lei i ba kei hi. 13 Ahang bel, pianken khelhna sa' lungsim banga na nuntak uleh, na si ding uhi. Ahihhangin, pianken khelhna sa' thilhihte Kha pansana na hihlup zel uleh bel na hing ding uhi. 14 Ahang bel, Pathian' Kha pii-a omte peuhmah Pathian' tate ahi uhi. 15 Launa nuaia saltan kikna Kha ngah na hi kei uh a, tate suahna Kha ngah na hi zaw uhi. Tua Kha pansanin, Abba, Pa, chi-in i kikou hi. 16 Eite, Pathian' tate i hi, chih, Kha mahmah in eite kha hon theihpih hi. 17 Tua banga tate i hihtak manin, Pathian' gouluahte, Khrist tawh gouluah-khawmte i hi. Tua bel, ama' thupina i tan sam theih nadinga amah tawh thuakkhawm i hih taktak leh, chihna ahi.
Tunung Thupi nading Lametna
18 Tu huna i thuaknate, denchianga eite' thupina hon latsak pah ding tawh teh thamin ka sep kei hi. 19 Pathian' tate latsak nading, thilsiam khempeuh in ngaklahtakin a ngak hi. 20 Ahang bel, thilsiam khempeuh, siattheihna nuaia koih takdih ahi uhi. Amau' deihtela tua banga koih ahi kei uh a, tua banga koihpa' deihtelna banga, lametna neia koih ahi zaw uhi. 21 Siattheihna nuaia saltanna apanin thilsiamte suahtaksak ahi ding uh a, Pathian' tate' noplenna thupi sung lutsak ahi ding uhi. 22 Tu dongin, thilsiam khempeuh, nauvei natna thuak bangin, thumin a mau uhi. 23 Amaute kia hilouin, gah masa Kha nei eite mah zong, lungsung ah thumin i mau hi. Ta pichingte suahna, tua i pumpi tatna ding i ngaaklah man ahi. 24 Hiai lametna neia hotdam i hita uhi. Ahihhangin, muhsa lametna bel lametna ahi kei. Kua'n a muhsa banghanga lamen lailai ding ahia? 25 I muh nailouh i lamet leh bel i ngak teitei hi. 26 Tua bang a hihna ah, Kha in i hatlouhnate ah hon huh gige hi. Eite'n i nget ding bangin Pathian kianga i nget ding nangawn i thei kei a, ahihhangin, Kha mahmah in thu-a genkhiak theihlouh maunatein, eite adingin hon thumsak hi. 27 I lungtangte veel a, theivekpa Pathian in Kha' lungsim a thei a, tua Kha in Pathian' deihlamin, misiangthoute adingin a thumsak hi. 28 Ahihhangin, thil bangkim ah Pathian in amah itte adingin a hoihlam ngenin a sem, chih i thei hi. Amah itte bel, ama'n a tup leh a ngim bangbanga a sapte ahi. 29 Ahang bel, Pathian in a theihkholhte, a Tapa batpih-a bawl dingin a sepkhol hi. Tua bel, amah, sanggam tampite laka a khatna ahih theih nading ahi. 30 Ama'n a sehkholhte a sam lai a, a sapte dik a tangsak lai a, dik a tansakte a thupisak lai hi. 31 Tua bang ahih leh, hiai thilte tawh kisaiin bang i genta dia le? Eite lama Pathian pang ahih nung, kua'n hon dou zou peuhmah ding ahia? 32 Ama' Tapa nangawn siit loua, hon pumpiak Pathian in, deihsaktakin thil bangkim tawh hon pekhawm tawk lou ding hia? 33 Pathian in a teelsa mite kua'n siattuta hek ding ahia? Amaute diktangsakpa lah Pathian hi a! 34 Amaute kua'n mawhtangsak peuhmah ding ahia? Eite taanga si, thamloua thou kik, Pathian' taklama tu a, hon thumsakpa lah Khrist hi a! 35 Khrist' itna apan eite kua'n hon khenkhe ding ahia? Gimthuakna, gentheihna, gelgawtna, kialna, vuaktanna, sih lauhuaina, ahih kei leh, namsau in maw? 36 Nangma hanga sun nitumtuma sihna maituah ung a, gawh ding belamte banga sim hi ung, chi-a na kigelh bangin, namsau in hon khenkhe ding hia? 37 Khenkhe lou hiai ding. Hiaite khempeuh ah, hon Itpa tungtawnin, vualtungtuangte sanga tungtuang zaw i hi. 38 Sihna in zong, hinna in zong, vansawltakte'n zong, thuneihna neite leh vangletna neite'n zong, tu huna om thilte'n zong, hong tung pah ding thilte'n zong, 39 sanna in zong, thuukna in zong, thilsiam khempeuh laka bang peuh in zong, Khrist Jesu i Toupa-a om Pathian' itna apan eite hon khenkhe thei kei ding, chih theitelin ka muang mahmah hi.
Israel Hamphatna Mansuah
1 Ke'n Khrist ah thutak ka gen a, zuau ka gen kei. Kha Siangthou ah ka sia-le-pha theihna lungtang in hon theihpih hi: 2 Ka lungtang ah lungkhamna leh dahna bei theilou ka nei hi. 3 Ahang bel, ka sanggamte, sa dana ka minampih Israelte hoih nading a hih peuhmah leh keimah hamsethuaka omin, Khrist apan satkhiakin om thei leng ut hiai ka hi. 4 Tate-a bawlna amautea hi a, Pathian' thupina, thukhunte, Dan neihna, tempul biakna leh thuchiamte amautea ahi. 5 Pubulte amautea hi a, Khrist nangawn mihing hihna lama tua pubulte' khangguia hong piang ahi. Amah lah mi khempeuh tunga Pathian, Tangtawna phata om hi ahi! Amen.
Thuneihnakim nei Pathian
6 Pathian' thu bangmah lou suakta bang ahi kei hi. Ahang bel, Israel suante, Israel hi vek lou uhi. 7 Abraham' suante ahih man lel-un, Abraham' tate taktak hi vek tuan lou uhi. Tua naksangin, Isak ah na suan a kiminlawh zaw ding, chih ahi. 8 Thu dangin gen lehang, sa-a piandan ngeina-a piangte, Pathian' tate ahi kei uh a, thuchiam banga piangte ahi zaw Abraham chisuana kisim, chihna ahi. 9 Ahang bel, tua thuchiam hibangin a kigen hi: Hibang hunin kei kong pai ding a, Sara in tapa a nei ding, chi-in. 10 Tua kia ahi kei. Rebek' tate'n pa khat akibang a nei uh. Tua bel, eite' pa Isak ahi. 11 Hinapi-in, tua taphikte a pian maun, a sia a pha bangmah a hih maun, thu khat a kigen hi. Tua bel, teelna tawh kisaia, Pathian' thiltup leh ngim a paisuak nading ahi. 12 A uzaw in a nauzaw' nna a sem ding, chi-in, Rebek kiang ah a na kigen hi. 13 Jakob ka itta, Esau ka mudahta, chi-a na kigelh bangbang ahi. 14 Tuabang ahih leh, bang i genta dia le? Pathian in diktattaka vaihawm lou ahi, chihna ahi diam? Hi peuhmah lou! 15 Ama'n Mosi kiang a: Zahngaihna ka neihna mi tunga zahngaihna nei ding ing a, lainatna ka neihna mi tunga lainatna nei ding hi'ng, a na chi hi. 16 Tua bang ahih manin, mihing' lunggulhna, ahih kei leh, hahkatna thu ahi kei a, Pathian' zahngaihna thu ahi zaw hi. 17 Ahang bel, Laisiangthou in Faro tawh kisaiin: Hiai ngimna leh tupnain nang kon domsang hi. Tua bel, nang tungtawna ka vangletna ka latsak theih nading leh, leitung khempeuha ka min a kiphuanzak theih nading ahi, chi-in a na gen hi. 18 Tua bang ahih manin, Pathian, a zahngaih nopna mi peuhmah tung ah a zahngai a, a lungkhauhsak nop mi peuhmah a lungkhauhsak hi. 19 Noute'n ka kiang ah: Tua bang ahih leh, Pathian in banghanga eite hon mawhsa lai ahia? Ama' deihtelna kua'n nang ahia? non chi uh ahi mai thei. 20 Ahihhangin, mihing aw, Pathian seel vial ding nang kua na hia? Thilsiam in amah Siampa kiang ah: Banghanga kei hibanga hon siam na hia! a chi dia hia? 21 Beelvelpa'n, beellei tang khat apan a manpha-a zat ding beel leh, zat vantanga zat ding beel vel dingin, bellei tang kibang tung ah thuneihna a nei kei-a hia? 22 Pathian in a thangpaihna langsak a, a vangletna theihsak ding teela, a thangpaihna tukna, tua hihsiat dinga saksate' tunga dawhzawhna lianpi neia a thuakzawh leh, eite'n bang gen zenzen ding i hia? 23 Ama'n a zahngaihna tukna, tua thupina tang dinga a sakkholhsate' kianga a thupina thupi kichin dan a theihsak nop mana hiai hih a hih leh, eite'n bang gen zenzen ding i hia? 24 Tuate lah eite nangawn, Judate lak apan kia sap hilou, Zentelte lak apana zong sap hi samte hi i hi. 25 Ama'n Hosia laibu sunga: Ka mi hiloute, ka mite chi ding ing a, itlouhnu, itnu chi ding hi'ng, a na chi hi. 26 Tua baan ah: Noute ka mite hi kei uteh, a kichihna mun ah, Pathian Hing' tate chiha hong om ding uhi, a chih bangbang ahi. 27 Israel tawh kisaiin, Isai kikoukhia a: Israel tamdan tuipi piaua sehnel zah hi mah leh, a sibangte kia hotdam hi ding uhi. 28 Ahang bel, Toupa'n leitung ah diktattakin leh setden dingin thu khen pah ding hi, a na chi hi. 29 Isai in ama lam a: Toupa Vanglianpen in, chisuan hon na hawisak lou hi leh, Sodom bang suakta ding hang a, Gomora banga bawl hita ding hi hang, chi-a, a na gen bangbang ahi.
Tuhuna Israel Omdan
30 Tua bang ahih leh, bang i genta dia le? Diktatna delh lou Zentelte'n upna pansana om tua diktatna a ngahta uh. 31 Diktatna Dan delh Israelte'n lah, tua diktatna a ngah zou kei uh. 32 Banghanga ngah zou lou uhiam? Amaute'n upna pansana delh loua, Dan zuihna pansana ngah ding banga a delh man ua, ngah zou lou uh ahi. Kipalpaihna Suang ah a kipalpaita uhi. 33 Ngai in, Zion ah kipalpaihna suang leh, pukna suangpi koih ka hi, amah umte peuhmah zahlak ngeilou ding hi, chi-a na kigelh bangbang ahi.
Israelte' Taksap: Tangthupha
1 Sanggamte aw, Israelte adinga ka lungtang' lunggulh leh Pathian kianga ka thumna zaw, amaute hotdam ahih theih nading uh ahi. 2 Ahang bel, amaute, Pathian lam ah a phatuamngai uh, chih ka theihpih hi. Ahihhangin, a phatuamngaihna uh, theihna tunga kibulphuh ahi kei hi. 3 Pathian apan hong tung diktatna a theihlouh manun, amau' diktatna lamkhiak a sawm uh a, Pathian' diktatna ah a kitahlut kei uhi. 4 Ahang bel, a ummi peuhmah adinga diktatna ngah nadingin, Khrist ahi Dan in a ngim diktatna. 5 Dan pansana diktatna pen, Mosi in hibangin a na gen hi: Tuate hih mi zaw, tuate hihin a hing ding hi, chi-in. 6 Ahihhangin, upna pansana diktatna in bel hibangin a gen hi: Na lungtangin: Vaantunga kua kaltou ding? chi ken. Tua bel, Khrist hon piisuk ding, chihna ahi. 7 Ahih kei leh: Khuuk thuuk ah kua kumsuk ding, chi ken. Tua bel, misite lak apan Khrist piitou ding, chihna ahi. 8 A hih leh, bang gen ahia? Na kiang chin ah thu a om. Na kamsung ah leh na lungsung mahmah ah a om, a chi hi. Tua bel, upna thu ka tangkoupih uh ahi: 9 Jesu, Toupa ahi, chi-a na kama na gup a, amah misite lak apan Pathian in a kaithou, chih lungtanga na up chiangin, hotdam na hi ding, chih. 10 Ahang bel, na lungtangin ahi na up a, diktatna na ngah. Na kamin ahi na genkhiaka, hotdamna na ngah. 11 Laisiangthou in: Amah muang mi peuhmah a zahlak ngei kei ding, chi-a a na gen bangbang ahi. 12 Ahang bel, Juda leh Zentel kal ah kilam-danna himhim a om kei hi. Toupa kibang leh kikhat, mi khempeuh tunga Toupa ahi a, amah samte khempeuh a kichingin a vualzawl hi. 13 Ahang bel, Toupa' min sama beel peuhmah hotdam ahi ding, chih ahi.
Israel NoUma
l4 Tua hileh, amaute'n a up louhpa uh, bangchi'n a sam thei ding ua? A thu a zak louhpa uh bangchi'n a um thei ding ua? Amaute kianga thuphuang omloupi-in bangchi'n a thu a za thei ding ua? 15 Sawl hiloupi-in kua'n bangchi'n a thu a phuang thei ding ua? Lungmuanna tangthupha phuang a, thuhoih thu hon tunte' khe kilawm hi nah e! chi-a na kigelh bangbang ahi. 16 Ahihhangin, Israel khempeuh in tua tangthupha saang kim lou hi. Ahang bel, Isai in: Toupa, koute' thupuak kua'n um hiam? a na chikhinta hi. 17 Tua bang ahih manin, zaakna pansana upna hong om a, zaakna lah Pathian thupuak pansana hong om ahi. 18 Amaute'n a za kei ua hiam chi dek leng lah, za thamtham uhi: Amaute' aw leitung khempeuh tungkhinta a, a thu uh kawlmong donga thangkhinta hi, chih hiven, 19 Ahih leh, Israelte'n a theisiam kei ua hiam? chi kik dek leng lah, a masapenin Mosi in: Nam hiloute zanga hazatna hon neisak ding ing a, theihsiamnabei nam khat zanga hon hehsak ding hi'ng, na chi khinta hi. 20 Isai in hangsantaka: Kei hon zongloute' muha om ing a, kei hon ngen loute' kianga kilaakta hi'ng, na chikhin zel hi. 21 Ahihhanga, Israel tawh kisaia ama'n: Nam genhak leh thumanglou adinga sun nitumtuma baan zak hi'ng, na chikhin hi.
Israel Nolh Hiveklou
1 Ahih leh, Pathian in a mite nolh hiam? ka chi. Nolh peuhmah lou! Keimah mah zong Israel mi ka hi. Abraham' suan khat ka hi. Benjamin beh apan piang ka hi. 2 Pathian in a theihkholhsa, a mite a nolh kei hi. Laisiangthou in Elija thu a gen na thei kei ua hia? Ama'n Israel mawhsakna Pathian kiang a tut a: 3 Toupa, amaute'n na kamsangte a that uh. Na maitamte a hihchim uh. Kei kia mahmah a damsun ka hi. Kei nangawn thah hon sawm uh, a chih theilou na hi umaw? 4 Pathian dawnna bang ahia le? Pathian in: Baal maia khukdin ngeilou, mi 7,000 kei adingin ka siit, a chi hi. 5 Tua mah bangin, tu hunin zong a sibang, hehpihna pansana a teel a om uhi. 6 Hehpihna pansan ahih nung, nasep thilhih pansan ahita kei hi. Tua bang na hi kei leh, hehpihna kichi, hehpihna ahita kei ding a, nasep thilhih zong, nasep thilhih a hita kei ding hi. 7 Bangchi ahita dia? Israel in lah a zon ngah lou, ahihhanga telte'n ngah. Adangte khauha taakgawpta ahi ve ua. 8 Pathian in tuni donga, amaute lusukna pia hi. Muh theihlouh nading mitte pia a, zak theihlouhna ding bilte pia hi, chi-a na kigelh bangbang ahi. 9 David in: A mai ua ankuang kilui thaang leh pial suak henla, amaute adingin kipalpaihna leh pukna suak hen. 10 A muh theihlouh nadingun, a mitte uh mialsakin om henla, a nungzangte uh kulden hen, a na chi hi.
Israel Nolhna, Zentelte' Hamphatna.
11 A hih leh, amaute thou nawn lou dinga kipalpai ahi ua hiam ka chi lai hi. Hi peuhmah lou! Amaute' tatlekna hangin, Zentelte kiang ah hotdamna hong tung ahi. Tua bel, Israel' hazatna tawhthawha a om theih nading ahi. 12 Amaute' tatlekna, leitung bup adinga hauhna hong suak a, amaute' supna, Zentelte adinga hauhna hong suak ahih nung, amaute' bukimna in bangzahta-a hauhna hon tun tazen ding ahia! 13 Tuin, nou Zentelte kianga thugen ka hi. Kei, Zentelte kianga sawltaklian ka hihna zahzahin ka nasep ka sial hi. 14 Ahang bel, bangchi hiam beeka, sa dana ka nampihte ka hazatsak a, a lak ua pawlkhat beek ka hotdam theih leh, chih ka lamet ahi. 15 Amaute nolhna, leitung bup kilempihkikna ahih nung, amaute saankikthakna, misite lak apan kaihthawhna hilou bang dang ahi dia? 16 Anvui neel mekman sehkhen khat, gahmasa banga lat pen a sianthou nung, anvui neel mekman a lompi-in a siangthou hi. A zungpi a sianthou nung, a kahiangte a siangthou hi. 17 Pathian in kahiang pawlkhat a satkhia a, nang oliv taklou hinapi, oliv tak ah hon phutlutin hon zom a, oliv zungpi apan hinna tui na kikoppih hi. 18 Tua bang ahih nung, tua kahiangte tung ah kisathei vial ken. Na kisaktheih leh, hiai ngaihsun in: Nang, zungpi vakpa na hi kei a, a zungpi in nang hon vak ahi zaw hi. 19 Pathian in kei hon phuhluta hon zop theih nadinga kahiangte satkhia aka, na chi ahi mawh kei ding. 20 Ahi, ahihhangin, amaute uplahna hanga satkhiak ahi uh. Nang bel, upna pansana ding na hi. Kiuangsak kenla, lauthawng khilkhial taven. 21 Pathian in oliv tak hiangte nangawn hawi lou ahih chiangin, nang zong hon hawi lou thei mahmah ahi aw! 22 Tua bang ahih manin, Pathian' migitna leh thukhauhna ngaihsun in: A pukte tung ah a thukhauh a, ahihhangin, nang tung ah a migi hi. Tua bel, a migitna sunga na om gige leh, chihna ahi. Tua banga na om kei leh bel, nang zong hon saatkhe sam ding hi. 23 Amaute zong, uplahna-a a om nilouh kei uleh, phuhluta zopkik ahi ding uhi. Pathian in amaute phutlutin a zom kik thei hi. 24 Nang, oliv taklou bawn, pianken ngeina lou banga, oliv taka phuhluta zop na hih nung, oliv tak kahiangte, oliv tak ah phuhluta zop hi tawk lou ding uhia?
Israel Saankikna
25 Sanggamte aw, noute'n hiai thusim kiseel na theih louh uh ka deih kei hi. Tua hi kei leh, na kipilsak kha ding uhi. Zentelte bukimna a hong tun masiah adingin, Israel tung ah lungtang khauhna bang zah hiam hong tung ahi. 26 Tuachi-in, Israel khempeuh hotdam ahi ding uhi. Hukhepa Zion apan hong pai ding, ama'n, pathianmitna limsaklouhna, Jakob apan lamang ding hi. 27 Ahang bel, a khelhnate ka lakmang chianga ka thukhun ding hiai hiven, chi-a na kigelh bangbang ahi ding hi. 28 Tangthupha tawh kisaiin, noute hangin, amaute melmate ahi uhi. Teelna tawh kisaiin bel, pubulte hangin, itte ahi uhi. 29 Ahang bel, Pathian' thawnpiak leh a sapna kikhel thei hilou hiven. 30 Khatvei laiin Pathian thu mangloute na hi uh a, tuin, amaute' thumanlouhna hangin, zahngaihna na ngah uhi. 31 Tua mah bangin, tuin amaute thumangloute ahi uh a, tua bel, noute' tunga Pathian zahngaihna hanga, amaute'n zong zahngaihna a ngah theih nading uh ahi. 32 Pathian in mi khempeuh tunga zahngaihna a neih theih nadingin, mi khempeuh, thumanlouhna ah a khakkhum vekta hi.
Pathian Pahtawina
33 Pathian' pilna leh theihna hauhna thuuk hina tel e! A lunggelnate theihkhiak zawhlouh hi natel e! A lampite muhkhiak zawhlouh hina tel e! 34 Toupa' lungsim kua'n ahia thei? Amah thuhilhpain kua ahia pang? 35 Pathian in a ditkik dinga kua'n ahia amah leitawisak ngei? 36 Thil bangkim amah apan, amah tungtawn leh amah adinga om ahi. Ama' tung ah Tangtawnin thupina omta hen! Amen.
Kithoihna Hing
1 Tua bang ahih manin, sanggamte aw, Pathian' zahngaihna ngaihsunin, na pumpite uh kithoihna hinga a siangthou leh, Pathian' lungtaina hi dinga laan dingin kon kun hi. Tua mah, noute adingin, khalama biakna thilhih ahi. 2 Tulai leitung nuntak zia bangin nungta nawn kei unla, Pathian' deihlam bukim, a hoih leh ama' lungtaina bang hi hiam, chih entela, pha na sakpih theih nadingun, na lungsim uh thaksakna pansana, mi kipumkhek suakta un.
Kha' Thawnpiakte banga Sep
3 Pathian in kei kianga hehpihna hon piak pansanin, noute kiang ah hiai kon gen ahi: Noute, na hihna uh kheng vala lianin kingaihsun kei un. Pathian in noute upna hon piak zahin, lungsim chiimtakin na hihna chiang uh ngaihsun zaw un. 4 Eite tek in pumpi khat i nei chiat. Tua pumpi ah kahiang tampi i nei. Hiai kahiangte'n sep kibang a sem vek kei uh. 5 Tua mah bangin, Khrist ah, eite tampi hinapi-in, pumpi khat i hi a, kihiangtuah tek i hi. 6 Eite kianga hehpihna hon piak bangbangin, thawnpiak tuam tek i ngah uhi. Mi khat kianga thawnpiak, kamsang thugen theihna ahih leh, ama'n a upna tawh kikhomin thu gen hen. 7 Midang kianga thawnpiak, nasepsakna ahih leh, tua bangin sem hen. Sinsakna thawnpiak ngah mi in, tua bangin sinsak hen. 8 Hanthawnna thawnpiak ngah mi in, tua bangin hanthawn hen. Tasamte' taksap awnghukna thawnpiak ngah mi in thilphaltakin pia hen. Makaihna thawnpiak ngah mi in, thanuamtakin ma kai hen. zahngaihna nasep thawnpiak ngah mi in, lungtaitakin zahngaihna nna sem hen.
Khristian Gamtatna
9 Itna ahih leh, atak, lepchiahna tellou hi hen. A hoihlou peuhmah hua unla, a hoih peuhmah leen tinten un. 10 Sanggam ki-itnain kideihthawh tuah tek un. Pahtawina kipiak lam ah, a pe masa hih kituh un. 11 Toupa' nasep lam ah, hahkatna tasam louin khalam lunglawpna neiden zaw un. 12 Lametna ah lungnuam un. Haksa thuakna ah thuakhat un. Thumna ah kuhkal un. 13 Misiangthoute' taksap awng hu dingin na neih na lam uh kikoppih un. Zindou siamna lunggulh un. 14 Noute hon bawlsete vualzawl un. Vualzawl unla, hamsiat kei un. 15 Lungnuamte lungnoppih unla, kapte kahpih un. 16 Khat leh khat lungsim kibanga kilemtakin nungtakhawm un. Kisathei louin, mi niamte tawh kipawl nuam un. Kipilsak kei un. 17 Gilou, gilouin thuk kei un. Mi khempeuh mitmuha a dik hih dingin pilvang un. 18 Nou lam pana hih theih ahih liai leh, mi khempeuh tawh kilem un. 19 Ka itte aw, phu kila kei un. Thangpaihna, Pathian awn zaw un. Phulak keia ahi, ke'n ka thuk ding, Toupa'n a chi, chi-in na kigelh hi. 20 Tua naksangin, na meima a gilkial chiangin, nek ding pia in. A dangtak chiangin, dawn ding pia in. Tua banga na hih leh, ama' luzanga meiam kholkhawm na hi ding, chih ahi. 21 Gilou kizousak kenla, a hoihin gilou zouzaw in.
Kumpi Thuneihna
1 Kuapeuh, vaihawm thuneite thuthu-a a om ding ahi. Pathian' piak louh, thuneihna nei a om kei hi. Thuneihna neia vaihawmte Pathian seh ahi. 2 Tua bang ahih manin, thuneihna seela nang mi peuhmah in Pathian' thuseh seela nang ahi. Tua banga hih mite'n, amau tung ah thukhenna a kitut ding uhi. 3 A hoiha gamtate adingin, vaihawm mite a lauhuai kei uh. A hoihloua gamtate adingin bel, a lauhuai uhi. Thuneihna nei mi launa apan na suakta nuam hia? Tua ahih leh, a hoihin gamta lechin, ama'n hon phat ding hi. 4 Amah na hoih nadinga Pathian' nasem ahi. Ahihhangin, a hoihloua na gamtat chiangin bel, lau mai in. Ama'n namsau a mawktawi kei hi. Amah, Pathian' nasem mi hi a, a hoihloua gamta mi tunga thangpaihna tuna phula mi ahi. 5 Tua bang ahih manin, thangpaihna lauh man kia hilouin, sia-le-pha theihna lungtang hangin, thuneite' thuthu-a na om ding ahi. 6 Hiai hangin ahi, noute'n siah na piak uh. Thuneite zaw, hunbita vaihawm dinga Pathian' nasemte ahi uhi. 7 Mi chih kiang ah, a ngah dinga kilawm pia un; Siah ngah dingte kiang ah siah pia un. Leiman ngah dingte kiang ah leiman pia un. Zahtakna ngah dingte kiang ah zahtakna pia un. Pahtawina ngah dingte kiang ah pahtawina pia un.
Veng leh pamte lama Mawhpuakna
8 Noute'n, ki-ittuahna loungal, kuamah lei ba kei un. Ama' mihinpih itmi in, Dan zuikim ahi. 9 Angkawm ken, Tuai that ken, Gu ken, chih leh, thupiak dang himhim hiai thupiak khat in a tunkhawm hi: Nang na ki-it bangin na veng na pamte it in, chih. 10 Itna in a veng a pam siatna a hih kei hi. Tua bang ahih manin, Dan zuihkimna ahi. 11 Tu hun, bang hun hi hiam, chih na theih manun, tua banga na hih ding uh ahi. Ihmu khanlawh a hunta hi. A hang bel, eite'n i up chil lai sangin tuin i hotdamna hong nai zawta hi. 12 Zan a beidek dekta a, khua hong vaak dekta hi. Tua bang ahih manin, mial nasepte paimang ni, vaak galvanin kivan ni. 13 A leklua leh zukhamsia leh hukna lanna, numei pasal kal paktatna leh kilang-khenna,deihgawhna om louin, suna gamta bangin a kilawmin nungta ni. 14 Toupa Jesu Khrist silh zaw unla, pianken khelhna sa' lunggulhna pichin dingin hunlem kibawl kei un.
Khristian Noplenna
1 Kiseltheihna thilte ah, upna hatloute mawhsa louin, saan dan siam un. 2 Upna hat mi khat peuh in, bangteng a ne thei maithei hi. Ahihhangin, upna hatlou mi in, antehlouhing kia a ne thei maithei hi. 3 Bangteng ne thei mi in, a ne theilou mi simmawh kei hen. Bangteng ne vek theilou mi in, a ne thei mi mawhsa kei hen. Amah zong Pathian' saansa mi ahi veve hi. 4 Midang' sila mawhsa ding nang kua na hia? Ama' din leh puk thu, ama' toupa'n thu a khen na ke. Toupa'n amah dingsak thei hiven. 5 Mi khat in ni dang sangin ni khat a ngai thupi zaw hi. Mi dang khat in, ni khempeuh kibangin a ngai hi. Mi chih in, ama' lungsung ah tua bangin kiptakin lenden hen. 6 Ni khat, ni dang sanga ngaithupi zaw mi in, Toupa' mai ah tua ni a tang hi. 7 Kuamah ama' ading kia-a hinga nungta ahi kei. Kuamah ama' ading kia-a si ahi sam kei. 8 Eite hinga i nuntak leh, Toupa adinga hinga nungta i hi a, i sih leh, Toupa adinga si i hi. Tua bang ahih manin, i sihin zong, hinga i nuntakin zong, Toupa-a i hi. 9 Hiai ngimna mahin, Khrist a si a, a thoukik hi. Tua bel, amah a site leh a hinga nungtate' Toupa ahih theih nading ahi. 10 Tua ahih nungsang, banghanga nang na sanggam mawhsa ding na hia? Banghanga nang na sanggam simmawh ding na hia? Eite, Khrist' thukhenna tutphah maia ding tek ding i hi. 11 Kei ahing ka hih mana ka maia khuk khempeuh khukdin ding a, Pathian maia lei khempeuh kipulaak ding hi, Toupa'n chi hi, chi-in a na kigelh hi. 12 Tua bang ahih manin, eite'n Pathian' mai ah, eima' tungthu i pulaak tek ding hi. 13 Tua bang ahih manin, kimawh-sak tuah tawpta ni. Kuapeuh a sanggam' maia kipalpaih nading koih lou dingin kithunun hen. 14 Toupa Jesu-a om mi khat bangin kimuangtakin ka gen hi: An khatpeuh amaha sianglou mawng a om kei hi. Ahihhangin, mi kuapeuh in bangpeuh a siangloua a ngaih leh, tua pen ama' adingin a sianglou ahi. 15 Nang nek khatpeuh hanga na sanggam' lungtang a nat leh, itna dana gamta na hita kei hi. Na nek khatpeuh tungtawnin na sanggam hihse ken. Ama' adingin Khrist a sikhin zou hi. 16 Nang a hoiha na ngaih khatpeuh, a kigensiat ding phal ken. 17 Pathian' kumpigam zaw nek leh dawn thu ahi kei. Kha Siangthoua diktatna, kilemna leh lungnopna thu ahi zaw hi. 18 Hibanga Khrist' nasem mi in Pathian a lungtaisak a, mihingte' phat zong a lawh hi. 19 Tua bang ahih manin, eite'n kilemna leh kilamtouhna tun thei thilte delh ni. 20 Nek leh dawn thu leltakin Pathian' nasep hihse kei un: An khempeuh a siang tham a, ahihhangin, an khatpeuh mi'n a nek a, midang khatpeuh' kipalpaihna a tut leh, a ne mi adinga hoihlou ahi. 21 Sanggam khatpeuh kipalpaisak, lungtang nasak, zawngkhalsak ding sa nek hita leh, zu dawn hita leh, a dang khatpeuh zong hih louh a hoih hi. 22 Hibangte khempeuh tawh kisaiin, upna na neih bangbang, nang leh Pathian kal ah nei lei in. Ama' hoihsak thil pen, amah mawhtansakna suaksak lou mi, mi nunnuam ahi. 23 23 Ahihhangin, uplahna nei kawmkawma ne mi in, upna tawh kituaka ne a hih louh manin, amah a kimawhtan ahi. Upna tawh kituak hilou thilhih peuhmah khelhna ahi.
Khristian Noplenna Zatdan
1 A hat eite'n, eima' kipahlam zong loua a hatloute' hatlouhna i puakpih ding ahi. 2 Michih in a veng a pam hoih nading leh lamtouh nadingin, a veng a pam kipahlam a zon ding ahi. 3 Khrist nangawnin ama' kipahlam a zong kei hi. Nou hon selphoute' selphouna keima' tung ah a tu, chi-a na kigelh bangbang ahi. 4 Nidang laia na kigelhte, eite hon sinsak nadinga na kigelh ahi. Tua bel, eite'n Laisiangthou' sinsak thuakhatna leh hanthawnna tungtawna lametna i neih nading ahi. 5 Thuakhatna leh hanthawnna hon pepa Pathian in, Khrist Jesu-a noute kitanauna ah, lungsim kibang hon neisak hen aw. 6 Tua hi leh, lungsim kibang leh gen kibangin, i Toupa Jesu Khrist' Pa Pathian na pahtawi thei ding uhi. 7 Tua bang ahih manin, Khrist in eite hon santaak bangin, Pathian' thupi nadingin, khat leh khat kisaang tuah tek un. 8 Pubulte kianga thuchiamte kipsak dingin Pathian' thutak hangin, Khrist, zeksumte' adingin sila hong hi, chih noute kon hilh ahi. 9 Tua bel, Zentelte'n a zahngaihna hanga, Pathian a pahtawi theih nading uh ahi. Tua hanga Zentelte laka, nang hon phat ding ing a, na min phata la sa ding hi'ng, chi-a na kigelh bangbang ahi. 10 Tuabanah: Nou Zentelte aw, ama' mite tawh lungnuamkhawm un! a chi lai hi. 11 Tuabanah: Nou Zentelte khempeuh in, Toupa phat un! Nou namte khempeuh in amah phatla sa un! a chi sawn lai hi. 12 Isai in: Jese Zungpi hong sel ding a, amah namte tunga vaihawm dinga hong dingkhe dingpa ahi. Zentelte'n ama' tunga lametna nga ding uhi, a na chi hi. 13 Lametna pia Pathian in, amah na muan bangun, lungnopna leh lungmuanna khempeuh tawh noute hon kidimsak hen. Tua hi leh, Kha Siangthou' vangletna pansanin, lametna tawh na kidimlet ding uhi.
Laikhak Thiltup leh Ngim
14 Sanggamte aw, noute, hoihna tawh na kidim uh a, theihna ah na kiching uh a, khat leh khat na kisinsak thei uh chih ka muang hi. 15 Hinapi-in, bang thuthu hiam phawksak nop kon nei a, hangsantakin kon gelh ahi. 16 Ahang bel, Zentelte adinga Jesu Khrist' sila khat hi dinga Pathian in hehpihna kei hon piak man ahi. Pathian' tangthupha, amaute kianga tang-koupihin, siampi nna ka sem hi. Tua bel, Zentelte, Pathian saan tham, thillata lat, Kha Siangthou' sehtuam siangthou hong hih theih nading uh ahi. 17 Tua bang ahih manin, Pathian' thil lam tawh kisaiin, Khrist Jesu ah kisial nading ka nei hi. 18 Pathian thu mang dinga Zentelte pii dinga, Khrist in ka gen leh septe tungtawna a sepkhiakte loungal bel bangmah ka gen ngam kei ding hi. 19 Tua bel, Kha' vangletna pansana thilhihthei mahmah, chiamtehna lamdangte leh vangletna nasepte tungtawna hih ahi. Tua bangin, Jerusalem apan Ilirikam gam kiim teng donga paikualin, Khrist' tangthupha ka phuang kimta hi. 20 Khrist a kitheih nailouhna muna tangthupha gen ka tup ahi ngitnget hi. Tuachi louin zaw, midang' suangphum tunga lam ka hi kha kha ding hi. 21 Ama' thu a kihilh louhnate'n mu ding uh a, a za ngeinailoute'n theisiam ding uhi, chi-a na kigelh bangin hih ka tum zaw hi. 22 Hiai hang mah ahi, noute kianga hong hawh ding daala ka om nilouh.
Paul' Khualzin Sawmdan
23 Ahihhangin, tuin hiai gamte-a ka sep nading mun a om nawn louh tawh, noute kong muh nopna kum tampi a phaktak tawh, 24 Spein gama ka hawh chiangin, noute hong tot ka sawm hi. Ka lamet bel, pai kawma noute hong tot ding, bangtan hiam noute'n kikholhna nuam non piak ding uh, noute'n ka zinsawnna-a non huh ding uh ahi. 25 Ahihhangin, tuin Jerusalem lam ah, tua-a misiangthoute' nasem dingin ka pai ding hi. 26 Makedonia leh Akhaia gama mite'n Jerusalema misiangthoute laka gentheite adingin kipaktakin thawnpiakte a pia uhi. 27 Tua banga thawnpiakte piak a kipahlam uh ahi. Tua banga hih ding a bat uh zong ahi sam hi. Ahang bel, Zentelte'n Judate' khalam vualzawlnate tang sam ahih nung uh, amaute'n zong a sa lam vualzawlnate uh, Judate a tanpih sam uh a bat uh ahi. 28 Ke'n, hiai thawnpiakte ka piakkhiak a, amaute'n a saangna uh chih ka theihtel chiangin, noute kong tawn malam ding a, Spein gam ah ka hawh ding hi. 29 Noute kianga kong hawh chiangin, Khrist tangthupha vualzawlna kim tawh kong hawh ding chih ka thei hi. 30 Ka sanggamte aw, i Toupa Jesu Khrist tungtawnin leh, Kha' itna tungtawnin, noute kon ngen hi: Kei adinga Pathian kianga thumin kidouna-a ka panna ah kei tawh hong pangkhawm teitei un. 31 Judia gama thu-umloute' khut apan hutkhiak ka hih theih nadingin leh, Jerusalem khua-a ka nasep, misiangthoute adinga santaak ahih theih nadingin hon thumsak un. 32 Tua baan ah, Pathian' deihlama noute kianga lungnopna tawh kong hawh a, noute' hihhalha ka om theih nadingin thum un. 33 Lungmuanna Pathian in noute khempeuh hon ompih hen. Amen.
Mimal Chibaibuknate
1 Kenkrie khua-a saptuam' dekonnu, i sanggamnu Fibi, noute kiang ah kon phat hi. 2 Misiangthoute saan ding dan bangtakin, Toupa ah amah na saang unla, noute' huhna a kisapna peuh ah na huh un. Amah mi tampi adingin a phatuam a, kei adingin zong a phatuam hi. 3 Khrist Jesu-a ka seppihte, Prisila leh Akuila chibai hon na buksak un. 4 Amaute'n keima' hinna huin, lubuuk phalin a pang uhi. Amaute tung ah kipahthu ka gen hi. Tua thamlouin, Zentel saptuamte'n zong amaute tung ah kipahthu a gen uhi. 5 Tua mah bangin, amaute' inna saptuam kikhawmte zong chibai hon na buksak un. Ka lawm deihthawh Epeneta chibai hon na buksak un. Amah, Asia gama Khrist lama kihei masapen ahi. 6 Noute adinga nakpitaka nasem Mari chibai hon na buksak un. 7 Ka koltanpih ka tanaute, Andronika leh Junia chibai hon na buksak un. Amaute sawltakliante laka madawkte, keima-a Khrist-a na om masate ahi uhi. 8 Toupa-a ka it Ampliata chibai hon na buksak un. 9 Khrist-a ka seppih uh Arbana leh ka lawm it Stakhu chibai hon na buksak un. 10 Khrist-a ettelsa leh phat ngah Apele chibai hon na buksak un. Aristobula' innsung mite chibai hon na buksak un. 11 Ka tanau Herodian chibai hon na buksak un. Toupa-a om Narsisa' innsung mite chibai hon na buksak un. 12 Toupa-a nasep kuhkal numeite Traifena leh Traifosa chibai hon na buksak un. Toupa-a nasep kuhkal dang, ka lawm deihthawh Persi chibai hon na buksak un. 13 Toupa-a teel Rufa leh a nu, kei adinga zong nu hi sam, chibai hon na buksak un. 14 Asinkhrita, Flegan, Hermi, Patroba, Herma leh, amaute kianga om sanggamte chibai hon na buksak un. 15 Filologa, Julia, Neria leh a sanggamnu leh, Olimpa leh amaute kianga om misiangthou khempeuh chibai hon na buksak un, 16 Kitawp siangthouin chibai kibuk tuah tek un. Khrist' saptuamte khempeuh in chibai hon khak uhi. 17 Ka sanggamte aw, na sinsa uh sinsakna tawh kituak loua kikhenna omsak a, na lampi ua kipalpaihna koihte apan kiveng dingin kon haanthawn hi. Amaute kiheisan un. 18 Tua bang mite, i Toupa Khrist' nasem ahi kei uh a, amau' gilpi ading sem ahi zaw uhi. Kamzol thu leh maitangphat siam thuin mimawlte a khem uhi. 19 Michih in na thumanna uh a zakkhittak manun, noute tunga lungnopna tawh ka kidim hi. Ahihhangin, a hoih lam tawh kisaia pii ding leh, a se lam tawh kisaia mawl dingin noute kon deih hi. 20 Khamuanna Pathian in noute khenuai ah Setan a sikden pahta ding hi. I Toupa Jesu Khrist' hehpihna in noute hon ompih hen. 21 Ka seppih Timothi in noute chibai hon khak hi. Ka tanaute Lusia leh Jason leh Sosipater in zong noute chibai hon khak uhi. 22 Hiai lai hon gelhpa kei Tersia in, Toupa ah noute chibai kon khak hi. 23 A zindou siamna, kei leh saptuam bup in ka tan uh, Gaia in noute chibai hon khak hi. Khawpi kempa Erasta in noute chibai hon khak hi. I sanggampa Kuarta in noute chibai hon khak hi. 24 I Toupa Jesu Khrist' hehpihna in noute khempeuh hon ompih hen. Amen. 25 Leitung pian chil apan a beisa hun sawtpi na kiseel thusim laakkhiaka hong om bangbanga ka tangthupha leh Jesu Khrist kitangkoupihna pansana noute hon phutkip thei Pathian ahi. 26 Pathian' thupiakin, Laisiangthoua kamsang thugente' tungtawnin, tua thusim kiseel tuin laakkhiak leh theihsak ahita. Tua bel, namte khempeuh in a up ua, ama' thu a man theih nading uh ahi. 27 Tua bang Pathian pii omsun tung ah, Jesu Khrist tungtawnin, thupina omdenta hen! Amen.
1 Kei, Pathian in ama' deihlama Jesu Khrist' sawltaklian khat hi dinga a sap Paul leh i sanggampa Sostheni in, 2 Korinth khua-a om, Pathian' saptuam leh, Khrist' Jesu-a sehtuamte leh siangthou dinga sapte kiang ah leh mun khempeuha i Toupa Jesu Khrist' min sama beelte khempeuh kiang ah tawh lai kon gelh uhi. Tua Toupa Jesu Khrist, amaute leh eite' Toupa ahi. 3 I Pa Pathian leh Toupa Jesu Khrist apan hehpihna leh lungmuanna noute tung ah om hen.
Kipahthu Genna
4 Pathian in Khrist Jesu' tungtawna a hehpihna noute hon piak manin, ka Pathian tung ah noute hangin kipahthu ka gen gige hi. 5 Ahang bel, ama'n Khrist tungtawnin banglam peuh ah noute hon hausak in, thugen theihna khempeuh leh theihna khempeuh ah hon hausak hi. 6 Tua bel, Jesu Khrist ka theihpihna uh noute' sunga hihkip a hihtak man ahi. 7 Tua bang ahih manin, i Toupa Jesu Khrist' kilaakna lunglawptaka na ngak kawmun, khalam thawnpiak bangmah na tasam kei uhi. 8 Ama'n noute a tawp dongin hon hihhat ding a, i Toupa Jesu Khrist ni-in genbaanglouin na om ding uhi. 9 A Tapa Jesu Khrist i Toupa tawh kipawlna nei dinga noute hon sampa Pathian a muanhuai hi.
Saptuam Sunga Kipawlkhenna
10 Sanggamte aw, i Toupa Jesu Khrist' mina noute kon hanthawnna hiai ahi: Thu kibang na gen ding uh ahi. Na lak ua kikhenna a om louh ding ahi. Lungsim kibang leh tup kibanga na kiphankhawm ding uh ahi. 11 Ka sanggamte aw, Kloe inkawte laka mi pawlkhat in na lak uah kinakna a om, chi-in hon hilh uhi. 12 Hiai ahi ka gen: A khat a khat in: Ke'n Paul ka zui, Ke'n Apolo ka zui, Ke'n Kifa ka zui, Ke'n Khrist ka zui, na chi tuam tek uhi. 13 Khrist kikhenzak thei hia? Noute adingin Paul a kikilhdena hia? Ahih kei leh, Paul' mina kibaptis na hi umaw? 14 Krispa leh Gaia loungal na lak ua kuamah ka baptis louh manin Pathian tung ah kipahthu ka gen hi. 15 Tua hi kei leh, khat peuh in keima' mina mi baptis hon chi laidep ding hiven. 16 Stefenate innkuan zong ka baptis mah ve. Tua lou mi dang ka baptis lam ka thei kei hi. 17 Khrist in baptis dingin kei hon sawl kei a, tangthupha gen dingin hon sawl zaw hi. Tua zong, mihing' pilna thute zanga gen dingin hon sawl kei hi. Tua hi kei leh, Khrist' khros vangletna a vuaksuak ding hi.
Pathian' Pilna leh Vangletna Khrist
18 Khros thu zaw a mangthang lei lelte adingin haina ahi a, ahihhangin, Pathian in a hotdam lellel eite adingin bel Pathian' vangletna ahi. 19 Ahang bel, A pilte' pilna mangthangsak ding ing a, a lemtheite' lemtheihna vuaksuaksak ding ka hi, chi-in a na kigelh hi. 20 Koi ah ahia mipil? Koi ah ahia laithei mi? Koi ah ahia tu hun leitunga thei kisa-a selkhah mi? Pathian in hiai leitung mite' pilna, haihuai suaksak hi lou hia? 21 Hiai Pathian' pilna ahi: Leitung mite'n amau' pilna pansana Pathian a theihtheih louh nungun, a kitang-koupih thu haihuai tungtawna a ummite hotdam Pathian' kipahlam ahi. 22 Judate'n chiamtehna a ngiat uh a, Grikte'n pilna a zong uhi. 23 Ahihhangin, koute'n a kikilhlum Khrist ka tangkoupih uhi. Tua lah Judate adingin kipalpaihna ahi a, Grikte adingin haina ahi. 24 Ahihhangin, Judate hi-in, Grikte hita leh, Pathian in a sapte adingin, Khrist mah Pathian' vangletna leh Pathian' pilna ahi. 25 Pathian tawh kisaia a haihuai peuhmah mihingte sangin a pilzaw hi. Pathian tawh kisaia a hatlou peuhmah mihingte sangin a hatzaw hi. 26 Sanggamte aw, Pathian in noute hon sap lai ngaihsun un. Noute tampi mihing' tehna dana pii, mithuzawh thei, miliana piang na hi kei uhi. 27 Ahihhangin, Pathian in a pilte a zahlaksak theih nadingin a haihuai leitung thilte a teel hi. Pathian in a hatte a zahlaksak theih nadingin a hatlou leitung thilte a teel hi. 28 Pathian in leitung miniamte leh thil simmawhhuaite a teel a, thil om lelte bangmahlou a suahsak theih nadingin a omlou thilte nangawn a teel hi. 29 Ama' maia kuamah a kisial theih louh nading ahi. 30 Amah vangin ahi noute, Khrist Jesu-a om na hih uh. Khrist Jesu mah eite adingin Pathian apan pilna hong hi ahi. Tua bel, amah eite' diktatna, siangthouna leh tatna hong hi, chihna ahi. 31 Tua ahih manin, a kisial nuam peuhmah Toupa ah kisial hen, chi-in a na kigelh hi.
1 Sanggamte aw, noute kianga Pathian thu tangkoupiha kong pai laiin, paukam siamna hiam, pilna sangzaw hiam tawh kong pai kei hi. 2 Tua naksangin, noute lak ah Jesu Khrist leh kilhlupa ompa amah loungal bangmah dang theih ka tum kei hi. 3 Noute kiang ah hatlouhna leh launa tawh ka om a, nakpitakin ka liing hi. 4 Ka thupuak leh ka thugen pen mihing' pilna leh thuzawhsiamna thu zangin ka gen kei a, Kha leh vangletna lahkhiakna tawh ahi zaw hi. 5 Tua bel, na upna uh mihingte' pilna tunga kinga hilou a, Pathian' vangletna tunga kinga ahih zawk nading ahi.
Kha apan Pilna
6 Ahihhangin, a pichingte lak ah koute'n pilna thu ka gen uhi. Tua bel, tu hun leitung pilna ahi kei a, tu hun leitung vaihawmte' pilna ahi sam kei. Tuate zaw bangmahlou hong suak ding ahi. 7 Koute'n Pathian' pilna thusim kiseel ka gen uhi. Tua bel, eite thupi nadinga hun om ma-a ama'n a sehkholh pilna kiseel ahi. 8 Tu hun leitung vaihawmte kuamah in tua a thei kei uhi. Na theikha hita le uh, thupina Toupa a kilhden kei ding uhi. 9 Ahihhangin, Mita muh ngeilouh, bila zak ngeilouh, mihing' lungsima ngaihsut ngeilouh, Pathian in amah itte adinga a bawlkholh thil, chi-in a na kigelh hi. 10 Ahihhan gin, Pathian in tua mah eite kiang ah, a Khain a phoulaakta hi. Kha in thil bangkim a zongkhia a, a thuk mahmah Pathian' thilte nangawn a zongkhia hi. 11 Mihing' sunga kha mah loungal in tua mihing' ngaihsutte kua'n a thei thei a? Tua mah bangin, Pathian' Kha mah loungal kuamah in Pathian' ngaihsutte a thei kei hi. 12 Eite'n leitung apan kha ngah i hi kei a, Pathian apan Kha ngah i hi zaw hi. Tua mah Pathian in eite kianga manbeia hon piak thilte i theihsiam theih nading ahi. 13 Koute'n hiai thilte ka gen uh a, mihing hon sinsak pilna thutein ka gen kei uh a, Kha Siangthou hon sinsak thutein ka gen zaw uh a, khalam thutakte khalam thutein ka gen uhi. 14 A umlou mi adingin Pathian' Kha tawh kisai thilte haina ahih manin, tuate a sang thei kei hi. Tuate khalama theih lei ahih manin a theisiam thei kei hi. 15 Khami in bel thil bangkim a khentel zel a, ahihhangin, amah pen kuama'n a khentel thei kei hi. 16 Ahang bel, Kua'n Toupa' lungsim thei a, kua'n amah thuhilh ding eita? chih ahi. Eite'n bel Khrist' lungsim i nei hi.
Saptuam sunga Kipawlkhenna
1 Sanggamte aw, khamite kianga thugen bangin noute kiang ah thu ka gen thei kei. Sami, Khrist-a naungekte kianga thugen bangin ka gen zaw hi. 2 Tu donga an gum ne thei nailou na hih manun, nawituiin kon vaak hi. Tu nangawnin zong an gum na saang thei kei lai uh. 3 Sami na hi lai uhi. Noute lak ah kihazatna, kikhinna leh kikhennate a om hi. Tua bang na hih lai teng uh sami na hi kei ua hia? 4 Khat in: Ke'n Paul ka zui, a chi a, a dang khat in: Ke'n Apolo ka zui, a chi hi. Tua bang na chih lai teng uh, sami na hi kei ua hia? 5 Paul kua a zenzen a? Apolo zong kua a zenzen a? Noute zong amaute tungtawna a ummi hong suak hi lou na hi umaw? Amaute zaw, Toupa'n amaute nna a got banga semte ahi lei uhi. 6 Ke'n khaichi ka pawi a, Apolo in tui a buak a, ahihhangin, a khangsakpa Pathian ahi. 7 A pawipa bangmah ahi kei a, tui buakpa zong bangmah ahi kei. A khangsakpa Pathian kia ahi bangkima bangkim. 8 A pawipa leh tui buakpa in tup kibang a nei uhi. Mi chih in a nasep bangbangin pahtakman a saang ding hi. 9 Koute, Pathian tawh semkhawmte ka hi uh a, noute, Pathian louma na hi uh a, Pathian' innlam na hi uhi. 10 Pathian in hehpihna hon piak bangbangin, innlam siampa bangin ke'n suangphum ka phum a, midang in tua suangphum tung ah a lam hi. Ahihhangin, mi chih in tua suangphum tunga a lamdan ah pilvang hen. 11 Suangphum kiphumsa loungal, suangphum dang kuama'n a phum thei kei hi. Tua suangphum bel Jesu Khrist ahi. 12 Mi khat peuh in hiai suangphum tung ah khamin hiam, ngunin hiam, suangmanphain hiam, singin hiam, loupain hiam, ahih kei leh, buhpawlin hiam a lam kha thei hi. 13 Nasep khempeuh a hihna bangbanga kilang ding ahi. Tua Ni in a phoulak ding a, mei in a kitelsak ding hi. Kua nasep hita leh, bangchi bang hi hiam, chih mei in a entel ding hi. 14 Mi khat peuh in tua suangphum tunga a lamna-a a nasep a omden aleh, pahtakman a sang ding hi. 15 Kua nasep zong a kattum leh, tua mi a sum ding hi. Ahihhangin, amah bel, meia paisuak bang leiin hotdamin a om ding hi. 16 Noute, Pathian' tempul na hi uhi. Noute sung ah Pathian' Kha a teeng, chih na thei kei ua hia? 17 Kuapeuh in Pathian' tempul a hihsiat leh, Pathian in amah a hihse ding hi. Pathian' tempul a siangthou hi. Noute tua Pathian' tempul na hi uhi. 18 Kuamah amah leh amah kikhem taksang kei hen. Noute laka mi kuapeuh, tu hun leitung tehna dana pii kisa ahih aleh, a pii theih nadingin hong hai phot hen aw. 19 Ahang bel, leitung pilna pen Pathian adingin haina ahi. Ama'n a pilte, a pillepchiahna uah a man, chi-in a na kigelh hi. 20 Toupa'n a pilte' suangtuahna a hawmpi ahi, chih a thei, chi-in zong a na kigelh lai hi. 21 Tua ahih manin, kuama'n mihingte kisialpih kei hen! Thil bangkim noutea ahi. 22 Paul zong, Apolo zong, Kifa zong, noutea ahi. Leitung thilte khempeuh, sihna zong, hinna zong, tu huna om thilte zong, mailam huna om ding thilte zong, a vekpi-in noutea ahi.
Khrist' Sawltakliante
1 Tua bang ahih manin, mite'n koute zaw, Khrist' nasemte leh Pathian' thusim kemte hi-in hon thei uhen. 2 Ahi a, kemmite zaw a muanhuai ding uh a kisam hi. 3 Ahihhangin, noute hi-in, mihing thukhennain hita leh, kei a hon ettelna uh kei adingin thil neuchik ahi. A taktakin, kei leh kei ka kiettelna nangawn a ching kei hi. 4 Ke'n kei kimawhsak nading ka thei kei hi. Hinapi-in, tua in midik hon tangsak tuan kei hi. Kei hon entelpa Toupa ahi. 5 Tua ahih manin, a hun tun main bangmah entel kei un. Toupa hong pai chiangin, ama'n a kisel mial thilte a phoulaak ding a, mihing' tupte a laakkhe ding hi. Tua hun chiangin, mi chih in Pathian apan phatna a ngah ding hi. 6 Sanggamte aw, noute' phattuam nadingin hiai thilte kei leh Apolo tung ah etsaknain ka belh hi. Tua bel, a kigelhsa kaan vala na kingaihsut louh nading uleh, khat leh khat kisialpih louh dan na sin nading uh ahi. 7 Mi dang tawh kibang lou-a kua'n noute hon bawl eita? Na saan thawh louh uh bang na nei ua eita? A saan thawh lei na hih nungsang uh, a saan thawh lou bangtaka banghanga kisial zenzen? 8 Na taita u maw? Na hauta u maw? Koute tellouin kumpipate bangin vai na hawmta u maw! Koute'n zong noute tawh vai ka hawmkhawm theih nadingun, vaihawm taktak le uchin ut nang e! 9 Sawltaklian koute zaw thah dinga mawhtansak kizuite laka nanungpen, leitung khuavannuai' etnop, vansawltakte leh mihingte' etnopa Pathian in a bawltaakte bangin ka kingaihsun hi. 10 Khrist hangin koute mihai ka suakta uh a, noute zaw Khrist ah na pii uhi! Koute ka hat kei uh a, noute zaw na hat uhi! Noute zaw mite' pahtawi na hi uh a, koute bel simmawh ka hi uhi! 11 Tu mahmahin zong gilkial leh dangtakin ka om uh. Puansilh hoih ka nei kei uh. Vuak ka thuak uh. Inn-le-lou beiin ka om uh. 12 Koumau' khutte zanga semgimin ka om uh. Kamsia zanga hong kiengbawl chiangin, ka vualzawl uh a, bawlsiata ka om chiangun ka thuak teitei uh. 13 Gensiata ka om chiangun kam nemin ka hanthawn uh a, tu dongin zong leitung thilnin, miteng' kih ka suak uhi. 14 Noute maizumsak dinga hiaite gelh ka hi kei. Ka it ka tate banga hon vauhilh ka hi zaw. 15 Noute'n Khrist-a hon sinsakmi 10,000 nei hiai le uchin zong, pa tampi na nei kei uhi. Kei bel, tangthupha tungtawna noute' pa ka hi. 16 Tua ahih manin, kei, etteh-a hon nei dingin kon hanthawn hi. 17 Hiai hang mahin, noute kiang ah Timothi kon sawl hi. Amah, Toupa-a ka it mahmah ahi. Toupa ah amah a muanhuai hi. Ama'n Khrist-a ka nuntak zia noute hon theisak ding. Ka nuntak zia pen saptuam khempeuha ka sinsakna tawh a kituak hi. 18 Noute kianga kei hong pai lou dinga non ngaihsut manun, noute laka pawlkhat a kiuangsak uhi. 19 Toupa'n pha a sak leh, sawtlou nungin ka hong pha ding hi. Tua hun chiangin, a kisatheite'n kamhat thu lei hiloua vangletna nei taktak uhiam ka theitel ding hi. 20 Pathian' gam zaw kama thugen lei hilouin, vangletna thu ahi zaw hi. 21 Bang na deih ua? Chiang tawh hong kuan ding ka hi hia? Ahih kei leh, itna leh lungnemna tawh hong kuan ding ka hi zaw hia?
Kingaihnanin leh Thununna
1 Noute lak ah kingaihna nin a om, chih hong kigen taktak hi. Zentelte lak nangawna om ngeilou kingaihna nin ahi. Mi khat in a pa' zi a kitenpih. 2 Noute'n dah leh lungkhama tua bang mi na kipawlna uapan na koihkhiak zawk ding uh hinapi, kiotsakna'n na nei zawmah ua! 3 Noute lak ah sain om kei mah leng, khain ka om hi. Noute laka om bangin, tua bang hih mi tung ah thukhenna ka zouta. 4 I Toupa Jesu Khrist' mina na kikhopkhawm chiangun, kei zong na lak uah ka khain ka om a i Toupa Jesu' vangletna zong a om hi. 5 Hibang mi, khelhna pianken pumpi hihmanthata a om a, Toupa Jesu' ni-a a kha hotdama a om theih nadingin, Setan kiang ah pekhia un. 6 Na kisialna uh hoihlou ahi. Silngou tawmchik in anvui nei mekman a beupi-in a thousak, chih na thei kei ua hia? 7 Silngou sawh louh anvui nei mekman beu thak na suah theih nadingun, silngou lui paikhevek un. Silngou sawh louh na hi mah uhi. Ahang bel, i Paikan Belamnou Khrist kigoukhinta hi. 8 Tua ahih manin, silngou lui sawh louh, takna leh thutakin Paikan Ankuang lui ni. Silngou lui zaw a sia kideihsakna leh lungsim siatna ahi. 9 Ka laikhak ah, kingaihna nina bualte tawh na kipawl louh ding uh ahi, ka chi hi. 10 Hiai leitung mi kingaihna nina bualte, huaihamte, lepgute, milimbete gen ka hi kei. Tua hi leh bel, leitung na nutsiat uh kul ding ahi. 11 Sanggam kichi napi-a kingaihna nina buai, huaiham, milimbia, gensiathat, zukhamhat leh negu mi gen ka hi. Tua bang mi tawh kipawl kei unla, nek zong nekhawm kei un. 12 Pawlam mite vaihawmsak ding kei tawh bang kisai zenzen ding? Sunglam mite hilou hia na vaihawmsak ding uh? 13 Pawlam mite ahihleh, a tung uah Pathian in thu a khen ding. Tua ahih manin, a gilou mipa noute lak apan hawlkhia un.
A Unimite laka Kihek Kipei
1 Noute laka kuapeuh in midang khat tawh thusia nei leh, thukhensak dingin misiangthoute' mai tun louin midiktatloute' mai na tun ngam ding ua hia? 2 Misiangthoute'n leitung mite tung ah thu a khen ding uh, chih na thei kei ua hia? Leitung mite tunga thukhen ding na hih nung uh, thil neupente tawh kisai thukhen dingin na chin kei ua hia? 3 Vansawltakte tung ah eite'n thu i khen ding chih na thei kei ua hia? Tua ahih nungsang, tu damsung thute i khen sem kei dia hia? 4 Tua banga tu damsung thute thukhen ding na neih chiangun, saptuam' ngaiha mi neute, thukhen dingin na sep ua hia? 5 Na maizum nadingun hiai ka gen ahi: A um mite kala thusia khen ding noute laka mipil khat beek om lou hia? 6 Hinapi-in, sanggam leh sanggam na kihek na kipei uh a, a umloumite' mai na kitun zawmah ua! 7 Noute laka kihek kipeina a om pen na vuallelhna uh hikhin pah ahi. Banghanga a thuakzaw-a pang mai lou? Banghanga a sumzaw-a pang mai lou? 8 Tua naksangin, a nepen leh a thuaksak penin na pang uh a, tua lah na sanggamte uh tung ah ahi zawmah hi. 9 Midiktatloute'n Pathian' kumpigam a luah kei ding, chih na thei kei ua hia? Kuamah' kikhemzousak kei un. Kingaihna nina bualte, milimbete, angkawmte, pasal kizuakte, pasal leh pasal kingaihna nina bualte, 10 gutate, huaihamte, zukhamhatte, mi gensiathatte leh negute'n Pathian' kumpigam a luah sam kei ding uhi. 11 Noute laka pawlkhat tua bang mi na hi ngeita uhi. Ahihhangin, Toupa Jesu' minin i Pathian in Kha pansanin noute hon silsiangta a, hon sep-tuamta a, dik hon tangsakta hi. 12 Kei adingin bangteng a siang. Hinapi-in bangteng a phatuam ahi vek kei. Kei adingin bangteng a siang. Hinapi-in, bangmah nuai ah salin ka lut nuam kei hi. 13 An pen gilpi ading ahi a, gilpi zong an ading ahi. Ahihhangin, Pathian in a nihin a mangthangsak ding. Pumpi pen kingaihna nin ading ahi kei a, Toupa ading ahi zaw. Toupa zong pumpi ading ahi. 14 Pathian in misite lak apan Toupa a kaithouta. A vangletna tungtawnin eite zong hon kaithou ding hi. 15 Na pumpite uh Khrist' kahiangte ahi, chih na thei kei ua hia? Ke'n Khrist' kahiangte lain, a kizuakmi' kahiangte ka suaksak dia hia? Suaksak peuhmah lou ding! 16 Kizuakmi tawh a kizom mi peuhmah, kizuakmi tawh sa pum khat a suak, chih na thei kei ua hia? Ama'n: Nihte sa pumkhat a suak ding uh, a chi hi. 17 Ahihhangin, Toupa tawh kizom mi pen amah tawh kha pumkhat a suak hi. 18 Kingaihna nin taisan un. Mihing in khelhna a hih dangte peuhmah pumpi pawlam ah ahi. Kingaihna nin hih mi bel ama' pumpi tung ah a khial hi. 19 Na pumpi uh, Pathian apan na ngah uh, noute sunga om Kha Siangthou' teenna tempul ahih lam na thei kei ua hia? Noumaua na hi kei uh a, 20 a man piaka leisa na hi uh. Tua ahih manin, na pumpi uleh na khaun Pathian pahtawi un. Tua na pumpi uleh na kha uh Pathian a ahi.
