The New Testament of our Lord and Saviour Jesus Christ
1 Maussauh haih zis gas Abraham dah nyei nyet, Dawi dah lo Yesu Khristu dah diuscaiq shap zis nghuot. 2 Abraham mas yaus zis Isak; Isak mas yaus zis Yakop; Yakop mas yaus zis Yuda yahge nyah vmang vnoeuh moq; 3 Yuda gas Pere yahge Zera lyis Tama masyah yaus zis nghuot. Pere mas yaus zis Hezron; Hezron mas yaus zis Ram; 4 Ram mas yaus zis Aminadab; Aminadab mas yaus zis Nashon; Nashon mas yaus zis Salmon; 5 Salmon gas Boaz lyis Rahab masyah yaus zis nghuot. Boaz gas Obed lyis Rutha masyah yaus zis nghuot. Obed mas yaus zis Yese; 6 Yese mas yaus zis hwankti Dawi; Dawi gas Solomon lyis Uria dah yhensain nyhiq nghuot ku soeu masyah yaus zis nghuot. 7 Solomon mas yaus zis Rehoboam; Rehoboam mas yaus zis Abiya; Abiya mas yaus zis Asa; 8 Asa mas yaus zis Yehoshaphat; Yehoshaphat mas yaus zis Yehoram; Yehoram mas yaus zis Uzia; 9 Uzia mas yaus zis Yotham; Yotham mas yaus zis Ahaz; Ahaz mas yaus zis Hezekia; 10 Hezekia mas yaus zis Manase; Manase mas yaus zis Amon; Amon mas yaus zis Yosia; 11 Babilon mau pheh jons loh las nyeis dah uhlyis Yosia mas yaus zis Yekhonia yahge nyah vmang vnoeuh moq; 12 Babilon mau pheh jons loh thang lhyi Yekhonia mas yaus zis Shealtiel; Shealtiel mas yaus zis Zerubabe; 13 Zerubabe mas yaus zis Abiud; Abiud mas yaus zis Eliakim; Eliakim mas yaus zis Azor; 14 Azor mas yaus zis Zadok; Zadok mas yaus zis Akhim; Akhim mas yaus zis Eliud; 15 Eliud mas yaus zis Eleazar; Eleazar mas yaus zis Mathan; Mathan mas yaus zis Yakop; 16 Yakop mas yaus dah Yosep gas, Khristu ge dah Yesu lyis khoeu kat soeu Mari dah yhensain phoq nghuot. 17 Housoeh diuscaiq dvnganh lyis Abraham masyah Dawi jweh shoq dvci nyei caiq; Dawi masyah Babilon pheh jons loh yvmas jweh shoq dvci nyei caiq; Babilon pheh jons loh masyah Khristu mas jweh shoq dvci nyei caiq tsain nghuot. 18 Gvshih Yesu Khristu khoeu los cho ka heisoeh ge: Nyah ungwes Mari gas Yosep xiklyis kwank toh zis, nyah aiq yuk ma zomhgoh shih lyis Gyingshang Dyos masyah, Mari dah ung mha loshang bos los zis lyis tsain seq. 19 Gvshih nyah yhensain phoq Yosep gas dan soeu nghuot yvmvyah, Mari lyis svbih xikkhonh mas xoq ma mes lhoeu phuh las tsoek yah she tyamp das, ge nghamh thyet. 20 Nghuot laus eq nyang haih zis lyis nghamh yoeuh nyeis lyis, yoeuh aq,Yhensaindah loeuswons soeu nyang lyis yhetmoq mas nyvng xoeuq las taiq zis gas, Dawi dah lo Yosep eh, nvng Mari lyis nah yhensain nyhiq khyvlyis yoeus das xiklyis vgyuk: nyang loshang gungs lyis chi zis gas, Gyingshang Dyos masyah nghuot. 21 Nyang gas yukgis lo khoeu los das, nvng gas nyah nyings lyis Yesu oen yoh nyhink dyei das: khasoeh ge lyis, nyah vnyau vshih lyis nyamoq dah yaunos masyah khyuot yoeus das. 22 Gvshih haih cho dvnganh Yhensain dah lvpe mhayah taiq toh dang nyuk los bas jungh, ge bweh los. 23 Houka: Yoeuh aq, lonyi gyingh gas loshang gungs lyis chi lha yukgis lo khoeu los das; nyah nyings lyis Immanuel ge lui das, ge. Hauh vjyuk gas Mangso ka ngamoq yah dvgeh nyeis, ge zis nghuot. 24 Yosep yhet masyah toq los las,Yhensaindah loeuswons soeu taiq toh zis yah dvyhangteh, nyah yhensain nyhiq lyis yoeus. 25 Nghuot laus eq Mari nyah loxeih yukgis lo ma khoeu dvchank nyang yah ma zomhgoh. Yosep gas, nyah nyings lyis Yesu ge nyhink dyei.
1 Gvshih hwankti Herod zaih lyis, Yuda mau Betlehem mas Yesu khoeu los lyis yoeuh aq, joeui bos bang buisthuq shot pheh yah Yerusalem mas jweh los las, 2 Khoeu los dah Yuda Hwankti ka khamha nyeis lah? Buisthuq shot pheh nyah kyi lhyi ngamoq nyvng yvmvyah nyang lyis paiq das xiklyis ngamoq jweh los, ge. 3 Hwankti Herod hauh dang xauhgyo lyis, nyang yahge Yerusalem mas bang dvnganhmoq chiq las, 4 nyang gas nyamoq mas dah phudyei uhjyung jens yahge maussauh lhaih bang lyis tsainh toh las, Khristu khamha khoeu das zis lyis nyei. 5 Nyamoq taiq zis gas, Nyang lyis Yuda mau, Betlehem wugungs mas khoeu das: khasoeh ge lyis lvpe lhaihtoh zis gas, 6 Yuda mau Betlehem nvng gas, Yuda zau jens mas ngis thank soeu ma nghuot; Ngah vnyau Israel dius lyis shwih guon das zau gas, Nvng masyah thuq los das, ge. 7 Hauh uhlyis Herod gas, joeui bos bang lyis tsoek yah gauh khi yoeus las, hau kyi thuq los dah shishenh lyis jyuk-yang nyei gyo las, 8 nyang nyamoq lyis Betlehem mas nhang lha taiq zis gas, Namoq loshang lhyi jyuk-yang loh nyei xo lha, nyang lyis nyvng lho lhyi, ngos eq nyang lyis yoh paiq bas jungh, ngos lyis los taiq kyoh geh, ge. 9 Hwankti phoq dah dang lyis xauhgyo las, nyamoq thuq loh lyis, nyamoq buisthuq shot pheh nyvng kat dah kyi ka, loshang nyeis dah vtoeu mha loh no joq shoq nyamoq dah xik mas loh nyeis. 10 Hauh kyi lhyi tsain nyvng lyis, nyamoq svsoh gaus. 11 Hauh yhen mha tsain wvng loh lyis, loshang yahge nyah ungwes Mari lyis nyvng las, nyamoq phvluk zomhgyuis las nyang lyis paiq. Nyamoq dah zisyos phank las nyang lyis xing, loban yahge mura jyungshuk tsain dyei. 12 Nyamoq Herod jyank mas ma tauh loh das xiklyis yhetmoq mas thuq xoeuq las zaih nhang zis xauh yvmvyah, nyamoq gas nyamoq nyang mau pheh gohcho yah tauh loh. 13 Gvshih nyamoq loh khoq thang lhyi,Yhensaindah loeuswons soeu ka, Yosep lyis yhetmoq mas thuq xoeuq las taiq zis gas, Toq aq, Loshang yahge nyah ungwes lyis shwih las Egutu pheh cangh aq, ngos nvng lyis doms khi shishenh jweh shoq houmha nyeis aq: khasoeh ge lyis Herod gas loshang lhyi mhont das zis xo das, ge. 14 Housoeh nyang toq las nyenh lyis hauh loshang yahge nyah ungwes lyis shwih las Egutu pheh e. 15 Herod shei buisnyeis jweh shoq houmha nyeis. Hauh zis gas, Ngos ngah Lo lyis Egutu masyah khi yoeus goeus, ge lvpe dah nhuot masyah Yhensain taiq dah dang gas nyuk los bas jungh, ge bweh los. 16 Herod gas hau joeui bos bang yah nyang lyis hwah khoq zis seq lyis, nhaiqlom tsoeu zis yah, joeui bos bang nyang lyis taiq toh khoq dah shishenh lyis suon yoeuh las, hauh mau mas dius nhang lha, Betlehem yahge hauh wuxom mha nyeis dah yukgis lo aiq zvn masyah o pheh bang lyis sat nhang. 17 Lvpe Yeremia taiq khoq dah dang nyuk los goeus. 18 Hauh zis gas, Rama mas shei uhngauh, ngausdyeis ngausnhvp yah kukxi thwe lhyi xauhgyo; Rakhel gas nyah lo jens gvng mas kuk nyingh shohthang thauh zis lyis nhaiq ma yoh taink lo: Khasoeh ge lyis nyamoq ma nyeis lo, ge. 19 Gvshih Herod shei thang lhyi, yoeuh aq, Yhensain dah loeuswons soeu ka, Yosep lyis Egutu mas yhetmoq mas thuq xoeuq las taiq zis gas, 20 Toq aq, loshang yahge nyah ungwes lyis shwih las Israel mau mas loh aq, hauh loshang dah kang lhyi xo bang shei goeus, ge. 21 Nyang toq las loshang yahge nyah ungwes lyis shwih las Israel mau pheh los. 22 Nghuot laus eq Akhela-u gas nyah uwus Herod gungsthaiq Yuda mau mas guon nyeis zis lyis nyang xauhgyo lyis, houmha wvng loh das zis gyuk nyeis. Hauh thoq lyis nyang lyis yhetmoq mas zaih nhang yvmvyah, Galile mau pheh loh las, 23 Nazaret ge dah wugungs dvkoeuq mas loh nyeis. Hauh zis gas, Nyang lyis Nazaret phoq ge lui das ge, lvpe jens taiq khoq dang nyuk los.
1 Hauh buisnyeis lyis jeisnyhop dyei soeu Yohan thuq los las, Yuda mau mhanhdyvp mas taiq hoeuh nyeis zis gas. 2 Maukhung munghdan jweh ni los las, nhaiqlom thaiq geh, ge. 3 Lvpe Esaia gas haih soeu cho heisoeh ge: Mhanhdyvp mas dvyuk kaiq nyeis dah thwe ka, Yhensain dah cho lhyi sont toh geh, Nyah chokhyoh lyis soq dan geh, ge. 4 Yohan ka, gola-u mauh dyi wuot, thyikdom mas shohyeis dyichih chih toh. Nyah wom gas janghgyik yahge mhanhdyvp mas dah dyoyhei nghuot. 5 Hauh uhlyis Yerusalem, Yuda mau gonh mas bang, Yodan lvng vwi vyvm mas bang dvnganh, nyah jyank mas e lha, 6 nyamoq dah yaunos lyis rhen lha, Yodan lvng Yohan jyank mas nyamoq jeisnyhop tsain kham. 7 Pharishe yahge Saduke jens nyoshoq jeisnyhop kham das xiklyis lyih yvlyis nyvng las, nyang nyamoq lyis taiq zis gas, Ywimuhtsanh vnyau eh, jweh los das dah nhaiqlom dyis masyah cangh das zis namoq lyis hank yah taiq kyingh goh lah? 8 Housoeh yvmvyah nhaiqlom thaiq zis yah mon yih dah vshih shih geh. 9 Namoq ehnyet mas Abraham gas namoq dah phauh thyeih nghuot oen vtaiq zo goh. Ngos namoq lyis taiq bah, Mangso ka haih lukzains masyah Abraham xiklyis lo jens yoh thuq los nhang. 10 Gvshih yangh wuzung gas saiqzains khyei mha toh goeus. Housoeh yvmvyah gis dah vshih ma shih dah vzains khanghmuh lyis thoeuq las nyi mas kat das. 11 Ngos namoq lyis nhaiqlom thaiq das xiklyis jeis yah jeisnyhop dvdyei shih, nghuot laus eq ngah thang mha los soeu ka ngah thoq lyis yombos soeu nghuot las, ngos gas hauh soeu dah thyvkoq dvng dyei das zis yangh ma mon. Nyang gas namoq lyis gyingshang Dyos yah eq, nyi yah eq jeisnyhop dyei das. 12 Nyang nyah thanjang mas guk lhank das xiklyis hauq chi toh. Nyang gukmos lyis jyi mha kat toh las, guksom lhyi ka ma jom nyi mas ngheq das, ge. 13 Hauh uhlyis Yesu gas Yohan loq mas jeisnyhop kham das xiklyis Galile mau masyah Yohan nyeis dah Yodan lvng mas jweh los. 14 Nghuot laus eq Yohan nyang lyis tomp las taiq, Ngos yuk nah jyank mas jeisnyhop dvkham chah zis, nvng ngah jyank mas lyih lhyeh, ge. 15 Yesu nyang lyis phuk taiq zis gas, Gvshih gas heisoeh kuot aq, khasoeh ge lyis heisoeh kuot zis gas dan cho dvnganh nyuk los das xiklyis nghuot, ge. Housoeh ge lho lhyi nyang dvkham dyei. 16 Yesu jeisnyhop kham lha jeis khau mhayah toq los yah dvyih, nyah jyank mas maukhung phank los las, Mangso dah Dyos gas khotjyauh teh gyoh los las nyah thoq mas los no joq yvlyis ngos nyvng. 17 Maukhung mhayah thwe eq dvkoeuq los zis gas, Haih soeu ka ngos jyetdap dah ngah Lo nghuot, ngos nyang lyis nhaiqdoeus, ge.
1 Hauh thang lhyi yius yah shiwu zis xauh das xiklyis, Dyos gas Yesu lyis mhanhdyvp pheh shwih loh. 2 Wom ma zo zis nyeici nyeih nyeici nyens thang lhyi Yesu wom yuot. 3 Hauh thang lhyi yius nyah jyank mas los las taiq zis gas, Nvng Mangso dah Lo nghuot lyis gas, haih lukgoq lyis ohlhyoq bweh nhang aq, ge. 4 Yesu nyang lyis phuk taiq zis gas, Dius gas ohlhyoq yah kyingh yoh dwis nyeis zis ma nghuot: Mangso nhuot masyah thuq dah dang khonh khanghmuh yah yoh dwis nyeis das, ge lhaih toh, ge. 5 Tsai, yius gas Yesu lyis Gyingshang wus Yerusalem mas shwih loh las, Yhenmuh thyoh mas yap nhang lha taiq zis gas, 6 Nvng Mangso dah Lo nghuot lyis gas o mha dyvm gyoh aq. Khasoeh ge lyis nah khyei lukzains mas ma thungh das xiklyis, nyang nyah loeuswons bang lyis tying toh las, nyamoq loq yah nvng lyis po yoeus das, ge lhaih toh, ge. 7 Yesu phuk taiq zis gas, Nvng Yhensain nah Mangso lhyi vshi yoeuh ge lhaih toh, ge. 8 Tsai, yius gas Yesu lyis svsoh nyhang dah boms thoq mas shwih doq loh las, mungkvn mas dah munghdan dvnganh yahge nyamoq dah kuhxing cho dvnganh lyis chixoeuq. 9 Yius gas, Nvng gop las ngos lyis paiq lyis gas, hauh zis dvnganh yah ngos nvng lyis dyei das, ge. 10 Yesu nyang lyis phuk taiq zis gas, Satan eh, thuq loh aq: Khasoeh ge lyis nvng Yhensain nah Mangso lhyi paiq las, nyang lyis kyingh phuqsoe chah, ge lhaih toh, ge. 11 Yius gas Yesu jyank masyah gang loh goeus las, loeuswons bang nyang lyis los phuqsoe. 12 Yohan thung khyoq zis xauh cho Yesu xauhgyo lyis, nyang Galile mau pheh thuq khoq. 13 Nyang Nazaret mas ma nyeis. Zebulun yahge Napthali mau Galile Thomh yvm, Kaperna-um wus mas loh nyeis. 14 Haih cho ka, lvpe Esaia taiq khoq dang nyuk los das xiklyis nghuot. 15 Hauh zis gas, Zebulun mau yahge Napthali mau, thomh yvm chank yah, Yodan lvng thyitvp gohnyau bang nyeis dah Galile mau; 16 Mauchuotdwang mas tsung toh bang gas, bvng zainsmuh nyvng goeus. Shei mau yahge hauh siyet khau mha tsung toh bang jyank mas bvng zis thuq los goeus, ge. 17 Hauh shishenh masyah Yesu gas, Maukhung munghdan gas ni los goeus las namoq yaunos masyah tauh los geh, ge nyah loeus taiq hoeuh zoh loh. 18 Yesu Galile thomh yvm chank yah suh loh lyis, oeng nhoh zo dah vmang vnoeuh aiq yuk, Petru ge dah Simon yahge nyah vnoeuh Andre gas thomh mas nyho yah oeng gaiq nyeis zis lyis nyvng. 19 Yesu nyah zomh lyis taiq, Ngah thang mha chank los geh, ngos nah zomh lyis dius nhoh nhang das, ge. 20 Nyah zomh gas houjang yah nyamoq nyho tsain toh khoq las nyah thang mha chank loh. 21 Hou mhayah doms loh lyis, gohtoeu vmang vnoeuh dvzomh, Zebedi dah lotang Yaku yahge Yohan lyis nyvng. Nyamoq gas lhyik khau mha nyamoq uwus Zebedi yah dvgeh nyho pho nyeis. Yesu gas nyah zomh lyis khi. 22 Housoeh nyah zomh gas houjang yah nyah zomh dah uwus yahge lhyik lyis toh khoq las nyah thang mha chank loh. 23 Yesu gas Galile dvmau gonh loh las lyi jungs mas jyauh. Munghdan cho Gausyis Dang taiq hoeuh uhlyis yah, dius jens dah nos vja ja yahge noslom vja ja lyis gis los nhang. 24 Housoeh nyah nyings gas Siria dvmau gonh hoeuh loh yvmvyah, nyamoq gas nos bang, yau khih chang khih bang, yius kuq bang, chuot bang yahge gungsjen shei bang dvnganhmoq lyis nyah jyank mas shwih lyih las, nyang nyamoq lyis gis los nhang. 25 Housoeh Galile yahge Dekapoli mau, Yerusalem, Yuda mau yahge Yodan lvng thyitvp mas dah dius moqjens nyah thang mha chank los.
1 Dius moqjens nyvng lyis nyang boms thoq mas doq loh. Nyang tsung toh lyis nyah changlo jens nyah jyank mas los. 2 Hauh uhlyis nyang nyamoq lyis jyauh zoh lyis yah taiq zis gas, 3 Dyos mas shohjyen nyeis cho lhyi soh bang gas ngelhoq: Khasoeh ge lyis maukhung munghdan gas nyamoq zis nghuot. 4 Kukxi bang gas ngelhoq: Khasoeh ge lyis nyamoq gas nhaiqtaink zis xauh das. 5 Ehnyet noeuh nhamp bang gas ngelhoq: Khasoeh ge lyis nyamoq gas nyeisjvng lyis vso vlho xauh sain das. 6 Dan cho lhyi yuot shet bang gas ngelhoq: Khasoeh ge lyis nyamoq jo los das. 7 Nhaiqnyen shoh seqgyo bang gas ngelhoq: Khasoeh ge lyis nyamoq gas nhaiqnyen shohgyo zis xauh das. 8 Nhaiqlom gyingshang bang gas ngelhoq: Khasoeh ge lyis nyamoq gas Mangso lhyi nyvng das. 9 Mehoq tamp bang gas ngelhoq: Khasoeh ge lyis nyamoq lyis Mangso dah lo jens ge lui das. 10 Dan cho gvng mas shoeuhshih zis xauh bang gas ngelhoq: Khasoeh ge lyis maukhung munghdan gas nyamoq dah munghdan nghuot. 11 Ngah gvng mas svbih yah namoq lyis jwangh las shoeuhshih zis yahge ma ying khyvlyis tyi vja ja xo zis xauh lyis namoq ngelhoq. 12 Gaus geh svsoh gauslaus geh, khasoeh ge lyis maukhung mha namoq lyis phauh shangh zis gas svsoh kuh. Khasoeh ge lyis namoq xik mas dah lvpe jens lyis eq nyamoq houyah dvyhangteh shoeuhshih goeus, ge. 13 Namoq gas nyeisjvng dah coh nghuot: nghuot laus eq coh gas ngvm zis bi tyamp goeus ya, hauh zis lyis khasoeh doms yoh ngvm nhang das lah? Nghe pheh doeuh tyamp las svbih yah nang nheh das zis masyah lai las cha eq yhung pvjus lo. 14 Namoq gas mungkvn dah bvng zis nghuot: jing thoq mas kuot toh dah wugungs lyis hank eq ma yoh gos shung toh. 15 Nyibung lyis tuonh las dang yah hank ma tsungh lhunk toh; dvyhen gonh yah nyvng das xiklyis nyibung gus mas dvgyangh tuonh kih toh. 16 Housoeh las svbih gas namoq dah gis muhzoh lyis nyvng las, maukhung thoq mas namoq Uwus lyis chungh bas jungh, dius xikkhonh mas namoq dah bvng zis lyis pank dyei geh. 17 Ngos gas Moshe dah lyi yahge lvpe jens dah dang lyis lhoeu thyoq das xiklyis lyih oen vnghamh goh. Ngos gas lhoeu thyoq das xiklyis lyih zis ma nghuot, nyuk los nhang das xiklyis dvlyih. 18 Khasoeh ge lyis ngos namoq lyis jyoengh taiq bah, maukhung yahge nyeisjvng lai loh laus eq, hauh lyi mas sauhchvp ngis dvkoeuq, dvzoq eq ma nyuk nyuk, i loh das zis ma nghuot. 19 Housoeh yvmvyah tyingtoh dang mas vtsihlo dvkoeuq lyis ma chank chank, svbih lyis housoeh jyauh nghuot lyis gas, maukhung munghdan mas hauh soeu lhyi ngis thank soeu ge lui das. Nghuot laus eq chank las jyauh soeu lhyi ka, maukhung munghdan mas kuh soeu ge lui langh das. 20 Ngos namoq lyis taiq zis gas, Namoq dah dan cho ka Pharishe jens yahge lyi svra jens dah dan cho thoq lyis ma zes lyis gas, namoq munghdan mas jyoengh ma xauh wvng das. 21 Dius vsat, sat soeu hank laus eq soetuon zis xauh das, ge gohnhamp yah taiq toh zis namoq xauhgyo goeus. 22 Ngos namoq lyis taiq bah: Dvyuk yuk nyah vmang vnoeuh lyis shohyos gungs mas nhaiqyo nghuot lyis gas, soetuon zis xauh das. Nyah vmang vnoeuh lyis, Nvng teh zis ge taiq soeu hank laus eq nhaiqbos huom dah soetuon zis xauh das. Nvng koh, ge sang soeu ka munyi thomh mas jweh das. 23 Housoeh yvmvyah hauh phon mha nvng nah jyungshuk chi e uhlyis, nah vmang vnoeuh yah nvng lyis yobos dvja ja huon chank bos lyis, nvng hauh uhlyis yoh nghamh soh lyis gas, 24 Hauh zis lyis phon xik mas toh khoq las, nah vmang vnoeuh yah shih cangxeih loh taiq tamp goh aq. Hauh thang lhyi lyih las nah jyungshuk lyis phudyei aq. 25 Nvng lyis zau kauq soeu yah cho mha dvgeh nghuot shih lyis, hauh soeu yah lvnyap taiq tamp goh aq. Housoeh ma nghuot lyis gas nvng lyis soetuon soeu jyank mas kyauh das. Soetuon soeu nvng lyis pyada lyis kyauh las, nyang gas nvng lyis thung khyoq das. 26 Ngos namoq lyis jyoengh taiq bah, thang thank thunkcent kyvp ma dye cap dvchank, nvng hou mhayah yoh thuq los das zis ma nghuot. 27 Nyi shuot lvng vshuot ge gohnhamp dah bang taiq zis lyis namoq xauhgyo ku goeus. 28 Nghuot laus eq ngos namoq lyis taiq zis gas, Vmesbih lyis nyetnau zis yah yoeuh soeu hank eq nyah ehnyet mas hauh vmesbih yah nyi shuot goeus. 29 Housoeh las nah loqyos nyoqjeih yah nvng lyis shuot nhang lhyi, hauh yvlyis thuiq tyamp aq. Nvng nah dvgungs gonh lyis munyi thomh mas khyoq kat zis xauh das thoq lyis nah gungsdoeus dvkoeuq dyoq das zis gas nah xiklyis zes gis. 30 Nah loqyos loq yah nvng lyis shuot nhang lhyi, hauh yvlyis thyet doeuh tyamp aq: Khasoeh ge lyis nvng nah dvgungs gonh lyis munyi thomh mas khyoq kat zis xauh das thoq lyis, nah gungsdoeus dvkoeuq dyoq das zis gas nah xiklyis zes gis. 31 Nyah yhensain nyhiq lyis she tyamp mes soeu hank laus eq, nyang lyis kangh maussauh lhaih dyei bas jungh, ge dah dang eq joq. 32 Nghuot laus eq ngos namoq lyis taiq zis gas, Hank laus eq yauxi zis za ma nghuot lyis gas, yhensain nyhiq lyis she tyamp soeu hank laus eq, nyang lyis lvng shuot nhang zis nghuot. Hauh vmesbih lyis nyihwank yoeus soeu eq nyi shuot zis nghuot. 33 Tsai, Namoq ma jyoeng khyvlyis mau vkhi. Nvng Yhensain lhyi maukhi zis yah dvyhangteh yoh nyuk los das ge gohnhamp bang taiq khoq zis lyis namoq xauhgyo ku: 34 Nghuot laus eq ngos namoq lyis taiq zis gas, Mau khi nyang vkhi goh. Maukhung yah mau vkhi goh: khasoeh ge lyis hauh zis gas Mangso dah tank nghuot. 35 Nyeisjvng yah eq mau vkhi goh: houka Mangso dah nangte nghuot. Yerusalem yah mau vkhi, houka hwankti zainsmuh dah wus nghuot. 36 Nah uhloms yah mau vkhi, nvng nah cam dvkhvt yangh thyoeu bas jungh, noq bas jungh ge ma yoh kuot. 37 Nvng taiq dang mas, nghuot lyis gas nghuot, ma nghuot lyis eq ma nghuot, oen bas jungh: dang hei mhayah lai zis cha eq ma gis masyah los. 38 Nyoqjeih xiklyis nyoqjeih, zwis xiklyis zwis, dvm jyen cap, ge taiq khoq dah dang gas namoq xauhgyo ku.’ 39 Nghuot laus eq ngos namoq lyis taiq zis gas, Ma gis soeu lhyi ma gis zis vdoms phuk. Nah loqyos bvlot tyuk dyei soeu lhyi gohtoeu dvshot eq lhaiq dyei shih aq. 40 Dvyuk yuk nvng lyis zau kauq las nah dyi yoeus mes soeu lhyi nah thoq dyi eq yoeus nhang shih aq. 41 Nvng lyis cho dvmain tsoengh loh nhang lhyi, nvng nyang yah dvgeh aiq main loh aq. 42 Nvng lyis sang soeu lhyi dyei aq; nah jyank masyah jyeih nghoh mes soeu lhyi jyeih dyei aq. 43 Nvng nah yhenkyoh lyis jyetdap las, nah jeswus lyis hoeng aq, ge taiq zis lyis namoq xauhgyo ku. 44 Nghuot laus eq ngos namoq lyis taiq zis gas, Namoq dah jeswus lyis jyetdap geh. Namoq lyis shoeuhshih bang lyis shvmanh dung dyei geh. 45 Housoeh lyis namoq gas maukhung mha nyeis, namoq Uwus dah lo jens duot das: khasoeh ge lyis nyang gas ma gis bang yahge gis bang thoq mas nyah buis lyis tso nhang lha, dan bang yahge ma dan bang thoq mas mau dvyih wus dyei nhang. 46 Namoq lyis jyetdap bang lyis kyingh namoq jyetdap lyis chah phauh shangh zis yoh das lah? Khoengh khywi bang eq housoeh gas kuot ma nghuot lhyeh? 47 Namoq dah vmang vnoeuh lyis kyingh jeshuh lyis gas gohnyau bang thoq lyis cha zes lah? Khoengh khywi bang eq housoeh gas kuot ma nghuot lhyeh? 48 Housoeh las maukhung mha namoq dah Uwus gas dyinghjet zis yah dvyhangteh namoq eq dyinghjet nyeis geh.
1 Namoq dah gis muhzoh lyis svbih nyvng bas jungh oen nyamoq xikkhonh mas ma kuot das xiklyis zaih geh: housoeh ma nghuot lyis gas, maukhung mha namoq Uwus jyank masyah khyik manh phauh yoh das zis ma nghuot. 2 Namoq vlu dyei uhlyis yah namoq nyang xikkhonh mas lvbuh vmuot goh: gis guons kuot bang gas lyi jungs mas, talhoeu mha svbih chungh das xiklyis kyingh dvtsain kuot nyeis. Ngos namoq lyis jyoengh taiq bah, nyamoq gas nyamoq dah khyikmanh phauh xauh yoeus goeus. 3 Nghuot laus eq nvng vlu dyei lyis, nah loqyos loq kuot zis loqwi loq lyis vseq nhang. 4 Housoeh lyis namoq vlu dyei zis gas tsoek yah nghuot las, tsoek yah gauh kuot yvlyis nyvng soeu, namoq Uwus gas namoq lyis phauh shangh das. 5 Namoq shvmanh dung uhlyis gis guons kuot bang teh vkuot goh: khasoeh ge lyis svbih yah nyamoq lyis nyvng bas jungh, ge lyi jungs mas, talhoeu chokangh mas yap las shvmanh dung das zis tsain o. Ngos namoq lyis jyoengh taiq bah, nyamoq gas nyamoq khyik manh phauh tsain yoh goeus. 6 Nghuot laus eq namoq gas shvmanh dung dah uhlyis vsainnyang yvplhunk khau mha wvng las, khomh nyheih lho lha, sam yvmas nyvng soeu, namoq dah Uwus lyis shvmanh dung geh; housoeh lyis tsoek yah kuot yvlyis nyvng soeu, namoq dah Uwus gas namoq lyis shvmanh dyei das. 7 Namoq shvmanh dung uhlyis gohnyau bang kuot teh dang nuk nuk las vdung goh: khasoeh ge lyis nyamoq dang nyoshoq dung gvng mas gyo yoeus dyei das, ge nghamh. 8 Namoq ma dung shih lyis yah namoq chah zis lyis namoq dah Uwus seq goeus yvmvyah nyamoq teh vkuot goh. 9 Housoeh las namoq heisoeh dung geh: Maukhung mha nyeis, ngamoq dah Uwus eh, Nah nyings gyingshang nyeis bas jungh. 10 Nah munghdan jweh los bas jungh; Maukhung mha nah ehnyet tap joq zis yah dvyhangteh, Nyeisjvng mas eq tap joq bas jungh. 11 Ngamoq chah nyeis dah wom jeis khvnyhik ngamoq lyis dyei aq. 12 Ngamoq lyis cu bang dah yobos lyis ngamoq khyuot dyei zis yah dvyhangteh, Ngamoq cu dah yobos lyis khyuot dyei aq. 13 Ngamoq lyis shiwu yvmas vshwih loh; Ma gis cho mhayah ngamoq lyis khyuot kat aq: khasoeh ge lyis munghdan yomsoq yahge phunk nyoqnho ngelang gas vcaiq vto nah zis nghuot. Amen. 14 Khasoeh ge lyis namoq svbih lyis cu dah yobos lyis khyuot dyei nghuot lyis gas, maukhung mha namoq dah Uwus eq namoq yobos lyis khyuot dyei das. 15 Nghuot laus eq svbih yah namoq lyis cu zis lyis namoq ma khyuot dyei lyis gas, namoq dah Uwus gas namoq yobos lyis ma khyuot dyei das. 16 Namoq womkyi uhlyis, gis guons kuot bang teh nyoqnho vnyhauh goh: khasoeh ge lyis nyamoq womkyi zis lyis svbih nyvng bas jungh ge nyamoq nyoqnho svsoh tsain nyhauh. Ngos namoq lyis jyoengh taiq bah, nyamoq gas nyamoq phauh shangh zis xauh goeus. 17 Nghuot laus eq nvng womkyi uhlyis, nvng uhloms mas coeu juot las nyoq eq cheih aq. 18 Housoeh nvng womkyi zis svbih xikkhonh mas ma nghuot, sam yvmas nyeis soeu, nah Uwus xikkhonh mas dede nghuot joq las, sam joqyos lyis nyvng soeu, nah Uwus gas nvng lyis phauh shangh das. 19 Naus yahge yus zo, khauh bang yah yoh kyungh phank khauh loh dah nyeisjvng thoq mas namoq zisyos lyis vtsain yung toh goh. 20 Naus yahge yus ma zo thyoq, khauh bang eq ma yoh thyoq wvng khauh loh dah, maukhung mha namoq zisyos lyis dvyung toh geh. 21 Khasoeh ge lyis namoq zisyos joq yvmas namoq nhaiqlom eq joq das. 22 Nyoqjeih gas gungs dah bvng zis nghuot. Housoeh las nah nyoqjeih gyings lyis gas, nah dvgungs gonh bvng joq das. 23 Nghuot laus eq nah nyoq ma gyings nghuot lyis gas, nah dvgungs gonh soeng soeng noq das. Housoeh yvmvyah nvng mas bos dah bvng zis soeng soeng noq nghuot lyis gas, hauh noq zis gas kha iq noq soengh thoengh nghuot joq lah! 24 Hank eq yhensain aiq yuk lyis ma yoh phuqsoe: khasoeh ge lyis dvyuk lyis hoeng lha gohtoeu dvyuk lyis jyetdap das. Dvyuk lyis domsyos gyo las, dvyuk lyis gas ma phauh ma danh kuot das. Namoq gas Mangso yahge nyeisjvng zisyos lyis dvgeh ma yoh phuqsoe: 25 Housoeh yvmvyah ngos namoq lyis taiq bah, namoq gas kang xiklyis cha zo das cha shuk das; gungs xiklyis cha wuot das, oen vchiq goh. Kang ka zonoms thoq lyis, gungs gas dyimis thoq lyis zes phauhdap ma nghuot lhyeh? 26 Mau dang nghoq jens lyis yoeuh geh; nyamoq gas jyo ma khyoq, jyo eq ma yhomh, jyi mha yhomh kat zis eq ma bos: nghuot laus eq maukhung mha namoq dah Uwus gas nyamoq lyis gvmtsoh nyeis. Namoq gas nyamoq thoq lyis zes phauhdap ma nghuot lhyeh? 27 Namoq chiq las vsainnyang kang lhyi loq dvbon hank yoh chent kat? 28 Wuot das xiklyis namoq chamus chiq goh? Pa mha dah anghchau ban khasoeh yuk kuh los yvlyis nghamh yoeuh geh. Nyamoq gas muh eq ma zwi, jei eq ma ni: 29 nghuot laus eq ngos namoq lyis taiq bah, phunk nyoqnho ngelang bos dah Solomon dyimis yangh haih ban dvjyo lhyi ma nyis. 30 Lomsjingh ehnyet nain bang eh, khvnyhik joq las nvpyo nyikhyomp mas doeuh kat das, yos mas dah nyoq lyis yangh Mangso heisoeh gvmhuot lyis gas, namoq lyis hauh thoq lyis zes gvmhuot das ma nghuot lhyeh? 31 Housoeh yvmvyah namoq gas chiqjyen zoh lyis yah, Cha zo cha shuk das, cha wuot das oen vtaiq goh. 32 Khasoeh ge lyis gohnyau bang gas hai dvnganh yvlyis tsain xo. Maukhung mha namoq dah Uwus gas hau namoq chah nyeis zis dvnganh seq. 33 Namoq gas Mangso munghdan yahge nyah dan cho lhyi shih cangxeih xo geh, housoeh lyis haih zis dvnganh namoq lyis lung dyei das. 34 Housoeh yvmvyah phvnaq nyeihyo xiklyis vnghamh chiq goh: Khasoeh ge lyis phvnaq nyeihyo dah chiq cho lhyi phvnaq nyeihyo chiq goeus jungh. Dvnyeih dah chiq cho ka dvnyeih nyhenshang geh joq.
1 Namoq soetuon zis ma xauh bas jungh, soe vtuon goh. 2 Khasoeh ge lyis namoq soetuon vgus namoq soetuon zis xauh das; namoq laiq dyei pan mhayah namoq lyis laiq dyei das. 3 Nah nyoqjeih mas bos dah thangh-tungh lyis ma nghamh yoeuh, nah vmang vnoeuh nyoqjeih mas bos dah phvlhau lhyi chamus yoeuh nyeis lah? 4 Nah nyoqjeih mas thangh-tungh bos joq las, nah vmang vnoeuh lyis, Nah nyoqjeih mas phvlhau yoeus tyamp dyei bah, oen khasoeh yoh taiq lah? 5 Gis guons kuot soeu eh, nvnyang nyoqjeih mas dah thangh-tungh lyis shih yoeus tyamp aq; hauh thang lhyi nah vmang vnoeuh nyoqjeih mas dah phvlhau lhyi yoeus tyamp dyei das zis dede nyvng das. 6 Gyingshang dah zis lvkhuih jens lyis vdyei goh. Namoq uhshot lyis wuq xikkhonh mas vdoeuh kat goh: housoeh kuot lyis nyamoq hauh yvlyis nang nheh doq lhyweq las namoq lyis dyvm ngat los das. 7 Dung geh, housoeh lyis namoq yoh das; xo geh, housoeh lyis namoq nyvng das; khomh koq geh, housoeh lyis namoq lyis phank dyei das. 8 Khasoeh ge lyis dung soeu hank eq yoh; xo soeu eq nyvng; khomh koq soeu lhyi eq phank dyei das. 9 Namoq hank laus eq, nyah lo ohlhyoq sang lhyi lukgoq dyei das lhyeh? 10 Oengdoq sang lhyi lhangnyis dyei das lhyeh? 11 Namoq ma gis bang yangh, namoq lo jens lyis gis dah jyungshuk seq dyei lyis gas, maukhung mha namoq dah Uwus gas, nyang lyis dung bang lyis hauh thoq lyis gis dah jyungshuk seq dyei das ma nghuot lhyeh? 12 Gohyuk yah namoq lyis khasoeh kuot dyei nhang mes lyis namoq eq nyamoq lyis housoeh nyang, kuot dyei geh. Khasoeh ge lyis haih zis gas lyi yahge lvpe jens taiq zis nghuot. 13 Zvvs dah khomh cho yah wvng geh: khasoeh ge lyis, dyoqbis yvpheh bangh loh dah khomh gas hanh, cho eq suh pyo lha houmha wvng loh bang nyoshoq nghuot. 14 Kang dwis yvpheh bangh loh dah khomh gas zvvs las cho eq choyauhyot nghuot yvmvyah, hauh zis lyis xo nyvng bang nain. 15 Wus dah cauhpau jens teh nghuot las, yvng yeis khuk zis yah namoq jyank mas los das lvpe hwah lyis zaih geh. 16 Namoq, nyamoq dah zoeu gyomh masyah zvbiq shih, nhoh zoeu zains masyah maiphang shih yoh thyoq yoeus lhyeh? 17 Housoeh las saiq gis zains khanghmuh gas gis dah vshih shih joq. Nghuot laus eq ma gis dah saiqzains mas ma gis dah vshih shih joq. 18 Saiq gis zains mas ma gis dah vshih ma yoh shih. Ma gis dah saiqzains mas eq gis dah vshih ma yoh shih. 19 Gis dah vshih ma shih dah saiqzains khanghmuh lyis gas thoeuq las nyi mas doeuh kat das. 20 Housoeh las nyamoq dah vshih lyis yoeuh las hauh saiqzains lyis yoh tsain seq das. 21 Ngos lyis, Yhensain eh, Yhensain eh ge bang dvnganh maukhung munghdan mas xauh wvng das zis ma nghuot. Maukhung mha nyeis, ngah Uwus dah ehnyet chank soeu dvxauh wvng das. 22 Hauh buisnyeis lyis dius nyoshoq gas ngos lyis, Yhensain eh, Yhensain eh, nah nyings masyah ngamoq lvpe pe goeus, nah nyings masyah yius khat tyamp goeus; nah nyings masyah mauhphoh muh lyis zwi goeus ma nghuot lhyeh, ge taiq los das. 23 Hauh uhlyis ngos gas, Ngos namoq lyis khayhoq eq ma seq ku: lyi ma chi muh kuot bang eh, namoq ngah jyank masyah thuq loh geh, oen taiq das. 24 Housoeh yvmvyah hai ngah dang dvnganh lyis xauhgyo las chank kuot soeu hank laus eq nyah yhen lhyi lukmuh lom thoq mas ci toh dah joeui bos soeu yah doeusgoh. 25 Mau wus, jeis je, lyeis muot los las, hauh yhen lhyi bat laus eq hauh yhen khyei ka lukmuh lom thoq mas ci toh yvmvyah ma lains loh. 26 Hai ngah dang lyis xauhgyo las ma chank soeu hank laus eq nyah yhen lhyi sihsho yos mas ci toh dah koh soeu yah doeusgoh. 27 Mau wus, jeis je, lyeis muot los las, hauh yhen lhyi bat yvmvyah lains loh. Hauh dyoqbis zis gas kha iq kuh lah! 28 Gvshih Yesu haih dang dye taiq lyis, dius jens gas nyang jyauh cho lhyi svsoh mauh. 29 Khasoeh ge lyis nyang gas, maussauh lhaih bang teh ma nghuot, vmingh bos soeu teh nyamoq lyis jyauh.
1 Nyang boms masyah gyoh los lyis, moqjens nyah thang mha chank los. 2 Yoeuh aq, mvnggvng dap soeu dvyuk nyang lyis los dupaiq las, Yhensain eh, nvng bauh nghuot lyis gas, ngos lyis yoh thyauhlhyang los nhang, ge. 3 Yesu nyah loq yhuonh kat las nyang lyis tanh zoh lyis yah taiq zis gas, Ngos mes, nvng thyauhlhyang los bas jungh, ge thangjang nyah gungs mas mvnggvng gas dyuk loh. 4 Housoeh Yesu nyang lyis taiq zis gas, Haih cho hank lyis eq vtaiq kyoh; nghuot laus eq nah gungs phudyei bang lyis loh chixoeuq aq. Housoeh las Moshe tying toh khoq zis yah dvyhangteh, jyungshuk phudyei zis yah nyamoq xikkhonh mas kanghjyoeng nghuot bas jungh, ge. 5 Yesu Kaperna-um wus mas wvng loh lyis, jes dvxo guon zau dvyuk nyah jyank mas los las, nyang lyis sang zis gas, 6 Yhensain eh, ngah jyeidwis gas gungsjen shei lha yhen mha svsoh nos nyeis, ge dung lyis, 7 Yesu nyang lyis taiq zis gas, Ngos los las nyang lyis gis los nhang das, ge. 8 Nghuot laus eq hau jes dvxo guon zau phuk taiq zis gas, Yhensain eh, nvng ngah nyhanghmau thang mha wvng los das zis ngos ma mon: nghuot laus eq nah dang dvkhonh kyingh taiq kat lyis ngah jyeidwis gis los das. 9 Khasoeh ge lyis ngos gas vmingh khau mha dah dius dvyuk nghuot las ngah o mha eq jeslo jens nyeis: ngos haih soeu lhyi, Loh aq, oen lhyi nyang loh. Gohtoeu dvyuk lyis, Los aq, oen lhyi nyang los. Ngah jyeidwis lyis, Haih zis kuot aq, oen lhyi nyang kuot, ge. 10 Yesu hauh dang xauhgyo lyis mauh las, nyah thang mha chank yenh bang lyis, Ngos namoq lyis jyoengh taiq bah, Israel dius nyau mas yangh hei iq lomsjingh soeu ngos ma nyvng, ge. 11 Ngos namoq lyis taiq zis gas, Buisthuq buiswvng pheh yah dius nyoshoq jweh los das las, maukhung munghdan mas Abraham, Isak, Yakop moq yah zo shuk das. 12 Hauh munghdan lo jens nghuot vvng bang gas nghe pheh soeng soeng noq yvmas doeuh kat zis xauh das: hauh yvmas ngausdyeis ngausnhvp yah zwis khih chap loh das. 13 Yesu gas jes dvxo guon zau lyis, nvng loh aq, nvng lomsjingh zis yah dvyhangteh nah jyank mas bweh bas jungh, ge kat. Hauh shishenh lyis nyang, nyah jyeidwis gas gis los goeus. 14 Yesu gas Petru dah yhen mha wvng loh lyis, Petru dah yuknyih gungs ngeh las nos lhain toh zis lyis nyvng. 15 Housoeh Yesu nyah loq mas tanh lho lhyi hau gungs ngeh zis gis tyamp. Hauh uhlyis nyang toq las nyang lyis daih. 16 Nyenhthang jweh lyis nyamoq gas, yius kuq bang nyoshoq lyis nyah jyank mas shwih lyih las, nyang gas nyah dang khonh yah yius lyis khat tyamp: nos bang dvnganh lyis gis los nhang. 17 Haih zis gas, Nyang yamoq dah shanghsenh kham tyamp dyei las, Yamoq dah noslom wons tyamp dyei goeus, ge lvpe Esaia taiq toh dang nyuk los das xiklyis nghuot. 18 Yesu gas nyah nvm yvm nvm wi lhaink toh dah moqjens zainsmuh lyis nyvng lho lhyi, thomh thyitvp pheh goeu e das xiklyis vmingh dyei. 19 Hauh uhlyis maussauh lhaih soeu dvyuk nyah jyank mas los las, Svra eh, nvng khalhye loh khalhye, ngos nah thang mha chank das, ge. 20 Yesu nyang lyis taiq zis gas, Womkhuih jens eq khyung bos, mau dang nghoq jens eq sot yoh: nghuot laus eq Cangsoeu Lo gas nyah uhloms toh das joqyos ma yoh, ge. 21 Nyah changlo jens mas gohtoeu dvyuk eq, Yhensain eh, ngah uwus lyis shih loh nyhop khoq nhang aq, ge nyang lyis taiq. 22 Nghuot laus eq Yesu nyang lyis taiq zis gas, Ngah thang mha chank los aq; shei bang lyis gas nyamoq shei bang nyang nyhop bas jungh, ge. 23 Nyang lhyik khau mha wvng goeus ya, nyah changlo jens nyah thang mha chank los. 24 Hauh uhlyis, yoeuh aq, hauh thomh mas lyeismuh jyang muot los lyis changhphauq doeuh las lhyik gas nyop bah ge lyis eq nyang gas yhet joq. 25 Changlo jens nyang lyis loh nhauh las taiq zis gas, Yhensain eh, ngamoq lyis khyuot yoeus aq, gudwvng bah ge goeus, ge. 26 Nyang nyamoq lyis taiq zis gas, Lomsjingh ehnyet ngis bang eh, chamus gyuk nyeis goh, ge uhjyangh nyang toq las lyeisdons yahge thomh lyis nyho lho lhyi hauh zis gas samlo no tyamp. 27 Housoeh dius jens gas mauh las, Haih soeu ka khasoeh teh dah dius nghuot au lhyeh? Hau lyeis yahge thomh yangh nyah domsyos gyo, ge. 28 Nyang thomh thyitvp Gadara mau jweh loh lyis, yius kuq dah dius aiq yuk gas lop masyah thuq los las nyang lyis zes langh. Nyah aiq yuk gas svsoh lhuon lha, hauh cho khvt chank yah hank eq ma yoh lai loh. 29 Housoeh las yoeuh aq, hauh aiq yuk gas, Mangso dah Lo Yesu eh, ngamoq nvng yah cha sen lah? Shishenh ma jweh shih lyis nvng ngamoq lyis joeng das zis jweh los lhyeh, ge tsain kaiq. 30 Gvshih nyamoq jyank masyah gvgis lo we yvmas wuq dvjens botzo nyeis. 31 Housoeh las yius jens nyang lyis dung zis gas, nvng ngamoq lyis khat tyamp das lyis gas, ngamoq lyis wuq jens mas wvng nhang aq, ge. 32 Nyang nyamoq lyis taiq zis gas, Thuq loh geh, ge. Nyamoq gas thuq las wuq jens mas tsain wvng loh. Yoeuh aq, hauh wuq jens dvnganh yah nyeismhung mhayah thomh mas tyauq wvng las ciang shei. 33 Wuq yoeuh bang gas hauh wus mas phang wvng loh las, bweh ya bweh zis yahge yius kuq vzomh dah cho tsain taiq kyoh. 34 Housoeh las, yoeuh aq dvwus gonh bang Yesu yah xauhgoh das xiklyis thuq loh las, nyang lyis nyvng goeus ya, nyang lyis nyamoq dah maukyo mhayah thuq loh das xiklyis tsain dung.
1 Nyang lhyik khau mha wvng las goeu loh lyis nyah wugungs mas jweh loh. 2 Hauh uhlyis, yoeuh aq, gungsjen shei lha yhetyos mas dvnyeis soeu dvyuk lyis nyah jyank mas tsain dvng lyih. Yesu nyamoq dah lomsjingh ehnyet lyis nyvng lyis, gungsjen shei soeu lhyi taiq zis gas, Lo eh yom huont aq, nah yaunos khyuot dyei goeus, ge. 3 Housoeh las, maussauh lhaih bang mas dvyhamh gas, Haih soeu ka loeusmus soqzo dang taiq, ge nyamoq dah ehnyet mas tsain taiq zo nyeis. 4 Yesu gas nyamoq khasoeh nghamh zis lyis seq las taiq zis gas, Namoq ehnyet mas chamus ma gis zis nghamh goh? 5 Nah yaunos khyuot dyei goeus oen zis yah, Toq las suh loh aq, oen zis khah zis zes taiq lwis lah? 6 Nghuot laus eq Cangsoeu Lo gas nyeisjvng thoq mas yaunos khyuot dyei das vmingh yoh zis gas namoq seq bas jungh, gungsjen shei soeu lhyi, Toq aq, nah yhetyos yoeus las nah yhen pheh loh lo aq, ge. 7 Hauh uhlyis nyang toq las nyah yhen pheh loh. 8 Moqjens hauh zis nyvng lyis, nyamoq mauh las, dius lyis heisoeh teh vmingh dyei dah Mangso lhyi chungh. 9 Yesu hou mhayah lai loh lyis, Mathe ge soeu khoengh khywi joqyos mas tsung toh zis nyvng las nyang lyis, Ngah thang mha chank los aq, ge. Housoeh nyang toq las nyah thang mha chank loh. 10 Hauh thang lhyi Yesu gas hauh soeu dah yhen, womjus mas tsung toh lyis, khoengh khywi bang yahge yaunos wons bang nyoshoq, Yesu yahge nyah changlo jens yah dvgeh tsung toh. 11 Hauh zis lyis Pharishe moq nyvng lyis, nyamoq gas nyah changlo jens lyis taiq zis gas, Namoq dah svra gas khoengh khywi bang yahge yaunos wons bang yah dvgeh chamus zo shuk au lhyeh, ge. 12 Yesu hauh zis xauhgyo las nyamoq lyis taiq zis gas, Yanghzan bang gas mvcheih lastsiang ma chah, nos bang dvchah. 13 Housoeh las namoq loh las, Ngos gas nhaiqnyen shohgyo zis lyis o, lomhxangh lainh zis lyis ma o, ge dah vjyuk lyis xuq geh: khasoeh ge lyis, ngos lyih zis gas, dan bang lyis khi das xiklyis ma nghuot, yaunos wons bang xiklyis dvnghuot, ge. 14 Hauh thang lhyi Yohan dah changlo jens nyah jyank mas lyih las, Ngamoq yahge Pharishe moq womkyi lhyi, nah changlo jens gas chamus wom ma kyi goh lah, ge. 15 Nyang nyamoq lyis taiq zis gas, Nyi hwank yvp yah sen dah loshang jens yah dvgeh nyeis shih uhlyis, nyamoq gas nhaiqkuk nhaiqngis zis xauh das lah? Nghuot laus eq loloeu saiq lyis nyamoq jyank masyah yoeus tyamp das buisnyeis jweh los das: hauh uhlyis nyamoq womkyi das. 16 Dyi tyang mha misseh saiq yah hank ma pho: khasoeh ge lyis, pho toh dah vdwang yah dyi lyis lang yaq las, hou mhayah juiq zis zes lvm los das. 17 Zvbiq jeis saiq eq shohyeis thung tyang mha hank ma kat. Kat nghuot lyis gas, buk las zvbiq jeis eq shuon, shohyeis thung eq monh das. Zvbiq jeis saiq gas shohyeis thung saiq mas kat las, hau aiq ja yah gis joq, ge. 18 Yesu nyamoq lyis haih zis taiq nyeis dah uhlyis, lyi jungs uhjyung dvyuk nyah jyank mas los las nyang lyis dupaiq zoh lyis yah taiq zis gas, Ngah lonyi lo gvshih shei goeus; nghuot laus eq nvng los las nyah thoq mas loq kih dyei lyis gas dwis los das, ge. 19 Housoeh Yesu toq las nyah thang mha chank e. Nyah changlo jens eq chank e. 20 Hauh uhlyis, dvci aiq zvn suih shuon dah vmesbih dvyuk gas nyah thang mha lyih las nyah dyithang mha tanh. 21 Khasoeh ge lyis nyah nhaiqlom mas, Ngos nyah dyi thang mha khvlangh xauh tanh lyis ngos gis los das, ge taiq zo. 22 Yesu lhain yoeuh las nyang lyis nyvng lho lhyi nyang taiq zis gas, Lonyi eh, yom huont aq, nah lomsjingh zis gas nvng lyis gis los nhang goeus, ge. Hauh shishenh masyah hauh vmesbih gas gis los goeus. 23 Yesu gas, hau guon soeu dah yhen mha jweh loh lyis, khvlhank muot bang yahge dius nyoshoq hoeu nyeis zis lyis nyvng lyis, 24 Nyang taiq zis gas, Joqyos xwiq geh, khasoeh ge lyis lonyi lo gas shei zis ma nghuot, yhet joq zis dvnghuot, ge, Nyamoq gas nyang lyis yis. 25 Nghuot laus eq dius jens lyis thuq loh nhang thang lhyi, nyang wvng loh las hauh lonyi lo dah loq mas zwi lho lhyi, nyang gas toq los. 26 Housoeh las nyah cho ka wuxom gonh mas hoeuh loh. 27 Yesu gas hou mhayah lai loh lyis, nyoqjet aiq yuk gas nyah thang mha chank los las kaiq sang zis gas, Dawi dah Lo eh, ngah aiq yuk lyis nhaiqnyen aq, ge. 28 Nyang yvpkhau mha wvng loh lyis, nyoqjet vzomh eq nyah jyank mas los. Yesu nyah aiq yuk lyis taiq zis gas, Ngos yoh gis los nhang oen zis lyis jingh lhyeh, ge lyis, nyah aiq yuk gas, Yhensain eh, jingh, ge. 29 Housoeh nyang nyah aiq yuk dah nyoq mas tanh uhlyis yah taiq zis gas, Nah aiq yuk lomsjingh zis yah dvyhangteh bweh bas jungh, ge. 30 Hauh uhlyis nyah aiq yuk nyoq bangh los. Yesu gas nyah aiq yuk lyis hank lyis eq ma seq nhang das xiklyis khyangh com kat. 31 Nghuot laus eq nyah aiq yuk gas, nyah cho lhyi hauh wuxom gonh mas tsain taiq hoeuh loh. 32 Nyamoq thuq loh yah dvyih, yius kuq dah nhuotjet dvyuk lyis nyah jyank mas shwih los. 33 Yius khat tyamp thang lhyi nhuotjet dang jis los. Hauh uhlyis dius jens gas mauh las, Israel dius jens mas heisoeh teh zis khanhamp eq ma nyvng ku, ge. 34 Nghuot laus eq Pharishe jens taiq zis gas, Nyang gas yius zau dah vmingh yah yius lyis khat tyamp zis nghuot, ge. 35 Yesu gas wus yahge wukhau khanghmuh mas suh jyuon yenh las, nyamoq dah lyi jungs mha eq jyauh uhlyis yah, Mangso munghdan gausyis dang lyis taiq hoeuh las, dius mas nos vja ja yahge noslom vja ja lyis gis los nhang. 36 Nyang moqjens lyis nyvng lyis, nyamoq gas yoeuh soeu ma bos dah yvng jens teh vshoh vjyen dungsshih lvnggang tsain dyos yenh yvmvyah, nyang nyamoq lyis nhaiq yoeuh nyen. 37 Hauh thang lhyi nyang nyah changlo jens lyis taiq zis gas, Jyo yhomh das zis nyoshoq bos laus eq, muh zwi bang nain, ge. 38 Housoeh yvmvyah jyo Yhensain ka nyah jyo yhomh das zis uhkung jens lyis nhang kat dyei bas jungh dung nyeis geh, ge.
1 Yesu gas nyah changlo dvci aiq yuk lyis khi yoeus las nyamoq lyis yius khat tyamp das zis yahge nos thyoh vja ja, noslom vja ja lyis yoh gis los nhang das toeuh dyei. 2 Lvgyo dvci aiq yuk moq dah nyings gas haih zis tsain nghuot. Cangxeih vyuk gas Petru ge soeu Simon, nyah vnoeuh Andre; Zebedi dah lotang Yaku yahge nyah vnoeuh Yohan; 3 Philip yahge Bartholomeu; Thoma yahge khoengh khywi soeu Mathe; Alphe dah lo Yaku yahge Thade; 4 Vnyau lyis jyet soeu Simon yahge Yesu lyis phanhlyen soeu Yudas Iskarot moq nghuot. 5 Yesu hai dvci aiq yuk moq lyis nhang kat uhlyis yah dyens mhoq zis gas, Namoq gas gohnyau bang jyank mas vwvng goh, Samari wukhau mha eq vwvng goh. 6 Nghuot laus eq Israel vnyau mas dyuk loh dah yvng jens dah jyank mas dvloh geh. 7 Namoq loh lyis, Maukhung munghdan gas ni los goeus oen tsain taiq hoeuh geh. 8 Nos bang lyis gis los nhang geh; shei goeus bang lyis dwis los nhang geh; mvnggvng dap bang lyis eq thyauhlhang nhang geh; yius jens lyis khat thuq dyei geh. Namoq gas phauh ma gyoh xauh yoeus las, namoq eq phauh ma sang dyei geh. 9 Namoq dah dyilhunk mas ngwis, xing, thunkjangh dyvpson cha eq vkat chi goh. 10 Bvtmuh yahge dyi aiq dung, thyvkoq, lhamloq eq vtsain chi goh: khasoeh ge lyis muh zwi soeu ka nyah zokho yah mon yih nyeis. 11 Wukhau, wugungs khateh yvmas loh nghuot laus eq, houmha mon yih soeu khayuk nyeis zis lyis nyei gyo las, doms thuq loh shoq houmha nyeis geh. 12 Namoq hauh yhen mha wvng loh lyis phauh nyang zis yah jhent geh. 13 Hauh yhenbang mas mon yih nghuot lyis gas, namoq dah nyenstap zis gas nyamoq mas joq bas jungh: nghuot laus eq ma mon yih lyis gas namoq dah nyenstap zis gas namoq jyank mas tauh los bas jungh. 14 Hank laus eq namoq lyis ma lhom yoeus, namoq dah dang lyis ma gyo yoeus bang bos nghuot lyis, hauh yhen, hauh wukhau mhayah namoq thuq loh lyis, namoq khyei mha phvlhau lhyi ko khyoq toh khoq geh. 15 Ngos namoq lyis jyoengh taiq bah, soetuon dah buisnyeis lyis Sodom yahge Gomora gas hauh wus thoq lyis sunghhuq das. 16 Yoeuh aq, ngos namoq lyis womkhuih jens jo mas yvng jens lyis teh nhang kat. Housoeh yvmvyah namoq gas lhangnyis teh yik las khotjyauh teh kyonhzoeh nyeis geh. 17 Nghuot laus eq dius jens lyis zaih geh: khasoeh ge lyis nyamoq gas namoq lyis soetuon huom mha kyauh tyamp das. Nyamoq dah lyi jungs mha eq namoq lyis tsain lyuk das. 18 Nyamoq xikkhonh mas eq, gohnyau bang dah xikkhonh mas eq thanghchvp duot das xiklyis, ngah gvng mas, namoq lyis zau bang yahge hwankti jens xikkhonh mas eq lang she loh zis xauh das. 19 Namoq lyis kyauh tyamp goeus ya, namoq khasoeh oen cha taiq das zis vchiq goh: namoq taiq das dang gas hauh uhlyis namoq lyis dyei los das. 20 Khasoeh ge lyis, dang taiq soeu ka namoq ma nghuot, namoq Uwus dah Dyos gas namoq vkhau mha dang taiq nyeis. 21 Hauh uhlyis, vmang vnoeuh nyang changh shei cho pheh kyauh tyamp das, uwus gas lo lyis shei das yvmas kyauh tyamp das. Lo jens gas nyhiphoq lyis jes sont las shei nhang das. 22 Ngah nyings gvng mas dius dvnganh gas namoq lyis hoeng los das. Nghuot laus eq thang thank jweh shoq yoh jhen soeu ka, khyuot yoeus zis xauh das. 23 Housoeh haih wus mas shoeuhshih lyis gohtoeu dvwus pheh phang loh geh. Ngos namoq lyis jyoengh taiq bah, Cangsoeu Lo ma jweh shih lyis Israel mau mas dah wugungs lyis namoq yoh lhaink khvp das zis ma nghuot. 24 Changlo gas svra thoq lyis zes zis ma nghuot; jyeidwis eq nyah joeuzoe thoq lyis zes zis ma nghuot. 25 Changlo gas nyah svra iq, jyeidwis eq nyah joeuzoe iq duot los lyis gas geh joq. Yhensain lhyi nyamoq Bezebu ge lui nghuot lyis gas, nyah yhenbang lyis ma gis dah nyings zes lui das ma nghuot lhyeh? 26 Housoeh yvmvyah nyamoq lyis vgyuk goh: khasoeh ge lyis, ma yoh chixoeuq shoq nghop toh zis cha eq ma bos. Ma seq shoq shung toh zis cha eq ma bos. 27 Ngos namoq lyis soeng soeng noq yvmas taiq zis lyis bvng yvmas taiq kyoh geh. Nhuot sot sot zis namoq xauhgyo yvlyis yhen khung thoq mas taiq hoeuh geh, ge. 28 Gungs lyis kyingh yoh sat las dyos lyis ma yoh tsain sat bang lyis vgyuk goh. Dyos yahge gungs lyis munyi thomh mas yoh mhont soeu lhyi dvgyuk geh. 29 Joslo aiq doeu gas dyvpson dvkyvp yah ungh ma nghuot lhyeh? Nah Uwus ma bauh lyis hau jos dvdoeu eq nyeisjvng mas ma dyet gyoh. 30 Khasoeh ge lyis namoq dah cam khvt dvnganh lyis yangh suon toh. 31 Housoeh yvmvyah vchiq goh, namoq gas jos nyoshoq thoq lyis zes phauhdap. 32 Housoeh yvmvyah svbih dah xikkhonh mas ngos lyis rhen soeu lhyi, ngos eq maukhung mha ngah Uwus xikkhonh mas hauh soeu lhyi rhen das. 33 Nghuot laus eq svbih xikkhonh mas ngos lyis he tyamp soeu lhyi, maukhung mha ngah Uwus dah xikkhonh mas ngos eq hauh soeu lhyi he tyamp das. 34 Nyeisjvng thoq mas nyenstap cho chi lyih das xiklyis ngos lyih oen vnghamh goh; nyenstap cho chi lyih das xiklyis ngos lyih zis ma nghuot, moengsa chi los das xiklyis ngos dvlyih. 35 Khasoeh ge lyis ngos lyih zis gas, loloeu gas nyah uwus yah, lonyi gas nyah ungwes yah, doeusmuh gas nyimuh yah tyixo goh das xiklyis dvnghuot. 36 Dius dvyuk dah jeswus gas nyah yhen mha bang nyang nghuot los das. 37 Ngos lyis jyetdap thoq lyis nyah ungwes uwus lyis zes jyetdap soeu ka, ngos yah ma mon: ngos lyis jyetdap thoq lyis nyah loloeu lonyi lyis zes jyetdap soeu eq ngos yah ma mon. 38 Hauh thoq lyis magoh, nyah tapzains wuq las ngah thang mha ma chank soeu ka ngos yah ma mon. 39 Vsainnyang kang lhyi xo soeu ka kang dyuk das. Ngah gvng mas kang dyuk soeu ka, kang yoh das. 40 Namoq lyis lhom yoeus soeu ka ngos lyis lhom yoeus zis nghuot; ngos lyis lhom yoeus soeu eq ngos lyis nhang kat soeu lhyi lhom yoeus zis nghuot. 41 Dius dvyuk lyis lvpe nghuot yvmvyah lhom yoeus soeu ka lvpe dah khyik manh phauh xauh yoeus das. Dius dvyuk lyis dan soeu khyvlyis lhom yoeus soeu eq hau dan soeu dah khyik manh phauh xauh yoeus das. 42 Ngos namoq lyis jyoengh taiq bah, Haih bang mas loshang dvyuk lyis changlo nghuot yvmvyah shuk jeis dvkom khvlangh gvmshuk soeu hank laus eq, nyang khyik manh phauh dyuk das zis ma nghuot.
1 Yesu gas nyah changlo dvci aiq yuk lyis dyens dye mhoq kat las, nyamoq dah wus mas jyauh das zis yahge taiq hoeuh das xiklyis, nyang eq hou mhayah thuq loh. 2 Khristu kuot dah muhzoh lyis Yohan thung mhayah xauhgyo lyis, nyang nyah changlo jens lyis nhang lha taiq zis gas, 3 Nvng gas hau jweh los das soeu nghuot lah? Nghuot ya ngamoq gohtoeu lhyi nghamhloms shih das lah, ge. 4 Yesu nyamoq lyis phuk taiq zis gas, Namoq nyvng las xauhgyo zis Yohan lyis loh taiq kyoh geh. 5 Nyoqjet bang nyoq nyvng los; khyei gyau bang yoh suh loh; mvnggvng dap bang eq thyauh lhyang loh; nojet bang no gyo los; shei goeus bang eq doms dwis los nhang zis xauh las, nyungs bang lyis gausyis dang taiq kyoh nyeis. 6 Ngos mas ehnyet zis ma bos soeu hank laus eq ngelhoq, ge. 7 Nyamoq loh khoq thang lhyi Yesu gas, Yohan cho dius phung lhyi taiq zis gas, Namoq mhanhdyvp pheh cha loh yoeuh goh? Lyeis muot kamh dah jvmbu lyis lhyeh? 8 Housoeh lyis cha loh thuq yoeuh goh? Lungphauq dyi wuot soeu lhyi lah? Yoeuh aq, nhamp dah dyimis wuot bang gas hwankti yhen mha nyeis. 9 Housoeh lyis cha loh thuq yoeuh goh? Lvpe lhyi lah? Nghuot goeus, ngos namoq lyis taiq bah, lvpe thoq lyis zes kuh soeu nghuot. 10 Yoeuh aq, nah cho sont langh das xiklyis, Ngos ngah loeuskyoh soeu lhyi nah xik pheh nhang kat, ge lhaih toh zis gas nyah cho nghuot.’ 11 Ngos namoq lyis jyoengh taiq bah, vmesbih masyah khoeu los bang mas jeisnyhop dyei soeu Yohan thoq lyis zes soeu hank ma thuq los ku. Nghuot laus eq maukhung munghdan mas ngis thank soeu ka, nyah thoq lyis zes kuh. 12 Jeisnyhop dyei soeu Yohan dah buisnyeis masyah gvshih jweh shoq, maukhung munghdan gas shohbop shohjyen xauh nyeis las, shohbop shohjyen kuot bang gas hauh zis lyis tsoengh lhuot yoeus nyeis. 13 Khasoeh ge lyis, lvpe jens dvnganh yahge Moshe dah lyi gas, Yohan dah buisnyeis jweh shoq cha bweh los das cho uhlhomh taiq toh. 14 Namoq lhom yoeus mes nghuot lyis gas, Yohan gas jweh los das dah Eliya nghuot. 15 Gyo yoeus das no dap soeu ka xauhgyo bas jungh. 16 Haq caiq mas bang lyis cha yah byi xoeuq das lah? Nyamoq gas kaih jang mas tsung lha dvyuk yah dvyuk lui goh nyeis dah loshang jens yah doeusgoh. 17 Ngamoq gas namoq lyis khvlhank muot dyei lyis eq namoq ma goh; Ngamoq kukxi lyis eq namoq ma ngaus. 18 Khasoeh ge lyis Yohan jweh los las ma zo ma shuk nyeis lyis eq nyamoq gas, Nyang mas yius bos, tsain ge. 19 Cangsoeu Lo lyih las zo shuk lyis eq, Yoeuh aq, wom lvm soeu, zvbiq yet soeu, khoengh khywi bang yahge yaunos wons bang dah dyenschangh, tsain ge. Nghuot laus eq Mangso dah joeui lhyi ka hau muhzoh yah jyoeng yvlyis tuonh shet nyeis. 20 Housoeh nyang dang zoh yoeus las, nyah yomsoq zains muhzoh nyothyang kuot goeus dah wugungs, ehnyet ma tsain thaiq yvmvyah, nyang nyamoq lyis heisoeh ge nyho. 21 Korazin eh, nvng mvtanhzoe nghuot. Betsaida eh, nvng mvtanhzoe nghuot. Khasoeh ge lyis, namoq jyank mas nyvng nhang dah yomsoq zains muhzoh lyis Taire yahge Sidon mas nyvng nhang nghuot lyis gas, hauh wus mas bang gohnhamp yah yanghthung dyi wuot, nyiyvp boms mas lhoeuh las nhaiqlom yoh thaiq hah das. 22 Nghuot laus eq ngos namoq lyis taiq bah, soetuon dah buisnyeis lyis Taire yahge Sidon xauh zis gas namoq thoq lyis sunghhuq das. 23 Kaperna-um eh, nvng maukhung jweh shoq chunghtoq zis xauh das lah, munyi thomh jweh shoq khyoq zis xauh das: khasoeh ge lyis, nah jyank mas kuot dah yomsoq zains muhzoh lyis Sodom mas toq kuot nghuot lyis gas, hauh zis gas khvnyhik jweh shoq joq shih das. 24 Khasoeh ge lyis, ngos namoq lyis taiq bah, soetuon dah buisnyeis lyis Sodom xauh zis gas nah thoq lyis zes sunghhuq das, ge. 25 Hauh shishenh lyis Yesu gas dang phank las, Maukhung nyeisjvng dah Yhensain Uwus eh, joeui bos bang yahge ehnyet yik bang jyank masyah nvng haih cho jens lyis tsain nghop shung toh las, lonoeuh jens lyis chixoeuq yvmvyah, ngos nvng lyis nhaiqshoqlang. 26 Nghuot goeus Uwus eh, heisoeh bweh los zis gas nvng nhaiqdoeus khyvlyis nghuot. 27 Ngah Uwus gas, ngos lyis dvnganh dyei toh goeus: Lo hank nghuot yvlyis Uwus mas lai las hank ma seq. Uwus hank nghuot yvlyis Lo yahge hauh Lo yah nyah cho chixoeuq das xiklyis khyen yoeus zis xauh soeu mha lai las hank ma seq. 28 Nyung daus las yvwons lyei bang dvnganhmoq eh, ngah jyank mas los geh, ngos namoq lyis no nhang das. 29 Ngah tanzoe lyis dvng geh, ngah jyank masyah xuq geh, khasoeh ge lyis, ngos gas noeuh nhamp las, o mha gyoh soeu nghuot: housoeh lyis namoq xauh no das. 30 Khasoeh ge lyis ngah tanzoe gas dvng lwis zis yahge ngah yvwons eq siq, ge.
1 Yesu gas Yuda No Buisnyeis lyis sunghso yos cho yah lai loh. Nyah changlo jens gas wom yuot las, sunghso nham lhyi tsain shap zo. 2 Hauh zis lyis Pharishe moq nyvng las, nyamoq nyang lyis taiq zis gas, Yoeuh aq, nah changlo jens gas Yuda No Buisnyeis lyis kuot das lyi ma bos zis tsain kuot, ge. 3 Nyang nyamoq lyis taiq zis gas, Dawi gas yuot shet dah uhlyis nyang gas nyang yah nyeis bang yah dvgeh, 4 Mangso dah yhen mha khasoeh wvng loh las, phudyei bang kyingh ma nghuot lyis gas, nyang yahge, nyang yah dvgeh bang ma gis zo dah hau chixoeuq ohlhyoq lyis nyamoq khasoeh zo tyamp zis lyis namoq ma tsain nghap ku lhyeh? 5 Nghuot ya phudyei bang Yuda No Buisnyeis dah lyi lhyweq laus eq, nyamoq gas yobos ma bos cho Moshe dah lyi maussauh lyis ma tsain nghap yoeuh goh lhyeh? 6 Ngos namoq lyis taiq bah, Yhenmuh thoq lyis zes kuh zis heimha joq. 7 Ngos o mes zis gas phudyei cho ma nghuot, nhaiqnyen cho lhyi dv o mes ge dah dang khonh vjyuk lyis namoq seq nghuot lyis gas, yobos ma bos bang lyis namoq dang thang thyet das zis ma nghuot. 8 Khasoeh ge lyis hauh Cangsoeu Lo gas hau Yuda No Buisnyeis dah Yhensain nghuot, ge. 9 Hou mhayah nyang toq loh lyis, nyamoq dah lyi jungs mas wvng loh. 10 Houmha loq dvshot shei soeu dvyuk nyeis. Nyamoq gas nyang lyis yoh kauq shoq nyang lyis nyei zis gas, Yuda No Buisnyeis lyis nos bang lyis gis los nhang zis, lyi bos lah, ge. 11 Nyang nyamoq lyis taiq zis gas, Namoq dvyuk yuk mas yvng dvdoeu kyingh yoh las hauh zis Yuda No Buisnyeis lyis dwang mas dyet gyoh joq lyis, ma siq yoeus das lhyeh? 12 Dius gas yvng thoq lyis kha iq zes phauhdap lah? Housoeh yvmvyah Yuda No Buisnyeis lyis, gis dah muh zwi das zis gas lyi bos, ge. 13 Hauh uhlyis nyang hauh soeu lhyi, Nah loq yhuonh kat aq, ge. Nyang loq yhuonh kat lyis hauh zis gas gohtoeu dvshot yhangteh gis los. 14 Pharishe moq thuq loh las, nyang lyis khasoeh yoh mhont das cho xamgoh nyeis. 15 Yesu haih zis lyis seq lyis, hou mhayah jhank loh. Nyah thang mha chank los dah moqjens zainsmuh dvnganhmoq lyis nyang gis los nhang. 16 Nyang lyis gohtoeu dius jens lyis ma seq nhang das xiklyis nyang nyamoq lyis taiq toh. 17 Haih zis gas lvpe Esaia taiq khoq zis nyuk los das xiklyis nghuot. 18 Hauh dang gas, Ngos khyen yoeus toh ngah jyeidwis lyis yoeuh aq; Ngos nhaiqdoeus las ngos jyetdap soeu nghuot; Ngos nyang lyis ngah Dyos kat dyei las, Nyang gas ngah soetuon cho gohnyau bang lyis kyoh das, 19 Nyang gas nyingh ma nyo, ma kaiq las, Nyah thwe lhyi talhoeu mha hank eq ma xauhgyo das. 20 Lyi jus cho lhyi ung cho yoh nhang buisnyeis jweh shoq, Nyang gas jap dah jvmbu lyis ma khyauh das zis yahge Nyikhauh thuq nyeis dah nyizoh lyis ma sat das. 21 Nyah nyings mas gohnyau bang eq loms das, ge. 22 Hauh thang lhyi nyoqjet, nhuot jet dah yius kuq soeu dvyuk lyis, nyah jyank mas shwih los. Nyang gas hauh soeu lhyi gis los nhang lha, dang yoh jis los, nyoq eq nyvng los. 23 Dius jens dvnganh gas mauh las, Haih soeu ka Dawi dah Lo ma nghuot lhyeh, ge. 24 Nghuot laus eq Pharishe jens hauh zis xauhgyo lyis, Haih soeu ka yius zau Bezebu dah vmingh yah yius lyis khat tyamp, tsain ge. 25 Nyamoq nghamh yvlyis Yesu seq las, nyamoq lyis taiq zis gas, Nyang changh nyang gang lvn loh dah munghdan khanghmuh gas dyoqbis das. Nyang changh nyang gang lvn loh dah wugungs, nghuot ya yhen ka yoh goeng joq das zis ma nghuot. 26 Satan yah Satan lhyi khat tyamp nghuot lyis gas, nyang gas, nyang gungs lyis nyang zan nyeis yvmvyah nyah munghdan gas khasoeh yoh goeng joq das lah? 27 Ngos Bezebu dah vmingh yah yius khat tyamp nghuot lyis gas, namoq dah lo jens gas hank dah vmingh yah yius lyis khat thuq lah? Housoeh yvmvyah nyamoq gas namoq lyis soetuon das bang duot das. 28 Nghuot laus eq Mangso dah Dyos masyah ngos yius lyis khat tyamp nghuot lyis gas, Mangso munghdan namoq jyank mas jweh goeus. 29 Yombos soeu lhyi shih cangxeih ma twih lyis gas, nyah yhen mha wvng las nyah zisyos lyis hank ma yoh thyoq yoeus. Nyang lyis twih thang lhyi nyah yhen dvyoh thyoq das. 30 Ngos yah dvgeh ma nyeis soeu ka ngos lyis jes sont zis nghuot. Ngos yah dvgeh ma huom nyeis soeu ka dungsshih lvnggang mus loh das. 31 Housoeh yvmvyah ngos namoq lyis taiq bah, dius jens dah yaunos yahge loeusmus soqzo zis dvnganh khyuot tyamp dyei zis xauh das. Nghuot laus eq Gyingshang Dyos lyis loeusmus soqzo dah yobos lyis gas ma yoh khyuot tyamp dyei. 32 Cangsoeu Lo lyis nhuot yah taiq shuot soeu hank lyis laus eq yobos yoh khyuot dyei, nghuot laus eq Gyingshang Dyos lyis taiq shuot soeu lhyi ka haq caiq mas eq, jweh los das vcaiq mas eq yobos ma yoh khyuot dyei das. 33 Gis dah vshih yoh das xiklyis gas gis dah saiqzains yoh chah. Ma gis dah saiqzains yoh lyis gas ma gis dah vshih yoh das: khasoeh ge lyis nyamoq dah vshih lyis yoeuh las hauh saiqzains lyis yoh tsain seq. 34 Ywimuhtsanh vnyau eh, namoq ma tsain gis zis, gis dah dang khasoeh yoh taiq das lah? Khasoeh ge lyis nhaiqlom mas dyingh las nhuot mas taiq thuq los. 35 Gis soeu ka nyah gis dah zisyos mhayah gis zis thuq kat. Ma gis soeu ka ma gis dah zisyos masyah ma gis zis thuq kat. 36 Ngos namoq lyis taiq bah, Soetuon buisnyeis lyis yuk khanghmuh gas nyang taiq dah yhung pvjus dang khanghmuh nyhenshang dang thang thyet zis xauh das. 37 Khasoeh ge lyis, nah dang gvng mas nvng lyis jyoeng khyvlyis suon dyei das. Nah dang gvng mas nvng dang thang thyet zis xauh das, ge. 38 Hauh thang lhyi maussauh lhaih bang yahge Pharishe dvyhamh gas, nyang lyis, Svra eh, ngamoq nvng chixoeuq dah vlho dvkoeuq nyvng mes, ge. 39 Nghuot laus eq nyang nyamoq lyis phuk taiq zis gas, Ma gis zis yahge Mangso lhyi tyamp khoq dah caiq mas bang gas vlho tsain xo. Nghuot laus eq lvpe Yona dah vlho mha lai las gohtoeu chah vlho eq nyamoq lyis ma dyei das. 40 Khasoeh ge lyis Yona gas somh nyeih somh nyens hau oengmuh womdau mas lungh joq zis yah dvyhangteh, Cangsoeu Lo eq somh nyeih somh nyens jweh shoq nyeisjvng khau mha lungh das. 41 Soetuon dah uhlyis Ninewe dius jens gas haq caiq mas bang yah dvgeh toq los las nyamoq lyis dang thang thyet das. Khasoeh ge lyis nyamoq gas Yona taiq kyoh dah dang gvng mas nhaiqlom tsain thaiq goeus. Yoeuh aq, heimha Yona thoq lyis zes cho joq. 42 Soetuon dah buisnyeis lyis mautyi pheh dah hwankti nyih gas haq caiq mas bang yah dvgeh toq los las nyamoq lyis dang thang thyet das. Khasoeh ge lyis nyamoq gas Solomon dah joeui gyo yoeus das xiklyis mau thang mhayah jweh los. Yoeuh aq, heimha Solomon thoq lyis zes soeu nyeis. 43 Yius gas dius jyank masyah thuq loh las, kyuk dah mau mas lamh yenh. Nyang noyos xo laus eq ma nyvng. 44 Hauh thang lhyi nyang doms taiq zis gas, Ngos thuq khoq dah yhen mha tauh loh das, ge. Nyang jweh loh lyis, yhen ka shenh shang lha vshung vgvn joq yvlyis nyvng. 45 Hauh thang lhyi nyang loh las, nyah thoq lyis zes xungh xent dah yius nyhet doeu shwih las, hauh vkhau mha los tsain wvng lungh joq. Housoeh las hauh soeu dah wotwu gas xikpheh thoq lyis zes yau los. Hai lhung dah vcaiq mas bang eq houyah dvyhangteh bweh los das, ge. 46 Yesu dius jens lyis dang taiq nyeis shih lyis, yoeuh aq, nyah ungwes yahge nyah vwik jens gas nghe mha yap las nyang lyis dang jis mes nyeis. 47 Housoeh las dius dvyuk nyang lyis taiq zis gas, Yoeuh aq, nah ungwes yahge nah vwik jens nvng lyis dang jis mes las nghe mha yap joq, ge. 48 Nghuot laus eq nyang hau los taiq soeu lhyi phuk taiq zis gas, Ngah ungwes yahge ngah vwik jens gas hank nghuot lah, ge. 49 Housoeh nyang nyah changlo jens lyis loq tuonh kat las taiq zis gas, Yoeuh aq, haih bang gas ngah ungwes yahge ngah vwik jens nghuot, ge. 50 Khasoeh ge lyis maukhung mha ngah Uwus dah ehnyet chank bang hank laus eq ngah vwik, ngah nhamhmuh, ngah ungwes tsain nghuot, ge.
1 Hauh nyeihyo Yesu gas hauh yhen mhayah thuq loh las thomh yvm mas tsung toh. 2 Dius moqjens nyah jyank mas zain huom los las, nyang lhyik khau mha loh wvng tsung toh. Moqjens gas jyankyvm mas yap joq. 3 Nyang nyamoq lyis dangtoeuq yah nyoshoq ja taiq kyoh zis gas, Yoeuh aq, jyo khyoq soeu ka, jyo nyau sanh das xiklyis nghe pheh thuq loh. 4 Nyang jyo sanh khyoq kat lyis, dvkhamh gas chokhyoh mas gyoh las hauh yvlyis nghoq jens yah lyih kui zo tyamp. 5 Gohtoeu dvkhamh gas tsoh ma thoeu dah lukjvp yos mas gyoh loh. Tsoh ma thoeu lha hauh zis gas lvnyap yuk thuq los. 6 Nghuot laus eq vnyet ma yoh chent yvmvyah buis tso los lyis lhap nyhauh tyamp. 7 Dvyhamh gas zoeu gyomh mas gyoh loh, zoeu zains yuk kuh los las hauh yvlyis huop tyamp. 8 Gohtoeu ka nyeisjvng gis yvmas gyoh las, jyo dvxo huon, khyukci huon, somhci huon je los. 9 Gyo yoeus das no dap soeu ka xauhgyo bas jungh, ge. 10 Changlo jens nyang lyis nyei zis gas, Nyamoq lyis chamus dangtoeuq yah taiq kyoh lah, ge. 11 Nyang nyamoq lyis phuk taiq zis gas, Maukhung munghdan dah nghop toh cho ka namoq lyis seq nhang goeus. Nghuot laus eq nyamoq lyis gas ma seq nhang shih. 12 Yoh bang lyis lung dyei das: Housoeh nyamoq gas magons magoh yoh das; ma yoh bang jyank masyah gas nyamoq yoh joq zis yangh yoeus tyamp dyei das. 13 Ngos nyamoq lyis dangtoeuq yah taiq zis gas, nyamoq yoeuh laus eq ma nyvng, xauhgyo laus eq ma seqgyo yvmvyah nghuot. 14 Housoeh yvmvyah lvpe Esaia taiq khoq zis gas, nyamoq jyank mas nyuk los. Houka: Namoq xauhgyo laus eq ma daq gyo khyen yoeus. Namoq yoeuh laus eq ma nyvng. 15 Khasoeh ge lyis, haih bang dah ehnyet gas nhaiq chuot nonungs las, nyamoq nojet, nyoq eq chenh goeus. Housoeh ma nghuot ya nyamoq dah nyoq nyvng los. Nyamoq no xauhgyo, nyamoq dah ehnyet mas seq los las, ngos nyamoq lyis yhoh dyei das xiklyis ngah jyank mas lhain los das, ge. 16 Nghuot laus eq namoq nyoq nyvng zis yahge namoq no xauhgyo yvmvyah ngelhoq. 17 Ngos namoq lyis jyoengh taiq bah, namoq nyvng yvlyis lvpe jens yahge dan bang nyoshoq moq nyvng mes laus eq ma xauh nyvng khoq. Namoq xauhgyo yvlyis gyo mes laus eq ma xauhgyo khoq. 18 Housoeh yvmvyah jyo nyau sanh dah dangtoeuq lyis gyo yoeus geh. 19 Dvyuk yuk Mangso munghdan dang lyis xauhgyo laus eq nyah ehnyet khau mha sanh toh dah jyo nyau lyis ma shop soeu yah yoeus tyamp dyei las nyang ma seqgyo. Hauh zis gas cho mas gyoh dah jyo nyau nghuot. 20 Lukjvp yos mas gyoh dah jyo nyau gas, Dang lyis xauhgyo las lvnyap lhom yoeus dah soeu nghuot. 21 Nghuot laus eq nhaiqlom khau mha vnyet ma chent yvmvyah, dvyoq kyingh dvyoh kham. Nyang hauh dang gvng mas shoeuhshih zis xauh lyis ehnyet dyet las lvnyap nungsdoms loh. 22 Zoeu gyomh mas gyoh dah jyo nyau gas, Dang lyis xauhgyo laus eq mungkvn mas dah chiqjyen zis yahge mhuih jyomh dah zisyos gas hauh dang lyis huop las vshih ma yoh shih bang nghuot. 23 Nghuot laus eq nyeisjvng gis yvmas gyoh goeu gas, Dang lyis xauhgyo zis yah dvyhangteh hauh zis lyis seqgyo yoeus, vshih shih las, dvxo huon, khyukci huon, somhci huon je los bang nghuot. 24 Nyang nyamoq lyis gohtoeu dangtoeuq eq taiq: Maukhung munghdan gas, nyah yos mas jyo nyau gis sanh kat soeu yah doeusgoh. 25 nyamoq yhet joq dah uhlyis, ma gis dah jes lyih las sunghso sanh toh yvmas yohnoq los sanh khoq. 26 Nghuot laus eq jyo nyau yuk los las vshih shih dah uhlyis yohnoq eq thuq los. 27 Housoeh las hauh yhensain dah uhkung jens nyang lyis taiq zis gas, Yhensain eh, nah yos mas gis dah jyo kyingh dvkhyoq ma nghuot lhyeh? Housoeh lyis chamus yohnoq yuk los lah, ge. 28 Nyang nyamoq lyis taiq zis gas, Haih zis gas jes yah kuot zis dvnghuot, ge. Uhkung jens nyang lyis taiq zis gas, Housoeh lyis ngamoq yohnoq pom lhyi nuot tyamp das zis nvng vgyo lah, ge. 29 Nyang gas, Ma nghuot, namoq nyoq nuot lyis sunghso nyet lyis ma bos zangh nuot tyamp bas jungh. 30 Aiq ja yah dvgeh yet yhomh nyos jweh shoq yuk joq bas jungh. Jyo yhomh nyos lyis, jyo yhomh bang lyis, Nyoq lyis ngheq tyamp das xiklyis cangxeih yet dain toh geh, sunghso lhyi ka yet las ngah jyi mha kat toh geh oen das, ge. 31 Nyang nyamoq lyis dangtoeuq taiq shih zis gas, Maukhung munghdan gas, dius dvyuk nyah yos mha yoeus sanh kat dah anghwvng shih yah doeusgoh. 32 Hauh zis gas vnyau dvnganh thoq mas zes ngis. Nghuot laus eq hauh zis kuh los goeus ya, angh nyaus phoqywi thoq lyis kuh thank vzains bweh los las, hauh vko mha mau dang nghoq jens sot yoh sot. 33 Nyang nyamoq lyis gohtoeu dangtoeuq taiq shih zis gas, Maukhung munghdan gas, vmesbih dvyuk sunghso mons somh pan mha yoeus kat lyis, sunghso dvnganh yvlyis yoh dau los nhang dah bicheih yah doeusgoh, ge. 34 Housoeh Yesu gas, haih zis dvnganh, moqjens lyis dangtoeuq yah taiq. Dangtoeuq ma bos bos nyang nyamoq lyis cha eq ma taiq kyoh. 35 Hauh zis gas, Ngos gas ngah nhuot haq las dangtoeuq yah taiq bah, Mungkvn xi lhyi yah shung toh zis lyis taiq das, ge lvpe taiq toh dang nyuk los das xiklyis nghuot. 36 Yesu gas moqjens lyis pont kat lho lha yhen khau mha wvng loh lyis, nyah changlo jens gas nyah jyank mas los las taiq zis gas, Yos mas dah yohnoq dangtoeuq ngamoq lyis doms phui kyoh aq, ge. 37 Nyang nyamoq lyis phuk taiq zis gas, Gis dah jyo nyau sanh soeu ka, Cangsoeu Lo nghuot. 38 Yos gas mungkvn nghuot; gis dah jyo nyau gas munghdan lo jens lyis taiq. Nghuot laus eq yohnoq gas ma gis soeu dah lo jens nghuot. 39 Hauh yohnoq lyis sanh dah jes gas Satan nghuot; yet yhomh dah shishenh gas mungkvn thank zis nghuot. Jyo yhomh bang gas loeuswons bang nghuot. 40 Hauh yohnoq lyis tsainh yoeus las nyi mas ngheq teh, mungkvn thank uhlyis housoeh bweh das. 41 Hauh Cangsoeu Lo gas nyah loeuswons bang lyis nhang kat das las, nyamoq gas nyah munghdan mas dah ehnyet lainszo nhang bang yahge lyi ma chi dah muh kuot bang dvnganhmoq lyis tsainh las, 42 nyamoq lyis nyikhyomp mas khyoq kat das zis nghuot. Hauh yvmas nyamoq ngausdyeis ngausnhvp yah zwis khih chap loh das. 43 Hauh uhlyis dan bang gas, nyamoq Uwus dah munghdan mas buis soeh bvng los das. Gyo yoeus das no dap soeu ka xauhgyo bas jungh, ge. 44 Maukhung munghdan gas yos mas shung toh dah zisyos yah doeusgoh. Hauh zis lyis dius dvyuk nyvng lyis, doms shung toh khoq las gaus ehnyet yah loh las, yoh ya yoh goeu lyis ungh las hauh yos lyis wis yoeus. 45 Tsai, maukhung munghdan gas, gis dah uhshot lyis xo dah soenghi phoq yah doeusgoh. 46 Nyang gas svsoh phauhdap dah uhshot lyis xo nyvng lyis, loh las vsainnyang yoh ya yoh zis lyis ungh las hauh yvlyis wis yoeus. 47 Tsai maukhung munghdan gas, thomh mas doeuh las oeng vja ja lyis yoh nghop yoeus dah nyho yah doeusgoh. 48 Hau dyingh joq zis lyis jyankyvm mas yoeus los las tsung uhlyis yah gis yvlyis khyont mas kat, nghuot laus eq ma gis yvlyis gas doeuh tyamp. 49 Mungkvn thank uhlyis eq houyah dvyhangteh bweh los das. Loeuswons bang gyoh los las ma shop bang lyis dan bang masyah kangh yoeus las, 50 Nyikhyomp mas doeuh khyoq tyamp das. Hauh yvmas ngausdyeis ngausnhvp yahge zwis khih chap loh das. 51 Yesu nyamoq lyis taiq zis gas, Hai dvnganh zis lyis vtsain seqgyo shih lah, ge. Nyamoq nyang lyis phuk taiq zis gas, Seqgyo goeus Yhensain eh, ge. 52 Housoeh las nyang nyamoq lyis taiq zis gas, Maukhung munghdan xiklyis maussauh lhaih svra duot das zis xuq goeus soeu khanghmuh gas, vsainnyang dah zisyos kyunk masyah vsaiq eq vcauh eq lap thuq los dah yhensain dvyuk yah doeusgoh. 53 Hauh thang lhyi Yesu gas, dangtoeuq dye taiq lyis hou mhayah thuq loh. 54 Nyah wus mas doms jweh loh lyis, nyamoq dah lyi jungs mas nyamoq lyis jyauh yvlyis gyo mauh las, Hauh soeu ka heisoeh teh dah joeui yahge yomzains muhzoh kuot das yomsoq khalhye yah yoh au lhyeh? 55 Nyang gas hai soehfuh dah lo ma nghuot lhyeh? Nyah ungwes gas Mari ge soeu nghuot las, nyah vnoeuh moq Yaku, Yosep, Simon yahge Yuda moq nghuot ma nghuot lhyeh? 56 Nyah nhamhmuh jens dvnganhmoq eq yang yah dvgeh ma nghuot lhyeh? Housoeh dvnghuot zis haih soeu housoeh teh yomsoq khalhye yah yoh au lhyeh, tsain ge. 57 Housoeh nyamoq gas nyang lyis ehnyet lainszo gus bweh. Nghuot laus eq Yesu nyamoq lyis taiq zis gas, Lvpe ka vsainnyang mau, yahge yhen mas lai las nyoqnho ngelang ma yoh zis ma bos, ge. 58 nyamoq lomsjingh ehnyet ma bos yvmvyah, hauh joqyos mas nyang yomsoq zains muhzoh nyoshoq ma yoh kuot khoq.
1 Hauh shishenh lyis Galile mungh zau Herod gas Yesu dah nyings hoeuh zis xauhgyo lyis, 2 nyah jyeidwis jens lyis taiq zis gas, Haih zis gas jeisnyhop dyei soeu Yohan nghuot. Nyang gas shei masyah dwis toq los goeus, housoeh yvmvyah nyang yomsoq zains muhzoh yoh kuot, ge. 3 Housoeh Herod gas nyah boek Philip dah yhensain nyhiq Herodia gvng mas Yohan lyis nyhik nhang lha thung mas lhunk toh. 4 Khasoeh ge lyis Yohan gas Herod lyis nyah boek Philip dah yhensain nyhiq Herodia lyis yoeus das lyi ma bos ge taiq yvmvyah nghuot. 5 Nyang gas Yohan lyis sat mes laus eq moqjens lyis gyuk: khasoeh ge lyis nyamoq gas nyang lyis lvpe dvyuk nghuot ge loms. 6 Nghuot laus eq Herod khoeu dah buisnyeis lyis, hauh pwe mha los bang dah xikkhonh mas Herodia dah lonyi lo goh xoeuq zis yah Herod lyis nhaiqtap nhang. 7 Hauh uhlyis nyang gas hau lonyi lo lyis, nyang cha sang cha dyei das, ge das-ing dah khonh toh. 8 Housoeh hauh lonyi lo gas nyah ungwes joeui dyei zis yah dvyhangteh, Jeisnyhop dyei soeu Yohan dah uhloms lyis bvn masyah kat los dyei aq, ge taiq. 9 Hwankti ka nhaiqkuk laus eq maukhi toh dang yahge nyah boenghwus jens gvng mas nyang lyis dyei das xiklyis taiq kat las, 10 nyang dius nhang lha thung mha Yohan dah uhloms lyis thyet goeus. 11 Nyah uhloms lyis bvn masyah yoeus los las hauh lonyi lo lyis dyei lyis, nyang gas nyah ungwes lyis dyei. 12 Nyah changlo jens gas, mvng lyis loh yoeus nyhop thang lhyi Yesu lyis loh tsain taiq kyoh. 13 Yesu hauh yvlyis xauhgyo lyis, nyang gas lhyik mas tsung lha sam joqyos pheh jhank loh. Nghuot laus eq dius jens hauh zis xauhgyo lyis wus masyah thuq las khyei cho yah nyah thang mha tsain chank loh. 14 Nyang lhyik masyah thuq loh lyis moqjens lyis nyvng kat. Nyamoq lyis nhaiq yoeuh nyen las, nyamoq dah nos bang lyis gis los nhang. 15 Nyenhthang jweh lyis, nyah changlo jens nyah jyank mas los taiq zis gas, Haih zis gas mhanhdyvp nghuot, shishenh eq lai loh goeus, moqjens lyis wukhau mha nyamoq xiklyis zonoms loh tsain wis bas jungh, nyamoq lyis nhang kat aq, ge. 16 Yesu taiq zis gas, Nyamoq lyis ma loh nhang noh nyamoq lyis namoq zonoms dyei geh, ge. 17 Nyamoq, nyang lyis taiq zis gas, Ngamoq ohlhyoq oeng koeuq yahge oengdoq aiq doeu dvyoh, ge. 18 Nyang gas, Hauh zis ngah jyank mas chi los aq, ge. 19 Housoeh nyang gas moqjens lyis mhanh thoq mas tsung das zis taiq toh lho lha, ohlhyoq oeng koeuq yahge oengdoq aiq doeu lyis yoeus chi lho lha, maukhung pheh nghank las shvmanh dung. Hauh thang lhyi khyiq las hauh ohlhyoq nyah changlo jens lyis dyei. Changlo jens gas moqjens lyis gvm dyei. 20 Nyamoq dvnganhmoq zo jo thang lhyi, nyet dah vpop vsop tsain kui tsainh lyis dvci aiq dang muis nghuot. 21 Zo bang vmesbih yahge loshang jens ma suon, yukgis goeu oeng khyoengh ko nghuot. 22 Yesu moqjens lyis pont nyeis uhlyis nyah changlo jens lyis lhyik mas tsung lha thyitvp pheh, nyah xik pheh goeu loh nhang. 23 Nyang gas moqjens lyis pont lho lha, shvmanh dung das xiklyis boms mas nyang kyingh doq loh. Mauchuot los lyis houmha nyang kyingh nyeis. 24 Nghuot laus eq hauh uhlyis lhyik gas jyankyvm yah svsoh we yvmas loh nyeis. Hauh uhlyis lyeis ma doeus yvmvyah changhphauq doeuh nyeis. 25 Nvpsangh nyoq nyvng zoh lyis Yesu gas thomh thoq cho yah nyamoq jyank pheh suh los nyeis. 26 Housoeh thomh thoq cho suh los yvlyis changlo jens nyvng lyis nyamoq gyuk las kaiq zis gas, Haih zis gas sidyos nghuot, ge. 27 Nghuot laus eq houjang yah Yesu nyamoq lyis taiq zis gas, Vgyuk goh, ngos dvnghuot, yomhont geh, ge. 28 Petru nyang lyis phuk taiq zis gas, Yhensain eh, nvng dvnghuot lyis gas jeis thoq cho yah ngos lyis nah jyank mas los nhang aq, ge. 29 Los aq, ge nyang lyis taiq lho lhyi, Petru gas lhyik masyah gyoh las Yesu jyank mas loh das xiklyis jeis thoq mas suh loh. 30 Nghuot laus eq lyeismuh jyang lhyi nyvng lyis nyang gyuk los: hauh uhlyis nyang nyop loh nyeis las kaiq zis gas, Yhensain eh, ngos lyis khyuot yoeus aq, ge. 31 Yesu loq lvnyap yhuonh kat las, nyang lyis lang she uhlyis yah taiq zis gas, Lomsjingh Ehnyet nain soeu eh, chamus khamkhvv lah, ge. 32 Nyamoq lhyik khau mha wvng goeus ya, lyeis eq tam goeus. 33 Hauh lhyik khau mha bang nyang lyis dupaiq uhlyis yah taiq zis gas, Nvng gas Mangso dah lo jyoengh nghuot, ge. 34 Nyamoq thyitvp pheh dap loh lyis, Genesaret mau mas jweh loh. 35 Hauh joqyos mas bang gas nyang lyis seq las, nyamoq gas hauh wuxom gonh mas dah nos bang dvnganh lyis Yesu jyank mas loh shwih los nhang. 36 Housoeh nyamoq gas nyah dyithang lhyi khvlangh tanh das xiklyis nyang lyis dung. Nyang lyis xauh tanh bang dvnganh gis los.
1 Yerusalem mas dah maussauh lhaih bang yahge Pharishe jens Yesu jyank mas los taiq zis gas, 2 Nah changlo jens gas chamus nyamoq loq ma cheih wom zo las logis jens dah thungh lyis thyoq goh lah, ge. 3 Nyang nyamoq lyis phuk taiq zis gas, Namoq dah thungh chank das xiklyis Mangso dah tyingtoh dang lyis chamus thyoq goh lah? 4 Mangso taiq zis gas, Nah ungwes uwus lyis phauh nyang aq; ungwes uwus lyis ma gis zis taiq soeu ka shei nyang shei bas jungh, ge. 5 Nghuot laus eq namoq taiq zis gas, Nah ungwes uwus lyis, Namoq ngah loq masyah xauh yoeus das vyhang ka Mangso lhyi dyei ge las, 6 nyah nyhiphoq lyis ma phauh lyis gas, nyang gas shuot zis ma bos ge namoq dah thungh yah Mangso dah tyingtoh dang lyis peq toh. 7 Gis guons kuot bang eh, namoq yah sen lha Esaia pe khoq zis gas jyoengh nyang nghuot. 8 Hauh zis gas: Haih dius jens gas nyamoq nhuotkuk yah ngos lyis phauh nyang laus eq, Nyamoq dah nhaiqlom gas ngos yah we goh joq. 9 Dius dah tyingtoh dang lyis kyingh vgungs toh las jyauh chah yhangteh jyauh nyeis yvmvyah, nyamoq ngos lyis paiq zis gas vkom dvnghuot, ge. 10 Housoeh nyang moqjens lyis khi lha taiq zis gas, Gyo yoeus las seqgyo geh. 11 Nhuot mas wvng zis gas dius lyis vwot v-oeu bweh nhang zis ma nghuot; nhuot masyah thuq loh zis gas dius lyis vwot v-oeu bweh nhang, ge. 12 Hauh uhlyis changlo jens nyah jyank mas los las taiq zis gas, Haih dang Pharishe jens xauhgyo lyis nhaiq gyo nos zis nvng vseq lah, ge. 13 Nyang nyamoq lyis phuk taiq zis gas, Maukhung mha dah ngah Uwus ma xoh toh vzains dvnganh yah khuot tyamp zis xauh das. 14 Nyamoq housoeh nghuot langh shih bas jungh, nyamoq gas nyoqjet dah choshe bang nghuot. Nyoqjet soeu ka nyoqjet soeu lhyi choshe lhyi ka, aiq yuk yah dwang mas gyoh das, ge. 15 Petru nyang lyis phuk taiq zis gas, Haih dangtoeuq ngamoq lyis phui kyoh aq, ge. 16 Nyang nyamoq lyis taiq zis gas, Namoq haih zis lyis gvshih jweh shoq do ma lhain goh lhyeh? 17 Nhuot mas wvng dah vyhang cha nghuot laus eq womdau khau mha wvng loh thang lhyi nghe pheh thuq loh goeus zis lyis namoq ma seq goh lhyeh? 18 Nghuot laus eq nhuot masyah thuq loh zis gas, nhaiqlom khau mhayah bweh thuq los las, haih goeu gas dius lyis vwot v-oeu bweh nhang. 19 Khasoeh ge lyis nhaiqlom masyah ma gis zis nghamh, dius sat, nyi shuot lvng shuot, yauxi, khauh, ma ying kanghjyoeng kat zis yahge loeusmus soqzo zis bweh thuq los. 20 Haih goeu gas dius lyis vwot v-oeu bweh nhang zis nghuot. Nghuot laus eq loq ma cheih wom zo zis gas, dius lyis vwot v-oeu bweh nhang zis ma nghuot, ge. 21 Yesu gas hou mhayah thuq las Taire yahge Sidon wuxom pheh jhank loh. 22 Hauh uhlyis yoeuh aq, Khanan vmesbih dvyuk hauh mau masyah los las kaiq sang zis gas, Dawi dah Lo Yhensain eh, ngos lyis nhaiqnyen aq, ngah lonyi lo yius kuq las svsoh shanghsenh nyeis, ge. 23 Housoeh ge nghuot laus eq Yesu gas, nyang lyis dang dvkhonh eq ma toeuh dyei. Nyah changlo jens nyang lyis los taiq zis gas, Nyang lyis loh nhang aq: Khasoeh ge lyis nyang gas yah thang mha chank kaiq ngaus yenh, ge. 24 Nyang phuk taiq zis gas, Ngos lyis gas Israel yhen bang mas dyuk tyamp dah yvng jens jyank mas kyingh dvnhang kat, ge. 25 Hauh uhlyis nyang ywi los las gyuis gop zoh lyis yah taiq zis gas, Yhensain eh, ngos lyis bos pangh aq, ge. 26 Nyang phuk taiq zis gas, Loshang jens dah zonoms lyis yoeus las lvkhuih jens lyis doeuh dyei zis gas ma doeus, ge. 27 Hauh vmesbih nyang lyis phuk taiq zis gas, Nghuot goeus Yhensain eh, nghuot laus eq lvkhuih eq nyah yhensain kihgus masyah gyoh dah zopop kui zo, ge. 28 Housoeh Yesu nyang lyis phuk taiq zis gas, Vmesbih eh, nah lomsjingh zis gas kuh joq. Nvng omes zis yah dvyhangteh bweh bas jungh, ge. Nyah lonyi lo gas hauh shishenh lyis nyang gis los goeus. 29 Yesu gas hauh mau masyah thuq loh lyis, Galile thomh nvm mas jweh loh. Housoeh boms mas doq loh las houmha tsung toh. 30 Hauh uhlyis moqjens nyah jyank mas zain los las khyei gis loq ma yoh, nyoqjet, nhuotjet bang yahge gohtoeu noslom vja ja yoh bang nyoshoq moq lyis nyamoq shwih nhoenk lyih las, nyah khyeiyang mas toh. Housoeh las nyang nyamoq lyis gis los nhang. 31 Housoeh nhuotjet bang yoh jis los, shei nhui bang gis los, khyei dyoq bang yoh suh loh, nyoqjet bang nyvng los zis lyis moqjens nyvng lyis mauh. Housoeh las nyamoq gas Israel dah Mangso phunk lyis tsain chungh. 32 Hauh thang lhyi Yesu gas nyah changlo jens lyis khi lha taiq zis gas, Ngos haih moqjens lyis nhaiqnyen: Khasoeh ge lyis, nyamoq ngos yah nyeis zis gvshih somh nyeih nyangh goeus, nyamoq zo das zis cha eq ma yoh. Ngos nyamoq lyis wom yuot zis yah ma mes nhang kat, nyamoq cholvt mas wom yuot lhyauh das, ge. 33 Changlo jens nyang lyis taiq zis gas, Mhanhdyvp mas heinyhoq moq lyis tham shoq dah ohlhyoq gas khamha yoh xo das lah, ge. 34 Yesu nyamoq lyis phuk taiq zis gas, Ohlhyoq khanyhoq koeuq yoh goh lah, ge lyis, Nyamoq taiq zis gas, Nyhet koeuq yahge oengdoq dvtsiq dvbos lo, ge. 35 Moqjens lyis nyeisjvng mas tsung das xiklyis taiq toh lho lha, 36 Nyang hau ohlhyoq nyhet koeuq yahge oengdoq lyis yoeus chi lha jyehjuh chungh thang lhyi khyiq las, changlo jens lyis dyei. Changlo jens eq moqjens lyis gvm dyei. 37 Housoeh nyamoq dvnganhmoq zo jo thang lhyi, nyet dah vpop vsop kui tsainh lyis nyhet dang muis nghuot. 38 Zo bang vmesbih yahge loshang jens ma suon, yukgis komshang nyei khyoengh nghuot. 39 Nyang moqjens lyis pont kat thang lhyi, lhyik khau mha wvng tsung lha Magadan wuxom mha jweh loh.
1 Hauh uhlyis Pharishe yahge Saduke moq los las, nyang lyis shiwu zoh lyis maukhung mha dah vlho dvkoeuq chixoeuq aq, ge sang. 2 Nyang nyamoq lyis taiq zis gas, nyenhthang lhyi namoq taiq zis gas, maukhung nes las mau phangh das. 3 Nvpsangh pheh maukhung nes, mau eq noq lyis gas, Khvnyhik mau thunghkyei gyoh das ge gyangh daq taiq. Namoq maukhung wuhsoh lyis seq yoeuh laus eq, shishenh yah sen dah vlho lhyi ka ma seq yoeuh ma nghuot lhyeh? 4 Ma shop zis yahge Mangso lhyi toh tyamp bang gas, vlho tsain xo. Nghuot laus eq lvpe Yona dah vlho mha lai las gohtoeu chah vlho eq nyamoq lyis ma dyei das, ge. Housoeh nyang nyamoq lyis toh khoq las thuq loh. 5 Changlo jens gas thomh thyitvp pheh goeu dap loh lyis, nyamoq ohlhyoq wons los das zis tohnyhik khoq. 6 Yesu nyamoq lyis taiq zis gas, Pharishe yahge Saduke jens dah bicheih lyis zaih geh, ge. 7 Housoeh nyamoq nyang changh taiq goh zis gas, Yang ohlhyoq ma tsain wons yvmvyah nghuot, ge. 8 Yesu hauh yvlyis seq las, Lomsjingh ehnyet nain bang eh, namoq ohlhyoq ma wons cho lhyi chamus taiq goh nyeis lah? 9 Namoq ma seqgyo shih goh lhyeh? Ohlhyoq oeng koeuq yah dius oeng khyoengh lyis tsoh las khanyhoq dang yoh kui tsainh shih zis lyis namoq ma soh goh lhyeh? 10 Ohlhyoq nyhet koeuq yah dius nyei khyoengh lyis tsoh las khanyhoq dang yoh kui tsainh shih zis lyis ma tsain soh lo goh lhyeh? 11 Ngos namoq lyis ohlhyoq dah cho ma taiq zis gas namoq chamus ma seqgyo goh lah? Pharishe yahge Saduke moq dah bicheih lyis zaih geh, oen dvtaiq, ge. 12 Hauh uhlyis ohlhyoq dah bicheih lyis taiq zis ma nghuot, Pharishe yahge Saduke moq jyauh dah cho lhyi zaih das zis dvtaiq yvlyis tsain seqgyo. 13 Gvshih Yesu gas Kesare mau Philipi mas jweh loh lyis, nyang nyah changlo jens lyis nyei zis gas, Dius jens Cangsoeu Lo lyis hank nghuot ge goh lah, ge. 14 Nyamoq, nyang lyis taiq zis gas, Dvyhamh gas jeisnyhop dyei soeu Yohan; dvyhamh gas Eliya; gohtoeu dvyhamh gas, Yeremia, nghuot ya, lvpe dvyuk yuk nghuot, ge. 15 Housoeh lyis namoq gas ngos lyis hank nghuot oen goh lah, ge nyamoq lyis taiq. 16 Simon Petru phuk taiq zis gas, Nvng gas dwis nyeis Mangso dah Lo Khristu nghuot, ge. 17 Yesu nyang lyis phuk taiq zis gas, Yona dah lo Simon eh, nvng gas ngelhoq, nvng lyis haih zis chixoeuq zis gas suihshoh ma nghuot, maukhung mha dah ngah Uwus chixoeuq zis dvnghuot. 18 Petru eh, ngos nvng lyis taiq bah, nvng gas luk nghuot las, Ngos ngah tsainhtoh phung lhyi haih lukmuh lom thoq mas ci toh das las, hauh yvlyis shei dah yomsoq ge munyi thomh khomh yah yoh ung das zis ma nghuot, ge. 19 Maukhung munghdan suhshih ngos nvng lyis dyei das: nyeisjvng thoq mas nvng twih ya twih toh zis gas, maukhung mha eq twih toh zis xauh das. Nyeisjvng thoq mas nvng phui ya phui kat zis cha nghuot laus eq maukhung mha phui kat zis xauh das, ge. 20 Hauh thang lhyi nyang gas Yesu Khristu nghuot zis hank lyis eq ma taiq das xiklyis nyah changlo jens lyis khyangh wontang com toh. 21 Hauh shishenh masyah Yesu gas Yerusalem mas e lha logis jens yahge phudyei uhjyung jens, maussauh lhaih bang dah loq mas shanghsenh zis vja ja xauh thang lhyi nyang lyis sat las, somh vnyeih lyis dwis toq das cho nyah changlo jens lyis chixoeuq zoh loh. 22 Housoeh las Petru gas nyang lyis khi yoeus las nyho zis gas, Yhensain eh, ma gis bweh, hauh zis gas nvng masyah we loh bas jungh; haih zis nah jyank mas khanhamp eq ma bweh bas jungh, ge. 23 Nghuot laus eq nyang Petru lyis lhain yoeuh las phuk taiq zis gas, Satan eh, ngah nungsthank pheh jik loh aq, nvng gas Mangso shot pheh yah ma nghamh, dius shot pheh yah dvnghamh yvmvyah, nvng gas ngah dah lainszo gus nghuot, ge. 24 Housoeh Yesu nyah changlo jens lyis taiq zis gas, Dvyuk yuk ngah thang chank soeu duot mes lyis gas, nyah gungs lyis nungsyos toh, nyah tapzains wuq las ngah thang mha chank bas jungh. 25 Khasoeh ge lyis vsainnyang kang lhyi khyuot yoeus mes soeu ka, kang dyuk das. Nghuot laus eq ngah gvng mas kang dyuk soeu ka kang xo nyvng das. 26 Dius dvyuk gas mungkvn gonh lyis sain toh laus eq nyah kang dyuk tyamp lyis gas nyah xiklyis chah vkyuh bos lah? Cangsoeu dius gas nyah kang lhyi cha yah yoh thaiq yoeus das lah? 27 Khasoeh ge lyis hauh Cangsoeu Lo gas Uwus dah phunk mas nyah loeuswons bang yah dvgeh jweh los das; hauh uhlyis yuk khanghmuh gas nyah muhzoh lyis tank las phauh shangh zis xauh das. 28 Ngos namoq lyis jyoengh taiq bah, heimha yap joq bang dvyhamh gas hauh Cangsoeu Lo nyah munghdan yah jweh los zis ma nyvng dvchank ma shei das, ge.
1 Khyuk nyeih dah thang lhyi Yesu gas Petru, Yaku yahge nyah vnoeuh Yohan moq lyis shwih las boms nyhang thoq mas nyamoq nyang kyingh doq loh. 2 Nyang gas nyamoq dah xikkhonh mas vwot thaiq los las nyah nyoqnho ka buis teh bvng los, nyah dyi eq thyoeu lha kyi kyi bvng los. 3 Nyang yah jisgoh nyeis dah Moshe yahge Eliya eq nyamoq lyis nyetlos nyettant nyvng xoeuq. 4 Housoeh Petru Yesu lyis taiq zis gas, Yhensain eh, heimha yang nyeis das xiklyis gis. Nvng gyo nghuot lyis gas, ngamoq heimha zvng somh koeuq nvng, Moshe, Eliya xiklyis dvyuk dvkoeuq kuot dyei das, ge. 5 Nyang housoeh taiq nyeis shih lyis bvng dah jyommauh yah nyamoq lyis nghop tyamp las: yoeuh aq, jyommauh khau mhayah thwe dvkoeuq taiq zis gas, Haih soeu ka ngos jyetdap dah ngah Lo nghuot, ngos nyang lyis nhaiq doeus - nyah dang gyo geh, ge. 6 Changlo jens haih zis xauhgyo lyis, gyuk nvn las gop pyeh toh. 7 Housoeh Yesu nyamoq lyis los tanh las taiq zis gas, Toq geh, vgyuk goh, ge. 8 Nyamoq tsain nghank yoeuh lyis, Yesu masyah lai las gohtoeu hank lyis eq ma nyvng lo. 9 Nyamoq boms masyah gyoh los dah uhlyis, Yesu nyamoq lyis khyangh com zis gas, Cangsoeu Lo shei masyah ma doms dwis toq los dvchank, haih nyoqnyvng hank lyis eq vtaiq kyoh goh, ge. 10 Nyah changlo jens nyang lyis nyei zis gas, Maussauh lhaih bang chamus Eliya shih jweh los chah ge taiq au lhyeh, ge. 11 Yesu nyamoq lyis phuk taiq zis gas, Jyoengh Eliya shih los las dvnganh yvlyis soq das. 12 Nghuot laus eq ngos namoq lyis taiq bah, Eliya gas jweh los goeus zis nyamoq gas nyang lyis ma seq yvmvyah nyamoq o khyvlyis kuot. Houyah dvyhangteh Cangsoeu Lo eq nyamoq dah loq mas shanghsenh zis xauh das, ge. 13 Changlo jens gas nyang nyamoq lyis jeisnyhop dyei soeu Yohan dah cho taiq kyoh nyeis ge seqgyo. 14 Nyamoq moqjens jyank mas jweh e lhyi, dius dvyuk nyah jyank mas lyih las nyah xikkhonh mas phvluk zomhgyuis las taiq zis gas, 15 Yhensain eh, ngah lo lyis nhaiqnyen aq: khasoeh ge lyis, nyang gas chuot las shanghsenh nyeis. Nyi mas eq, jeis mas eq dvsoq soq lyis lains wvng loh. 16 Ngos nyang lyis nah changlo jens jyank mas shwih e laus eq nyamoq ma yoh lhoq gis dyei, ge. 17 Yesu phuk taiq zis gas, Lomsjingh cho ma bos, ung lhung dah vcaiq mas bang eh, Ngos namoq yah khanyhank jweh shoq yoh nyeis nyeis das lah? Khanyhank jweh shoq namoq lyis jhen chah das lah? Nyang lyis ngah jyank mas shwih los aq, ge. 18 Yesu yius lyis nyho lho lhyi yius gas loshang jyank masyah thuq loh goeus las, hauh shishenh masyah nyang gas gis los. 19 Hauh thang lhyi changlo jens nyang kyingh Yesu jyank mas los las taiq zis gas, Ngamoq hauh yius lyis chamus ma yoh khat thuq au lhyeh, ge. 20 Yesu nyamoq lyis taiq zis gas, Namoq lomsjingh ehnyet nain yvmvyah nghuot. Ngos namoq lyis jyoengh taiq bah, namoq mas lomsjingh ehnyet anghshih chvp iq bos nghuot lyis gas, namoq haih boms lyis, Thyimha ywi cheh loh aq, ge lyis ywi cheh loh das. Housoeh nghuot lyis gas namoq xiklyis ma duot zis cha eq ma bos lo das. 21 Nghuot laus eq shvmanh dung zis yahge womkyi zis yah kyingh ma nghuot lyis gas haih ja gas ma yoh thuq loh, ge. 22 Gvshih nyamoq Galile mau mas nyeis dah uhlyis, Yesu nyamoq lyis taiq zis gas, Cangsoeu Lo gas dius jens dah loq mas phanhlyen dyei zis xauh das. 23 Nyamoq gas nyang lyis sat das, hauh thang lhyi somh vnyeih lyis nyang dwis toq das, ge. Changlo jens gas vthanklang masyah ohyom. 24 Kaperna-um mha jweh loh lyis, yhenmuh khoenghdaus khywi bang gas Petru jyank mas los las, Namoq dah svra gas yhenmuh khoenghdaus ma kat lah, ge lyis nyang phuk taiq zis gas, Kat, ge. 25 Petru yhen khau mha wvng loh lyis Yesu nyang lyis lhom taiq zis gas, Simon eh, nvng khasoeh nghamh? Nyeisjvng hwankti jens khoenghdaus, vkhoq khywi zis gas hank jyank masyah nghuot au lhyeh? Nyamoq lo jens masyah lah? Gohnyau bang jyank masyah lah, ge. 26 Petru gas, Gohnyau bang jyank masyah nghuot ge lyis, Yesu gas, Lo jens gas luiq goeus. 27 Nghuot laus eq yah gvng mas nyamoq ehnyet ma dyet bas jungh, thomh mas oeng nghweh e khyoq aq; cangxeih yoh dah oeng lyis lap yoeus las nhuot lang haq lyis ngwis dvkyvp nyvng das: hauh zis yoeus las nvng yahge ngah xiklyis nyamoq lyis dyei aq, ge.
1 Hauh shishenh lyis changlo jens gas Yesu jyank mas los las taiq zis gas, Maukhung munghdan mas kuh thank zis hank nghuot, ge. 2 Nyang loshang dvyuk nyah jyank mas khi yoeus las nyamoq vgungs mas yap nhang lha taiq zis gas, 3 Ngos namoq lyis jyoengh taiq bah, namoq ehnyet thaiq las loshang jens teh ma bweh los nghuot lyis gas, namoq maukhung munghdan mas ma xauh wvng loh das. 4 Housoeh yvmvyah haih loshang teh ehnyet o mha gyoh soeu hank laus eq, maukhung munghdan mas zes kuh soeu nghuot los das. 5 Heisoeh teh dah loshang dvyuk lyis ngah nyings masyah lhom yoeus soeu hank laus eq ngos lyis lhom yoeus zis nghuot. 6 Nghuot laus eq ngos lyis lomsjingh dah haih ngis bang dvyuk yuk lyis yaunos kuot nhang soeu hank laus eq, nyah lainzain mas mhoq shan tyaulhangh las hauh dah thomh noq mas khyoq kat lyis nyah xiklyis zes gis. 7 Yaunos kuot das xiklyis shiwu cho nyoshoq bos yvmvyah mungkvn gas mvtanhzoe nghuot: khasoeh ge lyis hau yaunos thuq los zis gas soengh choenk nghuot. Nghuot laus eq hau shiwu cho lhyi bweh nhang soeu ka mvtanhzoe nghuot. 8 Nah loq nah khyei dvjaja yah nvng lyis shuot nhang lhyi, hauh yvlyis thyet doeuh tyamp aq; Nah dah aiq loq nghuot ya, aiq khyei dap zis yah vcaiq vto nyi mas kat zis xauh das thoq lyis, loqdung khyeidung yah kang dwis yvmas xauh wvng loh das zis gas nah xiklyis zes gis. 9 Nah nyoqjeih yah nvng lyis shuot nhang lhyi ka, hauh yvlyis thuiq tyamp aq. Nyoq dvjeih yah kang dwis yvmas xauh wvng zis gas, nyoq aiq jeih yah munyi thomh mas wvng loh thoq lyis zes gis. 10 Housoeh yvmvyah ngis bang dvyuk lyis eq chaxwe ma nhang vkuot goh. Khasoeh ge lyis ngos namoq lyis taiq bah, maukhung mha nyamoq dah loeuswons bang eq, maukhung mha nyeis, ngah Uwus nyoqnho lhyi vjangh yoeuh nyeis. 11 Cangsoeu Lo gas dyuk loh soeu lyis khyuot yoeus das xiklyis lyih. 12 Namoq khasoeh nghamh goh lah? Dius dvyuk yuk yvng dvxo doeu yoh: hou mhayah dvdoeu chowhang whang dyuk loh lyis, gauci gau lyis boms mas nyhei toh khoq las, chowhang whang dyuk loh dah vdoeu lyis loh xo ma nghuot lhyeh? 13 Ngos namoq lyis jyoengh taiq bah, hauh vdoeu xo nyvng lyis, chowhang ma whang dyuk dah gauci gau doeu nyhenshang gauslaus thoq lyis hau dvdoeu xiklyis zes gauslaus. 14 Houyah dvyhangteh maukhung mha dah namoq Uwus gas, hau ngis bang mas dvyuk yuk dyuk das zis yangh ma bauh. 15 Nah vmang vnoeuh yah nvng lyis cu lhyi, nvng e lha nah aiq yuk nyang kyingh nyeis yvmas, nyang chah zis lyis taiq aq. Nyang nah dang gyo yoeus lyis gas, nvng nah vmang vnoeuh lyis yoh doms jyoeuq yoeus goeus. 16 Nghuot laus eq nyang ma gyo dyei lyis gas, nvng yah dvgeh kanghjyoeng dvyuk, nghuot ya aiq yuk shwih e lha, dang khonh khanghmuh lyis kanghjyoeng aiq yuk somh yuk dah xikkhonh mas taiq jyoeng aq. 17 Nyamoq dang lyis eq ma gyo dyei nghuot lyis gas, tsainhtoh phung lhyi taiq kyoh aq. Tsainhtoh phung lhyi eq nyang ma gyo dyei nghuot lyis gas, nyang gas gohnyau bang yahge khoengh khywi soeu teh nghuot bas jungh. 18 Ngos namoq lyis jyoengh taiq bah, nyeisjvng mas namoq twih ya twih zis lyis maukhung mha twih toh das. Nyeisjvng mas namoq phui ya phui kat zis lyis maukhung mha eq phui kat das. 19 Ngos namoq lyis taiq shih bah, nyeisjvng thoq mas namoq aiq yuk xamxonh las dung lyis gas, cha nghuot laus eq namoq dung zis lyis maukhung thoq mas ngah Uwus gas namoq lyis kuot dyei das. 20 Khasoeh ge lyis ngah nyings mas aiq yuk, nghuot ya somh yuk dvgeh huom dah nyamoq vgungs mas ngos bos, ge. 21 Hauh uhlyis Petru nyah jyank mas los taiq zis gas, Yhensain eh, ngah vmang vnoeuh ngos lyis doms shuot doms shuot nghuot lyis, ngos nyah yobos lyis khanyhoq lhain khyuot dyei chah das lah? Nyhet lhain jweh shoq lah, ge. 22 Yesu nyang lyis taiq zis gas, Ngos nvng lyis nyhet lhain kyingh oen ma taiq; nyhetci lhain mulas nyhet lhain jweh shoq khyuot dyei aq, ge. 23 Housoeh yvmvyah maukhung munghdan gas, uhkung jens lyis jyen suon mes dah hwankti dvyuk yah doeusgoh. 24 Housoeh jyen suon nyeis lyis, nyang lyis ngwis jyen sens sens wvn wvn dap soeu dvyuk nyah jyank mas tsain shwih los. 25 Hauh soeu ka jyen cap das zis cha eq ma yoh yvmvyah, nyah gungs, nyah yhensain nyhiq, nyah lo jens yahge nyang yoh ya yoh zis dvnganh ungh las jyen cap das xiklyis nyah yhensain vmingh dyei. 26 Hauh uhkung ka nyah xikkhonh mas phvluk zomhgyuis paiq las taiq zis gas, Yhensain eh, ngos lyis jenh jhen dyei shih aq, ngos nvng lyis dvnganh yah cap das, ge. 27 Hauh uhkung dah yhensain ka nhaiqnyen las kat kat: nyah jyen lhyi lhuiq tyamp dyei. 28 Nghuot laus eq uhkung hauh vyuk thuq loh lyis, nyang lyis jyen dvxo shauh soeu uhkung changh dvyuk yah xauhgoh lyis, nyang gas hauh soeu lhyi nyhik yoeus lho lha, lainzain mas chih toh las, Ngah ngwis jyen cap aq, ge sang. 29 Hau uhkung changh eq nyah khyeiyang mas gyuis las nyang lyis khyoeuq zis gas, Ngos lyis jenh jhen dyei shih aq, ngos nvng lyis dvnganh yah cap das, ge. 30 Jyeih dyei soeu eq ma gyo dyei, jyen dye cap shoq nyang lyis thung mha lhunk toh. 31 Hauh cho lhyi nyah uhkung changh jens nyvng lyis, ehnyet ma tap las nyang kuot ya kuot zis dvnganh nyamoq dah yhensain lhyi loh tsain taiq kyoh. 32 Hauh thang lhyi nyah yhensain nyang lyis khi yoeus las taiq zis gas, Ung lhung dah uhkung eh, nvng ngos lyis dung yvmvyah, nvng cap chah jyen dvnganh yah ngos lhuiq dyei goeus. 33 Ngos nvng lyis nhaiqnyen zis yah dvyhangteh, nvng nah uhkung changh lyis eq nhaiqnyen chah ma nghuot lhyeh, ge. 34 Nyah yhensain svsoh nhaiqyo las nyang cap chah goeu dye cap shoq thung vgyis jens loq mas kyauh toh. 35 Houyah dvyhangteh, namoq yuk khanghmuh nah vmang vnoeuh cu zis lyis ehnyet nhaiqlom dvnganh yah ma khyuot dyei lyis gas, maukhung mha dah ngah Uwus eq namoq lyis houyah dvyhangteh kuot das, ge.
1 Gvshih Yesu haih dang dye taiq lyis, nyang Galile mau masyah toq las Yodan lvng thyitvp, Yuda wuxom mha jweh loh. 2 Moqjens zainsmuh nyah thang mha chank los las, nyang houmha nyamoq lyis gis los nhang. 3 Hauh uhlyis Pharishe moq nyah jyank mas los las nyang lyis shiwu zoh lyis nyei zis gas, Dvyuk yuk gas nyah yhensain nyhiq dvja ja chah shuot lyis she tyamp das zis lyi vbos lah, ge. 4 Nyang nyamoq lyis phuk taiq zis, Cangxeih lyis yah nyah zomh lyis gvnkhanh soeu ka, vbusbih yahge vmesbih lyis gvnkhanh toh goeus yvlyis namoq ma nghap ku goh lhyeh? 5 Hauh gvng mas vbusbih gas nyah ungwes uwus lyis toh khoq zis yah nyah yhensain nyhiq yah tsoq las, nyah zomh gas gungsshoh dvkoeuq kyingh duot das, ge. 6 Housoeh yvmvyah nyah zomh gas aiq yuk ma nghuot, gungsshoh dvkoeuq dvnghuot lo. Housoeh Mangso tsomp toh yvlyis dius yah ma kangh bas jungh, ge. 7 Nyamoq nyang lyis taiq zis gas, Housoeh lyis gas, kangh maussauh lhaih dyei las nyang lyis yoh nhang kat, ge Moshe chamus tying toh au lhyeh, ge. 8 Nyang nyamoq lyis taiq zis gas, Namoq nhaiqlom tsain than yvmvyah, namoq dah yhensain nyhiq jens lyis tsain she tyamp das xiklyis Moshe vmingh dyei zis nghuot. Nghuot laus eq cangxeih gas heisoeh ma nghuot. 9 Ngos namoq lyis taiq bah, yauxi cho mhayah lai las, vsainnyang dah yhensain nyhiq lyis she tyamp las gohtoeu nyihwank yoeus soeu hank laus eq nyi shuot soeu nghuot, ge. 10 Nyah changlo jens nyang lyis taiq zis gas, Nyi lvng dah cho heisoeh nghuot lyis gas, nyi yoeus, yhenloh ma kuot lyis gis, ge. 11 Nghuot laus eq nyang nyamoq lyis phuk taiq zis gas, Hai jyauh cho lhyi dius dvnganhmoq yah ma yoh lhom yoeus: hauh zis dyei toh zis xauh bang kyingh dvyoh lhom yoeus. 12 Khasoeh ge lyis dius dvyhamh gas, nyah ungwes ung mhayah khoeu los lyis yah yukgis ma dyeh bang bos. Dvyhamh gas dius yah shan toh. Dvyhamh gas maukhung munghdan xiklyis nyi ma yoeus yhen ma loh bang eq bos. Yoh lhom yoeus soeu ka lhom yoeus bas jungh, ge. 13 Hauh thang lhyi loshang jens thoq mas loq kih las shvmanh dung dyei bas jungh ge, nyamoq lyis nyah jyank mas shwih lyih uhlyis, changlo jens gas nyamoq lyis nyho. 14 Nghuot laus eq Yesu taiq zis gas, Loshang jens ngah jyank mas los nhang geh, nyamoq lyis vtomp toh goh: khasoeh ge lyis maukhung munghdan gas housoeh teh bang xiklyis nghuot, ge. 15 Housoeh nyang nyamoq thoq mas loq kih dyei lho lha, hou mhayah toq loh. 16 Yoeuh aq, dius dvyuk nyah jyank mas los las, Svra eh, ngos vcaiq vto kang yoh das xiklyis gis zis cha kuot chah lah, ge. 17 Nyang taiq zis gas, Nvng ngos lyis gis cho yah sen lha chamus nyei? Gis soeu dvyuk kyingh dvbos. Nvng kang o mes lyis gas tyingtoh dang lyis chank aq, ge. 18 Nyang, Yesu lyis taiq zis gas, Lyi kha koeuq nghuot lah, ge. Yesu phuk taiq zis gas, Dius vsat, nyi vshuot, vkhauh, ma ying kanghjyoeng vkat; 19 Nah ungwes uwus lyis phauh nyang aq, nah yhenkyoh lyis nvnyang gungs lyis teh yoh jyetdap das, ge. 20 Hauh loyvm phoq nyang lyis taiq zis gas, Hauh goeu dvnganh yvlyis ngos loyvm yoq lyis yah chank kuot goeus: ngos cha chah shih lah, ge. 21 Yesu nyang lyis taiq zis gas, Nvng dyinghjet mes lyis gas, Loh aq, nvng yoh zis ungh las nyungs bang lyis dyei tyamp aq, housoeh lyis nvng maukhung mha zisyos yoh das. Housoeh las ngah thang mha chank los aq, ge. 22 Nghuot laus eq hau loyvm phoq hauh dang xauhgyo lyis nhaiqkuk zis yah loh lo: Khasoeh ge lyis nyang gas zisyos nyoshoq yoh soeu nghuot. 23 Housoeh las Yesu nyah changlo jens lyis taiq zis gas, Ngos namoq lyis jyoengh taiq bah, dis soeu ka maukhung munghdan mas svsoh wvng yau. 24 Ngos namoq lyis taiq shih bah, Dis soeu dvyuk Mangso munghdan mas yoh wvng das thoq lyis gas, nghvpnho mha gola-u wvng das zis zes lwis, ge. 25 Nyah changlo jens hauh zis xauhgyo lyis nyamoq svsoh mauh las, Housoeh lyis gas khyuot yoeus zis hank xauh das lah, ge. 26 Nghuot laus eq Yesu nyamoq lyis yoeuh lho lha taiq zis gas, Haih zis gas dius yah gas ma yoh bweh, nghuot laus eq Mangso ka dvnganh zis lyis yoh bweh nhang, ge. 27 Petru nyang lyis phuk taiq zis gas, Yoeuh aq, ngamoq dvnganh yah toh khoq las nah thang mha chank los goeus. Housoeh las ngamoq cha xauh yoeus das lah, ge. 28 Yesu nyang lyis taiq zis gas, Ngos namoq lyis jyoengh taiq bah, Cangsoeu Lo gas nyah phunk yah hwankti tank mas tsung dah dius caiq vsaiq mas namoq ngah thang mha chank bang eq, hwankti tank dvci aiq lom mas tsung lha Israel dvci aiq nyau lyis soetuon das, ge. 29 Ngah nyings gvng mas yhen, vmang vnoeuh, nhamhmuh, ungwes, uwus, yhensain nyhiq, lo jens, maunyeis lyis tyamp soeu hank laus eq vkyuh dvxo huon xauh yoeus las, vcaiq vto kang vso vlho xauh kham yoeus das. 30 Nghuot laus eq cangxeih bang nyoshoq gas thang thank nghuot das. Thang thank bang cangxeih nghuot das, ge.
1 Maukhung munghdan gas zvbiq khyam mha muh zwi uhkung lhung kat das zis nvpsangh yah thuq loh dah yhensain dvyuk yah doeusgoh. 2 Hauh soeu ka dvnyeih lyis ngwis kyvp dvkoeuq dyei das xiklyis tsain xam woengh goh las uhkung jens lyis zvbiq khyam mha nhang kat. 3 Gau shishenh ko lhyi nyang thuq e lhyi kaih jang mas gohtoeu mvgon yap joq bang lyis nyvng las, 4 nyamoq lyis taiq zis gas, Namoq eq zvbiq khyam mha tsain e geh, phauh mon yih nyhoq ngos namoq lyis dyei das, ge lho lhyi nyamoq e loh. 5 Tsai nyang dvci aiq shishenh yahge somh shishenh lyis doms thuq e lha houyah dvyhangteh kuot. 6 Oeng shishenh lyis doms thuq e lyis eq, gohtoeu mvgon yap joq bang lyis nyvng las, Namoq dvbuis yah heimha mvgon chamus yap joq goh, ge nyamoq lyis taiq. 7 Nyamoq gas nyang lyis, Ngamoq lyis hank ma lhung yvmvyah nghuot ge lho lhyi, nyang nyamoq lyis taiq zis gas, Namoq eq zvbiq khyam mha tsain e geh, ge. 8 Nyenhthang jweh lyis, zvbiq khyam sain ka, muh zwi bang lyis khi los aq, thang thank wvng soeu masyah cangxeih wvng soeu jweh shoq uhkung phauh khaih aq, ge nyah ziszom lyis taiq toh. 9 Hauh uhlyis oeng shishenh lyis lhung zis xauh bang los las, ngwis dvyuk dvkyvp tsain xauh yoeus. 10 Nghuot laus eq cangxeih wvng bang los las, nyamoq zes xauh yoeus das ge nghamh laus eq, dvyuk dvkyvp kyingh dvtsain xauh yoeus. 11 nyamoq tsain xauh yoeus dah thang lhyi nyamoq gas, yhensain lhyi lop zoh lyis yah taiq zis gas, 12 Hai thang thank wvng bang gas dvshishenh kyingh dvkung, nghuot laus eq khvnyhik dvnyeih yah wons wuq las buis gywes zis kham bang, ngamoq lyis nvng, nyamoq yah dvyhangteh kuot nyvng! ge. 13 Nghuot laus eq nyang nyamoq mas dvyuk lyis phuk taiq zis gas, Buisnoms phoq eh, ngos nvng lyis ma kuot cu. Ngwis dvkyvp khyoq toh zis lyis nvng gyo goeus ma nghuot lhyeh? 14 Nah zis yoeus las loh aq; thang thank wvng bang lyis nvng yah dvyih dyei das zis ngos o. 15 Ngah vyhang lhyi ngos o khyvlyis kuot das zis, lyi ma bos lhyeh? Ngos gis yvmvyah nah nyoq yoeuh zoeu vnghuot lah? 16 Housoeh yvmvyah thang thank soeu ka xik pheh nghuot los das, cangxeih soeu ka thang thank nghuot los das, ge. 17 Yesu gas nyah changlo jens dvci aiq yuk lyis shwih las Yerusalem pheh doq loh nyeis uhlyis cho mha nyamoq lyis lhyenwhei taiq zis gas, 18 Yoeuh aq, yang Yerusalem pheh doq loh nyeis: Cangsoeu Lo gas phudyei uhjyung jens yahge maussauh lhaih bang loq mas kyauh tyamp las, nyamoq gas nyang lyis shei das cho dang thang thyet das zis yahge, 19 Nyang lyis jwangh, lyuk las tapzains mas taplhangh tyamp das xiklyis gohnyau bang lyis kyauh tyamp das. Somh vnyeih lyis dwis toq kat zis xauh das, ge. 20 Hauh thang lhyi Zebedi lotang ungwes gas Yesu jyank mas nyah lotang yah dvgeh e dupaiq lho lha nyang lyis dvja sang. 21 Nyang gas, Cha o mes lah, ge nyei. Hau vmesbih taiq zis gas, Nah munghdan mas ngah lotang lhyi nah loqwi pheh dvyuk, loqyos pheh dvyuk tsung nhang aq, ge. 22 Nghuot laus eq Yesu gas, Namoq cha dung zis lyis namoq nyang ma seq. Ngos shuk das kom lhyi namoq yoh shuk goh das lhyeh, ge lyis, nyamoq gas, Ngamoq yoh kuot, ge. 23 Nyang nyamoq lyis taiq zis gas, Ngah kom lhyi namoq shuk nyang shuk chah das. Nghuot laus eq ngah loqwi loqyos mas yoh tsung das dah vmingh ngos ma yoh dyei. Houka ngah Uwus sont toh dyei bang xiklyis dvnghuot, ge. 24 Hauh zis dvci yuk moq xauhgyo lyis nyamoq gas hau vmang vnoeuh aiq yuk lyis nhaiq tsain yo. 25 Nghuot laus eq Yesu nyamoq lyis khi yoeus las taiq zis gas, Gohnyau bang lyis guon bang gas nyamoq thoq mas zau las, vmingh yoh bang eq nyamoq thoq mas vmingh tsain bos yvlyis namoq seq. 26 Nghuot laus eq namoq gas housoeh ma nghuot das. Namoq vzainsmuh kuot mes soeu hank laus eq namoq dah jyeidwis duot chah. 27 Namoq mas uhjyung duot mes soeu hank laus eq namoq dah jyeidwis duot bas jungh. 28 Cangsoeu Lo gas, phuqsoe kham das xiklyis jweh los zis ma nghuot. Phuqsoe das zis yahge, nyoshoq lyis khyuot yoeus das xiklyis nyah kang dyei das zis dvjweh los, ge. 29 Yerikho masyah nyamoq thuq los lyis, moqjens zainsmuh nyah thang mha tsain chank los. 30 Hauh uhlyis nyoqjet aiq yuk choyvm mas tsung toh zis, Yesu lai loh sam gyo lyis nyah aiq yuk kaiq zis gas, Dawi dah Lo Yhensain eh, ngah aiq yuk lyis nhaiqnyen aq, ge. 31 Moqjens gas nyah aiq yuk lyis samlo nyeis bas jungh ge nyho laus eq, nyah aiq yuk gas zes kaiq las, Dawi dah Lo Yhensain eh, ngah aiq yuk lyis nhaiqnyen aq, ge. 32 Yesu yap las nyah aiq yuk lyis khi yoeus lho lha taiq zis gas, Ngos nah aiq yuk lyis cha kuot dyei das zis o goh lah, ge. 33 Nyah aiq yuk gas, Yhensain eh, ngah aiq yuk dah nyoqjeih phank dyei das zis o, tsain ge. 34 Housoeh las Yesu gas nyah aiq yuk lyis nhaiqnyen las nyoqjeih mas tanh dyei. Houjang yah nyah aiq yuk dah nyoq nyvng los las nyah thang mha tsain chank loh.
1 Nyamoq gas Yerusalem mas jweh ni los las, Tsanlun boms khyei, Betphage wukhau mha jweh loh lyis Yesu gas changlo aiq yuk lyis nhang lha taiq kat zis gas, 2 Nah aiq yuk xik mas dah wukhau mha wvng loh geh. Houjang houmha twih toh dah mauhlyihzoe zains yahge mauhlyihzoe lo lyis nah aiq yuk nyvng das. Hauh yvlyis ngah jyank mas phui she los geh. 3 Dvyuk yuk nah aiq yuk lyis dvja ja taiq lyis gas, Yhensain hauh yvlyis yhung chah ge, oen nyamoq lyis taiq geh. Houjang nyang hauh yvlyis tsain nhang kat das. 4 Hau dvnganh gas lvpe dah dang nyuk los das xiklyis bweh los zis nghuot. 5 Houka: Zion lonyi lyis heisoeh oen taiq aq: Yoeuh aq, nah Hwankti ka noeuh nhamp dah nhaiqlom yah mauhlyihzoe thoq mas, Nghuot goeus mauhlyihzoe zains dah lo mauhlyihzoe lo thoq mas ji las, Nah jyank mas jweh los, ge. 6 Hauh changlo tang ka Yesu nyah aiq yuk lyis tying kat vgus loh kuot las, 7 Mauhlyihzoe zains yahge mauhlyihzoe lo tsain she los las, nyamoq dah dyimis nyhoeuh dyei lho lha nyang hauh thoq mas ji. 8 Moqjens zainsmuh gas nyamoq dah dyi yah cho mha tsain nyhoeuh dyei. Dvyhamh gas saiqzains mas dah saiqko zan las cho mha nyhoeuh dyei. 9 Nyah xik pheh thang pheh chank bang moqjens gas kaiq las, Dawi dah Lo lyis chungh goh! (Hosana!) Yhensain dah nyings mas jweh los soeu ka ngelhoq. Nyhang thank Mangso lhyi chungh goh, ge. 10 Gvshih Yerusalem mas wvng loh lyis dvwus gonh hoeu lha, Haih soeu ka hank nghuot lah, ge. 11 Moqjens gas, Haih soeu ka Galile mau, Nazaret wukhau mha dah Yesu ge dah lvpe nghuot, tsain ge. 12 Hauh thang lhyi Yesu gas Mangso dah yhenmuh mas wvng loh las hauh yhenmuh khau mha ungh bang wis bang dvnganhmoq lyis khat thuq las, ngwis thaiq bang dah kihgus yahge khotjyauh ungh bang dah tank lyis toeu phanh tyamp. 13 Ngah yhen lhyi shvmanh dung yhen oen das, ge lhaih toh goeus lyis eq, namoq gas haih yvlyis khyanktau khyung tsain kuot nyvng! ge taiq. 14 Yhenmuh khau mha, nyah jyank mas lyih dah nyoqjet bang yahge khyei dyoq bang lyis nyang gis los nhang. 15 Nghuot laus eq phudyei uhjyung jens yahge maussauh lhaih bang gas, nyang kuot dah mauhphoh zis yahge yhenmuh khau mha, Dawi dah Lo lyis chungh goh, ge tsain kaiq nyeis dah loshang jens lyis nyvng lyis nhaiq tsain yo. 16 Nyamoq cha taiq yvlyis nvng vxauhgyo lah, ge nyang lyis taiq lho lhyi, Yesu taiq zis gas, Xauhgyo. Lonoeuh yahge loshang jens dah nhuot masyah dyinghjet dah Chungh Dang thuq los das, ge yvlyis namoq khanhamp eq ma nghap yoeuh ku goh lhyeh, ge. 17 Nyang gas nyamoq lyis nyhei toh khoq las wus nghe pheh thuq las Bethani mas loh yhet khoq. 18 Nungs lyis nvpyo noq yah, nyang hauh wugungs mas tauh los lyis, nyang wom yuot. 19 Choyvm mas maiphang dvzains nyvng las nyang e lhyi cha eq ma dap, vhuq kyingh dvnghuot las, nyang gas hauh saiqzains lyis, Gvshih masyah nvng mas khanhamp eq shih ma shih lo bas jungh, ge lho lhyi, maiphang zains gas houjang yah kyuk loh. 20 Changlo jens hauh yvlyis nyvng lho lhyi, nyamoq svsoh mauh las taiq zis gas, Haih maiphang zains houjang yah chamus kyuk tyamp, ge. 21 Yesu nyamoq lyis phuk taiq zis gas, Ngos namoq lyis jyoengh taiq bah, namoq lomsjingh ehnyet bos las khamkhvv zis ma bos nghuot lyis gas, haih maiphang zains mas bweh thoq lyis namoq yoh tsain kuot das zis yahge haih boms lyis eq ywi las thomh mas cheh wvng aq, ge lyis, namoq taiq vgus bweh das. 22 Hauh thoq lyis namoq lomsjingh ehnyet yah shvmanh dung zis dvnganh yah namoq xauh yoeus das, ge. 23 Nyang yhenmuh khau mha wvng loh las jyauh nyeis lyis, phudyei uhjyung jens yahge dius jens dah logis jens nyah jyank mas los nyei zis gas, Nvng gas chah vmingh yah haih zis tsain kuot lah? Nvng lyis haih vmingh hank dyei, ge. 24 Yesu nyamoq lyis phuk taiq zis gas, Ngos eq namoq lyis dvja nyei yoeuh bah, namoq eq hauh zis lyis taiq kyoh lyis gas, ngos chah vmingh yah heinyhoq zis kuot yvlyis ngos namoq lyis taiq kyoh das. 25 Yohan dah jeisnyhop cho ka maukhung mhayah nghuot lah? Dius masyah nghuot lah, ge. Nyamoq nyang changh tsain xamgoh zis gas, Yang, Maukhung mhayah nghuot oen ya, Housoeh lyis namoq nyang lyis chamus ma lomsjingh goh, ge das. 26 Dius masyah nghuot oen yang taiq lyis gas, yang moqjens lyis gyuk: khasoeh ge lyis Yohan gas lvpe nghuot zis lyis dvnganhmoq jingh, ge. 27 Housoeh las nyamoq Yesu lyis taiq zis gas, Ngamoq ma seq, ge. Nyang nyamoq lyis taiq zis gas, Ngos haih muh chah vmingh yah kuot zis namoq lyis ma taiq kyoh das, ge. 28 Namoq khasoeh nghamh goh lah? Dius dvyuk gas lo aiq yuk yoh. Nyang gas lomons jyank mas e lha, Nauh mons eh, khvnyhik zvbiq khyam mha e zwi aq, ge lyis, 29 Nyang gas, Ngos ma e, ge laus eq thang lhyi nyang ehnyet thaiq las e goeus. 30 Tsai, nyang ngis vyuk jyank mas e lha vgus housoeh taiq lyis, Ngos e das ge las ma e. 31 Hau aiq yuk mas nyah uwus o mes zis khayuk kuot, ge. Nyamoq taiq zis gas, Lomons nghuot, ge. Yesu nyamoq lyis taiq zis gas, Ngos namoq lyis jyoengh taiq bah, khoengh khywi bang yahge nghe nyhiq jens gas namoq dah xik pheh Mangso munghdan mas wvng loh. 32 Khasoeh ge lyis Yohan gas dan cho lhyi chank las namoq jyank mas los laus eq namoq gas nyang lyis ma tsain jingh. Nghuot laus eq khoengh khywi bang yahge nghe nyhiq jens gas nyang lyis jingh. Namoq hauh zis lyis nyvng laus eq nyang lyis jingh das xiklyis namoq ehnyet ma tsain thaiq. 33 Gohtoeu dah dangtoeuq lyis gyo yoeus shih geh: Yhensain dvyuk gas zvbiq dvkhyam ba tsungh toh lho lha, yvmlhaink yah khyam kyamp las zvbiq nyhet zwvng eq doeu toh. Tyoeuq zvm eq thung lho lha khyam muh zwi bang lyis tsoeuh dyei khoq las nyang we mau pheh loh. 34 Vshih nyhink nyos jweh lyis houmha dah vshih xauh yoeus das xiklyis nyah jyeidwis jens lyis khyam tsoeuh zwi bang jyank mas nhang kat. 35 Khyam zwi bang gas nyah jyeidwis jens lyis nyhik las, dvyuk lyis bat, dvyuk lyis sat, gohtoeu dvyuk lyis lukzains yah tsain doeuh. 36 Tsai, nyang gas xik pheh thoq lyis nyo dah gohtoeu jyeidwis jens lyis doms nhang kat lyis eq, nyamoq gas xikpheh yhangteh nyamoq lyis kuot. 37 Thang thank lyis, nyah lo lyis gas nyamoq phauh nyang das ge, nyamoq jyank mas nyah lo lyis nhang kat. 38 Nghuot laus eq khyam zwi bang hauh lo lyis nyvng lyis, Haih soeu ka yhenzis zom das soeu nghuot. Los geh, nyang lyis sat las, nyah yhenzis yang yoeus goh, ge nyamoq nyang changh tsain taiq goh. 39 Nyamoq gas nyang lyis nyhik las, zvbiq khyam nghe pheh she thuq las sat. 40 Housoeh las zvbiq khyam sain doms los lyis haih khyam tsoeuh zwi bang lyis khasoeh kuot das lah, ge nyei. 41 Nyamoq taiq zis gas, Hau lhung bang lyis gas ma gis khyvlyis nyang mhont das las, shishenh jweh lyis, nyang lyis vshih yoh dyei bang, gohyuk lyis hauh khyam cheh tsoeuh toh das, ge. 42 Yesu nyamoq lyis taiq zis gas, Yhen tsuk bang khyen tyamp dah luklom gas, Yhenthunk lukzains bweh los. Haih zis gas Yhensain nyang kuot las, yah xikkhonh mas mauhphoh zis nghuot, ge dah lhaihtoh dang lyis khanhamp eq ma nghap yoeuh goh lhyeh, ge. 43 Housoeh las ngos namoq lyis taiq bah, Mangso munghdan gas namoq jyank masyah yoeus las hauh dah vshih yoh dyei bang lyis dyei das. 44 Haih lukzains thoq mas gyoh soeu hank laus eq dyis tyamp das. Hank thoq mas laus eq hauh zis gyoh lyis gas, phih soeh nhoeuq tyamp das. 45 Hauh dangtoeuq lyis phudyei uhjyung jens yahge Pharishe moq xauhgyo lyis, nyang nyamoq lyis toeuq las taiq yvlyis nyamoq seq. 46 Nyang lyis nyhik das zis yomkat laus eq, moqjens lyis nyamoq gyuk: khasoeh ge lyis, nyang gas lvpe nghuot zis lyis nyamoq jingh.
1 Yesu nyamoq lyis dangtoeuq yah phuk taiq zis gas, 2 Maukhung munghdan gas nyah lo xiklyis nyihwank pwe kuot dyei dah hwankti dvyuk yah doeusgoh. 3 Hauh nyihwank pwe mha khi toh bang lyis nyah jyeidwis jens lyis yah khi nhang kat lyis, nyamoq ma los. 4 Nyang gohtoeu jyeidwis jens lyis doms nhang lha taiq zis gas, Ngah nyenhcon ba sont toh goeus. Noeu eq, nyhuk toh dah gaunyhauq eq sat goeus: dvnganh yah cicont nghuot goeus, nyihwank pwe mha dvlyih lo geh, ge kat. 5 Nghuot laus eq nyamoq hauh yvlyis pvlhyahlyoeus kuot las nyamoq nyang cho pheh tsain loh. Dvyuk gas nyah danh pheh, gohtoeu dvyuk gas soenghi kuot loh. 6 Nyeis shih dah bang gas, nyah jyeidwis jens lyis nyhik yoeus las xoq lhoeu phuh zis yah sat. 7 Hwankti hauh zis xauhgyo lyis nhaiqyo las jeslo jens nhang lha dius sat bang lyis mhont nhang. Nyamoq dah wugungs lyis eq ngheq. 8 Hauh thang lhyi nyang nyah jyeidwis jens lyis taiq zis gas, Ngah nyihwank pwe cicont nghuot goeus, nghuot laus eq khi toh bang gas ma mon. 9 Housoeh yvmvyah namoq talhoeu chokangh mas loh las nyvng ya nyvng nyhoq pwe mha tsain khi los geh, ge. 10 Jyeidwis jens talhoeu mha tsain thuq e lha, gis lyis gang lyis nyamoq nyvng ya nyvng bang dvnganh lyis yoh khi tsainh toh goeus las, hauh nyihwank pwe mha boenghwus dyingh nhoenk joq. 11 Hwankti ka boenghwus yoeuh das ge wvng los lyis, houmha pwe dyi ma wuot soeu dvyuk lyis nyvng. 12 Housoeh las nyang gas, Buisnoms phoq eh, nvng nyi hwank pwe dyimis ma wuot zis heimha khasoeh los lah, ge nyei lyis nyang cha ma daq taiq lo. 13 Hwankti nyah jyeidwis jens lyis taiq zis gas, Nyang lyis khyei mha loq mas twih las shwih loh zis yah, ngausdyeis ngausnhvp yah zwis khih chap loh dah nghe pheh, mauchuotdwang mas khyoq kat geh. 14 Khi zis xauh bang nyo laus eq khyen yoeus zis xauh bang nain, ge. 15 Hauh thang lhyi Pharishe moq thuq los las nyang taiq dang mas thangzoe khasoeh kuot las yoh xo das zis xamgoh nyeis. 16 Hauh uhlyis nyamoq gas, nyamoq dah changlo jens yahge Herodia moq lyis Yesu jyank mas nhang kat las, Svra eh, nvng gas jyoeng nyeis zis yahge, hank lyis eq nyoqnho ma khyen, dvnganhmoq lyis Mangso dah cho jyoeng khyvlyis jyauh las hank nyoqnho lhyi eq ma yoeuh, hank lyis eq gungsyaus ma yaus yvlyis ngamoq seq. 17 Housoeh yvmvyah nvng khasoeh nghamh zis ngamoq lyis taiq aq, hwankti Kesar lyis khoengh kat das zis, lyi bos lah, ma bos lah, ge. 18 Nghuot laus eq Yesu gas nyamoq dah lhung ehnyet lyis seq las taiq zis gas, Gis guons kuot bang eh, namoq ngos lyis chamus shi yoeuh goh lah? 19 Ngos lyis hau ngwis chixoeuq geh, ge taiq lyis, nyamoq gas ngwis dvkyvp nyah jyank mas chi los dyei. 20 Housoeh las nyang nyamoq lyis doms taiq zis gas, Haih zis hank gungslho yahge maussauh dap lah, ge. 21 Nyamoq gas nyang lyis, Kesar zis nghuot, ge. Hauh uhlyis nyang gas, Kesar zis nghuot lyis gas Kesar lyis dyei geh, Mangso zis nghuot lyis gas Mangso lhyi dyei geh, ge. 22 Nyamoq hauh dang lyis xauhgyo lyis mauh las, nyang lyis toh khoq las tsain thuq loh. 23 Dwis toq cho ma bos ge dah Saduke moq gas, hauh nyeihyo nyang, nyah jyank mas los nyei zis gas, 24 Svra eh, nyihwank goeus dah yukgis dvyuk loshang ma bos shei khoq lyis nyah yhensain nyhiq lyis nyah vnoeuh shoeuh las nyah vmang dah vshih tsoq bas jungh, ge Moshe taiq. 25 Gvshih heisoeh teh vmang vnoeuh nyhet yuk ngamoq yah dvgeh nghuot. Cangxeih vyuk nyihwank las loshang ma bos shih lyis shei khoq las, vnoeuh gas chauhmuh shoeuh. 26 Hau aiq vyuk eq, somh vyuk eq, vnoeuh moq nyhet yuk jweh shoq hauh vmesbih lyis tsain shoeuh. 27 Thang thank lyis hauh vmesbih eq shei loh. 28 Housoeh las dwis toq los uhlyis hauh vmesbih gas nyhet yuk gonh mas khayuk dah yhensain nyhiq nghuot das lah? Khasoeh ge lyis nyang gas nyamoq dvnganhmoq yah phoengh wvng goeus, ge. 29 Yesu nyamoq lyis phuk taiq zis gas, Namoq lhaihtoh dang lyis ma seq, Mangso dah yomsoq cho lhyi eq ma seq yvmvyah shuot zis nghuot. 30 Khasoeh ge lyis, dwis toq los yvmas, nyamoq nyi hwank zis ma bos, lonyi dyeizo zis eq ma bos, maukhung mha loeuswons bang teh dvnghuot lo. 31 Nghuot laus eq shei masyah dwis toq cho, Mangso namoq lyis taiq zis lyis namoq ma nghap yoeuh goh lhyeh? 32 Nyang taiq zis gas, Ngos gas Abraham dah Mangso, Isak dah Mangso, Yakop dah Mangso nghuot: Mangso ka shei bang dah Mangso ma nghuot, dwis bang dah Mangso dvnghuot, ge. 33 Moqjens hauh zis lyis xauhgyo lyis nyang jyauh dah cho gvng mas mauh. 34 Saduke moq dah dang lyis taiq nhoeuh zis Pharishe moq xauhgyo lyis, nyamoq zain los las, 35 Nyamoq mas lyi svra nghuot soeu dvyuk, nyang lyis shi yoeuh zoh lyis yah taiq zis gas, 36 Svra eh, lyi mas dah tyingtoh dang mas khah zis zes kuh lah, ge. 37 Yesu nyang lyis taiq zis gas, Hau nah Yhensain Mangso lhyi nah nhaiqlom dvnganh yah, nah ehnyet dvnganh yah, nvng dolhain zis dvnganh yah nvng jyetdap chah, ge. 38 Haih zis gas cangxeih dah dang yahge tyingtoh dang zainsmuh nghuot. 39 Aiq vkhonh eq hauh zis yah doeusgoh las, Nah yhenkyoh lyis nah gungs yah dvyhangteh jyetdap chah, ge zis nghuot.’ 40 Haih tyingtoh dang aiq khonh gas, Moshe dah lyi yahge lvpe jens dah dang dvnganh dah vpom nghuot. 41 Pharishe moq dvgeh huom toh yvmas Yesu nyamoq lyis nyei zis gas, 42 Khristu dah cho lhyi namoq khasoeh tsain nghamh goh lah? Nyang hank dah lo nghuot lah, ge. Nyamoq, nyang lyis taiq zis gas, Dawi dah lo nghuot, ge. 43 Nyang nyamoq lyis taiq zis gas, Housoeh lyis Dawi gas dyos kat dyei zis xauh las nyang lyis Yhensain ge lui las, 44 Hauh Yhensain ngah Yhensain lhyi taiq zis gas, Ngos nah jeswus lyis nah khyei o mha toh shoq, Nvng ngah loqyos shot pheh tsung toh aq, ge. 45 Housoeh Dawi gas nyang lyis, Yhensain ge lui lyis, nyah lo khasoeh yoh nghuot das lah, ge. 46 Housoeh las hauh nyeihyo masyah nyang lyis dang dvkhonh yangh hank ma yoh toeuh lo. Nyang lyis dang hank ma womh nyei lo.
1 Hauh thang lhyi Yesu gas moqjens yahge nyah changlo jens lyis taiq zis gas, 2 Maussauh lhaih bang yahge Pharishe moq gas, Moshe dah tank mas tsung toh. 3 Housoeh yvmvyah nyamoq taiq yvlyis gyo las chank kuot geh. Nghuot laus eq nyamoq kuot teh vchank kuot goh: Khasoeh ge lyis, nyamoq gas nyamoq nyang taiq toh las nyamoq ma chank kuot. 4 Khasoeh ge lyis nyamoq gas svsoh lyei dah yvwons zwis toh las, gohyuk dah kvtoq mas tsain kih dyei. Nghuot laus eq nyamoq gas hauh yvlyis loqnyhauh yah eq ma mes thungh tanh. 5 Nyamoq kuot dah muhzoh dvnganh yvlyis svbih nyvng bas jungh ge lyi kwilo yahge dyithang bandyoms xing xing tsain kuot. 6 Pwe mha gis thank joqyos, lyi jungs mas gis thank tsunggus lyis tsain o. 7 Kaih mas svbih yah Svra eh, ge lui las phauh nyang jeshuh das yvlyis tsain o. 8 Nghuot laus eq namoq gas Svra oen vlui nhang goh: namoq dah choshe soeu ka Khristu ge soeu dvyuk kyingh nghuot las, namoq dvnganhmoq gas vmang vnoeuh dvnghuot. 9 Nyeisjvng thoq mas namoq hank lyis eq uwus oen vlui goh. Khasoeh ge lyis maukhung mha nyeis soeu dvyuk kyingh namoq dah Uwus dvnghuot. 10 Uhjyung jens ge lui das zis v-o goh: Khasoeh ge lyis namoq dah choshe soeu ka Khristu ge soeu dvyuk kyingh dvnghuot. 11 Namoq mas zes kuh soeu ka namoq dah changlo duot bas jungh. 12 Hank laus eq vsainnyang gungs lyis chunghtoq soeu ka, o mha khyoq zis xauh das. Vsainnyang gungs lyis o mha gyoh soeu ka chunghtoq zis xauh das. 13 Nghuot laus eq namoq gis guons kuot dah Pharishe moq yahge maussauh lhaih bang gas mvtanhzoe nghuot! Khasoeh ge lyis, namoq gas dius jens maukhung munghdan mas wvng loh das khomh lyis nyheih toh las, namoq nyang eq ma wvng loh, wvng loh mes bang lyis eq kyamp gos toh. 14 Gis guons kuot dah maussauh lhaih bang yahge Pharishe moq eh, namoq gas mvtanhzoe nghuot! Khasoeh ge lyis, namoq gas shvmanh xing xing dung guons kuot las, chauhmuh jens dah yhen lhyi kuot zo kuot shuk. Housoeh yvmvyah namoq zes kuh dah soetuon zis xauh das. 15 Gis guons kuot dah maussauh lhaih bang yahge Pharishe moq eh, namoq gas mvtanhzoe nghuot! Yuda lomsjingh cho lhyi chank das dius dvyuk yoh shoq namoq gas thomh cho tung yos cho khyop xo lha nyang lyis yoh lying yoeus goeus ya, namoq thoq lyis aiq huon zes shoq munyi thomh lo duot nhang. 16 Nyoqjet dah choshe bang eh, namoq mvtanhzoe nghuot! Hank laus eq yhenmuh dah xing yah maukhi lhyi tyink dyei chah, nghuot laus eq yhenmuh yah maukhi lhyi ka cha ma kuot noh, tsain ge. 17 Nyoq eq jet, koh eq koh bang eh, hauh xing lhyi tsingh-kan nhang dah yhenmuh yahge xing ka khah zis zes kuh lah? 18 Hank laus eq phon thoq mas dah jyungshuk yah maukhi lhyi tyink dyei chah, nghuot laus eq phon yah maukhi lhyi cha ma chah, tsain ge. 19 Nyoq jet bang namoq eh, hauh jyungshuk lyis tsingh-kan nhang dah phon yahge jyungshuk gas khah zis zes kuh lah? 20 Housoeh yvmvyah hauh phon yah maukhi soeu ka hauh zis yahge hauh thoq mas joq zis dvnganh yah maukhi goeus. 21 Hau yhenmuh yah maukhi soeu eq hauh zis yahge houmha nyeis soeu dah nyings yah maukhi goeus. 22 Maukhung yah maukhi soeu eq Mangso dah hwankti tank yahge houmha tsung toh soeu dah nyings yah maukhi goeus. 23 Gis guons kuot dah maussauh lhaih bang yahge Pharishe moq eh, namoq gas mvtanhzoe nghuot! Khasoeh ge lyis namoq gas shomnhamh, hoeuhxangh, lyenhswi jeih mas dah ciboms dvboms kat goeus laus eq, hauh lyi mas bos thoq lyis zes yhaugyen dah lyi jyoeng cho, nhaiqnyen zis yahge lomsjingh cho lhyi namoq tsain toh khoq. Zes yhaugyen zis lyis ma gis lhyweq toh khoq. 24 Nyoqjet dah choshe bang eh, namoq tyop lyis kan tyamp las gola-u lyis doms tsain nyhau kat nyvng. 25 Gis guons kuot dah maussauh lhaih bang yahge Pharishe moq eh, namoq mvtanhzoe nghuot! Khasoeh ge lyis namoq gas kom yahge bvn dah vthoq pheh tsain cheih, vkhau mha ka lhuot zo lhuot shuk zis yahge nyoqnoq zis yah yoh dah zisyos yah dyingh joq. 26 Nyoqjet dah Pharishe jens eh, nghe pheh eq lhyang los das xiklyis hau kom yahge bvn lywas dah vkhau mha cangxeih cheih aq. 27 Gis guons kuot dah maussauh lhaih bang yahge Pharishe moq eh, namoq gas mvtanhzoe nghuot. Khasoeh ge lyis namoq gas thoq mas thyoeu zis yah juot toh laus eq vkhau mha ka mvng dah shohyau yahge vchoqh vjyot zis dvnganh yah dyingh joq dah lop yah doeusgoh. 28 Houyah dvyhangteh, namoq gas nghe mha dius jens xik mas dan teh kuot. Nghuot laus eq vkhau mha ka gis guons kuot zis yahge yaunos yobos yah dyingh joq. 29 Gis guons kuot dah maussauh lhaih bang yahge Pharishe moq eh, namoq gas mvtanhzoe nghuot! Namoq gas lvpe jens dah lop lyis ci lha, dan bang dah lop lyis soh das xiklyis tsain shunk. 30 Yang gas phauh thyeih moq caiq mas nyeis ya, lvpe jens dah suih huot yvmas bos das zis ma nghuot, ge namoq taiq. 31 Housoeh lvpe jens lyis sat dah lo jens nghuot yvlyis namoq nyang kanghjyoeng kat nyeis. 32 Housoeh namoq phauh thyeih moq dah yaunos dyingh shoq tsain kuot tyink geh. 33 Lhangnyis eh, Ywimuhtsanh vnyau eh, munyi thomh mas dang thang thyet kat das masyah khasoeh yoh luiq das lah? 34 Housoeh las yoeuh aq, lvpe jens joeui bos bang yahge maussauh lhaih bang lyis ngos namoq jyank mas nhang kat las, nyamoq mas dvyhamh lyis, namoq sat, dvyhamh lyis tapzains mas taplhangh, dvyhamh lyis namoq dah lyi jungs mas bat zis yahge dvwus thang lhyi dvwus tsain shoeuhshih das. 35 Housoeh dan soeu Abel suih masyah hau yhenmuh yahge phon jo mas namoq sat dah Barakhia dah lo Zekharia suih jweh shoq nyeisjvng thoq mas huot tyamp, dan bang dah suih dvnganh zis gas namoq thoq mas kih toh das. 36 Ngos namoq lyis jyoengh taiq bah, haih zis dvnganh yah haq caiq mas bang jyank mas jweh los das. 37 Yerusalem eh, Yerusalem eh, nvng lvpe jens lyis sat las, nah jyank mas nhang kat bang lyis lukzains yah doeuh sat dah wus eh, gyoqzains gas gyoqlo jens lyis nyah dungs khau mha xwih tsainh teh, nah lo jens lyis ngos khanyhoq lhain xwih tsainh toh mes laus eq, nvng ma gyo. 38 Yoeuh aq, nah yhenmuh gas jyamhjyuklhyuk nyet joq khoq goeus. 39 Khasoeh ge lyis ngos namoq lyis taiq bah: Yhensain dah nyings mas jweh los soeu ka ngelhoq, ge namoq nyang ma taiq dvchank, gvshih masyah nvng ngos lyis ma nyvng das, ge.
1 Yesu hau yhenmuh masyah thuq loh nyeis lyis, nyah changlo jens gas hau yhenmuh mas dah yhen lhyi tuonh shet das ge nyah jyank mas los. 2 Yesu nyamoq lyis taiq zis gas, Hai dvnganh yvlyis namoq nyvng ma nghuot lhyeh? Ngos namoq lyis jyoengh taiq bah, hauh goeu gas ma thyoq thyoq luk dvlom thoq mas dvlom kih toh zis ma bos lo das, ge. 3 Nyang Tsanlun boms thoq mas tsung toh lyis, nyah changlo jens nyang lyis lhyenwhei los nyei zis gas, Hounyhoq zis gas khanhamp nghuot los das lah? Nvng doms jweh das zis yahge mungkvn thank das lyis chah vlho thuq los das lah? Ngamoq lyis taiq kyoh aq, ge. 4 Yesu nyamoq lyis phuk taiq zis gas, Namoq lyis hank eq chowhang ma shwih whang bas jungh, zaih geh. 5 Khasoeh ge lyis, nyoshoq moq ngah nyings masyah thuq los das. Ngos gas Khristu nghuot ge, nyoshoq lyis chowhang shwih whang das. 6 Moeng zan goh zis yahge moeng dyoq dah loeus namoq xauhgyo los das. Nghuot laus eq vdvn goh: Khasoeh ge lyis hauh goeu gas bweh los das. Nghuot laus eq thang thank gas ma nghuot shih. 7 Khasoeh ge lyis dius dvnyau yah dvnyau, munghdan dvkoeuq yah dvkoeuq jes sont goh los das. Joqyos vdeh deh mas panghkhauq gyoh zis yahge maunyeis dwis zis bweh los das. 8 Hau dvnganh gas lo khoeu nos nos xi zis dvnghuot shih. 9 Nyamoq gas namoq lyis shanghsenh zis xauh nhang das yvmas kyauh tyamp las, sat das. Ngah nyings gvng mas dius nyau khanghmuh namoq lyis hoeng das. 10 Hauh uhlyis dius nyoshoq lomsjingh cho mhayah nungsdoms loh das, dvyuk yah dvyuk phanhlyen goh das, nyang changh nyang hoeng goh das. 11 Lvpe hwah jens eq nyoshoq thuq los las, nyoshoq lyis chowhang shwih whang das. 12 Lyi ma chi dah muh je los das yvmvyah nyoshoq moq dah jyetdap nhaiqlom eq jam loh das. 13 Nghuot laus eq thang thank jweh shoq jhen soeu ka khyuot yoeus zis xauh das. 14 Hauh munghdan gausyis dang gas dius nyau khanghmuh xiklyis kanghjyoeng yoh bweh bas jungh, nyeisjvng thoq mas nyeis dah dius dvnganh lyis taiq hoeuh das nghuot. Hauh thang lhyi thang thank buisnyeis jweh los das. 15 Housoeh yvmvyah lvpe Daniel taiq toh, lhoeu thyoq dah vchoqh vjyot zis gas hau gyingshang joqyos mas yap joq yvlyis namoq nyvng lyis, maussauh nghap soeu ka hauh yvlyis seqgyo bas jungh. 16 Hauh uhlyis Yuda mau mas nyeis bang gas boms pheh phang loh bas jungh. 17 Yhenkhung mha nyeis soeu ka, nyah yhen khau mha dah vyhang yoeus das zis ma gyoh los goeus jungh. 18 Yos mas nyeis soeu ka nyah shanhzoe yoeus das zis ma tauh los goeus jungh. 19 Hauh buisnyeis lyis loshang gungs nghuot bang yahge lonoeuh nauh gvmshuk bang gas mvtanhzoe nghuot! 20 Nghuot laus eq namoq phang shishenh gas Yuda No Buisnyeis yahge cungh lyis ma nghuot bas jungh, shvmanh dung nyeis geh. 21 Khasoeh ge lyis, mauthuq nyeiszvn masyah khvnyhik jweh shoq ma bweh ku, thang pheh eq ma bweh lo das shanghsenh gas hauh buisnyeis gyo lyis bweh thuq los das. 22 Hauh buisnyeis lyis ma shungh dyei lyis gas hank eq ma yoh luiq das. Nghuot laus eq khyen yoeus bang xiklyis gas, hauh buisnyeis shungh dyei das. 23 Hauh uhlyis dvyuk yuk namoq lyis, Yoeuh aq, Khristu heimha nyeis, thyimha nyeis, ge laus eq vjingh goh. 24 Khasoeh ge lyis, ma ying dah Khristu jens eq, lvpe hwah jens eq thuq los las, gis bweh lyis khyen toh goeus bang lyis yangh chowhang yoh shwih whang shoq, vlho zainsmuh yahge mauh loqmuh chixoeuq das. 25 Yoeuh aq, ngos namoq lyis uhlhomh taiq toh. 26 Housoeh las nyamoq gas namoq lyis, Yoeuh geh, nyang gas mhanhdyvp mas nghuot, ge taiq laus eq namoq vloh goh. Nyang gas khau lhunk mas nyeis, ge laus eq hauh yvlyis vjingh goh. 27 Khasoeh ge lyis, buisthuq masyah maunyoq nyik zis buiswvng jweh shoq bvng loh zis yah dvyhangteh, hau Cangsoeu Lo doms jweh los zis gas housoeh teh nghuot das. 28 Mvng joq yvmas lvngda eq houmha zain los das. 29 Tsai, hauh shanghsenh dah buisnyeis lai loh thangjang buis eq soeng soeng noq los das. Lhamhmuh eq ma tso lo das. Kyi eq maukhung mhayah gyoh las maukhung yomsoq nonh das. 30 Hauh uhlyis Cangsoeu Lo dah vlho ka maukhung mha thuq los das. Houjang nyeisjvng thoq mas dah dius nyau khanghmuh gas kuk nyingh shoh thang thauh uhjyangh, hauh Cangsoeu Lo gas yomsoq yahge phunk zainsmuh yah maukhung jyommauh yah gyoh los zis lyis nyvng das. 31 Nyah loeuswons bang lyis lvbuh thwe zainsmuh yah nhang kat las, nyamoq gas lyeis nyei shot, maukhung dvthang mhayah gohtoeu dvthang jweh shoq, nyang khyen toh bang lyis xwih tsainh das. 32 Gvshih hau maiphang zains masyah xuq yoeus geh, hauh dah vnyuk tuot las vhuq thuot los goeus ya, zvn wvng los goeus zis lyis namoq seq. 33 Houyah dvyhangteh namoq gas, hau bweh los zis dvnganh lyis nyvng lyis nyang gas khomhdwang mas ni los goeus yvlyis seq geh. 34 Ngos namoq lyis jyoengh taiq bah, Haih zis ma nyuk los dvchank haq caiq ma lai das. 35 Maukhung nyeisjvng lai loh laus eq ngah dang gas ma lai loh das. 36 Nghuot laus eq hauh buisnyeis yahge shishenh lyis gas hank eq ma seq. Maukhung mha dah loeuswons bang ma seq, Lo eq ma seq, Uwus kyingh dvseq. 37 Cangsoeu Lo doms lyih das buisnyeis gas, Noa zaih lyis bweh yhangteh nghuot los das. 38 Khasoeh ge lyis jeis ma nhauq shih lyis dah dius jens gas, Noa jeis sangpho khau mha wvng loh buisnyeis jweh shoq zo, shuk, nyihwank, lonyi dyeizo tsain kuot nyeis. 39 Jeis nhauq los las dvnganh yvlyis khyuot loh shoq nyamoq ma soh ma thamh nyeis. Houyah dvyhangteh Cangsoeu Lo jweh lyih lyis eq housoeh nghuot das. 40 Hauh uhlyis danh mas yukgis aiq yuk dvgeh nyeis mhayah dvyuk lyis shwih loh las dvyuk gas nyet joq das. 41 Vmesbih aiq yuk dvgeh wom mhoq nyeis masyah dvyuk lyis shwih loh las dvyuk gas nyet joq das. 42 Housoeh las namoq Yhensain khah shishenh lyis lyih das zis ma seq yvmvyah, zungh nyeis geh. 43 Nghuot laus eq yhensain ka nyenh lyis khauh soeu wvng das shishenh lyis seq nghuot lyis gas, nyah yhen lhyi ma los yoh thyoq wvng shoq nyang zungh nyeis das zis namoq seq geh. 44 Housoeh yvmvyah namoq eq cicont kuot geh: Khasoeh ge lyis, namoq ma zangh soh dah shishenh lyis Cangsoeu Lo jweh los das. 45 Hauh thoq lyis Yhensain ka nyah yhenbang lyis shishenh jweh lyis zonoms dyei das xiklyis toeuq toh, lomluk las joeui bos dah jyeidwis gas hank nghuot lah? 46 Nyah yhensain jweh los uhlyis lomluk luk kuot nyeis yvlyis los nyvng jus dah jyeidwis gas ngelhoq. 47 Ngos namoq lyis jyoengh taiq bah, yhensain ka nyah zisyos dvnganh thoq mas guon soeu nyang lyis kuot nhang das. 48 Nghuot laus eq ma lyungs jyeidwis gas nyah ehnyet mas, Ngah yhensain los das zis nyangh shih ge nghamh zo nyeis. 49 Housoeh nyah jyeidwis changh jens lyis bat las, yhei yet bang yah dvgeh zo shuk las nyeis dah uhlyis, 50 hauh jyeidwis dah yhensain ka, nyang ma nghamh dah buisnyeis, ma soh dah shishenh lyis doms los das. 51 Nyang lyis jap chink las gis guons kuot bang yah dvgeh toh das. Hauh yvmas ngausdyeis ngausnhvp yah zwis khih chap loh das.
1 Maukhung munghdan gas, nyibung tsain chi lha loloeu saiq lyis zes e dah lonyi gyingh dvci yuk yah doeusgoh. 2 Nyamoq mas oeng yuk gas yik, oeng yuk gas tsain koh. 3 Koh bang gas nyamoq nyang dah nyibung gas chi lha coeu ka ma tsain chi. 4 Nghuot laus eq yik bang gas nyamoq dah nyibung yah dvgeh coeu thuk tsain chi. 5 Gvshih loloeu saiq gas sheq nyeis shih yvmvyah, nyamoq dvnganh gas yhet tsain muih joq. 6 Gungsgvm lyis gas, Loloeu saiq jweh los goeus! Nyang lyis zes langh das zis toq geh, ge kaiq nyeis. 7 Hauh uhlyis lonyi gyingh dvnganhmoq toq las nyamoq nyang dah nyibung lyis tsain sont. 8 Koh bang yah yik bang lyis taiq zis gas, Namoq dah coeu ngamoq lyis dvtsiq jenh kat dyei geh: ngamoq dah nyibung shei loh nyeis, ge. 9 Nghuot laus eq yik bang phuk taiq zis gas, Namoq xiklyis yahge ngamoq xiklyis ma tham das, ungh bang jyank mas namoq nyang loh wis geh, ge. 10 Nyamoq e wis nyeis uhlyis loloeu saiq jweh los las cicont sont toh bang gas nyihwank pwe mha nyang yah dvgeh wvng loh las khomh nyheih goeus. 11 Hauh thang lhyi gohtoeu lonyi jens eq jweh los las, Yhensain eh, yhensain eh, ngamoq lyis khomh phank dyei aq, ge. 12 Nghuot laus eq nyang phuk taiq zis gas, Ngos namoq lyis jyoengh taiq bah, ngos namoq lyis ma seq, ge. 13 Housoeh yvmvyah Cangsoeu Lo khanhamp lyih das dah buisnyeis yahge shishenh lyis ma seq yvmvyah zungh nyeis geh, ge. 14 Maukhung munghdan gas dius dvyuk we mau pheh gyung suh das las, nyah jyeidwis jens lyis khi yoeus las nyah vyhang nyamoq lyis tsain kyauh toh khoq yhangteh nghuot. 15 Dvyuk lyis xing kyvp oeng khyoengh, gohtoeu dvyuk lyis aiq khyoengh, thang thank dvyuk lyis dvkhyoengh mulas, nyamoq nyang yoh kuot dah yom lyis tank las dyei toh khoq las, houjang yah nyang gas gyung suh loh. 16 Houjang xing kyvp oeng khyoengh xauh yoeus soeu ka, hauh zis yah soenghi loh kuot lyis gohtoeu oeng khyoengh myat los. 17 Houyah dvyhangteh aiq khyoengh xauh yoeus soeu ka, hauh zis yah soenghi loh kuot lyis gohtoeu aiq khyoengh myat los. 18 Nghuot laus eq dvkhyoengh xauh yoeus soeu ka, nyah yhensain dah ngwis lyis nyeisjvng mas doeu nyhop shung toh. 19 Dvyoq nyangh thang lhyi hauh jyeidwis jens dah yhensain doms los las soenghi jyen los suon. 20 Housoeh las xing kyvp oeng khyoengh xauh yoeus soeu ka, gohtoeu oeng khyoengh doms chi lyih las taiq zis gas, Yhensain eh yoeuh aq, nvng ngos lyis xing kyvp oeng khyoengh dyei toh zis yah ngos tsai oeng khyoengh yoh myat yoeus, ge. 21 Nyah yhensain nyang lyis taiq zis gas, Nghuot goeus, gis las lomluk dah jyeidwis eh, nvng gas vyhang dvmhauh yvmas lomluk goeus. Vyhang nyoshoq dah thoq mas ngos nvng lyis guon nhang das: nah yhensain gaus yvmas bos aq, ge. 22 Xing kyvp aiq khyoengh xauh yoeus soeu eq jweh los las, Yhensain eh, nvng ngos lyis aiq khyoengh dyei toh zis, yoeuh aq, ngos gohtoeu aiq khyoengh yoh myat los, ge. 23 Nyah yhensain nyang lyis taiq zis gas, Nghuot goeus, gis las lomluk dah jyeidwis eh, nvng vyhang dvmhauh yvmas lomluk goeus. Vyhang nyoshoq thoq mas ngos nvng lyis guon nhang das: nah yhensain gaus yvmas bos aq, ge. 24 Hauh thang lhyi dvkhyoengh xauh yoeus soeu los las taiq zis gas, Yhensain eh, nvng gas yau dah dius dvyuk nghuot las, nvng ma khyoq masyah yhomh yoeus das, nvng ma sanh toh masyah tsainh yoeus das zis lyis ngos seq. 25 Housoeh ngos gyuk las nah xing kyvp dvkhyoengh lyis nyeisjvng mas doeu nyhop shung toh. Yoeuh aq, nah vyhang joq shih, ge. 26 Nyah yhensain nyang lyis phuk taiq zis gas, Lan las ma lyungs dah jyeidwis eh, ngos ma khyoq masyah yhomh yoeus das zis yahge ma sanh toh masyah tsainh yoeus das zis nvng seq nyeis. 27 Housoeh yvmvyah ngah ngwis lyis ngwis jyi mha yoh tsomh nhang toh das las, ngah ngwis bonzoe eq ngwis lhyi eq doms yoh tauh yoeus das. 28 Housoeh yvmvyah nyah jyank mas dah ngwis yoeus las dvmons yoh soeu lhyi dyei geh. 29 Khasoeh ge lyis yoh bang lyis lung dyei das las nyang mas nyo los je los das. Nghuot laus eq ma yoh soeu jyank masyah gas, nyang yoh ya yoh zis lyis eq doms yoeus tyamp shih das. 30 Hau ma lyungs jyeidwis lyis gas, nghe pheh soeng soeng noq yvmas doeuh kat geh. Hauh yvmas nyang gas ngausdyeis ngausnhvp yahge zwis khih chap loh das, ge. 31 Hauh Cangsoeu Lo gas nyah phunk bvng las gyingshang loeuswons bang dvnganh yah dvgeh gyohlyih dah uhlyis, nyang gas nyah phunk bos dah hwankti tank mas tsung das las, 32 Dius nyau khanghmuh lyis nyah xikkhonh mas tsainh toh lho lha, yvng yoeuh soeu ka yvng yahge shvbeq jens lyis kangh toh teh nyamoq lyis kyoq toh das. 33 Yvng lyis nyah loqyos shot pheh, shvbeq lyis nyah loqwi shot pheh toh das. 34 Hauh uhlyis Hwankti phoq gas nyah loqyos shot pheh nyeis bang lyis, Namoq Uwus jyank masyah shvmanh tsain yoh bang eh, los geh, mauthuq nyeiszvn lyis yah namoq xiklyis sont toh dah munghdan vso vlho lhyi tsain kham yoeus geh. 35 Khasoeh ge lyis, Ngos wom yuot lyis namoq ngos lyis zonoms dyei, ngos jeis shet lyis namoq ngos lyis shuk das zis dyei. Ngos boengh duot yenh lyis namoq ngos lyis boengh daih langh. 36 Ngos shohchen nghuot uhlyis namoq ngos lyis gvm huot. Ngos nos nyeis lyis namoq ngos lyis tsain dyangh. Ngos thung lungh nyeis lyis namoq ngos lyis komh goeus, oen das. 37 Hauh uhlyis dan bang gas, Yhensain eh, nvng yuot zis lyis ngamoq khanhamp nyvng las tsoh ku lah? Jeis shet zis lyis khanhamp nyvng las gvmshuk ku lah? 38 Nvng boengh duot yenh zis lyis ngamoq khanhamp nyvng las boengh daih ku lah? Nvng shohchen nghuot zis lyis ngamoq khanhamp nyvng las gvm huot ku lah? 39 Nvng nos xauh zis yahge thung lungh nyeis yvlyis ngamoq khanhamp nyvng las nvng lyis komh ku lah, ge nyang lyis tsain toeuh das. 40 Hauh uhlyis hwankti phoq nyamoq lyis phuk taiq das zis gas, Ngos namoq lyis jyoengh taiq bah, hai ngah vnoeuh moq mas ngis thank soeu dvyuk lyis namoq kuot zis gas, ngos lyis kuot goeus, ge. 41 Loqwi shot pheh bang lyis nyang taiq das zis gas, Nhoengh khonh zangh bang eh, ngos yah gang las yius gomloeus yahge nyah loeuswons bang xiklyis sont toh dah ma jom nyi mas wvng loh geh. 42 Khasoeh ge lyis ngos wom yuot dah uhlyis namoq ngos lyis zonoms ma dyei. Ngos jeis shet dah uhlyis namoq ngos lyis jeis ma dyei. 43 Ngos boengh duot yenh dah uhlyis ngos lyis boengh ma daih; Ngos shohchen nghuot uhlyis namoq ngos lyis ma gvmhuot. Ngos nos xauh zis yahge thung lungh nyeis dah uhlyis namoq ngos lyis ma komh, ge. 44 Hauh uhlyis nyamoq eq, Yhensain eh, nvng wom yuot zis, jeis shet zis, boengh duot yenh zis, shohchen nghuot zis, nos xauh zis yahge thung lungh zis lyis ngamoq khanhamp nyvng las nvng lyis ma phuqsoe dyei lah, ge phuk taiq das. 45 Nyang nyamoq lyis phuk taiq das zis gas, Ngos namoq lyis jyoengh taiq bah, haih bang mas ngis thank soeu dvyuk lyis namoq ma kuot zis gas, ngos lyis ma kuot zis nghuot, ge. 46 Housoeh las nyamoq gas vcaiq vto shanghsenh yvmas wvng loh das. Nghuot laus eq dan bang gas, vcaiq vto kang dwis yvmas xauh wvng das, ge.
1 Yesu haih dang dvnganh dye taiq lho lhyi nyah changlo jens lyis taiq zis gas, 2 Aiq nyeih thang lhyi hau Lhuiq Kat Pwe nghuot zis namoq seq nyeis las, Cangsoeu Lo gas tapzains mas taplhangh tyamp das xiklyis phanhlyen zis xauh das, ge. 3 Hauh uhlyis phudyei uhjyung jens yahge maussauh lhaih bang, dius jens dah logis jens gas, Kayapa ge Phudyei Zainsmuh dah yhen ganthoq mas tsain zop huom toh. 4 Yesu lyis tsoek yah nyhik yoeus las sat das cho xamgoh nyeis. 5 Nghuot laus eq nyamoq taiq zis gas, Pwe gyo lyis ma nghuot goeus jungh, dius hoeu toq mvbeh, ge. 6 Gvshih Yesu gas Bethani mas mvnggvng dap soeu Simon dah yhen mha nyeis, 7 Nyang womjus mas tsung toh lyis, vmesbih dvyuk, luk thyoeu jywanglo mhayah svsoh phauh dah xangh coeu nyah jyank mas chi lyih las nyah uhloms mas huot kat dyei. 8 Nghuot laus eq nyah changlo jens hauh zis lyis nyvng lyis, nyamoq nhaiq yoeuh yo las taiq zis gas, Chamus haih coeu lhyi vyu vgeh kuot? 9 Khasoeh ge lyis hauh yvlyis phauh nyo nyo yah ungh las nyungs bang lyis yoh gvm dyei das zis, ge. 10 Yesu hauh zis lyis seq las nyang nyamoq lyis taiq zis gas, Chamus hauh vmesbih lyis yau nhang goh lah? Nyang ngos lyis gis khyvlyis kuot goeus. 11 Hau nyungs bang gas vjangh namoq yah dvgeh nyeis, nghuot laus eq ngos gas namoq yah vjangh ma nyeis. 12 Khasoeh ge lyis, haih coeu lhyi ngah gungs mas huot kat zis gas, nyang ngos lyis ba nyhop das xiklyis sont zis nghuot. 13 Ngos namoq lyis jyoengh taiq bah, mungkvn gonh mas haih gausyis dang taiq hoeuh loh dah joqyos khanghmuh mas nyang lyis soh das nyhenshang hai nyang kuot khoq cho lhyi taiq kyoh das, ge. 14 Changlo dvci aiq yuk mas bos, Yudas Iskarot ge soeu ka, phudyei uhjyung jens jyank mas e lha, 15 Nyang lyis ngos namoq dah loq mas dyei lyis, ngos lyis cha dyei das lah, ge nyamoq lyis nyei. Nyamoq gas, nyang lyis ngwis kyvp somhci suon dyei. 16 Hou mhayah nyang lyis yoh phanhlyen dyei das toeuh xo nyeis. 17 Gvshih bicheih ma kat ohlhyoq zo pwe, cangxeih vnyeih lyis changlo jens Yesu jyank mas los nyei zis gas, Lhuiq Kat Pwe zo das xiklyis nvng ngamoq lyis khamha sont toh dyei nhang mes lah, ge. 18 Nyang taiq zis gas, Hauh wugungs mas soeu dvyuk jyank mas loh las, Ngah shishenh ni los goeus, nah yhen mha ngos ngah changlo jens yah hau Lhuiq Kat Pwe zo das ge Svra taiq kat, oen nyang lyis taiq geh, ge. 19 Changlo jens eq Yesu taiq kat vgus kuot las, hau Lhuiq Kat Pwe nyenhcon lhyi tsain ba sont toh. 20 Gvshih nyenhthang lhyi nyang gas dvci aiq yuk moq yah dvgeh joqyos yoeus. 21 Nyamoq wom zo nyeis uhlyis nyang taiq zis gas, Ngos namoq lyis jyoengh taiq bah, namoq mas dvyuk ngos lyis phanhlyen das, ge. 22 Hauh uhlyis nyamoq nhaiq svsoh tsain kuk las dvyuk thang lhyi dvyuk nyang lyis, Yhensain eh, ngos nghuot lah, ge. 23 Nyang phuk taiq zis gas, Bvn mas ngos yah dvgeh loq lap soeu ka ngos lyis kyauh tyamp das soeu nghuot. 24 Lhaih toh zis yah dvyhangteh, Cangsoeu Lo gas kuot tyink loh chah, nghuot laus eq Cangsoeu Lo lyis phanhlyen soeu ka mvtanhzoe nghuot! Nyang ma khoeu los ya nyah xiklyis zes gis das, ge. 25 Hauh uhlyis kyauh tyamp soeu Yudas eq nyang lyis, Svra eh, ngos nghuot lah, ge lyis, nyang gas, Nvng taiq goeus, ge phuk taiq. 26 Nyamoq wom zo nyeis uhlyis Yesu gas ohlhyoq yoeus las shvmanh thang lhyi khyiq las, changlo jens lyis dyei uhlyis yah taiq zis gas, Namoq tsain yoeus zo geh, haih zis gas ngah gungs nghuot, ge. 27 Nyang kom lhyi yoeus las jyehjuh lyis chungh thang lhyi dyei uhlyis yah taiq zis gas, Namoq dvnganhmoq haih zis shuk geh: 28 Haih zis gas nyoshoq moq dah yaunos lyis khyuot tyamp das xiklyis huot tyamp dah ngah suih yah kuot toh thanghchvp nghuot. 29 Ngos namoq lyis taiq bah, Ngah Uwus dah munghdan mas namoq yah dvgeh zvbiq saiq lyis xauh shuk buisnyeis jweh shoq, zvbiq shih mas zis lyis ngos ma shuk lo, ge nyamoq lyis gvm dyei. 30 Nyamoq chunghthwe dvkoeuq chungh lho lha, Tsanlun boms pheh thuq loh. 31 Yesu nyamoq lyis taiq zis gas, khvnyens namoq dvnganh gas ngos lyis tyamp khoq das: khasoeh ge lyis, Hauh yvng yoeuh soeu lhyi ngos bat sat las, Yvng phung mha dah yvng gas dyos loh das, ge lhaih toh, ge. 32 Nghuot laus eq ngos gas dwis toq los nhang thang lhyi, Galile mau mas ngos namoq dah xikpheh loh langh das, ge. 33 Petru nyang lyis phuk taiq zis gas, Dvnganhmoq nah gvng mas nvng lyis tyamp khoq laus eq ngos gas khanhamp eq ma tyamp das, ge. 34 Yesu nyang lyis taiq zis gas, Ngos nvng lyis jyoengh taiq bah; khvnyens nyang gyoq ma tuon shih lyis nvng ngos lyis somh lhain he tyamp das, ge. 35 Petru nyang lyis phuk taiq zis gas, Ngos nvng yah dvgeh shei chah laus eq nvng lyis gas ma he tyamp das, ge. Changlo jens dvnganh eq vgus housoeh taiq. 36 Hauh thang lhyi Yesu gas nyamoq yah dvgeh, Gesemani ge dah joqyos mas jweh las changlo jens lyis taiq zis gas, Ngos thyimha shvmanh loh dung uhlyis namoq heimha tsung langh geh, ge. 37 Hauh uhlyis nyang gas Petru yahge Zebedi dah lotang lyis eq shwih las, kuk zis yah ehnyet nyo nyeis. 38 Housoeh las nyang nyamoq lyis taiq zis gas, Ngah nhaiqlom shei bah ge shoq nhaiqkuk nhaiqngis nyeis. Ngos yah dvgeh namoq heimha phuksohlhaiq mus nyeis langh geh, ge. 39 Housoeh nyang hou mhayah dvthungh loh shih las, nyah nyoqnho gop las shvmanh dung uhlyis yah taiq zis gas, Ngah Uwus eh, gis bweh nghuot lyis gas, haih kom ngah jyank masyah lai loh nhang aq: nghuot laus eq ngos o khyvlyis ma nghuot, nvng o khyvlyis dvnghuot bas jungh, ge. 40 Nyang nyah changlo jens jyank mas tauh los lyis, nyamoq yhet joq yvlyis los nyvng las Petru lyis, Khasoeh gah, namoq ngos yah dvshishenh eq ma yoh zungh nyeis goh lhyeh? 41 Shiwu yvmas namoq ma wvng loh bas jungh zungh nyeis uhjyangh shvmanh dung geh. Dyos gas mes laus eq gungsshoh gas yomnhuk joq, ge. 42 Nyang aiq vlhain doms loh las shvmanh dung zis gas, Oh ngah Uwus eh, haih kom lhyi ngos ma shuk shuk ngah jyank masyah ma yoh lai loh nghuot lyis gas, nah ehnyet nghuot bas jungh, ge. 43 Dvlhain doms tauh los lyis eq, nyamoq nyoqkuk lyei las doms yhet muih joq yvlyis los nyvng. 44 Housoeh nyang nyamoq lyis toh khoq las somh vlhain doms loh las vkhang dah dang khonh doms dung nyeis. 45 Hauh thang lhyi nyang nyah changlo jens jyank mas los las taiq zis gas, Gvshih lvlaihsoe yhet joq lhyeh? Yoeuh aq, Cangsoeu Lo lyis yaunos wons bang loq mas kyauh tyamp das shishenh gas jweh los goeus. 46 Toq geh, yang tsain loh goh: yoeuh aq, ngos lyis kyauh tyamp das soeu los goeus, ge. 47 Nyang taiq nyeis shih lyis, yoeuh aq, dvci aiq yuk mas bos dah Yudas gas los las, phudyei uhjyung jens yahge dius jens dah logis jens mas dah dius dvjens dvlvng moengsa yahge dunghkuq chi lha nyah thang mha chank los. 48 Gvshih nyang lyis phanhlyen soeu ka, Ngos bvlot tanh soeu ka hauh soeu nyang nghuot goeus; nyang lyis nyhik yoeus geh, ge nyamoq lyis wuhsoh dyei toh. 49 Nyang gas Yesu jyank mas chot e lha, Svra eh, dvyangh lah, ge bvlot tanh. 50 Yesu nyang lyis phuk taiq zis gas, Buisnoms phoq eh, nvng kuot chah zis lvnyap dvkuot aq, ge. Housoeh las nyamoq Yesu lyis kvp tsain dap nyhik. 51 Yesu yah dvgeh nyeis bang mas dvyuk gas, nyah moengsa she lha Phudyei Zainsmuh dah jyeidwis dvyuk lyis zan khyoq kat lho lhyi, nyah no dyet tyamp. 52 Yesu nyang lyis taiq zis gas, Nah moengsa lhyi dyvng mas cank toh aq: khasoeh ge lyis moengsa she bang dvnganh gas moengsa yah shei das, ge. 53 Ngos ngah Uwus lyis shvmanh dung lyis, nyang gvshih nyang loeuswons bang nyoshoq, dvci aiq dvp thoq lyis zes shoq ngah jyank mas yoh nhang kat das zis lyis nvng ma nghamh yoeuh lhyeh? 54 Housoeh kuot lyis, Haih cho yoh bweh das, ge lhaihtoh dang gas khasoeh yoh nyuk los das lah, ge. 55 Hauh shishenh lyis nyang, Yesu moqjens lyis taiq zis gas, Namoq ngos lyis khyanktau nyhik teh nyhik das zis moengsa, dunghkuq yah tsain los lhyeh? Ngos nyeih khanghmuh yhenmuh mas jyauh uhjyangh tsung toh lyis eq namoq ngos lyis ma nyhik. 56 Nghuot laus eq heisoeh bweh los zis dvnganh, lvpe jens dah maussauh nyuk los das xiklyis nghuot, ge. Hauh uhlyis changlo jens dvnganh yah nyang lyis tyamp khoq las cangh loh. 57 Yesu lyis nyhik bang gas, maussauh lhaih bang yahge logis jens huom toh dah Phudyei Zainsmuh Kayapa jyank mas Yesu lyis tsain shwih loh. 58 Petru gas nyah thang mha we we masyah chank loh las, Phudyei Zainsmuh gan thoq khau mha wvng las muh thang thyet yvlyis yoeuh das xiklyis zungh bang yah dvgeh tsung toh. 59 Gvshih Phudyei uhjyung jens yah dvgeh nhaiqbos dvhuom gonh Yesu lyis yoh sat das dah kanghjyoeng tsain xo. 60 Nghuot laus eq hank eq ma yoh. Ma ying kanghjyoeng nyoshoq los laus eq kanghjyoeng cha eq ma nyvng. Thang thank lyis ma ying kanghjyoeng aiq yuk los las taiq zis gas, 61 Haih soeu ka, Ngos Mangso dah yhenmuh lyis thyoq tyamp las, somh nyeih gyo lyis hauh zis lyis yoh doms kuot, ge taiq goeus, ge. 62 Hauh uhlyis Phudyei Zainsmuh toq las nyang lyis, Nvng lyis tyixo kanghjyoeng kat nyeis zis cha nghuot, nvng ma phuk taiq lhyeh, ge. 63 Nghuot laus eq Yesu gas samlo dvnyeis. Tsai Phudyei Zainsmuh taiq zis gas, Mangso dah Lo ge, Khristu gas nvng nghuot lah? Ma nghuot lah, zis ngamoq lyis taiq kyoh bas jungh, oen dwis nyeis dah Mangso nyings yoeus las ngos nvng lyis maukhi, ge. 64 Yesu nyang lyis taiq zis gas, Nvng taiq goeus, ngos namoq lyis taiq bah, hauh Cangsoeu Lo gas Yomsoq dah loqyos shot pheh tsung lha maukhung jyommauh yah jweh lyih yvlyis namoq nyvng das, ge. 65 Hauh uhlyis Phudyei Zainsmuh gas nyah dyi lang chuiq las, Haih soeu ka Mangso lhyi loeusmus soqzo dang taiq. Yoeuh aq, namoq nyang hauh loeusmus soqzo dang lyis xauhgyo goeus. Chah kanghjyoeng chah shih lah? 66 Namoq soe khasoeh tuon das, ge. Nyamoq phuk taiq zis gas, Nyang gas shei chah dah yobos bos soeu nghuot, ge. 67 Nyamoq gas nyah nyoqnho mha svkanh dyeh gyuon las chwiq. Gohyhamh bang eq nyang lyis loqwu yah tsain tyuk las, 68 Khristu eh, nvng lyis hank tyuk zis lyis pe zis yah ngamoq lyis taiq kyoh aq, tsain ge. 69 Petru gas ganthoq mas tsung toh: nyelo dvyuk nyah jyank mas los las, nyang lyis taiq zis gas, Nvng eq Galile dius Yesu yah nyeis ku, ge. 70 Nghuot laus eq nyang gas, Nvng cha taiq mes zis ngos ma seqgyo, ge nyamoq dvnganh dah xikkhonh mas he. 71 Tsai, nyang gas wumuk pheh thuq loh lyis gohtoeu vmesbih dvyuk eq nyang lyis nyvng las, houmha nyeis bang lyis taiq zis gas, Haih soeu eq Nazaret mas Yesu yah dvgeh nyeis soeu nghuot, ge. 72 Nyang gas, Hauh soeu lhyi ngos ma seq, ge maukhi nyeissoq las doms he. 73 Khanyhank ma nyangh lyis houmha yap joq bang los las Petru lyis taiq zis gas, Nvng eq nyamoq mas zis dvyuk jyoengh nghuot: nvng kat dah nyingh ma dyeh zis gas nvng lyis tuonh shet nyeis, ge. 74 Housoeh las nyang gas nhoengh nhoengh khan khan maukhi lha taiq zis gas, Ngos hauh soeu lhyi ma seq, ge. Houjang gyoq tuon los. 75 Housoeh las Petru gas, Gyoq ma tuon shih lyis nvng ngos lyis somh lhain he tyamp das, ge Yesu nyang lyis taiq dang lyis soh los las nyang nghe pheh e lha svsoh ngaus.
1 Nvpyo jweh lyis phudyei uhjyung jens yahge dius jens dah logis jens dvnganh Yesu lyis sat das cho xamgoh. 2 Nyamoq gas nyang lyis twih lho lha mungh zau Pilat jyank mas loh shwih kyauh tyamp. 3 Nyang lyis phanhlyen dah Yudas gas, Yesu lyis dang thang thyet goeus zis nyvng lyis, nyang auhuiq las, phudyei uhjyung jens yahge logis jens jyank mas hau ngwis somhci yoeus e lha, 4 Yobos ma bos soeu dah suih lyis ngos phanhlyen goeus las ngos yaunos dap goeus, ge. Nyamoq gas, Hauh zis ngamoq yah cha sen? Nvnyang kuot zis dvnghuot, ge. 5 Housoeh las nyang gas hauh ngwis lyis yhenmuh khau mha doeuh toh khoq las nyah gungs lyis nyang e lhangh sheizo. 6 Phudyei uhjyung jens gas, hauh ngwis lyis kui lha, Haih zis gas suih phauh nghuot yvmvyah, vlu ziskwi mas kat toh das zis lyi ma bos, ge. 7 Hauh thang lhyi nyamoq doms xamgoh las, dius boengh lyis nyhop das xiklyis yam shuon soeu dah maunyeis lyis wis toh. 8 Housoeh yvmvyah hauh maunyeis lyis khvnyhik jweh shoq Suih yos, ge tsain lui. 9 Lvpe Yeremia taiq khoq dang mas, Hauh Yhensain ngos lyis taiq toh zis yah dvyhangteh, Israel dius dvyhamh yah dius dvyuk dah phauh thyet toh dah phauh ngwis kyvp somhci lhyi nyamoq yoeus las, 10 Yhensain ngos lyis taiq toh zis yah dvyhangteh nyamoq hauh yvlyis yoeus las yam shuonh soeu dah maunyeis wis yvmas yhung, ge zis gas hauh uhlyis nyuk los. 11 Yesu gas mungh zau xikkhonh mas yap joq. Mungh zau nyang lyis nyei zis gas, Nvng Yuda hwankti nghuot lhyeh, ge. Yesu taiq zis gas, Nvng taiq nyeis, ge. 12 Phudyei uhjyung jens yahge logis jens yah nyang lyis zau kauq laus eq nyang cha eq ma phuk taiq. 13 Pilat gas nyang lyis, Nyamoq nvng lyis khanyhoq zau kauq nyeis zis lyis nvng ma xauhgyo lhyeh, ge. 14 Nghuot laus eq nyang dang dvkhonh eq ma phuk taiq. Housoeh mungh zau gas svsoh mauh. 15 Gvshih haih pwe mha mungh zau gas, dius xiklyis thung lungh bang mas nyamoq lhuiq kat nhang mes soeu dvyuk yuk lyis gyangh lhuiq kat dyei. 16 Hauh uhlyis Baraba ge, ma gis nyings hoeuh soeu dvyuk thung lungh nyeis. 17 Housoeh yvmvyah nyamoq dvgeh zain dah uhlyis, Pilat nyamoq lyis taiq zis gas, Ngos namoq xiklyis hank lyis lhuiq kat dyei das zis o goh lah? Baraba lyis lah? Khristu ge Yesu lyis lah, ge. 18 Khasoeh ge lyis nyamoq noh gvng mas, Yesu lyis kyauh tyamp yvlyis nyang seq. 19 Pilat soetuon tank mas tsung toh shih lyis, nyah yhensain nyhiq yah dius nhang lha nyang lyis taiq kat zis gas, Dan soeu lhyi nvng cha eq vkuot; nyah gvng mas khvnyhik yangh ngos yhetmoq mas ma nyens mus nyeis, ge. 20 Nghuot laus eq phudyei uhjyung jens yahge logis jens gas, Baraba lyis kat kat las Yesu lyis gas mhont das xiklyis sang gis, ge dius jens lyis jaus jyuonh, yomdyei. 21 Mungh zau nyamoq lyis phuk taiq zis gas, Haih dvzomh mas namoq xiklyis ngos khayuk lyis kat kat dyei das zis o mes goh lah, ge. Nyamoq gas, Baraba lyis o mes, ge. 22 Tsai, Pilat nyamoq lyis taiq zis gas, Housoeh lyis Khristu ge dah Yesu lyis ngos khasoeh kuot das lah, ge. Nyamoq dvnganh gas, Nyang lyis tapzains mas taplhangh aq, ge. 23 Hauh uhlyis mungh zau taiq zis gas, Chamus lah? Nyang ma gis zis cha kuot lah, ge. Nghuot laus eq nyamoq gas, Nyang lyis tapzains mas taplhangh tyamp bas jungh, ge zes tsain kaiq los. 24 Pilat gas nyang taiq dah dang lyis hank ma gyo dyei hoeu los zis lyis nyvng lyis, jeis yoeus las moqphung xikkhonh mas nyang loq cheih zoh lyis yah taiq zis gas, Haih dan soeu dah suih masyah ngos luiq bas jungh: namoq kuot dah muh dvnghuot, ge. 25 Hauh uhlyis dius dvnganhmoq gas, Nyah suih gas ngamoq thoq mas eq, ngamoq lo jens thoq mas eq joq bas jungh, ge. 26 Housoeh nyang nyamoq xiklyis Baraba lyis kat kat dyei. Nghuot laus eq Yesu lyis gas, lyuk lho lha tapzains mas taplhangh tyamp das xiklyis kyauh tyamp. 27 Hauh thang lhyi mungh zau dah jeslo jens gas, Yesu lyis mungh zau yhen mha shwih wvng loh las, nyamoq dvdvp gonh dah jeslo jens lyis nyah jyank mas khi tsainh las, 28 Nyamoq gas nyah dyimis lyis khyuot tyamp dyei las, dyi nesnoq gvmhuot. 29 Nyamoq gas zoeu yah zaiq dah buismuk nyah uhloms mas tsungh dyei. Nyah loqyos loq mas jvmbu dvyau chi toh nhang lha, nyah xikkhonh mas nyamoq phvluk zomhgyuis las jwangh zoh lyis yah, Yuda hwankti kang xing bas jungh, tsain ge. 30 Nyamoq gas nyang lyis svkanh dyeh gyuon las, hau jvmbu yau doms yoeus las Yesu dah uhloms mas lyuk dyei. 31 Nyamoq gas nyang lyis dye jwangh goeus ya, nyamoq hauh dyi khyuot yoeus las, nyah dyi doms gvmhuot lho lha, nyang lyis tapzains mas taplhangh das zis shwih thuq loh. 32 Nyamoq thuq loh lyis Kureni dius Simon ge soeu lhyi nyvng las nyah tapzains lyis bos tsain tsoengh wuq nhang. 33 Nyamoq gas Golgotha ge, Uhkhangh ge dah joqyos mas jweh lyis, 34 nyamoq gas kyei yah lhoeuq dah zvbiq nyang lyis gvmshuk, nghuot laus eq nyang chaq yoeuh las ma shuk lo. 35 Nyamoq gas nyang lyis dye taplhangh toh thang lhyi, nyah dyi lyis nyamoq doeugoh las gvm yoeus. 36 nyamoq gas houmha tsung lha nyang lyis zungh nyeis. 37 Nyah uhloms toeu mha, Haih soeu ka YUDA HWANKTI YESU nghuot, ge nyang lyis zau kauq dang lhaih tap toh. 38 Khyanktau aiq yuk lyis eq nyang yah dvgeh, nyah loqwi loqyos dvshot dvyuk tapzains mas tsain lhangh toh. 39 Cho mha suh lai loh bang eq nyang lyis jwangh zoh lyis yah, uhloms nguot las, 40 Yhenmuh lyis thyoq tyamp las somh nyeih gyo lyis doms kuot das ge soeu eh, nvnyang gungs lyis khyuot yoeus aq, nvng Mangso dah Lo nghuot lyis gas, tapzains masyah gyoh los aq, tsain ge. 41 Phudyei uhjyung jens, maussauh lhaih bang yahge logis jens eq houyah dvyhangteh nyang lyis jwangh las, 42 Gohyuk lyis nyang khyuot yoeus, nyah gungs lyis nyang ma yoh khyuot yoeus nyvng! Nyang Israel hwankti nghuot lyis gas, nyang lyis ngamoq yoh lomsjingh das xiklyis tapzains masyah gvshih gyoh los bas jungh. 43 Nyang gas Mangso lhyi loms nyeis; Ngos gas Mangso dah lo nghuot, ge taiq goeus yvmvyah, Mangso nyang lyis o nghuot lyis gas nyang lyis gvshih khyuot kat bas jungh, tsain ge. 44 Nyang yah dvgeh tapzains mas lhangh toh dah khyanktau aiq yuk eq houyah dvyhangteh tsain jwangh. 45 Gvshih dvci aiq shishenh masyah somh shishenh jweh shoq dvmau gonh mau chuot joq. 46 Somh shishenh ko lhyi Yesu thwe zainsmuh yah taiq zis gas, ELI, ELI LEMA SABAKTHANI ge. Hauh zis gas, Ngah Mangso eh, ngah Mangso eh, nvng ngos lyis chamus doeuh tyamp toh lah, ge zis nghuot. 47 Houmha yap joq bang dvyhamh hauh dang xauhgyo lyis, Nyang gas Eliya lyis lui nyeis, tsain ge. 48 Houjang yah nyamoq mas dvyuk wuih e lha, khotlhyop dvjop lyis shihjyen jeis mas jen las, jvmbu yau mas tap las nyang lyis gvmshuk. 49 Dvyhamh bang gas, Nghuot lo goeus jungh, Eliya nyang lyis vlyih khyuot yoeus das lah zis langh yoeuh goh, ge. 50 Tsai, Yesu gas thwe zainsmuh yah doms kaiq lho lha nyah dyos lyis kyauh tyamp. 51 Yoeuh aq, yhenmuh mas dah gos misseh eq vthyoh mas zis vkhyei mha jweh shoq aiq khyamh juiq tyamp. Maunyeis eq dwis las lukmuh lom eq tsain gwi. 52 Lop eq tsain phank hanh los las yhet joq goeus, gyingshang bang dah gungs eq nyoshoq toq los las, 53 Nyang dwis toq loh dah thang lhyi lop masyah thuq las hau gyingshang wus vkhau mha wvng loh las nyoshoq moq lyis nyvng xoeuq. 54 Gvshih jes dvxo guon zau yahge nyang yah dvgeh Yesu lyis zungh bang hau maunyeis dwis zis yahge bweh ya bweh los zis nyvng lyis svsoh gyuk las, Haih soeu ka jyoengh nyang Mangso dah Lo nghuot, tsain ge. 55 Galile mau masyah Yesu lyis phuqsoe lha nyah thang mha chank yenh dah vmesbih jens nyoshoq eq houmha nghuot las, we we masyah yoeuh nyeis. 56 Hauh bang mas Magdala Mari, Yaku yahge Yosep dah ungwes Mari, Zebedi lo jens dah ungwes moq nghuot. 57 Gvshih nyenhthang jweh lyis Yesu dah changlo dvyuk nghuot, dis soeu Yosep ge dah Arimathia dius dvyuk jweh los. 58 Nyang gas Pilat jyank mas wvng las, Yesu dah mvng lyis sang lhyi, Pilat gas hauh mvng nyang lyis dyei kat das zis vmingh dyei. 59 Housoeh las Yosep gas mvng lyis yoeus las lhoq dah jeimuh mis yah lyet lho lha, 60 Lukmuh lom mas kyungh toh dah nyah lop saiq mas toh. Hau lopkhonh mas lukzains toeu cheiq khoq las loh. 61 Houmha Magdala Mari yahge gohtoeu Mari eq lop nhuotkhonh mas tsain tsung toh. 62 Hau sont buisnyeis dah nungs nyeih phudyei uhjyung jens yahge Pharishe moq gas Pilat jyank mas e lha, 63 Yhensain eh, yeis khuk soeu ka, nyang dwis nyeis shih lyis, Ngos gas somh nyeih thang lhyi dwis toq los das, ge nyang taiq dang lyis ngamoq soh. 64 Housoeh yvmvyah nyenh lyis nyah changlo jens nyang lyis los khauh yoeus las, shei masyah toq loh goeus, ge dius jens lyis ma yoh taiq bas jungh somh nyeih hauh lop wontang zungh das zis vmingh dyei aq: housoeh ma nghuot lyis gas, xik lyis hwah lungs cho thoq lyis thang lhyi hwah lungs cho zes yau los das, ge. 65 Pilat nyamoq lyis taiq zis gas, Namoq zungh das bang yoh, namoq yoh kuot nyhoq wontang loh kuot geh, ge. 66 Housoeh nyamoq e lha, lop mas dah luk lyis loqsoh tap, zungh nhang lha gau gau kuot toh.
1 Yuda No Buisnyeis lai las dvdaus dah cangxeih vnyeih, nyoq nyvng zoh lyis, Magdala Mari yahge gohtoeu Mari gas lop lyis komh das zis tsain e. 2 Hauh uhlyis, yoeuh aq, maunyeis gvgis dwis los: Khasoeh ge lyis, Yhensain dah loeuswons soeu maukhung mhayah gyoh lyih las, lop khomh luklom lyis toeu tyamp las hauh thoq mas tsung toh. 3 Nyah vwot gas mau nyoq nyik teh nghuot; nyah dyi eq gyu teh thyoeu. 4 Nyang lyis gyuk dvn yvmvyah, zungh bang tyik tyik nvn las shei bang teh chuot tyamp. 5 Hauh loeuswons soeu yah hauh vmesbih aiq yuk lyis taiq zis gas, Nah aiq yuk vgyuk goh, tapzains mas taplhangh tyamp goeus soeu Yesu lyis nah aiq yuk xo yvlyis ngos seq. 6 Nyang heimha ma nyeis lo: Khasoeh ge lyis nyang taiq zis yah dvyhangteh, nyang gas dwis toq loh goeus: Los geh, nyang lhain dah joqyos lyis los yoeuh geh. 7 Lvnyap loh las nyah changlo jens lyis, Nyang gas dwis toq loh goeus, oen taiq kyoh geh. Yoeuh aq, nyang gas namoq dah xik pheh Galile mau mas loh goeus. Houmha namoq nyang lyis nyvng das. Yoeuh aq, ngos namoq lyis taiq kyoh, ge. 8 Hauh uhlyis nyah aiq yuk gas gyuk eq gyuk, gaus eq svsoh gaus zis yah lop masyah lvnyap loh las nyah changlo jens lyis hauh dang taiq kyoh das xiklyis tsain wuih loh. 9 Yoeuh aq, Yesu nyah aiq yuk yah xauhgoh las. Gausyis nyeis bas jungh, ge. Nyah aiq yuk gas nyah khyei lhyi zwi las tsain paiq. 10 Yesu nyah aiq yuk lyis taiq zis gas, Vtsain gyuk goh, ngah vmang vnoeuh moq Galile mau mas loh das xiklyis loh taiq kyoh geh, nyamoq ngos yah houmha xauhgoh das, ge. 11 Nyah aiq yuk loh nyeis lyis, yoeuh aq, lop zungh bang mas dvyhamh wukhau mha wvng loh las, houmha bweh ya bweh cho dvnganh yah phudyei uhjyung jens lyis taiq kyoh. 12 Hauh uhlyis nyamoq logis jens yah tsain huom lha, xam nyoq thang lhyi, nyamoq gas jeslo jens lyis ngwis nyoshoq dyei las taiq zis gas, 13 Nyenhyo ngamoq yhet joq uhlyis nyah changlo jens nyang lyis lyih khauh yoeus loh, oen taiq geh. 14 Haih zis lyis mungh zau xauhgyo nghuot lyis namoq lyis yobos ma zangh das xiklyis ngamoq, nyang lyis jyoeuq das, ge. 15 Housoeh nyamoq hauh ngwis tsain yoeus khoq las, jyauh kat zis yah dvyhangteh kuot. Housoeh las dang hauh zis gas Yuda dius mas khvnyhik jweh shoq hoeuh nyeis. 16 Housoeh las changlo jens dvci dvyuk moq gas, Galile mau mas loh las, Yesu nyamoq lyis taiq toh dah boms mas tsain doq loh. 17 Houmha nyang lyis nyvng las tsain paiq. Nghuot laus eq dvyhamh bang gas khamkhvv. 18 Yesu nyamoq jyank mas los las taiq zis gas, Maukhung thoq mas eq, nyeisjvng thoq mas eq, vmingh dvnganh yah ngos lyis dyei goeus. 19 Housoeh yvmvyah namoq loh las, dius nyau khanghmuh lyis ngah changlo jens bweh nhang lha, Uwus, Lo, Gyingshang Dyos dah nyings masyah nyamoq lyis jeisnyhop dyei geh. 20 Ngos namoq lyis taiq ya taiq yvlyis yoh chank das xiklyis nyamoq lyis jyauh geh. Hauh thoq lyis, yoeuh aq, mungkvn thank shoq, ngos vjangh namoq yah dvgeh nyeis, ge. Amen.
1 Mangso dah Lo Yesu Khristu dah gausyis Dang cangxeih vpom; 2 Lvpe Esaia lhaih toh zis gas, Yoeuh aq, nah cho sont langh das xiklyis, Ngos ngah loeuskyoh soeu lhyi nah xik pheh nhang kat. 3 Mhanhdyvp mas dvyuk kaiq nyeis dah thwe ka, Yhensain dah cho lhyi sont toh geh, Nyah chokhyoh lyis soq dan geh, ge. 4 Mhanhdyvp mas jeisnyhop dyei soeu Yohan thuq los las yaunos khyuot dyei das xiklyis nhaiqlom thaiq las jeisnyhop kham geh ge taiq hoeuh nyeis. 5 Housoeh las Yuda mau gonh bang yahge Yerusalem mas bang dvnganh nyah jyank mas e lha, nyamoq dah yaunos lyis rhen lha, Yodan lvng mas nyah loq yah jeisnyhop dyei zis tsain xauh. 6 Yohan ka gola-u mauh dyi wuot, thyikdom mas shohyeis dyichih chih toh. Nyah wom gas janghgyik yahge mhanhdyvp mas dah dyoyhei nghuot. 7 Housoeh nyang taiq hoeuh zis gas, Ngah thoq lyis zes yombos soeu dvyuk ngah thang mha los das: ngos gas nyah thyvkoq twih lyis gop las phui das zis yangh ma mon. 8 Ngos gas namoq lyis jeis yah jeisnyhop dyei, nghuot laus eq nyang gas namoq lyis Gyingshang Dyos yah jeisnyhop dyei das, ge. 9 Hauh buisnyeis gyo lyis Yesu gas Galile mau, Nazaret masyah jweh los las, Yodan lvng, Yohan loq mas jeisnyhop kham. 10 Yesu jeis masyah toq los yah dvyih, maukhung phank los las, hauh Dyos nyah thoq mas khotjyauh teh gyoh los yvlyis nyang nyvng. 11 Housoeh maukhung mhayah thwe dvkoeuq los zis gas, Nvng gas ngos jyetdap dah ngah Lo nghuot, ngos nvng lyis nhaiqdoeus, ge. 12 Houjang Dyos gas nyang lyis mhanhdyvp pheh jyuonh kat. 13 Nyang gas mhanhdyvp mas nyeici nyeih Satan yah shiwu las yewus jens yah nyeis uhlyis loeuswons bang nyang lyis los phuqsoe. 14 Yohan thung khyoq zis xauh thang lhyi, Yesu gas Galile mau pheh loh las, Mangso dah Gausyis Dang lyis taiq kyoh zis gas, 15 Shishenh nyuk los goeus las Mangso dah munghdan ni los goeus. Namoq dah yaunos masyah tauh los las Gausyis Dang lyis lomsjingh geh, ge. 16 Yesu Galile thomh yvm chank yah suh loh lyis, oeng nhoh zo dah vmang vnoeuh aiq yuk Petru ge dah Simon yahge nyah vnoeuh Andre gas, thomh mas nyho yah oeng gaiq nyeis zis lyis nyvng. 17 Yesu nyah zomh lyis taiq, Ngah thang mha chank los geh, ngos nah zomh lyis dius nhoh nhang das, ge. 18 Nyamoq gas houjang yah nyamoq nyho tsain toh khoq las nyah thang mha chank loh. 19 Xik pheh dvthungh loh lho lhyi, gohtoeu vmang vnoeuh dvzomh Zebedi dah lotang Yaku yahge Yohan lyis nyvng. Nyamoq gas lhyik khau mha nyho pho nyeis. 20 Housoeh Yesu gas nyah zomh lyis nyvng yah dvyih nyah zomh lyis khi. Nyah zomh gas nyah zomh dah uwus Zebedi yahge uhkung jens lyis lhyik mas toh khoq las Yesu thang mha chank loh. 21 Yesu yahge nyah changlo jens gas Kaperna-um wus mas jweh loh. Yuda No Buisnyeis jweh lyis Yesu gas lyi jungs mas wvng las jyauh. 22 Nyang gas maussauh lhaih bang teh ma nghuot, vmingh bos soeu teh jyauh yvmvyah nyamoq gas nyang jyauh cho lhyi mauh. 23 Hauh uhlyis nyamoq dah lyi jungs khau mha yius wvng dah dius dvyuk nyetlos nyettant kaiq ngaus zis gas, 24 Nazaret phoq Yesu eh, nvng ngamoq yah cha sen lah? Nvng ngamoq lyis mhont das xiklyis los lhyeh? Ngos nvng hank nghuot zis seq; Nvng gas Mangso dah Gyingshang Soeu nghuot, ge. 25 Yesu nyang lyis nyho lha taiq zis gas, No aq, nyah jyank masyah thuq loh aq, ge. 26 Housoeh las yius gas, hauh soeu lhyi huonh nhang lho lha, yomkat kaiq las nyah jyank masyah thuq loh. 27 Nyamoq dvnganhmoq mauh las nyei goh zis gas, Haih zis cha nghuot au? Jyauh cho vsaiq nghuot lhyeh? Nyang vmingh dyei yvlyis yius eq tsain gyo dyei, ge. 28 Houjang yah Galile vyvm vwi mas bang dvnganhmoq gas dvkhauyah nyah cho tsain taiq hoeuh loh. 29 Nyamoq lyi jungs masyah thuq lyih thangjang nyamoq gas Yaku, Yohan yah dvgeh Simon yahge Andre yhen mha wvng loh. 30 Houmha Simon dah yuknyih gungs ngeh las nos lhain toh. Houjang nyamoq gas nyah cho Yesu lyis tsain taiq kyoh. 31 Yesu los las, nyang lyis loq masyah she toq lho lhyi, hau gungs ngeh las nos zis gis goeus las, nyang nyamoq lyis daih. 32 Nyenhthang buis wvng zoh lyis, nos bang, yius kuq bang dvnganh lyis nyah jyank mas tsain shwih lyih. 33 Dvwus gonh bang hauh khomhdwang mas lyih tsain huom toh. 34 Nyang gas nos bang, noslom vja ja bos bang dvnganh lyis gis los nhang. Yius jens lyis eq khat tyamp. Nyamoq gas nyang lyis seq yvmvyah nyang nyamoq lyis dang ma taiq nhang. 35 Nvpsangh nyoq ma nyvng shih lyis, nyang toq las mhanhdyvp pheh loh las shvmanh dung. 36 Hauh uhlyis Simon yahge nyang yah dvgeh nyeis bang gas, nyang lyis chank xo. 37 Nyang lyis nyamoq nyvng lyis taiq zis gas, Dvnganhmoq yah nvng lyis xo nyeis, ge. 38 Nyang nyamoq lyis taiq zis gas, Vyvm vwi mas dah wugungs mas tsain loh goh: khasoeh ge lyis ngos jweh los zis gas, hauh yvmas eq yoh taiq kyoh das xiklyis nghuot, ge. 39 Housoeh nyang gas Galile dvmau gonh loh las lyi jungs mas tsain taiq hoeuh las yius lyis eq khat thuq dyei. 40 Mvnggvng dap soeu dvyuk nyang lyis los dupaiq las dung zis gas, Nvng bauh nghuot lyis gas ngos lyis yoh thyauhlhyang los nhang, ge. 41 Nyang nhaiq yoeuh nyen yvmvyah nyah loq yhonh kat las nyang lyis tanh uhlyis yah taiq zis gas, Ngos mes, nvng thyauhlhyang los bas jungh, ge. 42 Houjang mvnggvng nos gis goeus las, nyang gas thyauhlhyang goeus. 43 Yesu gas nyang lyis zaih nhang lha lvnyap nhang kat. 44 Haih cho hank lyis eq vtaiq kyoh, nghuot laus eq nvnyang gungs phudyei soeu jyank mas loh chixoeuq aq, Moshe dah lyi yah dvyhangteh loh phudyei aq: khasoeh ge lyis, nyamoq xiklyis kanghjyoeng nghuot bas jungh, ge. 45 Nghuot laus eq nyang thuq loh las, hauh cho nyoshoq moq lyis taiq hoeuh loh. Housoeh yvmvyah nyang gas wugungs mas debangh ma yoh loh. Nyang gas mhanhdyvp mas nyeis lyis, khyiq khanghmuh mas bang nyah jyank mas los.