Nupa Hihna
1 Tuin laia non gelh uh thute gen lehang: Pasal adingin numei koppiha neih louh a hoih. 2 Ahihhangin, kingaihna nin a om louh nadingin, pasal in ama' zi tuam nei henla, numei in ama' pasal tuam nei hen. 3 Pasal in nupa hihna dana a zi tan dinga kilawm a zi kiang ah pia henla, tua mah bangin zi in zong a pasal tan dinga kilawm a pasal kiang ah pia hen. 4 Zi' pumpi amah kia-a ahi kei a, a pasala zong ahi. Tua mah bangin, pasal pumpi amah kia-a ahi kei a, a zi-a zong ahi. 5 Tomkha kal adinga na kithukimna uh ahih kei ngai leh, kuamah kidektuah kei un. Tua zong an ngawla thum nadingin hi hen. Mahni kidek theihlouhna hanga Setan in hon zola hon khem louh nadingin, omkhawm kik un. 6 Ahihhangin, hiai ka gen: Thupiaka ka gen hilouin, phalna dana ka gen ahi zaw. 7 Mi khempeuh kei bangin om le uh ka deih hi. Ahihhangin, michih in Pathian' thawnpiak a ngah bangbang a nei tek hi. Mi khat in thawnpiak khat, midang in thawnpiak tuam khat a nei hi. 8 Tuin, koppih neilou leh meigongte adingin ka gen hi: Kei banga a om uh amau adingin a hoih hi. 9 Ahihhangin, kidek theilou ahih uleh, koppih nei uhen. Lunggulhna tawh kidim sangin, koppih neih a hoih zaw hi. 10 Tuin, koppih neite thu ka pia hi: Kei' thupiak hilouin, Toupa' thupiak ahi. Zi in a pasal taisan kei hen. 11 A taisan taak aleh, koppih beiin omden hen. Ahih kei leh, a pasal mah tawh kilemkik hen. Tua bang mahin, pasal in a zi a mak louh ding ahi. 12 Midangte kiang ah hiai ka gen hi: Toupa' gen hilouin kei' gen ahi. Sanggampa khat in a umloumi zi a neih a, a zi amah tawh omkhawm a lungkim naak leh, a mak louh ding ahi. 13 Sanggamnu khat in a umloumi pasal a neih a, a pasal amah tawh omkhawm a lungkim naak leh, a mak louh ding ahi. 14 Ahangbel, Pathian in a umlou pasal pen, a zi tungtawnin sehtuam siangthouin a bawl a, a umlou zi pen a pasal tungtawnin sehtuam siangthouin a bawl hi. Tua bang hi kei leh, na tate uh a siang lou a hi ding uhi. Tuin bel, a siangthou uhi. 15 Ahihhangin, a umloumi pen a taikhiak nop leh taikheta ve. Tua bang thu ah sanggampa hiam, sanggamnu hiam henin a om kei hi. Pathian in kilema om dingin eite hon sam hi. 16 Zi aw, na pasal na hondam kha mawh ding hiam, chih bangchi'n na theia ahia? Pasal aw, na zi na hondam kha mawh ding hiam, chih bangchi'n na theia ahia? 17 Bangteng hi leh, Toupa'n mi chih kianga hihna a hawm dan leh, Pathian in a sap laia ahihna bangbangin mi chih nungta hen. Saptuamte khempeuh ah hiai dan ka khung hi. 18 Zeksumsa-a sap om hia? Zeksum louh suak tuan kei hen. Zeksum louha sap om hia? Zeksum thak tuan kei hen. 19 Zeksum lah bangmah a phatuam kei a, sum louh zong bangmah a phatuam kei. A phatuam pen zaw Pathian' thupiakte zuih ahi. 20 Mi chih Pathian in a sap laitaka a om bangin om hen. 21 Sala na om laitaka sap na hi hia? Phamawh sa ken. Na suahtak theih aleh suakta lei in. 22 Sal hisa-a Toupa' sap mi pen, Toupa-a noplen mi ahi. Tua mah bangin, a suaktasa-a sap mi zong Khrist' sal ahi. 23 Aman piaka leisa na hih manin mihingte' sal suak ken. 24 Sanggamte aw, mi chih in Pathian tunga ahih ding bangbang Pathian in a sap laitaka a om bangbang in Pathian ah om zaw hen. 25 Nungak siangthou tawh kisaiin, Toupa apan thupiak ka nei kei hi. Hinapi-in, Pathian in zahngaihna a piak, muanhuaia a bawl mi bangin keima' thukhenna ka pia hi. 26 Tulai hun haksatna hangin pasal a om dan ngei banga a om ama' adingin a hoih, chi-in ka ngaihsun hi. 27 Zi neihna-a hen na hi hia? Kisutkhe ken. Zi apan khahkhiaksa na hi hia? Zi zong ken. 28 Ahihhangin, zi nei na hih leh, na khial kei. Nungak siangthou in pasal a neih leh a khial kei. Hinapi-in, koppih nei mi in tu damsung haksatna a tuak ding. Tua apan hon awngsut nuam ka hi zaw hi. 29 Ahihhangin, sanggamte, hiai ka gen hi: Hun a tomta. Tu apan zi neite nangawn zi neilou bangin om hen. 30 A kapte kaplou bangin om hen. 31 Leitung thil zangte a zang lua lou bangin om hen. Hiai leitung, tu-a a om bangbang pen a bei ding hi. 32 Lunghimawhna nei loua na om uh kon deih hi. Zi neilou pasal in Toupa tawh kisai thilte a awlmawh a, Toupa kipahsak ding dan a zong hi. 33 Ahihhangin, zi nei pasal in bel hiai leitung damsung thilte a awlmawh a, a zi kipahsak ding dan a zong a, 34 a awlmawh lam kanih a kisuah hi. Pasal neilou numei, ahih kei leh nungak siangthou in pumpi leh kha-a siangthou nadingin, Toupa tawh kisai thilte a awlmawh a, pumpi leh kha-a Toupa kianga kipiakzawhna a zong hi. Pasal nei numei in bel leitung damsung thilte a awlmawh a, a pasal kipahsak ding dan a zong hi. 35 Na phattuampih ding uh deihnain hiai ka gen ahi. Noute hon thangkam nuam ka hi kei a, nuntak dan dika na nuntak ua, Toupa' nna na sep uh hon tuailuaisak a om louh ding ka deih man ahi zaw. 36 Mi khatpeuh in a khamsa nungak siangthou tung ah hihdik lou a kisa kha thei. A nungak zong a pallai bei a, a lou theilou ahih leh, hoih a sak bangbangin hih hen, a khial kei. Kiteeng uhen. 37 Ahihhangin, mi khatpeuh a lungtanga hiai thu khentatkhin mi ahi thei. Kulna zong nei lou, ama' deihtelna kithunun mi ahi thei. Tua bang mi in a siangthouna kepbit a sawm leh a hih dik hi. 38 Tua ahih manin, nungak siangthou kitenpih mi in a hih hoih, ahihhangin, a kitenpih lou mi in a hih hoih zaw. 39 Zi ahih leh a pasal damsung teng daan in a hen hi. Ahihhangin, a pasal a sih aleh, Toupa-a om mi a ut peuh a nei thei hi. 40 Ahihhangin, kei' thukhenna ah bel, a om bangin a beiin om leh nuam a sa zaw ding. Toupa' Kha nei sama kitheiin hiai ka gen ahi.
Milimbiakna An
1 Tuin, milimte kianga kithoihna thillatte tawh kisai gen lehang: Eite khempeuh in theihna i nei, chih i thei. Theihna in mi a kisatheisak a, itna in bel mi a tungding hi. 2 Mi kuapeuh bang hiam theia a kingaihsut leh tua bang mi in a theih ding thei nailou ahi. 3 Ahihhangin, kuapeuh in Pathian a it nungsang, tua mi Pathian' theih mi ahi. 4 Tua ahih manin, milimte kianga kithoihna thillatte tawh kisai hiai ka gen ahi: Leitunga milim bangmah ahi kei, chih i thei. Pathian khat kia loungal a dang a om kei, chih i thei. 5 Leitung hi-in, vaan ah hita leh, pathiante a chih uh tampi a om a, pathian tampi, toupa tampi mah a om hi. 6 Ahihhangin, eite adingin Pathian khat kia a om. Amah zaw Pa ahi. Thil bangkim amah apan om ahi. Eite amah adinga om i hi. Toupa khat kia mah a om. Amah Jesu Khrist ahi. Ama' tungtawnin thil bangkim a hong om. Eite ama' hanga nungta i hi. 7 Ahihhangin, mi khempeuh tua theihna nei ahi vek kei hi. Mi pawlkhat in milimte a thei mahmah uh a, milimte kianga kithoihna thillat ahi, chih theihsain tu dongin a ne uh a, a sia-le-pha theihna uh hatlou ahih manin a buahsak uhi. 8 Ahihhangin, an in Pathian tawh hon kinaisak tuan kei. I nek louh hangin, i se tuan kei a, i nek hangin lah i hoih tuan kei hi. 9 Ahihhangin, pilvang un. Na noplenna un a hatlou midang a kipalpaisak kha zenzen ding hi. 10 Nang theihna na nei, Milim tempula ne dinga tu lai, a hatlou mi khat in hon mu kha thei hi. Tua hangin, milimte kianga kithoihna thillatte ne dingin, tua bang mi' sia-le-pha theihna maingalsak kha lou ding na hi hia? 11 Tua bang sanggam hatlou adinga Khrist si ahi. Na theihnain amah na mangthangsak kha de. 12 Hibanga na sanggamte uh tunga na khelh ua, a sia-le-pha theihna hatlou uh na liamsak khak chiangun, Khrist tunga khial na suak uhi. 13 Tua ahih manin, ka sa nek in ka sanggam a kipalpaisak sangin, ka sanggam ka puksak louh nadingin sa himhim ka ne nawn kei ding hi.
Sawltakliante' Hamphatna
1 Sawltaklian ka hi kei-a hia? Noplen ka hi kei-a hia? Ke'n i Toupa Jesu Khrist ka mu kei-a hia? Noute, Toupa-a ka nasep gah na hi kei ua hia? 2 Midangte adingin sawltaklian hita kei leng zong, noute adingin zaw ka hi mahmah hi! Toupa-a sawltaklian ka hih chiamtehna noute na hi uhi. 3 Kei hon khingte ka dawnna hiai ahi: 4 Koute'n ne ding leh dawn dingin hamphatna ka nei kei ua hia? 5 Sawltaklian dangte leh Toupa' sanggamte leh Kifa banga a ummi zi tonpih vialvial dingin hamphatna ka nei kei tuam ua hia? 6 Ahih kei leh, Barnaba leh kei kia nektawm zong kawm teiteia sem ding ka hi tuam ua hia? 7 Kua ahia amah kivaka sepaiha pang ngei? Kua ahia grephuan bawl a, a gah ne lou? Kua ahia ganhon vui a, a nawitui ne lou? 8 Mihing' ngaihsut dan leia hiaite gen ka hi-a hia? Dan in hibang mah gen hilou hia? 9 Ahang bel, Mosi Dan Laibu sung ah: Bawngtal in buh a chil laiin a muk hen ken, chi-in a na kigelh hi. Pathian in a awlmawh bawngtalte lei ahi maw? 10 Eite ading gen ahi mahmah hi. Hi mah lou maw? Hi tham e. Hiai eite adinga kigelh ahi. Leiletpa'n lei a leh a, buhchilpa'n buh a chil pen, a gah tan ding kilametna tawh a sep ding mah ahi. 11 Noute ah khalam khaichi ka pawi uh a, noute apan pumpi ading gah ka tan uh kilawm lou lua ahi maw? 12 Midangte'n noute apan nek muh nading hamphatna nei ahih nungsang, koute'n nei zawsem lou ding ka hi umaw? Hinapi-in, hiai hamphatna ka zang kei uhi. Khrist' tangthupha a kidal louh nadingin thil bangkim ka thuak zaw uhi. 13 Tempul sung thil siangthou nasemte'n tempul apan nek a mu uh a, maitama nasemte'n maitam apan a ne uh chih na thei kei ua hia? 14 Tua mah bangin, tangthupha gen mite'n tangthupha apan nek a muh ding uh Toupa' thupiak ahi. 15 Ahihhangin, ke'n hiai hamphat-nate ka zang kei hi. Noute'n tuate kei tunga na hih nading ua ka gelh zong ahi kei hi. Hiai kisialna mi'n bangmahlou hon suahsak sangin, kei adingin sih a hoihzaw ding hi. 16 Tangthupha ka gen leh, kisialna ding ka nei kei hi. Ahang bel, gen lou theilou ka hi. Ahi, tangthupha gen kei leng ka tung gik ding ahi! 17 Ahang bel, keima' utthu-a gen hi leng pahtakman ka nei hi. Ahihhangin, keima' utthu-a gen ka hih kei ngai leh, kepna nna piaka ka om man ahi zaw hi. 18 Tua hi leh, ka pahtakman bang a hita dia? Tangthupha ka gen chianga, tangthupha-a ka hamphatna zang khial lou a, Khrist' tangthupha, a manbeia ka piak mah ka pahtakman ahi. 19 Kuamah' sal hilou a, noplen hinapi-in, mi khempeuh' salin ka kibawl hi. Tua bel, mi a tam thei pen ka lak zawh nadinga ka hih ahi. 20 Judate ka lak zawh nadingin, Judate lak ah Judami bangin ka om. Dan nuaia omte ka lak zawh nadingin, Dan nuaia om hi kei mah leng, Dan nuaia om bangin ka om a, 21 Dan neiloute ka lak zawh nadingin, Dan neiloute lak ah Dan neilou bangin ka om. Pathian lam ah bel, Dan neilou ka hi kei a, Khrist' dan nuaia om ka hi. 22 A hatloute ka pii zawh nadingin, a hatloute lak ah a hatlou bangin ka om, Bangchi chi hiama bangzah hiam beek ka hotdam zawh nadingin, mi khempeuh lak ah bang teng hi ka hi. 23 Hiai bel tangthupha vualzawlnate midang ka tanpih nop mana, tangthupha hanga hibanga hih ka hi, 24 Kitaitehna ah a taimi teng tai mah leh, khat kia in vualtungtuan man a saang, chih na thei kei ua hia? Tua vualtungtuan man na saan theih nadingun tai un. 25 Vualtungtuan man saan ding kituh kuapeuh, banglam peuh ah amah a kithunun ding kisam hi. Tua banga taite'n a sethei pahtakna lukhu ngah dingin a pang uhi. Eite bel, a setheilou pahtakna lukhu ngah dingin i pang hi. 26 Tua ahih manin, kei zaw ngim tumta neilou bangin ka tai kei a, huihkhua leltak nawh bangin zong ka pang sam kei hi. 27 Ahihhangin, ka pumpi ka thunun a, salin ka nei hi. Tua hi kei leh, midangte kianga tangthupha ka phuan nungin, keimah tak pahtakna lukhu ngah zoulouin ka om kha ding hi.
Israelte apan Sinsakna
1 Sanggamte aw, tua thamlouin, hiai thu na theih louh uh ka deih kei hi: I pu i pate a vekpiun tua meipi nuai ah a om uh a, a vekpiun tua tuipi tawnin a paisuak uhi. 2 Avekpiun meipi ah leh tuipi ah, Mosi-a baptislut ahi uhi. 3 A vekpiun khalam an kibang a ne uh a, 4 a vekpiun khalam tui kibang a dawn uh a, amaute zui tua khalam Suangpi apan a dawn uhi. Tua Suangpi Khrist ahi. 5 Hinapi-in, amaute a tamzaw in Pathian a lungtaisak kei hiai uh a, ama'n amau' pumpite gamdai-gamkeu ah a thehthang hi. 6 Hiai thilte eite' etteh ding ahi. Amaute'n thil gilou a lunggulh bang ua i lunggulh louh nading ahi. 7 Amaute laka pawlkhat milim bia a hih bangun, milim bete suak kei ni. Mite, ne ding leh dawn dingin a tusuk uh a, Pathian theiloute' nuamtalna-a buai dingin a dingkhia uh, chi-in a na kigelh hi. 8 Amaute laka pawlkhat numei pasal kal ah a paktat uh a, ni khat thu-a 23,000 a sih bangun paktat kei ni. 9 Amaute laka pawlkhat in Toupa a ze-et uh a, gulte'n a thah bangin Toupa ze-et kei ni. 10 Amaute laka pawlkhat a phun uh a, a hihmangthang vansawltakte in amaute a hihmanthat bangin phun kei ni. 11 Hiai thilte khempeuh etteh hi dingin amaute tung ah a tung a, eite' kihilh nadingin a na kigelh ahi. Eite tung ah tua hun tawp buchinna hong tungta hi. 12 Tua ahih manin, a dinga kingaihsun mi pilvang hen, a puk kha ding hi. 13 Mihing thuak ngeina vai khemna zolna himhim noute tung ah a tung kei hi. Pathian a muanhuai a, ama'n na thuak zawh vai uh khemna zolna na tung ua a tun ding a phal kei ding hi. Na thuak zawh nadingun, khemna zolna tawh kitonin suahtakna lampi hon bawlsak ding hi.
Milimbiakna Ankuang leh Toupa' Ankuang
14 Tua ahih manin, ka itte aw, milimbiakna taisan un. 15 Mipilte kianga thugen banga gen ka hi. Ka thugen ngaihsun un. 16 Kipahthu genna nou, tua-a dinga kipahthu i genna pen Khrist' sisan i tan-khawmna ahi kei-a hia? Tanghou i balkhap pen Khrist' pumpi i tankhawmna ahi kei-a hia? 17 Ahang bel, eite tampi hinapi-in tanghou beu khat, pumpi khat i hi uhi. Ahangbel, eite'n i vekpi-a tanghou beu khat apan tangkhawm i hi uhi. 18 Sa lama Israelte ngaihsun un. Maitama thillat nete in maitam apan tan nei ahi kei ua hia? 19 Bang gen ka hia leh? Milim pen hihna neipi, ahih kei leh, milim kianga kithoihna thillat zong hihna neipi ahi, ka chihna ahi-a hia? 20 Zentelte'n kithoihna thil a latte uh Pathian kianga lat hilouin, dawite kianga lat ahi, ka chihna ahi. Dawite tawh tankhawm na neih ding uh ka deih kei hi. 21 Toupa' nou leh dawite' nou na dawnkhawm thei kei ding uh a, Toupa' an leh dawi' an na nekhawm thei kei ding uhi. 22 Toupa' thikthusiatna tawhkuang sawm i hi-a hia? Amah sanga hatzaw i hi-a hia?
Khristian Noplenna
23 Kei adingin bangteng a siang. Hinapi-in, bangteng a phatuam ahi vek kei. Kei adingin bangteng a siang. Hinapi-in, bangteng mi bawlhoih ahi vek kei hi. 24 Kuama'n ama' angsung kia khual kei hen. Mi chih in midang' angsung zong khual sam hen. 25 Na sia-le-pha theihna uh hanga thu dong sese louin, sa zuakna muna kizuak sa peuhpeuh ne un. 26 Ahang bel, leitung leh a omte khempeuh Toupa-a ahi. 27 A umlou mi khat peuh in an ne dinga hon chial a, na hawh nop uleh, na sia-le-pha theihna uh hanga thu dong sese louin, na mai ua kilui peuh ne un. 28 Ahihhangin, mi khat peuh in: Milimbiakna sa hi veh e, a chih aleh, tua hon hilhpa leh a sia-le-pha theihna khual unla, ne kei un. 29 Nang' sia-le-pha theihna gen ka hi kei a, midang' sia-le-pha theihna gen ka hi zaw hi. Ahih leh, ka noplenna midang' sia-le-pha theihna thu-a kikai ding ahi-a hia? 30 Ke'n kipahthu genna tawh an ka nek leh, thil khat peuh adinga Pathian kianga kipahthu ka gen khit nung, banghanga kei gensiata om ka hia? 31 Tua ahih manin, na nekun zong, na dawnun zong, ahih kei leh, bangpeuh na hih chiangun, bangkim Pathian thupi nadingin hih un. 32 Juda mi hi-in, Grik mi hita leh, Pathian' saptuam hita leh, kuamah kipalpaisak kei un. 33 Ke'n thil bangkim ah mi khempeuh lungtaisak ka sawm bangin, tua bangin hih un. Ahang bel, ke'n keima' phattuam nading ka zong kei a, Pathian in mi tampi a hotdam theih nadingin mi tampite' phattuam nading ka zong zaw hi.
1 Kei ettehin hon nei un. Ke'n zong Khrist etteha nei ka hi.
Biakna
2 Sanggamte aw, thil bangkima kei non phawk gige manun leh kon sinsakna masate na letkip manun noute kon phat hi. 3 Noute'n hiai na theih ding uh ka deih hi: Pasal chih lutang Khrist ahi. Numei' lutang pasal ahi. Khrist' lutang Pathian ahi. 4 Lutang khuh kawma pasal thuum hiam, thugen hiam in a lutang a selphou hi. 5 Lutang khuh loua numei thuum hiam, thugen hiam in a lutang a selphou hi. Tua bel, sammet giau tawh kibang geih ahi. 6 Numei in a lutang a khuh kei leh, a sam nangawn metgiau hen. Sammet hiam, metgiau hiam a zumhuai hi. Tua ahih nungsang, a lutang khuh hen. 7 Pasal in bel a lutang a khuh ding ahi kei. Amah, Pathian' batpih leh thupina ahi. Numei ahih leh pasal' thupina ahi. 8 Pasal zaw numei apan hong om ahi kei a, numei bel pasal apan hong om ahi. 9 Numei adinga pasal siam ahi kei a, numei pen pasal adinga siam ahi. 10 Hibang ahih manin, vansawltakte hangin, numei in a lu tung ah thuneihna chiamtehna a khuk ding ahi. 11 Ahihhangin, Toupa ah bel pasal zong numei apan tangdin ahi kei. Numei zong pasal apan tangdin ahi sam kei. 12 Numei pen pasal apan hong om a hih bangin, pasal zong numei tungtawna piang ahi. Ahihhangin, thil bangkim Pathian apan ahi. 13 Noute'n thukhenna kibawl un. Numei in lutang khuh loua Pathian kianga a thuum thil kilawm ahi-a hia? 14 Pasal in sam sau a neih leh amah adinga zahlakhuai ahi, chih na pianpih lungsim un hon sinsak lou hia? 15 Numei in sam sau a neih leh bel, ama' thupina ahi. Ama' kikhuh nadinga sam kipia ahi. 16 Mi kuapeuh hiai thu ah selkhah mah leh, eite'n ngeina dang i nei kei. Pathian' saptuamte'n zong a nei kei hi.
Toupa' Nitakan
17 Tu-a hiai thuhilhnate kon piakin, noute kon phat kei hi: Noute na kikhop chiangun hoihzawk nading hilouin, siat nading ahi zaw hi. 18 A masapenin, saptuam na kikhop chiangun, na lak uah kikhenna a om, chih ka za a, ka up natan zong a om hi. 19 Pathian' saan mite a kitheihtel nadingin kibatlouhna bel a om ding mah ahi. 20 Nong paikhawm chiang ua na nek uh zaw Toupa' Nitakan hilou ahi. 21 Ahang bel, na nek chiangun, michih in ama' an a ne masa a, na kingak kei uhi. Mi khat gilkialin a om a, midang khat zukhamin a om hi. 22 Noute'n nek nading leh dawn nading inn neilou na hi ua hia? Ahih kei leh, Pathian' saptuam simmawhin, bangmah neiloute na maizumsak u maw? Bang ka gen dia? Noute kon phat dia hia? Kon phat thei het kei hi! 23 Noute kianga kon piaksawn, ke'n Toupa apan ka saan ahi. Toupa Jesu lehbawla a khot zanun, ama'n tanghou a la a, 24 kipahthu a gen khitin a balkham a: La unla, ne un. Hiai noute adinga kitamkham ka pumpi ahi. Kei non theih gige nadingun hiai hih zel un, a chi hi. 25 Tua mah bangin, nitakan nek khitin, nou a la a: Hiai nou ka sisana thukhunthakna ahi. Hiai na dawn teng ua kei non theih gige nadingun hih zel un, a chi hi. 26 Tua bang ahih manin, hiai tanghou na nek ua, hiai nou na dawn tengun, Toupa hong paikik mateng adingin a sihna na phuang uh ahi. 27 Mi kuapeuh in simmawhtaka hiai tanghou ne a, Toupa' nou a dawn leh, Toupa' pumpi leh sisan tung ah a mawh ding hi. 28 Mi amah kientel masain tanghou nein nou dawn hen, 29 Toupa' pumpi phawk loua simmawhtaka nea dawn mi in ama' tunga mawh kitansakna-a nea dawn ahi. 30 Tua hangin noute laka tampitak zawngkhal leh chinain na om uh a, tampitak zong na ihmuta uhi. 31 Eite kithukhenin kientel masa sek lehang, Toupa' thukhenna thuak lou ding i hi. 32 Ahihhangin, thukhensaka i om chianga leitung mite tawh mawhtansakna i thuakkhawm louh nadinga Toupa' hon thununna ahi. 33 Tua ahih manin, ka sanggamte aw, ne dinga nong paikhawm chiangun, kingak un. 34 Na kikhop-khawmna uh thuakna a suah louh nadingin, gilkial a om leh inn ah ne hen. Thil dang tawh kisai a hih leh, kong pai chiangin thuhilhna kon pe ding hi.
Khalam Thawnpiakte
1 Sanggamte aw, tuin khalam thawnpiakte tawh kisai theih neilou-a na om ding uh ka deih kei hi. 2 Noute khatvei laiin Zentelte na hi uh a, bangchi chi hiamin a pautheilou milimte lama pimangin na om uhi. 3 Noute kon theisak ahi: Pathian' Kha-a thugen kuamah in: Jesu hamsiatin om hen, a chi thei kei a, Kha Siangthou tungtawn loungalin: Jesu, Toupa ahi, a chi thei sam kei hi.
Thawnpiak Tuamtuam
4 Thawnpiak tuamtuam a om a, ahihhangin, Kha khat a kibang ahi. 5 Sep tuamtuam a om a, ahihhangin, Toupa khat a kibang ahi. 6 Sepsak dan tuamtuam a om a, ahihhangin, mi khempeuh sunga sempa Pathian khat a kibang ahi. 7 Ahihhangin, Pathian in i kiphat-tuampih tek nadingin, mi chih kiang ah Kha' nasep kilatkhiakna hon pia. 8 Kha tungtawnin mi khat kiang ah pilna thupuak piak ahi. Tua Kha tungtawn mahin mi dang kiang ah theihna thupuak piak ahi. 9 Tua Kha mah in mi dang kiang ah upna a pia. Tua mah in midang kiang ah hihdamna thawnpiakte a pia a, 10 mi dang kiang ah thil lamdang hihtheihna a pia a, midang kiang ah kamsang thugen theihna a pia a, midang kiang ah khate theihkak theihna a pia a, midang kiang ah pau tuamtuama thugen theihna a pia a, mi dang kiang ah paute hilhchet theihna a pia hi. 11 Kha khat leh a kibang in hiaite khempeuh a sem hi. Ama' deih leh gel bangbangin mi chih kiang ah thawnpiakte a hawm hi.
Pumpi Khat, Kahiang Tampi
12 Pumpi khat ahi a, kahiang tampi nei ahi. Tua pumpi ah kahiang tampi om mah leh, pumpi khat a bawl uhi. Khrist zong tua bang ahi. 13 Eite khempeuh Kha khat in pumpi khat ah hon baptislut hi. Juda mite hi-in Grik mite hita leh, sal hi-in noplen hita leh, eite khempeuh' dawn ding tua Kha khat piak i hi. 14 Pumpi bel kahiang khat kia ahi kei a, kahiang tampi ahi. 15 Khepek in: Kei zaw khut ka hih louh manin, pumpi-a ka hi kei, chi leh, tua a chih man leiin pumpi-a a hilou tuan dia hia? 16 Bil in: Kei zaw mit ka hih louh manin, pumpi-a ka hi kei, chi leh, tua a chih man leiin pumpi-a a hilou tuan dia hia? 17 Pumpi a vekpi-in mit hi leh, zakna koi ah a omta dia le? Pumpi a vekpi-in zakna hi leh gimnam zakna koi ah a omta dia le? 18 Pathian in kahiangte a vekpi-in a deihna munmun pumpi ah a bulh hi. 19 Amaute a vekpi-un kahiang khat hi mawk le uh, pumpi koi ah a omta dia le? 20 Tu'n bel kahiang tampi a om a, pumpi khat a suak uhi. 21 Mit in khut kiang ah: Nang louin kisam ke'ng! a chi thei kei hi. Lutang in zong khepekte kiang ah: Noute louin kisam keng! a chi thei sam kei hi. 22 Tua naksangin, a hatlou zaw-a kilang pumpi kahiangte a kisam mahmahte ahi zaw. 23 Thupiloua i ngaihsut pumpi kahiangte zong thupina i piak zawkte ahi uhi. Tua baan ah, i phawk thamlouh kahiangte, kilawmna tamsem i pia hi. 24 Kilawmna nei kahiangte'n limbawl tuam ding a kisam kei uhi. Ahihhangin, Pathian in pumpi kahiangte kituak takin a zomkhawm a, pahtawina kisamte pahtawina lianzaw a pia hi. 25 Tua bel, pumpi-a kikhenna a om louh nading ahi a, kahiangte a kibanga kiawlmawhna a kineihtuah nading uh ahi. 26 Kahiang khat in a thuak leh, kahiang chih in amah tawh a thuakkhawm a, kahiang khat in pahtawina a ngah leh, kahiang chih amah tawh a kipakkhawm hi. 27 Tuin noute Khrist' pumpi na hi uh a, tua pumpi-a kihiangtuah tek na hi uhi. 28 Pathian in saptuam sung ah, a masapenin sawltakliante, anihna ah kamsangte, a thumna ah sinsakmite a sep hi. Tua baan ah thillamdang hih theite, hihdamna thawnpiak neite, midangte huh theite, vaisaina neite, pau tuamtuam zanga pau theite a sep hi. 29 A vekun sawltaklian ahi ua hia? A vekun kamsang ahi ua hia? A vekun sinsakmi ahi ua hia? A vekun thillamdang hih thei ahi ua hia? 30 A vekun hihdamna thawnpiak nei ahi ua hia? A vekun paute in a pau ua hia? A vekun paute hilhchet theihna a nei ua hia? 31 Ahihhangin, thawnpiak thupizawte nakpitakin lunggulh un.
Itna
1 Tuin ke'n lampi hoih pen noute kon sinsak ding: Mihing paute leh vansawltakte' pautein thu ka gen thei mai thei. Ahihhangin, itna ka neih kei leh, dak ging, ahih kei leh, dakkhutbet ging bang lei ka suak hi. 2 Kamsang thugen theihna thawnpiak ka nei mai thei. Thusim kiseelte theihsiam theihna khempeuh ka nei mai thei. Theihna khempeuh ka nei mai thei. Mualte suan theihna nangawn upna ka nei mai thei. Ahihhangin, itna ka neih kei leh bangmah ka hi kei. 3 Ka neih ka lam khempeuh gentheite vaak nadingin ka pe mai thei. Ka pumpi nangawn meia haltum dingin ka pe mai thei. Ahihhangin, itna ka neih kei leh, bangmah ka lawhtak kei hi. 4 Itna a lungduai a, a migi hi. Itna in a haza kei. Itna a kisial kei a, a kisathei kei hi. 5 Itna a huham kei a, ama' angsung kia a khual kei hi. Itna a hehbaih kei a, mi' gitlouhnate a chiamteh teh kei hi. 6 Itna in diktatlouhna a kipahpih kei a, thutak a kipahpih zaw hi. 7 Itna in bangteng a hu gige a, bangteng a muang zou gige a, bangteng a lamen gige a, a thuak mualsuah zou gige hi. 8 Itna a zuau ngei kei. Kamsang thugente om mah leh, beisak ahi ding hi. Paute om mah leh tawpsak ahi ding hi. Theihna om mah leh, beisak ahi ding hi. 9 Eite'n a kimloua thei i hih manin, a kimlouin thu i gen uh. 10 Ahihhangin, bukimna a hong tun chiangin, bukimlouhna beisak ahi ding hi. 11 Kei naupang ka hih laiin, naupang pauin ka pau a, naupang' theihin ka thei a, naupang' ngaihsutin ka ngaihsun hi. Ahihhangin, piching ka hong hih chiangin bel, naupang thilte ka nusia hi. 12 Tuin eite'n limlang miala kilang bang leiin i mu milmial uh. Ahihhangin, tua hun chiangin, kimaituahin i mu ding uhi. Tuin a kimlouin ka thei a, tua hun chiangin, theiha ka om bangin, a kimin ka theita ding hi. 13 Hiai thil thumte a omden uhi: Upna, lametna leh itna. Hiaite lak ah a thupipen itna ahi.
Kamsang Thugen leh Paute
1 Hitna a delhin delh un. Khalam thawnpiakte lunggulh un. Adiakin, kamsang thugen theihna lunggulh un. 2 Pautea thugen mi in mihingte kianga thugen ahi kei a, Pathian kianga thugen ahi zaw hi. Kuama'n amah a theisiam kei hi. Ahihhangin, a khain thusim kiseelte a gen hi. 3 Kamsang thugen mi in bel mihingte kiang ah, amaute lamtouh nading, hanthawn leh khamuan nadingin thu a gen hi. 4 Pautea thugen mi, amah leh amah a kilamtou hi. Kamsang thugen mi in bel saptuam a lamtou hi. 5 Noute khempeuh in paute zanga thu na gen theih nading uh kon deihsak hi. Ahihhangin, kamsang thugen theihna kon deihsak sem hi. Saptuam lamtouh nadinga hilhchian thei ahih kei ngai leh paute zanga thugen mi sangin, kamsang thugen mi a thupi zaw hi. 6 Tuin, sanggamte aw, kilaaknain hiam, theihnain hiam, kamsang thugenin hiam, ahih kei leh, thuhilhnain hiam hiloua, pautuamte zanga thugenin noute kiang ah hong pai leng, noute adingin bang ka phatuam dia ahia? 7 Hinna neilou thil gingtheite, tamngai hi-in, kaihging hita leh, a ging in gindan tumta a neih kei leh, bang kaih kitum hiam, chih kua'n a thei dia? 8 Pengkul pen gindan tumta neia a kimut kei leh, galdou dingin kua a kisakhol thei dia? 9 Noute zong tua bang na hi uhi. A kithei pau zanga thu na gen kei uleh, na gen uh kua'n a thei dia? Huihkhua-a pau bang leltak na hi ding uhi. 10 Leitung ah pau tampi a om. Ahihhangin, gen neilou pau a om kei hi. 11 Mi' thugen ka theih keia leh, thugen mi adingin melmakmi ka suak a, amah zong kei adingin melmakmi a suak hi. 12 Noute zong tua bang na hi uhi. Khalam thawnpiakte na lunggulh bangun, saptuam lamtouh nadingte hauh diak sawm un. 13 Tua ahih manin, kuapeuh pau-tea thugen mi in a thugen a hilhchet theih nadingin thum hen. 14 Pautea ka thum chiangin ka kha a thum a, ka lungsima theihna ah bel a gahsuah tuan kei. 15 Bang ka lawhta dia le? Ka khain ka thum ding a, ka I lungsima theihnain zong ka thum ding ahi. Ka khain phatna la ka sa ding a, ka lungsima theihnain zong ka sa ding ahi. 16 Nang na kha-a Pathian na phat laiin, bangmah theilou mi in na kipahthu gen ah bangchi'n, Amen, a chi thei dia? Ahang bel, ama'n na gen theilou hiven. 17 Kipahthu na gen hoih ngial a, ahihhangin, mi dang a lamtou tuan kei hi. 18 Noute teng sangin pautein thu ka gentam zaw. Tua hangin Pathian tung ah kipahthu ka gen hi. 19 Ahihhangin, saptuam sung ah zaw pautea paukam 10,000 ka gen sangin, mite sinsak nadingin theihtheih paua paukam nga gen ka telzaw hi. 20 Sanggamte aw, naupang banga ngaihsut tawpta un. Lungput gilou lam ah naungek hi unla, na ngaihsutna lam uah piching hi un. 21 Dan Laibu sung ah: Paute zang mite tungtawn leh, melmak mite' muk zangin hiai mite kiang ah thu ka gen ding, tua bang hun nangawnin ngaikhe lou ding uhi, Toupa'n a chi, chi-in a na kigelh hi. 22 Tua ahih manin, paute zaw chiamtehhna ahi. Tua zong a ummite ading hilouin, a umloumite adinga chiamtehna ahi. Kamsang thugen bel, a umlou mite ading hilouin, a ummite ading ahi zaw hi. 23 Mun khat ah saptuam hong kikhawm henla, mi khempeuh pautein pau henla, tua mun ah bangmah theilou mi, ahih kei leh, a umlou mi pawlkhat hong lut leh, mihaite, hon chi lou ding uhia? 24 Mi chih in kamsang thugen gen leh bel, tua ah a umlou mi, ahih kei leh, bangmah theilou mi khat hong lut leh, avekun amah mikhial a hihna kiphawksakin mawh a tangsak ding uhi. 25 A lungsung thu-imte pholhkhiakin a om ding a, ama'n khupbawhin Pathian a be ding a: Noute lak ah Pathian a om taktak! chi-in a phuang ding hi.
Biakna Dan Kizen
26 Sanggamte aw, bang i genta dia le? Noute nong kikhop chiangun, phatna la sak ding na nei tek uhi. Sinsakna gen ding zong na nei tek uhi. Paute na nei tek uhi. Kilaakna gen ding na nei tek uhi. Hilhchetna na nei tek uhi. Saptuam lamtouh nadingin thil bangkim hih un. 27 Mi kuapeuh in pautea thu a gen leh, mi nih in hiam, ahih kei leh, a tam tawpin thum in gen hen. Tua zong khat khata kikhelin hi henla, khat in hilhchian hen. 28 A hilhchian thei a om kei aleh, a pau pen saptuam sung ah dai dide henla, amah leh Pathian kal ah gen hen. 29 Kamsang nih hiam, thum hiam in thu gen henla, midangte'n thu kigen limtakin chian uhen. 30 A tu mi khat peuh kianga kilaakna hong tun aleh, thugen masapen daai hen. 31 Mi khempeuh in sinsakna ngah a, hanthawnna a ngah theih nadingin khat khata kikhelin na vekun Pathian thu na gen thei uhi. 32 Kamsangte' khate zaw kamsangte thunuaia om ahi. 33 Pathian zaw buaina Pathian ahi kei a, lemna Pathian ahi zaw hi. Misiangthoute kikhopna tenga hih dan bangin, 34 saptuam sungte ah numeite daai dide uhen. Dan in a gen bangin, a pau uh phal ahi kei. A kiphahniam zaw ding uh ahi. 35 Amaute'n bangpeuh kan nop a neih uleh, inn ah amau' pasalte kiang ah kan uhen. Saptuam sunga pau numei adingin a zumhuai hi. 36 Pathian thu noute apan kipan ahi-a hia? Ahih kei leh, noute kia hong banpha ahi-a hia? 37 Mi kuapeuh in kamsang hiam, ahih kei leh, kha thawnpiak neia khami hi-a a kingaihsut aleh, noute kianga kon gelh, Toupa' thupiak ahi, chi-in saang hen. 38 Hibang thu a limsak kei leh bel, amah zong limsaklouh-in a om ding hi. 39 Tua ahih manin, ka sanggamte aw, kamsang banga thugen theih ding lunggulh un. Pautea pau kham kei un. Ahihhangin, thil bangkim a kilawm leh a kilem dimdiamin hih un.
Khrist Thawhkikna
1 Sanggamte aw, noute kianga tangthupha kong gen pen mah kon theisak thak nuam hi. Tua mah noute'n na saangta uh a, tua mah ah na dingkip uhi. 2 Noute kianga kong gen hiai tangthupha kiptaka len na hih nungsang uh, hiai maha hotdam na hi uhi. Tua ahih kei leh, a mawkna-a um na hi ding uhi. 3 Ke'n ka saansa mah noute kiang ah a poimawh penin kon gensawn hi. Tua bel, Laisiangthou' gen bangbanga i khelhnate adinga Khrist a sihna thu ahi. 4 Amah phumin a om a, Laisiangthou gen bangbangin, ni thum ni-in kaihthawhin a om hi. 5 Amah Kifa kiang ah a kilaak a, tua nungin Sawmlenihte kiang ah a kilaak hi. 6 Tua nungin, a hun kibangin sanggamte 500 sanga tamzaw kiang ah a kilaak hi. Tuate lak ah pawlkhatte ihmu khinta mah leh, a tamzaw a damlai uhi. 7 Tua baan ah, Jakob kiang ah a kilaak a, tua khitin sawltakliante khempeuh kiang ah a kilaak hi. 8 A tawppenin, pian hun loua piang kei kiang nangawn ah hong kilaak hi. 9 Kei zaw sawltakliante laka a neupen ka hi. Pathian' saptuam ka bawlsiat manin, sawltaklian chih tuak zong ka hi kei hi. 10 Ahihhangin, Pathian' hehpihna hangin ka hihna bangbang ka hi lei a, kei tunga ama' hehpihna a mawkna a suak kei hi. Tua thamlouin sawltaklian dang teng sangin ka semgim zaw hi. Hinapi-in, kei ka hi kei a, kei tunga kipia hehpihna in sem ahi zaw hi. 11 Kei hiam, amaute hiam hita le-ung, hiai tangthupha ka gen uh a, noute'n tua na um uhi.
Misite Thawhkikna
12 Misite lak apan Khrist kaihthawhin a om, chih ka gen uhi. Tua hinapi, bangchi dana noute laka pawlkhat in misi thawhkkikna a om kei, chi thei na hi ua? 13 Misite thoukik lou na hi leh bel, Khrist nangawn kaihthawha omlou hi ding hi. 14 Khrist thoukik lou na hita leh bel, ka thugen uh a mawkna ahi ding a, na upna uh zong a mawkna ahi ding hi. 15 Tua thamlouin, koute Pathian tawh kisaiin theihpih takloute hita ve ung; ahang bel, Pathian in Khrist a kaithou chi-a amah tawh kisaia theihpihna thu na gen hi ve-ungin. Misite kaihthawh hilou taktak hileh, Pathian in Khrist kaithou lou hita ve. 16 Misite kaihthawh hi kei lelah Khrist zong kaihthawh a na hi kei ding hi. 17 Pathian in Khrist kaithou lou na hi leh, noute' upna a mawkna ahi ding a, na khelhna ua om lai na hi ding uhi. 18 Tua hi leh, Khrist sunga ihmusate mangthang hita ve! 19 Eite'n tu damsung lei adinga Khrist tunga lametna nei i hih leh, mi laklaka mi hehpihhuaipen i hi ding hi. 20 Ahihhangin, Pathian in misite lak apan Khrist a kaithou taktak a, a na ihmusate laka gah masa a nahi. 21 Mi khat hanga sihna hong tun bangin, mi khat hang mahin misi thawhkikna hong om ahi. 22 Adam-a mi khempeuh a sih bangin, Pathian in Khrist sung ah mi khempeuh a hingsak ding hi. 23 Ahihhangin, michih adingin ama' hun tek a om ding hi. Khrist, gah masa ahi. Tua baan ah, amah hong pai chiangin, ama-ate a thou ding uhi. 24 Tua khit chianga ama'n ukna thuneihna leh vangletna khempeuh hihmangthang a, Pa Pathian kianga kumpigam a piakkhiakkhit chiangin tawpna hong tung ding hi. 25 Ama'n a melmate khempeuh a khepek nuaia a koih mateng vai a hawm ding mah a kilawm him ahi. 26 Hihmanthata om ding meima nanungpen sihna ahi. 27 Ama'n thil bangkim a khenuaia koihta hiven. Thil bangkim ama' khenuaia koih a kichihna in, Khrist nuaia thil bangkim koihpa Pathian bel a genkhawm kei, chih a kitel hi. 28 Pathian in hiai a hih tangtun chiangin, thil bangkim ama' nuaia koihpa' nuai ah a Tapa mah zong koih ahita ding hi. Tua bel, Pathian, bangkima bangkim a hih theih nadinga ama'n hibanga hih ding ahi. 29 Thawhkikna omlou na hi leh, misite adinga baptisna tangte'n bang a chihna uh ahita dia le? Misite kaihthawh hi hetkei leh, misite adinga banghanga mi kibaptis uh hi ding ahia? 30 Koute zong banghanga dakkal tenga sih lauhuaia kikoih nuam ding ka hi ua? 31 Khrist Jesu i Toupa-a noute kon sial taktak bangin hiai a taktak ahi: Nisimin ka si hi. 32 Mihing' deihdan leia Efesa khua-a gamsate tawh kisual ka na hih leh, ke'n bang ka lawhtak dia eita? Misite kaihthawha omlou hi leh, Nein dawn le'ng ake, zingchianga si ding hi lim ve hang, kichi bangin chi le'ng ake. 33 Kuamah kikhemzousak kei un. Lawm hoihlou in omdan hoih a hihse nak hi. 34 Diktatna tawh kisaiin kiphawk thak unla, khial kei un. Ahang bel, mi pawlkhat in Pathian phawklou uh ahi. Na maizum nadingua hiai gen ka hi.
Thoukik Pumpi
35 Mi khat in: Misite bang chi banga kikaithou hiam? Bang pumpi tawh thoukik uhiam? a chi ahi ding e. 36 Nang mihai! Na tuh na pawi pen a sih phot kei leh a hing thei kei. 37 Na tuh na pawi chiangin, a hong om ding a kung pen na tuhin na pawi kei hi. Buh hita hen aw, khaichi tang khat peuh hita hen aw, a tang ahi na tuha na pawi. 38 Ahihhangin, Pathian in ama' deih bangbangin pumpi a pia hi. Khaichi tang teng adingin ama' kung tek a pia hi. 39 Sa khempeuh sa kibang ahi vek kei. Mihingte'n amau' sa nam tuam khat a nei uh a, vasate'n sa nam tuam dang a nei uh. 40 Vanlam pumpite leh leilam pumpite a om. Vanlam pumpite' thupina nam khat ahi a, leilam pumpite' thupina nam tuam ahi. 41 Ni in vakna nam khat a nei a, khapi in vakna nam tuam a nei. Aksite'n vakna nam tuam a nei uh. Aksi khat vakna pen aksi dang' vakna tawh a kibang kei hi. 42 Misi thawhkikna zong tua bang ahi ding. A kituha kipawi pumpi pen a muatthei ahi a, tua mah a muattheilouin a kikaithou hi. 43 Sim-mawhhuaia kituhin a kipawi a, thupitaka kaihthawhin a om. Hatloua kituhin a kipawi a, vangliana kaihthawhin a om. 44 Salam pumpi-a kituhin a kipawi a, khalam pumpi-a kaihthawhin a om hi. Salam pumpi a om a, khalam pumpi zong a om hi. 45 Mi masapen Adam, hinna nei mihing hong suak! chi-in a na kigelh hi. Adam nanung bel hinna pia Kha ahi. 46 Ahihhangin, khalam a om masa kei a, salam a om masa hi. Tua khit chiangin, khalam a om hi. 47 Mihing masa pen leia leivui apan bawl ahi. Mihing nihna bel vantung apan ahi. 48 Lei mihingte bel tua lei apana mihing bangbang ahi a, vaanlam mihingte zong tua vaan apana mi bangbang ahi. 49 Eite'n leia bawl mihing batna i neih bangin, vaan apan tua mi batna zong i nei ding hi. 50 Sanggamte aw, noute kiang ah hiai ka gen hi: Sa leh sisan in Pathian' kumpigam a luah thei kei hi. Tua mah bangin, muat thei in muattheihlouhna a luah thei kei hi. 51 Ngai dih ua, noute thusim kiseel kon hilh hi: Eite khempeuh i ihmu vek kei ding, ahihhangin, i vekpi-in khenlamdanin i om ding hi. 52 Pengkul nanungpen gin chiangin, thakhatin, mitphiatkal leiin, khenlamdanin i om ding hi. Ahang bel, pengkul hong ging ding a, tua hun chiangin, misite muat theiloua kaihthawhin a om ding uh a, eite khenlamdanin i om ding hi. 53 Hiai a muat thei in muattheihlouhna a silh teitei ding a, hiai a sithei in sihtheihlouhna a silh teitei ding ahi. 54 Hiai a muat thei in muattheihlouhna a silh a, hiai a sithei in sihtheihlouhna a silh chiangin, vualzawhna in sihna a valhta, kichi hong tung ding ahi. 55 Sihna aw, na vualzawhna koia omta ahia? sihna aw, na gu koia omta ahia? chi-a na kigelh a hong tungta ding hi. 56 Sihna gu khelhna ahi a, khelhna vangletna bel Dan ahi. 57 Ahihhangin, i Toupa Jesu Khrist tungtawna vualzawhna hon pepa Pathian tung ah kipahthu om hen! 58 Tua ahih manin, ka it ka sanggamte aw, kiptakin ding unla, bangmah kihihlingsak louin Toupa' nasep ah kipumpiak gige un. Toupa-a noute' sepgimna a mawkna ahi kei hi.
Pathian' Mite adinga Thilpiak
1 Tuin, misiangthoute adinga na thilpiak uh tawh kisai: Galatia gama saptuamte kianga ka thupiak bangin noute'n zong hih un. 2 Mi chih in na lamkhiak bangbangun, nipikala ni masapenin na koihkhia un. Kei kong pai chianga thilpiak lak khawm tawm kul lou dingin hih un. 3 Noute'n na muan uh mi pawlkhat sepkhia un. Kei kong pai chiangin, hehpihna hanga na thawnpiakte uh Jerusalema paw dingin, amaute pulakna lai tawh ka sawl ding hi. 4 Kei ka vapai a kilawm leh zong, amaute'n hon zui ding uhi.
Mimal Ngetnate
5 Makedonia gam ka tot khit chiangin, noute kiang ah kong pai ding hi. Makedonia gam tawnsuak ding chi ka hi. 6 Noute kiang ah bangtan hiam, phalbi sung teng houh tam leng. Ka pai nading peuhmah ah noute'n hon khasawn le uchin ka chi hi. 7 Tutung in zaw, paikawma noute hong muh zual lei ka ut kei a, Toupa'n pha a sak leh, noute kianga tam takdih ka lamen hi. 8 Ahihhangin, Pentikos ni zat dong Efesa khua ah ka taam ding, 9 gahsuaha sep theih nading kong lianpi kei adingin a kihong hi. Hon dou mi tampitak zong om veve hi. 10 Timothi noute kianga hong pai chiangin, lauthawng loua a om theih nading na ngaihsun un. Amah zong kei bangbanga Toupa' nasem ahi. 11 Tua hangin kuama'n amah simmawh kei hen. Amah ka kianga hong pai theih nadingin, a zinna lam ah lungmuangtakin hon kha un. Sanggamte tawh amah a hong pai ding ka lamen hi. 12 Tuin, i sanggampa Apolo tawh kisai gen lehang: Amah, sanggamte tawh noute kiang ah hong pai leh, chi-in nakpitakin ka kun hi. Ahihhangin, tu huna hong pai ding a ut het kei hi. Hun lem a muh chiangin hong pai na ding hi. 13 Kiveng unla, thu-up sung ah dingkip unla, hangsantakin om unla, hattakin om un. 14 Na hih peuhmah uh itnain hih un. 15 Stefenas innkuante, Akhaia gama a um masapente ahi uh, chih leh, misiangthoute' nasepsak lam ah a kipe zou mahmah uh, chih na thei uhi. 16 Sanggamte aw, noute zong tua bang mite leh koute tawh semkhawm leh semgim mi peuhmah kianga kitahlut dingin kon hanthawn hi. 17 Stefena, Forchunata leh Akhaika hong tun takun ka kipak mahmah hi. Noute'n non na piakkhak louh uh ka taksap awng amaute'n hon huksak uhi. 18 Amaute'n ka kha hon halhsak uh a, noute' kha zong a halhsak uhi. Tua bang mite a hihna bangtakun saang un.
Chibaibukna
19 Asia gama saptuamte'n noute chibai hon khak uhi. Akuila leh Prisila in amau' inna saptuam kikhawmte tawh, Toupa-a lung-taitakin noute chibai hon khak uhi. 20 Sanggamte khempeuh in noute chibai hon khak uhi. Kitawp siangthouin kichibai chiat un. 21 Kei, Paul in keima' khut mahmahin hiai chibaibukna kon gelh ahi. 22 Kuapeuh in Toupa Jesu Khrist a it kei aleh, hamsethuakin om hen. Toupa aw, hong pai in! 23 Toupa Jesu Khrist' hehpihna in noute hon ompih hen. 24 Khrist Jesu-a kon itna noute khempeuh kon khak hi. Amen.
1 Kei, Pathian' deihlama Jesu Khrist' sawltaklian Paul leh i sanggampa Timothi in, Korinth khua-a Pathian' saptuam leh Akhaia gam khempeuha misiang-thou omte kiang ah lai kon gelh uhi. 2 I Pa Pathian leh Toupa Jesu Khrist apan hehpihna leh lungmuanna noute tung ah om hen.
Khamuanna Khempeuh' Pathian
3 I Toupa Jesu Khrist' Pathian leh Pa phatin om hen. Amah zahngaihna Pa leh khamuanna Pathian ahi. 4 Midangte ka hanthawn theih nadingun ama'n koute' haksatna khempeuh ah hon hanthawn hi. Pathian apan hanthawnna ka ngah pen mahun haksatna khat peuh thuakte ka hanthawn uhi. 5 Khrist' thuaknate koute' hinna sunga hong luanlet bangin, Khrist' tungtawna ka khamuanna uh zong a luanglet hi. 6 Koute'n gimna haksatnate ka thuak uleh, Pathian in noute hon hanthawn theih nading leh hon hotdam theih nading ahi. Pathian in koute hon hanthawn leh, noute hon hanthawn theih nading leh tua hanthawnna in koute' thuak banga na thuakna ua thuakzawhna gah a suah nading ahi. 7 Koute' thuaknate na tang sam uh a, koute' hanthawnna zong na tang sam uh, chih ka theih manun, noute kon muanna uh a kip hi. 8 Sanggamte aw, Asia gam ah gimna haksatnate ka thuak uh, chih na theih louh uh ka deih kei uhi. Koute'n ka thuak zawh vai uh tunggikna ka nei uh a, hinna nangawn mansuah ka lau uhi. 9 Ka lungtang uah sihna thukhenna thuakta bangin ka kithei uhi. Hiai bel, koumau kimuang lou a, misite kaithoupa Pathian ka muan zawk nading uh ahi. 10 Ama'n koute tua sih theihna lauhuai thupi apan hon hukheta a, hon hukhe lellel a, hon hukhe lai ding, chih ka muang uhi. 11 Tua bel, noute'n thuumna-a non huh man uh ahi ngei ding hi. Tua bang ahih manin, mi tampite' thuumna dawnna-a deihsakna hehpihna piaka om ka hih manun, koute taangin mi tampite'n kipahthu a gen ding uhi.
Paul' Thilsawm Khekna
12 Koute' kisialna hibang ahi: Leitunga ka nuntak zia uh, ka sia-le-pha theihna un hon theihpih hi. Noute tawh kisaia ka nuntak zia uh ahi diak hi. Sa pilna bangin ka nungta kei uh a, Pathian' hehpihna apan siangthouna leh chihtakna tawh ka nungta zaw uhi. 13 Noute kiang ah na sim theih louh ding uleh na theih theih louh ding uh bangmah kon gelh kei uhi. Na sim theih ding uleh na theih theih gige ding uh ka muang ahi. 14 Koute theih natan non neita uh a, a kima na theih hun uh hong om ding, chih ka lamen hi. Tua hun chiangin, noute'n koute non kisialpih ding uhi. I Toupa Jesu ni hong tun chiangin, koute'n zong tua zah mahin noute kon kisialpih ding uhi. 15 Hibang kimuanna ka neih manin, noute hong phak ka sawm masa hi. Noute'n phattuamna nihvei na tan ding uh ka deih man ahi. 16 Makedonia gama ka hawh chiangin hon tawn lengla, Makedonia gam apan kong kilehkik chiangin hon tawn nawnin, noute'n Judia gam ah hon khasawn le uchin ka chi hi. 17 Hiai ka sawm laiin, a sawm maimai ka hi-a hia? Sa dan banga Ahi, ahi, chih leh, Ahi kei, ahi kei, chih a kitona chikhawm khawma thil sawm ka hi-a hia? 18 Pathian muanhuai a hih taktak manin, noute kianga ka thugen uh, Ahi, chih leh Ahi kei, chih a hikhawm kei hi. 19 Ahang bel, Pathian' Tapa Jesu Khrist thu, kei leh Sila leh Timothi in ka gen uh zaw, Ahi, chih leh, Ahi kei, chih a hikhawm kei a, amah ah, Ahi, chih ahi gige zaw hi. 20 Pathian' thuchiamte khempeuh a vekpi-in Khrist ah, Ahi, chih ahi vek hi. Tua bang ahih manin, koute'n Patthian' thupi nadingin, amah ah, Amen, ka chi uhi. 21 Koute tawh noute Khrist-a hon dingkipsakpa leh hon thaunilhpa Pathian ahi. 22 Ama'n ama'-a i hihna kipsakna Kha eite' lungsung ah hon koih hi. Tua Kha bel, ama'n eite hon khamkholhna leh hong tung ngeingei ding thil chiamna ahi. 23 Tua thamlouin, noute kon hawi nopna-a Korinth khua-a hong kik lou ka hi. Tua bang ahi chih ka hinna kha hon theihpihpa Pathian ahi. 24 Noute' upna hon thuneihkhum nuam ka hi kei uh a, noute' lungnop nadinga noute tawh semkhawm ka hi zaw uhi. Ahang bel, upna pansana dingkip na hi uhi.
1 Tua bang ahih manin, noute' lungtang nasak kha ning chi-in noute kiang hong phakkik takdih louh dingin thu ka na khentatta hi. 2 Ahang bel, ke'n noute hon dahsak ka na hihtak leh, kon dahsakte loungal kei hon lungnuamsak ding kua dang ka neia eita? 3 Hong pai leng, hon lungnuamsak dinga kilawm noute'n kei non dahsak kha ding uhi. Tua hanga hibanga hon gelh ka hi. Noute khempeuh in ka lungnopna na tang sam ding uh, chih ka muang hi. 4 Ka lungtanga natna leh awlmawhna lianpi tawh, khitui tampi tawh noute kianga lai hon gelh ka hi. Noute kon dahsak nop man ahi kei a, kon itna thuk dan kon theihsak nop man ahi zaw hi.
Akhialmi Ngaihdamna
5 Mi khat peuh in dahna piangsakta ahih leh, noute khempeuh hon dahsak zahin kei hon dahsak kei. Kamuangtaka gen louhin dah bel hon dahsak mah hi. 6 Noute a tamzaw in gawtna na piak uh ama' adingin a kichingta hi. 7 Tuin amah na ngaihdam ua, na hanthawntak ding uh kilawm ahi. Tuachilouin zaw, lungkhamna in amah a tuum kha ding hi. 8 Tua bang ahih manin, amah na itna uh phawksak thak dingin kon hanthawn hi. 9 Noute kianga lai kon gelhna hang bel, thil bangkim ah thu na mang uhiam chih kon ettel nop man ahi. 10 Mi khat peuh na ngaihdam uleh, ke'n zong ka ngaidam hi. Ngaihdam nading kulna om ahih peuhmah leh, ka ngaihdam ahita hi. 11 Setan in eite nuamtak hon sak louh nadingin, tua bang mi ka ngaidam hi. Setan' thil gel dante lah i theihmawh ahi kei hi.
Thukhun Thak Nasepna
12 Khrist' tangthupha gen dinga Troas-a ka hawh laiin, Toupa'n kong lianpi hon honsak hi. 13 Ahihhangin, ka sanggampa Tita tua muna ka muh louh bel ka lungsim a tawldam thei kei a, amaute mangpha ka khak a, Makedonia gam zuanin ka paita hi. 14 Ahihhangin, Pathian tung ah kipahthu tung hen. Ama'n Khrist ah koute vualzoua hon kizuisakin hon makaih hi. Ama'n koute' tungtawnin Khrist theihna gimnamtui mun chih ah a zamsuaksakta hi. 15 Ahang bel, Pathian adingin koute Khrist' gimnam ka hi uh a, hotdama om lellelte leh mangthang lellelte lak ah Khrist' gimnam ka hi uhi. 16 Pawlkhatte adingin hinna gim ka nam uh a, pawl dangte adingin sihna gim ka nam uhi. Hibang dinga kiching kua ahia? 17 Koute'n mi tampite bangin, koumau' met nadingin Pathian thu ka zuak kei uhi. Tua naksangin, Pathian apana sawlte ka hihna bangbangun, Pathian' mitmuha takna tawh Khrist ah thu ka gen uhi.
1 Koute, koumau kiphat sawm thak ka hi ua hia? Ahih kei leh, sawltaklian dangte banga noute apan phatna lai kisam ka hi ua hia? 2 Noute mah ka lai uh na hi uhi. Miteng' theih leh sim theih, koute' lungtang sunga kigelh laikhak na hi uhi. 3 Noute Khrist' laikhak, koute' sepgah na hi uh, chih na kilang-sakta uhi. Laituia kigelh hilou, Pathian' Kha hing' gelh na hi zaw uhi. Suangpek tunga kigelh hilou, mihing lungtang sa tunga kigelh na hi zaw uhi. 4 Koute'n Pathian lam ah Khrist tungtawnin hibang kimuanna ka nei uhi. 5 Koumau apan om banga thil bang peuh ngaihsun dingin koute ka ching uh chihna ahi kei. Koute' chinna zaw Pathian apan ahi. 6 Ama'n Thukhun Thak nasemte hi dingin koute hon chingsak ahi. A laigelh lei nasem hilouin a Kha nasemte ka hi uhi. Ahang bel, a laigelh in a that a, a Kha in bel hinna a pia hi.
Thukhun Thak Thupina
7 Sihna hon tun nasepna, tua suangpek tunga a khuaka kigelh pen, thupitaka taangphain hong tung hi. Mosi' meia tua thupina taang ahih manin, Israelte'n Mosi' maitang a en gige thei kei uhi. Ahihhangin, tua thupina hong mual a, hong mang hiai hiai hi. 8 Tua bang a na hih leh, a Kha nasepna thupi zawsem lou ding hia! 9 Mihingte mawhtanna hon tun tua nasepna bawn thupi ahih nung, diktatna hon tun nasepna thupi zaw sem lou ding hia! 10 Thupina thupizaw a om hi. A na om masa' thupina pen in thupina thupizaw tawh tehin, thupina a neita kei hi. 11 A muala mangthang thei bawn, thupina tawh hong tung ahih nung, a omden pen' thupina nak thupi zawk natel inchia! 12 Tua bang lametna nei ka hih manun, thugen ka hangsan uhi. 13 A muala hong mang hiai hiai Mosi' maitang taang pen, Israelte'n en thei lou uh ahih manin, Mosi in khuhnain a maitang a khuh hi. Koute zaw Mosi banga maitang khuh ka hi kei uhi. 14 Ahihhangin, tua mite' lungtang a khauh a, tuni dongin, Thukhun Lui a sim chiangun, tua khuhna hawkkhiak louhin a om lai hi. Ahang bel, Khrist kia ah tua khuhna kihawkkhia ahi. 15 Tuni dongin, Mosi laibute a sim chiangun, tua khuhna in a lungtangte uh a khuh lai hi. 16 Ahihhangin, kuapeuh Toupa lama a kihei chiangin, Toupa'n tua khuhna a lamang hi. 17 Toupa mah ahi tua a Kha. Toupa' Kha omna peuh ah noplenna a om hi. 18 Eite khempeuh maitang khuhna hawksa-a Toupa' thupina taangsawnsakte i hi uhi. Kha a hipa Toupa apan thupina thupi semsem batpihin bawllamdangin i om toutou uhi.
Leibel sunga Goute
1 Koute'n Pathian' zahngaihna ka ngah bang ua, hiai nasepna ngah ka hih manun, ka lungke kei uhi. 2 Lungkiak naksangin, simtatna leh a zumhuai nuntak dan ka tawpsan uhi. Khemna thu ka zang kei uh a, zekhemna zangin Pathian thu ka kaikawi sam kei uhi. Thutak kiteltakin ka gen uh a, Pathian' mitmuha michih' sia-le-pha theihna' pompih theihin ka kibawl zaw uhi. 3 Koute' tangthupha na kikhuh ahih zenzen leh zong, a mangthang lellelte adinga kikhuh ahi lei hi. 4 Tulai leitung pathian in a umlou mite' lungsim mit a tawsak a, Pathian batpih ngeingei ahipa Khrist' thupina tangthupha vak tangkhia mu theilou dingin amaute a koih-a ahi. 5 Koute'n koumau kitangkoupih ka hi kei uh a, Khrist Jesu mah Toupa ahi, chih leh, Jesu hanga noute' silate ka hi uh, chih tangkoupih ka hi zaw uhi. 6 Ahang bel, mial lak apan vaak hong taang hen, a chipa Pathian in Jesu Khrist' maitanga Pathian' thupina theihna vaak hon pe dinga koute' lungsunga ama' vaak tangsakta hiven. 7 Ahihhangin, koute'n hiai gou leibel peuh ah ka kem uhi. Tua bel, hiai vangletna thupi mahmah, koute apan hilou a, Pathian apan ahi, chih a lat nading ahi. 8 Langkhat langkhat ah nehchihin ka om uh a, ahihhangin, nehtapin ka om kei uh. Lauthawngin ka om uh a, ahihhangin, lametbeiin ka omkei uh. 9 Gelgawtin ka om uh a, ahihhangin, Pathian in hon taisan kei. Hihpukin ka om uh a, ahihhangin, hihsiatin ka om kei uh. 10 Koute'n ka pumpi uah Toupa Jesu' sihna ka paw gige uhi. Tua bel, koute' pumpi-a Jesu' hinna a kilat nading ahi. 11 Tua bang teng hinapi-in, koute ka hing lailai uhi. Pathian in a sithei koute' pumpi-a Jesu' hinna a latsak nadingin, Jesu hangin si dinga piakkhiaksa ka hi uhi. 12 Tua bang ahih manin, koute' sung ah sihna in a sem a, noute' sung ah hinna in a sem hi. 13 Ke'n um ing a, tua hanga thu gen ka hi, chi-in a na kigelh hi. Tua upna kha mah neiin koute'n zong ka um uh a, thu ka gen uhi. 14 Pathian in Toupa Jesu a kaithouta a, Jesu tawh koute zong hon kaithoukhawmin, noute tawh ama' omna mun ah hon piikhawm ding, chih ka thei uhi. Koute'n tua ka theih manun ka um uhi. 15 Hiaite khempeuh noute' phattuam nading ahi. Tua mah, mi tam semsem baanpha tua hehpihna in Pathian thupi nadinga kipahthu genna a luanletsak nading ahi. 16 Tua bang ahih manin, koute ka lungke kei uhi. Koute' pawlam mihinna zawngkhal semsem mah leh, Pathian in koute' sunglam mihinna pen nisimin a thaksak gige hi. 17 Koute' gimthuak haksatnate zaang mahmah mah leh hun tomchik sung lei daih ding in Tangtawn thupina hon tun ding hi. Tua thupina in tu-a haksatnate khempeuh a khup vek ding hi. 18 Tua bang ahih manin, koute'n a kimu theite ka buaipih kei uh a, a kimutheiloute ka thudon zaw uhi. Ahang bel, a kimutheite, hun tomchik ading ahi a, a kimutheiloute bel Tangtawn thil ahi.
Vanlam Inn
1 Eite i tenna leilam puanbuk pen hihsiatin om mah leh, mihing khuta lam hilou, vantunga Tangtawn inn, Pathian apan inn i nei chih i thei hi. 2 I vaanlam inn silh ding lunggulhin thuuma mauin i om tadih uhi. 3 Tua banga silh-a i om chianga, savuaka om lou ding hi ve hangin. 4 Ahang bel, silhloua omlou a, i vanlam inn silha i om a, a si thei pen hinna' valhzawha a om ding i ut manin, hiai puanbuka i om sung teng thuma mauin leh lungsim giktakin i om tadih hi. 5 Hiai ding maha eite hon bawl a, a hong tung ngeingei ding thil kipsakna-a khamkholhna Kha hon pepa Pathian ahi. 6 Tua bang ahih manin, kimuangtakin i om gige a, hiai pumpi-a i om sung teng Toupa tawh i omkhawm tadih kei chih i thei. 7 Upna pansana nungta i hi a, muhna pansana nungta i hi kei hi. 8 Kimuangtakin i om, ka chi hi. Ahi a, hiai pumpi apan paikhia a, Toupa tawh omkhawm i teel zaw hi. 9 Tua bang ahih manin, pumpi ah omin om keita leng, amah lungtaisak ding tuppenin i nei hi. 10 Ahang bel, michih in pumpi-a om sunga a thilhihte hanga a saan dinga kilawm, a sia hi-in a pha hita leh, a saan theih nadingin Khrist' thukhenna tutphah maia ding teitei ding i hi uhi.
Kilemkikna Nasep
11 Koute'n Toupa lau kichi bang hi hiam, chih ka thei uh a, tua hangin mite ka zol uhi. Koute' hihna Pathian' mai ah a kitel a noute' sia-le-pha theihna ah zong a kitel ding ka lamen hi. 12 Noute' maia kiphat kik ka hi kei uh a, koute non kisialpih theih nading uh hunlem hon bawlsak ka hi zaw uhi. Lungsunga om pen hilou, muh-theihte kisialpih mi pawlkhat a om uh a, tuate na dawn theih nadingun, kisialpih ding hon bawlsak ka hi uhi. 13 Koute ka hai uleh, Pathian ading ahi a, ka pii uleh, noute ading ahi. 14 Khrist' itna in tua bang dingin hon phuutluih hi. Ahang bel, mi khempeuh adingin mi khat a sita a, tua hanga mi khempeuh sita ahi, chih ka um taktak uhi. 15 Amah mi khempeuh adinga a sihna hang bel, a hingte amau adinga hinga nungta nawn loua, amaute adinga si a, kaihthawha ompa adinga hinga a nuntak zawk nading uh ahi. 16 Tua bang ahih manin, tu apanin sa danin kuamah ka thei nawn kei uhi. Hun paisa ah, Khrist zong hibangin na theita mah le-ung, tu'n zaw hibangin amah ka thei nawn kei uhi. 17 Tua bang ahih manin, mi kuapeuh Khrist-a a om chiangin, thilsiam thak ahita. Thil luite a beita a, ngai un, a thak hong suakta uhi. 18 Thil bangkim Pathian apan ahi. Ama'n Jesu Khrist tungtawnin eite amah tawh hon kilemkiksakta a, hiai kilemkikna nasep koute hon pia hi. 19 Pathian in Khrist ah leitung mite amah tawh a kilemkiksak chihna ahi. Amaute' tatlekna, amaute' mawhnain a simta kei hi. Ama'n hiai kilemkikna thu koute hon kemsak a, 20 Khrist' palaite ka hi uhi. Tuin Pathian in koute' tungtawnin noute hon ngenta a, Khrist taangin kon kun uhi: Pathian tawh na kilemta un aw. 21 Khrist in khelhna nei hetlou hinapi, Pathian in eite adingin khelhnain a bawl hi. Tua bel, eite amaha Pathian' diktatna i suah theihna ahi.
1 Koute Pathian tawh sem-khawmte ka hih manun, noute kon hanthawn uhi: Pathian' hehpihna phattuampih louh dingin saang kei un. 2 Ama'n: Kon deihsakna huna hon ngaikhia ing a, hotdamna ni-a hon huh ka hi, chi hi. Ngai un, Pathian deihsakna hun tu hun ahi a, hotdamna ni tu hun ahi.
Paul'Haksathuaknate
3 Kuama'n ka nasepsa uh a gensiat theih dingun, kuamah ka kipalpaisak kei uhi. 4 Tua naksangin, koute Pathian' silate ka hihna uh, lam chiteng ah phathuaiin ka langsak zaw uhi: Nakpitaka thuaknate ah, taksapnate ah, mangbatnate ah, 5 vuaknate ah, koltannate ah, mipi' khutlum thuaknate ah, sepgimnate ah, ihmutmawhnate ah, anngolhnate ah, 6 siangthouna ah, theihsiamna ah, thuakhatna leh migitna ah, Kha Siangthou ah, itna taktak ah, 7 thutak genna ah, Pathian' vangletna ah, taklam veilama diktatna galvan zatna ah, 8 pahtawina leh selphouna ah, gensiatna leh phatna ah, a tak hinapi a khemmi banga ngawhna ah, 9 theih mahmah hinapi, theihlouh banga bawlna ah, si dekdek hinapi hin lailaina ah, vuakthuak napi thaha omlouhna ah, 10 dah napi lungnop gigena ah, zawng napi mi tampi hausaksakna ah, bangmah neilou hi napi bangkim ka nei uhi hiaite khempeuh ah Pathian' silate ka hihna uh phathuaiin ka langsakta uhi. 11 Korinthte aw, koute'n noute kiang ah langtangtakin thu ka gen uhi. Noute adingin ka lungtangte uh ka honglian uhi. 12 Koute'n noute adingin ka lungtang uah siit ka nei kei uh a, noute'n bel koute adingin na lungtang uh na hong kei uhi. 13 Tate kianga thugen banga noute kianga thugen ka hi. Kithukna kilawmin na lungtangte uh hon pe sam un.
Hakkol Batkhawm Louh
14 A umlou mite tawh kituakloupi-in hakkol batkhawm kei un. Diktatna leh danbeia gamtatna in bang a kikop theia ahia? Ahih kei leh, mial leh vaak in bang kipawlna a neia ahia? 15 Khrist leh Belial in bang kilemna a nei ua ahia? A ummi leh a umlou mi in bang a kikop theia ahia? 16 Pathian' tempul leh milimte'n kilemna a nei-a hia? Eite Pathian hing' tempul i hi uhi. Pathian in: Amaute tawh teengkhawm ding ing a, amaute laka nungta ding hi'ng. Amaute' Pathian hi ding ing a, amaute ka mite hi ding uhi, a chih bang ahi. 17 Tua bang ahih manin, a umloute lak apan hong paikhia unla, a tuamin om un, Toupa'n chi hi. A sianglou himhim khoih kei un. Tua hi leh, noute hon saang ding ing a, 18 noute adinga Pa hi ding ing a, noute ka tapate ka tanute hi ding hi uteh, chi-a Toupa Vanglianpen in gen hi.
1 Ka itte aw, eite'n hibang thuchiamte nei i hih manin, Pathian launa tungtawna siangthouna-a pichingin, sa leh kha ninsak thil peuhmah apan kisiangsak ni.
Paul' Lungnopna
2 Koute adingin na lungtangte uh hon hon un. Koute kuamah tung ah a diklouin ka gamta kei uhi. Kuamah ka khialsak kei uh a, kuamah ka nese kei uhi. 3 Noute mawhtan nadinga thugen ka hi kei. Tuma lamin zong koute'n ka lungtangte uh kon hon dan uh kon genta hi. 4 Noute kon muang mahmah a, na kiang ua thugen ka hangsan a, kon kisialpih pih mah hi. Noute'n zong ka lungtang non hanthawn mahmah uh a, ka haksatnate ah zong lungnopna tawh ka dimlet hi. 5 A taktakin koute Makedonia gam kong tunun, ka pumpite un tawlngakna a mu kei a, heina peuh ah nehchihin ka om uhi. Pawlam ah kidouna a om a, sunglam ah launa a om hi. 6 Ahihhangin a lungkete khamuanpa Pathian in Tita' hong tunna tungtawnin koute hon khamuan hi. 7 Ama' hong tunna tungtawn kia hilouin, amah na khamuanna un koute hon khamuan sawnsawn hi. Ama'n kei non ngaihna uleh, non lungkhampihna uleh awlmawhna uh hon hilh a, tua in ka lungnopna a liansak sem hi. 8 Ka laikhaka noute hon lungkhamsakta ka na hih leh zong, phamawh ka sa kei. Ka laikhak in na lungtang uh a nasak, chih ka thei. Phamawh sa leng zong, tuin ka lungnuam hi. Na lungnatna uh hun tomchik sung lei ading ahi. 9 Noute kon lungkhamsak mana lungnuam ka hi kei a, na lungkhamna un kisika lungheina a tun, chih ka theih mana lungnuam ka hi zaw hi. Ahang bel, Pathian' deihlama lungkham na hi uh a, koute hangin supna na nei kei uhi. 10 Pathian deihlam lungkhamna in kisika lungheina a tun a, kisika lungheina in hotdamna a tun a, tua lah a kisikhuai het kei hi. Ahihhangin, leitung dana lungkhamna in zaw sihna a tun hi. 11 Pathian deihlam lungkhamna in noute sung ah bang a tun hiam en mah un: Bangzahta-a kiawlmawhna, bangzahta-a patauhna, kei non muh ding uh bangzahta-a lunggulhna, bangzahta-a awlmawhna, bangzahta-a kisiansuah nopna noute sunga hon tun hiam! Hiai thu ah na mawh kei uh, chih banglam peuh ah zong na kilangsakta uhi. 12 Noute kiang ah lai hon gelhta mah leng, a khialpa' phattuam nading, ahih kei leh, a thuakpa' phattuam nadinga kon gelh ahi kei a, koute adinga na kipiakzawhna uh Pathian' mai ah kithei le uchin, chih ka deih mana kon gelh ahi zaw hi. 13 Hibang tenga na kipiakzawhna un koute hon hanthawn mahmah ahi. Koute'n hiai hanthawnna ka ngah baan uah, Tita' lungnopna ka muh un hon lungnuamsak diak hi. Ahang bel, noute khempeuh in ama' lungsim na tawldamsak uh a, a lungdam mahmah hi. 14 Ke'n amah kiang ah noute kon na kisialpih khinta a, tua thu ah kei non zahlaksakta kei uhi. Noute kianga kon gen peuhmah uh a dik bangin, tua zaha Tita kianga kon kisialpihna uh zong a dik, chih a kitelta hi. 15 Noute na thumang uh a, lau leh liingin amah na na saang uh, chih a muh takin, noute hon it hon ngaihna a lian semsem hi. 16 Noute muanna kim kon neih theih ka kipak mahmah hi.
Thilphalna
1 Sanggamte aw, Pathian in Makedonia gam saptuamte kiang ah hehpihna a pia, chih na theih uh ka deih hi. 2 Amaute'n nakpitaka ze-etna thuak napi-in, nakpitakin a lungnuam uhi. Nakpitaka a zawnna ua panin, thawnpiak lama hehpihna hauhna nakpitakin a luanglet hi. 3 Amaute'n a hih theih zah uh a pia uh a, a hih theih zah vai nangawn uh a pe nuam uh, chih ka theihpih hi. 4 Misiangthoute nasepsakna hamphatna leh hehpihna hanga thawnpiak tang sam nuamin, amau' tup mawngin koute hon ngen ngutngut uhi. 5 Koute' lametna banga hiai hih ahi kei uh a, Toupa kianga amau mah kipe masain, Pathian' deihlamin koute kiang ah a kipia uhi. 6 Tita in a patkhitsa bangin, noute lama hehpihna nasep bukimsak leh, chi-in amah ka ngen uhi. 7 Noute'n bangkim na hau uh a, upna, thugenna, theihna, chihtakna leh koute non itna uah zong na hau uhi. Thawnpiak lama hehpihna ah zong hong hau un aw. 8 Thupiaka kon piak ahi kei a, na itna uh takna midangte-a tawh teha ka ettel nop man ahi zaw hi. 9 Noute'n i Toupa Jesu Khrist' hehpihna na thei uhi. Amah a hau mahmah hinapi, noute hangin nakpitaka zawngin hong om hi. Tua bel, ama' zawnna tungtawna noute nong hauh theih nading uh ahi. 10 Hiai thu ah noute adinga a hoihpen kon thuhilhna hiai ahi: Nikumin a pe masapen noute na hi uh. Tua thamlouin, piak nopna a nei masapen na hi uh. 11 Tuin hiai nasep buchingsak unla, kilawptaka na utna utawh kikhomin leh na neih utawh kikhomin pia un. 12 Ahang bel, mi'n a neih louhpi hilou a, a neih banga a piak pen, utna tawh piak ahih chiangin, Pathian in a saang nuam hi. 13 Midangte tung zangsak a, noute tung giksak nuam ka hi kei uh a, kikim chiata om ding ka deih man uh ahi zaw hi. 14 Tu huna na hauhna un amaute' taksap awng hu ding a, amaute' hauhna in noute' taksap awng a huk hun om ding a, kikim chiatna om ding ahi. 15 Tua hi leh, A khawm tam in a valin a nei kei a, a khawm tawm in zong a tasam kei, chi-a a na kigelh bangbang hong hi ding ahi.
Tita Kisawlna
16 Ke'n noute adingin phatuam ka ngai hi. Pathian in tua bang phatuamngaihna Tita' lungsung ah zong a guan hi. Tua bang ahih manin, noute hangin Pathian tung ah kipahthu ka gen hi. 17 Ama'n amah ka hanthawnna uh a kipahpih a, tua thamlouin, a tamsem sep ding a thalawp hi. Ama' lungtup mawnga noute kianga hong hawh ahi. 18 Sanggampa khat tawh amah kon sawl uhi. Tua sanggampa pen tangthupha nasepna-a saptuamte khempeuh' phatlawh khat ahi. 19 Tua thamlouin, hiai hehpihna hanga na thawnpiak uh ka puak laiun, saptuamte'n amah ka tonpih dingun a teel uhi. Hiai thawnpiak ka hawm laiun, Toupa mahmah' thupi nadingin ka hawm uh a, midangte huh ding na thalawp dan uh langsak dingin zong ka hawm uhi. 20 Khuttawi liantaka thawnpiak na piakte uh ka hawm laiun, gensiat baangloua hawm ka ut uhi. 21 Toupa' mitmuha a dika hih ka ut uh a, mihingte' mitmuh nangawna a dika hih ka ut uhi. 22 Tua baan ah, amaute zui dingin ka sanggampa uh kon sawl uhi. Amah mi phatuamngai ahihna lam tampi ah ka theitel uhi. Noute hon muan manin, tuin a phatuamngai sem hi. 23 Tita ahih leh, noute laka ka seppih ahi. Ka sanggam dangte ahih uleh, saptuamte' palaite ahi uh a, Khrist pahtawina ahi uhi. 24 Tua bang ahih manin, na itna uh kitelna leh noute kon kisialpihna uh bang hang hi hiam, chih amaute tung ah langsak unla, saptuamte muh dingin hih un.
1 Misiangthoute adinga nasepsakna tawh kisai ka gelh sawnsawn a kul kei hi. 2 Noute tua bang nasep na kithalawp uh, chih ka thei hi. Akhaia gama om noute, thawnpiak pe dinga kum khat paita-a mansa na hihna uh, Makedonia gama mite kiang ah kon na kisialpihta hi. Noute' kithalawpna in mi tamzawte nasem dingin a kithalawpsak hi. 3 Ahihhangin, noute kiang ah sanggamte kon sawl hi. Noute kon kisialpihna uh a mawkna ahih louh nading leh, mansain na om nuteh ka chihsa banga na na om theih nadingun, amaute kon sawl hi. 4 Makedonia mi khatpeuh in kei hon zui henla, noute mansain hon mu kei leh, noute gen louh, koumau mahmah zong noute kon muanna uah ka maizum kha ding uhi. 5 Noute hong veh dinga sanggamte, a hun ma-a nget kul ka sa hi. A paisa huna na chiamsa bangun, khuttawi liantaka thawnpiak pe dinga mansa-a hon koih dingin amaute hon sawl ka hi. Tua hi leh, it guiguia piak hi lou-a phaltak leh khuttawiliantaka piak dinga mansa ahi ding hi.
Tampi Pawia Tampi At
6 Hiai ka gen thei gige un: Tawmchik pawi mi in tawmchik a at ding a, tampi pawi mi in tampi a at ding hi. 7 Mi chih in piak dinga lungtanga a tup bangin pia hen. It guiguia piak ding ahi kei a, phut banga ngaia piak ding zong ahi kei hi. Pathian in lungdamtaka pe mi ahi a it. 8 Pathian in noute adingin a hehpihna a khangsak thei hi. Ama'n bangkim ah, hun khempeuh ah, na taksapte uh hon piain nna hoih khempeuh sepna ah hon hausak thei hi. 9 Ama'n a tasamte' kiang ah thawnpiakte hawmzak a, a diktatna Tangtawnin omden hi, chi-in a na kigelh hi. 10 Pathian in khaichi pawipa kiang ah khaichi a pia a, nek ding an zong a pe ding hi. Ama'n na buhpangte ua ante a khang-sak ding a, noute diktatna gah khopte a tamsak ding hi. 11 Ama'n thilphaltaka om dingin banglam peuh ah hon hausak ding a, na thilphalna uh koute tungtawnin Pathian tunga kipahthu gennain a gah ding hi. 12 Hibang siampi nasep na sep un misiangthoute' taksap awng a hu ding hi. Tua thamlouin, Pathian tunga mi tampi' kipahthu genna a luangletsak ding hi. 13 Noute'n hibang nasepna tungtawnin na hihna tak uh na kilangsak ding uh ahi. Khrist' tangthupha na upna uleh, na zuihna uleh, neihsa thilphaltaka midangte na kikoppih manun, a saangte'n Pathian a phat ding uhi. 14 Amaute'n zong noute' sunga om Pathian' hehpihna genseng louh hangin, noute adinga thuumin, noute hon ngai mahmah uhi. 15 A gena genseng louh a thawnpiak hangin Pathian tung ah kipahthute omta hen!
Paul' Kihutna
1 Khrist' lungnemna leh nunnemnain noute kon ngen Noute tawh kimaituah chianga zahkai a, a gala khauh kei Paul ka hi. 2 Mi pawlkhat tunga khauh ka sawm banga ka khauh a kul louh nadingin noute kon ngen hi. Amaute'n koute, sa dana om bangin hon ngawh uhi. 3 3 Koute leitunga sa-a nungta hi mah le-ung, sa danin gal ka dou kei uhi. 4 Ka gal douna galvante uh sa galvan ahi kei a, kulhpite phei thei Pathian' vangletna nei galvante ahi zaw hi. 5 Mihing' pansante leh Pathian theihna doua kisangkoihnate ka phelgawp uh a, mihing' lunggelna peuhmah Khrist thu mangsak dingin salin ka kai uhi. 6 Noute' thumanna hong bukim phot peuhmah leh, thu manlouhna gamtat peuhmah gawt dingin koute a mansa hi-na n'ung. 7 Noute'n thil peuhmah a pawlama muhtheih kia na en naak uhi. Kuapeuh in, Khrist-a kimuang ahih leh, koute tua bang mi' hihna zahzaha Khrist-a ka hihna uh ngaihsun thak hen aw. 8 Ahang bel, Toupa'n, noute phelzak nading hiloua lamtouh nadinga thuneihna hon piak kisialpih zek mah leng zong maizumpih lou ding ka hi. 9 Ka laikhakte pansana noute hon lausak sawm banga kilat ding ka ut kei hi. 10 Mi pawlkhatte'n: A laikhakte a gik a, a thahat a, ahihhangin, amah tak hong om chiangin zawngkhalpi ahi, a thugen zong bangpi hi kei, hon chi uh hiven. 11 Tua bang mite'n hiai ngaihsun uhen: A gala ka laikhakte ua ka hihna bangbang uh, noute laka ka om chiangun zong ka hi ding uhi. 12 Mi pawlkhat amau kiphat a om uhi. Tua bang mite tawh pawlkhata kikoih hiam, kiteh hiam ka ut kei uhi. Amau mah tehna-a kizang a, amau leh amau kitehkakte a pii ahi kei uhi. 13 Pathian in hon tehnate valin koute ka kisial kei ding uhi. Pathian in mawhpuakna hon piak tawh kikhomin ka kisial zaw ding uhi. Tua mawhpuakna ka tan un noute zong hon baan hi. 14 Noute kiang hong pha lou bang takin a tuan a valin ka kisial kei ding uhi. Ahang bel, Khrist' tangthupha tawh noute kiang kong pha tawk uhi. 15 Koute a kan a valin ka kisial kei uhi. Midangte' nasepsa ka kisialpih kei uh a, na upna uh a khan bangbanga noute laka ka nasep uh nakpitaka a khan ding ka lamet uh ahi zaw hi. 16 Tua hi leh, noute' banlam gamte ah zong tangthupha ka tangkoupih ding uh. Midang' sepna sunga nna kisemsa ka kisialpih nuam kei uhi. 17 Ahih-hangin, a kisial peuhmah Toupa ah kisial hen. 18 Amah kiphat mi in phat a lawh kei a, Toupa' phat mi ahi zaw phat lawh.
Paul leh Sawltaklian Takloute
1 Ka haina neukha na thuakzou le uchin ka chi hi. Ahi a, na na thuakzou taktakta tham uhi. 2 Pathian' thikthusiatnain ahi noute adinga ka thikthusiat. Pasal khat adingin noute kon na khamta hi. Tua pasal khat Khrist ahi. Amah kiang ah noute, nungak siangthou bangin kon pe nuam hi. 3 Ahihhangin, gulpi in a pillepchiahna-a Evi a khem banga Khrist kianga na kipiakna uh tak mahmah leh siangthou mahmah apan na lungsim uh khemkhiaka a om khak ding ka lau hi. 4 Mi khatpeuh hong pai a, noute kianga kong gen uh Jesu pen hilou, Jesu tuam dang khat hong gen ahi mai thei. Ahih kei leh, na saansa uh Kha pen hilou, kha tuam dang khat saang na hi mai thei uh. Ahih kei leh, na saansa uh tangthupha pen hilou, tangthupha tuam dang khat saang na hi mai thei uhi. Tua bang ahih leh, tom pang zou na hi mah ding uhi. 5 Ahihhangin, sawltaklian tungnungte sanga niamzawin ka kingaihsun het kei hi. 6 Thugen kisinsiam mi zaw ka hi kei, ahihhangin, theihna ka nei hi. Banglam peuh ah, noute kiang ah hiai ka kilangsakta uhi. 7 Noute kiang ah Pathian' tangthupha manbeiin ka gen hi. Noute hon domkang dingin kei ka kiniamkhiak hi. Hibanga ka hih, a khial ka hi-a hia? 8 Noute adinga sem dingin, saptuam dangte apan huhna lain amaute ka lok hi. 9 Noute kianga ka om laiin, taksap ka neih chiangin zong noute adingin puakgik ka hi kei hi. Makedonia gam apan hong pai sanggamte'n ka taksap awng a hu uhi. Banglam peuh ah noute adinga puakgik hilou dingin ka kikem a, tua bangin ka kikem lai ding hi. 10 Khrist' thutak keia a om manin, kisialta mah leng, Akhaia gama mi kuamah in ka kisialna a dai thei kei ding hi. 11 Banghangin maw? Noute kon it louh manin maw? Noute kon it, chih Pathian in a thei hi. 12 Mi pawlkhatte'n a kisialpih thilte utawh kisaiin, koute tawh kikima mite' ngaihsut ding a lunggulh uh a, tua banga kisial theihna hun lem zong ahi uhi. Tua bang hun lem a muh louh nadingun, ka hihsa bangin ka hih lai ding hi. 13 Hiai mite zaw sawltaklian takloute ahi uh a, khemhat nasemte ahi zaw uhi. Khrist' sawltakliana kibawltawm ahi uh a, 14 a lamdang ahi kei hi. Setan nangawn vaak sawltak bangin a kibawltawm hi. 15 Tua bang ahih nung, ama' nasemte, diktatna nasemte banga a kibawltawm uleh, a lamdang ahi kei hi. Amaute' tawpna zaw a nasepte uh tawh kigun ahina ding hi.
Paul'Kisialpih Thuaknate
16 Ka gen kik lai ding. Kuama'n kei mihaiin hon sep kei hen. Tua banga hon sep a omtak aleh, neukha ka kisial theih nadingin, tua bangin hon sep phot uhen aw. 17 Hibanga kimuangtaka ka kisialna ah, Toupa' deihlama thugen ka hi kei a, mihai banga thugen ka hi zaw hi. 18 Mi tampite sa dana kisial uh ahih manin, kei zong ka kisial ding hi. 19 Noute na pii mahmah manun, mihaite na thuakzou na ve ua le! 20 Noute sila-a hon nei mi khatpeuh, na tung ua kiliansak khat peuh, na maitang uh hon betsak khat peuh nangawn thuakzou hi ve uchin! 21 Tua bangte hih dingin koute zawngkhal lua mah hi ung! Hibanga ka kiphuan ka maizum e! Midang khatpeuh in a kisialpih ngam pen ke'n zong ka kisialpih ngam hi. Ahi-a lah, mihai banga thugen ka hita ve! 22 Amaute Hebru mi ahi umaw? Kei zong ka hi. Amaute Israel mi ahi umaw? Kei zong ka hi. Amaute Abraham' tate ahi umaw? Kei zong ka hi. 23 Amaute Khrist' nasemte ahi umaw? Kei zong ka hi sem. Mihai banga thugen ka hi! Sep lam ah ka semgim zaw. Sat ka nakthuak zaw. Suangkul tan lam ah ka tang mun zaw. Sih lauhuaina ka tuak zihzeh. 24 Judate apan khata 40 chinglou sat ngavei ka thuak. 25 Chianga sat thumvei ka thuak. Suanga den khatvei ka thuak. Longsiatna thumvei ka tuak. Ni khat leh zan khat tui tung ah taihmangin ka om. 26 Khualzin ka hi tawntung. Tui apan sih lauhuaina ka tuak. Suamhatte apan sih lauhuaina ka tuak. Ka minampihte apan sih lauhuaina ka tuak. Zentelte apan sih lauhuaina ka tuak. Gamdai-gamkeua sih lauhuaina ka tuak. Khawpi-a sih lauhuaina ka tuak. Tuipi-a sih lauhuaina ka tuak. 27 Tawltakin ka semgim. Ihmut mulouin ka om zihzeh. Gilkial dangtakin ka om. An ngawlin ka om zihzeh. Khawdamsa leh vuaktangin ka om. 28 Hibang teng baan ah, saptuamte khempeuh ka awlmawhna in nisimin hon delhgik. 29 Kua ahia zawngkhala a om a, ke'n ka zawng-khalpih louh? Kua ahia khelhna sunga a puk a, ke'n ka lungkhampih louh? 30 Kisial lou theilou ka hih leh, ka hatlouhna tawh kisai thilte ka kisialpih ding hi. 31 Zuau ka gen louh dan i Toupa Jesu Khrist' Pathian leh Pa in a thei. Amah zaw Tangtawna phat ding mah ahi. 32 Damaska ah kumpipa Areta nuaia ukpipa'n kei hon mansak dingin sepaihte tawh Damaska a veengsak a, 33 ahihhangin, kulhbaanga tawhlet apan bawma khaikhiaksukin ka om a, ka suakta hi.
Paul' Mengmuh leh a Ling
1 Ka kisial lailai ding. Ka kisial hanga ka lawhtak ding om kei mah leh, Toupa apan mengmuh leh kilaaknate gen lailai ding hi'ng. 2 Khrist-a om mi khat ka thei hi. A paisa kum sawmleli hun laiin, amah van thumna ah laktouhin a om hi. Pumpi-a laktouha om hia, pumpi apan paikhia hia, ka thei kei. Pathian in a thei hi. 3 Tua mipa pumpi-a omin hia, pumpi apan paikhiain hia ka thei kei, Pathian in a thei. 4 Paradis-a laktouhin a om a, genkhiak theihlouh leh genkhiak phallouh thilte a za hi. 5 Hibang mi ka kisialpih ding a, keimah bel ka hatlouhnate chih louhngal, ka kisialpih kei ding. 6 Kisial teitei ding hita lengzong, mihai ka hi kei ding. Thutak gen hi lei ding hi vengin. Ahihhangin, mi khat peuh in ka thilhih leh ka thugen sanga thupizawa hon koih louh nadingin ka kidaam hi. 7 A thupi mahmah kilaaknate hanga a kaan a vala ka kiletsak louh nadingin, Pathian in ka sa tung ah ling hon pia hi. Tua ling pen kei hon gimsak ding, Setan' sawltak a suak hi. 8 Hiai ling lakhe dingin thumvei Toupa ka ngen a, 9 ahihhangin, ama'n: Ka hehpihna nang adingin a kiching hi, ahang bel, hatlouhna ah ka vangletna kichinna kilang ahi, hon chi hi. Tua bang ahih manin, Khrist' vangletna ka tunga a tamden nadingin, ka hatlouhna kipaktakin ka sial ding hi. 10 Hiai hang ahi, Khrist vanga, hatlouhnate, zahlaknate, taksapnate, bawlsiaatnate, haksatnate ka kipahpih. Ahang bel, ka hatlouh chianga a hat hi zaw vengin.
Paul' Awlmawhna
11 Kei leh kei mihai ka kisuahta! Ahihhangin, noute'n tua banga non suahsak uh ahi ve! Noute'n kei non phat uh kilawm ahi. Bangmah hi kei mah leng, sawltaklian tungnungte sangin neuchikin zong ka niam zaw tuan kei hi. 12 Sawltaklian hihna kitheihna, chiamtehnate, thillamdangte, vangletna nasepte noute lak ah kuhkaltakin ka hih hi. 13 Noute adinga puakgik ka hih louhna chih louh, saptuam dangte sanga na niamzawkna uh bang om ahia? Hiai noute tunga ka diktatlouhna hon ngaidam un! 14 Noute a thumvei nadinga hong veh dingin tuin ka manta hi. Noute adingin puakgik ka hi kei ding. Ahang bel, na neih na lam uh deih ka hi kei a, noute mahmah hon deih ka hi zaw hi. Tate'n nu-le-pate ading gou a khol ding ahi kei a, nu-le-pate'n tate ading gou a khol ding ahi zaw hi. 15 Tua bang ahih manin, noute adingin ka neih ka lam leh keimah nangawn kipaktakin ka kizangbei nuam hi. Ke'n noute kon it semsem chianga noute'n kei non itna uh kiam semsem ding ahi maw? 16 Tua bang na hita lezong, noute adingin puakgik ka hi kei hi. Hinapi-in, pillepchiah ka hi a, pillepchiahna zanga hon man ka hita maw le? 17 Noute kianga mi kon sawlte laka khat peuh tungtawnin noute kon nesia-a hia? 18 Noute kianga hong pai dingin Tita ka kun a, i sanggampa zong amah tawh kon sawlkhawm hi. Tita in noute hon nesia-a hia? Koute lungput kibangin, kalsuanna lam kibangin ka pai kei ua hia? 19 Noute' maia kihu danin non ngaihsun nilouh ua hia? Pathian' mitmuha Khrist-a thu gengen ka hi uhi. Noute kon it uh a, ka hihsa khempeuh uh noute lamtouh nadinga ka hih uh ahi. 20 Noute kianga kong pai chiangin, kon deih banga oma kon muh louh khak ding ka lau hi. Noute lak ah kinakna, kihazatna, thangpaia kitomna, kilangkhenna, kigensiatna, kiphunsanna, kiotsakna leh kilemlouhna ka muh khak ding ka lau hi. 21 Noute kianga kong pai kik chiangin, ka Pathian in noute' maia hon zahlaksak ding ka lau hi. A sianlouhna uh, a kingaihna nin uleh, a paktatna ua pan kisika lunghei lou lai mite a om khak ding ka lau hi.
Paul' Thuneihna
1 Noute a thumvei nadinga hong veh ding ka hi. Thu khat peuhpeuh, nih hiam, thum hiam' theihpihna pansana hihkip ding ahi. 2 Noute kong veh nihveina ah, vauhilhna kon peta. Tuin noute laka ka om louh laiin, tua mah kon theisak kik ahi. Noute kianga kong paikik chiangin, tu ma-a a na khialte ka hawi kei ding. A khial dang khat peuh zong ka hawi kei ding. 3 Ahang bel, Khrist in kei tungtawna thu gen hina hiam, chih a kitelna ngiat hi ve uchin. Noute tawh kisaiin amah a hatlou het kei a, a vanglian hi. 4 Amah hatloua kilhlup ahi ngei ngut a, hinapi-in, Pathian' vangletna pansana hing ahi. Tua mah bangin, koute amah ah hat lou ka hi ngei ngut uh a, hinapi-in, noute' nasem dingin Pathian' vangletna pansanin amah tawh ka hingkhawm ding uhi. 5 Thu-up sunga om taktak na hina uhiam, noute kivel unla, kientel un. Na kiettelna ua a chinglah khattou na hih kei uleh, Khrist noumau' sunga om ahi, chih na thei kei ua hia? 6 Kiettelna ah koute ka chinglah kei uh, chih na muhkhiak ding uh ka hi. 7 Noute'n thil gilou na hih louh nadingun, Pathian kiang ah ka thuum hi. Tua bel, phatlawh banga ka kilat ding uh deihna ahi kei a, koute a chinglah bangin kilang mah le-ung, noute'n a phathuai thil na hih ding uh deihna-a thuum ka hi. 8 Ahang bel, koute'n thutak dou lam bangmah ka hih thei kei uh a, thutak gum lam ngen ka hih zaw uhi. 9 Koute ka hat kei uh a, noute na hat peuhmah chiangun ka kipak uh a, noute pichinsaka na om nadingun ka thuum hi. 10 Noute kianga ka om louh laia, hibanga ka gelhna a san a hang hiai ahi: Toupa'n thuneihna kei hon pia a, tua thuneihna pen noute phukpaih nading ahi kei a, noute lamtouh nading ahi zaw hi. Noute kianga kong pai chiangin, hiai thuneihna zangin khauh kei thei leng, chih ka ut ahi zaw hi.
Chibaibukna
11 Sanggamte aw, a tawppenin mangpha. Pichin ding ngim unla, kon ngetnate ngaikhia un. Khamuangtakin om unla, lungput munkhatin om un. Itna leh lemna muanna hon pepa Pathian in noute hon ompih hen. 12 Kitawp siangthouin khat leh khat kimuak un. 13 Misiangthoute khempeuh in noute chibai hon khak uhi. 14 Toupa Jesu Khrist' hehpihna leh Pathian' itna leh Kha Siangthou' pawlna in noute khempeuh hon ompihta hen. Amen.
1 Kei, sawltaklian Paul, mihingte tungtawna kisawl hilou, mihing' sawl zong hilou, Jesu Khrist leh, misite lak apan amah kaithoupa Pathian leh Pa hon sawl ka hi. 2 Kei leh ka kianga sanggamte khempeuh in, Galatia gama saptuamte kiang ah lai kon gelh uhi. 3 I Pa Pathian leh i Toupa Jesu Khrist apan, hehpihna leh lungmuanna noute tung ah om hen. 4 I khelhna man pia a, tulai gitlouhna khang hun apan hon hukhe dingin, i Toupa Jesu Khrist amah mah hong kipia hi. Tua mah, i Pathian leh Pa' deihlam ahi. 5 I Pathian leh Pa tung ah thupina Tangtawnin omdenta hen. Amen.
Tangthupha Dang Omlou
6 Khrist' hehpihna pansana noute hon sampa taisan a, tangthupha tuam khat lama na kiheisan pah uh lamdang ka sa hi. 7 Tua tangthupha tuam khat lah tangthupha ahi het kei hi. Mi pawlkhat in noute hon lungbuaisak a, Khrist' tangthupha kaikawi ahi peuhmah uhi. 8 Ahihhangin, koute laka mi nangawn hi-in, vantunga vansawltak nangawn hita leh, mi kuapeuh in, noute kianga kong gensa uh hilou, tangthupha tuam khat hong gen leh, tua bang mi Pathian in hamsiat hen! 9 Koute'n kong gen khitsa uh bangin, tuin ke'n kon gen kik hi: Mi khat peuh in, na sansa uh hilou, tangthupha tuam himhim a gen leh tua bang mi Pathian in hamsiat hen! 10 Ke'n mihingte' pahtak lawh sawm ka hi-a hia, ahih kei leh, Pathian' pahtak? Ahih keileh, mihingte lungtaisak sawm ka hi-a hia? Mihingte lungtaisak sawm lai hi leng, Khrist' sila ka hi kei ding hi.
Pathian' Sap Paul
11 Sanggamte aw, ke'n noute kianga kong gen tangthupha pen, mihing' phuahtawm ahi kei, chih na theih uh ka deih hi. 12 Hiai tangthupha, mihing apan ka saan ahi kei a, mihing hon sinsak zong ahi kei a, Jesu Khrist in ka kianga hon latsak ahi zaw hi. 13 Nidang laia, Juda sabiak sunga ka nuntak dan masa, noute'n na zata uhi. A kaan a vaalin, Pathian' saptuam ka bawlsia a, sukbei ka sawm hi. 14 Juda sabiak sung ah ka khanvual Judami tampite sangin ka madawk zaw hi. Ka pu ka pate' thugousiah ngeina gumin nakpitakin ka phatuamngai hi. 15 Ahihhangin, Pathian in ka nu' gilsunga ka om lai apan kei hon na khenkhetuamta a, a hehpihnain hon sam hi. 16 Ama'n keima' kianga a Tapa latsak a kipahlam ahi. Tua bel, Zentelte laka a Tapa' thu ka gen ding a deihna ahi. Tua laiin, mihing kuamah tawh thu ka kikum kei hi. 17 Kei ma-a sawltaklian na hikhintate tawh thu kikum dingin Jerusalem ah ka hawh sam kei. Arabia gam ah ka pai pah zaw hi. Tua nungin, Damaska ah ka paikik hi. 18 Kum thum nungin, Peter tawh kimeltheih dingin Jerusalem ah ka hawh a, amah kiang ah ni sawmlenga sung ka taam hi. 19 Ahihhangin, tua ah, Toupa' sanggampa Jakob loungal, sawltaklian dang kuamah ka veh kei hi. 20 Noute kianga hiai kon gelh zuauthu ahi kei, chih Pathian in hon theihpih hi. 21 Tua nungin, Suria leh Silikia gam ah ka pai hi. 22 Khrist-a om, Judia gama saptuamte' meltheih ka hi kei. 23 Nidang laia eite hon bawlsepa'n, hihbei a sawm tang-thupha-a thu-up tuin a genta, chi-a kigen a zak uh ahi lei hi Amaute'n keima' hangin Pathian a phatta uhi.
Zeksum Thu
1 Kum sawmleli nungin, Jerusalem ah ka paitou kik a, tua hunin, Barnaba tawh ka hi uh a, Tita zong ka tonpih uhi. 2 Kilakna ka muh thumanga pai ka hi. Zentelte laka ka gen tangthupha, amaute' mai ah ka luikhia hi. Tua zong, a mawkna-a tai khak ding, ahih kei leh, tua banga taikhin ka hih khak ding ka lau manin, mi poimawh hi-a kilangte' mai ah a tuamin ka hih ahi. 3 Ahihhangin, ka kianga om Tita nangawn, Grik mi hinapi-in, zeksumsak teitei ahi kei hi. 4 Hiai zeksum thu zaw, a taklou sanggamte hanga piang ahi. Kua hiam khat in, a simin eite lak ah amaute hong piilut hi. Amaute'n eite sala hon kaih sawmin, Khrist Jesu-a noplenna i neih hong ensim ahi uhi. 5 Noute kianga tangthupha thutak a omden theih nadingin, koute tua bang mite' nuai ah dakkal khat lei zong ka lut kei uh a, ka kipe kei uhi. 6 Dinmun neia kilang mite ahih leh, a bang teng na hita le uh zong, tua in kei adingin bangmah 1 am-danna tuam a piangsak kei hi. Pathian in pawlam latdanin thu a khen kei. Dinmun neia kilangte'n ka thugen bang mahin a behlap kei uh. 7 Tua naksangin, zeksumte kianga tangthupha nasep Peter kianga piak ahih bangin, zeksumloute kianga tangthupha nasep kei kianga piak a hihna tua mite'n a mu uhi. 8 Zeksumte kianga Peter sawltaklian a hihna tungtawna sempa Pathian ahi. Zentelte kianga sawltaklian ka hihna tungtawnin, tua Pathian mah in a sem hi. 9 Khuampi hihna minnei, Jakob, Kifa leh Johan in kei kianga Pathian in hehpihna hon piak a mu uhi. Tuachi-in, amaute'n kithuahpihna khut taklam kei leh Barnaba hon pia uhi. Koute Zentelte kianga pai ding, amaute Judate kianga pai ding, chih a thukim uhi. 10 Koute'n gentheite ka phawk gige ding uh hon nget sun uh ahi. Tua bang hih lah ka kithalawp lamtak ahi.
Paul In Peter Khing
11 Antiokh-a Peter hong hawh takin, a mai ah ka khing hi. Ahang bel, amah mawhsakhuaia a om man ahi. 12 Jakob apan mi kuate hiam hong pai maun, ama'n Zentelte tawh a nekhawm a takhawm hi. Ahihhangin, amaute hong pai takun, zeksum pawl a lau manin, a kituamhui a, a kituam-koihta hi. 13 Juda dangte'n amah a lepchiahna ah a zui uh a, Barnaba nangawn amaute' lepchiahna in a pimang hi. 14 Tangthupha thutak tawh kituakin amaute a gamta kei uh, chih ka muh takin, amaute khempeuh' mai ah, Peter kiang ah: Nang Judami hinapi Judami bangin na nungta kei a, Zentel mi bangin na nungta hi. Tua bang hinapi, Juda ngeina zui dinga Zentelte na ngiat bangchi dan ahia? ka chi hi.
Diktansakna
15 Eite, piandan mawnga Juda mi i hi a, Zentel mikhialte i hi kei hi. 16 Pathian in Dan zuihna hangin mi dik a tangsak kei a, Jesu Khrist upna hangin dik a tangsak zaw, chih i thei hi. Dan zuihna hang hilou a, Khrist upna hanga diktansak i hih nadingin, eite nangawn in Khrist Jesu ah upna i ngata hi. Ahang bel, Dan zuihna hanga kuamah dik tansaka omlou ding ahih man ahi. 17 Khrist sunga diktansakna ngah i sawmna in, eite zong mikhialte i hi, chih a kitelsakkhin hi. Tua hi leh, Khrist in khelhna angvan ahi, chihna hi ding hia? Hi peuhmah lou! 18 Ke'n ka phelgawpsa ka lamkik leh, Dan palsat mi ka hi, chih kitelsak ka hi lei ding hi. 19 Ahang bel, Pathian lama ka nuntak theih nadinga, Dan tungtawna tua Dan sihsan ka hita hi. 20 Khrist tawh kilhlupkhawm ka hita. Hinapi-in ka hing hi. Ahihhangin, a hingpa kei ka hita kei a, Khrist, keima' sunga hing ahi. Pumpi-a ka nuntakna pen, Pathian' Tapa upna pansana nungta ka hita. Ama'n hon it a, kei adingin a kipumpiak hi. 21 Ke'n Pathian hehpihna ka nawlkhin kei hi. Ahang bel, Dan pansana diktatna ngah theih na hi leh, Khrist a mawkna-a si a suakta ding hi! ka chi hi.
Upna maw, Dan maw?
1 Galatia mihaite aw! Thutak muang lou dinga kua'n noute hon bumhai hita mai ahia? Jesu Khrist kikilhlum ahihna noute' mitmuha kiteltaka latsak ahita vele! 2 Noute apan thil khat kia ka thei nuam hi: Dan zuihna pansanin maw Kha na ngah uh, ahih kei leh, na thuzak uh na upna uh pansanin? 3 Tua zaha hai lawmlawm na hi umaw? Kha-a pankhin a, sa thilhiha zawh sawm na hi umaw? 4 A mawkna-a tua zaha thuakta na hi ua hia? A mawkna hi taktak hi hia? 5 Dan na zuihna uh hanga Pathian in Kha hon pia a, na lak ua thillamdangte hih maw, ahih kei leh, na thuzak uh na upna uh hangin? 6 Abraham ngaihsun un: Ama'n Pathian a um a, Pathian in tua upna, ama' adingin diktatnain a simsak hi. 7 Tua bang na hi hiven, a umte Abraham' tate ahi, chih thei gige un. 8 Pathian in upna pansanin Zentelte dik a tangsak ding chih, Laisiangthou in a mukhol hi. Tuachi-in, Abraham kiang ah tangthupha a na genkhol hi: Nangma' tungtawnin namte khempeuh vualzawlin a om ding hi, a chi hi. 9 Tua ahih manin, upna neite mah, upna neipa Abraham tawh vualzawlna tangkhawm ahi uhi. 10 Dan zuihna muangte khempeuh hamse thuak ahi uhi. Ahang bel, Dan Laibu sunga kigelhte khempeuh zui gige lou mi kuapeuh hamse thuak ahi, chi-in a na kigelh hi. 11 Dan pansanin Pathian' mai ah kuamah diktansak ahi kei, chih a kitel hi. Ahang bel, a diktatte upna pansana hing ding ahi, chih ahi. 12 Dan zaw, upna tunga kibulphuh ahi kei hi. Tua naksangin, tuate hih mite, tuate pansanin a hing ding chih ahi. 13 Eite' sik leh tanga hamsia-a bawla hong omin Khrist in Dan hamsia apan hon tanta hi. Ahang bel, singtunga kikhai mi peuhmah hamse thuak ahi, chi-in a na kigelh hi. 14 Tua bel, Abraham tunga vualzawlna kipe pen, Khrist Jesu tungtawna Zentelte tunga hong tun theih nading leh, eite'n upna pansana Pathian' chiamsa Kha i ngah theih nading ahi.
Dan leh Thuchiam
15 Sanggamte aw, nisim nuntakna apan ettehna khat hon la ning. Mihing' thukhun, ahi ding bangtaka kipsaksa, kuama'n a nawlkhin thei kei a, behlap zong a behlap thei kei hi. Hiai thu zong tua mah bang ahi. 16 Pathian in Abraham leh a chisuan kiang ah thuchiamte a pia hi. Mi tampi gen bangin, chisuante kiang ah, a chi kei a, mi khat genin, Na chisuan kiang ah, a chi zaw hi. Tua chisuan khat Khrist ahi. 17 Tua nung kum 430-a Dan kipia in, tua malama Pathian in a na kipsaksa thukhun a phiat kei a, tua thuchiam a phiat kei hi. 18 Gouluahna pen, Dan tunga kinga hi leh bel, thuchiam tunga kinga ahi kei ding hi. Ahihhangin, Pathian in gouluahna pen, thuchiam tungtawnin Abraham kiang ah a pia hi. 19 Tua ahih leh, Dan in a tup bang hi ding ahia? Pathian in thuchiam a piaknapa, tua chisuan a hong tun mateng adinga, tatleknate hanga piakbehlap a na hi. Tua Dan pen, palai khat pansanin, vansawltakte tungtawna piak ahi. 20 Palai pen, langkhat kia taanga palai ahi kei. Ahihhangin, Pathian zaw khat ahi. 21 Tua ahih manin, Dan in Pathian' thuchiamte a kalh-a hia? Kaih peuhmah lou! Pathian in hinna pe thei dan khatpeuh na pia hita leh, Dan pansana diktatna hong tungkhin peuhmah ding hi. 22 Ahihhangin, Laisiangthou in leitung khuavannuai buppi khelhna nuaia taangin a khakkhum hi. Tua bel, Pathian in a um eite kianga Jesu Khrist upna tungtawna tua thuchiam a tangtunsak theih nading ahi. 23 Hiai upna thu a hong tun main, Dan in eite hon koltangsak a, upna thu latsak ahih mateng adingin hon henchip hi. 24 Tuachi-in, tua Dan pen Khrist kianga eite hon kha dinga hon ukpa ahi. Tua bel, eite, upna pansana diktansak i hih theih nading ahi. 25 Tu'n zaw, upna thu hong tungta ahih manin, tua Dan ukna nuai ah eite i om nawn kei hi.
Pathian' Tate
26 Khrist Jesu upna tungtawnin, noute khempeuh Pathian' tate na hi uhi. 27 Ahang bel, Khrist-a kibaptis-lutkhin noute khempeuh in Khrist silh na hita uhi. 28 Juda leh Grik kikhentuam lou, sila leh noplen kikhentuam lou, pasal leh numei kikhentuam lou ahi. Khrist Jesu ah, noute khempeuh pumkhat na hi uhi. 29 Noute Khrist-a na hih nungsang uh, Abraham' chisuan, thuchiam banga gouluahte na hi uhi.
1 Ka gen hiai ahi: Gouluahpa pen, bangkim neipa hinapi-in, naupang a hih lai teng, sila tawh a kilamdanna a om kei hi. 2 A pa' hun seh a tun mateng, amah donte leh kemte' thunuai ah a om hi. 3 Tua mah bangin, eite zong naupang i hih laiin, leitung sinsakna bulte nuai ah i na koltang uhi. 4 Ahihhangin a hun seh hong tunkim takin, Pathian in a Tapa hon sawl a, amah, Dan nuai ah, numei apan hong piang hi, 5 Ta hihna hamphatna kim i neih theih nadinga, Dan nuaia omte hong tan dingin Pathian in amah hon sawl ahi. 6 Tate na hih manun, Pathian in a Tapa' Kha noute lungsung ah hon sawllut a, tua Kha mah Abba, Pa, chi-a kikoukhepa ahi. 7 Tua bang ahih manin, sila hi nawnlou-in, ta na hita uhi. Ta na hih manun, Khrist tungtawnin Pathian in gouluahtein hon bawlta hi.
Galatiate Awlmawhna
8 Tuma lamin, Pathian na theih louh laiun, piandan mawnga pathian hiloute nuai ah, silain na om uhi. 9 Ahihhangin, tuin zaw, Pathian na theita uhi. Pathian' theih na hita uh, chih ding ahi zawmah hi. Tua bang ahih nunga, a zawngkhal leh a kiching lou sinsaknate lama na kiheikik uh bangchi dan ahia? Tuate' nuaia sila suak kik nuam na hi umaw? 10 Ni sehtuamte, kha sehtuamte, hun sehtuamte, kum sehtuamte na tang mawk ua! 11 Noute adinga a mawkna-a thapai khin ka hi kha ding chih kon laupih hi. 12 Sanggamte aw, noute kon ngen hi: Kei, noute bangbang ka hih manin, kei bangbang hi un. Kei tung ah na khial kei uhi. 13 Na theihsa uh bangin, noute kianga tangthupha kong gen masak laiin, pumpi dammawhna hangin ahi. 14 Ka pumpi dammawhna pen, kei adingin haksatna hi mah leh, na simmawh kei uh a, nial zong non nial kei uhi. Tua naksangin, Pathian apan vansawltak hi leng kilawm, Khrist Jesu mahmah hi leng kilawm dongin, kei non na saang uhi. 15 Tua na lungnopna uh bang suakta ahia le? Hithei hi leh, na mittangte nangawn uh khel-khiain kei non pe nuam ding uh chih ka thei hi. 16 Thutak kong hilh mana tu-a noute' meima hong suakta ka hi maw? 17 Tua mite'n amau lama hon zolzawh sawmin a phatuam ngai uhi. Ahihhangin, a hoih lam ngimna ahi kei hi. A deih uh zaw, amaute adinga na phatuamngaih theih nading ua, koute apan noute hon mikhualsak nuam ahi uhi. 18 A ngim a hoih leh, phatuamngaih a hoih gige hi. Noute kianga ka om lai kia hilouin, tua bangin phatuamngai gige le uchin. 19 Ka ta deihthawhte aw, Pathian in noute sunga Khrist a siam pichin masiah, nauveiin kon vei thak hi. 20 Tumah mahin noute kiang ah omin, ka aw suak kheng thei leng ut natel ing e! Noute tungthu ah lah ka lungzing mawk a!
Hagar leh Sara
21 Dan nuaia om nuam noute'n hon hilh dih ua. Dan in a gen thei lou na hi umaw? 22 Abraham in tapa nih a nei a, khat pen, innsung nasem sila numei apan ahi a, a khat dang pen, noplen numei apana piang ahi, chi-in a na kigelh hi. 23 Innsung nasem sila numei apana piang tapa pen, ngeina banga suak ahi a, ahihhangin, noplen numei apana piang tapa pen bel, thuchiam tangtunna, thuchiam' ta ahi. 24 Hiai thilte etsak nei ahi uhi. Ahang bel, tua numeite, thukhun nih taanga ding ahi uhi. Numei khat pen Sinai Mual apan ahi. Tua in sila hi ding tate a nei hi. Hiai Hagar ahi. 25 Hagar bel, Arabia gama Sinai Muang sikletaanga ding ahi a, amah tulai Jerusalem, a tate tawh sila-a om tawh kibang ahi. 26 Ahihhangin, tunglam apan Jerusalem zaw noplen ahi. Amah eite khempeuh nu ahi. Ahang bel, 27 Nang a chiing numei, tate neilounu aw, nuam in. Pasal neinu sanga lungzuangnu' tate tamzaw ahih manin, nauvei natna thuaklou nu, kikoukhia in, chi-in a na kigelh hi. 28 Sanggamte aw, tuin eite Isak bangin, thuchiam tate i hi uhi. 29 Tua hun laiin, piandan ngeina-a suak tapa in Kha' vangletna apana suak tapa pen a bawlsia hi. Tuin zong tua mah bang ahi. 30 Ahihhangin, Laisiangthou in bang a gen a? Innsung nasem sila numei leh a tapa hawlkhia un. Ahang bel, innsung nasem sila numei' tapa in noplen numei' tapa tawh, bangchi mahin gou a luahkhawm ngei kei ding hi, a chi hi. 31 Tua ahih manin, sanggamte aw, eite, innsung nasem sila numei' tate i hi kei uh a, noplen numei' tate i hi zaw uhi.
Khrist-a Noplenna
1 Noplen dingin Khrist in eite hon suaktasakta hi. Tua ahih nung, noplenna sung ah dingkip un. Kuama'n sila hihna kola hon awksak kik dingin kiphal kei un. 2 Ka thugen chiamteh un! Kei, Paul in noute kon hilh ahi. Zek na kisumsak lai siah uh, Khrist in noute adingin manphatna himhim a neita kei ding. 3 Zek sumsak kuapeuh kiang ah ka gen ahi. Tua bang mi in Dan avekpi-a zuih ding leiba kiguan ahi. 4 Dan pansana diktansakna ngah sawm noute, tua Dan in noute apanin, Khrist phattuamna a phiat a, hehpihna apan puuk na hi uhi. 5 Ahihhangin, koute'n upna pansanin, ka lamet uh tua diktatna pen Kha tungtawnin lawptakin ka ngak uhi. 6 Ahang bel, Khrist Jesu ah, zeksum leh zeksum louh, a koi-zawsam in zong phattuamna a nei kei hi. A phatuam omsun ahih leh, itna tungtawna gamtang tua upna ahi. 7 Noute kitaitehna hoiha tai na hi uhi. Kua'n noute hong kalsungkhawh a, thutak na muan ding uh hon dai ahia? 8 Tua bang kizolna zaw, noute hon Sampa apan ahi kei hi. 9 Silngou tawmchik in anvui neel mekman a beupi-in a thousak hi. 10 Ngaihsut dan dang na nei kei ding uh, chih Toupa ah ka muang hi. Noute hong lungbuaisak mi in, a kuapeuh na hita leh zong, thukhenna a thuak ding hi. 11 Sanggamte aw, ke'n zeksum ding ahi, chi-a gen lai ka hih leh, banghanga bawlsiatna thuak lai keita? Tua bang na hi leh, khros kipalpaihna beita ahi kei dia hia! 12 Noute hong buaisakte ahih leh, a tawp tungin, ki-attankhevek vanglak le uh ka chi mahmah hi!
Kha-a Nuntakna
13 Sanggamte aw, noute noplen dinga sap na hi uhi. Ahihhangin, na noplenna uh, pianken sa' lunggulhna gilou pichin nadingin lemtangin zang kei un. Itnain nna kisepsak tek zaw un. 14 Nang na ki-it bangin na veng na pamte it in, chih thupiak khat in Dan khempeuh a khaikhawm hi. 15 Noute kikeituah a, kinetuah na hi uh a, na kinekgaih louh nadingun kiveng un. 16 Ahihhangin, hiai ka gen ahi: Kha pansanin nungta un. Tuachi-in, pianken sa' lunggulhna gilou na pichin kei ding uhi. 17 Pianken sa' lunggulhna in Kha a dou a, Kha' lunggulhna in pianken sa' a dou hi. Amaute a kihal ahi uhi. Tua ahih manin, noute'n na hih noplouhte uh na hih nak uhi, 18 Ahihhangin, Kha in hon pii hiven, Dan nuaia om na hi kei uhi. 19 Pianken sa' lunggulhna thilhihte a kitel mahmah hi: Angkawmna, kingaihna nin, sianlouhna, paktatna, 20 milimbiakna leh bumna, muhdahna, kilemlouhna, hazatna, thangpaia hanzaakna, angsung khualna, kikhenna, kinakna leh 21 etlahna, tual-thahna, zukhamna, zumun uangtatna leh tua bangte ahi. Tuma lama kon hilhkholh bangin, tuin kon hilhkhol hi. Hibanga nungtate'n Pathian kumpigam a luah kei ding hi. 22 Ahihhangin, Kha gah zaw itna, lungnopna, lemna, lungduaina, migitna, mi tunga siamna, muanhuaina, 23 lungnemna leh kithununna ahi. Hibangte tawh kihal dan himhim a om kei hi. 24 Khrist-a ahita peuhmahte'n, pianken sa, a utnate leh lunggulhna tawh a kilhlumta uhi. 25 Kha-a nungta i hih bangin, eite, Kha mah tawh kituakin gamta ni. 26 Eite kiliansak kei ni. Khat leh khat kitawnghangin kihaza kei ni.
Siamna
1 Sanggamte aw, mi kuapeuh a tatlek chiangin, a khami noute'n nunnemtakin na piikik un. Ahihhangin, noute zong khemna zolna-a na lut louh nading-un, kivengin kikem un. 2 Puakgik kidawn tuah tek un. Hibanga na hih chiangun, Khrist' dan zui na hi ding uhi. 3 Mi kuapeuh, bangmah hilou napi, banghiam tak hi-a a kingaihsut chiangin, amah leh amah kikhem ahi. 4 Michih in ama' thilhih a ettel zel ding ahi. Tua hi leh, midang tawh kiteh louin, amah kisial thei ding ahi. 5 Ahang bel, michih in ama' puak a kipuak tek ding ahi. 6 Thu-a sinsakna ngah mi peuhmah in a thilhoih neihte amah sinsakmi a tanpih sam ding ahi. 7 Kuamah kikhemzousak kei un. Pathian zaw zekhem theih ahi kei hi. Ahang bel, mi'n a pawi mah at ding ahi. 8 Ama' sa' lunggulhna lungtaisak dinga pawi mi in, tua khelhna pianken sa apan siatna a at ding hi. Ahihhangin, Kha lungtaisak dinga pawi mi in, Kha apan Tangtawn hinna a at ding hi. 9 Nahoih sep chimtak kei ni. I tawpsan kei leh, a huntakin a gah i at ding hi. 10 Tua ahih manin, hun lem i muh bangbangin, mi khempeuh tung ah nahoih sem ni. Adiakin, upna-a innkuanpihte tung ah sem ni.
Thilsiamthak
11 Keima' khut mahmaha laimal golpipi-a kon gelh en un! 12 Salama mite' phatna zong mite'n, noute zeksumsak teitei hon sawm uh ahi. Tuate'n Khrist khros hanga bawlsiatna a pelh nop man lei uh ahi. 13 Zeksumte nangawn in Dan a zuih louhpi uh. Hinapi-in, amaute'n noute zeksum dingin hon deih uhi. Na sa tung ua a kisial nop man uh ahi. 14 Ke' n zaw i Toupa Jesu Khrist khros loungal ka sial ngei louh ding dan! Ahang bel, tua khros tungtawna leitung in kei hon kikilhlupsan ahita a, kei zong leitung kikilhlupsan ka hita hi. 15 Khrist Jesu ah, zeksum in lah manphatna a nei kei a, zeksumlouh in zong manphatna a nei kei hi. A manpha pen zaw thilsiamthak ahi. 16 Hiai dan kikhung zuite khempeuh tung ah, Pathian' Israel tung mahmah ah, lungmuanna leh zahngaihna om hen, 17 Ke'n ka pumpi tunga Toupa Jesu' chiamtehna ka puak manin, tu apanin kuama'n kei hon buaisak kei hen. 18 Sanggamte aw, i Toupa Jesu Khrist' hehpihna in noute kha hon ompihta hen, Amen.
1 Kei, Pathian deihlama Jesu Khrist' sawltaklian in, Efesa khua-a Khrist Jesu-a sehtuam leh muanhuaite kiang ah lai kon gelh hi. 2 Pathian i Pa leh Toupa Jesu Khrist apan hehpihna leh lungmuanna noute tung ah om hen.
Pa' Teelna
3 I Toupa Jesu Khrist' Pathian leh Pa phatin om hen. Ama'n vanmunte-a khalam vualzawlna namkimin Khrist ah eite hon vualzawlta hi. 4 Ama'n a mitmuha siangthou leh genbaanglou hi dingin, leitung siam main Khrist ah eite hon na teelta hi. 5 Ama' kipahlamtak leh deihlama, Jesu Khrist tungtawna a ta pichingte hon suaksak dingin itnain eite hon na sepkhol khinta hi. 6 Tua bel, a Itpa-a aman beia eite hon piak tua hehpihna thupi pahtawina i suah nading ahi. 7 Pathian' hehpihna hauhna bangbangin tua a Itpa ah a sisan tungtawnin tatna, tatleknate ngaihdamna i tangta. 8 Ama'n tua hehpihna, pilna leh theihsiamna khempeuh tawh, eite tung ah a dimletin hon sungbua a, 9 Khrist-a sep a tup leh ngim a deihlam thusim kiseel, a kipahlamtakin eite kiang ah hon theisakta hi. 10 Tua a deihlam thiltup leh ngim bel, a hun hong buchin chianga tangtunsak a tup ahi tua lah, vantung leh leitunga om bangkim, lutang khat nuaia koih ding, chihna ahi. Tua lutang bel Khrist ahi. 11 A deihlam thiltup leh ngim tawh kituaka bangkim semkhepa Pathian' thiltup bangbanga sehkholh hitain, koute zong Khrist ah teel ka na hita uhi. 12 Tua bel, Khrist-a muanna a nei masa koute a thupina pahtawina ka suah nading uh ahi. 13 Noute zong thutak thu, noute hotdamna tangthupha na zak takun Khrist ah huailut na hi uhi. Umta na hih manun amah ah chiamsa Kha Siangthoua chiamteh na hi uhi. 14 Tua Kha Siangthou bel, Pathian' thupina pahtawina hong hi ding tua a neihsa hitate tatna hong tun mateng adinga i gouluah ngeingei ding kipsaka khamkholhna ahi.
Thuumna
15 Hiai hang mahin, Toupa Jesu na upna uleh, misiangthoute khempeuh na itna thu uh ka zak nungsang, 16 ka thumnate ah noute' min louin noute hanga kipahthu gen ka tawp kei hi. 17 I Toupa Jesu Khrist' Pathian leh thupina Pa ahipa'n amah theih sem nadinga Kha tungtawna pilna leh kilaakna noute hon piak nadingin ka ngen hi. 18 Na theihsiamna mitte uh a vaksak a, ama' hon sapna bang lametna hi hiam, chih na theih nading uleh misiangthoute-a ama' gouluah thupi hauhnate bang hi hiam, chih na theih nadingun ka ngen hi. 19 Tua chiangin, ama' vangletna thahat mahmah in a sep bangbanga, a um eite lama ama' vangletna thupilua mahmah bang hi hiam, chih na theih nadingun ka ngen hi. 20 Tua bel, misite lak apan Khrist a kaihthawha, vanmunte-a ama' taklama a tutsak laia, Khrist tunga a zat vangletna mah ahi. 21 Ama'n vaihawm kumpite, thuneihna neite, vangletna leh tou hihna neite khempeuh leh, tu hun kia hiloua a hong tung ding hun donga min kiphuak khempeuh tunglam pek ah amah a tusak hi. 22 Pathian in Khrist' khenuai ah bangkim a koih a, saptuam adingin bangkim tunga lutang hihna a pia hi. 23 Tua saptuam bel, ama' pumpi ahi a, bangkima bangkim dimsakpa' kichinna ahi.
Pathian Lama Si
1 Noute na hih uleh, na tatleknate uleh na khelhnate uh sunga si na nahi uhi. 2 Tuate sung ah hiai leitung nuntak dan ngeina zuiin leh, huihkhua-a thunei kumpipa, tu huna thumangloute sunga sempa' kha deihna bangin na nungta uhi. 3 Tua thumangloute lak ah eite khempeuh zong, i sa utna banga gamtain, sa leh lungsim' lunggulhna gilou bangbangin i na om uhi. Piandan mawngin, midangte bangin thangpaihna tuak dinga piang him i na hi uhi.
Pathian Lama Hing
4 Ahihhangin, zahngaihna hau Pathian in itna lianpitakin eite hon it hi. 5 Tatleknate sunga si i hih laitakin, ama'n Khrist tawh hon hihhingkhawmta hi hehpihna hanga hotdam na hi uhi. 6 Ama'n Khrist tawh hon kaithoukhawm a, vanmunte ah Khrist Jesu ah amah mah tawh hon tukhawmsak hi. 7 Tua bel, eite lama Khrist Jesu-a migitna hanga ama' hehpihna hauhna tehpihbei, tunung huna a etsak theih nading ahi. 8 Ahang bel, Pathian in hehpihna hangin, upna tungtawnin noute hon hondamta hi. Tua lah, noute apana piang ahi kei a, Pathian' thawnpiak ahi zaw hi. 9 Mi'n a kisialpih theih louh nadingin, hiai thawnpiak pen, nasepa lawhkhiak ahi kei hi. 10 Ahang bel, eite ama' khutsuak i hi a, nahoihte sem dinga Khrist Jesu-a siam i hi uhi. Tua nahoihte bel, eite' sep dinga Pathian in a na bawlkholh ahi.
Khrist-a Khat Suahna
11 Tua ahih manin, nidang laia sa lama, satunga khuta sum zeksum kichite'n, Zeksumlouh, hon na chih uh, Zentelte na hih lam uh theigige un. 12 Tua hun laiin, noute Khrist neilou na hi uh a, Israel khua-le-tui hihna apan pawlam mi na hi uh a, thuchiam thukhun apan mikhual, lametna neilou leh leitunga Pathian neilou na hi uhi. 13 Ahihhangin, tu'n bel, nidang laia gamlapi-a om noute, Khrist' sisan pansanin, Pathian in Khrist Jesu ah amah tawh hon kinaisakta hi. 14 Ahang bel, amah mah eite' kilemna ahi: Ama'n mihing pawl nihte khat hon suaksak a, eite kimelmaakna banglai a chimsakta hi. 15 Ei mihing pawl nihte apan mihing thak khat, amaha a siam nadingin, kimelmaakna omsak tua Dan, a sunga thupiakte leh thusehte khempeuh tawh, ama' sa mahmah ah a beisakta a, kilemna a bawlta hi. 16 Tua chiangin, ei mihing pawl nihte Pathian tawh hon kilemsak dingin Khrist in khros ah eite' kimelmaakna a sisakta. Tua khros tungtawnin, ei mihing pawl nihte, mihing thak, tua pumpi khat hon suaksakta hi. 17 Amah hong pai a, gamlapi-a om noute kiang ah leh, naichika omte kiang ah, kilemna thu hong gen hi. 18 Ahang bel, eite'n i nihun, amah tungtawna Kha khat pansanin Pa kiang lut theihna i ngahta hi. 19 Tua ahih manin, tu'n zaw, melmakmite leh gamdang mite na hi nawn kei uh a, misiangthoute tawh khua-le-tui khat leh Pathian' innkuante na hikhawm zawta uhi. 20 Pathian in sawltakliante leh kamsangte' suangphum tung ah noute hon lamtou hi. Jesu Khrist mahmah a kiua suang poimawh pen ahi. 21 Pathian in Khrist ah, tua innlam a vekpi-in a sutuah a, Toupa ah Pathian' tenna tempul siangthouin a dingkhia hi. 22 Kha-a Pathian tenna dingin, Pathian mah in Khrist ah noute zong hon lamtoukhawm hi.
Thusim Kiseel Kiiakna
1 Hiai hangin, kei Paul, nou Zentelte adinga Jesu Khrist-a hentapa ka hi. 2 Noute adinga Pathian in a hehpihna nasepna kei hon kepsak dan na zata tham ding uhi. 3 Tua bel, kilaakna tungtawna tua thusim kiseel kei kianga theihsaka om, na kiang ua tomkima kon gelhtak bangin na zata tham ding uhi. 4 Tua na sim chiangun, tua Khrist thusim kiseel ka theihtel dan na thei ding uhi. 5 A beisa hun dang ah, Pathian in hiai thusim kiseel mihingte kiang ah hibangin a langsak ngeikei hi. Tu'n bel, sawltaklian siangthoute leh kamsangte kiang ah, a Kha pansanin a langsakta hi. 6 Pathian in tangthupha tungtawnin hiai thusim kiseel a langsakta: Tua bel, tu-a, Zentelte, Israelte tawh gouluahkhawmte, pumpi khat kahiangte leh Khrist-a thuchiam tanpihte hong hihtaakna thu uh ahi. 7 A vangletna pansana Pathian in a hehpihna thawnpiak kei hon piak bangbangin tua thusim kiseel nasempa ka hong suakta hi. 8 Misiangthoute khempeuh laka neupen sanga neuzaw kei kiang ah, Pathian in hiai hehpihna hon pia hi. Tua bel, a kisuikhe zoulou Khrist' hauhnate, Zentelte laka gen dingin ahi. 9 Hiai thusim kiseel nasepna bang hi hiam, chih michih kianga kiteltaka gen dingin zong ahi. Tua thusim kiseel bel a beisa hun sung teng, thil bangkim siampa Pathiana kiseel ahi. 10 Pathian in a ngim bel, Pathian' pilna thuah tampi, vanmun khawnga vaihawm kumpite leh thuneihna neite kianga, saptuam tungtawna, tu huna theihsak ding a deihna ahi. 11 Tua bel, tua a Tangtawn thiltup bangbanga, Khrist Jesu i Toupa-a a sepkhiakna pilna a theih nading uh ahi. 12 Amah upna tungtawnin, Pathian naih theihna noplenna leh kimuanna amah mah ah i nei uhi. 13 Tua ahih manin, noute adinga ka thuakte hanga lungke lou dingin kon ngen hi. Tua thuaknate, noute' thupina ahi zaw hi. Efesate adinga Thumsakna 14 Hiai hangin, i Toupa Jesu Khrist' Pa mai ah ka khukdin a, 15 amah, lei leh vaana innkuan min khempeuh kiphuahnapa' mai ah ka thuum hi. 16 Ama'n ama' hauhna thupi bangbanga, na sunglam mihinna uh hatsak nadinga, a Kha tungtawna vangletna hon piak nading bang, 17 upna tungtawna noute khempeuh sunga Khrist a teen theih nading leh, itna sunga zungkai leh bulkip neia na om nading uh bang, 18 misiangthoute khempeuh tawh, Khrist' itna a zat dan, a sau dan, a thuk dan leh a saan dan na theihsiam theih nading uh bang, 19 tua Khrist' itna theihkhit zawhlouh na theih nading uleh, a Kha in Pathian kichinna tawh noute hon kidimsak nading bang ka ngen hi. 20 Tuin, eite sunga seem a vangletna bangbanga, i nget leh i ngaihsut sanga nakpitaka kiching zaw-a sem thei amah tung ah, 21 amah tung mahmah ah, saptuam ah leh Khrist Jesu ah, hun om sung teng, a bei ni omlouin thupina omdenta hen! Amen.