1 Dvkyoh lo nyangh thang lhyi, nyang gas Kaperna-um mas doms loh las nyah yhen mha nyeis zis lyis tsain xauhgyo. 2 Housoeh las dius dvnganhmoq zop huom yvmvyah joqyos eq ma bos lo. Khomhdwang mas jweh shoq tsain nyeis las nyang nyamoq lyis Dang taiq kyoh. 3 Housoeh gungsjen shei soeu dvyuk lyis dius nyei yuk yah nyah jyank mas dvng lyih. 4 Dius puk thoeu yvmvyah nyah jyank mas ma yoh tanh loh las, nyamoq gas nyang nyeis dah vtoeu mha yhenkhung dwang phank las, gungsjen shei soeu lhyi yhetyos eq cheq juons khyoq kat. 5 Yesu gas nyamoq dah lomsjingh zis lyis nyvng las, gungsjen shei soeu lhyi taiq zis gas, Lo eh, nah yaunos khyuot dyei goeus, ge. 6 Hauh yvmas maussauh lhaih bang dvyhamh tsung toh las, nyamoq ehnyet mas tsain nghamh zis gas, 7 Haih soeu ka chamus loeusmus soqzo dang taiq au lhyeh? Mangso kyingh ma nghuot lyis gas yaunos hank yoh khyuot dyei lah, ge. 8 Houjang yah Yesu gas nyamoq dah nhaiqlom khau mha nghamh zis lyis nyah dyos mas seq las, nyang nyamoq lyis taiq zis gas, Namoq ehnyet mas chamus housoeh tsain nghamh goh lah? 9 Gungsjen shei soeu lhyi, Nah yaunos khyuot dyei goeus, oen das zis yahge, Nah yhetyos toq yoeus las suh loh aq, oen zis kha khonh taiq lwis lah? 10 Cangsoeu Lo gas nyeisjvng mas yaunos yoh khyuot dyei dah vmingh yoh zis gas namoq seq bas jungh, ge. 11 Hauh gungsjen shei soeu lhyi taiq zis gas, Ngos nvng lyis taiq bah, toq aq, nah yhetyos yoeus las nah yhen pheh loh aq, ge. 12 Houjang nyang toq los las yhetyos yoeus chi lha, dvnganhmoq dah xikkhonh mas suh loh yvmvyah dvnganhmoq svsoh mauh las, Mangso lhyi chungh zis yah, Ngamoq heisoeh teh zis khanhamp eq ma nyvng ku, ge. 13 Nyang gas thomh yvm pheh doms thuq loh lyis, moqjens dvnganh nyah jyank mas los yvmvyah, nyang nyamoq lyis jyauh. 14 Nyang lai dyet loh lyis Alphe dah lo Lewi gas khoengh khywi dah joqyos mas tsung toh zis lyis nyvng las nyang lyis, Ngah thang mha chank los aq, ge taiq lyis nyang toq las nyah thang mha chank loh. 15 Hauh thang lhyi Yesu gas, Lewi yhen, womjus mas tsung toh lyis khoengh khywi bang yahge yaunos wons bang nyoshoq eq Yesu yahge nyah changlo jens yah dvgeh tsung toh: khasoeh ge lyis nyoshoq moq nyah thang mha chank yenh. 16 Nyang khoengh khywi bang yahge yaunos wons bang yah dvgeh wom zo nyeis zis lyis, maussauh lhaih bang yahge Pharishe moq nyvng lyis nyah changlo jens lyis taiq zis gas, Nyang khoengh khywi bang yahge yaunos wons bang yah dvgeh chamus zo shuk au lhyeh, ge. 17 Hauh zis xauhgyo las Yesu gas, Yanghzan bang mvcheih lastsiang ma chah, nos bang dvchah; ngos gas dan bang lyis khi das xiklyis lyih zis ma nghuot, yaunos wons bang xiklyis dvnghuot, ge. 18 Yohan dah changlo jens yahge Pharishe moq wom gyangh kyi. nyamoq lyih las nyang lyis taiq zis gas, Yohan dah changlo jens yahge Pharishe jens dah changlo jens gas womkyi lhyi, nah changlo jens chamus wom ma kyi goh lah, ge. 19 Yesu nyamoq lyis taiq zis gas, Phoengh hwank pwe mha bang Loloeu saiq yah dvgeh nyeis uhlyis nyamoq wom yoh kyi lah? Loloeu saiq yah dvgeh nyeis shih lyis nyamoq wom ma yoh kyi. 20 Nghuot laus eq loloeu saiq lyis nyamoq jyank masyah shwih loh buisnyeis jweh los das; hauh uhlyis nyamoq womkyi das. 21 Dyi tyang mha misseh saiq yah hank ma pho: housoeh pho lhyi ka, vsaiq chuq yah vcauh lyis lang yaq las, hou mhayah juiq zis zes lvm los. 22 Zvbiq jeis saiq lyis eq shohyeis thung cauh mas hank ma kat toh. Hauh zis kat nghuot lyis gas, zvbiq jeis saiq gas shohyeis thung lhyi zo phuk las zvbiq jeis shuon das, shohyeis thung eq monh das. Zvbiq jeis saiq gas shohyeis thung saiq mas kat chah, ge. 23 Hauh thang lhyi nyang gas Yuda No Buisnyeis lyis sunghso yos cho yah lai loh. Nyamoq loh nyeis lyis nyah changlo jens gas sunghso nham lhyi tsain shap. 24 Housoeh las Pharishe moq nyang lyis taiq zis gas, Yoeuh aq, Yuda No Buisnyeis lyis kuot das lyi ma bos zis lyis chamus kuot goh, ge. 25 Nyang nyamoq lyis taiq zis gas, Dawi nyang yahge nyah dyenschangh jens yuot shet las chah nyeis uhlyis cha kuot khoq zis lyis khayhoq eq ma nghap yoeuh ku goh lhyeh? 26 Phudyei Zainsmuh Abiatha dah zaih lyis Mangso dah yhen khau mha wvng las, phudyei bang mas lai las zo das lyi ma bos, chixoeuq toh dah ohlhyoq lyis zo las, nyang yah dvgeh bang lyis eq dyei, ge. 27 Nyang nyamoq lyis taiq zis gas, Yuda No Buisnyeis gas dius xiklyis kuot toh zis nghuot; dius gas Yuda No Buisnyeis xiklyis kuot toh zis ma nghuot. 28 Housoeh yvmvyah Cangsoeu Lo gas Yuda No Buisnyeis dah Yhensain nghuot, ge.
1 Nyang lyi jungs mas doms wvng loh lyis, houmha loq dvshot shei soeu dvyuk nyeis. 2 Nyamoq gas nyang lyis yoh kauq shoq, nyang Yuda No Buisnyeis lyis hauh soeu lhyi vgis los nhang dvluk, ge tsain zungh yoeuh nyeis. 3 Nyang gas hau loq shei soeu lhyi, Xikkhonh mas toq yap aq, ge. 4 Hou lho lha nyang nyamoq lyis taiq zis gas, Yuda No Buisnyeis lyis gis cho kuot das zis, lyi bos lah, ma gis cho kuot das zis, lyi bos lah? Kang kyoeu gis lah, sat gis lah, ge nyei. Nyamoq samlo nyeis. 5 nyamoq nhaiqlom than yvmvyah nyang nhaiqkuk las, nhaiq yo zoh lyis yah zui lhaink yoeuh las hauh soeu lhyi taiq zis gas, Nah loq yhuonh kat aq, ge. Nyang loq yhuonh kat lyis, nyah loq gis los. 6 Hauh uhlyis Pharishe moq thuq loh las, nyang lyis khasoeh yoh mhont das cho, houjang Herodia moq yah xamgoh nyeis. 7 Yesu gas nyah changlo jens yah dvgeh Galile Thomh pheh loh lyis, Yuda mau yahge Galile mau mas dah dius phung zainsmuh nyah thang mha chank los. 8 Hauh uhlyis Yerusalem mas bang, Idumea yahge Yodan lvng thyitvp mas bang, Taire yahge Sidon wuxom mas bang somci moqmuh gas nyang kuot dah muh zains lyis xauhgyo las nyah jyank mas los. 9 Moqjens yah nyang lyis ma zangh nyhenh das xiklyis, nyah nyhenshang lhyik dvkoeuq sont toh dyei das xiklyis nyang nyah changlo jens lyis taiq. 10 Khasoeh ge lyis, nyang gas dius nyoshoq moq lyis gis los nhang yvmvyah, noslom yoh ya yoh bang gas, nyang lyis xauh tanh das xiklyis duon nyhenh los. 11 Yius jens eq nyang lyis nyvng lho lhyi nyah xikkhonh mas gyuis las kaiq zis gas, Nvng gas Mangso dah Lo nghuot, ge. 12 Nyang lyis gohtoeu dius jens lyis ma seq nhang das xiklyis nyang nyamoq lyis than than taiq toh. 13 Tsai, nyang hau boms mas doq loh las, nyang khi yoeus mes bang lyis khi lhyi, nyamoq eq nyah jyank mas los. 14 Housoeh las nyang gas, dvci aiq yuk lyis khyen lha lvgyo jens ge nyhink las toeuq kat toh. Nyamoq gas nyang yah dvgeh nyeis das xiklyis eq, loeus taiq hoeuh das xiklyis eq, 15 yius yoh khat tyamp dah vmingh yoh das xiklyis eq nghuot. 16 Petru ge nyhink dyei dah Simon. 17 Maujau dah lo jens ge vjyuk bos, Boanage ge nyhink dyei, Zebedi dah lo jens Yaku yahge Yaku dah vnoeuh Yohan. 18 Andre, Philip, Bartholomeu, Mathe, Thoma, Alphe dah lo Yaku, Thade, vnyau lyis jyet soeu Simon yahge, 19 Nyang lyis phanhlyen das Yudas Iskarot moq nghuot. Hauh thang lhyi nyang yhen pheh loh. 20 Moqjens nyah jyank mas doms los yvmvyah nyamoq wom zo das shishenh yangh ma tsain yoh. 21 Nyah dyenschangh jens hauh zis lyis xauhgyo lyis, nyamoq gas, Nyang lyis nyhik das ge los. Khasoeh ge lyis dius jens gas Yesu koh goeus, tsain ge. 22 Yerusalem masyah gyoh los dah maussauh lhaih bang eq, Nyang mas Bezebu bos, yius zau dah yomsoq yah nyang yius lyis khat tyamp, tsain ge. 23 Housoeh las nyang nyamoq lyis khi yoeus las dangtoeuq yah taiq zis gas, Satan ka Satan lyis khasoeh yoh khat tyamp das lah? 24 Munghdan dvkoeuq mas nyang changh nyang gang lvn, zan goh nghuot lyis gas, yoh goeng joq das zis ma nghuot. 25 Dvyhen khau mha dius eq, nyang changh nyang gang lvn, dyoqgoh lyis, hauh yhen ka yoh goeng joq das zis ma nghuot. 26 Houyah dvyhangteh, Satan ka vsainnyang changh zan goh lyis gas, nyang yoh goeng toenk das zis ma nghuot, thank dyuk das. 27 Yombos soeu lhyi shih cangxeih ma twih lyis gas, nyah yhen khau mha wvng las nyah zisyos lyis hank eq ma yoh thyoq yoeus; nyang lyis twih thang lhyi nyah yhen dvyoh thyoq das. 28 Ngos namoq lyis jyoengh taiq bah, cangsoeu dius dah yaunos dvnganh zis yahge, nyamoq dah loeusmus soqzo dang vja ja lyis khyuot tyamp dyei das. 29 Nghuot laus eq, hau Gyingshang Dyos lyis loeusmus soqzo soeu hank laus eq yobos khyuot dyei zis khanhamp eq ma xauh, vcaiq vto yaunos dap soeu nghuot joq, ge. 30 Housoeh ge zis gas nyamoq yah nyang lyis, Yius kuq soeu ge taiq yvmvyah nghuot. 31 Nyah ungwes, nyah vwik jens gas nghe mha lyih yap las nyang lyis lui nhang kat. 32 Hauh uhlyis nyah vwi vyvm mas tsung toh dah dius jens nyang lyis taiq zis gas, Yoeuh aq, nah ungwes yahge nah vwik jens, nhamhmuh jens nghe mha yap las nvng lyis nyei nyeis, ge. 33 Nyang nyamoq lyis phuk taiq zis gas, Ngah ungwes yahge ngah vwik jens gas hank nghuot goh lah, ge. 34 Nyang nyah yvm lhaink yah tsung toh bang lyis yoeuh lho lha taiq zis gas, Yoeuh aq, ngah ungwes yahge ngah vwik jens. 35 Mangso dah ehnyet chank bang hank laus eq, ngah vwik, ngah nhamhmuh, ngah ungwes tsain nghuot, ge.
1 Tsai, hau thomh yvm mas nyang doms jyauh xi loh lyis, moqjens nyah jyank mas zain huom los las nyang gas thomh mas lhyik dvkoeuq vkhau mha loh wvng tsung toh: moqjens gas thomh yvm tung yos mas nyeis. 2 Hauh uhlyis dangtoeuq yah nyoshoq ja jyauh uhlyis nyang nyamoq lyis taiq zis gas: 3 Gyo yoeus geh. Jyo khyoq soeu ka jyo khyoq das ge thuq loh. 4 Sanh kat lyis dvkhamh gas chokhyoh mas gyoh las, hauh yvlyis nghoq jens yah lyih kui zo tyamp. 5 Gohtoeu dvkhamh gas tsoh ma thoeu dah lukjvp yos mas gyoh; tsoh ma thoeu yvmvyah dvdvm kyingh lyis yuk thuq los. 6 Nghuot laus eq vnyet ma yoh chent yvmvyah buis tso los lyis lhap nhe lha nyhauh tyamp. 7 Gohtoeu ka zoeu gyomh mas gyoh loh, zoeu zains yuk kuh los las hauh yvlyis huop tyamp yvmvyah vshih ma yoh shih. 8 Gohtoeu ka nyeisjvng gis yvmas gyoh las, yuk kuh bvng lainh zis yah vshih shih los las, somhci, khyukci, dvxo huon je los, ge. 9 Nyang nyamoq lyis taiq zis gas, Gyo yoeus das no dap soeu ka xauhgyo bas jungh, ge. 10 Hauh thang lhyi nyang kyingh nyeis lyis, nyang yah dvgeh nghuot dah changlo dvci aiq yuk moq gas, hauh dangtoeuq cho nyang lyis nyei. 11 Nyang nyamoq lyis taiq zis gas, Mangso munghdan dah nghop toh cho ka namoq lyis seq nhang goeus. Nghuot laus eq nghe pheh bang lyis gas dvnganh zis dangtoeuq yah dvchixoeuq. 12 nyamoq yoeuh laus eq ma nyvng, xauhgyo laus eq ma seqgyo. Housoeh ma nghuot lyis gas nyamoq Mangso jyank tauh los las yobos khyuot dyei zis xauh das. 13 Nyang nyamoq lyis taiq zis gas, Haih dangtoeuq ma seqgyo goh lhyeh? Housoeh lyis gas dangtoeuq dvnganh yvlyis khasoeh seqgyo yoeus goh das lah? 14 Jyo khyoq soeu ka hauh dang lyis khyoq goeus. 15 Cho mas gyoh zis gas, hauh dang lyis sanh yah dvyih nyamoq xauhgyo zis lyis Satan lvnyap los las, nyamoq nhaiqlom mas sanh toh dah dang lyis yoeus tyamp zis nghuot. 16 Houyah dvyhangteh, hauh lukjvp yos mas sanh khyoq toh zis gas, hauh dang lyis xauhgyo yah dvyih gausyis zis yah lvnyap lhom yoeus bang nghuot. 17 Nghuot laus eq nyamoq mas vnyet ma chent joq yvmvyah, dvyoq dvyoh kham. Hauh thang lhyi hauh dang gvng mas, shanghsenh zis yahge shoeuhshih zis xauh los yah dvyih nyamoq lvnyap nungsdoms loh zis lyis ge. 18 Zoeu gyomh mas sanh kat toh goeu gas, hauh dang lyis xauhgyo laus eq, 19 Hauh maunyeis dah chiqjyen, zisyos mhuih jyomh cho yahge, nyoqnoq obos cho wvng los zis yah hauh dang lyis huop las vshih ma yoh shih bang nghuot. 20 Tsai, nyeisjvng gis yvmas sanh toh bang gas, hauh dang lyis xauhgyo zis yah lhom yoeus las vshih shih las somhci, khyukci, dvxo huon jebais los bang nghuot, ge. 21 Nyang nyamoq lyis taiq zis gas, Nyibung lyis tuonh las dang theh mas, jungjeis mas tuonh das ge gyangh yoeus los lhyeh? Nyibung gus mas kih das ge dvgyangh yoeus los ma nghuot lhyeh? 22 Khasoeh ge lyis, nghop shung toh yvlyis dede Chixoeuq das. Nghop toh zis cha laus eq phank xoeuq das. 23 Gyo yoeus das no dap soeu ka xauhgyo bas jungh, ge. 24 Nyang nyamoq lyis taiq zis gas, Namoq cha xauhgyo yvlyis zaih geh: Namoq laiq dyei pan mhayah namoq lyis doms laiq dyei das: hauh thoq lyis lung dyei shih das. 25 Khasoeh ge lyis, yoh bang lyis lung dyei das; ma yoh bang jyank masyah gas nyamoq yoh joq zis yangh yoeus tyamp dyei das. 26 Tsai, nyang taiq zis gas, Mangso munghdan gas, nyeisjvng mas jyo sanh soeu teh nghuot. 27 Sanh toh las, nyang nyeih nyenh yhet, toq, kuot las nyau khasoeh yuk kuh los zis eq ma seq. 28 Nyeisjvng gas nyang pheh yah vshih shih los nhang lha, cangxeih lyis vnyuk, thang lhyi vnham, hauh thang lhyi vshih dap los nhang. 29 Vshih nyhink goeus ya jyo yhomh nyos jweh las, houjang hau banlyenh yah yet yoeus, ge. 30 Nyang doms taiq zis gas, Mangso munghdan cho lhyi cha yah yoh toeuq das lah? Dangtoeuq cha yah byi das lah? 31 Hauh zis gas anghwvng shih chvp teh nghuot joq. Nyeisjvng mas sanh khyoq lyis nyeisjvng thoq dah vshih dvnganh mas zes ngis laus eq, 32 Sanh kat thang lhyi yuk los las, anghnyaus phoqywi dvnganh thoq lyis kuh thank las, vko kuh thya los yvmvyah, mau dang nghoq jens hauh buisshen mha sot yoh sot, ge. 33 Housoeh dangtoeuq nyoshoq yah hauh dang cho nyamoq seqgyo nyhoq nyang nyamoq lyis taiq kyoh. 34 Dangtoeuq ma bos bos, nyang nyamoq lyis cha eq ma taiq kyoh. Nghuot laus eq nyamoq nyang kyingh nyeis lyis, nyah changlo jens lyis dang dvnganh dah vjyuk phant kyoh. 35 Hauh buisnyeis nyenhthang jweh lyis, nyang nyamoq lyis taiq zis gas, Yang thyitvp pheh tsain goeu e goh, ge. 36 Nyamoq gas moqjens lyis toh khoq las Yesu tsung toh goeus dah lhyik khau mha wvng las nyang lyis shwih loh. Nyang yah dvgeh gohtoeu lhyik eq tsain bos shih. 37 Hauh uhlyis lyeismuh jyang toq los las, lhyik lyis jeisphauq bat yvmvyah hauh lhyik mas jeis dyingh los nyeis. 38 Nghuot laus eq nyang gas lhyik thang mha uhkhoeuq khoeuq las yhet joq: hauh uhlyis nyamoq gas, nyang lyis nhauh las taiq zis gas, Svra eh, ngamoq dyuk tyamp das zis lyis nvng ma bos chiq lhyeh, ge. 39 Nyang toq las lyeis lyis nyho lha, thomh lyis eq, Tsoeklo sam loh aq, ge. Housoeh las lyeis gas tam loh las sam goeus. 40 Nyang nyamoq lyis taiq zis gas, Namoq chamus tsain gyuk goh? Lomsjingh zis ma bos goh lah, ge. 41 Nyamoq svsoh mauh las, dvyuk yah dvyuk taiq goh zis gas, Haih soeu ka hank nghuot lah? Hau lyeis yahge thomh yangh nyah domsyos gyo, ge.
1 Gvshih nyamoq gas hauh thomh thyitvp, Gerasa mau mas jweh loh. 2 Nyang lhyik masyah thuq yah dvyih, yius kuq dah vbusbih dvyuk lop khyam mhayah thuq los las nyang yah xauhgoh. 3 Hauh soeu dah joqyos gas, lopkhyam nghuot las, nyang lyis hank eq ma yoh twih, shamjvng yah yangh ma yoh twih toh. 4 Khasoeh ge lyis nyang lyis kyomh yahge shamjvng yah nyoshoq lhain twih toh laus eq, nyang shamjvng lyis vdoeus doeus lang phaiq thyet tyamp las, nyang lyis yoh mhiq yoeus ko yom hank eq ma bos. 5 Nyeih nyenh vjangh yah hauh lopkhyam yahge boms mas nyeis las, kaiq zis yah nyang gungs nyang lukgoq mas vkhyamh khyamh lhyamh tyamp. 6 Yesu lyis we masyah nyvng kat lyis, nyang wuih loh las, nyang lyis dupaiq. 7 Nyang yomkat kaiq las taiq zis gas, Nyhang thank Mangso dah Lo Yesu eh, ngos nvng yah cha sen lah? Nvng ngos lyis ma shoeuhshih das xiklyis ngos nvng lyis Mangso nyings yah dung, ge. 8 Khasoeh ge lyis, nyang gas yius lyis, Yius nvng eh, haih soeu jyank masyah thuq loh aq, ge yvmvyah nghuot. 9 Yesu gas, Nah nyings cha nghuot, ge nyang lyis nyei. Nyang phuk taiq zis gas, Ngah nyings Nyoshoq nghuot: khasoeh ge lyis, ngamoq nyoshoq nghuot, ge. 10 Housoeh hauh joqyos masyah nyamoq lyis ma pont tyamp bas jungh, ge nyang lyis dung. 11 Gvshih hauh bauslhyoq mas wuq dvjens buot zo nyeis. 12 Housoeh las yius jens gas, Ngamoq lyis hauh wuq jens mas jenh wvng nhang aq, ge nyang lyis dung. 13 Nyang eq gyo las yius jens gas thuq las wuq jens mas wvng goeus ya, wuq jens gas hauh gammhung mhayah tyauq gyoh loh las thomh mas tsain ciang shei. Hauh wuq jens gas aiq khyoengh ko nghuot. 14 Wuq yoeuh bang gas, phang wuih loh las, hauh mau yahge wus mas, hauh cho tsain taiq kyoh lho lhyi, nyamoq cha mus loh zis lyis e tsain yoeuh. 15 Nyamoq Yesu jyank mas jweh lyis, yius nyoshoq kuq soeu ka, dyimis wuot las cha ma chah soeu teh dah ehnyet yah tsung toh yvlyis nyamoq nyvng yvmvyah gyuk. 16 Hauh cho nyvng bang eq, hauh yius kuq soeu yahge wuq jens mas khasoeh bweh zis lyis, nyamoq lyis tsain lhom taiq kyoh. 17 Housoeh las nyamoq gas, nyamoq dah wuxom masyah thuq loh das nyhenshang nyang lyis chomp sang. 18 Nyang lhyik mas wvng lyis, yius kuq soeu ka Yesu lyis, nyang yah dvgeh nyeis das xiklyis dung. 19 Yesu gas ma gyo, Nah yhen mha bang yahge nah dyenschangh jens jyank mas doms loh las hauh Yhensain nah xiklyis kha iq kuot dyei zis yahge, kha iq nhaiqnyen goeus zis lyis loh taiq kyoh aq, ge nyang lyis taiq kat. 20 Housoeh las, nyang thuq loh las Yesu nyah xiklyis kha iq kuot dyei yvlyis Dekapoli mau mas taiq hoeuh loh goeus las dvnganhmoq mauh. 21 Yesu gas lhyik yah thyitvp pheh doms goeu loh lyis, moqjens nyah jyank mas zain los. Nyang gas thomh yvm mas nyeis. 22 Yoeuh aq, lyi jungs uhjyung jens mas Yairu ge soeu jweh los las, nyang lyis nyvng lyis, nyah khyeiyang mas gyuis las, 23 Nyang lyis khyoeuq zis gas, Ngah lonyi lo shei bah ge loh goeus, nyang dwis nyeis bas jungh, nvng los las nyah thoq mas loq kih zis yah gis los nhang aq, ge. 24 Housoeh las nyang gas nyang yah dvgeh loh. Moqjens eq nyah thang mha chank yenh las, nyamoq gas nyang lyis zangh duon nyhenh. 25 Dvci aiq zvn suih shuon lha nos dah vmesbih dvyuk gas, 26 Lastsiang nyoshoq dah loq mas nyang yoh goeu dvnganh dye yhung laus eq cha eq ma gis, dvzes xungh xent los. 27 Nyang Yesu cho xauhgyo lyis, hauh dius puk mas loh las, nyah nungsthank dyithang mha tanh. 28 Khasoeh ge lyis nyang gas, Nyah dyimis lyis khvlangh ngos xauh tanh ya ngos gis los das, ge. 29 Hauh uhlyis nyang suih shuon zis houjang doms tyamp las, nyah noslom gis los goeus zis lyis nyang sohseq. 30 Yesu gas nyang masyah yomsoq thuq loh zis, houjang nyah ehnyet mas soh yvmvyah, dius puk pheh lhain los uhjyangh, Ngah dyimis lyis hank tanh, ge taiq lho lhyi, 31 Nyah changlo jens nyang lyis taiq zis gas, Moqjens nvng lyis duon nyhenh los zis lyis nyvng las, Ngos lyis hank tanh, ge shih lhyeh, ge. 32 Nyang gas heisoeh hank kuot yvlyis nyvng das xiklyis zuilhaink lhain yoeuh nyeis. 33 Hauh vmesbih gas, nyang mas bweh dah cho lhyi seq yvmvyah, gyuk nvn zoh lyis yah los las nyah xikkhonh mas gyuis gyoh uhjyangh jyoengh nghuot cho dvnganh taiq kyoh. 34 Nyang gas, Ngah lonyi eh, nah lomsjingh zis gas nvng lyis gis los nhang goeus. Nyenstap zis yah loh aq, nah noslom gis los bas jungh, ge nyang lyis taiq. 35 Nyang taiq nyeis shih lyis, lyi jungs uhjyung dah yhen mha bang jweh los las, Nah lonyi shei goeus: hau svra lyis chamus thauqkhyi nyeis lo, ge. 36 Nghuot laus eq Yesu nyamoq dang lyis ma gyo, lyi jungs uhjyung lhyi taiq zis gas, Vchiq, loms kyingh dvloms aq, ge. 37 Yesu gas Petru, Yaku yahge Yaku dah vnoeuh Yohan mas lai las, gohyuk hank lyis eq nyah thang mha ma chank nhang. 38 Gvshih hau lyi jungs uhjyung dah yhen mha jweh lyis, dius wuhtoeng ge ngaus zis yahge shei uhngauh zis lyis nyang nyvng. 39 Nyang yhen mha wvng loh las, nyamoq lyis taiq zis gas, Namoq chamus wuhtoeng ge ngausdyeis ngausnhvp mus nyeis goh lah? Loshang ka shei zis ma nghuot, dvyhet joq, ge. 40 Nyamoq gas nyang lyis jwangh. Nghuot laus eq nyang gas, dvnganh lyis nghe pheh dye thuq loh nhang lha, loshang dah ungwes uwus yahge nyang yah dvgeh nghuot bang lyis shwih lho lha, hau loshang lhain toh yvmas wvng loh. 41 Hauh uhlyis nyang gas, hau nyelo dah loq lyis zwi toh las, Nyelo eh, toq aq, ge. 42 Houjang hauh nyelo gas toq las suh loh. Nyah nyenhkyi ka dvci aiq zvn nghuot. Housoeh nyamoq svsoh mauh lhung thungh goeus. 43 Hauh muh dah cho hank eq ma seq bas jungh, nyang nyamoq lyis khyangh gvgis com toh las, nyelo lyis zonoms dyei das zis tying toh.
1 Yesu hou mhayah thuq las, nyah wus pheh loh. Nyah changlo jens eq nyah thang mha chank yenh. 2 Yuda No Buisnyeis jweh lyis, lyi jungs mas nyang jyauh zoh loh. Nyah dang xauhgyo bang nyoshoq gyo mauh las taiq zis gas, Haih dius yuk heinyhoq zis khalhye yah yoh au lhyeh? Nyang lyis dyei toh joeui cha nghuot au? Nyah loq yah yomzains muh kuot nyeis nyvng! 3 Nyang gas hau soehfuh ma nghuot lhyeh? Mari dah lo, Yaku, Yosep, Yuda yahge Simon yahge Yuda moq dah vmang eq nyang nghuot ma nghuot lhyeh? Nyah nhamhmuh jens eq heimha yang yah dvgeh nyeis ma nghuot lhyeh, ge. Nyamoq gas nyang lyis ehnyet lainszo gus bweh. 4 Nghuot laus eq Yesu nyamoq lyis taiq zis gas, Lvpe ka, vsainnyang mau, buisnoms yahge yhen mhayah lai las nyoqnho ngelang ma yoh zis ma bos, ge. 5 Nos bang dvyhamh thoq mas loq kih dyei las nyamoq lyis gis los nhang thoq lyis lai las, nyang hauh yvmas gohtoeu chah yomsoq zains muhzoh eq ma yoh kuot. 6 Nyamoq dah ma lomsjingh ehnyet gvng mas, nyang mauh nyeis. Hauh thang lhyi vyvm vwi mas dah wukhau mha nyang loh jyauh. 7 Nyang hau changlo dvci aiq yuk lyis khi yoeus las, dvzomh dvzomh lyis nhang kat las, yius lyis yoh ung das toeuh dyei. 8 Lhamloq masyah gohtoeu gyung cho xiklyis ohlhyoq eq, bvtmuh eq, dyilhunk mas ngwis eq ma chi das xiklyis jyauh kat. 9 Nghuot laus eq thyvkoq koq las, thoq dyi eq aiq dung vwuot loh goh. 10 Hauh thoq lyis, namoq kha yhen mha nghuot laus eq wvng goeus ya, hauh joqyos masyah thuq loh shishenh jweh shoq houmha nyeis geh. 11 Hank laus eq namoq lyis ma lhom yoeus las namoq dang ma gyo yoeus lyis gas, hou mhayah thuq loh uhjyangh nyamoq xikkhonh mas kanghjyoeng duot das xiklyis, namoq khyeiwu mas dap dah phvlhau lhyi ko khyoq toh khoq geh, ge kat. 12 Housoeh nyamoq thuq loh las, dius nhaiqlom thaiq das cho tsain taiq hoeuh. 13 Nyamoq yius nyoshoq lyis eq khat tyamp zis yahge, nos bang nyoshoq lyis coeu juot dyei las lhoq gis dyei. 14 Nyah dah nyings hoeuh zis lyis hwankti Herod xauhgyo. Dvyhamh taiq lyis Jeisnyhop dyei soeu Yohan gas, shei masyah dwis toq kat zis xauh goeus; housoeh las hauh muh yoh kuot, ge. 15 Gohyhamh bang gas, Nyang gas Eliya nghuot; gohyhamh bang gas, Gohlhain dah lvpe jens mas dah lvpe dvyuk nghuot, ge. 16 Nghuot laus eq Herod hauh zis xauhgyo lyis, Ngos uhloms thyet goeus dah Yohan ka shei masyah dwis toq los goeus, ge. 17 Khasoeh ge lyis, Herod gas nyah vnoeuh Philip dah yhensain nyhiq Herodia dah gvng mas, Yohan lyis nyhik nhang lha thung mha lhunk toh. Herod gas Herodia lyis nyihwank yoeus goeus yvmvyah, 18 Yohan gas Herod lyis, Nah vnoeuh dah yhensain nyhiq lyis yoeus zis gas lyi lhyweq cho nghuot, ge taiq. 19 Herodia gas Yohan lyis nhaiqnos las, nyang lyis sat mes, nghuot laus eq nyang lyis ma yoh sat. 20 Khasoeh ge lyis Yohan ka dan, gyingshang soeu eq nghuot yvlyis Herod seq yvmvyah, nyang lyis gyuk woms zis yah dvgeh gomh nyeis. Nyah dang xauhgyo khanghmuh nyah ehnyet mas zangh. Nghuot laus eq, nyah dang lyis gausyis zis yah gyo yoeus nyeis. 21 Shishenh doeus, Herod dah khoeu buisnyeis lyis, nyang gas nyah loeuzomh jens, jeszau jens yahge Galile mau mas dah mungh zau jens lyis nyenhcon daih nyeis lyis, 22 houmha Herodia dah lonyi wvng las goh xoeuq zis yah Herod yahge nyang yah dvgeh tsung toh bang lyis nhaiqtap nhang. Housoeh las hwankti ka, hau lonyi lo lyis, Nvng cha o zis sang aq, ngos nvng lyis dyei das, ge taiq. 23 Hauh thoq lyis, nvng ngos lyis sang ya sang zis ngah munghdan dvgohyih jweh shoq ngos nvng lyis dyei das, ge nyang lyis maukhi toh. 24 Hauh uhlyis nyang thuq loh las, nyah ungwes lyis, Ngos cha sang das lah, ge nyei. Nyah ungwes nyang lyis taiq zis gas, Jeisnyhop dyei soeu Yohan dah uhloms lyis sang aq, ge. 25 Houjang nyang hwankti jyank mas lvnyap wvng sang zis gas, Nvng ngos lyis gvshih nyang jeisnyhop Yohan dah uhloms lyis bvn masyah kat los dyei das zis ngos o, ge. 26 Hwankti ka svsoh nhaiqkuk laus eq, maukhi toh dang yahge nyah boenghwus jens gvng mas, nyang lyis ma womh he lo. 27 Houjang hwankti ka zungh dah jeslo dvyuk nhang lha Yohan dah uhloms lyis e yoeus das zis vmingh dyei kat lyis, nyang e lha thung mha Yohan dah uhloms lyis thyet goeus. 28 Hauh uhloms lyis bvn masyah yoeus los las hauh lonyi lo lyis dyei. Hauh lonyi lo eq nyah ungwes lyis dyei. 29 Nyah changlo jens hauh zis xauhgyo lyis, nyamoq e lha nyah mvng lyis yoeus las lopkhyung mha kat toh. 30 Hauh thang lhyi lvgyo jens gas Yesu jyank mas zain zop las, nyamoq kuot goeus dah cho dvnganh, jyauh cho dvnganh nyang lyis tsain taiq kyoh. 31 Housoeh las nyang nyamoq lyis taiq zis gas, sam joqyos mas namoq nyang dvdvm no yoeus geh: khasoeh ge lyis e los kuot bang nyo las, nyamoq gas wom zo das shishenh yangh ma yoh bos, ge. 32 Housoeh las nyamoq nyang kyingh lhyik yah sam joqyos pheh jhank loh. 33 Nghuot laus eq dius jens gas nyamoq thuq loh zis lyis nyvng. Nyoshoq moq eq nyamoq lyis seq las wus khanghmuh masyah khyei cho lvnyap loh las nyamoq xik mas wuih jweh loh. 34 Housoeh Yesu lhyik masyah thuq loh lyis moqjens lyis nyvng kat. Nyamoq gas yoeuh soeu ma bos dah yvng jens yah doeusgoh yvmvyah, nyang nyamoq lyis nhaiq yoeuh nyen. Housoeh nyang nyamoq lyis nyoshoq jyauh xi. 35 Nyenhthang lhyi nyah changlo jens nyah jyank mas los taiq zis gas, Haih zis gas mhanhdyvp nghuot, shishenh eq lai loh goeus. 36 Housoeh las moqjens lyis vyvm vwi wukhau mha zonoms loh wis bas jungh, nyamoq lyis nhang kat aq, ge. 37 Nyang nyamoq lyis taiq zis gas, Nyamoq lyis namoq zonoms dyei geh, ge. Nyamoq taiq zis gas, Ngamoq ngwis kyvp aiq xo yah ohlhyoq loh wis tsoh das lah, ge. 38 Nyang nyamoq lyis doms taiq zis gas, Namoq ohlhyoq khanyhoq yoh goh lah, e xo yoeuh geh, ge. Nyamoq seq lho lhyi, Ohlhyoq oeng koeuq yahge oengdoq aiq doeu dvnghuot, ge. 39 Housoeh las dvnganhmoq gas, hauh mhanh nyaus pa mha nyang huom nyang tsain tsung bas jungh, ge nyang vmingh dyei. 40 Nyamoq gas dvxo xo, oengci ci mulas nyang jens nyang tsung toh. 41 Nyang hau ohlhyoq oeng koeuq yahge oengdoq aiq doeu yoeus chi lha, maukhung mha nghank yoeuh las shvmanh dung thang lhyi, ohlhyoq lyis khyiq las dius jens lyis gvm das nyhenshang nyah changlo jens lyis dyei. Hau oengdoq aiq doeu eq dvnganhmoq lyis gvm dyei. 42 Nyamoq dvnganhmoq zo jo. 43 Nyet dah ohlhyoq yahge oengdoq nyamoq kui tsainh lyis dvci aiq dang muis nghuot. 44 Ohlhyoq zo bang yuk gis goeu oeng khyoengh nghuot. 45 Nyang dius jens lyis pont nyeis uhlyis, houjang nyah changlo jens gas lhyik mas wvng las thyitvp Betsaida pheh loh das nyhenshang nhang kat. 46 Nyamoq lyis dye pont kat lho lhyi, nyang gas shvmanh dung das xiklyis boms pheh doq loh. 47 Nyenhthang jweh lyis, hauh lhyik gas thomh mas nghuot joq las, nyang kyingh tungyos mas nyeis khoq. 48 Nyoqnyvng zoh lyis nyang gas jeis thoq cho suh las lhyik lyis lai khoq das ge cvvq. Hauh uhlyis lyeis uh doeus las nyamoq lhyik zes yau nyeis yvlyis nyang nyvng. 49 Nghuot laus eq nyamoq gas nyang jeis thoq mas suh loh zis nyvng lyis sidyos nghuot soh bos ge nghamh las tsain kaiq. 50 Khasoeh ge lyis, dvnganhmoq nyang lyis nyvng las gyuk dvn. Houjang nyang nyamoq lyis taiq zis gas, Yomhont geh, ngos dvnghuot, ma gyuk noh, ge. 51 Nyang gas nyamoq nyeis dah lhyik khau mha wvng goeus ya, lyeis eq tam loh yvmvyah nyamoq ma thoq taiq lo shoq mauh. 52 Nyamoq dah nhaiqlom than zis gas, ohlhyoq yah sen dah yomsoq muh lyis nyamoq ma seqgyo yvmvyah nghuot. 53 Nyamoq thyitvp pheh dap loh lyis Genesaret mau mas jweh loh las lhyik lyis twih toh. 54 nyamoq lhyik masyah thuq loh yah dvyih dius jens gas nyang lyis seq las, 55 hauh wuxom gonh tsain wuih las nyamoq, nyang kha thaq nyeis ge zis xauhgyo yvmas, nos bang lyis thyangh nyhoeuh masyah dvng e. 56 Hauh thoq lyis wukhau, wugungs, mhanhdyvp wukhau, kaih mas eq nyang wvng loh lyis noslom vja ja zis yah nos bang gas, houmha shwih toh yvmvyah, nyah dyithang lhyi khvlangh xauh tanh das xiklyis nyang lyis dung. Nyang lyis xauh tanh bang dvnganh gis los.
1 Housoeh Pharishe moq yahge Yerusalem masyah los dah maussauh lhaih bang dvyhamh nyah jyank mas zop los. 2 Housoeh changlo jens dvyhamh loq ma cheih, ma lhoq ma shang zis yah ohlhyoq zo yvlyis nyamoq nyvng. 3 Khasoeh ge lyis Pharishe yahge Yuda jens dvnganh gas, nyamoq logis jens thungh chank las, loq ma cheih lyis ohlhyoq ma zo. 4 Kaih masyah los lyis eq lyi yah dvyhangteh nyamoq gungs ma cheih lyis gas ma zo. Hauh thoq lyis kom, auh, thunk khuq lyis cheih zis yahge gohtoeu eq nyamoq chank zis bos shih. 5 Housoeh las Pharishe yahge maussauh lhaih bang nyang lyis nyei zis gas, Nah changlo jens gas chamus logis jens dah thungh lyis ma chank, loq ma cheih wom zo goh lah, ge. 6 Nyang nyamoq lyis taiq zis gas, Gis guons kuot bang eh, namoq yah sen lha Esaia pe khoq zis lyis lhaih toh zis gas, Haih dius jens dah nhuot yah ngos lyis phauh nyang laus eq, Nyamoq dah nhaiqlom gas ngos yah we goh joq. 7 Dius dah tyingtoh dang lyis kyingh vgungs toh las jyauh chah yhangteh jyauh nyeis yvmvyah, nyamoq ngos lyis paiq zis gas vkom dvnghuot, ge. 8 Namoq gas Mangso dah tyingtoh dang lyis nungsyos toh las, khuq auh cheih yhangteh dius dah thungh lyis kyingh tsain chank nyeis. 9 Housoeh yvmvyah nyang nyamoq lyis taiq zis gas, Namoq dah thungh chank das xiklyis Mangso dah tyingtoh dang lyis gas peq toh nyvng! 10 Moshe taiq zis gas, Ungwes uwus lyis phauh nyang aq, ungwes uwus lyis ma gis zis taiq soeu ka shei nyang shei bas jungh, ge. 11 Nghuot laus eq namoq taiq zis gas, Dius dvyuk nyah ungwes uwus lyis, Ngah jyank masyah nvng xauh yoeus das vyhang ka, phudyei jyungshuk kuot goeus ya cha ma chah lo ge, 12 Nyah ungwes uwus lyis pangh das nyhenshang namoq tomp toh. 13 Housoeh namoq jyauh dah thungh gvng mas, Mangso dah dang lyis tsain peq toh. Housoeh teh zis namoq nyoshoq kuot, ge. 14 Housoeh nyang moqjens lyis doms khi lha taiq zis gas, Namoq dvnganhmoq ngah dang gyo yoeus las seqgyo geh. 15 Nghe mhayah dius dah vkhau mha wvng los dah vyhang ka, nyang lyis vwot v-oeu yoh bweh nhang zis ma nghuot. Dius dah vkhau mhayah thuq los zis gas vwot v-oeu bweh nhang. 16 Gyo yoeus das no dap soeu ka xauhgyo bas jungh, ge. 17 Moqjens masyah yvpkhau mha wvng loh thang lhyi, nyah changlo jens gas hauh dangtoeuq lyis doms nyei. 18 Housoeh las nyang nyamoq lyis taiq zis gas, Nghe mhayah dius dah vkhau mha wvng los zis cha laus eq dius lyis vwot v-oeu kuot zis ma nghuot. Namoq eq seq cho ma bos. 19 Khasoeh ge lyis, zonoms gas nhaiqlom khau mha wvng loh zis ma nghuot, womdau khau mha wvng loh thang lhyi nghe pheh thuq loh ma nghuot lhyeh? Housoeh nyang gas zonoms dvnganh gas lhoqshang ge taiq hoeuh. 20 Dius jyank masyah thuq los zis gas dius lyis vwot v-oeu kuot. 21 Khasoeh ge lyis dius dah ehnyet khau mhayah ma gis zis nghamh thuq los zis gas, nyi shuot lvng shuot, yauxi, dius sat, 22 khauh, nyoqnoq, ung lhung, chuq, nyoqjvng ma nyaus wotwu, noh, loeusmus soqzo, khwank zis yahge vkoh vbang zis nghuot. 23 Hai ma gis zis dvnganh gas vkhau mhayah thuq los las dius lyis vwot v-oeu bweh nhang, ge. 24 Nyang hou mhayah toq loh las Taire mau mas jweh loh. Nyang yhen khau mha wvng loh zis lyis hank lyis eq ma seq nhang mes laus eq nyang ma yoh tamh. 25 Yius kuq dah nyelo yoh dah vmesbih dvyuk gas, nyah cho xauhgyo yvmvyah, nyang houjang nyah khyeiyang mas lyih gyuis las, 26 Nyah lonyi jyank mas dah yius khat tyamp dyei das xiklyis dung nyeis. Hauh vmesbih gas Heleni dius Sirophoni vnyau nghuot. 27 Nghuot laus eq Yesu hauh vmesbih lyis taiq zis gas, Loshang jens shih cangxeih zo jo bas jungh: khasoeh ge lyis loshang jens dah zonoms lyis yoeus las lvkhuih jens lyis doeuh dyei zis gas ma doeus, ge. 28 Hauh vmesbih nyang lyis phuk taiq zis gas, Nghuot goeus Yhensain eh, kihgus jeis mas dah lvkhuih eq loshang jens dah zopop kui zo, ge. 29 Nyang hauh vmesbih lyis taiq zis gas, Nvng heisoeh taiq gvng mas, Loh aq, yius gas nah lonyi jyank masyah thuq loh goeus, ge. 30 Hou mhayah nyang yhen mha doms jweh loh lyis, nyah lonyi lo yius ma bos lo, yhetyos mas lhain toh zis lyis nyvng. 31 Taire wuxom mhayah thuq loh lyis Sidon masyah lai dyet loh las Dekapoli wuxom cho lai loh lyis Galile thomh mas jweh loh. 32 Houmha nyamoq gas nojet las o twih soeu lhyi nyah jyank mas tsain shwih lyih las, nyah thoq mas loq kih dyei das xiklyis tsain dung. 33 Moqjens masyah nyang lyis shwih thuq loh las, nyah nokhyung khau mha Yesu dah loq nyhauh jauh kat dyei zis yahge svkanh dyeh las nyah lhyo lhyi eq tanh dyei. 34 Nyang maukhung mha nghank yoeuh zis yah, soqmuh nyhank las nyang lyis Ephatha, ge taiq. Hauh zis gas, Bangh los aq, ge zis nghuot. 35 Houjang nyah no bangh los, lhyo twih zis eq buis loh las, nyang khyangh khyangh yoh taiq. 36 Hauh cho hank lyis eq ma taiq kyoh bas jungh, ge nyang nyamoq lyis khyangh com kat laus eq, zes com kat zes taiq kyoh loh. 37 Nyamoq svsoh mauh zis yah, Nojet bang lyis xauhgyo los nhang, dang ma yoh jis bang lyis dang yoh jis los nhang lha, dvnganh zis lyis gis shoq yoh kuot dyei, ge tsain taiq.
1 Hauh buisnyeis gyo lyis moqjens zain huom nyeis las zonoms cha eq ma yoh las, Yesu gas nyah changlo jens lyis khi lha taiq zis gas, 2 Ngos haih moqjens lyis nhaiqnyen: khasoeh ge lyis, nyamoq ngos yah nyeis zis gvshih somh nyeih nyangh goeus, nyamoq zo das zis cha eq ma yoh. 3 Ngos nyamoq lyis yhen pheh wom yuot zis yah pont kat lyis, cholvt mas yuot lhyauh shangh das, khasoeh ge lyis nyamoq dvyhamh gas mau we masyah zis nghuot, ge. 4 Nyah changlo jens nyang lyis phuk taiq zis gas, Mhanhdyvp mas heinyhoq moq xiklyis ohlhyoq khalhye yah yoh thoq luk das lah, ge. 5 Nyang nyamoq lyis, Ohlhyoq khanyhoq yoh goh lah, ge lyis, Nyhet koeuq yoh, ge. 6 Housoeh las dius jens lyis nyeisjvng mas tsung das xiklyis taiq las, hau ohlhyoq nyhet koeuq yoeus chi lha jyehjuh chungh thang lhyi khyiq las, gvm das xiklyis nyah changlo jens lyis dyei. Nyamoq eq moqjens lyis gvm dyei. 7 Nyamoq oengdoq mhauhlo dvtsiq tsain yoh yvlyis eq nyang shvmanh lho lha, nyamoq xikkhonh mas toh dyei das xiklyis vmingh dyei. 8 Housoeh nyamoq zo jo thang lhyi, nyet dah vpop vsop kui tsainh lyis nyhet dang muis nghuot. 9 Nyamoq zo bang nyei khyoengh ko nghuot. Hauh thang lhyi nyang nyamoq lyis pont kat. 10 Houjang nyang nyah changlo jens yah dvgeh lhyik khau mha wvng las, Dalmanutha wuxom mha jweh loh. 11 Hauh uhlyis Pharishe moq thuq los las nyang yah taiq phyen-goh las nyang lyis shiwu zoh lyis maukhung mha dah vlho dvkoeuq sang. 12 Housoeh nyang soqmuh nyhank las taiq zis gas, Dius haq caiq mas dah bang chamus vlho tsain xo au lhyeh? Ngos namoq lyis jyoengh taiq bah, haq caiq lyis vlho cha eq ma dyei das, ge. 13 Nyang nyamoq lyis toh khoq las lhyik khau mha doms wvng zis yah thyitvp pheh goeu loh. 14 Changlo jens ohlhyoq wons los das zis tohnyhik khoq las, chont khau mha ohlhyoq dvkoeuq kyingh dvbos joq. 15 Nyang nyamoq lyis jyauhhuh kat zis gas, Pharishe jens yahge Herod dah bicheih lyis zaih geh, ge. 16 Housoeh nyamoq nyang changh taiq goh zis gas, Yang ohlhyoq ma tsain wons yvmvyah nghuot, ge. 17 Yesu hauh yvlyis seq las nyamoq lyis taiq zis gas, Namoq ohlhyoq ma wons cho lhyi chamus taiq goh nyeis lah? Namoq ma seqgyo shih goh lhyeh? Namoq dah ehnyet dvtsain than joq shih goh lhyeh? 18 Nyoqjeih dap las ma nyvng goh lhyeh, no dap las ma xauhgyo lhyeh? Namoq ma comh goh lhyeh? 19 Ngos dius oeng khyoengh xiklyis ohlhyoq oeng koeuq lyis khyiq las tsoh thang lhyi, namoq vpop vsop khanyhoq dang yoh kui goh lah, ge. Nyamoq taiq zis gas, Dvci aiq dang, ge. 20 Dius nyei khyoengh lyis ohlhyoq nyhet koeuq yah tsoh thang lhyi, namoq khanyhoq dang dyingh shoq yoh kui goh lah, ge. Nyamoq taiq zis gas, Nyhet dang, ge. 21 Nyang nyamoq lyis taiq zis gas, Namoq ma seqgyo shih goh lah, ge. 22 Nyamoq Betsaida mas jweh loh lyis, nyamoq gas nyoqjet dah yukgis dvyuk nyah jyank mas shwih lyih las, tanh dyei das xiklyis nyang lyis dung. 23 Nyang gas nyoqjet soeu lhyi loq masyah wus nghe pheh she thuq loh las, nyah nyoq mas svkanh taiqh lho lha, nyah thoq mas loq kih uhlyis yah, Nvng dvja ja lyis vnyvng lah, ge nyang lyis nyei. 24 Nyang nghank yoeuh las taiq zis gas, Ngos dius jens lyis saiqzains suh loh yhangteh nyvng, ge. 25 Hauh thang lhyi nyoq mas nyah loq kih toh las, hauh soeu lhyi nghank yoeuh nhang lhyi, nyah nyoqjeih doms gis los las dius yuk khanghmuh lyis dede nyvng. 26 Yesu gas, nyang lyis nyah yhen mha nhang kat uhlyis yah taiq kat zis gas, Wukhau mha vwvng loh, ge. 27 Hauh thang lhyi Yesu yahge nyah changlo jens gas Kesare Philipi wus mas wvng loh lyis, cho mha nyah changlo jens lyis nyei zis gas, Dius jens ngos lyis hank nghuot ge goh lah, ge. 28 Nyamoq nyang lyis taiq zis gas, Jeisnyhop dyei soeu Yohan; dvyhamh gas Eliya; gohtoeu dvyhamh gas, Lvpe dvyuk yuk nghuot, ge. 29 Nyang nyamoq lyis, Namoq gas ngos lyis hank nghuot oen goh lah, ge. Petru phuk taiq zis gas, Nvng gas Khristu nghuot, ge. 30 Nyah cho hank lyis eq ma taiq das xiklyis nyang nyamoq lyis khyangh wontang com toh. 31 Hauh thang lhyi Cangsoeu Lo gas shanghsenh zis nyoshoq xauh las, logis jens, phudyei uhjyung jens yahge maussauh lhaih bang yah peq tyamp las, sat zis xauh das, somh nyeih thang lhyi dwis toq los das cho nyang nyamoq lyis jyauh xi loh. 32 Nyang hauh dang lyis debangh taiq. Housoeh Petru gas nyang lyis khi yoeus las nyho. 33 Nyang nyah changlo jens lyis lhain yoeuh las, Petru lyis nyho zis gas, Satan eh, ngah nungsthank pheh jik loh aq: nvng gas Mangso shot pheh yah ma nghamh, dius shot pheh yah dvnghamh, ge. 34 Nyang nyah changlo jens yahge moqjens lyis khi yoeus las taiq zis gas, Dvyuk yuk ngah thang chank soeu duot mes lyis gas, nyah gungs lyis nungsyos toh, nyah tapzains wuq las ngah thang mha chank bas jungh, ge. 35 Khasoeh ge lyis vsainnyang kang lhyi khyuot yoeus mes soeu ka, kang dyuk das. Nghuot laus eq ngah nyhenshang yahge gausyis dang gvng mas kang dyuk soeu ka kang yoh das. 36 Cangsoeu dius gas mungkvn gonh lyis sain toh laus eq nyah kang dyuk tyamp lyis gas chah vkyuh bos lah? 37 Cangsoeu dius gas nyah kang lhyi cha yah yoh thaiq yoeus das lah? 38 Hai nyi shuot lvng shuot las yaunos dap dah caiq mas, ngos yahge ngah dang lyis xoq lyis gas, Cangsoeu Lo gas nyah Uwus dah phunk khau mha hauh gyingshang loeuswons bang yah jweh lyih lyis, nyang eq hauh soeu lhyi xoq das, ge.
1 Nyang nyamoq lyis taiq zis gas, Ngos namoq lyis jyoengh taiq bah, houmha yap joq bang dvyhamh, Mangso munghdan gas yomsoq yah jweh lyih zis lyis nyvng shoq shei zis ma bos das, ge. 2 Khyuk nyeih thang lhyi Yesu gas Petru, Yaku, Yohan moq lyis shwih las nyamoq nyang kyingh boms nyhang thoq mas doq loh; hauh uhlyis nyamoq dah xikkhonh mas nyang vwot thaiq los. 3 Nyah dyi eq thyoeu lha kyi kyi bvng: nyeisjvng thoq mas hou iq yoh cauh thyoeu zis hank eq ma bos. 4 Yesu yah jis goh nyeis dah Moshe yahge Eliya eq nyamoq lyis nyvng xoeuq. 5 Petru Yesu lyis taiq zis gas, Svra eh, heimha yang nyeis das zis gis, yang zvng somh koeuq kuot goh; nah nyhenshang dvkoeuq, Moshe nyhenshang dvkoeuq, Eliya nyhenshang dvkoeuq nghuot bas jungh, ge. 6 Khasoeh ge lyis nyamoq gyuk nyeis yvmvyah, nyang cha taiq das zis ma seq lo. 7 Hauh uhlyis jyommauh yah nyamoq lyis nghop gos las, hauh jyommauh khau mhayah thwe dvkoeuq taiq thuq los zis gas, Haih soeu ka ngos jyetdap, ngah Lo nghuot, nyah dang gyo geh, ge. 8 Vyvm vwi mas nyamoq nyetlos nyettant yoeuh kat lyis Yesu yahge nyamoq nyang masyah lai las gohtoeu hank lyis eq ma nyvng lo. 9 Gvshih nyamoq boms masyah doms gyoh los lyis, Cangsoeu Lo gas shei masyah ma dwis toq los dvchank, nyamoq nyvng zis hank lyis eq ma taiq kyoh das xiklyis nyang nyamoq lyis khyangh com toh. 10 Nyamoq hauh dang lyis gyo chi lha, shei masyah dwis toq los das ge zis gas, cha lhyi ge au, ge nyang changh nyang nyei goh nyeis. 11 nyamoq, nyang lyis nyei zis gas, Maussauh lhaih bang gas, chamus Eliya shih cangxeih los chah, ge taiq au lhyeh, ge. 12 Nyang nyamoq lyis phuk taiq zis gas, Eliya jyoengh nyang cangxeih jweh los las dvnganh zis lyis soq kuot toh goeus. Cangsoeu Lo eq shanghsenh zis nyoshoq xauh las ma phauh ma danh kuot zis xauh das cho lhaih toh ma nghuot lhyeh, ge. 13 Nghuot laus eq ngos namoq lyis taiq bah, Eliya gas los goeus. Nyah cho lhyi lhaih toh zis yah dvyhangteh, nyang lyis nyamoq o khyvlyis kuot goeus, ge. 14 Changlo jens jyank mas jweh loh lyis, nyamoq dah vyvm mas moqjens zainsmuh tsain nyeis las, maussauh lhaih bang nyamoq yah taiq phyen-goh nyeis zis lyis nyvng. 15 Houjang dius dvnganhmoq nyang lyis nyvng kat lho lhyi, svsoh mauh zis yah nyang lyis lyih tsain wuih zes langh. 16 Nyang nyamoq lyis nyei zis gas, Namoq nyamoq yah cha taiq phyen-goh nyeis lah, ge. 17 Moqjens mas dvyuk nyang lyis phuk taiq zis gas, Svra eh, nhuotjet yius kuq dah ngah lo lyis, ngos nah jyank mas shwih lyih. 18 Nyang lyis kuq los goeus ya, khamha eq nyang lyis nyeisjvng mas she lhain lha, nyop vdoe doe zwis khih chap las gyi lang loh. Housoeh las yius khat thuq dyei bas jungh oen ngos nah changlo jens lyis taiq laus eq, nyamoq ma yoh khat thuq dyei, ge. 19 Yesu nyang lyis phuk taiq zis gas, Lomsjingh cho ma bos dah caiq mas bang eh, ngos namoq yah dvgeh khanyhank jweh shoq xauh nyeis das lah? Ngos namoq lyis khanyhank jweh shoq jhen chah das lah? Nyang lyis ngah jyank mas shwih los aq, ge. 20 Housoeh las nyamoq gas nyang lyis nyah jyank mas shwih los. Yius gas Yesu lyis nyvng yah dvyih loshang lhyi chuot nhang lha, nyang nyeisjvng mas lains loeu las nhuot mas nyop vdoe doe mus nyeis. 21 Housoeh las nyang gas nyah uwus lyis taiq zis gas, Nyang heisoeh mus zis khanyhank nyangh goeus lah, ge. Nyang gas, Loshang lhyi yah nghuot goeus. 22 Nyang lyis mhont tyamp das zis ge nyi mas eq, jeis mas eq vlhain lhain doeuh kat goeus; nghuot laus eq nvng yoh kuot nghuot lyis gas nhaiqnyen las ngah phvtang lhyi bos jenh pangh aq, ge. 23 Yesu nyang lyis taiq zis gas, Nvng yoh bweh lyis oen chamus sang! Lomsjingh soeu xiklyis dvnganh yah yoh bweh, ge. 24 Houjang yah loshang dah uwus gas kaiq las, Yhensain eh, ngos lomsjingh, ngos ma lomsjingh zis lyis bos pangh aq, ge. 25 Dius jens tsain wuih zain los yvlyis Yesu nyvng lyis, hauh yius lyis nyho zis gas, Nhuotjet, nojet yius nvng eh, ngos nvng lyis vmingh dyei bah, nyah jyank masyah thuq loh aq, khayhoq eq vdoms wvng loh lo, ge. 26 Yius eq kaiq las nyang lyis doms chuot nhang lha thuq loh. Nyang eq shei goeus teh nghuot las, dius nyoshoq moq gas, Nyang shei goeus, ge. 27 Nghuot laus eq Yesu nyah loq masyah she toq kat lho lhyi, nyang toq los. 28 Nyang yhen khau mha wvng loh lyis, nyah changlo jens nyang kyingh nyang lyis nyei zis gas, Ngamoq hauh yius lyis chamus ma yoh khat thuq au lhyeh, ge. 29 Nyang nyamoq lyis taiq zis gas, Haih ja gas shvmanh dung zis yah kyingh dvyoh thuq loh nhang, ge. 30 Nyamoq hou mhayah thuq las Galile chank yah tsain loh lyis, nyang hank lyis eq ma mes seq nhang. 31 Khasoeh ge lyis Cangsoeu Lo lyis svbih loq mas phanhlyen dyei las nyamoq gas nyang lyis sat das, hauh thang lhyi somh vnyeih lyis nyang dwis toq das, ge nyah changlo jens lyis jyauh nyeis. 32 Nyamoq hauh cho ma seqgyo laus eq nyang lyis nyei das zis tsain gyuk. 33 Housoeh nyamoq gas Kaperna-um mas jweh loh. Yhen khau mha lungh joq uhlyis nyang nyamoq lyis nyei zis gas, Namoq cho mha cha lhyi taiq nyingh nyo goh lah, ge. 34 Nghuot laus eq nyamoq gas samlo nyeis: khasoeh ge lyis cho mha dvyuk yah dvyuk kuh thank zis hank nghuot, ge taiq nyingh nyo goh. 35 Housoeh nyang tsung uhlyis yah, nyah changlo dvci aiq yuk lyis khi yoeus las taiq zis gas, Namoq mas dvyuk yuk uhshe soeu duot mes lyis gas, dvnganhmoq dah thang chank soeu yahge dvnganhmoq dah jyeidwis duot chah, ge. 36 Nyang gas loshang dvyuk lyis nyamoq dah vgungs mas yap nhang toh: nyang lyis po lho lha, nyang nyamoq lyis taiq zis gas, 37 Hank laus eq heisoeh teh dah loshang dvyuk lyis ngah nyings masyah lhom yoeus soeu ka, ngos lyis lhom yoeus zis nghuot. Ngos lyis lhom yoeus soeu hank laus eq ngos lyis lhom yoeus zis ma nghuot, ngos lyis nhang kat soeu lhyi lhom yoeus zis dvnghuot, ge. 38 Yohan nyang lyis taiq zis gas, Svra eh, ngamoq nah nyings yah yius khat thuq soeu dvyuk lyis nyvng: nyang gas ngamoq mas zis ma nghuot yvmvyah nyang lyis tomp toh, ge. 39 Nghuot laus eq Yesu gas, Nyang lyis vtomp toh goh: khasoeh ge lyis, ngos lyis ma gis zis taiq las ngah nyings mas yomsoq muh yoh kuot soeu hank eq ma bos. 40 Khasoeh ge lyis yang lyis tyi ma xo soeu ka yah shot pheh zis nghuot. 41 Ngos namoq lyis jyoengh taiq bah, namoq gas Khristu yah sen yvmvyah namoq lyis jeis dvkom gvmshuk soeu hank laus eq, nyah khyik manh phauh dyuk das zis ma nghuot. 42 Ngos lyis lomsjingh dah haih ngis bang dvyuk yuk lyis yaunos kuot nhang soeu hank laus eq nyah lainzain mas mhoq shan tyaulhangh las thomh mas lhwih kat das zis gas nyah xiklyis zes gis. 43 Housoeh nah loq yah nvng lyis shuot nhang lhyi, hauh yvlyis thyet tyamp aq: Loq aiq shot dap las ma jom munyi thomh mas wvng das thoq lyis, loq dvshot kyingh yah kang dwis yvmas wvng das zis gas nah xiklyis zes gis. 44 Hauh munyi mas nyamoq dah luk ma shei, nyi eq ma yoh sat. 45 Nah khyei yah nvng lyis shuot nhang lhyi, hauh yvlyis thyet tyamp aq: khyei aiq khyei yah dap las munyi thomh mas wvng das thoq lyis khyei dung yah kang dwis yvmas wvng das zis gas nah xiklyis zes gis. 46 Hauh munyi mas nyamoq dah luk ma shei, nyi eq ma yoh sat. 47 Nah nyoqjeih yah nvng lyis shuot nhang lhyi, hauh yvlyis thuiq tyamp aq: nyoq aiq jeih yah munyi thomh mas khyoq kat zis xauh das thoq lyis nyoq dvjeih yah Mangso munghdan mas wvng das zis gas nah xiklyis zes gis. 48 Hauh munyi mas nyamoq dah luk ma shei, nyi eq ma yoh sat. 49 Khasoeh ge lyis lomhxangh dvnganh lyis coh cheih teh yuk khanghmuh lyis nyi yah phuot shang zis xauh das. 50 Coh gas gis, nghuot laus eq nyah dah ngvm zis bi tyamp goeus ya, khasoeh doms yoh ngvm nhang das lah? Namoq mas coh ngvm nhang lha, namoq nyang changh nyang nyenstap nyeis geh, ge.
1 Hou mhayah nyang toq las, Yodan lvng thyitvp Yuda wuxom mha jweh loh lyis moqjens nyah jyank mas doms zain los yvmvyah, nyang gyangh kuot vgus nyamoq lyis jyauh. 2 Housoeh Pharishe moq nyah jyank mas los las, nyang lyis shiwu zoh lyis nyei zis gas, Yhensain phoq gas yhensain nyhiq lyis she tyamp das zis lyi vbos lah, ge. 3 Nyang nyamoq lyis phuk taiq zis gas, Moshe namoq lyis khasoeh ge tying toh lah, ge. 4 Nyamoq taiq zis gas, Kangh dah maussauh lhaih toh las, nyang lyis nhang kat das zis Moshe kuot nhang toh, ge. 5 Yesu nyamoq lyis taiq zis gas, Namoq nhaiqlom tsain than yvmvyah, Moshe haih lyi lhaih toh. 6 Nghuot laus eq, mauthuq nyeiszvn masyah Mangso ka vbusbih yahge vmesbih lyis gvnkhanh toh goeus. 7 Housoeh yvmvyah vbusbih gas nyah ungwes uwus lyis toh khoq zis yah, nyah yhensain nyhiq yah tsoq las, 8 nyah zomh gas gungsshoh dvkoeuq kyingh nghuot das. Housoeh nyah zomh gas aiq yuk ma nghuot, gungsshoh dvkoeuq dvnghuot lo. 9 Housoeh Mangso tsomp toh yvlyis dius yah ma kangh bas jungh, ge. 10 Yvpkhau mha tsain nyeis uhlyis changlo jens gas haih cho nyang lyis doms tsain nyei. 11 Housoeh las nyang nyamoq lyis taiq zis gas, Hank laus eq nyah yhensain nyhiq lyis she tyamp las, gohtoeu dvyuk phoengh doms hwank lyis gas, nyang nyi shuot zis nghuot. 12 Housoeh vmesbih eq nyah yhensain phoq lyis she tyamp las, gohtoeu dvyuk yah phoengh doms wvng lyis gas, nyang lvng shuot zis nghuot, ge. 13 Loshang jens lyis tanh dyei bas jungh, ge nyamoq gas nyah jyank mas tsain shwih lyih. Nghuot laus eq changlo jens gas nyamoq lyis nyho. 14 Yesu hauh zis lyis nyvng lyis nhaiqyo las nyamoq lyis taiq zis gas, Loshang jens lyis ngah jyank mas los nhang geh, nyamoq lyis vtomp toh goh: khasoeh ge lyis Mangso munghdan gas housoeh teh bang dah xiklyis nghuot. 15 Ngos namoq lyis jyoengh taiq bah, hank laus eq Mangso munghdan lyis loshang teh ma lhom yoeus soeu ka, nyang houmha ma xauh wvng loh das, ge. 16 Yesu loshang jens lyis po lha nyamoq thoq mas loq kih las shvmanh dyei. 17 Tsai nyang cho mha doms loh nyeis lyis dius dvyuk wuih los las, phvluk zomhgyuis zis yah nyang lyis nyei zis gas, Gis dah Svra eh, ngos vcaiq vto kang yoh das xiklyis cha kuot chah lah, ge. 18 Yesu nyang lyis taiq zis gas, Nvng ngos lyis chamus Gis soeu oen lui lah? Mangso mha lai las gis soeu dvyuk eq ma bos. 19 Lyi mas, nyi shuot lvng vshuot, dius vsat, vkhauh, ma ying kanghjyoeng vkat, v-an zo, nah ungwes uwus lyis phauh nyang aq, ge zis nvng seq toh goeus, ge. 20 Hauh soeu phuk taiq zis gas, Svra eh, hauh goeu dvnganh zis lyis ngos loyvm yoq lyis yah chank goeus, ge. 21 Yesu nyang lyis yoeuh uhlyis yah jyet las nyang lyis taiq zis gas, Nvng dvja chah shih, nvng loh las nvng yoh ya yoh zis lyis ungh las nyungs bang lyis gvm dyei aq: housoeh lyis maukhung mha zisyos yoh das, housoeh nvng ngah thang mha chank los aq, ge. 22 Hauh dang khonh xauhgyo lyis nyang nyoqnho shen. Nyang nhaiqkuk zis yah loh lo: Khasoeh ge lyis nyang gas zisyos nyoshoq yoh soeu nghuot. 23 Housoeh Yesu zuilhaink yah yoeuh lho lha nyah changlo jens lyis taiq zis gas, Yoh khuiq bang gas Mangso munghdan mas wvng das zis kha iq yau, ge. 24 Changlo jens gas nyah dang lyis tsain gyo mauh nyeis. Nghuot laus eq Yesu nyamoq lyis doms taiq zis gas, Loshang jens eh, Mangso munghdan mas wvng das zis kha iq yau! 25 Dis soeu ka Mangso munghdan mas wvng lwis thoq lyis gola-u gas nghvpnho mha lai das zis zes lwis, ge. 26 Nyamoq gas svsoh mauh las dvyuk yah dvyuk taiq goh zis gas, Housoeh lyis gas khyuot yoeus zis hank xauh das lah, ge. 27 Yesu nyamoq lyis yoeuh las taiq zis gas, Haih zis gas dius yah gas ma gis bweh, nghuot laus eq Mangso ka ma gis bweh zis ma nghuot: khasoeh ge lyis Mangso yomsoq gas dvnganh zis yoh bweh, ge. 28 Hauh uhlyis Petru nyang lyis phuk taiq zis gas, Yoeuh aq, ngamoq gas vyhang dvnganh toh tyamp las nah thang mha chank los goeus, ge. 29 Yesu phuk taiq zis gas, Ngos namoq lyis jyoengh taiq bah, hank laus eq ngos yahge hauh gausyis dang nyhenshang yhen, vmang vnoeuh, nhamhmuh jens, ungwes, uwus, yhensain nyhiq, lo jens, maunyeis yvsoh toh tyamp soeu ka, 30 shoeuhshih zis yah dvgeh, haq caiq mas yhen, vmang vnoeuh, nhamhmuh, ungwes, lo jens yahge maunyeis yvsoh dvxo huon yoh yoeus das, jweh los das caiq mas eq vcaiq vto kang yoh das. 31 Nghuot laus eq cangxeih bang nyoshoq gas thang thank nghuot das. Thang thank bang cangxeih nghuot das, ge. 32 Gvshih nyamoq gas Yerusalem pheh doq loh cho mha nghuot. Yesu gas nyamoq dah xik mas loh nyeis las nyamoq mauh. Nyah thang mha chank loh bang eq gyuk nyeis. Nyang gas changlo dvci aiq yuk lyis khi yoeus las nyang mas bweh das cho nyamoq lyis taiq kyoh zoh loh zis gas, 33 Yoeuh aq, yang Yerusalem pheh doq loh nyeis. Hau Cangsoeu Lo gas phudyei uhjyung jens yahge maussauh lhaih bang loq mas kyauh tyamp zis xauh das. Nyamoq gas nyang lyis shei das cho dang thang thyet las, nyang lyis gohnyau bang dah loq mas kyauh tyamp das. 34 Nyamoq gas nyang lyis jwangh, svkanh dyeh gyuon, lyuk las sat das. Somh vnyeih lyis nyang dwis toq das, ge. 35 Zebedi lotang Yaku yahge Yohan nyah jyank mas e sang zis gas, Svra eh, ngah zomh sang ya sang zis nvng ngah zomh lyis kuot dyei das yvlyis ngah zomh o, ge. 36 Nyang nyah zomh lyis taiq zis gas, Ngos nah zomh lyis cha kuot dyei das yvlyis o lah, ge. 37 Nyah zomh phuk taiq zis gas, Nah phunk nyoqnho yah hwankti tank mas tsung uhlyis ngah zomh lyis nah loqyos pheh dvyuk, loqwi pheh dvyuk tsung nhang aq, ge. 38 Nghuot laus eq Yesu nyah zomh lyis taiq zis gas, Nah zomh cha sang nyeis zis nah zomh nyang ma seq. Ngos shuk kom lhyi nah zomh yoh shuk das lhyeh? Ngos kham dah jeisnyhop cho lhyi eq nah zomh yoh kham das lah, ge. 39 Nyah zomh gas, Ngah zomh yoh kuot das, ge. Yesu nyah zomh lyis taiq zis gas, Ngos shuk kom lhyi nah zomh xauh shuk das; ngos kham dah jeisnyhop lyis eq xauh kham das. 40 Nghuot laus eq ngah loqwi loqyos mas yoh tsung das vmingh ngos ma yoh dyei. Houka sont toh dyei bang xiklyis dvnghuot, ge. 41 Hauh zis dvci yuk moq xauhgyo lyis, nyamoq gas Yaku yahge Yohan lyis nhaiq tsain yo. 42 Housoeh Yesu nyamoq lyis khi yoeus las taiq zis gas, Gohnyau lyis guon das bang gas, nyamoq dah thoq mas zau las, nyamoq mas kuh bang gas nyamoq thoq mas vmingh tsain bos yvlyis namoq seq. 43 Nghuot laus eq namoq mas gas housoeh ma gis nghuot; namoq mas uhjyung duot mes soeu hank laus eq namoq dah jyeidwis duot chah. 44 Namoq mas uhjyung duot mes soeu hank laus eq, dvnganhmoq dah jyeidwis duot bas jungh. 45 Khasoeh ge lyis, hau Cangsoeu Lo gas phuqsoe kham das xiklyis jweh los zis ma nghuot. Phuqsoe das zis yahge nyoshoq lyis khyuot yoeus das xiklyis, nyah kang dyei das zis dvjweh los, ge. 46 Nyamoq Yerikho wus mas jweh las nyang gas nyah changlo jens yahge dius moqjens yah dvgeh Yerikho masyah thuq loh lyis Timiu dah lo nyoqjet Batimiu gas choyvm mas tsung lha dung zo nyeis. 47 Nazaret phoq Yesu nghuot zis lyis xauhgyo lyis nyang kaiq las, Dawi dah Lo Yesu eh, ngos lyis nhaiqnyen aq, ge. 48 Nyang samlo nyeis das xiklyis nyoshoq moq nyang lyis tung toh, nghuot laus eq nyang gas zes kaiq las, Dawi dah Lo eh, ngos lyis nhaiqnyen aq, ge. 49 Yesu gas yap las, Nyang lyis khi los aq, ge. Housoeh las nyamoq gas hau nyoqjet soeu lhyi lui zoh lyis yah, Yomhuont aq, toq aq, nyang nvng lyis khi nyeis, ge. 50 Nyang gas nyah dyi khyuot lhwih tyamp lha Yesu jyank mas tsangh toq loh. 51 Yesu nyang lyis taiq zis gas, Ngos nvng lyis cha kuot dyei das zis o lah, ge. Nyoqjet soeu nyang lyis taiq zis gas, Svra eh, ngah nyoq doms nyvng nhang aq, ge. 52 Yesu nyang lyis taiq, Suh loh aq, nah lomsjingh zis gas nvng lyis gis los nhang goeus, ge. Houjang yah nyah nyoq nyvng los las, gyung cho mhayah Yesu thang mha chank loh.
1 Gvshih nyamoq Yerusalem yahge Tsanlun boms nvm, Betphage yahge Bethani wukhau mha jweh los lyis, nyang nyah changlo aiq yuk lyis nhang lha taiq kat zis gas, 2 Nah aiq yuk xik mas dah wukhau mha loh geh: houmha wvng loh yah dvyih hank eq ma ji ku shih dah mauhlyihzoe lo twih toh zis lyis nah aiq yuk nyvng das: hauh yvlyis phui she los geh. 3 Dvyuk yuk nah aiq yuk lyis chamus housoeh kuot goh lah, ge nyei lyis nah aiq yuk gas, Yhensain hauh yvlyis yhung chah. Nyang hauh yvlyis lvnyap doms tauh dyei das oen geh, ge. 4 Nyah aiq yuk loh las choyvm khomh nghe pheh twih toh dah mauhlyihzoe lyis nyvng. Nyamoq hauh yvlyis phui nyeis lyis, 5 houmha yap joq bang dvyhamh gas, Nah aiq yuk hauh mauhlyihzoe lyis chamus phui goh lah, ge nyei. 6 Yesu nyah aiq yuk lyis vmingh dyei kat vgus nyamoq lyis tsain taiq. Housoeh las nyamoq gas nyah aiq yuk lyis yoeus nhang. 7 Hauh uhlyis nyah aiq yuk gas, hau mauhlyihzoe lyis Yesu jyank mas she loh las, hauh thoq mas nyamoq dah dyimis nyhoeuh las, nyang houmha ji. 8 Nyoshoqmoq eq nyamoq dah dyi yah cho mha tsain nyhoeuh dyei. Gohtoeu dvyhamh bang gas pa mha dah saiq kyang zan las cho mha nyhoeuh dyei. 9 Xik pheh loh bang yahge nungs pheh chank bang gas kaiq las, Mangso lhyi chungh goh! (Hosana!) Yhensain dah nyings mas jweh los soeu ka ngelhoq: 10 Yhensain nyings mas jweh los das dah yah Uwus Dawi dah munghdan gas ngelhoq: Nyhang thank Mangso lhyi chungh goh, ge. 11 Nyang Yerusalem mas wvng loh las, yhenmuh mas eq wvng loh. Vyhang dvnganh zis lyis dye yoeuh lyis mau chuot los las dvci aiq yuk yah dvgeh Bethani pheh thuq loh. 12 Nungs nvp nyamoq Bethani masyah thuq los lyis, nyang wom yuot. 13 Housoeh vhuq moengh joq dah maiphang dvzains lyis nyang we masyah nyvng kat las, houmha shih dvlom lom xauh yoeus mvbeh ge nghamh las loh. Houmha jweh lyis, maiphang shih shih nyos ma nghuot yvmvyah vhuq lyis kyingh dvnyvng. 14 Housoeh las Yesu hauh yvlyis, Hank khanhamp eq nah vshih ma doms zo lo bas jungh, ge. Nyah changlo jens eq hauh zis lyis xauhgyo. 15 Nyamoq Yerusalem mas jweh lyis, hau yhenmuh mas eq nyang wvng loh las hau yhenmuh khau mha kaih ungh kaih wis bang lyis khat thuq tyamp; ngwis thaiq bang dah kihgus yahge khotjyauh ungh bang dah tank lyis eq toeu phanh tyamp. 16 Nyang hau yhenmuh mas hank lyis khuq dvkhyvp eq ma chi lai nhang. 17 Nyang nyamoq lyis jyauh las taiq zis gas, Ngah yhen ka dius nyau khanghmuh shvmanh dung yhen, ge lui das ge lhaih toh ma nghuot lhyeh? Nghuot laus eq namoq gas hauh yvlyis khyanktau khyung tsain kuot, ge. 18 Maussauh lhaih bang yahge phudyei uhjyung jens hauh zis xauhgyo lyis, Yesu lyis sat das cho tsain xo. Khasoeh ge lyis dius dvnganhmoq gas nyang jyauh cho lhyi mauh yvmvyah nyamoq gas nyang lyis gyuk nyeis. 19 Nyensyo jweh los las wus nghe pheh thuq loh. 20 Nvpsangh lyis nyamoq suh lai loh lyis hau maiphang zains gas vnyet eq cheq kyuk joq yvlyis nyamoq nyvng. 21 Housoeh Petru nghamh soh los las nyang lyis taiq zis gas, Svra eh, yoeuh aq, nvng nhoengh dah maiphang zains gas kyuk tyamp goeus, ge. 22 Yesu nyamoq lyis phuk taiq zis gas, Mangso lhyi lomsjingh geh. 23 Ngos namoq lyis jyoengh taiq bah, hank laus eq khamkhvv ehnyet ma bos bos vsainnyang taiq zis yah dvyhangteh bweh das, ge lomsjingh nghuot lyis gas haih boms lyis, Nvng ywi las thomh mas cheh wvng aq, ge lyis nvng taiq vgus bweh das. 24 Housoeh las ngos namoq lyis taiq bah, namoq o zis shvmanh dung lyis namoq yoh yoeus goeus oen loms lyis, namoq xauh yoeus das. 25 Shvmanh dung las yap joq uhlyis, dius dvyuk yuk nvng lyis dvja ja toq lhoq cu lhyi maukhung mha namoq dah Uwus gas namoq dah yobos lyis yoh khyuot tyamp dyei bas jungh, nyah yobos lyis khyuot dyei aq. 26 Namoq nyah yobos ma khyuot dyei lyis, maukhung mha namoq dah Uwus gas namoq yobos lyis ma khyuot dyei, ge. 27 Nyamoq gas Yerusalem mas doms jweh loh: nyang yhenmuh khau mha suh loh lyis, phudyei uhjyung jens, maussauh lhaih bang yahge logis jens nyah jyank mas jweh lyih las, 28 Nyang lyis taiq zis gas, Nvng gas chah vmingh yah kuot? Nvng lyis haih vmingh hank dyei, ge. 29 Yesu nyamoq lyis phuk taiq zis gas, Ngos namoq lyis dang dvkhonh nyei yoeuh bah, ngos lyis phuk taiq geh, housoeh lyis ngos chah vmingh yah heinyhoq zis kuot yvlyis ngos namoq lyis taiq kyoh das. 30 Yohan dah jeisnyhop cho ka maukhung mhayah nghuot lah? Dius masyah nghuot lah, ngos lyis taiq kyoh geh, ge. 31 Nyamoq gas nyang changh nyang taiq goh las, Maukhung mhayah nghuot oen yang taiq lyis gas, Housoeh lyis namoq nyang lyis chamus ma lomsjingh goh lah, ge das. 32 Nghuot laus eq yang nyang lyis dius masyah nghuot oen das lah? Nyamoq moqjens lyis gyuk: khasoeh ge lyis Yohan gas lvpe jyoengh nghuot zis lyis dvnganhmoq jingh, ge. 33 Housoeh las nyamoq gas Yesu lyis, Ngamoq ma seq, ge phuk taiq. Yesu nyamoq lyis taiq zis gas, Ngos haih muh chah vmingh yah kuot zis namoq lyis ma taiq kyoh das, ge.
1 Nyang nyamoq lyis dangtoeuq yah taiq xi loh zis gas, Dius dvyuk zvbiq dvkhyam ba tsungh toh lho lha, yvmlhaink yah khyam kyamp las, zvbiq nyhet zwvng eq doeu toh. Tyoeuq zvm eq thung lho lha, khyam muh zwi bang lyis tsoeuh dyei khoq las we mau pheh loh. 2 Shishenh jweh lyis, khyam tsoeuh zwi bang jyank masyah zvbiq shih gvmboms xauh yoeus das xiklyis jyeidwis dvyuk lyis nhang kat. 3 Nyamoq gas nyang lyis nyhik yoeus, bat las gungskom nhang kat. 4 Nyang gohtoeu jyeidwis dvyuk lyis nyamoq jyank mas doms nhang kat. Nyamoq gas hauh soeu dah uhloms lyis bat las, xoq lhoeu phuh kat. 5 Tsai, nyang gohtoeu dvyuk doms nhang lhyi, nyamoq hauh soeu lhyi sat. Gohtoeu nyoshoq yuk lyis nhang kat lyis eq, nyamoq gas dvyhamh lyis bat pop, dvyhamh lyis sat. 6 Nyang jyetdap lo dvyuk nyeis shih: ngah lo lyis gas nyamoq phauh das ge nghamh las, thang thank lyis nyang lyis eq nyamoq jyank mas nhang kat. 7 Nghuot laus eq khyam kuot nyang changh taiq goh zis gas, Haih soeu ka yhenzis zom das soeu nghuot, los geh, nyang lyis sat goh. Housoeh lyis nyah yhenzis gas yah zis nghuot das, ge. 8 Housoeh nyamoq gas nyang lyis nyhik lho lha sat las, zvbiq khyam nghe pheh doeuh tyamp. 9 Housoeh yvmvyah zvbiq khyam sain ka, khasoeh kuot das lah? Nyang gas khyam tsoeuh zwi bang lyis los mhont las hauh zvbiq khyam gohyuk lyis dyei das. 10 Lhaihtoh dang mas, Yhen tsuk bang peq tyamp dah luklom gas Yhenthunk lukzains bweh los. 11 Haih zis gas Yhensain nyang kuot las, yah xikkhonh mas mauhphoh zis nghuot, ge zis lyis namoq ma nghap yoeuh goh lhyeh, ge. 12 Housoeh las nyamoq gas nyang lyis nyhik das zis tsain yomkat laus eq moqjens lyis gyuk: khasoeh ge lyis haih dangtoeuq gas, nyang nyamoq lyis toeuq las taiq yvlyis nyamoq seqgyo las, nyamoq gas nyang lyis toh khoq las thuq loh. 13 Nyah dang mas yobos xo lha nyang lyis nyhik das xiklyis, nyamoq gas Pharishe moq yahge Herodia ge bang dvyhamh lyis nyah jyank mas nhang kat. 14 Housoeh nyamoq jweh lyis taiq zis gas, Svra eh, nvng gas jyoeng zis nghuot las, hank lyis eq gungsyaus ma yaus, dius dah nyoqnho lhyi ma yoeuh, Mangso dah cho lhyi jyoeng khyvlyis jyauh nyeis zis gas ngamoq seq. Hwankti Kesar lyis khoengh kat das zis lyi bos lah, ma bos lah? 15 Ngamoq kat das au, ma kat das au, ge. Nghuot laus eq nyang gas yamoq dah ehnyet gis guons kuot zis seq las nyamoq lyis taiq zis gas, Namoq ngos lyis chamus shi yoeuh goh lah? Hauh ngwis dvkyvp ngah jyank mas chi los geh, ngos yoeuh bah, ge. 16 Housoeh las nyamoq ngwis dvkyvp yoeus los lyis, nyang nyamoq lyis taiq zis gas, Haih zis hank gungslho yahge maussauh dap lah, ge. Nyamoq gas, Kesar zis nghuot, ge. 17 Housoeh las Yesu nyamoq lyis phuk taiq zis gas, Kesar zis nghuot lyis gas Kesar lyis dyei geh; Mangso zis nghuot lyis gas Mangso lhyi dyei geh, ge. Nyamoq gas nyang lyis svsoh tsain mauh. 18 Hauh thang lhyi, Dwis toq cho ma bos ge taiq dah Saduke moq nyah jyank mas los nyei zis gas, 19 Svra eh, Yhensain nyhiq bos dah vmang, lo ma bos khoq shei lhyi, vmang dah chauhmuh lyis vnoeuh shoeuh las vmang dah vshih tsoq bas jungh ge Moshe ngamoq lyis lhaih toh dyei. 20 Housoeh teh dah vmang vnoeuh moq nyhet yuk nyeis. Xik lyis dah vyuk gas phoengh hwank las nyau ma bos shei khoq. 21 Aiq vyuk chauhmuh shoeuh las lo ma bos shei khoq. Somh vyuk eq housoeh vgus nghuot. 22 Hau nyhet yuk gonh nyang lyis shoeuh laus eq lo ma bos. Thang thank lyis hauh vmesbih eq shei loh. 23 Gvshih hau dwis toq los uhlyis, nyang gas hank dah yhensain nyhiq nghuot das lah? Khasoeh ge lyis nyang gas nyhet yuk moq yah phoengh wvng goeus, ge. 24 Yesu nyamoq lyis phuk taiq zis gas, Namoq lhaihtoh dang lyis ma seq, Mangso dah yomsoq cho lhyi eq ma seq yvmvyah shuot nyeis ma nghuot lhyeh? 25 Shei bang dwis toq lyis, nyamoq nyi hwank zis ma bos: lonyi dyeizo zis eq ma bos nyamoq gas maukhung mha loeuswons bang teh dvnghuot lo. 26 Hauh thoq lyis shei bang dwis toq los das cho yah sen lha, hauh mhanhgyomh mas Mangso ka, Ngos gas Abraham dah Mangso, Isak dah Mangso, Yakop dah Mangso nghuot, ge Moshe lhyi taiq toh dang lyis Moshe dah maussauh mas namoq ma nghap yoeuh goh lhyeh? 27 Nyang gas shei bang dah Mangso ma nghuot, dwis bang dah Mangso dvnghuot. Housoeh yvmvyah namoq svsoh shuot goeus, ge. 28 Maussauh lhaih bang mas dvyuk los las nyamoq taiq phyen-goh yvlyis xauhgyo zis yahge nyang vlhomuh phuk taiq yvlyis yoh seq las nyang lyis nyei zis gas, Tyingtoh dang dvnganh mas khah zis zes yhaugyen lah, ge. 29 Yesu nyang lyis phuk taiq zis gas, Israel jens eh, gyo yoeus geh, Lyi dvnganh yvmas cangxeih vkoeuq gas, Yhensain yah Mangso ka Yhensain dvyuk kyingh nghuot. 30 Yhensain nah Mangso lhyi nah nhaiqlom dvnganh yah, nah dyos dvnganh yah, nvng dolhain zis dvnganh yah, nah yom dvnganh yah yoh jyetdap das. Haih zis gas cangxeih tyingtoh dang nghuot. 31 Aiq vkoeuq gas, Nvng nah yhenkyoh lyis nah gungs yah dvyhangteh yoh jyetdap das. Haih thoq lyis kuh dah tyingtoh dang gohtoeu ma bos lo, ge. 32 Maussauh lhaih soeu nyang lyis taiq zis gas, nghuot goeus svra eh, nvng taiq dah dang jus joq: Mangso dvyuk kyingh dvnghuot, nyah thoq lyis gohtoeu hank ma bos lo. 33 Hauh thoq lyis nhaiqlom dvnganh yah, seq gyo zis dvnganh yah, yom dvnganh yah nyang lyis jyetdap das zis yahge vsainnyang yhenkyoh lyis vsainnyang gungs yah dvyhangteh jyetdap das zis gas, nyi ngheq phudyei zis yahge lomhxangh dvnganh thoq lyis zes joq, ge. 34 Hauh soeu ka yik zis yah phuk taiq nyeis yvlyis Yesu nyvng lyis, Nvng gas Mangso munghdan yah ma we, ge nyang lyis taiq. Hauh thang lhyi ka, nyang lyis hank eq cha ma womh nyei lo. 35 Yesu yhenmuh mas jyauh uhjyangh phuk taiq zis gas, Khristu gas Dawi dah lo nghuot, ge maussauh lhaih bang khasoeh yoh taiq lah? 36 Khasoeh ge lyis Dawi nyah gungs nyang Gyingshang Dyos masyah taiq zis gas, Hauh Yhensain ngah Yhensain lhyi taiq zis gas, Ngos nah jeswus lyis nah khyei o mha toh shoq, Nvng ngah loqyos shot pheh tsung toh aq, ge. 37 Housoeh las Dawi nyang, nyang lyis Yhensain ge. Housoeh lyis nyah lo khasoeh yoh nghuot das lah, ge. Moqphung ka nyang lyis gausyis zis yah tsain gyo dyei. 38 Nyang nyamoq lyis jyauh uhlyis yah taiq zis gas, Maussauh lhaih bang lyis zaih geh: nyamoq gas dyixing wuot las suh mes, kaih mas phauh nyang zis yah jeshuh das zis eq, 39 Lyi jungs mas gis thank tsunggus lyis eq, pwe mha gis thank joqyos lyis eq tsain o mes. 40 Chauhmuh jens dah yhen lhyi kuot zo kuot shuk las, gis guons kuot zis yah shvmanh xing xing dung: hauh bang gas zes than dah dang thang thyet zis xauh das. 41 Yesu gas ziskwi yah twi twi tsung lha, moqjens houmha ngwis kat yvlyis yoeuh nyeis: dis bang nyoshoq gas ngwis nyo nyo tsain kat. 42 Hauh uhlyis nyungs dah chauhmuh dvyuk lyih las dyvpson dvkyvp phauh dah thunkcent aiq kyvp kat. 43 Hauh gvng mas nyang nyah changlo jens lyis yoeuh las taiq zis gas, Ngos namoq lyis jyoengh taiq bah, hai nyungs dah chauhmuh gas, ziskwi mha kat bang dvnganh thoq lyis zes nyo shoq kat goeus. 44 Khasoeh ge lyis nyamoq dvnganhmoq gas nyamoq magons magoh yoh masyah vlu kat. Nghuot laus eq nyang gas vshoh vjyen masyah nyah kang khoeu das zis yoh zis dvnganh kat goeus, ge.
1 Nyang yhenmuh masyah thuq loh lyis nyah changlo dvyuk nyang lyis taiq zis gas, Svra eh, yoeuh aq khoek khoek dah luk yahge yhenzains yoszains tsain nghuot nyvng gah, ge. 2 Yesu nyang lyis phuk taiq zis gas, Hai kuh dah yhenzains yoszains lyis nvng nyvng lhyeh? Hauh goeu gas ma thyoq thyoq, luk dvlom thoq mas dvlom kih toh zis ma bos lo das, ge. 3 Yhenmuh yah twi twi, Tsanlun boms thoq mas nyang tsung toh uhlyis, Petru, Yaku, Yohan yahge Andre moq nyang lyis lhyenwhei nyei zis gas, 4 Heinyhoq zis khanhamp nghuot das lah? Hai dvnganh nyuk los das lyis chah vlho thuq los das lah? Ngamoq lyis taiq kyoh aq, ge. 5 Yesu nyamoq lyis phuk taiq zis gas, Namoq lyis hank eq chowhang ma shwih whang bas jungh zaih geh. 6 Khasoeh ge lyis nyoshoq moq ngah nyings masyah thuq los las, Ngos gas Khristu nghuot ge nyoshoq lyis chowhang shwih whang das. 7 Moeng zan zis yahge moeng dyoq dah loeus namoq xauhgyo lyis vchiq goh: hauh cho bweh chah, nghuot laus eq thang thank zis gas ma nghuot shih. 8 Khasoeh ge lyis, dius dvnyau yah dvnyau, munghdan dvkoeuq yah dvkoeuq jes sont goh los das. Joqyos vdeh deh mas maunyeis dwis los das. Phanghkhauq gyoh das. Nghuot laus eq heika lokhoeu nos nos xi zis dvnghuot shih. 9 Nghuot laus eq namoq gas vsainnyang gungs vsainnyang zaih geh. Nyamoq gas nhaiqbos huom mha namoq lyis kyauh tyamp das; lyi jungs mha namoq lyis batpop zis tsain xauh das; guon bang yahge hwankti jens xikkhonh mas shwih hwank las, ngah xiklyis kanghjyoeng bweh das zis xauh yap das. 10 Dius nyau dvnganh lyis Gausyis dang shih xauh taiq hoeuh das. 11 Namoq lyis soetuon bang jyank mas shwih e lha, kyauh tyamp goeus ya, namoq dang khasoeh taiq das zis vchiq goh: hauh shishenh lyis namoq lyis taiq nhang zis yah dvyhangteh taiq geh: hauh zis gas nvng taiq nyeis zis ma nghuot, Gyingshang Dyos dvtaiq nyeis. 12 Hauh uhlyis vmang gas vnoeuh lyis, vnoeuh gas vmang lyis, uwus gas vlo lyis shei yvpheh kyauh tyamp das: lo jens gas nyamoq dah nyhiphoq jens lyis jes kuot las sat nhang das. 13 Ngah nyings gvng mas dius dvnganhmoq hoeng zis namoq xauh das. Thang thank jweh shoq jhen soeu ka khyuot yoeus zis xauh das. 14 Nghuot laus eq lvpe Daniel taiq toh: lhoeu thyoq dah vchoqh vjyot zis gas ma yap vvng dah joqyos mas yap joq yvlyis namoq nyvng lyis, maussauh nghap soeu ka hauh yvlyis seqgyo bas jungh. Yuda mau mas nyeis bang gas boms pheh phang loh bas jungh. 15 Yhenkhung mha nyeis soeu ka yhen khau mha ma gyoh los goeus jungh. Yhen khau mha dvja ja yoeus loh das ge eq ma wvng loh goeus jungh. 16 Yos mas nyeis soeu eq nyah shanhzoe yoeus das zis ma tauh los goeus jungh. 17 Hauh buisnyeis lyis loshang gungs nghuot bang yahge lonoeuh nauh gvmshuk bang gas mvtanhzoe nghuot! 18 Namoq phang shishenh gas cungh lyis ma nghuot bas jungh, shvmanh dung nyeis geh. 19 Khasoeh ge lyis, Mangso nyeisjvng vsaiq gvnkhanh masyah gvshih jweh shoq ma bweh ku, thang pheh eq ma bweh lo das shanghsenh gas hauh buisnyeis gyo lyis bweh thuq los das. 20 Hauh buisnyeis lyis Yhensain nyang ma shungh dyei lyis gas, hank eq ma yoh luiq. Nghuot laus eq nyang khyen toh bang xiklyis gas, hauh buisnyeis shungh dyei goeus. 21 Hauh uhlyis dvyuk yuk namoq lyis, Yoeuh aq, Khristu heimha nyeis. Yoeuh aq, nyang thyimha nyeis, ge laus eq vjingh goh. 22 Khasoeh ge lyis ma ying dah Khristu jens yahge lvpe hwah jens thuq los las, gis bweh lyis Mangso khyen toh goeus bang lyis chowhang yoh shwih whang shoq, nyamoq vlho yahge mauh loqmuh chixoeuq das. 23 Namoq zaih geh, yoeuh aq, ngos namoq lyis dvnganh uhlhomh taiq toh. 24 Nghuot laus eq hau yaukyenh shanghsenh thang lhyi dah buisnyeis lyis buis eq soeng soeng noq los das. Lhamhmuh eq ma tso lo das. 25 Kyi eq maukhung mhayah dyet gyoh las, maukhung mha dah yomsoq nonh das. 26 Hauh shishenh lyis Cangsoeu Lo gas, yomsoq yahge phunk zainsmuh yah jyommauh yah gyoh los zis lyis nyamoq nyvng das. 27 Nyang nyah loeuswons bang lyis nhang lha, lyeis nyei shot, nyeisjvng vthang mhayah maukhung vthang mha jweh shoq nyang khyen toh bang lyis xwih tsainh das. 28 Gvshih hau maiphang zains masyah xuq yoeus geh: hauh dah vnyuk tuot las vhuq thuot los goeus ya, zvn wvng los goeus zis lyis namoq seq. 29 Houyah dvyhangteh namoq gas hau bweh los zis lyis nyvng lyis, nyang gas khomhdwang mas ni los goeus yvlyis seq geh. 30 Ngos namoq lyis jyoengh taiq bah, Haih zis ma nyuk los dvchank haq caiq ma lai das. 31 Maukhung yahge nyeisjvng lai loh laus eq ngah dang gas ma lai loh das. 32 Nghuot laus eq hauh buisnyeis yahge shishenh lyis gas hank eq ma seq: Maukhung mha dah loeuswons bang ma seq, Lo eq ma seq, Uwus kyingh dvseq. 33 Namoq hauh shishenh khanhamp nghuot zis ma seq yvmvyah zaih las zungh nyeis geh. 34 Haih zis gas, dius dvyuk nyah yhen lhyi nyah jyeidwis jens lyis kyauh toh khoq las, nyang yuk nyang toeu lhyi muh gvm dyei lho lha, khomh zungh soeu lhyi eq zungh nyeis das xiklyis vmingh dyei khoq las gyung suh loh zis yah doeusgoh. 35 Khasoeh ge lyis hauh yhensain ka gungsgvm lyis, gyoq tuon nyen lyis, nyoq nyvng zoh lyis, khah shishenh lyis jweh los das yvlyis namoq ma seq yvmvyah zungh nyeis geh. 36 Housoeh ma nghuot lyis gas, nyang nyetlos nyettant los uhlyis namoq yhet joq zis lyis los nyvng das. 37 Ngos namoq lyis taiq zis gas, dvnganhmoq lyis taiq zis nghuot las, zungh nyeis geh, ge.
1 Hauh thang lhyi aiq nyeih lyis Lhuiq Kat Pwe yahge bicheih ma kat ohlhyoq zo pwe nghuot. Hauh uhlyis phudyei uhjyung jens yahge maussauh lhaih bang gas, nyang lyis tsoek yah khasoeh nyhik las sat das dah cho tsain xo nyeis. 2 Nghuot laus eq nyamoq taiq zis gas, Pwe gyo lyis ma nghuot goeus jungh, dius hoeu toq mvbeh, ge. 3 Nyang gas Bethani mas mvnggvng dap soeu Simon dah yhen, womjus mas tsung toh lyis, vmesbih dvyuk svsoh phauh dah mura nadu coeu kat dah luk thyoeu jywang lo lyis yoeus lyih las, hauh zis lyis khwih lho lha nyah uhloms mas huot kat dyei. 4 Nghuot laus eq nyamoq dvyhamh nhaiqyo las nyang changh nyang taiq goh zis gas, Chamus haih coeu lhyi vyu vgeh kuot au? 5 Khasoeh ge lyis hauh yvlyis ngwis kyvp somhxo nyet yah ungh las nyungs bang lyis gvm dyei das zis, ge nyamoq hauh vmesbih lyis nyho. 6 Nghuot laus eq Yesu taiq zis gas, Nghuot goeus jungh, namoq nyang lyis chamus lhoeu yau goh, nyang gas ngah xiklyis gis dah muh kuot goeus. 7 Khasoeh ge lyis, nyungs bang gas vjangh namoq yah dvgeh nyeis las, namoq nyamoq lyis gis zis kuot dyei mes uhlyis khanhamp eq yoh kuot dyei; nghuot laus eq ngos gas namoq yah vjangh ma nyeis. 8 Nyang gas nyang duot nyhoq kuot goeus: nyang coeu huot kat dyei zis yah ngos lyis ba nyhop das xiklyis sont zis nghuot. 9 Ngos namoq lyis jyoengh taiq bah, mungkvn gonh mas haih gausyis dang taiq hoeuh loh dah joqyos khanghmuh mas nyang lyis soh das nyhenshang hai nyang kuot khoq cho lhyi taiq kyoh das, ge. 10 Changlo dvci aiq mas zis dvyuk nghuot dah Yudas Iskarot gas, Yesu lyis phudyei uhjyung jens jyank mas phanhlyen dyei das zis nyamoq jyank pheh e loh. 11 Hauh zis lyis nyamoq xauhgyo lho lhyi gaus las, nyang lyis ngwis dyei das dangthoengh tsain toh. Housoeh las nyang lyis yoh phanhlyen dyei das toeuh xo nyeis. 12 Bicheih ma kat ohlhyoq zo pwe cangxeih nyeihyo Lhuiq Kat Pwe lomhxangh lainh das yvnglo phudyei uhlyis, nyah changlo jens nyang lyis nyei zis gas, Nvng Lhuiq Kat Pwe zo das xiklyis nvng ngamoq lyis khamha loh sont toh dyei langh nhang mes lah, ge. 13 Nyang nyah changlo aiq yuk lyis nhang lha taiq kat zis gas, Wugungs mas wvng loh geh; jeis-jywang wuq soeu dvyuk nah aiq yuk yah xauhgoh das, nyah thang mha chank loh geh. 14 Nyang khalhye wvng loh yvmas, hauh yhensain lhyi, Ngos yahge ngah changlo jens hau Lhuiq Kat Pwe zo das dah boenghdoq yvp khah zis nghuot lah, ge Svra nyei nhang kat, oen taiq geh. 15 Hauh uhlyis nyang gas sont toh dah yhenthoq yvpmuh dvyvp tuonh shet das, yah nyhenshang houmha ba sont toh langh geh, ge. 16 Hauh changlo tang thuq loh las, wugungs mas wvng loh lyis nyang nyah aiq yuk lyis taiq kat vgus nyvng las, hau Lhuiq Kat Pwe nyenhcon lhyi tsain ba sont toh. 17 Nyenhthang lhyi, nyang hau dvci aiq yuk moq yah dvgeh jweh loh. 18 Nyamoq tsung lha wom tsain zo nyeis lyis Yesu taiq zis gas, Ngos namoq lyis jyoengh taiq bah, namoq mas dvyuk ngos yah dvgeh wom zo soeu ka ngos lyis phanhlyen das, ge. 19 Nyamoq kuk las dvyuk thang lhyi dvyuk, Ngos nghuot lah, ge tsain nyei. 20 Nyang nyamoq lyis phuk taiq zis gas, Dvci aiq yuk mas dvyuk, bvn khau mha ngos yah dvgeh jen zo soeu nghuot. 21 Cangsoeu Lo gas nyah cho lhaih toh zis yah dvyhangteh xauh chah, nghuot laus eq Cangsoeu Lo lyis phanhlyen soeu ka mvtanhzoe nghuot! Nyang ma khoeu los ya nyah xiklyis zes gis das, ge. 22 Nyamoq housoeh zo nyeis lyis Yesu gas, ohlhyoq yoeus las shvmanh thang lhyi khyiq lho lha nyamoq lyis dyei uhlyis yah taiq zis gas, Namoq yoeus zo geh: haih zis gas ngah gungs nghuot, ge. 23 Nyang kom lhyi eq yoeus las dye chungh thang lhyi nyamoq lyis dyei lyis nyamoq dvnganhmoq hauh zis tsain shuk. 24 Nyang nyamoq lyis taiq zis gas, Haih zis gas nyoshoq moq xiklyis huot tyamp, ngah suih yah kuot toh thanghchvp nghuot. 25 Ngos namoq lyis jyoengh taiq bah, Mangso dah munghdan mas zvbiq saiq lyis ngos xauh shuk buisnyeis jweh shoq, zvbiq shih mas zis lyis ngos ma shuk lo das, ge. 26 Nyamoq chunghthwe dvkoeuq chungh lho lha, Tsanlun boms pheh thuq loh. 27 Yesu nyamoq lyis taiq zis gas, Khvnyens namoq dvnganhmoq ngah gvng mas ehnyet dyet das: Khasoeh ge lyis, Yvng yoeuh soeu lhyi ngos bat sat las, Yvng jens dyos loh das, ge lhaih toh. 28 Nghuot laus eq ngos gas dwis toq los nhang thang lhyi, Galile mau mas ngos namoq xik mas loh langh das, ge. 29 Petru nyang lyis taiq zis gas, Dvnganhmoq tyamp khoq laus eq ngos gas ma tyamp das, ge. 30 Yesu nyang lyis taiq zis gas, Ngos nvng lyis jyoengh taiq bah, khvnyens nyang gyoq aiq nyen ma tuon shih lyis nvng ngos lyis somh lhain he tyamp das, ge. 31 Petru gas, Ngos nvng yah dvgeh shei chah lyis eq ngos nvng lyis ma he tyamp das, ge taiq. Nyamoq dvnganhmoq eq vgus housoeh taiq. 32 Nyamoq gas Gesemani ge yvmas jweh loh lyis, nyang nyah changlo jens lyis taiq zis gas, Ngos shvmanh dung uhlyis namoq heimha tsung langh geh, ge. 33 Nyang gas Petru, Yaku, Yohan moq lyis shwih las, nyang svsoh chiqjyen zis yah ehnyet nyo nyeis. 34 Nyang nyamoq lyis taiq zis gas, Ngos shei das shoq nhaiqkuk nhaiqngis nyeis. Namoq heimha phuksohlhaiq mus nyeis langh geh, ge. 35 Hou mhayah dvthungh loh shih lho lha nyeisjvng mas gop las shvmanh dung zis gas, Gis bweh lyis hauh shishenh ngah jyank masyah lai loh nhang aq. 36 Aba, Uwus eh, nvng dvnganh zis lyis yoh bweh nhang: haih kom lhyi ngah jyank masyah lhuiq tyamp dyei aq, nghuot laus eq ngos o khyvlyis ma nghuot, nvng o khyvlyis dvnghuot bas jungh, ge. 37 Nyang doms los lyis, nyamoq yhet joq yvlyis nyvng las Petru lyis taiq zis gas, Simon eh, nvng yhet muih joq lhyeh? Dvshishenh eq nvng ma yoh zungh langh lhyeh? 38 Phuksohlhaiq mus las shvmanh dung nyeis geh. Housoeh ma nghuot lyis namoq shiwu zis xauh das. Dyos gas mes laus eq gungsshoh gas yomnhuk joq, ge. 39 Tsai, nyang doms loh shih las vkhang dung dah dang khonh doms dung nyeis. 40 Doms tauh los lyis nyamoq doms yhet joq zis lyis los nyvng. Housoeh nyamoq gas svsoh yhet mes las nguis nyeis shih yvmvyah nyang lyis khasoeh phuk taiq das zis yangh ma seq. 41 Housoeh nyang somh vlhain tauh los las nyamoq lyis taiq zis gas, Namoq yhet las lvlaihsoe no nyeis shih goh lhyeh? Geh goeus, shishenh jweh goeus, yoeuh aq Cangsoeu Lo gas yaunos wons bang loq mas phanhlyen dyei goeus. 42 Toq geh, yang loh goh, yoeuh aq, ngos lyis phanhlyen das soeu ka jweh los goeus, ge. 43 Nyang taiq nyeis shih lyis, changlo dvci aiq yuk mas dah Yudas yahge phudyei uhjyung jens, maussauh lhaih bang, logis jens jyank masyah bang moengsa yahge dunghkuq chi dah moqjens nyetlos nyettant los. 44 Nyang lyis phanhlyen soeu ka nyamoq lyis, Ngos bvlot tanh soeu ka hauh soeu nyang nghuot goeus. Nyang lyis nyhik las vlhomuh shwih loh geh, ge vsoh dyei toh vgus. 45 Nyang jweh yah dvyih nyah jyank mas dvlhain dvm e lha, Svra eh, ge bvlot tanh. 46 Nyamoq gas Yesu lyis dap nyhik las shwih loh. 47 Vyvm mas yap joq soeu dvyuk gas moengsa she lha Phudyei Zainsmuh jyeidwis dah no jap thyet dyei. 48 Yesu nyamoq lyis taiq zis gas, Namoq gas khyanktau nyhik das teh moengsa, dunghkuq chi lha ngos lyis nyhik das zis los goh lhyeh? 49 Jyauh uhlyis yah yhenmuh mas ngos namoq yah nyeih yau nyeih dvgeh nyeis laus eq namoq ngos lyis ma nyhik; nghuot laus eq lhaihtoh dang nyuk los chah, ge. 50 Nyamoq dvnganhmoq yah nyang lyis tyamp khoq las cangh loh. 51 Shohchen mha jeimuh mis khuk chi dah loyvm dvyuk nyah thang mha chank loh. Nyang lyis nyamoq yah nyhik loh. 52 Nyang gas hau jeimuh mis lyis khyuot toh khoq las shohchen cangh loh. 53 Nyamoq gas Yesu lyis Phudyei Zainsmuh jyank mas shwih loh uhlyis, phudyei uhjyung jens, logis jens yahge maussauh lhaih bang dvnganhmoq huom toh. 54 Petru gas Phudyei Zainsmuh dah ganthoq mha jweh shoq we we masyah chank loh las zungh bang yah dvgeh joq tsung gvng nyeis. 55 Gvshih Phudyei uhjyung jens yah dvgeh nhaiqbos dvhuom gonh Yesu lyis yoh sat das dah kanghjyoeng tsain xo laus eq hank eq ma yoh. 56 Khasoeh ge lyis, nyoshoq moq nyah cho ma ying kanghjyoeng tsain kat laus eq, nyamoq dah kanghjyoeng dang ma tsain huq. 57 Hauh uhlyis dvyhamh toq las nyah cho ma ying kanghjyoeng tsain kat zis gas, 58 Haih soeu ka loq yah kuot toh dah hai yhenmuh lyis, ngos thyoq tyamp las somh nyeih gyo lyis loq yah ma kuot kuot, gohtoeu dvkoeuq doms kuot das, ge nyang taiq dang lyis ngamoq xauhgyo, ge. 59 Nghuot laus eq nyamoq dah kanghjyoeng dang gas ma huq shih. 60 Hauh uhlyis Phudyei Zainsmuh gas nyamoq xikkhonh mas toq yap las, Yesu lyis nyei, Nvng lyis tyixo kanghjyoeng kat nyeis zis cha nghuot, nvng ma phuk taiq lhyeh, ge. 61 Nghuot laus eq nyang dvkhonh eq ma phuk taiq, samlo dvnyeis. Tsai, Phudyei Zainsmuh nyang lyis nyei zis gas, Nvng gas Ngelhoq soeu dah Lo ge, Khristu nghuot lah, ge. 62 Yesu taiq zis gas, Ngos nghuot. Hauh thoq lyis Cangsoeu Lo gas Yomsoq dah loqyos shot pheh tsung lha, maukhung jyommauh yah jweh lyih yvlyis namoq nyvng das, ge. 63 Phudyei Zainsmuh gas, nyah dyi lang chuiq zis yah taiq zis gas, Yang chah kanghjyoeng tsain chah shih lah? 64 Hauh loeusmus soqzo dang lyis namoq vxauhgyo shih goh lah? Namoq khasoeh dang thang thyet goh? Nyamoq dvnganhmoq gas, Nyang shei mon soeu nghuot, ge dang thang tsain thyet. 65 Dvyhamh gas nyang lyis svkanh dyeh gyuon. Nyah nyoqnho lhyi nghop dyei lho lha, nyang lyis chwiq las, Lvpe pe aq, ge nyang lyis taiq. Zungh bang eq nyang lyis tyuk las shwih loh. 66 Petru gas hauh yhen o ganthoq khau mha nyeis uhlyis, Phudyei Zainsmuh dah uhkung nyhiq dvyuk los las, 67 Petru joq gvng nyeis yvlyis nyvng lyis, nyang lyis yoeuh las taiq zis gas, Nvng eq Yesu ge dah Nazaret phoq yah nyeis ku, ge. 68 Nghuot laus eq nyang he lha taiq zis gas, Ngos ma seq, nvng cha taiq zis eq ngos ma seqgyo, ge. Nyang khyam khomh pheh thuq loh. Hauh uhlyis gyoq tuon los. 69 Hauh uhkung nyhiq nyang lyis doms nyvng lho lhyi, vyvm vwi yap joq bang lyis taiq zis gas, Haih soeu eq nyamoq mas zis dvyuk nghuot, ge. 70 Nyang gas doms he. Hauh thang lhyi dvsoq lyis vyvm vwi mas tsain yap joq bang eq Petru lyis taiq zis gas, Nvng nyamoq mas zis dvyuk jyoengh nghuot: nvng Galile dius eq nghuot, ge. 71 Housoeh las nyang gas, Namoq taiq soeu lhyi ngos ma seq, ge nhoengh nhoengh khan khan maukhi. 72 Houjang gyoq aiq nyen tuon los. Housoeh las Petru gas, Gyoq aiq nyen ma tuon shih lyis nvng ngos lyis somh lhain he tyamp das, ge Yesu nyang lyis taiq dang lyis soh los las svsoh ngaus.
1 Nvpsangh yah phudyei uhjyung jens gas logis jens, maussauh lhaih bang yahge nhaiqbos huom gonh xam nyoq goeus las Yesu lyis twih lho lha Pilat jyank mas loh shwih kyauh tyamp. 2 Pilat nyang lyis taiq zis gas, Nvng Yuda hwankti nghuot lhyeh, ge. Nyang phuk taiq zis gas, Nvng taiq nyeis, ge. 3 Phudyei uhjyung jens yah nyang lyis nyoshoq ja kauq. 4 Housoeh Pilat nyang lyis doms nyei zis gas, Nvng cha eq ma phuk taiq lhyeh? Yoeuh aq, nvng lyis nyamoq hounyhoq tyixo nyeis, ge. 5 Nghuot laus eq Yesu cha eq ma doms phuk taiq yvmvyah Pilat mauh. 6 Gvshih hauh pwe mas nyamoq lhuiq kat nhang mes dah thung lungh bang dvyuk yuk lyis nyang gyangh lhuiq kat dyei. 7 Gomloeus toq yvmas dius sat las yobos zangh dah Baraba ge soeu gomloeus toq bang yah dvgeh thung lungh joq. 8 Moqjens gas Pilat jyank mas e lha, nyang nyamoq lyis vjangh yah kuot dyei teh kuot dyei das xiklyis tsain sang zoh loh. 9 Pilat phuk taiq zis gas, Namoq nyhenshang Yuda hwankti lhyi lhuiq kat dyei nhang mes lhyeh, ge. 10 Khasoeh ge lyis phudyei uhjyung jens gas noh gvng mas nyang lyis kyauh tyamp yvlyis nyang seq. 11 Nghuot laus eq phudyei uhjyung jens gas, nyamoq xiklyis Baraba dvlhuiq kat dyei bas jungh, ge moqjens lyis jaus jyonh nyeis. 12 Pilat nyamoq lyis doms phuk taiq zis gas, Housoeh lyis namoq Yuda hwankti ge lui soeu lhyi ngos khasoeh kuot das lah, ge. 13 Nyamoq gas, Nyang lyis tapzains mas taplhangh toh aq, ge doms tsain kaiq. 14 Pilat nyamoq lyis taiq zis gas, Chamus lah? Nyang ma gis zis cha kuot cu lah, ge. Nyamoq doms zes kaiq zis gas, Nyang lyis tapzains mas taplhangh toh aq, ge. 15 Pilat eq moqphung lhyi ehnyet lhoq tap dyei mes las, nyamoq xiklyis Baraba lyis lhuiq kat dyei las, Yesu lyis gas lyuk lho lha tapzains mas taplhangh tyamp das xiklyis kyauh tyamp. 16 Jeslo jens gas Yesu lyis mungh zau yhen mha shwih loh las nyamoq jes dvdvp gonh lyis khi tsainh toh. 17 Nyamoq gas, nyang lyis nesnoq dah dyimis gvm huot, zoeu yah zaiq dah buismuk eq nyah uhloms mas tsungh dyei lho lha, 18 Yuda hwankti kang xing bas jungh, ge nyang lyis tsain kaiq. 19 Nyamoq gas nyah uhloms lyis jvmbu yau yah lyuk, svkanh eq dyeh gyuon, phvluk thuk las nyang lyis tsain paiq. 20 Nyamoq gas nyang lyis dye jwangh goeus ya, hau nesnoq dyixing lyis khyuot yoeus lho lha nyah dyi doms gvmhuot. Housoeh nyang lyis tapzains mas taplhangh das zis shwih thuq loh. 21 Alesanda yahge Rufu dah uwus, Kureni Simon gas Pa mhayah wvng los nyeis yvlyis nyamoq gas nyang lyis Yesu dah tapzains tsoengh wuq nhang. 22 Nyamoq gas nyang lyis Golgotha ge yvmas shwih loh: hauh dang jyuk gas Uhkhangh ge dah joqyos nghuot. 23 Nyamoq gas mura yah lhoeuq dah zvbiq nyang lyis gvmshuk. Nghuot laus eq nyang hauh yvlyis ma lhom yoeus. 24 Nyamoq gas nyang lyis dye taplhangh thang lhyi, nyah dyi lyis hank yoeus vvng ge tsain doeugoh.. 25 Nyang lyis nyamoq lhangh tyamp zis gas, gau shishenh lyis nghuot. 26 Hauh thoq mas YUDA HWANKTI ge nyang lyis kauq dah dang khonh lhaih tap toh. 27 Nyamoq gas khyanktau aiq yuk lyis eq, nyah loqyos shot pheh dvyuk, loqwi shot pheh dvyuk nyang yah dvgeh tsain taplhangh toh. 28 Houka, Nyang lyis lyi lhyweq bang yah bos suon tap tyamp goeus, ge dah lhaihtoh dang nyuk los. 29 Suh e loh bang eq ma phauh ma nyang lainkamh nocwih kuot las, Ah! yhenmuh lyis thyoq tyamp las somh nyeih gyo lyis doms kuot soeu eh, 30 Nvnyang gungs lyis khyuot yoeus las tapzains masyah gyoh los aq, tsain ge. 31 Phudyei uhjyung jens eq houyah dvyhangteh nyang lyis jwangh las, maussauh lhaih bang yah nyamoq nyang taiq goh zis gas, Nyang gohyuk lyis gas khyuot yoeus, nyang gungs nyang gas ma yoh khyuot yoeus nyvng! 32 Ngamoq nyvng las yoh lomsjingh bas jungh, hauh Israel dah hwankti, Khristu tapzains masyah gvshih gyoh los aq, ge dvyuk dvyuk tsain taiq jwangh. Nyang yah dvgeh tapzains mas lhangh toh vzomh eq nyang lyis ma phauh ma danh tsain taiq. 33 Nyeih gungs jweh lyis dvmau gonh chuot joq zis somh shishenh jweh shoq nghuot. 34 Somh shishenh lyis Yesu thwe zainsmuh yah kaiq zis gas, ELOI, ELOI LEMA SABAKTHANI ge. Hauh vjyuk gas, Ngah Mangso eh, ngah Mangso eh, nvng ngos lyis chamus doeuh tyamp toh lah, ge zis nghuot. 35 Hauh vyvm mas yap joq bang dvyhamh gas hauh zis xauhgyo las taiq zis gas, Yoeuh aq, nyang Eliya lyis lui nyeis, ge. 36 Hauh uhlyis dius dvyuk wuih los las khotlhyop dvjop mas jeis jyen jen lho lha jvmbu lyang mas tap las nyang shuk das xiklyis dyei las taiq zis gas, Eliya nyang lyis vlyih yoeus khyoq das lah, yamoq yoeuh goh, ge. 37 Yesu gas thwe zainsmuh yah kaiq lho lha kang gyoh. 38 Hauh uhlyis yhenmuh mas dah gos misseh gas vthyoh mas zis vkhyei mha jweh shoq aiq khyamh juiq tyamp. 39 Nyang housoeh kaiq lho lha kang gyoh yvlyis nyah xik mas yap joq dah jes dvxo guon zau nyvng lyis, Haih soeu ka Mangso dah Lo gyingh nghuot, ge taiq. 40 We we masyah yoeuh nyeis dah vmesbih jens eq nyeis. Hauh bang gas Magdala Mari, Yaku ngis yahge Yosep dah ungwes Mari yahge Salome nghuot las, nyamoq gas nyang Galile mas nyeis yoq lyis nyang lyis phuqsoe dah bang nghuot. 41 Yerusalem mas nyang yah dvgeh doq loh dah vmesbih jens gohtoeu eq nyoshoq nghuot. 42 Hauh nyeih gas Yuda No Buisnyeis dah xiklyis nyeihyo, sont buisnyeis nghuot yvmvyah nyenhthang jweh lyis, 43 Nyoqnho ngelang bos dah nhaiqbos, Mangso munghdan lyis langh nyeis soeu Arimathia mas dah Yosep lyih las, nhaiqlom yangh yangh Pilat jyank mas Yesu mvng lyis loh sang yoeus. 44 Pilat gas Yesu gvshih shei tyamp goeus yvlyis mauh las jes dvxo guon zau lyis khi lha, Nyang shei zis nyangh goeus lhyeh, ge nyei. 45 Jes dvxo guon zau jyank masyah shei goeus cho seq lho lhyi, nyang gas Yosep lyis hauh mvng dyei. 46 Nyang gas jeimuh misdain wis las, nyang lyis yoeus khyoq lho lha hauh zis yah lyet las lukmuh lom mas kyungh toh dah lop mas kat toh. Hau lopkhonh mas nyang lukzains toeu cheiq toh. 47 Magdala Mari yahge Yosep dah ungwes Mari gas, nyah mvng toh dah joqyos lyis nyvng.
1 Yuda No Buisnyeis lai thang lhyi Magdala Mari, Yaku dah ungwes Mari yahge Salome moq gas hauh mvng lyis loh juot dyei das xiklyis xangh coeu tsain wis. 2 Dvdaus dah cangxeih vnyeih nvpsangh buis canh los lyis, nyamoq hauh lop pheh e loh. 3 Nyamoq dvyuk yah dvyuk taiq goh loh zis gas, Yang lyis hau lopkhonh mas dah lukzains hank toeu tyamp dyei das au, ge. 4 Nyamoq yoeuh kat lyis hau lukzains toeu phanh toh yvlyis nyvng. Hauh lukzains gas svsoh kuh zis nghuot. 5 Hauh lop khau mha wvng loh lyis, bang bang thyoeu dah shanhzoe wuot las, loqyos shot pheh tsung toh dah loyvm phoq lyis nyamoq nyvng las mauh. 6 Nyang nyamoq lyis taiq zis gas, Namoq vmauh goh, tapzains mas taplhangh tyamp goeus, Nazaret mas dah Yesu lyis namoq xo nyeis. Nyang toq loh goeus, nyang heimha ma nyeis lo; nyang lyis toh dah joqyos mas yoeuh geh. 7 Nghuot laus eq loh geh, nyah changlo jens yahge Petru moq lyis, Nyang gas Galile mau pheh namoq xik mas loh goeus. Nyang namoq lyis taiq toh vgus, houmha nyang lyis nyvng das, oen taiq kyoh geh, ge. 8 Nyamoq gas nvn, mauh yvmvyah lvnyap thuqh loh las lop masyah cangh khoq. Nyamoq gyuk yvmvyah hank lyis eq cha ma taiq. 9 Gvshih hau dvdaus dah cangxeih vnyeih noq yah nyang dwis toq los thang lhyi, nyang yius nyhet doeu khat tyamp dyei dah Magdala Mari lyis Yesu cangxeih nyvng xoeuq. 10 Hauh vmesbih loh las nyang yah dvgeh zomh ku bang, kukxi ngaus nyeis yvmas loh taiq kyoh. 11 Yesu dwis nyeis, nyang nyvng khoq goeus ge yvlyis nyamoq xauhgyo laus eq ma jingh. 12 Hauh thang lhyi nyamoq mas zis aiq yuk wukhau pheh loh nyeis lyis, nyah gungs gohja thaiq las nyvng xoeuq. 13 Nyah aiq yuk tauh loh las nyeis khoq bang lyis taiq kyoh laus eq nyamoq ma jingh. 14 Changlo jens dvci dvyuk moq womjus mas tsung toh uhlyis nyang nyvng xoeuq. Nyang shei masyah dwis toq los las, nyvng bang dah dang lyis ma tsain jing yvmvyah, nyamoq dah ma lomsjingh zis yahge nhaiqlom than zis lyis nyho. 15 Nyang nyamoq lyis taiq zis gas, Namoq mungkvn goms shoq loh las, cangsoeu dius nyau khanghmuh lyis gausyis Dang taiq kyoh geh. 16 Lomsjingh las jeisnyhop kham soeu ka khyuot yoeus zis xauh das; ma lomsjingh soeu ka dang thang thyet zis xauh das. 17 Lomsjingh bang yoh kuot dah vlho ka, haih zis nghuot. Ngah nyings masyah nyamoq yius lyis yoh khat tyamp das. Nyingh saiq yah eq yoh tsain taiq das. 18 Lhangnyis lyis eq yoh nyhik lhangh toh das; nyonoq bos dah jeis shuk laus eq ma shei nhang das. Nos bang thoq mas nyamoq loq kih dyei las hauh bang doms huiq los das, ge. 19 Hauh Yhensain nyamoq lyis dye taiq thang lhyi, maukhung mha toqh yoeus zis xauh las, Mangso dah loqyos shot pheh tsung toh. 20 Nyamoq eq thuq loh las, Yhensain pangh zis yah eq, nyamoq mas bweh dah vlho yah Dang lyis goeng toenk nhang zis yah eq, joqyos khyiq khanghmuh tsain taiq hoeuh. Amen.
1 Cangxeih lyis yah nyoq yah nyvng dah kanghjyoeng yahge gausyis Dang lyis wons wuq bang taiq kyoh zis yah dvyhangteh, 2 Ngamoq vkhau mha bweh lai loh goeus cho vjaja lyis lhaih xi bang nyoshoq bos yvmvyah, 3 Ngos eq haih cho dvnganh lyis vpom mhayah vlhomuh nyei gyo thang lhyi nvng xuq goeus cho dvnganh gas jyoengh jus yvlyis nvng yoh seq shoq ngos nah xiklyis vzoh yah lhaih dyei das oen nghamh thyet toh, nhaiqbos Theophilu eh. 5 Yuda hwankti Herod zaih lyis, Abiya vkoq mas dah Zekharia ge dah phudyei soeu dvyuk nyeis. Nyah yhensain nyhiq Elizabet gas Aron dah nyeinyet nghuot. 6 Nyah zomh gas yobos huon chank ma bos khyvlyis Yhensain dah lyi yahge tyingtoh cho dvnganh lyis chank las Mangso xikkhonh mas dan nyeis. 7 Nghuot laus eq Elizabet gas dius thonh nghuot yvmvyah, nyah zomh loshang ma bos, Nyah zomh gas mang eq mang loh goeus. 8 Dvlhain ka nyang Mangso dah xikkhonh mas nyah phudyei phung mha muh kuot vvng lhyi, 9 phudyei bang dah thungh yah dvyhangteh nyamoq doeugoh lyis nyang mas vvng lha, nyang gas Yhensain dah yhenmuh mas wvng las xangh ngheq nhamp nyeis. 10 Hauh uhlyis dius jens dvnganhmoq gas nghe pheh shvmanh dung nyeis. 11 Xangh ngheq nhamp dah phon loqyos shot pheh Yhensain dah loeuswons soeu yap las nyang lyis nyvng xoeuq. 12 Zekharia nyang lyis nyvng las gyuk nvn nyeis. 13 Nghuot laus eq hauh loeuswons soeu yah nyang lyis taiq zis gas, Vgyuk Zekharia eh, khasoeh ge lyis nvng dung zis lyis gyo dyei goeus; nah yhensain nyhiq Elizabet gas nah nyhenshang yukgis lo dvyuk khoeu los das, nvng nyah nyings lyis Yohan ge lui das. 14 Housoeh las nvng gausyis nhaiqtap zis yoh das; nyang khoeu los yvmvyah dius nyoshoq eq gaus das. 15 Khasoeh ge lyis nyang gas Yhensain xikkhonh mas kuhxing das. Nyang gas zvbiq yahge yhei shuk das zis ma nghuot; nyah ungwes dah ung mhayah yangh Gyingshang Dyos yah dyingh das. 16 Nyang gas Israel jens nyoshoq lyis nyamoq dah Yhensain Mangso jyank pheh doms lhain los nhang das. 17 Uwus moq dah ehnyet lyis lo jens jyank pheh, dang ma gyo bang lyis dan bang dah joeui cho pheh lhain los nhang das zis yahge, Yhensain xiklyis sont toh dah dius nyau lyis cicont kuot dyei das nyhenshang nyang gas Eliya dah dyos yahge yomsoq dyingh las nyah xik pheh loh das, ge. 18 Zekharia loeuswons soeu lhyi taiq zis gas, Ngos gas mang loh goeus, ngah yhensain nyhiq eq nyenhkyi kuh goeus yvmvyah, haih zis lyis jyoengh nghuot oen ngos kha mhayah yoh seq das lah, ge. 19 Loeuswons soeu nyang lyis taiq zis gas, Ngos gas Mangso xikkhonh mas yap soeu Gabriel nghuot. Nvng lyis taiq kyoh aq, ge haih gausyis loeus taiq kyoh das xiklyis, ngos lyis nhang kat. 20 Yoeuh aq, nyah shishenh jweh lyis nyuk los das dah ngah dang lyis nvng ma jingh yvmvyah, haih cho bweh los dah buisnyeis jweh shoq nvng dang ma yoh jis, nhuot jet nyeis das, ge. 21 Zekharia gas yhenmuh khau mha loh nyangh nyeis yvmvyah, nyang lyis langh nyeis dah dius jens gas mauh nyeis. 22 Nyang thuq los dah uhlyis nyamoq lyis dang ma yoh jis lo yvmvyah, nyang gas yhenmuh mas nyoqnyvng nyvng zis lyis nyamoq soh dyei. Nyang gas nyamoq lyis loq toeuq toeuq las nhuot jet zis yah nyeis. 23 Nyang gas, nyang phudyei muh kuot dah buisnyeis dyingh lyis, nyah yhen pheh loh. 24 Hauh thang lhyi nyah yhensain nyhiq Elizabet gas loshang gungs lyis chi los las, nyang kyingh yhen khau mha lhamhmuh oeng khyvp gauh lungh joq. 25 Housoeh nyang taiq zis gas, Svbih dah xikkhonh mas ngos lyis jwangh nyhap zis yoeus tyamp dyei das xiklyis Yhensain ka ngos lyis nyoqzons doeus las jyehjuh dyei goeus, ge. 26 Elizabet loshang gungs lyis chi zis lhamhmuh khyuk vkhyvp lyis, Mangso ka loeuswons soeu Gabriel lyis Galile mau Nazaret ge dah wugungs mas, 27 Hwankti Dawi dah vnyau vshih, Yosep ge soeu xiklyis kwank toh dah lonyi gyingh jyank mas nhang kat. Hauh lonyi dah nyings gas Mari nghuot. 28 Loeuswons soeu nyah jyank mas jweh taiq zis gas, Dvyangh lah? Yhensain ka nvng lyis nyoqzons doeus las, nvng yah dvgeh nyeis. (Vmesbih jens mas nvng gas ngelhoq), ge. 29 Mari gas nyang lyis nyvng las housoeh taiq zis lyis gyo mauh las, Heisoeh lhom jis zis gas khasoeh ge zis nghuot das au, ge nyah ehnyet mas nghamh nyeis. 30 Loeuswons soeu nyang lyis taiq zis gas, Mari eh, vgyuk: nvng gas Mangso nyoqzons doeus soeu nghuot. 31 Nvng gas loshang gungs lyis chi lha, yukgis lo dvyuk khoeu das. Nvng nyah nyings lyis Yesu oen nyhink dyei chah. 32 Nyang gas kuhxing lha nyang lyis gas Nyhang thank Soeu dah Lo ge lui das: Yhensain Mangso ka nyah uwus Dawi dah hwankti tsung tank eq nyang lyis dyei das. 33 Nyang gas Yakop dah yhen thoq mas vcaiq vto guon das. Nyah munghdan khayhoq eq thank das zis ma nghuot, ge. 34 Mari loeuswons soeu lhyi taiq zis gas, Hauh zis khasoeh yoh bweh das lah? Ngos lonyi gyingh dvnghuot, ge. 35 Loeuswons soeu nyang lyis phuk taiq zis gas, Gyingshang Dyos nah thoq mas jweh das las, nyhang thank thoq mas soeu dah yomsoq yah nvng lyis gos das. Housoeh las nvng khoeu das lo gas gyingshang. Nyang lyis Mangso dah Lo ge lui das. 36 Yoeuh aq, dius thonh ge dvlui, nvng yah dvhuh dah Elizabet eq manglo lyis yukgis loshang dvyuk gungs lyis chi zis lhamhmuh khyuk khyvp nghuot los goeus. 37 Khasoeh ge lyis Mangso ma yoh kuot zis cha ma bos, ge. 38 Hauh uhlyis Mari taiq zis gas, Yoeuh aq, Yhensain dah jyeidwis ngos nghuot nyeis; nah dang yah dvyhangteh ngah jyank mas nghuot bas jungh, ge. Hauh uhlyis hauh loeuswons soeu nyah jyank masyah loh. 39 Hauh buisnyeis gyo lyis Mari gas Yuda mau boms wugungs dvkoeuq mas lvnyap toq loh las, 40 Zekharia yhen mha nyang wvng loh lyis, Elizabet yah loh xauhgoh. 41 Mari lhom jis zis lyis Elizabet xauhgyo lyis nyah ung mha loshang jywe los. Elizabet gas Gyingshang Dyos dyingh las, 42 thwe zainsmuh yah kaiq zis gas, Vmesbih jens mas nvng gas ngelhoq, nah ung mha dah shih eq ngelhoq. 43 Ngah Yhensain dah ungwes ngah jyank mas jweh los zis gas, kha iq gaus chank bos au! 44 Yoeuh aq, nvng lhom jis dang ngah no mas xauhgyo yah dvyih, ngah ung mha loshang ka gaus zis yah jywe los. 45 Yhensain jyank masyah nyang lyis taiq zis gas bweh los das, ge lomsjingh dah vmesbih gas ngelhoq. 46 Mari taiq zis gas, Ngah dyos Yhensain lhyi chungh. 47 Ngah dyos eq khyuot yoeus Yhensain mha gauslaus: 48 Khasoeh ge lyis ma mon ma yih dah nyah jyeidwis lyis nyang nhaiqdoeus dyei: khasoeh ge lyis, Yoeuh aq, gvshih masyah dius caiq dvnganh gas ngos lyis ngelhoq soeu ge das. 49 Khasoeh ge lyis yomsoq zains bos soeu ka ngos lyis kuh thank dah muh kuot dyei, nyah nyings eq gyingshang. 50 Nyang lyis phauh nyang gyukwoms bang thoq mas nyah nhaiqnyen shohgyo zis gas, dvcaiq thang lhyi dvcaiq joq joq. 51 Nyah loqyom yah yombos zis lyis chixoeuq; Nyamoq dah ehnyet mas nghamh yvlyis khwank nyeis soeu lhyi lhoq sanh tyamp. 52 Yombos bang lyis nyamoq hwankti tank masyah khyoq las, Nyhen mha gyoh bang lyis nyang toeutoq das. 53 Nyang gas yuot bang lyis zonoms gis yah jo nhang lha, Dis bang lyis gungskom nhang kat. 54 Nyah nhaiqnyen ehnyet lyis soh zis yah nyah jyeidwis Israel lyis pangh dyei. 55 Houka Abraham yahge nyah lo jens nghuot dah yah phauh thyeih moq lyis dyei toh dah vcaiq vto dangthoengh yah dvyhangteh nghuot, ge. 56 Mari gas Elizabet yah dvgeh lhamhmuh somh khyvp ko nyeis lho lha nyah yhen pheh tauh loh. 57 Gvshih Elizabet gas buisnyeis dyingh las, yukgis lo dvyuk khoeu. 58 Yhensain ka nyah kuhxing dah nhaiqnyen shohgyo zis nyang lyis khasoeh Chixoeuq yvlyis buisnoms sainhchangh yahge dvhuh bang xauhgyo lyis nyang yah dvgeh tsain gaus nyeis. 59 Xet vnyeih lyis, loshang lhyi vthyoh tyomh dyei das zis nyamoq los las, nyah uwus dah nyings teh nyang lyis Zekharia ge nyhink das zis sont. 60 Nyah ungwes phuk taiq zis gas, Ma nghuot, nyang lyis Yohan oen nyhink dyei chah, ge. 61 Nyang lyis nyamoq taiq zis gas, Nah vhuh mas housoeh ge zis hank eq ma bos, ge. 62 Nyamoq gas nyah uwus lyis loq toeuq las nyings khasoeh nyhink mes yvlyis nyei. 63 Nyang gas lhaih das luklhyoq sang yoeus las, Nyah nyings gas Yohan nghuot, ge lhaih xoeuq. Housoeh nyamoq dvnganhmoq mauh. 64 Houjang nyah nhuot eq bangh, lhyo eq buis las dang taiq zis yah Mangso lhyi chungh. 65 Nyah vyvm vwi mas nyeis bang gas gyuk las, hauh dang lyis Yuda boms mau dvnganh yvmas hoeuh loh. 66 Xauhgyo bang dvnganh dah nhaiqlom mas tsain comh toh las, Haih loshang ka khasoeh teh soeu nghuot das au, tsain ge. Khasoeh ge lyis, Yhensain dah yomsoq gas nyang yah dvgeh nghuot. 67 Hauh uhlyis nyah uwus Zekharia gas Gyingshang Dyos dyingh las pe zis gas, 68 Hauh Yhensain Israel dah Mangso ka ngelhoq: Nyah dius lyis komh las khyuot yoeus cho kuot dyei. 69 Nyah jyeidwis Dawi dah yhen mhayah, yah xiklyis yomsoq bos dah khyuot yoeus soeu thuq los nhang das, ge. 70 Mungkvn xi masyah nyang nyah gyingshang lvpe jens dah nhuot masyah taiq toh zis yah dvyhangteh, 71 Yah jeswus yahge yang lyis hoeng bang dvnganh dah loq masyah lhuiq kat das xiklyis nghuot. 72 Nyang taiq zis gas, Yah phauh thyeih moq lyis nhaiqnyen ehnyet Chixoeuq las nyah gyingshang dangthoengh lyis soh das, ge. 73 Ngamoq yahge ngamoq dah jes jens masyah khyuot yoeus las gyuk ehnyet ma bos bos nyang lyis yoh phuqsoe das xiklyis Mangso ka yah phauh thyeih Abraham lyis maukhi dang yah dangthoengh toh. 75 Housoeh yang gas yah dvcaiq gonh nyah xikkhonh mas gyingshang zis yah dan khyvlyis yoh nyeis das nyhenshang nghuot. 76 Loshang eh, nvng lyis gas, Nyhang thank Soeu dah lvpe ge lui los das: khasoeh ge lyis nvng gas Yhensain dah cho sont das xiklyis nyah xik pheh loh das zis nghuot las, 77 Nyah dius jens lyis yaunos khyuot dyei zis xauh yvmvyah khyuot yoeus dah jyehjuh lyis seq nhang das. 78 Yah Mangso dah nhaiqnyen jyehjuh yah, nyah khyuot yoeus cho ka yah thoq mas buis teh pank dyei las, 79 chuot zis yahge shei dah siyet mas tsung toh bang dvnganh lyis nyenstap cho mha xauh suh bas jungh, nyhang thank thoq masyah pank dyei nyeis, ge. 80 Loshang ka bes los zis yahge nyah dah dyos yombos los las Israel vnyau lyis thuq xoeuq buisnyeis jweh shoq nyang gas mhanhdyvp mas nyeis.
1 Hauh buisnyeis gyo lyis mungkvn gonh dius nyings lhaih das xiklyis Kesar Agustu dah dang kyoh kat. 2 Haih dius nyings lhaih zis gas, Siria mau mas Kureni mungh zau kuot uhlyis, cangxeih vlhain nghuot. 3 Hauh uhlyis dius dvnganhmoq gas, nyings lhaih das xiklyis yuk khanghmuh vsainnyang wus pheh tsain loh. 4 Housoeh Yosep eq, Dawi dah nyei nyet nghuot yvmvyah, Galile mau Nazaret wus masyah Yuda mau Betlehem ge, Dawi dah wugungs pheh loh. 5 Nyah yhensain nyhiq duot das xiklyis kwank toh dah Mari yah dvgeh nyings kat das xiklyis loh. Mari gas ung mha loshang chi. 6 Nyah zomh houmha nyeis dah uhlyis, Mari loshang khoeu das buisnyeis jweh los las, 7 yukgis lomons lyis khoeu lha, misseh yah lyet las lang khau mha lhain toh: khasoeh ge lyis nyah zomh xiklyis hau boengh doq yhen mha joqyos ma bos. 8 Hauh wuxom pa mha yvng yoeuh bang gas, nyenh lyis nyamoq dah yvng tsomh uhlyis yah nyeis. 9 Yoeuh aq, Yhensain dah loeuswons soeu ka, nyamoq jyank mas jweh las, Yhensain dah phunk gas, nyamoq dah vyvm vwi mas bvng joq: housoeh las nyamoq gas svsoh gyuk. 10 Loeuswons soeu nyamoq lyis taiq zis gas, Vgyuk goh, Yoeuh aq dius dvnganhmoq xiklyis gaus thank dang ngos namoq jyank mas wons lyih. 11 Khvnyhik Dawi wugungs mas namoq xiklyis khyuot yoeus soeu khoeu los. Hauh soeu ka Yhensain Khristu nghuot. 12 Namoq xiklyis vlho ka haih zis nghuot. Loshang lhyi shipu yah lyet las lang mas lhain toh zis lyis namoq nyvng das, ge. 13 Hauh loeuswons soeu yah dvgeh, loeuswons bang moqjens nyetlos nyettant thuq los las Mangso lhyi chungh zis gas: 14 Nyhang thank thoq mas Mangso ka phunk bos nyeis bas jungh, Nyeisjvng mas eq nyang nhaiqdoeus bang jyank mas nyenstap zis joq bas jungh, ge. 15 Hauh loeuswons bang nyamoq jyank masyah maukhung pheh tauh loh thang lhyi, yvng yoeuh bang dvyuk yah dvyuk taiq goh zis gas, Yang gvshih Betlehem jweh shoq e lha, bweh los goeus zis yahge Yhensain yang lyis seq nhang zis yah dvyhangteh, e tsain yoeuh goh, ge. 16 Housoeh nyamoq lvnyap e lha, Mari yahge Yosep lyis eq, lang mas lhain toh dah loshang lyis eq tsain nyvng. 17 Housoeh nyamoq nyvng lho lhyi, haih loshang dah cho, nyamoq lyis taiq kyoh khoq dah dang lyis tsain hoeuh loh. 18 Yvng yoeuh bang taiq dah dang lyis xauhgyo bang dvnganhmoq gas mauh. 19 Nghuot laus eq Mari gas haih cho dvnganh yvlyis comh yoeus las nyah ehnyet mas nghamh yoeuh nyeis. 20 Yvng yoeuh bang nyamoq lyis taiq zis yah dvyhangteh, nyamoq xauhgyo, xauh nyvng dah cho dvnganh gvng mas Mangso dah phunk lyis chungh las tauh loh. 21 Xet nyeih dyingh las nyang lyis vthyoh tyomh dyei lyis, nyang ung mha ma bos shih lyis yah loeuswons soeu nyings dyei toh vgus, nyang lyis Yesu ge nyhink. 22 Moshe dah lyi yah dvyhangteh nyamoq dah cheihshang chah dah buisnyeis dyingh los lyis, nyah zomh gas Yhensain lhyi kyauh das xiklyis nyang lyis Yerusalem mas shwih e. 23 Cangxeih khoeu dah yukgis lo khanghmuh lyis Yhensain xiklyis gyingshang oen yoh taiq das, ge Yhensain dah lyi mas lhaih toh vgus nghuot. 24 Yhensain dah lyi mas taiq zis yah dvyhangteh, khotjyauh dvzomh, nghuot ya, guzoe lo dvzomh yah lomhxangh lainh. 25 Yoeuh aq, Yerusalem mas Simon ge soeu dvyuk nyeis. Nyang gas dan las lomsjingh cho mha wontang soeu nghuot las Israel lyis nhaiqtaink dyei das cho lhyi nghamhloms nyeis soeu nghuot. Gyingshang Dyos eq nyah thoq mas nyeis. 26 Simon gas Yhensain dah Khristu lyis ma nyvng dvchank ma shei das ge, Gyingshang Dyos yah chixoeuq zis xauh. 27 Thungh yah dvyhangteh kuot dyei das nyhenshang nyhiphoq gas Yesu lyis shwih e lhyi, nyang eq Dyos yah yhenmuh mas jweh lyih los. 28 Nyang gas hauh loshang lyis nyah loq mas po chi lha Mangso lhyi chungh zis gas, 29 Yhensain eh, nah dang vgus nah jyeidwis lyis nyenstap zis yah shei nhang lo aq: 30 Khasoeh ge lyis nah khyuot yoeus cho lhyi ngah nyoqjeih yah nyvng goeus. 31 Dius dvnganhmoq xikkhonh mas hauh zis nvng sont toh dyei. 32 Gohnyau bang lyis pank dyei das dah bvng zis yahge Nah vnyau Israel dah phunk nyhenshang nghuot, ge. 33 Nyah cho yah sen zis lyis taiq gvng mas, Yosep yahge nyah ungwes gas gyo mauh. 34 Simon gas nyamoq lyis shvmanh dyei lho lha nyah ungwes Mari lyis taiq zis gas, Haih loshang ka Israel dius jens nyoshoq dyoqbis zis xauh das cho yahge khyuot yoeus zis xauh das xiklyis Mangso khyen toh soeu nghuot. Nyang lyis dius nyoshoq yah ngoek tyamp das, Mangso jyank mas dah vlho nghuot las nghop toh dah nghamh cho lhyi phank xoeuq das. 35 Nah sainh lyis eq shamthoh teh dah chiqjyen cho yah thauh kyank dyei zis xauh das, ge. 36 Hou mhayah Asher vnyau Phanuel dah lonyi Anna ge dah lvpe vmesbih dvyuk nyeis. Nyang gas svsoh mang goeus: lonyi uhlyis yah nyhet zvn kyingh nyah yhensain phoq yah zomh nyeis las, 37 zvnlom xetci nyei zvn bos shoq chauhmuh muh nyeis. Nyang gas yhenmuh yah ma gang, womkyi lha shvmanh dung zis yah nyeih nyenh Mangso lhyi phuqsoe nyeis. 38 Nyang eq hauh shishenh lyis los las Yhensain dah jyehjuh lyis chungh las, Yerusalem wugungs lyis khyuot yoeus das cho lhyi nghamhloms bang dvnganhmoq lyis nyah cho taiq kyoh. 39 Nyah zomh gas Yhensain dah lyi yah dvyhangteh dye kuot lho lhyi, nyamoq nyang dah wugungs Nazaret mas tauh loh. 40 Hauh loshang ka kuh bes, yombos los las joeui yah dyingh joq. Mangso dah nhaiqdoeus soeu bweh nyeis. 41 Gvshih nyah nyhiphoq gas, zvn yau zvn Lhuiq Kat Pwe Yerusalem mas loh. 42 Yesu dvci aiq zvn jweh lyis, pwe dah thungh yah dvyhangteh, nyamoq eq Yerusalem pheh doq loh. 43 Pwe buisnyeis lai loh thang lhyi tsain tauh loh lyis, loshang Yesu gas Yerusalem mas gyoh nyeis khoq; hauh zis lyis nyah ungwes uwus gas ma seq. 44 Nyang dius phung mha bos, ge nghamh las, dvnyeih gyung cho loh thang lhyi, buisnoms sainhchangh yahge seq goh bang mas nyang lyis tsain xo. 45 Nyah zomh gas nyang lyis ma nyvng lyis Yerusalem mas doms loh las nyang lyis xo. 46 Housoeh somh vnyeih lyis, nyang lyis yhenmuh khau mha svra moq dah vgungs mas tsung lha gyo yoeus las nyei goh nyeis zis lyis nyvng. 47 Nyah dang lyis xauhgyo bang dvnganhmoq gas, nyang seqgyo cho lhyi eq, nyang phuk taiq dang gvng mas eq tsain mauh. 48 Nyah ungwes uwus nyang lyis nyvng lhyi tsain mauh las nyah ungwes nyang lyis taiq zis gas, Lo eh, chamus nvng ngamoq lyis heisoeh kuot lah? Yoeuh aq, nah uwus yahge ngos gas nvng lyis sainhkhoh las xo nyeis, ge. 49 Nyang nyamoq lyis taiq zis gas, Chamus namoq ngos lyis xo goh? Ngos gas ngah Uwus dah yhen mha nyeis chah yvlyis namoq ma seq goh lhyeh, ge. 50 Nghuot laus eq nyang nyah aiq yuk lyis taiq dah dang lyis nyah aiq yuk ma seqgyo. 51 Housoeh nyang gas nyamoq yah dvgeh loh las Nazaret mas jweh lyis nyamoq sang dang gyo las nyeis. Nghuot laus eq nyah ungwes gas hauh dang dvnganh zis lyis nyah nhaiqlom mas comh toh. 52 Yesu gas gungs bes yvmas thyoh bes, joeui bos los las, Mangso xikkhonh mas eq, dius xikkhonh mas eq nyoqnho ngelang bos los.
1 Hwankti Kesar guon zis dvci oeng vzvn lyis Pontu Pilat gas Yuda mau lyis, Herod gas Galile mau lyis, nyah vnoeuh Yuda gas Ituria yahge Trakoni lyis, Lisani gas Abili lyis guon nyeis uhlyis, 2 Anna yahge Kayapa gas phudyei zainsmuh tsain nghuot. Hauh uhlyis, Mangso dah dang gas mhanhdyvp mas nyeis, Zekharia dah lo Yohan jyank mas jweh los. 3 Nyang gas Yodan lvng vwi vyvm dvkhauyah jweh las yaunos masyah nhaiqlom thaiq zis yah jeisnyhop kham geh, Mangso ka namoq dah yaunos khyuot dyei das, ge taiq hoeuh nyeis. 4 Lvpe Esaia dah maussauh mas lhaih toh vgus, mhanhdyvp mas dvyuk kaiq nyeis dah thwe ka, Yhensain dah cho lhyi tsain sont toh geh; Nyah chokhyoh lyis soq dan geh. 5 Langhkhau khanghmuh yoh tyink das, Boms khanghmuh, jing khanghmuh lyis chink khyoq das; Cho yauhyot lyis yoh xiq das, Cho guih lyis yoh lhoq dan das. 6 Cangsoeu dius dvnganh Mangso dah khyuot yoeus cho lhyi nyvng das, ge. 7 Yohan ka nyah jyank mas jeisnyhop kham das xiklyis tsain los dah dius moqjens lyis taiq zis gas, Ywimuhtsanh vnyau eh, jweh los das dah nhaiqlom dyis masyah cangh das zis namoq lyis hank yah taiq kyingh goh lah? 8 Housoeh yvmvyah nhaiqlom thaiq zis yah mon yih dah vshih shih geh. Namoq ehnyet mas Abraham gas namoq dah phauh thyeih nghuot, oen vtaiq zo goh; khasoeh ge lyis, ngos namoq lyis taiq bah, Mangso ka haih lukzains masyah Abraham xiklyis lo jens yoh thuq los nhang. 9 Gvshih yangh wuzung gas saiqzains khyei mha toh goeus. Housoeh yvmvyah gis dah vshih ma shih dah vzains khanghmuh lyis thoeuq las nyi mas kat das. 10 Dius jens nyang lyis nyei zis gas, Housoeh lyis ngamoq cha kuot das lah, ge. 11 Nyang nyamoq lyis phuk taiq zis gas, Thoq dyi aiq dung yoh soeu ka ma yoh soeu lhyi gvm dyei bas jungh; zonoms yoh soeu eq vgus housoeh kuot bas jungh, ge. 12 Khoengh khywi bang eq jeisnyhop kham das ge nyah jyank mas lyih las taiq zis gas, Svra eh, ngamoq cha kuot das lah, ge. 13 Nyang nyamoq lyis taiq zis gas, Toeuq toh dah vgus masyah jyeq las vkhywi yoeus goh, ge. 14 Jeslo jens eq nyang lyis nyei zis gas, Ngamoq cha kuot das lah, ge. Nyang nyamoq lyis phuk taiq zis gas, Hank lyis eq lyi ma bos khyvlyis ngwis vlhyent yoeus goh; ma jus khyvlyis zau vkauq goh, namoq nyang dah uhkung phauh yah nhaiqtap geh, ge. 15 Dius jens gas, Yohan ka Meshia mvbeh, ge nghamhloms zis yah nyamoq ehnyet mas tsain nghamh yoeuh nyeis. 16 Yohan nyamoq dvnganhmoq lyis phuk taiq zis gas, Ngos gas namoq lyis jeis mas jeisnyhop dyei: nghuot laus eq ngah thoq lyis yombos soeu dvyuk ngah thang mha los nyeis. Ngos gas nyah thyvkoq twih phui das zis yangh ma mon. Nyang gas namoq lyis Gyingshang Dyos yah eq, nyi yah eq jeisnyhop dyei das. 17 Nyang nyah thanjang mas guk lhank das xiklyis hauq chi toh. Nyang gukmos lyis jyi mha kat toh las, guksom lhyi ka ma jom nyi mas ngheq das, ge. 18 Housoeh nyang gas gohtoeu taiq kyingh dang nyoshoq yah eq dius jens lyis gausyis dang taiq kyoh. 19 Mau nyei boms dvboms lyis guon dah zau Herod gas nyah vnoeuh Philip dah yhensain nyhiq Herodia cho yahge, Herod kuot dah ma shop muh dvnganh gvng mas eq nyang nyho zis xauh. 20 Hau thang lhyi Herod gas Yohan lyis thung lhunk zis yah nyang gas zes ma gis dah muh kuot goeus. 21 Dius jens dvnganh jeisnyhop dye kham thang lhyi Yesu eq jeisnyhop kham. Nyang shvmanh dung nyeis lyis maukhung phank los las, 22 Gyingshang Dyos gas khotjyauh gungs teh zis nyah thoq mas gyoh lyih. Hauh uhlyis maukhung mhayah thwe dvkoeuq thuq los zis gas, Nvng gas ngos jyetdap dah ngah Lo nghuot, ngos nvng lyis nhaiqdoeus, ge. 23 Yesu gas muh kuot xi loh lyis, somhci zvn ko nghuot; Nyang gas dius jens nghamh vgus, Yosep dah lo khyvlyis nghuot. Yosep gas Heli dah lo; 24 Heli gas Mathat dah lo; Mathat gas Lewi dah lo; Lewi gas Melki dah lo; Melki gas Yanai dah lo; Yanai gas Yosep dah lo; 25 Yosep gas Matathia dah lo; Matathia gas Amo dah lo; Amo gas Nahum dah lo; Nahum gas Esli dah lo; Esli gas Nagai dah lo; 26 Nagai gas Maat dah lo; Maat gas Matathia dah lo; Matathia gas Semein dah lo; Semein gas Yosek dah lo; Yosek gas Yoda dah lo; 27 Yoda gas Yoanan dah lo; Yoanan gas Resa dah lo; Resa gas Zerubabe dah lo; Zerubabe gas Shealtiel dah lo; Sheatiel gas Neri dah lo; 28 Neri gas Melki dah lo; Melki gas Adi dah lo; Adi gas Khosam dah lo; Khosam gas Elmadam dah lo; Elmadam gas Era dah lo; 29 Era gas Yoshua dah lo; Yoshua gas Elieza dah lo; Elieza gas Yorim dah lo; Yorim gas Mathat dah lo; Mathat gas Lewi dah lo; 30 Lewi gas Simon dah lo; Simon gas Yuda dah lo; Yuda gas Yosep dah lo; Yosep gas Yonam dah lo; Yonam gas Eliakim dah lo; 31 Eliakim gas Melea dah lo; Melea gas Mena dah lo; Mena gas Matatha dah lo; Matatha gas Nathan dah lo; Nathan gas Dawi dah lo; 32 Dawi gas Yese dah lo; Yese gas Obed dah lo; Obed gas Boaz dah lo; Boaz gas Salmon dah lo; Salmon gas Nashon dah lo; 33 Nashon gas Aminadab dah lo; Aminadab gas Admin dah lo; Admin gas Arni dah lo, Arni gas Hezron dah lo; Hezron gas Pere dah lo; Pere gas Yuda dah lo; 34 Yuda gas Yakop dah lo; Yakop gas Isak dah lo; Isak gas Abraham dah lo; Abraham gas Tera dah lo; Tera gas Nahor dah lo; 35 Nahor gas Serug dah lo; Serug gas Reu dah lo; Reu gas Peleg dah lo; Peleg gas Eber dah lo; Eber gas Shela dah lo; 36 Shela gas Kainan dah lo; Kainan gas Arphaza dah lo; Arphaza gas Shem dah lo; Shem gas Noa dah lo; Noa gas Lamek dah lo; 37 Lamek gas Methusela dah lo; Methusela gas Enok dah lo; Enok gas Yared dah lo; Yared gas Mahalalel dah lo; Mahalalel gas Kenan dah lo; 38 Kenan gas Enosh dah lo; Enosh gas Set dah lo; Set gas Adam dah lo; Adam gas Mangso dah lo nghuot.
1 Hauh thang lhyi Yesu gas Gyingshang Dyos dyingh las Yodan lvng masyah tauh loh lyis, Dyos yah mhanhdyvp pheh shwih loh. 2 Houmha nyeici nyeih Satan yah shiwu zis xauh; hauh buisnyeis gyo lyis nyang gas cha eq ma zo las, thang thank lyis nyang wom yuot. 3 Housoeh las yius nyang lyis taiq zis gas, Nvng Mangso dah Lo nghuot lyis gas, haih lukgoq lyis ohlhyoq bweh nhang aq, ge. 4 Yesu nyang lyis phuk taiq zis gas, Dius gas ohlhyoq yah kyingh yoh dwis nyeis zis ma nghuot, ge lhaih toh, ge. 5 Tsai, yius gas nyang lyis boms nyhang thoq mas shwih doq loh las, mungkvn mas dah munghdan dvnganh lyis dvdvm dyvm chixoeuq. 6 Yius gas, Haih yomsoq yahge dis cho dvnganh yah ngos nvng lyis dyei das. Khasoeh ge lyis hauh zis gas ngos lyis kyauh toh goeus las, ngos dyei mes soeu hank lyis eq yoh dyei. 7 Nvng ngos lyis paiq lyis gas, hai dvnganh yah nah zis nghuot das, ge. 8 Yesu nyang lyis phuk taiq zis gas, Nvng Yhensain nah Mangso lhyi paiq las, nyang lyis kyingh phuqsoe chah, ge lhaih toh, ge. 9 Tsai, yius gas nyang lyis Yerusalem mas shwih loh las, Yhenmuh thyoh mas yap nhang lha taiq zis gas, Nvng Mangso dah Lo nghuot lyis gas hei mhayah o mha dyvm gyoh aq. 10 Khasoeh ge lyis lhaih toh zis gas, Nvng lyis gomh das xiklyis Mangso ka nyah loeuswons bang lyis tying toh das. 11 Nah khyei lukzains mas ma thungh das xiklyis nyamoq loq yah nvng lyis po langh das, ge. 12 Yesu phuk taiq zis gas, Nvng Yhensain nah Mangso lhyi vshi yoeuh ge lhaih toh, ge. 13 Yius gas Yesu lyis shiwu zis dvnganh dye goeus ya, nyah jyank masyah dvyoq gang loh. 14 Hou mhayah Yesu gas Galile mau pheh tauh loh. Gyingshang Dyos dah yomsoq gas nyang mas bos joq. Hauh uhlyis nyah cho dvmau yah hoeuh loh. 15 Nyang nyamoq dah lyi jungs mas jyauh las nyamoq dvnganhmoq nyang lyis chungh. 16 Housoeh nyang nyeis bes los dah Nazaret mas jweh loh las, nyah thungh yah dvyhangteh Yuda No Buisnyeis lyis lyi jungs mas wvng loh. Houmha nyang maussauh nghap das xiklyis toq yap. 17 Lvpe Esaia maussauh dain nyang lyis dyei los las, nyang hauh yvlyis phank lyis heisoeh ge lhaih toh yvlyis nyvng. 18 Yhensain dah Dyos ngah thoq mas nyeis. Khasoeh ge lyis nyungs bang lyis gausyis dang taiq kyoh das xiklyis, Nyang ngos lyis coeu juot dyei. Lhunk toh bang lyis phank kat das xiklyis, nyoqjet bang doms nyvng das xiklyis, zaiq toh las shanghsenh zis xauh bang luiq das xiklyis taiq kyoh das nyhenshang nyang ngos lyis nhang kat. 19 Yhensain nhaiq doeus zvn lyis taiq hoeuh das, ge. 20 Dye lyis nyang hauh maussauh nyheih las uhshe soeu lhyi doms dyei lho lha tsung toh. Hauh lyi jungs mas bang dvnganh nyang lyis yoeuh tsuk toh. 21 Housoeh nyang nyamoq lyis taiq zis gas, Hai lhaihtoh dang gas khvnyhik nyang namoq dah no mas nyuk los goeus, ge. 22 Dvnganhmoq yah nyah cho lhyi kanghjyoeng kat dyei zis yahge, nyah nhuot masyah thuq los dah jyehjuh dang lyis mauh las, Haih soeu ka Yosep dah lo ma nghuot lhyeh, ge. 23 Housoeh las nyang nyamoq lyis taiq zis gas, Namoq gas ngos lyis, Lastsiang eh, nvnyang gungs lyis yhohzo aq; ngamoq xauhgyo ku vgus, Kaperna-um mas kuot teh nvnyang mau mas eq kuot xoeuq aq, ge sodang yah tsain taiq los das, ge. 24 Nyang taiq zis gas, Ngos namoq lyis jyoengh taiq bah, lvpe lhyi nyah choq thyet mau mas lhom yoeus zis ma bos, ge. 25 Nghuot laus eq ngos namoq lyis jyoengh taiq bah, Eliya zaih lyis maukhung lhyi somh zvn lhamhmuh khyuk khyvp mau ma wus las, mau gonh mas panghkhauq gyoh los lyis Israel vnyau mas chauhmuh nyoshoq nyeis khoq ku. 26 Nghuot laus eq Sidon mau Zarephat mha dah chauhmuh dvyuk mas lai las gohyuk hank jyank mas eq Eliya lyis ma nhang kat. 27 Lvpe Elisha zaih lyis eq Israel mau mas mvnggvng dap bang nyoshoq nyeis khoq; Siria dius Naman mas lai las nyamoq mas gohyuk hank eq ma yoh thyauhlhang los, ge. 28 Haih dang xauhgyo lyis lyi jungs mas bang dvnganh gas nhaiqlom dyis zis yah, 29 toq las nyang lyis wus nghe pheh khat thuq las nyamoq wus kuot toh dah jing mhung mhayah vtauh khyvlyis duon thyet khyoq das ge tsain shwih loh. 30 Nghuot laus eq nyang gas nyamoq dah vjo masyah thuq las loh lo. 31 Yesu gas Galile mau Kaperna-um wus mas loh las, Yuda No Buisnyeis lyis nyang dius jens lyis jyauh. 32 Nyang gas vmingh yah taiq yvmvyah nyamoq gas nyang jyauh cho lhyi mauh. 33 Hauh uhlyis lyi jungs mas yius kuq dah dius dvyuk nyeis, nyang gas yomkat kaiq las, 34 Nazaret phoq Yesu eh, nvng ngamoq yah cha sen lah? Nvng ngamoq lyis mhont das xiklyis los lhyeh? Ngos nvng hank nghuot zis seq; Nvng gas Mangso dah Gyingshang Soeu nghuot, ge. 35 Hauh uhlyis Yesu gas nyang lyis, Tsoek! nyah jyank masyah thuq loh aq, ge nyho. Housoeh las yius gas hauh soeu lhyi dvm ma dap nhang nhang nyamoq vgungs mas toeulhain tyamp khoq las nyah jyank masyah thuq loh. 36 Housoeh las dvnganhmoq mauh las nyamoq nyang changh taiq goh nyeis zis gas, Haih zis gas chah dang nghuot au lhyeh? Zaudang yah eq, yomsoq yah eq yius lyis taiq kat las nyamoq thuq loh, ge. 37 Housoeh las hauh mau vyvm vwi joqyos khyiq khanghmuh mas nyah cho tsain taiq hoeuh loh. 38 Nyang lyi jungs masyah thuq loh las, Simon dah yhen mha wvng loh. Houmha Simon dah yuknyih gungs svsoh ngeh las nos nyeis. Nyamoq gas nyah nyhenshang Yesu lyis sang. 39 Housoeh las nyang nyah nvm mas yap las hauh nos lyis nyho tyamp lho lhyi nyang gungs ngeh zis gis los. Nyang houjang toq las nyamoq lyis daih. 40 Buis wvng zoh lyis noslom vja ja yah nos moq yoh bang dvnganh gas hauh bang lyis nyah jyank mas shwih lyih; nyang gas nyamoq yuk khanghmuh dah thoq mas loq kih dyei las gis los nhang. 41 Yius jens eq, nyoshoq moq masyah, Nvng gas Mangso dah Lo nghuot, ge kaiq las tsain thuq loh. Nyamoq gas nyang Meshia nghuot yvlyis seq yvmvyah nyang nyamoq lyis dang ma yoh jis lo shoq nyho. 42 Nyoq nyvng los lyis nyang gas mhanhdyvp pheh loh. Dius jens gas nyang lyis chank xo lha, nyah jyank mas jweh lyis, nyang lyis nyamoq jyank masyah ma gang loh das xiklyis tomp. 43 Yesu nyamoq lyis taiq zis gas, Gohwus gohthomh mas eq Mangso munghdan gausyis dang ngos loh taiq kyoh chah: khasoeh ge lyis hauh nyhenshang ngos lyis nhang kat, ge. 44 Housoeh nyang gas dvmau gonh mas dah lyi jungs mas tsain taiq hoeuh.
1 Dvlhain ka Yesu Genesaret thomh yvm mas yap joq dah uhlyis moqjens gas Mangso dang gyo yoeus das xiklyis nhoenk los. 2 Hauh uhlyis nyang gas jyank yvm mas lhyik aiq koeuq joq yvlyis nyvng. Oeng nhoh bang gas lhyik masyah thuq las nyho tsain cheih nyeis. 3 Nyang gas Simon dah lhyik khau mha wvng lho lha, tungyos masyah dvtsiq we loh das xiklyis Simon lyis sang. Housoeh nyang tsung lha moqjens lyis jyauh. 4 Nyang dang dye taiq lyis Simon lyis taiq zis gas, Jeis nauh yvmas ywi las nyho doeuh aq, ge. 5 Simon nyang lyis phuk taiq zis gas, Yhensain eh, ngamoq nyens gonh kuot nyung goeus, nghuot laus eq nah dang masyah ngos nyho doeuh bah, ge. 6 Nyamoq nyho doeuh zis yah dvyhangteh oengdoq nyoshoq xauh doeuh yoeus las nyho eq juiq bah ge loh. 7 Housoeh nyamoq gas gohtoeu lhyik mas dah loeuzomh jens lyis los bos pangh das xiklyis uk nyeis. Nyamoq los las lhyik aiq koeuq mas dyingh las nyop loh bah ge loh. 8 Simon Petru hauh zis nyvng lyis, Yesu dah khyeiyang mas gyuis gyoh las taiq zis gas, Yhensain eh, ngah jyank masyah gang loh aq: Khasoeh ge lyis ngos gas yaunos wons soeu nghuot, ge. 9 Khasoeh ge lyis nyamoq oengdoq hounyhoq tsain xauh yoeus yvmvyah, nyang eq, nyang yah dvgeh bang dvnganhmoq eq mauh. 10 Simon dah oengnhoh changh Zebedi dah lotang Yaku yahge Yohan eq tsain mauh. Yesu Simon lyis taiq, Vgyuk, gvshih masyah nvng dius nhoh das, ge. 11 Nyamoq lhyik lyis jyankyvm mas dvp loh lho lhyi, nyamoq vyhang dvnganh tsain toh khoq las nyah thang mha chank loh. 12 Nyang wugungs dvkoeuq mas nyeis lyis, yoeuh aq, dvgungs yah mvnggvng dap soeu dvyuk Yesu lyis nyvng lyis, dupaiq las dung zis gas, Yhensain eh, nvng bauh nghuot lyis gas ngos lyis yoh thyauhlhyang los nhang, ge. 13 Hauh uhlyis Yesu gas nyang nyah loq yhuonh kat las, nyang lyis tanh uhlyis yah, Ngos mes, nvng thyauhlhyang los aq ge lho lhyi, houjang nyah gungs mas mvnggvng gas dyuk loh. 14 Yesu gas, hank lyis eq ma taiq kyoh das xiklyis khyangh com lho lha taiq zis gas, Loh aq, gohyhamh bang dah xiklyis kanghjyoeng nghuot bas jungh, phudyei soeu jyank mas nah gungs loh chixoeuq aq, Moshe lyi vgus, nvng thyauhlhyang los goeus gvng mas loh phudyei khoq aq, ge. 15 Nghuot laus eq Yesu dah cho ka zes hoeuh loh. Dius moqjens gas nyah dang gyo yoeus das zis yahge nos yhoh yoeus das xiklyis tsain zain los. 16 Nghuot laus eq nyang gas mhanhdyvp pheh thuq loh las shvmanh dung nyeis. 17 Dvnyeih gas, nyang nyamoq lyis jyauh nyeis lyis, Galile mau, Yuda mau yahge Yerusalem, wus khanghmuh mas dah Pharishe jens yahge lyi svra jens eq, nyah nvm thaq los tsung toh. Nyamoq lyis gis los nhang das xiklyis Yhensain dah yomsoq gas nyah jyank mas bos joq. 18 Yoeuh aq, gungsjen shei soeu dvyuk lyis yhetyos masyah nyamoq dvng lyih las, nyah xikkhonh mas wvng das xiklyis cho tsain xo. 19 Nghuot laus eq dius sunk nyo yvmvyah nyang lyis khasoeh kuot las dvng hwank das cho xo ma nyvng las, nyamoq gas yhenkhung mha doq loh las yhenkhung phank lho lha, hauh soeu lhyi nyah yhetyos yah dvgeh moqphung vgungs, Yesu dah xikkhonh mas juons khyoq kat. 20 Nyang nyamoq dah lomsjingh nhaiqlom lyis nyvng lyis nyang lyis taiq zis gas, Buisnoms eh, nah yaunos khyuot dyei goeus, ge. 21 Hauh uhlyis maussauh lhaih bang yahge Pharishe moq gas, heisoeh loeusmus soqzo dang taiq soeu ka hank nghuot lah? Mangso kyingh ma nghuot lyis gas, yaunos hank yoh khyuot dyei lah, ge. 22 Nghuot laus eq nyamoq nghamh zis lyis Yesu seq yvmvyah, nyamoq lyis phuk taiq zis gas, Namoq ehnyet mas chamus housoeh tsain nghamh goh lah? 23 Nah yaunos khyuot dyei goeus oen zis yahge, Toq yap las suh loh aq, oen zis kha khonh zes taiq lwis lah? 24 Nghuot laus eq cangsoeu Lo gas nyeisjvng thoq mas yaunos yoh khyuot dyei dah vmingh yoh zis gas namoq seq das xiklyis hauh gungsjen shei soeu lhyi, Ngos nvng lyis taiq bah, Toq aq, nah yhetyos yoeus las nah yhen pheh loh aq, ge. 25 Houjang nyang nyamoq xikkhonh masyah toq las, nyah yhetyos yoeus lho lha Mangso lhyi chungh uhlyis yah nyah yhen pheh loh. 26 Nyamoq dvnganhmoq mauh dvn las Mangso lhyi chungh nyeis; nyamoq gyuk las taiq zis gas, Khvnyhik ngamoq muh gohtseq nyvng goeus, ge. 27 Hauh thang lhyi nyang thuq loh lyis khoengh khywi jang mas Lewi ge dah khoengh khywi soeu tsung toh zis lyis nyvng las nyang lyis, Ngah thang mha chank los aq, ge. 28 Nyang gas dvnganh toh khoq las nyah thang mha chank loh. 29 Lewi gas Yesu lyis nyah yhen mha pwe zainsmuh dvkoeuq kuot dyei; houmha khoengh khywi bang yahge gohtoeu nyoshoq moq dvgeh tsung toh. 30 Housoeh las Pharishe moq yahge nyamoq dah maussauh lhaih bang dvyhamh gas, Namoq khoengh khywi bang yahge yaunos wons bang yah dvgeh chamus zo shuk goh lah, ge nyah changlo jens lyis tsain lop. 31 Yesu nyamoq lyis phuk taiq zis gas, Yanghzan bang gas mvcheih lastsiang ma chah, nos bang dvchah. 32 Dan bang lyis khi das xiklyis ngos lyih zis ma nghuot; yaunos wons bang nhaiqlom thaiq das xiklyis dvnghuot, ge. 33 Nyamoq, nyang lyis taiq zis gas, Yohan dah changlo jens gas Pharishe dah changlo jens teh dvsoq soq lyis womkyi lha shvmanh dung; nghuot laus eq nah changlo jens gas zo shuk nyeis, ge. 34 Nyang nyamoq lyis taiq zis gas, Nyi hwank pwe los bang lyis, nyamoq loloeu saiq yah dvgeh nyeis shih lyis wom yoh kyi nhang das lah? 35 Nghuot laus eq, loloeu saiq lyis nyamoq jyank masyah shwih loh buisnyeis jweh los das, hauh uhlyis nyamoq womkyi das, ge. 36 Nyang nyamoq lyis dangtoeuq dvkoeuq taiq zis gas, Dyi saiq masyah misseh chuiq las dyi tyang mha hank ma pho; housoeh kuot lyis gas, dyi saiq eq juiq las, vcauh eq dyisaiq seh yah ma phi goh das. 37 Zvbiq saiq eq shohyeis thung cauh mas hank ma kat, shohyeis thung cauh mas zvbiq jeis saiq kat lyis gas, zvbiq jeis saiq gas hau thung lhyi juiq nhang zis yah zvbiq shuon lha shohyeis thung eq monh das. 38 Nghuot laus eq zvbiq saiq lyis gas shohyeis thung saiq mas kat chah. 39 Zvbiq vcauh shuk goeus soeu ka vsaiq lyis ma o: Khasoeh ge lyis vcauh gas gis ge taiq, ge.
1 Yuda No Buisnyeis dvnyeih lyis, Yesu gas sunghso yos cho yah lai loh. Hauh uhlyis nyah changlo jens gas sunghso nham lhyi shap las loq yah tsain nis phuk zo loh. 2 Housoeh las Pharishe dvyhamh nyamoq lyis taiq zis gas, Yuda No Buisnyeis lyis kuot das lyi ma bos zis lyis chamus kuot goh, ge. 3 Yesu nyamoq lyis phuk taiq zis gas, Dawi nyang yahge nyah dyenschangh jens gas, yuot shet dah uhlyis, cha kuot khoq zis lyis namoq ma nghap yoeuh goh lhyeh? 4 Nyang gas Mangso dah yhen khau mha wvng loh las, phudyei bang kyingh ma nghuot lyis gas, hank eq ma gis zo, chixoeuq ohlhyoq lyis nyah dyenschangh jens lyis eq dyei las, tsain zo ma nghuot lhyeh, ge. 5 Nyang nyamoq lyis taiq zis gas, Cangsoeu Lo gas Yuda No Buisnyeis dah Yhensain nghuot, ge. 6 Gohtoeu Yuda No Buisnyeis lyis nyang gas lyi jungs mha wvng las jyauh nyeis; houmha loqyos loq shei soeu dvyuk nyeis. 7 Maussauh lhaih bang yahge Pharishe moq gas, nyang lyis yoh kauq shoq Yuda No Buisnyeis lyis nyang nos bang lyis vgis los nhang dvluk, ge tsain zungh yoeuh nyeis. 8 Nghuot laus eq nyamoq nghamh zis lyis Yesu seq las, loq shei soeu lhyi, Heimha los yap aq, ge lyis nyang toq yap joq. 9 Yesu nyamoq lyis taiq zis gas, Ngos namoq lyis dvja nyei yoeuh bah, Yuda No Buisnyeis lyis gis cho kuot das zis lyi bos lah? ma gis cho kuot das zis lyi bos lah? Kang kyoeu gis lah, mhont gis lah, ge. 10 Hauh thang lhyi nyang gas vyvm vwi mas nyamoq lyis tsain yoeuh lho lha, nyang nos soeu lhyi taiq zis gas, Nah loq yhuonh kat aq, ge. Nyang loq yhuonh kat lyis nyah loq gis los. 11 Nghuot laus eq, nyamoq gas nhaiq gis yo las, Yesu lyis khasoeh kuot das lah, ge nyang changh nyang xamgoh nyeis. 12 Hauh buisnyeis gyo lyis, Yesu gas shvmanh dung das xiklyis boms mas doq loh las dvnyens gonh Mangso lhyi shvmanh dung nyeis. 13 Nyoq nyvng los lyis nyah changlo jens lyis khi yoeus las nyamoq masyah dvci aiq yuk khyen yoeus lho lha, nyamoq lyis lvgyo jens ge nyhink. 14 Hauh bang gas, Yesu yah Petru ge nyings nyhink dyei dah Simon yahge nyah vnoeuh Andre; Yaku yahge Yohan; Philip; Bartholomeu; 15 Mathe yahge Thoma; Alphe dah lotang Yaku yahge Zelot ge soeu Simon; 16 Yaku dah lo Yuda yahge phanhlyen soeu Yudas Iskarot moq nghuot. 17 Yesu gas lvgyo jens yah dvgeh jing masyah gyoh loh las jangpa mha nyah changlo jens dius phung zainsmuh yah dvgeh yap joq. Hauh yvmas Yuda mau gonh mas bang, Yerusalem mas bang, thomh yvm Taire yahge Sidon mau mas bang bos. 18 Nyamoq gas nyah dang gyo yoeus das zis yahge, nyamoq dah nos zis gis los das xiklyis tsain los. Yius yah yau dyei zis xauh bang eq los las gis los nhang zis xauh. 19 Yhensain dah gungs mas yomsoq thuq las dvnganhmoq lyis gis los nhang yvmvyah moq dvphung gonh nyang lyis xauh tanh das xiklyis tsain yomkat. 20 Housoeh nyang nyah changlo jens lyis nghank yoeuh las taiq zis gas, Namoq nyungs bang gas ngelhoq: Khasoeh ge lyis Mangso munghdan gas namoq zis nghuot. 21 Namoq gvshih yuot shet nyeis bang gas ngelhoq: Khasoeh ge lyis namoq jo los das. Namoq gvshih ngaus nyeis bang gas ngelhoq: Khasoeh ge lyis namoq yis das. 22 Cangsoeu Lo gvng mas namoq lyis hoeng zis yah kangh tyamp las jwangh zis yah namoq nyings lyis ma gis khyvlyis nghamh las lhoeu thyoq zis xauh lyis namoq ngelhoq. 23 Hauh buisnyeis lyis tsain gausyis las jywe nyeis geh: Khasoeh ge lyis maukhung mha namoq lyis phauh shangh zis gas svsoh kuh. Nyamoq dah phauh thyeih moq eq lvpe jens lyis housoeh teh kuot ku. 24 Nghuot laus eq namoq dis bang gas mvtanhzoe nghuot! Khasoeh ge lyis namoq gas pyo pyo xauh nyeis goeus. 25 Gvshih namoq jo buk nyeis bang gas mvtanhzoe nghuot! Khasoeh ge lyis namoq yuot shet zis xauh das. Namoq gvshih yis nyeis bang gas mvtanhzoe nghuot! Khasoeh ge lyis namoq gas kukxi zis yahge ngaus zis xauh das. 26 Dius dvnganhmoq namoq lyis gis, ge taiq lyis namoq mvtanhzoe nghuot! Khasoeh ge lyis namoq dah phauh thyeih moq eq lvpe hwah jens lyis housoeh teh taiq khoq ku. 27 Namoq gyo yoeus bang lyis ngos taiq bah, Namoq dah jeswus lyis jyetdap geh. Namoq lyis hoeng bang lyis eq gis khyvlyis kuot dyei geh. 28 Namoq lyis nhoengh bang lyis shvmanh dyei geh; namoq lyis laihwangh bang lyis shvmanh dung dyei geh. 29 Nah bvlot dvshot los tyuk soeu lhyi, gohtoeu dvshot eq lhaiq dyei shih aq; nah thoq dyi yoeus soeu lhyi nah dyi lyis eq yoeus nhang shih aq. 30 Nvng lyis sang soeu lhyi dyei aq; nah kyahsoe zisyos yoeus loh soeu jyank masyah vdoms sang lo. 31 Gohyuk yah namoq lyis khasoeh kuot dyei nhang mes lyis namoq eq nyamoq lyis housoeh nyang kuot dyei geh. 32 Namoq lyis jyetdap bang lyis kyingh namoq doms phuk jyetdap lyis gas, namoq xiklyis chah jyehjuh bos lah? Khasoeh ge lyis yaunos wons bang yangh vsainnyang lyis jyetdap bang lyis gas jyetdap. 33 Namoq lyis gis zis kuot bang lyis kyingh gis khyvlyis phuk kuot lyis gas, namoq xiklyis chah jyehjuh bos lah? Khasoeh ge lyis yaunos wons bang eq housoeh gas kuot. 34 Yoh doms cap das teh bang lyis za dvjyeih dvnghoh dyei lyis gas namoq xiklyis chah jyehjuh bos lah? Khasoeh ge lyis yaunos wons bang yangh yaunos wons bang lyis yoh doms cap das nyhoq jyeih dyei. 35 Nghuot laus eq namoq dah jeswus lyis jyetdap aq, nyamoq lyis gis zis kuot geh; doms xauh yoeus das oen ma nghamh jyeih nghoh dyei geh; housoeh lyis namoq khyik manh phauh gas kuh das. Nyhang thank thoq mas Soeu dah lo jens eq namoq duot das: khasoeh ge lyis nyang gas jyehjuh ma seq nghamh bang yahge ma gis bang lyis nhaiqnyen nyeis. 36 Housoeh yvmvyah namoq dah Uwus nhaiqnyen zis yah dvyhangteh, namoq eq nhaiqnyen nyeis geh. 37 Soe vtuon goh, housoeh lyis namoq eq soetuon zis ma xauh das. Yobos vhuon goh, housoeh lyis namoq eq yobos huon zis ma xauh das. Khyuot dyei geh, housoeh lyis namoq eq khyuot dyei zis xauh das. 38 Dyei geh, housoeh lyis namoq lyis dyei das: jyoeng pan mhayah dyingh muis shoq lhvvq jying lha namoq dah dyithang khau mha dyei das: Khasoeh ge lyis namoq laiq dyei pan mhayah namoq lyis doms laiq dyei das. 39 Nyang nyamoq lyis dangtoeuq yah taiq zis gas, nyoqjet soeu ka nyoqjet soeu lhyi cho yoh she goh das lah? Aiq yuk yah dwang mas ma gyoh das lah? 40 Changlo gas svra thoq lyis zes zis ma nghuot: nghuot laus eq dyinghjet shoq xuq goeus soeu hank laus eq nyah svra teh nghuot das. 41 Nah nyoqjeih mas bos dah thangh-tungh lyis ma nghamh yoeuh, nah vmang vnoeuh nyoqjeih mas bos dah phvlhau lhyi chamus yoeuh nyeis lah? 42 Vsainnyang dah nyoqjeih mas dah thangh-tungh yangh ma nyvng zis, Vmang vnoeuh eh, nah nyoqjeih mas dah phvlhau lhyi ngos yoeus tyamp dyei bah, oen nah vmang vnoeuh lyis khasoeh yoh taiq lah? Gis guons kuot soeu eh, nah nyoqjeih mas dah thangh-tungh lyis shih cangxeih yoeus tyamp aq; hauh thang lhyi nah vmang vnoeuh nyoqjeih mas dah phvlhau lhyi yoeus tyamp dyei das zis dede nyvng das. 43 Khasoeh ge lyis, saiq gis zains mas ma gis dah vshih ma shih; ma gis dah saiqzains mas eq gis dah vshih ma shih. 44 Housoeh las saiqzains khanghmuh lyis nyah vshih masyah yoh seq: Khasoeh ge lyis zoeu zains masyah maiphang shih hank ma thyoq yoeus ku; zoeu gyomh masyah eq zvbiq shih hank ma thyoq ku. 45 Gis soeu ka nyah gis dah nhaiqlom zisyos masyah gis zis thuq kat. Ma gis soeu eq nyah ma gis dah nhaiqlom masyah ma gis zis thuq kat: Khasoeh ge lyis nhaiqlom mas dyingh las nhuot mas taiq thuq los. 46 Ngos taiq zis yah dvyhangteh ma tsain kuot zis, ngos lyis Yhensain eh, Yhensain eh, oen chamus lui goh lah? 47 Ngah jyank mas los las, ngah dang gyo yoeus zis yah chank kuot bang hank lyis laus eq, nyang hank yah doeusgoh zis lyis ngos chixoeuq das. 48 Nyang gas lukmuh lom thoq mas noq noq doeu cuk toh dah yhen tsuk soeu yah doeusgoh: jeis je los las changhphauq doeuh lyis eq hauh yhen lhyi ma yoh lhoq nhont: Khasoeh ge lyis hauh zis gas lukmuh lom thoq mas ci toh. 49 Nghuot laus eq xauhgyo thang lhyi ma chank dah soeu ka, yhen lhyi ma ci, nyeisjvng mas kuot soeu yah doeusgoh. Hauh yhen lhyi jeisbaus yah guons las houjang lains loh; hauh yhen dyoqbis tyamp, ge.
1 Yesu dius jens lyis dvnganh dye jyauh goeus ya, Kaperna-um wus mas wvng loh. 2 Hauh uhlyis jes dvxo guon zau jyetdap dah jyeidwis gas nos las shei loh nyeis. 3 Nyang Yesu dah loeus xauhgyo las, Yuda jens dah logis jens lyis Yesu jyank mas, nyah jyeidwis lyis lyih lhoq gis dyei das xiklyis sang nhang kat. 4 Nyamoq Yesu jyank mas jweh lyis, nyang lyis khyoeuq taiq zis gas, Nvng haih zis kuot dyei das xiklyis nyang gas mon yih soeu nghuot. 5 Nyang gas yah vnyau lyis jyetdap yvmvyah, yah xiklyis lyi jungs eq dvkoeuq kuot dyei soeu nghuot, ge. 6 Housoeh las Yesu gas nyamoq yah dvgeh chank loh. Nyang hauh yhen yah khahweq ma we yvmas jweh lyis, jes dvxo guon zau gas nyah dyenschangh lyis yah taiq nhang kat zis gas, Yhensain eh, nvng lyis ma thauqkhyi lo goeus jungh, nvng ngah yhen nyhangh mau khau mas wvng das zis ngos ma mon. 7 Housoeh ngos eq nah jyank mas lyih das zis ma mon oen ngos nghamh; nghuot laus eq nah dang dvkhonh yah taiq kat aq. Housoeh lyis ngah jyeidwis gis los das. 8 Khasoeh ge lyis ngos gas vmingh khau mha dah dius dvyuk nghuot las, ngah o mha eq jeslo jens nyeis: ngos haih soeu lhyi, Loh aq, oen lhyi nyang loh. Gohtoeu dvyuk lyis, Los aq, oen lhyi nyang los. Ngah jyeidwis lyis, Haih zis kuot aq, oen lhyi nyang kuot, ge. 9 Yesu gas hauh zis xauhgyo lyis, nyang lyis mauh las nyah thang mha chank yenh bang lyis lhain yoeuh las, Ngos namoq lyis taiq bah, Israel dius nyau mas yangh hei iq lomsjingh zis ngos ma nyvng, ge. 10 Hau nhang kat zis xauh bang yhen mha doms jweh loh lyis, hauh jyeidwis gas gis nyeis langh goeus zis lyis nyvng. 11 Ma nyangh lyis nyang gas Na-in ge dah wukhau mha loh lyis nyah changlo jens yahge moqjens eq nyang yah dvgeh loh. 12 Nyang wus khomh jweh ni los lyis, Yoeuh aq, chauhmuh dvyuk dah loloeu loteh shei lha mvng tsain dvng nyhop loh: wugungs dius nyoshoq eq nyang yah dvgeh nghuot. 13 Yhensain ka hauh chauhmuh lyis nyvng lyis nhaiq yoeuh nyen las, nyang lyis, Vngaus, ge. 14 Nyang loh las, koncaih lyis tanh lho lhyi, mvng dvng bang gas no yap joq. Housoeh nyang gas, Loyvm phoq eh, ngos nvng lyis taiq bah, Toq aq, ge. 15 Shei soeu ka toq tsung lha dang jis los. Housoeh Yesu gas nyah ungwes lyis kyauh kat. 16 Dvnganhmoq gyuk los las, nyamoq Mangso lhyi chungh zoh lyis yah taiq zis gas, Lvpe zainsmuh dvyuk yamoq mas thuq los goeus; Mangso ka nyah dius lyis lyih komh yenh, ge. 17 Housoeh las hai nyah loeus gas Yuda mau gonh yahge hauh vyvm vwi mas tsain taiq hoeuh loh. 18 Yohan dah changlo jens gas hauh cho dvnganh Yohan lyis loh taiq kyoh. 19 Yohan gas nyah changlo aiq yuk lyis khi lha, Yesu jyank mas nhang lha taiq zis gas, Nvng gas lyih das soeu nghuot lah? Nghuot ya ngamoq gohtoeu lhyi langh shih das lah, ge. 20 Nyah aiq yuk eq nyah jyank mas jweh lyis, Nvng gas hau jweh los das soeu nghuot lah? Nghuot ya ngamoq gohyuk lyis langh shih das lah, ge jeisnyhop dyei soeu Yohan ngah aiq yuk lyis nah jyank mas nyei nhang kat, ge. 21 Hauh shishenh lyis nyang, nyang gas nos bang, yomh, yius kuq bang nyoshoq lyis gis los nhang; nyoqjet bang nyoshoq lyis eq nyvng los nhang. 22 Yesu nyamoq lyis phuk taiq zis gas, Namoq nyvng las xauhgyo zis Yohan lyis loh taiq kyoh geh: nyoqjet bang nyoq nyvng los, khyei gyau bang yoh suh loh, mvnggvng dap bang thyauh lhyang loh, nojet bang no gyo los, shei goeus bang eq doms dwis los nhang zis xauh las, nyungs bang lyis gausyis dang taiq kyoh nyeis. 23 Ngos mas ehnyet dyet zis ma bos soeu hank laus eq ngelhoq, ge. 24 Yohan dah loeuswons bang aiq yuk loh khoq thang lhyi, Yesu gas Yohan cho dius phung lhyi taiq zis gas, Namoq mhanhdyvp pheh cha loh yoeuh goh? Lyeis muot kamh dah jvmbu lyis lhyeh? 25 Housoeh lyis cha loh thuq yoeuh goh? Lungphauq dyi wuot soeu lhyi lah? Yoeuh aq, nhamp dah dyimis wuot las zogis shuklhoq zo bang gas hwankti yhen mha nyeis. 26 Housoeh lyis cha loh thuq yoeuh goh? Lvpe lhyi lah? Nghuot goeus, ngos namoq lyis taiq bah, lvpe thoq lyis zes kuh soeu nghuot. 27 Yoeuh aq, nah cho sont das zis ngos ngah loeuskyoh soeu lhyi nah xik pheh nhang kat, ge lhaih toh zis gas nyah cho nghuot. 28 Ngos namoq lyis taiq bah, vmesbih masyah khoeu bang mas jeisnyhop dyei soeu Yohan thoq lyis kuh soeu hank ma bos. Nghuot laus eq Mangso munghdan mas ngis thank soeu ka nyah thoq lyis zes kuh, ge. 29 Khoengh khywi bang yahge dius jens dvnganhmoq gas, Yohan dah dang xauhgyo lyis, nyah jeisnyhop lyis tsain kham zis yah, Mangso ka dan, ge nyamoq rhen. 30 Pharishe jens yahge Lyi svra jens gas, Yohan dah jeisnyhop lyis ma kham yoeus, Mangso toeuq toh cho lhyi peq tyamp. 31 Housoeh las Yhensain taiq zis gas, Haq caiq mas bang, nyamoq cha yah doeusgoh zis lyis ngos cha yah byi das lah? 32 Nyamoq gas kaih jang mas tsung lha, dvyuk yah dvyuk lui goh las, Ngamoq gas namoq lyis khvlhank muot dyei lyis eq namoq ma goh, Ngamoq kukxi lyis eq namoq ma ngaus, ge dah loshang jens yah doeusgoh. 33 Khasoeh ge lyis jeisnyhop dyei soeu Yohan gas, ohlhyoq eq ma zo, zvbiq eq ma shuk jweh los lyis namoq gas, Nyang mas yius bos, tsain ge. 34 Yoeuh aq, Cangsoeu Lo gas zo shuk uhjyangh lyih lyis, Womlvm soeu, zvbiq yet soeu, khoengh khywi bang yahge yaunos wons bang dah dyenschangh, tsain ge. 35 Nghuot laus eq Mangso dah joeui ka jyoeng yvlyis hau joeui dah lo jens yah tuonh shet nyeis. 36 Pharishe dvyuk gas nyang yah dvgeh wom zo das zis nyang lyis khi; nyang eq Pharishe dah yhen khau mha wvng las womjus mas tsung toh. 37 Yoeuh aq, hauh wugungs mas yaunos wons dah vmesbih dvyuk gas Yesu Pharishe yhen mha wom zo das zis tsung toh zis lyis seq lyis, xangh coeu luk jywanglo dvkoeuq chi lyih las, 38 Nyah khyeiyang nungstsaink mas ngaus yap uhlyis yah Yesu khyei mha nyoqdyeis yah jyweq los las, nyah uhloms mas cam yah buot las nyah khyei lhyi bvlot tanh zis yah coeu juot dyei. 39 Nyang lyis khi dah Pharishe hauh yvlyis nyvng lyis, nyah ehnyet mas, Haih soeu lvpe nghuot lyis gas, nyang lyis tanh dah haih vmesbih gas hank nghuot zis eq, yaunos wons dah soeu nghuot zis lyis eq nyang seq wondoeus, ge. 40 Yesu nyang lyis phuk taiq zis gas, Simon eh, ngos nvng lyis taiq das zis dvja bos, ge. Nyang gas, Svra eh, taiq aq, ge. 41 Yesu gas, jyeih dyei soeu dvyuk mas jyen dap soeu aiq yuk bos: dvyuk mas ngwis kyvp oengxo, gohtoeu dvyuk mas oengci nghuot. 42 Nyah aiq yuk gas jyen cap das zis ma yoh yvmvyah nyah aiq yuk lyis khyuot tyamp dyei goeus. Housoeh lyis hau aiq yuk mas nyang lyis khayuk zes jyetdap das lah, ge. 43 Simon phuk taiq zis gas, Zes nyoshoq khyuot tyamp dyei zis xauh soeu nghuot das oen ngos nghamh, ge. Nyang taiq zis gas, Nvng jus khyvlyis soetuon goeus, ge. 44 Housoeh nyang gas vmesbih jyank pheh xoeu lha Simon lyis taiq zis gas, Haih vmesbih lyis nvng nyvng ma nghuot lhyeh? Ngos nah yhen mha wvng los lyis nvng ngos lyis khyei cheih jeis ma dyei: nghuot laus eq nyang gas nyah nyoqdyeis yah ngah khyei mha taiqh dyei las, nyah cam yah buot dyei. 45 Nvng ngos lyis bvlot ma tanh, nghuot laus eq haih vmesbih gas ngos wvng los masyah ma lyen lo ngah khyei mha bvlot tanh nyeis. 46 Nvng ngah uhloms lyis coeu eq ma juot dyei, nghuot laus eq haih vmesbih gas ngah khyei lhyi xangh coeu juot dyei. 47 Housoeh yvmvyah ngos nvng lyis taiq bah, nyah yaunos nyoshoq lyis khyuot dyei zis xauh goeus yvmvyah nyang zes las jyetdap nyeis. Dvmhauh khyuot dyei zis xauh soeu ka nainlo dvjyetdap, ge. 48 Hauh vmesbih lyis eq, Nah yaunos khyuot tyamp dyei goeus, ge nyang lyis taiq. 49 Nyang yah dvgeh womjus mas tsung toh bang, nyamoq ehnyet mas taiq zis gas, Yaunos yangh yoh khyuot dyei soeu haih zis gas hank nghuot lah, ge. 50 Nyang hau vmesbih lyis taiq zis gas, Nah lomsjingh zis gas nvng lyis khyuot yoeus goeus, nyenstap zis yah loh lo aq, ge.
1 Hauh thang lhyi khanyhank ma nyangh lyis nyang gas Mangso munghdan gausyis dang lyis taiq hoeuh uhjyangh wus yahge wukhau khanghmuh jweh loh. Changlo dvci aiq yuk moq eq nyang yah dvgeh nghuot. 2 Yius kuq zis yahge noslom nyoshoq masyah gis los nhang zis xauh dah vmesbih jens dvyhamh, yius nyhet doeu thuq loh goeus dah Magdala ge soeu Mari; 3 Herod dah ziszom Khuza dah yhensain nyhiq Yoana yahge Susana, gohtoeu nyoshoq moq eq nyamoq yoh zisyos yah nyang lyis phuqsoe uhjyangh nyang yah dvgeh tsain chank yenh. 4 Wugungs khanghmuh masyah dah dius phung nyah jyank mas huom los lyis, nyang dangtoeuq yah taiq zis gas, 5 Jyo khyoq soeu ka nyah jyo nyau sanh das xiklyis thuq loh. Nyang sanh kat lyis dvkhamh gas chokhyoh mas gyoh las svbih yah nang nheh zis yahge mau dang nghoq jens yah lyih kui zo tyamp. 6 Dvyhamh gas lukjvp yos mas gyoh loh. Hauh zis gas yuk los laus eq nyeissoq ma nam yvmvyah nyhauh loh. 7 Dvyhamh gas zoeu gyomh mas gyoh loh, hauh zis gas zoeu zains yah dvgeh yuk kuh los las hauh yvlyis huop tyamp. 8 Gohtoeu ka nyeisjvng gis yvmas gyoh las, yuk kuh los lyis vshih eq dvxo huon je los. Nyang haih zis dye taiq lyis, Gyo yoeus das no dap soeu ka xauhgyo bas jungh, ge. 9 Nyah changlo jens nyang lyis nyei zis gas, Haih dangtoeuq gas cha ge mes lah, ge. 10 Nyang taiq zis gas, Maukhung munghdan dah nghop toh cho ka namoq lyis seq nhang goeus. Nghuot laus eq gohyhamh bang lyis gas ngos dangtoeuq yah dvtaiq. Housoeh nyamoq yoeuh laus eq ma nyvng, gyo laus eq ma seqgyo, ge. 11 Gvshih haih dangtoeuq gas heisoeh nghuot: jyo nyau gas Mangso dah Dang nghuot. 12 Cho mha gyoh zis gas, hauh zis lyis xauhgyo lyis nyamoq lomsjingh las khyuot yoeus zis ma xauh das xiklyis, yius los las nyamoq nhaiqlom mas dah dang lyis yoeus tyamp zis xauh bang nghuot. 13 Luk thoq mas gyoh zis gas, nyamoq hau dang xauhgyo lyis gausyis zis yah dang lyis lhom yoeus laus eq vnyet ma chent yvmvyah, dvyoq kyingh lomsjingh las shiwu zis xauh lyis nungsdoms loh bang nghuot. 14 Zoeu gyomh mas gyoh zis gas, xauhgyo thang lhyi chiq cho, dis los cho yahge pyo cho yah huop las mos dah vshih ma shih bang nghuot. 15 Nghuot laus eq nyeisjvng gis yvmas gyoh zis gas, gis dah ehnyet yah dang lyis gyo yoeus lho lha wontang zwi zains toh las jhen zis yah vshih shih bang nghuot. 16 Nyibung lyis tuonh las dang yah nghop toh zis hank ma bos, jungjeis mas eq hank ma kat toh: wvng los bang bvng zis nyvng das xiklyis nyibung gus mas dvgyangh tuonh toh. 17 Khasoeh ge lyis, ma chixoeuq shoq gauh shung toh zis cha eq ma bos; ma seq ma nyvng shoq nghop toh zis cha eq ma bos. 18 Housoeh yvmvyah namoq khasoeh xauhgyo zis lyis zaih nyeis geh. Khasoeh ge lyis, yoh bang lyis lung dyei das; ma yoh bang jyank masyah gas nyamoq yoh joq teh zis yangh yoeus tyamp dyei das. 19 Hauh uhlyis nyah ungwes yahge nyah vwik jens gas nyah jyank mas jweh lyih las dius puk thoeu yvmvyah nyah jyank mas ma tsain yoh wvng loh. 20 Housoeh nyang lyis taiq los zis gas, Nah ungwes yahge nah vwik jens nvng yah xauhgoh mes las nghe mha los tsain yap joq, ge. 21 Nyang nyamoq lyis phuk taiq zis gas, Mangso dang lyis xauhgyo las, hauh yvlyis chank kuot bang gas ngah ungwes yahge ngah vwik jens nghuot, ge. 22 Dvnyeih gas nyang nyah changlo jens yah dvgeh lhyik khau mha wvng tsung lha nyamoq lyis taiq, Yang thomh thyitvp pheh goeu e goh, ge nyamoq goeu loh. 23 Housoeh nyamoq goeu loh nyeis lyis Yesu gas yhet joq. Houmha lyeismuh jyang muot yvmvyah chont mas jeis dyingh los las, nyamoq gudwvng bah ge. 24 Housoeh las nyamoq gas nyang lyis loh nhauh uhlyis yah taiq zis gas, Svra eh, svra eh, ngamoq shei bah ge loh nyeis, ge. Housoeh nyang toq las lyeis yahge jeisphauq lyis nyho lho lhyi, hauh zis gas tam loh las sam joq. 25 Nyang nyamoq lyis taiq zis gas, Namoq dah lomsjingh zis gas khalhye gah, ge. Hauh uhlyis nyamoq gyuk mauh las, Haih soeu ka hank nghuot lah? Lyeis yahge jeisphauq lyis taiq kat lyis, nyah domsyos tsain gyo, ge nyang changh nyang tsain taiq goh. 26 Nyamoq gas Galile thyitvp Gerasa ge dah mau mas jweh loh. 27 Nyang tungyos pheh thuq suh loh lyis houmha hauh wus mas dah yius kuq dah yukgis dvyuk yah xauhgoh. Hauh soeu ka shishenh nyangh nyangh dyimis ma wuot, yhen mha eq ma nyeis, lopkhyam mha kyingh dvnyeis. 28 Nyang Yesu lyis nyvng yah dvyih kaiq zis yah xikkhonh mas gop las, Nyhang thank Mangso dah Lo Yesu eh, Nvng ngos yah cha sen lah? Nvng ngos lyis ma shoeuhshih das xiklyis ngos dung, ge thwe zainsmuh yah taiq. 29 Khasoeh ge lyis Yesu gas hauh yius lyis hauh dius yuk jyank masyah thuq loh das xiklyis vmingh dyei yvmvyah nghuot. Vlhain lhain nyang lyis kuq las shamjvng yah twih las kyomh kyomh toh lyis eq, lang phaiq thyet las yius gas nyang lyis mhanhdyvp pheh shwih loh loh mus. 30 Yesu nyang lyis nyei zis gas, Nah nyings cha nghuot, ge. Nyang gas, Nyoshoq nghuot: Khasoeh ge lyis nyah vkhau mha yius nyoshoq lungh joq. 31 Nyamoq lyis noq thank dwang chuk buiq mas ma khat tyamp das xiklyis nyang lyis dung. 32 Hauh jingkank mas wuq dvjens bot zo nyeis: nyamoq gas hauh wuq jens mas wvng nhang aq, ge nyang lyis vmingh sang nyeis las nyang gyo dyei. 33 Hauh uhlyis yius jens gas dius jyank masyah thuq las wuq jens mas tsain wvng loh. Wuq jens gas gammhung mhayah tyauq gyoh las thomh mas ciang shei. 34 Wuq yoeuh bang hauh zis nyvng yvmvyah cangh loh las, wugungs yahge wukhau mha loh tsain taiq kyoh. 35 Nyamoq eq bweh goeus cho lhyi yoeuh das xiklyis thuq loh las Yesu jyank mas jweh lyis, vkhang yius thuq loh goeus dah dius gas yos yos lyis dah ehnyet teh, dyimis wuot las Yesu dah khyeiyang mas tsung toh zis lyis nyamoq nyvng las gyuk. 36 Hauh zis lyis nyvng bang gas, vkhang yius kuq soeu lhyi khasoeh kuot las gis los nhang zis nyamoq lyis taiq kyoh. 37 Hauh uhlyis Gerasa mau vyvm vwi mas dah somhloh moqjens dvnganhmoq gas, nyang lyis nyamoq jyank masyah thuq loh das xiklyis tsain dung: Khasoeh ge lyis nyamoq svsoh gyuk. Nyang gas chont khau mha wvng tsung lha tauh loh. 38 Nghuot laus eq yius cangh thuq loh goeus soeu ka, nyang yah dvgeh nyeis das xiklyis nyang lyis khyoeuq nyeis. Nghuot laus eq Yesu gas nyang lyis nhang kat uhlyis yah taiq zis gas, 39 Nah yhen mha tauh loh las, Mangso nvng lyis kha iq kuot dyei goeus zis loh taiq hoeuh aq, ge. Nyang eq loh las Yesu nyah xiklyis kha iq kuhxing zis kuot dyei goeus zis lyis dvwus gonh, joqyos khanghmuh mas taiq hoeuh loh. 40 Housoeh Yesu tauh loh lyis, dius jens gas nyang lyis gauslaus zis yah lhom yoeus: Khasoeh ge lyis nyamoq dvnganhmoq gas nyang lyis tsain langh nyeis. 41 Yoeuh aq, Yairu ge, lyi jungs uhjyung dvyuk los las, Yesu dah khyeiyang mas gyuis las, nyah yhen mha los das xiklyis khyoeuq nyeis. 42 Khasoeh ge lyis, dvci aiq zvn ko dah nyah lonyi loteh gas shei loh nyeis. Nyang e loh nyeis lyis moqjens yah nyang lyis duon nyhenh los. 43 Dvci aiq zvn suih shuon lha nos dah vmesbih dvyuk gas, nyang yoh goeu dvnganh mvcheih lastsiang jens jyank mas yhung mhont tyamp lyis eq, hank eq nyang lyis ma thyeh yhoh gis dyei. 44 Nyah nungsthank dyithang mha tanh lho lhyi, nyang suih shuon zis houjang doms tyamp. 45 Yesu gas, Ngos lyis hank tanh, ge nyei. Dvnganhmoq yah he uhlyis, Petru yahge nyang yah dvgeh nghuot bang taiq zis gas, Svra eh, moqjens nvng lyis tsain duon nyhenh los lyis, Ngos lyis hank tanh lah, ge. 46 Yesu gas, Dvyuk ngos lyis tanh goeus, khasoeh ge lyis ngah gungs masyah yomsoq thuq loh zis ngos seq, ge. 47 Hauh vmesbih gas ma yoh zauh toh zis lyis seq goeus ya, tyik tyik nvn zis yah nyah xikkhonh mas gyuis gyoh las, nyang lyis chamus tanh zis yahge houjang nyang khasoeh gis los zis lyis taiq thuq. 48 Yesu nyang lyis taiq zis gas, Lonyi eh, nhaiq dainh lo aq, nah lomsjingh zis gas nvng lyis gis los nhang goeus; nyenstap zis yah loh lo aq, ge. 49 Nyang housoeh taiq nyeis lyis, lyi jungs uhjyung dah yhen mha bang dvyuk los las, Nah lonyi shei goeus; Svra lyis vthauqkhyi nyeis lo, ge. 50 Hauh dang Yesu xauhgyo lyis phuk taiq zis gas, Vchiq, lomsjingh ehnyet dvbos aq, housoeh lyis nah lonyi gis los das, ge. 51 Housoeh nyang yhen khau mha jweh loh lyis, Petru, Yaku yahge Yohan, nyelo dah ungwes uwus masyah lai las gohyuk hank lyis eq ma wvng nhang. 52 Dvnganhmoq yah ngaus las hauh nyelo xiklyis shei uh tsain ngauh nyeis laus eq nyang taiq zis gas, Vngaus goh, nyang ma shei, dvyhet joq, ge. 53 Hauh nyelo shei goeus zis lyis tsain seq yvmvyah, nyamoq gas nyang lyis jwangh yis. 54 Nghuot laus eq nyang, nyah loq lyis zwi las, Nyelo eh, toq aq, ge lui lho lhyi, 55 nyah dyos doms los las, nyang houjang toq los. Yesu gas, nyang lyis zonoms dyei das zis nyamoq lyis taiq toh. 56 Nyah ungwes uwus gas mauh: laus eq bweh goeus cho hank lyis eq ma taiq kyoh das xiklyis, nyang nyamoq lyis khyangh com.
1 Hauh thang lhyi Yesu gas nyah changlo dvci aiq yuk lyis khi yoeus las, yius dvnganh lyis ung das zis yahge noslom gis los nhang das yomsoq yahge toeuh dyei las, 2 Mangso munghdan cho lhyi taiq kyoh das xiklyis eq, nos bang lyis gis los nhang das xiklyis eq nyang nyamoq lyis nhang kat. 3 Nyang nyamoq lyis taiq zis gas, Gyung cho xiklyis lhamloq, bvtmuh, ohlhyoq, ngwis, dyi aiq dung, cha eq vchi goh. 4 Namoq kha yhen mha wvng loh lyis eq hauh wukhau mhayah doms thuq loh shishenh jweh shoq houmha nyeis geh. 5 Hank laus eq namoq lyis ma lhom yoeus nghuot lyis gas, namoq hauh wukhau mhayah doms thuq loh dah uhlyis nyamoq xikkhonh mas kanghjyoeng duot das xiklyis namoq khyei mha dap dah phvlhau lhyi ko khyoq toh khoq geh, ge. 6 Housoeh nyamoq tsain thuq loh las, wugungs khanghmuh mas gausyis dang taiq hoeuh yenh uhlyis yah joqyos khyiq khanghmuh mas nos bang lyis gis los nhang. 7 Gvshih nyei boms dvboms guon soeu hwankti Herod gas nyang kuot dah muhzoh dvnganh yvlyis xauhgyo lyis, nyang gas nhaiqlom svsoh ma nyens ma tap mus nyeis: khasoeh ge lyis, dvyhamh bang gas, Yohan gas shei masyah dwis toq los. 8 Dvyhamh gas Eliya jweh los. Gohtoeu dvyhamh gas, Gohnhamp dah lvpe dvyuk dwis toq los, ge. 9 Herod gas, Ngos Yohan lhyi uhloms thyet goeus: nghuot laus eq ngos hei iq xauhgyo tsuk toh soeu ka hank nghuot lah? Nyang lyis nyvng mes, ge. 10 Lvgyo jens tauh los las, nyamoq kuot goeus dah cho dvnganh nyang lyis tsain taiq kyoh. Nyang gas nyamoq lyis shwih las, Betsaida wus pheh jhank loh. 11 Nghuot laus eq dius jens seq las nyah thang mha tsain chank loh. Housoeh nyang nyamoq lyis lhom yoeus las Mangso munghdan cho lhyi taiq kyoh. Nos gis los mes bang lyis gis los nhang. 12 Nyenhthang buis wvng loh lyis dvci aiq yuk moq nyang lyis los taiq zis gas, Haih zis mhanhdyvp dvnghuot yvmvyah, moqjens lyis vwi vyvm wukhau mha yhet das joqyos yahge xo zo das xiklyis nyamoq lyis nhang kat aq, ge. 13 Nyang taiq zis gas, Nyamoq lyis namoq zonoms dyei geh, ge. Hauh uhlyis nyamoq phuk taiq zis gas, Haih dius dvnganhmoq xiklyis gas ngamoq loh wis zis ma nghuot lyis gas, ohlhyoq oeng koeuq yahge oengdoq aiq doeu mas lai las ngamoq cha eq ma yoh, ge. 14 Khasoeh ge lyis yukgis jens oeng khyoengh ko nghuot. Nyang nyah changlo jens lyis taiq zis gas, Dvhuom mha oengci ci tsung nhang geh, ge. 15 Nyamoq eq housoeh kuot las dvnganhmoq lyis tsung nhang. 16 Hauh thang lhyi ohlhyoq oeng koeuq yahge oengdoq aiq doeu lyis nyang yoeus chi lha, maukhung mha nghank yoeuh las shvmanh dung thang lhyi khyiq las moqjens lyis gvm dyei das nyhenshang changlo jens lyis dyei. 17 Nyamoq dvnganhmoq zo jo thang lhyi, nyet dah vpop vsop kui tsainh lyis dvci aiq dang nghuot. 18 Hauh thang lhyi nyang kyingh shvmanh dung nyeis uhlyis, nyah changlo jens eq nyang yah dvgeh nyeis las, nyang nyamoq lyis nyei zis gas, Moqjens ngos lyis hank nghuot ge goh lah, ge. 19 nyamoq phuk taiq zis gas, Dvyhamh gas, Jeisnyhop dyei soeu Yohan; dvyhamh gas, Eliya; gohtoeu dvyhamh gas, gohnhamp dah lvpe dvyuk dwis toq los, tsain ge, ge. 20 Nyang nyamoq lyis taiq zis gas, Namoq gas ngos lyis hank nghuot oen goh lah, ge. Petru phuk taiq zis gas, Nvng gas Mangso dah Khristu nghuot, ge. 21 Hauh zis hank lyis eq ma taiq das xiklyis nyang nyamoq lyis khyangh wontang com toh. 22 Housoeh nyang taiq zis gas, Cangsoeu Lo gas shanghsenh zis nyoshoq xauh las, maussauh lhaih bang, phudyei uhjyung jens yahge logis jens yah peq tyamp las, nyang lyis sat thang lhyi somh vnyeih lyis dwis toq los das, ge. 23 Housoeh nyang dvnganhmoq lyis taiq zis gas, Dvyuk yuk ngah thang chank soeu duot mes lyis gas, nyah gungs lyis nungsyos toh las nyeih khanghmuh nyah tapzains wuq las ngah thang mha chank bas jungh. 24 Khasoeh ge lyis vsainnyang kang lhyi khyuot yoeus mes soeu ka kang dyuk das. Nghuot laus eq ngah gvng mas kang dyuk soeu ka kang yoh das. 25 Dius gas mungkvn gonh lyis sain toh laus eq, nyah kang dyuk tyamp lyis gas nyah xiklyis chah vkyuh bos lah? 26 Hank laus eq ngos yahge ngah dang lyis xoq soeu lhyi ka, cangsoeu Lo gas nyah phunk yah, Uwus dah phunk yahge gyingshang loeuswons bang dah phunk yah jweh lyih lyis nyang lyis eq xoq das. 27 Nghuot laus eq ngos namoq lyis jyoengh taiq bah, heimha yap joq bang mas dvyhamh gas Mangso munghdan ma nyvng dvchank gas ma shei das, ge. 28 Hauh dang taiq thang lhyi xet nyeih ko lhyi, Yesu gas Petru, Yaku, Yohan moq lyis shwih las, shvmanh dung das xiklyis boms mas doq loh. 29 Nyang shvmanh dung nyeis lyis nyah nyoqnho vwot thaiq los las, nyang wuot dyi eq thyoeu lha kyi kyi bvng. 30 Vbusbih aiq yuk, Moshe yahge Eliya gas nyang yah dang jis goh nyeis yvlyis nyamoq nyetlos nyettant nyvng. 31 Nyah aiq yuk gas phunk yah thuq los las, Yesu Yerusalem mas kuot nyhuk chah dah nyang shei chah cho lhyi taiq goh nyeis. 32 Nghuot laus eq Petru yahge nyang yah dvgeh nghuot vzomh gas yhet tsain nguis nyeis zis gying soh los lyis, nyah phunk yahge nyang yah dvgeh yap joq vbusbih aiq yuk lyis nyvng. 33 Hauh vbusbih aiq yuk nyah jyank masyah gang loh nyeis lyis, Petru gas Yesu lyis, Svra eh, heimha yang nyeis das xiklyis gis, yang zvng somh koeuq kuot goh, Nvng, Moshe, Eliya xiklyis dvyuk dvkoeuq ge las nyang cha taiq nyeis zis nyang ma seq taiq. 34 Nyang housoeh taiq nyeis lyis, jyommauh yah nyamoq lyis nghop las, nyamoq hau vkhau mha wvng loh nyeis lyis nyamoq gyuk los. 35 Hauh thang lhyi jyommauh khau mhayah eq thwe dvkoeuq thuq los zis gas, Haih soeu ka ngos khyen toh, ngos jyetdap Lo nghuot; nyah dang gyo geh, ge. 36 Hauh thwe dye taiq lyis, Yesu dvyuk lyis kyingh dvnyvng lo: hauh yoq lyis nyamoq tsoeklo nyeis las, nyamoq nyvng zis lyis hank lyis eq ma taiq kyoh. 37 Nungs nyeih nyamoq boms masyah gyoh los lyis, dius nyoshoq moq nyang lyis zes langh. 38 Yoeuh aq, dius phung mhayah yukgis dvyuk gas kaiq las, Svra eh, ngah lo lyis yoeuh dyei das zis ngos nvng lyis dung: khasoeh ge lyis nyang gas ngah loteh nghuot. 39 Yoeuh aq, yius yah kuq dah uhlyis gas chuot las nyetlos nyettant kaiq los. Nyop vdoe doe mulas yius yah nyang lyis nos shoq shoeuhshih las khayhoq eq nyang yah ma gang loh. 40 Nyang lyis khat thuq dyei das xiklyis nah changlo jens lyis ngos dung yoeuh goeus; nghuot laus eq nyamoq ma yoh khat tyamp. 41 Yesu phuk taiq zis gas, Lomsjingh cho ma bos, ma shop dah caiq mas bang eh, ngos namoq yah dvgeh khanyhank jweh shoq nyeis las namoq lyis jhen dyei nyeis das lah? Nah lo lyis heimha shwih los aq, ge. 42 Loshang los nyeis uhlyis, yius yah kuq lhain kat las chuot nhang. Nghuot laus eq Yesu gas yius lyis nhant las loshang lo lyis gis los nhang lha nyah uwus lyis doms kyauh kat. 43 Nyamoq dvnganhmoq Mangso dah yomsoq zains lyis tsain mauh. Nyang kuot dah muhzoh dvnganh gvng mas tsain mauh nyeis lyis nyang nyah changlo jens lyis taiq zis gas, 44 Namoq haih dang lyis wontang gyo yoeus geh: khasoeh ge lyis Cangsoeu Lo gas svbih loq mas phanhlyen dyei zis xauh das, ge. 45 Nghuot laus eq nyamoq gas nyang cha lhyi taiq zis ma seqgyo: khasoeh ge lyis haih zis gas nyamoq jyank masyah nghop shung toh. Nyang lyis nyamoq hauh cho nyei das zis tsain gyuk. 46 Hauh uhlyis nyamoq mas kuh thank zis hank, ge taiq phyen-goh thuq los. 47 Yesu gas nyamoq ehnyet mas nghamh zis lyis seq las, loshang dvyuk lyis nyah vyvm mas shwih toh las, 48 Nyang nyamoq lyis taiq zis gas, Ngah nyings masyah haih loshang lhyi lhom yoeus soeu hank laus eq, ngos lyis lhom yoeus zis nghuot. Ngos lyis lhom yoeus soeu hank laus eq ngos lyis nhang kat soeu lhyi lhom yoeus zis nghuot. Khasoeh ge lyis namoq dvnganhmoq mas ngis thank soeu ka, kuh thank soeu eq nghuot, ge. 49 Yohan phuk taiq zis gas, Svra eh, nah nyings yah yius khat thuq soeu dvyuk lyis ngamoq nyvng. Nyang ngamoq mas zis ma nghuot yvmvyah, nyang lyis tomp toh, ge. 50 Yesu nyang lyis taiq zis gas, Nyang lyis vtomp toh goh: khasoeh ge lyis namoq lyis tyi ma xo soeu ka namoq shot pheh zis nghuot, ge. 51 Nyang lyis toqh yoeus das shishenh jweh los nyeis lyis, nyang gas Yerusalem mas e das zis lyis wontang nghamh tsuk zains toh. 52 Nyah xik pheh loeuswons bang lyis nhang kat. Nyah xiklyis cicont sont toh dyei das nyhenshang nyamoq gas Samari wukhau dvkoeuq mas wvng loh. 53 Nyah nyoqnho ka Yerusalem pheh loh das teh dvdoeus yvmvyah nyamoq gas nyang lyis ma tsain lhom yoeus. 54 Nyah changlo tang Yaku yahge Yohan hauh zis lyis nyvng las taiq zis gas, Yhensain eh, nyamoq lyis ngheq tyamp das zis ngamoq lyis maukhung mha dah nyi vkhi khyoq nhang mes lah, ge. 55 Nghuot laus eq nyang lhain yoeuh las nyah aiq yuk lyis nyho. 56 Hauh thang lhyi Yesu yahge nyah changlo jens gas gohwus pheh loh. 57 Hauh thang lhyi nyamoq cho mha loh nyeis lyis dius dvyuk Yesu lyis taiq zis gas, Nvng khalhye loh khalhye ngos nah thang mha chank das, ge. 58 Yesu nyang lyis taiq zis gas, Womkhuih jens eq khyung bos; mau dang nghoq jens eq sot yoh; nghuot laus eq Cangsoeu Lo gas nyah uhloms toh das joqyos ma yoh, ge. 59 Nyang gas gohtoeu dvyuk lyis, Ngah thang mha chank los aq, ge. Nyang taiq zis gas, Yhensain eh, ngah uwus lyis shih loh nyhop khoq nhang aq, ge. 60 Nghuot laus eq Yesu nyang lyis taiq zis gas, Shei bang lyis gas nyamoq dah shei bang nyang nyhop bas jungh: nvng gas Mangso munghdan cho loh taiq hoeuh aq, ge. 61 Tsai, gohtoeu dvyuk eq, Yhensain eh, ngos nah thang chank das: nghuot laus eq ngah yhen mha nyeis bang lyis shih loh jeshuh khoq bah, ge. 62 Yesu nyang lyis taiq zis gas, Khont zwi las nungs pheh lhain yoeuh soeu hank laus eq Mangso munghdan yah ma mon, ge.