Kipumkhatna
1 Tua ahih manin, ama' hon sapna, hotdamna tawh kikhoma nungta dingin, kei Toupa-a hentapa in noute kon hanthawn hi. 2 Kingaihniamna leh lungnemna khempeuh tawh, lungduaitaka itna-a kithuakzou tuahin om un. 3 Noute hon henkhawm lemna ah, Kha-a kipumkhatna lenkip dingin nakpitakin pang un. 4 Sapa na om lai ua, lametna kibang tang dinga sap na hih bangun, pumpi khat a om a, Kha khat a om a, 5 Toupa khat, thu-up khat, baptisna khat a om. 6 Bangkim tunga om, bangkim tungtawna om leh noute khempeuh sunga ompa, eite khempeuh' Pa, Pathian khat a om hi. 7 Ahihhangin, Khrist in thawnpiak hon piak zahzahin, eite tek kiang ah hehpihna hon pia hi. 8 Tua ahih manin, Vansanga a kaltouh laiin, saltanna salin a kai a, mihingte kiang ah thawnpiakte a pia, chi-in a gen hi. 9 A kaltou, chih bang chihna ahia? Lei mun nuainungzaw ah a kumsuk masa chihna ahi. 10 Thil bangkim a dimsak theih nadinga, vaante khempeuh tunglam peka kaltoupa mah ahi a kumsukpa. 11 Amah mah in mi pawlkhat sawltaklian hihna a pia. Mi pawlkhat kamsang hihna a pia. Mi pawlkhat tangthupha genmi hihna a pia. Mi pawlkhat Pastor hihna leh sinsakmi hihna a pia hi. 12 Khrist' pumpi lamtouhna nna sem dinga, misiangthoute a thop theih nadingin hibangin thawnpiakte a pia hi. 13 Tua bel, eite khempeuh, thu-up leh Pathian' Tapa theihna lama kipumkhatna leh, Khrist kichinna zahzaha i pichin mateng ading ahi. 14 Tua hileh, tuihualte'n a lang a langa a seep leh sinsakna huih chiteng leh khemmang sawmna mihing pillepchiahna in lehlam lehlama a mutleng naupang i hi nawn kei ding hi. 15 Tua naksanga, itna-a thutak gen a, Lutang ahipa Khrist sunga bangkima i khantouh zawk nading ahi. 16 Ama'n amah apanin, pumpi a vekpi-in kizopna thaguite khempeuhin a kizomsak a, a phankhawm hi. Tuate tungtawna kahiang tek in ama' sep ding banga a sep chiangin, tua pumpi a khangsak a, itna ah amah leh amah a kilamtou hi.
Mihing Lui leh Mihing Thak
17 Tua ahih manin, Toupa ah hiai genin kon ngiat hi: Zentel dangte, a phatuamlou a lungsim ngaihsutna utawh a nuntak bangua noute na nuntak nawn louh ding uh ahi. 18 Amaute zaw a lungtang uh a khauh manin, theihtheihna a nei nawn kei uh a, Pathian' hinna apan pawsiah ahi uh a, a theihtheihna uh a mial hi. 19 Amaute'n phamawhsakna a nei nawn kei uh a, huaihamtaka a sianglou hih dingin numei pasal kal paktatna ah a kipumpiak uhi. 20 Noute'n zaw Khrist na theih dan uh tua bang ahi kei hi. 21 Jesu-a thutak om bangbangin, ama' thu na zata uh a, amah ah sinsak na hita uhi. 22 Nidang laiin, lunggulhna khem-hatna in hon hihsiat bangbangin na na nungta uhi. Tu'n bel, sinsaka na om bangun, na nuntakna masa uh, na mihing lui uh suahkhia unla, 23 na khalam lungsim put uh thaksakin om unla, 24 diktatna leh siangthouna diktaka Pathian batpiha siamthak, tua mihing thak pen silh un. 25 Tua ahih manin, noute tek in zuautheihna suahkhia unla, na veng na pamte uh kiang ah thutak gen un. Ahang bel, eite khat leh khat kihiangtuah tek i hi uhi. 26 Na thangpaih chiangun khial kei unla, na thangpaihna uh ni tumpihsak kei un. 27 Dawimangpa zong mun awn nawn kei un. 28 Guta in gu nawn kei henla, a tasam mi kianga piak ding a neih theih nadingin, a khuta nna hoih semin gim zaw hen. 29 Na kam uah thusia himhim pawtsak kei unla, a zate adinga hehpihna a hih theih nadingin, kilamtouh nadinga kul thu hoih pawtsak zaw un. 30 Tua chiangin, Pathian' Kha Siangthou lungkhamsak kei un. Tatna ni adinga Pathian in tua Kha Siangthoua hon chiamteh ahi. 31 Khaatna, thangpaihna, hehna, kinakna leh kigensiatna khempeuh, a sia kideihsakna khempeuh tawh suahkhia un. 32 Pathian in Khrist-a noute hon ngaihdamtaak bangin, noute zong lungnemna tawh siam kituh tek unla, kingaidam tuah tek un.
1 Tua ahih manin, Pathian' ta deihthawhte bangin, Pathian' hindan lasawn un. 2 Khrist' in zong eite hon it a, Pathian kianga a namtui mahmah, thillat leh kithoihna hi dinga eite adinga a kipiak bangin, itna ah nungta un. 3 Misiangthoute' nuntak ding dan bangin nungta unla, ahihhangin, kingaihna nin hiam, sianlouhna himhim, ahih kei leh huaihamna, na lak uah a lawh zong lou kha kei un. 4 Zahmawh thil, thugen haihuaite, ahih kei leh, chiamnuih thanghuaite a kilawmlou ahi. Na lak uah hibang om kei henla, kipahthu gennate om zaw hen. 5 Ahang bel, kingaihna nina buai, siangthoulou leh huaiham mi zaw milim bia ahi a, tua bang mi kuamah in Khrist leh Pathian' kumpigam ah goutan a nei kei, chih na thei uhi. 6 Thuginalou peuha kuamah' khemzawhin om kei un. Hiaite hangin thumanglou tate tung ah Pathian' thangpaihna hong tung ahi. 7 Tua ahih manin, hibang thil hihte lak ah pang kei un. 8 Tuma lamin, noute mial na hi uhi. Ahihhangin, tu'n bel Toupa ah vaak na hita uh a, vaak tate bangin nungta un. 9 Kha gah zaw hoihna khempeuh, diktatna khempeuh leh thutak khempeuh ahi. 10 Tua chiangin, Toupa lungtaisak bang hi hiam, chih zongkhia unla, 11 gahsuah neilou mial nasepte ah panna nei kei unla, tuate phoulak zaw un. 12 Ahang bel, thumangloute'n a sima a hihte uh, a gen nangawn a zumhuai hi. 13 Ahihhangin, a kiphoulak khempeuh vaak in a latsak ahi. Ahang bel, bangteng muh theih suaksak vaak hiven. 14 Tua bang ahih man ahi: Nang ihmu aw, khanglou inla misite lak apan thoukhia in, tuachi-in, na tung ah Khrist hong taang ding hi, chi-a a na gen ahi. 15 A pilloute bang hilouin, a pilte bangin, na nuntak dan uah pilvang unla, 16 nite hoih lou ahih manin, a man piain hun lem lei zel unla, 17 a hoih thei penin zang un. Hai nuam dah unla, Toupa' deihlam bang hi hiam, chih theitel zaw un. 18 Zukhamin om kei un, tua in uangtatna tun ahi. Kha-a luahdimsakin om zaw unla, 19 phatna late, Pathian late leh khalam latein kihoupih tek un. Toupa' mai ah la sa unla, na lungsung uah ging kilawm bawl un. 20 Thilbangkim ah, i Toupa Jesu Khrist minin Pa Pathian kiang ah kipahthu genin om gige un. 21 Pathian zahtaaka launa hangin kiniamkhiak tuah tek un.
Zite leh Pasalte
22 Zite aw, Toupa nuaia nuailut bangin noumau pasalte nuai ah nuailut un. 23 Ahang bel, Khrist zong ama' pumpi saptuam' lutang a hih a, Hondampa ahih bangin, pasal zong zi' lutang ahi. 24 Tua ahih manin, Khrist nuaia saptuam a nuailut bangin, zite zong thilbangkim ah amau' pasalte nuai ah lut uhen. 25 Pasalte aw, Khrist in zong saptuam a it a, amah adinga a kipumpiak bangin, noumau' zite it un. 26 Tuia sil a, thugen tungtawna a sianthousak theih nadingin, saptuam adingin amah a kipia hi. 27 Tua baan ah, nin baang lou, vuai lou leh, tua bang himhim om loua siangthou leh genbaangloua saptuam thupitaka amah leh amah a kipiak theih nading ahi. 28 Tua bangin, pasalte'n amau' pumpi bangbangin, amau' zite a it ding uh ahi. Ama' zi itpa amah ki-it ahi. 29 Kuamah in ama' pumpi mah a mudah ngei kei a, Toupa'n saptuam a it bangin, vakin a deihthawh zaw hi. 30 Ahang bel, eite ama' pumpi kahiangte, a sa apana sa, a guh apana guh i hi uhi. 31 Hiai hangin, pasal in a nu-le-pa a nuse ding a, a zi ah a belh ding a, nihte sa pum khat a suak ding uhi. 32 Hiai thusim kiseel a thupi hi. Ahihhangin, ken zaw, Khrist leh saptuam thu gen ka hi. 33 Ahita zongin, noute kuapeuh in zong amah a ki-it bangin a zi a it teitei ding ahi. Zi in zong a pasal a zahtak teitei ding ahi.
Tate leh Nu-le-Pa
1 Tate aw, Toupa ah na nu-le-pate uh thu mang un. Ahang bel, hiai a dik him ahi-a ahi. 2 Na nu-le-napate uh pahtawi un. Thuchiam tawh kipekhawm thupiak masapen hiai ahi. 3 Tua chi-a nou adinga hoih ding a, lei tunga khantoua nuam sa ding na hi uh, chih ahi. 4 Nou, pate aw, na tate uh thangpaisak kei un. Toupa' thununna leh taihilhna ah keem piching zaw un. 5 Silate aw, Khrist' thu na man ding bangtakun, lau leh liingin lungtang chihtakna tawh, sa lama na toute' uh thu mang un. 6 Mihing lungtaisak sawm banga mitmei veeng lei hilouin, Khrist' nasemte bangin, lungtang apanin Pathian deihlam hih un. 7 Mihing' nasem hiloua Toupa' nasem na hih manun, hoih deihna tawh na toute uh' nna sem un. 8 Sila hita leh noplen hita leh, kuapeuh in a sep hoih leh, Toupa apan pahtakman saang ding ahi, chih thei un. 9 Tua chiangin, nou, toute aw, tua bang mahin hih unla, silate vau tawpsan un. Noute'n zong vantung ah Tou na nei uh a, ama'n deihsaktuam a nei kei, chih thei un. 10 Atawppenin, ka sanggamte aw, Toupa ah leh a thahatna vanglianpi ah thahat suah un. 11 Pathian' galvan kimin kivan un. Tuachi-in, dawi-mangpa' zekhemnate na nang zou ding uhi. 12 Ahang bel, i doute sa leh sisan nei ahi kei uh a, tu huna, mial tunga vaihawm kumpite, thuneihna neite, vangletna neite leh vanmunte-a kha gilou honte ahi zaw uhi. 13 Tua ahih manin, Pathian' galvan kim la un. Tuachi-in, ni hoihlou ah amaute na nang zou ding uh a, na nan zawh khit nungun zong na ding lai ding uhi. 14 Tua ahih manin, thutaka kawng gaksain, diktatna awmphaw silhsain om unla, 15 lemna tangthupha-a kisakkholhna khedap bunsain om un. 16 Tua teng baan ah, upna lum la un. Tua lum pansanin giloupa' thalkuangtheite na hihmit thei ding uhi. 17 Tua chiangin, hotdamna siklukhu leh Pathian' thu Kha namsau la un. 18 Tua chiangin, thuumna namkim leh ngetna namkimin, hun teng ah Kha ah thuum un. Hibang lungsim neiin, kuhkaltakin kiveng unla, misiangthoute khempeuh adingin thuum gige un. 19 Tangthupha thusim kiseel theisak dinga hangsantaka ka kam kaat theih nadingin, kei adingin zong hon thumsak un. 20 Tua tangthupha hanga khainiang bun palai ka hi. Tua tangthupha ka gen ding bangtaka, hangsantaka ka gen theih nadingin hon thumsak un.
Chibaibukna
21 Ahihhangin, bangchi khawsak ka hi hiam, chih leh, bang hih ka hi hiam, chih na theih nadingun, sanggam it leh Toupa-a nasem muanhuai Tukika in bangkim noute hon theisak ding hi. 22 Bangchi khawsak ka hi uhiam, chih na theih nading uleh, ama'n noute hon hanthawn theih nadingin, hiai ding mahin noute kiang ah amah kon sawl ahi. 23 Pa Pathian leh Toupa Jesu Khrist apan lungmuanna, tua chiangin, upna tawh kizui itna, sanggamte tung ah omta hen. 24 Lungtanga i Toupa Jesu Khrist it taktakte khempeuh tung ah hehpihna omta hen. Amen.
1 Khrist Jesu' sila Paul leh Timothi in, Khrist Jesu-a om, Filipi khua-a misiangthoute khempeuh leh, bishopte leh dekonte kiang ah lai kon gelh uhi. 2 I Pa Pathian leh Toupa Jesu Khrist apan hehpihna leh lungmuanna noute tung ah om hen.
Kipahthu Genna
3 Noute kon phawk tengin, ka Pathian tung ah kipahthu ka gen hi. 4 Noute khempeuh adinga ka thuumna khempeuh ah, lungnopna tawh ka thuum hi. 5 Ni masapen apan tu donga tangthupha nasepna-a na panna uh hangin Pathian tung ah kipahthu ka gen hi. 6 Hiai mahmah ka muang hi: Noute sunga nna hoih panpa'n Khrist Jesu' ni dongin a zoukim ding, chih. 7 Noute ka lungtanga kon neih manin, hibanga noute khempeuh kon phawk a kilawm him ahi. Henta kolbunin om taleng, tangthupha gumin a kipna thu gen taleng, noute kon phawk hi. Pathian' hehpihna ka tan tangsamte na hi uhi. 8 Khrist Jesu' lainatna nou ngiingeiin noute kon ngai mahmah, chih hon theihpihpa Pathian ahi. 9 Theihna leh theihkakna lama noute' itna a khan semsem nadingin ka thuum hi. 10 Tua bel, a hoihpen na theihtel nading uh, Khrist' ni donga a taka siang leh genbaangloua na om theih nading uh ka deihna a hi. nPathian' thupi nading leh phat nadingin, Jesu Khrist tungtawna om diktatna gahtein kidim le uchin ka chi hi.
Paul' Thuaknate
12 Sanggamte aw, ka tunga thil tungte'n tangthupha phuanzak semsemna a tun taktak, chih na theih uh ka deih hi. 13 Khrist-a khainiang bun ka hi, chih innpi veengpawl leh, adangte khempeuh' mai ah a kitelta hi. 14 Ka khainiang butte hangin, Toupa-a sanggamte a tamzaw lau lou leh hangsantaka Pathian thu gen dingin hanthawnin a om uhi. 15 Pawlkhatte'n hazatna leh kielna hangin Khrist' thu a gen tham uhi. Pawlkhatte'n bel, hoih deihna hangin Khrist' thu a gen uhi. 16 Amasa pawl in chihtakna tawh hilouin, amau angsung khualna tawh, Khrist' thu a gen uh a, tua banga hihin, ka khainiang butna baan ah, gimna hon behlap ding a kisa uhi. 17 A nunung pawl in bel, tangthupha gupna hanga thuak ka hi, chih theiin, itna tawh Khrist' thu a gen uhi, 18 Bang a phamawh dia? Tupna diklou hi-in, thutakin hita leh, banglam peuha Khrist' thu a kigen peuh leh, hiai hangin ka lungnuam hi.
Khrist-a Nuntakna
19 Ahi, ka lungnuam lai ding. Ahang bel, noute' thuumna tungtawn leh, Jesu Khrist' Kha huhna hangin, ka tunga thil tungte ka suahtakna hong suak ding chih ka thei hi. 20 Bangmah ah ka zahlak kei ding a, ahi gigesa bangin, tuin zong sihna hi-in, hinna hita leh, ka pumpi-a Khrist pahtawia a om nadingin, hangsanna ka nei gige zaw ding chih kimuanna taktak leh lametna ka nei hi. 21 Ahang bel, kei adingin nuntak Khrist ahi a, sih zong meetna ahi. 22 Pumpi-a nuntak lai kei adingin sepgim gahsuahna ahi ding hi. Hinapi-in, bang teel zaw ding ka hi hiam, ka thei kei hi. 23 Thil nih kaltehin ka om: Paikhiaka Khrist tawh omkhawm ding ka lunggulh hi. Tua lah kei adingin nakpitakin a hoihzaw hi. 24 Ahihhangin, pumpi-a ka om lai noute adingin a poimawh zaw hi. 25 Hiai muang ka hih manin, pumpi-in noute khempeuh tawh ka omkhawm lai ding chih ka thei. Thu-up sunga na khan nading uleh, na lungnop nadingun noute khempeuh tawh ka omkhawm lai ding hi. 26 Tua hileh, noute tawh ka omkhawm kikna tungtawnin leh keima' hangin, Khrist-a na lungnopna uh a dimlet ding hi. 27 Bangteng hong tung taleh, Khrist' tangthupha tawh kituakin nungta peuhmah phot un. Tua hileh, noute kianga hong paiin hong mu taleng, ahih kei leh, a gal apan noute' thu na za taleng, tangthupha sunga thu-up gumin mi khat bang maiin lungsim munkhatin na dingkip uh chih ka thei ding hi. 28 Hon doute'n bangchi mahin noute hon lausak kei ding hi. Hiai bel, amaute hihmanthatin a om ding uh a, noute hotdamin na om ding uh chih chiamtehna ahi. Ahi, Pathian in noute hon hondam ding hi. 29 Ahang bel, Khrist up kia hilouin, ama' adinga na thuak ding uh zong phalsak na hi uhi. 30 Kidouna keia om na muhsa uh leh, tu-a om lai na zak uh bangbang noute'n zong na tuak uhi.
Khrist' Kingaihniamna
1 Khrist tawh kizopna hanga kihanthawnna na neih ua, itna-a khamuanna na neih ua, Kha tawh kipawlna na neih ua, lungnelna leh lainatna na neih naak uleh, 2 lungput munkhata omin, itna kibang neiin, lungput leh tup kibangin ka lungnopna bukimsak un. 3 Angsung khualna leh kipilsakna tawh bangmah hih kei unla, ahihhangin, kingaihniamna lungput tawh, midangte noute sanga hoihzawin ngaihsun un. 4 Noute laka kuapeuh in ama' hoih nading kia en louin, midangte hoih nading zong en sam hen. 5 Khrist Jesu' neih hiai lungput nei un: 6 Ama'n Pathian hihna pianzia nei gige hinapi-in, Pathian tawh kikima om khiaklaha let tentun dingin sep lou hi. 7 Amah hong kiawngsut a, sila bangin hong om a, mihingin hong pai hi. 8 Mihing' mei puin, amah hong kiniamkhiak a, sih donga thu mangin, khrosa sihna dong hong thuak hi. 9 Tua ahih manin, Pathian in amah pahtawina sangpen pia a, min teng khempeuh sanga min tungnung zaw pia hi. 10 Jesu' min kilawhna-a, vantung, leitung leh vannuaia khuk khempeuh a khukdin nading, 11 leh Pa Pathian' thupi nadinga, lei chih in, Jesu Khrist, Toupa ahi, chih a phuan nading ahi.
Aksite banga Taang
12 Tua bang ahih manin, ka itte aw, thu na man gige bangun, noute kianga ka om lai kia hilouin, a diakin ka om louh laiin, lau leh liing kawmin na hotdamna chiat uh semkhia un. 13 Ama' deihlam sep nopna hon pepa leh, noute sunga sempa Pathian ahi. 14 Phunphun lou leh, seelseel louin nna peuhmah sem un. 15 Tulai khang gilou laka genbaanglou leh poikhoihlou, Pathian' tate na hong hih theih nadingun, tua bangin sem un. Leitung ah, amaute laka aksite banga taang na hi uhi. 16 Ahang bel, hinna thu tawi na hih manun, tua bangin, kei amawknain ka tai kei a, amawknain ka semgim kei, chih theiin, Khrist' ni-in ka kisial thei ding hi. 17 Na upna ua pan hong tung thillat leh nasep tunga dawn thillat banga sunbuaka om lellel himah leng, noute khempeuh tawh ka lungnuamkhawm hi. 18 Noute zong na lungnuam uh a, kei tawh zong na lungnuamkhawm ding uhi.
Timothi leh Epafrodita
19 Noute' tawh kisai thu ka zak chianga hanthawna ka om theih nadingin, noute kianga Timothi kon sawl theih ding, Toupa Jesu ah ka sawm hi. 20 Noute' hoih nading awlmawh taktak, tua bang lungsim nei, mi dang ka nei kei hi. 21 Mi khempeuh in Jesu Khrist' thilte zong louin, amau angsung ding kia a zong uhi. 22 Amah ahih leh, ta in a pa tawh a semkhawm nasepna ah kei tawh a semkhawm hi. Tua banga a nuntak zia ettelsa leh saanthamsa na thei uhi. 23 Tua bang ahih manin, keima' tungthu bangchi bangin a kihei hiam, chih ka theihtel chiangin, amah hon sawl pah ka sawm hi. 24 Kei mahmah zong kong pai pah ding chih Toupa ah kimuanna ka nei hi. 25 Ahihhangin, ka sanggampa Epafrodita noute kianga hon sawl kik kul ka sa hi. Amah ka seppihpa ahi. Noute apan thupawpa amah non sawl uh, ka taksap awng hu-a hon kempa hong suak ahi. 26 Ama'n noute khempeuh hon ngaina mahmah a, ama' chinat thu na za uh chih a theihin a lungkham hi. 27 Amah si dektakin a china ngeingut a, ahihhangin, Pathian in ama' tung ah zahngaihna a nei hi. Thamlouin, lungkhamna tunga lungkhamna ka neih thuah sawnsawn louh nadingin keima' tung ah zong zahngaihna nei ahi. 28 Tua bang ahih manin, amah hon sawl ka kilawp diak hi. Noute'n amah na muh kik chiangun, na lungdam mahmah ding uh a, kei ka lungkham a phadawm ding hi. 29 Kipak takin Khrist ah amah na saang unla, amah bang mite pahtawi un. 30 Ahang bel, Khrist' nna a sepna hanga si dektak ahi a, noute'n nong huh theih louh taang uh, ama'n hong huh a, sihngama a hinna nangawn luikhia ahi.
Sa ah Muan ding Omlou
1 A tawppenin, ka sanggamte aw, Toupa ah lungnuam un! Noute kianga a ngei mah gelh kik kei adingin chimtakhuai ahi kei hi. Noute' kiveen nadingin a hoihzaw hi. 2 Uite, nna gilou semte leh sa atgawpte apan kiveng un. 3 Eite i hi zaw zeksumte, kha-a Pathian bete, Khrist Jesu suang a, sa-a muanna ngaloute. 4 Sa-a kimuan ding chi le'ng, ke'n muan ding ka nei sem mawh kei ding hi. Mi kuapeuh in, sa-a muan ding nei a kisak aleh, ke'n ka nei sem: 5 Ni giat ni-a zeksum, Israel mi, Benjamin nama mi, Hebru laka Hebru kholdiak, Dan lama Farisai ka hi. 6 Phatuamngaihna chi le'ng, saptuam bawlse hiaia phatuamngai ka na hi. Dan tawh kisaia diktatna chi le'ng, genbaanglou ka hi. 7 Ahihhangin, kei adinga metna na hite peuhmah, Khrist hangin supnain ka simta hi. 8 Tua thamlouin, Khrist Jesu ka Toupa theihna thupi tungnung tawh tehin, thil bangkim mannain ka sim a, ama' hangin thil bangpeuh ka mansuah taktak hi. Khrist ka tan theih nadingin, thil bangpeuh ninneng bangin ka simta. 9 Dan apan hong om keima' diktatna hilou a, Khrist-a om upna tungtawna diktatna pen nei a, Khrist sunga ka om theih nadingin, tua bangin ka hih ahi. Tua diktatna bel, upna tungtawna Pathian apan hong om ahi. 10 Khrist ka thei nuam a, a thawhkikna vangletna ka thei nuam a, a thuakna leh a sihna ah amah bat ka ut hi. 11 Ahang bel, bangchi hiam beekin, misite lak apan thawhkikna hinna ka nei nuama ahi.
Phakchiam lam Delh
12 Tua neikhin ka hi kei a, hihbukimna tangkhin zong ka hi kei. Ahihhangin, Khrist Jesu'n tup leh ngim neia kei hon letkiptaak bangin, tua a tup a ngim mah nei nuamin mailam ka delh hi. 13 Sang-gamte aw, a neikhin leh a tungkhinin ka kisim kei hi. Ahihhangin hiai thil khat ka hih: Nunglama thil omte nusiain, mailama omte ka delh hi. 14 Pahtakman sang dingin, Pathian in vanlam sapnain Khrist ah kei hon sam a, tua pahtakman ngah sawmin phakchiam lam ka delh teitei hi. 15 Tua bang ahih manin, eite a piching zahzah in hiai lungput nei ni. Hiai thu-a lungput dang na neih uleh, a diklouh dan Pathian in hon theitelsak ding hi. 16 Ahihhangin, i tunkhitna chiang chiang tawh kikhoma nungtain kalsuan ni.
Van Khua-le-tui Hihna
17 Sanggamte aw, midangte tawh kei ettehin hon nei unla, etteha non neih bangun, tua banga nungtate chiamteh un. 18 Ahang bel, hun paisa-a kon hilhtak bangin, tuin khitui kekawmin, noute kon hilh kik ahi: Mi tampite, Khrist' khros meima ahi uhi. 19 Amaute' tawpna zaw siatna ahi a, amaute' pathian amau gilpi ahi a, a thupina uh zong a zahlakna uh ahi. A lungsim uh leilam thilte ah a nga uhi. 20 Eite' khua-le-tui hihna zaw vantung ah ahi. Vantung apan hong pai ding Hondampa Toupa Jesu Khrist, lunglawptakin i ngak uhi. 21 Ama'n ama' pumpi thupi batpihin, eite pumpi thulimlou hon bawllamdangsak ding hi. Ama'n thil bangkim ama' nuaia koih theihna vangletna a nei hi.
1 Tua bang ahih manin, ka sanggam it leh ngaihte aw, ka lungnopna leh pahtakna lukhu na hi uhi. Ka itte aw, Toupa ah dingkip un aw.
Kipumkhatna
2 Toupa-a lungput munkhata om dingin, Euodia leh Sintekhe ka ngen ngutngut hi. 3 Hakkolbatpih muanhuai nang zong kon ngen hi: Tangthupha guma hon dinpih hiai numeite leh Klimen leh ka seppih dang, a min uh Hinna Laibu sunga kikhumte tawh na huh in. 4 Toupa ah lungnuam gige un. Ka chi lai ding: Lungnuam un! 5 Na lungnemna lungput uh, mi khempeuh theihin kilang hen. Toupa hong paipah ding hi, 6 bangmah ah patau kei un. Thil bangkim ah, kipahthu genna tawh kithuah thuumna leh ngetnain, Pathian' mai ah na ngetna uh luikhia un. 7 Tua hi leh, theihsiam seeng louh Pathian' lungmuanna in Khrist tungtawnin na lungtangte uh leh lungsimte uh hon veensak ding hi.
Ngaihsuta Neih Dingte
8 A tawppenin, sanggamte aw, a tak peuhmah, a thupi-a manpha peuhmah, a diktat peuhmah, a siangthou peuhmah, a kilawm peuhmah, a deihhuai peuhmah a hoiha phathuai ahih peuh leh tuate ngaihsun un. 9 Keimah apan na sin uh, na saan uh, ahih kei leh, na muh uh atakin hih un. Tua hi leh, khamuanna Pathian in noute hon ompih ding hi.
Filipite Thilphalna
10 Noute'n kei non awlmawhna uh atawptawpin hong paklun kik khongkhong ahih manin, Toupa ah nakpitakin ka lungnuam hi. Noute'n non awlmawhta tham uh a, latsak nading hun lem na mu kei ua ahi. 11 Taksap ka neih mana hibang thu gen ka hi kei. Ka tana lungkim daan ka theita. 12 Taksap kichi bang hi hiam, chih leh, hauh kichi bang hi hiam, chih ka thei hi. Niang leh taia om daan, kiala om daan, taksap daan leh hauh daan ka theita. Koipeuh ah, bangchi tenga oma zong lungkimna thusim ka theita. 13 Vangletna hon pepa Khrist tungtawnin thil bangkim hih thei dingin hatna kiching ka nei hi. 14 Ahihhangin, ka haksatnate non thuakpih uh, na hih hoih mahmah uhi. 15 Nou Filipite'n hiai na thei uhi: Tangthupha kipat chila, Makedonia gam apan ka kipatkhiak laiin, noute chih louh, saptuam kuamah in piak leh saan lam thu ah hon huh kei hi. 16 Thesalonika-a ka om lai nangawnin, ka taksap chiangin noute'n huhna non khak pahpah uhi. 17 Thawnpiak lamen ka hi kei a, noute' hoihna-a kisim ding gahsuahte zong ka hi zaw hi. 18 A kiching sanga tamzaw ka saangta. Noute' thawnpiak, Epafrodita apan ka saangta a, ka vahta hi. Tuate thillat gimnamtui, saantham kithoihna, Pathian' lungtaina ahi uhi. 19 Ka Pathian in Khrist-a a hauhna thupi bangbangin, noute taksapte khempeuh awng hon huksak ding hi. 20 I Pathian leh Pa tung ah thupina om tawntungta hen. Amen.
Chibaibukna
21 Khrist Jesu-a misiangthoute khempeuh chibai hon na buksak un. Ka kianga om sanggamte'n noute chibai hon khak uhi. 22 Misiangthoute khempeuh in, a diakin, Kaisar inkawte'n chibai hon khak uhi. 23 Toupa Jesu Khrist' hehpihna in na kha uh hon ompih hen. Amen.
1 Kei, Pathian' deihlama Khrist Jesu' sawltaklian Paul leh i sanggampa Timothi in, 2 Khrist-a om Kolosa khua-a sanggam siangthoute leh muanhuaite kiang ah lai kon gelh uhi. I Pa Pathian apan hehpihna leh lungmuanna noute tung ah om hen.
Kipahthu Genna
3 Noute adinga ka thuum chiangun, Pathian leh i Toupa Jesu Khrist' Pa tung ah kipahthu ka gen gige uhi. 4 Ahang bel, noute'n Khrist' Jesu na upna uleh, misiangthoute khempeuh na itna thu uh ka za uhi. 5 Tua upna leh itna bel, noute adinga vantunga koihsa lametna apan piang ahi. Tua thu lah tangthupha thutak thu apan na zaktaaksa uh ahi. 6 Tua tangthupha, leitung khuavannuaia gahsuahin a khang a, noute kiang zong hong tungta hi. Tua tangthupha thutak na zak ua, thutak pansana Pathian' hehpihna na theih ni uapan, noute ah zong gah a suah hi. 7 Tua thutak bel ka seppih it uh Epafra apan na sin uh ahi a, amah lah koute' taanga Khrist' nasempa muanhuai ahi. 8 Ama'n Kha-a na itna uh zong koute hon hilh hi. 9 Hiai hangin, na itna thu uh ka zak nung uapan, noute adinga Pathian kianga thuum leh nget ka tawp kei uhi: Pathian in khalam pilna leh theihsiamna khempeuh tungtawna ama' deihlam theihna kim tawh noute hon dimsak nadingin Pathian kiang ah ka ngen uh a, 10 Toupa' min tawh kikhoma na nuntak theih nading uleh, amah lungtaisaka nna hoih chitenga gahsuah a, Pathian theihna kima na khan semsem nadingun ka thuum uhi. 11 Tua baan ah, kipahna tawh thuakhatna thupitak leh lungduaina na neih nading ua, ama' thahatna thupi banga vangletna-a noute hihhata nong om theih nadingun zong ka thuum uhi. 12 Tua bangin, vaak kumpigama misiangthoute tawh gouluahkhawm dinga noute hon chingsakpa Pa tung ah kipahthu ka gen gige uhi. 13 Ama'n mial thuneihna apan eite hon hukhiain, a it a Tapa' kumpigam hon lutsakta hi. 14 Eite'n tua Tapa ah, a sisan tungtawnin, tatna leh khelhnate ngaihdamna i ngah hi. Khrist' Tungnunna 15 Amah bel, muhtheihlouh Pathian batpih ahi a, thilsiam khempeuh tunga masapen hihna, nei ahi. 16 Ahang bel, amah pansana bangkim siam ahi: Leitunga omte hi-in, vantunga omte hita leh, muhtheih hi-in, muhtheihlouh hita leh, kumpitutphahte, vangletnate, tou hihna neite hi-in, thuneihna neite hita leh, bangkim ama' siam leh ama' adinga siam ahi. 17 Thil bangkim om main amah a om a, amah mah ah thil bangkim a kilemkhawm hi. 18 Khrist mah pumpi lutang ahi. Tua pumpi bel saptuam ahi. Ama'n thil bangkima tungnunna a neih theih nadingin, thil bangkim kipatna leh bul ahi a, misite lak apan piang masapen ahi. 19 Amaha Pathian' bukimna a teen Pathian kipahna ahi. 20 Amah mah pansana, leitung leh vantunga om thil bangkim amah tawh kilempih ding Pathian' kipahna ahi. Pathian in Khrist' khros sisan tungtawna kilemna bawlin, hiai kilemkikna a bawl hi. 21 Noute na hih uleh, khatvei laiin gitlouhna nasepte hangin, na lungsim uah Pathian apan mikhual leh meima na hi uhi. Ahihhangin, tuin Pathian in noute hon kilempihkikta hi. 22 Ama'n ama' maia siangthou leh melhemlou leh, genbaangloua hon dinsak theih nadingin, Khrist' pumpi sihna tungtawnin hon kilempihkik ahi. 23 Tua bel, tangthupha-a om lametna apan pialmang loua, upna-a zungkai leh kiptaka na om gige uleh chihna ahi. Hiai tangthupha bel, na zaksa uh, vannuaia thilsiam teng kianga kigenzak mah ahi. Kei Paul, hiai tangthupha nasempa ka hong hi ahi.
Paul' Sepgimna
24 Tuin noute adinga ka thuak ka kipak hi. Khrist in a pumpi adinga a thuakna-a kisam laite, ke'n ka pumpi-in ka hihkim hi. Tua ama' pumpi bel saptuam ahi. 25 Noute hanga Pathian in kepna nna hon piak bangbangin, saptuam nasempa ka hong hi hi. Tua kepna nna pen, noute kianga Pathian' thu a bukima piakna nasep ahi. 26 Tua bel, taanglai apan leh akhang akhanga thusim kiseel ahi a, tuin, a misiangthoute kiang ah tua thusim kiseel latsak ahita hi. 27 Hiai thusim kiseel hauhna thupi bang hi hiam, chih Zentelte laka misiangthoute kianga latsak ding Pathian in a teel hi. Tua thusim kiseel bel, thupi nading lametna noumaua om Khrist ahi. 28 Amah Khrist ahi koute'n ka gen uh. Khrist Jesu-a michih pichinga ka dinsak theih nadingun, pilna khempeuh zanga, michih vauhilhin ka sinsak uhi. 29 Hiai mah ngimin, keima sunga ama' thahatna in a sep bangbangin, theihtawp suaha semin ka pang hi.
1 Noute leh Laodikei khua-a omte leh, sa-a mei ka muh nai louhte khempeuh adinga ka kisuuk dan na theih uh ka deih hi. 2 Lungtanga hanthawnna bang, itna-a kiphankhawmna bang, theihtelna kim bang, Pathian' thusim kiseel theihna bang amaute neihsak ka tup leh ka ngim ahi. Tua thusim kiseel bel Khrist ahi. 3 Khrist ah pilna gou khempeuh leh theihna kim a kiseel hi. 4 Kuama'n kamsiam thu-a noute hon khem zawh louh nadingin hiai ka gen ahi. 5 Noute kiang ah sain om kei mah leng, khain ka om hi. Kilemtaka na om dan uleh, Khrist na upna uh kip dan theiin, nakpitakin ka kipak hi.
Khrist-a Nuntakna
6 Toupa Khrist Jesu na Toupa ua na, amah ah nungta gige un. 7 Sinsaka na om bangun, ama' sunga zungkai leh lamtouhin om unla, thu-upa kipin kipahthu genna hau un. 8 Mihing ngeina leh leitung thubulte banga mihing' thilsuui dan leh, kikhemna maimaia mi'n hon matzawh louh nadingun pilvang un. Tuate khempeuh Khrist-a kibulphuh ahi kei hi. 9 Khrist ah Pathian' bukimna, pumpi neiin hong om a, 10 amah ah noute na bukim uhi. Amah bel, thuneihna leh vangletna khempeuh' lutang ahi. 11 Amah ah, mihing khuta suum hilouin, khelhna pianken suahkhiakna leh, Khrist-a zeksuumna tungtawna zeksuum taktak na hita uhi. 12 Baptisna ah amah tawh vuikhawm na hi uh a, Pathian' vangletna na upna uh tungtawna, amah tawh kaihthawhkhawm na hita uhi. Pathian in misite lak apan amah a kaithouta hi. 13 Noute, na khelhnate uleh pianken sa-a suumlouhna sunga si na hih laitakun, Pathian in Khrist tawh hon hihhingkhawmta a, na tatleknate khempeuh uh hon ngaidamta. 14 Eite hon dou leh, eite hon daai, tua khuta gelh Dan in a ngiatte khempeuh khrosa kilhdenin a thaimang a, a lamangta hi. 15 Ama'n vangletnate leh thuneihnate' thahatna a suhkhiaksak a, khros pansana tuate tunga vualzouin, taan^pi muhin a langsakta hi. 16 Tua ahih manin, nek thu hi-in, dawn thu hita leh, ahih kei leh, ankuanglui thu hi-in, kha thak thu hita leh, ahih kei leh, Sabbath thu hita leh, kuama' mawhsak phamawh sa kei un. 17 Tuate zaw thil hong tung dingte' liim lei ahi a, atak pen Khrist ahi. 18 Kingaihniamna taklou leh, vansawltakte biak khawng kipahpih a, muhtheihlouh thilte sawk a, ama' pianken lungsim leia kisangkoih mi in na pahtakman uh hon suh ding phal kei un. 19 Tua bang mi in Lutang ahipa tawh kizopna a lenkip kei hi. Pumpi pen, a kizopna guhtuahte leh thaguite tungtawna tua a Lutang apan kivaak leh kizomkhawm ahi a, Pathian in a khansak banga khang ahi. 20 Noute, Khrist tawh sikhawmta a, leitung thubulte sihsanta na hih nung uh, hiai leilam thil' hon neih hi lai banga, banghanga tua dante nuaia kipelut lai ding na hi ua oi? 21 Lawng ken, Chiam ken, Khoih ken, kichi dante gen ka hi. 22 Hiaite khempeuh mihing' thupiakte leh sinsakte ahi a, zat khita bei tawmtawmte ahi uhi. 23 Hiai thusehte'n pawlam latdan ah pilhuai batna a nei uh. Ahihhangin, hiaite' sinsak amau kibawltawm biakna, kingaihniamna taklou leh pumpi engbawla sawinate'n zaw sa lunggulhna gilou dou theihna manphatna a nei kei uhi.
Nuntakna Siangthou
1 Noute, Khrist tawh kaihthawhkhawm na hihtak nung uh, Pathian' taklama Khrist' tutna muna om, tunglama thilte zong gige un. 2 Leitunga thil omte hilouin, tunglama thil omte lunggulh un. 3 Noute na sita uh a, tuin na hinna uh Pathian ah, Khrist tawh seel-khawmin a om hi. 4 Na hinna uh ahipa Khrist hong kilat chiangin, amah tawh thupi-in nong kilang-khawm ding uhi. 5 Tua ahih manin, noute'n na khelhna pianken utawh kisaite khempeuh hihlum un. Tuate: kingaihna nin, sianlouhna, hukna lanna, lunggulhna gilou leh deihgawhna ahi. Deihgawhna bel milim biakna ahi. 6 Hiai hangin thuinanglou tate tung ah Pathian' thangpaihna hong tung ding hi. 7 Khatvei laiin, noute zong tuate sunga na nuntak laiun, tuate bangin na gamta uhi. 8 Ahihhangin, tuin, hiaite khempeuh: hehna, thangpaihna, asia kideihsakna lungput, kigensiatna leh kampau zahmawhte, na suahkhiak ngeingei ding uh ahi. 9 Zuauthu kihilh tuah kei un. Ahang bel, mihing lui suahkhia na hita uh a, 10 mihing thak silh na hita uhi. Tua mihing thak bel, a siampa Pathian batpiha theihna kima siamthak ahi. 11 Hiai ah Grik hi-in, Juda hita leh, zeksuum hi-in zeksuumlouh hita leh, namtom hi-in Skithia mi hita leh, sila hi-in noplen hita leh, kideidanna a om tuam kei. Khrist mah bangkima bangkim ahi zaw hi. 12 Tua ahih manin, noute, Pathian' miteelte, siangthou leh it mahmahte na hih bangun, lainatna, migitna, kiniamkhiakna, lungnemna leh thuakhatna silh un. 13 Kithuakzou tuah tek unla, kingaidamtuah unla, kilungnopmawhna na neih chiangun, Khrist in hon ngaihdam bangin kingaidam un. 14 Hiaite khempeuh tung ah itna kisilhthuah un. Itna in tuate khempeuh kilemtakin a hen-khawm hi. 15 Noute pumpi khat kahiangte hi a, kilem dinga sap na hih bangun, na lungtang uah, Khrist' lungmuanna vaihawmsak un. Tua baan ah, kipah daan thei un. 16 Noute pilna chiteng tawh khat leh khat kisinsaka, na kihanthawn kawmkawmun leh Pathian tunga lungtangtaka kipahna tawh phatna late, Pathian late leh khalam late na sak kawmkawmun, Khrist' thu tawh kidim kiihkeihin om un. 17 Na hih peuhmah uh, kampau hi-in thilhih hita leh, Toupa Jesu' min sialin hih vek unla, ama' tungtawnin Pa Pathian tung ah kipahthu gen un.
Khristian Innkuan
18 Zite aw, Toupa-a omte' hih dinga kilawm himin, na pasalte uh thuthuin om un. 19 Pasalte aw, na zite uh it unla, amaute tung ah huham kei un. 20 Tate aw, thil bangkim ah, na nu-le-pate uh thu mang un. Hiai Toupa' lungtaina mahmah ahi. 21 Pate aw, na tate uh thangpaisak kei un, a lungke kha ding uhi. 22 Silate aw, thil bangkim ah, salama na toute uh thu mang un. Mihing lungtaisak sawma mitmei veng leltak hilouin, chihtakna leh Pathian launa tawh thu mang un. 23 Na hih peuhmah uh, mihing tunga hih bang hilouin, Toupa tunga hih bangin, lungtang teng mah tawh hih le uchin, 24 Toupa apan pahtakman hi dingin, gouluahna na ngah ding uhi. A nna na sep uh Khrist, Toupa ahi. 25 Ahihhangin, Pathian in deih-saktuam neilou ahih manin, a dik lou thil hih mi peuhmah a dik lou thil a hih man piak thuk ahi ding hi.
1 Toute aw, noute'n zong vantung ah Tou na nei uh chih theiin, na silate uh tung ah a dik atang hih un.
Thuhilhna Dang
2 Kiveenna dan leh kipahna dan theiin, thuumna lam ah kipia un. 3 Pathian in koute thugen nading kong hon honsak nading leh, Khrist' thusim kiseel ka phuan theih nadingun, koute adingin zong hon thuumsak un. Tua Khrist' thusim kiseel hanga khainiang bun ka hi. 4 Tua thu ka phuan ding bang taka ka phuan theih nadingin, kei adingin hon thuumsak un. 5 Pawlam mite lak ah piltakin gamta un. A man piain hun lem lei unla, a phatuam penin zang un. 6 Na kampau uh hehpihna tawh kidim, chi sawh hi hen. Tua hileh, michih na dawn dan ding uh na thei ding uhi.
Chibaibukna
7 Tukika in keima' tungthu noute hon hilh ding hi. Amah, sanggam deihthawh, nasem muanhuai leh Toupa-a sila hihpih ahi. 8 Koute' omdan hon hilhin noute' lungtang hon hanthawn ding hi. 9 I sanggam muanhuai leh deihthawh Onesima in amah hon zui ding hi. Amah zong noute laka mi khat ahi. Amaute'n hiaia thil omdan khempeuh hon hilh ding uhi. 10 Ka kolbutpih Aristarkha leh Barnaba' saggamnu' tapa Marka in zong chibai hon khak hi. Amah tawh kisai thuhilhna na ngahta uhi. Amah noute kianga hong hawh chiangin na saang un. 11 Jasta kichi Jesu in zong noute chibai hon khak hi. Hiaite Pathian' kumpigam adinga ka seppihte laka Judami omsunte ahi uh a, kei adingin khamuanna ahi uhi. 12 Noute laka mi, Khrist Jesu' nasem khat Epafra in noute chibai hon khak hi. Amah noute adinga thumin, nakpitakin a pang hi. Pathian' deihlam khempeuha pichinga na din nading uleh, kimuanna kim neia na om nadingun amah a thum hi. 13 Ama'n noute ading leh Laodikei leh Hierapolisa omte adingin nakpitakin a sem, chih ka theihpih hi. 14 I deihthawh daktor Luka leh Dema in noute chibai hon khak uhi. 15 Laodikeia om sanggamte leh sanggamnu Nimfa leh a inn-a saptuamte chibai hon na buksak un. 16 Hiai laikhak noute laka a kisimkhit chiangin, Laodikei saptuamte na simsak unla, noute'n zong Laodikeite kianga laikhak na sim un. 17 Arkhipa kiang ah: Toupa-a nasepna na ngah sem zou dingin pilvang in, chi-in na hilh un. 18 Kei, Paul in hiai chibaibukna, keima' khuta ka gelh ahi. Ka khainiang but thei gige un. Hehpihna noute tung ah om hen. Amen.
Chibai Bukna
1 Paul leh Sila leh Timothi in Pa Pathian leh Toupa Jesu Khrist-a om Thesalonika saptuamte kiang ah lai kon gelh uhi. I Pa Pathian leh i Toupa Jesu Khrist apan hehpihna leh lungmuanna noutea hi hen aw.
Thesalonikate Phathuaina
2 Ka thuumna uah, noute' min louin, noute khempeuh hangin Pathian kiang ah kipahthu ka gen gige uhi. 3 Upna gahsuah na nasep uh, itna hanga na sepgimna uleh, i Toupa Jesu Khrist-a lametna hanga kuhkala na lungduaina uh, i Pathian leh Pa' mai ah ka theigige uhi. 4 Pathian' it sanggamte aw, ama'n noute hon teelta, chih ka thei uhi. 5 Ahang bel, noute' hanga na lak ua bangchi banga nungta ka hi uhiam, chih na theihsa uh bangin, noute kianga tangthupha kong gen uh, thu leltaka hong tung louin, vangletna tawh, Kha Siangthou tawh, theihtelna lianpi tawh hong tung hi. 6 Nakpitaka thuak kawmin, thu na sang uh a, ahihhangin, Kha Siangthoua lungnopna neiin, koute etteha neite leh Toupa etteha neite na hita uhi. 7 Tuachi-in, Makedonia gam leh Akhaia gama, a ummi khempeuh adingin etteh nong suakta uhi. 8 Noute apanin Toupa thu a thangkheta a, Makedonia gam leh Akhaia gam kia ah hilouin, mun chih ah a thangkheta hi. Pathian na upna thu uh, koipeuha mi'n a zaktak manun, noute tungthu bangmah ka gen uh a kulta kei hi. 9 Bangchi banga Pathian' vualzawlna tawh noute laka hong lut ka hi uhiam, chih leh, milimte apan Pathian lama nong kiheitak daan uh, amaute mahmah in a gen uhi. Tua banga nong kiheina uh bel, a hing leh a tak Pathian' nasem ding leh, 10 vantung apan hong pai ding a Tapa ngak dingin ahi. Tua a Tapa bel, misite lak apan a kaihthawh Jesu ahi a, hong tung ding thangpaihna apan hon Hukhepa ahi.
Paul Nuntakdan
1 Sanggamte aw, noute laka kong lutna uh a vuaksuak kei, chih nou-mau mah in na thei uhi. 2 Na theihsa uh bangin, amalama ka thuak uh bangin, Filipi khua ah zahlakhuaipi-a bawlin ka om uhi. Hinapi-in, i Pathian' hon piak hangsanna tawh, noute kiang ah Pathian' tangthupha kong gen uh a, lungtanga awlmawhna leh veina lianpi neiin ka pang uhi. 3 Noute kon hanthawn laiun, lampial ding hiam, siangthou lou ding hiam, ahih kei leh, hon khemzawh ding hiam sawma lungsim nei ka hi kei uhi. 4 Pathian in hon muan leh, tangthupha hon kepsakte banga thugen ka hi zaw uhi. Mihingte lungtaisak sawmin thu ka gen kei uh a, ka lungtangte uh entelpa Pathian lungtaisak sawmin thu ka gen zaw uhi. 5 Na theihsa uh bangin, chikmahin maitangphatna kam ka zang kei uh a, deihgawlna seel ding zong ka nei kei uhi. Hiai thu ah, Pathian mahmah, koute hon theihpihpa ahi. 6 Noute apan hita leh, ahih kei leh, midangte apan hita leh, mihing kuamah apan pahtawina ka zong kei uhi. 7 Khrist' sawltakliante ka hih manun, noute tunga huhna ngiat thei ka hi uhi. Hinapi-in, nu in a tate deihthawhtaka don a, a kep bangin, noute tung ah lungnemtakin ka om uhi. 8 Koute adinga deihthawh mahmah nong suahtak manun, Pathian tangthupha kia hilouin ka hinna nangawn uh hon kikoppih nuam ka sa uhi. 9 Sanggamte aw, nakpitaka nna ka sep daan uleh, ka sepgim daan uh, na thei gige uhi. Hibanga a sun a zana ka khut ua nna semin leh, noute kuamah tunga puakgik hilouin, noute kiang ah Pathian' tangthupha ka gen uhi. 10 A ummi noute laka ka nuntakna uh a sianthou daan, a diktat daan leh, genbaanglou ahih daan hon theihpihte na hi uh a, Pathian zong hon theihpihpa ahi. 11 Na theihsa uh bangin, Pa in a tate tunga a hih banga noute tek hon hanthawn ka hi uh a, hon khamuan ka hi uh a, thu hon pia ka hi uhi. 12 Tua bel, a kumpigam leh a thupina sunga noute hon samlutpa Pathian adinga kilawm hima na nuntak nading uh ka deihna uh ahi.
Thesalonikate Kiheina
13 Noute'n, koute apan na zak uh Pathian thu na saan laiun, mihing' thu bangin na sang kei uh a, Pathian' thu ahihna bangbangin na sang uh a, tua thutak in a ummi noute sung ah hiamtakin a sem hi. Hiai hangin, tawp louin Pathian tung ah kipahthu ka gen gige uhi. 14 Sanggamte aw, Khrist Jesu-a om, Judia gama Pathian' saptuamte etteha neite nong suakta uhi. Amaute'n Judate' khut a thuak uh bangin, noute'n zong noumau' gammite' khut na thuakta uhi. 15 Tua Judate mah ahi Toupa Jesu that a, amaute' kamsangte mahmah zong that. Amaute mah ahi koute zong hon hawlkhia. Pathian a lungtaisak kei uh a, mi khempeuh a dou uhi. 16 Zentelte hotdam ahih theih nading ua, amaute kianga thu ka gen ding uh Judate mah in hon dai uhi. Hibangin a khelhna uh a dimletsak gige uhi. Amaute tunga Pathian' thangpaihna nasetaka hong tung ahita hi. 17 Sanggamte aw, hun tomkha noute apan kaihkhenin om mah le-ung, ka lungsung uah na om gige uhi. Noute kimaituaha hon muh ding ka lunggulh mahmah uh a, tup zong nakpitakin ka tum uhi. 18 Noute kianga hong pai ding ka na utta tham uh a, kei, Paul mahmah in zong ka na sawm zihzehta hi. Ahihhangin, Setan in koute hon dai hi. 19 Bang ahia ka lamet uleh ka lungnopna uh, ahih kei leh Toupa Jesu Khrist hong pai chianga ama' maia ka kisialpih ding uh pahtakna lukhu? Noute mah hilou maw? 20 Hi tham e, noute mah ka thupina uleh lungnopna na hi uhi.
Awlmawhna
1 Koute'n ka thuak zawh nawn louh takun, Athen khua ah koumau kia-in nutsiat hi phot mai le ung hoihpen dingin ka ngaihsun uhi. 2 Tuachi-in, Timothi noute kiang ah kon sawl uh a, amah, i sanggampa leh, Pathian' sila leh, Khrist' tangthupha-a ka seppih uh ahi a, na upna utawh kisaia noute hon kipsak ding leh hon hanthawn dinga kon sawl uh ahi. 3 Tua bel, hiai ze-etnate'n noute kuamah hon linsak louh nading ka deihna uh ahi. Hibanga ze-etnate thuak dinga seh i hi, chih noute mah in zong na thei uhi. 4 Noute tawh ka omkhawm laiun, thuakgimnate thuak ding i hi, chi-in kon na hilhkhol uhi. Na theih uh bangin, tuin tuate hong tung ahita hi. 5 Tuachi-in, ka thuak zawh nawn louh takin, na upna uh tawh kisaia hong veh dingin Timothi hon sawl ka hi. Bangchi hiam khatin, khempa'n hon khem kha leh, ka sepgimna uh amawkna hong suak kha ding, chih ka lauhthawng man ahi.
Timothi' Thutut
6 Ahihhangin, tu'n zaw noute apanin koute kiang ah Timothi hong tungta a, na upna uleh na itna uh tawh kisai kipahhuai thu hon puak hi. Ngainatakin non phawk uh a, koute' hon muh nop bangin noute'n zong non mu nuam uh, chih hon gen hi. 7 Tua bang ahih manin, sanggamte aw, ka thuaknate uleh ka lungzinnate khempeuh uah, na upna un hon hanthawn a, noute tawh kisaiin ka khamuangta uhi. 8 Toupa-a na dinkip peuh chiangun, koute ka hing huaihuai uhi. 9 Noute' hanga i Pathian' maia lungnopna ka neihte khempeuh uah, Pathian tunga kipahthu a kiching bangchi gen zawh peuhmah ding ka hi ua? 10 Noute' mei mu a, na upna ua a kisam khatpeuh hihkim nuama a sun a zana Pathian kianga nakpitaka ka na nget tawntung uh ahi mah hi.
Thumsakna
11 Tuin, i Pathian leh Pa mahmah leh, i Toupa Jesu Khrist in noute kiang ah koute hon tun mahmah hen. 12 Koute'n noute kon it bangbangun, Toupa'n noute na ki-ittuahna uleh, mi khempeuh na itna uh khangsak semsem hen. 13 I Toupa Jesu Khrist, a misiangthoute khempeuh tawh hong pai chianga, i Pathian leh Pa' maia siangthouna-a genbaanglou hi dingin na lungtangte uh kipsak hen aw.
Nuntakdan Siangthou
1 A tawppenin, sanggamte aw, Pathian lungtaisak dinga bangchi nuntak ding hi hiam, chih koute apan na sintak uh bangin, tua banga nungta semsem dingin Toupa Jesu ah noute kon ngen uh a, kon hanthawn teitei uhi. 2 Toupa Jesu tungtawna tua thupiak kon piakte uh bang hi hiam, chih a theite na hi uhi. 3 Ahang bel, sehtuam siangthou na hih ding uh Pathian' deihlam ahi. Tua hang mah in, numei pasal kal nitna apan kikem un. 4 Siangthoutak leh zahtakhuaitakin noumau pumpi tek kem un. 5 Pathian theilou Zentelte bangin numei pasal kienlah kei un. 6 Hibang lamah kuama'n a sanggam zaangsakin talek kei un. Koute'n kon vauhilh uh a, kon theihsaktak uh bangin, Toupa zaw hibang khelhnate khempeuh phulapa hi ahi. 7 Ahang bel, Pathian in a buah dinga eite hon sam lou a, a siangthou dinga hon sam hi zaw ahi. 8 Tua bang ahih manin, hiai thuhilhna nial mi in mihing nial ahi kei a, noute a Kha Siangthou hon pepa Pathian nial ahi. 9 Sanggam ki-itna thu ahih leh, noute ki-ittuah tek dinga Pathian-a sinsaksate na hih manun, laia kon gelh uh a kul kei hi. 10 Tua bangin, Makedonia gam tenga sanggamte khempeuh na itta uhi. Ahihhangin, sanggamte aw, tua banga hih semsem dingin kon hanthawn thakthak uhi. 11 Kon thuhilhtak uh bangin, mi tawh kilemtaka nuntak ding, noumau' sep ding tek awlmawh ding, noumau' khuta sem ngiatngiat dingin nakpitakin tum tinten un. 12 Tua hi leh, pawlam mite muha kilawmin na nungta ding uh a, bangmah lah na tasam kei ding uhi.
Khrist Hong Pai nading Thu
13 Sanggamte aw, lametna neilou midangte banga na lungkham louh nadingun, ihmusate tungthu na theih louh uh ka deih kei uhi. 14 Ahang bel, Jesu a si a, a thoukikta, chih i up ngaia leh, Pathian in Jesu-a ihmusate amah tawh hon tonpih ding, chih i um hi. 15 Toupa hong pai donga hingdama na om lai eite'n, ihmusate i makhelh kei hiai ding chih Toupa' thuin noute kiang ah kon gen uhi. 16 Ahang bel, Toupa mahmah ngaihtaka thupiak tawh, vansawltak tungnungpen' aw tawh, Pathian' pengkul ging tawh, vantung apan hong kumsuk ding a, Khrist-a misite a thou masa ding uhi. 17 Tua hun chiangin, hingdama na om lai eite, huihkhua-a Toupa tuak dingin amaute tawh meipi lak ah laktouhin i om ding hi. Tuachi-in, Toupa tawh i omkhawm denta ding hi. 18 Tua bang ahih manin, hiai thutein na kikhamuantuah tek un.
Toupa' Ni
1 Ahihhangin, sanggamte aw, a hun leh nite tawh kisai ahih leh, noute kianga kon gelh a kul kei hi. 2 Toupa' Ni zaw, zankhanga guta banga hong tung ding ahi, chih noute mahmah in diktakin na thei uhi. 3 Mite'n, muanna leh bitna nei, a kichih laitakun, thakhatin, amaute tung ah siatna hong tung guih ding hi. Numei' nauvei natna bang ahi ding a, amaute a suakta kei hiai ding uhi. 4 Ahihhangin, sanggamte aw, noute zaw, tua Ni in guta banga hon bingphawn theih dinga miallaka om na hi kei uhi. 5 Na vekun, vaak' tate leh sun' tate na hi uhi. Eite, mial' tate i hi kei a, zan' tate zong i hi kei hi. 6 Tua bang ahih manin, midangte' ihmut bangin ihmu kei ni. Pii kiukiaua eimah kithununin om zaw ni. 7 Ihmute zaw zana ihmu ahi uh a, zukhamte'n zong zana kham ahi uhi. 8 Eite bel sun' tate i hih manin, awmphaw banga upna leh itna silhin leh, siklukhu banga hotdamna lametna khuin, eimah kithununin om ni. 9 Ahang bel, Pathian in thangpaihna thuak dinga eite hon sep lou a, i Toupa Jesu Khrist tungtawna hotdamna tang dinga hon sep ahi zaw hi. 10 Hak tale'ng, ihmu tale'ng, amah tawh i hinkhawm theih na dinga, amah eite adinga sita ahi. 11 Tua bang ahih manin, na na hih gigetak uh bangin, kihanthawn tuahin, kilamtou tuah tek un.
Hanthawnna
12 Sanggamte aw, Toupa lama noute hon makaih a, hon vauhilh a, na lak ua nakpitaka semgimte zahtak daan siam dingin kon ngen uhi. 13 Amaute, a nasep uh hanga pahtawi dan thei unla, noumau mah zong kilemtakin om un. 14 Sanggamte aw, nuntak dan kilawmloute vauhilh ding, zahkaaite hanthawn ding, hatloute huh ding leh, mi khempeuh tunga lungduai dingin kon hanthawn uhi. 15 Kuamah in gitlouhna, gitlouhna-a thuk lou dingin, ahihhanga, siam kituh tuah gige zaw ding leh, midangte tunga zong siam tuh dingin pilvang un. 16 Lungnuam gigein om un. 17 Tawp louin thum gige unla, 18 thil bangkim ah, Pathian tung ah kipahthu gen un. Hiai noute adinga, Khrist-a Pathian' deihlam ahi. 19 Kha Siangthou phelhmit kei un. 20 Noute laka Pathian thu kigen simmawh kei un. 21 Bangkim entel unla, a hoihlam peuhmah lenkip tinten un. 22 Ahoihloua kilang peuhmah apan kihem un.
Vualzawlna
23 Pathian, lungmuanna pepa Pathian mahmah in noute sehtuam siangthou sipsip in hon bawl hen. Ama'n, Toupa Jesu Khrist hong pai chianga, na kha uh, na hinna uleh, na pumpi uh genbaanglou dingin hon kembit hen. 24 Noute hon sampa amah a muanhuai a, ama'n tua bangin hon kem ding hi. 25 Sanggamte aw, koute adingin hon thuumsak un. 26 Sanggamte khempeuh tawp siangthouin chibai hon na buksak un. 27 Hiai laikhak, sanggamte khempeuh' zaka simkhe-sak teitei dingin, Toupa' minin thu kon pia hi. 28 I Toupa Jesu Khrist' hehpihna in noute hon ompih hen. Amen.
Chibai Bukna
1 Paul leh Sila leh Timothi in, i Pa Pathian leh i Toupa Jesu Khrist-a om Thesalonika saptuamte kiang ah lai kon gelh uhi. 2 I Pa Pathian leh Toupa Jesu Khrist apan hehpihna noutea hi hen aw.
Kipahthu Genna
3 Sanggamte aw, noute hanga Pathian tunga kipahthu gen gige lou thei lou ka hi uhi. Noute' upna nakpitaka khangtou a, noute' ki-ittuahna a khantouh manin, tua banga kipahthu gengen ding maha kilawm ka hi uhi. 4 Tua bang ahih manin, bawlsiatna leh ze-etna na thuakte ua na lungduaina uleh na upna uh hangin, Pathian' saptuamte lak ah koute'n kon sial sial uhi. 5 Tua bel, Pathian' thukhenna a diktat, chih a kilatna ahi. Pathian' kumpigam adinga thuak na hi uh a, tua lah Pathian' kumpigam tang taaka seh na hihna uh a kitelna ahi sawnsawn hi. 6 Nou hon thuaksakte Pathian in a thuk ding a, ama' mitmuhin thil diktat ahi ding hi. 7 Vantung apan Toupa Jesu Khrist, a vansawltak vangliante tawh, meikuanga hong kilat chiangin, nou hon thuaksakte apanin noute leh koute tawlngakna hon pekhawm ding hi. 8 Tua hun chiangin, ama'n Pathian theiloute tung ah leh, i Toupa Jesu Khrist' tangthupha sangloute tung ah thu a khen ding hi. 9 Amaute gawtin a om ding uh a, Tangtawn manthatna ahi ding. Tua manthatna bel, Toupa' omna apan leh a vangletna thupi apan hawlkhiakna hi ding ahi. 10 Tua hun bel, amah hong pai a, a misiangthoutea pahtawia om a, a ummi khempeuh laka lamdangsaka a om ni-in ahi ding hi. Noute laka theihpihna thu kong gen uh na up manun, noute zong a ummi khempeuh laka kihel na hi uhi. 11 Hibang ahih manin, i Pathian' sapte laka kihel taaka noute hon seh nading leh, hoihna leh upna nasep na lunggulh khempeuh uh, a vangletna pansana a tangtunsak nadingin, noute adingin ka thuum gige uhi. 12 Hibanga ka thumna uh bel, i Pathian leh i Toupa Jesu Khrist' hehpihna bangbanga, noutea i Toupa Jesu Khrist' min pahtawia a om a, amaha noute pahtawia na om nading ua thuum ka hi uhi.
Puksanna Thupi
1 Sanggamte aw, i Toupa Jesu Khrist hong pai nading leh, eite amah kianga kaihkhawma i om nading tawh kisaiin, kon vauhilh khol nuam mahmah uhi. 2 Tua bel, mi'n kha khat peuh apan ahi chih hiam, koute' thugen apan ahi chih hiam, ahih kei leh, koute' laikhak apan ahi chih hiam paulama, Khrist' Ni hong tungkhinta ahi, a chih uleh, lungliap leh patau paha na om louh ding uh ka deih man uh ahi. 3 Banglam mah ah, kuamah' khemzawhin omkei un. Ahang bel, puksanna om masa a, khelhna mipa leh mangthang tapa hong kilang masa louin, tua Ni hong tung lou ding ahi. 4 Tua mipa bel, mite'n Pathian a chih khempeuh uh, ahih kei leh, a biak khempeuh uh douin, tuate tung ah amah a kitawisang ding a, amah mah Pathian kihisakin, Pathian' tempul ah Pathian bangin a tu ding hi. 5 Noute kianga ka om laia, hiai thilte kon hilh thei gige nawn lou na hi ua hia? 6 Amah a hun taka hong kilat nadinga, tu-a amah bang in lentang hiam, chih na thei uhi. 7 Danbeia gamtatna thusim kiseel in tuin zong a sem panta hi. Amah lentangpa a kilakkhiak mateng, amah a lentang nilouh ding hi. 8 Tua khit chiangin, Pathian in danbeia gamtapa hong kilat a phal ding a, Toupa Jesu'n a kama huin amah a hihmangthang ding a, amah hong kilatnain vangletna beiin tua mipa a koih ding hi. 9 Danbeia gamtapa hong kilat chiangin, Setan in amah tungtawnin a sem ding a, atak hilou vangletna nasep leh chiamtehna lamdangte leh, thillamdangte a hih ding a, 10 diktatlouhna chitengin a mangthang lellelte a khem ding. Tua hihmanthat lellelte bel, hotdam ahih nading uh thutak it ding a nial man ua hihmanthat ahi uhi. 11 Amaute'n thutak a it louh manun, Pathian in amaute tung ah nakpitaka khem-zawha omna a tungsak ding a, tua atak hilou, Setan nasepnate a taksang ding uhi. 12 Hibanga thutak um lou a, diktatlouhna kipahpihte khempeuh mawhpaihin a om ding uhi.
Dinkip Ding
13 Ahihhangin, Toupa' deihthawh sanggamte aw, noute hanga Pathian tunga kipahthu gen gige lou theilou ka hi uhi. Ahang bel, Kha pansana siangthoua sehtuamna tungtawn leh thutak upna tungtawna hotdam hi dinga, a chil apan Pathian teelsa na hih man uh ahi. 14 Ama'n koute' gen tangthupha tungtawnin, tua hotdamna ah noute hon sam ahi. Tua bel, i Toupa Jesu Khrist' thupina tang dinga noute hon sam ahi, chihna ahi. 15 Tua a hih manin, sanggamte aw, dingkip unla, kama thugen hita leh, laikhak tungtawn hita leh, koute'n kon piaksawn uh sinsakna lenkip un. 16 Tuin, i Toupa Jesu Khrist mahmah leh, eite hon it a, hehpihna tungtawna Tangtawn hanthawnna leh lametna hoih hon pepa, i Pathian leh Pa in 17 na lungtangte uh khamuan henla, thu hoih na gen chiteng uh leh nna hoih na sepna chiteng uah noute hon hatsak hen.
Thumsakna Ngetna
1 Atawppenin, Sanggamte aw, Toupa' thu, noute laka a kigen a, pahtawia a omtak banga, midangte laka zong kintaka a kithehdalh a, pahtawia a om nadingin koute adingin hon thumsak un. 2 Tua baan ah, mi khempeuh upna nei hi kim lou ahih manin, migiloute leh ngongtatte apan ka bit nadingun hon thumsak un. 3 Ahihhangin, Toupa a muanhuai a, ama'n noute hon kipsak ding a, giloupa apan hon veng ding hi. 4 Kon thupiakte uh, tu-a na zuih bangun na zui lailai ding uh, chih muanna Toupa ah ka nei uhi. 5 Tuin, Toupa'n na lungtangte uh, Pathian itsak henla, Khrist' lungduaina bangin lungduaisak hen.
Thadah Louh Ding
6 Ahihhangin, sanggamte aw, koute apan sinsakna a ngahte uh banga nungta lou a, nasep thadah sanggam a om uhi. Tua bang sanggam peuhmah apan kikangkoih dingin, i Toupa Jesu Khrist' minin thu kon pia uhi. 7 Noute tawh ka omkhawm lai ua, noute laka nasep thadaha ka om louh manun, bangchi-a etteha hon neia, non zuih uh kilawm hiam, chih noumau mah in na thei uhi. 8 Aman beiin kuamah' an ka ne kei uhi. Kuamah tunga puakgik ka suah louh nadingun, asun azanin ka semgim zaw uhi. 9 Thuneihna ka neih louh man uh ahi kei a, noute adinga etteh dinga ka kibawl nop man uh ahi zaw hi. 10 Noute kianga ka om lai na-ngawnun, hiai thu kon peta uhi: Kuapeuh in nna a sep nop kei aleh, nek zong ne kei hen, chi-in. 11 Ahang bel, noute laka pawl khat, nasep thadah om uh ahi, chih ka za uhi. Nna a sem nuam kei uh a, kisalahtakin midang thu ah a kikum zaw uhi. 12 Tua bang mite, nna sem ngiatngiat a, amau' an mah ne dingin, i Toupa Jesu Khrist mina thu piain ka vauhilh uhi. 13 Sanggamte aw, noute na hih uleh, nna hoih sep chimtak kei un. 14 Kuapeuh in, hiai laikhaka koute' thuhilhna a man kei leh, tua bang mi a maizum theih nadingin chiamteh unla, kithuahpih kei un. 15 Ahihhangin, tua bang mi, meima bangin bel en kei unla, sanggam bangin taihilh zaw un.
Vualzawlna
16 Tuin, lungmuanna pepa Toupa mahmah in, lam chiteng ah chiklai peuhin noute hon lungmuan henla, hon ompih gige hen. 17 Kei, Paul mahmah in hiai chibaibukna, keima' khut mahmaha ka gelh ahi. Ka laikhakte khempeuh ah, chiamtehna hi dingin hibangin ka gelh hi. 18 I Toupa Jesu Khrist' hehpihna in na vekun hon ompih hen. Amen.
Chibaibukna
1 Kei, Pathian i Hondampa leh i lamet Khrist' thupiaka Khrist Jesu' sawltaklian Paul in, 2 thu-up sunga ka tapa taktak, Timothi kiang ah lai kon gelh hi. Pathian i Pa leh, Khrist Jesu i Toupa' hehpihna, zahngaihna leh lungmuanna na tung ah om hen.
Sinsakmi Takloute
3 Makedonia gama ka pai ding laia kon hanthawn bangin, Efesa khua ah om in. Mi pawlkhatte, sinsakna diklou sinsak nawnlou dinga thu na piak theih nadingin tua ah om in. 4 Amaute'n tangthu bulbal neilou leh, khangthu sut bei theih louh khawng a buaipih louh nadingun hilh in. Hibang thute'n kiselnate a piangsak a, upna pansana om pathianmitna limsakna lama phattuamna a piangsak kei hi. 5 Hiai thupiak in a ngim bel, lungtang siang leh theihtelna hoih leh, upna taktak apan hong om itna ahi. 6 Mi pawlkhatte'n hiaite pialsanin thugen phatuam lou lam a ngatsan uhi. 7 Dan sinsakmite hih a kilawp uh a, hinapi-in, a thugen uh hi-in, kimuanga a sinsak uh hita leh, bang hi hiam, chih a thei kei uhi. 8 Mi'n a zat dik peuh leh, Dan a hoih, chih i thei hi. 9 Dan zaw, mi diktat adinga piak ahi kei a, dan beia gamtate, mihelte, pathianmitna neiloute leh mikhialte, siangthou-loute leh sabiakbeite, pate thatte, nute thatte, tualthatte adinga piak ahi, chih i thei hi. 10 Tua chiangin, kingaihna nina bualte, tawkawhukte, mihing gute, zuautheite, chiampelte sinsakna chidam tawh kikalh himhimte adinga piak ahi. 11 Sinsakna chidam bel, a nunnuam Pathian' tangthupha thupi mahmah tawh kituak ahi. Ama'n tua tangthupha kei hon kemsak hi.
Paul tunga Toupa' Hehpihna
12 Kei hon hihhatpa, Khrist Jesu i Toupa tung ah kipahthu ka gen hi, Ahang bel, ama'n kei muanhuaiin hon sim a, hiai nasepna hon pia hi. 13 Khatvei laiin, Jesu gensepa, bawlsepa leh huhampa ka na hita. Ahihhangin, theiloupi-a upna beia gamta ka hih manin, zahngaihna ka ngah hi. 14 Khrist Jesu-a om thu-up leh itna tawh kitonin, i Toupa' hehpihna ka tung ah a dimleta sunin a om hi. 15 Hiai thugen a vekpi-a saantaaka muanhuai ahi: Mikhialte hondam dingin Khrist Jesu leitung ah hong pai hi. Tuate lak ah kei, a khial phapen ka hi. 16 Zahngaihna ka ngahna hang hiai ahi: Jesu Khrist in a khial phapen kei ah a thuak-zawhna tawpneilou a langsak hi. Tua bel, amah um nuam a, Tangtawn hinna hon ngah dingte' etteh hi dinga a latsak nop man ahi. 17 Tuin, amah, Tangtawn Kumpipa, a si theilou, a kimutheilou, Pathian pii omsun tung ah pahtawina leh thupina Tangtawnin omta hen. Amen. 18 Ka tapa Timothi aw, khat vei laia, nang tawh kisaia genkholhna thu a gente uh tawh kituakin, hiai thuhilhna kon pia hi. Tua genkholhna thute zuia, kidouna hoih na dou theih nading ka ngimna ahi. 19 Thu-up leh sia-le-pha theihna hoih lenkip in. Mi pawlkhatte'n hiaite pampaihin, a upna uh long sia bangin a sesak uhi. 20 Amaute lak ah, Humenaia leh Aleksandar a kihel uhi. Pathian gensiat louh a sin nadingun amaute Setan khut ah ka pekheta hi.
Biakna
1 Tua chiangin, amasapenin, mi khempeuh adinga deih ngetnate, thuumnate, thuumsaknate leh kipahthu gennate nei dingin kon hanthawn hi. 2 Pathianmitna limsakna leh siangthouna teng tawh, gal-muangtak leh kilemtaka eite i nuntak diamdiam theih nadingin, kumpipate leh thuneihna neite khempeuh adingin hibanga thuumsak ding ahi. 3 Hiai a hoih a, Pathian i Hondampa' lungtaina ahi. 4 Ama'n mi khempeuh hotdam ahih ding uh, thutak a hon theih ding uh a deih hi. 5 Ahang bel, Pathian khat a om a, Pathian leh mihing kal ah palai khat a om. Tua bel, mihing ahipa Khrist Jesu ahi. 6 Amah mah mi khempeuh adinga tatna man hi dingin a kipia a, tua theihpihna a huntaka piak ahi. 7 Hiai theihpihna thu gena tangkoupa leh sawltaklian hi dinga seh ka hi. Thutak ka gen a, zuau ka gen kei hi. Zentelte kianga thu-up diktak sinsakpa hi dinga seh zong ka hi. 8 Munchiha pasalte'n thangpaihna hiam, kiselna hiam neiloua khut siangthou lika a thuum ding uh ka deih hi.
Tangpi Biakna-a Numeite
9 Numeite, nikten puansilh a kilawm lei, a uanglua lou leh a kituak hun leia a kizep uh ka deih. Sam phek, sam tantom, kham leh suangmanpha leh puan mantamtea a kizep louh ding uh ka deih hi. 10 Pathian mitna limsaka kinei numeite adinga kilawm himin, nahoih sepin kizem le uh ka deih hi. 11 Numei in dai dindenin leh, thunuailutna kim tawh sin hen. 12 Numei in a sinsak hiam, pasal tunga a thuneih hiam, ka phal kei hi. A daih dinden ding ahi. 13 Ahang bel, Adam bawl masak ahi a, tua nungin Evi bawl ahi. 14 Khemzawha om Adam ahi kei a, numei ahi khemzawha om a, talek hong hi pen. 15 Ahihhangin, numeite, upna, itna, nuntakdan kilawm leh siangthouna tawh a nuntak uleh, nau neihna ah humbit ahi ding uhi.
Bishop leh Dekon Chinna
1 Hiai thugen saantaak ahi: Kuapeuh in bishop hih a lunggulh leh nahoih sep ut ahi. 2 Bishop zaw, genbaanglou, zi khat nei, kidekthei, lungsim chiim, zahtak tham, zindou siam, sinsak thei mi ahi ding ahi. 3 Zukhamhat lou, huham lou, nunnem, kinak hatlou, dangka sum deihta lou ahi ding ahi. 4 Ama' innsung hoihtaka uk a, a tate'n zong zahtakna kilawm tawh a thuman uh ahi ding ahi. 5 Ahang bel, ama' innsung nangawn uk dan theilou mi in Pathian' saptuam bangchi-in a kem thei dia? 6 Piangthak chiil ahi ding ahi kei. Tuachi louin zaw, kisatheiin a kiliansak kha ding a, dawimangpa tawh kibanga mawhpaih ahi kha ding hi. 7 Pawlam mite' phatlawh zong ahi ding ahi. Tuachi louin zaw, minsiain dawimangpa' thaang ah a awk kha ding hi. 8 Tua mah bangin, dekonte, zahtak tham, thutak, zukhamhat lou, dangka sum deihta lou mi ahi ding uh ahi. 9 Sia-le-pha theihna siangtaka thu-up thusim kiseel lenkip mi ahi zaw ding uh ahi. 10 Amaute ettel masak hi uh henla, genbaanna a om kei leh, dekon na sem uhen. 11 Tua mah bangin, a zite uh zong, zahtak tham, gensiathat lou, kideek thei leh bangkima muanhuai ahi ding uh ahi. 12 Dekonte, zi khat nei ahi ding uh a, amau' tate leh innsung uk zou mi ahi ding uh ahi. 13 Nasem hoih dekonte'n phat a lawh uh a, Khrist Jesu a upna uah hangsanna zong a nei uhi. 14 Na kianga hong pai pah ding lamen mah leng, hiai thuhilhnate kon gelh hi. 15 Ahang bel, kong zekai khak leh, Pathian' innkuan sunga bangchi gamtat ding hiam, chih na theih nading ka deihna ahi. Pathian' innkuan bel, Pathian hing' saptuam ahi a, tua lah thutak khuampi leh kingakna suangphum ahi. 16 Nial vuallouhin Pathianmitna thusim kiseel a thupi hi: Pathian, sa neiin hong kilang a, Kha in a hihna diktak gen a, vansawltakte' muh hi a, namte laka tangkoupih hi a, leitung khuavannuaia up hi a, thupina khua-a laktouha om ahi.
Timothi Thuhilhnate
1 Hun nunung ah, pawlkhatte'n pimangna khate leh dawite' sinsaknate lungzuanin, thu-up a taisan ding uh, chih Kha in kiteltakin a gen hi. 2 Tuate, a sia-le-pha theihna uh sik-ama halkeusa, zuauthei lepchiahte ahi ding uhi. 3 Kiteen a kham uh a, an pawlkhat bang nek louh ding, chi-in thu a pia uhi. Tua bang ante lah, a umte leh thutak theite'n kipahthu gena a san ding ua Pathian in a siam hi tham a. 4 Ahang bel, Pathian siamsa thil bangkim a hoih a, kipahthu genna tawh san ahih peuh leh, bangmah nial ding hilou ahi. 5 Ahang bel, Pathian' thu leh thuumna-a siansuah a hita uhi. 6 Sanggamte kianga hiai thilte na sinsak leh, thu-up thutakte leh pilvangtaka na zuihsa sinsakna hoih apan kivak khanglian, Jesu Khrist nasempa hoih na hi ding hi. 7 Sabiakbei tangthu leh pitek' tangthu bulbal neiloute tawh kisaina nei peuhmah ken. Pathianmitna limsakna lam ah kisintou zaw in. 8 Pumpi kisawizawtna in phattuamna a nei zek. Ahihhangin, pathianmitna bel thilbangkim ah a phatuam hi. Tua in tu huna nuntakna ding leh, hong tung ding huna nuntakna ding thuchiam a nei hi. 9 Hiai thugen a vekpi-a saantaaka muanhuai ahi. 10 Hiai thuchiam ngah dinga Pathian hing tunga muanna i neih manin, i semgim a, kousiatna i thuak hi. Amah mi khempeuh' Hondampa ahi a, a umte dingin ahi diak hi. 11 Hiai thupiakin pia inla, sinsak in. 12 Na tuailaina kuamah kisimmawhsak ken. Paukam ah hi-in, gamtat ah hita leh, itna ah, upna ah leh hindan siang ah hita leh, a ummite' etteh dingin kibawl zaw in. 13 Ka hong pai mateng, taangpi' maia Laisiangthou sim, hanthawnna thugen leh sinsakna ah kipumpiak in. 14 Thawnpiak na tan pen ngaihthah ken. Upate'n na tunga khut hon ngak laia, kamsang thugen tungtawna, tua thawnpiak nang hong kipia ahi. 15 Hiai thilte suutin ngaihsun in. Mi khempeuh in na khantouh dan kiteltaka a muh theih nadingin, hiaite ah lunglut in. 16 Nangmah leh na sinsakna ah limtakin kiveng inla, tuate ah om gige in. Tua banga na om leh, nangmah kihum-bitin, na thu ngaikhete zong na hondam ding hi.
Meigongte, Upate leh Silate Thuhilhna
1 Papi upate aw khauhin taai kenla, pa bangin hanthawn zaw in. Papi late, sanggam bangin hanthawn in. 2 Nupi upate ahih leh, nu bangin, nupilate sanggam bangin, lungsim siangtakin hanthawn in. 3 Meigong taktakte' meigong hihna zahtak in. 4 Ahihhangin, meigong in tate hiam, tute hiam a neih leh, amaute'n amau innsung mite kema a sabiak uh taksuah ding sin masa uh henla, tua baan ah a nu a pate uleh a pu a pate un amaute a kepna uh thukkik uhen. Hiai, Pathian' mitmuhin a hoih a, a san tham hi. 5 Meigong taktak, amah kia-a om in Pathian a muang a, taksapte ngenin asun a zanin a thum gige hi. 6 Ahihhangin, meigong nuamtal zaw, a nuntak sung nangawnin a sisa ahi. 7 Amaute genbaangloua a om theih nadingun, hiaite thupiakin pia in. 8 Ahihhangin, ama' mite, adiakin, a innsung mite' taksap awng hu lou mi kuapeuh in thu-up nial ahi a, a umlou mi sanga se zaw ahi. 9 Meigong kuamah, kum 60 nuai lam mi zaw, meigong minkhumna ah gelhlut ken. Pasal khat kia nei ngeisa, 10 nahoih sep lama phat lawh, tate vaklianta, zindou siam, misiangthoute' khe silsak, gim-thuakte huh, nahoih chiteng thanuamtaka sem gige meigong bel, meigong minkhumna ah gelhlut in. 11 Meigong naupang zawte ahih leh gelhlut ken. Ahang bel, a salam lunggulhnate un Khrist kianga a kipiakna uh a zou a, pasal neih a ut nak uhi. 12 Tua bangin, a upna masa uh tawpsanin, amau tung ah mawhtanna a kitut uhi. 13 Tua baan ah, a thadah uh a, inn chih ah a banpawt uh. Thadaha vialvak thamlouin, migen a hat uh a, thil teng ah a kikum uh a, gen louh dingding a gen uhi. 14 Tua ahih manin, meigong naupang zawte'n zaw pasal nei le uh ka chi. Tate neiin, innsung kem hoih uh henla, melmapa adingin gensiatna hun lem bawlsak kei le uh ka deih hi. 15 Meigong pawlkhatte zaw, Setan zui dingin a pialkhinta uhi. 16 A ummi pasal hi-in numei hita leh, khat peuh in a innsunga meigongte a neih leh, amaute a huh ding ahi. Amaute tawh kisaia saptuam puakgik a got louh ding ahi. Tua hi leh, saptuam in meigong taktakte a huh thei ding hi. 17 Uk siam upate, adiakin, thu nasem leh sinsakna nasemte, a zahniha pahtawina ngahtaaka seh hi uhen. 18 Ahang bel, Laisiangthou in: Bawngtal in buh a chil laiin a muk hen ken, a chi hi. Tua chiangin, Nasem mi, a thaman ngah taak ahi, a chi hi. 19 Upa hekna thu, theihpih mi nih hiam, thum hiam apan ahih kei leh sang ken. 20 Mi dangte' lau theih nadingin, a khialte, tangpi' maia taihilh ding ahi. 21 Hiai thuhilhnate, zawlphamna neiloua zui ding leh, deihsak tuam neia bangmah hih lou dingin, Pathian leh Toupa Jesu Khrist leh vansawltak teeltuamte' mitmuhin, khauhtakin thu kon pia hi. 22 Kuamah tung ah khut nga pah ken. Midangte' khelhna ah kihel ken. Nang leh nang siangthouin kikem in. 23 Na gilpi hang leh na chinat pahpah manin, tui kia dawn nawn kenla, grep zu neukha kha zang in. 24 Mi pawlkhatte' khelhna teltakin a kilang a, amau main thukhenna mun a tung pah hi. Mi pawlkhatte' khelhna in bel amau a nungzuih hi. 25 Tua mah bangin, mi pawlkhatte' nahoih septe teltakin a kilang a, a kilang loute zong a kisel thei tuan kei hi.
1 Pathian' min leh a sinsakna gensiata a om louh nadingin, sila hakkola taangte khempeuh in amau' toute zahtak thamin sep uhen. 2 A ummi toua neite'n zong, a toute uh, sanggamte hong suak ahih man lelun, simmawh tuan kei uhen. Amau' nasepna phattuampihte, a ummite leh deihthawhte ahih manun, amaute' nna a hoih semin sem zawmah uhen. Hiai thilte sinsakin amaute hanthawn in. 3 Kuapeuh in, sinsakna diklou sinsakin, i Toupa Jesu Khrist' thuhilhna tawh kituaklou leh pathianmitna limsakna tawh kituaklou a sinsak kha thei a, 4 tua banga sinsak a om leh, bangmah theiloupi a kipilsak ahi. Tua bang mi pen, kinakna leh kiselna peuha lunglutna siangthou lou nei ahi. Tuate'n, kihazatna, kinakna, kigensiatna paukam leh kimuanmawhna gilou a tun a, 5 lungsim kisia neite kal ah, kikeihtuahna a tun hi. Tua bang lungsim kisia neite'n thutak a nei kei uh a, pathianmitna limsakna zong sum-le-pai lama metna ngah theihna a sa uhi. Tua bangte apan kihemkhia in. 6 Ahihhangin, lungkimna tawh kithuah pathianmitna bel, metna thupitak ahi. 7 Ahang bel, leitung ah bangmah i lutpih kei a, bangmah i paikhiakpih thei sam kei ding, chih i theitel hi. 8 Nek ding leh silh ding i neih leh, tua-a lungkim ding ahi. 9 Hauh ut mite zaw, khemna leh thaang leh hon hihse thei lunggulhna haihuai tampite sung ah a puk uhi. Tuate'n siatna leh manthatna sung ah amaute a tumsak hi. 10 Ahang bel, dangka sum deihtak zaw thil hoihlou chiteng zungpi ahi a, mi pawlkhatte, amau duhgawlna delha thu-up apan hipmangin a om uh a, lungkhamna tampi-in a kisun pailet gawp uhi.
Timothi kianga Thupiak
11 Ahihhangin, nang, Pathian' mi aw, hiaite khempeuh taisan inla, diktatna, pathianmitna, upna, itna, thuakhatna leh nunnemna delh in. 12 Thu-up gupna galdouna hoih dou in. Theihpih mi tampite' maia na thu-up hoih na gup lai a, sapa na omna, tua Tangtawna hinna lenkip in. 13 Thil bangkim kianga hinna pepa Pathian' mitmuh leh, Pontia Pilat' maia a hihna gumpa Khrist Jesu' mitmuhin nang thu kon pia hi. 14 I Toupa Jesu Khrist hong kilat dongin, hiai thupiak, nin baang lou leh genbaanglouin kemta in. 15 A nunnuam leh a omsun Vaihawmpa, kumpite' Kumpipa leh toute' Toupa Pathian in ama' hun tak ah, Jesu Khrist a kilangsak ding hi. 16 Amah kia a sitheilou ahi a, naih theihlouh vaak ah a nungta a, amah kuama'n a mu ngei kei a, muh zong muh theihlouh ahi. Ama' tung ah minletna leh thahatna omdenta hen. Amen. 17 Tu huna ahaute kisathei lou ding leh, a kiplou hauhna muang loua Pathian hing muang zaw dingin thu pia in. Ama'n i nuamzat ding a kiching mahmahin bangkim hon pia hi. 18 Thil hoih hih ding, na hoih sepa hau ding, hawmsem ding leh neih-le-lam midangte hawm nuam dingin amaute thu pia in. 19 Hibanga hihin, hinna taktak Tangtawn hinna a letkip nadingun, hong tung ding hun adinga suangphum kip hi ding gou a kikhol ding uhi. 20 Timothi aw, na kep dinga hong kipia pen hoihtakin kem inla, Pathian phawk loua mawkpau leh a dikloupi-a theihna kichi, kikalhpipite kiheisan in. 21 Hiai theihna, mi pawlkhatte'n nei a kichi uh a, thu-up a pialmangsan uhi. Hehpihna in nang hon ompih hen aw. Amen.
Chibaibukna
1 Kei, Khrist Jesu-a om hinna thuchiam banga, Pathian deihlama Jesu Khrist' sawltaklian Paul in, 2 ka tapa deihthawh Timothi kiang ah lai kon gelh hi. Pa Pathian leh Khrist Jesu i Toupa apan hehpihna, zahngaihna leh lungmuanna na tung ah om hen aw. Muanhuaina 3 Sun leh zanin, ka deih ngetna thuumnate ah, tawp louin nang kon phawk gige hi. Tua banga kon phawkna ah, ka pu ka pate' hih banga, ka sia-le-pha theihna siangtak tawh a nna ka sep Pathian tung ah kipahthu ka gen hi. 4 Na khituite ka thei gige a, ka lungnopna a kim nadingin nang hon muh ding ka lunggulh mahmah hi. 5 Na upna takdan ka thei gige hi. Tua upna tak, na pi Loisi ah leh, na nu Iunisi ah a teeng masa hi. Nangmah ah zong a teeng chih theitelin ka muang hi. 6 Hiai hangin, na tunga ka khut ngakna tungtawna na ngah, Pathian' thawnpiak mutkuang dingin kon theisak thak hi. 7 Ahang bel, Pathian in eite dawilokna kha hon pia ahi kei a, vangletna, itna leh kithununna kha hon pia ahi zaw hi. 8 Tua ahih manin, i Toupa tawh kisai theihpihna thu gen ding zahpih kenla, ama' hentapa keimah zong hon zahpih ken. Tangthupha hanga ka thuaknate, Pathian' vangletna zahzahin hon thuakpih zaw in. 9 Pathian in eite hon hondam a, siangthoua nungta dingin hon sam hi. Tua pen, eite'n i sepsa khatpeuh hang ahi kei a, ama' tup leh hehpihna hang ahi zaw hi. Ama'n hun kipat main, Khrist Jesu ah hiai hehpihna eite hon na peta hi. Hehpihna hong kilang hi. Khrist Jesu' tangthupha tungtawnin, sihna a 10 Ahihhangin, i Hondampa Khrist Jesu hong kilatna tungtawnin, hiai Pathian in beisak a, hinna leh sihtheihlouhna, muhtheihin a langsakta hi. 11 Hiai tangthupha tawh kisaiin, Zentelte kianga tangkoupa, sawltaklian leh sinsakpa hi dingin kei a hon sep hi. 12 Hiai hang ahi, tu-a ka thuak banga ka thuak. Ahihhangin, ka maizum kei hi. Ahang bel, ke'n ka uppa ka thei a, ama'n, amah ka kepsaksa pen, tua Ni dongin a kem thei, chih theitelin ka muang mahmah hi. 13 Kei apan na zak sinsakna chidam etteh-in nei inla, Khrist Jesu-a om upna leh itna ah tua kem in. 14 Pathian in nang hon kepsak, tua thilhoih, eima' sunga teeng Kha Siangthou pansanin kem in. 15 Asia gama omte khempeuh in kei hon taisan uh, chih na thei hi. Amaute lak ah Fugela leh Harmozeni a kihel uhi. 16 Onesifora in kei hon halhsak zelzel a, khainiang buna ka hentakna zong hon zahpih kei hi. Tua hangin, Toupa'n a innkawte tung ah zahngaihna pia hen aw. 17 Amah Rom khua-a a om laiin, kei hon muh mateng hong zongkhe teitei hi. 18 Ama'n tua Ni chianga, Toupa apan zahngaihna a ngah ding Toupa'n phal hen aw. Ama'n Efesa khua ah, lam tampi-in kei hon huh, chih na thei hi.
1 Tua ahih manin, nang ka tapa aw, Khrist Jesu-a om hehpihna ah hattakin om in. 2 Theihpih mi tampite' maia ka thugen na zakte, a sinsak thei ding midang, mi muanhuaite kiang ah kemsak in. 3 Jesu Khrist' sepaih hoih bangin haksatna koute hon thuakpih in. 4 Sepaiha pang kuamah, leitung nuntakna tawh kisaiin a kibuaisak kei a, amah sepaiha lapa lungtaisak a sawm zaw hi. 5 Tua mah bangin, kidemna-a pang mi in, a dan bangtak a zuih louh chiangin, vualtungtuanna lukhu a ngah kei hi. 6 Lounei mi in gimtaka a sep leh, a sepgim gahte ne masapa ahih ding mah ahi. 7 Ka thugen suut detdet in. Toupa'n hiaite theihtheihna nang hon pia hen. 8 David' suana piang Jesu Khrist, misite lak apan kaihthawha ompa thei gige in. Hiai ka tangthupha gen ahi. 9 Hiai hangin, migilou banga thuaksakin ka om a, khainianga henna dong ka thuak hi. Ahihhangin, Pathian' thu zaw hen ahi kei hi. 10 Tua ahih manin, teeltuamte hangin bangteng ka thuak teitei hi. Amaute'n zong, Khrist Jesu-a om hotdamna, Tangtawn thupina tawh a ngah sam nadingun ka thuak hi. 11 Hiai thugen saantaak ahi: Amah tawh i sihkhawmtak nung, amah tawh hinkhawm zong hingkhawm ding hi hang. 12 I thuak teitei leh, amah tawh vai zong hawmkhawm ding hi hang. Amah i kilepsan leh ama'n zong eite hon kilepsan ding hi. 13 Eite muanhuai louin om mah lehang, amah zaw muanhuai gige hi. Amah leh amah kinial thei lou hi.
Pathian' Phat Nasemmi
14 Hiai thilte amaute theisak thak in. Thu kammalte tawh kisaia kisel lou dingin, Toupa' mai ah amaute khauhtakin vauhilh in. Hibanga kiselna a phatuam kei a, a zate a buaisak zaw hi. 15 Thutak thu diktaka zang thei, maizum nading om lou, Pathian saan nasemmi hi dingin, theihtawp suaha kisinin Pathian kiang ah kipia in. 16 Sabiakbei thugen leh, mawk kamtamte lak ah kihel ken. Hibanga buai mite zaw pathianmitna tasam semsem uhi. 17 Amaute' sinsakna, meimasia bangin a daih ding hi. Humenaia leh Fileta, amaute lak ah a kihel uhi. 18 Amaute'n thutak a kiheisan uh a, thawhkikna omkhinta ahi, a chi uh a, mi pawlkhatte' upna a phelgawpsak uhi. 19 Ahihhangin, Pathian' suangphum kiptakin a ding hi. Tua suangphum, laigelhin a kichiamteh hi: Toupa'n ama'-ate a thei hi, chih leh Khrist' min lou peuhmah in diktatlouhna nusia hen, chi-in. 20 Inn lian sung ah kham leh nguna kibawl vanzatte kia a om kei a, sing leh belleia kibawl zong a om hi. Pawlkhatte manphataka zat, pawlkhatte manphaloutaka zat ding ahi uhi. 21 Tua ahih manin, mi kuapeuh, a nunung pawl apan a kisiansuah chiangin, manphataka zat, sehtuam, a Pu adinga phatuam nahoih khat peuh sem dinga taak vanzat a suak ding hi. 22 Tuailai' lunggulhna giloute taisan inla, lungtang siangtaka Toupa' min loute tawh diktatna, upna, itna leh lemna delh in. 23 Ahaihuai leh theihlouhpi thil tawh kisaia kiselna ah kihel ken. Hiaite'n kinakna a tun, chih na thei hi. 24 Toupa' sila adingin, mi tawh kitot a kilawm kei hi. Mi chih tunga migi, sinsak thei, lamet zawhna nei ahi zaw ding ahi. 25 Amah kalhte, nunnemtakin thuhilh leh, Pathian in amaute kisikin a lungheisak ding a, thutak theihna ah a pii ding hi. 26 Tuachi-in, dawimangpa'n ama' deihlam hih dinga a matna apan amaute hong kiphawkin, dawimangpa' thaang a peel ding uhi.
NiNunungte-a Pathian Phawklouhna
1 Ahihhangin, hiai chiamteh in: Ni nanungte ah, hun haksate hong om ding hi. 2 Mihing, amau leh amau ki-itte, dangka sum deihtate, kisialhatte, kisatheite, Pathian gensete, nu-le-pa thu mangloute, kipahdan theiloute, siangthouloute hong om ding uhi. 3 Itnabeite, ngaidamtheiloute, gensiathatte, kithununloute, huhamte, ahoih deihloute, 4 zuautatte, ngongtatte, kimisakte, Pathian it sanga nopsakna it zawte ahi ding uhi. 5 Pathianmitna limsak batna a nei ding uh a, ahihhangin, a vangletna a nial ding uhi. Hibang mite kiheisan in. 6 Amaute, mi' inn khawnga va kineel a, numei lungkhauh zoulou, khelhna gik pua, lunggulhna gilou tuamtuama pimanga omte sala mante ahi uhi. 7 Tua bang mite lah, sin gige napi-a thutak thei thei ngeiloute ahi uhi. 8 Jani leh Jambri in Mosi a dou bangun, hiai mite'n thutak a dou uhi. Amaute, lungsim kisia, thu-up tawh kisaia Pathian' pampaihsa ahi uhi. 9 Ahihhangin, amaute a masawn kei ding uhi. Ahang bel, Jani leh Jambri bangin, a haina uh mi khempeuh' mai ah a kilang ding hi.
Timothi' Mawhpuakna
10 Ahihhangin, nang zaw ka sinsakna, ka nuntak dan, ka tup leh ngim, ka upna, lametzawhna, itna leh sekdouna na thei hi 11 bawlsiatna leh gimna, pumpi-a ka thuakte, Antiokh, Ikoniam leh Lustra-a ka tunga thil tungte khempeuh, bawlsiatna ka thuak khempeuh na thei hi. Hinapi-in, Toupa'n hiaite apan kei hon hukhia hi. 12 Ataktakin, Khrist Jesu-a pathianmitna limsaka nuntak ut mi peuhmah in bawlsiatna a thuak ding hi. 13 Migilou leh lepchiahte a se semsem ding uh a, mite a khem ding uh a, midangte'n amaute a khem ding uhi, 14 Ahihhangin, nang zaw na sinsa leh na theihtelsa ah om gige in. Hiaite, kua apan na sin a, na theihtel hi hiam, chih na thei hi. 15 Na neu apanin, Laisiangthou na thei hi. Tua Laisiangthou in Khrist Jesu-a upna tungtawnin, hotdam nadingin nang hon piisak thei hi. 16 Laisiangthou khempeuh Pathian' hatkhiak ahi. Tua ahih manin, sinsak nading, taihilh nading, bawlhoih nading leh diktatna lama kichil nadingin a phatuam hi. 17 Tua bel, Pathian' mi pen, Pathian in a bukimsak theihna leh, nahoih chiteng sem dinga a thop theihna ahi.
1 I toupa Jesu Khrist hong kilat nading leh, a kumpigam ngaihsunin, Pathian leh ama' mai ah hiai mawhpuakna kon guan hi. Ama'n mihingte leh misite tung ah thu a khen ding hi. 2 Tua ahih manin, thu kon pia hi: Thu tawh kisai tangthupha phuang in! A hun leh a hun louin zong mansain om in. Thuakzawhna leh sinsakna khempeuh tawh, pilvangtakin sinsak inla, bawlhoih inla, taihilh inla hanthawn in. 3 Mite'n sinsakna chidam a ngaihkhiak ngap louh hun uh hong tung ding a, amau' lunggulhna gilou lamlam, a bil huuk un a zak nop lamlam gen ding sinsakmi tampipi a khawm ding uhi. 4 Thutak taisanin, lehlam ah tangthu bulbal neiloute bil a dawh ding uhi. 5 Ahihhangin, nang zaw thil bangkim ah, ngaihsaktakin kiveng inla, haksatna thuak teitei in. Sawltak nna sem inla, na nasep sem bukim teitei in. 6 Kei zaw, Pathian in dawn thillat banga hon sunbuaka om lellel ka hita a, ka paikhiak hun hong tungta hi. 7 Ke'n kidouna hoih ka doukhinta. Kitaitehna ka mualsuahta a, thu-up ka kembitta hi. 8 Tuin, Pathian in pahtakman piak ding diktatna lukhu kei adingin koihsain a nei hi. Tua ni chiangin, Thukhenpa diktat ahipa, Toupa in tua kei hon pe ding hi. Kei kia hilouin, ama' hong kilatna lunggulhte khempeuh zong a pe ding hi. 9 Ka kianga hong pai pah ding hon sawm teitei in. 10 Ahang bel, Dema in tulai leitung a it manin kei hon taisanta a, Thesalonika khua ah a paita hi. Krisen, Galatia gam ah a paita a, Tita lah Dalmatia gam ah a paita hi. 11 Ka kianga om Luka kia ahi. Nasepna ah kei adingin Marka a phatuam mahmah a, amah zong khia inla, hon tonpih in. 12 Tukika ahih leh, Efesa khua ah ka sawlta hi. 13 Na hong pai chiangin, Troas khua-a Karpa kianga ka nutsiat, ka puanaktual hon puak inla, ka laibute, adiakin savun laibu zialte hon puak in. 14 Siksekpa Aleksandar ka tung ah a gilou mahmah a, a gamtatna bangbangin, Toupa'n thuk hen aw. 15 Ama'n i thupuak a dou mahmah manin, nang zong amah tawh kisaiin pilvang in. 16 Ka dikna thu ka gen masakna ah kuama'n hon dinpih kei hi. Mi khempeuh in hon taisan vek uhi. Amau' mawhnain kisim kei tapeuh hen aw. 17 Ahihhangin, Toupa'n hon dinpih a, hon hatsak hi. Hiai bel, thupuak a bukima ka tangkoupih nading leh, Zentelte khempeuh in a zak nading ahi. Tuachi-in, Toupa'n humpinelkai kamsung apan hon hukhia hi. 18 Gitlouh nasep kei hon dou khempeuh apan Toupa'n hon hukhe ding a, a vaanlam kumpigam adingin bittakin hon humbit ding hi. Ama' tung ah thupina om tawntungta hen aw. Amen!
Chibaibukna
19 Prisila leh Akuila leh Onesiforate innkuan chibai hon na buksak in. 20 Korinth khua ah Erasta a taam a, Mileta khua ah Trofima chinasain ka nusia hi. 21 Phalbi ma-a hiai mun hong tun ding hon sawm teitei in. Eubula in nang chibai hon khak hi. Puden, Lina, Klaudia leh sanggamte khempeuh in chibai hon khak uhi. 22 Toupa Jesu Khrist in na kha hon ompih hen. Hehpihna in nang hon ompih hen. Amen.
Chibaibukna
1 Kei, Pathian' sila leh Jesu Khrist' sawltaklian Paul, Pathian' teelte' upna lamtouh nading leh pathianmitna tun, tua thutak theihna adinga sem ka hi. 2 Tua upna leh theihna bel, zuau gen lou Pathian in hun kipat ma-a a chiamsa, Tangtawn hinna lametna tunga kinga ahi. 3 Ama'n a hun seh a hong tun takin, tua ama' thu hon langsakta hi. Tua bel, i Hondampa Pathian' thupiaka kei kianga kepsaka om tua thugenna tungtawnin ahi. 4 I thu-up tankhawm lama ka tapa taktak Tita kiang ah lai kon gelh hi. Pa Pathian leh i Hondampa Jesu Khrist apan hehpihna, zahngaihna leh lungmuanna na tung ah om hen.
Tita' Mawhpuakna
5 Krit tuikulha nang kon nutsiatna bel, nasep khitlouhte na sep buching a, kon thupiak banga khua chiha upate na seh ding ka deihna ahi. 6 Upa bel genbaanglou, zi khat nei, a tate upna nei mite, huham lou, ahih kei leh, phengpi lou ahi teitei ding ahi. 7 Bishop pen Pathian' nasempa ahih manin, genbaanglou, kiliansak mi hilou, hehbaih lou, zuhai lou, hiamgam lou, dangka sum deihta mi hi lou, ahi teitei ding ahi. 8 Zindou siam, ahoih lam peuhmah deih, lungpil, diktat, siangthou, kithunun mi ahi zaw ding ahi. 9 A santaak sinsakna kiptaka len, tua mah midangte sinsaka hanthawn thei, tua doute lah selthal thei mi ahi ding ahi. 10 Ahang bel, phengphi, thu namanlou gengen leh khemhat tampi a om hi. Adiakin, zeksumte lak ah a tam hi. 11 Tua bang mite'n sinsak louh ding thute sinsakin, mi a innkuan kuanun a susia uhi. Tua lah metna nin a deih man uh ahi. Tua bang mite' kam humsak teitei ding ahi. 12 Amau' kamsangte laka khat in: Krit mite zaw, zuautheite, gamsa giloute, thadah anhaite ahi uh, a na chi hi. 13 Hiai theihpihna a dik mah ahi. Tua ahih manin, amaute thu-upa a muanhuai nadingun, amaute khauhtakin taihilh in. 14 Judate' tangthu bulbal neilou khawng a buaipih louh ua, thutak nialte' thupiak khawng a thudon louh nadingun, amaute taihilh in. 15 Lungsim siangte adingin bangteng a siang a, ahihhangin, lungsim ninte leh a umloute adingin bel, bangmah a siang a om kei hi. Ataktakin bel, a lungsim uh leh a sia-le-pha theihna uh a nin-a ahi. 16 Pathian thei, a kichi uh. Ahihhangin, a gamtatun amah a nial uhi. Mi kihhuai, thumanglou, nahoih sem dinga chinglou ahi uhi.
Sinsak ding Tuamtuam
1 Nang zaw thu-up chidam tawh kituak thute sinsak in. 2 Papi lamte, zahtakhuai, kidekthei, kithunun leh thu-upa chidam, itna leh thuakhatna nei mi hi dingin sinsak in. 3 Tua mah bangin, nupi lamte, a omdan ua zahdan siam, gensiat hat lou, zuhai lou, a hoih lam peuhmah sinsak mi hi zaw dingin sinsak in. 4 Tua bel, amaute'n nupilate, a pasalte uh leh a tate uh it dinga a sinsak theih nading uh ahi. 5 Tua baan ah, kithunun thei, beven lou, innsung kem hiathiat, chingkam, a pasalte uh thuthu-a om dinga a sinsak theih nading uh ahi. Tua bel, kuama'n Pathian thu a gensiat louh nading ahi. 6 Tua mah bangin, papilate hibangin sinsak inla, amaute kithunun dingin hanthawn in. 7 Thil bangkim ah nahoih sep lama etteh hi dingin kibawl in. Na thu-up sinsak lam ah mawhsak nading omlouin thutakna leh chihtakna leh 8 kampau kilawm kilangsak in. Tua hileh, nang hon doute'n hon gensiat nading a mu kei ding uh a, a maizum zaw ding uhi. 9 Silate, amau' toute thu mang ding, thil bangkima a kipahlam uh zong ding, a thu uh sel lou dingin sinsak in. 10 A toute uh' neihsa bangmah guksak lou ding, a muanhuaina uh nahoih chitenga kilangsak zaw dingin sinsak lechin, lam chiteng ah, i Hondampa Pathian' thu-up sinsakna deihhuaiin a kilang thei ding uhi. 11 Ahang bel, hotdamna hon tun Pathian' hehpihna mi khempeuh kiang ah hong kilangta hi. 12 Tua hehpihna in pathianmit louhna leh leitung thil lunggulhnate nial a, tulai huna kithunun ding, diktata gamta ding leh pathianmitna limsak taka nungta dingin eite hon sinsak hi. 13 Tua bel, lametna kipahhuai, i Pathian thupi leh Hondampa Jesu Khrist hong kilat nading i ngak sunga i nuntak ding dan ahi. 14 Danbeia gamtatna chiteng apan eite hon tan ding leh, nahoih sema phatuamngai, ama' deihtuam mite i hih theih nadinga hon siangsak dingin, amah a kipeta hi. 15 Hiai thilte thuneitakin gen inla, hanthawnin taihilh in. Kuamah kisimmawhsak ken.
Thilhoih Hih Ding
1 Vaihawmte leh thuneihna neite nuaia luta thumang ding leh, a hoih peuhmah hih dinga mansa gige dingin amaute theisak in. 2 Kuamah gense lou ding, vuallemtak, nunnem leh mi khempeuh tunga kingainiam dingin amaute theisak in. 3 Khatvei laiin, eite zong mihaite, thumangloute, khemzawhte, lunggulhna gilou leh nopsakna namkim nuaia sala taangte i na hi uhi. Siat kideihsakna lungput leh kihazatuah, muhdahhata kimudahtuahte i hi uhi. 4 Ahihhangin, mihing lam ah, i Hondampa Pathian' migitna leh itna hong kilangta a, 5 tua hong kilat takin, ama'n i thilhih diktatte hang hilouin, ama' zahngaihna hangin eite hon hondamta hi. Tua hotdamna bel Kha Siangthou pansana pianthakna-a silsiangna leh thaksakna tungtawnin ahi. 6 Ama'n tua Kha Siangthou pen, i Hondampa Jesu Khrist tungtawnin, eite tung ah a kiching mahmahin hon sungbua hi. 7 Tua bel, ama' hehpihna hanga diktansak hi khintain Tangtawn hinna lametna nei, gouluahte i suah theihna ahi. 8 Hiai thugen a saantak ahi. Tua ahih manin, Pathian muangtate, thil hoih peuhmah hih dinga akipiak theih nadingun, hiai thilte ngiat teitei lechin kon chi ahi. Mi chih adingin hiai thilte a hoih leh a phatuam ahi. 9 Ahihhangin, a haihuai kikalhnate leh khangthute leh Dan tawh kisai kiselnate leh kinaknate peel in. Ahang bel, hiaite a phatuamlou leh mannabei ahi. 10 Kikhenna piangsak mi pen, khatvei nihvei na vauhilh nungin nawlkhin in. 11 Tua bang mi zaw lampiala khial ahi a, amah leh amah kimawhtan ahita hi.
Thu Nunungte
12 Artema hiam, ahih kei leh, Tukika hiam, na kianga kon sawl chiangin, Nikopoli ah, ka kiang ah hong pai teitei in. Tua-a phalbi sung taam dingin thu ka khentatta hi. 13 Dansiam Zena leh Apolo a zin nading uah, bangmah kisamlouin na paisak pah un. 14 I mite'n nisim taksapte a suktuah theih nading uh leh, gahsuah loua a om louh nadingun thil hoih hiha hahkat a kisin ding uh ahi. 15 Ka kianga omte khempeuh in noute chibai hon khak uhi. Thu-up sunga kou hon itte chibai hon na buksak in. Noute khempeuh tung ah hehpihna om hen. Amen.
Chibaibukna
1 Kei, Khrist Jesu' hentapa Paul leh i sanggampa Timothi in, ka lawm deihthawh uh leh ka seppih uh Filemon kiang ah leh, 2 ka deihthawh uh sanggamnu Afia kiang ah leh, ka sepaihpih uh Arkhipa leh na inn-a kikhawm saptuamte kiang ah lai kon gelh uhi. 3 I Pa Pathian leh Toupa Jesu Khrist apan hehpihna leh lungmuanna noute tung ah om hen.
Kipahthu Genna leh Thuumna
4 Ka thuumnatea na min louin ka Pathian tung ah kipahthu ka gen gige hi. 5 Toupa Jesu na upna leh misiangthoute khempeuh na itna thu ka za hi. 6 Na thu-up midangte na kikoppihna in gah a suah theih nadingin ka thuum hi. Tua bel, Khrist-a thilhoih na neih khempeuh theiin, a phattuampih ding uh chihna ahi. 7 Sanggam aw, misiangthoute' lungtangte na halhsak manin, na itna in kou hon lungnuamsak a, hon hanthawn mahmah hi.
Onesima adinga Ngetsakna
8 Na hih dingte Khrist ah thupiaka hangsantaka hon pe thei hi mah leng, 9 itna hangin kon nget thawh zaw hi. Tua bang ahih nungsang, kei putek Paul, tu mahmaha zong Khrist Jesu' hentapa in kon ngen hi. 10 Ka khainiang but sunga ka neih, ka tapa Onesima taanga hon ngen ka hi, 11 Khatvei laiin, amah nang adingin mannabei ahi. Ahihhangin, tu'n zaw nang leh kei adingin a manphata hi. 12 Amah kon sawlkik hi amah ka lungtang mahmah ahi. 13 Tangthupha hanga khainiang buna ka om sungin, nang taanga kei hon panpih dingin amah ka lentang nuam tham hi. 14 Ahihhangin, nang' phasakna om louin, tua bangin ka hih nuam kei hi. Kei lama deihsakna non piak nop pen, nangma' lungtanga piang hiloua, hon hihsak teitei ka suah khak ding ka ut kei hi. 15 Amah tawh hun tomkha na kikhen pen uh, amah na neihden theih nading hong suak ahi kha mahmah ding hi. 16 Tua zong sila banga neih hi nawn louin, sila sanga hoihzaw, sanggam it bangin ahi zawmah lai hi. Adiakin, amah kei adingin deihthawh mahmah hong suakta a, nang adingin, sa lam ah leh Toupa lam ah deihthawh ahi sem hi. 17 Tua bang ahih manin, kei pen na seppih khata non sim leh, kei non saan ding bangbangin amah na saangta in. 18 Ama'n na tunga a diklou hih a neih himhim leh, ahih kei leh, bat hon neih leh, kei' batin na sim in. 19 Kei, Paul in hiai keima' khut mahmaha ka gelh ahi: Kon din ding hi. Nangmah mah in zong na hinna nangawn non ba sam ka chihna zaw ahi kei hi. 20 Ahi, sanggam aw, Toupa ah nang apan banghiam tantuan hon ngahsak lechin ka chi mahmah hi. Toupa ah ka lungsim hon halhsak in. 21 Ka thu na man ding muanga hon gelh ka hi. Kon nget sanga thupizaw na hih ding chih ka thei hi. 22 Tua louin, ka kingak nading mun hon na bawlsak in. Noute' thuumnate tungtawnin, noute kianga piakkik ka hina ding chih ka muang hi. 23 Khrist Jesu hanga ka hentakpihpa Epafra in nang chibai hon khak hi. 24 Ka sepaihpih Marka, Aristarkha, Dema leh Luka in zong noute chibai hon khak uhi. 25 I Toupa Jesu Khrist hehpihna in na kha hon ompih hen. Amen.
Vansawltakte sanga Tungnung Khrist
1 Nidang laiin, hun tuamtuam ah leh, lam tuamtuamin Pathian in kamsangte tungtawnin, i pu i pate kiang ah thu a na genta. 2 Ahihhangin, tu hun nanung ah bel, a Tapa tungtawnin thu hon gen hi. Tua a Tapa bel thil bangkim gouluahpa hi dinga a seh ahi a, ama' tungtawn mahin leitung khuavannuai a siam hi. 3 Tua Tapa mah, Pathian' thupina taankhiakna leh Pathian' hihna taktak lahkhiakna ahi. Ama'n a vanglian mahmah ama' thuin bangkim a dingkipsak vek hi. Ama'n i khelhnate siansakna a bawl khitin, vantung ah Tungnungpen' taklam ah a tuta hi. 4 Vansawltakte' hihna min sanga hihna min tungnungzaw luahpa ahih mah bangin, amah mah amaute sanga tungnungzaw tham hong hi ahi. 5 Vansawltakte a kuapen kiang ah ahia Pathian in: Nang zaw ka Tapa na hi, tuni-in na Pa kong hita, a chih ngei? Ahih kei leh: Ama' Pa hi ding ing a, amah ka Tapa hi ding hi, a chih ngei himhim? 6 Tua baan ah, Pathian in a Tapa masapen leitunga hon pilut laiin: Pathian' vansawltakte khempeuh in amah bia hen, a chi hi. 7 Ama'n vansawltakte tawh kisaiin: A vansawltakte huihte suaksak a, a silate meikuangte suaksak hi, a chi hi. 8 Ahihhangin Tapa tawh kisaiin bel: Pathian aw, na kumpitutphah Tangtawn Tangtawnin omden ding a, na kumpigam chiang lah diktatna kumpichiang hi ding hi. 9 Nang diktatna it chin a, danbeia gamtatna hua na hi. Tua ahih mana, Pathian, na Pathian in na lawmte teng tunga hon koihta a, nakpitaka lungnopna sathau hon nilh hi, a chi hi. 10 Tua louin zong: Toupa aw, nang a chila, leitung kingakna suangphum phum chin a, vaante na khutsuak hi ahi. 11 Tuate hong mangthang ding uh a, ahihhanga, nang zaw omden na hi. Tuate puansilh banga hong lui ding uh a, 12 kumpipuan banga zialkhe ding chin a, puansilh banga khekkhiak hi ding uhi. Ahihhanga, nang zaw a ngeingeia omden china, na kumte zong bei ngei lou ding hi, a chi hi. 13 Vansawltakte a kuapen kiang ah ahia Pathian in: Na melmate na khe ngakna-a ka bawl masiah, ka taklam ah tu in, a chih ngei? 14 Vansawltakte khempeuh ahih leh, hotdamna luah dingte' nasem dinga sawlkhiak khate ahi kei ua hia?
Vauhilhnate
1 Tua bang ahih manin, i tolhmang louh nadingin, i zaksate limtak-in i thudon sem ding a kisam hi. 2 Ahang bel, vansawltakte' tungtawna thu kigente a kip a, tuate palsatna leh thumanlouhna peuhmah in gawtna a kituak ngah hiven. 3 Tua bang ahih manin, tua zaha hotdamna thupi thudon kei lehang, eite bangchi suahtak theih peuhmah ding i hia? Hiai hotdamna, Toupa'n a phuankhiak masak hi a, tua zate mah in a dikna thu theihpihna eite kiang ah hon gen uhi. 4 Pathian mahmah in zong chiamtehna, thillamdangte, a tuamtuam vangletna nasep lamdangte leh ama' deihna banga a hawm Kha Siangthou thawnpiakte pansanin hiai a theihpih hi.
A Sanggamte banga Bawl Khrist
5 I gen, a hong tung ding leitung khuavannuai pen, ama'n vansawltakte' thunuai ah a koih kei. 6 Ahihhangin, mun khat ah, kua hiam khat in theihpihna thu pilvangtakin a gen a: Mihing bang hi peuhmah ahia, hizahta-a na awlmawh? Mihing tapa zong bang hi peuhmah ahia, hizahta-a na khawtuah? 7 Nang amah, vansawltakte sanga nuainungzaw zeka bawl chin a, thupina leh pahtawina khusak chin a, na khutsuakte uksak chin a, 8 ama' khepek nuaia thil bangkim koih na hi, a chi hi. Pathian in ama' khepek nuaia thil bangkim a koih laiin, koih louh bangmah a hawi kei hi. Hinapi-in, tuin, thil bangkim ama' khepek nuaia kikoihin i mu tadih kei hi. 9 Ahihhangin, Pathian' hehpihna pansana mi chih sik leh tanga sihna a thuak theih nadinga, vansawltakte sanga nuainungzaw zeka bawl takdiha ompa leh, sihna a thuakna hanga tu-a thupina leh pahtawina khuksaka ompa Jesu i mu hi. 10 Ahang bel, ama' ading leh amah apan thil bangkim ompa Pathian adingin, tate tampi thupina-a piilutpa leh, amaute' hotdamna bawlpa pen, thuakna tungtawna a bukimsak kilawm him ahi. 11 Mite siangthousakpa leh a sianthousakte innkuan khat ahi uhi. Tua bang ahihmanin, amaute, sanggamte chih ding Jesu a maizum kei hi. 12 Ama'n: Ka sanggamte kianga na min phuang ding ing a, kikhawmte laka nang phatna la sa ding hi'ng, a chi hi. 13 Tua baan ah, ama'n: Ke'n amah muang ding hi'ng, a chi hi. Tua baan ah, ama'n: En un, Pathian hon piak tate tawh hiaia om hi'ng, a chi lai hi. 14 Tate bel sa leh sisan nei ahih manun, tua banga ama'n zong sa leh sisan nei mihing hihna tang sam ahi. Tua bel, ama'n a sihna pansana, sihna vangletna nei tua dawimangpa, vangletna beia a koih theih nading ahi. 15 Tua baan ah, a damsung teng uh sih launa sala tangte a suahtaksak theih nading ahi sawnsawn hi. 16 Ama' panpihte zaw vansawltakte ahi het kei uh a, Abraham' suante ahi zaw uhi. 17 Hiai hang mahin, amah zaw Pathian lungkimsak thei, zahngaithei leh a muanhuai siampilian ahih theih nading leh, mite' khelhnate khuhna a bawl theih nadinga bangkima a sanggamte bangbang a hong suah kul ahi. 18 Amah mah in zong khemna zolna tuaka hong thuak ahih manin, khemna zolna tuakte a panpih thei hi.
Mosi sanga Tungnungzaw Khrist
1 Tua ahih manin, sanggam siangthou, vanlam sapna tangsamte aw, Khrist Jesu ngaihsun gige un. Amah i thu-up tawh kisaia Sawltaklian leh Siampilian ahi. 2 Pathian' innsung khempeuh ah Mosi a muanhuai bangin, amah zong, tua bang dinga amah seppa tung ah a muanhuai hi. 3 Tua bang ahih manin, innlampa in a innlam sanga pahtawina thupizaw a tan bangin, Jesu'n, Mosi sanga pahtawina thupizaw a tan ding kilawm him ahi. 4 Ahang bel, inn peuhmah mi khattei' lam hi a, ahihhanga, bangkim lampa bel Pathian ahi. 5 Mosi bel nung chianga kigen ding thilte theihpihpa hi-in, sila ahihna ah, Pathian innkuan sung khempeuh ah a muanhuai hi. 6 Ahihhangin, Khrist bel, Tapa ahihna ah, Pathian' innkuan tung ah a muanhuai hi. I hangsanna leh i kisialpih lametna pen i letkip nung, eite ama' innkuante i hi uhi.
Lungtang Khauhsak Lauhuaina
7 Kha Siangthou in: Tuni-a a aw na zak chiangun, 8 gamdai-gamkeua ze-etna hun sunga hela na hih bangun, na lungtang uh khauhsak kei un. 9 Tua ah na pu na pate un kei hon ze-etin hon enkhia uh a, kum 40 sung ka thilhihte mu uhi. 10 Tua hang ahi, tua khangte tunga heh a: A lungtangte uh lampial gige a, ka lampite thei lou uhi, ka chih. 11 Tuachi-in, thangpaia kichiam zenin: Ka khawl tawldamna ah lut ngei kei unteh, chi ka hi, a chih bangin, 12 sanggamte aw, na lak ua kuamah in lungtang gilou leh uplahna neia, Pathian hing na kiheisan louh nadingun kiveng un. 13 Ahihhangin, khelhna khemhatna in na lak ua kuamah lungtang hon khauhsak louh nadingin, Tuni, a kichih sung tengin, nisimin kihanthawn tuah zaw un. 14 A chila i neih kimuanna a tawp donga i letkip nak leh, Khrist-a tan neite i hi. 15 Tuni-a a aw na zak chiangun, tua helna-a na hih bangun, na lungtang uh khauhsak kei un, chi-a kigenkhinsa bangin kiveng un. 16 Za napi-a helte kuate ahia? Mosi in Aigupta gam apan a piikhiakte hi lou maw? 17 Tua baan ah, kum 40 sung a thangpaihna kuate tung ah ahia? A khial a, gamdai-gamkeua a luang uh pukte tung ah hilou maw? 18 Tua baan ah, ama' thu mangloute ahih kei ngai leh, a khawl tawldamna sung lut lou ding, chi-a a kichiamna kuate tung hi ding eita? 19 Tua bangin, uplahna hangin, amaute tua a khawl tawldamna ah a lut theita kei uh, chih i mu hi.
Khawl Tawldamna Taktak
1 Tua bang ahih manin, lau ni. Tuachi louin zaw, ama' khawl tawldamna sung lut nading thuchiam omlai napi-in, na lak uah a lut lah khattou a om zenzen kha ding hi. 2 Ahang bel, amaute kianga kigenta bangin, eite kiang ah zong tangthupha a kigenta hi. Ahihhangin, amaute'n thu' a zak pen uh, upna tawh kithuaha saang lou uh a hih manin, amaute adingin a phatuam kei hi. 3 Pathian in: Thangpaia kichiam zena: Amaute ka khawl tawldamna ah lut ngei kei unteh, chi ka hi, a chih bangbangin, a um eite bel, tua khawl tawldamna ah i lut lellel hi. Pathian in leitung khua vannuai a siam khitin, a nasep zou ahita hi. 4 Ahang bel, koilai hiam ah, ni sagih ni thu hibangin a na gen a: Ni sagih ni-in Pathian, a nasep khempeuh apan a khawl tawldamta hi, a chi hi. 5 Tua bang hinapi-in, ama'n a tunga kigensa bangin: Amaute ka khawltawldamna ah lut ngei kei unteh, a chi kik lai hi. 6 Mi pawlkhat, tua khawl tawl-damna-a lut ding om lai ahi, chih leh, nidang laia tangthupha kigen za masate'n a um kei uh a, thumanlouhna hangin, tua khawl tawldamna ah a lut kei uh, chih a kitel hi. 7 Pathian in nidang laia a gensa bangin, sawtpi nungin, David tungtawn-in: Tuni-a a aw na zak chiangun, na lungtang uh khauhsak kei un, chi-in, ni dang khat a sep kik a, Tuni, a chi hi. 8 Joshua in amaute khawl tawldamna na pekhin hita leh, a nunglamin, Pathian in nidang khat thu gen lou ding ahi. 9 Tua bang ahih manin, Pathian' mite adingin Sabbath khawlna a om lai, chih a kitel hi. 10 Ahang bel, Pathian zong ama' nasep apan khawl tawldam samta ahi. 11 Tuabang ahih manin, amaute banga, uplahna hanga kuamah puk loua, tua khawl tawldamna-a lut dingin theihtawp suah ni. 12 Ahang bel, Pathian Thu a hing a, a vanglian hi. Namsau hiamtuah bangteng sangin a hiamzaw a, hinna leh kha, guhlawi leh guhsungngek nangawn tuamkhen hialin a sun thei a, lungtang' ngaihsut leh tup a theitel hi. 13 Pathian' muh louh dingin thilsiam bangmah a kisel thei kei. Thu khen dinga i thutut nadingpa' mitmuhin bangkim hawksa leh vuaktang ahi.
Khrist' Siampilian Hihna
14 Eite'n Siampilian thupi khat, vante-a paisuakpa i nei hi. Amah Jesu, Pathian' Tapa ahi. Tua ahih nung, thu-up pen lenkip ni. 15 I hatlouhnate hon phawkpih theilou Siampilian nei i hi kei. Eite mah banga lam chitenga zolna tuak, ahihhanga, khiallou Siampilian nei i hi zaw hi. 16 Tua ahih nungsang, kimuangtakin, hehpihna kumpitutphah mai naih ni. Tuachi-in, i kul laitaka hon panpih ding zahngaihna leh hehpihna i ngah ding hi.
1 Siampilian peuhmah, mihingte lak apan kiteelkhia ahi. Pathian lam tawh kisaia mihingte siklehtaanga ding ding, khelhnate thoihna leh thawnpiak thillatte laan dinga Pathian' seh ahi. 2 Amah zong hatlouhna nei a hih manin, bangmah theiloute leh lampialte tung ah a zahngai thei hi. 3 Hiai hang mah in mipite' khelhnate thoihna a lat chiangin, ama' khelhnate thoihna zom; a lat a kul hi. 4 Kuamah in hiai dinmun a kilak thawh theih ahi kei. Aron banga Pathian' sap ahi ding ahi. 5 Tua mah bangin, Khrist in zong Siampilian hihna amah leh amah kipia a, kipahtawi ahi kei. Amah kianga: Nang zaw ka Tapa na hi, tuni-in na Pa kong hita, chipa Pathian ahi. 6 Mun dang khat ah ama'n: Nang zaw Melkhisedek tawh hihna kibang nei Siampi hi tawntung na hi, a chi hi. 7 Jesu, sa-a a nuntak laiin, sihna apan amah Hukhetheipa kiang ah, nakpitaka kikou leh khitui luangin, thumnate leh ngetnate a laan hi. Kihtakna siangthoua kihtakna tawh a nuailut manin, Pathian in amah a ngaikhia hi. 8 Tapa hinapi-in, a thuakte tungtawnin thuman a kisin hi. 9 Tua banga Pathian in amah a buchinsak takin, amah, ama' thu mangte adingin Tangtawn hotdamna nak hong hita a, 10 Pathian in Melkhisedek tawh hihna kibang siampilian hihna a pia hi.
Vauhilhna
11 Hiai ah Khrist tawh kisaiin gen ding tampi a om. Ahihhangin, a sin lam na ze-ol manun, gentel a haksa hi. 12 Ataktakin, noute sinsakmi na hih uh hunta ahi. Hinapi-in, Pathian thu tawh kisai thutak thubulte hon sinsak thak vek ding mi na kul lailai uhi. An gum hilouin, nawitui na kisam lai uhi! 13 Nawitui sen mi zaw naungek ahi laia, diktatna tawh kisai sinsaknate a thei nai kei hi. 14 An gum ahih leh bel, pichingte ading ahi. Pichingte bel, a theihtheihna uh kisin zongsangin, a sia a pha khentel thei dingin a kisinsiamta uhi.
Pichin Kulna
1 Tua bang ahih manin, Khrist tawh kisai sinsakna thubulte nusia-in, pichinna lam tawh kisai genta ni. Kingakna thubul suangphum phum thakthak nawn kei ni. Tua bel, nasep sisate apan kisika lungheina thute, Pathian upna thute, 2 baptisna tawh kisai kisinsakna thute, khutngak thute, misi thawhkikna thute, Tangtawn thukhenna thute ahi. 3 Pathian in a phal leh tua bang i hih mah ding ahi. 4 Ahang bel, khatvei hihvaka omkhin a, vanlam thawnpiak chiam-khin a, Kha Siangthoua tan neikhin a, 5 Pathian thu hoihna leh hun hong tung dinga vangletnate chiamkhin a, 6 tua bang nunga mi a pukmang uleh zaw, amaute adingin lunghei kik nadinga kibawlthak theih ahi kei hi. Ahang bel, amau' man nadinga Pathian' Tapa kilhden thak a, tangpi' maia zahlaksak hive un. 7 Lou, a tunga vuahtui ke zelte na dong a, a kikhawhsakna mite adinga gah phatuam suah pen in Pathian' vualzawlna tang ahi. 8 Ahihhangin, ling leh lou lingnei khawng peuh suah pen zaw a mannabei ahi a, hamsia lawh ahih ding a lauhuai a, a tawpa halsianga a om lai ding a lauhuai hi. 9 Itte aw, hibangin thu gen mah leung, noute tungthu ah zaw thil hoihzaw, hotdamna tawh kisai thilte na nei uh chih ka muang uhi. 10 Pathian zaw diktat lou ahi kei a, amah na itna nasep uleh, ama' mite na panpihtak bang ua, na panpih lainate uh a mangngilh kei ding hi. 11 Noute tek in na lamet uh na theihtel ding uh kon deih uhi. Tua bang dinga a tawp donga hahkattaka na pan tek ding uh kon deih uhi. 12 Nong thadah ding uh kon deih kei uh a, upna leh ngakzawhna tungtawna thuchiam gouluahte etteha nei zaw dingin kon deih uhi.
Pichin ding Deihna
13 Pathian in Abraham kianga thu a chiam laiin, minlawh ding a lianzaw a om louh manin, amah leh amah kiminlawhin a kichiam hi: 14 Ke'n nang kon vualzawl ngeingei ding a, suan tampitak kon pe ding hi, a chi hi. 15 Abraham in ngak zou taka a ngak nungin, thuchiam a luahta hi. 16 Mihingte bel, amaute sanga lianzaw khat peuh' min louin a kichiam uh a, tua kichiamna in thu kigensa a kipsak a, kiselna khempeuh a beisak hi. 17 Pathian in a tup leh a ngim pen kikhel theilou ahih dan, tua thuchiam luah dingte kianga kiteltaka a latsak nop manin, kichiamna zangin tua thuchiam a kipsak hi. 18 Pathian in hibanga a hihna hang bel, eite kianga lametna hon piak lenkip dinga i delh laitaka, nakpitaka hanthawna i om theih nading ahi. Nakpitaka hanthawna i om theihna lah, Pathian in zuau a gen theih hetlouh dan, thil kikhel theilou nih pansana a latsakna tunga kinga ahi. 19 Hiai lametna bel sikkipa i neih ahi. Tua sikkip lah, i hinna adinga kip mahmah leh tou mahmah ahi. Tua sikkip mah, puanzak khena mun siangthoupen Pathian omna tawh mankip ahi. 20 Tua mun siangthoupen ah i lamhongpa Jesu, i sik i taangin a valutta hi. Amah Melkhisedek tawh hihna kibang, Tangtawn Siampilian hong hipa ahi.