1 Yhensain ka gohtoeu nyhetci aiq yuk lyis eq toeuq kat las, nyamoq lyis nyang loh das wukhau khyiq khanghmuh mas aiq yuk dvtwi twi nyah xik mas nhang kat. 2 Nyang nyamoq lyis taiq zis gas, Jyo yhomh das zis nyoshoq bos laus eq, muh zwi bang nain. Housoeh yvmvyah jyo Yhensain ka nyah jyo yhomh das zis uhkung jens lyis nhang kat dyei bas jungh dung nyeis geh. 3 Namoq tsain loh geh, yoeuh aq, ngos namoq lyis womkhuih jens jo mas yvng lo jens lyis teh, nhang kat. 4 Ngwis thung, bvtmuh, thyvkoq teh zis cha eq vchi goh: cholvt mas hank lyis eq vjhent goh. 5 Namoq kha yhen mha wvng loh laus eq, Haih yhen mha nyenstap joq bas jungh, oen shih cangxeih taiq geh. 6 Hauh yhen mha nyenstap dah lo nyeis nghuot lyis gas, namoq dah nyenstap zis hauh soeu jyank mas doengs joq das, ma nyeis nghuot lyis gas, namoq dah nyenstap zis gas namoq jyank mas tauh los das. 7 Namoq hauh yhen mha nyang nyeis las, nyamoq gvmtsoh zis zo shuk geh: khasoeh ge lyis muh zwi soeu ka, nyah uhkung phauh yoh mon: dvyhen thang lhyi dvyhen vtyungh vlvng goh. 8 Namoq wvng loh dah wukhau mha laus eq, nyamoq lhom yoeus langh nghuot lyis gas, namoq xikkhonh mas khyoq dyei yvlyis tsain zo shuk geh. 9 Houmha nos bang lyis gis los nhang lha, Mangso dah munghdan gas namoq jyank mas ni los goeus, oen dius jens lyis taiq kyoh geh. 10 Nghuot laus eq namoq loh dah wus mas bang, namoq lyis ma lhom yoeus nghuot lyis gas, talhoeu pheh doms thuq las heisoeh oen taiq geh. 11 Ngamoq khyei mha dap, namoq wus mas dah phvlhau yangh namoq lyis yobos tuonh shet yvmas kanghjyoeng duot das nyhenshang ko khyoq toh khoq goeus; nghuot laus eq Mangso munghdan gas namoq jyank mas ni los goeus zis lyis soh geh, oen taiq kyoh geh. 12 Nghuot laus eq namoq lyis ngos taiq bah, hauh buisnyeis lyis Sodom wugungs kham zo zis gas, hauh wus thoq lyis sunghhuq das, ge. 13 Korazin eh, nvng mvtanhzoe nghuot! Betsaida eh, nvng mvtanhzoe nghuot! Khasoeh ge lyis namoq jyank mas nyvng nhang dah yomsoq zains muhzoh lyis Taire yahge Sidon mas nyvng nhang nghuot lyis gas, hauh wus mas bang gohnhamp yah yanghthung dyi wuot, nyiyvp boms mas lhoeuh las nhaiqlom yoh thaiq hah das. 14 Soetuon dah buisnyeis lyis Taire yahge Sidon xauh zis gas namoq thoq lyis sunghhuq das. 15 Kaperna-um eh, nvng maukhung jweh shoq chunghtoq zis xauh das lah, munyi thomh jweh shoq khyoq zis xauh das. 16 Namoq dah dang gyo soeu ka ngah dang gyo zis nghuot, Namoq lyis peq tyamp soeu ka ngos lyis peq tyamp zis nghuot. Ngos lyis peq tyamp soeu ka, ngos lyis nhang kat soeu lhyi peq tyamp zis nghuot, ge. 17 Hau nyhetci aiq yuk moq gas gauslaus zis yah tauh los las taiq zis gas, Yhensain eh, nah nyings masyah yius jens yangh ngamoq dah dang tsain gyo, ge. 18 Nyang nyamoq lyis doms taiq zis gas, Satan gas maunyoq nyik teh maukhung mhayah gyoh zis ngos nyvng goeus. 19 Yoeuh aq, lhangnoq yahge gungsgauh lyis nang nheh das zis yahge jeswus yomsoq dvnganh zis lyis ung tyamp das yomsoq gas, ngos namoq lyis dyei goeus yvmvyah, namoq lyis cha yah eq yoh nos nhang das zis ma nghuot. 20 Nghuot laus eq yius gas namoq dah dang gyo oen vgauslaus goh: namoq dah nyings maukhung mha lhaih toh yvmvyah dvgauslaus geh, ge. 21 Hauh shishenh lyis Yesu gas, Dyos mas gauslaus las heisoeh ge: Maukhung nyeisjvng dah Yhensain Uwus eh, joeui bos bang yahge ehnyet yik bang jyank masyah nvng haih cho jens lyis nghop shung toh las, lonoeuh jens lyis chixoeuq yvmvyah, ngos nvng lyis nhaiqshoqlang. Nghuot goeus Uwus eh, heisoeh bweh los zis gas nvng nhaiqdoeus khyvlyis nghuot. 22 Ngah Uwus gas ngos lyis dvnganh dyei toh goeus: Lo hank nghuot yvlyis Uwus mas lai las hank eq ma seq, Uwus hank nghuot yvlyis Lo yahge hauh Lo yah nyah cho chixoeuq das xiklyis khyen yoeus zis xauh soeu mha lai las hank ma seq. 23 Hauh thang lhyi nyang nyah changlo jens jyank pheh lhain yoeuh las gauh taiq zis gas, Namoq nyvng dah vyhang lhyi nyvng dah nyoq gas ngelhoq. 24 Khasoeh ge lyis ngos namoq lyis taiq bah, namoq nyvng yvlyis lvpe jens yahge hwankti jens nyoshoq nyvng mes laus eq ma xauh nyvng khoq. Namoq xauhgyo yvlyis gyo mes laus eq ma xauhgyo khoq, ge. 25 Yoeuh aq, lyi svra dvyuk toq yap las Yesu lyis shiwu zoh lyis yah taiq zis gas, Svra eh, vcaiq vto kang vso vlho xauh kham yoeus das xiklyis ngos cha kuot chah lah, ge. 26 Yesu nyang lyis taiq zis gas, Lyi maussauh mas cha lhaih toh? Nvng khasoeh seqgyo lah, ge lyis, 27 Nyang phuk taiq zis gas, Nah Yhensain Mangso lhyi nah nhaiqlom dvnganh yah, nah dyos dvnganh yah, nah yom dvnganh yah, nvng dolhain zis dvnganh yah jyetdap aq, nah yhenkyoh lyis eq nah gungs yah dvyhangteh jyetdap aq, ge. 28 Yesu doms taiq zis gas, Nvng taiq zis jus, housoeh kuot lyis kang yoh das, ge. 29 Nghuot laus eq nyang gas vsainnyang dan zis lyis seq nhang mes dah ehnyet yah taiq zis gas, Ngah yhenkyoh gas hank nghuot lah, ge. 30 Yesu phuk taiq zis gas, Dius dvyuk Yerusalem wus masyah Yerikho pheh gyoh e lhyi, khyanktau xauh. Hauh bang gas nyah dyi khyuot lho lha vnyhoq mvnos bat, dvmtap las vluk shei bah ge lyis toh khoq las tsain loh. 31 Hou cho yah phudyei soeu dvyuk suh lai jus las, hauh soeu lhyi nyvng lyis gohshot jhank lai loh. 32 Vgus Lewi dius dvyuk hauh yvmas jweh las nyang lyis loh yoeuh lho lha gohshot cho yah doms jhank lai loh. 33 Nghuot laus eq gyung suh loh dah Samari dvyuk hauh soeu jyank mas jweh las nyvng lyis nhaiq yoeuh nyen las, 34 nyah jyank mas loh las, nyah dvm mas coeu yahge zvbiq kat dyei lho lha misseh yah lyet dyei thang lhyi, nyah mauhlyihzoe thoq mas thuq loh las, boenghdoq yhen dvkoeuq mas shwih loh las dyangh dyei. 35 Thang lhyi nyeihyo nyang ngwis kyvp aiq koeuq yhensain lhyi lap dyei las taiq zis gas, nyang lyis bos dyangh aq, kha nyhoq jes gyoh zis ngos doms los uhlyis nvng lyis doms cap das, ge thuq loh. 36 Hau somh yuk mas khyanktau xauh soeu dah yhenkyoh gas khayuk nghuot oen nvng nghamh lah, ge nyei. 37 Nyang gas, Nyang lyis nhaiqnyen soeu nghuot, ge. Yesu taiq zis gas, Nvng eq houyah dvyhangteh loh kuot aq, ge. 38 Gvshih nyamoq loh lyis, nyang gas wukhau dvkoeuq mas wvng loh: houmha Matha ge dah vmesbih dvyuk gas, nyang lyis nyah yhen mha boengh lhom yoeus langh. 39 Nyang mas Mari ge dah vnoeuh dvyuk bos: nyang gas Yesu dah khyeiyang mas tsung lha nyah dang gyo nyeis. 40 Nghuot laus eq Matha gas phuqsoe dah muh lyis chiq yvmvyah, Yesu jyank mas los las taiq zis gas, Yhensain eh, ngah vnoeuh gas boengh daih cho mha ngos lyis kyingh doeuh gyomh toh dyei yvlyis nvng chaxwe ma nhang lhyeh? Nyang ngos lyis bos pangh das xiklyis taiq kat dyei aq, ge. 41 Yesu nyang lyis phuk taiq zis gas, Matha, Matha, nvng gas vyhang nyoshoq lyis ehnyet nyo las chiq nyeis. 42 Nghuot laus eq chah zis dvja kyingh dvnghuot: Mari gas gis zis lyis khyen yoeus goeus yvmvyah, hauh zis lyis nyah jyank masyah yoh yoeus tyamp dyei das zis ma nghuot, ge.
1 Dvlhain ka nyang joqyos dvdeh mas shvmanh dung nyeis. Nyang dye dung thang lhyi nyah changlo dvyuk nyang lyis taiq zis gas, Yhensain eh, Yohan eq nyah changlo jens lyis shvmanh dung jyauh yhangteh, ngamoq lyis eq jyauh aq, ge. 2 Nyang nyamoq lyis taiq zis gas, Namoq shvmanh dung lyis heisoeh dung geh: Ngamoq dah Uwus eh, Nah nyings gyingshang nyeis bas jungh. Nah munghdan jweh los bas jungh. 3 Ngamoq chah dah wom jeis ngamoq lyis nyeih yau nyeih dyei aq. 4 Ngamoq gas ngamoq lyis cu bang dah yobos lyis khyuot dyei goeus yvmvyah ngamoq dah yobos lyis khyuot dyei aq. Ngamoq lyis shiwu yvmas vshwih loh. 5 Yesu nyamoq lyis taiq zis gas, Namoq mas dvyuk, dyenschangh yoh las, gungsgvm lyis nyah jyank mas e lha, Dyenschangh phoq eh ohlhyoq somh lhyoq jenh dyei langh aq; 6 ngah dyenschangh dvyuk nyah gyung cho mhayah ngah jyank mas jweh los, nyang lyis tsoh das zis cha eq ma joq, ge lho lhyi, 7 yhen khau mha soeu ka, Ngos lyis vthauqkhyi goh; khomh eq nyheih goeus, ngah lo jens eq ngos yah dvgeh yhetyos mas yhet joq goeus, ngos nvng lyis ma yoh toq dyei lo, ge phuk toeuh goh lah? 8 Ngos namoq lyis taiq bah, dyenschangh nghuot, ge las ma toq dyei nghuot laus eq nyang tungh khyoeuq sang nyeis yvmvyah, hauh soeu lhyi nyang chah ya chah zis, toq las dyei das. 9 Housoeh yvmvyah ngos namoq lyis taiq bah, Dung geh, hauh zis namoq lyis dyei das: xo geh, housoeh lyis namoq nyvng das; khomh koq geh, housoeh lyis namoq lyis phank dyei das. 10 Dung soeu hank eq yoh; xo soeu eq nyvng; khomh koq soeu lhyi eq phank dyei das. 11 Dangtoeuq gvshih namoq mas uwus dvyuk yuk lyis lo gas ohlhyoq sang lhyi lukgoq dyei das lhyeh? Oengdoq sang lhyi lhangnyis dyei das lhyeh? 12 Gyoq uq sang lhyi gungsgauh dyei das lhyeh? 13 Namoq ma gis dah bang yangh vsainnyang lo jens lyis gis dah jyungshuk seq dyei lyis gas, hauh thoq lyis zes las maukhung mha dah Uwus gas, nyang lyis dung bang lyis hauh Gyingshang Dyos dyei das ma nghuot lhyeh? 14 Nyang gas nhuotjet yius lyis khat tyamp: yius thuq loh thang lhyi, nhuotjet soeu dang jis los las, dius jens gas mauh. 15 Nghuot laus eq nyamoq mas dvyhamh taiq zis gas, Yius zau Bezebu dah vmingh yah nyang yius jens lyis yoh khat thuq, ge. 16 Gohyhamh bang eq nyang lyis shiwu zoh lyis yah, maukhung mha dah vlho dvkoeuq tsain sang. 17 Nyang gas nyamoq nghamh yvlyis seq las nyamoq lyis taiq zis gas, munghdan nyang changh zan goh lyis gas hauh munghdan gas dyoqbis das. Yhenbang nyang changh dyoqgoh lyis gas hauh yhen ka dyoqbis tyamp das. 18 Ngos gas Bezebu dah yomsoq yah yius jens lyis khat tyamp, ge namoq taiq. Satan gas nyang changh nyang zan goh nghuot lyis gas, nyah munghdan khasoeh yoh goeng joq das lah? 19 Ngos Bezebu yomsoq yah yius jens lyis khat thuq nghuot lyis gas, namoq dah lo jens gas hank mas yah khat thuq nyeis lah? Housoeh yvmvyah nyamoq gas namoq lyis soetuon das bang duot das. 20 Nghuot laus eq ngos gas Mangso dah yomsoq yah yius jens lyis khat tyamp nghuot lyis gas, Mangso munghdan namoq jyank mas jweh goeus. 21 Yombos soeu ka jes kyahsoe yah nyah yhen zungh nyeis lyis gas, nyah zisyos gau joq. 22 Nghuot laus eq nyah thoq lyis yombos soeu los las, nyang lyis ung tyamp thang lhyi, nyang khauq dah sham lham yoeus tyamp lho lha, nyah yhenzis lyis tsain gvm yoeus. 23 Ngos yah dvgeh ma nghuot soeu ka, ngos lyis jes sont soeu nghuot. Ngos yah dvgeh ma tsainh soeu ka dungsshih lvnggang nghuot, ge. 24 Yius gas dius jyank masyah thuq loh las, kyuk dah mau mas lamh yenh. Nyang noyos xo laus eq ma nyvng. Hauh thang lhyi nyang doms taiq zis gas, Ngos thuq khoq dah yhen mha tauh loh das, ge. 25 Nyang jweh loh lyis yhen ka shenh shang lha vshung vgvn joq yvlyis nyvng. 26 Hauh thang lhyi nyang loh las nyah thoq lyis zes xungh xent dah yius nyhet doeu shwih las hauh vkhau mha los tsain wvng lungh joq. Housoeh las hauh soeu dah wotwu gas xikpheh thoq lyis zes yau los. 27 Nyang housoeh taiq nyeis uhlyis, dius phung mhayah vmesbih dvyuk gas kaiq las nyang lyis taiq zis gas, Nvng lyis khoeu kat las nauh gvmshuk soeu ka ngelhoq, ge. 28 Nghuot laus eq nyang taiq zis gas, Nghuot goeus, Mangso dang lyis gyo yoeus las chank bang gas nge zes lhoq, ge. 29 Moqjens zain nhoenk los lyis nyang nyamoq lyis taiq zoh loh zis gas, Dius haih caiq gas lhung dah vcaiq nghuot. Nyamoq gas vlho lhyi tsain xo laus eq, lvpe Yona dah vlho mha lai las gohtoeu chah vlho lhyi eq nyamoq lyis ma chixoeuq das. 30 Yona gas Ninewe bang dah vlho duot vgus, Cangsoeu Lo eq dius haq caiq xiklyis vlho duot das. 31 Hauh Soetuon yvmas, mautyi hwankti nyih gas haq caiq mas bang yah dvgeh toq los las nyamoq lyis dang thang thyet das. Khasoeh ge lyis nyamoq gas Solomon dah joeui gyo yoeus das xiklyis mau thang mhayah jweh los. Yoeuh aq, heimha Solomon thoq lyis zes soeu nyeis. 32 Soetuon yvmas Ninewe wus mas bang gas, haq caiq mas bang yah dvgeh toq las nyamoq lyis dang thang thyet dyei das: khasoeh ge lyis Yona taiq kyoh dang gvng mas nyamoq nhaiqlom tsain thaiq los. Yona thoq lyis zes soeu heimha nyeis. 33 Nyibung lyis tuonh las hank ma gyangh gos shung toh; dang yah eq ma gyangh tsungh toh: wvng los bang bvng zis nyvng das xiklyis nyibung gus mas dvgyangh tuonh toh. 34 Nyoqjeih gas gungs dah bvng zis nghuot. Nah nyoqjeih gyings lyis gas, nah dvgungs gonh bvng joq das, nah nyoqjeih ma gis lyis gas nah gungs eq soeng soeng noq. 35 Housoeh yvmvyah nah jyank mas bos dah bvng zis gas ma noq tyamp bas jungh zaih nyeis aq. 36 Nah gungs mas soeng soeng noq zis dvchuq eq ma bos, gungs gonh yah bvng nyeis nghuot lyis gas, bvng dah nyibung yah nvng lyis pank dyei yhangteh nah gungs gonh bvng zis yah dyingh das, ge. 37 Nyang housoeh taiq nyeis lyis, Pharishe dvyuk gas nyang yah dvgeh zo shuk das zis nyang lyis khi lha, nyang wvng las wom zo das zis tsung toh. 38 Pharishe gas Yesu nyang wom ma zo shih lyis cheihshang cho ma kuot yvmvyah mauh nyeis. 39 Housoeh las Yhensain nyang lyis taiq zis gas, Namoq Pharishe jens gas, kom yahge bvn lyis nghe pheh kyingh dvgyangh shang nhang; namoq dah vkhau mha ka lhuot zo lhuot shuk las lhung zis kyingh dyingh joq. 40 Koh bang eh, nghe pheh kuot toh dah Mangso ka vkhau mha eq kuot ma nghuot lhyeh? 41 Bvn vkhau mha bos zis nyungs bang lyis dyei geh. Housoeh lyis dvnganh gas, namoq xiklyis lhoqshang zis duot das. 42 Pharishe jens eh, namoq mvtanhzoe nghuot! Khasoeh ge lyis, namoq gas shomnhamh yahge angh nyaus dvja ja mas ciboms dvboms tsain kat. Nghuot laus eq, lyi jyoeng zis yahge Mangso lhyi jyetdap cho lhyi lhyweq toh khoq. Ciboms dvboms dyei cho lhyi ma toh khoq, lyi jyoeng cho yahge Mangso lhyi jyetdap cho lhyi kuot vvng. 43 Pharishe jens eh, namoq mvtanhzoe nghuot! Khasoeh ge lyis, lyi jungs mas gis thank tsunggus mas tsung, kaih mas phauh nyang jeshuh das yvlyis namoq o. 44 Namoq mvtanhzoe nghuot! Khasoeh ge lyis namoq gas ma nyvng lo dah lop yah doeusgoh, dius jens gas hauh thoq mas pyo pyo suh nyeis, ge. 45 Hauh uhlyis lyi svra dvyuk nyang lyis phuk taiq zis gas, Svra eh, nvng heisoeh taiq zis gas, ngamoq lyis jwangh nyeis. 46 Housoeh las nyang taiq zis gas, Lyi svra moq eh, namoq eq mvtanhzoe nghuot! Khasoeh ge lyis namoq gas dius jens lyis wons nanh dah yvwons kih dyei las vsainnyang gas hauh yvwons lyis loqnyhauh yah eq ma tsain tanh yoeuh ku. 47 Namoq gas mvtanhzoe nghuot! Khasoeh ge lyis, namoq dah phauh thyeih moq sat dah lvpe jens lop lyis tsain ci goeus. 48 Namoq gas namoq dah phauh thyeih moq dah muhzoh lyis kanghjyoeng kat bang yahge xamxonh bang jyoengh nghuot: khasoeh ge lyis, nyamoq dah lvpe jens lyis sat las, nyamoq lop lyis namoq tsain ci. 49 Housoeh yvmvyah, Mangso dah joeui yah taiq zis gas, lvpe jens yahge lvgyo jens lyis ngos nyamoq jyank mas nhang kat das, nyamoq dvyhamh lyis sat las dvyhamh lyis shoeuhshih das. 50 Mungkvn cangxeih gvnkhanh uhlyis yah huot tyamp, lvpe jens dvnganh dah suih gas haq caiq bang masyah cangjau sang das. 51 Abel dah suih masyah hau yhenmuh yahge phon jo mas sat zis xauh dah Zekharia suih jweh shoq, nghuot goeus, ngos namoq lyis taiq bah, hauh zis gas haq caiq bang mas yoh huon das. 52 Lyi svra jens eh, namoq mvtanhzoe nghuot! Khasoeh ge lyis, seq cho suhshih yoeus toh las, vsainnyang eq ma wvng, wvng loh mes bang lyis eq namoq kyoq toh, ge. 53 Nyang nghe pheh thuq loh lyis lyi svra moq yahge Pharishe jens gas nyang lyis svsoh nhaiqyo zis yah nyang lyis cho vja ja yah sen lha nyei zis yah, 54 nyang dvja ja taiq shuot lyis yobos nyhik das nyhenshang langh nyeis.
1 Hauh uhlyis dius ma thoq suon lo dah moqjens zain los las, nyamoq nyang changh zangh nang goh loh nyeis lyis, nyang nyah changlo jens lyis shih taiq zis gas, Pharishe jens dah bicheih lyis zaih geh, ge. Houka gis guons kuot ge dah wotwu nghuot. 2 Khasoeh ge lyis ma yoh chixoeuq shoq nghop shung toh zis cha eq ma bos; ma yoh seq shoq shung toh zis cha eq ma bos. 3 Housoeh yvmvyah namoq chuot yvmas taiq ya taiq zis lyis bvng yvmas xauhgyo los das. Yvplhunk mas nhuot sot sot zis yhen khung thoq mas taiq hoeuh loh das. 4 Ngah loeuzomh jens eh, ngos namoq lyis taiq bah, gungs lyis kyingh yoh sat las hauh thang lhyi cha eq ma yoh kuot lo bang lyis vgyuk goh. 5 Nghuot laus eq hank lyis gyuk chah zis ngos namoq lyis taiq; gungs lyis sat thang lhyi, munyi thomh mas yoh khyoq kat dah yomsoq yoh soeu lhyi dvgyuk geh. Nghuot goeus, ngos namoq lyis taiq bah, nyang lyis gyuk geh. 6 Nghuot laus eq jos oeng doeu lyis dyvpson aiq kyvp yah ungh ma nghuot lhyeh? Hau jos dvdoeu lyis eq Mangso ma tohnyhik. 7 Namoq dah uhloms mas cam khvt dvnganh lyis yangh suon toh. Housoeh yvmvyah vchiq goh, namoq gas jos nyoshoq thoq lyis zes phauhdap. 8 Nghuot laus eq ngos namoq lyis taiq bah, Hank laus eq dius xikkhonh mas ngos lyis rhen soeu lhyi, cangsoeu Lo eq Mangso dah loeuswons bang xikkhonh mas nyang lyis rhen das. 9 Nghuot laus eq cangsoeu dius xikkhonh mas ngos lyis he tyamp soeu lhyi, Mangso dah loeuswons bang xikkhonh mas nyang lyis eq he tyamp das. 10 Cangsoeu Lo lyis dang yah jis shuot yobos lyis yoh khyuot dyei: nghuot laus eq Gyingshang Dyos lyis loeusmus soqzo dah yobos lyis gas ma yoh khyuot dyei das. 11 Nyamoq gas namoq lyis lyi jungs mas nhaiqbos bang, vmingh yoh dah guon bang xikkhonh mas shwih loh lyis, khasoeh cha phuk taiq das zis vchiq goh. 12 Hauh shishenh lyis khasoeh taiq chah zis gas, Gyingshang Dyos yah namoq lyis jyauh das. 13 Dius huom mha dvyuk nyang lyis taiq zis gas, Svra eh, ngah vmang lyis ngos yah yhenzis gvm goh das cho lhyi bos taiq aq, ge. 14 Nyang hauh soeu lhyi taiq zis gas, Lvcang eh, nah zomh jo mas soetuon das zis yahge gvm dyei das soeu kuot das nyhenshang ngos lyis hank toeuq toh lah, ge. 15 Nyang nyamoq lyis taiq zis gas, Nyoqnoq cho lhyi tsain zaih lha zaih geh: khasoeh ge lyis, zisyos magons magoh yoh yvmas dius dah kang bos zis ma nghuot, ge. 16 Nyang nyamoq lyis dangtoeuq dvkoeuq taiq zis gas, Dis soeu dvyuk dah maunyeis mas guknyau shihnyau nyoshoq yoh los. 17 Nyang nghamh zis gas, Ngah guknyau shihnyau kat toh das joqyos ma bos, ngos khasoeh kuot das au? 18 Ngos heisoeh kuot das: Ngah jyi cauh lyis thyoq tyamp las, zes kuh zis tsuk lho lha, hauh yvmas ngah wom yahge yhenzis dvnganh kat toh das. 19 Housoeh las ngah gungs dyos lyis, Gungs dyos eh, zvnlom nyoshoq xiklyis vyhang nyoshoq kat toh goeus, zo shuk, pyo lha nyenstap nyeis aq, oen taiq das, ge. 20 Nghuot laus eq Mangso nyang lyis taiq zis gas, Koh soeu eh, khvnyens nyang, nyang nah gungs dyos lyis yoeus tyamp das: housoeh las nvng ba kat toh vyhang ka hank xiklyis nghuot das lah, ge. 21 Vsainnyang xiklyis zisyos yung toh las Mangso mha ma dis soeu ka housoeh teh soeu nghuot. 22 Tsai, nyang nyah changlo jens lyis taiq zis gas, Housoeh yvmvyah ngos namoq lyis taiq bah, kang xiklyis cha zo das; gungs xiklyis cha wuot das oen vchiq goh, ge. 23 Kang ka zonoms thoq lyis, gungs gas dyimis thoq lyis zes phauhdap. 24 Kvnhoq jens gas jyo ma khyoq, jyo eq ma yhomh zis lyis nghamh yoeuh geh; nyamoq mas jyi eq ma bos, zisyos eq ma joq; nghuot laus eq Mangso ka nyamoq lyis gvmtsoh nyeis. Namoq gas nghoq thoq lyis kha iq zes phauhdap! 25 Namoq chiq las vsainnyang kang lhyi loq dvbon hank yoh chent kat? 26 Housoeh teh ngis thank cho lhyi yangh namoq ma yoh kuot lyis, gohtoeu nyet shih goeu lyis chamus chiq nyeis goh lah? 27 Anghchau ban khasoeh yuk kuh los yvlyis nghamh yoeuh geh. Nyamoq gas muh eq ma zwi, jei eq ma ni, nghuot laus eq ngos namoq lyis taiq bah, phunk nyoqnho ngelang bos dah Solomon dyimis yangh haih ban dvjyo lhyi ma nyis. 28 Lomsjingh ehnyet nain bang eh, yos mas yuk las phvnaq nyeihyo nyikhyomp mas kat tyamp das dah mhanh lyis yangh Mangso heisoeh gvmhuot lyis gas, namoq lyis hauh thoq lyis zes gvmhuot das ma nghuot lhyeh? 29 Cha zo cha shuk das oen zis yah sen yvmas kyingh shishenh vthank nhang goh. 30 Khasoeh ge lyis, hauh zis lyis gas mungkvn mas dah dius jens tsain xo lha, hounyhoq namoq chah nyeis yvlyis namoq dah Uwus seq. 31 Namoq gas Mangso munghdan lyis xo geh; housoeh lyis hau chah nyeis cho dvnganh namoq lyis lung dyei das. 32 Yvng phung ngis eh, Vchiq goh: khasoeh ge lyis, namoq Uwus gas hauh munghdan namoq lyis dyei das zis svsoh mes. 33 Namoq yoh zis lyis ungh las, gvm dyei geh. Khauh soeu ma jweh, naus eq ma yoh zo joqyos, maukhung mha namoq zisyos xiklyis ma seq tyang dah ngwis thung kuot toh geh. 34 Khasoeh ge lyis, namoq zisyos joq yvmas namoq nhaiqlom eq joq das. 35 Namoq dah yhensain nyihwank pwe mhayah tauh los lyis zes das xiklyis sont langh nyeis dah jyeidwis jens teh dyichih chih, nyibung tuonh las cicont langh nyeis geh. 36 Nyang jweh las khomh koq lyis hau jyeidwis jens nyang lyis khomh phank dyei. 37 Jyeidwis jens langh nyeis zis lyis yhensain los nyvng lyis, hauh jyeidwis jens gas ngelhoq. Ngos namoq lyis jyoengh taiq bah, hauh yhensain nyang dyichih chih lho lha, nyamoq lyis zojus mas tsung nhang lha, nyang nyang nyamoq lyis phuqsoe das. 38 Nyensyo gungsgvm lyis, nghuot ya maubuh los yoq lyis housoeh zungh nyeis langh zis lyis yhensain los nyvng lyis, hauh jyeidwis jens gas ngelhoq. 39 Haih zis lyis seq geh: khauh soeu khanhamp los das zis lyis yhensain seq nghuot lyis gas, nyah yhen lhyi ma los yoh thyoq wvng shoq nyang zungh nyeis das. 40 Housoeh yvmvyah namoq eq cicont kuot geh. Khasoeh ge lyis namoq ma zangh soh dah shishenh lyis, Cangsoeu Lo jweh los das, ge. 41 Hauh thang lhyi Petru nyang lyis taiq zis gas, Yhensain eh, haih dangtoeuq gas ngamoq lyis kyingh taiq lah, dvnganhmoq lyis taiq lah, ge. 42 Yhensain taiq zis gas, Yhensain ka nyah yhenbang lyis, shishenh jweh lyis zonoms gvm dyei das xiklyis toeuq toh, lomluk las joeui bos dah jyeidwis gas hank nghuot lah, ge. 43 Nyah yhensain jweh los uhlyis lomluk luk kuot nyeis yvlyis los nyvng jus dah jyeidwis gas ngelhoq. 44 Ngos namoq lyis jyoengh taiq bah, yhensain ka nyah zisyos dvnganh thoq mas guon soeu nyang lyis kuot nhang das. 45 Nghuot laus eq hauh jyeidwis gas nyah ehnyet mas, Ngah yhensain los das zis nyangh shih ge, nghamh las, phoq jyeidwis nyhiq jyeidwis jens lyis bat, zo shuk, yet nyeis lyis gas, 46 hauh jyeidwis dah yhensain ka nyang ma nghamh dah buisnyeis, ma soh dah shishenh lyis nyah yhensain jweh los lyis, nyang lyis zan chink las lom ma luk bang yah dvgeh toh das. 47 Nyah yhensain dah ehnyet lyis seq toh las, nyah ehnyet ma chank, cicont ma sont toh dah jyeidwis hank laus eq pop pop bat zis xauh das. 48 Nghuot laus eq ma seq las lyuk mon dah muh shuot soeu ka, nainlo dvxauh lyuk das: khasoeh ge lyis, nyoshoq dyei zis xauh soeu hank laus eq nyah jyank masyah nyoshoq sang zis xauh das. Nyoshoq dyei toh goeus soeu jyank masyah zes las sang das. 49 Nyeisjvng thoq mas nyi khyoq kat das xiklyis ngos los; hauh nyi gvshih nyang dap nyeis lyis kha iq gis das lah? 50 Nghuot laus eq ngos kham chah shih dah jeisnyhop dvkoeuq bos shih. Hauh zis ma kham dvchank, ngos kha iq ehnyet nyo nyeis lah? 51 Nyeisjvng thoq mas nyenstap cho chi lyih das xiklyis nghuot oen nghamh goh lhyeh? Ma nghuot, kangh das xiklyis dvnghuot. 52 Khasoeh ge lyis, gvshih masyah gas oeng yuk nyeis dah yhen mha somh yuk gas aiq yuk yah, aiq yuk gas somh yuk yah tyixo goh das. 53 Uwus yahge loloeu, loloeu yahge uwus; ungwes yahge lonyi, lonyi yahge ungwes, nyimuh yahge doeusmuh, doeusmuh yahge nyimuh gang goh das. 54 Nyang dius phung lhyi eq taiq zis gas, Buiswvng shot pheh jyommauh nyvng lyis, nvng houjang yah mau wus das, ge vgus wus los. 55 Mautyi lyeis muot los lyis gas, buis gywes das ge vgus gyangh bweh los. 56 Gis guons kuot bang eh, maukhung yahge nyeisjvng nyoqnho wuhsoh lyis seq taiq lyis gas: haq caiq dah vlho lhyi chamus ma seq suon goh lah? 57 Namoq nyang gungs lyis chamus jyoeng khyvlyis soe ma tuon goh lah? 58 Nvng gas nvng lyis zau kauq soeu yah cho mha dvgeh nghuot shih lyis hauh soeu yah lvnyap taiq tamp goh aq. Housoeh ma nghuot lyis gas, zau kauq soeu yah nvng lyis soetuon soeu jyank mas kyauh das. Soetuon soeu nvng lyis pyada lyis kyauh las, nyang gas nvng lyis thung khyoq das. 59 Ngos nvng lyis taiq bah, thang thank thunkcent kyvp ma dye cap dvchank nvng hou mhayah yoh thuq los das zis ma nghuot.
1 Hauh uhlyis houmha nyeis bang dvyhamh gas, Pilat mungh zau gas, Galile dius dvyhamh bang dah suih lyis nyamoq lomhxangh lainh zis yah lhoeuq cho Yesu lyis tsain taiq kyoh. 2 Yesu nyamoq lyis phuk taiq zis gas, Hauh Galile dius jens housoeh xauh yvmvyah, Galile dius dvnganh thoq lyis yaunos zes wons oen namoq nghamh goh lah? 3 Ma nghuot, ngos namoq lyis taiq bah: namoq eq nhaiqlom ma thaiq lyis gas, namoq dvnganh houyah dvyhangteh dyoqbis das. 4 Nghuot ya, Silom wus mas dah tyoeuqzvm gyop las nhiq sat goeus bang dvci xet yuk gas Yerusalem mas bang dvnganh thoq lyis yaunos zes wons bang nghuot oen namoq nghamh goh lah? 5 Ma nghuot, ngos namoq lyis taiq bah, namoq eq nhaiqlom ma thaiq lyis gas namoq dvnganh houyah dvyhangteh dyoqbis das. 6 Nyang haih dangtoeuq eq taiq shih: dius dvyuk nyah zvbiq khyam mha maiphang dvzains tsungh toh. Houmha vshih e xo lhyi cha eq ma nyvng. 7 Housoeh las nyang nyah zvbiq khyam dyangh soeu lhyi taiq zis gas, Yoeuh aq, ngos haih maiphang zains mas shih xo zis somh zvn bos goeus; cha eq ma nyvng, thoeuq tyamp aq, chamus joqyos nghant toh lah, ge. 8 Nghuot laus eq hauh soeu nyang lyis phuk taiq zis gas, Yhensain eh, khvzvn yuk joq shih bas jungh: ngos zuilhaink yah khop nhuk, jenh kat dyei shih das. 9 Sangnhaiq vshih shih los mvbeh, ma shih los nghuot lyis gas, hauh thang lhyi nvng thoeuq tyamp aq, ge. 10 Yuda No Buisnyeis lyis nyang gas lyi jungs dvlom mas jyauh nyeis. 11 Yoeuh aq, dvci xet zvn gonh yius kuq nosbaus wons dah vmesbih dvyuk nyeis. Nyang gas nungs goeuh las shoqlang ma yoh dan lo. 12 Yesu hauh vmesbih lyis nyvng las, nyang lyis nyah jyank mas khi yoeus lho lha, Vmesbih eh, nvng nos masyah luiq goeus ge, 13 Nyah thoq mas Yesu loq kih lho lhyi, houjang nyang dan los las, Mangso phunk lyis chungh. 14 Yesu Yuda No Buisnyeis lyis noslom yoh bang lyis gis los nhang yvmvyah, lyi jungs gomh soeu ka, nhaiqyo las dius jens lyis taiq zis gas, Muh zwi das xiklyis khyuk nyeih bos, hauh buisnyeis gyo lyis lyih yhoh yoeus geh, Yuda No Buisnyeis lyis vlyih goh, ge. 15 Yhensain nyang lyis phuk taiq zis gas, Gis guons kuot soeu eh, namoq yuk khanghmuh Yuda No Buisnyeis lyis, noeu nghuot ya mauhlyihzoe lyis jeis gvmshuk das zis, zungs masyah phank shwih thuq loh ma nghuot lhyeh? 16 Housoeh lyis dvci xet zvn Satan yah twih toh zis xauh, Abraham lonyi nghuot dah haih vmesbih lyis hau twih toh masyah Yuda No Buisnyeis lyis ma gis phui kat lhyeh, ge. 17 Nyang heisoeh taiq lho lhyi, nyang lyis tyixo bang dvnganh gas tsain xoq goeus. Dius jens gas nyang kuot dah mauhphoh cho dvnganh gvng mas tsain gauslaus. 18 Hauh thang lhyi Yesu taiq zis gas, Mangso munghdan gas cha yah doeusgoh lah? Ngos cha yah byi das lah? 19 Hauh zis gas, dius dvyuk yoeus las nyah khyam mha sanh kat dah anghwvng shih chvp yah doeusgoh. Hauh zis yuk las vzains kuh los lyis mau dang nghoq jens hauh vko mha sot yoh sot, ge. 20 Nyang taiq shih zis gas, Mangso munghdan lyis ngos cha yah byi das au lhyeh? 21 Hauh zis gas vmesbih dvyuk sunghso mons somh pan mha yoeus kat lyis sunghso dvnganh yvlyis yoh dau los nhang dah bicheih yah doeusgoh, ge. 22 Tsai, nyang gas, dvwus thang lhyi dvwus wvng las jyauh uhlyis yah, Yerusalem pheh e loh. 23 Hauh uhlyis dius dvyuk nyang lyis taiq zis gas, Yhensain eh, khyuot yoeus zis xauh bang nainlo dvnghuot lhyeh, ge. Nyang nyamoq lyis taiq zis gas, 24 Zvvs dah khomh cho yah wvng das xiklyis yomkat geh: khasoeh ge lyis dius nyoshoq wvng loh das zis xo laus eq ma tsain xauh wvng loh das. 25 Hauh Yhensain khomh toq nyheih toh goeus ya, namoq nghe pheh yap las khomh koq uhlyis yah, Yhensain eh, ngamoq lyis khomh phank dyei aq ge lyis, Namoq khalhye yah zis nghuot yvlyis ngos ma seq, ge toeuh das. 26 Namoq gas, Ngamoq nah xikkhonh mas zo shuk ku; ngamoq dah talhoeu mha eq nvng jyauh ku, tsain ge das. 27 Nghuot laus eq nyang taiq das zis gas, Namoq khamha bang nghuot yvlyis ngos ma seq; ma jyoeng dah muh kuot bang dvnganhmoq eh, ngah jyank masyah thuq loh geh, ge. 28 Abraham, Isak, Yakop yahge lvpe jens nyoshoq Mangso munghdan mas nyeis zis lyis namoq nyvng las, namoq nyang gas nghe pheh khat thuq zis xauh das: hauh yvmas ngausdyeis ngausnhvp yah zwis khih chap loh das. 29 Hauh uhlyis dius jens gas buisthuq buiswvng, mautsung mautyi pheh yah los las Mangso munghdan mas zo shuk das. 30 Housoeh las, thang thank bang gas xik lyis nghuot das; xik lyis bang gas thang thank nghuot das, ge. 31 Hauh nyeihyo nyang Pharishe dvyhamh Yesu jyank mas tsain lyih las Yesu lyis taiq zis gas, Nvng hei mhayah thuq loh aq; Herod nvng lyis sat das zis cvvq nyeis, ge. 32 Nyang nyamoq lyis taiq zis gas, Hauh dah cauhpau lhyi heisoeh oen loh taiq geh, Khvnyhik yahge phvnaq nyeihyo ngos yius khat tyamp las nos zis lyis gis los nhang das, somh vnyeih lyis ngah muh dye das. 33 Nghuot laus eq khvnyhik phvnaq nyeihyo, sangphoq nyeihyo ngos suh chah shih: Khasoeh ge lyis, Yerusalem mas lai las lvpe gohyos ma gis shei. 34 Yerusalem eh, Yerusalem eh, lvpe jens lyis sat las, nah jyank mas nhang kat bang lyis lukzains yah doeuh sat dah wus eh, gyoqzains gas gyoqlo jens lyis nyah dungs khau mha xwih tsainh teh, nah lo jens lyis ngos khanyhoq lhain xwih tsainh toh mes laus eq, nvng ma gyo. 35 Yoeuh aq, nah yhenmuh gas jyamhjyuklhyuk joq goeus. Ngos namoq lyis taiq bah, Yhensain nyings mas jweh los soeu ka ngelhoq, ge namoq nyang ma taiq dvchank, nvng ngos lyis ma nyvng das, ge.
1 Hauh thang lhyi, Yuda No Buisnyeis lyis nyang gas Pharishe uhjyung dvyuk dah yhen mha wom zo das zis wvng loh lyis, nyamoq gas nyang lyis zungh yoeuh nyeis. 2 Yoeuh aq, khyei loq yam nos dah vbusbih dvyuk Yesu jyank mas jweh los. 3 Housoeh las Yesu gas lyi svra moq yahge Pharishe moq lyis taiq zis gas, Yuda No Buisnyeis lyis gis los nhang das zis lyi vbos lah, ge. 4 Nyamoq gas samlo nyeis. Hauh soeu lhyi nyang shwih yoeus las gis los nhang lho lha nhang kat. 5 Hauh thang lhyi nyang nyamoq lyis taiq zis gas, Namoq dvyuk yuk dah lo, nghuot ya noeu Yuda No Buisnyeis lyis jeisdwang mas dyet gyoh loh lyis, namoq houjang ma siq yoeus das lhyeh, ge. 6 Nyamoq gas nyang lyis haih cho ma yoh phuk taiq lo. 7 Khi toh boenghwus gas zes phauh joqyos lyis tsain khyen zis nyvng las, nyang nyamoq lyis dangtoeuq yah taiq zis gas, 8 Dius dvyuk yuk nvng lyis nyihwank pwe mha khi lhyi, zes gis joqyos mas vloh tsung; nah thoq lyis nyoqnho ngelang bos soeu lhyi eq nyang khi toh mvbeh. 9 Nah aiq yuk lyis khi toh soeu lyih las, Haih soeu lhyi joqyos xwiq dyei aq, ge nvng lyis taiq lyis, nvng gas xoq zis yah nyhen thank joqyos mas cheh tsung chah das. 10 Nghuot laus eq nvng lyis khi lhyi, nyhen thank yvmas loh tsung aq. Hauh uhlyis nvng lyis khi toh soeu los las, Dyenschangh phoq eh, nyhang mha doq tsung aq, ge nvng lyis taiq lyis, nvng yah tsung toh bang dvnganh dah xikkhonh mas nvng nyoqnho ngelang yoh das. 11 Khasoeh ge lyis, nyah gungs lyis chungh zo soeu hank laus eq o mha khyoq zis xauh das: nghuot laus eq nyah gungs lyis o mha gyoh soeu ka chungh zis xauh das, ge. 12 Nyang lyis boengh khi soeu lhyi eq nyang taiq zis gas, Nvng nyeihzvng, nghuot ya, nyenhcon khi tsoh lyis, nah dyenschangh jens, nah vmang vnoeuh, buisnoms sainhchangh jens, dis dah yhenkyoh hank lyis eq vkhi. Nyamoq eq nvng lyis doms khi tsoh lyis gas, nvng lyis zo jyen doms yoh cap das. 13 Nghuot laus eq nvng pwe kuot lyis, nyungs bang, khyei gis loq ma yoh bang khyei gyau bang, nyoqjet bang lyis khi aq. 14 Housoeh lyis nvng ngelhoq das: khasoeh ge lyis nyamoq nvng lyis jyehjuh ma yoh tauh. Nghuot laus eq dan bang dwis toq yvmas nvng jyehjuh xauh kham das, ge. 15 Nyang yah dvgeh zo tsung toh soeu dvyuk hauh zis xauhgyo lyis, Mangso munghdan mas wom xauh zo das soeu ka ngelhoq, ge nyang lyis taiq. 16 Yesu nyang lyis phuk taiq zis gas, Dius dvyuk nyenhcon tsoh pwe zainsmuh dvkoeuq kuot las, dius nyoshoq lyis khi toh. 17 Nyenhcon tsoh yoq jweh lyis, Tsain los geh, zo shuk das zis dvnganh cicont nghuot goeus, ge khi toh bang lyis khi das xiklyis nyah jyeidwis lyis nhang kat. 18 Nghuot laus eq nyamoq dvnganhmoq xamxonh las tsain jyamp taiq. Cangxeih vyuk gas, Ngos maunyeis dvchuq wis toh, hauh zis lyis loh yoeuh chah, ngos lyis jenh nhang kat aq, ge. 19 Gohtoeu dvyuk gas, Ngos gas noeu oeng kya wis toh, hauh zis lyis shi yoeuh chah, ngos lyis jenh nhang kat aq, ge. 20 Gohtoeu dvyuk eq, Ngos eq phoengh hwank toh, housoeh las ma yoh los, ge. 21 Hauh jyeidwis gas nyah yhensain lhyi hauh cho los taiq kyoh. Hauh yhensain ka nhaiq gis yo las nyah jyeidwis lyis taiq zis gas, Wus talhoeu yahge khyam gyung mas lvnyap e lha, nyungs bang khyei gis loq ma yoh bang, khyei gyau bang, nyoqjet bang lyis e shwih hwank aq, ge. 22 Hauh thang lhyi jyeidwis taiq zis gas, Yhensain eh, nvng taiq vgus khi goeus, nghuot laus eq joqyos bos shih, ge. 23 Hauh yhensain ka nyah jyeidwis lyis, talhoeu mha, vthunk vyoq mas e lha, ngah yhen khau dyingh bas jungh, nyamoq lyis ma gyo ma thoq khi hwank aq, ge. 24 Khasoeh ge lyis ngos namoq lyis taiq bah, khi toh bang dvyuk eq ngah nyenhcon lhyi xauh zo shi yoeuh das zis ma nghuot, ge. 25 Moqjens nyang yah dvgeh loh nyeis las, nyang lhain yoeuh lho lha nyamoq lyis taiq zis gas, 26 Ngah jyank mas los soeu hank laus eq, vsainnyang dah ungwes uwus, yhensain nyhiq yahge lo jens, vmang vnoeuh yahge nhamhmuh moq; hauh thoq lyis vsainnyang kang lhyi jyet thoq lyis ngos lyis ma zes jyet lyis gas ngah changlo ma yoh bweh. 27 Hank laus eq vsainnyang tapzains wuq las ngah thang mha ma chank soeu ka ngah changlo ma yoh bweh. 28 Khasoeh ge lyis namoq jyank mas dvyuk yuk tyoeuqzvm tsuk das lyis, hauh zis dye tsuk shoq nyah ngwis luk das, ma luk das zis lyis tsung lha cangxeih ma suon yoeuh soeu bos lah? 29 Housoeh vpom xi lho lha dye shoq ma tyeh tsuk nyhuk lyis gas, nyvng bang dvnganhmoq gas jwangh las, 30 Haih soeu ka, kuot xi lho lha dye shoq ma yoh tsuk lo, tsain ge das. 31 Dvcho ka: hwankti dvyuk gas gohtoeu hwankti dvyuk yah moeng zan goh das cvvq lyis, dius aiq mons yah lyih dah bang lyis dvmons yah yoh thoenk zan das, ma yoh thoenk zan das zis, tsung lha cangxeih ma nghamh yoeuh zis bos das lah? 32 Ma duot lyis gas, gohtoeu hwankti we yvmas nghuot shih lyis lvgyo nhang lha nyenstap das xiklyis kuot nhang chah. 33 Housoeh las namoq mas vsainnyang yoh ya yoh zis lyis ma tyamp khoq soeu hank laus eq ngah changlo ma yoh bweh. 34 Coh gas gis, nghuot laus eq, ngvm zis bi tyamp goeus ya khasoeh doms yoh ngvm nhang das lah? 35 Hauh zis gas nyeisjvng xiklyis ma gis, jenh eq ma gis las nghe pheh gyangh doeuh tyamp. Gyo yoeus das no dap soeu ka xauhgyo bas jungh, ge.
1 Hauh uhlyis khoengh khywi bang yahge yaunos wons bang dvnganh gas, nyah dang gyo das ge nyah jyank mas zain los. 2 Housoeh las Pharishe moq yahge maussauh lhaih bang lop zis gas, Haih soeu ka yaunos wons bang lyis lhom yoeus las, nyamoq yah dvgeh zo shuk nyeis, ge. 3 Nyang nyamoq lyis haih dangtoeuq yah taiq zis gas, 4 Namoq dvyuk yuk yvng dvxo doeu yoh; hou mhayah dvdoeu dyuk loh lyis gauci gau doeu lyis mhanhdyvp mas nyhei toh khoq las, dyuk dah vdoeu lyis nyvng shoq ma chank xo soeu hank bos lah? 5 Nyang hauh yvlyis xo nyvng lyis, gauslaus zis yah nyah kvtoq mas kih wuq las, 6 Nyah yhen mha jweh los lyis, nyah dyenschangh jens yahge nyah yhenkyoh bang lyis khi tsainh las taiq zis gas, Ngah yvng dyuk dah vdoeu doms nyvng goeus yvmvyah, ngos yah dvgeh tsain gausyis goh, ge. 7 Houyah dvyhangteh ngos namoq lyis taiq bah, Dan las nhaiqlom thaiq ma chah dah dius gauci gau yuk lyis gauslaus thoq lyis, yaunos wons soeu dvyuk nhaiqlom thaiq los lyis maukhung mha zes gauslaus. 8 Vmesbih dvyuk gas ngwis kyvp dvci yoh yvmas dvkyvp dyuk tyamp lyis, nyibung tuonh lho lha yhen shenh las nyvng shoq vlhomuh ma xo zis bos das lah? 9 Nyang hauh zis xo nyvng lho lhyi, nyah dyenschangh jens yahge yhenkyoh bang lyis taiq zis gas, Ngah ngwis dyuk dah vkyvp xo nyvng goeus yvmvyah ngos yah dvgeh chomp gaus goh, ge. 10 Houyah dvyhangteh ngos namoq lyis taiq bah, yaunos wons soeu dvyuk nhaiqlom thaiq los lyis, Mangso dah loeuswons bang xikkhonh mas gauslaus chank bos, ge. 11 Nyang taiq shih zis gas, Gohlhain dius dvyuk mas yukgis lo aiq yuk bos. 12 Vnoeuh yuk gas nyah uwus lyis, Uwus eh, ngos yoh vvng dah yhenzis gvmdyei aq, ge sang lhyi, nyang nyah yhenzis nyah zomh lyis gvm dyei. 13 Khanyhank nyeih ma nyangh lyis vnoeuh yuk gas nyah yhenzis dvnganh yoeus las we mau pheh gyung suh loh. Hauh mau mas xihphah wuhlhan lha nyah zisyos dvnganh kvlhoeu lhangzvng tyau tyamp. 14 Housoeh nyang yoh ya yoh goeu dvnganh thank tyamp dah thang lhyi, hauh mau mas panghkhauq zainsmuh gyoh los las nyang gas shanghsenh los. 15 Hauh uhlyis nyang gas hauh mau mas dah dius dvyuk jyank mas khau nges nyeis. Hauh soeu ka nyang lyis nyah yos mas wuq nyhoeu nhang kat. 16 Nyang gas wuq zo dah nukkuk yah nyah womdau tyink mes laus eq, nyang lyis hank ma gvmtsoh. 17 Housoeh nyang nghamh soh los las taiq zis gas, Ngah uwus dah uhkung jens gas jo shoq xauh zo las nyet shih das. Ngos gas heimha yuot shet shei loh nyeis. 18 Ngos toq las ngah uwus jyank mas loh las nyang lyis, Uwus eh, ngos Mangso lhyi eq, nvng lyis eq cu goeus. 19 Ngos nah lo oen das zis ma mon lo, nah uhkung dvyuk yhangteh jenh toh aq, oen taiq das. 20 Housoeh nyang toq las nyah uwus jyank mas loh. Nyang we mas dvnghuot shih lyis, nyah uwus gas nyang lyis nyvng lyis nhaiq yoeuh nyen zis yah wuih e lha, nyah lainzain mas po lha bvlot zwi tanh. 21 Hauh lo nyang lyis taiq zis gas, Uwus eh, ngos Mangso lhyi eq, nvng lyis eq cu goeus, ngos gas nah lo oen lui das zis ma mon lo, ge. 22 Nghuot laus eq nyah uwus, jyeidwis jens lyis taiq zis gas, Gis thank dyi xing dung lvnyap yoeus gvmhuot geh, nyah loq mas loqkyop kyop dyei las, nyah khyei mha thyvkoq koq dyei geh. 23 Nyhuk toh noeulo eq she los las sat geh, yang zo las pyo goh: 24 Khasoeh ge lyis hai ngah lo gas shei goeus zis doms dwis los, nyang dyuk goeus zis doms nyvng, ge. Housoeh las nyamoq pwe kuot nyeis. 25 Gvshih nyah lomons yuk gas yos masyah los las yhen mha jweh ni los lyis zains thungh mangh bat sam yahge goh sam xauhgyo. 26 Nyang gas jyeidwis dvyuk lyis khi yoeus las khasoeh nghuot zis nyei yoeuh. 27 Hauh soeu ka nyang lyis, Nah vnoeuh doms los goeus las, nah uwus eq nyang lyis yangh yangh zan zan xauh lhom yoeus langh yvmvyah, nyhuk toh noeulo eq sat goeus, ge. 28 Lomons yuk nhaiqyo los las yvpkhau mha eq ma wvng loh lo. Housoeh las nyah uwus thuq loh las nyang lyis e jyoeuq yoeus. 29 Nyang nyah uwus lyis phuk taiq zis gas, Yoeuh aq, heinyhoq zvn ngos nvng lyis jons dvyuk teh phuqsoe los: tyingtoh dang khayhoq eq ma lai ku, nghuot laus eq ngah dyenschangh jens yah pyo das zis shvbeq lo dvdoeu yangh nvng ngos lyis ma dyei ku. 30 Nghuot laus eq nghe nyhiq yah zomh las nah zisyos chi yonh tyamp, hai nah lo doms los lyis gas, nyhuk toh dah noeulo nyah xiklyis sat dyei, ge. 31 Nyah uwus nyang lyis taiq zis gas, Vlo eh, nvng gas vjangh ngos yah dvgeh nyeis: ngos yoh ya yoh zis dvnganh nah zis nghuot. 32 Hai nah vnoeuh gas shei goeus zis doms dwis los; dyuk goeus mhayah doms xo nyvng. Housoeh yvmvyah yang pyo pyo gausyis gis, ge.
1 Yesu nyah changlo jens lyis eq taiq zis gas, Dis soeu dvyuk gas nyah ziszom dvyuk yoh. Hauh ziszom gas nyah yhensain dah zisyos lyis lhoeu mhont tyamp dyei, ge zau kauq bang bos. 2 Dis soeu ka nyang lyis khi yoeus las taiq zis gas, Hai nah cho ngos xauhgyo zis khasoeh nghuot lah? Nvng kuot dah muhzoh jyen suon xoeuq aq, gvshih masyah nvng gas ziszom muh yoh kuot lo das zis ma nghuot, ge. 3 Hauh uhlyis ziszom nyah nhaiq mas taiq zo zis gas, Ngos khasoeh kuot das lah? Ngah yhensain ngos lyis ziszom muh no tyamp dyei goeus. Ngos yos eq ma yoh khop, yon zo das zis eq xoq. 4 Nghuot laus eq ziszom muh masyah gyoh thang lhyi svbih, nyamoq yhen mha ngos lyis lhom yoeus das xiklyis cha kuot das zis ngos seq goeus, ge. 5 Yhensain lhyi jyen dap bang yuk khanghmuh lyis khi yoeus las, cangxeih dah soeu lhyi, Ngah yhensain lhyi nvng jyen khanyhoq dap lah, ge nyei. 6 Hauh soeu taiq zis gas, Coeu dvxo joi dap, ge. Nyang gas, Nah jyen comh maussauh buk yoeus las, oengci oen lvnyap lhaih aq, ge. 7 Tsai, gohtoeu dvyuk lyis eq, Nvng jyen kha nyhoq dap lah, ge. Nyang gas sunghso dvxo luh dap, ge lho lhyi nyang taiq zis gas, Nah jyen comh buk yoeus las xetci oen lhaih aq, ge. 8 Ma dan dah ziszom joeui bos khyvlyis kuot yvmvyah hauh yhensain ka nyang lyis chungh: khasoeh ge lyis haq caiq mas dah lo jens gas nyamoq muh kuot yvmas, bvng dah lo jens thoq lyis zes yik. 9 Housoeh las ngos namoq lyis taiq bah, nyeisjvng zisyos yah vsainnyang xiklyis buisnoms tsain kuot geh, hauh zis wui lho lhyi namoq gas, vcaiq vto joqyos mas lhom yoeus zis xauh das. 10 Dvmhauh yvmas lomluk soeu ka nyoshoq yvmas eq lomluk das. Dvmhauh yvmas ma dan soeu ka nyoshoq yvmas eq dan das zis ma nghuot. 11 Housoeh las nyeisjvng zisyos lyis yangh namoq lom ma yoh luk lyis gas, hau jyoeng dah zisyos namoq lyis loms las hank kyauh das lah? 12 Namoq gas svbih dah vyhang lhyi lom ma yoh luk lyis gas, namoq yoh vvng dah zisyos namoq lyis hank dyei das lah? 13 Jyeidwis dvyuk yhensain aiq yuk lyis ma yoh phuqsoe: khasoeh ge lyis dvyuk lyis hoeng lha dvyuk lyis gas jyetdap das. Dvyuk lyis domsyos gyo las dvyuk lyis gas ma phauh ma danh kuot das. Namoq gas Mangso yahge nyeisjvng zisyos lyis dvgeh ma yoh phuqsoe, ge. 14 Hauh dang dvnganh zis lyis ngwis nyoqnoq dah Pharishe moq xauhgyo las, nyang lyis tsain jwangh. 15 Nyang nyamoq lyis taiq zis gas, Svbih dah xikkhonh mas vsainnyang gungs lyis dan, ge bang namoq nghuot. Nghuot laus eq namoq nhaiqlom lyis Mangso seq: khasoeh ge lyis dius xikkhonh mas chunghtoq zis gas Mangso xikkhonh mas gas vchoqh vlhauq nghuot. 16 Lyi yahge lvpe jens dah dang gas, jeisnyhop Yohan dah buisnyeis jweh shoq nghuot. Hou mhayah Mangso munghdan gausyis dang lyis taiq kyoh nyeis las, dius dvnganh gas houmha xauh wvng das xiklyis tsoengh nyhenh loh. 17 Lyi maussauh mas dah sauhchvp dvzoq gyoh lwis thoq lyis, maukhung yahge nyeisjvng lai loh das zis svsoh lwis. 18 Vsainnyang dah yhensain nyhiq she tyamp las gohtoeu dvyuk lyis phoengh hwank soeu hank laus eq nyi shuot zis nghuot. Yhensain phoq she tyamp dah vmesbih lyis phoengh hwank soeu eq nyi shuot zis nghuot. 19 Dis soeu dvyuk gas nyeih khanghmuh nesnoq las yhwiq dah jeimuh dyi xing wuot las nghamh nghamh zo zis yah pyo nyeis. 20 Gungs gonh dvmjot jot dah Lazaru ge, shohjyen soeu dvyuk lyis khomhdwang mas lyih tsain toh las, 21 Dis soeu dah kihgus masyah gyoh dah zopop kui zo mes nyeis. Lvkhuih eq nyah dvm mas los lyoq dyei. 22 Hauh thang lhyi hauh shohjyen soeu shei lai loh las, loeuswons bang gas nyang lyis Abraham sainhkhonh khau mha shwih kat toh. Dis soeu eq shei lha tsain ba nyhop. 23 Munyi thomh mas shanghsenh zoh lyis yah, nyah nyoq nghank yoeuh kat lyis, svsoh we yvmas Abraham yahge nyah sainhkhonh khau mha dah Lazaru lyis nyvng kat. 24 Hauh uhlyis nyang kaiq las taiq zis gas, Uwus Abraham eh, ngos lyis nhaiqnyen aq; ngos haih nyilhyam thyoh mas shanghsenh zis xauh nyeis yvmvyah, Lazaru gas nyah loqnyhauh thyoh jeis mas jen las ngah lhyo mha taiqh jyamh dyei das zis ngah jyank mas jenh nhang kat aq, ge. 25 Nghuot laus eq Abraham taiq zis gas, Lo eh, nvng gas dwis nyeis yoq lyis gis dah zis lyis xauh yoeus. Lazaru gas houmha shanghsenh zis lyis soh aq. Nghuot laus eq gvshih nyang gas nhaiqtaink zis xauh las, nvng gas shanghsenh zis xauh nyeis. 26 Hauh thoq lyis, hei mhayah namoq jyank pheh goeu e mes bang ma yoh goeu dap loh das xiklyis eq, hou mhayah ngamoq jyank pheh hank ma yoh goeu dap los das xiklyis eq, ngamoq yahge namoq dah jo mas langhkhau zainsmuh kyo joq, ge. 27 Nyang taiq zis gas, Housoeh lyis gas, ngah uwus dah yhen mha nyang lyis nhang kat das xiklyis dung. 28 Khasoeh ge lyis ngos vmang vnoeuh oeng yuk yoh shih yvmvyah, heisoeh shanghsenh dah joqyos mas nyamoq ma jweh das xiklyis, nyang nyamoq lyis loh zaih nhang aq, ge. 29 Abraham nyang lyis phuk taiq zis gas, Nyamoq gas Moshe dah lyi yahge lvpe jens dah maussauh yoh: hauh bang nyamoq dah dang gyo yoeus bas jungh, ge. 30 Dis soeu ka, Ma nghuot, uwus Abraham eh, shei goeus bang mas zis dvyuk nyamoq jyank mas doms loh lyis nyamoq nhaiqlom tsain thaiq das, ge. 31 Abraham nyang lyis taiq zis gas, Nyamoq Moshe yahge lvpe jens dah dang yangh ma gyo yoeus lyis gas, shei goeus bang dvyuk doms toq loh laus eq gyo yoeus das zis ma nghuot, ge.
1 Hauh thang lhyi, nyang changlo jens lyis taiq zis gas, Lainszo gus ma bos shoq gas ma yoh bweh; nghuot laus eq lainszo gus lhoeu thuq soeu ka mvtanhzoe nghuot! 2 Hai ngis bang dvyuk yuk lyis yaunos kuot nhang soeu ka, nyah lainzain mas mhoq shan tyaulhangh las thomh mas lhwih kat das zis gas nyah xiklyis zes gis. 3 Namoq gas namoq nyang zaih geh: Nah vmang vnoeuh nvng lyis yobos kuot lhyi nyang lyis nyho aq. Nyang nhaiqlom thaiq lyis gas nyang lyis yobos khyuot dyei aq. 4 Nyang nvng lyis dvnyeih lyis nyhet lhain yobos kuot las, Ngos nhaiqlom thaiq goeus, ge dvnyeih lyis nyhet lhain nah jyank mas doms lhain los las taiq lyis gas, nvng nyah yobos khyuot dyei aq. 5 Lvgyo jens Yhensain lhyi taiq zis gas, Ngamoq dah lomsjingh ehnyet je los nhang aq, ge. 6 Yhensain taiq zis gas, Namoq lomsjingh ehnyet anghshih chvp iq bos nghuot lyis, namoq gas nyvng zains lyis, Nvng vnyet masyah guot las thomh mas loh yuk joq aq, oen taiq lyis hauh zis gas namoq domsyos gyo das. 7 Namoq jyank mas yos phuk soeu, nghuot ya yvng yoeuh soeu jyeidwis nyeis las, yos pheh yah jweh los yah dvyih nyang lyis, Lvnyap los tsung lha zo shuk aq, ge namoq mas hank taiq das lah? 8 Nyang lyis, Ngah nyenhcon ba aq, nvng dyichih chih las ngos dye zo shuk shoq ngos lyis phuqsoe aq, hauh thang lhyi nvng dvyoh zo shuk das, ge taiq das ma nghuot lhyeh? 9 Nyang lyis taiq ya taiq zis kuot dyei yvmvyah, nyang gas jyeidwis lyis, Nhaiqshoqlang, ge taiq das lah? Ma taiq mvbeh. 10 Houyah dvyhangteh namoq eq taiq ya taiq zis lyis dye kuot lho lhyi, Ngamoq gas phauh ma dap dah jyeidwis dvtsain nghuot, ngamoq kuot chah goeu kyingh dvkuot oen taiq geh, ge. 11 Nyang Yerusalem pheh loh uhlyis Samari yahge Galile mau gungs cho lai loh. 12 Wukhau dvkoeuq mas wvng loh lyis, mvnggvng nos dah yukgis dvci yuk we we mas yap joq las nyang yah xauhgoh. 13 Nyamoq kaiq las taiq zis gas, Yhensain Yesu eh, ngamoq lyis nhaiqnyen aq, ge. 14 Nyang nyamoq lyis nyvng las nyamoq lyis taiq zis gas, Namoq dah gungs phudyei bang lyis loh chixoeuq geh, ge. Nyamoq loh nyeis lyis tsain thyauhlhang loh goeus. 15 Nyamoq mas dvyuk gas, nyang gis goeus zis lyis nyvng lho lhyi, tauh loh las Mangso lhyi yomkat kaiq chungh lho lha, 16 Nyah khyeiyang mas dupaiq las nyang lyis nhaiqshoqlang sang. Nyang gas Samari dius nghuot. 17 Yesu phuk taiq zis gas, Dvci yuk thyauhlhyang loh goeus ma nghuot lhyeh? Gau yuk khapheh loh goeus lah, ge. 18 Haih tungbaus mas lai las gohtoeu ka Mangso phunk lyis chungh das zis doms tauh los soeu ma bos lo nyvng, ge lho lha, 19 Nyang hauh soeu lhyi taiq zis gas, Toq las loh lo aq; nah lomsjingh zis gas nvng lyis gis los nhang goeus, ge. 20 Mangso munghdan khanhamp jweh los das cho, Pharishe moq yah nyang lyis nyei lyis nyang taiq zis gas, Mangso munghdan jweh zis gas nyoqjeih yah yoeuh nyeis las nyvng das zis ma nghuot. 21 Yoeuh aq, heineh, yoeuh aq thyineh, ge yoh taiq das zis ma nghuot: khasoeh ge lyis Mangso dah munghdan gas namoq dah vkhau mha nghuot, ge. 22 Nyang changlo jens lyis taiq zis gas, cangsoeu Lo dah buisnyeis dvnyeih lyis namoq nyvng mes laus eq, ma xauh nyvng das shishenh jweh los das. 23 Nyamoq gas namoq lyis, Heimha yoeuh aq, thyimha yoeuh aq ge lyis eq nyamoq thang mha vchank loh goh. 24 Khasoeh ge lyis maukhung dvshot pheh yah maunyoq nyik kat zis gohtoeu dvshot jweh shoq bvng loh zis yah dvyhangteh, Cangsoeu Lo gas nyah buisnyeis lyis housoeh nghuot los das. 25 Nghuot laus eq hauh zis ma bweh shih lyis shanghsenh zis nyoshoq yahge haq caiq bang peq tyamp zis xauh shih das. 26 Noa zaih lyis bweh yhangteh, hauh Cangsoeu Lo dah buisnyeis lyis eq housoeh nghuot los das. 27 Noa gas jeis sangpho khau mha wvng lho lhyi jeis nhauq las, dvnganh yvlyis mhont tyamp dah buisnyeis jweh shoq nyamoq gas, zo, shuk, nyihwank, lonyi dyeizo tsain kuot nyeis. 28 Lot zaih lyis eq housoeh vgus nghuot. Hauh uhlyis eq nyamoq gas zo, shuk, wis, ungh, jyo khyoq, yhen kuot las nyeis. 29 Nghuot laus eq Lot gas Sodom masyah thuq loh dah buisnyeis lyis maukhung mha dah nyi yahge hwank mau wus las, dvnganh yvlyis mhont. 30 Cangsoeu Lo thuq xoeuq dah buisnyeis lyis eq housoeh nghuot das. 31 Hauh buisnyeis lyis yhenkhung mha nyeis soeu ka, nyah yhen khau mha joq vyhang vlyih gyoh yoeus lo. Yos mas nyeis soeu eq vtauh los lo. 32 Lot dah yhensain nyhiq lyis tsain soh geh. 33 Vsainnyang kang lhyi khyuot yoeus das cho xo soeu hank laus eq, kang dyuk das. Kang dyuk soeu hank laus eq nyang kang xauh dwis das. 34 Ngos namoq lyis taiq bah, hauh nyens lyis dvjung mas aiq yuk yhet joq mhayah dvyuk lyis shwih loh las dvyuk gas nyet joq das. 35 Vmesbih aiq yuk dvgeh wom mhoq nyeis masyah, dvyuk lyis shwih loh las dvyuk gas nyet joq das. 36 Yos mas nyeis dah vbusbih aiq yuk mas, dvyuk lyis shwih yoeus loh las dvyuk gas nyet joq khoq das. 37 Nyamoq nyang lyis taiq zis gas, Yhensain eh, khamha bweh das lah, ge. Nyang gas, Mvng joq yvmas lvngda eq houmha zain los das, ge.
1 Hauh thang lhyi, dius gas yom ma gyau gyau vjangh shvmanh dung chah dah cho lhyi Yesu nyamoq lyis dangtoeuq yah taiq zis gas, 2 Wusmuhpuk dvkoeuq mas Mangso lhyi ma gyuk, dius lyis eq gungsyaus ma seq yaus dah soetuon soeu dvyuk nyeis. 3 Hauh wus mas chauhmuh dvyuk nyeis. Nyang gas nyah jyank mas lyih las sang zis gas, Ngah jeswus yahge ngah jo mas dan khyvlyis soetuon dyei aq, ge. 4 Nyang gas nyangh shoq soe ma tuon dyei toh tyamp. Hauh thang lhyi nyang taiq zis gas, Ngos gas Mangso lhyi ma gyuk, dius changh lyis eq gungsyaus ma yaus nghuot laus eq, 5 haih chauhmuh gas ngos lyis dvthauqkhyi nyeis yvmvyah, nyah shot pheh dap las lvto phuk dyei das: housoeh ma nghuot lyis gas nyang ngos lyis lhoq nyung nyeis das, ge. 6 Housoeh las Yhensain taiq zis gas, Ma dan dah soetuon soeu taiq zis lyis gyo yoeuh geh. 7 Mangso nyang khyen toh bang, nyang lyis nyeih nyenh dung nyeis shot pheh dap las dan khyvlyis lvnyap soetuon dyei das. 8 Ngos namoq lyis taiq bah, nyang gas nyamoq xiklyis lvto lvnyap phuk dyei das. Nghuot laus eq cangsoeu Lo jweh lyih buisnyeis lyis haih nyeisjvng mas lomsjingh ehnyet bos bang lyis xo nyvng das lah, ge. 9 Vsainnyang gungs lyis dan, ge nghamhzo las gohyhamh bang lyis gas cha nho ma doeus bang lyis toeuq las nyang hai dangtoeuq yah eq taiq kyoh. 10 Dius aiq yuk shvmanh dung das xiklyis yhenmuh mas doq loh: dvyuk gas Pharishe, gohtoeu dvyuk gas khoengh khywi soeu nghuot. 11 Pharishe gas yap las, Mangso eh, ngos gas lhuot zo lhuot shuk, ma dan, nyi shuot lvng shuot bang teh ma nghuot thoq lyis magoh khoengh khywi soeu yhangteh yangh ma nghuot yvmvyah ngos nvng lyis jyehjuh chungh. 12 Ngos gas Yuda No Buisnyeis dvdaus lyis aiq lhain womkyi lha, ngos yoh goeu dvnganh mas ciboms dvboms vlu kat, ge dung. 13 Khoengh khywi soeu ka we mas yap las, nyah nyoq maukhung mha ma womh nghank yoeuh yoeuh nyah yvnggvng mas bat las dung zis gas, Mangso eh, ngos yaunos wons soeu lhyi nhaiqnyen aq, ge. 14 Ngos namoq lyis taiq bah, haih soeu ka thyi gohtoeu dvyuk thoq lyis dan zis yah nyah yhen pheh loh. Khasoeh ge lyis vsainnyang gungs lyis chunghzo soeu hank laus eq o mha khyoq zis xauh das. Vsainnyang gungs lyis o mha gyoh soeu ka chungh zis xauh das, ge. 15 Nyamoq gas lonoeuh jens lyis tanh dyei bas jungh, ge nyah jyank mas shwih lyih yvlyis changlo jens nyvng las nyamoq lyis tsain nyho. 16 Nghuot laus eq Yesu nyamoq lyis khi yoeus las taiq zis gas, Loshang jens lyis ngah jyank mas los nhang geh, nyamoq lyis vtomp toh goh: khasoeh ge lyis, Mangso munghdan gas housoeh teh bang xiklyis nghuot. 17 Ngos namoq lyis jyoengh taiq bah, Hank laus eq Mangso munghdan lyis loshang teh ma lhom yoeus soeu ka, houmha ma yoh wvng loh, ge. 18 Guon soeu dvyuk nyang lyis nyei zis gas, Gis dah Svra eh, ngos vcaiq vto kang yoh das xiklyis cha kuot chah lah, ge. 19 Yesu nyang lyis taiq zis gas, Nvng ngos lyis chamus Gis soeu, oen lui lah? Mangso mha lai las gis soeu dvyuk eq ma bos. 20 Lyi mas, nyi shuot lvng vshuot, dius vsat, vkhauh, ma ying kanghjyoeng vkat, nah ungwes uwus lyis phauh nyang aq, ge zis nvng seq toh goeus, ge. 21 Nyang taiq zis gas, Haih goeu dvnganh lyis ngos loyvm yoq lyis yah chank goeus, ge. 22 Yesu haih yvlyis xauhgyo las nyang lyis taiq zis gas, nvng dvja chah shih: nvng yoh dah goeu dvnganh ungh las nyungs bang lyis gvm dyei aq, housoeh lyis nvng maukhung mha zisyos yoh das; housoeh las ngah thang mha chank los aq, ge. 23 Gvshih, nyang haih zis xauhgyo lyis, nyang svsoh nhaiqkuk: khasoeh ge lyis nyang gas svsoh dis soeu nghuot. 24 Nyang housoeh nhaiqkuk yvlyis Yesu nyvng lyis, nyang taiq zis gas, Yoh khuiq bang gas Mangso munghdan mas wvng das zis kha iq yau! 25 Khasoeh ge lyis dis soeu Mangso munghdan mas wvng lwis thoq lyis gola-u gas nghvpnho mha wvng das zis zes lwis, ge. 26 Hauh dang lyis xauhgyo bang taiq zis gas, Housoeh lyis gas khyuot yoeus zis hank xauh das lah, ge. 27 Nyang taiq zis gas, Dius ma gis bweh zis Mangso ka gis bweh, ge. 28 Hauh uhlyis Petru taiq zis gas, Yoeuh aq, ngamoq gas dvnganh toh khoq las nah thang mha chank los goeus, ge. 29 Housoeh las nyang nyamoq lyis taiq zis gas, Ngos namoq lyis jyoengh taiq bah, Mangso munghdan gvng mas vsainnyang dah yhen, ungwes, uwus, vmang vnoeuh, yhensain nyhiq, lo jens lyis toh khoq soeu hank laus eq, 30 gvshih dah vcaiq mas nyoshoq huon xauh yoeus das: hauh thoq lyis jweh los das vcaiq mas eq vcaiq vto kang xauh yoeus das, ge. 31 Hauh thang lhyi nyang gas dvci aiq yuk moq lyis nyah jyank mas shwih yoeus las nyamoq lyis taiq zis gas, Yoeuh aq, yang gas Yerusalem pheh loh nyeis. Cangsoeu Lo yah sen lha lvpe jens lhaih ya lhaih toh zis dvnganh nyuk los das. 32 Khasoeh ge lyis nyang lyis gohnyau bang loq mas kyauh tyamp las, jwangh, ma phauh gis kuot zis yahge svkanh dyeh gyuon zis xauh das. 33 Nyamoq gas nyang lyis lyuk las sat das: somh vnyeih lyis nyang dwis toq das. 34 Nyamoq gas haih zis dvkoeuq eq ma seqgyo: khasoeh ge lyis haih dang gas nyamoq xikkhonh mas nghop shung toh las, taiq kyoh zis dvkoeuq eq ma tsain seq. 35 Gvshih nyang Yerikho mas jweh ni los lyis, nyoqjet soeu dvyuk choyvm mas tsung lha dung zo nyeis. 36 Moqjens lai sam gyo las, nyang gas hauh zis cha nghuot yvlyis nyei. 37 Nyamoq gas nyang lyis, Nazaret Yesu lai loh zis lyis tsain taiq kyoh dyei. 38 Housoeh las nyang kaiq sang zis gas, Dawi dah Lo Yesu eh, ngos lyis nhaiqnyen aq, ge. 39 Xik lyis loh nyeis bang gas nyang tsoeklo nyeis bas jungh ge, nyang lyis tsain nyho. Nghuot laus eq nyang gas zes kaiq las, Dawi dah Lo eh, ngos lyis nhaiqnyen aq, ge. 40 Yesu yap las, hauh soeu lhyi nyah jyank mas shwih los das xiklyis vmingh dyei. Housoeh nyah jyank mas ni los lyis nyang lyis nyei zis gas, 41 Ngos nvng lyis cha kuot dyei das zis o lah, ge. Nyang gas, Yhensain eh, ngah nyoq doms nyvng nhang aq, ge. 42 Yesu nyang lyis taiq zis gas, Nah nyoq doms nyvng los bas jungh, nah lomsjingh zis gas nvng lyis gis los nhang goeus, ge. 43 Houjang yah nyah nyoq nyvng los las, Mangso dah phunk lyis chungh zis yah nyah thang mha chank loh. Dius dvnganh gas hauh zis lyis nyvng las Mangso lhyi chungh.
1 Yesu gas Yerikho wus cho yah wvng las lai loh. 2 Yoeuh aq, khoengh khywi bang mas uhjyung nghuot dah Zake ge soeu dvyuk nyeis. Hauh soeu ka dis soeu nghuot. 3 Nyang gas Yesu hank nghuot yvlyis nyvng mes las xo laus eq dius puk thoeu lha, nyang gas nyhen yvmvyah ma yoh nyvng. 4 Housoeh las nyang lyis nyvng shoq, xik lyis uhlhomh wuih las nyang lai loh das choyvm, lvhomp zains mas doq loh. 5 Yesu hauh yvmas jweh las nghank yoeuh kat lyis nyang lyis nyvng las, Zake eh, lvnyap gyoh los aq, khvnyhik ngos nah yhen mha thoeng das, ge. 6 Nyang eq lvnyap gyoh las nyang lyis gauslaus gausseq lhom yoeus langh. 7 Nyamoq hauh zis nyvng lyis, nyamoq dvnganhmoq gas nyang lyis, yaunos wons soeu yhen mha boengh wvng doq, ge lop. 8 Zake toq yap las Yhensain lhyi taiq zis gas, Yhensain eh, yoeuh aq ngah vyhang dvgohyih nyungs bang lyis dyei das; dvyuk yuk lyis ngos anzo lyis nyei huon doms cap das, ge. 9 Yesu nyang lyis taiq zis gas, Khyuot yoeus cho ka khvnyhik haih yhen mha los goeus, khasoeh ge lyis nyang eq Abraham dah lo dvyuk nghuot. 10 Cangsoeu Lo gas dyuk loh soeu lhyi xo lha khyuot yoeus das xiklyis los zis nghuot, ge. 11 Nyamoq haih zis lyis tsain xauhgyo lyis, nyang gas Yerusalem mas jweh ni los yvmvyah eq, nyamoq gas Mangso munghdan lvnyap thuq los das ge nghamh yvmvyah eq, nyang dangtoeuq dvkoeuq yah doms kyah taiq. 12 Housoeh yvmvyah nyang taiq zis gas, Nyoqnho bos soeu dvyuk gas, nyang nyang munghdan dvkoeuq xauh yoeus thang lhyi doms los das ge we mau pheh loh. 13 Hauh uhlyis nyah jyeidwis jens mas dvci yuk lyis khi las, yuk khanghmuh lyis ngwis kyvp dvci ci kyauh toh lho lha taiq zis gas, Ngos doms jweh los shoq haih zis yah soenghi kuot geh, ge. 14 Nghuot laus eq nyah dius jens gas nyang lyis hoeng lha, Haih soeu ngamoq thoq mas guon das zis ngamoq ma o, ge nyah thang mha mang chank kat kat. 15 Hauh thang lhyi nyang munghdan yoh las tauh jweh los lyis, nyang ngwis dyei toh khoq dah jyeidwis jens soenghi kuot las, vmyat khayuk khanyhoq yoh zis seq shoq nyamoq lyis khi nhang kat. 16 Cangxeih vyuk lyih las taiq zis gas, Yhensain eh, nah ngwis kyvp mas dvci kyvp myat goeus, ge. 17 Nyang gas, Gis dah jyeidwis eh, nvng gas vmhauhlo dah muh mas lomluk goeus, wus dvci lhyi guon aq, ge nyang lyis taiq. 18 Aiq vyuk eq, Yhensain eh, nah ngwis kyvp mas oeng kyvp myat goeus, ge. 19 Nyang gas hauh soeu lhyi eq, Nvng wus oeng koeuq lyis guon aq, ge taiq. 20 Gohtoeu dvyuk eq lyih las, Yhensain eh yoeuh aq, nah ngwis kyvp lyis ngos misseh yah khoek tsomh toh. 21 Nvng gas ma toh masyah yoeus las, jyo ma khyoq masyah seq yhomh dah dius yau dvyuk nghuot yvmvyah ngos nvng lyis gyuk, ge taiq. 22 Nyang taiq zis gas, Ma lyungs jyeidwis eh, nvnyang dang khonh yah ngos nvng lyis soetuon das: ngos ma toh masyah yoeus las, jyo ma khyoq masyah yhomh yoeus soeu, yau dah dius nghuot yvlyis nvng seq toh goeus lyis gas, 23 ngos doms los lyis ngah ngwis bonzoe yahge ngwis lhyi yoh shoq ngwis jyi mha chamus ma kat toh, ge. 24 Vyvm mas yap joq bang lyis eq nyang taiq zis gas, Nyah jyank masyah hauh ngwis kyvp dvkoeuq lyis yoeus las ngwis kyvp dvci yoh soeu lhyi dyei geh, ge. 25 Nyamoq, nyang lyis taiq zis gas, Yhensain eh, nyang ngwis kyvp dvci yoh goeus, ge. 26 Ngos namoq lyis taiq bah, Yoh bang lyis lung dyei das. Ma yoh bang jyank masyah gas, nyamoq yoh joq zis yangh yoeus tyamp dyei das. 27 Ngos, nyamoq lyis guon das yvlyis ma o dah ngah jeswus lyis heimha shwih los las, ngah xikkhonh mas sat geh, ge. 28 Nyang housoeh dye taiq lho lhyi, nyang gas nyamoq xik mas Yerusalem pheh tsoq loh nyeis. 29 Tsanlun ge dah boms, Betphage yahge Bethani wukhau nvm mas jweh ni los lyis, nyang nyah changlo aiq yuk lyis nhang lha taiq kat zis gas, 30 Nah aiq yuk, xik mas dah wukhau mha loh geh; houmha wvng loh lyis hank eq ma ji ku shih dah mauhlyihzoe lo dvdoeu twih toh zis lyis nah aiq yuk wvng loh lyis nyvng das, hauh yvlyis phui she los geh. 31 Dvyuk yuk nah aiq yuk lyis, Chamus hauh yvlyis phui goh lah, ge nyei lyis, Yhensain hauh yvlyis yhung chah ge, oen taiq geh, ge. 32 Jyeinhang zis xauh vzomh loh las nyang taiq kat vgus loh nyvng. 33 Nyah aiq yuk mauhlyihzoe lo lyis phui nyeis lyis, yhensain moq gas, Hauh mauhlyihzoe lo chamus phui goh lah, ge nyah aiq yuk lyis nyei. 34 Nyah aiq yuk phuk taiq zis gas, Yhensain haih yvlyis yhung chah ge, ge. 35 Nyah aiq yuk gas hau mauhlyihzoe lo lyis Yesu jyank mas she loh dyei. Mauhlyihzoe gungs thoq mas nyamoq dah dyimis nyhoeuh las Yesu lyis ji nhang. 36 Nyang housoeh ji loh nyeis lyis cho mha dius jens gas nyamoq dah dyi tsain nyhoeuh dyei. 37 Gvshih wugungs jweh bah ge dah Tsanlun boms nyeismhung mha jweh lyis, nyah moqjens gas nyamoq nyvng ku dah yomsoq zains muhzoh gvng mas phunk lyis gauslaus las Mangso lhyi yomkat las tsain chungh zis gas, 38 Yhensain nyings mas jweh los dah hwankti ka ngelhoq; Maukhung mha nyenstap zis yahge nyhang thank joqyos mas phunk bos nyeis bas jungh, ge. 39 Dius moqjens masyah Pharishe dvyhamh nyang lyis taiq zis gas, Svra eh, nah changlo jens lyis nyho aq, ge. 40 Nyang nyamoq lyis phuk taiq zis gas, Ngos namoq lyis taiq bah, haih bang samlo nyeis nghuot lyis gas lukgoq tsain kaiq los das, ge. 41 Nyang hauh wus mas jweh ni los las, hauh wugungs lyis nyvng lyis, hauh nyhenshang nyang ngaus las taiq zis gas, 42 Wugungs nvng eh, nah nyenstap zis yah sen zis cha nghuot yvlyis khvnyhik nvng toq seq ya lhyeh! Nghuot laus eq gvshih gas hauh zis lyis nvng ma nyvng. 43 Khasoeh ge lyis, nah jeswus jens gas nah vyvm vwi mas gvduk kuot lho lha, nvng lyis tsain lhaink toh las, nvng lyis shot khanghmuh kyamp gos toh dah buisnyeis jweh los das. 44 Nvng lyis eq, nah wusciank khau mha nyeis bang lyis eq mhont tyamp das las, nvng mas lukgoq dvlom thoq mas dvlom yangh ma yoh ci toh lo das: khasoeh ge lyis Mangso nvng lyis komh das shishenh lyis nvng ma seq. 45 Nyang gas yhenmuh mas wvng loh las houmha kaih ungh kaih wis bang lyis khat thuq tyamp. 46 Nyang nyamoq lyis taiq zis gas, Maussauh mas, Ngah yhen ka shvmanh dung yhen nghuot, ge lhaih toh laus eq namoq gas hauh yvlyis khyanktau khyung tsain kuot, ge. 47 Nyang gas nyeih khanghmuh yhenmuh mas jyauh nyeis. Nghuot laus eq Phudyei uhjyung jens, maussauh lhaih bang yahge dius jens lyis uhshe bang gas, nyang lyis sat das cho tsain xo. 48 Nghuot laus eq dius jens dvnganh gas nyah dang mas nhaiq wvng nyeis yvmvyah, nyamoq khasoeh kuot das cho ma xo nyvng.
1 Dvnyeih gas nyang yhenmuh mas dius jens lyis jyauh zis yahge gausyis dang taiq kyoh nyeis dah uhlyis, Phudyei uhjyung jens, maussauh lhaih bang yahge logis jens nyah jyank mas lyih las, 2 Nvng gas chah vmingh yah haih zis kuot lah? Nvng lyis haih vmingh hank dyei zis ngamoq lyis taiq kyoh aq, ge. 3 Nyang nyamoq lyis phuk taiq zis gas, Ngos eq namoq lyis dvja nyei bah, ngos lyis phuk taiq geh. 4 Yohan dah jeisnyhop cho ka Mangso mhayah nghuot lah? Dius masyah nghuot lah, ge. 5 Nyamoq nyang changh xamgoh las, Yang maukhung mhayah nghuot oen taiq lyis gas, Housoeh lyis namoq, nyang lyis chamus ma lomsjingh goh lah, ge das. 6 Nghuot laus eq yang dius masyah nghuot oen lhyi ka, dius dvnganh gas yang lyis lukgoq yah doeuh das: khasoeh ge lyis Yohan ka lvpe nghuot yvlyis nyamoq jingh, ge. 7 Housoeh las nyamoq phuk taiq zis gas, Khamha yah nghuot zis ngamoq ma seq, ge. 8 Yesu nyamoq lyis taiq zis gas, Ngos haih muh chah vmingh yah kuot zis namoq lyis ma taiq kyoh das, ge. 9 Hauh thang lhyi, nyang dius jens lyis haih dangtoeuq yah taiq zoh loh zis gas, Dius dvyuk zvbiq dvkhyam ba tsungh toh lho lha, khyam muh zwi bang lyis tsoeuh dyei khoq las, nyang gas we mau mas nyangh shoq loh nyeis. 10 Shishenh jweh lyis, khyam mha dah zvbiq shih gvmboms nyang lyis dyei bas jungh ge, khyam tsoeuh zwi bang jyank mas jyeidwis dvyuk nhang kat. Nghuot laus eq khyam tsoeuh zwi bang gas nyang lyis bat las, gungskom nhang kat. 11 Nyang gohtoeu jyeidwis dvyuk lyis doms nhang kat. Nyang lyis eq nyamoq bat, vxoq vcaiq shoeuhshih las gungskom nhang kat. 12 Somh vyuk nhang lhyi, nyang lyis eq dvmtap las, khat thuq tyamp. 13 Hauh thang lhyi zvbiq khyam sain taiq zis gas, Ngos khasoeh kuot das lah? Ngos jyetdap, ngah lo lyis nhang kat das, nyang lyis gas nyamoq phauh nyang mvbeh, ge. 14 Nghuot laus eq, khyam tsoeuh zwi bang nyang lyis nyvng lyis, nyamoq nyang changh taiq goh zis gas, Haih soeu ka yhenzis zom das soeu nghuot. Hauh yhenzis gas yah zis nghuot bas jungh, nyang lyis sat goh, ge. 15 Nyamoq gas, nyang lyis zvbiq khyam nghe pheh she thuq las sat. Housoeh las zvbiq khyam sain ka nyamoq lyis khasoeh kuot das lah? 16 Nyang jweh los las hauh khyam tsoeuh zwi bang lyis mhont las, zvbiq khyam ka gohyhamh bang lyis dyei das, ge. Hauh zis xauhgyo bang gas, Heisoeh ma nghuot bas jungh, tsain ge. 17 Nyang nyamoq lyis yoeuh las taiq zis gas, Housoeh lyis gas, yhen tsuk bang peq tyamp dah luklom gas, yhenthunk lukzains bweh los goeus, ge lhaih toh zis gas cha ge lah? 18 Hauh lukzains thoq mas gyoh soeu hank laus eq dyis tyamp das. Hank thoq mas laus eq hauh zis gyoh lyis gas phih soeh nhoeuq tyamp das, ge. 19 Hauh dangtoeuq gas, phudyei uhjyung jens yahge maussauh lhaih bang lyis toeuq las taiq yvlyis nyamoq seqgyo las, hauh uhlyis yangh nyang lyis nyhik das zis sont nyeis. Nghuot laus eq dius jens lyis gyuk. 20 Housoeh las nyamoq gas, jyoeng guons kuot dah joh yoeuh bang lyis lhom nhang zis gas, nyang cha taiq yvlyis nyhik las, nyang lyis yomsoq yahge vmingh yoh dah mungh zau jyank mas yoh kyauh tyamp das xiklyis nghuot. 21 Nyamoq, nyang lyis nyei zis gas, Svra eh, nvng gas dius dah nyoqnho lhyi ma yoeuh dan khyvlyis jyauh las Mangso dah lyi jus jus jyauh nyeis zis lyis ngamoq seq. 22 Ngamoq gas hwankti Kesar lyis khoengh kat das zis lyi bos lah, ma bos lah, ge. 23 Nghuot laus eq nyang gas nyamoq dah nhaiqlom guih zis seq las nyamoq lyis taiq zis gas, 24 Ngwis kyvp dvkoeuq ngos lyis chixoeuq geh, hauh zis hank gungslho yahge maussauh dap lah, ge. Nyamoq taiq zis gas, Kesar zis nghuot, ge. 25 Nyang nyamoq lyis taiq zis gas, Housoeh yvmvyah Kesar zis nghuot lyis gas Kesar lyis, Mangso zis nghuot lyis gas Mangso lhyi dyei geh, ge. 26 Nyamoq gas dius jens xikkhonh mas nyah dang khonh mas yobos ma nyvng zis yahge nyang phuk taiq dang lyis tsain mauh las samlo no dyuk goeus. 27 Hauh uhlyis, dwis toq cho ma bos ge dah Saduke dvyhamh nyah jyank mas los nyei zis gas, 28 Svra eh, yhensain nyhiq bos dah vmang, lo ma bos khoq shei lhyi, vmang dah chauhmuh lyis vnoeuh shoeuh las vmang dah vshih tsoq bas jungh ge Moshe ngamoq lyis lhaih toh dyei. 29 Gvshih houteh vmang vnoeuh nyhet yuk nyeis. Cangxeih vyuk gas nyihwank las lo ma bos shei khoq. 30 Aiq vyuk eq chauhmuh shoeuh las lo ma bos shei khoq. 31 Somh vyuk eq chauhmuh shoeuh goeus. Housoeh nyhet yuk jweh shoq lo ma bos tsain shei khoq. 32 Thang thank lyis hauh vmesbih eq shei loh. 33 Housoeh yvmvyah hau dwis toq los uhlyis hauh vmesbih gas, hank dah yhensain nyhiq nghuot das lah? Khasoeh ge lyis nyang gas nyhet yuk moq yah phoengh wvng goeus, ge. 34 Yesu nyamoq lyis phuk taiq zis gas, Haih mungkvn lo jens gas phoengh hwank, lonyi dyeizo kuot. 35 Nghuot laus eq shei masyah dwis toq los las hauh mau mas jweh bang gas, phoengh hwank, lonyi dyeizo zis ma bos lo. 36 Nyamoq gas loeuswons bang teh nghuot las ma shei lo. Nyamoq lyis shei masyah dwis toq los nhang goeus yvmvyah nyamoq gas Mangso dah lo jens nghuot. 37 Shei bang lyis dwis toq los nhang cho yah sen lha Moshe ka kanghjyoeng dede chixoeuq goeus. Nyi dap nyeis dah mhanhgyomh yah sen lha lhaih toh dah Jyomp maussauh doeus mas Moshe ka Yhensain lhyi Abraham dah Mangso, Isak dah Mangso, Yakop dah Mangso, ge lui. 38 Khasoeh ge lyis nyang gas shei bang dah Mangso ma nghuot, dwis nyeis bang dah Mangso dvnghuot; Mangso dah xikkhonh mas haih bang dvnganh gas dwis nyeis, ge. 39 Hauh uhlyis maussauh lhaih bang dvyhamh nyang lyis phuk taiq zis gas, Svra eh, nvng taiq zis jus, ge. 40 Hauh thang lhyi nyamoq gas nyang lyis cha eq ma womh nyei lo. 41 Nyang nyamoq lyis taiq zis gas, Khristu gas Dawi dah lo nghuot, ge nyamoq khasoeh yoh taiq lah? 42 Dawi nyang Chungh Dang maussauh mas, Hauh Yhensain ngah Yhensain lhyi taiq zis gas, 43 Ngos nah jeswus lyis nah nangte kuot shoq, Nvng ngah loqyos shot pheh tsung toh aq, ge. 44 Housoeh las Dawi gas Khristu lyis Yhensain ge lui lyis gas, nyah lo khasoeh yoh nghuot das lah, ge. 45 Hauh thang lhyi dius dvnganhmoq xauhgyo shoq nyang nyah changlo jens lyis taiq zis gas, 46 Maussauh lhaih bang lyis zaih geh: nyamoq gas dyixing wuot las suh mes. Kaih mas phauh nyang zis yah jeshuh das zis eq, lyi jungs mas gis thank tsunggus lyis eq, pwe mha gis thank joqyos lyis eq tsain o mes. 47 Chauhmuh jens dah yhen lhyi kuotzo kuot shuk las dius dah xikkhonh mas yoeuh doeus das xiklyis shvmanh xing xing dung guons kuot. Hauh bang gas zes than dah yobos dyei zis xauh das, ge.
1 Housoeh nyang yoeuh kat lyis, dis bang ziskwi mha vlu tsain kat nyeis yvlyis nyvng las, 2 thunkcent aiq kyvp kat, nyungs dah chauhmuh dvyuk lyis eq nyang nyvng. 3 Nyang taiq zis gas, Ngos namoq lyis jyoengh taiq bah, hai nyungs dah chauhmuh gas nyamoq dvnganhmoq thoq lyis zes nyo shoq kat goeus. 4 Khasoeh ge lyis hauh bang dvnganhmoq gas, nyamoq magons magoh yoh masyah vlu kat. Nghuot laus eq nyang gas vshoh vjyen masyah nyah kang khoeu das zis dvnganh kat goeus, ge. 5 Dius dvyhamh gas yhenmuh lyis yungh dah luk yahge dyei toh dah jyungshuk yah shunk toh zis lyis taiq nyeis lyis nyang taiq zis gas, 6 Gvshih namoq nyvng nyeis, luk dvlom thoq mas dvlom ci toh dah haih goeu gas, dvlom thoq mas dvlom kih toh zis ma bos lo das buisnyeis jweh los das, ge. 7 Nyamoq, nyang lyis nyei zis gas, Svra eh, hauh zis gas khanhamp nghuot das lah? Hauh cho bweh ni los lyis chah vlho nghuot das lah, ge. 8 Nyang taiq zis gas, Namoq mhuih khwangh zis ma xauh bas jungh, zaih geh: khasoeh ge lyis, nyoshoq moq ngah nyings yoeus las, Ngos gas Khristu nghuot; hauh shishenh jweh ni los goeus, ge vguons kuot taiq los das: housoeh las namoq hauh bang thang mha vchank loh goh. 9 Namoq gas moeng dyoq zis yahge gomloeus toq cho xauhgyo lyis vgyuk vdvn goh: Hauh cho ka xik bweh los das. Nghuot laus eq thang thank zis gas ma jweh los shih, ge. 10 Tsai, nyang nyamoq lyis taiq zis gas, Dius dvnyau yah dvnyau, munghdan dvkoeuq yah dvkoeuq zan goh das. 11 Joqyos vdeh deh mas maunyeis gvgis dwis las, panghkhauq, yomh jweh los das. Maukhung mhayah eq gyukphoh zis yahge vlho zainsmuh bweh thuq los das. 12 Nghuot laus eq hauh cho dvnganh ma bweh shih lyis, ngah nyings gvng mas svbih yah namoq lyis nyhik las shoeuhshih, lyi jungs mas kyauh tyamp las thung lhunk, hwankti yahge guon bang dah xikkhonh mas shwih loh zis tsain xauh das. 13 Housoeh teh zis gas namoq kanghjyoeng kat das dah toeuh bweh los das. 14 Housoeh yvmvyah namoq khasoeh toeuh das zis, xik lyis yah ma nghamh toh noh zis namoq nhaiqlom mas tsain kat chi geh. 15 Khasoeh ge lyis jeswus namoq lyis ma yoh taiq ung, dang uh ma yoh lhomh das nyhenshang ngos namoq lyis nhuot mas joeui dyei das. 16 Namoq dah nyhiphoq, vmang vnoeuh, vnyau vhuh yahge dyenschangh jens gas namoq lyis phanhlyen das. Namoq mas dvyhamh lyis gas sat das. 17 Ngah nyings gvng mas dvnganhmoq namoq lyis hoeng los das. 18 Nghuot laus eq namoq dah cam dvkhvt eq dyoq das zis ma nghuot. 19 Namoq gas jhen zis yah namoq dah kang khyuot yoeus zis xauh das. 20 Yerusalem wugungs lyis jeswus yah lhaink toh zis lyis namoq nyvng goeus ya, hauh wugungs dyoqbis bah ge goeus zis lyis namoq seq toh lo geh. 21 Hauh uhlyis Yuda mau mas nyeis bang gas boms pheh phang loh bas jungh. Wugungs khau mha nyeis bang gas thuq loh bas jungh. Wuxom mha nyeis bang eq wus vkhau mha ma wvng los bas jungh. 22 Khasoeh ge lyis hauh buisnyeis lyis gas, lhaih ya lhaih toh dang nyuk los das las, haih buisnyeis gas lvto phuk das buisnyeis nghuot. 23 Hauh buisnyeis lyis loshang gungs nghuot bang yahge lonoeuh nauh gvmshuk bang gas mvtanhzoe nghuot! Khasoeh ge lyis hauh mau mas gyukluklvsonh shohjyen zis xauh las, haih dius nyau thoq mas nhaiqlom dyis zis jweh das. 24 Nyamoq gas moengsa yah dyoqbis das, dius nyau khanghmuh yah nyhik shwih loh zis xauh das. Gohnyau bang dah shishenh ma thank dvchank Yerusalem gas gohnyau bang yah nang zaiq toh zis xauh das. 25 Hauh uhlyis buis, lhamhmuh yahge kyi mha eq vlho thuq los das; thomh yahge jeisphauq toq thwe gvng mas munghdan gas mauh las, 26 hauh nyeisjvng mas bweh los zis lyis yoeuh las, dius jens gyuk zis yah chuot lains loh das. Khasoeh ge lyis maukhung mha dah yomsoq nonh los das. 27 Hauh uhlyis Cangsoeu Lo gas, yomsoq yahge phunk zainsmuh yah jyommauh yah gyoh los zis lyis nyamoq nyvng das. 28 Haih vyhang bweh zoh los lyis, namoq uhloms nghank las yoeuh kat geh: khasoeh ge lyis namoq dah khyuot yoeus cho jweh ni los goeus. 29 Nyang nyamoq lyis dangtoeuq yah taiq zis gas, Namoq maiphang zains yahge gohtoeu saiqzains dvnganh zis lyis yoeuh geh: 30 Saiq nyuk tuot los zis nyvng goeus ya, zvn wvng los zis lyis namoq nyang yoh seq. 31 Houyah dvyhangteh hai bweh los dah vyhang lhyi nyvng lyis, Mangso munghdan gas jweh ni los goeus zis seq geh. 32 Ngos namoq lyis jyoengh taiq bah, Haih zis ma nyuk los dvchank haq caiq ma lai das. 33 Maukhung nyeisjvng lai loh laus eq ngah dang gas ma lai loh das. 34 Namoq gas vsainnyang dah gungs lyis zaih nyeis geh. Namoq gas, zo lais shuk lais pwe kuot gvng mas nyeisjvng thoq mas dah chiqjyen yvmas shishenh vthank nhang goh. Hauh buisnyeis gas lhyik baiq teh namoq mas nyetlos nyettant thungh phuh los das. 35 Khasoeh ge lyis, hauh buisnyeis gas nyeisjvng gonh mas nyeis ya nyeis bang thoq mas jweh los das. 36 Housoeh yvmvyah hai bweh los das dah cho dvnganh masyah namoq luiq las, cangsoeu Lo dah xikkhonh mas yoh yap das xiklyis, vjangh shvmanh dung las zungh nyeis geh, ge. 37 Housoeh Yesu gas nyeih lyis yhenmuh mas jyauh nyeis. Nyenh lyis gas thuq las Tsanlun ge dah boms mas loh nyeis. 38 Dius dvnganh nyah dang lyis gyo yoeus das nyhenshang nvpsangh yah yhenmuh mas tsain los.
1 Lhuiq Kat Pwe ge nyhink dah bicheih ma kat ohlhyoq zo pwe jweh ni los nyeis. 2 Hauh uhlyis phudyei uhjyung jens yahge maussauh lhaih bang gas, nyang lyis khasoeh yoh sat das dah cho tsain xamgoh nyeis. Nghuot laus eq nyamoq gas dius jens lyis gyuk nyeis. 3 Hauh shvhoeu lhyi dvci aiq yuk mas Iskarot ge dah Yudas jyank mas Satan wvng las, 4 nyang thuq loh las phudyei uhjyung jens yahge zau jens jyank mas, nyang lyis khasoeh yoh phanhlyen dyei das cho, nyamoq yah e xamgoh nyeis. 5 Hauh bang gas gaus las ngwis dyei das xiklyis xamxonh. 6 Nyang nyamoq yah xamxonh las moqjens ma nyeis uhlyis nyang lyis yoh phanhlyen dyei das toeuh xo nyeis. 7 Lhuiq Kat Pwe yvnglo sat phudyei las bicheih ma kat ohlhyoq zo pwe shishenh jweh los. 8 Housoeh yvmvyah nyang gas, Petru yahge Yohan lyis xik pheh nhang lha taiq kat zis gas, Yang zo das xiklyis Lhuiq Kat Pwe loh sont langh geh, ge. 9 Hauh aiq yuk nyang lyis nyei zis gas, Nvng ngamoq lyis khamha loh sont toh dyei langh nhang mes lah, ge. 10 Nyang nyah aiq yuk lyis taiq zis gas, Nah aiq yuk wugungs mas wvng loh lyis jywang dvng soeu dvyuk yah xauhgoh das: hauh soeu wvng loh dah yhen khau mha chank wvng loh geh. 11 Hauh yhensain lhyi, Ngos ngah changlo jens yah Lhuiq Kat Pwe zo das dah boenghdoq yvp khah zis nghuot lah, ge Svra nyei nhang, oen taiq geh. 12 Housoeh lyis nyang sont toh dah yhenthoq yvpmuh dvyvp tuonh shet das, yah nyhenshang houmha ba sont toh langh geh, ge. 13 Nyah aiq yuk loh lyis nyang taiq kat vgus nyvng las, hau Lhuiq Kat Pwe nyenhcon lhyi tsain ba sont toh. 14 Shishenh jweh las nyang gas lvgyo jens yah dvgeh kihgus mas joqyos yoeus. 15 Nyang nyamoq lyis taiq zis gas, Ngos shanghsenh zis ma xauh shih lyis namoq yah dvgeh haih Lhuiq Kat Pwe svsoh zo shuk mes. 16 Ngos namoq lyis taiq zis gas, Mangso munghdan mas doms xauh zo shishenh jweh shoq, ngos haih yvlyis ma zo das, ge. 17 Nyang kom lhyi yoeus las jyehjuh chungh lho lha taiq zis gas, Haih zis lyis yoeus las namoq mas gvm geh. 18 Ngos namoq lyis taiq bah, Mangso munghdan jweh los shoq, ngos zvbiq shih mas zis ma shuk lo das, ge. 19 Hauh thang lhyi ohlhyoq yoeus las jyehjuh chungh lho lha khyiq dyei las taiq zis gas, Haih zis gas namoq xiklyis dyei tyamp dah ngah gungs nghuot. Ngos lyis soh das xiklyis haih zis kuot geh. 20 Houyah dvyhangteh nyamoq dye zo thang lhyi kom lhyi yoeus las taiq zis gas, Haih zis gas namoq xiklyis huot tyamp, ngah suih yah kuot toh dah thanghchvp vsaiq nghuot. 21 Nghuot laus eq yoeuh aq, ngos lyis phanhlyen das soeu dah loq gas haih kihgus mas ngah loq yah dvgeh nghuot. 22 Cangsoeu Lo gas toeuq toh zis yah dvyhangteh loh lo das; nghuot laus eq nyang lyis phanhlyen soeu ka mvtanhzoe nghuot, ge. 23 Hauh uhlyis nyamoq eq hauh cho kuot das zis hank nghuot das au, ge tsain nyei goh nyeis. 24 Hauh thoq lyis changlo jens mas zes kuh soeu hank nghuot nyeis au lhyeh, ge nyamoq taiq phyen goh nyeis yvmas, 25 Nyang nyamoq lyis taiq zis gas, Gohnyau hwankti jens gas nyamoq xauh guon bang lyis kyukzo nhantzo. Nyamoq lyis vmingh dyei bang eq, nyamoq nyang gungs lyis jyehjuh yhensain nghuot ge taiqzo. 26 Nghuot laus eq namoq gas housoeh ma nghuot; namoq mas zes kuh soeu ka zes ngis soeu yhangteh nghuot las, uhjyung ka phuqsoe soeu teh nghuot chah. 27 Womjus mas tsung toh soeu yahge phuqsoe soeu hank zes kuh lah? Wom jus mas tsung toh soeu ma nghuot lhyeh? Nghuot laus eq ngos gas namoq mas phuqsoe soeu teh nghuot nyeis. 28 Namoq gas, ngos yaukyenh uhlyis, ngos yah dvgeh nyeis bang nghuot. 29 Ngah Uwus ngos lyis munghdan dyei zis yah dvyhangteh, ngos namoq lyis dyei. 30 Namoq gas ngah munghdan mas, ngah kihgus mas yoh zo shuk das zis yahge soetuon tank mas tsung lha, Israel dvci aiq nyau lyis soetuon das, ge. 31 Housoeh las Yhensain taiq zis gas, Simon, Simon Satan gas namoq lyis sunghso khyink teh khyink mes nyeis. 32 Nghuot laus eq nah lomsjingh ehnyet ma dyoq das xiklyis, ngos nvng lyis shvmanh dung dyei. Nah nhaiqlom thaiq las doms lhain soh los lyis, nah vmang vnoeuh moq lyis thukxank nyeis aq, ge. 33 Petru taiq zis gas, Yhensain eh, ngos gas nvng thung gyoh laus eq, shei chah laus eq nvng yah dvgeh loh das xiklyis cicont nghuot, ge. 34 Nyang taiq zis gas, Petru, ngos nvng lyis taiq bah, khvnyens gyoq ma tuon shih lyis nvng, ngos lyis ma seq, ge somh lhain he tyamp das, ge. 35 Nyang nyamoq lyis doms taiq zis gas, Ngos namoq lyis ngwis thung, bvtmuh yahge thyvkoq ma bos bos nhang kat lyis dvja ja vchah goh lah, ge. Nyamoq gas, Cha eq ma chah, ge. 36 Nyang taiq zis gas, Gvshih gas ngwis thung yoh soeu ka yoeus chi aq, bvtmuh eq houyah dvyhangteh wons aq, moengsa ma yoh soeu ka dyi ungh las wis chi aq. 37 Ngos namoq lyis taiq bah, O mha dah dang gas ngos mas nyuk los chah. Houka, Nyang lyis gas lyi lhyweq bang mas bos suon kat goeus; jyoengh ngah cho lhaih toh zis gas nyuk los, ge. 38 Nyamoq taiq zis gas, Yoeuh aq, moengsa aiq chamh joq, ge. Nyang gas, Hauh zis luk goeus, ge. 39 Hauh thang lhyi nyang gas, vjangh gyangh doq dah Tsanlun boms mas doq loh. Nyah changlo jens eq nyah thang mha chank loh. 40 Joqyos mas jweh las nyang nyamoq lyis taiq zis gas, Shiwu yvmas ma wvng loh das xiklyis shvmanh dung nyeis geh, ge lho lha, 41 nyamoq nyeis masyah luk dvlom doeuh ko loh las, phvluk zomhgyuis lho lha shvmanh dung zis gas: 42 Uwus eh, nvng bauh lyis gas, haih kom ngah jyank masyah yoeus tyamp dyei aq, nghuot laus eq ngah ehnyet ma nghuot, nah ehnyet dvnghuot bas jungh, ge. 43 Loeuswons soeu dvyuk maukhung mhayah thuq los las nyang lyis yomdyei nyeis. 44 Nyah ehnyet loh thank nyung daus zis yah dvgeh yomkat las shvmanh dung nyeis lyis, nyah gywesjeis eq nyeisjvng mas suih zoq gyoh teh gyoh nyeis. 45 Shvmanh dung masyah toq las nyah changlo jens jyank pheh loh lyis, nyamoq gas nhaiqkuk ehnyet yah yhet joq zis lyis loh nyvng. 46 Nyang nyamoq lyis taiq zis gas, Namoq chamus yhet joq goh lah? Shiwu yvmas ma bos loh das xiklyis toq las shvmanh dung nyeis geh, ge. 47 Housoeh taiq nyeis shih lyis, yoeuh aq, moqjens yah dvgeh, dvci aiq yuk mas dvyuk nghuot dah Yudas ge soeu ka, nyamoq xik mas loh las, Yesu lyis bvlot tanh das xiklyis nyah jyank mas ni loh. 48 Yesu nyang lyis taiq zis gas, Yudas eh, nvng gas cangsoeu Lo lyis bvlot tanh zis yah phanhlyen nyeis vnghuot lah, ge. 49 Yesu yah dvgeh nyeis bang gas, bweh los das cho lhyi yoeuh seq las nyang lyis taiq zis gas, Yhensain eh, ngamoq moengsa yah vzan das lah, ge. 50 Dvyuk gas Phudyei Zainsmuh jyeidwis dah loqyos no zan thyet dyei. 51 Yesu phuk taiq zis gas, No geh, ge hauh no lyis nyang tanh zis yah doms gis nhang. 52 Yesu gas jweh los dah phudyei uhjyung jens, yhenmuh gomh zau jens yahge logis jens lyis taiq zis gas, Namoq gas khyanktau nyhik das teh, ngos lyis nyhik das xiklyis moengsa, dunghkuq chi lha los lhyeh? 53 Yhenmuh mas nyeih yau nyeih ngos namoq yah dvgeh nyeis uhlyis gas namoq ngos lyis ma nyhik, nghuot laus eq gvshih gas namoq dah shishenh nghuot joq zis yah dvyhangteh, mauchuot dwang dah yomsoq eq nghuot, ge. 54 Hauh dius jens gas Yesu lyis nyhik las Phudyei Zainsmuh dah yhen mha tsain shwih loh. Petru eq nyamoq yah we we masyah chank loh. 55 Ganthoq khau mha nyi khat las tsung toh yvmas Petru eq bos. 56 Housoeh nyikhyomp yvm mas tsung toh zis lyis jyeidwis nyelo dvyuk nyvng lyis, nyang lyis jeih jeih yoeuh las, Haih soeu eq Yesu yah dvgeh zis nghuot, ge. 57 Petru he lha taiq zis gas, Nyelo eh, nyang lyis ngos ma seq, ge. 58 Dvxa lhyi gohtoeu dvyuk eq Petru lyis nyvng las, Nvng eq haih bang mas zis nghuot ge lyis, Petru gas, Vbusbih eh, ngos ma nghuot, ge. 59 Dvshishenh ko doms nyangh thang lhyi, gohtoeu dvyuk taiq zis gas, Haih soeu eq jyoengh nyang, nyang yah dvgeh zis nghuot. Nyang Galile dius eq nghuot, ge. 60 Petru doms taiq zis gas, Vbusbih eh, nvng cha taiq zis ngos ma seq, ge. Housoeh taiq yah dvyih gyoq tuon los. 61 Hauh uhlyis Yhensain ka Petru lyis lhain yoeuh kat: Gyoq ma tuon shih lyis nvng ngos lyis somh lhain he tyamp das, ge dah Yhensain dang lyis Petru soh los yah dvyih, 62 Petru nghe pheh thuq las svsoh ngaus. 63 Yesu lyis nyhik toh bang gas, nyang lyis lyuk las tsain jwangh. 64 Nyah nyoq lyis nghop dyei las lyuk zis yah, nyang lyis taiq zis gas, nvng lyis lyuk zis hank nghuot lah? Lvpe pe aq, ge. 65 Gohtoeu dah loeusmus soqzo dang eq nyoshoq Yhensain lhyi sang gyuon shih. 66 Nyoq nyvng los lyis, dius jens dah logis jens, phudyei uhjyung jens, maussauh lhaih bang tsain huom lha, Yhensain lhyi hauh huom pheh shwih e lha taiq zis gas, 67 Nvng Khristu nghuot jyoeng lhyi ka ngamoq lyis taiq aq, ge. Yesu nyamoq lyis taiq zis gas, Ngos taiq lyis eq namoq jingh das zis ma nghuot. 68 Ngos nyeidang lyis eq namoq ma phuk taiq, ngos lyis kat kat das zis ma nghuot. 69 Gvshih masyah cangsoeu Lo gas Mangso Yomsoq dah loqyos shot pheh tsung das, ge. 70 Nyamoq dvnganhmoq gas, Housoeh lyis nvng Mangso dah Lo nyang nghuot lhyeh, ge tsain nyei. Nyang gas, Ngos hauh soeu nghuot ge namoq taiq nyeis, ge. 71 Housoeh hauh bang taiq zis gas, Yang gohtoeu chah kanghjyoeng chah shih lah? Yvnyang nyah nhuot masyah xauhgyo goeus, ge.
1 Housoeh somci moqmuh dvnganhmoq yah toq las, nyang lyis Pilat jyank mas shwih e. 2 Haih soeu ka dius jens lyis chowhang shwih whang lha, vsainnyang gas Khristu ge dah hwankti nghuot, ge Kesar lhyi khoengh ma kat noh, ge tung zis ngamoq nyvng, ge zau tsain kauq. 3 Pilat nyang lyis nyei zis gas, Nvng Yuda hwankti nghuot lhyeh, ge. Nyang phuk taiq zis gas, Nvng taiq nyeis, ge. 4 Pilat gas, Ngos haih dius yuk mas chah yobos eq ma nyvng, ge phudyei uhjyung jens yahge moqjens lyis taiq. 5 Nghuot laus eq hauh bang zes kaiq las taiq zis gas, Haih dius yuk gas Galile mau masyah xi lha Yuda mau khyiq khanghmuh, haih joqyos mas jweh shoq jyauh las shwih hoeu, ge. 6 Pilat haih zis xauhgyo yah dvyih, Haih dius yuk gas Galile dius nghuot lhyeh, ge nyei. 7 Hwankti Herod guon dah yvmas soeu nghuot zis seq yah dvyih, nyang lyis hauh hwankti jyank mas shwih kat nhang. Hauh shvhoeu lhyi Herod eq Yerusalem mas nyeis. 8 Herod gas Yesu lyis nyvng lyis svsoh gaus: khasoeh ge lyis nyah cho xauhgyo yvmvyah nyang lyis nyvng mes zis nyangh goeus. Chixoeuq dah vlho dvkoeuq koeuq lyis xauh nyvng das, ge nghamhloms nyeis. 9 Herod gas nyang lyis dang nyoshoq nyei laus eq, nyang gas cha eq ma phuk taiq. 10 Phudyei uhjyung jens yahge maussauh lhaih bang gas toq las, nyang lyis yobos khoek khoek taiq huon. 11 Herod gas nyah jesphung yah dvgeh Yhensain lhyi jwangh nyhap zis yah nyang lyis kyi kyi bvng dah dyi gvmhuot las Pilat jyank mas doms shwih dyei kat. 12 Hauh nyenhyo Herod yahge Pilat gas buisnoms bweh los: xikpheh gas nyang changh nyang jes dvnghuot. 13 Pilat gas Phudyei uhjyung jens yahge zauguon jens, dius jens lyis khi tsainh las taiq zis gas, 14 Haih soeu ka dius jens lyis chowhang shwih whang soeu teh namoq ngah jyank mas shwih los las, yoeuh aq, namoq nyang dah xikkhonh mas ngos nyang lyis nyei yoeuh goeus. Nghuot laus eq, namoq nyang lyis yobos huon zis yah dvyhangteh, ngos nyang mas yobos ma nyvng. 15 Ngos namoq lyis Herod jyank mas eq nhang kat goeus: Herod eq yobos ma nyvng. Yoeuh aq, haih soeu ka shei mon dah yobos cha eq ma kuot toh. 16 Housoeh yvmvyah ngos haih soeu lhyi lyuk las kat kat das, ge. 17 (Khasoeh ge lyis, hauh pwe mha thung lungh bang dvyuk yuk lyis ma lhuiq kat ma gis nghuot.) 18 Somci moqmuh gas, Hauh soeu lhyi toh las nyamoq lyis Baraba lhuiq kat dyei aq, ge dvyih dvyot tsain kaiq sang. 19 (Baraba gas wugungs lyis jausxo, coeuh kang nhang dah yobos, dius sat dah yobos gvng mas thung gyoh soeu nghuot.) 20 Pilat gas Yesu lyis lhuiq kat mes las dvlhain doms taiq. 21 Nyamoq kaiq zis gas, Nyang lyis tapzains mas taplhangh aq, taplhangh aq, tsain ge. 22 Pilat gas, Hauh soeu ka cha cu lah? Ngos nyah jyank mas shei das yobos dvkoeuq eq ma nyvng, ge somh vlhain jweh shoq taiq. Housoeh las ngos nyang lyis lyuk las kat kat das, ge. 23 Dius jens gas hauh soeu lhyi tapzains mas taplhangh tyamp das xiklyis yomkat tsain kaiq nyeis las, hauh bang thwe yahge phudyei uhjyung jens dah thwe kaiq ung tyamp. 24 Pilat eq nyamoq dung zis yah dvyhangteh bweh shoq dang thang thyet dyei. 25 Coeuh kang nhang dah zis yahge dius sat yobos gvng mas thung lhunk toh soeu lhyi nyamoq o zis yah dvyhangteh lhuiq las, Yesu lyis gas nyamoq o khyvlyis kyauh tyamp. 26 Yhensain lhyi shwih thuq loh dah uhlyis, Kureni mhanhdyvp wukhau mhayah los langh dah Simon lyis nyvng lyis, nyhik las Yesu thang mha tapzains bos wuq nhang. 27 Yesu thang mha chank loh dah dius somci moqmuh mas, Yhensain gvng mas ngausdyeis ngausnhvp mus bang vmesbih jens dvyhamh bos. 28 Hauh bang lyis Yesu lhain yoeuh las taiq zis gas, Yerusalem lonyi jens eh, namoq ngah nyhenshang vngaus goh, namoq nyang xiklyis yahge namoq dah lo jens xiklyis ngaus geh. 29 Yoeuh aq, dius thonh vmesbih gas ngelhoq: lo ma wons ku dah ung yahge vnoeuh ma jyop ku dah nauh gas phauhdap ge taiq los dah buisnyeis jweh los das. 30 Hauh uhlyis nyamoq gas boms lyis, Ngamoq thoq mas jingh gyoh nhiq aq, jing jens eh, ngamoq lyis nghop toh dyei aq, ge khi das. 31 Khasoeh ge lyis vnyaus zains lyis housoeh kuot lyis, vkyuk zains gas khasoeh bweh das lah, ge. 32 Yhensain yah dvgeh khyanktau aiq yuk lyis eq sat das xiklyis shwih thuq loh. 33 Uhkhangh ge dah joqyos mas jweh lyis, tapzains mas taplhangh las, khyanktau aiq yuk lyis eq nyah loqwi loqyos dvshot dvyuk taplhangh toh. 34 Housoeh las Yesu taiq zis gas, Uwus eh, nyamoq kuot dah zis nyamoq ma seq yvmvyah nyamoq lyis khyuot dyei aq, ge. Nyah dyi lyis eq nyamoq doeugoh las gvm yoeus. 35 Dius jens eq houmha tsain yoeuh yap joq. Houmha dah zau jens Yesu lyis jwangh zis gas, Nyang gohyhamh lyis daq khyuot yoeus. Mangso khyen yoeus dah Khristu nghuot lyis gas nyah gungs nyang khyuot yoeus bas jungh, ge. 36 Jeslo jens los las nyang lyis shihjyen jeis dyei uhlyis yah jwangh zis gas, 37 Nvng Yuda Hwankti nghuot jyoeng lhyi, nvnyang gungs nvnyang khyuot yoeus zo aq, ge. 38 Nyah vtoeu mha maussauh lhaih toh zis gas, Haih soeu ka YUDA HWANKTI nghuot, ge Heleni, Latin yahge Hebre nyingh pheh yah tsain lhaih toh. 39 Tapzains mas lhangh toh dah khyanktau dvyuk eq, Nvng Khristu nghuot lyis gas nah gungs lyis nvnyang yahge ngah aiq yuk lyis eq khyuot yoeus aq, ge ma phauh ma danh sang. 40 Gohtoeu dvyuk gas nyah dyenschangh phoq lyis nyho lha taiq zis gas, Nvng eq joeng zis heinyhoq xauh nyeis goeus lyis eq Mangso lhyi ma gyuk lhyeh? 41 Yah aiq yuk gas vsainnyang kuot dah yobos gvng mas mon yih khyvlyis xauh kham lha, haih soeu ka cha ma cu, ge. 42 Nyang Yesu lyis taiq zis gas, Yhensain eh, nah munghdan mas jweh lyis, ngos lyis soh dyei aq, ge. 43 Yesu nyang lyis taiq zis gas, Ngos nvng lyis jyoengh taiq bah, khvnyhik nyang nvng ngos yah dvgeh Pharadisu mas nyeis das, ge. 44 Hauh shishenh gas dvci aiq shishenh ko nghuot las, somh shishenh jweh shoq dvmau gonh mau chuot joq. 45 Buis eq soeng soeng noq las, yhenmuh khau mha gos misseh eq vgungs masyah juiq tyamp. 46 Yesu thwe zainsmuh yah taiq zis gas, Uwus eh, ngah dyos lyis nah loq khau mha kyauh goeus, ge nyang kang gyoh. 47 Hauh cho lhyi jes dvxo guon zau nyvng lyis, Haih soeu ka ehnyet dan soeu gyingh nghuot, ge Mangso lhyi chungh nyeis. 48 Hauh cho lhyi los jweh yoeuh bang gas heisoeh teh yvlyis nyvng las sainhkhonh loq bat las tauh loh. 49 Galile mau masyah Yhensain thang mha chank los dah vmesbih jens yahge nyang yah seq goh bang eq we masyah tsain yap las hau dvnganh yvlyis yoeuh nyeis. 50 Yoeuh aq, nhaiqbos zau Yosep ge soeu nyang gas gis las dan soeu dvyuk nghuot. 51 Nyang gas, Arimathia mas dah Yuda dius nghuot. Nyang gas Mangso munghdan lyis langh nyeis dah nhaiqbos soeu nghuot las nyamoq xam lha kuot yvmas xam ma bos xonh soeu nghuot. 52 Nyang gas Pilat jyank mas wvng las Yesu dah gungs lyis sang yoeus. 53 Gungs lyis khyoq las jeimuh mis yah lyet lho lha hank eq ma nyhop ku shih dah lop mas e kat toh. 54 Hauh nyeih gas Yuda jens dah sont buisnyeis nghuot zis yahge Yuda No Buisnyeis eq ni los goeus. 55 Galile mau masyah, nyang yah dvgeh chank los dah vmesbih jens eq lop mas nyah mvng toh dah joqyos lyis yoeuh das xiklyis tsain los. 56 Hauh thang lhyi nyamoq doms los las, xangh coeu yahge nvm pyo zis tsain sont toh. Tyingtoh dang yah dvyhangteh Yuda No Buisnyeis lyis no nyeis.
1 Dvdaus dah cangxeih vnyeih, nvpsangh noq yah hau vmesbih jens gas, gohtoeu vmesbih jens yah dvgeh nyamoq sont toh dah xangh coeu chi lha lop pheh tsain e loh. 2 Jweh lyis lop mas dah lukzains toeu phanh toh zis nyvng las, 3 lop mas wvng loh lyis eq Yhensain Yesu dah mvng lyis ma tsain nyvng. 4 Housoeh svsoh tsain mauh nyeis lyis, yoeuh aq, bvng dah dyi wuot dah dius aiq yuk, nyamoq vyvm mas yap joq. 5 Hauh vmesbih jens gyuk yos zoh lyis yah nyeisjvng mas tsain gop joq lyis, hauh aiq yuk nyamoq lyis taiq zis gas, Dwis nyeis soeu lhyi shei bang mas chamus xo nyeis goh lah? Nyang heimha ma nyeis lo, dwis toq loh goeus. 6 Galile mas nyeis shih yoq lyis nyang namoq lyis khasoeh taiq toh zis lyis soh geh. 7 Cangsoeu Lo gas yaunos dap bang dah loq mas kyauh tyamp zis xauh las, tapzains mas taplhangh tyamp zis xauh thang lhyi somh vnyeih lyis dwis toq das, ge taiq toh, ge. 8 Housoeh nyamoq gas nyang taiq dang lyis tsain soh. 9 Lop masyah doms loh las hauh cho dvnganh, dvci dvyuk moq yahge gohtoeu dah bang lyis tsain taiq kyoh. 10 Lvgyo jens lyis hauh loeuskyoh bang gas, Magdala Mari, Yaku ungwes Mari, Yoana yahge gohtoeu vmesbih jens tsain nghuot. 11 Nyamoq taiq dang gas lvdyoq mvnyei taiq teh dvnghuot las ma tsain jingh. 12 Nghuot laus eq Petru gas toq las lop pheh wuih e. Lop mas jweh las gop yoeuh lyis lyet misseh dvjoq lo zis nyvng yvmvyah mauh las nyah yhen pheh tauh loh. 13 Hauh nyeihyo nyang, Yerusalem masyah nyhet main ko we dah Ema-u wukhau pheh dius aiq yuk loh nyeis. 14 Hauh nhaiqtang eq hau bweh lai loh dah cho lhyi taiq goh loh. 15 Housoeh taiq goh nyeis lyis Yesu nyang nvmtanh jweh thuq los las, nyamoq dvgeh loh. 16 Nghuot laus eq nyah aiq yuk gas Yesu nghuot zis ma seq das xiklyis nyoq hwah nhang. 17 Nyang nyah aiq yuk lyis taiq zis gas, Nah aiq yuk gyung suh uhjyangh chah bvhwa lhah goh las nhaiqngis goh lah, ge. 18 Khleopa ge soeu nyang lyis phuk taiq zis gas, Nvng gas Yerusalem mas dah boenghwus nghuot las, khvlyens bweh dah cho lhyi nvng kyingh ma seq dvmus lhyeh, ge. 19 Nyang nyei zis gas, chah cho gah, ge. Nyah aiq yuk taiq zis gas, Nazaret wukhau mha dah Yesu cho nghuot. Nyang gas lvpe nghuot las, Mangso yahge dius xikkhonh mas kuot dah muh yahge taiq dang mas yomsoq bos soeu nghuot. 20 Hauh soeu lhyi phudyei uhjyung jens yahge ngamoq dah guon bang yah sat das xiklyis kyauh tyamp las, tapzains mas tsain taplhangh tyamp. 21 Nyang gas Israel dius nyau lyis khyuot yoeus das soeu nghuot, oen ngamoq nghamhloms. Hauh thoq lyis haih cho bweh zis gvshih somh nyeih bos goeus. 22 Ngamoq mas dah vmesbih dvyhamh nvpsangh yah e lha, 23 Nyah mvng ma nyvng las tauh los lyis, Nyang gas dwis nyeis, ge loeuswons bang yah nyvng xoeuq dah cho los tsain taiq kyoh las nyamoq mauh nyeis. 24 Housoeh las ngamoq yah nyeis bang dvyhamh lop mas e yoeuh lyis eq, hauh vmesbih jens taiq teh nyvng nghuot laus eq nyamoq, nyang lyis ma nyvng, ge taiq ge, ge. 25 Nyang nyah aiq yuk lyis taiq zis gas, Lvpe jens dah dang dvnganh yvlyis yoh lomsjingh das joeui ma bos, nhaiqlom than bang eh, 26 Khristu gas housoeh teh shanghsenh kham lha nyah phunk mas yoh wvng das ma nghuot lhyeh, ge lho lha, 27 Moshe masyah xi lha lvpe jens dvnganh dah dang mas, nyang yah sen lha lhaih toh dang lyis nyang nyah aiq yuk lyis phui kyoh. 28 Nyah aiq yuk loh nyeis dah wukhau nvm mas jweh lyis, nyang lai loh das teh doeus las, 29 nyah aiq yuk gas nyang lyis, Ngah aiq yuk yah dvgeh wukhau mha thoeng goh: buis wvng goeus, mau eq chuot goeus, ge nyang lyis khyoeuq. Housoeh las thoeng das xiklyis nyah aiq yuk yah loh. 30 Womjus mas nyamoq yah dvgeh tsung toh uhlyis, ohlhyoq lyis yoeus las shvmanh thang lhyi khyiq las nyah aiq yuk lyis dyei. 31 Hauh uhlyis nyah aiq yuk nyoq bangh los las, nyang Yesu nghuot zis lyis tsain seq. Housoeh las nyang gas nyah aiq yuk jyank masyah dyuk loh. 32 Nyah aiq yuk dvyuk yah dvyuk taiq goh zis gas, Nyang cho mha yah aiq yuk yah dvgeh taiq goh los las, lhaihtoh dang vjyuk phant uhlyis, yah aiq yuk dah nhaiqlom nyi soeh ngeh vnghuot lah, ge. 33 Nyah aiq yuk gas hauh shishenh lyis nyang, Yerusalem wus pheh tauh loh las dvci dvyuk moq gas gohyhamh bang yah dvgeh nyeis zis lyis loh nyvng. 34 Huom nyeis bang eq, Yhensain ka jyoengh dwis toq goeus, Simon dah nyoq mas eq nyvng xoeuq, ge taiq. 35 Nyah aiq yuk eq cho mha bweh zis yahge ohlhyoq khyiq yvmas, nyang nghuot cho yoh seq cho lhyi tsain taiq kyoh. 36 Housoeh tsain taiq goh nyeis lyis, nyamoq dah vgungs mas Yesu yap las nyamoq lyis taiq zis gas, Namoq nyenstap nyeis bas jungh, ge. 37 Nghuot laus eq changlo jens gas sidyos lyis nyvng, ge nghamh las gyuk nyeis. 38 Nyang nyamoq lyis taiq zis gas, Chamus chiq nyeis goh lah? Chamus ehnyet khamkhvv goh lah? 39 Ngah loq ngah khyei lhyi yoeuh geh, ngos lyis zwi yoeuh geh, ngos gas gungs gyingh nyang nghuot. Sidyos gas ngos lyis nyvng teh shohyau shohkhyiq ma bos, ge. 40 Haih zis taiq lho lha, nyang nyamoq lyis nyah loq yahge nyah khyei chixoeuq. 41 Hauh bang gaus las ma yoh jingh shih, dvmauh nyeis shih lyis, nyang nyamoq lyis taiq zis gas, Namoq heimha zonoms dvja ja vyoh lah, ge. 42 Nyamoq gas nyang lyis kank dah oengdoq dvchink yahge dyoyhei dvtap dyei lyis, 43 Yhensain ka yoeus las nyamoq xikkhonh mas zo. 44 Nyang nyamoq lyis taiq zis gas, Moshe dah Lyi mas eq, lvpe jens dah maussauh mas yahge Chungh Dang maussauh mas ngos lyis toeuq las lhaih ya lhaih toh dang nyuk los chah ngos namoq yah dvgeh nyeis khoq yoq lyis taiq dah dang gas, haih cho nyang nghuot. 45 Housoeh las lhaihtoh dang seqgyo das xiklyis nyamoq dah seqgyo cho lhyi phank dyei. 46 Nyang taiq zis gas, Lhaihtoh dang heisoeh ge: Khristu gas shanghsenh zis xauh las somh vnyeih lyis shei masyah dwis toq chah: 47 Yerusalem masyah xi lha, dius nyau khanghmuh lyis yaunos yoh khyuot dyei dah nhaiqlom thaiq cho lhyi nyah nyings mas yoh taiq kyoh das. 48 Namoq eq haih cho dvnganh dah kanghjyoeng tsain nghuot. 49 Yoeuh aq, ngah Uwus dah dangthoengh joq zis yah dvyhangteh, ngos namoq lyis nhang kat dyei das. Housoeh las namoq gas nyhang mha dah yomsoq ma xauh yoeus dvchank, Yerusalem mas nyeis shih geh, ge. 50 Hauh thang lhyi nyamoq lyis Bethani jweh shoq shwih loh las, nyah loq toeu lha nyamoq lyis shvmanh dyei. 51 Housoeh shvmanh dyei nyeis uhlyis, nyang gas changlo jens yah gang las maukhung mha toqh yoeus zis xauh goeus. 52 Housoeh las nyamoq gas nyang lyis paiq las svsoh gausyis zis yah Yerusalem wus pheh tsain tauh loh. 53 Housoeh Mangso lhyi chunghtoq las chungh zis yah Yhenmuh mas tsain nyeis nyeis. Amen.
1 Cangxeih lyis Dang bos: hauh Dang gas Mangso yah nghuot las Dang gas Mangso nghuot. 2 Nyang gas cangxeih lyis yah Mangso yah nghuot. 3 Vyhang dvnganh zis lyis nyang yah kuot toh. Kuot toh yvmas, nyang ma bos bos kuot zis dvkoeuq eq ma bos. 4 Nyang mas kang bos, hauh kang ka dius jens dah bvng zis nghuot. 5 Hau bvng zis gas chuot yvlyis pank dyei; chuot zis gas bvng zis lyis ma duot. 6 Mangso jyank masyah nhang kat dah dius dvyuk bos: nyah nyings gas Yohan nghuot. 7 Kanghjyoeng kat das nyhenshang nyang los zis gas bvng zis yah sen lha nyang kanghjyoeng kat lyis, nyang masyah dius dvnganhmoq yoh lomsjingh bas jungh ge zis nghuot. 8 Nyang gas hauh bvng zis ma nghuot, bvng zis lyis kanghjyoeng kat das xiklyis dvlos. 9 Hau jyoeng dah bvng zis gas mungkvn mas los nyeis dah dius yuk khanghmuh lyis pank dyei. 10 Hauh soeu ka haih mungkvn mas nyeis khoq: haih mungkvn lyis eq nyang yah kuot toh goeus; nghuot laus eq mungkvn gas nyang lyis ma seq kat. 11 Nyang gas nyah vnyau jyank mas jweh nyeis laus eq, nyah vnyau gas nyang lyis ma tsain lhom yoeus. 12 Nghuot laus eq nyang lyis lhom ya lhom yoeus bang ge, nyah nyings lyis lomsjingh bang lyis Mangso dah lo jens duot das dah yomsoq dyei goeus. 13 Hauh bang lyis khoeu kat toh zis gas, suih masyah eq ma nghuot, gungsshoh ehnyet masyah eq ma nghuot, dius ehnyet khyvlyis eq ma nghuot, Mangso mhayah dvnghuot. 14 Dang gas suihshoh lyih duot las yah jyank mas nyeis ku. Yang nyvng dah nyah phunk gas Uwus dah Loteh phunk nghuot las, jyoeng zis yahge jyehjuh yah dyingh joq. 15 Yohan gas nyah cho lhyi kanghjyoeng kat las kaiq taiq zis gas, Ngah thang mha los soeu ka ngah xik lyis yah nhaiqdoeus zis xauh soeu nghuot, oen ngos taiq soeu ka haih soeu nghuot. Khasoeh ge lyis nyang gas ngah xik lyis yah nyeis goeus, ge. 16 Yang dvnganhmoq gas dyingh joq dah nyah jyehjuh lyis dvsoenk thang lhyi dvsoenk xauh kham yoeus. 17 Khasoeh ge lyis, Lyi gas Moshe yah dyei khoq; nghuot laus eq jyehjuh yahge jyoeng cho ka, Yesu Khristu masyah los zis nghuot. 18 Mangso lhyi hank khanhamp eq ma nyvng yoeuh ku: nghuot laus eq Uwus sainhkhonh mas nyeis dah Loteh gas nyah cho lhyi taiq hoeuh goeus. 19 Yerusalem mas dah Yuda jens gas phudyei bang yahge Lewi jens lyis Yohan jyank mas nhang lha, Nvng hank nghuot lah, ge nyei uhlyis Yohan kanghjyoeng kat las, 20 Nyang rhen cho ka, Ngos gas Khristu ma nghuot, ge. 21 Hauh bang nyang lyis nyei zis gas, Housoeh lyis nvng Eliya nghuot lhyeh, ge lyis, Ma nghuot, ge. Lvpe nghuot lhyeh, ge lyis eq, Ma nghuot, ge. 22 Hauh bang eq, Nvng hank nghuot lah? Ngamoq lyis nhang kat bang lyis doms taiq das dang bos shoq, nah gungs lyis nvnyang khasoeh oen zis taiq kyoh aq ge lyis, 23 Nyang taiq zis gas, Ngos gas lvpe Esaia taiq toh zis yah dvyhangteh, Yhensain dah cho lhyi dan nhang geh ge mhanhdyvp mas dvyuk kaiq nyeis dah thwe nghuot. 24 Pharishe jens gas nyamoq mas bang lyis nhang kat las, 25 Nyamoq nyang lyis taiq zis gas, Nvng gas Khristu eq ma nghuot, Eliya eq ma nghuot, lvpe eq ma nghuot lyis gas chamus jeisnyhop dyei lah, ge. 26 Yohan nyamoq lyis phuk taiq zis gas, Ngos gas jeis mas jeisnyhop dyei. Nghuot laus eq namoq vgungs mas yap joq, namoq ma seq soeu ka, 27 ngah thang mha dvlos laus eq ngah thoq lyis zes las, ngos gas hauh soeu dah thyvkoq twih phui dyei das zis yangh ma mon, ge. 28 Hauh cho bweh dah joqyos gas, Yodan lvng thyitvp, Bethani wukhau, Yohan jeisnyhop dyei dah yvmas nghuot. 29 Hauh thang lhyi nyeihyo Yohan gas, Yesu nyah jyank mas los nyeis yvlyis nyvng las taiq zis gas, Yoeuh aq, haih mungkvn mas yaunos lyis wons tyamp das, Mangso dah Yvnglo! 30 Ngah thang mha los soeu ka ngah xik lyis yah nhaiqdoeus zis xauh soeu nghuot oen ngos taiq toh soeu ka haih soeu nghuot. Khasoeh ge lyis nyang gas ngah xik lyis yah nyeis goeus. 31 Ngos gas nyang lyis ma seq, nghuot laus eq ngos jweh los las jeisnyhop dyei zis gas, nyang lyis Israel xikkhonh mas chixoeuq das zis nghuot. 32 Yohan kanghjyoeng kat zis gas, Dyos gas maukhung mhayah khotjyauh teh gyoh los las, hauh soeu thoq mas lyih no zis lyis ngos nyvng goeus. 33 Haih soeu hank nghuot zis lyis ngos ma seq, nghuot laus eq, jeis mas jeisnyhop dyei das xiklyis ngos lyis nhang kat soeu nyang taiq zis gas, Dyos dvyuk dah thoq mas lyih gyoh no joq yvlyis nvng nyvng das, hauh soeu ka Gyingshang Dyos mas jeisnyhop dyei soeu nyang nghuot, ge. 34 Ngos nyvng goeus las, Haih soeu ka Mangso dah Lo nghuot oen kanghjyoeng kat, ge. 35 Hauh thang lhyi nyeihyo Yohan gas nyah changlo aiq yuk yah dvgeh yap joq lyis, 36 Yesu los nyeis zis lyis yoeuh las nyang taiq zis gas, Yoeuh aq, Mangso dah Yvnglo, ge. 37 Hauh dang lyis hauh changlo aiq yuk xauhgyo lyis, Yesu thang mha tsain chank loh. 38 Yesu lhain yoeuh kat lyis, hauh dius aiq yuk chank los zis nyvng las, Cha xo goh lah, ge nyei. Nyah aiq yuk gas, Svra eh, nvng khamha nyeis lah, ge nyei. 39 Nyang nyah aiq yuk lyis taiq zis gas, Los yoeuh geh nyvng das, ge. Houka nyei shishenh ko lhyi nghuot. Nyang khamha nyeis zis loh nyvng las, hauh nyeihyo nyang yah dvgeh nyeis. 40 Yohan taiq dang xauhgyo las, nyah thang chank dah dius aiq yuk mas dvyuk gas Simon Petru dah vnoeuh Andre nghuot. 41 Hauh soeu ka nyah vmang Simon lyis shih xauhgoh las nyang lyis taiq zis gas, Ngamoq Meshia lyis nyvng goeus, ge. (Meshia vjyuk gas Khristu nghuot.) 42 Nyang lyis nyah jyank mas shwih e. Yesu hauh soeu lhyi yoeuh las taiq zis gas, Nvng gas Yona dah lo Simon nghuot. Nvng lyis gas Kepha ge lui das, ge. (Hauh vjyuk gas lukzains, ge.) 43 Hauh thang lhyi nyeihyo Yesu gas Galile mau pheh loh uhlyis nyang Philip lyis nyvng lho lhyi, Ngah thang mha chank los aq, ge taiq. 44 Philip gas Andre yahge Petru dah wukhau, Betsaida mas soeu nghuot. 45 Philip gas Nathaniel yah xauhgoh las nyang lyis taiq zis gas, Moshe dah lyi yahge lvpe jens lhaih toh, Yosep dah lo Nazaret Yesu lyis ngamoq nyvng goeus, ge. 46 Nathaniel nyang lyis taiq zis gas, Nazaret masyah gis zis dvja ja yoh thuq los lhyeh, ge. Philip gas, Los yoeuh aq, ge. 47 Yesu gas Nathaniel los nyeis zis lyis nyvng lyis, nyang lyis toeuq las taiq zis gas, Yoeuh aq Israel gyingh soeu dvyuk nghuot las nyang mas ung lhung zis ma bos, ge. 48 Nathaniel gas nyang lyis, Nvng ngos lyis khalhye yah seq lah, ge nyei. Yesu doms taiq zis gas, Philip nvng lyis ma lui shih shvhoeu lhyi nvng maiphang zains khyei mha nyeis zis lyis ngos nyvng, ge. 49 Nathaniel nyang lyis phuk taiq zis gas, Svra eh, nvng gas Mangso dah Lo nghuot; Israel dah Hwankti nghuot, ge. 50 Yesu nyang lyis taiq zis gas, ngos nvng lyis maiphang zains khyei mha nyvng oen yvmvyah lomsjingh lhyeh? Haih thoq lyis zes kuh zis eq nvng nyvng das, ge. 51 Ngos namoq lyis jyoengh taiq bah, vkhoeuq maukhung khomh phank los las Mangso dah loeuswons bang gas cangsoeu Lo thoq mas doq gyoh kuot nyeis zis lyis namoq nyvng das, ge taiq.
1 Hauh thang lhyi somh vnyeih lyis Galile mau Kana wukhau mha nyihwank pwe bos. Yesu dah ungwes eq houmha nyeis. 2 Yesu yahge nyah changlo jens lyis eq hauh nyihwank pwe mha tsain khi. 3 Zvbiq thank tyamp las Yesu ungwes gas nyang lyis, Nyamoq zvbiq ma bos lo ge taiq kyoh. 4 Yesu nyang lyis taiq zis gas, Vmesbih eh, nvng ngos lyis chamus los taiq lah? Ngah shishenh ma jweh shih, ge. 5 Yesu dah ungwes eq, Nyang kuot nhang zis dvnganh yah kuot geh, ge jyeidwis jens lyis taiq toh. 6 Yuda thungh yah dvyhangteh cheihshang das xiklyis aiq somhci galan wvng dah luk yammuh khyuk lom joq. 7 Yesu nyamoq lyis taiq zis gas, Haih yammuh goeu mas jeis tyink geh, ge. Nyamoq eq yammuh mas jeis dyingh shoq tsain kham kat. 8 Nyang nyamoq lyis taiq zis gas, Gvshih pwe jangzoe lyis loh khoeuh dyei aq, ge zis yah dvyhangteh tsain kuot. 9 Pwe jangzoe gas hauh zvbiq jeis bweh nhang dah jeis lyis chaq yoeuh las, hauh jeis khoeuh los dah jyeidwis jens gas zvbiq jeis kha mhayah yoh zis seq laus eq pwe jangzoe gas ma seq yvmvyah, loloeu saiq lyis khi lha, 10 Yuk khanghmuh zvbiq jeis nghamh shih jo shoq gvm shuk thang lhyi zvbiq jeis phih dvgyangh dyei; nvng gas zvbiq jeis nghamh lyis gvshih jweh shoq tsomh toh, ge. 11 Yesu gas cangxeih vlhain dah vlho lhyi hai Galile, Kana mha Chixoeuq las, nyah phunk nyvng nhang lha, nyah changlo jens eq nyang lyis lomsjingh. 12 Hauh thang lhyi Yesu yahge nyah ungwes, nyah vnoeuh moq, nyah changlo jens yah dvgeh Kaperna-um wus pheh loh las houmha dvyoq dvnyeis. 13 Yuda jens dah Lhuiq Kat Pwe ni los nyeis goeus las, Yesu gas Yerusalem pheh doq loh. 14 Yesu gas yhenmuh mas noeu, yvng yahge khotjyauh ungh bang, ngwis thaiq zo bang tsung toh yvlyis nyvng lyis, 15 twih lvxuk kuot las, houmha ungh bang, noeu, yvng, khotjyauh dvnganh zis lyis yhenmuh masyah khat thuq tyamp; kihgus lyis eq toeu phanh tyamp. 16 Khotjyauh ungh bang lyis taiq zis gas, Haih zisyos lyis yoeus loh geh, ngah Uwus dah yhen lhyi soenghi yhen vtsain kuot nyeis goh, ge. 17 Yhensain dah yhen mha nhaiq kank wvng dah ehnyet gas ngos lyis zo tyamp das ge lhaih toh zis lyis hauh uhlyis changlo jens nghamh soh los. 18 Yuda jens nyang lyis phuk taiq zis gas, Heisoeh teh kuot zis gas, ngamoq lyis chah vlho chixoeuq lah, ge. 19 Yesu nyamoq lyis taiq zis gas, Haih yhenmuh lyis thyoq tyamp geh; ngos somh nyeih lyis doms toeu toq das, ge. 20 Yuda jens nyang lyis taiq zis gas, Haih yhenmuh lyis nyeici khyuk zvn tsuk zis lyis nvng gas somh nyeih lyis yoh toeu shap das lah, ge. 21 Nyang housoeh taiq zis gas, nyah gungs ge dah yhenmuh lyis toeuq las taiq zis nghuot. 22 Housoeh yvmvyah, shei yvmvyah dwis toq los thang lhyi, nyah changlo jens gas nyang taiq toh dang lyis doms soh las, lhaihtoh dang lyis eq, Yesu taiq dang lyis eq tsain lomsjingh. 23 Lhuiq Kat Pwe yoq lyis Yesu gas Yerusalem mas nyeis uhlyis nyang chixoeuq dah vlho lhyi tsain nyvng las, nyoshoq moq nyah nyings mas lomsjingh. 24 Nghuot laus eq Yesu gas nyamoq lyis ma loms: Khasoeh ge lyis nyang gas dius dvnganhmoq lyis seq toh. 25 Dius dah ehnyet khau mha bos zis lyis nyang seq yvmvyah, dius cho lhyi kanghjyoeng hank eq ma kat dyei noh.
1 Pharishe jens mas Nikodimu ge soeu Yuda jens lyis guon dah dius dvyuk nyeis. 2 Nyenh lyis Yesu jyank mas lyih las, Svra eh, nvng gas Mangso jyank masyah jweh lyih dah svra dvyuk nghuot yvlyis ngamoq seq. Khasoeh ge lyis Mangso nvng yah dvgeh ma nyeis nghuot lyis gas nvng chixoeuq dah vlho dius hank eq ma yoh kuot, ge. 3 Yesu nyang lyis phuk taiq zis gas, Ngos nvng lyis jyoengh taiq bah, hank laus eq dvlhain ma doms khoeu lhyi ka, nyang Mangso munghdan lyis ma yoh nyvng, ge. 4 Nikodimu nyang lyis taiq zis gas, Dius gas kuh thang lhyi khasoeh yoh doms khoeu das lah? Ungwes ung mas doms wvng las khoeu das lah, ge. 5 Yesu phuk taiq zis gas, Ngos nvng lyis jyoengh taiq bah, hank laus eq jeis yahge Gyingshang Dyos mas ma khoeu soeu ka, Mangso munghdan mas ma yoh wvng das. 6 Gungsshoh mas khoeu zis gas gungsshoh nghuot; Dyos masyah khoeu zis gas dyos nghuot. 7 Ngos taiq dah dang gvng mas vmauh: nvng dvlhain doms khoeu chah. 8 Lyeis gas nyang muot loh mes yvpheh muot loh las, lyeis thwe lhyi nvng xauhgyo laus eq, khapheh yah muot los las khapheh muot loh zis ma seq: Dyos masyah khoeu bang dvnganhmoq eq houyah dvyhangteh nghuot, ge. 9 Nikodimu phuk taiq zis gas, Haih cho khasoeh yoh bweh das lah, ge. 10 Yesu nyang lyis taiq zis gas, Nvng gas Israel vnyau dah svra dvyuk nghuot joq las haih zis yangh ma seq lhyeh? 11 Ngos nvng lyis jyoengh taiq zis gas, Ngamoq gas ngamoq seq dah vyhang lhyi taiq; ngamoq nyvng zis lyis kanghjyoeng kat, nghuot laus eq ngamoq dah kanghjyoeng lhyi namoq ma tsain lhom yoeus. 12 Ngos namoq lyis nyeisjvng yah sen zis taiq lyis namoq ma jingh zis, maukhung dah cho taiq lyis namoq khasoeh lomsjingh goh das lah? 13 Maukhung mhayah gyoh los dah cangsoeu Lo mas lai las gohyuk hank eq maukhung mha doq loh ku soeu ma bos. 14 Moshe ka mhanhdyvp mas lhangnoq lyis toeushap toh zis yah dvyhangteh, cangsoeu Lo gas toeushap toh zis xauh das. 15 Houka nyang lyis lomsjingh bang dvnganhmoq gas, dyoqbis zis ma xauh, vcaiq vto kang yoh das xiklyis nghuot. 16 Khasoeh ge lyis nyang lyis lomsjingh bang dvnganhmoq gas dyoqbis zis ma xauh, vcaiq vto kang yoh das xiklyis, Mangso ka nyah Loteh lyis dyei tyamp shoq mungkvn lyis jyetdap. 17 Khasoeh ge lyis Mangso ka nyah Lo lyis mungkvn mas nhang kat zis gas, mungkvn lyis soetuon das xiklyis ma nghuot, nyang masyah mungkvn lyis khyuot yoeus das xiklyis dvnghuot. 18 Nyang lyis lomsjingh soeu ka, soetuon zis ma xauh; ma lomsjingh soeu ka, Mangso dah Loteh nyings lyis ma lomsjingh yvmvyah, gvshih yangh soetuon zis xauh goeus. 19 Hauh soetuon zis gas, Bvng zis gas haih mungkvn mas wvng laus eq, dius jens gas nyamoq kuot zis ma gis yvmvyah, bvng zis lyis ngwis thoq lyis chuot zis lyis zes ngwis yvmvyah nghuot. 20 Ma gis zis kuot soeu ka bvng zis lyis hoeng lha, nyang kuot dah muhzoh lyis ma mes kyink yvmvyah bvng yvmas ma los. 21 Jyoeng zis kuot bang gas, nyang kuot dah muhzoh gas Mangso xikkhonh mas phi thoeuq zis lyis yoh chixoeuq das xiklyis bvng yvmas los, ge. 22 Hauh thang lhyi Yesu gas changlo jens yah dvgeh Yuda mau mas nyeis las, jeisnyhop dyei nyeis. 23 Yohan eq Salim nvm mas dah Enon mas jeis nyoshoq joq yvmvyah, jeisnyhop dyei nyeis. Dius nyoshoq jeisnyhop los kham. 24 Khasoeh ge lyis Yohan gas thung ma gyoh shih. 25 Yohan dah changlo jens gas Yuda jens yah cheihshang cho lhyi tsain taiq phyen-goh nyeis las, 26 nyamoq Yohan jyank mas lyih las nyang lyis taiq zis gas, Svra eh, yoeuh aq, Yodan lvng thyitvp pheh, nvng yah dvgeh nyeis ku lha nvng kanghjyoeng kat dyei soeu ka, nyang nyang jeisnyhop dyei nyeis las, dius dvnganhmoq nyah jyank jweh los, ge. 27 Yohan phuk taiq zis gas, Maukhung mhayah ma dyei lyis gas dius hank eq cha ma xauh lhom yoeus, ge. 28 Ngos gas Khristu ma nghuot, ngos gas nyah xik pheh nhang kat dah soeu dvnghuot oen ngos taiq dang lyis namoq nyang kanghjyoeng bos kat dyei goeus. 29 Nyi hwank pwe mha lonyi saiq lyis yoh soeu ka, loloeu saiq nghuot: dyenschangh phoq gas loloeu saiq vyvm mas yap las, hauh soeu dah dang thwe xauhgyo yvmvyah gaus nyeis. Housoeh ngos gaus zis gas ngah jyank mas nyuk los. 30 Nyang gas je los das, ngos gas yoms loh das. 31 Nyhang mhayah los soeu ka dvnganh thoq mas zes soeu nghuot: nyeisjvng masyah bweh los soeu ka nyeisjvng yah sen lha, nyeisjvng cho lhyi kyingh dvseq taiq. Maukhung mhayah jweh los soeu ka dvnganh dah vzainsmuh nghuot. 32 Nyoqjeih yah nyvng zis, no yah gyo zis dvnganh yvlyis kanghjyoeng kat nyeis. Nyang kanghjyoeng kat zis lyis hank eq ma lhom yoeus. 33 Nyah kanghjyoeng cho lhyi lhom yoeus soeu ka, Mangso ka jyoeng zis nghuot yvlyis kyihau tap zis nghuot. 34 Mangso nhang kat soeu ka, Mangso dah dang lyis taiq: Khasoeh ge lyis nyang gas Gyingshang Dyos lyis laiq dyei, toeuq dyei zis ma nghuot. 35 Uwus gas Lo lyis jyetdap las dvnganh zis lyis nyah loq khau mha dyei toh. 36 Lo lyis lomsjingh soeu ka vcaiq vto kang lhyi yoh: Lo lyis ma lomsjingh soeu ka kang dwis cho ma nyvng, Mangso dah nhaiqlom dyis zis gas hauh soeu thoq mas joq.
1 Yesu gas Yohan thoq lyis changlo jens zes yoh zis yahge, Yohan thoq lyis jeisnyhop zes yoh dyei yvlyis Pharishe jens xauhgyo zis lyis Yhensain seq. 2 (Yesu nyang jeisnyhop ma dyei laus eq nyah changlo jens kham dyei.) 3 Nyang gas Yuda mau masyah dyens toq las Galile pheh doms loh. 4 Housoeh las nyang gas Samari mau cho yah suh lai loh. 5 Nyang gas, Yakop gas nyah lo Yosep lyis dyei toh dah maunyeis chuq nvm mas joq, Sika ge dah Samari wugungs mas jweh loh. 6 Hauh yvmas Yakop dah jeisdwang joq. Yesu gas gyung suh nyung las jeisdwang nvm mas tsung toh. Hauh shishenh gas nyeihgungs ko nghuot. 7 Samari vmesbih dvyuk jeis kham das ge lyih nyeis: Yesu hauh vmesbih lyis taiq zis gas, jeis dvtsiq gvmshuk aq, ge. 8 (Nyah changlo jens gas zonoms wis das xiklyis wugungs pheh wvng loh.) 9 Hauh vmesbih nyang lyis taiq zis gas, Nvng Yuda vnyau nghuot las, ngos Samari jyank mas chamus shuk jeis sang, ge. Khasoeh ge lyis Yuda dius nyau gas Samari dius nyau yah ma zomh goh. 10 Yesu nyang lyis phuk taiq zis gas, Nvng Mangso dah shvmanh jyungshuk yahge ngos lyis jeis gvm shuk aq, ge taiq soeu hank nghuot zis lyis nvng toq seq nghuot lyis gas, nvng nyang lyis dung las, nyang gas nvng lyis kang dwis jeis dyei das, ge. 11 Vmesbih nyang lyis taiq zis gas, Yhensain eh, nah jyank mas jeis gaiq pungh ma joq, jeisdwang eq noq, kang dwis jeis khalhye yah yoh das lah? 12 Haih jeisdwang gas, ngamoq dah phauh thyeih ngamoq lyis dyei toh las, nyang yahge nyah lo jens eq shuk, nyah gaunyhauq lyis eq gvmshuk toh, nvng ngamoq dah phauh thyeih Yakop thoq lyis ma zes kuh ma nghuot lhyeh, ge. 13 Yesu nyang lyis phuk taiq zis gas, Haih jeisdwang mas jeis shuk bang hank laus eq jeis doms shet shih das. 14 Nghuot laus eq ngos gvmshuk dah jeis lyis shuk soeu ka, vcaiq vto ma shet lo das las, ngos dyei dah jeis gas nyah vkhau mha vcaiq vto kang yoh dyei dah jeisthuq dwang bweh das, ge. 15 Hauh vmesbih nyang lyis taiq zis gas, Yhensain eh, ngos jeis eq ma shet, heimha jeis eq ma lyih lang chah lo bas jungh, hauh jeis ngos lyis dyei aq, ge. 16 Yesu nyang lyis taiq zis gas, Nah yhensain phoq lyis heimha loh khi los aq, ge. 17 Hauh vmesbih phuk taiq zis gas, Ngos yhensain phoq ma bos, ge. Yesu nyang lyis taiq zis gas, Ngos yhensain phoq ma bos ge nvng taiq dang jus: 18 Khasoeh ge lyis nvng yhensain phoq oeng yuk yoh ku goeus; gvshih dah soeu ka nah yhensain phoq ma nghuot; haih cho mha nvng dang jyoeng taiq, ge. 19 Hauh vmesbih nyang lyis taiq zis gas, Yhensain eh, nvng Lvpe nghuot yvlyis ngos seq goeus. 20 Ngamoq dah phauh thyeih moq gas haih boms mas gyangh paiq; namoq taiq zis gas, Paiq chah joqyos gas Yerusalem mas kyingh dvnghuot, ge. 21 Yesu nyang lyis taiq zis gas, Vmesbih eh, ngos lyis lomsjingh aq, namoq gas haih boms mas eq, Yerusalem wus mas eq ma nghuot nghuot, Uwus lyis paiq das shishenh gas jweh los das. 22 Namoq gas namoq nyang ma seq yvlyis paiq. Ngamoq gas ngamoq nyang seq yvlyis paiq: Khasoeh ge lyis khyuot yoeus cho ka Yuda vnyau masyah nghuot. 23 Nghuot laus eq jyoeng khyvlyis paiq bang gas, Dyos mas eq, jyoeng yvmas eq Uwus lyis paiq das shishenh gas jweh los nyeis las, gvshih yangh nghuot joq. Uwus gas housoeh paiq bang lyis xo nyeis. 24 Mangso ka Dyos nghuot. Nyang lyis paiq bang gas, Dyos mas eq, jyoeng yvmas eq paiq chah, ge. 25 Hauh vmesbih nyang lyis taiq zis gas, Khristu ge dah Meshia jweh los das zis ngos seq. Hauh soeu jweh goeus ya, nyang yang lyis cho khat khanghmuh taiq shet das, ge. 26 Yesu nyang lyis taiq zis gas, Nvng yah jis goh nyeis soeu ngos gas hauh soeu nyang nghuot goeus, ge. 27 Hauh uhlyis nyah changlo jens tauh los las, vmesbih yah dang jis goh zis nyvng lyis tsain mauh. Nghuot laus eq, Nvng cha chah? Vmesbih yah dang chamus jis goh, ge hank eq ma nyei. 28 Vmesbih gas nyah jywang toh khoq lho lha, wugungs pheh tauh loh las dius jens lyis taiq zis gas, 29 Ngos cha kuot khoq zis dvnganh ngos lyis doms taiq kyoh soeu lhyi lyih yoeuh geh, hauh soeu ka Khristu vnghuot au, ge. 30 Nyamoq eq wus masyah thuq loh las nyah jyank mas tsain jweh e. 31 Hauh uhlyis changlo jens nyang lyis khyoeuq zis gas, Svra eh, wom zo aq, ge. 32 Nyang nyamoq lyis phuk taiq zis gas, Namoq ma seq dah zonoms ngos yoh, ge. 33 Housoeh yvmvyah changlo jens dvyuk yah dvyuk taiq goh zis gas, Nyang lyis dvyuk yuk zonoms dyei goeus lah, ge. 34 Yesu nyamoq lyis taiq zis gas, Ngos lyis nhang kat soeu o khyvlyis chank kuot das zis yahge, nyah muh tyeh zwi das zis gas ngah zonoms nghuot, ge. 35 Namoq gas lhamhmuh nyei khyvp nghuot thang lhyi guk yhomh das, ge ma nghuot lhyeh? Yoeuh aq, ngos namoq lyis taiq bah, nghank las yoeuh kat geh, yos mas guk nyhink joq goeus las jyo yhomh das xiklyis gvshih yangh nghuot joq. 36 Jyo yhomh soeu ka uhkung phauh yoh zis yah dvgeh vcaiq vto kang xiklyis jyo xauh yhomh yoeus las, jyo khyoq soeu yahge jyo yhomh soeu dvgeh yoh gausyis das. 37 Housoeh las, dvyuk khyoq las gohtoeu dvyuk yhomh goeus ge dah sangkhyangh gas jus. 38 Namoq yom ma kat toh yvmas jyo yhomh das zis ngos namoq lyis nhang kat: Gohyhamh yomkat goeus yvmas namoq lyis eq bos joq nhang. 39 Ngos kuot khoq dah cho dvnganh yah ngos lyis doms taiq kyoh dyei, ge dah hau vmesbih kanghjyoeng dang gvng mas, hauh wugungs mas dah Samari dius nyoshoq nyang lyis tsain lomsjingh. 40 Housoeh las hau Samari jens nyah jyank mas los las, Ngamoq yah dvgeh jenh nyeis goh, ge tsain dung yvmvyah, aiq nyeih nyeis khoq. 41 Nyah dang gvng mas nyoshoq moq lomsjingh los. 42 Hauh bang hauh vmesbih lyis taiq zis gas, Gvshih gas nvng taiq yvmvyah kyingh ngamoq lomsjingh zis ma nghuot lo, ngamoq nyang xauhgyo lho lha, Haih soeu ka haih mungkvn dah khyuot yoeus soeu Khristu nyang jyoengh nghuot zis lyis ngamoq nyang seq goeus, ge. 43 Aiq nyeih dah thang lhyi nyang gas Galile mau pheh thuq loh. 44 Khasoeh ge lyis lvpe ka, vsainnyang mau mas nyoqnho ngelang ma bos, ge Yesu nyang kanghjyoeng kat nyeis. 45 Galile mau mas jweh lyis, Galile bang gas pwe yoq lyis Yerusalem mas nyang kuot xoeuq dah muhzoh dvnganh zis lyis nyvng las nyang lyis tsain lhom yoeus. Khasoeh ge lyis, nyamoq eq hauh Lhuiq Kat Pwe mha bos. 46 Yesu gas, nyang jeis lyis zvbiq bweh nhang khoq dah joqyos, Galile mau, Kana wukhau mha doms los uhlyis, zau dvyuk dah yukgis lo gas Kaperna-um mha nos nyeis. 47 Yesu gas Yuda mau masyah Galile mau mas jweh nyeis zis lyis hauh zau phoq xauhgyo las nyah jyank mas e lha, shei bah ge goeus dah nyah lo lyis los jenh lhoq gis dyei aq, ge nyang lyis dung nyeis. 48 Yesu nyang lyis taiq zis gas, Namoq vlho yahge mauh loqmuh ma nyvng lyis gas ma lomsjingh, ge. 49 Hauh zau phoq nyang lyis taiq zis gas, Yhensain eh, ngah lo ma shei shih lyis jenh los aq, ge. 50 Yesu nyang lyis taiq zis gas, Loh aq, nah lo doeng los das, ge. Hauh soeu eq Yesu taiq dang lyis jingh las loh lo. 51 Nyang loh nyeis lyis, nyah jyeidwis jens nyang lyis lyih zes uhlyis yah taiq zis gas, Nah lo doeng los goeus, ge. 52 Housoeh las nos huiq dah shishenh nyei huq lyis, nyamoq gas, Nyinaq dvshishenh lyis nos huiq goeus, ge tsain taiq kyoh. 53 Hau nos huiq los dah shishenh gas, Nah lo doeng los das, ge Yesu nyang lyis taiq dah shishenh nyang nghuot zis lyis nyah uwus seq las, nyang yahge nyah yhenbang dvnganhmoq lomsjingh. 54 Haih vlho ka, Yesu Yuda mau masyah Galile mau mas jweh las chixoeuq khoq, aiq vlhain vlho nghuot.
1 Hauh thang lhyi Yuda jens dah pwe dvkoeuq bos las, Yesu gas Yerusalem pheh doq loh. 2 Hau Yerusalem mas, Yvng khomh nvm mas Hebre nyingh pheh yah, Bethzatha ge dah thomh dvkoeuq joq. Hauh thomh yvm mas thoenggus oeng koeuq bos. 3 Hauh vkhau mha nos bang, nyoqjet bang, khyei gyau bang, gungsjen shei teh dah nos bang moqjens zainsmuh gas jeis dwis los das yvlyis langh nyeis. 4 Khasoeh ge lyis loeuswons soeu dvyuk gyoh los las thomh lhoq dwis dah uhlyis hank laus eq cangxeih xauh wvng soeu ka, chah ja noslom laus eq gis los zis xauh. 5 Hauh yvmas somhci xet zvn gonh nos soeu dvyuk bos. 6 Yesu gas hau nos lhain toh soeu lhyi los nyvng las, nyo nyangh goeus yvlyis seq yvmvyah, hauh nos soeu lhyi, Nvng vgis mes lah, ge nyei. 7 Nos soeu phuk taiq zis gas, Yhensain eh, jeis dwis uhlyis ngos lyis thomh mas shwih wvng das dius ma yoh, ngos wvng loh nyeis lyis, ngah xik pheh dvyuk yuk wvng loh tyamp, ge. 8 Yesu nyang lyis taiq zis gas, Toq aq, nah yhetyos kui wuq las suh loh aq, ge. 9 Hauh nos soeu houjang gis los las, yhetyos kui wuq las suh loh. Hauh nyeih gas Yuda No Buisnyeis nghuot. 10 Housoeh las Yuda jens hau nos gis los soeu lhyi taiq zis gas, Khvnyhik Yuda No Buisnyeis nghuot, nah yhetyos ma gis wuq, ge. 11 Nyang nyamoq lyis phuk taiq zis gas, Ngos lyis gis los nhang soeu yah, Nah yhetyos yoeus las suh loh aq, ge ngos lyis taiq, ge. 12 Nyamoq nyang lyis nyei zis gas, Nvng lyis yhetyos yoeus las suh loh aq, ge soeu hank nghuot lah, ge. 13 Hau nos gis goeus soeu ka, Hank nghuot zis eq ma seq kat: Khasoeh ge lyis hauh joqyos mas dius nyoshoq whom toh las, Yesu gas hau dius puk masyah jhank thuq loh. 14 Hauh thang lhyi Yesu gas, yhenmuh mas hauh soeu lhyi nyvng las nyang lyis taiq zis gas, Yoeuh aq, nvng gvshih yanghzan goeus thang pheh haih thoq lyis zes dah shohjyen zis ma xauh bas jungh, yaunos vdoms kuot lo, ge. 15 Hauh soeu ka thuq loh las, nyang lyis gis los nhang soeu ka Yesu nghuot dah cho Yuda jens lyis taiq kyoh. 16 Yuda No Buisnyeis lyis houyhang teh dah muh kuot yvmvyah, Yuda jens Yesu lyis shoeuhshih las sat das cho xo nyeis. 17 Nghuot laus eq Yesu nyamoq lyis phuk taiq zis gas, Gvshih jweh shoq ngah Uwus gas vjangh muh zwi nyeis yvmvyah, ngos eq zwi, ge. 18 Housoeh Yuda No Buisnyeis dah thungh lhoq thyoq thoq lyis magoh, Mangso lhyi nyah Uwus nghuot ge, nyah gungs lyis nyang Mangso yah byi yvmvyah, Yuda jens gas nyang lyis yoh sat das cho zes yomkat xo nyeis. 19 Housoeh las Yesu nyamoq lyis phuk taiq zis gas, ngos namoq lyis jyoengh taiq bah, Vlo gas vsainnyang ehnyet yah cha eq ma yoh kuot, Uwus kuot nhang goeu kyingh dvyoh kuot. Uwus zwi dah muhzoh lyis Lo eq houyah dvyhangteh chank zwi nyeis. 20 Uwus gas Lo lyis jyetdap yvmvyah, nyang zwi ya zwi dah muh dvnganh, Lo lyis Chixoeuq. Namoq mauh hangh shoq gvshih thoq lyis zes kuh dah muhzoh lyis eq nyang lyis Chixoeuq das. 21 Khasoeh ge lyis, Uwus gas shei bang lyis toeu toq las dwis los nhang zis yah dvyhangteh, Lo eq nyang dyei mes soeu lhyi kang dyei. 22 Uwus gas hank lyis eq soe ma tuon, soetuon cho dvnganh Lo lyis dyei goeus. 23 Dvnganhmoq Lo lyis phauh nyang zis gas Uwus lyis phauh nyang zis yah dvyhangteh nghuot. Lo lyis ma phauh ma nyang kuot soeu ka, nyang lyis nhang kat dah Uwus lyis ma phauh ma nyang kuot zis dvnghuot. 24 Ngos namoq lyis jyoengh taiq bah, ngah dang gyo las ngos lyis nhang kat soeu lhyi lomsjingh soeu ka, vcaiq vto kang yoh goeus las, dang thang thyet yvmas ma bos, shei masyah dwis nyeis yvpheh yoh luiq los goeus. 25 Ngos namoq lyis jyoengh taiq bah, shei joq bang gas Mangso dah Lo dah thwe lhyi xauhgyo das shishenh jweh los nyeis las, gvshih yangh eq jweh joq. Hauh zis xauhgyo bang gas dwis nyeis das. 26 Khasoeh ge lyis Uwus nyang mas kang bos zis yah dvyhangteh, Lo nyang mas eq kang bos das cho dyei toh. 27 Soetuon dah vmingh eq nyang lyis dyei toh: Khasoeh ge lyis nyang gas cangsoeu Lo nghuot. 28 Haih cho lhyi vmauh goh: khasoeh ge lyis lop mas bos bang dvnganh eq nyah thwe xauhgyo das shishenh jweh los das. 29 Gis zis kuot khoq bang gas kang bos yvpheh toq los das; ma shop zis kuot bang gas dang thang thyet yvpheh xauh toq los das. 30 Ngos gas ngah ehnyet yah kuot zis cha ma bos: ngos xauhgyo zis yah dvyhangteh soetuon goeus. Ngos tuon dah soe eq jyoeng; khasoeh ge lyis ngos gas ngah ehnyet chank das zis ma xo, ngos lyis nhang kat, Uwus dah ehnyet chank das zis kyingh dvxo. 31 Ngah gungs lyis ngvnyang kanghjyoeng kat nghuot lyis gas hauh kanghjyoeng ka ma jyoeng. 32 Ngah xiklyis kanghjyoeng kat dyei soeu dvyuk nyeis: nyang kat dah kanghjyoeng ka jyoeng yvlyis ngos seq. 33 Namoq gas Yohan jyank mas mang kat las, hauh soeu ka jyoeng dah cho kanghjyoeng kat. 34 Ngos yoh dah kanghjyoeng ka dius jyank masyah ma nghuot, nghuot laus eq namoq khyuot yoeus zis xauh bas jungh oen ngos haih cho taiq kyoh. 35 Yohan gas duk nyeis las pank dyei nyeis dah nyibung nghuot khoq yvmvyah, namoq gas hau nyah dah bvng yvmas dvyoq pyo mes nyeis. 36 Ngos gas Yohan thoq lyis zes kuh dah kanghjyoeng yoh. Ngos tyeh wons wuq das xiklyis Uwus ngos lyis dyei toh las muh kuot nyeis. Ngos kuot muhzoh gas, Uwus ngos lyis nhang kat cho lhyi kanghjyoeng kat nyeis. 37 Ngos lyis nhang kat dah Uwus nyang ngos lyis kanghjyoeng kat dyei nyeis. Namoq gas nyah thwe lhyi khanhamp eq ma xauhgyo ku, nyah gungs khyank lyis eq ma nyvng yoeuh ku. 38 Nyah dang eq namoq ehnyet mas ma bos: khasoeh ge lyis, nyang nhang kat soeu lhyi namoq ma lomsjingh. 39 Lhaihtoh dang lyis xo nghap geh: Khasoeh ge lyis houmha vcaiq vto kang yoh ge namoq nghamh. Nghuot laus eq hauh zis gas ngah cho lhyi kanghjyoeng kat nyeis. 40 Namoq kang yoh das xiklyis namoq ngah jyank mas ma mes los. 41 Dius yah nyoqnho ngelang dyei yvlyis ngos ma lhom yoeus. 42 Khasoeh ge lyis, namoq mas Mangso dah jyetdap zis ma bos yvlyis ngos seq. 43 Ngos gas ngah Uwus dah nyings masyah lyih nghuot laus eq, namoq ngos lyis ma lhom yoeus. Gohtoeu dvyuk yuk vsainnyang nyings masyah los nghuot lyis gas, hauh soeu lhyi namoq lhom yoeus das. 44 Namoq gas Mangso jyank masyah los dah nyoqnho ngelang lyis ma xo xo, dvyuk yah dvyuk dyei goh dah nyoqnho ngelang lyis lhom yoeus lyis gas, namoq khasoeh yoh lomsjingh das lah? 45 Uwus dah xikkhonh mas ngos namoq lyis zau kauq das oen vnghamh goh: namoq lyis zau kauq das soeu ka, namoq khau nges nyeis dah Moshe dvnghuot. 46 Moshe lhyi lomsjingh nghuot lyis gas, ngos lyis eq lomsjingh das. Khasoeh ge lyis Moshe ka ngah cho lhyi lhaih toh. 47 Nyang lhaihtoh cho lhyi ma lomsjingh lyis gas, ngah dang lyis khasoeh yoh lomsjingh das lah, ge.
1 Yesu gas Tiberia ge dah Galile thomh thyitvp pheh goeu e. 2 Nos bang thoq mas kuot xoeuq dah yomsoq muh lyis nyvng yvmvyah, moqjens nyah thang mha tsain chank loh. 3 Housoeh las Yesu gas hau boms thoq mas doq las nyah changlo jens yah dvgeh tsung toh. 4 Lhuiq Kat Pwe ge Yuda jens dah pwe eq ni los nyeis. 5 Housoeh Yesu nghank yoeuh kat lyis, nyah jyank mas moqjens los nyeis yvlyis nyvng las, Philip lyis taiq zis gas, Heinyhoq moq zo das ohlhyoq khalhye wis das au, ge. 6 Housoeh ge nyei zis gas nyang lyis shi yoeuh zis dvnghuot. Khasoeh ge lyis nyang khasoeh kuot das zis gas nyang seq toh. 7 Philip phuk taiq zis gas, Ngwis kyvp aiqxo yah ohlhyoq wis lyis eq, dvyuk dvmhauh tsoh das xiklyis yangh ma tham das, ge. 8 Nyah changlo jens mas dvyuk nghuot dah Simon Petru dah vnoeuh Andre nyang lyis taiq zis gas, 9 Yukgis lo dvyuk mas ohlhyoq oeng koeuq yahge oengdoq aiq doeu gas bos, nghuot laus eq heinyhoq dah moqphung xiklyis thoq tham das lah, ge. 10 Yesu taiq zis gas, Dius jens lyis tsain tsung nhang geh, ge. Hauh yvmas mhanh eq thoeu joq. Housoeh yukgis oeng khyoengh ko tsung toh. 11 Hauh thang lhyi Yesu gas, hauh ohlhyoq lyis yoeus las jyehjuh chungh thang lhyi changlo jens lyis gvm dyei las, changlo jens gas tsung toh bang lyis gvm dyei. Houyah dvyhangteh oengdoq lyis eq nyamoq chah nyhoq gvm dyei. 12 Nyamoq zo jo thang lhyi nyang nyah changlo jens lyis taiq zis gas, Cha eq ma dyuk shoq, zo nyhet dah vpop dvnganh yah kui tsainh geh, ge. 13 Housoeh ge zis yah dvyhangteh, nyamoq kui tsainh lyis hau ohlhyoq oeng koeuq masyah zo nyet goeu dvci aiq dang muis nghuot. 14 Nyang chixoeuq dah vlho lhyi moqphung nyvng las, hauh bang taiq zis gas, Haih soeu ka mungkvn mas jweh lyih das dah lvpe jyoengh nghuot, ge. 15 Hauh dius jens gas Yesu lyis nyamoq dah hwankti tsoengh kuot nhang das sont zis lyis nyang seq las, nyang kyingh boms pheh doq loh. 16 Nyenhthang jweh lyis, nyah changlo jens gas thomh pheh gyoh e. 17 Chont dvlom mas wvng tsung lha thomh thyitvp, Kaperna-um pheh goeu loh. Hauh uhlyis mau chuot goeus, Yesu eq nyamoq jyank mas ma jweh los shih. 18 Lyeismuh jyang muot los yvmvyah jeisphauq toq los. 19 Nyamoq somh main nyei main ko goeu loh lyis, Yesu gas jeis thoq mas suh las, nyamoq lhyik nvm mas ni los yvlyis nyamoq nyvng las gyuk. 20 Nghuot laus eq nyang nyamoq lyis taiq zis gas, Vgyuk goh, ngos dvnghuot, ge. 21 Nyamoq gas nyang lyis lhyik mas wvng tsung nhang mes nyeis lyis, houjang lhyik eq nyamoq jweh mes dah mau mas jweh loh. 22 Hauh nungs nyeih thomh thyitvp pheh nyeis khoq dah dius jens gas, lhyik dvlom kyingh dvjoq yvlyis nyvng las, Yesu gas nyah changlo jens yah dvgeh ma loh loh, changlo jens kyingh dvloh zis lyis nyvng kat. 23 (Tiberia mas dah lhyik dvkhamh gas Yhensain jyehjuh chungh thang lhyi moqjens hauh ohlhyoq zo dah joqyos goeukhanh mas dap loh nyeis.) 24 Housoeh las houmha Yesu eq, nyah changlo jens eq ma nyeis lo zis seq lyis, nyamoq eq lhyik mas tsung lha Yesu lyis xo uhjyangh Kaperna-um mha chank jweh loh. 25 Thomh thyitvp pheh Yesu lyis nyvng lyis, Svra eh, nvng heimha khanhamp jweh los lah, ge nyei. 26 Yesu taiq zis gas, Ngos namoq lyis jyoengh taiq bah, namoq gas vlho lhyi nyvng las ngos lyis xo zis ma nghuot, ohlhyoq xauh zo las jo yvmvyah dvxo. 27 Seq dyoq loh dah zonoms yoh das xiklyis yom vkat goh; cangsoeu Lo yoh dyei dah vcaiq vto kang xiklyis goeng joq dah zonoms yoh das zis yom dvkat geh: khasoeh ge lyis Uwus Mangso ka nyang lyis kyihau tap toh, ge. 28 Housoeh las nyamoq nyang lyis taiq zis gas, Mangso dah muh zwi das xiklyis ngamoq cha kuot chah lah, ge. 29 Yesu nyamoq lyis taiq zis gas, Mangso dah muhzoh ge zis gas, nyang nhang kat soeu lhyi lomsjingh cho nghuot, ge. 30 Nyamoq, nyang lyis taiq zis gas, Ngamoq nyvng las nvng lyis lomsjingh das xiklyis nvng ngamoq lyis chah vlho chixoeuq lah? Cha kuot goeus lah? 31 Nyamoq zo das xiklyis Nyang gas maukhung mhayah khyoq dyei, ge lhaih toh zis yah dvyhangteh, ngamoq dah phauh thyeih moq gas mhanhdyvp mas mana tsain xauh zo, ge. 32 Yesu nyamoq lyis taiq zis gas, Ngos namoq lyis jyoengh taiq bah, namoq lyis maukhung mha yah ohlhyoq khyoq dyei zis gas Moshe ma nghuot; maukhung mhayah jyoeng dah ohlhyoq khyoq dyei soeu ka, ngah Uwus dvnghuot. 33 Khasoeh ge lyis Mangso dah ohlhyoq oen zis gas, maukhung mhayah gyoh lyih las mungkvn lyis kang dyei zis lyis ge, ge. 34 Housoeh las nyamoq gas, Yhensain eh, hauh ohlhyoq ngamoq lyis vjangh yah dyei nyeis aq, tsain ge. 35 Yesu nyamoq lyis taiq zis gas, Ngos gas kang ohlhyoq nghuot. Ngah jyank mas los soeu ka yuot zis xauh das zis ma nghuot. Ngos lyis loms soeu ka khanhamp eq shet das zis ma nghuot. 36 Nghuot laus eq ngos namoq lyis taiq bah, namoq ngos lyis nyvng nyeis laus eq ma lomsjingh. 37 Uwus yah ngos lyis dyei ya dyei toh zis dvnganh gas, ngah jyank mas jweh los das nghuot las ngah jyank mas jweh los soeu hank lyis eq ngos khat tyamp das zis ma nghuot. 38 Khasoeh ge lyis ngos maukhung mhayah gyoh lyih zis gas, ngah ehnyet chank das xiklyis ma nghuot; ngos lyis nhang kat soeu dah ehnyet chank das xiklyis dvnghuot. 39 Ngos lyis dyei toh zis dvnganh yvmas dvkoeuq eq ma chi thyuk thyuk, thang thank buisnyeis lyis dwis toq nhang das zis gas ngos lyis nhang kat soeu ngah Uwus dah ehnyet nghuot. 40 Nyah Lo lyis nyvng las nyang lyis lomsjingh dah dius, yuk khanghmuh gas vcaiq vto kang xauh yoeus bas jungh, ge zis gas ngos lyis nhang kat soeu ngah Uwus dah ehnyet nghuot las, thang thank buisnyeis lyis ngos hauh soeu lhyi dwis toq los nhang das, ge. 41 Housoeh Yesu nyang nyang, ngos gas maukhung mhayah gyoh los dah ohlhyoq nghuot, ge yvmvyah Yuda jens lop zis nghuot. 42 Nyamoq taiq zis gas, Nyang gas Yosep dah lo Yesu ma nghuot lhyeh? Nyah uwus ungwes lyis eq yang seq ma nghuot lhyeh? Khasoeh las ngos gas maukhung mhayah gyoh los soeu nghuot ge taiq au lhyeh, ge. 43 Yesu nyamoq lyis phuk taiq zis gas, Namoq nyang changh nyang vtsain lop nyeis goh. 44 Ngos lyis nhang kat dah Uwus, ngah jyank pheh ni los nhang soeu ma nghuot lyis gas, ngah jyank mas hank eq ma yoh los. Hauh soeu lhyi ka thang thank buisnyeis lyis ngos dwis toq los nhang das, ge. 45 Lvpe maussauh mas lhaih toh zis gas, Cangsoeu dius dvnganh gas Mangso dah jyauh zis xauh das, ge. Ngah Uwus jyank masyah xauhgyo las xuq soeu khanghmuh ngah jyank mas los das. 46 Cangsoeu dius dvyuk eq Uwus lyis nyvng ku zis ma nghuot, Mangso jyank masyah gyoh lyih soeu kyingh Uwus lyis dvnyvng ku. 47 Namoq lyis ngos jyoengh taiq bah, ngos lyis lomsjingh soeu ka vcaiq vto kang yoh. 48 Ngos gas kang ohlhyoq nghuot. 49 Mhanhdyvp mas mana zo khoq bang, namoq dah phauh thyeih moq gas shei goeus. 50 Hauh ohlhyoq gas maukhung mhayah gyoh los zis nghuot las hauh yvlyis zo soeu ka ma shei das. 51 Ngos gas maukhung mhayah gyoh los, dwis dah ohlhyoq nghuot. Haih ohlhyoq lyis zo soeu ka, vjangh yah kang dwis nyeis das. Mungkvn mas kang dwis nyeis das xiklyis ngos dyei dah ohlhyoq gas ngah shoh nghuot, ge. 52 Housoeh las Yuda jens nyamoq nyang changh taiq phyen-goh nyeis zis gas, Haih soeu ka nyah shoh yang lyis khasoeh yoh gvmtsoh das lah, ge. 53 Yesu nyamoq lyis taiq zis gas, ngos namoq lyis jyoengh taiq bah, cangsoeu Lo dah shoh lyis zo zis yahge suih lyis shuk zis ma nghuot lyis gas, namoq mas kang ma bos. 54 Ngah shoh lyis zo, ngah suih lyis shuk soeu ka vcaiq vto kang yoh las, thang thank dah buisnyeis lyis ngos nyang lyis dwis toq los nhang das. 55 Khasoeh ge lyis ngah shoh gas gyingh dah zonoms nghuot; ngah suih eq gyingh dah shuk phoh nghuot. 56 Ngah shoh zo las ngah suih shuk soeu ka, ngos mas nyeis; ngos eq nyang mas nyeis. 57 Kang dwis nyeis, ngah Uwus gas ngos lyis nhang kat las, ngos ngah Uwus masyah kang dwis zis yah dvyhangteh, ngos lyis zo soeu eq ngos masyah kang dwis das. 58 Haih zis gas maukhung mhayah gyoh los dah ohlhyoq nghuot. Shei goeus bang phauh thyeih moq zo khoq dah mana teh ma nghuot, haih ohlhyoq zo soeu ka vcaiq vto kang dwis das, ge. 59 Haih zis gas Kaperna-um wukhau mha dah lyi jungs mha nyang jyauh uhlyis taiq dah dang nghuot. 60 Nyah changlo jens nyoshoq hauh dang lyis xauhgyo lyis, Haih dang gas svsoh yau dah dang nghuot, hank yoh gyo yoeus das lah, ge. 61 Nyah changlo jens housoeh lop goh nyeis yvlyis Yesu nyah nhaiqlom masyah seq las nyamoq lyis taiq zis gas, Haih dang yah namoq lyis ehnyet dyet nhang goeus lhyeh? 62 Hauh cangsoeu Lo vkhang nyeis khoq dah joqyos mas doq loh zis lyis namoq nyvng lyis namoq khasoeh oen das lah? 63 Kang lhyi yoh dwis nhang soeu ka Dyos nghuot. Gungsshoh gas cha yhung pvjus: ngos namoq lyis taiq dah dang gas Dyos nghuot, kang eq nghuot. 64 Nghuot laus eq namoq mas dvyhamh gas ma lomsjingh, ge. Khasoeh ge lyis Yesu gas, ma jingh bang hank nghuot zis eq, nyang lyis phanhlyen das zis hank nghuot zis eq, cangxeih lyis yah seq toh. 65 Housoeh las nyang taiq zis gas, Hauh cho gvng mas ngah Uwus ma nhang lhyi ngah jyank mas hank eq ma yoh jweh, oen ngos namoq lyis taiq goeus, ge. 66 Hauh shishenh lyis nyah changlo nyoshoq nyah thang mha ma chank lo, tsain tauh loh. 67 Housoeh las Yesu nyah changlo dvci aiq yuk lyis taiq zis gas, Namoq loh mes lhyeh, ge. 68 Simon Petru nyang lyis phuk taiq zis gas, Yhensain eh, ngamoq hank jyank mas loh das lah? Nvng gas vcaiq vto kang yah sen dah dang yoh. 69 Nvng gas dwis nyeis, Mangso dah Lo Khristu nghuot yvlyis ngamoq jingh las seq goeus, ge. 70 Yesu nyamoq lyis phuk taiq zis gas, Namoq dvci aiq yuk lyis khyen yoeus goeus ma nghuot lhyeh? Nghuot laus eq namoq mas dvyuk gas Yius nghuot, ge. 71 Housoeh ge zis gas, Simon dah lo Yudas Iskarot lyis toeuq las taiq zis nghuot: khasoeh ge lyis hauh soeu ka nyang lyis phanhlyen das soeu nghuot las, changlo dvci aiq yuk mas eq bos.
1 Hauh thang lhyi Yesu gas Galile mau mas suh yenh: Yuda jens nyang lyis sat das zis xo yvmvyah, Yuda mau mas ma mes suh yenh. 2 Hauh shishenh lyis Yuda jens dah Phunk pwe ge dah pwe jweh los goeus las, 3 Nyah vnoeuh moq nyang lyis taiq zis gas, Nvng kuot dah muhzoh lyis nah changlo jens nyvng bas jungh, haih mau masyah thuq las Yuda mau pheh loh aq. 4 Khasoeh ge lyis vsainnyang gungs lyis moeng hoeuh das zis xo soeu hank laus eq nyang kuot muh lyis nghop shung lha cha eq ma kuot. Nvng heinyhoq yoh kuot nyeis nghuot lyis gas mungkvn lyis nah gungs chixoeuq aq, ge. 5 Khasoeh ge lyis nyah vnoeuh moq yangh nyang lyis ma lomsjingh. 6 Yesu nyamoq lyis taiq zis gas, Ngah shishenh ma jweh shih, namoq dah shishenh vjangh yah nghuot joq. 7 Mungkvn gas namoq lyis ma yoh hoeng, ngos lyis dvhoeng: khasoeh ge lyis hauh bang kuot cho ma shop zis lyis ngos kanghjyoeng kat yvmvyah nghuot. 8 Hauh pwe mha namoq doq loh geh; ngah shishenh ma jweh shih yvmvyah, ngos gas ma doq loh shih das, ge. 9 Nyang dang hauh goeu nyamoq lyis taiq lho lha, Galile mas nyeis khoq shih. 10 Nghuot laus eq nyah vnoeuh moq hauh pwe mha doq loh thang lhyi, nyang eq debangh ma nghuot, gauh doq loh khyvlyis doq loh. 11 Housoeh las Yuda jens gas, hauh pwe mha nyang lyis xo lha, Haih dius yuk khalhye nyeis, ge. 12 Moqjens mas nyah cho tsain moengs goh las dvyhamh gas, Nyang gas dius gis dvnghuot, ge. Tsai dvyhamh gas, Ma nghuot, nyang gas dius lyis mhuih jyomh soeu nghuot, ge. 13 Nghuot laus eq Yuda jens lyis gyuk yvmvyah, nyah cho lhyi debangh hank eq ma taiq. 14 Hauh pwe shishenh dvgohyih nghuot loh lyis, Yesu gas yhenmuh mas wvng las jyauh nyeis. 15 Housoeh las Yuda jens mauh zis yah taiq zis gas, Haih dius yuk maussauh eq ma xuq ku zis heinyhoq khasoeh seq au lhyeh, ge. 16 Yesu nyamoq lyis phuk taiq zis gas, ngos jyauh cho ka ngah zis ma nghuot, ngos lyis nhang kat soeu zis dvnghuot. 17 Hauh soeu dah ehnyet chank mes soeu nghuot lyis gas, jyauh dah cho haih zis gas, Mangso jyank masyah lah, ngah ehnyet yah taiq zis nghuot lah, ge zis seq khyen yoeuh das. 18 Vsainnyang dah ehnyet yah taiq soeu ka vsainnyang dah nyoqnho ngelang xo zis nghuot. Vsainnyang lyis nhang kat soeu dah nyoqnho ngelang lyis xo soeu ka, jyoeng lha nyang mas ma dan cho ma bos. 19 Moshe ka namoq lyis lyi dyei toh goeus ma nghuot lah? Nghuot laus eq namoq hauh zis lyis dvyuk eq ma chank shih lhyeh? Chamus namoq ngos lyis sat das zis xo goh lah, ge. 20 Moqjens phuk taiq zis gas, Nvng yius kuq, nvng lyis sat das zis hank xo nyeis lah, ge. 21 Yesu nyamoq lyis phuk taiq zis gas, Ngos muh dvja kuot goeus las namoq dvnganhmoq eq mauh goeus. 22 Moshe ka namoq lyis vthyoh tyomh cho dyei toh goeus. Hauh zis gas Moshe masyah ma nghuot, phauh thyeih moq masyah dvnghuot. Housoeh las namoq gas No Buisnyeis lyis dius lyis vthyoh tyomh cho tsain kuot nyeis. 23 No Buisnyeis lyis loshang lhyi vthyoh tyomh cho lhom yoeus laus eq Moshe dah lyi gas ma dyoqbis loh nghuot lyis gas, No Buisnyeis lyis ngos dius dvgungs gonh lyis lhoq gis gvng mas namoq ngos lyis nhaiqyo lhyeh? 24 Thoqlosbaus lyis yah soe vtuon goh, dan khyvlyis dvtuon geh, ge. 25 Yerusalem mas dah dius dvyhamh taiq zis gas, Sat das xiklyis nyamoq xo dah dius yuk haih zis ma nghuot lhyeh? 26 Yoeuh aq, nyang gas debangh taiq kyoh nyeis yvmvyah, nyang lyis cha ma yoh taiq. Haih soeu nyang Khristu nghuot zis lyis guon bang nyang jyoengh vseq au? 27 Nghuot laus eq haih soeu khalhye yah nghuot zis hank eq seq das zis ma nghuot ge. 28 Housoeh las Yesu yhenmuh mas jyauh zoh lyis yah kaiq las taiq zis gas, Namoq ngos lyis seq, ngos khalhye yah zis eq seq. Ngos gas ngvnyang los zis ma nghuot, ngos lyis nhang kat soeu ka jyoeng, hauh soeu lhyi namoq ma seq. 29 Ngos gas nyang lyis seq: khasoeh ge lyis ngos gas nyah jyank masyah nghuot las nyang ngos lyis nhang kat goeus, ge. 30 Housoeh las nyamoq gas nyang lyis nyhik das zis sont laus eq nyah shishenh ma jweh shih yvmvyah, nyang lyis hank eq ma yoh nyhik. 31 Moqjens mas dius nyoshoq nyang lyis lomsjingh las taiq zis gas, Khristu los las nyang gas haih soeu thoq lyis vlho zes yoh chixoeuq das lah, ge. 32 Dius jens gas nyah cho moengs goh nyeis zis lyis Pharishe jens xauhgyo las, phudyei uhjyung jens yahge Pharishe moq gas nyang lyis nyhik das xiklyis zungh bang lyis nhang kat. 33 Yesu nyamoq lyis taiq zis gas, ngos namoq yah dvyoq kyingh nyeis las, ngos lyis nhang kat soeu jyank mas doms loh das. 34 Namoq ngos lyis xo laus eq ma nyvng das. Ngos nyeis jang mas eq namoq ma yoh jweh los, ge. 35 Housoeh las Yuda jens nyamoq nyang changh taiq goh zis gas, Yang ma yoh xo nyvng shoq haih dius yuk khapheh loh bah ge au? Dyos loh dah Heleni jens jyank mas loh las, hauh bang lyis jyauh das nvdoeus. 36 Namoq ngos lyis xo laus eq ma nyvng das, ngos nyeis jang mas eq namoq ma yoh jweh los das, ge dah dang gas cha ge mes dah dang nghuot au lhyeh, ge. 37 Hau pwe dah thang thank buisnyeis zainsmuh mas Yesu yap las taiq zis gas, Jeis shet soeu bos lyis ngah jyank mas los shuk bas jungh. 38 Ngos lyis lomsjingh soeu ka lhaihtoh dang mas taiq zis yah dvyhangteh, hauh soeu dah ungkhau mhayah kang bos dah jeislvng yaus thuq nyeis das, ge. 39 Nyang housoeh taiq zis gas, nyang lyis lomsjingh bang xauh yoeus das dah Dyos lyis toeuq las taiq zis nghuot. Khasoeh ge lyis Yesu gas nyah phunk ma pank shih yvmvyah Gyingshang Dyos ma dyei shih zis nghuot. 40 Housoeh taiq dang moqjens mas nyoshoq moq xauhgyo las nyamoq taiq zis gas, Haih soeu ka lvpe jyoengh nghuot, ge. 41 Dvyhamh gas, Haih soeu ka Khristu nyang nghuot goeus, ge. Nghuot laus eq dvyhamh gas, Khristu gas Galile mau masyah thuq los das lah? 42 Khristu gas Dawi dah vnyau vshih masyah dyos las, Dawi dah joqyos ge dah Betlehem wukhau mhayah dvthuq los das, ge lhaihtoh dang mas bos ma nghuot lhyeh, ge. 43 Housoeh las moqjens gas nyah gvng mas gang loh. 44 Nyamoq mas dvyhamh gas nyang lyis nyhik mes laus eq, hank eq nyang lyis ma nyhik. 45 Housoeh las zungh bang gas phudyei uhjyung jens yahge Pharishe moq jyank mas doms jweh loh lyis nyamoq gas, Nyang lyis chamus ma shwih los goh lah, ge lhom nyei langh. 46 Zungh bang phuk taiq zis gas, Khayhoq eq haih soeu teh taiq soeu ma bos, ge. 47 Housoeh las Pharishe jens nyamoq lyis taiq zis gas, Namoq lyis eq mhuih goeus lhyeh? 48 Guon bang nghuot ya Pharishe mas zis hauh soeu lhyi lomsjingh soeu bos lah? 49 Haih dius jens gas lyi ma seq las nhoengh zis xauh goeus, ge. 50 Nikodimu nyamoq lyis taiq zis gas, (nyamoq mas dvyuk nghuot soeu nyenh lyis Yesu jyank mas lyih soeu nghuot.) 51 Nyang cha kuot goeus zis ma xauhgyo, ma seq shih lyis yah Lyi gas dvyuk yuk lyis soe gyangh tuon lhyeh, ge. 52 Nyamoq phuk taiq zis gas, Nvng eq Galile mas zis nghuot lhyeh? Nvng dvxo choq yoeuh aq, Galile masyah lvpe hank eq ma thuq los ku, ge. 53 Hauh thang lyis nyamoq yuk khanghmuh, nyang yuk nyang toeu yhen pheh tsain loh lo.
1 Nghuot laus eq Yesu gas Tsanlun boms pheh doq loh. 2 Nvpsangh yah nyang gas yhenmuh mas doms loh lyis, dius nyoshoq nyah jyank mas zain los yvmas nyang tsung lha jyauh nyeis. 3 Hauh uhlyis maussauh lhaih bang yahge Pharishe jens gas, nyi lvng shuot goh nyeis dah vmesbih dvyuk lyis nyamoq vgungs mas loh shwih lhyap toh las 4 nyamoq nyang lyis taiq zis gas, Svra eh, haih vmesbih lyis nyi lvng shuot goh nyeis uhlyis ngamoq loh nyhik goeus. 5 Heisoeh teh dah vmesbih lyis lukzains yah yoh doeuh, ge Moshe ka Lyi mas ngamoq lyis vmingh dyei toh. Gvshih nvng gas khasoeh oen das lah, ge. 6 Housoeh ge nyei zis gas, nyang lyis yobos huon das zis nyvng das xiklyis nyang lyis shi yoeuh zis nghuot. Yesu gas ma xauhgyo guons kuot las gop las tsoh mas loqnyhauh yah lhaih nyeis. 7 Nyamoq housoeh doms tsank nyei nyei kuot yvmvyah, nyang nghank las nyamoq lyis taiq zis gas, Namoq mas yobos ma yoh soeu shih nyang lyis lukzains yah doeuh aq, ge. 8 Housoeh dye taiq yah dvyih nyang doms gop las tsoh mas lhaih nyeis. 9 Nyamoq hauh dang xauhgyo lyis nyamoq dah ehnyet mas zangh las, logis jens uhshe lha dvyuk thang lhyi dvyuk thuq loh. Housoeh Yesu nyang kyingh nyet joq las, hauh vmesbih eq vgungs mas yap joq. 10 Yesu nghank yoeuh lyis vmesbih mas lai las gohtoeu hank lyis eq ma nyvng yvmvyah, nyang lyis taiq zis gas, Vmesbih eh, nvng lyis zau kauq bang khapheh loh goeus lah? Nvng lyis hank eq dang thang ma thyet lhyeh, ge. 11 Vmesbih gas, Yhensain eh, hank ma thyet ge toeuh lyis, Yesu taiq zis gas, Ngos eq nvng lyis dang thang ma thyet, loh lo aq, yaunos vkuot lo, ge. 12 Housoeh las Yesu nyang lyis doms taiq zis gas, Ngos gas mungkvn dah bvng zis nghuot. Ngah thang mha chank soeu ka chuot yvmas khanhamp eq ma suh las kang dah bvng cho yoh das. 13 Housoeh las Pharishe jens nyang lyis taiq zis gas, Nah cho lhyi nvnyang kanghjyoeng kat las, nah kanghjyoeng ka ma jyoeng, ge. 14 Yesu nyamoq lyis taiq zis gas, Ngah cho lhyi ngvnyang kanghjyoeng kat laus eq jyoeng. Ngos khapheh yah los las khapheh loh das zis ngvnyang seq: nghuot laus eq namoq gas ngos khapheh yah thuq los las khapheh loh das zis ma seq. 15 Namoq gas gungsshoh khyvpheh yah soetuon. Ngos gas hank lyis eq soe ma tuon. 16 Soetuon nghuot laus eq ngos tuon khyvlyis jus joq. Khasoeh ge lyis, ngos gas dvyuk kyingh ma nghuot, ngos eq, ngos lyis nhang kat soeu, ngah Uwus eq dvgeh nghuot. 17 Namoq dah Lyi mas eq, kanghjyoeng aiq yuk dah dang gas jyoeng, ge lhaih toh. 18 Ngos gas vsainnyang xiklyis kanghjyoeng kat soeu nghuot. Ngos lyis nhang kat soeu ngah Uwus eq ngah cho kanghjyoeng kat dyei nyeis, ge. 19 Nyamoq nyang lyis taiq zis gas, Nah Uwus gas khalhye nyeis, ge. Yesu phuk taiq zis gas, Namoq gas ngah Uwus lyis eq, ngos lyis eq ma seq. Ngos lyis seq ya, ngah Uwus lyis eq seq das, ge. 20 Dang haih zis gas yhenmuh mas jyauh nyeis uhlyis vlu yvp mas taiq dah dang nghuot. Nyah shishenh ma jweh shih yvmvyah, nyang lyis hank eq ma nyhik. 21 Nyang nyamoq lyis dvlhain doms taiq zis gas, Ngos loh das, hauh uhlyis namoq ngos lyis xo das. Vsainnyang yaunos mas eq namoq shei das. Ngos loh das joqyos mas eq namoq ma yoh jweh das, ge. 22 Housoeh las Yuda jens gas, ngos loh das joqyos mas namoq ma yoh jweh das, ge nyang taiq zis gas, nyang gungs nyang sat das nvdoeus, tsain ge. 23 Yesu tsoq taiq zis gas, Namoq gas nyhen mha dah bang nghuot. Ngos gas nyhang mha dah soeu dvnghuot. Namoq gas haih mungkvn mas bang nghuot, Ngos gas haih mungkvn mas zis ma nghuot. 24 Housoeh yvmvyah ngos namoq lyis, Namoq gas vsainnyang yaunos mas shei das, oen taiq goeus: khasoeh ge lyis, ngos hauh soeu nghuot zis lyis namoq ma jingh yvmvyah, namoq vsainnyang yaunos mas shei das, ge. 25 Housoeh nyamoq taiq zis gas, Nvng hank nghuot lah, ge nyei. Yesu nyamoq lyis taiq zis gas, Ngos gas xik pheh yah ngos namoq lyis taiq toh soeu, hauh soeu nyang nghuot. 26 Ngos namoq dah cho mha bos taiq soetuon dyei das zis nyoshoq bos. Nghuot laus eq ngos lyis nhang kat soeu ka jyoeng nyeis yvmvyah, nyah jyank masyah ngos xauhgyo zis mungkvn lyis taiq kyoh zis nghuot, ge. 27 Uwus dah cho taiq yvlyis nyamoq ma seq. 28 Housoeh las Yesu nyamoq lyis taiq zis gas, Hauh cangsoeu Lo lyis namoq toeu shap toh uhlyis, ngos gas hauh soeu nghuot zis eq, ngos gas ngah ehnyet yah cha eq ma kuot, nghuot laus eq ngah Uwus ngos lyis jyauh zis yah dvyhangteh, hauh dang ngos taiq nyeis zis lyis eq namoq seq los das. 29 Ngos lyis nhang kat soeu ka ngos yah dvgeh nyeis. Uwus gas ngvnyang kyingh lyis ma toh khoq: khasoeh ge lyis, nyang o dah muh lyis ngos vjangh kuot nyeis, ge. 30 Hauh dang taiq nyeis lyis dius nyoshoq nyang lyis lomsjingh. 31 Yesu gas, nyang lyis lomsjingh dah Yuda jens lyis taiq zis gas, Namoq ngah dang mas goeng toenk joq lyis, namoq ngah changlo gyingh nghuot joq. 32 Jyoeng cho namoq seq das las, hauh jyoeng cho ka namoq lyis lhuiq kat das, ge. 33 Nyamoq, nyang lyis phuk taiq zis gas, Ngamoq gas Abraham dah vnyau nghuot las khanhamp eq hank jyank mas jons ma mus ku dvnghuot lyis, luiq ge khasoeh yoh taiq das lah, ge. 34 Yesu nyamoq lyis phuk taiq zis gas, Ngos namoq lyis jyoengh taiq bah, yaunos kuot bang hank laus eq yaunos dah jons nghuot joq. 35 Jons gas yhen mha vjangh yoh nyeis zis ma nghuot: lo gas vjangh nyeis. 36 Housoeh las Lo yah namoq lyis lhuiq kat lyis gas, namoq jyoengh luiq das. 37 Namoq Abraham dah vnyau nghuot zis ngos seq: nghuot laus eq ngah dang namoq mas ma bos yvmvyah, namoq ngos lyis sat das zis xo nyeis. 38 Ngos gas ngah Uwus jyank mas nyvng zis yah dvyhangteh taiq. Namoq eq namoq dah uwus jyank masyah nyvng zis yah dvyhangteh tsain kuot nyeis, ge. 39 Nyamoq, nyang lyis phuk taiq zis gas, Abraham gas ngamoq dah uwus nghuot, ge. Yesu nyamoq lyis taiq zis gas, Namoq Abraham dah lo nghuot lyis gas, Abraham kuot dah muh tsain chank kuot das. 40 Nghuot laus eq gvshih gas namoq lyis Mangso jyank masyah ngos xauhgyo las hau jyoeng dah cho taiq kyoh soeu ge dah ngos lyis sat das zis tsain xo: Abraham gas housoeh teh soeu ma nghuot. 41 Namoq gas namoq dah uwus kuot zis yah dvyhangteh kuot nyeis, ge. Nyamoq, nyang lyis taiq zis gas, Ngamoq deslos ma nghuot, ngamoq gas Uwus dvyuk kyingh dvyoh: hauh soeu ka Mangso nyang nghuot, ge. 42 Yesu nyamoq lyis taiq zis gas, Namoq Uwus gas Mangso nghuot lyis, namoq ngos lyis jyetdap das. Khasoeh ge lyis ngos gas Mangso mhayah thuq los soeu nghuot: Ngah ehnyet yah ngos jweh los zis ma nghuot, nyang gas ngos lyis nhang kat. 43 Chamus ngah dang lyis ma seqgyo goh lah? Khasoeh ge lyis ngah dang lyis ma kamp gyo las ngah dang ma seqgyo. 44 Namoq gas namoq dah uwus ge dah yius masyah tsain dyos lyih las namoq uwus nyetnau khyvlyis chank mes. Yius gas cangxeih yoq lyis yah dius sat soeu nghuot. Nyah jyank mas jyoeng zis ma yoh bos las jyoeng cho mha ma yoh nyeis. Nyang dyoq dah dang taiq lyis nyang nyah ungkhau mha bos zis yah dvyhangteh taiq nyeis. Khasoeh ge lyis nyang gas dyoq soeu nghuot, lvdyoq dah uwus eq nghuot. 45 Ngos dang jyoeng taiq yvmvyah namoq ma lomsjingh. 46 Ngos mas yobos bos oen namoq mas hank yoh tuonh shet das lah? Ngos dang jyoeng taiq nghuot lyis gas, chamus ngos lyis ma lomsjingh goh lah? 47 Mangso yah sen soeu ka nyah dang lyis gyo nyeis. Namoq gas Mangso dah bang ma nghuot las, nyah dang lyis ma tsain gyo, ge. 48 Yuda jens nyang lyis phuk taiq zis gas, Nvng gas Samari dius nghuot las yius wvng soeu nghuot, oen ngamoq taiq zis gas jus ma nghuot lhyeh, ge. 49 Yesu phuk taiq zis gas, ngos yius wvng nyeis soeu ma nghuot, ngah Uwus lyis phauh nyang zis dvnghuot. Namoq yuk ngos lyis ma phauh ma nyang kuot. 50 Ngos gas ngvnyang nyoqnho ngelang lyis ma xo; xo lha soetuon dyei soeu dvyuk nyeis. 51 Ngos namoq lyis jyoengh taiq bah, ngah dang lyis chank soeu ka khanhamp eq ma shei lo, ge. 52 Yuda jens nyang lyis taiq zis gas, Nvng yius wvng soeu nghuot yvlyis gvshih ngamoq seq goeus. Abraham yahge lvpe jens dye shei goeus. Nghuot laus eq nvng taiq zis gas, Ngah dang lyis chank soeu ka shei zis khanhamp eq ma bos das, ge. 53 Nvng gas shei loh goeus ngamoq uwus Abraham thoq lyis ma zes kuh ma nghuot lhyeh? Lvpe jens eq shei khoq goeus, nvng hank nghuot oen nghamh zo, ge. 54 Yesu phuk taiq zis gas, Ngah gungs lyis ngvnyang chungh nghuot lyis gas, ngah nyoqnho ngelang cha eq ma bos; nghuot laus eq ngos lyis chungh soeu ka, namoq dah Mangso nghuot, ge namoq taiq dah ngah Uwus nyang nghuot, ge. 55 Nghuot laus eq namoq gas nyang lyis ma seq, ngos gas seq. Ma seq oen lhyi ka ngos eq namoq teh hwah soeu bweh das: nghuot laus eq ngos gas nyang lyis seq las nyah dang lyis eq chank kuot. 56 Namoq dah uwus Abraham gas, ngah buisnyeis nyvng das yvlyis gaus las, nyang hauh zis lyis nyvng las gaus goeus, ge. 57 Yuda jens nyang lyis taiq zis gas, Nvng oengci zvn yangh ma bos shih zis Abraham lyis nyvng ku lhyeh, ge. 58 Yesu nyamoq lyis phuk taiq zis gas, Ngos namoq lyis jyoengh taiq bah, Abraham dah xik lyis yah ngos nyeis, ge. 59 Housoeh las nyamoq gas nyang lyis doeuh das ge lukgoq tsain kui. Yesu gas nyah gungs shung lha yhenmuh masyah nyamoq jo chank thuq loh.
1 Nyang lai loh nyeis lyis, khoeu los masyah nyoqjet soeu dvyuk lyis nyvng. 2 Nyah changlo jens nyang lyis taiq zis gas, Svra eh, haih soeu nyoqjet zis khoeu los zis gas yobos kuot soeu ka hank nghuot lah? Haih dius yuk lah? Nyah ungwes uwus lah, ge. 3 Yesu phuk taiq zis gas, Haih soeu yobos kuot zis ma nghuot, nyah nyhiphoq eq ma nghuot, Mangso dah muh, hauh soeu mhayah chixoeuq das xiklyis dvnghuot. 4 Ngos lyis nhang kat soeu dah muhzoh lyis nyeihyo nyoq nyvng shih uhlyis ngos wons wuq chah. Muh hank eq ma yoh wons wuq das dah nyenhyo jweh los das. 5 Ngos mungkvn mas nyeis shih dah uhlyis ngos mungkvn dah bvng zis nghuot, ge. 6 Housoeh dye taiq thang lhyi, nyang nyeisjvng mas svkanh dyeh kat, tsohnyhon lhoeuq yoeus las hauh soeu dah nyoq mas juot dyei las, 7 nyang lyis taiq zis gas, Silom thomh mas loh cheih aq, ge. Houyah dvyhangteh nyang loh cheih lyis nyoq nyvng los las loh lo. (Silom vjyuk gas, Nhang kat, ge zis nghuot.) 8 Housoeh las yhen kyoh yahge xik pheh nyang nyoqjet zis lyis nyvng yoeuh bang gas, Haih soeu ka tsung lha dung zo soeu ma nghuot lhyeh, ge. 9 Dvyhamh gas, Haih soeu nyang nghuot, ge. Tsai dvyhamh gas, Hauh soeu yah doeusgoh, ge. Nyang taiq zis gas, Ngos hauh soeu nyang nghuot goeus, ge. 10 Housoeh yvmvyah nyamoq, nyang lyis taiq zis gas, Housoeh lyis nah nyoq khasoeh yoh nyvng los lah, ge. 11 Nyang phuk taiq zis gas, Yesu ge soeu tsohnyhon lhoeuq las ngah nyoq mas juot dyei lho lha, Silom thomh mas loh cheih aq, ge zis yah dvyhangteh ngos loh cheih lyis nyoq nyvng los, ge. 12 Nyamoq, nyang lyis taiq zis gas, Hauh soeu khamha nyeis, ge nyei. Nyang phuk taiq zis gas, Ngos ma seq, ge. 13 Nyamoq gas vkhang nyoqjet soeu lhyi Pharishe jens jyank mas shwih e. 14 Yesu tsohnyhon lhoeuq las hauh soeu lhyi nyoq nyvng nhang nyeih gas Yuda No Buisnyeis nghuot. 15 Pharishe moq eq, nyah nyoq khasoeh nyvng los cho doms nyei lyis hauh soeu taiq zis gas, Nyang ngah nyoq mas tsohnyhon kat dyei las, ngos nyoq cheih lho lhyi nyvng los, ge. 16 Pharishe dvyhamh gas, Haih soeu ka No Buisnyeis lyis ma phauh yvmvyah, nyang gas Mangso jyank masyah jweh lyih soeu ma nghuot, ge. Gohtoeu dvyhamh gas, Yaunos wons soeu ka heiteh dah vlho khasoeh yoh kuot das, ge tsain gang loh. 17 Housoeh las nyamoq gas nyoqjet khoq soeu lhyi, Nah nyoq nyvng nhang soeu lhyi nvng khasoeh oen nghamh, ge nyei. Nyang phuk taiq zis gas, Hauh soeu ka lvpe nghuot, ge. 18 Yuda jens gas, nyang gas nyoqjet soeu nghuot zis nyoq doms nyvng los zis lyis ma jingh yvmvyah, nyoqjet khoq soeu dah nyhiphoq lyis khi lha, 19 nyamoq lyis nyei zis gas, Khoeu los masyah nyoqjet dah haih soeu ka nah zomh dah lo nghuot lhyeh, ge. 20 Hauh soeu dah nyhiphoq nyamoq lyis phuk taiq zis gas, Hauh soeu ka ngah zomh dah lo nghuot, khoeu los masyah nyoqjet zis ngah zomh seq. 21 Nghuot laus eq gvshih hank yah khasoeh kuot dyei las nyoq nyvng los zis gas ngah zomh ma seq. Nyang lyis nyei yoeuh geh, nyang nyenhkyi bos goeus las nyah cho nyang taiq das, ge. 22 Nyah nyhiphoq housoeh ge zis gas, Yuda jens lyis gyuk yvmvyah nghuot. Khasoeh ge lyis, Yesu gas Khristu nghuot ge las lhom yoeus soeu hank lyis laus eq lyi jungs mhayah khat thuq das zis gvshih yangh dye xam nyoq toh goeus. 23 Housoeh las hauh soeu dah nyhiphoq gas, Nyang nyenhkyi bos goeus, nyang lyis nyei yoeuh geh, ge zis nghuot. 24 Housoeh las hauh nyoqjet khoq soeu lhyi doms khi lha nyang lyis taiq zis gas, Mangso lhyi chungh aq, hauh soeu ka yaunos wons soeu nghuot zis ngamoq seq, ge. 25 Hauh soeu phuk taiq zis gas, Nyang yaunos wons soeu nghuot ma nghuot zis ngos ma seq: ngos seq zis gas, ngos xikpheh nyoqjet, gvshih gas nyvng goeus, hounyhoq kyingh dvnghuot, ge. 26 Nyamoq, nyang lyis doms taiq zis gas, Nyang nvng lyis cha kuot dyei? Nah nyoq khasoeh phank dyei lah, ge. 27 Hauh soeu phuk taiq zis gas, Gvshih shih ngos namoq lyis taiq kyoh goeus; namoq nyang ma tsain seqgyo. Chamus doms tsain gyo mes goh lah? Namoq eq nyah changlo duot mes goh vnghuot lah, ge. 28 Housoeh las nyamoq gas, nyang lyis jwangh zoh lyis yah taiq zis gas, Nvng yuk nyah changlo nghuot, ngamoq gas Moshe dah changlo jens dvtsain nghuot. 29 Mangso ka Moshe lhyi eq dang jis zis ngamoq seq. Haih soeu khalhye yah nghuot zis gas ngamoq ma seq, ge. 30 Hauh soeu phuk taiq zis gas, Nyang gas nyoq yoh phank dyei goeus lyis eq, nyang khalhye yah nghuot zis namoq ma seq zis gas mauhphoh nghuot. 31 Yaunos kuot bang lyis Mangso ma gyo dyei zis gas ngamoq seq: nghuot laus eq Mangso lhyi paiq soeu nghuot las, nyah ehnyet lyis chank nghuot lyis gas Mangso nyang lyis gyo dyei. 32 Khoeu los lyis yah jet goeus dah nyoq lyis dvyuk eq yoh phank dyei ge mungkvn gvnkhanh masyah ma xauhgyo ku. 33 Haih soeu ka Mangso jyank masyah ma nghuot lyis gas, cha eq yoh kuot das zis ma nghuot, ge. 34 Nyamoq nyang lyis phuk taiq zis gas, Gungs gonh yaunos thomh masyah dvkhoeu los zis ngamoq lyis jyauh nyeis lhyeh, ge nyang lyis khat thuq kat. 35 Hauh soeu lhyi khat thuq cho Yesu xauhgyo las, nyang lyis xo nyvng lyis taiq zis gas, Mangso dah Lo lyis lomsjingh lah, ge. 36 Nyang phuk taiq zis gas, Yhensain eh, ngos lomsjingh das soeu ka hank nghuot lah, ge. 37 Yesu nyang lyis taiq zis gas, Hauh soeu lhyi nvng nyvng ku goeus, nvng yah jis goh soeu ka hauh soeu nyang nghuot, ge. 38 Hauh soeu ka, Yhensain eh, ngos lomsjingh nyeis, ge nyang lyis paiq. 39 Yesu taiq zis gas, Haih mungkvn mas ngos jweh lyih zis gas, soetuon das xiklyis nghuot las, nyoqjet bang nyoq nyvng los das xiklyis eq, nyoq nyvng nyeis bang ma nyvng das xiklyis eq nghuot, ge. 40 Nyang yah dvgeh nyeis dah Pharishe jens hauh dang lyis xauhgyo las nyang lyis taiq zis gas, Ngamoq eq nyoqjet lhyeh, ge. 41 Yesu nyamoq lyis taiq zis gas, Namoq nyoqjet ya yaunos ma tsain yoh das, gvshih namoq taiq zis gas, Ngamoq nyoq nyvng ge yvmvyah namoq yaunos bos joq shih, ge.
1 Ngos namoq lyis jyoengh taiq bah, yvng khom mha khomh cho yah ma wvng, gohcho yah dyvm wvng soeu ka khauh soeu, khyanktau nghuot. 2 Khomh cho yah wvng soeu ka yvng yoeuh soeu nghuot. 3 Khomh zungh soeu eq hauh soeu lhyi ka gyangh phank dyei; yvng eq nyah thwe gyo las, nyang gas nyah yvng lyis nyings yoeus las nghe pheh gyangh shwih thuq loh. 4 Nyah yvng lyis shwih thuq lho lha, yvng jens dah xik pheh loh yvmvyah, yvng eq nyah thwe seqgyo las nyah thang mha chank loh. 5 Dius boengh dah thwe lhyi ka, yvng jens ma shoeuq yvmvyah, hauh soeu thang mha ma chank loh, dvtsain phang loh, ge. 6 Yesu gas hauh dangtoeuq nyamoq lyis taiq laus eq, nyang chah cho taiq nyeis yvlyis nyamoq ma seq gyo. 7 Housoeh yvmvyah Yesu nyamoq lyis doms taiq. Ngos namoq lyis jyoengh taiq bah, Ngos gas yvng jens dah khomh nghuot. 8 Ngah xik lyis los bang dvnganh gas khauh bang, khyanktau jens dvtsain nghuot. Yvng eq nyamoq dah dang ma tsain gyo dyei. 9 Ngos gas khomh nghuot: ngos masyah wvng soeu ka khyuot yoeus zis xauh das; thuq wvng yoh kuot las katjang nyvng das. 10 Khauh soeu ka khauh das, sat das, mhont das zis ma nghuot lyis gas ma los. Ngos gas, nyamoq kang yoh las magons magoh dyingh bas jungh, oen dvlyih. 11 Ngos gas gis dah yvng yoeuh soeu nghuot: gis dah yvng yoeuh soeu ka yvng xiklyis nyah kang yoh dyei. 12 Nghuot laus eq yvng lyis sain dah yvng yoeuh soeu ma nghuot, uhkung dvnghuot lyis gas, womkhuih los zis nyvng lyis, yvng lyis toh khoq las phang loh. Womkhuih eq yvng lyis ngat zo las khat sanh tyamp. 13 Hauh soeu ka uhkung dvnghuot yvmvyah yvng xiklyis ma chiq dyei, phang khoq. 14 Ngos gas gis dah yvng yoeuh soeu nghuot. Ngos gas ngah yvng lyis seq las ngah yvng eq ngos lyis seq. 15 Uwus gas ngos lyis seq las ngos eq Uwus lyis seq. Housoeh yvmvyah ngah yvng xiklyis ngah kang dyei tyamp. 16 Haih phung mha ma bos dah yvng gohtoeu eq ngos yoh shih: hauh bang eq ngah thwe lhyi gyo las, nyamoq lyis ngos shwih tsainh las, yvng phung dvkoeuq, yvng yoeuh soeu dvyuk kyingh bweh das. 17 Housoeh las ngos gas ngah kang lhyi doms xauh yoeus bas jungh, oen kang kyauh tyamp yvmvyah, ngah Uwus ngos lyis jyetdap. 18 Ngah kang lhyi hank eq ma yoh yoeus tyamp: ngah ehnyet yah ngvnyang dvkyauh tyamp: kyauh tyamp das yomsoq yahge doms xauh yoeus das yomsoq ngvnyang yoh. Hauh tyingtoh dang gas ngah Uwus jyank masyah ngos yoh toh, ge. 19 Hauh dang gvng mas Yuda jens gang loh das cho doms thuq los. 20 nyamoq nyoshoq moq taiq, Nyang yius wvng las huonh nyeis: chamus nyah dang gyo nyeis goh lah, ge. 21 Dvyhamh gas, Nyah dang gas yius wvng soeu dah dang ma nghuot: yius gas nyoqjet soeu dah nyoq lyis yoh phank dyei das lah! ge. 22 Gvshih Yerusalem mas Yhenmuh Kyauh pwe nghuot. Hauh yoq gas cungh nghuot. 23 Yesu gas yhenmuh Solomon dah wumuk thang mha suh loh. 24 Housoeh Yuda jens nyang lyis khyam nyang los nyei zis gas, Nvng kha nyhank jweh shoq ngamoq lyis khamkhvv nhang das lah, ge. 25 Yesu nyamoq lyis phuk taiq zis gas, Ngos namoq lyis taiq kyoh goeus, namoq nyang ma tsain jingh dvmus. Ngah Uwus dah nyings yah ngos kuot dah muh gas ngah cho kanghjyoeng kat nyeis. 26 Nghuot laus eq ngos namoq lyis taiq toh zis yah dvyhangteh, namoq gas ngah yvng ma tsain nghuot las ma tsain jingh. 27 Ngah yvng jens gas ngah thwe lhyi gyo las, ngah thang mha chank, ngos eq nyamoq lyis seq. 28 Ngos nyamoq lyis vcaiq vto kang dyei toh las, nyamoq khanhamp eq dyoqbis xauh das zis ma nghuot. Ngah loq masyah hank eq ma yoh lhuot yoeus das. 29 Nyamoq lyis ngah loq mas kyauh toh dah ngah Uwus gas, dvnganh thoq mas zes kuh nyeis yvmvyah, ngah Uwus loq masyah nyamoq lyis hank eq yoh lhuot yoeus das zis ma nghuot. 30 Ngos yahge ngah Uwus gas dvyuk dvnghuot. 31 Hauh uhlyis Yuda jens gas nyang lyis doeuh das ge lukgoq doms tsain kui. 32 Yesu nyamoq lyis phuk taiq zis gas, Ngah Uwus jyank masyah gis dah muh nyoshoq ngos namoq lyis chixoeuq goeus. Hauh muh mas khakoeuq gvng mas ngos lyis lukgoq yah doeuh das lah, ge. 33 Yuda jens nyang lyis phuk taiq zis gas, Gis dah muh gvng mas nvng lyis doeuh das zis ma nghuot, loeusmus soqzo thang lhyi dius dvnghuot zis nvnyang gungs lyis Mangso kuot gvng mas doeuh das zis dvnghuot, ge. 34 Yesu nyamoq lyis phuk taiq zis gas, Namoq gas mangso jens nghuot nyeis oen ngos taiq, ge namoq dah Lyi mas lhaih toh ma nghuot lhyeh? 35 Mangso dang xauh yoeus bang lyis namoq gas, mangso jens ge taiq toh las, lhaihtoh dang lyis ma gis lhoq thyoq lyis gas, 36 Ngah Uwus gyingshang nhang lha haih mungkvn mas nhang kat zis xauh soeu, ngos gas Mangso dah Lo nghuot oen taiq gvng mas hauh soeu lhyi, Nvng loeusmus soqzo oen lha gis taiq das lhyeh? 37 Ngos ngah Uwus dah muh ma kuot nghuot lyis gas, ngos lyis vjingh goh. 38 Hauh muh ngos kuot nghuot lyis gas, ngos lyis ma loms laus eq, ngos mas ngah Uwus bos las, ngah Uwus mas ngos bos zis lyis namoq seq las lomsjingh bas jungh, hauh muh lyis lomsjingh nyeis geh, ge. 39 Housoeh yvmvyah nyang lyis nyhik das zis nyamoq doms xo laus eq, nyang gas nyamoq loq masyah luiq loh. 40 Hauh thang lyis Yesu gas Yohan jeisnyhop dyei dah joqyos, Yodan lvng thyitvp pheh goeu e lha houmha nyeis. 41 Dius nyoshoq moq nyah jyank mas jweh los las taiq zis gas, Yohan gas vlho cha ma chixoeuq hauh soeu cho Yohan taiq zis dvnganh jus, ge. 42 Houmha dius nyoshoq moq Yesu lyis lomsjingh.