Melkhisedek
1 Hiai Melkhisedek bel, Salem kumpipa leh Pathian Tungnungpen' siampi ahi. Abraham in tua kumpipate zoua innlama hong chiahkik laiin, Melkhisedek in a na dawn a, a na vualzawl hi. 2 Tuachi-in, Abraham in amah kiang ah, gallak sumte khempeuha sawma khat a pia hi. Amasapenin, a min khiakna, diktatna kumpipa chihna ahi. Anihna ah, Salem Kumpipa, chihna ahi. Salem Kumpipa chih bel, Lemna Kumpipa, chihna ahi sawnsawn hi. 3 Amah zaw, pa nei lou, nu nei lou, khangthu nei lou, ompat ni nei lou, hin tawp nei lou, Pathian' Tapa banga bawl siampi hi tawntung ahi. 4 Melkhisedek thupidan ngaihsun peuhmah dih ua: Pubul Abraham nangawn in amah kiang ah a gallak sumte sawma khat a pe tanghial hi! 5 Levi' suante adingin, Abraham' suante bel a mite uh, a sanggamte uh ahi. Hinapi-in, Levi' suante'n tua a mite uh, a sanggamte uapan sawma khat a laak ding uh, Dan in a ngiat ahi. 6 Ahihhangin, hiaia kigen Melkhisedek in bel, Levi' suan hi kha het lou hinapi-in, thuchiamte neipa Abraham apan sawma khat a la a, amah a vualzawl hi. 7 A lianzaw in a neuzaw vualzawl mah ahi, chih selvuallouha dik ahi. 8 I gen khat ah, a sithei mihingte'n sawma khat a la uh. Hiai pen ah bel, a hingden, chi-a kigenpa'n sawma khat a la hi. 9 Tua hi leh, sawma khat lapa Levi in, Abraham tungtawnin sawma khat a pia, chih theih ahi. 10 Ahang bel, Melkhisedek in Abraham a na dawn laiin, Levi pen amah suangpa Abraham khala om ahi lai hi.
Aron Siampi Hihna Kichinglou
11 Dan bel, Levi' suante' siampi hihna tunga kibulphuh ahi. Hinapi-in, Levi' suante' siampi hihna tungtawnin buchinna a kingah thei kei hi. Levi' suante' siampi hihna tungtawna buchinna kingah thei na hi leh, Aron hihna bang hilou, Melkhisedek tawh hihna kibang nei siampi dang hong pai banghanga kul ding ahia? 12 Siampi hihna a kikhek chiangin, Dan zong a kikhek teitei ding mah a kul hi. 13 Ahi a, hibang teng a kigennapa Jesu zaw nam dang' suan ahi. Tua nam apan maitam nasem kuamah a om ngei kei. 14 I Toupa lah Judah suana piang ahi, chih a kitel mahmah a, Judah nam tawh kisaiin lah, Mosi in siampi hihna thu bangmah a na gen kei hi. 15 Melkhisedek tawh hihna kibang, siampi dang khat hong pai manin, i thugen hong kitel semsem hi. 16 Tua siampi lah, a pu a pa khangthu dana siampi hong hi ahi kei a, a si theilou hinna vangletna hanga siampi hong hi ahi zaw hi. 17 Ahang bel: Nang zaw Melkhisedek tawh hihna kibang nei Siampi hi tawntung na hi, chi-a Pathian in phuangta hiven. 18 Siampi hihna dan masa pen, a kichin louh mana kinawlkhin ahi. 19 Ahang bel, Dan in bangmah buchingsak thei lou hi ven. Tuachi-in, Pathian in lametna hoihzaw hon lalut a, tua lametna pansanin eite'n Pathian i naih uhi. 20 Tua siampi hihna dan thak pen, kichiamna tel loua piak ahi het kei hi! Aron leh a suante' siampi hihna zaw kichiamna himhim tel loua siampi hihna ahi. 21 Ahihhangin, amah zaw Pathian in a kianga: Toupa kichiamta a, a lungsim heikik lou ding hi: Nang zaw Siampi hi tawntung na hi, a chih laia, kichiamna tawh siampi hong hi ahi. 22 Hiai kichiamna thupi hangin, Jesu zaw thukhun hoihzaw kipsakpa a hong hita hi. 23 Siampi tampitak a na omta hi. Ahang bel, sihna hanga siampi hihna lenden thei kuamah om lou hiven. 24 Ahihhangin, Jesu bel, Tangtawna hingden ahih manin, Tangtawn Siampi hihna neidenpa ahi. 25 Tua bang ahih manin, ama'n ama' tungtawna Pathian hon zuante khempeuh a buching sipsipa hondam thei ahi. Ahang bel amaute adia thungetsak dinga amah nungtaden hiven. 26 Tua bang Siampilian, eite taksap awng hu dingin a kiching mahmah hi. Amah zaw siangthou, genbaanglou, nin baanglou, mikhialte apana sehtuam, vaante tunglam peka tawisanga om ahi. 27 Amah zaw, siampilian dangte banga, nisima ama' khelhna thoihna laan masa-a, tua khita mite khelhnate thoihna a lat thak zihzeh kul lou ahi. Amah mah a kipumlat laitakin, amaute adinga khatveia setden dinga kilan ahita hi. 28 Ahang bel, Dan in a chinglou zawngkhal mihingte, siampilian hi dingin a sep a, ahihhangin, tua Dan nunga hong om kichiamna in bel, Tapa mahmah Siampilian hi dingin a sep a, Tangtawna kiching dinga buchinsak ahita hi.
Thukhun Hoihzaw
1 Thugen laigil hiai ahi: Vantunga Thupina Kumpitutphah taklama tupa, Siampilian nei taktak i hi. 2 Amah, mihing' lam hilou, Toupa' lam hizaw biakbuk taktaka mun siangthou sunga nasempa ahi. 3 Siampilian peuhmah, thawnpiakte leh kithoihnate laan dinga seh ahi a, tua ahih manin, hiai Siampilian in zong lat ding bang hiam a neih a kul hi. 4 Amah leitunga om hi lebel, siampi ahi kei ding hi. Ahang bel, Dan in a ngiat thawnpiakte laan ding mite na omkhinta hiven. 5 Tuate'n mun siangthou ah nna a sem uhi. Tua mun siangthou lah, vaantunga om, a taktak pen batpih leh liim lei ahi. Tua hang ahi, Mosi in biakbuk a lam dek laia Pathian in a hilhkholh a: Mual tunga nang kianga etteh ding kon lah bangbanga bangkim na bawl teitei ding ahi aw, a chih. 6 Ahihhangin, amaute' siampi nasepna sangin, Jesu' siampi nasepna a tungnung zaw. Ahang bel, ama' hong palaina thukhun pen, thuchiam hoihzaw tunga kibulphuh thukhun ahih manin, thukhun lui sanga thupizaw ahi.
Thukhun Thak
7 Tua thukhun masa pen a chinlahna om lou na hi leh, thukhun dang zon kul lou ding ahi. 8 Ahihhangin, Pathian in tua mite demin thu a na gen a: Ngai un, Israel inkawte leh Judah inkawte tawh kala thukhun thak ka bawl ding hun hong tung dekta, chi-a Toupa'n phuangkhia hi. 9 A pu a pate uh Aigupta apan piikhe dinga baantanga ka kaihkhiak laia, amaute tawh kala ka thukhun bang hi lou ding hi. Ahang bel, amaute tua ka thukhuna muanhuai lou uh a, amaute kiheisan hi vengin, chi-a Toupa'n phuangkhia hi. 10 Tua nung chianga Israel inkawte tawh kala thukhun ka bawl ding hiai ahi: Amaute' lungsim sunga ka Dante koih ding ing a, amaute' lungtang pek tunga gelh nalai ding hi'ng. Amaute' Pathian hi ding ing a, amaute ka mite hi ding uhi, chi-a Toupa'n phuangkhia hi. 11 Mi'n a veng a pam kiang hiam, a sanggam kiang hiama: Toupa thei in, chi-a sinsak nawn lou ding hi. Ahang bel, amaute, a neupen apan a lianpen dong in kei hon theita ding uh hiven. 12 Ahang bel, amaute' diktatlouhnate ngaidam ding ing a, a khelhnate uh leh danbeia a gamtatnate uh theigige nawn lou ding hi vengin, a chi hi. 13 Hiai thukhun, a thak, a kichihna in a masapen zat nawn louh dingin a luisakta hi. A luita leh a zattheih nawnlouh pen a bei ding mah ahi.
Thukhun Lui
1 Thukhun masa in, biakna-a zat ding daan a nei a, leilam biakbuk zong a nei hi, 2 Biakbuk khat a kilam a, tua sunga dantan masa sung ah, meivak tunna mung, dawhkan leh a tunga siansuahsa tanghou beu kikoihte a om hi. Hiai dantan pen, Mun Siangthou, a kichi hi. 3 Puanzak nihna khena dantan pen, Mun Siangthoupen, a kichi hi. 4 Tua Mun Siangthoupen sung ah gim namtui halna khama kibawl maitam leh, khama kituam thukhun singkuang a om hi. Tua singkuang sung ah, mana koihna kham beita leh, Aron' chiangkhun sel tua baan ah, thukhun gelhna suangpekte a om hi. 5 Tua singkuang tung ah, thupina cherubte a om a, tuate'n a khaun khuhna sin a zakkhum uhi. Ahihhangin, hiai thilte nouneltakin tu'n i suut man kei uhi. 6 Hibanga bangkim a kibawl dimdiam khitin, tua dantan pawnung sung ah, biakna nasem dingin siampite a lut gige uhi. 7 Ahihhangin, dantan sungnung sung ah bel, siampilian kia a lut hi. Tua zong, kum khatin khatvei lei a lut a, sisan tawi louin a lut ngei kei hi. Tua sisan pen ama' khelhnate leh, tupkholh louha mite' khelhnate thoih nadingin a laan hi. 8 Hiai thil tungtawna Kha Siangthou in hon lah nop bel, biakbuk masa a din lai teng, Mun Siangthoupen sung lut theihna lampi hon ahi nai kei, chih ahi. 9 Ahang bel, tua thawnpiakte leh kithoihna thillatte'n biakbuka a bemite' sia-le-pha theihna a siangsak thei kei, chih, tu huna eite hon etsakna ahi. 10 Tua thillatte lah nek leh dawn leh, zeknei taka kisilna khawng ahi a, biakna dan thak hong tun mateng adinga kizang salam thil ahi lei uhi.
Thukhun Thak Sisan
11 Thil hoih hong tungtate tawh kisaia, Siampilian hihna tawh Khrist hong pai takin, mihing khuta lam hilou, biakbuk thupizaw leh buchingzaw sung ah a lut hi. Tua biakbuk pen bel, hiai leitung thilsiam ahi kei hi. 12 Amah zaw tua Mun Siangthoupen sunga a lut laiin, kelte leh bawngnoute' sisan tawiin a lut kei a, khatveia setden dingin ama' sisan mahmah tawiin a lut a, Tangtawn tatna a bawl hi. 13 A siangloua ngaihte tunga kelte leh bawngtalte' sisante leh bawngla vute thehna in pawlama amaute a siansak leh, 14 Khrist' sisan in nasep sisate apanin noute' sia-le-pha theihna siangsak zaw tham lou ding hia! Amah lah Pathian hing nasem ding a, sehtuam siangthoua hon bawl nadinga Tangtawn Kha tungtawna Pathian maia genbaangloua kilaan hita a! 15 Hiai hanga Khrist, thukhun thak palai hong hi ahi. Tua bel, sapte'n chiamsa Tangtawn gouluahna a tan theih nading-ua, thukhun masa nuaia talekte tankhe dinga amah hong sita ahi, chihna ahi. 16 Thusiah a om chiangin, a thusiahpa' sihna a kitelna kul sese ahi. 17 Ahang bel, tua thusiah pen, a thusiahpa' sih nunga kizang hi lei a, a dam laia kizang ngei lou ahi. 18 Hibang ahih manin, thukhun masa zong, sisan pang loua zat hi lou ahi. 19 Mosi in thupiak peuhmah mipite khempeuh kianga a phuankhiak laiin, bawngnoute leh kelte' sisan, tui tawh, samul sanau tawh, husawp hiangte tawh lain, tua laibuzial leh mipite a theh hi. 20 Ama'n; Na zuih ding ua Toupa' hon piak thukhun sisan hiai ahi, a chi hi. 21 Tua mah bangin, tua sisanin biakbuk leh zekthil saina vanzat peuhmah a theh hi. 22 Ahi tham a, bangkim sisana siansuah ding, Dan in a ngiat ahi. Sisan suah louin ngaihdamna himhim a om kei hi. 23 Tua bangin, vaanlam thilte' kibatpihte khempeuh, hibang kithoihna thillattea siansuah a kul hi. Ahihhangin, vanlam thil taktakte bel, hiaite sanga hoihzaw kithoihna thillata siansuah ahi. 24 Tua ahih manin, Khrist zaw mihing bawl mun siangthou ah a lut kei. Tua zaw a taktak pen batpih lei ahi. Ahihhangin, tu huna Pathian' maia eite taanga vading dingin, amah, vantung mahmah ah a valut zaw hi. 25 Amah zaw, vantunga a lut laiin, siampilian, ama' sisan hilou sisan tawia kum sima Mun Siangthoupen sunga a lut thakthak banga, amah kilaan thakthak dinga lut ahi kei hi. 26 Tua banga lut na hi lebel, leitung khuavannuai kisiam nungsang Khrist in tamveipi thuak zihzehta ve. Tu'n bel, kithoihna thillata amah a kilatna pansana, khelhna beisak dingin, setden dingin khatvei hong kilaan hi. 27 Mihing adinga khatvei sih seh ahi a, tua nung chianga thukhenna maituah dinga seh ahih bangin, 28 mi tampite khelhnate lamang dingin, Khrist khatvei latin a kilaanta hi. Amah a nihveina dingin hong kilang kik ding. Tua bel, khelhna tawh kisai ding hilouin, amah na ngakte adinga hotdamna hon puak dinga hong kilang ding ahi zaw hi.
Khatveia Setden Khrist Kilatna
1 Dan zaw thil hoih hong tung dingte' liim ahi a, a takte ahi kei hi. Tuabang ahih manin, a kumsima kithoihna thillat kilaan thakthakte pansanin, Dan in a be dinga hon naihte a buchingsak thei ngei kei hi. 2 Tua kithoihna thillatte n amaute buchingsak thei na hi leh, thillatte tawpta lou ding hia? Ahang bel, a be mite, setden dinga siansak hita ding uh a, a khelhnate uh hanga mawh kisakna nei nawn lou ding uh hiven. 3 Ahihhangin, kithoihna thillatte zaw, khelhnate a kumsima phawk thakthakna a suak lei hi. 4 Ahang bel, bawngtalte leh kelte' sisan in khelhnate lamang theilou hiven. 5 Tua ahih manin, leitunga Khrist hong lutlaitakin: Kithoihnate leh thillatte lunggulh lou chin a, kei adinga pumpi hon bawlsak zawta na hi. 6 Haltum thillatte leh khelhna thillatte kipahpih lou chin a, 7 tua ahihman a ke'n: Ngai in, laibuziala ka tungthu kigelh bangin, kei hiah om ing, Pathian aw, na deihlam hih dinga hong pai hita'ng, chi hi'ng, a chi hi. 8 Dan in tua bang kithoihnate leh thillatte a ngiat hinapi-in, ama'n: Kithoihna leh thillatte, haltum thillatte leh khelhna thillatte na lunggulh kei a, kipahpih zong na kipahpih kei, a chi masa phot hi. 9 Tua khitin: Kei hiah om ing, na deihlam hih dinga hong pai hita'ng, a chi lai hi. A nihna a tunkhiak theih nadingin, a masapen a nawlkhin hi. 10 Khatveia setden dinga Jesu Khrist pumpi kilatna tungtawnin tua Pathian' deihlam thilhih in eite hon siangthousakta hi. 11 Siampi peuhmah, a nisimin biakna nasemin a ding a, khelhna lamang thei ngeiloupi kithoihna thillat kibang a nisim mahin a laan thakthak hi. 12 Ahihhangin, hiai Siampi pen in bel, khatveia setden dinga, khelhnate adinga kithoihna thillat khat a latkhit takin, Pathian' taklam ah a tuta hi. 13 Tua nungsang, a melmate a khepek ngakna-a a kibawl ding ngakin a om hi. 14 Ahang bel, ama'n tua kithoihna thillat khat pansana a sianthousakte, a tawntung adingin a buchingsakta hi. 15 Kha Siangthou in zong hiai thu eite hon theisak a, a masapenin: 16 Tua nite nunga amaute tawh kala thukhun ka bawl ding hiai ahi: Ka Dan thute amaute' lungtanga koih ding ing a, a lungsim ua gelh nalai ding hi'ng, Toupa'n chi hi, a chi hi, 17 Tua baan ah: Amaute' khelhnate leh danbeia a gamtatnate uh thei gige nawn lou ding hi'ng, a chi lai hi. 18 Hiai khelhnate a kingaihdam khit nungsang, khelhna thoihna thillat himhim a kul nawn kei hi.
Upna Kip Kulna
19 Tua ahih manin, sanggamte aw, eite'n Jesu' sisan pansanin Mun Siangthoupen sung lut theihna kimuanna i neita hi. 20 Tua bel, eite adinga puanzak sung lut paisuak theihna lampi thak leh a hing kihong tawna lutna ahi. Tua puanzak bel ama' pumpi ahi. 21 Tua baan ah Pathian' inkawte tunga Siampi thupi ahipa khat nei i hi. 22 Upna pansana theihtelna neiin, lungtang taktakin Pathian naih ni. Ama'n mawh kisakna apan hon siangsak dingin i lungtangte a thehsiangta a, i pumpite zong tui siangin a silsiangta hi. 23 Thuchiam hon pepa muanhuai ahih manin, i thu-up kiptakin len ni. 24 Tua baan ah, itna leh nasep hoih lama kithathousak dingin, khat leh khat kiawlmawh tuah tek ni. 25 Tua bang dingin, mi pawlkhatte bangin, biakna kikhop tawpsan kei ni. Ni hong nai hulhul chih i theih bangin, kihanthawn semsem ni. 26 Ahang bel, thutak theihna i neih nunga, thei gegu-a i khelh lailai le zaw, khelhnate adinga thoihna thillat himhim om nawnta lou ahi. 27 Hong tung ngeingei ding thukhenna lauhuai leh, Pathian' melmate kangtum ding meikuang kia mabana nei zawta ding i hi. 28 Mosi' Dan zui lou mi peuhmah, theihpih mi nih hiam, thum hiamte' theihpihna pansanin, zahngaihna om het louin a si zel uhi. 29 Pathian' Tapa khe-a sikden mi, amah sehtuam siangthoua bawlna tua thukhun sisan pen thil sianglou banga bawl mi leh, hehpihna pepa Kha zahlaksak mi pen, bangzahta-a gawtna nazaw thuak taak hi dingin na um ua eita? 30 Ahang bel, phulak himhim keima' lak ding ahi, keima'n thuk ding ka hi, chipa leh, Toupa'n ama' mite tung ah thu a khen ding, chipa i thei hi. 31 Pathian hing' thukhenna khut thuak ding zaw thil mulkimhuai ahi. 32 Noute'n vaak na sankhit chil lai uh, thuakna donga nakpitaka panga na dinkip lai uh, tua hun paisa theigige un. 33 Khatvei vei tangpi' maia zahlaksakna leh bawlsiatna na thuak uh a, khatvei vei, tua banga thuakte na panpih uhi. 34 Keimah mah zong suangkula ka om laiin, non thuakpih uhi. Mi'n na neih leh lam uh hon suh laiun, lungdamtakin na thuak uhi. Ahang bel, gou hoihzaw leh touzaw na neih lam uh na theih man uh ahi. 35 Tua ahih manin, na kimuanna uh paimang kei un, tua in nakpitaka pahtakna lawh ding ahi. 36 Pathian' deihlam na hih khit chiang ua ama'n hon chiamsa pen na ngah theih nadingun, kuhkala sekdouna na neih ding uh kul ahi. 37 Ama'n: Sawt lou nung chiangin, a hongpai dingpa hong pai ding a, sawt hal lou ding hi. 38 Ahihhanga ka midiktat zaw, upna pansana nungta ding hi. A tonkik lebel, amaha ka kha in' kipahna nei lou ding hi, a chi hi. 39 Ahihhangin, eite zaw a tonkik a, hihmanthata omte laka pang i hi kei uh a, a um a, kha hotdama omte laka pang i hi zaw hi.
Upna
1 Upna bel i lamet thilte theitela muanzawhna ahi a, i muh louh thilte kiteltaka muhna ahi. 2 Hiai upna hangin ahi, tanglai mite'n phat a na lawh uh. 3 Pathian' thupiakin leitung khuavannuai a kibawl a, a kimuthei thil zong a kimuthei thil apan kibawl ahi kei, chih, upna pansanin i thei hi. 4 Upnain Abel in Pathian' mai ah, Kaina' thillat sanga hoihzaw, kithoihna thillat a laan hi. Pathian in a thillat a pompih laiin, tua upna hangin amah mi diktat, chi-a phat lawh ahi. Amah sikhin hinapi-in, tua upnain, thu a gen nalai hi. 5 Enokh in sihna a thuak louhna dingin, a upna hangin Pathian in a lamang a, a kimu zouta kei hi. Ahang bel, lakmanga a om ma-a Pathian lungtaisakpa, chi-a phat lawhsa a hita him hi. 6 Ahi a, upna pang louin Pathian lungtaisak theih ahi himhim kei hi. Amah kianga hong pai mi in, amah a om taktak, chih leh, amah zong taktak mi lawhchingsakpa ahi, chih a up teitei a kul hi. 7 Noa in thil muh nai louh tawh kisaia hilhkholhna a ngah laiin, Pathian launa siangthou neiin, a inkawte hutkhiak nadingin, upnain longpi a bawl hi. A upnain leitung mite mawh a tangsak a, upna pansana hong tung diktatna luahpa hong hita hi. 8 Abraham, nung chianga a luah ding gama pai dinga sap ahih laiin, a pai nading mun thei lou hinapi-in, upnain thu a mang a, a paita hi. 9 Pathian' gamchiam gam ah, gamdanga vamikhual bangin, upnain a vateeng hi. Thuchiam kikhat a luahpih Isak leh Jakob teen bangin, puanbukte ah a vateeng hi. 10 Ahang bel, ama'n suangphum kip neia kilam khawpi lamena ngak a na hi. Tua khawpi geelpa leh lampa Pathian ahi. 11 Abraham in amah teksia hinapi, Sara zong a chiing hinapi, Thuchiampa muanhuaia a seh manin, a upna pansanin chi suan theihna a nei hi. 12 Tuachi-in, hiai mi, misi tawh kibang hinapi-in, amah apanin vana aksite banga tam leh tuipi piaua sehnel simseng louh banga tam suante hong piang hi. 13 Hiai mite khempeuh sih donga upna neiin a na nungta uhi. Ahihhangin, tua chiamsa thilte luah louin a si uh a, hinapi-in, gamlapi apan galmuha muangin a kipahpih uhi. Leitung ah zaw mikhual leh khualtaam lei i hi, a kichi uhi. 14 Tua bang chi mite'n, amaua mawng gam lunggulha zong hita uh, chih a kilangsak mahmah uhi. 15 A nutsiatsa uh gam pen lunggulh hi le uh bel, kik nading hun lem a muta mahmah ding uhi. 16 Tua bang hilouin, gam hoih zaw vangam zong ahi zaw uhi. Tua ahih manin, Pathian in amaute adingin, khawpi khat a bawlkholhsak namah a, amaute' Pathian chi-a kiminlawh ding Pathian a maizum kei hi. 17 Pathian in Abraham a ze-et laiin, ama'n upnain kithoihna thillat dingin Isak a laan hi. Tua thuchiam ngahpa in a tapa tang neihsun a laan hi. 18 Tua thuchiam lah, Pathian in amah kianga: Isak tungtawnin na suante kisui ding ahi, a chih hinapi, 19 Pathian in misite kaithou thei ahi, chi-in a sep hi. Gentehna danin kigen leh, ama'n misite lak apan Isak ngah kik ahi mah hi. 20 Upnain Isak in Jakob leh Esau, amaute' tunung thu ding tawh kisaiin a vualzawl hi. 21 Upnain Jakob in, a sih dek kuanin, Josef tate a vualzawl a, a chiangkhun dawna kingaiin Pathian a bia hi. 22 Upnain Josef in, a sih dek kuanin, Aigupta gam apan Israelte paikhiak ding thu a gen a, ama' guhte tawh kisaiin thukhah thu a pia hi. 23 Upnain Mosi' nu-le-pate'n, amah a pian nung kha thum sung a sel uhi. Amaute'n amah naungek vantaang tunga mi ahi, chih a muh manun, kumpipa' thupiak nangawn a lau kei uhi. 24 Mosi a hong pichin nungin, upnain, Faro' tanu' tapa chih-a om ding a ut kei hi. 25 Hun tomchik sung khelh nopsaknate sunga buai sangin, Pathian' mite tawh bawlsiatna thuak ding a telzaw. 26 Ama'n mailama pahtakman a mitsuan manin, Aigupta gam goute sangin, Khrist' hanga zahlaknate, hauhna manphazawin a sep hi. 27 Kumpipa' thangpaihna lau louin Aigupta gam a nusia a, Muhtheihlouhpa a muh manin, a thuak teitei hi. 28 Aigupta tamasate hihmangthangpa'n, Israel tamasate kuamah tunga khut a khak louh nadingin, ama'n upnain Paikan leh sisan thehna a bawl hi. 29 Upnain Israelte Tuipi San ah lei hula pai bangin, a paisuak uhi. Aiguptate'n tuabanga hih a tum sam uh a, ahihhangin, tui in amaute a tummang hi. 30 Upnain Israelte'n Jerikho, ni sagih sung a kimvel uh a, tua Jerikho kulhbaangte a chimta hi. 31 lUpnain kizuaknu Rahab in enkhete a na zintun a, tua hangin, thumangloute tawh thahkhawmin a om kei hi. 32 Bang ka gen nalai dia le? Gideon thute, Barak thute, Samson thute, Jeftha thute, David thute, Samuel thute leh kamsangte thute gen ding chi lehang, hun kiching lou hi. 33 Tuate khempeuh in upna pansanin kumpigamte a zou uh a, thukhenna diktatin vai a hawm uh a, thuchiamte a ngah uhi. Amaute'n humpinelkai' kam a chihsak uh a, 34 meikuang thahatnate, thahatnabeiin a koih uh a, namsau hiamte a pel uhi. Amaute' hatlouhnate thahatna a suak a, kidouna phual ahte a hat mahmah uh a, gamdang sepaihhonte a nawhzak uhi. 35 Numeite'n a misite uh thoukikin a ngah uhi. Midangte'n zong a melmate uh khuta engbawlna leh thahna a thuak laiun, khahkhiaka om ding a teel kei uhi. Ahang bel, thawhkikna hoihzaw a ngah nop man uh a na hi. 36 Midangte'n mawkbawla nuihsanna leh chianga sat a thuak uh a, khainianga henna leh kolbutna nangawn a thuak uhi. 37 Suanga denna a thuak uh a, sing atna-a attanin a om uh a, ze-etna a thuak uh a, namsaua satlupna a thuak uhi. Belamvunte leh kelvunte silhin taksapna leh bawlsiatna leh engbawlna thuakin a vakvai uhi. 38 Leitung amaute omna taak hilou tua mite, gamdai-gamkeu leh mualtung khawng ah a vakvai uh a, kawkhuk leh leihawm peuh ah a teeng kawikawi uhi. 39 Hiai mite khempeuh in, a upna uh hangin phat na lawhta mah le uh, amaute kuamah in tua thuchiam a luah kei uhi. 40 Ahang bel, Pathian in eite lungsima hon neiin, thil hoihzaw a na gel a, eite telloua amaute kia buchinsak louh ding pha a sa-a ahi.
Khrist' Thuakzawhna
1 Tua ahih manin, tua zaha theihpihmi meipi thupi in hon kimkot ahih nung, hon dai khempeuh leh baihlamtaka hon tuailuaisak pahpah khelhna paikhiain, i maia tai nading kichiamtehna ah kuhkaltaka taiin, 2 thu-up bulphuhpa leh kimsakpa Jesu mitsuan ni. Ama'n zaw, Pathian in ama' maia a koihsak lungnopna mitsuanin, khros zahlakna bangmahin a sim kei a, khros sihna a thuak a, tua khitin, Pathian' kumpitutphah taklam ah a tuta hi. 3 Noute, baha na lungkiak louh nadingun, tua zaha mikhialte' douna thuakzoupa ngaihsun un. 4 Noute'n sisan luang hialin khelhna na dou nai tadih kei uhi. 5 Tate banga noute kianga hanthawnna thu kigen na mangngilhta ua hia? Tua hanthawnna thu bel, Ka tapa aw, Toupa' thununna neungaih kenla, hon taihilh chiangin, lungke ken. 6 Ahang bel, Toupa'n a itte thunun a, ta taka a saan peuhmah sawi nak hiven, chi-a kigelh ahi. 7 Haksatna peuhmah thununna ahi, chi-in thuak un. Toupa'n ta taktakte na hihna bangun hon thunun ahi. A pa' thunun louh ta kua om ngei ahia? 8 Thununna lawh lou na hih ua leh sawn na hi ua hilou ding hia? Ta tak peuhmah in thununna thuak ahi. 9 Tua thamlouin, eite khempeuh in sa lam ah pate i nei uh a, amaute'n hon thunun uhi. Tuabang mahin, amaute i zahtak hi. Tua bang ahih manin, i hin nadingin, khate' Pa' thunuaia i kipiak ding hi zaw tham lou ding hia! 10 I pate'n, amau' phasak bangbangin, hun tomchik sung hon thunun uhi. Pathian in bel ama' siangthouna i tan sam theih nadingin, eite hoih nading mahin, hon thunun zaw hi. 11 Thununna peuhmah i thuak laitakin, a nuamin a kilang kei a, haksain a kilang hi. Ahihhangin, a nung chiangin, tua thununna nuaia kisinte adingin, gah khamuanhuai, diktatna a gahsuah hi. 12 Tua bang ahih manin, na bantha hatloute uh leh, na khuk zawte uh khauhsak un. 13 Khebaite poihlong semsem lou a, damsaka na om zawk nadingun, na khete uh adingin lampi mam bawl un.
Pathian Nial Lauhuaina
14 Mi khempeuh tawh kilema nungta ding leh siangthou dingin theihtawp suah un. Siangthouna louin, kuama'n Toupa a mu kei ding hi. 15 Kuama'n Pathian' hehpihna na ngah khelh louh nadingun pilvangtakin kiveng un. Tua baan ah, buaina piangsak a, mi tampi ninsak ding khaatna zung kuamah sunga hong sel louh nadingin, pilvangtakin kiveng un. 16 Kuamah numei pasal kala paktat lou dingin pilvang un. Ahih kei leh, Esau in a uzaw hihna hamphatna, an kam khata a khot banga Pathian zahloua na om louh nadingun pilvangtakin kiveng un. 17 Na theihsa uh bangin, Esau in a khawnungin hiai vualzawlna luah nuam mahleh, nawi khina om a, khitui luanga a zon hangin, lungheina a mu theita kei hi. 18 Noute, khoih theih leh meia kang thei mual hong tung na hi kei uhi. Khawmial leh mei vom leh huihpi in a tuamna leh, 19 pengkul ginna, ahih kei leh, thugen awging, a zate'n a lauh ua, amaute kianga thu gen nawn lou dinga a ngetna mun uh, tua mual hong tung zong na hi sam kei uhi. 20 Tua mual zaw, ganta nangawn in a sukkhak leh, suanga denlup teitei ding, chih thupiak a kizatna mun ahi a, amaute'n a thuak zou kei uhi. 21 Tua bang thil muh mulkimhuai lua ahih manin, Mosi in: Ka lau lua a, ka liing, a chi hi. 22 Ahihhangin, noute' hong tunna Mual, Pathian hing' khawpi, vaanlam Jerusalem ahi zaw hi. Vansawltak simseng louhte kiang hong tung na hita uh a, 23 Tamasa saptuam pawl kikhawmte, a minte uh vantunga kigelhte kiang hong tung na hita uh a, mi khempeuh tunga Thukhenpa Pathian kiang leh, bukimsaksa mi diktatte' khate kiang hong tung na hita uhi. 24 Tua baan ah, Thukhun Thak palai Jesu kiang leh Abel' sisan sanga thu hoihzaw gen, tua sisan thehna hong tung na hita uhi. 25 Kuamah in Thugenpa na nial louh nadingun pilvang un. Leitunga amaute vauhilhpa nialte a suahtak kei uleh, vantung apan hon vauhilhpa kiheisan lehang, i suakta kei sem ding hi. 26 Tua laiin, ama' aw in lei a liingsak hi. Tuin ama'n: Lei kia hilouin vante zong khatvei liingsak kik lai ding ka hi, chi-in thu a chiamta hi. 27 Khatvei liingsak kik, a chih bel, a lingtheiloute omdensak a, a lingthei thilsiamte a lakkhiak ding a genna ahi. 28 Tua bang ahih manin, a lingtheilou kumpigam ngah i hih nung, kipahdan siam ni. Zahdan leh laudan siamin, a saan thamin Pathian bia ni. 29 Eite' Pathian zaw thil kangtum thei mei ahi.
Hanthawnna Dangte
1 Sanggam ki-ittuahnain ki-it gige un. 2 Mikhualte zindou siam ding mangngilh kei un. Zindou siam mi pawlkhatte'n theihlouh kalin, vansawltakte zinin a dou ngei uhi! 3 Koltangte, amaute tawh tangkhawm banga kingaihsunin, phawk gige un. Bawlsiatna gelgawtna thuakte zong, a thuakte banga kingaihsunin, phawk gige un. 4 Pathian in angkawmte leh numei pasal kala paktatte tunga thu khen ding ahih manin, mi khempeuh in nupa hihna pahtawi ding ahi a, nupa lupna zong buahsak louh ding ahi. 5 Na nuntakna uh, dangka sum deihgawhna apan kem unla, na neih zah utawh lungkim un. Ahang bel, Pathian in: Nang hon nuse ngei lou ding ing a, hon taisan ngei lou ding hi'ng, a chi hi. 6 Tua ahih manin, kimuangtakin: Toupa kei hon panpihpa hive'n, lau lou ding hi'ng, mihingte'n bang hon lawh thei ding ahia? i chi hi. 7 Noute kianga Pathian thu gen, na makaite uh theigige un. Amaute' nuntak dan apana gahte en unla, a upna uh ettehin nei un. 8 Jesu Khrist zaw zanni leh, tuni leh, Tangtawnin a ngeingei ahi. 9 Sinsakna tuam chiteng in a kaihmang theihin om kei un. Nek hanga phatuam lou zekbawl ante tawh kisai dante-a kihen sangin, hehpihna apana i lungtangte hatsak a hoihzaw hi. 10 Eite'n maitam khat i neih bel, biakbuka nasemte'n a nek theih louhna uh maitam ahi. 11 Siampilian in, Mun Siangthoupen sung ah, gantate' sisan a tawilut a, a luangte bel, giahphual pawlam ah a kihaltum hi. 12 Tua bangin, Jesu'n zong, ama' sisan mahmaha mite hihsiangthou dingin, khawpi kongpi pawlam ah a thuakta hi. 13 Tua ahih manin, ama' zahlakna thuakpih-in, giahphual pawlam ah, amah kiang ah pai ni. 14 Ahang bel, hiai ah khawpi kip leh omden ding i nei kei a, a hong om ding khawpi lunggulh in i zong zaw hi. 15 Tua bang ahih manin, Jesu' tungtawnin, Pathian kiang ah, phatna thillat laan gige ni. Tua mah a min gupna mukte apan gahsuah ahi. 16 Tua baan ah, thil hoih hih ding mangngilh kei unla, na neihsa uh midangte hawm sam un. Ahang bel, tua bang thillatte ah Pathian a lungdam hi. 17 Na makaite uh muangin thu mang unla, amaute' thunuai ah lut un. Noute hon kem a, na hinna uh vengte ahi uh a, tua kepna thu a tut teitei nading uh neisawn ahi uhi. A nasep uh puakgik hiloua lungnopna a suah zawk nadingin, amaute' thu mang un. Ahang bel, tua bang a hih kei leh, noute adinga zong phatuam lou ding ahi. 18 Koute adingin thuum un. Banglam peuha phathuaia nuntak ding lunggulhin, sia-le-pha theihna siang ka nei uh, chih theitel in ka muang uhi. 19 Adiakin, noute kianga sawlkika ka hong om baih nadingin, hon thuumsak un, chi-in kon ngen hi. 20 Belamchingpa thupi i Toupa Jesu ahi a, Tangtawn thukhun sisan tungtawna, misite lak apan amah kaithoupa Pathian ahi. Amah khamuanna Pathian ahi a, 21 ama'n a deihlam hih nadingin, thil hoih chitengin noute hon thuam henla, ama'n koute sung ah zong, Jesu Khrist tungtawnin, a kipah lam sem hen. Jesu Khrist tung ah Tangtawn Tangtawnin thupina omdenta hen. Amen. 22 Sanggamte aw, kon hanthawnna thute thuak teitei dingin kon ngen hi. Lai tomchik lei ahi noute kianga kon gelh. 23 I sanggampa Timothi a kikhahta, chih na theih uh ka deih hi. Amah a hong tun pah aleh, noute mu dingin amah tawh kong ton ding hi. 24 Na makaite khempeuh uleh, misiangthoute khempeuh chibai hon na buksak un. Itali gam apan hong paite'n noute chibai hon khak uhi. 25 Noute khempeuh tung ah hehpihna omta hen. Amen.
1 Kei, Pathian leh Toupa Jesu Khrist' sila Jakob in, akitheh-zak nam sawmlenihte kiang ah lai kon gelh a, noute chibai kon buk hi.
Ze-etna in Atup
2 Ka sanggamte aw, lam tuamtuam tampitaka ze-etna na tuah chiangun lungnopna siang ahi chi-in ngaihsun un. 3 Ahang bel, hiai na thei uhi: Na upna uh ze-eta a om chiangin, tua in lungduaina a gahsuah hi. 4 Lungduaina in noute sunga a kiching a sep khit chiangin, noute hon pichingsak a, tua in chinlahna neilouin hon bawl hi. 5 Noute laka kuapeuh in tua theihna pilna a taksap leh, mi khempeuh kianga it lou leh tai loua pepa Pathian kiang ah ngen hen, ama'n a pe ding hi. 6 Ahihhangin, ama'n umlah louin, um taktakin ngen hen. Ahang bel, a umlah mi pen, huih in a mut leh seep tuipi tuihual tawh kibang ahi. 7 Tua bang mi in Toupa apan bangmah ngah ding kinem kei hen. 8 Amah, lungsim thuah nei ahi a, a hih khempeuha kiplou mi ahi. 9 Sanggam khawsakna niam in a dinmun sang sial hen. 10 Ahihhangin, ahau mi bel, gampalak paak banga mangthang ding ahih manin, a dinmun niam sial hen. 11 Ahang bel, ni hong suak a, hong sat mahmah chiangin, pakkung a hong vuai pah a, a pak a pulh a, a kilawmna a mual hi. Tua mah bangin, ahau mi zong a sumsin laitak nangawnin a vuaimang ding hi. 12 Ze-etna thuaka kuhkal mi, mi nunnuam ahi. Ahang bel, ze-etna a thuak mualsuah khit chiangin, hinna lukhu a ngah ding hi. Pathian in amah itte adingin, tua hinna lukhu a chiamsa ahi. 13 Gilou hih dinga zolna tuak mi kuamah in, Pathian in hon zol, chi kei hen, Gilou hih dingin, Pathian zoltheih ahi kei a, ama'n lah kuamah a zol kei hi. 14 Michih ama' lunggulhna gilou in a kaihmang chiangin, zolna tuak ahi zaw hi. 15 Lunggulhna gilou in nou a paai chiangin khelhna a piang a, khelhna a pichin chiangin sihna a tun hi. 16 Ka sanggam deihthawhte aw, khemzawhin om kei un. 17 Thawnpiak hoih leh bukim peuhmah tunglam apan ahi a, vaan vakte' Pa apan hong tungsuk ahi. Amah ah, kikhel themthum, chih a om kei a, kiheikik nading lungsim neuchik zong a om kei hi. 18 Ama'n ama' deihtelna bangbangin, thutak thu pansanin, eite tain hon neita hi. Tua bel, eite ama' thilsiamte laka gahmasate i hih theih nading a ngimna ahi. 19 Tua ahih manin, ka sanggam deihthawhte aw, hiai chiamteh un: Kuapeuh mah, thu ngaihkhiak lam kilawp hen. Thugen lam ah leh heh lam kilawp kei hen. 20 Ahang bel, mihing' hehna in Pathian deihlam diktatna a gahsuah kei hi. 21 Tua ahih manin, nitna khempeuh, lungsim sia-a dimna khempeuh koihmang unla, noute sunga thu kipawi, lungnemtakin saang un. Tua thu in na hinna uh hon hondam thei hi. 22 Thu ngaikhe leltak hi-in bel noumau kikhem kei un. Thuzuite hi zaw un. 23 Kuapeuh, thu ngaikhia a, zui tuan lou mi zaw, hibang ahi: Amah limlang ah a maitang a kien a, 24 a kiet khitin, a paikhia a, bangchi bang melpu hi hiam, chih a kimangngilh pah hi. 25 Ahihhangin, kuapeuh, noplenna omsak tua daan hoihkim en a, zuih zong zui mi leh a zaksa mangngilh loua zui mi ahih leh bel, a hih peuhmah ah a ma vang ding hi. 26 Noute laka kuapeuh, sabiak limsaka kingaihsun napi-a, a lei a thunun kei leh, amah kikhem lei ahi. Hibang mi' sabiak amawkna ahi. 27 Pathian leh Pa' mitmuha a siang leh nin baang lou sabiak ahih leh, hiai ahi: Tagahte leh meigongte a lungkham laitak ua veh leh, leitung thila kibuahsak louh ahi.
Upna in Khentuam Neilou
1 Ka sanggamte aw, i Toupa Jesu Khrist, thupina Toupa umte na hih manun, mi khentuam nei kei un. 2 Na kikhopna inn uah kham zungbuh bun, puan hoih silh mi khat hong lut thei. Tua chiangin, puanse nipnep silh, mi genthei khat zong hong lut thei. 3 Puan hoih silh mi pen deihsak tuamin: Nang ading hiai ah tutna hoih om e, na chi mai thei uh. Mi genthei pen kiang ah: Tua ah na ding in, na chi mai thei uh. Ahih kei leh: Nang ka khebul ah, suai tung ah tu in, na chi mai thei uh. 4 Tua banga na hih uleh, noute laka khentuam nei na hi kei ding ua hia? Ngaihsutna gilou neia thukhen na hi kei ding ua hia? 5 Ka deihthawh, ka sanggamte aw, ngai dih uh: Pathian in, upna-a hau dingin leitung mite mitmuha mi gentheite a teel kei-a hia? Amah itte adinga a chiamsa kumpigam luah dingin, mi gentheite a teel kei-a hia? 6 Noute'n lah, a gentheite na zahlaksak uhi. Ahaute hi lou maw noute hon nesia? Ahaute hi lou maw thukhenna inn-a noute hon kailut? 7 Ahaute hi lou maw noute hong kilawhna min manpha gensia? 8 Laisiangthou sunga kigelh, kumpi daan na zuih taktak chiangun, a hihdik na hi ding uhi. Ahang bel, tua kumpi daan in: Nang na ki-it bangin na veng na pamte it in, a chi hi. 9 Deihsaktuam na neih chiangun bel, a khial na hi ding uhi. Dan palsatte, chi-in Dan mah in hon mawhpaih ding hi. 10 Dan a vekpi-a hoih sa, ahihhanga khat leltaka kipalpai mi peuhmah zong, Dan khempeuh palsata mawh ahi. 11 Ahang bel, Angkawm ken, a chipa'n, Tualthat ken, zong a chi lai hi. Ang na kawm louh hangin, tuai na thah leh, Dan palsat mi na hi veve ding hi. 12 Noplenna daan pansana thukhenna tuak dingte bangin, thu gen unla, gamta un. 13 Ahang bel, zahngaihna neilou mi peuhmah in zahngaihnabeia thukhenna a thuak ding hi. Thukhenna tunga vualzou, zahngaihna ahi!
Upna, a Nasep-thilhih ah Kilang
14 Ka sanggamte aw, mi'n upna ka nei, kichi mahleh, nasep thilhih a neih kei leh, bang phatuam ding ahia? Tua bang upna in amah a hondam thei dia hia? 15 Sanggampa khat hiam, sanggamnu khat hiam in silh ding leh nek ding a tasam thei hi. 16 Tua bang mi kiang ah, noute laka khat peuh in: Khamuangtakin pai inla, lumtak leh vahtakin na omta in, chi-in, a pumpi taksap awng hu ding bangmah pe kei leh, bang phatuam mawk ding ahia? 17 Tua mah bangin, upna in nasep thilhih a neih kei leh, amah kia-a omin a si ahi. 18 Ahihhangin, noute laka khat peuh in: Nang upna na nei: ke'n nasep thilhih ka nei, a chi mai thei. Ahih leh, nasep thilhih pang louin, na upna hon lak ve le. Ke'n nasep thilhihin ka upna kon lak ding. 19 Pathian khat a om, chih na um hi. Hoih e! Dawite nangawn in tua a um uh a, a liing hiai uhi. 20 Nang mihai, nasep thilhih nei lou upna a si ahi, chih a kitelna na deih maw? 21 Eite hon suangpa pubul Abraham in, maitama a tapa Isak a lat laitakin, tua nasep thilhihna ah, Pathian in amah diktata sim ahi kei-a hia? 22 A upna, nasep thilhih tawh a ton a, nasep thilhihin a upna a bukimsak, chih na mu hi. 23 Abraham in Pathian a um a, Pathian in tua a upna, ama' diktatnain a simsak, chi-a Laisiangthou in a gen bukimsak ahi. Tuachi-in, amah, Pathian' lawm, chihin a om hi. 24 Tua ahih manin, upna kia hilouin, mi a thilhih ah diktansak ahi, chih na thei hi. 25 Tua mah bangin, kizuaknu Rahab in enkhemite giahna a piak a, lam tuama a sawlkhiak laiin, tua a thilhihna ah, Pathian in amah dik a tangsak hilou maw? 26 Kha telloua pumpi a si ahih bangin, nasep thilhih neilou upna zong a si ahi.
Upna in Lei Thunun
1 Ka sanggamte aw, Pathian in, a sinsakmi eite tunga khauh zaw-a thu khen ding ahi, chih na thei uhi. Tua ahih manin, noute laka tampi, sinsak mi hi kei un. 2 Eite khempeuh lam tampi ah i kipalpai hi. Mi kuapeuh, kampau lama a kipalpaih kei leh, amah mi piching ahi a, a pumpi thunun thei ahi. 3 En dih: Sakolte i thunun theih nadingin, a kam uah kamkaihna i bulh a, tua chiangin, a pumpiun i kaihei thei hi. 4 Ahih kei leh, etteh ding tuilong la ni. Tuilongte lianpipi ahi uh a, huih hattak in a muta pai ahi uhi. Hinapi-in, longpu in kaihheina neuchikin a utna lamlam ah a kaihei hi. 5 Tua mah bangin, lei pen, mihing pumpi kahiang neuchik ahi. Ahihhangin, nakpitakin a kisial nak hi. Meiek neuchik in gam lianpi a kaatdan ngaihsun dih ua. 6 Lei zong meikuang ahi. Pumpi kahiangte laka khat, diktatlouhna lompi ahi. Mihing hinna a vekpi-in a sesak thei a, mihing nuntak zia khempeuh a kaangsak hi. Tua lei, amah mah zong gawtmun meia kaang ahi. 7 Ganhing namkim, huihkhua-a lengte, leitunga bokvakte leh tuia omte, a kikhoizual thei a, mihingte'n tuate a khoizual uhi. 8 Ahihhangin, kuama'n lei a khoizual thei kei. Gilou om kinken thei lou ahi a, sihna gu tawh kidim ahi. 9 I leiin i Pathian leh Pa i phat a, i lei mahin Pathian batpiha bawl mihingte i hamsiat zel hi. 10 Kam khat apanin phatna leh hamsiatna a pawt. Ka sanggamte aw, hibang ding hi lou hi. 11 Tuinak khat apan tui lim leh tui limlou a pawtkhawm thei-a hia? 12 Ka sanggamte aw, theipi kung in oliv gah a suah thei-a hia? Ahih kei leh, grep gui in theipi gah a suah thei-a hia? Chikhuk in zong tui siang a suah theih louhpi.
Upna in Pilna Gahsuah
13 Noute laka a pii leh a theisiam kua ahia? Tua bang mi in gamtat hoihin tua pilna leh theihsiamna kilangsak hen. Pilna apan hong piang nunnemna pansanin, nasep thilhihin tua kilangsak hen. 14 Ahihhangin, noute'n lungsunga kihazatna a kha mahmah leh angsung khualna nei na hih uleh, kisial vial kei un. Ahih kei leh, thutak nialin zuautat kei un. 15 Tua bang pilna zaw, tunglam apan ahi kei a, leilam apan, mihing pianpih lungtang apan, dawimangpa apan ahi zaw hi. 16 Noute laka kihazatna leh kinakna omna peuh ah, buaina leh gamtat gilou chiteng a om hi. 17 Ahihhangin, tunglam apan pilna bel, a masapenin a siangthou phot hi. Tua chiangin, kilemna a deih a, midang a khual a, nuailut a siam a, a zahngaithei a, gah hoih a suah a, khentuam a nei kei a, a lepchiah kei hi. 18 Kilemna bawlte 'n, lemna tawh khaichi a pawi uh, a gah diktatna a at uhi.
Upna in Kingaihniamna Gahsuah
1 Noute laka kidouna leh kinakna bangin omsak ahia? Noute' pumpi kahiangte sunga lunggulhna kisualte apan hilou maw? 2 Nakpitaka lunggulhna na nei uh a, lah na ngah kei uhi. Na that uh a, na deihgawh uh a, na lunggulh uh lah na ngah thei kei uhi. Na kitawng uh a, na kidou uhi. Na nget louh manun, na nei kei uhi. 3 Na nget chiangun zong, noumau nopsak nading na ngim uhi. Na ngim uh a dik louh manin, na nget uh na ngah kei uhi. 4 Angkawmhatte aw, leitung tawh lawmta-a kineihna zaw, Pathian tawh kimelmakna ahi, chih na thei kei ua hia? Leitung' lawm hih ding a teel mi peuhmah, Pathian' meima ahi. 5 Ahihkei leh, Pathian in eite sunga Kha a teensak pen, thikthuse mahmah ahi, chi-a Laisiangthou in a gen, a mawkna-a gen na sa ua hia? 6 Ahihhangin, ama'n hehpihna tamsem eite hon pia hi. Tua hangin ahi ama'n: Pathian in a kisatheite dou a, a kingainiamte bel hehpihna pia hi, a chih. 7 Tua a hih nung, Pathian' nuai ah lut unla, giloupa nang un. Hi leh, amah noute apan a taimang ding hi. 8 Pathian naih un, hileh, ama'n hon naih ding hi. Nou mikhialte aw, na khut uh silsiang un. Nou lungsim thuah neite aw, na lungtang uh hahsiang un. 9 Lungkham unla, dah unla, kapkhia un. Na nuih uh kahna suaksak unla, na lungnopna uh lungkhamna suaksak un. 10 Toupa' mai ah kiniamkhiak un. Hi leh, ama'n hon domsang ding hi. 11 Sanggamte aw, kigense kei un. A sanggam gense mi, ahih kei leh, a sanggam tunga thu khen a, mawhsa mi in Dan gensia-a thukhen ahi. Dan gensia-a thu na khen chiangun a zui lou na hi pah uh a, Dan tunga thukhen na hi uhi. 12 Dan Pepa leh Thukhenpa khat kia a om. Amah ahi, hon hondam thei leh hon hihmangthang thei. Ahihhangin, na veng na pam tunga thu khen a, mawhsa ding nang kua na zenzen a?
Upna in Pathian tunga Kingakna Gahsuah
13 Tuni hiam, zingchiang hiamin, hiai khawpi, tua khawpi ah i hawh ding a, kum khat taamin sum i sin ding a, sum i lam ding, a chi noute'n na ngai un. 14 Zingchianga bang hong tung ding hiam, chih na theih louhpi uh. Na hinna uh bang ahia? Na hinna uh, tuimei tomchik hong kai a, theng kik pah bang lei ahi. 15 Toupa'n pha a sak leh i dam dia, hiai bang, tua bang hih le'ng, na chih zawk ding uh ahi. 16 Noute na kisial uh a, na pau uang uhi. Tua banga kisialna khempeuh gitlouhna ahi. 17 Tua bang ahih manin, thil hoih hih ding kilawm thei napi-a hih lou mi peuhmah mi khial ahi.
1 Nou ahaute'n ngai dih uh. Noute tunga gim gentheihna hong tung ding ahih manin, kap unla, mau un. 2 Na hauhnate uh a muatta. Na puante uh siim in a negaita. 3 Na kham uh leh na ngunte uh a mualta. A molhna in noute demin theihpihna thu a gen ding a, mei bangin na sa uh a kaang ding hi. Noute'n lah ni nanungte ah hauhna na khawlkhawm uhi. 4 En un! Lou nasema na goihte' uh' thaman pe louin, na kheem uh. Tua thamante, noute demin a kikou a, Toupa Vanglianpen in tua buhlate' kikou a za hi. 5 Leitung ah nuamtat luain na nungta uh a, pumpi nopsakna sung ah na buai uh a, gawh ding ganta bangin na kivak thauta uhi. 6 Noute hon nang lou a diktatte na mawhpaih uh a, na that uhi.
Upna in Ngakzou
7 Ka sanggamte aw, tua bang ahih nungsang, Toupa hong pai dongin thuakhattakin om un. Loukhou mi in lou apan gah manpha a ngak a, vuah masate leh vuah nanungte thuakhattaka a ngak dan en un. 8 Toupa hong pai nading naita ahih manin, noute zong thuakhattakin om unla, kiptakin ding un. 9 Sanggamte aw, kiphunsan kei un. Tua ahih keileh, Pathian' thukhenna na thuak ding uhi. Thukhenpa kongkhak bula ding ahi aw! 10 Ka sanggamte aw, kamsangte ettehin nei un. Amaute'n Toupa' minin thu a gen uh a, thuakna a tuah chiangun, lungduai mahmahin a thuak uhi. 11 Na theihsa uh bangin, a thuakhatte nunnuam i sa uhi. Job' thuakhat dan na zata uhi. Atawpa Toupa'n amah adinga bang hihsak hiam, na muta uhi. Toupa'n lainatna leh zahngaihna a hau hi. 12 Ka sanggamte aw, tua teng baan ah, kichiam kei un. Vaan louin zong, lei louin zong, ahih kei leh, thil dang himhim louin kichiam kei un. Hi, na chih uh, ahi hi henla, Hilou, na chih uh, ahilou hi hen. Tuachi louin zaw Pathian thukhenna na thuak ding uhi.
Upna in Midangte ading Thuumsak
13 Noute lak ah, buaina tuak a om hia? Pathian kiang ah thuum hen. Kipak a om hia? Phatna late sa hen. 14 Noute lak ah, china a om hia? Amah adinga thuumsak ding leh, Toupa min siala amah sathau nilh dingin saptuam upate samsak hen. 15 Upna tawh thuumna in china a damsak ding. Toupa'n amah phong ding ahi. Amah a na khialta ahih leh, Toupa'n ngaidam ding ahi. 16 Tua ahih manin, hihdama na om theih nadingun, na tatleknate uh kipulaktuah un. Mi diktat' ngetna thuumna a vanglian a, thil tampi hih thei dingin tha a nei hi. 17 Elija zong, eite mah banga pianken nei mihing khat ahi. Vuah zuk louh nadingin a lungtang khempeuhin a thuum a, kum thum leh a kimkhat, tua gam ah vuah a zu kei hi. 18 Amah a thuum kik a, Pathian in vaan apan vuah a zusak a, lei in gah a suah hi. 19 Ka sanggamte aw, noute laka khat peuh, thutak apan a pialmang chiangin, midang in na piikik un. 20 Hiai chiamteh un: Mikhial a lampialna apan piikik mi peuhmah in, sihna apan ama' hinna hondam ding a, a khelhna tampite a khuhsak ding hi.
1 Kei, Jesu Khrist' sawltaklian Peter in, Pathian' teelte Ponto gam, Galatia gam, Kapadokia gam, Asia gam leh Bithunia gama kithehzaka khualtaamte khempeuh kiang ah lai kon gelh hi. 2 Noute, Jesu Khrist thu mang ding leh, Pa Pathian theihkholh banga Kha' sehtuam siangthouna tungtawna, Jesu Khrist' sisan theh tang dinga Pathian' teelte na hi uhi. Hehpihna leh lungmuanna noute tung ah khang semsem hen.
Lametna Hing
3 I Toupa Jesu Khrist' Pa a hipa Pathian phatin om hen! Ama'n a zahngaihna lian mahmah in pianthakna eite hon peta. Tua bel, misite lak apan Jesu' thawhkikna tungtawna om lametna hing i tan nadinga pianthakna ahi. 4 Tua baan ah, eite adinga vantunga kikoih, a sethei lou, a nin thei lou leh a mual thei lou gou luahna i tan nadinga pianthakna ahi. 5 Hun nanunga latsak dinga mansa-a om, tua hotdamna hong tun masiah adingin, Pathian' vangletna in na upna uh tungtawnin noute hon kembit hi. 6 Tua ahih manin, tu hun tomchik sung ze-etna namkim nuai ah lungkhamna thuak tadih mah le uchin, hiai hotdamna ah nakpitakin na lungnuam uhi. 7 Meia halsiang nung nangawna mangthang thei kham sik sangin na upna uh tak mahmah a manpha zaw hi. Khrist hong kilat chianga, na upna uh takna kilang a, phatna leh thupina leh pahtawina a suah theih nadingin, hiai ze-etnate hong tung ahi. 8 Amah mu lou napi-in na it uhi. Tu'n amah mu lou napi-in na um uh a, a kigenkhe theilou leh a thupi mahmah lungnopnain na kidim uhi. 9 Na upna un a tup a ngim, tua na khate uh hotdamna na ngahta uhi. 10 Kamsangte'n hiai hotdamna tawh kisaiin, pilvangtakin thu a kan kawikawi uhi. Hiai kamsangte'n noute tunga hong tung ding hehpihna thu a nagenkhol uhi. 11 Amaute' sunga om Khrist' Kha in Khrist thuak nading thu leh a nunga zui ding thupina a genkholh laiin, amaute'n bang hun leh bang chi banga hong tung ding hiam, chih thei nuamin a zong uhi. 12 Vantung apan Pathian in hon sawl Kha Siangthou pansanin, mite'n noute kiang ah tangthupha hon hilh uhi. Tua tangthupha mah, kamsangte'n a na genkholhsa uh ahi. Tua banga a genkholh laiun, amau' nna kisep hilouin, noute adinga sem ahi uh, chih amaute kiang ah theihsak ahita hi. Vansawltakte nangawn in hiai thilte velphaak a lunggulh mahmah uhi.
Siangthouna
13 Tua bang ahih manin, lungsim kisakkholhna puan teeng unla, kithunun un. Jesu Khrist hong kilat chianga, Pathian in noute hon piak ding hehpihna ah na lametna uh kiptakin nga unla, 14 ta thumangte bangin, nidang lai sa utna gilou zuiin nungta kei un. Bangmah na theih louh laiun, tua bangin na na nungta uhi. 15 Tu'n bel, noute hon sampa a siangthou bangin, na nuntakna khempeuh uah siangthouin nungta un. 16 Ahang bel, Kei ka siangthou bangin noute siangthou un, chi-in a na kigelh hi. 17 Gup tuam neilou a, mi chih nasep tunga thukhenpa kianga, Pa, chi-a sama beel na hih nungsang uh, zahtak leh lau thuahin leitung ah mikhual bangin nungta un. 18 Ahang bel, na pu na pate ua pana na nuntakna uh kisesa apan a mangthang thei ngun, ahih kei leh khama tat na hi kei uh a, 19 genbaanglou, ahih kei leh, melhemnabei belamnou' sisan banga a manpha mahmah Khrist' sisana tat na hi zaw uh, chih na thei uhi. 20 Amah zaw leitung kisiam ma-a teelkholhsa, noute hanga tu hun nanunga Pathian in hon latsak ahi. 21 Ama' tungtawnin, Pathian na um uhi. Pathian in misite lak apan amah a kaithou a, thupina a khusak hi. Tua ahih manin, na upna uleh lametna na ngakna uh Pathian ahi. 22 Tu'n, Kha tungtawna thutak zuihna pansanin na hinna uh na kisiansuahta uh a, na sanggamte uh na it taktakta uh a, lungtang apan khat leh khat ki-it tuah semsem un. 23 Ahang bel, a mangthang thei chi apan hilouin, a mangthang thei lou, a hing leh a omden Pathian' thu apan piangthak na hi zaw uhi. 24 Ahang bel, Mihingte khempeuh loupa bang hi a, a thupina khempeuh uh zong gamlak loupa pak bang hi ahi. Tua loupa vuai a, a pakte pulh hi. 25 Ahihhanga Toupa' thu zaw Tangtawna omden hi. Hiai thu mah ahi, tangthupha pansana noute kianga hong kigen.
1 Tua ahih manin, a sia kideihsakna lungput khempeuh, zekhemna khempeuh, lepchiahna khempeuh, deihgawhna nin khempeuh leh kigensiatna khempeuh koihkhia un. 2 Naungek suakthakte bangin, khalam nawitui siang lunggulh un. Tua pansanin na hotdamna uah na khangtou ding uhi. 3 Tua bangin, Toupa a hoih, chih na chiamkhinta uhi.
Suang Hing leh Teel
4 Noute'n Suang hing amah non zuanta uhi. Amah zaw mihingte' nolh, ahihhanga Pathian' teel, ama' adinga manpha ahi. 5 Noute zong, Pathian' saan tham khalam kithoihnate Jesu Khrist tungtawna laan dinga, siampi siangthou hihna neia bawl na hi uhi. Noute mah khalam inna kilam suang hingte bang na hi uhi. 6 Ahang bel, Laisiangthou ah: En un, Zion ah suang khat teelpi pen leh a kiu suang manpha phum hi'ng. Amah muang mi peuhmah zahlaksak hi ngei lou ding hi, chi-in a na kigelh hi. 7 A um noute adingin amah manpha hi. Ahihhangin, a umloute adingin bel, Innlamte'n a nolh uh suang, a kiu suang poimawhpen hong hita hi. 8 Tua baan ah, Mite kipalpaisak suang leh amaute puksak suangpi hi ahi. Amaute'n, thu kigen a man louh manun, a kipalpai uhi. Tua lah, amaute' tunna dinga seh ahi him hi. 9 Ahihhangin, noute bel nam teel, kumpi siampi, nam siangthou, Pathian' mite na hi uhi. Tua mah, mial apan vak hoih lamdang sunga noute hon samlutpa phatna na phuanzak theih nading uh ahi. 10 Nidang laiin, nama sim na hi kei uh a, tu'n zaw, Pathian' namte na hita uhi. Nidang laiin, zahngaihna na ngah kei uh a, tu'n zaw, zahngaihna na ngahta uhi. 11 Ka deihthawhte aw, hiai leitunga khualzin leh khualtaam leltak bangin, sa utna na tawpsan un, chi-in kon ngen tinten ahi. Tua'n na hinna kha uh a suai nak hi. 12 Zentelte lak ah diktattakin nungta un. Tua hi leh, amaute'n gamtat gilouin hon ngawh mah le uh, na nasep hoihte uh muin, Pathian in eite hong veh ni chiangin Pathian a pahtawi ding uhi.
Vaihawmte' Thuman
13 Toupa' hangin, mihingte laka thuneihna tawite thunuai ah lut un. Kumpipa, thuneihna sangpen nei ahi a, a thunuai ah lut un. 14 Ahih kei leh, giloua nungtate gawt ding hiam, a hoiha nungtate phat ding hiama kumpipa'n a sawl ukpipate' thunuai ah lut un. 15 Ahang bel, mihai mawkpaute na kamsimsak theih nading ua, a hoiha na nuntak ding uh Pathian' deihlam ahi. 16 Noplente bangin nungta un. Ahihhangin, na noplenna uh a sia kideihsakna lungput khuhnain zang kei un. Pathian' silate bangin nungta zaw un. 17 Mi chih zah dan siam un. A ummite' kitanauna it un. Pathian lau dan siam unla, kumpipa pahtawi dan siam un. 18 Silate aw, na toute uh zahtaka lau dan siamin thu mang un. Tou hoihte leh siamte kia hilouin, a huhamte thu zong mang un. 19 Ahang bel, mi'n Pathian a phawk mana a dik loupi-a thuakna a tuah chiangin a phathuai ahi. 20 Ahihhangin, gamtat gilou hanga vuak na thuak ua, na thuak zawh hangun, nou adingin bang phathuaina om ding ahia? Gamtat hoih hanga na thuak ua, na thuak zawh chiangun bel, Pathian' mai ah a phathuai hi. 21 Hiai ding maha sap na hi uhi. Ahang bel, Khrist in eite adingin a thuak a, ama' khekhap na zuih nadingun, etteh ding hon nutsiat ahi. 22 Ama'n khelhna hih lou a, a kama zekhemna thu himhim kimu lou hi. 23 Amah a enghou laiun a thuk kei a, a thuak laiin a vau kei a, diktattaka Thukhenpa khut ah a kipe zaw hi. 24 Amah mah in sing tung ah a pumpi-in eite khelhnate a pua hi. Tua bel, eite'n khelhnate i sihsan a, a diktata i nuntak theih nading ahi. Ama' liammate pansana damsak i hi uhi. 25 Ahang bel, noute, belam bangin na na-pialmangta uh a, ahihhangin, tuin na hinna uh Chingpa leh Ukpa kiang ah nong kiknawnta uhi.
Zi leh Pasalte
1 Zite aw, tua mah bangin, na pasalte uh thunuai ah lut un. Tua hi leh, amaute khat peuh, Pathian thu um lou na hita mah leh, kama thugen hilouin, a zite uh gamtatna in amaute a zolzou ding hi. 2 A siangthoua na nuntak uleh, hindan siangthouna zahdan na siamna uh a muh chiangun, zolzawhin a om ding uhi. 3 Na kilawmna uh pawlam kizepna samphekte leh, kham manpha leh, puanhoihte apan hi kei hen. 4 Pathian' mitmuha a manpha mahmah, na mihinna sunggil uh kilawmna tui theilou, lungnemna leh nunnemna apan kilawmna hi zaw hen. 5 Ahang bel, Pathian tunga lametna nga, tanglai numei siangthoute'n amau pasalte' thunuaia lutin, kilawmna a na ngah uhi. 6 Sara in Abraham' thu manga, toupa, a na chih hibang ahi. Noute zong, lauh man hiloua, a dika na gamtat uleh, Sara tanute na hi uhi. 7 Pasalte aw, tua mah bangin, na zite uh tunga na gamtatna uah, amaute khual dan siam un. Amaute beel kitambaih zaw a hihna uleh, hehpihna hanga piak hinna thawnpiak tanpihte a hihna uh phawkin, amaute pahtawi dan siam un. Tua hileh, na thuumna uh dalin a om kei ding hi.
Nahoih Sep hanga Thuak
8 A tawppen in, noute khempeuh, khat leh khat kilemtakin om un. Kilainatin sanggam bangin ki-it unla, lungneltakin bangkim ah kiniamkhiak un. 9 Gitlouhna, gitlouhnain thuk kei unla, kousiatna, kousiatnain thuk kei unla, vualzawlnain thuk zaw un. Vualzawlna na luah theih nading ua Pathian in noute hon sam ahi. 10 Ahang bel, Hinna it a, ni hoih tampi mu nuam kuapeuh in, gitlouhna apan a lei, zekhemna apan a mukte a veen teitei ding ahi. 11 Thilhoihlou kiheisan a, a hoih a hih teitei ding ahi. Lemna zonga a delha a delh teitei ding ahi. 12 Ahang bel, Toupa' mit, mi diktatte tunga tu-a, a thuumna uh bil dawh hiven. Ahihhanga, thil hoihlou hihte tunga bel Toupa' mai gum hi. 13 Noute'n a hoih hih ding na kilawp uleh, kua'n hon mawkbawl ding ahia? 14 Ahihhangin, diktatna thil khat peuh hanga na thuak khak uleh zong, a nunnuam na hi uhi. Amaute' kihtakte kihta kei unla, linthawnin om kei un, chih ahi. 15 Ahihhangin, na lungsung uah, Khrist mah Toupa-a sehtuamin nei un. Lungsunga lametna na neih uh, a san a hang hon dong peuhmah, lungnemtak leh zah dan siamtaka dawng dingin, mansa gigein om un. 16 Sia-le-pha theihna siangtakin om peuh le uchin, Khrist-a na nuntakna hoihte uh dikloutaka gensete'n hon gensiatna uh a mualphoupih ding uhi. 17 Pathian' deihlam a hih peuh leh, gitlouhna hih mana thuak sangin, thil hoih hih mana thuak a hoih zaw hi.
Khrist' Thuakna
18 Ahang bel, Khrist in Pathian kiang hon tut theih nadingin, eite' khelhnate hangin setden dingin khatvei a thuakkhinta a, mi diktat in mi diktatloute adingin a thuakta. Amah pumpi-a thahin a om a, Kha pansana hinsak ahi. 19 Tua Kha mah pansanin amah a vapai a, suangkul sunga khate kiang ah tangthupha a vaphuang hi. 20 Tua khate bel, tanglai peka Noa dam laia, long kilam sung teng Pathian in ngakzoutaka a ngak laia thumangloute ahi uhi. Tua long sung ah mi tawmchik, a vekun giat kia, tui apan hotdamin a om uhi. 21 Hiai tui in, Jesu Khrist' thawhkikna tungtawna noute' hotdamna baptisna, a limin a lak hi. Tua bel, pumpi nitna silsiangna hilouin, sia-le-pha siang-taka Pathian lam ngatna genna ahi zaw. 22 Jesu Khrist, vantung ah a paita a, Pathian' taklam ah a om a, vansawltakte, thuneihna neite leh vangletnate ama' thunuai ah a om hi.
Pathian adinga Nuntak
1 Khrist in eite adinga a pumpi-a thuakta ahih manin, noute zong tua bang lungput tawh kigalvan un. Ahang bel, pumpi-a sihna thuakkhin mi pen khelhna tawh a kisai nawn kei hi. 2 Tua bang ahih manin, tua bang mi pen, a leitung nuntakna ah sa utna zuiin a nungta nawn kei a, Pathian' deihlam zuiin a nungta zaw hi. 3 Ahang bel, Zentelte' utlam, numei pasal kal paktatna, sa utna, zukhamna, khama uangtatna, uangnekna, muhthadahhuai milim biakna sunga buala, a paisa hun na zat uh a kichingvalta hi. 4 Tua bangte sunga na bualte'n, tu-a amaute tawh na bualkhawm nop nawn louh uh a muh chiangun, lamdang a sa uh a, nakpitakin hon gense gawp uhi. 5 Ahihhangin, misite leh mihingte tunga thukhen dinga mansa-a Ompa' mai ah, thukhenna thuak dingin a ding teitei ding uhi. 6 Hiai hang mah ahi, tu-a sikhinsate kianga zong tangthupha a na kiphuan. Tua bel, pumpi tawh kisaia, mihing lama thukhenna a thuak theih nading uleh, kha tawh kisaia, Pathian' lama a nuntak theih nading uh ahi. 7 Thil bangkim tawpna a naita hi. Tua ahih manin, na thuum theih nadingun lungsim chim leh kithununin om un. 8 Bang teng sangin, nakpitakin ki-it tuah tek un. Ahang bel, itna in khelhna tampite a khuh hi. 9 Phun louin zin dou ngaihsak un. 10 Mi chih in, Pathian' hehpihna nam tuamtuam kemmi bangin Kha' thawnpiak a ngah peuhpeuh, midangte' nasepsak nadingin muanhuaitakin zang hen. 11 Kuapeuh in thu a gen chiangin, Pathian' thute mahmah gen mi bangin gen hen. Kuapeuh in midang' nna a sepsak chiangin, Jesu Khrist tungtawna bangkima Pathian phata a om theih nadingin, Pathian in hatna a piak zahzahin sem hen. Pathian tung ah thupina leh vangletna, Tangtawn Tangtawnin omta hen. Amen.
Khristian Hihna hanga Thuak
12 Ka deihthawhte aw, ze-etna haksapi na thuakte uh, noute tunga a tung lou dingpi hong tung bangin ngaihsun kei unla, lamdang sa kei un. 13 Khrist' thupina hong kilat chianga nakpitaka na lungnop nadingun, ama' thuak thuakpih na hi uhi. Tua ahih manin lungnuam un. 14 Khrist' min hanga simmawhna na thuak chiangun mi nunnuam na hi uhi. Ahang bel, thupina Kha leh Pathian Kha noute tunga om ahi. Amaute lam ah, amah gensiatin a om a, noute lam ah bel, amah pahtawiin a om hi. 15 Noute'n na thuak uleh, tualthat hiam, guta hiam, migilou dang himhim hiam, ahih kei leh, mi kichinglah kikumhat hiam hihna hanga thuak hi kei peuh le uchin. 16 Mi'n Khristian hihna hanga a thuak chiangin zum kei henla, tua min a put manin Pathian pahtawi zaw hen. 17 Ahang bel, thukhenna, Pathian' innkuan sunga a kipat hun hong tungta ahi. Eite tawh kisaia thukhenna a kipat leh, Pathian' tangthupha zuiloute' tawpna bang a hita zen de aw? 18 Tua baan ah, Mi diktatte adinga hotdama om haksa ahih chiangin, pathianmitna neiloute leh mikhialte bang suak ding ahia? 3 19 Tua bang ahih manin, Pathian' deihlama thuakte, a muanhuai mahmah, amaute Siampa' khuta a hinna uh kemsak a, thil hoih a hih ding uh ahi.
Upate leh Tuailaite
1 Kei, Upa hi sam, Khrist' thuaknate theihpih sam leh, hong kilang ding thupina tang sam ding khat in noute laka upate kon hanthawnna hiai ahi: 2 Noute' kepna nuaia om, Pathian' belamhonte vak unla ching un. Aloutheilou ahih man hilouin, na ut man uh hizawin leh, punna nin deih man zong hilouin, sep ding lunglawp man hizaw hen. 3 Noute khuta Pathian' hon kepsakte tunga kiliansak louin, belamhonte' etteh dingin kibawl un. 4 Tua hi leh, Belamchingpa Lianpen hong kilat chiangin, a tui theilou thupina lukhu, pahtakmanin na sang ding uhi. 5 Tuailaite aw, tua bang mahin, a upazawte' thunuai ah lut un. Thamlouin, khat leh khat thunuai ah kiluttuah tek unla, kingaihniamna silh un. Ahang bel, Pathian in a kisatheite dou a, a kingainiamte bel, hehpihna pia hi. 6 Tua bang ahih manin, Pathian in a hun taka noute hon pahtawi theih nadingin, ama' khut hat nuai ah kiniamkhiak un. 7 Ama'n noute hon khawtuah ahih manin, na lungzinna khempeuh uh ama' tung ah nga un. 8 Na melmapa uh dawimangpa, a nawmvalh ding mi zongin, humpinelkai humham bangin a vialvak vak hi, kithunun leh kivengtakin om un. 9 Leitung bupa na sanggamte un noute' thuakte bang mah thuak uh ahi, chih thei unla, thu-up sunga dingkipin dawimangpa nang un. 10 Khrist Jesu-a Tangtawn thupina tang dinga noute hon sampa leh, hehpihna khempeuh neipa Pathian mahmah in, hun sawt lou na thuakkhit chiangun hon pichingsak henla, hon dingkipsak henla, hon thakhauhsak henla, hon kipsak hen aw. 11 Ama' tung ah thupina leh ukna vangletna om tawntungta hen. Amen.
Chibaibukna
12 Sanggam muanhuaia ka neih Silvana' huhna tawh, noute kiang ah lai tomchik kon gelh a, noute hanthawnnain leh, hiai Pathian' hehpihna diktak ahi, chih theih-pihnain kon gelh ahi. Tua hehpihna ah dingkip un. 13 Noute tawh teelkhawma om, Babulon saptuamte'n chibai hon khak uhi. Tua mah bangin, ka tapa Marka in zong chibai hon khak hi. 14 Itnain khat leh khat kitawpin kimuak un. Khrist Jesu-a om noute khempeuh sung ah, lungmuanna omta hen. Amen.
Chibaibukna
1 Kei, Simon Peter, Jesu Khrist' sila leh sawltaklian in, koutea bang thu-up manpha, i Pathian leh Hondampa Jesu Khrist' diktatna tungtawna ngahtate kiang ah lai kon gelh hi. 2 Pathian leh i Toupa Jesu theih na kim tungtawnin, hehpihna leh lungmuanna noute sung ah khang semsem hen. 3 A thupina leh a hoihna pansana eite hon sampa amah ahi. Ama' Pathianna vangletna in, amah theihna kim tungtawnin, hinna leh pathianmitna tawh kisai thil bangkim eite hon peta hi. 4 Ama'n tua thupina leh hoihna pansanin, thuchiam thupi leh manpha mahmahte hon peta a, pathianna pianken tangsamte nong hih theih nading uleh, sa utna hanga leitung kisiatna na pelh theih nadingun hiai thuchiamte hon pia ahi.
Upna Gahsuah Sapna leh Teelna
5 Hiai hang mahin, theihtawp suahin na upna uah hoihna behlap unla, hoihna ah theihna behlap un. 6 Theihna ah kithununna behlap unla, kithununna ah kuhkalna behlap unla, kuhkalna ah pathianmitna behlap un. 7 Pathianmitna ah, sanggam ki-itna behlap unla, sanggam ki-itna ah itna behlap un. 8 Hiaite noutea ahih a, kichingtaka na neih uleh, i Toupa Jesu Khrist theihna ah, keu leh gahsuah louin na om kei ding uhi. 9 Hiaite a tasam mi peuhmah, naichik kia mu, mittaw ahi a, a khelhna luite apan siansak ahita, chih mangngilh mi ahi. 10 Tua ahih manin, sanggamte aw, sap na hihna uleh, teel na hihna uh kitelsak dingin theihtawp suah un. Hibanga na hih uleh, na kipalpai ngei kei ding uhi. 11 Tua hi leh, i Toupa leh Hondampa Jesu Khrist' Tangtawn kumpigam ah nakpitaka kipahpihna tawh piilut na hi ding uhi.
Thutaka Kiphuhkipna
12 Pathian in tu-a na neih uh thutak ah noute hon phutkipta a, hiai thilte na theita uhi. Hinapi-in, hiai thilte mah kon phawksak thak nuam gige hi. 13 Ahi, hiai ka pumpi puanbuka ka teen sung teng, na theihgigena uh thaksak ding mah dik ka sa hi. 14 Ahang bel, i Toupa Jesu Khrist in kiteltaka hon theihsak bangin, ka pumpi puanbuk ka suahkhe pahta ding, chih ka thei hi. 15 Ahihhangin, ka paikhiak nung chianga hiai thilte na theih gige teitei nadingun, theihtawp ka suah nuam hi.
Kamsang' Thugenkholh
16 Koute'n i Toupa Jesu Khrist' vangletna leh hong paina thu noute kon hilh laiun, pillepchiah taka phuahtawm tangthu peuh zui ka hi kei uhi. Ama' kumpithupina mita mute ka hi zaw uhi. 17 Thupina thupi mahmah apan amah kianga hong tung' aw in: Hiai ka Tapa it, a tunga ka lungkim mahmahna ahi, a chi hi. Tua laitak mahin, ama'n Pa Pathian apan pahtawina leh thupina ngah ahita hi. 18 Koute mahmah in zong, tua mual siangthou tunga amah tawh ka om laiun, vantung apan tua aw ka za uhi. 19 Koute'n kamsangte' thugenkholh a kipsema latsaka om ka mu uhi. Phalvak hong vaak a, zingsol aksi na lungsung ua hong suah masiah, hiai thu, mial lak apan vaak hong taang bangin, na ngaihsak le uchin a hih hoih na hi ding uhi. 20 Bang teng hi leh, hiai thei masa phot un: Laisiangthoua kamsang thugenkholh peuhmah, kamsangmi' khiakna dana tung ahi kei hi. 21 Ahang bel, mihing' deihna apan kamsang thugenkholh piang ahi ngei kei a, mite'n Kha Siangthou' pii bangbanga Pathian apan thu gen a hi zaw uhi.
Sinsakmi Takloute
1 Hinapi-in tanglaia, Israelte laka kamsang takloute a na omtak bangin, noute lak ah zong, sinsakmi takloute hong om ding ahi. Tua sinsakmi takloute'n mi hihse thei sinsakna takloute, a sima hon pawlutin amaute leipa Toupa nangawn nolhin amau leh amau a kihihse pah ding uhi. 2 Mi tampite'n a gamtatna zumhuaite uh a zui ding uh a, amaute hangin thutak a kigense ding hi. 3 A duhgawl manun, phuahtawm thute pansanin, nekzonnain noute hon nei ding uhi. Sawtpi apanin amaute' mawhtan nading a om maimai kei a, a siatgawp nading uh zong a ihmu kei hi. 4 Vansawltakte nangawn a khelh laiun, Pathian in a hawi kei a, suangkul mial sungte ah a khum a, thukhenna tuak dingin henchipsain a koih khol hi. 5 Ama'n tanglai leitung a hawi kei a, pathianmitna neiloute tung ah tuichimpi a tungsak a, tua diktatna thugenpa Noa leh midang sagih a hondam hi. 6 Tua nungin, Sodom leh Gomora khawpite mawh-tangsakin a haltum a, pathianmitna neiloua nuntak sawmte tunga bang tung ding hiam, chih etsaknain a zang hi. 7 Lot mi diktat ahi a, danbeia numei pasal kal paktatna muin a lungkham thei mahmah hi. Amah bel Pathian in a hukhia hi. 8 Danbeia nungtate' nuntakna kihhuaite'n amaute laka teeng tua mi diktatpa' hinna kha a nisimin a lunggimsak mahmah hi. 9 Tua bang a na hih leh, Toupa'n pathianmitna neite bel, ze-etna lak apan hutkhiak dan leh, midiktatloute, thukhenna ni adinga hawi kawma gawt dan a thei, chihna ahi. 10 Adiakin, amaute' sa utna zuia nungta a, tou hihna neite' thuneihna simmawhte tung ah hiai a dik hi. Hibangte bel, suahngal leh amau thu kia deih, vantung mi thupite nangawn gensiat lau lou ahi uhi. 11 Hinapi-in, a vanglian zaw leh thahat zaw vansawltakte nangawn in, Toupa' mai ah, vantung mi thupite a gense kei uhi. 12 Ahihhangin, hiai mite'n bel, a theihphak louh peuhmah uh a gensia uh a, piankena phawkna om bangbang leia gamta gamsa gilou, mata thah ding lei bang ahi uhi. Gamsate bangin amaute zong a mangthang ding uhi. 13 Amaute'n diktatlouhna thaman a saang ding uhi. Nuam a chihte uh, suntang lailaia zukham ankhama om ahi. Tua bang nuamtatna tawh kikhemzoute ahih manun, noute tawh a nekkhawm chiangun, buahna leh melhemna a hong suak uhi. 14 Angkawm mita dim ahi uh a, khelh a tawpsan ngei kei uh a, lungsim kiploute a khempuk nak uhi. Lungtang' deihgawhna lam ah, duhgawl a siam uh a, hamsethuak tate ahi uhi. 15 Lampi dik leh tang nusiain, Beor' tapa Balaam gamtat zuiin a lampial uhi. Amah bel, diktatlouhna thaman deih mahmahpa ahi. 16 Ahihhangin, ganhing pautheilou sabiltung nangawn in mihing' pauin tua kamsangpa' tatlekna a taihilh a, a haina a kham hi. 17 Hiai mite zaw, tui omlou tuikhuk leh, huihpi' mut mang meipi bang ahi uhi. Amaute adingin mialna leh lungkhamna mun a kisiit gige hi. 18 Amaute'n bangmah paailou leh kiotsakna kam zangin, khelhna pianken sa utna lam tahin, lamkhiala omna apan suakta lellelte a zol uhi. 19 Amaute mahmah, gitlouhna sala tang hi gige kawmin, mite kiang ah suahtakna a chiam uhi. Thil khat peuh in mi a thuzawha a uk leh, tua thil in tua mi sala kai ahi mawk hi. 20 Ahang bel, Toupa leh Hondampa Jesu Khrist theihna tungtawna, hiai leitung nitnate apan a suahtak khit nung ua, tua leitung nitnate maha a kik mite bel, a kipatna uh sanga a tawpna uh se zaw hiven. 21 Amaute diktatna lampi thei lou hi vanglak le uh, amau adingin a hoih zaw hi. 22 Ui in ama' luak ne nawn, kichi leh, Vokpi kisilsiangsa a buala buai nawn, kichi paunakte amaute tung ah a dik hi.
Toupa'Ni
1 Ka it ka deihthawhte aw, hiai noute kianga ka laikhak nihveina ahi. Laikhakte a nih-in lungsim ngaihsutna chidam lama hon tokthou dinga kon phawk-thaksak nopna ahi. 2 Nidang laia kamsang siangthoute' thugente na theih gige uh ka deih hi. Na sawltakliante uh tungtawna, Toupa leh Hondampa'n thupiak hon piak zong thei gige un. 3 Amasapenin, hiai thei un: Ni nanungte ah simmawhhatte hong om ding a, amau' sa utna bangbangin a nungta ding uhi. 4 Amaute'n: Ama' hong pai nading thuchiam koia om ahia? I pu i pate lah sita a, tua nungsang siamchil apan thil bangkim a ngeingeiin a om tou lailai, chi-in a gen kawikawi ding uhi. 5 Ahihhangin, tanglai pekin, Pathian' thuin vaante a na om a, leitung zong tui apan, tui tungtawn mahin hong kilang a, Pathian thu-a dinkhawmsak ahi, chih amaute apan selin a om a, a kimangngilhsak teitei lai uhi. 6 Tua hun laia leitung pen tui in a na tum a, hihsiatgawpin a na om hi. 7 Ahihhangin, tua Pathian' thu mah in, tu-a om lei vaante leh leitung a kem a, thukhen ni leh pathianmitna neiloute manthat ni-a meia hihsiat dingin, Pathian in a siit hi. 8 Ka deihthawhte aw, hiai thu khat mangngilh kei un. Toupa adingin, ni khat zong kum 1,000 bang ahi a, kum 1,000 zong ni khat bang ahi. 9 Mi pawlkhatte'n, zekai kichi a theihdan bangun, Toupa zaw a thuchiam tangtungsak dingin a zekai kei hi. Ama'n kuamah manthat ding deih lou a, kuapeuh kisika a lunghei ding deih zaw ahih manin, eite lama dawhzou ahi zaw hi. 10 Ahihhangin, Toupa' ni zaw guta banga hong tung ding ahi. Vaante gin ngaihtakin a mang ding a, thilbulte mei in a haltui ding a, leitung leh a sunga nasep omte khempeuh a kangtum ding hi. 11 Hibanga thil bangkim tuimanga kikhenzak ding ahih manin, bangchi bang mi na hih uh kul hiam? Siangthou leh pathianmitna lim-saktaka na nuntak ding uh ahi. 12 Pathian' ni hong tung pah ding lamenin na ngak uh a, a hong tun nading na kinawhsak kawmun, tua bangin nungta un. Tua ni adingin, mei in thilbulte haltui ding a, vaante kikhenzak ding a, kangtum vek ding ahi. 13 Ahihhangin, eite'n bel, a thuchiam tawh kituakin, lei thak leh van thak i ngak hi. Tua ah diktatna a teeng ding hi. 14 Ka it ka deihthawhte aw, hiai thilte lamen na hih manun, nin baanglou, gensiat baanglou leh amah tawh kilema na om theih nadingun, nakpitakin pang un. 15 Pathian in pilna a piak bangin, i sanggampa Paul in zong, noute kiang ah lai hon gelhta hi. Tua a laigelh bangin, i Toupa' dawhzawhna in hotdamna a tun hi, chih thei gige un. 16 Ama'n a laikhakte khempeuh ah, hiai thilte a gelh hi. A laikhak ah a theih haksa pawlkhat a om a, a theiloute leh a kiploute'n Laisiangthou thu dangte a kaihkawi bangun, tuate amau siat nadingin a kaikawi uhi. 17 Tua ahih manin, ka deihthawhte aw, hiai theita na hih manun, danbeia nungtate' lampialna in na dinmun kip uapan hon pimang louh nadingin pilvang un. 18 I Toupa leh Hondampa Jesu Khrist' hehpihna leh, amah theihna ah khangtou un. Ama' tung ah thupina, tu leh Tangtawnin omdenta hen! Amen.
Hinna Thu
1 A chil apan na om gigesa, koute'n ka zak uh, mita ka muh uh leh ka et uh, khuta ka lawn uh, tua hinna Thu tawh kisai, noute kiang ah kon tangkoupih uhi. 2 Tua hinna latsak ahita a, koute'n ka mu uh a, ka theihpih uh a, ka phuang uhi. Tua Tangtawn hinna mah, Pa tawh omkhawm, ama'n koute kianga a latsak, noute kiang ah kon tangkoupih uhi. 3 Noute'n zong koute tawh kipawlna na neih nadingun, ka muhsa uleh ka zaksa uh noute kianga hon gen ka hi uhi. Koute' kipawlna zaw Pa tawh, a Tapa Jesu Khrist tawh kipawlna ahi. 4 Noute' lungnopna a kim nadingin, hiai thilte noute kiang ah kon gelh uhi.
Amah tawh Kipawlna: Vaaka Gamtat
5 Amah apan ka zak uh, noute kianga kon gen uh hiai thupuak ahi: Pathian zaw vaak ahi a, amah ah mial himhim a om kei, chih. 6 Amah tawh kipawlna nei kichi napi-a miala i gamtat leh, zuau gen i hi a, thutak zuia nungta i hi kei hi. 7 Ahihhangin, amah vaaka om ahih banga eite vaaka i gamtat chiangin, khat leh khat kipawlna nei i hi a, a Tapa Jesu' sisan in khelhna khempeuh apan hon siangsak ahi.
Khelh Kiphuanna
8 Eite, khelhna nei loua i kigen chiangin, ei leh ei kikhem i hi a, thutak eite sunga om lou ahi. 9 I khelhnate i pulak chiangin bel, i khelhnate hon ngaidam ding leh, diktatlouhna khempeuh apan hon siangsak dingin, amah a muanhuaiin a diktat hi. 10 Eite, takhial lou, i kichih chiangin, amah zuautheipa i suaksak a, eite sung ah a thu a om kei, chihna ahi.
1 Ka ta deihthawhte aw, na khelh louh nadingun, hiai thilte noute kiang ah kon gelh hi. Mi kuapeuh in a khelh zenzen leh, Pa' maia hon Gensakpa, a Diktatpa Jesu Khrist i nei hi, 2 I khelhnate khuhna thillat amah mah ahi. Eite' khelhnate kia hilouin, leitung bup' khelhna khuhna thillat zong ahi.
Amah Theihna Tehna: A Thupiakte Zuih
3 Ama' thupiakte i zuih chiangin, amah i theita, chih i thei hi. 4 Amah ka thei, chi napi-a, ama' thupiakte zui lou mi bel, a zuauthei ahi a, ama' sung ah thutak a om kei hi. 5 Ama' thupiak zui mi peuhmah sung ah Pathian' itna hihkimin a om taktak hi. Eite amaha om i hi, chih i theihna dan hibang mah ahi. 6 Jesu-a om, kichi mi peuhmah, ama' gamtat banga a gamtat ding ahi.
Ki-ittuahna
7 Ka itte aw, noute kiang ah thupiak thak kon gelh kei a, a chil apan na ngahsa uh thupiak lui mah kon gelh ahi. Tua thupiak lui bel, a chil apan na zaksa uh thu ahi. 8 Ahihhangin, thupiak thak khat hon gelh mah ka suak hi. Mial beita a, vaak diktak hong taangta ahih manin, tua thupiak, amah ah leh noute ah a dik hi. 9 Mi kuapeuh in, vaaka om kichi napi-a, a sanggam a muhdah leh miala om lai ahi. 10 Ama' sanggam it mi peuhmah, vaaka nungta ahi a, amah kipalpaisak ding amah ah bangmah a om kei hi. 11 Ahihhangin, a sanggam mudah mi peuhmah, miala gamta ahi. Mial in a mit tawsak ahih manin, tua bang mi in a paina a thei kei hi.
Amah Theite' Khalam Hinkhua
12 Ta deihthawhte aw, ama' min vanga Pathian in na khelhnate uh ngaidamta ahih mana noute kianga hon gelh hi'ng. 13 Pate aw, a chil apana Ompa, amah na theihtak man ua noute kianga hon gelh hi'ng. Tangvalte aw, giloupa na zawhtak man ua noute kianga hon gelh hi'ng. Taneute aw, Pa na theihtak man ua noute kianga hon gelh hi'ng. 14 Pate aw, a chil apana Ompa, amah na theihtak man ua noute kianga hon gelh hi'ng. Tangvalte aw, na thahat man uh, Pathian' thu noute' sunga a teen man leh, giloupa na zawhtak man ua, noute kianga hon gelh hi'ng.
Leitung Itlouh ding
15 Leitung, ahih kei leh, a sunga thil om peuhmah it kei un. Mi kuapeuh in leitung a it chiangin, Pa' itna ama' sung ah a om kei hi. 16 Ahang bel, leitunga thil om peuhmah, Pa apan ahi kei a, leitung apan ahi zaw hi. Tuate, sa' utnate, mit' lunggulh giloute leh damsung kisaktheihpih thil giloute ahi uhi. 17 Leitung leh a lunggulhte a beimang ding a, Pathian' deihlam hih mi bel, Tangtawnin a omden ding hi.
Khrist-doupa' Kha
18 Ta deihthawhte aw, tu hun nanung ahita. Khrist doupa hong pai ding, chih na zata uh. Tuin zong Khrist doute tampi hong paikhinta hi. Tu hun nanung ahita, chih i theihna tua mah ahi. 19 Amaute, eite lak apan a paikhia uhi. Eite laka mi ahi taktak kei him uhi. Eite laka mi hi taktak le uh bel, eite lak ah a omden ding uhi. A paikhiakna un, eite laka mi ahi taktak kei uh, chih a kitelsak hi. 20 Ahihhangin, noute'n bel, a Siangthoupa apan thaunilhna tang na hi uh a, na vekun thutak na theita uhi. 21 Noute'n thutak na theih louh man ua hon gelh ka hi kei a, thutak na theih man uleh, thutak apan zuau a pawt louh mana hon gelh ka hi zaw hi. 22 Kua ahia zuauthei mi? Jesu, Khrist ahi, chih nial mi ahi zuauthei. Tua bang mi mah ahi Khrist doumi. Tua bang mi in Pa leh Tapa nial ahi. 23 Tapa nial mi in Pa zong a nei kei hi. Tapa sang mi in bel, Pa zong a nei hi.
Thutak Neih Gige
24 A chil apan na zaksa uh, noute sung ah omsak gige un. Tua a om gige naak leh, noute zong Tapa ah leh Pa ah na om gige ding uhi. 25 Ama'n eite hon chiamsa hiai mah ahi: Tangtawn hinna. 26 Noute hon khemmang sawmte tawh kisaiin, hiaite kon gelh ahi. 27 Noute na hih uleh, amah apan na ngah uh thaunilhna na sung uah a om gige a, kuamah' sinsak na kul kei uhi. Ahihhangin, ama' hon thaunilhna in thil bangkim tawh kisaiin hon sinsak hi. Tua thaunilhna pen, zuau hilouin, a tak ahi. Hon sinsak bangbangin, amah ah om gige un.
Pathian' Tate
28 Tua bang ahih manin, ta deihthawhte aw, amah hong kilat chiangin, kimuangngamtakin i om ding a, amah hong pai hun takin, ama' mai ah, maizum louin i om thei ding hi. 29 Amah a diktat chih thei na hih chiangun, diktatna hih mi peuhmah ama' suan ahi, chih na thei uhi.
1 Ngai un, Pa in eite hon itna lian hina tel e, Pathian' tate a hon chih! Tua bang i hi mah hi! Tua bang i hih manin, leitung mite'n amah a theih louh bangun, eite zong hon thei kei uhi. 2 Ka it, ka deihthawhte aw, tuin, eite Pathian' tate i hita hi. I hihna ding buchingin bel a kilang naai kei hi. Ahihhangin, Pa'n amah hon latsak chiangin, amah i bang ding, chih bel i thei hi. Amah a hihna bangbanga mu ding i hih manin, amah i bang ding hi. 3 Hiai lametna nei peuhmah, amah a siangthou bangin a kihihsiangthou hi.
Pathian' Tate' Gamtat: Diktatna
4 A khial mi peuhmah in dan palsatta ahi. Khelhna kichi, danbeia gamtatna ahi. 5 I khelhnate lamang dinga amah hong kilang ahi, chih na thei uhi. Amah ah khelhna himhim a om kei hi. 6 Amaha om gige mi a khialkhial kei hi. Khelhna hihhih mi kuamah in amah a mu nai kei a, theih zong a thei nai kei hi. 7 Ka ta deihthawhte aw, kuamah kikhemmangsak kei un. Amah a diktat bangbangin, a dika gamta mi, mi diktat ahi. 8 Khelhna hihhih mi zaw, dawimangpa apan ahi. Ahang bel, dawimangpa'n a chil apan a khial tawntung hi. Pathian' Tapa latsaka a omna san hiai ahi: dawimangpa nasepte hihmangthang dingin 9 Pathian' suan kuamah a khialkhial kei. Ahang bel, Pathian' chi ama sunga a om gige man ahi. Pathian suan ahih manin, a khialkhial thei kei hi. 10 Pathian' tate leh dawimangpa tate i theihkakna hibang ahi: Diktata gamta lou mi peuhmah, Pathian apan ahi kei. A sanggam it lou mi peuhmah zong, Pathian apan ahi kei hi.
Thutak leh Gamtata Kiit
11 A chil apan na zak uh hiai thupuak ahi. I ki-it tuah tek ding ahi, chih. 12 Kaina bangin om kei ni. Amah zaw giloupa apan ahi a, a sanggampa a that hi. Banghanga that ahia? Ama' thilhihte a diktat kei a, a sanggampa' thilhihte a diktata ahi. 13 Ka sang gamte aw, leitung mite'n noute hon muhdah chiangun lamdang sa kei un. 14 Sihna apan hinna i tungta, chih i sanggamte itna ah i thei hi. 15 A sanggam it lou mi peuhmah, sihna sunga om lai ahi. 15 A sanggam mudah mi peuhmah tualthat ahi. Tualthat mi kuamah in Tangtawn hinna, ama' sunga om gigein a nei kei, chih na thei uhi.
Itna Gahsuah
16 Itna bang hi hiam, chih i theihna hiai ahi: Jesu Khrist in eite adinga a hinna a piakna ah i thei hi. Tua ahih manin, eite'n sanggamte adinga i hinna i piak sam ding kilawm ahi. 17 Mi khat peuh in leitung neih leh lam a nei mai thei. A sanggam tasam khat zong a mu mai thei. Ahihhangin, ama'n amah lainat kei leh, bangchi-a ama' sunga Pathian' itna om hi thei ding hiam? 18 Ka ta deihthawhte aw, a thu leltak, ahih kei leh, lei leltakin ki-it kei ni. Nasep thilhih leh thutakin ki-it zaw ni. 19 Hibang ahi, thutak apan i hi, chih i theihna leh, ama' maia lungmuangtaka i om theihna. 20 Tua bel, i lungtang in mawh hon tansak dek peuhmah chiangin, chihna ahi. Ahangbel, i lungtang sanga Pathian lianzaw a, ama'n bangkim thei hiven. 21 Ka itte aw, i lungtang in mawh hon tansak kei leh bel, Pathian' mai ah kimuanna i nei hi. 22 Ama' thupiakte zui a, ama' lungtaina lam thilte i hih manin, i nget peuhmah ama'n hon ngaihsak zel hi. 23 Hiai ahi ama' thupiak: A Tapa Jesu Khrist' min i up ding. Tua baana a thupiak banga i ki-it tuah tek ding. 24 Ama' thupiak zui mi, Pathiana om gige ahi a, Pathian zong ama' sunga om gige ahi. Amah eite sunga om gige ahi, chih, Kha hon piak pansanin i thei uhi.
Khate Ettelna
1 Ka it ka deihthawhte aw, kha napeuh um kei un. Khate Pathian apan ahi uhiam, chih entel zaw un. Ahang bel, kamsang taklou tampi leitung ah a paikhe khinta uhi. 2 Pathian' Kha na theih nading uh hiai ahi: Jesu Khrist, sa neiin hong paita, chih gum kha peuhmah Pathian apan ahi. 3 Ahihhangin, Jesu Khrist, sa neiin hong pai, chih gum lou kha peuhmah Pathian apan ahi kei. Hiai mah, Khrist doupa' kha ahi. Khrist doupa' kha hong pai ding, chih na zaksa uh ahi. Amah tuin zong leitung ah a om khinta hi. 4 Ka ta deihthawhte aw, noute Pathian apan na hi uhi. Leitunga ompa sangin, noute' sunga Ompa lianzaw ahih manin, amaute na zou khinta uhi. 5 Amaute, leitung apan ahi uh a, leitung thil a gen uh. Tua ahih manin, leitung mite'n bil a dawh uhi. 6 Eite bel, Pathian apan i hi uh a, Pathian thei mi peuhmah in bil hon dawh hi. Ahihhangin, Pathian apan hi lou mi peuhmah in eite bil hon dawh kei hi. Hiai apanin, thutak Kha leh khemna kha i theikak hi.
Khrist' Itna banga Ki-it
7 Ka deihthawhte aw, itna, Pathian apan ahih manin, i ki-it tuah tek ding ahi. A it mi peuhmah, Pathian' suan ahi a, Pathian a thei hi. 8 Pathian zaw itna ahih manin, itna neilou mi peuhmah in Pathian a thei kei hi. 9 Hiai ah Pathian in a itna eite lam ah hon langsakta: Pathian in a Tapa tang neihsun leitunga hon sawlna ah. Tua bel, ama' tungtawna i hin theih nading ahi. 10 Itna hiai ahi: Eite'n Pathian i it, chih ahi kei a, ama'n eite hon it a, i khelhna khuhna thillat hi dingin a Tapa hon sawl, chih ahi zaw hi. 11 Ka deihthawhte aw, Pathian in tua zaha eite hon it ahih nung, eite zong i ki-it tuah tek ding mah ahi.
Itna tungtawna Pathian Muh
12 Kuama'n chiklai mahin Pathian a mu ngei kei. Ahihhangin, eite i ki-it tuah tek chiangin eite sunga Pathian om ahi a, eite sunga itna kimsak ahi. 13 Ama'n a Kha pansana tan hon got manin, eite, Pathian ah i om gige a, Pathian eite sung ah a om gige, chih i thei hi. 14 Leitung khuavannuai Hondampa hi dingin, Pathian in a Tapa hon sawl, chih i muta a, i theihpihta hi. 15 Jesu, Pathian' Tapa ahi, chih gum mi peuhmah' sung ah Pathian a om gige a, amah zong Pathian ah a om gige hi. 16 Tua bangin, Pathian in eite hon itna i muta a, i umta hi.
Itna Buchinna
Pathian zaw itna ahi. Itna-a om gige mi, Pathiana om gige ahi a, Pathian zong ama' sunga om gige ahi. 17 Ama' hihna bangbang, leitunga eite hihna hita ahih manin, hibangin, Pathian in eite lak ah a itna a kimsakta. Tua bel, Pathian' thukhen ni adinga kimuanna i neih theih nading ahi. 18 Itna ah launa a om kei. Itna kim in launa a hawlmang zaw hi. Ahang bel, launa kichi, gawtna launa ahi. A lau mi pen, itna ah a kim nai kei hi.
Pathian Itna leh Sanggamte Itna
19 Ama'n eite hon it masak manin, eite'n amah i it hi. 20 Mi kuapeuh in, Pathian ka it, chi napi-a, a sanggam a muhdah leh, amah mi zuauthei ahi. A muh gegu, a sanggam it lou mi in, a muhlouh Pathian bangchi it theih mawk ding ahia? 21 Ama'n lah hiai thupiak eite hon pia a: Pathian it mi in a sanggam zong a it ding ahi, chi-in.
Pathian' Tapa Upna: Vualzawhna
1 Jesu, Khrist ahi, chih um mi peuhmah Pathian' suan ahi. Pa it mi peuhmah in a Tapa a it hi. 2 Pathian it a, a thupiakte i zuihna mah Pathian' tate i it, chih i theihna hi ahi. 3 Pathian i itna hiai ahi: A thupiakte i zuihna. A thupiakte lah a zuih haksa kei hi. 4 Ahang bel, Pathian' suan peuhmah in leitung khuavannuai zoukhinta hiven. Leitung khuavannuai nuaisiah a, vualzawhna hiai ahi: I upna. 5 Leitung khuavannuai nuaisiaha zou mi kua ahia? Jesu, Pathian' Tapa ahi, chih um mi ahi leitung khuavannuai nuaisiaha zou mi.
Hotdam Kitheihtelna
6 Hiai ahi tui leh sisan pansana hong paipa: Khrist ahipa Jesu. Tui kiain ahi kei a, tui leh sisanin ahi zaw hi. Kha thutak ahih manin, Kha ahi theihpihpa. 7 Ahang bel, vantung ah theihpih thum a om: Pa tawh, Thu tawh, Kha tawh. Hiai thumte khat ahi uhi. 8 Leitung ah theihpih thum a om: Kha tawh, tui tawh, sisan tawh. Hiai thumte khat bangin a kithukim uhi. 9 Mihing' theihpihna nangawn i sang, ahihhangin, Pathian' theihpihna a thupi zaw hi. Pathian' theihpihna bel, a Tapa tungthu a theihpihna mah ahi. 10 Pathian' Tapa um mi peuhmah in, ama' lungsung ah theihpihna a nei hi. Pathian um lou mi in bel, Pathian in a Tapa' tungthu a theihpihna um lou ahih manin, amah zuauthei a suaksak hi. 11 Theihpihna hiai ahi: Pathian in Tangtawn hinna eite hon pia a, tua hinna a Tapa-a om ahi, chih. 12 Tua Tapa nei mi peuhmah in hinna a nei a, Pathian' Tapa nei lou mi peuhmah in hinna a nei kei hi. 13 Pathian' Tapa' min a um noute'n Tangtawn hinna na nei uh, chih na theih nading ua, noute kianga hiai thilte hon gelh ka hi.
Thuumna a Kimuanna leh Lainatna
14 Pathian' maia kimuanna i neih hiai ahi: Ama' deihlam thil khat peuh i nget chiangin, ama'n hon ngaikhia, chih. 15 Ama'n i nget peuhmah hon ngaikhia, chih i theih chiangin, amah apan i nget pen i ngah, chih i thei hi. 16 Mi kuapeuh in, sihna tun lou khelhna khat peuh hih a sanggam a muh chiangin, amah adingin thuumsak hen. Tua bangin, sihna tun lou khelhna hih mi adingin hinna a pe ding. Sihna tun khelhna a om. Tua tawh kisaiin thum hen, ka chi kei. 17 Diktatlouhna khempeuh khelhna ahi a, sihna tun lou khelhna zong a om hi.
Khelh Zongsatna apan Suahtakna
18 Pathian apan piang peuhmah a khialkhial kei, chih i thei. Pathian' Tapa in amah a kembit a, giloupa'n amah a khoih thei kei hi. 19 Eite, Pathian' tate i hi, chih i thei a, giloupa' thunuai ah leitung bup a koltang, chih i thei hi. 20 A Dikpa pen i theih nadingin, Pathian' Tapa hong pai a, theihsiamna hon peta, chih zong i thei. Eite bel, a Dikpa, tua a Tapa Jesu Khrist mah mah ah i om uhi. Amah Pathian dik ahi a, Tangtawn hinna ahi. 21 Ka deihthawhte aw, milimte apan kihem un. Amen.
Chibaibukna
1 Kei, upapa in, thutaka ka it, teel numei leh a tate kiang ah lai kon gelh hi. Kei kia in hon it ka hi kei a, thutak theitate khempeuh in zong hon it hi. 2 Eite sunga teeng leh eite hon ompih tawntung ding, tua thutak hanga hon it ka hi. 3 Pa Pathian apan leh Pa' Tapa, Toupa Jesu Khrist apan hehpihna leh zahngaihna leh lungmuanna in, thutak ah leh itna ah noute hon ompih hen.
Khrist' Thupiak Zuihna
4 Pa apan thupiak i ngahsa banga, na tate pawlkhat thutaka om ka muh manin, nakpitakin ka lungnuam hi. 5 Numei zahtakhuai aw, thupiak thak hon gelh ka hi kei a, a chil apan i ngahsa mah hon gelh ka hi: I ki-it tuah tek ding ahi, chih. Tua banga ki-it tuah tek dingin kon ngen hi. 6 Hiai ahi itna: A thupiakte banga i gamtat. A chil apan na zaksa uh, na zuih ding uh, hiai thupiak ahi.
Khrist Doute
7 Ahang bel, Jesu Khrist sain hong pai, chih, tangpi' maia gum lou, khemmi tampi leitung ah a paikheta hi. Tua bang mi peuhmah khemmi leh Khrist doumi ahi. 8 Ngah sawma i seplawh thilte mansuah lou a, pahtakman a kima na ngah nadingun pilvang un. 9 Khrist' sinsakna sunga om gige lou a, talek mi peuhmah in Pathian tak a nei kei hi. Khrist' sinsakna sunga om gige mi peuhmah in bel, Pa leh Tapa a neikhawm hi. 10 Kuapeuh na kianga hong pai a, hiai sinsakna hon puak kei leh, na inn ah na tungsak kenla, muah zong na muak ken. 11 Ahang bel, tua bang mi muak mi peuhmah in a gamtat gilou a kikoppih ahi.
Mangphakhakna
12 Na kiang ah gen ding tampi ka nei a, ahihhangin, laipek leh laituia gelh ka ut kei hi. I lungnopna a kim nadingin, kong veh a, kimaituaha i kihou ding ka sawm hi. 13 Na sanggamnu, teel numei' tate'n chibai hon khak uhi. Amen.
Chibaibukna
1 Kei, upapa in, thutaka ka it ka deihthawh Gaia kiang ah lai kon gelh hi. 2 Ka it aw, na khalama na chidam banga, bangkima na hoih nading leh, na damtheih nadingin ka thuum hi. 3 Ahang bel, sanggamte hong pai uh a, thutak zuia na gamtat banga thutak nanga a teen thu hon hilh manun, nakpitakin ka lungnuam hi. 4 Ka tate thutak zuia a gamtat uh ka zaka ka lungnopna kaana lungnopna lianzaw ka nei kei hi.
Gaia' Thilphalna
5 Ka it aw, nang adingin theih louh mikhual hi mah le uh, sanggamte tunga na hih peuhmah ah, muanhuaitakin na hih hi. 6 Amaute'n saptuamte' mai ah, na itna thu a gen uhi. Amaute a zinna ua, Pathian' maia hih dia kilawm bang zela na nakhaksawn leh hih hoih na hi ding hi. 7 Ahang bel, amaute Pathian' mina a zinna uah, Zentelte apan bangmah a sang kei uhi. 8 Thutak adinga amaute tawh semkhawm i suah theih nadingin, tua bangte i san ding kilawm him ahi.
Daiotrefe
9 Saptuamte kiang ah lai kon gelh a, ahihhangin, amaute laka tungnun ut Daiotrefe in koute hon sang kei hi. 10 Tua bang ahih manin, ka hong hawh chiangin, a thilhih amah ka phawksak ding hi. Ama'n koute' tungthu a siasiain a gen hi. Hon gensiat zong lungkim zoulouin, amah mah in zong sanggamte a na sang kei a, a sang nuamte nangawn a kham a, saptuamte lak apan a hawlkhe lai hi.
Demetria
11 Ka it aw, a gilou mi' omdan la kenla, a hoih mi' omdan la zaw in. A hoih hih mi peuhmah, Pathian apan suak ahi a, a gilou hih mi peuhmah Pathian mu nailou ahi. 12 Demetria in bel miteng phat a lawh a, thutak in zong amah a phat hi. Koute'n zong ka phat uh a, ka phatna uh a dik, chih na thei uhi.
Mangphakhakna
13 Na kianga gen ding tampi ka nei a, ahihhangin, laipek leh laituia gelh ka ut kei hi. 14 Hon muh pah a, kimaituaha kihou ka sawm hi. Lungmuanna na tung ah om hen. Hiaia om lawmte'n chibai hon khak uhi. Tua-a om lawmte, a min minun chibai hon na buksak in. Amen.
Chibaibukna
1 Kei, Jesu Khrist' sila leh Jakob' sanggampa Juda in, Pa Pathian' sapte, a sehtuamte leh, Jesu Khrist-a a kepte kiang ah lai kon gelh hi. 2 Noute tung ah zahngaihna leh, lungmuanna leh, itna khang semsem hen.
Thu-up Hutna
3 Ka itte aw, i tankhawm hotdamna thu tawh kisai gelh ding ka lawp mahmah laitakin, misiangthoute kianga khatveia setden dinga kepsak thu-up hu-a nakpitaka pang dinga hon hanthawn nading gelh kul ka sa hi. 4 Ahang bel, mi kuate hiam na lak uah a simin hong lut uhi. Hiai pathianmitna neiloute, mawhtansak dinga sawtpi-a chiamtehsa ahi uhi. Amaute'n Pathian' hehpihna, numei pasal kal paktat nadinga phalna danin a zang uh a, Thuneihnakim nei i Toupa omsun Jesu Khrist a nial uhi.
Puksante
5 Toupa'n Aigupta gam apan ama' mite hukhekhin hinapi-in, a nungin a umloute a hihmangthang, chih na theihsa uh hi mah leh, kon phawkthaksak nuam hi. 6 Tua baan ah, a hihna dinmun masa uh lenkip lou a, a tenna uh taisan vansawltakte zong, tua Ni thupi-a gawt dingin miallak ah a koih a, Tangtawn khainiangtein a hen hi. 7 Tua mah bangin, Sodom leh Gomora leh a kim a kiang ua khuate, numei pasal kal paktatna-a kipumpiak a, amau mihinpih hiloute nangawn enlah a, a delh manun, Tangtawn meia gawtna thuak dingte etsaknain a nei hi. 8 Tua mah bangin, hiai mangneite'n amau' pumpi hihninin, tou hihna neite pampaihin, vaanlam mi thupite a gensia uhi. 9 Ahihhangin, vansawltak tungnung Mikhael hilhial in zong, dawimangpa tawh Mosi' luang a kituh laiun, amah a gense ngam kei a: Toupa'n hon taihilh hen! a chi zaw hi. 10 Hinapi-in, hiai mite'n bel, a theihsiam louh peuhmah uh a gensia uhi. Lungsim suangtuahna bei gamsate bangin, piankena a theihsiamte uh a hih uh a, tuate mah amaute hihmangthangte ahi. 11 Amaute tung a gik hi! Kaina' lampi a tawn uh a, punna delhin Balaam' lampialna ah a tailut uh a, Kora' helna ah a mangthang uhi.
Hoihnabeite leh Puksante Mawhtanna
12 Hiai mite'n bel, maingaltakin noute kiang ah ankuang a um uh a, noute' itna ankuang luina ah, siatna suangpi lauhuai kisel ahi uhi. Amau kivak lei ahi uh a, tuipai lou meipi huih mutlengte ahi uh a, phavang sing gah ngeilou, a lehniha keu, a zunga bawhkhiakte ahi uhi. 13 Tuipi tuihual kihawt zuazua, amau zahlakna phuan zuazua-a phihkhete ahi uh a, aksi vakthap, amau adinga Tangtawn mial bikbek, Pathian in a sitsak gigete ahi uhi. 14 Adam apan khang sagihna Enokh in hibang mite' thu a na genkhol a: En un, Toupa a misiangthou sang mun sang tampi tawh a hong pai. 15 Ama'n mi khempeuh tung ah thu a khen ding. Amaute laka pathianmitna neiloute khempeuh mawh a tangsak ding. Pathianmitna neilou mikhialte, pathianmitna limsakloutaka a gamtatnate uah leh, pathianmitna limsakloutak leh thukhauhtaka amah gensiatna a gente uah, mawh a tangsak ding, a chi hi. 16 Hiai mite zaw phunhatte, midem nading zongte, amau' sa utna banga gamtate, kam kisatheitak zang a, amau hamphatna zong a, mi maitangphatte ahi uhi.
Thuakzawhna
17 Ahihhangin, ka itte aw, i Toupa Jesu Khrist' sawltakliante'n nidang laia a na thugente uh thei gige un: 18 Ni nanungte ah, simmawhhatte, amau' sa utna banga omte leh pathianmitna limsakloutaka gamtate hong om ding, a chih uh. 19 Hiai mite zaw, pianpih lunggulhna banga gamta, Kha nei lou, kilangkhenna omsakte ahi uhi. 20 Ka itte aw, noute zaw, a siangthou penpen na thu-up ua kilamtouin, Kha Siangthou ah thuum un. 21 Tangtawn hinna hon puak ding i Toupa Jesu Khrist zahngaihna na ngak kawmun, Pathian' itna sung ah kikem un. 22 A umlahte tung ah zahngaih siam unla, 23 midangte zong meikuang apan kaikhia unla, hukhia un. Midangte tung ah launa tawh kithuah zahngaihna langsak unla, sa nitna in a buahsak puansilh nangawn kih un.
Pathian Phatna
24 Kipalpai lou dinga hon kem theipa leh, a thupina maia genbaanglou leh, lungnopna lianpi tawh noute hon tun theipa Pathian ahi. 25 Amah a pii omsun Hondampa Pathian tung ah thupina leh, kumpithupina leh vangletna leh ukna, tanglai kumte om ma leh tu leh Tangtawnin omdenta hen! Amen.
Thumasa
1 Jesu Khrist' kilakna, Pathian in thil hong tung pah mahmah dingte tawh kisai a silate kianga a lah dinga amah a piak ahi. Khrist in a vansawltak sawlin hiai kilakna, mite theisak dingin Johan kiang ah a lak hi. 2 Johan in Pathian' thu leh Jesu Khrist theihpihna leh a muhte khempeuh theihpihna thu a gen hi. 3 A hun hong naita ahih manin, hiai kamsang genkholhna kigelh za-a lungsunga kem mi, mi nunnuam ahi.
Chibaibukna leh Phatna
4 Kei, Johan in Asia gama saptuam sagihte kiang ah lai kon gelh hi. A omlel, a omkhin leh a hong pai dingpa Jesu Khrist leh, a kumpitutphah maia kha sagihte apanin hehpihna leh lungmuanna noute tung ah om hen. 5 Jesu Khrist bel, theihpihpa muanhuai, misite laka piang masapen leh, leitung kumpipate ukpa ahi. Amah eite hon it a, a sisana i khelhnate apan hon siangsakpa leh, 6 a Pathian leh Pa adinga kumpigam leh siampite-a hon bawlpa tung ah thupina leh vangletna Tangtawn Tangtawnin om hen. Amen. 7 En un, amah meipi tawh hong pai ding a, mit tengin amah mu ding hi. Amah dawtte nangawn in mu ding a, leitung namte khempeuh in amah suun ding hi. Tua bang teekteek hi ding hi! Amen. 8 Toupa Pathian in: Kei, Alfa leh Omega, a Masapen leh a Nunungpen ka hi. A omlel, a omkhin leh a hong pai dingpa, Vanglianpen ka hi, a chi hi. 9 Kei, noute' sanggampa leh, Khrist Jesu-a gimgentheihna leh kuhkaltaka thuakna leh kumpigam hanga na thuakpih uh Johan, Pathian' thu leh Jesu Khrist ka theihpihna hangin, Patmos kichi tuikulh ah ka om hi. 10 Toupa Ni in Khain ka om a, ka nunglam ah pengkul ging banga ngaih aw khat ka za hi. 11 Tua aw in: Kei, Alfa leh Omega, a Masapen leh a Nanungpen ka hi. Na muhte laibu ah gelh inla, Asia gama saptuam sagihte, Efesa saptuam, Smurna saptuam, Pergamam saptuam, Thuatira saptuam, Sardis saptuam, Filadelfia saptuam leh Laodikei saptuamte kiang ah khak in, hon chi hi. 12 Kei hon houpih aw en dingin ka kihei a, khama kibawl meivak mung sagihte ka mu hi. 13 Tua meivak mung sagihte laizanga om kua hiam khat mihing tapa tawh kibang ka mu hi. Ama'n a khepek dong khuh kumpipuantual a silh a, khama kibawl puanduang khat a awm ah a vet hi. 14 A lutang leh sam samul bangin a ngou a, vuk bangin a ngou a, a mitte lah meikuang bang ahi. 15 A khepekte, pummeia zap sumsan am bang ahi a, a aw lah tui tampi luang ging bang ahi. 16 Ama'n a khut taklam ah aksi sagih a tawi a, a kam apan namsau hiamtuah a pawt a, a mei lah, ni a sat vang laitak bang ahi. 17 Amah ka muh takin, si bang maiin a khebul ah ka puk hi. Ahihhangin, ama'n a khut taklam ka tung ah a nga a: Lau ken. Kei a Masapen leh a Nanungpen ka hi. 18 Kei, Ahingpa ka hi. Ka sita a, ngai in, Tangtawn Tangtawnin ka hingden hi! Misikhua leh Sihna tahbi ken ka nei hi. 19 A omlel leh, tununga hong om ding na muhte gelh in. 20 Ka khut taklama na muh aksi sagihte leh, khama kibawl meivak mung sagihte tawh kisai thusim-kiseel hiai ahi: Tua aksi sagihte, saptuam sagihte kemte ahi uh a, na muh meivak mung sagihte bel saptuam sagihte ahi.
Efesa Saptuam
1 Efesa saptuam kempa kiang ah: A khut taklama aksi sagih tawipa, khama kibawl meivak mung sagih laizanga paipa'n hiai thilte a gen a: 2 Na thilhihte, na sepgimna leh na thuakzawhna ka thei. Migiloute na thuak theihlouh dan ka thei. Sawltaklian kichi a, lah hi hetloute na entel a, zuautheite a hihna uh na muhtak dan zong ka thei hi. 3 Na kuhkal a, na thuakzou a, keima' min hangin na semgim a, tawiin na chimtak kei hi. 4 Ahihhangin, hiai ah demna kon nei hi: Non itna masa na tawpsan thu ah. 5 Tua ahih manin, na pukna mun a sanna thei gige in! Kisikin lunghei inla, na hih masakte hih in. Tua banga na lunghei kei leh, ka hong pai ding a, na meivak mung a omna apan ka suan ding. 6 Ahihhangin, hiai na nei: Nikolai pawlte' nasep na hua a, ken zong ka hua hi. 7 Saptuamte kianga Kha' thugen, zakna ding bil nei peuh in zata hen. A vualzoupa kiang ah, Pathian' Paradis laizanga om hinna singkung apan nek ding ka pe ding hi, a chi, chi-in gelh in.
Smurna Saptuam
8 Smurna saptuam kempa kiang ah: Si-a hingkikpa, a Masapen leh a Nanungpen in hiai thilte a gen a: 9 Na thilhihte, na gimthuakna leh tasama na gentheihna ka thei, ahihhangin, na hau hi, Juda kichi a, lah hi hetloute' Pathian gensiatna ka thei. Amaute Setan' sunagog ahi uhi. 10 Na thuak dek thilte bangmah lau ken. Ze-eta na om theih nadingin, dawimangpa'n na lak ua pawlkhat suangkula hon khum dek ahi a, ni sawm sung gim na thuak ding hi. Sih dongin muanhuai in, hi leh pahtakmanin hinna lukhu kon pe ding hi. 11 Saptuamte kianga Kha' thugen, zakna ding bil nei peuh in zata hen. A vualzoupa, sih nihna in a hihna het kei ding hi, a chi, chi-in gelh in.
Pergamam Saptuam
12 Pergamam saptuam kempa kiang ah: Namsau hiamtuah tawipa'n hiai thilte a gen a: 13 Na thilhihte leh na tenna mun tua Setan' tutphah omna ka thei. Setan' tenna na khawpi-a ka martar muanhuai Antipas thah a hih lai nitein ka min na gum a, keimah non upna na tawpsan kei hi. 14 Ahihhangin, demna zek kon nei hi. Balaam' sinsakna nei mite na nei hi. Balaam in Israel tate, milimte' maia kithoihnate ne ding leh, numei pasal kal paktatna hih ding a, a mai ua kisuihpukna koih dingin Balak a sinsak hi. 15 Nikolai pawlte' sinsakna neite zong na nei a, tua sinsakna ka zadah hi. 16 Kisikin lunghei in. Tua ahih kei leh, na kiang ah kong pai pah ding a, ka kama namsauin kon dou ding hi. 17 Saptuamte kianga Kha' thugen, zakna ding bil nei peuh in zata hen. A vualzoupa kiang ah, mana selguk apan nek ding ka pe ding hi. Tua baan ah, suang pak khat, a tunga min thak kigelh, a sangpa loungal in a theih louh ka pe ding hi, a chi, chi-in gelh in.
Thuatka Saptuam
18 Thuatira saptuam kempa kiang ah: Pathian' Tapa, meikuang bang mit neipa, sumsan nawttet bang khepek neipa in hiai thilte a gen a: 19 Na thilhihte, na itna, na nasep, na upna leh na thuakzawhna ka thei. A chillai sangin na naksep zaw hi. 20 Ahihhangin, hiai demna zek kon nei hi. Numei Jezebel na khahzan mawk hi. Amah leh amah kamsang kineihnu ahi. Ama'n a sinsaknain ka silate numei pasal kal paktat ding leh milimte' maia kithoihnate ne dingin a khemzou hi. 21 A kingaihna nin apan kisika lunghei nading hun kiching ka pia a, ahihhangin a lunghei nuam kei hi. 22 Tua bang ahih manin, amah chinain lupna ka ngaksak ding a, amah tawh ang kikawmte zong kisika a lunghei kei uleh, gim ka thuaksak ding hi. 23 A tate ka that gam ding a, saptuamte khempeuh in, Kei, mihing' lungsim leh lungtang entelpa ka hi, chih a thei ding uhi. Noute na thilhih bang tekun kon thuk ding hi. 24 Thuatira khua-a om midangte, Jezebel' sinsakna zuiloute leh, Setan' thusim kiseel thuktak kichite thei nailoute kiang ah, hiai ka gen a, puakgik dang kon suan kei ding hi, 25 Ka hong pai mateng, na neihsa uh len tinten un. 26 A vualzoupa leh a tawp donga ka nasem mi kiang ah, namte tunga thuneihna ka pe ding. 27 Ama'n sikchiangin amaute uk ding a, leibeel banga amaute paitam dimdem ding hi. Tua thuneihna bel, ke'n ka Pa apan ka ngah bangbanga pe ding ka hi. 28 Amah kiang ah zingsol aksi zong ka pe ding hi. 29 Saptuamte kianga Kha' thugen, zakna ding bil nei peuh in zata hen, a chi, chi-in gelh in.
Sardis Saptuam
1 Sardis saptuam kempa kiang ah: Pathian' Kha sagih neipa leh aksi sagih neipa'n hiai thilte a gen a: Na thilhihte ka thei. A hing min na pu a, ahihhangin, a si na hi. 2 Khanglou inla, a si dek geigei na neih laite hatsak in. Ahang bel, na thilhihte, Pathian' mai ah a kiching kei chih ka mu hi. 3 Tua ahih manin, na ngahsa leh na zaksa pen thei gige-in lenkip inla, kisikin lunghei in. Guta banga hong pai ding ka hi. Kong pai hun ding na thei kei ding hi, kiveng in. 4 Ahihhangin, Sardis ah mi tawmchik, a puansilhte uh ninsak lou, na nei lai hi. Amaute puan ngou silhin kei tawh kithuahin a nungta ding uhi. Ahang bel, amaute tua dingin a taak uhi, 5 A vualzoupa'n puan ngoute a silh ding a, hinna laibu apan a min ka thaimang kei ding. Ka Pa' mai ah leh, a vansawltakte' mai ah, a min ka gum ding hi. 6 Saptuamte kianga Kha' thugen, zakna ding bil nei peuh in zata hen, a chi, chi-in gelh in.
Filadelfia Saptuam
7 Filadelfia saptuam kempa kiang ah: A Siangthoupa leh a Dikpa, David' tahbi neipa, ama' honsa kuamah khak theihlouh leh, ama' khaksa lah kuamah hon theihlouhpa'n hiai thilte a gen a: 8 Na thilhihte ka thei. En in, na mai ah kuamah khak theilouh kong honsa ka koih. Thahatna neuchik na nei a, hinapi-in, ka thu na kem a, ka min na kilepsan kei hi. 9 Setan' sunagog hinapi, Judate kichi a, lah hi hetlou zuautheite na mai ah kon paisak ding a, na khebul ah ka boksak ding a, nang kon it, chih ka theisak ding hi. 10 Kuhkal dinga kon thupiak na zuih manin, ke'n zong leitung bupa teengte ze-etna hong tung dek a hong tun chiangin, kon hum ding hi. 11 Ngai in, kong pai guih ding hi! Kuama'n na pahtakna lukhu hon suh louh nadinein, na neihsa pen lenkip in. 12 A vualzoupa, ka Pathian' tempul ah khuampi-in ka bawl ding a, ama'n tua tempul a nuse nawn kei ding hi. Ama' tung ah ka Pathian' min leh, ka Pathian khawpi Jerusalem Thak min ka gelh ding. Tua khawpi bel, vana ka Pathian apan hong paisuk ahi. Tua baan ah, ama' tung ah ka min thak zong ka gelh ding hi. 13 Saptuamte kianga Kha' thugen, zakna ding bil nei peuh in zata hen, a chi, chi-in gelh in.
Laodikei Saptuam
14 Laodikei saptuam kempa kiang ah: Amen ahipa, a muanhuaipa leh theihpih takpa, Pathian' thilsiam ukpa'n hiai thilte a gen a: 15 Na thilhihte ka thei. Vot lah vot lou, sat lah sa lou na hi. Na vot hiam, na sat hiam ka deih hi. 16 Tu'n bel, vot lah vot lou, sat lah sa lou, lum pelhpulh na hih manin, ka kam apan kon sekhe ding hi. 17 Ka hau a, hauhna ka lam a, taaksap ka nei kei, na chi. Ahihhangin, genthei, hehpihhuai, tasam, mittaw leh vuaktang na hih lam na kiphawk kei hi. 18 Nong hauh theih nadingin, puansilh ngou, tua baan ah, na mit vak nading mitlou, kei apan lei dingin kon thuhilh hi. 19 Ken ka itte ka taai a, ka thunun hi. Tua bang ahih manin, phatuam ngai inla, kisikin lunghei in. 20 Ngai in, Kei, kongkhak bul ah ka ding a, ka kiu hi. Kuapeuh in ka aw a zak a, kong hon hon leh, amah kiang ah ka lut ding a, amah tawh an ka umkhawm dia, ama'n kei tawh a umkhawm ding. 21 Kei ka vualzou a, ka Pa' kumpitutphaha amah tawh ka tutkhawm bangin, a vualzoupa zong, ka kumpitutphah ah kei tawh ka tukhawmsak ding. 22 Saptuamte kianga Kha' thugen, zakna ding bil nei peuh in zata hen, a chi, chi-in gelh in, a chi hi.
Vantunga Kumpitutphah
1 Hiai thilte nungin, ka en a, ngai un, vantung ah kongkhak honsa khat a om hi. Aw ka zak masak pen, pengkul ging bang in kei hon houpih a: Hiai ah hong paitou in, hiai thilte nunga hong tung ding thilte kon ensak ding, hon chi hi. 2 Thakhatin, Khain ka om a, ngai un, vantung ah kumpitutphah khat leh a tunga mi khat tu a om hi. 3 Tua kumpitutphah tunga tupa bel, jaspar leh sardi suang manpha zia bangin a kilang a, tua kumpitutphah kimkot ah emeral suang manpha zia banga kilang, sakhituihup a zaam hi. 4 Tua kumpitutphah kimkot mah ah, kumpitutphah dang 24 a om hi. Tua kumpitutphahte tung ah puan ngou silh, upa 24 tu-in ka mu a, amaute'n khama kibawl pahtakna lukhute a khu uhi. 5 Tua kumpitutphah apan khawphiate, vanpi gingte leh awte a pawt hi. Tua baan ah, tua kumpitutphah mai ah meivak sagih a kuang a, tuate Pathian' Kha sagihte ahi uhi. 6 Tua kumpitutphah mai ah, khrustal banga siang, tui limlang kuangpi zong a om hi. A laizang ah, tua kumpitutphah kimkot ah, mailam leh nunglam mit-a dim thilhing li a om uhi. 7 Thilhing khatna pen, humpinelkai tawh a kibang a; thilhing nihna pen, bawngnou tawh a kibang a; thilhing thumna pen, mihing maitang bang maitang nei ahi a; thilhing lina pen, muvanlai lenglai tawh a kibang ahi. 8 Tua thilhing lite'n kha guk tek a nei uh a, tua khate a sung leh pua mita dim ahi. Amaute'n sun leh zan tawlnga louin: Toupa Pathian Vanglianpen, Omkhinsa, Om lei leh hong Paidingpa, a siangthou hi, a siangthou hi, a siangthou hi! a chi uhi. 9 Tua thilhing lite'n, kumpitutphah tunga tupa, Tangtawn Tangtawna hing gigepa kiang ah, thupina leh pahtawina leh kipahthu a pia uhi. 10 Tua banga a hih laiun, upa 24-te, tua kumpitutphah tunga tupa, Tangtawn Tangtawna hing gigepa' mai ah a bok uh a, amah a bia uhi. Tua kumpitutphah mai ah a pahtakna lukhute uh a koih uh a: 11 Toupa, koute' Pathian aw, thupina leh pahtawina leh vangletna ngah dinga ching na hi. Ahang bel, nang bangkim siam chin a, nang' deihna banga kisiam leh om hive-un, a chi uhi.