1 Mari yahge nyah vbi Matha nyeis dah Bethani wukhau mha Lazaru ge soeu nos nyeis. 2 Hauh Mari gas Yhensain lhyi mura huot kat dyei las khyei lhyi nyah cam yah buot dyei soeu nghuot. Hau nos soeu Lazaru gas nyah mungs nghuot. 3 Housoeh las hauh vbi vnoeuh nhaiqtang, nyah jyank mas taiq nhang kat zis gas, Yhensain eh, nvng jyetdap soeu nos nyeis, ge. 4 Yesu gas hauh dang xauhgyo lyis nyang taiq zis gas, Haih nos gas shei nos nos zis ma nghuot: hei mhayah Mangso dah phunk xiklyis nghuot las, Mangso dah Lo masyah yoh chunghtoq das xiklyis bweh los cho nghuot, ge. 5 Yesu gas Matha, nyah vnoeuh yahge Lazaru lyis jyetdap. 6 Lazaru nos nyeis cho xauhgyo lyis, nyang nyeis yvmas aiq nyeih thoeng khoq shih. 7 Hauh thang lhyi nyah changlo jens lyis taiq zis gas, Yuda mau pheh doms loh goh, ge. 8 Nyah changlo jens nyang lyis taiq zis gas, Svra eh, Yuda jens gvshih eq lukgoq yah doeuh sat das ge xo nyeis lyis, houmha doms loh shih das lah, ge. 9 Yesu phuk taiq zis gas, Dvnyeih lyis dvci aiq shishenh bos ma nghuot lah? Nyeih lyis suh e soeu ka haih mungkvn dah bvng zis nyvng las khyeiuh ma thungh. 10 Nyenh lyis suh e soeu ka, nyang mas bvng zis ma bos yvmvyah, khyeiuh seq thungh, ge. 11 Nyang hauh goeu lyis dye taiq thang lhyi, nyamoq lyis taiq zis gas, Yah dyenschangh phoq Lazaru yhet joq: nyang lyis nhauh toq das xiklyis ngos houmha e das, ge. 12 Nyah changlo jens nyang lyis taiq zis gas, Yhensain eh, nyang yhet muih joq dvnghuot lyis gas gis los das, ge. 13 Yesu gas Lazaru shei goeus cho taiq kyoh nyeis lyis eq, nyamoq gas yhet zis lyis dvtaiq das, ge tsain nghamh. 14 Housoeh las Yesu gas nyamoq lyis, Lazaru shei goeus, ge debangh taiq. 15 Nyamoq yoh lomsjingh das xiklyis ngos houmha ma nyeis jus yvmvyah, namoq dah cho ngos gaus nyeis. Nghuot laus eq gvshih houmha tsain e goh, ge. 16 Didimu ge dah Thoma gas, Nyang yah dvgeh bos shei das zis yang eq loh goh, ge nyah changlo changh jens lyis taiq. 17 Yesu jweh lyis, Lazaru lyis lopkhyung mha nyei nyeih toh goeus zis nyvng. 18 Bethani wukhau ka Yerusalem wus yah aiq main ko dvkyo joq yvmvyah, 19 mungs chithyuk dah vbi vnoeuh vzomh, Matha yahge Mari lyis nhaiqtaink das ge Yuda dius jens nyoshoq moq los nyeis. 20 Yesu jweh los cho Matha xauhgyo yah dvyih, nyang lyis zes das ge e loh. Mari gas yhen mha tsung toh khoq shih. 21 Hauh uhlyis Matha gas, Yhensain eh, nvng heimha dvnyeis ya ngah mungs ma shei das zis: 22 gvshih laus eq, Mangso jyank mas nvng dung ya dung yvlyis Mangso nvng lyis dyei das zis ngos seq, ge Yesu lyis lhom taiq kyoh. 23 Yesu nyang lyis taiq zis gas, Nah mungs doms toq das, ge. 24 Matha nyang lyis taiq zis gas, Thang thank doms toq dah buisnyeis lyis nyang eq dwis toq das zis gas ngos seq, ge. 25 Yesu nyang lyis taiq zis gas, Ngos gas dwis toq cho yahge kang nghuot. Ngos lyis lomsjingh soeu ka, nyang shei laus eq kang dwis das. 26 Hank laus eq kang dwis nyeis las ngos lyis lomsjingh soeu ka khanhamp eq shei das zis ma nghuot: nvng haih zis lyis vjingh lah, ge. 27 Matha nyang lyis taiq zis gas, Nghuot goeus Yhensain eh, nvng gas haih mungkvn mas jweh lyih, Mangso dah Lo Khristu nghuot zis lyis ngos jingh, ge. 28 Nyang housoeh taiq lho lha, nyah vnoeuh Mari lyis loh gauh lui las, Svra jweh los goeus, nvng lyis lui nyeis, ge. 29 Mari hauh dang xauhgyo yah dvyih lvnyap toq las Yesu jyank pheh e loh. 30 Yesu gas wukhau mha ma jweh los shih: Matha nyang yah xauhgoh yvmas nyeis khoq. 31 Housoeh yhen mha Mari lyis nhaiqtaink dyei dah Yuda jens gas, Mari lvnyap toq thuq loh zis nyvng las nyamoq nyah thang mha chank e lha, Nyang lop mas e ngaus bah ge soh bos, tsain ge. 32 Mari gas Yesu nyeis dah joqyos mas jweh las nyang lyis nyvng lyis, nyah khyeiyang mas dupaiq las taiq zis gas, Yhensain eh, nvng heimha dvnyeis ya ngah mungs ma shei das zis, ge. 33 Mari ngaus las nyah thang mha chank lyih dah Yuda jens eq ngaus zis lyis Yesu nyvng lyis, nyah dyos mas nhaiqngis zis yah ehnyet nyo nyeis las, 34 nyang lyis khamha nyhop toh lah, ge nyei. Nyah zomh taiq zis gas, Yhensain eh, lyih yoeuh aq, ge. 35 Yesu ngaus. 36 Housoeh las Yuda jens gas, Yoeuh aq, nyang hauh soeu lhyi kha iq jyetdap, ge. 37 Tsai dvyhamh taiq zis gas, Nyoqjet soeu lhyi nyoq yoh phank dyei dah haih soeu ka, Lazaru lyis eq ma shei das khyvlyis ma yoh kuot das lhyeh, ge. 38 Housoeh las Yesu gas nyah ehnyet mas nhaiq doms ngis zis yah lop pheh e loh. Hauh lop gas lukkhyung nghuot las lukzains yah cheiq toh. 39 Yesu taiq zis gas, Hauh luk toeu tyamp geh, ge. Shei soeu dah nhamhmuh Matha taiq zis gas, Yhensain eh, gvshih gas nvm hah das, nyang shei zis nyei nyeih bos goeus, ge. 40 Yesu gas, Nvng lomsjingh lyis gas, Mangso dah phunk xauh nyvng das oen ngos taiq toh goeus ma nghuot lhyeh, ge. 41 Housoeh las nyamoq gas hau mvng toh yvmas dah luk lyis toeu tyamp. Hauh uhlyis Yesu gas maukhung mha nghank yoeuh las, Uwus eh, nvng ngah dang gyo dyei yvmvyah ngos nvng lyis chungh. 42 Nvng vjangh ngah dang gyo dyei yvlyis ngos seq. Nghuot laus eq nvng ngos lyis nhang kat goeus zis gas, haih vyvm vwi mas dah dius jens lomsjingh bas jungh, oen ngos taiq zis nghuot, ge. 43 Housoeh dye taiq thang lhyi, Lazaru eh, thuq lyih aq, ge thwe zainsmuh yah kaiq kat. 44 Hauh uhlyis shei goeus soeu ka, nyah khyei nyah loq mas misseh lyet las, nyoqnho mha eq shuhkyenh lyet zis thuq lyih. Yesu nyamoq lyis taiq zis gas, Nyang lyis phui kat geh, ge. 45 Housoeh las Mari jyank mas nhaiqtaink lyih bang Yuda jens nyoshoq moq Yesu kuot zis lyis nyvng las nyang lyis tsain lomsjingh. 46 Dvyhamh gas Pharishe moq jyank mas loh las, Yesu kuot cho lhyi tsain taiq kyoh. 47 Housoeh las Pharishe moq yahge phudyei uhjyung jens gas, hauh nhaiqbos huom khi tsainh las taiq zis gas, Yang cha kuot das au lhyeh? Hauh soeu ka vlho nyoshoq chixoeuq nyeis. 48 Nyang lyis heisoeh dvnyhei toh lyis gas dius dvnganh nyang lyis dye tsain lomsjingh das las, Roma dius jens lyih las yah joqyos, yah vnyau lyis lhuot yoeus loh das, ge. 49 Nghuot laus eq nyamoq mas hauh zvnyo dah Phudyei Zainsmuh Kayapa ge vyuk taiq zis gas, Namoq cha ma seq. 50 Dius dvnyau gonh dyoqbis zis ma xauh shoq, haih vnyau xiklyis dius dvyuk shei kham lhyi yah xiklyis shonsi das yvlyis namoq ma nghamh yoeuh nyvng, ge. 51 Dang hauh zis gas nyah ehnyet yah nyang taiq zis ma nghuot: hauh zvn lyis Phudyei Zainsmuh nghuot yvmvyah, Yesu gas vnyau xiklyis shei kham chah das, ge pe zis nghuot. 52 Hauh vnyau xiklyis kyingh ma nghuot, joqyos khyiq khanghmuh mas dyos joq, Mangso dah lo jens lyis tsain shwih tsainh das xiklyis shei kham chah das, ge zis nghuot. 53 Hauh nyeihyo masyah nyang lyis sat das cho, nyamoq joeui da nyeis. 54 Housoeh las Yesu gas Yuda jens dah xikkhonh mas debangh ma suh xoeuq, hou mhayah thuq las mhanhdyvp yvm, Ephraim wukhau mha nyah changlo jens yah dvgeh nyeis. 55 Gvshih Yuda jens dah Lhuiq Kat Pwe ni los nyeis las, dius nyoshoq moq pwe ma jweh shih lyis, vsainnyang gungs cheihshang das xiklyis wukhau mhayah Yerusalem wugungs pheh tsain doq loh. 56 Nyamoq gas Yesu lyis xo lha, Yhenmuh mas yap las dvyuk yah dvyuk nyei goh zis gas, Namoq khasoeh nghamh goh? Nyang haih pwe mha ma los das lhyeh, ge. 57 Hauh uhlyis phudyei uhjyung jens yahge Pharishe moq gas, nyang lyis yoh yoeus shoq, Hank laus eq nyang nyeis joqyos seq lyis gas taiq kyoh chah, ge las vmingh dyei toh.
1 Lhuiq Kat Pwe jweh das zis khyuk nyeih chah shih lyis, shei masyah dwis los nhang dah Lazaru nyeis joqyos Bethani mas jweh e. 2 Nyamoq gas nyang lyis nyenhcon tsain lhom tsoh langh yvmas, Matha gas wom bos dwis tsoh nyeis. Lazaru gas nyang yah tsung lha wom zo bang mas bos. 3 Hauh uhlyis Mari gas phauhdap dah mura nadu coeu gyingh kyatthah 30 yoeus las, Yesu dah khyei mha juot lho lha nyah cam yah buot dyei. Hauh nadu coeu ka dvyhen khau yah nhoenk toh. 4 Housoeh nyah changlo dvyuk nghuot las nyang lyis phanhlyen das dah, Simon dah lo Yudas Iskarot taiq zis gas, 5 Hau nadu coeu lhyi ngwis somhxo yah ungh las, nyungs bang lyis chamus ma gvm dyei, ge. 6 Nyang housoeh ge zis gas nyungs bang xiklyis nghamh dyei las taiq zis ma nghuot: nyang gas ngwis thung chi soeu nghuot las, kat toh dah ngwis masyah gyangh lap zo dah khauh soeu nghuot las taiq zis dvnghuot. 7 Housoeh las Yesu taiq zis gas, Nyang kuot zis nghuot goeus jungh, hauh zis gas ngos lyis nyhop dah buisnyeis xiklyis nghuot. 8 Nyungs bang gas namoq yah vjangh dvgeh nyeis: ngos gas namoq yah vjangh ma nyeis, ge. 9 Yesu houmha nyeis zis lyis Yuda jens nyoshoq moq seq: nyamoq lyih zis gas, Yesu lyis kyingh nyvng mes las ma nghuot, shei masyah nyang dwis los nhang dah Lazaru lyis eq nyvng mes las nghuot. 10 Housoeh las phudyei uhjyung jens gas, Lazaru lyis eq sat das zis tsain xamgoh nyeis. 11 Khasoeh ge lyis nyah cho gvng mas, Yuda nyoshoq moq tsain thuq loh las Yesu lyis tsain lomsjingh goeus. 12 Hauh thang lhyi nyeihyo Yesu gas Yerusalem mas los nyeis zis lyis, hauh pwe mha jweh nyeis dah moqjens xauhgyo lyis, 13 nyamoq gas dyoms ko zan chi lha nyang lyis zes das xiklyis thuq los uhjyangh kaiq las, Hosana! Yhensain nyings mas jweh los soeu, Israel Hwankti ka ngelhoq, ge. 14 Yesu gas mauhlyihzoe lo nyvng las ji. Hauh zis gas lhaihtoh dang mas: 15 Zion lonyi eh, vgyuk, yoeuh aq nah hwankti ka mauhlyihzoe lo ji las jweh los nyeis, ge zis yah dvyhangteh nghuot. 16 Hauh cho lhyi nyah changlo jens gas vsaiq yoq lyis ma seqgyo. Nghuot laus eq Yesu gas phunk lyis chungh zis xauh thang lhyi, nyang lyis toeuq las lhaih toh zis lyis eq, nyamoq soh. 17 Hauh cho bweh zis gas, Lazaru lyis lop masyah lui las, shei masyah lhoeu toq yoeus uhlyis nyang yah dvgeh nyeis dah moqjens yah kanghjyoeng kat dyei. 18 Hauh cho gvng mas moqjens gas nyang lyis e tsain zes zis nghuot. Khasoeh ge lyis nyang kuot vlho lhyi nyamoq xauhgyo goeus. 19 Housoeh las Pharishe jens nyamoq nyang changh taiq goh zis gas, Namoq khasoeh eq ma yoh kuot lo zis vsoh goh lah? Yoeuh aq, jyoengh nyang dvmau gonh bang nyah thang mha dye chank loh goeus, ge. 20 Haih pwe mha shvmanh dung das zis doq los bang mas Heleni eq dvyhamh bos. 21 Hauh bang gas, Galile mau, Betsaida wugungs dius Philip jyank mas e lha taiq zis gas, Nhaiqbos eh, ngamoq gas Yesu lyis nyvng mes, ge. 22 Philip gas Andre lyis taiq kyoh las, Andre yahge Philip gas Yesu lyis e taiq kyoh. 23 Yesu nyamoq lyis phuk taiq zis gas Cangsoeu Lo dah phunk lyis chungh das shishenh jweh los nyeis. 24 Namoq lyis ngos jyoengh taiq zis gas, Gukchvp gas nyeisjvng mas gyoh las ma dyoq tyamp lyis gas dvkoeuq kyingh dvnghuot joq: shei tyamp lyis gas vshih nyoshoq shih los. 25 Vsainnyang kang lhyi yu soeu ka kang som das: haih mungkvn mas vsainnyang kang lhyi hoeng soeu ka vcaiq vto kang xauh yoeus shoq, vsainnyang kang lhyi yoh tsomh toh das. 26 Ngos lyis phuqsoe soeu hank laus eq ngah thang mha chank bas jungh; ngos nyeis jang mas ngah jyeidwis eq nyeis das. Ngos lyis phuqsoe soeu nghuot lyis gas, ngah Uwus hauh soeu lhyi chungh das. 27 Gvshih ngos ehnyet nyo nyeis: ngos cha taiq das lah? Uwus eh, ngos lyis lhuiq kat aq, nghuot laus eq haih cho gvng mas ngos haih shishenh mas jweh nyeis. 28 Uwus eh, nah nyings lyis chungh aq ge. Hauh uhlyis maukhung mha dah thwe ka, Ngos chungh goeus, chungh shih das, ge taiq thuq los. 29 Hauh joqyos mas yap huom joq bang, hauh cho xauhgyo bang gas, Maujau jau nyeis, ge. Dvyhamh bang gas, Nyang lyis loeuswons soeu taiq nyeis, tsain ge. 30 Yesu phuk taiq zis gas, Thwe haih zis gas ngah xiklyis nyings thuq los zis ma nghuot, namoq xiklyis dvnghuot. 31 Haih mungkvn lyis soetuon zis gas gvshih nghuot: haih mungkvn zau lyis khat tyamp das zis gas gvshih nghuot. 32 Ngos gas nyeisjvng masyah toqh kat zis xauh goeus ya, dius dvnganh lyis ngah shot pheh lang yoeus das, ge. 33 Housoeh ge zis gas nyang khasoeh shei kham das vlho chixoeuq uhlyis yah taiq zis nghuot. 34 Moqjens nyang lyis phuk taiq zis gas, Khristu gas vcaiq vto goeng joq das ge las Lyi mas bos zis dvxauhgyo ku. Housoeh dvnghuot zis nvng gas, Cangsoeu Lo toqh kat zis xauh das, ge zis gas cha ge zis nghuot lah, cangsoeu Lo gas hank nghuot lah, ge. 35 Yesu nyamoq lyis taiq zis gas, Haih bvng zis gas namoq mas dvsoq dvnyeis lo das; Hau chuot zis gas namoq lyis ma chank duons bas jungh, namoq mas bvng zis joq shih lyis suh e geh; chuot yvmas suh e soeu ka vsainnyang kha pheh loh zis eq ma seq. 36 Namoq gas bvng nyeis shih lyis bvng dah lo jens yoh bweh bas jungh, bvng zis lyis lomsjingh nyeis geh, ge. Yesu haih dang dye taiq thuq las nyamoq jyank masyah gang dyuk loh. 37 Heinyhoq dah yomsoq muh nyamoq xikkhonh mas kuot xoeuq laus eq, nyamoq gas nyang lyis ma lomsjingh. 38 Hauh zis gas, Yhensain eh, ngamoq loeus lyis hank lomsjingh lah? Yhensain ka nyah yomsoq hank lyis chixoeuq ku lah, ge lvpe Esaia taiq dah dang nyuk los das xiklyis nghuot. 39 Housoeh yvmvyah nyamoq gas nyang lyis ma lomsjingh: Khasoeh ge lyis, Esaia doms taiq zis gas, 40 Nyamoq nyoq ma nyvng, ehnyet mas eq ma seq gyo, nhaiqlom ma thaiq las ngos nyamoq lyis lhoq gis dyei zis ma xauh bas jungh, ge nyang nyamoq dah nyoq lyis jet nhang, nhaiqlom lyis eq than nhang, ge. 41 Esaia gas nyah phunk lyis nyvng las nyah cho housoeh taiq zis nghuot. 42 Housoeh ge laus eq guon bang yangh nyoshoq moq nyang lyis lomsjingh. Nghuot laus eq Pharishe jens yah nyamoq lyis lyi jungs masyah khat thuq das zis chiq las nyamoq gas nyang lyis ma rhen. 43 Khasoeh ge lyis, nyamoq gas Mangso jyank mas dah nyoqnho ngelang yoh das thoq lyis dius jyank mas dah nyoqnho ngelang yoh das zis lyis ngwis. 44 Yesu kaiq las taiq zis gas, Ngos lyis lomsjingh soeu ka, ngos lyis loms zis ma nghuot, ngos lyis nhang kat soeu lhyi lomsjingh zis dvnghuot, ge. 45 Ngos lyis nyvng soeu ka ngos lyis nhang kat soeu lhyi nyvng zis nghuot. 46 Ngos lyis lomsjingh soeu hank laus eq chuot yvmas ma lungh joq bas jungh, oen ngos bvng zis duot las mungkvn mas jweh lyih. 47 Ngah dang xauhgyo las ma lomsjingh soeu hank lyis laus eq ngos soetuon das zis ma nghuot: Khasoeh ge lyis ngos haih mungkvn mas jweh lyih zis gas soetuon das xiklyis ma nghuot, khyuot yoeus das xiklyis dvnghuot. 48 Ngos lyis peq tyamp las ngah dang ma lhom yoeus soeu lhyi soetuon das zis soetuon soeu nyang nyeis. Ngos taiq dah dang mas nyang, thang thank buisnyeis lyis hauh soeu lhyi soetuon das. 49 Ngos gas ngah ehnyet yah taiq zis ma nghuot. Ngos khasoeh jyauh das zis gas ngos lyis nhang kat, ngah Uwus gas ngos lyis tyingtoh dang dyei kat goeus. 50 Nyah tyingtoh dang gas vcaiq vto kang nghuot zis ngos seq. Housoeh yvmvyah ngos taiq ya taiq zis gas, ngah Uwus taiq kat khyvlyis taiq, ge.
1 Gvshih hau Lhuiq Kat Pwe ma jweh shih lyis Yesu gas, haih mungkvn masyah nyah Uwus jyank mas loh das shishenh jweh goeus zis seq. Haih mungkvn mas nyah dius jens lyis nyang jyetdap zis gas mungkvn goms shoq nghuot. 2 Nyenhcon dye zo lyis yius gas Simon dah lo Yudas Iskarot dah ehnyet mas, nyang lyis phanhlyen das joeui dye da las, 3 Nyang gas Mangso jyank masyah los las Mangso jyank mas tauh loh das zis yahge, dvnganh zis lyis Uwus yah nyah loq mas kyauh toh yvlyis nyang seq yvmvyah, 4 wom zo nyeis masyah Nyang toq loh las, nyah dyi khyuot tyamp lho lha buot misseh dvkoeuq thyikdom mas chih toh. 5 Hauh thang lhyi jeislang mas jeis kat yoeus las, changlo jens dah khyei cheih dyei lho lha, nyang chih toh dah misseh yah buot dyei dyei kuot. 6 Nyang Simon Petru jyank mas jweh lyis, Petru nyang lyis taiq zis gas, Yhensain eh, nvng ngah khyei cheih das lah, ge. 7 Yesu nyang lyis phuk taiq zis gas, Ngos kuot cho lhyi nvng gvshih ma seq laus eq thang pheh seq das, ge. 8 Petru gas, Ngah khyei lhyi nvng khanhamp eq ma yoh cheih das, ge. Yesu nyang lyis taiq zis gas, Ngos nvng lyis ma yoh cheih dyei lyis gas nvng ngos yah ma sen, ge. 9 Simon Petru nyang lyis taiq zis gas, Yhensain eh, ngah khyei kyingh ma nghuot, loq yahge uhloms eq cheih dyei aq, ge. 10 Yesu nyang lyis taiq zis gas, Gungs cheih goeus soeu ka khyei mhayah lai las gohtoeu cha cheih chank ma bos lo: hauh soeu dah gungs gonh gas shang joq goeus, namoq eq shang goeus, nghuot laus eq namoq dvnganhmoq gyingshang zis ma nghuot, ge. 11 Khasoeh ge lyis nyang lyis phanhlyen das soeu hank nghuot yvlyis nyang seq toh. Housoeh las, Namoq dvnganh gyingshang zis ma nghuot, ge taiq zis nghuot. 12 Housoeh nyamoq dah khyei dye cheih dyei las, nyah dyi yoeus wuot lho lha doms tsung uhlyis yah nyang nyamoq lyis taiq zis gas, Gvshih namoq lyis ngos kuot cho namoq vseqgyo goh lah? 13 Namoq ngos lyis, Svra ge eq, Yhensain ge eq tsain lui. Houyah dvyhangteh ngos nghuot yvmvyah namoq dah dang eq jus. 14 Housoeh Svra eq, Yhensain eq nghuot joq las ngos yangh namoq dah khyei cheih dyei lyis gas, namoq eq nyang changh nyang dah khyei gis cheih dyei goh. 15 Namoq lyis ngos kuot yhangteh namoq eq chank kuot bas jungh oen, ngos namoq xiklyis yikhyoh toh zis nghuot. 16 Ngos namoq lyis jyoengh taiq bah, jyeidwis gas yhensain thoq lyis zes zis ma nghuot; mang suh soeu eq jyeinhang kat soeu thoq lyis zes zis ma nghuot. 17 Haih cho lhyi namoq seq las, hauh yvlyis chank kuot lyis gas, namoq ngelhoq. 18 Namoq dvnganh lyis toeuq las taiq zis ma nghuot: ngos khyen yoeus bang lyis gas ngos seq: nghuot laus eq, Ngos yah wom zo soeu ka nyah thyvthank lvnhaiq yah ngos lyis thoenk, ge lhaihtoh dang nyuk los das xiklyis nghuot. 19 Hauh cho bweh los uhlyis ngos hauh soeu nghuot zis gas namoq lomsjingh bas jungh oen, ma bweh shih lyis taiq toh. 20 Ngos namoq lyis jyoengh taiq zis gas, Ngos nhang kat soeu lhyi lhom yoeus zis gas ngos lyis lhom yoeus zis nghuot. Ngos lyis lhom yoeus soeu eq ngos lyis nhang kat soeu lhyi lhom yoeus zis nghuot, ge. 21 Yesu gas housoeh ge dye taiq lyis, nyah dyos mas chiqjyen zis yah, Ngos namoq lyis jyoengh taiq bah, namoq mas dvyuk ngos lyis phanhlyen das ge kanghjyoeng kat nyeis. 22 Housoeh las changlo jens gas hank lyis toeuq las taiq zis eq ma seq, khamkhvv lha nyang changh nyang nyei goh nyeis. 23 Hauh uhlyis Yesu jyetdap dah changlo dvyuk gas, Yesu dah sainhkhonh mas nges toh las, 24 Simon Petru gas, Nyang hank lyis toeuq las taiq nyeis lah? Ngamoq lyis taiq kyoh aq, ge nyang lyis vsoh yah nyei. 25 Hauh changlo gas Yesu dah sainhkhonh mas doms lhain nghe lha, Yhensain eh, khayuk nghuot lah, ge nyei. 26 Yesu phuk taiq zis gas, Ngos ohlhyoq dvkoeuq jen las dyei soeu nghuot, ge lho lha hau ohlhyoq dvkoeuq jen las Simon dah lo Yudas Iskarot lyis dyei. 27 Hauh soeu ka ohlhyoq dvnhuot yoeus zo thang lhyi Satan ka nyah jyank mas wvng. Housoeh las Yesu nyang lyis taiq zis gas, Nvng kuot chah muh lvnyap kuot aq, ge. 28 Nyang lyis chamus housoeh taiq zis gas kihgus mas bang hank eq ma seq. 29 Yesu nyang lyis housoeh taiq zis gas, Yudas gas ngwis zom soeu nghuot las, Yesu gas nyang lyis pwe xiklyis yang chi chah zis e wis aq, nghuot ya nyungs bang lyis dvja ja dyei aq, ge soh bos ge nyamoq dvyhamh nghamh. 30 Yudas hauh ohlhyoq dvkoeuq lhom yoeus yah dvyih thuq loh. Hauh shishenh gas nyenhyo nghuot. 31 Hauh soeu thuq loh thang lhyi Yesu gas, Gvshih cangsoeu Lo gas chungh zis xauh nyeis las, Mangso eq nyang mas phunk lyis chungh zis xauh goeus. 32 Mangso ka, nyang mas phunk lyis chungh zis xauh goeus ya, Mangso eq nyang lyis nyang nyang mas phunk lyis chungh zis xauh las, nyang lyis gvshih nyang chungh dyei das. 33 Loshang jens eh, ngos namoq yah dvsoq nyeis shih das: Namoq ngos lyis tsain xo das: ngos loh joqyos mas namoq ma yoh jweh das oen Yuda jens lyis taiq teh, gvshih ngos namoq lyis eq taiq. 34 Housoeh namoq dvyuk yah dvyuk jyetdap goh nyeis geh, oen tyingtoh dang saiq ngos namoq lyis dyei toh. Ngos namoq lyis jyetdap zis yah dvyhangteh, namoq eq nyang changh nyang jyetdap goh nyeis das. 35 Housoeh namoq dvyuk yah dvyuk jyetdap ehnyet bos nyeis lyis gas, namoq ngah changlo jens nghuot nyeis zis gas, dius dvnganh yoh seq los das, ge. 36 Simon Petru nyang lyis taiq, Yhensain eh, nvng khapheh loh lo das lah, ge. Yesu nyang lyis phuk taiq zis gas, Ngos loh das joqyos mas nvng gvshih ma yoh chank das, thang pheh dvyoh chank das, ge. 37 Tsai, Petru gas, Yhensain eh, ngos nvng yah dvgeh gvshih chamus ma yoh chank das lah? Ngos nah xiklyis ngah kang yoh dyei tyamp, ge. 38 Yesu nyang lyis phuk taiq zis gas, Nvng ngah xiklyis nah kang yoh dyei das lhyeh? Ngos nvng lyis jyoengh taiq bah, gyoq ma tuon shih lyis nvng ngos lyis somh lhain he tyamp das, ge.
1 Namoq ehnyet vnyo goh: Mangso lhyi lomsjingh geh, ngos lyis eq lomsjingh geh. 2 Ngah Uwus dah yhen mha joqyos nyoshoq bos: hauh zis ma joq lyis gas, Ma joq oen ngos namoq lyis taiq goeus jvng goeus; khasoeh ge lyis namoq nyhenshang joqyos sont das xiklyis ngos loh das. 3 Ngos loh las namoq xiklyis joqyos sont toh las, ngos nyeis jang mas namoq eq yoh nyeis shoq, ngos doms lyih las namoq lyis ngah jyank mas shwih yoeus das. 4 Ngos loh dah joqyos mas loh das cho namoq seq, ge. 5 Thoma nyang lyis taiq zis gas, Yhensain eh, nvng khapheh loh das zis eq ngamoq ma seq zis, cho khasoeh seq das lah, ge. 6 Yesu nyang lyis taiq zis gas, Ngos gas cho eq, jyoeng zis eq, kang eq nghuot. Ngos masyah ma nghuot lyis gas ngah Uwus jyank mas hank eq ma yoh jweh. 7 Namoq ngos lyis seq goeus lyis gas, ngah Uwus lyis eq seq goeus. Gvshih masyah namoq, nyang lyis seq goeus, nyvng eq tsain nyvng goeus, ge. 8 Philip nyang lyis taiq zis gas, Yhensain eh, ngamoq lyis Uwus Chixoeuq aq, housoeh lyis ngamoq nhaiqtap das, ge. 9 Yesu nyang lyis taiq zis gas, Yuda eh, ngos namoq yah heinyhank nyangh shoq nyeis los goeus lyis eq nvng ngos lyis ma seq lhyeh? Ngos lyis nyvng ku soeu ka Uwus lyis eq nyvng ku goeus. Housoeh lyis, Ngamoq lyis Uwus Chixoeuq aq, oen khasoeh taiq lah? 10 Ngos gas Uwus mas nyeis zis yahge Uwus eq ngos mas nyeis zis lyis nvng ma jingh lhyeh? Ngos namoq lyis taiq dah dang gas ngah ehnyet yah taiq dah dang ma nghuot, ngos mas bos dah ngah Uwus gas, hauh muh lyis nyang kuot nyeis. 11 Ngos gas Uwus mas nyeis zis yahge Uwus gas ngos mas nyeis zis lyis lomsjingh nyeis geh, nghuot ya hauh muh masyah khvlangh ngos lyis lomsjingh geh. 12 Ngos namoq lyis jyoengh taiq bah, ngos lyis lomsjingh soeu ka, ngos kuot dah muh lyis nyang eq yoh kuot das. Hauh thoq lyis zes dah muh eq yoh kuot das: khasoeh ge lyis ngos gas ngah Uwus jyank mas loh das. 13 Housoeh Uwus gas Lo mas phunk yoh chungh shoq, ngah nyings yoeus las namoq cha dung lyis ngos kuot dyei das. 14 Namoq ngah nyings yoeus las ngah jyank mas dvja ja dung lyis ngos kuot dyei das. 15 Namoq ngos lyis jyetdap nghuot lyis gas, ngah tyingtoh dang lyis chank kuot geh. 16 Ngos gas Uwus jyank masyah dung das. Uwus gas namoq yah vcaiq vto nyeis das dah gohtoeu Nhaiqtaink Soeu dvyuk namoq lyis dyei das. 17 Mungkvn gas hau jyoeng dah Dyos lyis ma nyvng ma seq yvmvyah ma tsain lhom yoeus. Namoq gas nyang lyis seq: khasoeh ge lyis nyang gas namoq yah dvgeh nghuot, namoq mas nyeis das. 18 Ngos namoq lyis chauhlo lyis teh she tyamp toh das zis ma nghuot, ngos namoq jyank mas doms lyih das. 19 Dvsoq lyis mungkvn gas ngos lyis ma nyvng kat das. Nghuot laus eq namoq gas ngos lyis nyvng shih das: khasoeh ge lyis ngos dwis nyeis yvmvyah namoq eq dwis nyeis das. 20 Ngos gas ngah Uwus mas nyeis, namoq eq ngos mas nyeis las, ngos eq namoq mas nyeis zis lyis hauh nyeihyo namoq yoh seq das. 21 Ngah tyingtoh dang yoh yoeus las chank kuot soeu ka ngos lyis jyetdap soeu nghuot. Ngos lyis jyetdap soeu lhyi ka ngah Uwus eq jyetdap das. Ngos eq nyang lyis jyetdap zis yah ngvnyang gungs nyang, nyang lyis chixoeuq das, ge. 22 Iskarot ma nghuot dah soeu Yuda nyang lyis taiq zis gas, Yhensain eh, nah gungs nvnyang ngamoq lyis Chixoeuq las mungkvn lyis ma chixoeuq das zis gas chamus lah, ge. 23 Yesu nyang lyis phuk taiq zis gas, Ngos lyis jyetdap soeu nghuot lyis gas, ngah dang lyis chank kuot das: ngah Uwus eq hauh soeu lhyi jyetdap das. Ngamoq gas hauh soeu jyank mas e lha nyang yah dvgeh nyeis das. 24 Ngos lyis ma jyetdap soeu ka, ngos taiq toh dang ma yoh chank: namoq xauhgyo yoeus dah dang gas ngah dang ma nghuot, ngos lyis nhang kat soeu, ngah Uwus dah dang dvnghuot. 25 Ngos namoq yah dvgeh nyeis shih uhlyis ngos namoq lyis haih dang taiq toh. 26 Ngah Uwus ngah nyings masyah nhang kat das dah Nhaiqtaink soeu ge dah Gyingshang Dyos gas, namoq lyis dvnganh yah jyauh las, namoq lyis ngos taiq toh dang dvnganh yah soh nhang das. 27 Nyenstap cho ngos namoq lyis toh toh dyei. Ngah nyenstap zis ngos namoq lyis dyei goeus: mungkvn mas bang dyei yhangteh ngos namoq lyis dyei zis ma nghuot. Namoq ehnyet vnyo goh, gyuk eq vgyuk goh. 28 Ngos loh las namoq jyank mas doms lyih das oen lha, ngos namoq lyis taiq zis gas, namoq xauhgyo goeus. Namoq ngos lyis jyetdap nghuot lyis gas, Uwus jyank mas ngos loh yvmvyah namoq gaus das: khasoeh ge lyis Uwus gas ngah thoq lyis zes kuh. 29 Hauh muh bweh thuq los uhlyis namoq yoh lomsjingh bas jungh oen, ma bweh los shih lyis yah ngos namoq lyis taiq toh. 30 Gvshih masyah ngos namoq yah dang nyangh shoq ma xauh jis goh lo das: khasoeh ge lyis mungkvn zau gas jweh los nyeis. Hauh soeu ngah thoq mas chah yomsoq eq ma bos. 31 Ngos ngah Uwus vmingh dyei zis yah dvyhangteh kuot zis gas, ngos ngah Uwus lyis jyetdap cho mungkvn yoh seq das xiklyis nghuot. Toq geh, hei mhayah loh lo goh, ge.
1 Ngos gas jyoeng dah zvbiq nwis nghuot. Ngah Uwus gas khyam sain nghuot. 2 Ngos mas vshih ma shih dah vko khanghmuh lyis gas, nyang choeu tyamp. Vshih shih dah vko lhyi ka zes shih bas jungh, ge shang kat. 3 Namoq gas, ngos namoq lyis taiq kyoh dah dang gvng mas gvshih yangh shang goeus. 4 Ngos mas dap joq geh, ngos eq namoq mas dap joq das. Zvbiq ko ka zvbiq nwis mas ma dap lyis gas nyang kyingh vshih ma yoh shih zis yah dvyhangteh, namoq eq ngos mas ma dap lyis gas vshih ma yoh shih das. 5 Ngos gas zvbiq nwis nghuot, namoq gas vko tsain nghuot. Ngos mas dap joq las ngos eq hauh soeu mha dap nghuot lyis gas, hauh soeu ka vshih nyoshoq yoh shih los das: khasoeh ge lyis ngos yah gang lyis namoq cha eq ma yoh kuot das. 6 Ngos mas ma dap soeu ka nyhauh loh dah vko lhyi teh doeuh tyamp zis xauh das. Hauh yvlyis dius yah nyi mas khyom kat las ngeh jom tyamp das. 7 Namoq ngos mas dap joq las ngah dang eq namoq mas bos joq lyis gas, namoq dung mes zis dung geh, yoh das. 8 Namoq vshih nyoshoq shih los yvmvyah, ngah Uwus phunk lyis chungh zis xauh las namoq eq ngah changlo duot los das. 9 Uwus gas ngos lyis jyetdap yhangteh ngos eq namoq lyis jyetdap. Ngah jyetdap yvmas nyeis geh. 10 Ngos gas ngah Uwus dah tyingtoh dang chank kuot las, nyah jyetdap yvmas nyeis zis yah dvyhangteh, namoq eq ngah tyingtoh dang chank kuot lyis gas, ngah jyetdap yvmas nyeis das. 11 Ngah dah gaus ehnyet namoq mas bos joq das zis yahge namoq dah gausyis zis dyingh los das xiklyis, haih dang ngos namoq lyis taiq toh. 12 Ngos namoq lyis jyetdap zis yah dvyhangteh namoq nyang changh nyang jyetdap goh nyeis geh. Hauh zis gas ngah tyingtoh dang nghuot. 13 Buisnoms xiklyis nyah kang dyei tyamp shoq jyetdap thoq lyis zes kuh dah jyetdap ehnyet gas hank jyank mas eq ma bos. 14 Namoq ngah tyingtoh dang chank kuot lyis gas, namoq ngah dah buisnoms jens tsain nghuot. 15 Gvshih masyah ngos namoq lyis jyeidwis oen lha ma lui lo das. Khasoeh ge lyis, jyeidwis gas nyah yhensain cha kuot yvlyis ma seq. Nghuot laus eq ngos namoq lyis buisnoms oen lui das: khasoeh ge lyis ngah Uwus jyank masyah ngos xauhgyo zis dvnganh ngos namoq lyis seq nhang goeus. 16 Namoq ngos lyis khyen yoeus zis ma nghuot, namoq lyis ngos dvkhyen yoeus. Housoeh namoq lyis toeuq toh zis gas, namoq thuq loh las vshih shih das xiklyis nghuot las, houka namoq dah vshih joq das nyhenshang nghuot. Hank laus eq namoq ngah nyings masyah Uwus jyank mas dung lyis nyang namoq lyis dyei bas jungh. 17 Namoq dvyuk yah dvyuk jyetdap goh nyeis bas jungh oen ngos namoq lyis haih dang tying toh. 18 Mungkvn namoq lyis hoeng nghuot lyis gas, ngos lyis shih hoeng zis gas seq geh. 19 Namoq mungkvn yah sen bang nghuot lyis gas, mungkvn gas vsainnyang yah sen bang lyis jyetdap. Namoq gas mungkvn yah sen bang ma nghuot, haih mungkvn masyah ngos namoq lyis khyen yoeus yvmvyah, mungkvn gas namoq lyis hoeng. 20 Jyeidwis gas yhensain thoq lyis zes zis ma nghuot oen, ngos namoq lyis taiq dah dang soh nyeis geh. nyamoq ngos lyis shoeuhshih nghuot lyis gas namoq lyis eq shoeuhshih das. Nyamoq ngah dang lyis chank nghuot lyis gas namoq dah dang lyis eq chank das. 21 Nghuot laus eq nyamoq gas ngah nyings gvng mas hauh cho dvnganh namoq lyis kuot das; khasoeh ge lyis ngos lyis nhang kat soeu lhyi nyamoq ma seq. 22 Ngos nyamoq lyis ma lyih taiq kyoh ya, nyamoq yobos ma bos das. Nghuot laus eq gvshih gas nyamoq dah yobos lyis jyamp gus ma bos lo. 23 Ngos lyis hoeng soeu ka ngah Uwus lyis eq hoeng. 24 Gohyuk ma yoh kuot dah muh ngos nyamoq lyis ma kuot nghuot lyis gas nyamoq mas yobos ma bos das. Nghuot laus eq gvshih gas hai kuot dah muh lyis nyamoq nyvng laus eq, nyamoq gas ngos yahge ngah Uwus lyis tsain hoeng. 25 Nghuot laus eq houka soe ma bos yvmas nyamoq ngos lyis hoeng, ge nyamoq Lyi mas lhaihtoh dang nyuk los das xiklyis nghuot. 26 Ngah Uwus jyank masyah ngos nhang kat das, Nhaiqtaink soeu ge dah jyoeng Dyos gas, Uwus jyank masyah thuq los las namoq jyank mas jweh lyis, nyang gas ngah cho kanghjyoeng kat das. 27 Namoq eq cangxeih lyis yah ngos yah dvgeh nyeis goeus yvmvyah, kanghjyoeng yoh kat das.
1 Namoq ehnyet ma dyet bas jungh oen, haih goeu ngos namoq lyis taiq. 2 Nyamoq gas namoq lyis lyi jungs masyah khat thuq tyamp das: jyoengh nyang namoq lyis yoh sat soeu hank laus eq Mangso lhyi phuqsoe dah muh wons nyeis ge nghamh dah shishenh jweh los das. 3 Nyamoq namoq lyis housoeh tsain kuot zis gas, nyamoq gas ngah Uwus lyis eq ma seq, ngos lyis eq ma seq yvmvyah nghuot. 4 Nghuot laus eq shishenh jweh lyis ngos namoq lyis taiq toh zis soh bas jungh oen, haih dang ngos namoq lyis taiq. Xikpheh gas ngos namoq yah dvgeh nyeis shih yvmvyah ngos namoq lyis heisoeh ma taiq ku. 5 Gvshih gas ngos lyis nhang kat soeu jyank mas ngos loh das: namoq gas dvyuk eq ngos lyis, Nvng khapheh loh das lah, ge ma nyei. 6 Nghuot laus eq haih cho ngos namoq lyis taiq kyoh yvmvyah, namoq nhaiqlom mas nhaiqngis zis yah tsain dyingh joq. 7 Heisoeh oen laus eq, ngos namoq lyis jyoeng cho dvtaiq. Ngos loh zis gas namoq xiklyis zes gis cho nghuot: khasoeh ge lyis, ngos ma loh lyis gas hau Nhaiqtaink soeu namoq jyank mas jweh los das zis ma nghuot. Ngos loh khau yah, ngos nyang lyis namoq jyank mas dvyoh nhang kat das. 8 Hauh soeu jweh lyis, nyang gas, yobos cho, dan cho, soetuon cho, mungkvn lyis dede chixoeuq das. 9 Yaunos yoh cho chixoeuq das zis gas, nyamoq ngos lyis ma lomsjingh yvmvyah nghuot. 10 Dan cho chixoeuq das zis gas, ngos ngah Uwus jyank mas loh las namoq ngos lyis ma nyvng lo yvmvyah nghuot. 11 Soetuon cho chixoeuq das zis gas, haih mungkvn zau lyis soetuon goeus yvmvyah nghuot. 12 Ngos namoq lyis taiq khoq das cho nyoshoq bos shih, nghuot laus eq gvshih namoq ma thoq kham yoeus shih. 13 Nghuot laus eq hai jyoeng dah Dyos jweh lyih lyis, nyang gas jyoeng cho dvnganh namoq lyis cho she das. Hauh soeu ka nyah ehnyet yah taiq zis ma nghuot, nghuot laus eq xauhgyo yoeus nyhoq taiq kyoh das. Bweh los das zis lyis nyang namoq lyis chixoeuq das. 14 Nyang ngos lyis chungh das: khasoeh ge lyis, nyang gas ngah jyank masyah lhom yoeus zis lyis namoq lyis taiq kyoh das. 15 Ngah Uwus yoh ya yoh zis gas ngos yoh zis nghuot. Housoeh las nyang ngah jyank masyah yoeus las namoq lyis taiq kyoh das, oen ngos taiq goeus. 16 Dvsoq lho lhyi namoq ngos lyis ma nyvng lo das, dvsoq lho lhyi doms nyvng das: khasoeh ge lyis ngos Uwus jyank mas loh das. 17 Housoeh nyah changlo jens dvyhamh nyang changh nyang taiq goh zis gas, Dvsoq lho lhyi namoq ngos lyis ma tsain nyvng lo das, dvsoq lho lhyi doms nyvng das ge eq, Uwus jyank pheh ngos loh das ge las eq, nyang yang lyis taiq zis gas cha ge dah dang nghuot au lhyeh, ge. 18 Tsai, nyamoq gas, Dvsoq lho lhyi ge taiq zis eq, cha ge dah dang nghuot au lhyeh? Nyang taiq dang lyis yang ma seqgyo, ge. 19 Nyang lyis tsain nyei mes yvlyis Yesu seq las nyang gas, Dvsoq lho lhyi namoq ngos lyis ma nyvng lo das, dvsoq lho lhyi doms nyvng das, oen ngos namoq lyis taiq dang lyis namoq nyang changh nyang tsain nyei goh nyeis goh lhyeh? 20 Ngos namoq lyis jyoengh taiq bah, namoq gas ngausdyeis ngausnhvp yah kuk nyeis uhlyis mungkvn gas gaus nyeis das. Namoq nhaiqkuk nhaiqngis zis xauh laus eq, namoq dah kuk cho ka gaus yvpheh lhain los das. 21 Vmesbih gas lo khoeu das lyis nyah shishenh jweh las nos nyeis; nghuot laus eq lo dye khoeu thang lhyi, haih mungkvn mas dius lo dvyuk khoeu toh goeus yvmvyah, gaus las xik lyis dah nos zis, chiqjyen zis tohnyhik tyamp. 22 Houyah dvyhangteh namoq gvshih nhaiq tsain kuk nyeis. Nghuot laus eq namoq yah ngos doms xauhgoh las, namoq gausyis das. Hau namoq dah gausyis zis lyis hank yoh lhuot yoeus das zis ma nghuot. 23 Hauh buisnyeis lyis namoq ngos lyis cha eq ma nyei chah lo das. Ngos namoq lyis jyoengh taiq bah, ngah nyings masyah Uwus jyank mas dvja ja dung lyis, nyang namoq lyis dyei das. 24 Gvshih jweh shoq namoq ngah nyings yoeus las cha eq ma dung yoeuh ku shih. Namoq dah gausyis cho dyingh nyuk los shoq yoh bas jungh, dung nyeis geh. 25 Haih cho ngos namoq lyis dangtoeuq yah taiq kyoh ku goeus: Dangtoeuq yah ma nghuot nghuot, Uwus dah cho namoq lyis bvng bvng taiq kyoh das shishenh gas jweh los goeus: 26 Hauh buisnyeis lyis namoq ngah nyings yoeus las tsain dung das. Namoq dah xiklyis ngos ngah Uwus jyank mas dung das oen lha ma taiq. 27 Khasoeh ge lyis, namoq ngos lyis jyetdap las ngos gas Uwus jyank masyah los yvlyis namoq lomsjingh yvmvyah Uwus nyang namoq lyis jyetdap. 28 Ngos gas Uwus jyank masyah mungkvn mas jweh los goeus: Tsai, mungkvn lyis tyamp las Uwus jyank mas loh das, ge. 29 Nyah changlo jens nyang lyis taiq zis gas, Yoeuh aq, gvshih gas dangtoeuq yah ma nghuot, nvng bvng bvng taiq goeus: 30 Nvng dvnganh zis seq nyeis zis eq, hank eq nvng lyis cha ma nyei chah zis eq, gvshih ngamoq seq goeus. Housoeh las nvng Mangso jyank masyah jweh lyih zis lyis ngamoq jingh goeus, ge. 31 Yesu phuk taiq zis gas, Namoq gvshih jingh goeus lah? 32 Yoeuh aq, namoq nyang yuk nyang toeu yhen pheh dyos loh das las, ngos lyis kyingh toh khoq das dah shishenh jweh los das. Gvshih nyang jweh joq goeus, nghuot laus eq ngos gas ngvnyang kyingh ma nghuot, Uwus gas ngos yah dvgeh nghuot. 33 Namoq ngos mas nyenstap zis yoh yoeus bas jungh oen, haih dang ngos namoq lyis taiq. Namoq gas mungkvn mas shanghsenh zis tsain xauh das, nghuot laus eq gaus nyeis geh. Ngos gas mungkvn lyis ung tyamp goeus, ge.
1 Yesu hauh dang dye taiq lyis, maukhung mha nghank yoeuh las taiq zis gas, Uwus eh, shishenh jweh goeus. 2 Nvng Lo lyis dyei toh zis dvnganh lyis vcaiq vto kang dyei das xiklyis suihshoh bos bang dvnganh thoq mas guon das vmingh dyei toh zis yah dvyhangteh, nah Lo gas nah phunk lyis chungh bas jungh, nah Lo dah phunk lyis chungh dyei aq. 3 Dvyuk kyingh nghuot las jyoeng dah Mangso nvng lyis eq, nvng nhang kat dah Yesu Khristu lyis eq, nyamoq yoh seq yoeus zis gas, vcaiq vto kang nghuot. 4 Ngos wons wuq das xiklyis nvng ngos lyis kyauh toh dah muhzoh lyis ngos dye wons wuq goeus yvmvyah, nyeisjvng thoq mas nah phunk lyis chungh dyei goeus. 5 Uwus eh, mungkvn ma joq shih lyis, nvng yah dvgeh ngos yoh joq dah phunk yah gvshih ngos lyis phunk chungh dyei aq. 6 Mungkvn mas nvng ngos lyis kyauh toh dah dius jens lyis ngos nah nyings chixoeuq goeus. Nyamoq gas nah dius jens nghuot las, nvng ngos lyis nyamoq dyei toh. Nyamoq nah dang tsain chank kuot goeus. 7 Nvng ngos lyis dyei ya dyei zis dvnganh nah jyank masyah nghuot zis gas gvshih nyamoq seq goeus. 8 Khasoeh ge lyis nvng ngos lyis dyei kat dang, ngos nyamoq lyis dyei goeus las, nyamoq eq hauh yvlyis lhom yoeus goeus yvmvyah, nah jyank masyah ngos lyih zis nyamoq vlhomuh seq las, nvng ngos lyis nhang kat zis lyis eq lomsjingh goeus. 9 Ngos nyamoq dah xiklyis dung: mungkvn xiklyis dung zis ma nghuot; nvng ngos lyis dyei bang xiklyis dvdung. Khasoeh ge lyis nyamoq gas nah dius tsain nghuot. 10 Ngos yoh ya yoh zis gas nah zis nghuot; nvng yoh ya yoh zis eq ngah zis nghuot las, ngah phunk gas nyamoq mas chungh zis xauh goeus. 11 Gvshih masyah ngos gas mungkvn mas ma nyeis lo: nghuot laus eq haih moq gas mungkvn mas nyeis nyeis das bang nghuot, ngos gas nah jyank mas los das zis nghuot. Gyingshang dah Uwus eh, yamoq gas dvkoeuq kyingh dvnghuot teh, haih bang nghuot nyeis bas jungh. Nvng ngos lyis dyei bang lyis nah nyings mas goeng toenk nhang toh aq. 12 Haih mungkvn mas ngos nyamoq yah dvgeh nyeis uhlyis, nvng ngos lyis dyei bang mas nah nyings goeng toenk nhang lha, nyamoq lyis gomh kat goeus. Nyamoq mas dyoqbis soeu dah lo masyah lai las gohyuk gas dvyuk eq ma dyoq ma bis loh zis nghuot. Hauh soeu dyoqbis loh zis gas lhaihtoh dang nyuk los das xiklyis nghuot. 13 Gvshih gas ngos nah jyank mas los das las, ngah gausyis zis gas nyamoq mas nyuk los bas jungh oen lha, mungkvn mas ngos haih dang taiq toh. 14 Nah dang ngos nyamoq lyis dyei toh goeus: ngos gas mungkvn mas zis ma nghuot zis yah dvyhangteh, hauh moq eq mungkvn mas zis ma nghuot yvmvyah mungkvn gas nyamoq lyis hoeng. 15 Haih bang lyis mungkvn masyah tyungh yoeus das xiklyis ngos dung nyeis zis ma nghuot, ma gis ma shop yvmvyah gomh das xiklyis ngos dvdung. 16 Ngos gas mungkvn mas zis ma nghuot zis yah dvyhangteh, nyamoq eq mungkvn mas zis ma tsain nghuot. 17 Nah dang gas jyoeng zis nghuot, nah dah jyoeng cho mha nyamoq lyis gyingshang nhang aq. 18 Nvng ngos lyis mungkvn mas nhang kat yhangteh ngos eq nyamoq lyis mungkvn mas tsain nhang kat. 19 Nyamoq nyang jyoeng cho mha gyingshang nyeis bas jungh oen lha, ngos gas nyamoq xiklyis ngvnyang gungs ngvnyang gyingshang nhang toh goeus. 20 Haih bang xiklyis kyingh ngos dung zis ma nghuot: nyamoq taiq kyoh dah dang gvng masyah ngos lyis lomsjingh los das bang xiklyis eq ngos dung. 21 Uwus eh, nvng gas ngos mas nghuot las, ngos eq nvng mas nghuot zis yah dvyhangteh hauh bang dvnganhmoq gas yamoq mas dvkoeuq kyingh duot las, nvng ngos lyis nhang kat cho lhyi haih mungkvn yoh lomsjingh das xiklyis nyamoq dvnganhmoq gas dvkoeuq kyingh duot los bas jungh. 22 Yang gas dvkoeuq kyingh dvnghuot teh nyamoq eq dvkoeuq kyingh bweh las, nvng ngos lyis dyei toh dah nyoqnho ngelang gas ngos nyamoq lyis dyei toh. 23 Ngos gas nyamoq mas nghuot las, nvng gas ngos mas nghuot yhangteh, nyamoq lyis eq dvkoeuq kyingh mas goeng toenk zis xauh las, nvng ngos lyis jyetdap teh nyamoq lyis eq jyetdap las, nvng ngos lyis nhang kat zis haih mungkvn yoh seq bas jungh. 24 Uwus eh, mungkvn ma joq shih lyis yah nvng ngos lyis jyetdap nyeis yvmvyah, nvng ngos lyis dyei toh phunk lyis, nvng ngos lyis dyei toh bang eq yoh nyvng bas jungh. Ngos nyeis joqyos mas nyamoq ngos yah dvgeh yoh nyeis das xiklyis ngos o mes. 25 Dan dah Uwus eh, mungkvn gas nvng lyis ma seq laus eq, ngos gas seq nyeis. Nvng ngos lyis nhang kat zis gas haih bang eq seq. 26 Nvng ngos lyis jyetdap ehnyet gas, nyamoq jyank mas joq joq bas jungh, oen eq, ngos nyamoq jyank mas vjangh nyeis nyeis das xiklyis eq, nah nyings ngos nyamoq lyis seq nhang goeus las, seq nhang nyeis das, ge.
1 Yesu hauh dang dye taiq lyis, nyah changlo jens yah dvgeh thuq las, Kidron lvng thyitvp pheh tsain goeu e. Hauh yvmas khyam bos las, nyang gas changlo jens yah houmha wvng loh. 2 Yesu gas nyah changlo jens yah dvgeh houmha nyoshoq lhain e ku lha, nyang lyis phanhlyen dah Yudas eq hauh joqyos lyis seq toh. 3 Housoeh las Yudas gas jes dvphung yah, phudyei bang yahge Pharishe moq jyank masyah jeszau jens lyis xauh shwih lho lhyi, nyibung, nyiduk, jeszis chi lha hou pheh tsain e loh. 4 Yesu gas nyang mas bweh los nyeis dah cho dvnganh seq yvmvyah, e lha nyamoq lyis taiq zis gas, Namoq hank lyis xo goh lah, ge. 5 Nyamoq, nyang lyis phuk taiq zis gas, Nazaret Yesu lyis xo, ge. Nyang nyamoq lyis taiq zis gas, Ngos gas hauh soeu nghuot, ge. Nyang lyis phanhlyen dah Yudas eq hauh bang yah dvgeh yap joq. 6 Nyang nyamoq lyis, Ngos hauh soeu nghuot goeus ge las taiq yah dvyih hauh bang gas nungsjik jik las nyeisjvng mas lains loh. 7 Nyang gas, Hank lyis xo goh lah, ge nyamoq lyis doms nyei. Nyamoq gas, Nazaret Yesu lyis xo, ge doms tsain taiq. 8 Yesu phuk taiq, Ngos hauh soeu nghuot goeus oen ngos namoq lyis taiq goeus: ngos lyis xo nghuot lyis gas, haih bang gas loh lo bas jungh, ge. 9 Hauh zis gas, Nvng ngos lyis dyei goeus yvmas, dvyuk lyis eq ma dyuk nhang, ge taiq dah dang nyuk los das xiklyis nghuot. 10 Simon Petru gas moengsa wons toh las, moengsa she lha Phudyei Zainsmuh jyeidwis dah loqyos no lyis zan thyet khyoq kat. Hauh jyeidwis dah nyings gas Malkho, ge. 11 Yesu Petru lyis taiq zis gas, Nah moengsa lhyi dyvng mas cank toh aq: ngah Uwus ngos lyis dyei toh kom lhyi ngos ma shuk das lhyeh, ge. 12 Hauh uhlyis jeslo jens, jeszau phoq yahge Yuda jens dah vgyis moq gas Yesu lyis nyhik las twih she loh. 13 Housoeh hauh zvnyo Phudyei Zainsmuh bweh los dah Anna jyank mas cangxeih shwih loh. Khasoeh ge lyis nyang gas Kayapa dah yukphoq nghuot. 14 Hau Kayapa ka, Vnyau xiklyis dius dvyuk shei lhyi zes gis, ge Yuda jens lyis joeui dyei soeu nghuot. 15 Simon Petru yahge gohtoeu changlo dvyuk gas, Yesu thang mha chank loh. Hau gohtoeu changlo lyis Phudyei Zainsmuh seq las, Yesu yah dvgeh Phudyei Zainsmuh dah ganthoq mas wvng loh. 16 Petru gas nghe shot pheh khomhdwang mas yap joq khoq. Housoeh las Phudyei Zainsmuh yah seq goh dah changlo gas thuq loh las, khomh zungh vmesbih lyis taiq lho lha Petru lyis shwih hwank kat. 17 Khomh zungh vmesbih gas Petru lyis, Nvng eq hauh soeu dah changlo mas zis dvyuk nghuot lhyeh, ge. Petru gas, Ma nghuot, ge toeuh. 18 Hauh uhlyis ngamh las vgyis moq dah jyeidwis jens gas nyi khat las nyi tsain gvng yap joq. Petru eq hauh bang yah dvgeh yap las nyi bos gvng nyeis. 19 Phudyei Zainsmuh gas Yesu lyis nyah changlo dah cho yahge nyang jyauh cho nyei yoeuh. 20 Yesu nyang lyis phuk taiq zis gas, Mungkvn mas ngos debangh taiq goeus. Yuda jens huom dah lyi jungs mas eq, yhenmuh mas eq ngos vjangh jyauh goeus: ngos vkhauh vguis cha eq ma jyauh. 21 Nvng ngos lyis chamus nyei? Ngos khasoeh jyauh zis gas xauhgyo bang lyis nyei yoeuh aq, ngos taiq dang lyis nyamoq seq, ge. 22 Housoeh ge taiq lho lhyi, vyvm mas yap joq dah vgyis dvyuk gas Yesu lyis tyuk las, Phudyei Zainsmuh iq yvlyis nvng housoeh toeuh das lhyeh, ge. 23 Yesu nyang lyis phuk taiq zis gas, Ngos taiq dang ma gis lyis gas ma gis oen kanghjyoeng kat aq. Ngos dang gis dvtaiq lyis, ngos lyis chamus tyuk, ge. 24 Housoeh las Anna gas, Nyang lyis Phudyei Zainsmuh Kayapa jyank mas she kat nhang. 25 Simon Petru gas nyi gvng yap joq. Hauh uhlyis nyamoq gas, Nvng eq nyah changlo jens mas zis dvyuk vnghuot lah, ge nyang lyis nyei. Nghuot laus eq Petru gas, Ngos ma nghuot, ge he. 26 Petru no hwe thyet dyei soeu yah vmang vnoeuh doeusgoh soeu Phudyei Zainsmuh dah jyeidwis dvyuk eq nyang lyis, Khyam mha ngos nvng lyis hauh soeu yah dvgeh nyvng khoq ma nghuot lhyeh, ge nyei. 27 Housoeh las Petru doms he nyeis lyis houjang gyoq tuon los. 28 Tsai, nyamoq gas Yesu lyis Kayapa jyank masyah Pretori soetuon yvpmuh pheh e shwih kat. Hauh shishenh gas nvpsangh noq yah nghuot. Nyamoq gas hau Lhuiq Kat Pwe zo das zis nghuot yvmvyah, nyamoq dah gungs vwot v-oeu ma bweh das xiklyis nyamoq nyang gas hauh yvpmuh mas ma wvng. 29 Housoeh las Pilat gas, nyamoq nyeis yvmas thuq loh las, Namoq haih soeu lhyi kauq zis cha nghuot goh lah, ge nyei. 30 Nyamoq, nyang lyis phuk taiq zis gas, Haih soeu ma gis dah muh kuot soeu ma nghuot lyis gas ngamoq nah jyank mas shwih lyih das zis ma nghuot, ge. 31 Pilat nyamoq lyis taiq zis gas, Namoq, nyang lyis shwih yoeus las namoq dah lyi yah dvyhangteh soetuon geh, ge. Yuda jens nyang lyis taiq zis gas, Ngamoq gas hank lyis sat das dah lyi ma bos, ge. 32 Nyamoq housoeh ge zis gas, Yesu nyang khasoeh teh dah cho yah xauh shei kham das, ge dah vlho chixoeuq las taiq toh dang nyuk los das xiklyis nghuot. 33 Housoeh las Pilat gas Pretori soetuon yvpmuh khau mha doms wvng loh las Yesu lyis khi yoeus, nyei zis gas, Nvng Yuda hwankti nghuot lhyeh, ge. 34 Yesu nyang lyis phuk taiq zis gas, Hauh zis gas nvnyang nyei lah? Gohyuk yah ngah cho nvng lyis taiq kyoh lah, ge. 35 Pilat phuk taiq zis gas, Ngos Yuda dius nghuot lhyeh? Nah dius jens yahge phudyei uhjyung jens gas nvng lyis ngah jyank mas lyih kyauh toh. Nvng cha zangh kuot lah, ge. 36 Yesu phuk taiq zis gas, Ngah munghdan haih mungkvn mas zis ma nghuot. Ngah munghdan haih mungkvn mas zis nghuot lyis gas, ngos Yuda dius loq mas ma wvng shoq ngah changlo jens zau das: gvshih gas ngah munghdan heimha ma nghuot, ge. 37 Housoeh las Pilat nyang lyis taiq zis gas, Housoeh lyis nvng hwankti nghuot lhyeh, ge nyei. Yesu gas, Nvng taiq zis yah dvyhangteh ngos hwankti nyang nghuot. Housoeh jyoeng shot pheh kanghjyoeng kat das xiklyis ngos khoeu los, mungkvn mas jweh los. Jyoeng cho yah sen bang dvnganh gas ngah thwe tsain gyo, ge. 38 Pilat nyang lyis taiq zis gas, jyoeng ge zis cha nghuot lah, ge. Housoeh Yuda jens jyank pheh doms thuq loh las, ngos haih soeu mha cha yobos eq ma nyvng. 39 Nghuot laus eq Lhuiq Kat Pwe mha namoq lyis ngos dius dvyuk lyis lhuiq kat dyei dah thungh namoq mas joq zis yah dvyhangteh, Yuda hwankti lhyi vlhuiq kat dyei nhang mes lah, ge. 40 Nyamoq kaiq sang zis gas, Hauh soeu lhyi ma nghuot, Baraba lyis lhuiq kat dyei aq, ge. Baraba gas khyanktau nghuot.
1 Hauh thang lhyi Pilat gas Yesu lyis lang she lha lyuk. 2 Jeslo jens eq zoeu buismuk kuot las nyah uhloms mas tsungh dyei, dyi nesnoq eq nyang lyis gvm huot las, 3 Yuda hwankti dvyangh lhyeh, ge nyang lyis tsain tyuk. 4 Pilat gas ganthoq pheh doms thuq las nyamoq lyis taiq zis gas, Yoeuh aq, ngos haih soeu mha chah yobos eq ma nyvng zis seq bas jungh oen, nyang lyis ngos namoq jyank mas shwih thuq xoeuq, ge. 5 Yesu gas zoeu buismuk tsungh, dyi nesnoq wuot zis thuq los. Pilat nyamoq lyis taiq zis gas, Haih soeu lhyi yoeuh geh, ge. 6 Housoeh las phudyei uhjyung jens yahge zau jens gas, Nyang lyis tapzains mas taplhangh toh aq, ge tsain kaiq. Hauh uhlyis Pilat gas, Namoq nyang, nyang lyis yoeus las taplhangh toh geh, ngos gas nyang mas chah yobos eq ma nyvng, ge. 7 Yuda jens nyang lyis phuk taiq zis gas, Ngamoq eq lyi yoh, lyi yah sen lha nyang gas shei chah: chamus ge lyis nyang gas, nyang gungs nyang Mangso dah Lo tsuk zo, ge. 8 Pilat hauh dang xauhgyo lyis zes gyuk nyeis yvmvyah, 9 Pretori soetuon yvpmuh khau mha doms wvng lho lha, Yesu lyis, Nvng khalhye zis nghuot, ge nyei lyis, Yesu gas dang dvkhonh eq ma phuk taiq. 10 Housoeh las Pilat nyang lyis taiq zis gas, Nvng ngos yah dang ma jis lhyeh? Ngos nvng lyis lhuiq kat das vmingh yahge tapzains mas taplhangh toh das vmingh yoh zis lyis nvng ma seq lhyeh, ge. 11 Yesu phuk taiq zis gas, Nvng lyis nyhang mhayah dyei toh dah vmingh za ma nghuot lyis gas, nvng ngah thoq mas vmingh cha eq ma yoh: housoeh yvmvyah, ngos lyis nah jyank mas lyih kyauh tyamp soeu ka yobos zes las kuh, ge. 12 Housoeh las Pilat gas Yesu lyis lhuiq kat das cho xo nyeis. Nghuot laus eq Yuda jens tsain kaiq zis gas, Nvng hauh soeu lhyi lhuiq kat lyis gas, nvng hwankti Kesar dah buisnoms ma nghuot lo: vsainnyang gungs lyis vsainnyang hwankti tsuk zo soeu ka, hwankti Kesar dah gomloeus nghuot, ge. 13 Pilat hauh dang xauhgyo lyis, nyang Yesu lyis shwih thuq loh las, Hebre pheh yah Gabatha ge dah luklhyoq nyhoeuh joqyos soetuon tank mas e tsung toh. 14 Gvshih Lhuiq Kat Pwe dah xiklyis sont dah buisnyeis nghuot las nyeihgungs nghuot. Hauh uhlyis nyang Yuda jens lyis taiq zis gas, Namoq dah hwankti lhyi yoeuh geh, ge. 15 Nyamoq gas kaiq las, Shung tyamp geh, shung tyamp geh, tapzains mas lhangh tyamp geh, ge. Pilat nyamoq lyis taiq zis gas, Namoq dah Hwankti lhyi ngos tapzains mas taplhangh toh das lah, ge. Phudyei uhjyung jens phuk taiq zis gas, Kesar masyah lai las ngamoq hwankti ma yoh, ge. 16 Housoeh las nyang lyis tapzains mas taplhangh tyamp das xiklyis, nyang lyis nyamoq loq mas kyauh tyamp. Nyamoq gas Yesu lyis shwih yoeus loh. 17 Nyang gas nyah tapzains lyis nyang wuq las Uhkhangh ge dah joqyos pheh e loh. Hauh joqyos lyis Hebre pheh yah Golgotha, ge. 18 nyamoq gas houmha nyang lyis tapzains mas taplhangh toh. Nyang yah dvgeh khyanktau aiq yuk eq dvshot dvyuk lhangh toh las, Yesu gas hauh aiq yuk dah vjo mas nghuot. 19 Pilat eq maussauh lhaih las tapzains mas tap toh. Hau lhaih zis gas, YUDA HWANKTI NAZARET YESU ge zis nghuot. 20 Yesu lyis taplhangh toh dah joqyos gas wugungs yah ni joq las, Yuda dius nyoshoq moq hau Hebre, Heleni yahge Latin nyingh pheh yah lhaih toh maussauh lyis tsain nghap. 21 Housoeh las Yuda jens dah phudyei uhjyung jens Pilat lyis taiq zis gas, Yuda Hwankti oen vlhaih, Ngos gas Yuda Hwankti nghuot ge nyang taiq, oen dvlhaih aq, ge. 22 Pilat phuk taiq zis gas, Ngos lhaih toh khyvlyis lhaih toh goeus, ge. 23 Jeslo jens gas Yesu lyis tapzains mas dye lhangh thang lhyi, nyah dyi lyis yoeus las, nyei khyamh khyoq lho lha dvyuk dvkhyamh tsain yoeus loh. Khau dyi lyis eq housoeh kuot bah ge laus eq, hauh khau dyi gas dyijang ma bos dung gonh yoq toh zis nghuot. 24 Housoeh las nyamoq gas, Haih dyi lyis yamoq ma lang chuiq chuiq, hank yoeus vvng zis doeusgoh goh, ge nyang changh nyang tsain taiq. Jeslo jens housoeh kuot zis gas, Nyamoq ngah dyi lyis nyang changh nyang gvm goh las, Ngah khau dyi lyis eq tsain doeusgoh, ge dah lhaihtoh dang nyuk los das xiklyis nghuot. 25 Gvshih Yesu dah tapzains nvm mas nyah ungwes yahge nyah ungwes dah vnoeuh, Kalopa yhensain nyhiq Mari yahge Magdala Mari moq yap joq. 26 Housoeh Yesu gas, nyah ungwes yahge nyah jyetdap changlo vyvm mas tsain yap joq yvlyis nyvng las, nyah ungwes lyis, Vmesbih eh, nah lo lyis yoeuh aq, ge. 27 Hauh changlo lyis eq, Nah ungwes lyis yoeuh aq, ge taiq. Hauh shishenh masyah hauh changlo gas nyang lyis nyah yhen mha shwih nyhei toh. 28 Hauh thang lhyi Yesu gas muh dvnganh dye goeus zis lyis seq las, lhaihtoh dang nyuk los das xiklyis, Ngos jeis shet, ge taiq. 29 Hauh yvmas jeis jyen dyingh shoq dah yam dvlom tsung toh. Housoeh las nyamoq gas khotlhyop mas jeis taiq lho lha, jvmbu lyang thyoh mas tap las nyah nhuot mas yhuonh dyei. 30 Yesu hauh jeis jyen lhom shuk lho lha, Dye goeus, ge. Hauh thang lhyi nyang nyah uhloms nghuiq las kang gyoh. 31 Hauh buisnyeis gas sont nyeih nghuot las, nungs nyeih eq Yuda No Buisnyeis zainsmuh nghuot yvmvyah, no nyeih lyis tapzains mas mvng ma dap joq bas jungh, Yuda jens gas hauh bang dah khyei lhyi tsain khyauh las hauh mvng lyis tsain yoeus tyamp das zis Pilat jyank mas vmingh tsain sang. 32 Housoeh jeslo jens los las, nyang yah dvgeh lhangh toh dah vzomh dah khyei tsain khyauh dyei. 33 Nghuot laus eq Yesu jyank mas jweh lyis, nyang shei goeus yvlyis nyamoq nyvng las, nyah khyei lhyi ka ma khyauh dyei. 34 Nghuot laus eq jeslo dvyuk gas, nyah nvmjaus lyis lham yah thauh phank dyei las, hauh uhlyis suih yahge jeis thuq los. 35 Hauh zis nyvng soeu ka kanghjyoeng kat las, nyah kanghjyoeng ka jus: namoq eq yoh lomsjingh bas jungh, jyoeng dang nyang taiq nyeis zis gas nyang nyang seq. 36 Khasoeh ge lyis, haih cho bweh zis gas, Nyah shohyau dvkoeuq eq gyau das zis ma nghuot, ge dah lhaihtoh dang nyuk los das xiklyis nghuot. 37 Tsai lhaihtoh dang dvkoeuq mas, Nyamoq thauh phank soeu lhyi nyamoq nyvng das, ge. 38 Hauh thang lhyi Yuda jens lyis gyuk yvmvyah, Tsoek yah Yesu dah changlo gauh kuot soeu, Arimathia wukhau mha dah Yosep ge soeu ka, Yesu dah mvng khyoq yoeus das zis Pilat jyank mas sang. Pilat eq yoeus nhang lha, nyang e lha hauh mvng lyis khyoq yoeus. 39 Xik pheh nyenh lyis nyah jyank lyih dah Nikodimu eq Mura yah xangh coeu lhoeuq zis dvxo paung ko chi los. 40 Nyah aiq yuk gas Yesu dah gungs lyis yoeus las, Yuda jens dah mvng baih thungh yah dvyhangteh, xangh coeu yah dvgeh jeimuh mis yah tsain lyet. 41 Nyang lyis taplhangh dah joqyos mas khyam dvkoeuq joq. Houmha dius hank eq ma nyhop ku shih dah lop saiq dvkoeuq joq. 42 Yuda jens dah sont buisnyeis nghuot zis yahge, lop hauh zis eq ni joq las, nyah aiq yuk gas Yesu lyis houmha kat toh.
1 Dvdaus dah cangxeih vnyeih, nvpsangh nyoq ma nyvng shih lyis Magdala Mari gas, lop pheh e loh las lop mas dah lukzains ywi joq yvlyis nyvng. 2 Housoeh las nyang gas Simon Petru yahge Yesu jyetdap dah changlo jens jyank mas wuih loh las nyamoq lyis taiq zis gas, Yhensain lhyi lop masyah nyamoq yoeus las khalhye toh tyamp zis eq ngamoq ma seq, ge. 3 Housoeh las Petru yahge gohtoeu changlo gas lop pheh tsain e. 4 Nyah aiq yuk dvgeh tsain wuih loh lyis hau gohtoeu changlo gas Petru lyis wuih lhyweq las nyang shih lop mas jweh e. 5 Nyang gop yoeuh lyis misseh joq zis lyis dvnyvng. Nghuot laus eq nyang gas vkhau mha ma wvng e. 6 Simon Petru eq nyah thang mha chank loh las houmha jweh lyis, vkhau pheh wvng yoeuh laus eq, joq dah misseh lyis kyingh dvnyvng. 7 Jeimuh mis joq zis eq, uhloms mas dah shoeuhkyenh gas misseh yah dvgeh ma nghuot nghuot, gohtoeu nap toh zis eq nyang nyvng. 8 Housoeh las lop mas cangxeih jweh e dah hau gohtoeu changlo eq chank wvng loh las, nyvng vgus jingh. 9 Khasoeh ge lyis nyang gas shei masyah dwis toq das, ge lhaihtoh dang lyis nyah aiq yuk ma seq shih. 10 Housoeh las hauh changlo aiq yuk gas yhen pheh doms tsain loh. 11 Mari gas hau lop nghe mha ngaus yap joq. Housoeh ngaus zoh lyis yah gop las lop khau mha doms yoeuh yoeuh kuot. 12 Hauh uhlyis bang bang thyoeu dyi wuot dah loeuswons aiq yuk gas Yesu gungs toh dah uhloms shot pheh dvyuk, khyei thang shot pheh dvyuk tsung toh zis lyis nyvng. 13 Hauh aiq yuk nyang lyis taiq, Nyelo eh, nvng chamus ngaus nyeis lah, ge. Nyang taiq, Ngah Yhensain lhyi yoeus loh las khalhye toh toh zis ma seq las nghuot, ge. 14 Housoeh ge nyang nungsthank pheh lhain yoeuh kat lyis, Yesu yap joq zis lyis nyvng. Nghuot laus eq hauh zis Yesu nghuot yvlyis ma seq. 15 Yesu nyang lyis taiq, Vmesbih eh, chamus ngaus nyeis? Nvng hank lyis xo, ge. Nyang gas hauh soeu lhyi khyam kuot soeu jyo lha nyang lyis taiq zis gas, Yhensain eh, nvng nyang lyis dvng tyamp nghuot lyis gas, khamha toh zis ngos lyis jenh taiq kyoh aq, ngos yoeus loh das, ge. 16 Hauh uhlyis Yesu gas, Mari eh, ge lui. Nyang eq nyah jyank pheh lhain los las, Hebre nyingh pheh yah Raboni, ge. (Houka, Svra ge zis nghuot.) 17 Yesu nyang lyis taiq zis gas, Ngos lyis vtanh, khasoeh ge lyis ngos Uwus jyank mas ma doq loh shih nghuot laus eq ngah vnoeuh moq jyank mas loh las, Ngos gas ngah Uwus yahge namoq dah Uwus, ngah Mangso yahge namoq dah Mangso jyank pheh doq loh lo das ge oen, nyamoq lyis taiq kyoh aq, ge. 18 Magdala Mari eq loh las, Yhensain lhyi nyang nyvng goeus cho yahge, nyang gas nyang lyis housoeh taiq kat dah cho changlo jens lyis taiq kyoh. 19 Housoeh las dvdaus dah cangxeih vnyeih nyenhthang mau shomp shomp chuot los lyis, Yuda jens lyis gyuk yvmvyah, changlo jens nyeis dah yhen mha khomh nyheih tyamp thang lhyi, Yesu nyamoq dah vgungs mas jweh yap las taiq zis gas, Namoq nyenstap nyeis bas jungh, ge. 20 Housoeh dye taiq lyis nyang nyamoq lyis nyah loq yahge nyah nvmjaus chixoeuq. Changlo jens eq Yhensain lhyi nyvng las gaus. 21 Yesu nyamoq lyis taiq zis gas, Namoq nyenstap nyeis bas jungh, Ngah Uwus ngos lyis nhang kat teh ngos eq namoq lyis nhang kat, ge. 22 Housoeh taiq lho lha, changlo jens thoq mas soq kat dyei las taiq zis gas, Gyingshang Dyos lhom yoeus geh: 23 Hank yobos lyis laus eq namoq khyuot tyamp dyei lyis gas gyuot das; hank yobos lyis eq namoq huon toh lyis gas, bos joq das, ge. 24 Housoeh Yesu jweh uhlyis changlo dvci aiq yuk mas bos dah Didimu ge soeu Thoma gas nyamoq yah dvgeh ma nyeis jus. 25 Housoeh las gohtoeu changlo jens nyang lyis, Ngamoq gas Yhensain lhyi xauh nyvng goeus, ge taiq kyoh. Nghuot laus eq nyang nyamoq lyis taiq, Nyah loq mas tyinghzoe yos ma nyvng, hauh tyinghzoe yos mas ngah loqnyhauh yah ma thauh yoeuh, nyah nvmjaus mas ngah loq ma xauh lap yoeuh lyis gas ngos ma jingh, ge. 26 Hauh thang lhyi xet nyeih lyis changlo jens yhen khau mha doms tsain lungh joq las, Thoma eq nyamoq yah dvgeh nyeis. Khomh kyank toh lyis eq, Yesu nyamoq jyank mas los yap las taiq zis gas, Namoq nyenstap nyeis bas jungh, ge. 27 Hauh uhlyis nyang gas Thoma lyis, Nah loqnyhauh heimha yhuonh kat las ngah loq lyis yoeuh aq, nah loq tuont kat las ngah nvmjaus mas eq lap yoeuh aq, ma jingh vmus, lomsjingh nyeis aq, ge. 28 Thoma nyang lyis phuk taiq zis gas, Ngah Yhensain yahge ngah Mangso eh, ge. 29 Yesu nyang lyis taiq zis gas, Thoma eh, nvng ngos lyis nyvng las dvlomsjingh, ma nyvng laus eq lomsjingh bang gas ngelhoq, ge. 30 Haih maussauh mas ma lhaih toh dah gohtoeu vlho nyoshoq eq Yesu nyah changlo jens xikkhonh mas kuot xoeuq. 31 Nghuot laus eq heinyhoq lhaih toh zis gas, Mangso dah Lo ge dah Khristu nghuot zis lyis, namoq yoh lomsjingh las, nyah nyings mas lomsjingh yvmvyah kang xauh yoeus bas jungh oen lhaih toh.
1 Hauh thang lyis Yesu gas Tiberia thomh yvm mas, nyah changlo jens lyis nyah gungs dvlhain doms nyvng xoeuq. Hauh uhlyis chixoeuq cho gas heisoeh ge. 2 Simon Petru yahge lozoms ge dah Thoma, Galile mau, Kana wukhau mas dah Nathaniel, Zebedi dah lotang yahge gohtoeu changlo aiq yuk gas dvgeh tsain nyeis. 3 Simon Petru gas, Ngos oeng e gaiq bah ge nyamoq lyis taiq. Nyamoq gas, Ngamoq eq chank das, ge. Housoeh nyamoq thuq loh las lhyik mas houjang wvng. Hauh nyens gonh nyamoq cha eq ma xauh yoeus. 4 Nyoq nyvng los lyis, Yesu gas thomh yvm nyeismhung mas yap joq. Nghuot laus eq changlo jens gas Yesu nghuot yvlyis ma tsain seq. 5 Yesu nyamoq lyis taiq zis gas, Loshang jens eh, namoq oengdoq vyoh goh lah, ge. Nyamoq phuk taiq zis gas, Ma yoh, ge. 6 Nyang nyamoq lyis taiq zis gas, Chont dah loqyos shot pheh nyho doeuh geh, housoeh lyis yoh das, ge. Houyah dvyhangteh nyamoq nyho tsain doeuh las, oeng nyoshoq xauh shenh yoeus yvmvyah nyho yangh ma tsain yoh lang lo. 7 Housoeh las Yesu jyetdap dah changlo gas, Yhensain dvnghuot ge Petru lyis taiq kyoh. Yhensain nghuot ge zis lyis Petru xauhgyo lyis, nyang gas shohchen nghuot las, thoq dyi yoeus wuot lho lha thomh mas wvng loh. 8 Gohtoeu changlo jens gas, oeng doq dyingh shoq bos dah nyho she las lhyik lo yah tsain jweh los: khasoeh ge lyis nyamoq gas nyeismhung yah nyoshoq ma we, gaiq dvxo ko dvwe. 9 Nyamoq gas tung yos mas jweh los lyis nyigywe mas oeng kank toh, ohlhyoq eq tsain nyvng. 10 Yesu nyamoq lyis taiq zis gas, Gvshih namoq yoh dah oengdoq mas zis dvkhamh yoeus los geh, ge. 11 Housoeh Simon Petru doq los las, oeng kuh dvxo oengci somh doeu bos dah nyho lyis tung yos mas she thuq kat. Oengdoq hounyhoq bos nghuot laus eq nyho gas ma juiq. 12 Yesu nyamoq lyis taiq zis gas, Los geh nvpceh los zo geh, ge. Nyang Yhensain nghuot yvlyis changlo jens seq las, nyamoq mas khayuk eq nyang lyis, Nvng hank nghuot ge ma womh nyeis. 13 Hauh uhlyis Yesu los las hauh ohlhyoq yoeus las changlo jens lyis dyei, oengdoq eq houyah dvyhangteh dyei. 14 Yesu nyang shei masyah dwis toq kat zis xauh thang lyis, changlo jens lyis nyvng xoeuq yvmas, haih zis gas somh vlhain nghuot. 15 Gvshih wom dye zo thang lyis, Yesu Simon Petru lyis taiq zis gas, Yohan dah lo Simon eh, haih bang thoq lyis nvng ngos lyis jyetdap lhyeh, ge. Nyang taiq zis gas, Nghuot goeus Yhensain eh, ngos nvng lyis jyetdap zis gas nvng seq, ge. Yesu nyang lyis taiq zis gas, Ngah yvnglo jens lyis nyhoeu tsoh nyeis aq, ge. 16 Aiq vlhain, Yohan dah lo Simon eh, nvng ngos lyis jyetdap nyeis lhyeh, ge nyang lyis nyei. Nyang phuk taiq zis gas, Nghuot goeus Yhensain eh, ngos nvng lyis jyetdap zis gas nvng seq, ge. Yesu gas, Ngah yvng jens lyis yoeuh nyeis aq, ge. 17 Somh vlhain, Yohan dah lo Simon eh, nvng ngos lyis jyetdap nyeis lhyeh, ge nyei. Somh vlhain jweh shoq, Nvng ngos lyis jyetdap nyeis lhyeh, ge nyang lyis nyei yvmvyah, Petru nhaiqkuk las, Yhensain eh, nvng gas dvnganh yvlyis seq nyeis; ngos nvng lyis jyetdap zis gas nvng seq, ge toeuh. Yesu gas, Ngah yvng jens lyis nyhoeu tsoh nyeis aq, ge. 18 Ngos nvng lyis jyoengh taiq bah, nvng loyvm nghuot yoq lyis nvnyang gungs lyis nvnyang dyichih chih las loh mes joqyos khyiq khanghmuh mas yoh loh: nghuot laus eq nvng mang goeus ya, nvng nah loq lvm las gohyuk yah nvng lyis dyichih chih dyei las, nvng ma o joqyos mas shwih loh das, ge nyang lyis taiq. 19 Housoeh ge taiq zis gas, Petru gas Mangso dah phunk lyis yoh chungh das xiklyis, nyang khasoeh teh dah shei cho yah shei das zis lyis toeuq las taiq toh zis nghuot. Hauh dang dye taiq lyis Yesu gas Petru lyis, Ngah thang mas chank los aq, ge. 20 Petru lhain yoeuh kat lyis, xikpheh nyenhcon zo nyeis lyis, Yesu dah sainhkhonh mas nges las Yhensain eh, nvng lyis kyauh tyamp das soeu khayuk nghuot lah, ge nyei dah soeu, Yesu jyetdap dah changlo chank los nyeis yvlyis nyvng. 21 Petru gas hauh soeu lyis nyvng las Yesu lyis taiq zis gas, Yhensain eh, haih soeu ka khasoeh nghuot das lah, ge. 22 Yesu nyang lyis taiq zis gas, Ngos doms jweh lyih shoq ngos nyang lyis gyoh nyeis nhang mes, hauh zis nvng yah cha sen lah? Nvng gas ngah thang mas chank los aq, ge. 23 Hauh dang gvng mas hauh changlo gas ma shei das ge vmang vnoeuh moq mas loeus hoeuh loh; nghuot laus eq, hauh soeu ma shei das, ge Yesu taiq zis ma nghuot. Ngah ehnyet o khyvlyis nghuot lyis gas, ngos doms jweh lyih shoq nyang dwis nyeis das, hauh zis nvng yah cha sen lah, ge taiq zis dvnghuot. 24 Hauh changlo gas haih cho lhyi kanghjyoeng kat las, haih cho lhyi lhaih toh soeu nghuot. Nyah kanghjyoeng jyoeng zis gas ngamoq seq. 25 Yesu kuot dah muhzoh gohtoeu nyoshoq bos shih; hauh yvlyis dvnganh chank lhaih lyis, hau lhaihtoh maussauh buk gas mungkvn gonh mas yangh ma ywih das oen ngos nghamh. Amen.
1 Theophilu eh, ngah maussauh cangxeih vbuk mas Yesu muh kuot xi masyah nyang lyis maukhung pheh toqh yoeus loh shishenh jweh shoq gyo lyis nyang kuot cho, jyauh cho dvnganh lyis lhaih toh goeus. 2 Nyang toqh kat zis ma xauh shih shishenh lyis nyang khyen toh lvgyo jens lyis Gyingshang Dyos dah yomsoq yah tyingtoh dang tsain taiq toh. 3 Nyang shanghsenh kham thang lhyi, nyeici nyeih top nyamoq lyis nyah gungs nyoshoq lhain chixoeuq las, nyang dwis nyeis cho ma yoh he dah kanghjyoeng vja ja yah Chixoeuq. Nyamoq gas nyang lyis nyvng las nyang nyamoq lyis maukhung munghdan cho taiq kyoh. 4 Housoeh nyamoq yah dvgeh huom nyeis lyis, nyang nyamoq lyis taiq zis gas, Yerusalem masyah ma thuq thuq, namoq ngah jyank masyah xauhgyo yoeus das, Uwus dah dangthoengh lyis langh nyeis geh. 5 Khasoeh ge lyis Yohan gas jeis yah jeisnyhop dyei, namoq gas ma nyangh lyis Gyingshang Dyos yah jeisnyhop dyei zis xauh das, ge. 6 Housoeh nyamoq dvgeh tsain huom toh shih uhlyis, nyamoq gas nyang lyis, Yhensain eh, gvshih Israel dius jens lyis hauh munghdan doms dyei das lah, ge. 7 Nyang nyamoq lyis taiq zis gas, Uwus gas nyah vmingh yah toeuq toh dah shishenh yahge yoq lyis namoq ma seq noh. 8 Nghuot laus eq Gyingshang Dyos namoq thoq mas jweh lyis, namoq yomsoq yoh yoeus das las, namoq gas Yerusalem wugungs yahge Yuda mau gonh, Samari yahge nyeisjvng goms shoq ngah kanghjyoeng tsain duot das, ge. 9 Haih zis dye taiq las, nyamoq yoeuh nyeis lyis, nyang lyis nyhang mas toqh yoeus loh las, jyommauh dvbungh gas nyamoq xikkhonh masyah nyang lyis po loh. 10 Nyang doq loh tyamp las, nyamoq maukhung mas yoeuh tsuk toh shih lyis, yoeuh aq, dyi thyoeu wuot dah dius aiq yuk nyamoq nvm mas yap thuq los las, 11 Galile bang eh, chamus maukhung mas yoeuh tsuk toh shih goh lah? Namoq dah xikkhonh masyah maukhung mas toqh kat zis xauh soeu, Yesu gas namoq nyvng nyeis lyis loh zis yah dvyhangteh, housoeh doms jweh lyih das, ge. 12 Nyamoq gas Tsanlun boms masyah Yerusalem wugungs pheh tauh loh. Hauh boms gas Yerusalem masyah nyei falong dvwe joq. 13 Jweh lyis nyamoq gyangh nyeis dah thoq yvp mas tsain doq loh. Hauh moq gas, Petru, Yohan, Yaku, Andre, Philip yahge Thoma, Bartholomeu yahge Mathe, Alphe dah lo Yaku, Zelot Simon yahge Yaku dah vnoeuh Yuda moq nghuot. 14 Nyamoq gas, vmesbih jens yahge Yesu ungwes Mari, nyah vmang vnoeuh moq yah dvgeh ehnyet dvlom yah wontang shvmanh dung las tsain nyeis. 15 Hauh buisnyeis gyo lyis Petru gas changlo dvxo aiqci ko dah vgungs mas toq yap las taiq zis gas, 16 Boekyis eh, Yesu lyis nyhik bang dah cho she soeu, Yudas lyis toeuq las gohlhain Dawi dah nhuot masyah Gyingshang Dyos taiq toh las, lhaihtoh dang gas nyuk los chah goeus. 17 Khasoeh ge lyis yamoq mas bos suon kat las, haih muh mas nyang eq muh xauh yoeus goeus. 18 Hauh soeu ka nyah dah ma shop muh phauh yah maunyeis dvchuq wis toh goeus: houmha nyang gas vtauh pheh yah gyoh shei las, womdau thauh phuk las, oeu eq dvyos dvzoq mus tyamp. 19 Hauh cho lhyi Yerusalem bang dvnganh seq loh goeus; housoeh las hauh maunyeis chuq lyis nyamoq nyingh pheh yah Akeldama ge nyhink toh. Houka Suih yos, ge zis nghuot. 20 Hauh cho ka Chungh Dang mas, Nyah joqyos jyamhjyuklhyuk mus bas jungh, houmha hank eq ma nyeis bas jungh, ge eq. Nyah dah uhshe muh lyis gohyuk xauh yoeus bas jungh, ge eq bos. 21 Housoeh las Yohan jeisnyhop dyei xi masyah, Yesu lyis yamoq jyank masyah toqh yoeus jweh shoq, Yhensain Yesu yamoq mas suh e nyeis. 22 Hauh shishenh top mas yang yah dvgeh suh e soeu, dvyuk gas yang yah dvgeh nyah dah dwis toq cho kanghjyoeng bweh chah, ge. 23 Hauh uhlyis nyamoq gas, Yustu eq ge, Barsaba ge dah Yosep yahge Mathia lyis tsain khyen kat. 24 nyamoq shvmanh dung zis gas, Dius yuk khanghmuh dah ehnyet lyis seq nyeis dah Yhensain eh, Yudas gas nyang yah sen joqyos pheh loh lo das ge, toh tyamp dah muh yahge, 25 Lvgyo muh xiklyis haih aiq yuk mas nvng hank lyis khyen yoeus toh cho ngamoq lyis tuonh shet aq, ge. 26 Nyamoq doeugoh lyis hauh zis gas Mathia lyis vvng loh. Hou mhayah nyang gas hau lvgyo dvci dvyuk mas lung los.
1 Pentekoti buisnyeis jweh lyis, nyamoq dvnganhmoq yah dvkhyiq thaq dvgeh huom toh. 2 Hauh uhlyis maukhung masyah uklyeis los teh, nyetlos nyettant nyings thuq los thwe ka, nyamoq tsung toh dah yvpkhau mas dyingh los. 3 Nyilhyam teh zis eq thuq los las, nyamoq nyang yuk nyang toeu dah thoq mas lyih no joq. 4 nyamoq dvnganh eq Gyingshang Dyos dyingh las, Dyos yah jyuonh zis yah dvyhangteh, gohtoeu nyingh yah tsain taiq los. 5 Hauh uhlyis maukhung o mas nyeis ya nyeis dah dius nyau khanghmuh mas nyeis las, lomsjingh cho mas wontang dah Yuda jens gas, Yerusalem wugungs mas nyeis. 6 Hau nyings dah thwe xauhgyo lyis, somci moqmuh gas zain los zis yah nyamoq yuk khanghmuh changlo jens taiq dah dang lyis vsainnyang nyingh yah xauhgyo yvmvyah tsain mauh dvn nyeis. 7 Nyamoq mauh dvn las taiq zis gas, Yoeuh aq, gvshih hai taiq nyeis bang dvnganh gas, Galile dius kyingh ma tsain nghuot lhyeh? 8 Housoeh lyis yang yuk khanghmuh vsainnyang choq thyet mau mas dah nyingh pheh yah yoh gyo yoeus zis gas khasoeh au lhyeh? 9 Yang gas Parthi, Mede, Elam mau mas bang yahge Mesopotamia mau, Yuda mau yahge Kapadokia mau, Pontu yahge Asia, 10 Phrigia yahge Pamphilia, Egutu yahge Kureni wuxom mas nyeis dah Libya mau mas bang, Roma masyah los dah boenghwus, Yuda dius jens yahge Yuda phung mas wvng bang, 11 Kreti yahge Arabia mau mas bang, yang dvnganh gas Mangso dah mauhphoh muhzoh cho, nyamoq taiq kyoh dang lyis nyang yuk nyang toeu nyingh pheh yah xauhgyo goeus, ge. 12 Housoeh nyamoq dvnganhmoq yah mauh khamkhvv las, Heisoeh ge zis gas cha nghuot au lhyeh, ge nyang changh nyang taiq goh. 13 Nghuot laus eq dvyhamh gas, nyamoq lyis jwangh zis yah taiq zis gas, Haih bang gas zvbiq saiq shuk yet, ge. 14 Hauh uhlyis Petru gas, lvgyo dvci dvyuk moq yah dvgeh toq yap las thwe than yah taiq zis gas, Yuda mau mas bang yahge Yerusalem mas nyeis bang eh, namoq haih cho seqgyo bas jungh, ngah dang lyis eq gyo yoeus geh. 15 Namoq nghamh yhangteh haih bang zvbiq yet zis ma nghuot: Khasoeh ge lyis gvshih gau shishenh dvnghuot shih. 16 Haih cho ka lvpe Yoel taiq toh dang nghuot. Houka, 17 Mangso heisoeh ge, Thang thank buisnyeis lyis ngah Dyos, Dius dvnganhmoq thoq mas huot khyoq las, namoq dah loloeu lonyi jens lvpe pe das; namoq dah wotyamh jens nyoqnyvng nyvng las, namoq dah lokhoq jens yhetmoq moq das. 18 Nghuot goeus, hauh buisnyeis lyis Ngah jyeidwis phoq, jyeidwis nyhiq jens thoq mas Ngah Dyos huot khyoq las, Nyamoq lvpe pe das. 19 Ngos gas maukhung thoq mas mauh loqmuh, nyeisjvng mas vlho vja ja, Suih, nyi, nyikhauh soq lyis chixoeuq das. 20 Kuhxing duk bvng ge dah hauh Yhensain dah buisnyeis ma jweh shih lyis, Buis gas mauchuotdwang bweh tyamp das, Lhamhmuh gas suih teh bweh das. 21 Hauh uhlyis Yhensain nyah nyings lyis lui soeu khanghmuh khyuot yoeus zis xauh das, ge. 22 Israel dius jens eh, haih dang gyo yoeus geh: Mangso ka Nazaret phoq ge dah Yesu loq masyah namoq mas yomsoq muh, mauh loqmuh yahge vlho kuot xoeuq yvmvyah, nyang gas Mangso khyen toeuq toh soeu nghuot yvlyis chixoeuq zis gas namoq seq. 23 Haih soeu ka Mangso nghamh toh goeus joeui yah xiq toh zis yah dvyhangteh, namoq gas lyi ma chi bang dah loq mas kyauh tyamp las, nyang lyis tapzains mas taplhangh sat. 24 Nghuot laus eq shei, nos dah shohjyen zis lyis Mangso khyuot tyamp dyei las, nyang lyis dwis toq los nhang. Khasoeh ge lyis hau shei zis gas, nyang lyis yoh zwi kyamp toh zis ma nghuot. 25 Khasoeh ge lyis, hauh soeu yah sen las Dawi taiq zis gas, Yhensain lhyi nah xikkhonh mas vjangh nyvng goeus; Ngos ma lop ma loeh bas jungh ge Nyang ngah loqyos shot pheh nyeis. 26 Housoeh las ngah nhaiqlom gauslaus nyeis zis yahge, Ngah lhyo gauslaus nyeis. Ngah gungsshoh eq nghamhloms nyeis das. 27 Khasoeh ge lyis nvng ngah dyos lyis shei mau mas ma toh tyamp; Nvng nah Gyingshang Soeu dyoqbis xauh das zis ma gyo. 28 Kang dwis cho nvng ngos lyis seq nhang. Nah xikkhonh mas nvng ngos lyis gausyis zis yah tyink dyei das, ge. 29 Boekyis eh, yah phauh thyeih Dawi gas shei las nyhop zis xauh goeus, nyah lop gas khvnyhik jweh shoq yang yah dvgeh joq zis lyis, ngos namoq lyis womh womh taiq bah. 30 Nyang gas lvpe nghuot zis yahge, nyah nyei nyet mas zis dvyuk gas nyah hwankti tank mas tsung nhang das ge Mangso nyang lyis maukhi lha dangthoengh toh yvlyis seq yvmvyah, 31 Khristu dah dwis toq los cho nyang uhlhomh nyvng las, nyah dyos lyis shei mau mas ma toh tyamp das zis yahge, nyah gungsshoh dyoqbis ma xauh das cho taiq toh. 32 Yesu haih yuk lyis nyang Mangso dwis toq nhang goeus; Ngamoq dvnganh eq haih cho dah kanghjyoeng nghuot. 33 Nyang gas nyah Uwus Mangso dah loqyos shot pheh toqh yoeus zis xauh goeus zis yahge Mangso nyang lyis dangthoengh toh zis yah dvyhangteh nyah jyank masyah Gyingshang Dyos lyis xauh lhom yoeus goeus. Gvshih namoq nyvng las xauhgyo zis gas, ngamoq thoq mas nyang huot khyoq dah jyungshuk nghuot. 34 Khasoeh ge lyis Dawi gas maukhung mha toqh kat zis ma xauh laus eq nyang nyang heisoeh ge: Hauh Yhensain ngah Yhensain lhyi taiq zis gas, 35 Ngos nah jeswus lyis nah nangte kuot shoq, Nvng ngah loqyos shot pheh tsung toh aq, ge. 36 Housoeh yvmvyah namoq tapzains mas taplhangh sat goeus dah Yesu lyis Mangso ka Yhensain yahge Khristu bweh nhang zis gas, Israel yhenbang dvnganh top seq yoeus geh, ge. 37 Hauh zis tsain xauhgyo lyis nyamoq ehnyet mas zangh las, nyamoq gas Petru yahge gohtoeu lvgyo jens lyis taiq zis gas, Boekyis eh, ngamoq khasoeh kuot das lah, ge. 38 Petru nyamoq lyis taiq zis gas, Namoq dah yaunos khyuot dyei das xiklyis namoq yuk khanghmuh nhaiqlom thaiq las, Yesu Khristu dah nyings mas jeisnyhop kham geh. Housoeh lyis Gyingshang Dyos ge dah jyungshuk gas namoq xauh yoeus das. 39 Khasoeh ge lyis hauh dangthoengh gas namoq yahge namoq dah lo jens xiklyis nghuot las, we we mas nyeis bang dvnganh yahge Yhensain Mangso khi yoeus dah bang dvnganh xiklyis nghuot, ge. 40 Dang gohtoeu nyoshoq yah eq nyang nyamoq lyis taiq kyingh yomdyei taiq zis gas, Vsainnyang gungs lyis hai ung lhung dah vcaiq masyah lhuiq yoeus geh, ge. 41 Housoeh nyah dang lyis lhom yoeus bang lyis jeisnyhop dyei las, hauh nyeihyo dius somh khyoengh ko lung los. 42 Hauh bang gas lvgyo jens dah jyauh cho, dvgeh zomh cho, ohlhyoq khyiq gvm cho yahge shvmanh dung cho mha wontang tsain chank. 43 Lvgyo jens masyah eq mauh loqmuh yahge vlho nyoshoq kuot xoeuq las, dius jens dvnganh gyukwoms los. 44 Lomsjingh bang dvnganhmoq gas dvjoq mas dvgeh huom lha, nyamoq yoh dah vyhang dvnganh xonh yhung. 45 Nyamoq gas vsainnyang dah kyahsoe zisyos lyis eq ungh las, dvnganh lyis nyamoq chah zis yah dvyhangteh gvm dyei. 46 nyamoq gas nyeih yau nyeih yhenmuh mas zophuom lha, nyamoq dah yhen mas gaus gaus yis yis dyei mes ehnyet yah chomp zo shuk. 47 Housoeh nyamoq gas Mangso lhyi chunghtoq zis yah dius dvnganh dah chungh cho lhyi xauh lhom yoeus. Nyeih khanghmuh Yhensain gas khyuot yoeus xauh bang lyis nyamoq phung mas je los nhang.
1 Gvshih Petru yahge Yohan gas, somh shishenh dah shvmanh dung shishenh lyis, yhenmuh mas tsain doq loh. 2 Hauh uhlyis, nyah ungwes ung masyah khyei ma yangh soeu dvyuk lyis dvng los las, yhenmuh mas wvng loh bang jyank masyah dung zo bas jungh ge, Yunghshop ge dah yhenmuh khomh nvm mas nyeih khanghmuh e toh toh kuot. 3 Petru yahge Yohan yhenmuh mas wvng loh nyeis zis lyis nyang nyvng las, Nhaiqnyen aq, ge dung. 4 Petru yahge Yohan gas nyang lyis yoeuh tsuk toh las, Ngah aiq yuk lyis yoeuh aq, ge. 5 Nyah aiq yuk jyank masyah dvja ja xauh yoeus das ge nghamh las nyah aiq yuk lyis soq yoeuh nyeis. 6 Petru taiq zis ka, Ngwis xing gas ngos ma yoh, nghuot laus eq ngos yoh zis nvng lyis dyei bah: Nazaret Yesu Khristu dah nyings masyah toq las suh loh aq, ge. 7 Nyang nyah loqyos loq lyis zwi las lang toq kat. Houjang yah nyah khyeinyoqtyon yombos los. 8 Nyang dyvm toq yap las suh loh uhlyis yah, goh jywe las Mangso lhyi chungh zoh lyis nyah aiq yuk yah dvgeh yhenmuh mas wvng loh. 9 Dius dvnganh gas, nyang suh loh uhjyangh Mangso lhyi chungh yvlyis nyvng. 10 Hauh soeu ka yhenmuh mas dah Yunghshop khomh nvm mas tsung las dung zo soeu nghuot zis lyis nyamoq seq yvmvyah, nyang mas bweh los dah cho gvng mas tsain mauh hangh toh. 11 Hauh soeu ka, Petru yahge Yohan lyis lang toh zis yah Solomon wumuk thang ge joqyos mas nyeis lyis, dius dvnganhmoq mauh zis yah nyamoq jyank mas wuih los. 12 Hauh zis lyis Petru nyvng las dius jens lyis phuk taiq zis gas, Israel dius jens eh, haih soeu dah cho lhyi chamus tsain mauh goh lah? Ngah aiq yuk nyang dah yomsoq yah, nghuot ya lomsjingh dah muh yah haih soeu lhyi yoh suh loh nhang teh chamus yoeuh tsuk toh goh lah? 13 Abraham, Isak yahge Yakop dah Mangso, yah phauh thyeih moq dah Mangso ka nyah Jyeidwis Yesu lyis chunghtoq zis dvnghuot. Nyang lyis gas namoq kyauh tyamp las Pilat nyang lyis lhuiq kat das ge sont lyis, namoq gas Pilat dah xikkhonh mas nyang lyis peq tyamp. 14 Hau Gyingshang lha dan soeu lhyi namoq peq tyamp las, dius sat soeu lhyi yuk namoq xiklyis kat kat das zis sang yoeus. 15 Kang sain lhyi namoq sat goeus; Mangso ka shei masyah nyang lyis dwis toq nhang goeus. Ngamoq eq hauh cho dah kanghjyoeng tsain nghuot. 16 Nyah yomsoq gas hai khyei dyoq soeu lhyi yombos nhang goeus. Namoq yoh nyvng yoh seq cho lhyi nyah nyings lyis lomsjingh zis yah bweh nhang goeus. Namoq dvnganhmoq nyvng zis yah dvyhangteh Yesu lyis lomsjingh dah lomsjingh cho ka nyang lyis gis los nhang goeus. 17 Gvshih nghuot laus eq, boekyis eh, namoq yahge namoq dah zauguon jens seq cho ma bos las kuot goeus zis gas ngos seq. 18 Hauh zis gas, Mangso ka lvpe jens dvnganh dah nhuot masyah, Nyah Khristu gas shanghsenh xauh chah, ge uhlhomh taiq nhang zis lyis nyang, nyuk los nhang goeus. 19 Nhaiqlom thaiq las tauh los geh, housoeh lyis namoq yaunos khyuot dyei zis xauh das. 20 Housoeh Yhensain ka yomsoq vsaiq yoh doms huiq dah shishenh dyei das nghuot las nyang namoq xiklyis khyen toeuq toh Meshia nghuot dah Yesu lyis nhang kat das. 21 Gohlhain yah nyah Gyingshang lvpe jens dah nhuot masyah Mangso taiq toh zis yah dvyhangteh, vyhang dvnganh zis lyis vsaiq doms kuot dah caiq jweh shoq nyang gas maukhung mha nyeis nyeis chah. 22 Moshe taiq zis gas, Yhensain namoq dah Mangso ka, ngos teh dah lvpe dvyuk lyis, namoq dah vmang vnoeuh masyah namoq xiklyis thuq los nhang das, nyang taiq ya taiq yvlyis tsain gyo chah. 23 Hauh lvpe dah dang ma gyo soeu hank lyis laus eq, Mangso dah dius nyau masyah thyuk tyamp zis xauh das. 24 Nghuot goeus, Samuel masyah nyah thang mha chank thuq los las taiq dah lvpe jens dvnganhmoq gas, haih buisnyeis lyis bweh nyeis dah cho lhyi tsain taiq hoeuh. 25 Namoq eq hau lvpe jens dah nyei nyet jens tsain nghuot. Mangso ka yah phauh thyeih moq yah thanghchvp toh uhlyis, Abraham lyis, Nah vnyau masyah nyeisjvng thoq mas dius nyau dvnganh shvmanh yoh das ge zis yah dvyhangteh, 26 namoq yuk khanghmuh lyis vsainnyang dah unglhung cho masyah yoh lhain los dah shvmanh jyehjuh dyei das xiklyis Mangso ka nyah Jyeidwis Yesu lyis namoq jyank mas cangxeih nhang kat goeus, ge.
1 Nyah aiq yuk housoeh moqphung lyis taiq nyeis uhlyis, phudyei bang, yhenmuh gomh soeu yahge Saduke jens thuq los. 2 Lvgyo tang ka moqphung lyis, Shei loh goeus bang gas Yesu dwis toq los zis yah dvyhangteh dwis toq los das ge jyauh nyeis yvmvyah, nyamoq nhaiq tsain yo. 3 Housoeh nyamoq nyenhthang zoh lyis nyah aiq yuk lyis nyhik las nungs nvp jweh shoq thung mha lhunk toh. 4 Nghuot laus eq dang xauhgyo yoeus bang nyoshoq lomsjingh goeus. Lomsjingh bang vbusbih dvnganh lyis oeng khyoengh ko nghuot. 5 Nungs nyeih nyamoq dah zauguon bang, logis jens yahge maussauh lhaih bang gas, 6 Phudyei Zainsmuh Anna yah dvgeh Kayapa, Yohan Alesanda, Phudyei Zainsmuh dah vnyau dvnganh Yerusalem wugungs mas tsain huom toh. 7 Housoeh nyah aiq yuk lyis nyamoq dah vgungs mas kat toh las nyei zis gas, Nah aiq yuk gas chah yomsoq yah, hank nyings masyah haih muh kuot goh lah, ge. 8 Hauh uhlyis Petru Gyingshang Dyos dyingh las phuk taiq zis gas, Dius dah guon bang yahge Israel dah logis jens eh, 9 hai khyei ma yangh soeu lhyi gis zis kuot gvng mas, hauh soeu lyis khasoeh yhoh, ge khvnyhik ngah aiq yuk lyis nyeiwu zis xauh lyis gas, 10 namoq dvnganhmoq yahge Israel dvnyau gonh lyis seq nhang bah: namoq tapzains mas taplhangh sat las, Mangso ka shei masyah dwis toq nhang dah Nazaret Yesu Khristu nyings yah haih soeu namoq xikkhonh mas yanghzan zis yah yap joq. 11 Hauh Yesu gas, namoq yhen tsuk bang peq tyamp dah luklom nghuot joq laus eq yhenthunk lukzains bweh los. 12 Hank masyah eq khyuot yoeus cho ma bos lo: khasoeh ge lyis khyuot yoeus zis xauh das xiklyis maukhung o mha cangsoeu dius lyis dyei dah nyings gohtoeu ma bos lo, ge. 13 Nyamoq gas Petru yahge Yohan dah womh womh kuot yvlyis nyvng las, nyah aiq yuk gas maussauh ma seq bang dvnghuot zis lyis seq las tsain mauh. Nghuot laus eq nyah aiq yuk gas xikpheh Yesu yah dvgeh nyeis ku zis nyamoq soh. 14 Gis los nhang zis xauh soeu eq nyah aiq yuk yah dvgeh yap joq zis lyis nyamoq nyvng nyeis yvmvyah, tomp das cho cha ma bos lo. 15 Nghuot laus eq nyah aiq yuk lyis hau huom masyah thuq loh das zis vmingh dyei lho las, nyamoq nyang changh xamgoh zis gas, 16 Haih aiq yuk lyis khasoeh kuot goh das lah? Nyah aiq yuk loq masyah comh phoh vlho dvkoeuq kuot goeus zis gas Yerusalem mas bang seq goeus yvmvyah, yang he chank ma bos lo. 17 Nghuot laus eq hauh cho dius jens mas ma zes hoeuh loh bas jungh, gvshih masyah hauh nyings yoeus las hank lyis eq ma taiq das khyvlyis nyah aiq yuk lyis nyho tomp tyamp goh, ge. 18 Housoeh nyah aiq yuk lyis lui las, Yesu dah nyings yoeus las cha eq ma yoh taiq, ma yoh jyauh das khyvlyis nyah aiq yuk lyis vmingh dyei. 19 Petru yahge Yohan nyamoq lyis phuk taiq zis gas, Mangso dah dang gyo das thoq lyis namoq dah dang gyo das zis, Mangso xikkhonh mas jus ma jus gas namoq nyang nghamh thyet geh. 20 Ngah aiq yuk gas ngah aiq yuk nyvng goeus, xauhgyo goeus cho lhyi ka ma taiq ma yoh nyeis, ge. 21 Housoeh nyamoq gas nyah aiq yuk lyis yobos dyei das cho ma nyvng yvmvyah, svsoh kyuk las kat kat. Khasoeh ge lyis nyah aiq yuk kuot dah muhzoh gvng mas dius dvnganhmoq Mangso lhyi tsain chungh. 22 Hauh vlho yah gis los nhang zis xauh soeu ka, nyenhkyi nyeici zvn nyet bos goeus. 23 Housoeh nyah aiq yuk gas kat kat zis xauh las, nyamoq nyang dah dyenschangh jens jyank pheh loh las, phudyei bang yahge logis jens nyah aiq yuk lyis taiq kat dang dvnganh nyamoq lyis taiq kyoh. 24 Hauh zis xauhgyo lyis nyamoq gas, dvthwe kyingh yah Mangso lhyi kaiq dung zis gas, Maukhung yahge nyeisjvng, thomh yahge houmha dah vyhang dvnganh lyis kuot toh las guon nyeis dah Yhensain eh, 25 Gyingshang Dyos gas, nah jyeidwis, Dawi nhuot masyah taiq zis gas, Gohnyau bang chamus lhuon lha, Dius jens vkom mas nghamh toeuq nyeis au? 26 Nyeisjvng hwankti jens yahge guon bang dvgeh huom lha, Yhensain yahge nyah Meshia lyis jes sont nyeis, ge. 27 Jyoengh nyang nvng coeu juot toh, nah Gyingshang Jyeidwis Yesu lyis jes sont das xiklyis Herod yahge Pontu Pilat, gohnyau bang yahge Israel dius jens gas hauh wus mas tsainh toh. 28 Nyamoq gas yomsoq yah nah ehnyet joeui yah bweh das nyhenshang xik lyis yah nghamh thyet toh goeus dah muh dvnganh lyis kuot das zis huom toh. 29 Yhensain eh, gvshih nyamoq kyuk tant dang lyis jenh yoeuh aq. Nah jyeidwis jens nah dang lyis womh womh yoh taiq das xiklyis pangh aq. 30 Lhoqh gis das xiklyis nah loq yhuonh las nah Gyingshang Jyeidwis Yesu nyings yah mauh loqmuh yahge yomsoq muh kuot das yomsoq dyei aq, ge. 31 Housoeh nyamoq shvmanh dye dung lyis nyamoq huom joq dah joqyos gas nonh los las dvnganhmoq yah Gyingshang Dyos dyingh los zis yah, Mangso dang lyis ma gyuk ma woms tsain taiq kyoh. 32 Hau lomsjingh bang dvphung gonh yah nhaiqlom dvkoeuq khyvlyis yah xam tsain xonh. Housoeh las hank laus eq vsainnyang yoh dah vyhang lhyi, ngah zis ma ge dvnganhmoq tsain chomp chi. 33 Lvgyo jens eq Yhensain Yesu dah dwis toq cho lhyi yomsoq zainsmuh yah kanghjyoeng tsain kat nyeis yvmvyah, nyamoq dvnganh gas Mangso jyank masyah jyehjuh nyoshoq xauh yoeus. 34 nyamoq mas chah soeu dvyuk eq ma bos: khasoeh ge lyis maunyeis yvsoh yoh bang, yhen yoh bang dvnganhmoq, hauh zis ungh las yoh dah ngwis lyis yoeus lyih las, 35 Lvgyo jens khyeiyang mas tsain toh. Housoeh hauh ngwis lyis chah soeu khanghmuh lyis nyamoq chah zis yah dvyhangteh gvm dyei. 36 Housoeh Kupru mau mas khoeu dah Lewi dius Yosep gas nyah maunyeis lyis ungh las yoh dah ngwis chi los las lvgyo jens lyis kyauh toh. Hauh soeu lhyi lvgyo jens yah Barnaba ge nyhink. Barnaba vjyuk gas Yomdyei soeu, ge.
1 Nghuot laus eq Anani ge soeu yahge nyah yhensain nyhiq Saphira gas, nyah zomh yoh dah zisyos ungh las, 2 Nyah zomh dvgeh khaujeini zis yah hauh phauh dvkhamh gauh shung toh las dvkhamh lvgyo jens lyis e kyauh. 3 Petru nyang lyis taiq zis gas, Anani eh, nvng chamus Satan dah dang gyo las maunyeis phauh dvkhamh nah xiklyis thyet toh lah? Nvng chamus Gyingshang Dyos lyis hwah lah? 4 Hauh zis ma ungh shih lyis nah zis nghuot ma nghuot lhyeh? Ungh thang lhyi eq yoh ungh dah nah ngwis nah zis nghuot las nvng o khyvlyis yoh kuot ma nghuot lhyeh? Chamus nah nhaiq mas housoeh kuot das zis nghamh lah? Nvng gas dius lyis hwah zis ma nghuot, Mangso lhyi hwah zis dvnghuot, ge. 5 Hauh dang xauhgyo yah dvyih Anani gas lains shei tyamp. Hauh zis xauhgyo bang dvnganh eq svsoh gyuk. 6 Housoeh loyvm jens toq las, nyah mvng lyis thop lho lha e dvng nyhop. 7 Hauh thang lhyi somh shishenh ko nyangh lyis, yhensain nyhiq eq housoeh bweh cho ma seq las wvng los. 8 Tsai Petru gas, Nyeisjvng ungh zis heinyhoq kyingh dvnghuot lhyeh? Ngos lyis taiq kyoh aq ge lyis, nyang eq, Nghuot goeus, heinyhoq yah dv ungh, ge. 9 Petru nyang lyis taiq zis gas, Yhensain dah Dyos lyis shi yoeuh das zis nah zomh chamus housoeh xamxonh goh lah? Yoeuh aq, nah yhensain phoq lyis nyhop bang dah khyei, khomh mas jweh los goeus, nvng lyis eq dvng tyamp das, ge. 10 Houjang nyang eq nyah khyeiyang mas lains shei goeus. Loyvm jens eq wvng los lyis, hauh vmesbih shei joq yvlyis nyvng las nyah yhensain phoq dah vyvm mas e dvng nyhop. 11 Housoeh phung dius jens dvnganh yahge hauh cho lhyi tsain xauhgyo bang dvnganh gas svsoh gyuk goeus. 12 Gvshih lvgyo jens dah loq masyah vlho yahge mauh loqmuh nyoshoq dius jens dah xikkhonh mas bweh xoeuq nyeis. Hauh bang dvnganhmoq dvgeh Solomon dah wumuk thang mha nyeis. 13 Gohtoeu dius jens hank eq nyamoq yah ma womh zomh. Nghuot laus eq dius jens gas nyamoq lyis gyukwoms. 14 Yhensain lhyi lomsjingh bang nyelo yukgis lo nyoshoq zes nyo los. 15 Housoeh las Petru suh lai loh lyis, dvyuk yuk dah thoq mas siyet khvlangh zangh bas jungh ge, nos bang lyis cho mha jung yahge mvnyhoeuq yah lyih tsain dvng toh. 16 Hauh thoq lyis Yerusalem vyvm vwi wukhau mha dah nos bang yahge yius wvng las shoeuhshih zis xauh bang lyis tsain shwih jweh lyih. Hauh bang dvnganh eq gis los zis xauh. 17 Nghuot laus eq Phudyei Zainsmuh yahge nyah dyenschangh jens Saduke ge dah dius phung dvnganhmoq gas, noh dah ehnyet dyingh joq yvmvyah toq las, 18 lvgyo jens lyis nyhik lho lha wus thung mas lhunk toh. 19 Nghuot laus eq hauh nyenhyo Yhensain dah loeuswons soeu ka, thung khomh phank tyamp dyei las, nyamoq lyis shwih thuq kat uhlyis taiq zis gas, 20 Namoq thuq loh geh, yhenmuh mas yap las hai kang dang dvnganh yah dius jens lyis taiq kyoh geh, ge. 21 Nyamoq hauh zis xauhgyo lyis, nvpsangh yah yhenmuh mas wvng las tsain jyauh. Nghuot laus eq Phudyei Zainsmuh yahge nyah dyenschangh jens eq jweh los las, soetuon bang yahge Israel jens dah nhaiqbos dvnganh lyis khi huom toh lho lha, lvgyo jens lyis shwih thuq los das xiklyis thung mha dius nhang kat. 22 Jyeidwis jens gas, thung mha lvgyo jens lyis ma nyvng yvmvyah tauh los las taiq zis gas, 23 thung eq goeng goeng kyank toh, zungh bang eq khomh nghe pheh zungh nyeis zis ngamoq nyvng; nghuot laus eq hauh zis phank yoeuh lyis vkhau mha hank eq ma nyeis langh, ge. 24 Yhenmuh gomh soeu yahge phudyei uhjyung jens hauh dang xauhgyo lyis, Haih cho cha bweh los das au, ge uhnungh tsain nungh. 25 Hauh uhlyis dvyuk wvng los las nyamoq lyis taiq zis gas, Yoeuh aq, namoq thung mha lhunk toh bang gas yhenmuh mas yap las dius jens lyis jyauh nyeis, ge. 26 Housoeh las jeszau gas nyah jeslo jens yah lyih las, lvgyo jens lyis tsain shwih loh. Nghuot laus eq khoek khoek ma womh kuot. Khasoeh ge lyis, dius jens lukzains yah doeuh das yvlyis gyuk. 27 Housoeh nyamoq shwih yoeus las nhaiqbos huom xikkhonh mas nyhei toh las Phudyei Zainsmuh nyamoq lyis nyei zis gas, 28 Namoq haih nyings yah cha eq vtaiq, oen ngamoq khoek khoek taiq toh goeus ma nghuot lhyeh? Yoeuh aq, gvshih Yerusalem dvwus gonh namoq dah jyauh cho tyink las, haih soeu dah cangjau ngamoq thoq mas kih dyei das zis cvvq nyeis, ge. 29 Petru yahge lvgyo jens phuk taiq zis gas, Ngamoq gas dius dah dang gyo das thoq lyis Mangso dang lyis gyo chah. 30 Ngamoq phauh thyeih dah Mangso ka namoq tapzains mas taplhangh sat dah Yesu lyis dwis toq los nhang goeus. 31 Israel vnyau lyis nhaiqlom thaiq cho yahge yaunos khyuot dyei das cho lhyi phank dyei das xiklyis uhjyung yahge khyuot yoeus soeu kuot das ge, Mangso ka hauh soeu lhyi nyah loqyos shot pheh chunghtoq toh goeus. 32 Ngamoq eq haih cho dah kanghjyoeng tsain nghuot. Nyah dang gyo bang lyis Mangso dyei dah Gyingshang Dyos eq hauh dah kanghjyoeng nghuot, ge. 33 Hauh dang xauhgyo lyis nyamoq nhaiqyo zis yah lvgyo jens lyis sat das zis nghamh los. 34 Nghuot laus eq dius dvnganh dah xikkhonh mas nyoqnho ngelang yoh dah Lyi svra Gamale ge dah Pharishe dvyuk hauh nhaiqbos huom mha toq las, lvgyo jens lyis nghe pheh dvdvm thuq loh nhang das xiklyis taiq kat las, 35 nyang taiq zis gas, Israel dius jens eh, haih bang lyis cha kuot das zis gas vlhomuh nghamh yoeuh shih geh. 36 Khasoeh ge lyis xikpheh Thuda ge soeu nyang dvkohlhaiq teh thuq los lho lhyi dius nyeixo ko nyah thang mas chank ku. Nyang gas sat zis xauh las, nyah dang gyo bang dvnganh gas lanhsanhhu bi dyuk zis yah nyang kuot cho cha eq ma bweh lo. 37 Hauh thang lhyi dius nyings lhaih yoq lyis, Galile dius Yuda thuq los las dius jens lyis nyah jyank pheh lang yoeus loh. Nyang eq sat zis xauh las nyah thang chank bang eq lanhsanhhu mus tyamp. 38 Housoeh yvmvyah gvshih ngos namoq lyis taiq bah, Haih soe yah sen las nghuot goeus jungh, nyamoq lyis cha vkuot goh: khasoeh ge lyis nyamoq nghamh toh zis cangsoeu dius masyah nghuot lyis gas dyoq tyamp das. 39 Nghuot laus eq Mangso jyank masyah nghuot lyis gas namoq nyamoq lyis ung das zis ma nghuot, Mangso lhyi jes kuot bang dvduot das, ge. 40 Hauh dang lyis nyamoq lhom yoeus yvmvyah, lvgyo jens lyis khi yoeus lho lha lyuk las Yesu nyings yah ma taiq das xiklyis vmingh dyei lho lha kat kat. 41 Nyamoq gas, Nyah nyings gvng mas xoqphuh das zis mon yih nyeis ge Mangso suon dyei yvmvyah gausyis zis yah hauh huom masyah tsain thuq loh. 42 Nyamoq nyeih yau nyeih yhenmuh mas eq, nyamoq nyeis dah yhen khanghmuh mas eq, Yesu gas Khristu nghuot cho ma lyen lo jyauh, taiq kyoh nyeis.
1 Hauh buisnyeis gyo lyis changlo jens nyo los lyis, nyeih yau nyeih dah phuqsoe muh mas nyamoq mas dah chauhmuh jens lyis yoeuh lhaiq toh yvmvyah, Heleni jens gas Hebre jens lyis tsain lop. 2 Hauh uhlyis lvgyo dvci aiq yuk moq gas, somci moqmuh lyis khi tsainh toh las taiq zis gas, Yang Mangso dah dang lyis nungsyos toh las lvzo lvshuk ba dyei nyeis das zis gas ma doeus. 3 Housoeh las boekyis eh, namoq mas lomluk las Gyingshang Dyos yahge joeui dyingh bang nyhet yuk khyen toh geh. Yang hauh bang lyis haih muh mas toeuq kat goh. 4 Ngamoq gas shvmanh dung muh yahge gausyis dang taiq kyoh muh mas shishenh top yoh dyei das. ge. 5 Hauh dang lyis phung dius jens dvnganh xamxonh las lomsjingh ehnyet yahge Gyingshang Dyos dyingh dah Stephan yahge Yuda, Prokoru, Nikanor, Timon, Pamena yahge Yuda lomsjingh cho chank soeu gohnyau bang Antiok wus mas dah Nikola moq lyis tsain khyen yoeus. 6 nyamoq lyis lvgyo jens dah xikkhonh mas tsain shwih toh. nyamoq shvmanh dung thang lhyi nyamoq thoq mas loq kih dyei. 7 Mangso dah dang eq jelvm los las Yerusalem wugungs mas changlo nyoshoq je los. Phudyei bang nyoshoq eq hau lomsjingh cho tsain chank. 8 Gvshih Stephan ka Mangso dah jyehjuh yah lomsjingh ehnyet yahge yomsoq yah dyingh soeu nghuot las, dius jens dah xikkhonh mas kuh dah yomsoq muh yahge mauh loqmuh kuot xoeuq. 9 Bent Kureni yahge Alesandria mas dah Yuda dius dvyhamh vsainnyang Lhuiq kat zis xauh bang ge dah lyi jungs phung mha dah phung dius jens nghuot. nyamoq gas Stephan yah phyen-goh. Kiliki yahge Asia mau mas dah Yuda dius jens dvyhamh eq nyang yah phyen-goh. 10 Nghuot laus eq Dyos gas Stephan lyis joeui dang dyei las nyang taiq lyis nyamoq nyang lyis ma yoh he. 11 Housoeh nyamoq gas dius dvyhamh lyis khauwhot dyei las, Nyang gas Moshe yahge Mangso lhyi loeusmus soqzo nyeis zis ngamoq xauhgyo, ge taiq nhang. 12 Nyamoq gas dius jens, logis jens yahge lyi svra moq lyis hoeu nhang las, hauh bang gas nyang lyis loh nyhik lha nhaiqbos huom mha tsain shwih e. 13 Housoeh ma ying kanghjyoeng jens lyis toeuq toh las nyamoq gas, Hauh soeu ka haih Gyingshang joqyos yahge lyi lyis loeusmus soqzo dang ma no lo taiq nyeis. 14 Khasoeh ge lyis Nazaret Yesu ge soeu ka haih joqyos lyis thyoq tyamp las, ngamoq lyis Moshe dyei toh dah thungh lyis thaiq tyamp das ge nyang nyang taiq dang ngamoq xauhgyo, ge. 15 Housoeh hau huom mha tsain tsung toh bang dvnganh nyang lyis yoeuh tsuk toh lyis, nyah nyoqnho ka loeuswons soeu dah nyoqnho teh nghuot zis nyamoq nyvng.
1 Phudyei Zainsmuh taiq cho haih zis jyoeng lah, ge. 2 Nyang taiq zis gas, Vmang vnoeuh moq yahge uwus moq eh, gyo yoeus dyei geh: ngamoq dah phauh thyeih Abraham Haran mas ma los nyeis shih, Mesopotamia mau mas nyeis khoq yoq lyis, phunk bos dah Mangso ka nyah jyank mas thuq xoeuq las taiq zis gas, 3 Nah mau, nah buisnoms sainhchangh masyah thuq las ngos nvng lyis tuonh shet das mau mas loh aq, ge. 4 Housoeh las nyang gas Khade mau masyah thuq las Haran mau mas los nyeis. Houmha nyah uwus shei thang lhyi, Mangso ka gvshih namoq nyeis, haih mau mas thuot los nhang. 5 Houmha nyang lyis yhenzis yahge maunyeis khyei yos iq khvlangh ma dyei laus eq Mangso nyang lyis dangthoengh toh zis gas, nyang yahge nyah vkoq gas hauh mau lyis xauh sain das, ge. Hauh uhlyis Abraham gas loshang ma bos shih. 6 Hauh thoq lyis Mangso haih cho lhyi taiq zis gas, Nyah vnyau lvbaus mau mas loh khau nyeis las, hauh mau mas nyeixo zvn jons duot las nyamoq lyis gyvzaiq gyvnang kuot zis xauh das. 7 Nyamoq lyis jons kuot dah vnyau lyis eq, ngos joeng das, hauh uhlyis nyamoq thuq los las haih joqyos mas ngos lyis paiq das, ge. 8 Vthyoh tyomh cho yah sen dah thanghchvp lyis eq nyang lyis dyei kat. Housoeh las Abraham mas yaus dah Isak lyis xet vnyeih lyis vthyoh tyomh dyei. Isak mas yaus zis Yakop, Yakop mas yaus zis phauh thyeih moq dvci aiq yuk nghuot. 9 Phauh thyeih moq gas Yosep lyis noh las Egutu mau pheh ungh kat. Nghuot laus eq Mangso nyang yah dvgeh nyeis yvmvyah, 10 Shohjyen zis dvnganh masyah nyang lyis khyuot yoeus las, Egutu hwankti Pharao dah xikkhonh mas nyang lyis nyoqnho yoh nhang lha joeui Chixoeuq nhang. Hauh hwankti ka Egutu mau yahge nyah yhenbang dvnganh lyis guon soeu kuot nhang. 11 Hauh uhlyis Egutu mau yahge Khanan mau gonh mas phangh khauq gyoh las yaukyenh zainsmuh jweh los. Yamoq dah phauh thyeih moq eq zonoms khalhye ma daq xo lo. 12 Gvshih Egutu mau mas wom joq cho lhyi Yakop xauhgyo las, nyang gas, yah phauh thyeih moq lyis cangxeih vlhain nhang kat. 13 Aiq vlhain ka Yosep gas nyah vmang vnoeuh moq lyis nyang hank nghuot cho taiq kyoh las Yosep dah vnyau cho lhyi eq Pharao seq loh. 14 Housoeh Yosep gas nyah uwus Yakop yahge nyah dvyhen gonh oen das, dius nyhetci oeng yuk gonh lyis loeus kyoh las Egutu pheh los das xiklyis khi kat. 15 Yakop eq Egutu mau mas e lha, nyang yahge yah phauh thyeih moq houmha shei goeus. 16 Nyamoq mvng lyis Shekhem mha tsain yoeus los las, Shekhem mas tsain nyeis, Hamor dah nyei nyet jens jyank masyah Abraham dah ngwis yah wis toh lop mas tsain nyhop. 17 Abraham lyis Mangso dangthoengh toh zis yah sen dah shishenh jweh los lyis, Egutu mas nyeis, yah dius jens gas svsoh jebais los. 18 Hauh uhlyis Yosep lyis ma seq dah hwankti dvyuk guon xi los. 19 Nyang gas yah vnyau lyis lhyent zis yah, phauh thyeih moq lyis gyvzaiq gyvnang shoeuhshih las nyamoq dah lonoeuh jens lyis shei bas jungh ge doeuh tyamp nhang. 20 Hauh shishenh lyis Moshe khoeu los: nyang gas Mangso dah xikkhonh mas yungh joq. Nyah uwus dah yhen mas lhamhmuh somh khyvp nyhoeu las, 21 doeuh tyamp toh zis xauh uhlyis, Pharao dah lonyi kui zis yah nyah lo kuot las nyhoeu kat. 22 Moshe eq Egutu joeui dvnganh xuq las, nhuot nhuot loq loq kunk soeu nghuot. 23 Gvshih Moshe nyenhkyi nyeici zvn bos lyis nyah boekyis Israel jens jyank mas e komh mes ehnyet bos los. 24 Hauh uhlyis gyvzaiq gyvnang xauh nyeis soeu dvyuk lyis nyang nyvng las, hauh soeu lhyi yeimus las, gyvzaiq gyvnang kuot soeu Egutu dius lyis lvto phuk khyvlyis sat. 25 Moshe loq yah boekyis lyis Mangso khyuot yoeus cho phank dyei nyeis zis gas nyamoq seq das, ge las nghamh laus eq, nyamoq gas ma tsain seq. 26 Thang lhyi nyeihyo Moshe ka, Israel nyang changh nyang zan goh nyeis zis lyis e zangh nyvng las, nyah aiq yuk lyis khyuon mes yvmvyah, Nhaiqbos tang eh, vmang vnoeuh nyang changh dvnghuot lyis chamus nyang changh nyang zan goh nyeis lah, ge khyuon lhyi, 27 yhenkyoh lyis shoeuhshih nyeis soeu ka, Moshe lhyi duon tyamp zis yah, Nvng lyis ngamoq thoq mas guon soeu yahge, soetuon soeu hank kuot nhang? 28 Nyinaq Egutu dius dvyuk lyis sat teh, ngos lyis eq sat mes lhyeh, ge phuk taiq. 29 Hauh dang gvng mas Moshe phang lha, Midian mau mas dius boengh e duot nyeis uhlyis, nyang mas yukgis lo aiq yuk bos. 30 Nyeici zvn dyingh lai thang lhyi, Sina boms dah mhanhdyvp, nyi duk nyeis dah mhanhgyomh mas, Yhensain dah loeuswons soeu nyah jyank mas thuq los. 31 Moshe ka hauh yvlyis nyvng lyis hauh nyoqnyvng gvng mas nyang mauh las hauh zis lyis yoeuh das ge loh lyis, Yhensain dah thwe hou mhayah taiq thuq los zis gas, 32 Ngos gas nah phauh thyeih moq dah Mangso, Abraham, Isak, Yakop moq dah Mangso nghuot, ge. Moshe ka gyuk nvn las ma womh yoeuh mus. 33 Yhensain nyang lyis taiq zis gas, Nah thyvkoq khyuot tyamp aq. Khasoeh ge lyis nvng yap joqyos gas gyingshang. 34 Egutu mas ngah dius jens xauh dah shoeuhshih cho lhyi ngos jyoengh nyvng goeus. Nyamoq noskyingh thwe xauhgyo. Housoeh yvmvyah nyamoq lyis khyuot yoeus das xiklyis ngos gyoh los zis nghuot. Los aq, ngos nvng lyis Egutu mas nhang kat bah, ge. 35 Housoeh las, Nvng lyis guon soeu yahge soetuon soeu hank kuot nhang, ge las nyamoq he tyamp dah Moshe lhyi, Mangso ka mhanhgyomh mas thuq xoeuq dah loeuswons soeu lhyi yah, guon soeu yahge khyuot yoeus soeu kuot das xiklyis nhang kat. 36 Housoeh nyang nyamoq lyis Egutu mas eq, Thomh Nes mas eq, mhanhdyvp mas eq nyeici zvn top yomsoq muh yahge mauh loqmuh chixoeuq las shwih los. 37 Haih Moshe nyang, Namoq vmang vnoeuh masyah ngos teh dah lvpe dvyuk thuq los nhang das ge Israel jens lyis taiq toh soeu nghuot. 38 Mhanhdyvp mas nghuot yoq lyis dah moqphung mha Sina boms mas nyang yah dang jis goh dah loeuswons soeu yahge yah phauh thyeih moq yah dvgeh nghuot soeu ka, nyang nghuot: yang lyis dyei das, kang bos dah dang lhom yoeus soeu eq nyang nghuot. 39 Yah phauh thyeih moq gas nyah dang ma mes gyo las, nyang lyis nungsyos toh zis yah, nyamoq dah nhaiqlom mas Egutu pheh doms tauh loh mes. 40 Nyamoq Aron lyis taiq zis gas, Ngamoq xik pheh kat das zis mangso jens kuot aq. Khasoeh ge lyis ngamoq lyis Egutu masyah shwih thuq los, haih Moshe chamus goeus zis ngamoq ma seq, ge. 41 Hauh buisnyeis gyo lyis nyamoq noeu lho dvkoeuq kuot las, hauh silho lyis lomhxangh lainh las nyamoq nyang loq yah kuot dah muhzoh xiklyis pwe kuot nyeis. 42 Housoeh yvmvyah Mangso ka nyamoq jyank masyah nyoqnho gohshot xoeu tyamp las, maukhung mha dah buislom lhamhmuh lyis paiq das xiklyis doeuh tyamp khoq dah haih zis gas, lvpe jens dah maussauh mas, Israel dius jens eh, hau mhanhdyvp mas nyeici zvn gyo lyis namoq sat dah gaunyhauq yahge lomhxangh lainh zis gas, Ngos lyis paiq zis nghuot lah? 43 Namoq paiq das xiklyis kuot toh dah gywes lho tsain nghuot dah Molok dah zvng yahge namoq dah gywes Rephan dah kyi namoq tsain wuq. Housoeh yvmvyah namoq lyis ngos Babilon lai shoq jonsdoeus loh nhang das, ge lhaih toh. 44 Nvng nyvng dah vzwvng yah dvyhangteh chank kuot aq, ge Moshe lhyi taiq kat zis teh kuot dah kanghjyoeng zvng lyis, hauh mhanhdyvp mas, yah phauh thyeih moq xauh yoeus. 45 Hauh thang lhyi yah phauh thyeih moq gas, nyamoq xikkhonh masyah Mangso khat tyamp dah gohnyau bang mau lyis nyamoq dah mau kuot das xiklyis Yoshua yah dvgeh wvng los uhlyis haih zvng eq chi wvng los las Dawi dah zaih jweh shoq joq. 46 Dawi gas Mangso xikkhonh mas nyoqnho yoh las, Yakop dah Mangso nyhenshang zvng xo das xiklyis sang toh goeus laus eq, 47 Solomon yuk nyah xiklyis zvng kuot dyei. 48 Nghuot laus eq nyhang thank Soeu ka, dius loq yah dvkuot yhen mas lungh zis ma nghuot. Hauh cho lvpe taiq zis gas, 49 Maukhung ka ngah hwankti tank, nyeisjvng gas ngah nangte nghuot. Nvng ngah xiklyis khasoeh teh dah yhen kuot das lah? Ngos no das joqyos gas khamha nghuot lah? 50 Hau dvnganh zis lyis ngah loq yah kyingh dvkuot toh ma nghuot lhyeh? ge Yhensain taiq, ge. 51 Nhaiqlom than lha ehnyet yahge no lyis vthyoh ma tyomh bang eh, namoq vjangh Gyingshang Dyos lyis ngoek tyamp; namoq dah phauh thyeih moq kuot teh namoq eq housoeh dvtsain kuot nyeis. 52 Namoq dah phauh thyeih ma shoeuhshih ku dah lvpe hank bos lah? Hauh Dan Soeu thuq los das cho lhyi taiq hoeuh bang lyis, nyamoq sat. Gvshih namoq eq hauh soeu lhyi kyauh tyamp bang yahge sat bang nghuot. 53 Loeuswons bang masyah xauh yoeus dah Mangso dah lyi xauh yoeus bang nghuot laus eq, namoq hauh yvlyis chank tyink zis ma nghuot, ge. 54 Hauh cho xauhgyo lyis nyamoq nhaiq gis yo zis yah nyang lyis zwis swih las tsain yoeuh. 55 Nyang gas Gyingshang Dyos dyingh las, maukhung mha yoeuh kat lyis, Mangso phunk yahge Mangso dah loqyos shot pheh Yesu yap joq yvlyis nyvng las, 56 Yoeuh aq, maukhung phank hanh joq las cangsoeu Lo gas Mangso dah loqyos shot pheh yap joq yvlyis ngos nyvng goeus, ge. 57 Hauh uhlyis nyamoq gas no cauq, yomkat kaiq las, dvyih dvyot dvlhain dvm lyis nyah jyank mas tsain dyvm e las, 58 nyamoq gas nyang lyis wus nghe pheh she thuq loh las lukzains yah tsain chomp doeuh. Hauh uhlyis kanghjyoeng jens eq nyamoq dah dyi khyuot las Saulo ge dah loyvm phoq khyeiyang mas tsain toh. 59 Housoeh tsain doeuh nyeis lyis, Stephan shvmanh dung zis gas, Yhensain Yesu eh, ngah dyos lyis lhom yoeus dyei aq, ge. 60 Tsai, nyang phvluk zomhgyuis las, Yhensain eh, haih yobos nyamoq lyis vhuon dyei ge yomkat kaiq. Hauh zis dye taiq lyis nyang shei goeus.
1 Saulo eq nyang lyis sat dah yvmas bos jyonh. Hauh buisnyeis lyis Yerusalem mas dah phung ka shoeuhshih zis xauh los las, lvgyo jens masyah lai las gohtoeu dvnganhmoq gas Yuda mau, Samari mau, joqyos khyiq khanghmuh mas tsain dyos loh. 2 Nghuot laus eq lomsjingh cho mha wontang bang gas, Stephan lyis ba nyhop las, nyah xiklyis kukxi zainsmuh kuot. 3 Saulo ka yhen khanghmuh wvng las nyelo yukgis lo lyis lang she lha thung lhunk zis yahge hau phung lyis thyoq sanh tyamp. 4 Dyos loh bang gas, loh jweh dah joqyos khanghmuh mas Dang lyis taiq kyoh. 5 Hauh uhlyis Philip gas Samari wus mas loh las, Khristu dah cho taiq kyoh. 6 Nyang taiq kyoh cho xauhgyo zis yahge nyang chixoeuq dah vlho tsain nyvng lyis, dius jens ehnyet dvlom yah nyah dang lyis nhaiq wvng zis yah tsain gyo yoeus. 7 Khasoeh ge lyis, yius kuq bang nyoshoq masyah, yius jens gas yomkat kaiq las tsain thuq loh. Gungsjen shei bang yahge khyei dyoq bang nyoshoq eq gis los. 8 Housoeh las hauh wus mas svsoh gausyis nyeis. 9 Nghuot laus eq houmha Simon ge soeu dvyuk nyeis. Nyang gas nyah gungs nyang diuszains dvyuk teh nghamh las nyah hweq kat zis yah Samari jens lyis dvyoq mauh nhang soeu nghuot. 10 Dius ngislo kuhlo dvnganhmoq yah, Haih soeu ka kuh thank Mangso dah yomsoq nghuot, ge nyah dang lyis omes zis yah tsain gyo. 11 Hauh soeu ka nyah hweq yah nyamoq lyis nyangh nyangh lo mauh nhang goeus yvmvyah, nyang lyis omes zis yah gyo zis nghuot. 12 Nghuot laus eq Mangso dah munghdan cho yahge Yesu Khristu nyings yah sen dah gausyis dang Philip taiq kyoh yvlyis tsain lomsjingh las, nyelo yukgis lo jeisnyhop tsain kham. 13 Simon nyang eq lomsjingh las jeisnyhop dye kham yoeus lyis, Philip thang mas chank nyeis. Nyang kuot dah yomsoq muh yahge vlho nyvng lyis nyang svsoh mauh. 14 Samari jens Mangso dah Dang lhom yoeus zis lyis Yerusalem mas nyeis dah lvgyo jens xauhgyo lyis, nyamoq gas Petru yahge Yohan lyis nyamoq jyank mas nhang kat. 15 Nyah aiq yuk eq houmha jweh lyis, nyamoq Gyingshang Dyos xauh yoeus das xiklyis shvmanh tsain dung dyei. 16 Khasoeh ge lyis nyamoq hank thoq mas eq Gyingshang Dyos ma gyoh lyih ku shih. Yhensain Yesu dah nyings mas jeisnyhop kham zis kyingh dvtsain nghuot shih. 17 Housoeh lvgyo Petru yahge Yohan nyamoq thoq mas loq kih dyei lyis, nyamoq hau Gyingshang Dyos tsain xauh kham yoeus. 18 Lvgyo nhaiqtang dah loq kih dyei las Dyos xauh kham yoeus zis lyis Simon nyvng lyis, nyang ngwis e dyei lho lha, 19 sang zis gas, Hank thoq mas laus eq ngos loq kih lyis, hauh soeu Gyingshang Dyos xauh yoeus das xiklyis, housoeh teh dah yomsoq ngos lyis eq dyei aq, ge. 20 Petru taiq zis gas, Mangso dah jyungshuk lyis ngwis yah xauh yoeus das ge nghamh yvmvyah, nah ngwis gas nvng yah dvgeh dyoqbis bas jungh. 21 Nah ehnyet Mangso dah xikkhonh mas ma dan joq yvmvyah, haih cho mha nvng ma bos, gvmboms ma yoh. 22 Housoeh yvmvyah nah lhung cho lhyi nhaiqlom thaiq las Yhensain lhyi dung aq, nah ehnyet mas nghamh khoq cho toq khyuot dyei mvbeh. 23 Khasoeh ge lyis nvng mas noh cho yah dyingh joq las yaunos dah mauchuotdwang mas lungh joq yvlyis ngos nyvng, ge. 24 Simon phuk taiq zis gas, Nah aiq yuk taiq cho ngah jyank mas cha eq ma jweh bas jungh, ngah nyhen shang nah aiq yuk nyang Yhensain jyank mas bos dung dyei geh, ge. 25 Nyah aiq yuk gas Yhensain dah dang cho kanghjyoeng kat las dye taiq kyoh lyis, Samari wukhau nyoshoq mas hau gausyis dang taiq kyoh uhjyangh Yerusalem pheh tsain tauh loh. 26 Gvshih Yhensain dah loeuswons soeu Philip lyis taiq zis gas, Toq aq, Yerusalem masyah Gaza pheh loh dah cho bangh shoq, mautyi pheh dyet loh aq, ge. Hauh cho ka mhanhdyvp cho nghuot. 27 Housoeh nyang toq las loh. Yoeuh aq, Ethiopia mas guon soeu hwankti nyhiq Kandake dah xikkhonh mas nyoqnho ngelang zainsmuh yoh las, nyah zisyos dvnganh yah zom soeu Ethiopia dius Unuk gas, Mangso lhyi chungh paiq das xiklyis Yerusalem mas loh khoq. 28 Gvshih nyang doms tauh loh zis nyah nyang lhyingh khau mha tsung las lvpe Esaia dah maussauh nghap nyeis. 29 Hauh uhlyis Dyos yah Philip lyis taiq zis gas, Loh aq, hau lhyingh yah tanh tanh loh aq, ge. 30 Philip eq wuih loh las Esaia maussauh nghap nyeis zis xauhgyo lyis, Nvng nghap cho lhyi seqgyo lhyeh, ge nyang lyis nyei. 31 Hauh soeu phuk taiq zis gas, Vjyuk taiq kyoh das soeu ma bos lyis ngos khasoeh kuot las seqgyo das lah, ge las nyang yah dvgeh lhyingh khau mha wvng tsung das xiklyis Philip lyis yus. 32 Nyang nghap dah maussauh dang gas haih zis nghuot. Yvng lyis teh nyang lyis sat das soeu jyank mas shwih loh; Yvnglo gas yvng mauh gom soeu xikkhonh mas taih toh teh, nyang nyah nhuot ma haq. 33 Nyang khyoq zis xauh yvmvyah, nyang lyis jyoeng khyvlyis dang thang ma tsain thyet dyei. Nyah dius caiq hank yoh shap? Khasoeh ge lyis nyah kang ka, Nyeisjvng thoq mas thank tyamp goeus, ge. 34 Unuk Philip lyis phuk taiq zis gas, Haih lvpe ka hank lyis toeuq las taiq au lhyeh, nyah gungs lyis nyang taiq au? Nghuot ya, gohtoeu dvyuk yuk lyis taiq lah, ge. 35 Hauh uhlyis Philip dang taiq phank las, hauh maussauh masyah dang zoh yoeus lho lha, Yesu yah sen dah gausyis dang nyang lyis taiq kyoh. 36 Housoeh nyah aiq yuk tsoq loh las jeis joq yvmas jweh lyis Unuk gas, Yoeuh aq, heimha jeis joq; ngos jeisnyhop kham das xiklyis tomp toh das zis cha bos lah, ge. 37 Philip taiq zis gas, Nah nhaiqlom dvnganh yah nvng lomsjingh goeus ya, gis kham goeus, ge. Nyang phuk taiq zis gas, Yesu Khristu gas Mangso dah Lo nghuot nyeis zis gas ngos lomsjingh goeus, ge. 38 Housoeh nyah lhyingh no nhang lha, nyah aiq yuk jeis lvng mas gyoh e lha, Philip gas Unuk lyis jeisnyhop dyei. 39 Jeis masyah tsain thuq los lyis Yhensain dah Dyos Philip lyis shwih loh las, ma nyvng kat lo. Unuk eq gauslaus zis yah nyah cho nyang loh lo. 40 Philip gas Azotu wus mas jweh nyeis yvlyis nyang soh. Nyang Kesare wus jweh shoq loh uhlyis suh lai dah wus khanghmuh mas hauh gausyis dang taiq kyoh.
1 Hauh yoq lyis Saulo ka Yhensain dah changlo jens lyis sat das xiklyis kyuk tant cho lhyi tsoq kuot nyeis shih. Housoeh nyang gas phudyei zainsmuh jyank mas e lha, 2 haih cho chank bang nyelo yukgis lo, nyvng ya nyvng yvlyis nyhik las Yerusalem mas yoh she los shoq, Damasku wugungs, lyi jungs mas bang lyis dyei kat das vmingh maussauh sang wons. 3 Nyang Damasku wugungs nvm mas jweh lyis maukhung mha dah bvng zis nyah yvmlhaink yah nyetlos nyettant bvng thuq los. 4 Nyang eq nyeisjvng mas lains loh lyis, nyang lyis taiq dah thwe dvkoeuq xauhgyo zis gas, Saulo, Saulo, nvng ngos lyis chamus shoeuhshih nyeis lah, ge. 5 Hauh uhlyis nyang gas, Yhensain eh, nvng hank nghuot lah, ge nyei. Yhensain taiq zis gas, Ngos gas nvng shoeuhshih nyeis dah Yesu nghuot. 6 Nghuot laus eq, toq las wus mas wvng loh aq. Nvng kuot chah cho nvng lyis taiq kyoh langh das, ge. 7 Nyang yah dvgeh loh bang gas tsain mauh: khasoeh ge lyis, thwe xauhgyo laus eq hank lyis eq ma nyvng. 8 Saulo nyeisjvng masyah toq las nyoq phank yoeuh lyis cha eq ma nyvng yvmvyah, nyamoq gas nyang lyis loq masyah she las Damasku wus mas shwih wvng loh. 9 Gvshih nyang gas somh nyeih top nyoq ma nyvng las ma zo ma shuk nyeis. 10 Gvshih Damasku wus mas Anani ge dah changlo dvyuk nyeis. Yhensain ka nyoqnyvng masyah, Anani eh, ge lui. Nyang eq, Yhensain eh, heimha nyeis, ge toeuh. 11 Yhensain taiq zis gas, Toq aq, Chodan ge dah wus cho mha e las, Yuda yhen mha Tarshu mas dah dius Saulo ge soeu lhyi e xo aq, nyang shvmanh dung nyeis. 12 Nyah nyoqnyvng mas Anani ge soeu nyah jyank mas wvng los las, nyang nyoq doms nyvng bas jungh, ge nyah thoq mas loq kih dyei zis, nyvng goeus, ge. 13 Anani gas, Yhensain eh, hauh soeu ka Yerusalem mas nah Gyingshang bang lyis ma gis khyvlyis kha iq kuot zis gas, dius nyoshoq masyah loeus nyoshoq xauhgyo goeus. 14 Nah nyings yoeus bang dvnganh lyis twih she loh das ge, phudyei uhjyung jens jyank masyah vmingh xauh yoeus goeus, heimha eq jweh nyeis, ge toeuh. 15 Nghuot laus eq Yhensain nyang lyis taiq zis gas, Dv e aq, hauh soeu ka gohnyau bang yahge hwankti jens xikkhonh mas eq, Israel vnyau xikkhonh mas eq ngah nyings wons wuq das xiklyis ngos khyen toh, ngah jyeidwis nghuot. 16 Khasoeh ge lyis ngah nyings gvng mas kha iq shanghsenh shohjyen xauh das cho ngos nyang lyis chixoeuq das, ge. 17 Housoeh Anani hauh yhen mha jweh e lha, Saulo thoq mas loq kih las, Vmang vnoeuh Saulo eh, nvng nyoq doms nyvng zis yahge Gyingshang Dyos yah dyingh bas jungh, nvng los cho mha nvng lyis nyvng xoeuq dah Yhensain Yesu gas ngos lyis nhang kat, ge lho lhyi, 18 Houyah dvyih Saulo dah nyoq masyah vkyvp teh dah zis gyoh tyamp las nyah nyoq doms nyvng goeus. Housoeh nyang toq las jeisnyhop kham. 19 Zonoms eq zo las yom huiq yoeus. Hauh thang lhyi Saulo ka Damasku wus mas dah changlo jens yah dvyoq nyeis uhjyangh, 20 Khristu gas Mangso dah Lo nghuot, ge hauh uhlyis nyang lyi jungs mas tsain taiq kyoh. 21 Nyah dang xauh ya xauhgyo bang gas mauh las, Haih soeu ka Yerusalem mas haih nyings yoeus bang lyis lhoq thyoq soeu ma nghuot lhyeh? Gvshih heimha eq housoeh teh bang lyis nyhik las phudyei uhjyung jens jyank mas loh kyauh das zis los jweh nyeis ma nghuot lhyeh, ge taiq. 22 Saulo ka dvnyeih dvnyeih yombos los las, Yesu gas Khristu nyang nghuot dah cho kanghjyoeng Chixoeuq zis yah Damasku mas nyeis dah Yuda jens lyis mauh nhang. 23 Buisnyeis nyangh nyangh lo thang lhyi Yuda jens nyang lyis sat das zis xamgoh. 24 Nghuot laus eq nyamoq dah khaujeini cho lhyi Saulo seq tyamp goeus. Nyang lyis yoh sat shoq, khomh mas nyeih nyenh tsain lhom nyeis. 25 Housoeh las changlo jens gas, nyenh lyis nyang lyis mhanghkhoq masyah ciank khomhbaiq cho nghe pheh tsain xuot khyoq kat. 26 Housoeh nyang Yerusalem mas jweh lyis changlo jens yah zomhgoh das zis yomkat; nghuot laus eq nyang gas changlo nghuot goeus zis nyamoq ma jingh las nyang lyis dvnganhmoq gyuk. 27 Nghuot laus eq Barnaba gas nyang lyis lvgyo jens jyank mas shwih e lha, Saulo ka Yhensain yah cho mas khasoeh xauhgoh las, Yhensain yah nyang lyis khasoeh taiq zis eq, Damasku mas Yesu nyings yoeus las womh womh taiq kyoh cho eq nyamoq lyis taiq kyoh. 28 Housoeh Yerusalem mas nyang nyamoq yah thuq wvng kuot uhjyangh, 29 Yhensain Yesu dah nyings yoeus las womh womh taiq kyoh nyeis. Greek nyingh kat dah Yuda jens yah eq taiq phyen-goh yvmvyah, nyamoq gas nyang lyis sat das ge sont. 30 Hauh cho lhyi boekyis seq lyis nyang lyis Kesare jweh shoq shwih kat las Tarshu pheh nhang kat. 31 Hauh uhlyis Yuda mau, Samari mau yahge Galile mau dvkhauyah dah phung ka nyenstap zis yah tsain kuhxing los. Nyamoq gas Gyingshang Dyos dah nhaiqtaink dyei zis yah dvyhangteh Yhensain lhyi gyukwoms zis yah nyeis las nyoshoq jebais los. 32 Hauh uhlyis Petru gas dvkhauyah chank komh yenh. Dvlhain ka Luda wus mas nyeis dah Gyingshang bang jyank mas eq jweh e. 33 Hauh yvmas gungsjen shei lha xet zvn top yhetyos masyah ma yoh toq dah Anea ge vbusbih dvyuk lyis nyvng. 34 Petru nyang lyis taiq zis gas, Anea eh, Yesu Khristu nvng lyis gis los nhang goeus: toq aq, nah yhetyos shung aq, ge. Houyah dvyih nyang toq loh. 35 Luda yahge Sharon wus mas nyeis bang dvnganh eq nyang lyis nyvng las Yhensain jyank pheh tsain lhain los. 36 Gvshih Yopa wus mas Tabitha ge dah changlo vmesbih dvyuk nyeis. Greek pheh hauh nyings gas Dorka ge. Vjyuk gas cvt nghuot. Nyang gas gis dah muhzoh yahge vlu dyei cho mas nhaiqbos soeu nghuot. 37 Hauh yoq lyis nyang nos las shei tyamp. Nyah mvng lyis cheih las nyhang tsank yvp mas toh toh. 38 Luda gas Yopa wus yah ni joq las, Petru houmha nyeis cho changlo jens xauhgyo lyis nyamoq dius dvzomh nhang lha, Ngamoq jyank pheh lvnyap jenh lyih aq, ge dung kat. 39 Petru toq las hauh aiq yuk yah dvgeh chank loh. Nyang jweh lyis nyhang tsank yvp mas shwih wvng loh las, chauhmuh jens dvnganhmoq nyah vyvm mas yap ngaus uhjyangh, nyamoq yah dvgeh nyeis shih uhlyis Dorka chop dah dyi chixoeuq las nyeis. 40 Petru dvnganhmoq lyis nghe pheh khat thuq lho las, phvluk zomhgyuis las shvmanh dung nyeis. Housoeh hauh mvng pheh lhain los las, Tabitha eh, toq aq, ge. Hauh uhlyis Tabitha gas nyoq phank las Petru lyis nyvng lyis toq tsung toh. 41 Petru eq loq yhuonh kat las she toq lho las, gyingshang bang yahge chauhmuh jens lyis khi yoeus las vdwis kyauh. 42 Hauh cho lhyi Yopa wuxom gonh xauhgyo yvmvyah nyoshoq Yhensain lhyi lomsjingh. 43 Housoeh Petru gas Yopa wus mas dvyoq lo shohyeis muh kuot soeu Simon yah dvgeh nyeis.
1 Gvshih Kesare wus mas Korneli ge soeu dvyuk nyeis. Nyang gas Itali ge dah thoenkgus jesdvp mas jes dvxo guon zau nghuot. 2 Hauh soeu ka lomsjingh cho mas wontang lha nyah yhenbang dvnganh yah dvgeh, Mangso lhyi gyuk woms zis yah svbih lyis vlu nyoshoq dyei uhjyangh Mangso lhyi vjangh dung nyeis. 3 Dvnyeih gas, somh shishenh ko lhyi Mangso dah loeuswons soeu nyah jyank mas jweh las, Korneli eh, ge nyang lyis taiq zis gas nyoq mas gyoq gyoq nyvng. 4 Nyang gas hauh soeu lyis gyuk zoh lyis gyaus gyaus yoeuh tsuk toh las, Yhensain eh, chah cho nghuot lah, ge nyang lyis nyei. Hauh soeu ka, Nah shvmanh dung zis yahge vlu dyei cho ka, Mangso xikkhonh mas nyoqnyhank dvkoeuq khyvlyis bangh los goeus. 5 Gvshih Yopa wus mas dius nhang las, Petru ge dah Simon lyis khi aq. 6 Nyang gas shohyeis muh kuot soeu Simon yhen mas nyeis; nyah yhen ka thomh yvm mas nghuot, ge. 7 Korneli yah dang jis goh dah loeuswons soeu loh thang lhyi, nyah yhen mas dah uhkung dvzomh yahge nyah thang mas vjangh chank yenh moq mas lomsjingh cho mas wontang soeu jeslo dvyuk lyis khi yoeus las, 8 nyamoq lyis hauh cho dvnganh taiq kyoh lho las, Yopa wus mas nhang kat. 9 Nyamoq eq nungs nyeih loh las, Yopa nvm mas jweh lyis, Petru gas nyeihgungs dvci aiq shishenh ko lhyi shvmanh dung das ge yhenkhung thoq mas doq loh. 10 Housoeh wom ba nyeis uhlyis nyang wom yuot las zonoms dvja ja zo mes nyeis. Hauh uhlyis nyang yhet muih loh las nyoqnyvng nyvng. 11 Maukhung phank las kha iq teh jangthunk dvkhyvp nyeisjvng mas khyoq kat yvlyis nyang nyvng. 12 Hauh yvmas nyeisjvng thoq mas dah nyei khyei dap gaunyhauq, yewus, shweh loh ja yahge maudang nghoq vja ja tsain bos. 13 Petru eh, toq las sat zo aq, ge thwe nyings thuq los zis nyang xauhgyo. 14 Petru phuk taiq zis gas, Ma nghuot, Yhensain eh, ma gis zo zis yahge ma lhoq ma shang vyhang lhyi ngos khanhamp eq ma zo yoeuh, ge. 15 Aiq vlhain dah thwe ka, Mangso cheihshang goeus vyhang lyis ma lhoq oen vsang, ge. 16 Somh lhain shilo housoeh bweh las, hauh thang lhyi hauh yvlyis maukhung pheh dvlhaindvm doms yoeus tyamp. 17 Petru gas nyang nyvng dah nyoqnyvng gas cha nghuot au, ge mauh khamkhvv nyeis uhlyis, Korneli nhang kat bang Simon yhen xo nyeis las khomh nvm mas yap joq. 18 Hauh yhen mas Petru ge dah Simon nyeis ma nyeis tsain kaiq nyei nyeis. 19 Petru gas nyoqnyvng hauh dah cho lhyi nghamh yoeuh nyeis shih lyis, Dyos gas, Yoeuh aq, dius somh yuk nvng lyis xo nyeis. 20 Housoeh yvmvyah nvng toq las gyoh e aq; nyamoq yah dvgeh chank loh aq, khamkhvv chank ma bos: khasoeh ge lyis nyamoq lyis ngos nhang kat, ge. 21 Petru eq Korneli yah nyah jyank mas nhang kat bang jyank mas gyoh e las nyei zis gas, Yoeuh aq, namoq xo nyeis soeu ngos nghuot, chah soe bos las xo goh lah, ge. 22 Nyamoq taiq zis gas, Dan las Mangso lhyi gyukwoms zis yahge Yuda dvnyau gonh dah xikkhonh mas nyoqnho ngelang bos las jes dvxo guon zau Korneli gas nvng lyis nyah yhen mas khi hwank las nah dang gyo yoeus das cho, Mangso jyank masyah Gyingshang loeuswons soeu lyih taiq kyingh zis xauh, ge. 23 Housoeh nyang nyamoq lyis khi hwank las thoeng nhang. Nungs nyeih Petru toq las nyamoq yah dvgeh loh. Yopa wus mas dah boekyis dvyhamh eq nyang yah dvgeh bos loh. 24 Hauh thang lhyi nyeihyo Kesare wus mas wvng loh. Korneli gas nyah vmang vnoeuh moq yahge buisnoms sainhchangh jens lyis shwih huom lha nyamoq lyis langh nyeis. 25 Gvshih Petru wvng loh lyis, Korneli gas lhom zes zis yah nyah khyeiyang mas dupaiq. 26 Nghuot laus eq Petru gas, Toq aq, ngos eq seq shei dah dius dvnghuot, ge taiq uhjyangh nyang lyis she toq kat. 27 Housoeh nyang jisgoh zoh lyis yah wvng loh yoeuh lyis dius nyoshoq huom joq yvlyis nyvng. 28 Petru nyamoq lyis taiq zis gas, Yuda dius ge soeu ka gohnyau dius yah thuq wvng zomh goh dah lyi thungh ma bos zis lyis namoq nyang seq. Nghuot laus eq, hank lyis eq ma mon ma yih, ma gying ma shang oen ma gis sang cho ka Mangso ngos lyis chixoeuq goeus. 29 Housoeh nghuot yvmvyah, ngos lyis khi lyis ngos ma he he chank los. Housoeh las ngos lhyi chamus khi goh lah, oen nyei mes, ge. 30 Korneli taiq zis gas, Lai loh goeus nyei nyeih nyenhthang somh nayi lyis ngos ngah yhen mas shvmanh dung nyeis lyis, yoeuh aq, kyi kyi bvng dah dyimis wuot soeu dvyuk ngah xikkhonh mas nyetlos nyettant yap xoeuq las, 31 Nyang taiq zis gas, Korneli eh, nah shvmanh dung dang gyo yoeus goeus. Nah vlu dyei zis eq Mangso comh toh goeus. 32 Housoeh yvmvyah Yopa mas Petru ge dah Simon lyis e shwih nhang aq; hauh soeu ka thomh nvm mas nyeis, shohyeis muh kuot soeu Simon yhen mas nyeis, ge. 33 Housoeh yvmvyah houjang ngos nah jyank mas dius nhang las, gvshih nvng jweh los zis gas svsoh gis. Housoeh las Mangso nvng lyis taiq nhang kat dang lyis gyo yoeus das xiklyis gvshih ngamoq dvnganh Mangso xikkhonh mas nghuot joq, ge. 34 Petru dang zoh yoeus las taiq zis gas, Mangso ka dius nyoqnho ma khyen zis gvshih ngos jyoengh seq goeus. 35 Dius nyau khanghmuh mas nyang lyis gyukwoms phauh nyang zis yah dan dah muh kuot soeu lyis gas nyang yoh lhom yoeus. 36 Mangso ka Israel dius jens lyis gausyis Dang dyei yvlyis namoq seq. Hauh dang mas nyang gas dvnganh dah Yhensain nghuot dah Yesu Khristu masyah nyenstap gausyis Dang lyis taiq kyoh nyeis. 37 Yohan jeisnyhop cho lhyi taiq kyoh thang lhyi, Dang haih zis gas Galile mau masyah Yuda mau gonh mas dyos loh goeus. 38 Mangso ka Nazaret phoq Yesu lyis Gyingshang Dyos yah eq, yomsoq yah eq nyang lyis coeu juot dyei goeus zis namoq seq. Yesu Khristu gas vwi vyvm mas loh las, gis dah muh kuot zis yahge yius yah nhiq zaiq toh bang dvnganhmoq lyis lhoq gis dyei. Khasoeh ge lyis Mangso ka nyang yah dvgeh nghuot. 39 Housoeh Yuda jens dah mau mas eq, Yerusalem wus mas eq, nyang kuot yenh muhzoh dvnganh dah kanghjyoeng jens gas ngamoq nghuot. Hauh soeu lyis nyamoq tapzains mas lhangh sat. 40 Nghuot laus eq Mangso nyang somh vnyeih lyis hauh soeu lyis dwis toqh kat las, 41 Nyah gungs lyis dius dvnganh lyis ma nghuot, Mangso yah kanghjyoeng duot das xiklyis khyen toeuq toh bang nghuot las Yesu shei masyah dwis toq los thang lhyi, nyang yah dvgeh zo shuk nyeis dah ngamoq lyis nyvng xoeuq. 42 Yhensain nyang nyang eq dwis bang yahge shei goeus bang dah soetuon soeu kuot das xiklyis, Mangso toeuq toh soeu nghuot goeus cho dius jens lyis taiq kyoh las kanghjyoeng kat das xiklyis nyang ngamoq lyis taiq toh. 43 Lvpe jens dvnganh eq nyah cho kanghjyoeng kat zis gas, Nyah nyings lyis loms ya lomsjingh bang yaunos khyuot dyei zis xauh das, ge. 44 Petru hauh cho taiq nyeis shih lyis, hauh dang xauhgyo bang dvnganhmoq thoq mas Gyingshang Dyos gyoh los. 45 Gyingshang Dyos ge dah jyungshuk gas, gohnyau bang thoq mas huot khyoq yvmvyah Petru yah dvgeh chank bang, vthyoh tyomh cho chank goeus bang yahge lomsjingh bang mauh hangh toh. 46 Khasoeh ge lyis nyamoq dang vja ja taiq zis yahge Mangso lhyi chungh zis tsain xauhgyo. 47 Housoeh Petru taiq zis gas, Yang teh Gyingshang Dyos xauh yoeus bang lyis jeis yah jeisnyhop kham das xiklyis hank tomp toh chank bos lah, ge. 48 Housoeh nyang nyamoq lyis Yesu Khristu dah nyings mas jeisnyhop kham das cho taiq kat. Hauh thang lhyi nyamoq gas Petru lyis, dvyoq nyeis khoq das xiklyis dung.
1 Lvgyo jens yahge Yuda mau mas dah lomsjingh bang dvyhamh gas, Gohnyau bang eq Mangso dah dang lhom yoeus, ge dah cho xauhgyo. 2 Petru Yerusalem mas jweh lyis vthyoh tyomh cho chank bang gas, nyang lyis yobos huon. 3 Nvng chamus vthyoh tyomh cho ma chank bang jyank mas loh las, nyamoq yah dvgeh zo shuk lah, ge. 4 Hauh uhlyis Petru gas hauh cho vzoh yah dvkoeuq thang lhyi dvkoeuq heisoeh ge, taiq kyoh. 5 Ngos gas Yopa wus mas shvmanh dung nyeis; hauh uhlyis ngos muih loh lyis nyoqnyvng nyvng yvmas, kha iq teh jangthunk dvkhyvp maukhung masyah khyoq kat zis gas ngah jyank mas jweh los. 6 Ngos doms soq yoeuh lyis, nyeisjvng thoq mas dah nyei khyei dap gaunyhauq, yewus, shweh loh ja yahge maudang nghoq vja ja tsain bos zis nyvng. 7 Hou kyingh ma nghuot, Petru eh, toq las sat zo aq, ge ngos lyis taiq dah thwe eq xauhgyo. 8 Ngos gas, Ma nghuot, Yhensain eh, vwot v-oeu yahge ma lhoq ma shang ja ngah nhuot mas khanhamp eq ma wvng ku, oen taiq. 9 Nghuot laus eq tsai dvlhain maukhung mas dah thwe ka, Mangso lhoqshang nhang goeus dah vyhang lhyi, Ma lhoq oen ma gis sang, ge. 10 Housoeh somh lhain bweh thang lhyi hau dvnganh maukhung pheh doms yoeus tyamp. 11 Hauh uhlyis nyang Kesare wus masyah ngah jyank mas nhang kat dah dius somh yuk, ngos nyeis dah yhen ganthoq mas yap joq. 12 Ma khamkhvv khvv nyamoq yah chank loh das xiklyis Dyos gas ngos lyis taiq. Hauh thoq lyis hai boekyis khyuk yuk moq eq ngos yah dvgeh loh las Korneli yhen mas wvng loh. 13 Hauh uhlyis hauh soeu ka, nyang loeuswons soeu dvyuk nyah yhen mas los yap yvlyis nyvng; hau loeuswons soeu nyang lyis taiq zis gas, Yopa wus mas dius nhang las Petru ge dah Simon lyis khi aq. 14 Nyang gas nvng yahge nah yhenbang dvnganh khyuot yoeus zis xauh dah gausyis dang nvng lyis dyei das ge los taiq cho ngamoq lyis taiq kyoh. 15 Ngos dang zoh phank las taiq nyeis lyis, cangxeih lyis, yah thoq mas Gyingshang Dyos gyoh lyih yhangteh nyamoq thoq mas eq gyoh lyih. 16 Yohan gas jeis yah jeisnyhop dyei, namoq lyis gas Gyingshang Dyos yah jeisnyhop xauh kham yoeus das, ge Yhensain nyang taiq toh dang lyis ngos soh. 17 Housoeh las Yhensain Yesu Khristu lyis lomsjingh bang yang lyis dyei dah jyungshuk yah dvyhangteh, Mangso nyamoq lyis dyei nghuot lyis gas, ngos gas hank nghuot las Mangso lhyi yoh tomp toh das lah, ge. 18 Hauh cho tsain xauhgyo lyis, nyamoq samlo nyeis las, Housoeh lyis gas, Mangso ka gohnyau bang lyis eq kang dwis yvpheh yoh shwih loh dah ehnyet thaiq cho dyei goeus nyvng, ge. 19 Stephan masyah vzoh xi dah vshoh vjyen shoeuhshih cho gvng masyah tsain dyos loh bang gas, Phoenisia, Kupru mau yahge Antiok wus jweh shoq loh las Yuda dius nyau lyis kyingh Dang tsain taiq kyoh. 20 Nghuot laus eq Kupru yahge Kureni mau mas bang dvyhamh, Antiok mas jweh lyis Yhensain Yesu dah gausyis dang Heleni dius lyis eq tsain taiq kyoh. 21 Yhensain dah loq nyamoq yah dvgeh nghuot yvmvyah, nyoshoq tsain lomsjingh las Yhensain jyank pheh lhain los. 22 Haih loeus gas, Yerusalem mas dah phung jens dah no mas tsain taiq jweh loh zis yah nyamoq gas Barnaba lyis Antiok jweh shoq nhang kat. 23 Houmha jweh las Mangso ka dius jens lyis khasoeh shvmanh dyei cho nyvng lyis nyang svsoh gausyis zis yah nyamoq gas Yhensain mas lomluk luk goeng goeng kuk tap toh das xiklyis dvnganhmoq lyis yomdyei taiq kyingh goeus. 24 Khasoeh ge lyis hauh soeu ka dius gis nghuot yvmvyah, Gyingshang Dyos yah eq, lomsjingh zis yah eq, dyingh joq soeu dvyuk nghuot. Dius nyoshoq lyis Yhensain jyank pheh shwih los. 25 Barnaba gas Saulo lyis loh xo das ge Tarshu pheh thuq loh. Nyang lyis nyvng lyis Antiok mas shwih los. 26 Nyah aiq yuk gas dvzvn dyingh shoq hauh phung yah dvgeh huom nyeis yvmvyah, dius nyoshoq lyis xauh jyauh. Antiok gas changlo jens lyis Khristan ge cangxeih nyhink dah joqyos nghuot. 27 Hauh uhlyis Yerusalem mas dah lvpe jens gas Antiok mas jweh e. 28 Hauh moq mas Agabu ge soeu toq las mungkvn gonh mas yuot panghkhauq zainsmuh los das cho Dyos Chixoeuq zis yah dvyhangteh lvpe pe. Hauh zis Klodi Kesar zaih lyis bweh goeus. 29 Housoeh las changlo jens gas Yuda mau mas dah boekyis jyank mas vsainnyang yoh nyhoq bos pangh kat das ge tsain nghamh thyet toh. 30 Housoeh toeuq toh zis yah dvyhangteh nyamoq kuot las Barnaba yahge Saulo dah loq masyah logis jens jyank mas huon kat.
1 Hauh yoq lyis hwankti Herod gas, phung dius dvyhamh lyis shoeuhshih das ge loqyom tyonh nyeis. 2 Housoeh Yohan dah vmang Yaku lyis moengsa yah sat. 3 Hauh cho Yuda jens yoeuh gaus zis lyis nyvng las, Petru lyis eq nyhik das zis yomkat nyeis. Hauh shishenh gas bicheih ma kat ohlhyoq zo dah pwe nghuot. 4 Petru lyis yoh nyhik lyis thung mas kat toh. Herod gas Lhuiq Kat Pwe lai thang lhyi dius jens jyank mas phank kat dyei das ge, jeslo nyei yuk yuk bos dah jesphung nyei phung loq mas Petru lyis kyauh toh. 5 Housoeh Petru gas thung mha lungh joq. Nghuot laus eq phung ka nyah xiklyis Mangso jyank mas shvmanh khyoeuq dung nyeis. 6 Herod gas Petru lyis shwih thuq yoeus das dah xik lyis nyensyo, Petru gas shamjvng aiq jvng twih las jeslo aiq yuk dah vjo mas yhet joq. Pyada jens eq thung khomh mas zungh nyeis. 7 Hauh uhlyis yoeuh aq, Yhensain dah loeuswons soeu dvyuk gyoh yap las hauh yvpkhau mas bvng joq. Nyang gas Petru dah nunghkhung mas bat las, Lvnyap toq aq, ge nhauh. Hauh uhlyis shamjvng eq nyah loq masyah gyuot loh. 8 Loeuswons soeu nyang lyis taiq zis gas, Dyichih chih las thyvkoq koq aq, ge. Nyang eq kuot goeus. Tsai, Nah dyi lyet chi las ngah thang mas chank los aq, ge doms taiq. 9 Nyang eq thuq las chank loh nyeis. Nghuot laus eq loeuswons soeu bweh nhang dah muh hauh zis jyoengh nghuot zis nyang ma seq las, nyoqnyvng nghuot, ge nghamh nyeis. 10 Nyah aiq yuk zungh joqyos aiq deh lai las, wus shot pheh wvng dah thyeq khomh mas jweh lyis, hauh khomh eq nyang pheh yah phank los. Nyah aiq yuk thuq las wus cho dvkoeuq mas chank los lho las, loeuswons soeu ka houjang nyang yah gang loh. 11 Petru yoh nghamh soh lyis, Yhensain gas nyah loeuswons soeu nhang lha Herod dah loq masyah eq, Yuda jens nghamh toh cho dvnganh masyah eq ngos lyis khyuot yoeus goeus zis gas gvshih ngos jyoengh seq goeus, ge. 12 Nyang hauh cho nghamh soh lyis, dius nyo nyo lo huom las shvmanh dung nyeis joqyos, Makho ge dah Yohan dah ungwes Mari yhen pheh loh. 13 Petru gas, yhen nghe pheh yah khomh loh koq yoeuh lyis, Roda ge dah jyeidwis nyelo dvyuk khomh phank dyei das ge loh. 14 Nyang gas Petru thwe nghuot yvlyis seq las khomh ma phank phank yvpkhau mas wuih tauh loh las taiq zis gas, Petru gas khomh nghe mas yap joq, ge. 15 Nyamoq nyang lyis taiq zis gas, Nvng koh, ge. Nyang gas jyoengh nghuot ge kyingh taiq nyeis. Tsai nyamoq taiq zis gas, Nyah loeuswons soeu nghuot das, ge. 16 Nghuot laus eq Petru gas khomh mas kyingh koq nyeis yvmvyah, nyamoq khomh phank lyis nyang lyis nyvng las tsain mauh. 17 Petru gas tsoeklo nyeis das xiklyis loq toeuq las, nyang lyis thung masyah Yhensain khasoeh shwih thuq los cho nyamoq lyis taiq kyoh las, Haih cho Yaku yahge boekyis lyis taiq kyoh kat geh, ge. Nyang gas gohjoqyos pheh doms thuq loh. 18 Nyoqnyvng los lyis jeslo jens gas Petru mas cha bweh zis ma seq yvmvyah, svsoh nhunk loh. 19 Herod gas Petru lyis xo ma nyvng goeus ya, zungh bang lyis yen yoeuh las nyamoq lyis sat das zis vmingh dyei. Hauh thang lhyi nyang gas Yuda mau masyah Kesare wus pheh gyoh loh las houmha nyeis. 20 Hauh yoq lyis Herod gas Taire yahge Sidon dius jens lyis svsoh nhaiqyo goeus. Housoeh las nyamoq gas ehnyet dvlom yah nyah jyank mas e. Cangxeih lyis hwankti yhen zom soeu Blastu lyis nyamoq lyis pangh das xiklyis lhung las hwankti lyis nyenstap das xiklyis dung: Khasoeh ge lyis nyamoq mau gas hauh hwankti mau mas dah zonoms shukphoh lyis nges nyeis. 21 Housoeh buisnyeis doengs nyeih lyis, Herod gas hwankti gungs shunk las hwankti tank mas tsung las dang taiq. 22 Hauh uhlyis dius jens kaiq zis gas, Dius dah thwe ma nghuot, gywes dah thwe dvnghuot, ge. 23 Nyang gas Mangso dah phunk lyis ma chungh yvmvyah, houjang Yhensain dah loeuswons soeu nyang lyis dvm dyei las, luk luk zis yah shei loh. 24 Mangso dah dang gas tsoq las kuhxing jebais los. 25 Barnaba yahge Saulo ka, nyah aiq yuk kuot dyei chah muh dye las Makho ge dah Yohan lyis eq shwih las Yerusalem masyah tauh loh.
1 Gvshih Antiok wus mas dah phung mha, lvpe jens, svra moq bos. Hauh moq mas Barnaba, Niger ge dah Simon, Kureni dius Luki, Herod yah zomh bes los dah Manaen yahge Saulo moq nghuot. 2 Nyamoq gas Yhensain lhyi chungh paiq las womkyi nyeis lyis Gyingshang Dyos taiq zis gas, Ngos toeuq toh dah muh lyis wons wuq das xiklyis Barnaba yahge Saulo lyis khyen toeuq toh geh, ge. 3 Houyah dvyhangteh, nyamoq gas womkyi, shvmanh dung las, nyah aiq yuk thoq mas loq dye kih dyei las nhang kat. 4 Housoeh Gyingshang Dyos nyah aiq yuk lyis nhang kat zis yah dvyhangteh, Selukia mas gyoh e las, hou mhayah Kupru pheh goeu loh. 5 Salami wus mas jweh lyis Yuda jens dah lyi jungs mas Mangso dang lyis taiq kyoh. Nyah aiq yuk lyis pangh das xiklyis Yohan eq bos. 6 Nyamoq gas hauh goeujo suh lai loh las, Papho wus mas jweh lyis, Bar-yesu ge dah Yuda hweq seq soeu lvpe hwah dvyuk yah xauhgoh. 7 Hauh soeu ka Segiu Paulu ge dah mungh zau jyank mas nyeis soeu nghuot. Mungh zau gas yik soeu nghuot. Nyang gas Mangso dah dang gyo mes las, Barnaba Yahge Saulo lyis khi yoeus. 8 Hauh uhlyis (hweq seq soeu ge dah vjyuk khyvlyis nyhink dah) Elima gas hau mungh zau dah lomsjingh yvlyis lhoeu thyoq mes las, nyamoq lyis zan. 9 Hauh uhlyis Paulo eq ge dah Saulo ka Gyingshang Dyos dyingh zis yah nyang lyis yoeuh tsuk toh las taiq zis gas, 10 Ung lhung cho yahge phanh cho dvnganh dyingh joq, yius dah lo, dan cho khanghmuh dah jes phoq eh, Yhensain dah dan cho lhyi taiq thyoq masyah nvng khanhamp no das lah? 11 Yoeuh aq, gvshih Yhensain nvng lyis yobos dyei las buis dvyoq ma xauh nyvng nyoqjet nyeis das, ge. Houjang nyang nyoq gos tyamp las, soeng soeng noq tyamp. Housoeh nyang lyis she das dius xo uhjyangh suh lhain nyeis. 12 Hauh cho lhyi mungh zau nyvng lyis Yhensain dah jyauh cho lhyi mauh zis yah lomsjingh nyeis. 13 Hauh thang lhyi Paulo yahge nyah dyenschangh jens gas, Papho masyah goeu las Pamphilia mau Perga wus mas jweh e. Nghuot laus eq Yohan gas nyamoq yah gang las Yerusalem pheh tauh loh. 14 Nghuot laus eq nyamoq gas, Perga masyah toq lyis, Pisidia mau Antiok wus mas jweh loh. Yuda No Buisnyeis lyis nyamoq lyi jungs mas wvng tsung toh. 15 Hauh uhlyis lyi maussauh buk yahge lvpe maussauh buk dye nghap lyis hauh lyi jungs guon bang gas nyamoq jyank mas dius nhang las taiq zis gas, Boekyis eh, moqphung lyis taiq kyingh das dang yoh lyis taiq kyingh geh, ge. 16 Hauh uhlyis Paulo toq las loq vsoh yah: Israel jens yahge Mangso lhyi gyukwoms bang eh, gyo yoeus geh. 17 Haih Israel dius dah Mangso ka yah phauh thyeih moq lyis khyen yoeus goeus yvmvyah Egutu mas boengh duot nyeis shih lyis nyamoq lyis dius nyau kuh kuot goeus. Mangso ka nyah yombos dah loqyom yah nyamoq lyis hou mhayah shwih thuq los. 18 Tsai mhanhdyvp mas nyeici zvn ko nyamoq lyis Ehnyet xing xing yah shwih los. 19 Nyang gas Khanan mau mas dah dius nyhet nyau lyis mhont las, hauh maunyeis yhenzis gas Israel jens dah vso vlho kuot dyei. Haih cho dvnganh bweh lai los zis gas 450 zvn ko nyangh. 20 Hauh thang lhyi lvpe Samuel caiq jweh shoq nyang nyamoq lyis soetuon bang toh dyei. 21 Hauh thang lhyi nyamoq hwankti sang las, Mangso ka Benyamin vkoq, Kisha dah lo Saulo lyis dyei. Nyang gas 40 zvn hwankti duot goeus. 22 Nyang hauh soeu lyis khyoq tyamp uhlyis Dawi lyis nyamoq dah hwankti duot nhang. Hauh soeu dah cho, nyang nyang kanghjyoeng kat zis gas, Yese dah lo Dawi gas ngah ehnyet yah phi thank soeu nghuot las nyang ngos o zis dvnganh chank kuot das. 23 Hauh soeu dah vkoq mas Mangso dah dangthoengh toh zis yah dvyhangteh, Israel xiklyis khyuot yoeus soeu Yesu lyis thuq los nhang. 24 Hauh soeu ma los shih lyis Yohan eq Israel vnyau dvnganh lyis nhaiqlom thaiq zis yah sen dah jeisnyhop cho taiq kyoh. 25 Yohan gas nyah muhzoh tyeh wons wuq nyeis lyis, Ngos lyis hank nghuot oen nghamh nyeis goh lah? Ngos gas hauh soeu ma nghuot, yoeuh aq, ngah thang mas dvyuk jweh los das; ngos gas hauh soeu dah thyvkoq khyuot dyei das zis yangh ma mon, ge. 26 Vmang vnoeuh moq eh, haih khyuot yoeus cho ka Abraham dah vnyau vshih, lo jens nghuot dah namoq yahge gohtoeu Mangso lhyi gyukwoms bang dah xiklyis dyei goeus. 27 Khasoeh ge lyis Yerusalem mas moq yahge nyamoq dah guon bang gas, nyang lyis ma seq zis yahge Yuda No Buisnyeis khanghmuh nghap dah lvpe jens dah dang lyis ma seqgyo yvmvyah, nyang lyis dang thang thyet zis yah hauh lvpe dang lyis nyuk los nhang. 28 Nyang mas shei mon dah yobos ma nyvng laus eq, nyang lyis sat das zis Pilat jyank mas sang. 29 Housoeh nyang lyis toeuq las lhaih ya lhaih toh zis dye kuot lyis, nyang lyis saiqzains masyah yoeus khyoq las lop mas kat toh. 30 Nghuot laus eq Mangso ka shei masyah nyang lyis toq los nhang. 31 Galile masyah Yerusalem pheh nyang yah dvgeh doq loh bang lyis, buisnyeis nyangh nyangh lo nyah gungs lyis nyvng xoeuq las nyamoq gas gvshih dius jens dah xikkhonh mas nyah kanghjyoeng jens bweh nyeis. 32 Ngamoq gas ngamoq dah phauh thyeih moq lyis Mangso dyei toh dangthoengh nghuot dah hau gausyis dang lyis namoq jyank mas wons los. 33 Mangso ka Yesu lyis shei masyah dwis toq nhang zis yah nyamoq dah lo jens nghuot bang yamoq mas Nyah dangthoengh lyis tyink dyei goeus. Houka Chungh Dang maussauh aiq mas lhaih toh zis yah dvyhangteh, Nvng ngah Lo nghuot, Khvnyhik ngos nvng lyis ngah gungs masyah yaus kat, ge. 34 Nyang lyis shei masyah dwis toq nhang las, dyoqbis zis ma doms xauh nhang lo zis yah sen las, Dawi lyis ngos dyei toh Gyingshang dah dangthoengh jens ngos nvng lyis dyei das, ge. 35 Housoeh yvmvyah gohtoeu Chungh Dang mas eq, Nah Gyingshang Soeu lyis nvng dyoqbis xauh nhang das zis ma nghuot, ge nyang taiq. 36 Khasoeh ge lyis Dawi gas nyah caiq mas Mangso dah nghamh thyet toh cho lhyi dye kuot thang lhyi shei goeus las nyang lyis nyah phauh thyeih moq dah vyvm mas toh zis yah bop yuq goeus. 37 Nghuot laus eq Mangso dwis toqh kat soeu ka bop yuq zis ma xauh. 38 Housoeh las boekyis eh, hauh soeu gvng mas, yaunos yoh khyuot dyei dah cho namoq lyis taiq kyoh nyeis zis gas seq geh. 39 Moshe lyi chank khyvlyis yah namoq dah yaunos masyah ma yoh luiq. Nghuot laus eq Yesu lyis lomsjingh soeu hank laus eq hau yaunos masyah yoh luiq. 40 Zaih geh, lvpe pe khoq zis namoq jyank mas ma bweh los bas jungh. 41 Jwangh bang eh, yoeuh aq mauh las dyoqbis geh, khasoeh ge lyis namoq dah buisnyeis lyis ngos muh dvkoeuq kuot nyeis. Dius dvyuk ngos namoq lyis taiq kyoh laus eq hauh muh lyis namoq lomsjingh das zis ma nghuot, ge. 42 Paulo yahge Barnaba hau lyi jungs masyah thuq loh nyeis lyis, dius jens gas nyah aiq yuk lyis, Haih cho yah sen lha jweh los das No Buisnyeis lyis doms taiq das xiklyis sang. 43 Lyi jungs mas huom masyah dyos loh lyis, Yuda jens nyoshoq moq yahge Yuda lomsjingh cho lhyi bos chank bang nyoshoq Paulo yahge Barnaba thang mas tsain chank loh. Nyah aiq yuk gas nyamoq lyis Mangso dah jyehjuh mas suh e nyeis das xiklyis yomdyei taiq kyingh. 44 Hauh thang lhyi dah Yuda No Buisnyeis lyis, Mangso dah dang gyo yoeus das zis wus gonh dvgeh tsain huom toh. 45 Nghuot laus eq Yuda jens gas hauh moqjens lyis nyvng lyis noh ehnyet dyingh joq las Paulo taiq dang lyis jwangh zis yah tyixo khyvlyis goes tsain sang. 46 Paulo yahge Barnaba eq womh womh taiq zis gas, Mangso dang nyamoq lyis cangxeih taiq kyoh das zis gas yhaugyen. Nghuot laus eq namoq hauh yvlyis he las vcaiq vto kang yah ma mon khyvlyis dang thang thyet yoeus yvmvyah, ngamoq gohnyau bang shot pheh loh das, ge. 47 Khasoeh ge lyis, Yhensain ngamoq lyis tying toh zis gas, Nyeisjvng gonh khyuot yoeus cho bweh los shoq, Ngos nvng lyis gohnyau bang xiklyis bvng zis kuot, ge. 48 Gohnyau bang hauh zis xauhgyo lyis gaus zis yah Yhensain dang lyis tsain chungh. Housoeh nyoshoq lyis vcaiq vto kang yoh das xiklyis toeuq toh goeus zis yah dvyhangteh tsain lomsjingh los. 49 Yhensain dang gas hauh mau gonh goms shoq hoeuh loh. 50 Yuda jens gas, lomsjingh cho mas wontang las nyoqnho ngelang bos dah vmesbih jens yahge hauh wus mas dah vgyis moq lyis yom taiq bos dyei las, Paulo yahge Barnaba lyis vshoh vjyen shoeuhshih nhang las, nyamoq dah wuxom masyah khat tyamp. 51 Housoeh nyamoq lyis yobos Chixoeuq khyvlyis nyah aiq yuk khyei mas dah phvlhau lyis nyamoq shot pheh ko khyoq khoq las Ikoni wus mas jweh loh. 52 Changlo jens gas, gaus zis yah Gyingshang Dyos dyingh joq.
1 Ikoni wus mas eq Paulo yahge Barnaba gas Antiok mas teh Yuda jens dah lyi jungs mas loh wvng las taiq lyis Yuda jens yahge Heleni jens nyoshoq lomsjingh. 2 Nghuot laus eq ma loms dah Yuda jens gas, gohnyau bang dah ehnyet lyis lhoqh thyoq las boekyis lyis hoeng dah xiklyis gomloeus kuot. 3 Housoeh nyah aiq yuk eq houmha nyangh nyangh lo nyeis las, Yhensain dah cho lhyi womh womh tsain taiq kyoh. Yhensain eq nyamoq lyis vlho yah kuot das yomsoq dyei zis yah nyah aiq yuk taiq kyoh, Yhensain dah nhaiqnyen shohgyo dang gas jyoeng yvlyis nyang kanghjyoeng kat dyei. 4 Wus mas bang gas ehnyet lvn tyamp yvmvyah, dvyhamh gas Yuda jens shot pheh, dvyhamh gas lvgyo jens shot pheh bweh loh. 5 Gohnyau bang mas moq eq, Yuda dius yahge nyamoq dah vgyis jens eq, nyah aiq yuk lyis gyvzaiq gyvnang kuot las lukgoq yah doeuh sat das ge sont zis lyis, 6 Nyah aiq yuk seq las Likaoni wuxom pheh phang loh. Housoeh nyah aiq yuk gas Listra yahge Derbe wus yahge vyvm vwi mas joq dah wus mas, 7 gausyis dang tsain taiq kyoh. 8 Listra wus mas nyah ungwes ung masyah khyei dyoq soeu nghuot las khanhamp eq ma suh yoeuh ku soeu dvyuk tsung toh. 9 Nyang gas Paulo taiq dang gyo nyeis. Hauh soeu lyis Paulo yoeuh kat lho lyis, yoh gis los das shoq lomsjingh ehnyet bos yvlyis nyvng seq las, 10 thwe than yah, Zungh zungh toq yap aq, ge. Nyang eq dyvm toq las suh loh. 11 Housoeh Paulo kuot dah muhzoh lyis dius jens nyvng las nyamoq Likaoni nyingh yah kaiq zis gas, mangso jens diusyeis tsungh las yah jyank mas jweh los, ge. 12 Housoeh nyamoq gas Barnaba lyis Ze-u, Paulo gas dang taiq uhjyung nghuot yvmvyah, nyang lyis Herme ge tsain nyhink. 13 Hauh wus nghe pheh joq dah Ze-u yhenmuh mas dah phudyei soeu eq wus khomh mas noeujungs lu yahge bankhwank chi lyih las moqjens yah dvgeh nyah aiq yuk lyis lomhxangh lainh das zis tsain cvvq. 14 Nghuot laus eq lvgyo Paulo yahge Barnaba gas, hauh cho lhyi xauhgyo lyis nyah aiq yuk dyimis lang chuiq tyamp lho las, dius phung mas wuih wvng loh las kaiq zis gas, 15 Nhaiqbos moq eh, chamus hauh zis kuot goh lah? Ngah aiq yuk eq namoq yah dvyhangteh seq shei dah dius dvtsain nghuot; hai vjyuk ma bos dah muh toh tyamp las maukhung nyeisjvng, thomh yahge houmha bos ya bos yvlyis gvnkhanh toh, kang dwis dah Mangso jyank mas lhain los bas jungh oen namoq lyis gausyis dang los taiq kyoh zis dvnghuot. 16 Nyang gas gohlhain dah caiq mas dius nyau khanghmuh lyis nyamoq o khyvlyis chank bas jungh, ge kat toh. 17 Nghuot laus eq nyah gungs lyis kanghjyoeng ma bos bos toh tyamp zis ma nghuot; gis zis kuot uhjyangh maukhung masyah mau yahge guk nyau shih nyau, nyah yoq dyei zis yah yang lyis zonoms yah eq, gausyis zis yah eq jo nhang nyeis, ge. 18 Housoeh taiq lyis yangh dius jens gas nyah aiq yuk lyis lomhxangh lainh dyei das zis vluk ma yoh tomp. 19 Hauh thang lhyi Antiok yahge Ikoni wus mas dah Yuda jens jweh los las, dius phung lyis nyamoq shot pheh shwih lho las Paulo lyis lukgoq yah doeuh las, nyang lyis shei goeus jyo yvmvyah wus nghe pheh she thuq tyamp. 20 Nghuot laus eq changlo jens khyam nyang yap joq lyis, nyang toq las wus mas wvng loh. Nungs nyeih nyang yahge Barnaba Derbe pheh loh. 21 Hauh wus mas gausyis dang taiq kyoh las changlo nyoshoq bweh nhang las, nyah aiq yuk gas Listra, Ikoni, Antiok wus cho doms los. 22 Changlo jens dah ehnyet goeng nhang uhjyangh, hauh lomsjingh cho mas goeng das xiklyis taiq kyingh yomdyei zis yahge Mangso munghdan mas wvng das lyis shanghsenh zis nyoshoq xauh chah, ge jyauh toh khoq. 23 Phung khanghmuh mas logis jens khyen yoeus las womkyi zis yahge shvmanh dung thang lhyi, nyamoq lomsjingh nyeis Yhensain dah loq mas kyauh toh khoq. 24 Hauh thang lhyi nyah aiq yuk gas Pisidia mau cho suh las, Pamphilia mau mas jweh loh. 25 Housoeh Perga wus mas dang taiq kyoh las, Atalia pheh tsain gyoh loh. 26 Hou mhayah lhyik yah goeu las, nyah aiq yuk wons wuq goeus muh xiklyis Mangso dah jyehjuh mas kyauh las, nyah aiq yuk lyis nhang kat dah Antiok wus pheh tauh loh. 27 Nyah aiq yuk jweh lyis phung lyis huom nhang las, Mangso nyah aiq yuk masyah kuot cho dvnganh eq, gohnyau bang lyis, nyang lyis lomsjingh das xiklyis Mangso cho phank dyei zis eq tsain taiq kyoh. 28 Housoeh nyah aiq yuk houmha changlo jens yah nyangh nyangh lo thoeng nyeis.
1 Yuda mau mas bang dvyhamh jweh los las, boekyis lyis Moshe dah thungh yah dvyhangteh vthyoh tyomh cho ma chank lyis gas namoq khyuot yoeus yvmas ma yoh jweh das ge tsain jyauh. 2 Housoeh las lvn loh das cho bweh las, Paulo yahge Barnaba gas hauh bang yah taiq phyen-goh lyis, hauh cho huq yoeuh das xiklyis boekyis gas, Paulo, Barnaba yahge nyamoq mas dvyhamh lyis Yerusalem mas nyeis dah lvgyo jens yahge logis jens jyank mas nhang das xiklyis nghamh thyet toh. 3 Housoeh phung yah nyamoq lyis los pauq kat las, nyamoq gas Phoenisia yahge Samari mau cho lai uhjyangh, gohnyau bang nhaiqlom thaiq goeus cho taiq kyoh yvmvyah boekyis lyis svsoh gaus nhang. 4 Yerusalem mas jweh lyis, phung, lvgyo jens yahge logis jens gas nyamoq lyis lhom yoeus las, nyamoq gas Mangso nyamoq lyis yah kuot nhang cho dvnganh lyis taiq kyoh. 5 Nghuot laus eq Pharishe phung mas dah lomsjingh bang dvyhamh toq las, gohnyau lyis vthyoh tyomh dyei das zis yahge Moshe dah lyi chank das zis chah shih, ge taiq. 6 Lvgyo jens yahge logis jens haih cho xamgoh das xiklyis tsain huom. 7 Hauh cho mas nyoshoq taiq phyen-goh thang lhyi Petru toq las nyamoq lyis taiq zis gas, Boekyis eh, gohnyau bang ngah nhuot masyah hau gausyis dang xauhgyo zis yah lomsjingh bas jungh ge, cangxeih lyis yah Mangso ngos lyis namoq masyah khyen yoeus zis gas namoq tsain seq. 8 Nhaiqlom lyis yoh seq dyei dah Mangso ka, yang lyis dyei yhangteh nyamoq lyis eq Gyingshang Dyos dyei las, nyang nyamoq lyis khyen yoeus cho lhyi chixoeuq goeus. 9 Housoeh lomsjingh zis yah nyamoq dah nhaiqlom lyis Gyingshang nhang goeus yvmvyah, yang yahge nyamoq jo mas shaih cho cha eq ma bos. 10 Housoeh gvshih phauh thyeih moq eq ma duot, yang eq ma yoh wuq dah yvwons lyis changlo jens dah kvtoq mas wuq nhang goh ge chamus Mangso lhyi shi yoeuh goh lah? 11 Housoeh ma nghuot, yang eq nyamoq teh Yhensain Yesu Khristu dah jyehjuh yah kyingh khyuot yoeus xauh das oen yang loms nyeis, ge. 12 Hauh uhlyis huom joq bang gas samlo nyeis las, Barnaba yahge Paulo nyah aiq yuk loq yah gohnyau bang mas Mangso khasoeh teh dah vlho yahge mauh loqmuh bweh nhang cho taiq kyoh uhlyis tsain gyo nyeis. 13 Nyah aiq yuk dang thank lyis Yaku taiq zis gas, Boekyis eh, ngah dang gyo yoeus geh. 14 Mangso ka gohnyau bang mas, dius dvnyau lyis nyah dius duot das nyhenshang lui yoeus khyvlyis nyah jyetdap cho nyamoq lyis, cangxeih chixoeuq cho lhyi Petru gvshih phui kyoh goeus. 15 Hauh cho ka lhaih toh, lvpe jens dah dang yah doeusgoh joq: hauh zis gas, 16 Hauh dah thang lhyi ngos tauh los las, dyoq gyoh joq, Dawi dah zvng lyis doms tsuk das. Hau dyoq joq yvlyis ngos doms ci las toeu tsung toh das. 17 Housoeh las gohtoeu dius nyau khanghmuh gas, Yhensain lhyi xo das. Ngah dius nyau kuot das xiklyis lui yoeus zis xauh dah gohnyau bang dvnganh gas ngos lyis xo das ge, hau dvnganh yvlyis kuot toh soeu, 18 cangxeih mauthuq nyeiszvn lyis yah seq nhang goeus, ge. 19 Housoeh yvmvyah, gohnyau bang mas Mangso jyank pheh lhain los bang lyis ma gis lhoqh yau oen nghamh. 20 Nghuot laus eq yang nyamoq lyis phvra silho dah vwot v-oeu vyhang, yauxi muh, lainzain lhyent sat shoh yahge suih lyis kyi das cho, maussauh yah gis kyoh kat, oen ngos nghamh. 21 Khasoeh ge lyis Moshe Lyi gas Yuda No Buisnyeis khanghmuh lyi jungs mas nghap kyoh nyeis yvmvyah, gohnhamp caiq lyis yah, wus khanghmuh mas hauh dang taiq kyoh bang bos, ge. 22 Hauh uhlyis lvgyo jens yahge logis jens gas, phung gonh xam las nyamoq mas dah dius khyen las, Paulo yahge Barnaba yah dvgeh Antiok pheh nhang kat das cho tsain xamxonh. Houyah dvyhangteh boekyis mas uhshe bang Barsaba ge dah Yuda yahge Sila lyis khyen lha, 23 Nyah aiq yuk loq masyah lhaih huon kat dang gas, Ngamoq lvgyo jens yahge logis jens, boekyis gas, Antiok wus yahge Siria mau, Kiliki mau mas nyeis dah gohnyau bang boekyis jyank mas jeshuh kat. 24 Ngamoq jyank masyah gyangh thuq loh bang dvyhamh, ngamoq eq ma taiq kat zis, namoq lyis vthyoh tyomh las lyi chank chah ge dang yah taiq nhunk las ehnyet nyo nhang zis lyis ngamoq xauhgyo yvmvyah, 25 ngamoq dvgeh huom las, dvxam mha khyen yoeus dah Lvgyo jens lyis namoq jyank mas ngamoq dah jyetdap Barnaba yahge Paulo yah dvgeh nhang kat. 26 Hauh bang gas, yah Yhensain Yesu Khristu dah nyhenshang nyamoq dah kang lhyi kyauh toh goeus bang nghuot. 27 Housoeh las ngamoq gas Yuda yahge Sila lyis namoq jyank mas nhang kat. Hauh cho yah sen las nyah aiq yuk nhuot yah nyang, namoq lyis taiq kyoh das. 28 Khasoeh ge lyis Gyingshang Dyos yah ngamoq gis oen xamxonh zis gas, hai yhaugyen cho mas lai las gohtoeu lyei dah yvwons s lyis ma wons nhang das xiklyis nghuot. 29 Phvra lyis phudyei dah vyhang, suih, lainzain lhyent sat shoh yahge yauxi muh lyis jhank nyeis lyis gis. Namoq haih goeu lyis chank nyeis lyis gis. Yanghzan nyeis bas jungh, ge. 30 Nyamoq lyis nhang kat las Antiok mas jweh lyis, moqjens kyoh huom lha hau huon kat maussauh lyis tsain dyei. 31 Hauh zis dye nghap lyis hau taiq kyingh dang gvng mas nyamoq gaus. 32 Yuda yahge Sila gas lvpe jens eq nghuot las, dang nyoshoq yah boekyis lyis taiq kyingh yomdyei. 33 Houmha dvyoq nyeis khoq thang lhyi, houmha dah boekyis gas nyamoq lyis nhang kat bang jyank mas nyenstap zis yah doms pont kat. 34 (Sila gas houmha nyeis shih das ge nghamh thyet las nyeis.) 35 Paulo yahge Barnaba gas Antiok mas thoeng nyeis shih las, gohtoeu nyoshoq moq lyis Yhensain dah dang jyauh, taiq kyoh nyeis. 36 Buisnyeis gvgis lo nyangh los lyis, Paulo Barnaba lyis taiq zis gas, Yhensain dah dang taiq kyoh toh goeus dah wus khanghmuh mas dah boekyis khasoeh bweh nyeis zis lyis e doms komh goh, ge. 37 Barnaba gas Makho ge dah Yohan lyis shwih mes. 38 Nghuot laus eq Paulo gas nyang lyis nyah aiq yuk yah dvgeh shwih ma gis ge nghamh: khasoeh ge lyis nyang gas yoszoh masyah nyamoq yah ma loh loh, Pamphilia mau masyah nyah aiq yuk lyis toh khoq soeu nghuot, ge. 39 Housoeh nyah aiq yuk jo mas xam ma xonh goh yvmvyah Barnaba gas Makho lyis shwih las Kupru pheh lhyik yah goeu e. 40 Nghuot laus eq Paulo gas Sila lyis khyen toh lho tha, boekyis gas nyang lyis Mangso dah jyehjuh mas kyauh lho lyis nyah aiq yuk toq khoq. 41 Housoeh Paulo gas Siria mau, Kiliki mau cho lai loh las phung lyis yom tsain dyei.
1 Derbe yahge Listra wus mas eq nyang jweh las, yoeuh aq, houmha Timothi ge dah changlo dvyuk nyeis. Nyah ungwes gas lomsjingh dah Yuda vmesbih nghuot las, nyah uwus gas Heleni nghuot. 2 Listra yahge Ikoni wus mas nyeis boekyis gas, nyah dah wotwu gis cho lhyi tsain taiq. 3 Paulo gas hauh soeu lyis shwih mes las, nyah uwus gas Heleni nghuot zis lyis houmha dah Yuda dius dvnganhmoq tsain seq yvmvyah, nyang lyis vthyoh tyomh dyei. 4 Housoeh dvwus thang lhyi dvwus suh lai uhjyangh, Yerusalem mas dah lvgyo jens yahge logis jens taiq kat dang lyis tsain chank geh ge, nyamoq lyis dyei. 5 Phung eq hau lomsjingh cho mas yombos los las lomsjingh bang nyeih khanghmuh je los. 6 Gvshih Asia mau mas Dang taiq kyoh das zis Gyingshang Dyos nyamoq lyis tomp yvmvyah, nyamoq gas Phrigia yahge Galati mau lai las, 7 Misia mau jweh bah ge lyis Bithuni mau pheh wvng loh das zis tsain sont. Nghuot laus eq Yesu dah Dyos gas nyamoq lyis vmingh ma dyei yvmvyah, 8 Misia mau yvm cho lai las Troa wus mas tsain jweh loh. 9 Hauh yvmas nyenh lyis Paulo nyoqnyvng nyvng zis gas, Makedoni dius dvyuk los yap las, Makedoni mau pheh goeu lyih las ngamoq lyis los bos pangh geh, ge nyang lyis sang. 10 Hauh nyoqnyvng nyvng las Makedoni dius jens lyis gausyis dang taiq kyoh das xiklyis Yhensain yang lyis khi zis nghuot, ge nghamh yoeus las, Makedoni mau pheh goeu das xiklyis ngamoq houjang sont. 11 Housoeh yvmvyah ngamoq Troa masyah dan dan Samotrake goeujo pheh sangpho yah goeu loh lyis nungs nyeih Neapoli wus mas jweh loh. 12 Hou mhayah doms lai lyis, Roma guon dah Makedoni wuxom mas dah wusmuh Philipi mas jweh las, hauh yvmas ngamoq dvyoq nyeis. 13 Yuda No Buisnyeis jweh lyis, wus khomh nghe mas joq dah jeis yvm mas tsain e. Houmha shvmanh dung joqyos bos das teh mus las e tsung toh. Houmha tsain huom los dah vmesbih jens lyis taiq kyoh. 14 Hauh uhlyis Mangso lhyi paiq soeu Thiatira wus mas dah nesnoq misseh ungh dah Lidia ge soeu ngamoq dah dang gyo yoeus las, Paulo taiq kyoh dang lyis lhom yoeus das xiklyis Yhensain gas nyah nhaiqlom phank dyei. 15 Hauh vmesbih yahge nyah yhenbang jeisnyhop dye kham lyis, Yhensain mas ngos wontang lomsjingh goeus zis namoq suon yoeus goeus lyis gas, ngah yhen mas jenh wvng thoeng geh, ge khyoeuq khi las nyeis nhang. Ngamoq eq nyang yus zis yah dvyhangteh e thoeng. 16 Ngamoq hau shvmanh dung joqyos mas e lyis, yius kuq dah lonyi dvyuk yah xauhgoh. Hauh soeu ka nyah yhensain moq lyis gyuis wvng zis yah ngwis svsoh yoh los nhang soeu nghuot. 17 Hauh nyelo gas Paulo yahge ngamoq thang mas chank kaiq kaiq kuot zis gas, Haih bang gas namoq lyis khyuot yoeus cho taiq kyoh, nyhang thank Mangso dah jyeidwis jens nghuot, ge. 18 Nyoshoq nyeih nyang housoeh mus las, Paulo nhaiqlom phot phot tsoeu las, lhain yoeuh las hauh yius lyis, Yesu Khristu dah nyings masyah ngos nvng lyis taiq, nyah jyank masyah thuq loh aq, ge nyho lho lyis, houjang yius gas nyelo jyank masyah thuq loh. 19 Gvshih nyah yhensain moq gas ngwis wvng cho ma bos lo zis seq lyis, Paulo yahge Sila lyis nyhik las, kaih mas nyeis dah guon bang jyank mas she e. 20 Housoeh pyada jens dah xikkhonh mas nyah aiq yuk lyis shwih wvng las taiq zis gas, Haih Yuda jens yamoq dah wus lyis svsoh tsain lhoeu nhunk zis yahge, 21 Yang Roma dius ma yoh kham yoeus, ma yoh chank lyi ma bos dah thungh los tsain jyauh nyeis, ge. 22 Housoeh las dius phung gas nyah aiq yuk lyis tyixo las jes kuot. Wus guon bang eq nyah aiq yuk dah dyi lyis lang chuiq tyamp dyei las, lvxuk yah xuk das cho taiq. 23 Housoeh nyah aiq yuk lyis nyoshoq lhain xuk thang lhyi thung mas tsain lhunk lho las, nyah aiq yuk lyis goeng goeng zungh das cho, thung vgyis lyis taiq toh. 24 Thung vgyis eq housoeh taiq toh dang gvng mas, nyah aiq yuk lyis thung khaulhunk yvp pheh hwank las khyei mas eq kyomh yah kyomh toh. 25 Nghuot laus eq gungsgvm ko lhyi Paulo yahge Sila shvmanh dung zis yahge Mangso lhyi tsain chungh nyeis lyis thung lungh bang gas nyah aiq yuk dah dang tsain gyo nyeis. 26 Hauh uhlyis maunyeis nyetlos nyettant dwis las, thung yhen-yos nonh los zis yahge khomh bangh tyamp las yuk khanghmuh lyis twih toh dah twih buis tyamp. 27 Thung vgyis soh los las thung khomh bangh joq zis nyvng lyis, thung dius jens phang loh goeus jyo yvmvyah nyah moengsa she las nyah gungs nyang sat shei zo das zis sont nyeis. 28 Paulo yomkat kaiq zis gas, Nvng nvnyang gungs lyis vgudwvng nhang, ngamoq dvnganh yah heimha nyeis, ge. 29 Hauh uhlyis nyang nyibung sang chi las yvpkhau mas wuih wvng loh las, gyuk nvn zoh lyis yah Paulo yahge Sila xikkhonh mas phvluk zomhgyuis toh. 30 Tsai, nyah aiq yuk lyis shwih thuq las taiq zis gas, Yhensain nhaiqtang eh, ngos khyuot yoeus zis xauh shoq ngos cha kuot chah lah, ge. 31 Nyah aiq yuk taiq zis gas, Yhensain Yesu lyis lomsjingh aq; housoeh lyis nvng yahge nah dvyhen gonh khyuot yoeus zis xauh das, ge. 32 Housoeh nyang yahge nyah dvyhen gonh lyis Yhensain dah dang taiq kyoh. 33 Hauh nyenhyo nyang nyah aiq yuk lyis shwih loh las nyah aiq yuk dah dvm cheih dyei. Hauh shishenh lyis nyang yahge nyah dvyhen gonh houjang jeisnyhop tsain kham. 34 Tsai, nyang nyah yhen khau mas shwih wvng loh las zonoms yah phuqsoe uhjyangh Mangso lhyi lomsjingh los yvmvyah, nyang yahge nyah yhenbang dvgeh gauslaus nyeis. 35 Nyoq nyvng los lyis pyada zau jens gas, hauh vzomh lyis kat kat aq, ge jeslo jens lyis yah taiq nhang kat. 36 Thung vgyis gas hauh dang Paulo lyis taiq kyoh las, nyah aiq yuk lyis kat kat das zis zau jens taiq nhang yvmvyah, gvshih nyenstap zis yah thuq loh lo geh, ge. 37 Nghuot laus eq Paulo nyamoq lyis taiq zis gas, Ngah aiq yuk Roma dius dvnghuot yvlyis ma nyei yoeuh yoeuh dang thang ma thyet shih lyis svbih xikkhonh mas bat, thung khyoq lho las, gvshih tsoek yah gauh nhang kat das ge cvvq lhyeh? Ma nghuot, nyamoq gungs doeu nyang lyih kat kat bas jungh, ge. 38 Jeslo jens hauh dang zau jens lyis loh taiq kyoh lyis, nyah aiq yuk Roma dius nghuot zis xauhgyo lyis tsain gyuk las, 39 nyamoq gungs doeu nyang nyah aiq yuk jyank mas e las shangphu shwih thuq las hauh wus masyah jenh thuq loh das zis tsain khyoeuq. 40 Housoeh nyah aiq yuk gas thung masyah thuq las, Lidia yhen mas wvng loh. Housoeh boekyis lyis nyvng goeus ya nyamoq lyis nhaiqtaink toh khoq las tsain thuq loh.
1 Paulo yahge Sila gas Amphipoli yahge Apoloni wus lai lyis, Thesaloni wus mas jweh loh. Houmha Yuda jens dah lyi jungs dvkoeuq bos. 2 Paulo gas nyah thungh yah dvyhangteh, lyi jungs mas wvng las, Yuda No Buisnyeis somh daus top Mangso dah Jyomp maussauh masyah nyamoq yah dvgeh xamgoh zis gas, 3 Khristu gas shanghsenh chah zis yahge shei masyah dwis toq chah cho Jyomp maussauh masyah taiq las phui kyoh zis gas, Ngos namoq lyis taiq kyoh dah Yesu gas hauh Khristu nyang nghuot, ge. 4 Nyamoq mas dvyhamh gas lomsjingh las Paulo yahge Sila yah tsain xonh. Hauh bang mas lomsjingh cho mas wontang dah Heleni nyoshoq yahge nyoqnho ngelang bos dah vmesbih jens eq nyoshoq bos. 5 Nghuot laus eq Yuda jens gas noh las, kaih jang mas nyeis, lhung bang dvyhamh yah dvgeh moqphung dvkoeuq kuot las wus gonh lyis dius hoeu toq nhang. Nyamoq gas Paulo yahge Sila lyis moqphung mas shwih los das xiklyis xo nyeis lyis nyamoq gas Yason dah yhen lyis los khyang. 6 Nyah aiq yuk lyis ma nyvng goeus ya, Yason yahge Lomsjingh bang dvyhamh lyis wus logis jens dah xikkhonh mas she los zis yah kaiq zis gas, Mungkvn gonh lyis vtauh vxoeu kuot bang gvshih heimha jweh goeus. 7 Yason gas nyah aiq yuk lyis boengh lhom toh. Nyamoq dvnganh gas Yesu ge dah gohtoeu hwankti bos shih ge taiq yvmvyah Kesar dah lyi lyis tyixo khyvlyis kuot nyeis. 8 Wugungs dius jens yahge guon bang hauh dang xauhgyo lyis, nhaiq tsain yo nyeis. 9 Nghuot laus eq Yason yahge gohyhamh bang jyank masyah kham toh vyhang lhyi nyamoq yoeus toh las nyamoq lyis kat kat. 10 Boekyis gas hauh nyeihyo nyang Paulo yahge Sila lyis Berea wus pheh nhang kat. Nyah aiq yuk houmha jweh lyis Yuda jens dah lyi jungs mas tsain wvng loh. 11 Houmha nyeis dah Yuda jens gas Thesaloni dius jens thoq lyis nhaiq zes bos. Khasoeh ge lyis nyamoq gas hauh dang mas nhaiqkank wvng zis yah lhom yoeus las, jus ma jus yoh seq das xiklyis Jyomp maussauh mas nyeih yau nyeih xo nghap yoeuh nyeis. 12 Housoeh las nyamoq mas nyoshoq tsain lomsjingh. Nyoqnho ngelang bos dah Heleni vmesbih jens yahge vbusbih jens eq nyoshoq bos. 13 Nghuot laus eq Thesaloni mas dah Yuda jens gas, Paulo Berea wus mas eq Mangso dah dang taiq kyoh nyeis cho xauhgyo lyis, nyamoq houmha eq chank jweh las dius jens lyis jaus jyuonh zis yah Paulo lyis jes mus nhang. 14 Boekyis gas houjang Paulo lyis panglai jyankyvm mas jweh shoq pauq kat. Sila yahge Timothi gas nyeis khoq shih. 15 Nghuot laus eq Paulo lyis e pauq kat bang gas Athen jweh shoq e shwih kat las, Sila yahge Timothi lyis lvnyap chank los das cho, tying kat dang wons las tauh los. 16 Gvshih Paulo gas Athen wus mas nyah aiq yuk lyis langh uhjyangh thoeng nyeis lyis, hauh wus gonh phvra kyingh joq yvlyis nyang nyvng lyis nyah ehnyet ma nyens mus. 17 Housoeh las nyang gas lyi jungs mas Yuda jens yah eq, Yuda lomsjingh cho mas wontang bang yah eq, nyeih yau nyeih kaih mas xauhgoh bang yah eq taiq phyen-goh xamgoh nyeis. 18 Housoeh las, Epikuri cho yahge Stoik cho chank dah joeui kunk bang dvyhamh nyang yah taiq phyen-goh. Dvyhamh gas, haih nhuot thunk soeu cha taiq mes au lhyeh, ge. Gohyhamh gas gohmau phvra cho taiq kyoh soeu nghuot das, ge. Khasoeh ge lyis nyang Yesu dah cho yahge dwis toq dah gausyis loeus cho taiq yvmvyah nghuot. 19 Nyamoq gas Paulo lyis shwih yoeus las Arepagu mas shwih loh las taiq zis gas, Hau nvng jyauh dah cho saiq ngamoq lyis seq nhang aq, ge dung. 20 Nvng taiq cho dvkhamh gas ngamoq xiklyis, mauh das teh ge xauhgyo. Housoeh las nvng cha taiq mes yvlyis ngamoq seq mes, ge. 21 Gvshih Athen dius jens yahge houmha khau nyeis gohmau bang gas, jyauh cho vsaiq lyis tsain taiq nhamgoh zis yah kyingh, shishenh lai nhang nyeis. 22 Paulo Arepagu huom mas yap las taiq zis gas, Athen bang eh, namoq gas cho khat khanghmuh mas svsoh lomsjingh nyeis yvlyis ngos nyvng. 23 Khasoeh ge lyis, ngos namoq dah wus chank suh lai loh las namoq paiq dah vyhang lhyi jeih jeih yoeuh lyis, Ma seq dah Mangso dvkoeuq xiklyis, ge lhaih toh phon dvkoeuq lyis nyvng. Hau namoq ma seq seq paiq soeu dah cho, ngos namoq lyis taiq kyoh bah. 24 Mungkvn yahge houmha nyeis ya nyeis yvlyis gvnkhanh toh Soeu nghuot. Maukhung yahge nyeisjvng dah Yhensain nghuot las, dius loq yah kuot dah phvra yhen mas lungh joq zis ma nghuot. 25 Khasoeh ge lyis nyang gas dwis dah kang yahge yoh ya yoh yvlyis dyei soeu nghuot yvmvyah, nyang dvja ja chah soeu teh, dius loq yah phuqsoe chah zis ma nghuot. 26 Dius dvyuk kyingh masyah dius nyau dvnganh lyis gvnkhanh toh las, nyeisjvng gonh mas nyeis dyos nhang. Nyamoq khamha nyeis dyos das xiklyis maukyo yahge shishenh lyis gvn toeuq toh dyei. 27 Nyamoq gas Mangso lhyi xo wu zis yah nyvng lyis nyvng das. Nyang gas yang hank yah eq we nyeis zis ma nghuot. 28 Dius dvyuk taiq zis gas, Yang gas nyang mas nyeis las kang dwis nyeis. Namoq dah sodang svra dvyhamh taiq zis yah dvyhangteh, Yang eq nyah lo jens nghuot, ge. 29 Housoeh las yang gas Mangso dah vshih tsain nghuot yvmvyah, Mangso lhyi dius dah ehnyet yah nghamh toeuq las kuot dah ngwis, xing, luk yah kuot dah silho yah doeusgoh oen yang ma gis nghamh. 30 Ma xauhgyo, ma seq las lai loh goeus caiq lyis Mangso ka yoeuh lhaiq kat dyei las, gvshih gas joqyos khanghmuh mas nyeis bang dvnganh lyis, nhaiqlom thaiq das xiklyis nyang tying toh. 31 Khasoeh ge lyis nyang khyen yoeus soeu dah loq yah mungkvn gonh lyis dan khyvlyis soetuon das xiklyis nyang buisnyeis dvnyeih toeuq toh. Nyang toeuq toh buisnyeis jyoengh bweh los das yvlyis dius khanghmuh xikkhonh mas kanghjyoeng Chixoeuq khyvlyis yah Yesu lyis shei masyah dwis toq los nhang goeus, ge. 32 Shei goeus bang dwis toq los ge dah cho xauhgyo lyis, dvyhamh bang gas jingh. Dvyhamh gas, Haih cho dvlhain doms gyo mes shih, ge. 33 Housoeh Paulo eq nyamoq jyank masyah thuq loh. 34 Nghuot laus eq dius dvyhamh gas nyang yah zomh las lomsjingh. Hauh moq mas Arepagu dius vgyis Dionisi, Damari ge dah vmesbih dvyuk yahge gohtoeu dius jens eq bos.
1 Hauh cho bweh thang lhyi Paulo gas Athen wus masyah thuq las Korinthu wus pheh loh. 2 Ketha hwankti Klodi gas, Yuda jens dvnganh, Roma wus masyah thuq chah, ge vmingh khyoq yvmvyah, Pontu mau mas khoeu Akula ge dah Yuda dvyuk gas nyah yhensain nyhiq Priska yah dvgeh Itali mau masyah thuot los zis ma nyangh shih. Paulo gas nyamoq yah xauhgoh las nyah zomh yhen mas boengh doq nyeis. 3 Nyamoq gas muga zvng chop zo bang tsain nghuot las, muh doeusgoh yvmvyah, Paulo eq nyah zomh yah dvgeh nyeis las muh kuot nyeis. 4 Yuda No Buisnyeis khanghmuh lyi jungs mas Yuda jens yahge Heleni jens lyis eq lomsjingh shoq taiq kyoh yomdyei nyeis. 5 Sila yahge Timothi Makedoni masyah chank duons los lyis, Paulo gas dang taiq kyoh cho top kuot las, Yesu gas Khristu nghuot, ge Yuda jens lyis kanghjyoeng kat nyeis. 6 Nyamoq gas tomp las jwangh nyhap los lyis, nyang nyamoq lyis nyah dyi ko xoeuq zis yah taiq zis gas, Namoq dah suih namoq uhloms mas joq bas jungh; ngos mas yobos ma bos lo: gvshih masyah gohnyau jyank pheh lai loh lo das, ge. 7 Nyang hou mhayah thuq las, Mangso lhyi paiq dah Titiu Yustu ge soeu yhen mas wvng loh. Hauh soeu yhen ka lyi jungs yah dvgeh nghuot. 8 Krispu ge dah lyi jungs vgyis eq, nyah yhenbang dvnganh mebih yah Yhensain lhyi tsain lomsjingh. Korinthu dius jens nyoshoq eq xauhgyo lyis lomsjingh las jeisnyhop tsain kham. 9 Dvnyens gas Yhensain gas nyoqnyvng masyah Paulo lyis taiq zis gas, Vgyuk, dvtaiq aq, samlo vnyeis. 10 Ngos nvng yah dvgeh nghuot. Nvng lyis shanghsenh nhang das zis hank loq eq yoh jweh das zis ma nghuot. Haih wus mas ngah dius nyoshoq nyeis, ge. 11 Housoeh hauh yvmas Mangso dah dang jyauh uhjyangh dvzvn dvkhyamh nyeis khoq. 12 Nghuot laus eq Galio gas Akhaia mau mas mungh zau kuot yoq lyis Yuda jens dvlhain dvm Paulo lyis jes sont las, nyang lyis soetuon jang mas shwih e las taiq zis gas, 13 Haih soeu ka lyi yah ma huq khyvlyis Mangso lhyi paiq das nyhenshang ngamoq dah dius jens lyis taiq kyingh nyeis soeu nghuot, ge. 14 Housoeh Paulo phuk taiq das ge dvsont shih lyis Galio nyamoq lyis taiq zis gas, Yuda jens eh, muh haih zis lyi lhyweq muh, lhung cho nghuot lyis gas ngos namoq lyis jhen las gyo dyei vvng. 15 Nghuot laus eq gvshih gas namoq dah nyeidang dah dangkhonh, vmingh, namoq dah lyi cho yah sen las phyen-goh cho dvnghuot las namoq nyang yoeuh goh geh. Ngos housoeh teh muh mas soetuon soeu ma mes kuot, ge. 16 Housoeh ge nyamoq lyis soetuon jang masyah loh nhang. 17 Hauh uhlyis Heleni jens dvnganh gas lyi jungs gomh soeu Sotene lyis nyhik las soetuon jang mas tsain bat. Galio gas hauh cho lhyi pvlhyahlyoeus dvkuot. 18 Hauh thang lhyi Paulo gas, houmha nyangh nyangh lo dvyoq nyeis khoq thang lhyi boekyis lyis jeshuh khoq las Siria mau pheh sangpho yah goeu loh. Priska yahge Akula vzomh eq nyang yah dvgeh nghuot. Paulo gas xikpheh maukhi las dangthoengh toh zis bos yvmvyah Kenkhrea wus mas uhyuk tyamp. 19 Housoeh nyamoq Ephesu mas jweh las Paulo gas hauh vzomh lyis houmha khyoq toh khoq. Nyang gas lyi jungs mas wvng las Yuda jens yah lhah goh nyeis. 20 Houmha bang Paulo lyis houmha dvyoq nyeis khoq das xiklyis sang laus eq nyang ma gyo. 21 Nyang nyamoq lyis jeshuh zoh lyis taiq zis gas, Mangso dah ehnyet nghuot lyis gas ngos namoq jyank mas doms jweh das, ge. Housoeh nyang Ephesu masyah sangpho yah goeu khoq. 22 Gvshih Kesare jweh lyis, nyang Yerusalem pheh doq loh las, phung lyis xauhgoh khoq lho las, Antiok mas doms loh. 23 Hauh yvmas dvyoq nyeis khoq las hou mhayah doms thuq lyis Galati yahge Phrigia mau suh lai uhjyangh changlo jens dvnganhmoq lyis thukxank yomdyei. 24 Hauh uhlyis Apolo ge Alesandria wus mas dah dangdat, Yuda dius dvyuk Ephesu mas jweh los. Hauh soeu ka lhaihtoh dang khoek khoek seq soeu nghuot. 25 Hauh soeu ka Yhensain dah cho xauh xuq las dyos mas svsoh o mes zis yah Yesu cho vlhomuh jyauh nyeis. Nghuot laus eq nyang gas Yohan dah jeisnyhop cho kyingh dvseq. 26 Gvshih nyang gas lyi jungs mas womh ehnyet yah taiq kyoh zoh loh. Hauh uhlyis Priska yahge Akula gas, nyang taiq kyoh dang xauhgyo lyis nyang lyis khi las, Mangso cho zes shopsaq shoq vlhomuh jyauh. 27 Nyang gas Akhaia mau pheh goeu e mes lyis, Boekyis eq nyang lyis zes yomdyei las, changlo jens nyang lyis lhom yoeus das xiklyis, nyamoq jyank mas maussauh tsain dyei kat. Nyang jweh lyis Mangso dah jyehjuh gvng mas lomsjingh bang lyis gvgis bos thukxank dyei. 28 Khasoeh ge lyis Yesu gas Khristu nyang nghuot, ge lhaihtoh dang tuonh xoeuq las, Yuda jens lyis yomsoq zains yah taiq ung.
1 Apolo Korinthu wus mas nyeis nyeis lyis, Paulo gas thoq mau cho suh lai loh las, Ephesu mas jweh e. Houmha changlo dvyhamh yah xauhgoh. 2 Nyang nyamoq lyis taiq zis gas, Namoq lomsjingh uhlyis, Gyingshang Dyos vxauh yoeus shih goh lah, ge. Nyamoq, nyang lyis taiq zis gas, Gyingshang Dyos ge zis yangh ngamoq ma xauhgyo ku, ge. 3 Paulo nyamoq lyis taiq zis gas, Housoeh lyis namoq khasoeh teh jeisnyhop kham goh lah, ge. Nyamoq taiq zis gas, Yohan dah jeisnyhop kham, ge. 4 Yohan dah jeisnyhop gas vsainnyang dah yaunos masyah lhain los bang lyis dyei dah jeisnyhop nghuot. Yohan Israel jens lyis taiq zis gas, Ngah thang mas jweh soeu lyis lomsjingh geh, hauh soeu ka Yesu nghuot. ge. 5 Hauh bang hauh dang xauhgyo lyis, Yhensain Yesu dah nyings mas jeisnyhop tsain kham. 6 Gvshih Paulo nyamoq thoq mas loq kih dyei goeus ya, nyamoq thoq mas Gyingshang Dyos jweh las nyamoq dang vja ja jis las lvpe tsain pe los. 7 Nyamoq dvnganh lyis vbusbih dvci aiq yuk nghuot. 8 Hauh thang lhyi Paulo gas lyi jungs mas wvng las Mangso munghdan cho lhyi womh womh lhamhmuh somh khyvp top yomsoq bos dah dang yah taiq kyingh. 9 Nghuot laus eq dvyhamh gas nhaiqlom than zis yah ma lomsjingh, moqphung xikkhonh mas haih cho yah sen lha ma gis khyvlyis taiq los lyis changlo jens lyis shwih las hau joqyos toh khoq las Tiranu ge dah jyauh yvpmuh mas nyeih nyenh taiq goh nyeis. 10 Housoeh aiq zvn gyo lyis jyauh las Asia mau gonh mas dah Yuda dius, Heleni dius Yhensain dah dang lyis tsain gyo yoeus. 11 Mangso eq Paulo loq masyah yomsoq muh chixoeuq goeus las, 12 Paulo dah gungs yah tanh dah misseh, huyhauh teh zis dvja ja, nos bang jyank mas yoeus los lyis, hauh nos bang gis los. Yius wvng zis eq thuq loh. 13 Hauh uhlyis yius khat thuq dyei yenh bang Yuda dius dvyhamh eq, yius kuq bang lyis Yhensain Yesu dah nyings yoeus las yius lyis khat zis yah taiq zis gas, Paulo taiq dah Yesu nyings yah ngos namoq lyis vmingh dyei bah, thuq loh geh, ge. 14 Yuda Phudyei Zainsmuh Skewa dah loloeu nyhet yuk eq housoeh tsain kuot. 15 Hauh uhlyis ma shop dah yius gas nyamoq lyis, Yesu lyis ngos seq, Paulo lyis eq ngos seq, nghuot laus eq namoq hank nghuot goh: ge. 16 Hauh yius kuq soeu eq nyamoq thoq mas dyvm doq las nis ung tyamp. Housoeh nyamoq gas shohthungh shohnyhoq shohchen hauh yhen masyah phang thuq loh. 17 Hauh cho lhyi Ephesu mas dah Yuda, Heleni dius dvnganh xauhgyo lyis, nyamoq gyuk dvn mauh las Yhensain Yesu dah nyings lyis chungh nyeis. 18 Lomsjingh goeus bang nyoshoq eq lyih las vsainnyang kuot shuot cho cu rhen. 19 Mandan muot zo bang nyoshoq eq, nyamoq dah maussauh tsain chi lyih las, dius dvnganh dah xikkhonh mas ngheq tyamp. Hauh maussauh phauh suon yoeuh lyis ngwis kyvp oeng mons ko phauh nghuot. 20 Housoeh Yhensain dah dang gas yomsoq zainsmuh yah ung los. 21 Hauh cho bweh thang lhyi, Paulo gas Makedoni mau yahge Akhaia mau dye suh lai loh las, Yerusalem mas doms e das, hou mhayah Roma wus pheh eq jweh yoeuh das, ge ehnyet mas nghamh toh. 22 Housoeh yvmvyah nyang lyis bos pangh vzomh Timothi yahge Erastu lyis shih Makedoni mau pheh nhang kat las, nyang gas Asia mau mas dvyoq nyeis khoq shih. 23 Gvshih hauh gyo lyis, hauh cho gvng mas dius hoeu chetchet lo toq los. 24 Khasoeh ge lyis Demetrio ge dah ngwis shonh soeu ka Artemi dah ngwis phvra gyamhlo kuot zis yah shonh bang lyis ngwis nyoshoq yoh nhang nyeis. 25 Hauh soeu ka nyah ngwis shonh changh jens yahge gohtoeu hauh muh kuot zo bang dvnganh lyis khi huom las taiq zis gas, Loeuzomh jens eh, haih muh yah kyingh yang dis nyeis zis gas namoq nyang seq. 26 Nghuot laus eq gvshih gas, Ephesu wus mas kyingh yangh ma nghuot lo, Asia vluk dvmau gonh nghuot shoq, haih Paulo ge soeu ka, Dius loq kuot zis gas phvra ma nghuot ge, dius nyoshoq lyis nyang taiq dang yoh jingh nhang loh goeus. 27 Housoeh yvmvyah, yah dah muh gas jwangh zis xauh thoq lyis magoh kuhxing dah gywes lonyi Artemi dah paiq yhenmuh eq dius jens ma phauh lo zis yahge Asia mau yahge mungkvn gonh paiq dah gywes lonyi dah nyoqnho ngelang lhoeu thyoq tyamp das zis eq chiq chank bos, ge. 28 Hauh dang tsain xauhgyo lyis nyamoq nhaiqyo las Ephesu dius dah Artemi gas kuhxing ge tsain kaiq. 29 Housoeh hauh wus gonh hoeu las, Paulo dah gyung suh changh Makedoni dius Gai-u yahge Aristaku lyis nyhik she las, nyamoq dah pwe gus mas wuih e. 30 Paulo eq haih moqphung mas wvng mes laus eq changlo jens nyang lyis tomp toh. 31 Paulo yah seq goh, hauh wus mas dah dius zains dvyhamh eq nyang lyis pwe gus mas ma wvng das xiklyis taiq nhang kat. 32 Hauh uhlyis moqphung gas, vnhunk nhunk mus nyeis las gohyuk gohja tsain kaiq. Nyamoq nyothyang gas vsainnyang chamus lyih tsain huom zis yangh ma seq. 33 Gvshih Yuda dius jens Alesanda lyis jyuonh las moqphung mas toqh kat. Alesanda eq moqphung sam das xiklyis loq vsoh dyei las taiq bah ge cvvq. 34 Nghuot laus eq nyang Yuda dius nghuot zis seq lyis, dvnganhmoq gas dvyih dvyot, Ephesu jens dah Artemi gas kuhxing, ge aiq shishenh ko nyangh shoq tsain kaiq nyeis. 35 Wus mas lhaih comh soeu ka hauh moqphung lyis dye sam nhang thang lhyi taiq zis gas, Ephesu bang eh, haih Ephesu wus gas kuhxing dah Artemi gywes lonyi dah yhenmuh yahge maukhung mas gyoh los dah gungslho lyis tsainh toh joqyos nghuot yvlyis ma seq soeu hank bos lah? 36 Hauh cho ka ma yoh ngoek cho nghuot yvmvyah ehnyet nyens nyens nyeis gis zis yahge ma nghamh yoeuh muh ma gis kuot. 37 Nyamoq gas yah phvra yhen lyis thyoqzo dyei bang eq ma nghuot, yah gywes lonyi lyis loeusmus soqzo bang eq ma nghuot zis, namoq haih bang lyis she los lhyeh? 38 Housoeh yvmvyah Demetrio yahge nyah ngwis loqmuh zwi bang dvyuk lyis kauq chank bos lyis, soetuon jang phank toh, mungh zau eq nyeis, nyamoq nyang changh nyang zau kauq goh das. 39 Hei mhayah lai las seq mes cho dvja ja bos lyis, lyi wvng dah wus moq huom mas taiq thyet bas jungh. 40 Khvnyhik haih bang hoeu dah muh haih zis gas vyang ma bos yvmvyah, yang lyis yobos huon das zis chiq chank bos. Heisoeh teh hoeu yvlyis chamus bweh nhang ge dah phuk dang ngamoq ma yoh, ge. 41 Nyang hauh zis dye taiq lyis hauh moq huom lhyi tyo tyamp.
1 Gvshih hau hoeu cho sam tyamp thang lhyi, Paulo gas changlo jens lyis khi yoeus las taiq kyingh yomdyei toh khoq lho las jeshuh las Makedoni mau pheh e das zis thuq loh. 2 Hauh wuxom cho suh lai las taiq kyingh yom dye dyei lyis Akhaia mau mas jweh loh. 3 Houmha lhamhmuh somh khyvp nyeis khoq las, Siria mau pheh doms goeu loh das cvvq lyis, Yuda jens nyang lyis lhom yvmvyah, Makedoni cho doms tauh loh das ge nghamh toh. 4 Hauh uhlyis nyah thang chank yenh bang gas, Berea wus mas dah Piru dah lo Sopata; Thesaloni wus mas dah Aristaku yahge Sekundu; Derbe wus mas dah Gai-u; Asia mau mas dah Tichiku, Trophimu; yahge Timothi nghuot. 5 Nyamoq gas xik lyis loh las Troa wus mas ngamoq lyis langh nyeis. 6 Ngamoq eq bicheih ma kat ohlhyoq zo pwe lai thang lhyi, Philipi wus masyah goeu las oeng nyeih nyangh thang lhyi Troa wus, nyamoq jyank mas jweh lyis houmha nyhet nyeih tsain thoeng. 7 Dvdaus dah cangxeih vnyeih lyis ohlhyoq khyiq das xiklyis changlo jens zain joq lyis, Paulo gas nungs nvp thuq das zis sont yvmvyah, nyamoq lyis gungsgvm jweh shoq hauh dang taiq kyingh nyeis. 8 Hau nyamoq huom joq, thoq yvp mas nyibung nyoshoq duk nyeis. 9 Khomhbaiq mas Utiku ge dah loyvm phoq dvyuk tsung las yhet joq. Paulo dang taiq xing nyeis shih lyis hauh soeu yhet muih loh las, somh tsank yhen masyah dyet gyoh loh. Nyamoq nyang lyis e kui uhlyis nyang shei goeus. 10 Housoeh Paulo gyoh loh las hauh soeu lyis po yoeus las taiq zis gas, Vchiq goh nyang kang bos shih, ge. 11 Paulo doms doq loh zis yah, ohlhyoq khyiq las zo lho las, nyoqnyvng shoq nyamoq yah dang xing xing dye jisgoh thang lhyi, thuq loh. 12 Nyamoq hauh loyvm phoq lyis vdwis shwih loh las, nhaiqtaink zis nyoshoq xauh. 13 Paulo gas tungyos cho loh das zis sont toh yvmvyah nyang lyis Aso wus masyah sangpho mha shwih tsung das khyvlyis ngamoq nyah xik pheh hauh wus mas sangpho yah loh langh. 14 Nyang Aso wus mas ngamoq yah xauhgoh goeus ya, nyang lyis sangpho shwih tsung lha, Mitilen wus pheh goeu e. 15 Ngamoq hou mhayah doms toq lyis, nungs nyeih Kio mas jweh loh. Hou mhayah dvnyeih nyangh lyis Samo mas jweh loh. Hauh nungs nyeih Miletu wus mas jweh loh. 16 Khasoeh ge lyis Paulo gas Yerusalem mas Pentekoti buisnyeis duons lyis duons shoq ge mangh nyeis las, Asia mau mas buisnyeis ma thank nhang mes yvmvyah, Ephesu wus lyis lai toh khoq das ge nghamh toh. 17 Gvshih Paulo gas Miletu wus masyah Ephesu wus, phung mas dah logis jens lyis khi nhang kat. 18 Nyamoq nyah jyank mas jweh lyis nyang nyamoq lyis taiq zis gas, Ngos Asia mau mas vsaiq wvng nyeih masyah khvnyhik jweh shoq ngos kang khasoeh dwis zis namoq seq. 19 Ngos Yhensain dah muh wons wuq yvmas ehnyet khyoq las, ngausdyeis ngausnhvp yah Yuda jens lhom cho dah yaukyenh shanghsenh vja ja lyis kham zo zis yah ehnyet khyoq las ngausdyeis yah Yhensain dah muh lyis ngos wons wuq lai los. 20 Namoq xiklyis vkyuh bos dah muh lyis zwi cho mas ngos khanhamp eq nungs ma jik, namoq lyis hauh dang taiq kyoh las dvyhen dvyhen bvng bvng jyauh goeus. 21 Yuda dius yahge Heleni dius eq yaunos masyah Mangso jyank pheh lhain los las, yah Yhensain Yesu lyis lomsjingh das xiklyis ngos khoek khoek choshet toh. 22 Gvshih yoeuh aq, ngos Dyos lyis domsyos gyo zis yah Yerusalem mas loh chah nyeis. Houmha ngos cha mus das zis gas ngos ma seq. 23 Thung lungh das zis yahge shoeuhshih das zis gas ngos lyis langh nyeis ge, wus khanghmuh mas Gyingshang Dyos gas ngos lyis zaih nhang cho kyingh ngos dvseq. 24 Nghuot laus eq ngos gas ngos chank chah cho lhyi yoh nyhuk das zis yahge Mangso dah jyehjuh gausyis dang kanghjyoeng kat das xiklyis, Yhensain Yesu jyank masyah ngos xauh yoeus dah muh lyis eq, dye wons wuq das xiklyis ngos ngah kang lhyi ma yu. 25 Yoeuh aq, ngos hai maukhung munghdan cho taiq kyoh yenh yoq lyis xauhgoh, zomh yoeuh bang namoq dvnganhmoq, thang pheh ngah nyoqnho lyis ma doms nyvng lo das zis ngos seq. 26 Housoeh las dius hank dah suih eq ngah jyank mas ma dap zis gas, ngos khvnyhik namoq lyis kanghjyoeng kat. 27 Khasoeh ge lyis Mangso nghamh toeuq cho dvnganh zis namoq lyis taiq kyoh cho lhyi ngos khanhamp eq ma chilhaiq. 28 Mangso ka nyah suih yah wis dah Mangso dah phung lyis yoeuh das gomh das xiklyis, Gyingshang Dyos namoq lyis uhshe bang kuot nhang goeus yvmvyah, namoq gas vsainnyang gungs yahge yvng phung gonh lyis wontang yoeuh nyeis geh. 29 Ngos thuq loh thang lhyi yvng phung lyis nhaiq ma nyen, wus dah cauhpau jens gas namoq mas wvng las yvng phung lyis nyamoq o khyvlyis kuot tyamp das zis ngos seq. 30 Namoq mas gomloeus pan bang toq los las changlo jens lyis eq chowhang shwih whang das. 31 Housoeh las ngos namoq dvnganhmoq lyis somh zvn top nyeih nyenh ma no lo nyoqdyeis yah taiq kyingh toh zis lyis soh las phuksohlhaiq kuot geh. 32 Mangso dah nhaiqnyen shohgyo dah loq yah, nyah jyehjuh Dang mas kyauh toh. Hauh dang gas namoq lyis yoh kuhxing los nhang zis yahge Mangso nyah dius jens dvnganh lyis dyei dah jyehjuh jyungshuk gas namoq lyis xauh kham zo nhang. 33 Ngos gas hank dah ngwis xing, dyimis lyis eq nyoqnoq o ma bos ku. 34 Nghuot goeus haih loq gas ngah gungs yahge ngah Muh wons changh jens chah dah cho khat khanghmuh kuot dyei loq nghuot yvlyis namoq nyang seq. 35 Housoeh tungh kuot las yom ma bos bang lyis bos gis thuk cho eq, lhom yoeus thoq lyis dyei zis gas nge zes lhoq ge, Yhensain Yesu nyang taiq dang lyis soh las ngos kuot teh kuot dah muh mas yomnhuk bang lyis yoh pangh das xiklyis ngos namoq lyis yikhyoh chixoeuq goeus, ge. 36 Housoeh dye taiq lho las, nyang nyamoq dvnganhmoq yah dvgeh phvluk zomhgyuis las shvmanh dung. 37 nyamoq dvnganhmoq ngaus zis yah Paulo lainzain lyis po las nyang lyis bvlot tanh. 38 Thang pheh nyah nyoqnho ma xauh nyvng lo das, ge dah dang khonh mas nyamoq nhaiq zes kuk. Hauh thang lhyi Sangpho jweh shoq eq nyang lyis e tsain pauq kat.
1 Ngamoq nyamoq lyis kangh toh khoq las Kosa goeujo dan dan goeu loh. Nungs nyeih Rode mas tsain jweh, hou mhayah Patara wus mas jweh. 2 Phoenisia mau pheh goeu dah sangpho nyvng las hauh zis yah tsung loh. 3 Kupru goeujo nyvng kat lyis, hauh loqyos shot pheh lai loh las, Siria mau pheh goeu gyoh las sangpho mas dah hu khyoq das xiklyis Taire wus mas thoeng. 4 Houmha dah changlo jens lyis loh xauhgoh zis yah ngamoq hauh wus mas nyhet nyeih nyeis khoq. Hauh bang eq Paulo lyis Yerusalem pheh ma loh das xiklyis Dyos yah taiq. 5 Nyhet nyeih lai thang lhyi ngamoq thuq las tsoq loh lyis, houmha bang vmesbih jens yah dvgeh wus nghe jweh shoq chank pauq kat. Jyankyvm mas jweh lyis ngamoq dvnganhmoq phvluk zomhgyuis las shvmanh tsain dung. 6 Dye lyis dvyuk yah dvyuk jeshuh goh thang lhyi, ngamoq sangpho khau mha wvng las, nyamoq eq yhen pheh tauh loh. 7 Ngamoq Taire wus masyah jeis cho tsoq loh lyis Ptolemai wus mas jweh loh. Houmha ngamoq lomsjingh bang yah xauh jhent goh zis yah nyamoq yah dvgeh dvnyeih nyeis khoq. 8 Nungs nyeih ngamoq hou mhayah Kesare wus mas jweh loh. Housoeh nyhet yuk mas dvyuk nghuot las, gausyis dang taiq kyoh soeu svra Philip yhen mas ngamoq boengh wvng doq khoq. 9 Hauh soeu ka lvpe seq pe dah lonyi gyingh nyhet yuk yoh. 10 Ngamoq nyah yhen mas dvyoq nyeis lyis, Yuda mau masyah Agabu ge dah lvpe dvyuk jweh los. 11 Housoeh nyang ngamoq jyank wvng las Paulo dah dyichih nyah khyei nyah loq mas yoeus twih lho las taiq zis gas, Gyingshang Dyos heisoeh taiq nyeis. Haih dyichih sain lyis Yerusalem mas Yuda jens yah heisoeh twih las gohnyau loq mas kyauh das, ge. 12 Ngamoq hauh dang xauhgyo lyis, ngamoq yahge houmha bang gas, nyang lyis Yerusalem mas ma loh das xiklyis tsain taiq kyingh. 13 Paulo phuk taiq zis gas, Namoq chamus tsain ngaus las ngos lyis nhaiqngis nhang goh lah? Twih zis za ma nghuot, Yhensain Yesu dah nyings xiklyis Yerusalem mas loh shei kham das zis yangh cicont nghuot, ge. 14 Housoeh ma yoh jyoeuq lo goeus ya, Yhensain dah ehnyet dvnghuot lo oen ngamoq eq samlo nyeis. 15 Hauh thang lhyi ngamoq gas dyens sont las Yerusalem pheh loh. 16 Kesare mas dah changlo jens dvyhamh eq ngamoq yah dvgeh loh zis yah, ngamoq boengh loh doq das dah yhensain, changlo nyoshoq zvn duot goeus soeu Kupru dius Manason dah yhen mas tsain shwih loh. 17 Ngamoq Yerusalem mas jweh lyis, boekyis gas ngamoq lyis gausyis zis yah lhom yoeus. 18 Nungs nyeih Paulo gas ngamoq yah dvgeh Yaku jyank mas lamh e lyis logis jens dvnganh eq huom joq langh. 19 Nyamoq yah dye jhent goh las, nyang wons wuq muh mas, gohnyau bang mas Mangso bweh nhang cho dvkoeuq thang lhyi dvkoeuq taiq kyoh. 20 Hauh zis xauhgyo lyis nyamoq eq Yhensain lhyi chungh las nyang lyis taiq zis gas, Vmang eh, Yuda dius mas lomsjingh bang khyoengh soe mons soe nyo zis gas nvng seq. Hauh bang dvnganh gas Lyi mas nhaiq wvng bang kyingh nghuot. 21 Nghuot laus eq gohnyau bang mas loh nyhamh toh dah Yuda dius dvnganh lyis, vsainnyang dah lo jens lyis vthyoh tyomh cho ma kuot dyei noh, nyamoq thungh ma chank noh, ge Moshe Lyi ma chank das khyvlyis nyang jyauh, ge dah dang gas hauh bang dvnganh dye xauhgyo goeus. 22 Khasoeh kuot das? Nvng jweh zis nyamoq jyoengh xauhgyo hah das. 23 Housoeh las ngamoq taiq teh chank kuot aq. Ngamoq jyank mas dangthoengh toh bang nyei yuk bos. 24 Nah cho yah sen las nyamoq xauhgyo dah loeus gas ma jus zis yahge, nvng gas Lyi lyis phauh nyang las chank kuot nyeis zis lyis nyamoq seq das xiklyis haih bang lyis nvng shwih las, nvng eq nyamoq yah dvgeh cheihshang cho kuot aq. Nyamoq dah uhyuk phauh nvng kham aq. 25 Nghuot laus eq lomsjingh dah gohnyau bang dah cho ngamoq nghamhthyet cho maussauh yah nyamoq lyis seq nhang goeus. Nyamoq gas phvra lyis kyangh goeus dah vyhang yahge suih, lainzain lhyent sat shoh, yauxi cho lyis jhank chah, ge. 26 Hauh thang lhyi Paulo hauh vbusbih jens lyis shwih las, nungs nyeih nyah cheihshang cho lhyi nyamoq yah dvgeh kuot. Hauh thang lhyi, nyang yhenmuh mas wvng las cheihshang thungh lyis khanyhoq nyeih nyangh thang lhyi tyeh las nyamoq dvyuk yah dvyuk xiklyis phudyei das cho loh taiq kyoh. 27 Hau nyhet nyeih vluk dyingh los nyeis lyis Asia mau mas dah Yuda jens gas yhenmuh mas Paulo lyis nyvng lyis, moqphung lyis jyuonh las, Nyang lyis nyhik las kaiq zis gas, 28 Israel dius jens eh, bos pangh geh. Haih soeu ka joqyos khyiq khanghmuh mas bang dvnganh lyis yah vnyau yahge Lyi lyis eq, haih joqyos lyis eq, Lyi yah ma huq khyvlyis jyauh soeu nghuot. Hauh thoq lyis magoh, yhenmuh mas Heleni dius shwih wvng las haih Gyingshang joqyos lyis vwot v-oeu kuot, ge. 29 (Khasoeh ge lyis, Trophimu ge dah Ephesu dius dvyuk lyis wus mas Paulo yah dvgeh nyamoq nyvng goeus las, hauh soeu lyis yhenmuh mas shwih wvng goeus ge tsain nghamh.) 30 Dvwus gonh hoeu lha, moqjens tsain wuih wvng los las, Paulo lyis nyhik, yhenmuh masyah she thuq lho las khomh eq dvlhain dvm nyheih tyamp. 31 Housoeh Paulo lyis sat das zis sont nyeis lyis, thoenkgus jesdvp guon dah zauzains jyank mas Yerusalem gonh hoeu nyeis cho loeus jweh loh. 32 Nyang gas jeslo jens yahge jes dvxo guon zau jens lyis shwih las nyamoq jyank pheh dvlhain dvm wuih e. Nyamoq gas jeslo jens yahge zauzains moq lyis nyvng lyis, nyamoq Paulo lyis lyuk zis tsain no. 33 Housoeh zauzains e las Paulo lyis she yoeus lho las jvngchoh aiq khat yah twih das zis vmingh dyei. Paulo hank nghuot? Nyang cha cu zis eq nyei yoeuh. 34 Moqphung gas dvyhamh dvja ge kaiq zis yah nyo hoeu yvmvyah, vlhomuh ma yoh seq shih lyis Paulo lyis thoenkgus jesdvp khau mas kat toh das xiklyis vmingh dyei. 35 Zvmlhangh mas jweh lyis, moq dius gas ehnyet gywes zis yah Paulo jyank dyvm los yvmvyah, jeslo jens yah nyang lyis po doq loh. 36 Chank los dah moqjens gas, Nyang lyis sat geh, ge tsain kaiq nyeis. 37 Paulo lyis thoenkgus jesdvp khau mas kat bah ge loqzoh mas, Paulo zauzains lyis taiq zis gas, Ngos nvng lyis dang dvkhonh vyoh taiq das lah, ge. Zauzains phuk taiq zis gas, Nvng Heleni nyingh seq lah, ge. 38 Housoeh lyis nvng gas khvlyens shih gomloeus toq las mhanhdyvp mas dius nyei khyoengh lyis shwih loh dah Egutu dius nvng vnghuot lah, ge nyei. 39 Paulo gas, Ngos Kiliki mau, Tarshu wus mas dah Yuda dius nghuot. Ngos nyeis wus gas vtsiq vlo ma nghuot; haih dius lyis dang yoh taiq das vmingh dyei aq, ge tungh sang nyeis. 40 Nyang vmingh yoh lyis, zvmlhangh thyoh mas yap las, moqphung sam das xiklyis loq vsoh dyei. Nyamoq sam goeus ya, Hebre nyingh pheh yah nyamoq lyis taiq zis gas,
1 Nhaiqbos uwus moq yahge boekyis eh, namoq xikkhonh mas ngah gungsgos dang lyis gyo yoeus dyei geh ge, 2 Hebre nyingh pheh yah nyang taiq dang lyis nyamoq xauhgyo lyis zes sam nyeis. Housoeh nyang taiq zis gas, 3 Ngos gas Kiliki mau, Tarshu wus mas khoeu dah Yuda dius nghuot. Nghuot laus eq, haih wus mas ngos bes los las, Gamale dah khyeiyang mas ngamoq phauh thyeih moq dah svsoh than lyi thungh yah dvyhangteh jeih jyvp xuq las, khvnyhik dah namoq teh ngos eq Mangso shot pheh nhaiq wvng zis yah, 4 nyelo yukgis lo lyis twih she, thung khyoq las, haih cho chank bang lyis sat shoq shoeuhshih yoeuh ku. 5 Phudyei bang yahge logis jens phung gonh eq ngah xiklyis kanghjyoeng yoh kat. Ngos nyamoq jyank mas dah maussauh xauh yoeus las Damasku wus mas nyeis bang lyis eq Yerusalem mas twih she los las yobos dyei das xiklyis ngos Damasku pheh loh. 6 Housoeh ngos loh las, Damasku wus nvm mas jweh loh nyeis lyis, nyeih gungs lyis maukhung masyah svsoh bvng zis ngah vyvm vwi mas nyetlos nyettant bvng thuq los. 7 Ngos gas nyeisjvng mas lains loh las xauhgyo dah dang gas, Saulo, Saulo, nvng ngos lyis chamus shoeuhshih nyeis lah, ge. 8 Ngos phuk taiq zis gas, Yhensain eh, nvng hank nghuot? Nyang taiq zis gas, Ngos gas nvng shoeuhshih nyeis dah Nazaret Yesu nghuot, ge. 9 Ngos yah dvgeh loh bang gas bvng zis tsain nyvng laus eq, ngos lyis taiq nyeis soeu dah thwe lyis gas ma xauhgyo. 10 Tsai ngos gas, Yhensain eh, ngos cha kuot das lah, oen lyis Yhensain ngos lyis taiq zis gas, Toq las Damasku mas loh aq, nvng lyis dyei toh dah muh dvnganh houmha nvng lyis taiq kyoh das, ge. 11 Hauh bvng dah yet gvng mas ngos nyoq ma nyvng lo lyis, ngos yah loh bang ngah loq mas she lha, ngos lyis Damasku mas shwih wvng loh. 12 Housoeh lyi chank zis yah lomsjingh cho mas wontang las, houmha nyeis dah Yuda dius dvnganhmoq dah xikkhonh mas nyoqnho ngelang bos dah Anani ge soeu, 13 ngah nvm mas lyih yap las, Ngah vnoeuh Saulo eh, nah nyoq doms nyvng bas jungh, ge. Hauh uhlyis ngos ngah nyoq doms nyvng zis yah nyang lyis nyvng. 14 Nyah nhaiqlom seq das zis yahge Dan Soeu lyis nyvng las nyah nhuot mas dah dang xauhgyo yoeus das xiklyis, yah phauh thyeih moq dah Mangso ka nvng lyis khyen toh. 15 Khasoeh ge lyis nvng nyvng ku zis yahge xauhgyo ku cho lhyi nyeisjvng gonh mas nyah xiklyis kanghjyoeng kat dyei soeu nvng bweh das. 16 Gvshih nvng chamus sheq nyeis lah? Toq aq, Yhensain dah nyings lyis yoeus las jeisnyhop kham las, nah yobos cheihshang tyamp aq, ge. 17 Hauh thang lhyi ngos Yerusalem mas tauh loh las yhenmuh mas shvmanh dung nyeis lyis ngos nyoqnyvng nyvng zis gas, 18 Nvng Yerusalem masyah lvnyap thuq loh aq, nvng ngah cho kanghjyoeng kat dang lyis nyamoq ma lhom yoeus das, ge Yhensain ngos lyis taiq. 19 Hauh uhlyis ngos gas, Yhensain eh, nvng lyis lomsjingh bang lyis lyi jungs masyah ngos thung nyhik khyoq zis yahge tsain lyuk zis gas nyamoq nyang seq. 20 Nah kanghjyoeng Stephan dah suih huot yoq lyis eq ngos nyang vyvm mas yap las, hauh cho lhyi xam bos xonh las nyang lyis sat bang dah dyimis zungh dyei goeus, oen taiq goeus. 21 Yhensain taiq zis gas, Loh aq, ngos nvng lyis gohnyau bang nyeis dah we mau pheh nhang kat das, ge. 22 Houmha jweh shoq nyamoq nyah dang gyo lho las, Houteh soeu lyis gas shung tyamp geh, sat geh, nyang kang dwis das zis ma mon lo, ge tsain kaiq. 23 Housoeh kaiq uhjyangh, nyamoq nyang dah dyi khyuot doeuh tyamp las tsohphih tsain doeuh lhank nyeis lyis, 24 zauzains taiq zis gas, Paulo lyis thoenkgus jesdvp khau mas shwih hwank las, nyah cho chamus heisoeh kaiq zis yoh seq shoq lyuk las nyei yoeuh geh, ge. 25 Shohyeis twih yah nyang lyis lyuk das xiklyis lang twih goeus ya, Paulo gas vyvm mas yap dah jes dvxo guon zau lyis, Khasoeh Roma dius nghuot soeu lyis, dang thang ma thyet shih lyis namoq nyang lyis lyuk zis gas lyi bos lhyeh, ge. 26 Jes dvxo guon zau hauh zis xauhgyo lyis, zauzains jyank mas loh taiq zis gas, Nvng cha kuot bah oen lah? Hauh soeu ka Roma dius nghuot, ge. 27 Zauzains eq Paulo jyank mas e las, Nvng Roma dius nghuot lah? Ngos lyis taiq kyoh aq ge. Nyang taiq zis gas, Nghuot, ge. 28 Tsai, zauzains taiq zis gas, Ngos Roma dius xauh bweh das nyhenshang phauh nyoshoq yah dvyoh yoeus, ge. Paulo taiq zis gas, Ngos gas Roma dius bweh goeus zis khoeu los soeu nghuot, ge. 29 Housoeh nyang lyis nyei wu yoeuh das ge bang houjang tsain thuq khoq. Zauzains eq Paulo Roma dius nghuot cho seq goeus ya, nyang lyis twih shuot las gyuk nyeis. 30 Yuda jens Paulo lyis chah yobos huon zis zauzains jeih jeih seq mes yvmvyah nungs nvp Paulo lyis phui kat las phudyei uhjyung jens yahge Yuda lyi huom gonh lyis huom das xiklyis vmingh dyei. Housoeh nyang Paulo lyis nyamoq xikkhonh masyah lyih shwih toh.
1 Housoeh Paulo gas nhaiqbos huom lyis yoeuh tsuk toh las taiq zis gas, Boekyis eh, ngos khvnyhik jweh shoq gis zis dvnganh lyis seq nghamh ehnyet yah Mangso xikkhonh mas dwis nyeis, ge. 2 Housoeh las Phudyei Zainsmuh Anani gas, Nyah nhuot lyis tyuk dyei geh, ge vnvm mas yap joq bang lyis vmingh dyei. 3 Paulo nyang lyis taiq zis gas, Vthyoeu juot dah tyoyvm eh, Mangso nvng lyis tyuk das: Lyi bos khyvlyis soetuon das zis nvng heimha dvtsung lhyi, Lyi yah shaih khyvlyis ngos lyis tyuk nhang lhyeh, ge. 4 Vyvm mas yap joq bang eq, Nvng Mangso dah Phudyei Zainsmuh lyis ma phauhgis womh taiq lhyeh, ge. 5 Paulo taiq zis gas, Boekyis eh, nyang Phudyei Zainsmuh nghuot zis ngos ma seq las nghuot. Nah vnyau thoq mas guon soeu lyis ma phauh yoh kuot das zis ma nghuot, ge lhaih toh, ge. 6 Hau huom joq bang mas dvyhamh gas Saduke, dvyhamh gas Pharishe tsain nghuot yvlyis Paulo seq lyis, nyang hauh huom mas kaiq zis gas, Boekyis eh, ngos gas Pharishe jens dah lo Pharishe nyang nghuot. Shei goeus bang dwis toq cho lhyi lomsjingh gvng mas ngos shoenk zis xauh nyeis, ge. 7 Housoeh taiq kat lyis Pharishe yahge Saduke moq nyang changh nyang phyen-goh las moq huom gas gang lvn loh. 8 Khasoeh ge lyis, Saduke moq gas, Dwis toq ge zis ma bos, loeuswons bang yahge dyos eq ma bos, ge sang. Nghuot laus eq Pharishe moq gas hau dvnganh yvlyis lhom yoeus. 9 Housoeh las svsoh tsain taiq hoeu goh nyeis. Hauh uhlyis Pharishe phung mas dah maussauh lhaih bang dvyhamh toq las, haih soeu mas chah yobos eq ngamoq ma nyvng, Dyos nghuot ya loeuswons soeu nyang yah dang taiq goh nyeis zis dvnghuot, ge. 10 Housoeh svsoh phyen-goh los lyis, zauzains gas nyamoq Paulo lyis lang chingh sat das yvlyis chiq yvmvyah, nyamoq jyank mas gyoh e lha, nyamoq xikkhonh masyah nyang lyis lang she lha thoenkgus jesdvp khau mha shwih loh das xiklyis jeslo jens lyis vmingh dyei. 11 Hauh nyensyo Yhensain gas Paulo nvm mas yap las, Vgyuk, nvng ngah cho Yerusalem mas kanghjyoeng kat zis yah dvyhangteh Roma wus mas eq kat chah shih, ge. 12 Nyoq nyvng lyis Yuda dius dvyhamh tsain huom, gomloeus pan lha, Paulo lyis ma yoh sat dvchank gas cha eq ma zo ma shuk das, ge nyamoq nyang gungs lyis mau tsain khi toh. 13 Housoeh xam bang nyeici nyet ko nghuot. 14 Nyamoq gas phudyei uhjyung jens yahge logis jens jyank mas e lha taiq zis gas, Paulo lyis ma yoh sat dvchank gas zonoms cha lyis eq ma tanh das oen ngamoq mau tsain khi toh. 15 Housoeh yvmvyah gvshih namoq yahge hau nhaiqbos huom yah dvgeh, Paulo dah cho vlhomuh nyei yoeuh mes shih oen nyang lyis nvpyo namoq jyank mas khi yoeus das khyvlyis zauzains lyis sang kat geh. Ngamoq gas nyang heimha ma jweh shih lyis sat das zis cicont kuot nyeis das, ge. 16 Housoeh lhom cho lhyi Paulo vbi dah lo xauhgyo las thoenkgus jesdvp khau mha Paulo lyis wvng taiq kyoh. 17 Paulo eq jes dvxo guon zau dvyuk lyis khi las taiq zis gas, Haih loyvm phoq lyis zauzains jyank mas shwih e dyei aq: nyang dvja taiq mes ge, ge. 18 Nyang hauh soeu lyis zauzains jyank mas shwih wvng las taiq zis gas, Haih loyvm phoq nvng lyis taiq das dang dvja bos yvmvyah, nyang lyis nah jyank mas shwih lyih das zis thung lungh Paulo ngos lyis khi lha sang kat, ge. 19 Zauzains gas nyang lyis nyah loq mas she las, sam joqyos mas shwih loh las nyang lyis nyei zis gas, Nvng ngos lyis cha taiq mes, ge. 20 Nyang taiq zis gas, Paulo lyis vlhomuh nyei choq yoeuh mes shih teh kuot las, phvnaq nyeihyo huom mas shwih los dyei das xiklyis, nvng lyis sang das, ge Yuda jens xam tsain xonh goeus. 21 Nghuot laus eq nyamoq o khyvlyis vgyo dyei: Khasoeh ge lyis Paulo lyis ma yoh sat dvchank gas cha eq ma zo ma shuk das ge nyamoq gungs lyis mau tsain khi toh bang nyeici nyet, nyang lyis lhom sat das zis tsain tamh joq das; gvshih yangh nah vmingh langh uhjyangh nyamoq haih muh kuot das zis cicont nghuot, ge. 22 Zauzains gas, hauh loyvm phoq lyis, Nvng ngos lyis haih cho lyih taiq kyoh zis hank lyis eq vtaiq kyoh, ge khyangh dye com lyis nhang kat. 23 Tsai nyang gas jes dvxo guon zau aiq yuk lyis khi lha taiq zis gas, Khvnyens gau shishenh lyis Kesare wus pheh loh das zis jeslo aiqxo, nyang ji zis nyhetci, lham chi bang aiqxo lyis sont toh geh, ge. 24 Hauh thoq lyis Paulo lyis nyang ji nhang las mungh zau Felik jyank mas tsoek yah yoh shwih kat das xiklyis taiq toh. 25 Maussauh eq heisoeh ge lhaih dyei kat. 26 Klodi Lusia gas nyoqnho ngelang kuh dah mungh zau Felik lyis jeshuh kat. 27 Haih soeu lyis Yuda jens nyhik las sat das tsain sont lyis, jeslo jens yahge ngos loh las, nyang Roma dius nghuot zis seq los yvmvyah, nyamoq jyank masyah khyuot yoeus toh. 28 Housoeh nyang lyis kauq cho seq mes yvmvyah, nyamoq dah lyi huom mas shwih hwank yoeuh lyis, 29 ngos nyvng zis gas, nyang mas shei mon, thung khyoq mon dah kauq cho ma bos, nyamoq lyi yah sen las nyei cho dvtsain kauq. 30 Haih soeu lyis sat das zis Yuda jens khaujeini las lhom cho ngos lyis taiq kyoh yvmvyah, ngos nyang lyis houjang nah jyank mas shwih kat nhang las, nyang lyis kauq bang eq nah xikkhonh mas tsain lyih nhang das khyvlyis taiq toh, ge. 31 Housoeh taiq kat zis yah dvyhangteh, jeslo jens eq Paulo lyis Antipatri jweh shoq nyenh lyis loh tsain shwih kat. 32 Nungs nvp, nyang ji bang lyis gas nyang yah dvgeh loh das khyvlyis toh khoq las, nyamoq gas thoenkgus jesdvp pheh tsain tauh los. 33 Nyang ji bang eq Kesare wus jweh las mungh zau lyis maussauh dyei toh khoq lho las Paulo lyis eq nyah xikkhonh mas shwih hwank kat. 34 Hauh maussauh dye nghap lyis Paulo kha mau mas zis nghuot yvlyis nyei yoeuh las, Kiliki mau mas zis nghuot yvlyis seq goeus ya, 35 mungh zau gas, Nvng lyis kauq bang jweh los lho lyis, ngos nah soe gyo dyei das, ge taiq las Paulo lyis Pretori ge, Herod dah yhenmuh mas, zungh bang toh las lhunk toh das zis vmingh dyei.
1 Hauh thang lhyi oeng nyeih lyis Phudyei Zainsmuh Anani gas logis jens yah dvgeh, Tertulu ge dah dangdat dvyuk shwih las nyamoq gas mungh zau jyank mas Paulo cho e tsain nyei. 2 Housoeh Paulo lyis khi wvng los yah dvyih, Tertulu kauq dang taiq phank los zis gas: Nyoqnho ngelang bos dah Felik eh, nah gvng mas ngamoq gas nyeis tam nyeis zis yahge nvng guon cho lyes yvmvyah, haih vnyau eq kuhxing los. 3 Ngamoq hauh yvlyis cho khat khanghmuh, joqyos khyiq khanghmuh mas vjangh nhaiqshoqlang ehnyet yah lhom yoeus khamzo nyeis. 4 Nghuot laus eq shishenh nyoshoq ma thank nhang dang lyung yah ngamoq taiq das dang lyis nah kuhxing ehnyet yah jenh gyo dyei aq. 5 Haih soeu ka ma gis ma shop zis yah, mungkvn gonh dah Yuda jens lyis shwih hoeu las hau Nazaret phung dah vgyis uhjyung nghuot nyeis zis gas ngamoq nyvng. 6 Nyang gas yhenmuh lyis yangh vwot v-oeu kuot das ge sont nyeis. Housoeh yvmvyah ngamoq nyang lyis nyhik las ngamoq dah lyi yah dvyhangteh soetuon mes. 7 Nghuot laus eq jeszau Lusia gas nyang lyis ngamoq loq masyah chot shwih yoeus loh. Hauh thang lhyi Lusia gas ngamoq lyis nah xikkhonh mas Paulo lyis yobos los huon das xiklyis vmingh dyei toh. 8 Nvng nyang lyis nyei yoeuh lyis ngamoq nyang lyis kauq cho jyoeng zis nghuot yvlyis nvnyang yoh seq das, ge. 9 Yuda dius jens eq housoeh nghuot ge bos taiq. 10 Mungh zau gas nyang dang taiq das xiklyis vsoh dyei yah dvyih, Paulo taiq zis gas, Yhensain nvng haih vnyau thoq mas soetuon soeu zvnlom nyangh nyangh kuot ku goeus zis gas ngos seq yvmvyah, ngos ngah cho lhyi gauslaus zis yah taiq bah. 11 Khasoeh ge lyis Yerusalem mas shvmanh dung das xiklyis doq loh zis, buisnyeis dvci aiq nyeih ma lai shih zis gas nvng yoh seq, ge. 12 Nyamoq gas ngos Yhenmuh yahge lyi jungs, wus vkhau mas hank yah phyen-goh zis eq, moqphung lyis shwih hoeu yos eq nyamoq ma nyvng. 13 Gvshih nyamoq ngos lyis kauq cho mas, nvng lyis chah kanghjyoeng ma yoh tsain chixoeuq. 14 Nghuot laus eq cho dvja gas ngos nah xikkhonh mas rhen. Houka ngamoq phauh thyeih dah Mangso lhyi nyamoq shuot ge nghamh dah cho ge lomsjingh vkhyoh yah paiq. Housoeh paiq yvmas Lyi maussauh mas dyei toh cho dvnganh yahge lvpe jens dah maussauh mas lhaih toh zis dvnganh lyis lomsjingh las lhom yoeus toh. 15 Ngos gas nyamoq yah dvyhangteh Mangso mas nghamhloms cho yoh. Houka dius dvnganh gas gis bang eq, ma gis bang eq shei masyah dwis toq los ge dah nghamhloms cho nghuot. 16 Ngos vjangh yah Mangso yahge dius xikkhonh mas shang dah seq nghamh ehnyet yah kang yoh dwis das xiklyis kank bos nyhoq yomkat nyeis. 17 Housoeh nyoshoq zvn lai thang lhyi, ngah dius nyau jyank mas Vlu jyungshuk dyei das zis yahge phudyei das xiklyis ngos jweh loh. 18 Ngos housoeh phudyei nyeis shishenh lyis nyamoq ngos lyis yhenmuh mas nyvng. Hauh shishenh lyis ngos ngah cheihshang thungh lyis dye kuot goeus. Houmha ngos yah dvgeh moqphung hank eq ma nyeis, hoeu cho eq cha ma bos. 19 Asia mau mas dah Yuda dvyhamh nyeis. Nyamoq ngos lyis kauq chank bos lyis gas, hauh bang nyang nah xikkhonh mas lyih taiq gis. 20 Nghuot ya, ngos hauh lyi huom xikkhonh mas yap joq uhlyis, haih dius jens ngos cu yobos nyvng lyis gas nyamoq nyang taiq thuq los bas jungh. 21 Ngos gas shei bang doms dwis los ge dah lomsjingh cho gvng mas khvnyhik namoq dah soetuon zis xauh nyeis oen nyamoq xikkhonh mas yap uhlyis kaiq kat dang mas lai las nyamoq ngos lyis yobos huon chank cha ma bos. 22 Mungh zau Felik gas Cho ge dah lomsjingh cho lhyi gvgis lo seq toh. Zauzains Lusia heimha jweh lyis ngos namoq dah soe dang thang thyet dyei das ge taiq zis yah hauh huom no toh. 23 Housoeh nyang gas jes dvxo guon zau lyis, Paulo lyis zungh soeu yah toh das xiklyis vmingh dyei. Nghuot laus eq nyah buisnoms jens lyih phuqsoe mes bang lyis ma tomp das xiklyis taiq toh. 24 Nyoshoq nyeih thang lhyi, Felik gas Yuda vmesbih Drusila ge, nyah yhensain nyhiq yah los las, Paulo lyis khi yoeus lho las, Khristu lyis lomsjingh cho lyis gyo yoeus. 25 Paulo gas, dan cho, nyang gungs nyang guon cho yahge jweh los das soetuon cho taiq thuq xoeuq lyis Felik dvn las phuk taiq zis gas, Gvshih loh shih aq, ngos doms ngo uhlyis nvng lyis khi das, ge. 26 Paulo gas nyang lyis ngwis dyei mvbeh ge nghamhloms yvmvyah nyang lyis dvsoq soq lyis khi yoeus las lhah goh nyeis. 27 Aiq zvn thang lhyi Porkiu Festu gas Felik dah muh lyis los thaiq. Housoeh Felik gas Yuda jens lyis ehnyet lhoqh pyo dyei mes yvmvyah Paulo lyis thung khyoq toh shih.
1 Hauh mauxom mas Festu wvng los thang lhyi somh nyeih lyis nyang gas Kesare wus masyah Yerusalem pheh loh. 2 Hauh uhlyis Phudyei Zainsmuh yahge Yuda jens dah uhjyung jens gas, nyang lyis Paulo dah cho tyixo khyvlyis, 3 Paulo lyis Yerusalem mas loh das xiklyis khi nhang das zis sang las, nyamoq gas Paulo lyis cho mas lhom sat das zis sont. 4 Nghuot laus eq Festu phuk taiq zis gas, Paulo lyis Kesare mas lhunk toh chah shih zis yahge, ma nyangh lyis nyang eq houmha tauh loh das. 5 Namoq mas vmingh bos bang ngos yah dvgeh loh las, hauh soeu mas yobos dvja ja bos lyis gas, hauh bang nyang kauq bas jungh, ge. 6 Housoeh nyamoq jyank mas xet nyeih, nghuot ya dvci nyeih ko thoeng khoq las, nyang gas Kesare wus pheh loh. Hauh nungs nyeih, nyang soetuon tank mas tsung las Paulo lyis khi los nhang. 7 Nyang jweh lyis, Yerusalem masyah los dah Yuda jens gas Paulo dah yvmlhaink yap las nyang lyis yobos vja ja tsain taiq huon. Nghuot laus eq nyamoq kanghjyoeng ma yoh chixoeuq. 8 Paulo phuk taiq zis gas, Yuda jens dah lyi lyis eq, yhenmuh lyis eq, hwankti Kesar lyis eq ngos cha ma cu ku, ge gungsgos dang taiq. 9 Nghuot laus eq Festu gas, Yuda jens xikkhonh mas nyoqnho yoh mes las Paulo lyis taiq zis gas, Nvng Yerusalem mas loh las, houmha ngah xikkhonh mas haih muhzoh cho soetuon kham das zis nvng gyo das lah, ge. 10 Paulo taiq zis gas, ngos Kesar dah soetuon tank xik mas yap joq. Houka ngos lyis soetuon dyei das joqyos nghuot. Nvng vlhomuh seq nyeis zis yah dvyhangteh ngos Yuda jens lyis cha ma cu. 11 Khasoeh ge lyis ngos cu nghuot lyis gas, nghuot ya shei mon zis dvja ja cu lyis gas shei das zis lyis ngos ma jhank. Nghuot laus eq nyamoq ngos lyis yobos huon cho cha eq ma jyoeng lyis gas ngos lyis hank eq nyamoq loq mas yoh kyauh das zis ma nghuot. Kesar xikkhonh mas soetuon dyei das zis ngos dung. 12 Festu gas nyah dah soetuon huom bang yah dye xamgoh las nyang lyis phuk taiq zis gas, Nvng Kesar soetuon dyei das zis dung kham goeus las, Kesar jyank mas loh das, ge. 13 Hauh thang lhyi buisnyeis kha nyhank ma nyangh lyis hwankti Agripa yahge Bernike gas Kesare wus mas jweh las Festu lyis loh xauhgoh. 14 nyamoq nyoshoq nyeih nyeis thang lhyi, Festu gas Paulo dah cho hau hwankti lyis taiq kyoh zis gas, Felik lhunk toh langh dah thung lungh soeu dvyuk nyeis. 15 Ngos Yerusalem mas nyeis lyis phudyei uhjyung jens yahge Yuda logis jens hauh soeu dah cho lhyi taiq las, nyah cho dang thang thyet dyei das zis tsain sang. 16 Ngos gas kauq soeu, kauq bang yah nhuot tsuk taiq goh las gungsgos dang ma yoh taiq shih lyis, hank lyis kyauh tyamp das zis eq Roma thungh ma bos oen las nyamoq lyis taiq toh. 17 Housoeh las nyamoq heimha tsain huom joq lyis, ngos eq ma sheq toh lo, nungs nyeih nyang soetuon tank mas tsung las, hauh soeu lyis shwih thuq los das zis taiq kat. 18 Hauh uhlyis nyang lyis kauq bang toq yap laus eq, nyang mas ngos jyo dah ma gis cho nyamoq cha eq ma yoh chixoeuq. 19 Nyamoq gas nyang yah ma woenghgoh cho dvtsiq bos. Houka nyamoq dah lomsnoq cho yah sen cho yahge shei goeus dah Yesu ge soeu lyis Paulo gas, Nyang dwis nyeis ge dah cho jens nghuot, ge. 20 Haih nyeidang jens lyis jyoeng dah phuk dang yoh shoq khasoeh nyei gyo das yvlyis vlhomuh ma yoh nghamh yvmvyah, Paulo lyis haih cho yah sen lha Yerusalem pheh loh las houmha soetuon kham das lah, oen nyei goeus. 21 Nghuot laus eq Paulo gas nyah soe lyis Kesar tuon dyei shoq thung lhunk toh das xiklyis sang yvmvyah, ngos nyang lyis Kesar jyank mas yoh nhang kat shishenh jweh shoq thung lhunk toh das xiklyis vmingh dyei, ge. 22 Agripa Festu lyis taiq zis gas, Ngos hauh soeu cha taiq das yvlyis gyo mes ge. Festu gas, Nvpyo xauhgyo das, ge. 23 Nungs nyeih Agripa yahge Bernike gas shunk las ngelang bos bos, jeszau jens yahge wus mas dah vgyis, nhaiqbos bang yah dvgeh lyih las yvpmuh mas tsain jweh lyis, Festu taiq kat zis yah dvyhangteh Paulo lyis hwank kat. 24 Hauh uhlyis Festu taiq zis gas, hwankti Agripa yahge gvshih heimha tsain nyeis bang eh, Yerusalem yahge haih wus mas dah Yuda jens dvnganh, ngos lyis los taiq las, hauh soeu lyis kang dwis nhang toh ma gis lo, ge tsain kaiq zis gas gvshih namoq nyvng nyeis, haih soeu lyis nghuot. 25 Nghuot laus eq ngos haih soeu mas shei mon dah yobos cha eq ma nyvng. Nyang Agustu soetuon dyei das xiklyis dung kham toh goeus las, ngos nyang lyis houmha nhang das zis nghamh thyet toh. 26 Nghuot laus eq nyah cho yah sen las ngamoq dah Kesar hwankti zainsmuh lyis jeihjyvp lhaih das zis cha eq ma yoh. Housoeh yvmvyah nyang lyis nyei wu thang lhyi ngos dvja ja yoh lhaih das xiklyis namoq dvnganhmoq xikkhonh mas, zes las nvng hwankti Agripa dah xikkhonh mas ngos nyang lyis shwih thuq xoeuq. 27 Khasoeh ge lyis thung lungh soeu dvyuk loh shwih kat lyis, nyang lyis huon dah yobos cho cha ma lhaih lhaih nhang kat das zis gas ma jus, oen nghamh, ge.
1 Agripa Paulo lyis taiq zis gas, Nah cho dang taiq das toeuh yoh goeus, ge. Housoeh las Paulo loq toeu las gungsgos dang taiq zis gas, 2 Hwankti Agripa eh, ngos lyis Yuda jens kauq zis yah sen lha, khvnyhik ngos nah xikkhonh mas gungsgos dang xauh taiq las gaus. 3 Khasoeh ge lyis nvng gas Yuda jens dah lyi cho yah phyen-goh cho lhyi jeih jeih seq. Housoeh yvmvyah ngos lyis jhen las gyo dyei das xiklyis khyoeuq. 4 Ngos loyvm uhlyis yah, Yerusalem mas nyeis ngah vnyau yah dvgeh nghuot yvmvyah ngos chank dah wotwu Yuda jens dvnganhmoq tsain seq. 5 Nyamoq kanghjyoeng kat mes lyis gas, ngos gas hau paiq thungh mas zes than dah phung mas dah Pharishe dvyuk nghuot yvlyis nyamoq cangxeih lyis yah seq toh. 6 Nghuot laus eq gvshih Mangso ka phauh thyeih moq lyis dyei toh dangthoengh lyis ngos nghamhloms yvmvyah ngos heimha yap las soetuon zis xauh nyeis. 7 Hauh dangthoengh xauh yoeus shoq, ngamoq dvci aiq nyau gonh nyeih nyenh Mangso lhyi phuqsoe nyeis. Hau nghamhloms cho gvng mas Yuda jens ngos lyis tsain kauq, hwankti Agripa eh. 8 Mangso ka, shei bang lyis dwis toq nhang ge zis lyis namoq heimha tsung toh bang yuk khanghmuh chamus ma yoh lomsjingh lah? 9 Ngvnyang Nazaret Yesu dah nyings lyis gomloeus kuot chah oen ngos jyoengh nghamh ku. 10 Housoeh nyang ngos Yerusalem mas kuot ku goeus. Phudyei uhjyung jens jyank masyah vmingh yoh las, Gyingshang bang nyoshoq lyis thung khyoq thoq lyis magoh nyamoq lyis sat dah yobos dyei das nyhenshang ngos eq bos xihhonh. 11 Lyi jungs khanghmuh mas eq, nyamoq lyis shoeuhshih zis yahge Yesu lyis loeusmus soqzo nhang shoq khank goeus. Nyamoq lyis svsoh nhaiqyo las gohnyau bang dah wus mas jweh shoq chank shoeuhshih ku. 12 Housoeh phudyei uhjyung jens jyank masyah vmingh maussauh yoeus wons las ngos Damasku wus pheh loh lyis, 13 Hwankti phoq eh, nyeih gungs lyis buis thoq lyis bvng zis hauh cho mas ngos yahge ngah dyenschangh jens dah vyvm vwi mas, maukhung masyah bvng thuq los zis nyvng. 14 Hauh uhlyis ngamoq dvnganhmoq yah nyeisjvng mas lains loh lyis, ngos lyis Hebre nyingh pheh yah Saulo, Saulo, nvng ngos lyis chamus shoeuhshih nyeis lah? Tyanghchon lyis thvvq lyis nvng nos ge taiq thwe ngos xauhgyo. 15 Ngos gas, Yhensain eh, nvng hank nghuot lah, oen toeuh lyis, Yhensain taiq zis gas, Ngos gas nvng shoeuhshih nyeis soeu Yesu nghuot. 16 Nghuot laus eq toq aq, nah khyei yah zungh zungh yap aq: nvng lyis ngah jyeidwis duot das xiklyis ngos nah jyank mas thuq xoeuq zis nghuot. Nvng khvnyhik ngos mas nyvng cho lhyi thang pheh ngos nvng lyis Chixoeuq das cho gohyuk lyis taiq kyoh das zis nghuot. 17 Ngos nvng lyis Israel dius jens masyah eq, ngos nvng lyis nhang kat dah gohnyau bang masyah eq khyuot yoeus das. 18 Housoeh nvng nyamoq dah nyoqjeih lyis phank dyei las, nyamoq gas chuot masyah bvng yvpheh lhain los das zis yahge, Satan dah yomsoq masyah Mangso jyank pheh lhain los das. Housoeh nyamoq ngos lyis lomsjingh gvng mas nyamoq dah yobos khyuot dyei zis xauh las Mangso khyen yoeus zis xauh bang yah dvgeh vso vlho xauh yoeus das, ge. 19 Housoeh las hwankti Agripa eh, ngos gas hau maukhung mas dah ngos nyvng nyoqnyvng lyis domsyos gyo nyeis. 20 Hauh cho lhyi cangxeih lyis Damasku mas, hauh thang lhyi Yerusalem mas, tsai Yuda mau gonh yahge gohnyau bang mas, nyamoq yaunos masyah nhaiqlom thaiq las, Mangso jyank pheh lhain los zis yah nhaiqlom thaiq cho yah mon yih dah muhzoh lyis kuot chah oen taiq kyoh. 21 Hauh cho gvng mas Yuda jens yhenmuh mas ngos lyis nyhik las sat das zis tsain sont. 22 Mangso jyank masyah bos pangh zis xauh yvmvyah, khvnyhik jweh shoq dvyoh nyeis zis yahge, heimha yap zis yah ngislo kuhlo lyis kanghjyoeng kat yvmas, lvpe jens yahge Moshe yah bweh los das ge taiq toh cho masyah lai las, ngos gohtoeu vtseq cha ma taiq. 23 Khristu shanghsenh zis xauh chah zis yahge shei masyah cangxeih yoh dwis toq los las, nyah vnyau yahge gohnyau bang lyis bvng zis yoh tuonh shet das cho nghuot. 24 Housoeh ge gungsgos dang taiq yvlyis Festu gas, Paulo eh, nvng koh goeus; nah joeui nyhang zis gas nvng lyis koh nhang goeus, ge. 25 Nghuot laus eq Paulo taiq zis gas, Nyoqnho ngelang bos dah Festu eh, ngos ma koh; gying dah ehnyet yah jyoeng dang taiq. 26 Hwankti Agripa eh, ngos womh zis yah shang shang yoh taiq. Haih cho lhyi nyang ma seq zis dvkoeuq eq bos das zis ma nghuot. Khasoeh ge lyis bweh cho ka vthunk vyoq mas bweh zis ma nghuot. 27 Hwankti Agripa eh, lvpe jens dah dang lyis nvng jingh lhyeh? Jingh nyeis zis gas ngos seq, ge. 28 Agripa Paulo lyis taiq zis gas, hai dvsoq kyingh gyo lyis nvng ngos lyis Khristan yoh bweh nhang das oen nghamh lhyeh, ge. 29 Paulo taiq zis gas, Shishenh lyung laus xing laus, hai ngos lyis twih toh shamjvng mas lai las, nvng yahge khvnyhik ngah dang gyo nyeis bang dvnganh eq, vluk bweh zis za ma nghuot, ngos teh nghuot das xiklyis ngos Mangso lhyi dung mes, ge. 30 Nyang housoeh dye taiq lyis hwankti toq yap las nyang yah dvgeh mungh zau, Bernike yahge gohtoeu dvnganhmoq dvgeh thuq loh. 31 Tsain thuq loh lyis, Haih soeu ka shei vvng, nghuot ya twih twih vvng dah yobos dvja eq kuot zis ma nghuot, ge tsain taiq goh. 32 Agripa Festu lyis taiq zis gas, Haih soeu nyang Kesar yah soetuon dyei das cho ma sang ya, phui kat gis goeus, ge.
1 Gvshih ngamoq lyis Itali mau pheh sangpho yah goeu chah ge dye thyet dyei thang lhyi, Paulo yahge gohtoeu thung dius dvyhamh lyis Agustu jesdvp mas dah Yuliu ge dah jes dvxo guon zau loq mas kyauh kat. 2 Hauh uhlyis Asia wuxom mas dah sangpho goeukhanh mas loh das xiklyis cicont nghuot dah Adramuti masyah wvng los dah sangpho mas ngamoq wvng tsung lha toq loh. Thesaloni wus masyah los dah Makedoni dius Aristaku eq ngamoq yah dvgeh nghuot. 3 Nungs nyeih ngamoq Sidon wus mas thoeng. Yuliu gas Paulo lyis nhaiqnyen las, nyah buisnoms jens jyank mas nyang chah zis pangh bas jungh ge e xauhgoh nhang. 4 Hou mhayah thuq goeus ya, lyeis muot tauh los yvmvyah, Kupru goeujo lyeis tam jyankyvm cho tsain loh. 5 Ngamoq Kiliki yahge Pamphilia mau mas dah panglai cho goeu thang lhyi Likia mau Mira wus mas jweh loh. 6 Hauh nyensyo jes dvxo guon zau gas Itali pheh goeu e dah Alesandria wus mas dah sangpho nyvng las, houmha ngamoq lyis wvng nhang. 7 Hou mhayah buisnyeis nyangh shoq, zoh yah Khinidu nvm mas jweh lyis, lyeis than lha houmha ma dap loh nhang yvmvyah, Kreti goeujo lyeis tam yvcho Salmone vyvm chank yah lai loh. 8 Hauh vyvm cho vyau vkeh tsain loh lyis Lasea wus yah ni dah Goeukhanh Gis ge dah sangpho goeukhanh mas tsain jweh loh. 9 Shishenh geh ko lo nyangh los lyis, womkyi shishenh yangh lai tyamp yvmvyah sangpho yah suh e das zis gyuk chah yoq jweh las, Paulo nyamoq lyis taiq zis gas, 10 Loeuzomh jens eh, haih gyung cho ka svsoh gyukphoh nghuot goeus, yah kyahsoe eq, sangpho eq somh thoq lyis magoh yah kang eq somh das teh mus, ge. 11 Jes dvxo guon zau gas Paulo dah dang thoq lyis sangpho komp soeu yahge sangpho sain dah dang lyis zes las jingh. 12 Goeukhanh hauh zis eq cungh lyis yoh thoeng das teh ma doeus yvmvyah, Phonik goeukhanh mas yoh jweh lyis jweh shoq loh las, houmha cungh yoh ku shoq jweh loh das cho lhyi nyothyang xam tsain xonh. Hauh joqyos gas Kreti goeujo mas dah buiswvng mautyi pheh nyoqnho xoeu toh dah goeukhanh nghuot. 13 Housoeh las mautyi lyeis, zoh yah muot los goeus ya, nyamoq nghamh zis yah top nghuot goeus ge tsain nghamh las, jywangh yoeus tyamp lho las Kreti goeujo jyank yvm cho yah lai loh. 14 Nghuot laus eq ma nyangh lyis buisthuq mautsung lyeismuh jyang ka hauh goeujo masyah muot los. 15 Houka sangpho lyis los bat las, xik pheh ma yoh loh lo yvmvyah nyamoq kat kat las lyeis muot loh yvpheh bos loh. 16 Kauda ge dah goeujo ngis, lyeis tam yvcho yah los nyeis lyis nyah lhyik jens lyis svkhyen yoh zwi toh. 17 Hauh yvlyis sangpho thoq mas tsain lang kih las sangpho kuh yah toenk shoq twih yah tsain lang twih tap toh. Tsai, Suti ge dah sihmuis jyank yvm mas kih das zis chiq yvmvyah, nyah misseh lyis khyoq tyamp las bos tsain nyoeu loh. 18 Lyeis jyang ka sangpho lyis tsoq las bat nyeis yvmvyah nungs nyeih gas sangpho hu dvkhamh lyis panglai mas tsain tyungh khyoq. 19 Tsai somh vnyeih lyis hauh sangpho yah sen dah kyahsoe lyis eq ngamoq nyang loq yah tyungh khyoq. 20 Buisnyeis nyoshoq nyeih buis ma nyvng, kyi eq ma thuq, lyeis than kyingh los nyeis yvmvyah, ngamoq yoh luiq das oen nghamh das cho dvtsiq eq ma bos lo. 21 Nyamoq wom ma zo zis svsoh nyangh los goeus las, Paulo nyamoq vgungs mas toq yap las taiq zis gas, Loeuzomh jens eh, namoq ngah dang gyo las Kreti goeujo masyah ma thuq ya heisoeh dyoqbis, dyuk loh zis ma xauh das. 22 Gvshih laus eq, yom huont geh. Sangpho mas lai las namoq hank kang eq som das zis ma nghuot. 23 Khasoeh ge lyis, ngos phuqsoe nyeis, ngah Mangso dah loeuswons soeu vmvn ngah vyvm mas yap las taiq zis gas, 24 Paulo eh vgyuk, nvng hwankti Kesar xikkhonh mas xauh yap das. Yoeuh aq, nvng yah dvgeh haih sangpho mas tsung bang dvnganhmoq, nah gvng mas Mangso nyamoq lyis kang luiq nhang das, ge. 25 Housoeh las loeuzomh jens eh, yom huont geh, Khasoeh ge lyis ngos lyis taiq zis yah dvyhangteh nghuot das oen ngos Mangso lhyi loms. 26 Nghuot laus eq yang goeujo dvkoeuq koeuq mas sangpho loh dyoq das, ge. 27 Dvci nyei vnyeih nyenhthang jweh las, ngamoq Mediteranean Thomh cho nyoeu loh nyeis lyis, gungsgvm lyis tung yos dvjoq joq mas ni los soh bos, ge sangpho muh zwi bang nghamh. 28 Housoeh jeis keq yoeuh lyis, aiqci lvm noq zis tsain seq. Dvsoq lyis doms keq lyis, dvci oeng lvm dvnoq lo zis tsain seq. 29 Housoeh las lukmhung mas thungh das zis gyuk yvmvyah, nyamoq sangpho vthang pheh dah jywangh nyei koeuq khyoq las nyoq nyvng los bas jungh ge, shvmanh tsain dung nyeis. 30 Sangpho muh zwi bang hou mhayah tsain phang das ge nghamh zis yah sangpho uhloms pheh dah jywangh tsain khyoq das teh kuot las lhyik lyis jeis mas tsain khyoq nyeis lyis, 31 Paulo jes dvxo guon zau yahge jeslo jens lyis taiq zis gas, Hai sangpho muh zwi bang sangpho mas ma nyeis lo lyis gas namoq yoh luiq das zis ma nghuot lo, ge. 32 Jeslo jens gas lhyik twih dah twih e thyet las, hauh lhyik lyis nyoeu loh nhang. 33 Nyoq nyvng los lyis Paulo gas nyamoq dvnganh lyis wom zo das xiklyis kywih las, Namoq dvci nyei nyeih nhangh langh nyeis las hauh gyo lyis cha eq ma tsain zo. 34 Housoeh las zonoms dvja ja zo geh; haih zis gas namoq dwis nyeis das cho nghuot. Namoq uhloms mas cam dvkhvt eq dyuk loh das zis ma nghuot, ge. 35 Housoeh dye taiq yah dvyih ohlhyoq yoeus las, nyamoq dvnganhmoq dah xikkhonh mas Mangso dah jyehjuh lyis chungh lho las, khyiq las zo. 36 Hauh uhlyis nyamoq dvnganhmoq yom yoeus las zonoms dvja ja tsain zo. 37 Hauh sangpho mha dah dius dvnganh lyis aiqxo nyhetci khyuk yuk nghuot. 38 Nyamoq jo shoq dye tsain zo lyis sangpho siq das xiklyis sunghso lyis jeis mas tsain doeuh khyoq. 39 Nyoq nyvng lyis, nyamoq hauh jyank yvm lyis ma seq laus eq sihsho yos vthunk dvkoeuq lyis nyvng kat las, gis bweh lyis houmha nyamoq dah sangpho loh no toh das ge thyet toh. 40 Housoeh nyamoq jywangh lyis thomh mas thyet khyoq khoq. Tsai sangpho komp dah lvshvp lyis twih dah twih lyis tsain phui tyamp. Hauh thang lhyi sangpho uhloms shot pheh misseh toq kat. Housoeh lyeis lyis yah hau jyank yvm pheh duon loh nhang. 41 Nghuot laus eq sihsho jyank yvm lyis sangpho loh thungh las sangpho uhloms zuk joq yvmas sangpho vthang pheh jeisphauq los tsain bat yvmvyah dyoq loh. 42 Hauh uhlyis jeslo jens gas thung dius jeis bat bat las cangh loh das yvlyis chiq yvmvyah, nyamoq lyis sat das zis xamgoh nyeis. 43 Jes dvxo guon zau gas Paulo lyis khyuot yoeus mes yvmvyah, nyamoq xam cho lhyi tomp las, Jeisbat seq bat bang hank laus eq jeis mas gyoh las tung yos mas cangxeih jweh bas jungh, ge. 44 Nyet bang dvyhamh gas thyvkhyamh yah, dvyhamh gas sangpho vdoeus vdyet mas lang lwi ji las goeu loh bas jungh, ge taiq. Housoeh nyamoq dvnganh tung yos mas yoh shwih kat las tsain luiq.
1 Ngamoq housoeh jesluiq shohluiq las vlhomuh yoh jweh thang lhyi, goeujo hauh yvlyis Malta ge zis yoh seq. 2 Houmha nyeis bang gas nhaiqnyen zis yah ngamoq lyis lhom zes yoeus. Mau eq wus, ngamh eq ngamh yvmvyah nyi khat dyei. 3 Hauh uhlyis Paulo thangh kui lha nyikhyomp mas kat lyis, Ywimuhtsanh dvdoeu nyi ngeh los yvmvyah thuq los las nyah loq mas tsuk lhangh toh. 4 Paulo loq mas ywimuhtsanh tsuk lhangh toh yvlyis hauh wukhau bang nyvng lyis, nyamoq nyang changh taiq goh zis gas, Haih dius yuk gas jyoengh nyang dius sat soeu nghuot soh bos: khasoeh ge lyis nyang thomh masyah yoh luiq los laus eq, jyoeng dah lyi gas nyang lyis ma dwis nyeis nhang lo, ge. 5 Paulo gas hauh lhangnyis lyis nyikhyomp mas ko khyoq las cha eq ma mus, nyeis. 6 Nyamoq gas, Nyah gungs yam los das, ma nghuot lyis eq dvsoq lyis lains shei loh das ge yoeuh nyeis. Nghuot laus eq nyangh shoq langh yoeuh lyis eq nyang mas cha eq ma chah los zis nyvng lyis nyamoq dah ehnyet doms thaiq las taiq zis gas, Haih soeu ka gywes dvkoeuq dvnghuot soh bos, ge. 7 Hauh vnvm mas dah goeujo vgyis Publiu dah maunyeis tsain joq. Hauh soeu ka ngamoq lyis lhom yoeus las somh nyeih top buisnoms ehnyet yah boengh daih. 8 Hauh uhlyis Publiu dah uwus gas gungs eq ngeh, womnes eq nos nyeis. Paulo gas hauh soeu lyis shvmanh dung zis yah nyah loq kih dyei las nyang lyis gis los nhang. 9 Housoeh bweh yvmvyah hauh goeujo mas dah gohtoeu noslom yoh bang eq jweh los las gis los zis tsain xauh. 10 Nyamoq eq ngamoq lyis phauh nyang cho nyoshoq kuot las, hou mhayah sangpho tsung thuq loh lyis ngamoq mas chah nyeis goeu sangpho mas kat dyei kat. 11 Hauh goeujo mas lhamhmuh somh khyvp cungh lai shoq nyeis khoq thang lhyi, Gywes zoms ge Alesandria mas dah sangpho yah tsoq loh. 12 Siraku wus mas jweh lyis, ngamoq houmha somh nyeih thoeng nyeis khoq. 13 Hou mhayah ngamoq doms tsoq loh lyis, Regium wus mas jweh loh. Nungs nyeih gas mautyi lyeis muot los las, aiq nyeih lyis Puteoli wus mas dvjweh loh. 14 Ngamoq houmha lomsjingh bang yah xauhgoh las, nyhet nyeih thoeng khoq das xiklyis tsain sang lha, thoeng khoq. Hauh thang lhyi Roma wus pheh tsain loh. 15 Hauh wus mas dah lomsjingh bang gas, ngamoq jweh das cho xauhgyo yvmvyah, zes das ge, Apiu kaih yahge Boenghdoq yhen Somh joq jweh shoq tsain lyih langh. Paulo nyamoq lyis nyvng lyis Mangso lhyi chungh las yom yoh. 16 Ngamoq Roma wus mas jweh loh lyis, jes dvxo guon zau gas thung dius jens lyis, zungh dah zau loq mas kyauh toh. Nghuot laus eq Paulo lyis gas nyang lyis zungh soeu jeslo yah dvgeh gohtoeu nyeis das toeuh dyei. 17 Buisnyeis somh nyeih lai thang lhyi Paulo gas, houmha dah Yuda vgyis nhaiqbos bang lyis khi. Nyamoq jweh lyis nyang taiq zis gas, Boekyis eh, ngah vnyau lyis eq, phauh thyeih dah thungh lyis eq ma doeus khyvlyis ngos cha eq ma kuot ku. Nghuot laus eq ngos lyis Yerusalem mas nyhik las Roma loq mas thung dius khyvlyis kyauh zis xauh. 18 Roma zau jens gas ngos lyis nyei choq yoeuh thang lhyi ngos lyis phui kat mes: khasoeh ge lyis ngos shei mon yobos cha ma kuot ku zis nyamoq seq. 19 Nghuot laus eq Yuda jens ma gyo yvmvyah ngos gas ngah vnyau jens lyis yobos huon dais ma bos nghuot laus eq ngos gas Kesar xikkhonh mas soetuon kham das xiklyis sang chah loh. 20 Ngos gas Israel vnyau dah nghamhloms cho yah sen lha ngos heisoeh shamjvng yah twih zis xauh nyeis yvmvyah, ngos namoq yah xauhgoh las jisgoh das xiklyis namoq lyis dung kat zis nghuot, ge. 21 Housoeh nyamoq taiq zis gas, Ngamoq nah cho yah sen las Yuda mau masyah maussauh ma xauh yoeus; heimha los bang boekyis hank eq nah cho ma gis loeus cha ma taiq. 22 Nghuot laus eq haih nvng bos dah phung lyis joqyos khanghmuh yobos huon zis xauh cho ngamoq seq nyeis yvmvyah, hauh zis yah sen lha nvng khasoeh nghamh zis ngamoq gyo mes, ge. 23 Nyamoq Paulo yah xauhgoh das buisnyeis doengs toh las, nyang thoeng dah yhen mas dius nyoshoq lyih huom toh. Nvpsangh masyah nyenhthang jweh shoq, Nyang taiq kyoh dah Mangso munghdan cho dah dang lyis phant kyoh las, Moshe dah Lyi yahge lvpe maussauh jens lyis tuonh shet zis yah, Yesu dah cho jyoeng yvlyis nyamoq lomsjingh los shoq vlhomuh phui kyoh. 24 Housoeh taiq dah dang lyis dvyhamh gas jingh los, dvyhamh gas he tyamp. 25 Housoeh nyamoq nyang changh xam ma xonh. Housoeh nyamoq gang loh nyeis lyis Paulo dvkhonh doms taiq zis gas, lvpe Esaia dah nhuot lyis yah namoq dah phauh thyeih moq lyis Gyingshang Dyos taiq nyeis zis gas jus. 26 Hauh zis gas, Haih dius jens jyank mas heisoeh loh taiq aq, Namoq gas jyoengh gyo yoeus laus eq khanhamp eq seqgyo das zis ma nghuot; yoeuh laus eq nyvng das zis ma nghuot. 27 Khasoeh ge lyis Haih vnyau dah ehnyet gas than tyamp goeus; nyamoq no jet goeus. nyamoq nyoqjeih lyis tsain chenh toh goeus. Housoeh ma nghuot lyis gas nyamoq dah nyoq nyvng las nyamoq dah no xauhgyo zis yahge nyamoq gas ngah jyank mas lhain los das. Housoeh ngos nyamoq lyis gis los nhang das, ge Mangso taiq. 28 Paulo taiq zis gas, Mangso dah khyuot yoeus cho haih zis gas gohnyau bang lyis dyei goeus, nyamoq gyo yoeus das zis gas, namoq seq toh geh, ge. 29 Hauh dang dye taiq lyis, Yuda jens thuq loh las nyamoq nyang changh khoek khoek taiq phyen-goh nyeis. 30 Hou mhayah, Paulo gas nyang nghoh dah yhen mas aiq zvn top nyeis lyis, nyah jyank mas lyih bang dvnganh lyis lhom yoeus las, 31 Mangso munghdan cho taiq kyoh zis yahge Yhensain Yesu Khristu yah sen cho lhyi debangh womh womh jyauh nyeis.
1 Yesu Khristu dah jyeidwis ngos Paulo ka, lvgyo duot das xiklyis khi toh las Mangso dah gausyis dang nyhenshang toeuq toh zis xauh soeu nghuot. 2 Gausyis dang mas nyang gas gohlhain lvpe jens lyis yah gyingshang lhaihtoh dang mas dangthoengh toh las, 3 Nyah Lo, yah Yhensain Yesu Khristu lyis gas, gungsshoh khyvlyis Dawi dah vnyau vshih mas khoeu los nhang. 4 Gyingshang dah Dyos mas, yomsoq yah nyang lyis shei masyah dwis toqh kat las nyang gas Mangso dah Lo, yah Yhensain Yesu Khristu nghuot yvlyis taiq hoeuh. 5 Nyah nyings gvng mas dius nyau khanghmuh hau lomsjingh cho lhyi domsyos gyo bas jungh ge, nyah jyank masyah jyehjuh yahge lvgyo muh lyis ngamoq xauh kham yoeus. 6 Yesu Khristu yah sen bang duot das xiklyis khi tsainh toh bang mas namoq eq bos. 7 Mangso dah jyetdap bang yahge gyingshang dius bweh bas jungh ge, khi yoeus zis xauh dah Roma bang dvnganhmoq thoq mas, yah Uwus Mangso yahge Yhensain Yesu jyank masyah, jyehjuh yahge nyenstap zis joq bas jungh. 8 Namoq dah lomsjingh zis gas mungkvn gonh seq loh goeus las, Yesu Khristu nyings yah ngos ngah Mangso lhyi shih nhaiqshoqlang sang. 9 Ngah shvmanh dung dang mas ngos namoq lyis soh nyeis cho lhyi, nyah Lo dah gausyis dang taiq kyoh zis yah ngos phuqsoe nyeis, Mangso ka ngah kanghjyoeng nghuot. 10 Mangso dah ehnyet o khyvlyis gvshih thang thank lyis ngos namoq yah los yoh xauhgoh das cho phank dyei das xiklyis ngos shvmanh dung nyeis. 11 Khasoeh ge lyis namoq lyis yom yoh bos nhang shoq, Dyos jyungshuk dvkhamh yoh gvm dyei bas jungh, ngos namoq yah yoh xauhgoh das nyhenshang hwangh nyeis. 12 Ngos taiq mes zis gas, yah lomsjingh cho gvng mas yang nyang changh nyang yom yoh dyei goh das oen zis nghuot. 13 Hauh thoq lyis boekyis eh, gohnyau bang masyah khyuot yoeus xauh bang lyis yoh taiq kyoh shwih los teh, namoq masyah eq yoh taiq kyoh shwih los das xiklyis namoq jyank mas los das zis nyoshoq lhain sont laus eq, gvshih jweh shoq kyamp toh zis xauh nyeis yvlyis, namoq lyis seq nhang mes. 14 Heleni yahge dius soengh, joeui bos bang, joeui ma bos bang yahge dius dvnganh lyis gausyis dang taiq kyoh das nyhenshang jyen shauh soeu ka ngos nghuot. 15 Housoeh las namoq Roma bang lyis eq hau gausyis dang svsoh taiq kyoh mes nyeis. 16 Hau Khristu dah gausyis dang mas ngos ma xoq: khasoeh ge lyis hauh zis gas cangxeih lyis Yuda, hauh thang lhyi gohnyau lomsjingh bang dvnganh lyis yoh khyuot yoeus das xiklyis Mangso dah yomsoq nghuot. 17 Lomsjingh gvng mas dan cho yoh ge, Mangso dah dan cho ka, hau gausyis dang mas Chixoeuq toh: khasoeh ge lyis dan soeu ka lomsjingh zis yah dwis nyeis das, ge lhaih toh. 18 Maukhung mhayah Mangso dah nhaiqlom dyis zis gas, gywes ma tsungh bang yahge nyamoq dah ma gis muhzoh yah jyoeng cho lhyi kyamp gos tyamp bang thoq mas Chixoeuq. 19 Khasoeh ge lyis Mangso lhyi seq gis cho ka, Mangso nyang nyamoq lyis Chixoeuq goeus las, hauh zis gas nyamoq xikkhonh mas dede nghuot. 20 Khasoeh ge lyis, nyoq yah ma nyvng, Mangso nyah vcaiq vto yomsoq yahge Mangso nghuot cho ka, hau gvnkhanh zis dvnganh masyah yoh nyvng las, nyamoq hauh zis lyis mauthuq nyeiszvn lyis yah nyvng las seq goeus. Housoeh yvmvyah nyamoq jyamp gus ma bos lo. 21 Nyamoq Mangso lhyi seq toh las, nyang lyis Mangso lhyi teh ma phauh nyang, Nhaiqshoqlang eq ma tsain ge, nyamoq nghamh cho ka vkom duot las nyamoq dah koh ehnyet gas chuot tyamp. 22 Nyamoq gas nyang gungs nyang joeui bos tsain ge laus eq nyamoq gas koh bang nghuot. 23 Ma seq shei dah Mangso phunk nyoqnho lyis, seq shei dah dius, nghoq, nyei khyei dap yewus, shweh loh ja dah silho jens yah tsain thaiq tyamp. 24 Housoeh las Mangso ka nyamoq lyis nyamoq dah obos dah vchoqh vjyot muh kuot bas jungh ge kyauh tyamp. Housoeh nyamoq gas nyamoq nyang changh vxoq vcaiq muh tsain kuot. 25 Khasoeh ge lyis, Mangso dah jyoeng cho lhyi hwah cho yah tsain thaiq tyamp. Gvnkhanh soeu lhyi paiq phuqsoe das gungsthaiq gvnkhanh toh zis lyis tsain paiq phuqsoe nyeis. Gvnkhanh toh soeu nyang gas vcaiq vto phunk bos. Amen. 26 Housoeh las Mangso ka nyamoq lyis vxoq vcaiq dah gungsshoh nyetnau muh mas kyauh tyamp. Nyamoq dah vmesbih jens yangh soengh choenk lyi khyvlyis zomh cho yah tyi lha nyamoq nyang changh tsain zomhgoh. 27 Vbusbih jens eq vmesbih jens yah zomhgoh dah soengh choenk lyi toh tyamp las vbusbih nyang changh vxoq vcaiq muh tsain kuot yvmvyah nyamoq dah gungs mas nyamoq dah nyetnau yobos yah mon yih dah yobos dyei zis tsain kham yoeus. 28 Tsai, Mangso cho, jyoeng dah seq cho lhyi ngoek tyamp yvmvyah, Mangso ka nyamoq lyis ma gis dah ehnyet yah suh e das xiklyis kyauh tyamp las nyamoq gas nyamoq ma kuot vvng dah muh lyis tsain kuot. 29 Nyamoq gas lhung cho vja ja, ma gis cho, nyoqnoq obos, gohyuk lyis nos nhang mes cho yah dyingh joq; noh, dius sat, dyoqgoh, mhuih, hoeng, wotwu ma gis zis yah dyingh joq. 30 Loeusmus goh, khyangh sang goh, Mangso lhyi hoeng bang, moengs bang, khwank bang, gomloeus pan bang, nyhiphoq dang ma gyo bang, 31 Seq cho ma bos bang, dang thanghchvp lais bang, jyetdap ehnyet ma bos bang, yobos ma yoh thoq khyuot dyei bang yahge nhaiq ma seq nyen bang nyamoq tsain nghuot. 32 Housoeh kuot bang gas shei mon, ge Mangso dah soetuon cho lhyi seq laus eq nyamoq gungs nyang hauh zis lyis tsain kuot thoq lyis magoh, housoeh chank kuot bang lyis eq xihhonh, bos gaus nyeis.
1 Housoeh yvmvyah gohyuk lyis soetuon soeu eh, nvng gas jyamp das cho ma bos lo: khasoeh ge lyis nvng soetuon dah muh lyis nvnyang kuot nyeis yvmvyah, gohyuk lyis soetuon yah dvyih nah gungs lyis nvnyang dang thang thyet goeus. 2 Housoeh kuot bang dah thoq mas Mangso dah soetuon cho ka jus yvlyis yang seq. 3 Housoeh kuot bang lyis soetuon nyeis las vsainnyang gas chank kuot soeu eh, nvng Mangso dah soetuon yvmvyah yoh luiq das oen nghamh lah? 4 Mangso dah jyehjuh gas nhaiqlom yoh thaiq shoq nvng lyis shwih uhshe los goeus yvlyis ma soh seq las, nyah magons magoh dah jyehjuh eq kuhxing ehnyet yah nvng lyis jhen nyeis yvlyis nvng chaxwe ma nhang lhyeh? 5 Nvng nothoeu zis yahge ma yoh thaiq dah ehnyet gvng mas hau Mangso dah nhaiqlom dyis ge, dan dah soetuon das buisnyeis lyis nvng kham das zis yobos yom nyhuk toh. 6 Mangso ka dvyuk yah dvyuk lyis vsainnyang dah muhzoh yah dvyhangteh phauh shangh das. 7 Gis dah muh kuot las jhen zis yah phunk, nyoqnho ngelang ma dyoq ma dyuk zis xo soeu lhyi ka vcaiq vto kang dyei das. 8 Nghuot laus eq vsainnyang vkyuh kyingh xo bang yahge dyoqgoh nyensgoh las, jyoeng cho lhyi domsyos ma gyo, lhung zis kuot bang xiklyis nhaiqlom tsoeu zis yahge nhaiqlom dyis zis xauh das. 9 Ma gis muh khanh bang dvnganhmoq thoq mas yaukyenh zis yahge shanghsenh zis xauh das. Houka cangxeih lyis Yuda jens, hauh thang lhyi gohnyau bang xauh das. 10 Gis dah muh kuot soeu khanghmuh mas phunk, nyoqnho ngelang yahge nyenstap zis joq das. Cangxeih lyis Yuda dius mas shih, hauh thang lhyi gohnyau bang mas eq joq das. 11 Khasoeh ge lyis Mangso ka dius dah nyoqnho khyen zis ma nghuot. 12 Lyi ma yoh las yaunos kuot bang hank laus eq, Lyi ma bos khyvlyis dyoqbis das. Lyi khau mha yaunos kuot bang gas Lyi khyvlyis soetuon zis xauh das. 13 Lyi xauhgyo ku zis yah kyingh Mangso xikkhonh mas dan zis ma nghuot; Lyi lyis chank kuot bang lyis gas dan bang ge das. 14 Gohnyau bang gas Lyi ma yoh, nghuot laus eq Lyi yah taiq toh cho lhyi nyang pheh nyang chank kuot nyeis lyis, nyamoq Lyi ma yoh laus eq hau taiq toh cho ka nyamoq xiklyis Lyi bweh los goeus. 15 Nyamoq dah wotwu gas nyamoq dah ehnyet mas Lyi dah taiq toh cho lhaih toh goeus yvlyis chixoeuq nyeis zis yahge nyamoq dah seq nghamh ehnyet eq hauh yvlyis kanghjyoeng kat dyei nyeis las, nyamoq dah seq ehnyet gas nyamoq lyis yobos huon das, nghuot ya yobos khyuot dyei das. 16 Housoeh ngos taiq kyoh dah Gausyis Dang yah dvyhangteh, Mangso ka Yesu Khristu loq yah dius dah nghop toh cho lhyi soetuon das buisnyeis lyis houyah dvyhangteh nghuot das. 17 Yoeuh aq, nvng gas Yuda dius nyings dap soeu nghuot las, hauh Lyi mas nges zis yah Mangso yah sen lha moengs nyeis. 18 Nyah ehnyet o zis seq las Lyi yah jyauh yvmvyah gis thank yvlyis dang thang seq thyet las, 19 Nvng gas nyoqjet bang dah choshe soeu yahge, chuot yvmas bang xiklyis bvng zis, 20 koh bang dah shet dyei soeu, lonoeuh jens dah svra, lyi mas jyoeng dah seq cho bos soeu nghuot, ge ehnyet tap nyeis. 21 Gohyuk lyis jyauh soeu nvng gas nah gungs lyis ma jyauh das lhyeh? Ma gis khauh ge taiq kyoh lho lha nvnyang gas khauh lhyeh? 22 Nyi vshuot ge las nvng gas nyi shuot nyeis lhyeh? Silho lhyi choqh ge las nvng silho yhen lhyi thyoq yoeus nyeis lhyeh? 23 Nvng lyi mas khwank nyeis las lyi lhyweq zis yah Mangso lhyi ma phauh ma nyang kuot lhyeh? 24 Khasoeh ge lyis namoq gvng mas Mangso dah nyings gas gohnyau bang mas loeusmus soqzo zis xauh nyeis, ge lhaih toh. 25 Lyi lyis chank lyis gas, vthyoh tyomh zis vkyuh bos. Nghuot laus eq Lyi lhyweq soeu nvng nghuot joq lyis, nah vthyoh tyomh cho ka ma tyomh zis doms bweh joq goeus. 26 Housoeh yvmvyah vthyoh tyomh soeu ma nghuot laus eq Lyi taiq toh cho lhyi chank nghuot lyis gas, Mangso yah nyang lyis vthyoh tyomh soeu ge suon dyei das ma nghuot lah? 27 Gungs vthyoh ma tyomh laus eq Lyi chank lyis gas, lhaih toh Lyi khyvlyis chank las vthyoh tyomh toh dah nvng, Lyi lhyweq soeu lhyi soetuon das ma nghuot lhyeh? 28 Khasoeh ge lyis thoqlos baus lyis Yuda nghuot soeu ka Yuda gyingh ma nghuot. Gungsshoh dah vthyoh tyomh zis eq vthyoh tyomh gyingh ma nghuot. 29 Nghuot laus eq nhaiqlom mas Yuda nghuot soeu ka Yuda dius gyingh nghuot. Vthyoh tyomh cho jyoeng ka ehnyet yah sen cho nghuot. Houka gungs shoh yah ma nghuot, dyos yah sen zis dvnghuot. Housoeh teh bang gas gohyuk yah chungh zis ma nghuot mulas, Mangso yah chungh yvlyis xauh kham yoeus.
1 Housoeh lyis gas, Yuda jens gas gohnyau bang thoq lyis cha zes lah? Vthyoh tyomh zis eq chah vkyuh bos lah? 2 Cho khat khanghmuh mas vkyuh svsoh bos. Cangxeih lyis Mangso ka hauh Lyi Yuda jens dah loq mas kyauh toh yvmvyah nghuot. 3 Nyamoq mas dvyhamh ma lomsjingh lyis gas khasoeh gah? Nyamoq dah ma lomsjingh zis gas Mangso dah wontang cho lhyi vnyet vxuh bweh nhang lhyeh? 4 Housoeh ma nghuot: dius dvnganh gas hwah bang bweh los laus eq Mangso jyoeng zis gas dede nghuot cho kyink toh. Khasoeh ge lyis, Jyomp maussauh mas lhaih toh zis yah dvyhangteh, Nvng taiq dang gas dede jus joq zis yahge Nvng soetuon zis xauh lyis ung los bas jungh, ge. 5 Gvshih, yah ma dan cho ka, Mangso dah dan yvlyis bvng bvng zes nyvng nhang nghuot lyis gas, yang khasoeh taiq das lah? Mangso yang lyis nhaiqlom dyis dah joeng cho dyei lyis gas Nyang lyi ma chi khyvlyis kuot zis nghuot lhyeh? (Ngos heisoeh taiq zis gas dius dah nghamh cho khyvlyis chank las dvtaiq.) 6 Housoeh ma nghuot, Mangso lyi ma chi nghuot lyis gas mungkvn gonh lyis soe khasoeh yoh tuon das lah? 7 Tsai, ngos cu zis gas Mangso dah jyoeng cho lhyi bvng bvng zes bweh nhang khyvlyis yah nyah nyoqnho ngelang lyis zes chixoeuq dyei lyis gas, ngos yaunos yoh soeu dvyuk teh chamus dang thang thyet zis xauh nyeis shih lah? 8 Housoeh dvnghuot lyis gas, Gis cho bweh thuq los bas jungh, ma gis muh tsain kuot goh oen chamus ma taiq das lah? Jyoengh dius dvyhamh gas housoeh, ngamoq lyis loeusmus soqzo zis yah yobos huon nyeis. Nyamoq mon yih dah dang thang thyet zis xauh das. 9 Housoeh lyis khasoeh gah? Ngamoq dah chojeis gas gohyhamh thoq lyis zes gis lhyeh? Ma nghuot, khasoeh ge lyis ngos Chixoeuq goeus zis yah dvyhangteh Yuda jens yahge gohnyau bang dvnganhmoq gas yaunos dah yomsoq o mha nghuot joq. 10 Lhaih toh zis yah dvyhangteh: Dan soeu ma bos, dvyuk eq ma bos; 11 Seqgyo soeu hank ma bos, Mangso lhyi xo soeu eq ma bos; 12 Dvnganhmoq chowhang whang loh goeus, Nyamoq yhung pvjus bang bweh tyamp, nhaiqbos cho chixoeuq zis hank ma bos, dvyuk yangh ma bos. 13 Nyamoq dah khyunghkang ka bangh joq dah lop tsain nghuot; Nyamoq lhyo eq mhuih dang taiq. Nyamoq nhuotkuk khau mha ywimuhtsanh dah duk bos. 14 Nyamoq nhuot mas xungh xent dah nhoengh dang yah dyingh joq. 15 Nyamoq dah khyei ka suih huot das zis nyap. 16 Nyamoq dah cho mha dyoqbis zis yahge shanghsenh cho yah dyingh joq. 17 Nyamoq nyenstap cho lhyi ma seq: 18 Nyamoq mas Mangso lhyi gyukwoms cho ma bos, ge. 19 Lyi mas lhaih toh zis dvnganh zis gas, Lyi khau mha kang dwis bang chank das xiklyis lhaih toh yvlyis yang seq. Hau lhaih toh dah Lyi gas hank lyis eq ma seq oen jyamp taiq das cho ma dyei toh zis yahge mungkvn dius dvnganh gas Mangso dah soetuon zis xauh das cho chixoeuq toh. 20 Housoeh las Lyi taiq toh cho lhyi tyink khyvlyis yah hank eq Mangso xikkhonh mas yoh dan zis ma nghuot. Khasoeh ge lyis Lyi gas yang yaunos yoh bang nghuot ge zis lyis kyingh dvyoh chixoeuq. 21 Nghuot laus eq gvshih gas Lyi yahge lvpe jens kanghjyoeng kat toh laus eq Lyi yah ma sen khyvlyis yah Mangso dah dan cho lhyi chixoeuq goeus. 22 Hauh zis gas Yesu Khristu lyis lomsjingh gvng mas, lomsjingh bang dvnganh lyis dyei, Mangso dah dan cho nghuot. Khasoeh ge lyis houmha khwih khyamh cho ma bos. 23 Khasoeh ge lyis dius dvnganh gas yaunos kuot las, Mangso dah phunk lyis kat khyoq tyamp. 24 Nghuot laus eq gvshih gas Yesu Khristu khyuot yoeus gvng mas phauh ma dyei noh, Mangso dah jyehjuh yah dan cho xauh yoeus. 25 Mangso ka, Yesu Khristu lyis yah jyank mas nhang lha yah xiklyis lomhxangh kuot goeus. Housoeh nyah suih gvng mas nyang lyis lomsjingh bang gas nyamoq dah yaunos khyuot dyei zis tsain xauh. Mangso heisoeh kuot zis gas nyang nyang dan soeu nghuot ge yvlyis chixoeuq das nyhenshang nghuot. 26 Lai loh goeus shishenh lyis nyang dius dah yaunos lyis yoeuh lhaiq tyamp goeus. Nghuot laus eq gvshih nyang gas nyamoq dah yaunos lyis soetuon khyvlyis nyah dan cho lhyi chixoeuq nyeis. Heisoeh Mangso ka nyah gungs dan cho lhyi chixoeuq zis yah Yesu lyis lomsjingh bang dvnganh lyis dan cho xauh yoeus nhang. 27 Housoeh lyis khwank das cho cha bos? Cha ma bos, Chamus? Yang Lyi chank las lah? Ma nghuot, lomsjingh gvng mas dvnghuot. 28 Khasoeh ge lyis yang seqgyo zis gas, dius dvyuk Lyi yah taiq toh muh lyis chank kuot khyvlyis ma nghuot, lomsjingh gvng mas dan cho xauh yoeus ge zis nghuot. 29 Mangso ka Yuda jens dah Mangso kyingh nghuot lhyeh? Gohnyau bang dah Mangso eq nyang nghuot, ma nghuot lhyeh? Nghuot, gohnyau bang dah Mangso eq nghuot. 30 Mangso ka dvso kyingh dvnghuot yvmvyah, vthyoh tyomh kham bang lyis lomsjingh gvng mas dan nhang, Tsai vthyoh tyomh ma kham bang lyis eq hau lomsjingh cho yah kyingh dan nhang das. 31 Housoeh lyis gas, lomsjingh gvng mas hauh Lyi lyis tyamp goeus lhyeh? Housoeh ma nghuot, tyamp das gungsthaiq yang hauh Lyi lyis tsain chank tyink.
1 Housoeh lyis gas yah phauh thyeih Abraham dah thungh phuh cho cha nghuot? 2 Abraham gas muhzoh yah dan zis xauh yoeus lyis gas, khwank chank bos; nghuot laus eq Mangso xikkhonh mas khwank chank ma bos. 3 Hau lhaihtoh dang mas khasoeh ge lah? Abraham gas Mangso lhyi lomsjingh gvng mas nyang lyis dan soeu, ge dyei goeus, ge. 4 Gvshih muh zwi soeu xauh yoeus dah uhkung phauh gas jyungshuk khyvlyis suon yoeus zis ma nghuot, nyang muh zwi phauh dvnghuot. 5 Vsainnyang muh mas nges khyvlyis ma nghuot, yaunos yoh bang lyis yoh dan nhang soeu lhyi lomsjingh soeu lyis ka nyah lomsjingh zis lyis dan, ge suon dyei das. 6 Houka muhzoh yah ma nghuot, Mangso yah dan soeu, ge suon dyei zis xauh soeu ka ngelhoq cho, Dawi eq taiq toh. 7 Nyang taiq zis gas: Chah shuot zis lyis khyuot dyei las, nyah yaunos lyis nghop tyamp dyei zis xauh soeu ka ngelhoq. 8 Yhensain yah yobos comh zis ma xauh soeu ka ngelhoq, ge. 9 Housoeh haih ngelhoq cho ka vthyoh tyomh bang xiklyis kyingh nghuot lah, nghuot ya, vthyoh ma tyomh bang xiklyis eq nghuot lah? Abraham gas lomsjingh gvng mas dan soeu, ge dyei goeus oen yang taiq. 10 Housoeh lyis gas khanhamp suon dyei zis xauh lah? Vthyoh ma tyomh shih lyis lah? Vthyoh tyomh thang lhyi lah? Vthyoh tyomh thang lhyi ma nghuot, vthyoh ma tyomh shih lyis nghuot goeus. 11 Nyang vthyoh tyomh vlho lhyi xauh yoeus zis gas, nyang vthyoh ma tyomh shih lyis yah bos joq dah lomsjingh ehnyet gvng mas nyang lyis dan zis kuot dyei dah kyihau nghuot. Houka vthyoh ma tyomh, lomsjingh las hauh gvng mas dan ge suon dyei zis xauh bang dah phauh thyeih duot dyei das xiklyis nghuot. 12 Nyang gas vthyoh tyomh kham bang dah phauh thyeih eq nghuot. Hauh bang gas vthyoh tyomh kham bang thoq lyis zes las yah phauh thyeih Abraham vthyoh tyomh ma kham shih lyis yoh dah lomsjingh zis yah kang dwis yhangteh kang dwis bang nghuot. 13 Abraham, nghuot ya nyah vnyau vshih lyis mungkvn yhenzis khyvlyis dyei das ge dangthoengh toh uhlyis Abraham hau Lyi chank tyink gvng mas ma nghuot. Abraham gas lomsjingh gvng mas Mangso ka nyang lyis dan ge suon dyei zis xauh gvng mas dvnghuot. 14 Khasoeh ge lyis, Lyi chank bang vso vlho kham yoeus bang tsain nghuot lyis gas, dius dah lomsjingh zis gas vkom nghuot loh zis yahge Mangso dangthoengh eq pyaih tyamp goeus. 15 Lyi gas Mangso dah nhaiqlom dyis cho she los, nghuot laus eq lyi ma joq lyis gas, lyi lhyweq cho eq ma bos das. 16 Housoeh hauh dangthoengh lyis Mangso dah jyehjuh yah Abraham dah vnyau vshih dvnganh xauh kham yoeus das nyhenshang yoh kham toh das xiklyis hauh dangthoengh lyis lomsjingh yvmas vpom xi toh. Abraham dah vshih ge zis gas, Lyi chank tyink bang kyingh ma nghuot, Abraham teh lomsjingh bang lyis eq ge zis nghuot. Khasoeh ge lyis Abraham gas yang dvnganh dah lomsjingh phauh thyeih nghuot. 17 (Ngos nvng lyis dius nyau nyoshoq dah uwus duot nhang goeus ge lhaih toh) Abraham gas lomsjingh nyeis. Shei bang lyis dwis toq nhang zis yahge ma bweh shih dah vyhang lhyi yoh bweh los nhang dah Mangso xikkhonh mas hauh dangthoengh gas goeng joq. 18 Nghamhloms joqyos ma bos laus eq Abraham gas lomsjingh zis yah nghamhloms nyeis las dius nyau nyoshoq dah uwus bweh loh. Jyomp maussauh mas taiq zis gas, Nah vnyau vshih jens gas maukhung mha kyi teh jebais los das, ge. 19 Nyah lomsjingh ehnyet yah nyang dvxo zvn ko bos los goeus dah nyah gungsdom lyis eq, loshang ma yoh khoeu lo dah Sara ung lhyi eq yom ma shuon. 20 Lomsjingh cho ma dyuk, Mangso dah dangthoengh lyis ma khamkhvv, nyah lomsjingh cho mha yombos los las Mangso lhyi chungh nyeis. 21 Mangso ka nyang toh dah dangthoengh lyis yoh tyink dyei ge yom nghamh zuk nyeis. 22 Housoeh las nyah lomsjingh cho lhyi dan cho nghuot ge suon dyei goeus. 23 Nyang lyis housoeh suon dyei ge dah dang gas nyah xiklyis kyingh lhaih toh zis ma nghuot. 24 Houka yah Yhensain Yesu Khristu lyis dwis toq nhang soeu lhyi lomsjingh bang, dan bang ge suon yoeus zis xauh dah, yah xiklyis eq lhaih toh. 25 Yang cu dah yaunos gvng mas nyang gas shei das xiklyis kyauh tyamp zis xauh las, yang dan cho yoh das xiklyis dwis toqh kat zis xauh goeus.
1 Lomsjingh gvng mas tsain dan los yvmvyah, yah Yhensain Yesu Khristu gvng mas yang Mangso yah yoh nyenstap goeus. 2 Yesu gas yang lyis lomsjingh khyvpheh yah gvshih kham zo nyeis Mangso dah jyehjuh shot pheh shwih wvng loh goeus. Housoeh yang gas Mangso dah phunk mas xauh wvng das zis nghamhloms zainsmuh bos las khwank gaus nyeis. 3 Hauh thoq lyis yang gas yaukyenh shanghsenh xauh dah cho mha laus eq yang khwank gaus nyeis. Khasoeh ge lyis yaukyenh zis gas jhen zis lyis bweh los nhang yvlyis yang seq. 4 Jhen zis gas kyink zis, kyink zis gas nghamhloms zis lyis bweh nhang. 5 Hau nghamhloms zis gas yang lyis ehnyet yom ma gyau nhang. Khasoeh ge lyis yang lyis dyei toh dah Gyingshang Dyos khyvlyis yah Mangso dah jyetdap ehnyet gas, yah nhaiqlom khau mha huot kat dyei goeus. 6 Yang gas yomnhuk joq shih lyis toeuq toh shishenh lyis, Khristu gas yaunos yoh bang xiklyis shei kham goeus. 7 Jyoengh, dan soeu xiklyis shei kham das dius hank ma bos mvbeh; dius gis dvyuk yuk xiklyis gas womh shei kham das zis dvyuk yuk bos mvbeh. 8 Nghuot laus eq yang yaunos dap bang nghuot joq shih lyis, Khristu gas yah nyhenshang shei kham yvmvyah, Mangso ka nyah jyetdap cho lhyi, yah jyank mas dede Chixoeuq goeus. 9 Housoeh nyah suih gvng mas gvshih yang dan cho yoh goeus las, nyah gvng mas Mangso dah nhaiqlom dyis masyah yang khyuot yoeus zis zes xauh. 10 Khasoeh ge lyis yang gas nyang lyis jes kuot bang dvtsain nghuot joq shih lyis, nyah Lo shei kham zis yah, yang lyis Mangso yah mehoq tamp zis xauh goeus bang yang gas nyah dah dwis nyeis kang yah zes las khyuot yoeus zis xauh das. 11 Tsai, hauh thoq lyis yang lyis Mangso yah mehoq tamp das xiklyis nyang gas yah Yhensain Yesu Khristu lyis nhang kat yvmvyah yang gauslaus nyeis. 12 Housoeh las dius dvyuk gvng mas yaunos gas mungkvn mas wvng los las yaunos gvng mas shei cho jweh los zis yah dvyhangteh, dius dvnganh yaunos kuot yvmvyah dvnganh gas shei chah. 13 Khasoeh ge lyis, hauh lyi ma dyei shih lyis yaunos gas mungkvn mas joq goeus; nghuot laus eq lyi ma joq shih gyo lyis yaunos comh toh ge zis ma bos. 14 Nghuot laus eq Adam masyah Moshe jweh shoq shei zis guon nyeis las, Adam dah shuot cho teh ma shuot bang thoq mas eq guon nyeis. Adam gas jweh los das soeu dah vzwvng nghuot. 15 Nghuot laus eq hau aiq yuk gas dvyhangteh ma nghuot. Khasoeh ge lyis Mangso dah jyehjuh jyungshuk gas Adam dah yaunos teh ma nghuot. Dius dvyuk dah yaunos gvng mas dius nyoshoq shei zis xauh ge zis gas jus. Nghuot laus eq Mangso dah jyehjuh gas hauh thoq lyis zes kuh joq. Houyah dvyhangteh Yesu Khristu ge dah dius dvyuk dah jyehjuh gvng mas dius nyoshoq lyis dyei dah nyah jyehjuh jyungshuk gas zes kuh joq. 16 Mangso dah jyehjuh jyungshuk yah dius dvyuk dah yaunos cho ka shaih goh. Adam gas yaunos dvkoeuq kuot uhlyis yobos yoh ge dah dang thang thyet cho chank los. Nyah thang lhyi yaunos nyoshoq kuot uhlyis ma mon ma yih laus eq yobos ma bos ge dah jyehjuh jyungshuk chank los. 17 Khasoeh ge lyis dius dvyuk dah shuot cho gvng mas shei zis yah guon cho bweh thuq los zis gas jyoeng. Nghuot laus eq Yesu Khristu ge dius dvyuk kuot dah muh gvng mas bweh thuq los dah vkyuh gas kha iq zes kuh joq! Mangso dyei dah magons magoh jyehjuh jyungshuk lyis xauh yoeus las nyah jyehjuh yah dan ge suon dyei zis xauh bang dvnganh gas Yesu Khristu ge dius dvyuk dah gvng mas kang dwis zis yah xauh guon nyeis das. 18 Housoeh las dius dvyuk shuot dah yaunos gvng mas dius dvnganh dang thang thyet zis xauh zis yah dvyhangteh, dius dvyuk dan dah muhzoh gvng mas dius dvnganh gas dan cho xauh las kang tsain dwis nyeis das. 19 Khasoeh ge lyis dius dvyuk domsyos ma gyo gvng mas nyoshoq lyis yaunos wons bang bweh nhang zis yah dvyhangteh, gohtoeu dius dvyuk domsyos gyo gvng mas nyoshoq gas dan bang bweh los das. 20 Lyi jweh los yvmvyah shuot cho nyo los. Nghuot laus eq yaunos zes nyo los zes Mangso dah jyehjuh gas magons magoh zes dyingh shon los. 21 Housoeh yaunos gas shei cho khyvpheh yah guon nyeis zis yah dvyhangteh Mangso dah jyehjuh gas dan khyvlyis yah guon nyeis las, yah Yhensain Yesu dah jyehjuh yah yang lyis vcaiq vto kang dwis yvpheh shwih loh nyeis.
1 Housoeh lyis gas yang khasoeh taiq das lah? Jyehjuh je los bas jungh oen yang yaunos mas kang tsoq dwis nyeis das lah? 2 Ma nghuot, yang yaunos masyah shei gang goeus lyis gas houmha khasoeh kang tsoq dwis nyeis das lah? 3 Yesu Khristu mas jeisnyhop kham bang yang dvnganh gas nyang shei kham yvmas jeisnyhop tsain kham nyeis yvlyis namoq ma seq goh lhyeh? 4 Housoeh yvmvyah Khristu gas Uwus dah phunk yah, shei masyah dwis toq los nhang zis xauh zis yah dvyhangteh, yang eq kang saiq mas yoh suh shoq, hau jeisnyhop kham yvmas shei yvlyis yang kham yoeus las, nyang yah dvgeh nyhop zis tsain xauh goeus. 5 Yang gas nyang shei kham yvmas dvgeh bos shei kham lhyi ka, nyang dwis toq los yvmas eq dvgeh dwis toq los das. 6 Yang gas yaunos dah jyeidwis ma tsoq bweh bas jungh, yaunos gungsshoh lyis mhont das xiklyis, yah dius cauh lyis nyang yah dvgeh taplhangh kham yvlyis yang seq. 7 Khasoeh ge lyis shei goeus soeu ka yaunos masyah lhuiq zis xauh goeus. 8 Yang Khristu yah dvgeh shei lhyi ka, yang nyang yah dvgeh dwis nyeis das oen lomsjingh nyeis. 9 Khasoeh ge lyis Khristu gas dwis toq nhang zis xauh goeus yvmvyah ma doms shei lo zis lyis yang seq. Shei zis eq nyang lyis ma yoh guon lo. 10 Khristu shei zis gas yaunos xiklyis dvlhain kyingh shei lha, nyang kang dwis zis gas Mangso xiklyis dwis nyeis. 11 Houyah dvyhangteh namoq eq yaunos yah shei gang loh bang nghuot las, yah Khristu Yesu gvng mas Mangso mha dwis nyeis bang nghuot oen nghamh yoeus chah. 12 Namoq obos ehnyet dah jyeidwis jens ma duot loh bas jungh, yaunos lyis namoq dah seq shei gungs mas vguon nhang goh. 13 Namoq dah gungsdoeus lyis ma gis ma shop muh kuot das xiklyis yaunos dah muh mas vkyauh tyamp goh. Hauh gungsthaiq shei mhayah dwis toq nhang zis xauh bang teh namoq gungs Mangso lhyi kyauh las, namoq gungsdoeus lyis dan dah muh kuot das nyhenshang Mangso lhyi kyauh toh geh. 14 Khasoeh ge lyis namoq gas lyi khau mha ma nghuot, jyehjuh khau mha kang dwis nyeis yvmvyah yaunos dah yomsoq gas namoq thoq mas ma yoh zau lo. 15 Housoeh lyis gas khasoeh gah? Yang gas lyi khau mha ma nghuot, jyehjuh khau mha dvtsain nghuot yvmvyah, yaunos kuot das lah? Housoeh ma nghuot. 16 Namoq dvyuk dah domsyos gyo lyis namoq gas hauh soeu dah jyeidwis nghuot yvlyis namoq ma seq lhyeh? Yaunos dah jons duot lyis gas shei das. Mangso lhyi domsyos gyo dah jons duot lyis gas dan yvlyis xauh kham yoeus das. 17 Namoq xikpheh yaunos dah jons duot ku laus eq, namoq xauh yoeus dah jyauh cho, jyoeng yvvlyis ehnyet nhaiqlom dvnganh yah domsyos gyo goeus las Mangso lhyi nhaiqshoqlang. 18 Namoq gas yaunos masyah lhuiq kat zis xauh las dan cho dah jons jens duot los goeus. 19 (Namoq gungsshoh nhuk joq yvmvyah dius dah nghamh cho lhyi chank las ngos dvtaiq). Dvlhain ka ma gis dah muh kuot das xiklyis ma lhoq ma shang zis yahge ma shop dah jons jens bweh nhang. Houyah dvyhangteh gvshih gas namoq dah gungs dvnganh yah gyingshang dah muh kuot das xiklyis dan cho dah jons jens bweh los nhang chah goeus. 20 Namoq yaunos jons tsain duot nyeis shih uhlyis, namoq gas Mangso o cho, dan cho yah cha ma tsain sen. 21 Gvshih doms yoeuh lyis xoqphoh cho xikpheh namoq kuot ku goeus muh masyah chah vkyuh xauh yoeus lah? Hauh muh dah uhkung phauh gas shei zis nghuot. 22 Gvshih gas yaunos masyah lhuiq zis xauh las, Mangso dah jyeidwis jens duot goeus. Hauh vkyuh gas namoq gyingshang bang bweh los las thang thank lyis vcaiq vto kang yoh. 23 Khasoeh ge lyis yaunos dah uhkung phauh gas shei zis nghuot; Mangso dah jyehjuh jyungshuk gas yah Yhensain Yesu Khristu mas vcaiq vto kang nghuot.
1 Boekyis eh, ngos lyi seq bang lyis taiq bah, dius dwis nyeis gyo lyis lyi gas nyang lyis sain toh zis lyis namoq ma seq nyeis goh lhyeh? 2 Housoeh yhensain phoq yoh dah vmesbih gas yhensain phoq dwis nyeis dvchank, lyi gvng mas nyang yah dvgeh twih toh: nghuot laus eq yhensain phoq shei goeus ya, yhensain phoq yah sen dah lyi masyah luiq goeus. 3 Housoeh las yhensain phoq dwis nyeis shih lyis, yhensain phoq gohyuk xo loh lyis gas, nyang lyis lvng shuot soeu ge das: nghuot laus eq yhensain phoq shei goeus ya, nyang lyi masyah luiq goeus las, yhensain phoq gohyuk jyank mas loh laus eq nyang lvng shuot soeu bweh das zis ma nghuot. 4 Houyah dvyhangteh boekyis eh, shei masyah dwis toq los soeu yah phoengh wvng las yah Mangso xiklyis vshih yoh shih bas jungh, namoq eq Khristu gungs mas Lyi yah shei gang loh. 5 Khasoeh ge lyis yang gungsshoh nghuot shih lyis, Lyi yah nhauh toq kat, yah dah yaunos dap gungsshoh dah obos ehnyet gas shei muhzoh dah vshih shih bas jungh, yah gungsdoeus jens lyis muh khanh dyei nyeis. 6 Nghuot laus eq gvshih gas yang lyis twih toh dah Lyi masyah shei luiq goeus las, yang gas lhaih toh Lyi cauh dah phuqsoe bang ma nghuot lo, gyingshang Dyos dah kang vsaiq mas dvphuqsoe nyeis. 7 Housoeh lyis gas yang khasoeh oen taiq das lah? Lyi gas yaunos nghuot joq lhyeh? Housoeh ma nghuot: Lyi yah ma nghuot lyis gas, yaunos lyis ngos ma seq: Khasoeh ge lyis nyoq vnoq, ge Lyi ma taiq ya, ngos nyoqnoq obos cho lhyi jyoengh ma seq. 8 Nghuot laus eq yaunos gas tyingtoh dang lyis jyamp las obos cho vja ja lyis ngos masyah kuot thuq kat. Khasoeh ge lyis lyi ma joq lyis gas yaunos gas shei joq. 9 Khasoeh ge lyis xikpheh ngos gas lyi dah nghe pheh nyeis khoq: nghuot laus eq hauh lyi dah twih toh cho ngah jyank mas jweh yah dvyih, yaunos gas ngos mas kuh los las ngos gas shei loh. 10 Housoeh kang dyei das ge dah dangthoengh yah jweh los dah lyi nyang ngos mas shei cho bweh nhang. 11 Khasoeh ge lyis yaunos gas hau tyingtoh dang lyis yhung lha ngos lyis mhuih zis yah sat. 12 Housoeh las Lyi gas gyingshang, hau tyingtoh dang eq gyingshang, dan las gis joq. 13 Housoeh lyis gas, gis ja gas ngah xiklyis shei cho bweh los lhyeh? Housoeh ma nghuot: yaunos gas gis zis lyis yhung lha ngos lyis shei nhang. Houka yaunos dah wotwu lyis chixoeuq das xiklyis nghuot. Housoeh las tyingtoh dang gas yaunos gas cha yah ma yoh byi shoq kuh cho lhyi chixoeuq nyeis. 14 Khasoeh ge lyis Lyi gas Dyos yah sen yvlyis yang seq; nghuot laus eq ngos gas gungsshoh ehnyet bos las yaunos dah jons duot das xiklyis ungh zis xauh. 15 Ngos khanh yoszoh lyis ngos ma seqgyo; nghuot laus eq ngos kuot mes cho lhyi ma kuot kuot, ngos hoeng dah muh lyis kyingh ngos dvkuot nyeis. 16 Ngos ma mes kuot zis lyis ngos kuot lyis gas, Lyi gas gis joq yvlyis, ngos xamxonh. 17 Housoeh las, gvshih ngos nyang hauh zis lyis kuot nyeis zis ma nghuot, ngos mas bos dah yaunos dvkuot nyeis. 18 Khasoeh ge lyis ngah ungkhau mha, nghuot goeus, ngah gungsshoh mas gis zis cha ma bos yvlyis ngos seq. Ngos mas kuot mes ehnyet bos joq laus eq gis khyvlyis kuot das zis ngos ma nyvng. 19 Kuot mes dah gis cho lhyi ngos ma kuot, ma mes kuot, ma shop yvlyis ngos kuot nyeis. 20 Housoeh ngos ma mes kuot yvlyis ngos kuot nyeis lyis gas, ngos nyang hauh yvlyis ma kuot, ngos mas bos dah yaunos dvkuot nyeis. 21 Housoeh ngos nyvng dah lyi dvkoeuq gas, ngos gis dah muh lyis kuot mes khanghmuh ma gis zis lyis kyingh ngos dvyoh kuot. 22 Khasoeh ge lyis ngah ungkhau mha ka, Mangso dah lyi lyis nhaiqdoeus nyeis. 23 Nghuot laus eq ngah gungsdoeus mas gohtoeu lyi dvkoeuq gas ngah ehnyet mas bos dah lyi yah zan goh nyeis zis ngos nyvng. Hauh lyi gas ngos lyis ngah gungsdoeus mas bos, yaunos lyi dah thung dius kuot. 24 Mvshohjyen soeu ngos eh, hai shei nhang dah gungs masyah ngos lyis hank khyuot yoeus das lah? 25 Yah Yhensain Yesu Khristu gvng mas ngos lyis khyuot kat Mangso dah jyehjuh lyis chungh. Housoeh las ngos gungs doeu nyang, Mangso lyi lyis phuqsoe nyeis; nghuot laus eq gungsshoh yah gas yaunos lyi lyis ngos phuqsoe nyeis.
1 Housoeh yvmvyah gvshih gas, Khristu Yesu mas nyeis bang dah xiklyis gas dang thang thyet dais ma bos lo. 2 Khasoeh ge lyis Khristu Yesu masyah kang saiq dyei, dwis nyeis Dyos dah lyi gas ngos lyis yaunos dah lyi yahge shei cho lyi mhayah lhuiq kat. 3 Khasoeh ge lyis gungsshoh yomnhuk las Lyi ma yoh kuot yvlyis, Mangso ka nyah Lo lyis yobos bos dah gungsshoh teh doeus khyvlyis, yaunos lyis shang tyamp das xiklyis nhang kat yvmvyah, nyah gungsshoh mas yaunos lyis dang thang thyet tyamp goeus. 4 Housoeh gungsshoh khyvlyis ma chank Dyos khyvlyis chank las kang dwis nyeis bang yang gas hau Lyi taiq toh dah dan cho yoh nyuk los nhang das xiklyis nghuot. 5 Khasoeh ge lyis gungsshoh ehnyet chank bang gas, gungs yah sen dah vyhang lhyi nghamh twih toh. Nghuot laus eq Dyos dah ehnyet chank bang gas Dyos dah nhaiqdoeus khyvlyis loh nyeis. 6 Gungsshoh yah sen yvmas nghamh twih toh cho ka shei cho nghuot. Dyos mas nghamh twih cho ka kang yahge nyenstap yvpheh shwih loh nyeis. 7 Haih cho gvng mas gungsshoh lyis nghamh twih dah ehnyet gas Mangso lhyi jesmus nyeis las Mangso dah lyi lyis ma chank las, jyoengh ma yoh chank. 8 Gungsshoh ehnyet chank bang gas Mangso lhyi yoh pyo nhang zis ma nghuot. 9 Nghuot laus eq Mangso dah Dyos namoq mas nyeis goeus yvmvyah, namoq gas gungsshoh o khyvlyis ma nghuot, Dyos dah ehnyet o khyvlyis tsain suh nyeis. Ehnyet mas Khristu dah Dyos ma lungh soeu hank laus eq Khristu yah ma sen. 10 Khristu namoq mas nyeis lyis gas yaunos gvng mas gungs shei laus eq dan soeu dah gvng mas namoq dah dyos gas dwis nyeis das. 11 Yesu lyis shei masyah toq los nhang soeu dah dyos namoq mas nyeis lyis gas, Khristu lyis dwis toq los nhang soeu ka namoq mas bos dah dyos khyvpheh yah namoq dah seq shei gungs lyis eq dwis dah kang dyei das. 12 Housoeh las boekyis eh, yang gas gungsshoh ehnyet chank das xiklyis gungsshoh dah jyen dap bang ma nghuot. 13 Khasoeh ge lyis, gungsshoh yah sen khyvlyis kang dwis nyeis lyis gas, namoq shei das; nghuot laus eq namoq dyos masyah gungsshoh dah wotwu lyis tsain thyuk tyamp lyis gas namoq dwis nyeis das. 14 Mangso dah Dyos yah shwih zis xauh ya xauh bang gas Mangso dah lo jens nghuot. 15 Khasoeh ge lyis, Mangso namoq lyis dyei dah dyos gas namoq lyis jons kuot las nyang lyis doms gyuk nhang das xiklyis ma nghuot. Hauh gungsthaiq hauh dyos gas namoq lyis Mangso dah lo jens duot nhang lha hauh dyos yomsoq yah yang gas Mangso lhyi, Aba Uwus eh, oen sang. 16 Hauh Dyos nyang, yah dyos yah dvgeh kanghjyoeng kat zis gas, Yang gas Mangso dah lo jens nghuot, ge. 17 Yang gas lo jens tsain nghuot goeus ya, vso vlho kham yoeus bang nghuot. Khristu yah dvgeh shanghsenh kham lhyi ka nyang yah dvgeh nyoqnho ngelang dyei zis eq xauh kham das. 18 Khasoeh ge lyis gvshih shishenh dah shanghsenh zis gas, yang lyis Chixoeuq das phunk yah byi das zis ma mon oen ngos nghamh. 19 Gvnkhanh toh zis dvnganh gas Mangso dah lo jens hank nghuot yvlyis Chixoeuq das nyhenshang sainh hwangh zis yah langh nyeis. 20 Khasoeh ge lyis gvn ya gvnkhanh toh zis gas vsainnyang o zis yahge hauh dah toeuqkhom vkom bweh loh das zis gas vsainnyang dah ehnyet o khyvlyis ma nghuot mulas, Mangso bweh nhang yvmvyah dvnghuot. 21 Nghuot laus eq dvnyeih gas gvnkhanh toh zis dvnganh gas dyoqbis masyah yoh luiq las Mangso lo jens xauh yoeus, phunk nyoqnho bos dah luiq cho mha xauh bos das yvlyis nghamhloms zis yah Mangso heisoeh bweh nhang goeus. 22 Khasoeh ge lyis gvnkhanh toh zis dvnganh gas gvshih jweh shoq dvgeh lokhoeu nos nos dah vmesbih teh nos kyingh nyeis yvlyis yang seq. 23 Hauh thoq lyis Dyos dah cangxeih vshih lyis kham yoeus bang yang eq, yah gungs lyis khyuot ge, Mangso dah lo jens duot das shishenh lyis tsain langh nyeis. 24 Khasoeh ge lyis yang nghamhloms cho haih yvmas khyuot yoeus zis tsain xauh goeus. Nghuot laus eq nyvng yvlyis nghamhloms zis gas nghamhloms cho gyingh ma nghuot. Yang mas hank gas yoh nyvng yvlyis nghamhloms nyeis lah? 25 Ma nyvng dah vyhang lyis dvnghamhloms nyeis lyis gas, yang hauh yvlyis ehnyet xing xing tsain langh nyeis. 26 Houyah dvyhangteh Dyos eq yah dah yomnhuk yvlyis thukxank dyei nyeis. Yang shvmanh khasoeh dung das zis ma seq. Nghuot laus eq hauh Dyos nyang dang ma yoh thuq, soqmuh nyhank zis yah, yah xiklyis mehoq yoh tamp shoq bos shangphu dyei nyeis. 27 Yah ehnyet nhaiqlom lyis lhau yoeuh soeu Mangso ka Dyos cha nghamh nyeis yvlyis seq. Khasoeh ge lyis Dyos gas nyah dius jens xiklyis Mangso dah ehnyet o zis yah dvyhangteh Mangso jyank mas shangphu dyei nyeis. 28 Mangso ka nyang lyis jyetdap las nyah toeuqkhom yah dvyhangteh khi yoeus toh bang xiklyis gas, cho dvnganh yvmas gis zis chomp bweh los nhang nyeis yvlyis yang seq. 29 Khasoeh ge lyis, nyah Lo gas vmang vnoeuh nyoshoq mas lobes duot bas jungh ge, xik lyis yah seq toh bang lyis, nyah Lo dah gungskhyank yah doeusgoh das xiklyis nyang gas nyamoq lyis xik lyis yah toeuq toh. 30 Xik lyis yah toeuq toh bang lyis eq nyang khi yoeus. Khi yoeus bang lyis eq nyang dan nhang, dan nhang goeus bang lyis eq phunk tsain yoh nhang. 31 Housoeh lyis heinyhoq mas yang cha taiq das lah? Mangso, yah shot pheh nyeis lyis gas yang lyis tyi hank yoh xo das lah? 32 Nyah Lo lyis ma yu, yang dvnganhmoq xiklyis nyang lyis kyauh tyamp soeu ka, nyah Lo eq cheq vyhang dvnganh lyis eq yang lyis jyungshuk dyei das ma nghuot lhyeh? 33 Mangso khyen yoeus bang lyis yobos hank yoh huon das lah? Dan nhang soeu ka Mangso nghuot. 34 Dang thang thyet das soeu hank nghuot lah? Shei kham lha, nghuot goeus, shei kham thoq lyis magoh, shei masyah dwis toqh kat zis xauh thang lhyi Mangso dah loqyos shot pheh nghuot joq las, yah xiklyis khyoeuq dyei soeu Khristu Yesu nyang nghuot. 35 Khristu dah jyetdap masyah yang lyis hank yoh kangh tyamp das lah? Yaukyenh, shanghsenh, shoeuhshih, panghkhauq, shohchen, shohjyen, gudwvng cho, moengsa yah lah? 36 Nah gvng mas ngamoq dvnyeih gonh sat zis xauh, Ngamoq gas sat das nyhenshang she loh dah yvng jens lyis teh kuot zis xauh, ge lhaih toh zis yah dvyhangteh nghuot. 37 Housoeh ma nghuot! Yang lyis jyetdap nyeis soeu gvng mas hai dvnganh mas yang gas ung bang thoq lyis zes bang nghuot. 38 Khasoeh ge lyis shei cho, dwis cho, loeuswons bang, zauguon, yomsoq, gvshih joq dah vyhang yahge thang pheh jweh los das vyhang, 39 nyhang mha dah yomsoq eq, nyhen mha dah yomsoq eq gvn ya gvnkhanh toh vyhang masyah cha nghuot laus eq yah Yhensain Khristu Yesu mas Mangso dah jyetdap ehnyet masyah yang lyis yoh kangh tyamp das zis ma nghuot oen zis ngos soh soh nghuot.
1 Ngos Khristu yah sen soeu nghuot las jyoeng dang taiq, ngos ma hwah. Gyingshang Dyos yah guon yvlyis lhom yoeus dah ngah sohseq ehnyet yah ngos ma hwah cho kanghjyoeng kat. 2 Ngah suih ngah shoh, ngah vnyau jens dah nyhenshang ngah ehnyet mas nhaiqkuk zainsmuh yahge yaukyenh cho malyen lo xauh nyeis cho taiq lyis kha iq kuh joq lah! 3 Khasoeh ge lyis, nyamoq xiklyis ngos Mangso dah nhoengh zis lyis eq, Khristu yah gang loh das zis lyis eq kham mes shoq nghuot. 4 Israel jens gas Mangso lo jens nghuot. Nyamoq lyis nyah lo jens duot nhang lha, nyah phunk thuq xoeuq. Nyamoq yah thanghchvp toh, Lyi eq dyei. Nyamoq gas jyoeng dah paiq cho yahge Mangso dah dangthoengh lyis eq xauh yoeus. 5 Nyamoq gas nyings hoeuh dah Hebre phauh thyeih moq masyah yaus lyih bang nghuot. Dius khyvlyis gas Khristu eq nyamoq vnyau yah sen. Dvnganh lyis guon dah Mangso lhyi vcaiq vto chungh goh. Amen. 6 Mangso dah dangthoengh gas vnyet vkom bweh goeus oen zis ma nghuot. Khasoeh ge lyis Israel vnyau dvnganh yah Mangso dah dius gyingh ma tsain nghuot. 7 Abraham dah vnyau vshih nghuot bang eq dvnganh gas Mangso dah lo jens nghuot lhyeh? Mangso Abraham lyis taiq zis gas, Ngos nvng lyis dangthoengh toh vgus Isak masyah nah vnyau vshih gyoh das, ge. 8 Hauh vjyuk gas, gungsshoh pheh yah khoeu los dah lo jens gas Mangso dah lo jens ma tsain nghuot; Mangso dangthoengh toh zis yah dvyhangteh khoeu los dah lo jens gas Abraham dah vnyau vshih gyingh nghuot ge suon yoeus dyei. 9 Khasoeh ge lyis dangthoengh mas, Heinyos ngos doms jweh lyis Sara gas yukgis lo yoh das, ge taiq toh. 10 Haih zis kyingh ma nghuot, Rebeka dah lotang eq yah phauh thyeih Isak masyah los. 11 Nghuot laus eq lotang ma khoeu shih las, gis gang cha ma daq kuot shih lyis yah Mangso Rebeka lyis taiq zis gas, Nah lo kuh vyuk gas ngis vyuk jyank mas jons mus das, ge. 12 Mangso housoeh taiq zis gas, nyang toeuq toh zis yah dvyhangteh lobes yuk lyis ma lui yoeus, khyen cho mha nyang gas dius ya kuot dah muh lyis vgungs toh las khyen zis ma nghuot, nyang o khyvlyis dvkhyen. 13 Housoeh Jyomp maussauh mas, Ngos Yakop lyis jyetdap las, Esau lyis hoeng, ge lhaih toh. 14 Housoeh lyis yang, Mangso ma dan oen taiq das lah? Housoeh ma nghuot. 15 Khasoeh ge lyis, Ngos jyehjuh kuot mes soeu lhyi jyehjuh kuot das. Ngos nhaiqnyen mes soeu lhyi nhaiqnyen das, ge Moshe lhyi taiq toh. 16 Housoeh las Mangso dah khyen cho ka dius dah omes cho, dius dah zwi khank cho mha ma nges. Mangso dah nhaiqnyen cho mha dvnges toh. 17 Khasoeh ge lyis lhaihtoh dang mas Egutu hwankti Pharao lyis taiq zis gas, Nvng mas ngah yomsoq yoh chixoeuq las ngah nyings nyeisjvng gonh hoeuh loh bas jungh, oen ngos nvng lyis dvtoeu toh, ge. 18 Housoeh las Mangso ka nyang nhaiqnyen mes soeu lyis nhaiqnyen las, nhaiqlom than nhang mes soeu lyis lhoq than dyei nyeis. 19 Nghuot laus eq namoq dvyuk yuk ngos lyis, Housoeh lyis Mangso ka dius lyis yobos khasoeh yoh xo das lah? Nyang bauh dah cho lhyi hank yoh kyamp toh lah, ge ngos lyis taiq mes mvbeh. 20 Buisnoms phoq eh, nvng gas hank nghuot las Mangso lhyi housoeh yoh toeuh lah? Tsoh auh dvlom gas hauh yvlyis kuot toh goeus soeu lhyi, Nvng ngos lyis chamus heisoeh kuot lah, oen yoh taiq lhyeh? 21 Auh shonh soeu ka tsohnyhon lhyi nyang o khyvlyis kuot das toeuh yoh las, tsoh dvjop zis lyis dvkhamh yah nyoqnho ngelang bos yvmas yhung das phauhdap auh, gohtoeu dvkhamh yah ma phauh dah auh yoh kuot ma nghuot lhyeh? 22 Housoeh Mangso eq housoeh kuot nyeis. Nyang gas nyah nhaiqlom dyis cho Chixoeuq zis yah nyah yomsoq lyis seq nhang nyeis. Nghuot laus eq nyah dah nhaiqlom dyis gvng mas monh las somh loh mon bang lyis ehnyet xing xing jhen nyeis. 23 Yhensain ka nyah nhaiqnyen cho kham yoeus das bang ge dah yang lyis nyah mathank magons Phunk lyis xauh nyvng nhang das nyhenshang o nyeis. Hauh bang gas Mangso dah phunk xauh yoeus das zis sont toh goeus bang nghuot. 24 Khasoeh ge lyis yang gas Mangso yah khi toh goeus bang nghuot las, Yuda jens mas kyingh ma nghuot, gohnyau bang mas zis eq nghuot. 25 Houyah dvyhangteh, Hosea maussauh mas eq Mangso heisoeh ge taiq: Ngah dius ma nghuot bang lyis ngos ngah dius oen das; Ngos ma jyet ku dah dius nyau lyis eq, Ngos jyet dah dius nyau nghuot, oen das. 26 Tsai, namoq ngah dius jens ma nghuot, ge nyamoq lyis taiq zis xauh joqyos mas nyang, dwis nyeis Mangso dah lo jens ge das, ge. 27 Esaia eq Israel vnyau dah cho kaiq las, Israel jens gas thomh mas sihsho nyhoq nyo laus eq, nyamoq mas dvtsiq kyingh khyuot yoeus zis dvxauh das. 28 Khasoeh ge lyis Mangso ka nyeisjvng thoq mas dius lyis soetuon cho lvnyap kuot tyink das. 29 Houyah dvyhangteh xik lyis yah Esaia taiq toh zis gas, Maukhung Jesphung Yhensain yang lyis vnyau vshih dvyhamh ma nyhet toh lyis gas, Yang Sodom teh bweh las Gomora yah doeusgoh das, ge. 30 Housoeh yvmvyah yang cha taiq chank bos lo lah? Dan yvlyis ma chank dah gohnyau bang gas lomsjingh gvng mas dan cho yoh. 31 Israel vnyau gas, lyi chank las dan cho yoh das xiklyis yomkat, nghuot laus eq hauh lyi lyis ma yoh tsain chank tyink. 32 Chamus ma yoh ge lyis, nyamoq gas lomsjingh zis lyis ma nges, muhzoh mas vgungs toh khyvlyis kyingh dvtsain yomkat yvmvyah ma yoh tyink. Housoeh las thungh dwes das luklom mas tsain thungh lains. 33 Hauh zis gas lhaihtoh dang mas, Yoeuh aq, ngos Zion mha thungh lains das luklom yahge lainszo das lukmuh lom toh. Nghuot laus eq nyang lyis lomsjingh soeu hank laus eq yom ma gyau das, ge toh.
1 Boekyis eh, ngah vnyau Israel jens khyuot yoeus zis xauh das nyhenshang ngos ngah ehnyet nhaiqlom dvnganh yah ngos kha iq o mes zis yah nyamoq xiklyis Mangso jyank mas shvmanh dung nyeis lah! 2 Khasoeh ge lyis nyamoq gas Mangso dah cho mha nhaiqkank wvng yvlyis ngos kanghjyoeng yoh kat. Nghuot laus eq hau nhaiq wvng yvmas seq cho ma bos. 3 Khasoeh ge lyis nyamoq gas Mangso jyank masyah los dah dan cho lhyi ma tsain seq las, vsainnyang dah dan cho lhyi doengs nhang das ge yomkat yvmvyah nyamoq gas Mangso dah dan cho lhyi ma lhom yoeus. 4 Khasoeh ge lyis lomsjingh bang dvnganh gas dan cho yoh bas jungh, Khristu gas hau Lyi lyis thank loh nhang goeus. 5 Lyi chank zis yah Mangso xikkhonh mas dan soeu yoh bweh cho yah sen lha Moshe ka, Lyi chank soeu ka dwis nyeis das ge, lhaih toh. 6 Nghuot laus eq lomsjingh zis yah Mangso xikkhonh mas yoh dan los cho yah sen lha lhaihtoh dang mas, nah ehnyet mas, Khristu lyis gyoh los nhang das xiklyis maukhung mha hank yoh doq das lah, oen vsang. 7 Khristu lyis shei masyah dwis toq nhang das xiklyis, Noq thank joqyos mas hank yoh gyoh loh das lah, oen eq vsang. 8 Housoeh ge zis gas, Mangso dang gas nvng yah ni joq, nah nhuotkuk mas, nah nhaiqlom khau mha bos. Hauh zis gas ngamoq taiq kyoh dah lomsjingh cho yah sen dah dang nghuot. 9 Housoeh Yesu gas Yhensain nghuot, ge nah nhuot yah rhen lha, Mangso ka nyang lyis dwis toq nhang yvlyis nah ehnyet mas lomsjingh nghuot lyis gas nvng khyuot yoeus zis xauh das. 10 Khasoeh ge lyis dius gas dan zis xauh yoeus shoq, ehnyet nhaiqlom yah lomsjingh las, khyuot yoeus zis xauh shoq nhuot yah rhen toh. 11 Khasoeh ge lyis lhaihtoh dang eq, Nyang lyis lomsjingh soeu hank laus eq yom ma gyau das, ge. 12 Khasoeh ge lyis Yuda dius, gohnyau bang lyis khwih khyamh zis ma bos yvmvyah houmha yuk khanghmuh bos. Mangso ka dvnganh dah Yhensain nghuot las, nyang lyis lui bang dvnganh lyis shvmanh jyehjuh magons magoh dyei. 13 Lhaihtoh dang mas taiq zis yah dvyhangteh, Yhensain dah nyings lyis lui soeu khanghmuh khyuot yoeus zis xauh das. 14 Nghuot laus eq Yhensain lhyi ma lomsjingh shih bang gas nyang lyis khasoeh yoh lui das lah? Nyamoq dang lyis ma xauhgyo ku lhyi khasoeh yoh lomsjingh das lah? Dang cho taiq kyoh soeu ma bos lyis nyamoq khasoeh yoh xauhgyo das lah? 15 Gausyis dang taiq kyoh das bang lyis ma nhang kat lyis gas khasoeh yoh taiq kyoh das lah? Lhaihtoh dang mas taiq zis yah dvyhangteh, hau gausyis dang wons los dah loeuskyoh bang dah khyei ka kha iq yungh! 16 Nghuot laus eq hau gausyis dang lyis dvnganhmoq lhom yoeus zis ma nghuot. Khasoeh ge lyis Esaia nyang taiq zis gas, Yhensain eh, ngamoq loeus lyis hank lomsjingh lah, ge. 17 Housoeh las hau lomsjingh ehnyet gas loeus xauhgyo masyah bweh los, hauh loeus gas Khristu dah cho taiq kyoh masyah los. 18 Nghuot laus eq ngos nyei zis gas, Nyamoq hauh loeus ma xauhgyo ku zis jyoeng lhyeh? Nyamoq xauhgyo goeus. Khasoeh ge lyis lhaihtoh dang mas taiq zis yah dvyhangteh, Nyamoq dah thwe ka nyeisjvng gonh mas, Nyamoq dang gas mungkvn goms shoq duons loh goeus, ge. 19 Tsai, ngos nyei zis gas, Israel dius jens ma seqgyo lhyeh? Moshe nyang shih toeuh zis gas, Ngos gas cha ma nghuot dah dius nyau lyis yhung zis yah ngah dius nyau lyis noh nhang das. Koh dah dius nyau lyis yhung lha namoq lyis nhaiqyo nhang das, ge. 20 Hauh thoq lyis Esaia womh womh taiq zis gas, Ngos lyis ma xo bang ngos lyis nyvng goeus. Ngah cho ma nyei bang jyank mas ngos thuq xoeuq, ge. 21 Nyang Israel yah sen cho taiq zis gas, Domsyos ma gyo, gomloeus toq dah dius jens lyis lhom yoeus das xiklyis ngos ngah loq dvnyeih gonh yhuonh toh, ge.
1 Housoeh las ngos nyei zis gas, Mangso ka nyah vnyau lyis peq tyamp goeus lah? Housoeh ma nghuot, Ngvnyang eq Israel vnyau, Abraham dah vshih yahge Benyamin vkoq nghuot. 2 Mangso ka xik lyis yah nyang khyen toh dah nyah dius nyau lyis ma peq tyamp. Lhaihtoh dang mas Eliya gas Israel jens lyis yobos huon zis yah Mangso lhyi khasoeh dung yvlyis namoq seq. 3 Yhensain eh, nyamoq nah lvpe jens lyis sat goeus. Nah phon lhyi eq tsain thyoq tyamp; ngos kyingh dvnyet joq lo las, nyamoq ngah kang lhyi eq tsain xo, ge. 4 Mangso ka nyang lyis khasoeh ge toeuh lah? Bala mangso xikkhonh mas phvluk zomh gyuis ma paiq dah yukgis nyhet khyoengh gas, ngos ngah xiklyis nyhet toh, ge. 5 Houyah dvyhangteh haq caiq mas eq Mangso jyehjuh gvng mas nyang khyen yoeus zis xauh bang dvyhamh nyet shih. 6 Nyang khyen yoeus cho ka muhzoh gvng mas ma nghuot, nyah jyehjuh gvng mas nghuot. Muhzoh yah nghuot lyis gas, nyah jyehjuh cho ka jyehjuh gyingh ma nghuot lo. 7 Housoeh lyis khasoeh taiq das lah? Israel jens gas nyamoq xo zis ma nyvng. Mangso khyen yoeus zis xauh bang nainlo dvtsain nyvng; nyet bang gas Mangso lui zis lyis ma xauhgyo. 8 Lhaihtoh dang mas taiq zis yah dvyhangteh, Mangso ka nyamoq dah uhnuk yahge ehnyet nhaiqlom lyis yoeu nhang lha khvnyhik jweh shoq nyamoq ma nyvng, xauh eq ma xauhgyo. 9 Dawi eq, Nyamoq dah zo pwe ka nyamoq xiklyis lhyik yahge twih mas nyih zis yah lains bas jungh, nyamoq joeng zis xauh bas jungh. 10 Nyamoq ma yoh nyvng das xiklyis nyoqjet nhang zis xauh bas jungh; Nyamoq dah nungs gas lyei dah yvwons o mha vjangh goeuh joq bas jungh, ge. 11 Housoeh las ngos nyei zis gas, Israel jens gas nyamoq dyoqbis shoq thungh lains goeus lah? Ma nghuot, Nyamoq yaunos kuot yvmvyah khyuot yoeus cho ka gohnyau bang jyank mas jweh loh. Houka Yuda dius jens noh cho bweh das nyhenshang nghuot. 12 Yuda jens dah yaunos kuot zis gas mungkvn dius jens xiklyis shvmanh jyehjuh nyoshoq bweh los nhang. Yuda jens dah dyos mas shohjyen cho ka gohnyau bang xiklyis shvmanh jyehjuh nyoshoq bweh los nhang. Housoeh lyis gas Yuda jens dvnganh hau khyuot yoeus yvmas bos nhang zis xauh lyis gas, kha iq kuh dah jyehjuh jyungshuk bweh los das lah! 13 Housoeh las ngos namoq gohnyau bang lyis taiq zis gas, Ngos gohnyau bang dah lvgyo nghuot joq dvchank, ngos ngah muhzoh mas nyoqnho ngelang yoeus las khwank nyeis. 14 Ngos ngah vnyau lyis noh dah ehnyet bos nhang zis yah nyamoq dvyhamh lyis yoh khyuot yoeus das. 15 Khasoeh ge lyis, nyamoq lyis peq tyamp zis gas cangsoeu dius jens yah Mangso jo mas buisnoms bweh los shoq mehoq tamp cho bweh los lyis gas, Yuda jens lyis Mangso doms lhom yoeus cho ka shei bang lyis kang dwis nhang zis nghuot. 16 Khasoeh ge lyis cangxeih yhomh dah guknyau shih nyau khyvlyis phudyei dah ohlhyoq dvkhyiq gas gyingshang nghuot lyis gas hau ohlhyoq dvkoeuq gonh gyingshang. Vnyet gyingshang lhyi ka vko jens eq gyingshang. 17 Tsungh toh dah tsanlun zains dah vko dvkhamh pheq tyamp las hauh vngot mas tsanlun lamh dah vko lhyi gyangh tsoq tsungh toh. Gohnyau bang nghuot dah nvng gas hauh tsanlun lamh dah vko yah doeusgoh las, nvng gas Yuda jens dah yombos dyos kang bos xauh gvm yoeus. 18 Housoeh lyis nvng hauh vko pheq tyamp zis xauh teh dah bang lyis dius ngis ma gis yoeuh khyoq, ma gis khwank, nvng gas vko dvnghuot. Nvng vnyet lyis wons toh zis ma nghuot, hauh vnyet yah nvng lyis dvwons toh. 19 Nghuot laus eq, Ngos lyis coq das zis hauh vko ka pheq tyamp zis xauh goeus, ge nvng taiq mvbeh. 20 Nghuot goeus, nyamoq gas ma lomsjingh yvmvyah pheq tyamp zis xauh: nvng gas lomsjingh zis yah goeng joq. Nghuot laus eq nvng vkhwank, gyukwoms nyeis aq. 21 Khasoeh ge lyis, Mangso ka vko gyingh ge dah Yuda lyis yangh ma yu lyis gas nvng lyis eq yu das teh mus lah? 22 Haih yvmas Mangso ka kha iq nhaiq seq nyen zis yahge kha iq than shoq yau dyei yvlyis yang nyvng goeus. Nyang gas yaunos kuot bang lyis than than joeng laus eq namoq gas nyah nhaiqnyen shohgyo cho lhyi kham yoeus cho mha tsoq las mon yih shoq suh e nyeis lyis gas, Yhensain ka namoq lyis nhaiqnyen nyeis das. Nghuot laus eq namoq eq nyah nhaiqnyen zis kham yoeus mon bang ma duot lyis gas pheq tyamp zis xauh das. 23 Yuda jens nyamoq dah ma lomsjingh cho tyamp lyis gas, nyah joqyos mas doms coq zis tsain xauh das: Khasoeh ge lyis Mangso ka nyang lyis yoh doms coq. 24 Namoq gohnyau bang gas hau tsanlun lamh vko lhyi zan yoeus las soengh choenk nghuot dah tsanlun gyingh mas coq tsungh teh nghuot. Yuda jens gas tsungh toh dah vko gyingh teh nghuot las, hau tsanlun vko jens lyis vkhang dah vzains gyingh mas coq tsungh das zis gas Mangso xiklyis zes lwis ma nghuot lhyeh? 25 Boekyis eh, namoq gas namoq nyang svsoh seq ge ma nghamh das xiklyis nghop toh, Mangso dah jyoeng cho dvkoeuq ngos namoq lyis seqgyo nhang mes. Houka Israel jens gas vjangh ehnyet than joq das zis ma nghuot, laus eq houka khyuot yoeus xauh las Mangso jyank mas jweh loh das, Gohnyau bang dah sonzoh dyingh los shoq dvnghuot das. 26 Heika Israel dius dvnganh khyuot yoeus zis khasoeh xauh das cho nghuot. Lhaihtoh dang mas: Zion masyah khyuot yoeus soeu thuq los las, Yakop vnyau masyah lhung cho dvnganh yoeus tyamp das. 27 Ngos nyamoq dah yaunos yoeus tyamp dyei uhlyis, Ngos nyamoq yah haih thanghchvp toh das, ge. 28 Namoq gohnyau bang gvng mas Yuda jens gas Gausyis Loeus lyis peq tyamp yvmvyah nyamoq gas Mangso dah jeswus bweh los. Nghuot laus eq Mangso ka nyamoq lyis khyen yoeus dah vnyau kuot goeus yvmvyah nyamoq dah phauh thyeih moq lyis toh dah dangthoengh gvng mas nyamoq gas nyang jyetdap zis xauh bang nghuot. 29 Khasoeh ge lyis Mangso ka hank lyis laus eq khi yoeus las shvmanh dyei das xiklyis nghamh thyet thang lhyi ma phanh lo soeu nghuot. 30 Namoq gohnyau bang xiklyis gas, namoq xikpheh Mangso dah domsyos ma gyo, nghuot laus eq gvshih gas Yuda jens domsyos ma gyo yvmvyah namoq gas Mangso dah nhaiqnyen cho xauh yoeus. 31 Namoq Mangso dah nhaiqnyen zis xauh kham yoeus teh nyamoq eq xauh kham yoeus bas jungh ge nyamoq gvshih domsyos ma gyo mus nyeis. 32 Khasoeh ge lyis Mangso ka dius dvnganh lyis nhaiqnyen zis yoh chixoeuq shoq dvnganh lyis domsyos ma gyo yvmas lhunk toh zis xauh nhang. 33 Mangso dah jyehjuh kha iq kuh joq! Nyah joeui yahge seq cho ka kha iq noq! Nyang nghamh thyet cho lhyi hank yoh phant kyoh! Nyah cho lhyi hank yoh seqgyo! 34 Lhaihtoh dang mas taiq zis yah dvyhangteh, Yhensain dah ehnyet lyis hank seq lah? Nyang lyis joeui hank yoh dyei lah! 35 Mangso jyehjuh tauh dyei bas jungh ge nyang lyis hank cha jyungshuk dyei toh ku lah? 36 Vyhang dvnganh yvlyis nyang gvnkhanh toh. Joq ya joq zis dvnganh gas nyang masyah, nyah xiklyis goeng joq. Mangso ka vcaiq vto phunk bos bas jungh. Amen.
1 Housoeh yvmvyah boekyis eh, Mangso ka yang lyis nhaiqnyen nyeis yvmvyah, namoq gungs lyis gyingshang lha lhom yoeus mon dah dwis nyeis, lomhxangh khyvlyis Mangso lhyi ngheq phudyei geh oen ngos namoq lyis taiq kyingh yomdyei kat. Houka namoq phudyei vvng, jyoeng dah paiq cho nghuot. 2 Namoq gas haih mungkvn dah vwot lyis ma wuot: Mangso lhyi namoq vkhau mha dah ehnyet nhaiqlom dvnganh lyis vsaiq thaiq nhang geh. Hauh uhlyis namoq gas Mangso o dah cho, gis cho, lhom yoeus mon cho yahge dyinghjet cho cha tsain nghuot yvlyis seq gvn das. 3 Housoeh Mangso ngos lyis dyei toh dah jyehjuh jyungshuk yah ngos namoq yuk khanghmuh lyis taiq bah. Namoq nyang gungs lyis nghamh vvng thoq lyis lai las vnghamh goh. Hauh gungsthaiq Mangso dius yuk khanghmuh lyis lvdoeus toeuq las dyei toh dah lomsjingh cho yah dvyhangteh vsainnyang gungs lyis nghamh yoeuh las thyet geh. 4 Khasoeh ge lyis dvgungs mas gungsbon nyoshoq bos, hauh gungsbon jens eq nyang muh nyang bos. 5 Houyah dvyhangteh yang nyoshoq tsain nghuot laus eq, Khristu mas dvgungs kyingh nghuot las, nyang changh nyang sain goh joq. 6 Housoeh yang gas yang lyis dyei toh dah jyehjuh jyungshuk nyang ja nyang nghuot zis yah dvyhangteh hauh yvlyis yhung chah. Yang yoh dah jyehjuh jyungshuk gas Mangso dah dang taiq kyoh das muh nghuot lyis gas yang yoh dah lomsjingh cho yah dvyhangteh kuot chah. 7 Phuqsoe muh nghuot lyis gas phuqsoe muh wons wuq bas jungh; jyauh muh nghuot lyis gas jyauh bas jungh. 8 Taiq kyingh yomdyei muh nghuot lyis taiq kyingh yomdyei muh khanh nyeis bas jungh. Vlu dyei soeu eq magons magoh dyei bas jungh; guon soeu eq yomkat las guon bas jungh; nhaiq seq nyen soeu ka gausyis ehnyet yah kuot bas jungh. 9 Jyetdap cho mha vguons kuot zis ma bos bas jungh; ma gis yvlyis hoeng geh, gis yvlyis zwi zains toh geh. 10 Jyetdap yvmas Khristan vmang vnoeuh teh jyet goh geh. Dvyuk yah dvyuk phauh nyang cho tungh chixoeuq goh nyeis geh. 11 Muh mas ma lan lo yomkat nyeis geh; Yhensain lhyi nhaiq wvng zis yah phuqsoe nyeis geh. 12 Nvng nghamhloms zis gas nvng lyis gauslaus nhang bas jungh; shanghsenh yvmas jhen geh; Vjangh shvmanh dung nyeis geh. 13 Nyungs dah Khristan dyenschangh jens lyis nvng yoh vyhang gvm dyei aq. Boengh daih nyeis geh. 14 Namoq lyis shoeuhshih bang lyis Mangso jyank mas shvmanh dung dyei geh; vnhoengh goh, shvmanh dyei geh. 15 Gauslaus bang yah dvgeh gauslaus las ngaus bang yah dvgeh ngaus geh. 16 Dvyuk yah dvyuk xamxonh zis yah pangh thuk goh nyeis geh. Vkhwank goh, nyoqnho ma yoh dah muh lyis lhom yoeus las wons wuq nyeis geh. Vsainnyang seq thoq lyis joeui bos oen vmoengs. 17 Dvyuk yuk nvng lyis ma gis khyvlyis kuot lyis, nvng nyang lyis ma gis khyvlyis vtauh dyei. Yuk khanghmuh gis ge nghamh yvlyis tungh kuot aq. 18 Namoq gas dvnganh yvmas nah shot pheh yah gis bweh lyis dius yuk khanghmuh yah nyenstap khyvlyis nyeis geh. 19 Jyetdap bang eh, khanhamp eq lvto vphuk; Mangso dah nhaiqlom dyis yvlyis xwiq toh geh: Khasoeh ge lyis lhaihtoh dang mas taiq zis gas, Lvto phuk das zis gas ngah muh nghuot, ngos tauh dyei das, ge Yhensain taiq. 20 Lvto phuk das gungsthaiq lhaihtoh dang mas taiq zis yah dvyhangteh, nah jeswus yuot lyis tsoh aq: shet lyis jeis gvmshuk aq; heisoeh kuot gvng mas nvng nyang lyis xoqphuh nyoqnho ngeh nhang das. 21 Ma gis zis yah nvng lyis ma ung bas jungh, gis zis yah ma gis yvlyis dv ung bas jungh.
1 Yuk khanghmuh gas guon dah toeuh yoh bang dah o mha gyoh nyeis bas jungh. Khasoeh ge lyis Mangso jyank masyah ma nghuot lyis gas, chah toeuh eq ma bos: bos dah toeuh dvnganh zis gas Mangso yah dyei toh. 2 Hank laus eq hau toeuh yoh soeu lhyi ngoek zis gas Mangso toeuq toh soeu lhyi ngoek yvmvyah nyang gungs nyang soetuon zis xauh das. 3 Khasoeh ge lyis guon bang gas gis dah muh kuot bang xiklyis gyuk phoh duot zis ma nghuot. Ma gis dah muh kuot bang xiklyis gyuk phoh dvtsain nghuot. Nvng vmingh yoh bang lhyi ma gyuk gyuk nyeis mes lah? Gis dah muh kuot aq: housoeh lyis nvng chungh zis xauh das. 4 Khasoeh ge lyis nyang gas nah vkyuh xiklyis Mangso dah muh wons soeu nghuot. Nvng ma gis mus kuot nghuot lyis gas gyuk aq: khasoeh ge lyis nyang gas yoh joeng dah yomsoq jyoeng yoh. Nyang gas Mangso dah jyeidwis nghuot las ma gis zis kuot soeu lhyi Mangso gungsthaiq soetuon lha yobos dyei soeu nghuot. 5 Housoeh las nvng gas Mangso yobos dyei das yvlyis gyuk las kyingh ma nghuot, sohseq ehnyet yah vmingh yoh bang dah domsyos gyo nyeis chah. 6 Hauh gvng mas eq namoq khoengh tsain kat nyeis: khasoeh ge lyis nyamoq gas vsainnyang kuot chah muh lyis wons wuq uhlyis Mangso xiklyis muh wons bang tsain duot nyeis. 7 Housoeh las nyamoq lyis dyei chah zis dvnganh dyei geh; khoengh khywi soeu mha khoengh kat las, vkhoq kui soeu mha vkhoq kat geh. Gyuk chah soeu lhyi gyuk las phauh chah soeu lhyi phauh geh. 8 Dvyuk yah dvyuk jyetdap goh thoq lyis lai las hank yah eq chah jyen vdap goh: khasoeh ge lyis gohyuk lyis jyetdap soeu ka lyi lyis domsyos gyo goeus. 9 Khasoeh ge lyis nyi shuot lvng vshuot, dius vsat, vkhauh, gohyuk yah sen vyhang lhyi nyoq vnoq ge dah Lyi yahge gohtoeu bos shih dah Lyi dvnganh zis gas, Nah yhenkyoh lyis nvnyang gungs lyis teh yoh jyetdap das ge dah dang mas xom toh. 10 Jyetdap zis gas yhenkyoh lyis ma gis zis kuot ku zis ma nghuot: housoeh jyetdap zis gas Lyi dvnganh chank kuot goeus. 11 Gvshih gas yhet soh los shishenh nghuot chah goeus yvlyis namoq seq yvmvyah namoq haih jyetdap lyi lyis chank kuot chah. Khasoeh ge lyis yang khyuot yoeus xauh das cho ka yang lomsjingh zoh loh yoq thoq lyis gvshih zes ni goeus. 12 nyensyo lai loh nyeis las nyeihyo jweh los nyeis: housoeh mauchuot cho yah sen dah muh lyis toh tyamp las, bvng zis yah sen dah jesgungs lyis tsain wuot toh goh. 13 Nyeih lyis yhangteh topkoq suh e goh: vpyo lais, vshuk yet, nghe nyhiq vnan, vdyoqgoh, vnoh goh. 14 Yhensain Yesu Khristu lyis jesgungs teh wuot toh geh, gungsshoh nyetnau khyvlyis tyink das zis toeuh dvtsiq eq vdyei.
1 Lomsjingh cho mha yomnhuk soeu lhyi lhom yoeus geh: nghuot laus eq nyang nghamh khamkhvv cho lhyi taiq phyen-goh das xiklyis lhom yoeus zis ma nghuot bas jungh. 2 Khasoeh ge lyis dvyuk dah lomsjingh cho ka dvnganh yah gis zo ge loms: gohtoeu lomsjingh cho mha yomnhuk soeu dvyuk gas anghnyaus zo nyeis. 3 Vja ja zo soeu ka ma zo soeu lhyi dius ngis ma yoeuh khyoq bas jungh; ma zo soeu eq zo soeu lhyi soe vtuon: khasoeh ge lyis Mangso ka nyang lyis lhom yoeus. 4 Nvng gas hank nghuot las gohyuk dah jyeidwis lyis soetuon lah? Hauh soeu dah muh ung cho, ma ung cho lhyi ka nyah yhensain nyang thyet das. Nyang jyoengh yoh ung das: khasoeh ge lyis hauh Yhensain ka nyang lyis ung shoq yoh kuot dyei. 5 Dius dvyuk gas buisnyeis dvnyeih gas gohnyeih thoq lyis zes yhaugyen ge nghamh: gohtoeu dvyuk gas nyeih khanghmuh dvyhangteh nghuot ge nghamh. Hank eq hank nyang ehnyet mas goeng goeng yap bas jungh. 6 Buisnyeis kyi soeu ka Yhensain dah phunk lyis chungh das xiklyis kyi nyeis. Ja khanghmuh zo soeu ka Yhensain dah phunk lyis chungh das xiklyis zo. Khasoeh ge lyis nyang gas hau Yhensain dah jyehjuh lyis chungh las zo nyeis. Zonoms dvkhamh lyis kyi soeu eq Mangso dah phunk lyis chungh das xiklyis kyi nyeis. Housoeh nyang eq Yhensain dah jyehjuh lyis chungh nyeis. 7 Khasoeh ge lyis, yang hank eq vsainnyang gungs xiklyis kyingh dwis nyeis zis ma nghuot; hank laus eq vsainnyang xiklyis kyingh shei zis ma nghuot. 8 Dwis nyeis lyis gas Yhensain nyhenshang yang dwis nyeis; shei lhyi eq Yhensain dah nyhenshang tsain shei loh. Housoeh yvmvyah dwis laus eq, shei laus eq yang gas Yhensain yah sen joq. 9 Khasoeh ge lyis shei bang yahge dwis nyeis bang dah Yhensain bweh shoq, Khristu gas shei kham lha dwis toq loh goeus. 10 Housoeh las nvng anghphoq kyingh zo soeu nah boek lyis chamus soetuon nyeis lah? Nvng vja ja zo soeu eq nah boek lyis chamus dius ngis yoeuh khyoq lah? Yang dvnganhmoq gas Mangso dah soetuon zis xauh das xiklyis nyah soetuon tank xikkhonh mas xauh jweh yap das. 11 Khasoeh ge lyis lhaihtoh dang mas, Yhensain taiq zis gas, Ngos dwis nyeis zis yah dvyhangteh, yuk khanghmuh ngah xikkhonh mas los dupaiq las, lhyo khanghmuh gas, Ngos gas Mangso nghuot ge rhen das, ge. 12 Yang yuk khanghmuh gas Mangso jyank mas vsainnyang dah cho lhyi suon xoeuq chah das. 13 Housoeh yvmvyah yang dvyuk yah dvyuk chah soe ma tuon goh. Hank laus eq vsainnyang boek xik mas thungh lains gus, lainszo gus ma toh das cho dvnghamh thyet goh. 14 Yhensain Yesu yah dvgeh kang dwis yvmvyah ngos jyoengh yoh seq zis gas, zonoms cha nghuot laus eq hauh zis nyang pheh yah loms noq cho khyvpheh yah ma sen oen. Nghuot laus eq dius dvyuk yuk gas zonoms dvja ja lyis ma lhoq ge nghamh lyis gas, hauh zis gas nyah xiklyis ma lhoq. 15 Nvng zo dah zonoms shukphoh gvng mas nah boek lyis ehnyet ma tap joqyos bweh nhang lhyi ka, nvng jyetdap cho mha suh e nyeis zis ma nghuot. Khristu gas nyah xiklyis shei kham dyei goeus yvmvyah, nah zonoms yah nyang lyis vlhoq thyoq. 16 Namoq gis ge lhom yoeus toh yvlyis gohyuk lyis, ma gis oen ma sang nhang goh. 17 Khasoeh ge lyis Mangso munghdan gas lvzo lvshuk cho ma nghuot, Gyingshang Dyos yah dyei dah dan cho, nyenstap gauslaus cho dvnghuot. 18 Housoeh chank las Khristu dah muh wons wuq soeu ka, Mangso nhaiqdoeus soeu bweh las, dius dah chungh zis eq xauh das. 19 Housoeh yvmvyah, yang gas nyang changh nyang nyenstap cho yoh bweh nhang cho yahge nyang changh nyang kuhxing los nhang cho lhyi vjangh nghamh toeuq zis yah suh e nyeis goh. 20 Zonoms gvng mas Mangso dah muhzoh lyis vlhoeu thyoq tyamp. Zonoms dvnganh gas zo gis. Nghuot laus eq zo las dius lyis lainszo nhang zis gas shuot cho nghuot. 21 Nah boek lyis lainszo nhang cho nghuot lyis gas, shoh zo, zvbiq shuk, chah zonoms laus eq jhank das zis gas gis cho nghuot. 22 Hai cho yah sen lha nvng khasoeh chank kuot ge zis gas nvng yahge Mangso yah sen. Vsainnyang jus ge lomsjingh las thyet zis yah dvyhangteh kuot las ehnyet mas shang shang yobos ma bos ge nghamh soeu ka ngelhoq. 23 Khamkhvv zis yah zo soeu ka Mangso dang thang thyet zis xauh goeus. Houka lomsjingh zis yah ma zo yvmvyah nghuot: khasoeh ge lyis lomsjingh zis yah ma kuot zis cha eq yaunos nghuot.
1 Yang lomsjingh cho mha yombos bang gas vsainnyang pyo cho ma gis chank, lomsjingh cho yomnhuk bang wons chah dah yvwons lyis bos gis pangh. 2 Yang dvnganh gas yah vmang vnoeuh jens dah nyeisgis yaplhoq das cho nghamh las lomsjingh cho mha jebais los das xiklyis nyamoq lyis lhoq pyo dyei goh. 3 Housoeh lhaihtoh dang mas, Nvng lyis jwangh nyhap dang gas ngos lyis zangh los, ge zis yah dvyhangteh, Khristu eq nyah gungs lyis nyang gaus nhang zis ma nghuot. 4 Lhaihtoh dang dvnganh gas yang lyis jyauh das xiklyis nghuot. Housoeh yang gas lhaihtoh dang masyah yoh dah jhen cho yahge yombos nhang cho gvng mas nghamhloms cho bos das xiklyis nghuot. 5 Yang dvnganh gas Khristu Yesu dah yikhyoh lyis chank las namoq nyang changh ehnyet dvdain dvlom yoh nghuot bas jungh, jhen cho yahge yomdyei cho dyei nyeis dah Mangso ka namoq lyis shwih bas jungh. 6 Housoeh lyis namoq dvnganhmoq dvgeh dvthwe kyingh yah, yah Yhensain Yesu Khristu dah Uwus nghuot dah Mangso lhyi yoh chungh das. 7 Housoeh las Mangso dah nyoqnho ngelang xiklyis Khristu gas namoq lyis lhom yoeus goeus zis yah dvyhangteh, namoq nyang changh nyang lhom yoeus goh geh. 8 Khasoeh ge lyis ngos taiq zis gas, Mangso ka dang jings soeu nghuot cho Chixoeuq das xiklyis phauh thyeih moq lyis dyei toh dah dangthoengh tyink das zis Khristu gas vthyoh tyomh bang Yuda jens dah gis cho nyhenshang jweh los, oen. 9 Gohnyau bang yangh Mangso dah nhaiqnyen cho lhyi yoh chungh bas jungh ge eq jweh los. Lhaihtoh dang mas taiq zis yah dvyhangteh nghuot. Houka, Gohnyau bang mas ngos nvng lyis chungh das, Ngos nvng lyis chunghthwe kat das, ge. 10 Tsai, lhaihtoh dang mas, Gohnyau bang eh, Mangso dah dius jens yah dvgeh gauslaus geh. 11 Tsai, Gohnyau bang dvnganh eh, Yhensain lhyi chungh geh; Dius jens dvnganh eh, nyang lyis chungh geh. 12 Tsai Esaia gas, Yese dah vnyet dvkoq thuq los das, Nyang gas Gohnyau bang lyis guon das; Nyamoq gas nyang lyis nghamhloms das, ge. 13 Gvshih Gyingshang Dyos dah yomsoq yah namoq dah nghamhloms cho tsoq je los bas jungh, Nghamhloms vpom nghuot dah Mangso ka, namoq dah lomsjingh cho mha gauslaus zis yahge nyenstap zis tyink dyei bas jungh. 14 Ngah boekyis eh, namoq gas gis cho yah dyingh las seq cho dvnganh dyingh zis yah, namoq nyang changh yoh jyauh goh nyeis yvlyis ngos wontang loms toh. 15 Nghuot laus eq haih maussauh mas ngos namoq lyis taiq kyingh kat dah cho dvkhamh womh womh lhaih kat. Ngos housoeh womh womh lhaih zis gas, 16 Mangso ngos lyis Khristu Yesu dah jyeidwis duot zis yah gohnyau bang xiklyis muh wons soeu duot das toeuh dyei yvmvyah nghuot. Gohnyau bang gas Mangso lhom yoeus mon dah phudyei duot las Gyingshang Dyos yah Mangso lhyi kyauh zis xauh bang bweh bas jungh, ngos gas phudyei soeu khyvlyis Mangso dah Gausyis dang lyis taiq kyoh. 17 Housoeh las Khristu Yesu mas dvdain dvlom bweh zis yah ngos wons wuq dah Mangso muh mas yoh khwank gaus nyeis. 18 Ngos womh womh taiq das zis gas Gohnyau bang Mangso dah domsyos gyo bas jungh Khristu gas ngos lyis yhung lha shwih uhshe nhang cho dvnghuot. Nyang haih yvlyis dang yah eq, muhzoh yah eq kuot. 19 Yomsoq muh yahge mauh loqmuh, Mangso dah Dyos yomsoq yah eq kuot. Housoeh ngos gas Yerusalem masyah Ilirikum wuxom ngap shoq chwang lha Khristu dah cho gausyis dang lyis taiq kyoh. 20 Nghuot laus eq dvyuk yuk tsuk toh dah vpom thoq mas ma tsank bas jungh, ngos vjangh nghamh tsuk zains toh zis gas, Khristu nyings ma xauhgyo ku shih joqyos mas, ngos hau gausyis dang taiq hoeuh das cho nghuot. 21 Lhaihtoh dang mas lhaih toh zis yah dvyhangteh nghuot: Houka: Nyah cho khanhamp eq ma xauhgyo ku bang nyvng das, Hauh zis ma xauhgyo ku bang seqgyo los das, ge. 22 Housoeh las ngos namoq jyank mas jweh das cho tomp toh zis nyoshoq lhain xauh. 23 Gvshih gas haih wuxom jens mas ngos kuot chah dah muh dye wons wuq goeus. Ngos namoq jyank mas los xauhgoh das xiklyis nyoshoq zvn lyis yah nghamh toh goeus. 24 Gvshih namoq jyank mas yoh los das oen nghamhloms. Ngos Spain mau pheh loh uhlyis namoq yah los xauhgoh mes. Namoq yah dvyoq zomh nyeis thang lhyi, hauh mau mas namoq ngos lyis pangh kat bas jungh oen nghamhloms nyeis. 25 Gvshih gas, Mangso dah dius jens lyis pangh thuk muh wons wuq das xiklyis Yerusalem pheh loh nyeis. 26 Khasoeh ge lyis Makedoni yahge Akhaia mau mas dah phung jens gas, Yerusalem mas nyeis, shohjyen dah Mangso dius jens lyis pangh das xiklyis gausyis zis yah vlu tsainh das zis nghamh thyet toh. 27 nyamoq thyet cho ka dius yah kywih las ma nghuot, nghuot laus eq jyoengh ge lyis hauh bang lyis pangh thuk das nyhenshang nyamoq mas yvwons s bos. Khasoeh ge lyis, Yuda jens dah dyos vso vlho gohnyau bang lyis gvm lyis gas, gohnyau bang gas nyeisjvng zisyos yah nyamoq lyis pangh das zis gis. 28 Housoeh yvmvyah haih muh dye kuot las, hauh bang xiklyis yung dah ngwis dye kyauh goeus ya, ngos Spain pheh loh uhjyangh namoq jyank mas wvng xauhgoh khoq das. 29 Namoq jyank mas jweh lyis Khristu dah shvmanh jyehjuh dyingh zis yah jweh das yvlyis ngos seq. 30 Housoeh yvmvyah boekyis eh, Yhensain Yesu Khristu gvng mas eq, Dyos yah dyei dah jyetdap gvng mas eq namoq ngah xiklyis ngos yah dvgeh malyen lo lomsjingh ehnyet zainsmuh yah shvmanh dung yvmas yomkat das xiklyis yomdyei kat. 31 Houka Yuda mau mas dah ma lomsjingh bang masyah jeslhuiq das zis yahge Yerusalem mas ngos phuqsoe dah muhzoh lyis houmha nyeis dah Mangso dius jens yoh lhom yoeus dyei das xiklyis shvmanh bos dung geh. 32 Housoeh Mangso dah ehnyet nghuot lyis gas ngos namoq lyis gausyis zis yah yoh xauhgoh las, namoq yah dvgeh pyo pyo yom doms yoh huiq das. 33 Nyenstap vpom Mangso ka, namoq dvnganhmoq yah dvgeh nghuot bas jungh. Amen.
1 Kenkhrea phung mha muh wons soeu, ngamoq dah nhamhmuh Phoebe lyis ngos namoq jyank mas taiq toenk dyei kat. 2 Mangso dius jens dah lhom yoeus goh khyvlyis Yhensain nyings mas nyang lyis lhom yoeus las chah cho mha laus eq, nyang chah yvmas yoeuh dyei geh. Khasoeh ge lyis nyang gas dius nyoshoq lyis eq, ngos lyis eq bos thuk ku dah dyenschangh gis nghuot. 3 Khristu Yesu dah muh mas ngah muh wons changh jens Priska yahge Akula lyis bos jeshuh dyei geh. 4 Nyah zomh gas ngah kang xiklyis vsainnyang dah lainzain kham das zis nghamh thyet ku yvmvyah, ngos nyah zomh lyis jyehjuh soh. Ngos kyingh ma nghuot, gohnyau bang dah phung dvnganh eq nyah zomh lyis jyehjuh soh. 5 Nyah zomh yhen mha dah phung lhyi eq bos jeshuh dyei geh. Akhaia mau mas Khristu xiklyis cangxeih shih dah shihxeih nghuot, ngos jyetdap dah Epaenetu lyis bos jeshuh dyei geh. 6 Namoq xiklyis svsoh yomkat ku dah Mari lyis bos jeshuh dyei geh. 7 Ngah vnyau Yuda tsain nghuot las, ngos yah dvgeh thung lungh ku dah Androniku yahge Yunia lyis bos jeshuh dyei geh: hauh vzomh gas lvgyo jens mas nyings hoeuh las, ngah xikpheh Khristan bweh goeus. 8 Yhensain yah zomh cho mha ngos jyetdap dah Ampliatu lyis bos jeshuh dyei geh. 9 Ngamoq yah dvgeh Khristu dah muh mas pangh soeu Urbanu yahge ngos jyetdap dah Staki lyis bos jeshuh dyei geh. 10 Khristu mas dang jings dah Apele yahge Aristobulu dah yhenbang lyis bos jeshuh dyei geh. 11 Ngah Yuda vnyau Herodion lyis bos jeshuh dyei geh. Narkisu yhenbang Khristan vmang vnoeuh moq lyis bos jeshuh dyei geh. 12 Yhensain muh wons wuq dah Triphena yahge Triphosa lyis bos jeshuh dyei geh. Yhensain mha gvgis yomkat dah jyetdap Persi lyis jeshuh dyei geh. 13 Yhensain dah muh mas lyes soeu Rufu yahge nyah ungwes, ngos lyis vjangh nyah lo lyis teh dyangh soeu lhyi bos jeshuh dyei geh. 14 Asinkritu, Phlegon, Herme, Patroba, Herma yahge nyamoq yah dvgeh nyeis dah Khristan boekyis lyis bos jeshuh dyei geh. 15 Philologu yahge Yulia, Nereu yahge nyah nhamhmuh lyis eq, Olimpa yahge nyang yah dvgeh nyeis dah Mangso dius jens dvnganhmoq lyis jeshuh dyei geh. 16 Namoq nyang changh nyang gyingshang dah bvlot tanh zis yah jeshuh goh nyeis geh. Khristu dah phung jens dvnganh gas, namoq lyis tsain jeshuh kat. 17 Boekyis eh, namoq kham yoeus dah jyauh cho lhyi tyixo lha, lvn nhang zis yahge dius jens dah lomsjingh cho lhyi lainszo nhang bang lyis zungh yoeuh las, nyamoq lyis jhank nyeis bas jungh, ngos namoq lyis taiq kyingh kat. 18 Khasoeh ge lyis housoeh teh bang gas, yah Yhensain Khristu lyis ma phuqsoe, vsainnyang womdau xiklyis kyingh chiq las, cha ma seq bang lyis danggis dang chau yah tsain mhuih. 19 Nyamoq hau Gausyis Dang mas nhaiq wvng lomsjingh nyeis cho ka, dius dvnganh mas hoeuh loh goeus. Housoeh yvmvyah ngos namoq xiklyis gaus nyeis. Namoq gas gis cho cha nghuot yvlyis seq dah joeui bos bang bweh las, ma gis cho mha ka yobos ma bos bang bweh nhang mes. 20 Nyenstap vpom Mangso ka, ma nyangh lyis Satan lhyi namoq dah khyei o mha nang gyik tyamp das. Yah Yhensain Yesu dah jyehjuh gas namoq yah dvgeh nghuot bas jungh. 21 Muh wons changh Timothi yahge ngah Yuda vnyau Luki, Yason, Sosipata moq gas namoq lyis jeshuh kat. 22 Haih maussauh lhaih soeu ngos Tertiu eq Yhensain mha namoq lyis jeshuh kat. 23 Ngos lyis eq, phung gonh lyis eq, boengh daih dah yhensain Gai-u ka namoq lyis jeshuh kat. Hauh wus mas dah ngwis kwi zom soeu Erastu yahge vmang vnoeuh Kuartu vzomh gas namoq lyis jeshuh kat. 24 Yah Yhensain Yesu Khristu dah jyehjuh gas namoq yah dvgeh nghuot bas jungh. Amen. 25 Yang Mangso phunk lyis chungh goh. Ngos namoq lyis taiq kyoh goeus Yesu Khristu cho gausyis loeus yahge gohlhain caiq masyah nghop shung toh dah jyoeng cho chixoeuq kat zis yah dvyhangteh, nyang gas namoq lyis namoq dah lomsjingh cho mha goeng goeng yoh yap nhang toh. 26 Nghuot laus eq gvshih hau nghop toh dah jyoeng cho ka lvpe jens lhaih toh khyvlyis chixoeuq kat. Dius nyau khanghmuh Mangso lhyi lomsjingh las nyah domsyos gyo bas jungh ge, vcaiq vto Mangso tying toh zis yah dvyhangteh hau jyoeng cho lhyi taiq kyoh nyeis goeus. 27 Dvyuk kyingh nghuot las nyang kyingh joeui bos dah Mangso ka, Yesu Khristu gvng mas vcaiq vto phunk bos bas jungh. Amen.
1 Yesu Khristu dah lvgyo kuot das xiklyis Mangso dah ehnyet yah khi toh dah ngos Paulo yahge boek Sotene gas, 2 Korinthu wus mas joq, Mangso dah phung mha bos bang yahge khyiq khanghmuh mas ngamoq yahge nyamoq dah Yhensain Yesu Khristu lyis chomp paiq bang Khristu Yesu gvng mas Mangso dah gyingshang bang bweh das xiklyis lui yoeus zis xauh bang dvnganh jyank mas dang tying kat. 3 Yah Uwus Mangso yahge Yhensain Yesu Khristu dah jyehjuh yahge nyenstap zis gas namoq lyis dyei bas jungh. 4 Yesu Khristu gvng mas namoq lyis jyehjuh dyei toh yvmvyah, ngos namoq nyhenshang ngah Mangso lhyi vjangh nhaiqshoqlang sang. 5 Namoq gas Khristu Yesu mas dvdain dvlom bweh nyeis yvmvyah taiq dang yahge seq cho dvnganh, ja khanghmuh gas nyah gvng mas dyinghjet joq goeus. 6 Khristu dah Loeus gas namoq mas vnyet goeng goeng yoh chent joq goeus. 7 Housoeh, yah Yhensain Yesu thuq los das yvlyis langh nyeis uhlyis namoq ma xauh lhom yoeus dah jyehjuh jyungshuk dvja eq ma bos lo. 8 Yah Yhensain Yesu Khristu dah buisnyeis lyis yobos huon chank ma bos bas jungh, Nyang gas thang thank jweh shoq goeng joq nhang das. 9 Nyah Lo, yah Yhensain Yesu Khristu yah yoh zomh shoq namoq lyis lui yoeus dah Mangso ka wontang. 10 Ngah boekyis eh, namoq dvnganh gas taiq dang xamxonh goh nyeis das xiklyis ngos namoq lyis Yah Yhensain Yesu Khristu nyings yah yomdyei kat; housoeh lyis namoq mas gang lvn loh cho ma bos das. Namoq nghamh cho, toeuqkhom dvkoeuq mas xamxonh goh nyeis geh. 11 Khasoeh ge lyis, ngah boekyis eh, namoq mas dyoqgoh cho bos yvlyis Khloe yhenbang dvyhamh ngos lyis los taiq kyoh. 12 Ngos heisoeh taiq bah, namoq dvyuk yah dvyuk shaih khyvlyis, Ngos gas Paulo thang chank, ngos gas Apolo thang chank, ngos gas Petru thang chank, ngos gas Khristu thang chank, ge tsain taiq goh nyeis. 13 Khristu gas vphung phung khyoq zis xauh goeus nyvng lhyeh? Paulo ka namoq xiklyis taplhangh zis kham goeus lhyeh? Namoq Paulo nyings masyah jeisnyhop tsain kham goh lhyeh? 14 Krispu yahge Gai-u mas lai las, ngos namoq hank lyis eq jeisnyhop ma dyei yvmvyah ngos Mangso lhyi nhaiqshoqlang sang. 15 Housoeh yvmvyah namoq gas ngah nyings yah jeisnyhop kham goeus ge hank eq ma yoh tsain taiq. 16 Jyoengh oen lhyi Stephana yahge nyah yhenbang lyis eq ngos jeisnyhop dyei goeus; hauh thoq lyis gohyuk hank lyis dyei shih lah zis ngos ma soh lo. 17 Khasoeh ge lyis Khristu ngos lyis nhang kat zis gas jeisnyhop dyei das xiklyis ma nghuot, gausyis dang taiq kyoh das xiklyis dvnghuot. Khristu dah tapzains dah yomsoq gas vkom ma bweh bas jungh, ngos nhuot joeui yah taiq kyoh zis ma nghuot. 18 Khasoeh ge lyis Khristu tapzains mas shei dah loeus gas, dyoqbis loh bang xiklyis vjyuk ma bos; nghuot laus eq khyuot yoeus xauh bang, yah xiklyis gas hauh zis Mangso dah yomsoq nghuot. 19 Khasoeh ge lyis lhaihtoh dang mas taiq zis gas, Joeui bos bang dah joeui lhyi ngos lhoq thyoq das, Dolhain bang dah seqgyo cho lhyi ngos peq tyamp das, ge. 20 Housoeh las joeui bos bang khalhye nyeis lah? Maussauh lhaih soeu khalhye nyeis lah? Haih mungkvn mas dah dangdat khalhye nyeis lah? Mangso ka haih mungkvn mas dah joeui lhyi vkoh vpaq kuot tyamp dyei ma nghuot lhyeh? 21 Khasoeh ge lyis dius gas vsainnyang joeui yah Mangso lhyi ma yoh seq bas jungh ge, Mangso ka nyah joeui da zis yah dvyhangteh kuot toh goeus. Hauh gungsthaiq ngamoq taiq kyoh dah dang koh paq, lyis lomsjingh bang lyis khyuot yoeus das xiklyis Mangso nghamh thyet goeus. 22 Hauh yvlyis kyink das nyhenshang Yuda jens gas vlho tsain sang lha, Heleni jens gas joeui tsain xo. 23 Nghuot laus eq ngamoq gas, taplhangh toh zis xauh soeu Khristu dah cho tsain taiq kyoh. Hauh zis gas Yuda jens dah xiklyis lainszo gus nghuot, Gohnyau bang xiklyis koh paq bweh nyeis. 24 Nghuot laus eq Mangso khi yoeus zis xauh dah Yuda jens yahge gohnyau bang xiklyis Khristu gas Mangso dah yomsoq yahge Mangso dah joeui nghuot. 25 Khasoeh ge lyis Mangso dah vkoh vpaq cho ka dius dah joeui bos thoq lyis joeui zes bos. Mangso dah yomnhuk zis gas dius dah yombos thoq lyis yom zes bos. 26 Gvshih boekyis eh, namoq lyis khi yoeus cho nghamh wu yoeuh geh. Gungsshoh khyvlyis joeui bos bang nyoshoq bos zis ma nghuot. Toeuh bos bang yahge zau nyau mas bang eq nyoshoq bos zis ma nghuot. 27 Mangso ka joeui bos bang lyis xoq lhoeu phuh das xiklyis mungkvn mas koh bang ge nghamh toh bang lyis khyen yoeus. Yombos bang lyis xoq lhoeu phuh das xiklyis mungkvn mas yomnhuk bang ge suon toh bang lyis khyen yoeus. 28 Mungkvn mas yhaugyen ge nghamh yoeus bang lyis mhont das xiklyis Mangso ka dius ngis gyoh bang, gohyuk yah choqh bang, cha ma nghuot ge nghamh yoeus zis xauh bang lyis khyen yoeus. 29 Hauh vjyuk gas, Mangso xikkhonh mas hank eq ma yoh khwank das xiklyis nghuot. 30 Mangso ka namoq lyis Khristu yah dvdain dvlom bweh nhang goeus las, Mangso ka Khristu lyis, yah dah joeui duot los nhang goeus. Yang nyah gvng mas Mangso xikkhonh mas yoh dan los goeus. Mangso dah gyingshang bang yoh bweh los goeus zis yahge yaunos masyah khyuot kat zis xauh goeus. 31 Housoeh las lhaihtoh dang mas taiq zis yah dvyhangteh, Khwank dais bos soeu hank laus eq Yhensain mha khwank nyeis bas jungh, ge.
1 Boekyis eh, Mangso dah nghop toh jyoeng cho loeus ngos namoq lyis los taiq kyoh uhlyis, dang soenk yah, joeui bos zis yah jweh los zis ma nghuot. 2 Khasoeh ge lyis ngos namoq yah nyeis gyo lyis Yesu Khristu cho, zes las nyang taplhangh zis xauh cho, shei cho mha lai las gohtoeu cho dvnganh tohnyhik toh das oen nghamh thyet toh. 3 Housoeh las ngos namoq jyank mas jweh nyeis uhlyis ngos gas yomnhuk zis yah gyuk nvn zis yah nyeis. 4 Ngos jyauh cho yahge loeus dang lyis dius dah joeui cho lyes dah dang ma yhung, Yoh loms, Mangso Dyos dah muhzoh yahge yomsoq lyis yhung lha dvtaiq kyoh. 5 Housoeh las namoq dah lomsjingh cho ka, dius dah joeui mha ma nges, Mangso dah yomsoq mas nges las goeng joq. 6 Nghuot laus eq ngos gas Dyos lomsjingh cho mha nhaiqbos doengs goeus bang lyis joeui yah taiq kyoh. Nghuot laus eq houka haih mungkvn yah sen dah joeui ma nghuot; mungkvn mas dah dyoqbis tyamp das zau jens dah joeui eq ma nghuot. 7 Nghuot laus eq ngos taiq kyoh dah joeui ka cangsoeu dius ma seq shoq nghop shung toh, Mangso dah noq thank joeui nghuot. Houka mungkvn ma joq shih lyis yah, yang nyoqnho ngelang xauh yoeus das nyhenshang Mangso toh dah nghamh toeuq cho nghuot. 8 Haih mungkvn lyis guon bang hank eq haih joeui lhyi ma seq; Seq ya, phunk bos dah Yhensain lhyi nyamoq ma tsain taplhangh das. 9 Nghuot laus eq lhaihtoh dang mas taiq zis gas, Hank ma nyvng, ma xauhgyo ku cho bweh das ge, hank ma nghamh soh cho lhyi Mangso ka nyang lyis jyetdap bang dah xiklyis sont toh, ge. 10 Mangso ka nyah Dyos cho yah yang lyis nyah dah nghop toh cho lhyi chixoeuq goeus. Hauh Dyos gas vyhang dvnganh lyis kyingh ma nghuot, Mangso dah noq thank nghamh toeuq cho lhyi yangh lap yoeuh nyeis. 11 Dius dvyuk mas bos dah dyos ma nghuot lyis gas, dius yah sen yvlyis hank yoh seq lah? Houyah dvyhangteh Mangso dah Dyos yah ma nghuot lyis gas Mangso nyang yah sen dah cho lhyi hank eq ma yoh seq. 12 Yang gas mungkvn yah sen dah dyos lyis kham yoeus zis ma nghuot. Mangso yang lyis dyei toh dah jyehjuh dvnganh lyis seq bas jungh, Mangso nhang kat dah Dyos lyis tsain kham yoeus. 13 Housoeh yvmvyah Dyos lyis kham yoeus goeus bang lyis Dyos yah sen dah jyoeng cho lhyi taiq kyoh uhlyis ngamoq gas dius dah joeui khyvlyis ma taiq; Dyos yah jyauh dah dang yah dvtaiq. 14 Soenghchoenk dius gas Mangso dah Dyos yah dyei dah jyehjuh jyungshuk lyis ma yoh lhom yoeus. Hauh zis gas nyah xiklyis vkoh vpaq cho nghuot joq; dyos ehnyet yah kyingh hauh cho dah phauhdap zis lyis dvyoh thyet dyei yvmvyah, nyang gas hounyhoq lyis seqgyo zis ma nghuot. 15 Dyos bos soeu ka vyhang dvnganh dah phauhdap cho lhyi soe yoh tuon. Nghuot laus eq nyang lyis gas hank eq soe ma yoh tuon. 16 Lhaihtoh dang mas, Yhensain dah ehnyet lyis hank seq las nyang lyis joeui hank yoh dyei lah, ge taiq toh zis yah dvyhangteh nghuot. Nghuot laus eq yang mas gas Khristu dah ehnyet yoh toh.
1 Boekyis eh, ngos namoq lyis dyos ehnyet bos bang lyis teh ma yoh taiq kyoh. Gungsshoh dius gyingh dvnghuot shih bang yahge Khristu mas lonoeuh jens lyis teh taiq kyoh. 2 Gvshih jweh shoq namoq cicont ma nghuot shih yvmvyah, zos ma tsoh, nauh dvgvmshuk, gvshih yangh namoq cicont ma nghuot shih. 3 Housoeh las namoq gungsshoh gyingh dvtsain nghuot shih khyvlyis tsain nyeis; namoq mas noh cho, dyoqgoh cho bos yvmvyah, houka namoq haih mungkvn yah sen khyvlyis kang dwis nyeis zis nghuot cho kanghjyoeng chixoeuq nyeis ma nghuot lhyeh? 4 Namoq mas dvyuk yuk gas, Ngos gas Paulo thang chank, tsai gohyhamh gas, Ngos gas Apolo thang chank, ge tsain taiq goh lyis, namoq mungkvn dius jens teh kyingh kang dwis nyeis ma nghuot lhyeh? 5 Apolo gas hank nghuot lah? Paulo eq hank nghuot lah? Ngah aiq yuk gas Mangso dah jyeidwis jens tsain nghuot las, ngamoq gvng mas namoq Mangso lhyi yoh lomsjingh los bas jungh oen shwih uhshe dyei bang dvtsain nghuot. Housoeh las yang yuk khanghmuh gas Mangso gvn chixoeuq toh dah muh yoh zwi nyeis. 6 Ngos gas nyau khyoq, Apolo gas jeis sanh las, yuk kuh los nhang soeu ka Mangso nghuot. 7 Housoeh tsungh soeu ka cha ma nghuot, jeis sanh soeu eq cha ma nghuot; yuk kuh los nhang dah Mangso kyingh vgungs dvnghuot. 8 Tsungh soeu yahge jeis sanh soeu dah nghamh toeuq cho dvkoeuq dvnghuot; Mangso ka vsainnyang kuot dah muhzoh lyis tank las phauh shangh das. 9 Khasoeh ge lyis ngamoq gas Mangso dah muh chomp zwi bang nghuot. Namoq gas Mangso dah yos yahge yhenzains yoszains tsain nghuot. 10 Mangso ngos lyis dyei toh dah jyehjuh jyungshuk lyis yhung lha, joeui bos dah soehfuh teh, ngos vpom xi toh goeus. Gohyhamh gas houmha tsoq tsuk nyeis: nghuot laus eq yuk khanghmuh vsainnyang khasoeh tsoq kuot yvlyis zaih nyeis bas jungh. 11 Khasoeh ge lyis Mangso dvlhain xi toh goeus, Yesu Khristu ge dvkoeuq kyingh dah yhen-yos mas gohtoeu vpom yoh xi zis ma nghuot. 12 Hauh yhen-yos mas dvyhamh ngwis, xing, phauhdap luk yhung lha tsoq ci loh. Dvyhamh gas saiq, huhyau, lhyeih yah tsoq kuot. 13 Dvyuk dvyuk dah kank bos muhzoh gas Yhensain Yesu jweh los nyeih lyis thuq los das. Khasoeh ge lyis hauh buisnyeis lyis nyi gas dvyuk yah dvyuk kuot dah muh lyis shi yoeuh las gis cho, ma gis cho lhyi chixoeuq das: 14 Hauh tsoq tsuk yvmas yhung dah vyhang hauh nyi mas yoh luiq nghuot lyis gas hau tsuk soeu ka phauh shangh zis xauh das. 15 Dvyuk yuk dah muhzoh ngeh tyamp nghuot lyis gas, nyang somh tyamp das. Nghuot laus eq nyang gas nyi masyah luiq teh nyah gungs kyingh khyuot yoeus zis xauh das. 16 Namoq gas Mangso dah yhenmuh nghuot las Mangso dah Dyos namoq mas bos yvlyis namoq ma seq goh lhyeh? 17 Dius dvyuk yuk Mangso dah yhenmuh lyis lhoeu thyoq lyis gas, Mangso ka hauh soeu lhyi mhont tyamp das: khasoeh ge lyis Mangso dah yhenmuh gas gyingshang joq: nvng gas hauh yhenmuh nghuot. 18 Hank eq vsainnyang gungs lyis ma mhuih jyomh bas jungh. Namoq dvyuk yuk haih mungkvn vsoenk mas joeui bos ge nghamh soeu ka jyoengh joeui bos soeu bweh das nyhenshang koh soeu bweh bas jungh. 19 Khasoeh ge lyis, haih mungkvn mas dah joeui ka Mangso xikkhonh mas koh zis nghuot. Hau lhaihtoh dang mas taiq zis yah dvyhangteh, Mangso ka hau joeui bos bang lyis nyamoq nyang dah yik cho lhyik mas nyih nhang. 20 Gohtoeu lhaihtoh dang dvkoeuq mas eq, Joeui bos bang dah nghamh yoeuh cho ka vkyuh ma bos yvlyis Yhensain seq, ge bos. 21 Housoeh yvmvyah hank eq dius dah uhshe bang gvng mas khwank ehnyet ma bos bas jungh. Khasoeh ge lyis dvnganh zis gas namoq zis nghuot. 22 Paulo eq Apolo eq, Petru eq, haih mungkvn eq, dwis zis yah shei zis eq, gvshih nyeis zis yahge thang pheh nyeis dyos das zis eq, dvnganh namoq zis nghuot. 23 Namoq gas Khristu dah zis nghuot las Khristu gas Mangso zis nghuot.
1 Ngamoq gas Mangso nghop shung toh dah jyoeng cho lhyi zom bang ge Khristu dah jyeidwis jens nghuot oen namoq suon yoeus gis. 2 Housoeh hauh jyeidwis mas bos chah dah kank bos cho dvja gas, nyang nyah Yhensain lhyi lomluk chah. 3 Gvshih namoq, nghuot ya soetuon jang mas ngos lyis soetuon lhyi, ngos hauh yvlyis chaxwe ma nhang; ngos ngvnyang gungs lyis yangh soe ma tuon. 4 Khasoeh ge lyis ngos sohseq dah ngah ehnyet gas lhoqshang, nghuot laus eq ngos yobos ma bos oen taiq zis ma nghuot: ngos lyis soetuon soeu ka Mangso dvnghuot. 5 Shishenh top ma jweh shih lyis hank lyis eq soe vtuon goh. Thang thank soetuon cho lhyi Yhensain jweh los shoq langh nyeis chah. Nyang gas chuot yvmas nghop shung toh dah vyhang dvnganh lyis eq, dius dah ungkhau mha gauh nghamh toeuq toh cho lhyi chi thuq xoeuq das. Hauh uhlyis hank eq hank mon yih zis yah dvyhangteh Mangso jyank masyah chungh cho xauh das. 6 Boekyis eh, namoq vkyuh xiklyis haih cho mha ngos yahge Apolo dah cho lhyi yikhyoh toh las taiq toh. Heisoeh taiq toh cho ka, Chank chah lyi vpom masyah lai las vkuot, ge dah sangkhyangh dah noq thank vjyuk lyis seqgyo das nyhenshang nghuot. Namoq gas dius dvyuk lyis nghamh kuh las khwank, gohtoeu dvyuk lyis gas ma phauh gis vkuot. 7 Nvng lyis gohyuk thoq mas hank zau nhang lah? Nvng yoh goeu dvnganh nvng lyis Mangso dyei toh ma nghuot lhyeh? Housoeh lyis namoq xauh kham yoeus dah vyhang ka Mangso jyank masyah yoh dah jyehjuh jyungshuk ma nghuot teh namoq khasoeh yoh moengs lah? 8 Gvshih namoq chah ya chah zis dvnganh yoh joq goeus ma nghuot lhyeh? Namoq dis goeus lhyeh? Ngamoq yangh hwankti ma bweh shih lyis namoq hwankti jens bweh joq goeus lhyeh? Gis, namoq hwankti jens bweh lyis ngamoq eq namoq yah dvgeh xauh guon das yvmvyah, ngos namoq hwankti bweh das zis o. 9 Khasoeh ge lyis moeng zan ung lha suh jens xoeuq uhlyis sat zis xauh das bang lyis thang thank mas suh nhang teh, Mangso ka cangsoeu yahge loeuswons bang dah xikkhonh mas chomp yoeuh bas jungh ge, ngamoq lvgyo jens lyis thang thank mas toh, oen ngos nghamh. 10 Khasoeh ge lyis ngamoq gas Khristu gvng mas koh nyeis, namoq gas Khristu mas dvdain dvlom joeui bos bang nghuot. Ngamoq gas yomnhuk, namoq gas yom bos; ngamoq gas dius ngis gyoh las namoq gas nyoqnho ngelang bos bang nghuot. 11 Ngamoq gas gvshih jweh shoq yuot, shet, shohchen, shohthungh shohnyhoq shoeuhshih zis xauh las nyeis gus ma bos dvjoqyos masyah dvjoqyos suh nyeis. 12 Ngamoq nyang dah loq yah tsoeng lha muh tsain zwi zo; ngamoq nhoengh zis xauh lyis shvmanh dyei; shoeuhshih zis xauh lyis ngamoq tsain jhen. 13 Ngamoq ma phauh gis kuot zis xauh lyis dang chau jis; ngamoq gvshih jweh shoq mungkvn gonh dah mhotkhyot yahge dvkhauyah dah mhotkhyot ngamoq bweh nyeis. 14 Ngos namoq lyis xoqphuh nhang das oen haih cho lhaih zis ma nghuot; ngos jyetdap lo jens lyis teh ngos namoq lyis taiq kyingh. 15 Khasoeh ge lyis, namoq dah Khristan kang dwis cho mha namoq lyis jyauh bang dvmons ko bos laus eq, namoq lyis yaus kat uwus dvyuk dvyoh. Ngos gas hau gausyis dang taiq kyoh khyvlyis namoq Khristu yah dvdain dvlom kang dwis cho mha jweh loh nhang, namoq dah uwus bweh los. 16 Housoeh las, ngah yikhyoh chank nyeis geh oen ngos namoq lyis dung kat. 17 Hauh cho gvng mas, Khristan kang dwis cho mha, ngos jyetdap lomluk dah ngah lo Timothi lyis ngos namoq jyank mas nhang kat. Nyang gas joqyos khanghmuh mas dah phung lhyi ngos jyauh teh, Khristu yah dvdain dvlom kang dwis cho vsaiq dah cho lhyi namoq doms soh shoq taiq kyingh das. 18 Ngos namoq jyank mas ma yoh jweh los das teh mus las, namoq dvyhamh khwank nyeis. 19 Yhensain gyo lyis gas ngos namoq jyank mas lvnyap jweh los das. Housoeh khwank bang dah dang lyis kyingh ma nghuot, nyamoq dah yomsoq lyis eq ngos yoh seq das. 20 Khasoeh ge lyis Mangso munghdan gas dang mas bos zis ma nghuot, yomsoq mas dvbos. 21 Ngos namoq jyank mas lvxuk yah los das lah? Nghuot ya jyetdap las noeuh nhamp dyos yah los das lah? Namoq khah zis zes o goh lah?
1 Gvshih Khristan ma nghuot bang yangh ma kuot, gyukphoh dah yauxi zis namoq mas bos cho ngos lyis taiq kyoh bang bos. Dius dvyuk gas nyah uwus dah nyinhungh lyis yoeus, ge dah yauxi cho ngos xauhgyo. 2 Housoeh teh wotwu dyoq nyeis laus eq namoq khwank nyeis shih goh lhyeh? Namoq gas kuk zis yah housoeh yauxi bang lyis namoq phung masyah phe tyamp vvng. 3 Ngos gas gungs namoq yah we joq laus eq, dyos gas namoq jyank mas jweh las namoq yah dvgeh nghuot. Ngos namoq jyank mas jweh nyeis teh, hau gyukphoh ma shop muh kuot soeu lhyi, yah Yhensain Yesu dah nyings yah dang thang thyet goeus. 4 Namoq, yah Yhensain Yesu Khristu dah nyings mas huom nyeis geh. Hauh uhlyis ngah dyos eq namoq yah dvgeh nghuot. Yah Yhensain Yesu Khristu dah yomsoq eq namoq yah dvgeh nghuot. 5 Yhensain dah buisnyeis lyis hauh soeu dah dyos khyuot yoeus zis xauh das xiklyis, hauh soeu dah gungs lyis mhont chah las, namoq hauh soeu lhyi Satan loq mas kyauh tyamp geh. 6 Namoq khwank nyeis das zis gas ma gis. Bicheih dvmhauh gas ohlhyoq jop gonh lyis bi los nhang, ge dah sangkhyangh lyis namoq ma seq goh lhyeh? 7 Namoq shang nyang lhoqshang los das xiklyis bicheih cauh ge dah yaunos lyis yoeus tyamp geh. Hauh uhlyis namoq gas bicheih ma kat dah ohlhyoq saiq teh bweh los das. Namoq housoeh jyoengh yoh kuot yvlyis ngos top seq. Khasoeh ge lyis Khristu ge, yah nyhenshang lhuiq kat dah lomhxangh gas sat zis xauh goeus las, yah dah Lhuiq Kat Pwe kuot das zis cicont nghuot goeus. 8 Housoeh yvmvyah yaunos yahge lhung cho ge dah bicheih cauh bos dah ohlhyoq yah ma nghuot, lhoqshang dah ehnyet yahge jyoeng ge dah bicheih ma bos ohlhyoq yah Lhuiq Kat Pwe kuot goh. 9 Ngos lhaih dah maussauh mas namoq gas wotwu dyoq bang yah ma zomhgoh das xiklyis taiq toh. 10 Housoeh taiq toh yvmas, haih mungkvn mas dah yauxi bang, nyoqnoq obos bang, khauh bang, silho paiq bang yah ma zomhgoh das nyhenshang taiq mes zis ma nghuot. Nyamoq lyis yoh jhank das zis gas namoq haih mungkvn masyah thuq loh lo chah das. 11 Ngos taiq mes zis gas, nyah gungs lyis nyang Khristan vmang vnoeuh nghuot ge toh las wotwu dyoq, nyoqnoq obos, silho paiq, loeusmus khyangh sang, yhei pauhzoe kuot, khauh, houteh soeu yah ma zomh thoq lyis magoh, dvgeh tsung lha ma zomh zo shuk noh oen zis nghuot. 12 Khasoeh ge lyis Khristan ma nghuot dah nghe pheh bang lyis soetuon cho ka ngos yah cha ma sen. nyamoq lyis Mangso soetuon das. 13 Nghuot laus eq namoq gas phung khau mha bang lyis soetuon gis ma nghuot lhyeh? Lhaihtoh dang mas, Namoq vkhau mha ma shop soeu lhyi namoq masyah khat tyamp geh, ge toh.
1 Namoq mas dvyuk yuk soe bos yvlyis Mangso dah dius jens thyet dyei zis kham yoeus das gungsthaiq chamus gohnyau bang soetuon soeu jyank mas womh e lah? 2 Mangso dah dius jens gas mungkvn lyis soetuon das yvlyis namoq ma seq goh lhyeh? Mungkvn lyis soetuon das bang namoq gas soelo dvtsiq dvthang lhyi khvlangh ma yoh tuon goh lhyeh? 3 Ngamoq gas loeuswons bang lyis soetuon das zis namoq ma seq nyeis goh lhyeh? Housoeh las hai nyeisjvng thoq dah cho lhyi soe zes yoh gis tuon ma nghuot lhyeh? 4 Housoeh soe thuq los lyis phung yah cha ma sen, phung mha toeuh ma bos bang lyis soetuon nhang das lhyeh? 5 Namoq xoq bas jungh oen ngos haih cho dvtaiq. Khristan vmang vnoeuh nyang changh soe bos lyis namoq mas soe seq tuon dah joeui bos soeu dvyuk eq ma bos lo lhyeh? 6 Ma lomsjingh bang dah xikkhonh mas yangh Khristan boekyis nyang changh zau kauq goh nyeis nyvng! 7 Gvshih namoq mas dvyuk yah dvyuk kauq goh cho ka Khristan dah somh cho nghuot goeus. Cu cho lhyi jhen tyamp zis gas zes ma gis lhyeh? 8 Hauh gungsthaiq namoq Khristan vmang vnoeuh nyang changh tsain mop zo goh. 9 Lhung bang gas Mangso munghdan dah vso vlho ma xauh kham yoeus das yvlyis namoq ma seq goh lhyeh? Chowhang vwhang goh: yauxi bang eq, silho paiq bang eq, nyi shuot lvng shuot bang eq, yukgis nyang changh zomh bang eq, 10 Khauh bang eq, nyoqnoq obos bang eq, yhei pauhzoe eq, loeusmus bang eq, kyuk tant lhuot zo bang eq, Mangso munghdan vso vlho ma xauh kham yoeus das. 11 Namoq dvyhamh gas hou yhangteh bang nghuot khoq; nghuot laus eq namoq gas yah Yhensain Yesu Khristu dah nyings yah eq, yah Mangso dah Dyos yah eq namoq lyis cheihshang lha Mangso mha kyauh toh bang, Mangso xikkhonh mas dan bang ge zis kham yoeus goeus bang bweh goeus. 12 Namoq mas dvyuk yuk, Ngos gas cha lhyi laus eq kuot das toeuh yoh, ge das. Nghuot laus eq dvnganh gas nah xiklyis gis zis ma nghuot. Ngos dvnganh zis kuot das toeuh yoh oen yoh taiq laus eq, chah cho gvng mas eq ngos lyis hauh jons duot das zis ngos toeuh dyei das zis ma nghuot. 13 Zonoms gas womdau xiklyis, womdau gas zonoms xiklyis nghuot ge namoq taiq das. Houka jus, laus eq Mangso ka hau aiq ja lyis yah dvyih lhoq thyoq das. Gungs gas yauxi das xiklyis ma nghuot, Yhensain lhyi phuqsoe das xiklyis dvnghuot. Yhensain eq gungs xiklyis chah zis dyei nyeis. 14 Mangso ka nyah yomsoq yah Yhensain lhyi dwis toq nhang goeus las, yang lyis eq nyah yomsoq yah dwis toq nhang das. 15 Namoq dah gungs gas Khristu dah gungsdoeus nghuot yvlyis namoq ma seq goh lhyeh? Housoeh nghuot lyis gas Khristu dah gungsdoeus lyis ngos kangh tyamp las nghe nyhiq dah gungsdoeus kuot das lhyeh? Housoeh ma gis bweh. 16 Nghe nyhiq yah tsoq toh soeu ka nyang yah gungs dvgungs kyingh dvnghuot nyeis yvlyis namoq ma seq goh lhyeh? Lhaihtoh dang mas, Nyah aiq yuk gas gungs shoh dvkoeuq kyingh bweh das ge taiq toh. 17 Nghuot laus eq Yhensain mha tsoq soeu ka Dyos khyvlyis gungs dvkoeuq kyingh dvnghuot. 18 Yauxi cho lhyi jhank geh. Dius yah kuot dah yaunos dvnganh gas vsainnyang gungs dah gis cho lhyi ma los yoh zangh. Nghuot laus eq yauxi cho mha yaunos yoh soeu ka nyah gungs lyis nyang shuot nyeis. 19 Namoq dah gungs gas Mangso namoq lyis dyei toh las namoq mas bos Gyingshang Dyos dah yhenmuh nghuot yvlyis namoq ma seq goh lhyeh? Namoq gas namoq nyang gungs lyis yoh sain zis ma nghuot, Yhensain yah dvsain toh. 20 Mangso ka namoq lyis phauh lang yah wis toh goeus yvmvyah namoq dah gungs lyis Mangso dah phunk nyhenshang yhung geh.
1 Gvshih namoq lyis lhaih kat cho yah sen lha taiq das. Vbusbih gas nyi ma yoeus yoh nyeis lyis zes gis. 2 Nghuot laus eq yauxi cho nyo los yvlyis jhank das xiklyis vbusbih khanghmuh nyang yuk nyang toeu yhensain nyhiq yoh gis, vmesbih eq nyang yuk nyang toeu yhensain phoq yoh gis. 3 Yhensain phoq gas lyi yah dvyhangteh yhensain nyhiq yah zomhgoh bas jungh. Yhensain nyhiq eq houyah dvyhangteh yhensain phoq yah zomhgoh las dvyuk yah dvyuk dah chah cho lhyi tyink goh bas jungh. 4 Yhensain nyhiq gas vsainnyang gungs lyis ma yoh sain, yhensain phoq dvsain toh. Yhensain phoq eq vsainnyang gungs lyis ma yoh sain, yhensain nyhiq dvsain toh. 5 Namoq ma yoh zain las Satan yah shiwu zis ma xauh bas jungh, namoq xamxonh zis yah shvmanh dung shishenh masyah lai las namoq zomhgoh cho mha ma jhank noh: hauh shishenh lai goeus ya dvgeh doms nyeis geh. 6 Ngos heisoeh taiq zis gas vmingh dyei khyvlyis ma nghuot, namoq khyamhsa das khyvlyis cho shet zis dvnghuot. 7 Jyoengh oen lyis dius dvnganhmoq ngos teh kuot nhang mes: nghuot laus eq yuk khanghmuh gas Mangso jyank masyah vsainnyang dah jyehjuh jyungshuk tsain xauh yoeus: dius dvyuk gas dvja, gohtoeu dvyuk eq gohtoeu dvja tsain xauh yoeus. 8 Nyiyoeus yhen ma loh shih bang yahge chauhmuh jens lyis ngos taiq zis gas, ngos teh nyeis loh lyis namoq xiklyis gis das. 9 Nghuot laus eq namoq ehnyet lyis ma yoh zain lyis gas nyiyoeus yhenloh bas jungh: khasoeh ge lyis ngeh gywes nyeis das thoq lyis gas nyiyoeus yhenloh zis zes gis. 10 Nyiyoeus yhenloh goeus bang lyis ngos taiq toh bah, houka ngos taiq zis ma nghuot, yhensain taiq zis gas, yhensain nyhiq gas yhensain phoq yah ma gang bas jungh. 11 Gang goh lyis gas, nyang yhen ma doms loh goeus jungh, nghuot ya vkhang dah yhensain phoq yah mehoq tamp las doms dap goh bas jungh. Yhensain phoq eq yhensain nyhiq lyis ma tyamp bas jungh. 12 Yhensain taiq toh dang ma nghuot laus eq, gohyhamh bang lyis ngos taiq zis gas, Khristan yukgis dvyuk gas ma lomsjingh dah yhensain nyhiq yoh laus eq, hauh vmesbih nyang yah nyeis mes lyis gas nyang lyis ma kangh tyamp bas jungh. 13 Houyah dvyhangteh Khristan vmesbih dvyuk ma lomsjingh dah yhensain phoq yoh laus eq hauh vbusbih nyang yah dvgeh nyeis mes lyis gas, hauh vbusbih lyis ma kangh tyamp bas jungh. 14 Khasoeh ge lyis, ma lomsjingh dah yhensain phoq gas lomsjingh dah yhensain nyhiq gvng mas, ma lomsjingh dah yhensain nyhiq eq lomsjingh dah yhensain phoq gvng mas cheihshang dyei zis xauh las Mangso lhom yoeus mon bang yoh bweh los. Housoeh ma nghuot lyis gas namoq dah lo jens ma shang das. Gvshih gas nyamoq Mangso lhom yoeus mon bang bweh los. 15 Nghuot laus eq hau ma lomsjingh dah yhensain phoq, nghuot ya yhensain nyhiq gas gang loh mes lyis gang loh goeus jungh. Housoeh teh cho mha Khristan nghuot dah yhensain phoq, nghuot ya yhensain nyhiq gas khyot khyang yoh kuot las, Mangso ka namoq lyis nyenstap zis yah nyeis das xiklyis khi toh. 16 Khristan vmesbih eh, nvng nah yhensain phoq lyis yoh khyuot yoeus das ma nghuot oen khasoeh yoh taiq lah? Houyah dvyhangteh Khristan vbusbih eh, nvng nah yhensain nyhiq lyis yoh khyuot yoeus das zis ma nghuot oen khasoeh yoh taiq lah? 17 Yuk khanghmuh gas Yhensain nyang lyis gvm dyei toh dah jyehjuh jyungshuk yah dvyhangteh, nyang lyis lui yoeus uhlyis nghuot joq zis yah dvyhangteh kang dwis nyeis bas jungh. Haih zis gas ngos phung khanghmuh lyis jyauh cho nghuot. 18 Vthyoh tyomh soeu ka Mangso khi zis xauh lyis, nyang vthyoh tyomh cho ma tyamp goeus jungh. Vthyoh ma tyomh soeu khi zis xauh lyis nyang vthyoh ma tyomh goeus jungh. 19 Dius dvyuk vthyoh tyomh ma tyomh zis gas cha ma nghuot, Mangso tyingtoh dang lyis chank das zis kyingh vgungs nghuot. 20 Yuk khanghmuh gas Mangso khi zis xauh uhlyis nghuot joq zis yah dvyhangteh housoeh vgus nghuot joq bas jungh. 21 Khi zis xauh uhlyis jons nghuot soeu ka vchiq, nghuot laus eq jons duot mhayah yoh luiq das toeuh yoh das nghuot lyis gas hauh toeuh lyis yoeus aq. 22 Khasoeh ge lyis jons nghuot nyeis uhlyis, Yhensain yah khi zis xauh soeu ka Yhensain lhuiq zis xauh soeu nghuot. Houyah dvyhangteh, luiq soeu nghuot las Khristu yah khi zis xauh soeu ka nyah jons nghuot. 23 Namoq lyis Mangso ka phauh lang gyoh las wis toh goeus yvmvyah dius dah jons vduot goh. 24 Boekyis eh, dvyuk dvyuk gas khi zis xauh yoq lyis yah dvyhangteh, Mangso yah zomh las kang tsoq dwis nyeis goh. 25 Gvshih namoq maussauh yah nyei los, phoengh ma wvng bang cho yah sen lha, Yhensain tyingtoh dang ngos ma yoh, nghuot laus eq Yhensain dah nhaiqnyen jyehjuh gvng mas lomluk soeu dvyuk khyvlyis ngos yoh nghamh suon yoeuh cho lhyi taiq kat. 26 Gvshih yang xauh nyeis dah yaukyenh cho yah dyingh dah zaih gvng mas vbusbih dvyuk gas nyang housoeh nghuot joq zis yah dvyhangteh nyeis lyis zes gis oen ngos nghamh. 27 Nvng yhensain nyhiq yoh goeus lah? Gang goh das cho vxo lo; nyi ma yoeus shih soeu nghuot lyis gas yhensain nyhiq vxo lo. 28 Nghuot laus eq nvng nyihwank lyis, hauh zis yaunos kuot zis ma nghuot; lonyi eq phoengh wvng lyis, nyang yaunos kuot zis ma nghuot; nghuot laus eq nyi yoeus yhen loh bang nyeih yau nyeih thungh phuh xauh kham nyeis dah shanghsenh cho lhyi jhank nhang mes yvmvyah ngos heisoeh taiq zis nghuot. 29 Boekyis eh, ngos taiq mes zis gas heisoeh nghuot. Shishenh nyoshoq ma bos lo: gvshih masyah nyiyoeus goeus bang nyi ma yoeus bang teh nyeis das. 30 Ngaus bang gas ma kuk bang teh, yis bang gas ma pyo bang teh, hu wis bang gas nyamoq dah hu lhyi ma sain bang teh; 31 Mungkvn zisyos yhung nyeis bang gas zisyos sain toh las ma yhung bang teh nghuot los bas jungh: khasoeh ge lyis hai gvshih nyvng nyeis dah mungkvn gas nyangh nyangh joq lo das zis ma nghuot. 32 Ngos gas namoq mas chiqjyen cho ma bos das xiklyis omes nyeis. Yhensain nyhiq ma yoeus soeu ka, hau Yhensain dah muh mas nhaiq wvng zis yah chiq nyeis las Yhensain o khyvlyis kuot mes nyeis. 33 Nghuot laus eq nyiyoeus soeu ka, nyah yhensain nyhiq lyis lhoq pyo dyei mes las mungkvn vyhang lhyi chiq nyeis. 34 Housoeh las nyang gas ehnyet aiq shot lang goh nyeis. Yhen ma loh soeu, nghuot ya lonyi gyingh gas nyah gungs yahge dyos gyingshang bas jungh Yhensain lhyi kyauh mes yvmvyah, Yhensain dah muh mas nhaiq wvng chiq nyeis. Nghuot laus eq yhenloh goeus dah vmesbih gas nyah yhensain phoq lyis lhoq pyo mes las mungkvn vyhang lhyi chiq nyeis. 35 Ngos heisoeh taiq zis gas namoq lyis pangh mes yvmvyah nghuot. Namoq lyis lyi yah zwi zains toh das xiklyis ma nghuot. Namoq lyis jyoeng cho, phi cho jus khyvlyis chank kuot nhang mes thoq lyis magoh Yhensain dah muh mas nyhet toh cho ma bos vlhomuh yoh phuqsoe nhang mes las taiq zis nghuot. 36 Kwank toh thang lhyi nyihwank cho ma kuot das ge nghamh thyet dah vzomh yah sen lha: vbusbih gas Vmesbih thoq mas nyang kuot cho ma doeus ge nghamh nghuot nghuot, nyah ehnyet ma nyens, ma yoh zain las nyihwank chah ge nghamh lyis, nyang nghamh o zis yah dvyhangteh nyah aiq yuk nyihwank cho kuot bas jungh. Nyang yaunos kuot zis ma nghuot. 37 Nghuot laus eq vbusbih gas nyi ma yoeus das ge nghamh thyet zis yah, nyah ehnyet lyis eq vlhomuh yoh joeu las, hauh vmesbih lyis nyi ma hwank nyeis lyis nyang gis khyvlyis kuot goeus. 38 Housoeh vmesbih lyis nyihwank soeu ka gis khyvlyis kuot nyeis. Nghuot laus eq hauh vmesbih lyis ma yoeus yoeus nyeis soeu ka zes gis zis kuot goeus. 39 Yhenloh goeus dah vmesbih gas nyah yhensain phoq dwis nyeis dvchank nyang yah twih goh toh. Nghuot laus eq yhensain phoq shei goeus ya luiq goeus las nyang hank jyank mas loh mes lyis eq yoh loh goeus. Nghuot laus eq Khristan yukgis yah phoengh wvng chah. 40 Nghuot laus eq hauh vmesbih gas yhen ma doms loh lo yoh nyeis lyis gas nyang zes pyo zis yah ngelhoq cho nghuot das. Heika ngos nghamh cho nghuot. Ngos mas eq Mangso dah Dyos bos zis nghuot oen nghamh.