Laibuzial leh Belamnou
1 Tua khitin, kumpitutphah tunga tupa' khut taklam ah, laibuzial khat, a sung leh pua kigelh, belhchipna sagiha kibelh-chip ka mu hi. 2 Tua khitin, a thahat mahmah vansawltak khat ka mu a, ama'n aw ngaihtakin: Belhchipnate phei a, laibuzial phen dinga chin kua om hiam? chi-in a kikou hi. 3 Ahihhangin, tua laibuzial phei dingin hiam, a sung en ding nangawn hiamin zong, a chin kuamah, vantung ah zong, leitung ah zong, leinuai ah zong a om mahmah kei hi. 4 Tua banga, tua laibuzial phei ding leh sim ding, ahih kei leh, a sung en ding nangawna chin kuamah a om louh manin, nakpitakin ka kap nilouh hi. 5 Tua khitin, upate laka khat in ka kiang ah: Kap kenla, ngai in, Judah nam apan tua Humpinelkai, David Zungpi, tua laibuzial belhchipna sagihte phei ding leh, laibuzial phen dingin a vualzouta hi, hon chi hi. 6 Tua khitin, ngai un, a kigou-khinsa hileh kilawm, Belamnou khat ka mu a, amah tua kumpitutphah leh thilhing lite lai ah a ding hi. Tua Belamnou in ki sagih leh mit sagih a nei hi. Tua a mit sagihte bel, leitung khempeuha kisawlkhia Pathian' Kha sagihte ahi. 7 Amah a hong pai a, kumpitutphah tunga tupa' khut taklam apan tua laibuzial a la hi. 8 Tua banga a lak laitakin, thilhing lite leh upa 24-te, Belamnou' mai ah a bok uhi. Amaute'n kaihging khat leh gim namtuite-a kidim kham belkuang a tawi tek uhi. Tua gim namtuite bel, misiangthoute' thuumnate ahi. 9 Amaute'n la thak khat a sa uh a: Tua laibu la ding leh, a belhchipnate phei dinga chin nang na hi. Ahang bel, thaha na om chin a, Pathian adinga beh chih, pau chih, mi chih leh nam chih apan koute, na sisana hon tanta chin a, 10 ka Pathian uh adinga kumpigam leh siampite-a hon bawlta chin a, koute'n leitunga vaihawm ding hive ungin, a chi uhi. 11 Tua khitin, ka en a, tua kumpitutphah kimkota vansawltak simsenglouh, sang mun sang tampi leh, sangsawm mun sangsawm tampi leh, thilhingte leh upate' aw ka za a, 12 amaute'n aw ngaihtakin: Gawhsa Belamnou in, vangletna leh hauhna leh, pilna leh thahatna leh, pahtawina leh thupina leh, phatna ngah dingin chin hi! chi-in la a sa uhi. 13 Tua khitin, vantunga om leh leitunga om leh, leinuaia om leh, tuipi sunga om thilsiam khempeuh in: Kumpitutphah tunga Tupa leh Belamnou kiang ah phatna, pahtawina, thupina leh vangletna Tangtawnin om tawntungta hen, chi-a la a sak uh ka za hi. 14 Tua khitin, thilhing lite'n: Amen! a chi uh a, upa 24-te'n zong bokin, Tangtawn Tangtawna hing gigepa a bia uhi.
Belhchipnate
1 Tua khitin, Belamnou in belhchipna sagihte laka khatna a phei lai ka mu hi. Tua lai mahin, thilhing lite laka khat in, vanpi ging banga ngaih awin: Hongpai inla, hong en in! hon chih zong ka za hi. 2 Tua banga ka et leh, ngai un, sakol kaang khat ka mu hi. Tua sakol kaang tunga tuangpa'n thalphel khat a tawi a, a kiang ah pahtakna lukhu khat a kipia a, vualzoua zou zel dingin a kuankhia hi. 3 Belamnou in belhchipna nihna a phei takin, thilhing nihna in: Hong pai inla, hong en in! hon chih ka za hi. 4 Ka et leh, ngai un, sakol dang khat, meikuang banga san hong pai ka mu hi. Tua sakol tunga tuangpa kiang ah, leitung apan galmuanna a lakmang nading leh, mite kithahtuahsak nading vangletna leh namsau lianpi khat zong piak ahi. 5 Belamnou in belhchipna thumna a phei takin, thilhing thumna in: Hong pai inla, hong en in! hon chih ka za hi. Ka et leh, ngai un, sakol vom khat ka mu a, a tunga tuangpa'n a khut in buukna phala kopkhat a tawi hi. 6 Tua khitin, thilhing lite lak apan aw hi leh kilawm ka za a, tua in: Ni khat thaman huitbuh man dingin omer kimkhat hisak inla, barlibuh ahih leh omer khat leh alang hisak in. Sathau leh grepzu bel hihse ken, a chi hi. 7 Belamnou in belhchipna lina a phei takin, thilhing lina' aw in: Hong pai inla, hong en in! hon chih ka za hi. 8 Ka et leh, ngai un, sakol daang khat ka mu hi. A tunga tuangpa' min bel Sihna ahi a, Misikhua in amah a zui hi. Amah kiang ah leitung mi sehli suah seh khat tunga thuneihna piak ahi. Amah kiang ah namsau leh kial leh, sihna leh leitung gamsate zanga amaute thah ding thu piak ahi. 9 Belamnou in belhchipna ngana a phei takin, Pathian' thu hang leh a theihpihna uh hanga thahna thuakte' hinna khate, maitam nuaia om ka mu hi. 10 Amaute'n aw ngaihtaka kikouin: A Siangthoupa leh a Dikpa, Thuneihnakim uun Toupa aw, leitunga teengte tunga ka sisan phuba uh lak ding bangtan hal lai ding na hiam? a chi uhi. 11 Tua khate kiang ah, kumpipuan ngou khat tek piak ahi. Tua baan ah, amaute banga thaha hong om ding, a sila hihpihte uleh, sanggamte uh a kim masiah, na ngak lai tadih dinga hilhin a om uhi. 12 Belamnou in belhchipna gukna a phei takin, ka et leh, ngai un, zinpi nakpitakin a ling hi. Ni lah samul vom ippi bangin hong vom a, khapi lah sisan bangin hong san hi. 13 Vaan aksite, theipi hut huihpi' mut pulh bangin, leitung ah a ke duamduam uhi. 14 Vandum lah laipek zial bangin a kizialkhia a, mualsangte leh tuikulh gamte a omna uapan lakkhiak ahi uhi. 15 Tua khitin, leitung kumpipate, kumpi tapate, sepaih makai liante, a haute, a thahatte, sila leh noplen khempeuh, mual tunga kawkhukte leh suangpi lakte ah a kibu uh a, 16 mualsangte leh suangpite kiang ah: Koute hon delhkhum unla, kumpitutphah tunga tupa' maitang leh, Belamnou' thangpaihna ni thupi apan hon sel un! 17 Ama' thangpaihna ni thupi hong tungta, kua mahmah ding zou ding hiam? a chi uhi.
Mi 1,44,000 Kichiamtehna
1 Hiai thilte nungin, lei kiu li-a ding, vansawltak li ka mu hi. Amaute'n leitung leh tuipi tung, ahih kei leh, singkung himhim tunga nung lou dingin leitung huih lite a lenchip uhi. 2 Tua nungin, vansawltak dang khat, suahlam apan hong paitou ka mu hi. Ama'n Pathian hing' chiamtehna a tawi hi. Ama'n aw ngaihtakin, gam leh tuipi hihsiat theihna vangletna piaka om tua vansawltak lite a sam a: 3 I Pathian' silate' taltanga chiamtehna i koihkhit mateng, gam leh tuipi, ahih kei leh, singkungte hihse kei un, a chi hi. 4 Tua khitin, Israel nam khempeuh apan mi kichiamteh phazah ka za hi. Avekpi-in 1,44,000 ahi. 5 Judah nam apan kichiamteh 12,000; Reuben nam apan kichiamteh 12,000; Gad nam apan kichiamteh 12,000; - makaite chih zong 19,21. 6 Asher nam apan kichiamteh 12,000; Naftali nam apan kichiamteh 12,000; Manase nam apan kichiamteh 12,000; 7 Simeon nam apan kichiamteh 12,000; Levi nam apan kichiamteh 12,000; Isakhar nam apan kichiamteh 12,000; 8 Zebulun nam apan kichiamteh 12,000; Josef nam apan kichiamteh 12,000; Benjamin nam apan kichiamteh 12,000.
Mipi Tampite
9 Hiai thilte nungin, ka et leh, gamte, namte, mite, paute apan mi tampi mahmah, kuamah simseng louh ka mu hi. Amaute, kumpitutphah mai ah leh Belamnou' mai ah, kumpipuan ngou silhin a ding uh a, khutin tumsing teh hiangte a tawi tek uhi. 10 Amaute aw ngaihtakin a kikou uh a: Hotdamna, Toupa i Pathian kumpitutphah tunga tupa leh, Belamnoua ahi, a chi uhi. 11 Tua khitin, tua vansawltakte khempeuh, kumpitutphah leh upate leh, thilhing lite kimkot ah a ding uhi. Amaute'n kumpitutphah mai ah bokin Pathian a bia uh a: 12 Amen! Phatna leh thupina leh pilna, pahtawina leh vangletna leh thahatna, Tangtawnin Pathian in tang tawntung hen. Amen! a chi uhi. 13 Tua nungin, upate laka khat in kei hon dong a: Hiai kumpipuan ngou silhte kuate hi a, koi apan hong pai hi uhiam? hon chi hi. 14 Ke'n: Pu aw, nangma'n na thei hi, ka chi hi. Ama'n ka kiang ah: Hiaite, tua gimthuakna thupi apan hong paikhia, a kumpipuante uh Belamnou' sisana sawpa ngousakte ahi uh. 15 Tua bang ahih manin, Amaute'n Pathian' kumpitutphah maia omin, a sun a zan a tempul sung ah, ama' nna sem uhi. Kumpitutphah tunga tupa'n amaute tung ah a puanbuk zakkhum ding hi. 16 Amaute gilkial ngei nawn lou ding uh a, dangtak ngei nawn lou ding uhi. Ni hita leh, satna himhim in zong amaute haai lou ding hi. 17 Ahang bel, kumpitutphah laia tua Belamnou, amaute chingpa hi ding a, ama'n amaute tuihing luite ah pii ding a, Pathian in amaute' mit apan khitui khempeuh nulhul ding hiven, a chi hi.
Belhchipna Sagihna
1 Belamnou in belhchipna sagihna a phei takin, dakkal kimkhat sung vantung a dai sipsip hi. 2 Tua khitin, Pathian' maia ding tua vansawltak sagihte ka mu hi. Amaute kiang ah pengkul sagih a kipia hi. 3 Tua khitin, vansawltak dang khat hong pai a, gim namtui halna kham noudai tawiin, maitam mai ah a ding hi. Amah kiang ah, gim namtui tampi a kipia hi. Tua bel, misiangthoute khempeuh' thumna tawh, kumpitutphah maia kham maitam tunga a latkhawm dinga piak ahi. 4 Tua vansawltak' khut apanin gim namtui khu leh misiangthoute' thumna Pathian' mai ah a zaamtou hi. 5 Tua khitin, tua vansawltak in, gim namtui halna noudai a la a, tua maitam apan mei a dimin a luak a, leitung ah tua mei a thehsuk hi. Tua khit phetin, husate, vanpigingte, khawphiate leh nakpitaka zinling hong om hi.
Pengkulte
6 Tua khitin, pengkul sagih tawi tua vansawltak sagihte, a pengkul uh mut dingin a kisa uhi. 7 Vansawltak khatna in a pengkul a mut a, gialpi leh mei, sisan tawh kihel, leitung ah hong bawsuk hi. Tua in singkungte sehthum suah seh khat a kangtum a, louhing khempeuh zong a kangtum hi. 8 Tua nungin, vansawltak nihna in a pengkul a mut a, mual lianpi meia kaang banga kaang banghiam khat, tuipi sunga paihlutin a om hi. Tua in tuipi seh thum suah seh khat sisan a suaksak a, 9 tuipi-a om ganhingte sehthum suah seh khat a si a, longpite seh thum suah seh khat hihsiat ahi. 10 Tua nungin, vansawltak thumna in a pengkul a mut a, vaan apanin aksi lianpi, meisel banga kuang, luite seh thum suah seh khat tung ah leh, luinakte tung ah a kia hi. 11 Tua aksi min bel, Khaatna ahi. Tua in tui seh thum suah seh khat a khasak a, tua tui apan mi tampi a si uhi. 12 Tua nungin, vansawltak lina in a pengkul a mut a, ni seh thum suah seh khat, khapi seh thum suah seh khat leh, aksite seh thum suah seh khat tung ah khut a kikha a, a hong mialta uhi. Sun hun seh thum suah seh khat leh, zan hun seh thum suah seh khat a bei hi. 13 Tua nungin, ka et leh, vaan laia leeng vansawltak khat in ngaihtakin: Tung gik! Tung gik! Vansawltak omlai thumte' pengkul mut dek hangin, leitunga teengte tung a gik hi! a chih ka za hi.
1Tua nungin, vansawltak ngana in a pengkul a mut a, aksi khat, vaan apan leia kesa ka mu hi. Tua vansawltak kiang ah, kawkhuk tawbei honna tabi piak ahi. 2 Ama'n tua kawkhuk tawbei a hong a, tua apanin, haltuina mei phualpi khu bang meikhu a kitungtou hi. Tua meikhu in ni leh vaan a mialsakta hi. 3 Tua meikhu apanin, khaupete leitung ah a hong tung uhi. Amaute kiang ah leitung aikamte' vangletna bangbang vangletna piak ahi a, 4 a taltang ua Pathian' chiamtehna neiloute kia hihnatna thuaksak ding, ahihhanga, leitung loupate, louhing himhim leh, singkung himhim bel hihsiat louh ding thu piak ahi. 5 Tua mite bel thah louh ding, ahihhanga kha nga sung hihnatna thuaksak ding thu piak ahi. Tua hihnatna ahih leh, aikam deh banga na ahi. 6 Tua nitein, mite'n sihna lunggulh in a zong ding uh a, a mu kei ding uhi. Sih a ut ding uh a, sihna in amaute a taisan ding hi. 7 Tua khaupete bel, kidou dinga kisa sakolte bang ahi uh a, a lutung uah khama kibawl hi leh kilawm, kumpilukhu a khu uh a, a meite uh mihing mei bang ahi. 8 Numei sam bang sam a nei uh a, a hate uh humpinelkai hate bang ahi. 9 Sik awmphawte a nei uh a, a khazap ging uh, kidou dinga taai sakol kangtalai tampi ging bang ahi. 10 Amaute'n aikam mei bang mei a nei uh a, tua a meite uah gu a nei uh a, kha nga sung mite hihnatna thuaksak nading vangletna a nei uhi. 11 Amaute'n tua kawkhuk tawbei neipa vansawltak pen kumpipain a nei uhi. Ama' min Hebru pauin Abadon ahi a, Grik pauin Apolion ahi. 12 Tunggikna khat a beita. Ngai un, tunggikna nih hong tung lai ding a om hi. 13 Tua nungin, vansawltak gukna in a pengkul a mut a, Pathian' maia om kham maitam ki lite apan aw khat ka za hi. 14 Tua aw in pengkul tawi vansawltak gukna kiang ah: Iufratis lui lianpi-a hensa-a kikoih vansawltak lite khahkhia in, a chi hi. 15 Tua vansawltak lite bel, Pathian in a kum, a kha, a ni, a dak adinga mansa-a a koih ahi uh a, tuin mihing khempeuh seh thum suah seh khat that dingin khahkhiak ahi uhi. 16 Tua dinga kuankhia sakol tungtuang sepaih pawlpi tamdan 200,000,000 ahi, chi-a kigen ka za hi. 17 Tua baan ah, mengmuhna-a ka muh sakolte hibang ahi uhi: Tua sakol tungtuangte'n meikuang banga san, sandup leh kaat banga eng awmphawte a nei uhi. Tua sakolte' lutangte humpinelkai lutang bang ahi. A kamsung ua panin mei, meikhu leh kaat hong pawt hi. 18 A kamsung ua pan hong pawt tua hipi thum, mei, meikhu leh kaatin mihing khempeuh seh thum suah seh khat a that uhi. 19 A vangletna uh a kam sung uleh a mei uah a om a, a meite uh gulpi bang ahi a, lutangte a nei uhi. Tuatein mite a hihna uhi. 20 Hiai hite-a si lou, mihing omlaite lah a khut nasepte uapan kisikin a lunghei tuan kei uhi. Dawi biak, kham leh ngun leh sumsan leh suang leh singa kibawl milimte, muh lah mu thei lou, zak lah za thei lou, pai lah pai thei loute biak a tawp tuan kei uh. 21 A tualthahna uh, damdawi zanga a bumna uh, numei pasal kala a paktatna uh, ahih kei leh, a guktakna ua-pan zong kisikin a lunghei tuan kei uhi.
Vansawltak leh Laibu Neu
1 Tua nungin, a thahat mahmah vansawltak dang khat, vantung apan hong paisuk ka mu a, ama'n meipi puanin a silh hi. A lutang ah sakhituihup a kai a, a maitang ni bang ahi a, a khete meikuang khuampi bang ahi. 2 Ama'n a kiphensa laibu neu khat a tawi a, a khe taklamin tuipi a sik a, a khe veilamin gamhul a sik hi. 3 Amah humpinelkai humham bangin, ngaihtakin a kikou a, a kikou chiangin, vanpi ging sagihte'n aw a suah uhi. 4 Tua vanpi ging sagihte'n aw a suah takun, ke'n gelh dingin ka kisa hi. Ahihhangin, vantung apan aw ka za a, tua in: Vanpi ging sagihte' gente bilhchip inla, gelh ken, hon chi hi. 5 Tua khitin, tuipi tung leh gamhul tung sika ding vansawltak ka muh pen in, vanlam ah a khut taklam a liktou a, 6 amah Tangtawn Tangtawna hing gigepa, vaante leh a sunga omte leh, lei leh a sunga omte leh tuipi leh a sunga omte khempeuh Siampa' min sialin a kichiam a: Zekai nawn lou ding hi! 7 Vansawltak sagihna in a pengkul a mut dek nitein, Pathian in a sila, tua kamsangte kianga a gensa bangin, Pathian' thusim kiseel a tungkimta ding hi, a chi hi. 8 Tua nungin, vaan apan aw ka zak pen in kei hon houpih kik a: Pai inla, tuipi leh gamhul sika ding vansawltak' khuta laibu neu phensa-a om vala in, hon chi hi. 9 Sawla ka om bangin, tua vansawltak kiang ah ka vapai a: Tua laibu neu kei hon pia in, ka chi hi. Ama'n ka kiang ah: La inla, ne in. Laibu in na gilpi a khasak ding a, ahihhangin, na kam ah bel khuaizu bangin a khum ding, hon chi hi. 10 Tua vansawltak' khut apan laibu neu ka la a, ka neta hi. Ka kam ah khuaizu bangin a khum a, ahihhangin, ka nek khitin, ka gilpi ah a kha hi. nAma'n ka kiang ah: Mite, namte, paute leh kumpipate tampi tawh kisai, Pathian apan thu na gen kik teitei ding ahi, hon chi hi.
Theihpihmi Nihte
1 Tua nungin, tua vansawltak in tehna chiang pumpeng khat hon pia a: Thou inla, Pathian' tempul, a maitam teh inla tua-a bete sim in, 2 Ahihhangin, tempul huang pawnung nusia inla, teh ken, Zentelte kianga piaksa ahi. Amaute'n kha 42 sung, khawpi siangthou a sikden ding uh. 3 Tua khit chiangin, ka theihpihmi nihte kiang ah vangletna ka pe ding a, amaute'n saiip puan silhin, ni 1,260 sung, Pathian apan thu a gen ding uhi, a chi hi. 4 Hiaite, leitung Toupa' maia ding, oliv singkung nihte leh, meivak mung nihte ahi uhi. 5 Mi khempeuh in amaute hihnat a sawm chiangun, a kam uapan mei hong pawtin a galte uh a kangtum hi. Amaute hihnat sawm peuhmah a sih teitei ding dan hibang ahi. 6 Hiai mite'n, a thugen sung ua vuah a zuk louh nadingin, vaan khakbing theihna a nei uhi. Tua baan ah, luite sisan suahsak theihna leh, a ut hun peuh ua, hii namkima leitung gawt theihna thuneihna zong a nei uhi. 7 Amaute'n a theihpihna thu uh a genkhit takun, kawkhuk tawbei apan hong pawttou gamsa in amaute a suai a, a zou a, a that a, 8 amaute' luangte, tua khawpi thupi kongzing ah a lum hi. Etsakna dana genin, tua khawpi bel Sodom leh Aigupta ahi. Tua ah, amaute' Toupa zong khros tunga kilhlupin a om hi. 9 Namte, paute, minamte khempeuh apana mite'n ni thum leh a kimkhat sung amaute' luangte a en uh a, vui a phal kei uhi. 10 Leitunga teengte, tua luangte tunga kisiala nopbawlin, thawnpiakte kikhak tuahin a om uhi. Ahang bel, hiai kamsang nihte'n leitunga teengte a na thuaksak ekta ua ahi. 11 Ahihhangin, ni thum leh a kimkhat nungin, amaute' sung ah Pathian apan hinna hu a lut a, a kheun hong ding uh a, a mute a lau mahmah uhi. 12 Vantung apan aw in amaute kianga: Hiai ah hong paitou un, a chih a za uh a, meipi lak ah, a galte uh muh tanglaiin, vantung ah a paitou uhi. 13 Tua hun laitakin, zinpi nakpitakin a liing a, tua khawpi sehsawm suah seh khat a chim hi. Tua zinling ah, mi 7,000 a si uh a, a dangte'n lau mahmahin, van Pathian a pahtawi uhi. 14 Tunggikna nihna a beita a, tunggikna thumna hong tung pah ding hi.
Pengkul Sagihna
15 Tua nungin, vansawltak sagihna in a pengkul a mut takin, vantung ah awte ngaihtaka kikou a om a: Leitung kumpigamte, i Toupa leh a Khrist' kumpigam hong suakta a, ama'n Tangtawn Tangtawnin vai hawm ding hi! a chi uhi. 16 Tua khitin, upa 24, Pathian' maia amau' kumpitutphah tunga tute'n bokin Pathian a bia uh a: 17 A omlel, a omkhin leh a omlai dingpa, Toupa Pathian Vanglianpen aw, na vangletna la a, vai na hawm manin, na tung ah kipahthu hon gen ung. 18 Namte a na heh uh a, tu'n nang thangpaihna hong tungta. Misite tunga na thukhen hun hong tungta. Nang na sila kamsangte leh misiangthoute leh, nangma' min zahtak milian mineu pahtakman na piak a, leitung hihsete na hihsiat hun hong tungta hi, a chi uhi. 19 Tua nungin, vantunga Pathian' tempul honin hong om a, a tempul sung ah, a thukhun singkuang hong kimu hi. Tua khitin, khawphiate, husate, vangingte, zinlingte leh gialpi thupitakte hong om hi.
Numei leh Gulpi
1 Tua khitin, vaan ah chiamtehna thupitak leh lamdangtak khat hong kilang hi: Ni puansilha nei numei khat a om a, a khenuai ah khapi a sikdeen a, a lutung ah aksi sawmlenih, pahtakna lukhuin a khu hi. 2 Amah a gai lai ahi a, nausuak ding nauvei natna thuakin a kikou hi. 3 Tua khitin, vaan ah chiamtehna dang khat hong kilang a, ngai un, dragon san lianpi khat, lutang sagih leh ki sawm nei, kumpilukhu sagih khu, hong kilang hi. 4 Tua dragon in a meiin vaana aksite sehthum suah seh khat a kaikhia a, leitung dennain a nei hi. Amah tua numei nausuak dek mai ah a ding a, a ta a suahkhiak khit phet chianga negai dingin a na ngak hi. 5 5 Tua numei in tapa, ta pasal khat, sik chianga namte uk dingpa, a nei khia hi. Tua naungek pen Pathian kiang ah leh, a kumpitutphah ah laktouhin a om hi. 6 Tua khit phetin, tua numei pen gamdai-gamkeu ah, Pathian in mun a bawlkholhsak ah, ni 1,260 sung kep dingin a taaita hi. 7 Tua nungin, vantung ah kidouna a om a, Mikhael leh a vansawltakte'n tua dragon a dou uh a, dragon leh a vansawltakte'n zong amaute a na dou uhi. 8 Ahihhangin, dragon leh a vansawltakte'n Mikhael leh a vansawltakte a zou kei uh a, vaan ah amaute adingin mun a om nawn kei hi. 9 Tua bangin, tua dragon lian, tua tanglai gulpi, dawimangpa, ahih kei leh Setan kichi, leitung bup khempa, paihkhiak ahita a, a vansawltakte tawh leitunga paihkhiaksuk ahita hi. 10 Tua nungin, vaan ah aw ngaihtak khat ka za a, tua aw in: Tuin Pathian' hotdamna leh vangletna leh kumpigam hong tungta a, a Khrist' thuneihna hong tungta hi. Ahang bel, i Pathian' maia i sanggamte a sun a zana hekpa lah paihkhiaka omta hiven. 11 Tua i sanggamte'n Belamnou' sisan leh, a theihpihna thuteun amah zouta uhi. Amaute'n sih dongin zong a hinna uh it lou uhi. 12 Tua bang ahih manin, nou vaante leh, vantunga teengte nuam un! Leitung leh tuipi aw, dawimangpa na tung ua hong tunsuk manin, na tung uh gik hi! Hun tomchik kia neita, chih a kitheih manin, heh mahmah hi, a chi hi. 13 Tua dragon leitunga paihkhiaksuk ahi, chih a kitheih takin, tapa neinu a deihta hi. 14 Ahihhangin, tua numei, gamdai-gamkeua a muna a lenlut theih nadingin, muvanlai lianpi' kha nih piak ahi. Tua mun ah, hun khat leh hunte leh hun kimkhat sung, tua gulpi' khoih phak louhna ah, kepin a om hi. 15 Tua bang ahih manin, gulpi in numeinu taaimang dingin, a kam apan tuikhang lian zah tui, numeinu nung ah a phihkhia hi. 16 Ahihhangin, lei in numeinu a panpih a, a kamka a, dragon in a kam apan a phihkhiak tuikhang lian a navalh hi. 17 Numeinu tung ah dragon a thangpai mahmah a, a suante, tua Pathian' thupiak zuia Jesu Khrist' theihpihna lenkipte dou dingin a kuankhia hi.
1 Tua bangin tua dragon, tuipi piau ah a ding hi.
Tuipi apan Gamsa
Tua nungin, tuipi apan hong paikhia gamsa khat ka mu hi. Ama'n lutang sagih leh kii sawm a nei hi. Tua kii sawmte ah kumpilukhu sawm a om a, tua a lutangte ah Pathian gensiatna min a om tek hi, 2 Tua gamsa ka muh, gialbem a bang a, a khepekte ahih leh, vompi khepekte a bang a, a kam lah humpinelkai kam a bang hi. Tua dragon in, a vangletna leh a kumpitutphah leh a thuneihna, tua gamsa kiang ah a pia hi. 3 A lutangte laka khat, sihpih thama liam hi leh kilawm ka mu a, ahihhangin, tua liamma a damkikta hi. Leitung mi khempeuh in lamdang sain, tua gamsa a zui uhi. 4 Tua gamsa kianga thuneihna pepa dragon a bia uh a, tua gamsa zong a bia uh a: Hiai gamsa bang kua om hiam? Amah dou thei ding kua om hiam? a chi uhi. 5 Dragon in tua gamsa kiang ah, kisaktheihna thute, Pathian gensiatna thute a gen theih nadingin kam khat a pia a, kha 42 sung ading thuneihna a pia hi. 6 Tua bangin, Pathian gense ding, a min gense ding, a tenna mun gense ding leh, vantunga teengte gense dingin ama'n a kam a kata hi. 7 Dragon in tua gamsa kiang ah, misiangthoute dou ding leh zou dingin phalna a pia a, nam khempeuh, pau khempeuh leh minam khempeuh tunga thuneihna zong a pia hi. 8 Belamnou' Hinna Laibu sunga min kigelh lou, leitunga teengte khempeuh in tua gamsa a bia uhi. Hiai Belamnou bel, leitung siamchil apan gawhsa ahi. 9 Zakna ding bil nei peuh in zata hen. 10 Sala kaih dingte sala kaih hi ding a, namsaua thah dingte namsaua thah hi ding hi. Hiai ah, misiangthoute adingin, kuhkaltaka thuakzawhna leh muanhuaina a kul hi.
Leitung apan Gamsa
11 Tua nungin, gamsa dang khat, leitung gamhul apan hong paikhia ka mu hi. Ama'n belamnou bangin kii nih a nei a, ahihhangin, dragon bangin a pau hi. 12 Ama'n gamsa masa sik leh taanga pangin, gamsa masa' thuneihna khempeuh a zang hi. Ama'n leitung leh a sunga teengte khempeuh, tua gamsa masa a besak hi. Tua gamsa bel, a liamma damkik gamsa pen ahi. 13 Hiai gamsa in tua gamsa masa bangin, chiamtehna lamdangpipi leh thupi taktak a bawl a, mihingte mitmuhin vaan apan mei nangawn a kesuksak hi. 14 Dragon in amah kiang ah vangletna a pia a, ama'n gamsa masa bangin, chiamtehna lamdangpipi a hihte pansanin, leitunga teengte khempeuh a khemzou hi. Tua bangin, gamsa masa pahtawi nadinga a lim bawl dingin, amaute thu a pia hi. Tua gamsa bel, namsaua liam napi-a nungta lai ahi. 15 Gamsa masa' lim kianga nakna hu piak theih nadingin, dragon in amah kiang ah vangletna a pia a, tua bel, gamsa lim a pau theih nading leh, gamsa lim be nuam loute a thah theih nading ahi. 16 Ama'n mi khempeuh, a neu a lian, a zawng a hau, sal hi-in noplen hita leh, a khut taklam uh hiam, a taltang uh hiam ah, chiamtehna a koihsak teitei hi. 17 Tua bel, tua chiamtehna hiam, tua gamsa' min hiam, a min nambat hiam, neiloute peuhmah in lei lah lei theih louh ding, zuak lah zuak theih louh ding, a chihna ahi. 18 Hiai ah pilna kisam hi. Theihsiamna nei peuhmah in, gamsa nambat suutkhia hen, mihing nambat ahi a, nambat 666 ahi.
Belamnou leh Ml 1,44,000
1 Tua nungin, ka et leh, ngai un, Zion Mual tunga Belamnou ding ka mu hi. Mi 1,44,000, a taltang ua ama' min leh a Pa' min kigelhte tawh a dingkhawm hi. 2 Tua khitin, vaan apan aw ging ka za a, tui tampi luang ging bang leh, vanpi ging ngaihtak bang ahi. Kaihging tumte' kaihging tum ging tawh zong a kibang hi. 3 Amaute'n kumpitutphah mai leh, thilhing lite leh upate' mai ah, la thak khat a sa uh a, tua la thak pen, Jesu'n leitung apan a tatsa 1,44,000 loungal, kuama'n a sin thei kei hi. 4 Hiaite bel, numeia kibuahsak lou, siangthoua kikemte ahi uh a, Belamnou a paina lamlama zuite ahi uhi. Amaute, mihingte lak apan tatsa, Pathian ading leh Belamnou adinga gah masate ahi uhi. 5 Amaute' kam ah zekhemna thu a pawt kei a, Pathian' kumpitutphah mai ah genbaanglou ahi uhi.
Vansawltak Thumte
6 Tua nungin, vansawltak dang khat, vaan kimlaia leeng ka mu hi. Ama'n leitunga teeng minam khempeuh, nam khempeuh, pau khempeuh kianga gen ding, Tangtawn tangthupha a nei hi. 7 Ama'n aw ngaihtakin: Pathian lau unla, pahtawi un. Ama' thukhen hun hong tungta hi. Amah, lei leh vaan, tuipi leh tuinakte Siampa bia un, a chi hi. 8 Tua khitin, vansawltak nihna in hon zui a, ama'n: Chimta! Tua Babulon khawpi thupi, a angkawmna hanga thangpaihna zu minamte khempeuh dawnsaknu, a chimta! a chi hi. 9 Tua khitin, vansawltak thumna in hon zui a, aw ngaihtakin: Tua gamsa leh a lim bia a, a taltang uhiam, a khut uhiama a chiamtehna nei peuhmah in, 10 Pathian' thangpaihna zu gei mahmah bangmah tawh hellouh, a thangpaihna noua kisung, a dawn ding uh a, vansawltak siangthoute' mai ah leh, Belamnou mai ah mei leh kaata gawtna thuaksak ahi ding uhi. 11 Tua gawtna meikhu Tangtawnin a kitungtou ding. Tua gamsa leh a lim bia a, a min chiamtehna neite'n a sun a zan tawlngak a mu kei ding uh, a chi hi. 12 Hiai ah, Pathian' thupiakte zui a, Jesu tunga muanhuaite adingin, kuhkaltaka thuakzawhna a kul hi. 13 Tua nungin, vaan apan aw khat ka za a, tua in: Gelh in: Toupa-a si, misite tu apan a nunnuam ahi uhi, a chi hi. Kha in: Ahi, a sepgimna uapan tawlngain a khawlta ding uh a, a nasepte un amaute a zui ding hi, a chi hi.
Leitung Anlaakna
14 Tua khitin, ka et leh, ngai un, meipi ngou leh, tua meipi tunga tupa khat ka mu hi. Amah mihing tapa a bang a, a lutung ah khama kibawl kumpilukhu a khu a, a khutin kawite hiam khat a tawi hi. 15 Tempul apan vansawltak dang khat hong paikhia a, ngaihtakin a kikou a, meipi tunga tupa kiang ah: Na kawite golhlut inla, buh at in. Leitung buh minta ahih manin, nang adingin anlaak hunta hi, a chi hi. 16 Tua bangin, meipi tunga tupa'n leitung ah a kawite a golhlut a, leitung buh a ki-atta hi. 17 Tua nungin, vansawltak dang khat, vantunga om tempul apan hong paikhia a, ama'n zong kawite hiam a tawi hi. 18 Tua khitin, vansawltak dang khat, maitam apan hong pai hi. Ama'n meikuang tung ah vangletna a nei a, ngaihtakin a kikou a, kawite hiam tawipa kiang ah: Na kawite golhlut inla, leitunga grep gah bomte lakhawm in. Grep gahte minta hi, a chi hi. 19 Tua bangin, tua vansawltak in a kawite leitung ah a golhlut a, leitung grep gahte a lakhawm a, Pathian' thangpaihna grep sukna khuk thupitak ah a pailut hi. 20 Tua khitin, khawpi pawlam ah, tua grep sukna khuk ah, grep a kichil hi. Tua grep sukna apan sisan a luang a, sakol kamkaihna chiang phain, louching 1,600 dong a luang hi.
Vansawltak Sagihte leh Gimna Sagihte
1 Tua nungin, vaan ah chiamtehna dang, thupi leh lamdang ka mu hi. Vansawltak sagih in gimna hii nanung sagihte a tawi uhi. Tua bel, Pathian' thangpaihna kimna ahita hi. 2 Tua baan ah, tui limlang kuangpi, meikuang kihel banga kilang ka mu hi. Gamsa leh a lim leh, ama' chiamtehna leh a min nambat tunga vualzoute, tuipi piaua ding zong ka mu hi. Amaute'n Pathian' piak kaihgingte a tawi uh a, 3 Pathian' sila Mosi la leh Belamnou' la a sa uh a: Toupa Pathian Vanglianpen aw, na thilhihte thupi-in lamdang hi! Misiangthoute' Kumpipa aw, na gamtatna dikin tang hi! 4 Toupa aw, nang kua'n hon kihta lou thei ding hiam? Na min kua'n phat lou thei ding hiam? Nang kia lah a siangthou hi chin a, namte khempeuh hong pai a, nang hon be ding lah hi ua! Na thukhenna lah kilangta a! a chi uhi. 5 Tua nungin, ka et leh, ngai un, vantung ah, Theihpihna biakbuk kichi tempul a kihong hi. 6 Tua tempul apanin, hii sagih tawi vansawltak sagih hong paikhia uhi. Tuate'n puan malngat vaak, siang-thoutak a silh uh a, a awm uah khama kibawl puanduang a vet uhi. 7 Tua khitin, thilhing lite laka khat in, tua vansawltak sagihte kiang ah, khama kibawl belkuang sagih a pia hi. Tua belkuangte bel, Tangtawna hing Pathian' thangpaihna-a dim ahi. 8 Tua tempul lah Pathian' thupina leh a vangletna apan meikhu-a dim ahi a, vansawltak sagihte' tawi hii sagihte a tunkim masiah, kuamah tua tempul sung ah a lut thei kei hi.
Pathian' Thangpaihna Belkuang Sagihte
1 Tua nungin, tua tempul apan aw ngaihtak khat ka za hi. Tua aw in vansawltak sagihte kiang ah: Pai unla, Pathian' thangpaihna belkuangte leitung ah bungsuk un, a chi hi. 2 Vansawltak khatna a pai a, gam tung ah a belkuang a bungsuk a, gamsa chiamtehna neite leh ama' lim bete tung ah meima sia leh kihhuaite a tung hi. 3 Tua khitin, vansawltak nihna in tuipi tung ah a belkuang a bungsuk a, tua tuipi pen misisa' sisan bangin sisan hong suak hi. Tuipi-a ganhing khempeuh a si pah hi. 4 Tua khitin, vansawltak thumna in luite leh tuinakte tung ah a belkuang a bungsuk a, tuate sisan hong suak uhi. 5 Luite uk vansawltak in: Toupa aw, nang a omlel, a omkhin leh a Siangthoupa, hiai thukhennate ah na diktat hi, nang hibanga thu khenta hi vechin. 6 Ahang bel, amaute'n misiangthoute leh kamsangte' sisan suah uh a, tuin, nang amaute' dawn dinga sisan pia hive chin. Tua lah a thalawhsa uh hi mahmah hi, a chih ka za hi. 7 Tua pen maitam apan aw in a na dawng a: Ahi, Toupa Pathian Vanglianpen, na thukhennate dikin tang hi, a chih ka za hi. 8 Tua khitin, vansawltak lina in ni tung ah a belkuang a bungsuk a, ni kiang ah mihingte meia hal theihna vangletna piak ahi. 9 Tua mei sa mahmah in amaute a haaita hi. Hinapi-in, amaute'n hiai gimnate tunga vangletna neipa Pathian' min a gensia uh a, amah pahtawi dingin kisikin a lunghei tuan kei uhi. 10 Tua khitin, vansawltak ngana in tua gamsa' tutphah tung ah leh, a kumpigam tung ah a belkuang a bungsuk a, ama' kumpigam hong mialta a, mite'n na sain lei a tep uhi. 11 Tua natnate leh meimate hangin, vaan Pathian a gensia uh a, a thilhihte ua pan kisikin a lunghei tuan kei uhi. 12 Tua khit in, vansawltak gukna in Iufratis lui lianpi tung ah a belkuang a bungsuk a, suahlam kumpipate adinga lampi a kibawl theih nadingin, tua luitui a kangta hi. 13 Tua khit phetin, upi melpu, kha gilou thum ka mu hi. Amaute bel, dragon' kam apan leh, gamsa' kam apan leh, kamsangtaklou' kam apan hong paikhia ahi uhi. 14 Amaute, dawite' khate ahi uh a, chiamtehna lamdangte a bawl thei uhi. Pathian Vanglianpen' ni thupi-a, kidouna-a pang dingin, leitung khempeuha kumpipate kaikhawm dingin a kuankhia uhi. 15 Jesu'n: Ngai un, guta bangin kong pai hi! A vuaktanna dawk a, a zumhuaina mite muh louh dinga kikema hak gige leh, a puan silhsa-a om mi a nunnuam ahi, a chi hi. 16 Tua bangin, amaute'n, Hebru paua, Armagedon kichi mun ah, tua kumpipate a kaikhawm uhi. 17 Tua khitin, vansawltak sagihna in, huihkhua tung ah a belkuang a bungsuk a, tempul apan leh, kumpitutphah apan aw ngaihtak hong ging a, tua in: Kisemkhinta! a chi hi. 18 Tua khitin, awte, khaw-phiate, vanpi gingte hong om a, zinpi a ling hi. Mihing in leitung a luah nungsang, tua bang zaha zinling thupi a om ngei nai kei hi. 19 Tua khawpi thupi phei thum a kisuah a, namte' khawpite a chim hi. Pathian in Babulon khawpi thu a thei gige a, zunou a thangpaihna sousang tawh kidim a pia hi. 20 Tuikulh gam khempeuh a taaimang a, mualte a kimu nawn kei hi. 21 Tua khitin, vaan apan gialpi lianpipi, talen khata gik ngen, mihingte tung ah hong kia hi. Tua hii a natsiat luat manin, amaute'n Pathian a hamsiat uhi.
Gamsa tunga Tuang Numei
1 Tua nungin, belkuang sagih tawi vansawltak sagihte laka khat hong pai a, kei hong houpih a: Hong pai in, tui tampite tunga tu, kizuaknu thupi gawtna kon ensak ding. 2 Leitung kumpipate, amah tawh ang a kikawm uh a, leitunga teeng mite'n ama' angkawmna zu a khamta uhi, a chi hi. 3 Tua khitin, tua vansawltak in Khain gamdai-gamkeu ah kei hon pua a, gamsa sanau tunga tuang numei khat ka mu hi. Tua gamsa pen, Pathian gensiatna mintein a pumdim hi. Ama'n lutang sagih leh kii sawm a nei hi. 4 Tua numei in puan sandup leh sanau a silh a, kham leh suangmanpha leh kepsuang manpha-a kizemin a te solsol hi. Ama'n angkawmna thil kihhuai leh nina dim nou khat, khama kibawl a tawi hi. 5 A taltang ah: THUSIM KISEEL BABULON KHAWPI THUPI KIZUAKTE LEH LEITUNG THIL KIHHUAITE' NU chih a kigelh hi. 6 Tua numei pen, misiangthoute' sisan leh Jesu' martarte' sisan dawn khamin ka mu hi. Amah ka muh takin, lamdang ka sa lua hi. 7 Tua vansawltak in ka kiang ah: Banghanga lamdang sa na hia? Tua numei' thusim kiseel leh a tuanna, lutang sagih leh kii sawm nei gamsa' thusim kiseel kon hilhchian ding. 8 Gamsa na muh pen khatvei laia na om khinsa, tu laitaka om lou lei, kawkhuk tawbei apan hong paikhetou ding a, a manthatna tung ding pen ahi. Leitunga teeng, leitung siamchil apan a min uh Hinna Laibu sunga kigelh lou mite'n tua gamsa a muh chiangun lamdang a sa ding uhi. Ahang bel, tua gamsa pen, khatvei laia na omkhinsa, tu laitaka om lou lei, ahihhanga hong om lai ding a hih man ahi. 9 Hiai thei dingin pilna nei lungsim a kisam hi. Tua lutang sagihte bel, tua numei tutna mual sagihte ahi uh a, 10 kumpipa sagihte ahi nalai uhi. A lak ua ngate a pukkhinta uh a, khat a om lei a, a dang khat a hih leh, hong kilang nai kei hi. A hong kilat chiangin, tomchik sung lei a om ding hi. 11 Tua gamsa omkhinsa, tu laitaka om lou lei pen mah, kumpi giatna ahi. Amah bel, sagihte laka pang ahi a, a manthatna a tung ding hi. 12 Tua baan ah, kii sawm na muhte, kumpigam nei nailou kumpipa sawmte ahi uhi. Ahihhangin, tua gamsa tawh kitonin, amaute'n kumpipate' thuneihna dakkal khat sung a nei ding uhi. 13 Amaute tup leh ngim kibang nei ahi uh a, a vangletna uh leh thuneihna uh, tua gamsa a pe ding uhi. 14 Hiaite'n Belamnou douin, gal a bawl ding uh a, Belamnou in amaute a zou ding hi. Ahang bel, amah, toute' Toupa leh kumpipate' Kumpipa hiven. A sapte leh a teeltuamte leh a muanhuaite, amah tawh a omkhawm ding uhi, a chi hi. 15 Tua baan ah, ama'n ka kiang ah: Tua kizuaknu' tutna tui tampi na muhte bel, minamte, mihonpite, namte leh paute ahi uhi. 16 Tua gamsa leh kii sawm na muhte'n, kizuaknu a mudah ding uhi. Amah hihsiain vuaktangin a nuse ding uh a, a sa a ne ding uh a, meiin amah a hal ding uhi. 17 Ahang bel, Pathian in, Pathian' thute a tunkim mateng, ama' tup leh ngim semkhe dingin tua gamsa kianga a vangletna uh pe dingin, amaute lungsim a neisak hi. 18 Tua numei na muh pen, leitung kumpipate tunga vaihawma uk, tua khawpi thupi ahi, a chi lai hi.
Babulon Pukna
1 Hiai thilte nungin, vansawltak dang khat, vaan apan hong kumsuk ka mu hi. Ama'n thuneihna lianpi a nei a, a thupina in leitung a taanvak hi. 2 Amah aw ngaihtakin a kikou a: Chimta! Babulon thupi chimta! Dawite leh kha giloute khempeuh tenna suakta, vasa ninte leh kihhuaite tenna suakta. 3 Ahang bel, namte khempeuh in a angkawmna thangpaihna zugei dawnkhamta. Leitung kumpipate amah tawh ang kikawm uh a, leitung sumsinmite'n ama' nuamtatna hauhlawhta uh hiven, a chi hi. 4 Tua khitin, vaan apan aw dang khat ka za a, tua in: Ka mite aw, ama' khelhna-a na kihel louh nadingun leh, a thuakgimna hiite na tan louh nadingun, amah apan hong paikhia un. 5 Ama' khelhnate vaan sunin vumta a, Pathian in a diktatlouhnate thei gige hi. 6 Ama' hon piak bangbang pekik unla, a nasepte a lehnihin thuk un. A zulehbulhna nou ah, a lehnihin lehbulhsak un. 7 Thupina leh nuamtatna amah a kipiak zahzah, thuakna leh lungkhamnain thuk un. Amah a lungtang ah kisial a: Kumpinu-a tu hi'ng a, meigong hi lou hi'ng, dah ngei lou ding hi'ng, chi hi. 8 Tua bang ahih manin, ni khat thuin ama' thuakgimna hiite hong tung ding hi. Ama' tunga thukhenpa, Toupa Pathian, a thahat mahmah manin, meia haltum hi ding hi. 9 Amah tawh ang kikawm leh a nuamtatpih, leitung kumpipate'n amah haalna meikhu a muh chiangun, a kah ding uh a, a suun ding uhi. 10 Ama' thuakgimna mu-a mulkimin, gamlapi ah a ding ding uh a: Tunggik! Tunggik! Nang khawpi thupi Babulon, nang khawpi vanglian! Dakkal khat sungin na siatgawpna hong tungta mai! chi-in a kikou ding uhi. 11 Leitung sumsinmite'n, a zuaksumte uh lei ding mi om nawn lou ahih manin, amah a kah ding uh a, a suun ding uhi. 12 Tua a zuaksumte uh bel, kham, ngun, suangmanphate leh kepsuangte, tua baan ah, puan malngatte, puan sandup leh sanaute leh lungekpuante, tua baan ah, sing sahoih namkimte, saihate leh sing manpha, sumsan, sik leh suangpaka kibawl van namkimte ahi. 13 Tua baan ah, singguithakte, nektheih namtuite, chimte, sathau namtuite, murate, singnai namtuite, zu leh oliv thau, anvui leh huit buh, bawngte leh belamte leh sakolte leh kangtalaite leh mihing' pumpite leh khate ahi lai hi. 14 Amaute'n: Na hinna in a lunggulh mahmah gahte'n nang hon taisanta a, hauhna thil leh a manpha leh a lim khempeuh in nang hon taisanta. Amaute na mu ngei nawn kei ding hi, a chi ding uhi. 15 Tua numeinu apan hibangte zuak a, hauhlawh sumsinmite, ama' thuakna mulkimin, gamlapi ah a ding ding uh a, amah kahin a suun ding uh a, 16 a kikou ding uh a: Tunggik! Tunggik! Khawpi thupi aw, puan malngat leh puan sandup leh sanaua kizemnu, kham leh suangmanpha leh kepsuanga tesolsolnu! 17 Tua bang hauhna thupi, dakkal khat sunga hihsiatgawp hita mai! a chi ding uhi. Longpulian leh longa khualzin mi khempeuh leh, longpute leh tuipi apan nek mute, gamlapi ah a ding ding uhi. 18 Amaute'n tua khawpi kaang khu a muh chiangun: Hiai banga khawpi thupi dang om ngei hiam? a chi ding uhi. 19 A luzaang ua leivui kibuakin a kikou ding uh a, kapin a mau tuaituai ding uh a: Tunggik! Tunggik! Khawpi thupi aw, tuipi-a long neite khempeuh in ama' hauhna apan hauhna a ngahnanu! Dakkal khat sunga segawpta mai! 20 Tua vansawltak in: Vaan aw, ama' siatna tung ah nuam in! Misiangthoute leh sawltakliante leh kamsangte nuam un! Pathian in ama' tung ah na phuba uh hon laksakta hi! a chi hi. 21 Tua nungin vansawltak thahat mahmah khat in, buhhek suang lianpi chia suang khat a dom a, tuipi sung ah a lawnlut a: Khawpi thupi Babulon hibang thaguma paihkhiaksuk hi ding a, kimu ngei nawn lou ding hi. 22 Na sung ah gawsem tumte leh lasiamte, tamngai tumte leh pengkul tumte apan ging kilawm kiza ngei nawn lou ding hi. Na sung ah khutsiam nasem khat peuh zong kimu ngei nawn lou ding hi. Na sung ah buhhekna ging kiza ngei nawn lou ding hi. 23 Na sung ah meivak taang nawn lou ding hi. Na sung ah mou leh mouneipa' aw kiza nawn lou ding hi. Na sumsinmite leitung ah mi minthangte na-hita. Na dawi aisan in namte khempeuh khemzouta. 24 Ama' sung ah kamsangte leh misiangthoute' sisan leh, leitunga thaha omte khempeuh' sisan kimuta, a chi hi.
Haleluia
1 Hiai thilte nungin, vantunga mi tampite awng zuazua bang aw ka za a, tua in: Haleluia! Hotdamna leh thupina leh pahtawina leh vangletna Toupa i Pathian-a ahi. 2 Ahang bel, a thukhennate dika tang hiven. Ama'n kizuaknu thupi, a angkawmna-a leitung hihsenu mawhtangsakta a, a silate' sisan phuba ama' tung ah lata hi, a chi hi. 3 Tua baan ah: Haleluia! Tua khawpi kang khu Tangtawn Tangtawnin kitungtou hi, a chi lai hi. 4 Tua khitin, upa 24-te leh thilhing lite'n bokin, kumpitutphah tunga Tupa Pathian a bia uh a, kikouin: Amen! Haleluia! a chi uhi. 5 Tua khitin, kumpitutphah apan aw khat hong pawt a: Nou, ama' silate khempeuh leh amah laute khempeuh in, aneu alianin i Pathian phat un! a chi hi. 6 Tua nungin, mi tampi aw bang leh, tui tampi luang ging bang leh, vanpiging bang aw ka za a, tua aw in: Haleluia! Toupa Pathian Vanglianpen in vai hawmta! 7 Eite nuam luain kipak ni, pahtawina amah pe ni! Belamnou' mouneihna hong tungta, a mou zong kimankhinta. 8 Puan malngat siang leh paak, a silh dingin kipia hi, a chi hi. Tua puan malngat bel, misiangthoute' nasep diktatte genna ahi. 9 Tua khitin, tua vansawltak in ka kiang ah: Gelh in: Belamnou' mouneihna ankuang um dinga chialte' a nunnuam hi uhi, a chi hi. Tua baan ah, hiaite Pathian thu diktakte ahi uhi, a chi lai hi. 10 Tua laitakin, tua vansawltak be dingin, a khebul ah ka bok hi. Ahihhangin, ama'n ka kiang ah: Hibangin hih ken! Kei, Jesu tawh kisai theihpihna kem na sanggamte leh nangmah tawh semkhawm khat ka hi lei hi. Pathian be zaw in! Kamsang thugenna kha in a tup zaw, Jesu tawh kisai theihpihna piak ahi, hon chi hi.
Sakol Kaang tunga Tuangpa
11 Tua hunin, vaan kihong ka mu a, ngai un, ka mai ah sakol kaang khat leh a tunga mi khat tuang ka mu hi. Tua sakol tungtuangpa' min Muanhuaipa leh a Dikpa ahi. Ama'n thudikin thu a khen a, gal a bawl hi. 12 Ama' mitte' meikuang bang ahi a, a lutung ah kumpilukhu tampi a khu hi. Min kigelh, amah loungal midang kuamah theihlouh, a nei hi. 13 Ama'n sisana kidiahsa kumpipuan a silh a, ama' min Pathian Thu ahi. 14 Vantunga sepaih honpite'n, puan malngat ngou leh siang a kizema sakol kaangte tunga tuangin, amah a zui uhi. 15 Ama' kam apan namsau hiam, namte sat nading, hong pawt hi. Ama'n amaute tung ah sikchiangin vai a hawm ding hi. Amah mah in, Pathian Vanglianpen' thangpaihna mulkimhuaipi grep sukna a chil hi. 16 Ama' kumpipuan leh pheipi tung ah hiai min a kigelh hi: KUMPITE' KUMPIPA LEH TOUTE' TOUPA, chi-in. 17 Tua nungin, ni sunga ding vansawltak khat ka mu hi. Amah ngaihtakin a kikou a, huihkhua-a leeng vasate khempeuh kiang ah: Hong pai unla, Pathian thupi' ankuang um dingin hong kikhawm un. 18 Kumpipate' sate, sepaih makaite' sate, mi hatte' sate, sakolte' sate leh a tungtuangte' sate, mi khempeuh noplente leh sila a neu a lian' sate na ne ding uhi, a chi hi. 19 Tua khitin, tua gamsa, leitung kumpipate leh a sepaih honpite uh tawh ka mu hi. Amaute tua sakol tunga tuangpa leh a sepaihonpite dou dinga hong kuankhia ahi uhi. 20 Ahihhangin, tua sakol tunga tuangpa'n tua gamsa leh tua kamsang taklou a man hi. Tua kamsang taklou ahi, tua gamsa sik leh taanga chiamtehna lamdangte hih a, tua gamsa' chiamtehna nei leh ama' lim bete khempeuh khempa. Tua gamsa leh kamsang taklou, kaata kang meidila a hinga paihin a om uhi. 21 Adangte ahih leh, tua sakol tunga tuangpa' kam apan hong pawt namsaua thahin a om uhi. Tua bangin, vasate khempeuh amaute' sain a vahta uhi.
Kum 1,000
1 Tua nungin, vantung apan hong kumsuk vansawltak khat, kawkhuk tawbei honna tabi leh khainiang lianpi tawi ka mu hi. 2 Ama'n dragon thupi, tua tanglai gulpi a man a, kum 1,000 sung adingin a henta hi. Amah bel dawimangpa, ahih kei leh Setan ahi. 3 Tua vansawltak in kawkhuk tawbei ah amah a pailut a, tua kum 1,000 a bei mateng, namte a khem nawn louh nadingin belhchipnain a belhchipkhum hi. Tua nungin, hun tomkha amah khahkhiaka a om a kul ding hi. 4 Tua baan ah, kumpitutphahte leh a tunga tute ka mu hi. Amaute' khut ah, thukhenna thuneihna piak ahi. Jesu a theihpihna uh hang leh, Pathian thu hanga ngawngtanna thuakte' khate zong ka mu hi. Amaute' bel, gamsa, ahih kei leh, a lim be lou, a taltang ua zong, ahih kei leh, a khut ua zong ama' chiamtehna neiloute ahi uhi. Amaute thoukika hing ahi uh a, Khrist tawh kum 1,000 sung vai a hawm ding uhi. 5 Hiai pen thawhkikna masa ahi. Ahihhangin, misi dangte bel, tua kum 1,000 a bei mateng a hingkik kei uhi. 6 Thawhkikna masa-a pang mi a nunnuam leh a siangthou ahi. Tua bang mi tung ah sih nihna in vangletna a nei kei hi. Pathian leh Khrist' siampite ahi zaw ding uh a, Khrist tawh kum 1,000 sung vai a hawm ding uhi.
Setan Siatna
7 Tua kum 1,000 a bei chiangin, Setan a tanna apan khahkhiak ahi ding a, 8 a kuankhe ding a, leitung kiu li apan namte khemin, kidouna-a pang dingin a kaikhawm ding. Amaute Gog leh Magog ahi uhi. Amaute tamdan, tuipi piaua sehnel bang ahi. 9 Amaute leitung vailam daapin a kuan uh a, Pathian' misiangthoute' giahphual, Pathian' deihthawh khawpi a uum uhi. Ahihhangin, vaan apan meikuang hong kesuk a, amaute a kangtum hi. 10 Amaute khempa, dawimangpa leh tua gamsa leh tua kamsang taklou a kipaihlutna, kaata kang meidil sung ah paihlut ahita uhi. Tua ah, Tangtawnin sun leh zan na thuakin a omden ding uhi.
Misite tunga Thukhenna
11 Tua nungin, kumpitutphah ngou lianpi khat leh, a tunga tupa ka mu hi. Ama' mai apan lei leh vaan a taaimangta a, amaute adingin mun a omta kei hi. 12 Tua khitin, misite, a neu a lian, tua kumpitutphah maia dingin ka mu hi. Pathian in laibute a phen a, tua khitin, laibu dang khat a phen a, tua bel hinna laibu ahi. Mite tung ah, a nasepte uh banga thukhen ahi. A nasepte uh bel, tua laibute sunga kigelh ahi. 13 Tuipi in a sunga om misite hon pekhia a, sihna leh Misikhua in zong amaute' sunga om misite hon pekhia uhi. Mi chih tung ah, ama' nasep banga thukhen ahi. 14 Tua nungin, sihna leh Misikhua nangawn, meidil sunga paihlut ahi. Hiai ahi sih nihna. 15 Hinna laibu sunga min kigelh lou mi peuhmah, meidil sunga paihlut ahita hi.
Jerusalem Thak
1 Tua nungin, vaan thak leh lei thak ka mu a, vaan masa leh lei masa a paimangkhinta a, tuipi himhim a om nawnta kei hi. 2 Tua khitin, Pathian apan vaana hong paisuk Khawpi Siangthou, Jerusalem thak ka mu hi. Tua khawpi bel, mou, a pasal adinga kilawmtaka kizem banga bawl ahi. 3 Tua khitin, kumpitutphah apan aw ngaihtak ka za a, tua in: Ngai un, tuin Pathian' tenna mihingte lak ah hong omta. Amah amaute tawh a teengkhawm ding hi. 4 Amaute ama' mite ahi ding uh a, Pathian mahmah in amaute a ompih ding a, a Pathian uh ahi ding hi. Ama'n amaute' mit apan khitui khempeuh a nulhul ding. Sihna zong, dahna zong, kahna zong, natna zong, a om nawn kei ding. Thilte' paidan lui a beita hi, a chi hi. 5 Kumpitutphah tunga tupa'n: Ngai un, thil bangkim a vekpi-in ka bawlthakta! a chi hi. Tua baan ah, ka kiang ah: Gelh in, hiai thute a dik a, a saantaak hi, a chi hi. 6 Ama'n ka kiang ah: Sepzawh vek ahita! Kei Alfa leh Omega, a Bul leh a Tawp ka hi. Ke'n a dangtak khempeuh kiang ah hinna tuikhuk apan dawn ding, a manbeiin ka pe ding. 7 A vualzoupa'n hiaite khempeuh a luah ding a, ama' Pathian ka hi ding a, amah ka tapa ahi ding. 8 Ahihhangin, dawilokte, umloute, gilou kihhuaite, tualthatte, kingaihna nina bualte, bumhatte, milimbete leh zuautheite khempeuh' tan bel, kaata kaang meidil ahi ding hi. Hiai ahi sih nihna, a chi hi. 9 Tua nungin, hii nanung sagihte-a dim belkuang sagih tawi, tua vansawltak sagihte laka khat a hong pai a, ka kiang ah: Hong pai in! Mou, Belamnou' zi kon ensak ding, a chi hi. 10 Tua bangin, ama'n Khain kei hon pua a, mual lianpi leh sangpi tung ah hon tun a, Khawpi Siangthou Jerusalem, Pathian apan vaana hong paisuk hon ensak hi. 11 Tua khawpi in Pathian' thupina a khu a, a thupina taangpha, suang manpha penpen jaspar suang bangin a taang a, khrustal bangin a siang hi. 12 Tua khawpi in kulh baang sang thupi a nei a, kongpi sawmlenih a nei a, tua kongpite ah vansawltak sawmlenih a om uhi. Tua kongpite tung ah, Israel suan nam sawmlenihte' minte a kigelh hi. 13 Suahlam ah kongpi thum, mallam ah kongpi thum, simlam ah kongpi thum leh tumlam ah kongpi thum a om hi. 14 Tua khawpi kulh baang in kingakna suangphum sawmlenih a nei a, tuate tung ah Belamnou' sawltaklian sawmlenihte' minte a tuang hi. 15 Kei hon houpih vansawltak in tua khawpi leh a kongpite leh, a kulhbaang teh nading khama kibawl tehna chiang a tawi hi. 16 Tua khawpi kiuli kikima kilam ahi a, a dung leh a vai a kikim hi. Ama'n tehna chiangin tua khawpi a teh a, louchiing 12,000 ahi. A dung leh a vai leh a san lam a kikim hi. 17 Tua khitin, a khawpi kulhbaang a teh a, tong 144 in a sah hi. Tua bel, vansawltak in mihing' gen dana tonga a teh ahi. 18 Tua khawpi kulhbaang bel jaspar suanga kilam ahi a, tua khawpi lah kham sianga kilam, limlang banga siang ahi. 19 Tua khawpi kulh baang kingakna suangphumte bel, suangmanpha namkima zep ahi. Suangphum khatna pen jaspar ahi a, a nihna safaiar, a thumna kalsedon, a lina emeral, 20 a ngana sardoniks, a gukna sardi, a sagihna krusolait, a giatna beril, a kuana topazi, a sawmna krusopa, a sawmlekhatna jasin, a sawmlenihna amethi suang manphate ahi. 21 Tua kongpi sawmlenihte kep suang ahi uh a, kongpi khat zel kep suang beu khata kibawl ahi. Tua khawpi kongzing lah kham sianga kibawl ahi a, tua kham lah limlang muh paisuak theih bang ahi. 22 Tua khawpi sung ah tempul ka mu kei hi. Ahang bel, Toupa Pathian Vanglianpen leh Belamnou, a tempul ahi. 23 Tua khawpi in a taanvak ding ni zong, kha zong a kul kei hi. Pathian' thupina in taanvak a, Belamnou a meivaak ahi. 24 Tua vaak ah hotdam namte a tualleeng ding uh a, leitung kumpipate'n a thupina uh a lalut ding uhi. 25 A kongpite a kikhak ni a om ngei kei ding a, zan lah a om ngei kei ding hi. 26 Tua ah namte' thupina leh pahtawina a kilalut ding hi. 27 Tua ah a sianglou peuhmah a lut kei ding a, a zumhuai, ahihkei leh a zuautheihhuai hih mi kuamah zong a lut kei ding, Belamnou' hinna laibu sunga min kigelhte kia a lut ding hi.
Hinna Lui
1 Tua nungin, tua vansawltak in hinna tui luanna lui hon ensak hi. Tua lui bel, khrustal banga siang, Pathian leh Belamnou' kumpitutphah apan hong luangkhia ahi. 2 Tua khawpi thupi kongzing ah, tua lui a luang suk a, lui gei tuak ah, hinna singkung a pou a, tua singkung in a kha simin gah nam sawmlenih a suang hi. Tua singtehte, namte hihdam nading ahi. 3 Hamsia himhim a om nawn kei ding hi. Tua khawpi ah, Pathian leh Belamnou' kumpitutphah a om ding a, ama' silate'n a nna a sem ding uhi. 4 Amaute'n ama' mei a mu ding uh a, amaute' taltang ah ama' min a tuang ding hi. 5 Tua ah zan a om nawn kei ding. Mei vaak zong, ni vaak zong a kul kei ding uh. Toupa Pathian in amaute vaak a pe ding. Tuachi-in, amaute'n Tangtawn Tangtawnin vai a hawm ding uhi. 6 Tua nungin, tua vansawltak in ka kiang ah: Hiai thute a saantaakin a dik hi. Toupa, kamsangte khate' Pathian in thil hong tung dingte, a silate lak dinga a vansawltak a sawl ahi, a chi hi.
Jesu Hong Pai ding
7 Jesu'n: Ngai un, kong pai pah ding! Hiai laibu sunga kamsang thugente keema zui mi a nunnuam ahi, a chi hi. 8 Hiai thilte za-a mupa kei Johan ka hi. Hiaite ka zak a, ka muh takin, hiai thilte hon ensak vansawltak be dingin a khebul ah ka bok hi. 9 Ama'n ka kiang ah: Hibangin hih ken! Nang leh kamsang na sanggamte' sila hihpih leh, hiai laibu sunga thute zuite' sila hihpih ka hi. Pathian bia in! hon chi hi. 10 Tua khitin, ama'n: A hun a nai tak manin, hiai laibu-a kamsang' thugente belhchipin bilh ken. 11 A diktatlou mi, diktat louin om nalai henla, a nin mi, nin nalai hen. A diktat mi lah diktat nalai henla, a siangthou mi lah siangthou nalai hen, a chi hi. 12 Jesu'n: Ngai un, kong pai pah ding! Ka pahtakman ka kiang ah a om a, michih kiang ah a nasep bangbangun ka pe ding hi. 13 Kei Alfa leh Omega, a Masapen leh a Nanungpen, a Bul leh a Tawp ka hi. 14 Hinna singkung apan a nek theih nading uleh, tua khawpi kongpitea a lut theih nading ua, a puansilhte uh sawpsiang mite a nunnuam uhi. 15 Pawlam ah uite, bumhatte, numei leh pasal kala paktatte, tualthatte leh, milimbete leh zuautatna ita zuautatte khempeuh a om uhi. 16 Kei Jesu'n, saptuamte adinga hiai theihpihnate nang hon pe dinga ka vansawltak kon sawl ahi. Kei, David Zungpi leh David Suan, a Tangpha Zingsol Aksi ka hi, a chi hi. 17 Kha leh mou in: Hong pai in! a chi uhi. A za peuhmah in: Hong pai in! chi hen. A dangtak peuhmah hong pai henla, a ut peuhmah in hinna tui a manbeiin dawn hen. 18 Hiai laibu sunga kamsang thugente za peuhmah ka vauhilh ahi: Kuapeuh in hiaite a behlap peuhmah aleh, Pathian in hiai laibu sunga kigen thuaknate ama' tung ah a behlap ding hi. 19 Tua baan ah, kuapeuh in hiai laibu sunga kamsang thugente apan lakmang a neih peuhmah aleh, Pathian in hiai laibu sunga kigen hinna singkung leh khawpi siangthou apan a tan a lakmangsak ding hi. 20 Hiai thilte Theisakpa'n: Ahi, kong pai pah ding, a chi hi. Amen. Hong pai in, Toupa Jesu! 21 I Toupa Jesu Khrist' hehpihna noute khempeuh tung ah omta hen. Amen.
New Testament, Paite Version, copyright © 2004 by Bibles International. Used by permission. All rights reserved worldwide.