1 Gvshih silho lhyi kyangh dah shoh zos cho yah sen lha namoq lhaih kat cho lhyi taiq das. Yang dvnganhmoq mas seq cho bos, ge nyamoq taiq zis gas jus. Nghuot laus eq housoeh teh seq cho ka dius lyis khwank nhang; nghuot laus eq jyetdap cho ka jebais los nhang. 2 Dius dvyuk yuk gas, Ngos dvja ja seq, ge nghamh lyis gas, nyang seq chah zis yangh jyoengh ma seq shih. 3 Nghuot laus eq Mangso lhyi jyetdap soeu nghuot lyis gas Mangso eq nyang lyis seq. 4 Housoeh las silho lhyi kyangh dah phudyei zonoms yah sen lha taiq lyis, silho ge zis gas dwis nyeis cho ma bos cha ma nghuot yvlyis eq, Dvso kyingh dah Mangso mha lai las gohtoeu ma bos lo yvlyis eq yang seq. 5 Maukhung yahge nyeisjvng mas mangso jens, ge nyhink zis nyoshoq joq las mangso nyoshoq yahge yhensain nyoshoq bos. 6 Nghuot laus eq yah xiklyis gas, Uwus ge dah Mangso dvso kyingh dvnghuot. Nyang gas vyhang dvnganh yvlyis gvnkhanh toh soeu nghuot las yang gas nyah xiklyis kang dwis nyeis. Yesu Khristu ge Yhensain eq dvyuk kyingh dvnghuot las nyah gvng mas dvnganh bweh los, yang eq nyah gvng mas kang dwis nyeis. 7 Nghuot laus eq yuk khanghmuh mas seq gvn dah seq cho bos zis ma nghuot: dius dvyhamh silho lhyi tsain paiq ku los bang nghuot las gvshih jweh shoq hau silho lhyi kyangh dah phudyei zo uhlyis houka silho lhyi kyangh dah zonoms nghuot ge nghamh. Nyamoq dah sohseq ehnyet yomnhuk yvmvyah nyamoq zo dah zonoms gas nyamoq lyis vwot v-oeu bweh nhang ge nghamh. 8 Zonoms gas Mangso yahge yang tsoq goh cho mha zes goeng los nhang zis ma nghuot. Yang ma zo lyis cha ma somh loh, zo lyis eq chah vkyuh ma lung los. 9 Nghuot laus eq namoq heisoeh kyoq toh cho ma bos yoh zo zis gas Mangso lhyi lomsjingh cho mha yomnhuk bang dah lainszo gus ma bweh das xiklyis zaih nyeis geh. 10 Heisoeh teh cho mha, sohseq ehnyet yomnhuk soeu dvyuk, seq cho bos bang namoq silho yhen mha zo tsung toh yvlyis nyvng lyis, silho lhyi kyangh dah phudyei lyis womh zo los bas jungh ge yomdyei cho vbweh das lah? 11 Housoeh las sohseq cho yomnhuk dah nah boekyis xiklyis Khristu shei kham dyei goeus nghuot laus eq nah dah seq cho gvng mas hauh soeu dyoqbis loh das ma nghuot lhyeh? 12 Heisoeh namoq gas namoq dah boekyis lyis shuot las yomnhuk dah sohseq ehnyet lyis dvmtap lyis gas namoq Khristu lyis shuot goeus. 13 Housoeh las zonoms yah ngah boekyis lyis yaunos kuot nhang zis dvbweh das lyis gas, ngah boekyis lyis ma lains nhang das xiklyis ngos khanhamp eq shoh ma zo lo das.
1 Ngos gas luiq soeu ma nghuot lhyeh? Ngos lvgyo dvyuk ma nghuot lhyeh? Ngos yah Yhensain Yesu Khristu lyis nyvng yoeuh goeus ma nghuot lhyeh? Namoq eq ngos Yhensain xiklyis wons wuq dah muh mas dah vshih ma nghuot lhyeh? 2 Gohyhamh bang ngos lyis lvgyo dvyuk lyis teh ma lhom yoeus ma nghuot lhyeh! nghuot laus eq namoq gas lhom yoeus. Khasoeh ge lyis Khristu yah dvdain dvlom bweh las kang tsain dwis nyeis dah namoq nyang ngos lvgyo dvyuk jyoeng cho dah kanghjyoeng kyihau tsain nghuot. 3 Ngos lyis mau dius nghuot cho nyei choq bang lyis ngos phuk taiq dang gas haih zis nghuot. 4 Ngos zwi dah muh nyhenshang ngos mas zo shuk das toeuh ma yoh lhyeh? 5 Gohtoeu lvgyo jens, Yhensain dah vnoeuh moq yahge Petru teh bang dah yikhyoh chank khyvlyis ngos suh yenh uhlyis lomsjingh dah yhensain nyhiq shwih yenh das vmingh ma gis yoh lah? 6 Nghuot ya, ngah aiq yuk Barnaba kyingh ngamoq zo shuk das zis ngamoq nyang muh zwi chah lhyeh? 7 Vsainnyang zokho wons las jes muh hank wons? Zvbiq khyam zwi las hou mhayah ma thyoq zo zis hank bos lah? Yvng nyhoeu lha nauh ma nyhet yhung zis hank bos lah? 8 Haih nyeih yau nyeih bweh dah dangtoeuq lyis taiq kyoh zis yah kyingh ngos taiq mes cho lhyi dye nhang mes zis ma nghuot. Lyi mas eq haih cho taiq nyeis ma nghuot lhyeh? 9 Khasoeh ge lyis Guk nang nyeis noeulu lyis nhuottsungh vtsungh toh dyei, ge Moshe dah lyi mas lhaih toh. Heisoeh taiq yvmas Mangso ka noeujungs lu jens lyis kyingh chiq las taiq nyeis lhyeh? 10 Yah xiklyis jyoengh taiq nyeis ma nghuot lhyeh? Jyoengh yah xiklyis lhaih toh. Danh phuk soeu yahge jyo yhomh soeu ka vsainnyang xauh yoeus vvng dah jyo gvmboms lyis nghamhloms zis yah kuot nyeis. 11 Ngamoq gas namoq mas Dyos jyo khyoq toh las, namoq mas dah nyeisjvng thoq yah sen dah vyhang vkyuh lhyi kham yoeus lyis ngamoq xiklyis dvmsunk cho nghuot lah? 12 Gohyuk namoq masyah xauh yoeus das zis nghamhloms dah toeuh tsain yoh lyis gas, ngamoq zes yoh vvng ma nghuot lhyeh? Nghuot laus eq ngamoq hauh toeuh lyis ma yhung, Khristu dah gausyis dang lyis kyamp gos dah pahkai cho ma bos bas jungh, yau cho dvnganh ngamoq xauh lyis jhen. 13 Yhenmuh mas gyingshang muh zwi bang gas yhenmuh mas zis xauh zo zis eq, Phudyei bang eq phon mha zis gvmboms xauh zo yvlyis namoq seq. 14 Houyah dvyhangteh hau gausyis dang taiq kyoh bang gas hau gausyis dang mas womdau yoh khoeu das ge Yhensain taiq toh. 15 Nghuot laus eq ngos gas haih toeuh dvkoeuq eq ma yhung, ngos haih toeuh dung das oen ngos haih cho lhaih toh zis ma nghuot. Ngos housoeh dung das gungsthaiq ngos shei loh das zis gas zes gis. Ngah khwank cho vnyet vkom bweh das khyvlyis hank lyis eq toeuh dyei das zis ma nghuot. 16 Haih gausyis dang taiq kyoh yvmvyah ngah xiklyis khwank chank ma bos: khasoeh ge lyis ngos gas Mangso taiq toh zis yah dvyhangteh ma taiq ma yoh nyeis. Ngos hau gausyis dang lyis ma taiq kyoh lyis gas, ngos gyukphoh mvtanhzoe nghuot. 17 Housoeh hauh muh lyis ngah ehnyet yah ngos khyen lha kuot nyeis nghuot lyis gas, ngos uhkung phauh yoh das yvlyis yoh nghamhloms nyeis. Nghuot laus eq ngos haih muh lyis Mangso loms las kyauh toh goeus muh nghuot yvmvyah kuot chah dah yvwons s khyvlyis ngos kuot nyeis. 18 Housoeh lyis ngos chah uhkung phauh xauh yoeus das lah? Hau gausyis dang lyis phauh ma yoeus yoh taiq kyoh zis yahge gausyis dang yah sen dah muh xiklyis ngah toeuh lyis ma yhung yhung yoh taiq kyoh zis gas vmyat nghuot. 19 Ngos gas hank jons eq ma nghuot, luiq soeu nghuot. Laus eq dius gis yoh nyhoq yoh das xiklyis dvnganhmoq dah jons duot nyeis. 20 Yuda jens lyis yoh shoq Yuda jens mas Yuda teh, ngos kuot. Ngah gungs Lyi khau mha ma nyeis laus eq, Lyi khau mha bang lyis yoh shoq, Lyi khau mha nyeis soeu teh ngos bweh nyeis. 21 Houyah dvyhangteh, gohnyau bang jyank mas muh wons uhlyis nyamoq lyis yoh shoq ngos Yuda Lyi ma chank, gohnyau bang teh kuot. Heisoeh oen lhyi ngos gas Mangso dah Lyi ma chank soeu nghuot oen taiq mes zis ma nghuot. Jyoengh ngos gas Khristu dah Lyi khau mha nyeis soeu nghuot. 22 Mangso lhyi lomsjingh cho mha yomnhuk bang lyis yoh lhom yoeus shoq yomnhuk bang jyank mas yomnhuk soeu teh ngos bweh nyeis. Housoeh las dvyhamh lyis gis bweh cho dvkoeuq koeuq yah yoh khyuot yoeus shoq, ngos gas dius nyau vja ja mas ngos nyamoq teh bweh nyeis. 23 Ngos haih cho dvnganh chank kuot zis gas Gausyis dang gvng mas shvmanh jyehjuh lyis namoq yah dvgeh xauh kham yoeus das xiklyis nghuot. 24 Wuih khyank goh yvmas, dvnganhmoq wuih laus eq, ung jyungshuk gas dvyuk kyingh dvxauh yvlyis namoq vlhomuh seq. Housoeh namoq ung jyungshuk xauh yoeus shoq wuih khyank nyeis geh. 25 Lhoeu pwe wvng das nyhenshang toeuq yoeuh nyeis bang gas, than dah chank chah Lyi lyis chank kuot. Housoeh kuot zis gas seq dyoqbis dah bankhwank buismuk xauh yoeus das xiklyis nghuot. Yang gas vcaiq vto ma seq dyoqbis dah buismuk xauh yoeus das xiklyis yomkat. 26 Housoeh las ngos gas wuih jweh das toeuqkhom pheh dan dan wuih. Housoeh las ngos gas chwiq goh lyis eq lyeis mas ma chwiq tangh tyamp dah chwiq soeu yah doeusgoh. 27 Gohyhamh bang lyis gausyis dang dye taiq kyoh thang lhyi, ngos gas ngah gungs lyis ma mon ma yih doeuh tyamp zis ma xauh bas jungh oen, ngos ngah gungs lyis yomkat joeu nyeis.
1 Boekyis eh, Moshe shwih dah yah phauh thyeih moq mas cha bweh loh cho namoq lyis doms soh nhang mes. Nyamoq dvnganh gas, jyommauh o mha suh los; Thomh Nes pyo pyo yoh goeu luiq los. 2 Nyamoq dvnganh gas hau jyommauh yahge thomh mas jeisnyhop kham zis yah Moshe dah thang chank bang bweh los. 3 Dvyhangteh dah Dyos wom lyis dvnganhmoq zo las, 4 Dvyhangteh dah Dyos jeis lyis dvnganhmoq shuk; nyamoq mas chank los nyeis dah Dyos lukmuh lom masyah nyamoq shuk; hauh lukmuh lom gas Khristu nghuot. 5 Nghuot laus eq nyamoq mas nyothyang lyis Mangso ma o yvmvyah, nyamoq gas mhanhdyvp mas dvyos dvsanh shei dyuk loh. 6 Gvshih haih cho dvnganh gas nyamoq ma gis zis kuot teh ma gis ma shop dah vyhang lhyi nyoq ma gis noq cho yahge yang lyis nyamoq dvyhamh teh silho ma paiq das cho zaih nhang dah yikhyoh nghuot. 7 Hauh thoq lyis lhaihtoh dang mas, Dius jens gas zo shuk pwe dvkoeuq mas tsung lha tsain zo nyeis lyis houka zo lais shuk lais zis yah toq las gohshot pheh thaiq loh, ge lhaih toh zis yah dvyhangteh namoq gas nyamoq teh silho paiq bang vbweh goh. 8 Nyamoq dvyhamh bang yauxi lha, dvnyeih dvm lyis dius aiq mons somh khyoengh gywis tyamp teh, ma bweh shoq yang gas yauxi lha yobos dap bang ma bweh goh. 9 Nyamoq dvyhamh bang hau Yhensain lhyi shi yoeuh las lhangnyis yah chweh sat zis xauh teh, yang gas Yhensain lhyi ma gis shi yoeuh. 10 Nyamoq dvyhamh bang lop las shei cho dah loeus wons soeu yah mhont zis xauh teh, yang yoh lop das zis ma nghuot. 11 Haih cho dvnganh nyamoq mas bweh los zis gas gohyuk xiklyis yikhyoh bweh das nyhenshang nghuot las yang lyis taiq kyingh zaih nhang das xiklyis lhaih toh. Khasoeh ge lyis yang gas mungkvn caiq thank das shishenh lyis dius lyih tsain duot vvng bang nghuot. 12 Housoeh las dvyuk yuk, Ngos gas goeng goeng yap joq ge nghamh lyis gas, ma lains das xiklyis zaih nyeis bas jungh. 13 Namoq xauh ku dah shiwu cho ka dius jens dvnganhmoq mas xauh ku ja dvnghuot. Nghuot laus eq Mangso ka nyah dangthoengh jyoeng lha namoq lyis namoq ma yoh kham dah shiwu cho xauh nhang zis ma nghuot. Shiwu zis xauh uhlyis yoh kham das yomdyei las shiwu cho masyah yoh loeutyonh thuq los das cho phank dyei das. 14 Housoeh las ngos jyetdap bang eh, silho paiq cho jhank geh. 15 Ngos namoq lyis joeui bos bang lyis teh taiq nyeis: ngos taiq dang lyis nghamh yoeuh geh. 16 Yang gas Mangso dah jyehjuh lyis chungh las ngelhoq kom mha dah zvbiq shuk uhlyis, Khristu dah suih yah zomhgoh nyeis zis ma nghuot lhyeh? Yang ohlhyoq khyiq las hauh yvlyis zo uhlyis Khristu dah gungs yah zomhgoh nyeis zis ma nghuot lhyeh? 17 Khasoeh ge lyis ohlhyoq gas dvkoeuq dvnghuot. Yang hau ohlhyoq lyis chomp khyiq zo yvmvyah yang nyoshoq nghuot laus eq, gungs dvkoeuq dvnghuot. 18 Israel dius jens lyis nghamh yoeuh geh; lomhxangh lainh shoh lyis zo bang gas Mangso dah phon mha nyang yah dvgeh xonh zo bang nghuot, ma nghuot lhyeh! 19 Ngos heisoeh taiq zis gas, Silho nghuot ya silho lhyi lainh dah lomhxangh zonoms gas jyoengh yhaugyen oen taiq mes lhyeh? 20 Ngos housoeh taiq mes zis ma nghuot, gohnyau bang dah phon mha lainh dah lomhxangh gas Mangso lhyi lomhxangh lainh zis ma nghuot, yius jens lyis kyangh nyeis oen taiq mes. Ngos namoq lyis yius jens yah zomhgoh nyeis bang ma mes bweh nhang. 21 Namoq gas Yhensain dah kom mha zis shuk lho lha yius jens dah kom mha yoh doms shuk das zis ma nghuot. Yhensain dah womjus mas zo lho lha yius jens dah womjus mas yoh doms zo das zis ma nghuot. 22 Yang Yhensain lhyi noh nhang mes nyeis lhyeh? Yang gas hau Yhensain thoq lyis yom zes bos oen nghamh lhyeh? 23 Nyamoq gas, Ngamoq cha eq kuot das toeuh yoh, tsain ge. Houka jus, nghuot laus eq dvnganh gas gis zis ma nghuot. Yang dvnganh kuot das toeuh yoh laus eq dvnganh zis yoh thuk yoh pangh zis ma nghuot. 24 Hank eq vsainnyang dah vkyuh lyis ma xo, gohyuk dah vkyuh lyis xo nyeis bas jungh. 25 Sohseq ehnyet gvng mas cha eq ma nyei nyei, kaih mas ungh zis cha eq wis zo geh. 26 Khasoeh ge lyis lhaihtoh dang mas, Nyeisjvng yahge houmha dyingh joq zis dvnganh gas Yhensain yah sen ge taiq. 27 Ma lomsjingh soeu dvyuk yuk namoq lyis khi lha namoq loh mes nghuot lyis, sohseq ehnyet gvng mas cha eq ma nyei choq choq, namoq xikkhonh mas sont dyei zis zo geh. 28 Nghuot laus eq dvyuk yuk yah, Heika silho lhyi kyangh dah zonoms nghuot ge taiq kyoh lyis gas, hau taiq kyoh soeu xiklyis yahge sohseq ehnyet gvng mas vzo goh. 29 Sohseq ehnyet oen yvmas namoq dah ehnyet lyis ma nghuot, gohyuk dah sohseq ehnyet lyis taiq mes zis nghuot. Namoq dvyuk yuk, Ngos yoh kuot dah toeuh lyis gohyuk dah sohseq ehnyet yah dang thang thyet das lah? 30 Dvyuk yuk gas ngos jyehjuh chungh goeus dah zonoms xiklyis ngos chamus loeusmus las yobos xo zis xauh das lah? 31 Housoeh yvmvyah namoq zo laus eq, shuk laus eq, cha kuot laus eq, dvnganh yvmas Mangso dah phunk xiklyis kuot geh. 32 Namoq gas Yuda vnyau jens xiklyis eq, gohnyau bang xiklyis eq, Mangso dah tsainhtoh phung xiklyis eq ehnyet dyet gus vbweh nhang goh. 33 Dius dvnganhmoq khyuot yoeus zis xauh das xiklyis ngos ngah xiklyis gis das cho ma nghamh, dvnganhmoq dah vkyuh lyis xo lha dius jens o shoq kuot. Namoq eq ngos kuot teh chank kuot geh.
1 Ngos gas Khristu dah yikhyoh yoeus teh namoq eq ngah yikhyoh yoeus geh. 2 Namoq gas cho khat khanghmuh mas ngos lyis soh las, ngos namoq lyis hau tyingtoh dang jyauh toh zis yah dvyhangteh tsain chank kuot nyeis yvmvyah ngos namoq lyis chungh. 3 Nghuot laus eq ngos namoq lyis seq nhang mes zis gas, Khristu gas vbusbih khanghmuh dah uhloms nghuot; yhensain phoq gas nyah yhensain nyhiq dah uhloms nghuot; Mangso ka Khristu dah uhloms nghuot cho lhyi ngos namoq lyis seqgyo nhang mes. 4 Vbusbih hank laus eq shvmanh dung, nghuot ya moq phung mha gausyis dang taiq lyis uhloms nghop toh lyis gas, vsainnyang uhloms dah nyoqnho ngelang gyoh nhang nyeis. 5 Vmesbih hank laus eq shvmanh dung, nghuot ya moq phung mha Mangso dah dang taiq uhlyis uhloms ma nghop lyis gas, nyah yhensain phoq dah nyoqnho ngelang gyoh nhang nyeis. Nyang gas uhyuk tyamp dah vmesbih yah cha ma shaih. 6 Vmesbih gas uhloms ma nghop das nghuot lyis gas, cam eq yuk tyamp bas jungh. Nghuot laus eq cam gom tyamp, nghuot ya uhyuk tyamp das zis gas, vmesbih xiklyis xoqphuh cho nghuot lyis gas, nyang uhloms nghop bas jungh. 7 Vbusbih gas Mangso dah gungsdoeus lho yahge phunk nyoqnho dyei soeu nghuot yvmvyah uhloms nghop toh das zis ma doeus. Vmesbih gas vbusbih dah phunk nyoqnho nghuot. 8 Khasoeh ge lyis vbusbih gas vmesbih masyah gvnkhanh toh zis ma nghuot, vmesbih yuk vbusbih masyah dvnghuot. 9 Hauh vbusbih eq vmesbih xiklyis gvnkhanh toh zis ma nghuot, vmesbih lyis gas hauh vbusbih xiklyis gvnkhanh toh. 10 Housoeh yvmvyah loeuswons bang lyis phauh nyang khyvlyis vmesbih gas nyah yhensain phoq dah vmingh o mha nghuot dah vlho chixoeuq das xiklyis uhloms nghop chah. 11 Nghuot laus eq yang Yhensain yah zomh las kang dwis cho mha, vbusbih gas vmesbih ma bos lyis ma gis teh vmesbih eq vbusbih ma bos ma gis. 12 Khasoeh ge lyis, vmesbih gas vbusbih masyah gvnkhanh toh zis yah dvyhangteh, vbusbih gas vmesbih masyah khoeu los. Hauh thoq lyis dvnganh yvlyis bweh los nhang dah Yhensain ka Mangso nyang nghuot. 13 Vmesbih gas uhloms ma nghop Mangso dah moqphung mha shvmanh dung lyis doeus lah, zis vsainnyang nghamh suon yoeuh nyeis geh. 14 Vbusbih gas cam mui lyis nyah xiklyis ngelang gyoh cho nghuot zis gas soenghchoenk lyi mas namoq lyis chixoeuq nyeis ma nghuot lhyeh? 15 Nghuot laus eq vmesbih cam mui zis gas nyah xiklyis yungh cho nghuot: Nyah cam xing ka nyah uhloms lyis nghop zis bweh das nyhenshang dyei toh. 16 Nghuot laus eq dvyuk yuk hauh cho yah sen lha taiq phyen-goh nghuot lyis gas, ngamoq mas eq, Mangso dah phung mha eq, paiq dah huom mha housoeh uhloms nghop dah thungh mas lai las gohtoeu ma bos, oen ngos hauh soeu lhyi taiq das. 17 Namoq paiq das xiklyis zain los dah huom ka vkyuh bos los das xiklyis tsain huom zis ma nghuot. Vkyuh yomh das khyvlyis dvhuom lha o mha taiq toh cho mha ngos namoq lyis ma chungh. 18 Cangxeih vcho ka, namoq dah phung huom mha namoq mas xam ma xonh tyixo goh bang bos cho ngos xauhgyo; hauh zis dvkhamh jus oen ngos jingh. 19 Namoq mas gang lvn loh cho bweh lo das; Hauh uhlyis hank gas jus yvpheh bos ge dah jyoeng cho dede thuq los das. 20 Housoeh las namoq dvgeh huom uhlyis, Yhensain dah nyenhcon zo das xiklyis huom zis ma nghuot. 21 Khasoeh ge lyis namoq zo dah uhlyis, nyang yuk nyang toeu wom nyang yuk nyang toeu zo nyeis. Dvyhamh gas yuot nyeis, dvyhamh gas zvbiq shuk yet nyeis. 22 Zo shuk das xiklyis vsainnyang yhen ma tsain bos goh lhyeh? Nghuot ya Mangso dah tsainhtoh phung lhyi ma phauh ma nyang jwangh las, ma yoh bang lyis xoq lhoq phuh zis nghuot lhyeh? Ngos namoq lyis haih cho yah sen lha khasoeh taiq los das oen nghamhloms nyeis goh lah? Ngos namoq lyis chungh das lah? Jyoengh ma chungh. 23 Khasoeh ge lyis gvshih ngos namoq lyis cheh kyauh toh dah jyauh cho ka Yhensain Mangso mhayah lhom yoeus. Houka Yhensain Yesu gas jeswus loq mas kyauh tyamp zis xauh nyens lyis Yhensain Yesu gas ohlhyoq yoeus las, 24 jyehjuh chungh thang lhyi khyiq las, Haih zis gas namoq xiklyis dyei tyamp dah ngah gungs nghuot, ngos lyis soh nyeis das xiklyis haih zis yoeus zo geh, ge. 25 Houyah dvyhangteh nyenhcon dye zo thang lhyi, nyang kom lhyi eq yoeus las, Haih kom ka ngah suih yah kyihau tap las kuot toh dah thanghchvp vsaiq nghuot. Hauh yvlyis shuk khanghmuh ngos lyis soh das xiklyis haih zis kuot geh, ge. 26 Namoq gas khanhamp laus eq haih ohlhyoq zo las haih kom mha zis shuk khanghmuh hauh Yhensain dah shei kham cho lhyi, nyang doms jweh lyih shoq, kanghjyoeng kat taiq kyoh dyei dah vjyuk nghuot. 27 Housoeh las hank laus eq ma mon ma yih zis yah Yhensain dah ohlhyoq zo las, kom mha zis shuk lyis gas, Yhensain dah gungs yahge suih lyis shuot nyeis. 28 Housoeh yvmvyah hank laus eq vsainnyang gungs lyis nyei wu yoeuh las, hauh ohlhyoq lyis zo las hauh kom mha zis eq shuk bas jungh. 29 Khasoeh ge lyis hau ohlhyoq zo las hau kom mha zis shuk uhlyis hauh Yhensain gungs dah vjyuk lyis ma seqgyo soeu ka vsainnyang dang thang thyet zo khyvlyis zo shuk nyeis. 30 Housoeh yvmvyah namoq mas yomnhuk las ma yanghzan bang nyoshoq nyeis, shei loh bang eq nyoshoq nghuot goeus. 31 Yang yvnyang gungs lyis shih kyink yoeuh lyis gas Mangso dah soetuon zis ma xauh das. 32 Nghuot laus eq yang lyis heisoeh Mangso soetuon lha joeng cho ka yang lyis mungkvn dius jens yah dvgeh dang thang thyet zis ma xauh nhang das xiklyis jyauh cho nghuot. 33 Housoeh las ngah boekyis eh, Yhensain dah nyenhcon zo pwe zo das xiklyis namoq zop huom nyeis lyis gas nyang changh nyang langh goh geh. 34 Housoeh namoq Yhensain dah nyenhcon zo pwe zo das xiklyis zop huom zis gas, Mangso dah soetuon zis xauh das xiklyis ma nghuot goeus jungh, dius dvyuk yuk yuot nyeis lyis gas, yhen mha zo bas jungh. Gohtoeu chah shih cho yah sen lha ngos jweh los lyis tyeh taiq kyoh das.
1 Boekyis eh, namoq maussauh yah nyei los dah Dyos jyungshuk dah cho yah sen lha, hauh dah jyoeng cho ngos namoq lyis seq nhang mes. 2 Namoq gohnyau tsain nghuot shih uhlyis cho vja ja pheh chowhang whang zis yah kang ma bos dah silho jens lyis paiq los zis gas namoq nyang seq. 3 Hank laus eq Mangso Dyos yah shwih zis kham yoeus soeu nghuot lyis gas, Yhensain Yesu lyis ma nhoengh Gyingshang Dyos yah shwih zis ma xauh kham yoeus lyis gas, Yhensain Yesu gas Yhensain nghuot ge hank eq ma yoh rhen cho, ngos namoq lyis seq nhang mes. 4 Gvshih Dyos jyungshuk vja ja bos laus eq, hau jyehjuh jyungshuk lyis Dyos dvkoeuq masyah dyei nyeis. 5 Wons wuq das phuqsoe muhzoh vja ja bos, nghuot laus eq phuqsoe das Yhensain ka dvyuk kyingh dvnghuot. 6 Wons wuq muhzoh xiklyis kank bos cho vja ja nghuot. Nghuot laus eq dvnganhmoq lyis vsainnyang wons wuq phuqsoe dah lhyenwhei muhzoh xiklyis kank bos cho dyei soeu ka Mangso dvso kyingh dvnghuot. 7 Dvnganhmoq xiklyis vkyuh bos bas jungh, dvyuk yah dvyuk mas hau Dyos bos joq cho vja ja khyvlyis chixoeuq nyeis. 8 Khasoeh ge lyis dvyuk yuk lyis hau Dyos gas joeui dang seq taiq das kank bos nhang; gohtoeu dvyuk lyis hau Dyos gas seq cho dah dang yoh taiq das kank bos nhang. 9 Gohtoeu dvyuk lyis hau Dyos gas Mangso lhyi lomsjingh cho kank bos nhang; gohtoeu dvyuk lyis hau Dyos gas nos lhoq gis das jyungshuk yoh nhang. 10 Hau Dyos nyang gohtoeu dvyuk lyis yomsoq muh yoh kuot das kank bos cho dyei; gohtoeu dvyuk lyis lvpe pe nhang, gohtoeu dvyuk lyis Dyos yah dyei dah kank bos cho nghuot ma nghuot seq nghamh gvn yoeuh das jyungshuk, gohtoeu dvyuk lyis nyingh vja ja seq kat nhang, gohtoeu dvyuk lyis taiq dang dah vjyuk seq phant thuq das kank bos cho tsain dyei toh. 11 Nghuot laus eq hauh kank bos cho jyehjuh jyungshuk dvnganh gas, Dyos dvkoeuq kyingh yah bweh nhang lha, nyah ehnyet tap khyvlyis nyang yuk nyang toeu lhyi lhyenwhei kank bos cho gvm dyei toh. 12 Khristu gas gungsdoeus nyoshoq bos dah gungs yah doeusgoh. Hauh gungs dah gungsdoeus nyoshoq nghuot laus eq gungs dvkoeuq kyingh dvnghuot. 13 Houyah dvyhangteh yang dvnganh gas Yuda jens laus eq, gohnyau bang laus eq, jons jens laus eq, luiq bang laus eq Dyos dvkoeuq kyingh mas jeisnyhop tsain kham lha gungsdom dvkoeuq kyingh bweh los. Dvnganhmoq dah ehnyet mas hau Dyos dvkoeuq kyingh lyis kham yoeus. 14 Khasoeh ge lyis gungs mas gungsdoeus dvkoeuq kyingh bos zis ma nghuot, nyoshoq bos. 15 Khyei ka, Ngos loq ma nghuot yvmvyah gungs yah ma sen, ge sang lhyi ka, housoeh taiq gvng mas nyang gungs yah jyoengh ma sen zis ma nghuot. 16 Tsai, no gas, Ngos nyoqjeih ma nghuot yvmvyah gungs yah ma sen, ge sang lhyi ka, housoeh ge gvng mas nyang gungs yah jyoengh ma sen zis ma nghuot. 17 Dvgungs gonh nyoqjeih dvkoeuq dvnghuot lyis gas, xauhgyo das cho khalhye bos lah? Xauhgyo das cho kyingh nghuot lyis eq, xauh nam das cho khalhye bos lah? 18 Gvshih gas Mangso nyang o zis yah dvyhangteh gungsdoeus nyang doeus nyang lyis nyah joqyos yah nyang gungs mas tap toh. 19 Tsai, dvnganh gas gungsdoeus kyingh dvnghuot lyis gas, gungsdom bweh los das zis ma nghuot. 20 Gvshih gas gungsdoeus nyoshoq bos nghuot laus eq, gungs dvkoeuq kyingh dvnghuot. 21 Housoeh las nyoqjeih gas loq lyis, Ngos nvng lyis ma chah, ge ma yoh sang. Uhloms eq khyei aiq khyungh lyis, Ngos namoq lyis ma chah, ge ma yoh sang. 22 Hauh thoq lyis gungs mas yom zes nhuk dah gungsdoeus jens eq ma bos ma gis nghuot. 23 Gungs mas hou iq phauh ma dap teh dah gungsdoeus jens lyis yang zes yhaugyen teh gomh nyeis. Yah dah ma yungh gungsdoeus jens lyis zes las nyoqnho ngelang bos shoq shunk toh. 24 Yungh joq goeus dah gungsdoeus jens lyis gas ma shunk dyei chah lo. Nyoqnho ma yoh dah gungsdoeus jens lyis nyoqnho ngelang zes yoh nhang das xiklyis Mangso nyang hauh gungsdoeus jens lyis dvgeh xonh tap toh. 25 Housoeh las gungs mas gungsdoeus jens nyang changh shaih loh dyos loh zis ma bos, nyang changh nyang chiq goh nyeis. 26 Housoeh gungsdoeus dvkoeuq shohjyen zis xauh lyis, gohtoeu gungsdoeus dvnganh eq houyah dvgeh kham zo nyeis. Gungsdoeus dvkoeuq chungh zis xauh lyis, gohtoeu gungsdoeus dvnganh eq dvgeh gauslaus nyeis. 27 Gvshih namoq dvnganh gas Khristu dah gungs nghuot las, dvyuk yah dvyuk gas hauh gungsdoeus jens nghuot. 28 Mangso ka hauh phung mha, cangxeih joqyos mas lvgyo jens, aiq vjoq mas lvpe jens, somh vjoq mas svra moq, hauh thang lhyi yomsoq muh kuot bang, nos lhoq gis das kank bos jyungshuk yoh bang, gohyuk lyis pangh thuk bang, cho tuonh shet das kank bos bang yahge gohtseq nyingh vja ja seq kat bang lyis nyah joqyos yah nyang toeuq kat toh. 29 Nyamoq dvnganh gas lvgyo nghuot lhyeh? Dvnganhmoq lvpe tsain nghuot lhyeh? Dvnganhmoq svra tsain nghuot lhyeh? Dvnganhmoq yomsoq muh yoh kuot lhyeh? 30 Dvnganhmoq nos lhoq gis dah jyehjuh yoh lhyeh? Dvnganhmoq gohtseq nyingh vja ja kat lhyeh? Dvnganhmoq kat dah nyingh vjyuk phui lhyeh? 31 Housoeh las namoq gas zes thank dah jyehjuh jyungshuk lyis tungh o mes nyeis geh. Tsai, ngos namoq lyis zes thank dah cho dvkoeuq chixoeuq shih das.
1 Ngos gas dius nyingh yahge loeuswons bang nyingh vja ja seq taiq laus eq jyetdap ehnyet ma bos lyis gas, thwe bos dah mangh yahge nyings huomh toh dah janghau teh ngos bweh nyeis. 2 Ngos lvpe seq pe zis yahge, nghop shung toh cho dvnganh, seq cho vja ja yoh joq zis yahge, boms lyis yoh xwih dah lomsjingh ehnyet bos laus eq, jyetdap ehnyet ma bos lyis gas ngos cha eq ma nghuot. 3 Ngos yoh zis dvnganh dyei gvm tyamp las, ngah gungs lyis yangh ngheq phudyei das zis kyauh tyamp laus eq, jyetdap ehnyet ma bos lyis gas ngah xiklyis chah vkyuh ma bos. 4 Jyetdap ehnyet gas ehnyet xing, nhaiqnyen, noh cho ma bos, ma moengs ma khwank. 5 Jyetdap ehnyet gas ma doeus khyvlyis ma kuot, vsainnyang vkyuh ma xo, lvnyap ma nyho, yobos ma xo. 6 Jyetdap ehnyet gas ma dan cho mha ma gauslaus, jyoeng cho mha gauslaus nyeis. 7 Jyetdap ehnyet gas khanhamp eq vsomh ma kham, vjangh lomsjingh nyeis, vjangh nghamhloms nyeis, vjangh jhen nyeis. 8 Jyetdap ehnyet gas khanhamp eq nungsdoms loh zis ma nghuot; lvpe seq pe cho nghuot lyis gas wui loh das; nyingh vja ja seq taiq cho nghuot lyis eq doms tyamp das; seq cho nghuot lyis gas bi tyamp das. 9 Khasoeh ge lyis yah dah seq cho jyehjuh jyungshuk eq, Dyos yah jyuonh dah lvpe dang taiq dah kank bos cho eq dyinghjet zis ma nghuot, vdoeus kyingh dvnghuot. 10 Nghuot laus eq hau dyinghjet zis jweh los goeus ya, vdoeus gas dyuk loh das. 11 Ngos loshang yoq lyis ngos taiq cho, ehnyet mas kham zo cho, nghamh cho dvnganh gas loshang teh nghuot. Nghuot laus eq ngos svyenh nghuot goeus ya, loshang dah wotwu lyis ngos tyamp goeus. 12 Gvshih yang nyvng zis gas bvngtoenk masyah thuq los dah silho lhyi nyvng teh yet yet dvnyvng; hauh thang lyis yang nyoqnho changh nyvng goh das: gvshih ngos seq zis gas dvdoeus dvnghuot; hauh uhlyis Yhensain ngos lyis seq teh ngos eq vlhomuh seq das. 13 Gvshih gas lomsjingh zis, nghamhloms zis yahge jyetdap zis ge somh ja bos: nghuot laus eq hauh goeu mas zes kuh thank zis gas jyetdap ehnyet nghuot.
1 Housoeh yvmvyah namoq gas jyetdap ehnyet lyis yhung das xiklyis yomkat chah. Dyos jyungshuk lyis nghamh omes nyeis geh. Zes las hau Dang lyis seq taiq kyoh dah jyehjuh jyungshuk lyis omes nyeis geh. 2 Khasoeh ge lyis gohtseq nyingh kat soeu ka gohyuk lyis taiq nyeis zis ma nghuot, Mangso lhyi dvtaiq nyeis; Khasoeh ge lyis nyah nyingh hank ma seqgyo dyei, nyang gas Dyos yom lyis yhung lha nghop toh cho lhyi taiq nyeis. 3 Nghuot laus eq Mangso Dang taiq soeu ka dius jens lyis jebais los nhang dang, yomdyei taiq kyingh dang, nhaiqtaink dang taiq kyoh nyeis. 4 Gohtseq nyingh kat soeu ka, vsainnyang lyis jebais nhang; nghuot laus eq Mangso dah dang seq taiq soeu ka hau phung gonh lyis jebais los nhang. 5 Ngos namoq dvnganhmoq lyis gohtseq nyingh seq taiq nhang mes, nghuot laus eq Mangso dah dang yoh taiq kyoh das kank bos cho yah sen dah jyehjuh jyungshuk zes yoh nhang mes: khasoeh ge lyis gohtseq nyingh kat soeu ka nyang taiq dah dang vjyuk lyis taiq phui soeu bos lyis kyingh phung lhyi jebais los nhang. Housoeh ma nghuot lyis gas, Mangso dang taiq kyoh soeu ka gohtseq nyingh kat thoq lyis zes phauhdap. 6 Boekyis eh, gvshih ngos namoq jyank mas jweh las, nyingh vja ja kat laus eq, Mangso jyank mas dah nyoqnyvng dang, seq cho dah dang, Dyos yah jyuonh las taiq dah Mangso dang yahge jyauh dang ma taiq kyoh nghuot lyis gas, namoq xiklyis chah vkyuh bos lah? 7 Toenk nghuot ya khvlhank teh dah kang ma bos dah toenk khvlhank lyis tsain yoeuh goh. Hauh yvmas nyings dah thwe lhyi kyoq kyoq ma yoh lhoq thuq lyis gas, hauh thwe lhyi hank khasoeh yoh gvn yoeus das lah? 8 Lvbuh eq gvn bos khyvlyis ma muot lyis gas, jes toq das khyvlyis hank sont das lah? 9 Houyah dvyhangteh namoq gohtseq nyingh kat yvmas dang vjyuk kyoq kyoq ma nghuot lyis gas hank khasoeh seqgyo das lah? Namoq dah dang gas lyeisdons mas dyuk tyamp das. 10 Mungkvn mas nyingh thwe vja ja bos laus eq, hauh nyingh thwe mha vjyuk ma bos zis dvkoeuq eq ma bos. 11 Nghuot laus eq ngos ma seqgyo dah vnyau nyingh jis soeu ka ngah xiklyis lvbaus nghuot joq las ngos eq nyah xiklyis lvbaus nghuot joq. 12 Namoq gas Dyos jyungshuk lyis nghamh o mes nyeis yvmvyah, hauh phung kuhxing los das xiklyis yoh jebais los nhang dah Dyos jyehjuh jyungshuk lyis zes las yhung nyeis geh. 13 Housoeh las gohtseq nyingh kat soeu ka, nyang taiq dang dah vjyuk eq yoh phant dah kank bos jyehjuh xauh yoeus das nyhenshang nyang shvmanh dung chah. 14 Khasoeh ge lyis ngos nyingh vja ja yah shvmanh dung uhlyis, jyoengh ngah dyos gas shvmanh dung nyeis laus eq ngah ehnyet gas houmha ma bos. 15 Housoeh lyis ngos khasoeh kuot das lah? Ngos dyos yah shvmanh dung las ngah ehnyet yah eq shvmanh dung das: ngos ngah dyos yah chunghthwe kat las, ngah ehnyet yah eq chunghthwe kat das. 16 Namoq gas dyos yah kyingh Mangso dah jyehjuh lyis chungh las shvmanh dung lyis gas paiq huom mha bos dah dius laiq dvyuk gas namoq taiq dang ma seqgyo yvmvyah namoq shvmanh dung dang lyis khasoeh kuot las Amen, ge yoh chank sang das lah? 17 Namoq dah jyehjuh Chungh Dang kha iq gis laus eq gohyuk xiklyis jebais los das cho mha vkyuh bos das zis ma nghuot. 18 Ngos namoq thoq lyis gohtseq nyingh vja ja zes seq kat yvmvyah Mangso lhyi nhaiqshoqlang. 19 Nghuot laus eq ngos paiq huom mha dang taiq nyeis uhlyis gohtseq nyingh yah dang khonh dvmons yoh taiq thoq lyis, gohyuk lyis yoh jyauh shoq seqgyo dah dang oeng khonh lyis dvzes taiq mes. 20 Boekyis eh, namoq nghamh yoeuh cho mha loshang vduot goh; ma shop cho mha lonoeuh dvduot nyeis geh. Nghamh yoeuh cho mha logis kuot geh. 21 Lhaihtoh dang mas, Ngah dius nyau jens lyis gohtseq nyingh kat bang dah nhuot yah lhyo yah ngos taiq das. Gohnyau lvbaus dah nhuot yah ngos taiq das. Housoeh lyis yangh ngah vnyau jens ngah dang gyo das zis ma nghuot, ge Yhensain taiq. 22 Housoeh yvmvyah gohtseq nyingh seq kat dah jyehjuh gas, ma lomsjingh bang xiklyis kanghjyoeng vlho dvnghuot. Mangso dah dang yoh taiq kyoh dah jyehjuh jyungshuk kank bos cho ka lomsjingh bang xiklyis kanghjyoeng vlho nghuot. 23 Housoeh las phung gonh zain los las, dvnganhmoq gohtseq nyingh kat taiq uhlyis, ma seqgyo dah dius laiq, nghuot ya ma lomsjingh bang bos lyis gas, Namoq koh nyeis, ge nyamoq taiq das ma nghuot lhyeh? 24 Nghuot laus eq yuk khanghmuh Mangso dah dang taiq kyoh nyeis lyis, ma lomsjingh soeu nghuot ya dius laiq dvyuk yuk wvng los lyis, nyang xauhgyo dah dang gvng mas, nyang gas yobos wons soeu nghuot yvlyis vlhomuh yoh soh das. 25 Nyang xauhgyo dah dang dvnganh gvng mas nyah ehnyet nhaiqlom soetuon zis xauh zis yah nyah dah nghop shung toh dah nghamh cho thuq los das las nyang gas gop zis yah Mangso lhyi paiq las, Mangso ka namoq yah jyoengh nyeis nyvng, ge rhen das. 26 Housoeh las boekyis eh, ngos taiq mes zis haih zis nghuot. Namoq paiq das xiklyis huom uhlyis, dvyuk gas Chunghthwe kat cho, dvyuk gas jyauh cho, gohtoeu dvyuk gas nyoqnyvng dang phui kyoh cho, gohtoeu dvyuk gas nyingh vja ja yah taiq las, gohtoeu dvyuk gas taiq dang dah vjyuk phui cho wons wuq nyeis geh. Namoq kuot cho dvnganh gas phung lhyi jebais los nhang cho bweh nhang bas jungh. 27 Dvyuk yuk gohtseq nyingh yah taiq das bang bos lyis gas, nyo thank aiq yuk, nghuot ya somh yuk, dvyuk thang lhyi dvyuk taiq las, dvyuk gas hau taiq dang dah vjyuk phant bas jungh. 28 Vjyuk phant soeu ma bos lyis gas, Nyingh vja ja kat mes soeu ka hau tsainhtoh phung mha nyang gas samlo nyeis las nyah gungs nyang yah eq, Mangso yah eq jis goh nyeis bas jungh. 29 Mangso dang taiq kyoh das nyhenshang nyoqnyvng xauh lhom yoeus bang aiq yuk somh yuk taiq las gohyuk gas nyamoq taiq dang lyis suon yoeuh nyeis bas jungh. 30 Nghuot laus eq hauh huom mha tsung toh soeu dvyuk yuk mas Mangso jyank masyah nyoqnyvng dang jweh lyis gas dang taiq nyeis soeu ka no bas jungh. 31 Zophuom yvmas bos bang dvnganh gas xuq cho bos las yom yoh das nyhenshang dvnganhmoq gas dvyuk thang lhyi dvyuk Mangso dang lyis yoh taiq kyoh das. 32 Lvpe nyoqnyvng dang lyis yoh taiq kyoh dah jyehjuh jyungshuk lyis yhung yvmas, taiq kyoh soeu ka vsainnyang gungs lyis joeu chah das. 33 Khasoeh ge lyis Mangso ka vnhunk nhunk dah Mangso ma nghuot. Nyang gas nyenstap ngwis ngon cho dah Mangso dvnghuot. 34 Mangso dius jens dah phung dvnganh mas chank nyeis zis yah dvyhangteh, vmesbih jens gas zophuom yvmas samlo nyeis bas jungh; nyamoq mas dang taiq das toeuh ma bos; Yuda jens dah lyi mas taiq toh zis yah dvyhangteh nyamoq gas uhjyung jens ma yoh bweh. 35 Nyamoq dvja ja dah cho seq mes nyvng mes lyis gas, yhen mha vsainnyang dah yhensain phoq lyis nyei yoeus bas jungh. Huom mha vmesbih xiklyis dang taiq zis gas vxoq vcaiq muh nghuot. 36 Mangso dah dang gas namoq jyank masyah thuq los zis nghuot lhyeh? Nghuot ya hauh dang namoq jyank mas kyingh dvjweh los lhyeh? 37 Dius dvyuk yuk vsainnyang gungs lyis Mangso dah lvgyo nghuot, nghuot ya Dyos yomsoq xauh yoeus soeu nghuot ge nghamh soeu ka, hai ngos lhaih kat cho ka Mangso tying toh zis nghuot yvlyis seq bas jungh. 38 Dvyuk yuk nyang haih cho ma gyo lyis gas, nyah dang lyis eq hank ma gyo bas jungh. 39 Housoeh las boekyis eh, namoq gas Mangso dah dang taiq kyoh das cho mha nghamh o mes nyeis geh: nyingh vja ja taiq das cho lhyi eq vtomp toh goh. 40 Cho khvt khanghmuh mas phi lha jus khyvlyis kuot loh geh.
1 Boekyis eh, ngos namoq lyis taiq kyoh las namoq eq lhom yoeus zis yah hauh yvmas namoq dah lomsjingh cho goeng toenk joq goeus dah hau Gausyis dang cho ngos namoq lyis doms taiq kyingh mes. 2 Hauh gausyis dang gas ngos namoq lyis taiq kyoh ku goeus dang nghuot. Namoq gas hau gausyis dang lyis goeng goeng lomsjingh zwi zains toh lyis namoq khyuot yoeus zis xauh das. Housoeh ma nghuot lyis namoq dah lomsjingh cho ka vkom lomsjingh zis dvnghuot das. 3 Khasoeh ge lyis ngos lhom yoeus goeus dah yhaugyen thank cho lyis ngos namoq lyis kyauh toh goeus. Houka lhaihtoh dang mas lhaih toh zis yah dvyhangteh Khristu gas yah yaunos xiklyis shei kham goeus cho. 4 Nyang nyhop zis xauh las lhaihtoh dang mas taiq zis yah dvyhangteh, somh vnyeih lyis dwis toq loh goeus cho, 5 Petru lyis nyvng xoeuq, hauh thang lhyi nyah changlo jens dvci aiq yuk lyis nyvng xoeuq. 6 Hauh thang lhyi nyah thang mha chank bang boekyis oengxo nyet lyis dvlhain dvm lyis nyvng xoeuq. Nyamoq mas nyothyang ka gvshih jweh shoq kang dwis nyeis shih, dvyhamh gas yhet pyo tyamp goeus. 7 Hauh thang lhyi Yaku lyis, hauh thang lhyi lvgyo jens dvnganhmoq lyis nyvng xoeuq. 8 Thang thank lyis ngos buisnyeis ma dyingh khoeu los dah loshang teh dah soeu jyank mas eq thuq xoeuq. 9 Khasoeh ge lyis ngos gas lvgyo jens mas ngis thank soeu ngos nghuot. Ngos Mangso dah tsainhtoh phung lhyi shoeuhshih yvmvyah lvgyo oen das zis yangh ma mon. 10 Nghuot laus eq Mangso dah jyehjuh gvng mas ngos gas gvshih dah ngos nghuot joq. Mangso ngos lyis dyei dah jyehjuh eq vkom ma nghuot, gohtoeu lvgyo jens dvnganhmoq thoq lyis ngos muh zes wons wuq nyeis. Housoeh yoh kuot zis gas ngos kank bos gvng mas ma nghuot, ngos yah dvgeh nghuot dah Mangso jyehjuh dvnghuot. 11 Housoeh las ngos laus eq, gohtoeu lvgyo jens laus eq hai gausyis dang lyis taiq kyoh las namoq eq lomsjingh goeus. 12 Khristu gas shei masyah dwis toq loh goeus cho ngamoq taiq kyoh nyeis lyis, namoq mas dvyhamh gas, shei yvmas dwis toq cho ma bos oen khasoeh yoh sang lah? 13 Shei masyah dwis toq los zis ma bos lyis gas Khristu eq dwis toq loh das zis ma nghuot. 14 Khristu ma dwis toq loh lyis gas, ngamoq dah taiq kyoh dang gas vkom nghuot las, namoq dah lomsjingh zis eq vkom dvnghuot. 15 Hauh thoq lyis ngamoq gas Mangso cho mha ma ying kanghjyoeng nghuot loh das. Khasoeh ge lyis Mangso ka Khristu lyis dwis toq loh nhang goeus oen lha ngamoq nyah cho kanghjyoeng kat goeus. Nghuot laus eq shei goeus bang jyoengh ma dwis toq lyis gas, Mangso nyang lyis dwis toq kat das zis ma nghuot. 16 Shei goeus bang ma dwis toq lyis gas, Khristu eq dwis toq kat zis ma xauh lo. 17 Khristu ma dwis toq loh lyis gas, namoq dah lomsjingh zis gas loms shuot cho dvkoeuq nghuot zis yah namoq gas namoq dah yaunos mas dvnyop joq shih. 18 Hauh thoq lyis, Khristu lyis lomsjingh las shei loh bang eq somh loh goeus ge dah vjyuk nghuot. 19 Yang haq caiq lyis kyingh Khristu mas nghamhloms chank dvbos lyis gas, yang gas cangsoeu dius dvnganhmoq thoq lyis zes shohjyen xauh bang nghuot. 20 Nghuot laus eq, jyoengh bweh cho ka, Khristu gas shei masyah dwis toq loh goeus las, yhet pyo goeus bang dwis toq das zis pauh toh cho tsain xauh yoeus. 21 Khasoeh ge lyis, dius dvyuk gvng mas shei cho bweh los zis yah dvyhangteh dius dvyuk gvng mas eq shei bang xiklyis dwis toq das cho bweh los goeus. 22 Dius dvnganh gas Adam yah dvdain dvlom nghuot las shei loh. Houyah dvyhangteh, Khristu yah dvdain dvlom tsain nghuot yvmvyah dvnganh gas shei masyah Khristu mas dwis toq los das. 23 Nghuot laus eq yuk khanghmuh nyang yuk nyang toeu vvng khyvlyis dwis toq los das. Khristu gas cangxeih dwis toq loh. Hauh thang lhyi Khristu doms jweh lyih uhlyis, nyang yah sen bang dwis toq los das. 24 Hauh thang lhyi thang thank shishenh jweh los das, hauh uhlyis Khristu gas zau nyeis dah dyos sidyos, toeuh yoh bang, yomsoq dvnganh lyis ung tyamp las hau munghdan lyis Uwus Mangso dah loq mas kyauh das. 25 Khasoeh ge lyis Khristu gas Mangso yah gomloeus jens dvnganh lyis ung tyamp las Khristu dah khyei o mha toh das shishenh jweh shoq guon nyeis das. 26 Thang thank dah jeswus ge dah shei cho ka mhont zis xauh das. 27 Lhaihtoh dang mas, Mangso ka vyhang dvnganh yvlyis nyah khyei o mha toh, ge. Vyhang dvnganh ge yvmas Mangso nyang houmha ma bos zis gas bvng bvng nghuot. Khasoeh ge lyis vyhang dvnganh Khristu dah khyei o mha toh dah Yhensain ka Mangso nyang nghuot. 28 Nghuot laus eq dvnganh yvlyis Khristu guon dah o mha dye toh lyis, hauh Lo nyang vyhang dvnganh yvlyis Uwus Mangso dah o mha toh das las, Mangso ka joq zis dvnganh thoq mas nyang guon nyeis das. 29 Shei goeus bang dah nyhenshang nyamoq dah gungsthaiq khyvlyis jeisnyhop kham bang dah cho ka khasoeh gah? Chah vkyuh bweh nhang mes dah nghamhloms zis yah kuot lah? Dvyhamh bang nghamh zis yah dvyhangteh, shei goeus bang dwis toq das cho ma bos cho jyoeng nghuot lyis gas, shei goeus bang xiklyis ge chamus dius jens jeisnyhop tsain kham lah? 30 Ngamoq eq chamus shishenh khanghmuh gyuk chiqh cho mha shei ma soh chank kuot nyeis lah? 31 Boekyis eh, ngos gas nyeih yau nyeih shei cho yah thungh phuh nyeis. Ngos heisoeh yoh taiq zis gas Yhensain mha namoq gvng mas ngos khwank chank bos yvmvyah nghuot. 32 Ngos dius dah ehnyet khyvlyis mungkvn vkyuh lyis nghamhloms zis yah, Ephesu wus mas dah yewus yah sat goh lyis gas ngah xiklyis chah vkyuh bos lah? Shei goeus bang ma dwis toq los das lyis gas dius jens gyangh taiq dang: Yang zo goh, shuk goh, pyo pyo nyeis goh: khasoeh ge lyis yang phvnaq nyeihyo shei das, ge teh dvnghuot das. 33 Namoq chowhang vwhang goh: ma gis dah dyenschangh jens gas gis dah wotwu lyis lhoeu thyoq. 34 Dan cho chank das zis soh geh, yaunos vtsoq kuot goh: namoq dvyhamh Mangso lhyi ma seq: namoq xoq bas jungh oen ngos heisoeh taiq. 35 Shei goeus bang khasoeh yoh dwis toq das lah? Khasoeh teh gungs nghuot das lah, ge dvyuk yuk nyei das. 36 Houka koh soeu dah nyeidang nghuot, nvng nyeisjvng mas jyo nyau dvchvp xoh lyis, hauh jyo nyau shih ma shei tyamp lyis gas yoh yuk los zis ma nghuot. 37 Nvng tsoh mas xoh dah jyo nyau gas gukchvp, nghuot ya gohtoeu vnyau dvja ja dvnghuot. Yuk los dah gungs gas nvng xoh dah vjeih ma nghuot lo. 38 Mangso ka nyang o zis yah dvyhangteh, hauh jyo nyau lyis gungs vsaiq dyei toh. Yhensain ka jyo nyau khanghmuh lyis vsainnyang yah phi dah gungs tsain dyei toh. 39 Kang dwis nyeis dah gungs shoh bos ya bos zis gas dvja kyingh ma nghuot: dius dah gungs shoh dvja, gaunyhauq dah gungs shoh dvja, nghoq dah gungs shoh dvja, oengdoq dah gungs shoh dvja dvnghuot. 40 Maukhung yah sen dah gungs, nyeisjvng mas zis yah sen dah gungs ge gohtoeu toeu bos. maukhung gungs yah sen dah phunk gas, nyeisjvng yah sen dah gungs dah phunk yah shaih joq. 41 Buis eq nyah phunk yoh, lhamhmuh eq nyah phunk, kyi eq nyang gohphunk yoh, kyi mha yangh dvlom yah dvlom bvng zis gohtoeu toeu dvnghuot. 42 Shei goeus bang dwis toq das cho eq housoeh nghuot. Hauh gungs gas tsoh mas nyhop lyis seq dyoqbis loh. Dwis toq los lyis ma seq dyoqbis zis nghuot das. 43 Nyhop zis xauh uhlyis ma yungh, yom ma bos. Dwis toq los uhlyis houka yungh las yomsoq bos das. 44 Nyhop uhlyis nyeisjvng gungs dvnghuot, dwis toq los uhlyis gas dyos gungs nghuot das. Nyeisjvng gungs bos lyis gas dyos gungs eq bos das. 45 Lhaihtoh dang mas taiq zis yah dvyhangteh, cangxeih dius Adam gas kang dwis dah cangsoeu dius khyvlyis gvnkhanh toh zis xauh goeus. Nghuot laus eq thang thank Adam gas kang bos dah dyos nghuot. 46 Dyos gungs shih bos zis ma nghuot, nyeisjvng gungs bos thang lhyi dyos yah sen dah gungs doms bos. 47 Cangxeih Adam gas tsoh yah gvnkhanh toh las nyeisjvng mas zis nghuot. Thang lhyi dah Adam gas maukhung mhayah jweh los soeu nghuot. 48 Nyeisjvng thoq yah sen dah dius jens gas tsohmop yah gvnkhanh zis xauh soeu yah tsain doeusgoh. Maukhung yah sen bang gas maukhung mhayah jweh los dah dius yuk yah tsain doeusgoh. 49 Tsohmop yah kuot toh dah dius yuk yah doeusgoh dah gungsdoeus lho lhyi yang chi toh zis yah dvyhangteh, maukhung mhayah jweh los dah dius yah doeusgoh dah gungs doeus lho lhyi eq yang tsain chi toh das. 50 Boekyis eh, ngos namoq lyis taiq mes zis gas, suih yah shoh yah nghuot dah dius gas Mangso munghdan dah vso vlho ma yoh zom das zis yahge seq dyoqbis zis gas ma seq dyoqbis dah vso vlho lhyi xauh zom das zis ma nghuot. 51 Gyo geh, nghop toh dah jyoeng cho dvkoeuq ngos namoq lyis taiq kyoh bah: yang dvnganh gas shei loh das zis ma nghuot. Nghuot laus eq thang thank dah lvbuh nyings lyis, yang dvnganh gas nyet los nyet tant nyoq dvnyik gyo lyis thaiq loh das. Khasoeh ge lyis hauh lvbuh muot kat uhlyis shei goeus bang gas ma dyoq ma bis dwis toq los das zis yahge khanhamp eq doms shei das zis ma nghuot lo. Yang dvnganh thaiq loh das. 53 Khasoeh ge lyis hau seq dyoqbis zis gas ma seq dyoqbis yvpheh thaiq loh das; hai seq shei zis eq ma seq shei yvpheh thaiq loh das. 54 Housoeh las hai seq dyoqbis zis gas ma seq dyoqbis zis lyis eq seq shei zis gas ma seq shei yvlyis eq thaiq wuot goeus ya, Shei zis gas Ung zis yah nyhau tyamp zis xauh goeus, Shei zis lyis Ung zis yah nhiq zaiq cho dye goeus, ge lhaihtoh dang nyuk los. 55 Shei zis eh, nah nyen khalhye gah? Shei zis eh, nah ung zis khalhye gah? 56 Shei cho ka nyah nyen yaunos masyah xauh yoeus. Yaunos gas nyah yomsoq lyis Lyi masyah xauh yoeus. 57 Nghuot laus eq Yhensain Yesu gvng mas yang lyis ung cho dyei dah Mangso jyehjuh gas kuh joq. 58 Housoeh yvmvyah, ngos jyetdap boekyis eh, namoq goeng goeng yap geh. Yhensain Mangso dah muh wons wuq nyeis cho ka khanhamp eq vkom ma nghuot yvlyis soh zis yah hau Yhensain dah muhzoh mas vjangh tungh yomkat wons wuq nyeis geh.
1 Yuda mau mas Mangso dah dius jens lyis pangh das nyhenshang vlu ngwis yung das xiklyis namoq lhaih nyei los zis yah sen lha, ngos Galati mau mas dah phung jens lyis tying kat yhangteh namoq kuot geh. 2 Ngos jweh los lyis khywi cho ma kuot chah lo bas jungh, daus khanghmuh dah cangxeih vnyeih lyis, nyang yuk nyang toeu lhyi Mangso nyeisgis yaplhoq nhang zis yah dvyhangteh vsainnyang dah vlu lyis yung toh langh geh. 3 Ngos jweh los lyis, namoq tying kat, huon maussauh lhaih las namoq khyen toeuq toh bang lyis hau vlu ngwis Yerusalem mas ngos loh dih kat nhang das. 4 Ngah nyhenshang vkyuh bos das teh bweh las ngos eq loh doeus geh lyis gas, nyamoq ngos yah dvgeh loh bas jungh. 5 Ngos Makedoni mau cho suh lai las namoq jyank mas jweh los das: khasoeh oen lhyi, ngos Makedoni mau cho suh lai loh chah. 6 Ngos namoq yah dvyoq nyangh shoq xauh nyeis mvbeh oen nghamh. Hauh thang lhyi khapheh nghuot laus eq ngos gyung tsoq suh loh das nyhenshang namoq ngos lyis yoh pangh kat das oen nghamhloms. 7 Ngos namoq jyank cho yah suh lai uhjyangh dvsoq dvno khyvlyis ma mes kuot. Mangso dah ehnyet nghuot lyis gas ngos namoq yah dvgeh dvyoq xauh nyeis das oen nghamhloms nyeis. 8 Pentekoti pwe jweh shoq ngos Ephesu wus mas nyeis shih das. 9 Vkyuh bos dah muhzains wons wuq das toeuh gis ngah xiklyis joq. Nghuot laus eq ngos lyis tyixo dah jeswus nyoshoq eq nyeis. 10 Namoq jyank mas Timothi jweh los nghuot lyis, nyang mas chiqh cho gyuk cho ma bos, namoq yah dvgeh yoh nyeis bas jungh, nyang lyis gaus gaus yis yis lhom yoeus langh geh. Khasoeh ge lyis nyang gas ngos yah dvyhangteh Yhensain dah muhzoh lyis wons wuq nyeis soeu nghuot. 11 Hank eq nyang lyis dius ma phauh ma nyang ma kuot bas jungh. Nyah gyung cho lhyi pyo pyo yoh tsoq loh bas jungh, nyang lyis namoq pangh kat chah. Housoeh Khristan boekyis yah dvgeh ngah jyank mas doms los das oen ngos nghamhloms las langh nyeis. 12 Gvshih boek Apolo cho yah sen lha taiq lyis, gohtoeu boekyis yah dvgeh nyang namoq jyank mas los kwang das nyhenshang ngos nyang lyis dvsoq soq lyis yom e dyei goeus. Nghuot laus eq nyang gvshih shishenh lyis loh das zis nyang dvtsiq eq ma nghamh thyet. Gis bweh shishenh jweh lyis nyang loh das. 13 Namoq zungh nyeis geh, lomsjingh cho mha goeng goeng yap las womh womh kuot geh, yangh yangh kuot geh. 14 Namoq kuot muh dvnganh zis gas jyetdap ehnyet yah kuot nyeis geh. 15 Namoq Stephana yahge nyah yhenbang dah cho seq. Nyamoq gas Akhaia mau mas cangxeih Khristan bweh bang nghuot las, Mangso dah dius jens lyis phuqsoe das xiklyis nyamoq gungs lyis kyauh toh bang nghuot. 16 Boekyis eh, namoq gas housoeh teh bang shwih cho lhyi eq, nyamoq yah dvgeh pangh thuk zis yah muh wons wuq phuqsoe nyeis bang shwih cho lhyi eq lhom yoeus las chank das xiklyis ngos namoq lyis dung. 17 Stephana, Fortunatu yahge Akhaiku moq jweh los yvmvyah ngos gaus. Nyamoq gas namoq dah gungsthaiq ngos lyis phuqsoe. 18 Nyamoq gas namoq dah ehnyet lyis pyo nhang teh ngah ehnyet lyis eq pyo nhang goeus. Housoeh teh bang gas chungh zis kham mon bang nghuot. 19 Asia mau mas dah tsainhtoh phung ka namoq lyis jeshuh kat. Akula yahge Priska vzomh yah dvgeh nyamoq yhen mha zop paiq dah phung mha bang eq, namoq lyis Khristan jyetdap ehnyet yah svsoh tsain jeshuh kat. 20 Heimha nyeis dah Khristan boekyis dvnganh namoq lyis jeshuh kat. Namoq nyang changh nyang gyingshang dah bvlot tanh zis yah jeshuh goh geh. 21 Ngos Paulo dah jeshuh dang lyis ngvnyang loq yah lhaih kat. 22 Dvyuk yuk hauh Yhensain lhyi ma jyetdap nghuot lyis gas, nyang nhoengh zis xauh bas jungh. Hauh Yhensain jweh los bas jungh. 23 Yhensain Yesu dah jyehjuh gas namoq yah dvgeh nghuot bas jungh. 24 Ngah jyetdap ehnyet gas, Khristu Yesu mas namoq dvnganhmoq yah dvgeh nghuot bas jungh.
1 Mangso dah ehnyet yah dvyhangteh, Khristu Yesu dah lvgyo ngos Paulo yahge vmang vnoeuh Timothi gas — Korinthu wus mas Mangso dah tsainhtoh phung yahge Akhaia mau gonh mas dah gyingshang bang dvnganhmoq lyis jeshuh kat. 2 Yah Uwus Mangso yahge Yhensain Yesu Khristu gas jyehjuh yahge nyenstap cho namoq lyis dyei bas jungh. 3 Nhaiq seq nyen dah Uwus yahge pangh cho vja ja dah Mangso, yah Yhensain Yesu Khristu dah Uwus Mangso lhyi nhaiqshoqlang chungh goh. 4 Yang yaukyenh shanghsenh vja ja xauh uhlyis Mangso yang lyis pangh goeus. Housoeh las yang gas Mangso jyank masyah kham yoeus dah nhaiqtaink jyehjuh yah gohtoeu yaukyenh shanghsenh vja ja xauh nyeis bang lyis doms yoh pangh. 5 Yang gas Khristu khamzo dah shanghsenh nyoshoq lyis bos gvm kham zis yah dvyhangteh, Khristu mas Mangso dyei dah pangh cho jyehjuh zainsmuh lyis eq bos gvm kham yoeus nyeis. 6 Housoeh las ngamoq shanghsenh zis xauh lyis, houka namoq xiklyis nhaiqtaink jyehjuh yahge khyuot yoeus cho xauh yoeus das nyhenshang nghuot. Ngamoq nhaiqtaink jyehjuh xauh kham yoeus lyis gas, namoq eq ngamoq yah dvyhangteh hauh jyehjuh lyis xauh kham yoeus las ngamoq jhen dah shanghsenh yvlyis namoq ehnyet xing xing yah yoh jhen das yom xauh yoeus. 7 Ngamoq shanghsenh yvmas namoq bos zis yah dvyhangteh, ngamoq kham yoeus dah nhaiqtaink jyehjuh lyis eq namoq xauh kham yoeus nyeis yvmvyah, namoq mas ngamoq dah nghamhloms cho ma lop ma loeh goeng joq yvlyis ngamoq seq. 8 Boekyis eh, Asia mau mas ngamoq xauh goeus dah shanghsenh cho namoq lyis doms taiq kyingh mes. Ngamoq lyis nhiq dah shanghsenh ge dah yvwons s gas kuh las svsoh lyei yvmvyah ngamoq gas kang dwis das zis yangh ma nghamhloms lo shoq nghuot. 9 Ngamoq gas shei das yobos dang thang thyet zis xauh bang nghuot oen vsainnyang gungs lyis nghamh goeus. Nghuot laus eq heisoeh bweh cho ka ngamoq gas vsainnyang gungs lyis ma nges, shei goeus bang lyis dwis toq nhang dah Mangso lhyi nges das xiklyis nghuot. 10 Nyang gas housoeh teh gyukphoh shei cho mhayah ngamoq lyis lhuiq kat goeus las lhuiq kat shih das. Namoq eq namoq dah vkyuh dung zis yah ngamoq lyis pangh nyeis yvmvyah nyang gas ngamoq lyis khyuot lhuiq kat shih das oen nghamhloms zis yah langh nyeis. Housoeh yvmvyah Mangso dah dius jens nyoshoq ngamoq xiklyis shvmanh dung dang lyis gyo dyei las ngamoq lyis shvmanh dyei das. Housoeh dius nyoshoq gas nyamoq dah thwe kat las ngamoq xiklyis Mangso lhyi nhaiqshoqlang ge tsain chungh das. 12 Ngamoq ehnyet mha khwank das cho dvkoeuq bos. Houka haih mungkvn mas ngamoq kang dwis cho, zes las namoq yah zomh tsoq goh cho mha dius dah seq cho mha ma nges, Mangso dah jyehjuh yomsoq yah ngamoq gas Mangso dyei dah jyoeng lha lhoqshang dah ehnyet yah guon khyvlyis chank las muh wons wuq cho nghuot. 13 Gvshih ngamoq lhaih huon dah maussauh mas namoq nghap las seqgyo das cho kyingh dvlhaih kat. Nghuot laus eq gvshih namoq ngamoq taiq yvlyis dvkhamh dvseqgyo laus eq thang pheh namoq ngamoq taiq yvlyis dyinghjet shoq seqgyo das nyhenshang ngos nghamhloms. Housoeh Yhensain Yesu dah buisnyeis lyis ngamoq gas namoq gvng mas yoh khwank teh namoq eq ngamoq gvng mas yoh khwank das. 15 Haih cho jens lyis nghamhnywe zis yah namoq gas aiq vlhain jyehjuh xauh yoeus bas jungh, namoq jyank mas shih los jweh das oen nghamhtoeuq toh. 16 Khasoeh ge lyis ngos Makedoni mau pheh loh uhjyangh eq, hou mhayah tauh los uhlyis eq namoq jyank mas wvng las Yuda mau pheh loh das gyung cho xiklyis namoq jyank masyah pangh cho yoh bas jungh oen nghamh. 17 Gvshih ngos housoeh nghamh toeuq yvmas ngos gas phanh ehnyet bos soeu nghuot cho chixoeuq nyeis lhyeh? Ngos nghamh toeuq cho lhyi ngos nghamh thyet loh uhlyis vsainnyang vkyuh dvxo dah cvvq ehnyet yah kuot loh lhyeh? Dvshishenh lyis, Nghuot goeus ge las eq ma nghuot lo ge las eq aiq ja taiq nyeis lhyeh? 18 Jyoengh Mangso ka jyoeng yvlyis taiq nyeis zis yah dvyhangteh ngos ngamoq lyis dyei dah dangthoengh eq nghuot zis yahge ma nghuot lhoeuq dah dang aiq ja ma nghuot. 19 Khasoeh ge lyis ngos, Sila yahge Timothi taiq kyoh goeus Mangso dah Lo Yesu Khristu gas, Nghuot yahge ma nghuot mvlhuk lvjus soeu ma nghuot. Jyoengh oen lhyi nyang gas Mangso nhaiqdoeus cho lhyi, Nghuot ge taiq dah Yhensain nghuot. 20 Nyang mas Mangso dah dangthoengh dvnganh, Nghuot, ge dah phuk dang nghuot. Housoeh las ngamoq gas Mangso dah phunk hoeuh das xiklyis Yesu Khristu mas Amen oen sang. 21 Namoq yahge ngamoq dvgeh Khristu mas dvdain dvlom kang dwis nhang soeu ka, Mangso nyang nghuot. 22 Mangso nyang yang lyis lhyenwhei khyen yoeus zis yah nyah dius nyau nghuot cho kyihau tap las, jweh los das shishenh lyis yang kham yoeus das jyehjuh dvnganh xiklyis pauh toh khyvlyis yah nhaiqlom khau mha hau Gyingshang Dyos huot kat dyei toh goeus. 23 Ngos Korinthu pheh ma doms loh lo das oen nghamh thyet zis gas namoq lyis sunghhuq nhang mes las nghuot cho ngah ehnyet lyis seq dyei dah Mangso ka ngah kanghjyoeng nghuot goeus. 24 Ngamoq namoq lyis, cha lhyi lomsjingh chah oen ma taiq, namoq gas hau lomsjingh cho mha goeng goeng yap joq yvlyis ngamoq seq. Ngamoq gas namoq dah gausyis pyo ngon cho xiklyis namoq yah dvgeh muh dvwons wuq nyeis.
1 Housoeh namoq nhaiqkuk cho dvlhain ma doms bweh bas jungh, ngos namoq jyank pheh ma doms los das oen nghamh thyet goeus. 2 Khasoeh ge lyis, ngos namoq lyis nhaiq lhoq ngis lyis gas, ngos lyis gaus nhang soeu ka hank nghuot lo das lah? Ngos nhaiq lhoq ngis goeus bang namoq kyingh dvnghuot das. 3 Ngos lyis gaus nhang das bang nyang ngos lyis ehnyet ma pyo cho ma bweh nhang bas jungh, ngos namoq jyank mas ma mes los lo. Housoeh las ngos haih maussauh lyis lhaih kat. Khasoeh ge lyis ngos gaus lyis namoq dvnganh eq gaus das yvlyis loms. 4 Ngos gas yaukyenh shanghsenh, ehnyet nyo las nyoqdyeis nyoshoq yah hauh maussauh lyis lhaih kat goeus. Ngos nghamh toeuq cho ka namoq lyis nhaiq lhoq ngis das xiklyis ma nghuot. Ngos namoq lyis kha iq jyetdap nyeis cho seq nhang mes las lhaih kat. 5 Gvshih dvyuk yuk yah dius dvyuk yuk lyis nhaiqkuk nhang lhyi ka, ngos lyis ma nghuot, dvcho khyvlyis taiq lyis gas namoq dvnganh lyis nhaiqkuk nhang zis nghuot. Ngos heisoeh taiq zis gas hauh soeu thoq mas dvmsunk khyvlyis ma mes kuot yvmvyah taiq zis nghuot. 6 Namoq nyothyang yah yobos huon jyauh mhoq dvm dyei zis gas hauh soeu xiklyis geh joq. 7 Hauh soeu ka ma yoh zain shoq dah nhaiqkuk yvmas ma nyop loh bas jungh, nyang lyis namoq yobos khyuot dyei las nhaiq doms taink nyeis geh. 8 Housoeh las namoq gas nyang lyis jyoengh jyetdap nyeis cho nyang seqgyo shoq kuot das xiklyis ngos namoq lyis dung. 9 Xikpheh ngos namoq jyank mas maussauh lhaih kat cho ka, shi yoeuh yvlyis namoq kha iq yoh kham cho yahge ngos taiq shet toh cho lhyi domsyos gyo las chank kuot das xiklyis cicont nghuot nyeis lah, ge yvlyis seq das nyhenshang nghuot. 10 Namoq gas, dvyuk yuk nyang cu yvlyis khyuot dyei lyis gas, ngos eq bos khyuot dyei. Khasoeh ge lyis ngos dvyuk yuk lyis yobos khyuot dyei chah los lyis, ngos gas namoq dah nyoqnho lhyi yoeuh las Khristu xikkhonh mas nyah yobos khyuot dyei. 11 Ngos heisoeh kuot zis gas Satan shih yang lyis ma ung tyamp bas jungh joeui yah kuot zis nghuot. Khasoeh ge lyis, Satan dah joeui da cho lhyi yang seq. 12 Khristu dah gausyis dang taiq kyoh das xiklyis ngos Troa wus mas jweh lyis hauh joqyos mas ngos muh yoh wons wuq bas jungh Yhensain ngah xiklyis khomh phank toh dyei. 13 Nghuot laus eq ngamoq dah vmang vnoeuh Titu yah ma xauhgoh las, ngos svsoh chiq nyeis. Housoeh las ngos houmha bang lyis jeshuh khoq las Makedoni mau pheh loh. 14 Nghuot laus eq Mangso lhyi nhaiqshoqlang: Khasoeh ge lyis nyang gas ngamoq lyis Khristu yah dvdain dvlom kuot dyei las Khristu dah ung cho pwe mha jens loh dah thung dius jens lyis teh Mangso ka ngamoq lyis shwih. Khristu lyis seq dah seq cho lhyi xangh shom teh joqyos khanghmuh mas tyo das xiklyis Mangso ka ngamoq lyis yhung nyeis. 15 Khasoeh ge lyis ngamoq gas Mangso lhyi Khristu ngheq dyei dah xangh shom yah doeusgoh. Hauh xangh shom ka khyuot yoeus xauh bang mas eq somh loh bang mas eq hoeuh loh goeus. 16 Hauh shom ka dyoqbis bang mas shei nhang dah shei shom duot las, khyuot yoeus zis xauh goeus bang dah xiklyis gas kang dwis nhang dah xangh shom nghuot. Housoeh las housoeh teh muh wons wuq das zis hank mon yih nyeis lah? 17 Ngamoq gas gohyhamh nyoshoq teh Mangso dah dang lyis phauh ma dap dah kaih hu teh ungh cho wis cho ma kuot. Ngamoq gas Mangso nhang kat bang nghuot las, Khristu dah jyeidwis jens khyvlyis Mangso xikkhonh mas hauh dang lyis jyoeng lha lhoqshang ehnyet yah dvtsain taiq kyoh.
1 Heisoeh taiq zis gas ngamoq dah cho ngamoq moengs teh ge lhyeh? Dius dvyhamh teh ngamoq cho taiq toenk maussauh namoq lyis dyei chah lah? Nghuot ya, namoq jyank masyah taiq toenk maussauh sang wons chah lhyeh? 2 Namoq gungs nyang dius yuk khanghmuh nghap las yoh seq, ngamoq dah ungkhau ehnyet mas lhaih toh dah maussauh nyang tsain nghuot. 3 Hauh maussauh lyis Khristu nyang lhaih las ngamoq lyis yah huon kat zis gas bvng bvng nghuot. Hauh maussauh lyis mvcheih yah ma lhaih, dwis nyeis Mangso dah Dyos yah, tsai luklhywaq mas ma nghuot dius dah nhaiqlom mas tsain lhaih toh. 4 Ngamoq heisoeh womh taiq zis gas, Khristu gvng mas Mangso mha ngamoq nghamhnywe las nghuot. 5 Ngamoq gas haih muh lyis yoh kuot oen yoh taiq das zis ngamoq chah yomsoq eq ma bos. Ngamoq yoh dah yomsoq gas Mangso mhayah nghuot. 6 Yang gas Thanghchvp saiq xiklyis muh yoh wons bas jungh, ngamoq lyis yomdyei zis gas hauh Yhensain nyang nghuot. Hau Thanghchvp saiq gas lhaih toh dah Lyi mas bos zis ma nghuot. Dyos mas dvbos. Khasoeh ge lyis sauhchvp yah lhaihtoh Lyi gas kang thyet las Dyos gas kang dwis nhang. 7 Luk lhywaq mas lhaih toh dah Lyi dyei uhlyis Mangso dah phunk bvng joq. Hau phunk bvng zis gas Moshe nyoqnho mhayah zoh zoh bi loh nyeis. Nghuot laus eq svsoh bvng nyeis shih las Israel dius jens nyah nyoqnho lhyi ma yoh yoeuh tsuk toh. Shei cho bweh nhang dah Lyi lyis housoeh teh phunk yah dyei lyis gas, 8 Dyos dah muhzoh yah sen dah phunk gas kha iq zes bvng das ma nghuot lhyeh? 9 Dang thang thyet cho yah sen dah muhzoh gas phunk bos nghuot lyis gas, khyuot yoeus cho dyei zis yah sen dah muhzoh gas phunk kha iq zes bos das lah! 10 Gvshih svsoh bvng dah phunk gvng mas, xik lyis dvlhain bvng goeus dah phunk gas yop loh goeus oen yang yoh taiq. 11 Dvsoq kyingh dvdoengs joq dah muh yangh phunk bos nghuot lyis gas, goeng joq dah muh mas phunk kha iq zes bos joq das lah? 12 Ngamoq haih nghamhloms cho tsain bos yvmvyah, ngamoq svsoh womh nyeis. 13 Ngamoq gas Moshe teh ma nghuot. Nyang gas nyah nyoqnho mhayah bvng dah phunk bi loh goeus zis Israel jens ma nyvng das xiklyis nyah nyoqnho lhyi nyoqnghop khuk toh. 14 Israel jens dah ehnyet gas jyoengh nghop gos toh. Khvnyhik jweh shoq laus eq Thanghchvp cauh lyis nghap khanghmuh nyamoq dah ehnyet lyis nyoqnghop hauh zis yah tsain nghop toh shih. Dius dvyuk gas Khristu mas kang dwis los lyis hau nyoqnghop lyis dvyoh yop tyamp. 15 Khvnyhik jweh shoq yangh nyamoq Moshe dah lyi nghap uhlyis hau nyoqnghop gas nyamoq dah nghamh cho lhyi tsain khuk toh shih. 16 Nghuot laus eq nyang Yhensain jyank pheh lhain los lyis hau nyoqnghop lyis xik tyamp dyei zis xauh nyeis. 17 Yhensain ge zis gas Dyos lyis ge, Yhensain dah Dyos lungh joqyos mas luiq dah toeuh yoh. 18 Housoeh las yang dvnganh gas nyoqnghop xik tyamp goeus dah nyoqnho yah Yhensain dah phunk dah siyet lyis doms tauh chixoeuq nyeis. Hau phunk nyang Dyos ge dah Yhensain mhayah jweh los las Yhensain yah zes zes doeus dah phunk shot pheh yang lyis thaiq loh nhang.
1 Mangso ka nyah nhaiqnyen zis yah ngamoq lyis haih muh kyauh toh goeus. Housoeh las ngamoq yom ma gyau. 2 Ngamoq gas zauh toh dah xoq phoh dah muh dvnganh lyis tyamp goeus. Ngamoq gas mhuih khyvlyis ma kuot; Mangso dang lyis ma hwah, ma phanh taiq. Ngamoq gas Mangso dah xikkhonh mas jyoeng cho dah bvng yvmas kang dwis las yuk khanghmuh dah sohseq ehnyet yah doeus khyvlyis tsain nyeis. 3 Ngamoq taiq kyoh dah gausyis dang lyis ma seqgyo bang bos lyis gas, hauh bang gas somh loh zis xauh bang dvnghuot. 4 Hai mungkvn dah ma gis mangso ge Satan gas nyamoq dah ehnyet lyis mauchuotdwang yah nghop tyamp dyei yvmvyah nyamoq ma lomsjingh. Satan ka Mangso dah gungsdoeus nyang nghuot dah Khristu dah phunk cho hau Gausyis Dang masyah thuq dah bvng yvlyis gos tyamp dyei. 5 Khasoeh ge lyis ngamoq gas ngamoq nyang cho lhyi taiq kyoh zis ma nghuot, Yesu Khristu gas Yhensain nghuot cho, ngamoq gas Yesu gvng mas namoq dah jyeidwis tsain nghuot yvlyis eq taiq kyoh. 6 Yesu Khristu dah nyoqnho mha bvng dah phunk cho namoq seq bas jungh, ngamoq dah ehnyet lyis pank dyei dah Mangso ka, Mauchuotdwang masyah bvng zis thuq los das, ge taiq dah Mangso nyang nghuot. 7 Nghuot laus eq mathank magons yomsoq gas yah jyank masyah ma nghuot, Mangso jyank masyah nghuot cho yoh chixoeuq bas jungh, hai Dyos zisyos yoh toh bang yang gas tsoh yam yah dv doeusgoh. 8 Ngamoq gas dvsoq soq lyis yaukyenh laus eq thungh thyi zis ma xauh; dvlhain lhain khamkhvv laus eq ehnyet ma dyet. 9 Jeswus nyoshoq bos laus eq dyenschangh ma yoh lo zis khanhamp eq ma bos. Dvlhain lhain svsoh nos loh laus eq ma dyoq ma bis. 10 Yesu gas ngamoq gungs mas kang dwis nyeis zis dede nghuot das nyhenshang, ngamoq dah seq shei gungs gas Yesu kham khoq, shanghsenh dah shei cho lhyi vjangh kham nyeis. 11 Yesu dah kang dwis cho ka ngamoq dah seq shei gungsshoh mas yoh nyvng bas jungh, ngamoq gas ngamoq dah kang dwis cho gonh mas shishenh khanghmuh Yesu nyhenshang shei kham das cho mha suh e nyeis. 12 Haih vjyuk gas, Shei cho ka ngamoq mas muh khanh nyeis laus eq, kang dwis cho ka namoq mas muh khanh nyeis. 13 Lhaihtoh dang mas, Lomsjingh yvmvyah ngos taiq, ge zis yah dvyhangteh ngamoq eq lomsjingh yvmvyah tsain taiq. 14 Yhensain Yesu lyis shei masyah dwis toq nhang dah Mangso ka ngamoq lyis eq Yesu yah dvgeh dwis toq nhang das las, namoq yah dvgeh nyah xikkhonh mas shwih loh das zis ngamoq seq. 15 Haih cho dvnganh gas namoq mas vkyuh bweh los das nyhenshang nghuot. Mangso dah jyehjuh lyis kham yoeus bang eq zes nyo los zis yah dvyhangteh, Yhensain dah phunk lyis nhaiqshoqlang shvmanh dung cho eq zes nyo los das. 16 Haih cho gvng mas ngamoq khanhamp eq ehnyet ma dyet yom ma gyau. Ngamoq dah gungs nghe pheh nyoq yah nyvng dah gungs vzwvng gas zoh zoh yah dyoqbis loh nyeis. Nghuot laus eq gungs vkhau pheh dyos vzwvng gas dvnyeih dvnyeih vsaiq soq thaiq yvlyis xauh kham yoeus. 17 Ngamoq dvdvm dvsoq xauh nyeis dah shanghsenh dvtsiq dvthang ka ngamoq lyis yaukyenh thoq lyis zes kuh zis yahge vcaiq vto nghuot dah phunk lyis xauh kham yoeus nhang nyeis. 18 Ngamoq gas nyoq yah nyvng dah vyhang lhyi yoeuh tsuk toh zis ma nghuot. Nyoq yah ma nyvng dah vyhang lhyi dvyoeuh tsuk toh. Khasoeh ge lyis nyoq yah nyvng dah vyhang ka dvsoq dvjoq, nyoq yah ma nyvng dah vyhang ka vcaiq vto goeng joq.
1 Nyeisjvng thoq mas yang nyeis dah zvng ge dah gungsdom dyoqbis loh lyis Mangso ka maukhung mha yang nyeis das xiklyis nyang kuot dah vcaiq vto goeng joq dah yhen yang yoh toh yvlyis yang seq. 2 Gvshih yang hau zvng mas lungh joq lyis maukhung mha dah yhen lyis yoh wuot toh das zis svsoh bweh nhang mes yvmvyah yang nos tsain kyingh nyeis. 3 Housoeh xauh wuot toh goeus ya yang gas gungs ma yoh bang duot das zis ma nghuot. 4 Haih nyeisjvng zvng mas nyeis shih uhlyis wons wuq dah yvwons yah nhiq yvlyis xauh kham dah ehnyet yah nos tsain kyingh nyeis. Housoeh noskyingh zis gas yah nyeisjvng gungsdom lyis yoeus tyamp mes las ma nghuot, seq shei yvlyis vcaiq vto kang dwis cho pheh thaiq loh das nyhenshang maukhung mha dah gungs lyis wuot toh mes las nghuot. 5 Hau thaiq loh das cho, yah nyhenshang sont dyei soeu ka Mangso nghuot. Nyang gas yang kham yoeus dah jyehjuh dvnganh xiklyis pauh toh dyei khyvlyis Dyos dyei toh. 6 Housoeh yvmvyah ngamoq gas womh ehnyet vjangh dyingh joq. Haih nyeisjvng gungsdom mas nyeis shih dvchank gas yang Yhensain dah yhen yah we joq zis yang seq. 7 Khasoeh ge lyis yah kang dwis cho ka nyoq yah nyvng yvmas ma nghuot, lomsjingh yvmas kang dvdwis nyeis. 8 Ngamoq gas womh ehnyet yah dyingh joq las, gungs dah zvng lyis tyamp zis yah Yhensain yah dvgeh nyeis das yvlyis zes o nyeis. 9 Housoeh las yang gas heimha gungsdom yhen mha nyeis laus eq, thyimha nyeis laus eq gohtoeu dvnganh mas nyang lyis nhaiqdoeus nhang mes. 10 Khasoeh ge lyis yang dvnganh gas soetuon zis xauh das nyhenshang Khristu xikkhonh mas thuq xoeuq chah. Hauh uhlyis yang yuk khanghmuh gas hau gungsdom mas nyeis nyeis shih lyis kuot dah muh gis laus gang laus vvng khyvlyis kham yoeus chah das. 11 Ngamoq gas Yhensain dah gyukwoms cho cha ge yvlyis seq yvmvyah, gohyuk lyis yoh jyoeuq yoeus das xiklyis yomkat. Mangso ka yah cho jyuk jyuk seq. Namoq eq namoq dah ehnyet mas ngah cho vlhomuh seq oen nghamhloms. 12 Heisoeh taiq yvmas ngamoq gas vsainnyang dah gis cho lhyi namoq xikkhonh mas chungh yoeus zis ma nghuot, ngamoq gvng mas namoq yoh khwank das xiklyis dvnghuot. Hauh uhlyis dius dah wotwu lyis ma yoeuh, nghe pheh vwot lyis kyingh yoeuh las seq khwank bang lyis yoh phuk taiq das. 13 Ngamoq jyoengh ma gying zis nghuot lhyeh? Ma gying nghuot lyis gas Mangso dah xiklyis ma gying zis nghuot. Nghuot ya ngamoq gying lhyeh? Gying nghuot lyis gas namoq xiklyis nghuot. 14 Ngamoq lyis Khristu dah jyetdap ehnyet yah guon nyeis. Khasoeh ge lyis dius dvyuk nyoshoqmoq xiklyis shei kham goeus yvlyis ngamoq soh, nhaiq tap. Housoeh las houka nyah dah shei kham yvmas dvnganhmoq shei kham goeus ge dah vjyuk nghuot. 15 Kang dwis nyeis bang eq nyamoq vkyuh xiklyis kang ma dwis, nyamoq xiklyis shei kham dyei thang lhyi dwis toq loh soeu xiklyis kyingh kang dwis nyeis bas jungh, dvnganhmoq dah xiklyis nyang shei kham goeus. 16 Housoeh las ngamoq gas gvshih masyah hank lyis eq, dius dah vkant lyis yoeuh las soetuon cho ma kuot. Xikpheh Khristu lyis dius dah vkant khyvlyis chank las dang thang thyet cho kuot lai loh goeus. Nghuot laus eq gvshih housoeh ma kuot lo. 17 Hank laus eq Khristu yah dvdain dvlom nghuot loh lyis nyang gas dius saiq bweh los goeus. Vcauh gas lai loh goeus, yoeuh aq dvnganh gas vsaiq bweh los. 18 Hauh cho dvnganh lyis Mangso yah kuot toh. Mangso ka yang nyah jeswus duot nyeis masyah nyah buisnoms bweh los das nyhenshang Khristu Yesu gvng mas thaiq loh nhang. Gohtoeu dius jens lyis eq nyah buisnoms duot nhang das nyhenshang ngamoq lyis muh kyauh toh. 19 Ngamoq taiq kyoh dah gausyis dang gas, Mangso ka Khristu mas dius dvnganh lyis nyah buisnoms duot nhang cho yah sen dah Dang nghuot. Mangso ka nyamoq dah yobos lyis ma comh dyei lo thoq lyis magoh nyamoq lyis nyah buisnoms bweh los shoq khasoeh kuot cho taiq kyoh dah dang ngamoq lyis dyei toh. 20 Housoeh las ngamoq gas Khristu dah cho dih dyei dah lvgyo jens nghuot las Mangso ka nyang ngamoq dah nhuot mas dang khyvlyis namoq lyis shangphu nyeis; namoq gas Mangso dah jeswus nghuot nyeis masyah nyah buisnoms jens duot los geh oen Khristu gungsthaiq khyoeuq nyeis. 21 Khristu gas yaunos ma dap soeu nghuot. Nghuot laus eq yang gas Khristu yah dvdain dvlom duot los las Mangso dah dan cho lhyi xauh kham yoeus das nyhenshang Mangso ka Khristu lyis, yah nyhenshang yang teh yaunos yoh soeu bweh nhang.
1 Namoq gas Mangso dah jyehjuh xauh kham yoeus bang nghuot zis yah dvyhangteh hauh jyehjuh lyis vyu vgeh ma kuot tyamp bas jungh, ngamoq Mangso yah dvgeh muh zwi bang khyvlyis yah namoq lyis shangphu kat. 2 Mangso taiq zis gyo geh, Ngos namoq lyis jyehjuh dyei das shishenh jweh lyis ngos namoq dung dang gyo yoeus dyei, Ngos namoq lyis Khyuot yoeus buisnyeis jweh lyis ngos namoq lyis pangh, ge. Mangso dah jyehjuh kham yoeus das zis gvshih yangh gis dah shishenh nghuot; yoeuh aq, gvshih yangh khyuot yoeus buisnyeis nghuot. 3 Ngamoq wons wuq muh yah sen lha hank eq yobos ma xo bas jungh ngamoq hank cho eq thungh lains gus ma bos shoq yomkat. 4 Ngamoq gas yaukyenh, shanghsenh, yau cho lhyi ehnyet xing xing jhen zis yah kuot. Cho khvt khanghmuh mas ngamoq gas Mangso dah jyeidwis jens nghuot yvlyis dvchixoeuq. 5 Ngamoq gas bat khyop, thung lhunk, dius hoeu toq cho xauh, muh zwi shangh, ma xauh yhet, zosyuot jeisshet cho tsain xauh. 6 Ehnyet lhoqshang cho, seq cho, jhen cho, nhaiqnyen cho yah eq, Gyingshang Dyos dah jyehjuh cho yahge, gyingh dah jyetdap ehnyet yah eq; 7 ngamoq taiq kyoh dah jyoeng dang yahge Mangso dah yomsoq yah, ngamoq gas Mangso dah jyeidwis jens nghuot cho Chixoeuq goeus. Ngamoq gas dan cho lhyi dyvm zan das xiklyis eq, vsainnyang lyis gos das xiklyis eq yhung das kyonhkhyi tsain kuot. 8 Ngamoq gas nyoqnho ngelang dyei zis, goes sang zis, chungh zis tsain xauh. Ngamoq lyis mhuih jyomh bang nghuot ge tsain tsuk. Nghuot laus eq ngamoq gas jyoeng dang tsain taiq. 9 Ngamoq gas hank ma soh ma seq bang teh nghuot laus eq nyings hoeuh bang nghuot. Shei loh teh nghuot laus eq yoeuh aq, ngamoq dwis nyeis. Joeng zis xauh laus eq sat zis ma xauh. 10 Nhaiqkuk zis xauh laus eq, ngamoq vjangh gauslaus nyeis; shohjyen teh nghuot laus eq nyoshoq moq lyis dis nhang; cha eq ma yoh teh nghuot laus eq jyoengh ngamoq dvnganh yvlyis sain toh bang nghuot. 11 Jyetdap dah Korinthu bang eh, ngamoq gas namoq lyis khyangh khyangh taiq goeus. Ngamoq dah ehnyet khomh lyis namoq xiklyis khonhchauh phank toh. 12 Namoq yuk ngamoq dah jyetdap ehnyet lyis namoq jyank mas ma jweh shoq nyheih toh. 13 Namoq dah ehnyet khomh phank toh geh. Gvshih ngos namoq lyis ngah lo jens lyis teh taiq nyeis. Namoq eq ngamoq lyis housoeh teh nghamh cho tauh Chixoeuq geh. 14 Ma lomsjingh bang yah xonh las muh vwons wuq nyeis goh. Khasoeh ge lyis dvgeh xonh las wons wuq das zis ma gis bweh. Jus zis yahge shuot zis gas dvgeh khasoeh yoh xonh nyeis das lah? Bvng zis gas chuot zis yah dvgeh khasoeh yoh zomh das lah? 15 Khristu yahge Satan gas khasoeh xam yoh xonh? Lomsjingh soeu ka ma lomsjingh soeu yah khasoeh toeuq las nyeis das lah? 16 Mangso dah yhenmuh gas phvra yah khasoeh xam yoh xonh das lah? Khasoeh ge lyis, Yang gas dwis nyeis Mangso dah yhenmuh tsain nghuot. Mangso nyang, Ngos gas ngah dius nyau jens mas ngah yhen duot nhang lha nyamoq mas nyeis das. Ngos nyamoq dah Mangso duot las, nyamoq gas ngah vnyau duot das, ge. 17 Housoeh las Yhensain taiq zis gas, Namoq gas nyamoq lyis toh khoq chah, nyamoq jyank masyah gohtoeu kangh yoeus geh. Vwot v-oeu lhyi vzangh thungh goh, housoeh lyis ngos namoq lyis lhom yoeus das. 18 Ngos gas namoq uwus duot las, namoq gas ngah loloeu lonyi jens duot das, ge Maukhung Jesphung Yhensain taiq.
1 Jyetdap bang eh, haih dangthoengh dvnganh gas yang lyis dyei toh. Housoeh yvmvyah yang gas gungsshoh yahge dyos lyis lhoq lhoeuh dah vwot v-oeu dvnganh mhayah vsainnyang gungs lyis cheihshang tyamp las, Mangso lhyi gyukwoms zis yah gyingshang thank khyvlyis kang dwis goh. 2 Namoq nhaiqlom mas ngamoq xiklyis joqyos dyei las lhom yoeus geh. Ngamoq hank lyis eq ma cu, hank lyis eq ma lhoq thyoq, hank thoq mas eq toeuh ma yoeus. 3 Ngos heisoeh taiq zis gas namoq lyis yobos huon dang thang thyet das xiklyis ma nghuot; khasoeh ge lyis xikpheh ngos namoq lyis taiq goeus zis yah dvyhangteh, namoq lyis ngamoq svsoh jyetdap yvmvyah shei lhyi yangh lyis vjangh namoq yah dvgeh nyeis. 4 Ngos namoq lyis svsoh nghamh kuh toh. Ngos namoq xiklyis svsoh khwank nyeis. Yaukyenh shanghsenh vja ja xauh laus eq ngos mas womh ehnyet dyingh joq thoq lyis magoh ngos mas gaus cho eq dyingh muis joq. 5 Makedoni mau mas jweh loh lyis yangh ngamoq mas nyenstap cho ma yoh. Joqyos khanghmuh mas yaukyenh shanghsenh cho, gohtoeu dius jens yah dyoqgoh cho eq bos. Ngamoq dah ungkhau mha gyuk cho chiq cho vja ja xauh. 6 Nghuot laus eq nhaiqngis nyoqyaus bang lyis nhaiqtaink dah Mangso ka, ngamoq jyank mas Titu jweh los zis yah ngamoq lyis yom yoh nhang goeus. 7 Titu jweh los gvng mas kyingh ma nghuot, nyang lyis namoq khasoeh yomdyei cho taiq kyoh las eq, ngamoq ehnyet pyo cho yoh. Hauh thoq lyis namoq gas ngos yah xauhgoh mes las kha iq hwangh nhaiqngis nyeis cho, ngos lyis khomp dyei das nyhenshang kha iq sont toh goeus cho taiq kyoh las, ngos gvshih zes gaus zis yah pyo nyeis. 8 Ngos huon maussauh yah namoq lyis nhaiqkuk nhang laus eq hau maussauh zangh lhaih yvlyis ma auhuiq; nghuot laus eq hauh maussauh gas namoq lyis dvyoq nhaiq ngis nhang cho soh las nhaiqkuk cho ka dvtsiq bos lai loh goeus. 9 Nghuot laus eq gvshih gas ngos gaus nyeis. Houka ngos namoq lyis nhaiqkuk nhang lha ma nghuot, namoq dah nhaiqkuk zis gas xikpheh namoq dah kang dwis cho mha nhaiqlom thaiq los nhang goeus yvmvyah nghuot. Mangso ka hau nhaiqkuk cho lhyi yhung nyeis las ngamoq gas namoq lyis nos nhang cho cha ma bweh nhang. 10 Khasoeh ge lyis Mangso yhung dah nhaiqkuk zis gas, khyuot yoeus zis xauh nhang nyeis. Hauh gvng mas ehnyet ma tap joqyos ma bos. Nghuot laus eq ehnyet ma thaiq dius ehnyet khyvlyis nhaiq dvkuk lyis gas shei cho lhyi dvkuot thuq nyeis. 11 Namoq dah nhaiqkuk cho lhyi Mangso khasoeh yhung yvlyis yoeuh geh. Houka namoq lyis kha iq nhaiqdoeus nhang, namoq mas yobos ma dap cho chixoeuq das ehnyet kha iq nhauh dyei, gis cho lvnyap bweh nhang mes las nhaiqyo zis yah dvn loh, ehnyet mas kham zo nyeis cho, namoq lomsjingh yvmas goeng toenk cho, yobos bos soeu lhyi yobos dyei das zis cicont nghuot cho jens gas, cho khvt khanghmuh mas namoq yobos ma bos ge cho lhyi chixoeuq nyeis. 12 Housoeh las ngos namoq lyis hauh maussauh lhaih kat laus eq shuot soeu gvng mas ma nghuot, shuot zis xauh kham soeu gvng mas eq ma nghuot. Mangso xikkhonh mas namoq ngamoq lyis jyoengh kha iq jyetdap hwangh nyeis yvlyis Chixoeuq, seq nhang mes las lhaih kat. 13 Housoeh dede nghuot goeus las ngamoq yom yoh. Housoeh yom yoh thoq lyis magoh svsoh gauslaus nyeis. Khasoeh ge lyis namoq gas Titu lyis tsain gaus nhang lha, nyang gaus cho lhyi ngamoq nyvng las nghuot. 14 Ngos namoq cho Titu lyis khwank kyoh goeus. Housoeh khwank kyoh zis yah dvyhangteh jyoeng cho namoq Chixoeuq goeus las ngos lyis yomgyau nhang zis ma nghuot. Ngamoq namoq lyis khanhamp eq jyoeng cho lhyi kyingh dvtaiq zis yah dvyhangteh, Titu lyis namoq cho khwank kyoh zis eq jyoeng zis yoh seq goeus. 15 Namoq gas nyang jyauh cho lhyi domsyos gyo das zis cicont nghuot yvlyis eq, nyang lyis gyuk nvn zis yah lhom yoeus yvlyis eq soh joq yvmvyah, nyang namoq lyis jyetdap ehnyet gas zes kuhxing lha yombos los. 16 Ngos namoq lyis jyuk jyuk yoh loms toh goeus yvmvyah gauslaus nyeis.
1 Jyetdap boekyis eh, Makedoni mau mas dah phung jens lhyi Mangso chah jyehjuh dyei goeus cho, ngamoq namoq lyis seq nhang mes. 2 Nyamoq xauh kham goeus dah shanghsenh cho mha vthank lang mas shiwu zis xauh goeus. Nghuot laus eq nyamoq dah gaus cho svsoh kuh yvmvyah nyamoq gas svsoh nyungs bang nghuot laus eq nyamoq dah dyei gvm cho mha magons magoh dyei mes jyetdap ehnyet bos. 3 Hauh phung jens gas nyamoq duot nyhoq dyei cho ngos namoq lyis top nyang kanghjyoeng kat. 4 Nyamoq gas Yuda mau mas dah Mangso dah dius jens lyis pangh thuk das cho mha bos mes las, yoh bos das toeuh dyei das nyhenshang nyamoq ehnyet yah tungh khyoeuq nyeis. 5 Nyamoq gas ngamoq nghamhloms thoq lyis jes shoq dyei. Nyamoq gas cangxeih lyis vsainnyang gungs shih Yhensain lhyi kyauh toh. Hauh thang lhyi Yhensain o zis yah dvyhangteh pangh thuk cho mha kyauh. 6 Housoeh las xik lyis yah yvwons s yoeus kuot nyeis goeus dah Titu lyis hai vlu yah sen lha namoq dah lhyenwhei jyetdap ehnyet yah phuqsoe muh dye shoq namoq lyis pangh bas jungh ngamoq nyang lyis yomdyei. 7 Namoq gas lomsjingh cho, taiq cho, seq cho mha, namoq pangh thuk mes dah ehnyet mas, ngamoq lyis jyetdap cho mha namoq dyinghjet joq goeus. Housoeh las jyetdap ehnyet yah phuqsoe muh mas eq namoq magons magoh vlu dyei das yvlyis ngamoq omes. 8 Ngos heisoeh taiq zis gas, tyingtoh dang khyoq toh nyeis zis ma nghuot. Gohyhamh bang dah pangh thuk cho mha jyetdap ehnyet kha iq kuhxing nyeis yvlyis taiq kyoh zis yah namoq dah jyetdap ehnyet gyingh ge yvlyis yoh seq das nyhenshang taiq zis nghuot. 9 Namoq gas yah Yhensain Yesu Khristu dah jyehjuh lyis tsain seq. Yhensain Yesu gas nyang dis nyeis laus eq namoq xiklyis nyah gungs lyis shohjyen soeu kuot goeus. Nyang shohjyen xauh gvng mas namoq dis los goeus. 10 Hai vlu dyei cho yah sen lha ngos nghamh khyvlyis oen lhyi ka, vnhaiqyos namoq kuot xi toh dah muh lyis gvshih tyeh kuot lyis namoq xiklyis gis das. Namoq gas jyetdap ehnyet yah dyei mes ehnyet cangxeih bos bang kyingh ma nghuot, vlu cangxeih dyei bang tsain nghuot. 11 Housoeh yvmvyah hauh muh lyis tsoq las tyeh kuot geh. Namoq hauh muh lyis kuot loh yvmas bauh ehnyet bos joq zis yah dvyhangteh duot nyhoq tyeh kuot geh. 12 Namoq mas dyei mes dah jyetdap ehnyet bos lyis Mangso ka namoq duot nyhoq dyei dah jyungshuk lyis lhom yoeus das. Namoq ma duot yvlyis Mangso sang das zis ma nghuot. 13 Khasoeh ge lhyi gohyhamh lyis sunghhuq nhang das xiklyis ngos namoq lyis yvwons s huon zis ma nghuot. 14 Nghuot laus eq gvshih namoq mas magons magoh yoh joq yvmvyah chah nyeis bang lyis pangh thuk das nyhenshang phi; dvnyeih buis lyis nyamoq nyoshoq yoh joq las namoq chah nyeis lyis nyamoq eq namoq lyis doms thuk das. Heisoeh kuot las nyang changh nyang yih yih yoh pangh goh. 15 Lhaihtoh dang mas: Nyoshoq yung toh soeu eq guszes loh zis ma bos, dvmhauh dvxauh yung toh soeu eq chah shih zis ma bos, ge lhaih toh zis yah dvyhangteh nghuot. 16 Namoq lyis pangh thuk das xiklyis ngamoq mas mes dah ehnyet bos teh, Titu dah ehnyet mas eq heisoeh bos nhang dah Mangso jyehjuh lyis kha iq chungh gis lah! 17 Titu gas ngamoq dung dang lyis lhom yoeus thoq lyis magoh, svsoh kuot dyei mes ehnyet bos las, nyang namoq jyank pheh los das nyhenshang nyah ehnyet nyang nghamh thyet toh. 18 Hauh gausyis dang taiq muh wons wuq cho mha, phung dvnganh yah nghamh kuh toh soeu vmang vnoeuh dvyuk lyis eq ngamoq nyang yah dvgeh nhang kat. 19 Hauh thoq lyis hai jyetdap ehnyet yah phuqsoe dah vlu tsainh muh mas ngamoq yah dvgeh suh e das xiklyis phung jens yah khyen toeuq toh zis xauh soeu eq nyang nghuot. Hauh cho ka Yhensain dah phunk nyoqnho ngelang Chixoeuq das zis yahge ngamoq dah pangh mes ehnyet lyis Chixoeuq das xiklyis nghuot. 20 Hai dyei mes ehnyet yah dyei dah jyungshuk lyis yhung cho mha ngamoq lyis hank eq yobos huon chank ma bos bas jungh zaih nyeis. 21 Yhensain dah xikkhonh mas kyingh ma nghuot, dius dah xikkhonh mas eq jyoeng lha phi dah muh khanh das zis gas ngamoq dah nghamh toeuq cho nyang nghuot. 22 Housoeh yvmvyah ngamoq gas hau vmang vnoeuh tang yah dvgeh gohtoeu Khristan vmang vnoeuh dvyuk lyis eq nhang kat. Hauh soeu lhyi ngamoq nyoshoq lhain shi yoeuh lyis nyang gas khanhamp eq mes zis yahge seq pangh soeu nghuot yvlyis yoh seq. Gvshih nyang gas namoq thoq mas nghamhnywe ehnyet bos las svsoh pangh mes nyeis. 23 Titu cho yah sen lha taiq lyis, nyang gas ngah loeuzomh yahge namoq lyis pangh thuk das xiklyis ngos yah muh zomh zwi soeu nghuot. Nyang yah dvgeh chank los dah vmang vnoeuh aiq yuk gas phung jens dah lvgyo nghuot las Khristu dah phunk nyoqnho Chixoeuq das vzomh nghuot. 24 Housoeh yvmvyah, namoq yah sen lha ngamoq nyoqnho ngelang yoeus las khwank zis gas jus cho phung jens dvnganh top yoh seq bas jungh, nyamoq lyis namoq dah jyetdap ehnyet Chixoeuq geh.
1 Yuda mau Mangso dah dius jens jyank mas huon kat dah pangh thuk cho yah sen lha ngos namoq jyank mas lhaih kat chank ma bos. 2 Namoq pangh mes jyetdap ehnyet bos yvlyis ngos seq. Housoeh las namoq dah cho Makedoni mung dius jens lyis khwank xoeuq goeus. Akhaia mau mas vmang vnoeuh moq gas vnhaiqyos yah yangh pangh das zis cicont kuot toh goeus, oen Makedonia bang lyis ngos taiq goeus. Namoq kuot mes cho gvng mas nyamoq nyothyang dah ehnyet lyis nhauh toq dyei goeus. 3 Haih cho yah sen lha namoq mas ngamoq khwank dang gas vkom ma bweh bas jungh, haih vmang vnoeuh moq lyis namoq jyank mas nhang kat. Ngos taiq goeus zis yah dvyhangteh namoq gas namoq vlu yah cicont kuot toh das. 4 Housoeh ma nghuot lyis gas, Makedoni dius dvyhamh ngos yah dvgeh chank los las, namoq cicont ma nghuot yvlyis nyvng lyis namoq kyingh xoqphuh das zis ma nghuot, ngamoq eq namoq lyis nghamhnywe toh goeus zis yah dvyhangteh kha iq xoqphuh das lah! 5 Housoeh yvmvyah, namoq jyehjuh jyungshuk dangthoengh toh zis yah dvyhangteh, hauh yvlyis sont toh das nyhenshang ngos haih boekyis lyis ngah xikpheh namoq jyank mas nhang kat chah, oen nghamh. Ngos jweh los lyis vlu sont toh goeus zis nghuot las namoq dyei zis gas dyei chah las dyei khyvlyis ma nghuot, dyei mes dah jyetdap ehnyet yah dyei cho yoh chixoeuq das. 6 Jyo dvtsiq khyoq soeu ka dvtsiq xauh yhomh das; jyo nyoshoq khyoq soeu ka nyoshoq xauh yhomh das yvlyis soh las zaih nyeis geh. 7 Yu dah ehnyet yah eq ma nghuot, dyei chah dah yvwons s gvng mas kyingh eq ma nghuot, yuk khanghmuh nyah ehnyet mas nghamh toeuq toh zis yah dvyhangteh dyei bas jungh: khasoeh ge lyis Mangso ka gausyis ehnyet yah dyei soeu lhyi jyetdap. 8 Mangso ka namoq chah thoq lyis zes shoq yoh dyei. Housoeh namoq vsainnyang xiklyis chah nyeis cho dvnganh yoh das thoq lyis gis dah muhzoh khanghmuh xiklyis chah thoq lyis zes shoq xauh yoeus das. 9 Lhaihtoh dang mas, Nyang gas chah nyeis dah nyungs bang lyis magons magoh gvm dyei las, Nyah nhaiqnyen cho ka vcaiq vto goeng joq, ge. 10 Nyau khyoq soeu lhyi nyau dyei las zo das zonoms kuot dyei soeu Mangso ka, namoq mas chah dah jyo nyau luk shoq dyei thoq lyis magoh, hauh nyau lyis yuk kuh los nhang zis yah jyo nyoshoq xauh yhomh nhang. Houka namoq magons magoh dyei dah jyetdap ehnyet mas dah vshih lyis taiq zis nghuot. 11 Namoq masyah nyamoq xauh lhom yoeus dah vlu jyungshuk gvng mas dius nyoshoq Mangso dah jyehjuh lyis chungh das. Namoq shishenh khanghmuh vlu magons magoh yoh dyei shoq Yhensain ka namoq lyis vjangh dis nhang das. 12 Khasoeh ge lyis haih namoq phuqsoe dah muh gas Mangso dah dius jens chah nyeis yvlyis yoh tyink dyei thoq lyis magoh, Mangso dah jyehjuh lyis chungh dah thwe yah dyingh los nyeis. 13 Hai namoq phuqsoe muh yikhyoh gis gvng mas, dius nyoshoq gas, Khristu dah gausyis dang lyis namoq wontang lhom yoeus lomsjingh gvng mas eq, namoq dah jyetdap ehnyet yah nyamoq lyis eq gohyhamh bang lyis eq magons magoh vlu dyei gvng mas eq, Mangso lhyi nhaiqshoqlang chungh dah ehnyet dyingh muis los nhang nyeis. 14 Namoq gas svsoh zes dah Mangso jyehjuh lyis xauh kham goeus yvmvyah, nyamoq gas namoq lyis svsoh jyet ehnyet yah namoq xiklyis shvmanh dung dyei das. 15 Phauh ma yoh thoq suon dah Mangso jyehjuh jyungshuk gvng mas Mangso lhyi nhaiqshoqlang sang nyeis goh.
1 Namoq xikkhonh mas ehnyet noeuh nhamp zis yah ehnyet nyhen mha khyoq cho chixoeuq las namoq yah we loh lyis womh ehnyet chixoeuq nyeis soeu nghuot, ge loeusmus zis xauh soeu ngos Paulo nyang Khristu dah nhaiqnyen ehnyet yahge noeuh nhamp ehnyet yah namoq lyis dung kat. 2 Khristu dah noeuh nhamp, ehnyet nyhen mha gyoh yvlyis byi las ngos namoq jyank jweh los uhlyis dang than jis shoq ma bweh das xiklyis khyoeuq kat. Khasoeh ge lyis ngamoq lyis mungkvn dah obos khyvlyis kuot las kang dwis bang nghuot, ge taiq bang lyis ngos than than yoh taiq. 3 Ngamoq gas mungkvn mas nyeis zis jyoeng laus eq mungkvn ehnyet khyvlyis jes tsain zan nyeis zis ma nghuot. 4 Ngamoq jeszan yvmas yhung dah kyonhkhyi ka mungkvn dius jens chi dah kyonhkhyi ma nghuot. Mangso dah yomsoq yah dyingh dah kyonhkhyi chi lha goeng dah thoenkgus jesdvp jens lyis thyoqpi tyamp. Ngamoq gas ma jus dah phyen-goh dang lyis thyoq tyamp. 5 Ngamoq gas Mangso lhyi seq cho joeui lhyi khwank zis yah pahkai dah muh dvnganh yvlyis thyoqpi tyamp. Ngamoq gas dius dah nghamh cho dvnganh lyis nyhik lhunk tyamp las Khristu dah domsyos gyo nhang. 6 Namoq gas ngamoq dah domsyos top gyo las dang jings cho yoh seq goeus ya, ngamoq gas dang ma jings dah muh cha lhyi laus eq yobos dyei das zis cicont nghuot. 7 Namoq gas chah cho mha eq thoqlosbaus lyis dvtsain yoeuh nyeis. Ngos gas Khristu yah sen, ge vsainnyang gungs lyis nghamh soeu dvyuk yuk bos lah? Bos lyis gas nyah gungs lyis dvlhain doms nghamh suon yoeuh bas jungh. Khasoeh ge lyis nyang gas Khristu shot pheh dah dius nghuot zis yah dvyhangteh, ngamoq eq Khristu shot pheh dah dius nghuot. 8 Khasoeh ge lyis ngos gas Mangso dyei dah toeuh yah sen lha dvmsunk zangh khwank laus eq ma xoq, haih toeuh gas namoq lyis thyoqpi das xiklyis ma nghuot, toeutoq das xiklyis dvnghuot. 9 Housoeh las ngos huon maussauh yah namoq lyis kyuk mes khyvlyis vjyuk ma mes phui nhang. 10 Khasoeh ge lyis dius dvyhamh gas, Paulo dah huon maussauh gas dvmsunk zis yahge kank bos nghuot laus eq nyah gungs ngamoq yah nyeis lyis nyang gas yomnhuk, nyah dang eq cha vkyuh ma bos, tsain ge. 11 Housoeh ge soeu seq toh das cho ka, ngamoq gas we yvmas nyeis uhlyis maussauh lhaih kat zis yah dvyhangteh dius gungs nyang namoq jyank mas jweh los uhlyis eq houyah dvyhangteh ngamoq kuot das. 12 Jyoengh oen lhyi vsainnyang gungs lyis chunghzo bang mas bos suon tap las, ngamoq gungs lyis nyamoq yah ma womh byi. Nyamoq gas nyamoq kha iq nyhang zis seq das xiklyis nyamoq nyang vkeq thyet toh zo. Housoeh teh bang gas kha iq koh lah! 13 Ngamoq gas khwank vvng thoq lyis lai las khwank das zis ma nghuot. Namoq mas ngamoq zwi khank dah muh yah dvgeh, ngamoq zwi khank das xiklyis Mangso nyang toeuq toh dyei dah muhzoh vkhau mha ngamoq dvyoh khwank. 14 Namoq gas Mangso ngamoq xiklyis toeuq toh dyei muhzoh khau mha bos joq yvmvyah ngamoq gas Khristu dah gausyis loeus namoq jyank mas chi los uhlyis muhzoh wons wuq das gvm toh dah vkyo lhyweq khyvlyis ma kuot. 15 Housoeh yvmvyah ngamoq gas Mangso ngamoq lyis toeuq toh dyei dah muhzoh mas lai las, gohyuk dah muhzoh yah sen yvmas ngamoq moengs zis ma nghuot. Housoeh kuot das gungsthaiq khanhamp eq toeuq toh dyei dah muhzoh khau mha namoq dah lomsjingh cho je los das zis yahge namoq mas muhzoh zes yoh kuot das yvlyis ngamoq nghamhloms. 16 Hauh thang lhyi ngamoq gas namoq dah mau nghe pheh lai las gohtoeu munghdan mas Yhensain Yesu dah cho gausyis dang loh yoh taiq kyoh das. Tsai gohyuk dah joqyos, cicont kuot toh dah muhzoh cho mha moengs khwank chah das zis ma nghuot. 17 Nghuot laus eq lhaihtoh dang mas, Khwank mes soeu ka, Yhensain kuot dah muhzoh mas khwank nyeis bas jungh, ge taiq toh. 18 Khasoeh ge lyis, Jyoeng dah nyoqnho ngelang dyei zis xauh soeu ka vsainnyang gungs lyis vsainnyang chunghzo soeu ma nghuot. Mangso chungh zis xauh soeu dvnghuot.
1 Namoq ngos dvtsiq koh dah yobos lhyi jhen dyei shih das yvlyis ngos o. Jyoengh jenh jhen dyei shih geh. 2 Mangso ka namoq lyis noh ehnyet bos zis yah dvyhangteh ngos eq namoq lyis noh ehnyet bos. Namoq gas Khristu nyang yah kyingh phoengh wvng das xiklyis ngos dangthoengh dyei toh goeus lonyi gyingh yah doeusgoh. 3 Ewa gas lhangnyis dah joeui bos dah yik cho yah mhuih khwangh zis xauh teh namoq eq namoq dah nghamh cho thyoq tyamp zis xauh las namoq dah dyinghjet dah lhoqshang ehnyet yah Khristu lyis loms las chank suh dah ehnyet dyoq das yvlyis ngos chiqh. 4 Khasoeh ge lyis namoq jyank mas dius dvyuk yuk jweh los las, ngamoq ma taiq kyoh ku dah gohtoeu Yesu dvyuk dah cho taiq kyoh lyis namoq gaus gaus yis yis tsain lhom yoeus. Tsai ngamoq jyank masyah xauh lhom yoeus toh dah Dyos yahge gausyis dang yah kyoq kyoq shaih dah dyos yahge Gausyis Dang lyis tsain lhom yoeus nyeis nyvng! 5 Ngos gas hau namoq kuh thank lvgyo jens ge lui bang mas dvtsiq eq ngis soeu ma nghuot oen ngos nghamh. 6 Ngos gas taiq kyoh yvmas ma duot soeu nghuot laus eq, jyoengh seq cho mha ka housoeh ma nghuot. Ngamoq gas shishenh khanghmuh lyis bweh dah cho jeis dvnganh mas haih cho namoq lyis dede seq nhang goeus. 7 Namoq chunghtoq zis xauh bas jungh oen, ngos ngah gungs o mha gyoh las, Mangso dah gausyis dang namoq lyis phauh ma sang taiq kyoh goeus. Housoeh kuot zis gas ngos mas shuot cho nghuot lhyeh? 8 Ngos namoq mas muh wons nyeis dah shishenh gyo lyis, gohtoeu phung jens ngos lyis thuk goeus. Houka namoq lyis pangh thuk das xiklyis gohphung mhayah ngos khyanktau kuot zis nghuot oen lo goh. 9 Hauh thoq lyis ngos namoq yah dvgeh nyeis shishenh lyis ngwis xing chah los lyis pangh das zis ngos namoq lyis ma thauqkhyi. Makedoni mau masyah jweh los dah boekyis gas ngos chah ya chah zis chi los dyei. Lai loh goeus shishenh lyis ngos namoq lyis yvwons ma lyei nhang teh jweh los das shishenh lyis eq yvwons ma lyei nhang das. 10 Khristu dah jyoeng dang ngos mas bos zis yah dvyhangteh, hai ngos khwank cho lhyi Akhaia mauxom mha hank eq yoh tomp das zis ma nghuot, oen dangthoengh dyei. 11 Ngos heisoeh taiq zis gas ngos namoq lyis ma jyetdap las nghuot lhyeh? Ngos namoq lyis jyetdap zis gas Mangso seq. 12 Ngamoq kuot zis yah dvyhangteh nyamoq eq kuot, ge gohtoeu lvgyo jens taiq khwank das toeuh ma yoh bas jungh, gvshih ngos kuot vgus tsoq kuot nyeis shih das. 13 Hauh bang gas jyoeng dah lvgyo jens ma nghuot. Nyamoq gas Khristu dah lvgyo gyingh jens teh doeus shoq, yeis khuk las mhuih dah muh zwi bang nghuot. 14 Heisoeh kuot zis gas mauh chank ma bos: Satan yangh bvng dah loeuswons soeu teh dah yeis yoh khuk nyeis. 15 Housoeh las nyah jyeidwis jens nyang eq dan cho lhyi taiq kyoh kanghjyoeng kat dah jyeidwis jens yah doeus shoq yeis khuk nyeis zis gas mau phoh zis ma nghuot. Thang thank lyis nyamoq chank kuot zis yah dvyhangteh xauh kham das. 16 Ngos puk taiq mes zis gas, ngos lyis koh soeu nghuot oen lha hank eq ma gis nghamh. Namoq housoeh nghamh lyis eq ngos lyis koh soeu lhyi teh khvlangh lhom yoeus geh, housoeh ngos eq khwank dang dvtsiq taiq das. 17 Jyoengh oen lhyi, gvshih ngos taiq hwank cho ka Mangso taiq nhang mes cho ma nghuot. Hai taiq khwank cho mha ngos gas jyoengh nyang koh soeu teh taiq nyeis. 18 Nghuot laus eq dius nyoshoq dius dah kank bos cho mha khwank nyeis yvmvyah, ngos eq khwank das. 19 Namoq nyang joeui nyo bos las koh bang lyis gausyis zis yah tsain jhen nyeis nyvng! 20 Namoq gas namoq lyis vmingh dyei bang, namoq thoq mas toeuh yoeus bang, twih khyoq las nyhik yoeus bang, dius ngis yoeuh khyoq bang, bvlot tyuk dyei bang hank lyis laus eq jhen nyeis. 21 Ngamoq gas housoeh teh cho kuot das xiklyis yomnhuk cho rhen das xiklyis yangh xoq. Nghuot laus eq dius dvyuk yuk dvcho cho mha khwank lyis gas, ngos eq koh soeu teh womh taiq. 22 Israel jens Hebre dius nghuot lhyeh? Ngos eq nghuot. Nyamoq Abraham dah vnyau vshih nghuot lhyeh? Ngos eq nghuot. 23 Nyamoq Khristu dah jyeidwis jens nghuot lhyeh? Koh soeu dah dang teh gas nghuot laus eq ngos gas nyamoq thoq lyis zes gis dah jyeidwis nghuot. Ngos nyamoq thoq lyis muh zes zwi khank. Nyamoq thoq lyis zes las nyoshoq lhain thung gyoh. Nyamoq thoq lyis zes las wuseh xuk zis xauh. Ngos shei nos cho nyoshoq lhain zes xauh. 24 Yuda jens ngos lyis dvlhain lhyi somhci gau dvm dvm mulas oeng lhain lyuk zis xauh. 25 Roma jens bat zis somh lhain xauh. Lukzains yah doeuh zis dvlhain, jeis sangpho dyoq yvmas somh lhain bos. Dvlhain ka nvmukdra mas 24 nayi dang yenh. 26 Gyung nyoshoq lhain suh yvmas jeis je los las xauh dah gudwvng zis, khyanktau xauh dah gudwvng zis, ngah Yuda dius jens gvng mas gudwvng zis, gohnyau bang gvng mas gudwvng zis, wukhau mha xauh dah gudwvng zis, mhanhdyvp mas xauh dah gudwvng zis, thomh mas xauh dah gudwvng zis, hwah dah boekyis gvng mas gudwvng zis xauh lai loh goeus. 27 Muhzwi khank chah cho, ma xauh yhet zis nyoshoq lhain, zos yuot jeis shet, zonoms thank zis nyoshoq lhain, khau gus ma yoh zis yahge shohchen bweh zis vjangh xauh nyeis. 28 Hau thoq lyis phung dvnganh dah cho chiq zis gas nyeih yau nyeih ngos lyis nhiq zaiq toh. 29 Yomnhuk soeu dvyuk yuk bos lyis ngos yomnhuk yvlyis khamzo nyeis. Dvyuk yuk yaunos mas lains loh lyis ngos ehnyet nyo nyeis. 30 Ngos khwank chank bos lyis gas, ngos kha iq yomnhuk oen cho mha dvkhwank das. 31 Ngos ma hwah zis gas Yhensain Yesu dah Uwus, Mangso seq. Hau Yhensain Mangso dah nyings gas vcaiq vto ngelhoq bas jungh. 32 Damasku wus mas ngos nyeis uhlyis hwankti Areta o mha dah mungh zau gas ngos lyis nyhik das nyhenshang wus khomh jens mas zungh bang tsain toh. 33 Nghuot laus eq phung dius jens ngos lyis mhanghkhoq mas kat las wusciank masyah xuot khyoq dyei yvmvyah nyah loq masyah yoh luiq loh.
1 Khwank cho vkyuh ma bos laus eq hau Yhensain jyank masyah nyoqnyvng yah chixoeuq cho yah sen lha ngos khwank dang taiq shih das. 2 Khristan phoq dvyuk gas lai loh goeus dvci nyei zvn yoq lyis nyhang thank maukhung somh tsank pheh shwih dang doq loh zis xauh cho ngos seq. Housoeh shwih dang loh zis gas gungs bos lah, ma bos lah, zis gas ngos ma seq, Mangso dvseq. 3 Ngos doms taiq shih bah, hauh dius yuk lyis Paradisu pheh shwih dang loh zis ngos seq. Housoeh hauh zis gas jyoengh bweh lah? Yhetmoq nyoqnyvng nghuot lah, zis Mangso dvseq. 4 Nyang gas houmha dius dah dangkhonh yah ma gis taiq, dius dah nhuot yah taiq das toeuh ma bos dah dang yah xauhgyo yoeus. 5 Housoeh las ngos hauh soeu dah cho khwank das. Nghuot laus eq ngvnyang kha iq yomnhuk nyeis cho jens mas lai las ngah cho ngos ma khwank das. 6 Ngos khwank mes laus eq ngos koh das zis ma nghuot. Khasoeh ge lyis ngos gas jyoeng zis dvtaiq das. Nghuot laus eq ngos ma khwank das: khasoeh ge lyis namoq hank eq ngos kuot cho xauh nyvng, ngos taiq dang lyis xauhgyo yvmvyah ngos lyis seq masyah jes las ngos lyis nghamh kuh cho ma mes bweh nhang. 7 Ngos nyvng dah mauhphoh nyoqnyvng gvng mas ngos mas nghamh kuh las khwank cho ma bos bas jungh ge, ngah gungsdom mas zoeu zoeu cho dvkoeuq ngos kham zo nyeis. Hau nos cho ka Satan yah nhang kat dah lvgyo teh ngos lyis bat las ngos khwank dah zwis lyis khyauh tyamp dyei nyeis. 8 Hau nos yvlyis yoeus tyamp das xiklyis ngos gas hauh Yhensain lhyi shvmanh somh lhain dung. 9 Nghuot laus eq Mangso ka, Ngah jyehjuh gas nah xiklyis geh joq: khasoeh ge lyis nvng yomnhuk uhlyis ngah yomsoq gas kuh thank nghuot joq, ge nyang ngos lyis taiq. Housoeh yvmvyah Khristu dah yomsoq gas ngos lyis khomp gos las khau nges nhang nyeis cho ehnyet mas xauh kham zo bas jungh, ngah yomnhuk cho gvng mas ngos svsoh pyo nyeis. 10 Housoeh las ngos gas Khristu gvng mas kham dah yomnhuk cho, jwangh cho, shanghsenh cho, shoeuhshih zis xauh cho yahge yaukyenh cho jens gvng mas gausyis nhaiqtap nyeis. Khasoeh ge lyis ngos yomnhuk uhlyis yombos nyeis. 11 Ngos gas koh soeu teh kuot nyeis. Namoq ngos lyis housoeh kuot nhang goeus. Namoq gas ngos lyis taiq toenk cho shet vvng bang nghuot. Khasoeh ge lyis ngos gas cha eq ma nghuot soeu bweh nyeis lyis yangh, namoq lhyenwhei toh dah lvgyo jens o mha dvtsiq eq ma gyoh. 12 Ngos gas lvgyo dvyuk bweh nyeis cho kanghjyoeng chixoeuq das xiklyis yomsoq muh yahge mauh loqmuh nyoshoq lyis namoq mas kuhxing ehnyet yah kuot xoeuq goeus. 13 Namoq masyah pangh thuk ngwis ma yoeus cho mhayah lai las ngos namoq lyis goh phung jens yah vkant nyhen khyvlyis kuot ku lah? Housoeh Lyi ma chi cho zangh kuot yobos lyis jenh khyuot dyei geh. 14 Gvshih ngos namoq jyank mas somh vlhain kwang los das zis cicont nghuot goeus las, ngos namoq lyis cha ma sang das: khasoeh ge lyis, ngos namoq dah ngwis lyis o zis ma nghuot, namoq lyis dv o. Jyoengh oen lhyi lo jens gas ungwes uwus xiklyis zisyos yung toh dyei ma vvng, ungwes uwus moq nyang nyamoq dah lo jens xiklyis dvyung toh vvng. 15 Ngos namoq lyis pangh das nyhenshang oen lhyi ngos yoh ya yoh zis dvnganh yahge ngah gungs lyis yangh gausyis zis yah yhung das zis ngwis. Ngos namoq lyis svsoh jyetdap yvmvyah namoq ngos lyis dvtsiq dvjyetdap das lhyeh? 16 Housoeh las ngos namoq lyis yvwons lyei nhang zis ma nghuot cho namoq xamxonh das. Nghuot laus eq ngos gas namoq lyis joeui yah mhuih khyvlyis twih khyoq yoeus ge dvyuk yuk taiq das. 17 Ngos khasoeh mhuih zo lai loh goeus lah? Ngos namoq jyank mas nhang dah lvgyo jens mas dvyuk yuk masyah toeuh yoeus las namoq dah vyhang lhyi thyet zo nyeis lah? 18 Ngos gas Titu lyis namoq jyank mas los das xiklyis dung las nhang kat. Gohtoeu Khristan vmang vnoeuh dvyuk eq nyang yah dvgeh chank los. Titu gas namoq mas toeuh yoeus las vyhang thyet zo nyeis oen das lah? Nyang yahge ngos gas nghamh zis yahge kuot zis dvcho dvnghuot. 19 Ngamoq gas namoq xikkhonh mas vjangh yah vsainnyang yobos ma bos oen gungs gos dang tungh taiq bang nghuot ge nghamh mvbeh? Housoeh ma nghuot! Khristu taiq nhang mes zis yah dvyhangteh Mangso xikkhonh mas ngamoq taiq. Hauh thoq lyis jyetdap bang eh, ngamoq kuot ya kuot zis gas namoq lyis pangh das xiklyis dvkuot. 20 Ngos namoq jyank mas jweh lyis, namoq gas ngos o khyvlyis, ngos nyvng mes khyvlyis ma nghuot langh, ngos mas eq namoq o khyvlyis namoq nyvng mes khyvlyis ma nghuot mus das yvlyis chiqh. Tsai ngos gas namoq mas dyoqgoh cho, noh cho, nhaiqlom dyis cho, tyam cho, jwangh goh cho, goes sang goh, khwank, hoeu cho bweh nyeis yvlyis nyvng das zis chiqh. 21 Ngos namoq jyank mas doms jweh lyis, Mangso ka ngos lyis namoq xikkhonh mas khyoq tyamp zis xauh nhang das yvlyis chiqh. Gvshih jweh shoq nhaiqlom ma thaiq wotwu yoq, nyetnau las yauxi cho chank nyeis bang nyoshoq gvng mas ngos ngausdyeis gyoh das yvlyis chiqh.
1 Ngos namoq jyank mas somh vlhain jweh los das. Lhaihtoh dang mas taiq vgus, zau kauq cho dvja ja bos lyis kanghjyoeng aiq yuk somh yuk dah dang yah doengs nhang chah. 2 Xikpheh yaunos kuot lai loh goeus bang yahge gohtoeu dvnganhmoq lyis ngos taiq mes. Hauh yvlyis xikpheh ngos namoq jyank mas aiq vlhain jweh los uhlyis taiq toh zis yah dvyhangteh, gvshih namoq yah we nyeis shishenh lyis eq dvlhain doms taiq das. Houka thang lhain ngos doms jweh los uhlyis namoq hank eq soetuon yobos dyei masyah ma yoh luiq das. 3 Khristu gas ngos mas dang taiq nyeis cho kanghjyoeng lhyi namoq o nyhoq nyvng das. Khristu gas namoq yah tsoq goh las muh zwi uhlyis nyang yomnhuk zis ma nghuot. Hauh gungsthaiq nyah yomsoq lyis namoq mas chixoeuq das. 4 Khasoeh ge lyis nyang gas yomnhuk dah vkant mas tapzains mas taplhangh sat zis xauh laus eq Mangso dah yomsoq yah dwis nyeis. Yang eq Khristu yah dvdain dvlom duot gvng mas yomnhuk nyeis. Nghuot laus eq namoq yah tsoq goh cho mha yang gas Khristu yah dvgeh dwis nyeis yvmvyah Mangso dah yomsoq lyis xauh gvm yoeus das. 5 Namoq gas lomsjingh yvmas kang dwis bang nghuot zis yoh seq das nyhenshang namoq nyang gungs nyang suon yoeuh soetuon zo geh. Namoq shank shoq somh loh bang ma nghuot lyis gas, Khristu Yesu namoq mas nyeis cho lhyi jyoengh yoh seq das. 6 Ngamoq gas somh loh bang ma nghuot yvlyis namoq seq das oen loms. 7 Namoq shuot cho lhyi ma kuot bas jungh oen ngamoq Mangso jyank mas shvmanh dung. Houka ngamoq shiwu yvlyis ung cho chixoeuq das nyhenshang ma nghuot; ngamoq gas somh loh bang teh nghuot laus eq namoq jyoeng yvlyis yoh kuot das xiklyis dvdung dyei nyeis. 8 Khasoeh ge lyis ngamoq gas jyoeng cho lhyi tyixo zis cha eq ma yoh kuot, jyoeng cho mha dvtsain yoh yap. 9 Housoeh las ngamoq yomnhuk las namoq yombos nyeis lyis ngamoq gauslaus. Housoeh namoq dyinghjet bang bweh los bas jungh eq shvmanh dung nyeis. 10 Namoq yah we joq lyis ngos haih maussauh lhaih zis gas, ngos namoq jyank mas jweh lyis Yhensain ngos lyis dyei toh dah toeuh lyis mvgon ma yhung tyamp das xiklyis nghuot. Hauh toeuh gas namoq lyis thyoqpi das xiklyis ma nghuot, jebais los nhang das xiklyis dvnghuot. 11 Ngah boekyis eh, gvshih ngamoq jeshuh kat. Namoq dvnganhmoq yoh dyinghjet shoq tsoq las yomkat nyeis geh. Ngos dung dang lyis gyo yoeus las nyang changh nyang xamxonh zis yah nyenstap khyvlyis nyeis geh. Jyetdap zis yahge nyenstap vsain Mangso ka namoq yah dvgeh nyeis das. 12 Namoq nyang changh vmang vnoeuh dah bvlot tanh zis yah jeshuh goh geh. Mangso dah dius jens dvnganh namoq lyis jeshuh kat. 13 Yhensain Yesu Khristu dah jyehjuh, Mangso dah jyetdap zis yahge Gyingshang Dyos dah zomh cho ka namoq dvnganhmoq yah dvgeh nghuot bas jungh.
1 Dius dah vmingh yah lvgyo toeuq toh zis xauh soeu ma nghuot, dius yah toeuq toh dah lvgyo eq ma nghuot, Yesu Khristu yahge nyang lyis dwis toq nhang dah Uwus Mangso vmingh yah lvgyo nghuot soeu, ngos Paulo gas, 2 heimha ngos yah dvgeh nyeis dah boekyis dvnganh gas, Galati mau mas dah phung jens lyis maussauh lhaih las jeshuh kat. 3 Yah Uwus Mangso yahge Yhensain Yesu Khristu jyank masyah jyehjuh yahge nyenstap zis gas namoq mas joq bas jungh. 4 Haih gvshih dah ma gis ma shop caiq masyah khyuot kat bas jungh, yah Uwus Mangso o zis yah dvyhangteh Khristu gas domsyos gyo zis yah, yah yaunos xiklyis nyah gungs lyis dyei tyamp goeus. 5 Hauh Uwus Mangso mha vcaiq vto phunk bos joq bas jung. Amen. 6 Khristu dah jyehjuh yah namoq lyis lui yoeus soeu jyank masyah lvnyap gang las gohtoeu gausyis dang shot pheh chank loh las ngos namoq lyis mauh. 7 Jyoengh oen lhyi Yhensain Yesu dah cho mha lai las Gausyis Dang gohtoeu ma bos lo. Nghuot laus eq gvshih ngos taiq nyeis zis gas, Khristu dah Gausyis Dang lyis lhoeu thyoq das nyhenshang yomkat nyeis bang dvyhamh namoq khamkhvv shoq lhoq yau nyeis gvng mas taiq zis nghuot. 8 Nghuot laus eq ngamoq namoq lyis taiq kyoh goeus dah Gausyis Dang yah shaih dah gohtoeu dah gausyis dang, ngamoq laus eq, maukhung loeuswons soeu laus eq namoq lyis taiq kyoh lyis gas, nyang munyi thomh yah mon dah nhoengh zis xauh bas jungh. 9 Namoq lhom yoeus goeus dah Gausyis Dang yah shaih dah gohtoeu gausyis dang dvkoeuq lyis, dvyuk yuk namoq lyis taiq kyoh lyis gas, nyang nhoengh zis xauh bas jungh oen, xikpheh ngamoq taiq ku goeus zis yah dvyhangteh gvshih ngos doms taiq nyeis. 10 Khasoeh ge lyis ngos heisoeh taiq zis gas dius o khyvlyis kuot nyeis lah? Housoeh ma nghuot. Ngos o mes cho ka Mangso xihhonh nhaiqdoeus cho dvnghuot. Ngos gas dius xikkhonh mas hoeuh shoq yomkat nyeis lah? Ngos dius o khyvlyis dvyomkat nyeis shih lyis gas, ngos Khristu dah jyeidwis ma nghuot lo. 11 Boekyis eh, ngos taiq kyoh goeus dah Gausyis Dang gas, dius yah kuot thuq kat cho ma nghuot yvlyis ngos namoq lyis taiq kyingh. 12 Khasoeh ge lyis ngos hauh zis lyis dius hank jyank masyah eq xauh lhom yoeus zis ma nghuot, Yhensain Yesu Khristu nyang nyoqnyvng khyvlyis chixoeuq zis dvnghuot. 13 Ngos Yuda thungh yah nyeis uhlyis ngos khasoeh chank kuot yvlyis namoq xauhgyo ku. Ngos gas Mangso dah phung lhyi nhaiqnyen ehnyet ma bos thyoq tyamp das zis lohthank shoq yomkat ku goeus. 14 Yuda loms noq thungh lyis chank kuot yvmas ngos gas ngah vnyau mas ngos yah dvgyamh bang nyoshoq thoq lyis nhaiq zes wvng zis yah phauh thyeih moq dah lyi lyis chank kuot tyink lai loh goeus. 15 Nghuot laus eq ngos ngah ungwes ung masyah ma khoeu shih lyis Mangso ka nyah jyehjuh yah ngos lyis khyen lha nyang lyis phuqsoe das nyhenshang khi yoeus. 16 Hauh thang lhyi gohnyau bang lyis nyah Lo dah Gausyis Dang yoh taiq kyoh das xiklyis nyah Lo ngos lyis chixoeuq. Hauh uhlyis ngos gas hank dah joeui dyei zis lyis eq ma sang, ma kham yoeus. 17 Hauh thoq lyis, ngah xik lyis yah lvgyo duot bang yah loh xauhgoh das xiklyis Yerusalem mas eq ma doq loh; Arabia mau mas dvlhain dvm lyis e lho lha Damasku mas tauh loh. 18 Somh zvn thang lhyi, ngos Kepha ge dah Petru yah xauhgoh las nyah jyank masyah loeus xauh yoeus das xiklyis Yerusalem mas doq loh las, nyang yah dvci oeng nyeih nyeis khoq. 19 Yhensain dah vnoeuh Yaku mas lai las gohtoeu lvgyo jens lyis ngos ma nyvng. 20 Gvshih ngos namoq lyis lhaih kat zis gas jyoeng cho nghuot. Ngos hwah dang ma taiq zis gas Mangso seq. 21 Hauh thang lhyi ngos Siria mau yahge Kiliki wuxom mha jweh loh. 22 Hauh yoq lyis Yuda mau mas dah Khristan phung dius jens gas ngos yah nyoqnho changh ma seq goh shih. 23 Nghuot laus eq nyamoq gas, xikpheh ngamoq lyis shoeuhshih ku soeu ka, gohlhain nyang mhont tyamp das xiklyis khank ku dah lomsjingh cho lhyi gvshih taiq kyoh nyeis ge, gohyuk taiq yvlyis dvxauhgyo ku. 24 Housoeh las nyamoq gas ngah gvng mas Mangso phunk lhyi tsain chungh.
1 Hauh thang lhyi dvci nyei zvn lai lhyi, Titu lyis eq shwih las ngos Barnaba yah dvgeh Yerusalem pheh doms loh. 2 Heisoeh ngos loh zis gas Mangso dyei dah nyoqnyvng dang yah dvyhangteh nghuot. Uhjyung jens kyoq kyoq huom yvmas ngos Gohnyau bang lyis taiq kyoh Gausyis Dang cho taiq phui kyoh. Ngos housoeh taiq phui kyoh chah zis gas, xik pheh laus eq gvshih laus eq ngos yomkat nyeis dah muhzoh lyis vkom somh loh cho ma bweh nhang mes yvmvyah nghuot. 3 Ngah dyenschangh Titu gas Heleni dius nghuot laus eq hank eq nyang lyis vthyoh ma tsoengh tyomh nhang. 4 Dvyhamh gas nyang lyis vthyoh tyomh nhang mes. Khristu Yesu yah dvdain dvlom bweh las kang dwis gvng mas ngamoq xauh yoeus, luiq toeuh lyis joh yoeuh das xiklyis dius dvyhamh gas Khristan vmang vnoeuh guons kuot zis yah ngamoq dah huom mha gauh wvng los. 5 Nghuot laus eq hau Gausyis dang dah jyoeng cho namoq dah xiklyis yoh goeng joq bas jungh, ngamoq nyamoq lyis dvminit yangh shoeuh cho kham zis ma nghuot. 6 Nyoqnho ngelang bos dah uhjyung jens teh bang gas nyamoq jyoengh uhjyung jens nghuot ma nghuot gas ngah xiklyis lhyenwhei yhaugyen zis ma nghuot. Khasoeh ge lyis Mangso ka nghe pheh yah nyvng khyvlyis soe ma tuon. Hau nyoqnho ngelang bos teh dah uhjyung jens gas ngos lyis joeui dyei cho vsaiq cha ma bos. 7 Nyamoq ngos lyis joeui vsaiq dyei das gungsthaiq Mangso ka Petru lyis vthyoh tyomh dah Yuda jens lyis gausyis dang taiq kyoh das yvwons s dyei goeus zis yah dvyhangteh ngos lyis eq vthyoh ma tyomh dah gohnyau bang lyis taiq kyoh das yvwons kyauh toh goeus cho nyamoq nyvng, seq. 8 Khasoeh ge lyis Mangso dah yomsoq yah Petru lyis Yuda dius dah nyhenshang lvgyo toeuq toh goeus zis yah dvyhangteh ngos lyis eq gohnyau bang nyhenshang lvgyo toeuq toh. 9 Housoeh ngos lyis dyei toh dah jyehjuh tsain nyvng lyis, phung dah khungzains uhshe bang oen gis dah Yaku, Petru yahge Yohan moq gas, Mangso ngos lyis lhyenwhei dyei toh dah yvwons s lyis bos toeuq dyei. Housoeh ngamoq dvnganh gas muh wons changh nghuot cho vlho Chixoeuq khyvlyis nyamoq gas Barnaba yahge ngos lyis loq zwi zis yah lhom yoeus. Ngamoq gas gohnyau jyank mas muh wons las nyamoq gas Yuda jens mas muh wons das xiklyis xamxonh toh goeus. 10 Nyamoq gas ngamoq lyis shohjyen bang chah nyeis cho mha pangh das zis ma tohnyhik das xiklyis tying kat. Haih zis ngos svsoh wons wuq mes dah muh nyang nghuot. 11 Nghuot laus eq Petru gas Antiok wus mas jweh lyis, nyah wotwu shuot cho gyoq gyoq nghuot joq las ngos nyang lyis dius phung xikkhonh mas nyho goeus. 12 Khasoeh ge lyis Yaku nhang kat bang dvyhamh houmha ma jweh los shih lyis Petru gas gohnyau bang yah dvgeh zo nyeis. Nghuot laus eq hauh nhang kat zis xauh bang jweh los goeus ya, vthyoh tyomh bang lyis gyuk yvmvyah, gohnyau bang yah dvgeh wom zo masyah thuq jhank loh. 13 Gohtoeu Yuda vmang vnoeuh moq eq Petru yah dvgeh ma womh bang teh chank loh nyeis yvmvyah Barnaba yangh nyamoq mas bos loh nyeis. 14 Gvshih nyamoq hau Gausyis Dang dah jyoeng cho mha dan dan ma suh zis ngos nyvng lyis nyamoq dvnganh dah xikkhonh mas Petru lyis, Nvng gas Yuda dius nghuot las, Yuda dius teh ma kuot, gohnyau teh nghuot joq las gohnyau bang lyis Yuda jens teh kang yoh dwis shoq khasoeh yoh nyhenh kuot das lah, oen taiq goeus. 15 Ngamoq gas Yuda gyingh nghuot las, yaunos dap dah gohnyau bang oen nyhink bang ma nghuot, tsain ge. 16 Nghuot laus eq dius gas Lyi chank bang dah muhzoh yah Mangso dah xikkhonh mas ma yoh dan, Yesu Khristu lyis lomsjingh zis yah kyingh dvyoh dan zis lyis ngamoq seq yvmvyah ngamoq eq Lyi chank dah muhzoh yah ma nghuot, Khristu lyis lomsjingh gvng mas Mangso xikkhonh mas dan bang bweh los bas jungh, ngamoq yangh Khristu Yesu lyis lomsjingh goeus. Khasoeh ge lyis Lyi dah muhzoh yah hank eq Mangso xikkhonh mas dan yvmas ma yoh jweh. 17 Housoeh las yang gas Khristu yah dvdain dvlom duot gvng mas Mangso xikkhonh mas yoh dan bas jungh yomkat cho mha ngamoq nyang eq gohnyau bang teh yaunos dap bang nghuot yvlyis nyvng goeus ya, Khristu nyang yaunos kuot cho lhyi yomdyei nyeis oen yoh taiq das lah? Khasoeh eq ma gis bweh. 18 Khasoeh ge lyis, xikpheh ngos thyoq sanh tyamp dah Lyi cho lhyi ngos doms toenk nhang nyeis lyis gas, ngos gas Lyi lhyweq soeu nghuot yvlyis Chixoeuq nyeis. 19 Lyi yah sen lha taiq lyis, Lyi gas ngos lyis sat goeus las ngos gas shei soeu nghuot. Ngos Mangso xiklyis kang dwis bas jungh, ngos gas Khristu yah dvgeh nyah tapzains mas taplhangh sat zis xauh goeus. 20 Housoeh las ngah gungs dwis nyeis shih zis ma nghuot, ngos mas Khristu dvdwis nyeis. Gvshih ngos dwis nyeis dah kang ka ngos lyis jyetdap las ngah xiklyis nyah kang dyei tyamp, Mangso dah Lo lyis lomsjingh gvng mas dwis nyeis dah kang dvnghuot. 21 Ngos Mangso dah jyehjuh lyis peq das zis ma gyo: khasoeh ge lyis dius gas Lyi yah Mangso dah xikkhonh mas yoh dan los nghuot lyis gas, Khristu gas vnyet dvshei kham lo.
1 Koh dah Galati bang eh, tapzains mas Yesu Khristu shei kham cho, ngos namoq xikkhonh mas gyoq gyoq nyvng shoq taiq phui kyoh goeus lyis eq, namoq lyis hank yah hweq kat yoeus lah? 2 Namoq hauh Dyos xauh yoeus zis gas Lyi chank tyink dah muhzoh yah nghuot lah? Gausyis dang xauhgyo las hauh yvlyis lomsjingh gvng mas nghuot lah? Ngos namoq nhuot masyah hauh dvcho kyingh seq mes. 3 Namoq khasoeh hei iq koh goh lah? Namoq gas hau Dyos mas nges zis yah kuot xi lho lha, gvshih gas namoq gungsshoh yom lyis nges las vthang sau mes lhyeh? 4 Namoq nyang thungh phuh kham zo dah shanghsenh lyis namoq vkom kham zo tyamp goeus lhyeh? Jyoengh hau thungh phuh zis gas namoq xiklyis vkom ma gis bweh loh. 5 Mangso ka namoq lyis Dyos dyei las, yomsoq muh kuot zis gas Lyi chank tyink gvng mas nghuot lah? Gausyis Dang lyis xauhgyo las lomsjingh gvng mas yoh bweh nhang lah? 6 Abraham thungh phuh cho lhyi nghamh yoeuh goh: lhaihtoh dang mas, Abraham gas Mangso lhyi lomsjingh las, Mangso eq nyang lyis dan soeu ge lhom yoeus, ge toh. 7 Housoeh yvmvyah Mangso lhyi lomsjingh bang gas, Abraham dah lo jens gyingh nghuot zis namoq seq geh. 8 Lhaihtoh dang eq, Mangso ka lomsjingh zis yah kyingh gohnyau bang lyis dan nhang das ge taiq toh. Housoeh las lhaihtoh dang gas, Dius nyau dvnganh gas nah gvng mas shvmanh yoh das ge Abraham lyis Gausyis Dang taiq kyoh goeus. 9 Housoeh las Abraham gas Mangso lhyi lomsjingh yvmvyah shvmanh jyehjuh xauh kham zis yah dvyhangteh lomsjingh bang dvnganh eq shvmanh jyehjuh xauh kham yoeus. 10 Lyi chank tyink dah cho lhyi nges soeu hank laus eq nhoengh yvmas bos: khasoeh ge lyis lhaihtoh dang gas, Lyi mas lhaih ya lhaih toh zis yah dvyhangteh ma kuot tyink soeu hank laus eq Mangso dah nhoengh zis xauh das, ge lhaih toh. 11 Lhaihtoh dang mas Mangso lhyi lomsjingh soeu lhyi nyah xikkhonh mas dan soeu nghuot ge suon dyei zis xauh soeu ka dwis nyeis, ge lhaih toh yvmvyah Lyi chank tyink zis yah Mangso xikkhonh mas hank eq ma yoh dan das zis gas bvng bvng nghuot. 12 Nghuot laus eq lhaihtoh dang mas, Lyi mas taiq ya taiq toh dang lyis chank tyink soeu ka kang dwis nyeis das ge lhaih toh yvmvyah Lyi gas lomsjingh cho yah cha ma sen. 13 Saiq mas lhangh zis xauh soeu khanghmuh Mangso dah nhoengh zis xauh soeu nghuot ge lhaih toh zis yah dvyhangteh, Khristu gas yah xiklyis nhoengh zis xauh soeu bweh loh gvng mas, Lyi dah nhoengh zis xauh masyah Khristu gas yang lyis khyuot yoeus goeus. 14 Heisoeh Yesu kuot cho ka Abraham kham yoeus, Mangso jyank mas dah dangthoengh yah sen dah shvmanh jyehjuh lyis gohnyau bang eq Yesu Khristu gvng mas xauh kham yoeus das zis yahge yang eq hau lomsjingh gvng mas Mangso dangthoengh toh dah Dyos xauh kham yoeus das. 15 Boekyis eh, namoq nyeih khanghmuh thungh phuh nyeis cho mha ngos dangtoeuq dvkoeuq yah taiq das. Dius aiq yuk gas cho dvja mas xamxonh zis yah dangthoengh vlho maussauh dye lhaih toh lyis hauh yvlyis hank eq ma yoh thyoq, ma yoh jyeq kat. 16 Gvshih Mangso ka nyah dangthoengh, Abraham yahge nyah vnyau vshih lyis dyei toh, ge. Lhaihtoh dang mas vnyau vshih nyoshoq, nghuot ya dius nyoshoq ge dah dang ma chi. Nah vshih ge dvyuk lyis kyingh taiq nyeis las hauh zis gas Khristu nghuot. 17 Housoeh las ngos taiq mes zis gas heisoeh nghuot. Mangso ka Abraham yah thanghchvp dye toh thang lhyi hauh yvlyis yoeuh gomh das dangthoengh toh. 430 zvn nyangh thang lhyi dvthuq los dah Lyi gas hauh thanghchvp lyis ma yoh thyuk zis yahge hauh dangthoengh lyis eq ma yoh yoeus tyamp. 18 Khasoeh ge lyis Mangso dah jyehjuh vso vlho ka Lyi mas nges toh nghuot lyis gas hauh zis dangthoengh yah ma sen lo; nghuot laus eq Mangso ka dangthoengh gvng mas Abraham lyis hauh jyehjuh vso vlho dyei toh. 19 Housoeh lyis gas hauh Lyi dah toeuqkhom ka cha nghuot? Lyi lyis Mangso jyeq kat toh dyei cho ka shuot dah yaunos cho lhyi chixoeuq das xiklyis nghuot las houka dangthoengh toh dah Abraham vnyau vshih ma jweh los shih gyo lyis kyingh goeng joq das nyhenshang nghuot. Mangso ka Lyi lyis loeuswons bang khyvlyis yah jo mas suh soeu loq lyis yah dyei toh. 20 Nghuot laus eq Mangso ka dangthoengh dyei uhlyis jo mas suh dyei das dius ma chah, nyang dan dan kuot goeus. Mangso ka dvyuk kyingh dvnghuot. 21 Housoeh las Lyi gas Mangso dah dangthoengh lyis tyixo oen mes lah? Housoeh ma nghuot, khasoeh ge lyis cangsoeu dius jens gas kang yoh dwis nhang dah Lyi lyis dius jens toq xauh lhom yoeus toh lyis gas, dius yuk khanghmuh hauh Lyi chank tyink gvng mas Mangso xikkhonh mas yoh dan los das zis nghuot. 22 Nghuot laus eq Mungkvn gonh gas yaunos dah yomsoq yah nghop tyamp, ge lhaihtoh dang mas taiq. Housoeh las Yesu Khristu lyis lomsjingh yvmas vpom xi toh dah dangthoengh yah sen dah jyehjuh vso vlho ka lomsjingh bang kham yoeus goeus. 23 Nghuot laus eq hauh lomsjingh cho xiklyis shishenh ma jweh shih lyis lomsjingh cho dede thuq los shishenh jweh shoq Lyi gas yang dvnganh lyis thung dius jens lyis teh lhunk toh. 24 Housoeh las yang gas lomsjingh gvng mas dan los bas jungh ge, Lyi gas jyauh soeu khyvlyis Khristu jweh los shishenh jweh shoq yah xiklyis jyauh soeu duot dyei. 25 Nghuot laus eq lomsjingh cho jweh goeus las, yang gas jyauh soeu o mha ma nghuot lo. 26 Khasoeh ge lyis, Khristu Yesu lyis lomsjingh yvmvyah namoq dvnganh gas Mangso dah lo jens nghuot. 27 Namoq gas Khristu yah dvdain dvlom duot das xiklyis jeisnyhop tsain kham goeus las, Khristu lyis tsain wuot toh. 28 Housoeh las nyang changh shaih goh gang lvn cho ma bos bos, Yuda vnyau yahge gohnyau bang oen zis ma bos, jons yahge luiq soeu ma bos, nyelo yukgis lo oen das zis eq ma bos. Namoq dvnganh gas Khristu mas dvkoeuq dvnghuot. 29 Gvshih namoq Khristu yah sen bang nghuot lyis gas, namoq gas Abraham dah vnyau vshih tsain nghuot zis yahge hau dangthoengh joq zis yah dvyhangteh Mangso jyank masyah vso vlho xauh kham yoeus das.
1 Tsoq taiq das zis bos shih. Uwus jyank masyah yhenzis vso vlho dvnganh kham yoeus das yvmvyah jyoengh kham yoeus das zis jus joq laus eq loshang nghuot shih uhlyis gas jons dvyuk teh toh zis xauh. 2 Uwus toeuq toh shishenh jweh shoq nyang ngis shih gyo lyis gomh bang jyauh bang yahge nyang chah ya chah yvlyis kuot dyei dah yhen zom bang dah o mha nyang nyeis shih. 3 Houyah dvyhangteh yang eq Dyos dah cho mha seq dah nhaiqbos jens ma duot shih gyo lyis mungkvn lyis guon nyeis dah yius sidyos jens dah jons duot ku. 4 Nghuot laus eq shishenh jweh goeus ya, Mangso ka nyah Lo lyis nhang kat. Yang gas Mangso dah lo jens ge rhen dah jyehjuh xauh kham yoeus. 5 Hauh Lo gas Lyi khau mha nyeis bang lyis khyuot yoeus das nyhenshang cangsoeu ungwes masyah khoeu los las, Yuda jens dah Lyi khau mha nyeis lyih. 6 Gvshih namoq gas Mangso dah lo jens tsain nghuot yvlyis kanghjyoeng chixoeuq das xiklyis, Uwus eh, ngah uwus eh ge seq taiq, nyah Lo dah Dyos lyis yah ehnyet khau mha nhang kat dyei goeus. 7 Housoeh las nvng gas jons ma nghuot lo, lo dvyuk nghuot goeus: nyah lo nghuot goeus ya, Mangso jyank masyah nyah lo jens dah nyhenshang sont toh dah vso vlho dvnganh eq nvng lyis dyei das. 8 Lai loh goeus yoq lyis namoq Mangso lhyi ma seq shih yvmvyah ma jyoeng dah phvra jens dah jons tsain duot khoq. 9 Gvshih gas namoq Mangso lhyi seq goeus thoq lyis, Mangso eq namoq lyis seq goeus lyis, yomnhuk shohjyen dah yius sidyos jens jyank pheh namoq chamus doms tauh loh mes goh lah? 10 Namoq gas buisnyeis, lhamhmuh, shishenh yahge zvn dvkhamh lyis svsoh yhaugyen khyvlyis toh. 11 Ngos namoq jyank mas vkom mha dvyomkat tyamp mvbeh oen ngos namoq cho chiqh. 12 Boekyis eh, ngos namoq teh nghuot yvmvyah namoq eq ngos teh tsain kuot geh: oen ngos namoq lyis shangphu. Ngos namoq lyis cha ma cu. 13 Ngos namoq lyis Gausyis Dang cangxeih vlhain yoh taiq kyoh cho ka, gungsdom nos xauh las no nyeis gvng mas yoh taiq kyoh yvlyis namoq seq nyeis. 14 Ngah gungs yanghzan cho gvng mas namoq xiklyis thauqkhyi cho bweh nhang das laus eq namoq ngos lyis dius ngis ma khyoq, ma choqh thoq lyis magoh, maukhung mas dah loeuswons soeu dvyuk lyis teh, jyoengh Khristu lyis teh tsain lhom yoeus. 15 Hauh uhlyis namoq svsoh yoh pyo goeus. Gvshih namoq chamus lah? Hauh shishenh lyis namoq gas gis bweh lyis vsainnyang nyoqlom lap las ngos lyis dyei das zis yangh tsain womh yvlyis ngos namoq dah cho kanghjyoeng kat. 16 Gvshih gas ngos namoq lyis hau jyoeng cho taiq kyoh yvmvyah namoq dah jes bweh los goeus lah? 17 Ngos lyis tomp bang gas namoq mas nhaiq wvng. Nghuot laus eq jyoeng dah nghamh toeuq zis ma nghuot. Nyamoq dah o cho ka nyamoq thoq mas namoq dah nhaiq wvng cho xauh kham yoeus shoq namoq lyis ngos yah kangh tyamp nhang mes las dvnghuot. 18 Jyoeng dah nghamh toeuq cho yahge nhaiq wvng chiqh cho nghuot lyis gas gis. Ngos namoq yah nyeis lyis kyingh gis cho lhyi chiqh gis zis ma nghuot. Khanhamp laus eq gis cho lhyi chiqh nyeis das zis gas gis. 19 Jyetdap loshang jens eh, Khristu dah gungs khyank namoq mas dyinghjet los shishenh jweh shoq ngos gas namoq dah xiklyis lokhoeu dah ungwes teh lokhoeu nos doms nos nyeis. 20 Ngos namoq lyis thwe shaih khyvlyis yoh taiq das xiklyis ngos namoq yah kha iq nyeis mes lah! Ngos gas namoq dah cho svsoh chiqh nyeis. 21 Lyi khau mha nyeis mes bang lyis ngos nyei bah. Namoq gas hauh Lyi taiq toh cho lhyi ma xauhgyo ku goh lhyeh? 22 Khasoeh ge lyis lhaihtoh dang mas taiq zis yah dvyhangteh, Abraham gas loloeu aiq yuk yoh. Dvyuk gas jyeidwis nyih dah lo nghuot. Gohtoeu dvyuk gas nyicuk dah lo nghuot. 23 Jons nyhiq yah yoh dah lo gas diuslaiq khyvlyis khoeu los dah lo nghuot. Nghuot laus eq jons ma nghuot soeu yah yoh dah lo gas Mangso dangthoengh yah dvyhangteh khoeu los. 24 Hauh cho jens lyis dangtoeuq dvkoeuq khyvlyis seqgyo gis. Vmesbih aiq yuk gas hau thanghchvp aiq koeuq yah doeusgoh. Vmesbih dvyuk gas Hagar nghuot las nyang khoeu kat lo jens gas jons duot. Hagar gas Sina boms mas dyei dah thanghchvp vlho nghuot. 25 Hagar gas Arabia mau mas joq, Sina boms yah byi toh. Nyang gas gvshih jons duot nyeis Yerusalem yahge wus mas dius jens xiklyis vlho duot dyei nyeis. 26 Nghuot laus eq gohtoeu vmesbih gas maukhung Yerusalem yah byi toh. Nyang gas luiq dah vmesbih nghuot las, yah ungwes eq nghuot. 27 Khasoeh ge lyis lhaih toh zis gas, Lo ma khoeu dah dyeithonh eh, gauslaus nyeis aq; Lo khoeu nos ma xauh dah vmesbih eh, gaus zis yah kaiq nyeis aq; Khasoeh ge lyis doeuh tyamp toh dah vmesbih gas, yhensain phoq bos dah vmesbih thoq lyis loshang jens zes yoh, ge. 28 Boekyis eh, gvshih namoq gas Isak yhangteh nyah dangthoengh yah dvyhangteh yoh los dah Mangso dah lo jens nghuot. 29 Hauh shishenh lyis diuslaiq khyvlyis khoeu los lo gas Mangso dah Dyos gvng mas khoeu los dah lo lyis shoeuhshih. Gvshih uhlyis eq housoeh bweh nyeis. 30 Nghuot laus eq lhaihtoh dang gas cha taiq? Haih jyeidwis nyih yahge nyah lo lyis khat thuq aq: khasoeh ge lyis jyeidwis nyih dah lo gas nyicuk dah lo yah dvgeh uwus dah yhenzis vso vlho xauh sain das zis ma nghuot, ge. 31 Housoeh las boekyis eh, yang gas jyeidwis nyih dah lo jens ma nghuot, nyicuk dah lo jens dvnghuot.
1 Khristu gas yang lyis jons masyah lhuiq kat goeus las yang jons ma tsain nghuot lo. Housoeh las luiq goeus bang teh goeng goeng yap geh. Namoq dah gungs lyis jons tanzoe o mha vdoms bat lyet nyeis goh. 2 Gyo geh! namoq vthyoh tyomh lyis gas, Khristu gas namoq xiklyis chah vkyuh ma bos oen ngos Paulo nyang namoq lyis taiq kyoh. 3 Hauh thoq lyis vthyoh tyomh soeu ka Lyi dvnganh chank tyink chah oen vthyoh tyomh bang dvnganh lyis ngos dvlhain doms zaih nhang. 4 Lyi chank tyink khyvlyis yah Mangso xikkhonh mas dan cho yoh das ge yomkat bang namoq gas, Khristu yah gang las Mangso dah jyehjuh lyis kat khyoq tyamp. 5 Yang gas Mangso dah Dyos yomsoq mas nges las lomsjingh gvng mas Mangso xikkhonh mas dan ge suon dyei dah toeuh yoh das oen nghamhloms las langh nyeis. 6 Khasoeh ge lyis yang Yhensain Yesu mas nghuot joq lyis gas vthyoh tyomh, vthyoh ma tyomh ge zis gas cha yhaugyen zis ma nghuot: yhaugyen cho ka jyetdap ehnyet nyvng shoq muh khanh dah hau lomsjingh cho dvnghuot. 7 Xikpheh namoq svsoh yhaugyen khyvlyis kuot loh goeus; hauh jyoeng cho lhyi domsyos ma gyo bas jungh ge, namoq lyis hank kyamp toh lah? Hauh soeu ka namoq lyis khasoeh mhuih loh? 8 Housoeh mhuih zis gas, namoq lyis khi yoeus dah Mangso bweh nhang zis ma nghuot. 9 Ohlhyoq dvjop gonh lyis bi nhang das xiklyis bicheih dvtsiq dvchah ge dah dang lyis soh geh. 10 Nghuot laus eq ngos gas gvshih jweh shoq namoq lyis tsoq loms nyeis. Ngos yahge namoq gas Yhensain mha dvdain dvlom nghuot joq yvmvyah namoq gas shaih dah cho lhyi ma lhom yoeus das oen loms. Namoq lyis khamkhvv shoq thauqkhyi soeu hank lyis laus eq Yhensain ka soetuon yobos dyei das. 11 Nghuot laus eq boekyis eh, vthyoh tyomh cho yhaugyen oen ngos tsoq taiq kyoh nyeis ge cho jyoeng nghuot lyis gas, ngos chamus shoeuhshih zis xauh nyeis shih lah? Housoeh taiq kyoh ge zis jyoeng nghuot lyis gas, Khristu yah sen dah cho lhyi ngos taiq kyoh gvng mas yaukyenh cho bweh nhang das zis ma nghuot. 12 Namoq lyis lhoq yau bang gas, vthyoh tyomh zis kyingh ma nghuot, nyamoq nyang thyet tyamp lyis zes gis. 13 Boekyis eh, namoq gas luiq cho yoh bas jungh, namoq lyis khi yoeus goeus, nghuot laus eq hau luiq toeuh lyis jyamp las gungsshoh o mes khyvlyis vkuot goh. Housoeh kuot das gungsthaiq namoq gas jyetdap ehnyet yah nyang changh nyang phuqsoe goh geh. 14 Khasoeh ge lyis, Nah yhenkyoh lyis nvnyang gungs lyis teh jyetdap aq, ge dah tyingtoh dang dvkoeuq lyis chank kuot zis yah hauh Lyi dvnganh yoh nyuk los cho taiq toh. 15 Nghuot laus eq yewus jens teh namoq nyang changh nyang ngatzo goh nyeis lyis gas namoq nyang changh thyuk tyamp goh cho duot das las zaih nyeis geh. 16 Ngos taiq zis gas, Dyos taiq shet zis yah dvyhangteh chank kuot nyeis geh. Housoeh lyis namoq gungsshoh dah nyetnau cho ma kuot das. 17 Khasoeh ge lyis gungsshoh dah obos cho ka Dyos dah o cho yah tyixo goh. Gungsshoh dah o cho yahge Dyos dah o cho hai aiq koeuq gas jes dvtsain nghuot. Housoeh las namoq gas kuot mes khyvlyis ma tsain yoh kuot. 18 Hauh Dyos yah namoq lyis shwih nghuot lyis gas, namoq hau Lyi khau mha ma nghuot lo. 19 Gungsshoh dah muhzoh gas dede nghuot joq las, hauh zis gas nyi shuot lvng shuot, ma lhoq ma shang, yauxi nosxi, 20 silho paiq, hweq kuot, hoeng goh, dyoqgoh, noh, nhaiqlom dyis, lvn loh, gang loh, vphung phung bweh loh cho, 21 yhei yet, yhei shuk shoh zo teh dah cho yahge houyah doeus goh dah cho tsain nghuot. Housoeh kuot bang gas Mangso munghdan vso vlho xauh kham yoeus das zis ma nghuot oen ngos namoq lyis xikpheh taiq goeus zis yah dvyhangteh gvshih eq zaih nhang. 22 Nghuot laus eq hau Dyos dah vshih gas: jyetdap, gauslaus, nyenstap, jhen, nhaiqnyen, gis cho, lomluk cho, 23 nhaiqlom nyhen mha gyoh zis yahge nyang gungs nyang yoh joeu cho tsain nghuot. Haih cho jens lyis yoh tomp dah lyi ma bos. 24 Khristu Yesu yah sen bang gas, vsainnyang gungsshoh ehnyet lyis eq, nyetnau cho yahge obos cho tapzains mas lhangh sat goeus. 25 Yang hauh Dyos mas kang dwis nyeis lyis gas, Dyos yah shwih khyvlyis suh e nyeis goh. 26 Yang gas vkom mha moengs las, nyang changh nyang jausxo goh, noh goh cho ma kuot goh.
1 Boekyis eh, dius dvyuk yuk masoh mathamh yaunos zangh kuot lyis, Dyos yah shwih yvmas kang dwis bang namoq gas housoeh teh soeu lhyi noeuh nhamp ehnyet yah soq dyei geh. Namoq eq shiwu zis ma xauh bas jungh vsainnyang zaih nyeis geh. 2 Namoq nyang changh dah yvwons lyis bos wons wuq zis yah Khristu dah lyi lyis tyink nyeis geh. 3 Dius dvyuk yuk gas yhaugyen dah dius gis ma bweh shih lyis yhaugyen soeu nghuot goeus ge khwank soeu ka nyang nyah gungs lyis mhuih jyomh goeus. 4 Dius yuk khanghmuh nyah muhzoh lyis kyink bas jungh. Nyah muh gis joq nghuot lyis hauh yvlyis gohtoeu dvyuk yuk dah muh yah byi chank ma bos, nyang kuot muh mas nhaiqtap khwank chank bos das. 5 Khasoeh ge lyis, yuk khanghmuh vsainnyang yvwons s wons wuq chah das zis nghuot. 6 Hauh Khristu dah dang lyis xuq soeu ka, jyauh soeu lhyi vsainnyang yoh dah gis vyhang dvnganh gvm dyei nyeis bas jungh. 7 Namoq gas vsainnyang gungs lyis mhuih las chowhang vwhang goh, Mangso lhyi ma phauh yoh kuot das zis ma nghuot. Dius gas nyang xoh zis yah dvyhangteh nyang xauh yhomh das. 8 Dius dah gungsshoh ge dah tsoh mas xoh soeu ka shei ge dah dyoqbis jyo xauh yhomh das; Dyos ge dah tsoh mas xoh soeu ka vcaiq vto kang ge dah jyo xauh yhomh das. 9 Housoeh las yang gis dah muh zwi das zis ma nyung ma daus nyeis goh: khasoeh ge lyis yang ma toh tyamp lyis gas shishenh jweh lyis yang xauh yhomh yoeus das. 10 Housoeh yvmvyah yang shishenh yahge toeuh yoh zis yah dvyhangteh dius dvnganh lyis gis dah muh kuot nyeis goh, nghuot laus eq lomsjingh dah yhenbang lyis zes las kuot dyei goh. 11 Ngos namoq lyis ngah loq yah kha iq kuh dah sauhchvp lhaih toh zis lyis yoeuh geh. 12 Namoq lyis vthyoh tsoengh tyomh nhang bang gas, nghe pheh dah vlho lhyi khwank xoeuq bang nghuot. Nghuot laus eq nyamoq housoeh kuot cho ka Khristu dah tapzains gvng mas shoeuhshih zis ma xauh das nyhenshang dvnghuot. 13 Khasoeh ge lyis vthyoh tyomh bang nyang, hauh Lyi lyis chank tyink zis ma nghuot; nghuot laus eq nyamoq gas namoq vthyoh tyomh gvng mas khwank mes las namoq lyis vthyoh tyomh nhang zis nghuot. 14 Ngos gas yah Yhensain Yesu Khristu dah tapzains mas lai las gohtoeu cha cho mha eq ma khwank: khasoeh ge lyis nyang tapzains mas taplhangh sat zis xauh yvmvyah mungkvn gas ngah xiklyis vshei nghuot las ngos eq mungkvn xiklyis vshei bweh goeus. 15 Dvyuk yuk vthyoh tyomh laus, ma tyomh laus yhaugyen vpom ma nghuot. Gvnkhanh toh dah dius vsaiq bweh das zis dvyhaugyen. 16 Haih wotwu vzwvng lyi yah kang dwis cho mha chank nyeis bang dvnganh thoq mas nyenstap zis yahge nhaiqnyen zis joq bas jungh. Houyah dvyhangteh Mangso dah dius nyau Israel jens thoq mas eq nghuot joq bas jungh. 17 Gvshih masyah ngos lyis hank eq ma lhoeu yau lo bas jungh: khasoeh ge lyis Khristu gvng mas ngos kham dah dvm-yos kanghjyoeng ka ngah gungs mas dap joq. 18 Boekyis eh, yah Yhensain Yesu Khristu dah jyehjuh gas namoq dyos yah dvgeh nyeis nyeis bas jungh. Amen.
1 Mangso dah ehnyet yah Khristu Yesu dah lvgyo toeuq toh zis xauh soeu ngos Paulo gas, Ephesu wus mas nyeis, Khristu yah dvdain dvlom nghuot dah kang dwis cho mha lomluk bang, Mangso dah dius jens lyis dang tying kat. 2 Yah Uwus Mangso yahge Yhensain Yesu Khristu gas namoq lyis jyehjuh yahge nyenstap cho dyei bas jungh. 3 Yah Yhensain Yesu Khristu dah Uwus, Mangso lhyi nhaiqshoqlang chungh goh. Khasoeh ge lyis yang Khristu mas dvdain dvlom yoh bweh gvng mas nyang gas maukhung nyhang mha Dyos yah sen dah shvmanh jyehjuh cho khvt khanghmuh yang lyis dyei nyeis. 4 Yang gas jyetdap ehnyet yah nyah xikkhonh mas gyingshang lha yobos huon dais ma bos bang bweh los bas jungh yang Khristu gvng mas nyeisjvng ma xi shih lyis yah yangh Mangso ka yang lyis khyen yoeus goeus. 5 Nyang gas nyah jyetdap ehnyet yah, Yesu Khristu gvng mas yang lyis nyah lo jens ge rhen das xiklyis nghamh thyet toh goeus. Houka nyang o zis yah dvyhangteh nghamh toeuq cho nghuot. 6 Housoeh yvmvyah phauh ma sang, yang lyis dyei dah jyehjuh yahge phunk bos jyehjuh gvng mas Mangso lhyi chungh goh. 7 Khasoeh ge lyis Khristu shei kham gvng mas yang lhuiq kat zis xauh goeus. Houka yah yaunos khyuot tyamp dyei cho nghuot. Yang lyis heinyhoq magons magoh dyei dah Mangso jyehjuh gas kha iq kuhxing joq lah! 9 Nyah dah joeui yah eq, yik cho yah eq Mangso ka nyang nghamh toeuq toh cho lhyi kuot goeus las Khristu gvng mas tyink das xiklyis nghamh thyet toh goeus. Nghamh toeuq las nghop shung toh dah kuot das cho lhyi chixoeuq kat goeus. 10 Shishenh jweh lyis Mangso kuot tyink das dah nghamh toeuq cho ka maukhung nyhang tsank yahge nyeisjvng mas gvnkhanh toh vyhang dvnganh gas Khristu lyis uhjyung kuot zis yah dvdain dvlom kuot toh das cho nghuot. 11 Dvnganh gas Mangso dah nghamh toeuq cho yahge nghamh thyet toh zis yah dvyhangteh bweh los goeus. Tsai, xik lyis yah nghamh thyet toh goeus yvmas vpom kuot las Khristu mas dvdain dvlom nghuot gvng mas nyang nghamh toeuq toh khyvlyis yah yang lyis nyah dius nyau duot das xiklyis khyen toeuq toh goeus. 12 Housoeh lyis Khristu mas cangxeih nghamhloms cho yoh toh goeus bang yang gas, Mangso phunk lyis chungh goh. 13 Namoq lyis khyuot yoeus cho dyei, jyoeng dang ge dah gausyis loeus lyis namoq xauhgyo lyis namoq eq Mangso dah dius nyau jens bweh los goeus. Namoq Khristu lyis lomsjingh goeus las, nyang thoengh toh dah Gyingshang Dyos dyei gvng mas nyang gas namoq dah Yhensain nghuot cho kyihau tap dyei goeus. 14 Hau Dyos dyei cho ka Mangso nyah dius nyau jens lyis kham yoeus nhang das thoengh toh goeus vso vlho xauh kham das yvlyis pauh toh cho nghuot. Houka Mangso ka nyah dius nyau jens lyis dyinghjet dah luiq toeuh dyei das cho, yang lyis nhaiq tap nhang nyeis. Yang nyah phunk lyis chungh nyeis goh. 15 Housoeh yvmvyah namoq Yhensain Yesu lyis lomsjingh cho yahge Mangso dah dius jens lyis jyetdap cho ngos xauhgyo masyah, 16 ngos gas namoq nyhenshang Mangso lhyi malyen lo nhaiqshoqlang sang zis yah ngos shvmanh dung yvmas namoq lyis soh nyeis. 17 Namoq Mangso lhyi zes seq los bas jungh. Yah Yhensain Yesu Khristu dah Mangso, phunk bos Uwus gas joeui yahge nyoqnyvng yoh nyvng yomsoq bos dah Dyos namoq lyis dyei bas jungh, ngos Uwus Mangso lhyi dung. 18 Yhensain ka namoq lyis chah nghamhloms cho mha khi yoeus goeus zis eq, Yhensain dah dius nyau jens lyis thoengh toh, mauhphoh jyehjuh vso vlho ka kha iq magons magoh nghuot yvlyis eq, 19 Yhensain lhyi lomsjingh bang mas muh khanh nyeis dah nyah yomsoq gas kha iq kuhxing joq yvlyis eq, namoq yoh nyvng seq das xiklyis namoq dah ungkhau dolhain los bas jungh oen dung. Yang mas muh khanh nyeis dah yomsoq gas, 20 Khristu lyis dwis toq los nhang lha, maukhung mha Mangso dah loqyos shot pheh tsung toh nhang uhlyis yhung dah mathank magons yomsoq nyang nghuot. 21 Houmha Khristu gas, maukhung mungkvn lyis guon bang, vmingh yoh bang, yomsoq bos bang, yhensain jens dvnganh thoq mas joeu las guon nyeis. Nyah nyings gas haih mungkvn, jweh los das mungkvn mas taiq das toeuh yoh dah nyings dvnganh thoq lyis zes dah nyings nghuot. 22 Mangso ka vyhang dvnganh zis lyis Khristu khyei o mha toh las, nyang lyis hau phung nyhenshang dvnganh thoq mas dah uhloms duot das xiklyis toeuq toh. 23 Hauh phung ka dvnganh yvlyis yoh dyinghjet nhang soeu, dyinghjet ge dah Khristu gungs nghuot.
1 Lai loh goeus yoq lyis namoq gas domsyos ma gyo cho yahge yaunos gvng mas dyos gas shei joq. 2 Hauh shishenh lyis namoq gas hai mungkvn dah ma gis ma shop cho mha tsain suh e lha, maulat mas dah vmingh yoh soeu, sidyos dah domsyos tsain gyo. Hauh sidyos gas gvshih eq Mangso domsyos ma gyo dah lo jens mas muh kuot nyeis. 3 Jyoengh yang dvnganh eq xikpheh nyamoq teh nghuot las, yah dah gungsshoh nyetnau cho chank zis yah, gungsshoh yahge ungkhau mha nghamh khyvlyis kuot tyink goeus. Yang eq gungsshoh khyvlyis yah gohyuk yah dvyhangteh Mangso dah nhaiqlom dyis zis xauh kham vvng bang nghuot. 4 Nghuot laus eq Mangso ka nhaiqnyen ehnyet nyo las nyang yang lyis jyetdap ehnyet kuh joq las, 5 yang domsyos ma gyo dah lyi lhyweq cho yaunos gvng mas dyos mas shei joq bang lyis Khristu mas kang doms dwis nhang goeus. Houka Mangso dah jyehjuh yah namoq khyuot yoeus zis xauh goeus. 6 Yang gas Khristu yah dvdain dvlom bweh gvng mas Mangso ka yang lyis maukhung nyhang mha Yhensain yah dvgeh guon nyeis das xiklyis nyang yah dvgeh dwis toq nhang. 7 Nyang heisoeh kuot cho ka Khristu Yesu mas yang lyis jyetdap ehnyet Chixoeuq yvmas Yhensain dah jyehjuh gas gohtseq kuhxing joq cho thang pheh vcaiq caiq dius jens yoh nyvng das xiklyis nghuot. 8 Khasoeh ge lyis namoq gas lomsjingh gvng mas Mangso dah jyehjuh yah kyingh namoq khyuot yoeus zis xauh. Houka namoq yomkat las ma nghuot, Mangso dah jyehjuh jyungshuk dvnghuot. 9 Namoq zwi khank dah muhzoh gvng mas ma nghuot, Mangso dah jyungshuk dvnghuot. Housoeh las hank eq khwank chank ma bos. 10 Khasoeh ge lyis yang gas Mangso khasoeh gvnkhanh toh lyis housoeh nghuot joq. Khristu Yesu mas dvdain dvlom nghuot joq gvng mas, Mangso ka uhlhomh las cicont sont toh goeus, gis dah muh lyis kuot uhjyangh kang dwis das xiklyis yang lyis gvnkhanh toh goeus. 11 Khoeu los lyis yah gohnyau bang tsain nghuot las dius dah loq yah vsainnyang gungs mas kuot yoeus dah muh, vthyoh tyomh bang ge nyhink yoeus dah Yuda dius jens yah, Vthyoh ma tyomh bang, ge lui dah gohnyau bang eh, xikpheh namoq hank tsain nghuot yvlyis soh geh. 12 Hauh shishenh lyis namoq gas Khristu yah gang joq bang, Mangso khyen yoeus dius nyau Israel jens mas ma bos dah lvbaus, nyah dius nyau lyis dyei toh thanghchvp yah sen dangthoengh mas ma bos bang nghuot las, mungkvn mas nghamhloms chank ma bos, Mangso eq ma yoh, nyeis dyos los dah dius jens nghuot lai los goeus. 13 Nghuot laus eq gvshih gas Khristu Yesu mas dvdain dvlom nghuot goeus las xikpheh Mangso yah we joq laus eq Khristu shei kham gvng mas Mangso yah yoh ni los goeus. 14 Khasoeh ge lyis Khristu gas Yuda vnyau yahge gohnyau bang lyis dvkoeuq kyingh bweh nhang zis yah namoq lyis nyenstap cho dyei goeus. Nyang gas nyah gungs lyis kyauh tyamp yvmas yang lyis vnyau khyvlyis khwih khyamh las jes khyvlyis nyeis nhang dah vkyo lhyi thyoq tyamp goeus. 15 Nyang gas aiq nyau lyis nyang yah dvdain dvlom kuot las dius nyau saiq dvkoeuq bweh nhang das xiklyis Yuda lyi yah dvgeh tyingtoh lyi yahge chank chah lyi lyis thyuk tyamp goeus. Heisoeh khyvlyis nyenstap cho dyei goeus. 16 Khristu gas tapzains mas shei kham zis yah nyamoq dah hoeng cho lhyi thyoq tyamp las hau aiq nyau lyis dvnyau kyingh kuot las Mangso jyank mas doms shwih loh dyei. 17 Housoeh Mangso yah we joq dah namoq gohnyau bang lyis eq, Mangso yah ni nyeis dah Yuda dius jens lyis eq Khristu jweh los las hau nyenstap gausyis loeus taiq kyoh goeus. 18 Gohnyau bang yahge Yuda dius jens nghuot dah yang dvnganh gas Khristu gvng mas hau Dyos dvkoeuq kyingh yah Uwus xikkhonh mas yoh wvng loh goeus. 19 Housoeh yvmvyah gvshih gas namoq gohnyau bang, nghuot ya lvbaus yahge boenghwus ma nghuot lo. Namoq gas Mangso dah dius jens mas bos, mung dius jens nghuot las Mangso dah yhenbang nghuot. 20 Namoq eq lvgyo jens yahge lvpe jens xi toh yhen-yos mas yhen tsoq tsuk zis xauh goeus. Khristu gas hauh yhen thunk lukzains nyang nghuot. 21 Nyang gas yhen dvkoeuq gonh lyis goeng goeng zwi toh las gyingshang zis yah Yhensain mha kyauh toh yhenmuh bweh los nhang goeus. 22 Namoq eq Khristu yah dvdain dvlom duot las gohyhamh bang dvnganh yah chomp tsuk zis kham yoeus las nyah Dyos gvng mas Mangso nyeis dah joqyos bweh los goeus.
1 Haih cho gvng mas Khristu Yesu dah thung lungh soeu ngos Paulo gas, namoq gohnyau bang xiklyis, Mangso jyank mas shvmanh dung dyei. 2 Mangso ka nyah jyehjuh yah namoq xiklyis gis das cho nyhenshang haih muh kuot das zis ngos lyis dyei toh goeus yvlyis namoq jyoengh xauhgyo ku goeus. 3 Mangso ka nyah dah noq thank nghamh toeuq cho ngos lyis chixoeuq goeus. Haih cho yah sen lha lyung khyvlyis lhaih kat ku goeus. 4 Hauh zis namoq nghap ku lhyi Khristu yah sen lha ngos seqgyo hau noq thank cho lhyi namoq yoh xuq das. 5 Lai loh goeus yoq lyis hai noq thank cho cangsoeu dius lyis ma taiq kyoh ku. Nghuot laus eq Mangso ka gvshih nyah gyingshang lvgyo jens yahge lvpe jens lyis Dyos masyah Chixoeuq. 6 Hau noq thank cho ka gausyis dang gvng mas gohnyau bang gas Yuda dius jens yah dvgeh Mangso dah shvmanh jyehjuh xauh kham cho nghuot. Nyamoq gas dvgungs mas dah gungsdoeus tsain nghuot las Khristu gvng mas Mangso dyei dah dangthoengh dah vso vlho kham yoeus das toeuh tsain yoh. 7 Mangso dyei dah lhyenwhei jyehjuh jyungshuk gvng mas hauh Gausyis dang dah jyeidwis ngos lyis duot nhang goeus. Hauh jyehjuh jyungshuk lyis Mangso dah yomsoq yah khanh dah muhzoh khyvlyis ngos lyis dyei toh goeus. 8 Ngos gas Mangso dah dius jens mas ngis thank soeu thoq lyis yangh nyhen soeu nghuot laus eq Mangso ka Khristu dah mathank magons nyeisgis yaplhoq cho yah sen dah hau gausyis loeus lyis gohnyau bang jyank mas yoeus loh dyei das xiklyis eq, 9 Mangso dah nghop toh dah nghamh toeuq cho khasoeh kuot thuq kat das cho dius dvnganh lyis nyvng, seq nhang das xiklyis eq Mangso ngos lyis hauh toeuh dyei toh. Dwis ya dwis yvlyis gvnkhanh toh dah Mangso ka nyah dah noq thank cho lhyi gohlhain caiq masyah nghop shung toh. 10 Housoeh kuot zis gas guon dah loeuswons bang yahge maukhung mha yomsoq bos bang gas Mangso dah joeui vja ja lyis gvshih uhlyis phung dah kang dwis cho khyvlyis yah xuq las seq los nhang das xiklyis nghuot. 11 Mangso ka nyah dah vcaiq vto nghamh toeuq toh cho yah dvyhangteh haih yvlyis kuot goeus. Hau nghamh toeuq cho lhyi yah Yhensain Khristu Yesu gvng mas nyang yoh dye kuot goeus. 12 Khristu yah dvdain dvlom yoh bweh gvng mas eq, nyang lyis lomsjingh gvng mas eq yang gas womh ehnyet yah Mangso xikkhonh mas nghamhnywe zis yah yoh wvng. 13 Housoeh las ngos namoq xiklyis kham dah shanghsenh gvng mas namoq ehnyet ma dyet bas jungh oen shangphu. Houka namoq vkyuh xiklyis ngos kham cho nghuot. 14 Haih cho gvng mas maukhung yahge nyeisjvng mas nyeis dah yhenbang khanghmuh lyis jyoeng dah nyings dyei dah, 15 Uwus Mangso xikkhonh mas ngos dupaiq las shvmanh dung. 16 Namoq dah ungkhau ehnyet yombos los bas jungh Mangso ka nyah phunk yah magons magoh zisyos masyah nyah Dyos khyvlyis yah namoq lyis yomsoq dyei bas jungh oen eq, 17 lomsjingh gvng mas Khristu gas namoq dah nhaiqlom khau mha nyang nyeis joqyos kuot bas jungh oen zis yahge jyetdap ehnyet mas vnyet chent zis yah, 18 namoq gas Khristu dah jyet cho kha iq dvm lha xing, kha iq nyhang lha noq joq yvlyis Mangso dah dius jens dvgeh yoh seqgyo das xiklyis dung. 19 Nyah jyetdap cho lhyi ka khanhamp eq dvnganh yoh seq das zis ma nghuot. Namoq gas nyah jyetdap ehnyet seq los las Mangso nyang namoq mas nyeis bas jungh oen dung. 20 Yah ehnyet mas nyah yomsoq yah muh kuot nyeis. Yang seq dung, nghuot ya nghamh toeuq thoq lyis yangh zes shoq kuot dyei nyeis. 21 Mangso ka hau phung gvng mas eq, Khristu Yesu gvng mas eq vcaiq vto vjangh phunk bos nyeis bas jungh. Amen.
1 Housoeh yvmvyah Yhensain lhyi phuqsoe gvng mas thung lungh soeu ngos Paulo gas namoq lyis khi yoeus masyah Mangso toeuq goeus kang dwis cho vpom yah dvyhangteh kang dwis das xiklyis ngos namoq lyis taiq kyingh kat. 2 Vjangh ehnyet nyhen mha khyoq las noeuh nhamp zis yah jhen nyeis geh. Namoq nyang changh jhen zis yah jyetdap ehnyet Chixoeuq goh nyeis geh. 3 Namoq lyis dvgeh twih xom dah nyenstap shvnanh khying gvng mas Dyos yah dyei toh dvdain dvlom xamxonh cho lhyi yomkat las tsomh toh geh. 4 Namoq lyis Mangso khi yoeus cho mha nghamhloms zis dvkoeuq mas khi yoeus goeus zis yah dvyhangteh, dvgungs dvdyos, 5 Yhensain dvyuk, lomsjingh cho dvkhvt, jeisnyhop kham cho dvkoeuq kyingh dvnghuot. 6 Dius nyau dvnganh dah Uwus ge dah Mangso eq dvso kyingh dvnghuot. Nyang gas dvnganh dah Yhensain nghuot las dvnganh dah ungkhau mha muh khanh nyeis. 7 Yang yuk khanghmuh gas Khristu dyei dah lhyenwhei jyehjuh jyungshuk lyis xauh kham yoeus. 8 Lhaihtoh dang mas taiq zis yah dvyhangteh, Nyang gas svsoh nyhang yvmas doq loh lyis lhunk toh bang nyoshoq lyis nyang yah dvgeh shwih loh. Nyang gas dius nyau jens lyis jyungshuk dyei, ge. 9 Doq loh ge zis cha lhyi ge, yhensain ka nyhen thank nyeisjvng dah nyhen tsank mas cangxeih gyoh loh goeus ge mes zis nghuot. 10 Gyoh los soeu ka, dvnganh yvlyis nyah phunk nyoqnho yah tyink das nyhenshang nyhang thank maukhung mha doq loh soeu nyang nghuot. 11 Cangsoeu dius jens lyis jyehjuh jyungshuk dyei dah Yhensain eq nyang nghuot. Nyang gas dvyhamh lyis lvgyo jens, dvyhamh lyis lvpe jens, dvyhamh lyis gausyis dang taiq kyoh yenh bang, dvyhamh lyis phung yoeuh bang yahge jyauh bang tsain kuot nhang toh. 12 Nyang housoeh kuot zis gas Khristu dah gungs lyis jebais los nhang das nyhenshang Mangso dius jens dvnganh lyis Khristan phuqsoe sasvna muh dyinghjet shoq sont dyei cho nghuot. 13 Housoeh las yah lomsjingh cho gvng mas eq, Mangso dah Lo lyis seq cho gvng mas eq thang thank lyis yang nyeis ya nyeis bang gas dvkoeuq kyingh duot las Khristu dah nyhang thank dyinghjet dah gungs khyank vkant yah dvyhangteh nhaiqbos ung gying bang bweh los das. 14 Hauh uhlyis yang gas seq mhuih khwangh dah dius jens yah vphanh vphuk taiq tangh dah jyauh cho khanghmuh mas vtauh vxoeu bos dang loh dah loshang jens teh ma nghuot lo das. 15 Housoeh bweh das gungsthaiq jyetdap ehnyet yah jyoeng dang taiq las, yang gas cho khvt khanghmuh mas uhloms nghuot dah Khristu mas kuh bes los chah nyeis. 16 Uhloms ge dah Yhensain shwih uhshe dah vkhau mha gungsdom dah gungsdoeus bos ya bos zis gas dvkoeuq yah dvkoeuq coq tsuk nyeis zis yahge yaunyoq changnyoq khanghmuh tsoq tsuk yomdyei nyeis gvng mas gungs gonh lyis dvdain dvlom yoh zwi toh. Housoeh las gungsdoeus khanghmuh vsainnyang yah sen dah muh khanh lyis gungs gonh lyis jyetdap zis yah kuhxing jebais los nhang. 17 Nghamh cho vkyuh ma bos dah gohnyau bang teh tsoq las kang ma dwis das xiklyis Yhensain nyings mas ngos namoq lyis zaih nhang. 18 Nyamoq dah seq cho soeng soeng noq zis yah koh las ehnyet than yvmvyah Mangso dyei dah kang vso mha ma bos bang nghuot. 19 Nyamoq gas xoq gyuk ehnyet dvnganh chithyuk tyamp goeus yvmvyah nyetnau cho chank las, ma lhoq ma shang vchoqh vjyot muh vja ja lyis tomp toh cho ma bos shoq kuot das nyhenshang vsainnyang gungs lyis duon jens tyamp. 20 Namoq gas Khristu dah cho mha housoeh teh yvlyis xuq goeus zis ma nghuot. 21 Namoq nyah cho lhyi jyoengh xauhgyo ku goeus zis yahge nyah thang chank bang nghuot las Yesu mas bos hau jyoeng cho lhyi namoq xuq goeus. 22 Housoeh las namoq gas xikpheh namoq chank ku dah kang dwis cho mha dah gungskhyank cauh lyis eq, pyo cho lhyi nyetnau las mhuih jyomh mes ehnyet gvng mas dyoqbis goeus dah gungskhyank cauh lyis eq tyamp geh. 23 Namoq dah ehnyet gungsdyos lyis vsaiq bweh nhang geh. 24 Vsaiq lyis wuot toh las hauh yvlyis dan zis yahge gyingshang ge, jyoeng dah kang dwis cho mha yoh chixoeuq das. 25 Housoeh las hwah dang vtaiq goh; yuk khanghmuh lomsjingh dah vsainnyang vmang vnoeuh lyis dang jyoeng taiq goh geh: khasoeh ge lyis, yang dvnganh gas Khristu ge dah gungs mas dah gungsdoeus tsain nghuot. 26 Namoq nhaiqyo lyis hau nhaiqyo dah ehnyet lyis yaunos vkuot nhang goh, buis wvng shoq eq nhaiq vyo goh. 27 Yius lyis joqyos vxwiq goh. 28 Khauh ku soeu ma doms khauh lo bas jungh: chah nyeis bang lyis yoh pangh shoq, gvm dyei shoq, vsainnyang xiklyis jyoeng dah womdau khoeu kang dwis cho yoh shoq muh zwi nyeis bas jungh. 29 Namoq dah nhuot masyah ma shop dah dang cha eq ma taiq bas jungh. Xauhgyo bang xiklyis vkyuh bweh shoq, chah nyeis zis yah dvyhangteh jebais los nhang dang kyingh taiq nyeis geh. 30 Hauh thoq lyis Gyingshang Dyos lyis nhaiq vkuk nhang goh: khasoeh ge lyis hau Gyingshang Dyos gas namoq lyis Mangso sain toh cho lhyi kanghjyoeng kyihau nghuot las thang thank buisnyeis lyis Mangso namoq lyis lhuiq kat zis xauh das cho lhyi kham toh cho dvkoeuq eq nghuot. 31 Nhaiq gyeih, nhaiqlom dyis, nhaiq yo, dyoqgoh kaiq goh, ma phauh ma danh kuot, hoeng ehnyet vja ja yahge gohtoeu houyah doeusgoh cho dvnganh lyis shang tyamp geh. 32 Namoq nyang changh nhaiqnyen goh, gis dah ehnyet chixoeuq goh las, Mangso ka Khristu mas namoq dah yobos khyuot dyei goeus zis yah dvyhangteh, namoq eq dvyuk yah dvyuk yobos khyuot dyei goh nyeis geh.
1 Namoq gas Mangso dah jyetdap lo jens nghuot goeus yvmvyah nyang yah doeus los shoq yomkat chah das. 2 Khristu gas yang lyis jyetdap las yah xiklyis nyah gungs lyis Mangso nhaiqdoeus dah xangh shom phudyei vyhang kuot las lomhxangh lainh zis yah dvyhangteh, namoq eq jyetdap ehnyet yah shwih dah vkhau mha suh e nyeis geh. 3 Namoq Mangso dah dius nyau jens nghuot joq yvmvyah yauxi cho, ma lhoq ma shang zis dvnganh, nyoqnoq obos zis yah sen dah cho lhyi namoq mas dang yah yangh ma nyhink bas jungh. 4 Ma lhoq khonhchoqh, vwot v-oeu dang, ma yungh dang, zeh dang eq ma taiq taiq, nhaiqshoqlang Chungh Dang sang nyeis bas jungh. 5 Yau kuot soeu, ma daq xoq gungs ma shung soeu, nyoqnoq obos soeu hank eq Khristu yahge Mangso munghdan dah vso vlho lhyi ma xauh zom zis gas namoq nyang top seq toh. Khasoeh ge lyis nyoqnoq obos cho ka silho paiq cho dvja nghuot. 6 Hank laus eq yhung pvjus dang yah namoq lyis vmhuih jyomh nhang goh: khasoeh ge lyis hauh cho gvng mas Mangso dah nhaiqlom dyis zis gas domsyos ma gyo bang thoq mas jweh los das. 7 Housoeh yvmvyah namoq housoeh teh bang yah dvtsiq eq vbos zomh goh. 8 Xikpheh namoq eq soeng soeng noq yvmas nyeis lai loh goeus. Nghuot laus eq, gvshih gas Yhensain dius jens duot los goeus las bvng yvmas jweh joq goeus. Housoeh yvmvyah namoq gas bvng dah lo jens teh suh e nyeis geh. 9 Khasoeh ge lyis hau bvng zis gas gis cho vja ja, dan cho yahge jyoeng cho lhyi bweh los nhang. 10 Yhensain nhaiqdoeus zis cha nghuot yvlyis tungh xuq geh. 11 Chuot yvmas suh e bang kuot, vkyuh ma bos chuot cho yah sen dah muhzoh cha eq ma chank kuot, hauh muh jens lyis bvng yvmas chixoeuq nyeis geh. 12 Khasoeh ge lyis nyamoq gauh kuot muh gas taiq das zis yangh vxoq vcaiq nghuot. 13 Hauh cho bos ya bos zis lyis bvng yvmas chixoeuq kat lyis nyamoq dah soengh choenk wotwu gas dede thuq los. 14 Khasoeh ge lyis joq ya joq yvlyis dede thuq los nhang nyeis. Housoeh las nyang taiq zis gas, Yhet pyo soeu eh, toq aq, shei masyah dwis toq los aq. Khristu nvng lyis bvng zis pank dyei das, ge. 15 Housoeh las namoq khasoeh kang dwis nyeis zis gas vlhomuh zaih nyeis geh. Koh bang teh ma nghuot, joeui bos bang teh kang dwis geh. 16 Gvshih dah buisnyeis shishenh gas ma shop joq yvmvyah namoq yoh dah toeuh dvnganh yvlyis vkyuh bos das khyvlyis yhung geh. 17 Housoeh las koh bang vbweh goh; Yhensain o dah cho cha nghuot zis gas seqgyo geh. 18 Yhei vyet goh, houka nvng lyis dyoqbis nhang das. Dyos yah dyingh joq geh. 19 Namoq nyang changh chungh dah lvkhyank dang, Dyos dah lomsjingh cho yah sen dah Chungh Dang yah jis goh las namoq dah ungkhau ehnyet mas Mangso lhyi chunghthwe kat las chungh nyeis geh. 20 Yah Yhensain Yesu Khristu dah nyings yoeus las cho khvt khanghmuh xiklyis, Uwus Mangso dah jyehjuh lyis vjangh nhaiqshoqlang sang geh. 21 Khristu lyis gyukwoms dah ehnyet yah namoq nyang changh nyang o mha gyoh nyeis geh. 22 Yhensain nyhiq jens eh, namoq gas Yhensain dah guon cho lhyi kham yoeus zis yah dvyhangteh yhensain phoq jens dah guon cho lhyi kham yoeus geh. 23 Khristu gas phung dah uhloms duot das toeuh yoh teh, yhensain phoq eq yhensain nyhiq dah thoq mas uhloms duot das toeuh yoh. Khristu nyang nyah gungs nghuot dah hauh phung lhyi khyuot yoeus soeu eq nghuot. 24 Phung ka Khristu dah guon cho lhyi kham zis yah dvyhangteh yhensain nyhiq jens eq cho khat khanghmuh mas yhensain phoq dah guon yvlyis kham yoeus das. 25 Yhensain phoq jens eh, Khristu gas hau phung lhyi jyetdap las, hauh xiklyis nyah gungs kyauh tyamp zis yah dvyhangteh, namoq dah yhensain nyhiq jens lyis jyetdap nyeis geh. 26 Yhensain nyah kang lhyi kyauh tyamp cho ka, hauh phung lhyi jeis yah cheihshang lha nyah Dang yah Mangso lhyi phudyei zis yah, 27 Hauh phung lhyi nyah gungs xiklyis kyauh uhlyis nyang mas mesyos, vnyhung teh zis cha eq ma bos bos, gyingshang zis yahge tswi ma bos, phunk bos, yungh thank das xiklyis nghuot. 28 Housoeh las yhensain phoq jens gas vsainnyang gungs lyis jyetdap nyeis teh, vsainnyang dah yhensain nyhiq jens lyis jyetdap chah. Vsainnyang yhensain nyhiq lyis jyetdap soeu ka nyah gungs lyis nyang jyetdap. 29 Khasoeh ge lyis yang hank laus eq vsainnyang gungs lyis hoeng zis ma bos. Hauh gungsthaiq Khristu gas hauh phung lhyi khoeu tsoh yoeuh gomh teh yang gas hau gungs lyis khoeu tsoh yoeuh gomh nyeis goh. 30 Khasoeh ge lyis yang gas nyah gungsdom dah gungsdoeus jens tsain nghuot. 31 Lhaihtoh dang mas, Haih gvng mas vbusbih gas, nyah ungwes uwus lyis toh khoq las, nyah yhensain nyhiq yah xonh zis yah nyah zomh gas dvsuih dvshoh bweh das, ge bos. 32 Haih cho ka lhaihtoh dang mas Chixoeuq, noq thank jyoeng cho dvkoeuq nghuot las. Khristu yahge phung lhyi toeuq las taiq zis nghuot oen ngos seqgyo. 33 Nghuot laus eq houka namoq yah eq sen joq. Yhensain phoq khanghmuh gas nyah yhensain nyhiq lyis yoh jyetdap das las yhensain nyhiq khanghmuh eq nyah yhensain phoq lyis yoh phauh nyang das.
1 Loshang jens eh, namoq nyhiphoq dah domsyos gyo nyeis geh. Housoeh kuot zis gas Khristan jens kuot chah dah jus cho nghuot. 2 Lhaihtoh dang mas, Nah ungwes uwus lyis phauh nyang geh, housoeh lyis nvng nyeisgis yaplhoq las nyeisjvng thoq mas kang xing zis yah xauh nyeis das, ge. Housoeh taiq toh dang gas dangthoengh mas bos cangxeih dah tyingtoh dang nghuot. 4 Namoq nyhiphoq jens eh, namoq dah lo jens lyis nhaiqyo das khyvlyis vkuot goh. Housoeh kuot das gungsthaiq nyamoq lyis Yhensain dah nyho jyauh cho yahge cho shet yvmas nyhoeu tsoh nyeis geh. 5 Jons jens eh, namoq Khristu lyis phuqsoe nyeis teh namoq dah cangsoeu yhensain jens lyis gyukwoms zis yah ehnyet dan khyvlyis domsyos gyo nyeis geh. 6 Yhensain jens yoeuh nyeis lyis nyoqnho yoh mes las kuot zis kyingh ma nghuot, Khristu dah jons jens teh Mangso ehnyet o cho lhyi nhaiqlom dvnganh yah kuot nyeis geh. 7 Dius lyis phuqsoe teh kyingh ma nghuot, hauh Yhensain lhyi phuqsoe teh mes dah ehnyet yah namoq dah jons muh lyis zwi nyeis geh. 8 Jons lyis laus eq, luiq soeu lhyi laus eq, Mangso ka nyang yuk nyang toeu lhyi nyang kuot dah gis muhzoh xiklyis tauh dyei das zis seq nyeis geh. 9 Yhensain jens eh, namoq eq houyah dvyhangteh namoq dah jons jens thoq mas chank kuot nyeis geh. Nyamoq lyis kyuk tant cho no toh geh. Namoq yahge namoq dah jons jens gas maukhung mha Yhensain dvyuk yah kyingh sen bang nghuot las hauh Yhensain ka dvyuk yah dvyuk lyis nyoqnho ma khyen soetuon soeu nghuot yvlyis soh nyeis geh. 10 Thang thank lyis, Yhensain yah dvkoeuq kyingh nghuot khyvlyis eq, nyah yomzains yomsoq yah eq, namoq yomhuont nyeis geh. 11 Yius dah khaujeini zis lyis namoq yoh toeu nghank tyamp bas jungh, Mangso namoq lyis dyei toh dah jesgungs dvnganh zis lyis wuot toh geh. 12 Khasoeh ge lyis yang gas dius yah zan goh zis ma nghuot, maukhung nyhang mha nyeis ma shop dah yius jens yah eq, haih mauchuotdwang dah mungkvn lyis guon dah zau jens, vmingh bos bang yah dvtsain zan goh nyeis. 13 Housoeh yvmvyah, Mangso dah jesgungs dvnganh yvlyis gvshih nyang wuot toh geh. Housoeh lyis ma shop zis yahge yaukyenh buisnyeis jweh lyis namoq gas jeswus dah zan cho lhyi yoh thoenk zan shuq tyamp das. Thang thank jweh shoq dye zan lyis eq, namoq goeng goeng yoh yap das. 14 Housoeh las namoq thyikdom lyis jyoeng cho ge dah dyichih chih las dan zis lyis sainhkhonh nghop teh gos lho lha, 15 nyenstap gausyis dang taiq kyoh das zis cicont nghuot joq bas jungh, khyei mha thyvkoq koq las thoenk yap joq geh. 16 Hauh thoq lyis lomsjingh ge dah gos lyis vjangh chi toh geh. Khasoeh ge lyis namoq gas hauh gos yah ma shop soeu baiq kat dah nyi shamshih dvnganh lyis yoh sat das. 17 Tsai, Khyuot yoeus cho ge dah uhkyop lyis kyop las, hau Dyos yah dyei dah Mangso dang ge moengsa lhyi wons toh geh. 18 Mangso jyank masyah pangh cho yoh bas jungh khyoeuq zis yah shvmanh dung yvmas haih cho dvnganh kuot nyeis geh. Haih cho gvng mas phuksohlhaiq mus nyeis geh. Khanhamp eq yom vshwe, Mangso dah dius jens xiklyis vjangh vkyuh dung nyeis geh. 19 Ngos dang taiq das xiklyis cicont nghuot shishenh lyis Mangso ngos lyis dang dyei bas jungh, hau gausyis dang dah noq thank vjyuk lyis ma gyuk ma woms, womh womh yoh taiq shoq, ngah xiklyis eq vkyuh bos dung nyeis geh. 20 Gvshih ngos thung lungh soeu nghuot joq laus eq hau gausyis dang gvng mas lvgyo dvyuk nghuot joq. Hau gausyis dang taiq kyoh das xiklyis ngos yvwons yoh zis yah dvyhangteh womh womh yoh taiq bas jungh shvmanh bos dung geh. 21 Namoq ngos khasoeh nghuot nyeis dah loeus jyuk yang yoh seq shoq, Yhensain dah muh mas lomluk kank kat nyeis, yah jyetdap boekyis Tichiku taiq kyoh das. 22 Housoeh las yang dvnganh khasoeh bweh nyeis cho loeus dvnganh namoq lyis taiq kyoh bas jungh zis yahge, namoq lyis pangh, yomdyei das nyhenshang ngos nyang lyis namoq jyank mas nhang kat. 23 Uwus Mangso yahge Yhensain Yesu Khristu gas Khristan boekyis dvnganhmoq lyis nyenstap, jyetdap zis yahge, lomsjingh cho dyei bas jungh. 24 Mathank magons jyetdap ehnyet yah, yah Yhensain Yesu Khristu lyis jyetdap nyeis bang dvnganhmoq mas jyehjuh joq bas jungh.
1 Khristu Yesu dah jyeidwis Paulo yahge Timothi gas Philipi wus mas nyeis dah phung uhshe bang phung thuk jens yah dvgeh Khristu Yesu mas dvkoeuq nghuot dah Mangso gyingshang bang dvnganhmoq jyank mas maussauh lhaih kat. 2 Yah Uwus Mangso yahge Yhensain Yesu Khristu jyank masyah jyehjuh yahge nyenstap zis gas namoq mas joq bas jungh. 3 Ngos namoq dah cho nghamh yoeuh soh khanghmuh ngah Mangso lhyi nhaiqshoqlang sang. 4 Ngos namoq nyhenshang shvmanh dung khanghmuh gausyis zis yah dung. 5 Khasoeh ge lyis Yhensain dah muh wons wuq xi buisnyeis masyah gvshih jweh shoq gausyis dang taiq kyoh cho mha ngos lyis pangh thuk lai loh goeus. 6 Housoeh las namoq mas hai gis dah muh kuot xi toh dyei soeu Mangso ka, Khristu Yesu dah buisnyeis lyis hauh muh lyis yoh dye shoq tsoq wons wuq loh das zis nghuot yvlyis ngos soh soh nghuot. 7 Ngos namoq lyis nghamh twih toh ehnyet bos das zis gas doeus: khasoeh ge lyis namoq gas vjangh ngah nhaiq mas bos bang nghuot. Gvshih ngos thung lungh nyeis shishenh lyis eq hau gausyis dang lyis kyoq toh cho ma bos khomp khyoq, taiq kyoh zis yah jyauh las yoh goeng toenk nhang shishenh lyis eq, namoq dvnganhmoq gas ngos yah dvgeh Mangso dyei dah jyehjuh toeuh lyis chomp kham yoeus goeus bang nghuot. 8 Ngos gas Khristu Yesu nyang dah ehnyet mas bos dah jyetdap sainhnos ehnyet yah namoq lyis soh nyeis, oen ngos taiq dang jyoeng zis gas Mangso ngah kanghjyoeng nghuot. 9 Hauh thoq lyis namoq gas gis yvlyis seq khyen yoeus, jyoeng dah seq cho yahge dyinghjet dah joeui yah dvgeh namoq dah jyetdap ehnyet mas zes kuhxing los bas jungh ngos shvmanh dung dyei. 10 Hauh uhlyis namoq gas gis thank yvlyis seq khyen yoeus las Khristu doms jweh dah buisnyeis lyis ma lhoq ma shang vwot v-oeu cho dvnganh masyah luiq zis yah yobos ma bos bang bweh das. 11 Hauh thoq lyis Mangso dah phunk bvng los das zis yahge nyah nyoqnho ngelang lyis dius jens chungh bas jungh, Yesu Khristu kyingh vshih yoh shih nhang, gis thank dan dah vshih gas namoq kang dwis cho mha dyinghjet los das. 12 Boekyis eh, ngos mas bweh cho ka, gausyis dang jebais los das cho mha jyoengh pangh thuk das nyhenshang bweh los cho ngos namoq lyis seq nhang mes. 13 Hau hwankti yhen lhyi zungh bang dvnganh yahge gohtoeu heimha nyeis bang dvnganh gas ngos thung lungh cho ka Khristu dah jyeidwis duot yvmvyah nghuot cho tsain seq goeus. 14 Hauh thoq lyis ngos thung lungh gvng mas boekyis nyothyang ka Yhensain mha lomsjingh ehnyet zes yombos los las Mangso dah Dang lyis ma gyuk ma woms taiq kyoh das zis zes womh los. 15 Jyoengh nyamoq mas dvyhamh gas noh las zan goh mes ehnyet yah Khristu cho taiq kyoh. Nghuot laus eq dvyhamh gas omes ehnyet gis bos zis yah taiq kyoh. 16 Ngos gas Gausyis dang lyis khomp dah muh mas toeuq toh soeu nghuot yvlyis nyamoq seq nyeis yvmvyah jyetdap ehnyet yah taiq kyoh. 17 Gohtoeu dvyhamh gas lhoqshang ehnyet yah ma nghuot, vsainnyang vkyuh dvxo ehnyet yah taiq kyoh. Nyamoq gas ngos thung lungh nyeis yoq lyis ngah thoq mas yaukyenh cho je los shoq kuot das ge tsain nghamh. 18 Taiq kyoh dah vkhyoh gas ma yhaugyen. Vguons kuot laus eq, jyoeng ehnyet yah laus eq, gis bweh cho khanghmuh mas Khristu cho yoh taiq kyoh goeus yvmvyah hauh cho mha ngos gauslaus nyeis, jyoengh tsoq gauslaus nyeis shih das. 19 Khasoeh ge lyis namoq dah shvmanh dung dang gvng mas eq, Yesu Khristu dah Dyos ngos lyis pangh gvng mas eq ngos hai thung lungh masyah luiq los das. 20 Ngos gas khanhamp eq ngah yvwons lyis ma katkhyoq, shishenh khanghmuh mas laus eq, zes las gvshih laus eq lyes dah kank bos cho dyingh zis yah ngos shei lhyi yangh lyis ngah kang dwis cho gonh mas Khristu dah phunk bvng nhang das zis gas ngos nhaiqdoeus thank cho yahge nghamhloms cho nghuot. 21 Khasoeh ge lyis ngos kang dwis zis gas Khristu nyang nghuot, shei loh lyis eq vmyat nghuot. 22 Nghuot laus eq ngah gungsshoh mas kang dwis nyeis lyis vkyuh bos dah muh zes yoh zwi lyis gas, kang dwis cho yahge shei cho khah zis khyen yoeus chah zis ngos ma seq. 23 Ngos gas aiq shot yah lang zis xauh nyeis. Ngos gas gvshih dwis nyeis dah kang dwis cho lhyi toh las Khristu yah dvgeh kang dwis mes nyeis. Houka ngah xiklyis zes gis joq. 24 Nghuot laus eq namoq xiklyis ngos kang dwis nyeis das zis gas namoq xiklyis zes yhaugyen. 25 Ngos haih cho lhyi vlhomuh seqgyo yvmvyah ngos namoq yah dvgeh nyeis das. Namoq lyis zes jebais los nhang das zis yahge lomsjingh cho mha yoh gausyis das nyhenshang ngos namoq dvgeh tsoq las nyeis das yvlyis ngos seq. 26 Housoeh las ngos namoq jyank mas doms jweh uhlyis ngah gvng mas namoq gas Khristu Yesu mas zes yoh khwank das. 27 Gvshih namoq xiklyis yhaugyen thank zis gas, Khristu Yesu dah gausyis dang yah chank kuot nhang zis yah dvyhangteh kang dwis nyeis das cho nghuot. Housoeh lyis ngos namoq jyank mas jweh los laus eq, ma jweh laus eq, namoq gas Dyos dah nghamh toeuq cho dvkoeuq kyingh yah thoenk yap joq las, ehnyet o zis dvja kyingh yah gausyis loeus dah lomsjingh cho dah xiklyis dvgeh chomp zan nyeis yvlyis ngos xauhgyo. 28 Hauh thoq lyis namoq gas jes jens lyis vgyuk nyeis goh, vjangh womh ehnyet bos geh. Hauh zis gas nyamoq shoeuh las namoq ung das kanghjyoeng vlho duot das. Khasoeh ge lyis namoq lyis ung cho dyei zis gas Mangso nyang nghuot. 29 Khasoeh ge lyis namoq gas Khristu lyis lomsjingh khyvlyis yah kyingh ma nghuot, nyah xiklyis shanghsenh kham khyvlyis eq Yhensain dah muh lyis wons wuq das toeuh jyehjuh xauh yoeus goeus. 30 Gvshih namoq gas ngos yah dvgeh jeszan yvmas xauh wvng goeus. Houka xikpheh ngos zan cho lhyi namoq nyvng goeus. Gvshih eq ngos zan nyeis shih yvlyis namoq xauhgyo dah zan cho nyang nghuot.
1 Namoq gas Khristu yah dvgeh kang dwis gvng mas yombos los goeus zis yahge nyah jyetdap ehnyet gas namoq lyis nhaiqtaink dyei goeus. Hauh thoq lyis Dyos dah zomh cho yoh las nyang changh nyang jyetdap sainhnos cho xauh kham yoeus nyeis. 2 Housoeh las namoq gas xamxonh cho dvkoeuq, jyetdap ehnyet dvlom, ehnyet dvkoeuq kyingh nghuot khyvlyis ngos lyis nhaiq dainh shoq gausyis nhang geh oen ngos namoq lyis yomdyei. 3 Khwank mes ehnyet, vsainnyang vkyuh dvxo ehnyet yah cha eq vkuot goh. Dius gohyuk gas vsainnyang thoq lyis zes gis oen vjangh nghamh yoeus las, nyang changh nyang nhaiqlom nyhen mha gyoh nyeis geh. 4 Dius yuk khanghmuh vsainnyang yah sen yvlyis kyingh ma nghuot, nyang changh nyang sen yvlyis eq nghamh yoeuh bas jungh. 5 Khristu Yesu mas bos dah ehnyet nyang, namoq mas eq bos joq bas jungh. 6 Nyang gas, khanhamp eq soengh choenk Mangso nyang nghuot joq laus eq, Mangso yah dvyih nghuot joq das xiklyis lhuot yoeus das ge ma nghamh. 7 Hauh gungsthaiq nyah ehnyet bauh zis yah dvyhangteh nyang yoh zis dvnganh lyis toh las, jons gungs tsungh zis yah cangsoeu dius dah vwot yah thuq los goeus. 8 Heisoeh nyah gungs o mha gyoh las shei shoq domsyos gyo. Nyang jyoengh nyang tapzains mas shei shoq domsyos gyo goeus. 9 Housoeh yvmvyah Mangso ka Nyang lyis nyhang thank khyvlyis chunghtoq las nyings dvnganh thoq mas dah nyings dyei. 10 Housoeh las nyhang thank maukhung, nyeisjvng thoq yahge nyeisjvng khau mha bang dvnganhmoq Yesu nyings lyis phauh nyang chungh paiq das. 11 Yesu Khristu gas Yhensain nghuot ge dvnganh gas Uwus Mangso dah phunk xiklyis taiq hoeuh das. 12 Housoeh las ngos jyet kang bang eh, namoq ngos yah dvgeh nyeis yoq lyis namoq vjangh ngah domsyos gyo teh, gvshih namoq yah we nyeis yoq lyis ngah domsyos gyo das zis gas, zes yhaugyen joq. Housoeh las namoq dah khyuot yoeus cho lhyi dyinghjet shoq xauh yoeus bas jungh Mangso ka namoq mas khanh dyei nyeis. 13 Khasoeh ge lyis Mangso ka nyah ehnyet o dah cho lhyi kuot mes ehnyet yah yoh kuot das nyhenshang Mangso ka namoq mas muh kuot nyeis. 14 Namoq kuot chah dah cho khvt khanghmuh mas lop las phyen-goh cho ma bos bos kuot geh. 15 Housoeh lyis namoq gas wotwu dyoq las yobos yoh bang nyeis dah haih mungkvn mas tswi ma bos ehnyet lhoqshang dah Mangso lo jens teh bweh los das. Housoeh namoq gas kang dwis nhang dah dang lyis taiq kyoh nyeis zis yah maukhung gonh lyis pank dyei dah bvng zis teh nyamoq mas yoh bvng joq das. 16 Namoq housoeh kuot lyis gas ngos yomkat las wons wuq cho khanghmuh gas vkom ma nghuot yvmvyah Yhensain Yesu jweh buisnyeis lyis ngos khwank chank bos das. 17 Ngos sat xauh lyis, houka namoq dah Mangso lhyi phudyei namoq dah lomsjingh lomhxangh phon thoq mas ngah kang lhyi shukphoh jyungshuk khyvlyis huot khyoq laus eq ngos gauslaus nyeis. Ngos yah dvgeh namoq lyis eq gaus nhang mes. 18 Houyah dvyhangteh namoq eq gaus nyeis geh, ngos lyis eq namoq yah dvgeh bos gauslaus nhang geh. 19 Ngos namoq jyank masyah loeus xauhgyo las yom yoh bas jungh, Mangso o cho nghuot lyis gas Timothi lyis namoq jyank mas ma nyangh lyis yoh nhang kat das oen ngos nghamhloms nyeis. 20 Timothi kyingh ngos yah ehnyet doeusgoh las namoq dah cho nyang teh bos nghamh chiqh dyei soeu gohtoeu hank ma nyeis lo. 21 Gohyhamh bang dvnganh gas nyamoq yah sen zis kyingh dvtsain chiqh: Khristu Yesu yah sen cho mha nhaiq ma tsain wvng. 22 Nyang gas, lo gas uwus lyis thuk teh, gausyis dang tyo cho mha ngos yah dvgeh muh yomkat wons wuq nyeis yvmvyah, nyang kha iq phauhdap dius nghuot yvlyis namoq nyang seq. 23 Housoeh las ngah cho khasoeh bweh los das zis ngos seq yah dvyih, ngos nyang lyis namoq jyank mas nang kat das oen nghamhloms nyeis. 24 Hauh thoq lyis kha nyhank madot lyis ngos nyang namoq jyank mas los jweh das oen Yhensain mha loms toh. 25 Tsai, namoq dah vmang vnoeuh, zainsthuk thuk soeu, jeszan loeuzomh, ngos lyis pangh das xiklyis namoq nhang kat las, chah oen zis ma bos lo shoq ngos lyis phuqsoe soeu Epaphrodi lyis namoq jyank mas doms nhang kat chah oen nghamh. 26 Nyang gas namoq dvnganhmoq yah xauhgoh mes zis hwangh nyeis. Khasoeh ge lyis nyang nos yvlyis namoq xauhgyo goeus las nyang ehnyet svsoh ma nyens mus nyeis. 27 Nyang jyoengh vluk shei shoq nos goeus. Nghuot laus eq Mangso nyang lyis nhaiqnyen nyeis; nyang lyis kyingh ma nghuot, ngos gas kuk cho dvtsank thang lhyi dvtsank ma xauh bas jungh ge ngos lyis eq nhaiqnyen. 28 Housoeh las namoq nyang yah doms xauhgoh las namoq yoh gauslaus bas jungh zis yahge ngah dah kuk cho eq dyuk loh bas jungh oen, ngos nyang lyis namoq jyank mas nhang kat das zis zes omes nyeis. 29 Housoeh las namoq nyang lyis Khristan vmang vnoeuh dvyuk lyis teh lhom yoeus las, housoeh teh bang lyis phauh nyang geh. 30 Khasoeh ge lyis nyang gas namoq nyang ma yoh dyei dah pangh cho ngos lyis yoh dyei das xiklyis kang dyei las Khristu dah muh lyis vluk shei shoq wons wuq goeus.
1 Boekyis eh, dang thang sau lhyi ka Yhensain mha dvdain dvlom yoh bweh cho lhyi gaus nyeis geh. Xikpheh ngos namoq lyis lhaih kat ku cho lhyi doms lhaih kat kat kuot das zis ngos yvwons ma lyei thoq lyis magoh, namoq lyis sam cho yoh nhang. 2 Ma gis ma shop dah muh kuot bang lyis zungh yoeuh nyeis geh, lvkhuih jens lyis zaih geh. Vsainnyang gungs lyis lhyamh thyet bang lyis zungh yoeuh nyeis geh. 3 Vthyoh tyomh cho gyingh lyis kham yoeus bang gas nyamoq ma nghuot, yang dvnghuot. Khasoeh ge lyis yang gas Mangso lhyi nyah Dyos yah paiq las Khristu Yesu mas dvdain dvlom yoh bweh dah kang dwis cho mha khwank bang nghuot. Yang gas nghe pheh vlho kuot xoeuq dah pwe mas ma nges. 4 Jyoengh oen lhyi nghe pheh vlho lhyi nges das cho ngos yoh ku. Nghe pheh vlho lhyi nges das cho yoh ge dvyuk yuk nghamh lyis gas ngos zes yoh. 5 Ngos gas xet nyeih lyis vthyoh tyomh kham goeus. Israel vnyau mas dah Benyamin vkoq yahge, Hebre jens mas Hebre suih gyingh nghuot. Yuda jens dah lyi chank khyv pheh yoeuh lyis eq ngos Pharishe nghuot. 6 Nhaiq wvng yomkat cho yah sen lha taiq lyis ngos gas phung lhyi shoeuhshih soeu nghuot. Dan cho yoh das nyhenshang lyi chank tyink yvmas ngos chah yobos ma bos. 7 Nghuot laus eq ngah xiklyis vmyat nghuot ge las yoh taiq dah vyhang dvnganh gas gvshih Khristu gvng mas somh tyamp vyhang tsain nghuot oen ngos nghamh. 8 Hauh thoq lyis ngah Yhensain Khristu Yesu lyis yoh seq yoeus dah seq cho ka cho khvt khanghmuh mas zes las, vcaiq vto phauhdap joq yvmvyah hauh nyhenshang vyhang dvnganh yvlyis somh loh goeus khyvlyis ngos suon yoeus. Ngos gas nyah xiklyis vyhang dvnganh tyamp goeus. Khristu ge dah vmyat lyis xauh yoeus das nyhenshang yahge Khristu yah dvdain dvlom yoh bweh das xiklyis joq ya joq yvlyis jenh boms teh nghamh goeus. 9 Ngos gas lyi chank tyink zis yah ngah dan cho lhyi ma yoh. Gvshih gas Khristu lyis lomsjingh gvng mas dyei dah dan cho lhyi ngos yoh. Houka lomsjingh gvng mas Mangso nhaiqnyen las dyei dah jyehjuh jyungshuk nghuot. 10 Ngos gas Khristu lyis seq das cho, nyah dah dwis toq dah yomsoq lyis xauh nyvng xauh kham das cho, nyang yah dvgeh shanghsenh zis kham lha nyang shei kham teh shei kham das yvlyis kyingh ngos o nyeis. 11 Housoeh ngos gas shei bang dwis toq das cho mha xauh bos das oen nghamhloms nyeis. 12 Ngos gas gvshih yangh hauh jyungshuk xauh yoeus goeus oen eq, gvshih dyinghjet joq goeus oen eq taiq mes zis ma nghuot. Nghuot laus eq Khristu Yesu gas ung zis yah ngos lyis nyah dius bweh nhang goeus zis yah dvyhangteh ngos gas hauh jyungshuk lyis xauh yoeus shoq tsoq las yomkat nyeis. 13 Boekyis eh, ngos gas hauh jyungshuk lyis xauh yoeus goeus oen jyoengh ma nghamh. Nghuot laus eq ngos kuot cho dvkoeuq gas ngah nungsthank pheh vyhang dvnganh lyis tohnyhik las xikkhonh mas joq vyhang lhyi yoh nyhi bas jungh yomsoq dvnganh yah yomkat nyeis. 14 Housoeh yvmvyah ngos gas hauh jyungshuk lyis xauh yoeus das xiklyis toeuqkhom jweh shoq wuih. Hauh jyungshuk gas nyhang mha kang yoh dwis bas jungh Khristu gvng mas Mangso dah lhung kat cho nghuot. 15 Dyos cho mha nhaiqbos ung gying los goeus bang yang dvnganh gas, heisoeh teh ehnyet yah nghamh chah. Nghuot laus eq namoq dvyhamh mas shaih dah nghamh cho bos nghuot lyis, Mangso ka hauh zis namoq lyis chixoeuq das. 16 Khasoeh nghuot laus eq yang gas khvnyhik jweh shoq chank nyeis dah nghamh cho yah dvyhangteh xik pheh tsoq las suh loh goh. 17 Boekyis eh, namoq dvnganh gas ngah jyank masyah yikhyoh yoeuh yoeus nyeis geh. Ngamoq Chixoeuq goeus dah yikhyoh gis chank nyeis bang lyis yoeuh comh toh geh. 18 Haih cho xikpheh ngos namoq lyis nyoshoq lhain taiq kyoh ku goeus. Gvshih eq ngos namoq lyis nyoqdyeis yah puk taiq kyoh nyeis. Khristu tapzains mas shei kham cho lhyi jes kuot las kang dwis bang nyoshoq nyeis. 19 Hauh bang gas munyi thomh mas nyamoq dah cho thank das zis nghuot. Khasoeh ge lyis hauh bang dah Mangso ka gungsshoh dah nyoqnoq obos cho nghuot. Nyamoq gas vxoq vcaiq cho lhyi khwank cho kuot las hai nyeisjvng thoq mas dah vyhang lhyi kyingh nghamh twih toh. 20 Yang gas maukhung dius jens tsain nghuot las maukhung mhayah, yah khyuot yoeus Soeu Yhensain Yesu Khristu jweh los das yvlyis yang tsain langh nyeis. 21 Nyang gas vyhang dvnganh zis lyis nyah o mha yoh toh dah phunk nyoqnho, zau guon yomsoq lyis yhung zis yah yang seq shei dah gungs lyis nyah phunk bos gungs yah doeus shoq thaiq tsuk dyei das zis nghuot.
1 Housoeh las boekyis eh, ngos namoq lyis jyetdap las soh nyeis. Namoq gas ngah gaus joqyos yahge ngah buismuk nghuot. Jyetdap bang eh, Yhensain yah dvdain dvlom duot las kang dwis cho mha goeng goeng thoenk yap geh. 2 Eodia yahge Sintike eh, Yhensain mha vbi vnoeuh nghuot zis yah dvyhangteh xamxonh das xiklyis jyehjuh yah ngos nah aiq yuk lyis khyoeuq kat. 3 Ngah muh wons changh eh, hau vmesbih aiq yuk lyis pangh das xiklyis ngos o. Khasoeh ge lyis hau gausyis dang taiq kyoh cho mha nyah aiq yuk gas ngos yah dvgeh ma nyung ma daus yom bos kat goeus. Nyah aiq yuk yah dvgeh kuot lai loh bang mas Klemen yahge kang maussauh buk mas nyings bos, ngos lyis pangh thuk bang gohtoeu eq tsain bos. 4 Yhensain mha namoq vjangh gausyis nyeis bas jungh! Gausyis nyeis geh oen ngos doms taiq. 5 Namoq dah noeuh nhamp ehnyet lyis dius dvnganhmoq xikkhonh mas Chixoeuq geh. Yhensain jweh los nyeis. 6 Chah cho mha laus eq vchiq nyeis goh: namoq shvmanh dung khanghmuh khanhamp eq nhaiqshoqlang ehnyet yah namoq chah ya chah yvlyis Mangso lhyi taiq kyoh nyeis geh. 7 Housoeh lyis dius dah seq cho yah ma duons, Mangso dah nyenstap zis gas Khristu Yesu mas namoq dah ung khau yahge ehnyet nhaiqlom lyis gomh dyei das. 8 Boekyis eh dang thang sau lhyi, namoq gas jyoeng cho, phauh nyang gis cho, dan cho, lhoqshang cho, nhaiqdoeus cho, chungh cho, nyoqnho ngelang dvja ja, chungh cho dvja ja nghuot lyis gas hauh cho lhyi tsain nghamh yoeuh nyeis geh. 9 Ngah dang yahge kuot loh cho jens lyis nyvng yoeuh, xauhgyo yoeuh las xuq zis yah lhom yoeus chank kuot geh. Housoeh lyis nyenstap vpom Mangso ka, namoq yah dvgeh nyeis das. 10 Shishenh nyangh thang lhyi namoq dah jyetdap ehnyet ngos lyis dvlhain doms Chixoeuq yvmvyah ngos Yhensain Yesu mha svsoh gauslaus nyeis. Housoeh oen lhyi xikpheh namoq ngos lyis phuqsoe cho toh tyamp oen taiq mes zis ma nghuot. Jyetdap ehnyet lyis Chixoeuq das toeuh ma yoh oen zis dvnghuot. 11 Ngos heisoeh taiq zis gas, namoq ngos lyis ma yoeuh ma dyangh lo oen taiq zis ma nghuot. Khasoeh ge lyis ngos gas vsainnyang yoh nyhoq yah nhaiqtap zis yah daq nyeis das xiklyis xuq toh goeus. 12 Ngos gas jo buk laus eq, yuot shet zis xauh laus eq, magons magoh yoh uhlyis eq, ma nyo ma tham dvyoh dah shishenh lyis laus eq, khamha laus eq, khanhamp laus eq ehnyet tap khyvlyis seq nyeis das nyhenshang nghop shung toh dah joeui xuq toh goeus. 13 Ngos lyis yombos nhang dah Khristu gvng mas cho khvt khanghmuh lyis yoh kuot. 14 Nghuot laus eq ngos shanghsenh xauh uhlyis, ngos lyis pangh zis gas svsoh gis goeus. 15 Philipi phung dius jens eh, ngos Makedoni mau masyah thuq las gausyis dang taiq kyoh xi shishenh lyis namoq Philipi phung dvkoeuq kyingh ngos lyis pangh kat goeus cho lhyi eq, muh wons wuq cho mha namoq kyingh ngos yah zomh las somh cho yahge myat cho lhyi dvgeh xauh kham zo cho lhyi namoq nyang vlhomuh seq. 16 Ngos Thesaloni wus mas nyeis shih lyis yangh namoq ngos mas chah los uhlyis hau nyhenshang dvlhain magah pangh dah vlu huon kat dyei. 17 Ngos heisoeh taiq zis gas, jyungshuk ngwis lyis o lha ma nghuot, namoq phuqsoe muh dah vshih, vmyat je los nyo los das yvlyis kyingh ngos dv o mes. 18 Namoq Epaphrodi loq masyah huon kat dah vyhang vlu jyungshuk dvnganh xauh yoeus las suon xoeuq. Houka chah thoq lyis guszes shoq nghuot. Ngos mas magons magoh dyingh joq. Hauh vyhang ka Mangso xiklyis ngheq dyei dah xangh shom teh eq, Mangso nhaiq doeus las lhom yoeus mon dah lomhxangh teh eq nghuot. 19 Housoeh las ngah Mangso ka nyah dah magons magoh zisyos masyah Khristu Yesu gvng mas namoq chah ya chah zis dvnganh yvlyis shvmanh dyei das. 20 Gvshih yah Uwus Mangso mha vcaiq vto phunk bos joq bas jungh. Amen. 21 Khristu Yesu yah sen bang Mangso dah lo jens dvnganh lyis jeshuh kat. Heimha ngos yah dvgeh nyeis dah boekyis gas namoq lyis jeshuh kat. 22 Heimha nyeis, Mangso dah dius jens dvnganh, zes las Kesar hwankti yhen mha nyeis bang namoq lyis jeshuh kat. 23 Yhensain Yesu Khristu dah jyehjuh gas namoq yah dvgeh nghuot bas jungh. Amen.
1 Mangso dah ehnyet yah Khristu Yesu dah lvgyo ngos Paulo yahge vmang vnoeuh Timothi gas, 2 Kolose wus mas dah Mangso dah dius jens yahge Khristu mas lomluk dah boekyis jyank mas dang tying kat. Yah Uwus Mangso ka jyehjuh yahge nyenstap zis dyei bas jungh. 3 Ngamoq namoq xiklyis shvmanh dung khanghmuh, yah Yhensain Yesu Khristu dah Uwus, Mangso lhyi vjangh nhaiqshoqlang oen sang. 4 Khasoeh ge lyis, namoq Khristu Yesu lyis kha iq lomsjingh nyeis cho, Mangso dah dius jens lyis kha iq jyetdap nyeis cho ngamoq xauhgyo goeus. 5 Hau jyoeng dah dang ge Gausyis Dang namoq jyank mas cangxeih jweh los uhlyis, namoq gas hauh dang yah dyei dah nghamhloms cho lhyi xauhgyo goeus. Housoeh las namoq dah lomsjingh cho yahge jyetdap cho ka namoq xiklyis maukhung mha shung toh dyei dah nghamhloms cho mha vpom tsuk toh. 6 Namoq gas Mangso dah jyehjuh cho cangxeih xauhgyo las hauh jyehjuh lyis jyoengh seqgyo dah buisnyeis masyah hauh Gausyis Dang gas namoq jyank mas jweh los las shvmanh jyehjuh vja ja lyis dyei nyeis zis yah dvyhangteh, hau Gausyis Dang gas mungkvn gonh dyos jweh loh las shih nyoshoq shih los. 7 Namoq gas Mangso dah jyehjuh cho lhyi ngamoq dah jyetdap dah pangh soeu Epaphra jyank masyah xuq goeus. Nyang gas ngamoq dah gungsthaiq Khristu dah lomluk muh wons soeu nghuot. 8 Dyos yah dyei toh, namoq dah jyetdap ehnyet dah cho nyang ngamoq lyis taiq kyoh goeus. 9 Namoq gas Mangso dah ehnyet o cho lhyi yoh seq dah joeui, Dyos yah dyei dah seq gyo cho dvnganh yahge seq cho yah tyink dyei zis xauh bas jungh, ngamoq Mangso jyank mas shvmanh dung dyei. 10 Housoeh namoq gas Mangso o khyvlyis kang yoh dwis las, nyang nhaiqdoeus cho lhyi vjangh yoh chank kuot das. Housoeh namoq dah kang dwis cho mha gis dah muhzoh vja ja kuot thuqh zis yah Mangso lhyi seq cho mha zes kuhxing los das. 11 Housoeh las namoq thungh phuh los dah cho khanghmuh lyis kuh xing ehnyet yah yoh jhen das xiklyis nyah phunk bos yom zainsmuh yah namoq lyis yombos nhang bas jungh. 12 Hauh thoq lyis bvng dah munghdan mas nyeis, nyah gyingshang bang xiklyis Mangso toeuq toh dah vso vlho lhyi kham yoeus mon bang namoq yoh bweh los shoq sont dyei dah Mangso jyehjuh lyis gausyis chungh nyeis geh. 13 Nyang gas yang lyis ma shop dah mauchuotdwang yomsoq khau mhayah khyuot yoeus las, nyah jyetdap Lo dah munghdan mas shwih kat. 14 Hau Lo gas yang lyis lhuiq kat goeus. Houka yah yaunos lyis khyuot tyamp dyei cho nghuot. 15 Khristu gas nyoq yah ma yoh nyvng dah Mangso lhyi Chixoeuq. Nyang gas loxeih nghuot las gvnkhanh toh vyhang dvnganh mas zes thank dah soeu nghuot. 16 Khasoeh ge lyis, maukhung yahge nyeisjvng mas yomsoq bos dyos, sidyos jens, yhensain jens, guon bang, toeuh yoh bang yah dvgeh, nyoq yah yoh nyvng zis yahge nyoq yah ma yoh nyvng zis dvnganh lyis eq hauh Lo masyah gvnkhanh toh. Mangso ka vyhang dvnganh yvlyis nyang masyah nyah xiklyis eq gvnkhanh toh. 17 Nyang gas dvnganh dah xik mas nyeis las joq ya joq zis dvnganh gas nyah gvng mas nyah joqyos yah nyang goeng joq. 18 Nyang gas nyah gungs ge dah phung uhloms nghuot. Nyang nyang gungsdom dah kang vpom nghuot. Nyang kyingh cho khvt khanghmuh mas cangxeih joqyos yoh soeu bweh bas jungh, shei bang mas cangxeih dwis toq nhang zis xauh dah loxeih nghuot. 19 Khasoeh ge lyis Mangso nyang nghamh thyet zis yah dvyhangteh, nyang gas Mangso dah gungs khyank dyingh shoq kham yoeus goeus. 20 Housoeh las Mangso ka maukhung nyeisjvng mas nyeis ya nyeis, bos ya bos yvlyis nyang yah mehoq tamp das zis nghamh thyet toh goeus. Mangso ka tapzains mas nyah gungs dyei las shei kham soeu Lo dah phudyei suih yah nyenstap cho kuot las maukhung nyeisjvng mas nyeis ya nyeis yvlyis nyah jyank mas doms lang yoeus. 21 Namoq eq xikpheh gas namoq kuot dah ma gis dah nghamh cho yahge muh gvng mas Mangso yah we loh las nyah jeswus tsain duot loh. 22 Nghuot laus eq gvshih Mangso ka cangsoeu gungs tsungh toh dah nyah Lo lyis shei kham nhang khyvlyis yah namoq lyis nyah buisnoms kuot goeus. Housoeh kuot cho ka namoq gas gyingshang lha vchoqh vlhauq ma dap, yobos ma bos nyah xikkhonh mas namoq lyis yoh hwank kat das nyhenshang nghuot. 23 Jyoengh namoq gas namoq dah goeng dah lomsjingh vpom mha tsoq las yoh thoenk yap joq das. Lho lha hau gausyis dang lyis xauhgyo dah shishenh lyis namoq xauh yoeus toh dah nghamhloms cho lhyi vchi lhaiq kat goh. Ngos Paulo gas gausyis dang dah jyeidwis bweh goeus. 24 Gvshih gas namoq xiklyis ngos xauh dah shanghsenh yvmas ngos gaus nyeis. Khristu gas nyah gungs ge dah hau phung xiklyis shanghsenh xauh zis yah dvyhangteh ngos gas ngah gungs mas shanghsenh kham khyvlyis Khristu gas nyah gungs ge hau phung xiklyis kham das zis bos shih dah shanghsenh lyis ngos bos tyeh kham nyeis. 25 Namoq xiklyis gis cho kuot bas jungh ge Mangso ka phung muh wons soeu dvyuk khyvlyis ngos lyis toeuq toh zis xauh. Ngos lyis dyei toh yvwons s gas hau gausyis dang lyis dyinghjet shoq taiq kyoh das cho nghuot. 26 Nyang gas hau noq thank nghop toh dang lyis mungkvn mas nyeis dius jens ma seq shoq gohnhamp dvcaiq thang lhyi dvcaiq jweh shoq nghop shung toh laus eq gvshih gas nyah dius nyau lyis Chixoeuq kat goeus. 27 Mangso dah nghamh toeuq cho ka dius nyau khanghmuh xiklyis nyang shung toh dyei, phunk bos las mauhphoh cho yahge noq thank Dang lyis nyah dius nyau lyis Chixoeuq das cho nghuot. Hau Dang gas Khristu nyang namoq vkhau mha nyeis cho nghuot. Hauh vjyuk gas, namoq gas Mangso yah dvgeh nyah phunk lyis gvm yoeus das cho nghuot. 28 Housoeh yvmvyah ngamoq gas dius nyau khanghmuh lyis Khristu cho taiq kyoh. Dius yuk khanghmuh lyis Khristu mas nhaiqbos ung gying dah Khristan dvyuk dvyuk Mangso dah xikkhonh mas yoh shwih kat bas jungh, ngamoq gas joeui bos ya bos zis yah nyamoq lyis zaih nhang, jyauh nyeis. 29 Housoeh hauh cho yoh bweh shoq ngos gas Khristu dyei dah kuhxing yomsoq yah nyung daus zis yah yomkat zwi nyeis. Hauh yomsoq gas ngos mas muh kuot nyeis.
1 Ngos gas namoq xiklyis eq, Ladoki dius jens xiklyis eq, ngah nyoqnho ma nyvng ku bang dvnganh xiklyis eq ngos kha iq yomkat nyeis cho namoq lyis taiq kyoh. 2 Housoeh ngos wons wuq yomkat cho ka, nyamoq dvnganh mas womh ehnyet dyingh zis yah dvyuk yah dvyuk dah jyetdap ehnyet mas twih goh los las nyamoq gas hau jyoeng cho lhyi seq las yoh loms toh goeus ge dah zisyos lyis dyingh dyingh xauh kham yoeus das. Heicho yah Mangso dah nghop toh dah noq thank cho ge Khristu lyis seq los das. 3 Nyang gas Mangso dah nghop toh joeui dvnganh yahge seq cho dvnganh phank xoeuq dah suhshih nghuot. 4 Housoeh las hank laus eq shuot cho lhyi jus das teh, gis das teh ge shoq taiq phyen-goh cho yahge mhuih cho ma bweh bas jungh, ngos heisoeh taiq kyingh. 5 Khasoeh ge lyis ngah gungsdom namoq yah ma nyeis laus eq, dyos mas ngos namoq yah dvgeh nyeis las, namoq yomkat goengtoenk ehnyet yah Khristu lyis lomsjingh cho mha dvgeh yap joq yvlyis ngos nyvng las gauslaus. 6 Namoq gas Khristu Yesu lyis Yhensain oen lhom yoeus goeus zis yah dvyhangteh, nyang yah dvgeh kang dwis las suh e nyeis geh. 7 Nyang mas nyet chent las kuot nyuk toh goeus zis yah lomsjingh cho mha doengs joq nhang cho lhyi, Jyauh cho lhyi kham yoeus goeus zis yah dvyhangteh, nyang mas nauh nauh nyet chent las nyang mas vsainnyang dah kang dwis cho lhyi cuk zis yah namoq dah lomsjingh cho lhyi zes goeng nhang geh. Lho lha namoq gas jyehjuh soh zis yah kang dwis nyeis geh. 8 Khristu dah tyingtoh dang masyah ma nghuot, dius dah tying dang chank las vkyuh ma bos suon yoeuh joeui khyvlyis mhuih jyomh cho eq, maulvt mas dah yius masyah thuq dah jyauh cho eq, hank eq namoq lyis jons ma kuot bas jungh zaih geh. 9 Khasoeh ge lyis dius gungs tsungh las haih mungkvn mas kang dwis nyeis yoq lyis Mangso dah gungs khyank gas nyang mas dyingh joq. 10 Namoq gas nyang mas kang dwis gvng mas dyinghjet dah kang dwis cho yoh goeus. Hauh Yhensain ka maukhung nyeisjvng mas yomsoq bos bang, toeuh yoh dah dyos jens dvnganh lyis guon dah zes thank soeu nghuot. 11 Namoq gas Yhensain yah dvdain dvlom duot las kang dwis uhlyis vthyoh tyomh goeus. Houka dius loq yah vthyoh ma tyomh, hai yaunos dap gungs shoh dah yomsoq masyah lhuiq kat ge, Khristu kuot dyei dah vthyoh tyomh cho nghuot. 12 Namoq gas jeis nyhop kham uhlyis nyang yah dvgeh nyhop zis xauh las Khristu lyis shei masyah dwis toq los nhang dah Mangso mha dwis toq los nhang das yomsoq bos yvlyis lomsjingh gvng mas nyang yah dvgeh dwis toq los nhang zis eq tsain xauh goeus. 13 Namoq gas xikpheh yaunos kuot bang nghuot las eq, Yuda dius jens ma nghuot las lyi ma chi vthyoh ma tyomh dah gohnyau bang nghuot khoq las eq, dyos cho mha shei joq. Nghuot laus eq gvshih gas Mangso namoq lyis Khristu yah dvgeh kang doms dwis nhang goeus. Mangso ka yah yaunos dvnganh lyis khyuot tyamp dyei goeus. 14 Nyang gas yah dah ma doeus magoq yaunos jyen lhyi eq, houyah sen dah lyi lyis eq tapzains mas bat tap zis yah shang tyamp dyei goeus. 15 Hau tapzains thoq mas Khristu gas maukhung nyeisjvng mas dah yomsoq bos bang yahge toeuh yoh bang dvnganh lyis khyoq tyamp las nyamoq lyis thung dius kuot zis yah ung hoeu thang mha chank nhang lha, dius phung yah chomp yoeuh soeu bweh nhang tyamp. 16 Housoeh yvmvyah, zonoms shukphoh yah pwe vja ja dah thungh lyi lyis chank dah lhamhmuh canh nyeih yahge no nyeih dah cho yah sen lha, hank eq namoq lyis dang thang ma thyet bas jungh. 17 Houteh zis dvnganh gas jweh los das shishenh lyis bweh los das vyhang dah siyet kyingh dvtsain nghuot. Gungs gas Khristu nyang nghuot. 18 Lhyenwhei nyoqnyvng lyis nyvng yvmvyah dius dvnganh thoq lyis zes ge nghamh zis yahge gungs lyis ma jus khyvlyis nyhen mha gyoh nhang lha, loeuswons bang lyis tsoengh paiq nhang soeu hank lyis laus eq namoq lyis dang thang vthyet nhang goh. Housoeh teh bang gas nyamoq dah soengh choenk ehnyet khyvlyis vkom mha moengs bang nghuot. 19 nyamoq gas gungs dah uhloms ge, Khristu lyis zwi zains toh cho ma bos lo. Yaunyoq changnyoq gyi coq twih toh dah gungs gonh gas Khristu ge dah uhloms masyah zonoms kham yoeus las Mangso dah ehnyet o khyvlyis kuh los. 20 Namoq gas Khristu yah dvgeh shei goeus las haih mungkvn lyis guon yomsoq bos, dyos dah loq masyah lhuiq kat zis xauh goeus. Housoeh lyis namoq gas chamus haih mungkvn yah sen bang teh tsain suh e nyeis goh lah? 21 Chamus namoq gas, Haih zis vzwi goh, vchaq yoeuh, vtanh goh, ge tung toh dah lyi lyis domsyos gyo chank kuot nyeis lah? 22 Hau lyi dvnganh gas dvlhain yhung thang lhyi vkyuh ma bos lo vyhang yah tsain sen. Hauh cho dvnganh gas dius yah kuot thuq dah lyi yahge jyauh cho dvnghuot. 23 Heisoeh teh lyi gas loeuswons bang lyis tsoengh paiq nhang, ma jus khyvlyis ehnyet nyhen mha khyoq nhang, vsainnyang gungs lyis svsoh nyom cho lhyi toeu toq dah joeui dvja teh nghuot.Nghuot laus eq gungs shoh dah nyetnau ehnyet lyis joeu yvmas chah vkyuh ma bos.
1 Namoq gas Khristu yah dvgeh dwis toq kat zis xauh goeus las Mangso dah loqyos shot pheh tsung toh, Khristu ge dah maukhung vyhang lhyi omes nyeis geh. 2 Nyeisjvng mas vyhang lhyi vnghamh twih toh goh; nyhang mha dah vyhang lhyi nghamh twih toh geh. 3 Khasoeh ge lyis namoq gas shei goeus bang nghuot las namoq dah kang ka Khristu yah dvgeh Mangso mha shung toh goeus. 4 Namoq dah kang gyingh gas Khristu nghuot las nyang doms thuq los uhlyis yang eq nyang yah dvgeh phunk mas tsain thuq los das. 5 Housoeh yvmvyah yah vkhau mha muh khanh nyeis mungkvn dah obos ehnyet, yauxi, ma lhoq ma shang vwot v-oeu muh, nyetnau, ma gis ma shop, nyoqnoq cho yahge silho paiq cho dvja nghuot. Housoeh teh ehnyet lyis thyuk tyamp chah. 6 Housoeh teh gvng mas Nyang lyis domsyos ma gyo bang dah thoq mas Mangso dah nhaiqlom dyis zis jweh los das. 7 Gohnhamp namoq dah kang dwis cho gonh mas hauh cho yah nghop toh uhlyis namoq nyang eq housoeh teh yaunos kuot zis yah kang dwis khoq. 8 Gvshih gas nhaiqyo, nhaiqlom dyis, hoeng ehnyet, yobos comh, loeusmus soqzo, khonhchoqh dvnganh shung tyamp geh. 9 Namoq nyang changh vhwah goh: khasoeh ge lyis hau gungs khyank cauh yah dvgeh wotwu lyis khyuot tyamp las gungs khyank saiq lyis wuot toh goeus. 10 Gvnkhanh soeu Mangso ka nyah dah dius saiq lyis Mangso nyah gungs doeus lho yah zes zes doeus los shoq tsoq kuot nyeis. Housoeh kuot zis gas namoq hau Yhensain lhyi dyinghjet shoq seq los das nyhenshang nghuot. 11 Housoeh las Heleni, Yuda dius, vthyoh tyomh soeu, ma tyomh soeu, dius soengh, Sithia dius, jons yahge luiq soeu ge, nyamoq jo mas gvn nyeis das cho ma bos. Khristu gas namoq dvnganh dah vkhau mha nyeis las nyang gas dvnganh mas yhaugyen thank soeu eq nghuot. 12 Namoq gas Mangso dah dius jens nghuot las nyang gas namoq lyis jyetdap las nyah xiklyis khyen yoeus zis xauh bang nghuot. Housoeh las namoq gas jyetdap, nhaiqnyen shohgyo, ehnyet nyhen mha gyoh las noeuh nhamp, kuhxing ehnyet lyis wuot toh geh. 13 Namoq dvyuk yuk thoq mas yobos huon chank bos lyis dvyuk yah dvyuk jhen zis yah nyang changh nyang yobos khyuot goh geh. Yhensain ka namoq lyis yobos khyuot dyei goeus zis yah dvyhangteh, namoq nyang changh yobos yoh khyuot dyei goh chah. 14 Kank bos cho dvnganh thoq mas dyinghjet dvdain dvlom yoh bweh shoq dvnganh yvlyis twih dah jyetdap ehnyet lyis tsank wuot chi geh. 15 Khristu dyei dah nyenstap cho ka namoq dah nhaiqlom mas guon nyeis las houka namoq nghamh thyet cho mha cho tuonh shet bas jungh: khasoeh ge lyis hau nyenstap cho lhyi xauh kham zo das nyhenshang Mangso ka namoq lyis dvgungs khyvlyis khi yoeus goeus: housoeh las nhaiqshoqlang oen geh. 16 Khristu dah dang gas namoq mas dyingh dyinghjet jet bos joq bas jungh: joeui bos zis dvnganh yah namoq nyang changh jyauh, cho tuonh shet goh nyeis geh. Chungh Dang, chunghthwe dang, dyos yah sen dah Chungh Dang yah namoq nhaiqlom khau mha Mangso lhyi jyehjuh chungh nyeis geh. 17 Housoeh las namoq cha taiq taiq, cha kuot kuot, Yhensain Yesu dah nyings yoeus las nyeis geh. Dvnganh yvlyis kuot nyeis geh. Nyah gvng mas Uwus Mangso lhyi chungh nyeis geh. 18 Yhensain nyhiq jens eh, vsainnyang dah yhensain phoq dah o mha gyoh nyeis geh. Houka Khristan dvyuk khyvlyis Yhensain mha doeus cho nghuot. 19 Yhensain phoq jens eh, namoq dah yhensain nyhiq jens lyis jyetdap nyeis geh. Nyamoq lyis vnyho goh. 20 Loshang jens eh, nyhiphoq jens dah domsyos vjangh gyo nyeis geh. Houka Mangso nhaiqdoeus dah Khristan jens kuot vvng muh nghuot. 21 Nyhiphoq jens eh, namoq dah lo jens lyis nhaiq vyo nhang goh. Housoeh kuot lyis nyamoq nhaiqngis yomgyau das. 22 Jons jens eh, namoq dah cangsoeu yhensain jens lyis cho khvt khanghmuh mas domsyos gyo nyeis geh. Nyoqnho yoh mes las nyamoq xikkhonh mas kyingh domsyos gyo khyvlyis ma nghuot. Mangso lhyi gyukwoms zis yah lhoqshang ehnyet yah domsyos gyo nyeis geh. 23 Namoq cha kuot kuot dius lyis kuot dyei teh ma nghuot, Yhensain lhyi kuot dyei teh ehnyet nhaiqlom dvnganh yah yomkat kuot nyeis geh. 24 Mangso ka nyah dius nyau lyis thoengh toh dah jyehjuh vso vlho lhyi namoq kham yoeus das yvlyis vjangh soh nyeis geh: Khasoeh ge lyis Khristu gas namoq phuqsoe nyeis dah Yhensain gyingh nghuot. 25 Ma jyoeng khyvlyis kuot soeu khanghmuh lyis nyang kuot dah ma jyoeng muh xiklyis phauh shangh zis xauh das. Khasoeh ge lyis Mangso ka soetuon cho mha nyoqnho ma khyen.
1 Yhensain jens eh, namoq eq maukhung mha Yhensain dvyuk bos yvlyis soh las namoq dah jons jens lyis jyei nhang zo cho mha lyi dan khyvlyis kuot geh. 2 Shvmanh dung cho mha malyen lo yomkat nyeis geh. Namoq shvmanh dung cho mha ehnyet mas jen jen mus las Mangso lhyi nhaiqshoqlang sang nyeis geh. 3 Khristu dah noq thank dang cho yoh taiq kyoh das toeuh gis Mangso ngamoq lyis dyei bas jungh ngamoq xiklyis shvmanh bos dung geh. Khasoeh ge lyis Khristu dah noq thank dang lyis taiq kyoh gvng mas gvshih ngos thung gyoh nyeis. 4 Hau noq thank dang lyis ngos taiq kyoh das yvwons s yoh zis yah dvyhangteh bvng bvng yoh taiq kyoh bas jungh shvmanh dung dyei geh. 5 Namoq yoh dah toeuh khanghmuh lyis ma kat khyoq vlhomuh yhung zis yah ma lomsjingh shih bang dah xikkhonh mas joeui yah suh e nyeis geh. 6 Namoq taiq dang gas khanhamp eq coh soeh ngvm las jyehjuh cho khyvlyis nhaiq wvng nhang dah dang nghuot las nyei soeu khanghmuh dah dang lyis jus dah phuk dang khasoeh yoh dyei das cho cvvq toh geh. 7 Ngamoq dah jyetdap boek, lomluk muh wons soeu, Yhensain muh mas pangh dah jyeidwis Tichiku gas ngos yah sen dah cho dvnganh namoq lyis taiq kyoh das. 8 Ngamoq dvnganh khasoeh bweh nyeis dah cho jeis namoq lyis taiq kyoh zis yah namoq ehnyet tap zis xauh bas jungh ngos nyang lyis namoq jyank mas nhang kat. 9 Nyang yah dvgeh namoq jyank mas dah soeu nghuot las, lomluk soeu, jyetdap dah boek Onesimu lyis eq nhang kat goeus. Nyah aiq yuk gas heimha bweh cho dvnganh namoq lyis taiq kyoh das. 10 Ngah thung lungh changh Aristaku ka namoq lyis jeshuh kat. Barnaba dah boek Makho eq namoq lyis jeshuh kat. Namoq jyank mas Makho jweh los lyis nyang lyis lhom yoeus geh oen shet kat cho lhyi namoq xauh yoeus toh goeus. 11 Yustu ge dah Yesu eq namoq lyis jeshuh kat. Hai somh yuk kyingh lomsjingh dah Yuda dius nghuot las Mangso munghdan xiklyis ngos yah dvgeh muh zwi bang, ngos lyis svsoh pangh dah ngah zainsthuk tsain nghuot. 12 Namoq jyank masyah nghuot las Khristu Yesu dah jons Epaphra eq namoq lyis jeshuh kat. Nyang gas nhaiq wvng zis yah namoq xiklyis shvmanh dung nyeis. Namoq gas Mangso o dah cho mha domsyos gyo chank suh las nhaiqbos ung gying zis yah lomsjingh cho mha vlhomuh seqgyo dah Khristan duot las vjangh yoh thoenk yap joq bas jungh ge, nyang Mangso jyank mas khyoeuq nyeis. 13 Nyang gas namoq xiklyis eq, Ladoki yahge Herapoli wus bang xiklyis eq muh yomkat zwi khank nyeis zis gas ngos nyah cho kanghjyoeng kat. 14 Ngamoq dah jyetdap mvcheih svra Luka yahge Dema gas namoq lyis jeshuh kat. 15 Ladoki mas nyeis boekyis, Nimpha yahge nyah yhen mha huom dah phung lhyi eq jeshuh dyei geh. 16 Hai huon kat maussauh namoq dye nghap goeus ya, Ladoki phung lhyi nghap nhang lha, nyamoq lyis yah huon das maussauh eq namoq nghap yoeuh geh. 17 Yhensain dah muh mas wons wuq das xiklyis kyauh toh yvlyis dye shoq zwi tyink aq oen Arkhipu lyis taiq kyoh geh. 18 Ngos Paulo nyang, hai ngah jeshuh dang lyis ngah loq yah lhaih kat. Ngos thung mha lungh joq yvlyis vtohnyhik goh. Mangso dah jyehjuh gas namoq yah dvgeh nghuot bas jungh.
1 Paulo, Sila yahge Timothi moq gas, Uwus Mangso yahge Yhensain Yesu Khristu mas nghuot dah Thesaloni wus mas dah phung lhyi maussauh lhaih kat. Jyehjuh yahge nyenstap zis gas namoq mas joq bas jungh. 2 Ngamoq gas namoq dvnganhmoq xiklyis vjangh jyehjuh chungh nyeis zis yahge ngamoq dah shvmanh dung dang mas namoq lyis nyings yoeus nyeis. 3 Khasoeh ge lyis namoq dah lomsjingh cho mha muhzoh khasoeh khanh nyeis zis eq, namoq dah jyetdap ehnyet gvng mas muh kha iq khank nyeis zis eq, Yhensain Yesu mas namoq dah nghamhloms cho kha iq goeng yvlyis eq yah Uwus Mangso dah xikkhonh mas ngamoq soh nyeis. 4 Boekyis eh, Mangso ka namoq lyis jyetdap las nyah dius duot das xiklyis khyen yoeus cho ngamoq seq. 5 Khasoeh ge lyis, ngamoq dah gausyis dang gas, dang yah kyingh jweh zis ma nghuot, yomsoq yah eq Gyingshang Dyos yah eq, gausyis dang dah jyoeng cho lhyi dyingh dyingh lomsjingh ehnyet yah eq namoq jyank mas los taiq kyoh. Namoq yah dvgeh nyeis lyis namoq dah gis cho xiklyis ngamoq kang khasoeh dwis cho namoq nyang seq. 6 Namoq gas ngamoq yahge Yhensain dah yikhyoh yoeus las cho tsain chank kuot nyeis. Shanghsenh zis nyoshoq xauh laus eq, hauh gausyis dang lyis Gyingshang Dyos masyah los dah gauslaus ehnyet yah tsain lhom yoeus. 7 Housoeh las namoq gas Makedoni mau yahge Akhaia mau mas dah lomsjingh bang dvnganhmoq dah yikhyoh bweh los. 8 Khasoeh ge lyis namoq mas dah hau Yhensain dah loeus gas Makedoni mau yahge Akhaia mau gonh hoeuh loh thoq lyis magoh namoq Mangso lhyi lomsjingh cho loeus eq dvkhauyah hoeuh loh goeus. Housoeh las namoq lyis cha taiq dais ma bos lo. 9 Namoq jyank mas ngamoq jweh los uhlyis namoq ngamoq lyis khasoeh lhom yoeus zis eq, namoq gas dwis nyeis las jyoeng dah Mangso lhyi yoh phuqsoe das xiklyis phvra lyis tsain tyamp las Mangso jyank pheh khasoeh lhain los zis eq, 10 maukhung mhayah jweh los das Mangso dah Lo lyis langh nyeis zis lyis eq, dius jens dvnganh taiq hoeuh nyeis. Hau Lo Yesu gas shei goeus bang masyah Mangso dwis toq los nhang lha jweh los das Mangso dah nhaiqlom dyis masyah yang lyis lhuiq kat soeu nghuot.
1 Boekyis eh, ngamoq namoq jyank mas jweh los cho ka vkom ma nghuot zis gas namoq nyang seq. 2 Ngamoq namoq nyeis dah Thesaloni wus mas ma los shih, Philipi wus mas nyeis dah uhlyis ngamoq lyis khasoeh shoeuhshih zis yahge jwangh nyhap zis xauh cho lhyi namoq seq. Housoeh tyixo cho nyoshoq bos laus eq namoq lyis Mangso dah gausyis dang yoh taiq kyoh das xiklyis yah Mangso ka ngamoq lyis womh ehnyet dyei toh goeus. 3 Ngamoq shuot cho yahge ma lhoq ma shang ehnyet yah dvyuk yuk lyis mhuih jyomh mes dah ehnyet yah namoq lyis taiq kyingh ku zis ma nghuot. 4 Hauh gungsthaiq ngamoq gas khanhamp eq Mangso taiq nhang zis yah dvyhangteh taiq nyeis. Khasoeh ge lyis Mangso ka ngamoq lyis mon yih bang nghuot cho soetuon thuq kat las seq goeus yvmvyah hau gausyis loeus taiq kyoh das nyhenshang loms toh goeus. Ngamoq gas dius lyis nhaiqdoeus nhang das xiklyis yom ma kat, yang kuot loh dah wotwu lyis yoh seq soeu Mangso lhyi nhaiqdoeus nhang das xiklyis yom dvkat. 5 Khasoeh ge lyis namoq vlhomuh seq zis yah dvyhangteh, ngamoq gas namoq jyank mas ma jus khyvlyis mhuih dang taiq zis yah, nghuot ya nyoqnoq cho lhyi nghop shung toh dang chi lha los zis ma nghuot. Hauh cho mha Mangso nyang kanghjyoeng nghuot. 6 Ngamoq gas namoq jyank masyah eq, gohyuk jyank masyah eq hank jyank masyah eq chungh cho xauh yoeus shoq yomkat zis ma nghuot. 7 Ngamoq gas Khristu dah lvgyo jens nghuot zis yah dvyhangteh namoq lyis vmingh yah yoh taiq. Nghuot laus eq ngamoq namoq yah nyeis uhlyis ungwes gas nyah lo jens lyis dyangh teh, noeuh noeuh nhamp nhamp kuot goeus. 8 Namoq gas ngamoq dah jyetdap kang twih bang bweh los goeus. Mangso dah gausyis dang kyingh ma nghuot, ngamoq dah kang lhyi yangh namoq lyis gvm dyei das zis cicont nghuot. 9 Boek yis eh, ngamoq muh kha iq zwi khank lai loh goeus yvlyis namoq vlhomuh soh nyeis. Namoq lyis yvwons ma lyei nhang bas jungh oen ngamoq gas ngamoq dah kang khoeu muh lyis nyeih nyenh zwi khank zis yah Mangso dah gausyis dang lyis taiq kyoh. 10 Namoq lomsjingh nyeis bang xikkhonh mas ngamoq dah wotwu lhoq shang, jyoeng zis yah yobos huon dais ma bos nyeis zis gas namoq nyang eq, Mangso eq kanghjyoeng tsain nghuot. 11 Uwus gas nyah lo jens lyis kuot dyei teh namoq dvyuk dvyuk lyis ngamoq kuot dyei goeus zis namoq seq. 12 Ngamoq namoq lyis yomdyei cho yahge nhaiqtaink cho kuot goeus. Nyah munghdan mas xauh wvng das zis yahge phunk xauh yoeus bas jungh ge namoq lyis khi yoeus dah Mangso lhyi nhaiqdoeus nhang dah kang dwis cho mha suh e nyeis das nyhenshang ngamoq tsoq las taiq kyingh yomdyei kat. 13 Tsai Mangso dah jyehjuh lyis malyen lo chungh das cho gohtoeu dvkoeuq bos shih. Ngamoq namoq jyank mas hau Mangso dang los taiq kyoh uhlyis dius dah dang lyis teh ma nghuot, Mangso dang namoq xauhgyo las lomsjingh zis yah lhom yoeus goeus. Hauh dang gas namoq lomsjingh bang dah vkhau mha muh khanh dyei nyeis dah Mangso dang gyingh nyang nghuot. 14 Boekyis eh, namoq mas xauh kham dah cho jens gas Yuda mau mas Mangso dah phung nghuot dah Khristu Yesu yah sen bang mas eq dvyhangteh xauh nyeis. Namoq gas vsainnyang dius jens loq mas shoeuhshih cho xauh zis yah dvyhangteh, nyamoq eq Yuda dius jens loq mas shoeuhshih zis tsain xauh. 15 Hauh bang gas Yhensain Yesu lyis eq lvpe jens lyis eq sat goeus. Ngamoq lyis eq tsain shoeuhshih. Nyamoq gas Mangso nhaiqdoeus das khyvlyis ma tsain kuot, yuk khanghmuh dah jes duot nyeis. 16 Ngamoq gas gohnyau bang lyis nyamoq khyuot yoeus cho khasoeh xauh das cho taiq kyoh yvlyis yangh Yuda dius jens tomp tyamp das xiklyis yom tsain kat. Heisoeh khyvlyis nyamoq shuot nyeis dah yaunos dyingh dyingh kuot goeus. Housoeh las thang thank lyis Mangso dah nhaiqlom dyis zis gas nyamoq thoq mas jweh los. 17 Boekyis eh, ngamoq eq namoq yah nhaiqlom yah ma nghuot, gungsdom yah dvyoq gang joq las soh nyeis. Namoq yah nyoq nyvng sangh tsuk doms xauhgoh das nyhenshang yomkat nyeis. 18 Ngamoq namoq jyank mas doms los mes. Ngos Paulo nyang namoq jyank mas doms jweh los das xiklyis dvlhain aiq lhain yomkat yoeuh goeus. Nghuot laus eq Satan ka ngamoq lyis kyoq toh. 19 Yah Yhensain Yesu doms jweh los lyis, nyah xikkhonh mas gohtoeu hank ma nghuot, namoq lyis vgungs toh las ngamoq dah nghamhloms cho, gausyis cho yahge ung cho nyhenshang khwank das buismuk nghuot. 20 Jyoengh nyang namoq gas ngamoq dah nyoqnho ngelang yahge gauslaus cho tsain nghuot.
1 Housoeh las ngamoq ma yoh zain lo yvmvyah, Athen wus mas ngamoq nyang kyingh gyoh nyeis das zis nghamh thyet las, 2 Khristu dah gausyis dang taiq kyoh yvmas ngamoq yah dvgeh muh wons nyeis, ngamoq dah boek Timothi lyis nhang kat. 3 Namoq mas hank eq hai gvshih xauh nyeis dah shoeuhshih cho gvng mas lomsjingh cho ma lop ma loeh bas jungh, namoq lyis thukxank yomdyei das xiklyis nyang lyis namoq jyank mas nhang kat. Hai yang xauh nyeis dah shoeuhshih cho ka yah xiklyis Mangso dah nghamh toeuq cho dvkhamh nghuot oen yvlyis namoq nyang seq nyeis. 4 Khasoeh ge lyis, ngamoq namoq yah dvgeh nyeis shih uhlyis, yang gas shoeuhshih zis xauh das cho, taiq kyoh zaih nhang toh goeus. Houyah dvyhangteh top bweh los goeus yvlyis namoq vlhomuh seq. 5 Ngos tsoq las ma yoh zain lo yvmvyah, namoq dah lomsjingh cho khasoeh nghuot joq zis yoh seq das xiklyis ngos Timothi lyis nhang kat. Jyoengh nyang namoq gas yius yah shiwu yvpheh chank loh las ngamoq yomkat ohhont toh dah muhzoh vnyet vkom ma mes bweh nhang. 6 Gvshih Timothi gas namoq jyank masyah ngamoq jyank mas doms jweh los las, namoq mas lomsjingh cho yahge jyetdap zis je los cho gausyis lhom yoeus phoh dah loeus wons los. Namoq ngamoq lyis vjangh vlhomuh soh nyeis thoq lyis ma goh, ngamoq namoq yah xauhgoh mes teh, namoq eq ngamoq yah xauhgoh mes cho ngamoq lyis los taiq kyoh. 7 Housoeh las boekyis eh, ngamoq dah yaukyenh cho yahge shohjyen xauh nyeis uhlyis namoq cho xauhgyo las yom gyo bos. Houka namoq dah lomsjingh cho gvng mas yom yoh cho nghuot. 8 Khasoeh ge lyis, namoq gvshih Yhensain Yesu mas dvdain dvlom kang dwis cho mha ma lop ma loeh yap joq las yang nhaiqtap khyvlyis yoh tsain dwis nyeis. 9 Gvshih gas namoq gvng mas ngamoq Mangso lhyi nhaiqshoqlang yoh sang goeus. Namoq gvng mas Yhensain xikkhonh mas ngamoq xauh yoeus dah gausyis ehnyet dah gvng mas ngamoq nyang lyis nhaiqshoqlang tsain chungh. 10 Ngamoq gas namoq dah nyoqnho xauh nyvng das zis yahge namoq dah lomsjingh cho mha chah nyeis shih yvlyis yoh tyink das xiklyis ngamoq ehnyet dvnganh yah nyeih nyenh dung nyeis. 11 Namoq nyeis yvmas ngamoq los das cho lhyi, yah Uwus Mangso nyang yahge Yhensain Yesu cho sont dyei bas jungh. 12 Namoq nyang changh nyang thoq mas eq, dius dvnganh dah thoq mas eq namoq toh dah jyetdap ehnyet gas ngamoq namoq thoq mas toh dah jyetdap ehnyet teh zes las jelvm los nhang das xiklyis Mangso namoq lyis pangh bas jungh. 13 Haih cho yah nyang namoq lyis thukxank das. Yah Yhensain Yesu gas nyah gyingshang bang dvnganh yah dvgeh doms jweh uhlyis, namoq gas yah Uwus Mangso xikkhonh mas, dyinghjet las gyingshang bang bweh los das.
1 Thang thank lyis boekyis eh, Mangso nhaiqdoeus das nyhenshang namoq kang khasoeh dwis chah cho namoq ngamoq masyah xuq goeus, Namoq hauh cho chank yah kang dwis nyeis goeus. Hauh thoq lyis zes yoh kuot das nyhenshang Yhensain Yesu dah nyings mas ngamoq namoq lyis shangphu zis yah yomdyei kat. 2 Khasoeh ge lyis namoq kang khasoeh dwis gis ge tyingtoh cho lhyi Yhensain Yesu dah vmingh yah ngamoq namoq lyis dyei toh goeus zis gas namoq seq. 3 Mangso ka namoq lyis gyingshang nhang mes zis yahge nyetnau muh kuot mhayah kyoq kyoq luiq das nyhenshang o. 4 Namoq yukgis jens vsainnyang dah yhensain nyhiq yah gyingshang zis yah nyoqnho ngelang bos khyvlyis khasoeh yoh chomp nyeis das cho seq chah. 5 Mangso lhyi ma seq dah gohnyau bang teh nyetnau ehnyet yah ma gis zomh. 6 Heisoeh teh muh mas namoq hank eq vsainnyang dah Khristan vmang vnoeuh lyis shuot cho nghuot ya, vmang vnoeuh thoq mas toeuh yoeus cho ma gis kuot. Haih cho xikpheh ngamoq namoq lyis taiq kyoh ku goeus las Mangso ka shuot loh soeu lyis joeng das cho khoek khoek zaih nhang goeus. 7 Mangso ka yang lyis ma lhoq ma shang kang dwis cho mha dwis nyeis das xiklyis khi yoeus toh zis ma nghuot. Gyingshang dah kang dwis cho mha nyeis das nyhenshang dvkhi yoeus toh. 8 Housoeh las haih jyauh cho lhyi peq soeu hank laus eq dius lyis ma nghuot gyingshang Dyos dyei dah Mangso lhyi peq tyamp soeu dvnghuot. 9 Namoq dah lomsjingh vmang vnoeuh lyis jyetdap das cho yah sen lha ngos namoq jyank mas lhaih kat das chank ma bos lo. Nyang changh nyang jyetdap goh nyeis das cho Mangso jyauh yvlyis namoq kham goeus. 10 Jyoengh oen lhyi namoq gas Makedoni mau gonh mas dah Khristan vmang vnoeuh dvnganh lyis housoeh jyetdap cho chank kuot nyeis goeus. Housoeh las boekyis eh, namoq dah jyetdap ehnyet zes je los das xiklyis ngamoq namoq lyis khyoeuq. Housoeh zes las tsoq kuot loh goh. 11 Ngamoq namoq lyis taiq ku zis yah dvyhangteh, namoq gas nyenstap khyvlyis kang dwis nyeis das nyhenshang eq, gohyuk dah cho mha ma bos lhoeuh, vsainnyang dah womdau khoeu muh lyis nghamh toeuq nyeis bas jungh. 12 Haih cho khyvlyis yah namoq gas lomsjingh dah phung dius ma nghuot bang dah phauh nyang cho lhyi xauh kham yoeus das. Hauh thoq lyis namoq dah chah shih cho yah sen lha hank lyis eq ma nges lo noh das. 13 Boekyis eh, namoq gas nghamhloms cho ma bos bang teh nhaiqkuk zis ma xauh bas jungh, ngamoq gas shei goeus bang yah sen lha hau jyoeng cho namoq lyis seq nhang mes. 14 Yhensain Yesu gas shei lha dwis toq los yvlyis yang lomsjingh nyeis lyis gas, Yesu lyis lomsjingh zis yah shei loh bang lyis eq Mangso ka Yesu yah dvgeh nyah jyank mas shwih loh das oen ngamoq lomsjingh. 15 Gvshih ngamoq namoq lyis jyauh nyeis zis gas Yhensain dah jyauh cho nghuot. Yhensain jweh los lyis yang dwis nyeis shih bang gas shei goeus bang dah xik pheh loh das zis ma nghuot. 16 Yhensain dah kaiq hoeu thwe, vmingh dang, loeuswons vgyis dah thwe yahge Mangso dah lvbuh thwe yah dvgeh Yhensain nyang maukhung mhayah gyoh los das. Hauh uhlyis Khristu lyis lomsjingh las shei loh bang cangxeih dwis toq los das. 17 Hauh shishenh lyis dwis nyeis shih dah yang gas nyamoq yah dvgeh jyommauh yah nyhang mha toqh yoeus loh zis xauh das. Housoeh las yang Yhensain yah vjangh dvgeh nyeis das. 18 Housoeh las haih dang yah namoq nyang changh yomdyei goh nyeis geh.
1 Boekyis eh, haih cho bweh los das shishenh yahge yoq khanhamp nghuot das cho namoq lyis ma lhaih kat noh. 2 Khasoeh ge lyis Yhensain doms jweh lyih das buisnyeis gas nyenh lyis khauh soeu wvng teh, jweh los das yvlyis namoq nyang jyuk jyuk seq toh. 3 Dius jens gas, Sam joq, gau joq goeus, ge taiq das. Housoeh taiq uhlyis nyang loshang gungs lyis chi dah vmesbih gas lokhoeu nos nos yhangteh hau dyoqbis zis gas nyamoq thoq mas nyetlos nyettant jweh los das las dius jens hank eq yoh luiq das zis ma nghuot. 4 Nghuot laus eq boekyis eh, namoq gas chuot yvmas nyeis bang ma nghuot yvmvyah hauh Yhensain doms jweh los das buisnyeis gas khauh soeu teh, nyetlos nyettant namoq thoq mas jweh das zis ma nghuot. 5 Khasoeh ge lyis namoq dvnganh gas bvng dah lo jens yahge nyeih dah lo jens nghuot. Yang gas nyenh yahge chuot zis yah eq ma sen. 6 Housoeh yvmvyah yang gas gohyhamh teh ma yhet joq joq, phuk soh lhaiq zungh yoeuh nyeis chah. 7 Dius jens gas nyenh lyis yhet joq: nyenh lyis yhei yet nyeis. 8 Nghuot laus eq yang gas nyeih yah sen yvmvyah phuk soh lhaiq mus chah. Yang gas lomsjingh cho yahge jyetdap ge dah sainhkhonh nghop nghop las, yang nghamhloms dah khyuot yoeus cho ge dah uhkyop tsain kyop toh goh. 9 Mangso yang lyis nyah dah nhaiqlom dyis yvlyis kham nhang das xiklyis yang lyis khyen yoeus toh zis ma nghuot, Yhensain Yesu Khristu gvng mas khyuot yoeus cho xauh sain das xiklyis dvkhyen yoeus toh. 10 Nyang doms jweh los uhlyis yang gas dwis nyeis laus eq, shei goeus laus eq nyang yah dvgeh kang yoh dwis nyeis das nyhenshang nyang gas yah xiklyis shei kham dyei goeus. 11 Haih cho gvng mas namoq gvshih kuot nyeis zis yah dvyhangteh, nyang changh nyang yomdyei goh cho, pangh thuk goh cho kuot nyeis geh. 12 Boekyis eh, namoq mas khyoeuq kat zis gas, muh wons las namoq lyis Khristan kang dwis cho mha cho shet, jyauh nyeis bang lyis jus jyoeng khyvlyis phauh nyang nyeis das nyhenshang khyoeuq kat. 13 Nyamoq dah muh gvng mas svsoh jyetdap zis yah nyamoq lyis phauh nyang nyeis geh. Namoq nyang changh eq nyenstap goh nyeis geh. 14 Boekyis eh, namoq lyis taiq kyingh zis gas, Lan bang lyis zaih nhang lha, nhaiqngis bang lyis thukxank nyeis geh. Yomnhuk bang lyis pangh geh, yuk khanghmuh dah thoq mas jhen ehnyet bos geh. 15 Hank lyis eq ma gis gvng mas ma gis khyvlyis ma tauh tauh, namoq nyang changh yahge dius dvnganhmoq xiklyis gis dah muh kuot das zis namoq nghamh toeuq toh geh. 16 Vjangh gausyis nyeis geh. 17 Malyen lo shvmanh dung nyeis geh. 18 Cho khvt khanghmuh mas jyehjuh chungh nyeis geh. Houka Khristu mas namoq dah kang dwis cho yah sen lha Mangso o khyvlyis nghuot. 19 Namoq ehnyet lyis yomdyei nyeis dah Gyingshang Dyos lyis vkyamp toh goh. Gyingshang dyos lyis nhaiq vkuk nhang goh. 20 Mangso dah dyos kat dyei zis xauh las taiq kyoh dang lyis pvlhyahlyoeus vkuot. 21 Cho dvnganh lyis kyink las gis yvlyis lhom yoeus las zwi zains toh geh. 22 Ma gis dah cho dvnganh lyis jhank geh. 23 Yang lyis nyenstap cho dyei dah Mangso nyang nyamoq lyis cho khvt khanghmuh mas gyingshang nhang lha yah Yhensain Yesu Khristu jweh los uhlyis, namoq dah gungs, ehnyet, dyos dvnganh gas yobos huon chank ma bos shoq gomh nyeis bas jungh. 24 Namoq lyis khi yoeus soeu ka wontang soeu nghuot las haih cho lhyi kuot das. 25 Boekyis eh, ngamoq xiklyis eq shvmanh dung dyei geh. 26 Lomsjingh bang dvnganh lyis gyingshang dah wotwu yah jeshuh dyei geh. 27 Hai huon maussauh lyis lomsjingh bang dvnganh lyis nghap kyoh das nyhenshang hau Yhensain kyauh toh dah toeuh yah ngos namoq lyis vmingh dyei. 28 Yah Yhensain Yesu Khristu dah jyehjuh gas namoq yah dvgeh joq bas jungh.
1 Paulo, Sila yahge Timothi ngamoq gas, yah Uwus Mangso yahge Yhensain Yesu Khristu dah dius jens Thesaloni phung dius jens lyis maussauh lhaih kat. 2 Yah Uwus Mangso yahge Yhensain Yesu Khristu gas namoq lyis jyehjuh yahge nyenstap cho dyei bas jungh. 3 Ngamoq dah boekyis eh, namoq dah cho yah sen lha Mangso dah jyehjuh lyis yang vjangh chungh chank bos. Housoeh yang chungh cho kuot das zis gas yah xiklyis jus dah muh nghuot. Khasoeh ge lyis namoq dah lomsjingh cho ka svsoh kuhxing los las namoq dah, dius lyis jyetdap ehnyet eq zes je los goeus. 4 Housoeh las ngamoq nyang namoq dah cho Mangso dah phung mha gausyis zis yah taiq moengs yenh. Ngamoq gas namoq xauh kham dah shoeuhshih cho lhyi tsoq las, shanghsenh kham zis yah lomsjingh nyeis cho lhyi taiq khwank gaus yenh. 5 Haih cho dvnganh gas Mangso soetuon zis jyoeng yvlyis kanghjyoeng tsain kat nyeis. Hauh vkyuh gvng mas namoq gas nyah munghdan yah mon yih bang bweh los goeus zis yahge hauh xiklyis eq namoq shanghsenh zis xauh nyeis. 6 Mangso ka lyi jus khyvlyis kuot das las namoq lyis shanghsenh zis xauh nhang bang lyis shanghsenh cho tauh dyei das. 7 Yhensain Yesu gas Mangso lhyi ngoek tyamp bang yahge yah Yhensain Yesu dah gausyis dang lyis domsyos ma gyo bang lyis joeng das nyhenshang nyah yomsoq bos loeuswons bang yah dvgeh maukhung mhayah thuq los das. Hauh uhlyis Mangso ka shanghsenh zis xauh nyeis dah namoq yahge ngamoq lyis svkhyen sunghhuq cho yoh nhang das. 9 Hau joeng zis xauh das bang gas Yhensain xikkhonh masyah kangh tyamp zis yah, nyah yomsoq dah phunk yah gang loh ge, vcaiq vto thyoqpi tyamp zis xauh das. 10 Yhensain doms jweh los dah buisnyeis lyis nyah dius jens dvnganh dah xikkhonh mas phunk lyis eq, lomsjingh bang dvnganh dah phauh nyang chungh cho lhyi eq kham yoeus das. Ngamoq taiq kyoh dah Dang lyis namoq lomsjingh nyeis yvmvyah nyah dius jens yahge nyang lyis lomsjingh bang mas namoq eq bos das. 11 Haih cho gvng mas ngamoq eq namoq xiklyis vjangh shvmanh dung dyei nyeis. Namoq gas Mangso khi yoeus zis xauh bang dah kang dwis cho yah mon yih khyvlyis kang yoh dwis bas jungh oen ngamoq Mangso jyank mas shvmanh dung dyei. Nyang gas nyah phunk yomsoq yah namoq dah gis zis bweh nhang mes dah ehnyet bos ya bos yvlyis tyink dyei las namoq dah lomsjingh muhzoh lyis tyeh kuot dyei bas jungh. 12 Heisoeh yah Yhensain Yesu dah nyings gas namoq gvng mas phunk nyoqnho bos das. Yah Mangso yahge Yhensain Yesu Khristu dah jyehjuh yah haih cho bweh los bas jungh.
1 Ngah boekyis eh, yah Yhensain Yesu Khristu doms jweh los das cho yahge Yhensain yah dvgeh nyeis das nyhenshang xwih tsainh zis xauh das cho yah sen lha ngos namoq lyis shangphu. 2 Yhensain doms jweh los das ge dius jens taiq gvng mas namoq dah ehnyet mas lvnyap khamkhvv cho, nhunk cho ma bweh bas jungh, namoq lyis taiq kyingh kat. Housoeh ge dah dang gas, ngamoq lvpe dang taiq uhlyis, nghuot ya Gausyis dang taiq kyoh uhlyis, nghuot ya maussauh lhaih uhlyis bos dah dang nghuot ge nghamh lyis nghamh hah das. 3 Khasoeh nghuot laus eq namoq lyis hank khasoeh eq ma mhuih jyomh bas jungh. Khasoeh ge lyis thang thank dah Mangso lhyi gomloeus toq cho ma bweh shih lyis, munyi thomh mas khyoq zis xauh das. Lhung soeu ma thuq los dvchank hauh buisnyeis jweh das zis ma nghuot. 4 Nyang gas dius jens paiq nyeis dah mangso bos ya bos yvlyis tyixo lha, nyang gungs nyang gas dvnganh dah thoq lyis phunk zes bos soeu nghuot ge chungh zo das. Nyang gas Mangso dah yhenmuh mas yangh wvng tsung lha nyang gungs nyang Mangso nghuot ge taiq hoeuh das. 5 Ngos namoq yah dvgeh nyeis shih uhlyis, haih cho dvnganh ngos namoq lyis taiq kyoh ku goeus yvlyis ma tsain soh lo goh lhyeh? 6 Nghuot laus eq hauh cho gvshih ma bweh los shoq kyoq toh zis dvja ja bos. Hauh zis cha nghuot yvlyis namoq seq. Shishenh jweh lyis hau Lhung Soeu thuq los das. 7 Seqgyo yau, hau nghop toh dah lhung cho ka gvshih yangh muh kuot nyeis goeus; nghuot laus eq kyoq toh soeu lhyi nyah joqyos masyah shang tyamp shishenh ma jweh dvchank hauh cho bweh los das zis ma nghuot. 8 Hauh thang lhyi hau Lhung soeu thuq los das, nghuot laus eq Yhensain Yesu jweh los lyis Lhung soeu lhyi nyah nhuot mas soq yah sat las nyah dah duk bvng phunk yah mhont tyamp das. 9 Hau Lhung soeu ka Satan dah yomsoq yah jweh los das las hwah dah yomsoq muh yahge mauh loqmuh vja ja kuot xoeuq das. 10 Hauh thoq lyis dyoqbis xauh das bang dah thoq mas ma gis ma shop khyvlyis mhuih cho vja ja kuot das. Nyamoq gas khyuot yoeus xauh das nyhenshang hau jyoeng cho lhyi ma lhom yoeus, ma jyet yvmvyah nyamoq dyoqbis tyamp das. 11 Housoeh yvmvyah nyamoq gas shuot cho lhyi lomsjingh shoq Mangso ka shuot cho dah yomsoq lyis nyamoq mas muh khanh das nyhenshang nhang kat. 12 Housoeh hau jyoeng cho lhyi ma lomsjingh, yaunos dah pyo cho mha chank suh bang dvnganh gas dang thang thyet zis xauh das. 13 Yhensain dah jyetdap boekyis eh, namoq gvng mas ngamoq gas Mangso dah jyehjuh lyis vjangh yoh chungh das. Khasoeh ge lyis, Mangso ka namoq lyis gyingshang bang kuot dyei dah Dyos dah yomsoq yah eq, jyoeng yvlyis lomsjingh dah namoq dah lomsjingh cho yah eq, cangxeih dah khyuot yoeus xauh bang khyvlyis namoq lyis khyen yoeus goeus. 14 Mangso ka namoq lyis ngamoq taiq kyoh dah gausyis dang cho yah namoq lyis khi yoeus goeus. Nyang gas yah Yhensain Yesu dah phunk masyah namoq kham yoeus vvng dah gvmboms lyis yoh sain bas jungh ge khi yoeus. 15 Housoeh yvmvyah boekyis eh, ngamoq taiq kyoh dah gausyis dang khyvlyis eq, huon maussauh khyvlyis eq ngamoq namoq lyis jyauh, hau jyoeng dah cho mha goeng goeng thoenk yap las zwi zains toh geh. 16 Yah Yhensain Yesu nyang yahge yang lyis jyetdap las nyah yehjuh yah yang lyis vcaiq vto goeng joq dah womh zis yahge goeng dah nghamhloms cho dyei soeu Uwus Mangso ka, 17 namoq lyis vjangh gis dah cho taiq zis yah yoh zwi khank nyeis bas jungh yomdyei zis yah goeng toenk nhang nyeis bas jungh.
1 Ngamoq dah boekyis eh, thang thank namoq lyis tying toh mes zis gas, Yhensain dah dang gas namoq mas jweh ngap los teh, tsoq las lvnyap jweh ngap loh las nyoqnho ngelang dyei zis yah yoh lhom yoeus das nyhenshang ngamoq xiklyis shvmanh bos dung nyeis geh. 2 Mangso ka ngamoq lyis ma gis ma shop, lhung bang dah loq masyah khyuot kat bas jungh, shvmanh bos dung dyei geh: khasoeh ge lyis, hau gausyis loeus lyis dius yuk khanghmuh lomsjingh zis ma nghuot. 3 Nghuot laus eq Yhensain ka wontang lha, nyang namoq lyis ehnyet yombos nhang lha ma shop soeu dah jes kuot masyah gomh dyei das. 4 Namoq gas, ngamoq tying ya tying toh yvlyis tsain chank kuot nyeis zis yah dvyhangteh tsoq las kuot nyeis das oen nghamhnywe dah ehnyet Yhensain ngamoq lyis dyei. 5 Namoq Mangso dah jyetdap cho lhyi zes seqgyo los das zis yahge Khristu dyei dah jhen cho lhyi seqgyo das nyhenshang eq, Yhensain ka namoq lyis choshe bas jungh. 6 Boekyis eh, lan zis yah kang dwis nyeis bang dvnganh yah eq, ngamoq jyauh cho lhyi ma chank bang yah eq, ma zomh zomh gohtoeu toeu nyeis das xiklyis yah Yhensain Yesu Khristu nyings masyah ngamoq namoq lyis vmingh dyei. 7 Namoq gas ngamoq kuot xoeuq dah yikhyoh yah dvyhangteh chank kuot vvng cho namoq nyang vlhomuh seq. Ngamoq namoq yah dvgeh nyeis shishenh lyis ngamoq lan dah yikhyoh ma chixoeuq. 8 Ngamoq gas phauh ma dyei hank dah pangh cho eq ma lhom yoeus. Hauh gungsthaiq namoq hank lyis eq yvwons ma huon bas jungh, ngamoq nyeih nyenh muh tsain zwi shangh lai loh goeus. 9 Ngamoq housoeh kuot zis gas ngamoq mas namoq jyank masyah pangh thuk das cho sang das toeuh ma bos las ma nghuot, namoq chank kuot das xiklyis yikhyoh bweh bas jungh oen dvtsain kuot. 10 Namoq yah dvgeh nyeis shih uhlyis, Muh ma mes zwi soeu ka wom eq ma zo goeus jungh, oen ngamoq namoq lyis tying toh ku. 11 Ngamoq haih cho chamus taiq lah oen lhyi, namoq mas dvyhamh lan zis yah kang dwis las, chah muh ma zwi zwi, gohyuk dah muh mas bos nhunk bang bos cho ngamoq xauhgyo. 12 Housoeh kuot nyeis bang gas, nyamoq gis khyvlyis vlhomuh nyeis las nyamoq nyang womdau khoeu muh zwi zo nyeis bas jungh oen, Yhensain Yesu Khristu dah nyings mas ngamoq taiq kyingh zaih nhang. 13 Nghuot laus eq boekyis eh, namoq gis dah muh zwi das zis vnyung vdaus nyeis goh. 14 Haih maussauh mas ngamoq namoq lyis lhaih huon dah dang lyis domsyos ma gyo soeu dvyuk yuk bos lyis, nyang lyis comh toh las: nyang xoq bas jungh, nyang yah vzomh goh. 15 Nghuot laus eq nyang lyis jeswus lyis teh vkuot goh, vmang vnoeuh lyis teh taiq kyingh zaih nhang geh. 16 Yah nyenstap vpom nghuot dah Yhensain ka namoq lyis cho khvt khanghmuh mas vjangh yah nyenstap cho dyei bas jungh. Yhensain ka namoq dvnganhmoq yah dvgeh nghuot bas jungh. 17 Haih zis ngos ngvnyang loq yah lhaih: Paulo Jeshuh kat. Ngos lhaih huon maussauh khanghmuh mas ngah loqyos gas haih zis nghuot. Ngos heisoeh gyangh lhaih. 18 Yah Yhensain Yesu Khristu dah jyehjuh gas namoq dvnganhmoq yah dvgeh joq bas jungh.
1 Yah khyuot yoeus Mangso yahge yang nghamhloms joqyos nghuot dah Khristu Yesu gvng mas, Khristu Yesu dah lvgyo ngos Paulo gas, 2 lomsjingh cho mha ngah lo gyingh nghuot dah Timothi jyank mas maussauh lhaih kat. Uwus Mangso yahge yah Yhensain Khristu Yesu jyank masyah nvng lyis jyehjuh, nhaiqnyen zis yahge nyenstap zis dyei bas jungh. 3 Ngos Makedoni mau pheh lai loh uhlyis nvng lyis taiq toh goeus zis yah dvyhangteh, Ephesu wus mas tsoq nyeis nhang mes. Houmha dius dvyhamh shuot dah lomsjingh cho lhyi tsain jyauh nyeis, hauh yvlyis nvng yoh tomp tyamp chah das. 4 Jyoengh ma gis bweh dah tying dang mvnyei, ma thank lo dah dius caiq shap cho toh tyamp das xiklyis nyamoq lyis taiq aq. Hauh cho jens gas dyoqgoh nyens goh, phyen-goh cho lhoq thuq nyeis las hau lomsjingh cho yah kyingh dvyoh seq dah Mangso dah nghamh toeuq toh cho lhyi ma yoh bweh los nhang. 5 Hai taiq toh dah toeuqkhom ka lhoqshang ehnyet masyah thuq los dah jyetdap cho, gying dah soh seq ehnyet yahge gyingh dah lomsjingh cho lhyi nhauh toq kat cho tsain nghuot. 6 Dvyhamh gas hauh cho jens masyah whang lha vkoh vpaq vkyuh ma bos dah taiq phyen-goh cho yah dye tyamp. 7 Nyamoq gas Mangso dah lyi jyauh bang tsain bweh mes, laus eq nyamoq gas vsainnyang taiq dang lyis eq, vsainnyang nghamhnywe zis yah taiq nyeis dah cho cha nghuot yvlyis ma tsain seqgyo. 8 Lyi gas yhung chah khyvlyis yhung lhyi ka hauh Lyi gis yvlyis ngamoq seq. 9 Housoeh las yang seq toh chah cho ka, hauh lyi gas dius gis jens xiklyis ma nghuot; lyi lhyweq bang, shei mon yaunos bos bang, gywes ma tsungh bang, yaunos bos bang, lomsnoq cho ma chank bang, lomsjingh cho nghuot ya dyos yah sen cho mha nhaiq ma wvng bang, ungwes uwus lyis sat bang yahge dius sat bang, 10 wotwu dyoq bang, nye changh yukgis changh nyeis goh bang, jons ungh dah soenghi kuot bang, hwah bang, ma ying kanghjyoeng kat bang yahge gohtoeu cho vja ja khyvlyis yah lomsjingh dah jyauh cho lhyi tyixo lha kang dwis bang xiklyis lyi dvtoh. 11 Hauh jyauh cho ka phunk bos las ngelhoq Mangso mhayah gausyis Dang yah dvyhangteh nghuot. Hau gausyis dang lyis taiq hoeuh das nyhenshang Mangso ka ngos lyis kyauh toh. 12 Ngos wons wuq muhzoh xiklyis ngos lyis yomdyei soeu, yah Yhensain Khristu Yesu lyis nhaiqshoqlang chungh. Nyang gas ngos lyis mon yih soeu nghuot ge suon lha nyang lyis phuqsoe das xiklyis toeuq toh zis xauh yvmvyah nyang lyis nhaiqshoqlang chungh. 13 Ngos gas lai loh goeus shishenh lyis Yhensain lhyi ma gis khyvlyis yobos huon, khyangh pu, shoeuhshih soeu jwangh soeu, nghuot ku laus eq, Mangso ka ngos lyis nhaiqnyen nyeis: khasoeh ge lyis ngos mas lomsjingh cho ma bos shih las ngos cha kuot nyeis zis ngos ma seq. 14 Yah Yhensain ka nyah magons magoh jyehjuh ngah thoq mas huot khyoq dyei las Khristu yah dvdain dvlom kang dwis nyeis yvmvyah yang xauh yoeus vvng dah lomsjingh cho yahge jyetdap ehnyet ngos lyis dyei goeus. 15 Yaunos dap bang lyis khyuot yoeus das xiklyis Khristu Yesu gas mungkvn mas jweh lyih, ge dah dang gas top nyang lhom yoeus las lomsjingh mon, jyoeng lha wontang dah dang nghuot. Hau yaunos wons bang mas ngos yaunos nyo thank soeu nghuot. 16 Nghuot laus eq, Mangso ngos lyis nhaiqnyen cho ka thang pheh Yhensain lhyi lomsjingh las vcaiq vto kang xauh yoeus das bang dvnganh dah nyhenshang yikhyoh bweh bas jungh ge Khristu Yesu gas ngos yaunos zes nyo soeu lhyi nyah dah nhaiqlom xing xing jhen cho lhyi Chixoeuq zis nghuot. 17 Gvshih, vcaiq vto Hwankti nghuot las ma seq dyoq dyuk loh, nyoqjeih yah ma yoh nyvng, dvso kyingh dah Mangso mha phunk yahge nyoqnho ngelang gas vcaiq vto bos joq bas jungh. Amen. 18 Ngah lo Timothi eh, lai loh goeus shishenh lyis nvng lyis toeuq las taiq toh dah lvpe dang yah dvyhangteh, wons wuq loh das nyhenshang ngos nvng lyis vmingh dyei; jes vlhomuh yoh zan das xiklyis hau lvpe jens taiqtoh dang lyis kyonhkhyi teh yhung aq. 19 Hauh thoq lyis nvng mas lomsjingh cho yahge gying dah sohseq ehnyet bos aq. Dvyhamh gas sohseq ehnyet yah taiq kyingh yvlyis ma gyo yvmvyah nyamoq dah lomsjingh cho lhyi lhoeu thyoq tyamp. 20 Nyamoq mas Satan loq mas kyauh khyvlyis ngos joeng dah Himenu yahge Alesandria tsain bos. Housoeh kuot zis gas nyamoq dah loeusmus soqzo cho lhyi doms tyamp bas jungh, jyauh das xiklyis kuot zis nghuot.
1 Housoeh yvmvyah cangxeih lyis dius dvnganhmoq dah nyhenshang Mangso jyank mas shangphu cho, shvmanh dung cho, bos khyoeuq cho yahge jyehjuh chungh cho kuot nyeis aq oen ngos nvng lyis taiq kyingh kat. 2 Yang gas Mangso lhyi gyukwoms cho dvnganh mas vlhomuh chank suh las doeus las gis dah wotwu bos zis yah samlo nyenstap khyvlyis kang dwis nyeis bas jungh. Hwankti jens yahge vmingh yoh bang dvnganhmoq xiklyis shvmanh dung dyei aq. 3 Haih muh gas gis dah muh nghuot las yah khyuot yoeus Yhensain Mangso lhyi nhaiqdoeus nhang nyeis. 4 Nyang gas dius dvnganh khyuot yoeus zis xauh las hau jyoeng cho lhyi seq los das nyhenshang o. 5 Khasoeh ge lyis Mangso ka dvso kyingh nghuot las Mangso yahge dius jo mas shangphu dyei soeu eq dius lyih duot dah Khristu Yesu ge soeu dvyuk kyingh nghuot. 6 Yhensain ka dius nyau dvnganh lyis khyuot yoeus das nyhenshang nyah gungs lyis nyang kyauh tyamp goeus. Housoeh khyvlyis yah yang shishenh jweh lyis Mangso ka dius lyis khyuot yoeus mes cho kanghjyoeng lhyi hau toeuq toh shishenh lyis chixoeuq zis nghuot. 7 Housoeh las Yhensain ka ngos lyis lvgyo dvyuk khyvlyis eq, gohnyau bang dah jyauh soeu dvyuk khyvlyis eq hau lomsjingh cho yahge jyoeng cho dah dang lyis taiq kyoh das nyhenshang nhang kat zis xauh. Ngos hwah nyeis zis ma nghuot; jyoeng dang dvtaiq. 8 Phung dah paiq cho huom khanghmuh mas vbusbih jens lyis shvmanh dung nhang mes. Mangso mha kyauh toh zis xauh dah vbusbih jens gas, nhaiq yo cho, phyen-goh cho ma bos bos, gyingshang dah loq toeu lha shvmanh yoh dung. 9 Vmesbih jens lyis eq nyamoq dah dyimis wuot cho mha shop khyvlyis vlhomuh wuot nhang mes. Cam zaiq, xing, pvleh yahge phauhdap dyimis yah ma shunk, 10 paiq thungh chank kuot dah vmesbih jens dah nyhenshang kuot vvng zis yah dvyhangteh gis dah wotwu yah vsainnyang dah gungs lyis shunk nyeis bas jungh. 11 Vmesbih jens gas ehnyet nyhen mha gyoh zis yah samlo xuq bas jungh. 12 Vmesbih jens gas jyauh das zis yahge vbusbih jens thoq mas toeuh yoeus las guon das zis ngos ma gyo. nyamoq gas samlo nyeis bas jungh. 13 Khasoeh ge lyis Adam lyis shih gvnkhanh las Ewa lyis gas thang lhyi dvgvnkhanh toh. 14 Satan dah mhuih zis xauh soeu ka Adam ma nghuot, vmesbih yuk mhuih zis xauh las Mangso dah lyi lyis lhyweq goeus. 15 Nghuot laus eq vmesbih dvyuk gas shop zis yah lomsjingh cho, jyetdap cho, gyingshang cho mha tsoq chank nyeis lyis gas, hau lo khoeu dah gvng mas nyang khyuot yoeus zis xauh das.
1 Phung dah uhshe soeu dvyuk bweh mes soeu ka gis thank dah muh lyis o mes soeu nghuot ge dah dang gas jyoeng dang nghuot. 2 Phung lhyi uhshe dah soeu ka yobos ma bos soeu, yhensain nyhiq dvyuk kyingh bos soeu, zaih soeu, vsainnyang gungs lyis joeu soeu, cho jeis lyis yoeuh las kang dwis soeu, boengh mes daih soeu, seq jyauh das vlho chi soeu nghuot chah. 3 Yhei ma shuk, ma bat, ehnyet noeuh nhamp las nyens nyens tap tap nghuot chah. Nyang gas ngwis nyoq ma noq soeu nghuot chah. 4 Vsainnyang yhen lhyi vlhomuh yoh guon las, vsainnyang lo jens lyis domsyos gyo zis yah phauh nyang zis xauh kham shoq yoh kuot soeu nghuot chah. 5 Dius dvyuk gas vsainnyang yhen lhyi ma seq shwih nghuot lyis gas, Mangso dah phung lhyi loqzamh khasoeh yoh zwi das lah? 6 Nyang gas phung dius vsaiq bweh los soeu eq ma nghuot goeus jungh, nyang gas khwank ehnyet bos los las yius Satan lyis teh dang thang thyet zis ma xauh bas jungh, hau lomsjingh cho mha nhaiqbos chah. 7 Nyang gas jwangh las yobos huon zis ma xauh, yius dah lhyik mas ma nyih bas jungh, phung nghe pheh bang phauh nyang kham soeu eq nghuot chah. 8 Phung thuk jens eq dan las wotwu gis bang nghuot chah. Lhyo kuq soeu, zvbiq shuk lais soeu, ngwis nyonsdot soeu ma gis nghuot. 9 Mangso yah Chixoeuq toh goeus dah lomsjingh cho jyoeng cho lhyi shangkyei dah sohseq ehnyet yah lhom yoeus las zwi zains toh bang nghuot chah. 10 Nyamoq gas cangxeih lyis kyink zis xauh las, yobos huon dais ma bos lyis gas phung thuk muh wons bas jungh. 11 Nyamoq dah yhensain nyhiq jens eq wotwu gis bang nghuot las, loeus ma mus, zaih lha cho khvt khanghmuh mas lomluk bang nghuot chah. 12 Phung thuk gas yhensain nyhiq dvyuk kyingh yoh soeu nghuot las, vsainnyang yhen yahge lo jens lyis gis gis yoh guon soeu nghuot chah. 13 Vsainnyang dah muh lyis vlhomuh wons wuq dah phung thuk gas nyah xiklyis gis dah nyoqnho ngelang yoh las Khristu Yesu mas nyamoq dah lomsjingh cho mha womh dah ehnyet yah yoh taiq kyoh. 14 Ngos nvng lyis haih maussauh lhaih nyeis uhlyis nah jyank mas ma nyangh lyis yoh jweh das oen nghamhloms nyeis. 15 Nghuot laus eq ngos lvnyap ma yoh jweh los lyis dwis nyeis Mangso dah phung ge, hau jyoeng cho lhyi thuk dah zains tsain nghuot dah Mangso dah yhenbang mas yang khasoeh teh dah wotwu chank chah cho yoh seq bas jungh oen haih maussauh lyis lhaih kat. 16 Yah lomsnoq cho dah nghop toh zis gas kha iq kuhxing yvlyis hank eq ngoek chank ma bos zis gas o mha taiq toh zis yah dvyhangteh nghuot. Nyang gas cangsoeu gungs shoh yah thuq los zis yah dan soeu nghuot yvlyis Dyos yah Chixoeuq goeus, loeuswons bang eq nyang lyis nyvng goeus. Nyah cho dius nyau dvnganh lyis taiq kyoh goeus. Mungkvn gonh gas nyang lyis lomsjingh goeus. Housoeh nyang gas maukhung mha toqh kat zis xauh goeus.
1 Dyos yah bvng bvng taiq zis gas, Thang pheh dius dvyhamh gas lomsjingh cho lhyi tyamp das; nyamoq gas hwah las mhuih dah dyos dang gyo las yius Satan dah jyauh cho mha tsain chank loh das. 2 Vsainnyang dah sohseq ehnyet gas ngeh dah thyeq yah tanh ngheq zis xauh bang teh shei tyamp goeus dah mhuih bang gas housoeh teh jyauh cho lhyi tsain taiq hoeuh. 3 Housoeh teh bang gas nyihwank cho yahge zonoms dvkhamh lyis kyi das nyhenshang tsain jyauh. Nghuot laus eq lomsjingh bang yahge jyoeng cho lhyi seq bang gas nhaiqshoqlang oen shvmanh dung zis yah yoh zo das xiklyis Mangso ka hauh zonoms lyis gvnkhanh toh. 4 Mangso gvnkhanh toh zis dvnganh gas gis las zonoms cha lhyi eq ma peq noh: nghuot laus eq zonoms dvnganh lyis nhaiqshoqlang oen shvmanh dung zis yah lhom yoeus chah. 5 Khasoeh ge lyis Mangso dang yahge shvmanh dung dang gas hauh yvlyis gyingshang nhang nyeis las Mangso lhom yoeus mon dah zonoms bweh los nhang nyeis. 6 Hai taiq shet toh dang yah dvyhangteh nvng Khristan vmang vnoeuh moq lyis taiq kyingh nyeis lyis gas, nvng xauh lhom yoeus las chank nyeis, Dyos dah lomsjingh cho mha eq, jyoeng dah jyauh dang mas eq vsainnyang gungs lyis nyhoeu kuh, Khristu dah jyeidwis gis nghuot nyeis. 7 Nghuot laus eq Mangso yah ma sen taiq das xiklyis vkyuh ma bos dah mvnyei dang lyis jhank las gywes so lhyi phauh nyang dah kang dwis cho lhyi pot toh aq. 8 Gungs yah sen lha pot zis gas vkyuh dvtsiq dvbos. Nghuot laus eq hau dyos dah lomsjingh cho mha pot cho ka cho khvt khanghmuh mas vkyuh bos; khasoeh ge lyis houka haq caiq yahge thang caiq xiklyis kang yoh dyei. 9 Hauh dang gas jyoeng lha dvnganh lhom yoeus las lomsjingh gis dah dang nghuot. 10 Dius dvnganh yahge zes las lomsjingh bang dah khyuot yoeus Yhensain nghuot las kang dwis Mangso ka yah dah nghamhloms joqyos nghuot yvmvyah yang zwi khank cho mha yomkat nyeis. 11 Nyamoq lyis hai taiq shet dang yahge jyauh cho lhyi dyei toh aq. 12 Nvng wotyamh nghuot yvmvyah hank eq nvng lyis dius ngis ma khyoq bas jungh, taiq dang, wotwu, jyetdap cho mha, lomsjingh cho mha, ehnyet lhoqshang cho mha eq lomsjingh bang xiklyis yikhyoh bweh nyeis aq. 13 Ngos jweh los shoq dius phung xikkhonh mas Jyomp maussauh nghap kyoh cho, gausyis dang taiq kyoh cho yahge jyauh cho lhyi shishenh dyei las yomkat nyeis aq. 14 Lvpe jens taiq toh dang bos yvmas phung whop jens nah thoq mas loq tsain kih las toeuq toh dyei uhlyis nvng lyis kyauh toh, nvng mas bos, dyos yah sen dah jyehjuh jyungshuk lyis ma phauh ma danh kuot las vchi thyuk tyamp. 15 Nvng seq los kunk los cho dius jens dvnganh yoh nyvng bas jungh, haih taiq toh goeus yvwons lyis nhaiq wvng zis yah chank kuot las houmha lang toh aq. 16 Nah gungs lyis eq, nvng jyauh dang lyis eq zaih lha zungh yoeuh nyeis aq. Nvng haih cho jens lyis tsoq kuot nyeis aq, khasoeh ge lyis nvng housoeh kuot lyis nah gungs lyis eq, nah dang xauhgyo bang lyis eq nvng yoh khyuot yoeus das.
1 Nyenhkyi bos dah logis lyis vnyho, nah uwus lyis teh sang aq; ngis bang lyis vmang vnoeuh lyis teh, 2 nyhiqzains jens lyis ungwes moq lyis teh, lonyi jens lyis nhamhmuh jens lyis teh, lhoqshang ehnyet yah taiq kyingh nyeis aq. 3 Jyoengh dvyuk kyingh nghuot dah chauhmuh jens lyis phauh nyang nyeis aq. 4 Nghuot laus eq chauhmuh dvyuk yuk mas lo jens nyei jens bos lyis gas, nyamoq gas nyamoq yhen khau nyhenshang lomsnoq cho yah sen lha kuot cho yvwons lyis shih xuq bas jungh; housoeh kuot khyvlyis vsainnyang ungwes uwus, vphauh vyos lyis jyehjuh phuk bas jungh. Khasoeh ge lyis houka Mangso lhyi nhaiqdoeus nhang cho nghuot. 5 Nyang bauh nghuot las nyang lyis yoeuh das zis hank ma bos dah chauhmuh dvyuk gas Mangso lhyi nghamhloms zis yah nyeis las nyeih nyenh shvmanh dung zis yah Mangso jyank mas pangh cho dung nyeis. 6 Nghuot laus eq wotwu dyoq las pyo cho dvxo dah chauhmuh gas dwis nyeis shih laus eq vshei dvnghuot. 7 Nyamoq lyis hank eq yobos huon chank ma bos bas jungh, haih tying toh dang yah nyamoq lyis taiq kyingh nyeis aq. 8 Dvyuk yuk nyang yah sen soeu yahge zes las yhen khau dius lyis ma khoeu soeu ka, lomsjingh cho lhyi ngoek soeu nghuot las ma lomsjingh soeu thoq lyis zes las ma shop soeu nghuot. 9 Nyenhkyi khyukci zvn ma lai lyis gas khah chauhmuh lyis eq chauhmuh nyings mas ma bos shih goeus jungh; Nyang gas dvlhain kyingh phoengh dvwvng soeu nghuot chah. 10 Hauh thoq lyis nyang gas wotwu gis cho mha hoeuh soeu, lo jens lyis vlhomuh khoeu bes kat soeu, boenghwus lyis nyah yhen mha daih ku soeu, ehnyet nyhen mha gyoh las Khristan changh jens lyis kuot dyei soeu, shohjyen bang lyis bos pangh soeu, gis dah muhzoh khanghmuh lyis yomkat las bos wons wuq soeu nghuot chah. 11 Nghuot laus eq nyenhkyi ngis shih dah chauhmuh jens lyis chauhmuh nyings mas ma kat goeus jungh. Khasoeh ge lyis, nyamoq ehnyet omes cho yah duon gvng mas yhen loh lyis Khristu masyah nungs seq doms loh. 12 Housoeh las nyamoq gas Yhensain lhyi cangxeih toh goeus dah dangthoengh lyis toh tyamp dah yaunos yoh bang bweh los. 13 Hauh thoq lyis nyamoq gas dvyhen dvyhen kwang lha shishenh lyis vkom thank nhang cho seq kuot los. Hauh thoq lyis zes ma gis cho ka nyamoq ma taiq vvng cho lhyi tsain taiq loeusmus yenh las nyamoq yah ma sen dah cho mha bos seq nhunk bang bweh los. 14 Housoeh las jeswus jens gas yah cho ma gis khyvlyis taiq das cho lhyi toeuh ma dyei das khyvlyis nyenhkyi ma kuh shih dah chauhmuh jens gas phoengh wvng las lo bos zis yah yhenkhau zom nyeis das xiklyis ngos zes o nyeis. 15 Khasoeh ge lyis, gvshih yangh chauhmuh dvyhamh Satan dah thang chank das nyhenshang nungs doms loh goeus. 16 Lomsjingh dah vmesbih dvyuk yuk gas nyah yhen mha chauhmuh muh bang bos nghuot lyis gas, nyang nyamoq lyis yoeuh chah. Nyamoq nyhenshang phung lhyi yvwons s ma gis lyei nhang. Housoeh kuot lyis phung ka jyoengh khau nges gus ma bos lo dah chauhmuh jens lyis yoh yoeuh dyei das. 17 Uhshe dah muh lyis vlhomuh kuot nyeis dah phung shwih bang gas uhkung phauh aiq huon yoh mon soeu nghuot oen nghamh yoeuh gis. Zes las Dang taiq kyoh las jyauh cho mha yomkat wons wuq nyeis bang gas housoeh kham yoeus mon bang nghuot. 18 Khasoeh ge lyis lhaihtoh dang mas, Guk nang nyeis noeulu lyis nhuottsungh vtsungh toh dyei; tsai muh zwi soeu ka nyah uhkung phauh xauh kham zo vvng, ge taiq. 19 Kanghjyoeng aiq yuk somh yuk ma bos bos, phung uhshe soeu lhyi yobos huon zis ma gis gyo dyei. 20 Gohyuk gyukwoms bas jungh, yaunos kuot bang dvnganh lyis moqphung xikkhonh mas nyho lha jyauh aq. 21 Haih taiq shet toh cho lhyi hank dah nyoqnho lyis eq ma yoeuh, nvng kuot loh cho khanghmuh mas dvshot shot mas ma dap dap, domsyos gyo las chank kuot das nyhenshang Mangso yahge Khristu Yesu dah xikkhonh mas eq, gyingshang loeuswons bang xikkhonh mas eq ngos nvng lyis taiq toh. 22 Yhensain dah muh wons wuq das nyhenshang hank lyis eq loq kih las muh kyauh das zis vgyen. Gohyhamh bang yaunos kuot cho mha vbos lhoeuh. Nvnyang yobos ma dap shoq shangkyei nyeis aq. 23 Nvng dvsoq soq lyis nos yvmvyah, nah womdau zos tyik yvmas pangh jus das nyhenshang jeis kyingh ma shuk shuk, zvbiq dvtsiq tsiq bos shuk dyei nyeis aq. 24 Dvyhamh bang dah yaunos gas nyvng das xiklyis dede nghuot las nyamoq dah yaunos gas nyamoq dah xik pheh soetuon yvpheh loh nyeis. Nghuot laus eq dvyhamh bang dah yaunos gas thang lhyi dede dvyoh nyvng. 25 Houyah dvyhangteh gis dah muhzoh lyis dede yoh nyvng, dede ma nghuot yvlyis yangh ma yoh nghop shung toh.
1 Jons jens gas, vsainnyang dah yhensain lhyi phauh nyang gis soeu nghuot oen nghamh chah. Housoeh lyis hank eq Mangso dah nyings yahge ngamoq dah jyauh cho lhyi ma gis khyvlyis loeusmus soqzo das zis ma nghuot. 2 Khristan yhensain jens dah o mha nyeis dah jons jens gas vsainnyang dah yhensain lhyi dvyhangteh vmang vnoeuh dvnghuot oen ma phauh ma nyang ma gis kuot: khasoeh ge lyis vsainnyang phuqsoe lha vkyuh xauh kham bang gas vsainnyang jyetdap nyeis dah lomsjingh bang nghuot yvmvyah nyamoq lyis zes nyangh phuqsoe chah. Nvng gas haih cho lhyi jyauh zis yah taiq kyoh nyeis chah. 3 Hank laus eq shaih dah jyauh cho jyauh soeu ka, yah Yhensain Yesu Khristu dah jyoeng lha dyinghjet dah dang yahge yah lomsjingh cho dah jyauh cho lhyi ma chank soeu nghuot. 4 Nyang gas khwank las cha eq ma seq soeu nghuot. Nyang gas dang taiq goh yvmas taiq phyen-goh das xiklyis dyoqgoh das xiklyis ma jus dah ehnyet bos soeu nghuot. Housoeh kuot yvmvyah noh cho, gang lvn loh cho, phyen-goh cho, laihwangh cho, ma gis khyvlyis kuot jyo cho tsain thuq los nhang nyeis. 5 Hauh thoq lyis uhnuk ma dyingh cho yahge jyoeng cho lhyi ma nyvng ma seq bang masyah phyen-goh cho dvsoq soq thuq los nyeis. Lomsnoq cho ge zis gas dis los das nyhenshang nghuot ge nyamoq nghamh. 6 Jyoengh oen lhyi ka vsainnyang yoh yvmas nhaiq seq tap lyis gas, lomsnoq cho ka dius dvyuk lyis svsoh dis nhang nyeis. 7 Khasoeh ge lyis, yang haih mungkvn mas cha chi los? Cha ma chi los. Mungkvn masyah cha yoh chi loh? Cha ma yoh chi loh. 8 Housoeh las yang wuot das zo das zis yoh goeus ya, hauh zis yah nhaiq tap nyeis goh. 9 Nghuot laus eq dis mes bang gas, shiwu zis xauh las vkoh vpaq yah shanghsenh yoh bweh nhang dah nyoqnoq obos cho nyoshoq dah lhyik mas nyop loh. Houka nyamoq lyis dyoqbis las somh loh yvmas she wvng loh. 10 Khasoeh ge lyis ngwis nyoqnoq ehnyet gas, ma gis cho vja ja dah vpom nghuot. Dius dvyhamh gas hauh zis yoh das nyhenshang svsoh omes nyeis yvmvyah, lomsjingh cho mhayah whang loh las kuk cho vja ja yah vsainnyang dah ehnyet lyis dyoqbis loh nhang. 11 Mangso dah dius nvng gas haih cho dvnganh lyis jhank aq. Dan cho, gywes so lhyi phauh nyang cho, lomsjingh cho, jyetdap cho, nhaiqlom xing cho yahge noeuh nhamp ehnyet lyis yoh shoq yomkat nyeis aq. 12 Lomsjingh zis yah sen dah wuih khyank goh pwe mha duot thank shoq wuih las vcaiq vto kang ge dah jyungshuk xauh yoeus shoq kuot aq. Khasoeh ge lyis hau kang dwis cho mha nvng lyis Mangso lui yoeus uhlyis nvng gas kanghjyoeng nyoshoq dah xikkhonh mas lomsjingh goeus cho toenk toenk rhen goeus. 13 Vyhang dvnganh lyis kang dyei soeu Mangso xikkhonh mas eq, Pontu Pilat xikkhonh mas nyang lomsjingh cho lhyi toenk toenk rhen dah Khristu Yesu dah xikkhonh mas eq hai muh wons das xiklyis ngos nvng lyis taiq toh. 14 Nvng gas nvng lyis taiq toh goeus cho lhyi domsyos gyo las Khristu doms thuq xoeuq das buisnyeis jweh shoq lomluk luk chank kuot tyink nyeis aq. 15 Dvyuk kyingh nghuot las zau guon nyoqnho ngelang bos dah guon soeu, hwankti jens dah Hwankti, yhensain jens dah Yhensain, Mangso ka shishenh jweh lyis Yhensain Yesu lyis dvlhain doms thuq xoeuq nhang das. 16 Nyang kyingh ma shei ma dyuk soeu nghuot las nyang gas hank ma yoh ni loh dah bvng yvmas nyeis. Nyang lyis hank eq ma nyvng ku, hank eq nyang lyis ma yoh nyvng. Nyah jyank mas nyoqnho ngelang yahge vcaiq vto phunk bos joq bas jungh. Amen. 17 Haih nyeisjvng thoq kang dwis nyeis caiq dah zisyos nyeisgis yaplhoq cho mha dis bang lyis hauh zisyos mas ma khwank das zis yahge ma goeng dah nyeisgis yaplhoq cho lhyi nyamoq dah nghamhloms khau nges joqyos ma kuot, yang gausyis zis yah lhom yoeus das xiklyis vyhang dvnganh lyis magons magoh dyei dah Mangso lhyi nghamhloms las langh nyeis das nyhenshang taiq toh aq. 18 Gis zis kuot das cho yahge gis dah muh mas dis das nyhenshang eq, gohyuk lyis dyei gvm cho mha eq, magons magoh dyei das zis cicont nghuot bas jungh nyamoq lyis jyauh nyeis aq. 19 Heisoeh khyvlyis nyamoq gas thang caiq xiklyis goeng dah vpom duot nyeis bas jungh. Phauhdap dah zisyos nyamoq yoh yung toh las jyoeng dah kang dwis cho gyingh lyis yoh das. 20 Timothi eh, nvng lyis kyauh toh dah muh lyis vlhomuh yoeuh gomh zwi zains toh aq. Ma lhoq ma shang dang taiq yvlyis eq, dius dvyhamh seq cho nghuot ge ma jus khyvlyis nyhink dah vkoh vpaq phyen-goh dang lyis eq jhank aq. 21 Khasoeh ge lyis dius dvyhamh gas seq cho bos bang nghuot ge toh las lomsjingh cho mhayah whang loh. Mangso dah jyehjuh gas namoq dvnganhmoq yah dvgeh joq bas jungh.
1 Mangso o zis yah dvyhangteh Khristu dah lvgyo duot las Khristu Yesu dvdain dvlom duot nyeis gvng mas yang xauh yoeus das dangthoengh yah sen dah kang cho taiq hoeuh das nyhenshang nhang zis xauh soeu ngos Paulo gas, Ngos jyetdap, ngah lo Timothi lyis dang tying kat. 2 Uwus Mangso yahge yah Yhensain Khristu Yesu gas nvng lyis jyehjuh, nhaiqnyen zis yahge nyenstap cho dyei bas jungh. 3 Ngah phauh thyeih moq kuot teh, lhoqshang ehnyet yah ngos phuqsoe nyeis dah Mangso lhyi chungh. Ngos nyeih nyenh shvmanh dung yvmas namoq lyis malyen soh nyeis zis yah Mangso lhyi jyehjuh chungh nyeis. 4 Ngos nah nyoqdyeis lyis soh dyei las, ngos mas hau gauslaus cho dyingh los bas jungh ngos nvng yah svsoh xauhgoh mes nyeis. 5 Nvng gas nah vyos Loi metang nah ungwes Euni mas cangxeih bos joq, jyoeng dah lomsjingh ehnyet gas nvng mas zuk joq yvlyis ngos soh nyeis. Nvng mas eq hauh zis bos joq yvlyis ngos soh soh nghuot. 6 Housoeh yvmvyah ngos nvng lyis loq kih las muh dyei uhlyis Mangso jyank masyah nvng kham yoeus goeus dah jyehjuh lyis dwis nyeis nhang das xiklyis ngos nang lyis doms nhauh kat. 7 Khasoeh ge lyis Mangso ka yang lyis seq gyuk dah dyos ma dyei. Hau Yhensain dah Dyos gvng mas yang lyis yomsoq bos, jyetdap, vsainnyang gungs lyis seq joeu dah ehnyet dvdyei toh. 8 Housoeh las yah Yhensain Yesu dah xiklyis kanghjyoeng kat cho mha eq, Khristu gvng mas thung lungh soeu ngah gvng mas eq vxoq nyeis. Mangso ka nvng lyis hauh nyhenshang yomdyei toh goeus zis yah dvyhangteh, hau gausyis dang gvng mas shanghsenh kham cho mha ngos yah dvgeh yaukyenh cho chomp kham nyeis goh. 9 Mangso ka, yang kuot goeus dah muhzoh dvja ja gvng mas ma nghuot, nyang nghamh toh cho yahge jyehjuh gvng mas yang lyis khyuot yoeus las nyah dius jens duot das xiklyis khi toh. Nyang gas mauthuq nyeis ma zvn shih lyis yah Khristu Yesu gvng mas hauh jyehjuh yang lyis dyei toh. 10 Nghuot laus eq gvshih gas yah khyuot yoeus Yhensain Khristu jweh los shishenh lyis hauh cho yang lyis chixoeuq kat. Nyang gas shei cho dah yomsoq lyis yoeus tyamp las hau gausyis dang khyvlyis yah ma seq shei dah kang dwis cho lhyi Chixoeuq kat. 11 Gausyis dang taiq kyoh das nyhenshang Mangso ka ngos lyis lvgyo dvyuk khyvlyis eq, jyauh soeu khyvlyis eq toeuq toh. 12 Hauh cho gvng mas ngos haih shanghsenh zis kham nyeis. Nghuot laus eq ngos mas nghamhnywe cho dyingh dyingh bos joq: khasoeh ge lyis, ngos hank lyis khau nges nyeis yvlyis ngos seq zis yahge ngos lyis loms las ngah loq mas kyauh toh goeus dah vyhang lhyi hauh soetuon buisnyeis jweh shoq yoh tsomh toh dah yomsoq nyang mas bos oen zis ngos soh soh nghuot. 13 Ngos nvng lyis jyauh dah jyoeng dang lyis nvng chank kuot das yikhyoh toh las goeng goeng zwi zains toh zis yah yang Khristu Yesu yah dvdain dvlom duot las kang dwis cho yah sen dah lomsjingh cho yahge jyetdap ehnyet mas goeng joq nhang aq. 14 Nvng lyis loms las kyauh toh, gis dah vyhang lhyi, yah jyank mas bos joq Gyingshang Dyos dah yomsoq yah tsomh toh aq. 15 Asia mauxom mas bang dvnganhmoq ngos lyis tsain doeuh tyamp goeus zis nvng seq. nyamoq mas Phigelu yahge Hermogene tsain bos. 16 Yhensain ka Onesiphoru yhenbang lyis nhaiqnyen bas jungh: khasoeh ge lyis nyang ngos lyis nyoshoq lhain nhaiqtaink thoq lyis magoh, nyang ngos thung lungh cho yah sen lha ma xoq soeu nghuot. 17 Nyang gas Roma wus mas jweh yah dvyih ngos lyis nyvng shoq lyih xo xauhgoh. 18 Yhensain ka nyang lyis hauh soetuon buisnyeis lyis nhaiqnyen cho dyei bas jungh. Ephesu wus mas eq nyang ngos lyis kha iq daih goeus zis gas nvng vlhomuh seq.
1 Ngah lo eh, yah Khristu Yesu yah dvdain dvlom duot las kang dwis gvng mas xauh yoeus dah jyehjuh mas yombos nyeis aq. 2 Kanghjyoeng nyoshoq dah xikkhonh mas nvng ngah jyank masyah xuq, xauhgyo yoeus dah dang lyis yoeus las gohyuk lyis yoh doms jyauh das oen nvng yoh loms bang lyis cheh kyauh toh aq. 3 Khristu Yesu dah lomluk jeslo gis teh nvng kham yoeus vvng dah shanghsenh lyis kham yoeus aq. 4 Jesmuh wons nyeis dah jeslo dvyuk gas nyah thoq mas dah zau lyis nhaiqdoeus nhang shoq kuot mes yvmvyah jesphung yah ma sen dah dius jens cho mha ma bos nhunk. 5 Wuih khyank goh pwe mha wvng khyank goh soeu ka chank chah lyi vgus ma khyank goh lyis gas jyungshuk yoh das zis ma nghuot. 6 Danh muh, yos muh khank soeu ka, xauh yhomh yoeus dah guk nyau shih nyau cangxeih dah gvm boms xauh yoeus vvng. 7 Ngos taiq nyeis cho lhyi nghamh yoeuh aq: khasoeh ge lyis Yhensain ka hauh cho dvnganh nvng lyis seqgyo nhang das. 8 Ngos taiq kyoh dah gausyis dang mas bos zis yah dvyhangteh, shei masyah dwis toq los Dawi vnyau vshih nghuot dah Yhensain Yesu Khristu lyis soh nyeis aq. 9 Khasoeh ge lyis ngos gas Gausyis dang taiq kyoh gvng mas shanghsenh zis xauh. Ma shop dah thung dius dvyuk lyis teh shamjvng yah yangh twih zis xauh goeus. Nghuot laus eq Mangso dang gas ma twih toh. 10 Housoeh yvmvyah, ngos gas Mangso khyen yoeus zis xauh bang nyhenshang shanghsenh zis kham nyeis. Housoeh kham cho ka nyamoq eq Khristu Yesu gvng mas khyuot yoeus dah jyehjuh yah dvgeh, vcaiq vto phunk xauh yoeus das nyhenshang nghuot. 11 Haih zis gas jyoeng dang nghuot. Yang nyang yah dvgeh shei lhyi ka, nyang yah dvgeh eq yoh tsain dwis das. 12 Yang tsoq las kham nyeis lyis gas, nyang yah dvgeh eq xauh guon nyeis das. Yang nyang lyis ngoek tyamp lyis gas nyang eq yang lyis ngoek tyamp das. 13 Yang lom ma luk laus eq, nyang gas wontang: khasoeh ge lyis nyang gas nyang gungs lyis nyang yoh hwah ngoek tyamp zis ma nghuot. 14 Nah dius jens lyis haih cho taiq kyingh nyeis aq. Dang khonh jens dah vjyuk yah sen lha taiq phyen-goh las zan goh cho ma bos das xiklyis nyamoq lyis Mangso xikkhonh mas than than zaih nhang aq. Housoeh phyen-goh cho ka cha vkyuh ma bweh nhang thoq lyis, xauhgyo bang lyis lhoq thyoq cho dvbweh nhang. 15 Nvng gas nyah muh mas xoq chank cha ma bos dah muh wons soeu teh Mangso dah jyoeng dang lyis jus khyvlyis taiq kyoh, jyauh soeu khyvlyis eq Mangso xikkhonh mas nyoqnho yoh shoq nah Kank bos nyhoq yomkat nyeis aq. 16 Mangso yah we loh nhang dah vwot v-oeu yahge vkoh vpaq xamgoh dang lyis jhank aq. 17 Housoeh ge jyauh cho ka gungs lyis zo tomh loh dah mvnggvng dvm yah doeusgoh. Housoeh teh jyauh bang mas Himenu nhaiq tang Philetu bos. 18 Nyamoq gas hau jyoeng cho mhayah whang loh las, Yah dah dwis toq cho ka dye bweh goeus, ge taiq zis yah, dvyhamh bang dah lomsjingh cho lhyi lhoeu nhunk tyamp dyei. 19 Nghuot laus eq Mangso kuot toh, goeng dah vpom lhyi ka ma yoh nhont. Hauh vpom thoq mas, Yhensain ka nyah dius jens nghuot bang lyis seq, ge eq, Yhensain yah sen soeu nghuot ge taiq bang dvnganh gas lhung cho lhyi tsain jhank nyeis bas jungh, ge kyihau tap toh. 20 Yhenzains yoszains mas bvn khuq vja ja zis tsain joq; dvkhamh gas ngwis yah xing yah kuot toh; Dvyhamh gas saiq yahge tsoh yah kuot toh. Dvyhamh gas nyoqnho ngelang xiklyis yhaugyen uhlyis yhung lha, dvkhamh gas dius laiq nyeis dah joqyos mha tsain yhung. 21 Dius dvyuk yuk gas taiq loh goeus ma gis ma shop cho dvnganh masyah vsainnyang gungs lyis cheihshang lhyi ka, nyang gas Yhensain dah lhyenwhei nghamh toeuq toh cho mha yhung zis xauh kham yoeus das. Khasoeh ge lyis nyang gas gis dah muh lyis kuot das zis cicont nghuot joq bas jungh Yhensain dah xiklyis vkyuh bos yvmas kyauh toh goeus soeu nghuot. 22 Loyvm dah o mes cho lhyi jhank las, Mangso lhyi Lhoq shang ehnyet yah pangh das cho sang bang yah dvgeh Dan cho, lomsjingh cho, jyetdap cho yahge nyenstap cho lhyi yomkat xo nyeis aq. 23 Nghuot laus eq koh las cha ma seq nyei gyo phyen-goh bang lyis jhank aq. Housoeh teh bang dah vthang ka dyoqgoh cho dvnghuot yvlyis nvng seq. 24 Yhensain dah jyeidwis gas dyoqgoh zis ma gis bos, dvnganhmoq lyis nhaiq seq nyen, gis cho yahge nhaiqlom xing xing seq jyauh dah jyauh soeu nghuot chah. 25 Vsainnyang lyis tyixo bang lyis soq dyei uhlyis noeuh nhamp zis yah kuot soeu nghuot chah: khasoeh ge lyis nyamoq gas ehnyet thaiq las hau jyoeng cho lhyi seqgyo los das toeuh Mangso nyamoq lyis dyei lyis dyei das. 26 Hauh uhlyis nyamoq gas jus khyvlyis doms nyvng soh los las Satan dah lhyik masyah yoh luiq los das. Hauh Satan gas nyamoq lyis nyhik las nyang o khyvlyis chank nhang ku goeus soeu nghuot.
1 Thang thank buisnyeis lyis loh yau thank shishenh jweh das zis lyis seq nyeis aq. 2 Dius jens gas vsainnyang vkyuh dvxo, nyoqnoq, moengs, khwank bang nghuot los das. Nyamoq gas laihwangh dang taiq bang, nyhiphoq domsyos ma gyo bang, jyehjuh ma seq soh bang, lomsnoq cho ma bos bang nghuot das. 3 Nyamoq gas nhaiq ma bos, nhaiq ma seq nyen, nyhap, thyoq zo bang yahge gyukphoh bweh bang nghuot das. Nyamoq gas gis cho lhyi hoeng bang, 4 gauh chuq thyoq, dang ma jings, ehnyet nyhang lha khwank bang nghuot las: Mangso lhyi jyetdap das thoq lyis vsainnyang dah pyo cho lhyi zes ngwis bang nghuot das. 5 Nyamoq gas ngamoq dah lomsnoq cho dah thoqlosbaus lyis chank kuot laus eq hauh yomsoq gyingh lyis gas ngoek tyamp bang nghuot. Housoeh teh bang lyis eq jhank aq. 6 Nyamoq mas dvyhamh gas, dius jens dah yhen mha gauh wvng zis yah, seq cho nain las yomnhuk dah vmesbih jens lyis nyamoq loq mas wvng shoq tsain kuot. Hauh vmesbih jens gas vsainnyang shuot dah yaunos gvng mas ehnyet nyung daus las nhaiqlom ma tap zis yah nyetnau cho vja ja mas nhaiq wvng tyamp las, 7 jyauh yvlyis kham yoeus das zis vjangh o mes zis yah yomkat laus eq nyamoq hau jyoeng cho lhyi seq das yvmas khanhamp eq ma yoh jweh. 8 Yanne yahge Yambre gas Moshe lhyi tomp gos toh teh, hauh bang eq jyoeng cho lhyi tsain tomp gos toh. Hauh dius jens gas nyamoq dah ehnyet nghamh suon yoeuh ge zis ma bos lo las lomsjingh cho mha dyoqbis somh loh. 9 Nghuot laus eq nyamoq dah ung cho ka hounyhoq masyah jes las nyangh shoq yoh kham das zis ma nghuot. Khasoeh ge lyis hau aiq yuk mas cha bweh los cho dede thuq los teh, haih dius jens kha iq koh cho eq, dius jens xikkhonh mas dede thuq los das. 10 Nghuot laus eq nvng gas ngah jyauh cho, ngah wotwu yahge, ngah kang dwis cho mha ngos nghamh toh cho lhyi chank nyeis, ngah lomsjingh cho, ngos ehnyet xing cho, ngah jyetdap cho, jhen cho, 11 Ngos shoeuhshih zis xauh cho, khamzo cho; Antiok, Ikoni yahge Listra wus mas gyuk Phoh shoeuhshih cho xauh las ngos zain khoq yvlyis nvng seq. Housoeh xauh laus eq Yhensain ka ngos lyis hau dvnganh masyah khyuot yoeus. 12 Jyoengh, Khristu Yesu mas kang dwis las gywes so lhyi phauh nyang khyvlyis kang dwis mes soeu hank eq shoeuhshih zis xauh das. 13 Ma shop bang yahge vguons kuot bang, mhuih zo bang gas mhuih zo zis doms xauh las ma shop cho mha ma gis mhayah ma gis thank yvmas zes xunghxent loh das. 14 Nghuot laus eq nvng gas nvng xauh xuq las goeng goeng lomsjingh nyeis goeus, hau jyoeng cho mha tsoq las chank nyeis aq. Nvng gas nvng lyis jyauh bang hank nghuot yvlyis tsain soh nyeis. 15 Nvng lyis loshang yoq lyis yah joeui dyei las Khristu Yesu lyis lomsjingh gvng mas khyuot yoeus cho xauh yoeus das nyhenshang cho shwih she los dah gyingshang lhaihtoh dang vlhomuh seq soeu nghuot yvlyis eq soh nyeis aq. 16 Jyomp maussauh dvnganh lyis Mangso soq kat toh dyei yvmvyah jyoeng cho jyauh das, shuot cho lhyi yobos tuonh shet las kyink, shuot cho lhyi soq dan das zis yahge, jus dah kang dwis cho nyhenshang taiq shet dyei das xiklyis vkyuh bos. 17 Housoeh, Mangso dah muh wons wuq soeu ka gis dah muhzoh khanghmuh kuot das xiklyis kank bos cho yah tyink dyei las chi chah dah kyonhkhyi yah dyingh nhang nyeis.
1 Mangso xikkhonh mas eq, dwis nyeis bang yahge shei bang lyis soetuon das soeu Khristu Yesu xikkhonh mas eq, Yhensain ka guon das nyhenshang Hwankti khyvlyis jweh los das las ngos nvng lyis tungh kuot nhang zis gas, 2 Dang lyis taiq kyoh das xiklyis, seqgyo nhang das xiklyis, yobos tuonh shet las nyho das xiklyis, yomdyei das xiklyis, ehnyet xing xing toh las jyauh das xiklyis yoq doeus laus eq ma doeus laus eq yomkat nyeis aq oen, ngos nvng lyis kywih kat. 3 Dius jens gas, jyoeng lha chah zis ma bos dah jyauh cho lhyi ma gyo, nyamoq o yvpheh chank loh zis yah nyamoq ehnyet mas gvjywih yo shoq gyo yoeus mes dah cho lhyi jyauh das bang nyamoq xiklyis zes zes nyoshoq xo tsainh shishenh jweh los das. 4 Nyamoq gas hau jyoeng cho gyo mhayah phanh las dius dah mvnyei dang gyo das zis nhaiq wvng loh das. 5 Nvng gas chah cho bweh los laus eq nah gungs lyis joeu zis yah shanghsenh cho lhyi zain aq. Hau gausyis dang lyis taiq kyoh muh lyis wons wuq las, Mangso dah jyeidwis dvyuk khyvlyis nah yvwons s bos ya bos yvlyis wons wuq nyeis aq. 6 Ngah xiklyis gas ngah kang lhyi phudyei das shishenh jweh los nyeis. Gvshih nyang ngah xiklyis nyeisjvng thoq kang lhyi toh tyamp das shishenh jweh los nyeis. 7 Ngos gas wuih khyank goh cho mha kank bos nyhoq wuih goeus; khyank goh cho thank shoq wuih jweh goeus. Lomsjingh yvmas goeng goeng yap goeus. 8 Gvshih masyah dan dah soetuon soeu ge, Yhensain ka Soetuon buisnyeis lyis ngos lyis dyei das, dan dah kang dwis cho yah sen dah ung cho buismuk lyis ngah xiklyis toh toh. Ngos lyis kyingh ma nghuot, nyang doms jweh das buisnyeis lyis nhaiqdoeus zis yah langh nyeis bang dvnganhmoq lyis eq kyauh das. 9 Nvng ngah jyank mas lvnyap jweh das xiklyis mangh aq. 10 Dema gas haih mungkvn lyis ngwis yvmvyah ngos lyis toh tyamp khoq las Thesaloni wus pheh loh goeus. Kareka gas Galati mau pheh, Titu gas Dalamati mau pheh tsain loh goeus. 11 Luka kyingh ngos yah dvgeh nyeis. Makho lyis khi yoeus las nvng yah dvgeh shwih los aq. Khasoeh ge lyis haih muh mas nyang ngos lyis yoh pangh das. 12 Tichiku lyis gas ngos Ephesu wus pheh nhang kat. 13 Nvng los lyis Troa wus Karpu jyank mas ngos toh khoq dah ngah shanhzoe eq, maussauh eq, zes las shohyeis maussauh tsain yoeus los aq. 14 Hauh thunk bat soeu Alesanda gas ngos lyis ma gis zis nyoshoq kuot goeus. Nyang kuot zis yah dvyhangteh Yhensain ka nyang lyis phauh shangh das. 15 Nvng nyang lyis zaih las jhank aq: khasoeh ge lyis nyang gas yang taiq kyoh dah dang lyis than than kyoq tomp toh soeu nghuot. 16 Ngos lyis cangxeih vlhain zau kauq las ngos ngah gungs lyis ngos taiq gos uhlyis ngah shot pheh hank eq ma bos taiq toenk dyei. Dius dvnganh gas ngos lyis tyamp khoq: Mangso ka nyamoq housoeh kuot gvng mas yobos ma dyei bas jungh. 17 Nghuot laus eq Yhensain ka ngos yah nyeis las ngos lyis yomdyei yvmvyah ngos gas gohnyau bang dvnganh xauhgyo shoq hau gausyis dang lyis vlhomuh yoh taiq kyoh bas jungh: sat das dang thang thyet masyah lhuiq kat zis xauh goeus. 18 Yhensain ka ngos lyis ma gis cho dvnganh masyah khyuot kat las, nyah maukhung munghdan jweh shoq sam cho dyei zis yah shwih loh das. Nyang mas vcaiq vto phunk bos joq bas jungh. Amen. 19 Priska vzomh Akula yahge Onesiphoru dah yhenbang lyis jeshuh kat. 20 Erastu gas Korinthu wus mas gyoh nyeis khoq. Trophimu gas nos las, ngos nyang lyis Miletu wus mas nyhei toh khoq. 21 Cungh ma thuq shih lyis yoh jweh shoq mangh aq. Eubulu, Puden, Linu, Klaudia yahge gohtoeu Khristan boekyis dvnganhmoq nvng lyis tsain jeshuh kat. 22 Yhensain ka nah dyos yah dvgeh nghuot bas jungh. Mangso dah jyehjuh gas namoq mas joq bas jungh.
1 Mangso dah jyeidwis yahge Yesu Khristu dah lvgyo ngos Paulo maussauh lhaih kat. Mangso ka nyang khyen yoeus toh bang dah lomsjingh cho lhyi pangh toqh kat das zis yahge yah loms noq cho jyauh dah jyoeng cho lhyi yoh nyvng yoh seq shoq cho shwih she das nyhenshang ngos lyis khyen lha nhang kat. 2 Hauh lomsnoq cho ka vcaiq vto kang lhyi nghamhloms cho mha vpom kuot toh. Hwah cho ma bos dah Mangso ka gohlhain yah yang lyis vcaiq vto kang dyei das xiklyis dangthoengh dyei toh goeus. 3 Housoeh hauh shishenh jweh lyis hau vcaiq vto kang lhyi nyah dang mas chixoeuq kat. Hauh dang ngos lyis kyauh goeus las, yah khyuot yoeus Yhensain taiq toh zis yah dvyhangteh hauh yvlyis ngos taiq kyoh. 4 Yhensain Yesu lyis yang yah dvyhangteh lomsjingh cho mha dvgeh nghuot dah ngah lo gyingh Titu jyank mas ngos haih maussauh lhaih kat. Uwus Mangso yahge yah khyuot yoeus Yhensain Yesu Khristu gas nvng lyis jyehjuh yahge nyenstap cho dyei bas jungh. 5 Kreti goeujo mas kuot chah shih cho dvnganh lyis top jus shoq chank yoeuh chank chomp das zis yahge wus khanghmuh mas phung lhyi yoeuh dah yvwons s yoeus das logis jens toeuq kat toh das xiklyis ngos nvng lyis nyhei khoq. Ngos nvng lyis taiq shet goeus dang lyis comh aq. 6 Hauh phung logis gas yobos huon chank ma bos soeu, yhensain nyhiq dvyuk dvyoh soeu nghuot chah. Nyah lo jens gas lomsjingh bang nghuot chah. Ye dah wotwu yahge domsyos ma gyo cho nyings hoeuh dah lo jens yoh soeu ma gis nghuot. 7 Khasoeh ge lyis phung uhshe soeu ka Mangso dah muh lyis yvwons yoeus las wons wuq soeu nghuot las, yobos huon chank ma bos soeu nghuot gis. Nyang gas lhoq lhoq teh kuot soeu, phyiqkhyi chung soeu, yhei pauhzoe, dius bat, ngwis nyoqnoq soeu ma gis nghuot. 8 Nyang gas boengh mes daih, gis cho lhyi ngwis, vsainnyang gungs lyis seq joeu soeu, wot wons, dan, gyingshang, lyi chank soeu nghuot chah. 9 Nyang gas phung dah jyauh cho yahge xamxonh las loms gis dah Dang lyis wontang zwi zains toh soeu nghuot chah. Housoeh lyis nyang gas hau jyoeng dah jyauh cho yah dius jens lyis yomdyei ehnyet lyis yoh lang yoeus das zis yahge Dang lyis tyixo tomp gos bang dah shuot cho lhyi yoh tuonh shet das. 10 Khasoeh ge lyis nyamoq dah vjyuk ma bos dang yah phanh lo se kuot zis yah gohtoeu dah dius jens lyis mhuih jyomh bang nyoshoq bos, zes las Yuda lomsnoq cho mhayah thaiq wvng los bang mas bos. 11 Nyamoq dang taiq dah nhuot cauq toh dyei chah goeus: khasoeh ge lyis nyamoq gas ma gis jyauh cho lhyi jyauh las yhen gonh gonh tsain lhoq pi tyamp. Hau dvnganh gas nyamoq dah ngwis yoh das cho yah sen, vxoq vcaiq nghamh toeuq cho xiklyis nghuot. 12 Nyamoq mas nyamoq dah vnyau lvpe nghuot dah Kreti dius dvyuk taiq zis gas, Kreti dius jens vjangh hwah, Lhung dah yewus, lan dah womlvm bang nghuot, ge. 13 Hauh kanghjyoeng dang gas jus yvmvyah nyamoq gas Mangso lhyi jyoengh lomsjingh las lhom yoeus das nyhenshang eq, 14 Yuda jens dah mvnyei yahge jyoeng cho lhyi ngoek dah dius jens masyah thuq los dah tyingtoh dang lyis zwi zains toh bang ma nghuot lo das xiklyis eq nvng nyamoq lyis than than yoh nyho jyauh das. 15 Vsainnyang shangkyei nyeis goeus bang xiklyis dvnganh zis shangkyei; nghuot laus eq vsainnyang ma shangkyei lha Yhensain Yesu lyis ma lomsjingh bang xiklyis gas cha eq ma shangkyei. Khasoeh ge lyis Nyamoq dah nghamh cho yahge sohseq ehnyet gas vwot v-oeu nghuot. 16 Nyamoq Mangso lhyi seq, ge taiq laus eq nyamoq wotwu yah nyang lyis tsain ngoek tyamp. Nyamoq gas hoeng phoh bang, gis dah muh dvja ja kuot das zis yah ma huq bang yahge domsyos ma gyo bang nghuot.
1 Nghuot laus eq nvng gas jyoeng dah jyauh dang yah phi cho lhyi taiq kyoh las yoh jyauh nyeis das. 2 Lokhoq phauh jens lyis yhei ma yet, jyoeng zaih zis yah vsainnyang gungs lyis joeu das xiklyis jyauh aq. Nyamoq gas jyoeng dah lomsjingh cho, jyetdap ehnyet yah jhen ehnyet bos bas jungh. 3 Houyah dvyhangteh lokhoq nyih jens eq lomsjingh las gywes so lhyi phauh nyang bang kang dwis teh wotwu gis Chixoeuq las, khyangh ma pu, yhei dah jons ma duot, gis cho seq jyauh bang bweh bas jungh taiq shet aq. 4 Housoeh Mangso dah Dang gas loeusmus soq zo zis ma xauh bas jungh, lokhoq nyih jens eq nyamoq thoq lyis ngis dah nyhiq yvm jens lyis, vsainnyang dah yhensain phoq yahge lo jens lyis jyetdap, 5 vsainnyang gungs lyis joeu zis yah shangkyei lha gis dah yhen wons vmesbih duot las, vsainnyang yhensain phoq shwih khyvlyis chank bang yoh bweh das nyhenshang xuq nhang aq. 6 Houyah dvyhangteh, loyvm jens eq nyang gungs nyang joeu nyeis bas jungh, taiq kyingh yomdyei nyeis aq. 7 Dvnganh lyis nvnyang gis dah muhzoh yikhyoh Chixoeuq nyeis aq. Jyauh cho mha ehnyet dan zis yah yhaugyen zainsmuh khyvlyis kuot nyeis aq. 8 Nah jeswus jens gas yang lyis chah cho mha laus eq yobos ma yoh xo nyvng las xoqphuh bas jungh, nvng gas gohyuk dah yobos huon zis ma xauh shoq jyoeng dah dang yah taiq kyingh las jyauh nyeis aq. 9 Jons jens gas nyamoq dah yhensain jens dah o mha gyoh nyeis las cho khvt khanghmuh mas nyamoq lyis nhaiqdoeus nhang lha ma phuk toeuh bas jungh; 10 khauh cho ma kuot bas jungh, housoeh kuot das gungsthaiq, nyamoq gas khanhamp eq wontang dang jings bang nghuot cho yoh Chixoeuq das. Haih neh yah nyamoq gas vsainnyang kuot cho dvnganh mas, yah khyuot yoeus Soeu Mangso dah jyauh cho vsoenk lyis yoh tsain Chixoeuq das. 11 Khasoeh ge lyis Mangso ka dius nyau dvnganh lyis khyuot yoeus das xiklyis nyah jyehjuh lyis chi thuq xoeuq goeus. 12 Yang gas yah dah kuhxing Mangso ge, khyuot yoeus dah Yhensain Yesu Khristu dah phunk thuq los das ngelhoq buisnyeis lyis langh uhjyangh gywes ma tsungh ehnyet yahge mungkvn lyis nyetnau ehnyet doeuh tyamp das xiklyis eq, 13 wotwons zis yah vshih shih das cho, dan las gywes tsungh dah kang dwis cho yah haih mungkvn mas nyeis dyos das xiklyis eq, hau jyehjuh lyi gas yang lyis jyauh nyeis. 14 Yang lyis lyi lhyweq las ma gis ma shop dah yaunos masyah khyuot yoeus das xiklyis eq, yang gas ehnyet gyingshang lha nyang yah kyingh sen dah vnyau duot zis yah gis dah muh kuot das zis, nhaiq kank wvng dah vnyau duot das xiklyis eq, Khristu gas yah xiklyis nyah gungs dyei tyamp. 15 Nvng haih cho lhyi taiq kyoh las jyauh nyeis aq. Nvng yomdyei taiq kyingh las jyauh uhlyis nvng yoh dah toeuh bos ya bos zis yah taiq aq. Nvng lyis hank eq ma phauh ma danh dius ngis vyoeuh khyoq nhang.
1 Munghdan lyis guon bang yahge toeuh bos bang dah o mha gyoh las domsyos gyo nyeis das nyhenshang eq, gis dah muhzoh khanghmuh lyis kuot das xiklyis cicont nghuot joq das nyhenshang eq, nah phung dius jens lyis taiq kyingh nyeis aq. 2 Hank lyis eq ma gis zis ma taiq, nyenstap khyvlyis dapgoh nyeis das zis yahge dvnganhmoq lyis vjangh noeuh nhamp ehnyet Chixoeuq nyeis bas jungh, nyamoq lyis taiq kyingh nyeis aq. 3 Khasoeh ge lyis yang eq gohlhain ka koh, domsyos ma gyo zis yah chowhang whang bang nghuot. Yang gas gungsshoh dah obos zis yahge pyo cho vja ja chank kuot las hauh jons duot ku. Yang mas vjangh yah hoeng lha noh cho bos, nyang changh nyang hoeng goh bang tsain nghuot. 4 Nghuot laus eq yah khyuot yoeus soeu Mangso dah nhaiqbos cho yahge jyetdap cho thuq los uhlyis, 5 Yang gas khyuot yoeus zis xauh goeus. Hauh zis gas yvnyang kuot dah gis muhzoh gvng mas ma nghuot, nyah nhaiqnyen jyehjuh gvng mas dvnghuot. Hauh jyehjuh gas Gyingshang Dyos masyah jeis yah doms khoeu lha kang saiq xauh yoeus cho nghuot. 6 Yah khyuot yoeus soeu Yesu Khristu gvng mas Mangso ka yah thoq mas Gyingshang Dyos magons magoh huot khyoq dyei. 7 Heisoeh kuot cho ka, yang gas nyah jyehjuh yah Mangso nhaiqdoeus cho kham yoeus las yang nghamhloms nyeis, vcaiq vto kang xauh sain yoeus das xiklyis nghuot. 8 Haih dang gas wontang. Mangso lhyi lomsjingh bang gas dius yuk khanghmuh xiklyis gis las vkyuh bos muhzoh thoq mas taiq goeus dah cho jens lyis nhaiq wvng zis yah shishenh dyei las kuot nyeis bas jungh. 9 Nghuot laus eq vkyuh ma bos vkoh vpaq nyei, taiq phyen-goh dah nyeidang, xing dah sungson phant cho, lyi yah sen lha dyoqgoh cho lhyi jhank aq: khasoeh ge lyis hauh goeu gas vkyuh ma bos, vkom dvnghuot. 10 I loh gang lvn loh cho bweh nhang soeu lhyi dvlhain aiq lhain taiq kyingh zaih nhang thang lhyi ka nyang tsoq goh cho gohtoeu cha vkuot lo. 11 Housoeh teh soeu ka, dyoqbis loh las nyah yaunos gas nyang yobos yoh soeu nghuot yvlyis kanghjyoeng chixoeuq las nyang dang thang thyetzo nyeis yvlyis nvng seq. 12 Ngos nah jyank mas Artema yahge Tichiku dvyuk yuk nhang kat lyis, Nikopoli wus mas ngos lyis los zes langh das zis yoh yomkat nyhoq yomkat aq: khasoeh ge lyis hauh wus mas cungh nyeis ku das oen nghamh thyet toh. 13 Lyi dat Zena yahge Apolo lyis nyah aiq yuk dah gyung yoh suh das xiklyis chokhoq ma luk ma duons ma mus bas jungh, nyah aiq yuk lyis luk luk pangh kat aq. 14 Zo das, wuot das, nyeis yap das cho xiklyis jyoengh chah nyeis bang lyis yoh dyei shoq yah dius jens gis dah kang khoeu muh kuot yvmas nyamoq dah shishenh lyis seq yhung bas jungh oen zis yahge nyamoq gas vkyuh ma bos dah kang dwis cho ma kuot bas jungh jyauh aq. 15 Ngos yah dvgeh nyeis bang dvnganhmoq gas nvng lyis jeshuh kat. Lomsjingh cho mha ngamoq lyis jyetdap bang lyis bos jeshuh dyei aq. Jyehjuh gas namoq dvnganhmoq yah dvgeh joq bas jungh. Amen.
1 Khristu Yesu dah muh wons gvng mas thung lungh nyeis soeu ngos Paulo yahge yah vmang vnoeuh Timothi gas, Ngah aiq yuk dah jyetdap buisnoms yahge muh bos thuk nyeis Philemon jyank mas eq, 2 ngah aiq yuk dah nhamhmuh Aphia jyank mas eq, ngah aiq yuk dah jes loeuzomh Arkhipu jyank mas eq, nah yhen mha zop huom dah Khristan vmang vnoeuh moq jyank mas eq maussauh lhaih kat. 3 Yah Uwus Mangso yahge Yhensain Yesu Khristu jyank masyah jyehjuh yahge nyenstap zis gas namoq yah dvgeh nghuot bas jungh. 4 Ngos shvmanh dung khanghmuh nah cho taiq las ngah Mangso lhyi jyehjuh chungh. 5 Khasoeh ge lyis nvng gas Mangso dah dius jens dvnganhmoq lyis jyetdap nyeis zis yahge Khristu Yesu lyis lomsjingh nyeis cho ngos xauhgyo. 6 Lomsjingh dah Khristan tsain nghuot dah nvng yahge ngamoq gas Khristu mas dvdain dvlom bweh las kang dwis gvng mas yang xauh kham dah shvmanh jyehjuh dvnganh lyis zes noq khyvlyis seqgyo das xiklyis ngos shvmanh dung. 7 Vmang vnoeuh eh, nah jyetdap ehnyet gvng mas ngos svsoh gausyis zis yah yom yoh. Nvng gas Mangso dah gyingshang bang dvnganhmoq dah ehnyet lyis yoh lhoq pyo dyei. 8 Haih cho gvng mas ngos gas Khristan vmang vnoeuh nyang changh khyvlyis nvng kuot vvng dah muh lyis kuot das nyhenshang taiq das toeuh ngos yoh. 9 Nghuot laus eq Khristu dah lvgyo, lokhoq ngos Paulo nghuot joq zis yahge, gvshih Khristu xiklyis thung lungh soeu nghuot joq yvmvyah, jyetdap khyvlyis nvng lyis shangphu kat das zis ngos zes o. 10 Khristu mas ngah lo gyingh bweh los, ngah lo Onesimu xiklyis ngos nvng lyis shangphu kat. Khasoeh ge lyis ngos thung lungh nyeis lyis ngos gas nyah dyos cho mha ngos uwus duot los goeus. 11 Nyang gas xikpheh nah xiklyis vkyuh ma bos laus eq, gvshih gas nah xiklyis eq, ngah xiklyis eq vkyuh bos joq. 12 Gvshih ngos nyang lyis nah jyank mas doms nhang kat. Nyang yah dvgeh ngah ehnyet jweh bos joq. 13 Gausyis dang gvng mas thung lungh yvmas, nyang gas nah gungsthaiq ngos lyis phuqsoe das zis ngah jyank mas shwih nyeis mes. 14 Nghuot laus eq nah xamxonh cho ma yoh zis tsoengh kuot khyvlyis ngos cha eq ma mes kuot. Nvng bauh khyvlyis dvnghuot bas jungh. Housoeh las nvng ma xihhonh zis cha lhyi eq ngos ma kuot das. 15 Onesimu gas nvng yah vjangh dvgeh doms xauh nyeis das xiklyis nyang nvng yah dvsoq gang zis nghuot mvbeh. 16 Gvshih nyang gas jons kyingh ma nghuot lo, jons vsoenk masyah zes dah jyetdap Khristan vmang vnoeuh dvyuk bweh los goeus. Nyang gas ngah xiklyis kha iq phauhdap soeu bweh las nah jons dvyuk khyvlyis eq, Khristu mas vmang vnoeuh dvyuk khyvlyis eq kha iq zes phauhdap soeu bweh los das lah! 17 Housoeh yvmvyah nvng ngos lyis loeuzomh teh mus lyis gas, ngos lyis teh nyang lyis lhom yoeus aq. 18 Nyang nvng lyis dvja ja cu lhyi eq, jyen bos laus eq, hauh zis gas ngah jyen khyvlyis toh aq. 19 Ngos Paulo ka hauh jyen cap das oen, ngvnyang loq yah nyang lhaih kat. Nghuot laus eq nvnyang yangh Khristu mas nah kang dwis cho vsaiq nyhenshang ngos lyis jyen cap chah oen ma taiq kyingh noh das oen loms. 20 Housoeh las ngah vmang vnoeuh eh, hauh Yhensain dah nyoqnho lhyi yoeuh las hai ngos shangphu cho lhyi jenh kuot dyei aq. Khristu mas vmang vnoeuh nyang changh khyvlyis ngah ehnyet lyis lhoq pyo dyei aq. 21 Nvng gas ngos dung zis yah dvyhangteh kuot dyei das oen nghamhnywe zis yah haih maussauh lhaih kat. Jyoengh nyang ngos taiq thoq lyis zes las kuot dyei das yvlyis ngos seq. 22 Hauh thoq lyis, ngah xiklyis yhet yvp sont toh aq; khasoeh ge lyis, Mangso ka namoq dah shvmanh dung dang lyis gyo dyei das las namoq jyank mas doms jweh los nhang das oen ngos nghamhloms nyeis. 23 Khristu Yesu cho taiq kyoh yvmvyah ngah thung lungh changh Epaphra ka nvng lyis jeshuh kat. 24 Houyah dvyhangteh ngah muhzwi changh Makho, Aristaku, Dema yahge Luka moq eq nvng lyis jeshuh kat. 25 Yhensain Yesu Khristu dah jyehjuh gas namoq dvnganhmoq yah dvgeh nghuot bas jungh.
1 Gohlhain caiq lyis Mangso ka yah phauh thyeih moq lyis dang taiq cho nyoshoq lhain, neh vja ja khyvlyis yah lvpe jens dah nhuot yah taiq kyoh lai los goeus. 2 Nghuot laus eq hai thang thank dah buisnyeis lyis gas nyah Lo dah nhuot masyah yang lyis nyah dang dyei goeus. Hau Lo yah dwis ya dwis yvlyis gvnkhanh toh goeus zis yahge thang thank lyis mungkvn gonh lyis guon das soeu duot das nyhenshang Nyang lyis khyen toeuq toh goeus. 3 Nyang gas Mangso dah phunk duk bvng yvlyis Chixoeuq las Mangso nyang dah gungs khyank tsungh zis yah mungkvn buislom lhamhmuh joq ya joq zis dvnganh lyis nyah yomsoq bos dah Dang yah gomh toh. Nyang gas cangsoeu dius dah yaunos lyis yobos khyuot cheihshang cho dye kuot thang lhyi maukhung mha zauguon yomsoq bos Mangso dah loqyos shot pheh tsung toh. 4 Mangso nyang lyis dyei dah nyings gas loeuswons bang dah nyings thoq lyis zes kuh las lo lyis loeuswons bang thoq lyis zes phauhdap soeu kuot goeus. 5 Khasoeh ge lyis Mangso ka, Nvng ngah Lo nghuot, Khvnyhik ngos nvng lyis ngah gungs masyah yaus kat, ge eq, Ngos gas nyah Uwus duot las, Nyang eq ngah Lo duot das, ge eq khah loeuswons soeu lhyi eq Mangso khanhamp eq ma taiq ku. 6 Nghuot laus eq Mangso ka nyah Lo xeih lyis mungkvn mas nhang kat das sont uhlyis, Nyang gas, Mangso dah loeuswons bang dvnganh nyang lyis paiq bas jungh, ge taiq kat. 7 Mangso ka loeuswons bang dah cho taiq uhlyis, Mangso ka nyah loeuswons bang lyis lyeis kuot las, Nyah jyeidwis jens lyis nyilhyam kuot, ge. 8 Tsai hau Lo dah cho taiq uhlyis, Mangso ka, Mangso eh, nah munghdan vcaiq vto joq das! Nvng gas nah dius nyau jens lyis lyi jus khyvlyis guon. 9 Nvng gas dan cho lhyi jyet las shuot cho lhyi hoeng. Housoeh yvmvyah Mangso ge dah nah Mangso ka, nvng lyis khyen yoeus las nah dyenschangh lyis dyei thoq lyis zes kuh dah gausyis nyoqnho ngelang dyei las chunghtoq, ge. 10 Tsai, nyang gas, Yhensain eh, cangxeih uhlyis nvng nyeisjvng vpom xi toh las, Maukhung lhyi nah loq yah kuot toh. 11 Hauh zis gas tsain dyuk loh das laus eq nvng gas goeng joq das. Hau dvnganh gas dyimis teh tsain tyang tyamp das. 12 Nvng gas hauh vyhang lhyi thoq dyi lyis teh nap tyamp das las hauh zis gas dyimis teh thaiq tyamp zis tsain xauh das. Nghuot laus eq nvng gas vjangh vgus dvnghuot las, nah kang khanhamp eq ma thank das. 13 Mangso ka nvng lyis gomloeus toq bang lyis ngos nah nangte kuot shoq Ngah loqyos shot pheh tsung toh aq, oen khah loeuswons soeu lhyi eq khanhamp ma taiq ku. 14 Housoeh lyis loeuswons bang gas hank tsain nghuot lah? Nyamoq gas, khyuot yoeus dah vso vlho kham yoeus bang lyis pangh das nyhenshang Mangso yah nhang kat zis xauh bang, Mangso lhyi phuqsoe nyeis dah dyos tsain nghuot.
1 Housoeh yvmvyah yang chowhang ma whang loh bas jungh, yang xauhgyo goeus hau jyoeng cho lhyi goeng goeng zwi zains toh chah. 2 Loeuswons bang dah nhuot yah, yah phauh thyeih moq lyis taiq toh dang gas jyoeng dah lyi nghuot las, hauh lyi lyis ma chank bang gas vsainnyang yah mon yih dah joeng cho kham yoeus das cho jyoeng nghuot lyis gas, 3 hei iq kuhxing dah khyuot yoeus cho lhyi yang maphauh madanh kuot lyis gas yang joeng cho mhayah khasoeh yoh luiq das lah! Hauh khyuot yoeus cho lhyi cangxeih lyis Yhensain nyang taiq hoeuh las xauhgyo bang gas hauh lyi jyoeng cho kanghjyoeng chixoeuq goeus. 4 Hauh thoq lyis Mangso ka nyah yomsoq muh, mauh loqmuh vja ja kuot xoeuq khyvlyis yah eq, Gyingshang Dyos yah sen dah jyehjuh jyungshuk lyis nyang bauh zis yah dvyhangteh gvm dyei khyvlyis eq, nyamoq dah kanghjyoeng mha lung las chixoeuq nyeis. 5 Mangso ka gvshih yang taiq nyeis, jweh los das mungkvn vsaiq lyis loeuswons bang guon das khyvlyis toh zis ma nghuot. 6 Lhaihtoh dang dvdeh mas taiq zis gas, Mangso eh, cangsoeu dius gas khasoeh teh soeu nghuot las, Nvng nyang lyis soh nyeis lah? Dius laiq gas khasoeh teh soeu nghuot las Nvng nyang lyis gomh yoeuh nyeis lah? 7 Nvng nyang lyis dvsoq loeuswons bang o lhyi dvtsiq nyhen khyvlyis gvnkhanh toh las, nyang lyis phunk yahge nyoqnho ngelang tsungh dyei. Nyang lyis nvng kuot toh zis dvnganh thoq mas guon das toeuh dyei goeus. ge. 8 Jyomp maussauh mas, Mangso ka cangsoeu dius lyis gvnkhanh toh las dvnganh thoq mas guon das toeuh dyei ge zis gas, dwis ya dwis zis dvnganh lyis guon nhang ge mes zis nghuot. Nghuot laus eq cangsoeu dius jens vyhang dvnganh yvlyis guon nyeis zis gas yang ma nyvng shih. 9 Nghuot laus eq yang nyvng soeu ka Mangso dah jyehjuh gvng mas dvnganhmoq xiklyis yoh shei kham shoq shishenh dvtsiq gyo lyis loeuswons bang o mha nyhen nhang zis xauh dah Yesu Khristu nyang nghuot. Hauh Yhensain ka shei nos dah shanghsenh zis kham yoeus yvmvyah, gvshih phunk yahge nyoqnho ngelang buismuk tsungh dyei zis xauh nyeis yvlyis yang nyvng. 10 Dvnganh yvlyis gvnkhanh toh las yoeuh gomh nyeis dah Mangso ka lo jens nyoshoq lyis phunk yoh bos nhang das xiklyis shanghsenh kham khyvlyis yah Yesu lyis dyinghjet nhang. Heisoeh Mangso kuot cho ka gis cho nghuot. Khasoeh ge lyis nyamoq khyuot yoeus zis xauh das nyhenshang shwih los soeu ka Yesu nyang nghuot. 11 Nyang gas dius jens lyis nyamoq dah yaunos masyah cheihshang kat. Housoeh nyang yahge cheihshang kat zis xauh bang dvnganh gas Uwus dvyuk kyingh yoh las nyamoq lyis vmang vnoeuh oen lui das zis ma xoq. 12 Nyang Mangso lhyi taiq zis gas, Nvng kuot dah muh cho ngos ngah boekyis lyis taiq kyoh das, ngos nyamoq huom xikkhonh mas ngos nvng lyis chungh das, ge. 13 Tsai Yesu gas, Ngos Mangso lhyi loms das, ge las eq, ngos heimha Mangso ngos lyis dyei toh dah loshang jens yah nyeis, ge taiq. 14 Lo jens ge las nyang nyamoq lyis lui zis yah dvyhangteh, gungsshoh shomp mas wvng bang nghuot. Yesu nyah gungs eq nyamoq teh gungsshoh shomp mas wvng dah cangsoeu dius dvgeh xonh kham yoeus. Housoeh kham yoeus cho ka, nyah dah shei kham cho gvng mas shei cho lhyi guon dah Satan yomsoq lyis mhont tyamp das xiklyis nghuot. 15 Heisoeh khyvlyis yah shei cho lhyi gyuk yvmvyah dvcaiq gonh hauh jons duot nyeis bang lyis lhuiq kat. 16 Khasoeh ge lyis nyang gas loeuswons bang lyis pangh das xiklyis lyih zis ma nghuot. Abraham dah vnyau vshih lyis pangh das xiklyis dvlyih. 17 Housoeh yvmvyah nyang gas dius jens dah yaunos lyis yoh khyuot tyamp dyei das nyhenshang nhaiq seq nyen las wontang dah phudyei zainsmuh duot khyvlyis yah Mangso dah muh yoh wons bas jungh, cho khvt khanghmuh mas nyah vmang vnoeuh jens xauh kham zo cho lhyi nyamoq yah dvgeh xonh kham zo goeus. 18 Gvshih nyang gas shiwu xauh zis yah nyah gungs nyang shanghsenh zis xauh ku yvmvyah shiwu zis xauh bang lyis yoh pangh.
1 Mangso khyen lui toh dah ngah Khristan boekyis eh, yang rhen, lomsjingh cho dah Phudyei Zainsmuh duot das xiklyis Mangso nhang kat dah Yesu lyis nghamh yoeuh geh. 2 Moshe ka Mangso yhen mha dah nyah muh mas lomluk teh, nyang gas haih muh kuot das nyhenshang nyang lyis khyen kat soeu Mangso lhyi lomluk. 3 Yhen tsuk soeu ka hauh yhen thoq lyis nyoqnho ngelang zes bos. Houyah dvyhangteh, Yesu eq Moshe thoq lyis zes dah phunk nyoqnho ngelang lyis chungh cho kham yoeus mon. 4 Yhen ge yvlyis dius dvyuk yuk yah tsuk toh. Dvnganh yvlyis kuot toh soeu ka Mangso dvnghuot. 5 Moshe ka Mangso dah yhen mha jyeidwis teh lomluk soeu nghuot las thang pheh Mangso taiq kyoh das cho lhyi taiq soeu nghuot. 6 Nghuot laus eq Khristu gas Mangso yhen lhyi guon dah Lo nghuot khyvlyis lomluk. Yang eq yang nghamhloms cho lhyi womh ehnyet yahge nghamhnywe zis yah thank shoq zwi zains toh lyis gas, yang nyah yhenbang tsain nghuot. 7 Housoeh yvmvyah Gyingshang Dyos taiq zis gas: Khvnyhik namoq Mangso dah thwe xauhgyo lyis gas, 8 Mangso lhyi gomloeus toq las mhanhdyvp mas nghuot shishenh lyis nyang lyis shiwu dah namoq phauh thyeih jens teh ehnyet vthan goh. 9 Mangso ka namoq dah phauh thyeih moq nyeici zvn top mhanhdyvp mas ngos kuot xoeuq dah muh lyis nyvng laus eq ngos lyis tyi lha shi yoeuh. 10 Housoeh yvmvyah ngos hauh dius jens lyis nhaiqyo las, Nyamoq khanhamp eq lom ma luk, Ngos taiq toh dang lyis chank kuot das zis tsain ngoek, oen taiq goeus. 11 Ngos nhaiqyo las nyamoq lyis maukhi zis gas, Ngos nyamoq lyis dyei das noyos mas khanhamp eq ma xauh wvng das, oen. 12 Boekyis eh, dwis nyeis Mangso mhayah, nungsdoms loh shoq ma shop, seq loms shuot ehnyet bos bang, namoq mas dvyuk eq ma bos bas jungh, zaih nyeis geh. 13 Nyamoq mas dvyuk eq yaunos yah mhuih jyomh zis xauh las ehnyet than bang ma bweh bweh, lhaihtoh dang mas taiq, Khvnyhik oen, yah xiklyis yoh taiq shih dah shishenh lyis nyeih khanghmuh nyang changh nyang pangh goh nyeis geh. 14 Khasoeh ge lyis Khristan vsaiq bweh los shishenh lyis teh nghamhnywe dah lomsjingh cho mha thang thank jweh shoq goeng goeng zwi zains toh lyis gas, yang dvnganh gas Khristu yah dvgeh muh chomp wons nyeis bang nghuot. 15 Lhaihtoh dang mas taiq zis gas, Khvnyhik namoq Mangso thwe xauhgyo lyis gas, Mangso lhyi namoq dah phauh thyeih moq gomloeus toq uhlyis teh ehnyet vthan nyeis goh, ge. 16 Mangso dah thwe lhyi xauhgyo nyeis goeus lyis eq nyang lyis gomloeus toq bang gas hank tsain nghuot lah? Nyamoq gas Egutu mau masyah Moshe khyuot shwih los bang dvnganh nghuot. 17 Nyeici zvn top Mangso dah nhaiqyo zis xauh bang gas hank tsain nghuot lah? Hauh bang gas yaunos kuot las mhanhdyvp mas lains shei bang nghuot. 18 Nyamoq gas ngos dyei das noyos mas khanhamp eq ma xauh wvng das, ge hank lyis toeuq las Mangso maukhi lah? Nyah dang lyis domsyos ma gyo las gomloeus toq bang lyis toeuq las taiq ma nghuot lhyeh? 19 Housoeh nyamoq ma lomsjingh yvmvyah hauh mau mas ma tsain xauh wvng yvlyis yang yoh nyvng.
1 Gvshih Mangso ka yang lyis no yoeus das cho kham yoeus nhang das ge dangthoengh dyei toh goeus. Hau dangthoengh dyei toh goeus dah noyos lyis namoq mas ma xauh yoeus zis dvyuk eq ma bos bas jungh, zaih nyeis geh. 2 Khasoeh ge lyis ngamoq gas gohlhain dah dius jens yhangteh hau gausyis dang lyis xauhgyo goeus. Nghuot laus eq nyamoq xauhgyo dah gausyis dang gas nyamoq xiklyis vkyuh ma bos. Chamus ge lyis nyamoq xauhgyo uhlyis nyamoq hauh yvlyis lomsjingh zis yah ma lhom yoeus. 3 Yang lomsjingh bang gas Mangso dangthoengh toh dah noyos lyis xauh lhom yoeus goeus. Houka: Ngos nyamoq lyis nhaiqyo zis yah, Ngos nyamoq lyis no nhang das oen dyei dah mau mas khanhamp eq ma xauh wvng das oen dangthoengh yah maukhi toh, ge nyang taiq dah dang yah dvyhangteh nghuot. Nyang nyeisjvng lyis cangxeih gvnkhanh toh masyah nyang muh lyis dye kuot toh goeus. Nghuot laus eq nyang haih yvlyis taiq shih. 4 Khasoeh ge lyis lhaihtoh dang dvdeh mas, nyhet vnyeih yah sen lha, Mangso ka nyhet vnyeih lyis nyah muh dvnganh masyah no, ge. 5 Haih cho yah sen lha doms puk taiq toh zis gas, Ngos nyamoq lyis noyos dyei das oen dah mau mas nyamoq khanhamp eq ma xauh wvng das, ge. 6 Hau Gausyis Dang cangxeih xauhgyo bang gas hauh dang lyis ma lomsjingh yvmvyah hauh noyos mas ma xauh wvng. Housoeh las hauh noyos lyis gohtoeu dius jens kham yoeus das toeuh dyei tyamp. 7 Housoeh lhom yoeus cho lhyi Khvnyhik ge dah buisnyeis gohtoeu dvnyeih Mangso doms toeuq toh dyei ge dah cho dvkoeuq yah kanghjyoeng chixoeuq nyeis. Yhensain ka lhaihtoh dang mas taiq toh zis yah dvyhangteh zvn nyoshoq nyangh thang lhyi Dawi nhuot masyah Khvnyhik namoq nyah thwe xauhgyo nghuot lyis namoq ehnyet vthan goh, ge. 8 Mangso dangthoengh dyei toh dah no cho lhyi Yoshua gas hauh dius jens lyis dyei goeus nghuot lyis gas, thang lhyi buisnyeis gohtoeu dvkoeuq dah cho doms taiq lo das zis ma nghuot. 9 Housoeh las no nyeih lyis Mangso ka no nyeis teh Mangso dah dius jens xiklyis no das shishenh dvnyeih bos shih. 10 Khasoeh ge lyis Mangso dangthoengh dyei toh dah no cho lhyi kham yoeus goeus bang hank eq Mangso no nyeis teh nyah muh masyah no das. 11 Housoeh yvmvyah nyamoq ma lomsjingh gvng mas noyos mas ma xauh wvng teh yang hank mas eq ma bweh bas jungh, hau noyos mas yoh wvng das xiklyis yomkat ohhont nyeis goh. 12 Khasoeh ge lyis Mangso dang gas dwis nyeis zis yahge tsangh siq nghuot las, aiq shot zuk tyingh sham thoq lyis zes zuk. Houka ehnyet yahge dyos xauhgoh yvmas eq, yaunyoq yahge shohkhyang xauhgoh yvmas jweh shoq yoh jyweq gvn las, dius dah ungkhau mha nghamh cho yahge nghamh toh cho lhyi soetuon dyei nyeis. 13 Mangso mhayah cha eq ma yoh gos shung toh; dvnganh gas nyah xikkhonh mas dede nghuot las yang kuot cho dvnganh nyang lyis suon xoeuq chah das. 14 Housoeh las yang rhen lha lomsjingh cho lhyi goeng goeng zwi zains toh goh: khasoeh ge lyis Mangso jyank mas bangh wvng loh goeus Mangso dah Lo Yesu ge dah Phudyei Zainsmuh gas yang yoh toh. 15 Khasoeh ge lyis yah Phudyei Zainsmuh gas, yah yomnhuk cho lhyi nhaiq ma seq nyen soeu ma nghuot. Yang teh cho khat khanghmuh mas shiwu zis xauh ku laus eq yaunos ma kuot dah Phudyei Zainsmuh yang dvyoh toh. 16 Housoeh las yang womh dah ehnyet yah Mangso dah jyehjuh hwankti tank xikkhonh mas tsain wvng loh goh. Housoeh lyis yang gas nhaiqnyen zis xauh kham yoeus das zis yahge chah nyeis uhlyis yang lyis pangh dah jyehjuh xauh yoeus das.
1 Phudyei Zainsmuh khanghmuh gas yaunos xiklyis lomhxangh yahge jyungshuk phudyei bas jungh, dius masyah khyen lha dius dah gungsthaiq Mangso lhyi phuqsoe das xiklyis toeuq kat toh zis xauh soeu nghuot. 2 Nyah gungs nyang eq cho vja ja mas yomnhuk nyeis las seq cho ma bos bang, chah shuot loh bang lyis noeuh nhamp ehnyet yoh Chixoeuq soeu nghuot. 3 Nyang nyang yomnhuk nyeis yvmvyah gohyuk dah yaunos xiklyis kyingh ma nghuot, nyah yaunos xiklyis eq phudyei chah. 4 Hank eq vsainnyang gungs lyis Phudyei Zainsmuh duot dah nyoqnho ngelang mas yoh khyen toeuq toh zo zis ma nghuot. Aron lyis teh Mangso khi yoeus zis xauh soeu kyingh Phudyei Zainsmuh dvyoh kuot. 5 Houyah dvyhangteh Khristu eq Phudyei Zainsmuh nyoqnho ngelang mas nyang gungs nyang chungh zo zis ma nghuot, Housoeh kuot das gungsthaiq, Nvng ngah Lo nghuot, Khvnyhik ngos nvng lyis ngah gungs masyah yaus kat, ge taiq dah Mangso yah dvchungh toh. 6 Nyang gohyos dvdeh mas taiq zis gas, Nvng gas Melkhizedek dah gyamh huon zis xauh soeu, vcaiq vto phudyei soeu nghuot, ge. 7 Yesu gas gungsshoh mas kang dwis nyeis shishenh lyis, nyang lyis shei masyah yoh khyuot yoeus soeu Mangso lhyi ngausdyeis ngausnhvp nyoqdyeis gyoh zis yah shvmanh dung sang cho kuot goeus. Yhensain Yesu gas ehnyet nyhen mha gyoh las kyauh soeu nghuot yvmvyah Mangso eq nyang sang cho lhyi gyo yoeus dyei. 8 Nyang gas Mangso dah lo nyang nghuot nyeis laus eq, shanghsenh zis kham lha domsyos gyo cho lhyi xuq yoeus. 9 Nyang lyis dyinghjet soeu dye kuot dyei goeus ya, nyang gas domsyos gyo bang dvnganh xiklyis vcaiq vto khyuot yoeus cho dah vpom bweh los. 10 Mangso eq nyang lyis Melkhizedek dah gyamh huon dah Phudyei Zainsmuh nghuot ge taiq hoeuh dyei. 11 Haih cho yah sen lha ngamoq taiq das cho nyoshoq bos. Nghuot laus eq namoq gas lvnyap ma seqgyo yvmvyah namoq lyis phui kyoh das zis yau. 12 Shishenh suon yoeuh lyis namoq gas jyauh bang duot gis goeus, nghuot laus eq Mangso dah cangxeih vpom dang lyis yangh namoq lyis dvyuk yuk jyauh chah joq shih. Namoq gas wom than zo das gungsthaiq nauh dvshuk chah nyeis shih. 13 Nauh dvshuk shih soeu hank laus eq shuot cho yahge jus cho yah sen lha seq gvn dah thungh phuh cho ma bos dah lonoeuh dvnghuot nyeis shih. 14 Than dah wom gas kuh goeus bang xiklyis nghuot las, nyamoq gas kuot man gvng mas gis gang seq gvn bang nghuot.
1 Housoeh yvmvyah namoq gas Khristan lomsjingh cho dah dang vpom lhyi toh khoq las lomsjingh cho mha nhaiqbos ung gying goeus bang yah phi dah jyauh cho pheh cheh loh goh. 2 Jeisnyhop kham cho, loq kih muh huon cho, shei masyah dwis toq cho yahge vcaiq vto soetuon xauh cho jens lyis doms puk jyauh las vpom xi das zis ma chah lo. 3 Gvshih yang xik pheh toq loh goh! Mangso bauh lyis gas yang haih yvlyis nyang kuot das. 4 Khasoeh ge lyis hau lomsjingh cho mhayah nungs doms loh goeus bang lyis ehnyet dvlhain doms thaiq nhang das cho khasoeh gis bweh das lah? Nyamoq gas Mangso dah bvng yvmas dvlhain nyeis ku goeus las maukhung mha dah jyehjuh jyungshuk lyis wu yoeuh zis yahge Gyingshang Dyos lyis chomp kham yoeus ku goeus bang nghuot. 5 Tsai, nyamoq gas Mangso dang gas gis yvlyis eq, thang caiq yah sen dah yomsoq lyis eq vsainnyang xauh kham zo las seq goeus bang nghuot. 6 Housoeh bweh thang lhyi gvshih nyamoq gas nyamoq dah lomsjingh cho lhyi tyamp goeus. Nyamoq gas Mangso dah Lo lyis dvlhain doms taplhangh las moqphung xikkhonh mas maphauh madanh xoqphuh nhang yvmvyah nyamoq lyis nhaiqlom doms thaiq das cho khasoeh eq ma gis bweh lo. 7 Nyoshoq lhain wus gyon dah mau jeis lyis lhom yoeus las phuk tsungh bang dah xiklyis vkyuh bos dah jyo yuk kuh nhang dah nyeisjvng lyis Mangso shvmanh jyehjuh tsoq dyei nyeis. 8 Nghuot laus eq hauh nyeisjvng gas zoeu zains yahge nyoq kyingh dvyuk los nhang lhyi ka chah vkyuh ma bos thoq lyis magoh Mangso dah gyukphoh nhoengh zis yahge nyi mas ngheq tyamp zis xauh das. 9 Jyetdap bang eh, ngamoq heisoeh taiq laus eq, namoq yah sen lha ngamoq nghamh kuk nyeis. Namoq gas hau khyuot yoeus cho yah sen lha zes gis dah shvmanh jyehjuh xauh yoeus goeus cho lhyi ngamoq seq. 10 Khasoeh ge lyis Mangso ka lyi ma chi soeu ma nghuot. Nyang gas namoq wons wuq los goeus dah muhzoh lyis eq, namoq Yhensain lhyi jyetdap cho Chixoeuq das xiklyis lai loh goeus shishenh lyis yah gvshih jweh shoq Khristan nyang changh pangh goh cho lhyi eq, Mangso ma tohnyhik dyei. 11 Yang omes dah cho zainsmuh gas namoq dah nghamhloms cho dyingh los shoq yuk khanghmuh gas vsainnyang omes ehnyet lyis thang thank jweh shoq goeng joq nhang das cho nghuot. 12 Ngamoq gas namoq lyis lan bang ma bweh nhang mes. Nghuot laus eq lomsjingh zis yah ehnyet xing bang bweh las Mangso dyei dah vso vlho kham yoeus bang teh namoq lyis bweh los nhang mes. 13 Mangso Abraham lyis dangthoengh toh uhlyis, nyah dangthoengh vgus kuot das cho maukhi toh. Nyah thoq lyis zes soeu ma bos lo las, nyah nyings yoeus zis yah maukhi toh. 14 Mangso ka, Ngos nvng lyis jyoengh shvmanh dyei das; vnyau vshih lyis jebais los nhang das, ge. 15 Abraham gas jhen las langh nyeis yvmvyah, Mangso dah dangthoengh yah sen lha vso lhyi xauh kham yoeus. 16 Dius gas maukhi uhlyis vsainnyang thoq lyis zes kuh soeu dah nyings yoeus las mau gyangh khi zis yahge nyamoq dah phyen-goh cho dvnganh lyis hau maukhi dang yah doengs nhang, dye nhang. 17 Mangso ka nyang nghamh toeuq toh cho ma thaiq loh nhang cho lhyi dangthoengh vso vlho kham yoeus bang lyis bvng bvng Chixoeuq mes. Housoeh las nyah dangthoengh mas maukhi dang lhungh kat. 18 Housoeh hau dangthoengh yahge maukhi dang aiq ja yah ma gis thaiq loh cho nghuot zis yahge houyah sen lha Mangso ka hwah dang yoh taiq zis ma nghuot. Housoeh las nyang lyis nges las sam cho xauh yoeus bang ge yang gas, yang lyis dyei dah nghamhloms cho lhyi goeng goeng zwi zains toh das nyhenshang yomdyei cho nyoshoq xauh yoeus goeus. 19 Yang gas hau nghamhloms cho lhyi yah kang dwis cho nyhenshang jywangh dvkoeuq teh xauh kham yoeus goeus. Hau nghamhloms cho ka sam joq goeng joq las maukhung yhenmuh khau mha, gos toh dah misseh vkhau mha jweh wvng loh goeus. 20 Yhensain Yesu gas yah gungsthaiq hauh joqyos mas, yah xik pheh jweh wvng nyeis goeus las Melkhizedek dah gyamh huon cho yah, vcaiq vto phudyei zainsmuh bweh loh goeus.
1 Hai Salem hwankti Melkhizedek gas nyhang thank Mangso dah phudyei soeu nghuot. Abraham gas hwankti nyei yuk lyis zan ung lha tauh los uhlyis, Melkhizedek gas nyang lyis e zes las shvmanh dyei. 2 Abraham eq nyang chi los dah lvnyhvp dvnganh masyah ciboms dvboms Melkhizedek lyis gvm dyei. Melkhizedek ge dah nyings cangxeih vjyuk gas, Dan dah Hwankti nghuot las nyang gas Salem hwankti nghuot yvmvyah, Nyenstap Hwankti ge zis eq nghuot. 3 Melkhizedek dah ungwes uwus, phauh thyeih dius caiq ge zis ma bos, buisnyeis vpom yahge vcaiq thank ge zis ma bos yvmvyah, Mangso dah Lo yah doeus shoq bweh los las, vcaiq vto nyeis dah phudyei soeu nghuot. 4 Yah dah nyings hoeuh phauh thyeih Abraham gas nyang zan ung los lvnyhvp masyah ciboms dvboms Melkhizedek lyis dyei lyis, housoeh dyei zis kham yoeus soeu ka kha iq kuhxing soeu nghuot das zis gas namoq nghamh suon yoeuh geh. 5 Phudyei bang nghuot dah Lewi vnyau vshih jens gas nyamoq nyang dah vnyau jens ge dah Israel vnyau jens jyank masyah ciboms dvboms khywi yoeus das xiklyis hau Lyi mas nyamoq lyis taiq toh goeus. Hau Israel vnyau jens eq Abraham dah vnyau vshih dvtsain nghuot. 6 Melkhizedek gas Lewi vnyau mas zis ma nghuot laus eq Abraham jyank masyah ciboms dvboms kham yoeus las, Mangso jyank masyah dangthoengh yoh toh soeu Abraham lyis shvmanh dyei. 7 Shvmanh dyei soeu ka shvmanh zis kham yoeus soeu thoq lyis kuh zis gas cha khamkhvv chank ma bos. 8 Phudyei bang khyvlyis yah ciboms dvboms khywi yoeus zis gas seq shei dah dius jens khywi yoeus zis nghuot. Nghuot laus eq Melkhizedek kui yoeus dah ciboms dvboms gas lhaihtoh dang mas taiq zis yah dvyhangteh kang dwis nyeis soeu kui yoeus zis nghuot. 9 Ciboms dvboms zo dah Lewi gas Abraham dah loq cho yah ciboms dvboms Melkhizedek lyis dyei goeus oen yoh taiq. 10 Khasoeh ge lyis Melkhizedek gas Abraham lyis zes langh uhlyis Lewi ma khoeu shih, nyah phauh thyeih Abraham dah thyikdom mas dvnghuot shih oen yoh taiq. 11 Israel jens lyis lyi dyei uhlyis Lewi vnyau phudyei gyamh huon yvmas vpom toh las dyei goeus. Gvshih Lewi vnyau dah phudyei bang wons dah muh dyinghjet goeus nghuot lyis gas, Aron vkoq masyah ma nghuot, Melkhizedek dah gyamh huon zis kham yoeus dah gohtoeu phudyei dvyuk doms thuq los chah zis ma nghuot. 12 Khasoeh ge lyis hau phudyei gyamh huon yvlyis thaiq tyamp lyis gas, lyi eq thaiq tyamp chah das. 13 Hai gvshih taiq nyeis cho yah sen soeu, yah Yhensain ka gohkoq masyah los zis nghuot las hauh vkoq mas hank eq phudyei khyvlyis khanhamp eq phuqsoe yoeuh zis ma nghuot. 14 Nyang gas Yuda vkoq masyah khoeu los goeus yvlyis dvnganhmoq seq, Moshe ka phudyei bang yah sen lha taiq uhlyis Yuda vkoq dah cho cha eq ma taiq toh. 15 Melkhizedek teh dah gohtoeu phudyei soeu thuq los yvmvyah haih cho zes las dede nghuot. 16 Hauh soeu ka phudyei muh mas dius yah kuot toh lyi cho khyvlyis toeuq kat toh zis xauh soeu ma nghuot; mathank magons kang dah yomsoq yah toeuq kat toh zis xauh soeu dvnghuot. 17 Khasoeh ge lyis lhaihtoh Dang mas taiq zis gas, Nvng gas Melkhizedek yhangteh vcaiq vto phudyei soeu nghuot, ge. 18 Xiklyis dah lyi gas yomnhuk las vkyuh ma bos lo yvmvyah yoeus tyamp zis xauh goeus. 19 Khasoeh ge lyis Moshe dah lyi gas chah cho lhyi eq dyinghjet shoq ma yoh kuot. Gvshih gas hau zes gis dah nghamhloms cho dyei goeus las hauh gvng mas yang Mangso jyank mas yoh ni wvng loh. 20 Hauh thoq lyis Mangso maukhi toh dang eq bos shih. Gohyhamh bang lyis phudyei bang kuot nhang uhlyis housoeh teh maukhi dang ma bos. 21 Nghuot laus eq Yesu gas maukhi dang yah phudyei soeu bweh los goeus. Mangso nyang lyis taiq zis gas, Nvng gas vcaiq vto phudyei soeu nghuot das, ge Yhensain maukhi dangthoengh toh zis ma doms thaiq lo, ge. 22 Heisoeh muh huon cho mha ma doeusgoh yvmvyah Yhensain Yesu gas zes gis dah thanghchvp lyis pauh toh dyei zis bweh goeus. 23 Tsai, ma doeusgoh cho gohtoeu bos shih. Gohtoeu phudyei bang gas nyoshoq nghuot. Khasoeh ge lyis nyamoq gas shei loh yvmvyah nyamoq dah muh lyis ma yoh tsoq kuot. 24 Nghuot laus eq Yhensain Yesu gas vcaiq vto kang dwis nyeis yvmvyah nyah phudyei muh eq dius dvyuk yuk dah loq mas thot thaiq loh zis ma nghuot. 25 Housoeh yvmvyah nyang gas nyang lyis nges las Mangso jyank mas wvng los bang lyis khanhamp eq khyuot yoeus das yomsoq bos: khasoeh ge lyis nyang gas nyamoq nyhenshang Mangso jyank mas khyoeuq dyei das zis vjangh dwis nyeis. 26 Housoeh las Yhensain Yesu gas yang mas bweh nyeis, chah nyeis cho lhyi tyink dyei nyeis, yah xiklyis gis thank phudyei zainsmuh nghuot. Nyang gas yunghshop gyingshang lha, nyang mas shuot cho ma bos, yaunos ma dap. Nyang gas yaunos dap bang masyah kangh yoeus zis xauh las maukhung nyhang mha jweh shoq chunghtoqh zis xauh soeu nghuot. 27 Nyang gas gohtoeu phudyei zainsmuh jens teh cangxeih lyis nyah yaunos xiklyis, hauh thang lhyi dius nyau jens dah yaunos xiklyis nyeih khanghmuh lomhxangh lainh chah zis ma nghuot. Nyah gungs lyis lomhxangh kuot las phudyei uhlyis vcaiq vto xiklyis dvlhain lhyi yah dye shoq phudyei tyamp goeus. 28 Moshe dah lyi gas yomnhuk las ma dyingh ma jet dah dius lyis phudyei zainsmuh muh huon toh. Nghuot laus eq lyi toh thang lhyi jweh los, Mangso maukhi lha dyei toh dangthoengh gas vcaiq vto dyinghjet dah Lo lyis Phudyei Zainsmuh dah muh mas toh.
1 Gvshih ngamoq taiq kyoh nyeis cho dah dang vgungs gas, yang gas maukhung mha Gywes So Shoenkkhyi yah dyingh dah hwankti tank loqyos shot pheh tsung toh dah Phudyei Zainsmuh yoh toh. 2 Nyang gas gyingshang thank joqyos mas Phudyei Zainsmuh muh wons wuq nyeis. Hauh joqyos gas maukhung ge, dius yah ma kuot, Mangso nyang kuot toh dah zvng gyingh nghuot. 3 Phudyei Zainsmuh khanghmuh gas jyungshuk yahge gaunyhauq phudyei lyis Mangso jyank mas phudyei das xiklyis toeuq kat toh bang nghuot. Houyah dvyhangteh yah Phudyei Zainsmuh eq nyang mas lomhxangh lainh das xiklyis phudyei dvja chah joq. 4 Nyang nyeisjvng thoq mas kyingh dvnyeis lyis gas, phudyei soeu khasoeh eq yoh duot das zis ma nghuot. Khasoeh ge lyis Yuda lyi yah dvyhangteh jyungshuk yah phudyei dah phudyei bang nyeis goeus. 5 Phudyei bang khyvlyis nyamoq kuot dah muh gas maukhung mha paiq cho dah yikhyoh dah siyet dvnghuot. Moshe kuot los dah muh eq houyah dvyhangteh nghuot. Khasoeh ge lyis Moshe ka hau gyingshang dah Zvng kuot bah ge lyis, Mangso nyang lyis boms thoq mas, ngos nvng lyis chixoeuq goeus yikhyoh vgus hau dvnganh yoh kuot shoq zaih nyeis aq, ge taiq yvmvyah nghuot. 6 Nghuot laus eq gvshih gas gohtoeu phudyei bang yoh dah muh thoq lyis zes dah phudyei muh Yesu lyis dyei goeus. Mangso yah dius dah jo mas Yhensain Yesu kuot dyei dah thanghchvp lyi gas zes gis dah thanghchvp nghuot. Khasoeh ge lyis hau thanghchvp gas xik lyis thoq lyis zes gis dah dangthoengh mas vpom toh. 7 Cangxeih thanghchvp mas tswi ma bos zis jyoeng lhyi ka thang lhyi aiq vkoeuq lyis kuot toh dais ma bos lo. 8 Nghuot laus eq Mangso ka nyah dius nyau lyis yobos huon zoh lyis taiq zis gas, Israel vnyau jens yah eq, Yuda dius nyau jens yah eq thanghchvp saiq toh das buisnyeis jweh los das. 9 Hau thanghchvp gas, Ngos nyamoq lyis loq masyah she lha, Egutu mau masyah shwih los uhlyis ngos nyamoq dah phauh thyeih moq yah toh dah thanghchvp yah doeusgoh das zis ma nghuot. Nyamoq ngos yah toh dah thanghchvp mas dang ma jings yvmvyah, Ngos eq nyamoq lyis ma yoeuh ma gomh, ge Yhensain taiq. 10 Gvshih hai thanghchvp gas jweh los das buisnyeis dah thang lhyi Israel vnyau jens yah Ngos toh das thanghchvp nghuot. Ngos nyamoq dah ehnyet khau mha ngah lyi kat toh dyei das, Nyamoq nhaiqlom mas lhaih toh das. Ngos nyamoq dah Mangso duot das las, nyamoq eq ngah dius duot das. 11 Nyamoq mas hank eq vsainnyang yhenkyoh changh lyis eq, vsainnyang boekyis changh lyis eq, Mangso lhyi seq geh oen jyauh chah das zis ma nghuot: khasoeh ge lyis ngis thank masyah kuh thank jweh shoq dvnganhmoq ngos lyis tsain seq das. 12 Ngos nyamoq dah yobos lyis khyuot dyei las, nyamoq shuot cho lhyi ma soh dyei lo das, ge Yhensain taiq. 13 Hau thanghchvp saiq dah cho taiq dah vjyuk gas, Mangso ka cangxeih thanghchvp lyis vcauh kuot tyamp cho nghuot; cauh las yom tyamp zis cha laus eq ma nyangh lyis wui das.
1 Cangxeih thanghchvp mas paiq cho yah sen dah thungh lyi bos zis yah dvyhangteh dius yah kuot dah paiq joqyos eq bos chah. 2 Khasoeh ge lyis houmha zvng dvkoeuq kuot toh; hauh dah cangxeih vyvp mas nyi tuonh gus yahge Mangso lhyi kyangh dah phudyei ohlhyoq kih dah kih gus joq. Hauh yvlyis gyingshang joqyos ge. 3 Tsai, aiq vyvp oen das gosseh dah vkhau pheh yvp lyis gyingshang thank joqyos ge. 4 Hauh yvmas xangh ngheq dah xing phon yahge dvkoeuq gonh xing shauq toh dah Thanghchvp Kwi bos. Hauh kwi khau mha mana ohlhyoq bos dah xing auh eq, vhuq tsain thot los Aron dah lhamloq eq, lyi tsain lhaih toh dah luklhyoq dvzomh eq tsain bos. 5 Hauh kwi thoq mas dungs dap dah Kherubim silho aiq koeuq joq las Mangso nyeis dah vlho Chixoeuq. Nyamoq dah dungs lyis yaunos khyuot dyei joqyos ge, kwi nghop thoq mas lhywa nghop toh. Haih cho dah vjyuk lyis jyuk jyuk taiq kyoh chank ma bos. 6 Hai paiq cho thungh yah dvyhangteh dye sont goeus ya, phudyei bang gas Mangso dah phuqsoe muh lyis kuot das xiklyis, zvng khau cangxeih jweh dah vyvp mas nyeih yau nyeih tsain wvng. 7 Nghuot laus eq zvng dah vkhau yvp mas gas, phudyei zainsmuh nyang kyingh, nyah xiklyis eq, dius dah shuot cu cho xiklyis eq, phudyei das suih chi lha dvzvn dvlhain dvyoh wvng loh. 8 Haih thungh yah dvyhangteh cangxeih vyvp goeng joq dvchank gas, gyingshang thank joqyos mas wvng das cho eq ma bangh shih das cho Gyingshang Dyos gas bvng bvng jyauh nyeis. 9 Haih cho ka haq caiq dah cho Chixoeuq dah dangtoeuq dvkoeuq nghuot. Hauh vjyuk gas Mangso lhyi phudyei dah jyungshuk yahge gaunyhauq phudyei gas paiq soeu dah ehnyet lyis yoh dyinghjet nhang zis ma nghuot. 10 Hauh cho ka zonoms, shuk phoh yahge cheihshang cho vja ja yah sen lha kuot zis kyingh dvnghuot. Hauh zis gas Mangso dah vsaiq doms soq das caiq ma jweh shih gyo lyis toh langh, gungsshoh yah sen lha chank das lyi dvtsain nghuot. 11 Nghuot laus eq Khristu gas, gvshih yang xauh kham zo nyeis goeus dah nyeisgis yaplhoq cho dah phudyei zainsmuh khyvlyis jweh los goeus. Nyang phudyei muh kuot dah zvng gas loq yah ma kuot toh yvmvyah hai gvnkhanh toh dah nyeisjvng yah eq ma sen, zes kuh las dyinghjet dah paiq zvng nghuot. 12 Khristu gas Gyingshang Thank Joqyos khau mha vcaiq vto xiklyis dvlhain lhyi yah dye shoq wvng uhlyis, phudyei das xiklyis shvbeq, noeulu dah suih ma chi wvng, nyah suih yah wvng las yah nyhenshang vcaiq vto khyuot yoeus cho xauh yoeus goeus. 13 Shvbeq yahge noeuchoq lu dah suih, ngheq tyamp goeus ge noeu pon dah nyiyvp yah vwot v-oeu xauh bang dah thoq mas sanh gyuon lyis nyamoq dah vwot v-oeu bweh yvlyis yoh gyingshang nhang zis jyoeng nghuot lyis gas, 14 Khristu dah suih gas hauh thoq lyis yoh cheihshang dyei ma nghuot lhyeh? Khristu gas hau vcaiq vto Dyos yah nyah gungs lyis mesyos ma bos phudyei khyvlyis Mangso jyank mas phudyei goeus. Dwis nyeis Mangso lhyi yang yoh phuqsoe shoq Khristu dah suih gas yah ehnyet nhaiqlom lyis vkyuh ma bos paiq dah lyi thungh vshei lhyi chank nyeis masyah cheihshang yoeus das. 15 Haih cho gvng mas Mangso yah lui yoeus zis xauh bang gas, Mangso dangthoengh dyei toh goeus vcaiq vto shvmanh jyehjuh vso vlho xauh kham yoeus bas jungh ge, Khristu gas thanghchvp vsaiq lyis kuot dyei goeus. Housoeh kham yoeus das toeuh xauh yoeus zis gas, xik lyis dah thanghchvp khau mha nyeis uhlyis shuot cu dah yaunos masyah lhuiq kat das nyhenshang shei kham cho dvkoeuq bweh los goeus yvmvyah nghuot. 16 Vso vlho yah sen dah thanghchvp lyis bweh nhang das xiklyis gas thanghchvp chvp toh soeu jyoengh shei goeus cho kanghjyoeng yoh chixoeuq chah. 17 Khasoeh ge lyis thanghchvp toh soeu dwis nyeis shih lyis gas thanghchvp ma gis bweh shih. Thanghchvp toh soeu shei lhyi dvyoh doengs. 18 Housoeh las cangxeih thanghchvp lyis yangh suih chi lha dvgoeng joq nhang. 19 Cangxeih lyis Moshe ka nyah lyi mas bos tying ya tying toh zis dvnganh dius jens lyis dye taiq kyoh lyis, zoek zoek nes dah yvng mauh yahge shomnhamh kyang tsain yoeus las noeulu yahge shvbeq suih lyis jeis yah lhoeuq las lyi maussauh lyis eq, dius dvnganh lyis eq sanh gyuon. 20 Hauh thang lhyi nyang taiq zis gas, Heika Mangso namoq lyis domsyos gyo las chank kuot das nyhenshang toh dah thanghchvp lyis kyihau tap toh dah suih nghuot, ge. 21 Houyah dvyhangteh Moshe ka paiq dah zvng lyis eq, paiq cho mha yhung dah vyhang dvnganh lyis eq hauh suih yah sanh gyuon. 22 Lyi khyvlyis yah gas vyhang vluk dvnganh lyis suih yah yoh cheihshang lha, suih huot lyis kyingh yaunos dvkhyuot dyei. 23 Maukhung mha vkhang yah joq goeus dah vyhang dah tap yoeus yvlyis housoeh teh cho yah yoh cheihshang; nghuot laus eq maukhung vyhang gyingh lyis gas hauh thoq lyis zes gis dah lomhxangh lainh zis yah cheihshang chah. 24 Khasoeh ge lyis Khristu gas, maukhung mha dah yikhyoh yet dvnghuot las dius loq yah kuot toh dah Gyingshang Joqyos mas ma wvng, maukhung mha nyang wvng las gvshih yah gungsthaiq Mangso dah xikkhonh mas dede thuq los goeus. 25 Yuda phudyei zainsmuh gas gaunyhauq suih chi lha zvn yau zvn hau gyingshang thank yvp mas gyangh wvng. Nghuot laus eq Khristu gas nyah gungs lyis nyoshoq lhain wvng phudyei zis ma nghuot. 26 Housoeh phudyei nghuot lyis gas mungkvn cangxeih gvnkhanh yoq lyis yah nyoshoq lhain shei kham kham kuot das; nghuot laus eq gvshih gas nyeisjvng caiq thank das zis ni los shishenh lyis vcaiq vto nyhenshang dvlhain lhyi yah dye shoq jweh los las nyah gungs lyis lomhxangh lainh zis yah yaunos lyis wes tyamp goeus. 27 Cangsoeu dius yuk khanghmuh gas dvlhain shei chah das las hauh thang lhyi Mangso yah soetuon zis xauh das. 28 Houyah dvyhangteh Khristu eq dius nyoshoq dah yaunos lyis dvlhain lhyi yah dye shoq wons tyamp das xiklyis nyah gungs lyis lomhxangh kuot las phudyei dyei goeus. Yaunos wons tyamp dyei cho yah ma sen, nyang lyis langh nyeis bang lyis khyuot yoeus das nyhenshang aiq vlhain thuq xoeuq das.
1 Yuda jens dah lyi gas vgyingh dah yikhyoh gyingh ma nghuot, jweh los das hau nyeisgis yaplhoq cho dah siyet dvnghuot. nyamoq gas vjangh phudyei nyeis dah lomhxangh yah kyingh zvn yau zvn tsain phudyei. Housoeh las haih lomhxangh yah Mangso jyank mas wvng loh bang lyis hauh lyi gas nyamoq lyis dyinghjet bang khasoeh yoh bweh los nhang das lah? 2 Mangso lhyi paiq nyeis bang lyis yaunos masyah yoh cheihshang goeus nghuot lyis gas, nyamoq yaunos yoh shih bang nghuot oen khanhamp eq ma nghamh lo das las phudyei cho dvnganh eq no tyamp lo das zis nghuot. 3 Nghuot laus eq gvshih gas zvn yau zvn phudyei dah lomhxangh gas dius jens lyis nyamoq dah yaunos dah cho soh nhang nyeis. 4 Khasoeh ge lyis noeuchoq yahge shvbeq suih gas yaunos lyis khanhamp eq yoh yoeus tyamp dyei zis ma nghuot. 5 Housoeh yvmvyah Khristu gas hai mungkvn mas jweh lyih das zis cvvq uhlyis Mangso lhyi taiq zis gas, Nvng gas lomhxangh yahge jyungshuk lyis ma o, Nvng ngah xiklyis gungs sont toh dyei. 6 Phon thoq mas dah doeu gonh ngheq dyei dah gaunyhauq lomhxangh yahge yobos khyuot lomhxangh lyis nvng nhaiq ma doeus. 7 Hauh uhlyis ngos taiq zis gas, Sauhdain mas ngah cho lhaih toh zis yah dvyhangteh, Mangso eh, Nvng nhaiqtap khyvlyis kuot das zis gvshih ngos heimha jweh los oen goeus, ge. 8 Tsai, nyang cangxeih taiq zis gas, Phudyei dah lomhxangh yahge jyungshuk lyis eq, phon mha gaunyhauq ngheq dyei zis yahge yaunos khyuot lomhxangh lainh zis lyis eq lyi yah dvyhangteh phudyei nghuot laus eq hauh lomhxangh lyis Yhensain nvng ma o, nhaiq doeus zis ma nghuot, ge. 9 Hauh thang lhyi nyang taiq zis gas, Mangso eh, nvng nhaiqtap khyvlyis kuot das zis gvshih ngos heimha nyeis, ge. Housoeh las Mangso ka xik lyis phudyei dah lomhxangh vcauh dvnganh lyis yoeus tyamp las, Khristu dah phudyei yvlyis hauh joqyos mas gungsthaiq kat las goeng joq nhang. 10 Yesu Khristu gas Mangso kuot nhang mes dah nhaiqtap khyvlyis yah dvyhangteh, nyah gungs lyis vcaiq vto xiklyis dvlhain lhyi yah dvnganh dye shoq phudyei gvng mas, yang dvnganh gas yaunos masyah cheihshang kat zis xauh goeus. 11 Yuda phudyei soeu khanghmuh gas nyah dah phudyei muh lyis nyeih yau nyeih wons wuq zis yah phudyei cho dvja kyingh lyis nyoshoq lhain kuot nyeis. Nghuot laus eq haih phudyei dah lomhxangh gas yaunos lyis khanhamp eq ma yoh yoeus tyamp dyei. 12 Khristu gas yah yaunos khyuot dyei das nyhenshang vcaiq vto xiklyis vkyuh bos dah lomhxangh dvkoeuq kyingh lyis yah dye lainh lyis Mangso dah loqyos shot pheh loh tsung toh goeus. 13 Gvshih nyang gas houmha nyah jeswus jens lyis nyah khyei o mha nangte khyvlyis Mangso yah toh dyei shoq langh uhjyangh nyeis. 14 Khasoeh ge lyis nyang gas phudyei dah lomhxangh dvkoeuq yah yaunos masyah cheihshang kat zis xauh goeus bang lyis vcaiq vto xiklyis dyinghjet bang bweh los nhang. 15 Hau gyingshang Dyos eq yang lyis kanghjyoeng kat dyei: Nyang cangxeih taiq zis gas, 16 Haih zis gas hau jweh los das buisnyeis lyis nyamoq yah ngos toh das dah thanghchvp nghuot. Ngos ngah lyi nyamoq dah nhaiqlom mas kat dyei das las, nyamoq dah ehnyet mas lhaih toh das, ge hauh Yhensain taiq. 17 Hauh thang lhyi nyang taiq zis gas, Nyamoq dah yaunos yahge ma shop muh lyis ngos ma comh dyei lo das. 18 Housoeh las yaunos khyuot zis xauh goeus ya, yaunos khyuot dyei das xiklyis phudyei das chank ma bos lo. 19 Housoeh yvmvyah ngah boekyis eh, Yesu shei kham gvng mas yang gas hau gyingshang thank joqyos mas wvng das xiklyis dyinghjet dah toeuh yoh goeus. 20 Nyang gas nyah gungs ge dah yhenmuh gosseh lyis jyweq bangh loh las Mangso dah xikkhonh mas bangh loh, dwis nyeis cho vsaiq dvkoeuq yah xiklyis phank toh dyei goeus. 21 Yang gas Mangso dah yhen lhyi guon das dah Phudyei Zainsmuh dvyuk yoh. 22 Housoeh yvmvyah yang gas yaunos bos ge sohseq dah ehnyet lyis cheihshang lha, yah gungsdom lyis eq lhoqshang dah jeis yah dye cheihshang lhyi, yobos ma bos dah ehnyet, goeng dah lomsjingh cho bos zis yah Mangso jyank mas tsain ni loh goh. 23 Yang rhen dah lomsjingh cho dah nghamhloms cho mha goeng goeng zwi zains toh goh. Khasoeh ge lyis Mangso ka nyang toh dah dangthoengh mas wontang soeu nghuot yvlyis yang yoh loms. 24 Yang gas nyang changh nyang pangh thuk goh das nyhenshang, jyetdap ehnyet Chixoeuq goh zis yah gis dah muh chank kuot das xiklyis nyang changh nyang nghamh suon yoeuh goh nyeis goh. 25 Dvgeh zop huom dah thungh lyi lyis dvyhamh bang toh tyamp loh. Yang gas housoeh ma kuot kuot Yhensain doms jweh lyih dah buisnyeis ni los nyeis yvlyis namoq seq yvmvyah namoq nyang changh zes las yomdyei goh nyeis goh. 26 Khasoeh ge lyis yang gas hau jyoeng cho lhyi seq las dye lhom yoeus thang lhyi, pa-i yaunos doms kuot loh nyeis lyis gas, yah yaunos xiklyis lainh das lomhxangh bos lo das zis ma nghuot. 27 Yang gas jweh los das soetuon cho yahge Mangso lhyi tyixo bang lyis ngheq jyomh tyamp das gyukphoh nyi lyis gyuk zis yah langh nyeis das cho kyingh dvbos lo. 28 Moshe dah lyi lyis domsyos ma gyo soeu hank laus eq kanghjyoeng aiq yuk somh yuk dah dang yah yobos bos ge soetuon zis xauh lyis nhaiq ma nyen lo sat zis xauh. 29 Housoeh lyis gas Mangso dah Lo lyis chaxwe ma nhang kuot soeu, vsainnyang lyis yaunos masyah cheihshang dah Mangso thanghchvp suih lyis pvlhyahlyoeus kuot soeu, jyehjuh dyei dah Dyos lyis ma phauh gis kuot soeu ka khasoeh nghuot das lah? Nyang xauh mon dah joeng cho ka kha iq zes xungh das lah! Dvnghamh yoeuh geh. 30 Khasoeh ge lyis, Ngos lvto phuk das ge las eq, Yaunos dah uhkung phauh ngos laiq dyei das. Yhensain ka nyah dius jens lyis soetuon das, ge taiq soeu hank nghuot yvlyis yang seq. 31 Dwis nyeis Mangso dah loq khau mha gyoh cho ka svsoh gyuk chank bos cho nghuot. 32 Lai loh goeus shishenh lyis namoq khasoeh teh bang nghuot yvlyis doms soh nyeis geh. Hauh shishenh lyis Mangso dah bvng zis xauh kham yoeus thang lhyi shanghsenh cho nyoshoq xauh kham lai los goeus. Nghuot laus eq namoq yomkat thoenk yap joq gvng mas hauh zis namoq lyis ma yoh ung. 33 Namoq nyang moqphung xikkhonh mas jwangh zis yahge shoeuhshih cho dvlhain lhain xauh lai loh goeus. Tsai gohtoeu shishenh lyis gas namoq teh shoeuhshih zis xauh nyeis dah dyenschangh jens shot pheh nyeis las yaukyenh cho chomp kham khyvlyis yah yomdyei zis yah pangh goeus. 34 Namoq gas thung lungh zis xauh bang dah shanghsenh yvlyis nhaiq bos taink dyei goeus. Namoq dah vyhang lhuot loh zis xauh uhlyis eq gausyis zis yah somh kham goeus. Khasoeh ge lyis hauh thoq lyis zes gis las vjangh goeng joq dah vyhang dvja yoh yvlyis namoq seq. 35 Housoeh yvmvyah namoq dah womh ehnyet lyis vchi lhaiq kat goh. Housoeh lyis namoq phauh shangh zainsmuh xauh yoeus das. 36 Mangso o khyvlyis chank kuot das zis yahge nyah dangthoengh yah dvyhangteh vkyuh xauh kham shoq namoq kuhxing ehnyet yah jhen chah nyeis. 37 Khasoeh ge lyis lhaihtoh dang mas taiq zis gas, Dvsoq lyis jweh los das soeu ka, ma nyangh lyis jweh los das. Nyang ma sheq nyeis lo das. 38 Ngah dah dan bang gas lomsjingh zis yah dwis nyeis das. Nghuot laus eq nyamoq mas dvyuk nungsdoms lyis gas Ngos nyang mas nhaiqdoeus das zis ma nghuot, ge. 39 Yang gas nungsdoms las dyuk loh bang ma nghuot; Lomsjingh las khyuot yoeus zis xauh bang dvnghuot.
1 Lomsjingh ge zis gas yang nghamhloms dah vyhang ka jyoengh bweh das ge cho lhyi nghamhnywe nyeis las ma nyvng dah vyhang ka jyoengh joq oen seqgyo las lhom yoeus yvlyis ge. 2 Gohlhain dah dius jens gas nyamoq dah lomsjingh cho gvng mas Mangso yah gausyis lhom yoeus cho lhyi xauh yoeus. 3 Ma yoh nyvng dah vyhang mhayah yoh nyvng dah vyhang bweh los das xiklyis Mangso dah dang yah hai dwis ya dwis yvlyis gvnkhanh toh goeus cho yang yoh seq zis gas hau lomsjingh gvng mas nghuot. 4 Lomsjingh zis yah Abel gas Ka-in dah lomhxangh thoq lyis zes gis dah lomhxangh lainh goeus. Mangso ka nyah lomsjingh cho lhyi yoeuh las nyang lyis dan soeu ge lhom yoeus zis xauh goeus. Khasoeh ge lyis nyang lomhxangh lainh dah jyungshuk lyis Mangso nyang nhaiqdoeus dyei goeus yvmvyah nghuot. Abel shei goeus laus eq nyang lomsjingh gvng mas gvshih jweh shoq nyang dang taiq nyeis shih. 5 Lomsjingh gvng mas Enok gas ma shei shei Mangso yah thot yoeus loh zis xauh. Nyang lyis Mangso yah thot yoeus loh goeus las nyang lyis hank eq xo ma nyvng lo. Mangso yah thot yoeus zis ma xauh shih lyis, Enok gas Mangso dah nhaiqdoeus soeu nghuot, ge Jyomp maussauh mas taiq toh. 6 Lomsjingh zis ma bos lyis gas hank eq Mangso lhyi nhaiq ma yoh doeus nhang. Khasoeh ge lyis Mangso jyank mas los soeu hank laus eq Mangso nyeis zis yahge nyang lyis chank xo bang lyis jyehjuh dyei nyeis oen yvlyis lomsjingh soeu nghuot chah das. 7 Jweh los das shishenh lyis bweh das cho ma nyvng shih dah vyhang yah sen lha Mangso zaih nhang yvlyis Noa xauhgyo zis gas nyang lomsjingh gvng mas nghuot. Nyang gas Mangso dah dang lyis domsyos gyo zis yah sangpho dvlom tsuk las nyang yahge nyah yhenbang gas khyuot yoeus zis tsain xauh goeus. Housoeh las mungkvn lyis nyang dang thang thyet las, Noa gas lomsjingh zis yah sen, dan cho dah vso vlho kham yoeus zis nghuot. 8 Abraham gas Mangso nyang lyis dyei das ge dangthoengh toh mau pheh thuq loh das xiklyis lomsjingh cho ka nyang lyis domsyos gyo nhang. Housoeh las nyang khapheh loh nyeis zis nyang ma seq laus eq nyah mau masyah thuq gyoh loh. 9 Mangso dangthoengh toh dah mau mas nyang gas boenghwus teh lomsjingh zis yah nyeis yenh. Nyang gas Mangso jyank masyah nyang teh dangthoengh vso vlho chomp kham yoeus dah Isak yahge Yakop teh muga zvng mas nyeis. 10 Khasoeh ge lyis Abraham gas Mangso yah vzwvng kuot las goeng toenk dah vpom yah tsuk toh goeus dah wus lyis nghamhloms las langh nyeis. 11 Abraham gas mang goeus, Sara nyang eq nyenhkyi lai goeus las lo ma gis yoh lo. Nghuot laus eq Abraham gas lomsjingh zis yah uwus bweh loh goeus. Mangso ka nyang dangthoengh toh zis yah dvyhangteh wontang dah Yhensain nghuot yvlyis Abraham loms. 12 Abraham gas jyoengh shei goeus yukgis teh nghuot joq laus eq, nyang dvyuk masyah jebais los dah lo jens gas maukhung mha dah kyi jens yahge nvmukdra yvm mas ma thoq suon lo dah sihsho teh nyo dah lo jens nyeis dyos los. 13 Haih bang dvnganh gas lomsjingh yvmas shei loh goeus. nyamoq gas Mangso dyei toh dah dangthoengh yah sen dah vso vlho ma xauh lhom yoeus. Nghuot laus eq hauh yvlyis we masyah nyvng kat zis yah lhom yoeus. nyamoq gas hai nyeisjvng thoq mas lvbaus yahge boengh dvtsain duot yvlyis rhen yoeus. 14 Housoeh teh cho lhyi tsain taiq bang gas nyamoq nyang nyeis das nyhenshang munghdan dvkoeuq xo nyeis zis gas dede nghuot. 15 nyamoq thuq khoq mau cho lhyi nghamh suon yoeuh las soh nyeis zis ma nghuot. Hauh mau mas tauh loh mes lyis yoh loh das toeuh yoh toh. 16 Gvshih gas hauh thoq lyis zes dah maukhung mha dah munghdan lyis soh nyeis. Housoeh yvmvyah Mangso ka nyamoq dah Mangso oen das yvlyis xoq zis ma nghuot. Khasoeh ge lyis Mangso ka nyamoq xiklyis nyeis das joqyos dvkoeuq sont toh dyei. 17 Abraham gas Mangso shi yoeuh zis xauh uhlyis, Lomsjingh zis yah lo Isak lyis phudyei jyungshuk kuot las phudyei. Abraham gas Mangso jyank masyah dangthoengh kham yoeus soeu nghuot laus eq nyang gas nyah loteh lyis lomhxangh kuot las phudyei das zis gaunyhauq nghuot. 18 Mangso ka Abraham lyis, Ngos nvng lyis dangthoengh toh dah vnyau vshih gas Isak masyah gyoh das, ge. 19 Isak lyis shei masyah Mangso yoh dwis toq kat ge Abraham nghamh suon zis yah dvyhangteh jyoengh Abraham gas Isak lyis, shei masyah doms xauh yoeus. 20 Lomsjingh zis yah Isak gas jweh los das shishenh lyis xauh kham yoeus das shvmanh jyehjuh yah sen lha Yakop yahge Esau lyis dangthoengh dyei. 21 Lomsjingh zis yah Yakop gas nyang shei yeis lyis Yosep dah lotang lhyi shvmanh dyei las, nyah lhamloq thyoh mas nges las Mangso lhyi paiq. 22 Lomsjingh zis yah Yosep gas nyang shei das shishenh ni los lyis Israel jens Egutu mau masyah luiq thuq los das cho taiq kyingh toh las, nyah shohyau lyis khasoeh kuot das cho shet toh dang dyei toh. 23 Lomsjingh zis yah Moshe dah nyhiphoq gas Moshe khoeu los thang lhyi lhamhmuh somh khyvp top nyang lyis shung toh: Moshe ka svsoh yungh dah loshang nghuot yvlyis nyah zomh nyvng las hwankti dah zau dang lyis lhyweq das zis ma gyuk. 24 Moshe ka kuh los lyis, lomsjingh zis yah Pharao lonyi dah lo ge das yvlyis he tyamp. 25 Nyang gas dvyoq kyingh yaunos dah pyo cho mha pyo das thoq lyis, Mangso dah dius nyau yah dvgeh shohjyen xauh das yvlyis zes o. 26 Nyang Meshia xiklyis jwangh nyhap xauh zis gas Egutu munghdan dah zisyos dvnganh thoq lyis zes gis ge nghamh. Khasoeh ge lyis nyang gas jweh los das shishenh lyis doms xauh yoeus das phauh shangh jyungshuk lyis yoeuh tsuk toh. 27 Lomsjingh zis yah Moshe ka hwankti dah nhaiqlom dyis yvlyis ma gyuk, Egutu mau masyah thuq khoq. Nyang gas nyoq yah ma yoh nyvng dah Mangso lhyi yoh nyvng teh Egutu mau pheh tauh loh das zis he tyamp. 28 Nyang gas lomsjingh zis yah lomons jens lyis sat dah loeuswons soeu ka Israel Vnyau dah lomons jens lyis ma sat bas jungh, Lhuiq Kat Pwe xi kuot las yvng suih lyis khomh mas sanh gyuon das cho taiq toh. 29 Lomsjingh zis yah Israel jens gas tung yos mas teh Thomh Nes lyis yoh tsain goeu lai los. Egutu dius jens eq housoeh goeu yoeuh lyis tsain nyop shei zis dvxauh. 30 Lomsjingh zis yah Israel jens gas nyhet nyeih top Yerikho wus lyis dye suh lhaink lyis, hauh wusciank lyis yoh gyop gyoh nhang. 31 Lomsjingh zis yah nghe nyhiq Rahab gas Israel jens dah joh yoeuh bang lyis dyenschangh khyvlyis lhom yoeus yvmvyah Mangso lhyi domsyos ma gyo bang yah dvgeh sat zis ma xauh. 32 Ngos tsoq taiq chah shih lah? Gideon, Barak, Samson, Yeptha, Dawi, Samuel yahge lvpe jens dah cho taiq das ge lyis ngah shishenh mathoq luk. 33 Hauh bang gas lomsjingh gvng mas svbih munghdan lyis yoh zan ung. Nyamoq gas dan cho lhyi chank kuot las Mangso dangthoengh dyei toh cho lhyi xauh kham yoeus. Khangkhyi jens dah nhuot lyis yoh cheiq toh. 34 Nyilhyam lhyi yoh sat, moengsa thyoh masyah yoh phang luiq, nyamoq yomnhuk laus eq yombos nhang zis xauh yvmvyah moengzan yvmas lyes las lvbaus dah jesphung lhyi yoh zan shuq tyamp. 35 Vmesbih jens eq lomsjingh zis yah shei goeus dah nyamoq buisnoms jens lyis kang doms dwis nhang zis tsain xauh. Dvyhamh gas nyamoq lyis lhuiq kat das ge dah toeuh lyis ma lhom yoeus, zes phauh thank dah kang dwis cho pheh dwis toq das xiklyis shoeuhshih zis tsain kham. 36 Tsai dvyhamh gas, jwangh las lyuk thoq lyis magoh, twih las thung lhunk zis tsain xauh. 37 nyamoq gas luk yah doeuh sat, kywizoe yah vchink chink kywi sat, moengsa yah jap sat zis tsain xauh. Vshoh vjyen shoeuhshih, yhenh zis tsain xauh las yvng yeis shvbeq yeis khuk las tsain yenh. 38 Nyamoq gas yaukyenh shanghsenh las khaugus xo bang teh mhanhdyvp mas, boms mas, lukkhyung mha, tsoh khyung mha tsain nyeis yenh. Mungkvn gas nyamoq yah ma mon. 39 Hauh dvnganh zis gas, nyamoq dah lomsjingh gvng mas chunghtoq zis xauh laus eq Mangso dangthoengh dyei toh jyehjuh lyis nyamoq ma xauh kham yoeus shih. 40 Khasoeh ge lyis Mangso ka yah xiklyis zes gis dah nghamh thyet cho toh dyei. Hau thyet toh cho ka yang yah dvgeh nghuot lyis nyamoq lomsjingh dah dyinghjet vkyuh lyis xauh yoeus das.
1 Gvshih yah xiklyis hei iq nyo dah kanghjyoeng jens gas yang lyis lhaink toh. Housoeh las yang gas cho mha pahkai cho khanghmuh lyis eq, yang mas dap joq dah yaunos lyis eq phe tyamp las yang wuih das xiklyis nghamhloms thyet toh dah toeuqkhom jweh shoq jhen zis yah wuih jweh goh. 2 Yah lomsjingh cho xi mas zis vthang jweh shoq dyinghjet nhang soeu Yhensain Yesu lyis yoeuh tsuk toh goh. Yhensain ka nyang kham yoeus das, nyang lyis langh nyeis dah hau gausyis cho gvng mas hau tapzains mas shei kham dah xoqphuh cho lhyi chaxwe ma nhang, hau tapzains cho lhyi khyen yoeus las gvshih nyang gas Mangso dah hwankti tank loqyos shot pheh loh tsung toh goeus. 3 Yaunos wons bang yah svsoh hoeng cho lhyi hauh Yhensain kha iq kham lai los goeus yvlyis namoq nghamh yoeuh geh. Housoeh yvmvyah namoq mas yom gyau las shoeuh loh cho vbos nhang goh. 4 Namoq gas yaunos yah zan goh cho mha sat zis xauh das vkant jweh shoq ma loeutyonh ku shih. 5 Mangso ka, Ngah lo eh, hauh Yhensain nvng lyis soq dyei lyis gyo aq. Nyang nvng lyis nyho lha jyauh lyis yom vgyau. 6 Khasoeh ge lyis Mangso ka Nyang jyetdap soeu khanghmuh lyis jyauh las nyah lo jens khyvlyis lhom yoeus bang dvnganh lyis seq joeng, ge namoq lyis nyah lo jens nghuot khyvlyis yomdyei dang lyis namoq tohnyhik goeus lhyeh? 7 Namoq xauh nyeis dah shanghsenh yvlyis uwus dah jyauh cho teh jhen nyeis geh: Namoq xauh kham dah shanghsenh gas namoq lyis Mangso ka nyah lo jens lyis teh jyauh cho nghuot. Nyah uwus nyho lha ma jyauh dah lo khalhye bos ku lah? 8 Nyah lo jens dvnganhmoq kham ku teh, jyauh yvlyis ma kham yoeus lyis gas namoq lo gyingh ma nghuot, deslo dvtsain nghuot. 9 Yang lyis nyho lha jyauh dah cangsoeu uwus moq lyis yang phauh nyang. Housoeh lyis yah Dyos yah sen dah Uwus o mha gyoh nyeis las kang dwis nyeis chah ma nghuot lhyeh? 10 Cangsoeu uwus moq gas yang lyis dvyoq kyingh nyamoq jus ge nghamh suon zis yah dvyhangteh nyho lha seq jyauh; nghuot laus eq Mangso ka yah xiklyis gis das nyhenshang, nyang teh gyingshang los bas jungh ge yang lyis nyho lha jyauh. 11 Yang nyho lha jyauh zis xauh kham uhlyis houka yah xiklyis gaus cho ma nghuot, nhaiqkuk cho teh dvnghuot laus eq thang pheh doms yoeuh lyis housoeh teh nyho lha jyauh zis kham yoeus bang gas dan dah kang dwis cho lhyi nyenstap jyungshuk khyvlyis xauh yhomh yoeus. 12 Housoeh yvmvyah nhuk gyoh dah loq lyis toeu geh; nvn dah phvlukchvp lyis yombos nhang geh. 13 Cho dan chank tsoq suh loh geh, hauh uhlyis dyoq dah khyei ma yoh yhung lo shoq ma bweh, gis los das. 14 Dius dvnganhmoq yah nyenstap khyvlyis yoh nyeis shoq eq, gyingshang dah kang dwis cho lhyi xauh yoeus shoq eq yomkat nyeis geh. Khasoeh ge lyis housoeh teh kang dwis cho yah ma nghuot lyis hank eq Yhensain lhyi ma yoh nyvng. 15 Mangso dah jyehjuh masyah nungsdoms bang ma bweh bas jungh, zungh nyeis geh. Khoh dah saiq nyet gas yuk kuh los las nyah nyonoq yah yau nyoshoq yoh dyei teh, namoq hank mas eq housoeh ma bweh bas jungh zaih nyeis geh. 16 Wotwu ma gis, dyos lomsjingh cho ma bos zis yah wom dvnyo xiklyis kyingh yah mang muh toeuh ungh tyamp dah Esau teh, namoq hank mas eq ma bweh bas jungh, zaih nyeis geh. 17 Namoq seq zis yah dvyhangteh nyang gas thang lhyi ka uwus jyank masyah shvmanh jyehjuh yoh mes. Nghuot laus eq nyang ma yoh. Khasoeh ge lyis nyang kuot lai los goeus yvlyis doms soq das cho ngausdyeis yah xo laus eq ma nyvng lo. 18 Namoq gas Israel vnyau jens teh loq yah yoh tanh las nyi duk nyeis, chuot, soeng soeng noq, lyeis muh jyang muot, 19 lvbuh thwe gyo zis yahge nyoqnyvng dang thwe thuq dah Sina boms mas namoq jweh ku zis ma nghuot. Nyamoq hauh thwe xauhgyo lyis gohtoeu thwe dvkoeuq eq ma xauhgyo lo bas jungh ge tsain dung. 20 Khasoeh ge lyis nyamoq gas, Gaunyhauq dvdoeu yangh hauh boms lyis zangh tanh lyis, luk yah doeuh sat geh, ge tying toh zis lyis ma tsain yoh kham. 21 Nyvng zis dvkoeuq gonh gas gyukphoh nghuot yvmvyah Moshe yangh, Ngos svsoh gyuk goeus, ge. 22 Namoq gas Sina boms gungsthaiq Zion boms yahge loeuswons bang mons sens nyeis dwis nyeis Mangso dah wus ge, maukhung Yerusalem mas tsain jweh nyeis goeus. 23 Namoq gas maukhung mha nyings lhaih toh yvmas bos, lomons jens gausyis huom nyeis dah huom mha tsain jweh joq. Dius nyau dvnganh lyis soetuon soeu ge Mangso jyank mas eq, dyinghjet nhang zis xauh goeus dah dan bang dah dyos jyank mas eq, jweh nyeis goeus. 24 Namoq gas Thanghchvp saiq lyis kuot dyei soeu Yesu jyank mas eq, Abel suih thoq lyis zes, sanh gyuon suih jyank mas eq tsain jweh goeus. 25 Namoq gas hauh Dang taiq soeu lhyi ma gyo dyei ngoek tyamp cho ma bweh bas jungh zaih nyeis geh. Haih nyeisjvng thoq mas taiq kyingh soeu dah dang lyis gyo yoeus das zis ngoek bang yobos dyei masyah ma yoh luiq. Housoeh las yang gas maukhung mhayah taiq soeu lhyi nungs phuk tyamp lyis gas, yobos dyei masyah luiq das cho zes ma bos lo. 26 Hauh shishenh lyis Mangso dah thwe ka nyeisjvng lyis nhont kat; nghuot laus eq gvshih gas nyeisjvng lyis kyingh ma nghuot, maukhung lhyi eq dvlhain doms nhont das, ge dangthoengh toh. 27 Tsai dvlhain, ge dah dang vjyuk gas, gvnkhanh toh zis xauh dah vyhang dvnganh lhyi nhont las yoeus tyamp das las ma yoh nonh dah vyhang kyingh dvnyet joq das, ge zis nghuot. 28 Housoeh las yang xauh yoeus dah munghdan gas ma yoh nonh las yang Mangso lhyi chungh nyeis goh. Yang gas nhaiqshoqlang ehnyet bos las, gyukwoms zis yah Yhensain nhaiqdoeus khyvlyis Mangso lhyi phuqsoe nyeis goh. 29 Khasoeh ge lyis yah Mangso ka yoh ngeh jom nhang dah nyi nyang nghuot.
1 Namoq gas vmang vnoeuh nyang changh jyetdap vmang vnoeuh ehnyet tsoq las chixoeuq goh nyeis geh. 2 Namoq yhen mha lvbaus boenghwus lyis lhom yoeus las phuqsoe das zis vtohnyhik goh. Housoeh phuqsoe zis dvyhamh gas loeuswons bang lyis masoh mathamh zangh phuqsoe goeus. 3 Namoq gas thung lungh bang lyis eq dvgeh thung lungh joq bang teh nyamoq lyis soh nyeis geh. Shanghsenh zis xauh bang lyis namoq nyang shanghsenh nyeis teh soh nyeis geh. 4 Nyi hwank cho lhyi dius dvnganhmoq phauh nyang chungh bas jungh. Yhensain phoq yhensain nyhiq nyang changh dang yoh jings goh nyeis bas jungh. Mangso ka wotwu dyoq bang yahge nyi shuot lvng shuot bang lyis soetuon das. 5 Namoq gas ngwis nyoqnoq dah muh dvnganh lyis jhank nyeis geh. Yoh nyhoq yah nhaiqtap nyeis geh: khasoeh ge lyis Mangso ka, Ngos nvng lyis khanhamp eq ma toh khoq das; Ngos nvng lyis khanhamp eq ma doeuh tyamp toh das ge toh. 6 Housoeh yvmvyah, Yhensain ka ngos lyis pangh soeu nghuot las, Ngos cha lhyi eq ma gyuk noh. Ngos lyis hank cha yoh kuot das! oen yang womh ehnyet yah taiq nyeis goh. 7 Namoq lyis Mangso dah dang taiq kyoh goeus, xik lyis dah cho shwih she los bang lyis soh nyeis geh. Nyamoq kang khasoeh dwis las khasoeh shei loh goeus yvlyis doms nghamh yoeuh zis yah nyamoq dah lomsjingh yikhyoh lyis toeuq yoeus geh. 8 Yesu Khristu gas nyinaq, khvnyhik, vcaiq vto dvyhangteh nghuot. 9 Xikpheh ma nyvng ku, ma xauhgyo ku dah jyauh cho vja ja yah namoq lyis cho vshwih whang nhang goh. Zonoms yah sen, chank chah lyi lyis chank tyink khyvlyis ma nghuot, Mangso dah jyehjuh masyah dyos yom lyis kham yoeus zis gas zes gis. Zonoms yah sen dah lyi gas chank kuot bang lyis cha ma yoh pangh. 10 Yuda jens dah paiq joqyos vkhau mha phuqsoe dah phudyei bang gas yah phon mha dah phudyei cha eq yoh zo das toeuh ma yoh. 11 Yuda Phudyei Zainsmuh gas gaunyhauq dah suih lyis yaunos khyuot das phudyei khyvlyis gyingshang thank joqyos mas yoeus wvng loh nghuot laus eq hauh phudyei mvng lyis gas dvp nghe mha dvngheq tyamp. 12 Haih cho gvng mas Yesu eq nyah suih yah dius jens lyis yaunos masyah cheihshang yoeus das xiklyis wus nghe mha shei kham goeus. 13 Housoeh yvmvyah yang gas dvp nghe pheh nyah jyank mas thuq e lha nyang kham dah xoqphuh cho lhyi dvgeh chomp kham goh. 14 Khasoeh ge lyis haih nyeisjvng thoq mas yah xiklyis goeng joq dah wus ma bos las, yang gas thang pheh jweh los das wus lyis dvxo nyeis. 15 Housoeh las yang gas nyang lyis yah Yhensain nghuot oen rhen dah nhuot yahge phudyei dah yah Chungh Dang lyis Yhensain Yesu gvng mas, Mangso lhyi vjangh phudyei nyeis goh. 16 Gis dah muh kuot das zis namoq nyang changh pangh goh das cho vtohnyhik goh. Khasoeh ge lyis housoeh teh dah lomhxangh gas Mangso lhyi nhaiqdoeus nhang. 17 Namoq dah uhshe bang dah domsyos gyo las nyamoq taiq toh dang lyis chank kuot nyeis geh. Nyamoq gas nyamoq phuqsoe dah muh cho Mangso lhyi suon xoeuq chah las, namoq ehnyet lyis ma no lo zungh yoeuh dyei nyeis. Namoq nyamoq dah domsyos gyo lyis gas nyamoq kuot dah muh lyis gausyis zis yah kuot das. Housoeh ma nghuot lyis gas nyamoq nhaiqkuk zis yah kuot das las namoq xiklyis chah vkyuh ma bos das. 18 Ngamoq xiklyis malyen lo shvmanh dung nyeis geh. Ngamoq gas ngamoq dah sohseq ehnyet shang shang bos zis soh soh nghuot. Khasoeh ge lyis ngamoq gas shishenh khanghmuh jus cho kuot mes ehnyet tsain bos. 19 Mangso ka ngos lyis namoq jyank mas lvnyap doms jweh los nhang bas jungh, oen yomkat shvmanh dung das xiklyis sang kat. 20 Nyah kang lhyi phudyei las shei kham zis yah vcaiq vto thanghchvp lyis kyihau tap goeus las yvng jens dah yvng yoeuh uhjyung Zainsmuh ge, yah Yhensain Yesu lyis Mangso ka shei masyah dwis toq nhang goeus. 21 Namoq gas nyah nhaiqdoeus cho yoh chank kuot das xiklyis namoq mas chah nyeis, gis dah cho khanghmuh lyis nyenstap Mangso ka dyei bas jungh, Yhensain ka nyang o khyvlyis yah dvyhangteh Khristu gvng mas nyang nhaiqdoeus cho lhyi yang mas kuot bas jungh, Khristu mas vcaiq vto phunk bos bas jungh. Amen. 22 Boekyis eh, hai yomdyei dang lyis jhen zis yah gyo yoeus das xiklyis ngos namoq lyis sang kat. Khasoeh ge lyis ngos namoq lyis lhaih kat haih maussauh gas nyoshoq xing zis ma nghuot. 23 Ngamoq dah vmang vnoeuh Timothi gas thung mhayah luiq los goeus cho namoq lyis seq nhang mes. Nyang lvnyap jweh los lyis gas namoq yah xauhgoh das nyhenshang ngos nyang yah dvgeh los das. 24 Namoq dah uhshe bang dvnganh yahge Mangso dah dius nyau dvnganh lyis jeshuh dyei geh. Itali mau mas vmang vnoeuh moq gas namoq lyis jeshuh kat. 25 Mangso dah jyehjuh gas namoq dvnganhmoq yah dvgeh joq bas jungh.
1 Mangso yahge Yhensain Yesu Khristu dah jyeidwis nghuot dah Yaku gas, mungkvn gonh nyeis dyos joq dah Mangso dius jens lyis jeshuh kat. 2 Ngah boekyis eh, shiwu zis vja ja xauh uhlyis namoq xiklyis gaus cho nghuot oen lhom yoeus geh. 3 Khasoeh ge lyis namoq dah lomsjingh ehnyet yah housoeh teh shiwu cho lhyi yoh ung tyamp uhlyis vsainnyang mas yoh kham dah yom lung los yvlyis namoq seq. 4 Namoq gas chah cho mha laus eq chah zis ma bos, dyinghjet nyeis bas jungh, namoq dah jhen ehnyet lyis thang thank jweh shoq goeng joq nhang geh. 5 Nghuot laus eq namoq mas dvyuk yuk joeui chah nyeis lyis gas Mangso jyank mas shvmanh dung bas jungh, Mangso ka nyang lyis hauh cho dyei das: khasoeh ge lyis nyang gas dvnganh lyis magons magoh jyehjuh khyvlyis dyei nyeis soeu nghuot. 6 Nghuot laus eq, namoq shvmanh dung uhlyis loms shuot ehnyet ma bos bos, lomsjingh ehnyet yah dung chah. Loms shuot soeu hank laus eq lyeis muot las toq dah thomh mas jeisphauq yah doeusgoh. 7 Housoeh teh soeu ka nyang kuot cho dvnganh mas nyah ehnyet ma yoh nghamh thyet las ehnyet ma thyeh thyet soeu nghuot. 8 Nyang gas ehnyet aiq ja bos soeu nghuot las, Yhensain jyank masyah cha eq xauh yoeus das oen ma nghamh noh. 9 Nyungs dah Khristan vmang vnoeuh gas, nyang lyis Mangso toeu toq uhlyis gaus bas jungh. 10 Dis dah Khristan vmang vnoeuh ka, Mangso nyang lyis nyhen mha khyoq zis xauh lyis gaus nyeis chah: khasoeh ge lyis dis bang gas mhanhdyvp mas ban teh wui loh das. 11 Buis gas gywes ngeh los lyis ban zains ngeh kyuk tyamp. Ban buh eq gywis gyoh zis yah ban yungh dah vwot gas dyoq tyamp. Houyah dvyhangteh dis soeu ka nyah muhzoh kuot nyeis lyis dyoqbis las dyuk tyamp das. 12 Shiwu zis xauh lyis lomluk nyeis soeu ka ngelhoq: khasoeh ge lyis hauh soeu ka housoeh teh shiyoeuh cho lhyi yoh lai ung lhyi Mangso ka nyang lyis jyetdap bang lyis dyei das ge thoengh toh dah kang lhyi jyungshuk khyvlyis xauh kham yoeus das. 13 Dius dvyuk housoeh teh dah shiwu zis xauh lyis, Mangso ka ngos lyis shiwu, ge yoh taiq das zis ma nghuot. Khasoeh ge lyis ma gis zis gas Mangso lhyi yoh shiwu zis ma nghuot. Tsai, nyang hank lyis eq shiwu nyeis zis ma nghuot. 14 Nghuot laus eq dius dvyuk shiwu zis xauh ge zis gas, vsainnyang ehnyet obos cho yah she loh yvmas chank loh las hauh jons duot loh yvlyis taiq zis nghuot. 15 Hau obos ehnyet yenh goeus ya yaunos lyis khoeu kat. Yaunos yenh goeus ya shei cho lhyi khoeu kat. 16 Ngah jyetdap boekyis eh, chowhang vwhang goh. 17 Gis las dyinghjet dah jyehjuh jyungshuk dvnganh gas maukhung mhayah, maukhung bvng zis lyis tsain gvnkhanh toh dah Mangso mhayah los zis nghuot. Nyang mas phanh phuk nyeis gvng mas thaiq loh shaih loh cho yahge siyet ma bos. 18 Nyang gvnkhanh toh yvmas yang gas cangxeih joqyos yoh dah vxeih vnyau duot bas jungh, nyang o khyvlyis hau jyoeng dang yah nyang yang lyis yaus kat. 19 Ngah jyetdap boekyis eh, haih cho comh geh. Yuk khanghmuh gas gyo yoeus das zis nyap bas jungh, nghuot laus eq dang taiq das zis yahge nhaiq yo das zis vgyen. 20 Dius dah nhaiqyo zis gas Mangso o dah dan cho lhyi yoh bweh nhang zis ma nghuot. 21 Housoeh yvmvyah ma lhoq ma shang dah wotwu khanghmuh yahge ma gis wotwu dvnganh lyis shang tyamp geh. Ehnyet nyhen mha gyoh zis yah Mangso dah domsyos gyo las, nyang namoq ehnyet mas kat toh dyei goeus, namoq lyis yoh khyuot yoeus dah hauh dang lyis lhom yoeus geh. 22 Nyah dang lyis xauhgyo khyvlyis yah kyingh vsainnyang gungs lyis ma mhuih jyomh bas jungh, hauh dang lyis chank kuot nyeis geh. 23 Hauh dang xauhgyo las ma chank kuot soeu hank laus eq vsainnyang nyoqnho lhyi bvngtoenk mas yoeuh zo soeu yah doeusgoh. 24 Nyang gas nyah gungs lyis yoeuh zo lho lha thuq loh yah dvyih nyah gungs khasoeh teh zis tohnyhik tyamp. 25 Nghuot laus eq dius lyis lhuiq kat dah dyinghjet lyi lyis yoeuh tsuk toh soeu ka hauh lyi lyis xauhgyo las doms tohnyhik tyamp soeu ma nghuot, tsoq las chank kuot soeu nghuot yvmvyah nyang kuot yvlyis Mangso shvmanh zis xauh das. 26 Ngos gas lomsnoq cho chank soeu nghuot ge namoq mas dvyuk yuk nghamh laus eq, vsainnyang lhyo lhyi ma yoh joeu lyis gas nyah lomsnoq cho ka vkom dvnghuot las nyah gungs lyis mhuih jyomh soeu dvnghuot. 27 Uwus Mangso xikkhonh mas lhoqshang lha gyingh dah lom noq cho ge zis gas, yaukyenh xauh nyeis dah chauhmuh chauhlo jens lyis bos yoeuh bos gomh las, vsainnyang gungs lyis mungkvn dah vwot v-oeu yah ma zangh shoq zaih las nyeis cho nghuot.
1 Ngah boekyis eh, namoq gas yah phunk bos Yhensain Yesu Khristu lyis lomsjingh bang nghuot zis yah dvyhangteh dius jens lyis yoh nyvng dah gungs lyis yoeuh las nyoqnho khyen khyvlyis dvyuk yah dvyuk khanhamp eq vzomh goh. 2 Dangtoeuq, dis las xing loqkyop kyop, phauhdap dyimis wuot soeu dvyuk yahge vjuiq vnyho dyimis wuot dah nyungs soeu dvyuk namoq huom yvmas jweh los oen goh. 3 Namoq gas hau phauhdap dyimis wuot soeu lhyi zes phauh nyang zis yah, Haih gis thank joqyos mas tsung aq ge lho lha; nyungs soeu lhyi ka, Nvng thyimha yap aq, nghuot ya ngah khyeiyang mas tsung aq, ge sang lhyi ka, 4 namoq mas khwih khyamh cho lhyi bweh nhang lha, ma gis dah nghamh ehnyet yah dang thang thyet bang bweh goeus yvmvyah yaunos tsain bos. 5 Ngah jyetdap boekyis eh, gyo yoeus geh: Mangso ka haih mungkvn mas nyungs bang lyis lomsjingh cho mha dis bang bweh das zis yahge nyang lyis jyetdap bang lyis thoengh toh dah munghdan lyis xauh sain yoeus das nyhenshang nyang nyamoq lyis khyen yoeus. 6 Namoq yuk nyungs bang lyis ma phauh ma danh kuot goeus nyvng! Namoq lyis zaiq las soetuon bang xikkhonh mas lang she loh bang gas hank tsain nghuot lah? Hauh zis gas dis bang nghuot. 7 Nyamoq gas namoq lyis dyei toh goeus dah nyings gis lyis jwangh bang tsain nghuot. 8 Namoq gas, Nah yhenkyoh lyis nvnyang gungs lyis teh yoh jyetdap das, ge lhaihtoh dang mas bos. Maukhung munghdan lyi lyis domsyos gyo lyis gas namoq gis las jus yvlyis kuot nyeis. 9 Nghuot laus eq namoq gas dius lyis yoh nyvng dah gungs lyis yoeuh las nyoqnho khyen khyvlyis lhom yoeus las zomh nghuot lyis gas namoq yaunos tsain yoh zis yahge hauh Lyi gas namoq lyis lyi lhyweq soeu khyvlyis dang thang thyet das. 10 Hank laus eq lyi dvkoeuq lhyweq goeus ya lyi dvnganh yvlyis lhyweq goeus. 11 Khasoeh ge lyis, nyi shuot lvng vshuot, ge tung toh soeu nyang, Dius vsat, ge taiq nyeis shih. Nvng gas nyi ma shuot laus eq dius sat lyis gas nvng lyi lhyweq soeu nghuot goeus. 12 Housoeh yvmvyah namoq gas yang lyis lhuiq kat dah lyi yah soetuon zis xauh das bang teh taiq las, chank kuot loh geh. 13 Khasoeh ge lyis nhaiqnyen das ehnyet ma bos soeu lhyi soetuon uhlyis Mangso ka nyang lyis nhaiqnyen cho Chixoeuq das zis ma nghuot. Nghuot laus eq Nhaiqnyen ehnyet gas soetuon cho lhyi ung tyamp goeus. 14 Ngah boekyis eh, namoq dvyuk yuk gas, Ngos gas lomsjingh cho bos, ge taiq laus eq, nyang muh khanh yvmas kanghjyoeng ma chixoeuq lyis gas cha vkyuh bos lah? Hau lomsjingh zis gas nvng lyis yoh khyuot yoeus lhyeh? 15 Dangtoeuq: dyimis chah nyeis zis yahge zoshuk das zonoms dyet dah vmang vnoeuh, nghuot ya nhamhmuh jens nyeis oen goh. 16 Namoq gas nyamoq lyis, Namoq lyis Mangso shvmanh dyei bas jungh! Jo jo zo geh, nywe nywe nyeis geh, ge las kang xiklyis yhaugyen zis ma dyei lyis gas chah vkyuh bos das lah? 17 Lomsjingh cho mha eq houyah dvyhangteh nghuot. Muhzoh ma bos dah lomsjingh cho ka vshei dvnghuot. 18 Nghuot laus eq dvyuk mas lomsjingh cho bos las, gohtoeu dvyuk mas muhzoh bos, ge dvyuk yuk ngos lyis taiq los lyis gas, muhzoh ma bos dah lomsjingh cho ngos lyis Chixoeuq aq; ngos gas ngah lomsjingh cho lhyi ngah muhzoh yah nvng lyis Chixoeuq das. 19 Mangso ka dvso kyingh dvnghuot yvlyis nvng jingh lhyeh? Nghuot goeus, gis joq! Yius jens eq lomsjingh nyeis las tsain gyuk nvn nyeis. 20 Koh soeu eh, muhzoh ma bos dah lomsjingh cho ka vkom dvnghuot yvlyis nvng seq mes lhyeh? 21 Yah phauh thyeih Abraham gas Mangso xikkhonh mas dan cho lhyi khasoeh yoh yoeus lah? Nyang gas nyah lo Isak lyis phon mha phudyei ge dah muhzoh yah xauh yoeus. 22 Nyah lomsjingh cho yahge muhzoh dvgeh khanh nyeis zis yahge nyah lomsjingh cho ka nyah muhzoh gvng mas yoh dyinghjet los goeus yvlyis nvng ma nyvng ma seq lhyeh? 23 Abraham gas Mangso lhyi lomsjingh las nyah lomsjingh cho gvng mas nyang lyis dan, ge lhom yoeus dyei, ge dah lhaihtoh dang gas dyingh nyuk los. Housoeh las Abraham gas Mangso dah buisnoms phoq ge dah nyings lyis kham yoeus goeus. 24 Housoeh las dius gas nyah lomsjingh gvng mas kyingh ma nghuot, nyah muhzoh yah Mangso dah xikkhonh mas dan soeu yoh bweh los yvlyis namoq nyvng. 25 Nghe nyhiq Rahab dah cho eq houyah dvyhangteh nghuot. Nyang gas joh yoeuh bang lyis lhom yoeus lho lha, gohcho yah luiq thuq loh das xiklyis pangh kat dah muhzoh gvng mas Mangso xikkhonh mas dan cho lhyi xauh lhom yoeus. 26 Housoeh las gungs mas dyos ma bos lyis gas vshei dvnghuot teh, muhzoh ma bos dah lomsjingh cho eq vshei dvnghuot.
1 Ngah boekyis eh, yang svra moq gas gohyuk thoq lyis zes than dah lyi yah soetuon zis xauh das yvlyis soh zis yah, namoq svra nyoshoq yuk vkuot mes goh. 2 Yang dvnganhmoq gas dvsoq soq lyis seq shuot bang nghuot. Nghuot laus eq dius dvyuk gas nyang taiq yvmas khanhamp eq ma shuot nghuot lyis gas hauh soeu ka dyinghjet soeu nghuot las nyah gungs gonh lyis yoh joeu soeu nghuot. 3 Yang gas nyang lyis yah dang gyo nhang das xiklyis nyang nhuot mas thyeq lungthungh kat lyis yang o yvpheh yoh loh nhang. 4 Nghuot ya sangpho dvkoeuq lyis nghamh yoeuh goh, Svsoh kuh dah sangpho lhyi than dah lyeismuh jyang yah bat zis xauh laus eq, svsoh ngis dah shvp yah yoh joeu las sangpho komp soeu loh nhang mes yvpheh loh nyeis. 5 Lhyo ka houyah dvyhangteh nghuot. Houka gungsdoeus mas vmhauhlo dvnghuot laus eq svsoh kuh cho jeis lyis seq moengs. Vtsihlo dah nyi jyenh gas kha iq teh dah dainhjeis yos lyis yoh ngeh tyamp yvlyis nghamh yoeuh geh. 6 Lhyo eq nyi yah doeusgoh. Lhyo yah gungs shoh dah gungsdoeus mas ma gis ma shop dah mungkvn nghuot las gungs gonh mas hau ma shop yvlyis dyingh los nhang. Lhyo ka munyi yah nyang, yah kang dwis cho gonh lyis ngheq kat. 7 Yang cangsoeu dius gas gohtoeu yewus ja khanghmuh, nghoq ja khanghmuh, shweh loh ja yahge jeis khau mha dah oengdoq vja ja lyis yoh mhiq las hounyhoq zis tsain mih. 8 Nghuot laus eq lhyo lhyi ka hank eq ma yoh mhiq: hauh zis gas ma gis ma shop joq zis yahge ma yoh guon toh las shei nhang dah nyonoq yah dyingh joq. 9 Yang gas lhyo lhyi, yah Yhensain Uwus Mangso lhyi chungh yvmas eq, Mangso dah gungsdoeus lho yah dvyhangteh gvnkhanh toh goeus dah dius nyang changh yah nhoengh khan goh yvmas eq, yhung nyeis. 10 Nhuot dvkoeuq kyingh masyah Chungh Dang yahge nhoengh dang thuq los. Ngah boekyis eh, houka namoq mas ma bweh oeng. 11 Jeisthuq dwang dvkoeuq kyingh masyah jeis nghamh yahge jeis khoh yoh thuq kat zis ma nghuot. 12 Ngah boekyis eh, maiphang zains mas tsanlun shih, zvbiq nwis mas maiphang shih ma yoh shih. Houyah dvyhangteh coh ngvm jeis thuq dwang gas nghamh dah jeis ma yoh thuq nhang. 13 Namoq mas joeui bos las seq cho bos soeu dvyuk yuk bos lah? Hauh soeu ka nyang joeui bos cho lhyi nyah dah gis dah kang dwis cho yah eq, noeuh nhamp las joeui bos khyvlyis gis dah muhzoh kuot zis yah eq kanghjyoeng Chixoeuq bas jungh. 14 Nghuot laus eq namoq ehnyet mas noh goh cho, nhaiq khoh, namoq nyang vkyuh dvxo ehnyet bos lyis gas, namoq joeui bos ge nghamh las khwank zis yah hau jyoeng cho lhyi shuot dah yobos vkuot goh. 15 Housoeh teh joeui ka maukhung mhayah los dah joeui ma nghuot: houka mungkvn yahge dyos cho ma nghuot dah suih shoh yahge yius gomloeus yah dvsen. 16 Hauh yvmas noh cho, vsainnyang vkyuh dvxo cho, nhunk cho yahge ma gis ma shop cho vja ja bos yvlyis nyvng. 17 Nghuot laus eq nyhang mhayah jweh los dah joeui ka, cangxeih gas tsingh-kan, hauh thang lhyi nyenstap, noeuh nhamp, dap goh cho lhyi bweh nhang thoq lyis nhaiqnyen shoh gyo cho yah dyingh las gis dah muhzoh ge dah vshih lyis xauh yhomh yoeus. Houmha nyoqnho khyen cho yahge vguons kuot cho ma bos. 18 Hau gis dah cho ka nyenstap muh wons bang nyenstap cho mha nyau khyoq las xauh yhomh yoeus dah jyo nyau shih nyau nghuot.
1 Namoq mas zan goh cho yahge dyoqgoh nyens goh cho ka kha mhayah los lah? Houka namoq dah gungs shoh pyo cho omes mhayah thuq los las vjangh zan goh nyeis. 2 Namoq gas vyhang dvja ja lyis o lha hauh yvlyis ma yoh los lyis dius sat das zis cicont nghuot. Namoq svsoh o mes laus eq ma tsain yoh yvmvyah dyoqgoh zan goh nyeis. Namoq o zis namoq ma yoh: khasoeh ge lyis namoq hauh nyhenshang Mangso lhyi ma dung yvmvyah nghuot. 3 Namoq dung lyis ma tsain xauh yoeus: khasoeh ge lyis namoq kuot dah cho ka ma gis namoq nyang dah pyo cho mha yhung das xiklyis dvdung yvmvyah ma tsain xauh yoeus. 4 Namoq gas lom ma luk bang nghuot nyvng! Mungkvn yah buisnoms kuot zis gas, Mangso dah jeswus bweh nyeis ge zis lyis namoq ma seq goh lhyeh? Mungkvn dah buisnoms bweh mes soeu hank laus eq vsainnyang gungs lyis Mangso dah jeswus bweh nhang nyeis. 5 Yah jyank mas Mangso kat toh dyei dah dyos gas noh dah ehnyet dyingh joq ge dah lhaihtoh dang mas jyoeng cho ma bos oen namoq nghamh goh lhyeh? 6 Nghuot laus eq Mangso yang lyis dyei dah jyehjuh gas yom zes bos. Mangso ka khwank bang lyis kyamp toh laus eq, ehnyet nyhen mha gyoh bang lyis jyehjuh dyei, ge lhaihtoh dang mas taiq zis yah dvyhangteh nghuot. 7 Housoeh las Mangso dah o mha gyoh nyeis las nyang o cho chank geh. Satan lhyi thoenk tyamp geh; housoeh lyis nyang namoq jyank masyah phang loh das. 8 Mangso jyank pheh los geh; hauh uhlyis nyang namoq jyank pheh los das. Yaunos dap bang eh, namoq dah loq lyis cheihshang toh geh; vguons kuot bang eh, namoq dah ehnyet lyis tsingh-kan nhang geh. 9 Nhaiqkuk nhaiqngis zis yah kaiq ngaus geh; namoq dah yis zis gas ngaus yvpheh, gausyis zis gas chiqjyen yvpheh thaiq tyamp geh. 10 Yhensain xikkhonh mas namoq nhaiqlom nyhen mha gyoh nyeis geh: hauh uhlyis nyang namoq lyis toeu toq das. 11 Boekyis eh, namoq nyang changh tyixo dang vtaiq goh. Vsainnyang Khristan boekyis dvyuk lyis tyixo dang taiq, nghuot ya soetuon soeu hank laus eq hauh lyi lyis tyixo thoq lyis magoh hauh yvlyis soetuon soeu eq nghuot. Namoq hauh lyi lyis soetuon lhyi ka, lyi chank bang ma nghuot, hauh yvlyis soetuon bang dvnghuot joq. 12 Mangso kyingh lyi dyei soeu yahge soe yoh tuon soeu nghuot. Nyang kyingh yoh khyuot yoeus zis yahge yoh mhont tyamp soeu nghuot. Nah yhenkyoh lyis soetuon soeu nvng gas hank nghuot oen nghamh nyeis lah? 13 Khvnyhik, nghuot ya phvnaq nyeihyo yang dvwus wus mas loh las, houmha dvzvn thoeng lha soenghi kuot las ngwis nyo nyo yoh shoq kuot das ge bang eh, ngos taiq yvlyis gyo yoeuh geh. 14 Namoq gas phvnaq nyeihyo namoq dah kang chamus das zis yangh ma tsain seq. Namoq gas dvsoq kyingh dvthuq los las bi loh dah nyikhauh yah doeusgoh. 15 Mangso gyo lyis gas yang dwis nyeis las haih muh eq thyih muh eq yoh kuot das, ge dah dang gas namoq taiq gis. 16 Nghuot laus eq gvshih gas namoq khwank las tsain moengs nyeis: housoeh moengs cho dvnganh gas shuot cho nghuot. 17 Housoeh yvmvyah gis dah muh kuot das zis seq las ma kuot soeu ka yaunos bos.
1 Dis bang eh, gvshih ngos taiq dang lyis gyo yoeus geh! Namoq mas jweh los nyeis dah shanghsenh cho gvng mas kaiq ngaus nyeis geh. 2 Namoq dah dis cho dah zisyos gas bop yuq tyamp las, namoq dah dyimis lyis naus yah zo tyamp goeus. 3 Namoq dah ngwis xing mha yangh yus zo las hauh yus eq namoq yah tyi dah shot pheh kanghjyoeng duot das las namoq dah gungsshoh lyis nyi teh ngeh jom tyamp das. Namoq gas hai thang thank buisnyeis xiklyis zisyos tsain yung toh. 4 Namoq gas namoq dah danh mas muh zwi bang lyis uhkung phauh ma tsain dyei. Nyamoq lop dah thwe lhyi gyo yoeuh geh. Namoq dah jyo yhomh dyei bang dah kaiq thwe ka Maukhung Jesphung Yhensain Mangso dah no mas bangh wvng loh goeus. 5 Haih nyeisjvng thoq mas namoq dah kang dwis cho ka gungsdom ehnyet lyis lhoq ngon dah kyahsoe gis yahge pyo cho yah kyingh dyingh joq. Namoq gas sat xauh das buisnyeis xiklyis, namoq nyang gungs lyis coeu shoq tsain nyhuk nyeis. 6 Namoq gas yobos ma bos bang lyis dang thang thyet las sat goeus; nyamoq gas namoq lyis tyi ma xo. 7 Housoeh yvmvyah boekyis eh, Yhensain doms jweh lyih shoq jhen nyeis geh. Danh zwi zo soeu ka nyah danh masyah phauhdap dah guk nyau shi nyau khasoeh thuq los nhang das yvlyis khasoeh langh nyeis yvlyis yoeuh geh. Nyang gas ehnyet xing xing yah mau xeih yahge mau nhungh wus das yvlyis langh nyeis. 8 Namoq eq nhaiqlom xing xing jhen nyeis geh: Namoq yom hont zis yah nghamhloms nyeis geh. Khasoeh ge lyis Yhensain doms jweh lyih das buisnyeis gas ni los goeus. 9 Ngah boekyis eh, namoq Mangso dah dang thang thyet zis ma xauh bas jungh, namoq nyang changh vlop goh nyeis goh; soetuon soeu ka jweh los nyeis goeus las thuq xoeuq das zis cicont nghuot goeus. 10 Ngah boekyis eh, Yhensain dah nyings yah taiq kyoh, Lvpe jens dah cho lhyi nghamh suon yoeuh geh. Shanghsenh zis xauh uhlyis ehnyet xing xing jhen yvlyis yikhyoh yoeus geh. 11 Nyamoq gas yoh jhen bang nghuot las ngamoq gas nyamoq lyis, Ngelhoq bang oen sang. Yoba dah ehnyet xing cho namoq xauhgyo ku. Thang thank lyis Yhensain ka nyang lyis khasoeh pangh goeus cho namoq seq. Khasoeh ge lyis Yhensain ka nhaiqnyen shohgyo ehnyet yah dyingh joq soeu nghuot. 12 Zes las ngah boekyis eh, namoq dangthoengh toh dah uhlyis maukhi dang vyhung goh: maukhung, nyeisjvng, cha lhyi eq nyings yoeus las mau vkhi goh: namoq Mangso dah soetuon zis ma xauh bas jungh, namoq taiq dah dang gas nghuot zis lyis nghuot, ma nghuot zis lyis gas ma nghuot oen dvtaiq geh. 13 Namoq mas dvyuk yuk yaukyenh zis xauh nyeis lah? Nyang shvmanh dung bas jungh; dvyuk yuk ehnyet pyo nyeis lyis gas, nyang Chungh Dang yhang bas jungh. 14 Namoq mas dvyuk yuk nos xauh nyeis lah? Nyang gas phung logis jens lyis khi lha, nyamoq gas Yhensain dah nyings masyah nyang lyis tsanlun coeu juot las, nyah xiklyis shvmanh dung dyei bas jungh. 15 Lomsjingh zis yah shvmanh dung dang gas hau nos soeu lhyi yoh gis los nhang lha Yhensain ka nyang lyis doms yanghzan los nhang das zis yahge; nyang zangh kuot dah yaunos lyis eq khyuot dyei das. 16 Namoq lhoq gis zis xauh bas jungh, namoq dah yaunos lyis dvyuk yah dvyuk rhen goh las dvyuk yah dvyuk nyhenshang shvmanh dung dyei goh geh. Dan soeu dah shvmanh dung dang gas yoh bweh los nhang dah yomsoq bos. 17 Eliya gas yang teh cangsoeu dius dvnghuot laus eq, mau ma wus bas jungh ge shvmanh dung lyis, somh zvn lhamhmuh khyuk khyvp nyeisjvng mas mau ma wus mus tyamp. 18 Tsai nyang shvmanh doms dung lyis, maukhung ka mau wus khyoq dyei las, hau nyeisjvng gas, nyah jyo nyau shih nyau thuq los nhang. 19 Ngah boekyis eh, namoq mas dvyuk yuk hau jyoeng cho mhayah whang loh soeu lhyi tauh los nhang lhyi ka, 20 hank laus eq hau shwih tauh los soeu ka yaunos yoh soeu lhyi, nyah dah shuot cho mhayah doms tauh nhang kat zis yah nyah dyos lyis shei masyah khyuot yoeus las yaunos vbomsdom masyah khyuot kat zis xauh das nyhenshang kuot dyei soeu nghuot yvlyis soh nyeis bas jungh.
1 Yesu Khristu dah lvgyo ngos Petru gas Pontu, Galati, Kapadokia, Asia yahge Bithuni mau mas boenghwus teh khau nges yenh bang, Mangso khyen yoeus dah dius nyau jens lyis maussauh lhaih kat. 2 Nyah Dyos mas gyingshang dius nyau kuot las Yesu Khristu dah domsyos gyo das zis yahge nyah suih yah cheihshang yoeus das nyhenshang Uwus Mangso dah gohlhain yah nghamh toeuq toh zis yah dvyhangteh namoq lyis khyen yoeus goeus. Jyehjuh yahge nyenstap zis gas namoq mas dyingh los bas jungh. 3 Yang gas Yhensain Yesu Khristu dah Uwus Mangso lhyi chungh nyeis goh. Khasoeh ge lyis nyah nhaiqnyen ehnyet zainsmuh yah Yesu Khristu lyis shei masyah dwis toq los nhang gvng mas, nyang yang lyis kang vsaiq doms dyei toh goeus las yang mas dwis nyeis dah nghamhloms cho tyink dyei goeus. 4 Housoeh las yang gas nyah dius nyau xiklyis Mangso tsomh toh, magons magoh dah shvmanh jyehjuh lyis xauh sain das nyhenshang nghamhloms nyeis. Nyang gas ma bop ma yuq, vwot v-oeu ma bos, ma nyhauh loh dah vso namoq nyhenshang maukhung mha tsomh toh dyei. 5 Houka namoq xiklyis nghuot. Namoq gas lomsjingh gvng mas thang thank shishenh lyis thuq xoeuq das zis sont toh dah khyuot yoeus jyehjuh xiklyis Mangso dah yomsoq yah gomh toh zis xauh bang nghuot. 6 Namoq xauh nyeis dah shiyoeuh cho vja ja gvng mas nhaiqkuk zis dvyoq xauh laus eq hau khyuot yoeus cho gvng mas namoq svsoh gaus nyeis geh. 7 Hau shiyoeuh zis xauh dah cho ka namoq Mangso lhyi lomsjingh ehnyet gas gyingh lah, zis khyink yoeuh das xiklyis nghuot. Yoh thyoq dah xing lhyi yangh nyi mas ngheq shauq las khyink tyamp chah las xing thoq lyis zes phauhdap namoq dah lomsjingh cho lhyi eq goeng toenk das nyhenshang khyink tyamp chah. Housoeh lyis Yesu Khristu doms thuq xoeuq buisnyeis lyis chungh dah phunk yahge nyoqnho ngelang lyis namoq xauh kham yoeus das. 8 Namoq Yesu lyis ma nyvng ku laus eq nyang lyis jyetdap nyeis. Gvshih nyang lyis ma nyvng laus eq nyang lyis lomsjingh nyeis. Housoeh las namoq gas ma thoq taiq lo shoq dah gausyis zis yah gausyis nyeis. 9 Khasoeh ge lyis Yesu Khristu lyis lomsjingh kang dwis cho dah toeuqkhom nghuot dah namoq dyos kang dah khyuot yoeus cho lhyi xauh lhom yoeus nyeis. 10 Hai khyuot yoeus cho yah sen lha lvpe jens gas yomkat las nyei gyo pheh xo lha Mangso namoq lyis dyei das hau jyehjuh jyungshuk cho nyamoq lvpe pe lha taiq kyoh. 11 Hau khyuot yoeus zis yah sen dah jyehjuh gas khah shishenh khah caiq lyis khasoeh khyvlyis jweh das cho lhyi yomkat tsain xo. Nyamoq mas bos, Khristu dah dyos gas hauh shishenh lyis Khristu kham das dah shanghsenh cho lhyi eq, housoeh dye kham thang lhyi eq xauh kham yoeus das phunk lyis eq uhlhomh las Chixoeuq toh goeus. 12 Nyamoq wons wuq nyeis, taiq kyoh muh gas nyamoq nyang vkyuh xiklyis ma nghuot, namoq xiklyis dvnghuot cho Mangso ka haih lvpe jens lyis Chixoeuq goeus. Namoq jyank mas gausyis loeus chi los bang gas hau lvpe jens uhlhomh las taiq kyoh bang lyis maukhung mhayah nhang kat, Gyingshang Dyos dah yomsoq yah namoq lyis taiq shet yvmvyah namoq xauhgyo goeus. Haih cho lhyi loeuswons bang yangh seqgyo mes. 13 Housoeh yvmvyah namoq muh kuot loh das nyhenshang namoq ehnyet lyis cicont kuot geh. Yesu Khristu thuq jyweq xoeuq uhlyis namoq lyis dyei das jyehjuh lyis khamkhvv ehnyet ma bos bos, jyoeng zaih zis yah dyingh dyingh nghamhloms nyeis geh. 14 Mangso dah dang lyis domsyos gyo las, namoq xikpheh ma seq shih shishenh lyis namoq dah omes cho khyvlyis suh e lai loh goeus teh tsoq las vdoms kuot goh. 15 Namoq lyis khi yoeus dah Mangso ka gyingshang nyeis zis yah dvyhangteh, namoq eq namoq dah kuot loh cho khanghmuh mas gyingshang nyeis geh. 16 Hau lhaihtoh dang mas eq, Ngos gyingshang nyeis yvmvyah namoq eq gyingshang nyeis geh, ge toh. 17 Hauh thoq lyis dius dvnganh lyis nyoqnho ma khyen, hank eq hank nyang kuot zis yah dvyhangteh soetuon nyeis dah Mangso jyank mas namoq shvmanh dung lyis Nyang lyis Uwus eh, ge tsain dung. Housoeh las haih mungkvn mas namoq kang dwis nyeis gyo lyis nyang lyis gyukwoms nyeis geh. 18 Namoq dah phauh thyeih moq masyah bos lyih las phauh ma dap dah kang dwis cho wotwu masyah namoq lyis cha yah khyuot thaiq toh zis gas namoq seq. Houka seq dyoqbis loh dah ngwis xing teh zis dvja ja yah ma nghuot. 19 Mesyos ma bos, chah zis ma bos dah yvnglo teh dah phauhdap Khristu suih yah dvnghuot. 20 Mungkvn ma bos shih lyis yah Mangso ka nyang lyis khyen toeuq toh las hai thang thank shishenh lyis namoq xiklyis Chixoeuq kat. 21 Nyang lyis dwis toq los nhang lha phunk dyei dah Mangso lhyi nyah gvng mas namoq lomsjingh nyeis. Housoeh namoq dah lomsjingh cho yahge nghamhloms cho ka Mangso mha zuk joq. 22 Gvshih namoq gas hau jyoeng cho lhyi domsyos gyo zis yah namoq gungs lyis tsain cheihshang lha, namoq dah lomsjingh boekyis lyis jyoengh jyetdap nyeis. Housoeh las namoq nyang changh ehnyet dvnganh yah jyetdap goh nyeis geh. 23 Khasoeh ge lyis namoq gas dwis nyeis las vcaiq vto nyeis Mangso Dang gvng mas ma seq shei dah ungwes uwus moq lo jens teh doms khoeu kat zis xauh goeus. 24 Houka lhaihtoh dang mas, Cangsoeu dvnganh gas mhanh teh nghuot; nyamoq dah phunk dvnganh mhanh buh yah doeusgoh. Hauh mhanh nyhauh tyamp las vbuh eq gywis gyoh tyamp. 25 Nghuot laus eq Yhensain dang gas vcaiq vto joq, ge taiq toh. Hauh Dang gas namoq lyis taiq kyoh dah gausyis dang nghuot.
1 Housoeh yvmvyah namoq gas ma gis cho vja ja yahge, mhuih khwangh cho, tyam cho, noh cho yahge ma phauh gis taiq cho dvnganh yvlyis shang tyamp geh. 2 Lonoeuh teh dyos yah sen, gyingh dah nauh lyis vjangh yuot nyeis geh. Housoeh namoq shuk las kuhxing los zis yah khyuot yoeus zis xauh das. 3 Lhaihtoh dang mas, Yhensain ka kha iq nhaiqnyen shohgyo dah Yhensain nghuot yvlyis namoq nyang kham yoeus ku khyvlyis tsain seq goeus, ge. 4 Yhensain jyank mas los geh, nyang gas dius jens yah vkyuh ma bos ge khyen tyamp, dwis nyeis dah luk nghuot. Nghuot laus eq Mangso yah khyen yoeus, phauhdap dah luk bweh los goeus. 5 Namoq eq dwis nyeis luk teh Mangso jyank mas los las, dyos yah sen dah yhenmuh tsuk yvmas namoq nyang bos wvng las yhung zis kham geh. Hauh joqyos mas Yhensain Yesu gvng mas, Dyos yah sen lha nhaiqdoeus lhom yoeus gis dah lomhxangh lyis Mangso lhyi phudyei das nyhenshang gyingshang phudyei bang teh namoq phuqsoe das. 6 Khasoeh ge lyis lhaihtoh dang mas eq, Yoeuh aq, ngos Zion mha phauhdap luk dvlom khyen lha yhenthunk luklom khyvlyis khyoq toh las, Hauh yvlyis lomsjingh soeu hank laus eq yom ma gyau das. ge bos. 7 Namoq lomsjingh bang xiklyis haih luk gas phauhdap. Nghuot laus eq ma lomsjingh bang xiklyis gas, Yhen tsuk bang vkyuh ma bos ge peq tyamp dah luklom gas Yhaugyen dah yhenthunk lukzains bweh goeus, ge. 8 Tsai gohtoeu lhaihtoh dang dvkoeuq mas Haih luk gas dius jens lyis thungh lains nhang das; nyamoq lyis dyetgyoh nhang dah lukmuh lom eq duot das, ge taiq toh. Nyamoq gas hau Dang lyis ma lomsjingh yvmvyah thungh lains: housoeh tsain bweh zis gas nyamoq xiklyis Mangso dah ehnyet o cho nghuot. 9 Nghuot laus eq namoq gas, khyen yoeus dah vnyau, hwankti phudyei bang, gyingshang dius nyau yahge Mangso nyang sain nyeis bang nghuot. Housoeh khyen yoeus cho ka namoq lyis soeng soeng noq masyah nyah mauhphoh bvng yvmas khi hwank soeu dah phunk bos muhzoh lyis hoeuh kat dyei das xiklyis nghuot. 10 Namoq eq lai loh goeus shishenh lyis Mangso dius nyau ma tsain nghuot, gvshih gas nyah dius nyau tsain nghuot los goeus. Xik pheh Mangso nhaiqnyen zis ma xauh kham yoeus, gvshih gas nhaiqnyen zis tsain xauh kham yoeus goeus. 11 Ngos jyet kang bang eh, namoq gas mungkvn mas gyung suh boenghwus yahge khau nyeis bang teh nghuot las, gungs dyos yah zan goh nyeis, gungsshoh obos cho lhyi khanhamp eq vsomh ma dyei das xiklyis ngos namoq lyis dung kat. 12 Gohnyau bang gas namoq lyis ma gis zis kuot bang nghuot ge tsuk lyis namoq dah gis muhzoh nyvng las Yhensain doms jweh lyih buisnyeis lyis Mangso lhyi yoh chungh bas jungh, nyamoq xikkhonh mas namoq wotwu gis gis kuot geh. 13 Yhensain dah nyoqnho lhyi yoeuh las dius jens mas toeuh yoh bang dah o mha gyoh nyeis geh; nyhang thank toeuh yoh dah hwankti o mha laus eq, 14 ma shop muh kuot bang lyis shoenk zis yahge gis dah muh kuot bang lyis chungh das xiklyis, toeuq kat toh zis xauh dah mungh zau jens dah o mha laus eq gyoh nyeis geh. 15 Khasoeh ge lyis namoq gis dah muh khanh gvng mas seq cho ma bos vkoh vpaq ge taiq los dah dang lyis yoh sam nhang das zis gas Mangso o nyeis. 16 Namoq gas luiq bang teh nyeis geh; nghuot laus eq ma gis cho lhyi nghop gos tyamp das xiklyis namoq dah luiq toeuh lyis vyhung goh. Namoq gas Mangso yah sain toh dah jyeidwis jens teh kuot nyeis geh. 17 Yuk khanghmuh lyis phauh geh: namoq dah lomsjingh vmang vnoeuh lyis jyetdap geh; Mangso lhyi gyukwoms nyeis geh; hwankti lhyi phauh nyang geh. 18 Jyeidwis jens eh, namoq dah yhensain o mha yoh gyoh nyeis das. Nhaiqbos las seq nghamh yoeuh bang lyis kyingh ma nghuot, thung thot bang lyis eq phauh nyang cho vlhomuh Chixoeuq geh. 19 Namoq gas Mangso o cho lhyi tsain seq nyeis las namoq ma kham vvng dah shanghsenh xauh kham nyeis lyis gas Mangso ka hauh nyhenshang namoq lyis shvmanh dyei das. 20 Namoq gas namoq nyang kuot shuot dah yobos gvng mas kham vvng dah yobos lyis kham nyeis lyis gas cha chungh chank bos lah! Nghuot laus eq jyoeng cho lhyi kuot nyeis goeus lyis eq shanghsenh zis kham lha nos zain nyeis lyis gas Mangso ka namoq lyis hauh nyhenshang shvmanh jyehjuh dyei das. 21 Housoeh chank kuot das nyhenshang Mangso ka namoq lyis khi yoeus goeus. Khasoeh ge lyis Khristu nyang eq namoq xiklyis shanghsenh xauh zis yahge namoq nyah beszoh mas yoh chank nang bas jungh ge namoq xiklyis yikhyoh toh dyei. 22 Nyang gas yaunos kuot ku zis ma nghuot; nyah nhuot mas mhuih dang hank khanhamp eq ma xauhgyo ku. 23 Nyang lyis ma phauh gis kuot lyis nyang ma doms tauh kuot; nyang shanghsenh kham uhlyis nyang kyuk tant cho cha ma kuot, jyoeng dah soetuon soeu Mangso loq mas nyah dah nghamhloms cho kyauh toh. 24 Yang gas yaunos toh tyamp las dan yvmas kang yoh dwis nyeis bas jungh, Khristu nyang hau saiqzains thoq mas, yah yaunos nyah gungs mas wons tyamp dyei goeus: nyah dvm gvng mas namoq gas lhoq gis zis xauh goeus. 25 Namoq gas chowhang loh yvng jens teh nghuot. Gvshih gas hau Yvng yoeuh soeu yahge namoq dah gungs dyos lyis tsomh soeu dah thang chank das nyhenshang nyah jyank mas shwih tauh jweh los goeus.
1 Houyah dvyhangteh yhensain nyhiq jens eh, namoq yhensain phoq jens dah o mha gyoh nyeis geh. Haih cho khyvlyis namoq mas Mangso dang lyis ma lomsjingh shih dah yhensain phoq jens bos lyis namoq dah wotwu lyis nyvng las dang dvkhonh yangh ma taiq noh lomsjingh bang yoh bweh nhang das. 2 Khasoeh ge lyis nyamoq gas namoq dah wotwu kha iq gyingh zis yahge phauh nyang yvlyis nyvng das. 3 Namoq dah gungs shunk das zis nghe shot pheh nghuot dah cam soq, ngwis xing yah shunk, dyimis yungh yah ma nghuot. 4 Housoeh kuot das gungsthaiq namoq dah yungh cho ge yvmas jyoeng lha nyoq yah ma yoh nyvng, nhaiqlom khau mha kang dwis cho noeuh nhamp las vjangh nyens nyens nghuot dah ehnyet ge, nyenhkyi kuh ngis yah ma sen, yungh cho bos chah. Hau yungh cho ka Mangso xikkhonh mas phauhdap thank cho nghuot. 5 Khasoeh ge lyis gohnhamp Mangso lhyi nghamhloms nyeis, Lomsjingh cho kuh dah vmesbih jens eq, nyamoq dah yhensain phoq jens dah o mha gyoh nyeis khyvlyis yah nyamoq gungs lyis tsain shunk. 6 Sara eq houyah dvyhangteh teh kuot. Nyang gas Abraham lyis domsyos gyo las nyang lyis yhensain ge lui. Namoq eq cha lhyi eq ma gyuk ma woms, gis dah muh kuot nyeis lyis gas gvshih namoq gas Sara dah lonyi jens nghuot joq. 7 Houyah dvyhangteh yhensain phoq jens eh, vmesbih jens gas yom nhuk bang nghuot ge yvlyis vlhomuh seqgyo las namoq dah yhensain nyhiq jens yah zomh nyeis geh. Nyamoq lyis phauh nyang geh: khasoeh ge lyis nyamoq eq namoq yah dvyhangteh Mangso jyank masyah kang vso vlho jyungshuk kham yoeus das zis nghuot. Haih cho kuot geh, housoeh lyis namoq dah shvmanh dung dang lyis cha yah eq lhoeu nhunk cho ma bweh nhang das. 8 Vthang khyvlyis yah taiq mes zis gas, namoq dvnganhmoq mas dvyhangteh dah nghamh cho yahge kham zo zis yoh bos das las, boekyis nyang changh teh jyetdap goh, nhaiqbos goh zis yah dvyuk yah dvyuk dah nyhen mha gyoh nyeis geh. 9 Ma gis yvlyis ma gis zis yah, nhoengh zis lyis nhoengh zis yah vphuk goh. Housoeh kuot das gungsthaiq shvmanh dang yah phuk geh: khasoeh ge lyis hau shvmanh dah dang gas nyang namoq lyis khi yoeus uhlyis namoq lyis dyei das nyhenshang dangthoengh dyei toh goeus. 10 Lhaihtoh dang mas, Hank laus eq kang dwis cho mha gausyis zis yah nyeisgis yaplhoq cho o mes, nyvng mes soeu ka, ma gis cho taiq dang jhank las hwah dang taiq cho no tyamp chah. 11 Nyang gas ma gis cho mhayah tauh los las gis dah muh kuot bas jungh. Nyang nyenstap cho lhyi xo lha chank kuot bas jungh. 12 Khasoeh ge lyis Yhensain dah nyoqjeih gas dan bang lyis yoeuh nyeis las, nyah no gas nyamoq dung zis lyis gyo dyei. Nghuot laus eq ma gis zis kuot bang lyis gas ma gyo dyei, ge. 13 Namoq gas gis zis nhaiq wvng wvng kuot mes nyeis lyis gas, namoq lyis hank yoh lhoeu yau das lah? 14 Nghuot laus eq jyoeng cho lhyi chank kuot nyeis goeus lyis eq namoq shanghsenh xauh kham nyeis lyis gas, namoq ngelhoq; Hank lyis eq vgyuk goh, chiq eq vchiq goh. 15 Namoq dah nhaiqlom mas Khristu lyis phauh nyang zis yah Yhensain o khyvlyis chungh nyeis geh. Namoq mas kham yoeus toh goeus dah nghamhloms cho lhyi dvyuk yuk nyei nghuot lyis gas vjyuk yoh phuk taiq das xiklyis cicont kuot geh. 16 Nghuot laus eq hauh yvlyis noeuh nhamp las phauh nyang zis yah kuot nyeis geh. Namoq lyis ma phauh gis kuot bang gas, namoq Khristu thang chank bang khyvlyis chank kuot nyeis dah wotwu gis lyis nyvng las nyamoq taiq goeus dah dang yah sen lha xoqphuh bas jungh, namoq dah sohseq ehnyet shang shang yah kang dwis nyeis geh. 17 Khasoeh ge lyis Mangso o khyvlyis dvnghuot lyis gas gis dah muh kuot gvng mas shanghsenh xauh zis gas ma gis zis kuot las shanghsenh zis xauh thoq lyis zes gis. 18 Khasoeh ge lyis Khristu gas yah yaunos gvng mas dvlhain lhyi yah dvnganh dah xiklyis dye shoq shei kham goeus. Nyang gas dius gis dvyuk nghuot joq las yaunos wons bang dah gungsthaiq shei kham goeus. Housoeh kuot cho ka namoq lyis Mangso jyank mas shwih loh das xiklyis nghuot. Nyang gas gungs shoh khyvlyis yah sat zis xauh laus eq dyos mas Mangso dwis toq yoeus goeus. 19 Nyang gas hau dyos gungs mas nghuot uhlyis thung lungh nyeis dah dyos jyank mas loh tsain taiq kyoh. 20 Hauh dyos jens gas gohlhain Noa sangpho tsuk uhlyis Mangso ka ehnyet xing xing yah langh nyeis lyis domsyos ma gyo bang dah dyos tsain nghuot. Hau sangpho mha dius xet yuk kyingh jeis yah khyuot yoeus zis tsain xauh. 21 Hau jeis gas khvnyhik namoq lyis khyuot yoeus dah jeisnyhop kham cho lhyi Chixoeuq dah vlho nghuot. Hauh jeis nyhop gas gungs shoh mas dap dah vchoqh vlhauq lyis shang tyamp zis ma nghuot; sohseq ehnyet vwot yah Mangso xikkhonh mas dangthoengh toh cho nghuot. Namoq hau jeisnyhop lyis kham lhyi Yesu Khristu shei mhayah dwis toq los gvng mas khyuot yoeus zis tsain xauh. 22 Yesu Khristu gas maukhung mha Mangso dah loqyos shot pheh loh nyeis las, Loeuswons bang, maukhung mha toeuh yoh bang yahge yomsoq bos bang dvnganh thoq mas guon nyeis.
1 Khristu gas gungsshoh mas shanghsenh zis xauh goeus las nyang mas bos dah nghamh cho yah dvyhangteh, namoq eq vsainnyang gungs lyis yom hont geh. Khasoeh ge lyis gungs shoh shanghsenh kham goeus soeu ka yaunos yah cha ma sen lo. 2 Housoeh las gvshih masyah haih mungkvn mas namoq kang dwis das xiklyis nyet shih dah shishenh gyo lyis dius dah gungsshoh o mes khyvlyis ma chank, Mangso dah ehnyet khyvlyis joeu yvmas kang dwis chah. 3 Namoq gas lai loh goeus caiq lyis gvgis lo nyangh shoq gohnyau bang kuot mes cho lhyi tsain kuot khoq goeus. Namoq gas lyi ma chank dah muh, ma yungh ma shop dah muh, nyetnau, yhei shuk pwe kuot zis yah vchoqh vlhauq muh, silho paiq cho kuot zis yah kang dwis lai loh goeus. 4 Gvshih gas nyamoq yah dvgeh ye las zau ma guon dah kang dwis cho mha namoq ma bos lo gvng mas nyamoq mauh las namoq lyis ma phauh gis dang taiq. 5 Nghuot laus eq nyamoq gas dwis nyeis bang yahge shei goeus bang lyis soetuon das zis cicont toh soeu Mangso dah xikkhonh mas nyamoq nyang dah cho comh toh zis Chixoeuq chah das. 6 Haih cho gvng mas shei goeus bang lyis eq gausyis dang taiq kyoh goeus. Nyamoq gas gungsshoh khyvlyis kang dwis nyeis uhlyis dius yuk khanghmuh lyis soetuon teh nyamoq soetuon zis xauh goeus bang nghuot. Nyamoq lyis taiq kyoh cho ka Mangso dwis nyeis teh nyamoq dah dyos mas dwis nyeis das xiklyis nghuot. 7 Vyhang dvnganh dah thang thank shishenh jweh los nyeis. Housoeh las namoq gas shvmanh yoh dung das nyhenshang vsainnyang gungs lyis joeu las phuk soh lhaiq mus geh. 8 Dvnganh thoq lyis, namoq nyang changh jyetdap goh yvmas shvnanh khying twih toh geh: khasoeh ge lyis jyetdap cho ka yaunos nyoshoq lyis nghop tyamp. 9 Ma lop lop namoq nyang changh boengh daih goh nyeis geh. 10 Namoq dvyuk dvyuk Mangso jyank masyah lhyenwhei jyehjuh jyungshuk lyis xauh yoeus zis yah dvyhangteh Mangso dah jyehjuh vja ja lyis yvwons yoeus dah lvgungh teh nyang changh nyang gis dah vkyuh xiklyis yhung geh. 11 Dvyuk yuk loeus taiq kyoh lyis gas, Mangso dah dang taiq kyoh bas jungh. Dvyuk yuk phuqsoe lhyi ka Mangso dyei toh dah yom yah dvyhangteh phuqsoe nyeis bas jungh. Housoeh lyis nyang kuot muhzoh dvnganh gas Yesu Khristu gvng mas Mangso dah phunk lyis chungh cho bweh das. Yesu Khristu mas phunk yahge yomsoq vcaiq caiq bos joq. Amen. 12 Jyetdap bang eh, namoq xauh kham zo nyeis, svsoh nos dah shiwu cho ka xikpheh ma bweh ku, gohtseq dah cho jeis nghuot teh vmauh nyeis goh. 13 Mauh nyeis das gungsthaiq, namoq gas Khristu dah shanghsenh yvlyis Khristu yah dvgeh wvng kham yoeus nyeis yvmvyah gaus nyeis geh. Housoeh lyis nyang nyah phunk thuq jyweq xoeuq uhlyis, namoq svsoh gausyis zis yah dyingh los das. 14 Namoq Khristu thang chank bang nghuot yvmvyah ma phauh gis kuot zis xauh kham lhyi namoq ngelhoq. Houka phunk bos dyos ge Mangso dah Dyos gas namoq mas bos dah vjyuk nghuot. 15 Namoq mas dvyuk yuk shanghsenh xauh lyis houka dius sat soeu, khauh soeu, ma gis ma shop las soetuon zis xauh soeu, svbih dah soe mha bos khank yenh soeu nghuot yvmvyah xauh dah shanghsenh cho ma xauh bas jungh. 16 Nghuot laus eq Khristan nghuot yvmvyah shanghsenh xauh lyis gas, hauh yvlyis vxoq; hauh gungsthaiq Khristu dah nyings xauh kham yoeus las Mangso dah jyehjuh lyis chungh nyeis aq. 17 Soetuon xi das shishenh jweh los nyeis las Mangso dah yhenbang shih soetuon zis xauh das. Yang hau soetuon zis cangxeih xauh lyis gas Mangso dah gausyis dang lyis ma lomsjingh bang dah nyhenshang ka khasoeh nghuot das lah? 18 Lhaihtoh dang mas, Dius gis jens dah xiklyis khyuot yoeus zis xauh das nyhenshang yau lyis gas gywes ma tsungh dah yaunos wons bang gas cha bweh los das lah, ge toh. 19 Housoeh las nyamoq xiklyis Mangso dah ehnyet yah dvyhangteh shanghsenh zis xauh bang gas gis dah muhzoh kuot zis yah, vjangh wontang, nyamoq dah Gvnkhanh Soeu lhyi loms toh bas jungh.
1 Phung lhyi shwih uhshe soeu dvyuk khyvlyis phung lhyi yoeuh nyeis soeu ngos gas phung uhshe bang mas bos dah namoq lyis khyoeuq kat. Ngos gas Khristu kham dah shanghsenh lyis nyvng dah kanghjyoeng dvyuk khyvlyis yah eq, thuq los das phunk lyis namoq yah dvgeh xauh kham das oen nghamhloms nyeis soeu khyvlyis eq ngos namoq lyis khyoeuq kat. 2 Mangso namoq lyis kyauh toh dah yvng phung dah yvng yoeuh bang teh Mangso namoq lyis kuot nhang mes khyvlyis yah dvyhangteh, tsoengh kuot nhang zis xauh dah ehnyet teh ma nghuot, gausyis zis yah vlhomuh yoeuh gomh nyeis geh: uhkung phauh ngwis yoh das nyhenshang kyingh ma nghuot, kuot dyei mes dah ehnyet yah phuqsoe geh. 3 Namoq yoeuh gomh das nyhenshang kyauh toh dah phung lhyi guon mes ehnyet yah ma nghuot, hau yvng phung xiklyis gis dah yikhyoh duot nyeis geh. 4 Hau yvng yoeuh uhjyung thuq los uhlyis namoq gas khanhamp eq ma shen loh dah phunk bos buismuk xauh yoeus das. 5 Houyah dvyhangteh wotyamh jens eh, nyenhkyi kuh bang dah o mha gyoh nyeis geh. Namoq nyang changh phuqsoe goh das xiklyis namoq dvnganhmoq ehnyet nyhen mha gyoh ge dah huhyhauh lyis wuot chi geh: khasoeh ge lyis Lhaihtoh dang mas, Mangso ka khwank bang lyis kyamp toh laus eq, ehnyet nyhen mha gyoh bang lyis jyehjuh dyei las nyoqnho yoh nhang, ge bos. 6 Housoeh las Mangso ka nyah dah gis shishenh jweh lyis namoq lyis toeu toq bas jungh nyah dah yomzains loq o mha namoq ehnyet nyhen mha gyoh nyeis geh. 7 Namoq dah chiqh cho dvnganh nyang lyis kyauh toh geh: khasoeh ge lyis Nyang namoq lyis loqzamh zwi nyeis. 8 Namoq jyoeng zaih zis yah zungh nyeis geh: namoq dah jeswus ge dah Satan ka, khayuk lyis yoh nyhau tyamp das lah, ge nyings yenh dah khangkhyi teh lhaink yenh. 9 Namoq gas namoq lhom yoeus goeus dah lomsjingh cho lhyi goeng toenk nhang lha hau jeswus lyis thoenk zan geh. Khasoeh ge lyis mungkvn mas nyeis namoq dah lomsjingh boekyis eq housoeh teh shanghsenh xauh nyeis cho lhyi namoq seq. 10 Nghuot laus eq namoq dvdvm shanghsenh thang lhyi, jyehjuh dvnganh dah Mangso ka namoq lyis Khristu mas dvdain dvlom bweh nhang lha vcaiq vto phunk mas xauh wvng bas jungh, namoq lyis khi yoeus dah Yhensain nyang namoq lyis dyinghjet cho, goeng toenk cho, yom yahge goeng dah vpom dyei das. 11 Nyang mas yomsoq vcaiq vto bos joq bas jungh. Amen. 12 Ngos haih maussauh lyung lyis Sila bos pangh zis yah lhaih kat; ngos nyang lyis wontang dah Khristan vmang vnoeuh oen suon yoeus. Heika jyoeng dah Mangso jyehjuh nghuot cho ngos namoq lyis yomdyei zis yahge kanghjyoeng kat das xiklyis, haih maussauh lhaih kat. Houmha goeng goeng yap joq geh. 13 Babilon wus mas nyeis, namoq lyis teh khyen yoeus zis xauh dah phung ka namoq lyis jeshuh kat. Ngah lo Makho eq namoq lyis jeshuh kat. 14 Namoq nyang changh jyetdap vlho ge, bvlot tanh zis yah jeshuh goh geh. Khristu dah dius jens dvnganhmoq mas nyenstap zis joq bas jungh.
1 Yesu Khristu dah jyeidwis yahge lvgyo duot soeu, ngos Simon Petru gas, yah Mangso yahge khyuot yoeus Yhensain Yesu Khristu dah dan cho mha, ngamoq teh phauhdap dah lomsjingh cho xauh yoeus bang lyis dang tying kat. 2 Mangso yahge yah khyuot yoeus soeu Yesu Khristu lyis namoq seq gvng mas namoq gas jyehjuh yahge nyenstap cho dyinghjet shoq xauh kham yoeus bas jungh. 3 Nyah phunk yahge gis cho lhyi chomp kham yoeus das nyhenshang namoq lyis lui yoeus dah Khristu lyis seq gvng mas Mangso dah gywes so yomsoq gas jyoeng dah lomsnoq cho mha kang yoh dwis nyeis das xiklyis yang mas chah nyeis cho dvnganh dyei goeus. 4 Haih cho khyvlyis svsoh kuhxing lha phauhdap dah jyehjuh jyungshuk yah sen dah dangthoengh yang lyis dyei toh goeus. Housoeh las haih jyehjuh gvng mas yang gas mungkvn mas dah dyoqbis loh nhang dah nyetnau cho mhayah yoh luiq las soengh choenk gywes tsungh so tsungh bang yoh bweh los. 5 Haih cho gvng mas namoq lomsjingh cho mha gis cho, gis cho mha seq cho lhungh kat geh. 6 Seq cho mha vsainnyang gungs lyis joeu cho, vsainnyang gungs lyis joeu cho mha jhen cho, jhen cho mha gywes so lhyi phauh nyang cho, 7 Gywes so lhyi phauh nyang cho mha vmang vnoeuh sain teh nhaiqbos goh cho, hou mhayah jyetdap sainhnos goh cho lhungh kat geh. 8 Heinyhoq gas namoq mas bos chah dah kank bos cho tsain nghuot. Haih cho namoq mas magons magoh bos nghuot lyis gas namoq dah Yhensain Yesu Khristu lyis namoq seq zis yah kang dwis cho mha thyvdvng siq siq yah vkyuh bweh nhang das. 9 Nghuot laus eq hauh kank bos cho lhyi ma yoh soeu ka, we we ma nyvng nyoqjet soeu nghuot las, gohnhamp nyah yaunos masyah cheihshang kat zis xauh cho lhyi tohnyhik tyamp. 10 Housoeh las ngah boekyis eh, namoq lyis Mangso khi lha khyen yoeus cho lhyi vjangh xauh kham das xiklyis yomkat nyeis geh. Housoeh kuot nyeis lyis gas, namoq dah lomsjingh cho lhyi khanhamp eq ma tyamp das. 11 Hauh cho chank nyeis lyis gas, yah Yhensain yahge khyuot yoeus soeu Yesu Khristu dah vcaiq vto munghdan mas yoh wvng das toeuh, namoq lyis dyingh dyingh dyei das. 12 Housoeh las namoq haih cho lhyi tsain seqgyo las lhom yoeus toh goeus dah jyoeng cho mha vpom goeng goeng kuot toh goeus laus eq ngos namoq lyis vjangh taiq kyingh nyeis das. 13 Ngos kang dwis nyeis shih yoq lyis haih cho yah sen lha namoq lyis taiq kyingh zaih nhang zis gas ngos kuot vvng dah muh nghuot oen nghamh. 14 Yah Yhensain Yesu Khristu ngos lyis bvng bvng taiq toh goeus zis yah dvyhangteh, hai seq shei dah gungs ma nyangh lyis ngos haih gungs lyis toh tyamp das zis seq. 15 Housoeh las ngos shei thang lhyi haih cho lhyi dvcho cho yah namoq vjangh soh nyeis das xiklyis ngos yomkat ohhont das. 16 Yah Yhensain Yesu Khristu dah yomzains yah jweh los cho ngamoq namoq lyis seq nhang das xiklyis ngamoq gas dius yah kuot taiq dah mvnyei mas ma nges, nyah kuhxing cho lhyi ngamoq nyoqjeih yah nyvng goeus. 17 Nyang lyis Uwus Mangso jyank masyah nyoqnho ngelang yahge phunk dyei uhlyis, zes thank dah phunk nyoqnho ngelang khau mhayah nyah jyank mas jweh los dah thwe ka, Haih soeu ka ngos jyetdap Lo nghuot, ngos nyang lyis nhaiqdoeus, ge taiq uhlyis eq ngamoq houmha nyang yah dvgeh nghuot. 18 Ngamoq Yhensain yah dvgeh hau gyingshang boms thoq mas nyeis uhlyis maukhung mhayah nyings thuq los dah thwe lhyi ngamoq nyang xauhgyo. 19 Housoeh yvmvyah ngamoq gas lvpe jens taiq toh dah nyoqnyvng dang lyis zes yoh nghamhnywe. Namoq hauh Dang lyis vlhomuh gyo nyeis geh. Khasoeh ge lyis houka namoq dah ehnyet mas bvng los las buhnyhiq thuq los shishenh jweh shoq soeng soeng noq yvmas bvng joq dah nyibung teh nghuot. 20 Nghuot laus eq hank laus eq vsainnyang o khyvlyis lhaihtoh dang mas bos dah lvpe dang lyis vjyuk ma yoh phant yvlyis cangxeih comh toh chah. 21 Khasoeh ge lyis lvpe dang kha khonh eq dius dah ehnyet o khyvlyis bweh los zis ma nghuot. Gyingshang Dyos yah bos jyonh zis xauh bang gas Mangso jyank masyah jweh los dah dang lyis tsain taiq.
1 Lai loh goeus shishenh lyis dius jens mas lvpe hwah tsain thuq los zis yah dvyhangteh, namoq mas eq ma jus dah jyauh bang thuq los das. Nyamoq gas thyoqpi cho, ma jus dah jyauh cho gauh chi hwank las vsainnyang lyis khyuot yoeus goeus dah Yhensain lhyi eq peq tyamp das. Housoeh nyamoq gas nyamoq thoq mas nyetlos nyettant dyoqbis cho jweh los nhang das. 2 Housoeh bweh laus eq dius nyoshoq gas nyamoq dah ma gis wotwu cho mha chank loh das. Nyamoq housoeh kuot yvmvyah jyoeng cho lhyi ma gis khyvlyis tsain taiq jwangh das. 3 Hai ma jus dah jyauh bang gas nyamoq dah nyoqnoq ehnyet yah kuot yoeus dah mvnyei taiq las vmyat xo das. Nyamoq lyis joeng das soetuon soeu ka, gohlhain yah yangh cicont kuot toh goeus, nyamoq lyis mhont das soeu ka yhet muih joq zis ma nghuot. 4 Mangso ka, yaunos kuot dah loeuswons bang lyis yangh khyamhsa ma dyei, nyamoq lyis munyi thomh mas khyoq las, hau soeng soeng noq yvmas shamjvng yah twih las soetuon das buisnyeis lyis langh nhang toh. 5 Mangso ka gohlhain caiq lyis dah mungkvn lyis eq khyamhsa ma dyei, gywes so lhyi ma phauh nyang dah mungkvn lyis dvjeis lhyi nhang. Dan cho lhyi taiq kyoh soeu Noa yahge gohtoeu dius nyhet yuk lyis gas khyuot yoeus. 6 Mangso ka Sodom yahge Gomora aiq wus lyis eq nyi yah mhont las gywes ma tsungh bang khasoeh bweh los das cho yikhyoh toh. 7 Nyang gas lyi ma chi, wotwu dyoq dah dius jens gvng mas nhaiqkuk yomgyau nyeis soeu ge dah Lot lyis gas lhuiq kat. 8 Hauh dan soeu ka nyamoq yah dvgeh nyeis dah uhlyis dvnyeih dvnyeih nyamoq kuot dah ma gis muh lyis nyvng, xauhgyo gvng mas nyah ehnyet mas shanghsenh nyung daus nyeis. 9 Housoeh yvmvyah Mangso ka gywes so lhyi phauh nyang bang lyis nyamoq xauh nyeis dah shiwu cho mhayah khasoeh lhuiq kat das zis yahge lhung bang lyis soetuon buisnyeis jweh shoq khasoeh joeng das zis seq. 10 Zes las vchoqh vlhauq gungsshoh dah nyetnau cho mha tsain suh e las, Mangso dah toeuh lyis maphauh madanh kuot bang gas housoeh teh cho xauh das. Hai ma jus dah jyauh bang gas svsoh womh las lhoq lhoq teh nyhang mha dah phunk bos bang lyis phauh nyang cho ma Chixoeuq, nyamoq lyis ma phauh gis kuot. 11 Hai ma jus dah jyauh bang thoq lyis yom yahge yomsoq zes tsain bos dah Loeuswons bang yangh Yhensain xikkhonh mas nyamoq lyis ma phauh gis zau ma kauq. 12 Nghuot laus eq haih dius jens gas, nyhik yoeus las sat das xiklyis nyeis dyos dah gaunyhauq lamh jens teh, nyamoq yangh ma seq dah soengh choenk ehnyet yah ma phauh gis kuot. Nyamoq gas yewus yhangteh mhont tyamp zis xauh das. 13 Nyamoq gas nyamoq yah gohyuk lyis xauh nhang dah shanghsenh cho tauh dyei zis xauh das. Nyeihgungs lyis yangh nyamoq dah gungs shoh pyo cho lhyi tyink das xiklyis gas nyamoq dah pyo cho nghuot. Nyamoq gas namoq yah dvgeh zo shuk huom mha bos wvng yvmvyah namoq xiklyis vxoq vcaiq, nyoqnho gyoh cho bweh nhang nyeis. Nyamoq gas mhuih cho lhyi tsain ngwis. 14 Nyamoq gas nyi shuot lvng shuot muh yoh kuot das toeuh xo thoq lyis gohtoeu cha lhyi eq ma mes yoeuh. Nyamoq yaunos kuot las xauh kham dah whitau lhyi nhaiq ma thoq shei. Nyamoq dah ehnyet lyis nyoq noq o seq bos das xiklyis xik toh goeus. Nyamoq gas Mangso dah nhoengh zis xauh nyeis. 15 Nyamoq gas cho dan lyis toh tyamp las cho whang loh: Beora dah lo Balam chank dah cho mha chank loh goeus. Balam gas ma jus dah muh kuot las yoh dah uhkung phauh lyis obos soeu nghuot. 16 Balam gas nyang kuot dah yaunos gvng mas nyho lha jyauh zis xauh. Nyah mauhlyihzoe gas dius nyingh yah dang taiq los las lvpe dah huonh muh lyis tomp tyamp. 17 Haih dius jens gas jeis kanh dah jeisthuq dwang yahge lyeis jyang yah muot tangh los dah jyommauh teh tsain nghuot. Mangso ka soeng soeng noq yvmas nyamoq xiklyis noq thank joqyos dvkoeuq sont toh dyei. 18 Nyamoq gas shuot dah kang dwis cho mhayah vsaiq yoh luiq los bang lyis vkom mha moengs dang taiq zis yah gungs shoh dah nyetnau cho mha chuq yoeus las cho shwih whang loh. 19 Nyamoq gas nyamoq nyang dyoqbis dah wotwu dah jons tsain duot toh las gohyuk lyis lhuiq cho das ing toh. Khasoeh ge lyis dius dvyuk gas nyang lyis yoh ung dah vyhang dvnganh dah jons nghuot. 20 Dius jens gas namoq dah khyuot yoeus soeu Yhensain Yesu Khristu lyis yoh seq gvng mas, mungkvn dah vchoqh vjyot yomsoq masyah luiq los thang lhyi, tsai dvlhain vchoqh vjyot cho yah ung tyamp zis xauh lyis gas, thang thank lyis hauh bang dah bweh cho ka cangxeih thoq lyis zes xungh. 21 Dan cho lhyi seq lho lha, nyamoq lyis kyauh toh, gyingshang dah tyingtoh dang lyis lhyweq tyamp thoq lyis, hauh cho lhyi ma seq seq nyeis das zis gas dvzes gis shih. 22 Lvkhuih gas nyang duk yvlyis doms zo, wuq eq cheih dyei thang lhyi thomh boengh mas doms lhoeuh, ge dah sangkhyangh gas nyamoq xiklyis jus joq.
1 Ngos jyetdap dah dyenschangh jens eh, heika ngos namoq lyis aiq vlhain huon maussauh nghuot. Hai aiq koeuq mas namoq dah shangkyei ehnyet vpom yah seq nghamh yoeuh das xiklyis haih cho jens lyis taiq kyingh kat. 2 Gyingshang dah lvpe jens gohnhamp taiq khoq dang lyis eq, namoq dah lvgyo jens dah loq cho yah, namoq xauh yoeus dah khyuot yoeus soeu Yhensain tyingtoh dang lyis eq ngos namoq lyis doms soh nhang mes. 3 Hau thang thank buisnyeis lyis vsainnyang dah gungs shoh nyetnau khyvlyis chank zis yah kang dwis bang thuq los das yvlyis cangxeih seq toh chah. Nyamoq gas namoq lyis jwangh zis yah, Yhensain doms jweh los das ge dangthoengh dyei toh ma nghuot lhyeh? Gvshih nyang khalhye gah? 4 Ngamoq uwus moq shei loh goeus: nghuot laus eq vyhang dvnganh gas mungkvn lyis gvnkhanh dah shishenh yah dvyhangteh dvnghuot joq nyvng, ge los das. 5 Mangso ka cangxeih lyis maukhung yahge nyeisjvng lyis nyah dang yah gvnkhanh toh goeus yvlyis eq, nyeisjvng lyis jeis khau mhayah jeis yah she thuq toh goeus yvlyis eq, 6 tsai nyeisjvng vcauh lyis jeis yah dvjeis lhyi lha thyoq tyamp goeus yvlyis eq nyamoq pa i tohnyhik tyamp. 7 Nghuot laus eq Mangso ka gvshih joq dah maukhung yahge nyeisjvng lyis nyi yah mhont tyamp das xiklyis gohlhain dah hau dang yah nyang shung toh. nyamoq lyis gywes ma tsungh bang yah dvgeh soetuon lha mhont das buisnyeis jweh shoq toh shih das. 8 Nghuot laus eq jyetdap dyenschangh jens eh, hai dvcho lhyi vtohnyhik goh, Yhensain xikkhonh mas buisnyeis dvnyeih yahge khyoengh zvn gas cha ma shaih, nyah xiklyis hau aiq ja gas dvyhangteh dvnghuot. 9 Dius dvyhamh nghamh teh Mangso ka nyang dangthoengh toh goeus dah cho lhyi kuot tyink das xiklyis sheq nyeis zis ma nghuot; dvnganhmoq yaunos masyah lhain los las hank eq dyoqbis zis ma xauh bas jungh, nyang o nyeis yvmvyah nyang namoq lyis jhen nyeis zis dvnghuot. 10 Yhensain dah buisnyeis gas khauh soeu teh jweh los das. Hauh buisnyeis lyis maukhung nyings huomh toh thwe yah dyuk loh das. Maukhung vyhang dvnganh eq nyi ngeh las dyoqbis tyamp das; nyeisjvng yahge houmha nyeis ya nyeis zis gas bi tyamp das. 11 Vyhang dvnganh heisoeh mhont tyamp zis xauh das lyis gas, namoq khasoeh teh dius jens nghuot chah das lah? Namoq dah kang dwis cho ka gyingshang lha Mangso mha kyauh toh dah kang dwis cho nghuot chah das. 12 Namoq gas Mangso dah buisnyeis lyis langh nyeis cho mha lvnyap jweh los bas jungh gis thank khyvlyis yomkat zis yah langh nyeis geh. Hauh buisnyeis lyis maukhung ka ngeh las dyoqbis tyamp das; maukhung vyhang jens eq ngeh yvmvyah yings tyamp das. 13 Nghuot laus eq yang gas Mangso dangthoengh dyei toh goeus, dan bang nyeis das yhen ge maukhung vsaiq yahge nyeisjvng vsaiq lyis nghamhloms las dvlangh nyeis. 14 Housoeh las ngah dyenschangh jens eh, namoq hauh buisnyeis lyis langh nyeis shishenh lyis Mangso xikkhonh mas namoq dah ehnyet shangkyei lha yaunos ma dap bas jungh oen zis yahge nyang mas nyenstap zis yah yoh nyeis das xiklyis yomkat ohhont nyeis geh. 15 Yang jyetdap dah vmang vnoeuh Paulo eq, Mangso dyei dah joeui yhung lha namoq jyank mas lhaih kat goeus zis yah dvyhangteh, yang Mangso lhyi ehnyet xing xing yah langh nyeis zis gas khyuot yoeus xauh das xiklyis toeuh nghuot yvlyis seq geh, nyvng geh. 16 Paulo ka haih cho yah sen lha nyang huon maussauh mas hei yah dvyhangteh lhaih xoeuq toh. Nyah maussauh mas bos dah cho dvkhamh gas seqgyo nanh las joeui ma seq bang yahge ehnyet ma gying bang gas shuot khyvlyis vjyuk tsain phant yoeus. Dius jens gas gohtoeu lhaihtoh dang jens lyis shuot khyvlyis vjyuk phant yoeus. Housoeh nyamoq dah dyoqbis cho lhyi nyamoq nyang kuot yoeus goeus. 17 Nghuot laus eq dyenschangh jens eh, namoq gas heinyhoq lyis tsain seq toh goeus. Housoeh yvmvyah namoq gas lyi ma chi bang dah shuot cho pheh shwih loh yvpheh ma bos das zis yahge gau dah kang dwis cho mhayah ma gyoh tyamp das xiklyis zaih nyeis geh. 18 Namoq gas yah khyuot yoeus Yhensain Yesu Khristu dah jyehjuh yahge seq cho mha tsoq las kuhxing jebais los geh. Gvshih eq, vcaiq vto eq Yesu Khristu mas phunk bos bas jungh. Amen.
1 Cangxeih lyis yah nyeis, hauh kang dwis dang dah cho namoq jyank mas ngamoq lhaih kat. Ngamoq hauh zis lyis xauhgyo ku goeus. Nyoqjeih yah eq, nghuot goeus ngamoq nyvng eq nyvng ku goeus, ngamoq loq yah eq tanh ku goeus. 2 Hauh kang thuq los uhlyis ngamoq hauh zis lyis nyvng ku goeus. Housoeh las ngamoq hauh cho lhyi kanghjyoeng tsain kat. Uwus yah dvgeh nyeis ku goeus hauh vcaiq vto kang ka ngamoq jyank thuq los las ngamoq hauh kang cho namoq lyis taiq kyoh. 3 Ngamoq gas Uwus Mangso yah eq, Lo Yesu Khristu yah eq, zomh ku goeus las namoq eq ngamoq yah dvgeh yoh zomh bas jungh, ngamoq gyo ku, nyvng ku dah cho ngamoq namoq lyis taiq hoeuh. 4 Ngamoq gas hau gausyis cho namoq mas top jweh los bas jungh oen haih maussauh lhaih kat. 5 Mangso ka bvng zis nghuot las Nyang mas chuot zis ma bos. Haih Mangso dang lyis nyah lo masyah ngamoq xauhgyo ku goeus gvng mas namoq lyis taiq kyoh. 6 Yang gas nyang yah yoh zomh nyeis goeus ge las mauchuotdwang mas suh e nyeis shih lyis gas yah dang mas eq, yang kuot dah muhzoh mas eq, yang hwah bang tsain nghuot. 7 Nghuot laus eq, nyang gas bvng yvmas nyeis teh, yang eq bvng yvmas suh e nyeis lyis gas yang dvyuk yah dvyuk nyang changh zomh goh nyeis bang nghuot las nyah lo Yesu dah suih gas yang mas bos dah yaunos lyis cheihshang tyamp dyei goeus. 8 Yang yobos ma bos ge taiq lyis gas, yah gungs lyis yvnyang hwah bang tsain nghuot las yang gas dan cho ma bos bang tsain nghuot. 9 Nghuot laus eq, yah yaunos lyis Mangso xikkhonh mas Chixoeuq las rhen zis yah shangphu lhyi ka, nyang gas nyah dangthoengh mas doengs joq las hauh dan dah muhzoh lyis kuot soeu nghuot gvng mas, yah yaunos lyis khyuot tyamp dyei das zis yahge kuot cu cho dvnganh masyah cheihshang tyamp dyei das. 10 Yang yaunos ma kuot ge taiq lyis gas, yang Mangso lhyi hwah soeu kuot nhang lha Mangso dah dang eq yah jyank mas ma bos.
1 Ngah loshang jens eh, namoq yaunos ma kuot bas jungh, haih maussauh ngos namoq jyank lhaih kat. Nghuot laus eq dvyuk yuk yaunos zangh kuot lyis gas, hauh Uwus dah xikkhonh mas, yah xiklyis shangphu dyei soeu Yesu Khristu ge, dan Soeu yang yoh. 2 Yesu Khristu nyang nyang, yah yaunos xiklyis gungsthaiq lomhxangh nghuot las, nyah gvng mas, yah yaunos khyuot tyamp dyei zis tsain xauh thoq lyis ma goh dius yuk khanghmuh dah yaunos lyis eq khyuot tyamp dyei goeus. 3 Nyah tyingtoh dang lyis yang domsyos gyo zis yah chank nyeis lyis gas yang nyang lyis seq bang nghuot cho vlhomuh yoh seq. 4 Ngos nyang lyis seq ge dvyuk yuk taiq laus eq, Nyah tyingtoh dang lyis domsyos ma gyo lyis gas hauh soeu ka hwah soeu nghuot las hauh jyoeng zis gas nyah jyank mas ma bos. 5 Hank laus eq nyah dang lyis domsyos gyo soeu ka Mangso lhyi jyet ehnyet nyang mas yoh dyinghjet los goeus soeu nghuot. Heika yang Mangso yah dvdain dvlom khasoeh yoh bweh goeus cho lhyi top seq nhang. 6 Yang gas Mangso yah dvdain dvlom bweh las kang dwis bang nghuot oen taiq lyis gas, Yesu Khristu kang dwis dah wotwu yah dvyhangteh yang eq kang dwis chah. 7 Ngah jyetdap bang eh, gvshih ngos lhaih kat, haih tyingtoh dang gas vsaiq ma nghuot, cangxeih lyis yah namoq yoh toh dah tyingtoh dang vcauh dvnghuot. Hau tyingtoh dang cauh gas namoq xauhgyo ku goeus dah Mangso dang nghuot. 8 Nghuot laus eq gvshih ngos namoq jyank lhaih kat dah tyingtoh dang gas dvcho pheh yah vsaiq nghuot. Housoeh vsaiq nghuot zis jyoeng cho lhyi Khristu dah kang dwis yvmas eq, namoq dah thungh phuh cho mha eq yoh nyvng. Khasoeh ge lyis chuot cho ka bi tyamp las hauh jyoeng dah bvng zis gas gvshih yangh bvng joq. 9 Hank laus eq bvng yvmas nyeis ge lho lha nyah boekyis lyis hoeng soeu ka gvshih yangh mauchuotdwang mas lungh joq shih soeu nghuot. 10 Hank laus eq nyah boekyis lyis jyetdap soeu ka, hauh bvng yvmas nyeis soeu nghuot. Nyang mas dius dvyuk yuk lyis yaunos kuot nhang ja cha eq ma bos. 11 Nghuot laus eq nyah vmang vnoeuh lyis hoeng soeu ka, hauh mauchuotdwang mas nyeis las hauh chuot yvmas suh e gvng mas nyang khapheh loh nyeis zis yangh ma seq. Khasoeh ge lyis hauh chuot zis gas nyah nyoqjeih lyis jet nhang. 12 Ngah lo jens eh, Khristu gvng mas namoq dah yaunos khyuot tyamp zis xauh goeus yvmvyah ngos namoq lyis lhaih kat. 13 Uwus moq eh, cangxeih lyis yah nyeis nyeis soeu lhyi namoq seq nyeis yvmvyah, ngos namoq lyis lhaih kat. Loloeu jens eh, hauh ma shop dah yius Satan lyis namoq ung tyamp gvng mas, ngos namoq lyis lhaih kat. 14 Ngah lo jens eh, hauh Uwus lyis namoq seq nyeis yvmvyah ngos namoq lyis lhaih kat. Uwus moq eh cangxeih lyis yah nyeis nyeis soeu lhyi namoq seq yvmvyah ngos namoq lyis lhaih kat. Wotyamh jens eh, namoq yombos las Mangso dah dang namoq mas bos joq zis yah hauh ma shop dah yius Satan lyis ung tyamp gvng mas ngos namoq lyis lhaih kat. 15 Nyeisjvng lyis eq, nyeisjvng mas joq dah vyhang jens lyis eq vjyetdap nyeis goh. Namoq nyeisjvng lyis jyetdap nghuot lyis gas Uwus lyis ma jyetdap. 16 Nyeisjvng yah sen dah vyhang joq yah joq zis, gungs shoh dah nyetnau cho, dius jens nyoqjeih yah nyvng las obos cho yahge, haih mungkvn mas dius jens khwank zis yahge moengs nhang dah vyhang dvnganh gas Uwus jyank masyah los zis ma nghuot. Hau dvnganh gas nyeisjvng masyah thuq los zis dvnghuot. 17 Nyeisjvng yahge houmha dah cangsoeu dius jens nyoqnoq obos cho ka lai loh nyeis laus eq, Mangso nhaiqdoeus khyvlyis chank kuot nyeis soeu ka vcaiq vto nyeis. 18 Ngah lo jens eh, thang thank dah buisnyeis jweh ni los goeus! Namoq lyis taiq toh goeus zis yah dvyhangteh Khristu dah jeswus ge soeu ka jweh los das. Gvshih yangh Khristu dah jeswus jens nyoshoq thuq los goeus las thang thank buisnyeis jweh ni los goeus zis yang tsain seq. 19 Haih dius jens gas yah dah zomhgoh phung yah jyoengh ma sen, housoeh las yang masyah nyamoq tsain thuq loh. Sen zis jyoeng lhyi ka nyamoq yang yah nyeis das. Nghuot laus eq nyamoq housoeh thuq loh zis gas nyamoq mas hank eq yang yah jyoengh ma sen yvlyis vlhomuh Chixoeuq nyeis. 20 Nghuot laus eq, Yesu Khristu gas namoq dah thoq mas hau Gyingshang Dyos huot khyoq zis xauh goeus las namoq dvnganh gas hauh jyoeng cho lhyi tsain seq. 21 Namoq lyis ngos lhaih kat cho ka, hau jyoeng yvlyis namoq ma seq yvmvyah ma nghuot. Namoq seq yvmvyah dvnghuot. Hwah cho ka jyoeng cho yah khanhamp eq cha ma sen yvlyis eq namoq seq las lhaih kat. 22 Housoeh lyis hwah soeu ka hank nghuot lah? Yesu gas Meshia ma nghuot ge ngoek tyamp soeu nyang nghuot. Hau Uwus yahge Lo lyis ngoek tyamp soeu ka Khristu dah jeswus nghuot. 23 Hank laus eq, hau Lo lyis ngoek tyamp soeu ka Uwus lyis ngoek tyamp soeu eq nghuot. Hauh Lo lyis lhom yoeus soeu ka Uwus lyis lhom yoeus soeu eq nghuot. 24 Cangxeih lyis yah namoq xauhgyo ku dah Mangso dang lyis namoq dah ehnyet nhaiqlom khau mha bos joq nhang geh. Hauh Mangso dang namoq mas bos joq nghuot lyis gas, namoq vjangh yah Uwus yahge Lo yah dvdain dvlom nyeis das. 25 Haih zis gas Khristu nyang yang lyis dangthoengh dyei toh dah vcaiq vto kang nghuot. 26 Namoq lyis mhuih las chowhang shwih whang bah ge yomkat nyeis bang dah cho namoq jyank mas lhaih kat. 27 Nghuot laus eq namoq gas, Khristu nyah dyos namoq thoq mas huot khyoq dyei zis xauh goeus las, namoq mas hauh dyos bos nyeis dvchank hank eq namoq lyis ma jyauh lo noh. Khasoeh ge lyis nyah dyos gas namoq lyis cho khvt khanghmuh mas jyauh. Nyang jyauh cho ka jyoeng, hwah cho cha eq ma bos. Housoeh las namoq gas dyos jyauh zis yah dvyhangteh domsyos gyo las Khristu yah dvdain dvlom bweh nyeis geh. 28 Nghuot goeus lo jens eh, nyang thuq xoeuq buisnyeis lyis namoq gas xoq gyuk zis yah ma tamh noh, nyah xikkhonh mas womh womh yoh yap das xiklyis nyang yah dvdain dvlom bweh nyeis geh. 29 Khristu gas dan yvlyis namoq seq lyis hauh dan khyvlyis chank kuot bang yuk khanghmuh gas Mangso dah lo jens nghuot yvlyis namoq seq chah.
1 Yoeuh aq, Mangso ka yang lyis kha iq jyetdap? Nyah jyetdap ehnyet svsoh kuh joq las yang lyis Mangso dah lo jens ge nyhink goeus zis yah dvyhangteh yang eq jyoengh Mangso dah lo jens tsain nghuot. Nghuot laus eq mungkvn gas Mangso lhyi ma seq yvmvyah yang lyis eq ma tsain seq. 2 Jyetdap bang eh, gvshih yang Mangso dah lo jens tsain nghuot. Nghuot laus eq thang pheh yang cha bweh das zis dede ma yoh seq shih: Nghuot laus eq Khristu thuq los uhlyis yang gas nyang yah doeus das, khasoeh ge lyis nyang nyang nghuot zis yah dvyhangteh nghuot yvlyis yang tsain nyvng das. 3 Khristu mas hau nghamhloms cho yoh dah dius yuk khanghmuh gas Khristu nyang gyingshang joq zis yah dvyhangteh vsainnyang dah gungs lyis eq gyingshang nhang. 4 Yaunos kuot soeu hank laus eq Mangso dah lyi lyis lhyweq goeus. Khasoeh ge lyis yaunos gas lyi lhyweq muh nghuot. 5 Khristu gas cangsoeu dius jens dah yaunos lyis yoeus tyamp dyei das xiklyis thuq los zis namoq seq: nyang mas yaunos ma bos. 6 Housoeh las Khristu mas nyeis soeu hank laus eq tsoq las yaunos ma kuot. Yaunos tsoq kuot nyeis soeu hank laus eq nyang lyis ma nyvng, ma seq. 7 Ngah lo jens eh, hank eq namoq lyis chowhang ma shwih whang bas jungh; Khristu gas dan zis yah dvyhangteh dan dah muh kuot soeu hank laus eq dan. 8 Yaunos tsoq kuot nyeis soeu hank laus eq, Satan yah sen soeu nghuot, khasoeh ge lyis Satan ka cangxeih lyis yah yaunos kuot goeus. Housoeh las yius dah muhzoh lyis thyoq tyamp das xiklyis Mangso dah Lo gas thuq los goeus. 9 Mangso dah lo duot goeus soeu ka tsoq las yaunos ma kuot. Khasoeh ge lyis hauh soeu jyank mas Mangso dah seq cho yomsoq bos. Nyang gas Mangso dah lo nghuot yvmvyah yaunos ma yoh tsoq kuot. 10 Houka Mangso lo jens yahge yius dah lo jens ma doeusgoh cho dede nghuot. Hank laus eq dan dah muhzoh ma kuot, nghuot ya vsainnyang dah vmang vnoeuh lyis ma jyetdap soeu ka Mangso dah lo ma nghuot. 11 Cangxeih lyis yah namoq xauhgyo ku dah loeus gas, yang nyang changh jyetdap goh chah ge zis nghuot. 12 Yang gas Ka-in teh ma gis nghuot. Nyang gas ma shop soeu shot pheh dah dius duot las nyah vnoeuh Abel lyis sat. Ka-in ka Abel lyis chamus sat? Nyang kuot dah muhzoh shuot joq. Nyah vnoeuh kuot dah cho jens gas jus joq las nghuot. 13 Housoeh las boekyis eh, mungkvn dius jens namoq lyis hoeng laus eq vmauh goh. 14 Yang boekyis lyis jyetdap yvmvyah yang shei masyah dwis yvpheh yoh lhyweq goeus zis yang tsain seq. Boekyis lyis ma jyetdap soeu ka hauh shei cho dah yomsoq vkhau mha dvnyeis shih. 15 Nyah boekyis lyis hoeng soeu hank laus eq, dius sat soeu nghuot. Dius sat soeu ka nyang mas vcaiq vto kang ma bos yvlyis namoq seq. 16 Khristu gas yah xiklyis nyah kang dyei tyamp yvmvyah jyoeng dah jyetdap ehnyet gas cha nghuot yvlyis yang tsai seq. Yang eq yah kang lhyi yah boekyis xiklyis dyei gis. 17 Zisyos yoh soeu nghuot toh las nyah boekyis vshoh vjyen chah nyeis zis nyvng las nyah dah nhaiqnyen ehnyet khomh nyheih toh lyis gas nyang gas Mangso lhyi jyetdap soeu oen khasoeh yoh taiq das lah? 18 Ngah lo jens eh, yah dah jyetdap cho ka taiq dang yah kyingh ma nghuot, Muhzoh yah Chixoeuq dah jyetdap cho jyoeng nghuot chah. 19 Haih gungs gas jyoeng cho yah sen bang nghuot zis yoh seq. Mangso dah xikkhonh mas yang nghamhnywe zis yah nghuot das. 20 Yah dah sohseq ehnyet gas yang lyis dang thang thyet lyis Mangso ka yah sohseq ehnyet thoq lyis zes cho yahge nyang dvnganh yvlyis seq cho lhyi yang seq. 21 Housoeh las jyetdap bang eh, yah dah sohseq ehnyet yah yang lyis dang thang ma thyet lyis gas yang Mangso dah xikkhonh mas womh womh xauh wvng das. 22 Yang gas Mangso tyingtoh dang lyis domsyos gyo las nyang nhaiqdoeus dah muhzoh lyis chank kuot gvng masyah yang dung dah cho khvt khanghmuh lyis yang tsain xauh lhom yoeus. 23 Nyang yang lyis tyingtoh dang gas yang nyah lo Yesu Khristu lyis lomsjingh las Khristu yang lyis tyingtoh zis yah dvyhangteh nyang changh nyang jyetdap goh nyeis das cho nghuot. 24 Mangso tyingtoh dang lyis chank kuot soeu hank laus eq, Mangso yah dvdain dvlom nghuot las Mangso eq hauh soeu yah dvdain dvlom nghuot. Housoeh bweh cho lhyi Mangso dyei toh dah dyos gvng masyah yoh seq.
1 Jyetdap bang eh, dyos xauh yoeus goeus ge bang dvnganh lyis vjingh nyeis goh. Nyamoq xauh yoeus dah dyos gas Mangso jyank masyah gyoh los dah dyos nghuot lah? Kyink yoeuh geh, khasoeh ge lyis Lvpe hwah jens joqyos khyiq khanghmuh mas jweh nyeis goeus. 2 Mangso dah dyos nghuot ma nghuot yoh seq das cho ka haih zis nghuot. Yesu Khristu gas cangsoeu dius gungs tsungh las jweh los, ge rhen bang hank laus eq Mangso jyank masyah dyos xauh kham yoeus bang nghuot. 3 Nghuot laus eq, Hauh Yesu dah cho lhyi ma rhen bang hank laus eq, Mangso jyank masyah gyoh lyih dah dyos lyis xauh lhom yoeus bang ma nghuot. Nyamoq jyank mas bos dah dyos gas namoq xauhgyo ku goeus zis yah dvyhangteh, jweh los nyeis. Nghuot goeus gvshih yangh nyeisjvng mas lyih nyeis goeus Khristu dah Jeswus dah dyos nghuot. 4 Lo jens eh, namoq gas Mangso shot pheh bang nghuot las hauh Lvpe hwah jens lyis ung tyamp goeus. Khasoeh ge lyis namoq mas bos dah dyos gas nyeisjvng yah sen bang mas bos dah dyos thoq lyis yomsoq zes bos. 5 Hauh lvpe hwah jens gas, mungkvn yah sen bang nghuot yvmvyah nyamoq gas mungkvn dah cho tsain taiq. Mungkvn mas nyeis bang eq nyamoq dah dang domsyos tsain gyo. 6 Nghuot laus eq yang gas Mangso shot pheh zis nghuot. Mangso lhyi seq bang hank laus eq yah dang tsain gyo. Mangso shot pheh ma nghuot bang gas yah dang ma tsain gyo. Heisoeh khyvlyis yah yang gas jyoeng dah dyos lhom yoeus zis yahge ma jyoeng dah dyos lhom yoeus bang dah ma doeusgoh cho lhyi yoh taiq. 7 Jyetdap bang eh, yang nyang changh nyang jyetdap goh nyeis goh. Khasoeh ge lyis jyetdap ehnyet gas Mangso jyank masyah nghuot. Seq jyetdap soeu hank laus eq, Mangso lo nghuot las Mangso lhyi seq. 8 Jyetdap ehnyet ma bos soeu ka, Mangso lhyi seq zis ma nghuot: khasoeh ge lyis Mangso ka jyetdap ehnyet nghuot. 9 Yang gas Lo gvng mas vcaiq vto kang yoh bas jungh ge Mangso ka nyah Loteh lyis mungkvn mas nhang kat zis yah Mangso yang lyis jyetdap ehnyet Chixoeuq. 10 Jyetdap ehnyet ge taiq lyis, yang Mangso lhyi jyet ge yvlyis taiq zis ma nghuot, yah yaunos khyuot dyei das xiklyis gungsthaiq shoh-uh bweh bas jungh ge nyah lo lyis nhang kat zis yah nyang yang lyis jyetdap goeus yvlyis taiq zis dvnghuot. 11 Jyetdap bang eh, Mangso ka yang lyis hei iq jyetdap nyeis lyis, yang eq nyang changh nyang jyetdap goh gis. 12 Mangso lhyi hank khanhamp eq ma nyvng ku: yang nyang changh nyang jyetdap goh nyeis lyis gas, Mangso ka yah jyank mas bos joq yvmvyah, nyah jyetdap ehnyet gas yang mas dyinghjet joq. 13 Nyah dah dyos yang lyis dyei toh yvmvyah, yang eq nyang mas nyeis las, nyang eq yang mas nyeis yvlyis yang tsain seq. 14 Mungkvn dah khyuot yoeus Yhensain bweh bas jungh ge las Uwus gas hau Lo lyis nhang kat zis gas ngamoq nyvng las kanghjyoeng tsain kat. 15 Yesu gas Mangso dah Lo nghuot ge rhen soeu hank mas laus eq Mangso ka nyang mas nyeis. Nyang eq Mangso mha nyeis. 16 Housoeh las yah thoq mas Mangso jyetdap ehnyet toh toh cho lhyi yang seq las tsain lomsjingh nyeis. Mangso ka jyetdap ehnyet nghuot; housoeh las jyetdap ehnyet mas kang dwis soeu hank laus eq Mangso yah dvdain dvlom nghuot. Mangso eq nyang yah dvdain dvlom nghuot. 17 Ngamoq mas nyah jyetdap ehnyet dyinghjet los las hau soetuon buisnyeis lyis ngamoq womh ehnyet yoh das. Khasoeh ge lyis jyetdap cho lhyi ngamoq mas dyinghjet shoq yoh yhung goeus zis yahge haih mungkvn mas ngamoq gas Khristu yah dvyhangteh kang dwis goeus las ngamoq hau womh cho yoh. 18 Jyetdap ehnyet mas gyuk zis ma bos. Dyinghjet dah jyetdap cho ka gyuk yvlyis khat tyamp. Housoeh lyis gas gyuk ehnyet bos soeu hank mas laus eq jyetdap ehnyet ma yoh dyinghjet. Khasoeh ge lyis gyuk ehnyet gas joeng zis xauh das cho yah sen joq. 19 Mangso ka cangxeih lyis yah yang lyis jyetdap yvmvyah, yang eq nyang lyis jyetdap nyeis. 20 Dvyuk yuk, Ngos gas Mangso lhyi jyetdap nyeis ge las nyah vmang vnoeuh lyis hoeng nyeis lyis gas, hauh soeu ka hwah soeu nghuot. Khasoeh ge lyis vsainnyang yoh nyvng dah vmang vnoeuh lyis ma jyetdap lyis gas, vsainnyang ma yoh nyvng dah Mangso lhyi ma yoh jyetdap. 21 Yang lyis Khristu dyei toh dah tyingtoh dang gas, Mangso lhyi jyetdap soeu ka nyah vmang vnoeuh lyis eq yoh jyetdap das, ge zis nghuot.
1 Yesu gas Meshia nghuot ge lomsjingh soeu hank laus eq, Mangso dah lo jens nghuot las hauh Uwus lyis jyetdap soeu hank laus eq, lo lyis eq jyetdap. 2 Yang gas Mangso lhyi jyetdap las nyah tyingtoh dang lyis chank kuot nyeis nghuot lyis gas, Mangso dah lo jens lyis eq jyetdap nyeis cho yang tsain seq. 3 Khasoeh ge lyis Mangso tyingtoh dang lyis chank kuot zis gas nyang lyis jyetdap cho nghuot. Nyah tyingtoh dang gas yah xiklyis nyoshoq ma yau. 4 Khasoeh ge lyis Mangso dah lo khanghmuh gas hauh mungkvn lyis yoh ung. Mungkvn lyis yang yoh ung cho ka yah lomsjingh cho gvng masyah nghuot. 5 Yesu gas Mangso dah lo nghuot ge lomsjingh soeu kyingh ma nghuot lyis gas mungkvn lyis hank yoh ung tyamp das lah? 6 Yesu Khristu gas jeisnyhop kham cho dah jeis yahge shei cho dah suih yah jweh los soeu nghuot. Nyang gas jeis yah kyingh ma nghuot. Jeis yahge suih yah jweh los, dyos gas jyoeng yvmvyah hauh cho jyoeng yvlyis dyos nyang kanghjyoeng kat dyei. 7 Kanghjyoeng somh koeuq bos. 8 Hauh zis gas Dyos, jeis yahge suih nghuot las, hau somh koeuq gonh gas dvyhangteh doeusgoh dah kanghjyoeng tsain kat. 9 Yang gas dius dah kanghjyoeng kat cho lhyi daq jingh, nghuot laus eq Mangso dah kanghjyoeng kat cho ka zes goengtoenk las nyang gas nyah Lo dah cho kanghjyoeng kat dyei goeus. 10 Housoeh las Mangso dah lo lyis lomsjingh soeu hank laus eq, haih kanghjyoeng dang lyis nyah ehnyet nhaiqlom mas comh toh. Nghuot laus eq Mangso lhyi ma lomsjingh soeu hank laus eq, lo dah cho Mangso kanghjyoeng kat dyei dang lyis ma lomsjingh yvmvyah Mangso lhyi hwah soeu nghuot ge tsain nghamh. 11 Hauh kanghjyoeng dang gas haih zis nghuot. Mangso ka yang lyis mathank magons kang dyei goeus las hauh kang dah jeisthuq dwang gas Lo nyang nghuot. 12 Lo lyis yoh soeu hank laus eq, kang eq yoh. Lo lyis ma yoh soeu hank laus eq, hauh kang eq ma yoh. 13 Namoq gas vcaiq vto kang yoh goeus cho vlhomuh seq nyeis bas jungh, Mangso dah lo lyis lomsjingh nyeis bang namoq jyank mas ngos haih maussauh lhaih kat. 14 Mangso lhyi nyah ehnyet o khyvlyis yang cha lhyi laus eq dung lyis gas gyo dyei nyeis cho yoh loms gvng mas yang nyah xikkhonh mas womh womh yoh wvng. 15 Yang nyang lyis dung khanghmuh nyang gyo dyei. Haih cho jyoeng zis yang seq. Yang nyah jyank dung cho eq yoh goeus zis yang seq. 16 Nah boek dvyuk yuk shei das iq ma nghuot dah yaunos dvkoeuq koeuq kuot nyeis zis nvng nyvng lyis, nyah xiklyis Mangso lhyi vkyuh bos dung dyei gis. Mangso ka nyang lyis kang dyei das. Hauh zis gas shei vvng dah yaunos ma kuot bang xiklyis kyingh dung dyei das cho nghuot. Nghuot laus eq shei vvng dah yaunos ge zis bos las hauh xiklyis Mangso lhyi nvng bos dung dyei gis cho ngos ma taiq. 17 Ma jus dah muhzoh dvnganh gas yaunos nghuot. Nghuot laus eq ma shei vvng dah yaunos eq bos. 18 Mangso lo nghuot soeu ka yaunos tsoq las ma kuot zis yang tsain seq. Khasoeh ge lyis nyang lyis Mangso dah lo gomh toh las ma gis soeu ka nyang lyis yoh nos nhang das zis ma nghuot. 19 Mungkvn gonh gas ma gis soeu guon dah vkhau mha nghuot. Nghuot laus eq yang gas Mangso shot pheh bang nghuot yvlyis, yang seq. 20 Mangso dah lo gas jweh los goeus zis nghuot las, jyoeng dah Mangso lhyi yoh seq dah ehnyet, yang lyis dyei toh goeus zis yang seq. Yang gas lo Yesu Khristu yah dvdain dvlom kang dwis nyeis yvmvyah jyoeng dah Mangso yah eq dvdain dvlom kang tsain dwis nyeis. Hauh soeu ka jyoeng dah Mangso yahge vcaiq vto dah kang eq nghuot. 21 Ngah lo jens eh, ma jyoeng dah mangso jens lyis jhank nyeis geh.
1 Ngos jyetdap jyoeng dah vmesbih yahge nyah lo jens jyank mas --- Ngos logis maussauh lhaih kat. Nvng lyis ngos kyingh ma nghuot, jyoeng cho lhyi seq bang dvnganhmoq eq nvng lyis tsain jyetdap. 2 Khasoeh ge lyis, hauh jyoeng cho yah jyank mas bos las yang yah dvgeh vcaiq vto nyeis das xiklyis nghuot. 3 Uwus Mangso yahge Uwus dah Lo Yesu Khristu jyank masyah jyehjuh, nhaiqnyen zis yahge nyenstap zis gas jyoeng yvmas eq, jyetdap yvmas eq, yang yah dvgeh nghuot bas jungh. 4 Nah lo jens dvyhamh gas Uwus Mangso yang lyis tyingtoh goeus zis yah dvyhangteh, hauh jyoeng cho mha kang dwis nyeis zis nyvng las ngos svsoh gaus. 5 Housoeh las jyetdap dah vmesbih eh, yang dvyuk yah dvyuk jyetdap goh nyeis das xiklyis ngos nvng lyis khyoeuq kat. Gvshih ngos lhaih kat dah cho ka tyingtoh dang vsaiq ma nghuot, cangxeih lyis yah yang xauh yoeus toh goeus dah tyingtoh dang dvnghuot. 6 Gvshih ngos taiq nyeis dah jyetdap ge zis gas Mangso dah tyingtoh dang lyis domsyos gyo las chank kuot zis yah kang dwis nyeis cho nghuot. Cangxeih lyis yah namoq dvnganh xauhgyo ku goeus dah tyingtoh dang gas namoq dvnganh jyetdap yvmas kang dwis das cho nghuot. 7 Yesu Khristu gas cangsoeu gungs tsungh zis yah jweh lyih yvlyis ngoek dah mhuih jyomh bang nyoshoq gas, mungkvn gonh mas tsain thuq gyoh loh goeus. Hou teh bang gas mhuih jyomh bang, Khristu dah jeswus nghuot. 8 Ngamoq kuot toh dah muhzoh lyis namoq ma chithyuk thyuk namoq phauh shangh zis dyingh dyingh yoh bas jungh, vsainnyang zaih nyeis geh. 9 Khristu dah jyauh cho mha ma nyeis, hauh yvlyis lai toh khoq soeu hank laus eq Mangso lhyi ma yoh. Hauh jyauh cho lhyi chank nyeis soeu hank laus eq, Uwus lyis eq, Lo lyis eq yoh. 10 Haih jyauh cho ma chi los soeu dvyuk yuk namoq jyank jyweh los lyis, namoq yhen mha vlhom yoeus goh, nyenstap bas jungh oen yangh vsang goh. 11 Khasoeh ge lyis hauh soeu lhyi lhom jeshuh soeu hank laus eq, nyah dah ma gis muhzoh mas bos goeus. 12 Ngos namoq lyis lhaih kat das cho nyoshoq yoh. Nghuot laus eq maussauh mas lhaih ja cheih yah lhaih toh mes zis ma nghuot. Yang dvnganhmoq mas gauslaus cho dyingh shoq xauh yoeus das xiklyis namoq jyank mas jweh las, nhuot tsuk xauh taiq goh das zis lyis ngos nghamhloms nyeis. 13 Mangso khyen yoeus zis xauh soeu, nvng jyetdap vbi dah lo jens gas nvng lyis jeshuh kat.
1 Ngos jyetdap jyoeng dah Gai-u jyank mas— Ngos logis maussauh lhaih kat. 2 Ngah dyenschangh phoq eh, nah dyos nyeisgis yaplhoq zis ngos seq, nvng cho khvt khanghmuh mas nyeisgis yaplhoq las nvng yanghzan nyeis bas jungh, ngos vkyuh dung. 3 Nvng vjangh yah jyoeng cho mha suh e nyeis zis yah dvyhangteh, hauh jyoeng cho mha nvng kha iq wontang nyeis cho lhyi Khristan vmang vnoeuh moq dvyhamh jweh los las tsain taiq kyoh uhlyis ngos svsoh gaus. 4 Ngah lo jens, hauh jyoeng cho mha tsain suh e nyeis zis lyis xauhgyo dah gausyis joqyos thoq lyis zes dah gausyis joqyos ngos mas gohtoeu ma bos lo. 5 Ngah jyetdap buisnoms phoq eh, Khristan vmang vnoeuh moq, nyamoq lvbaus dvnghuot shih lyis nvng kuot dyei dah muhzoh dvnganh gas lomluk dah muh nghuot. 6 Nyamoq nah jyetdap cho lhyi haih phung mha los tsain taiq kyoh. Nyamoq gyung cho yoh tsoq loh das nyhenshang jyehjuh yah bos jenh pangh kat shih aq. Houka Mangso lyis nhaiqdoeus nhang cho nghuot das. 7 Khasoeh ge lyis nyamoq gas ma loms ma jingh bang masyah pangh thuk cho ma lhom yoeus yoeus, Khristu dah sasvna muhzoh mas tsain suh e bang nghuot. 8 Housoeh las hauh jyoeng dah muhzoh mas nyamoq yah muhwons changh yoh bweh bas jungh, yang Khristan jens gas haih dius jens lyis pangh thuk chah. 9 Hauh phung mha ngos maussauh lhaih kat goeus. Nghuot laus eq nyamoq dah uhjyung duot mes soeu Diotrephe gas ngos taiq kat dah cho jens lyis domsyos gyo das zis ma nghuot. 10 Ngos jweh los lyis nyang kuot tyamp goeus dah cho khvt khanghmuh lyis taiq kyoh das. Nyang gas yang lyis svsoh ma gis dang yahge hwah dang taiq. Nghuot laus eq hauh zis nyah xiklyis ma tham shih las, Khristan vmang vnoeuh moq jweh los lyis nyang ma lhom yoeus thoq lyis ma goh lhom yoeus mes bang lyis eq tomp tyamp las phung masyah eq khat thuq tyamp. 11 Ngos jyetdap dah buisnoms phoq eh, ma gis cho lhyi vtoeuq yoeus goh, gis cho lhyi dvtoeuq yoeus geh. Gis dah muh kuot soeu ka Mangso dah zis nghuot. Ma gis dah muh kuot soeu ka Mangso lhyi ma seq. 12 Dius yuk khanghmuh gas Demetrio dah gis cho lhyi kanghjyoeng tsain kat. Nyang kuot dah muhzoh gas jyoeng dah Mangso dang yah yih joq. Ngamoq eq kanghjyoeng tsoq kat las ngamoq kat dah kanghjyoeng dang gas jus yvlyis nvng seq. 13 Ngos nvng lyis taiq das cho nyoshoq yoh; nghuot laus eq pen yahge lhaih cheih yah ma mes lhaih lo. 14 Ma nyangh lyis nvng yah yoh xauhgoh das zis ngos nghamhloms nyeis. Hauh uhlyis yah aiq yuk nhuot tsuk xauh taiq goh das. 15 Nvng nyenstap nyeis bas jungh, Nah buisnoms jens dvnganh nvng lyis jeshuh kat. Nvng eq ngamoq dah buisnoms jens dvnganh lyis bos jeshuh dyei aq.
1 Yesu Khristu dah jons yahge Yaku dah vnoeuh ngos Yuda gas, Mangso khi yoeus las Uwus Mangso dah jyetdap zis yah Yhensain Yesu dah gomh cho mha kang dwis nyeis bang lyis dang kyoh kat. 2 Nhaiqnyen cho, nyenstap cho yahge jyetdap zis gas namoq thoq mas dyinghjet los bas jungh. 3 Ngah jyetdap bang eh, yang dvnganhmoq chomp lomsjingh las lhom yoeus toh goeus dah khyuot yoeus cho lhyi namoq jyank mas lhaih kat das zis ngos svsoh yomkat nyeis. Hauh uhlyis, Mangso ka nyah dius jens lyis vcaiq vto xiklyis dvlhain kyingh kyauh toh dah lomsjingh cho xiklyis tsoq las thoenk zan loh das cho namoq jyank dvlhain dvm maussauh lhaih las yomdyei chah cho ngos nyvng. 4 Khasoeh ge lyis, yang masoh mathamh nyeis uhlyis gywes ma tsungh bang gas yah jyank mas gauh wvng los. Nyamoq gas nyamoq pyo cho chank dah ma gis wotwu yah yoh tsain nghop tyamp das xiklyis yah Mangso dah jyehjuh yah sen dah dang lyis mes khyvlyis vguih vkoeu kuot tyamp thoq lyis magoh, dvyuk kyingh dah yah Yhensain Yesu Khristu lyis eq tsain he tyamp. 5 Mangso ka Israel dius nyau jens lyis Egutu masyah dvlhain khasoeh khyuot yoeus thang lhyi nyang lyis ma lomsjingh bang lyis mhont tyamp cho namoq seq laus eq, namoq lyis ngos doms taiq kyingh mes. 6 Vsainnyang yoh toh dah toeuh lyis ehnyet ma tap, vsainnyang dah nyeis joqyos toh tyamp khoq las thuq loh dah loeuswons bang lyis eq soh nyeis geh. Mangso ka nyah dah dang thang thyet buisnyeis zainsmuh mas nyamoq lyis dang thang thyet las joeng das xiklyis mauchot dwang mas vcaiq vto ge dah shamjvng yah twih toh. 7 Sodom yahge Gomora wus lyis eq, hau vyvm vwi wus jens lyis eq soh nyeis geh. Hauh wus mas dah dius jens gas hauh loeuswons bang teh, nye yukgis zomh cho mha lhyap lhyi lha soengh choenk lyi yah tyi lha zomh goh gvng mas dvnganhmoq xiklyis de bangh zaih nhang khyvlyis yah vcaiq vto nyi mas joeng zis tsain xauh. 8 Houyah dvyhangteh haih dius jens gas, nyamoq gungs lyis yaunos bweh nhang dah nyoqnyvng nyvng. Nyamoq gas Mangso dah toeuh lyis chaxwe ma nhang, nyhang mas dah phunk bos bang lyis ma phauh gis tsain kuot. 9 Loeuswons vgyis nghuot dah Mikhael yangh haih cho ma kuot. Moshe dah mvng lyis hank yoeus vvng zis yah sen lha hauh Satan yah phyen goh dyoqgoh uhlyis Mikhael gas Satan lhyi ma phauh ma danh yobos huon cho ma womh taiq. Nvng lyis Mangso yah nyho lha jyauh bas jungh; ge dvtaiq. 10 Nghuot laus eq, haih dius jens gas nyamoq ma seq cho cha lhyi eq ma phauh gis kuot zis yah tsain zan. Ye dah gaunyhauq teh vkhang yah bos joq dah seq cho eq nyamoq lyis tsain mhont tyamp. 11 Nyamoq gas Ka-in chank dah cho jeis lyis tsain chank gvng mas nyamoq xiklyis kha iq gyuk chank bos das lah! ngwis xing gvng mas Balam kuot shuot ja yobos mas nyamoq dah gungs lyis tsain kyauh tyamp. Kora gomloeus toq teh nyamoq eq gomloeus toq gvng mas nyamoq lyis mhont tyamp. 12 Nyamoq gas xoq zis ma seq lo shoq hoeu lha tsain zo shuk gvng mas, namoq dah zomhgoh zoshuk huom mha vchoqh vjyot lhoeuh nhang. Nyamoq gas Nyamoq vkyuh xiklyis kyingh tsain kuot, nyamoq gas mau ma bos lyeis yah muot tangh dah jyommauh, cungh thuq los laus eq vshih ma shih vnyet eq cheq khuot tyamp las shei goeus dah saiqzains yah doeusgoh. 13 Than dah Panglai jeisphauq yah eq tsain doeusgoh, nyamoq dah vchoqh vjyot muhzoh lyis panglai jeisnyop teh de bangh thuq los nhang. Nyamoq gas kyilamh teh tsain nghuot. Mangso ka nyamoq xiklyis noq thank dah mauchotdwang mas joqyos sont toh dyei goeus. 14 Adam caiq masyah nyhet vcaiq lyis dah Enok gas gohlhain yah haih dius jens dah cho pe toh. Hauh zis gas Yhensain ka nyah loeuswons mons mons sens sens yah jweh lyih las, 15 dius dvnganh lyis nyamoq kuot dah ma gis muhzoh gvng mas eq, gywes ma tsungh dah dius jens Mangso lhyi ngoek khyvlyis yah taiq dah gyukphoh dang jens dvnganh xiklyis eq soetuon lha dang thang thyet das, ge. 16 Haih dius jens gas vjangh yah lop las gohyuk lyis yobos tsain huon; nyamoq gas nyamoq nyang omes dah ma gis cho lhyi tsain chank. Nyamoq gas vsainnyang dah cho lhyi moengs zo las nyamoq dah vkyuh bos cho yoh das nyhenshang gohyuk lyis tsain chungh. 17 Nghuot laus eq jyetdap bang eh, lai loh goeus dah shishenh lyis yah Yesu Khristu dah lvgyo jens namoq lyis taiq kyoh goeus dah dang lyis tsain soh nyeis geh. 18 Nyamoq gas thang thank dah buisnyeis jweh uhlyis, namoq lyis loeusmus soqzo bang, gywes ma tsungh bang, vsainnyang dah gungsshoh obos ehnyet chank bang tsain thuq los das, ge namoq lyis taiq kyoh goeus. 19 Hauh bang gas phung khau mha gang lvn cho lhoeu thuq bang, vsainnyang gungsshoh obos cho chank bang, Dyos lyis ma xauh yoeus bang tsain nghuot. 20 Nghuot laus eq jyetdap bang eh, namoq dah gyingshang lomsjingh cho mha vpom tsuk las vsainnyang hauh yvlyis tsoq las kuhxing los nhang geh. Gyingshang Dyos dah yomsoq mas nges las vkyuh tsain dung nyeis geh. 21 Yhensain Yesu Khristu gas nyah nhaiqnyen shohgyo ehnyet yah namoq lyis dyei das mathank magons kang yoh shoq Mangso dah jyetdap ehnyet mas nyeis nyeis geh. 22 Loms shot khamkhvv mus nyeis bang lyis nhaiqnyen geh. 23 Tsai, dvyhamh lyis nyi masyah lhuot she yoeus teh khyuot yoeus geh. Tsai, gohtoeu dvyhamh lyis gyuk zis yah nhaiqnyen ehnyet Chixoeuq nyeis geh. Nghuot laus eq, nyamoq dah gungsshoh nyetnau masyah vchoqh vjyot dap dah dyimis lyis yangh hoeng nyeis geh. 24 Gvshih gas namoq lyis ma lains shoq yoh gomh las nyah phunk xikkhonh mas yaunos yobos ma bos yvmvyah gauslaus cho yoh dyei. 25 Yah Yhensain Yesu Khristu masyah, yah khyuot yoeus soeu dvso kyingh dah Mangso mha phunk, zauguon, yomsoq yahge toeuh gas lai loh goeus vcaiq caiq masyah haq caiq, vcaiq caiq vto to joq bas jungh. Amen.
1 Haih maussauh gas Yesu Khristu lyis Mangso dyei dah nyoqnyvng cho lhyi lhaih toh. Yesu lyis haih nyoqnyvng dyei zis gas ma nyangh lyis bweh los das cho Mangso dah jyeidwis jens yoh nyvng shoq Chixoeuq nhang das xiklyis nghuot. Khristu gas nyah jyeidwis Yohan jyank loeuswons soeu nhang las haih nyoqnyvng dang lyis seq nhang. 2 Heika Yohan taiq kyoh, Mangso jyank masyah jweh los dang yahge Yesu Khristu Chixoeuq dah jyoeng dah cho nghuot. 3 Haih maussauh nghap soeu yahge haih lvpe dang jens lyis gyo yoeus las, haih maussauh mas lhaih ya lhaih toh zis lyis chank kuot bang gas ngelhoq. Khasoeh ge lyis taiq kyoh dah muhzoh bweh das shishenh ni los goeus. 4 Ngos Yohan gas Asia mau mas joq dah phung nyhet phung lhyi maussauh lhaih kat. Haih caiq, gohlhain caiq, thang caiq mas nyeis dah Mangso jyank masyah eq, nyah hwankti tank xik mas nyeis dah dyos nyhet koeuq masyah eq, 5 wontang dah kanghjyoeng phoq, shei bang masyah cangxeih dwis toq los soeu, nyeisjvng dah hwankti jens lyis guon dah Yhensain Yesu Khristu jyank masyah eq jyehjuh yahge nyenstap zis gas namoq mas joq bas jungh. Yang lyis jyetdap las, nyah gungs nyang phudyei shei kham zis yah, yang lyis yah yaunos masyah khyuot kat las, 6 Nyah Uwus dah muhzoh lyis yoh wons wuq das xiklyis yang lyis munghdan vnyau yahge phudyei toeuh dyei soeu Yesu Khristu mas phunk nyoqnho yahge yomsoq vcaiq vto joq bas jungh! Amen. 7 Yoeuh aq, nyang gas jyommauh yah jweh lyih goeus.Yhensain lhyi lham yah thauh phank bang yah dvgeh dius jens dvnganh gas nyang lyis tsain nyvng das. Nyeisjvng mas dah dius nyau khanghmuh nyah gvng mas kuk nyingh shohthang thauh das. Houyah dvyhangteh bweh los bas jungh. Amen. 8 Ngos gas cangxeih soeu eq, thang thank soeu eq nghuot ge, haih caiq lyis eq, gohlhain caiq lyis eq, jweh los das caiq lyis eq nyeis dah Maukhung Jesphung Yhensain Mangso taiq. 9 Ngos gas namoq dah vmang vnoeuh Yohan nghuot. Yesu dah thang chank soeu dvyuk khyvlyis yah nyah munghdan yah sen dah dius jens xauh dah shanghsenh cho mha nhaiqlom xing zis yah namoq yah dvgeh jhen nyeis soeu nghuot. Ngos gas Mangso dah dang yahge Yesu dan cho lhyi taiq kyoh gvng mas Patmo goeujo pheh nhang kat zis xauh. 10 Hau Yhensain dah buisnyeis lyis ngos dyos mas nghuot loh las, ngah nungsthank mas lvbuh yhangteh dah thwe zainsmuh dvkoeuq lui zis ngos xauhgyo. 11 Hauh thwe ka, Nvng nyvng zis yah dvyhangteh maussauh mas lhaih las, hauh maussauh lyis phung nyhet koeuq nghuot dah Ephesu, Samirna, Pergamu, Thiatira, Sardi, Philadephia yahge Ladoki phung jens lyis huon kat aq, ge. 12 Housoeh ngos lyis jis nyeis soeu ka hank nghuot au, oen nyvng das xiklyis lhain yoeuh kat lyis ngos gas xing nyituonh gus nyhet koeuq yahge, 13 hauh vgungs mas dius teh soeu dvyuk nyah dyixing lhyi khyeiwu mas jweh shoq wuot chi. Nyah sainhkhonh mas xing dyichih chih toh zis ngos nyvng. 14 Nyah cam ka thyoeu dah yvng mauh teh, nghuot ya gyu teh thyoeu. Nyah nyoqjeih jens gas nyilhyam teh duk nyeis. 15 Nyah khyei ka nyi mas shuonh goeus dah thunk gyingh teh tsain bvng, nyah thwe ka nyings huomh toh dah jyvthyangh teh nyings nyeis. 16 Nyah loq mas kyi nyhet lom chi toh: nyah nhuot masyah aiq shot zuk dah tyingh sham thuq nyeis, nyah nyoqnho ka nyeih gungs lyis tso dah buis teh bvng joq. 17 Hauh soeu lhyi nyvng lyis ngos nyah khyeiyang mas shei soeu teh lains loh. Nyang gas nyah loqyos loq ngah thoq mas kih las, Vgyuk, ngos gas cangxeih soeu eq, thang thank soeu eq nghuot. 18 Ngos gas dwis nyeis soeu eq nghuot. Ngos shei goeus laus eq gvshih ngos vcaiq vto dwis nyeis. Ngos gas shei nos dah thoq mas eq, shei mau dah thoq mas eq guon das toeuh yoh. 19 Housoeh las nvng nyvng goeus zis lyis eq, gvshih joq zis lyis eq, thang pheh bweh los das cho lhyi eq lhaih toh aq. 20 Ngah loqyos loq mas nvng yoh nyvng dah kyi nyhet koeuq yahge xing nyituonh gus nyhet koeuq dah nghop toh cho ka haih zis nghuot. Kyi nyhet lom gas phung nyhet koeuq lyis zungh dah loeuswons nyhet yuk nghuot las nyi tuonh gus nyhet koeuq gas hauh phung nyhet phung nghuot, ge.
1 Ephesu wus phung mha dah loeuswons soeu lhyi heisoeh lhaih kat aq. Haih zis gas loqyos loq mas kyi nyhet lom chi toh las, xing nyituonh gus nyhet koeuq dah vgungs mas suh loh soeu dah dang nghuot. 2 Nvng kuot goeus dah muhzoh lyis ngos seq. Nvng kha iq yau las zwi khank zis yahge jhen cho lhyi eq ngos seq. Nvng gas ma shop bang lyis ma yoh yoeuh toh zis eq, lvgyo ma nghuot, lvgyo yeis khuk bang lyis yen las nyamoq gas hwah bang nghuot yvlyis yoh chixoeuq goeus zis ngos seq. 3 Nvng ehnyet xing, ngah nyings gvng mas shanghsenh kham lha nvng vsomh eq ma dyei. 4 Nghuot laus eq gvshih nvng ngos lyis xikpheh teh ma jyetdap lo las nvng mas yobos huon das zis ngos nyvng. 5 Housoeh yvmvyah nvng kha iq nyhang shoq dyet gyoh loh goeus cho nghamh yoeuh aq. Nah yaunos masyah lhain los las xikpheh teh doms chank kuot aq. Nvng nah yaunos masyah ma lhain los lyis gas ngos nah jyank mas jweh las nah nyituonh gus lyis hauh joqyos masyah xwih tyamp dyei das. 6 Nghuot laus eq Nikola dah changlo jens kuot dah wotwu lyis ngos hoeng teh nvng eq hoeng nyeis gvng mas nvng lyis chungh dais dvkoeuq bos. 7 Dyos gas phung jens lyis khasoeh taiq zis gas no dap soeu ka xauhgyo bas jungh. Ung cho yoh soeu lhyi Mangso dah Eden khyam gungs mas yuk dah kang saiqzains mas dah vshih zo das toeuh ngos dyei das. 8 Samirna phung mha dah loeuswons soeu lhyi heisoeh lhaih kat aq. Haih zis gas cangxeih soeu yahge thang thank soeu, shei goeus laus eq doms dwis nyeis soeu dah dang nghuot. 9 Nvng xauh dah yaukyenh cho yahge shohjyen cho lhyi ngos seq, nghuot laus eq nvng jyoengh dis nyeis. Yuda dius nghuot ge laus eq Yuda dius ma nghuot bang nvng lyis nyoqnho ngelang gyoh nhang, ma gis dah loeusmus soqzo dang taiq nyeis zis ngos seq. Jyoengh taiq lyis, nyamoq gas Satan dah phung dius jens nghuot. 10 Nvng jweh los nyeis dah shanghsenh cho lhyi vgyuk; yoeuh aq namoq lyis shiwu das satan ka namoq mas dvyhamh lyis thung mha lhunk toh las namoq buisnyeis dvci nyeih shoeuhshih zis xauh das. Shei shoq ngos lyis lomluk nyeis geh, housoeh lyis ngos nvng lyis kang buismuk dyei das. Houka nah ung cho dah phauh nghuot. 11 Dyos gas phung jens lyis khasoeh taiq zis gas, no dap soeu ka xauhgyo bas jungh. Aiq vlhain shei cho ka ung soeu lhyi yoh zangh das zis ma nghuot. 12 Pergamu phung mha dah loeuswons soeu lhyi heisoeh lhaih kat aq. Heika aiq shot zuk tyingh sham chi soeu dah dang nghuot. 13 Nvng khah joqyos mas nyeis zis ngos seq, Satan dah tank joq yvmas nvng khau nyeis. Ngos mas jyoeng zis yah kanghjyoeng kat dah Antipa ka Satan nyeis dah joqyos nghuot dah nah vgungs mas sat tyamp zis xauh dah shishenh lyis yangh, nvng gas ngos mas wontang lha ngos lyis lomsjingh dah nah lomsjingh cho lhyi ma ngoek tyamp. 14 Nghuot laus eq silho lhyi kyangh dah zonoms zo das zis yahge yauxi dah cho ge dah lainszo gus muh mas Israel jens chank las yaunos kuot shoq Balak lyis joeui dyei Balam dah jyauh cho mha chank loh bang dvyhamh namoq mas bos yvmvyah nvng lyis yobos huon dais dvtsiq ngos nyvng. 15 Houyah dvyhangteh namoq mas Nikola thang chank bang dah jyauh cho mha chank loh bang bos. 16 Housoeh yvmvyah gvshih nyang nah yaunos masyah lhain los aq. Housoeh ma nghuot lyis ngos nah jyank mas lvnyap jweh los las ngah nhuot masyah thuq dah tyingh sham yah hauh bang lyis zan das. 17 Dyos gas phung jens lyis khasoeh taiq zis gas no dap soeu xauhgyo bas jungh. Ung cho yoh bang lyis shung toh dah mana dvkhamh lyis eq, nyamoq yuk khanghmuh lyis thyoeu dah luk eq ngos dyei das. Hauh luk thoq mas lhaih toh dah nyings saiq lyis gas luk yoh soeu mha lai las gohyuk hank eq ma yoh bos seq. 18 Thiatira phung mha dah loeuswons soeu lhyi heisoeh lhaih kat aq. Haih zis gas nyilhyam teh duk bvng dah nyoqjeih yahge buot cheih toh dah thunk gyingh teh dah khyei dap soeu, Mangso dah Lo dang nghuot. 19 Nvng cha kuot yvlyis ngos seq. Nah jyetdap cho yahge lomsjingh cho mha wontang zis eq, muh wons wuq zis yah ehnyet kuhxing dah jhen cho lhyi eq ngos seq. Hauh thoq magoh, nvng thang thank kuot dah muhzoh gas cangxeih kuot dah muhzoh thoq lyis zes gis cho ngos seq. 20 Nghuot laus eq ngos nvng lyis yobos huon chank dvkoeuq bos. Khasoeh ge lyis nvng gas nyang gungs nyang Mangso jyank masyah lyih dah lvgyo nghuot ge dah vmesbih Yezebel lyis yobos yoeuh lhaiq toh zis yah shwih toh. Nyang gas ngah jyeidwis jens lyis yauxi muh kuot das zis yahge silho lhyi kyangh dah zonoms zo das cho jyauh las nyamoq lyis chowhang whang nhang. 21 Ngos nyang lyis yaunos masyah nhaiqlom thaiq das shishenh dyei toh laus eq nyah yauxi muh masyah nhaiqlom ma yoh thaiq los. 22 Housoeh las ngos nyang lyis nyah yhetyos mas doeuh tyamp toh das. Houmha nyang yah nyi shuot lvng shuot muh kuot bang yah dvgeh shanghsenh zainsmuh xauh das. Nyamoq gas hauh vmesbih yah kuot dah yauxi muh masyah nhaiqlom ma yoh thaiq los lyis gas ngos nyamoq lyis gvshih nyang hauh shanghsenh zis xauh nhang das. 23 Nyah thang chank bang lyis eq ngos sat das. Hauh uhlyis ngos gas dius yuk khanghmuh dah nghamh cho yahge bweh nhang mes cho dvnganh yvlyis seq dyei dah Yhensain nghuot yvlyis phung jens seq los das. Ngos namoq dvyuk yah dvyuk lyis vsainnyang kuot goeus dah muhzoh yah dvyhangteh tauh dyei das. 24 Nghuot laus eq Thiatira wus mas nyet joq shih dah phung dius jens dvyhamh gas hau yauxi dah jyauh cho lhyi ma chank thoq lyis magoh, dius jens taiq, Satan dah noq thank nghop shung toh cho lhyi eq ma xuq. Ngos namoq lyis taiq bah, namoq lyis gohtoeu yvwons s ma kyah dyei lo das. 25 Nghuot laus eq namoq yoh goeu lyis ngos jweh lyih shoq goeng goeng tsop zains toh geh. 26 Ung cho yoh las thang thank jweh shoq ngos nhaiqdoeus dah wotwu chi bang lyis ngos ngah Uwus jyank masyah yoh dah toeuh lyis dyei das. 27 Hauh toeuh gas svbih mau thoq mas thyeq lhamloq yah guon las yam shonh soeu dah yam lyis teh vdyis vmons bat khyop tyamp das toeuh nghuot. 28 Hau buhnyhiq ngos nyamoq lyis dyei das. 29 Dyos gas phung jens lyis khasoeh ge taiq zis gas, no dap soeu xauhgyo bas jungh, ge.
1 Sardi phung mha dah loeuswons soeu lhyi heisoeh lhaih kat aq. Haih zis gas Mangso dah Dyos nyhet koeuq yahge kyi nyhet lom chi toh soeu dah dang nghuot. Nvng kuot dah muhzoh ngos seq. Nvng gas kang dwis nyeis ge hoeuh laus eq vshei dvnghuot. 2 Housoeh las phuk soh lhaiq mus aq. Nvng mas nyet joq shih las shei loh nyeis bang lyis thukxank aq. Khasoeh ge lyis nvng kuot dah muhzoh ngah Mangso xikkhonh mas ma dyinghjet shih zis ngos nyvng dyei. 3 Housoeh yvmvyah nvng cha xauh xuq zis yahge xauhgyo zis doms soh aq. Hauh yvlyis domsyos gyo las nah yaunos masyah nhaiqlom thaiq las lhain los aq. Nvng phuk soh lhaiq ma mus lyis gas, ngos khauh soeu teh jweh lyih das. Ngos nah jyank mas khanhamp jweh lyih das zis eq nvng ma seq das. 4 Nghuot laus eq vsainnyang dyimis lyis vwot v-oeu ma mus nhang bang Sardi phung mha dvyhamh nyet joq shih. Nyamoq gas mon yih yvmvyah dyi thyoeu wuot las ngos yah dvgeh suh e das. 5 Ung cho yoh bang gas heisoeh teh dyimis thyoeu xauh wuot das. Ngos nyamoq dah nyings lyis kang maussauh buk masyah thyuk tyamp das zis ma nghuot. Ngah Uwus xikkhonh mas eq, nyah loeuswons bang xikkhonh mas eq nyamoq gas ngos yah sen bang nghuot oen kyoq kyoq taiq hoeuh das. 6 Dyos gas phung jens lyis khasoeh taiq zis gas no dap soeu ka xauhgyo bas jungh, ge. 7 Tsai, Philadephia wus phung mha dah loeuswons soeu lhyi heisoeh lhaih kat aq. Haih zis gas gyingshang soeu, jyoeng soeu, Dawi dah suhshih chi soeu, hank ma yoh nyheih shoq phank toh las hank ma yoh phank shoq nyheih toh soeu dah dang nghuot. 8 Nvng kuot nyeis dah muhzoh lyis ngos seq. Nvng yom dvtsiq dvbos laus eq, Ngah jyauh dang lyis nvng chank las ngah thoq mas wontang zis ngos seq. Nah xikkhonh mas hank eq ma yoh nyheih dah khomh dvkoeuq ngos phank hanh toh dyei goeus. 9 Yoeuh aq, vsainnyang Yuda dius nghuot ge laus eq ma jings, Satan phung mha bos dah hauh hwah bang lyis ngos, nyamoq lyis nah khyeiyang mas los tsain paiq nhang das las, ngos nvng lyis jyetdap nyeis zis gas nyamoq seq das. 10 Nvng gas ngos tying toh zis yah dvyhangteh ehnyet xing zis yah jhen das cho chank nyeis yvmvyah, nyeisjvng dius dvnganh yvlyis shiwu das xiklyis, nyeisjvng goms shoq shanghsenh zis jweh lyis ngos nvng lyis gomh das. 11 Ngos lvnyap jweh lyih das, nah dah ung buismuk lyis hank eq ma yoh lhuot yoeus bas jungh! Nvng yoh nyhoq lyis zungh nyeis aq. 12 Yoh ung soeu lhyi ngah Mangso dah zoppaiq yhenmuh mas khungzains dvzains ngos bweh nhang das. Nyang hou mhayah khanhamp eq nghe pheh thuq das zis ma nghuot. Ngah Mangso dah nyings lyis eq, ngah Mangso jyank masyah thuq las, maukhung masyah gyoh los dah Yerusalem wus saiq ge, ngah Mangso dah wus nyings lyis eq, ngvnyang dah nyings saiq lyis eq, hauh soeu thoq mas ngos lhaih tap dyei das. 13 Dyos gas phung jens lyis khasoeh taiq zis gas no dap soeu ka xauhgyo bas jungh. 14 Ladoki wus phung mas dah loeuswons soeu lyis heisoeh lhaih kat aq. Haih zis gas wontang zis yahge jyoeng dah kanghjyoeng phoq, Mangso gvn ya gvnkhanh toh dah vpom, Amen! ge soeu dah dang nghuot. 15 Nvng cha kuot goeus zis ngos seq. Nvng gas jyamh eq ma nghuot gywes eq ma nghuot. Nvng jyamh ya jyamh, gywes ya gywes dvkoeuq koeuq bweh das zis ngos o. 16 Nghuot laus eq gvshih nvng gas gywes eq ma nghuot jyamh eq ma nghuot, loms loms mus joq yvmvyah ngah nhuot masyah dyeh tyamp das. 17 Nvng gas, Ngos gas dis, ngos mas zisyos nyoshoq joq, ngos mas chah cho dvnganh yoh goeus ge taiq. Nghuot laus eq nvng gas kha iq shanghsenh las nhaiqnyen phoh zis nghuot joq yvlyis nvng ma seq nyvng! Nvng gas shohjyen, nyoqjet las shohchen mus nyeis. 18 Housoeh las nvng dis bas jungh, nyi mas kyink tyamp goeus dah xing lhyi eq, svbih xikkhonh mas nah shohchen vxoq vcaiq ma mus bas jungh. Nghop dyei das xiklyis nvng wuot dah dyimis thyoeu jens eq, nah nyoq nyvng das xiklyis juot ja mvcheih eq, ngah jyank mas wis yoeus das zis ngos nvng lyis joeu i da dyei. 19 Ngos gas ngos jyetdap bang dvnganh lyis nyho, jyauh zis yah joeng. Housoeh las nvng jyoengh gying soh zis yah nhaiqlom thaiq aq. 20 Yoeuh aq, ngos gas khomh koq yap joq, ngah thwe gyo las khomh phank dyei soeu hank jyank mas laus eq, ngos wvng las nyang yah dvgeh zoshuk das. Nyang eq ngos yah dvgeh xauh zo shuk das. 21 Ngos gas ung cho yoh las ngah uwus dah tank mas nyang yah dvgeh yoh tsung teh, ung cho yoh soeu lyis ngah uwus dah tank mas ngos yah dvgeh xauh tsung das toeuh ngos dyei das. 22 Dyos gas phung jens lyis khasoeh taiq zis gas no dap soeu ka xauhgyo bas jungh, ge.
1 Hauh thang lhyi gohtoeu nyoqnyvng dvkoeuq gas maukhung mha phank hanh toh dah khomh dvkoeuq lyis ngos nyvng. Xikpheh ngos lyis lui las ngos xauhgyo ku dah thwe ka lvbuh teh nyings nyeis zis yah, Heimha doq los aq, thang pheh bweh das cho ngos nvng lyis chixoeuq bah, ge. 2 Hauh uhlyis ngos dyos mas muis loh, maukhung mha hwankti tank dvkoeuq joq, hauh yvmas dius dvyuk tsung toh. 3 Nyah nyoqnho vwuot gas phauhdap luk nvgvthweq yahge patvmyah teh buh yungh joq las, hauh tank dah yvmlhaink mas myaq lung seng teh dah sainyvng yoqgan chent toh. 4 Hauh tank dah yvmlhaink mas tank aiqci nyei lom joq. Hauh tank mas dyithyoeu wuot las xing buismuk tsungh dah logis aiqci nyei yuk zui nyang tsain tsung lhaink toh. 5 Hau tank masyah maunyoq nyik, nyings huomh toh dah thwe yahge maujau jau dah thwe teh zis tsain thuq los. Hauh tank xikkhonh mas eq, Mangso dah dyo nyhet koeuq ge dah tuonh toh nyiduk nyhet koeuq eq bvng joq. 6 Tsai, hauh tank xikkhonh mas bvng toenk teh gying dah thomh dvkoeuq bos. Hauh thoq lyis magoh hwankti tank dah thyih shot haq shot mas, xik pheh, nungs pheh nyoqjeih yah dyingh dah yewus nyei doeu tsain nyeis. 7 Cangxeih dah yewus gas khangkhyi yah doeusgoh. Aiq vdoeu gas noeu yah doeusgoh. Somh vdoeu gas dius dah nyoqnho yah doeusgoh. Nyei vdoeu gas dang nyeis dah zonsmuh teh nghuot. 8 Hauh yewus nyei doeu gas dungs khyuk koeuq koeuq dap las gungs dah vkhau vthoq yvmlhaink yah nyoqjeih kyingh dyingh joq. Nyamoq gas nyeih nyenh malyen lo taiq zis gas, Gohlhain caiq, gvshih caiq, thang caiq lyis eq nyeis shih dah Maukhung Jesphung Yhensain Mangso ka Gyingshang, gyingshang, gyingshang! ge. 9 Hau yewus nyei doeu gas hwankti tank mas tsung toh las vcaiq vtoh kang dwis nyeis Yhensain dah phunk nyoqnho ngelang yahge jyehjuh lyis chunghthwe kat nyeis. 10 Hauh uhlyis nhaiqbos aiqci nyeis yuk eq, tank mas tsung toh las vcaiq vto dwis nyeis soeu lhyi tsain dupaiq. Nyamoq gas hauh tank xikkhonh mas xing buismuk lyis tsain khyuot toh las, 11 Ngamoq dah Yhensain Mangso eh, joq ya joq zis nvng gvnkhanh toh las, hauh goeu gas nvng nhaiqdoeus khyvlyis goeng joq zis yah kang tsain dwis nyeis. nvng gas phunk nyoqnho ngelang yahge yomsoq xauh yoeus das zis mon yih nyeis, tsain ge.
1 Tsai, tank mas tsung toh soeu dah loqyos loq mas sauhbuk vkhau vthoq lhaih toh las, kyihau nyhet koeuq tap toh dah sauhdain dvkoeuq ngos nyvng. 2 Hauh thang lhyi yombos dah loeuswons soeu dvyuk gas, hauh kyihau yoeus tyamp las maussauh dain phank das zis hank mon yih lah, ge thwe zainsmuh yah kaiq yvlyis ngos xauhgyo. 3 Nghuot laus eq maukhung mha eq, nyeisjvng mas eq, nyeisjvng dah o tsank mas eq, hauh maussauh lyis phank las hau vkhau mha dah maussauh chvp lyis yoeuh das soeu dvyuk eq ma bos. 4 Hauh sauhdain phank las hau vkhau mas lhaih toh cho jens lyis nghap mon soeu dvyuk eq ma xo nyvng yvmvyah ngos gvgis ngaus. 5 Housoeh las logis jens masyah dvyuk gas, Vngaus, yoeuh aq, Yuda vkoq mas Dawi dah vnyau vshih kuh nghuot dah khangkhyi ge soeu ka ung cho yoh goeus, nyang gas hauh kyihau nyhet koeuq lyis yoeus tyamp las sauhdain lyis yoh phank, ge. 6 Hauh uhlyis Yvnglo gas dwis nyeis dah yewus nyei ja yahge logis jens yvmlhaink toh dah hwankti tank dah vgungs mas yap joq zis ngos nyvng. Hauh Yvnglo gas sat zis xauh goeus teh nyvng. Nyang mas khyau nyhet koeuq yahge nyoqjeih nyhet lom dap. Hauh bang gas nyeisjvng goms shoq nhang kat zis xauh, Mangso dah dyos nyhet koeuq tsain nghuot. 7 Hauh Yvnglo los las, hwankti tank mas tsung toh soeu dah loqyos loq mas dah sauhdain lyis yoeus. 8 Hau sauhdain lyis xauh yoeus yah dvyih, hauh yewus nyei doeu yahge logis jens aiqci nyei yuk gas, hauh Yvnglo dah xikkhonh mas tsain dupaiq. Nyamoq dvyuk yah dvyuk toenk yahge Mangso dah dius jens shvmanh dung dang ge dah xangh shom yah dyingh joq dah xing kom jens eq tsain chi toh. 9 Nyamoq gas chunghthwe vsaiq yah, Nvng hauh sauhdain lyis yoeus das zis yahge kyihau lyis yoeus tyamp das zis mon. Khasoeh ge lyis nvng gas sat zis xauh goeus las, nvng shei kham phudyei zis yah dius nyau ja khanghmuh masyah eq, munghdan khanghmuh masyah eq, vnyau khanghmuh masyah eq, nyingh vja ja masyah eq, Mangso xiklyis nvng dius jens wis goeus. 10 Nvng gas nyamoq lyis, ngamoq dah Mangso lhyi phuqsoe muh yoh kuot das xiklyis hwankti mau yahge phudyei dius nyau dvnyau bweh nhang zis yah nyamoq gas nyeisjvng thoq mas guon nyeis das, ge tsain chungh. 11 Hauh thang lhyi ngos doms yoeuh kat lyis, hauh Hwankti tank dah yvmlhaink mas eq, Yewus nyei ja yahge logis jens dah yvmlhaink yap joq dah loeuswons bang dah thwe ngos xauhgyo. Hau loeuswons bang gas sens sens wvn wvn huon tsain nyo. 12 Nyamoq gas, Sat tyamp xauh dah Yvnglo gas, yomsoq, zisyos, joeui, yom, nyoqnho ngelang, phunk yahge chungh zis lyis kham yoeus das zis mon yih nyeis, ge thwe zainsmuh yah tsain chungh. 13 Hauh thoq magoh, maukhung thoq keq masyah eq, nyeisjvng masyah eq, nyeisjvng o tsank masyah eq, nvmukdra khau mhayah eq, maukhung nyeisjvng mas dah dwis ya dwis zis dvnganh gas, Hwankti tank mas tsung toh soeu yahge Yvnglo mas chungh cho, nyoqnho ngelang, phunk yahge yomsoq vcaiq vto bos joq bas jungh, ge. 14 Hauh uhlyis yewus nyei ja gas Amen! ge tsain toeuh. Logis jens eq phvluk zomhgyuis las tsain paiq.
1 Hauh thang lhyi Yvnglo gas kyihau nyhet koeuq masyah dvkoeuq phank kat yvlyis ngos nyvng las yewus nyei ja masyah dvdoeu gas maujau jau thwe teh zis yah, Los aq, ge taiq thwe ngos xauhgyo. 2 Ngos yoeuh kat lyis nyang thyoeu dvdoeu lyis nyvng. Houmha ji soeu ka lyei dvkoeuq chi toh, buismuk eq dvkoeuq tsungh dyei las nyang gas ung cho yoh goeus soeu nghuot zis yah dvyhangteh, ung shih das xiklyis thuq los. 3 Hauh thang lhyi Yvnglo gas kyihau aiq vkoeuq phank kat lyis, yewus aiq vdoeu gas, Los aq, ge taiq zis ngos xauhgyo. 4 Hauh uhlyis gohtoeu nyang nes teh zis dvdoeu thuq los. Hauh nyang ji soeu lhyi haih nyeisjvng thoq mas jeszan cho bweh nhang lha dius nyang changh sat goh nhang das toeuh dyei toh. Nyang lyis moengsa zainsmuh eq huon dyei. 5 Tsai Yvnglo gas kyihau somh vkoeuq lyis phank kat lyis, yewus somh vdoeu gas, Los aq, ge zis ngos xauhgyo. Hauh uhlyis ngos yoeuh kat lyis nyang noq dvdoeu nyeis. Houmha ji soeu ka nyah loq mas jvng dvkoeuq chi toh. 6 Hauh yewus nyei ja dah vjo masyah nyings thuq los teh dah thwe dvkoeuq ngos xauhgyo. Hauh thwe ka, Sunghso dvpan lyis dvnyeih dah uhkung phauh khyvlyis shangh chah. Laiq somh pan lyis dvnyeih dah uhkung phauh khyvlyis shangh chah. Nghuot laus eq hauh tsanlun zains jens yahge zvbiq khyam jens lyis vlhoeu thyoq tyamp goh, ge taiq. 7 Hauh thang lyis Yvnglo gas kyihau nyei vkoeuq lyis phank kat lyis yewus nyei vdoeu gas, Los aq, ge taiq zis ngos xauhgyo. 8 Tsai, ngos yoeuh kat lyis nyang nhamh dvdoeu lyis nyvng. Houmha ji soeu dah nyings gas Shei zau nghuot. Nyah thang mha munyi thomh eq tanh tanh chank yenh, nyamoq gas nyeisjvng dah nyei boms dvboms mas nyeis dah dius jens lyis moeng zan, phanghkhauq zainsmuh, yomh yahge yewus shoeuhshih zis yah sat das toeuh tsain yoh. 9 Tsai Yvnglo gas kyihau oeng vkoeuq phank lyis, Mangso dah dang taiq kyoh gvng mas eq, wontang zis yah kanghjyoeng kat gvng mas eq, sat zis xauh bang dah dyos lyis eq, hauh phon o mha ngos nyvng. 10 Hauh dyos jens gas, yomsoq zainsmuh yahge gyingshang lha dan dah Yhensain eh, ngamoq lyis sat dah yobos gvng mas nyeisjvng mas nyeis dah dius jens lyis ma shoeuhshih, soe ma tuon tuon nvng khanhamp jweh shoq nyeis dah lah, ge thwe zainsmuh yah tsain kaiq. 11 Nyamoq yuk khanghmuh lyis dyi thyoeu gvm huot las, nyamoq teh sat zis xauh das jyeidwis changh jens yahge vmang vnoeuh moq dah nyings yoh changjet shoq, dvsoq langh nyeis shih das xiklyis nyamoq lyis tying toh. 12 Tsai, Yvnglo gas kyihau khyuk vkoeuq phank kat zis ngos nyvng. Hauh uhlyis maunyeis svsoh dwis las buis eq thoeubaplap dah yanghthung misseh noq teh noq tyamp las lhamhmuh lom gonh eq suih teh nes tyamp. 13 Lvhomp zains lyis uklyeis yah thungh lyis shih-kyei gywis tyamp teh maukhung mas dah kyi ka nyeisjvng mas tsain gywis gyoh tyamp. 14 Maukhung ka lom tyamp dah sauhdain teh dyuk tyamp las boms yahge goeujo dvnganh eq vsainnyang joqyos masyah xwih tyamp zis tsain xauh. 15 Hauh uhlyis nyeisjvng mas dah hwankti jens, zau guon bang, jeszau jens, dis bang, yombos bang, dius yuk khanghmuh, jons jens yahge luiq bang, dvnganh gas lukkhyung jens yahge boms mas dah luk-uk jens mas tsain phang tamh. 16 Nyamoq gas boms yahge lukkhyung jens lyis lui las, Ngamoq thoq mas gyoh nhiq dyei aq. Hwankti tank mas tsung toh soeu dah nyoqnho yahge Yvnglo dah nhaiqlom dyis masyah ngamoq lyis gos dyei aq. 17 Nyah aiq yuk dah gyukphoh nhaiqlom dyis buisnyeis zainsmuh heimha jweh goeus las hauh zis lyis hank yoh thoenk yap das lah, ge.
1 Hauh thang lhyi loeuswons bang nyei yuk gas nyeisjvng nyei thunk mas yap joq las, nyeisjvng thoq mas eq, nvmukdra thoq mas eq, saiqzains thoq mas eq, lyeis ma yoh muot gyon bas jungh ge, nyeisjvng nyei thunk mas dah lyeis lyis tsain tsop zains toh yvlyis ngos nyvng. 2 Tsai, dwis nyeis Mangso dah kyihau chi toh dah loeuswons soeu dvyuk buisthuq shot pheh yah thuq los zis ngos nyvng. Nyang gas nyeisjvng yahge nvmukdra lyis lhoeu thyoq das toeuh yoh dah loeuswons soeu nyei yuk lyis thwe zainsmuh yah kaiq taiq. 3 Hauh loeuswons soeu ka, Ngamoq Mangso jyeidwis jens dah ngelang mas kyihau ma tap dvchank gas, nyeisjvng lyis eq, nvmukdra lyis eq, saiqzains lyis eq, vshoeuhshih shih goh, ge. 4 Ngelang mas Mangso dah kyihau tap toh goeus bang 144,000 nghuot cho ngos lyis taiq kyoh goeus. Hauh bang gas Israel dah lo jens dvci aiq koq masyah, 5 Yuda vkoq mas dvmons aiq khyoengh, Ruben vkoq mas dvmons aiq khyoengh, Gad vkoq mas dvmons aiq khyoengh, 6 Asher vkoq mas dvmons aiq khyoengh, Napthali vkoq mas dvmons aiq khyoengh, Manase vkoq mas dvmons aiq khyoengh, 7 Simon vkoq mas dvmons aiq khyoengh, Lewi vkoq mas dvmons aiq khyoengh, Isakha vkoq mas dvmons aiq khyoengh, 8 Zebulun vkoq mas dvmons aiq khyoengh, Yosep vkoq mas dvmons aiq khyoengh, Benyamin vkoq mas dvmons aiq khyoengh kyihau tap zis tsain kham yoeus goeus. 9 Hauh thang lhyi ngos yoeuh kat lyis houmha hank eq ma yoh thoq suon lo shoq nyo dah moqmuh dvkoeuq lyis ngos nyvng. Nyamoq gas vnyau khanghmuh, vhuh khanghmuh, mau khanghmuh mas bang yahge nyingh vja ja kat bang masyah eq, lyih tsain jweh bang nghuot. Hauh bang gas dyi thyoeu tsain wuot las, nyamoq loq mas tsanlun saiq ko tsain chi lha, hauh hwankti tank xikkhonh mas eq, Yvnglo dah xikkhonh mas eq tsain yap joq. 10 Nyamoq gas thwe zainsmuh yah khyuot yoeus cho ka hwankti tank mas tsung toh soeu yahge Yvnglo jyank masyah nghuot ge tsain kaiq. 11 Tsai, loeuswons bang dvnganh gas, hwankti tank, logis jens yahge yewus nyei doeu lyis tsain yap lhaink toh. Hauh uhlyis nyamoq gas hwankti tank khyeiyang mas gop las, Mangso lhyi dupaiq zis yah, 12 Amen! chungh, phunk, joeui jyehjuh chungh, nyoqnho ngelang, yomsoq yahge yom gas vcaiq vto yah Mangso jyank mas joq bas jungh! Amen ge tsain taiq. 13 Hauh uhlyis logis jens masyah dvyuk gas haih dyi thyoeu wuot bang gas hank tsain nghuot lah? Khapheh yah tsain thuq los bang nghuot lah, ge, ngos lyis nyei. 14 Ngos gas, Yhensain eh, ngos ma seq, nvng gas seq oen, toeuh. Hauh uhlyis, nyang gas, nyamoq gyukphoh shanghsenh zainsmuh masyah tsain luiq thuq los bang nghuot. Nyamoq dah dyimis lyis, hauh Yvnglo dah suih mas tsain cheihshang goeus. 15 Housoeh las nyamoq gas Mangso dah tank xikkhonh mas xauh nyeis zis yah nyah Yhenmuh mas nyang lyis nyeih nyenh tsain paiq nyeis. Hwankti tank mas tsung toh soeu eq, nyamoq yah dvgeh nyeis las nyamoq lyis gomh das. 16 Nyamoq gas thang pheh khanhamp eq yuot shet zis ma xauh lo das. Buis eq, khateh dah ngeh cho eq, nyamoq lyis yoh ngeh nhang das zis ma nghuot. 17 Khasoeh ge lyis hwankti tank vgungs mas nyeis dah Yvnglo gas nyamoq dah yvng yoeuh soeu bweh das. Kang jeisthuq dwang jweh shoq nyamoq lyis cho she das. Mangso eq nyamoq nyoq mas dah nyoqdyeis dvnganh buot tyamp dyei das, ge ngos lyis taiq.
1 Tsai, kyihau nyhet vkoeuq lyis Yvnglo phank kat lyis maukhung mha dvshishenh dah vgungs dvgohyih ko sam joq. 2 Hauh uhlyis Mangso xikkhonh mas yap joq dah loeuswons bang nyhet yuk lyis ngos nyvng. nyamoq lyis lvbuh nyhet lom dyei. 3 Tsai, xangh ngheq dah xing kyop chi dah gohtoeu loeuswons soeu dvyuk hau phon nvm mas e yap joq. Hwankti tank xikkhonh mas joq dah xing phon thoq mas Mangso lo jens dvnganhmoq dah vkyuh dung dang mas lhungh kat las phudyei bas jungh ge, xangh nyoshoq hauh soeu lhyi dyei. 4 Xangh shom nyikhauh gas Mangso xikkhonh mas yap joq loeuswons soeu dah loq masyah, Mangso dius jens shvmanh dung dang jens yah dvgeh nhoenk doq loh. 5 Hauh thang lhyi loeuswons soeu ka hauh xing kyop lyis yoeus las phon thoq mas nyi dyingh shoq dye kat thang lhyi hauh yvlyis nyeisjvng mas doeuh khyoq kat. Hauh uhlyis maujau jau, nyings huomh toh dah thwe, maunyoq nyik zis yah maunyeis dwis zis tsain bweh los. 6 Hauh uhlyis lvbuh nyhet koeuq chi toh loeuswons nyhet yuk gas, lvbuh muot das zis tsain sont nyeis. 7 Gvshih cangxeih dah loeuswons soeu nyah lvbuh muot kat. Hauh uhlyis suih yah lhoeuq dah gyu yahge nyi gas nyeisjvng thoq mas buiq gyoh los. Nyeisjvng eq somh boms dvboms ngeh loh. Saiq khyam eq, mhanh nyaus dvnganh eq, somh boms dvboms tsain ngeh tyamp. 8 Tsai, loeuswons aiq vyuk ka nyah lvbuh muot kat. Hauh uhlyis nyi ngeh nyeis teh dah boms zainsmuh dvkoeuq nvmukdra mas khyoq kat. Housoeh las nvmukdra somh boms dvboms suih bweh tyamp. 9 Nvmukdra mas dah kang dwis ja somh boms dvboms shei tyamp. Sangpho jens eq somh boms dvboms tsain gyop tyamp. 10 Tsai, loeuswons somh vyuk nyah lvbuh muot kat. Hauh uhlyis nyibung teh bvng joq dah kyi zainsmuh dvkoeuq gas maukhung masyah dyet gyoh las, jeismuh lvng somh boms dvboms yahge jeisthuq dwang jens dah thoq mas tsain gyoh kih joq. 11 Hauh kyi dah nyings gas, Khoh, ge zis nghuot. Jeis somh boms dvboms gas khoh tyamp las hau jeis khoh shuk bang nyoshoq tsain shei tyamp. 12 Tsai, loeuswons nyei vyuk nyah lvbuh muot kat. Hauh uhlyis buis dah somh boms dvboms, lhamhmuh dah somh boms dvboms, kyi dah somh boms dvboms eq tsain gyop tyamp las nyamoq dah bvng zis somh boms dvboms mau chuot tyamp zis yah nyeih lyis dah somh boms dvboms yahge nyenh lyis dah somh boms dvboms gas bvng zis ma tsain yoh lo. 13 Hauh thang lhyi ngos yoeuh kat lyis maulvt mas dang yenh dah zons dvdoeu gas, gohtoeu loeuswons somh yuk muot kat das lvbuh thwe nyings thuq los lyis nyeisjvng mas nyeis bang dvnganh xiklyis gyukphoh mvtanhzoe! Gyuk phoh mvtanhzoe! Kha iq gyukphoh dah mvtanhzoe nghuot das lah, ge kaiq nyeis dah thwe zainsmuh lyis ngos xauhgyo.
1 Tsai, loeuswons oeng vyuk nyah lvbuh muot kat. Hauh uhlyis maukhung masyah nyeisjvng mas kyi dvlom dyet gyoh joq zis ngos nyvng, Hau kyi lhyi noq thank dwang chukbuiq dah suhshih dyei. 2 Hauh kyi ka noq thank dah dwang chukbuiq lyis phank kat las nyikhauh gas nyikhyomp zainsmuh mas dah nyikhauh teh hauh dwang masyah nhoenk doq los zis yahge hauh dwang dah nyikhauh gvng mas buis yahge maulvt gas soeng soeng noq tyamp. 3 Hauh nyikhauh masyah janghgyik jens thuq los las, nyeisjvng mas tsain gyoh. Nyamoq lyis gungsgauh jens yoh ja yomsoq dyei toh. 4 Nyamoq gas nyeisjvng mas dah mhanh lyis eq, nyaus ya nyaus ja lyis eq, saiq jens lyis eq yoh zangh das zis ma nghuot ge vmingh dyei toh. Vsainnyang dah ngelang mas Mangso dah kyihau ma dap bang lyis kyingh yoh shoeuhshih das ge tying toh. 5 Janghgyik jens gas hauh dius jens lyis lhamhmuh oeng khyvp shoeuhshih masyah lai las sat das toeuh ma yoh. Hauh shoeuhshih zis gas gungsgauh pat yhangteh nos. 6 Hauh lhamhmuh oeng khyvp gyo lyis nyamoq shei cho tsain xo das, nghuot laus eq nyamoq hauh zis lyis nyvng das zis ma nghuot. Nyamoq tsain shei mes das, nghuot laus eq shei cho ka nyamoq jyank masyah phang loh das. 7 Hauh janghgyik jens gas jeszan das xiklyis shauq toh dah nyang jens yah doeusgoh. Nyamoq dah uhloms mas xing buismuk teh zis tsain tsungh. Nyamoq dah nyoqnho ka dius dah nyoqnho teh zis tsain nghuot. 8 Nyamoq dah cam gas nyelo jens dah cam teh nghuot. Nyamoq dah zwis gas khangkhyi jens dah zwis teh nghuot. 9 Nyamoq dah sainhkhonh lyis thyeq sainhkhonh nghop teh zis yah tsain nghop toh. Nyamoq dah dungs phap thwe ka, jes dyvm zan dah nyang lhyingh nyoshoq nyings huomh toh dah thwe yah doeus joq. 10 Nyamoq mas gungsgauh dah lhyank yahge nyen teh zis yuk las nyamoq lhyank yah dius jens lyis lhamhmuh oeng khyvp shoeuhshih das toeuh tsain yoh. 11 nyamoq gas nyamoq thoq mas guon dah hwankti dvyuk yoh. Hauh hwankti ka dwangchukbuiq lyis guon dah loeuswons soeu nghuot. Nyah nyings lyis Hebre pheh yah Abadon, Greek pheh yah gas Apolion (lhoeu thyoq soeu) ge zis nghuot. 12 Xiklyis dah mvtanhzoe gas lai loh goeus. Hauh thang lyis mvtanhzoe aiq ja jweh los shih das. 13 Hauh thang lhyi loeuswons khyuk vyuk nyah lvbuh muot kat. Hauh uhlyis Mangso xikkhonh mas joq xing phon vthunk nyei thunk masyah thwe dvkoeuq thuq los zis ngos xauhgyo. 14 Hauh thwe ka loeuswons soeu khyuk vyuk lyis, Uphrat lvng yvm mas lhunk toh dah loeuswons bang nyei yuk lyis phui kat aq, ge. 15 Housoeh las hauh loeuswons nyei yuk gas lhunk toh masyah phui kat zis tsain xauh. Nyamoq gas cangsoeu dius somh boms dvboms lyis sat das ge hauh shishenh, hauh buisnyeis, hauh lhamhmuh, hauh zvn xiklyis sont toh zis xauh bang tsain nghuot. 16 Nyang ji dah jesphung jens aiq xo wvn nghuot cho ngos lyis taiq kyoh goeus. 17 Tsai, ngah nyoqnyvng mas nyang jens yahge houmha ji bang lyis ngos nyvng. Nyamoq gas nyi teh nes, Nila vlanh teh lanh, hwank teh buh dah sainhkhonh nghop lyis tsain nghop toh. Nyang jens dah uhloms gas khangkhyi jens dah uhloms yah doeus las nyamoq dah lhyo masyah nyi jyenh, nyi khauh yahge hwank thuq nyeis. 18 Hauh nyang jens dah nhuot masyah thuq nyijyenh, nyikhauh, yahge hwank ge dah shanghsenh cho somh koeuq gvng mas, cangsoeu dius somh boms dvboms sat zis tsain xauh. 19 Khasoeh ge lyis hauh nyang jens dah yom gas nyamoq dah nhuot yahge lhyank mas tsain bos. Nyamoq dah lhyank jens gas uhloms dap lhangnyis teh doeus las, hauh zis yah dius jens lyis tsain chweh. 20 Hai shanghsenh cho mhayah yoh luiq las nyet joq shih dah cangsoeu dius jens gas, nyamoq kuot dah muhzoh masyah ehnyet ma yoh tsain thaiq, nyamoq gas yius jens lyis eq, nyoq ma nyvng no ma gyo, ma seq suh dah, ngwis, xing, thunk, luk yahge saiq silho jens lyis paiq cho eq ma tsain tomp tyamp. 21 Dius sat muh, hweq muh, yauxi muh, khauh muh masyah nyamoq nhaiqlom ma yoh tsain thaiq.
1 Hauh thang lhyi, Yombos dah gohtoeu loeuswons dvyuk maukhung masyah gyoh los zis ngos nyvng. Nyang gas jyommauh lyis wuot chi lha nyah uhloms yvmlhaink yah sainyvng yoqgan chent toh. Nyah nyoqnho ka buis yah doeus. Nyah khyei ka nyi zains teh nghuot. 2 Nyah loq khau mha phank toh dah sauhdain lo dvkoeuq lyis chi toh. Nyah loqyos khyei ka nvmukdra thoq mas, loqwi khyei ka tungyos mas nang toh las, 3 khangkhyi nyings teh, thwe zainsmuh yah yomkat kaiq kat. Nyang kaiq kat lho lhyi maujau jau dah thwe zainsmuh nyhet koeuq yah tsain toeuh thuq los. 4 Hauh maujau thwe taiq thuq kat yah dvyih ngos lhaih comh das sont nyeis. Nghuot laus eq maukhung mha dah hai maujau thwe nyhet koeuq taiq thuq cho lhyi nghop shung toh aq. Vlhaih toh ge dah thwe ngos xauhgyo. 5 Hauh thang lhyi nvmukdra yahge tungyos mas yap joq, ngos nyvng dah loeuswons soeu ka nyah loqyos loq lyis maukhung pheh tuonh las, 6 vcaiq vto dwis nyeis las maukhung, nyeisjvng, nvmukdra mas bos ya bos zis gvnkhanh toh dah Mangso nyings lyis yoeus las maukhi zis gas, vyoq shishenh sheq toh das cho ma bos lo. 7 Nghuot laus eq loeuswons nyhet vyuk lvbuh muot kat lyis Mangso ka nyah jyeidwis jens ge, lvpe jens lyis taiq toh goeus zis yah dvyhangteh nyah dah noq thank nghamh toeuq cho lhyi tyink das, ge. 8 Hauh thang lhyi maukhung mhayah ngos xauhgyo ku dah thwe, ngos lyis doms taiq zis gas, nvmukdra yahge tungyos mas yap joq dah loeuswons loq mas phank toh dah maussauh lyis e yoeus aq, ge. 9 Hauh uhlyis loeuswons jyank mas ngos e lha, Hauh sauhdain lo ngos lyis dyei aq, oen dung. Nyang gas, Yoeus las zo aq. Hauh zis gas nah womdau mas khoh das, nghuot laus eq nhuot mas gas dyoyhei teh chau das, ge ngos lyis taiq. 10 Hauh uhlyis hau sauhdain lo lyis ngos yoeus las zo. Houka ngah nhuot mas dyoyhei teh chau, nghuot laus hauh yvlyis dye nyhau lhyi ngah womdau mas khoh. 11 Hauh thang lyis loeuswons soeu ka dius nyau nyoshoq, munghdan nyoshoq mas dah nyingh nyoshoq yahge hwankti nyoshoq yah sen Mangso dah dang lyis nvng doms xauh taiq das, ge ngos lyis taiq.
1 Hauh thang lhyi loeuswons soeu ka keq ja wuseh teh zis dvseh ngos lyis dyei las, Toq aq. Mangso dah yhenmuh lyis eq, phon lhyi eq, keq aq. Yhenmuh mas paiq nyeis bang lyis eq suon yoeuh aq. 2 Nghuot laus eq hau yhenmuh dah nghe pheh gas vkeq. Khasoeh ge lyis hau zis gas gohnyau bang lyis dye kyauh tyamp goeus las, lhamhmuh nyeici aiq khyvp top tsain nang nheh tyamp das. 3 Tsai ngah kanghjyoeng aiq yuk lyis ngos nhang kat das nghuot las nyah aiq yuk gas yanghthung dyi wuot zis yah buisnyeis 1,260 nyeih top Mangso dah dang lyis tsain taiq das. 4 Hauh kanghjyoeng aiq yuk gas nyeisjvng dah Yhensain xikkhonh mas cuk toh dah tsanlun saiq aiq zains yahge nyi tuonh gus aiq koeuq tsain nghuot. 5 Dius dvyuk yuk nyah aiq yuk lyis jes sont bah ge uhlyis, nyah zomh nhuot masyah nyi thuq los las jes jens lyis ngheq tyamp nhang. Nyamoq lyis jes sont das xiklyis yomkat ya kat bang dvnganh lyis heisoeh sat zis tsain xauh das. 6 Nyah aiq yuk gas Mangso dah dang taiq kyoh das buisnyeis gyo lyis, mau ma wus das xiklyis, maukhung lhyi nyheih tyamp das toeuh tsain yoh. Jeis lyis suih yoh duot nhang dah toeuh eq, nyamoq mas chah dah shishenh khanghmuh mungkvn lyis yomh vja ja yah shanghsenh nhang das toeuh eq, tsain yoh. 7 Nyah aiq yuk vsainnyang dah taiq kyoh muhzoh dye thang lyis dwangchukbuiq masyah thuq los dah yewus gas nyah aiq yuk lyis zan ung lha sat zis xauh das. 8 Nyah aiq yuk dah mvng gas nyah aiq yuk dah Yhensain taplhangh sat zis xauh dah wusmuh talhoeu cho mha joq joq das. Hauh wus lyis vlho khyvlyis nyhink dah nyings gas Sodom wus, nghuot ya Egutu wus nghuot. 9 Hauh uhlyis vnyau vhuh, nyingh vja ja kat bang yahge munghdan khanghmuh mas dah dius nyau jens gas nyah aiq yuk dah mvng lyis nyhop das toeuh ma tsain dyei das. 10 Nyeisjvng mas nyeis dah dius jens gas, hauh loeuswons aiq yuk shei gvng mas, svsoh tsain gaus zis yah nyang changh nyang jyungshuk tsain thaiq goh, ung cho yoh dah pwe eq tsain kuot. Khasoeh ge lyis hauh loeuswons aiq yuk gas nyeisjvng mha dah dius nyoshoq lyis svsoh tsain shoeuhshih goeus. 11 Gvshih hauh buisnyeis somh nyeih dvkhyauq lai thang lyis Mangso jyank masyah dwis nhang dah kang soq nyah aiq yuk jyank mas wvng los las nyah aiq yuk gas zungh zungh tsain yap joq. Nyah aiq yuk lyis nyvng bang gas svsoh tsain gyuk nvn. 12 Hauh thang lhyi loeuswons aiq yuk gas, Heimha doq los aq, ge maukhung mas dah lui thwe zainsmuh dvkoeuq tsain xauhgyo. Nyah aiq yuk dah jes jens zungh yoeuh nyeis lyis jyommauh ji las maukhung pheh tsain doq loh goeus. 13 Hauh shishenh lyis maunyeis dwis zainsmuh dwis los las hauh wus ciboms dvboms gyop tyamp, dius eq nyhet khyoengh bos shei tyamp. Nyet joq bang gas tsain gyuk dvn zis yah, maukhung Mangso dah kuhxing nyoqnho ngelang lyis tsain chungh. 14 Mvtanhzoe aiq vkoeuq lai loh goeus. Nghuot laus eq mvtanhzoe somh vkoeuq lvnyap jweh los das. 15 Hauh thang lhyi loeuswons nyhet vyuk nyah lvbuh muot kat. Hauh uhlyis maukhung mha thwe zainsmuh thuq los zis gas, Mungkvn mas dah munghdan jens lyis guon dah toeuh gas yah Yhensain yahge nyah Meshia dah loq mas nghuot goeus yvmvyah nyang gas vcaiq vto guon nyeis lo das, ge. 16 Hauh uhlyis Mangso xikkhonh, nyamoq nyang hwankti tank mas tsung toh dah logis aiqci nyei yuk gas, nyeisjvng mas gop zis yah Mangso lhyi paiq las taiq zis gas, 17 Gohlhain caiq, gvshih caiq, thang caiq lyis eq nyeis dah Maukhung Jesphung Yhensain Mangso eh, nvng gas nah zau guon yomsoq chi lha mungkvn lyis guon nyeis goeus yvmvyah ngamoq nvng lyis chungh. 18 Nvng nhaiqyo das vyoq shishenh eq, shei bang lyis soetuon das vyoq shishenh eq, gvshih shishenh jweh goeus las dius nyau jens nhaiqlom tsain dyis nyeis goeus. Nah jyeidwis lvpe jens lyis eq, nah dius nyau jens lyis eq, nvng lyis tsain gyukwoms las phauh nyang nyeis dah ngislo kuhlo lyis eq phauh shangh das zis yahge, nyeisjvng lyis mhont bang lyis mhont tyamp das buisnyeis jweh los, ge. 19 Hauh uhlyis maukhung mha Mangso dah yhenmuh phank hanh los las, yhenmuh mas Thanghchvp Kwi lhyi ngos nyvng. Hauh thang lhyi maunyoq nyik, nyings huomh toh thwe, maujau jau, maunyeis dwis zis yah gyu mau lhungthungh bweh los.
1 Hauh thang lhyi maukhung mha mauhphoh dah vlho zainsmuh dvkoeuq thuq los zis gas, vmesbih dvyuk buis lyet chi lha lhamhmuh lyis nang zis yah kyi dvci aiq lom dap dah buismuk lyis tsungh toh. 2 Nyang gas loshang gungs lyis chi lha lokhoeu das xiklyis lokhoeu nos nos yvmvyah kaiq ngaus nyeis. 3 Tsai, maukhung mha mauhphoh dah gohtoeu vlho zainsmuh dvkoeuq thuq los. Uhloms nyhet lom dap las khyau dvci lom yuk nes dah mvnjung zainsmuh dvdoeu gas, nyah uhloms jens mas buismuk nyang koeuq nyang tsain tsungh toh. 4 Nyang gas maukhung mha dah kyi somh boms dvboms lyis nyah lhyank yah khyom yoeus las nyeisjvng mas khyoq kat. Hauh mvnjung gas lo khoeu bah ge dah vmesbih xikkhonh mas yap joq las, vmesbih lo khoeu yah dvyih hauh lo lyis kui nyhau tyamp das ge langh nyeis. 5 Hauh vmesbih gas dius nyau khanghmuh lyis thyeq lhamloq yah guon das yukgis lo khoeu. Nghuot laus eq nyah lo lyis Mangso yahge nyah hwankti tank xikkhonh mas chot she toqh yoeus zis xauh. 6 Hauh vmesbih gas nyah xiklyis Mangso sont toh dyei dah mhanhdyvp pheh phang loh, hau joqyos mas nyang lyis buisnyeis 1,260 nyeih jweh shoq khoeu tsoh das. 7 Hauh thang lhyi maukhung mha jeszan goh nyeis. Mikhael yahge nyah loeuswons bang gas hauh mvnjung yah zan goh nyeis. Hauh mvnjung eq nyah jyeidwis jens yah doms zan goh. 8 Nghuot laus eq mvnjung somh gvng mas, nyang yah nyah jyeidwis jens maukhung mha nyeis das toeuh ma tsain yoh lo. 9 Hauh uhlyis mungkvn gonh lyis mhuih jyomh tyamp yius yahge Satan ge gohlhain dah lhangnyis nghuot dah mvnjung zainsmuh gas nyah jyeidwis jens yah dvgeh nyeisjvng mas khat khyoq tyamp zis tsain xauh. 10 Hauh thang lhyi maukhung mas dah thwe zainsmuh dvkoeuq gas, Gvshih yah Mangso dah khyuot yoeus cho ka jweh los goeus. Gvshih Mangso ka hwankti nghuot cho nyah yomsoq chixoeuq. Gvshih nyah Meshia gas nyah dah zau guon yomsoq lyis chixoeuq goeus. Khasoeh ge lyis yah boekyis lyis yah Mangso xikkhonh mas nyeih nyenh yobos xo, tyi xo soeu lhyi maukhung masyah khat khyoq tyamp goeus. 11 Nyamoq gas Yvnglo dah suih yahge nyamoq kanghjyoeng kat nyeis, dan dah Mangso dang gvng mas nyang lyis yoh ung tyamp. Nyamoq gas shei shoq vsainnyang kang lhyi tsain kyauh tyamp. 12 Housoeh yvmvyah maukhung jens yahge houmha bos joq bang eh, tsain gauslaus nyeis geh. Nghuot laus eq nyeisjvng yahge nvmukdra gas mvtanhzoe tsain xauh. Khasoeh ge lyis Satan ka nyah buisnyeis dvtsiq dvnyet lo zis seq yvmvyah nhaiqlom dyis zis yah namoq jyank pheh gyoh lyih goeus, ge tsain taiq zis lyis ngos xauhgyo. 13 Hauh mvnjung gas nyang lyis nyeisjvng mas khyoq kat cho seq goeus ya yukgis lo khoeu kat dah vmesbih lyis nyhik das ge chank xo. 14 Hauh uhlyis vmesbih gas mvnjung dah jeswus masyah luiq las, mhanhdyvp masyah nyang nyeis dah joqyos mas yoh dang loh das xiklyis zonsmuh dah dungs aiq koeuq xauh yoeus. Nyang gas hauh joqyos mas somh zvn lhamhmuh khyuk khyvp mvnjung dah jes sont cho lhyi ma gyuk noh, gomh kat zis xauh das. 15 Mvnjung gas hau vmesbih lyis jeisbaus yah nyhoeuh kat das ge nyah nhuot mas dah jeis lyis jeislvng teh hauh vmesbih jyank mas muot kat. 16 Nghuot laus eq nyeisjvng gas hauh vmesbih lyis wons kat. Nyeisjvng gas nyah nhuot haq las hau mvnjung nhuot masyah muot kat dah jeislvng lyis nyhau tyamp dyei. 17 Hauh uhlyis mvnjung gas hau vmesbih lyis nhaiqlom dyis las, vmesbih dah nyet joq vnyau vshih ge Mangso dah tyingtoh dang chank zis yahge Yhensain Yesu chixoeuq dah jyoeng dang mas wontang chank nyeis bang lyis zan tyamp das xiklyis thuq loh. 18 Hau mvnjung gas nvmukdra dah jyankyvm dah sihmuis yos mas yap joq.
1 Hauh uhlyis nvmukdra masyah Yewus dvdoeu thuq los yvlyis ngos nyvng. Nyang mas khyau dvci lom yahge uhloms nyhet lom dap. Hauh khyau koeuq khanghmuh mas buismuk tsain tsungh las uhloms koeuq khanghmuh mas Mangso dah nyoqnho ngelang lyis khoengh lhoq shomh dah nyings tsain dap. 2 Hau ngos nyvng dah Yewus gas lutyoeuh yah doeus las nyah khyei ka woms khyei teh, nyah nhuot gas khangkhyi nhuot teh nghuot. Mvnjung gas nyah phunk, nyah tank yahge nyah dah kuh thank vmingh lyis eq, hau Yewus lyis dyei. 3 Yewus dah uhloms jens masyah uhloms dvlom gas shei das iq dvmdap teh mus nyeis. Nghuot laus eq hauh dvm gas gis tyamp goeus. Nyeisjvng gonh gas hauh yewus dah cho tsain mauh hangh las nyah thang tsain chank nyeis. 4 Mvnjung gas yewus lyis nyah dah vmingh kyauh goeus las, dius yuk khanghmuh hauh mvnjung lyis tsain paiq. nyamoq hauh yewus lyis eq tsain paiq zis yah hai yewus yah hank yoh doeus? Nyang lyis hank yoh khyank zan das lah, tsain ge. 5 Hauh yewus gas, khwank zis yahge Mangso lhyi loeusmus soqzo dang taiq das zis eq, lhamhmuh nyeici aiq khyvp top toeuh lyis yoh yhung nhang. 6 Nyang gas, Mangso yahge Yhensain dah nyings lyis eq, Mangso nyeis dah maukhung lyis eq, maukhung mha nyeis bang dvnganh lyis eq, loeusmus soqzo dang taiq nyeis. 7 Nyang gas Mangso dah dius jens lyis zan las ung das toeuh eq, mau khanghmuh mas nyeis, nyingh vja ja kat dah dius nyau khanghmuh lyis guon das toeuh eq dyei toh zis xauh soeu nghuot. 8 Sat tyamp zis xauh goeus Yvnglo dah kang maussauh buk mas nyeisjvng ma xi shih lyis yah nyings lhaih toh zis xauh goeus mungkvn dius jens masyah lai las nyeisjvng mas nyeis dah dius jens dvnganh hauh yewus lyis tsain paiq das. 9 No dap soeu ka xauhgyo bas jungh. 10 Nyhik zis xauh das soeu ka nyhik zis jyoengh xauh das. Moengsa yah shei das soeu eq moengsa yah shei das. Heika Mangso dah lo jens mas jhen zis yah lomsjingh cho bos chah zis taiq kyoh. 11 Hauh thang lhyi nyeisjvng khau masyah thuq los dah yewus gohtoeu dvdoeu lyis ngos nyvng. Nyang mas Yvnglo dah khyau teh dah khyau aiq lom dap las mvnjung teh dang taiq nyeis. 12 Nyang gas cangxeih yewus dah vmingh dvnganh lyis hauh yewus dah xikkhonh mas yhung lha shei bah ge shoq dah dvm gis goeus, cangxeih yewus lyis nyeisjvng yahge houmha nyeis bang dvnganh lyis tsain paiq nhang. 13 Hauh yewus aiq vdoeu gas mauhphoh vlho zainsmuh tsain chixoeuq nyeis. Dius nyoshoq dah xikkhonh mas maukhung masyah nyeisjvng mas nyi gyoh los nhang. 14 Nyang gas xik lyis dah yewus xikkhonh mas chixoeuq nhang dah vlho jens lyis chixoeuq las, nyeisjvng mas nyeis dius jens dvnganh lyis mhuih khwangh tyamp. Hauh yewus gas moengsa yos dvmdap laus eq ma shei doms gis los dah yewus lyis chungh zis yah nyah gungs lho kuot das xiklyis nyamoq lyis jyeinhang toh. 15 Hauh yewus dah gungslho dang yoh taiq das xiklyis eq, hauh yewus dah gungslho lhyi ma paiq paiq nyeis yah nyeis bang lyis sat das zis eq, yewus aiq vdoeu gas hauh gungslho mha soq muot kat dyei das toeuh eq yoh. 16 Hauh yewus gas cangsoeu dius dvnganh ngislo kuhlo, dis bang nyungs bang, luiq bang yahge jons jens dvnganh lyis vsainnyang dah loqyos loq mas nghuot ya ngelang mas nyah dah loqsoh tsoengh tap nhang. 17 Hauh yewus dah nyings nghuot ya hauh gungsthaiq sonzoh ge dah loqsoh dvkoeuq koeuq ma dap soeu hank laus eq vyhang ungh das, wis das toeuh ma tsain yoh. 18 Haih cho yah sen lha joeui bos chah. Joeui bos soeu ka hauh yewus dah sonzoh vjyuk lyis daq phui yoeus. Khasoeh ge lyis hauh sonzoh gas dius dvyuk dah nyings nghuot. Nyah sonzoh gas 666 nghuot.
1 Hauh thang lhyi ngos yoeuh kat lyis hauh yvnglo gas Zion boms thoq mas yap joq zis ngos nyvng. Nyah nyings yahge nyah uwus dah nyings lyis nyamoq dah ngelang mas tap toh dah dius 144,000 gas Yvnglo yah dvgeh tsain nyeis. 2 Tsai, maukhung mha dah jyvthyangh jeis gyoh sam gyo zis yahge maujau lhapzainstain teh dah thwe lyis ngos xauhgyo. Hauh thwe ka toenk khvlhank lyes bang toenk bat kat lyis nyings thuq los dah thwe teh nghuot. 3 Hauh dius 144,000 gas hwankti tank xikkhonh mas eq, yewus nyei doeu yahge logis jens xikkhonh mas eq, yap uhjyangh Chungh Dang vsaiq tsain chungh nyeis. Nyeisjvng mas dah cangsoeu dius nyau dvnganh masyah wis las khyuot zis xauh goeus dah dius 144,000 masyah lai las hauh Chungh Dang lyis hank eq ma yoh tsain xuq. 4 Hauh bang gas vmesbih jens yah vwot v-oeu ma kuot yoeuh ku dah yukgis lo jens nghuot. Nyamoq gas Yvnglo khapheh loh khapheh tsain chank loh. Nyamoq gas nyet joq dah cangsoeu dius nyau jens masyah wis las khyuot zis xauh las, Mangso yahge Yvnglo jyank mas cangxeih kyauh toh bang nghuot. 5 Nyamoq khanhamp eq hwah dang ma taiq ku. Yobos huon chank ma bos bang nghuot. 6 Hauh thang lhyi maulvt mas dang jyon yenh dah loeuswons soeu dvyuk ngos nyvng. Nyang gas dius nyau, dius koq khanghmuh, nyingh vja ja yahge munghdan khanghmuh lyis taiq kyoh das vcaiq vto dah gausyis dang lyis chi lyih. 7 Hauh loeuswons soeu ka cangsoeu dius nyau khanghmuh lyis soetuon das shishenh jweh goeus. Housoeh las Mangso lhyi gyukwoms nyeis geh, nyah vcaiq vto kuhxing dah phunk lyis chungh nyeis geh, maukhung nyeisjvng, nvmukdra yahge jeisthuq dwang jens lyis gvnkhanh toh soeu lhyi paiq nyeis geh, ge thwe zainsmuh yah taiq nyeis. 8 Tsai, loeuswons soeu aiq vyuk gas, xiklyis dah loeuswons soeu thang mha thuq los las Babilon wus zainsmuh gyop gyoh goeus, gyop gyoh goeus. Hauh wus gas yauxi muh mas nyetnau ge yet dah zvbiq dius nyau dvnganh lyis shuk nhang goeus, ge. 9 Tsai, loeuswons soeu somh vyuk gas cangxeih dah loeuswons aiq yuk thang mha thuq los las, hauh yewus yahge nyah gungslho lhyi paiq las vsainnyang ngelang, nghuot ya loq mas loqsoh tap yoeus bang hank eq, 10 Mangso dah nhaiqlom dyis ge dah kom mha dyingh shoq huot kat toh, svsoh yet nhaiqlom dyis ge dah zvbiq xauh shuk das. Hauh thoq ma goh, nyamoq gas gyingshang dah loeuswons bang xikkhonh mas eq, hau Yvnglo dah xikkhonh mas eq, nyi yah kant duk nyeis yvmas vshoh vjyen shoeuhshih zis xauh das. 11 Nyamoq lyis vshoh vjyen shoeuhshih yvmas yah nyikhauh gas vcaiq vto nhoenk doq loh nyeis. Hauh yewus yahge nyah gungslho lhyi paiq bang yahge, nyah nyings dah loqsoh tap zis kham yoeus bang dvnganh gas, nyeih nyenh dvtsiq eq sunghhuq das zis ma nghuot, ge thwe zainsmuh yah kaiq nyeis. 12 Mangso dah tyingtoh dang lyis chank tyink las, Khristu mas wontang ge, Mangso dah duis jens gas haih cho mha jhen cho bos chah. 13 Hauh thang lhyi maukhung mhayah, Lhaih toh aq; gvshih masyah Yhensain dah muh wons wuq zis yah shei loh bang gas ngelhoq, ge dah thwe dvkoeuq lyis ngos xauhgyo. Dyos eq, nghuot goeus! Nyamoq xauh no das. Khasoeh ge lyis nyamoq kuot dah muhzoh vkyuh gas nyamoq mas chank yenh, ge. 14 Tsai, ngos yoeuh kat lyis, jyommauh thyoeu dvkoeuq nyvng. Hauh jyommauh thoq mas dius teh doeus soeu dvyuk tsung toh. Nyah uhloms mas xing buismuk tsungh toh las, nyah loq mas zuk dah banlyenh dvchamh chi toh. 15 Hauh thang lhyi gohtoeu loeuswons soeu dvyuk hauh yhenmuh masyah thuq los las, jyommauh thoq mas tsung toh soeu lhyi, nyeisjvng mas guk nyhink gyop loh goeus. Guk yet shishenh jweh goeus las, guk yet das xiklyis nah banlyenh chi lha yet yoeus aq, ge thwe zains yah kaiq kat. 16 Housoeh jyommauh thoq mas tsung toh soeu ka nyah banlyenh lyis nyeisjvng mas lhwih kat las nyeisjvng mas dah jyo ka dye yhomh goeus. 17 Hauh thang lhyi gohtoeu loeuswons soeu dvyuk gas maukhung yhenmuh khau masyah thuq los zis ngos nyvng. Nyang eq zuk dah banlyenh dvchamh chi toh. 18 Hauh thang lhyi nyi lyis guon dah gohtoeu loeuswons soeu dvyuk gas phon masyah thuq los las, zuk dah banlyenh chi toh soeu lhyi, nyeisjvng mas zvbiq shih nyhink joq goeus yvmvyah nah banlyenh yoeus las zvbiq shih tsain yet yoeus aq, ge thwe zainsmuh yah kaiq las taiq. 19 Housoeh las hau loeuswons soeu ka nyeisjvng mas nyah banlyenh lhwih kat las zvbiq nwis dah vshih lyis tsainh yoeus las Mangso dah nhaiqlom dyis ge dah zvbiq nyhet zwvng mas huot kat. 20 Zvbiq shih lyis wus nghe mha nyhet zwvng yah nyhet las, hou mhayah yaus thuq dah suih lvng gas xing choeu main aiqxo, noq pheh nyang lungthungh nyhank bos.
1 Hauh thang lhyi maukhung mha ma daq taiq kyoh lo shoq kuhxing dah mauhphoh vlho zainsmuh dvkoeuq lyis ngos nyvng. Houka loeuswons nyhet yuk yomh nyhet koeuq tsain chi toh. Hauh yomh gas thang thank dah yomh tsain nghuot. Khasoeh ge lyis houka Mangso dah nhaiqlom dyis yvlyis thang thank vlhain chixoeuq dah vlho tsain nghuot. 2 Hauh thang lhyi nyi yah lhoeuq dah bvngtoenk thomh teh zis dvkoeuq ngos nyvng. Hauh yewus yahge nyah gungslho lyis eq, sonzoh yah nyings nyhink toh soeu lyis eq, ung tyamp bang lyis eq, ngos nyvng, nyamoq gas Mangso dyei toh toenk tsain chi las hauh bvngtoenk thomh yvm mas tsain yap joq. 3 Nyamoq gas Mangso dah jyeidwis Moshe dah Chungh Dang yahge Yvnglo dah Chungh Dang lyis chungh zis yah, Maukhung Jesphung Yhensain Mangso eh, nah muhzoh kuhxing zis yahge kha iq mauhphoh zis nghuot lah! Dius nyau khanghmuh dah Hwankti eh, nah cho jens gas kha iq dan las jyoeng joq lah! 4 Yhensain eh, nvng lyis ma gyuk, ma phauh nyang zis hank bos das lah? Nvng kuhxing zis lyis ma rhen soeu hank bos das lah? Nvng kyingh gyingshang, nvng kuot dah muhzoh dan cho dvnganhmoq nyvng yvmvyah, dius nyau dvnganh nah xikkhonh mas los tsain paiq das, tsain ge. 5 Hauh thang lhyi maukhung mha kanghjyoeng zvng joq dah yhenmuh phank toh yvlyis ngos nyvng. 6 Hauh Yhenmuh masyah yomh nyhet koeuq chi dah loeuswons bang nyhet yuk tsain thuq los. Nyamoq gas bvng las shang dah jeimuh dyi tsain shunk las nyamoq dah sainhkhonh mas xing dyichih tsain chih toh. 7 Tsai, hauh yewus nyei doeu masyah dvdoeu gas vcaiq vto kang dwis nyeis dah Mangso nhaiqlom dyis zis yah dyingh dah xing kom nyhet koeuq, hauh loeuswons bang nyhet yuk gonh lyis dyei. 8 Hauh yhenmuh gas Mangso dah phunk yahge yomsoq gvng mas nyikhauh dyingh nhoenk joq, Hauh loeuswons bang nyhet yuk chi lyih dah yomh ma thank dvchank hauh yhenmuh khau mha hank eq yoh wvng das zis ma nghuot.
1 Tsai, hauh loeuswons nyhet yuk lyis, Thuq e lha Mangso dah nhaiqlom dyis zis yah dyingh dah kom nyhet koeuq lyis nyeisjvng thoq mas huot khyoq kat geh, ge hauh yhenmuh masyah nyings thuq los dah thwe zainsmuh lyis ngos xauhgyo. 2 Hauh uhlyis cangxeih dah loeuswons soeu thuq e lha nyah kom lhyi nyeisjvng mas huot khyoq kat. Hauh uhlyis yewus dah loqsoh tap zis xauh bang yahge nyah gungslho lhyi paiq bang mas gyukphoh yahge xunghxent dah nos dvm bweh thuq los. 3 Hauh thang lhyi loeuswons aiq vyuk gas nyah kom lhyi nvmukdra mas huot khyoq kat. Hauh uhlyis nvmukdra jeis gas dius shei dah suih teh bweh tyamp las, nvmukdra khau mas kang dwis ya dwis zis dvnganh tsain shei tyamp. 4 Tsai, loeuswons somh vyuk gas nyah kom lhyi jeislvng yahge jeisthuq dwang jens mas huot khyoq kat: hauh uhlyis suih bweh tyamp. 5 Hauh uhlyis jeis zungh das loeuswons soeu ka, Gvshih caiq, gohlhain caiq, goeng toenk joq dah gyingshang Uwus eh, nvng soetuon zis gas dan, ge. 6 Nyamoq gas Mangso dah dius yahge lvpe jens dah suih lyis huot tyamp yvmvyah nvng nyamoq lyis suih doms shuk nhang. Hauh zis gas nyamoq mas xauh vvng lha xauh zis nghuot, ge taiq zis ngos xauhgyo. 7 Hauh thang lhyi phon mas dah thwe dvkoeuq eq, Maukhung Jesphung Yhensain Mangso eh; nah soetuon cho ka jyoengh jus las dan, ge taiq zis ngos xauhgyo 8 Tsai, loeuswons nyei vyuk gas, nyah kom lyis buis mas huot kat. Hauh uhlyis buis gas dius jens lyis svsoh ngeh zis yah ngheq jyomh tyamp das toeuh lyis yoh. 9 Housoeh las dius jens gas svsoh ngeh zis yah ngheq jyomh tyamp zis xauh las, yomh lyis guon dah Mangso nyings lyis eq loeusmus soq tsain zo. Nghuot laus eq nyamoq gas nhaiqlom ma thaiq, zes thank dah Mangso phunk lyis eq ma tsain chungh. 10 Hauh thang lhyi loeuswons oeng vyuk nyah kom lhyi yewus hwankti tank mas huot khyoq kat. Hauh uhlyis yewus dah munghdan gonh mas soeng soeng noq tyamp. Hauh dius jens nos khih las nyamoq dah lhyo ngat chink loh. 11 Housoeh nyamoq nos zis yahge dyingsjyen nos dvm bos gvng mas nyamoq gas maukhung Mangso lhyi tsain nhoengh. Nghuot laus eq, nyamoq nyang dah ma gis wotwu masyah nhaiqlom ma tsain thaiq. 12 Hauh thang lhyi loeuswons khyuk vyuk nyah kom lhyi Uphrat lvng mas huot khyoq. Hauh uhlyis buisthuq mau mas dah hwankti jens yoh los das cho bangh das xiklyis hauh jeismuh lvng kanh tyamp. 13 Hauh uhlyis puh teh ma lhoq ma shang dah sidyos somh koeuq lyis ngos nyvng. Nyamoq gas, mvnjung dah nhuot, yewus dah nhuot, lvpe hwah dah nhuot masyah tsain thuq los. 14 Nyamoq gas vlho yoh chixoeuq dah yius jens dah dyos tsain nghuot. Hauh dyos somh koeuq gas Maukhung Jesphung Mangso dah buisnyeis zainsmuh soetuon nyeih lyis jeszan das xikyis, nyeisjvng gonh dah hwankti jens lyis tsainh yoeus das ge tsain thuq loh. 15 Yoeuh aq, khauh soeu teh ngos jweh los das, housoeh svbih xikkhonh mas shohchen yenh las xoq ma phuh bas jungh, phuksohlhaiq mus las, vsainnyang dah dyimis lyis tsomh nyeis soeu ka ngelhoq. 16 Hauh yius jens gas hwankti jens lyis Hebre nyingh pheh yah Armagedon ge dah joqyos mas khi tsainh toh. 17 Hauh thang lhyi loeuswons nyhet vyuk nyah kom lyeis mas huot lhank kat. Hauh uhlyis, Muhzoh dye tyamp goeus, ge yhenmuh khau, hwankti tank masyah thwe zainsmuh thuq los. 18 Hauh shishenh lyis maunyoq nyik, thwe nyings huomh toh, maujau jau, gyukphoh dah maunyeis dwis los, nyeisjvng mas dius vsaiq gvnkhanh nyeih masyah houteh kuh las svsoh than dah maunyeis dwis zis khanhamp eq ma bweh ku. 19 Housoeh las hauh kuhxing dah wusmuh gas somh khyamh gyoh tyamp. Mau khanghmuh mas dah wus jens eq tsain lains gyop tyamp. Mangso ka Babilon wusmuh lyis soh las nyah dah nhaiqlom dyis ge kom mha dah zvbiq jeis lyis shuk nhang. 20 Goeujo jens dvnganh dyuk loh las boms jens eq ma tsain joq los. 21 Hauh uhlyis maukhung masyah dvlom lyis nyeici joi ko bos dah gyutomp maulhung thungh dius jens thoq mas tsain wus gyuon. Hau gyu mau yah joeng gvng mas dius jens gas Mangso lhyi tsain nhoengh. Khasoeh ge lyis hau joeng cho ka gyukphoh nghuot.
1 Hauh uhlyis kom nyhet koeuq chi dah loeuswons nyhet yuk mas dvyuk ngah jyank los las, Los aq, jeis lvng nyoshoq dah vyvm mas tsuk toh wusmuh ge dah moeng nyhiq zainsmuh lyis soe khasoeh tuon das cho ngos nvng lyis chixoeuq bah. 2 Nyeisjvng hwankti jens gas nyang yah yauxi muh kuot las, nyeisjvng dius jens gas nyah yauxi muh ge dah zvbiq jeis tsain shuk yet goeus, ge ngos lyis taiq. 3 Hauh uhlyis dyos gas ngos lyis shwih las, hau loeuswons soeu ka ngos lyis mhanhdyvp pheh shwih loh. Houmha uhloms nyhet lom yah khyau dvci lom yuk las Mangso lhyi loeusmus soqzo dah nyings dyingh shoq lhaih toh, zoek zoek nes dah yewus thoq mas tsung toh vmesbih dvyuk lyis ngos nyvng. 4 Hauh vmesbih gas nesnoq zis yah khvlhamh vwot bos dah dyimis wuot toh las xing, phauhdap luk, pvleh yah shunk toh. Nyang gas nyah nyetnau muh dah vshih, ma lhoq ma shang vchoqh vjyot zis yah dyingh muis joq dah xing kom lhyi nyah loq mas chi toh. 5 Nyah ngelang mas nyeisjvng mas dah nghe nyhiq jens dvnganh yahge ma gis ma shop chowhang tsain whang loh bang dvnganh dah ungwes, kuhxing dah Babilon wus ge nghop shung toh, noq thank vjyuk bos dah nyings dvkoeuq lhaih tap toh. 6 Tsai, hauh vmesbih gas Mangso dius jens dah suih lyis eq, Yhensain Yesu mas dang jings las sat xauh bang dah suih lyis eq shuk yet nyeis yvlyis ngos nyvng. Nyang lyis nyvng lyis maudvn dyoslhyoq tyamp. 7 Housoeh hauh loeuswons soeu ka, Nvng chamus mauh hangh toh lah? Hauh vmesbih nghop shung toh noq thank dah vjyuk lyis eq, uhloms nyhet lom, khyau dvci lom yuk yewus nghop shung toh noq thank dah vjyuk lyis eq, ngos nvng lyis taiq kyoh bah. 8 Nvng nyvng dah yewus gas xikpheh nyeis ku goeus, nghuot laus eq gvshih gas kang ma dwis nyeis lo. Nyang gas dwangchuk buiq masyah doq los nyeis las dyoqbis yvpheh loh das. Nyeisjvng cangxeih xi masyah vsainnyang dah nyings lyis kang maussauh mas ma bos lhaih toh. Nyeisjvng mas dah dius jens gas hauh yewus lyis nyvng yah dvyih dvnganhmoq tsain mauh hangh toh das. Nyang gas xikpheh kang dvlhain dwis ku goeus, gvshih kang ma dwis los. Nghuot laus eq thang pheh kang doms dwis los das. 9 Haih cho yah sen lha joeui yahge seq cho bos chah. Uhloms nyhet lom gas hauh vmesbih tsung toh dah boms nyhet koeuq nghuot. Nyamoq gas hwankti nyhet yuk eq nghuot. 10 Hwankti oeng yuk gas gyoh tyamp goeus dvyuk gas guon nyeis shih, gohtoeu dvyuk gas ma jweh los shih, hauh soeu jweh los lyis dvxa kyingh dvxauh guon das. 11 Xikpheh kang dvlhain dwis ku lha gvshih kang ma dwis lo dah yewus gas hwankti xet vyuk nghuot. Nghuot laus eq hauh hwankti nyhet yuk mas bos las nyang eq dyoqbis loh das. 12 Nvng nyvng dah khyau dvci loms gas hwankti toeuh ma lhom yoeus shih dah hwankti dvci yuk tsain nghuot. Nghuot laus eq hauh yewus yah dvgeh dvyuk dvshishenh shenh hwankti yhangteh guon das toeuh dyei zis tsain xauh das. 13 Tsai, hwankti dvci yuk mas nghamh toeuq cho dvkoeuq kyingh dvbos las, hau yewus lyis nyamoq dah yomsoq yah toeuh tsain kyauh. 14 Nyamoq gas Yvnglo lyis moeng zan das. Nghuot laus eq hauh yvnglo gas nyang khi yoeus las khyen yoeus zis xauh bang, lomluk las nyah thang chank bang yah dvgeh ung cho yoh das. Khasoeh ge lyis nyang gas yhensain jens dah Yhensain, hwankti jens dah Hwankti nghuot, ge ngos lyis taiq. 15 Tsai, loeuswons soeu ka, Nvng nyvng, nghe nyhiq tsung toh dah jeis lvng jens gas, munghdan jens, dius nyau jens, moqphung jens yahge nyingh vja ja kat dah dius jens tsain nghuot. 16 Tsai, Nvng nyvng dah khyau dvci lom yahge hauh yewus gas hauh nghe nyhiq lyis hoeng das. Nyamoq gas nghe nyhiq yoh yah yoh zis khyuot yoeus las shoh chen kuot tyamp das, nyah shoh lyis zo las nyang lyis nyi yah ngheq tyamp das. 17 Khasoeh ge lyis nyamoq gas Mangso dah dang nyuk los buisnyeis jweh shoq, nyamoq guon das toeuh, hauh yewus lyis xamxonh zis yah kyauh bas jungh, ge. Mangso ka nyamoq dah ehnyet nhaiqlom mas nyah nghamh toeuq cho chank kuot das ehnyet kat toh dyei. 18 Nvng nyvng dah vmesbih gas nyeisjvng hwankti jens lyis guon dah wus zainsmuh nghuot ge, ngos lyis taiq.
1 Hauh thang lhyi loeuswons soeu dvyuk maukhung masyah gyoh los zis ngos nyvng. Nyang mas toeuh zainsmuh bos las, nyah phunk gas nyeisjvng gonh bvng joq. 2 Hauh soeu ka thwe zainsmuh yah kuhxing dah Babilon wusmuh gyop gyoh goeus, gyop gyoh goeus. Hauh joqyos gas yius boengh jens dah nyeisgus, ma lhoq ma shang dah dyos jens khaugus yahge ma lhoq ma shang vchoqh vjyot dah nghoq vja ja khaugus bweh tyamp goeus. 3 Khasoeh ge lyis dius nyau ja khanghmuh gas hau wus dah yauxi muh mas nyetnau ge dah zvbiq jeis lyis tsain shuk goeus. Nyeisjvng hwankti jens eq, nyang yah dvgeh yauxi muh tsain kuot goeus. Mungkvn mas dah soenghi jens eq nyo dvmsunk dah nyetnau cho gvng mas dis los goeus, ge thwe than yah tsain kaiq. 4 Hauh thang lhyi maukhung mha thwe dvkoeuq gas, Ngah dius nyau jens eh, thuq los geh, nyah jyank masyah tsain thuq los geh! Nyang yah dvgeh yaunos ma kuot bas jungh, nyang yah hauh joeng zis ma xauh bas jungh. 5 Khasoeh ge lyis nyah yaunos maukhung jweh shoq zungs toh las, Mangso ka nyah dah lhung cho nyoshoq lyis soh nyeis. 6 Nyang namoq lyis kuot zis yah dvyhangteh nyang lyis eq doms kuot dyei geh, nyang kuot ya kuot zis yah dvyhangteh aiq huon doms tauh geh, namoq xiklyis kom mha nyang lhaiq dyei dah shuk ja thoq lyis soq aiq huon than shoq nyah kom mha tyink dyei geh. 7 Vsainnyang gungs lyis nyoqnho ngelang bos goeus, nyeisgis yaplhoq goeus ge nyhoq, nyang lyis shanghsenh cho yahge kuk cho tauh dyei geh. Khasoeh ge lyis nyang gas, Ngos hwankti nyih heimha guon nyeis, ngos chauhmuh ma nghuot. Ngos khanhamp eq kuk zis ma xauh das ge, nyang moengs zo nyeis. 8 Hauh cho gvng mas yomh, noslom, kukxi cho yahge phanghkhauq gas dvnyeih dvm lyis nyah jyank jweh las nyi yah ngheq tyamp zis xauh das. Khasoeh ge lyis nyang lyis soetuon dah Mangso ka yomsoq bos, ge taiq. 9 Nyang yah yauxi muh kuot las lhyap lhyi nyetnau dah nyeisjvng hwankti jens gas hauh wus ngeh dah nyikhauh thuq los zis nyvng lyis ngausdyeis ngausnhvp yah kuk nyingh shoh thang tsain thauh das. 10 Nyamoq gas hauh wus joeng cho xauh yvmas nyamoq eq bos xauh joeng das zis gyuk las, we we mas yap uhjyangh, kuhxing zis yah yombos dah Babilon wus eh, mvtanhzoe, mvtanhzoe nghuot goeus nyvng! Nvng gas dvnayi kyingh lyis soetuon zis xauh goeus nyvng, tsain ge das. 11 Nyeisjvng thoq mas dah soenghi jens eq, ngausdyeis ngausnhvp yah kuk nyingh shoh thang tsain thauh nyeis. Khasoeh ge lyis nyamoq dah hu hank eq wis lo das zis ma nghuot. 12 Nyamoq dah hu jens gas ngwis, xing, phauhdap luk, pvleh, jeimuh misyhwiq, khvlhamh buh vwot bos dah misseh, baulo khying yah yoq dah misseh, kyi kyi bvng dah misnes seh, xangh saiq vja ja, cang zwis yah kuot dah vyhang vja ja, phauhdap dah saiq, thunk, thyeq, luk thyoeu kyahsoe vja ja, 13 maza saiq, conh xangh, xangh ja mura, loban, coeu, zvbiq, ohlhyoq, monh, sunghso chen, noeu, yvng, nyang, nyanglhyingh, jons jens yahge dius jweh shoq tsain nghuot. 14 Soenghi kuot bang gas hau wus lyis, Nvng sain yoeus mes, gis dah vyhang dvnganh gas bi tyamp goeus. Nah zisyos kyahsoe yahge obos phoh dah yungh ja kyahsoe dvnganh eq bi tyamp goeus. Hauh kyahsoe lhyi thang pheh nvng khanhamp eq xauh nyvng lo das zis ma nghuot. 15 Babilon wus lyis nges las hu ungh zis yah dis los dah soenghi jens gas, hauh wus lyis joeng yvmas bos xauh joeng das zis chiqh las we we mas tsain yap joq das. Nyamoq gas ngausdyeis ngausnhvp yah kuk nyingh shoh thang tsain thauh uhjyangh, 16 jeimuh misseh, khvlhamh buh vwot bos dah baulo khying misseh, nes dah dyimis wuot las, xing, phauhdap luk, pvleh jens yah shunk toh wus zainsmuh gas mvtanhzoe, mvtanhzoe nghuot goeus! 17 Dvnayi lyis, yoh dah kyahsoe zisyos dvnganh lyis nyang thyuk tyamp goeus nyvng, ge ngausdyeis ngausnhvp yah kuk nyingh shoh thang tsain thauh das. Sangpho vgyis jens dvnganh yahge houmha bos ji dah gyung suh bang dvnganh, sangpho mas muh zwi bang yah nvmukdra masyah womdau khoeu dah soenghi kuot bang dvnganh gas we we mas tsain yap joq las, 18 hauh wus lyis ngeh nhang, nyilhyam mas dah nyikhauh lyis nyvng lyis, nyamoq gas haih wus iq kuhxing dah gohtoeu wus khanhamp eq ma bos ku lo, ge tsain kaiq. 19 Nyamoq gas vsainnyang dah uhloms mas tsohmop yah lhyauq las, hau kuhxing dah wus gas mvtanhzoe, mvtanhzoe xauh nyvng! Nvmukdra mas sangpho komp bang dvnganh lyis hau zisyos zainsmuh yah tsain dis los nhang dah wus gas dvnayi gyo lyis yoh yah yoh zis somh tyamp goeus nyvng, ge ngausdyeis ngausnhvp kuk nyingh shohthang thauh zis yah tsain kaiq. 20 Maukhung eh, hauh wus dyoqbis goeus las gauslaus geh. Mangso dah dius jens eh, lvgyo jens yahge lvpe jens eh, gaus nyeis geh. Khasoeh ge lyis nvng lyis kuot cho dvnganh xiklyis Mangso ka hauh wus lyis soetuon goeus, ge taiq cho ngos xauhgyo. 21 Hauh thang lhyi yombos dah loeuswons soeu dvyuk gas mhoq iq bos luklom dvkoeuq toeu yoeus las, nvmukdra mas doeuh khyoq kat lyis hauh zis gyoh wvng loh teh kuhxing dah Babilon wus eq doeuh khyoq kat zis xauh das. Thang pheh nyang lyis khanhamp eq xauh nyvng lo das zis ma nghuot. 22 Nvng mas toenk thwe, chungh thwe, khvlhank muot bang yahge lvbuh muot bang dah thwe thang pheh khanhamp eq xauhgyo lo das zis ma nghuot. Joeui vlho yahge soenghi kuot bang thang pheh nvng mas khanhamp eq thuq los lo das zis ma nghuot. Wom mhoq thwe eq thang pheh nvng mas khanhamp eq xauhgyo lo das zis ma nghuot. 23 Nvng mas nyibung dah bvng zis khanhamp eq yoh bvng los das zis ma nghuot lo, loloeu saiq yahge lonyi saiq dah thwe lyis eq nvng mas thang pheh khanhamp eq xauhgyo lo das zis ma nghuot. Nah soenghi jens gas nyeisjvng dah zauguon yomsoq bos thank bang bweh goeus. Nvng gas nyeisjvng mas dah dius jens dvnganh lyis ma jus dah hweq yah mhuih jyomh tyamp goeus nyvng! 24 Babilon wus joeng cho xauh zis gas lvpe jens dah suih, Mangso dius nyau jens dah suih yah nghuot goeus. Nyeisjvng thoq mas sat ya sat zis xauh bang dah suih hauh wus mas nyvng goeus las nghuot, ge taiq.
1 Hounyhoq thang lhyi, maukhung mha moqphung zainsmuh dvkoeuq dah nyings thwe yhangteh doeus dah thwe ngos xauhgyo. Nyamoq gas Mangso lhyi chungh geh! Khyuot yoeus cho phunk yahge yomsoq gas yah Yhensain Mangso sain toh. 2 Nyah soetuon cho jyoeng las dan joq. Vsainnyang dah yauxi muh yah nyeisjvng gonh lyis lhoeu thyoq nhang dah nghe nyhiq lyis, nyang dang thang thyet goeus. Yhensain dah jyeidwis jens lyis sat gvng mas Mangso ka nyang lyis joeng goeus ge taiq zis ngos xauhgyo. 3 Nyamoq doms kaiq zis gas, Mangso lhyi chungh geh, hauh wusmuh lyis ngeh tyamp nhang dah nyilhyam jens dah nyikhauh gas vcaiq vto nhoenk doq loh, ge. 4 Hauh uhlyis logis aiqci nyei yuk yahge kang dwis yewus nyei doeu gonh gas, phvluk zomhgyuis gop las hwankti tank mas tsung toh Mangso lhyi paiq zoh lyis yah, Amen! Mangso lhyi chungh, tsain ge. 5 Tsai, hwankti tank masyah nyings thuq los dah thwe dvkoeuq gas, Mangso dah jyeidwis jens dvnganh yahge nyang lyis gyukwoms bang ngislo kuhlo dvnganh, yah Mangso lhyi chungh paiq geh, ge. 6 Hauh thang lhyi somhlohmoq jens dah thwe teh thwe, jyvthyangh gyoh teh thwe yahge maujau jau thwe teh zis thuq los yvlyis ngos xauhgyo. Hauh thwe ka, Mangso lhyi chungh geh! Khasoeh ge lyis hauh Yhensain ka yah Yomzains Mangso ge dah Hwankti nghuot. 7 Hauh Yvnglo dah nyihwank pwe shishenh jweh goeus las yang gauslaus zis yah gausyis nyeis goh. Nyah kuhxing cho lhyi tsain chungh nyeis goh. Nyah lonyi saiq gas nyah gungs lyis dye shunk goeus. 8 Thyoeu lha shang dah jeimuh dyi yah vsainnyang gungs lyis shunk das toeuh nyang yoh. Hauh jeimuh dyi gas Mangso dius jens dah gis wotwu yahge muhzoh lyis taiq zis nghuot. 9 Hauh thang lhyi loeuswons soeu ka, Hauh Yvnglo dah nyihwank pwe mha khi yoeus zis xauh bang gas ngelhoq, oen lhaih toh aq. Haih dang gas Mangso dah jyoeng dang nghuot, ge ngos lyis taiq. 10 Hauh uhlyis ngos nyang lyis paiq das oen, nyah khyeiyang mas phvluk zomhgyuis. Nghuot laus eq hauh loeuswons soeu ka, Housoeh vkuot! Ngos gas nvng yah eq, nah boekyis yah eq dvgeh Yhensain Yesu chixoeuq dah jyoeng dang lyis chank las zwi zains toh bang dah jyeidwis loeuzomh dvnghuot. Mangso lhyi paiq aq, khasoeh ge lyis Yhensain Yesu kanghjyoeng chixoeuq dah hauh jyoeng dang nyang lvpe jens lyis gywes tsungh so tsungh dyei. 11 Hauh thang lhyi maukhung khomh phank hanh toh zis ngos nyvng, houmha nyang thyoeu dvdoeu nyeis las houmha ji soeu ka, Wontang yahge Jyoeng ge soeu nghuot. Nyang gas dan khyvlyis soetuon zis yah jeszan. 12 Nyah nyoqjeih gas nyilhyam teh tsain bvng joq, nyah uhloms mas buismuk nyoshoq tsungh toh. Nyang masyah lai las gohyuk hank eq ma bos seq dyei dah nyings nyah thoq mas lhaih tap toh. 13 Nyang suih mas jen dah dyimis wuot toh. Nyah nyings gas Mangso Dang ge zis nghuot. 14 Maukhung mha jesphung jens eq, nyang thyoeu ji las tsingh-kan dah jeimuh dyi thyoeu wuot zis yah nyah thang mha tsain chank loh. 15 Dius nyau jens lyis ung tyamp das xiklyis nyah nhuot masyah zuk dah moengsa thuq nyeis. Nyang gas nyamoq lyis thyeq lhamloq yah guon das, Maukhung Jesphung Mangso dah nhaiqlom dyis ge dah zvbiq nyhet zwvng mas nyang nang las nyhet das. 16 Nyah dyi yahge tanghbauh mas hwankti jens dah Hwankti, yhensain jens dah Yhensain ge lhaih tap toh. 17 Hauh thang lhyi loeuswons dvyuk buis thoq mas yap joq zis ngos nyvng. Nyang gas maudang nghoq jens lyis, Mangso dah zo shuk pwe zainsmuh mas los zop geh. 18 Los geh, hwankti jens dah shoh, jeszau, jeslo jens dah shoh, nyang jens dah shoh, nyang ji bang dah shoh, luiq bang yahge jons jens ngislo kuhlo dah shoh lyis namoq xauh zo das, ge thwe zainsmuh yah kaiq. 19 Hauh thang lhyi hauh yewus eq, nyeisjvng mas dah hwankti jens yah nyamoq dah jesphung jens eq, hauh nyang ji soeu yahge nyah jesphung lhyi zan das xiklyis tsain huom toh zis ngos nyvng. 20 Hauh yewus yah dvgeh nyah xikkhonh mas vlho kuot xoeuq dah lvpe hwah gas nyhik yoeus zis xauh goeus. Nyang gas hau vlho chixoeuq zis yah yewus dah loqsoh dap bang yahge yewus dah gungslho lhyi paiq bang lyis mhuih jyomh soeu nghuot. Hauh yewus yahge lvpe hwah gas hwank ngeh nyeis dah nyithomh mas vdwis khyoq kat zis tsain xauh. 21 Nyamoq dah jesphung jens gas nyang ji soeu dah nhuot masyah thuq dah moengsa yah sat zis xauh las nyamoq dah shoh lyis, nghoq dvnganh gas nyamoq yoh zo nyhoq jo shoq tsain zo.
1 Hauh thang lhyi loeuswons soeu dvyuk gas dwangchuk buiq dah suhshih yahge svsoh lyei shamjvng twih dvkvt lyis nyah loq mas chi lha, maukhung mhayah gyoh los zis ngos nyvng. 2 Nyang gas hauh yius Satan nghuot, gohlhain dah lhangnyis ge mvnjung lyis nyhik yoeus las dvkhyoengh zvn jweh shoq lhunk toh das xiklyis twih toh. 3 Hau loeuswons soeu ka mvnjung lyis dwangchuk buiq mas khyoq kat toh las, hauh joqyos lyis nyheih lho lha zvnlom dvkhyoengh dyingh shoq dius nyau jens lyis ma yoh mhuih jyomh bas jungh, kyihau thungh tap toh. Zvnlom dvkhyoengh dyingh lyis nyang lyis dvsoq phui kat das. 4 Hauh thang lhyi hwankti tank jens lyis ngos nyvng. Hauh hwankti tank jens mas tsung toh bang gas, soetuon das toeuh dyei toh zis tsain xauh bang nghuot. Hauh thoq lyis Yhensain Yesu chixoeuq dah dan cho lhyi eq, Mangso dah dang lyis kanghjyoeng kat las sat zis xauh bang yah, hauh yewus lyis eq, nyah gungslho lyis eq, ma paiq, vsainnyang dah ngelang yahge loq jens mas hau Yewus dah loqsoh ma kham yoeus bang dah dyos lyis ngos nyvng. Nyamoq gas kang doms dwis los las hwankti jens teh Yhensain Yesu yah dvgeh zvnlom dvkhyoengh dyingh shoq tsain guon nyeis das. 5 (Nyet joq shih dah shei bang gas, hauh dvkhyoengh zvn ma thank shih gyo lyis ma yoh dwis toq los,) heika cangxeih vlhain dwis toq cho nghuot. 6 Housoeh shei masyah cangxeih dwis toq los bang dah caiq mas xauh wvng bang gas ngelhoq las nyoshoq dah shvmanh jyehjuh tsain xauh kham yoeus. Aiq vlhain shei cho ka nyamoq thoq mas yomsoq ma bos. Nyamoq gas Mangso yahge Khristu dah phudyei bang nghuot das las zvnlom dvkhyoengh dyingh shoq Khristu yah dvgeh xauh guon nyeis das. 7 Hauh zvnlom dvkhyoengh lai lyis Satan ka thung mhayah phank kat zis xauh das las, 8 nyeisjvng gonh dyos nyeis dah Gog yahge Magog ge dah dius nyau jens lyis mhuih jyomh das xiklyis thuq los das. Satan ka moeng zan das xiklyis nvmukdra mas dah sihsho nyhoq nyo dah nyah dius jens lyis khi huom toh das. 9 Nyamoq gas nyeisjvng goms shoq nyenh loh las Mangso dah dius jens thoenggus yahge yhensain jyetdap dah wus lyis tsain lhaink toh. Nghuot laus eq maukhung masyah nyi gyoh los las nyamoq lyis ngeh jom tyamp. 10 Hauh thang lhyi, nyamoq lyis mhuih jyomh dah Yius eq nyi yahge hwank dap nyeis dah thomh mas khyoq kat zis xauh: houmha hauh yewus yahge lvpe hwah eq xiklyis yah tsain bos las nyamoq gas nyeih nyenh vcaiq vto shoeuhshih zis xauh das. 11 Hauh thang lhyi kuhxing dah hwankti tank thyoeu eq, houmha tsung toh soeu lhyi eq ngos nyvng. Hauh Yhensain xikkhonh mas dah maukhung yahge nyeisjvng gas dyuk loh las hauh aiq ja gonh lyis ma nyvng lo. 12 Hwankti tank xikkhonh mas shei bang ngislo kuhlo tsain yap joq zis ngos nyvng. Sauhbuk jens tsain phank toh, kangbuk ge gohtoeu sauhbuk eq dvkoeuq phank toh. Shei loh goeus bang gas nyamoq kuot khoq cho sauhbuk mas comh toh zis yah dvyhangteh nyamoq soetuon zis tsain xauh. 13 Hauh thang lhyi nvmukdra gas nyang mas tsain bos dah shei goeus bang lyis doms kyauh. Shei cho yahge shei mau eq, nyamoq mas bos dah shei bang lyis doms kyauh las dvnganh gas vsainnyang kuot lai los goeus dah wotwu yah dvyhangteh soetuon zis tsain xauh. 14 Hauh uhlyis shei zis yahge shei mau gas munyi thomh mas khyoq kat zis tsain xauh. Hauh munyi thomh gas aiq vlhain shei cho nghuot. 15 Kang maussauh mas nyings ma bos soeu hank laus eq hauh munyi thomh mas khyoq kat zis tsain xauh.
1 Hauh thang lhyi maukhung vsaiq, nyeisjvng vsaiq lyis ngos nyvng. Cangxeih maukhung yahge nyeisjvng gas dyuk goeus, thomh eq ma joq lo. 2 Hauh uhlyis gyingshang wus ge dah Yerusalem wus vsaiq gas loloeu saiq xiklyis shunk dah lonyi saiq teh dye sont las, Mangso nyeis dah maukhung mhayah gyoh los yvlyis ngos nyvng. 3 Tsai, ngos gas hwankti tank masyah taiq thuq los dah thwe zainsmuh dvkoeuq xauhgyo. Houka, gvshih Mangso yhen ka dius yah dvgeh nghuot. Nyang nyamoq yah dvgeh huom nyeis das las nyamoq gas nyah vnyau duot das. Mangso ka nyah gungs nyang nyamoq yah dvgeh nyeis las, nyang gas nyamoq dah Mangso duot das. 4 Nyang gas nyamoq nyoqjeih mas dah nyoqdyeis dvnganh lyis buot tyamp dyei das. Thang pheh shei ge zis ma bos lo das; kuk zis, ngaus zis, nos zis, xikpheh dah joq zis dvnganh dyuk goeus, ge. 5 Hauh thang lhyi hwankti tank mas tsung toh soeu taiq zis gas, Yoeuh aq, gvshih shishenh lyis vyhang dvnganh lyis ngos vsaiq doms kuot toh, ge. Tsai, Yhensain taiq zis gas, Lhaih toh aq: khasoeh ge lyis haih dang gas jyoeng lha wontang, ge. 6 Hauh thang lhyi nyang taiq zis gas, Muh dye goeus. Ngos gas Alfa yahge Omega, cangxeih yahge thang thank nghuot: jeis shet soeu hank eq hau jeisthuq dwang mas dah jeis lyis phauh ma gyoh xauh shuk das toeuh ngos dyei das. 7 Yoh ung soeu ka dang thoengh yah dvyhangteh xauh kham yoeus das las, ngos gas nyamoq dah Mangso duot las nyamoq eq ngah lo jens duot das. 8 Nghuot laus eq gyuk ehnyet bos bang, ma lomsjingh las dang ma jings bang, vchoqh vjyot bang, dius sat bang, yauxi bang, hweq kat bang, silho paiq bang yahge hwah bang dvnganh gas nyi yahge hwank ngeh nyeis dah thomh mas xauh tsain joeng das. Houka aiq vlhain shei cho nghuot, ge. 9 Hauh uhlyis thang thank dah yomh yah dyingh joq dah kom nyhet lom chi dah loeuswons bang nyhet yuk mas dvyuk ngah jyank los las, Los aq hauh Yvnglo dah yhensain nyhiq ge dah lonyi saiq ngos nvng lyis chixoeuq bah, ge ngos lyis taiq. 10 Tsai, hauh dyos gas ngos lyis shwih las hauh loeuswons soeu ka ngos lyis svsoh nyhang dah boms thyoh mas shwih doq loh las, Mangso nyeis dah maukhung masyah gyoh los gyingshang dah Yerusalem wus ngos lyis chixoeuq. 11 Hauh wus gas Mangso dah phunk yah bvng joq. Hauh wus gas shang dah bvngtoenk, nvgvthweq luk yahge phauh dah luk teh bvng joq. 12 Hauh wusciank zainsmuh gas kuhxing zis yah nyhang lha khomh dvci aiq khomh bos. Hauh khomh jens mas loeuswons bang dvci aiq yuk tsain zungh nyeis. Hauh khomh jens thoq mas Israel jens dvci aiq koq dah nyings tsain lhaih tap toh. 13 Buisthuq shot wus khomh somh koeuq, mautsung shot wus khomh somh koeuq, mautyi shot wus khomh somh koeuq, buiswvng shot pheh wus khomh somh koeuq nghuot. 14 Hauh wusciank lyis luk vpom dvci aiq koeuq dah thoq mas ci toh las, hauh khomh jens mas Yvnglo dah lvgyo jens dvci aiq yuk dah nyings lhaih toh. 15 Ngos yah jisgoh dah loeuswons soeu loq mas wus lyis eq, wus khomh jens lyis eq, wusciank lyis eq, keq das xiklyis xing keqseh dvkoeuq chi toh. 16 Hauh wus gas nyei thunk nghuot las, mau tsung yahge mautyi shot pheh dvyhangteh nghuot. Loeuswons soeu ka keqseh yah hauh wus lyis keq lyis lywas choeu, xing choeu, nyhang choeu main dvkhyoengh oengxo nghuot. 17 Tsai, hauh wusciank lyis eq keq yoeuh lyis dius keq zis yah dvyhangteh nghuot. Loeuswons soeu keq lyis pe 216 nyhang. 18 Hauh wusciank lyis nvgvthweq luk yah ci toh, hauh wus lyis gas lhoqshang dah bvngtoenk teh doeus dah xing gyingh yah kuot toh. 19 Hauh wusciank vpom luk jens lyis phauhdap luk vja ja yah shunk toh. Cangxeih dah vpom luk gas nvgvthweq, aiq gas nila, somh gas mvhoya, nyei gas myaq, 20 oeng gas jyaung, khyuk gas patvmyah, nyhet gas sengmut, xet gas myet-yweh, gau gas uqtapvyah, dvci ka mvhoya nyaus, dvci das gas wakintu, dvci aiq gas thitun nila tsain nghuot. 21 Hauh wus khomh dvci aiq koeuq eq pvleh dvci aiq koeuq nghuot. Khomh khanghmuh pvleh dvkoeuq koeuq nghuot. Hauh wus dah talhoeu cho ka bvngtoenk teh bvng dah xing gyingh nghuot. 22 Hauh wus vkhau mha Yhenmuh lyis ngos ma nyvng. Khasoeh ge lyis Maukhung Jesphung Yhensain Mangso yahge Yvnglo gas hauh wus dah yhenmuh nghuot. 23 Hauh wus lyis pank dyei das zis buis yahge lhamhmuh ma chah. Khasoeh ge lyis Mangso dah phunk gas hauh wus lyis pank dyei las Yvnglo gas hauh nyibung nghuot. 24 Nyeisjvng dius jens gas hauh wus dah bvng zis yah tsain suh e das. Nyeisjvng dah hwankti jens eq vsainnyang yoh dah yhenzis yoskhuih lyis hauh wus mas chi wvng los das. 25 Hauh wus khomh jens lyis dvnyeih gonh phank hanh toh das. Nyamoq lyis khanhamp eq nyheih toh das zis ma nghuot, khasoeh ge lyis hauh wus mas nyenh ge zis ma bos. 26 Dius nyau jens dah phunk nyoqnho ngelang yahge nyeisgis yaplhoq cho jens lyis hauh wus mas tsain chi wvng los das. 27 Nghuot laus eq vwot v-oeu cha eq hauh wus mas yoh wvng das zis ma nghuot. Vchoqh vjyot, vwot v-oeu kuot soeu, hwah cho chank soeu eq, hauh wus mas khanhamp eq xauh wvng das zis ma nghuot. Yvnglo dah kang maussauh mas nyings bos bang kyingh hauh wus mas xauh wvng das.
1 Tsai loeuswons soeu ka Mangso yahge Yvnglo dah hwankti tank masyah yaus thuq los las hauh wus chomuh gungs chank yaus loh, pvt teh cingh dah kang jeismuh lvng ngos lyis Chixoeuq. 2 Hauh jeismuh lvng thyitvp haqtvp jeis yvm chank yah shih dvci aiq ja shih dah, kang dwis nhang dah saiqzains tsain bos. Hauh yvmas lhamhmuh dvkhyvp dvlhain, dvzvn lyis dvci aiq lhain vshih shih joq. Hauh saiqzains dah vhuq eq dius nyau jens dah nos lhoq gis das xiklyis nghuot. 3 Thang pheh hauh wus mas Mangso dah nhoengh xauh ge zis cha eq ma bos lo das. Mangso yahge Yvnglo dah hwankti tank gas hauh wus dah vkhau mha joq das las, nyah jyeidwis jens nyang lyis phuqsoe das. 4 Nyamoq gas nyah nyoqnho lhyi xauh nyvng nyeis das. Nyamoq dah ngelang mas nyah nyings lhaih tap toh das. 5 Houmha nyenhyo ma bos lo das. Nyamoq nyibung bvng zis eq, buis bvng zis eq ma chah lo. Khasoeh ge lyis Yhensain Mangso ka nyamoq dah bvng zis duot das. Hauh thoq lyis nyamoq gas hwankti duot las vcaiq vto guon nyeis das. 6 Hauh thang lhyi loeuswons soeu ka, Haih dang jens gas dan las yoh loms. Lvpe jens lyis dyos dyei dah Yhensain Mangso ka shishenh ma nyangh lyis bweh los das cho, nyah jyeidwis jens jyank mas chixoeuq das xiklyis nyah loeuswons soeu lhyi nhang kat. 7 Yesu gas, Gyo yoeus aq, ngos lvnyap jweh los das! Haih maussauh mas bos lvpe jens dah dang lyis domsyos gyo las chank nyeis soeu ka ngelhoq, ge ngos lyis taiq. 8 Ngos Yohan gas haih cho jens lyis xauh eq xauhgyo, nyvng eq nyvng soeu nghuot. Heinyhoq dye xauhgyo zis yahge dye nyvng thang lhyi, ngos lyis haih cho chixoeuq dah loeuswons soeu khyeiyang mas, nyang lyis paiq das zis ngos phvluk zomhgyuis bah oen. 9 Nghuot laus eq nyang gas, Housoeh vkuot, ngos gas nvng, nah boekyis lvpe jens yahge haih maussauh mas dah dang lyis domsyos gyo zis yah chank nyeis bang dah loeuzomh changh jyeidwis dvnghuot. Mangso lhyi paiq aq, ge ngos lyis taiq. 10 Tsai, nyang gas haih cho dvnganh yah bweh das shishenh ni los goeus las, haih maussauh mas bos dah lvpe dang jens lyis vnghop shung toh. 11 Ma dan soeu ka ma dan khyvlyis chank nyeis shih bas jungh, ma lhoq ma shang soeu ka ma lhoq ma shang khyvlyis nghuot nyeis shih bas jungh, dan soeu ka dan khyvlyis nghuot nyeis shih bas jungh, gyingshang soeu ka gyingshang khyvlyis nghuot joq shih bas jungh. 12 Gyo aq, ngos lvnyap jweh lyih das, dvyuk yah dvyuk vsainnyang kuot goeus dah muhzoh yah dvyhangteh shangh das phauh lyis ngos yah dvgeh chi lyih das. 13 Ngos gas Alpha yahge Omega, cangxeih yahge thang thank zis nghuot. 14 Kangdwis nhang dah saiqzains mas dah vshih xauh zo das zis yahge, wus khomh cho chank yah wus mas wvng das toeuh yoh shoq, vsainnyang dah dyimis lyis cheihshang tyamp bang gas ngelhoq. 15 Nghuot laus eq dius teh yangh ma doeus lo shoq mulyanghsenh bang, hweq kat bang, nyetnau muh kuot bang, dius sat bang, silho paiq bang yahge hwah cho lhyi ngwis las chank kuot bang dvnganh gas wus nghe mha xauh nyeis das, ge ngos lyis taiq. 16 Ngos Yesu gas phung khau mha nyeis dah namoq lyis haih cho jeis taiq kyoh das nyhenshang ngah loeuswons lyis nhang kat. Ngos gas Dawi yhenbang masyah dyos lyih soeu nghuot. Ngos gas bvng dah buhnyhiq nghuot. 17 Hauh dyos yahge lonyi saiq gas, Los aq, tsain ge. Hauh zis xauhgyo yoeus soeu hank laus eq, Lo aq, ge bas jungh. Jeis shet soeu ka los bas jungh, kang jeis lyis omes soeu hank laus eq, phauh ma gyoh gyoh jyungshuk khyvlyis lhom yoeus bas jungh. 18 Ngos Yohan gas haih maussauh mas bos dah lvpe dang xauhgyo bang dvnganh lyis, gvgis zaih nhang. Haih dang mas dvja ja lhungh soeu hank lyis laus eq, Mangso ka haih maussauh mas bos joeng dah yomh lung dyei das. 19 Haih maussauh mas bos lvpe dang masyah dvja ja yoeus tyamp soeu hank lyis laus eq, hai mha lhaih toh kang dwis nhang saiqzains mas dah vshih xauh zo das toeuh yahge gyingshang wus mas wvng das toeuh lyis Mangso yoeus tyamp dyei das. 20 Haih cho lhyi kanghjyoeng kat dyei soeu ka, Jyoengh nghuot goeus. Ngos lvnyap jweh lyih das, ge. Amen. Yhensain Yesu eh, jweh los aq! 21 Yhensain Yesu dah jyehjuh gas Mangso dah dius jens yah dvgeh nghuot bas jungh! Amen.